ADVERTISEMENT

ADVERTISEMENT

ജില്ലാതല ഉദ്ഘാടനം

ആലപ്പുഴ: ചിൽഡ്രൻസ് ഫോർ ആലപ്പി ഒരുപിടി നന്മ പദ്ധതിയുടെ ജില്ലാതല ഉദ്ഘാടനം ഇന്ന് രാവിലെ 10.30ന് കൃഷിമന്ത്രി പി. പ്രസാദ് നിർവഹിക്കും. ചേർത്തല തെക്ക് തെക്ക് ജി.എച്ച് എസ്എസിൽ നടക്കുന്ന പരിപാടിയിൽ മന്ത്രി സജി ചെറിയാൻ ഒരുപിടി നന്മ പ്രഖ്യാപനം നടത്തും. ജില്ലാ പഞ്ചായത്ത് പ്രസിഡന്‍റ് കെ.ജി. രാജേശ്വരി അധ്യക്ഷത വഹിക്കും.
എ.എം. ആരിഫ് എംപി മുഖ്യാതിഥിയാകും. ജില്ലാ കളക്ടർ വി. ആർ. കൃഷ്ണതേജ, കഞ്ഞിക്കുഴി ബ്ലോക്ക് പഞ്ചായത്ത് പ്രസിഡന്‍റ് വി.ജി. മോഹനൻ, ജില്ലാ പഞ്ചായത്ത് ആരോഗ്യ സ്റ്റാൻഡിംഗ് കമ്മിറ്റി ചെയർമാൻ എം.വി. പ്രിയ, ചേർത്തല തെക്ക് പഞ്ചായത്ത് പ്രസിഡന്‍റ് വി.എസ്. സിനിമോൾ, അംഗം റോയി മോൻ, വിദ്യാഭ്യാസ ഡെപ്യൂട്ടി ഡയറക്ടർ പി. സുജാത, ചേർത്തല ഡിഇഒ സി.എസ്. ശ്രീകല, എഇ സി.കെ. ശൈലജ, സ്കൂൾ പ്രിൻസിപ്പൽ ബി.എസ്. ജിജബായി, പ്രധാന അധ്യാപിക എസ് മീര, പിടിഎ പ്രസിഡന്‍റ് ഡി.പ്രകാശൻ എന്നിവർ പങ്കെടുക്കും.

സെമിനാറും അനുമോദനവും

ആലപ്പുഴ: സൗഹൃദവേദി സംഘടിപ്പിച്ച ആലപ്പുഴയുടെ ആരോഗ്യപ്രശ്നങ്ങൾ സെമിനാറും കലോത്സവ വിജയികൾക്കുള്ള അനുമോദന സമ്മേളനവും ആലപ്പുഴ ചടയംമുറി ഹാളിൽ ജി. സുധാകരൻ ഉദ്ഘാടനം ചെയ്തു.

ADVERTISEMENT

കാറിടിച്ച് ബൈക്ക് യാത്രികന്‍ മരിച്ചു; ഭാര്യ ഗുരുതരാവസ്ഥയില്‍

ആലപ്പുഴ: തട്ടുകട അടച്ച് ഭാര്യയ്ക്കൊപ്പം ബൈക്കില്‍ മടങ്ങിയ ലോഡിംഗ് തൊഴിലാളി കാര്‍ ഇടിച്ചു മരിച്ചു. ആലപ്പുഴ പവര്‍ഹൗസ് വാര്‍ഡില്‍ ആറാട്ടുവഴി പടിഞ്ഞാറ് ശാന്തി ആശ്രമം വീട്ടില്‍ വാഹിദ് (43) ആണ് മരിച്ചത്. ഗുരുതരമായി പരിക്കേറ്റ ഭാര്യ സലീന ഗുരുതരാവസ്ഥയില്‍ മെഡിക്കല്‍ കോളജ് ആശുപത്രിയിലാണ്. വെള്ളക്കിണര്‍ മൈജി ഷോപ്പിനു സമീപം ദമ്പതികള്‍ യാത്ര ചെയ്ത ബൈക്കില്‍ കാര്‍ ഇടിക്കുകയായിരുന്നുവെന്നാണ് പ്രാഥമിക വിവരം. ഇന്നലെ രാത്രി 11.45 നായിരുന്നു അപകടം. സൗത്ത് പോലീസ് സ്റ്റേഷന്‍ അതിര്‍ത്തിയിലാണ് സംഭവം. ആറാട്ടുവഴി ഐഎന്‍ടിയുസി യൂണിറ്റിലെ ലോഡിംഗ് തൊഴിലാളിയാണ് മരിച്ച വാഹിദ്. പരേതനായ അത്താഴക്കൊട്ട് സാലിയുടെ മകനാണ്. പോസ്റ്റ് മാര്‍ട്ടത്തിനുശേഷം മൃതദേഹം പടിഞ്ഞാറെ ജുമാ മസ്ജിദ് ഖബർസ്ഥാനില്‍ ഖബറടക്കി. വാഹിദിന്‍റെ മരണത്തില്‍ ഐഎന്‍ടിയുസി സംസ്ഥാന വൈസ് പ്രസിഡന്‍റ് ബാബു ജോര്‍ജും യൂണിറ്റ് പ്രസിഡന്‍റ് സജിയും അനുശോചിച്ചു.

കാലപ്പഴക്കത്തില്‍ കുടിവെള്ള പദ്ധതി; മാവേലിക്കരയില്‍ ജനം ആശങ്കയില്‍

ആലപ്പുഴ: മാവേലിക്കരയിലെ കുടിവെള്ള പദ്ധതിയുടെ പഴക്കം അമ്പതാണ്ട്. കാലപ്പഴക്കം കൊണ്ട് പദ്ധതി അവതാളത്തിലായിട്ട് കാലംകുറെയായി. പക്ഷേ, അധികൃതര്‍ തിരിഞ്ഞുനോക്കുന്നേയില്ല. കുടിവെള്ള വിതരണ ടാങ്കും പൈപ്പുകളും കാലപ്പഴക്കം കൊണ്ട് ചക്രശ്വാസം വലിക്കുകയാണ്. പഴയ ആസ്ബസ്റ്റോസ് പൈപ്പാണു പലയിടത്തും ജലവിതരണത്തിന് ഉപയോഗിക്കുന്നത്. അതിനാല്‍ പൈപ്പ് പൊട്ടല്‍ തുടര്‍ക്കഥയായ മാവേലിക്കരയില്‍ ജലവിതരണം എപ്പോള്‍ തടസപ്പെടും എന്നതു പ്രവചിക്കാന്‍ പോലും സാധ്യമല്ല. കാലപ്പഴക്കം ചെന്ന ട്രീറ്റ്‌മെന്‍റ് പ്ലാന്‍റിലെ ശുദ്ധീകരണം പോലും കൃത്യമാണോയെന്നു നഗരവാസികളില്‍ ആശങ്കയുണ്ട്. ഈ പ്രശ്‌നങ്ങള്‍ക്കെല്ലാം പരിഹാരമായി നാലുവര്‍ഷം മുന്‍പു പ്രഖ്യാപിച്ച പദ്ധതി പ്രവര്‍ത്തനം ഇഴയുന്നുവെന്ന് ആക്ഷേപം. റീബില്‍ഡ് കേരളയില്‍ ഉള്‍പ്പെടുത്തി നഗരസഭ അതിര്‍ത്തിയിലും തഴക്കര പഞ്ചായത്ത്, ചെട്ടികുളങ്ങര പഞ്ചായത്തിലെ ഏതാനും പ്രദേശങ്ങളിലും ശുദ്ധജലം എത്തിക്കുന്ന തഴക്കര ശുദ്ധജല പദ്ധതിക്കു 2021ല്‍ പ്രാഥമിക അംഗീകാരം ലഭിച്ചതാണ്. പദ്ധതി പ്രകാരം അച്ചന്‍കോവിലാറ്റിലെ മണ്ഡപത്തിന്‍ കടവിനു സമീപം പുതിയ കിണര്‍ സ്ഥാപിച്ചു വെള്ളം പമ്പ് ചെയ്തു ബിഷപ് ഹോഡ്ജസ് എച്ച്എസ്എസിനു സമീപത്തുള്ള ജലഅഥോറിറ്റി വളപ്പില്‍ എത്തിക്കും. ഇവിടെ പുതിയതായി ട്രീറ്റ്‌മെന്‍റ് പ്ലാന്‍റ് നിര്‍മിക്കും. ശുദ്ധീകരിക്കുന്ന വെള്ളം പുതിയ ഓവര്‍ഹെഡ് ടാങ്കില്‍ ശേഖരിച്ചു വിതരണം ചെയ്യുന്നതാണു പദ്ധതി. പദ്ധതിയുടെ ഭാഗമായി കല്ലിമേല്‍ നൂറേക്കറിലും സംഭരണി നിര്‍മിക്കും. 11 ലക്ഷം ലീറ്റര്‍ സംഭരണ ശേഷിയുള്ള ടാങ്കില്‍നിന്നു തഴക്കര പഞ്ചായത്തിന്‍റെ വിവിധ ഭാഗങ്ങളിലേക്കു വെള്ളം എത്തിക്കുമെന്നായിരുന്നു പ്രഖ്യാപനം. എന്നാല്‍, പദ്ധതിക്കു വേണ്ടത്ര വേഗം ഇല്ലെന്നാണ് ആക്ഷേപം ഉയരുന്നത്. അന്തിമ അംഗീകാരം ലഭിച്ചു നിര്‍മാണ ജോലികള്‍ ആരംഭിക്കണമെന്നാണ് ആവശ്യം. ബിഷപ് ഹോഡ്ജസ് സ്‌കൂളിനു സമീപത്തെ ജലസംഭരണിക്കു കാലപ്പഴക്കം ഏറെയാണ്. ടാങ്കിന്‍റെ ഗോവേണി പലയിടത്തും തകര്‍ന്നു. സംഭരണിയുടെ കോണ്‍ക്രീറ്റ് ഭാഗങ്ങള്‍ അടര്‍ന്നുവീഴുന്ന അവസ്ഥയാണ്. നിലവിലെ സംഭരണി എത്രനാള്‍ എന്ന ചോദ്യം ഉയരുമ്പോള്‍ പുതിയ സംഭരണി നിര്‍മാണം വേഗം ആരംഭിക്കണമെന്ന ആവശ്യം ശക്തമാണ്. മാവേലിക്കര ജലഅഥോറിറ്റി വളപ്പില്‍ സ്ഥാപിക്കുന്ന പുതിയ ട്രീറ്റ്‌മെന്‍റ് പ്ലാന്‍റിനും ടാങ്കിനും പുതിയ സ്ഥലം കണ്ടെത്തണ്ട എന്ന അനുകൂല ഘടകം ഉള്ളപ്പോഴും പദ്ധതി വൈകുന്നു എന്നതാണ് ആക്ഷേപം.

മാന്നാറിൽ വീണ്ടും തെരുവുനായ അക്രമണം; ഒരുമാസത്തിനുള്ളില്‍ 15 പേര്‍ക്കു കടിയേറ്റു

മാന്നാര്‍: മാന്നാറില്‍ വീണ്ടും തെരുവനായ അക്രമണം. കഴിഞ്ഞ ഒരുമാസത്തിനുള്ളില്‍ 15 പേര്‍ക്കാണ് കടിയേറ്റിരിക്കുന്നത്. മാന്നാര്‍ കുട്ടമ്പേരൂര്‍ കോയിക്കല്‍ മുക്ക് ഇന്ത്യന്‍ ഓയില്‍ പമ്പിനു തെക്കുവശം ചായക്കട നടത്തുന്ന ചെന്നിത്തല ഒരിപ്രം മൂന്നാം വാര്‍ഡില്‍ മഠത്തില്‍ പടീറ്റതില്‍ ഗോപിയുടെ ഭാര്യ മണിയമ്മ(66)ക്ക് നായയുടെ അക്രമണത്തില്‍ പരിക്കേറ്റു. കൂടാതെ തൊടുപുഴയില്‍നിന്നും കെട്ടിട നിര്‍മാണ സാമഗ്രികളുമായി എത്തിയ വാഹനത്തിന്‍റെ ഡ്രൈവര്‍, വഴിയാത്രക്കാരായ ബംഗാളികള്‍ ഉള്‍പ്പെടെയുള്ളവര്‍ക്കാണ് കഴിഞ്ഞദിവസം തെരുവുനായ്ക്കളുടെ കടിയേറ്റത്. ചായക്കടയില്‍ ജോലി ചെയ്തുകൊണ്ടിരുന്ന മണിയമ്മയെ കടയില്‍ കയറിയാണ് കടിച്ചത്. പുലര്‍ച്ചെ നാലിന് കടതുറന്ന് നാലഞ്ചുപേര്‍ക്ക് ചായ കൊടുത്തശേഷം കടയ്ക്കുള്ളിലെ പൈപ്പില്‍നിന്നു വെള്ളം ശേഖരിച്ചുകൊണ്ടിരുന്ന മണിയമ്മയുടെ ദേഹത്തേക്ക് തെരുവുനായ ചാടിക്കയറുകയായിരുന്നു. പെട്ടെന്നുള്ള ആക്രമണത്തില്‍ താഴെ വീണ മണിയമ്മയുടെ വയറിലും ഇടുത്തേ കൈ വിരലുകളിലും കടിയേറ്റു. തുടര്‍ന്ന് വടക്കോട്ട് ഓടിയ നായ അവിടെ നിര്‍ത്തിയിട്ടിരുന്ന വാഹനത്തിന്‍റെ തൊടുപുഴ സ്വദേശിയായ ഡ്രൈവറെയും ജോലിക്കായി പോകുകയായിരുന്ന ബംഗാളികളെയും ആക്രമിക്കുകയായിരുന്നു. കടയിലെ ജോലിക്കാരിയെത്തിയാണ് മാവേലിക്കര ജില്ലാ ആശുപത്രിയിലെത്തിച്ച് പ്രഥമ ശുശ്രൂഷയും തുടര്‍ന്ന് ആലപ്പുഴ വണ്ടാനം മെഡിക്കല്‍ കോളജില്‍നിന്നു പ്രതിരോധ കുത്തിവെയ്പും നടത്തിയതെന്ന് മണിയമ്മ പറഞ്ഞു. അഞ്ചുപേരെ കടിച്ച തെരുവുനായ പിന്നീട് ചത്തതായും പേ വിഷബാധ സംശയിക്കുന്നതായും നാട്ടുകാര്‍ പറഞ്ഞു. രാവിലെ ട്യൂഷന്‍ കഴിഞ്ഞു വരുന്നവഴി കുട്ടമ്പേരൂര്‍ പുല്ലാമഠത്തില്‍ രാജേഷ്- അര്‍ച്ചന ദമ്പതികളുടെ മകനായ ആദിത്യന് ദിവസങ്ങള്‍ക്കു മുമ്പാണ് തെരുവുനായ ആക്രമണത്തില്‍ കാലിനു പരിക്കേറ്റത്. മാന്നാര്‍ പഞ്ചായത്തിന്‍റെ വിവിധ പ്രദേശങ്ങളില്‍ തെരുവുനായ ശല്യം രൂക്ഷമാണ്. പ്രധാന റോഡുകളും ഇടറോഡുകളും തെരുവുനായ്ക്കള്‍ കയ്യടക്കിയിരിക്കുകയാണ്. കാല്‍നടക്കാരും ഇരുചക്രവാഹനക്കാരുമാണ് തെരുവുനായ ആക്രമണങ്ങള്‍ക്കു കൂടുതല്‍ ഇരകളാകുന്നത്. പുലര്‍ച്ചെ നടക്കാന്‍ പോകുന്നവരെയും പാല്‍, പത്രവിതരണക്കാരെയും സ്ഥിരമായി ആക്രമിക്കുന്നതിനാല്‍ പുലര്‍ച്ചെ പുറത്തിറങ്ങാന്‍ പലരും മടിക്കുകയാണ്.

ആരോഗ്യമന്ത്രി രാജിവയ്ക്കണമെന്ന് കേരള കോൺഗ്രസ്-ജേക്കബ്

രാമങ്കരി: മന്ത്രി വീണാ ജോർജിന്‍റെ നിരുത്തരവാദപരമായ പെരുമാറ്റമാണ് ബിന്ദുവിന്‍റെ മരണത്തിലേക്ക് നയിച്ചതെന്ന് കേരള കോണ്ഗ്രസ്-ജേക്കബ് സംസ്ഥാന വൈസ് ചെയർമാൻ ബാബു വലിയവീടൻ. കോട്ടയം മെഡിക്കൽ കോളജ് സംഭവത്തിൽ പാർട്ടി ജില്ലാ കമ്മിറ്റി സംഘടിപ്പിച്ച പ്രതിഷേധ യോഗം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. സ്വയം ന്യായീകരിക്കാനുള്ള മന്ത്രിയുടെ വ്യഗ്രതയാണ് ബിന്ദുവിന്‍റെ ജീവൻ നഷ്ടപ്പെടുത്തിയതെന്നും ഇതു കൊലപാതകമാണെന്നും അദ്ദേഹം പറഞ്ഞു. മന്ത്രിക്ക് ആ സ്ഥാനത്ത് തുടരാൻ നിയമപരമായും ധാർമികമായും യാതൊരു അർഹതയുമില്ല. ഇത്തരമൊരു ദാരുണസംഭവം നടന്നപ്പോൾ മുഖ്യമന്ത്രി അമേരിക്കയിലേക്കു പോയത് കേരളത്തിലെ ജനങ്ങളോടുള്ള വെല്ലുവിളിയാണെന്നും അദ്ദേഹം പറഞ്ഞു. പ്രതിഷേധ യോഗത്തിൽ പാർട്ടി ജില്ലാ പ്രസിഡന്‍റ് തങ്കച്ചൻ വാഴച്ചിറ അധ്യക്ഷത വഹിച്ചു. പാർട്ടി ഉന്നതാധികാരസമിതി അംഗങ്ങളായ നൈനാൻ തോമസ്, ഷാജി സ്കറിയ, മത്തായിച്ചൻ കാഞ്ഞിക്കൽ, കെ.പി. കുഞ്ഞുമോൻ, ഷാജൻ മെതികളം, തോമാച്ചൻ കളപ്പുര, അന്‍റോച്ചൻ കോയിപ്പള്ളി, വിൽസൺ വണ്ടകം, മേൽസൺ മുണ്ടകം, ജോളി കവലേച്ചിറ, വറീച്ചൻ വേലിക്കകം, ജോമോൻ നടുവിലേക്കളം, തൊമ്മിക്കുട്ടി വാളംപറമ്പ് എന്നിവർ പ്രസംഗിച്ചു.

മന്ത്രി വീണാ ജോർജ് രാജിവയ്ക്കണം

പുളിങ്കുന്ന്: മന്ത്രി വീണാ ജോർജ് രാജിവയ്ക്കണമെന്നാവശ്യപ്പെട്ട് കോൺഗ്രസ് പുളിങ്കുന്ന് മണ്ഡലം കമ്മിറ്റിയുടെ നേതൃത്വത്തിൽ പുളിങ്കുന്ന് ജങ്കാർ കടവിൽ പ്രകടനവും പ്രതിഷേധ യോഗവും നടത്തി. കോൺഗ്രസ് പുളിങ്കുന്ന് മണ്ഡലം പ്രസിഡന്‍റ് ജോഷി കൊല്ലാറ അധ്യക്ഷത വഹിച്ചു. ഡിസിസി എക്സിക്യൂട്ടീവ് മെമ്പർ പി.കെ. ആന്‍റണി പത്തിൽ യോഗം ഉദ്ഘാടനം ചെയ്തു. മത്സ്യത്തഴിലാളി കോൺഗ്രസ് സംസ്ഥാന ജനറൽ സെക്രെട്ടറി എ.എസ്. വിശ്വനാഥൻ മുഖ്യപ്രഭാഷണം നടത്തി. പി. ഡി. ശശികുമാർ, മനോജ്‌ കാനാച്ചേരി, ജോസഫ് ജോസഫ് ആഞ്ഞിലിമൂട്ടിൽ, മജേഷ് അമ്പനാപ്പള്ളി, സുമേഷ്‌ കട്ടത്തറ, വിനോദ് കൊച്ചുപറമ്പിൽ, ജയപ്രകാശ് പുളിങ്കുന്ന്, ജയിംസ് കുഴിയിൽ, ജോൺ സി. ടിറ്റോ, ബാബു നടുവിലേടം, വിശ്വനാഥൻ തൈച്ചേരി, വർഗീസ് പുതുശേരി, രാഹുൽ കാവിൽ, അലക്സ്‌ മലയിൽ, സുഭാഷ് പതിനഞ്ചിൽച്ചിറ, തങ്കച്ചൻ കുഴിയടിച്ചിറ, ജോസൂട്ടി മണ്ണിശേരി, തങ്കച്ചൻ പറപ്പള്ളി എന്നിവർ പ്രസംഗിച്ചു.

ജിത ജോണിക്ക് ഗ്രീൻ ഫിനാൻസ് ഫെലോഷിപ്പ്

വൈപ്പിൻ: ഗ്രീൻ ഫിനാൻസ് ഹബ് ഫെലോഷിപ്പ്-2025ന് മലയാളിയായ ജിതാ ജോണി തെരഞ്ഞെടുക്കപ്പെട്ടു. ആഗോള കാലാവസ്ഥ പ്രശ്നങ്ങൾ കണ്ടെത്തി പരിഹാരത്തിനായി സുസ്ഥിര സാമ്പത്തിക പരിഹാരങ്ങൾ നിർദേശിക്കുന്ന അന്താരാഷ്ട്ര സംരംഭമാണ് ഗ്രീൻ ഫിനാൻസ് ഹബ്. 101 രാജ്യങ്ങളിൽനിന്നായി 500 പേരെയാണ് ഈ വർഷം ഫെലോഷിപ്പിനായി തെരഞ്ഞെടുത്തിട്ടുള്ളത്. ഇതിൽ ആദ്യ ബാച്ചിലെ ഒരാളാണ് ജിത. യുകെ ആസ്ഥാനമായ ഡിലോയ്റ്റ് കമ്പനിയുടെ മുംബൈയിലെ അസിസ്റ്റന്‍റ് മാനേജറായ ഇവർ കോഴിക്കോട് ഐഐഎമ്മിലാണ് എംബിഎ പഠനം പൂർത്തീകരിച്ചത്. യൂത്തിനെ പ്രതിനിധീകരിച്ച് നിരവധി അന്താരാഷ്ട്ര സമ്മേളനങ്ങളിൽ സംബന്ധിച്ചിട്ടുള്ള ജിത 2023 ജൂണിൽ ജർമനിയിൽ നടന്ന ഐക്യരാഷ്ട്രസഭയുടെ കാലാവസ്ഥ സമ്മേളനത്തിൽ ഇന്ത്യയെ പ്രതിനിധീകരിച്ചു. കുഴുപ്പിള്ളി ചെറുവൈപ്പ് ജിതാലയത്തിൽ ജോണിന്‍റെയും ലതയുടെയും മകളും ചേർത്തല തായപ്പള്ളി ഐവാൻ ജോണിന്‍റെ ഭാര്യയുമാണ്.

മൂവറയ്ക്കല്‍ റോഡ് തുറന്നു

ആലപ്പുഴ: നഗരസഭ വാര്‍ഷിക പദ്ധതിയില്‍ ഉള്‍പ്പെടുത്തി നിര്‍മാണം പൂര്‍ത്തീകരിച്ച ആശ്രമം വാര്‍ഡിലെ മൂവറയ്ക്കല്‍ റോഡും കാനയും തുറന്നു കൊടുത്തു. നഗരസഭാധ്യക്ഷ കെ.കെ. ജയമ്മ ഉദ്ഘാടനം ചെയ്തു. വൈസ് ചെയര്‍മാന്‍ പി.എസ്.എം. ഹുസൈന്‍ അധ്യക്ഷത വഹിച്ചു. എം.ആര്‍. പ്രേം മുഖ്യപ്രഭാഷണവും വാര്‍ഡ് കൗണ്‍സിലര്‍ ഗോപിക വിജയപ്രസാദ് സ്വാഗതവും ആശംസിച്ചു. ആര്‍. വിനിത,. ബി. നസീര്‍, സിമി ഷാഫിഖാന്‍, നജിത ഹാരിസ്, ജഗദീഷ്, ജി. വിജയപ്രസാദ്, പി.കെ. സുധീഷ്, എസ്. ദിലീപ്, കെ.കെ. അനില്‍കുമാര്‍, സതീഷ്, ഗിരീശന്‍, വിനോദ് എന്നിവര്‍ പ്രസംഗിച്ചു. പ്രദേശവാസികള്‍ അടക്കം നിരവധിപേര്‍ പങ്കെടുത്തു.

ഓൺലൈൻ ട്രേഡിംഗ്: 1.3 കോടി തട്ടിയെടുത്ത പ്രതി പിടിയിൽ

ചെങ്ങന്നൂർ: ഓൺലൈൻ ട്രേഡിംഗ്: 1.3 കോടി തട്ടിയെടുത്ത പ്രതി പിടിയിൽ. ഓൺലൈൻ ട്രേഡിംഗ് വ്യാപാരത്തിനായി ടെലിഗ്രാം അക്കൗണ്ടിലൂടെ ചാറ്റ് ചെയ്ത് പലതവണയായി വെൺമണി സ്വദേശിയുടെ കൈയിൽനിന്നും ഒരു കോടി മുപ്പതു ലക്ഷത്തി ഇരുപത്തിയയ്യായിരം രൂപ തട്ടിയെടുത്ത കേസിലാണ് രാജസ്ഥാൻ ശ്രീഗംഗാനഗർ സ്വദേശിയായ സുനിലിനെ (26) ജില്ലാ ക്രൈം ബ്രാഞ്ച് പാക്കിസ്ഥാൻ ബോർഡർ ആയ ശ്രീഗംഗാനഗറിൽനിന്നും അറസ്റ്റ് ചെയ്തത്. വെൺമണി പോലീസ് രജിസ്റ്റർ ചെയ്ത കേസ് പിന്നീട് ജില്ലാ ക്രൈം ബ്രാഞ്ച് ഏറ്റെടുക്കുകയായിരുന്നു. ചെങ്ങന്നൂർ കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. ജില്ലാ പോലീസ് മേധാവി എം.പി. മോഹനചന്ദ്രന്‍റെ നിർദേശപ്രകാരം ജില്ലാ ക്രൈം ബ്രാഞ്ച് ഡിവൈഎസ്പി എസ്. ന്യൂമാന്‍റെ നേതൃത്വത്തിൽ എസ്ഐമാരായ സുബാഷ് ബാബു, അഗസ്റ്റിൻ വർഗീസ്, എ. സുധീർ , സജികുമാർ, വി.വി. വിനോദ്, സിപിഒമാരായ ബൈജു സ്റ്റീഫൻ, സനൽ, അനൂപ്, അർഫാസ് അഷറഫ് എന്നിവരാണ് അന്വേഷണ സംഘത്തിലുണ്ടായിരുന്നത്.

സഭയെക്കുറിച്ച് ആഴത്തിൽ പഠിക്കണം: മാർ ജോസഫ് പണ്ടാരശേരിൽ

കല്ലിശേരി: ക്നാനായ കൂട്ടായ്മകളിൽ നമ്മുടെ സമുദായ അംഗങ്ങൾ സഭയെക്കുറിച്ച് ആഴത്തിൽ പഠിക്കാനുള്ള വേദികൾ കൂടിയാക്കണമെന്ന് കോട്ടയം അതിരൂപത സഹായമെത്രാൻ മാർ ജോസഫ് പണ്ടാരശേരിൽ പറഞ്ഞു. ക്നാനായ മലങ്കര പുനരൈക്യത്തിന്‍റെയും കേരള കത്തോലിക്കാ സഭയിൽ അന്ത്യോക്യൻ സുറിയാനി റീത്ത് (മലങ്കര റീത്ത്) അനുവദിച്ചതിന്‍റെയും 104-ാമത് വാർഷികാഘോഷം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. പ്രേഷിത സന്ദേശവുമായി ക് നാനായ സമുദായം ലോകത്തിന്‍റെ മിക്ക ഭാഗങ്ങളിലും എത്തിച്ചേർന്നിട്ടുണ്ടെന്ന് അധ്യക്ഷത വഹിച്ചുകൊണ്ട് ഗീവർഗീസ് മാർ അപ്രേം പറഞ്ഞു. ഉമയാറ്റുകര ഓർത്തഡോക്സ് ഇടവക കുരിശടിയിൽ നിന്നാരംഭിച്ച പുനരൈക്യ റാലിയോടെയാണ് പരിപാടികൾക്കു തുടക്കമായത്. പ്രൊ-പ്രോട്ടോസിഞ്ചലൂസ് ഫാ. തോമസ് ആനിമുട്ടിൽ, ഫാ. റെന്നി കട്ടേൽ, സാബു പാറാനിക്കൽ, സൽവി തയ്യിൽ, ഏയ്ബു നെടിയുഴത്തിൽ, ജെസി ചെറുമണത്ത് എന്നിവർ പ്രസംഗിച്ചു. മലങ്കര ഫൊറോനയിലെ വിവിധ മേഖലകളിൽ പ്രാഗത്ഭ്യം തെളിയിച്ചവരെ സമ്മേളനത്തിൽ ആദരിച്ചു. 1921 ജൂലൈ 5നാണ് കേരള കത്തോലിക്കാസഭയിൽ പുനരൈക്യപ്പെടുന്നവർക്ക് മലങ്കര റീത്ത് അനുവദിച്ചുകൊണ്ടുള്ള കൽപ്പന റോമിൽ നിന്നുണ്ടായത്.

ഫാ. ജോബ് കല്ലുവിളയിൽ മാവേലിക്കര ഭദ്രാസന വികാരി ജനറൽ

മാവേലിക്കര: മലങ്കര സുറിയാനി കത്തോലിക്കാ സഭ മാവേലിക്കര ഭദ്രാസനത്തിന്‍റെ പുതിയ വികാരി ജനറാളായി ഫാ. ജോബ് കല്ലുവിളയിലിനെ മാവേലിക്കര ഭദ്രാസനാധ്യക്ഷൻ ബിഷപ് മാത്യൂസ് മാർ പോളികാർപ്പോസ് നിയമിച്ചു.1967 സെപ്റ്റംബർ 27ന് കൊട്ടാരക്കര അമ്പലപ്പുറം കല്ലുവിളയിൽ കെ.എം. കൊച്ചുമ്മൻ-മേരിക്കുട്ടി ദമ്പതികളുടെ മകനായാണ് ജനനം. അമ്പലപ്പുറം ഇടവകാംഗമായ ഇദ്ദേഹം അമ്പലപ്പുറം, കൊട്ടാരക്കര, നെടുവത്തൂർ, എഴുകോൺ എന്നിവിടങ്ങളിലെ പ്രാഥമിക വിദ്യാഭ്യാസത്തിനുശേഷം സെന്‍റ് അലോഷ്യസ് മൈനർ സെമിനാരിയിലും തുടർന്ന് സെന്‍റ് മേരീസ് മലങ്കര സെമിനാരിയിലും ആലുവ സെന്‍റ് ജോസഫ് സെമിനാരിയിലും വൈദിക പരിശീലനം നടത്തി. 1994 ഡിസംബർ 28ന് ആയൂരിൽ ലോറെൻസ് മാർ അപ്രേം തിരുമേനിയിൽനിന്നും തിരുവനന്തപുരം അതിഭദ്രാസനത്തിനുവേണ്ടി വൈദിക പട്ടം സ്വീകരിച്ചു. ചെങ്ങന്നൂർ, കുറിച്ചിമുട്ടം, ആലാ, ചെറിയനാട്, വെൺമണി, കോടുകുളഞ്ഞി, പുന്തല, പാറശാല, കുടയാൽ, അരുവംകോട്, കരിമണ്ണൂർ, പുതുശേരിഭാഗം, വയല, ഏനാത്ത്, പുത്തൂർ, കാരിക്കൽ, പൂവത്തൂർ, തേവലപ്പുറം, കരുവേലിൽ, ഹ്യൂസ്റ്റൺ -അമേരിക്ക, ഇലഞ്ഞിമേൽ, ആല, ചേപ്പാട്, രാമപുരം, നല്ലില, പുളിയില, ഹരിപ്പാട്, ചെറുതന എന്നീ പള്ളികളിൽ വികാരിയായി സേവനം അനുഷ്ഠിച്ചു. സഭാതല എംസിവൈഎം ഡയറക്ടറായും പാറശാല, പുത്തൂർ, ചെങ്ങന്നൂർ, മാവേലിക്കര തുടങ്ങിയ വൈദിക ജില്ലകളുടെ ജില്ലാ വികാരിയായും സെന്‍റ് മരിയ വിയാനി വെൽഫെയർ അസോസിയേഷൻ സെക്രട്ടറി ആയും ചെങ്ങന്നൂർ പുലിയൂർ മാർ ഈവാനിയോസ് ലോ കോളജ് ഡയറക്ടർ ആയും സേവനം അനുഷ്ഠിച്ചു.

കുട്ടനാട് താലൂക്കിനെ പ്രളയബാധിത പ്രദേശമായി പ്രഖ്യാപിക്കണം: കേരള കോണ്‍ഗ്രസ്

ആലപ്പുഴ: ഒരുമാസത്തിനിടയില്‍ മൂന്നു പ്രാവശ്യം വെള്ളപ്പൊക്കം ഉണ്ടായി ദുരിതത്തിലായ കുട്ടനാടിനെ പ്രളയബാധിത പ്രദേശമായി പ്രഖ്യാപിച്ച് അടിയന്തരമായ സഹായങ്ങള്‍ ദുരിതബാധിതര്‍ക്കു നല്‍കാന്‍ സംസ്ഥാന സര്‍ക്കാര്‍ തയാറാവണമെന്ന് കേരള കോണ്‍ഗ്രസ് കുട്ടനാട് നിയോജകമണ്ഡലം നേതൃയോഗം. മഴയ്ക്കു ശമനം ഉണ്ടെങ്കിലും താഴ്ന്ന പ്രദേശങ്ങള്‍ ഇപ്പോഴും വെള്ളത്തിനടിയിലാണ്. ഒരു മാസമായി പണിയില്ലാതെ തൊഴിലാളി കുടുംബങ്ങള്‍ പട്ടിണിയിലാണ്. സൂകുളുകള്‍ തുറന്നെങ്കിലും ഹാജര്‍ നില കുറവാണ്. അഴുക്കു വെള്ളത്തിലൂടെ നീന്തിനടന്ന് പനിയും ചുമയും മറ്റു അസുഖങ്ങളുമായി നിരവധിപ്പേർ ചികിത്സയിലാണ്. പുഞ്ചകൃഷിയുടെ പിആര്‍എസിന്‍റെ പണം ഇതുവരെ ഭൂരിപക്ഷം കര്‍ഷകര്‍ക്കും ലഭിച്ചില്ല. രണ്ടാം കൃഷി പലരും ഉപേക്ഷിച്ചെന്നും യോഗം കുറ്റപ്പെ ടുത്തി. ജില്ലാ പ്രസിഡന്‍റ് ജേക്കബ് ഏബ്രഹാം ഉദ്ഘാടനം ചെ യ്തു. നിയോജകമണ്ഡലം പ്രസിഡന്‍റ് അഡ്വ. കെ.ആര്‍. ശ്രീകുമാര്‍ അധ്യക്ഷനായി. സംസ്ഥാന വൈസ് ചെയര്‍മാന്‍ റെജി ചെറിയാന്‍ മുഖ്യപ്രഭാക്ഷണം നടത്തി. ഉന്നതാധികാര സമിതി അംഗങ്ങളായ സാബു തോട്ടുങ്കല്‍, പ്രകാശ് പനവേലി, ജോസ് കാവനാടന്‍, ജോസ് കോയിപ്പള്ളി, റോയി ഊരാംവേലി, സണ്ണി തോമസ്, തോമസുകുട്ടി മാത്യു, ഐപ്പ് ചക്കിട്ട, ജോമ്പിള്‍ പെരുമാള്‍, ചാക്കോച്ചന്‍ മൈലംന്തറ, സി.റ്റി. തോമസ്, ഷാജി കല്ലറയ്ക്കല്‍, ബിജു ചെറുകാട്, ടെഡി സഖറിയ, ബൈജു ജോസ്, വേണു നെടുമുടി, ലാല്‍ വയലാര്‍ എന്നിവര്‍ പ്രസംഗിച്ചു.

ഫസ്റ്റ്‌ബെല്‍ ഡിജിറ്റല്‍ ക്ലാസുകള്‍ ഒമ്പതുമുതല്‍ ആരംഭിക്കും: മന്ത്രി വി. ശിവന്‍കുട്ടി

ആലപ്പുഴ: മാറിയ പാഠപുസ്തകത്തിനനുസരിച്ച് ഒന്നുമുതല്‍ 10 വരെ ക്ലാസുകള്‍ക്കുള്ള ഫസ്റ്റ്‌ബെല്‍ ഡിജിറ്റല്‍ ക്ലാസുകള്‍ ഒമ്പതുമുതല്‍ കൈറ്റ് വിക്ടേഴ്‌സില്‍ സംപ്രേഷണം ആരംഭിക്കുമെന്ന് പൊതുവിദ്യാഭ്യാസവകുപ്പ് മന്ത്രി വി. ശിവന്‍കുട്ടി പറഞ്ഞു. കുട്ടികള്‍ക്കുള്ള അധിക പിന്തുണ എന്ന തരത്തിലാണ് ക്ലാസുകള്‍ തയാറാക്കിയിട്ടുള്ളതെന്ന് മന്ത്രി പറഞ്ഞു. സമഗ്ര ഗുണമേന്മ വിദ്യാഭ്യാസ പദ്ധതിയുടെ ഭാഗമായി അക്കാദമിക് മോണിറ്ററിംഗ് പ്ലാറ്റ്‌ഫോമുകള്‍ പരിചയപ്പെടുത്താന്‍ കേരള ഇന്‍ഫ്രാസ്ട്രക്ചര്‍ ആൻഡ് ടെക്‌നോളജി ഫോര്‍ എജ്യുക്കേഷന്‍റ് (കൈറ്റ്) നേതൃത്വത്തില്‍ അമ്പലപ്പുഴ ഗവ. മോഡല്‍ എച്ച്എസ്എസില്‍ സംഘടിപ്പിച്ച ജില്ലയിലെ ഹൈസ്‌കൂള്‍ പ്രഥമാധ്യാപകര്‍ക്കുള്ള ശില്പശാലയില്‍ വീഡിയോ കോണ്‍ഫറന്‍സിംഗിലൂടെ സംസാരിക്കുകയായിരുന്നു മന്ത്രി. കൈറ്റ് സിഇഒ കെ. അന്‍വര്‍ സാദത്തും ശില്പശാലയില്‍ പങ്കെടുത്തു. ജൂലൈ മാസം തന്നെ സംസ്ഥാനതലത്തില്‍ മുഴുവന്‍ അധ്യാപകര്‍ക്കും പരിശീലനം നല്‍കി അക്കാദമിക് മോണിറ്ററിംഗിനും കുട്ടികളുടെ മെന്‍ററിംഗിനുമുള്ള ഡിജിറ്റല്‍ പ്ലാറ്റ്‌ഫോം രക്ഷിതാക്കള്‍ക്കുള്‍പ്പെടെ കാണുന്ന വിധം പൂര്‍ണമായും പ്രവര്‍ത്തനക്ഷമമാവുമെന്ന് അദ്ദേഹം പറഞ്ഞു. അക്കാദമിക് മാസ്റ്റര്‍ പ്ലാനുകള്‍ നടപ്പിലാക്കുന്നത് മോണിറ്റര്‍ ചെയ്യുന്നതിനും ആസൂത്രണം ചെയ്യുന്നതിനുമുള്ള സമഗ്രപ്ലസ് പോര്‍ട്ടല്‍ ഉപയോഗിക്കേണ്ട രീതി ശില്പശാലയില്‍ വിശദീകരിച്ചു. ഇതിനായി താഴെത്തട്ടു മുതല്‍ മുകള്‍ തട്ടുവരെ പ്രവര്‍ത്തനങ്ങള്‍ നിരീക്ഷിക്കുന്നതിനും നിര്‍ദേശങ്ങള്‍ നല്‍കുന്നതിനുമുള്ള സൗകര്യങ്ങളാണ് കൈറ്റിന്‍റെ നേതൃത്വത്തില്‍ ഒരുക്കിയിരിക്കുന്ന സമഗ്ര പ്ലസ് പോര്‍ട്ടലിലുള്ളത്. സമഗ്രപ്ലസ് (www.samagra. kite.kerala.gov.in) പോര്‍ട്ടലിലൂടെ അധ്യാപകര്‍ക്ക് ഡിജിറ്റല്‍ പ്ലാനുകള്‍ തയാറാക്കി സൂക്ഷിക്കാനും പ്രഥമാധ്യാപകര്‍ക്ക് സമര്‍പ്പിക്കാനും കഴിയും.

ചാരുംമൂട് ജംഗ്‌ഷനിൽ ഗതാഗതക്കുരുക്ക് അഴിയാക്കുരുക്ക്

ചാരുംമൂട്: കായംകുളം-പുനലൂര്‍ കെപി റോഡും കൊല്ലം-തേനി ദേശീയപാതയും സംഗമിക്കുന്ന ചാരുംമൂട് ജംഗ്ഷനില്‍ ഗതാഗതത്തിരക്കും അതുമൂലമുണ്ടാകുന്ന ഗതാഗതക്കുരുക്കും രൂക്ഷമായി. ഗതാഗതനിയന്ത്രണത്തിനായി സിഗ്‌നല്‍ ലൈറ്റുകള്‍ ഉണ്ടെങ്കിലും അവയൊന്നും വകവയ്ക്കാതെയാണ് ടിപ്പറുകളും സ്വകാര്യബസുകളുമടക്കം ചീറിപ്പായുന്നത്. നൂറനാട് പോലീസ് സ്റ്റേഷന്‍റെ പരിധിയിലുള്ള ഇവിടെ ഹോം ഗാര്‍ഡിന്‍റെ സേവനം മാസങ്ങളായി ലഭിക്കുന്നില്ല. ജംഗ്ഷന്‍റെ നാലുഭാഗത്തുമുള്ള റോഡില്‍ ഗതാഗതനിയമലംഘനം കാരണം അപകടങ്ങള്‍ വര്‍ധിക്കുകയാണ്. രാവിലെയും വൈകുന്നേരവും ജംഗ്ഷന്‍റെ നാലുഭാഗത്തേക്കും വാഹനങ്ങളുടെ നീണ്ടനിര കാണാം. സ്‌കൂള്‍കുട്ടികള്‍ ഉള്‍പ്പെടെ റോഡ് മുറിച്ചുകടക്കാന്‍ ഏറെ പണിപ്പെടേണ്ട സ്ഥിതിയാണുള്ളത്. സിഗ്നല്‍ ലൈറ്റുകള്‍ തെളിഞ്ഞാല്‍ വാഹനങ്ങള്‍ ചീറിപ്പായുന്നു. ഇതിനിടെ സിഗ്‌നല്‍ ലൈറ്റ് ശ്രദ്ധിക്കാതെ കാല്‍നടയാത്രക്കാര്‍ റോഡ് മുറിച്ചുകടക്കാന്‍ ശ്രമിക്കുന്നത് അപകടത്തിനു കാരണമാകുന്നു. രാവിലെയും വൈകുന്നേരവും സ്‌കൂള്‍ കുട്ടികള്‍ക്ക് ജംഗ്ഷന്‍ വഴി സൈക്കിളിലോ കാല്‍നടയായോ യാത്ര ചെയ്യാന്‍ കഴിയാത്ത സ്ഥിതിയാണ്. ജംഗ്ഷന്‍റെ നാലു ഭാഗത്തേ ക്കുമുള്ള റോഡില്‍ അനധികൃതമായി വാഹനങ്ങള്‍ മണിക്കൂറുകളോളം പാര്‍ക്ക് ചെയ്യുന്നതും ഗതാഗതക്കുരുക്കിനു കാരണമാകുന്നു. ജംഗ്ഷനില്‍നിന്ന് റോഡില്‍ 100 മീറ്റര്‍ പരിധിയില്‍ വാഹനങ്ങള്‍ പാര്‍ക്ക് ചെയ്യാന്‍ പാടില്ലെന്ന് പോലീസ് ഉത്തരവുണ്ടെങ്കിലും അതൊന്നും ഇവിടെ ബാധകമാകാത്ത സ്ഥിതിയാണ്. ജംഗ്ഷനു സമീപത്തുള്ള വ്യാപാരസ്ഥാപനങ്ങള്‍ക്കു മുന്നില്‍ വാഹനങ്ങള്‍ പാര്‍ക്കുചെയ്യുന്നതു കാരണം മറ്റു വാഹനങ്ങള്‍ക്ക് കടന്നുപോകാന്‍ പറ്റാത്ത സ്ഥിതിയുമുണ്ടാകാറുണ്ട്. കെപി റോഡിലെ കെഎസ് ആര്‍ടിസി ബസുകളും സ്വകാര്യബസുകളും ഗതാഗതനിയമങ്ങള്‍ ലംഘിക്കുന്നു. നൂറോളം കെഎസ്ആര്‍ടിസി, സ്വകാര്യബസുകളാണ് ഇതുവഴി സര്‍വീസ് നടത്തുന്നത് ബസുകള്‍ക്ക് റോഡുകളില്‍നിന്നുമാറി പാര്‍ക്ക് ചെയ്യാന്‍ സ്ഥലം ഇല്ലാത്തത് ചാരുംമൂട്ടിലെ ഗതാഗതക്കുരുക്കിനു പ്രധാനകാരണമാണ്. കാത്തിരിപ്പുകേന്ദ്രങ്ങളിലേക്ക് ബസുകള്‍ എത്താതെ ജംഗ്ഷനു സമീപത്തുതന്നെ നിര്‍ത്തി യാത്രക്കാരെ ഇറക്കുന്നതും കയറ്റുന്നതും ഗതാഗതക്കുരുക്കിന് ഇടയാക്കുകയാണ്. ഹോംഗാര്‍ഡിനെ വീണ്ടും നിയമിച്ച് ഗതാഗതനിയന്ത്രണം നടത്തണമെന്നും നിയമലംഘനം നടത്തുന്നവര്‍ക്കെതിരേ നടപടി വേണമെന്നും ആവശ്യം ശക്തമായിരിക്കുകയാണ്.

എടത്വയില്‍ വ്യത്യസ്ത അപകടങ്ങളില്‍ രണ്ടു മരണം

എടത്വ: മണിക്കൂറിനുള്ളില്‍ നാടിനെ കണ്ണീരിലാഴ്ത്തി വ്യത്യസ്ത അപകടങ്ങളില്‍ എടത്വയിലും പരിസരത്തും രണ്ടു മരണം. ഇന്നലെ പുലര്‍ച്ചെ ബൈക്കിടിച്ച് കോളജ് വിദ്യാര്‍ഥി മരണപ്പെട്ടപ്പോള്‍ വൈകിട്ട് നാലിന് യുകെജി വിദ്യാര്‍ഥി വെള്ളത്തില്‍ മുങ്ങി മരിച്ചു. എടത്വ പാലക്കളം പാലത്തിനു സമീപം പുത്തന്‍പുരയ്ക്കാല്‍ ജോയി ഏബ്രഹാമിന്‍റെ (ജോയിച്ചന്‍) മകന്‍ ലിജുമോന്‍ പി.ജെ (18) ആണ് നിയന്ത്രണം വിട്ട ബൈക്ക് പോസ്റ്റില്‍ ഇടിച്ചു മരിച്ചത്. പഠനത്തിനൊപ്പം സ്വയംതൊഴില്‍ ചെയ്തിരുന്ന ലിജുമോന്‍ വെള്ളിയാഴ്ച രാത്രിയില്‍ കേറ്ററിംഗ് പണി കഴിഞ്ഞു വീട്ടിലെത്തിയശേഷം സുഹൃത്തായ എടത്വ പട്ടത്താനം വീട്ടില്‍ സാജുവിന്‍റെ മകന്‍ മെറിക്കും (18) ഒന്നിച്ച് തിരുവല്ലയില്‍ പോയി മടങ്ങുമ്പോഴാണ് അപകടം നടന്നത്. മെറിക്ക് ഗുരുതര പരിക്കുകളോടെ തിരുവല്ല സ്വകാര്യ മെഡിക്കല്‍ കോളജ് ആശുപത്രിയില്‍ ചികിത്സയിലാണ്. ലിജുമോന്‍ സംഭവ സ്ഥലത്തുവച്ചുതന്നെ മരണപ്പെട്ടു. ഓടിക്കൂടിയ നാട്ടുകാര്‍ മെറിക്കിനെ തിരുവല്ല ആശുപത്രിയില്‍ എത്തിച്ചു. ലിജുമോന്‍റെ മൃതദേഹം ഇന്ന് നാലിന് വീട്ടില്‍ എത്തിക്കും. നാളെ രണ്ടിന് ഭവനത്തിലെ ശുശ്രൂഷയെ തുടര്‍ന്ന് എടത്വ കോളജില്‍ പൊതുദര്‍ശനത്തിനുച്ചശേഷം മൃതദേഹം എടത്വ സെന്‍റ് ജോര്‍ജ് ഫൊറോനാ പള്ളിയില്‍ സംസ്‌കരിക്കും. വിദേശത്ത് ജോലിയുള്ള ലിജോമോനാണ് ഏകസഹോദരന്‍. മറ്റൊരപകടത്തില്‍ യുകെജി വിദ്യാര്‍ഥിയാണ് മരിച്ചത്. വീട്ടുമുറ്റത്ത് കളിച്ചുകൊണ്ടിരുന്ന ചെക്കിടിക്കാട് കണിയാംപറമ്പില്‍ ജെയ്‌സണ്‍ തോമസിന്‍റെ മകന്‍ ജോഷ്വാ (5) ആണ് വീടിനു മുന്നിലെ തോട്ടില്‍ വീണ് മുങ്ങി മരിച്ചത്. ജോഷ്വായുടെ മാതാവ് ആഷ വിദേശത്താണ്. നാട്ടിലെ സ്വകാര്യ ആശുപത്രിയില്‍ ജോലി ചെയ്യുന്ന ജെയ്‌സണ്‍ മാതാവിനെ ഏല്‍പ്പിച്ച ശേഷമാണ് ജോലിക്കു പോയത്. വീട്ടുമുറ്റത്ത് കളിക്കുന്നതു കണ്ട് അകത്തേക്ക് പോയി മടങ്ങിവന്ന മുത്തശ്ശി കുട്ടിയെ കാണാത്തതിനെത്തുടര്‍ന്ന് പരിസരങ്ങളില്‍ തെരഞ്ഞെങ്കിലും കണ്ടെത്താന്‍ കഴിഞ്ഞില്ല. ഇവരുടെ അലര്‍ച്ചകേട്ട് ഓടിയെത്തിയ സമീപവാസികള്‍ തോട്ടില്‍നിന്നാണ് കുട്ടിയെ കണ്ടെത്തിയത്. ഉടന്‍തന്നെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. കുട്ടിയുടെ മൃതദേഹം ആശുപത്രി ടേബിളില്‍ കിടത്തിയപ്പോള്‍ കണ്ടുനിന്നവര്‍ വാവിട്ട് നിലവിളിച്ചു. എടത്വ പോലീസ് മേല്‍നടപടി സ്വീകരിച്ചശേഷം മൃതദേഹം വണ്ടനം മെഡിക്കല്‍ കോളജ് ആശുപത്രിയിലേക്കു മാറ്റി. പച്ച വിമല നഴ്‌സറി സ്‌കൂളിലെ യുകെജി വിദ്യാര്‍ഥിയാണ് ജോഷ്വാ. പച്ച സെന്‍റ് സേവ്യേഴ്‌സ് യുപി സ്‌കൂള്‍ മൂന്നാം ക്ലാസ് വിദ്യാര്‍ഥി ജെസ്‌വിന്‍ സഹോദരനാണ്.

അർത്തുങ്കൽ ഹാർബർ നിർമാണത്തിന് കല്ലുകള്‍ എത്തുന്നു

ചേര്‍ത്തല: അർത്തുങ്കൽ ഹാർബർ നിർമിക്കണമെന്നാവശ്യപ്പെട്ട് മത്സ്യത്തൊഴിലാളികൾ നടത്തിവന്ന സത്യഗ്രഹ സമരം 100 ദിവസം പിന്നിട്ടു. 101-ാം ദിവസം ഹാർബർ എൻജിനിയറിംഗ് ഓഫീസിനു മുന്നിൽ മത്സ്യത്തൊഴിലാളികൾ നടത്തിയ പ്രതിഷേധ ആങ്കറിംഗ് സമരം നടക്കുന്നതിനിടെ നിർമാണത്തിനുള്ള കല്ലുമായി ടോറസ് വണ്ടികൾ വന്നത് സമരക്കാർക്ക് ആവേശമായി. ആങ്കറിംഗ് സമരം കേരള സ്വതന്ത്ര മത്സ്യത്തൊഴിലാളി ഫെഡറേഷൻ പ്രഥമ സംസ്ഥാന പ്രസിഡന്‍റായിരുന്ന ഫാ. ജോസ് കളീക്കൽ ഉദ്ഘാടനം ചെയ്തു. കേന്ദ്രസർക്കാർ അനുവദിച്ച 163 കോടി രൂപ ഉണ്ടായിട്ടും ഹാർബർ നിർമാണം അനന്തമായി നീളുന്നതിൽ പ്രതിഷേധിച്ചാണ് ഫെഡറേഷന്‍റെ നേതൃത്വത്തിൽ ഹാർബർ എൻജിനിയറിംഗ് ഓഫീസിനു മുന്നിൽ മത്സ്യത്തൊഴിലാളികളും സ്ത്രീകളും സത്യഗ്രഹം ആരംഭിച്ചത്. തീരഗ്രാമങ്ങളിൽ പ്രതിഷേധം ശക്തി പ്രാപിച്ചതയോടെയാണ് നിർമാണത്തിനുള്ള ക്രെയിനും ട്രെട്രോപാടും സാമഗ്രികളും എത്തിത്തുടങ്ങിയത്. ആങ്കറിംഗ് സമരം പ്രഖ്യാപിച്ചതിനു ശേഷം നിർമാണത്തിനുള്ള സാമഗ്രികൾ എത്തുകയും സമരത്തിനിടെ കരിങ്കല്ലുമായി ടോറസ് ലോറികൾ എത്തിയതോടെ സത്യഗ്രഹ സമരം താത്കാലികമായി നിർത്താനും കാവൽസമരം തുടരാനും സമരസമിതി തീരുമാനിച്ചതായി അധ്യക്ഷത വഹിച്ച ഫെഡറേഷൻ സംസ്ഥാന പ്രസിഡന്‍റ് ജാക്സൺ പൊള്ളയിൽ പ്രഖ്യാപിച്ചു. സമരത്തിനിടയിൽ കല്ലുമായെത്തിയ വാഹനത്തെ ഫാ. വി.പി. ജോസഫ് വലിയവീട്ടിൽ ഫ്ലാഗ് ഓഫ് ചെയ്ത് ജനങ്ങളുടെ അകമ്പടിയോടെ നിർമാണ സ്ഥലത്ത് എത്തിച്ചാണ് സമരം അവസാനിപ്പിച്ചത്. സെപ്റ്റംബറില്‍ പുലിമുട്ടുകളുടെ നിർമാണം കടലിൽ തുടങ്ങുന്നതിനുള്ള കരിങ്കല്ലാണ് ഇപ്പോൾ സ്റ്റോക്ക് ചെയ്യുന്നത്. ഫാ. വി.പി. ജോസഫ് വലിയവീട്ടിൽ, രാജു ആശ്രയം, ആന്‍റണി കുരിശിങ്കൽ, ഷൈനി ജോഷി, ഔസേപ്പച്ചൻ പള്ളിക്കതയ്യിൽ, ജയറാണി ജീവൻ, സൂസൻ തുടങ്ങിയവർ പ്രസംഗിച്ചു.

പാലുത്പാദനത്തിൽ കേരളം സ്വയംപര്യാപ്തമാകുന്നു: മന്ത്രി

ആലപ്പുഴ: കേരളം പാലുത്പാദനത്തിൽ സ്വയംപര്യാപ്തത കൈവരിക്കുക എന്ന ലക്ഷ്യത്തിനടുത്തെത്തിയതായി മന്ത്രി ജെ. ചിഞ്ചുറാണി പറഞ്ഞു. മാവേലിക്കര വള്ളികുന്നം പഞ്ചായത്ത് മൃഗാശുപത്രിയുടെ പുതിയ കെട്ടിടത്തിന്‍റെ ശിലാസ്ഥാപനം നിർവഹിച്ചു സംസാരിക്കുകയായിരുന്നു മന്ത്രി. സംസ്ഥാനത്ത് പാലിന്‍റെ ആഭ്യന്തര ഉത്പാദനം വൻതോതിൽ വർധിച്ചിട്ടുണ്ട്. കൂടുതലാളുകളെ ക്ഷീരമേഖലയിലേക്ക് കൊണ്ടുവരാൻ വിവിധ പദ്ധതികൾ സർക്കാർ നടപ്പിലാക്കുന്നുണ്ട്. കയർ, തോട്ടം, മത്സ്യം എന്നീ മേഖലകളിലെ തൊഴിലാളികൾക്കായി പ്രത്യേക ക്ഷീരവികസന പദ്ധതികൾ സംസ്ഥാനത്തുണ്ടെന്നും മന്ത്രി പറഞ്ഞു. എം.എസ്. അരുൺ കുമാർ എംഎൽഎ അധ്യക്ഷനായി. മന്ത്രി ജെ. ചിഞ്ചുറാണിയുടെ നേതൃത്വത്തിലുള്ള മൃഗസംരക്ഷണ വകുപ്പിന്‍റെ വികസന പദ്ധതികൾ മാവേലിക്കരയിൽ വമ്പിച്ച മാറ്റങ്ങൾ കൊണ്ടുവരുമെന്നും എംഎൽഎ പറഞ്ഞു. ഭരണിക്കാവ് ബ്ലോക്ക് പ്രസിഡന്‍റ് എസ്. രജനി, വള്ളികുന്നം പഞ്ചായത്ത് പ്രസിഡന്‍റ് ഡി. രോഹിണി, വൈസ് പ്രസിഡന്‍റ് എൻ. മോഹൻകുമാർ, ബ്ലോക്ക് പഞ്ചായത്തംഗം കെ.വി. അഭിലാഷ് കുമാർ, പഞ്ചായത്ത് സ്ഥിരം സമിതി അധ്യക്ഷരായ മിനി പ്രഭാകരൻ, ജെ. രവീന്ദ്രനാഥ്, ജില്ലാ മൃഗസംരക്ഷണ ഓഫീസർ ഡോ. പി.വി. അരുണോദയ, പൊതുമരാമത്ത് കെട്ടിട വിഭാഗം അസി. എക്‌സിക്യൂട്ടീവ് എൻജിനിയർ ലക്ഷ്മി എസ്. ചന്ദ്രൻ, പഞ്ചായത്തംഗങ്ങളായ ജി. രാജീവ് കുമാർ, ആർ. രാജി, ഉഷാ പുഷ്‌കരൻ, ബിജി പ്രസാദ്, വിജയലക്ഷ്മി, ശങ്കരൻകുട്ടി നായർ, ബി. രാജലക്ഷ്മി, പി. കോമളൻ, അർച്ചന പ്രകാശ്, ത്രിദീപ് കുമാർ, ഇന്ദു കൃഷ്ണൻ, കെ. ഗോപി, പഞ്ചായത്ത് സെക്രട്ടറി ഇൻചാർജ് കെ. സുരേഷ്, വെറ്ററിനറി സർജൻ ഡോ. വേണുഗോപാൽ എന്നിവർ പ്രസംഗിച്ചു.

ജനറൽ ആശുപത്രിയിലെ പഴയ ബ്ലോക്ക് എംഎൽഎ സന്ദർശിച്ചു

അന്പലപ്പുഴ: ജനറൽ ആശുപത്രിയിലെ പഴയ ബ്ലോക്ക് എച്ച്. സലാം എംഎൽഎയുടെ നേതൃത്വത്തിലുള്ള സംഘം സന്ദർശിച്ചു. ഓർത്തോ, സർജറി വിഭാഗങ്ങളിലാണ് സന്ദർശനം നടത്തിയത്. കോട്ടയം മെഡിക്കൽ കോളജ് ആശുപത്രിയിലെ പഴയ കെട്ടിടത്തിൽ അപകടമുണ്ടായ പശ്ചാത്തലത്തിലായിരുന്നു സന്ദർശനം. ജനറൽ ആശുപത്രിയിലെ പഴയ കെട്ടിടത്തിലെ ഫിറ്റ്നസ് ഇല്ലാത്തതും പ്രവർത്തിപ്പിക്കാത്തതുമായ ഭാഗത്തേക്ക് രോഗികളോ മറ്റുള്ളവരോ എത്തുന്നില്ല എന്ന് ഉറപ്പുവരുത്തണമെന്ന് എച്ച്. സലാം ആർഎംഒ ക്ക് നിർദേശം നൽകി. കിഫ്ബി ഫണ്ട് വകയിരുത്തി 117 കോടി രൂപ ചെലവിൽ നിർമിച്ച ഏഴുനില ഒപി ബ്ലോക്കിൽ രണ്ടു നിലകൾ ഐപി വാർഡുകളാക്കി മാറ്റി പ്രവർത്തിപ്പിച്ചിരുന്നു. പഴയ കെട്ടിടത്തിന്‍റെ ചില ഭാഗങ്ങൾ അൺ ഫിറ്റായ സ്ഥലത്ത് പ്രവർത്തിച്ചിരുന്ന വാർഡുകളാണ് പുതിയ കെട്ടിടത്തിലേക്കു മാറ്റി പ്രവർത്തിപ്പിച്ചിരുന്നത്. ആശുപത്രി പ്രവർത്തനം സംബന്ധിച്ച് അവലോകനം നടത്തുന്നതിന് ചൊവ്വാഴ്ച രാവിലെ നഗരസഭയുടെയും പിഡബ്ല്യുഡി യുടെയും എൻജിനിയർ വിഭാഗങ്ങൾ, നഗരസഭാ, ആശുപത്രി അധികൃതർ എന്നിവരുടെ യോഗം ചേരും. ആശുപത്രി ആർഎംഒ ഡോ. ആശ മോഹൻദാസ്, ഡെപ്യൂട്ടി ഡി എംഒ ഡോ. ദിലീപ്, എആർഎംഒ ഡോ. പ്രിയദർശൻ, ഇൻഫെക്ഷൻ കൺട്രോൾ നഴ്സ് ഇന്ദുലേഖ എന്നിവർ എംഎൽഎക്കൊപ്പമുണ്ടായിരുന്നു.

ചെങ്ങന്നൂരിൽ കാർ തീവച്ച് നശിപ്പിച്ച സംഭവം: പ്രതി റിമാൻഡിൽ

ചെങ്ങന്നൂർ: ചെങ്ങന്നൂരിൽ കാർ തീവച്ച് നശിപ്പിച്ച സംഭവത്തിൽ പ്രതി പിടിയിൽ. മുളക്കുഴ ഇടയനേത്ത് വീട്ടിൽ സലിംകുമാറാണ് (അനൂപ്-37) ചെങ്ങന്നൂർ പോലീസിന്‍റെ പിടിയിലായത്. കഴിഞ്ഞദിവസം രാത്രി 12.30 ഓടെയാണ് ചെങ്ങന്നൂർ റെയിൽവേ സ്റ്റേഷനു പിറകിൽ താമസിക്കുന്ന തിട്ടമേൽ കോണത്തേത്ത് പുല്ലാട്ട് രാജമ്മയുടെ വീട്ടുമുറ്റത്ത് കിടന്ന കാർ തീയിട്ട് നശിപ്പിച്ചത്. രാജമ്മയുടെ വീടുമായുള്ളമുൻ വൈരാഗ്യമാണ് കാരണമെന്ന് പ്രതി പോലീസിനോട് പറഞ്ഞു. വെള്ളിയാഴ്ച രാത്രിയോടെയാണ് മുളക്കുഴയിലെ വീടിനു സമീപത്തുനിന്ന് ഇയാളെ പിടികൂടിയത്. വാഹനം കത്തിക്കാൻ ആവശ്യമായ പെട്രോൾ എവിടെനിന്ന് വാങ്ങിയെന്നും കൈകൾക്കു പൊള്ളലേറ്റ് ആശുപത്രികളിൽ ആരെങ്കിലും ചികിത്സതേടിയിട്ടുണ്ടോയെന്ന് പോലീസ് നടത്തിയ അന്വേഷണത്തിലാണ് ചെങ്ങന്നൂരിലെ ഒരു പെട്രോൾ പമ്പിലെ സിസിടിവി ദൃശ്യങ്ങളിൽനിന്ന് പ്രതിയെ പോലീസ് തിരിച്ചറിഞ്ഞത്. തുടർന്ന് ഇയാളുടെ വീട് കേന്ദ്രീകരിച്ച് അന്വേഷണം നടത്തി വരവേയാണ് ഇയാൾ പിടിയിലായത്. ചെങ്ങന്നൂർ ഡിവൈഎസ്പി എം. ബിനുകുമാറിന്‍റെ നിർദേശത്തെത്തുടർന്ന് സിഐ എസി. വിപിന്‍റെ നേതൃത്വത്തിലാണ് പ്രതിയെ പിടികൂടിയത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.

മുഖ്യമന്ത്രിക്ക് ധാർമികതയുണ്ടോയെന്ന് സിപിഎം പ്രവർത്തകർ ചിന്തിക്കണം: സന്ദീപ് വാര്യർ

കായംകുളം: കേരളത്തിൽ മെഡിക്കൽ കോളജ് കെട്ടിടങ്ങൾ കാലപ്പഴക്കം കൊണ്ട് ദ്രവിച്ച് തകർന്നു വീഴുകയും സാധാരണ മനുഷ്യജീവനുകൾ പൊലിയുകയും ചെയ്യുന്ന സാഹചര്യത്തിൽ കോടികൾ ചെലവഴിച്ച് മുഖ്യമന്ത്രി സകുടുംബം അമേരിക്കയിൽ ചികിത്സയ്ക്കു പോകുന്നതിൽ ധാർമികതയുണ്ടോ എന്ന് സിപിഎം പ്രവർത്തകർ ചിന്തിക്കണമെന്ന് കോൺഗ്രസ് നേതാവ് സന്ദീപ് വാര്യർ. അങ്കണവാടികളിലേക്ക് അനർഹരേയും ജനപ്രതിനിധികളെയും നിയമവിരുദ്ധമായി നിയമിച്ചതിനെതിരേ കോൺഗ്രസ്‌ പുതുപ്പള്ളി മണ്ഡലം കമ്മിറ്റികൾ ദേവികുളങ്ങര പഞ്ചായത്ത്‌ പടിക്കൽ നടത്തിയ ഏക ദിന ഉപവാസസമര സമാപന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. ബിജു ഡേവിഡ് അധ്യക്ഷത വഹിച്ചു. എസ്. രാജേന്ദ്രൻ, ചിരപ്പുറത്ത് മുരളി, അരിത ബാബു, എസ്. ബിന്ദിഷ്, എ. ശുഭദേവ്, ധനേഷ് കൃഷ്ണ, സ്വാമിനാഥൻ ഉണ്ണിത്താൻ, സുശീല വിശ്വംഭൻ, പദ്മകുമാർ കുറുപ്പ്, സന്തോഷ്‌ ചക്കാലത്തറ, ചിന്തു ശാന്തൻ, അഖിൽദേവ്, ലീന രാജു, മിനിമോഹൻ, ബാബു തങ്കൻ ചെറുവള്ളിൽ തുടങ്ങിയവർ പ്രസംഗിച്ചു.

സഹികെട്ട് നാട്ടുകാർ ദേശീയപാതയോരങ്ങൾ വെടിപ്പാക്കി

തുറവൂർ: നാട്ടുകാർ തന്നെയിറങ്ങി ദേശീയപാതയോരങ്ങൾ സഞ്ചാരയോഗ്യമാക്കാൻ. അരുരിലെ യൂത്ത് കോൺഗ്രസ് പ്രവർത്തകരിറങ്ങിയാണ് ദേശീയപാതയോരങ്ങൾ സഞ്ചാരയോഗ്യമാക്കിയത്. ഉയരപ്പാത നിർമാണവുമായി ബന്ധപ്പെട്ടു കാൽനടയാത്രപോലും ദുരിതത്തിലായ അരൂർ നിവാസികൾക്ക് സഹായവുമായാണ് വീണ്ടും യൂത്ത് കോൺഗ്രസ് പ്രവർത്തകർ ഇറങ്ങിയത്. അരൂർ ആശുപത്രി, അരൂർ വില്ലേജ് ഓഫീസ്, സെന്‍റ് അഗസ്ത്യൻസ് ഹൈസ്കൂൾ തുടങ്ങിയ പ്രദേശങ്ങളിലാണ് ദേശീയപാത അധികൃതരുടെ അനുമതിയോടെ അരൂർ മണ്ഡലം യൂത്ത് കോൺഗ്രസ് കമ്മിറ്റി ദേശീയപാതയോരങ്ങൾ വൃത്തിയാക്കി നടപ്പാതകൾ സഞ്ചാര യോഗ്യമാക്കിയത്. കോൺഗ്രസ് നേതാക്കളായ എസ്.എം.അൻസാരി, ജോബി തത്തങ്കേരി, ജോസഫ് എളവന്തറ, നീഫിൻ ജോസഫ് എന്നിവർ നേതൃത്വം നൽകി.

കായംകുളം നഗരസഭയിലേക്ക് കോൺഗ്രസ് മാർച്ച്

കായംകുളം: നഗരസഭയിലെ ശുചിമുറി മാലിന്യ അഴിമതിയിലും അങ്കണവാടി വർക്കർമാരുടെ നിയമനത്തിൽ സ്വജനപക്ഷപാതവും ആരോപിച്ച് കോൺഗ്രസ് കായംകുളം നഗരസഭയിലേക്ക് മാർച്ച് നടത്തി. ഡിസിസി പ്രസിഡന്‍റ് അഡ്വ. ബി. ബാബു പ്രസാദ് മാർച്ച് ഉദ്‌ഘാടനം ചെയ്തു. നഗരസഭയിൽ അഴിമതിയുടെ പരമ്പരസൃഷ്ടിച്ച് ചരിത്രം തിരുത്തിയ നഗരസഭാ ചെയർപേഴ്സൺ ഈ നാടിന് അപമാനമാണെന്നും ചെയർപേഴ്‌സൺ രാജിവയ്ക്കണമെന്നും ബാബുപ്രസാദ്‌ ആവശ്യപ്പെട്ടു. നോർത്ത് ബ്ലോക്ക് കോൺഗ്രസ് പ്രസിഡന്‍റ് ടി. സൈനു ലാബ്ദീൻ അധ്യക്ഷത വഹിച്ചു. കെപിസിസി ജനറൽ സെക്രട്ടറി അഡ്വ. കെ.പി. ശ്രീകുമാർ മുഖ്യപ്രഭാഷണം നടത്തി. ചിറപ്പുറത്ത് മുരളി, ഇ. സമീർ, എൻ. രവി, കറ്റാനം ഷാജി, ബിജു നസറുള്ള, ശോഭാ സുരേന്ദ്രൻ, ഷുക്കൂർ വഴിച്ചേരി, വള്ളിയിൽ റസാക്ക്, യു. മുഹമ്മദ്, എ.ജെ. ഷാജഹാൻ, കെ. പുഷ്പദാസ്, വേലഞ്ചിറ സുകുമാരൻ, ശ്രീജിത്ത് പത്തിയൂർ, എസ്. രാജേന്ദ്രൻ, രാജൻ ചെങ്കിളി, സി. എസ്. ബാഷ, ബിധു രാഘവൻ, അഫ്സൽ പ്ലാമൂട്ടിൽ എന്നിവർ പ്രസംഗിച്ചു.

ജേഴ്സികൾ വിതരണം ചെയ്തു

ആലപ്പുഴ: അടുത്ത സംസ്ഥാനതല മത്സരങ്ങളിൽ പങ്കെടുക്കാനുള്ള ജില്ലാ ടീമുകളെ തെരഞ്ഞെടുക്കുന്ന ബാസ്കറ്റ്ബോൾ ക്യാമ്പിൽ പങ്കെടുക്കുന്നവർക്ക് ആലപ്പി ബാസ്കറ്റ്ബോൾ അസോസിയേഷന്‍റെ (എഡിബിഎ) ആഭിമുഖ്യത്തിൽ ജേഴ്‌സികൾ വിതരണം ചെയ്തു. പട്ടണ ചത്വരത്തിലെ ബാബു ജെ. പുന്നൂരാൻ ബാസ്കറ്റ്ബോൾ സ്റ്റേഡിയത്തിൽ നടത്തിയ സമ്മേളനത്തിൽ മെഡിവിഷൻ മാനേജിംഗ് ഡയറക്ടർ ബിബു ബി. പുന്നൂരാൻ വിതരണോദ്ഘാടനം നിർവഹിച്ചു. പ്രസിഡന്‍റ് റോണി മാത്യു അധ്യക്ഷത വഹിച്ചു. റോട്ടറി ക്ലബ്‌ ഓഫ് ആലപ്പി ഈസ്റ്റിന്‍റെ ഈ വർഷത്തെ പുതിയ പ്രസിഡന്‍റ് ജെ. വെങ്കിടാചലം, സെക്രട്ടറി അനിൽ എസ്. പൈ എന്നിവർ മുഖ്യാതിഥികളായിരുന്നു. സെക്രട്ടറി ജോൺ ജോർജ്, പിആർഒ തോമസ് മത്തായി കരിക്കംപള്ളിൽ, എക്സിക്യൂട്ടീവ് കമ്മിറ്റി അംഗങ്ങളായ ജോസ് സേവ്യർ, ബ്രിജിറ്റ് ജോസഫ്, എം. ബിനു, എസ്. ഷഹബാസ്, ബി. സുഭാഷ് തുടങ്ങിയവർ പങ്കെടുത്തു.

മത്സരഫലം പ്രഖ്യാപിച്ചു

ആലപ്പുഴ: ജില്ലാതല വായനപക്ഷാചരണത്തിന്‍റെ ഭാഗമായി ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പ് ജില്ലാ ഓഫീസിന്‍റെ നേതൃത്വത്തില്‍ സംഘടിപ്പിച്ച ഇഷ്ടപുസ്തകം, ആര്‍ക്കും പറയാം മത്സരത്തിന്‍റെ ഫലം പ്രഖ്യാപിച്ചു. ഏറ്റവും ഇഷ്ടപ്പെട്ട പുസ്തകത്തിലെ പ്രിയപ്പെട്ട ഭാഗം തെരഞ്ഞെടുത്ത് വായിക്കുന്ന ഒന്നരമിനിറ്റില്‍ കവിയാത്ത വീഡിയോ തയാറാക്കാനാണ് മത്സരത്തില്‍ ആവശ്യപ്പെട്ടിരുന്നത്. ഹൈസ് കൂള്‍ വിഭാഗത്തില്‍ ജൂവൽ ടോൾസൺ അമ്പലപ്പുഴ, എ.എം. മാധവ് വളവനാട്, കൃഷ്ണതാര എസ് അശോക് നൂറനാട് എന്നിവര്‍ യഥാക്രമം ഒന്നും രണ്ടും മൂന്നും സ്ഥാനം കരസ്ഥമാക്കി. കുടുംബശ്രീ വനിതകളുടെ വിഭാഗത്തില്‍ ശ്രീകല ദേവയാനം കരിമുളക്കൽ, അരുണിമ ശ്രീനാഥ് മായിത്തറ, രമണി. കെ, മാരാരിക്കുളം തെക്ക് എന്നിവര്‍ യഥാക്രമം ഒന്നു രണ്ടും മൂന്നും സ്ഥാനം കരസ്ഥമാക്കി. വിജയികള്‍ക്കുള്ള സമ്മാനവും സര്‍ട്ടിഫിക്കറ്റുകളും ഏഴിന് ഉച്ചകഴിഞ്ഞ് 3.30 ന് പഴവീട് വിജ്ഞാനപ്രദായിനി ഗ്രന്ഥശാലയില്‍ നടക്കുന്ന വായനപക്ഷാചരണം ജില്ലാതല സമാപനസമ്മേളനത്തില്‍ വിതരണം ചെയ്യും.

യുഡിഎഫിന്‍റേത് കള്ളപ്രചാരണം: ചെയർപേഴ്‌സൺ

കായംകുളം: നഗരസഭ ഭരണവുമായി ബന്ധപ്പെട്ട് കഴിഞ്ഞ ഏതാനും ദിവസങ്ങളായി കോൺഗ്രസും ബിജെപിയും വ്യാജ ആരോപണങ്ങൾ ഉന്നയിച്ച് കള്ളപ്രചാരണം നടത്തിവരികയാണെന്നും ഇത് ജനം തള്ളിക്കളയുമെന്നും നഗരസഭാ ചെയർപേഴ്‌സൺ പി. ശശികല പറഞ്ഞു. ആധുനിക നിലയിലുള്ള മൊബൈൽ മാലിന്യ സംസ്കരണ പ്ലാന്‍റ് പദ്ധതി നഗരസഭ വികസനകാര്യ സ്ഥിരം സമിതിയും നഗരസഭ കൗൺസിൽ യോഗവും ഏകകണ്ഠമായി ചർച്ചചെയ്ത് അംഗീകരിക്കുകയും ചെയ്തിരുന്നു. ഈ രണ്ടു യോഗങ്ങളിലും യുഡിഎഫ്, ബിജെപി പ്രതിനിധികളും പങ്കെടുത്തിരുന്നു. അന്ന് ഒരു എതിർപ്പും ഇവർ പ്രകടിപ്പിച്ചില്ല. ഡിപിസി അംഗീകാരം കിട്ടിയതിനെ തുടർന്ന് ഇ ടെൻഡർ വിളിക്കുകയും കുറഞ്ഞ തുകയ്ക്ക് ക്വട്ടേഷൻ നൽകിയ സ്ഥാപനത്തിന് കരാർ കൊടുക്കുകയും ചെയ്തു. ഈ സ്ഥാപനത്തിന് മാത്രമേ കേന്ദ്ര-സംസ്ഥാന സർക്കാരുകളുടെയും സംസ്ഥാന ശുചിത്വ മിഷന്‍റെയും അംഗീകാരം ലഭിച്ചിട്ടുള്ളൂ- ചെയർപേഴ്‌സൺ പറഞ്ഞു. അങ്കൻവാടി ജീവനക്കാരുടെ നിയമനവുമായി ബന്ധപ്പെട്ട് വ്യാജ ആരോപണമാണ് ഉന്നയിക്കുന്നത്. 2012ലും 2018 ലും ആയി രണ്ട് ഘട്ടമായിട്ടാണ് അങ്കണവാടി നിയമനത്തിനുള്ള അപേക്ഷ സംയോജിത ശിശുവികസന ഡിപ്പാർട്ട്മെന്‍റ് ഓഫീസിൽ ക്ഷണിച്ചത്. ആയിരത്തോളം പേരാണ് അപേക്ഷ സമർപ്പിച്ചത്. 10 ദിവസമായി നടന്ന ഇന്‍റർവ്യൂവിൽ 800 മേൽ ആളുകൾ പങ്കെടുത്തു. ജില്ലാ ശിശുവികസന പദ്ധതി ഓഫീസരുടെ നേതൃത്വത്തിലാണ് ഇന്‍റർവ്യൂ നടത്തിയതും നിയമനം നടത്തിയതെന്നും ചെയർപേഴ്‌സൺ പി. ശശികല പറഞ്ഞു.

വായനപക്ഷാചരണം സമാപനവും ഐ.വി. ദാസ് അനുസ്മരണവും

ആലപ്പുഴ: അമ്പലപ്പുഴ താലൂക്ക് ലൈബ്രറി കൗണ്‍സില്‍ സംഘടിപ്പിക്കുന്ന വായനപക്ഷാചരണത്തിന്‍റെ സമാപനവും ഐവി ദാസ് അനുസ്മരണവും നാളെ വൈകുന്നേരം 3.30ന് പഴവീട് വിജ്ഞാനപ്രദായിനി വായനശാലയില്‍ എച്ച്. സലാം എംഎല്‍എ ഉദ്ഘാടനം ചെയ്യും. താലൂക്ക് ലൈബ്രറി കൗണ്‍സില്‍ പ്രസിഡന്‍റ് കെ.വി. ഉത്തമന്‍ അധ്യക്ഷത വഹിക്കും. പുരോഗമന കലാസാഹിത്യസംഘം ജില്ലാ കമ്മിറ്റി അംഗം സി. കെ. സുധാകരപ്പണിക്കര്‍ ഐ.വി. ദാസ് അനുസ്മരണ പ്രഭാഷണം നടത്തും. ജില്ലാ ലൈബ്രറി കൗണ്‍സില്‍ പ്രസിഡന്‍റ് അലിയാര്‍ എം. മാക്കിയില്‍, വാര്‍ഡ് കൗണ്‍സിലര്‍ ആര്‍. രമേശ്, കെ.കെ. സുലൈമാന്‍, അജയ് സുധീന്ദ്രന്‍, ദീപ്തി അജയകുമാര്‍ എന്നിവര്‍ പങ്കെടുക്കും.

ട്രെയിനപകടത്തിൽ പരിക്കേറ്റു ചികിത്സയിലിരുന്ന ലക്ഷദ്വീപ് സ്വദേശി മരിച്ചു

അമ്പലപ്പുഴ: ട്രെയിനപകടത്തിൽ പരിക്കേറ്റ് ആറുമാസമായി ചികിത്സയിലായിരുന്ന ലക്ഷദ്വീപ് സ്വദേശി അലപ്പുഴ മെഡിക്കൽ കോളജിൽ മരിച്ചു. ലക്ഷദ്വീപ് ചെത്തിലത്ത് ദ്വീപിൽ പടിപ്പുരയിൽ ജമാൽ മുഹമ്മദ് (45) ആണ് ആലപ്പുഴ മെഡിക്കൽ കോളജ് ആശുപത്രിയിൽ മരിച്ചത്. ജോലിസംബന്ധമായ ആവശ്യത്തിനായി ട്രെയിനിൽ കരുനാഗപ്പള്ളി റെയിൽവേ സ്റ്റേഷനിൽ ഇറങ്ങവേ ട്രെയിൻ മുന്നോട്ടെടുത്തപ്പോൾ പ്ലാറ്റ് ഫോമിൽ തലയടിച്ച് വീണ് ഗുരുതരമായി പരിക്കേൽക്കുകയായിരുന്നു. എറണാകുളത്തെ ഒരു കാറ്ററിംഗ് കമ്പനിയിൽ കഴിഞ്ഞ മൂന്നുവർഷമായി ജോലി ചെയ്തുവന്നിരുന്ന ജമാൽ മുഹമ്മദ് ഭാര്യ ബീഫാത്തുമ്മ, മക്കളായ ഫർഹ, റഫ്ഹാൻ എന്നിവരോടൊപ്പം എറണാകുളത്താണ് താമസിച്ചിരുന്നത്. അപകടത്തിൽപ്പെട്ട് ആശുപത്രിയിൽ എത്തിയതു മുതൽ വളഞ്ഞവഴി വാട്സ്ആപ്പ് ഗ്രൂപ്പ് കൂട്ടായ്മ അവർക്കാവശ്യമായ സഹായവുമായി രംഗത്തുണ്ടായിരുന്നു. ലക്ഷദ്വീപിൽനിന്നു ബന്ധുക്കളും എറണാകുളത്തുനിന്നു കാറ്ററിംഗ് കമ്പനി പ്രതിനിധികളും എത്തിയിരുന്നു. നീർക്കുന്നം ഇജാബ മസ്ജിദ് ഖബറിസ്ഥാനിൽ ജമാൽ മുഹമ്മദിന്‍റെ സംസ്കാരം നടത്തി. നൗഷാദ്. എ, റഷീദ് കോലേഴം, ഹംസ കുഴിവേലി, അലി പൂതിയോട്, നജീബ് മാർസ്, ഹാഷിം വണ്ടാനം, സാജിദ അസ്‌ലം, ഹസീന റഷീദ് തുടങ്ങിയവരുടെ ഇടപെടൽ ലക്ഷദ്വീപ് നിവാസികളായ ആ കുടുംബത്തിന് ആശ്വാസമായി.

വില്പന ശാലകളിൽ വിലവിവരപ്പട്ടിക പ്രദർശിപ്പിക്കണം

ആലപ്പുഴ: വില്പനശാലകളിലും കടകളിലും വില വിവരപ്പട്ടിക രേഖപ്പെടുത്തിയിട്ടില്ലെന്നും വില വിവരപ്പട്ടിക രേഖപ്പെടുത്താനുള്ള ബോർഡ് പോലുമില്ലെന്നും സാധനങ്ങളുടെ വില തോന്നുംപടിയാണെന്നും ഗാന്ധിയൻ ദർശനവേദി ചെയർമാൻ ബേബി പാറക്കാടൻ പറഞ്ഞു. ഹോർട്ടി കോർപ്പ് ഉൾപ്പെടെ സർക്കാർ സ്ഥാപനങ്ങളിൽ പോലും പൊതു വിപണിയെക്കാൾ സാധന വില വളരെ കൂടുതലാണെന്നും പൊതു വിപണിയേക്കാൾ വർധിച്ച സാധന വില പിൻവലിക്കാൻ ബന്ധപ്പെട്ടവർ തയാറാവണമെന്നും അദ്ദേഹം പറഞ്ഞു. കൺസ്യൂമർ സംരക്ഷണസമിതിയുടെ സംസ്ഥാന നേതൃത്വ സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. നേതൃത്വ സമ്മേളനത്തിൽ സംസ്ഥാന പ്രസിഡന്‍റ് ഹക്കീം മുഹമ്മദ് രാജ അധ്യക്ഷത വഹിച്ചു. എച്ച്. സുധീർ, എം.ഡി. സലീം, ഡി.ഡി. സുനിൽകുമാർ, ജോസ് പൂണിച്ചിറ, ജലജാ മേനോൻ, എൻ. മിനിമോൾ തുടങ്ങിയവർ പ്രസംഗിച്ചു. ജില്ലാ കളക്ടറെ നേരിൽകണ്ട് നിവേദനം നൽകുന്നതിനും തീരുമാനിച്ചു.

പൊന്നാംവെളിയിൽ അടിപ്പാതയ്ക്ക് ഹൈക്കോടതി ഉത്തരവ്

തുറവൂർ: പൊന്നാംവെളിയിൽ അടിപ്പാതനിർമിക്കണമെന്ന് ഹൈക്കോടതിയുടെ ഉത്തരവ്. ഏറെ തിരക്കുള്ള പൊന്നാംവെളി പ്രദേശത്തെ രണ്ടായി കീറിമുറിച്ചുകൊണ്ടുള്ള അശാസ്ത്രീയമായ ഹൈവേ നിർമാണത്തിൽ പ്രതിഷേധിച്ച് പട്ടണക്കാട് മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ നിരന്തരമായി നടത്തിയ ജനകീയ സമരങ്ങൾക്കാണ് ഫലം കണ്ടിരിക്കുന്നത്. ജനങ്ങളുടെ സഞ്ചാരസ്വാതന്ത്ര്യം സുഗമമാക്കുന്നതിനായി അടിപ്പാത പൊന്നാംവെളിയിൽ നിർമിക്കണമെന്ന ആവശ്യം ഉന്നയിച്ചു കേരള മുഖ്യമന്ത്രി മുതൽ ഹൈവേ മന്ത്രാലയങ്ങൾക്കുവരെ പല നിവേദനങ്ങളും സമർപ്പിച്ചിട്ടും യാതെരു നടപടിയും ഉണ്ടാകാത്തതിനെത്തുടർന്നാണ് പട്ടണക്കാട് മണ്ഡലം കോൺഗ്രസ് കമ്മിറ്റി ഹൈക്കോടതിയെ സമീപിച്ചത്. ജനങ്ങളുടെ ഈ ആവശ്യം മനസിലാക്കിയാണ് പൊന്നാംവെളിയിൽ അടിപ്പാത നിർമിക്കുന്നതിലേക്കായി ഹൈക്കോടതി ഉത്തരവ് നല്കിയിരിക്കുന്നത്.

മന്ത്രി വീണാ ജോര്‍ജിന്‍റെ രാജി ആവശ്യപ്പെട്ട് പ്രതിഷേധ മാര്‍ച്ചും ധര്‍ണയും

എടത്വ: കോട്ടയം മെഡിക്കല്‍ കോളജിലെ കെട്ടിടം ഇടിഞ്ഞുവീണു ബിന്ദു എന്ന വീട്ടമ്മ കൊല്ലപ്പെട്ടതില്‍ ആരോഗ്യമന്ത്രി വീണാ ജോര്‍ജ് രാജിവയ്ക്കണമെന്നാവശ്യപ്പെട്ട് കോണ്‍ഗ്രസ് എടത്വ മണ്ഡലം കമ്മിറ്റിയുടെ നേത്യത്വത്തില്‍ പ്രതിഷേധ മാര്‍ച്ചും ധര്‍ണയും നടത്തി. ഡിസിസി ജനറല്‍ സെക്രട്ടറി പി.കെ. പ്രതാപന്‍ പറവേലി ഉദ്ഘാടനം ചെയ്തു. മണ്ഡലം പ്രസിഡന്‍റ് ആന്‍റണി കണ്ണംകുളം അധ്യക്ഷത വഹിച്ചു. ഡിസിസി വൈസ് പ്രസിഡന്‍റ് സജി ജോസഫ്, ഡിസിസി ജനറല്‍ സെക്രട്ടറി ജെ.റ്റി. റാംസെ, വി.കെ. സേവ്യര്‍, വിശ്വന്‍ വെട്ടത്തില്‍, മറിയാമ്മ ജോര്‍ജ്, ജിന്‍സി ജോളി, ആന്‍സി ബിജോയി, ബിജു വരന്പത്ത്, തങ്കച്ചന്‍ ആശാംപറന്പില്‍, ആനി ഈപ്പന്‍, സ്റ്റാര്‍ലി ജോസഫ്, സോണിച്ചന്‍ തെക്കെടം, ജസ്റ്റിന്‍ മാളിയേക്കല്‍, ജോളി ലുക്കോസ്, തോമസ് കാട്ടുങ്കല്‍, ജോസി മണലേല്‍, തോമസ്‌കുട്ടി മരിയാപുരം, സാജന്‍ തൈശേരി തോമസ് ഈരത്ര തുടങ്ങിയവര്‍ പ്രസംഗിച്ചു.

വെള്ളക്കെട്ട് ഒഴിവാക്കാന്‍ നടപടിയില്ല; നില്‍പ് സമരം 12ന്

എടത്വ: അമ്പലപ്പുഴ-പൊടിയാടി റോഡിലെയും സമീപ പ്രദേശങ്ങളിലെ റോഡുകളിലെയും വെള്ളക്കെട്ട് ഒഴിവാക്കാന്‍ നടപടി സ്വീകരിക്കണമെന്നാവശ്യപ്പെട്ട് എടത്വ വികസനസമിതിയുടെ നേതൃത്വത്തില്‍ പ്രതിഷേധ നില്‍പ് സമരം നടത്തുന്നു. എടത്വ ടൗണ്‍ ഗാന്ധി സ്മൃതിക്കു സമീപം 12ന് രാവിലെ 9ന് പ്രസിഡന്‍റ് ഐസക് എഡ്വേര്‍ഡ് ഉദ്ഘാടനം ചെയ്യും. വൈസ് പ്രസിഡന്‍റ് അഡ്വ. ഐസക് രാജു അധ്യക്ഷത വഹിക്കും. ജനറല്‍ സെക്രട്ടറി ഡോ. ജോണ്‍സണ്‍ വി. ഇടിക്കുള, ട്രഷറര്‍ കുഞ്ഞുമോന്‍ പട്ടത്താനം, കണ്‍വീനര്‍ സാബു മാത്യു കളത്തൂര്‍ എന്നിവര്‍ നേതൃത്വം നല്‍കും. ഈ റോഡിന്‍റെ നിര്‍മാണ കാലയളവില്‍ വെള്ളക്കെട്ട് ഉണ്ടായപ്പോള്‍ അതു പരിഹരിക്കാനുള്ള സംവിധാനം ഉറപ്പുവരുത്താന്‍ അധികൃതര്‍ നടപടി സ്വീകരിക്കണമെന്ന് ആവശ്യപ്പെട്ട് എടത്വ വികസനസമിതിയുടെ നേതൃത്വത്തില്‍ നിവേദനം നല്കിയിരുന്നതാണ്. ജലനിരപ്പ് ചെറിയ രീതിയില്‍ ഉയര്‍ന്നാല്‍ പോലും ഇവിടെ വെള്ളക്കെട്ട് ഉണ്ടായി ഗതാഗതതടസം നേരിടുന്നത് പതിവ് സംഭവമാണ്. ആലപ്പുഴ, പത്തനംതിട്ട ജില്ലകളെ തമ്മില്‍ ബന്ധിപ്പിക്കുന്ന ഈ സംസ്ഥാനപാതയില്‍ ഉണ്ടാവുന്ന വെള്ളക്കെട്ടുമൂലം കെഎസ്ആര്‍ടിസി സര്‍വീസ് മുടങ്ങുന്നത് നിരവധി യാത്രക്കാര്‍ക്ക് ബുദ്ധിമുട്ട് വരുത്തിയിരിക്കുകയാണ്. അത്യാഹിത സമയങ്ങളില്‍ തിരുവല്ലയിലുള്ള പ്രധാന ആശുപ്രതികളില്‍ പോലും എത്താന്‍ പറ്റാത്ത അവസ്ഥയാണ്.

രാമപുരം ക്ഷേത്ര ജംഗ്‌ഷനിൽ ദേശീയപാതയ്ക്ക് മുകളിലൂടെ നടപ്പാലം നിർമിക്കും

കായംകുളം: ദേശീയപാത 66ൽ രാമപുരം ക്ഷേത്ര ജംഗ്ഷനിൽ ദേശീയപാതയ്ക്കു മുകളിലൂടെ നടപ്പാലം നിർമിക്കുന്ന കാര്യം പരിഗണിക്കുമെന്ന് ദേശീയപാത അഥോറിറ്റി ചീഫ് ജനറൽ മാനേജർ അറിയിച്ചതായി യു. പ്രതിഭ എംഎൽഎ പറഞ്ഞു. പത്തിയൂർ പഞ്ചായത്തിൽ ഉൾപ്പെട്ട ഏവൂർ, രാമപുരം തുടങ്ങിയ ക്ഷേത്രങ്ങളിലെ ഉത്സവങ്ങൾക്കും ഏവൂർ പള്ളിയിലെ റാസയ്ക്കും മറ്റും നിരവധി ഭക്തജനങ്ങളാണ് എത്തിച്ചേരുന്നത്. കൂടാതെ വിദ്യാലയങ്ങൾ, സർക്കാർ സ്ഥാപനങ്ങൾ, വിവിധ ആരോഗ്യ കേന്ദ്രങ്ങൾ എന്നിവയും ഈ പ്രദേശത്തിന്‍റെ സമീപത്തായി സ്ഥിതി ചെയ്യുന്നു. ദേശീയപാത നിർമാണം പൂർത്തിയായാൽ ഈ സ്ഥലങ്ങളിലേക്ക് എത്തേണ്ടവർ കിലോമീറ്ററുകൾ സഞ്ചരിച്ച് വേണം ഹൈവേയുടെ മറുവശത്ത് എത്തുവാൻ. ഈ വിഷയം ദേശീയപാത അഥോറിറ്റിയുടെ ശ്രദ്ധയിൽപ്പെടുത്തിയതിനെത്തുടർന്ന് പൊതുജനങ്ങളുടെ ആവശ്യവും പ്രദേശത്തെ സാംസ്കാരികവും മതപരവുമായ പ്രാധാന്യം കണക്കിലെടുത്ത് നിർമാണത്തിനും പ്രവേശനത്തിനും അനുയോജ്യമായ ഭൂമിയുടെ ലഭ്യതയ്ക്ക് വിധേയമായി രാമപുരം ക്ഷേത്ര ജംഗ്ഷനിൽ ഫുട് ഓവർ ബ്രിഡ്ജ് സ്ഥാപിക്കുന്നത് പരിഗണിക്കാം എന്ന് ദേശീയപാത അഥോറിറ്റി ചീഫ് ജനറൽ മാനേജർ രേഖാമൂലം അറിയിച്ചതായി എംഎൽഎ പറഞ്ഞു.

മൂലം ജലോത്സവം: വിളംബര ഘോഷയാത്ര നടത്തി

മങ്കൊമ്പ്: ചമ്പക്കുളം മൂലം ജലോത്സവത്തിന്‍റെ ഭാഗമായി രാജപ്രമുഖൻ ട്രോഫിയും വഹിച്ചുള്ള വിളംബര ഘോഷയാത്ര നടത്തി. കുറിച്ചി പാർഥസാരഥി ക്ഷേത്രത്തിൽ മണിക്കുട്ടൻ തിരുമേനി ഭദ്രദീപം തെളിയിച്ചു. ചങ്ങനാശേരി എംഎൽഎ ജോബ് മൈക്കിൾ ഘോഷയാത്ര ഉദ്ഘാടനം ചെയ്തു. കുട്ടനാട് തഹസിൽദാർ ഷിബു സി. ജോബ് ചടങ്ങിൽ അധ്യക്ഷത വഹിച്ചു. നീലംപേരൂർ, കാവാലം, പുളിങ്കുന്ന്, രാമങ്കരി, വെളിയനാട്, മുട്ടാർ, തലവടി, എടത്വ, തകഴി, അമ്പലപ്പുഴ ക്ഷേത്രം, നെടുമുടി മഠത്തിൽ ക്ഷേത്രം, ചമ്പക്കുളം പടിപ്പുരയ്ക്കൽ ക്ഷേത്രം, ചമ്പക്കുളം കല്ലൂർക്കാട് ബസിലിക്ക, കൈനകരി, മാപ്പിളശേരി തറവാട് എന്നിവിടങ്ങളിൽ സന്ദർശനം നടത്തിയ ഘോഷയാത്ര മങ്കൊമ്പ് ജംഗ്ഷനിൽ സമാപിച്ചു. സമാപനസമ്മേളനം തോമസ് കെ. തോമസ് എംഎൽഎ ഉദ്ഘാടനം ചെയ്തു. ചമ്പക്കുളം പഞ്ചായത്ത് പ്രസിഡന്‍റ് ടി.ജി. ജലജകുമാരി അധ്യക്ഷത വഹിച്ച ചടങ്ങിൽ കല്ലൂർക്കാട് ബസിലിക്ക റെക്ടർ റവ. ഡോ. ജയിംസ് പാലയ്ക്കൽ മുഖ്യാതിഥിയായി. വിവിധ സ്വീകരണ കേന്ദ്രങ്ങളിൽ ബ്ലോക്ക് പഞ്ചായത്ത് പ്രസിഡന്‍റ് ജിൻസി ജോളി, പഞ്ചായത്ത് പ്രസിഡന്‍റുമാരായ ടി.കെ. തങ്കച്ചൻ, ടി.ടി. സത്യദാസ്, നീനു ജോസഫ്, ആർ. രാജുമോൻ, ബിന്ദു ശ്രീകുമാർ, ഗായത്രി ബി. നായർ, ആൻസി ബിജോയ്, എസ്. അജയകുമാർ, മിനി മന്മഥൻ നായർ, എം.സി. പസാദ്, ബ്ലോക്ക് പഞ്ചായത്ത് വൈസ് പ്രസിഡന്‍റ് എം.എസ്. ശ്രീകാന്ത് തുടങ്ങിയവർ പ്രസംഗിച്ചു.

കോൺഗ്രസ് പ്രവർത്തകർ പ്രകടനം നടത്തി

തുറവൂർ: കേരളത്തിലെ ആരോഗ്യമേഖല തകർത്ത ആരോഗ്യമന്ത്രി വീണാ ജോർജ് രാജിവയ്ക്കണമെന്നാവശ്യപ്പെട്ടു കോൺഗ്രസ് മണ്ഡലം കമ്മിറ്റികളുടെ നേതൃത്വത്തിൽ പ്രകടനവും പ്രതിഷേധ സമ്മേളനവും നടത്തി. അരൂർ നോർത്ത്, ഈസ്റ്റ്, കോടംതുരുത്ത് വെസ്റ്റ്, ഈസ്റ്റ്, കുത്തിയതോട്, എഴുപുന്ന, തുറവൂർ വെസ്റ്റ്, ഈസ്റ്റ് മണ്ഡലം കമ്മിറ്റിയുടെ നേതൃത്വത്തിലാണ് പ്രകടനവും പ്രതിഷേധ പ്രതിഷേധ സമ്മേളനവും നടത്തിയത്. മാന്നാർ: ആരോഗ്യ വകുപ്പിന്‍റെ സമ്പൂർണ പരാജയത്തിനു കാരണക്കാരിയായ മന്ത്രി വീണാ ജോർജ് ഉടൻ രാജിവയ്ക്കണമെന്ന് കെപിസിസി മുൻ സെക്രട്ടറി മാന്നാർ അബ്ദുൾ ലത്തീഫ് ആവശ്യപ്പെട്ടു. മാന്നാർ മണ്ഡലം ഈസ്റ്റ്, വെസ്റ്റ് കോൺഗ്രസ് കമ്മിറ്റികൾ മാന്നാർ കമ്യുണിറ്റി ഹെൽത്ത്‌ സെന്‍ററിലേക്കു നടത്തിയ പ്രതിഷേധ സമരം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. മാന്നാർ ഈസ്റ്റ് കോൺഗ്രസ് മണ്ഡലം പ്രസിഡന്‍റ് മധു പുഴയോരം അധ്യക്ഷനായി. മാന്നാർ വെസ്റ്റ് മണ്ഡലം പ്രസിഡന്‍റ് ഹരി കുട്ടമ്പേരൂർ, ഡിസിസി സെക്രട്ടറി തോമസ് ചാക്കോ, കോൺഗ്രസ് മാന്നാർ ബ്ലോക്ക്‌ പ്രസിഡന്‍റ് സുജിത്ത് ശ്രീരംഗം തുടങ്ങിയവർ പ്രസംഗിച്ചു. മങ്കൊമ്പ്: മനുഷ്യത്വമോ മനഃസാക്ഷിയോ അൽപ്പമെങ്കിലും അവശേഷിക്കുന്നുണ്ടെങ്കിൽ ആരോഗ്യ മന്ത്രി അടിയന്തരമായി രാജിവയ്ക്കണമെന്ന് കോൺഗ്രസ് കുട്ടനാട് നോർത്ത് ബ്ലോക്ക് പ്രസിഡന്‍റ് സി.വി. രാജീവ് ആവശ്യപ്പെട്ടു. കോട്ടയം മെഡിക്കൽ കോളജിൽ കെട്ടിടം തകർന്നുവീണു വീട്ടമ്മ മരിച്ച സംഭവത്തിൽ പ്രതിഷേധിച്ചു വെളിയനാട് മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ നടത്തിയ പ്രതിഷേധ പ്രകടനം ഉദ്ഘാടനം ചെയ്യുകയായിരുന്നു അദ്ദേഹം. മണ്ഡലം പ്രസിഡന്‍റ് എ.കെ. കുഞ്ചെറിയ അധ്യക്ഷത വഹിച്ചു.

മന്ത്രി സജി ചെറിയാന്‍റെ കോലം കത്തിച്ചു

അമ്പലപ്പുഴ: കടലാക്രമണത്തിൽ വീടും വസ്തുവകകളും നഷ്ടപ്പെട്ട മത്സ്യത്തൊഴിലാളികളുടെ പ്രതിഷേധത്തെ ചെല്ലാനത്തെ പൊതുയോഗത്തിൽ വെച്ച് താടിവച്ച ഗുണ്ടകൾ എന്ന് ആക്ഷേപിക്കുകയും അപമാനിക്കുകയും ചെയ്ത ഫിഷറീസ് മന്ത്രി സജി ചെറിയാൻ മാപ്പു പറയണമെന്നാവശ്യപ്പെട്ടുകൊണ്ട് മത്സ്യത്തൊഴിലാളി കോൺഗ്രസ്‌ അമ്പലപ്പുഴ ബ്ലോക്ക്‌ കമ്മിറ്റിയുടെ നേതൃത്വത്തിൽ പുന്നപ്രയിൽ മന്ത്രി സജി ചെറിയാന്‍റെ കോലവുമേന്തി പ്രതിഷേധപ്രകടനം നടത്തി മന്ത്രിയുടെ കോലം കത്തിച്ചു. തുടർന്നു നടന്ന പ്രതിഷേധയോഗം മത്സ്യത്തൊഴിലാളി കോൺഗ്രസ്‌ സംസ്ഥാന ജനറൽ സെക്രട്ടറി എ.ആർ. കണ്ണൻ ഉദ്ഘാടനം ചെയ്തു. ബ്ലോക്ക്‌ പ്രസിഡന്‍റ് ഗിരീഷ് വിശ്വംഭരൻ അധ്യക്ഷനായി. മത്സ്യത്തൊഴിലാളി കോൺഗ്രസ് സംസ്ഥാന കമ്മിറ്റി അംഗങ്ങളായ എൻ. ഷിനോയ്, കെ.‌എഫ്. തോബിയാസ്, ഡിസിസി അംഗം പി. ഉദയകുമാർ, കോൺഗ്രസ്‌ മണ്ഡലം പ്രസിഡന്‍റ് പി.വി. ഷാജി തുടങ്ങിയവർ പ്രസംഗിച്ചു.

എസി റോഡുമായി ബന്ധിപ്പിക്കുന്ന ബൈറോഡുകള്‍ ഉയര്‍ത്തണം

എടത്വ: എസി റോഡുമായി ബന്ധിപ്പിക്കുന്ന എല്ലാ ബൈറോഡുകളും ഉയര്‍ത്തണമെന്നും കനാല്‍ അടിയന്തരമായി തുറക്കണമെന്നും കേരള കോണ്‍ഗ്രസ് ആവശ്യപ്പെട്ടു. തുടര്‍ച്ചയായി വെള്ളപ്പൊക്കമുണ്ടായിട്ടും കുട്ടനാട്ടുകാര്‍ക്ക് ഒരു ബൈറോഡില്‍നിന്നു പോലും എസി റോഡിലേക്ക് കയറാന്‍ പറ്റാത്ത അവസ്ഥയാണ് നിലവിലുള്ളത്. മുട്ടാര്‍ സെന്‍ട്രല്‍ റോഡ്, മുട്ടാര്‍ മിത്രക്കരി- മാമ്പുഴക്കരി -ജീമംഗലം റോഡ്, പുളിങ്കുന്ന്-പള്ളിക്കൂട്ടുമ്മ റോഡ് എന്നിവ എസി റോഡുമായി വളരെ താഴ്ന്നുകിടക്കുകയാണ്. മുട്ടാര്‍ സെന്‍ട്രല്‍ റോഡില്‍ സഹൃദയ ജംഗ്ഷന്‍ മുതല്‍ കൈതത്തോടു ജംഗ്ഷന്‍ വരെ ചെറുമഴയത്തും വെള്ളകെട്ട് അനുഭവപ്പെടുന്നു. വാഹനങ്ങള്‍ക്ക് പോകാന്‍ പറ്റാത്ത സാഹചര്യമാണുള്ളത്. ഇതോടെ മുട്ടാര്‍ ജനത ഒറ്റപ്പെട്ടു പോകുന്നതും പതിവാണ്. മുട്ടാര്‍-മിത്രക്കരി-മാമ്പുഴക്കരി-ജീമംഗലം റോഡിന്‍റെ അവസ്ഥയും വ്യത്യസ്ഥമല്ല. ഇപ്പോഴും റോഡിലെ വെള്ളം ഇറങ്ങിയിട്ടില്ല. കറുകയില്‍ ജംഗ്ഷനില്‍ വെള്ളകെട്ടാണ്. ജീമംഗലം കലുങ്ക് നിര്‍മാണോദ്ഘാടനം കഴിഞ്ഞ് നാലുവര്‍ഷം പിന്നിട്ടിട്ടും ഇതുവരെ ഒരു നിര്‍മാണവും നടന്നില്ല. എസി കനാലിനു തെക്കുഭാഗത്തുള്ള മുട്ടാര്‍, മിത്രക്കരി, തലവടി, രാമങ്കരി, കൊടുപ്പുന്ന, ചമ്പക്കുളം പ്രദേശങ്ങളില്‍ വെള്ളം കയറിയാല്‍ വെള്ളം ഒഴികിമാറാത്ത സ്ഥിതിയാണ്. കനാല്‍ അടിയന്തരമായി തുറന്നാല്‍ മാത്രമേ വെള്ളം ഒഴുകിമാറി ജലനിരപ്പ് താഴുകയുള്ളൂ. എന്നാല്‍, അധികൃതര്‍ യാതൊരു നടപടിയും സ്വീകരിക്കുന്നില്ല. എസി റോഡുമായി ബന്ധിപ്പിക്കുന്ന ബൈറോഡുകള്‍ ഉയര്‍ത്തി സ്ഥാപിച്ച് കനാല്‍ അടിയന്തരമായി തുറക്കാനുള്ള നടപടി സര്‍ക്കാര്‍ സ്വീകരിച്ചില്ലെങ്കില്‍ ജനകീയ പ്രതിരോധങ്ങള്‍ സംഘടിപ്പിക്കുന്നതിനും കേരള കോണ്‍ഗ്രസ് തീരുമാനിച്ചു. മുട്ടാര്‍ മണ്ഡലം കമ്മിറ്റിയുടെ നേത്യത്വത്തില്‍ നടന്ന പ്രതിഷേധ യോഗം സംസ്ഥാന ജനറല്‍ സെക്രട്ടറി തോമസുകുട്ടി മാത്യു ചീരംവേലില്‍ ഉദ്ഘാടനം ചെയ്തു. മണ്ഡലം പ്രസിഡന്‍റ് തോമസ് സി. ജോസഫ് ചിറയില്‍പറമ്പില്‍ അധ്യക്ഷത വഹിച്ചു. ഗ്രാമപഞ്ചായത്തംഗങ്ങളായ ഡോളി സക്കറിയ ചീരംവേലില്‍, ബിന്‍സി ഷാബു മുട്ടുംപ്പുറം, ചാച്ചപ്പന്‍ മാവേലി തുരുത്തേല്‍, ജോര്‍ജ് തോമസ് മണലില്‍, മാത്യു എം. വര്‍ഗീസ് മുണ്ടയ്ക്കല്‍, ജോസഫ് മാത്യു ശ്രാമ്പിക്കല്‍, ജേക്കബ് പി. മാത്യു തോട്ടയ്ക്കാട്ടുപുത്തന്‍കളം, എ.ഡി. അലക്‌സാണ്ടര്‍ ആറ്റുപ്പുറം, കുഞ്ഞുമോന്‍ മണലിപ്പറമ്പില്‍, ലൗലേഷ് സി. വിജയന്‍, സേവ്യര്‍കുട്ടി മോളിപ്പടവില്‍, ബാബു പാക്കള്ളി, എം.പി. ആന്‍റണി മുണ്ടയ്ക്കല്‍, മോളിമ്മ സേവ്യര്‍ എന്നിവര്‍ പ്രസംഗിച്ചു.

കുട്ടനാട്ടില്‍ ആശുപത്രി സൗകര്യമൊരുക്കി മാമ്പുഴക്കരി ക്രിസ് സെന്‍റർ

ആലപ്പുഴ: ചങ്ങനാശേരി അതിരൂപതയുടെ കുട്ടനാട് റിസര്‍ച്ച് ആന്‍ഡ് റിവൈവല്‍ ഇനിഷ്യേറ്റീവ് സൊസൈറ്റിയും (ക്രിസ്) ചെത്തിപ്പുഴ ആശുപത്രിയുമായി സഹകരിച്ച് മാമ്പുഴക്കരി ക്രിസ് സെന്‍ററില്‍ കുട്ടനാട്ടിലെ കര്‍ഷകര്‍ക്കായി മഴക്കാല രോഗീപരിചരണത്തിനായി ക്ലിനിക് ആരംഭിച്ചു. ഉദ്ഘാടനം മൂന്നിന് ആർച്ച്ബിഷപ് മാര്‍ ജോസഫ് പെരുന്തോട്ടം നിര്‍വഹിച്ചു. മൂന്നു മാസത്തേക്ക് ഈ ആരോഗ്യ പരിപാലന കേന്ദ്രത്തില്‍ എത്തിച്ചേരുന്ന എല്ലാവര്‍ക്കും കണ്‍സള്‍ട്ടേഷന്‍ ഇനത്തില്‍ യാതൊരുവിധ ഫീസും ഈടാക്കുന്നതല്ല. കണ്‍സള്‍ട്ടേഷന്‍ തികച്ചും സൗജന്യമായിരിക്കും. മരുന്നുകള്‍ക്കുള്ള കുറഞ്ഞ വില മാത്രം നല്‍കിയാല്‍ മതി. രണ്ടു ഡോക്ടര്‍മാരുടെ വിദഗ്ധമായ സേവനവും രാവിലെ 6.30 മുതല്‍ 7 30 വരെ രക്തപരിശോധനാ സംവിധാനങ്ങളും രാവിലെ പത്തു മുതല്‍ വൈകുന്നേരം ആറുവരെ ആശുപത്രി പരിശോധനാ സംവിധാനങ്ങളും ഇവിടെ ആഴ്ചയിലെ ഞായറാഴ്ച ഒഴികെ എല്ലാ ദിവസവും ഉണ്ടായിരിക്കും. യോഗത്തില്‍ ചങ്ങനാശേരി അതിരൂപത വികാരി ജനറാളും ക്രിസ് രക്ഷാധികാരിയുമായ മോണ്‍. മാത്യു ചങ്ങങ്കരി അധ്യക്ഷത വഹിച്ചു. കുട്ടനാട്ടിലെ ജനതയെ സഹായിക്കുന്ന നവംനവമായ പദ്ധതികളുമായി അതിരൂപത ഇനിയും മുന്നോട്ടുവരുമെന്ന് അദേഹം കൂട്ടിച്ചേര്‍ത്തു. ഈ ആശുപത്രിയില്‍ ഓപി സൗകര്യം എല്ലാ ദിവസവും രാവിലെ പത്തു മുതല്‍ ആറുവരെ ഉണ്ടായിരിക്കുന്നതാണ്. രാവിലെ ആറര മുതല്‍ ഏഴര വരെ ബ്ലഡ് കളക്ഷന്‍ സൗകര്യവും ആവശ്യപ്പെടുന്നവര്‍ക്കായി നല്‍കുന്നതാണ്. കൂടുതല്‍ പരിശോധനകള്‍ക്കായി ചെത്തിപ്പുഴ ആശുപത്രിയില്‍ മറ്റു സൗകര്യങ്ങള്‍ ലഭ്യമാണ്. ചെത്തിപ്പുഴ ഹോസ്പിറ്റല്‍ എക്‌സിക്യൂട്ടീവ് ഡയറക്ടര്‍ ഫാ. ജയിംസ് പി. കുന്നത്ത്, ക്രിസ് ഡയറക്ടര്‍ ഫാ. തോമസ് താന്നിയത്ത്, അസിസ്റ്റന്‍റ് ഡയറക്ടര്‍ ഫാ. സോണി പള്ളിച്ചിറയില്‍, സിസ്റ്റര്‍ ഡോ. ഗിഫ്റ്റി ഘടഉജ , ഫാ. ജോഷി മുപ്പത്തില്‍ച്ചിറ, ടോം ജോസഫ് ചമ്പക്കുളം, ഡോ. ജിജി ജേക്കബ്, പോള്‍ മാത്യു എന്നിവര്‍പ്രസംഗിച്ചു.

ആശങ്ക ഒഴിയുന്നില്ല: മഴ കനത്താൽ വീണ്ടും ദുരിതം

മുതുകുളം: കടലേറ്റത്തിനു ശമനമുണ്ടെങ്കിലും ആറാട്ടുപുഴക്കാരുടെ ആശങ്ക ഒഴിയുന്നില്ല. മഴ കൂടുതല്‍ കടുക്കുന്നതോടെ ദുരിതങ്ങള്‍ വീണ്ടും ആവര്‍ത്തിക്കുമെന്ന ഭീതിയിലാണവര്‍. കടലേറ്റ ഭീഷണി ശക്തമായുള്ള പ്രദേശങ്ങളില്‍ പ്രതിരോധ നടപടികള്‍ ഉടന്‍ സ്വീകരിക്കുമെന്ന് ബന്ധപ്പെട്ട അധികാരികള്‍ ഉറപ്പുനല്‍കിയെങ്കിലും നടപടികള്‍ വൈകുകയാണ്. ആറാട്ടുപുഴ തീരത്തെ കടലേറ്റ പ്രതിരോധ പ്രവര്‍ത്തനങ്ങളുമായി ബന്ധപ്പെട്ട് താലൂക്ക് ഓഫീസില്‍ രമേശ് ചെന്നിത്തല എംഎല്‍എയുടെ നേതൃത്വത്തില്‍ യോഗം ചേര്‍ന്നിരുന്നു. ഇറിഗേഷന്‍ സൂപ്രണ്ടിംഗ് എന്‍ജിനിയറുമായും കളക്ടറുമായും എംഎല്‍എ ഫോണില്‍ സംസാരിക്കുകയും ചെയ്തു. എസി പള്ളി, കാര്‍ത്തിക ജംഗ്ഷന്‍, പത്തിശേരി ജംഗ്ഷന്‍, മംഗലം എന്നിവിടങ്ങളിലും പെരുമ്പള്ളിയിലും ജിയോ ബാഗ് സ്ഥാപിക്കുന്നതിന് തുക അനുവദിക്കാന്‍ സൂപ്രണ്ടിംഗ് എന്‍ജിനിയറോട് രമേശ് ചെന്നിത്തല ആവശ്യപ്പെടുകയുമുണ്ടായി. പ്രദേശങ്ങളില്‍ ഉടന്‍തന്നെ ജിയോ ബാഗ് സ്ഥാപിക്കുന്നതിന് നടപടി സ്വീകരിക്കുമെന്ന് കളക്ടറും അറിയിച്ചിരുന്നതാണ്. എസി പള്ളി ജംഗ്ഷന്‍ മുതല്‍ എംഇഎസ് ജംഗ്ഷന്‍ വരെയും പടിഞ്ഞാറെ ജുമാ മസ്ജിദിന്‍റെ വടക്കുഭാഗം മുതല്‍ കാര്‍ത്തിക ജംഗ്ഷന്‍ വരെയും പത്തിശേരി ജംഗ്ഷന്‍ മുതല്‍ മംഗലം വരെയുമുള്ള പ്രദേശങ്ങളിലും അടുത്തിടെയുണ്ടായ കടലേറ്റം വലിയ നാശമാണ് വിതച്ചത്. വലിയഴീക്കല്‍ അഴീക്കോടന്‍ നഗറിനു തെക്ക്, പെരുമ്പള്ളി, കള്ളിക്കാട്, മീശമുക്ക് ഭാഗങ്ങളിലും കടലേറ്റമുണ്ടായി. നൂറിലധികം വീടുകളിലും കച്ചവടസ്ഥാപനങ്ങളിലും വെള്ളം കയറിയിരുന്നു. പെരുമ്പള്ളിയിലെ ജിയോബാഗ് മണല്‍ഭിത്തി തകര്‍ന്നതോടെ വലിയഴീക്കല്‍-തൃക്കുന്നപ്പുഴ തീരദേശ റോഡ് അപകടഭീഷണിയിലാണ്. റോഡിലാണ് തിരമാല പതിക്കുന്നത്. ഇവിടെ അടിയന്തര നടപടി കൈക്കൊണ്ടില്ലെങ്കില്‍ അടുത്ത കടലേറ്റത്തില്‍ റോഡ് പൂര്‍ണമായും തകരും. എസി പള്ളി ജംഗ്ഷന്‍റെ വടക്കുഭാഗത്ത് കടല്‍ഭിത്തി ദുര്‍ബലമായതിനാല്‍ റോഡിലേക്കാണ് തിരമാലകള്‍ അടിച്ചുകയറുന്നത്. ഇതുമൂലം ഇവിടെ റോഡില്‍ മണല്‍ കയറി അടിക്കടി ഗതാഗതതടസമുണ്ടാകുന്നു.

ചെങ്ങന്നൂരിൽ കാർ കത്തിച്ച സംഭവം: സിസിടിവി ദൃശ്യങ്ങൾ നിർണായകം

ചെങ്ങന്നൂർ: ചെങ്ങന്നൂർ റെയിൽവേ സ്റ്റേഷനു പിന്നിൽ കോതാലിൽ പുല്ലാട്ട് രാജമ്മയുടെ വീട്ടുമുറ്റത്ത് നിർത്തിയിട്ടിരുന്ന കാർ കത്തിച്ച സംഭവത്തിൽ സിസിടിവി ദൃശ്യങ്ങൾ കേന്ദ്രീകരിച്ച് അന്വേഷണം ഊർജിതമാക്കിയതായി ചെങ്ങന്നൂർ സിഐ എ.സി. വിപിൻ അറിയിച്ചു. ദൃശ്യങ്ങളിൽ കണ്ട അജ്ഞാത വ്യക്തിക്കുവേണ്ടി തെരച്ചിൽ തുടരുകയാണ്. വ്യാഴാഴ്ച രാത്രി 12:30നാണ് സംഭവം. അജ്ഞാതനായ ഒരാൾ പെട്രോൾ ഒഴിച്ച് കാറിന് തീയിടുകയായിരുന്നു. പൂർണമായും കത്തിനശിച്ച കാർ രാജമ്മയുടെ വിദേശത്തുള്ള മകൾ കവിതയുടെ ഉടമസ്ഥതയിലുള്ളതാണ്. സ്ഫോടന ശബ്ദം കേട്ട് വീട്ടുകാർ ഉണരുമ്പോൾ കാർ പൂർണമായി കത്തി. അയൽവാസികളും ഓടിക്കൂടി. തീ ജനാലയിലൂടെ വീടിനുള്ളിലേക്ക് പടർന്നിരുന്നു. കട്ടിൽ, മെത്ത, ദിവാൻകോട്ട് ഉൾപ്പെടെയുള്ള വീട്ടുപകരണങ്ങൾ കത്തിനശിച്ചു. വിവരമറിഞ്ഞ ഉടൻതന്നെ ഫയർഫോഴ്സ് സ്ഥലത്തെത്തി തീയണച്ചതിനാൽ വലിയൊരു ദുരന്തം ഒഴിവായി. സംഭവസമയത്ത് രാജമ്മയെക്കൂടാതെ നാലു വയസുകാരി അർഷിത, ലേഖ, മിഥുൻ മോഹൻ, നിഥിൻ മോഹൻ എന്നിവരും വീട്ടിലുണ്ടായിരുന്നു. വിവരമറിഞ്ഞ് കൗൺസിലർ സിനി ബിജുവും പോലീസും സംഭവസ്ഥലത്തെത്തി സ്ഥിതിഗതികൾ വിലയിരുത്തി.

മുക്കുപണ്ടം പണയംവച്ച് ഒന്നരക്കോടി തട്ടിയ കേസിൽ മൂന്നുപേർ കൂടി അറസ്റ്റിൽ

അന്പലപ്പുഴ: സ്വകാര്യ പണമിടപാട് സ്ഥാപനത്തിൽ മുക്കുപണ്ടം പണയംവച്ച് ഒന്നരക്കോടിയിൽപ്പരം രൂപ തട്ടിപ്പു നടത്തിയ കേസിൽ മൂന്നു പ്രതികൾ കൂടി അറസ്റ്റിൽ. പുന്നപ്ര തെക്ക് പഞ്ചായത്ത് എട്ടാം വാർഡ് കുറവൻതോടിനു സമീപം പുത്തൻപറമ്പ് വീട്ടിൽ എ. അഖിൽ (32), ചെട്ടികുളങ്ങര പഞ്ചായത്ത് കൈതവളപ്പ് കരയിൽ ചെട്ടികുളങ്ങര ക്ഷേത്രത്തിന്‍റെ പടിഞ്ഞാറെ നടയ്ക്കു സമീപം ദേവീകൃപയിൽ എസ്. ശ്രീകുമാർ (33), എറണാകുളം കുന്നത്തുനാട് വെങ്ങോല പഞ്ചായത്ത് രണ്ടാം വാർഡിൽ കോഞ്ഞാശേരി മുക്കുറ്റിപ്പറമ്പിൽ പരീതുകുഞ്ഞ് (51) എന്നിവരെയാണ് ക്രൈംബ്രാഞ്ച് അറസ്റ്റ് ചെയ്തത്. അറസ്റ്റിലായ അഖിലും ശ്രീകുമാറും ഇതേ ബാങ്കിലെ ജീവനക്കാരാണ്. 2024 ജൂലൈ 16 മുതൽ നവംബർ 18 വരെയുള്ള നാലുമാസ കാലയളവിലായിരുന്നു തട്ടിപ്പു നടന്നത്. പുതുതായി സ്ഥാനമേറ്റ മാനേജർ നടത്തിയ സ്റ്റോക്ക് പരിശോധനയിൽ ഒരേ മേൽവിലാസത്തിൽ നിരവധി തവണ സ്വർണം പണയംവച്ചതായി കണ്ടെത്തി. തുടർന്നുണ്ടായ സംശയത്തിൽ നടത്തിയ അന്വേഷണത്തിലാണ് 1,52,78,505 രൂപയുടെ തട്ടിപ്പു പുറത്തുവന്നത്. ആദ്യം അമ്പലപ്പുഴ പോലീസ് അന്വേഷിച്ച കേസ് പിന്നീട് ക്രൈംബ്രാഞ്ച് ഏറ്റെടുക്കുകയായിരുന്നു. കേസിലെ മറ്റു പ്രതികളായ പുന്നപ്ര തെക്ക് പഞ്ചായത്ത് എട്ടാം വാർഡ് കല്ലൂപ്പാറയിൽ ജെ. സുഹാസ്(33), ആലപ്പുഴ അവലൂക്കുന്ന് വെളിയിൽ വി. എസ്. അജിത്ത് (30) എന്നിവരുടെ അറസ്റ്റ് കഴിഞ്ഞ ദിവസം രേഖപ്പെടുത്തിയിരുന്നു. റിമാൻഡിലായ പ്രതികളെ കസ്റ്റഡിയിൽ വാങ്ങി കൂടുതൽ അന്വേഷണം നടത്തുമെന്ന് ക്രൈംബ്രാഞ്ച് ഡിവൈഎസ്പി :എസ്. ന്യൂമാൻ പറഞ്ഞു.

കായംകുളം കെഎസ്ആർടിസി ബസ് സ്റ്റേഷൻ നിർമാണം: പ്രാരംഭപ്രവർത്തനങ്ങൾ ആരംഭിച്ചു

കായംകുളം: പത്തു കോടി രൂപ വിനിയോഗിച്ച് നിർമിക്കുന്ന കായംകുളം കെഎസ് ആർടിസി ബസ് സ്റ്റേഷന്‍റെ പ്രാരംഭ നിർമാണ പ്രവർത്തനങ്ങൾ ആരംഭിച്ചു. നിർമാണത്തിനു മുന്നോടിയായുള്ള മണ്ണു പരിശോധന ഇന്നലെ ആരംഭിച്ചു. ഇനിയും പൊളിച്ചുമാറ്റേണ്ടതായുള്ള കാന്‍റീൻ കെട്ടിടം ഉൾപ്പടെ പൊളിച്ചു മാറ്റുന്നതിനായുള്ള നടപടികൾ സ്വീകരിച്ചതായി യു. പ്രതിഭ എംഎൽഎ പറഞ്ഞു. പൊതുമരാമത്ത് വകുപ്പിനാണ് പുതിയ കെട്ടിടത്തിന്‍റെ നിർമാണച്ചുമതല. 19,584 ചതുരശ്ര അടി വിസ്തീർണത്തിൽ രണ്ടു നിലകളായാണ് കെട്ടിടം നിർമിക്കുന്നത്. ഒന്നാം നിലയിൽ സ്റ്റേഷൻമാസ്റ്ററുടെ ഓഫീസ്, അന്വേഷണ കൗണ്ടർ, റിസർവേഷൻ കൗണ്ടർ, സെക്യൂരിറ്റികൾക്കുള്ള മുറികൾ, സ്ത്രീകൾക്കായുള്ള വെയിറ്റിംഗ് ഏരിയ, മെഡിക്കൽ റൂം, സ്ത്രീകൾ, പുരുഷന്മാർ, അംഗപരിമിതർ എന്നിവർക്കായി പ്രത്യേകം ശുചിമുറികൾ എന്നിവയാണ് ഉൾപ്പെടുത്തിയിട്ടുള്ളത്. ശീതീകരിച്ച ഫാമിലി വെയ്റ്റിംഗ് മുറി , സ്ത്രീകൾക്കും പുരുഷന്മാർക്കുമുള്ള താമസസൗകര്യങ്ങൾ, ശുചിമുറികൾ, ട്രാൻഫോർട്ട് ഓഫീസർ, ഡിപ്പോഎൻജിനിയർ എന്നിവരുടെ ഓഫീസ്, കെഎസ്ആർടിസി ഓഫീസുകൾ, ടിക്കറ്റ്, വെയിറ്റിംഗ് ഏരിയ ഉൾപ്പെടെ ടിക്കറ്റ് കാഷ് കൗണ്ടറുകൾ, കോഫിബാർ എന്നിവയാണ് ഒന്നാം നിലയിൽ ഉൾപ്പെടുത്തിയിട്ടുള്ളത്. കൂടാതെ ലിഫ്റ്റ് സൗകര്യവും സീവേജ് ട്രീറ്റ്മെന്‍റ് പ്ലാന്‍റും പദ്ധതിയിലുണ്ട്. 2023 -2024 സംസ്ഥാന ബജറ്റിൽ ഉൾപ്പെടുത്തിയാണ് പത്തു കോടി രൂപ അനുവദിച്ചിട്ടുള്ളത്.

പാടശേഖരത്തിന് കൽക്കെട്ടില്ല, നടക്കാൻ വഴിയുമില്ല

ആലപ്പുഴ: പാടശേഖരത്തിന് കൽക്കെട്ടില്ല, നടക്കാൻ വഴിയുമില്ല. ഒരു പ്രദേശത്തെ നാട്ടുകാരും കർഷകരും ദുരിതത്തിൽ. കരുമാടി മഠത്തിൽ വടക്കുവശം പാടശേഖരത്തിനു സമീപത്തുള്ള നാട്ടുകാരാണ് യാത്രാദുരിതത്തിൽ വലയുന്നത്. അമ്പലപ്പുഴ തെക്ക്, തകഴി പഞ്ചായത്തുകളുടെ അതിർത്തി പങ്കിടുന്ന ഈ പ്രദേശത്തെ പഞ്ചായത്ത് അവഗണിക്കുകയാണെന്നാണ് നാട്ടുകാരുടെയും കർഷകരുടെയും പരാതി. അമ്പലപ്പുഴ തെക്ക് പഞ്ചായത്ത് അഞ്ച്, തകഴി പഞ്ചായത്ത് ഒന്ന് എന്നീ വാർഡുകളുടെ അതിർത്തിയാണ് ഈ പ്രദേശം. രണ്ട് കൃഷിയുള്ള 200 ഏക്കറുള്ള ഈ പാടശേഖരത്തുനിന്ന് കൊയ്തെടുക്കുന്ന നെല്ല് തലച്ചുമടു വഴിയാണ് കർഷകർ റോഡിലെത്തിക്കുന്നത്. രണ്ടു മീറ്റർ വീതി പോലുമില്ലാത്ത ഈ വഴി നിറയെ കുഴികളും വെള്ളക്കെട്ടുമാണ്. വർഷങ്ങൾക്കു മുൻപ് സമീപത്തെ വിവാഹച്ചടങ്ങിനായി ചില വീട്ടുകാർ സ്വന്തം ചെലവിൽ ഈ വഴിയിൽ ക്വാറി വേസ്റ്റ് ഇട്ടതോടെയാണ് വഴി അൽപ്പമെങ്കിലും യാത്രായോഗ്യമായത്. ഇപ്പോൾ സിമന്‍റ് ചാക്കിൽ മണ്ണു നിറച്ചാണ് ഇതിലൂടെ യാത്ര ചെയ്യുന്നത്. സ്കൂൾ കുട്ടികളും നാട്ടുകാരും കുണ്ടും കുഴിയും നിറഞ്ഞ ഈ വഴിയിലൂടെയാണ് സ്ഥിരമായി യാത്ര ചെയ്യുന്നത്. അധികൃതരുടെ ഉദാസീനതയാണ് തങ്ങളുടെ ഈ ദുരിതത്തിന് കാരണമെന്ന് നാട്ടുകാർ പറയുന്നു. ഇത്രയും വലിയ പാടശേഖരമായിട്ടും ഇതുവരെ പാടശേഖരത്തിന് കൽക്കെട്ടും നിർമിച്ചിട്ടില്ല. ഇതിനായി വർഷങ്ങളായി കയറിയിറങ്ങാത്ത പടികളില്ലെന്ന് പാടശേഖര സമിതി ഭാരവാഹികൾ പറയുന്നു. ഈ ആവശ്യമുന്നയിച്ച് പലതവണ പഞ്ചായത്തിൽ ഉൾപ്പെടെ കത്തു നൽകിയിരുന്നുവെന്നും ഇവർ പറയുന്നു. ഈ വഴിയിൽ ഇഴജന്തുക്കളുടെ ശല്യം മൂലം ഭീതിയോടെയാണ് നാട്ടുകാർ യാത്ര ചെയ്യുന്നത്. തങ്ങളുടെ യാത്രാദുരിതത്തിന് എന്നു പരിഹാരമുണ്ടാകുമെന്നാണ് നാട്ടുകാർ ചോദിക്കുന്നത്. മഠത്തിൽ വടക്കുവശം പാലത്തിന് പടിഞ്ഞാറ് വശം 2 വർഷം മുൻപ് നിർമിച്ച കൽക്കെട്ട് ഇപ്പോൾ തകർന്നുകിടക്കുകയാണ്.

ഇഴഞ്ഞിഴഞ്ഞ് തൃക്കുന്നപ്പുഴ പാലം നിര്‍മാണം

തൃക്കുന്നപ്പുഴ: 2018ല്‍ തുടങ്ങിയ തൃക്കുന്നപ്പുഴ പാലം നിര്‍മാണത്തില്‍ ഏഴു വര്‍ഷം പിന്നിട്ടിട്ടും ഒരു പുരോഗതിയും ഇല്ലെന്ന് ജനകീയ കൂട്ടായ്മ ആരോപിച്ചു. ഓഗസ്റ്റില്‍ നിര്‍മാണം പൂര്‍ത്തിയാക്കി പാലം തുറന്നുകൊടുക്കുമെന്നാണ് കളക്ടറുടെ യോഗത്തില്‍ കഴിഞ്ഞ മാസം ഉറപ്പുനല്‍കിയത്. എന്നാല്‍, യോഗത്തിനു ശേഷം ഒരു ജോലിയും നടന്നില്ല. ആദ്യം കോടതിയില്‍ കൊടുത്ത ഉറപ്പ് ഈ വര്‍ഷം ഒക്ടോബറിൽ പാലം തുറന്നുകൊടുക്കുമെന്നായിരുന്നു. കോണ്‍ട്രാക്ടറുടെ മെല്ലെപ്പോക്ക് കാരണം രമേശ് ചെന്നിത്തല എംഎല്‍എ മുന്‍കൈയെടുത്ത് മന്ത്രി റോഷി അഗസ്റ്റിന്‍റെ ഓഫീസില്‍ വിളിച്ച യോഗത്തില്‍ ജൂണ്‍ 30ന് പാലം ഗതാഗതത്തിന് തുറന്നുകൊടുക്കുമെന്ന് ഉറപ്പുനല്‍കിയിരുന്നു. അത് നടക്കാതെ വന്നപ്പോള്‍ സിപിഎമ്മിന്‍റെ നേതൃത്വത്തില്‍ മാവേലിക്കര അസി. എക്‌സിക്യൂട്ടീവ് എന്‍ജിനിയറുടെ ഓഫീസ് പിക്കറ്റ് ചെയ്യുകയും തുടര്‍ന്ന് കളക്ടര്‍ വിളിച്ചുചേര്‍ത്ത യോഗത്തില്‍ ഓഗസ്റ്റ് 31ന് ഗതാഗതത്തിനു തുറന്നുകൊടുക്കുമെന്നു പറയുകയും ചെയ്തിരുന്നു. പൈലിംഗ് തീര്‍ന്നെങ്കിലും പാലം വാര്‍ക്കുന്നത് അനിശ്ചിതമായി നീളുകയാണ്. പാലത്തിന്‍റെ ഗര്‍ഡര്‍ വാര്‍ക്കുന്നത് ഇവിടെത്തന്നെയാണ്. ഇത് കാലതാമസം ഉണ്ടാക്കുന്നു. പഴയ പാലത്തില്‍നിന്ന് മൂന്നര മീറ്റര്‍ ഉയരത്തിലാണ് പുതിയ പാലം വരുന്നത്. ഈ ഉയരത്തില്‍നിന്ന് താഴേക്കുള്ള അപ്രോച്ച് റോഡിന്‍റെ ഡിസൈന്‍ ഇതുവരെ മേജര്‍ ഇറിഗേഷന്‍ നല്‍കിയിട്ടില്ലെന്നാണ് കോണ്‍ട്രാക്ടറുടെ വാദം. പാലം വാര്‍ക്കുന്നതിനോടൊപ്പം വശങ്ങളിലെ മരങ്ങളും പോസ്റ്റുകളും മാറ്റി സംരക്ഷണഭിത്തി കെട്ടിയാല്‍ മാത്രമേ ഓഗസ്റ്റില്‍ പണി തീര്‍ക്കാന്‍ കഴിയുകയുള്ളൂ. കോണ്‍ട്രാക്ടറുടെ മെല്ലെപ്പോക്കിനും മേജര്‍ ഇറിഗേഷന്‍ ഉദ്യോഗസ്ഥരുടെ അനാസ്ഥയ്ക്കും എതിരേ പ്രക്ഷോഭം ആരംഭിക്കുമെന്നും വിഷയം മുഖ്യമന്ത്രിയുടെ ശ്രദ്ധയിപ്പെടുത്തുമെന്നും ജനകീയ കൂട്ടായ്മ ഭാരവാഹികള്‍ അറിയിച്ചു.

നിയന്ത്രണം വിട്ട ബൈക്ക് പാഞ്ഞുകയറി കുട്ടിയുൾപ്പെടെ നാലു പേർക്കു പരിക്ക്

മുതുകുളം: നിയന്ത്രണംവിട്ട ബൈക്ക് റോഡരികിലേക്കു പാഞ്ഞുകയറി അമ്മയും രണ്ടു വയസുകാരനായ മകനും ഉൾപ്പെടെ നാലു പേർക്കു പരിക്ക്. മുതുകുളം ഹൈസ്‌കൂൾ ജംഗ്‌ഷനിൽ കഴിഞ്ഞ ദിവസം വൈകിട്ട് നാലരയോടെയാണ് അപകടമുണ്ടായത്. മുതുകുളം, കണ്ണമ്പള്ളി ഭാഗത്ത് താമസിക്കുന്ന ആതിര (28), മകൻ ആദവ് (രണ്ട്) ബൈക്ക് യാത്രികരായ രണ്ടു യുവാക്കൾ എന്നിവർക്കാണ് പരിക്കേറ്റത്. റോഡരികിൽ സ്കൂൾബസ് കാത്തുനിന്ന അമ്മയ്ക്കും മകനും ഇടയിലേക്ക് അമിതവേഗതയിലെത്തിയ പൾസർ ബൈക്ക് നിയന്ത്രണംവിട്ട് ഇടിച്ചുകയറുകയായിരുന്നു. ഇടിയുടെ ആഘാതത്തിൽ തെറിച്ചുവീണ ആതിരയുടെ തലയ്ക്കും കൈകൾക്കും കാലിനും സാരമായ പരിക്കേറ്റിട്ടുണ്ട്. കുഞ്ഞ് ആദവിന്‍റെ തലയ്ക്കാണ് പരിക്ക്. നാട്ടുകാർ ഉടൻതന്നെ ഇരുവരെയും കായംകുളം താലൂക്ക് ആശുപത്രിയിൽ പ്രവേശിപ്പിച്ചു.

കാടും പോളയും പായലും നിറഞ്ഞ് നാമ്പുകുളം

കറ്റാനം: നാമ്പുകുളം പാമ്പുകുളമായി മാറുന്നുവെന്ന് പരാതി. ഏറെ പ്രതീക്ഷയോടെ ജനങ്ങള്‍ കാത്തിരുന്ന നീന്തല്‍ കുളമാണ് ഇപ്പോള്‍ കാടും പോളയും പായലും നിറഞ്ഞ് ഇഴജന്തുക്കളുടെ ആവാസ കേന്ദ്രമായി മാറിയിരിക്കുന്നത്. മഴക്കാലപൂര്‍വ ശുചീകരണത്തിന്‍റെ ഭാഗമായി കുളം വൃത്തിയാക്കാന്‍ അധികൃതര്‍ക്ക് കഴിഞ്ഞിട്ടില്ല. പ്രതിദിനം കുളത്തില്‍ മാലിന്യങ്ങളും കുപ്പികളും നിക്ഷേപിക്കുന്നതിനെതിരേ നടപടിയുമില്ല. ജില്ലാ സ്‌കൂള്‍ അത്‌ലറ്റിക് വേദിയാക്കാനായി തെരഞ്ഞെടുത്ത കുളമാണ് അനാഥമായിപ്പോയത്. എംഎല്‍എ ഫണ്ടില്‍നിന്ന് അനുവദിച്ച 24 ലക്ഷം രൂപയ്ക്ക് 2014 ഏപ്രില്‍ 15നാണ് വാട്ടര്‍ സ്റ്റേഡിയത്തിന്‍റെ നിര്‍മാണം ആരംഭിച്ചത്. മണ്ണുമാന്തി ഉപയോഗിച്ച് വര്‍ഷങ്ങള്‍ പഴക്കമുള്ള പാര്‍ശ്വഭിത്തികള്‍ പൊളിച്ചുമാറ്റി പുതിയത് നിര്‍മിക്കാനാരംഭിച്ചെങ്കിലും കരാറുകാരന്‍ പാതിവഴിയില്‍ ഉപേക്ഷിച്ചുപോയി. എന്നാല്‍, തുടര്‍ന്ന് ഇതിനൊരു പരിഹാരം കാണാന്‍ കഴിയാതെ പോയത് അധികൃതരുടെ അനാസ്ഥയാണെന്ന് നാട്ടുകാര്‍ ആരോപിക്കുന്നു. കുളത്തിന്‍റെ തിട്ടകളും വശത്തുകൂടി കട്ടച്ചിറ ഭാഗത്തേക്ക് പോകുന്ന റോഡിന്‍റെ വശങ്ങളും ഇടിഞ്ഞുകൊണ്ടിരിക്കുകയാണ്. അപരിചിതര്‍ക്ക് അപകടം സംഭവിക്കാനുള്ള സാധ്യത ഏറെയാണ്. ഒട്ടേറെ പേര്‍ ഈ കുളത്തില്‍ വീഴുകയും ഒരാള്‍ മരണപ്പെടുകയും ചെയ്തിട്ടുണ്ട്. നാട്ടിലെ ജനങ്ങളെല്ലാം ഒരു കാലത്ത് കുളിക്കാനും അലക്കാനുമെല്ലാം ഈ കുളത്തിനെയാണ് ആശ്രയിച്ചിരുന്നത്. ഇവിടെനിന്നും നീന്തല്‍ പഠിച്ച അനേകം പേര്‍ നാട്ടിലുണ്ട്. മാവേലിക്കര താലൂക്കിലെ 50 മീറ്റര്‍ നീളമുള്ള ഏക കുളമാണ് ഇത്. അതുകൊണ്ടാണ് നീന്തല്‍ മത്സരങ്ങള്‍ നടത്താനായി തെരഞ്ഞെടുത്തത്. 25 വര്‍ഷത്തിലേറെയായി ഉപജില്ലാ സ്‌കൂള്‍ അത്‌ലറ്റിക് മത്സരങ്ങള്‍ ഇവിടെയാണ് നടന്നിരുന്നത്. തുടര്‍ന്നാണ് വാട്ടര്‍ സ്റ്റേഡിയം നിര്‍മിക്കാന്‍ തീരുമാനിച്ചത്. കുളത്തിന്‍റെ ആഴം കൂട്ടുകയും പില്ലറുകളും കമ്പികളും മറ്റും കുളത്തിലാക്കുകയും ചെയ്തതിനാല്‍ നാട്ടുകാര്‍ക്കും പിന്നീട് ഈ കുളം ഉപയോഗിക്കാന്‍ പറ്റാത്ത അവസ്ഥയായി. ഒരു നാടിന്‍റെ ജലസ്രോതസാസാകണം എന്നാവശ്യപ്പെട്ട് പഞ്ചായത്തിനും ജില്ലാ പഞ്ചായത്തിനും ബ്ലോക്ക് പഞ്ചായത്തിനും എംഎല്‍എക്കും നിവേദനം നല്‍കുമെന്ന് ഇന്ദിരാ സാംസ്‌കാരിക സമിതി പ്രസിഡന്‍റ് ടി.ടി. സജീവന്‍ അറിയിച്ചു.

കോൺക്രീറ്റ് അടർന്നുവീണിട്ടും രോഗികളെ കിടത്തിച്ചികിത്സിക്കുന്നു

ആലപ്പുഴ: കോട്ടയം മെഡിക്കൽ കോളജ് ആശുപത്രിയിലെ പഴയ കെട്ടിടം തകർന്നുവീണ് സ്ത്രീ മരിച്ച സംഭവം വിവാദമായിരിക്കേ, ആലപ്പുഴ ജനറൽ ആശുപത്രിയിലെ കെട്ടിടത്തിന്‍റെ ബലക്ഷയത്തിലും ആശങ്ക. കെട്ടിടത്തിന്‍റെ കോൺക്രീറ്റ് പലതവണ അടർന്നുവീണിട്ടും ഇപ്പോഴും രോഗികളെ ഇവിടെ കിടത്തിച്ചികിത്സിക്കുകയാണ്. സർജറി, മെഡിസിൻ ‍(പുരുഷ വിഭാഗം), മെഡിസിൻ ഐസിയു, ഡയാലിസിസ് യൂണിറ്റ്, സിടി സ്കാൻ തുടങ്ങിയവയാണ് ബലക്ഷയമുള്ള കട്ടിടത്തിൽ പ്രവർത്തിക്കുന്നത്. കോട്ടയം ദുരന്തത്തിന്‍റെ പശ്ചാത്തലത്തിൽ ഈ വിഭാഗങ്ങളും ഈ കെട്ടിടത്തിൽനിന്നു മാറ്റണമെന്നാണ് ആവശ്യം. രണ്ടുവർഷം മുൻപാണ് ജനറൽ ആശുപത്രിയിലെ മേൽക്കൂരയുടെ കോൺക്രീറ്റ് അടർന്നുവീണു തുടങ്ങിയത്. ഇത് ആവർത്തിച്ചതോടെ പൊതുമരാമത്ത് അധികൃതർ പരിശോധിച്ച് ഫിറ്റ്നസില്ലെന്ന് കണ്ടെത്തിയിരുന്നതാണെന്ന് ആരോഗ്യമേഖലയിലുള്ളവർ പറയുന്നു. എന്നാൽ, കോൺക്രീറ്റ് അടർന്ന ഭാഗത്തുനിന്ന് മറ്റിടങ്ങളിലേക്കു രോഗികളെ മാറ്റിക്കിടത്തുകയായിരുന്നു. അവിടെയും കോൺക്രീറ്റ് അടർന്നുവീണതോടെ പിന്നെയും മാറ്റിക്കിടത്തി. ഈ രീതിയാണ് തുടരുന്നത്. ഇതിൽ ഡോക്ടർമാർക്കടക്കം എതിർപ്പുണ്ട്. ജനറൽ ആശുപത്രിക്ക് 150 കോടിയോളം രൂപ മുടക്കി കിഫ്ബിയിൽ ഒപി സമുച്ചയം പണിതിരുന്നു. ഇതേ മാതൃകയിൽ ഐപി സമുച്ചയം പണിയണമെന്ന് രണ്ടു വർഷം മുൻപേ ആവശ്യമുയർന്നതാണ്. എന്നാൽ, അടുത്തിടെ ഏറെ പ്രതിഷേധങ്ങൾക്കൊടുവിൽ മാത്രമാണ് അതു പരിഗണിച്ചത്. ഏഴുകോടി രൂപയുടെ കെട്ടിടം നിർമിക്കാനുള്ള ടെൻഡറായിട്ടുണ്ടെന്നാണ് പറയുന്നത്. പഴയ ഒപി കെട്ടിടം പൊളിച്ചുനീക്കിയാണ് കെട്ടിടം നിർമിക്കുന്നത്. ഇവിടേക്ക് പുതിയ ഒപി സമുച്ചയത്തിലെ ഒപി മാറ്റി അവിടെ കിടത്തിച്ചികിത്സയ്ക്കായി നീക്കിവയ് ക്കാനാണ് ആലോചിക്കുന്നത്. പുതിയ കെട്ടിടം ടെൻഡർ നടപടികഴിഞ്ഞ് പൂർത്തിയാകണമെങ്കിൽ രണ്ടുവർഷമെങ്കിലും വേണ്ടിവരും. അത്രയും നാൾ രോഗികൾ ഇടിഞ്ഞുവീഴാറായ കെട്ടിടത്തിൽ കഴിയേണ്ട അവസ്ഥയാണ്. ‌ആലപ്പുഴ മെഡിക്കൽ കോളജ് ആശുപത്രി വണ്ടാനത്തേക്കു മാറ്റിയപ്പോൾ ഒഴിവുവന്ന കെട്ടിടമാണ് ജനറൽ ആശുപത്രി കിടത്തിച്ചികിത്സയ്ക്കായി ഉപയോഗിക്കുന്നത്. ഇതിന് 62 വർഷത്തോളം പഴക്കമുണ്ട്. മഴ ശക്തമാകുന്നതോടെ കോൺക്രീറ്റ് ഇനിയും വീഴാനിടയുണ്ട്.

കണ്ടെയ്നറുകളിൽ ഉടക്കി ഉപകരണങ്ങൾ നശിക്കുന്നു

കായംകുളം: കടലിൽ താഴ്ന്നുകിടക്കുന്ന കണ്ടെയ്നറുകളുടെ ഭീഷണി ഒഴിവാകാത്തത് മത്സ്യത്തൊഴിലാളികളെ തീരാദുരിതത്തിലാക്കുന്നു. കണ്ടെയ്നറുകളിൽ ഉടക്കി മത്സ്യബന്ധന ഉപകരണങ്ങൾ നശിക്കുന്ന സംഭവം ആവർത്തിക്കുമ്പോഴും പ്രശ്നപരിഹാരത്തിന് യാതൊരു നടപടിയും ഉണ്ടാകുന്നില്ല. കഴിഞ്ഞദിവസം കായംകുളം ഹാർബറിൽനിന്നു മത്സ്യബന്ധനത്തിനു പോയ വലിയഴീക്കൽ കുന്നുംപുറത്ത് വിഷ്ണുവിന്‍റെ ശ്രീ മുരുകൻ എന്ന വള്ളത്തിന് കണ്ടെയ്നറിൽ വല ഉടക്കി കീറിയതിനെത്തുടർന്ന് ലക്ഷങ്ങളുടെ നഷ്ടമുണ്ടായി, സുരക്ഷിതമെന്ന് കരുതിയ സ്ഥലത്ത് മത്സ്യബന്ധനം നടത്തിയിട്ടും ആവർത്തിക്കുന്ന ഇത്തരം അപകടങ്ങൾ മത്സ്യത്തൊഴിലാളികളിൽ ആശങ്ക വർധിപ്പിക്കുന്നു. കപ്പൽ അപകടത്തെത്തുടർന്ന് കടലിൽ വീണ കണ്ടെയ്നറുകൾ വലകൾക്ക് ഉടക്കായി, ലക്ഷങ്ങളുടെ നഷ്ടം സൃഷ്ടിക്കുകയാണ്. കഴിഞ്ഞ ഒരാഴ്ചയ്ക്കുള്ളിൽ നിരവധി വള്ളങ്ങൾക്ക് ലക്ഷങ്ങളുടെ നഷ്ടമാണ് ഉണ്ടായത്. ആറാട്ടുപുഴ മംഗലത്ത് സുരേഷിന്‍റെ ഉടമസ്ഥതയിലുള്ള മംഗലത്ത് മഹാദേവൻ വള്ളത്തിനും ലക്ഷക്കണക്കിന് രൂപയുടെ വല നഷ്ടപ്പെട്ടു. കായലിൽ അൻഷാദിന്‍റെ ഉടമസ്ഥതയിലുള്ള മിന്നൽ കൊടിവള്ളത്തിനും വലിയഴീക്കലുള്ള ശിവധാര വള്ളത്തിനും ലക്ഷങ്ങൾ വിലവരുന്ന വലയും നഷ്ടമായി. കണ്ടെയ്നറുകളുടെ കൃത്യമായ സ്ഥാനം അജ്ഞാതമായതിനാൽ സുരക്ഷിത മത്സ്യബന്ധനം ഭീതിയോടെ മാത്രമേ സാധ്യമാകൂ. സീസൺ കാലത്തെ വരുമാനം നഷ്ടപ്പെടുന്നത് തൊഴിലാളികളെ സാമ്പത്തിക പ്രതിസന്ധിയിലേക്കു തള്ളിവിടുന്നു. പ്രശ്നപരിഹാരത്തിന് അധികാരികൾ നടപടിയെടുക്കാത്തതിനെതിരേ മത്സ്യത്തൊഴിലാളികളുടെ പ്രതിഷേധം ശക്തമാകുകയാണ്.

സാംസണ്‍ ജേക്കബ് പ്രസിഡന്‍റ്, മെജോ ഫ്രാന്‍സിസ് സെക്രട്ടറി

ചേര്‍ത്തല: റോട്ടറി ക്ലബ് ഓഫ് ചേര്‍ത്തലയുടെ പുതിയ പ്രവര്‍ത്തനവര്‍ഷത്തെ ഭാരവാഹികളുടെ സ്ഥാനാരോഹണം ആറിനു വൈകിട്ട് റോട്ടറി ഹാളില്‍ നടക്കും. സാംസണ്‍ ജേക്കബ് പ്രസിഡന്‍റും മെജോ ഫ്രാന്‍സിസ് സെക്രട്ടറിയും അജീഷ്‌ ഗോപിനാഥ് ട്രഷററുമായുള്ള ഭരണസമിതിയാണ് ചുമതലയേല്‍ക്കുന്നത്. സ്ത്രീ ശക്തീകരണത്തിനു പ്രാധാന്യം നല്‍കിയുള്ള സാമൂഹിക സേവന പദ്ധതികളാണ് പുതിയ വര്‍ഷത്തില്‍ ക്ലബ് ഏറ്റെടുക്കുന്നതെന്ന് പ്രസിഡന്‍റ് സാംസണ്‍ ജേക്കബ്, സെക്രട്ടറി മെജോ ഫ്രാന്‍സിസ്, ട്രഷറര്‍ അജീഷ്‌ ഗോപിനാഥ്, പദ്ധതികള്‍ക്കു നേതൃത്വം നല്‍കുന്ന ഡോ. കെ. ഷൈലമ്മ, ഡോ. ബിജു മല്ലാരി, ശിവന്‍കുട്ടി നായര്‍ എന്നിവര്‍ പത്രസമ്മേളനത്തില്‍ അറിയിച്ചു. സ്ത്രീകള്‍ക്കായി ഓപ്പോള്‍ എന്ന പേരില്‍ വിവിധ പദ്ധതികളാണ് നടപ്പാക്കുന്നത്. കാന്‍സര്‍ രോഗനിര്‍ണയത്തിനായി മാമോഗ്രാം യൂണിറ്റുകളടക്കം സ്ഥാപിക്കാന്‍ പിന്‍കത്തോണ്‍ പദ്ധതി നടപ്പാക്കും. ഡോ. ചിത്രതാര ഗംഗാധരനാണ് ഇതിന്‍റെ ബ്രാന്‍ഡ് അംബാസഡറായി പ്രവര്‍ത്തിക്കുന്നത്. തൊഴിലില്ലായ്മക്കു പരിഹാരം കാണാന്‍ മെഗാ തൊഴില്‍മേളയും നിര്‍ധനരായവര്‍ക്കു വീടു നിര്‍മിച്ചു നല്‍കുന്ന ഉദയകിരണ്‍ പദ്ധതിയും നടപ്പാക്കുന്നുണ്ട്. ചുമതലയേല്‍ക്കല്‍ സമ്മേളനത്തില്‍ ഡോ.വി.പി. ഗംഗാധരന്‍ മുഖ്യാതിഥിയായി ഉദയകിരണ്‍ പദ്ധതി ഉദ്ഘാടനം ചെയ്യും. പുതിയ വര്‍ഷത്തെ സേവന പ്രവര്‍ത്തനങ്ങള്‍ റോട്ടറി ഡിസ്ട്രിക്ട് ഗവര്‍ണര്‍ ഡോ. ടീന ആന്‍റണി ഉദ്ഘാടനം ചെയ്യും.

തിരുവാതിര ഞാറ്റുവേല ചന്തയും കര്‍ഷക സഭയും

ചെങ്ങന്നൂര്‍: നഗരസഭ കൃഷിഭവന്‍റെ നേതൃത്വത്തില്‍ തിരുവാതിര ഞാറ്റുവേല ചന്തയും കര്‍ഷക സഭയും ഐക്കാട് പാലത്തിനു സമീപമുള്ള ഇടനാട് - പുത്തന്‍കാവ് കര്‍ഷക വെള്ളിയാഴ്ച വിപണിയില്‍ നടന്നു. നഗരസഭാ വൈസ് ചെയര്‍മാന്‍ കെ. ഷിബുരാജന്‍ ഉദ്ഘാടനം ചെയ്തു. വികസനകാര്യ സ്റ്റാൻഡിംഗ് കമ്മിറ്റി ചെയര്‍പേഴ്‌സണ്‍ മിനി സജന്‍ അധ്യക്ഷയായി. ക്ഷേമകാര്യ സ്റ്റാൻഡിംഗ് കമ്മിറ്റി ചെയര്‍മാന്‍ റിജോ ജോണ്‍ ജോര്‍ജ്, മുന്‍ വൈസ് ചെയര്‍മാന്‍ മനീഷ് കീഴാമഠത്തില്‍, കൃഷി അസിസ്റ്റന്‍റ് ഡയറക്ടര്‍ സൂസന്‍ തോമസ്, നഗരസഭ കൃഷി അസിസ്റ്റന്‍റ് ആര്‍. അനില്‍കുമാര്‍, മുന്‍ കൗണ്‍സിലറും വിപണിയുടെ പ്രസിഡന്‍റുമായ ജോസ് കെ. ജോര്‍ജ്, ട്രഷറര്‍ വിനു വി. ജോണ്‍, ഫാ. ഷിബു വര്‍ഗീസ് എന്നിവര്‍ പ്രസംഗിച്ചു. ഇതോടനുബന്ധിച്ചു പച്ചക്കറിവിത്തുകള്‍, തെങ്ങിന്‍തൈകള്‍, കുരുമുളകുതൈകള്‍ എന്നിവ സൗജന്യമായി വിതരണം ചെയ്തു.

നാളികേര ഉത്പന്നങ്ങളുടെ വില കുതിക്കുന്നു; തെങ്ങിൽ കയറാൻ ആളില്ല

പൂച്ചാക്കൽ: നാളികേരത്തിനും നാളികേര ഉത്പന്നങ്ങൾക്കും വില വാനോളം ഉയർന്നിട്ടും തെങ്ങിൽ കയറാൻ ആളില്ലാത്ത അവസ്ഥയാണ്. ഒരു തെങ്ങിൽ കയറുന്നതിന് 50 രൂപ മുതൽ 80 വരെയാണ് കൂലി. എന്നിരുന്നാലും കയറ്റക്കാരെ കിട്ടാനില്ല. ചേർത്തല താലൂക്കിലെ വടക്കൻ മേഖലകളായ തൈക്കാട്ടുശേരി, പാണാവള്ളി, അരൂക്കുറ്റി, പെരുമ്പളം മേഖലകളിൽ 184 തൊഴിലാളികൾ ഉണ്ടായിരുന്നിടത്ത് 13 തൊഴിലാളികൾ മാത്രമാണ് ഇപ്പോൾ ഉള്ളത്. പരമ്പരാഗത തെങ്ങുകയറ്റ തൊഴിലാളികൾ ഈ തൊഴിലിനോട് വിമുഖത കാണിക്കുന്നതും പുതിയ തലമുറ ഈ രംഗത്തേക്ക് വരാൻ മടിക്കുന്നതും തൊഴിലാളി പ്രതിസന്ധിക്കു കാരണമാകുന്നത്. തെങ്ങുകയറുന്നതിന് യന്ത്രം വന്നതോടെ സ്ത്രീകൾ ഉൾപ്പെടെ ധാരാളം ആളുകൾ ഈ രംഗത്തേക്കു കടന്നുവന്നിരുന്നു. എന്നാൽ, ജോലിയുടെ ആയാസം മനസിലാക്കിയതോടെ പലരും രംഗം വിട്ടു. കല്ലൻമുള കൊണ്ടുള്ള ഗോവണിയാണ് തെങ്ങുകയറ്റത്തിനു പരമ്പരാഗത തൊഴിലാളികൾ ഉപയോഗിച്ചിരുന്നത്. നേരത്തെ ഒരു ദിവസം അൻപതു മുതൽ എൺപതുതെങ്ങു വരെ കയറാൻ സാധിച്ചിരുന്നു എന്ന് പരമ്പരാഗത തെങ്ങുകയറ്റ തൊഴിലാളിയായ തൈക്കാട്ടുശേരി പഞ്ചായത്ത് തറേപ്പറമ്പിൽ സുബാഷ് പറയുന്നു. വെളിച്ചെണ്ണ വില കുതിക്കുന്നു ചരിത്രത്തിലാദ്യമായി വെളിച്ചെണ്ണ വില 400 രൂപയ്ക്ക് മുകളിലായി. ഹോൽസെയിൽ വില ലിറ്ററിന് 395 രൂപയും ചില്ലറ വിൽപ്പനശാലയിൽ 400 ആണ് ഇപ്പോഴത്തെ വില. തേങ്ങയ്ക്ക് വില കൂടിയതും തേങ്ങയുടെ ക്ഷാമവും വില വർധനവിന് കാരണമായിട്ടുണ്ട്. കേരളത്തിൽ തേങ്ങയുടെ ഉത്പാദനം കുറഞ്ഞതും തമിഴ്നാട്ടിൽനിന്നു തേങ്ങയുടെ വരവ് കുറഞ്ഞതും വില വർധനവിന് മറ്റൊരു കാരണമാണ്. ചിരട്ടയാണ് താരം ചിരട്ടയ്ക്ക് ഇപ്പോൾ പൊന്നുംവിലയാണ്. ഒരു കിലോ ചിരട്ടയ്ക്ക് 40 രൂപയാണ് വില. ചില്ലറ വിൽപ്പനക്കാരിൽ നിന്നു മൊത്ത വിൽപ്പനക്കാർ 38 നും 40നും ആണ് ചിരട്ട സംഭരിക്കുന്നത്. ഒരു മാസം ശരാശരി 6 ലോറി ചിരട്ട വരെ കയറ്റിപ്പോകുന്നുണ്ട്. തമിഴ്നാട്, പാലക്കാട് എന്നീ സ്ഥലങ്ങളിൽനിന്ന് എത്തുന്നവരാണ് ചിരട്ട കൂടുതലും കൊണ്ടുപോകുന്നത്. തമിഴ്നാട്ടിലെ ചിരട്ടക്കരി ഉത്പാദിപ്പിക്കുന്ന കമ്പനികളിലേ ക്കും സൗന്ദര്യവർധന വസ്തു ക്കളുടെ ഉത്പാദനങ്ങൾക്കുമാണ് ചിരട്ട സംഭരിക്കുന്നത്.

ഓൺലൈൻ തട്ടിപ്പിലൂടെ 25.5 ലക്ഷം തട്ടിയ സംഘത്തിലെ ഒരാൾകൂടി അറസ്റ്റിൽ

ആലപ്പുഴ: ഓൺലൈൻ ബൈഡിംഗ് (ലേലം) തട്ടിപ്പിലൂടെ തലവടി സ്വദേശിയായ മെഡിക്കൽ റെപ്രസെന്‍റേറ്റീവിൽനിന്നു പണം തട്ടിയ കേസിൽ മൂന്നാമത്തെയാളും അറസ്റ്റിലായി. മലപ്പുറം പാണ്ടിക്കാട് സ്വദേശിയാണ് ആലപ്പുഴ സൈബർ ക്രൈം പോലീസിന്‍റെ പിടിയിലായത്. പരാതിക്കാരനിൽനിന്നു തന്‍റെ ബാങ്ക് അക്കൗണ്ടിലേക്ക് വാങ്ങിയ പണം ചെക്ക് വഴിയും എടിഎം മുഖേനയും പിൻവലിച്ച മലപ്പുറം ഏറനാട് പാണ്ടിക്കാട് പഞ്ചായത്ത് വാർഡ് -17ൽ ചെമ്പൻ ഹൗസിൽ ദഹീൻ (21) ആണ് പിടിയിലായത്. കേസിൽ മലപ്പുറം പെരിന്തൽമണ്ണ സ്വദേശിയെയും തൃശൂർ കുന്നംകുളം സ്വദേശിയെയും നേരത്തെ അറസ്റ്റ് ചെയ്തിരുന്നു. സ്വകാര്യ ബിൽഡിംഗിന്‍റെ കമ്പനിയുടെ പ്രതിനിധിയായി ആൾമാറാട്ടം നടത്തി ടെലിഗ്രാം, വാട്‌സാപ്പ് എന്നിവ വഴി ബന്ധപ്പെട്ടാണ് പ്രതികൾ തട്ടിപ്പു നടത്തിയത്. 2025 മേയ് മുതൽ ലാവണ്യ എന്ന പേരിലുള്ള ടെലിഗ്രാം അക്കൗണ്ടിൽനിന്നു ബന്ധപ്പെട്ട് പരാതിക്കാരനെ ഓൺലൈൻ ബൈഡിംഗ് നടത്തി ലാഭമുണ്ടാക്കാമെന്നു വിശ്വസിപ്പിച്ച് വ്യാജ വെബ്സൈറ്റിന്‍റെ ലിങ്ക് അയച്ചുകൊടുക്കുകയും പരാതിക്കാരനെക്കൊണ്ട് അക്കൗണ്ട് ക്രിയേറ്റ് ചെയ്യിപ്പിക്കുകയും ചെയ്ത ശേഷം തട്ടിപ്പുകാർ വിവിധ ബാങ്ക് അക്കൗണ്ടുകളിലേക്ക് പണം അയച്ചുവാങ്ങുകയായിരുന്നു. അയച്ച പണം വ്യാജ വെബ് സൈറ്റിൽ ലാഭം സഹിതം പ്രദർശിപ്പിച്ചു വിശ്വസിപ്പിച്ചാണ് തട്ടിപ്പു തുടർന്നത്. വെബ്‌സൈറ്റിൽ കാണിച്ചിരുന്ന ലാഭം പിൻവലിക്കാൻ ശ്രമിച്ചപ്പോൾ ക്രെഡിറ്റ് സ്കോർ കുറവാണെന്നും ഇത് കൂട്ടുന്നതിനുവേണ്ടി വീണ്ടും ബൈഡിംഗ് ചെയ്യണമെന്നും പ്രതികൾ ആവശ്യപ്പെട്ടപ്പോഴാണ് പരാതിക്കാരന് ഇത് തട്ടിപ്പാണെന്ന് ബോധ്യമായത്. ആലപ്പുഴ സൈബർ ക്രൈം പോലീസ് സ്റ്റേഷനിലും നാഷണൽ സൈബർ ക്രൈം റിപ്പോർട്ടിംഗ് പോർട്ടലിന്‍റെ 1930 എന്ന ടോൾഫ്രീ നമ്പറിലും പരാതിപ്പെട്ടതോടെ അക്കൗണ്ടുകൾ മരവിപ്പിക്കാനും പ്രതികളെ പിടികൂടാനും കഴിഞ്ഞു. പരാതിക്കാരന് നഷ്‌ടമായ തുകയിൽ 3.8 ലക്ഷം രൂപ അറസ്റ്റിലായ പ്രതി ദഹീന്‍റെ പേരിലുള്ള ബാങ്ക് അക്കൗണ്ടിലേക്ക് വാങ്ങിയ ശേഷം ഈ തുക എടിഎം വഴിയും ചെക്ക് ഉപയോഗിച്ചും പിൻവലിച്ച് മലപ്പുറം പാണ്ടിക്കാട് ട്രാവൽ ഏജൻസി നടത്തുന്ന സുഹൃത്തിന് കൈമാറിയതായി പ്രതി പോലീസിനോട് പറഞ്ഞു. ഇയാളെക്കുറിച്ച് പോലീസ് കൂടുതൽ അന്വേഷണം നടത്തിവരികയാണ്. ആലപ്പുഴ സൈബർ ക്രൈം പോലീസ് സ്റ്റേഷൻ ഹൗസ് ഓഫീസർ ഏലിയാസ് പി. ജോർജിന്‍റെ നേതൃത്വത്തിലുള്ള അന്വേഷണസംഘം മൂന്നുദിവസം മുമ്പ് പ്രതിയെ അന്വേഷിച്ച് മലപ്പുറം പാണ്ടിക്കാട് എത്തിയെങ്കിലും പ്രതി ബംഗളൂരുവിൽ ഒളിവിൽ താമസിക്കുന്നതായാണ് വിവരം ലഭിച്ചത്. തുടർന്ന് ആലപ്പുഴ സൈബർ ക്രൈം പോലീസ് സ്റ്റേഷൻ സബ് ഇൻസ്‌പെക്ടർ എസ്.വി. ഷൈജുലാലിന്‍റെ നേതൃത്വത്തിൽ പോലീസ് പ്രതിയെ നിരീക്ഷിച്ചു വരികയും ഇയാൾ വീട്ടിലെത്തിയ ദിവസം പാണ്ടിക്കാട് പോലീസിന്‍റെ സഹായത്തോടെ പിടികൂടുകയുമായിരുന്നു. പ്രതിയെ ആലപ്പുഴ ചീഫ് ജുഡീഷൽ മജിസ്‌ട്രേറ്റ് മുമ്പാകെ ഹാജരാക്കി. ഛത്തീസ്ഗഡ് തെലിബന്ധ പോലീസ് സ്റ്റേഷനിലും ഇയാൾക്കെതിരേ പരാതി നിലവിലുണ്ടെന്ന് പോലീസ് പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]