ADVERTISEMENT

ADVERTISEMENT

കൂടുതല്‍ കേസുകള്‍ തീര്‍പ്പാക്കിയതിനുള്ള പുരസ്‌കാരം ആലപ്പുഴയ്ക്ക്

ആലപ്പുഴ: സംസ്ഥാന നിയമ സേവന അഥോറിറ്റി 2022ല്‍ നടത്തിയ നാഷണല്‍ ലോക് അദാലത്തുകളില്‍ സംസ്ഥാന തലത്തില്‍ ഏറ്റവും കൂടുതല്‍ കേസുകള്‍ തീര്‍പ്പാക്കിയതിനുള്ള പുരസ്‌കാരം ആലപ്പുഴ ജില്ലാ നിയമസേവന അഥോറിറ്റിക്ക് ലഭിച്ചു.
സംസ്ഥാന നിയമ സേവന അഥോറിറ്റിയുടെ വാര്‍ഷിക സമ്മേളനത്തില്‍ ജില്ലാ ജഡ്ജിയും ജില്ലാ ലീഗല്‍ സര്‍വീസസ് അഥോറിറ്റി ചെയര്‍മാനുമായ ജോബിന്‍ സെബാസ്റ്റ്യന്‍, ജില്ലാ നിയമ സേവന അഥോറിറ്റി സെക്രട്ടറിയും സബ് ജഡ്ജുമായ എം.ടി. ജലജാറാണി എന്നിവര്‍ സംസ്ഥാന നിയമ സേവന അഥോറിറ്റി എക്‌സിക്യൂട്ടീവ് ചെയര്‍മാനായ ഹൈക്കോടതി ജഡ്ജി വിനോദ് ചന്ദ്രനില്‍ നിന്നും പുരസ്‌കാരം ഏറ്റുവാങ്ങി.

ADVERTISEMENT

ക്ഷേമ സ്ഥാപങ്ങളില്‍നിന്ന് വിജയികളായ കുട്ടികളുടെ തുടര്‍ പഠനം സര്‍ക്കാര്‍ ഏറ്റെടുക്കണം: ഫാ. ലിജോ ചിറ്റിലപ്പള്ളി

ആലപ്പുഴ: ജില്ലയിലെ കുട്ടികളുടെ ക്ഷേമസ്ഥാപനങ്ങളില്‍ കഴിഞ്ഞ പൊതു പരീക്ഷയില്‍ വിജയികളായ മുഴുവന്‍ കുട്ടികളുടെയും തുടര്‍ പഠനച്ചെലവ് സര്‍ക്കാര്‍ ഏറ്റെടുക്കണമെന്ന് ഓര്‍ഫനേജ് അസോസിയേഷന്‍ സംസ്ഥാന പ്രസിഡന്‍റ് ഫാ. ലിജോ ചിറ്റിലപ്പള്ളി ആവശ്യപ്പെട്ടു. ജില്ലാ ഓര്‍ഫനേജ് അസോസിയേഷന്‍റെ നേതൃത്വത്തില്‍ ജില്ലയിലെ കുട്ടികളുടെ ക്ഷേമ സ്ഥാപനങ്ങളില്‍നിന്ന് എസ്എസ്എല്‍സി, പ്ലസ് ടു വിജയികളായ കുട്ടികളെ അനുമോദിക്കുന്ന ചടങ്ങ് ഉദ്ഘാടനം ചെയ്യുകയായിരുന്നു അദ്ദേഹം. വിവിധ സെന്‍ററുകളില്‍നന്ന് അമ്പതോളം വിദ്യാര്‍ഥികൾ പങ്കെടുത്തു. വിദ്യാര്‍ഥികള്‍ക്ക് കാഷ് അവാര്‍ഡും മെമന്‍റോയും സമ്മാനിച്ചു. അസോസിയേഷന്‍ ജില്ലാ പ്രസിഡന്‍റ് ഫാ. മൈക്കിള്‍ കുന്നേല്‍ അധ്യക്ഷത വഹിച്ചു. ജനറല്‍ സെക്രട്ടറി മുഹമ്മദ് ഷമീര്‍ ഗാന്ധിഭവന്‍, വൈസ് പ്രസിഡന്‍റുമാരായ ഫാ. സാനു ജോര്‍ജ്, സിസ്റ്റര്‍ അനുപമ, ജോയിന്‍റ് സെക്രട്ടറിമാരായ ബിനോയി തങ്കച്ചന്‍, സിസ്റ്റര്‍ മോളി, ജോണിക്കുട്ടി തുരുത്തേല്‍, ജി. രവീന്ദ്രന്‍പിള്ള, നിധിന്‍ എ.എസ്., എ.കെ. ഗോപിക്കുട്ടന്‍, ട്രഷറര്‍ മധു പോള്‍ എന്നിവര്‍ പ്രസംഗിച്ചു.

റോഡരികിൽ മാലിന്യം തള്ളൽ; കാടിറങ്ങി കാട്ടുപന്നികള്‍

ചാരുംമൂട്: കെപി റോഡിന്‍റെ വശങ്ങള്‍ കാട്ടുപന്നികളുടെ വാസസ്ഥലമായി മാറുന്നു. കായംകുളം-പുനലൂര്‍ റോഡിന്‍റെ വശങ്ങളിലെ കൊടുംകാടുകളാണ് സാനിറ്റോറിയം വളപ്പിലെത്തുന്ന കാട്ടുപന്നികളുടെ വാസസ്ഥലം. കഴിഞ്ഞദിവസം രാത്രി റോഡരികിലെ കാടുകളില്‍നിന്ന് കാട്ടുപന്നികള്‍ നിരനിരയായി ഇറങ്ങി സാനിറ്റോറിയം വളപ്പില്‍ ചെന്നതായും കൃഷി നശിപ്പിച്ചതായും പറയുന്നു. മിക്ക ദിവസങ്ങളിലും രാത്രി 12നുശേഷം റോഡിലൂടെ കാട്ടുപന്നികള്‍ വരിവരിയായി നടക്കുന്നത് യാത്രക്കാര്‍ കാണാറുണ്ട്. പറയംകുളം ജംഗ്ഷന് കിഴക്കുവശം മുതല്‍ ഐടിബിപി ജംഗ്ഷന് ഇപ്പുറം വരെയും പരസ്പരം കാണാന്‍ കഴിയാത്ത രീതിയിലുള്ള കൊടുംകാടുകളാണ്. രാത്രി കെപി റോഡിലൂടെ പോകുന്നവര്‍ക്ക് ഈ ഭാഗത്ത് എത്തുമ്പോള്‍ ഭയമാണ്. പലപ്പോഴും കാട്ടുപന്നികള്‍ കാറുകളുടെയും ഇരുചക്രവാഹനങ്ങളുടെയും മുന്നില്‍ ചാടിയിട്ടുണ്ട്. ഇതരസ്ഥലങ്ങളില്‍നിന്നു രാത്രി വാഹനത്തില്‍ മാലിന്യങ്ങള്‍ കാട്ടില്‍കൊണ്ടുവന്ന് തള്ളാറുണ്ട്. കാട്ടുപന്നികള്‍ക്ക് ആഹാരമായി ഇത് ലഭിക്കുന്നുണ്ട്. താമരക്കുളം പഞ്ചായത്ത് പരിധിയിലാണ് റോഡിന്‍റെ വശങ്ങളില്‍ കാടുള്ളത്. പൊതുമരാമത്ത് വകുപ്പും ഇത് ശ്രദ്ധിക്കാറില്ല. എട്ടുവര്‍ഷം മുന്‍പ് സാനിറ്റോറിയത്തിന്‍റെ മുന്‍വശം കെപി റോഡിന്‍റെ വശത്ത് ജനങ്ങള്‍ക്ക് വിശ്രമിക്കാനായി പാര്‍ക്ക് നിര്‍മിക്കാന്‍ ഭരണിക്കാവ് ബ്ലോക്ക് പഞ്ചായത്ത് തീരുമാനിച്ചിരുന്നു. പാര്‍ക്ക് നിര്‍മാണത്തിനാവശ്യമായ തുക എംഎല്‍എ ഫണ്ടില്‍നിന്ന് നല്‍കാനായിരുന്നു തീരുമാനം. റോഡിന്‍റെ വശങ്ങള്‍ അളന്ന് തിട്ടപ്പെടുത്തിയെങ്കിലും പാര്‍ക്ക് നിര്‍മാണം നടന്നില്ല. മത്സ്യവ്യാപാരത്തിനുശേഷം ഉപയോഗ ശൂന്യമായ പെട്ടികളും റോഡിന്‍റെ വശങ്ങളില്‍ തള്ളിയിരിക്കുകയാണ്. സമീപ പ്രദേശം ഉള്‍പ്പെടെയുള്ളിടത്ത് എന്ത് മാലിന്യം ഉണ്ടെങ്കിലും ഏതുതരം മാലിന്യമായാലും എല്ലാം തള്ളുന്നത് കെപി റോഡിനു സമീപത്തെ കാടുകളിലും റോഡിന്‍റെ വശങ്ങളിലുമാണ്. പൊതുമരാമത്ത് വകുപ്പും പഞ്ചായത്തും ബ്ലോക്ക് പഞ്ചായത്തും മുന്‍കൈയെടുത്ത് കാടുകള്‍ തെളിക്കണം എന്നാണ് ജനങ്ങളുടെ ആവശ്യം. ചാരുംമൂട് മാലിന്യം തള്ളുന്നവരെ കണ്ടെത്താന്‍ സ്ഥാപിച്ച കെപി റോഡിലെ കാമറകള്‍ നോക്കുകുത്തികളായി. അഞ്ചു വര്‍ഷം മുന്‍പ് ഭരണിക്കാവ് ബ്ലോക്ക് പഞ്ചായത്ത് കെപി റോഡില്‍ സാനിറ്റോറിയത്തിന്‍റെ റോഡ് വശങ്ങളിലും ചാരുംമൂടിന്‍റെ വിവിധ ഭാഗങ്ങളിലും മാലിന്യം തള്ളുന്നവരെ കണ്ടെത്താന്‍ ഭരണിക്കാവ് ബ്ലോക്ക് പഞ്ചായത്ത് സ്ഥാപിച്ച സിസി കാമറകളാണ് നോക്കുകുത്തികളായത്. ഐടിബിപി ജംഗ്ഷന്‍ മുതല്‍ കെപി റോഡില്‍ പാലൂത്തറ വരെയും കൊല്ലം-തേനി ദേശീയപാതയില്‍ ഭരണിക്കാവ് ബ്ലോക്ക് പഞ്ചായത്ത് മുതല്‍ ഫെഡറല്‍ ബാങ്കിനു സമീപം വരെയുമാണ് മാലിന്യം തള്ളുന്നത് കണ്ടെത്താന്‍ കാമറാകള്‍ സ്ഥാപിച്ചത്. ഇതോടൊപ്പം തന്നെ ഇരു റോഡുകളിലും പ്ലാസ്റ്റിക് മാലിന്യക്കൂടകള്‍ സ്ഥാപിച്ചിരുന്നു. എന്നാല്‍, ഇത് കാണാത്ത രീതിയിലാണ് ഇറച്ചി മാലിന്യങ്ങള്‍ ഉള്‍പ്പെടെയുള്ളവ ചാക്കുകളില്‍ കെട്ടി രാത്രി അതിനു വെളിയില്‍ തള്ളിയത്. ഇത് നീക്കം ചെയ്യുന്നതിനായി പിന്നീട് പതിനായിരക്കണക്കിന് രൂപ ചെലവായി.

പരിശീലകൻ മാത്യു ഡിക്രൂസിന്‍റെ മൃതദേഹത്തോടൊപ്പം ബാസ്‌കറ്റ്ബോളും അടക്കം ചെയ്തു

ആലപ്പുഴ: അന്തരിച്ച പ്രമുഖ ബാസ്‌കറ്റ്ബോൾ പരിശീലകൻ മാത്യു ഡിക്രൂസിന്‍റെ മൃതദേഹത്തോടൊപ്പം അദ്ദേഹത്തിന്‍റെ ആഗ്രഹപ്രകാരം ഏറ്റവും പ്രിയപ്പെട്ട ബാസ്‌കറ്റ്ബോളും കല്ലറയിൽ അടക്കം ചെയ്തു. സഹപ്രവർത്തകരും പരിശീലിക്കപ്പെട്ട കുട്ടികളും ചേർന്നാണ് ആഗ്രഹം സഫലീകരിച്ചത്. സിഎസ്ഐ ചർച്ചിൽ മൃതദേഹം സംസ്കരിച്ചു. രാജ്യാന്തര താരങ്ങളെ വളർത്തിയെടുത്ത കഴിവുറ്റ പരിശീലകനായിരുന്നു മാത്യു ഡിക്രൂസ്. ബാസ്കറ്റ്ബോൾ പരിശീലകൻ മാത്യു ഡിക്രൂസിന്‍റെ നിര്യാണത്തിൽ ആലപ്പി ഡിസ്ട്രിക്റ്റ് ബാസ്കറ്റ്ബോൾ അസോസിയേഷൻ (എഡിബിഎ) അനുശോചിച്ചു. പ്രസിഡന്‍റ് റോണി മാത്യു അധ്യക്ഷത വഹിച്ചു. സെക്രട്ടറി ജോൺ ജോർജ് അനുശോചനപ്രമേയം അവതരിപ്പിച്ചു.

ശ്രീകൃഷ്ണസ്വാമി ക്ഷേത്രാങ്കണത്തിൽ അഞ്ചുകോടിയുടെ അമിനിറ്റി സെന്‍റർ

അന്പലപ്പുഴ: ശ്രീകൃഷ്ണസ്വമി ക്ഷേത്രാങ്കണത്തിൽ ഒരുങ്ങുന്ന അഞ്ചുകോടി രൂപ ചെലവിൽ അമിനിറ്റി സെന്‍റർ. രണ്ടു നിലകളിലായി 17,300-സ്ക്വയർ ഫീറ്റിൽ പൂർത്തിയാക്കുന്ന സെന്‍ററിന്‍റെ താഴത്തെ നിലയിൽ 9 ഡീലക്സ് മുറികളും ഒരു സ്യൂട്ട് മുറിയും മുകൾനിലയിൽ 11 ഡീലക്സ് മുറികളും ഒരു സ്യൂട്ട് മുറിയുമാണ് ഉണ്ടാകുക. വിശാലമായ പാർക്കിംഗ് സൗകര്യത്തിനു പുറമേ സ്ത്രീകൾക്കും പുരുഷന്മാർക്കുമായ പ്രത്യേക ഡോർമെറ്ററികളും സ്റ്റോറേജും ശുചിമുറി സംവിധാനവുമുണ്ടാകും. അമ്പലപ്പുഴ ക്ഷേത്രത്തിൽ ദർശനത്തിന് ദൂരദേശത്തുനിന്ന് എത്തുന്നവർക്കുൾപ്പെടെ മെച്ചപ്പെട്ട സുഖസൗകര്യങ്ങളോടെ താമസസൗകര്യമൊരുക്കുന്നതിന്‍റെ ഭാഗമായാണ് അമിനിറ്റി സെന്‍റർ ഒരുക്കുന്നത്. ക്ഷേത്രത്തിന്‍റെ തെക്ക് പടിഞ്ഞാറെ ഭാഗത്ത് നിലവിൽ സ്ഥിതിചെയ്യുന്ന ദേവസ്വം സത്രം പൊളിച്ചുനീക്കിയാകും സെന്‍റർ നിർമിക്കുക. 40 വർഷം പഴക്കമുള്ള സത്രം കാലപ്പഴക്കം കൊണ്ട് താമസയോഗ്യമല്ലാതായതോടെ കഴിഞ്ഞ രണ്ടുവർഷമായി ഇതു ഭാഗികമായാണ് പ്രവർത്തിക്കുന്നത്. ഇതിനാൽ മറ്റു നാടുകളിൽനിന്ന് ക്ഷേത്രദർശനത്തിനെത്തുന്നവർ സ്വകാര്യ ലോഡ്ജുകളെയാണ് ആശ്രയിക്കുന്നത്. വിഷയം ശ്രദ്ധയിൽപ്പെട്ടതിനെത്തുടർന്നാണ് എച്ച്. സലാം, പൊതുമരാമത്തു മന്ത്രി മുഹമ്മദ് റിയാസുമായി ബന്ധപ്പെട്ട് അമിനിറ്റി സെന്‍ററിന് പണം അനുവദിപ്പിച്ചത്. അമിനിറ്റി സെന്‍ററിനു പുറമേ ക്ഷേത്രത്തിലെ ഉത്സവാഘോഷങ്ങളുടെ ഭാഗമായുള്ള കലാപരിപാടികൾ അരങ്ങേറുന്ന സ്റ്റേജും ഇതിനോടനുബന്ധിച്ച് ഓപ്പൺ എയർ ഓഡിറ്റോറിയവും പുനർനിർമിക്കും. അഞ്ചു കോടിക്കു പുറമേ ബജറ്റ് ഫണ്ടിൽനിന്നും ഒരുകോടി രൂപയാണ് ഇതിനായി അനുവദിച്ചത്. പൊതുമരാമത്ത് വകുപ്പിൽനിന്നും അനുവദിച്ച അഞ്ചു കോടി രൂപ ഉപയോഗിച്ചുള്ള കെട്ടിടത്തിന്‍റെ നിർമാണച്ചുമതല കേരള ഇറിഗേഷൻ ഇൻഫ്രാസ്ട്രക്ചർ ഡെവലപ്മെന്‍റ് കോർപറേഷന് (കിഡ്ക്) ആണ്. ഇവയുടെ നിർമാണപ്രവർത്തനവുമായി ബന്ധപ്പെട്ട് ദേവസ്വം ബോർഡംഗം അഡ്വ. എ. അജിത് കുമാറിന്‍റെ അധ്യക്ഷതയിൽ എംഎൽഎ യോഗം വിളിച്ചുചേർത്തു. പഞ്ചായത്ത് പ്രസിഡന്‍റ് ശോഭ ബാലൻ, അംഗങ്ങളായ സുഷമ രാജീവ്, വവിത, ദേവസ്വം അസി. കമ്മീഷണർ എം. എം. നിഖിൽലാൽ, അഡ്മിനിസ്ട്രേറ്റീവ് ഓഫീസർ അജിത്ത് എന്നിവർ പങ്കെടുത്തു.

കൊല്ലം-തേനി ദേശീയപാത വികസനം; പാതയോര നിർമാണങ്ങൾക്ക് നിയന്ത്രണം

ചാരുംമൂട്: കൊല്ലം-തേനി ദേശീയപാത നാലുവരിപ്പാതയാക്കി മാറ്റുന്നതിനായി സ്ഥലം ഏറ്റെടുക്കൽ നടപടികളിലേക്കു കടക്കുന്നതിനാൽ പാതയോരത്തെ പുതിയ നിർമാണങ്ങൾക്ക് ഇനി അനുമതി നൽകരുതെന്ന് വില്ലേജ് ഓഫീസുകൾക്ക് രേഖാമൂലം നിർദേശം നൽകി. അതിനാൽ കൊല്ലം-തേനി ദേശീയപാതയ് ക്കരികിൽ പുതിയ നിർമാണ പ്രവർത്തനങ്ങൾക്ക് ഇനി പെർമിറ്റ് ലഭിക്കില്ല. തദ്ദേശ സ്വയംഭരണ സ്ഥാപനങ്ങൾക്കും ഇതുസംബന്ധമായ നിർദേശം നൽകിക്കഴിഞ്ഞു. ഏറ്റെടുക്കുന്ന സ്ഥലത്തിന്‍റെ വിശദാംശങ്ങൾ ഭൂരാശി പോർട്ടിലിൽ പ്രസിദ്ധീകരിച്ചിട്ട് മൂന്നുമാസമായിട്ടും സ്ഥലം ഏറ്റെടുക്കൽ നടപടികൾ വൈകുകയാണ്. വേണ്ടത്ര ഉദ്യോഗസ്ഥരെ നിയോഗിക്കാത്തതും നടപടികൾ വൈകാൻ കാരണമാകുന്നു. ആലപ്പുഴ ജില്ലയുടെ ചുമതല ദേശീയപാത വിഭാഗം ഹരിപ്പാട് സ്‌പെഷൽ ഡെപ്യൂട്ടി തഹീൽദാർക്കും കൊല്ലം ജില്ലയുടെ ചുമതല കൊല്ലം ദേശീയപാത വിഭാഗം ഡെപ്യൂട്ടി തഹസീൽദാർക്കുമാണ്. എന്നാൽ, ഇവർക്ക് ദേശീയപാത 66ന്‍റെ വികസനപ്രവർത്തനങ്ങൾക്കും ചുമതലകൾ വഹിക്കേണ്ടിവരുന്നതിനാൽ ഇതും മറ്റൊരു പ്രതിസന്ധിയാണ്. സ്ഥലം ഏറ്റെടുക്കൽ നടപടികൾ വേഗത്തിലാക്കണം എന്ന ആവശ്യവുമായി കേന്ദ്ര ഉപരിതല ഗതാഗതവകുപ്പ് മന്ത്രി നിധിൻ ഗഡ്കരിക്ക് കൊടിക്കുന്നിൽ സുരേഷ് എംപി നിവേദനം നൽകിയിരിക്കുകയാണ്. സ്ഥലം ഏറ്റെടുക്കൽ വേഗത്തിലാക്കാൻ റവന്യുവകുപ്പിന് നിർദേശം നൽകണമെന്ന് കാട്ടി മുഖ്യമന്ത്രിക്കും എംപി കത്ത് നൽകി. കൊല്ലം-തേനി ദേശീയപാതയുടെ വികസന പ്രവർത്തനങ്ങൾ വേഗത്തിലാക്കണമെന്ന ആവശ്യവുമായി സംസ്ഥാന സർക്കാരും കേന്ദ്രമന്ത്രിക്ക് കത്ത് നൽകിയിട്ടുണ്ട്. കൊല്ലം ബൈപ്പാസ് മുതൽ-ചെങ്ങന്നൂർ ആഞ്ഞിലിമൂട് വരെ 54 കിലോമീറ്റർ വികസനത്തിന് നിലവിൽ 1993.28 കോടി രൂപയാണ് നിർമാണച്ചെലവായി എസ്റ്റിമേറ്റിലുള്ളത്. എന്നാൽ, ഇത് 2200 കോടി ആയി ഉയർത്തുമെന്നാണ് സൂചന. പൊതുമരാമത്ത് പദ്ധതികളുടെ നിരക്ക് വർധിച്ചതാണ് കാരണം. സംസ്ഥാന റവന്യുവകുപ്പിന് നിർദേശം ലഭിച്ചാൽ കല്ലിടീൽ നടപടികൾ വേഗത്തിലാകും. ദേശീയപാത പൊതുമരാമത്ത് വിഭാഗവും സ്ഥലമേറ്റെടുക്കൽ സംഘവും നേരത്തെ പാത കടന്നുപോകുന്ന സ്ഥലങ്ങളിൽ സംയുക്ത പരിശോധന നടത്തിയിരുന്നു. 24 മീറ്റർ വീതിയിൽ കൊടുംവളവുകൾ നിവർത്തിയും ബ്ലാക്ക് സ്പോട്ടുകൾ ഒഴിവാക്കിയും ഗ്രേഡിംഗ് വർധിപ്പിച്ചുമാണ് ദേശീയപാത 183 യാഥാർഥ്യമാക്കുക. കൊല്ലം, ഭരണിക്കാവ്, വണ്ടിപ്പെരിയാർ, കുമളി, തേനി തുടങ്ങിയ ജംഗ്‌ഷനുകളിലൂടെയാണ് പാത കടന്നുപോവുക. കയറ്റിറക്കങ്ങൾ പരമാവധി ഒഴിവാക്കാൻ നിലവിലുള്ളതിനേക്കാൾ ഉയർത്തിയാകും റോഡ് നിർമിക്കുക. കൊല്ലം കടവൂർ-തേവള്ളി - തൃക്കടവൂർ - അഞ്ചാലുംമൂട്‌ - പെരിനാട് - ഈസ്റ്റ് കല്ലട - ഭരണിക്കാവ് -ചക്കുവള്ളി -ശൂരനാട് നോർത്ത് - ആനയടി - താമരക്കുളം-ചാരുംമൂട്‌ -ചുനക്കര - മാങ്കാംകുഴി -കൊല്ലക്കടവ് ആഞ്ഞിലിമൂട്‌-ചെങ്ങന്നൂർ-പൊൻകുന്നം -കാഞ്ഞിരപ്പള്ളി -മുണ്ടക്കയം -കുട്ടിക്കാനം -വണ്ടിപ്പെരിയാർ-കുമളി വഴിയാണ് റോഡ് തമിഴ്നാട്ടിലേക്ക് പ്രവേശിക്കുക. തുടർന്ന് കമ്പം ഉത്തമപാളയം വഴി തേനിയിൽ എത്തിച്ചേരും.

സമഗ്ര കുട്ടനാട് കുടിവെള്ള പദ്ധതിക്ക് മന്ത്രിസഭ അംഗീകാരം നല്‍കി

എടത്വ: സമഗ്ര കുട്ടനാട് കുടിവെള്ള പദ്ധതിയിലെ മൂന്നു പാക്കേജുകളുടെ പൂര്‍ത്തീകരണത്തിനായി അധികതുക അനുവദിക്കാന്‍ മന്ത്രിസഭാ യോഗം അംഗീകാരം നല്‍കിയതായി തോമസ് കെ. തോമസ് എംഎല്‍എ അറിയിച്ചു. കുടിവെള്ള പദ്ധതിയുടെ രണ്ടാം ഘട്ടത്തിലെ പാക്കേജ് അഞ്ചില്‍ ഉള്‍പ്പെടുന്ന മുട്ടാര്‍, വെളിയനാട്, നീലംപേരൂര്‍ എന്നീ പഞ്ചായത്തുകളില്‍ ഉന്നതതല ജലസംഭരണികളുടെ നിര്‍മാണം, വിതരണ ശൃംഖല സ്ഥാപിക്കല്‍, നിലവിലുള്ള ജലസംഭരണികളുടെ പുനരുദ്ധാരണ പ്രവൃത്തി എന്നിവയ്ക്ക് 52,92,84,964 രൂപയും പാക്കേജ് ഏഴില്‍ രാമങ്കരി, ചമ്പക്കുളം പഞ്ചായത്തിലെ ഓവര്‍ഹെഡ് ടാങ്കിന്‍റെയും വിതരണ ശൃംഖലയുടെയും നിര്‍മാണം, രാമങ്കരി ഓവര്‍ഹെഡ് ടാങ്ക് സൈറ്റില്‍ ഓണ്‍ലൈന്‍ ക്ലോറിന്‍ ബൂസ്റ്റര്‍, നിലവിലുള്ള ഓവര്‍ ഹെഡ് ടാങ്കിന്‍റെ പുനരുദ്ധാരണം, പൈപ്പ് ലൈന്‍ സ്ഥാപിക്കല്‍ എന്നീ പ്രവൃത്തികള്‍ക്ക് 39,33,24,091 രൂപയും കുട്ടനാട് സമഗ്ര കുടിവെള്ള പദ്ധതി രണ്ടാം ഘട്ടത്തില്‍ പാക്കേജ്-ഒന്‍പതില്‍ ഉള്‍പ്പെടുന്ന വീയപുരം പഞ്ചായത്തിലെ ഉന്നതതല ജലസംഭരണിയുടെ നിര്‍മാണം, സ്റ്റാഫ് ക്വാര്‍ട്ടേഴ്‌സ്, എടത്വ ജല അഥോറിറ്റി ഓഫീസ് കെട്ടിടം എന്നിവയുടെ നിര്‍മാണം, പൈപ്പ് ലൈന്‍ സ്ഥാപിക്കല്‍ എന്നീ പ്രവൃത്തിക്ക് 5,90,70,537 രൂപയുമാണ് അനുവദിച്ചത്. പദ്ധതിയുടെ ടെന്‍ഡര്‍ നടപടികള്‍ നേരത്തെ പൂര്‍ത്തിയായിരുന്നു. പുതുക്കിയ റേറ്റിന് അനുസരിച്ച് തുക അനുവദിക്കണമെന്നാവശ്യത്തിനാണ് അംഗീകാരം ലഭിച്ചത്. ഒന്‍പത് പാക്കേജുകളിലായി നടപ്പാക്കുന്ന കുടിവെള്ള പദ്ധതിയുടെ ആദ്യഘട്ടത്തിലുള്ള നിര്‍മാണ പ്രവര്‍ത്തനങ്ങള്‍ അതിവേഗം പുരോഗമിച്ചുവരുന്നതായും രണ്ടാം ഘട്ടത്തിന്‍റെ പ്രവൃത്തികള്‍ ഉടന്‍ ആരംഭിക്കാന്‍ കഴിയുമെന്നും എംഎല്‍എ അറിയിച്ചു.

മുട്ടം റോട്ടറി ക്ലബ്‌ ഭാരവാഹികൾ ചുമതലയേറ്റു

ഹരിപ്പാട്: 2025-26 വർഷത്തെ മുട്ടം റോട്ടറി ക്ലബ്‌ ഭാരവാഹികൾ ചുമതലയേറ്റു. റോട്ടറി ക്ലബ്‌ ഹാളിൽ നടന്ന ചടങ്ങ് റോട്ടറി ഡിസ്ട്രിക്ട് 3211 ഗവർണർ ഇലക്ട് കൃഷ്ണൻ.ജി.നായർ ഉദ്ഘാടനം ചെയ്തു. പ്രസിഡന്‍റായി ഇ.കെ. ചന്ദ്രൻ, സെക്രട്ടറിയായി ജോർജ് വർഗീസ് തരകൻ, ട്രഷററായി പ്രസന്നകുമാർ. വി. തയ്യിൽ എന്നിവരാണ് ചുമതലയേറ്റത്. കെ.പി. അനിൽകുമാർ അധ്യക്ഷത വഹിച്ചു. സോൺ 23 അസിസ്റ്റന്‍റ് ഗവർണർ എബി ജോൺ, ജേക്കബ് വർഗീസ്, സൈമൺ, അരുൺനാഥ്, ആർ.കെ. പ്രകാശ്, ബി. രവികുമാർ, ആർ. ഓമനക്കുട്ടൻ, എസ്. സലികുമാർ, ആർ. രജനീകാന്ത്, ഹരികുമാർ മാടയിൽ, അഡ്വ. ജി. ഷിമുരാജ്, ഗോപകുമാർ മാടയിൽ, ഗിരീഷ്സദാശിവൻ എന്നിവർ പ്രസംഗിച്ചു. പളളിപ്പാട്, ചേപ്പാട്, പത്തിയൂർ പഞ്ചായത്തുകളിലെ ഹരിതകർമ സേനാംഗങ്ങൾക്ക് ഓവർകോട്ട് വിതരണം, ശ്രവണസഹായി വിതരണം തുടങ്ങി നിരവധിപ്രവർത്തനങ്ങൾക്കു തുടക്കം കുറിച്ചു.

അക്ഷരത്തിന്‍റെയും അറിവിന്‍റെയും അങ്കത്തിനിറങ്ങി ഗോപിദാസ്

അന്പലപ്പുഴ: ഗോപിദാസ് വീണ്ടും അക്ഷരത്തിന്‍റെയും അറിവിന്‍റെയും അങ്കത്തിനിറങ്ങി. മധുരം നുണയുന്നതു പോലെ വാർധക്യകാലത്തും പരീക്ഷയെഴുതി, അമ്മയുടെ സ്വപ്നം സാക്ഷാത്കരിക്കാനായി. പുന്നപ്ര പറവൂർ താന്നിപ്പടിച്ചിറയിൽ 79 വയസുകാരൻ ഗോപിദാസാണ് പ്രായത്തിന്‍റെ പരിമിതികളെ വെല്ലുവിളിച്ച് ഹയർ സെക്കൻഡറി തുല്യതാ പരീക്ഷയെഴുതിയത്. സംസ്ഥാനത്തെ ഏറ്റവും മുതിർന്ന പഠിതാവാണ് ഈ മുത്തച്ഛൻ. മകൻ സർക്കാർ ജീവനക്കാരനാകണമെന്നും പത്താം ക്ലാസ് പരീക്ഷ പാസാകണമെന്നുമായിരുന്നു മാതാവ് ഭവാനിയുടെ ആഗ്രഹം. പല കാരണം കൊണ്ട് അമ്മയുടെ ഈ രണ്ട് ആഗ്രഹവും പൂവണിയിക്കാൻ കഴിഞ്ഞില്ല. കുടുംബം പുലർത്താനായി പിന്നീട് കയർത്തൊഴിലാളിയായി. ഇതിനിടയിൽ മാതാവും മരണപ്പെട്ടു. എങ്കിലും പ്രിയപ്പെട്ട അമ്മയുടെ സ്വപ്നം യാഥാർഥ്യമാക്കാൻ ഗോപിദാസ് ഏഴാം ക്ലാസ് തുല്യതാ പരീക്ഷയെഴുതി. ഇതിൽ മികച്ച വിജയം നേടിയപ്പോൾ തുടർന്ന് പത്താം ക്ലാസ് തുല്യതാ പരീക്ഷയുമെഴുതി. നാലു വിഷയത്തിന് എ പ്ലസും മറ്റ് വിഷയങ്ങൾക്ക് എയും ലഭിച്ചു. അതിനേക്കാൾ മികച്ച വിജയം നേടുമെന്ന ആത്മവിശ്വാസമാണ് ഇത്തവണയുള്ളത്. വിവിധ ദിവസങ്ങളിലായി ആറു പരീക്ഷയാണ് എഴുതുന്നത്. ആദ്യ ദിവസം മലയാളമായിരുന്നു. ഞായറാഴ്ച മാത്രമാണ് അമ്പലപ്പുഴ കെ.കെ. കുഞ്ചുപിള്ള മെമ്മോറിയൽ സ്കൂളിൽ ക്ലാസുള്ളത്. മുടങ്ങാതെ ഈ ക്ലാസുകളിലെത്തുമായിരുന്നു. കൊച്ചുമക്കൾക്കൊപ്പം വാർധക്യം വീട്ടിലിരുന്ന് ആസ്വദിക്കുമ്പോഴും പഠനത്തിനും ഏറെ സമയം കണ്ടെത്തും. ഹയർ സെക്കൻഡറി തുല്യതാ എട്ടാം ബാച്ച് പഠിതാവാണ് ഈ മുത്തച്ഛൻ. പഠിക്കുന്ന സ്കൂളിൽത്തന്നെയാണ് പരീക്ഷയും. പ്രായവും അവശതയുമൊന്നും തന്‍റെ പഠനത്തിന് തടസമല്ലെന്ന് വീണ്ടും തെളിയിച്ചിരിക്കുകയാണ് ഗോപി ദാസ് എന്ന പഠിതാവ്. ആദ്യ ദിവസം പരീക്ഷ കഴിഞ്ഞിറങ്ങിയ ഗോപി ദാസിനെ എച്ച്. സലാം എംഎൽഎ പൊന്നാടയണിയിച്ച് ആദരിച്ചു.

എസി റോഡില്‍ നാളെമുതല്‍ ഗതാഗതനിയന്ത്രണം

ആലപ്പുഴ: എസി റോഡില്‍ പുതിയ പള്ളാത്തുരുത്തി പാലത്തിന്‍റെ ആര്‍ച്ച് കോണ്‍ക്രീറ്റിംഗ് പ്രവൃത്തികള്‍ നടക്കുന്നതിനാല്‍ 12 ശനിയാഴ്ച രാവിലെ 10 മുതല്‍ 13 ഞായറാഴ്ച രാവിലെ ആറു വരെ എസി റോഡിലൂടെയുള്ള ഗതാഗതത്തിന് നിയന്ത്രണമേര്‍പ്പെടുത്താന്‍ തീരുമാനം. കളക്‌ടറേറ്റില്‍ ചേര്‍ന്ന എസി റോഡ് നിര്‍മാണവുമായി ബന്ധപ്പെട്ട ഉദ്യോഗസ്ഥരുടെ യോഗത്തിലാണ് തീരുമാനം എടുത്തത്. കോട്ടയം- ചങ്ങനാശേരിയില്‍നിന്ന് ആലപ്പുഴയിലേക്ക് വരുന്ന ഭാരവാഹനങ്ങള്‍ തിരുവല്ല വഴി തിരുവല്ല -അമ്പലപ്പുഴ റോഡിലൂടെ ദേശീയപാതയില്‍ എത്തിച്ചേരണം. കോട്ടയം- ചങ്ങനാശേരിയില്‍നിന്നു വരുന്ന ചെറുവാഹനങ്ങള്‍ എസി റോഡിലൂടെ സഞ്ചരിച്ച് മങ്കൊമ്പ് ജംഗ്ഷനില്‍നിന്ന് ചമ്പക്കുളം ഭാഗത്തേക്ക് തിരിഞ്ഞ് നെടുമുടി പഞ്ചായത്ത് ഓഫീസ് ജംഗ്ഷന്‍ വഴി ദേശീയപാതയിലെ കാക്കാഴം റെയില്‍വേ മേല്‍പ്പാലത്തിന് വടക്ക് വശത്തുള്ള എസ്എന്‍ കവലയില്‍വന്ന് ആലപ്പുഴയിലേക്ക് യാത്ര തുടരണം. ആലപ്പുഴയില്‍നിന്നു ചങ്ങനാശേരിക്കു പോകുന്ന ഭാരവാഹനങ്ങള്‍ അമ്പലപ്പുഴ-തിരുവല്ല റോഡിലൂടെ ചങ്ങനാശേരിക്ക് പോകണം. ആലപ്പുഴയില്‍നിന്നു ചങ്ങനാശേരിക്കു പോകുന്ന ചെറു വാഹനങ്ങള്‍ ദേശീയപാതയിലെ എസ്എന്‍ കവലയില്‍നിന്നും കഞ്ഞിപ്പാടം-ചമ്പക്കുളം വഴി എസി റോഡിലെ പൂപ്പള്ളിയില്‍ ചെന്ന് ചങ്ങനാശേരിക്ക് യാത്ര തുടരണം. പള്ളാത്തുരുത്തി പഴയപാലത്തിന് സമാന്തരമായി പണിയുന്ന പുതിയ പാലത്തിന്‍റെ നടുവിലുള്ള 72 മീ. നീളമുള്ള ആര്‍ച്ചിന്‍റെ ആദ്യഘട്ട കോണ്‍ക്രീറ്റിംഗ് പ്രവൃത്തികളാണ് ശനിയാഴ്ച നടക്കുക. യോഗത്തില്‍ ജില്ലാ കളക്ടര്‍ അലക്‌സ് വര്‍ഗീസ് അധ്യക്ഷത വഹിച്ചു. കെഎസ്ടിപി എക്‌സി. എന്‍ജിനിയര്‍ ജി.എസ്. ജ്യോതി, അമ്പലപ്പുഴ ഡിവൈഎസ്പി കെ.എന്‍. രാജേഷ് തുടങ്ങിയവര്‍ പങ്കെടുത്തു. കെഎസ്ആര്‍ടിസി ബസ് റൂട്ടികളിലും മാറ്റം ആലപ്പുഴ: പള്ളാത്തുരുത്തി പാലത്തിന്‍റെ ആര്‍ച്ച് കോണ്‍ക്രീറ്റിംഗ് പ്രവൃത്തികള്‍ നടക്കുന്നതിനാല്‍ എസി റോഡിലൂടെയുള്ള കെഎസ്ആര്‍ടിസി ബസ് റൂട്ടുകളിലും മാറ്റമുണ്ടായിരിക്കും. ആലപ്പുഴ ഭാഗത്തുനിന്ന് ചങ്ങനാശേരി, കൈനകരി കോലത്ത് ജെട്ടി, തട്ടാശേരി എന്നീ സ്ഥലങ്ങളിലേക്കു പോകുന്ന ബസുകള്‍ കൈതവന കളര്‍കോട് ജംഗ്ഷന്‍ വഴി വണ്ടാനം എസ് എന്‍ കവല, ചമ്പക്കുളം വഴി പൂപ്പള്ളി ജംഗ്ഷനില്‍ എത്തി ചങ്ങനാശേരിക്കും മറ്റുള്ള സ്ഥലങ്ങളിലേക്കും പോകും. ചങ്ങനാശേരി ഭാഗത്തുനിന്ന് ആലപ്പുഴയ്ക്ക് വരുന്ന ബസുകള്‍ എസി റോഡിലെ മങ്കൊമ്പ് ജംഗ്ഷനില്‍നിന്ന് ഇടത്തോട്ട് തിരിഞ്ഞ് ചമ്പക്കുളം, കഞ്ഞിപ്പാടം വഴി എസ്എന്‍ കവലയില്‍ എത്തി ആലപ്പുഴയ്ക്ക് സര്‍വീസ് നടത്തും.

ഉയരപ്പാത നിര്‍മാണം മുന്നോട്ട്, യാത്രക്കാരുടെ പ്രതീക്ഷയും

തുറവൂര്‍: ലക്ഷ്യമിട്ട രീതിയില്‍ ഉയരപ്പാത നിര്‍മാണം നീങ്ങുന്നു. അരൂര്‍-തുറവൂര്‍ ഉയരപ്പാത നിര്‍മാണത്തിന്‍റെ 68 ശതമാനം ജോലികള്‍ പൂര്‍ത്തിയായി. 2023 ഫെബ്രുവരിയിലാണ് നിര്‍മാണം തുടങ്ങിയത്. 2026 ഫെബ്രുവരി അവസാനം പൂര്‍ത്തിയാക്കുന്ന വിധമാണ് നിര്‍മാണം. 12.75 കിലോ മീറ്റര്‍ പാതയില്‍ റാംപ്, ടോള്‍ ഗേറ്റ് എന്നിവയടക്കം 403 തൂണുകളാണ് നിര്‍മിക്കുന്നത്. ഇതില്‍ 394 തൂണിന്‍റെ നിര്‍മാണം പൂര്‍ത്തിയായി. ഇനി 9 തൂണുകള്‍ മാത്രമാണ് നിര്‍മിക്കാനുള്ളത്. പാതയ്ക്കു മാത്രമായി 354 തൂണുകളാണുള്ളത്. 9 മീറ്റര്‍ ഉയരത്തിലുള്ള ചിറക് വിരിച്ചിരിക്കുന്ന തൂണുകള്‍ക്ക് മുകളില്‍ കോണ്‍ക്രീറ്റ് ഗര്‍ഡറുകള്‍ സ്ഥാപിച്ചതിനുശേഷം 24 മീറ്റര്‍ വീതിയിലാണ് പാത ഒരുങ്ങുന്നത്. തുറവൂര്‍- പാട്ടുകുളങ്ങര, കുത്തിയതോട്-ചമ്മനാട്, എരമല്ലൂര്‍- ചന്തിരൂര്‍, അരൂര്‍ ക്ഷേത്രം കവല-അരൂര്‍ ബൈപാസ് തുടങ്ങി അഞ്ചു റീച്ചുകളായാണു വര്‍ക്കുകള്‍ നടക്കുന്നത്. അഞ്ചു റീച്ചുകളിലായി തൂണുകള്‍ക്കു മുകളില്‍ ഏഴു കിലോമീറ്റര്‍ പാതയുടെ കോണ്‍ക്രീറ്റിംഗ് പൂര്‍ത്തിയായി. തുറവൂര്‍ ജംഗ്ഷന്‍, അരൂര്‍ ബൈപാസ് കവല എന്നിവിടങ്ങളിലെ അപ്രോച്ച് റോഡിലൂടെ മാത്രമാണ് ഉയരപ്പാതയിലേക്ക് കയറുന്നതിനും ഇറങ്ങാനുമുള്ള സൗകര്യം. കുത്തിയതോട്, ചന്തിരൂര്‍ എന്നിവിടങ്ങളിലെ റാംപുകളിലൂടെ മാത്രമാണ് ഉയരപ്പാതയില്‍നിന്നു താഴേക്കിറങ്ങാന്‍ സൗകര്യമുള്ളത്. റാംപുകളുടെ നിര്‍മാണം നടന്നുവരികയാണ്. ഇതുകൂടാതെ 28 മീറ്റര്‍ വീതിയില്‍ ഉയരപ്പാതയുടെ മുകളില്‍ തന്നെ വാഹനങ്ങളുടെ ടോള്‍ പിരിക്കാനുള്ള ടോള്‍ ബൂത്തിന്‍റെ നിര്‍മാണം നടക്കുന്നു. അരൂര്‍-തുറവൂര്‍ ഉയരപ്പാതയുടെ പ്രധാന വെല്ലുവിളിയാണ് കാന നിര്‍മാണം. കാന നിര്‍മാണം പൂര്‍ത്തിയാകാത്തതുമൂലം വെള്ളം കെട്ടിനിന്നു പാതയിലെ റോഡുകള്‍ തകരുകയാണ്. നിര്‍മാണം പൂര്‍ത്തിയാക്കിയ കാനയില്‍നിന്നു പാതയോരത്തുള്ള ഇടത്തോടുകളിലേക്ക് വെള്ളം ഒഴുക്കിവിടുന്നതിനുള്ള പഞ്ചായത്തുകളുടെ അനുമതിക്കായി കരാറുകാര്‍ സമീപിച്ചെങ്കിലും ആറു മാസം വൈകിയാണ് അനുമതി നല്‍കിയത്.

ഒപ്പിട്ടവരെ ജോലിസ്ഥലത്തിരുത്തി വ്യത്യസ്ത സമരം

മാവേലിക്കര: ദേശീയ പണിമുടക്ക് ദിവസം സിപിഎം പ്രവർത്തകരുടെ നേതൃത്വത്തിൽ വ്യത്യസ്‌തമായ സമരം. കുന്നം ഗവ. എച്ച്എസ്എസിലാണു രജിസ്റ്ററിൽ ഒപ്പ് രേഖപ്പെടുത്തിയാൽ സ്കൂൾ സമയം അവസാനിക്കുന്നതുവരെ ജോലി സ്‌ഥലത്തു കാണണം എന്നാവശ്യപ്പെട്ടു സിപിഎം പ്രവർത്തകർ ആറ് മണിക്കൂറോളം സമരം നടത്തിയത്. ഇന്നലെ രാവിലെ 11നാണു സംഭവങ്ങളുടെ തുടക്കം. തഴക്കരയിൽ പണിമുടക്കിനെ അനുകൂലിച്ചു നടന്ന പ്രകടനത്തിനു പിന്നാലെ കുന്നം ഗവ. എച്ച്എസ്എസ് തുറന്നു പ്രവർത്തിക്കുന്നു എന്നറിഞ്ഞ സിപിഎം പ്രവർത്തകർ സ്‌കൂളിലെത്തി. എത്ര പേർ ഒപ്പിട്ടു എന്നു സമരക്കാർ അന്വേഷിച്ചപ്പോൾ 13 എന്ന മറുപടി ലഭിച്ചു. എന്നാൽ എണ്ണിയപ്പോൾ 11 പേർ മാത്രമേ ഉണ്ടായിരുന്നുള്ളൂ. രണ്ടുപേർ എവിടെ എന്നു ചോദിച്ചപ്പോൾ ഗ്രൗണ്ടിൽ ഉണ്ട് എന്നു മറ്റ് അധ്യാപകർ പറഞ്ഞു. സമരക്കാർ വീണ്ടും എത്തിയപ്പോഴും 11 പേർ മാത്രമേ സ്‌കൂളിൽ ഉണ്ടായിരുന്നുള്ളൂ. അന്വേഷിച്ചപ്പോൾ രണ്ടു പേർ മെഡിക്കൽ സ്റ്റോറിൽ പോയി എന്നായി നിലപാട്. തുടർന്നു സിപിഎം ലോക്കൽ കമ്മിറ്റി സെക്രട്ടറി എസ്. ശ്രീകുമാറിന്‍റെ നേതൃത്വത്തിൽ ഉപരോധ സമരം ആരംഭിച്ചു. സ്ഥലത്തെത്തിയ സിപിഎം നേതാവ് കെ. രഘുപ്രസാദ് ഹാജർ ബുക്ക്, മൂവ്‌മെന്‍റ് രജിസ്റ്റർ എന്നിവ കാണിച്ചാൽ സമരം അവസാനിപ്പിക്കാമെന്ന് അറിയിച്ചു. പ്രിൻസിപ്പലിന്‍റെ അഭാവത്തിൽ സ്‌കൂൾ ചുമതല ഉണ്ടായിരുന്ന അധ്യാപിക അതിനു തയാറായില്ല. ഇതോടെയാണു സമരം ശക്‌തമാക്കിയത്‌. വൈകിട്ട് അഞ്ചരയോടെ സ്‌ഥലത്തെത്തിയ പോലീസ് ഉപരോധം നടത്തിയവരെ അറസ്റ്റ് ചെയ്തു‌ നീക്കി. മുരളി തഴക്കര, വേണുഗോപാൽ, മെറിൽ എം. ദാസ് തുടങ്ങിയവർ സമരത്തിനു നേതൃത്വത്തിനു നൽകി. സമരക്കാർ എത്തിയ ശേഷമാണു മൂവ്‌മെന്‍റ് രജിസ്റ്ററിൽ രേഖപ്പെടുത്തൽ ഉണ്ടായതെന്നും ഹാജർ ബുക്കിലെയും മൂവ്‌മെന്‍റ് രജിസ്റ്ററിലെയും ഒപ്പ് വ്യത്യസ്‌തമാണെന്നും സിപിഎം ആരോപിച്ചു. ഇക്കാര്യം ചൂണ്ടിക്കാട്ടി വിദ്യാഭ്യാസ മന്ത്രിക്കു പരാതി അയച്ചു. സ്കൂളിൽ ഉണ്ടായിരുന്ന വനിതാ അധ്യാപകർ കാറിൽ പോകാൻ തുടങ്ങിയപ്പോൾ തടഞ്ഞെന്നും രണ്ട് അധ്യാപകർ മരുന്നു വാങ്ങാനായി ബൈക്കിലാണ് പോയതെന്നും ഉച്ചയ്ക്കുശേഷം ഇരുവരും ഒപ്പിട്ടില്ലെന്നും സ്കൂളിലെ മറ്റ് അധ്യാപകർ പറഞ്ഞു.

ജില്ലയിൽ സർക്കാർ മന്ദിരങ്ങൾ പലതും അത്യാസന്ന നിലയിൽ

ആലപ്പുഴ: കെഎസ്ആര്‍ടിസി ആലപ്പുഴ ഡിപ്പോയുടെ പതിറ്റാണ്ടുകള്‍ പഴക്കമുള്ള കെട്ടിടത്തിന്‍റെ മേല്‍ക്കൂരയിലെ കോണ്‍ക്രീറ്റ് പലയിടങ്ങളിലും ഇളകി വീണു കമ്പി തെളിഞ്ഞു നില്‍ക്കുന്നു. ഒന്നാം നിലയില്‍ മുന്‍പ് ഓഫീസുകള്‍ പ്രവര്‍ത്തിച്ചിരുന്ന ഭാഗത്തേക്കുള്ള പടിക്കെട്ടിനു മുകളില്‍ കമ്പി തെളിഞ്ഞു. ഇവിടെ കോണ്‍ക്രീറ്റിലും ഭിത്തിയിലും ജലം ഊര്‍ന്നിറങ്ങി ചോര്‍ച്ചയുമായി. മേല്‍ക്കൂരയില്‍ ചെടികളും മരങ്ങളും പിടിച്ചു. ഡിപ്പോയുടെ പ്രധാന കെട്ടിടത്തിനു പുറത്താണു മിക്കവരും ബസ് കാത്തു നില്‍ക്കുന്നത്. ഇത് ഒരു ഓഫീസിലെ മാത്രം പ്രശ്‌നമല്ല, പല സര്‍ക്കാര്‍ സ്ഥാപനങ്ങളിലും എപ്പോള്‍ വേണമെങ്കിലും ഇടിഞ്ഞു വീഴാവുന്ന, ചോര്‍ന്നൊലിക്കുന്ന കെട്ടിടങ്ങളിലാണു ജീവനക്കാര്‍ ജോലി ചെയ്യുന്നത്. ചിലയിടങ്ങളില്‍ പലതവണ പരാതി ഉന്നയിച്ചിട്ടും ഫലമില്ലാതെ വരുന്നതോടെ എല്ലാം സഹിച്ചു കഴിയേണ്ട സ്ഥിതിയിലാണ് ഉദ്യോഗസ്ഥര്‍. കെട്ടിടത്തിന്‍റെ തെക്കുവശത്ത് യാത്രികര്‍ ബസ് കാത്തുനില്‍ക്കുന്ന ഭാഗത്തും മേല്‍ക്കൂര ഇളകിയിട്ടുണ്ട്. ഇവിടെ കെട്ടിടം ദ്രവിച്ച സ്ഥിതിയിലാണ്. ശക്തമായ മഴയും കാറ്റുമുണ്ടായാല്‍ നിലംപൊത്താമെന്നതാണ് അവസ്ഥ. കെട്ടിടത്തിന്‍റെ ശോചനീയാവസ്ഥ കാരണം ഓഫിസ് പ്രവര്‍ത്തനങ്ങള്‍ സമീപത്തെ കെട്ടിടത്തിലേക്കു മാറ്റിയെന്നതു ജീവനക്കാര്‍ക്ക് ആശ്വാസമാണ്. എന്നാല്‍ ഇതേ കെട്ടിടത്തിനു താഴെ നില്‍ക്കേണ്ടി വരുന്ന യാത്രികര്‍ ഇപ്പോഴും അപകടാവസ്ഥയില്‍തന്നെ. വിണ്ടുകീറി കായംകുളം താലൂക്ക് ആശുപത്രി കെട്ടിടത്തിനും ബലക്ഷയം. കെട്ടിടത്തിന്‍റെ വിവിധ ഭാഗങ്ങളില്‍ മരങ്ങളും കുറ്റിച്ചെടികളും വളര്‍ന്നു ഭിത്തി വിണ്ടുകീറി. ആശുപത്രി ശുചിത്വത്തിനും മികച്ച പരിചരണത്തിനുമുള്ള കായകല്‍പ ഉള്‍പ്പെടെയുള്ള അവാര്‍ഡുകള്‍ നേടുമ്പോഴാണു മറുവശത്തു രോഗികള്‍ക്കും ജീവനക്കാര്‍ക്കും ഭീതിയുണ്ടാകും വിധം ഭിത്തി വിണ്ടുകീറുന്നത്. 20 വര്‍ഷം മാത്രം പഴക്കമുള്ള കെട്ടിടത്തില്‍ നൂറു കിടക്കകളുള്ള വാര്‍ഡിന്‍റെ വശങ്ങളിലാണു മരത്തിന്‍റെ വേര് ഇറങ്ങി പൊട്ടിപ്പൊളിയുന്നത്. ഡോക്ടര്‍മാരും നഴ്‌സുമാരും രോഗികളും കൂട്ടിരിപ്പുകാരും ഉള്‍പ്പെടെ തിങ്ങിനിറഞ്ഞു നില്‍ക്കുന്ന കാഴ്ചയാണ് മിക്കപ്പോഴും. പുരസ്‌കാരങ്ങള്‍ നേടുന്നതിനുള്ള മത്സര ഓട്ടത്തില്‍ പുറംമിനുക്കല്‍ മാത്രമാണു നടക്കുന്നതെന്ന് ആക്ഷേപമുണ്ട്. മരത്തിന്‍റെ ശിഖരങ്ങള്‍ മാറ്റുന്നതല്ലാതെ വേരോടെ പിഴുതു മാറ്റാന്‍ നടപടികള്‍ സ്വീകരിക്കാത്തതിനാല്‍ പ്രശ്‌നത്തിനു ശാശ്വത പരിഹാരമകുന്നില്ല. പൊളിഞ്ഞ നില ഒരു സര്‍ക്കാര്‍ ഓഫീസിന്‍റെ നിര്‍മാണത്തിന്‍റെ പേരില്‍ മറ്റൊരു ഓഫീസ് അപകടാവസ്ഥയിലായ കഥയാണു മാവേലിക്കര സബ് റജിസ്ട്രാര്‍ ഓഫീസിന്‍റേത്. തമ്മില്‍ ബന്ധിപ്പിച്ച നിലയിലായിരുന്നു മാവേലിക്കര താലൂക്ക് ഓഫീസും സബ് റജിസ്ട്രാര്‍ ഓഫീസും. പുതിയ കെട്ടിടം പണിയാനായി താലൂക്ക് ഓഫിസ് പൊളിച്ചതോടെ, സബ് റജിസ്ട്രാര്‍ ഓഫീസ് കെട്ടിട ഭാഗത്തിന്‍റെ പകുതി പൊളിഞ്ഞ നിലയിലായി. കെട്ടിടത്തിന്‍റെ പല ഭാഗങ്ങളിലും മേല്‍ക്കൂര ഇടിഞ്ഞു തുടങ്ങി. ഭിത്തിയിലെ ടൈലുകള്‍ ഇളകി വീഴുന്ന അവസ്ഥയുമുണ്ട്. താലൂക്ക് ഓഫീസ് നിര്‍മാണത്തിനായി ഭൂമി വേര്‍തിരിച്ചതോടെ സബ് റജിസ്ട്രാര്‍ ഓഫിസിലേക്കുള്ള പ്രധാന വഴിയും അടഞ്ഞു. ഇതോടെ പടിഞ്ഞാറു വശത്തുള്ള വഴിയിലൂടെ മാത്രമേ ഓഫീസില്‍ എത്താനാകൂ. വണ്ടിയെത്തില്ലെന്നതിനാല്‍ പ്രായമായവര്‍ക്ക് എത്താനും ബുദ്ധിമുട്ടായി. ഇടിഞ്ഞു വീണു ചേര്‍ത്തല താലൂക്ക് ഓഫീസില്‍ കാലപ്പഴക്കംകൊണ്ട് ഇടിഞ്ഞു വീഴാറായ ഓഫീസ് കെട്ടിടത്തിനുള്ളില്‍ ജീവന്‍ പണയംവച്ചാണ് 70ലേറെ ജീവനക്കാര്‍ ജോലി ചെയ്യുന്നത്. മഴ പെയ്താല്‍ ചോര്‍ന്നൊലിക്കുന്ന കെട്ടിടത്തില്‍ ഫയലുകള്‍ സൂക്ഷിക്കാന്‍പോലും ജീവനക്കാര്‍ ബുദ്ധിമുട്ടുകയാണ്. വര്‍ഷങ്ങള്‍ പഴക്കമുള്ള കെട്ടിടം ഭിത്തികളില്‍ വിള്ളല്‍ വീണും ഓടുകള്‍ ഇളകിയും ഇടിഞ്ഞുവീണു തുടങ്ങി. കഴിഞ്ഞ വര്‍ഷം ഓഫീസിന്‍റെ വടക്കുഭാഗത്തുള്ള കെട്ടിടത്തിന്‍റെ ഒരു ഭാഗം ഇടിഞ്ഞു വീണിരുന്നു. വടക്കുഭാഗത്തുള്ള കെട്ടിടങ്ങളില്‍ ജോലി ചെയ്യാന്‍ കഴിയാത്തിനാല്‍ ഓഫീസ് പ്രവര്‍ത്തനം തെക്കു ഭാഗത്തുള്ള കെട്ടിടത്തിലേക്ക് മാറ്റിയിരുന്നു. ഓഫീസിന്‍റെ പല ഭാഗങ്ങളും ഇടിഞ്ഞു വീണതോടെ സബ് ട്രഷറി ഓഫീസ് ഇവിടെനിന്നു മാറ്റി. മരപ്പട്ടി ശല്യവും രൂക്ഷമാണ്. വര്‍ഷങ്ങള്‍ക്കു മുന്‍പു താലൂക്ക് ഓഫീസ് കോംപ്ലക്‌സ് നിര്‍മിക്കാന്‍ ഫണ്ട് അനുവദിച്ചെങ്കിലും താത്കാലികമായി പ്രവര്‍ത്തിക്കാന്‍ സൗകര്യം ഒരുക്കാന്‍ കഴിയാതെ വന്നതോടെ കോംപ്ലക്‌സ് നിര്‍മാണവും മുടങ്ങി. മറ്റൊരു സ്ഥലത്ത് ഓഫീസ് പ്രവര്‍ത്തിപ്പിക്കാന്‍ സൗകര്യം ഒരുക്കണമെന്നാണു ജീവനക്കാരുടെ ആവശ്യം.

ഇന്നോവകാറിൽ മരണപ്പാച്ചിലിൽ യുവാക്കളുടെ സംഘം; നാട്ടുകാരുടെ സഹായത്തോടെ പോലീസ് വലയിലാക്കി

അമ്പലപ്പുഴ: അമിത വേഗത്തിൽ യാത്ര ചെയ്ത് നിരവധി വാഹനങ്ങളിൽ തട്ടിയ ഇന്നോവ കാറിൽ സഞ്ചരിച്ച യുവാക്കളുടെ സംഘത്തെ നാട്ടുകാരുടെ സഹായത്തോടെ പോലീസ് പിടികൂടി. കെഎൽ 01 സി എച്ച്-7629 എന്ന രജിസ്റ്റർ നമ്പരിലുള്ള ഇന്നോവ കാറാണ് അമ്പലപ്പുഴ പോലീസ് പിടികൂടിയത്. കാറിലുണ്ടായിരുന്ന കൊല്ലം കരുനാഗപ്പള്ളി സ്വദേശികളായ ആലിൻകടവ് പുന്നമൂട്ടിൽ അഖിൽ (26), ദിലീപ് ഭവനത്തിൽ സഞ്ജയ് (25), പ്രവീൺ നിവാസിൽ പ്രവീൺ (25), ഓച്ചിറ ചങ്ങംകുളങ്ങര ഗൗരി ഭവനിൽ ആദർശ് (23), ഷിയാസ് മൻസിലിൽ നിയാസ് (22), കാട്ടിൽ കടവ് തറയിൽ വീട്ടിൽ സൂരജ് (21) എന്നിവരെയും പോലീസ് കസ്റ്റഡിയിലെടുത്തു. ഞായറാഴ്ച രാത്രി 11.30നായിരുന്നു സംഭവം. സുഹൃത്തുകളായ ഇവർ സഞ്ജയിയെ വിദേശത്തേക്ക് യാത്രയാക്കാൻ കൊച്ചിയിലേക്ക് പോകുകയായിരുന്നു. വലിയഴീക്കൽ പാലം കടന്ന് തീരദേശ റോഡുവഴി എത്തിയ ഇവർ സഞ്ചരിച്ച വാഹനം എതിരേ വന്ന മാരുതിക്കാറിൽ തട്ടി മാരുതിയുടെ ഒരു വശത്തെ കണ്ണാടി തകർന്നു. ഇതിനുള്ള നഷ്ടപരിഹാരം നൽകി യാത്ര തുടർന്നതായി പോലീസ് പറഞ്ഞു. വീണ്ടുമുള്ള യാത്രയ്ക്കിടെ സ്കൂട്ടറിൽ തട്ടിയെങ്കിലും ഇവർ നിർത്താതെ പോയതായി നാട്ടുകാർ പറയുന്നു. ഇതിനിടെ സമീപത്തെ കടയിൽ നിർത്തി കുടിവെള്ളം വാങ്ങുന്നതിനിടെ നാട്ടുകാരുമായി വാക്കേറ്റമുണ്ടായി. നാട്ടുകാരെ അസഭ്യം പറഞ്ഞശേഷം വേഗത്തിൽ വാഹനമോടിച്ചുപോയ ഇവരുടെ പിന്നാലെ പല്ലന സ്വദേശികളായ ഒരു സംഘം നാട്ടുകാർ കാറിലും ഇരുചക്ര വാഹനങ്ങളിലുമായി ഇവരെ പിൻതുടർന്നു. വിവരമറിഞ്ഞ് അമ്പലപ്പുഴയിൽ വാഹനം തടയാൻനിന്ന പോലീസിനെ വെട്ടിച്ച് ഇന്നോവ കാർ മുന്നോട്ടു പാഞ്ഞു. പോലീസ് ജീപ്പിന്‍റെ വശത്തെ കണ്ണാടി, ബംന്പർ എന്നിവ തകർത്ത് അമിത വേഗത്തിൽ മുമ്പോട്ടു പാഞ്ഞ കാർ കാക്കാഴം റയിൽവേ മേൽപ്പാലത്തിന്‍റെ വലത് ഫുട്പാത്തിൽ ഇടിച്ചു കയറി. വലതുവശം പിൻഭാഗത്തെ ടയർ പൊട്ടിത്തെറിച്ചു. പിന്നീട് അഞ്ച് കിലോമീറ്ററോളം മുന്നോട്ട് ഓടിയ കാർ പുന്നപ്ര പോലീസ് സ്റ്റേഷന് സമീപത്തുനിന്ന് കിഴക്കോട്ട് പോയി കളരി ക്ഷേത്രത്തിന് സമീപത്തെ ആളൊഴിഞ്ഞ പറമ്പിലാണ് നിർത്തിയത്. കാറിൽനിന്ന് ഓടി രക്ഷപ്പെടാൻ ശ്രമിച്ച മൂന്നു പേരെ നാട്ടുകാർ പിടികൂടി പുന്നപ്ര സ്റ്റേഷനിലെത്തിച്ചു. മറ്റു മൂന്നുപേരെ പിന്നാലെയെത്തിയ അമ്പലപ്പുഴ പോലീസും പിടികൂടി. അഖിലാണ് കാർ ഓടിച്ചതെന്ന് പോലീസ് പറഞ്ഞു. യുവാക്കൾക്കെതിരേ പൊതുമുതൽ നശിപ്പിച്ചതിനുൾപ്പടെ കേസെടുത്തു. അമ്പലപ്പുഴ കോടതിയിൽ ഹാജരാക്കിയ പ്രതികളെ റിമാൻഡു ചെയ്തു.

ധന്യൻ മാർ ഈവാനിയോസ് ഓർമപ്പെരുന്നാൾ: ജന്മഗൃഹത്തിൽനിന്നു തീർഥാടന പദയാത്ര ആരംഭിച്ചു

മാവേലിക്കര: മലങ്കര കത്തോലിക്കാ സഭയുടെ പ്രഥമ മെത്രാപ്പോലീത്തയും മലങ്കര പുനരൈക്യ പ്രസ്ഥാനത്തിന്‍റെ ശില്പിയുമായ ധന്യൻ ആർച്ച്ബിഷപ് മാർ ഈവാനിയോസ് തിരുമേനിയുടെ 72-ാം ഓർമപ്പെരുന്നാളിന് മുന്നോടിയായി ജന്മ ഗൃഹത്തിൽനിന്നുള്ള തീർഥാടന പദയാത്ര ആരംഭിച്ചു. മാർ ഈവാനിയോസ് തിരുമേനിയുടെ ജന്മഗൃഹമായ മാവേലിക്കര പുതിയകാവ് പണിക്കരുവീട്ടിൽനിന്നു തിരുവനന്തപുരം പട്ടത്തെ കബറിങ്കലിലേക്കുള്ള തീർഥാടന പദയാത്രയാണ് ഇന്നലെ രാവിലെ ആരംഭിച്ചത്. മാർ ഈവാനിയോസ് തിരുമേനിയുടെ മാതൃ ഇടവകയായ പുതിയകാവ് സെന്‍റ് ജോസഫ് മലങ്കര സുറിയാനി കത്തോലിക്കാ ദേവാലയത്തിൽ നടന്ന വിശുദ്ധ കുർബാനയ്ക്ക് മാവേലിക്കര രൂപതാധ്യക്ഷൻ ബിഷപ് ഡോ. മാത്യൂസ് മാർ പോളികാർപ്പോസ് മെത്രാപ്പോലീത്ത മുഖ്യ കാർമികത്വം വഹിച്ചു . തുടർന്ന് എംസിവൈഎം ഭദ്രാസന പ്രസിഡന്‍റ് റോഷൻ വർഗീസിന് മാത്യൂസ് മാർ പോളികാർപ്പോസ് മെത്രാപ്പോലീത്ത വെള്ളിക്കുരിശും എംസിവൈഎം ഭദ്രാസന ജനറൽ സെക്രട്ടറി ജോബിൻ ജി. ജോണിന് ഡോ. ജോഷ്വാ മാർ ഇഗ്നാത്തിയോസ് മെത്രാപ്പോലീത്ത പതാകയും കൈമാറിയതോടെ പദയാത്ര പ്രയാണം ആരംഭിച്ചു. മാവേലിക്കര നഗരസഭാ ചെയർമാൻ നൈനാൻ സി. കുറ്റിശേരി, ഭദ്രാസന വികാരി ജനറൽ ഫാ. ജോബ് കല്ലുവിളയിൽ, യൂഹാനോൻ പുത്തൻവീട്ടിൽ റമ്പാൻ, ഫാ. കാലേബ് ചെറുവള്ളി, ഫാജോൺ പേരുപറമ്പിൽ എന്നിവർ പങ്കെടുത്തു. എംസിവൈഎം മാവേലിക്കര ഭദ്രാസന സമിതിയുടെ നേതൃത്വത്തിലാണ് പദയാത്ര നടത്തുന്നത്. കറ്റാനം , കടമ്പനാട് വഴി കൊല്ലം വൈദിക ജില്ലയുടെ പദയാത്ര സംഘത്തോടൊപ്പം ചേർന്ന്, പുത്തൂർ കുണ്ടറ, കല്ലുവാതുക്കൽ, ആറ്റിങ്ങൽ വഴി ദേശീയ പാതയിലൂടെ വിവിധ ഇടവകകൾ സന്ദർശിച്ച് 14ന് വൈകുന്നേരം ആറിന് പദയാത്ര പട്ടം സെന്‍റ് മേരീസ് കത്തീഡ്രലിൽ എത്തിച്ചേരും.

ദേശീയ പണിമുടക്ക്: ജില്ല നിശ്ചലമായി

ആലപ്പുഴ: കേന്ദ്രസര്‍ക്കാരിന്‍റെ തൊഴിലാളിവിരുദ്ധ-ജനവിരുദ്ധ നയങ്ങള്‍ക്കെതിരേ രാജ്യത്തെ സംയുക്ത തൊഴിലാളി സംഘടനകള്‍ നടത്തുന്ന ദേശീയ പണിമുടക്കില്‍ ജില്ല നിശ്ചലമായി. ബിഎംഎസ് ഒഴികെയുള്ള രാജ്യത്തെ 10 തൊഴിലാളി സംഘടനകള്‍ ചേര്‍ന്നാണ് ദേശീയ പണിമുടക്ക് പ്രഖ്യാപിച്ചത്. തൊഴിലാളികളുടെ അവകാശങ്ങളെ ഹനിക്കുന്ന പുതിയ തൊഴില്‍ച്ചട്ടങ്ങള്‍ റദ്ദാക്കണമെന്നാണ് തൊഴിലാളികളുടെ പ്രധാന ആവശ്യം. തൊഴില്‍സാമൂഹ്യസുരക്ഷയും മെച്ചപ്പെട്ട വേതനവും ആനുകൂല്യങ്ങളും ഉറപ്പാക്കണമെന്ന ആവശ്യങ്ങള്‍ കേന്ദ്രസര്‍ക്കാര്‍ അവഗഗണിച്ചതിനെ തുടര്‍ന്നാണ് തൊഴിലാളി സംഘടനകളുടെ സംയുക്ത സമരസമിതി പണിമുടക്കിലേക്ക് നീങ്ങിയത്. സിഐടിയു, ഐഎന്‍ടിയുസി, എഐടിയുസി, എച്ച്എംഎസ്, എസ്ഇഡബ്ല്യുഎ, എല്‍പിഎഫ്, യുടിയുസി എന്നിവ അടക്കമുള്ള തൊഴിലാളി സംഘടനകളുടെ സംയുക്ത സമരസമിതിയാണ് ദേശീയ പണിമുടക്ക് പ്രഖ്യാപിച്ചിരിക്കുന്നത്. സംയുക്ത കിസാന്‍ മോര്‍ച്ച, റൂറല്‍ വര്‍ക്കര്‍ യൂണിയന്‍, റെയില്‍വേ, എന്‍എംഡിസി ലിമിറ്റഡ്, സ്റ്റീല്‍ വ്യവസായം തുടങ്ങിയ പൊതുമേഖലയിലെ തൊഴിലാളികള്‍ തുടങ്ങിയവര്‍ പണിമുടക്കിന് പിന്തുണ പ്രഖ്യാപിച്ചിട്ടുണ്ട്. പാര്‍ലമെന്‍റ് പാസാക്കിയ നാല് പുതിയ തൊഴില്‍ നിയമങ്ങളോടുള്ള തൊഴിലാളി സംഘടനകളുടെ എതിര്‍പ്പ് ഉന്നയിച്ചാണ് ദേശീയ പണിമുടക്ക് പ്രഖ്യാപിച്ചിരിക്കുന്നത്. തൊഴിലാളി സംഘടനകളെ ഇല്ലാതാക്കുകയും, ജോലി സമയം വര്‍ധിപ്പിക്കുകയും തൊഴില്‍ നിയമങ്ങള്‍ ലംഘിക്കുന്ന തൊഴിലുടമകളെ പിഴകളില്‍നിന്ന് സംരക്ഷിക്കുകയും തൊഴിലാളികളുടെ അവകാശങ്ങളെ ദുര്‍ബലപ്പെടുത്തുകയും ചെയ്യുന്നതാണ് നാല് പുതിയ തൊഴില്‍ നിയമങ്ങളെന്നാണ് ട്രേഡ് യൂണിയനുകള്‍ ചൂണ്ടിക്കാണിക്കുന്നത്. ഇതിന് പുറമേ പൊതുമേഖലാ സ്ഥാപനങ്ങളുടെ സ്വകാര്യവത്കരണം, ജോലികള്‍ക്ക് പുറംകരാര്‍ കൊടുക്കുന്നത്, കരാര്‍ തൊഴിലാളികളെ നിയമിക്കുന്നത് അടക്കമുള്ള വിഷയങ്ങളും പണിമുടക്കുന്ന തൊഴിലാളി സംഘടനകള്‍ ചൂണ്ടിക്കാണിക്കുന്നുണ്ട്. ഈ നീക്കം തൊഴില്‍ സുരക്ഷയ്ക്കും ന്യായമായ വേതനത്തിനും ഭീഷണിയാണെന്നാണ് തൊഴിലാളി സംഘടനകള്‍ പറയുന്നത്. ലോക്ക് ഡൗണിനു സമാനം ആലപ്പുഴ ജില്ലയില്‍ പണിമുടക്ക് പൂര്‍ണമായിരുന്നു. വിരലിലെണ്ണാവുന്ന സര്‍വീസുകള്‍ മാത്രമാണ് കെഎസ്ആര്‍ടിസി നടത്തിയത്. ആലപ്പുഴ കെഎസ്ആര്‍ടിസി ബസ് സ്റ്റാന്‍ഡ് ആളൊഴിഞ്ഞ നിലയിലായിരുന്നു. ഗതാഗതം, ഇന്‍ഷ്വറന്‍സ്, റെയില്‍വേ, തപാല്‍, ബാങ്കിംഗ്, വൈദ്യുതി, ഉരുക്ക്, ടെലികോം മേഖലകളിലെ തൊഴിലാളികള്‍,വിവിധ സര്‍ക്കാര്‍ ജീവനക്കാര്‍, ആശാ വര്‍ക്കര്‍മാര്‍, അങ്കണവാടി ജീവനക്കാര്‍, സ്കൂൾ ഉച്ചഭക്ഷണ പാചക തൊഴിലാളികള്‍, ചെറുകിട കച്ചവടക്കാര്‍, ഓട്ടോടാക്സി ഡ്രൈവര്‍മാര്‍, ബീഡി തൊഴിലാളികള്‍ എന്നിവരും പണിമുടക്കില്‍ അണിചേര്‍ന്നതോടെ ജില്ല കോവിഡ് കാലത്തെ ലോക്ക് ഡൗണിനു സമാനമായിരുന്നു. ആശുപത്രി, മെഡിക്കല്‍ സ്റ്റോര്‍, ആംബുലന്‍സ്, മാധ്യമസ്ഥാപനം, പാല്‍ വിതരണം അടക്കമുള്ള അവശ്യസര്‍വീസുകളെ ദേശീയ പണിമുടക്കില്‍നിന്ന് ഒഴിവാക്കിയിരുന്നു. കൂടാതെ ആശുപത്രി, റെയില്‍വേ സ്റ്റേഷന്‍, വിമാനത്താവളം എന്നിവിടങ്ങളിലേക്കുളള ഗതാഗതത്തെയും മുന്‍കൂട്ടി നിശ്ചയിച്ച വിവാഹം, ടൂറിസം എന്നിവയെയും പണിമുടക്കില്‍നിന്ന് ഒഴിവാക്കിയിരുന്നെങ്കിലും ബഹുഭൂരിപക്ഷം പരിപാടികളും ചടങ്ങുകളും മാറ്റി വയ്ക്കുകയോ റദ്ദാക്കുകയോ ചെയ്തു.

പണിമുടക്കിൽ തീരദേശ മേഖല പൂർണമായും സ്തംഭിച്ചു

അമ്പലപ്പുഴ: കേന്ദ്ര സർക്കാരിന്‍റെ തൊഴിലാളിവിരുദ്ധ നയങ്ങൾക്കെതിരെ പ്രതിപക്ഷ ട്രേഡ് യൂണിയനുകളുടെ നേതൃത്വത്തിൽ 24 മണിക്കൂർ ബന്ദിൽ തീരദേശ മേഖല പൂർണ്ണമായും സ്തംഭിച്ചു. ചാകര പ്രദേശമായ തോട്ടപ്പള്ളി ഹാർബറിൽ നിന്ന് ഭൂരിഭാഗം വള്ളങ്ങളും കടലിലിറക്കിയില്ല. ഏതാനും ചില വള്ളങ്ങൾ പോയെങ്കിലും മൽസ്യ മൊന്നും ലഭിക്കാതെ രാവിലെ തന്നെ കരയണഞ്ഞു . പുറക്കാട്, പുന്തല, വളഞ്ഞവഴി, പുന്നപ്ര , പറവൂർ, വാടക്കൽ തീരങ്ങളിലെ നൂറുകണക്കിനു പൊന്തുകളും കരയിൽ തന്നെ സ്ഥാനം പിടിച്ചു. ഇതോടെ മൽസ്യ ലേലം നടക്കുന്ന തോട്ടപ്പള്ളി ഹാർബറും, പുന്നാപ്ര ഫിഷ് ലാൻ്റ് സെൻ്ററും ശൂന്യമായി മൽസ്യ വാഹനങ്ങളും നിലത്തിറങ്ങിയില്ല. ഐ സ്ഫാക്റ്ററികളും പ്രവർത്തിച്ചില്ല. തൃക്കുന്നപ്പുഴക്കും പുന്നപ്രക്കുമിടയിൽ നിരവധി ചെമ്മീൻ പീലിംഗ് സംസ്ക്കരണശാലകൾ ഉണ്ടെങ്കിലും അടഞ്ഞുകിടന്നു ആയിരക്കണക്കിനു സ്ത്രീ തൊഴിലാളികളാണ് ഇവിടം കൊണ്ട് ഉപജീവനം നടത്തുന്നത്. ദേശിയ പാതയോരത്തെ മീൻ തട്ടുകളും പ്രവർത്തിച്ചില്ല. മൽസ്യബന്ധനം നിലച്ചതോടെ ഹാർബറുകളിലെ ചെറുകിട ചായക്കടകൾമുതൽ വെള്ളക്കടകൾവരെ അടഞ്ഞുകിടന്നു. ചിലയിടങ്ങളിൽ തുറന്ന കടകൾ പകൽ 11 ഓടെ സമരാനുകൂലികൾ അടപ്പിച്ചു.

ദേശീയ പണിമുടക്ക്: ചേര്‍ത്തലയില്‍ തൊഴിലാളി സംഘടനകള്‍ പ്രകടനവും സമ്മേളനവും നടത്തി

ചേര്‍ത്തല: ദേശീയപണമുടക്കിന്‍റെ ഭാഗമായി ചേര്‍ത്തലയില്‍ തൊഴിലാളി സംഘനടകള്‍ പ്രകടനവും സമ്മേളനവും നടത്തി. സംയുക്ത ട്രേഡ് യൂണിയന്‍ ചേര്‍ത്തല മേഖലാ സമിതി പ്രകടനത്തിനു ശേഷം ചേര്‍ത്തല ബിഎസ്എന്‍എല്‍ ഓഫീസിനു മുന്നില്‍ നടത്തിയ സമ്മേളനം എഐടിയുസി സംസ്ഥാന പ്രസിഡന്‍റ് ടി.ജെ. ആഞ്ചലോസ് ഉദ്ഘാടനം ചെയ്തു. ടിയുസിഐ ജില്ലാ സെക്രട്ടറി കെ.വി. ഉദയഭാനു അധ്യക്ഷനായി. നേതാക്കളായ കെ. പ്രസാദ്, എന്‍.എസ്. ശിവപ്രസാദ്, പി.എസ്. ഷാജി, പി. ഷാജിമോഹന്‍ തുടങ്ങിയവര്‍ സംസാരിച്ചു പ്രകടനത്തിന് നേതാക്കളായ എ.പി. പ്രകാശന്‍, കെ.പി. പ്രതാപന്‍, വര്‍ക്കി പുന്നക്കല്‍, കെ. ഉമയാക്ഷന്‍, എ.എസ്. സാബു, ഷേര്‍ളി ഭാര്‍ഗവന്‍, കെ.വി. ചന്ദ്രബാബു, ടി.എസ്. അജയകുമാര്‍, പി.ഐ. ഹാരിസ്, ടി.എം. ഷെരീഫ്, കെ.വി. സന്തോഷ് തുടങ്ങിയവര്‍ നേതൃത്വം നല്‍കി. യുഡിടിഎഫ് നേതൃത്വത്തില്‍ യുഡിടിഎഫ് നേതൃത്വത്തില്‍ പ്രകടനവും സമ്മേളനവും കെപിസിസി ജനറല്‍ സെക്രട്ടറി എഎ. ഷുക്കൂര്‍ ഉദ്ഘാടനം ചെയ്തു. ഐഎന്‍ടിയുസി മേഖലാ പ്രസിഡന്‍റ് ജി.സുരേഷ്ബാബു അധ്യക്ഷനായി. കെപിസിസി സെക്രട്ടറി എസ്. ശരത് മുഖ്യപ്രഭാഷണം നടത്തി. നേതാക്കളായ സിറിയക്ക് കാവില്‍, വിഎസ്. ജബ്ബാര്‍, പി. ജയകുമാര്‍, കെ.വി. സോളമന്‍, സുബ്രഹ്‌മണ്യദാസ്, സി.ഡി. ശങ്കര്‍, ജി. സോമകുമാര്‍, പി.ആര്‍. രാജീവ്, കെ.സി. ആന്‍റണി, ടി.എസ്. രഘുവരന്‍, സജികുര്യാക്കോസ്, എന്‍. ശ്രീകുമാര്‍, കല്ലാപുറം സാബു തുടങ്ങിയവര്‍ സംസാരിച്ചു. സമാപന സമ്മേളനം കെപിസിസി നിര്‍വാഹക സമിതി മുന്‍ അംഗം കെ.ആര്‍. രാജേന്ദ്ര പ്രസാദ് ഉദ്ഘാടനം ചെയ്തു. ജി. വിശ്വംഭരന്‍ നായര്‍ അധ്യക്ഷനായി.

പൊതുപണിമുടക്ക്: എടത്വയില്‍ ഹര്‍ത്താല്‍ പ്രതീതി

എടത്വ: കേന്ദ്ര സര്‍ക്കാരിന്‍റെ തൊഴിലാളി കര്‍ഷകദ്രോഹ നയങ്ങളില്‍ പ്രതിഷേധിച്ച് സംയുക്ത തൊഴിലാളി സംഘടനകള്‍ ആഹ്വാനം ചെയ്ത പൊതുപണിമുടക്ക് എടത്വയില്‍ ഹര്‍ത്താല്‍ പ്രതീതിയുണ്ടാക്കി. കെഎസ്ആര്‍ടിസി ബസ് സര്‍വീസ് നിലച്ചു. കടകമ്പോളങ്ങള്‍ അടഞ്ഞുകിടന്നു. വിദ്യാഭ്യാസ സ്ഥാപനങ്ങള്‍ പ്രവര്‍ത്തിച്ചില്ല. സര്‍ക്കര്‍- പൊതുമേഖലാ സ്ഥാപനങ്ങള്‍, ബാങ്കുകള്‍ എന്നിവയും തുറന്നില്ല. നിര്‍മാണ മേഖലയിലെ തൊഴില്‍ശാലകളും പ്രവര്‍ത്തിച്ചില്ല. കെഎസ്ആര്‍ടിസി എടത്വ ഡിപ്പോയില്‍നിന്ന് രാവിലെ രണ്ട് ട്രിപ്പുകള്‍ നടത്തിയെങ്കിലും പിന്നീട് സര്‍വീസുകള്‍ മുടങ്ങുന്ന കാഴ്ചയാണുണ്ടായത്. പ്രതിദിനം 22 ഷെഡ്യൂള്‍ഡുകളാണ് എടത്വ ഡിപ്പോയല്‍നിന്ന് നടന്നിരുന്നത്. പണിമുടക്ക് ചമ്പക്കുളം മൂലം വള്ളംകളിയെ ബാധിച്ചരുന്നു. അപ്പര്‍ കുട്ടനാട്ടില്‍നിന്നുള്ള വള്ളംകളി പ്രേമികള്‍ സര്‍വീസ് ഇല്ലാത്തതിനാല്‍ ഏറെ വലഞ്ഞു. സ്വകാര്യ വാഹനത്തിലും വള്ളത്തിലുമാണ് ചമ്പക്കുളം വള്ളംകളി കാണാന്‍ കാണികള്‍ എത്തിയത്. ഓട്ടോ, ടാക്‌സി, ലോറി ഡ്രൈവര്‍മാരും പണിമുടക്കില്‍ പങ്കെടുത്തു. എടത്വയിലും പരിസര പഞ്ചായത്തുകളിലും കടകമ്പോളങ്ങള്‍ പൂര്‍ണമായി അടഞ്ഞുകിടന്നു. ഏതാനും മെഡിക്കല്‍ സ്റ്റോര്‍ മാത്രമാണ് തുറന്ന് പ്രവര്‍ത്തിച്ചത്. സര്‍ക്കാര്‍-എയ്ഡഡ് സ്‌കൂളുകള്‍ക്ക് അവധി നല്‍കിയില്ലെങ്കിലും പഠനം നടന്നില്ല. ചില സ്‌കൂളുകളില്‍ ഏതാനും അധ്യാപകര്‍ എത്തിയെങ്കിലും ഒറ്റപ്പെട്ട വിദ്യാര്‍ഥികള്‍ മാത്രമാണ് എത്തിയത്. സ്വകാര്യ മാനേജ്‌മെന്‍റ് സ്‌കൂളിന് ചൊവ്വാഴ്ചതന്നെ അവധി നല്‍കിയിരുന്നു. പൊതുനിരത്തുകളില്‍ സ്വകാര്യ വാഹനങ്ങൾ കുറഞ്ഞതിനാല്‍ പൊതുജനങ്ങളും പുറത്തിറങ്ങാന്‍ മടിച്ചു. പൊതുപണിമുടക്കിന് ആഹ്വാനം ചെയ്‌തെങ്കിലും ഹര്‍ത്താലിന്‍റെ പ്രതീതിയാണ് എങ്ങും പ്രകടമായത്.

മൂലം വള്ളംകളി: ചെറുതന രാജപ്രമുഖൻ

മങ്കൊമ്പ്: ചമ്പക്കുളത്താറ്റിൽ ഇന്നലെ നടന്ന മൂലം ജലോത്സവത്തിൽ ന്യൂ ചെറുതന ബോട്ട് ക്ലബ്ബിന്‍റെ ചെറുതന പുത്തൻചുണ്ടൻ ജേതാവ്. വാശിയേറിയ ഫൈനൽ പോരാട്ടത്തിൽ ചമ്പക്കുളം ബോട്ട് ക്ലബ്ബിന്‍റെ ചമ്പക്കുളം ചുണ്ടനെ രണ്ടാം സ്ഥാനത്തേക്കു പിൻതള്ളിയാണ് ചെറുതന രാജപ്രമുഖൻ ട്രോഫി നേടിയത്. ഫൈനലിൽ അനായാസ വിജയമാണ് ചെറുതന ബോട്ട് ക്ലബ് തുഴഞ്ഞുനേടിയത്. എന്നാൽ ലൂസേഴ്‌സ് ഫൈനലിലാണ് ഇഞ്ചോടിഞ്ച് പോരാട്ടം നടന്നത്. നിരണം ബോട്ട് ക്ലബ്ബിന്‍റെ ആയാപറമ്പ് വലിയ ദിവാൻജിയാണ് മൂന്നാം സ്ഥാനം നേടിയത്. ചുണ്ടൻ വള്ളങ്ങളുടെ ലൂസേഴ്സ് ഫൈനലിലാണ് കാണികളെ ഏറ്റവുമധികം ആവേശഭരിതാരാക്കിയത്. കാണികളും തുഴക്കാരും ഒരേപോലെ ആകാംക്ഷയിലായ മത്സരത്തിൽ കൈനകരി യുബിസിയുടെ ആയാപറമ്പ് പാണ്ടി ഒന്നാം സ്ഥാനം നേടി. ആദ്യപാദ മൽസരങ്ങളിൽ രണ്ടാം സ്ഥാനത്തേക്ക് പിൻതള്ളപ്പെട്ടെങ്കിലും നടുഭാഗം ബോട്ട് ക്ലബ്ബിന്‍റെ നടുഭാഗം ചുണ്ടനും, യുബിസി കൈനകരിയുടെ നടുഭാഗവും ഇഞ്ചോടിഞ്ചു മത്സരമാണ് കാഴ്ചവച്ചത്. ആയാപറമ്പ് പാണ്ടി ഒന്നാമതും, നടുഭാഗം രണ്ടാമതായും ഫിനിഷ് ചെയ്തു. ചുണ്ടൻ വള്ളങ്ങളുടെ രണ്ടാം ഹീറ്റ്സ് മത്സരഫലം അസാധുവായതും കാണികളെ ആശങ്കയിലാക്കി. ആയാപറമ്പ് പാണ്ടിയും ചമ്പക്കുളം ചുണ്ടനും മത്സരത്തിനിടെ രണ്ടുതവണ ഒട്ടിച്ചേർന്നത് മൽസരത്തിന്‍റെ നിറംകെടുത്തി. തുടർന്ന് ജൂറി ഓഫ് അപ്പീൽ മത്സരം ഉപേക്ഷിക്കുകയും, വീണ്ടും നടത്താൻ തീരുമാനിക്കുകയും ചെയ്തു. എന്നാൽ ആയാപറമ്പ് പാണ്ടി ചുണ്ടൻ പിന്മാറിയതോടെ ഹീറ്റ്സിൽ ഒന്നാമതെത്തിയ ചമ്പക്കുളം ചുണ്ടൻ ഫൈനലിലേക്ക് യോഗ്യത നേടുകയായിരുന്നു. വെപ്പ് എ ഗ്രേഡ് വിഭാഗത്തിൽ കുമരകം ടൗൺ ബോട്ട് ക്ലബ്ബിന്‍റെ അമ്പലക്കടവൻ ഒന്നാം സ്ഥാനവും നടുവിലേപറമ്പിൽ കൾച്ചറൽ ഡെവലപ്മെന്‍റ് സെന്‍റർ ആൻഡ് സൊസൈറ്റിയുടെ നവജ്യോതി രണ്ടാം സ്ഥാനവും കാരിച്ചാൽ ചുണ്ടൻ ബോട്ട് ക്ലബ്ബിന്‍റെ മണലി മൂന്നാം സ്ഥാനവും കരസ്ഥമാക്കി. വെപ്പ് ബി ഗ്രേഡ് വിഭാഗത്തിൽ കൊണ്ടാക്കൽ ബ്ലോട്ട് ക്ലബ്ബിന്‍റെ പിജി കരിപ്പുഴ ജേതാക്കളായപ്പോൾ കൊടുപ്പുന്ന ബോട്ട് ക്ലബ്ബിന്‍റെ ചിറമേൽ തോട്ടുകടവൻ രണ്ടാം സ്ഥാനം നേടി. വൈശ്യംഭാഗം ബോട്ട് ക്ലബ്ബിന്‍റെ പുന്നത്രപുരയ്ക്കൽ മൂന്നാം സ്ഥാനത്തെത്തി. കൊടിക്കുന്നിൽ സുരേഷ് എംപി, തോമസ് കെ. തോമസ് എംഎൽഎ എന്നിവർ ചേർന്ന് സമ്മാനങ്ങൾ വിതരണം ചെയ്തു. പൊതുപണിമുടക്ക് വള്ളംകളിയെ ഒട്ടും ബാധിച്ചില്ല. ആയിരങ്ങളാണ് അവധി മുതലാക്കി മത്സരം കാണാനെത്തിയത്.

പാൽപ്പായസവുമായി അമ്പലപ്പുഴ സംഘം ചമ്പക്കുളം വള്ളംകളിക്കെത്തി

ആലപ്പുഴ: ഐതിഹ്യപ്പെരുമയുണർത്തി മധുരമൂറുന്ന അമ്പലപ്പുഴ പാൽപ്പായസവുമായി അമ്പലപ്പുഴ സംഘം ചമ്പക്കുളം വളളംകളിക്കെത്തി. ചരിത്രപ്രസിദ്ധമായ ചമ്പക്കുളം മൂലം ജലോത്സവം ഇന്നലെയാണ് ചമ്പക്കുളത്ത് പമ്പയാറ്റിൽ നടന്നത്. സംസ്ഥാനത്തെ ഏറ്റവും പാരമ്പര്യമേറിയ വള്ളംകളിയാണ് ചമ്പക്കുളത്താറ്റിലെ മൂലംവള്ളംകളി. ചങ്ങനാശേരി കുറിച്ചി കരിങ്കുളം ശ്രീപാർത്ഥസാരഥി ക്ഷേത്രത്തിൽനിന്ന് അമ്പലപ്പുഴ ശ്രീകൃഷ്ണ സ്വാമി ക്ഷേത്രത്തിലേക്കുള്ള പ്രതിഷ്ഠാ വിഗ്രഹം വഹിച്ചുകൊണ്ടുള്ള ഘോഷയാത്ര ചമ്പക്കുളത്ത് എത്തി. മഠത്തിൽ ക്ഷേത്രത്തിൽ പൂജകൾക്കു ശേഷം മാപ്പിളശേരി തറവാട്ടിൽ വിഗ്രഹം ഇറക്കിവച്ച് അവിടെനിന്ന് കളിവള്ളങ്ങളുടെ അകമ്പടിയോടും നാനാജാതി മതസ്ഥരുടെ സഹകരണത്തോടെയും ചെമ്പകശേരി രാജാവ് അമ്പലപ്പുഴയ്ക്ക് കൊണ്ടുപോയതിന്‍റെ ചരിത്രസ്മരണ നിലനിർത്തുവാൻവേണ്ടി ആരംഭിച്ച അമ്പലപ്പുഴ മൂലക്കാഴ്ചയുടെ തുടർച്ചയാണ് ചമ്പക്കുളം മൂലം വള്ളംകളി. ആണ്ടുതോറും മിഥുനമാസത്തിലെ മൂലം നക്ഷത്രത്തിൽ ആഘോഷിക്കുന്ന ഈ വള്ളംകളി കേരളത്തിലെ ജലോത്സവങ്ങളുടെ തുടക്കം കൂടിയാണ്. അമ്പലപ്പുഴ ക്ഷേത്രത്തിൽനിന്ന് നിവേദിച്ച പാൽപ്പായസം ചമ്പക്കുളം മഠം മഹാലക്ഷ്മി ക്ഷേത്രത്തിൽ എത്തിച്ചശേഷമാണ് വള്ളംകളി നടന്നത്. വള്ള സദ്യക്ക് ശേഷം വാദ്യമേളങ്ങളുടെ അകമ്പടിയോടെയാണ് അമ്പലപ്പുഴ ക്ഷേത്രത്തിൽനിന്ന് പാൽപ്പായസവുമായി സംഘം പുറപ്പെട്ടത്. കൃഷ്ണ സന്നിധിയിൽ നടന്ന ആവേശകരമായ വഞ്ചിപ്പാട്ടിന് ശേഷമാണ് സംഘം യാത്രയായത്. ദേവസ്വം അസിസ്റ്റന്‍റ് കമ്മീഷണർ കെ. വിമൽ കുമാർ, അഡ്മിനിസ്ട്രേറ്റീവ് ഓഫീസർ എൻ. അജിത് കുമാർ, ക്ഷേത്രം കോയ്മ സ്ഥാനി വി.ജെ. ശ്രീകുമാർ, നാരായണ ഭട്ടതിരിപ്പാട് തുടങ്ങിയവർ നേതൃത്വം നൽകി.

എംഡിഎംഎയുമായി യുവാവ് പിടിയില്‍

മാവേലിക്കര: എംഡിഎംഎയും കഞ്ചാവുമായി യുവാവ് എക്‌സൈസിന്‍റെ പിടിയിൽ. മാവേലിക്കര എക്‌സൈസ് സര്‍ക്കിള്‍ ഇന്‍സ്പെക്ടര്‍ പി.എ. സഹദുള്ളയുടെ നേതൃത്വത്തില്‍ നടന്ന പരിശോധനയിലാണ് പാലമേല്‍ എരുമക്കുഴി വിഷ്ണു ഭവനത്തില്‍ വിനീത് (24) പിടിയിലായത്. എക്‌സൈസ് ഷാഡോ സംഘത്തിന്‍റെ നിരീക്ഷണത്തിലായിരുന്ന ഇയാള്‍ പാറ ജംഗ്ഷന്‍ ഇടപ്പോണ്‍ റോഡില്‍ ചെമ്പകശേരി മുക്കില്‍കഴിഞ്ഞദിവസം രാത്രി 11.55 ഓടെയാണ് പിടിയിലായത്. ഇയാളില്‍ നിന്ന് 1.12 ഗ്രാം എംഡിഎംഎയും 6.979 ഗ്രാം കഞ്ചാവുമാണ് പിടിച്ചെടുത്തത്. അസി. എക്‌സൈസ്ഇന്‍സ്‌പെക്ടര്‍ ഗോപകുമാര്‍, പ്രിവന്‍റീവ് ഓഫീസര്‍മാരായ അനു, പ്രവീണ്‍, സിവില്‍ എക്‌സൈസ് ഓഫീസര്‍, താജുദ്ദീന്‍, സിവില്‍ എക്‌സൈസ് ഓഫീസര്‍ ഡ്രൈവര്‍ പ്രദീപ് എന്നിവരടങ്ങിയ സംഘമാണ് പരിശോധനയ്ക്കു നേതൃത്വം നല്‍കിയത്.

ധന്യൻ മാർ ഈവാനിയോസ് ഓർമപ്പെരുന്നാൾ: തീർഥാടന പദയാത്രയ്ക്ക് ഇന്നു തുടക്കം

മാവേലിക്കര: മലങ്കര കത്തോലിക്കാ സഭയുടെ പ്രഥമ മെത്രാപ്പോലീത്തയും മലങ്കര പുനരൈക്യ പ്രസ്ഥാനത്തിന്‍റെ ശില്പിയുമായ ധന്യൻ ആർച്ച്ബിഷപ് മാർ ഈവാനിയോസ് തിരുമേനിയുടെ 72-ാം ഓർമപ്പെരുന്നാളിന് മുന്നോടിയായി തിരുവനന്തപുരം പട്ടത്തെ കബറിങ്കലിലേക്കുള്ള തീർഥാടന പദയാത്ര ഇന്ന് പുറപ്പെടും. ഈവാനിയോസ് തിരുമേനിയുടെ ജന്മഗൃഹമായ മാവേലിക്കര പുതിയകാവ് പണിക്കരുവീട്ടിൽനിന്ന് ഇന്നു രാവിലെ 9ന് നടക്കുന്ന ധൂപപ്രാർഥനയ്ക്കും ദിവ്യബലിക്കും ശേഷം വള്ളിക്കുരിശ് കൈമാറി മാവേലിക്കര രൂപതാധ്യക്ഷൻ ബിഷപ് ഡോ. മാത്യൂസ് മാർ പോളികാർപ്പോസ് ഉദ്‌ഘാടനം ചെയ്യും. എംസിവൈഎം മാവേലിക്കര ഭദ്രാസനസമിതിയുടെ നേതൃത്വത്തിലാണ് പദയാത്ര നടത്തുന്നത്. കറ്റാനം, കടമ്പനാട് വഴി കൊല്ലം വൈദിക ജില്ലയുടെ പദയാത്ര സംഘത്തോടൊപ്പം ചേർന്ന് പുത്തൂർ കുണ്ടറ, കല്ലുവാതുക്കൽ, ആറ്റിങ്ങൽ വഴി ദേശീയപാതയിലൂടെ വിവിധ ഇടവകകൾ സന്ദർശിച്ച് 14ന് വൈകുന്നേരം ആറിന് പദയാത്ര പട്ടം സെന്‍റ് മേരീസ് കത്തീഡ്രലിൽ എത്തിച്ചേരും.

ഹൈവേ വികസനം: ജനങ്ങളുടെ പ്രതിസന്ധി പരിഹരിക്കണം

ഹരിപ്പാട്: അശാസ്ത്രീയമായ ഹൈവേ നിർമാണത്തെ ത്തുടർന്ന് ജനങ്ങൾ വലിയരീതിയിൽ പ്രതിസന്ധി നേരിടുകയാണെന്ന് രമേശ് ചെന്നിത്തല എംഎൽഎ പറഞ്ഞു. ക്യാമ്പ് ഓഫീസിൽ മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം. കുമാരപുരം പഞ്ചായത്തിലെ പ്രധാനപ്പെട്ട ജംഗ്ഷനായ നാരകത്തറ പൂർണമായും ബ്ലോക്ക് ചെയ്യുന്ന രീതീയിലാണ് നിലവിലുള്ള നിർമാണ പ്രവർത്തനം നടക്കുന്നത്. ഇത് പഞ്ചായത്തിലെ ജനങ്ങളെ നേരിട്ട് ബാധിക്കും. ഈ വിഷയം ചർച്ച ചെയ്യുന്നതിനായി ദേശീയപാതാ അഥോറിട്ടി ഉദ്യോഗസ്ഥരുടെ മീറ്റിംഗ് 11ന്്‌ തിരുവനന്തപുരത്ത് വിളിച്ചുചേർത്തിട്ടുണ്ട്. കേന്ദ്ര ഹൈവേ മന്ത്രി നിതിൻ ഗഡ്‌ഗരിയെ നേരിട്ടു കണ്ട് നിവേദനം കൈമാറുമെന്നും അദ്ദേഹം പറഞ്ഞു.

ശുദ്ധജലം വിതരണം ചെയ്യണമെന്നാവശ്യപ്പെട്ട് പ്രമേയം

ചേര്‍ത്തല: ജനങ്ങള്‍ക്ക് ശുദ്ധജലം വിതരണം ചെയ്യണമെന്നാവശ്യപ്പെട്ട് പള്ളിപ്പുറം സെന്‍റ് മേരീസ് ഫൊറോന പള്ളി കേന്ദ്രകമ്മിറ്റി പ്രമേയം പാസാക്കി. പഞ്ചായത്തിലെ വാട്ടർ അഥോറിറ്റിയുടെ ശുദ്ധജല ടാങ്കിൽ ചിലര്‍ ഇറങ്ങി കുളിച്ചിരുന്നു. ശുദ്ധജല വിതരണ സംവിധാനം കുറ്റമറ്റരീതിയിൽ ആക്കുന്നതിനും ജനങ്ങളുടെ ആശങ്കകള്‍ പരിഹരിക്കുന്നതിനും ആവശ്യമായ സുരക്ഷാ സംവിധാനങ്ങൾ ഏർപ്പെടുത്തി പൊതുസമൂഹത്തിന് ആപൽശങ്കയില്ലാതെ ജലവിനിയോഗത്തിനുള്ള സാഹചര്യം സൃഷ്ടിക്കണമെന്നാവശ്യപ്പെട്ടുകൊണ്ട് ജലവിഭവവകുപ്പ് മന്ത്രി റോഷി അഗസ്റ്റിന് നൽകുന്നതിനുവേണ്ടി പള്ളിപ്പുറം സെന്റ് മേരീസ് പള്ളി വികാരി റവ.ഡോ. പീറ്റർ കണ്ണമ്പുഴ ചെയർമാനും, റോണി ചെറിയാൻ കോയിപ്പറമ്പിൽ വൈസ് ചെയർമാനും ആയിട്ടുള്ള പള്ളിപ്പുറം സെന്‍റ് മേരീസ് ഫൊറോന പള്ളി കേന്ദ്രകമ്മിറ്റിയിൽ ജനറൽ സെക്രട്ടറി അനൂപ് ആന്‍റണി ഉപ്പുപുറം അവതരിപ്പിച്ച പ്രമേയം പാസാക്കി.

വളയം പിടിക്കുന്ന മാലാഖമാര്‍ക്ക് എ.ബി. വിലാസം എന്‍എസ്എസ് യൂണിറ്റിന്‍റെ ആദരം

ആലപ്പുഴ: പലപ്പോഴും ഡോക്ടര്‍ ആയും നഴ്‌സ് ആയും ജോലി നോക്കേണ്ടിവരുന്ന ആംബുലന്‍സ് ഡ്രൈവര്‍മാരെ ഓര്‍മിക്കുന്ന ദിനമാണ് ജൂലൈ എട്ട്. ജീവിതത്തിനും മരണത്തിനും ഇടയിലുള്ള നൂല്‍പ്പാലത്തെ ഒരു വളയം കൊണ്ട് ചേര്‍ത്തുനിര്‍ത്തുവാന്‍ പണിപ്പെടുന്ന ഒരു കൂട്ടം മനുഷ്യരെ ഓര്‍മിക്കുന്ന ദിനം. ആധുനിക ആംബുലന്‍സ് സേവനങ്ങളുടെ പിതാവ് എന്നറിയപ്പെടുന്ന ഡൊമിനിക് ജീന്‍ ലാറിയുടെ ജന്മദിനമാണ് ജൂലൈ എട്ട്. നെപ്പോളിയന്‍ ചക്രവര്‍ത്തിയുടെ ആര്‍മിയിലെ പ്രധാന സര്‍ജനായി മാറിയ ഫ്രഞ്ച് സൈനിക ഡോക്ടറായിരുന്നു അദ്ദേഹം. യുദ്ധമുഖത്ത് മുറിവേറ്റവരെ കൊണ്ടുപോകാനായി ഫളയിംഗ് ആംബുലന്‍സ് എന്ന ആശയവും കൊണ്ടുവന്നത് അദ്ദേഹമായിരുന്നു. ആംബുലന്‍സ് ഡ്രൈവര്‍മാരായ മുഹമ്മദ് അസ്‌ലം, മുഹമ്മദ് സാലിഹ് എന്നിവരെയാണ് എ.ബി വിലാസം ഹയര്‍ സെക്കന്‍ഡറി സ്‌കൂളിലെ എന്‍എസ്എസ് യൂണിറ്റ് ആദരിച്ചത്. പ്രിന്‍സിപ്പല്‍ ബിജോ കെ. കുഞ്ചെറിയ പൊന്നാട അണിയിച്ചു. സീനിയര്‍ അസിസ്റ്റന്‍റ് എസ്. പ്രവീണ്‍, അധ്യാപകരായ അന്നാ ചെറിയാന്‍, എം. വി. സാബുമോന്‍, നാഷണല്‍ സര്‍വീസ് സ്‌കീം വോളണ്ടിയേഴ്‌സ് ആയ എസ്. അനശ്വര, എം.ആര്‍. അമല്‍ തുടങ്ങിയവര്‍ ആശംസകള്‍ അര്‍പ്പിച്ചു. ഇന്നലത്തെ ദീപിക ദിനപത്രത്തിലെ മറക്കരുത് ജീവനുവേണ്ടി ഓടുന്ന ഇവരെ എന്ന ലേഖനമാണ് കുട്ടികളില്‍ ഈ ആശയത്തിനു വിത്തുപാകിയത്.

അനധികൃത മണല്‍കടത്ത്, നാലുപേര്‍ വള്ളങ്ങളുമായി പിടിയില്‍

ചേര്‍ത്തല: ചെങ്ങണ്ട കായലില്‍ രാത്രികാലത്തു നടക്കുന്ന അനധികൃത മണല്‍ കടത്തല്‍ നെടുമ്പ്രക്കാട് വിളക്കുമരം പാലത്തിനു ഭീഷണിയാകുന്നു. കഴിഞ്ഞ ദിവസം പോലീസ് നടത്തിയ പരിശോധനയില്‍ മണല്‍ കടത്താന്‍ ശ്രമിച്ച നാലുവള്ളങ്ങള്‍ പിടികൂടി. സംഭവവുമായി ബന്ധപ്പെട്ട് നാലുപേരെയും ചേര്‍ത്തല സ്‌റ്റേഷന്‍ ഓഫീസര്‍ ജി. അരുണിന്‍റെ നേതൃത്വത്തില്‍ നടന്ന പരിശോധനയില്‍ പിടികൂടിയിരുന്നു. നെടുമ്പ്രക്കാട് വിളക്കുമരം പാലത്തിനു സമീപത്തുനിന്നാണ് ഇവരെ പിടികൂടിയത്. പള്ളിപ്പുറം, നെടുമ്പ്രക്കാട് സ്വദേശികളായ പ്രസന്നന്‍, രജിമോന്‍, അശോകന്‍, ഉദയകുമാര്‍ എന്നിവരാണ് പിടിയിലായത്. ഇവര്‍ക്കെതിരെ പോലീസ് കേസെടുത്തു. പിടിച്ചെടുത്ത വള്ളങ്ങള്‍ കളക്ടര്‍ക്കു കൈമാറി. രാത്രികാലങ്ങളിലും പുലര്‍ച്ചെയുമാണ് വള്ളങ്ങളില്‍ സ്ഥിരമായി മണല്‍ കടത്തുന്നത്. കായലില്‍നിന്നും എടുക്കുന്ന മണല്‍ കരയിലെത്തിച്ച് ലോറികളില്‍ കടത്തുകയാണ് പതിവ്. വള്ളത്തിന് 4000 മുതല്‍ 7000 രൂപക്കുവരെ വില്‍ക്കുന്നു. നെടുമ്പ്രക്കാട് വിളക്കുമരം പാലം നിര്‍മാണം പൂര്‍ത്തിയായി ഗതാഗതത്തിനു തുറന്നുകൊടുക്കാന്‍ സജ്ജമായിരിക്കുകയാണ്. 20 കോടിയോളം മുടക്കിയാണ് പാലം പൂര്‍ത്തിയാക്കിയത്. ഏറെ അടിയൊഴുക്കുള്ള കായലിലെ പാലത്തിനുസമീപമുള്ള മണല്‍ വാരുന്നത് പാലത്തിന്‍റെ തൂണുകളുടെ ബലക്ഷയത്തിനു കാരണമാകുമെന്ന് കാണിച്ച് നിര്‍മാണഘട്ടത്തില്‍ തന്നെ അധികൃതര്‍ മുന്നറിയിപ്പു നല്‍കിയിരുന്നതാണ്.

ബാലികയെ വെട്ടി പരിക്കേല്പിച്ച കേസിൽ പ്രതിക്ക് ജീവപര്യന്തം

പത്തനംതിട്ട: 12വയുസുള്ള പെണ്‍കുട്ടിയുടെ കൈപ്പത്തിക്ക് വെട്ടി ഗുരുതരമായി പരിക്കേല്പിച്ച കേസില്‍ പ്രതിക്ക് ജീവപര്യന്തം കഠിന തടവും ലക്ഷം രൂപ പിഴയും. കൂടല്‍ അതിരുങ്കല്‍ അഞ്ചുമുക്ക് പറങ്കാം തോട്ടത്തില്‍ ഗീവര്‍ഗീസ് തോമസി (അനിയൻകുഞ്ഞ്, 42) നെയാണ് പത്തനംതിട്ട അഡീഷണല്‍ ഡിസ്ട്രിക്ട് ആന്‍ഡ് സെഷന്‍സ് കോടതി ഒന്ന് ജഡ്ജി ജി.പി. ജയകൃഷ്ണന്‍ കുറ്റക്കാരനെന്ന് കണ്ടെത്തി ശിക്ഷ വിധിച്ചത്. പട്ടികജാതി,വര്‍ഗവിഭാഗങ്ങള്‍ക്കെതിരായ അതിക്രമങ്ങള്‍ തടയല്‍ നിയമത്തിലെ വകുപ്പ് പ്രകാരമാണ് ജീവപര്യന്തം ശിക്ഷിച്ചത്. ഗുരുതരമായി പരിക്കുകള്‍ ഏല്പിച്ചതിനു അഞ്ച് വര്‍ഷം കഠിന തടവും 50,000 രൂപയും, വീട്ടില്‍ അതിക്രമിച്ചുകടന്നതിനു മൂന്നു വർഷം കഠിന തടവും 25,000 രൂപ പിഴയും ശിക്ഷിച്ചു. ശിക്ഷാകാലയളവ് ഒരുമിച്ചു അനുഭവിച്ചാല്‍ മതിയാകും. പിഴത്തുക കുട്ടിക്ക് നല്‍കാനും, ഒടുക്കിയില്ലെങ്കില്‍ വസ്തുക്കളില്‍ നിന്നും കണ്ടുകെട്ടി നല്‍കാനുള്ള നടപടി സ്വീകരിക്കാനും വിധിയില്‍ പറയുന്നു. 2016 മാര്‍ച്ച് 18നാണ് കേസിനാസ്പദമായ സംഭവം. സ്ഥലത്ത് സ്ഥിരമായി മദ്യപിച്ച് ബഹളമുണ്ടാക്കുന്ന ഇയാ‌ളെ സംബന്ധിച്ചു കൂടല്‍ പോലീസില്‍ വിളിച്ചറിയിക്കുമെന്ന് പറഞ്ഞ അയല്‍വാസി മേടക്കര വീട്ടില്‍ പ്രിയ ദിലീപിനെയാണ് വെട്ടുകത്തിയുമായി ആക്രമിച്ചത്. ഈസമയം വീട്ടില്‍ യുവതിക്കൊപ്പം ഉണ്ടായിരുന്ന 12 കാരിയായ മകള്‍ കൈകള്‍ കൊണ്ട് തടഞ്ഞു. കൈകള്‍ക്ക് വെട്ടേറ്റു, ഇടതുകൈപ്പത്തിക്ക് താഴെ റിസ്റ്റിന്‍റെ ഭാഗത്ത് പ്രധാന ഞരമ്പ് മുറിഞ്ഞു മാറി. അതിന് താഴെയുള്ള അസ്ഥിക്ക് മുറിവും സംഭവിച്ചു. വലതു കൈവെള്ളഭാഗത്ത് ആഴത്തില്‍ മുറിവേല്‍ക്കുകയും ചെയ്തു. കൂടാതെ, പ്രിയയും കുടുംബവും വീട് വിറ്റ് പോകാത്തതിലുള്ള മുന്‍വിരോധവും ആക്രമണകാരണമായി. ഗുരുതര പരിക്കുകളോടെ കോട്ടയം മെഡിക്കല്‍ കോളജ് ആശുപത്രിയില്‍ ചികില്‍സ തേടി. കൂടല്‍ അഡിഷണല്‍ എസ്ഐ ആയിരുന്ന വി.ടി.രാജു കേസ് അന്വേഷണം നടത്തി. കോടതിയില്‍ കുറ്റപത്രം സമര്‍പ്പിച്ചത് അന്നത്തെ അടൂര്‍ ഡിവൈഎസ്പി റഫീഖ് ആയിരുന്നു. പ്രോസിക്യൂട്ടര്‍മാരായ ടി ഹരികൃഷ്ണന്‍, ഹരി ശങ്കര്‍ പ്രസാദ് എന്നിവര്‍ കോടതിയില്‍ ഹാജരായായി.

ചെന്നിത്തല പാടശേഖരത്തിൽ കർഷകർ കൃഷി ഉപേക്ഷിക്കുന്നു

മാന്നാര്‍: ചെന്നിത്തല പത്താം ബ്ലോക്ക് പാടശേഖരത്തിലെ കൃഷി മുടങ്ങുമെന്ന് കര്‍ഷകര്‍. കൃഷിയിറക്കേണ്ട സമയത്താണ് തുടര്‍ച്ചയായ മഴ പെയ്തത്. തുടര്‍ന്ന് പാടശേഖരം വെള്ളത്തില്‍ മുങ്ങി. ഇപ്പോള്‍ മഴ കുറഞ്ഞെങ്കിലും വെള്ളം വറ്റിക്കാനുള്ള ബുദ്ധിമുട്ട് കാരണം ചെന്നിത്തല പത്താം ബ്ലോക്ക് പാടശേഖരത്തിലെ 65 ഏക്കര്‍ പുഞ്ച നിലത്ത് അടുത്തവര്‍ഷം കൃഷി ഇറക്കാന്‍ കഴിയുകയില്ലന്ന് നെല്ലുത്പാദക സമിതി അറിയിച്ചു. 45 കര്‍ഷകര്‍ സ്വന്തമായി കൃഷി ചെയ്യുന്ന പാടത്ത് ഒരേ തറയില്‍ പെട്ടിക്കും മോട്ടറും തിരിച്ചും മറിച്ചും വെച്ചാണ് വെള്ളം വറ്റിക്കുകയും വെള്ളം കയറ്റുകയും ചെയ്യുന്നത്. ചോവാലില്‍ തോട്ടിലെ ഏറ്റവും ഉയര്‍ന്ന ഭാഗത്താണ് ഇപ്പോഴത്തെ മോട്ടോര്‍ തറ. ഏറ്റവും താഴ്ച ഭാഗത്തെ വെള്ളം വറ്റിവരണമെങ്കില്‍ വളരെ ദിവസങ്ങള്‍ എടുക്കും. ആറ്റില്‍ ജലനിരപ്പുയര്‍ന്നാല്‍ വാര്യത്ത് തോട് വഴി പുത്തനാറ്റിലേക്ക് പാടത്തുനിന്ന് വെള്ളം ഇറങ്ങുകയുമില്ല. കാലാവസ്ഥാ വ്യതിയാനം മൂലം നവംബര്‍ പകുതിക്ക് കൃഷി ഇറക്കേണ്ടതായിട്ടുണ്ട്. പക്ഷേ ഇപ്പോഴത്തെ പമ്പിംഗ് സംവിധാനം ഇതിന് സഹായകരമല്ല. വാര്യത്ത് തോട്ടുമുഖത്ത് ഉയര്‍ന്ന ഹോഴ്‌സ് പവറിലുള്ള പമ്പ് സ്ഥാപിച്ച് പമ്പിംഗ് നടത്തിയാല്‍ മാത്രമേ സമയത്ത് കൃഷി ഇറക്കാന്‍ കഴിയുകയുള്ളൂ. ആയതിന് പാടശേഖരസമിതി മുട്ടാത്ത വാതിലുകളില്ല. വര്‍ഷങ്ങളായി കാലാവസ്ഥാ വ്യതിയാനം കാരണം കൃഷി നഷ്ടത്തിലാണ്. ഒപ്പം സര്‍ക്കാര്‍ സംഭരിച്ച നെല്ലിന്‍റെ വിലയും പൂര്‍ണമായി ലഭിച്ചിട്ടില്ല. കാലപ്പഴക്കത്താല്‍ ജീര്‍ണതയിലായ പെട്ടിയും പറയും മാറ്റുകയും വാര്യത്ത് തോട്ടുമുഖത്തും ചോവാലില്‍ തോട്ടുമുഖത്തും 20 എച്ച്പി വീതമുള്ള രണ്ടു വെര്‍ട്ടിക്കല്‍ പമ്പുകള്‍ സ്ഥാപിച്ച് ജലസേചന സൗകര്യം ഒരുക്കി കര്‍ഷകരുടെ കൃഷി പ്രതിസന്ധി പരിഹരിക്കാന്‍ അടിയന്തര നടപടി ഉണ്ടാകണമെന്ന് പാടശേഖരസമിതി ആവശ്യപ്പെട്ടു.

സോളാറിലെ കെഎസ്ഇബി നയം; സര്‍ക്കാരിനു തിരിച്ചടിയാവും

അമ്പലപ്പുഴ: സോളാറിലെ കെഎസ്ഇബിയുടെ പുതിയ നയം സര്‍ക്കാരിന്‍റെ പ്രതിച്ഛായയ്ക്കു കളങ്കം വരുത്തിയേക്കും. 2020ലെ സോളാര്‍ നയം 2025ല്‍ മറികടക്കാന്‍ റെഗുലേറ്ററി കമ്മീഷന്‍ കരട് പുറപ്പെടുവിച്ചു. ഒക്ടോബര്‍ ഒന്നുമുതല്‍ പ്രാബല്യത്തില്‍ വരുത്തുവാനുള്ള തിരക്കിട്ട നീക്കമാണ് കമ്മീഷന്‍ നടത്തുന്നത്. 2020ലെ സോളാര്‍ നിയമം അനുസരിച്ച് ഗാര്‍ഷിക ഉപഭോക്താക്കള്‍ക്ക് നെറ്റ് മീറ്ററിങ്ങാണ് നടപ്പിലാക്കിവന്നിരുന്നത്. പകല്‍സമയങ്ങളില്‍ ഉപഭോക്താക്കള്‍ പുരപ്പുറം സോളാറിലൂടെ ഉത്്പാദിപ്പിക്കുന്ന വൈദ്യുതി കെഎസ്ഇബിയുടെ ഗ്രിഡിലേക്ക് നല്‍കും. ഉപഭോക്താക്കള്‍ ആവശ്യമുള്ള വൈദ്യുതി ഗ്രിഡില്‍നിന്ന് ഇമ്പോര്‍ട്ട് ചെയ്ത് ഉപയോഗിക്കാം. മാസത്തില്‍ കണക്കെടുക്കുമ്പോള്‍ ഉത്പാതിപ്പിച്ച വൈദ്യുതിയും ഉപയോഗിച്ച വൈദ്യുതിയും തട്ടിക്കിഴിച്ച് മിച്ചമുള്ള വൈദ്യുതി ഉപഭോക്താവിന്‍റെ എനര്‍ജി ബാങ്കില്‍ ബാലന്‍സ് ആയി രേഖപ്പെടുത്തും. അടുത്തമാസം ഉത്പാദനം കുറഞ്ഞാലും എനര്‍ജി ബാങ്കില്‍നിന്നുള്ള വൈദ്യുതി എടുത്ത് ബില്ല് ബാലന്‍സ് ചെയ്യാന്‍ കഴിയും. ഇത് ഗാര്‍ഹിക സോളാര്‍ ഉപഭോക്താക്കള്‍ക്ക് ഏറെ പ്രയോജനകരമായിരുന്നു. മീറ്ററിങ്ങിലെ ആകര്‍ഷണമാണ് സോളാര്‍ കേരളത്തില്‍ ജനപ്രിയമാകാന്‍ കാരണം. കേന്ദ്രസര്‍ക്കാരിന്‍റെ സബ്‌സിഡിയും ഏഴു ശതമാനം നിരക്കില്‍ ലോണ്‍ സൗകര്യവും വന്നതോടെ സാധാരണക്കാരന്‍ പോലും സോളാറിലേക്കു മാറി ത്തുടങ്ങി. കേരളത്തിൽ ഏകദേശം രണ്ടു ലക്ഷം സോളാര്‍ ഉപഭോക്താക്കളാണുള്ളത്. സോളാര്‍ രജിസ്‌ട്രേഷന്‍ ദിനംപ്രതി വര്‍ധിക്കുകയാണ്. രണ്ടു ലക്ഷം രൂപ ഉണ്ടെങ്കില്‍ ഒരു സോളാര്‍ പ്ലാന്‍റ് സ്ഥാപിക്കാന്‍ കഴിയും. ഇതില്‍ 78,000 രൂപ സബ്‌സിഡിയും ലഭിക്കും സോളാര്‍ മേഖലയില്‍ ലക്ഷക്കണക്കിന് യുവതീ-യുവാക്കളാണ് ജോലി നോക്കുന്നത്. അഭ്യസ്തവിദ്യരായ ചെറുപ്പക്കാര്‍ക്ക് ചെറിയ മുതല്‍ മുടക്കില്‍ തുടങ്ങാവുന്ന ഒരു സ്റ്റാര്‍ട്ട് അപ്പ് പദ്ധതി കൂടിയാണ് സോളാര്‍ റിന്യൂവബിള്‍ എനര്‍ജി മേഖല. സോളാര്‍ പദ്ധതി കേരളത്തില്‍ വ്യാപകമായതോടെയാണ് കെഎസ്ഇബി തനിനിറം പുറത്തെടുത്തു തുടങ്ങിയത്. തുടക്കത്തില്‍ മീറ്ററുകള്‍ ഉപഭോക്താക്കള്‍ക്ക് നല്‍കാതെ പദ്ധതി മരവിപ്പിക്കാന്‍ ശ്രമിച്ചു. അത് നടക്കാതെ വന്നപ്പോള്‍ 2020ലെ നിയമം തന്നെ മാറ്റാന്‍ കെഎസ്ഇ ബി റെഗുലേറ്ററി കമ്മീഷന്‍ തീരുമാനിച്ചു. കമ്മീഷന്‍റെ കരട് നിയമം നടപ്പിലാക്കുന്നതോടെ കേരളത്തില്‍ സോളാര്‍ പദ്ധതിതന്നെ ഇല്ലാതാകും. പുതിയ നിയമത്തില്‍ നെറ്റ് മീറ്ററില്‍ മൂന്ന് കിലോ വരെ ആക്കി ചുരുക്കി. ഇതോടെ ഒരു സാധാരണ ഇടത്തരം കുടുംബത്തിന് അഞ്ചു കിലോവാട്ട് സോളാര്‍ പ്ലാന്‍റ് എങ്കിലും ആവശ്യമായി വരും. പുതിയ നിയമം അനുസരിച്ച് അഞ്ച് കിലോ വാട്ടിന് നെറ്റ് ബില്ലിംഗ് സമമ്പ്രദായമേ സാധ്യമാകൂ. ഉപഭോക്താക്കള്‍ നല്‍കുന്ന വൈദ്യുതിക്ക് കുറഞ്ഞ തുകയും ഉപയോഗിക്കുന്ന വൈദ്യുതിക്ക് കൂടുതല്‍ തുകയും ഈടാക്കുന്ന ബില്ലിംഗ് രീതി ലാഭകരമല്ലെന്നും കെഎസ്ഇബിക്ക് നഷ്ടമുണ്ടാകുന്നു എന്ന വാദം ഉയര്‍ത്തിയാണ് പുതിയ നിയമം കെഎസ്ഇബി നടപ്പിലാക്കുന്നത്. ഇത് കടുത്ത പ്രതിഷേധത്തിന് ഇടയാക്കിയിട്ടുണ്ട്. കഴിഞ്ഞദിവസം തിരുവനന്തപുരത്ത് റെഗുലേറ്ററി കമ്മീഷന്‍ ഓഫീസിനു മുന്നില്‍ നടന്ന സമരം പ്രതിഷേധത്തിന്‍റെ ആഴം വെളിവാക്കുന്നതായിരുന്നു. കോടിക്കണക്കിന് രൂപ നികുതിയായി ലഭിക്കുന്ന മേഖലയാണിത്. ലക്ഷക്കണക്കിന് ചെറുപ്പക്കാര്‍ ടെക്‌നിക്കല്‍ നോണ്‍ ടെക്‌നിക്കല്‍ എന്നിങ്ങനെ ഉള്ളവര്‍ മേഖലയില്‍ ജോലി നോക്കുന്നു. പുതിയ നിയമം ചെറുപ്പക്കാരുടെ തൊഴില്‍ നഷ്ടപ്പെടുത്തുവാന്‍ ഇടയാക്കും. 2030 ഓടെ 50 ശതമാനം ഹരിത വൈദ്യുതി എന്ന കേന്ദ്രസര്‍ക്കാരിന്‍റെ പ്രഖ്യാപിത നയം കേരളത്തില്‍ നടപ്പിലാക്കാന്‍ കെഎസ്ഇബിയുടെ പുതിയ നയം വിലങ്ങുതടിയാകും. ആശാവർക്കര്‍മാരുടെ സമരത്തേക്കാള്‍ ശക്തമായ പ്രതിഷേധം സര്‍ക്കാരിന് നേരിടേണ്ടി വരും. വരുന്ന പഞ്ചായത്ത് -നിയമസഭാ തെരഞ്ഞെടുപ്പുകളില്‍ സോളാര്‍ ഉപഭോക്താക്കളുടെ പ്രതിഷേധം സര്‍ക്കാരിന് തിരിച്ചടിയാകാന്‍ സാധ്യതയുണ്ട്. രാജ്യത്തിന്‍റെ ഊര്‍ജമേഖലയെ ശവപ്പറമ്പ് ആക്കി മാറ്റുന്ന കെഎസ്ഇബിയുടെ പുതിയ സോളാര്‍ നയം തിരുത്തണമെന്നാണ് ഉപഭോക്താക്കളുടെ ആവശ്യം.

എക്സൈസിന്‍റെ മാവേലിക്കര റേഞ്ച് ഓഫീസ് തകര്‍ച്ചയുടെ വക്കില്‍

മാവേലിക്കര: എക്സൈസ് മാവേലിക്കര റേഞ്ച് ഓഫീസിലെ ഉദ്യോഗസ്ഥര്‍ ഒരോ നിമിഷവും ജീവനില്‍ ഭയന്നാണ് ജോലിയില്‍ മുഴുകുന്നത്. പതിറ്റാണ്ടുകളുടെ പഴക്കമുള്ള ജീര്‍ണിച്ച കെട്ടിടത്തിലാണ് നിലവില്‍ എക്സൈസ് ഓഫീസ് പ്രവര്‍ത്തിക്കുന്നത്. മൂന്നു വനിതകള്‍ ഉൾപ്പെടെ 26 പേരാണ് ഇവിടെ ജീവന്‍ പണയംവച്ച് ജോലിചെയ്തുവരുന്നത്. ഒന്നാംനില പൂര്‍ത്തിയായ പുതിയ ഓഫീസ് കെട്ടിടത്തിലേക്ക് ഓഫീസ് മാറ്റണമെന്ന ആവശ്യത്തിന് വകുപ്പ് ഇതുവരെ പച്ചക്കൊടി കാണിച്ചിട്ടില്ല. നിലവിലെ എക്സൈസ് ഓഫീസ് പ്രവര്‍ത്തിക്കുന്നത് കൊറ്റാര്‍കാവ് 78-ാം നമ്പര്‍ എന്‍എസ്എസ് കരയോഗത്തിന്‍റെ 75 വര്‍ഷത്തിനു മുകളില്‍ പഴക്കമുള്ള ജീര്‍ണിച്ച കെട്ടിടത്തിലാണ്. കെട്ടിടത്തിന്‍റെ ഭിത്തികളും മറ്റും വിള്ളല്‍വന്ന് അപകടാവസ്ഥയിലും മഴ വന്നാല്‍ ചോരുന്ന നിലയിലുമാണ്. മേല്‍ക്കൂരയിലെ തടികളും ദ്രവിച്ച നിലയിലാണ്. എന്‍എസ്എസ് കരയോഗം കെട്ടിടം ഉപയോഗയോഗ്യമല്ലെന്നും ഓഫീസിന്‍റെ പ്രവര്‍ത്തനം നടത്തുന്നത് അപകടഭീഷണി ഉയര്‍ത്തുന്നതാണെന്നും ചൂണ്ടിക്കാട്ടി എക്സൈസ് വകുപ്പിന് കത്തു നല്‍കിയിട്ടുണ്ട്. കെട്ടിടത്തോട് ചേര്‍ന്ന തൊണ്ടിമുറിയുടെ ഒരു ഭാഗത്തെ ഭിത്തി പൂര്‍ണമായും തകര്‍ന്ന് മേല്‍ക്കൂര നിലം പതിക്കാറായി നില്‍ക്കുകയുമാണ്. കൂടാതെ കാടുപിടിച്ചു കിടക്കുന്ന ഓഫീസ് പരിസരത്ത് ഇഴജെന്തു ശല്യവും രൂക്ഷമാണ്. വിദ്യാഭ്യാസവകുപ്പില്‍നിന്നു കൈമാറി കിട്ടിയ അടച്ചുപൂട്ടിപോയ വഴുവാടി ഗവ. എല്‍പിജി സ്‌കൂളിന്‍റെ സ്ഥലത്ത് 2023ല്‍ എക്സൈസ് റേഞ്ച് ഓഫീസിനായുള്ള കെട്ടിടനിര്‍മാണ പ്രവര്‍ത്തനങ്ങള്‍ ആരംഭിച്ചിരുന്നു. നിലവില്‍ താഴത്തെ നിലയില്‍ എക്സൈസ് ഇന്‍സ്പെക്ടറുടെ ഓഫീസ്, തൊണ്ടി മുറി, കാത്തിരുപ്പ കേന്ദ്രം, ശൗചാലയങ്ങള്‍, ഡ്യൂട്ടി മുറി, സ്വീകരണ മുറി, ഉദ്യോഗസ്ഥരുടെ വിശ്രമമുറി, പാര്‍ക്കിംഗ് ഏരിയ എന്നിവ പൂര്‍ത്തിയായിട്ടുണ്ട്. ഭിത്തികളുടേയും മേല്‍ക്കൂരയുടെ പണി പൂര്‍ത്തിയായ ഒന്നാം നിലയിലെ അസിസ്റ്റന്റ് എക്സൈസ് ഓഫീസറുടെ മുറി, ഓഫീസ് ഏരിയ, സ്റ്റോര്‍ മുറി, സെല്‍, ശൗചാലയ സൗകര്യമുള്ള ഉദ്യോഗസ്ഥരുടെ വിശ്രമമുറി എന്നിവയാണ് പൂര്‍ത്തിയാക്കാനുള്ളത്. ഭാവിയില്‍ രണ്ടാംനില നിര്‍മിച്ച് തട്ടാരമ്പലത്തില്‍ വാടകകെട്ടിടത്തില്‍ പ്രവര്‍ത്തിക്കുന്ന എക്സൈസ് സര്‍ക്കിംള്‍ ഇന്‍സ്പെക്ടര്‍ ഓഫീസ് കൂടി ഇവിടേക്ക് കൊണ്ടുവരാനാണ് പദ്ധതി. ഒന്നാം പിണറായി സര്‍ക്കാരിന്‍റെ കാലഘട്ടത്തിലാണ് സ്വന്തമായി കെട്ടിടമില്ലാതിരുന്ന മാവേലിക്കര എകസൈസ് ഓഫീസിന് കെട്ടിടത്തിനായി അഞ്ചു കോടി രൂപ അനുവദിച്ചത്. ഇതിന്‍റെ ആദ്യഘട്ടമായി 2.47 കോടി രൂപ അനുവദിച്ചു. ഓന്നാം നിലയുടെ രൂപരേഖ തയാറാക്കി സമര്‍പ്പിച്ച ശേഷം രണ്ടാം ഘട്ടത്തിനായി കാത്തിരിക്കുകയാണിപ്പോള്‍. മഴ കനക്കുന്ന സാഹചര്യത്തില്‍ നിലവില്‍ എക്സൈസ് ഓഫീസ് പ്രവര്‍ത്തിക്കുന്ന കെട്ടിടത്തിന്‍റെ അവസ്ഥ മോശമായി തുടരുകയാണ്. റോഡ് നിരപ്പില്‍നിന്നും താഴെയായ സ്ഥലത്ത് മഴമൂലം ഉണ്ടാകുന്ന വെള്ളക്കെട്ടും കെട്ടിടത്തിനു ഭീഷണിയാണ്. ഏതു നിമിഷവും തകര്‍ന്നു വീഴാറായ വാടക കെട്ടിടത്തില്‍നിന്നും ഉടനടി ഓഫീസ് മാറിയില്ലെങ്കില്‍ വലിയ ദുരന്തം തന്നെ സംഭവിക്കാന്‍ സാധ്യതയുള്ളതായാണ് വിദഗ്ധര്‍ ചൂണ്ടിക്കാട്ടുന്നത്.

വിശ്വകർമ സൊസൈറ്റി കായികതാരത്തെ ആദരിച്ചു

മാന്നാര്‍: കൗണ്‍സില്‍ ഓഫ് ഇന്ത്യന്‍ സ്‌കൂള്‍സ് വോളിബോള്‍ ഡിസ്ട്രിക്ട് ലെവല്‍ രണ്ടാം സ്ഥാനവും ഫുട്‌ബോള്‍ സ്റ്റേറ്റ് ലെവല്‍ സെലക‌്ഷനും കിട്ടിയ ഇന്‍ഫെന്‍റ് ജീസസ് സ്‌കൂള്‍ ടീം ക്യാപ്റ്റന്‍ മാസ്റ്റര്‍ അര്‍ജുനനെ വിശ്വകര്‍മ സര്‍വീസ് സൊസൈറ്റിയുടെ പെരിങ്ങിലിപ്പുറം 355-ാം നമ്പര്‍ ശാഖയുടെ നേതൃത്വത്തില്‍ ആദരിച്ചു. ശാഖ പ്രസിഡന്‍റ് കൃഷ്ണന്‍കുട്ടി ആചാരി, സെക്രട്ടറി ഉണ്ണികൃഷ്ണന്‍, ഖജന്‍ജി അംബിക അമ്മാള്‍, മഹിളാ സംഘം സംസ്ഥാന ജനറല്‍ സെക്രട്ടറി ദീപ ഉണ്ണികൃഷ്ണന്‍, താലൂക്ക് സെക്രട്ടറി രാജി ഗണേഷ്, ജ്യോതി രാജേഷ്, സരിത രാജീവ് എന്നിവര്‍ പങ്കെടുത്തു.

പഴയ കെട്ടിടം പൊളിച്ചുനീക്കാൻ നടപടിയില്ല

ചാരുംമൂട്: വള്ളികുന്നം പഞ്ചായത്തിലെ തോപ്പിൽഭാസി മെമ്മോറിയൽ പ്രാഥമിക ആരോഗ്യകേന്ദ്രത്തിലെ പഴയ കെട്ടിടം പൊളിച്ചുനീക്കാൻ നടപടിയില്ല. കാലപ്പഴക്കത്താൽ ജീർണിച്ച കെട്ടിടം ഏതു നിമിഷവും നിലം പതിക്കുന്ന സ്ഥിതിയിലാണ്. കെട്ടിടത്തിന് നൂറുവർഷത്തിന്മേൽ പഴക്കമുണ്ട്. ആദ്യകാലങ്ങളിൽ ആശുപത്രിയുടെ പ്രവർത്തനം പൂർണമായി ഈ കെട്ടിടത്തിലായിരുന്നു. കെട്ടിടത്തിന്‍റെ പല ഭാഗങ്ങളും വർഷങ്ങളായി തകർന്നുവീണുകൊണ്ടിരിക്കുകയാണ്. കെട്ടിടത്തിനു സമീപമാണ് ജീവനക്കാരുടെ ഇരുചക്രവാഹനങ്ങൾ വയ്ക്കുന്നതും ചികിത്സതേടിയെത്തുന്ന രോഗികളും ഒപ്പം എത്തുന്നവരും വിശ്രമിക്കുന്നതും. രണ്ടു വർഷം മുമ്പ് ഐപി വാർഡിനുവേണ്ടി നിർമിച്ച കെട്ടിടത്തിലേക്ക് ആശുപത്രിയുടെ ഒപി വിഭാഗത്തിന്‍റെ ചികിത്സ മാറ്റി. പഴക്കം ചെന്ന മറ്റൊരു കെട്ടിടത്തിലാണ് ഇപ്പോഴും പ്രതിരോധ കുത്തിവയ്പും എച്ച്ഐമാരുടെ ഓഫീസും പ്രവർത്തിക്കുന്നത്. സി.എസ്. സുജാത എംപിയായിരുന്ന കാലത്ത് എക്സറേ യൂണിറ്റിനുവേണ്ടി നിർമിച്ച കെട്ടിടത്തിലാണ് ഇപ്പോൾ ഫാർമസി പ്രവർത്തിക്കുന്നത്. ജില്ലയുടെ തെക്കേയറ്റത്ത് 1957ൽ പ്രവർത്തനം ആരംഭിച്ചതാണ് തോപ്പിൽ ഭാസി മെമ്മോറിയൽ ആശുപത്രി. കാലപ്പഴക്കം ചെന്ന കെട്ടിടം പൊളിച്ചുനീക്കി ആ സ്ഥാനത്ത് പുതിയ കെട്ടിടം നിർമിച്ച് എല്ലാം ഒരു കെട്ടിടത്തിനുള്ളിൽ പ്രവർത്തിക്കണമെന്നാണ് വർഷങ്ങളായി ജനങ്ങളുടെ ആവശ്യം.

കോണ്‍ഗ്രസ് ജില്ലാ ആശുപത്രി മാര്‍ച്ചില്‍ സംഘര്‍ഷം: മൂന്നു പ്രവര്‍ത്തകര്‍ക്കു പരിക്ക്

മാവേലിക്കര: മാവേലിക്കര, നൂറനാട് ബ്ലോക്ക് കോണ്‍ഗ്രസ് കമ്മി റ്റികളുടെ നേതൃത്വത്തില്‍ ആരോഗ്യമന്ത്രി വീണാ ജോര്‍ജ് രാജിവയ്ക്കണമെന്നാവശ്യപ്പെട്ട് മാവേലിക്കര ജില്ലാ ആശുപത്രിയിലേക്കു നടത്തിയ മാര്‍ച്ചില്‍ സംഘര്‍ഷം. സംഘര്‍ഷത്തില്‍ മൂന്നു പ്രവര്‍ത്തകര്‍ക്കു പരിക്കേറ്റു. പുതിയകാവ് നഗരസഭ ഷോപ്പിംഗ് കോംപ്ലക്‌സിനു മുന്നില്‍ നിന്ന് ആരംഭിച്ച മാര്‍ച്ച് പോലീസ് ജില്ലാ ആശുപത്രിക്ക് നൂറുമീറ്റര്‍ മുന്‍പായി തടഞ്ഞിരുന്നു. ഇവിടേക്കെത്തിയ കോണ്‍ഗ്രസ് പ്രവര്‍ത്തകര്‍ പോലീസ് വലയം ഭേദിച്ച് ആശുപത്രിക്ക് ഉള്ളിലേക്ക് കടക്കാന്‍ ശ്രമിച്ചു. പോലീസ് പ്രവര്‍ത്തകര്‍ക്കുനേരേ ബലം പ്രയോഗിച്ചു. ഇരച്ചെത്തിയ പ്രവര്‍ത്തകര്‍ പോലീസിനു നേരെയും ബലപ്രയോഗം നടത്തി. ഇതിനിടെ പോലീസും പ്രവര്‍ത്തകരുമായി ഉന്തും തള്ളുമുണ്ടാകുകയും സംഘര്‍ഷം ഉടലെടുക്കുകയുമായിരുന്നു. യൂത്ത് കോണ്‍ഗ്രസ് സംസ്ഥാന ജനറല്‍ സെക്രട്ടറി മീനു സജീവിന് ലാത്തിക്ക് അടിയേറ്റുവെന്ന് ആരോപിച്ച് കോണ്‍ഗ്രസ് പ്രവര്‍ത്തകര്‍ പ്രകോപിതരായി. ഇതിനിടെയാണ് ഔട്ട് റീച്ച് സെല്‍ മുന്‍ സംസ്ഥാന ചെയര്‍പേഴ്‌സണ്‍ അഡ്വ. മുത്താര രാജ്, മഹിള കോണ്‍ഗ്രസ് ജില്ലാ സെക്രട്ടറി അനിത സജി എന്നിവര്‍ക്കു പരിക്കേറ്റത്. കെപിസിസി നിര്‍വാഹകസമിതി അംഗം കോശി എം. കോശി ഉദ്ഘാടനം ചെയ്തു. മാവേലിക്കര ബ്ലോക്ക് കോണ്‍ഗ്രസ് പ്രസിഡന്‍റ് അനി വര്‍ഗീസ് അധ്യക്ഷത വഹിച്ചു. തുടര്‍ന്ന് പോലീസ് ആക്രമണത്തില്‍ പ്രതിഷേധിച്ച് കോൺഗ്രസ് പ്രവര്‍ത്തകര്‍ പുതിയകാവിലേക്ക് മാര്‍ച്ചും പുതിയകാവ് ജംഗ്ഷനില്‍ നടന്ന പ്രതിഷേധ യോഗവും നടത്തി. ഡിസിസി വൈസ് പ്രസിഡന്‍റ് അഡ്വ. കെ.ആര്‍. മുരളീധരന്‍ യോഗം ഉദ് ഘാടനം ചെയ്തു. നൂറനാട് ബ്ലോക്ക് പ്രസിഡന്‍റ് ജി. ഹരിപ്രകാശ് അധ്യക്ഷത വഹിച്ചു.

സിഗരറ്റിൽ കഞ്ചാവ് ഓയിൽ പുരട്ടി വലിച്ച മൂന്നു യുവാക്കൾ പിടിയിൽ

തുറവൂർ: സിഗരറ്റിൽ കഞ്ചാവ് ഓയിൽ പുരട്ടി വലിച്ച മൂന്നു യുവാക്കളെ പട്ടണക്കാട് പോലീസ് പിടികൂടി. പട്ടണക്കാട് രാധാമാധവത്തിൽ നിധിൻ (29), നികർത്തിൽ സുജിത് (24), പുൽപ്പാറയിൽ ആഷിക് (30) എന്നിവരെയാണ് സിഐ ജയന്‍റെ നേതൃത്വത്തിലുള്ള പോലീസ് അറസ്റ്റ് ചെയ്തത്. ഞായറാഴ്ച വൈകുന്നേരം ആറിന് പൊന്നാംവെളി കോതകുളങ്ങരയിലായിരുന്നു സംഭവം. യുവാക്കൾ കഞ്ചാവ് ഓയിൽ (ഹാഷിഷ്) ഉപയോഗിക്കുന്നുണ്ടെന്ന വിവരം ലഭിച്ചതിനെത്തുടർന്നാണ് പോലീസെത്തിയത്. പോലീസെത്തിയപ്പോൾ സിഗരറ്റ് വലിച്ചു നിൽക്കുന്ന യുവാക്കളെയാണ് കണ്ടത്. പരിശോധന നടത്തിയെങ്കിലും ഒന്നും കണ്ടെത്താനായില്ല. തുടർന്ന് നടത്തിയ ചോദ്യം ചെയ്യലിലാണിവർ കഞ്ചാവോയിൽ സിഗരറ്റിൽ പുരട്ടി വലിച്ചതായി മനസിലാക്കിയത്. പിന്നീടിവരെ സ്റ്റേഷനിലെത്തിച്ച് ചോദ്യം ചെയ്തെങ്കിലും ഹാഷിഷിന്‍റെ ഉറവിടം മനസിലാക്കാൻ കഴിഞ്ഞില്ല. കേസ് രജിസ്റ്റർ ചെയ്തെങ്കിലും യുവാക്കളെ സ്റ്റേഷൻ ജാമ്യത്തിൽ വിട്ടയയ്ക്കുകയായിരുന്നെന്നാണ് അറിയാൻ കഴിഞ്ഞത്. സിഗരറ്റിൽ ഹാഷിഷ് പുരട്ടി വലിക്കുന്നത് സ്റ്റേഷൻ ജാമ്യം കൊടുക്കാവുന്ന കേസാണെന്നും എന്നാൽ, യുവാക്കൾക്ക് ജാമ്യം നൽകിയിട്ടില്ലെന്നും സിഐ പറഞ്ഞു. എസ്ഐമാരായ മധുസൂദനൻ, ലതീഷ്കുമാർ, സിപിഒമാരായ അനീഷ്, ശ്രീകുമാർ എന്നിവരാണ് പരിശോധനാ സംഘത്തിലുണ്ടായിരുന്നത്.

ജില്ലാ ആയുർവേദ ആശുപത്രിക്കെട്ടിടം ഏതുനേരവും നിലംപൊത്താം!

ആലപ്പുഴ: ജില്ലാ ആയുർവേദ ആശുപത്രിക്കെട്ടിടം ശോച്യാവസ്ഥയുടെ നടുവിൽ. ഭിത്തികളിൽ വിള്ളലുണ്ട്. മേൽക്കൂരയിൽനിന്നു കോൺക്രീറ്റ് ഇളകിവീണുകൊണ്ടിരിക്കുന്നു. എപ്പോൾ ഇടിഞ്ഞുവീഴുമെന്ന് ആശങ്കപ്പെടുന്ന ഈ കെട്ടിടത്തിൽ 20 രോഗികളുണ്ട്. 50 രോഗികളെവരെ കിടത്തിച്ചികിത്സിക്കാവുന്ന ആശുപത്രിക്കെട്ടിടമാണ് ശോച്യാവസ്ഥയുടെ നടുവിലായത്. കെട്ടിടം തകർച്ചയിലായതുകാരണം കിടത്തിച്ചികിത്സിക്കുന്നവരുടെ എണ്ണം വെട്ടിക്കുറച്ചിരിക്കുന്നതിനാലാണ് 20 പേർ മാത്രമായത്. ഇതിനുപുറമേ നൂറുകണക്കിനു രോഗികളും അറുപതോളം ജീവനക്കാരുമാണ് ആശുപത്രിയിൽ ദിവസേന എത്തുന്നത്. ആശുപത്രിയുടെ ശോച്യാവസ്ഥ മുൻനിർത്തി ആലപ്പുഴ നഗരസഭാ കെട്ടിടത്തിലേക്കു മാറുന്നതിനു തീരുമാനമെടുത്തെങ്കിലും അനിശ്ചിതമായി നീളുകയാണ്. പുതിയ കെട്ടിടത്തിലേക്ക്‌ ഉടൻ ആശുപത്രി മാറുമെന്നു പറയാൻ തുടങ്ങിയിട്ട്‌ കുറച്ചു നാളുകളായെന്നു ജീവനക്കാർ പറഞ്ഞു. ഭരണ-പ്രതിപക്ഷാംഗങ്ങളുടെ അഭിപ്രായഭിന്നത മറികടന്നാണ് പഴയ ആലപ്പുഴ നഗരസഭാ അനക്സ് കെട്ടിടം താത്കാലികമായി ആശുപത്രിക്കു വിട്ടുനൽകാൻ കഴിഞ്ഞമാസം കൗൺസിൽ അംഗീകാരം നൽകിയത്. കെട്ടിടത്തിൽ വയറിംഗ്, ശൗചാലയങ്ങൾ തുടങ്ങി ആശുപത്രിക്കുവേണ്ട അടിസ്ഥാന സൗകര്യങ്ങൾ ഒരുക്കാനുള്ള കാലതാമസമാണ് കെട്ടിടമാറ്റം വൈകുന്നതിനു കാരണമെന്നു ബന്ധപ്പട്ടവർ പറഞ്ഞു. താഴത്തെ നിലയും ഒന്നാംനിലയും 1,30,952 രൂപ വാടകയ്ക്കാണ് നൽകാൻ തീരുമാനമായത്. പ്രവർത്തനം മറ്റൊരു കെട്ടിടത്തിലേക്കു മാറ്റിയാലുടൻ ആശുപത്രി പൊളിച്ച്‌ പുതിയ ആശുപത്രിയുടെ നിർമാണം തുടങ്ങുമെന്നാണ് അധികൃതർ പറഞ്ഞിരുന്നത്. അഞ്ചുകോടിയാണ് നിർമാണത്തിനായി അനുവദിച്ചത്. എംഎൽഎ ഫണ്ടിൽനിന്നും ആലപ്പുഴ ജില്ലാ പഞ്ചായത്തിൽനിന്നും രണ്ടുകോടി വീതവും ആയുഷിൽനിന്ന് ഒരു കോടിയുമാണ് നിർമാണത്തിനായി ലഭിക്കുന്നത്.

അഴിമതി ചൂണ്ടിക്കാട്ടിയതിന് മർദനമേറ്റ സംഭവം പ്രതിഷേധാർഹം: എം. ലിജു

അമ്പലപ്പുഴ: പുന്നപ്ര വടക്ക് പഞ്ചായത്തിൽ തൊഴിലുറപ്പ് പദ്ധതി ഓഡിറ്റിൽ രണ്ടു കോടി രൂപയുടെ അഴിമതി കണ്ടെത്തിയ വിഷയം പഞ്ചായത്ത് കമ്മിറ്റിയിൽ ഉന്നയിച്ച ജനപ്രതിനിധിയെ മർദിച്ച സംഭവം പ്രതിഷേധാർഹമെന്ന് എം. ലിജു. പുന്നപ്ര വടക്ക് പഞ്ചായത്തിൽ തൊഴിലുറപ്പ് പദ്ധതിയിൽ ഓഡിറ്റിൽ രണ്ടു കോടി രൂപയുടെ അഴിമതി കണ്ടെത്തിയ വിഷയം പഞ്ചായത്ത് യോഗത്തിൽ സാജൻ ഏബ്രഹാം ഉൾപ്പെടെയുള്ള പഞ്ചായത്തംഗങ്ങൾ പഞ്ചായത്ത്‌ യോഗത്തിൽ ഉന്നയിച്ചിരുന്നു. വിഷയം ഉന്നയിച്ച സാജനെ സിപിഎം അംഗങ്ങൾ ക്രൂരമായി മർദിക്കുകയായിരുന്നു. മർദനത്തിൽ പരിക്കേറ്റ് ആലപ്പുഴ മെഡിക്കൽ കോളജ് ആശുപത്രിയിൽ പ്രവേശിപ്പിച്ച സാജനെ സിപിഎം ഏരിയ സെക്രട്ടറിയുടെ നേതൃത്വത്തിൽ വീണ്ടും മർദിക്കുകയായിരുന്നു. സിപിഎം നേതൃത്വത്തിൽ നടന്ന അഴിമതിക്കെതിരേ പ്രതികരിച്ച പഞ്ചായത്തംഗം സാജൻ ഏബ്രഹാമിനെ മർദിച്ച സംഭവത്തിൽ ശക്തമായി പ്രതിഷേധിക്കുന്നതായും അഴിമതിക്കെതിരേയും സിപിഎം അക്രമത്തിനെതിരേയും കോൺഗ്രസ് പാർട്ടി ശക്തമായ സമരപരിപാടികളുമായി മുന്നോട്ട് പോകുമെന്നും എം. ലിജു പറഞ്ഞു.

റോട്ടറി ക്ലബ് ഓഫ് ആലപ്പി കൊയര്‍ സിറ്റി ഭാരവാഹികള്‍ ചുമതലയേറ്റു

ആലപ്പുഴ: 2025-2026 വര്‍ഷത്തിലെ റോട്ടറി ക്ലബ് ഓഫ് ആലപ്പി കൊയര്‍ സിറ്റി പ്രസിഡന്‍റായി റോട്ടെറിയന്‍ വര്‍ഗീസ് സേവ്യര്‍, സെക്രട്ടറി എസ്. പത്മകുമാര്‍, ട്രഷറർ സാജന്‍ കെ. ജോണ്‍ എന്നിവര്‍ ചുമതലയേറ്റു. ആലപ്പുഴ റോട്ടറി ക്ലബ് ഹാളില്‍ നടന്ന വര്‍ണാഭമായ ചടങ്ങ് നിയുക്ത റോട്ടറി ഗവര്‍ണര്‍ കൃഷ്ണന്‍ ജി. നായര്‍ ഉദ്ഘാടനം ചെയ്തു. റോട്ടെറിയന്‍ പി.സി. ചെറിയാന്‍ അധ്യക്ഷത വഹിച്ചു. ഈ വര്‍ഷത്തെ സാമൂഹ്യ പ്രവര്‍ത്തന പ്രോജക്ടുകള്‍ സ്‌പോണ്‍സര്‍ ചെയ്ത വിനോദ്.വി, മാത്യു പി.ജെ. സജികുമാര്‍, പദ്മകുമാര്‍, തോമസ് ആന്‍റോ പുളിക്കന്‍ എന്നിവരെ ആദരിച്ചു. അസി. ഗവര്‍ണര്‍ റോട്ടെറിയന്‍ ആന്‍റണി ഫെര്‍ണാണ്ടസ്, സിജു ജോയ്, രാഗേഷ് ചക്രപാണി, ബാലന്‍.പി, രാഗേന്ദു രാഗേഷ്, സോണിയ സിജു, പ്രീതി സജി, ടി.സി. ജോസഫ്, രാജന്‍ പീറ്റര്‍, ലയ സാജന്‍, എം.എസ്. റെജി, പി.ജി. റെയ്‌നോള്‍ഡ് എന്നിവര്‍ പ്രസംഗിച്ചു.

എംസിവൈഎം തീർഥാടന പദയാത്ര നടത്തി

മാവേലിക്കര: മലങ്കര കത്തോലിക്കാ സഭയുടെ പ്രഥമ മെത്രാപ്പോലീത്തയും മലങ്കര പുനരൈക്യ പ്രസ്ഥാനത്തിന്‍റെ ശില്പിയുമായ ധന്യൻ ആർച്ച്ബിഷപ് മാർ ഈവാനിയോസ് തിരുമേനിയുടെ 72-ാം ഓർമപ്പെരുന്നാളിനു മുന്നോടിയായി എംസിവൈഎം മാവേലിക്കര വൈദിക ജില്ലയുടെ നേതൃത്വത്തിൽ തീർഥാടന പദയാത്ര നടത്തി. മുട്ടം സെന്‍റ് ജോസഫ്സ് മലങ്കര സുറിയാനി കത്തോലിക്കാ ദേവാലയത്തിൽനിന്ന് ആരംഭിച്ച തീർഥാടന പദയാത്ര എംസിവൈഎം ഭാരവാഹികൾക്ക് വള്ളിക്കുരിശ് കൈമാറി മാവേലിക്കര ഭദ്രാസന വികാരി ജനറാൾ റവ. ജോബ് കല്ലുവിളയിൽ ഉദ്ഘാടനം നിർവഹിച്ചു. മാവേലിക്കര വൈദിക ജില്ല എംസിവൈഎം ഡയറക്ടർ റവ. ഡോ. ഗീവർഗീസ് കൈതവന, അനിമേറ്റർ സി. മേബിൾ എസ്ഐസി, ഫാ. റോബർട്ട് പാലവിള, ഫാ. കാലേബ് ചെറുവള്ളി, എംസിവൈഎം മാവേലിക്കര ഭദ്രാസന പ്രസിഡന്‍റ് റോഷൻ വർഗീസ്, വൈദിക ജില്ലാ പ്രസിഡന്‍റ് ജിത്തു സജി, സെക്രട്ടറി ലിൻഡ റേച്ചൽ ഫിലിപ്പ് എന്നിവർ പ്രസംഗിച്ചു. തുടർന്ന് എംസിവൈഎം മാവേലിക്കര ഭദ്രാസനസമിതിയുടെ നേതൃത്വത്തിൽ ധന്യൻ മാർ ഈവാനിയോസ് തിരുമേനിയുടെ മാതൃ ഇടവകയായ പുതിയകാവ് സെന്‍റ് ജോസഫ് മലങ്കര കത്തോലിക്കാ തീർഥാടന പള്ളിയിൽനിന്ന് കല്ലുമല സെന്‍റ് മേരീസ് മലങ്കര സുറിയാനി കത്തോലിക്ക പള്ളിയിലേക്ക് മെഴുകുതിരി പ്രദക്ഷിണവും നടത്തി. ഭദ്രാസന അധ്യക്ഷൻ ബിഷപ് മാത്യൂസ് മാർ പോളികാർപ്പോസ്, ഭദ്രാസന വികാരി ജനറാൾ റവ. ജോബ് കല്ലുവിളയിൽ, യൂഹാനോൻ പുത്തൻവീട്ടിൽ റമ്പാൻ, വൈദികർ, സന്യസ്തർ, അല്മായ പ്രതിനിധികൾ എന്നിവർ പങ്കെടുത്തു.

ബിന്ദുവിന്‍റെ മരണം സര്‍ക്കാര്‍ സ്‌പോണ്‍സേര്‍ഡ് കൊലപാതകം: അനൂപ് ആന്‍റണി

മാവേലിക്കര: ബിന്ദുവിന്‍റെ മരണം സംസ്ഥാന സര്‍ക്കാര്‍ സ്‌പോണ്‍സേര്‍ഡ് കൊലപാതകമാണെന്ന് ബിജെപി സംസ്ഥാന മീഡിയ പ്രഭാരി അനൂപ് ആന്‍റണി. ആരോഗ്യവകുപ്പ് മന്ത്രി വീണാ ജോര്‍ജ് രാജിവയ്ക്കണമെന്ന് ആവശ്യപ്പെട്ട് മാവേലിക്കര ജില്ലാ ആശുപത്രിയിലേക്ക് ബിജെപി ആലപ്പുഴ തെക്ക് ജില്ലാ കമ്മിറ്റിയുടെ നേതൃത്വത്തില്‍ നടത്തിയ പ്രതിഷേധ മാര്‍ച്ച് ഉദ്ഘാടനം ചെയ്യുകയായിരുന്നു അദ്ദേഹം. പിണറായി സര്‍ക്കാരിന്‍റെ കുറ്റകരമായ അനാസ്ഥയാണ് കോട്ടയം മെഡിക്കല്‍ കോളജില്‍ കെട്ടിടം ഇടിഞ്ഞുവീണ് ബിന്ദു മരിക്കാന്‍ കാരണം. പിആര്‍ മോഡല്‍ ആരോഗ്യകേരളമാണ് കോട്ടയത്ത് തകര്‍ന്നുവീണത്. ആരോഗ്യമന്ത്രി മുന്‍പു പറഞ്ഞ കേരളത്തിന്‍റെ കപ്പല്‍ മുങ്ങ കപ്പിത്താന്‍ നാടും വിട്ടു. സാധാരണക്കാരന്‍ ചികിത്സ ലഭിക്കാതെ ബുദ്ധിമുട്ടുമ്പോള്‍, മുഖ്യമന്ത്രി പിണറായി വിജയനും മന്ത്രിമാരും പരിവാരങ്ങളും വിദേശ രാജ്യങ്ങളില്‍ വിദഗ്ധ ചികിത്സതേടുന്നു. കേരളത്തിലെ സര്‍ക്കാര്‍ ആശുപത്രികളുടെ അവസ്ഥ ദയനീയമാണ്. ചികിത്സ തേടുന്നവരെ സര്‍ക്കാര്‍ മരണത്തിലേക്ക് തള്ളിവിടുകയാണ്. പിആര്‍ ജോലി കൊണ്ട് മലയാളിയെ കബളിപ്പിച്ച സര്‍ക്കാരിന്‍റെ മുഖത്തേറ്റ പ്രഹരമാണ് തിരുവനന്തപുരം മെഡിക്കല്‍ കോളജിലെ യൂറോളജി വിഭാഗം മേധാവി നടത്തിയ വെളിപ്പെടുത്തല്‍. അല്‍പ്പമെങ്കിലും ഉളുപ്പുണ്ടെങ്കില്‍ വീണാ ജോര്‍ജ് രാജിവയ്ക്കണമെന്നും അദ്ദേഹം പറഞ്ഞു. ജില്ലാ പ്രസിഡന്‍റ് സന്ദീപ് വാചസ്പതി അധ്യക്ഷത വഹിച്ചു. ജനറല്‍ സെക്രട്ടറിമാരായ അഡ്വ. കെ.കെ. അനൂപ്, കൃഷ്ണകുമാര്‍ രാംദാസ് എന്നിവര്‍ സംസാരിച്ചു. ആശുപത്രി പ്രവേശനകവാടത്തിന് 100 മീറ്റര്‍ മുന്‍പില്‍ പ്രതിഷേധക്കാരെ പോലീസ് തടഞ്ഞതിനെത്തുടര്‍ന്ന് പോലീസ് ബലപ്രയോഗം നടത്തിയതോടെ ഉന്തും തള്ളുമുണ്ടായി. ചെങ്ങന്നൂര്‍ ഡിവൈഎസ്പി ടി. ബിനുകുമാര്‍, എസ്എച്ച്ഒമാരായ സി. ശ്രീജിത്ത് (മാവേലിക്കര), എം.സി. അഭിലാഷ് (വെണ്‍മണി), പി.വി. മോഹിത് (കുറത്തികാട്) എന്നിവരുടെ നേതൃത്വത്തിലുള്ള പോലീസ് സംഘം സ്ഥലത്ത് സുരക്ഷയൊരുക്കി.

കെഎസ്ഇബി നിയമവിരുദ്ധമായി ബലപ്രയോഗത്തിലൂടെ ലൈന്‍ വലിച്ചു

മുഹമ്മ: കെഎസ്ഇബി നിയമ വിരുദ്ധമായി പുരയിടത്തിലൂടെ ബല‌പ്ര‌യോഗത്തിലൂടെ ലൈൻവലിച്ചതിനെ തു‌ടർന്നു വയോധികന്‍റെ ശ്രവണശേഷി നഷ്ടപ്പെട്ടതാ‌യി പരാതി. മുഹമ്മ കായിപ്പുറം തോട്ടുങ്കല്‍ വിലാസന് (76) ആണ് ശ്രവണശേഷി നഷ്ടപ്പെട്ടത്. പാലിയേറ്റീവ് കെയര്‍ ചികിത്സയില്‍ കഴിയുന്ന രോഗികളാണ് 24 മണിക്കൂറും പരസഹായം വേണമെന്നു ഡോക്ടര്‍മാര്‍ നിര്‍ദ്ദേശിച്ചിട്ടുള്ള വിലാസനും ഭാര്യ രാധമ്മയും. കഴിഞ്ഞമാസം 23 നു ജില്ലാ കളക്ടറുടെയും ആര്‍ഡിഒ യുടെയും ഉത്തരവുണ്ടെന്നു കളവ് പറഞ്ഞാണ് പോലീസുമായി ഉദ്യോഗസ്ഥരെത്തി വിലാസന്‍റെ പുരയിടത്തിലൂടെ ലൈന്‍ വലിക്കാന്‍ ശ്രമിച്ചത്. ഉത്തരവുകള്‍ കാണിക്കാന്‍ പറഞ്ഞെങ്കിലും മറ്റു പേപ്പറുകളാണ് ഉദ്യോഗസ്ഥര്‍ കാണിച്ചതെന്നു സ്ഥല ഉടമയായ മുഹമ്മ കായിപ്പുറം തോട്ടുങ്കല്‍ വീട്ടില്‍ ടി.ജി വിലാസന്‍ പറയുന്നു. അന്നു ബലമായി ലൈന്‍ വലിയ്ക്കാന്‍ ശ്രമിക്കുന്നതിനിടെ ഉദ്യോഗസ്ഥര്‍ തള്ളിയിട്ടതിനെത്തുടര്‍ന്നു പരിക്കേറ്റ വിലാസന്‍ മുഹമ്മ ആശുപത്രിയില്‍ ചികില്‍സ തേടിയിരുന്നു. ഇതുസംബന്ധിച്ചു അധികാരികൾക്കെതിരേ പരാതിയും നൽകിയിട്ടുണ്ട്. തന്റെ പുരയിടത്തിലൂടെ അയല്‍വാസി‌യുടെ പുരയിടത്തിലേയ്ക്കു വൈദ്യുത ലൈന്‍ വലിക്കുന്നതിനു സമ്മതപത്രം നല്‍കിയിട്ടില്ലെന്നും വിഷയം ആര്‍ഡിഒയുടെ പരിഗണനയില്‍ ആണെന്നും വിലാസന്‍ പറഞ്ഞു. ഊന്നുവടിയുടെ സഹായമില്ലാതെ നില്‍ക്കാന്‍ കഴിയാത്തവരാണ് താനും ഭര്‍ത്താവുമെന്ന് രാധമ്മ പരാതിയില്‍ പറയുന്നു. ശരീരിക ബുദ്ധിമുട്ടും സംസാരത്തിലെ പൊരുത്തക്കേടുമാണ് ആദ്യമുണ്ടായത്. പിന്നീടാണ് ശ്രവണശേഷി നഷ്ടപ്പെട്ടത്. ഇതേത്തുടര്‍ന്നു ചികില്‍സ തേടിയെങ്കിലും ശ്രവണ ശക്തിയില്‍ മാറ്റമുണ്ടായില്ല. സംസാരത്തിലെ പൊരുത്തമില്ലായ്മ തുടരുന്നതായും വീട്ടുകാര്‍ പറയുന്നു.

മദ്യപിച്ചെത്തിയ മകന്‍റെ മർദനമേറ്റ് വീട്ടമ്മ മരിച്ചു

അമ്പലപ്പുഴ: മദ്യപിച്ചെത്തിയ മകന്‍റെ മർദനമേറ്റ വീട്ടമ്മ മരിച്ചു. അമ്പലപ്പുഴ വടക്ക് പഞ്ചായത്ത് ഒമ്പതാം വാർഡ് കഞ്ഞിപ്പാടം ആശാരിപ്പറമ്പിൽ ആനി (55) ആണ് ഇന്നലെ പുലർച്ചെ ആലപ്പുഴ മെഡിക്കൽ കോളജ് ആശുപത്രിയിൽ മരിച്ചത്. ആനിയെ കഴിഞ്ഞ ഞായറാഴ്ചയാണ് നിർമാണത്തൊഴിലാളിയായ മകൻ ജോൺസൺ ജോയി (34) ക്രൂരമായി ആക്രമിച്ചത്. പിടിച്ചുമാറ്റാനെത്തിയ പിതാവ് ജോയിച്ചനും മർദനമേറ്റിരുന്നു. പരിക്കേറ്റ ഇരുവരും സമീപത്തെ പ്രാഥമികാരോഗ്യകേന്ദ്രത്തിൽ ചികിത്സതേടിയെങ്കിലും പിന്നീട് ആനിയെ ആലപ്പുഴ മെഡിക്കൽ കോളജ് ആശുപത്രിയിൽ പ്രവേശിപ്പിക്കുകയായിരുന്നു. ജോൺസൺ മദ്യപിച്ചെത്തി സ്ഥിരം വഴക്കുണ്ടാക്കുന്ന ആളാണെന്ന് സമീപവാസികൾ പറഞ്ഞു. സംഭവത്തെത്തുടർന്നുള്ള പരാതിയിൽ അമ്പലപ്പുഴ പോലീസ് കേസെടുത്ത് ജോൺസണെ റിമാൻഡ് ചെയ്തിരുന്നു. വണ്ടാനം മെഡിക്കൽ കോളജ് ആശുപത്രി മോർച്ചറിയിൽ പോസ്റ്റ് മോർട്ടം നടത്തി മൃതദേഹം ബന്ധുക്കൾക്ക് വിട്ടുനൽകി. മറ്റൊരു മകൻ ജോബിൻ.

മഹിളാ കോൺഗ്രസ് മാർച്ചിൽ പോലീസ് അതിക്രമം ജനാധിപത്യവിരുദ്ധ നടപടിയെന്ന് കൊടിക്കുന്നിൽ സുരേഷ് എംപി

മാവേലിക്കര: ആരോഗ്യമന്ത്രി വീണാ ജോർജിന്‍റെ രാജി ആവശ്യപ്പെട്ട് മഹിളാ കോൺഗ്രസ് സംഘടിപ്പിച്ച മാർച്ചിൽ പോലീസ് നടത്തിയ അതിക്രമം കടുത്ത ഭാഷയിൽ വിമർശിച്ച് കൊടിക്കുന്നിൽ സുരേഷ് എംപി. പ്രതിഷേധക്കാരായ സ്ത്രീകളെ തെരുവിൽ വലിച്ചിഴച്ച് അറസ്റ്റ് ചെയ്തതും ജലപീരങ്കിയും ലാത്തിച്ചാർജും ഉപയോഗിച്ചുള്ള സംസ്ഥാന സർക്കാരിന്‍റെ നയങ്ങൾ ജനാധിപത്യവിരുദ്ധമാണെന്നും അദ്ദേഹം കുറ്റപ്പെടുത്തി. മഹിളാ കോൺഗ്രസ് പ്രവർത്തകർ പൊതുസമൂഹത്തിന്‍റെ ആരോഗ്യപ്രശ്നങ്ങൾക്കായാണ് ശബ്ദമുയർത്തിയത്. അതിനെ അടിച്ചമർത്താൻ പോലീസ് അന്യായമായി ഇടപെടുകയും സ്ത്രീകളുടെ മേൽ ക്രൂരമായി അക്രമം ചെലുത്തുകയും ചെയ്തത് അങ്ങേയറ്റം അപലപനീയമാണ്. ഇതിന് രാഷ്ട്രീയ ഉത്തരവാദിത്തം ആരാണ് ഏറ്റെടുക്കുന്നതെന്നും എംപി ചോദിച്ചു. സംസ്ഥാന സർക്കാർ ജനാധിപത്യ സമരങ്ങളെ അടിച്ചമർത്താൻ പോലീസ് ഉദ്യോഗസ്ഥരെ ഉപയോഗിക്കുന്നതിൽ രാഷ്‌ട്രീയക്കളി കാണുന്നുണ്ട്. ചികിത്സയില്ല, മരുന്നില്ല, ആശുപത്രികൾ ദയനീയാവസ്ഥയിലാണ്. ചോദ്യംചെയ്താൽ പോലീസിനെ ഉപയോഗിച്ച ആക്രമിക്കുന്നു. ഇത് ഫാസിസ്റ്റ് സമീപനമാണ്- എംപി കൂട്ടി ച്ചേർത്തു.

മിത്രക്കരി സെന്‍റ് സേവ്യേഴ്സ് ഹൈസ്‌കൂളില്‍ പ്രതിഭാസംഗമം

ആലപ്പുഴ: മിത്രക്കരി സെന്‍റ് സേവ്യേഴ്സ് ഹൈസ്‌കൂളില്‍ നടന്ന പ്രതിഭാസംഗമം ഫാ. സ്‌കറിയ കന്യാകോണില്‍ ഉദ്ഘാടനം ചെയ്തു. സ്‌കൂള്‍ മാനേജര്‍ ഫാ. സിറിയക് പഴയമഠം അധ്യക്ഷത വഹിച്ചു. റമദാ ഹോട്ടല്‍ ചെയര്‍മാനും സാമൂഹ്യ പ്രവര്‍ത്തകനുമായ റെജി ചെറിയാന്‍ വിവിധ ക്ലബ് കളുടെ ഉദ്ഘാടനം നടത്തി. സ്‌കൂള്‍ ഹെഡ്മിസ്‌ട്രെസ് ലീന സെബാസ്റ്റ്യന്‍, ഷീന പോള്‍, മോളമ്മ തോമസ്, നിഷ സുധീര്‍, സിസ്റ്റര്‍ ചൈതന്യ തെരേസ, കുമാരി അലോന മേരി തോമസ് എന്നിവര്‍ പ്രസംഗിച്ചു. എസ്എസ്എല്‍സി പരീക്ഷയില്‍ മികച്ച വിജയം നേടിയ കുട്ടികളെ അനുമോദിച്ചു. വിവിധ ക്ലബ്കളുടെയും ദിശയുടെയും ഉദ്ഘാടനവും വായന വാരസമാപനവുംനടന്നു.

വില്ലേജ് ഓഫീസർ ലീവിൽ, ജനം ദുരിതത്തിൽ

തുറവൂർ: തുറവൂർ വില്ലേജ് ഓഫീസർ ലീവിലായതോടെ ഓഫീസ് പ്രവർത്തനം അവതാളത്തിലായെന്ന് പരാതി. ഓരോ ആവശ്യത്തിനും തുറവൂർ വില്ലേജ് ഓഫീസിൽ കയറിയിറങ്ങി ജനം കഷ്ടപ്പെടുകയാണ്. വില്ലേജ് ഓഫീസറിന്‍റെ നിസ്സഹകരണം മൂലം ഓൺലൈൻ അപേക്ഷകൾ പോലും നോക്കി അംഗീകരിച്ച് വിടാൻ സാധിക്കാത്ത അവസ്ഥയാണ്. അക്ഷയകേന്ദ്രങ്ങളിലൂടെ അപേക്ഷിക്കുന്ന ഓൺലൈൻ അപേക്ഷകൾ പോലും 10 മുതൽ 15 ദിവസങ്ങൾക്കുശേഷമാണ് പാസാക്കി ലഭിക്കുന്നത്. ഇതുമൂലം ജനങ്ങൾ ദുരിതത്തിലാണ്. കുട്ടികളുടെ അഡ്മിഷനും മറ്റും സമയത്ത് സർട്ടിഫിക്കറ്റ് ലഭിക്കാത്തതുമൂലം വിദ്യാഭ്യാസത്തിനും മറ്റും ബാധിക്കുന്നു. കഴിഞ്ഞ കുറച്ചുനാളുകളായി പ്രവർത്തനം താളംതെറ്റിയ രീതിയിലാണ്. തരം മാറ്റലിന് അപേക്ഷനൽകി വില്ലേജ് ഓഫീസിലെ റിപ്പോർട്ടിനായി നൂറുകണക്കിന് അപേക്ഷകരാണ് കാത്തു നിൽക്കുന്നത്. എന്താവശ്യത്തിന് തുറവൂർ വില്ലേജ് ഓഫീസിൽ ചെന്നാലും താട്ടാമുട്ടുന്യായങ്ങൾ പറഞ്ഞ് ജനങ്ങളെ ബുദ്ധിമുട്ടിക്കുകയാണെന്ന് നാട്ടുകാർ ആരോപിക്കുന്നു. അടിയന്തരമായി തുറവൂർ വില്ലേജ് ഓഫീസിലെ ജീവനക്കാരുടെ ജനദ്രോഹ നടപടി അവസാനിപ്പിക്കാനുള്ള നടപടി സർക്കാർ സ്വീകരിക്കണമെന്ന ആവശ്യം ഉയരുന്നു.

കപ്പൽ അപകടം; കണ്ടെയ്നറിൽ കുരുങ്ങി വീണ്ടും വല നശിച്ചു

ഹരിപ്പാട്: കപ്പൽ അപകടത്തെ ത്തുടർന്ന് കടലിൽ താഴ്ന്നുകിടക്കുന്ന കണ്ടെയ്നറുകൾ മൂലം ഉണ്ടാകുന്ന ഭീഷണി ഒഴിയുന്നില്ല. മത്സ്യബന്ധന ഉപകരണങ്ങൾ നശിക്കുന്ന സംഭവം ആവർത്തിക്കുകയാണ്. കഴിഞ്ഞ ദിവസം മീൻപിടിക്കുന്നതിനിടെ ആറാട്ടുപുഴ-തറയിൽക്കടവ് എല്ലാലി കിഴക്കതിൽ സുരേഷിന്‍റെ ഉടമസ്ഥതയിലുള്ള വള്ളത്തിന്‍റെ വലകൾ ഉടക്കികീറി. എൻടിപിസിക്ക് പടിഞ്ഞാറ് വല വലിക്കുന്നതിനിടെയാണ് കുരുങ്ങിയത്. 700 കിലോയോളം വലയ്ക്ക് നാശമുണ്ടായി. ആറു ലക്ഷം രൂപയുടെ നഷ്ടമുണ്ടായതായി സുരേഷ് പറഞ്ഞു. സുരക്ഷിതമെന്ന് കരുതിയ സ്ഥലത്ത് മത്സ്യബന്ധനം നടത്തിയിട്ടും വലകുരുങ്ങുന്നത് മത്സ്യത്തൊഴിലാളികളിൽ ആശങ്ക വർധിപ്പിക്കുകയാണ്.

തെരുവുനായകളുടെ വിളയാട്ടം : കണ്ണടച്ച് അധികൃതര്‍

എടത്വ: സ്‌കൂളിലേക്കെത്തുന്ന പിഞ്ചുകുട്ടികള്‍ ഉള്‍പ്പെടെയുള്ള വിദ്യാര്‍ഥികള്‍ക്കു ഭീഷണിയായി തെരുവുനായകളുടെ വിളയാട്ടം. തിരക്കേറിയ എടത്വ ടൗണും പരിസര പ്രദേശങ്ങളും സ്‌കൂളുകളിലേക്കുള്ള വഴികളും തെരുവുകള്‍ കീഴടക്കിയിരിക്കുകയാണ്. അക്രമാസക്തരായ നായ്ക്കള്‍ക്കെതിരേ അധികൃതര്‍ കണ്ണടച്ചിരിക്കുന്നതിനെതിരേ പ്രതിഷേധവും ശക്തമാണ്. ദിവസേന ആയിരക്കണക്കിന് വിദ്യാര്‍ഥികളും അധ്യാപകരും വിവിധ വകുപ്പുകളിലെ ജോലി ചെയ്യുന്ന ജീവനക്കാരും നൂറുകണക്കിന് യാത്രക്കാരും എത്തുന്ന എടത്വയിലെ തെരുവുകളിലാണ് നായ്ക്കള്‍ കൂട്ടംകൂട്ടമായി അലഞ്ഞു നടക്കുന്നത്. പുലര്‍ച്ചെ എത്തുന്ന പത്രവിതരണക്കാര്‍ മുതല്‍ വൈകി ടൗണില്‍ എത്തുന്ന യാത്രക്കാര്‍ക്കു വരെ തെരുവു നായ്കളുടെ ഉപദ്രവം നേരിടേണ്ടിവരുന്നത്. എടത്വ സെന്‍റ് അലോഷ്യസ് കോളജ് ഉള്‍പ്പെടെ പത്തോളം വിദ്യാഭ്യാസ സ്ഥാപനങ്ങളും തൊഴില്‍ അധിഷ്ഠിത വിദ്യാഭ്യസ സ്ഥാപനവും സ്ഥിതി ചെയ്യുന്ന എടത്വയില്‍ ദിവസേന നൂറുകണക്കിന് വിദ്യാര്‍ഥികള്‍ കാല്‍നടയായും സൈക്കിളിലും ബസുകളിലും എത്തുന്നുണ്ട്. ബസുകളിലെത്തുന്ന വിദ്യാര്‍ഥികള്‍ കാല്‍നടയായി വേണം അഞ്ഞൂറ് മീറ്റര്‍ അയലെയുള്ള വിദ്യാഭ്യാസ സ്ഥാപനങ്ങളില്‍ എത്തേണ്ടത്. ഒട്ടുമിക്ക വിദ്യാര്‍ഥികളും തെരുവുനായുടെ ഉപദ്രവം ഏല്‍ക്കാറുണ്ട്. രാത്രികാലങ്ങളില്‍ എത്തുന്ന യാത്രക്കാര്‍ ഏറെ ഭയപ്പെട്ടാണ് ടൗണിലൂടെ യാത്ര ചെയ്യുന്നത്. ആഴ്ചകള്‍ക്കു മുന്‍പ് എടത്വ കെഎസ്ആര്‍ടിസി ഡിപ്പോയിലെത്തിയ നിരവധി യാത്രക്കാര്‍ക്ക് തെരുവുനായുടെ കടിയേറ്റിരുന്നു. ഡിപ്പോയില്‍ മാത്രമല്ല സ്‌കൂള്‍, കോളജ് കോമ്പൗണ്ടുകള്‍, ഇവയുടെ മുന്‍വശത്തെ റോഡ്, ബോട്ടുജെട്ടി, എടത്വ പാലത്തിന് താഴെ, എടത്വ ആശുപത്രി കോമ്പൗണ്ട്, പള്ളിയുടെ പാര്‍ക്കിംഗ് ഗ്രൗണ്ട്, ഐറ്റിഐ റോഡ്, ചന്ത തുടങ്ങി ഒട്ടേറെ സ്ഥലങ്ങളില്‍ നെരുവുനായകള്‍ കൂട്ടം ചേര്‍ന്ന് നടക്കുകയാണ്. നായുടെ ഉപദ്രവം മാത്രമല്ല ഇരുചക്ര വാഹന യാത്രക്കാരെ അപകടത്തില്‍പ്പെടുത്തുന്നതും പതിവു കാഴ്ചയാണ്. പഞ്ചായത്ത് അധികൃതര്‍ ഇടപെട്ട് നായ്ക്കളെ വന്ധ്യംകരണ ശസ്ത്രക്രിയ നടത്തിയെങ്കിലും വീണ്ടും പെറ്റുപെരുകുകയാണ്. വീടുകളില്‍ വളര്‍ത്തുന്ന നായ്ക്കളെ തെരുവില്‍ തള്ളുന്നതാണ് കൂടുതലും അപകടകാരികളാകുന്നത്. നായ്കളുടെ കൃത്യമായ കണക്കെടുപ്പ് നടത്താത്തതാണ് വഴിയോരങ്ങളില്‍ ഇവ കൂടുന്നത്. പഞ്ചായത്തും മൃഗസംരക്ഷണവകുപ്പും അടിയന്തരമായി ഇടപെടണമെന്നാണ് പൊതുജനത്തിന്‍റെ ആവശ്യം.

മൂലം ജലോത്സവം: സാംസ്‌കാരിക സമ്മേളനം നടത്തി

മങ്കൊമ്പ്: ഒൻപതിന് ചമ്പക്കുളത്താറ്റിൽ നടക്കുന്ന മൂലം ജലോത്സവത്തോടനുബന്ധിച്ചുള്ള സാംസ്‌കാരിക ഘോഷയാത്രയും സാംസ്‌കാരിക സമ്മേളനവും നടന്നു. മന്ത്രി സജി ചെറിയാൻ സമ്മേളനം ഉദ്ഘാടനം ചെയ്തു. ചമ്പക്കുളം ഗോവേന്ത ജംഗ്ഷനിൽ നിന്നാരംഭിച്ച ഘോഷയാത്ര അമ്പലപ്പുഴ ഡിവൈഎസ്പി കെ.എൻ. രാജേഷ് ഫ്‌ളാഗ് ഓഫ് ചെയ്തു. തോമസ് കെ. തോമസ് എംഎൽഎ അധ്യക്ഷത വഹിച്ച സമ്മേളനത്തിൽ വള്ളംകളിരംഗത്തെ മുതിർന്നയാളുകളെ ചലച്ചിത്രതാരം പ്രമോദ് വെളിയനാട് ആദരിച്ചു. ചമ്പക്കുളം ബ്ലോക്കു പഞ്ചായത്ത് പ്രസിഡന്‍റ് ജിൻസി ജോളി, വൈസ് പ്രസിഡന്‍റ് എം.എസ്. ശ്രീകാന്ത്, പഞ്ചായത്ത് പ്രസിഡന്‍റുമാരായ ടി.ജി. ജലജകുമാരി, മിനി മന്മഥൻനായർ, ടി.ടി. സത്യദാസ്, എം.സി. പ്രസാദ്, ആൻസി ബിജോ, വൈസ് പ്രസിഡന്‍റുമാരായ സാജു കടമ്മാട്, അഗസ്റ്റിൻ ജോസഫ്, ബ്ലോക്കുപഞ്ചായത്തംഗം ജയശ്രീ വേണുഗോപാൽ, കുട്ടനാട് തഹസിൽദാർ ഷിബു സി ജോബ്, ജലോത്സവ സമിതി ഭാരവാഹികൾ തുടങ്ങിയവർ പ്രസംഗിച്ചു.

മാർ ഈവാനിയോസ് ഓർമപ്പെരുന്നാൾ: മെഴുകുതിരി പ്രദക്ഷിണം നടത്തി

മാവേലിക്കര: എംസിവൈഎം മാവേലിക്കര ഭദ്രാസനസമിതിയുടെ ആഭിമുഖ്യത്തിൽ ധന്യൻ ആർച്ച്ബിഷപ് മാർ ഈവാനിയോസിന്‍റെ 72-ാമത് ഓർമപ്പെരുന്നാളിനോടനുബന്ധിച്ച് മെഴുകുതിരി പ്രദക്ഷിണം നടത്തി. മാർ ഈവാനിയോസിന്‍റെ മാതൃ ഇടവകയായ പുതിയകാവ് സെന്‍റ് ജോസഫ് മലങ്കര സുറിയാനി കത്തോലിക്കാ തീർഥാടന ദേവാലയത്തിൽനിന്ന് ആരംഭിച്ച് കല്ലുമല സെന്‍റ് മേരീസ് മലങ്കര സുറിയാനി കത്തോലിക്കാ ദൈവാലയത്തിൽ സമാപിച്ചു. മെഴുകുതിരി പ്രദക്ഷിണത്തിന് മാവേലിക്കര ഭദ്രാസനാധ്യക്ഷൻ ബിഷപ് ഡോ. മാത്യൂസ് മാർ പോളിക്കാർപ്പോസ് മുഖ്യകാർമികത്വം വഹിച്ചു. വികാരി ജനറൽ ഫാ. ജോബ് കല്ലുവിളയിൽ, യൂഹാനോൻ പുത്തൻവീട്ടിൽ റമ്പാൻ, വൈദികർ, സിസ്റ്റേഴ്‌സ്, എംസിവൈഎം ഭദ്രാസന, ജില്ലാ, യൂണിറ്റ് തല ഭാരവാഹികൾ, അല്‌മായ അംഗങ്ങൾ എന്നിവർ പങ്കെടുത്തു. പ്രധാന പദയാത്ര നാളെ മാവേലിക്കര പുതിയകാവിലെ മാർ ഈവാനിയോസിന്‍റെ ജന്മഗൃഹമായ പണിക്കർ വീട്ടിൽനിന്ന് ആരംഭിച്ച് 14ന് തിരുവനന്തപുരം പട്ടം സെന്‍റ് മേരീസ് മലങ്കര കത്തോലിക്കാ പള്ളിയിൽ എത്തിച്ചേരും.

ചെങ്കുളത്തെ ക്വാറി അപകടം: അപകടകരമായ സാഹചര്യം മറച്ചുവച്ചതായി ആക്ഷേപം

കോന്നി: അത്യന്തം അപകടകരമായ സാഹചര്യത്തിൽ പയ്യനാമൺ ചെങ്കുളത്ത് ക്വാറിയിൽ ഇന്നലെ രണ്ട് ഇതര സംസ്ഥാന തൊഴിലാളികളെ ഉപയോഗിച്ച് ജോലിയെടുപ്പിച്ചതെന്ന് പ്രാഥമിക നിഗമനം. അപകടത്തേ തുടർന്ന് സ്ഥലം സന്ദർശിച്ച റവന്യൂ, ജിയോളജി, പോലീസ്, ഫയർഫോഴ്സ് ഉദ്യോഗസ്ഥർ ഇതു വിലയിരുത്തി. ജില്ലാ കളക്ടർ എസ്. പ്രേംകൃഷ്ണൻ സ്ഥലം സന്ദർശിച്ച് രക്ഷാപ്രവർത്തനം ഏകോപിപ്പിക്കുകയും പ്രാഥമികമായ അന്വേഷണം നടത്തുകയും ചെയ്തു. കോന്നി താഴം വില്ലേജിലാണ് അപകടമുണ്ടായ ക്വാറി വർഷങ്ങളായി പ്രവർത്തിക്കുന്നത്. പൊട്ടിച്ചു മാറ്റിയ പാറമടയുടെ ഇടുക്കുകളിൽ ഹിറ്റാച്ചി ഉപയോഗിച്ചാണ് ഇവർ ജോലിയെടുത്തിരുന്നത്. യാതൊരുവിധ സുരക്ഷാ മാനദണ്ഡങ്ങളോ പാലിച്ചിരുന്നില്ല. അപകടത്തേ തുടർന്ന് പാറമടയിലെ മറ്റു ജീവനക്കാർ രക്ഷാപ്രവർത്തനം നടത്താൻ ശ്രമിച്ചെങ്കിലും ഫലമുണ്ടായില്ല. ഉടമയുമായി ബന്ധപ്പെട്ടവർ സ്ഥലത്തെത്തിയശേഷമാണ് ഫയർഫ്സിൽ വിവരം അറിയിച്ചത്. വെടിമരുന്ന് ഉപയോഗിച്ചുള്ള സ്ഫോടനം അതീവ അപകടകരമായതിനാൽ, കർശനമായ സുരക്ഷാ മാനദണ്ഡങ്ങളും സർക്കാർ നിയമങ്ങളും പാലിക്കണമെന്ന നിർദേശമുള്ളതാണ്. സ്ഫോടനങ്ങൾ നടത്താൻ ലൈസൻസുള്ള വിദഗ്ധരെ മാത്രമേ ഇതിന് അനുവദിക്കാവൂവെന്നും ജിയോളജി വകുപ്പ് പറയുന്നു. ചെങ്കളം പാറമടയിൽ സ്ഫോടനങ്ങൾ കാരണം ശബ്ദം, പൊടി, ഭൂകമ്പ പ്രകമ്പനങ്ങൾ എന്നിവ പതിവാണെന്നു പരിസരവാസികൾ പറയുന്നു. സുരക്ഷാ മാനദണ്ഡങ്ങൾ പാലിക്കാതെ കുറഞ്ഞ ചെലവിൽ കൂടുതൽ അളവിൽ പാറ പൊട്ടിച്ചുമാറ്റുകയെന്നതാണ് രീതി. കോന്നിയിലെ പല സ്വകാര്യ പ‌ാറമടകളുടെയും പ്രവർത്തനം ഈ രീതിയിലാണ്. അനുമതി നൽകുന്ന ബന്ധപ്പെട്ട വകുപ്പുകൾ പിന്നീട് ഇവിടേക്ക് തിരിഞ്ഞു നോക്കാറില്ല. മൈനിംഗ് ആൻഡ് ജിയോളജി വകുപ്പാണ് പ്രധാനമായി ഇവരുടെ പ്രവർത്തനങ്ങൾ വിലയിരുത്തുന്നതും അനുമതികൾ നൽകുന്നതുമെങ്കിലും കൃത്യമായി ഇടപെടൽ ഇവർ നടത്താറില്ലെന്നും പറയുന്നു.

കാറിടിച്ച് ബൈക്ക് യാത്രികന്‍ മരിച്ചു; ഭാര്യ ഗുരുതരാവസ്ഥയില്‍

ആലപ്പുഴ: തട്ടുകട അടച്ച് ഭാര്യയ്ക്കൊപ്പം ബൈക്കില്‍ മടങ്ങിയ ലോഡിംഗ് തൊഴിലാളി കാര്‍ ഇടിച്ചു മരിച്ചു. ആലപ്പുഴ പവര്‍ഹൗസ് വാര്‍ഡില്‍ ആറാട്ടുവഴി പടിഞ്ഞാറ് ശാന്തി ആശ്രമം വീട്ടില്‍ വാഹിദ് (43) ആണ് മരിച്ചത്. ഗുരുതരമായി പരിക്കേറ്റ ഭാര്യ സലീന ഗുരുതരാവസ്ഥയില്‍ മെഡിക്കല്‍ കോളജ് ആശുപത്രിയിലാണ്. വെള്ളക്കിണര്‍ മൈജി ഷോപ്പിനു സമീപം ദമ്പതികള്‍ യാത്ര ചെയ്ത ബൈക്കില്‍ കാര്‍ ഇടിക്കുകയായിരുന്നുവെന്നാണ് പ്രാഥമിക വിവരം. ഇന്നലെ രാത്രി 11.45 നായിരുന്നു അപകടം. സൗത്ത് പോലീസ് സ്റ്റേഷന്‍ അതിര്‍ത്തിയിലാണ് സംഭവം. ആറാട്ടുവഴി ഐഎന്‍ടിയുസി യൂണിറ്റിലെ ലോഡിംഗ് തൊഴിലാളിയാണ് മരിച്ച വാഹിദ്. പരേതനായ അത്താഴക്കൊട്ട് സാലിയുടെ മകനാണ്. പോസ്റ്റ് മാര്‍ട്ടത്തിനുശേഷം മൃതദേഹം പടിഞ്ഞാറെ ജുമാ മസ്ജിദ് ഖബർസ്ഥാനില്‍ ഖബറടക്കി. വാഹിദിന്‍റെ മരണത്തില്‍ ഐഎന്‍ടിയുസി സംസ്ഥാന വൈസ് പ്രസിഡന്‍റ് ബാബു ജോര്‍ജും യൂണിറ്റ് പ്രസിഡന്‍റ് സജിയും അനുശോചിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]