ADVERTISEMENT

ADVERTISEMENT

വയോജന കമ്മീഷൻ പ്രവർത്തനമാരംഭിക്കണം: സീനിയർ സിറ്റിസൺസ് കോൺഗ്രസ്

പാലക്കാട്: വയോജന കമ്മീഷന്‍റെ പ്രവർത്തനം ഉടൻ ആരംഭിക്കണമെന്നു സീനിയർ സിറ്റിസൺസ് കോൺഗ്രസ് ജില്ലാ നേതൃയോഗം ആവശ്യപ്പെട്ടു.

കെഎസ്ആർടിസി, സ്വകാര്യ ബസുകൾ എന്നിവയിൽ യാത്രാആനുകൂല്യങ്ങൾ നല്കുക. ബസുകളിലെ ചവിട്ടുപടി താഴ്ത്തി നിർമിക്കുക, സർക്കാർ- അർധസർക്കാർ സ്ഥാപനങ്ങളിൽ വയോജനങ്ങളുടെ ആവശ്യങ്ങൾക്കു മുൻഗണന നല്കുക എന്നീ ആവശ്യങ്ങളും യോഗം ഉന്നയിച്ചു.

കെപിസസി സെക്രട്ടറി പി.വി. രാജേഷ് ഉദ്ഘാടനം ചെയ്തു സംസ്ഥാന വൈസ് പ്രസിഡന്‍റ് ഡോ.പി.പി. വിജയകുമാർ മുഖ്യപ്രഭാഷണം നടത്തി. ജില്ലാ പ്രസിഡന്‍റ് പി.സി. കുഞ്ഞിരാമൻ, ജനറൽ സെക്രട്ടറി എച്ച്.എ. സത്താർ, പ്രഫ.എം. ഉണ്ണികൃഷ്ണൻ, ഡോ.എ. ശിവരാമകൃഷ്ണൻ, കെ.ടി. പുഷ്പവല്ലി നമ്പ്യാർ, ആന്‍റണി റോബർട്ട്, വി.ആർ. കുട്ടൻ, കെ.ടി. സഹദേവൻ, രാധാ ശിവദാസ്, ഉഷ പാലാട്ട്, ശാന്തി നടരാജൻ, പി.കെ. ജയൻ, പി. കാജാ മൊയ്തീൻ പ്രസംഗിച്ചു.

ADVERTISEMENT

കാത്തലിക് സിറിയൻ ബാങ്കിന്‍റെ നവീകരിച്ച ശാഖ ഉദ്ഘാടനം ചെയ്തു

മണ്ണാർക്കാട്: കാത്തലിക് സിറിയൻ ബാങ്കിന്‍റെ നവീകരിച്ച ശാഖ മണ്ണാർക്കാട് ആശുപത്രിപ്പടി ബിഎസ്എൻഎൽ ഓഫീസിനു സമീപം പൂക്കുന്നം ബിൽഡിംഗിൽ നഗരസഭാ ചെയർമാൻ സി. മുഹമ്മദ്‌ ബഷീർ ഉദ്ഘാടനം ചെയ്തു. എടിഎം കൗണ്ടർ ഉദ്ഘാടനം യുജിഎസ് ഗ്രൂപ്പ്‌ മാനേജിംഗ് ഡയറക്ടർ അജിത്ത് പാലാട്ടും ഗോൾഡ് ലോൺ സെക‌്ഷൻ ഉദ്ഘാടനം അമാന ബെസ്റ്റ് ലെയ്ഡ് സൊസൈറ്റി മാനേജിംഗ് ഡയറക്ടർ കെ.വി.എ. റഹ‌്മാനും നിർവഹിച്ചു. വാർഡംഗം മുഹമ്മദ് ഇബ്രാഹിം, ഡോ.കെ.എ. കമ്മാപ്പ, ഡോ.ഷിഹാബുദീൻ, ഡോ.പരമേശ്വരൻ, ബാങ്ക് സോണൽ ഹെഡ് ജെയ്സൻ ജോസ്, ക്ലസ്റ്റർ ഹെഡ് ടി.വി. രാജഗോപാൽ, ശാഖാ മാനേജർ അനൂപ് പി. മേനോൻ തുടങ്ങിയവർ പങ്കെടുത്തു.

സ്കൂൾബസ് പരിശോധന; 85 ബസുകൾക്കു വിലക്ക്

ഒറ്റപ്പാലം: 85 സ്കൂൾ ബസുകൾക്ക് അധ്യയനവർഷാരംഭത്തിൽ സർവീസ് വിലക്ക്. പരിശോധന കർശനമാക്കി അധികൃതർ. പ്രത്യേക ക്യാന്പ് നടത്തിയുള്ള പരിശോധനയിലാണ് ജില്ലയിലാകെ 85 ബസുകൾക്ക് സർവീസ് നടത്താൻ അനുമതി നിഷേധിച്ചത്. ഈ ബസുകൾ ന്യൂനതകൾ പരിഹരിച്ചശേഷം ഹാജരാക്കിയാൽ അനുമതിനൽകും. ആകെ 647 വാഹനങ്ങളാണ് പരിശോധിച്ചത്. അതിൽ 562 ബസുകൾക്ക് പരിശോധനയ്ക്കുശേഷം സർവീസ് നടത്താനുള്ള അനുമതി നൽകി, ചെക്ക്ഡ് ഒകെ എന്ന സ്റ്റിക്കർ പതിപ്പിച്ചു. ഇന്നലയോടെ മോട്ടോർവാഹനവകുപ്പ് പരിശോധന പൂർത്തിയാക്കി. പട്ടാമ്പി താലൂക്കിലാണ് കൂടുതൽ വാഹനങ്ങൾ പരിശോധന പൂർത്തിയാക്കിയിട്ടുള്ളത്. 200 വാഹനങ്ങൾ പരിശോധിച്ചതിൽ 15 വാഹനങ്ങൾക്കാണ് ന്യൂനതകൾ കണ്ടെത്തിയത്. മണ്ണാർക്കാട്ട് 160 വാഹനങ്ങൾ പരിശോധിച്ചതിൽ 15 വാഹനങ്ങൾക്ക് അനുമതി നിഷേധിച്ചു. ചിറ്റൂരിൽ 137 വാഹനങ്ങൾ പരിശോധനയ്ക്ക് വിധേയമാക്കിയപ്പോൾ 28 വാഹനങ്ങൾക്ക് ന്യൂനതകൾ കണ്ടെത്തി തിരിച്ചയച്ചു. ഒറ്റപ്പാലത്ത് 90 വാഹനങ്ങൾ പരിശോധിച്ചപ്പോൾ 12 വാഹനങ്ങൾക്കാണ് അനുമതി നിഷേധിച്ചത്. ആലത്തൂരിൽ 60 വാഹനങ്ങൾ പരിശോധിച്ചപ്പോൾ 15 വാഹനങ്ങളെ തിരിച്ചയച്ചു. പാലക്കാട്ട് ഇന്നലെയാണ് പരിശോധന നടന്നത്. ഒറ്റപ്പാലം, പട്ടാമ്പി താലൂക്കുകളിലും രണ്ടാംഘട്ട പരിശോധന നടന്നു. ജിപിഎസ് സംവിധാനം കൃത്യമല്ലാത്തവ, അപകടമുണ്ടായാൽ കൺട്രോൾ റൂമിൽ അറിയിക്കാനുള്ള പാനിക് ബട്ടൺ പ്രവർത്തിക്കാതിരിക്കുക, ജനലിന്‍റെ ഗ്ലാസ് വാതിലുകൾ പ്രവർത്തിക്കാതിരിക്കുക, വൈപ്പർ കേടായവ, വിദ്യാവാഹൻ ആപ്പിൽ ബന്ധിപ്പിക്കാത്തവ തുടങ്ങിയവയ്ക്കാണ് അനുമതി നിഷേധിച്ചത്. പരിശോധനയ്ക്ക്‌ വിധേയമാക്കാത്തതോ അംഗീകാരം ലഭിക്കാത്തതോ ആയ സ്കൂൾ ബസുകൾ നിരത്തിലിറക്കിയാൽ കർശന നടപടിയെടുക്കുമെന്ന് മോട്ടോർ വാഹനവകുപ്പ് അധികൃതർ അറിയിച്ചു. സ്വകാര്യ വാഹനങ്ങളിൽ വിദ്യാലയങ്ങളിലേക്ക് കുട്ടികളെ കൊണ്ടുപോകുന്നതും കർശനമായി തടയാനാണ് അധികൃതരുടെ തീരുമാനം.

കല്ലടിക്കോടൻ മലയോരമേഖലയിലെ വന്യമൃഗശല്യം; ഡിഎഫ്ഒ യോഗം വിളിച്ചു

കല്ലടിക്കോട്: മൂന്നേക്കർ, മീൻവല്ലം, കരിമല, കല്ലടിക്കോട് ഭാഗങ്ങളിലെ നിലവിലെ വന്യജീവി ആക്രമണവുമായി ബന്ധപ്പെട്ട ലഘൂകരണ പ്രവൃത്തികൾ ആസൂത്രണം ചെയ്യുന്നതിനായി മണ്ണാർക്കാട് ഡിവിഷണൽ ഫോറസ്റ്റ് ഓഫീസറുടെ നേതൃത്വത്തിൽ യോഗം നടത്തി. ഇതുമായി ബന്ധപ്പെട്ട് പ്രദേശത്തെ കാട്ടാനകളുടെ ശല്യം പരിഹരിക്കുന്നതിന് നിർദേശങ്ങൾ ഉയർന്നുവരികയും അതനുസരിച്ച് പ്രവർത്തനങ്ങൾ ഏകോപിപ്പിക്കാനും തീരുമാനിച്ചു. കാട്ടാനകൾ ജനവാസ മേഖലകളിലേക്ക് ഇറങ്ങിവരുന്ന പാലക്കാട് ഡിവിഷനിലെ കേടുവന്ന 3.5 കിലോമീറ്റർ സോളാർ ഹാംഗിംഗ് ഫെൻസിംഗ് സന്നദ്ധപ്രവർത്തകരുടെയും വനംജീവനക്കാരുടെയും നേതൃത്വത്തിൽ ഇന്നുമുതൽ അറ്റകുറ്റപ്പണി നടത്തി പ്രവർത്തനക്ഷമമാക്കും. കാട്ടാന ജനവാസമേഖലകളിലേക്ക് ഇറങ്ങിവരുന്നതും നിലവിൽ സോളാർ ഫെൻസിംഗ് ഇല്ലാത്ത തുടിക്കോട് മുതൽ ചെറുമല വരെയുള്ള വനാതിർത്തിയിലെ സോളാർ ഹാംഗിംഗ് ഫെൻസിംഗ് നിർമാണ ജോലികൾ അടിയന്തരമായി പൂർത്തീകരിക്കും. കാട്ടാന ജനവാസമേഖലകളിലേക്ക് ഇറങ്ങിവരുന്നതും ഫെൻസിംഗിന് ബുദ്ധിമുട്ടേറിയതുമായ തരിപ്പപ്പതി പാലം മുതൽ ആറ്റില, കരിമല, പോത്തനട വനാതിർത്തികളിൽ സാധ്യമായ രീതിയിൽ സിംഗിൾ ലൈൻ ഫെൻസിംഗ് ചെയ്യാനും തീരുമാനിച്ചു. ഇതിലൂടെ പൂഴിക്കുന്ന് ഭാഗത്ത് തമ്പടിക്കുന്ന കാട്ടാനകളുടെ സഞ്ചാരം നിയന്ത്രിക്കാൻ ആവുമെന്നാണ് കണക്കാക്കുന്നത്. നിലവിലെ കാട്ടാന ആക്രമണങ്ങൾ തടയുന്നതിനായി മണ്ണാർക്കാട് ദ്രുതകർമസേന, പാലക്കയം ഫോറസ്റ്റ് സ്റ്റേഷൻ സ്റ്റാഫുകൾ, ഒലവക്കോട് റേഞ്ചിലെ സ്റ്റാഫുകൾ എന്നിവരടങ്ങുന്ന സംഘം മൂന്നേക്കർ കേന്ദ്രീകരിച്ച് ക്യാമ്പ് ചെയ്തു പ്രവൃത്തികൾ ഏകോപിപ്പിക്കും. പുതുക്കാട് പൂഴിക്കുന്ന് തമ്പടിക്കുന്ന കാട്ടാനകളെ തുരത്തി കരിമലയിലേക്കാക്കുന്ന പ്രവൃത്തികൾക്കായി മണ്ണാർക്കാട് ദ്രുതകർമസേനയെ ചുമതലപ്പെടുത്തി. ഈ മേഖലയിലെ വന്യജീവി ആക്രമണ ലഘൂകരണ പ്രവർത്തനങ്ങളിൽ ഒലവക്കോട് റേഞ്ച് സ്റ്റാഫുകളെ കൂടി ഉൾപ്പെടുത്താനും തീരുമാനിച്ചു.

പനംകുറ്റിയിൽ കാട്ടാനവിളയാട്ടം; വ്യാപകമായി കൃഷി നശിപ്പിച്ചു

വടക്കഞ്ചേരി: ഇടവേളക്കുശേഷം കിഴക്കഞ്ചേരി പനംകുറ്റിയിൽ കാട്ടാനയിറങ്ങി വ്യാപകമായി കൃഷിനശിപ്പിച്ചു. ചെറുനിലം ജോണി, ചെറുനിലം ജുബി, വരിക്കമാക്കൽ ബേബി, മുണ്ടൻചിറ റോയ് തുടങ്ങിയവരുടെ കൃഷികളാണ് നശിപ്പിച്ചിട്ടുള്ളത്. വാഴ, കുരുമുളക് കൊടികൾ, റബർ തുടങ്ങിയ വിളകളാണ് കൂടുതലും നശിപ്പിച്ചത്. വരിക്കമാക്കൽ ബേബിയുടെ തോട്ടത്തിലുണ്ടായിരുന്ന സ്പ്രേയറും ആന ചവിട്ടിനശിപ്പിച്ചിട്ടുണ്ട്. കുന്നേൽ എസ്റ്റേറ്റിലും കൃഷിനാശമുണ്ട്. കുലച്ചവാഴ തള്ളിയിട്ട് അതിലെ പിണ്ടി മാത്രമാണ് മുമ്പൊക്കെ ആന തിന്നിരുന്നത്. എന്നാൽ വാഴക്കുലകളും ആന തിന്നിട്ടുണ്ടെന്ന് ചെറുനിലം ജോണി പറഞ്ഞു. ഒറ്റയാനാണ് കൃഷിയിടങ്ങളിൽ കറങ്ങുന്നത്. വിവരമറിഞ്ഞ് വനപാലകർ സ്ഥലത്ത് എത്തിയെങ്കിലും ആനയെ കാടുകയറ്റാൻ നടപടിയൊന്നും എടുത്തിട്ടില്ലെന്നാണ് കർഷകരുടെ പരാതി. വീടുകൾക്ക് അടുത്തെത്തിയാണ് ആനകളുടെ ഈ വിളയാട്ടം. ഇതുമൂലം ആനയെ പേടിച്ച് രാത്രികാലങ്ങളിൽ വീടുകൾക്ക് കാവലിരിക്കുകയാണ് നാട്ടുകാർ. പരസ്പരം പഴിപറഞ്ഞ് വനപാലകർ നടപടിയെടുക്കാതെ പൊട്ടൻ കളി നടത്തുകയാണെന്നും കർഷകർ ആരോപിക്കുന്നു.

വിരമിക്കൽദിനത്തിൽ പ്രായം വെറുമൊരു നമ്പറല്ല സർ, അതൊരു യാഥാർഥ്യമാണ്..

മംഗലം ശങ്കരൻകുട്ടി ഷൊർണൂർ: പ്രായം വെറുമൊരു നമ്പറല്ല... വിങ്ങുന്ന മനസോടെ അവസാനത്തെ ഒപ്പും ചാർത്തി അവർ മൂന്നുപേരും ഒന്നിച്ച് പടിയിറങ്ങി. കുളപ്പുള്ളി ഗവ. പ്രസിൽനിന്നാണ് ആത്മസുഹൃത്തുക്കളുടെ ഒന്നിച്ചുള്ള പടിയിറക്കം ഇന്നലെ നടന്നത്. ഒരേ ക്ലാസ്മുറിയിൽ ഒരുമിച്ചിരുന്ന് പഠിച്ചുതുടങ്ങിയപ്പോൾ ആരംഭിച്ച ആത്മബന്ധത്തിന്‍റെ കാണാച്ചരട് ഔദ്യോഗികജീവിതത്തിൽനിന്ന് ഇന്നലെ പടിയിറങ്ങുംവരെ കാത്തുസൂക്ഷിച്ചവരാണ് ഈ മൂന്നുപേർ. സർക്കാർ പ്രസിലെ ഗസറ്റഡ് ഓഫീസറായ അഡ്മിനിസ്ട്രേറ്റീവ് അസിസ്റ്റന്‍റ് വാണിയംകുളം തൃക്കങ്ങോട് ലക്ഷ്മി നിവാസിൽ പി. വിജയകുമാർ, മണ്ണന്തല പ്രസിൽ ബൈൻഡർ സീനിയർ ഫോർമാനായ ഷൊർണൂർ കുളപ്പുള്ളി സ്വദേശി ഇ.എൻ. ബിനോയ്, ജനറൽ ഫോർമാനായ ഷൊർണൂർ കല്ലിപ്പാടം തുളസിനിലയത്തിൽ തുളസീധരൻ എന്നിവരാണ് ഇന്നലെ ഗവ. പ്രസിൽനിന്ന് വിരമിച്ചത്. ബിനോയിയും വിജയകുമാറും ഒന്നുമുതൽ ഏഴ് വരെ ആരിയഞ്ചിറ യുപി സ്കൂളിലാണ് പഠിച്ചത്. 1984-ൽ ഷൊർണൂർ കെവിആർ സ്കൂൾ, ഹൈസ്കൂൾ പഠനത്തിനെത്തിയ ഇവർക്കൊപ്പം തുളസീധരനും ചേർന്നു. ക്ലാസ് ലീഡറിനുവേണ്ടിയുള്ള മത്സരം വന്നപ്പോൾ വിജയൻ എസ്എഫ്ഐയിലും തുളസീധരൻ കെഎസ്‍യുവിലും മത്സരിച്ചു. തുളസീധനെ വിജയകുമാർ പരാജയപ്പെടുത്തിയെങ്കിലും സൗഹൃദം രാഷ്ട്രീയ കാഴ്ചപ്പാടുകൾപ്പുറമായിരുന്നു. സ്കൂൾ കാലഘട്ടത്തിനുശേഷം തുളസീധരനും ബിനോയും ഒറ്റപ്പാലം എൻഎസ്എസ് കോളജിലേക്കും വിജയകുമാർ ഷൊർണൂർ എസ്എൻ കോളജിലേക്കും വഴിപിരിഞ്ഞു. 1990 മാർച്ച് 16 ന് എൽഡി ക്ലർക്കായി വിജയകുമാറും 1989-ൽ കംപോസ്റ്റർ ഗെയിൻ സെക്കൻഡ്‌ തസ്തികയിലൂടെ തുളസീധരനും 1999-ൽ ബൈൻഡർ ഗ്രേഡ്-2 തസ്തികയിൽ ബിനോയിയും സർക്കാർ സർവീസിൽ കയറി. വിജയകുമാർ തിരുവനന്തപുരം, എറണാകുളം, തൃശൂർ, മലപ്പുറം, കോട്ടയം ജില്ലകളിലെ സർക്കാർ പ്രസിൽ ജോലിചെയ്തശേഷം 2024 മുതൽ അഡിമിനിസ്ട്രേറ്റീവ് അസിസ്റ്റന്‍റായി കുളപ്പുള്ളി പ്രസിൽ എത്തി. തുളസീധരൻ ആദ്യഘട്ടത്തിൽ വയനാട് പ്രസിലാണ് ജോലി ചെയ്തതെങ്കിലും 33 വർഷമായി ഷൊർണൂർ സർക്കാർ പ്രസിലുണ്ട്. 2019 മുതൽ ജനറൽ ഫോർമാനാണ്. ബിനോയ് എറണാകുളം, തിരുവനന്തപുരം, കോഴിക്കോട് തുടങ്ങിയ ജില്ലകളിൽ ജോലിചെയ്തു. 15 വർഷമായി ഷൊർണൂരിലാണ്. വിങ്ങുന്ന മനസോടെ ഈറനണിഞ്ഞ കണ്ണുകളുമായി പരസ്പരം കൈകൊടുത്ത് മൂവരും വഴിപിരിഞ്ഞു... ഇനിയും സൗഹൃദം പുറത്തുതുടരാമെന്ന വാഗ്ദാനത്തോടെ..

ഉയരങ്ങളിലെത്തിയാലും മനുഷ്യത്വം കൈവിടാത്തതു യഥാർഥമൂല്യം: വി.കെ. ശ്രീകണ്ഠൻ എംപി

പാലക്കാട്: പ്രയാസങ്ങളും പ്രതിസന്ധികളും അഭിമുഖീകരിച്ച് മുന്നേറിയവരാണ് ചരിത്രം സൃഷ്ടിച്ചിട്ടുള്ളതെന്നും ഏതു പദവികളിലെത്തിയാലും മനുഷ്യത്വം കൈവിടാതിരിക്കുന്നതാണ് യഥാർഥമൂല്യമെന്നും വി.കെ. ശ്രീകണ്ഠൻ എംപി. പാലക്കാട് ജില്ലയിലെ എസ്എസ്എൽസി, ഹയർസെക്കൻഡറി പരീക്ഷകളിൽ ഫുൾ എ പ്ലസ് നേടിയ വിദ്യാർഥികളെയും ഉന്നതവിജയം നേടിയ വിദ്യാലയങ്ങളെയും ആദരിക്കുന്ന ദീപിക ആദരം 2025 ഉദ്ഘാടനം ചെയ്ത് പ്രസംഗിക്കുകയായിരുന്നു എംപി. കഠിനാധ്വാനത്തിലൂടെയും സത്യസന്ധമായ പ്രവർത്തനത്തിലൂടെയും ആത്മാർഥമായ പരിശ്രമത്തിലൂടെയും വിജയിച്ചുവന്ന വിദ്യാർഥികളെ മലയാളത്തിലെ ഏറ്റവും പഴക്കമേറിയ ദിനപത്രമായ ദീപിക ആദരിക്കാൻ മുന്നോട്ടുവന്നതു ശ്ലാഘനീയമാണ്. വിജയത്തിന്‍റെ ഓരോ പടവുകൾ കയറുന്പോഴും അതിനുപിന്നിൽ പ്രയത്നിച്ച മാതാപിതാക്കളെയും അധ്യാപകരെയും സുഹൃത്തുക്കളെയും സ്മരിക്കണമെന്നും അദ്ദേഹം കുട്ടികളെ ഉദ്ബോധിപ്പിച്ചു. കാണിക്കമാത കോണ്‍വന്‍റ് ഇംഗ്ലീഷ് മീഡിയം ഹയർസെക്കൻഡറി സ്കൂളിൽ നടന്ന ചടങ്ങിൽ പാലക്കാട് ജയ് ക്രിസ്റ്റോ പ്രോവിൻസ് എഡ്യുക്കേഷണൽ കൗണ്‍സിലർ സിസ്റ്റർ ലത സിഎംസി അധ്യക്ഷത വഹിച്ചു. ദീപിക തൃശൂർ മാർക്കറ്റിംഗ് കോഓർഡിനേറ്റർ ഫാ. ജിയോ ചെരടായി സ്വാഗതവും സർക്കുലേഷൻ പാലക്കാട് ഏരിയ മാനേജർ സനൽ ആന്‍റോ നന്ദിയും പറഞ്ഞു. ദീപിക കോ- ഓർഡിനേറ്റിംഗ് എഡിറ്റർ ഫാ. റിന്‍റോ പയ്യപ്പിള്ളി പങ്കെടുത്തു. സാൻജോ കോളജ് ഓഫ് ഫാർമസ്യൂട്ടിക്കൽസ് സ്റ്റഡീസ് ഡയറക്ടർ ഫാ. സനിൽ കുറ്റിപ്പുഴക്കാരൻ ക്ലാസ് നയിച്ചു.

പഞ്ചായത്തിലേക്ക് പ്രതിഷേധമാർച്ച്‌

മണ്ണാർക്കാട്: കുരുത്തിച്ചാലിൽ നിരന്തരമായി നടക്കുന്ന അപകടങ്ങളുടെ ഉത്തരവാദിത്തം ഏറ്റെടുത്ത് കുമരംപുത്തൂർ പഞ്ചായത്ത് പ്രസിഡന്‍റ് രാജിവെക്കണമെന്ന് ബിജെപി ആവശ്യപ്പെട്ടു. ബിജെപി കുമരംപുത്തൂർ പഞ്ചായത്ത് കമ്മിറ്റിയുടെ ആഭിമുഖ്യത്തിൽ പഞ്ചായത്തിലേക്ക് പ്രതിഷേധമാർച്ച്‌ നടത്തി. മണ്ണാർക്കാട് മണ്ഡലം പ്രസിഡന്‍റ് ബിജു നെല്ലമ്പാനി ഉദ്ഘാടനം ചെയ്തു. പയ്യനെടം ഏരിയ പ്രസിഡന്‍റ് കെ. പ്രസാദ് അധ്യക്ഷനായി. മണ്ഡലം ജനറൽ സെക്രട്ടറിമാരായ രാജു പുഴക്കൽ, ടി.എ. സുധീഷ്, വൈസ് പ്രസിഡന്‍റുമാരായ എം.പി. പരമേശ്വരൻ, ടി.എം. സുധ, സെക്രട്ടറി എ.ജി. ശ്രീവിദ്യ, ഏരിയ ജനറൽ സെക്രട്ടറി അജിത്കുമാർ, വൈസ് പ്രസിഡന്‍റ് മഞ്ജുനാഥൻ, നേതാക്കളായ ബേബി ഡാനിയൽ, ബിനോയ് ജോസഫ്, വി. ബാലകൃഷ്ണൻ, കെ. സുരേഷ്, കെ. രതീഷ് എന്നിവർ പ്രസംഗിച്ചു.

വായനാവസന്തം പദ്ധതി തുടങ്ങി

പാലക്കാട്: സംസ്ഥാന ലൈബ്രറി കൗണ്‍സിലിന്‍റെ ആഭിമുഖ്യത്തില്‍ പുസ്തകങ്ങള്‍ വീട്ടിലേക്ക് എന്ന സന്ദേശവുമായി നടപ്പാക്കുന്ന വായനാവസന്തം പരിപാടിക്ക് കൊല്ലങ്കോട് തുടക്കമായി. കൊല്ലങ്കോട് പബ്ലിക് ലൈബ്രറിയുടെ പരിപാടി കൊല്ലങ്കോട് ഗ്രാമപഞ്ചായത്ത് പ്രസിഡന്‍റ് കെ. സത്യപാല്‍ ഉദ്ഘാടനം ചെയ്തു. സാഹിത്യനിരൂപകന്‍ ആഷാ മേനോന് പുസ്തകങ്ങള്‍ വീട്ടിലെത്തിച്ച് നല്‍കിയാണ് ഉദ്ഘാടനം ചെയ്തത്. എം.പി. വീരേന്ദ്രകുമാര്‍ രചിച്ച ഹൈമവതഭൂവില്‍, പത്രാധിപരും പ്രമുഖ കമ്യൂണിസ്റ്റ് നേതാവുമായിരുന്ന പി. നാരായണന്‍ നായരുടെ ആത്മകഥയായ അരനൂറ്റാണ്ടിലൂടെ എന്നീ കൃതികളാണ് വായനാ വസന്തത്തിന്‍റെ ഭാഗമായി കൈമാറിയത്. വായനശാലകളിലെത്താന്‍ കഴിയാത്തവര്‍ക്ക് വീടുകളില്‍ പുസ്തകം എത്തിച്ച് കൊടുക്കുന്ന പദ്ധതിയാണിത്. ലൈബ്രറി ഭാരവാഹികളായ, ആര്‍. മുരളീധരന്‍, എന്‍. ഉണ്ണികൃഷ്ണന്‍, കെ. സുമ, സുനിത എന്നിവര്‍ പങ്കെടുത്തു.

പട്ടാമ്പി മേഖലയിൽ തെരുവുനായ വന്ധ്യംകരണം പ്രതിസന്ധിയിൽ

ഷൊർണൂർ: പട്ടാമ്പി മേഖലയിൽ തെരുവുനായ വന്ധ്യംകരണം പ്രതിസന്ധിയിൽ. ഇവിടെ നായ്ക്കളുടെ എണ്ണവും കടിയേൽക്കുന്നവരുടെ എണ്ണവും കൂടുതലാണ്. പ്രശ്നത്തിനു ശാശ്വതപരിഹാരമെന്ന രീതിയിൽ സർക്കാർ ചൂണ്ടിക്കാട്ടുന്ന തെരുവുനായ വന്ധ്യംകരണത്തിനു പട്ടാമ്പിയിൽ കേന്ദ്രമില്ലാത്തതാണ് പ്രതിസന്ധിയുണ്ടാക്കുന്നത്. പട്ടാമ്പിയിലെ തെരുവുനായകളെ പിടിച്ച് കൂട്ടിലാക്കി, വണ്ടിയിൽ ഒറ്റപ്പാലത്ത് എത്തിച്ച്, വന്ധ്യംകരിച്ച് വീണ്ടും പട്ടാമ്പിയിൽ കൊണ്ടുവിടലാണ് ഇപ്പോൾ നടക്കുന്നത്. നിലവിൽ പട്ടാമ്പി, ഒറ്റപ്പാലം താലൂക്കുകളിലെ തെരുവുനായ്ക്കളെ വന്ധ്യംകരിക്കുന്ന കേന്ദ്രം ഒറ്റപ്പാലം വെറ്ററിനറി ആശുപത്രിയിൽ മാത്രമാണുള്ളത്. ഇവിടെയാവട്ടെ പരിമിതമായ സൗകര്യങ്ങൾ മാത്രമാണിവിടെയുള്ളത്. പട്ടാമ്പിയിൽനിന്നടക്കം പിടിച്ചുകൊണ്ടുവരുന്ന നായ്ക്കൾ ഉൾപ്പെടെ ചാടിപ്പോവുന്ന പ്രശ്നമായിരുന്നു അടുത്ത കാലംവരെ ഇവിടത്തെ തലവേദന. വർഷങ്ങൾ പഴക്കമുള്ള 20 ഇരുമ്പകൂടുകളായിരുന്നു ഇവിടെയുണ്ടായിരുന്നത്. ഈയടുത്ത കാലത്താണ് പത്തു പുതിയ കൂടുകൾ ജില്ലാപഞ്ചായത്ത് മുഖേന ബ്ലോക്ക് പഞ്ചായത്ത് ഫണ്ടിൽനിന്ന് 3.40 ലക്ഷം രൂപ ഉപയോഗിച്ച് ലഭ്യമാക്കിയത്. ഒരുമാസം 120 നായ്ക്കളെ വന്ധ്യംകരിക്കാൻ മാത്രമേ ഇവിടെ സാധിക്കുകയുള്ളൂ. എല്ലാ ബ്ലോക്കുകളിലും എബിസി കേന്ദ്രങ്ങൾ നടപ്പാക്കിയാൽ മാത്രമേ തെരുവുനായ്ക്കളുടെ വർധനവിന് തടയിടാനാവുകയുള്ളൂയെന്ന് ഒറ്റപ്പാലം താലൂക്ക് വെറ്ററിനറി ആശുപത്രി ഡോ. ദീപ ചിറയത്ത് പറയുന്നു. നായപിടിത്തക്കാരെ കിട്ടാത്തതും പ്രശ്‌നമാണ്.

മഴക്കാലം ആരംഭിച്ചതോടെ മലന്പുഴ എസ്പി ലെയ്ൻ താമസക്കാർ അപകടഭീഷണിയിൽ

ജോസ് ചാലയ്ക്കൽ മലന്പുഴ: തിമിർത്തുപെയ്യുന്ന മഴയും കാറ്റും ആരംഭിച്ചതോടെ മലന്പുഴ എസ്പി ലെയ്നിലെ കുടുബങ്ങൾ ഭീതിയിലാണ്. വീടുകൾ ഇടിഞ്ഞുപൊളിഞ്ഞു വീഴാറായി. പല വീടുകളും മഴയത്ത് നിലംപൊത്തി. പല വൻമരങ്ങളും ഒടിഞ്ഞുവീഴാനോ കടപുഴകി‌മറിയാനോ സാധ്യതയായി നിൽക്കുന്നു. രാത്രികളിൽ ഭീതിയോടെയാണ് കുഞ്ഞുങ്ങളും വയോധികരുമടക്കമുള്ള കുടുംബങ്ങൾ കഴിയുന്നത്. നാലുവർഷത്തിലധികമായി കിടപ്പുരോഗിയായി കഴിയുന്ന സലാവുദീനും ഭാര്യയും ഉൾപ്പെടെ ഇവിടെ താമസിക്കുന്നുണ്ട്. അറുപത്തിരണ്ടുകൊല്ലം മുന്പ് മലന്പുഴ ഡാം പണിയുന്പോൾ പണിക്കാർക്കു താമസിക്കാൻ ജലസേചനവകുപ്പ് നിർമിച്ചു കൊടുത്ത വീടുകളാണ് ഇവ. എന്നാൽ കാലപ്പഴക്കം കൊണ്ട് പല വീടുകളും തകർന്നുകൊണ്ടിരിക്കയാണ്. മലന്പുഴ ജില്ലാ ജയിലിനു പിറകിൽ ഇവരിൽ പലർക്കും സർക്കാർ വീട് നൽകിയിട്ടുണ്ടെങ്കിലും പല വീടുകളും പണിപൂർത്തിയാവാതെ കിടക്കുന്നതു മൂലം ഇവിടെനിന്നും താമസംമാറ്റാനാവാത്ത സ്ഥിതിയാണ്. മലന്പുഴ പഞ്ചായത്തംഗം ഹേമലതയും വില്ലേജ് ഉദ്യോഗസ്ഥരും ചേർന്ന് സ്ഥലം സന്ദർശിച്ച് അപകടസാധ്യതയുള്ള മരങ്ങളുടെ കണക്കെടുത്തുപോയിട്ടുണ്ട്. ഉടൻതന്നെ വേണ്ടതായ നടപടിയെടുക്കുമെന്ന് അവർ പറഞ്ഞു.

ടാപ്പിംഗ് തൊഴിലാളികളും തോട്ടം ഉടമകളും പ്രതിസന്ധിയിൽ

ജോജി തോമസ് നെന്മാറ: റബർമേഖലയിൽ ടാപ്പിംഗ് തൊഴിലാളികളും കർഷകരും പ്രതിസന്ധിയിൽ. കടുത്തചൂടിനെതുടർന്ന് ഫെബ്രുവരി അവസാനം നിർത്തി വച്ച ടാപ്പിംഗ് പുനരാരംഭിക്കാത്തതുമൂലം തൊഴിൽ നഷ്ടപ്പെടുന്നതായി പരാതി. ശക്തമായ വേനൽമഴയ്ക്കു പിന്നാലെ കാലവർഷവും നേരത്തേ എത്തിയതോടെ ബഹുഭൂരിപക്ഷം തോട്ടങ്ങളിലും മഴമറ (പ്ലാസ്റ്റിക് ഷേഡ്) സ്ഥാപിക്കാൻ കഴിഞ്ഞില്ല. ഇതുമൂലം മഴ ആരംഭിച്ചിട്ടും റബർടാപ്പിംഗ് ആരംഭിക്കാത്തതുമൂലം തൊഴിലാളികൾക്ക് തൊഴിലും ഉടമകൾക്കു വരുമാനവും നഷ്ടമാകുന്നു. പ്രതീക്ഷിച്ചതിലും ദിവസങ്ങൾമുമ്പേ കാലവർഷം എത്തിയതോടെ മരങ്ങളിൽ നനവുമൂലം മഴമറ സ്ഥാപിക്കുന്നതിനു പശതേയ്ക്കാൻ കഴിയാതെപോവുകയായിരുന്നു. സാധാരണ ഒരു മേഖലയിലെ ടാപ്പിംഗ് തൊഴിലാളികൾ പരസ്പരം സഹകരിച്ചാണ് റബർമരങ്ങളിൽ മഴയ്ക്കുമുമ്പ് മഴമറ സ്ഥാപിക്കാറുള്ളത്. ഇപ്രകാരം ടാപ്പിംഗ് നടക്കാത്ത വേനൽക്കാലത്ത് കുറച്ച് ദിവസം ടാപ്പിംഗ് തൊഴിലാളികൾക്ക്‌ തൊഴിൽ ലഭിക്കുമായിരുന്നു. കാലംതെറ്റിയ കാലാവസ്ഥാമാറ്റം റബർ മേഖലയിലെ ഉത്പാദനത്തെയും ബാധിച്ചതോടെ റബർ കർഷകരും വെട്ടിലായി. പലരും റബർ മരങ്ങളിൽ മഴമറ സ്ഥാപിക്കുന്നതിനായി പശ, പ്ലാസ്റ്റിക് തുടങ്ങി അസംസ്കൃത വസ്തുക്കൾ വാങ്ങിവച്ചെങ്കിലും മഴ കനത്തത്തോടെ മരങ്ങളിൽ ഇവ പിടിപ്പിക്കാൻ കഴിയാത്ത സ്ഥിതിയാണ്. മൂന്നു നാല് ദിവസമെങ്കിലും മഴമാറിയാൽ മാത്രമേ മൊരിചുരണ്ടി പശതേച്ച് മഴമറ സ്ഥാപിക്കാൻ കഴിയുകയുള്ളൂ. ജോലി നഷ്ടപ്പെട്ട ടാപ്പിംഗ് തൊഴിലാളികൾക്ക് സൗജന്യറേഷൻ, സാമ്പത്തിക അനുകൂല്യങ്ങൾ എന്നിവ ലഭ്യമാക്കണമെന്ന് തൊഴിലാളികൾ ആവശ്യപ്പെട്ടു. സ്കൂൾ തുറക്കാറായതോടെ മക്കളുടെ വിദ്യാഭ്യാസ ചെലവുകൾക്കായി റബർ ബോർഡ് മുഖേനയോ മറ്റോ തൊഴിലാളികൾക്ക് ആനുകൂല്യം ലഭ്യമാക്കണമെന്ന ആവശ്യവും ശക്തമാണ്. റബർ ഉത്പാദകസംഘങ്ങളും കർഷകരും മഴമറയ്ക്കുള്ള സാധനങ്ങൾ വാങ്ങാൻ വൻ തുക ഇതിനോടകം ചെലവഴിച്ചിട്ടുണ്ട്.

മഴയിൽ നല്ലേപ്പിള്ളിയിൽ ഞാറ്റടിമുങ്ങി കൃഷിനാശം

ചിറ്റൂർ: നല്ലേപ്പിള്ളിയിൽ ഒന്നാം വിള കൃഷിയിറക്കാൻ ഞാറ്റടി തയാറാക്കിയ കർഷകർക്ക് കനത്തമഴ കാരണം വെള്ളംമുങ്ങി വ്യാപക കൃഷിനാശം. ഒരുകിലോയ്ക്കു 45 രൂപയോളം വില കൊടുത്തു വാങ്ങിയ ഭദ്ര നെൽ വിത്ത് ഞാറുപാകിയത് വിത്ത് ചെളിയിലമർന്ന് മുളയ്ക്കാതെയും മുളവന്നത് ചെളിയിലമർന്നതും. എട്ട് ഏക്കറിനു വേണ്ടി ഞാറുപാകിയ നല്ലേപ്പിള്ളി ചക്കാം കൊളുമ്പുപാടശേഖരത്തിലെ സഭാപതി എന്ന കർഷകനാണ് ഞാറ് നശിച്ചത്. ചെളിയിൽ അമരാതെ ഞാറ്റുകണ്ടത്തിൽ പല ഭാഗത്തായി മുളച്ചത് ഒരു ഏക്കറിന് പോലും നടീലിന് തികയില്ല. ഭദ്രനെൽ 150 ദിവസം മൂപ്പാണ്. മൂപ്പ് കൂടിയ വിത്തായതുകൊണ്ട് നേരത്തെ ഞാറുപാകിയതാണ്. ഞാറുപാകി മൂന്നുദിവസവും വെള്ളംകെട്ടി നിർത്തിയ ശേഷം വെള്ളം തുറന്നുവിട്ടത് മുതൽ കനത്ത മഴയാണ്. ഞാറ്റടി നാശം നേരിട്ടതിനുപകരം ഇനി നിലം ഉഴുത് നിരപ്പാക്കി മഴ മുന്നറിയിപ്പ് നോക്കി വേണം മൂപ്പ് കുറഞ്ഞ വിത്ത്ഞാറു പാകാൻ. മഴ നാശത്തിന് പുറമെ കാട്ടുപന്നിക്കൂട്ടങ്ങളും ഞാറ്റുപാടത്തിറങ്ങി മുള പൊങ്ങിയ ഞാറിനെയും ചവിട്ടിമെതിച്ച് നശിപ്പിച്ചു. മഴ കാരണം നശിച്ച ഞാറ്റടി തയ്യാറാക്കാൻ 17000 രൂപയോളം ചിലവായി. ഇനി അത്രയും സംഖ്യ മുടക്കണം. പൊടി വിതയും വെള്ളം മുങ്ങിയത് കാരണം മിക്കവാറും കർഷകർക്കും വീണ്ടുംഞാറ് പാകാൻ വിത്ത് വേണം. വിത്താണെങ്കിൽ ആവശ്യത്തിനു കിട്ടാനുമില്ല.

വാഹനാപകടത്തിൽ പരിക്കേറ്റ അജ്ഞാതൻ മരിച്ചു

കൊല്ലങ്കോട്: ഊട്ടറയിൽ വാഹനാപകടത്തിൽ പരിക്കേറ്റു തൃശൂർ മെഡിക്കൽ കോളജ് ആശുപത്രിയിൽ ചികിത്സയിലായിരുന്ന അജ്ഞാതൻ മരിച്ചു. എപ്രിൽ രണ്ടിന് ഊട്ടറ അയ്യപ്പ ക്ഷേത്രത്തിനു സമീപത്തുവച്ചാണ് അപകടത്തിൽ പരിക്കേറ്റനിലയിൽ കണ്ടെത്തി ആശുപത്രിയിൽ പ്രവേശിപ്പിച്ചത്. മൃതദേഹം ആശുപത്രിയിൽ സൂക്ഷിച്ചിരിക്കുകയാണ്. ബന്ധുക്കളെക്കുറിച്ചോ താമസസ്ഥലം സംബന്ധിച്ചോ വിവരങ്ങൾ ലഭിച്ചിട്ടില്ല. 156 സെന്‍റീമീറ്റർ ഉയരം, ഇടതുകണ്ണിനു താഴെയും വലതുകവിളിലും കാക്കപ്പുള്ളി. ഇരുനിറമാണ്. മഞ്ഞ, ഇളംപച്ച, നീലനിറത്തിൽ പുക്കളുള്ള വസ്ത്രമാണ് ധരിച്ചിരുന്നത്. വിവരം ലഭിക്കുന്നവർ കൊല്ലങ്കോട് സ്റ്റേഷനിൽ അറിയിക്കണ‌മെന്നു പോലീസ് ഇൻസ്പെക്ടർ മണികണ്ഠൻ അറിയിച്ചു. ഫോൺ: 04923 - 262329, 949798

ജൂൺമാസത്തിനുമുന്പ് മംഗലംഡാം നിറയുന്നതു ചരിത്രത്തിലാദ്യം

മംഗലംഡാം: മംഗലംഡാം നിറഞ്ഞു. ഒരാഴ്ച കഴിഞ്ഞ് ഷട്ടറുകൾ തുറക്കുന്ന സ്ഥിതിയിലെത്തും. ജൂൺ ആദ്യത്തിൽതന്നെ വെള്ളംനിറഞ്ഞു മംഗലംഡാമിന്‍റെ ഷട്ടറുകൾ തുറക്കുന്ന സ്ഥിതിയുണ്ടാകുന്നത് ഡാമിന്‍റെ 69 വർഷത്തെ ചരിത്രത്തിൽ ആദ്യമാകും. ഇതിനുമുമ്പ് ഒന്നാം പ്രളയവർഷമെന്നു വിശേഷിപ്പിച്ച 2018 ലാണ് ജൂൺ 14ന് വെള്ളംനിറഞ്ഞ് ഷട്ടറുകൾ തുറന്നത്. എന്നാൽ രണ്ടാംപ്രളയ വർഷമായ 2019ൽ ഓഗസ്റ്റ് എട്ടിനാണ് ഷട്ടറുകൾ തുറന്നത്. തുടർന്നുള്ള വർഷങ്ങളിൽ ഡാമിന്‍റെ പരമാവധി സംഭരണശേഷി എത്താതെതന്നെ സുരക്ഷിത ജലനിരപ്പ് എന്നനിലയിൽ ഷട്ടറുകൾ നേരത്തെ തുറക്കുന്ന സ്ഥിതിയിലേക്കുമാറി. 2020ൽ ഓഗസ്റ്റ് മൂന്നിനും 2021ൽ ജൂലൈ 15നും 2022 ജൂലൈ എട്ടിനുമാണ് ഡാമിന്‍റെ ഷട്ടറുകൾ തുറന്നത്. കഴിഞ്ഞവർഷം ജൂലൈ 15നാണ് മുഴുവൻ ഷട്ടറുകളും തുറന്നത്. 2018 ജൂൺ 14ന് വെള്ളംനിറഞ്ഞ് ഡാമിന്‍റെ ഷട്ടറുകൾ തുറന്നപ്പോൾതന്നെ ജനങ്ങളിൽ വലിയ ആശങ്കയുണ്ടാക്കിയിരുന്നു. പ്രകൃതിയിലെ മാറ്റങ്ങളെ വലിയ ഭീതിയോടെയായിരുന്നു അന്നു ജനംകണ്ടത്. സമാന സ്ഥിതിയാണ് ഈ വർഷവുമുണ്ടാകുന്നത്. ഇനി കാലവർഷം കൂടുതൽ കടുത്താൽ പ്രളയ സാഹചര്യവുമുണ്ടാകാം. 2007ലാണ് അതിവർഷമുണ്ടായി മലയോരങ്ങളിൽ വലിയ തോതിലുള്ള ഉരുൾപൊട്ടലുണ്ടായത്. 2007 ജൂലൈ 15ന് 255 മില്ലീമീറ്റർ മഴയാണ് ഒറ്റദിവസം മംഗലംഡാമിൽ രേഖപ്പെടുത്തിയത്. ഈ മഴക്കണക്ക് റെക്കോർഡ് മഴയുടെ കൂട്ടത്തിലാണ് ഉൾപ്പെടുത്തിയിട്ടുള്ളത്. മിക്കവാറും വർഷങ്ങളിൽ ജൂലൈ മാസത്തിലാണ് മംഗലംഡാമിന്‍റെ ഷട്ടറുകൾ തുറന്നിട്ടുള്ളത്. 77.88 മീറ്ററാണ് മംഗലംഡാമിന്‍റെ പരമാവധി സംഭരണശേഷി. സമുദ്ര നിരപ്പുമായി കണക്കാക്കുമ്പോൾ 18 മീറ്റർ വെള്ളം മാത്രമാണ് ഡാമിലുള്ളത്. ജലനിരപ്പ് 76.51 മീറ്ററിൽ എത്തുമ്പോൾ ആദ്യ മുന്നറിയിപ്പും 77.28 മീറ്ററിൽ എത്തുമ്പോൾ രണ്ടാമത്തെ മുന്നറിയിപ്പും നൽകി ഡാം ഷട്ടർ തുറക്കുകയാണ് ചെയ്തിരുന്നത്. എന്നാൽ 2018, 2019 എന്നീ വർഷങ്ങളിലെ പ്രളയത്തിനുശേഷം ഇത്രയും ജലനിരപ്പ് എത്തുംമുമ്പേ ഷട്ടറുകൾതുറന്ന് വെള്ളം ക്രമീകരിക്കുന്ന റൂൾകർവ് സിസ്റ്റം പിന്തുടരുന്നുണ്ട്. ഇതുമൂലം ഷട്ടറുകൾ ഒന്നിച്ചുതുറന്ന് പുഴയിലേക്ക് വെള്ളംഒഴുക്കുന്നതു കുറക്കാനും പുഴയോരങ്ങൾ മുങ്ങിയുള്ള വലിയ നാശനഷ്ടങ്ങൾ കുറക്കാനും സഹായകമാണ്.

ലഹരിവിരുദ്ധ സന്ദേശയാത്രയ്ക്കു തുടക്കം

മണ്ണാർക്കാട്: സേവ് മണ്ണാർക്കാടിന്‍റെ ലഹരിവിരുദ്ധ പ്രവർത്തനങ്ങളുടെ ഭാഗമായാണ് സേവ് കുട്ടിക്കൂട്ടം അംഗങ്ങളുടെ നേതൃത്വത്തിൽ മണ്ണാർക്കാടിന്‍റെ വിവിധ ഭാഗങ്ങളിൽ ലഹരിവിരുദ്ധ സന്ദേശയാത്ര നടത്തി. ഉദ്ഘാടനം നഗരസഭാ ബസ് സ്റ്റാൻഡിൽ മുനിസിപ്പൽ ചെയർമാൻ സി. മുഹമ്മദ് ബഷീർ നിർവഹിച്ചു. മണ്ണാർക്കാട് ടൗൺ , ചിറക്കൽപടി, കാഞ്ഞിരം, തെങ്കര പുഞ്ചക്കോട് പ്രദേശങ്ങളിൽ ഇന്നലെ സന്ദേശയാത്രയെത്തി. ഇന്നു അലനല്ലൂർ, കോട്ടോപ്പാടം, ആര്യമ്പാവ്, കുമരംപുത്തൂർ ചുങ്കം തുടങ്ങിയ സ്ഥലങ്ങളിലും യാത്ര എത്തിച്ചേരും. കുട്ടിക്കൂട്ടം കുട്ടികളുടെ ഫ്ലാഷ് മോബ്, ലഹരി വിരുദ്ധ ബോധവത്കരണ പ്രസംഗങ്ങൾ, ഗാനങ്ങൾ, ആക്ടിംഗ് ബുക്ക് മണ്ണാർക്കാട് നടൻ സലീം ചുങ്കം അവതരിപ്പിക്കുന്ന ഏകാംഗ നാടകം തുടങ്ങിയ പരിപാടികളാണ് സംഘടിപ്പിച്ചിട്ടുള്ളത്. ഉദ്ഘാടന ചടങ്ങിൽ സേവ് ചെയർമാൻ ഫിറോസ് ബാബു അധ്യക്ഷത വഹിച്ചു. സേവ് ഭാരവാഹികളായ അബ്ദുൽ ഹാദി അറക്കൽ, നഷീദ് പിലാക്കൽ, റിഫായി ജിഫ്രി, ഉമ്മർ റീഗൽ, ഫക്രുദീൻ, റംഷാദ്, അബൂ റജ, പ്രവർത്തകരായ ലെഫ്റ്റനന്‍റ് ഹംസ, ഫൗസിയ, സുഹറ ഫാത്തിമ, ഹബീബ, ഷറീന, ഫസൽ റഹ്മാൻ, ജലീൽ, വിഷ്ണു, നിസാം നേതൃത്വം നൽകി.

മൂന്നേക്കർ ജനവാസമേഖലയിൽ തന്പടിച്ച് ഒറ്റയാൻ

കല്ലടിക്കോട്: മൂന്നേക്കറിൽ ജനവാസമേഖലയെ വിടാതെ ഒറ്റയാൻ. വ്യാഴാഴ്ച്ച രാത്രി ഒറ്റയാൻ മൂന്നേക്കർ സംസാരത്തൊടിയിൽ മോഹനന്‍റെ വീട്ടുമുറ്റത്തുള്ള കോഴിക്കൂട് തകർത്തു. മോഹനൻ രക്ഷപ്പെട്ടതു തലനാരിഴക്ക്. ശബ്‌ദംകേട്ട് പുറത്തുവന്നതായിരുന്നു മോഹനൻ. വേഗം വീട്ടിലേക്കു കയറിയതുകൊണ്ടുരക്ഷപ്പെട്ടു. ഇതിനു സമീപത്തുള്ള തോടിന് സംരക്ഷണഭിത്തിയൊരുക്കിയിരുന്ന മണൽചാക്കുകൾ ഒറ്റയാൻ തകർത്തു, ഇടപ്പറമ്പ് ഭാഗത്ത് കൃഷിയിടത്തിൽ റബർപാൽ നിറയ്ക്കുന്നതിനായി സൂക്ഷിച്ചിരുന്ന വീപ്പകൾ നശിപ്പിച്ചു. രണ്ടാഴ്ച്ചയായി മൂന്നേക്കർഭാഗത്തു സ്ഥിരം ഇത്തരം ആക്രമണം അഴിച്ചു വിടുന്നുണ്ട് കാട്ടാനകൾ. രാത്രിയിൽ ഇടപറമ്പ് ഭാഗത്തു തമ്പടിച്ച് ജനങ്ങൾക്കും സ്വത്തിനും ഭീഷണി സൃഷ്ടിക്കുന്നുണ്ട്.

പാലക്കുഴി തിണ്ടില്ലം ജലവൈദ്യുതപദ്ധതി പൈപ്പ് സ്ഥാപിക്കൽ തുടങ്ങി

വടക്കഞ്ചേരി: പാലക്കുഴി മലയോരവാസികളുടെ സ്വപ്നപദ്ധതിയായ തിണ്ടില്ലം മിനിജലവൈദ്യുത പദ്ധതിയുടെ പ്രധാന പ്രവൃത്തിയായ പൈപ്പ് സ്ഥാപിക്കൽ തുടങ്ങി. പാലക്കുഴി അഞ്ചുമുക്കിലെ ചെക്ക്ഡാമിൽനിന്നും മലഞ്ചെരിവിലൂടെ താഴെ കൊന്നക്കൽക്കടവിലെ പവർഹൗസിലേക്കാണ് പൈപ്പ് സ്ഥാപിക്കുന്നത്. കൊന്നക്കൽകടവിൽ പവർഹൗസിന്‍റെ നിർമാണം പൂർത്തിയായിട്ടുണ്ട്. തടയണയിൽ നിന്നും 294 മീറ്റർ ദൂരത്തിൽ ലൊ പ്രഷർ പൈപ്പും തുടർന്ന് പവർഹൗസ് വരെയുള്ള 438 മീറ്റർ ദൂരത്തിൽ ഹൈ പ്രഷർ പെൻസ്റ്റോക്ക് പൈപ്പുകളും സ്ഥാപിക്കുന്ന പ്രവൃത്തികളാണ് ആരംഭിച്ചിട്ടുള്ളത്. 2026 ജൂൺ മാസത്തിനു മുമ്പ് പദ്ധതി വഴി വൈദ്യുതി ഉത്പാദനം സാധ്യമാകും. ഇതിനാൽ തന്നെ തിണ്ടില്ലം വെള്ളച്ചാട്ടത്തിന്‍റെ മനോഹരക്കാഴ്ചകൾ ഈ കാലവർഷം കഴിയുന്നതോടെ ഇനി കാണാമറയത്താകും. പിന്നെ പൈപ്പ് വഴിയാകും വെള്ളം താഴെയെത്തുക. വെള്ളച്ചാട്ടം ഓർമയായി മാറും. വെള്ളച്ചാട്ടത്തിലേക്കുള്ള വെള്ളം ചെക്ക്ഡാമിൽ തടഞ്ഞു നിർത്തിയാണ് വൈദ്യുതി ഉത്പാദനം നടത്തുന്നത്. ഉത്പാദനം കഴിഞ്ഞ് വെള്ളം ഇതിനടുത്ത തോടുവഴി തന്നെ നിലവിലുള്ളതു പോലെ താഴേക്കൊഴുകി മംഗലംപുഴയിലെത്തും. ജില്ലാ പഞ്ചായത്തിന്‍റെ രണ്ടാമത്തെ ജലവൈദ്യുത പദ്ധതിയാണ് നിർമാണ പ്രവൃത്തികൾ അന്തിമഘട്ടത്തിലെത്തിയിട്ടുള്ളത്. പാലക്കാട് സ്മോൾ ഹൈഡ്രോ കമ്പനി എന്ന പേരിൽ ജില്ലാ പഞ്ചായത്തിന്‍റെ കീഴിലുള്ള കമ്പനിയാണ് പദ്ധതി നടപ്പിലാക്കുന്നത്. താരതമ്യേന നിരപ്പായ ഭൂപ്രദേശത്തെ ലോപ്രഷർ പൈപ്പ് സ്ഥാപിക്കൽ വലിയ പ്രയാസകരമാകില്ല. എന്നാൽ പിന്നീട് താഴേക്ക് കുത്തനെയുള്ള മലഞ്ചെരിവിൽ ഹൈപ്രഷർ പെൻസ്റ്റോക്ക് പൈപ്പുകൾ സ്ഥാപിക്കുന്നതാണ് ഏറെ ശ്രമകരമെന്ന് അധികൃതർ പറഞ്ഞു. ഖലാസികളെ എത്തിച്ചാണ് ഇതുചെയ്യുക.

മേഴ്സി കോളജ് പ്രിൻസിപ്പൽ സിസ്റ്റർ ഡോ. നിർമൽ ഇന്നു വിരമിക്കും

പാലക്കാട്: മേഴ്സി കോളജ് പ്രിൻസിപ്പൽ പദവിയിൽനിന്നും 27 വർഷത്തെ അധ്യാപന സേവനത്തിനുശേഷം സിസ്റ്റർ ഡോ. നിർമൽ (ജോറി ടി.എഫ്.) ഇന്നു വിരമിക്കുന്നു. തൃശൂർ ജില്ലയിലെ വൈലത്തൂരിൽ അധ്യാപകദമ്പതികളുടെ മകളായി ജനിച്ച സിസ്റ്റർ നിർമൽ പിതാവിന്‍റെ പ്രചോദനത്താൽ ഗണിതശാസ്ത്രത്തിൽ തൽപ്പരയാകുകയും ബിരുദാനന്തര ബിരുദത്തിനുശേഷം പാലക്കാട് ജയ്ക്രിസ്റ്റോ സിഎംസി പ്രോവിൻസിനുകീഴിൽ സന്യാസജീവിതം തെരഞ്ഞെടുക്കുകയുമായിരുന്നു. 1995 മുതൽ മേഴ്സി കോളജിൽ ഗണിതശാസ്ത്ര അധ്യാപികയായി സേവനം തുടങ്ങിയ സിസ്റ്റർ 2020 ൽ ഡോക്ടറേറ്റ് കരസ്ഥമാക്കി. 2023ല്‍ പ്രിൻസിപ്പൽ പദവിയിലേക്കുയർന്നു. അക്കാദമിക മികവിലൂടെ മികച്ച ശിഷ്യഗണങ്ങളെ വാർത്തെടുക്കാൻ ഇക്കാലയളവിലായി. പ്രിൻസിപ്പൽപദവിയിലിരിക്കെ മേഴ്സി കോളജിന്‍റെ വജ്രജൂബിലി ആഘോഷങ്ങളും മറ്റു കലാലയ പരിഷ്കാരങ്ങളും പ്രതിബദ്ധതയോടെ നിറവേറ്റാൻ സാധിച്ചുവെന്നതും ശ്രദ്ധേയമാണ്. ചാവറപ്പിതാവിന്‍റെ വിദ്യാഭ്യാസവീക്ഷണങ്ങൾ പിന്തുടർന്നുകൊണ്ട് പാലക്കാട് ജില്ലയിൽതന്നെ തുടർന്നും സേവനമനുഷ്ഠിക്കാനുള്ള തീരുമാനത്തിലാണ് സിസ്റ്റർ നിർമൽ.

നെല്ലിയാമ്പതി റോഡിൽ കൂറ്റൻമരം കടപുഴകി; ഗതാഗതം തടസപ്പെട്ടു

നെല്ലിയാമ്പതി: കനത്ത മഴയിലും കാറ്റിലും നെല്ലിയാമ്പതിയിൽ കൂറ്റൻമരം റോഡിനു കുറുകെ കടപുഴകി വീണതുമൂലം ഗതാഗതം തടസപ്പെട്ടു. നാലുദിവസത്തോളം റോഡിൽ വീണുകിടന്നമരം വൻ ഗതാഗത തടസമാണുണ്ടാക്കിയത്. സീതാർകുണ്ട് ഗ്രീൻലാൻഡ് റോഡിലാണ് പടുകൂറ്റൻ മരം വീണത്. തുടർച്ചയായി മഴ പെയ്തതുമൂലം നാലുദിവസമായിട്ടും മരം മുറിച്ചുമാറ്റാൻ കഴിഞ്ഞിരുന്നില്ല. തിങ്കളാഴ്ച വീണ മരം ഇന്നലെയാണ് പൊതുപ്രവർത്തകൻ പി.ഒ. ജോസഫിന്‍റെ നേതൃത്വത്തിലുള്ളവർ മുറിച്ചുമാറ്റിയത്. ഗ്രീൻഡ് ലാൻഡ് ഫാം ജീവനക്കാരായ സതീഷ്, മനോഹരൻ, മാനേജർ മാർട്ടിൻ, ടോമി എന്നിവരും ദൗത്യത്തിൽ പങ്കാളികളായി. മഴക്കാലത്ത് നെല്ലിയാമ്പതിയിൽ വൻമരങ്ങൾ കടപുഴകിവീഴുന്ന സംഭവം സാധാരണമാണ്. ഈസമയങ്ങളിലെല്ലാം രക്ഷാദൗത്യവുമായി പി.ഒ. ജോസഫും സംഘവും നേരത്തെയും രാപകൽ വ്യത്യാസമില്ലാതെ രംഗത്തിറങ്ങിയിരുന്നു.

കനത്തമഴയിൽ കുറിഞ്ഞിപ്പാടത്ത് കിണർ ഇടിഞ്ഞുതാഴ്ന്നു

കല്ലടിക്കോട്: തുടർച്ചയായി അനുഭവപ്പെടുന്ന മഴയെത്തുടർന്ന് വീടിനോടുചേർന്നുള്ള കിണർ ഇടിഞ്ഞുതാഴ്ന്നു. കരിമ്പ ഗ്രാമപഞ്ചായത്തിലെ മരുതുംകാട് കുറിഞ്ഞിപ്പാടം കണിച്ചുകാട്ടിൽ കെ.ജെ. ബിജുവിന്‍റെ കിണറാണ് വ്യാഴാഴ്ച്ച രാത്രിയിൽ ആൾമറയുൾപ്പടെ ഇടിഞ്ഞുതാഴ്ന്നത്. 26 കോൺക്രീറ്റ് റിംഗുകളും ഒരു എച്ച്പിയുടെ വൈദ്യുതപമ്പ്സെറ്റും മണ്ണിനടിയിലായി. വിവരമറഞ്ഞ് കരിമ്പ- 1 വില്ലേജ് അധികൃതർ സ്ഥലം സന്ദർശിച്ച് നാശനഷ്ടങ്ങൾ വിലയിരുത്തി. ഏതാനും ദിവസംമുൻപ് മൂന്നേക്കർ തുടിക്കോട് കാളിയത്ത് വീട്ടിൽ ജമേഷിന്‍റെ കിണറും ഇടിഞ്ഞുതാഴുകയുണ്ടായി.

വൈദ്യുതിയും കുടിവെള്ളവുമില്ല; പറമ്പിക്കുളം കോളനിയിൽ ദുരിതം

മുതലമട: കഴിഞ്ഞ പത്തുദിവസമായി കനത്തമഴ തുടരുന്നതിനാൽ പറമ്പിക്കുളത്തു വൈദ്യുതിയും കുടിവെള്ളവുമില്ലാതെ ജനം വലയുന്നു. തമിഴ്നാട് സർക്കാർ വൈദ്യുതിവകുപ്പാണ് പറമ്പിക്കുളം മേഖലയിൽ വൈദ്യുതിവിതരണം നടത്തിവരുന്നത്. ഇടയ്ക്കു വല്ലപ്പോഴും വൈദ്യുതിയെത്തി മിന്നിമറയും, പിന്നീട് മണിക്കൂറുകൾക്കുശേഷം ഇതാവർത്തിക്കും. വൈദ്യുതിതടസം കാരണം പ്രദേശത്തെ ആരോഗ്യ കേന്ദ്രം, മറ്റു സർക്കാർ ഓഫീസുകളുടെ പ്രവർത്തനവും താളം തെറ്റിയ നിലയിലാണ്. കാലവർഷം ആരംഭിച്ചതോടെ പറമ്പിക്കുളം മലമ്പാതയിൽ മരംവീണു ഗതാഗതതടസവും പതിവാകുന്നു. കഴിഞ്ഞദിവസം പുലർച്ചെ ആനപ്പാടി റോഡിനു കുറുകെ മരംവീണു ഗതാഗതം തടസപ്പെട്ടു. തമിഴ്നാട് ട്രാൻസ്പോർട്ട് കോർപറേഷൻ ബസ് മണിക്കൂറുകളോളം നിർത്തിയിടേണ്ടതായിവന്നതിനാൽ യാത്രക്കാർ പെരുവഴിയിൽ വലഞ്ഞു. വനംവകുപ്പിനെ വിവരം അറിയിച്ചിട്ടും സ്ഥലത്തെത്താതിനാൽ യാത്രക്കാരും സമീപതാമസക്കാരും മരം മുറിച്ചനീക്കിയാണ് ബസ്, വിനോദ സഞ്ചാരികളുടെ വാഹനം ഉൾപ്പെടെ ഗതാഗതം ആരംഭിച്ചത്. വനംവകുപ്പ് അത്യാവശ്യഘട്ടങ്ങളിൽ മരംമുറിച്ചുമാറ്റാൻ മൂന്നു കട്ടർമെഷീനുകൾ വാങ്ങിച്ചിട്ടുണ്ടെങ്കിലും ഇതു പ്രവർത്തനക്ഷമമല്ലൊന്നാണ് അറിയിക്കുന്നത്. എന്നാൽ യാത്രിക്കാരെ കൊണ്ട് മരംമുറിച്ചുമാറ്റാൻ വനം വകുപ്പിന്‍റെ തന്ത്രമാണ് യന്ത്രതകരാറെന്നും ആക്ഷേപമുണ്ട്. പറമ്പിക്കുളത്തിലേക്കുവരുന്ന വിനോദസഞ്ചാരികളിൽനിന്നും ചുങ്കം പിരിച്ചാണ് വനംവകുപ്പ് കടത്തി വിടുന്നത്. കാലവർഷം ഇനിയും ശക്തിപ്പെട്ടാൽ പറന്പിക്കുളം നിവാസികൾ അത്യാവശ്യ സേവനങ്ങളെന്നും ലഭിക്കാതെ ഒറ്റപ്പെടുമെന്ന ആശങ്കയുമുണ്ട്.

മലന്പുഴ ഉദ്യാനത്തിനുമുന്നിലെ റോഡ് തകർന്നനിലയിൽ

മലമ്പുഴ: മറ്റു സംസ്ഥാനങ്ങളിൽ നിന്നുൾപ്പെടെ ഒട്ടേറെ വിനോദസഞ്ചാരികൾ വരുന്ന മലമ്പുഴ ഡാം ഉദ്യാനത്തിനു മുന്നിലെ പ്രധാന റോഡ് തകർന്ന്് മാസങ്ങൾ പിന്നിട്ടിട്ടും അധികൃതർ മൗനം പാലിക്കുകയാണെന്ന് നാട്ടുകാരുടെയും വിനോദസഞ്ചാരികളുടെയും ആക്ഷേപം. മഴ ആരംഭിച്ചതോടെ ഇതിലൂടെ മഴവെള്ളം ശക്തമായി ഒഴുകി റോഡിന്‍റെ ഉയരവ്യത്യാസം വർധിച്ചതോടെ ഇരുചക്രവാഹനങ്ങൾക്കും ഓട്ടോറിക്ഷകൾക്കും അപകടഭീഷണിയാണെന്ന് സമീപത്തെ ഓട്ടോസ്റ്റാൻഡിലെ ഡ്രൈവർമാർ പറഞ്ഞു. എത്രയുംവേഗം റോഡ് സഞ്ചാരയോഗ്യമാക്കണമെന്ന ആവശ്യം ശക്തമായിരിക്കുകയാണ്.

തിരുവിഴാംകുന്ന് ഫാമിൽ തമ്പടിച്ച കാട്ടാനകളെ തുരത്തണം: കോൺഗ്രസ്

മണ്ണാർക്കാട്: തിരുവിഴാംകുന്ന് അമ്പലപ്പാറ, കാപ്പുപറമ്പ്, കച്ചേരിപ്പറമ്പ് എന്നീ പ്രദേശങ്ങളിൽ കാട്ടാനയുടെ ശല്യം വ്യാപകം. തിരുവിഴാംകുന്നിലെ കേരള മൃഗസംരക്ഷണ ഗവേഷണ കേന്ദ്രത്തിന്‍റെ ഫാമിൽ ഒരു മാസത്തോളമായി രണ്ടു കാട്ടാനകൾ തമ്പടിച്ചിരിക്കുന്നു. ഇത് പ്രദേശവാസികൾക്കും ഫാം ജീവനക്കാർക്കും ഫാം തൊഴിലാളികൾക്കും ഗവേഷണ വിദ്യാർഥികൾക്കും ഭീഷണിയാണ്. ഫാമിൽനിന്നും കാട്ടാനകളെ സൈലന്‍റ് വാലി വനത്തിലേക്ക് തുരത്തുന്നതിന് വനം ഉദ്യോഗസ്ഥരോട് നാട്ടുകാർ പല തവണ ആവശ്യപ്പെട്ടെങ്കിലും നടപടി ഉണ്ടായിട്ടില്ല. ഇനിയും വനംവകുപ്പ് നിസംഗത തുടർന്നാൽ ശക്തമായ സമരവുമായി രംഗത്തിറങ്ങുമെന്ന് നേതാക്കൾ മുന്നറിയിപ്പു നൽകി. ഉടൻ വനംവകുപ്പ് അധികാരികൾ നടപടി സ്വീകരിക്കണമെന്നാവശ്യപ്പെട്ടാണ് കോട്ടോപ്പാടം മണ്ഡലം കോൺഗ്രസ്‌ പ്രസിഡന്‍റ് ഉമ്മർ മനച്ചിതൊടി, ടി.കെ. ഇപ്പു, നൗഫൽ താളിയിൽ തുടങ്ങിയവർ ഇന്നലെ തിരുവിഴാംകുന്ന് ഫോറസ്റ്റ് സ്റ്റേഷനിൽ നിവേദനം നൽകിയത്.

കൃഷിയിടങ്ങൾവിട്ട് കാട്ടാനകൾ വീട്ടുവളപ്പുകളിൽ നാശംവിതയ്ക്കുന്നു

നെന്മാറ: കരിമ്പാറ പൂഞ്ചേരി മേഖലയിൽ കാട്ടാനകൾ വീട്ടുവളപ്പിൽഎത്തി നാശംവരുത്തി. കഴിഞ്ഞദിവസം രാത്രി 11 മണിയോടെ പൂഞ്ചേരി കമലം, ഉണ്ണികൃഷ്ണൻ, ആർ. ബാലൻ, രജിത, സുദേവൻ - ലത എന്നിവരുടെ വീട്ടുവളപ്പിലാണ് കാട്ടാന എത്തിയത്. കമലത്തിന്‍റെ വീട്ടുമുറ്റത്തെ പ്ലാവിലെ ചക്ക ലക്ഷ്യമാക്കി എത്തിയ ആന പ്ലാവ് കുലുക്കി ചക്ക തള്ളിയിട്ടു. ശബ്ദം കേട്ട് വീടിന് പുറത്ത് ലൈറ്റ് തെളിച്ചപ്പോഴാണ് കാട്ടാനയുടെ സാനിധ്യം വീട്ടുകാർ അറിഞ്ഞത്. തുടർന്ന് അടുത്ത വീട്ടുകാരെ ഫോണിൽ വിളിച്ച് വിവരമറിയിച്ച് ടോർച്ച് തെളിച്ചും ഒച്ചവച്ചും ശബ്ദമുണ്ടാക്കിയും ആണ് അരമണിക്കൂറിന് ശേഷം കാട്ടാന പ്രദേശത്തു നിന്ന് പോയത്. ബാലന്‍റെ വീടിന്‍റെ ചുറ്റുവേലിയും ഉണ്ണികൃഷ്ണന്‍റെ വീടിന്‍റെ പടിയും വേലിയും പുഞ്ചിരികളം ചെന്താമരാക്ഷന്‍റെ വേലിയും കാട്ടാനകൾ ചവിട്ടിമറിക്കുകയും ചെയ്തു. വനമേഖലയിൽ നിന്ന് ഒന്നര കിലോമീറ്ററോളം അകലെയുള്ള വീട്ടുവളപ്പുകളിൽ കൃഷിയിടങ്ങൾ താണ്ടി കാട്ടാനകൾ എത്തിയതോടെ പ്രദേശവാസികൾ ഭയചകിതരാണ്. വിവരമറിഞ്ഞ് രാവിലെ സമീപവാസികൾ സ്ഥലത്ത് തടിച്ചുകൂടി. വനം അധികൃതരെ വിവരമറിച്ചതിനെ തുടർന്ന് തിരുവഴിയാട് സെക്ഷൻ ജീവനക്കാർ സ്ഥലം സന്ദർശിച്ചു. കാട്ടാനകളെ ഉൾവനങ്ങളിലേക്ക് കയറ്റി വിടാനുള്ള നടപടി ഉണ്ടാവണമെന്നും തുടർച്ചയായി ജനവാസ മേഖലയിൽ കാട്ടാന വരുന്നതിന് പ്രതിരോധിക്കുന്നതിനായി പ്രദേശത്തെ തെരുവ് വിളക്കുകൾ സ്ഥാപിക്കണമെന്നും, വനമേഖലയിൽ നിന്ന് സ്ഥിരമായി കാട്ടാന വരുന്ന കൽച്ചാടി, ചള്ള, ഓവുപറ മേഖലകളിൽ ആർആർടി സംഘത്തെയും വനപാലകരെയും കാട്ടാനകളെ പ്രതിരോധിക്കാൻ നിയമിക്കണമെന്നും പ്രദേശവാസികൾ ആവശ്യപ്പെട്ടു. അടുത്തടുത്ത് വീടുകളുള്ള പ്രദേശത്ത് രാത്രിയിൽ കാട്ടാനകൾ എത്തി ഭീഷണി ഉയർത്തുന്നത് നടുക്കമുയർത്തുന്നതായി വീട്ടമ്മമാരായ രജിത, കമലം, ലത എന്നിവർ പറഞ്ഞു. കുട്ടികളുമായി വീടുകളിൽ കഴിയുന്നത് ഭയത്തോടെയാണെന്നും വീട്ടുമുറ്റത്ത് ആനകൾ ചവിട്ടി കുഴിയാക്കിയ കാൽപ്പാടുകൾ ചൂണ്ടി സുദേവനും പറഞ്ഞു.

മൂന്നേക്കറിൽ കാട്ടാനശല്യം രൂക്ഷം; കേരള കോണ്‍ഗ്രസ്-എം പ്രതിഷേധധർണ നാളെ

കല്ലടിക്കോട്: മൂന്നേക്കർ, മീൻവല്ലം, പാങ്ങ്, വാക്കോട്, തുടങ്ങിയ മലയോര മേഖലകളിൽ കഴിഞ്ഞ ഒരു മാസത്തിലേറെയായി കാട്ടാന കൃഷി നശിപ്പിച്ചുകൊണ്ടിരിക്കുന്നതിന് പരിഹാരം കാണണമെന്ന് കേരള കോണ്‍ഗ്രസ്- എം കരിന്പ മണ്ഡലം കമ്മിറ്റി ആവശ്യപ്പെട്ടു. വാഴ കമുക്, തെങ്ങ്, റബർ എല്ലാം ഇതിനോടകം തന്നെ നശിപ്പിച്ചു കഴിഞ്ഞു. വൈകുന്നേരം ആറുമണി ആകുന്പോഴേക്കും കാട്ടാനകൾഎത്തി കൃഷികൾ നശിപ്പിക്കുകയാണ്. വൈദ്യുതിയും വെളിച്ചവും ഇല്ലാത്തതുമൂലം ആളുകൾക്ക് ഇവയെ പ്രതിരോധിക്കാനോ ഓടിച്ചുവിടാനോ സാധിക്കുന്നില്ല. പല ആളുകളും കാട്ടാനയ്ക്ക് മുന്പിൽ അകപ്പെട്ട് രക്ഷപ്പെട്ടുപോകുന്നത് തലനാരിഴക്കു മാത്രമാണ്. ഫോറസ്റ്റ് ഉദ്യോഗസ്ഥർക്ക് ആവശ്യമായ ആധുനിക ഉപകരണങ്ങൾ നൽകി വന്യമൃഗങ്ങളെ തുരത്താനുള്ള സംവിധാനം വനംവകുപ്പ് ഒരുക്കികൊടുക്കണം. കല്ലടിക്കോട്, മൂന്നേക്കർ ഭാഗങ്ങളിൽ ആർആർടി യെ സ്ഥിരമായി നിയോഗിച്ച് ഫോറസ്റ്റ് ഉദ്യോഗസ്ഥർ നിരന്തരമായി പട്രോളിംഗ് നടത്തി കാട്ടാനയെ കാട്ടിലേക്ക് ഓടിച്ചുകയറ്റണം എന്നാണ് ജനങ്ങളുടെ ആവശ്യം. കേരള കോണ്‍ഗ്രസ്-എം കരിന്പ മണ്ഡലം കമ്മിറ്റിയുടെ നേതൃത്വത്തിൽ നാളെ രാവിലെ പത്തിന് മൂന്നേക്കർ ജംഗ്ഷനിൽ പ്രതിഷേധസമരം നടത്തും.

വടക്കഞ്ചേരി-മണ്ണുത്തി ദേശീയപാതയും മംഗലം-ഗോവിന്ദാപുരം സംസ്ഥാനപാതയും തകർന്നു

വടക്കഞ്ചേരി: തുടർച്ചയായ മഴയിൽ വടക്കഞ്ചേരി -മണ്ണുത്തി ദേശീയപാത, മംഗലം -ഗോവിന്ദാപുരം സംസ്ഥാനപാത ഉൾപ്പെടെ റോഡുകളിലെല്ലാം വലിയ കുഴികൾ രൂപപ്പെട്ട് തകർന്നു. കാലവർഷം കനക്കും മുമ്പേയാണ് റോഡുകളുടെ ഈ ദുരവസ്ഥ ഉണ്ടാകുന്നത്. പന്നിയങ്കര ടോൾപ്ലാസയിൽ വലിയതുക ടോൾ കൊടുത്ത് വാഹനങ്ങൾ കടന്നുപോകുന്ന വടക്കഞ്ചേരി - മണ്ണുത്തി ദേശീയപാതയിൽ എണ്ണാൻപറ്റാത്ത വിധം കുഴികൾ പെരുകി. കുഴികൾ ചാടിക്കടന്നാണ് വാഹനങ്ങൾ പോകുന്നത്. ഇതിനൊപ്പം വാണിയമ്പാറ, കല്ലിടുക്ക്, മുടിക്കോട് ഭാഗങ്ങളിൽ മേൽപ്പാല നിർമാണം നടക്കുന്നതിനാൽ സർവീസ് റോഡിലൂടെ ഒറ്റവരിയായാണ് വാഹനങ്ങൾ കടത്തിവിടുന്നത്. ഇതുമൂലം മണിക്കൂറുകളോളം നീളുന്ന വാഹനകുരുക്കും പതിവായി. ശങ്കരംകണ്ണംതോടിനടുത്ത് ചെമ്മണ്ണാംകുന്നിൽ പാതയിലേക്ക് മണ്ണൊഴുകിയെത്തുന്ന സ്ഥിതിയുണ്ട്. ഇത് വാഹനങ്ങൾക്ക് വലിയ അപകടഭീഷണിയാവുകയാണ്. മംഗലം -ഗോവിന്ദാപുരം സംസ്ഥാനപാതയിൽ മംഗലത്തെ പഴയ വില്ലേജ് ഓഫീസിനടുത്തെ പുതിയ കൾവർട്ടിനിരുവശവും വലിയ കുഴികൾ ഉണ്ടായിട്ടുണ്ട്. കഴിഞ്ഞ മഴക്കാലത്തിനു ശേഷമാണ് ഇവിടെ കൾവർട്ട് പണിതത്. നിർമാണ അപാകത മൂലം പല തവണ പൊളിച്ച്പണിതാണ് വാഹനങ്ങൾക്ക് പോകാൻ ഉറപ്പാക്കിയത്. വീണ്ടും കൾവർട്ട് തകരുമോ എന്ന ആശങ്കയുമുണ്ട്. മിനി ഇൻഡസ്ട്രിയൽ എസ്റ്റേറ്റിനു മുന്നിൽ തുടർച്ചയായ കുഴികളാണ്. ഇതെല്ലാം ചാടികടന്ന് വള്ളിയോടും മുടപ്പല്ലൂർ ടൗണിലുമുള്ള വെള്ളക്കെട്ടുകൾ താണ്ടികടന്ന് വേണം യാത്ര തുടരാൻ. കോരഞ്ചിറ - വാൽക്കുളമ്പ് - പനംകുറ്റി, പന്തലാം പാടം മലയോരപാത യാത്ര ചെയ്യാനാകാത്ത വിധം തകർന്ന നിലയിലായി. സമാന സ്ഥിതിയാണ് പല പഞ്ചായത്ത് റോഡുകളുടെയും.

സ്കൂട്ടറിൽ ബസ് തട്ടി യാത്രക്കാരി മരിച്ചു

ഒറ്റപ്പാലം: വാഹനാപകടത്തിൽ സ്കൂട്ടർ യാത്രക്കായിരിക്കും ദാരുണാന്ത്യം. വാണിയംകുളം തൃക്കങ്ങോട് സ്വദേശിനി സന്ധ്യയാണ് മരിച്ചത്. സ്കൂട്ടർ ഓടിച്ചിരുന്ന ഭർത്താവ് രാജേഷിനും പരിക്കേറ്റു. പാലക്കാട് കുളപ്പുള്ളി പ്രധാന പാതയിൽ ഒറ്റപ്പാലത്ത് ഗതാഗതക്കുരുക്കിൽപ്പെട്ട സ്കൂട്ടർ യാത്രക്കാരിക്കാണ് വാഹനാപകടത്തിൽ ദാരുണ അന്ത്യം ഉണ്ടായത്. സ്കൂട്ടറിൽ ബസ് തട്ടിയതിനെത്തുടർന്ന് താഴെ വീണ യുവതിയുടെ ശിരസിലൂടെ ബസിന്‍റെ പിൻചക്രങ്ങൾ കയറിയിറങ്ങുകയായിരുന്നു.

ചോദ്യങ്ങളുന്നയിച്ച് വെള്ളച്ചാലിലെ തൊഴിലുറപ്പുകണക്ക് ബോർഡ്

വടക്കഞ്ചേരി: പാവം ബോർഡ്. വെള്ളത്തിന്‍റെ കുത്തൊഴുക്കിലും പിടിച്ചുനിന്നേ മതിയാകൂ. 692 തൊഴിൽദിനങ്ങൾ സൃഷ്ടിച്ച വിശദവിവര ബോർഡാണ്. ചാലിൽനിന്നുംമാറ്റി ചാലിനരികെ ആളുകൾ കാണുന്ന സ്ഥലത്ത് ബോർഡ് സ്ഥാപിക്കാമായിരുന്നില്ലേ എന്ന് ബോർഡിന്‍റെ അപകടാവസ്ഥ കണ്ട് പലരും ചോദിക്കുന്നുണ്ട്. പക്ഷെ ബോർഡിലെ കണക്കുകളും തുകയുമെല്ലാം ആളുകളെ കാണിക്കാൻ പറ്റിയതല്ല എന്നാണുപറയുന്നത്. മംഗലം- ഗോവിന്ദാപുരം സംസ്ഥാനപാതയിൽ മൂച്ചിചുവട് സ്റ്റോപ്പിനടുത്ത് റേഷൻകടക്കു സമീപം ചാലിലാണ് ബോർഡ് സ്ഥാപിച്ചിട്ടുള്ളത്. ഗ്രാമീണ തൊഴിലുറപ്പു പദ്ധതിയുടെതാണ് ബോർഡ്. മംഗലംപാലം മുതൽ വള്ളിയോടുവരെ നീർച്ചാൽ പുനരുദ്ധാരണം. അഞ്ചുലക്ഷം രൂപയാണ് തുക. 2023 മേയ് 12ന് പണി തുടങ്ങി 2024 സെപ്റ്റംബർ മൂന്നിന് പ്രവൃത്തി പൂർത്തീകരിച്ചു എന്നും ഫലകത്തിലുണ്ട്. ഇതിനായി 692 തൊഴിൽ ദിനങ്ങൾ സൃഷ്ടിച്ചതായും പറയുന്നു. 2,17,588 രൂപ ചെലവഴിച്ചെന്നുമാണ് കണക്ക്. ഇത്രയും തൊഴിൽ ദിനങ്ങൾ സൃഷ്ടിച്ച് വെള്ളച്ചാലിൽ എവിടെയാണ് പ്രവൃത്തി നടന്നതെന്നാണു നാട്ടുകാർക്ക് പിടികിട്ടാത്തത്. ഇത്തരംകാര്യങ്ങളിൽ പരിശോധനകളും തിരുത്തലുകളും വേണമെന്നും നാട്ടുകാർ ആവശ്യപ്പെടുന്നു. ഇത്രയേറെ പണികുറഞ്ഞ സ്ഥലത്ത് നടത്തുമ്പോൾ അതിന്‍റെ പ്രയോജനം പ്രവൃത്തി വഴിയുണ്ടാകേണ്ടേ എന്ന ന്യായമായ ചോദ്യമാണു നാട്ടുകാർ ഉന്നയിക്കുന്നത്. ഇത്തരത്തിൽ മറ്റിടങ്ങളിലും ബോർഡുകൾ സ്ഥാപിച്ചിട്ടുണ്ടെന്നു പറയുന്നു.

മഴ: വിതയും ഞാറ്റടിയും വെള്ളത്തിൽ മുങ്ങി

നെന്മാറ: തുടർച്ചയായ കനത്ത മഴയിൽ ഒന്നാം വിള വിത നടത്തിയതും ഞാറുപാകിയ നെൽപ്പാടങ്ങളും വെള്ളത്തിൽ മുങ്ങി. ഞാറ്റടി തയ്യാറാക്കാനായി വിത്തുപാകിയ തിരുവഴിയാട് പുത്തൻതറ പാടശേഖരത്തിലെ കെ.നാരായണൻ എന്ന കർഷകൻ്റെ പാടശേഖരത്തിലെ ആറ്റടിയാണ് അഞ്ചുദിവസമായും വെള്ളം വാർന്നു പോകാതെ വെള്ളത്തിനടിയിലായത്. മേഖലയിലെ നെൽപ്പാടങ്ങൾ വെള്ളം വാർന്നു പോകാതെ മുളച്ചു പൊന്തിയ ഞാറ്റടികൾ നാലുദിവസത്തിലേറെയായി വെള്ളത്തിനടിയിലാണ്, കൈപ്പഞ്ചേരി, ഇടിയം പൊറ്റ മേഖലകളിലെ പൊടിയിൽ വിതച്ച നെൽപ്പാടങ്ങളിലും വെള്ളം മുങ്ങി കിടക്കുകയാണ്. ദിവസങ്ങളായി വെള്ളം മുങ്ങിക്കിടക്കുന്നതിനാൽ മുളച്ചുവന്ന നെൽച്ചെടികൾ അഴുകിത്തുടങ്ങിയതായി കർഷകർ പറഞ്ഞു. ഉമ ഇനത്തിൽപ്പെട്ട മൂപ്പ്കുറഞ്ഞ നെല്ലാണ് മിക്ക കർഷകരും വിളയിറക്കിയിരിക്കുന്നത്. നിറഞ്ഞൊഴുകുന്ന തോടുകളും നെൽപ്പാടങ്ങളിലെ വെള്ളം ഒഴുകിപ്പോകാനുള്ള സമയം ലഭിക്കുന്നതിന് മുമ്പ് അടുത്ത മഴ വരുന്നതും നെൽപ്പാടങ്ങളിലെ വെള്ളക്കെട്ടിന് കാരണമായി. വേനൽമഴ കൂടുതലായതിനാൽ നെൽപ്പാടങ്ങളിൽ ഉറവ ഉണ്ടായതും വെള്ളം മണ്ണിനടിയിലേക്ക് കൂടുതൽ താഴാത്തതിനാൽ പാടങ്ങളിൽ വെള്ളം കൂടുതൽ കെട്ടിനിൽക്കാനിടയാക്കി. മഴയുടെ ശക്തി ഉടൻ കുറഞ്ഞില്ലെങ്കിൽ വീണ്ടും ഞാറ്റടി തയ്യാറാക്കാൻ വിത്തുകൾ അന്വേഷിക്കേണ്ട സ്ഥിതി ഉണ്ടാവുമെന്ന് പുത്തൻതറയിലെ കർഷകനായ നാരായണൻ പറഞ്ഞു.

ബസ് കാത്തിരിപ്പുകേന്ദ്രത്തിനു മുന്നിൽ ഒഴുകുന്നതു പുഴുനിറഞ്ഞ മലിനജലം

വടക്കഞ്ചേരി: ടൗണിൽ കിഴക്കഞ്ചേരി റോഡിലുള്ള ബസ് കാത്തിരിപ്പു കേന്ദ്രത്തിനുമുന്നിൽ പുഴുനിറഞ്ഞ മാലിന്യകൂമ്പാരം. മഴപെയ്യുമ്പോൾ വെള്ളത്തിലൂടെ ഈ മാലിന്യകൂമ്പാരത്തിൽ നിന്നുള്ള അഴുക്കുവെള്ളം ബസ് കാത്തിരിപ്പു കേന്ദ്രത്തിനു മുന്നിലൂടെ ഒഴുകും. ദുർഗന്ധവും പുഴുക്കളും ഈച്ചയുമായുള്ള ഈ മലിനജലത്തിൽ ചവിട്ടികടന്നുവേണം യാത്രക്കാർക്കു ബസിൽ കയറിപ്പറ്റാൻ. തിരക്കുപിടിച്ച് ബസിൽ കയറുന്നതിനിടെ കൈയിലുള്ള സാധനങ്ങൾ അഴുക്കുവെള്ളത്തിൽ വീണാൽ അത് ഉപേഷിക്കുകയല്ലാതെ വേറെ വഴിയില്ലെന്നു സ്ത്രീയാത്രക്കാർ പറയുന്നു. അഴുക്കുചാലുകൾ യഥാസമയം വൃത്തിയാക്കാത്തതിനാൽ മലിനജലം മുഴുവൻ റോഡിൽ പരന്നൊഴുകാൻ കാരണമാവുകയാണ്.

കരിമ്പാറയിൽ കാട്ടാനകൾ നാശംതുടരുന്നു

നെന്മാറ: കരിമ്പാറ, കൽച്ചാടി, ചള്ള, പോവുപാറ മേഖലകളിൽ കാട്ടാന ജനവാസ മേഖലകളിൽ എത്തുന്നത് തുടരുന്നു. കരിമ്പാറ നിരങ്ങൻപാറ ഭാഗത്ത് പ്ലാവുകളുള്ള കൃഷിയിടങ്ങളിൽ കാട്ടാനകൾ വേലിയും കയ്യാലയും തകർത്ത് നാശം ഉണ്ടാക്കി. കഴിഞ്ഞ രണ്ട് ദിവസമായി മേഖലയിലെ വിവിധ ജനവാസ മേഖലകളിൽ ഒറ്റയായും കൂട്ടമായും കാട്ടാനകൾ എത്തി കൃഷിനാശം വരുത്തി. കൽച്ചാടിയിലെ റബർ തോട്ടങ്ങളിലും കൃഷിയിടങ്ങളിലും കൂട്ടമായും ഒറ്റയായും ഇറങ്ങി ഫലവൃക്ഷങ്ങൾ ഉൾപ്പെടെ നാശം വരുത്തി. ചള്ളയിൽ സുദേവൻ, ലത ദമ്പതികളുടെ വിറക്സൂക്ഷിപ്പ് കേന്ദ്രം കാട്ടാന തകർത്തു. പൂഞ്ചേരികളം ചെന്താമരാക്ഷ (കുഞ്ഞൻ) ന്‍റെ കമുകുകളും, തെങ്ങും മറിച്ചിട്ട് നശിപ്പിച്ചു. വീപ്പനാടൻ ജോർജ്, എലിസബത്ത് എന്നിവരുടെ കമുകുകളും നശിപ്പിച്ചിട്ടുണ്ട്. നെന്മാറ വനം ഡിവിഷനിലെ അയിലൂർ പഞ്ചായത്തിലെ തിരുവഴിയാട് സെക്ഷനിൽപ്പെട്ട പ്രദേശമാണിത്. ഒറ്റതിരിഞ്ഞും കൂട്ടമായും എത്തിയ കാട്ടാനകൾ ആൾത്താമസമില്ലാത്ത കൃഷിയിടങ്ങളിലാണ് ചവിട്ടി കുഴച്ച് കൂടുതൽ കൃഷിനാശം വരുത്തിയിരിക്കുന്നത്. മഴക്കാലത്ത് കാട്ടാനക്കൂട്ടം കൂട്ടമായി സഞ്ചരിച്ചതോടെ മിക്ക കൃഷിയിടങ്ങളും ചെളിക്കുളമായിട്ടുണ്ട്. റബർ തോട്ടങ്ങളിലെ പ്ലാറ്റ് ഫോമുകൾ കാട്ടാനകൾ നടന്ന് മണ്ണിടിഞ്ഞു നാശംവരുത്തി. ഉറവ വെള്ളം പോകാനുള്ള നീർച്ചാലുകളും കാട്ടാനകൾ നടന്നുനീങ്ങിയതോടെ തടസപ്പെട്ട് കൃഷിയിടങ്ങളിൽ വെള്ളം കെട്ടിനിൽക്കാൻ ഇടയാക്കി. വനമേഖലയോട് ചേർന്നുള്ള സൗരോർജ വേലിയും പ്രവർത്തിക്കുന്നില്ലെന്ന് മേഖലയിലെ കർഷകർ പരാതി പറഞ്ഞു. രാത്രികാലങ്ങളിൽ തുടർച്ചയായ കനത്തമഴയുള്ളതിനാൽ വൈദ്യുതിതടസം ഉണ്ടാക്കുന്നതും ആനകളുടെ സ്വൈര്യവിഹാരത്തിന് സൗകര്യമാകുന്നുണ്ടെന്ന് വീപ്പനാടൻ ജോർജ് പറഞ്ഞു. മഴയുടെ ശബ്ദത്തിൽ വീടിനുസമീപം ആനകൾ എത്തുന്നത് അറിയുന്നില്ലെന്നും വീട്ടമ്മയായ ലത പരാതി പറഞ്ഞു.

യാത്രാസൗകര്യമൊരുക്കാതെ പാലംപൊളിച്ചു; ഒറ്റപ്പെട്ട് തരൂർ ഗ്രാമപഞ്ചായത്ത്

ആലത്തൂർ: തരൂർ പഞ്ചായത്ത് അതിർത്തിയിലെ മൂന്ന് പാലങ്ങളും പകരം യാത്രാസൗകര്യമൊരുക്കാതെ പൊളിച്ചതിനാൽ യാത്രാസൗകര്യമില്ലാതെ ജനങ്ങൾ ദുരിതത്തിൽ. പാലക്കാട്-തൃശൂർ അതിർത്തി പങ്കിടുന്ന പഴമ്പാലക്കോട് തോട്ടുംപള്ളയിലെ നിലവിലെ പാലം പൊളിച്ചത് പകരം യാത്രാസൗകര്യമൊരുക്കാതെയാണ്. പുതിയപാലം നിർമിക്കുന്നതിനാൽ വലിയ വാഹനങ്ങൾക്ക് യാത്രാനിരോധനമുള്ളതിനാൽ ബസ് യാത്രക്കാരും വിദ്യാർഥികളും പൊതുജനങ്ങളും ദുരിതമനുഭവിക്കുകയാണ്. ഇപ്പോൾ വലിയ വാഹനങ്ങൾ തരൂർ പള്ളിവഴി പട്ടിപറമ്പിലാണ് എത്തുന്നത്. കുരുത്തിക്കോട് പാലത്തിന്‍റെ പണി നടക്കുന്നതിനാൽ പൂർണഗതാഗത നിരോധനമാണ് ഏർപ്പെടുത്തിയിട്ടുള്ളത്. വിദ്യാർഥികൾക്കും തൃശൂർ മെഡിക്കൽ കോളജിലേക്കുള്ള രോഗികൾക്കുമുള്ള എളുപ്പയാത്രാമാർഗം അടഞ്ഞിരിക്കുകയാണ്. യാത്രാസൗകര്യമൊരുക്കാതെ പത്തനാപുരം പാലംപൊളിച്ചതിനാൽ തോണിപ്പാടം മേഖല ഒറ്റപ്പെട്ട അവസ്ഥയിലാണ്. വാവുള്യാപുരം- പഴമ്പാലക്കോട് വരെ പൂർണമായും തകർന്നു കിടക്കുകയാണ്. പാലംപൊളിക്കുന്നതിന് മുമ്പ് പകരം യാത്രാസൗകര്യമൊരുക്കണമെന്ന് രാഷ്ടീയപാർട്ടികളും പ്രദേശവാസികളും ആവശ്യപ്പെട്ട് സമരം നടത്തിയിരുന്നു. മഴക്കാലമായതിനാൽ അപകടം ഒഴിവാക്കാനായി തകർന്നു കിടക്കുന്ന വാവുള്യാപുരം- പഴമ്പാലക്കോട് പ്രധാനപാതയുടെ അറ്റകുറ്റപണികൾ അടിയന്തരമായി നടത്തി സഞ്ചാരയോഗ്യമാക്കണമെന്ന് മുൻ ഗ്രാമപഞ്ചായത്ത് പ്രസിഡന്‍റുംം 12-ാം വാർഡ് അംഗവുമായ പി. മനോജ്കുമാർ ആവശ്യപ്പെട്ടു.

വൈഎംസിഎ പേൾ ജൂബിലി സമാപനം; ലഹരിക്കെതിരേ പോരാടാൻ ആഹ്വാനം

ഒറ്റപ്പാലം: വൈഎംസിഎ പേൾ ജൂബിലി സമാപനം ഫൊറോന വികാരി ഫാ. സണ്ണി വാഴേപ്പറന്പിൽ ഉദ്ഘാടനം ചെയ്തു. നാടിനെയും കുടുംബത്തെയും തകർത്തുകൊണ്ടിരിക്കുന്ന ലഹരി മാഫിയകൾക്കെതിരെ യുവജനസംഘടനകൾ രംഗത്തുവരണമെന്ന് അദ്ദേഹം പറഞ്ഞു. ജൂബിലി സ്മാരകമായി ഇറക്കുന്ന സുവനീർ പ്രകാശനകർമം വി.കെ. ശ്രീകണ്ഠൻ എംപി നിർവഹിച്ചു. ലഹരിക്കെതിരെ കുടുംബങ്ങളിൽ നിന്ന് തന്നെ പ്രവർത്തനം ആരംഭിക്കണമെന്ന് എംപി ഓർമിപ്പിച്ചു. സമ്മേളനത്തിൽ കെ. പ്രേംകുമാർ എംഎൽഎ വിശിഷ്ട വ്യക്തികളെ ആദരിച്ചു. യുവാക്കൾ കൂടുതൽ സാമൂഹ്യ പ്രതിബദ്ധതയുള്ളവരായി തീരണമെന്ന് അദ്ദേഹം പറഞ്ഞു. ഒറ്റപ്പാലം വൈഎംസിഎ പ്രസിഡന്‍റ് കെ.കെ. ജോർജ് അധ്യക്ഷത വഹിച്ചു. മുൻസിപ്പൽ ചെയർപേഴ്സണ്‍ കെ. ജാനകിദേവി, ഫാ. തോമസ് ജോണ്‍ തടത്തിൽ, മനോജ് സ്റ്റീഫൻ, തോമസ് ജേക്കബ്, ആൻസൻ ജോണ്‍, വി.ടി. ജയരാജ്, വിനു തോമസ് എന്നിവർ പ്രസംഗിച്ചു. ജൂബിലിയോട് അനുബന്ധിച്ച് നടത്തിയ സാഹിത്യമത്സര വിജയികൾക്ക് സമ്മാനവും വിതരണം ചെയ്തു.

മണ്ണാർക്കാട്ടെ ഗതാഗതക്കുരുക്ക് അഴിക്കാൻ നിയന്ത്രണങ്ങൾക്കു തീരുമാനം

മണ്ണാർക്കാട്: നഗരത്തിലെ ഗതാഗതക്കുരുക്ക് പരിഹരിക്കാൻ വിവിധയിടങ്ങളിൽ ഗതാഗത നിയന്ത്രണമേർപ്പെടുത്താൻ മണ്ണാർക്കാട് ട്രാഫിക് റെഗുലേറ്ററി കമ്മിറ്റി തീരുമാനിച്ചു. പ്രധാനമായും കോടതിപ്പടിയിലെ അതിരൂക്ഷമായ ഗതാഗതക്കുരുക്കാണു ഗതാഗത നിയന്ത്രണമേർപ്പെടുത്താൻ കാരണം. കോടതിപ്പടി കടന്നുകിട്ടാൻ മണിക്കൂറുകൾവേണ്ട സാഹചര്യത്തിലാണ് നഗരസഭ ചെയർമാൻ സി. മുഹമ്മദ് ബഷീറിന്‍റെ നേതൃത്വത്തിൽ ട്രാഫിക് റെഗുലേറ്ററികമ്മിറ്റി യോഗം വിളിച്ചത്. കോടതിപ്പടി ജംഗ്ഷനിലേക്ക് ഞെട്ടക്കടവുനിന്നും വരുന്ന നാലുചക്ര വാഹനങ്ങൾ അൽമ ആശുപത്രി ജംഗ്ഷനിൽ നിന്നും നമ്പ്യാൻപടി ഭാഗത്തുകൂടി തിരിച്ചുവിടാനാണ് പ്രധാന തീരുമാനം. ഇതിനു പോലീസിനെ നിയോഗിക്കാനും യോഗം തീരുമാനിച്ചു. കുന്തിപ്പുഴ പാലംമുതൽ നെല്ലിപ്പുഴ പാലംവരെ ദേശീയപാതയുടെ ഇരു ഭാഗത്തുമുള്ള അനധികൃത പാർക്കിംഗ് കർശനമായി നിയന്ത്രിക്കാനും യോഗം തീരുമാനിച്ചു. കോടതിപ്പടിയിലെ ടെലിഫോൺ തൂണും ബോക്സും മാറ്റാൻ ബിഎസ്എൻഎല്ലിനോട് ആവശ്യപ്പെടാനും യോഗം തീരുമാനിച്ചു. സ്കൂൾ തുറന്നാൽ എംഇഎസ് കല്ലടി കോളജുമുതൽ നെല്ലിപ്പുഴ ഡിഎച്ച്എസ് വരെ രാവിലെയും വൈകുന്നേരവും പോലീസും എക്സൈസും സ്കൂൾ പരിസരങ്ങളിലുണ്ടാവണം. ഓരോ ഓട്ടോസ്റ്റാൻഡിലും നിശ്ചയിച്ച ഓട്ടോറിക്ഷകൾ മാത്രമാണ് നിർത്തുന്നതെന്നു ഉറപ്പുവരുത്തണം. നഗരത്തിൽ സ്വകാര്യവ്യക്തികളുടെ സഹകരണത്തോടെ കൂടുതൽ പേ പാർക്കിംഗ് സൗകര്യങ്ങൾ ഒരുക്കുന്ന കാര്യം പരിഗണിക്കും. ഇത്തരത്തിൽ പേപാർക്കിൽ നൽകുന്ന പണം സാധനങ്ങൾ വാങ്ങുന്ന ബില്ലിൽ കുറവ് വരുത്തുന്നതു ഉൾപ്പെടെയുള്ള സൗകര്യങ്ങൾ ആലോചിക്കും. യോഗത്തിലെ നിർദേശങ്ങൾ വ്യാപാരികൾ, ബസ് ഉടമകൾ, തൊഴിലാളി സംഘടനകൾ, രാഷ്ട്രീയ പാർട്ടികൾ എന്നിവരെ അറിയിച്ചശേഷം നടപ്പാക്കുമെന്നും നഗരസഭാ ചെയർമാൻ സി. മുഹമ്മദ് ബഷീർ യോഗത്തിൽ പറഞ്ഞു. നഗരത്തിൽ ദേശീയപാത നവീകരിച്ചതോടെ ഗതാഗതക്കുരുക്ക് കുറഞ്ഞിരുന്നു. എന്നാൽ കഴിഞ്ഞ രണ്ടുമാസത്തിലധികമായി കോടതിപ്പടി മുതൽ മണ്ണാർക്കാട് പോലീസ് സ്റ്റേഷൻ വരെ ഗതാഗതക്കുരുക്ക് രൂക്ഷമാണ്. ഇതുപരിഹരിക്കാൻ എല്ലാവരും സഹകരിക്കണമെന്നും ചെയർമാൻ പറഞ്ഞു. നഗരസഭാ സ്ഥിരം സമിതി അധ്യക്ഷൻ കെ. ഹംസ, ഡെപ്യൂട്ടി തഹസിൽദാർ പി. എം. അസ്മാബി, എഎംവി ഐ കെ.യു. ലൈജു, ട്രാഫിക് എസ്ഐ അൻവർ സാദത്ത്, എൻഎച്ച് ഓവർസിയർ കെ. ശ്രീദേവി, പൊതുമരാമത്ത് ഓവർസിയർ സ്റ്റെഫി സി. ജോസ്, വില്ലേജ് ഓഫീസർ പി.എസ്. രാജേഷ്, എഎസ്ഐ കെ. പ്രശോഭ് തുടങ്ങിയവർ യോഗത്തിൽ പങ്കെടുത്തു.

പോത്തുണ്ടിഡാം ഷട്ടർ പുനഃസ്ഥാപിച്ചു

നെന്മാറ: പോത്തുണ്ടി അണക്കെട്ടിലെ തകരാറിലായ ഇടതുകരകനാൽ ഷട്ടർ അറ്റകുറ്റപ്പണി നടത്തി പുനഃസ്ഥാപിച്ചു. പാലക്കാട്‌ മെക്കാനിക്കൽ എൻജിനീയറിംഗ് ഡിവിഷന്‍റെ നേതൃത്വത്തിലാണു ഷട്ടർ പുനഃസ്ഥാപിച്ചത്. ഇക്കഴിഞ്ഞ വേനലിൽ വെള്ളം വിതരണത്തിനിടെയാണ് ചാനലിൽ കുടുങ്ങി ഷട്ടറിന്‍റെ യന്ത്രഭാഗങ്ങൾ വേർപെട്ടുവന്നത്. ഇതുമൂലം ദിവസങ്ങളോളം ജലവിതരണം തടസപ്പെട്ടു. മെക്കാനിക്കൽ ഡിവിഷൻ വിഭാഗം എൻജിനീയർമാർ മുങ്ങൽവിദഗ്ധരെ ഉപയോഗിച്ചു ടണലിലൂടെ അകത്ത് പ്രവേശിച്ചാണ് പൊട്ടിവീണ ഷട്ടറിൽ കൊളുത്തുകൾ പിടിപ്പിച്ച് ഭാഗികമായി ഉയർത്താൻ കഴിഞ്ഞത്. പിന്നീട് ഡാമിലെ എമർജൻസി ഷട്ടർ ഉപയോഗിച്ച് ജലവിതരണം ഭാഗികമായി ക്രമീകരിക്കുകയായിരുന്നു. ഇതിനിടെ കാലവർഷം ശക്തി പ്രാപിച്ചതോടെ പോത്തുണ്ടി ഡാമിലെ ജലനിരപ്പും ഉയർന്നു. 55 അടി സംഭരണശേഷിയുള്ള പോത്തുണ്ടി ഡാമിൽ നിലവിൽ 15.02 അടി വെള്ളമുണ്ട്. കഴിഞ്ഞ വർഷം മേയ് 29ന് 5.97 അടി വെള്ളമാണുണ്ടായിരുന്നത്. വൃഷ്ടി പ്രദേശമായ നെല്ലിയാമ്പതി മലനിരകളിൽ കഴിഞ്ഞ രണ്ടു ദിവസമായി ശക്തമായ മഴ ഉള്ളതിനാൽ ഡാമിലെ പ്രധാന ജലസ്രോതസുകളായ കുണ്ടറചോല, മീൻചാടിപുഴ, ചെറുനെല്ലിപ്പുഴ എന്നിവിടങ്ങളിൽ നിന്നും മറ്റു കാട്ടുചോലകളിൽ നിന്നും അണക്കെട്ടിലേക്കുള്ള നീരൊഴുക്ക് വർധിച്ചിട്ടുണ്ട്.

അഗളി കെഎസ്ഇബി ഓഫീസിനു മുമ്പിൽ സമരവുമായി കോൺഗ്രസ്

അഗളി: കഴിഞ്ഞ പത്തുദിവസത്തോളമായി അട്ടപ്പാടിയിൽ തുടർച്ചയായി വൈദ്യുതിതടസം നേരിടുന്നതിൽ പ്രതിഷേധിച്ച് കോൺഗ്രസ് മണ്ഡലം കമ്മിറ്റികളുടെ നേതൃത്വത്തിൽ അഗളി വൈദ്യുതി ഭവനുമുമ്പിൽ സമരം നടത്തി. വർഷങ്ങളായി മഴക്കാലം ആരംഭിക്കുമ്പോൾ അട്ടപ്പാടിയിൽ വൈദ്യുതിതടസം പതിവാണ്. കാറ്റിലും മഴയിലും വലിയ ബുദ്ധിമുട്ടുകളാണ് അട്ടപ്പാടിപ്രദേശത്തുള്ളവർ അനുഭവിച്ചുകൊണ്ടിരിക്കുന്നത്. തുടർച്ചയായ വൈദ്യുതിതടസം ദുരിതം ഇരട്ടിയാക്കുകയാണ്. കൃഷി നഷ്ടപ്പെട്ടവർക്ക് ഓൺലൈനായി അപേക്ഷ നൽകാൻപോലും കഴിയുന്നില്ല. പ്ലസ് ടു വിദ്യാർഥികൾ അടക്കം ഉപരിപഠനത്തിന് ഓൺലൈൻ അപേക്ഷ നൽകേണ്ടവർ കാലവർഷത്തിലെ ദുരിതങ്ങൾ താണ്ടി മണ്ണാർക്കാടെത്തി അപേക്ഷ നൽകേണ്ട ഗതികേടിലാണ്. ആശുപത്രികളുടെ പ്രവർത്തനമടക്കം താളംതെറ്റിയിരിക്കുന്നു. കെഎസ്ഇബിയിലെ ഉന്നതരായ ഉദ്യോഗസ്ഥരും കരാറുകാരും തമ്മിൽ നടത്തുന്ന കൊടുക്കൽ വാങ്ങലുകളാണു അട്ടപ്പാടിയിൽ തുടർച്ചയായി വൈദ്യുതി മുടങ്ങാൻ പ്രധാന കാരണമെന്ന് കോൺഗ്രസ് ആരോപിച്ചു. അട്ടപ്പാടിയുെ വിദൂര മേഖലകളിൽ വൈദ്യുതി തകരാറുകൾ അടിയന്തരമായി പരിഹരിക്കണമെന്നും കോൺഗ്രസ് ആവശ്യപ്പെട്ടു. കോൺഗ്രസ് ബ്ലോക്ക് പ്രസിഡന്‍റ് പി.എം.ഹനീഫ സമരം ഉദ്ഘാടനം ചെയ്തു. അഗളി മണ്ഡലം പ്രസിഡന്‍റ് ജോബി കുരിയക്കാട്ടിൽ അധ്യക്ഷത വഹിച്ചു. നേതാക്കളായ പി.സി. ബേബി, ഷിബു സിറിയക്, എം. കനകരാജ്, ബിനോയ് പൂക്കുന്നേൽ, മണികണ്ഠൻ. കെ, അജിത്ത് കള്ളക്കര, സി.കെ. ലിജോ, ഷാജി ജോൺ, സുരേഷ് പൊസത്തിയൂർ തുടങ്ങിയവർ പ്രസംഗിച്ചു.

ഫിറ്റ്‌നസ് ലഭിക്കാത്ത സ്കൂളുകൾക്ക് അനുമതി നൽകില്ലെന്നു വിദ്യാഭ്യാസവകുപ്പിന്‍റെ മുന്നറിയിപ്പ്

ഒറ്റപ്പാലം: മധ്യവേനലവധി കഴിഞ്ഞു സ്കൂൾ തുറക്കുന്നതിന്‍റെ ഒരുക്കങ്ങൾ തുടങ്ങി. സ്കൂളുകളുടെ കെട്ടിടത്തിന്‍റെ ഫിറ്റ്‌നസ്, സുരക്ഷാ സംവിധാനങ്ങളൊരുക്കൽ, സ്കൂൾ ബസുകൾ സജ്ജമാക്കൽ തുടങ്ങിയ പ്രവർത്തനങ്ങൾ നടന്നുവരികയാണ് . ജൂൺ രണ്ടിന് സ്കൂൾ തുറക്കുമെങ്കിലും എല്ലാ സ്കൂളുകൾക്കും ഇപ്പോഴും ഫിറ്റ്‌നസ് ലഭിച്ചിട്ടില്ല. 638 സ്കൂളുകൾക്കാണ് ഇതുവരെ ജില്ലയിൽ ഫിറ്റ്നസ് ലഭിച്ചിട്ടുള്ളതെന്നു അധികൃതർ പറയുന്നു. ആകെ 1,002 സ്കൂളുകളാണ് ജില്ലയിലുള്ളത്. 333 സർക്കാർ സ്കൂളുകളും 585 എയ്ഡഡ് സ്കൂളുകളുമുൾപ്പടെയാണിത്. അതിൽ 361 സ്കൂളുകളിൽ ഫിറ്റ്നസ് ലഭിക്കാനായുള്ള നടപടിക്രമങ്ങളിലാണ്. വ്യാഴാഴ്ചക്കകം ഫിറ്റ്‌നസിനായുള്ള നടപടി പൂർത്തിയാക്കണമെന്നാണ് കളക്ടറുടെ നിർദേശം. മൂന്ന് സ്കൂളുകളുടെ കെട്ടിടങ്ങൾക്കു ഫിറ്റ്‌നസ് അനുമതി നൽകിയിട്ടില്ല. ഉപജില്ലാ വിദ്യാഭ്യാസ ഓഫീസർമാരുടെ നേതൃത്വത്തിലാണ് സ്കൂളുകളിൽ പരിശോധനകൾ നടത്തേണ്ടത്. എന്നാൽ, നടപടി വേഗത്തിലാക്കാൻ എഇഒമാർക്കുപുറമേ വിദ്യാഭ്യാസ ഡെപ്യൂട്ടി ഡയറക്ടറെയും ജില്ലാ വിദ്യാഭ്യാസ ഓഫീസുകളിലെ ജീവനക്കാരെയും ഉൾപ്പെടുത്തി മൂന്നുപേരടങ്ങുന്ന വിവിധ സംഘങ്ങൾ രൂപവത്കരിച്ചാണ് ഇപ്പോൾ പരിശോധന പുരോഗമിക്കുന്നതെന്ന് വിദ്യാഭ്യാസ ഡെപ്യൂട്ടി ഡയറക്ടർ പി. സുനിജ പറഞ്ഞു. വെള്ളിയാഴ്ചയ്ക്കകം പൂർണമായും ഫിറ്റനസ് നേടാനാകുമെന്നാണ് വകുപ്പിന്‍റെ കണക്കുകൂട്ടൽ. ഫിറ്റ്‌നസ് ലഭിക്കാത്ത സ്കൂളുകൾക്കു പ്രവർത്തനാനുമതിയുണ്ടാകില്ലെന്നും ഉപ വിദ്യാഭ്യാസ ഡയറക്ടർ പറഞ്ഞു. സ്കൂൾ മാനേജ്മെന്‍റുകൾ ശ്രദ്ധിക്കണം ഒറ്റപ്പാലം: വിദ്യാഭ്യാസവകുപ്പ് സ്കൂൾ മാനേജ്മെന്‍റുകൾക്ക് വിവിധ നിർദേശങ്ങൾ നൽകി. ഇതിന്‍റെ ഭാഗമായി സ്കൂളുകളിൽ നിർമാണ പ്രവൃത്തികൾ നടക്കുന്നുണ്ടെങ്കിൽ ആഭാഗം മറച്ചുകെട്ടണം. കൂടാതെ ഇഴജന്തുക്കളുടെ ശല്യമില്ലെന്നു ഉറപ്പുവരുത്തുകയും ചെയ്യണം. സ്കൂളിലേക്കുള്ള വഴികളിലും അപകടാവസ്ഥയില്ലെന്നു ഉറപ്പാക്കണം, ജലാശയങ്ങൾക്കു സംരക്ഷണഭിത്തിയുണ്ടായിരിക്കണം, ശുദ്ധജല സംവിധാനങ്ങളിൽ ശുചിത്വം ഉറപ്പാക്കണം എന്നിവയാണ് പ്രധാന നിർദേശങ്ങൾ. പാചകത്തൊഴിലാളികൾക്ക് ഹെൽത്ത് കാർഡ് നിർബന്ധമാക്കിയിട്ടുമുണ്ട്. വൃത്തിയുള്ളതും സുരക്ഷിതവുമായ ശൗചാലയങ്ങൾ ബന്ധപ്പെട്ടവർ ഉറപ്പാക്കണം. പരിസരത്തെ കടകളിൽ ലഹരിക്കച്ചവടം ഇല്ലെന്നും ബന്ധപ്പെട്ടവർ ഉറപ്പാക്കണമെന്നും പ്രത്യേക നിർദേശമുണ്ട്. പോലീസും പരിശോധന നടത്തും ഒറ്റപ്പാലം: സ്കൂളുകളുടെ സുരക്ഷ പോലീസും പരിശോധിക്കും. കാടുമൂടിക്കിടക്കൽ, അപകടകരമായി നിൽക്കുന്ന മരം, കെട്ടിടങ്ങളുടെ അപകടാവസ്ഥ, സ്കൂൾപരിസരത്തെ മറ്റ് അപകടസാഹചര്യങ്ങൾ എന്നിവയാണ് പരിശോധിക്കുന്നത്. അതതു സ്റ്റേഷൻപരിസരത്തെ സ്കൂളുകളുടെ അവസ്ഥ പരിശോധിച്ച് പരിഹരിക്കേണ്ടതിന്‍റെ പട്ടിക ജില്ലാ ഭരണകൂടത്തിനു ഇവർ കൈമാറി. സ്കൂൾ തുറക്കുംമുൻപേ ഈ പ്രശ്നങ്ങളും പരിഹരിക്കാൻ വിദ്യാഭ്യാസവകുപ്പ് സ്കൂളുകൾക്കു നിർദേശം നൽകിയിട്ടുണ്ട്.

മഴക്കാലരോഗങ്ങള്‍ക്കെതിരേ ജാഗ്രത പാലിക്കണം: ജില്ലാ മെഡിക്കൽ ഓഫീസർ

പാലക്കാട്: കാലവര്‍ഷം ആരംഭിച്ചതിനാല്‍ പകര്‍ച്ചവ്യാധികള്‍ പടര്‍ന്നുപിടിക്കാനുള്ള സാധ്യത കൂടുതലായതിനാല്‍ പൊതുജനങ്ങള്‍ പരിസരശുചിത്വവും വ്യക്തിശുചിത്വവും ആഹാരശുചിത്വവും കൃത്യമായി പാലിക്കണമെന്നു ഡിഎംഒ (ആരോഗ്യം) അറിയിച്ചു. മഴവെള്ളം കെട്ടിനില്‍ക്കുന്ന സാഹചര്യം കൊതുകുജന്യരോഗങ്ങളായ ഡെങ്കിപ്പനി, ചിക്കുന്‍ഗുനിയ, മലമ്പനി എന്നിവക്കും കെട്ടികിടക്കുന്ന വെള്ളവുമായുള്ള സമ്പര്‍ക്കം ജന്തുജന്യരോഗമായ എലിപ്പനിക്കും സാഹചര്യവുമുണ്ടാകും. ആയതിനാല്‍ വീടിനുചുറ്റും കൊതുകു വളരാനുള്ള സാഹചര്യം ഇല്ലാതാക്കാനും ഭക്ഷണാവശിഷ്ടങ്ങളും മറ്റുമാലിന്യങ്ങളും അലക്ഷ്യമായി വലിച്ചെറിഞ്ഞ് എലിശല്യമുണ്ടാകാതെയിരിക്കാനും എല്ലാവരും ശ്രദ്ധിക്കണം. ആഹാരവും കുടിവെള്ളവും മലിനമാവുന്നതുവഴി ജലജന്യരോഗങ്ങളായ വയറിളക്കം, ഹെപ്പറ്റൈറ്റിസ് എ, ഇ എന്നിവ മൂലമുള്ള മഞ്ഞപ്പിത്തം, ടൈഫോയ്ഡ് എന്നിവയ്ക്കും സാധ്യതയുണ്ട്. തിളപ്പിച്ചാറ്റിയ വെള്ളംമാത്രം കുടിക്കുവാന്‍ ഉപയോഗിക്കുക, നന്നായി പാകംചെയ്ത ഭക്ഷണ സാധനങ്ങള്‍മാത്രം കഴിക്കുക, ഭക്ഷണപദാര്‍ഥങ്ങള്‍ എപ്പോഴും അടച്ചുസൂക്ഷിക്കുക, വ്യക്തിശുചിത്വം പാലിക്കുക എന്നിവയിലൂടെ ഇത്തരം രോഗങ്ങളെ അകറ്റിനിര്‍ത്താം. വയറിളക്കമുണ്ടായാല്‍ നിര്‍ജലീകരണം തടയാനായി ഒആര്‍എസ് ലായനി, കരിക്കിന്‍വെള്ളം, കഞ്ഞിവെള്ളം തുടങ്ങിയവ രോഗിക്കു നല്‍കണം. അഞ്ചുവയസിനുതാഴെ പ്രായമുള്ള കുട്ടികള്‍ വീട്ടിലുണ്ടെങ്കില്‍ നിര്‍ബന്ധമായും ഒരുപാക്കറ്റ് ഒആര്‍എസ് വീട്ടില്‍ കരുതേണ്ടതാണ്. ആരോഗ്യ പ്രവര്‍ത്തകരെ വിവരം അറിയിക്കേണ്ടതുമാണെന്നും അറിയിച്ചു.

ജില്ലയിൽ കനത്ത മഴ തുടരുന്നു: 48 വീടുകള്‍കൂടി തകര്‍ന്നു

പാലക്കാട്: കാലവര്‍ഷം ശക്തമായതിനെ തുടര്‍ന്ന് ജില്ലയില്‍ 48 വീടുകള്‍ക്കുകൂടി നാശനഷ്ടം. 28ന് ഉച്ചയ്ക്ക് ഒന്നുമുതല്‍ ഇന്നലെ ഉച്ചയ്ക്ക് 2.30 വരെയുള്ള കണക്കാണിത്. 47 വീടുകള്‍ ഭാഗികമായും ഒരുവീട് പൂര്‍ണമായും തകര്‍ന്നു. കാലവര്‍ഷംതുടങ്ങി ഇതുവരെ ജില്ലയില്‍ ആകെ 179 വീടുകളാണു തകര്‍ന്നത്. പാലക്കാട് താലൂക്കിലെ പാലക്കാട്-1, പാലക്കാട്-3, കോങ്ങാട് 1, കുന്നത്തൂര്‍മേട്, കോങ്ങാട്-1, പുതുപ്പരിയാരം -2, പറളി-1 , മുണ്ടൂര്‍-2 , മലമ്പുഴ-2, മുണ്ടൂര്‍-1 വില്ലേജുകളില്‍ ഒരോ വീടുകളും പുതുപ്പരിയാരം-2, അകത്തേത്തറ, കണ്ണാടി വില്ലേജുകളില്‍ രണ്ടു വീടുകളും ആലത്തൂര്‍ താലൂക്കിലെ പെരിങ്ങോട്ടുകുറിശ്ശി-1, കോട്ടായി-2 വില്ലേജുകളില്‍ രണ്ട് വീടുകള്‍ വീതവും തകർന്നു. വടക്കഞ്ചേരി-2 വില്ലേജില്‍ മൂന്ന് വീടുകളും ചിറ്റൂര്‍ താലൂക്കിലെ നല്ലേപ്പിള്ളി, ചിറ്റൂര്‍, വലിയവള്ളംപതി വില്ലേജുകളില്‍ ഒരോ വീടുകളും പട്ടഞ്ചേരി വില്ലേജിലെ മൂന്നു വീടുകളും ഒറ്റപ്പാലം താലൂക്കിലെ അനങ്ങനടി, കടമ്പഴിപ്പുറം-1, ചളവറ, ഒറ്റപ്പാലം-1 വില്ലേജുകളില്‍ ഒരോവീടും തകർന്നിട്ടുണ്ട്. പട്ടാമ്പി താലൂക്കിലെ വല്ലപ്പുഴ വില്ലേജില്‍ ഒരു വീടും, തൃത്താല വില്ലേജില്‍ രണ്ടുവീടും മണ്ണാര്‍ക്കാട് താലൂക്കിലെ പയ്യനെടം, മണ്ണാര്‍ക്കാട്-1, കുമരംപുത്തൂര്‍, കോട്ടോപ്പാടം-3, അലനല്ലൂര്‍-3 വില്ലേജുകളില്‍ ഒരോ വീടുകളും അലനല്ലൂര്‍-1, മണ്ണാര്‍ക്കാട്-2 വില്ലേജുകളില്‍ രണ്ടുവീടുകളുമാണ് ഭാഗികമായി തകര്‍ന്നത്. ആലത്തൂര്‍ താലൂക്കിലെ മേലാര്‍കോട് വില്ലേജിലെ ഒരു വീട് പൂര്‍ണമായും തകര്‍ന്നു. 28ന് രാവിലെ എട്ടുമുതല്‍ ഇന്നലെ രാവിലെ എട്ടുവരെ ജില്ലയില്‍ ശരാശരി 44.78 മില്ലീമീറ്റർ മഴയാണു പെയ്തത്.

ചിറ്റൂർ പുഴയോരവാസികൾക്കു ജാഗ്രതാനിർദേശം

ചിറ്റൂർ: കിഴക്കൻമേഖലയിൽ കനത്ത മഴ തുടരുന്നതിനാൽ മൂലത്തറ റഗുലേറ്റർ ഉയർത്തിയതുമൂലം ചിറ്റൂർപ്പുഴയിൽ ജലനിരപ്പ് കുത്തനെ ഉയർന്നു. പൊള്ളാച്ചി അമ്പ്രാംപാളയത്തിനു പടിഞ്ഞാറുവശം മഴ പെയ്തതിനാൽ മണക്കടവ് വിയർ വഴിയാണ് മൂലത്തറ റഗുലേറ്ററിൽ വെള്ളം എത്തിക്കൊണ്ടിരിക്കുന്നത്. 80 സെന്‍റീമീറ്റർ ജലം പുഴയിലൊഴുക്കി വരികയാണ്. മഴ ശക്തമായാൽ ആളിയാർഡാം ഷട്ടർ തുടക്കാൻ സാധ്യതയുള്ളതിനാൽ പുഴയോവാസികൾ ജാഗത പാലിക്കാൻ ജലസേചന വകുപ്പ് മുന്നറിയിപ്പ് നൽകി. മൂലത്തറ, പാറക്കളം നിലമ്പതി വഴി രാത്രിസഞ്ചാരം ഒഴിവാക്കാനും ആവശ്യപ്പെട്ടിട്ടുണ്ട്. പുഴയിൽ ഒഴുകി വരുന്ന നാളികേരം ശേഖരിക്കാൻ ഇറങ്ങുന്നതു ഒഴിവാക്കണം. പുഴയിൽ വെള്ളമിറക്കുമ്പോൾ ഒഴുകി വരുന്ന മരത്തടികൾ കരയിലെത്തിക്കാൻ ശ്രമിച്ചാൽ അപകടമുണ്ടായേക്കാം. പാറക്കളം നിലമ്പതിക്കുമിതെ വെള്ളം ഒഴുകുമ്പോൾ കാൽനടയായും വാഹനങ്ങളിലും മറുഭാഗം കടക്കാൻ ശ്രമിക്കരുതെന്നും മുന്നറിയിപ്പ് നൽകിയിട്ടുണ്ട്.

വാഹനാപകടത്തിൽ യുവാവ് മരിച്ചു

മണ്ണാർക്കാട്: കോങ്ങാട് ടിപ്പുസുൽത്താൻ റോഡിൽ ബൈക്കും കാറും കൂട്ടിയിടിച്ച് യുവാവ് മരിച്ചു. ബുധനാഴ്ച രാത്രി എട്ടരയോടെയാണ് അപകടം. പള്ളിക്കുറുപ്പ് ശാസ്തമംഗലം വാഴോത്ത് രവിയുടെ മകൻ വിഥുൻ(22) ആണു മരിച്ചത്. സംസ്കാരം നടത്തി. ബിഎസ്എൻഎല്ലിന്‍റെ ഒപ്റ്റിക്കൽ ഫൈബർ ജോലിയാണ് വിഥുന്. ജോലികഴിഞ്ഞു വീട്ടിലേക്കു വരുംവഴിയാണ് അപകടം. നാട്ടുകാർ ഉടൻ പെരിന്തൽമണ്ണയിലെ സ്വകാര്യ ആശുപത്രിയിൽ എത്തിച്ചെങ്കിലും ഇന്നലെ പുലർച്ചെ രണ്ടരയോടെ മരിച്ചു. അമ്മ: കവിത. സഹോദരി: വിപിത.

ഭാരതപ്പുഴ ഇരുകരയും മുട്ടി, ഭീതിയിൽ പ്രദേശവാസികൾ

ഒറ്റപ്പാലം: കാലവർഷം ശക്തമായതോടെ ഭാരതപ്പുഴ ഇരുകര മുട്ടി ഒഴുകുവാൻ തുടങ്ങി. പുഴ കരകവിയുമെന്നു പ്രദേശവാസികൾ ആശങ്കയിൽ. ദിവസങ്ങളായി തുടരുന്ന കനത്ത മഴയിലാണ് നഷ്ടപ്രതാപം വീണ്ടെടുത്ത് നിള ഇരുകരകളുംമുട്ടി പരന്നൊഴുകുന്നത്. മുൻകാലങ്ങളിൽനിന്ന് വിഭിന്നമായി വളരെ പെട്ടെന്നാണ് ഭാരതപ്പുഴ ഇരകര മുട്ടിഒഴുകുന്നത്. ഭാരതപ്പുഴയിലെ തടയണകളെല്ലാം നിറഞ്ഞുകവിഞ്ഞ് ഇതിനു മുകളിലൂടെയാണ് ഇപ്പോഴുള്ള ഒഴുക്ക്. ഒറ്റപ്പാലം മായന്നൂർ പാലത്തിനുമുകളിൽ നിന്ന് നോക്കിയാൽ പുഴയുടെ പരപ്പും വികാസവും തിരിച്ചറിയാനാവും. ലക്കിടി, മീറ്റ്ന, ഷൊർണൂർ തടയണുകളെല്ലാം ഇതിനകം വെള്ളംനിറഞ്ഞു കാണാനാവാത്ത അവസ്ഥയിലാണ്. ഷൊർണൂരിൽ പഴയ കൊച്ചിൻപാലം പുഴയിലേക്ക് കൂപ്പുകുത്തി നിൽക്കുന്ന അവസ്ഥയിലാണുള്ളത്. ഇത് എപ്പോൾ വേണമെങ്കിലും പൂർണമായി നിലംപതിക്കാം. രണ്ടു പ്രളയങ്ങളെ അതിജീവിച്ച പഴയ കൊച്ചിൻ പാലം സർക്കാർ പൊളിച്ചുനീക്കാൻ ഉത്തരവായെങ്കിലും പുഴയിൽ വെള്ളം നിറഞ്ഞതോടെ ഇതും നടക്കാത്ത സ്ഥിതിയാണ്. കൊച്ചിൻ പാലത്തിന് സമീപമുള്ള ഷൊർണൂർ, ചെറുതുരുത്തി ഭാരതപ്പുഴയിലെ തടയണയുടെ ഷട്ടറുകൾ തുറക്കണമെന്ന ആവശ്യം ശക്തമാണ്. തടയണ പൂർണമായും മണൽവന്ന് നിറഞ്ഞ അവസ്ഥയിലാണുള്ളത്. കഴിഞ്ഞദിവസം മണൽ വാരാൻ ഉത്തരവായെങ്കിലും ഭാരതപ്പുഴയിലെ ഒഴുക്ക് വർധിച്ചതോടെ മണലെടുപ്പ് ആശങ്കയിലാണ്. ചൊവ്വാഴ്ച ഉച്ചയോടെയാണ് ഒഴുക്ക് വർധിക്കുകയും മണിക്കൂറുകൾക്കകം ഇരുകരകളും നിറഞ്ഞു കവിഞ്ഞ് ഒഴുകാൻ തുങ്ങിയത്. പുഴയുടെ ഇരുവശങ്ങളിലും താമസിക്കുന്നവർ ജാഗ്രത പാലിക്കണമെന്നു പോലീസ് അറിയിച്ചു.

ജില്ലയിൽ കനത്ത മഴ: 17 വീടുകള്‍കൂടി തകര്‍ന്നു

പാലക്കാട്: കാലവര്‍ഷം ശക്തമായതിനെ തുടര്‍ന്ന് ജില്ലയില്‍ 17 വീടുകള്‍ക്കുകൂടി നാശനഷ്ടം. 27ന് ഉച്ചയ്ക്ക് ഒന്നുമുതല്‍ ഇന്നലെ ഉച്ചയ്ക്ക് 2.30 വരെയുള്ള കണക്കാണിത്. 13 വീടുകള്‍ ഭാഗികമായും നാലുവീടുകള്‍ പൂര്‍ണമായും തകര്‍ന്നു. പാലക്കാട്, ആലത്തൂര്‍, ചിറ്റൂര്‍, മണ്ണാര്‍ക്കാട് താലൂക്കുകളിലാണ് ഒരോ വീട് വീതം പൂര്‍ണമായും തകര്‍ന്നത്. ഇതോടെ ജില്ലയില്‍ കാലവര്‍ഷ കെടുതിയില്‍ തകര്‍ന്ന ആകെ വീടുകളുടെ എണ്ണം 131 ആയി. പാലക്കാട് നാലുവീടും, ആലത്തൂര്‍ രണ്ടുവീടും, ചിറ്റൂര്‍ രണ്ട്, മണ്ണാര്‍ക്കാട് നാല്, അട്ടപ്പാടി ഒരുവീടുമാണ് ഭാഗികമായി തകര്‍ന്നത്. 27 ന് രാവിലെ എട്ടുമുതല്‍ 28ന് രാവിലെ എട്ടുവരെ ജില്ലയില്‍ ശരാശരി 41.81 മില്ലീമീറ്റർ മഴയാണ് പെയ്തത്. തെങ്ങുവീണ് വീടു തകർന്നു വടക്കഞ്ചേരി: വണ്ടാഴി പാലമുക്കിൽ തെങ്ങുവീണ് വീടുതകർന്നു. ഏഴാംവാർഡിൽപ്പെട്ട പാലമുക്ക് പ്ലാച്ചിക്കാട് ബാലകൃഷ്ണന്‍റെ (മാത്തൂർ ബാലൻ) വീടാണ് തകർന്നത്. ബാലകൃഷ്ണനും ഭാര്യ വത്സലയും അമ്മ ജാനകിയുമാണ് വീട്ടിലുണ്ടായിരുന്നത്. ഇവർ പരിക്കേൽക്കാതെ രക്ഷപ്പെട്ടു. വീടിന്‍റെ മുൻഭാഗം പൂർണമായും തകർന്ന നിലയിലാണ്.

അട്ടപ്പാടി അഞ്ചുദിവസമായി ഇരുട്ടിൽ: ദുരിതംപേറി മലയോരജനത

അഗളി: അട്ടപ്പാടിയിൽ പല സ്ഥലങ്ങളിലും വൈദ്യുതി നിലച്ചിട്ട് അഞ്ചുദിവസം പിന്നിട്ടു. ചില പ്രദേശങ്ങൾ ഏഴുദിവസമായി അന്ധകാരത്തിലാണ്. തുടർച്ചയായുണ്ടായ കാലവർഷക്കെടുതിയിൽ മരങ്ങൾഒടിഞ്ഞും കടപുഴകിവീണും വൈദ്യുതി വിതരണം നിലയ്ക്കുകയായിരുന്നു. തുടർച്ചയായുണ്ടായ വൈദ്യുതിതടസത്തിൽ ജനം വലഞ്ഞു. കടകളിൽ മെഴുകുതിരിപോലും ഇല്ലാതായതോടെ നിരവധി വീടുകൾ രാത്രികളിൽ അന്ധകാരത്തിലായി. റേഷൻകട വഴിയുള്ള മണ്ണെണ്ണ വിതരണം നിലച്ചതിനാൽ മണ്ണെണ്ണ വിളക്കും വീടുകളിൽനിന്ന് അപ്രത്യക്ഷമായി. കോരിച്ചൊരിയുന്ന മഴ വിറകുക്ഷാമത്തിനും കാരണമായി. വൈദ്യുതിയില്ലാത്തതിനാൽ റേഷൻവിതരണവും പൂർണമായും മുടങ്ങി. പല വീടുകളിലും അരിയില്ലാത്ത അവസ്ഥയുണ്ട്. മൊബൈലുകൾ സ്വിച്ച് ഓഫ് ആയതോടെ ആശയവിനിമയത്തിനും മാർഗമില്ലാതായി. മഴയും കാറ്റും ഇരുട്ടും വന്യമൃഗ ശല്യവും മലയോര മേഖലയെ അതീവ ഭീതിയിലാഴ്ത്തുകയാണ്. പലഭാഗത്തും റേഷൻ വിതരണം മുടങ്ങിയതോടെ ആദിവാസി ഉന്നതികളിലും പട്ടിണിയുടെ നിഴലാട്ടമുണ്ടായി.വിവിധ പ്രദേശങ്ങളിലായി വൻതോതിൽ കൃഷിനാശവും സംഭവിച്ചിട്ടുണ്ട്. ഇലക്ട്രിക് ലൈനുകളിൽ ഭീഷണി ഉയർത്തുന്ന മരങ്ങളും വീടുകൾക്ക് അപകടമാം വിധമുള്ള മരങ്ങളുംമുറിച്ചു നീക്കുന്നതിനും ഗ്രാമപഞ്ചായത്തുകൾക്കും കെഎസ്ഇബി അധികൃതർക്കും യഥേഷ്ടം സമയം ലഭിച്ചിരുന്നെങ്കിലും ബന്ധപ്പെട്ടവർ അത്തരം പ്രവൃത്തികളിൽ കാണിച്ച നിഷ്ക്രിയത്വമാണ് ജനങ്ങൾ ഇന്നു നേരിടുന്ന ദുരിതങ്ങൾക്ക് കാരണമെന്നു അട്ടപ്പാടിക്കാർ ചൂണ്ടിക്കാട്ടുന്നു.

നെല്ലിയാമ്പതി മേഖലയിൽ വിവിധയിടങ്ങളിൽ മരംവീണു ഗതാഗതം തടസപ്പെട്ടു

നെന്മാറ: നെല്ലിയാമ്പതി മേഖലയിൽ വിവിധയിടങ്ങളിൽ മരം വീണ് ഗതാഗതം തടസപ്പെട്ടു. ചുരം റോഡിൽ പോത്തുണ്ടി ചെക്ക്പോസ്റ്റിൽനിന്നും ഒന്നരകിലോമീറ്റർ അകലെ കഴിഞ്ഞദിവസം രാത്രി മരംപൊട്ടിവീണ് ഗതാഗതം തടസപ്പെട്ടു. നെല്ലിയാമ്പതിയിൽനിന്ന് നെന്മാറയിൽ രോഗിയെ ഇറക്കി മടങ്ങിപ്പോവുകയായിരുന്ന ആംബുലൻസ് വഴിയിൽ കുടുങ്ങി. തുടർന്ന് അഗ്നിരക്ഷാസേന, വനം, അധികൃതരെ വിവരമറിയിച്ച് മരം മുറിച്ചുമാറ്റിയാണ് ഗതാഗതം പുനസ്ഥാപിച്ചത്. കഴിഞ്ഞദിവസം വൈകിട്ട് സീതാർ കുണ്ട് ഗ്രീൻലാൻഡ് റോഡിൽ വലിയ മരം കടപുഴകി സീതാർകുണ്ട് പോസ്റ്റ്ഓഫീസ് കെട്ടിടത്തിന്‍റെ ഷീറ്റ്, ഓട് എന്നിവ തകർന്നു. പൊതുപ്രവർത്തകനായ പി.ഒ. ജോസഫും ഗ്രീൻലാൻഡ് ഫാം ജീവനക്കാരുംചേർന്ന് മരം വെട്ടിമാറ്റി മേഖലയിലേക്കു ഗതാഗതം പുനഃസ്ഥാപിച്ചു. കാലവർഷം ശക്തമായതോടെ കഴിഞ്ഞ കുറച്ചു ദിവസങ്ങളായി ചുരം റോഡിലും നെല്ലിയാമ്പതിയിലെ വിവിധ റോഡുകളിലും വലുതും ചെറുതുമായ മരക്കൊമ്പുകൾ പൊട്ടി വീഴുന്നതും പതിവായി. മരക്കൊമ്പുകൾ ജീപ്പ് ഡ്രൈവർമാരും മറ്റു വാഹന യാത്രക്കാരും വലിച്ചു മാറ്റിയാണ് ചെറിയ ഗതാഗത തടസങ്ങൾ നീക്കുന്നത്. ചുരം റോഡിലും നെല്ലിയാമ്പതിയിലെ ഉൾപ്രദേശങ്ങളിലും മൊബൈൽ നെറ്റ്‌വർക്ക് എല്ലാ പ്രദേശങ്ങളിലും ലഭിക്കാത്തതും അപകടമുണ്ടാകുകയോ റോഡ് തടസമുണ്ടാവുകയോ ചെയ്താൽ അധികൃതരെ അറിയിക്കാൻ കഴിയാത്ത സ്ഥിതിയുണ്ട്. ഇതുമൂലം ജീപ്പ് യാത്രക്കാരും, സന്നദ്ധ പ്രവർത്തകരും, ബസ് യാത്രക്കാരും, ഇരു ചക്രവാഹനക്കാർ എന്നിവർ ചേർന്ന് പലപ്പോഴും മര കൊമ്പുകളും മറ്റും വലിച്ചുമാറ്റിയാണ് ഗതാഗതതടസം നീക്കാറുള്ളത്.

മരത്തിന്‍റെ ശിഖരങ്ങൾ മുറിച്ചുനീക്കി

ഒറ്റപ്പാലം: വൈദ്യുതി ലൈനിലേക്ക് ചായ്ഞ്ഞ മരത്തിന്‍റെ ശിഖരങ്ങൾ മുറിച്ചുമാറ്റി. പാലക്കാട്- കുളപ്പുള്ളി പ്രധാന പാതയിൽ കണ്ണിയംപുറം സ്വകാര്യ ആശുപത്രിക്ക് സമീപം റോഡരികിൽ സംരക്ഷിച്ചു വളർത്തിയിരുന്ന കാട്ടുമരമാണ് കനത്ത മഴയിൽ കെഎസ്ഇബി ലൈനിന് മുകളിലേക്ക് ചരിഞ്ഞത്. സംഭവം ശ്രദ്ധയിൽപ്പെട്ട പ്രദേശവാസികളും ഓട്ടോ ഡ്രൈവർമാരും ഉടൻ അധികാരികളെ വിവരം അറിയിക്കുകയായിരുന്നു. കെഎസ്ഇബി അധികൃതർ വൈദ്യുതി ബന്ധം വിച്ഛേദിച്ച ശേഷം ഷൊർണൂരിൽ നിന്ന് എത്തിയ ഫയർഫോഴ്സ് അധികൃതർ മരത്തിന്‍റെ ശിഖരങ്ങൾ മുറിച്ചുമാറ്റി. വാഹനഗതാഗതം കുറച്ചുനേരം തടസപ്പെട്ടു.

കെ.ജെ. മുഹമ്മദ്‌ കല്ലടിക്കോട് സർവീസ് സഹകരണ ബാങ്ക് പ്രസിഡന്‍റായി ചുമതലയേറ്റു

കല്ലടിക്കോട്: കല്ലടിക്കോട് സർവീസ് സഹകരണ ബാങ്ക് പ്രസിഡന്‍റായി കെ.ജെ. മുഹമ്മദ്‌ എന്ന മുഹമ്മദുപ്പ കരിമ്പനക്കൽ ചുമതലയേറ്റു. വരണാധികാരി ജെമുന യുടെ സാന്നിധ്യത്തിലാണ് ചുമതലയേറ്റത്. ബാങ്കിന്‍റെ പ്രസിഡന്‍റായിരുന്ന യൂസുഫ് പാലക്കൽ സ്ഥാനമൊഴിഞ്ഞ ഒഴിവിലേക്കാണ് മുഹമ്മദിനെ പ്രസിഡന്‍റായി ഐകകണ്ഠേന തെരഞ്ഞെടുത്തത്. ബാങ്ക് ഹാളിൽ നടന്ന യോഗത്തിൽ ബാങ്ക് ഡയറക്ടർമാരും സംഘടന നേതാക്കളും ജീവനക്കാരും സംബന്ധിച്ചു. ബാങ്ക് വൈസ് പ്രസിഡന്‍റ് ഡോ.സി.എം. മാത്യു അധ്യക്ഷനായി. ഗ്രാമപഞ്ചായത്ത്‌ പ്രസിഡന്‍റ് പി.എസ്. രാമചന്ദ്രൻ, പി കെ. അബ്ദുള്ളക്കുട്ടി, കെ.കെ.ചന്ദ്രൻ, ആന്‍റണി മതിപ്പുറം, എം.എസ്. നാസർ, രാജി പഴയകളം, സി.എം. നൗഷാദ്, പികെഎം മുസ്തഫ, സലാം തറയിൽ, നിസാമുദ്ദീൻ പൊന്നങ്കോട്, ജെ. ദാവൂദ്, മുഹമ്മദ്‌ ഹാരിസ്, സുരേഷ് കരിമ്പ, ജെന്നി ജോൺ, സബൂറ മൂസ തുടങ്ങിയവർ പ്രസംഗിച്ചു. യൂസുഫ് പാലക്കൽ സ്വാഗതവും സെക്രട്ടറി ബിനോയ്‌ ജോസഫ് നന്ദിയും പറഞ്ഞു.

ജില്ലയിൽ സ്‌കൂള്‍കെട്ടിടം ഫിറ്റ്‌നസ് പരിശോധന പുരോഗമിക്കുന്നു

പാലക്കാട്: പുതിയ അധ്യയനവര്‍ഷത്തെ വരവേല്‍ക്കാനായി സ്‌കൂളുകളിലെ മുന്നൊരുക്കത്തിന്‍റെ ഭാഗമായി സ്‌കൂള്‍ കെട്ടിട ഫിറ്റ്നസ് പരിശോധന പുരോഗമിക്കുന്നു. ജില്ലയില്‍ മൂന്നു വിദ്യാഭ്യാസ ജില്ലകളിലായി 1002 സ്‌കൂളുകളില്‍ 638 സ്‌കൂള്‍ കെട്ടിടങ്ങളുടെ ഫിറ്റ്നസ് പൂര്‍ത്തിയായി. ബാക്കിയുള്ള 361 സ്‌കൂളുകളില്‍ ഫിറ്റ്നസ് പരിശോധന പുരോഗമിക്കുകയാണ്. മൂന്നുസ്‌കൂളുകളുടെ കെട്ടിടങ്ങള്‍ക്ക് ഫിറ്റ്‌നസ് അനുമതി നല്‍കിയിട്ടില്ല. സ്‌കൂള്‍ പരിസരത്തിന്‍റെ വൃത്തി, കെട്ടിടത്തിന്‍റെ ഘടന, ഉറപ്പ്, മേല്‍ക്കൂരയുടെ ഉറപ്പ്, അപകടഭീഷണിയുള്ള മരങ്ങള്‍ മുറിച്ചുമാറ്റുക, മതിലുകളുടെ അറ്റകുറ്റപണി, സ്‌കൂള്‍ വാഹനങ്ങളുടെ ഫിറ്റ്നസ്, വൃത്തിയുള്ളതും സുരക്ഷിതവുമായ ശൗചാലയങ്ങള്‍ തുടങ്ങിയവയാണ് ഫിറ്റ്നസ് അനുവദിക്കുന്നതിന്‍റെ പ്രധാന മാനദണ്ഡങ്ങള്‍.

പ്രദർശനം ഇന്നുംകൂടി; ലക്ഷ്മി തിയേറ്റർ ഓർമയിലേക്ക്

ഒറ്റപ്പാലം: ലക്ഷ്മി തിയേറ്ററും ചരിത്രത്തിലേക്ക്. ഒറ്റപ്പാലം നഗരത്തിൽ ഇനി സിനിമാ തീയേറ്ററുകൾ ഇല്ല. ഇന്നുരാത്രിയിലെ തുടരും, നരിവേട്ട എന്നീ സിനിമകളുടെ സെക്കൻഡ് ഷോയോടെ തിയേറ്റർ പ്രവർത്തനം നിലക്കും. ഒറ്റപ്പാലം പട്ടണത്തിലെ ഗതാഗതക്കുരുക്ക് കുറയ്ക്കാനായി വരുന്ന ബൈപാസ് പദ്ധതി കടന്നുപോകുന്നത് തിയേറ്റർ നിൽക്കുന്ന സ്ഥലത്തുകൂടിയാണ്. പദ്ധതിയ്ക്കായി എട്ടു സെന്‍റ് കൈമാറേണ്ടിവന്നിട്ടുണ്ട്. ഇതോടെ തിയേറ്ററിന്‍റെ കാർ പാർക്കിംഗ് ഏരിയ നഷ്ടമാകുമെന്നും പാർക്കിംഗിനു സ്ഥലമില്ലാതെ പ്രവർത്തിക്കാനാകില്ലെന്നുമാണ് അധികൃതർ പറയുന്നത്. പുതുമുഖ നടനായി സത്യൻ അഭിനയിച്ച ആത്മസഖിയായിരുന്നു ലക്ഷ്മി തിയേറ്ററിലെ ആദ്യ സിനിമ. 1954 ഫെബ്രുവരി 11ന് ഒറ്റപ്പാലത്തെ വ്യവസായിയായിരുന്ന ഇ.പി. അച്യുതൻ നായരും സഹോദരൻ ഇ.പി. മാധവൻനായരും ചേർന്ന് അമ്മ എരണ്ടത്ത് പുത്തൻവീട്ടിൽ ലക്ഷ്മിയമ്മയുടെ പേരിലാണ് തിയേറ്റർ തുടങ്ങിയത്. ഒറ്റപ്പാലത്ത് ആദ്യമുയർന്ന കോൺക്രീറ്റ് കെട്ടിടവും ഇതായിരുന്നു. 1974ൽ ഷൊർണൂർ സ്വദേശി പി.കെ. രാജനു തിയേറ്റർ കൈമാറി. എന്നാൽ, ലക്ഷ്മി എന്ന പേര് നിലനിർത്തി രാജന്‍റെ മകൾ കയറാട്ട് ബീനയും ഭർത്താവ് പി.എൻ. ജയശങ്കറും ഇക്കാലമത്രയും തിയേറ്റർ നടത്തിപ്പോന്നു. ഏഴുപതിറ്റാണ്ട് സിനിമയുടെ ലോകത്തുണ്ടായിരുന്ന തിയേറ്റർ ഭൂരിഭാഗംകാലവും ബി ക്ലാസ് തിയേറ്ററായിരുന്നു. എന്നാൽ, യുകെയിൽനിന്നും ഹോളണ്ടിൽനിന്നുമെല്ലാമെത്തിച്ച യന്ത്രസംവിധാനങ്ങളോടെയാണ് അന്ന് തിയേറ്റർ പ്രവർത്തിച്ചിരുന്നത്. മമ്മൂട്ടി, മോഹൻലാൽ, സുരേഷ്‌ഗോപി, ജയറാം, ദിലീപ് തുടങ്ങി ഒറ്റപ്പാലത്ത് ചിത്രീകരണത്തിനെത്തിയ പ്രമുഖ നടൻമാരെല്ലാം ഇവിടെ സിനിമ കാണാൻ വന്നിട്ടുണ്ട്. 2018ൽ ചാരുബെഞ്ചും കസേരയുമെല്ലാം മാറ്റി ലക്ഷ്മി തിയേറ്റർ മൾട്ടിപ്ലക്‌സായി. ബാൽക്കണിയുൾപ്പെടെ 250 സീറ്റുള്ള ഒരു സ്‌ക്രീനും 150 സീറ്റുള്ള മറ്റൊരു സ്‌ക്രീനും ക്യൂബ് പ്രൊജക്ടറും ശീതീകരിച്ച സംവിധാനങ്ങളുമായാണ് തീയേറ്റർ നവീകരിച്ചത്. ഒടുവിൽ നാടിന്‍റെ വികസനത്തിനുവേണ്ടി വഴിമാറിക്കൊടുക്കാൻ ഒരുങ്ങുകയാണ് ഒറ്റപ്പാലം പട്ടണത്തിന്‍റെ മുഖമുദ്രകളിലൊന്നായ തിയേറ്റർ.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]