ADVERTISEMENT

ADVERTISEMENT

സൺ എഡ്യൂക്കേഷനിൽ ഫ്ലാഷ് മോബ് സംഘടിപ്പിച്ചു

നെടുമങ്ങാട് : സൺ എഡ്യൂക്കേഷനിലെ അധ്യാപക-വിദ്യാർഥികൾ ചേർന്ന് നടത്തിയ ഫ്ലാഷ് മോബ് മാനേജിംഗ് ഡയറക്ടർ ഷമീർ എ. മുഹമ്മദ്‌ ഉദ് ഘാടനം ചെയ്തു. അധ്യാപിക മീനു. ബി അധ്യക്ഷത വഹിച്ചു. എച്ച്ഒഡി സന്ധ്യ വിജയ് സ്വാഗതം പറഞ്ഞു.

മാനേജർ എം.എസ്. സുനിൽ, എച്ച്ആർ മാനേജർ ആസിഫ് ജാൻ, പ്ലേസ്‌മെന്‍റ് ഓഫീസർ അസ്‌ജദ്, സൂര്യ ഗായത്രി, എസ്. മീനു, ഷംജിത, നജ്ന എന്നിവർ പ്രസംഗിച്ചു. കെ.വി. വൃന്ദ, ശിവാനി, ബി.എസ്‌. അഞ്ജന, വിജിത, എം.എസ്‌. ഗോപിക എന്നിവർ ഫ്ലാഷ് മോബ് അവതരണത്തിന് നേതൃത്വം നൽകി.

ADVERTISEMENT

ടാറിംഗ് വൈകി: റോഡിൽ കഞ്ഞിവച്ചു പ്രതിഷേധിച്ചു

നെടുമങ്ങാട്: കുളക്കോട് - അരുവിക്കര ഡാം റോഡിൽ ടാറിംഗ് വൈകുന്നതിൽ ജനകീയ സമര സമിതിയുടെ പ്രതിഷേധം. കരാർ കമ്പനിയുടെ വാഹനങ്ങൾ തടഞ്ഞിട്ട ഇതിന് മുന്നിൽ കഞ്ഞിവച്ചാണ് പ്രതിഷേധിച്ചത്. ശങ്കരമുഖം ഗവ. എൽപി സ്കൂളിന് മുന്നിൽ ആരംഭിച്ച സമരം വൈകുന്നേരത്തോടെയാണ് അവസാനിച്ചത്. കേരള റോഡ് ഫണ്ട് ബോർഡ് അസിസ്റ്റന്‍റ് എക്സിക്യൂട്ടീവ് എൻജിനീയർ ടാറിംഗ് 15-ാം തീയതി ആരംഭിച്ച് 24ന് മുൻപ് പൂർത്തിയാക്കുമെന്നും അല്ലെങ്കിൽ കരാർ ഏറ്റെടുത്ത വിശ്വസമുദ്ര കമ്പനിക്കെതിരെ ശക്തമായ നടപടി സ്വീകരിക്കുമെന്നും എഴുതി നൽകി. കൂടാതെ ദിവസവും മൂന്നുനേരം റോഡ് നനയ്ക്കാനും കരാർ കമ്പനിക്ക് നിർദേശം നൽകി. നവീകരണം നടന്നു നാലുമാസമായിട്ടും ടാറിംഗ് നടത്താത്തതിനെ തുടർന്ന് പ്രദേശവാസികൾ ജനകീയ സമിതി രൂപീകരിച്ച് ശക്തമായ പ്രതിഷേധത്തിലാണ്.

കൂറ്റന്‍ തടിവീണ് കൈവിരല്‍ ചതഞ്ഞു; കുടുങ്ങിയ മോതിരം ഫയര്‍ഫോഴ്‌സ് മുറിച്ചുനീക്കി

മെഡിക്കല്‍കോളജ്: കൂറ്റന്‍ തടിവീണ് കൈവിരല്‍ ചതഞ്ഞതോടെ വിരലില്‍ കുടുങ്ങിയ മോതിരം ഫയര്‍ഫോഴ്‌സ് എത്തി മുറിച്ചുനീക്കി. കൊല്ലം തേവലക്കര സ്വദേശി ആദവിന്‍റെ (21) വലതുകൈവിരലില്‍ കുടുങ്ങിയ മോതിരമാണു മണിക്കൂറുകള്‍ നീണ്ട പരിശ്രമത്തിനൊടുവില്‍ ചാക്ക സ്റ്റേഷനിലെ ഫയര്‍ ആൻഡ് റെസ്‌ക്യു ഓഫീസര്‍മാരായ ശരത്ത്, ആദര്‍ശ്, സാം, അരുണ്‍ എന്നിവര്‍ ചേര്‍ന്നു കട്ടര്‍ ഉപയോഗിച്ച് മുറിച്ചുനീക്കിയത്. ശനിയാഴ്ച രാത്രി 10 മണിയോടുകൂടിയായിരുന്നു സംഭവം. തേവലക്കരയിലെ ഒരു ടിംബേഴ്‌സില്‍ തടിയിറക്കുന്നതിനിടെയാണ് വിരലില്‍ക്കൂടി വീണ് ചതഞ്ഞത്. ഉടന്‍തന്നെ യുവാവിനെ കൊല്ലത്തെ ഒരു ആശുപത്രിയിലും അവിടെനിന്ന് തിരുവനന്തപുരം മെഡിക്കല്‍കോളജ് ആശുപത്രിയിലും എത്തിക്കുകയായിരുന്നു. തുടര്‍ന്നാണ് ചാക്ക സ്റ്റേഷനില്‍ വിവരം ലഭിച്ചതിന്‍റെ അടിസ്ഥാനത്തില്‍ സേനാംഗങ്ങളെത്തി സ്റ്റീല്‍മോതിരം മുറിച്ചുനീക്കിയത്. ആദവ് ഒരുദിവസംകൂടി ആശുപത്രിയില്‍ തുടരേണ്ടിവരുമെന്നു മെഡിക്കല്‍കോളജ് അധികൃതര്‍ വ്യക്തമാക്കി.

സ്റ്റുഡന്‍സ് കോണ്‍ഗ്രസ് സമ്മേളനം സംഘടിപ്പിച്ചു

മെഡിക്കല്‍കോളജ്: ഇന്ത്യന്‍ അക്കാഡമി ഓഫ് പീഡിയാട്രിക്‌സ് കേരള ശാഖയും ഐഎപി തിരുവനന്തപുരം ശാഖയും തിരുവനന്തപുരം എസ്എടി ആശുപത്രിയും സംയുക്തമായി പീഡിയാട്രിക്‌സ് ബിരുദാനന്ദ ബിരുദ വിദ്യാര്‍ഥികള്‍ക്കായി പ്രഥമ സ്റ്റുഡന്‍സ് കോണ്‍ഗ്രസ് സമ്മേളനം സംഘടിപ്പിച്ചു. തിരുവനന്തപുരം മെഡിക്കല്‍ കോളജില്‍ നടത്തിയ സമ്മേളനം കേരള ആരോഗ്യശാസ്ത്ര സര്‍വകലാശാല വൈസ് ചാന്‍സലര്‍ ഡോ. മോഹനന്‍ കുന്നുമ്മല്‍ ഉദ്ഘാടനം ചെയ്തു. ഐഎപി കേരള പ്രസിഡന്‍റ് ഡോ. ഐ. റിയാസ് അധ്യക്ഷത വഹിച്ചു. ഡോ. എം.കെ.സി നായര്‍ മുഖ്യവിഷയാവതരണം നടത്തി. മെഡിക്കല്‍ വിദ്യാഭ്യാസ ഡയറക്ടര്‍ ഇന്‍ ചാര്‍ജ് ഡോ. കെ.വി. വിശ്വനാഥന്‍, ഐഎപി തിരുവനന്തപുരം പ്രസിഡന്‍റ് ഡോ. ഡി. കല്‍പ്പന, ഡോ. ഗോപിമോന്‍, ഡോ. ശ്രീജിത്ത് കുമാര്‍ എന്നിവര്‍ പങ്കെടുത്തു. തിരുവനന്തപുരം മെഡിക്കല്‍ കോളജിലെ ഡോ. ലാല്‍ മുന്‍സംഗി അവതരിപ്പിച്ച പ്രബന്ധം മികച്ച പ്രബന്ധമായി തെരഞ്ഞെടുത്തു. തിരുവനന്തപുരം അനന്തപുരി ആശുപത്രിയിലെ ഡോ. കാവ്യ ഗണേഷ്, ആലപ്പുഴ മെഡിക്കല്‍ കോളജിലെ ഡോ. എസ്. നിവേദിത എന്നിവര്‍ യഥാക്രമം രണ്ടും മൂന്നും സ്ഥാനങ്ങള്‍ നേടി.

കുടിവെള്ളം മുടങ്ങുന്നു: പ്രതിഷേധിച്ച് കോൺഗ്രസ്

നെടുമങ്ങാട്: കുറച്ചു ദിവസങ്ങളായി നെടുമങ്ങാട് ടൗണിലും പ്രദേശത്തും നഗരസഭയിലെ വിവിധ സ്ഥലങ്ങളിലും കുടിവെള്ളം തടസപ്പെട്ടതിൽ പ്രതിഷേധിച്ച് നെടുമങ്ങാട് ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ കച്ചേരി നടയിൽ ധർണ നടത്തി. ഡിസിസി മുൻ പ്രസിഡന്‍റ് അഡ്വ. കരകുളം കൃഷ്ണപിള്ള ധർണ ഉദ്‌ഘാടനം ചെയ്തു. നെടുമങ്ങാട് ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് ടി അർജുനൻ അധ്യക്ഷത വഹിച്ചു. കോൺഗ്രസ് ജില്ലാ ഭാരവാഹികളായ അഡ്വ. ബാജി, നെട്ടിറച്ചിറ ജയൻ, വട്ടപ്പാറ ചന്ദ്രൻ, അഡ്വ. മഹേഷ് ചന്ദ്രൻ, ഫാത്തിമ, നെടുമങ്ങാട് താഹിർ, മുതിയങ്കാവ് വിജയൻ, മഞ്ചയിൽ അനിഷ്, ശരീഫ് ചിറക്കാണി സുന്ദർ തുടങ്ങിയവർ പങ്കെടുത്തു.

സുധയ്ക്കും കുടുംബത്തിനും ഇനി സമാധാനമായി ഉറങ്ങാം

പേരൂര്‍ക്കട: പൊട്ടിപ്പൊളിഞ്ഞ കുടിലിലെ ഒറ്റമുറിയില്‍ ദയനീയാവസ്ഥയില്‍ കഴിഞ്ഞുവന്നിരുന്ന മുട്ടത്തറ സ്വദേശിനി സുധയ്ക്കും (60) കുടുംബത്തിനും ഇനി സമാധാനമായി ഉറങ്ങാം. കല്ലടിമുഖത്ത് ഒഴിവുള്ള ഫ്‌ളാറ്റ് ഇവര്‍ക്ക് അടിയന്തരമായി അനുവദിച്ചു നല്‍കിയതിനെത്തുടര്‍ന്ന് ഇവര്‍ ഫ്‌ളാറ്റിലേക്ക് മാറുകയായിരുന്നു. പുതിയ വീടിന്‍റെ പാലുകാച്ചല്‍ ചടങ്ങിന്‍റെ ഉദ്ഘാടനം മേയര്‍ ആര്യ രാജേന്ദ്രന്‍ നിര്‍വഹിച്ചു. വീടിന്‍റെ താക്കോല്‍ദാനവും മേയര്‍ നിർവഹിച്ചു. സുധയ്ക്ക് വാര്‍ധക്യകാല പെന്‍ഷന്‍ കാലതാമസം കൂടാതെ അനുവദിക്കുന്നതിനും മേയര്‍ നിര്‍ദേശം നല്‍കി. സുധ, മാതാവ്, രണ്ടുകുട്ടികള്‍ എന്നിവരടങ്ങുന്നതാണ് കുടുംബം. സുധയുടെ പിതാവ് ഒരുവര്‍ഷത്തിനു മുമ്പ് മരണപ്പെട്ടിരുന്നു.

10 പേരെ വിവാഹം ചെയ്തു മുങ്ങിയ യുവതി അറസ്റ്റിൽ

നെടുമങ്ങാട്: ഓൺലൈനിൽ വിവാഹ പരസ്യം നൽകി വിവിധ ജില്ലകളിലായി പത്തു പേരെ വിവാഹം കഴിച്ചശേഷം മുങ്ങിയ യുവതി കുടുങ്ങി. എറണാകുളം കാഞ്ഞിരമറ്റം സ്വദേശിയും രണ്ടു വയസ്സുള്ള കുട്ടിയുടെ മാതാവുമായ രേഷ്മ യാണ്‌ അടുത്ത വിവാഹത്തിനു തൊട്ടുമുൻപ് കുടുങ്ങിയത്‌. പ്രതിശ്രുത വരനായ പഞ്ചായത്ത്‌ അംഗവും ബന്ധുവും ചേർന്നാണ്‌ തട്ടിപ്പ്‌ വെളിച്ചത്തു കൊണ്ടുവന്നത്‌. വിവാഹത്തിനായി ഒരുക്കിയ ഓഡിറ്റോറിയത്തിൽ പോകാൻ‌ നിന്ന രേഷ്മയെ ആര്യനാട്‌ പോലീസ്‌ നാടകീയമായി അറസ്റ്റ്‌ ചെയ്യുകയായിരുന്നു. 45 ദിവസം മുൻപ്‌ വിവാഹം കഴിച്ചതിന്‍റെ രേഖകൾ ബാഗിൽനിന്നും കണ്ടെടുത്തതിനെ തുടർന്നാണ് കബളിപ്പിക്കപ്പെട്ടതായി പഞ്ചായത്ത്‌ അംഗവും ബന്ധുക്കളും അറിഞ്ഞത്.

കഞ്ചാവും എംഡിഎംഎയുമായി മൂന്നുപേർ പോലീസ് പിടിയിൽ

പ്രതികൾ സ്ഥിരം മയക്കുമരുന്നു വിൽപനക്കാർ നെടുമങ്ങാട്: കഞ്ചാവും എംഡിഎംഎം സഹിതം മൂന്നുപേരെ പോലീസ് പിടികൂടി. വാളിക്കോട് ദർശന സ്കൂളിനു സമീപം വാടയിൽ ഹൗസിൽ ഷംനാസ് നാസറിനെ 2.97 ഗ്രാം എംഡിഎംഎയുമാണു പിടികൂടിയത്. ഇയാൾ സമാനമായ നിരവധി കേസുകളിൽ ജയിൽ വാസം അനുഭവിച്ചിട്ടുള്ളയാളും നിലവിൽ നെടുമങ്ങാട് സ്റ്റേഷൻ പരിധിയിലെ റൗഡി ലിസ്റ്റിൽ ഉൾപ്പെട്ടിട്ടുള്ള ആളുമാണ്. പല സ്ഥലങ്ങളിലും വാടകവീടുകൾ കേന്ദ്രീകരിച്ച് മയക്കുമരുന്നു വിപണനം നടത്തിവരികയാണ് ഇയാളെന്നു പോലീസ് പറഞ്ഞു. പനവൂർ വിളയിൽ എസ്പികെ മൻസിലിൽ സൂഫിൻ, പനവൂർ സുധീർ മൻസിലിൽ സുധീർ എന്നിവരെ ഓരോ പൊതി കഞ്ചാവു സഹിതമാണ് പോലീസ് പിടികൂടിയത്. തിരുവനന്തപുരം റൂറൽ ഡാൻസാഫ് നടത്തിയ ലഹരി പരിശോധനയിലാണ് പ്രതികൾ പിടിയിലായത്. പ്രതികൾ സ്ഥിരമായി ഓട്ടോറിക്ഷയിൽ കറങ്ങി നടന്നു കഞ്ചാവ് വില്പന നടത്തുകയാണ് എന്നറിഞ്ഞതിന്‍റെ അടിസ്ഥാനത്തിലാണു തിരുവനന്തപുരം റൂറൽ ജില്ലാ പോലീസ് മേധാവി കെ.എസ്. സുദർശന്‍റെ നിർദേശപ്രകാരം നർകോട്ടിക് സെൽ ഡിവൈഎസ്പിയുടെ നേതൃത്വത്തിൽ തിരുവനന്തപുരം റൂറൽ ഡാൻസാഫ് ടീം അംഗങ്ങളായ എസ്ഐ ഓസ്റ്റിൻ ജി ഡെന്നിസൺ, ജിഎസ്ഐ സജുകുമാർ, ജിഎഎസ്ഐ സതികുമാർ, അനൂപ്, എസ്‌സിപിഒ ഉമേഷ്, സിപിഒ അഖിൽ കുമാർ, സിപിഒ അജിത് എന്നിവർ അടങ്ങിയ സംഘമാണ് പ്രതികളെ പിടികൂടിയത്.

റോഡിന്‍റെ ശോച്യാവസ്ഥയില്‍ പ്രതിഷേധിച്ച് ഉപവാസം

നെയ്യാറ്റിന്‍കര: പുന്നയ്ക്കാട് - പൂക്കൈത -പാറക്കുഴി റോഡിന്‍റെ ശോച്യാവസ്ഥ, വാർഡിന്‍റെ വികസന മുരടിപ്പ് എന്നിവയ്ക്കെതിരേയുള്ള പ്രതിഷേധവുമായി ബിജെപി പെരുമ്പഴുതൂർ ഏരിയാ പ്രസിഡന്‍റ് ജി. ശിവകുമാർ ഉപവസിച്ചു. ബിജെപി സൗത്ത് ജില്ലാ പ്രസിഡന്‍റ് മുക്കംപാലമൂട് ബിജു ഉദ്ഘാടനം ചെയ്തു. ശ്രീകുമാർ അധ്യക്ഷനായി. സമാപന സമ്മേളനം ബിജെപി മേഖലാ ട്രഷറർ എൻ.പി. ഹരി ഉദ്ഘാടനം ചെയ്തു. സംസ്ഥാന നേതാവ് എൻ.കെ. ശശി, ജില്ലാ ഭാരവാഹികളായ ശ്രീകല, രാജകുമാരി ബിജു, സി.എസ്. ചന്ദ്രകിരൺ, എന്‍ജിഒ സംഘം ജില്ലാ ഭാരവാഹി പ്രദീപ്‌ പുള്ളിത്തല, മണ്ഡലം പ്രസിഡന്‍റ് തിരുപുറം ഗോപാലകൃഷ്ണൻ, ജനറൽ സെക്രട്ടറി ഷിബുരാജ് കൃഷ്ണ, മണ്ഡലം ഭാരവാഹികളായ ആലംപൊറ്റ ശ്രീകുമാർ, അരുൺ സരയൂ, അജി, ജി.ജെ. കൃഷ്ണകുമാർ, പെരുമ്പഴുതൂർ പ്രഭ എന്നിവര്‍ പങ്കെടുത്തു.

ക്വാലാലംപൂരിലേക്ക് കൂടുതല്‍ വിമാന സര്‍വീസ് ആരംഭിച്ചു

വലിയതുറ: തിരുവനന്തപുരം അന്താരാഷ്ട്ര വിമാനത്താവളത്തില്‍നിന്നും ക്വാലാലംപൂരിലേയ്ക്ക് മലേഷ്യ എയര്‍ലൈന്‍സിന്‍റെ അധിക വിമാന സര്‍വീസ് ആരംഭിച്ചു. എല്ലാ ശനിയാഴ്ചകളിലുമാണ് പുതിയ സര്‍വീസ്. തിങ്കള്‍, ബുധന്‍, വെള്ളി, ഞായര്‍ സര്‍വീസുകള്‍ക്ക് പുറമേയാണ് ശനിയാഴ്ചത്തെ സര്‍വീസ്. രാത്രി 12.30ന് തിരുവനന്തപുരത്തെത്തി 1.20 ന് പുറപ്പെടും. തെക്ക്-കിഴക്കന്‍ രാജ്യങ്ങള്‍ക്കു പുറമെ ഓസ്‌ട്രേലിയ , ന്യൂസിലന്‍ഡ് എന്നിവിടങ്ങളിലേക്കുളള യാത്രക്കാര്‍ക്കും ഈ സര്‍വീസ് പ്രയോജനപ്പെടും.

കാട്ടുപന്നിയുടെ ആക്രമണത്തിൽ പരിക്കേറ്റു

പാലോട് : കാട്ടുപന്നിയുടെ ആക്രമണത്തിൽ ദമ്പതികൾക്ക് പരിക്കേറ്റു. ടാപ്പിംഗിനായി ഇരു ചക്രവാഹനത്തിൽ പോയ ദമ്പതികളെയാണ് കാട്ടുപന്നി ആക്രമിച്ചത്. ആക്രമണത്തിൽ ഗുരുതര പരിക്കേറ്റ നന്ദിയോട് ആലുംകുഴി ഇമ്മാനുവേൽ ഹൗസിൽ ആർ. ഗ്ലോറി (62)യെ മെഡിക്കൽ കോളജ് ആശുപത്രിയിലെ തീവ്രചരണ വിഭാഗത്തിൽ പ്രവേശിപ്പിച്ചു. ഇന്നലെ പുലർച്ചെ ആലുംകുഴി വട്ടപ്പാറ കലുങ്കിനു സമീപംവച്ചായിരുന്നു സംഭവം. ഭർത്താവ് ജോസിനും പരിക്കുണ്ട്. ഗ്ലോറിയാണ് വാഹനം ഓടിച്ചിരുന്നത്. ചൊവ്വാഴ്ച കാട്ടു പന്നിയുടെ ആക്രമണത്തിൽ കരിമൻകോട് സ്വദേശി ഉല്ലാസിനു പരിക്കു പറ്റിയിരുന്നു

നാടെങ്ങും "പ്ലാസ്റ്റിക് വിരുദ്ധയുദ്ധം': കാട്ടാക്കട മിനി സിവിൽ സ്റ്റേഷൻ മാലിന്യക്കുരുക്കിൽ

കാട്ടാക്കട: "പ്ലാസ്റ്റിക് മാലിന്യത്തിനെതിരേ പൊരുതുക' എന്ന സന്ദേശം ഉയർത്തി നാടെങ്ങും പരിസ്ഥിതിവാരാചരണം നടക്കുമ്പോൾ കിലോക്കണക്കിന് പ്ലാസ്റ്റിക് സംസ്‌കരിക്കാൻ കൈമാറാതെ കാട്ടാക്കട മിനി സിവിൽ സ്റ്റേഷനിൽ കൂട്ടിയിട്ടിരിക്കുന്നു. തെരുവുനായകളുടെ വിസർജ്യവും ചപ്പുചവറുകളുമൊക്കെചേർന്നുള്ള മാലിന്യത്തിനു സമീപത്തുകൂടെ മൂക്കുപൊത്താതെ സഞ്ചരിക്കാൻ കഴിയാത്ത സ്ഥിതിയാണുള്ളത്. താലൂക്ക് ഓഫീസ് ഉൾപ്പെടെ ഏഴു സർക്കാർ ഓഫീസുകൾ പ്രവർത്തിക്കുന്ന ബഹുനിലക്കെട്ടിടത്തിന്‍റെ ദയനീയാവസ്ഥയാണിത്. കെട്ടിടത്തിന്‍റെ താഴത്തെനിലയിലാണ് പ്ലാസ്റ്റിക് കൂമ്പാരം. രണ്ടാഴ്ചയോളമായി പ്ലാസ്റ്റിക് കവറുകളുടെ കൂന അവിടെയുണ്ടെന്നു വിവിധ ആവശ്യങ്ങൾക്കായി പതിവായി എത്തുന്നവർ പറഞ്ഞു. ഓഫീസുകൾ പ്രവർത്തിക്കുന്ന ഫ്ലോറുകളുടെ അവസ്ഥ ഇതാണെങ്കിൽ പുറത്ത് ഇതിലും ഗതികേടാണ്. പാഴ്വസ്തുക്കൾ ഉൾപ്പെടെ പലയിടത്തായി കൂട്ടിയിട്ട് പരിസരമാകെ വൃത്തിഹീനം. ആറുനിലകളിൽ 53,000 ചതുരശ്ര അടി വിസ്തീർണത്തിലുള്ള കെട്ടിടം വൃത്തിയായി സൂക്ഷിക്കണമെന്നു സർക്കാർ നിർദേശമുണ്ട്. ഓഫീസുകളിൽ ശുചീകരണത്തിന് ആളുണ്ടെന്നാണ് പറയുന്നത്. എന്നാൽ, അവരവരുടെ പരിസരം വൃത്തിയാക്കുന്നതല്ലാതെ പൊതുവായ ഒരു ശുചീകരണ സംവിധാനമില്ല. റവന്യു വകുപ്പിന്‍റേതാണു കെട്ടിടം. ഇവിടെ മാലിന്യസംസ്‌കരണത്തിനു പൊതുവായ സംവിധാനവും ഇല്ല. എന്നാൽ, പഞ്ചായത്തിന്‍റെ ഹരിതകർമസേനയ്ക്ക് മാലിന്യം സംഭരിക്കാം. ഇവിടെ അതും നടക്കുന്നില്ല. ആരുടെയും ശല്യം ഇല്ലാത്തതിനാൽ കെട്ടിടത്തിനുള്ളിലും പരിസരത്തും തെരുവുനായകൾ വിഹരിക്കുന്നു. വിവിധ ആവശ്യങ്ങൾക്കായി എത്തുന്നവർ ഇവയെയും പേടിക്കണം.

ബിജെപി നേതൃയോഗം

കൊട്ടാരക്കര: ടൂറിസവും കൃഷിയും അടിസ്ഥാനമാക്കി ജില്ലയുടെ കിഴക്കൻ മേഖലയുടെ വികസനതിന് പദ്ധതികൾ തയാറാക്കണമെന്ന് ബിജെപി ഈസ്റ്റ് ജില്ലാ നേതൃയോഗം ആവശ്യപ്പെട്ടു.നാഥൻ പ്ലാസ ഓഡിറ്റോറിയത്തിൽ നടന്ന യോഗം ജില്ലാ പ്രസിഡന്‍റ് രാജി പ്രസാദ് ഉദ്ഘാടനം ചെയ്തു. മൺട്രോത്തുരുത്തും തെന്മലയും, ചടയമംഗലവും മറ്റ് ടൂറിസം സ്ഥലങ്ങളും കൂട്ടിച്ചേർത്ത് പ്രത്യേക പദ്ധതി തയാറാക്കിയാൽ വികസനം വേഗത്തിലാമെന്നു യോ ഗം വിലയിരുത്തി. തദ്ദേശ തെരഞ്ഞെടുപ്പിൽ ബിജെപിയെ കിഴക്കൻ മേഖലയിലെ നിർണായകശക്തിയാക്കാനുള്ള പദ്ധതിക്കും യോഗം രൂപം നൽകി. വി.വി. രാജേഷ്, ജി.ഗോപിനാഥ്‌, അഡ്വ. വയക്കൽ സോമൻ തുട ങ്ങിയവർ പ്രസംഗിച്ചു.

വനം മന്ത്രി പൂച്ചത്തോലണിഞ്ഞ കാട്ടുമൃഗം: ആർവൈഎഫ്

തിരുവനന്തപുരം : വനം മന്ത്രി എ.കെ. ശശീന്ദ്രൻ 15 വയസുള്ള ഒരു കുട്ടി പന്നിക്കെണിയിൽപ്പെട്ട് മരിച്ചപ്പോൾ പറഞ്ഞ വാചകങ്ങൾ പൂച്ചത്തോലണിഞ്ഞ കാട്ടുമൃഗത്തിന്‍റെ ഭാഷയിലാണെന്ന് ആർവൈഎഫ് സംസ്ഥാന സെക്രട്ടറി വിഷ് ണു മോഹൻ. ആർവൈഎഫ് പ്രവർത്തകർ വനം വകുപ്പ് മന്ത്രിയുടെ ഔദ്യേഗിക വസതിയിലേക്ക് നടത്തിയ പ്രതിഷേധ മാർച്ച് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. കേരള മന്ത്രിസഭയിൽ കഴിവു കെട്ടവർക്കായുള്ള മത്സരമാണ് നടക്കുന്നത്. വനം മന്ത്രിയെ ചുമക്കുന്നതു മുഖ്യമന്ത്രിയുടെ അമിത താത്പര്യം കൊണ്ടാണ്. വന്യമൃഗങ്ങളുടെ ആക്രമണത്തിൽ നിരവധി പേർ കൊല്ലപ്പെടുകയും ഗുരുതരമായി പരിക്കേൽക്കുകയും ചെയ്തിട്ടും നിസംഗനായി തുടരുന്നത് മന്ത്രിക്കു മനുഷ്യത്വം ഇല്ലാത്തതുകൊണ്ടാണെന്നും അദ്ദേഹം പറഞ്ഞു. ആർവൈഎഫ് ജില്ലാ പ്രസിഡന്‍റ് ഡോ: ശരത് ചന്ദ്രൻ അധ്യക്ഷത വഹിച്ചു. അഡ്വ. യു.എസ്. ബോബി, സുനി മഞ്ഞുമല, കബീർ പൂവാർ, പ്രസാദ് കോവളം, ഷിബു, അനീഷ് എന്നിവർ സംസാരിച്ചു. പ്രവർത്തകൾ വനം മന്ത്രിയുടെ കോലം കത്തിച്ചു.

വെച്ചൂർ ഹരിഹരസുബ്രഹ്മണ്യ അയ്യരുടെ ജന്മശതാബ്ദി ആഘോഷങ്ങൾക്ക് തുടക്കം

തിരുവനന്തപുരം: കർണാടക സംഗീതജ്ഞൻ വെച്ചൂർ ഹരിഹരസുബ്രഹ്മണ്യ അയ്യരുടെ ജന്മശതാബ്ദി ആഘോഷങ്ങൾക്കു തുടക്കമായി. തൈക്കാട് ഭാരത് ഭവനിൽ നടന്ന ചടങ്ങ് ഫൗണ്ടേഷൻ പ്രസിഡന്‍റ് പ്രഫ. കുമാര കേരളവർമ ഉദ്ഘാടനം ചെയ്തു. ഫൗണ്ടേഷൻ എക്സിക്യൂട്ടീവ് കമ്മിറ്റി അംഗം പാർവതിപുരം പത്മനാഭ അയ്യർ അധ്യക്ഷ പ്രസംഗം നടത്തി. വെച്ചൂർ ഫൗണ്ടേഷന്‍റെ ഔദ്യോഗിക വെബ്സൈറ്റും യൂട്യൂബ് ചാനലും പ്രിൻസ് രാമവർമ ഉദ്ഘാടനം ചെയ്തു. തുടർന്ന് അദ്ദേഹത്തി ന്‍റെ കച്ചേരിയും അരങ്ങേറി. വയലിനിൽ അവനീശ്വരൻ വിനുവും മൃദംഗത്തിൽ നഞ്ചിൽ അരുളും ഘടത്തിൽ തിരുവനന്തപുരം രാജേഷും മുഖർശംഖിൽ തിരുനാക്കര രതീഷും അകന്പടിയായി. വെച്ചൂരിന്‍റെ ചെറുമകൾ രത്നപ്രഭ ശതാബ്ദി പ്രവർത്തനങ്ങൾക്ക് ആശംസകൾ നേർന്നു. വെച്ചൂർ ഫൗണ്ടേഷൻ സെക്രട്ടറി ആനയടി പ്രസാദ് സ്വാഗതവും എക്സിക്യൂട്ടീവ് കമ്മിറ്റി അംഗം സി. നീലകണ്ഠൻ നന്ദിയും പറഞ്ഞു.

യുവതിയെ പീഡിപ്പിച്ച് പണം തട്ടിയ യുവാവ് പിടിയിൽ

പോത്തൻ കോട്: യുവതിയെ പീഡിപ്പിച്ച ശേഷം പണം തട്ടിയെടുത്തെന്ന പരാതിയിൽ മോഡലും കൊറിയോഗ്രാഫറുമായ യുവാവ് അറസ്റ്റിൽ. കോഴിക്കോട് താമരശേരി തിരുവമ്പാടി കൂടരഞ്ഞി പാലകണ്ണിയിൽ ഫാഹിദ് (27) ആണ് അറസ്റ്റിലായത്. വിവാഹം കഴിക്കാമെന്നു പറഞ്ഞു പല സമയങ്ങളിലായി ലക്ഷകണക്കിനു രൂപ പെൺകുട്ടിയിൽനിന്നും വാങ്ങുകയും പിന്നെ ബന്ധത്തിൽനിന്നും പിന്മാറുകയും ചെയ്തുവെന്നു യുവതി പറയുന്നു. ഇതേ തുട ർന്നാണു യുവതി കഴക്കൂട്ടം പോലീസിൽ പരാതി നൽകിയത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. കോളജ് ഉൾപ്പെടെയുള്ള പരിപാടികൾക്ക് ഫാഷൻ ഷോ കൊറിയോഗ്രാഫറായി പ്രവർത്തിച്ചു വരികയാണ് ഫാഹിദ്. ഇയാൾ ഇത്തരത്തിൽ പല പെൺകുട്ടികളെയും കബളിപ്പിച്ച് പണം തട്ടുകയും പീഡിപ്പിക്കുകയും ചെയ്തിട്ടുണ്ടെന്ന് കഴക്കൂട്ടം പോലീസ് അറിയിച്ചു.

ക്ഷേത്രത്തിനു സമീപം കോഴിമാലിന്യം; നാട്ടുകാർ റോഡ് ഉപരോധിച്ചു

പേരൂർക്കട: ക്ഷേത്രത്തിനു സമീപം കോഴിമാലിന്യം കണ്ടെത്തിയതിൽ പ്രതിഷേധിച്ച് ക്ഷേത്ര ഭാരവാഹികളും നാട്ടുകാരും ചേർന്നു റോഡ് ഉപരോധിച്ചു. രാജീവ് ഗാന്ധി ബയോടെക്നോളജി- മേലാറന്നൂർ റോഡാണ് ഇന്നലെ രാവിലെ 10.30ന് ഉപരോധിച്ചത്. മേലാറന്നൂരിലെ പാറച്ചിറ മാടൻ തമ്പുരാൻ ക്ഷേത്രത്തിനു സമീപം നാലു കവർ കോഴി മാലിന്യം കണ്ടെത്തിയതോടെയാണ് പ്രശ്നങ്ങളുടെ തുടക്കം. ഈ ഭാഗത്ത് രാത്രികാലങ്ങളിലാണ് മാലിന്യം തള്ളുന്നതെന്നാണ് സൂചന. റോഡിലെ വളവിൽ വാഹനങ്ങൾ പാർക്ക് ചെയ്തിരിക്കുന്നതിനാൽ ഇതു ്യക്തമായി അറിയാൻ സാധിക്കില്ല. ആറന്നൂർ വാർഡ് കൗൺസിലർ എൽ.ആർ. ബിന്ദു മേനോൻ ഉടൻതന്നെ പ്രശ്നത്തിൽ ഇടപെടുകയും നഗരസഭാ ജീവനക്കാരെത്തി മാലിന്യം വാഹനത്തിൽ കയറ്റാൻ തയാറാവുകയും ചെയ്തുവെങ്കിലും സമരക്കാർ തടയുകയായിരുന്നു. തങ്ങളുടെ സമരം മാലിന്യം നിക്ഷേപിച്ചവർക്കെതിരെ ആണെന്നായിരുന്നു ഇവരുടെ നിലപാട്. ഒടുവിൽ പൂജപ്പുര പോലീസ് സ്ഥലത്തെത്തുകയും മാലിന്യം നിക്ഷേപിച്ചവരെ കണ്ടെത്തി നടപടിയെടുക്കാമെന്ന് ഉറപ്പു നൽകുകയും ചെയ്തു. ഇതിന്‍റെ അടിസ്ഥാനത്തിലാണ് സമരക്കാർ പിരിഞ്ഞുപോയത്. മാലിന്യം നിക്ഷേപിച്ചതിനു സമീപത്തുനിന്നും 200 മീറ്ററോളം അകലെ മാത്രമാണു സിസിടിവി ക്യാമറകൾ സ്ഥാപിച്ചിട്ടുള്ളത്. ലഭ്യമായ ദൃശ്യങ്ങൾ പരിശോധിച്ചു മാലിന്യ നിക്ഷേപകരെ കണ്ടെത്തുമെന്നു പൂജപ്പുര പോലീസ് അറിയിച്ചു. അതേസമയം കോഴി മാലിന്യം സ്ഥലത്തുനിന്നു നീക്കുന്നതിനു താൻ കൃത്യമായ ഇടപെടൽ നടത്തിയിട്ടുണ്ടെന്നും നഗരസഭ മാലിന്യം നീക്കം ചെയ്തിട്ടുണ്ടെന്നും വാർഡ് കൗൺസിലറും വ്യക്തമാക്കി.

സഖി വണ്‍ സ്റ്റോപ്പ് സെന്‍ററിന് പുതിയ കെട്ടിടം: ഉദ്ഘാടനം ഇന്ന്

തിരുവനന്തപുരം: പൂജപ്പുരയില്‍ വനിത ശിശുവകുപ്പ് കോംപ്ലക്‌സിനകത്ത് നിര്‍മിച്ച പുതിയ സഖി വണ്‍ സ്റ്റോപ്പ് സെന്‍റര്‍ കെട്ടിടത്തിന്‍റെ ഉദ്ഘാടനം ഇന്നു നടക്കും. രാവിലെ 11നു മന്ത്രി വീണാ ജോര്‍ജ് ഉദ്ഘാനം നിര്‍വഹിക്കും. 60 ലക്ഷം രൂപ ചെലവഴിച്ചാണ് കെട്ടിടം നിര്‍മാണം പൂര്‍ത്തിയാക്കിയിട്ടുള്ളത്. മന്ത്രി വി. ശിവന്‍കുട്ടി അധ്യക്ഷത വഹിക്കും. സ്ത്രീകള്‍ക്കും കുട്ടികള്‍ക്കുമെതിരെ അതിക്രമങ്ങള്‍ തടയുന്നതിനും അതിക്രമങ്ങള്‍ അതിജീവിച്ചവര്‍ക്ക് ആവശ്യമായ കൗണ്‍സിലിംഗ്, വൈദ്യസഹായം ചികിത്സ, നിയമസഹായം, പോലീസ് സംരക്ഷണം, സുരക്ഷിത അഭയം എന്നീ സേവനങ്ങള്‍ ഒരു കുടക്കീഴില്‍ ഉറപ്പുവരുത്തുന്നതിനായി കേന്ദ്ര, സംസ്ഥാന സര്‍ക്കാരുകള്‍ സംയുക്തമായി നടപ്പിലാക്കുന്ന പദ്ധതിയാണ് സഖി വണ്‍ സ്റ്റോപ്പ് സെന്‍റര്‍. വനിതാ ശിശു വികസന വകുപ്പ് മുഖേനയാണ് ഇത് നടപ്പിലാക്കുന്നത്. ഈ സംവിധാനം 24 മണിക്കൂറും പ്രവര്‍ത്തിക്കും. നിലവില്‍ 14 ജില്ലകളിലും ഒരു വണ്‍ സ്റ്റോപ്പ് സെന്‍റര്‍ വീതമാണ് പ്രവര്‍ത്തിക്കുന്നത്. കൂടാതെ എറണാകുളം, കോഴിക്കോട് ജില്ലകളില്‍ അഡീഷണല്‍ വണ്‍ സ്റ്റോപ്പ് സെന്ററുകള്‍ ആരംഭിക്കുന്നതിനുള്ള നടപടി സ്വീകരിച്ചു വരുന്നു. കേരളത്തില്‍ 14 ജില്ലകളിലുമായി 22,850 സ്ത്രീകള്‍ക്കും കുട്ടികള്‍ക്കും വണ്‍ സ്റ്റോപ്പ് സെന്‍റര്‍ മുഖേന സേവനം ലഭ്യമാക്കിയിട്ടുണ്ട്. ഫോളോ അപ്പ് നടപടികള്‍ ആവശ്യമായ സാഹചര്യങ്ങളില്‍ അതും വണ്‍ സ്റ്റോപ്പ് സെന്‍റര്‍ മുഖാന്തിരം നടത്തുന്നുണ്ട്. നിലവില്‍ തിരുവനന്തപുരം ജില്ലയില്‍ 2,296 സ്ത്രീകള്‍ക്കും കുട്ടികള്‍ക്കുമാണു വണ്‍ സ്റ്റോപ്പ് സെന്‍റര്‍ മുഖേന സേവനം നല്‍കിയിട്ടുള്ളത്. 480 കേസുകള്‍ വിമന്‍സ് ഹെല്‍പ്പ് ലൈന്‍ (മിത്ര 181) മുഖേനയാണ് വന്നിട്ടുള്ളത്.

തിരുവനന്തപുരം നഗരത്തിൽ വൻ തീപിടിത്തം

തിരുവനന്തപുരം: തിരുവനന്തപുരം പി എം ജിക്കു സമീപം സ്കൂട്ടർ ഷോ റൂമിൽ വൻ തീപിടി ത്തം. ലക്ഷക്കണക്കിനു രൂപയുടെ നാശനഷ്ടമുണ്ടായതായാണ് പ്രാഥമിക റിപ്പോർട്ട്. അപകടത്തിൽ പുതിയ സ്കൂട്ടറുകൾ അടക്കം കത്തി നശിച്ചു. സംഭവ സമയത്ത് ജീവനക്കാർ ഇല്ലാതിരുന്നതിനാൽ വൻ ദുരന്തം ഒഴിവായി. കഴിഞ്ഞ ദിവസം പുലർച്ചെയാണ് പിഎംജിക്കു സമീപമുള്ള ടിവിഎസ് ഷോറൂമിൽ തീപിടിത്തമുണ്ടായത്. ഷോർട്ട് സർക്യൂട്ടാണു തീപിടിത്തത്തിനു കാരണമെന്നാണ് പ്രാഥമിക വിലയിരുത്തുൽ. സമീപത്തുള്ള കെട്ടിടത്തിലെ സെക്യൂരിറ്റി ജീവനക്കാരാണ് ഫയർഫോഴ്‌സിനെ വിവരം അറിയിച്ചത്. മണിക്കൂറുകൾ നീണ്ട ശ്രമത്തിനൊടുവിൽ ആണ് ഈ നിയന്ത്രണവിധേയമാക്കിയതും പൂർണ്ണമായി അണയ്ക്കാൻ കഴിഞ്ഞതും. തിരുവനന്തപുരത്തുനിന്ന് നാലും ചാക്കയിൽനിന്നു മൂന്നും വിഴിഞ്ഞത്തുനിന്നും ഒന്നും കഴക്കൂട്ടത്തുനിന്നും ഒന്നും നെടുമങ്ങാടുനിന്ന് ഒന്നും യൂണിറ്റുകളെത്തിയാണ് തീയണച്ചത്.

"സുഗതവനം' പദ്ധതി തുടര്‍ന്ന് പട്ടം എസ്‌യുടി ആശുപത്രിയില്‍ പരിസ്ഥിതിദിനം ആചരിച്ചു

തിരുവനന്തപുരം: ലോക പരിസ്ഥിതി ദിനത്തിന്‍റെ ഭാഗമായി രപട്ടം എസ്‌യുടി ആശുപത്രി "സുഗതവനം' പദ്ധതിയുടെ തുടര്‍ച്ച നടപ്പാക്കി. കഴിഞ്ഞ വര്‍ഷം ആരംഭിച്ച "സുഗതനക്ഷത്ര ഉദ്യാനം' പദ്ധതിയുടെ തുടര്‍ച്ചയായി ഇത്തവണയും പരിസ്ഥിതി സംരക്ഷണ പ്രവര്‍ത്തനങ്ങള്‍ക്ക് തുടർച്ചയേകി. ആശുപത്രിയുടെ മാനേജിംഗ് ഡയറക്ടറും ചീഫ് എക്‌സിക്യൂട്ടീവ് ഓഫീസറുമായ കേണല്‍ രാജീവ് മണ്ണാളി ഒരു തൈ നട്ടുകൊണ്ടു ചടങ്ങ് ഉദ്ഘാടനം ചെയ്തു. സംസ്ഥാനത്തെ വിദ്യാലയങ്ങളിലും ആരാധനാലയങ്ങളിലും പൊതു സ്ഥലങ്ങളിലും "സുഗതവനം' സൃഷ്ടിക്കുക എന്ന ലക്ഷ്യത്തിന്‍റെ ഭാഗമായി സുഗതകുമാരി നവതി ആഘോഷ സമിതിയുമായി ചേര്‍ന്നാണ് പദ്ധതി നടപ്പിലാക്കിയതെന്ന് അദ്ദേഹം ഉദ്ഘടന വേളയില്‍ പറയുകയുണ്ടായി. മെഡിക്കല്‍ സൂപ്രണ്ട് ഡോ. രാജശേഖരന്‍ നായര്‍, ചീഫ് ലെയ്‌സണ്‍ ഓഫീസര്‍ രാധാകൃഷ്ണന്‍ നായര്‍, മറ്റു ജീവനക്കാര്‍ തുടങ്ങിയവര്‍ ചടങ്ങില്‍ പങ്കെടുത്തു നക്ഷത്ര വൃക്ഷത്തൈകള്‍ നട്ടു.

ഗ്രീന്‍പീസ് ഇന്ത്യ - ഫ്രണ്ട്‌സ് ഓഫ് മറൈന്‍ ലൈഫ് ലോക സമുദ്രദിനം ആചരിച്ചു

തിരുവനന്തപുരം: കേരളത്തില്‍ കപ്പലുമായി ബന്ധപ്പെട്ട് അപകടങ്ങള്‍ സംഭവിച്ച കുടുംബങ്ങളോട് ഐക്യദാര്‍ഢ്യം പ്രഖ്യാപിച്ച് വലിയതുറയില്‍ ലോക സമുദ്രദിനം ആചരിച്ചു. ഗ്രീന്‍പീസ് ഇന്ത്യയും ഫ്രണ്ട്‌സ് ഓഫ് മറൈന്‍ ലൈഫും ചേര്‍ന്നാണ് പരിപാടി സംഘടിപ്പിച്ചത്. എംഎസ്‌സി എല്‍സ-3 കപ്പല്‍ ദുരന്തത്തില്‍ ഇരകളായവരോടുള്ള ഐക്യദാര്‍ഢ്യമെന്ന നിലയില്‍ വലിയതുറയില്‍ ഫോട്ടോ സെഷനും സംഘടിപ്പിച്ചു. "പാഴാക്കാന്‍ സമയമില്ല' എന്ന സന്ദേശം ഉയര്‍ത്തിയായിരുന്നു സമുദ്രദിനം ആചരിച്ചത്. ദുരന്തത്തിനു ശേഷമുള്ള ദിവസങ്ങളില്‍ കേരള തീരത്തും തമിഴ്‌നാടിന്‍റെ ചില ഭാഗങ്ങളിലും പ്ലാസ്റ്റിക് മാലിന്യങ്ങള്‍ കരയ്ക്കടിഞ്ഞതായി സംഘാടകര്‍ പറഞ്ഞു. യുഎന്‍ സമുദ്ര സമ്മേളനത്തില്‍ ഷിപ്പിംഗ് വ്യവസായത്തിലെ ഡീകാര്‍ബണൈസേഷനും ആഗോള പ്ലാസ്റ്റിക് മലിനീകരണവും ചര്‍ച്ച ചെയ്യപ്പെടുന്ന ഈ കാലത്ത് എംഎസ്‌സി പോലുള്ള പ്രമുഖ ഷിപ്പിംഗ് കമ്പനികള്‍ക്ക് ഇത്തരം ദുരന്തങ്ങളുടെ ഉത്തരവാദിത്തത്തില്‍ നിന്ന് ഒഴിഞ്ഞുമാറാനാകില്ലെന്ന് ഗ്രീന്‍പീസ് ഇന്ത്യ ക്ലൈമറ്റ് ക്യാംപയ്‌നര്‍ എസ്.എന്‍. അമൃത പറഞ്ഞു. സമുദ്ര ജൈവവൈവിധ്യം, സമുദ്ര ആവാസവ്യവസ്ഥ, തീരദേശ ഉപജീവനമാര്‍ഗങ്ങള്‍, പ്രാദേശിക സമ്പദ്‌വ്യവസ്ഥ എന്നിവയെ എല്ലാം കപ്പല്‍ ദുരന്തം ബാധിച്ചു. ഇത്തരം നാശനഷ്ടങ്ങള്‍ക്ക് ഉത്തരവാദികളായവര്‍ മറുപടി പറയണമെന്നു സമുദ്ര സംരക്ഷണ പ്രവര്‍ത്തകനും ഫ്രണ്ട്‌സ് ഓഫ് മറൈന്‍ ലൈഫ് സ്ഥാപകനുമായ റോബര്‍ട്ട് പനിപ്പിള്ള പറഞ്ഞു. എംഎസ്‌സിയില്‍ നിന്നുള്ള നഷ്ടപരിഹാരത്തെക്കുറിച്ചറിയാന്‍ ഇരകളായവര്‍ക്ക് അവകാശമുണ്ടെന്ന് കെഎസ്എംടിഎഫ് കേരള സ്വതന്ത്ര മത്സ്യ തൊഴിലാളി ഫെഡറേഷന്‍ സംസ്ഥാന പ്രസിഡന്‍റ് ജാക്‌സണ്‍ പൊള്ളയില്‍ പറഞ്ഞു.

ദർശന പുണ്യം നുകർന്ന് ആയിരങ്ങൾ : ശ്രീപദ്മനാഭസ്വാമി ക്ഷേത്രത്തിൽ നൂറ്റാണ്ടുകൾക്കുശേഷം താഴികക്കുടം സമർപ്പിച്ചു

തിരുവനന്തപുരം: ശ്രീപദ്മനാഭസ്വാമി ക്ഷേത്രത്തിൽ രണ്ടര നൂറ്റാണ്ടിനു ശേഷം നടന്ന താഴികക്കുടം സമർപ്പണം ആയിരക്കണക്കിനു ഭക്തർക്ക് ദർശന പുണ്യമായി. ചടങ്ങുകൾക്ക് ക്ഷേത്രംതന്ത്രി തരണനല്ലൂർ ഗോവിന്ദൻ നന്പൂതിരിപ്പാട് മുഖ്യകാർമികത്വം വഹിച്ചു. 1750-ൽ മാർത്താണ്ഡവർമ മഹാരാജാവ് ശ്രീപത്മനാഭസ്വാമി ക്ഷേത്രം നവീകരിച്ച് തൃപ്പടിദാനം നടത്തിയിരുന്നു. തൃപ്പടിദാനം നടന്ന് 275 വർഷങ്ങൾക്കു ശേഷമാണ് ഇന്നലെ രാവിലെ ക്ഷേത്രത്തിൽ സ്തൂപികാസമർപ്പണം നടന്നത്. നവീകരണത്തിനു ശേഷം മഹാകുംഭാഭിഷേകവും ഇന്നലെ ക്ഷേത്രത്തിൽ നടന്നു. നൂറ്റാണ്ടിൽ ആദ്യമായി നടന്ന സ്തൂപികാ സമർപ്പണം കണ്ടു പുണ്യംനേടാൻ ക്ഷേത്രത്തിന്‍റെ മൂന്നുവശത്തുമായി ഭക്തർ തിങ്ങിക്കൂടി. ഗവർണർ രാജേന്ദ്ര വിശ്വനാഥ് ആർലേക്കർ, രാജസ്ഥാൻ മന്ത്രി കെ.കെ. വിഷ്ണോയ്, തിരുവിതാം കൂർ രാജകുടുംബാംഗങ്ങളായ പൂയം തിരുനാൾ ഗൗരി പാർവതിഭായി, അശ്വതി തിരുനാൾ ഗൗരി ലക്ഷ്മിഭായി, അവിട്ടം തിരുനാൾ ആദിത്യവർമ അടക്കമുള്ള പ്രമുഖരും പങ്കെടുത്തു. സുപ്രീം കോടതി നിരീക്ഷണത്തിനു പിന്നാലെ എട്ടു കൊല്ലംനീണ്ട നവീകരണത്തിനും കുംഭാഭിഷേകത്തിനുമാണ് ഇന്നലെ സമാപനമായത്. ഇനി അനന്തശായിയായ ശ്രീപദ്മനാഭസ്വാമിയുടെ കടുശർക്കര യോഗത്തിലുള്ള മൂലവിഗ്രഹത്തിന്‍റെ നവീകരണം മാത്രമാണ് പൂർത്തിയാക്കാനുള്ളത്. വിഷ്വക്സേന വിഗ്രഹത്തിന്‍റെ പുനഃപ്രതിഷ്ഠ, തിരുവാന്പാടി ശ്രീകൃഷ്ണസ്വാമി ക്ഷേത്രത്തിലെ അഷ്ടബന്ധകലശം എന്നിവയെല്ലാം ഒരുമിച്ചു നടത്തി. ഇന്നലെ രാവിലെ ഏഴിനു ക്ഷേത്രം സ്ഥാനി മൂലംതിരുനാൾ രാമവർമ ചെന്പകത്തിൻമൂട്ടിൽനിന്നു ശീവേലിപ്പുര വഴി തിരുവാന്പാടിയിലെത്തി. അവിടെ നടന്ന അഷ്ടബന്ധകലശത്തിന് പ്രദീപ് നന്പൂതിരിപ്പാട് കാർമികത്വം വഹിച്ചു. തുടർന്നു ശ്രീകോവിലിനു സമീപത്തെ വിഷ്വക്സേന ക്ഷേത്രത്തിലെ പുനഃപ്രതിഷ്ഠ നടന്നു. ശ്രീപദ്മനാഭസ്വാമിയുടെ പാദത്തിനു താഴെ കടുശർക്കര യോഗത്തിലുള്ള വിഷ്വക്സേന വിഗ്രഹത്തിന്‍റെ പ്രതിഷ്ഠയ് ക്ക് സജി നന്പൂതിരിപ്പാടും പദ്മനാഭൻ നന്പൂതിരിയും കാർമികത്വം വഹിച്ചു. നൂറോളം സ്വർണക്കലശങ്ങളിലാണ് പൂജാ ചടങ്ങുകൾ നടന്നത്. ഭരണസമിതി ചെയർമാൻ ജില്ലാ ജഡ്ജി കെ.പി. അനിൽകുമാർ, അംഗങ്ങളായ എ. വേലപ്പൻനായർ, കരമന ജയൻ, മൂപ്പിൽ സ്വാമിയാർ ഒറവങ്കര അച്യുതഭാരതി, ഉപദേശകസമിതി ചെയർമാൻ ജസ്റ്റിസ് ടി. ആർ. രാമചന്ദ്രൻനായർ തുടങ്ങിയവരും ചടങ്ങിൽ പങ്കെടുത്തു.

ബൈക്കിടിച്ച് ക്ഷീരകർഷകൻ മരിച്ചു

വെള്ളറട: ബൈക്ക് ഇടിച്ച് ഗുരുതരമായി പരിക്കേറ്റ് മെഡിക്കല്‍ കോളജില്‍ ചികില്‍സയിലായിരുന്ന ക്ഷീര കര്‍ഷകന്‍ മരിച്ചു. കുടപ്പനമൂട് കോവില്ലൂര്‍ കുന്നത്ത് വിളകാം വീട്ടില്‍ ശശികുമാര്‍ (68) ആണ് മരിച്ചത്. കഴിഞ്ഞദിവസം വൈകുന്നേരം മണലി ക്ഷീരസംഘത്തില്‍ പാല്‍ കൊടുത്തശേഷം റോഡിലേക്ക് ഇറങ്ങവെ നിയന്ത്രംവിട്ടുവന്ന ബൈക്ക് ശശികുമാറിനെ ഇടിച്ച് തെറിപ്പിക്കുകയായിരുന്നു. ഉടന്‍ തന്നെ തിരുവനന്തപുരം മെഡിക്കല്‍ കോളജിലെത്തിച്ച് ചികില്‍സ നല്‍കിയെങ്കിലും ജീവന്‍ രക്ഷിക്കാന്‍ കഴിഞ്ഞില്ല. ഭാര്യ: പ്രസന്ന കുമാരി. മക്കള്‍: അര്‍ച്ചന, അരുണ്‍ കുമാര്‍. മരുമകന്‍: സി. എസ്. അശോക് സഞ്ചയനം വെള്ളി രാവിലെ ഒന്പതിന്.

കരമനയാറ്റില്‍ പുരുഷന്‍റെ മൃതദേഹം കണ്ടെത്തി

മെഡിക്കല്‍കോളജ്: കരമനയാര്‍ ഒഴുകുന്ന കരമന പാലത്തിനു സമീപം പുരുഷന്‍റെ മൃതദേഹം കണ്ടെത്തി. ഏകദേശം 45 വയസ്‌ പ്രായം വരുന്നയാളുടെ മൃതദേഹമാണ് കണ്ടെത്തിയത്. മൃതദേഹത്തിന് രണ്ടുദിവസത്തെ പഴക്കം വരുമെന്ന് കരമന പോലീസ് അറിയിച്ചു. ഇന്നലെ വൈകുന്നേരം നാലോടെ കമിഴ്ന്നു കിടക്കുന്ന നിലയിലാണ് മൃതദേഹം കണ്ടെത്തുന്നത്. പാലത്തിനു സമീപം ചൂണ്ടയിടാനെത്തിയവരാണ് മൃതദേഹം കിടക്കുന്ന വിവരം പോലീസില്‍ അറിയിക്കുന്നത്. മരണകാരണം വ്യക്തമായിട്ടില്ല. മൃതദേഹം തിരുവനന്തപുരം മെഡിക്കല്‍കോളജ് ആശുപത്രിയില്‍ സൂക്ഷിച്ചിട്ടുണ്ട്. മരിച്ചയാളെക്കുറിച്ച് എന്തെങ്കിലും വിവരം ലഭിക്കുന്നവര്‍ കരമന സ്റ്റേഷനുമായി ബന്ധപ്പെടണം. ഫോണ്‍: 0471 2343534, 9497947120, 8129583960.

വെഞ്ഞാറമൂട് സ്കൂളിൽ പ്രഭാത ഭക്ഷണ പരിപാടി

വെഞ്ഞാറമൂട് : വെഞ്ഞാറമൂട് ഗവ. യുപിഎസിൽ നെല്ലനാട് പഞ്ചായത്ത് നടപ്പിലാക്കിയ പ്രഭാതഭക്ഷണ പരിപാടിയുടെ ഉദ്ഘാടനം എസ്എംസി ചെയർമാൻ എസ്. ഷിഹാസിന്‍റെ അധ്യക്ഷതയിൽ നെല്ലനാട് പഞ്ചായത്ത് പ്രസിഡന്‍റ് ബീനാ രാജേന്ദ്രൻ നിർവഹിച്ചു. വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ ആർ. ഉഷാകുമാരി, വികസന സ്റ്റാൻഡിംഗ് കമ്മിറ്റി ചെയർപേഴ്സൺ എഫ്. സജീന, പ്രഥമാധ്യാപിക എസ്. അമ്പിളി, സീനിയർ അസിസ്റ്റന്‍റ് എസ്.എസ്. ഗായത്രി നായർ, കോ-ഓർഡിനേറ്റർ എൽ. അനുചന്ദ്രൻ, സ്റ്റാഫ് സെക്രട്ടറി പി.ബി. ബിന്ദു എന്നിവർ പങ്കെടുത്തു.

വിവിധയിടങ്ങളിൽ പരിസ്ഥിതി ദിനാഘോഷം സംഘടിപ്പിച്ചു

വെള്ളറട: കെഎല്‍സിഎ പെരുങ്കടവിള സോണല്‍ സമിതിയുടെ നേതൃത്വത്തില്‍ പരിസ്ഥിതി ദിനത്തിന്‍റെ ഭാഗമായി മാവിൻതൈ നട്ടു. സോണല്‍ പ്രസിഡന്‍റ് ബിനില്‍ മണലുവിള അധ്യക്ഷത വഹിച്ചു. ഫാ. ഷിജോ ജോസ് ഉദ് ഘാടനം ചെയ്തു. സോണല്‍ സെക്രട്ടറി മാരായമുട്ടം അജികുമാര്‍, യൂണിറ്റ് പ്രസിഡന്‍റ് സേവ്യര്‍, കീഴറൂര്‍ ജോസ്, ചിന്നു കിഴാറൂ ര്‍, സജിത കിഴാറൂര്‍, സൗമ്യ കിഴാ റൂര്‍ എന്നിവര്‍ നേതൃത്വം നല്‍കി. വെള്ളറട: പരിസ്ഥിതി ദിനത്തോടനുബന്ധിച്ച് തെക്കന്‍ കുരിശുമല തീര്‍ഥാടന കേന്ദ്രത്തില്‍ തൈനട്ടു. നെയ്യാറ്റിന്‍കര രൂപത വികാരി ജനറാളും തീര്‍ഥാടനകേന്ദ്രം ഡയറക്ടറുമായ മോൺ. ഡോ. വിൻസന്‍റ് കെ. പീറ്റര്‍ ഉദ്ഘാടനം ചെയ്തു. ഫാ. അരുണ്‍ പി. ജിത്ത്, വെള്ളറട പഞ്ചായത്ത് സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ ജയന്തി എന്നിവര്‍ പങ്കെടുത്തു. വട്ടപ്പാറ: ലൂർദ് മൗണ്ട് സ്കൂൾസിലെ പരിസ്ഥിതി ദിനാഘോഷ പരിപാടികൾ മാനേജർ ബ്രദർ. പീറ്റർ വാഴേപറമ്പിലിന്‍റെ അധ്യക്ഷതയിൽ, കോട്ടൂർ വനമേഖലയിലെ ചീഫ് എക്സിക്യൂട്ടീവ് ഓഫീസറും അഗസ്ത്യാശ്രമം ബയോളജിക്കൽ പാർക്കിലെ ഉദ്യോഗസ്ഥനുമായ കെ.എൻ. ശ്യാം മോഹൻലാൽ ഉദ്ഘാടനം ചെയ്തു. തിരുവനന്തപുരം ഐസിഎഐ ചെയർമാൻ സി.എ. നിഖിൽ കുമാർ, സ്കൂൾ സുപ്പീരിയർ ബ്രദർ കെ.ടി. മാത്യു, സ്കൂൾ പ്രിൻസിപ്പൽമാരായ ജോസ് ഡി. സുജീവ്, ഷാഫി തോംസൺ, പിടിഎ പ്രസിഡന്‍റുമാർ തുടങ്ങിയവർ പങ്കെടുത്തു. തുടർന്ന് വിവിധ തരം വൃക്ഷത്തൈകൾ നടുകയും ചെയ്തു. കിളിമാനൂർ: പുളിമാത്ത് പഞ്ചായത്തിന്‍റെ പരിസ്ഥിതി ദിനാചരണം കുറ്റിമൂട് ഗവ. എൽപിഎസിൽ പഞ്ചായത്ത് വൈസ് പ്രസിഡന്‍റ് എ. അഹമ്മദ്‌ കബീർ ഉദ്ഘാടനം ചെയ്തു. എസ്എംസി ചെയർമാൻ ആർ. അനി അധ്യക്ഷനായിരുന്നു. പ്രധാനാധ്യാപിക എ.എസ്. നിലൂഷർ സ്വാഗതം പറഞ്ഞു. ജനപ്രതിനിധികളായ ബി. ജയചന്ദ്രൻ, ജി. രവീന്ദ്ര ഗോപാൽ, ടി.വി. ബീന, സുജി പ്രസാദ്, കൃഷി ഓഫീസർ എ.കെ. അനന്തപദ്മനാഭൻ, ബിആർസി ട്രെയിനർ ബി. ഷാനവാസ്‌, പ്രീതാ റാണി എന്നിവർ പങ്കെടുത്തു. വെള്ളറട: വെള്ളറട രുഗ്മിണി മെമ്മോറിയല്‍ നഴ്‌സിംഗ് കോളജിലെ പരിസ്ഥിതി ദിനാഘോഷം കോളജ് ഡയറക്ടര്‍ ഡോ. സി.എ. മോഹനന്‍ ഫലവൃക്ഷതൈ നട്ട് ഉദ്ഘാടനം ചെയ്തു. വൈസ് ചെയര്‍മാന്‍ ഡോ. ദേവിക, പ്രിന്‍സിപ്പല്‍ പ്രഫ. ഡോ. യൂജിന്‍, അഡ്മിനിസ്‌ട്രേറ്റീവ് ഓഫീസര്‍ എമില്‍ഡാ. ഡോ. കിഷ എന്നിവരും നഴ്‌സിംഗ് കോളജിലെ വിദ്യാർഥികളും പരിപാടിയില്‍ പങ്കെടുത്തു. കോളജ് പരിസരത്ത് നൂറിലധികം ഫലവൃക്ഷതൈകളാണ് പരിസ്ഥിതി ദിന ആഘോഷത്തിന്‍റെ ഭാഗമായി വച്ചുപിടിപ്പിച്ചത്. തിരുവനന്തപുരം: ക്രൈസ്റ്റ് നഗര്‍ സെന്‍ട്രല്‍ സ്‌കൂളിലെ പരിസ്ഥിതി ദിനാഘോഷ പരിപാടികളുടെ ഉദ്ഘാടനം സ്‌കൂള്‍ പ്രിന്‍സിപ്പല്‍ ഫാ.സേവ്യര്‍ അമ്പാട്ട് സിഎംഐ വൃക്ഷത്തൈ നട്ട് നിര്‍വഹിച്ചു. വിവിധ ക്ലാസുകളിലെ വിദ്യാര്‍ഥികള്‍ ശേഖരിച്ച 20 കിലോ ഇ മാലിന്യം സ്‌കൂള്‍ പ്രിന്‍സിപ്പലിന്‍റെ സാന്നിധ്യത്തില്‍ വിദ്യാര്‍ഥികള്‍ ക്ലീന്‍ കേരള കമ്പനിക്കു കൈമാറി. നേച്ചര്‍ ക്ലബ് ടീച്ചര്‍ കോ-ഓര്‍ഡിനേറ്റര്‍ കെ.ജി. സിനു പദ്ധതി വിശദീകരിച്ചു. പ്ലാസ്റ്റിക്കിന്‍റെ ഉപയോഗം, പുനരുപയോഗം, പാഴ്‌വസ്തുക്കള്‍ ഉറവിടത്തില്‍ സംസ്‌കരിക്കുക എന്നീ സന്ദേശങ്ങള്‍ വിളിച്ചോതുന്ന തരത്തില്‍ ചിത്രരചന മത്സരവും സംഘടിപ്പിച്ചു. ആര്‍.കെ. അനഘ സ്വാഗതം ആശംസിച്ചു. അഭിരാമി വിമല്‍ നന്ദി പറഞ്ഞു. നെടുമങ്ങാട്: ധീര ജവാൻ പ്രേംജിത് സ്മാരക റസിഡൻസ് അസോസിയേഷൻ ആൻഡ് ഗ്രന്ഥശാലയുടെ അഭിമുഖ്യത്തിൽ ലോക പരിസ്ഥിതി ദിനാചരണം സംഘടിപ്പിച്ചു. പറണ്ടോട് വലിയകലുങ്ക് എൽപി സ്കൂൾ മുറ്റത്തെ ഗാന്ധി പ്രതിമയ്ക്ക് സമീപത്ത് ആയുർവേദ ഔഷധസസ്യമായ ചുവന്ന നെല്ലിത്തൈനട്ട് ജി. സ്റ്റീഫൻ എംഎൽഎ പരിസ്ഥിതിദിനാഘോഷം ഉദ്ഘാടനം ചെയ്തു. ഗ്രന്ഥശാല പ്രസിഡന്‍റ് കണ്ടമത്ത് ഭാസ്ക്കരൻ നായർ അധ്യക്ഷത വഹിച്ചു. ആര്യനാട് പഞ്ചായത്ത് പ്രസിഡന്‍റ് വി. വിജു മോഹൻ, ബ്ലോക്ക്‌ പഞ്ചായത്ത് മെമ്പർ എ.എം. ഷാജി, സ്കൂൾ പ്രഥമാധ്യാപകൻ വൈ. എസ്. രാജൻ, അധ്യാപകൻ വി.ടി. സുജേഷ് ബാബു, ഗ്രന്ഥശാല സെക്രട്ടറി എസ്. സുധാകരൻ നായർ, എം. ജയമോഹനൻ നായർ, ചേരപ്പള്ളി പ്രശാന്ത്, പ്രേംജിത്തിന്‍റെ കുടുംബങ്ങങ്ങളായ എം. പീതാംബരൻ നായർ , എസ്. രേണുകാദേവി, എസ്. സൂര്യ തുടങ്ങിയവർ പ്രസംഗിച്ചു. പരിസ്ഥിതി സംരക്ഷണ പ്രതിജ്ഞചൊല്ലി മിഠായി വിതരണം ചെയ്തു. നെയ്യാറ്റിന്‍കര: അതിയന്നൂർ പഞ്ചായത്തിലെ ഹെൽത്ത് സെന്‍റര്‍ കോമ്പൗണ്ടിൽ പരിസ്ഥിതി ദിനാഘോഷങ്ങളോടനുബന്ധിച്ച് പച്ചത്തുരുത്ത് തയാറാക്കി. ഔഷധസസ്യങ്ങളാണ് പച്ചത്തുരുത്തിന്‍റെ സവിശേഷത. പഞ്ചായത്ത് പ്രസിഡന്‍റ് വി.പി. സുനിൽകുമാർ പച്ചത്തുരുത്ത് ഉദ്ഘാടനം ചെയ്തു. യോഗത്തിൽ ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ കൊടങ്ങാവിള വിജയകുമാർ അധ്യക്ഷനായി. ജനപ്രതിനിധികളായ ബി.ടി. ബീന, ശ്രീകല, അജിത, പ്രേംരാജ്, സെക്രട്ടറി ഹരിൻബോസ്, ഹരിത മിഷൻ കോ-ഓർഡിനേറ്റർ സൗപർണിക, സിഡിഎസ് ചെയർപേഴ്സൺ സിന്ധു, വിനിത, ബിജു, ഹരിത സേന പ്രസിഡന്‍റ് വിമല എന്നിവര്‍ സംബന്ധിച്ചു. നെയ്യാറ്റിന്‍കര: പരിസ്ഥിതി ദിനാഘോഷങ്ങളുടെ ഭാഗമായി അതിയന്നൂര്‍ ഗവ യുപി സ്കൂളിലെ വിദ്യാര്‍ഥികള്‍ൾക്ക് വിശ്വഭാരതി ഗ്രന്ഥശാലയുടെ ആഭിമുഖ്യത്തില്‍ വൃക്ഷത്തൈകള്‍ വിതരണം ചെയ്തു. ഗ്രന്ഥശാല പ്രസിഡന്‍റ് അഡ്വ. എസ്.എസ് ഷാജി, ജോയിന്‍റ് സെക്രട്ടറി സാബു, കള്‍ച്ചറല്‍ ഫോറം കണ്‍വീനര്‍ ശ്രീകുമാര്‍ എസ്. നായര്‍, വിമന്‍സ് ഫോറം പ്രസിഡന്‍റ് അഡ്വ. ശശികല, ബാലരാമപുരം ബിആര്‍സി പ്രതിനിധി സൗമ്യ, പിടിഎ പ്രസിഡന്‍റ് അനുപ്രിയ, ലിനി എന്നിവര്‍ സംബന്ധിച്ചു.

ഗ്യാസ് സിലിണ്ടര്‍ മോഷ്ടാവ് അറസ്റ്റില്‍

പേരൂര്‍ക്കട: പാചകവാതക സിലിണ്ടര്‍ മോഷ്ടിച്ചു മറിച്ചുവിറ്റയാളെ മ്യൂസിയം പോലീസ് അറസ്റ്റുചെയ്തു. കരമന തെലുങ്കുചെട്ടി തെരുവില്‍ ടി.സി 20/2205ല്‍ കാര്‍ത്തിക് (30) ആണ് അറസ്റ്റിലായത്. രണ്ടുദിവസം മുമ്പായിരുന്നു കേസിന്നാസ്പദമായ സംഭവം. മ്യൂസിയം സ്റ്റേഷന്‍ പരിധിയില്‍ ഡിപിഐ ജംഗ്ഷനിലെ രജനി ഗ്യാസ് ഏജന്‍സിയില്‍ സൂക്ഷിച്ചിരുന്ന രണ്ടു സിലിണ്ടറുകളാണ് പ്രതി മോഷ്ടിച്ചത്. ഇതില്‍ ഒന്ന് തമ്പാനൂരിലും മറ്റൊന്ന് കരമനയിലുമുള്ള കടകളില്‍ പ്രതി വില്‍പ്പന നടത്തിയത് പോലീസ് കണ്ടെടുത്തു. സിസിടിവി ദൃശ്യങ്ങള്‍ കേന്ദ്രീകരിച്ചു നടത്തിയ അന്വേഷണത്തിലാണ് പ്രതി പിടിയിലായത്. കന്‍റോണ്‍മെന്‍റ് എസി സ്റ്റ്യുവര്‍ട്ട് കീലറിന്‍റെ നേതൃത്വത്തില്‍ മ്യൂസിയം സിഐ വിമല്‍, എസ്ഐമാരായ ഷിജു, വിപിന്‍, സിപിഒമാരായ രഞ്ജിത്ത്, സാജന്‍, ഡിക്‌സണ്‍, അരുണ്‍, ഹൈനസ് എന്നിവരാണ് അന്വേഷണം നടത്തിയത്. പ്രതിയെ കോടതി റിമാന്‍ഡ് ചെയ്തു

ചുമട്ടുതൊഴിലാളിയെ ആക്രമിച്ച കേസിൽ രണ്ടുപേർ അറസ്റ്റിൽ

വാഴിച്ചൽ: വാഴിച്ചൽ പേരെയ് ക്കോണത്ത് ചുമട്ടുതൊഴിലാളിയെ ആക്രമിച്ച് ജനനേന്ദ്രിയത്തിൽ പരിക്കേൽപ്പിച്ച സംഭവത്തിൽ സഹതൊഴിലാളികളായ രണ്ടുപേർ അറസ്റ്റിൽ. പേരെയ്ക്കോണം സ്വദേശികളായ വിൻസന്‍റ്, ചന്ദ്രബോസ് എന്നിവരാണ് അറസ്റ്റിലായത്. ചുമട്ടുതൊഴിലാളി യൂണിയൻ ഐഎൻടിയുസി യൂണിയൻ പേരെയ്ക്കോണം യൂണിറ്റ് കൺവീനർ വർഗീസിനെയാണ് ഇരുവരുംചേർന്ന് ആക്രമിച്ചത്. കഴിഞ്ഞ മാസം 17നു വൈകുന്നേരം അഞ്ചുമണിയോടെ പേരെയ്ക്കോണത്തായിരുന്നു സംഭവം. പ്രതികൾ സഹോദരങ്ങളാണ്. ഇവർ മുൻപ് ഐഎൻടിയുസി യൂണിയനിലാണ് പ്രവർത്തിച്ചിരുന്നത്. നാലുവർഷം മുമ്പ് ഇതിലൊരാൾ എഐടിയുസി യൂണിയനിലും മറ്റൊരാൾ സിഐടിയുവിലേക്കും മാറി. ഇടയ്ക്കിടെ വർഗീസുമായി ഇവർ വാക്കുതർക്കത്തിൽ ഏർപ്പെടാറുണ്ടെന്നും തുടർന്നുണ്ടായ മുൻവൈരാഗ്യമാണ് ആക്രമണത്തിൽ കലാശിച്ചതെന്നും പോലീസ് പറഞ്ഞു.സംഭവദിവസം പണികഴിഞ്ഞ് വീട്ടിലേക്ക് വരുകയായിരുന്ന വർഗീസിനെ ഇരുവരുംചേർന്ന് അതിക്രൂരമായി മർദിച്ചവശനാക്കിയശേഷം കൈയിൽ കരുതിയിരുന്ന വളഞ്ഞ ഇരുമ്പ് കൊളുത്ത് ഉപയോഗിച്ച് വർഗീസിന്‍റെ ജനനേന്ദ്രിയത്തിൽ കുത്തിപ്പരിക്കേൽപ്പിക്കുകയായിരുന്നുവെന്ന് പോലീസ് പറഞ്ഞു. ആക്രമണത്തിനുശേഷം ഒളിവിൽപ്പോയ പ്രതികളെ വെഞ്ഞാറുമൂട്ടിൽനിന്ന് പിടികൂടുകയായിരുന്നു.

വിദ്യാഭ്യാസ അവാർഡുകൾ സമ്മാനിച്ചു

നേമം: കോൺഗ്രസ് പാപ്പനംകോട് വാർഡ് കമ്മിറ്റിയുടെ നേതൃത്വത്തിൽ എസ്എസ്എൽസി, പ്ലസ്ടു, ഡിഗ്രി പരീക്ഷകളിൽ ഉന്നതവിജയം നേടിയ വിദ്യാർഥികളെ പുരസ്കാരം നൽകി ആദരിച്ചു. മികവ് 2025 എന്ന പേരിൽ കൈമനം ബാങ്ക് ഓഡിറ്റോറിയത്തിൽ നടന്ന സമ്മേളനം മുൻ എംപി കെ. മുരളീധരൻ ഉദ്ഘാടനം ചെയ്തു. വാർഡ് പ്രസിഡന്‍റ് സുജി സുരേഷ് അധ്യക്ഷത വഹിച്ചു. മുൻ സ്പീക്കർ എൻ. ശക്തൻ, കെപിസിസി ജനറൽ സെക്രട്ടറി മര്യാപുരം ശ്രീകുമാർ, ഡിസിസി ജനറൽ സെക്രട്ടറി കൈമനം പ്രഭാകരൻ, നേമം ബ്ലോക്ക് കമ്മിറ്റി പ്രസിഡന്‍റ് കെ.പി. അജിത് ലാൽ, ബ്ലോക്ക് മുൻ പ്രസിഡന്‍റ് തമലം കൃഷ്ണൻകുട്ടി, വൈ. താജുദീൻ, ജയ്മോൻ, ആർ. സുഗതൻ, സുദർശനൻ നായർ എന്നിവർ പ്രസംഗിച്ചു.

തിരക്ക് വർധിക്കുന്നു : ഹൗസിംഗ് ബോര്‍ഡ് ജംഗ്ഷനില്‍ സിഗ്നല്‍ സംവിധാനം അത്യാവശ്യം

പേരൂര്‍ക്കട: അനുദിനം തിരക്ക് വർധിച്ചുവരുന്ന തിരുവനന്തപുരം ഹൗസിംഗ് ബോര്‍ഡ് ജംഗ്ഷനില്‍ ട്രാഫിക് സിഗ്നല്‍പോസ്റ്റുകള്‍ സ്ഥാപിക്കണമെന്ന് ആവശ്യം. അഞ്ചുറോഡുകള്‍ ചേരുന്ന ഈ ഭാഗത്തുകൂടി തലങ്ങും വിലങ്ങുമാണ് വാഹനങ്ങള്‍ സഞ്ചിച്ചുകൊണ്ടിരിക്കുന്നത്. തിരുവനന്തപുരം ഫയര്‍‌സ്റ്റേഷന്‍ സ്ഥിതിചെയ്യുന്നതിന് ജംഗ്ഷന് തൊട്ടടുത്താണ്. തമ്പാനൂര്‍ ഭാഗത്തെ ടൂറിസ്റ്റ് ബസുകളും ലോറികളും വന്നുതിരിയുന്നതും ഹൗസിംഗ് ബോര്‍ഡ് ജംഗ്ഷനിലാണ്. ഇരുചക്ര വാഹനങ്ങളും ഓട്ടോറിക്ഷകളും കാറുകളും എന്നുവേണ്ട, ബസുകള്‍ ഉള്‍പ്പെടെ യാതൊരു നിയന്ത്രണവുമില്ലാതെയാണ് ഇതുവഴി കടന്നുപോകുന്നത്. ദിനംപ്രതി ഇവിടെ വാഹനാപകടങ്ങള്‍ ഉണ്ടാകുന്നുണ്ടെന്ന് സ്റ്റാന്‍ഡിലെ ഓട്ടോത്തൊഴിലാളികള്‍ പറയുന്നു. വെള്ളിയാഴ്ച രാവിലെ ഹൗസിംഗ് ബോര്‍ഡ് പിന്നിട്ട് തമ്പാനൂരിലേക്ക് പോകുകയായിരുന്ന ഒരു ഇരുചക്ര വാഹനയാത്രികനെ ഒരു കാര്‍ ഇടിച്ചിട്ടിരുന്നു. ഹൗസിംഗ് ബോര്‍ഡ് ജംഗ്ഷനില്‍ രണ്ട് ഐലന്‍ഡുകളാണ് സ്ഥാപിച്ചിട്ടുള്ളത്. ഇതിനു സമീപം ട്രാഫിക് കാമറയും സ്ഥാപിച്ചിട്ടുണ്ട്. ഐലന്‍ഡുകള്‍ ചുറ്റി ചില അവസരങ്ങളില്‍ ബസുകള്‍ കടന്നുപോകുമ്പോഴാണ് കൂടുതലായി അപകടങ്ങള്‍ സംഭവിക്കുന്നത്. അംബേദ്കര്‍ പാര്‍ക്ക് സ്ഥാപിച്ചിരിക്കുന്നത് രണ്ടുറോഡുകള്‍ ചേരുന്നതിന് നടുക്കായിട്ടാണ്. ഇതില്‍ തമ്പാനൂരിലേക്കു പോകുന്ന റോഡിന് വീതി വളരെ കുറവാണ്. ട്രാഫിക് സംവിധാനം ഇല്ലാത്തതിനാല്‍ വാഹനങ്ങള്‍ എളുപ്പത്തില്‍ റോഡ് മുറിച്ചു കടന്നുപോകാന്‍ ശ്രമിക്കുന്നതാണ് അപകടത്തിന് ഇടയാക്കുന്നത്. ട്രാഫിക് പോലീസിന്‍റെ സേവനം ഈ ഭാഗത്ത് ഉണ്ടാകാറുമില്ല. കാര്യക്ഷമമായ രീതിയില്‍ പ്രവര്‍ത്തിക്കുന്ന ഒരു സിഗ്നല്‍സംവിധാനം ഹൗസിംഗ് ബോര്‍ഡ് ജംഗ്ഷനില്‍ സ്ഥാപിക്കുകയാണെങ്കില്‍ വാഹനഗതാഗതം സുഗമമാക്കാന്‍ സാധിക്കും.

കരകൾ ഇടിഞ്ഞ് കരമനയാർ; ആശങ്കയിലായി നാട്ടുകാർ

കുറ്റിച്ചൽ: തലസ്ഥാന നഗരത്തിനു കുടിവെള്ളം നൽകുന്ന കരമനയാറിന്‍റെ കരകൾ ഇടിയുന്നതോടെ പ്രദേശവാസികൾ ഭീതിയിൽ. കരമനയാർ കടന്നുപോകുന്നയിവിടെ കൃഷിഭൂമികൾ ഇടിഞ്ഞു താഴുന്നു. അടുത്തുള്ള വീടുകളും അപകടഭീഷണി നേരിടുകയാണ്. മഴക്കാടുകളായ അഗസ്ത്യമലയിൽനിന്നും ഉത്ഭവിക്കുന്നതാണു കരമനയാർ. 66 കി.മീ. നീളമുള്ള കരമനയാർ പനത്തുറയിലാണ് കടലിൽ ചേരുന്നത്. നദി കടന്നുപോകുന്ന സ്ഥലങ്ങളിലാണ് കരകൾ ഇടിഞ്ഞു താഴുന്നത്. ഈ പ്രദേശത്തെ 50ൽ അധികം വീടുകൾ ഭീഷണിയിലാണ്. കനത്ത മഴയിൽ ഇരമ്പിയാർത്തുവന്ന വെള്ളം ഏതാണ്ട് ഒരു കിലോമീറ്റർ ദൂരത്തിൽ കരകളെ വിഴുങ്ങി. തെങ്ങുകളും കരയിൽനിന്നിരുന്ന മുളങ്കൂട്ടവും വെള്ളത്തിൽ മുങ്ങുന്ന നിലയാണ്. മാത്രമല്ല ഇടിയാൻ പാകത്തിൽ നിൽക്കുന്ന കൃഷിഭൂമികളും ഇവിടുള്ളവരുടെ ആശങ്ക ഉയർത്തുകയാണ്. മഴ ഒന്നു കനത്താൽ മതി നദികൾ തങ്ങളുടെ കരകളും കൊണ്ടു പോകുമെന്നതാണ് അവസ്ഥ. നദികളുടെ ഇരുവശത്തുമുള്ള കൈതകളും മുളകളും ഇല്ലാതെയായി. അവനട്ടുപിടിപ്പിക്കുന്ന പദ്ധതി എല്ലാവരും ഉപേക്ഷിച്ചു. മണലൂറ്റ് തടയാൻ ഒരു നടപടിയും എടുത്തില്ല. അതിനാൽ തന്നെ മഴവെള്ളം വന്നാൽ അത് തടഞ്ഞുനിറുത്താൻ കഴിയുന്നില്ല കർഷകരുടെ പരാതികൾ നീളുന്നു. ഈ നദികളിൽ നിരവധി കുടിവെള്ള പദ്ധതികളാണ് ഉള്ളത്. വെള്ളം നദികളിൽ തന്നെ സംഭരിച്ചു നിറുത്താനുള്ള ശേഷി ഇപ്പോഴില്ല. അതിനാൽ തന്നെ വേനൽ വന്നാൽ നദി മെലിയും. കുടിവെള്ളം കിട്ടാക്കനിയാകും. ഭാവിയിൽ വെള്ളം നദികളിലൂടെ ഒഴുകുമോ എന്ന ആശങ്കയിലാണ് നാട്ടുകാർ. കൃഷിവകുപ്പും വാട്ടർ അഥോറിറ്റിയും സഹകരിക്കണം നദികളിൽ തടയണകെട്ടി വെള്ളം സംഭരിച്ച് നിറുത്താനും അത് ഭൂഗർഗജലമാക്കി മാറ്റാനും തയാറാക്കിയ പദ്ധതികൾ എല്ലാം ഫയലിൽ ഒതുങ്ങി. കർഷകരുമായി സഹകരിച്ച് നടത്തേണ്ട പദ്ധതി പണം ചെലവഴിക്കാതെ കിടക്കുകയാണ്. വനം വകുപ്പുമായി സഹകരിച്ച് മുളംതൈകളും വ്യക്ഷങ്ങളും നട്ടുപിടിപ്പാക്കുള്ള പദ്ധതികളും നടന്നിട്ടില്ല. നദികളിൽ മാലിന്യം കൊണ്ടിടുന്നത് തടയാൻ ബന്ധപ്പെട്ടവർ നടപടിയെ ടുക്കുന്നില്ല. അടിയന്തിരമായി പഞ്ചായത്ത് സംരക്ഷണഭിത്തി കെട്ടണമെന്നും കൃഷിനാശം സംഭവിച്ചവർക്ക് പരിഹാരം നൽകണമെന്നും ആവശ്യമുയർന്നു.

നവീകരിച്ച പഞ്ചമി ഗാർമെന്‍റ്സ് ആൻഡ്‌ ടെക്സ്റ്റൈൽസ് ഉദ്ഘാടനം ചെയ്തു

കോവളം: വെങ്ങാനൂർ പട്ടികജാതി സർവീസ് സഹകരണ സംഘത്തിനു കീഴിലെ നവീകരിച്ച പഞ്ചമി ഗാർമെന്‍റ്സ് ആൻഡ്‌ ടെക്സ്റ്റൈൽസിന്‍റെ കെട്ടിടം ജില്ലാ പഞ്ചായത്ത് പ്രസിഡന്‍റ് അഡ്വ. ഡി. സുരേഷ് കുമാർ ഉദ്ഘാടനം ചെയ്തു. സഹകരണ സംഘം പ്രസിഡന്‍റ് വി.എസ്. അജയകുമാർ, വൈസ് പ്രസിഡന്‍റ് അഡ്വ. ഭഗത് സിംഗ്, പഞ്ചായത്ത് മുൻ പ്രസിഡന്‍റുമാരായ വെങ്ങാനൂർ മോഹനൻ, മംഗലത്തുകോണം രാജു, ലോക്കൽ കമ്മറ്റി സെക്രട്ടറി കെ. മുരളി, സഹകരണ സംഘം സെക്രട്ടറി കവിതാ നായർ, വെങ്ങാനൂർ ബാങ്ക് പ്രസിഡന്‍റ് ബാലചന്ദ്രൻ നായർ എന്നിവർ ചടങ്ങിൽ പങ്കെടുത്തു.

എസ്എൻഡിപി യോഗം നെടുമങ്ങാട് യൂണിയൻ ലഹരിവിരുദ്ധ റാലി

നെടുമങ്ങാട്: എസ്എൻഡിപി യോഗം നെടുമങ്ങാട് യൂണിയനിലെ വനിതാ സംഘം, യൂത്ത്മൂവ്മെന്‍റ് കമ്മിറ്റികളുടെ സംയുക്താഭിമുഖത്തിൽ യൂണിയനിൽ ലഹരി വിരുദ്ധ ബോധവത്കരണ റാലി സംഘടിപ്പിച്ചു. തുടർന്നു നടന്ന പൊതുസമ്മേളനം യൂണിയൻ പ്രസിഡന്‍റ് എ. മോഹൻദാസിന്‍റെ അധ്യക്ഷതയിൽ പോലീസ് സർക്കിൾ ഇൻസ്പെക്ടർ ജി.ആർ. അജീഷ് ഉദ്ഘാടനം ചെയ്തു. വർധിച്ചുവരുന്ന സിന്തറ്റിക് അടക്കമുള്ള വിവിധ തരം രാസലഹരികളുടെ ഉപയോഗത്തിന്‍റെ അനന്തര ഫലങ്ങളെക്കുറിച്ചും നിയമപരമായ ശിക്ഷകളെക്കുറിച്ചും വിദ്യാർഥികളിൽ ബോധവത്കര ണം നടത്തേണ്ട രീതികളെക്കുുറിച്ചും ജി.ആർ. അജീഷ് ക്ലാസെടുത്തു. യൂണിയൻ ആക്ടിംഗ് സെക്രട്ടറി ഗോപാലൻ റൈറ്റ് ലഹരി വിരുദ്ധ സത്യപ്രതിജ്ഞ ചൊല്ലിക്കൊടുത്തു. തുടർന്നു വനിതാ സംഘം അംഗങ്ങൾ അവതരിപ്പിച്ച ലഹരി വിരുദ്ധ ഫ്യൂഷൻ ഡാൻസ് അരങ്ങേറി. വനിതാ സംഘം സെക്രട്ടറി കൃഷ്ണ റൈറ്റ് സ്വാഗതവും, പ്രസിഡന്‍റ് ലതകുമാരി, യൂത്ത് മൂവ്മെന്‍റ് കൺവീനർ രതീഷ് പ്ലാത്തറ എന്നിവർ ആശംസകൾ അർപ്പിച്ചു പ്രസംഗിച്ചു. വിവിധ ശാഖകളിലെ ഭാരവാഹികൾ, വനിതാ സംഘം, മൈക്രോ യൂണിറ്റ് ഭാരവാഹികൾ, യൂത്ത്മൂവ്മെന്‍റ് ഭാരവാഹികൾ തുടങ്ങിയവർ പങ്കെടുത്തു. യോഗത്തിൽ യൂത്ത്മൂവ്മെന്‍റ് ചെയർമാൻ നന്ദിയോട് രാജേഷ് നന്ദി പറഞ്ഞു.

തെന്നല വിശുദ്ധിയുടെ ആൾരൂപം: ഗാന്ധി ദർശൻ സമിതി

തിരുവനന്തപുരം: രാഷ്ട്രീയ വിശുദ്ധിയുടെ ആൾരൂപമായിരുന്നു തെന്നല ബാലകൃഷ്ണപിള്ളയെന്ന് കെപിസിസി ഗാന്ധി ദർശൻ സമിതി നേതൃയോഗം അഭിപ്രായപ്പെട്ടു. മാനവികതയും മതേതര ചിന്തകളും ഉയർത്തി പിടിക്കുന്നതിൽ മുന്നിൽനിന്ന സാമൂഹ്യപ്രവർത്തകനായ തെന്നലയുടെ വേർപാടു നികത്തനാകാത്ത നഷ്ടമാണ് പൊതുരംഗത്ത് ഉണ്ടാക്കിയതെന്നും പ്രമേയത്തിൽ ചൂണ്ടിക്കാട്ടി. ലാളിത്യം, സൗമ്യഭാവം, അച്ചടക്കം, ഊർജ്വസ്വലത തുടങ്ങിയ കർമശേഷികൾ അദ്ദേഹത്തെ വേറിട്ട തലങ്ങളിലെത്തിച്ചിരുന്നു. ഗാന്ധിയൻ പ്രസ്ഥാനങ്ങൾക്ക് ചൂണ്ടിക്കാണിക്കാൻ അഭിമാനമായിരുന്ന നേതാവിനെയാണ് നഷ്ടപ്പെട്ടതെന്നു സമിതിയുടെ അനുശോചന പ്രമേയത്തിൽ പറഞ്ഞു. ഗാന്ധി ദർശൻ സമിതി ജില്ലാ പ്രസിഡന്‍റ് വഞ്ചിയൂർ രാധാകൃഷ്ണൻ അധ്യക്ഷനായി. സംസ്ഥാന വർക്കിംഗ് പ്രസിഡന്‍റ് കമ്പറ നാരായണൻ, സംസ്ഥാന ഭാരവാഹികളായ പരശുവയ്ക്കൽ രാധാകൃഷ്ണൻ, പള്ളിക്കൽ മോഹനൻ, കോട്ടമുകൾ സുഭാഷ്, ജി.രവീന്ദ്രൻ നായർ, വി. ഹരികുമാർ ലീലാമ്മ ഐസക്, നാദിറ സുരേഷ് തുടങ്ങിയവർ പങ്കെടുത്തു.

ഉള്ളൂർ കവിതകൾ പ്രചരിപ്പിക്കേണ്ടത് കാലത്തിന്‍റെ അനിവാര്യത: കെ. ജയകുമാർ

തിരുവനന്തപുരം: ജീവിതത്തിലും കവിതയിലും നൈതികത ഉയർത്തിപ്പിടിച്ച കവിയാണ് മഹാകവി ഉള്ളൂർ എസ്. പരമേശ്വരയ്യർ എന്നു കവിയും ഗാനരചയിതാവുമായ കെ. ജയകുമാർ. ധാർമികമായ ച്യുതിയുടെ ഇക്കാലഘട്ടത്തിൽ ഉള്ളൂരിന്‍റെ കവിതകൾ പ്രചരിപ്പിക്കേണ്ടത് അനിവാര്യമാവുന്നു എന്നും കെ. ജയകുമാർ വ്യക്തമാക്കി. മഹാകവി ഉള്ളൂർ എസ്. പരമേശ്വരയ്യരുടെ 148-ാം ജന്മദിനാഘോഷവും 2024ലെ ഉള്ളൂർ അവാർഡ് ദാനവും നിർവഹിച്ചു പ്രസംഗിക്കുകയായിരുന്നു അദ്ദേഹം. ജഗതി ഉള്ളൂർ സ്മാരകത്തിൽ നടന്ന ചടങ്ങിൽ കവി മഞ്ജു വെള്ളായണിക്ക് ഉള്ളൂർ അവാർഡ് കെ. ജയകുമാർ സമ്മാനിച്ചു. ജലജമന്തികൾ എന്ന കാവ്യഗ്രന്ഥമാണ് മഞ്ജു വെള്ളായണിയെ അവാർഡിന് അർഹമാക്കിയത്. പണ്ഡിതോചിതമായ ഭാഷയും ആശയവും ഉള്ളൂർ കവിതകളുടെ സത്തയാണ്. ഉള്ളൂർ കവിത മനസിലാകുന്നില്ലെ ന്നു പറഞ്ഞു സാധാരണ ജനം ഉള്ളൂർ കവിതകളിൽ നിന്നും അകന്നു നില്ക്കുന്ന ഒരു സ്ഥിതിവിശേഷമുണ്ട്. മഹാകവിയുടെ മഹത്തരങ്ങളായ കവിതകൾ സാമാന്യ ജനങ്ങളിലെത്തിക്കേണ്ടത് ഇക്കാലഘട്ടത്തിന്‍റെ ആവശ്യമാണെന്നും കെ. ജയകുമാർ ചൂണ്ടിക്കാട്ടി. ജീവിതത്തിൽ നീതിബോധത്തിനു വലിയ വില കല്പിച്ച കവിയായിരുന്നു ഉള്ളൂർ. ധർമത്തിനു ക്ഷതംസംഭവിക്കുന്പോൾ ഉള്ളൂരിന്‍റെ കാവ്യബോധം ഉണർന്നു കവിതകൾ ജനിക്കുമായിരുന്നുവെന്നും കെ. ജയകുമാർ അഭിപ്രായപ്പെട്ടു. സാധാരണ കാഴ്ചകളിൽ അസാധാരണത ദർശിക്കുവാൻ കഴിയുന്പോഴാണ് നല്ല കവിത പിറക്കുന്നതെന്നും മഞ്ജു വെള്ളായണിയുടെ കവിതകൾ അത്തരത്തിലുള്ളതാണെന്നും കെ. ജയകുമാർ വ്യക്തമാക്കി. ചടങ്ങിൽ എഴുത്തുകാരനും ഉള്ളൂർ സ്മാരക പ്രസിഡന്‍റുമായ ഡോ. എൻ. പി. ഉണ്ണി അധ്യക്ഷത വഹിച്ചു. ഭാഷാപണ്ഡിതനും എഴുത്തുകാരനുമായ ഡോ. എഴുമറ്റൂർ രാജരാജ വർമ ചടങ്ങിനു ആശംസ നേർന്ന് പ്രസംഗിച്ചു. സംസ്ഥാന ഭാഷാ ഇൻസ്റ്റിറ്റ്യൂട്ട് മുൻ ഡയറക്ടർ ഡോ. എം.ആർ. തന്പാൻ അവാർഡിന് അർഹമായ കാവ്യഗ്രന്ഥം പരിചയപ്പെടുത്തി. മഞ്ജു വെള്ളായണി മറുപടി പ്രസംഗം നടത്തി. ഉള്ളൂർ സ്മാരകം ഭരണ സമിതി അംഗം എൻ. രാജ്കുമാർ സ്വാഗതവും സെക്രട്ടറി എസ്. ജയശങ്കർ നന്ദിയും പറഞ്ഞു.

പ്രകൃതി സംരക്ഷണം ലക്ഷ്യമാക്കി വയോധികന്‍റെ 56 മണിക്കൂര്‍ യാത്ര..!

പാറശാല : പ്രകൃതിയെ സംരക്ഷിക്കണമെന്ന പ്ലക്കാര്‍ഡുകളുമേന്തി നെയ്യാര്‍ഡാമില്‍നിന്ന് നെയ്യാറിന്‍റെ കരയിലൂടെ വയോധികൻ നടന്നത് 56 മണിക്കൂറുകള്‍. കേരള തമിഴ്‌നാട് അതിര്‍ത്തി പ്രദേശമായ കൊല്ലങ്കോട് പിരാകോട് കുഴിഞ്ഞാന്‍വിള രജീഷ് ഭവനില്‍ പരേതരായ കൃഷ്ണപ്പണിക്കരുടെയും ഗൗരിയുടെയും മകനായ പിരാകോട് കെ. രാമചന്ദ്രന്‍ (70) ആണ് ഭക്ഷണം പോലും കഴിക്കാതെ പ്രകൃതി സംരക്ഷണത്തിന്‍റെ പ്രചാരകനായി ജൂണ്‍ മൂന്നിനു നഗ്നപാദനായി യാത്രതിരിച്ചത്. പ്രകൃതി സംരക്ഷണം, വനവത്കരണം, കുളങ്ങളുടേയും തണ്ണീര്‍തടങ്ങളുടേയും സംരക്ഷണം, പ്ലാസ്റ്റിക് ഉപയോഗം നിയന്ത്രിക്കൽ എന്നിവ സംബന്ധിച്ച് ആളുകളില്‍ അവബോധം വളര്‍ത്തുകയാണ് രാമചന്ദ്രന്‍റെ ലക്ഷ്യം. 37 കിലോമീറ്റര്‍ ദൂരം പുഴയ്ക്ക് അരികിലൂടെ യാത്ര ചെയ്ത് സമീപത്തെ വീടുകളിലും വഴിയില്‍ കാണുന്നവരോടുമൊക്കെ രാമചന്ദ്രന്‍ സംസാരിച്ചിരുന്നു. കൈയ്യില്‍ കരുതിയ തൈകള്‍ മണ്‍വെട്ടി കൊണ്ടു കുഴിവെട്ടി ആളുകളോട് നടാന്‍ പ്രേരിപ്പിച്ചു. 500 ലധികം തൈകള്‍ നദിക്കരയില്‍ നട്ടു. നദിക്കു സമീപവും പുഴയ്ക്കുള്ളിലും വലിച്ചെറിഞ്ഞ പ്ലാസ്റ്റിറ്റ് മാലിന്യങ്ങള്‍ പെറുക്കിക്കൂട്ടി ഹരിത കർമസേനയെ ഏല്‍പ്പിച്ചു. കവിയും പരിസ്ഥിതി പ്രവര്‍ത്തകനുമായ രാജ് മോഹന്‍ കൂവളശേരി, പരിസ്ഥിതി കവിത ചൊല്ലി രാമചന്ദ്രന്‍റെ ഒറ്റയാള്‍ യാത്ര ഉദ്ഘാടനം ചെയ്തു. കള്ളിക്കാട്, കാട്ടാക്കട, ഒറ്റശേഖരമംഗലം, മണ്ഡപത്തിന്‍കടവ്, കീഴാറൂര്‍, പെരുങ്കടവിള, അരുവിപ്പുറം വഴി നെയ്യാറ്റിന്‍കര ഗ്രാമം ആറാട്ട് കടവില്‍ രാമചന്ദ്രന്‍റെ പ്രകൃതി സന്ദേശ യാത്ര അവസാനിപ്പിച്ചു. കുട്ടികള്‍ക്ക് മഴക്കുഴികളുടെ പ്രാധാന്യം സംബന്ധിച്ച ക്ലാസുളെടുത്ത് നേരത്തേയും രാമചന്ദ്രൻ ശ്രദ്ധയനായിരുന്നു. കന്യാകുമാരി ജില്ലയിലെ ശ്രീനാരായണ ഗുരുദേവ ചാരിറ്റബിള്‍ ട്രസ്റ്റിന്‍റെ സെക്രട്ടറിയും എല്‍ഐസി ഏജന്‍റും കൂടിയാണ് രാമചന്ദ്രന്‍. ഭാര്യ: എസ്. സുജാത. രജീഷ് ചന്ദ്രൻ, സുജീഷ് ചന്ദ്രന്‍ എന്നിവര്‍ മക്കളുമാണ്

കാന്താരിവിള ഇരപ്പാന്‍കുഴി കടവില്‍ വിദ്യാർഥി മുങ്ങിമരിച്ചു

വെള്ളറട : യൂട്യൂബിലും മറ്റു ചാനലുകളിലുമായി റീല്‍ കണ്ട് അ ന്പൂരി കാന്താരി വിള ഇരപ്പാന്‍ കുഴി കടവില്‍ കുളിക്കാനെത്തിയ 12 അംഗ സംഘത്തിലെ ഒരു വിദ്യാര്‍ഥി മുങ്ങി മരിച്ചു. തിരുവനന്തപുരം തുമ്പിടി വീട്ടില്‍ മാധവപുരം വേളിയില്‍ പ്രദീപിന്‍റെ മകന്‍ ആദിത്യ(20)നാണ് മരിച്ചത്. കടവില്‍ ഒന്നരയാള്‍ താഴ്ച യിൽ മാത്രമേ വെള്ളം ഉള്ളൂവെങ്കിലും ഇവിടെ കുളിക്കാന്‍ ഇറങ്ങരുതെന്നു പ്രദേശവാസികള്‍ പറഞ്ഞുവെങ്കിലും ആദിത്യന്‍ വെള്ളത്തിലേക്കു എടുത്തു ചാടുകയായിരുന്നുവെന്നു നാട്ടു കാർ പറയുന്നു. ആ ചാട്ടത്തിനിടെ കടവിനടിയില്‍ ഉണ്ടായിരുന്ന പാറയില്‍ മൂക്കിടിച്ചാണ് ആദി ത്യൻ മരണപ്പെട്ടത്. മൂക്കിടിച്ചതിനെ തുടര്‍ന്നു വെള്ളത്തില്‍നിന്ന് മുകളിലേക്കു വരാന്‍ ആദിത്യന് സാധിച്ചിട്ടില്ല. ഒപ്പം ഉണ്ടായിരുന്ന സുഹൃത്തുക്കള്‍ക്കും ആദിത്യ നെ രക്ഷിക്കാന്‍ കഴിഞ്ഞില്ല. ഒപ്പം ഉണ്ടായിരുന്ന വിദ്യാര്‍ഥിസംഘം കടവില്‍ തന്നെ കുളിച്ചുകൊണ്ടു നിന്ന പ്രദേശവാസികളോടു വിവരം പറഞ്ഞു. പ്രദേശവാസികൾ ആദിത്യനെ കരയ്ക്ക് എടുത്ത വെങ്കിലുംരക്ഷിക്കാന്‍ കഴിഞ്ഞില്ല. ഉടന്‍തന്നെ അമ്പൂരി സര്‍ക്കാരാശുപത്രിയിലെത്തിച്ചു. തുടര്‍ന്നു മൃതദേഹം തിരുവനന്തപുരം മെഡിക്കല്‍ കോളജ് മോര്‍ച്ചറിയിലേക്ക് മാറ്റി. വിദ്യാര്‍ഥി സംഘം വെള്ളറട സ്റ്റേഷനില്‍ അറിയിച്ചതിനെ അനുസരിച്ച് വെള്ളറട പോലീസ് കേസെടുത്തു.

അപകടത്തിൽപ്പെട്ട കപ്പലിലെ ചരക്കുകൾ വീണ്ടും വിഴിഞ്ഞം തീരത്ത്

വിഴിഞ്ഞം: അപകടത്തിൽപെട്ട കപ്പലിലെ ചരക്കുകൾ ഒരു ഇടവേളയ്ക്കു ശേഷം വീണ്ടും വിഴിഞ്ഞം തീരത്തടിഞ്ഞു. ഇന്നലെയും ഇന്നുമായി ഓയിൽ കാനുകളും തോടൊടുകൂടിയ കശുവണ്ടി, തേങ്ങ എന്നിവയു മാണു തീരത്തടിഞ്ഞത്. വിഴിഞ്ഞത്തും കോവളത്തുമായി ഇന്നലെ പത്തൊൻപത് ഓയിൽ കാനുകൾ തീരത്തടിഞ്ഞു. വിഴിഞ്ഞത്ത് മത്സ്യത്തൊഴിലാളികളുടെ വലയിൽ പതിനാറു കാനുകൾ കുടുങ്ങിയപ്പോൾ കോവളത്ത് രണ്ടും അടിമലത്തുറയിൽ ഒരു കാനും തീരത്തടിഞ്ഞു. ഒരു കാനിൽ 210 ലിറ്റർ ഓയിൽ ഉണ്ടെന്ന് തീരദേശ പോലീസ് പറഞ്ഞു. ഒരു ലിറ്റർ ഓയിലിനു വിപണിയിൽ 1,200 രൂപ വിലയുണ്ടെന്നാണ് കണക്കാക്കുന്നത്. ഓയിൽ കാനുകൾ കൂടാതെ തോടുള്ള കശുവണ്ടിയും തൊണ്ടോടു കൂടിയ തേങ്ങയും കടലിലിൽനിന്നും ഒഴുകി എത്തിയതായി മത്സ്യത്തൊഴിലാളികളും പറഞ്ഞു. അപകടത്തിൽപ്പെട്ട കപ്പലിൽനിന്ന് സാധനങ്ങൾ തീരത്തേക്ക് എത്തുന്നത് മത്സ്യത്തൊഴിലാളികൾക്ക് കൂടുതൽ തലവേദന സൃഷ്ടിക്കുകയാണ്. കപ്പലിലെ സാധനങ്ങൾ വലകളിൽ കുടുങ്ങി മത്സ്യബന്ധന വല പൂർണമായും നശിക്കുകയാണെന്നും മത്സ്യതൊഴിലാളികൾ പറയുന്നുണ്ട്. കഴിഞ്ഞ രണ്ടു ദിവസമായി കപ്പലിലെ മാലിന്യങ്ങൾ കുടുങ്ങി വല നശിച്ചെന്നു കാണിച്ച് നാലു മത്സ്യതൊഴിലാളികൾ തീരദേശ പോലീസിനു പരാതി നൽകിയിട്ടുണ്ട്.

ആനി മസ്‌ക്രീനില്‍നിന്നും പ്രചോദനം ഉള്‍ക്കൊള്ളണം: ആര്‍ച്ച്ബിഷപ് തോമസ് ജെ. നെറ്റോ

തിരുവനന്തപുരം: കേരള ലാറ്റിന്‍ കാത്തലിക് വിമന്‍സ് അസോസിയേഷന്‍ സ്ഥാപകദിനവും ആനി മസ്‌ക്രീന്‍ ജന്മദിനവും പാളയം സെന്‍റ് ജോസഫ്‌സ് കത്തീഡ്രല്‍ ഹാളില്‍ ആഘോഷിച്ചു. കെഎല്‍സിഡബ്ല്യൂഎ രൂപത പ്രസിഡന്‍റ് ജോളി പത്രോസിന്‍റെ അധ്യക്ഷതയില്‍ ചേര്‍ന്ന പൊതുയോഗം തിരുവനന്തപുരം ജില്ലാ കളക്ടര്‍ അനു കുമാരി ഉദ്ഘാടനം ചെയ്തു. സ്ത്രീകള്‍ ചൂഷണത്തിനു വിധേയരാകരുതെന്നും സാമ്പത്തിക-ആരോഗ്യ മേഖലകളില്‍ സുരക്ഷിതരായിരിക്കണമെന്നും കളക്ടര്‍ ഓര്‍മിപ്പിച്ചു. ആനി മസ്‌ക്രിനില്‍നിന്നും പ്രചോദനം ഉള്‍ക്കൊണ്ടുകൊണ്ടു സാമൂഹ്യനീതിയില്‍ അധിഷ്ഠിതമായ രാഷ്ട്ര നിര്‍മാണം നടത്തണമെന്നു തിരുവനന്തപുരം ലത്തീന്‍ അതിരൂപത മെത്രാപ്പോലീത്ത ഡോ. തോമസ് ജെ. നെറ്റോ പറഞ്ഞു. മോണ്‍. യുജിന്‍ എച്ച്. പെരേര, ഫാ. ബീഡ് മനോജ് അമാദോ, മോണ്‍. വില്‍ഫ്രഡ്, ഫാ. കോസ്‌മോസ് തോപ്പില്‍, ഫാ. സെബാസ്റ്റ്യന്‍ കളബാടന്‍, വിമല സ്റ്റാന്‍ലി, ഷേര്‍ളി സ്റ്റാന്‍ലി, മെറ്റില്‍ഡ മൈക്കിള്‍, നക്ഷത്ര സ്റ്റീഫന്‍ എന്നിവര്‍ പ്രസംഗിച്ചു.

പേടിസ്വപ്നമായി ബൈപ്പാസ് റോഡ് : പുന്നക്കുളം സ്വദേശി വിജയന് ഉറക്കമില്ലാത്ത രാത്രികൾ...

എസ്. രാജേന്ദ്രകുമാർ വിഴിഞ്ഞം: ""ഉറക്കമുണർന്നു വീടിനു മുന്നിലെത്തിയാൽ ആകാശം മാത്രം കാണാം. ഏറെ ഉയരത്തിൽ കെട്ടിപ്പൊക്കിയിരിക്കുന്ന നിർമിതിക്കപ്പുറം എന്ത് നടക്കുന്നെന്ന് അറിയാൻ പോലുമാകുന്നില്ല. റോഡിനു മകളിൽ യന്ത്രങ്ങൾ പ്രവർത്തിപ്പിക്കുന്ന ശബ്ദം കേൾക്കാം. ഇവ തകർന്നു വീണാൻ ഞാനും എന്‍റെ കുടുംബവും നശിക്കും. ഒപ്പം വാഹനങ്ങളിൽ സഞ്ചരിക്കുന്ന നിരവധി പേരുടെ ജീവനും'' കോവളം - കാരോട് ബൈപ്പാസിന്‍റെ വശത്തു താമസിക്കുന്ന പുന്നക്കുളം സ്വദേശ വിജയന്‍റെ മനസിലുള്ള നിരാശയാണ് വാക്കുകളിലൂടെ പ്രതിഫലിച്ചത്. വിജയന്‍റെ മാത്രം ആവലാതിയല്ല ഇത്. കൃത്യമായ വിലയിരുത്തലോ പാരിസ്ഥിതിക ആഘാതപഠനമോ നടത്താതെ വേഗത്തിൽ നിർമിച്ച ബൈപ്പാസ് റോഡിന്‍റെ വശങ്ങളിൽ താമസിക്കുന്ന നൂറു കണക്കിനു കുടുംബളുടെ ചങ്കിടിപ്പാണ്. കനത്ത മഴയിൽ കോഴിക്കോടും മലപ്പുറത്തുമെല്ലാം ബൈപ്പാസ് തകർന്നതായുള്ള വാർത്തകൾ വന്നതോടെ ഇവിടത്തുകാരുടെ ആശങ്ക കൂടുതൽ വർധിച്ചു. പാലങ്ങൾ നിർമിക്കേണ്ട ചതുപ്പു സ്ഥലങ്ങളിൽ കോൺക്രീറ്റ് സ്ലാബുകൾ കൊണ്ട് സൈഡ് വാളുകൾ കെട്ടിപ്പൊക്കി മണ്ണിട്ടു നികത്തി. ഈ ഭാഗങ്ങളിൽ അങ്ങിങ്ങ് കോൺക്രീറ്റ് പാളികളുടെ അടുക്കുകൾ കുലഞ്ഞത് നാട്ടുകാർക്കു പേടിസ്വപ്നമായി മാറിയെങ്കിലും അധികൃതർക്ക് അനക്കമില്ല. ജീവനും സ്വത്തിനും സുരക്ഷയ്ക്കും ഭീഷണിയാണെന്നു പരാതി പറഞ്ഞ വിജയന്‍റെ ആവലാതികൾ അറിയാനെത്തിയ ദേശീയപാത ഉദ്യോഗസ്ഥർ ഭാഷ മനസിലാകുന്നില്ലെന്നു പറഞ്ഞു തടിതപ്പി. പരാതി പറഞ്ഞു മടുത്തു. ഇനി വരുന്നിടത്തുവച്ചു കാണാമെന്നു പറഞ്ഞ് സ്വയം സമാധാനിക്കുകയാണ് വിജയൻ. വീടിനു സമീപം ചെറിയൊരു പലചരക്ക് കട തുടങ്ങി ഉപജീവനം നടത്തുന്ന ഇയാളുടെ മനസിലെ തീയാണ് ബൈപ്പാസ് റോഡ്. വിജയന്‍റെ വീടിനു തൊട്ടടുത്ത് മറ്റൊരു വീട് വാടകക്കെടുത്ത് ബൈപ്പാസ് നിർമാണ ജീവനക്കാരും താമസിക്കുന്നുണ്ട്. ആകാശംമുട്ടെ ഉയരത്തിൽ മണ്ണിട്ടു നികത്തിയുള്ള റോഡിന്‍റെ വശങ്ങളിലെ അപകടാവസ്ഥ ജീവനക്കാരെ വിജയൻ ഇടവിട്ടു വിളിച്ച് കാണിക്കുന്നുണ്ട്. വന്നു നോക്കുന്ന സാങ്കേതിക വിദഗ്ദർ മറുപടി പറയാതെ മടങ്ങുകയാണ് പതിവ്. കൂടുതൽ ചോദിച്ചാൽ ബന്ധപ്പെട്ടയാൾ ഇവിടെയില്ലെന്ന സ്ഥിരമറുപടിയും ലഭിക്കും. നിർമാണത്തിലെ അപാകതകൾ നിരന്തരം ചൂണ്ടിക്കാട്ടിയിട്ടും തിരിഞ്ഞു നോക്കാത്ത അധികൃതർക്കെതിരെ ജനരോഷവും ഉയരുന്നുണ്ട്. അടിസ്ഥാന സൗകര്യങ്ങൾ ഒന്നും ഒരുക്കാതെ ബൈപ്പാസ് നിർമാണം പൂർത്തിയായി എന്നവകാശപ്പെട്ട് അധികൃതർ ഗതാഗതത്തിനായി തുറന്നുകൊടുത്ത റോഡിൽ മാസങ്ങൾക്കുള്ളിൽ അങ്ങിങ്ങു വിള്ളൽ ഉണ്ടായി. കോൺക്രീറ്റ് ചെയ്തറോഡിലെ വിള്ളൽ തുടക്കത്തിൽ ടാർ ഉരുക്കിയൊഴിച്ച് അടക്കാൻ ശ്രമിച്ചെങ്കിലും ഫലമുണ്ടായില്ല. ഒടുവിൽ കോവളം മുതൽ കാരോട് വരെയുള്ള ബൈപാസിൽ അങ്ങിങ്ങ് അറ്റകുറ്റപ്പണികൾ ആരംഭിച്ച് തകർച്ച മറക്കാനും അധികൃതർ ശ്രമംതുടങ്ങി. അതും അവസാനമില്ലാതെ തുടരുമ്പോ ഴാണു ജനത്തിന്‍റെ സംശയങ്ങളും വർധിക്കുന്നത്. സർക്കാർ ഏറ്റെടുത്ത ഭൂമിയിൽ ശാസ് ത്രീയപഠനം നടത്താതെയും ജനങ്ങളെ അകറ്റിനിർത്തിയും അശാസ്ത്രിയമായി നിർമിച്ച ബൈപ്പാസിനെതിരെയാണു നാട്ടുകാരുടെ പരാതി. വെള്ളക്കെട്ടുള്ള സ്ഥലങ്ങളും ചതുപ്പു നിലങ്ങളും നികത്തിയാണു കോവളം - കാരോട് ബൈപ്പാസ് നിർമിച്ചത്. പാലം നിർമിച്ചാലുള്ള ചെലവു കണക്കിലെടുത്ത് അതു പൂർണമായി ഒഴിവാക്കി. പാലം നിർമിക്കേണ്ട സ്ഥലങ്ങൾ നികത്തി ഉയരത്തിൽ കോൺക്രീറ്റ് സ്ലാവുകൾകൊണ്ട് ചുമരുകൾ തീർത്ത് മണ്ണുനിറച്ചു റോഡ് നിർമാണവും പൂർത്തിയാക്കി. ഇടുങ്ങിയതും കുത്തനെയുള്ള കയറ്റിറക്കത്തിൽ ഏറെ അപകടകരമായി നിർമിച്ച സർവീസ് റോഡ് നാട്ടുകാർക്കും നൽകി. നിർമാണ വേളയിൽ അപാകതകൾ ചൂണ്ടിക്കാട്ടി രംഗത്തിറങ്ങിയ നാട്ടുകാരെ കേസിന്‍റെയും മറ്റും പേരു പറഞ്ഞു തുടക്കത്തിലേ അകറ്റി നിർത്തി. പിന്നെ നടന്നതെല്ലാം ഒരു വിഭാഗം ഉദ്യോഗസ്ഥരുടെയും ഉത്തരേന്ത്യൻ തൊഴിലാളികളുടെയും നിയന്ത്രണത്തിലായിരുന്നു. പ്രതിഷേധിച്ച് രംഗത്തിറങ്ങിയ ജനത്തെ പറഞ്ഞ് പറ്റിച്ച അധികൃതർ പഴയ പടിയിൽതന്നെ വീണ്ടും കെട്ടിപ്പൊക്കി.

ദേശീയപാതയില്‍ ബസും ബൈക്കും കൂട്ടിയിടിച്ച് യുവാവിന് ദാരുണാന്ത്യം

പാറശാല: ദേശീയപാതയില്‍ പവതിയാന്‍വിളയില്‍ ഇരുചക്രവാഹനവും ബസും കൂട്ടിയിടിച്ചുണ്ടായ അപകടത്തില്‍ ഇരുചക്രവാഹന യാത്രക്കാരനായ യുവാവിന് ദാരുണാന്ത്യം. സഹയാത്രക്കാരനായ യുവാവിനെ ഗുരുതരപരിക്കുകളോടെ മെഡിക്കൽ കോളജിൽ പ്രവേശിപ്പിച്ചു. വടൂര്‍ക്കോണം കുഴിഞ്ഞാന്‍വിള തൊട്ടരുകത്ത് പുത്തന്‍ വീട്ടില്‍ സുബിന്‍ (22) ആണ് മരിച്ചത്. പൊന്‍വിള സ്വദേശി അജീഷ് (27) ഗുരുതര പരിക്കുകളോടെ മെഡിക്കല്‍ കോജില്‍ ചികിത്സയിലാണ്. കഴിഞ്ഞദിവസം രാത്രി എട്ടിന് തിരുവനന്തപുരത്തുനിന്നും നഗര്‍കോവിലിലേക്ക് വരികയായിരുന്ന കെഎസ്ആര്‍ടിസി ബസും കളിയിക്കാവിളയിൽ നിന്നും പൊന്‍വിളയിലേക്ക് പോകുകയായിരുന്ന ബൈക്കും തമ്മില്‍ കൂട്ടി ഇടിച്ചത്. അപകടത്തില്‍ ഗുരുതരമായി പരിക്കേറ്റ ഇരുവരേയും നാട്ടുകാരും പോലീസും ചേര്‍ന്ന് ഉടന്‍തന്നെ പാറശാല സര്‍ക്കാര്‍ താലൂക്ക് ആസ്ഥാന ആശുപത്രിയിലെത്തിച്ച് പ്രഥമ ശുശ്രൂഷനല്‍കി. പരിക്ക് അതീവ ഗുരുതരമായതുകാരണം മെഡിക്കല്‍ കോളജ് ആശുപത്രിയിലേക്ക് മാറ്റി. രാത്രിയോടുകൂടി സുബിൻ മരിച്ചു. സ്വകാര്യ വാഹനത്തിലെ ജീവനക്കാരനാണ് മരിച്ച അവിവാഹിതനായ സുബിന്‍. കൂലിപ്പണിക്കാരനായ സുരേഷിന്‍റെയും പരേതയായ സത്യ സജിതയുടെയും മകനാണ് സുബിന്‍. സഹോദരന്‍ സുജിന്‍. മൃതദേഹം പോസ്റ്റുമോര്‍ട്ടത്തിനുശേഷം വീട്ടുവളപ്പില്‍ സംസ്കരിച്ചു. റോഡിലെ വെളിച്ചക്കുറവും തിരക്കുകളും അനധികൃത വാഹന പാര്‍ക്കിങ്ങുമാണ് അപകടത്തിന് കാരണമായതെന്ന് നാട്ടുകാര്‍ പറയുന്നു.

അജ്ഞാത മൃതദേഹം മോര്‍ച്ചറിയില്‍

മെഡിക്കല്‍കോളജ്: തിരുവനന്തപുരം മെഡിക്കല്‍കോളജ് ആശുപത്രിയില്‍ ചികിത്സയിലിരിക്കെ മരിച്ചയാളുടെ മൃതദേഹം മോര്‍ച്ചറിയില്‍. 70 വയസ്‌ പ്രായം തോന്നിക്കുന്ന പുരുഷന്‍റെ മൃതദേഹമാണ് മോര്‍ച്ചറിയിലുള്ളത്. കിള്ളിപ്പാലത്ത് റോഡുവശത്ത് അവശനിലയില്‍ കണ്ടതിനെത്തുടര്‍ന്ന് തമ്പാനൂര്‍ പോലീസിന്‍റെ നിര്‍ദേശപ്രകാരം 108 ആംബുലന്‍സിലാണ് വയോധികനെ ആശുപത്രിയില്‍ പ്രവേശിപ്പിച്ചത്. ഇവിടെ ചികിത്സയിലിരിക്കെ കഴിഞ്ഞ മേയ് 26നായിരുന്നു മരണം. ഇയാളെക്കുറിച്ച് എന്തെങ്കിലും വിവരം ലഭിക്കുന്നവര്‍ തമ്പാനൂര്‍ പോലീസുമായി ബന്ധപ്പെടണം. ഫോണ്‍: 949798 7013, 94479 24261, 94979 80046.

ബൈക്കുകൾ കൂട്ടിയിടിച്ച് യുവാവ് മരിച്ചു

ആറ്റിങ്ങൽ: ആലംകോട് അവിക്സിന് സമീപം കഴിഞ്ഞദിവസം രാത്രി 12ന് ബൈക്കുകൾ കൂട്ടിയിടിച്ച് നടയറ മുസ്‌ലിം ജമാഅത്തിന് സമീപം താമസിക്കുന്ന അഹമ്മദ് (27) മരിച്ചു. ആലംകോട് സഹറൽ മന്തി റസ്റ്റോറന്‍റിലെ ജീവനക്കാർ സഞ്ചരിച്ചിരുന്ന ബൈക്കും അഹമ്മദ് സഞ്ചരിച്ച ബൈക്കും തമ്മിലാണ് കൂട്ടിയിടിച്ചത്. മലപ്പുറം സ്വദേശി ശ്രീഹരി (22), കോട്ടയം സ്വദേശി ആദിത്യൻ (22) എന്നിവർക്കാണ് പരിക്കേറ്റത്. ഇതിൽ ഒരാളുടെ നില ഗുരുതരമാണ്.

ഒൻപതു വയസുകാരി വീടിനുള്ളിൽ മരിച്ച നിലയില്‍

നേമം: വീടിനുള്ളില്‍ ഒൻപതു വയസുകാരിയെ തൂങ്ങി മരിച്ച നിലയില്‍ കണ്ടെത്തി. പൊന്നുമംഗലം ശാന്തിവിള കീഴേ മുഖവൂര്‍ വീട്ടില്‍ ശ്യാമിന്‍റെയും ലേഖയുടെയും മകള്‍ അഹല്യ (9) നെയാണ് ഇന്നലെ ഉച്ചയോടെ മരിച്ച നിലയില്‍ കണ്ടെത്തിയത്. അച്ഛനും അമ്മയും സുഖമില്ലാത്തതിനാല്‍ രാവിലെ ആശുപത്രിയില്‍ പോയിരിക്കുകയായിരുന്നു. വീട്ടില്‍ വീണതിന് കുട്ടിയെ അച്ഛനും അമ്മയും വഴക്കു പറഞ്ഞിരുന്നതായി പറയുന്നു. അച്ഛന്‍റെ സഹോദരി വീട്ടിലുണ്ടായിരുന്നു. കുട്ടിക്ക് ഉച്ചയ്ക്ക് ഭക്ഷണം നൽകാനായി അന്വേഷിച്ചപ്പോൾ മുറി പൂട്ടിയിരിക്കുന്നത് കണ്ട് സംശയം തോന്നി മുറിയുടെ വാതില്‍ ചവിട്ടി പൊളിച്ച് നോക്കിയപ്പോഴാണ് അഹല്യയെ മരിച്ച നിലയില്‍ കണ്ടത്. നേമം യുപി സ്കൂളിലെ വിദ്യാര്‍ഥിനിയാണ്. മൃതദേഹം പോസ്റ്റുമോർട്ടത്തിനായി മെഡിക്കല്‍കോളജ് ആശുപത്രിയിലേയ്ക്ക് മാറ്റി. നേമം പോലീസ് കേസ്‌സെടുത്തു.

പൂവാർ കടൽത്തീരം ശുചീകരിച്ച് ക്രൈസ്റ്റ് നഗർ കോളജ് വിദ്യാർഥികൾ

മാറനല്ലൂർ: ലോക പരിസ്ഥിതി ദിനത്തോടനുബന്ധിച്ച് മാറനല്ലൂർ ക്രൈസ്റ്റ് നഗർ കോളേജിലെ പരിസ്ഥിതി ക്ലബും എൻ എസ്എസ് യൂണിറ്റും ഓഷ്യൻ സ്റ്റുഡൻസ് കമ്മ്യൂണിറ്റിയുമായി സഹകരിച്ചുകൊണ്ട് പൂവാർ കടൽത്തീരം ശുചീകരിച്ചു. കൊച്ചി കടലിൽ മുങ്ങിയ കപ്പലിൽനിന്നു തീരത്തടിയുന്ന മൈക്രോ പ്ലാസ്റ്റിക് ഉൾപ്പെടെയുള്ള മാലിന്യങ്ങൾ ശേഖരിച്ചുകൊണ്ടു പൂവാർ കോസ്റ്റൽ പോലീസ് പരിസരത്തെ തീരമാണ് വിദ്യാർഥികളുടെ നേതൃത്വത്തിൽ ശുചീകരിച്ചത്. സർക്കിൾ ഇൻസ്പെക്ടർ സി. കണ്ണൻ ശുചീകരണ പ്രവർത്തനങ്ങൾ ഉദ്ഘാടനം ചെയ്തു. പരിസ്ഥിതി ദിനത്തോടനുബന്ധിച്ച് കോളജിൽ പേപ്പർ ബാഗ് നിർമാണം പ്ലാസ്റ്റിക്ക് വിരുദ്ധ സന്ദേശം പ്രചരിപ്പിച്ചുകൊണ്ടുള്ള ഫ്ലാഷ് മോബ് എന്നിവ സംഘടിപ്പിച്ചു. കോളജ് മാനേജർ ഫാ. സിറിയക് മഠത്തിൽ സിഎംഐ, പ്രിൻസിപ്പൽ ഡോ. ജോളി ജേക്കബ് എന്നിവർ പ്രസംഗിച്ചു. അധ്യാപകരായ ഡോ. കെ.പി. ഷാനന്ദ്, ആർ. രാജേഷ് കുമാർ, എസ്. തസ്നി, ഡി.വി. ആതിര എന്നിവർ നേതൃത്വം നൽകി.

പൈപ്പ് പൊട്ടിയ കുഴിയില്‍ വീണ് സ്ത്രീക്ക് പരിക്ക്

പേരൂര്‍ക്കട: നന്ദാവനത്ത് പൈപ്പു പൊട്ടിയ കുഴിയില്‍ വീണ് സ്ത്രീക്ക് പരിക്കേറ്റു. തിരുവനന്തപുരം കവടിയാര്‍ സ്വദേശിനി സുജാതകുമാരി (48) ക്കാണ് പരിക്കേറ്റത്. കഴിഞ്ഞദിവസം രാവിലെയായിരുന്നു സംഭവം. മ്യൂസിയം ഭാഗത്തുനിന്നു നന്ദാവനം വഴി തമ്പാനൂരിലേക്ക് പോകുകയായിരുന്നു ഇവര്‍. സുജാതകുമാരി സഞ്ചരിച്ചിരുന്ന സ്‌കൂട്ടര്‍ പൈപ്പ് പൊട്ടിയ കുഴിയില്‍ വീഴുകയായിരുന്നു. കുഴിയില്‍ വെള്ളം നിറഞ്ഞിരുന്നതുകൊണ്ട് ഇവര്‍ കുഴി കാര്യമായി ശ്രദ്ധിച്ചിരുന്നില്ല. സ്‌കൂട്ടര്‍ മറിഞ്ഞുവീണുവെങ്കിലും ചെറിയ പരിക്കുകളോടെ യുവതി രക്ഷപ്പെട്ടു. സ്‌കൂട്ടര്‍ മറിഞ്ഞ് ശരീരത്തിലൂടെ വീണതുമൂലം കാലിനും റോഡില്‍ വീണപ്പോള്‍ കൈമുട്ടിനുമാണ് ഇവര്‍ക്ക് പരിക്കേറ്റത്. നാട്ടുകാര്‍ ചേര്‍ന്ന് വാഹനം ഉയര്‍ത്തി മാറ്റി. ഇവര്‍ തിരുവനന്തപുരം മെഡിക്കല്‍കോളജ് ആശുപത്രിയില്‍ പ്രാഥമിക ചികിത്സ തേടി. നന്ദാവനത്തെ പൈപ്പ് പൊട്ടിയ കുഴിയില്‍ ഇടയ്ക്കിടെ വാഹനയാത്രികര്‍ വീണു പരിക്കേല്‍ക്കുകയാണെന്ന് നാട്ടുകാര്‍ പറയുന്നു.

വൃദ്ധനെ കാണാനില്ലെന്നു പരാതി നൽകി

നെടുമങ്ങാട്: ഉഴമലയ്ക്കൽ പുതുക്കുളങ്ങര കൊറ്റാമല ജ്യോതി നിവാസിൽ ചന്ദ്രശേഖരൻ നായരെ (74) കാണാനില്ലെന്നു കാണിച്ച് ബന്ധുക്കൾ ആര്യനാട് പോലീസിൽ പരാതി നൽകി. കഴിഞ്ഞദിവസം വൈകുന്നേരം മൂന്നോടെ നെടുമങ്ങാട് മാർക്കറ്റിൽ പോവുകയും തിരികെ 5.30 തോടെ കൊറ്റാമല ജംഗ്ഷനിലെത്തുകയും ചെയ്തിരുന്നു. ഇതിനുശേഷം ഇദ്ദേഹം ഇതുവരെ വീട്ടിൽ തിരികെ എത്തിയിട്ടില്ലെന്നു ബന്ധുക്കൾ നൽകിയ പരാതിയിൽ പറയുന്നു. ഏകദേശം 165 സെന്‍റീമീറ്റർ ഉയരവും ഇടത്തരം ശരീര പ്രകൃതവുമാണ്. കാണാതാകുമ്പോൾ ക്രീം കളർ ഷർട്ടും വെള്ളമുണ്ടുമായിരുന്നു വേഷം. ഇയാളെപ്പറ്റി കൂടുതൽ വിവരം ലഭിക്കുന്നവർ ആര്യനാട് പൊലീസ് സ്റ്റേഷനിൽ 0472-2852033 എന്ന നമ്പറിൽ ബന്ധപ്പെടണമെന്ന് ആര്യനാട് എസ്എച്ച്ഒ അറിയിച്ചു.

ഗ്യാസ് സ്റ്റൗവിൽനിന്നു തീപടർന്നു

മലയിൻകീഴ്: വീട്ടിലെ ഗ്യാസ് അടുപ്പ്‌ കത്തിച്ചപ്പോൾ സ്റ്റൗവിൽ തീപടർന്നു. മലയിൻകീഴ് കോവിലുവിള കാറക്കോണം സൂനിലയത്തിൽ പുഷ്പലീലയുടെ വീട്ടിലെ അടുപ്പിനാണ് തീപടർന്നത്. അടുപ്പിനുപുറമേ അടുക്കളയിലെ ടൈലുകൾ പൊട്ടിനശിച്ചു. കിള്ളിയിൽനിന്ന്‌ അഗ്നിരക്ഷാസേനയെത്തി ഗ്യാസ് അണച്ച് തീകെടുത്തിയതിനാൽ വലിയ അപകടം ഒഴിവായി. അടുപ്പിന്‍റെ തകരാറാണ് തീപ്പിടിത്തത്തിനു കാരണമെന്നു കരുതുന്നു.

ലക്ഷംവീട് കോളനിയിൽ ലഹരിസംഘങ്ങൾ ഏറ്റുമുട്ടി

നേമം: കരുമം കണ്ണങ്കോട് ലക്ഷം വീട് കോളനിയിൽ ലഹരി സംഘങ്ങൾ ഏറ്റുമുട്ടി. വിവരമറിഞ്ഞെത്തിയ നേമം പോലീസിനു നേരെയും സംഘം കല്ലേറ് നടത്തി. ചൊവ്വാഴ്ച രാത്രി പത്തു മണിയോടെയായിരുന്നു സംഭവം. കല്ലേറില്‍ നേമം സ്റ്റേഷനിലെ രണ്ടു പോലീസുകാര്‍ക്ക് പരിക്കേറ്റു. ആക്രമണം നടത്തിയ കിരണ്‍ (31), മിഥുന്‍ (25), വിഷ്ണു (35) എന്നിവരെ പോലീസ് പിടികൂടി. ബാക്കിയുള്ളവര്‍ ഓടി രക്ഷപ്പെട്ടു. ഫോര്‍ട്ട് എസിയുടെ നേതൃത്വത്തില്‍ കൂടുതല്‍ പോലീസെത്തിയാണ് സംഘത്തെ പിടികൂടിയത്. ലഹരി ഉപയോഗിച്ചവര്‍ പരസ്പരം നടത്തിയ അക്രമത്തില്‍ കിരണിനു പരിക്കുണ്ട്. പത്തു പേരടങ്ങുന്ന സംഘം ലഹരി ഉപയോഗിച്ച ശേഷമാണു രണ്ടു മണിക്കൂറോളം സംഘര്‍ഷാവസ്ഥ സൃഷ്ടിച്ചത്. കിരണും മിഥുനും നേമം പോലീസ് സ്റ്റേഷനിലെ ഗുണ്ടാ ലിസ്റ്റില്‍പ്പെട്ടവരാണെന്ന് പോലീസ് പറഞ്ഞു. പ്രതികളുടെ ആക്രമണത്തില്‍ സിവിൽ പോലീസ് ഉദ്യോഗസ്ഥരായ ബീനിഷ്, വിനീത് എന്നിവര്‍ക്കാണ് പരിക്കേറ്റത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

നന്ദാവനത്ത് വാട്ടര്‍ അഥോറിറ്റിയുടെ കുടിവെള്ള പൈപ്പ് പൊട്ടി

പേരൂര്‍ക്കട: നന്ദാവനം-ബേക്കറി ജംഗ്ഷന്‍ റോഡില്‍ വാട്ടര്‍ അഥോറിറ്റിയുടെ കുടിവെള്ള പൈപ്പ് പൊട്ടി ശുദ്ധജലം പാഴാകുന്നു. പ്രധാന റോഡിലാണ് വന്‍ തോതില്‍ കുടിവെള്ളം പാഴാകുന്നത്. വാട്ടര്‍ അഥോറിറ്റി പാളയം സെക്ഷന്‍ പരിധിയിലുള്ള പ്രദേശമാണ് ഇവിടം. പൈപ്പ് പൊട്ടിയിട്ട് ഒരുമാസമായി എന്നാണ് നാട്ടുകാരും വ്യാപാരികളും പറയുന്നത്. അതേസമയം പൈപ്പ് പൊട്ടിയൊഴുകാന്‍ തുടങ്ങിയിട്ട് മൂന്നുദിവസം മാത്രമേ ആയിട്ടുള്ളൂവെന്നാണ് വാട്ടര്‍ അഥോറിറ്റി പറയുന്നത്. ടാര്‍ ഇളകി കുഴി രൂപപ്പെട്ട് അവിടെനിന്ന് ജലം ഒഴുകിപ്പരന്ന് ഓടയിലൂടെയാണ് പാഴാകുന്നത്. ദിനംപ്രതി ലക്ഷക്കണക്കിന് ലിറ്റര്‍ ശുദ്ധജലം പാഴാകുന്നുണ്ടെന്നാണ് കണക്ക്. ഇതിനു 50 മീറ്റര്‍ അകലെയായി മറ്റൊരു പൊട്ടല്‍കൂടിയുണ്ടെങ്കിലും അത് റോഡിനടിയിലൂടെയുള്ള ചോര്‍ച്ചയാണെന്നും പ്രദേശവാസികള്‍ പറയുന്നു. 315 എം.എം വിസ്താരം വരുന്ന ഹൈ ഡെന്‍സിറ്റി പൈപ്പാണ് ഇവിടെ പൊട്ടിയിരിക്കുന്നത്. ഇത് അറ്റകുറ്റപ്പണി ചെയ്യുന്നത് ക്ലേശകരമാണെന്നും ചെന്നൈയില്‍നിന്ന് പൈപ്പും അനുബന്ധ ഉപകരണങ്ങളും എത്തിയാല്‍ മാത്രമേ പണി ആരംഭിക്കാന്‍ സാധിക്കുകയുള്ളൂവെന്നും ഇതിനുള്ള കാലതാമസമാണ് പ്രശ്‌നത്തിനു കാരണമെന്നുമാണ് വാട്ടര്‍ അഥോറിറ്റി പാളയം എഇ പറയുന്നത്. ഇന്നുതന്നെ പുതിയ പൈപ്പ് എത്തുമെന്നും പണി ആരംഭിക്കുമെന്നും എഇ സൂചിപ്പിച്ചു. അതേസമയം ഏറെ വാഹനത്തിരക്കുള്ള റോഡാണ് ഇതെന്നും സെക്രട്ടേറിയറ്റിലേക്കും പരിസര പ്രദേശങ്ങളിലേക്കും ജലമെത്തിക്കുന്ന പൈപ്പായതുകൊണ്ടാണ് വാല്‍വ് അടയ്ക്കാന്‍ സാധിക്കാത്തതെന്നും വാട്ടര്‍ അഥോറിറ്റി സൂചിപ്പിച്ചു. ജെസിബി ഉപയോഗിച്ച് കുഴിച്ചാല്‍ മാത്രമേ ആഴത്തില്‍ കടന്നുപോയിട്ടുള്ള പൈപ്പ് കണ്ടെത്താനും അറ്റകുറ്റപ്പണി നടത്താനും സാധിക്കുകയുള്ളൂ. വരുന്ന അവധി ദിനങ്ങള്‍ ഇതിനായി തെരഞ്ഞെടുക്കുമെന്നും അറ്റകുറ്റപ്പണി ഉടന്‍ പൂര്‍ത്തീകരിക്കുമെന്നും വാട്ടര്‍ അഥോറിറ്റി സൂപ്രണ്ടിംഗ് എന്‍ജിനീയര്‍ വ്യക്തമാക്കി.

മണ്ണിന്‍റെ മനമറിഞ്ഞു പരിസ്ഥിതി ദിനാഘോഷം

മാറനല്ലൂർ: ക്രൈസ്റ്റ് നഗർ പബ്ലിക് സീനിയർ സെക്കൻഡറി സ്കൂളിലെ പരിസ്ഥിതി ദിനാഘോഷം എസ്‌സിടിഐഎംഎസ്ടി പോളിമെറിക് മെഡിക്കൽ ഡിവൈസ് ഡി വിഭാഗം ശാസ്ത്രജ്ഞൻ ഡോ. ജിജോ രാജ് ഉദ്ഘാടനം ചെയ്തു. പ്രിൻസിപ്പൽ ഫാ. ചാക്കോ പുതുകുളം സിഎംഐ അധ്യക്ഷനായി. ഹരിത കേരളം പദ്ധതിയുടെ ഭാഗമായ "പച്ചതുരുത്തിന് " തുടക്കം കുറിച്ചുള്ള സ്കൂൾ പൂന്തോട്ടം "എഡ്യുഫ്ലോറൻസിയയുടെ ഉദ്ഘാടനം വിശിഷ്ടാതിഥിത നിർവഹിച്ചു. ഫിനാൻസ് അഡ്മിനിസ്ട്രേറ്ററും വൈസ് പ്രിൻസിപ്പൽ ഫാ. മാത്യു പുത്തൻപുരയ്ക്കൽ സിഎംഐ വിശിഷ്ടാതിഥിക്കു സ്‌നേഹോപഹരം നൽകി. കുട്ടികളുടെ ബുള്ളറ്റിൻ ബോർഡിൽ പോസ്റ്റർ പ്രദർശിപ്പിച്ചു. പ്രത്യേക ഫാം റേഡിയോ പരിപാടികളും നടത്തി. കലാപരിപാടികളും അരങ്ങേറി. നെയ്യാറ്റിന്‍കര: നെയ്യാറ്റിന്‍കരയില്‍ വിദ്യാലയങ്ങളുടെയും വിവിധ സംഘടനകളുടെയും നേതൃത്വത്തില്‍ പരിസ്ഥിതിദിനം ആഘോഷിച്ചു. നെയ്യാറ്റിൻകര നഗരസഭയുടെയും കൃഷിഭവന്‍റെയും ഉരൂട്ടുകാല ഗവ. എംടിഎച്ച്എസിന്‍റെയും സംയുക്താഭിമുഖത്തിൽ സംഘടിപ്പിച്ച പരിസ്ഥിതി ദിനാഘോഷം കെ. ആന്‍സലന്‍ എംഎല്‍എ വൃക്ഷത്തൈ നട്ട് ഉദ്ഘാടനം ചെയ്തു. സ്കൂൾ അങ്കണത്തിൽ ചേര്‍ന്ന ചടങ്ങില്‍ നഗരസഭ ചെയർമാൻ പി.കെ. രാജമോഹനന്‍ അധ്യക്ഷനായി. സ്റ്റാന്‍ഡിംഗ് കമ്മിറ്റി ചെയര്‍മാന്മാരായ കെ.കെ. ഷിബു, ഡോ. എം.എ. സാദത്ത്, കൗണ്‍സിലര്‍മാരായ അഡ്വ. സജിന്‍ലാല്‍, കൂട്ടപ്പന മഹേഷ്, പ്രധാനാധ്യാപകൻ സോണി ലാൽ സി. ഗ്യാരി, കൃഷി ഓഫീസർ ടി. സജി, അധ്യാപകരായ ഗിരിജ, റാണി, സുലജ, സിമിലാൽ, അനശ്വര രാജശേഖരൻ, പിടിഎ പ്രസിഡന്‍റ് ഷാജു, കൃഷി അസിസ്റ്റന്‍റ് മുരുകൻ എന്നിവർ പങ്കെടുത്തു. പരിസ്ഥിതി ദിനത്തോടനുബന്ധിച്ച് പ്രകൃതിക്കൊരു പൊന്ന് പേരേപ്പാടൻസിലൂടെ എന്ന പദ്ധതിയുടെ ഭാഗമായുള്ള വൃക്ഷത്തൈ വിതരണോദ്ഘാടനം നെയ്യാറ്റിന്‍കര നഗരസഭ ചെയര്‍മാന്‍ പി.കെ. രാജമോഹനന്‍ നിര്‍വഹിച്ചു. നഗരസഭ സ്റ്റാന്‍ഡിംഗ് കമ്മിറ്റി ചെയര്‍മാന്മാരായ ഡോ. എം.എ. സാദത്ത്, ആര്‍. അജിത, മാനേജർ വൈ. ക്രിസ്തുദാസ്, മാർക്കറ്റിംഗ് മാനേജർ ജയ്സൺ ജോർജ്, മുൻ കൗൺസിലർ ജെ. ജോജിൻ എന്നിവർ സംബന്ധിച്ചു. നെയ്യാറ്റിന്‍കര ഊരൂട്ടുകാല ഗവ. ഐടിഐയിലെ പരിസ്ഥിതി ദിനാഘോഷങ്ങളുടെ ഉദ്ഘാടനവും ഫലവൃക്ഷ തൈനടീലും ബാലാവകാശകമ്മീഷൻ അംഗം ഡോ. എഫ്. വിൽസൻ നിർവഹിച്ചു. പ്രിൻസിപ്പൽ ഡി.എസ്. ഷീലുകുമാർ, പിടിഎ പ്രസിഡന്‍റ് രതീഷ് കുമാർ, അധ്യാപക വിദ്യാർഥി പ്രതിനിധി പ്രിയദർശിനി, ജെ. പ്രകാശ് ജെ എന്നിവർ പങ്കെടുത്തു. മഞ്ചവിളാകം ഗവ. യുപി സ്കൂളിലെ പരിസ്ഥിതി ദിനാഘോഷങ്ങളുടെ ഭാഗമായി പോസ്റ്റര്‍ രചന മത്സരം സംഘടിപ്പിച്ചു. ഒന്പതിന് പരിസ്ഥിതിദിന ക്വിസ് നടക്കും. ഫ്രാനിന്‍റെ ആഭിമുഖ്യത്തില്‍ വ്ളാങ്ങാമുറി എല്‍എംഎസ് എല്‍പി സ്കൂളില്‍ സംഘടിപ്പിച്ച പരിസ്ഥിതി ദിനാഘോഷം നെയ്യാറ്റിൻകര സി.എസ്ഐ ചർച്ച് വികാരി റവ. സത്യ സന്തോഷ് കുമാർ ഉദ്ഘാടനം ചെയ്തു. കൗണ്‍സിലര്‍ കൂട്ടപ്പന മഹേഷ്, ഫ്രാന്‍ ഭാരവാഹികളായ എസ്.കെ. ജയകുമാര്‍, എം. രവീന്ദ്രന്‍ എന്നിവര്‍ പങ്കെടുത്തു. കാരക്കോണം ഡോ. സോമര്‍ മെമ്മോറിയല്‍ സിഎസ്‌ഐ മെഡിക്കല്‍ കോളജ് കാമ്പസില്‍ സംഘടിപ്പിച്ച പരിസ്ഥിതി ദിനാഘോഷം സി എസ്ഐ ദക്ഷിണ കേരള മഹായിടവക ബിഷപ്പ് തിമോത്തി രവീന്ദര്‍, ബോഗൈന്‍ വില്ല തൈ നട്ട് ഉദ്ഘാടനം ചെയ്തു. ഡയറക്ടര്‍ ഡോ. എബ്രഹാം, മഹാത്മിനി സ്റ്റേറ്റ് സെക്രട്ടറി ടി.ടി. പ്രവീണ്‍, മെഡിക്കല്‍ സൂപ്രണ്ട് ഡോ. ബാബുരാജ് തുടങ്ങിയവര്‍ പങ്കെടുത്തു. നെടുമങ്ങാട്: ലോക പരിസ്ഥിതി ദിനാചരണത്തിന്‍റെ ഭാഗമായി മൂഴി ടിപ്പുകൾച്ചറൽ സൊസൈറ്റിയുടെയും തിരുവനന്തപുരം ജൻ ശിക്ഷൻ സൻ സ്ഥാനുമായി ചേർന്ന് പൊതുസ്ഥലങ്ങളിൽ 1500 ഫലവൃക്ഷ തൈകൾ നടുന്നതിന്‍റെ ബ്ലോക്കുതല ഉദ്ഘാടനം കേരള യൂത്ത് പ്രമോഷൻ കൗൺസിൽ സംസ്ഥാന ചെയർമാൻ സുമൻ ജിത്ത് മിഷ നിർവഹിച്ചു. സൊസൈറ്റി ചെയർമാൻ മൂഴിയിൽ മുഹമ്മദ് ഷിബു അധ്യക്ഷത വഹിച്ചു. 25 കുട്ടികൾക്ക് ഫലവൃക്ഷത്തൈകൾ സൗജന്യമായി വിതരണം ചെയ്തു. നെടുമങ്ങാട്: എസ്എഫ്ഐ നെടുമങ്ങാട് ഏരിയാ കമ്മിറ്റിയുടെ നേതൃത്വത്തിൽ സംഘടിപ്പിച്ച പരിസ്ഥിതി ദിനാഘോഷം ഏരിയാതല ഉദ്ഘാടനം പൂവത്തൂർ ഇ.കെ. നയനാർ ഗ്രന്ഥശാല അങ്കണത്തിൽ മാവിൻ തൈ നട്ടുകൊണ്ട് മുൻ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ എസ്.എസ്. ബിജു നിർവഹിച്ചു. ഏരിയയിലെ വെമ്പായം, മൂഴി, തേക്കട എന്നിവിടങ്ങളിൽ വൃക്ഷത്തെകൾ നടുകയും പ്ലാസ്റ്റിക് മലിനീകരണത്തിനെതിരേ ബോധവത്കരണം നടത്തുകയും ചെയ്തു. തിരുവല്ലം: ജൈവവൈവിധ്യ ക്ലബ്, നാഷണൽ സർവീസ് സ് കീം, എൻസിസി എന്നിവയുടെ ആഭിമുഖ്യത്തിൽ വെള്ളായണി കാർഷിക കോളജിൽ സംഘടിപ്പിച്ച പരിസ്ഥിതി ദിനാഘോഷം പ്രാദേശിക കാർഷിക ഗവേഷണം കേന്ദ്രം മേധാവി ഡോ. ശാലിനിപിള്ള ഉദ്ഘാടനം ചെയ്തു. ജൈവവൈവിധ്യ ക്ലബിന്‍റെ കോ -ഓർഡിനേറ്റർ ഡോ. അശ്വതി വിജയൻ, നാഷണൽ സർവീസ് സ് കീം പ്രോഗ്രാം ഓഫീസർ ഡോ. സംഗീത കെ.ജി. എന്നിവർ പ്രസംഗിച്ചു. എൻഎസ്എസ് വോളണ്ടിയേഴ്സ് ലഘുനാടകം അവതരിപ്പിച്ചു. പ്ലാസ്റ്റിക് മലിനീകരണത്തിനെതിരേ ലഘുലേഖകൾ തയാറാക്കുകയും ചെയ്തു. നെടുമങ്ങാട്: കർഷകകോൺഗ്രസ് ആനാട് മണ്ഡലം കമ്മിറ്റിയുടെ പരിസ്ഥിതി ദിനാഘോഷം ആനാട് ഗവ. ആയുർവേദ ആശുപത്രിയിൽ അഗസ്ത്യ മുരിങ്ങതൈ നട്ടുകൊണ്ട് കെപിസിസി നിർവാഹസമിതി അംഗം ആനാട് ജയൻ ഉദ്ഘാടനം ചെയ്തു. ആനാട് മണ്ഡലംപ്രസിഡന്‍റ് ആനാട് ജോയ് അധ്യക്ഷനായി. പഞ്ചായത്ത് മുൻ പ്രസിഡന്‍റുമാരായ ആനാട് ജി. ചന്ദ്രൻ, ആനാട് സുരേഷ്, കോൺഗ്രസ് മണ്ഡലം പ്രസിഡന്‍റ് ഹുമയൂൺ കബീർ, ആർ. അജയകുമാർ, എം.എൻ. ഗിരി, മെഡിക്കൽ ഓഫീസർ ഡോ. രോഹിത് ജോൺ, ദാമോദരൻ നായർ, വേലപ്പൻനായർ, ഡോ. പൂർണിമ എന്നിവർ സംസാരിച്ചു. വെഞ്ഞാറമൂട്: കീഴായിക്കോണം കലാലയ ഗ്രന്ഥശാലയുടെ ആഭിമുഖ്യത്തിൽ സംഘടിപ്പിച്ച പരിസ്ഥിതി ദിനാഘോഷം കീഴായിക്കോണം ഹോമിയോ ആശുപത്രി വളപ്പിൻ ഡോ: ദിവ്യ തൈ നട്ട് പദ്ധതി ഉദ്ഘാടനം ചെയ്തു. കലാലയ പ്രസിഡന്‍റ് ആർ. അജയകുമാർ, സെക്രട്ടറി എം.ബി. ബിജു, അംഗങ്ങളായ ബി. പ്രഭ, എസ്. രാജൻ, ജി. ബിജു എന്നിവർ പങ്കെടുത്തു. പാലോട് : ഞാറനീലി വന സംരക്ഷണ സമിതിയുടെ നേതൃത്വത്തിൽ സ്കൂളിൽ വൃക്ഷ തൈകൾ നടുകയും വിദ്യാർഥികൾക്ക് ബോധവത്കരണ ക്ലാസുകളും സംഘടിപ്പിച്ചു. ഞാറനീലി വി.കെ. കാണി സ്കൂളിൽ പാലോട് റേഞ്ച് ഫോറസ്റ്റ് ഓഫീസർ വിപിൻ ചന്ദ്രൻ വൃക്ഷ തൈകൾ നടുകയും വിദ്യാർഥികൾക്ക് പരിസ്ഥി ദിന സന്ദേശവും ബോധവൽക്കരണ ക്ലാസും എടുക്കുകയും ചെയ്തു. ഞാറനീലി വിഎസ്എസ് അംഗങ്ങളും പെരിങ്ങമ്മല സെക്ഷൻ സ്റ്റാഫുകളും പരിപാടിയിൽ പങ്കെടുത്തു. നെയ്യാറ്റിന്‍കര: പരിസ്ഥിതി ദിനത്തില്‍ വിദ്യാര്‍ഥികള്‍ക്കെല്ലാം പ്ലാവില തൊപ്പികള്‍. അതിയന്നൂർ പഞ്ചായത്തിലെ പോങ്ങിൽ എൽപി സ്കൂളിലെ വിദ്യാര്‍ഥികളാണ് പ്ലാവില തൊപ്പികളണിഞ്ഞു പരിസ്ഥിതി സംരക്ഷണ പ്രവര്‍ത്തനങ്ങളോടുള്ള ഐക്യദാര്‍ഢ്യം അറിയിച്ചത്. സ്കൂളിലെ പരിസ്ഥിതി ദിനാഘോഷം ആരോഗ്യ വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയർമാൻ കൊടങ്ങാവിള വിജയകുമാർ ഉദ്ഘാടനം ചെയ്തു. ബിന്ദു എസ്.ജെ. ജോർജ് അധ്യക്ഷയായി. പിടിഎ പ്രസിഡന്‍റ് ബിജു, രഞ്ജിനി, റാണി, ലിജി, ദാനം എന്നിവര്‍ സംബന്ധിച്ചു. ചാണി എല്‍എംഎസ് എല്‍പി സ്കൂളിലെ പരിസ്ഥിതി ദിനാഘോഷം കവയിത്രി ജാനു കാഞ്ഞിരംകുളം വൃക്ഷത്തൈ നട്ട് ഉദ്ഘാടനം ചെയ്തു. പരണിയം ഗവ. വൊക്കേഷണല്‍ ഹയര്‍സെക്കന്‍ഡറി സ്കൂളില്‍ പരിസ്ഥിതി ദിനാഘോഷങ്ങളുടെ ഭാഗമായി വിവിധ പരിപാടികള്‍ സംഘടിപ്പിച്ചു. വൃക്ഷത്തൈ നടീല്‍, പോസ്റ്റര്‍ നിര്‍മാണം, ചിത്രരചന, പരിസ്ഥിതിദിന ക്വിസ് എന്നിവ സംഘടിപ്പിച്ചു. മരുതത്തൂർ മഹാത്മ വായനശാലയിൽ പരിസ്ഥിതി ദിനാഘോഷം ഫല വൃക്ഷ തൈകൾ നട്ട് കവയിത്രി ആശ കിഷോർ ഉദ്ഘാടനം ചെയ്തു. പേരൂര്‍ക്കട: ആയുർവേദ മെഡിക്കല്‍ അസോസിയേഷന്‍ കരമന ഏരിയയും ആയുഷ് ഹെല്‍ത്ത് ആൻഡ് വെല്‍നെസ് സെന്‍ററും സംയുക്തമായി പരിസ്ഥിതി ദിനാഘോഷം സംഘടിപ്പിച്ചു. കരമന ഏരിയ സെക്രട്ടറി ഡോ. അനില സ്വാഗതം പറഞ്ഞു. ആയുർവേദ മെഡിക്കല്‍ അസോസിയേഷന്‍ സംസ്ഥാന കമ്മിറ്റി അംഗവും കല്ലറ ഗവ. ആയുർവേദ ഡിസ്‌പെന്‍സറി മെഡിക്കല്‍ ഓഫീസറുമായ ഡോ. സുഭാഷ് ചടങ്ങില്‍ ആശംസകള്‍ നേര്‍ന്നു. ആയുര്‍ കര്‍മ മെഡിക്കല്‍ ഓഫീസര്‍ ഡോ. രമ്യശ്രീ രവീന്ദ്രന്‍ പരിസ്ഥിതി സംരക്ഷണത്തെക്കുറിച്ച് ക്ലാസെടുത്തു. എം.ജി. അശ്വതി പരിസ്ഥിതി പ്രതിജ്ഞ ചൊല്ലിക്കൊടുത്തു. യോഗ ഇന്‍സ്ട്രക്ടര്‍ ഡോ. ആരതി നന്ദി പറഞ്ഞു. വെമ്പായം: പിരപ്പൻകോട് സെന്‍റ് ജോൺസ് പബ്ലിക് സ്കൂളിൽ നടന്ന പരിസ്ഥിതി ദിനാചരണം ഡയറക്ടർ ഫാ. ജോസ് കിഴക്കേടത്ത് ഫലവൃക്ഷ തൈ നട്ടു കൊണ്ട് ഉദ്ഘാടനം ചെയ്തു. തുടർന്ന് കുട്ടികൾക്കു പരിസ്ഥിതി ബോ ധവത്കരണ സന്ദേശം നൽകി. വെള്ളറട: കുന്നത്തുകാല്‍ ശ്രീ ചിത്തിര തിരുനാള്‍ റെസിഡന്‍ഷ്യല്‍ സെന്‍ട്രല്‍ സ്‌കൂളില്‍ ലോക പരിസ്ഥിതി ദിനാഘോഷം സം ഘടിപ്പിച്ചു. സ്‌കൂള്‍ പ്രിന്‍സിപ്പല്‍ എസ്. പുഷ്പവല്ലി പരിസ്ഥിതിദിന സന്ദേശം നല്‍കി. കുട്ടികളുടെ ചിത്ര പ്രദര്‍ശനവും, കലാപരിപാടികളും ഉണ്ടായിരുന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]