കോതമംഗലം: ബ്ലോക്ക് പഞ്ചായത്ത് കേരളോത്സവത്തിൽ നെല്ലിക്കുഴി പഞ്ചായത്ത് 259 പോയിന്റോടെ ഓവർറോൾ ചാന്പ്യൻഷിപ്പ് നേടി. കീരന്പാറ പഞ്ചായത്ത് 125 പോയിന്റോടെ രണ്ടാം സ്ഥാനം കരസ്ഥമാക്കി. ക്ലബ് വിഭാഗത്തിൽ പി. കൃഷ്ണപിള്ള സ്മാരക വായനശാല 68 പോയിന്റോടെ ഒന്നാം സ്ഥാനത്തും, 28 പോയിന്റോടെ സത്യൻ ആർട്സ് ആന്ഡ് സ്പോർട്സ് ക്ലബ് രണ്ടാം സ്ഥാനവും നേടി.
കീരംപാറ സെന്റ് സ്റ്റീഫൻസ് ഹയർ സെക്കൻഡറി സ്കൂൾ, സെന്റ് സ്റ്റീഫൻസ് ഗേൾസ് ഹൈസ്കൂൾ, ടിവിജെ ഹയർ സെക്കൻഡറി സ്കൂൾ, ചേലാട് ക്ലബ് എന്നീ കേന്ദ്രങ്ങളിലാണ് ഗെയിംസ്, അത്ലറ്റിക്സ്, കലാസാഹിത്യ മത്സരങ്ങൾ പൂർത്തീകരിച്ചത്. പത്ത് പഞ്ചായത്തുകളിൽ നിന്നുള്ള മത്സരാർഥികൾ പങ്കെടുത്തു.
ബ്ലോക്ക് പഞ്ചായത്ത് ഹാളിൽ നടത്തിയ സമാപന യോഗത്തിൽ വിജയികളായ ടീമുകൾക്കും വ്യക്തികൾക്കും ട്രോഫികൾ, സർട്ടിഫിക്കറ്റ്, മെമന്റോ എന്നിവ ബ്ലോക്ക് പഞ്ചായത്ത് പ്രസിഡന്റ് പി.എ.എം. ബഷീർ വിതരണം ചെയ്തു. ബ്ലോക്ക് പഞ്ചായത്ത് വൈസ് പ്രസിഡന്റ് നിസമോൾ ഇസ്മായിൽ അധ്യക്ഷത വഹിച്ചു.
പഞ്ചായത്ത് പ്രസിഡന്റുമാരായ പി.കെ. ചന്ദ്രശേഖരൻ നായർ, പി.എം. മജീദ്, എൻ.എം. ജോസഫ്, ബ്ലോക്ക് പഞ്ചായത്ത് സ്ഥിരംസമിതി അധ്യക്ഷരായ ജോമി തെക്കേക്കര, ജയിംസ്, സാലി ഐപ്, ജയിംസ് കോറന്പേൽ, പഞ്ചായത്ത് വൈസ് പ്രസിഡന്റുമാരായ ബിന്ദു ശശി, ശോഭ വിനയൻ, ബ്ലോക്ക് പഞ്ചായത്തംഗങ്ങളായ ആനിസ് ഫ്രാൻസിസ്, ലിസി ജോസഫ്, ആഷ ജയിംസ്, ടി.കെ. കുഞ്ഞുമോൻ, എക്സ്റ്റൻഷൻ ഓഫീസർ എം.എസ്. സിദ്ധിഖ് തുടങ്ങിയവർ പ്രസംഗിച്ചു.