ലങ്കയെ ദഹിപ്പിച്ച മിയാൻ മാജിക് : Deepika.com Sports News |

Click here for detailed news of all items

ലങ്കയെ ദഹിപ്പിച്ച മിയാൻ മാജിക്

Monday, September 18, 2023 1:09 AM IST

കൊളംബോ: വെറും 34 പന്തിൽ ഒരു ഏകദിന ക്രിക്കറ്റിന്‍റെ ഫലം നിർണയിക്കപ്പെട്ട ദിനം, അതായിരുന്നു സെപ്റ്റംബർ 17 ഞായർ. ഏകദിന ക്രിക്കറ്റല്ലേ, ഒരു ചായയൊക്കെ കുടിച്ച് റിലാക്സായി ടെലിവിഷന്‍റെ/ഗാഡ്ജറ്റിന്‍റെ മുന്നിൽ ഇരിക്കാമെന്നു കരുതിയവർക്ക് മഹാനഷ്ടം. കാരണം, ഏഷ്യ കപ്പ് ഫൈനലിൽ ടോസ് നേടി ബാറ്റിംഗ് തെരഞ്ഞെടുത്ത ശ്രീലങ്കയ്ക്കു ശ്വാസം വിടാൻപോലും അവസരം നൽകാതെ മുഹമ്മദ് സിറാജിന്‍റെ നേതൃത്വത്തിൽ ഇന്ത്യൻ പേസർമാർ കത്തിക്കയറി. ഇന്നിംഗ്സിലെ ആദ്യ 34 പന്ത് കഴിഞ്ഞപ്പോൾ ശ്രീലങ്ക ആറ് വിക്കറ്റ് നഷ്ടത്തിൽ 12 റണ്‍സ് എന്ന പരിതാപകരമായ സ്ഥിതിയിൽ, മഴപെയ്താലും മാനം ഇടിഞ്ഞാലും ഇന്ത്യ ജയിക്കുന്ന അവസ്ഥ!

ഇന്നിംഗ്സിലെ മൂന്നാം പന്തിൽ ജസ്പ്രീത് ബുംറ തുടങ്ങിവച്ച വിക്കറ്റ് വേട്ട പിന്നീട് സിറാജും ഹാർദിക് പാണ്ഡ്യയും ഏറ്റെടുത്തതോടെ കൊളംബോയിൽ അരങ്ങേറിയത് അക്ഷരാർഥത്തിൽ ലങ്കാദഹനം. സിറാജ് ഏഴ് ഓവറിൽ 21 റണ്‍സിന് ആറും ഹാർദിക് 2.2 ഓവറിൽ മൂന്നിനു മൂന്നും ബുംറ അഞ്ച് ഓവറിൽ 23ന് ഒരു വിക്കറ്റും വീഴ്ത്തിയതോടെ 15.2 ഓവറിൽ ശ്രീലങ്ക 50നു പുറത്ത്.

തീരെ ചെറിയ ലക്ഷ്യത്തിനായി ക്യാപ്റ്റൻ രോഹിത് ശർമ ബാറ്റ് കൈയിലെടുക്കാൻ തുനിഞ്ഞില്ല. പകരം ശുഭ്മാൻ ഗില്ലിനൊപ്പം ക്രീസിലേക്ക് അയച്ചത് ഇഷാൻ കിഷനെ. 19 പന്തിൽ 27 റണ്‍സുമായി ഗില്ലും 18 പന്തിൽ 23 റണ്‍സുമായി ഇഷാനും പുറത്താകാതെ നിന്ന് ഇന്ത്യയെ 6.1 ഓവറിൽ 51 റണ്‍സിലെത്തിച്ച് 10 വിക്കറ്റ് ജയം സമ്മാനിച്ചു. അതോടെ 2023 ഏഷ്യ കപ്പ് ഏകദിന ക്രിക്കറ്റ് കിരീടം ഇന്ത്യക്ക്. 100 ഓവർ അരങ്ങേറേണ്ട ഏകദിന മത്സരത്തിൽ എറിയേണ്ടിവന്നത് ആകെ 21.3 ഓവർ മാത്രം! മിയാൻ (സിറാജിന്‍റെ ചെല്ലപ്പേര്) മാജിക്കിൽ ഇന്ത്യക്ക് ഏഷ്യ കപ്പ്.

സിറാജിന്‍റെ ലങ്കാദഹനം

കുശാൽ പെരേരയെ (0) കെ.എൽ. രാഹുലിന്‍റെ ഗ്ലൗസിനുള്ളിൽ എത്തിച്ച് ജസ്പ്രീത് ബുംറയാണ് ലങ്കയുടെ ആദ്യ വിക്കറ്റ് വീഴ്ത്തിയത്. ബുംറയുടെ ഉജ്വല സ്വിംഗ് ആക്രമണത്തിനൊപ്പം ചേർന്ന സിറാജ് വിക്കറ്റ് വേട്ടയുടെ വേഗം കൂട്ടി. ലങ്കൻ ഇന്നിംഗ്സിൽ രണ്ടക്കം കാണാൻ സാധിച്ചത് കുശാൽ മെൻഡിസിനും (17), ദുശാൻ ഹേമന്തയ്ക്കും (13 നോട്ടൗട്ട്) മാത്രമാണ്.

0, 0, 0, 0, 0, 0 (ഒന്നാം ഓവർ)
w, 0, w, w, 4, w (രണ്ടാം ഓവർ)
0, 0, 0, w, 0, 1 (മൂന്നാം ഓവർ)
1, 0, 0, 0, 0, 0 (നാലാം ഓവർ)
0, 1, 0, 0, 0, 0 (അഞ്ചാം ഓവർ)

ഇതായിരുന്നു സിറാജിന്‍റെ ആദ്യ അഞ്ച് ഓവർ. ഏകദിന ക്രിക്കറ്റ് ചരിത്രത്തിൽ പവർപ്ലേയിലെ ഏറ്റവും മികച്ച സ്പെൽ... തന്‍റെ രണ്ടാം ഓവറിലായിരുന്നു സിറാജ് ഉഗ്രരൂപം പൂണ്ടത്. രണ്ടാം ഓവറിൽ നാല് വിക്കറ്റ് സിറാജ് പിഴുതു.

16 പന്തിൽ റിക്കാർഡ്

അഞ്ചു വിക്കറ്റ് നേട്ടം സ്വന്തമാക്കാൻ വെറും 16 പന്ത് മാത്രമായിരുന്നു മുഹമ്മദ് സിറാജിനു വേണ്ടിവന്നത്. പുരുഷ ഏകദിന ക്രിക്കറ്റ് ചരിത്രത്തിൽ ഏറ്റവും വേഗമേറിയ അഞ്ച് വിക്കറ്റ് നേട്ടം എന്ന റിക്കാർഡും സിറാജ് ഇതോടെ സ്വന്തമാക്കി. ശ്രീലങ്കയുടെ ചാമിന്ദ വാസ്, യുഎസ്എയുടെ അലി ഖാൻ എന്നിവരും 16 പന്തിൽ അഞ്ചു വിക്കറ്റ് വീഴ്ത്തിയിട്ടുണ്ട്. 2002നുശേഷമുള്ള കണക്കാണിത്. 2002നുശേഷമാണ് ബോൾ ബൈ ബോൾ ഡാറ്റ സൂക്ഷിക്കാൻ തുടങ്ങിയത്. 2003ൽ ബംഗ്ലാദേശിനെതിരേയായിരുന്നു ചാമിന്ദ വാസ് 16 പന്തിൽ അഞ്ചു വിക്കറ്റ് തികച്ചത്. ഏകദിന കരിയറിൽ സിറാജിന്‍റെ മികച്ച ബൗളിംഗ് പ്രകടനമാണ് 21 റണ്‍സിന് ആറ് വിക്കറ്റ്.

അതിവേഗം 50 വിക്കറ്റ്

ഏകദിന ക്രിക്കറ്റിൽ അതിവേഗം (ബോൾ കണക്ക് അടിസ്ഥാനത്തിൽ) 50 വിക്കറ്റ് തികയ്ക്കുന്ന ഇന്ത്യൻ ബൗളർ എന്ന നേട്ടത്തിനും മുഹമ്മദ് സിറാജ് അർഹനായി. 1002 പന്തിലാണ് സിറാജ് ഏകദിനത്തിൽ 50 വിക്കറ്റ് നേട്ടമാഘോഷിച്ചത്. ഇക്കാര്യത്തിൽ ലോകത്തിൽ രണ്ടാമനാണ് സിറാജ്. ശ്രീലങ്കയുടെ അജന്ത മെൻഡിസിന്‍റെ പേരിലാണു ലോക റിക്കാർഡ്.

ഏകദിന ക്രിക്കറ്റിൽ ഇന്ത്യക്കായി ഒരു മത്സരത്തിൽ ആറു വിക്കറ്റ് നേട്ടം സ്വന്തമാക്കുന്ന 11-ാമത് ബൗളറാണ് സിറാജ്. ഏഷ്യ കപ്പ് ഏകദിന ക്രിക്കറ്റ് ചരിത്രത്തിൽ ഏറ്റവും ചുരുങ്ങിയ സ്കോറാണ് ശ്രീലങ്കയുടെ 15.2 ഓവറിൽ 50. ഏകദിന ക്രിക്കറ്റിൽ ശ്രീലങ്കയുടെ ഏറ്റവും ചെറിയ രണ്ടാമത്തെ സ്കോറുമാണിത്, ആദ്യം ബാറ്റ് ചെയ്ത് ഏറ്റവും ചുരുങ്ങിയ ഓവറിനുള്ളിൽ പുറത്താകുന്നതിൽ ലോകത്തിൽ രണ്ടാമതും.

ഇന്ത്യ, രോഹിത് റിക്കാർഡിൽ

263 പന്ത് ബാക്കിനിൽക്കേയായിരുന്നു ഇന്ത്യയുടെ 10 വിക്കറ്റ് ജയം. ചേസിംഗിൽ ഏറ്റവും കൂടുതൽ പന്ത് ബാക്കിനിൽക്കേയുള്ള ഇന്ത്യയുടെ ജയമാണിത്. ഏഷ്യ കപ്പിൽ ഇന്ത്യയുടെ എട്ടാം ചാന്പ്യൻഷിപ്പാണ്. ഏഷ്യ കപ്പിൽ ഏറ്റവും കൂടുതൽ ചാന്പ്യന്മാരായതിന്‍റെ റിക്കാർഡ് ഇന്ത്യ പുതുക്കി.

ഏകദിന ഏഷ്യ കപ്പ് കിരീടം രണ്ട് തവണ സ്വന്തമാക്കിയ ക്യാപ്റ്റൻ എന്ന നേട്ടത്തിൽ രോഹിത് ശർമ എം.എസ്. ധോണി, മുഹമ്മദ് അസ്ഹറുദ്ദിൻ എന്നിവർക്കൊപ്പമെത്തി. ഒരു ടീമിനെതിരേ ഏറ്റവും കൂടുതൽ ജയമെന്നതിൽ ലങ്കയ്ക്കെതിരായ റിക്കാർഡ് 98 ആയും ഇന്ത്യ പുതുക്കി.
സിറാജാണ് പ്ലെയർ ഓഫ് ദ മാച്ച്. ഇന്ത്യൻ സ്പിന്നർ കുൽദീപ് യാദവ് പരന്പരയുടെ താരമായി.

മിയാൻ

1994 മാർച്ച് 13ന് ഹൈദരാബാദിൽ ജനിച്ച മുഹമ്മദ് സിറാജ് ടീം അംഗങ്ങൾക്കിടയിൽ അറിയപ്പെടുന്നത് മിയാൻ എന്ന്. മിയാൻ ഭായ് എന്നും സിറാജിനെ സഹതാരങ്ങൾ വിളിക്കുന്നു.
പേർഷ്യയിൽനിന്നാണ് മിയാൻ എന്ന വാക്കിന്‍റെ ഉദ്ഭവം. മുസ്‌ലിം ജെന്‍റിൽമാൻ എന്നതാണ് മിയാന്‍റെ അർഥം. സിറാജിനോടുള്ള ബഹുമാനവും സ്നേഹവും പ്രകടിപ്പിക്കുന്നതിന്‍റെ ഭാഗമായാണ് സഹതാരങ്ങളും അഭ്യുദയകാംഷികളും മിയാൻ എന്ന് അദ്ദേഹത്തെ വിളിക്കുന്നത്.

സ്കോർ കാർഡ്

ലങ്കൻ ഇന്നിംഗ്സ്: നിസാങ്ക സി ജഡേജ സിറാജ് 2, കുശാൽ പെരേര സി രാഹുൽ ബി ബുംറ 0, കുശാൽ മെൻഡിസ് ബി സിറാജ് 17, സമരവിക്രമ എൽബിഡബ്ല്യു ബി സിറാജ് 0, അസലങ്ക സി ഇഷാൻ ബി സിറാജ് 0, ധനഞ്ജയ സി രാഹുൽ ബി സിറാജ് 4, ശനക ബി സിറാജ് 0, വെല്ലലേഗ സി രാഹുൽ ബി ഹാർദിക് 8, ഹേമന്ത നോട്ടൗട്ട് 13, മദുഷാൻ സി കോഹ്‌ലി ബി ഹാർദിക് 1, പതിരാന സി ഇഷാൻ ബി ഹാർദിക് 0, എക്സ്ട്രാസ് 5, ആകെ 15.2 ഓവറിൽ 50.

വിക്കറ്റ് വീഴ്ച: 1-1, 2-8, 3-8, 4-8, 5-12, 6-12, 7-33, 8-40, 9-50, 10-50.
ബൗളിംഗ്: ബുംറ 5-1-23-1, സിറാജ് 7-1-21-6, ഹാർദിക് 2.2-0-3-3, കുൽദീപ് 1-0-1-0.
ഇന്ത്യൻ ഇന്നിംഗ്സ്: ഇഷാൻ നോട്ടൗട്ട് 23, ശുഭ്മാൻ ഗിൽ നോട്ടൗട്ട് 27, എക്സ്ട്രാസ് 1, ആകെ 6.1 ഓവറിൽ 51/0.
ബൗളിംഗ്: മദുഷാൻ 2-0-21-0, പതിരാന 2-0-21-0, വെല്ലലേഗ 2-0-7-0, അസലങ്ക 0.1-0-1-0.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.