ADVERTISEMENT

ADVERTISEMENT

ഇടവകദിനവും പൊതുസമ്മേളനവും

നെന്മാറ: ക്രിസ്തുരാജ ദേവാലയത്തിൽ ഇടവകദിനവും പൊതുസമ്മേളനവും നടത്തി. വികാരി ജനറാൾ മോൺ ജീജോ ചാലയ്ക്കൽ ഉദ്ഘാടനം ചെയ്തു. വികാരി ഫാ. സെബാസ്റ്റ്യൻ താമരശ്ശേരി അധ്യക്ഷനായി.

വിശുദ്ധ കുർബാനക്കു ശേഷം സമ്മാനദാനം, വിശിഷ്ട വ്യക്തികളെ ആദരിക്കൽ, കലാപരിപാടികൾ തുടർന്ന് സ്നേഹ വിരുന്നും നടന്നു. സെന്‍റ് റീത്താസ് കോൺവന്‍റ് സുപ്പീരിയർ സിസ്റ്റർ ബീഡ് സിഎംസി, പാസ്റ്ററൽ കൗൺസിൽ അംഗം ജീസൻ പതിയാൻ, കെ.എഫ്. ആന്‍റണി, കൈകാരന്മാർ ടോമി ഒളശയിൽ, ഷാജി കളമ്പാടൻ തുടങ്ങിയവർ പ്രസംഗിച്ചു.

ADVERTISEMENT

തോറ്റു തുന്നംപാടി കുടുംബ പ്രാരബ്ധങ്ങൾ; പെൺകുഞ്ഞുങ്ങൾ പൊൻകുഞ്ഞുങ്ങളായി

ഷൊർണൂർ: കൃഷ്ണനും ലീലയ്ക്കും സമയംതെളിഞ്ഞു. മൂന്നുപെൺമക്കളും അധ്യാപികമാരായി. കൂലിപ്പണിക്കാരായ പെരുമണ്ണൂരിലെ കൃഷ്ണനും ലീലക്കും പറയാനുള്ളതു പെൺകുഞ്ഞ് പൊൻകുഞ്ഞെന്ന ആപ്തവാക്യം നിർവൃതിയായി മാറിയതിന്‍റെ കഥ. സ്കൂൾ തുറക്കുന്നതിന് ഒരാഴ്ചമുമ്പാണ് മൂന്നാമത്തെ മകൾ നിത്യയ്ക്കും സർക്കാർസ്കൂളിൽ അധ്യാപികയാകാൻ അറിയിപ്പ് കിട്ടിയത്. ഇതോടെയാണ് ദിവസക്കൂലിക്കാരനായ കൃഷ്ണന്‍റെയും തൊഴിലുറപ്പുജോലിക്കുപോകുന്ന ലീലയുടെയും ഭാഗ്യം ശരിക്കും തെളിഞ്ഞത്. മൂന്നുമക്കളും അധ്യാപികമാരായി. ധന്യ, ദിവ്യ എന്നിവർ നേരത്തേതന്നെ അധ്യാപകജോലിയിൽ പ്രവേശിച്ചിരുന്നു. സാക്ഷരതാ ക്ലാസിൽനിന്ന് നേടിയ വിദ്യാഭ്യാസംമാത്രമാണ് കൃഷ്ണനുള്ളതെങ്കിലും തന്‍റെ മൂന്നു മക്കളെയും മറ്റുള്ളവർക്ക് അക്ഷരം പകർന്നുനൽകാൻ യോഗ്യരാക്കിയതിൽ ആഹ്ലാദം. ലീലയ്ക്ക് അഞ്ചാം ക്ലാസ് വിദ്യാഭ്യാസമേയുള്ളൂ. മൂവരെയും അധ്യാപികരാക്കണമെന്ന സ്വപ്നയാഥാർഥ്യത്തിനു പിന്നിൽ മാതാപിതാക്കളുടെ വലിയ പ്രാരബ്ധങ്ങളുടെ കഥയുണ്ടെന്നു മകൾ ധന്യ സാക്ഷ്യപ്പെടുത്തുന്നു. മൂത്തമകൾ ധന്യ 2016ൽ കോതച്ചിറ ജിഎൽപിഎസിൽ അധ്യാപികയായി. രണ്ടാമത്തെ മകൾ ദിവ്യ 2021ൽ ചാത്തനൂർ ജിഎൽപിഎസിലും അധ്യാപികയായി. മൂന്നാമത്തെ മകളും പ്രതീക്ഷയോടെ പിഎസ്‌സി ഫലം കാത്തിരിക്കുന്നതിനിടയിലാണ് അഡ്വൈസ് മെമ്മോ വന്നത്. മൂന്നുമക്കളും സർക്കാർ വിദ്യാലയത്തിൽമാത്രമാണ് പഠിച്ചതെന്നും രക്ഷിതാക്കളുടെ ജീവിതപ്രയാസം അറിയാവുന്ന ഇവർ ഒരിക്കൽപ്പോലും ട്യൂഷനു പോയിട്ടില്ലെന്നും കൃഷ്ണൻ പറയുന്നു. മരുമക്കളായ സുധീഷ്, കൃഷ്ണൻകുട്ടി, മുരളീധരൻ എന്നിവരും പിന്തുണയുമായി ഇവരോടൊപ്പമുണ്ട്. മക്കൾ അധ്യാപികമാരായെങ്കിലും തങ്ങളുടെ ജോലി ഉപേക്ഷിക്കാൻ ഈ മാതാപിതാക്കൾ തയാറല്ല. ആരോഗ്യമുള്ള കാലം അധ്വാനിച്ചുതന്നെ ജീവിതം നയിക്കാനാണ് ഇവരുടെ തീരുമാനം.

മീൻവല്ലം വിനോദസഞ്ചാരകേന്ദ്രത്തിൽ മൊബൈൽടവർ സ്ഥാപിക്കാൻ നടപടി

കല്ലടിക്കോട്‌: കരിമ്പ പഞ്ചായത്തിലെ മീൻവല്ലം വിനോദസഞ്ചാരകേന്ദ്രത്തിൽ ബിഎസ്‌എൻഎൽ മൊബൈൽ ടവർ സ്ഥാപിക്കണമെന്ന പൊതുജനങ്ങളുടെ ആവശ്യത്തെത്തുടർന്ന് വി.കെ ശ്രീകണ്ഠൻ എംപിയുടെ ഇടപെടൽ ഫലം കണ്ടു. നിർമാണം ഉടൻ ആരംഭിക്കാൻവേണ്ട നടപടികൾ കൈക്കൊള്ളാൻ ഉദ്യോഗസ്ഥരോടാവശ്യപ്പെട്ടിട്ടുണ്ടെന്നു കഴിഞ്ഞ ദിവസം എംപിക്ക്‌ കേന്ദ്രമന്ത്രിയുടെ മറുപടി ലഭിച്ചു. നേരിട്ടു സ്ഥലംസന്ദർശിക്കുകയും കാര്യങ്ങൾ ബോധ്യപ്പെട്ടതിന്‍റെ അടിസ്ഥാനത്തിൽ കേന്ദ്രമന്ത്രി ജ്യോതിരാദിത്യ സിന്ധ്യയ്ക്ക് എംപി നേരത്തെ കത്തുനൽകിയിരുന്നു.മൊബൈൽ കണക്റ്റിവിറ്റിയുടെ ലഭ്യത വിനോദസഞ്ചാരികളുടെ എണ്ണംകുറയുവാൻ കാരണയായിട്ടുണ്ട്. മീൻവല്ലത്തിനും, മരുതുംകാടിനും ഇടയിൽ സ്ഥിതിചെയ്യുന്ന മൂന്നേക്കർ പ്രദേശത്ത് മൊബൈൽ ടവർ സ്ഥാപിക്കുകയാണെങ്കിൽ ടൂറിസം പ്രവർത്തനവുമായി ബന്ധപ്പെട്ടവർക്കും, പ്രദേശവാസികൾക്കും വളരെ ഉപകാരപ്രദമായിരിക്കുമെന്നും എംപി കത്തിലൂടെ ആവശ്യപ്പെട്ടിരുന്നു.

വെള്ളപ്പാറ സാൻജോ സെൻട്രൽ സ്കൂളിൽ പ്രവേശനോത്സവം

പാലക്കാട്: വെള്ളപ്പാറ സാൻജോ സെൻട്രൽ സ്കൂളിൽ 2025- 26 അധ്യായന വർഷത്തെ പ്രവേശനോത്സവം ആഘോഷിച്ചു. ചടങ്ങിൽ സാൻജോ ഫാർമസി കോളജ് പ്രിൻസിപ്പൽ ഡോ.കെ.ആർ. വിനോദ് ഉദ്ഘാടനം നിർവഹിച്ചു. രക്ഷിതാക്കളും അധ്യാപകരും വിദ്യാർഥികളും പങ്കെടുത്ത ചടങ്ങിൽ സ്കൂൾ പ്രിൻസിപ്പൽ ഡോ. സനിൽ ജോസ് അധ്യക്ഷത വഹിച്ചു. സ്കൂൾ അഡ്മിനിസ്ട്രേറ്റർ ഫാ. നിതിൻ ജോസഫ് സ്വാഗതം ആശംസിച്ചു. വൈസ് പ്രിൻസിപ്പൽമാരായ അരുൺ വൈശാഖ്, അജോ ജോസഫ്, പിടിഎ അംഗങ്ങളായ സിജു മാത്യു പുഷ്കല എന്നിവർ പ്രസംഗിച്ചു. മുൻവർഷത്തെ പഠനത്തിൽ മികവുപുലർത്തിയ വിദ്യാർഥികളെ ചടങ്ങിൽ അനുമോദിച്ചു.

പ്രവേശനോത്സവവും സ്കൂൾബസ് ഉദ്ഘാടനവും

മണ്ണാർക്കാട്: എടത്തനാട്ടുകര ഗവ. ഓറിയന്‍റൽ ഹയർസെക്കൻഡറി സ്കൂളിൽ പ്രവേശനോത്സവവും എംഎൽഎ യുടെ ആസ്തിവികസന ഫണ്ടിൽനിന്നും അനുവദിച്ച സ്കൂൾബസിന്‍റെ ഉദ്ഘാടനവും സ്കൂളിൽ വർണാഭമായി നടന്നു. എൻ. ഷംസുദ്ദീൻ എംഎൽഎ ഉദ്ഘാടനം ചെയ്തു. അലനല്ലൂർ ഗ്രാമപഞ്ചായത്ത് പ്രസിഡന്‍റ് സജ്ന സത്താർ അധ്യക്ഷത വഹിച്ചു. ഗ്രാമപഞ്ചായത്ത് അംഗം അക്ബറലി പാറോക്കോട്ട്, പിടിഎ പ്രസിഡന്‍റ് പി. അഹമ്മദ് സുബൈർ, വൈസ് പ്രസിഡന്‍റ് അബ്ദുസ്സലാം പടുകുണ്ടിൽ, എംപിടിഎ പ്രസിഡന്‍റ് ടി.പി. സൈനബ തുടങ്ങിയവർ പ്രസംഗിച്ചു.

മോർച്ചറി ഫ്രീസറും പുരുഷവാർഡും ഉദ്ഘാടനം ചെയ്തു

ചെര്‍പ്പുളശേരി: സാമൂഹികാരോഗ്യ കേന്ദ്രത്തില്‍ കൂടുതല്‍ സൗകര്യങ്ങള്‍ ഒരുക്കുന്നതിന്‍റെ ഭാഗമായി നവീകരിച്ച പുരുഷവാര്‍ഡും മോര്‍ച്ചറിയില്‍ സ്ഥാപിച്ച ഫ്രീസറും പി. മമ്മിക്കുട്ടി എംഎല്‍എ ഉദ്ഘാടനം ചെയ്തു. 29 ലക്ഷം രൂപ ചെലവഴിച്ചാണ് 20 പേരെ കിടത്തിച്ചികിത്സിക്കാവുന്ന വാര്‍ഡ് ചെര്‍പ്പുളശേരി സാമൂഹികാരോഗ്യ കേന്ദ്രത്തില്‍ നവീകരിച്ചത്. ഉദ്ഘാടന ചടങ്ങില്‍ നഗരസഭാ ചെയര്‍മാന്‍ പി. രാമചന്ദ്രന്‍ അധ്യക്ഷനായി. നഗരസഭാ ചെയര്‍പേഴ്സണ്‍ സി. കമലം, സ്ഥിരംസമിതി അധ്യക്ഷരായ മിനി ടീച്ചര്‍, കെ.ടി. പ്രമീള, സാദിഖ് ഹുസൈന്‍, കൗണ്‍സിലര്‍മാരായ പി. വിഷ്ണു, കെ.എം. ഇസ്ഹാക്ക്, നഗരസഭാ സെക്രട്ടറി വി.ടി. പ്രിയ, രാഷ്ട്രീയ പാര്‍ട്ടി പ്രതിനിധികള്‍ തുടങ്ങിയവര്‍ പ്രസംഗിച്ചു. മെഡിക്കല്‍ ഓഫീസര്‍ ഷാഹുല്‍ ഹമീദ്, അസിസ്റ്റന്‍റ് എന്‍ജിനീയര്‍ പ്രജിഷ എന്നിവര്‍ പങ്കെടുത്തു.

നടുവട്ടം ഹയർസെക്കൻഡറി സ്കൂളിനു പുതിയ കെട്ടിടമായി

ഷൊർണൂർ: നടുവട്ടം ഗവ. ജനതാ ഹയർസെക്കൻഡറി സ്‌കൂളിന് ഇനി പുതിയ കെട്ടിടം. വിദ്യാഭ്യാസ വകുപ്പിന്‍റെ വിദ്യാകിരണം പദ്ധതിയിൽ ഉൾപ്പെടുത്തി നിർമിക്കുന്ന കെട്ടിടം തറക്കല്ലിട്ട ശേഷം ഒരു വർഷത്തിനകമാണ് പണി പൂർത്തീകരിച്ചത്. ഹയർസെക്കൻഡറിക്ക് വേണ്ടി നിർമിച്ചതാണ് ഈ കെട്ടിടം. നേരത്തെ മുഹമ്മദ് മുഹ്‌സിൻ എംഎൽഎയുടെ 2016-17 വർഷത്തെ ആസ്തി വികസന ഫണ്ട് ഉപയോഗിച്ച് നിർമിച്ച കെട്ടിടം കഴിഞ്ഞവർഷം ഉദ്ഘാടനം ചെയ്തിരുന്നു. 14 ക്ലാസ് മുറികൾ ആവശ്യമുള്ള സ്‌കൂളിൽ ഏറെക്കാലമായി ക്ലാസ് റൂമുകളുടെ വലുപ്പക്കുറവും പരിമിതിയായിരുന്നു. ഹയർസെക്കൻഡറിക്ക് നിർദേശിക്കപ്പെട്ടിട്ടുള്ള വലുപ്പത്തിലുള്ള നിർദിഷ്ട ക്ലാസ് റൂം ഇല്ലാതെയായിരുന്നു നടുവട്ടം ജനതയിൽ ഒൻപത് ക്ലാസ് മുറികൾ പ്രവർത്തിച്ചിരുന്നത്. 2022 അധ്യയനവർഷത്തിൽ പഠനസൗകര്യമില്ലെന്ന് കാണിച്ച് വിദ്യാർഥികൾ ബാലാവകാശ കമ്മിഷനു പരാതി നൽകിയിരുന്നു. കമ്മീഷന്‍റെ നിർദേശപ്രകാരം സർക്കാർ രണ്ടുകോടി രൂപ പുതിയ കെട്ടിടം പണിയുന്നതിനായി നൽകി. തുടർന്നാണ് പുതിയ കെട്ടിടം വന്നത്.

നവകേരള സദസ്: ഷൊര്‍ണൂരിന് ഏഴുകോടി

ഷൊര്‍ണൂര്‍: മണ്ഡലത്തില്‍ മുഖ്യമന്ത്രിയുടെ നേതൃത്വത്തില്‍ നടന്ന നവകേരള സദസില്‍ നിര്‍ദേശിക്കപ്പെട്ട എട്ട് പ്രധാന പദ്ധതികള്‍ക്കായി ഏഴുകോടിരൂപ സര്‍ക്കാര്‍ അനുവദിച്ചു. യാത്രക്കാരായി വരുന്ന സ്ത്രീകള്‍ക്കും കുട്ടികള്‍ക്കും കുറഞ്ഞ ചെലവില്‍ സുരക്ഷിതമായി താമസിക്കാന്‍ ഷൊര്‍ണൂര്‍ റെയില്‍വേ സ്റ്റേഷന് മുന്‍വശത്ത് ഷീലോഡ്ജ് നിര്‍മിക്കുന്നതിന് മൂന്നരക്കോടി രൂപയും തൃക്കടീരി ഗ്രാമപഞ്ചായത്തിലെ കാക്കത്തോട് പാലം നിര്‍മാണത്തിനു ഒരുകോടി രൂപയുമാണ് അനുവദിച്ചത്. കൂടാതെ ചെര്‍പ്പുളശ്ശേരി നഗരസഭയില്‍ കച്ചേരിക്കുന്ന് പോലീസ് സ്റ്റേഷന്‍- ഐഡിയല്‍ കോളജ് റോഡില്‍ കാക്കാത്തോടിനുകുറുകെ പുതിയപാലം നിര്‍മാണം, വെള്ളിനേഴി ഗ്രാമപഞ്ചായത്തില്‍ മുതലമൂര്‍ഖന്‍കടവില്‍ തൂക്കുപാലം നിര്‍മ്മാണ പൂര്‍ത്തികരണം, നെല്ലായ കുടുംബാരോഗ്യകേന്ദ്രം പുതിയ കെട്ടിടനിര്‍മാണം, വാണിയംകുളം കുടുംബാരോഗ്യകേന്ദ്രം പുതിയ കെട്ടിടനിര്‍മാണം, ചളവറ മുണ്ടേക്കോട്ടുകുറിശ്ശി കുടുംബാരോഗ്യകേന്ദ്രം പുതിയ കെട്ടിടനിര്‍മാണം, അനങ്ങനടി ആയുര്‍വേദ ഡിസ്പെന്‍സറി പുതിയ കെട്ടിടം നിര്‍മാണം എന്നീ പദ്ധതികള്‍ക്കായി 50 ലക്ഷം രൂപ വീതവുമാണ് അനുവദിച്ചത്.

ദേശീയ കുടുംബക്ഷേമപദ്ധതി സഹായം 2014 വരെ നൽകിയതായി ജില്ലാ കളക്ടർ

പാലക്കാട്: ദേശീയ കുടുംബക്ഷേമപദ്ധതി പ്രകാരം അനുവദിക്കപ്പെട്ട തുക നിലവിൽ 2014 വരെയുള്ള അപേക്ഷകർക്കാണ് അനുവദിച്ചിട്ടുള്ളതെന്നു ജില്ലാ കളക്ടർ മനുഷ്യാവകാശ കമ്മീഷനെ അറിയിച്ചു. 2011 ൽ നൽകിയ അപേക്ഷയിൽ തീരുമാനമായില്ലെന്നു പരാതിപ്പെട്ട് സമർപ്പിച്ച അപേക്ഷയിൽ കമ്മീഷൻ ജുഡീഷ്യൽ അംഗം കെ. ബൈജുനാഥ് ആവശ്യപ്പെട്ട റിപ്പോർട്ടിലാണ് ഇക്കാര്യമുള്ളത്. പരാതിക്കാരിക്ക് 20,000 രൂപ അനുവദിക്കാൻ 2021 ജനുവരി ആറിന് തീരുമാനിച്ചിട്ടുണ്ടെന്നു ജില്ലാ കളക്ടർ കമ്മീഷനെ അറിയിച്ചു. 2014 വരെയുള്ള അപേക്ഷകർക്കാണ് ധനസഹായം അനുവദിച്ചിട്ടുള്ളതെന്നും ഫണ്ടിന്‍റെ അപര്യാപ്തത കാരണം അതിനുശേഷം ധനസഹായം അനുവദിച്ച ഗുണഭോക്താക്കൾക്ക് തുക വിതരണം ചെയ്യാൻ കഴിഞ്ഞിട്ടില്ലെന്നും റിപ്പോർട്ടിൽ പറഞ്ഞു. ഫണ്ട് ലഭ്യതക്കനുസരിച്ച് മുൻഗണനാ ക്രമത്തിൽ ധനസഹായം അനുവദിക്കുന്നതാണെന്നും റിപ്പോർട്ടിൽ പറയുന്നു. ആലത്തൂർ സ്വദേശി പ്രേമകുമാരി സമർപ്പിച്ച പരാതിയിലാണ് നടപടി. പരാതിക്കാരിയുടെ ഭർത്താവ് 2011 ൽ ഹൃദയാഘാതത്താൽ മരിച്ചു. ദേശീയ കുടുംബസഹായനിധി പദ്ധതി പ്രകാരം ആനുകൂല്യത്തിനായി അപേക്ഷിച്ചെങ്കിലും ലഭിച്ചില്ലെന്നാണ് പരാതി.

കടുവഭീഷണി: കടപ്പാറ,കടമപ്പുഴ ഭാഗത്തു സ്ഥാപിച്ച കാമറട്രാപ്പുകൾ മാറ്റിസ്ഥാപിക്കും

മംഗലംഡാം: കടുവയെ കാണപ്പെട്ടിരുന്ന കടപ്പാറക്കടുത്ത് കടമപ്പുഴ, രണ്ടാംപുഴ ഭാഗത്തെ തോട്ടങ്ങളിൽ വനംവകുപ്പ് സ്ഥാപിച്ചിരുന്ന കാമറട്രാപ്പുകൾ മാറ്റി സ്ഥാപിക്കും. വച്ചിരിക്കുന്ന സ്ഥലത്ത് വന്യമൃഗങ്ങളുടെ സഞ്ചാരമൊന്നും കാമറകളിൽ പതിഞ്ഞിട്ടില്ല. ഇതിനാലാണ് ഇന്നുകൂടി കാത്തിരുന്ന് കാമറകൾ ഇതിനടുത്ത് തന്നെ മറ്റിടങ്ങളിലേക്ക് മാറ്റി സ്ഥാപിക്കുകയെന്ന് മംഗലംഡാം ഡെപ്യൂട്ടി റേഞ്ച് ഓഫീസർ ഹാഷിം പറഞ്ഞു. കാമറ സ്ഥാപിച്ചശേഷം കടുവയെ കണ്ടതായി ആരും പറഞ്ഞിട്ടില്ല. കഴിഞ്ഞ വ്യാഴാഴ്ചയാണ് രണ്ടിടങ്ങളിലായി കാമറകൾ സ്ഥാപിച്ചിട്ടുള്ളത്. പ്രദേശത്ത് പലതവണ കടുവയെ കണ്ടതിനെ തുടർന്നാണ് മരങ്ങളിൽ കാമറട്രാപ്പുകൾ സ്ഥാപിച്ചത്.

നിർമാണത്തിലെ അപാകത; മഴയിൽ കനാലിന്‍റെ ഭിത്തി ഇടിഞ്ഞു

കല്ലടിക്കോട്‌: നിർമാണത്തിലെ അപാകതയും മഴയും മണ്ണൊലിപ്പും മൂലം കനാലിന്‍റെ കോൺക്രീറ്റ്‌ ഭിത്തി ഇടിഞ്ഞ്‌ ലക്ഷങ്ങളുടെ നഷ്ടം. കാഞ്ഞിരപ്പുഴ ഇടതുകനാലിന്‍റെ ഇടക്കുർശി ഭാഗത്താണ് കോൺക്രീറ്റ്‌ ഇടിഞ്ഞിരിക്കുന്നത്‌. രണ്ടുമാസം മുമ്പ്‌ ഒരു കോടി രൂപ ചെലവിൽ 89 മീറ്റർ നീളത്തിൽ നിർമിച്ച കോൺക്രീറ്റ്‌ ഭിത്തിയാണ് ‌വെള്ളത്തിന്‍റെ തള്ളൽ മൂലം പൊട്ടിത്തകർന്ന് കനാലിലേയ്ക്ക്‌ മറിഞ്ഞത്‌. എട്ട് അടിയോളം ഉയരത്തിൽ നിർമിച്ച ഭിത്തിയുടെ നിർമാണത്തിലെ പിഴവാണെന്ന് കോൺഗ്രസ്‌ കരിമ്പ മണ്ഡലം കമ്മിറ്റി പ്രസിഡന്‍റ് സി.എം. നൗഷാദ്‌, യുഡിഎഫ്‌ കരിമ്പ മണ്ഡലം ചെയർമാൻ കെ.കെ. ചന്ദ്രൻ, ബാങ്ക്‌ പ്രസിഡന്‍റ് മുഹമ്മദുപ്പ കരിമ്പനയ്ക്കൽ, നവാസ്‌ മുഹമ്മദ്‌, മാത്യു കല്ലടിക്കോട്‌, അസർ എന്നിവർ പറഞ്ഞു. അധികാരികളുടെ അനാസ്ഥയാണ് കനാൽ ഭിത്തി തകരാൻ കാരണമെന്നും നിർമാണത്തിലെ അഴിമതി അവസാനിപ്പിക്കണമെന്നും കമ്പി ഉപയോഗിച്ച്‌ കോൺക്രീറ്റ്‌ചെയ്ത്‌ ഭിത്തി പുനർനിർമിക്കണമെന്നും കോൺഗ്രസ്‌ ആവശ്യപ്പെട്ടു. ജലവിഭവവകുപ്പ്‌ ഓഫീസിലേയ്ക്ക്‌ മാർച്ചും ധർണയും നടത്തുമെന്നും മണ്ഡലം കമ്മിറ്റി പ്രസിഡന്‍റ് പറഞ്ഞു.

ശ്മശാനവിഷയം: നഗരസഭായോഗത്തിൽ ബഹളം

പാലക്കാട്: മാട്ടുമന്ത ശ്മശാനത്തിലെ ജാതിമതിൽ വിവാദത്തെ ചൊല്ലി നഗരസഭ യോഗത്തിൽ ബഹളം. എൻഎസ്എസിനെ ഷെഡ് നിർമിക്കാൻ അനുമതി നൽകിയതിൽ ദൂരുഹതയുണ്ടെന്നാരോപിച്ചാണ് യുഡിഎഫ്- സിപിഎം അംഗങ്ങൾ ബഹളം വെച്ചത്. ആദ്യം മതിൽ നിർമിച്ചുവെങ്കിലും ഇപ്പോൾ വിവാദമായ പശ്ചാത്തലത്തിൽ നിർത്തിവെക്കുകയാണെന്നും തുടർന്ന് മതിൽകെട്ടാൻ ആർക്കും അനുമതി നൽകിയിട്ടില്ലെന്ന് നഗരസഭ വൈസ് ചെയർമാൻ ഇ. കൃഷ്ണദാസ് പറഞ്ഞു. കൗണ്‍സിൽ യോഗത്തിൽ വിഷയത്തെചൊല്ലി പ്രതിപക്ഷഅംഗങ്ങൾ പ്ലക്കാർഡുകൾ ഉയർത്തി ബഹളം ആരംഭിച്ചതോടെയാണ് വൈസ് ചെയർമാൻ എൻഎസ്എസിന് മാട്ടുമന്ത ശ്മശാനത്തിനകത്ത് മതിൽകെട്ടാൻ അനുമതി നൽകിയിട്ടില്ലെന്ന് വ്യക്തമാക്കിയത്. 2023 ൽ വലിയപാടത്തെ എൻഎസ്എസ് യൂണിറ്റ് മാട്ടുമന്ത പൊതുശ്മശാനത്തിൽ എല്ലാവിഭാഗം ആളുകൾക്ക് വേണ്ടിയും സ്വന്തം നിലക്കും ഒരു ഷെഡ് നിർമിച്ചു നൽകാമെന്ന് നഗരസഭയോട് സമ്മതിച്ചിരുന്നു. അന്ന് എല്ലാ കൗണ്‍സിലർമാരും ചേർന്ന കൗണ്‍സിൽ യോഗമാണ് എൻഎസ്എസിന് ഈ അനുമതി നൽകിയത്. പിന്നീട് സമുദായത്തിന് വേണ്ടി ശ്മശാനത്തിനകത്ത് ഷെഡും മതിലും ഉയർത്തിയ എൻഎസ്എസ് നഗരസഭയോട് പറഞ്ഞതിൽ നിന്ന് മാറി പ്രവർത്തിച്ചുവെന്ന് കണ്ടെത്തിയതിനെ തുടർന്ന് നിർമാണം നിർത്തിവെക്കാൻ ആവശ്യപ്പെടുകയായിരുന്നുവെന്നും അദ്ദേഹം പറഞ്ഞു. ജാതിതിരിച്ച് ശ്മശാനത്തിൽ ഇടം നൽകാൻ നഗരസഭ തീരുമാനിച്ചിട്ടില്ലെന്നും വൈസ് ചെയർമാൻ വ്യക്തമാക്കി. എല്ലാ കൗണ്‍സിൽ അംഗങ്ങളും ചേർന്നാണ് എൻഎസ്എസിന് അനുമതി നൽകിയത് എന്ന പരാമർശം വന്നതോടെ യോഗം വീണ്ടും ബഹളത്തിൽ മുങ്ങുകയായിരുന്നു. വിഷയത്തിൽ ചർച്ച അനുവദിക്കാം എന്ന നിലപാട് അധ്യക്ഷ സ്വീകരിച്ചത് പ്രതിപക്ഷ അംഗങ്ങൾ ഏറ്റെടുത്തു.

മുതലമട പഞ്ചായത്തിൽ സിപിഎം പിന്തുണയിൽ കോൺഗ്രസ് വിമതർക്കു വിജയം

മുതലമട: ഗ്രാമപഞ്ചായത്ത് ഭരണസമിതി ചേരിപ്പോരിന് തിരശീലയിട്ട് കോൺഗ്രസിൽനിന്നും പുറത്താക്കിയ പതിനാറാം വാർഡ് മെംബർ ജാസ്മിൻ ഷെയ്ക്കിനെ പ്രസിഡന്‍റായി തെരഞ്ഞെടുത്തു. 20 അംഗങ്ങളുള്ള പഞ്ചായത്തിൽ പ്രസിഡന്‍റ് തെരഞ്ഞെടുവിൽ 13 പേരാണ് പങ്കെടുത്തത്. എട്ട് സിപിഎം, രണ്ട് കോൺഗ്രസ്, മൂന്ന് വിമതകോൺഗ്രസ് അംഗങ്ങൾ എന്നിവരാണ് പങ്കെടുത്തത്. ഇതിൽ വിമത കോൺഗ്രസ് അംഗം ജാസ്മിൻ ഷെയ്ക്കിനു സിപിഎം പിന്തുണയോടെ പത്തും, കോൺഗ്രസിലെ എതിർസ്ഥാനാർഥി നസീമക്ക് മൂന്നും വോട്ടുകൾ ലഭിച്ചു. ഒരു കോൺഗ്രസ് അംഗം കൃഷ്ണമൂർത്തിയും വോട്ടെടുപ്പിൽ നിന്നും വിട്ടുനിന്നു. ഇതോടെ പത്ത് അംഗങ്ങളുടെ പിന്തുണലഭിച്ച ജാസ്മിൻ വിജയിച്ചതായി വരണാധികാരി കൃഷി അസിസ്റ്റന്‍റ് ഡയറക്ടർ സ്മിത സാമുവൽ പ്രഖ്യാപിച്ചു. തുടർന്ന് ജാസ്മിൻ അധികാരമേറ്റു. ഉച്ചക്ക്ശേഷം നടന്ന തെരഞ്ഞെടുപ്പിൽ കോൺഗ്രസ് വിമതപക്ഷ അംഗം പി. വിനേഷിനെ വൈസ്പ്രസിഡന്‍റായി തെരഞ്ഞെടുത്തു. വോട്ടിംഗിൽ പി. വിനേഷ് 15 ൽ 9 വോട്ടുകൾ നേടി വിജയിച്ചു. എതിർ സ്ഥാനാർഥിക്ക് 5 വോട്ട് ലഭിച്ചു. ഒരു വോട്ട് അസാധുവായി. പ്രസിഡന്‍റായി തെരഞ്ഞെടുക്കപ്പെട്ട ജാസ്മിൻ ഷെയ്ക്കിനെ സിപിഎം നേതാക്കൾ ഷാൾ അണിയിച്ച് അനുമോദിച്ചു. പ്രസിഡന്‍റ് തെരഞ്ഞെടുപ്പിൽ മുൻപഞ്ചായത്ത് പ്രസിഡന്‍റ്, വൈസ് പ്രസിഡന്‍റ് ഉൾപ്പെടെ മൂന്നു സ്വതന്ത്രരും മൂന്നു ബിജെപി അംഗങ്ങളും വിട്ടുനിന്നു.

പട്ടികവിഭാഗക്കാരുടെ ഭൂമി കൈയേറുന്നെന്ന പരാതി ഗൗരവമായി പരിശോധിക്കും: കെ. ശാന്തകുമാരി എംഎൽഎ

പാലക്കാട്: പട്ടികജാതി-പട്ടികവർഗ വിഭാഗക്കാർക്ക് അനുവദിച്ച ഭൂമി മറ്റുള്ളവർ കയ്യേറുന്നെന്ന പരാതി ഗൗരവമായി പരിശോധിക്കുമെന്ന് കേരള നിയമസഭ പട്ടികജാതി-പട്ടികവർഗ ക്ഷേമസമിതി ചെയർപേഴ്സണ്‍ കെ. ശാന്തകുമാരി എംഎൽഎ. ജില്ലയിലെ പട്ടികജാതി-പട്ടികവർഗ ക്ഷേമം സംബന്ധിച്ച് കേരള നിയമസഭ പട്ടികജാതി പട്ടികവർഗ ക്ഷേമ സമിതി നടത്തിയ സിറ്റിംഗിൽ സംസാരിക്കുകയായിരുന്നു ചെയർപേഴ്സണ്‍. വിവിധ നഗരസഭകളിലെ എസ്‌സി, എസ്ടി ഫണ്ട് വിനിയോഗത്തെ സംബന്ധിച്ച് വിശദമായ റിപ്പോർട്ട് നിയമസഭാ സമിതിക്ക് കൈമാറണമെന്ന് ചെയർപേഴ്സണ്‍ അറിയിച്ചു. അട്ടപ്പാടി കോട്ടത്തറ വില്ലേജിലെ ഭൂമി കയ്യേറ്റം സംബന്ധിച്ച് രണ്ട് മാസത്തിനകം റിപ്പോർട്ട് നൽകാൻ ഡെപ്യൂട്ടി കളക്ടർക്ക് ചെയർപേഴ്സണ്‍ നിർദ്ദേശം നൽകി. മൂന്ന് ഘട്ടമായി നടത്തുന്ന പരിശോധനയിൽ ഒന്നാംഘട്ടം പൂർത്തീകരിച്ചതായി ജില്ലാ കളക്ടർ സമിതിയെ അറിയിച്ചു. ചിറ്റൂർ ബ്ലോക്ക് പഞ്ചായത്ത് പരിധിയിൽ താമസിക്കുന്ന, പട്ടികജാതി വികസന ഫണ്ട് മുഖേന ഭൂമി ലഭ്യമാക്കാൻ കഴിയാത്ത ചക്കിളിയിൻ വിഭാഗത്തിൽപ്പെട്ടവർക്ക് പുതിയ പദ്ധതി ആവിഷ്കരിച്ച് ഫണ്ട് ലഭ്യമാക്കാനുള്ള നടപടി സ്വീകരിക്കുന്ന വിഷയം സർക്കാരിന്‍റെ ശ്രദ്ധയിൽപ്പെടുത്തും. അട്ടപ്പാടി പരിസ്ഥിതി പുനഃസ്ഥാപന പദ്ധതിയായ അഹാഡ്സിലെ പട്ടികജാതിപട്ടികവർഗ വിഭാഗക്കാരായ മുൻജീവനക്കാരെ സംരക്ഷിക്കണമെന്ന് ആവശ്യപ്പെട്ട് വനപരിപാലന സമിതി നൽകിയ പരാതിയിൽ പ്രത്യേകസിറ്റിംഗ് നടത്തുമെന്ന് ചെയർപേഴ്സണ്‍ അറിയിച്ചു. ആദിവാസി മേഖലകളിലെ തരിശായികിടക്കുന്ന സ്ഥലങ്ങളിൽ കൃഷി ഇറക്കുന്നതിന് വേണ്ട ജലസേചനസൗകര്യം ഒരുക്കാൻ ജലസേചന വകുപ്പിനോടാവശ്യപ്പെട്ടു. പെരിങ്ങോട്ടുകുറിശി ഗ്രാമപഞ്ചായത്തിലെ കണക്കത്തറ കോളനിയിൽ കുടിവെള്ളക്ഷാമം പരിഹരിക്കാൻ വേണ്ട നടപടി സ്വീകരിക്കാനും നിർദേശിച്ചു. പട്ടികജാതി, പട്ടികവർഗക്കാർ ജോലിചെയ്യുന്ന സേവക് സ്ഥാപനത്തിലെ തൊഴിലാളികൾക്ക് മാസംതോറുമുള്ള ശന്പളം അഞ്ചാംതിയതിക്കകം നൽകാനുള്ള നടപടി സ്വീകരിക്കണമെന്നും സമിതി നിർദേശിച്ചു. പാലക്കാട് ജില്ലയിലെ പരാതികളിൽ നടന്ന സിറ്റിംഗിൽ 24 പരാതികൾ പരിഗണിച്ചു. പുതിയതായി 21 പരാതികൾ ലഭിച്ചു. പുതുതായി ലഭിച്ചതിൽ 15 പരാതികൾ സമിതി പരിശോധിക്കും. ആറ്റെണ്ണം ജില്ലാതല പരിശോധനയ്ക്കായി കൈമാറി. കളക്ടറേറ്റ് കോണ്‍ഫറൻസ് ഹാളിൽ നടന്ന സിറ്റിംഗിൽ എംഎൽഎമാരായ പി.പി. സുമോദ്, വി. ശശി, കടകംപള്ളി സുരേന്ദ്രൻ, ജില്ലാ കളക്ടർ ജി. പ്രിയങ്ക, തുടങ്ങിയവർ പങ്കെടുത്തു.

സർവകക്ഷിയോഗം വിളിച്ച് പനയംപാടം റോഡ് നിർമാണം പുനരാരംഭിക്കണം: യുഡിഎഫ്

കല്ലടിക്കോട്: സ്ഥിരം അപകടമേഖലയായ പനയംപാടത്ത് സർവകക്ഷിയോഗം വിളിച്ച് റോഡ് നിർമാണം പുനരാരംഭിക്കണമെന്ന് യുഡിഎഫ് കരിമ്പ മണ്ഡലം കമ്മിറ്റി ആവശ്യപ്പെട്ടു. സിപിഎമ്മിന്‍റെ വികസനവിരുദ്ധ നയങ്ങളും അവരുടെ പ്രവർത്തികളും മറ്റുള്ളവർ അറിയാതിരിക്കുവാൻ വേണ്ടി പനയമ്പാടം റോഡിന്‍റെ കേടുപാടുകൾ തീർക്കാനുള്ള സംവിധാനം സിപിഎം തന്നെ ആട്ടിമറിക്കുകയും ചെയ്തു. എന്തൊക്കെ പണികൾ ആണ് നടത്തേണ്ടതെന്നും ഏതൊക്കെ രീതിയിൽ ചെയ്താലാണ് അവിടുത്തെ കാര്യങ്ങൾ വ്യക്തമായി നടപ്പാക്കാനാകുക എന്നറിയാതെ എംഎൽഎയെ വെച്ചുകൊണ്ട് ഉദ്ഘാടനം നടത്താൻ തീരുമാനിക്കുകയും അതിനെ യുഡിഎഫ് എതിർക്കുകയും ഉദ്ഘാടനം അല്ല വേണ്ടതെന്നും റോഡിന്‍റെ കൃത്യമായ പണികൾ നടത്തുകയാണ് വേണ്ടതെന്നും അതിനുശേഷം റോഡ് പണി തുടങ്ങിയാൽ മതി എന്ന് പറയുകയും ചെയ്തു. അതിന്‍റെ അടിസ്ഥാനത്തിൽ ഉദ്ഘാടനം മാറ്റിവയ്ക്കുകയുമാണുണ്ടായത്. പഞ്ചായത്തിൽ സർവകക്ഷിയോഗം വിളിക്കുകയും യോഗത്തിലെ തീരുമാനം യുഡിഎഫ് എതിർക്കുകയും ചെയ്തു. എംപി, എംഎൽഎ, എൻജിനീയർ തുടങ്ങിയവരെ ഉൾപ്പെടുത്തി സർവകക്ഷിയോഗം വിളിച്ച് നിർമാണ പ്രവർത്തനങ്ങൾ ആരംഭിച്ചാൽ മതി എന്നാണ് യുഡിഎഫ് ആവശ്യപ്പെട്ടത്. റോഡ് നിർമാണം യുഡിഎഫ് എതിർത്തു എന്ന് പറയുന്നത് വാസ്തവവിരുദ്ധമാണെന്നും ജനങ്ങളെ തെറ്റിദ്ധരിപ്പിക്കുന്ന രീതിയിലുള്ള പ്രസ്താവനകൾ അവസാനിപ്പിക്കണമെന്നും യുഡിഎഫ് ചെയർമാൻ കെ.കെ. ചന്ദ്രൻ ആരോപിച്ചു.

വിദ്യാർഥികൾക്കുള്ള യാത്രാകാർഡിൽ മാറ്റം

ഒറ്റപ്പാലം: വിദ്യാർഥികൾക്ക് ബസുകളിൽ യാത്രായിളവ് ലഭിക്കാനുള്ള കാർഡിൽ മാറ്റം വരുത്തി. ഇത്തവണ പച്ചക്കാർഡാണ് യാത്രായിളവിന് നൽകിയിരിക്കുന്നത്. നേരത്തെ പിങ്ക് കാർഡാണ് ഉപയോഗിച്ചിരുന്നത്. അടുത്തമാസം ഒന്നുമുതൽ കാർഡുള്ളവർക്ക് മാത്രമാകും സ്വകാര്യബസുകളിൽ യാത്രായിളവ് അനുവദിക്കുക. ഈമാസം യാത്രായിളവ് കാർഡ് വേണമെന്ന നിബന്ധനയില്ല. സർക്കാർ, എയ്ഡഡ്, സ്വാശ്രയ കോളജുകളിലെ വിദ്യാർഥികൾക്ക് കഴിഞ്ഞവർഷത്തേതുപോലെ കൺസഷൻ കാർഡ് നിർബന്ധമാണ്. ഈ കാർഡാണ് പച്ചനിറത്തിലുണ്ടാവുക. അതിനായി സ്ഥാപനമേധാവി അവരുടെ പരിധിയിലുള്ള ആർടി ഓഫീസിൽ അപേക്ഷ നൽകണം. അപേക്ഷ അംഗീകരിക്കുന്നതോടെ മോട്ടോർ വാഹനവകുപ്പ് തന്നെ പച്ചകാർഡ് വിതരണം ചെയ്യും. പ്ലസ്ടുവരെ വരെ പഠിക്കുന്ന വിദ്യാർഥികൾക്ക് അവരുടെ സ്ഥാപനമേധാവികൾ നൽകുന്ന തിരിച്ചറിയൽ കാർഡാണ് ഉപയോഗിക്കേണ്ടത്. ഗവേഷണം ഉൾപ്പെടെ സ്വകാര്യപഠനം നടത്തുന്ന വിദ്യാർഥികൾക്ക് അവരുടെ സ്ഥാപനത്തിന്‍റെ പ്രവർത്തനരേഖകൾ, സർവകലാശാല അഫിലിയേഷൻ എന്നിവ പരിശോധിച്ച് സർക്കാർ ഉത്തരവുകൾക്കു വിധേയമായി മോട്ടോർവാഹനവകുപ്പ് കാർഡ് അനുവദിക്കും. 27 വയസുവരെയുള്ളവർക്കാണ് കാർഡ് അനുവദിക്കുക. പ്ലസ് ടു വരെയുള്ള വിദ്യാർഥികൾക്ക് കെഎസ്ആർടിസി സൗജന്യമായി യാത്ര അനുവദിക്കും. ആവശ്യമുള്ളവർ കെഎസ്ആർടിസി ഓഫീസുമായി ബന്ധപ്പെട്ട് കൺസഷൻ കാർഡുകൾ ഉറപ്പാക്കണം. ഒരു ദിവസം താമസസ്ഥലത്തുനിന്നു വിദ്യാഭ്യാസ സ്ഥാപനംവരെയും തിരിച്ചും 40 കിലോമീറ്റർ ആണ് ദൂരപരിധി. വിദ്യാർഥികൾക്ക് ബുദ്ധിമുട്ട് നേരിടുന്നുണ്ടെങ്കിൽ പോലീസിലോ മോട്ടോർവാഹന വകുപ്പ് ഓഫീസുകളിലോ പരാതി നൽകാം.

കൂർക്കകൃഷിയുടെ തിരക്കുകളിൽ മണപ്പാടം, കണക്കന്നൂർ പ്രദേശങ്ങളിലെ കർഷകർ

വടക്കഞ്ചേരി: പുതുക്കോട് പഞ്ചായത്തിലെ മണപ്പാടം, കണക്കന്നൂർ, തോണിക്കടവ് പ്രദേശങ്ങളിൽ കൂർക്കകൃഷിയുടെ തിരക്കുകളിലാണ് കർഷകർ. കൂർക്കതല വില്പനയും നടീലുമായി എവിടേയും തിരക്കുകളാണ്. വേനലിലെ കനത്തമഴ പ്രശ്നമുണ്ടാക്കിയെങ്കിലും ഇപ്പോൾ പണികൾ സജീവമാണ്. വടക്കഞ്ചേരിയിൽ നിന്നും മണപ്പാടം വഴി തൃശൂർ ജില്ലയിലേക്ക് പ്രവേശിക്കുന്ന തോണിക്കടവ് റോഡിനിരുവശവുമായാണ് കൂർക്ക തലകളുടെ നേഴ്സറികളുള്ളത്. അര ഏക്കറിലും ഒരു ഏക്കറിലും കൂർക്ക നേഴ്സറികളുണ്ട്. വിത്ത് പാകി മുളപ്പിച്ചാണ് ഇവിടെ ആവശ്യത്തിനുള്ള കൂർക്കതല ഉണ്ടാക്കുന്നത്. ഒരു മൂടിന് 12 രൂപ മുതലാണ് വില. ഇതിൽ 20 മുതൽ 25 വരെ കൂർക്കതലയുണ്ടാകും. കൂർക്കകൃഷിക്ക് പേരുകേട്ട നാടാണ് ജില്ലാ അതിർത്തിക്കടുത്തെ ഈ പ്രദേശങ്ങൾ. ഇവിടെ ഇരുന്നൂറിലേറെ ഏക്കർ പാടത്ത് നെൽകൃഷിക്കൊപ്പം കൂർക്കകൃഷിയുമുണ്ടാകും. മണപ്പാടം ഭാഗങ്ങളിൽ മണൽ ചേർന്ന മണ്ണായതിനാൽ കൂർക്കകൃഷിക്ക് ഉത്തമമെന്നാണ് കർഷകർ പറയുന്നത്. ഇങ്ങനെയുള്ള മണ്ണിൽ കൂർക്കക്ക് നല്ല വിളവുണ്ടാകും. പറിക്കാൻ എളുപ്പമായതിനാൽ കൂലിചെലവും കുറയും. താലൂക്കിൽതന്നെ ഏറ്റവും കൂടുതൽ കൂർക്കകൃഷി ചെയ്യുന്ന പ്രദേശങ്ങളാണ് മണപ്പാടം, കണക്കന്നൂർ, തോണിക്കടവ് മേഖലകൾ. ഒന്നാംവിള നെല്ലിന് പകരം കൂർക്ക കൃഷിചെയ്യുന്ന പാടങ്ങളും ഇവിടെയുണ്ട്. രണ്ടാംവിള മാത്രമെ ഇവിടങ്ങളിൽ പൂർണമായുള്ള നെൽകൃഷിയുള്ളു. മംഗലംഡാം കനാലിന്‍റെ ഏറ്റവും വാലറ്റപ്രദേശങ്ങളായതിനാൽ ഇവിടെ കനാൽവെള്ളവും എത്താറില്ല. പാട്ടത്തിന് ഭൂമി എടുത്താണ് ഇവിടുത്തെ കൂർക്കകൃഷി. കൂർക്കയുടെ വിളവെടുപ്പും ആദ്യം മണപ്പാടത്തു നിന്നുതന്നെയാണ് ആരംഭിക്കുക. ഇതിനാൽ ഉയർന്നവിലയും കർഷകർക്ക് ലഭിക്കും.

പ്ലാവിൽനിന്നു വീണ യുവാവ് മരിച്ചു

വടക്കഞ്ചേരി: പ്ലാവിൽനിന്നു വീണ് തൃശൂരിലെ സ്വകാര്യ ആശുപത്രിയിൽ ചികിത്സയിലായിരുന്ന യുവാവ് മരിച്ചു. കിഴക്കഞ്ചേരി ആരോഗ്യപുരം ആലാകുന്നേൽ മാത്യുസാ(46)ണ് മരിച്ചത്. കഴിഞ്ഞ 12 നായിരുന്നു അപകടം. സമീപത്തെ പറമ്പിൽ ചക്കയിടാൻ പ്ലാവിൽ കയറിയപ്പോൾ കാൽ വഴുതി വീഴുകയായിരുന്നു. സംസ്കാരം ഇന്ന് 3.30ന് ആരോഗ്യപുരം സെന്‍റ് മേരീസ് പള്ളിയിൽ. ഭാര്യ: ബിന്ദു. മകൻ: അലക്സ്.

മംഗലംഡാം സെന്‍റ് സേവിയേഴ്സ് സെൻട്രൽ സ്കൂളിൽ വർണാഭമായി പ്രവേശനോത്സവം

മംഗലംഡാം: സെന്‍റ് സേവിയേഴ്സ് സെൻട്രൽ സ്കൂളിലെ പ്രവേശനോത്സവം ഗംഭീരമായി. സ്കൂൾ ജോയിന്‍റ് ഡയറക്ടർ ഫാ. സുമേഷ് നാല്പതാംകളം ഉദ്ഘാടനം ചെയ്തു. പ്രിൻസിപ്പൽ ഫാ. സിബിൻ തോമസ്, വൈസ് പ്രിൻസിപ്പൽ ജാൻസി ഷാജി, പിടിഎ പ്രസിഡന്‍റ് അജിത്കുമാർ, സ്റ്റാഫ് സെക്രട്ടറി സിൻഡ്രല തുടങ്ങിയവർ പ്രസംഗിച്ചു. പത്താംക്ലാസ് പരീക്ഷയിൽ നൂറുശതമാനം വിജയത്തിനൊപ്പം ഹരിതകേരള മിഷന്‍റെ ഏറ്റവുംമികച്ച ഹരിത സ്കൂളിനുള്ള അവാർഡും സ്കൂൾ നേടിയിരുന്നു. പത്താംക്ലാസിൽ ഉന്നത വിജയം കരസ്ഥമാക്കിയവർക്കും ക്ലാസുകളിലെ പഠന മികവുകൾക്കും കഴിഞ്ഞ അധ്യയന വർഷത്തിൽ മുഴുവൻദിവസവും ഹാജരായ വിദ്യാർഥിനി അന്ന തോമസിനേയും അനുമോദിച്ചു. കുട്ടികളുടെ വിവിധ കലാപരിപാടികളും അധ്യാപകർ അവതരിപ്പിച്ച സ്വാഗതഗാനവും ശ്രദ്ധേയമായി.

പന്നിയങ്കര ഗവ. എൽപി സ്കൂൾ പഴയ പ്രതാപത്തിലേക്ക്

വടക്കഞ്ചേരി: ക്ലാസിൽ കുട്ടികളുടെ ബഹളവും ആളനക്കവും കൂടിയതിന്‍റെ സന്തോഷത്തിലായിരുന്നു ഇന്നലെ പന്നിയങ്കര ഗവ. എൽപി സ്കൂളിലെ പ്രധാനാധ്യാപിക ബിന്ദു ടീച്ചർ. ഒന്നാം ക്ലാസിലേക്ക് ഏഴു കുട്ടികളെത്തി.രണ്ടാംക്ലാസിൽ നാലും മൂന്നാം ക്ലാസിൽ രണ്ടും നാലാം ക്ലാസിൽ അഞ്ചുകുട്ടികളുമായി 18 പേർ. പ്രീ പ്രൈമറി വിഭാഗത്തിൽ 17 കുട്ടികൾ വേറെയുമുണ്ട്. കഴിഞ്ഞ ഒരുപതിറ്റാണ്ടിനിടെ ക്ലാസ്മുറിയിൽ കുട്ടികൾ നിറഞ്ഞ പ്രതീതിയുണ്ടാകുന്നതു ഇതാദ്യം. കഴിഞ്ഞ വർഷവും പുറത്തു പറയാവുന്നവിധം കുട്ടികളുടെ എണ്ണമുണ്ടായിരുന്നു. എന്നാൽ കുട്ടികൾ കൂടിയപ്പോൾ അധ്യാപകരില്ല എന്ന വിഷമത്തിലാണ് രക്ഷിതാക്കൾ. പ്രധാനാധ്യാപിക ഉൾപ്പെടെ രണ്ടധ്യാപകരാണ് ഇപ്പോഴുള്ളത്. ഒരു ടീച്ചറെകൂടി കിട്ടിയിരുന്നെങ്കിൽ സ്കൂളിനെ പഴയ പ്രതാപത്തിലേക്കുതിരിച്ചു കൊണ്ടുവരാൻ കഴിയുമായിരുന്നെന്നാണ് കല്ലിങ്കൽപ്പാടം ഗവ.സ്കൂളിൽ നിന്നും പ്രമോഷനോടെ ഈ സ്കൂളിലെത്തിയ ബിന്ദു ടീച്ചർ പറയുന്നത്. സ്കൂൾ ലാഭകരമല്ല എന്നുപറഞ്ഞ് അധ്യാപകരെ നിയമിക്കാൻ വൈകരുതെന്ന അപേക്ഷയാണ് രക്ഷിതാക്കളും പങ്കുവയ്ക്കുന്നത്. വലിയൊരു ഇടവേളയ്ക്കുശേഷം സ്കൂൾ അന്തരീക്ഷം പുനഃസ്ഥാപിക്കാനാകുന്നതിന്‍റെ ആഹ്ലാദത്തിലായിരുന്നു എല്ലാവരും. ക്ലാസ്മുറിയിൽ കുട്ടികളെ നിറഞ്ഞുകണ്ടപ്പോൾ പ്രവേശനോത്സവത്തിനെത്തിയ വിശിഷ്ടാതിഥികൾക്കും അതു ആശ്ചര്യവും പ്രതീക്ഷയും നൽകുന്നതായി. ഇനിയും കൂടുതൽ കുട്ടികളെ സ്കൂളിലെത്തിക്കാനുള്ള ശ്രമം തുടരുമെന്നു വിശിഷ്ടാതിഥികളിൽ ഓരോരുത്തരും പറഞ്ഞു. ഒരുകോടി രൂപ ചെലവിൽ നിർമാണം പൂർത്തീകരിച്ച ഇരുനില കെട്ടിടത്തിലാണ് ഇപ്പോൾ ക്ലാസുകൾ നടക്കുന്നത്. പുതിയ കെട്ടിടം തന്നെയാണ് സ്കൂളിലെ പ്രധാന ആകർഷണവും. വാർഡ് മെംമ്പർ അമ്പിളി മോഹൻദാസ് പ്രവേശനോത്സവം ഉദ്ഘാടനം ചെയ്തു. സ്കൂളിന്‍റെ പഴയ പ്രതാപകാലം തിരിച്ചു വന്നില്ലെങ്കിലും സ്കൂളിനെ കൂടുതൽ മെച്ചപ്പെടുത്തിയെടുക്കാനുള്ള വലിയ ശ്രമത്തിലാണ് വടക്കഞ്ചേരി പഞ്ചായത്തും നാട്ടുകാരും. കുട്ടികളില്ലാതെ മൂന്നുവർഷം അടഞ്ഞുകിടന്ന സ്കൂൾ പിന്നീട് 2014ൽ ആറു കുട്ടികളുമായാണ് തുറന്നത്. പിന്നേയും സ്ഥിതിയിൽ വലിയ മാറ്റമുണ്ടായില്ല. പുതിയ കെട്ടിടവും മറ്റു ഭൗതിക സൗകര്യങ്ങളും ഒരുക്കിയതോടെയാണ് കൂടുതൽ കുട്ടികൾ എത്തിത്തുടങ്ങിയിട്ടുള്ളത്.

കമ്മാന്തറ മദർ തെരേസ സ്കൂൾ ഇക്കുറിയും മുന്നിൽ

വടക്കഞ്ചേരി: ആലത്തൂർ വിദ്യാഭ്യാസ ഉപജില്ലയിൽ എയ്ഡഡ് യുപി സ്കൂളുകളിൽ ഏറ്റവും കൂടുതൽ കുട്ടികൾ ഇക്കുറിയും കമ്മാന്തറ മദർ തെരേസ യുപി സ്കൂളിൽ. ഇക്കുറി 182 കുട്ടികൾ ഒന്നാം ക്ലാസിൽ ചേർന്നിട്ടുണ്ടെന്നു ഹെഡ്മിസ്ട്രസ് സി. രജനി പറഞ്ഞു. ഒന്നുമുതൽ ഏഴുവരെയുള്ള ക്ലാസുകളിലായി ഇപ്പോൾ 1975 കുട്ടികളുണ്ട്. ഇതിനുപുറമെ എൽകെജി, യുകെജി വിഭാഗങ്ങളിലായി 320 കുട്ടികളടക്കം കുട്ടികളുടെ എണ്ണം പുതിയ സ്കോറിലെത്തി. കുട്ടികൾക്കായുള്ള സ്വിമിംഗ് പൂൾ ഉൾപ്പെടെ അത്യാധുനികമായ ഭൗതിക സാഹചര്യങ്ങളോടെയാണ് സ്കൂൾ പ്രവർത്തിക്കുന്നത്. സ്കൂളിലെ അത്യാകർഷകമായ ഭൗതിക സാഹചര്യങ്ങളും പഠനത്തിലും പാഠ്യേതര രംഗത്തുമുള്ള മികവുകളുമാണ് സ്കൂളിനെ രക്ഷിതാക്കൾക്കും കുട്ടികൾക്കും പ്രിയപ്പെട്ടതാക്കുന്നത്. സ്റ്റീം അടുക്കള, മാലിന്യമുക്ത കലാലയമാക്കാൻ ലക്ഷ്യം വച്ചുള്ള പ്ലാന്‍റ്, കുട്ടികളുടെ പാർക്ക്, സമ്പൂർണ ഡിജിറ്റൽ ക്ലാസ്മുറികൾ തുടങ്ങി എല്ലാം മാറുന്ന കാലത്തിനനുസരിച്ചുള്ള മാറ്റങ്ങളുണ്ട്. സ്കൂളിലെ പ്രവേശനോത്സവം വാർഡ് മെംബർ സി. മുത്തു ഉദ്ഘാടനം ചെയ്തു. ഹെഡ്മിസ്ട്രസ് സി. രജനി, പിടിഎ പ്രസിഡന്‍റ് ബിനോയ് ജേക്കബ്, സ്കൂൾ മാനേജർ തോമസ് മാത്യു കാടൻകാവിൽ എന്നിവർ പ്രസംഗിച്ചു.

താഴെത്തട്ടിലുള്ള വിദ്യാര്‍ഥികളെ മുഖ്യധാരയിലെത്തിക്കണം: മന്ത്രി

പാലക്കാട്: സമൂഹത്തില്‍ താഴെ തട്ടിലുള്ള വിദ്യാര്‍ഥികളുടെ ജീവിതാവസ്ഥ പരിശോധിച്ച് സമൂഹത്തിനു മുന്നിലെത്തിക്കണമെന്നു മന്ത്രി കെ. കൃഷ്ണന്‍കുട്ടി. ഉമ്മിനി ഗവണ്‍മെന്‍റ് ഹൈസ്‌കൂളില്‍ ജില്ലാതല സ്കൂൾ പ്രവേശനോത്സവം ഉദ്ഘാടനം ചെയ്യുകയായിരുന്നു മന്ത്രി. കുട്ടികളുടെ ജീവിതാവസ്ഥ പരിശോധിക്കുന്നതില്‍ പട്ടികജാതി- പട്ടികവര്‍ഗ വിഭാഗത്തിലുള്ള വിദ്യാര്‍ഥികള്‍ക്കു പ്രാധാന്യം നല്‍കണം. ആര്‍ട്ടിഫിഷ്യല്‍ ഇന്‍റലിജന്‍സിന്‍റെ വരവ് വിദ്യാഭ്യാസ സമ്പ്രദായത്തില്‍ വലിയ മാറ്റം കൊണ്ടുവന്നു. ഇതിന്‍റെ സാധ്യതകള്‍ ഉപയോഗപ്പെടുത്തണം. കുട്ടികള്‍ ചോദ്യങ്ങള്‍ ചോദിക്കുന്നവരാവണം, അതിനായി വിദ്യാര്‍ഥികളെ പ്രാപ്തരാക്കണമെന്നും മന്ത്രി കൂട്ടിചേര്‍ത്തു. കൂടാതെ വിവിധ മേഖലകളില്‍ ഉന്നതിയിലെത്തിയവരുടെ ജീവിതം പ്രചോദനമാക്കണമെന്നും മന്ത്രി പറഞ്ഞു. എ. പ്രഭാകരന്‍ എംഎല്‍എ അധ്യക്ഷനായി. വി.കെ. ശ്രീകണ്ഠന്‍ എംപി മുഖ്യാതിഥിയായി. ജില്ലാ പഞ്ചായത്ത് പ്രസിഡന്‍റ് കെ. ബിനുമോള്‍ നവാഗതരെ സ്വാഗതംചെയ്തു. കായിക പ്രതിഭകള്‍ക്കുള്ള അനുമോദനം ജില്ലാ കളക്ടര്‍ ജി.പ്രിയങ്ക നിര്‍വഹിച്ചു. അകത്തേത്തറ ഗ്രാമപഞ്ചായത്ത് പ്രസിഡന്‍റ് സുനിത അനന്തകൃഷ്ണന്‍, വൈസ് പ്രസിഡന്‍റ് മോഹനന്‍, ജില്ലാ പഞ്ചായത്ത് അംഗം വി.കെ. ജയപ്രകാശ്, ഡിഡിഇ ഇന്‍ചാര്‍ജ് ടി.പി.സലീന, പാലക്കാട് ഡിഇഒ ആസിഫ് അലിയാര്‍, വിദ്യാകിരണം കോ-ഓര്‍ഡിനേറ്റര്‍ കെ.എന്‍. കൃഷ്ണകുമാര്‍, പിടിഎ പ്രസിഡന്‍റ് സി. ശിവരാമന്‍, എംപിടിഎ പ്രസിഡന്‍റ് ജെ.കെ. റീജ, പ്രധാന അധ്യാപിക കെ.പി. സുജാത എന്നിവര്‍ പങ്കെടുത്തു.

കത്തീഡ്രൽ സ്കൂളിൽ വർഷാരംഭം റോബോട്ടിക്‌സ് പഠനത്തിലൂടെ

പാലക്കാട്: സെന്‍റ് റാഫേൽസ് കത്തീഡ്രൽ സ്കൂളിന്‍റെ പുതിയ അക്കാദമിക് വർഷത്തിന്‍റെ ആദ്യദിനം വിദ്യാർഥികൾക്കും അധ്യാപകർക്കും ആവേശംനൽകുന്ന രീതിയിൽ ആഘോഷിച്ചു. പുതുതായി സ്കൂളിൽ റോബോട്ടിക്‌സ് പഠനപദ്ധതി ആരംഭിച്ചുകൊണ്ടാണ് ആദ്യദിനം ആഘോഷിച്ചത്. സ്കൂൾമാനേജർ ഫാ. ജോഷി പുലിക്കോട്ടിൽ നൂതന പഠനപദ്ധതിക്കൊപ്പം പുതിയ അധ്യയനവർഷം ഉദ്ഘാടനം ചെയ്തു. വൈസ് പ്രിൻസിപ്പൽ സന്ധ്യ തോമസ്, സ്കൂൾ പ്രിൻസിപ്പൽ ഫാ.കെ.വി. ആന്‍റോ, ഹയർസെക്കൻഡറി കോ-ഓർഡിനേറ്റർ ശ്രീജ എന്നിവർ പ്രസംഗിച്ചു.

കായികപരിശീലന ക്യാമ്പ് സമാപിച്ചു

വടക്കഞ്ചേരി: കണ്ണമ്പ്ര കൊട്ടേക്കാട് വായനശാലയുടെയും ക്ലബിന്‍റെയും സംയുക്താഭിമുഖ്യത്തിൽ കായിക പരിശീലന ക്യാമ്പ് നടത്തി. ക്യാമ്പിന്‍റെ സമാപനം വാർഡ് മെംബർ മേഘ അനിൽകുമാർ ഉദ്ഘാടനം ചെയ്തു. അത്‌ലറ്റിക് ക്ലബ് പ്രസിഡന്‍റ് വി. മോഹനൻ അധ്യക്ഷത വഹിച്ചു. എസ്ഐ കെ. ബാലസുബ്രഹ്്മണ്യൻ മുഖ്യപ്രഭാഷണം നടത്തി. ഫിസിക്കൽ ട്രെയ്നർ സി.സി. ചന്ദ്രബോസ്, വായനശാല പ്രസിഡന്‍റ് എ. രവീന്ദ്രൻ, സെക്രട്ടറി കെ.ആർ. ഷൺമുഖൻ, ബാലവേദി സെക്രട്ടറി വിസ്മയ രവീന്ദ്രൻ എന്നിവർ പ്രസംഗിച്ചു.

മണ്ണാർക്കാട് മണ്ഡലത്തിൽ ഏഴുകോടിയുടെ വികസന പദ്ധതികൾക്ക് അംഗീകാരം

മണ്ണാർക്കാട്: മുഖ്യമന്ത്രിയുടെ പ്രത്യേക മേൽനോട്ടത്തിൽ നടപ്പിലാക്കുന്നതും എംഎൽഎമാരിൽ നിന്ന് നിർദേശം സ്വീകരിച്ചതുമായ വികസനപ്രവർത്തനങ്ങളിൽ മണ്ണാർക്കാട് നിയോജക മണ്ഡലത്തിൽ നിന്ന് എൻ. ഷംസുദ്ദീൻ എംഎൽഎ സമർപ്പിച്ച ആറു വികസന പദ്ധതികൾക്ക് സർക്കാർ അംഗീകാരം നൽകി. അലനല്ലൂർ ഗ്രാമപഞ്ചായത്തിലെ എടത്തനാട്ടുകരയിലെ തടിയംപറമ്പ് - കൊമ്പംകല്ല് പാലം നിർമാണത്തിന് ഒരു കോടി രൂപ, തെന്നാരി മുക്കാട് മണ്ണാർക്കാട് മുൻസിപ്പാലിറ്റിയെയും തെങ്കര പഞ്ചായത്തിനെയും തമ്മിൽ ബന്ധിപ്പിക്കുന്ന പൊട്ടിതോടിനു കുറുകെ പാലം നിർമാണത്തിനു ഒരുകോടിരൂപ, മണ്ണാർക്കാട് പട്ടണത്തിൽ കുന്തിപ്പുഴക്കുസമീപം നഗരസൗന്ദര്യവത്കണത്തിന്‍റെ ഭാഗമായി വാക്ക്‌വേ നിർമാണത്തിനു ഒരുകോടിരൂപ, അട്ടപ്പാടിയിലെ പുതൂർ ജിടിവി എച്ച്എച്ച്എസിന് കെട്ടിടം നിർമാണത്തിനായി രണ്ടുകോടിരൂപ, കോട്ടോപ്പാടം ഗ്രാമപഞ്ചായത്തിലെ അരിയൂർ ജിഎംഎൽപി സ്കൂൾ ഗ്രൗണ്ട് നവീകരണത്തിന് ഒരുകോടിരൂപ, കുമരംപുത്തൂർ ഗ്രാമപഞ്ചായത്തിലെ ചങ്ങലീരിയിലെ പഞ്ചായത്ത് സിഎച്ച് മിനി സ്റ്റേഡിയം നവീകരണത്തിനു ഒരുകോടി രൂപ എന്നിങ്ങനെയാണ് തുക അനുവദിച്ചത്.

നന്ദിയോട് ആശുപത്രിയിൽ നവീകരിച്ച ലാബ് ഉദ്ഘാടനം

വണ്ടിത്താവളം: നന്ദിയോട് സാമൂഹ്യാരോഗ്യകേന്ദ്രത്തിൽ നവീകരിച്ച ലാബ് കൊല്ലങ്കോട് ബ്ലോക്ക് പഞ്ചായത്ത് പ്രസിഡന്‍റ് ആർ. ചിന്നക്കുട്ടനും പട്ടഞ്ചേരി ഗ്രാമപഞ്ചായത്ത് പ്രസിഡന്‍റ് പി.എസ്. ശിവദാസും സംയുക്തമായി ഉദ്ഘാടനം ചെയ്തു. യോഗത്തിൽ ബ്ലോക്ക് ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ നിസാർ അധ്യക്ഷത വഹിച്ചു. ബ്ലോക്ക് മെഡിക്കൽ ഓഫീസർ ഡോ.എം. ബിനു, പട്ടഞ്ചേരി പഞ്ചായത്ത് വൈസ് പ്രസിഡന്‍റ് അനില മുരളീധരൻ, പഞ്ചായത്ത് ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ ഷൈലജ പ്രദീപ്, വാർഡ് മെംബർമാരായ സുഷമ, ഗീത, വണ്ടിത്താവളം വ്യാപാര വ്യവസായി ഏകോപന സമിതി സെക്രട്ടറി കെ.കെ. ഷെറീഫ്, പ്രസിഡന്‍റ് സി. മണി, നഴ്സിംഗ് സൂപ്പർവൈസർ തുടങ്ങിയവർ പ്രസംഗിച്ചു

ലഹരിമുക്ത കാമ്പസ്: ബോധം കാമ്പയിനു തുടക്കം

മണ്ണാർക്കാട്: ലഹരി നിർമാർജന സമിതി സംസ്ഥാനകമ്മിറ്റിയുടെ നേതൃത്വത്തിൽ ലഹരിക്കെതിരെ നൂറുദിന കർമപദ്ധതിയുടെ ഭാഗമായി നടത്തുന്ന "ലഹരിമുക്ത കാമ്പസ് ബോധം കാമ്പയിൻ' ജില്ലാതല ഉദ്ഘാടനം എൻ. ഷംസുദീൻ എംഎൽഎ നിർവഹിച്ചു. എൽഎൻഎസ് ജില്ലാ പ്രസിഡന്‍റ് എം. ഹമീദ് ഹാജി അധ്യക്ഷനായി. ജനറൽസെക്രട്ടറി കെ.ടി. ജലീൽ, ഐ. മുഹമ്മദ്, ജമാലുദ്ദീൻ ആനക്കര, എസ്. മുഹമ്മദ്, ഹമീദ് കൊമ്പത്ത്, കെ. ഹസ്സൻ, കോട്ടോപ്പാടം ഗ്രാമപഞ്ചായത്ത് സ്ഥിരം സമിതി അധ്യക്ഷ കെ. റജീന, പി. മൻസൂറലി, കെ.എച്ച്. ഫഹദ്, കെ. അബ്ദുള്ള, സി.ടി. ഹംസ, കെ. ഫൈസൽ, എം. ഷഫീഖ്, എ. ഉനൈസ് പങ്കെടുത്തു.

ദേശീയപാതയിൽ പണിതീരുന്നതുവരെ ടോൾ ഒഴിവാക്കണം: കൺസ്യൂമർ ഫോറം

ആലത്തൂർ: ദേശീയപാതയിൽ നിർമാണ പ്രവൃത്തികൾ തീരുന്നതുവരെ വാഹനങ്ങളുടെ ടോൾ ഒഴിവാക്കണമെന്ന് ഫോറം ഫോർ കൺസ്യൂമർ ജസ്റ്റിസ് യോഗം കേന്ദ്ര സർക്കാരിനോടാവശ്യപ്പെട്ടു. ദേശീയപാതയിൽ പണിനടക്കുന്ന സ്ഥലങ്ങളിൽ ഗതാഗതക്കുരുക്ക് ഒഴിവാക്കാൻ കരാറുകളുടെ ചെലവിൽ അതാത് പോലീസ് സ്റ്റേഷൻ പരിധിയിലെ ഹോംഗാർഡുകളെ ഡ്യൂട്ടിക്ക് നിയോഗിക്കണമെന്നും ആവശ്യപ്പെട്ടു. കാവശ്ശേരി ഒന്ന് വില്ലേജ് ഓഫീസ് കെട്ടിടം, കാവശ്ശേരി ആരോഗ്യ ഉപകേന്ദ്രം കെട്ടിടം എന്നിവയുടെ നിർമാണം പ്രവർത്തി ത്വരിതപ്പെടുത്തുക, വന്യജീവി ആക്രമണത്തിൽ മരണപ്പെടുന്നവർക്ക് സർക്കാർ നൽകുന്ന ധനസഹായം പേവിഷ ബാധയേറ്റു മരിക്കുന്നവർക്കും നൽകുക എന്നീ ആവശ്യങ്ങളും യോഗം ഉന്നയിച്ചു. കെ.എസ്. ലക്ഷ്മീനാരായണൻ അധ്യക്ഷത വഹിച്ചു. സെക്രട്ടറി കെ. പഴനിമല റിപ്പോർട്ട് അവതരിപ്പിച്ചു. കെ. വേലുണ്ണി, പനക്കൽപറമ്പ് ഉസ്മാൻ, പി.കെ. മുഹമ്മദ് ബഷീർ, എസ്. ഗോപി, പി . വിജയൻ, കെ.ബി. തിലകേശൻ ്രസംഗിച്ചു.

ചിറ്റൂർ വാട്ടർ അഥോറിറ്റി എൻജിനീയറെ ഉപരോധിച്ച് കോൺഗ്രസ് പ്രവർത്തകർ

ചിറ്റൂർ: വാട്ടർ അഥോറിറ്റി എക്സിക്യൂട്ടീവ് എൻജിനീയറുടെ കാര്യാലയം പല്ലശ്ശന ഗ്രാമപഞ്ചായത്ത് അംഗങ്ങൾ, പല്ലശ്ശന മണ്ഡലം കോൺഗ്രസ്സ് കമ്മറ്റി,യൂത്ത് കോൺഗ്രസ് ഭാരവാഹികളുടെ നേതൃത്വത്തിൽ ഉപരോധിച്ചു. ജൽജീവൻ പദ്ധതിയുടെ ഭാഗമായി പൈപ്പിടാനായി പൊളിച്ച പല്ലശ്ശന- കരിപ്പോട് പിഡബ്ല്യുഡി റോഡിന്‍റെ പന്തപ്പുള്ളിമുതൽ കിഴക്കേഗ്രാമംവരെ തകർന്ന റോഡിന്‍റെ ശോചനീയാവസ്ഥ പരിഹരിക്കണമെന്നാവശ്യപ്പെട്ടാണ് ഉപരോധം നടത്തിയത്. അസിസ്റ്റന്‍റ് എക്സിക്യൂട്ടീവ് എൻജിനീയറും സൂപ്പർവൈസറും സമരക്കാരുമായി ചർച്ച നടത്തി. ഒരാഴ്ചക്കകം പരിഹാരം കാണാമെന്നു ഉറപ്പുനൽകി. സമയബന്ധിതമായി റോഡുപണി ചെയ്യാത്ത കരാറുകാരനെതിരെ ജില്ലാ കളക്ടർക്കും മറ്റു ബന്ധപ്പെട്ട അധികാരികൾക്കും പരാതി നൽകുമെന്നും എൻജിനീയർ സമരക്കാർക്ക് ഉറപ്പുനൽകിയതോടെ സമരക്കാർ പിരിഞ്ഞുപോയി. കോൺഗ്രസ് മണ്ഡലം പ്രസിഡന്‍റ് പി.എസ്. രാമനാഥൻ, ഗ്രാമപഞ്ചായത്ത് അംഗങ്ങളായ എസ്. അശോകൻ, മനു പല്ലാവൂർ, കോൺഗ്രസ് ബ്ലോക്ക് വൈസ് പ്രസിഡന്‍റ് സുധീർ, പ്രഭാകരൻ, ശ്യാം ദേവദാസ്, കെ.കെ. ഹരിദാസ്, എം. കുമാരൻ, വി. കുമാരൻ, ടി.എം. സുബ്രമഹ്ണ്യൻ, മനോജ് ഉണ്ണി, ഷിബു പല്ലാവൂർ എന്നിവർ പങ്കെടുത്തു.

നാട്ടുകാരുടെ വഴിമുടക്കി നിർമാണപ്രവൃത്തികൾ

വടക്കഞ്ചേരി: നിർമാണ സാമഗ്രികൾ റോഡിലിറക്കി ഗതാഗതം മുടക്കി. വണ്ടാഴി പഞ്ചായത്തിലെ ഒന്നാം വാർഡിൽപ്പെട്ട വള്ളിയോട് പടിഞ്ഞാറേക്കാട് തത്തനാടം റോഡിലാണ് പട്ടികവർഗ ഉന്നതിയിൽ വീട്ടുപറമ്പുകളുടെ സംരക്ഷണഭിത്തി നിർമിക്കാനുള്ള നിർമാണ സാമഗ്രികൾ റോഡിൽ ഇറക്കി നാട്ടുകാരുടെ വഴിമുടക്കിയിട്ടുള്ളത്. മെറ്റൽ, മണൽ, വാർപ്പ് സാധനങ്ങൾ, യന്ത്രസംവിധാനങ്ങൾ തുടങ്ങിയവയെല്ലാം റോഡിൽ കൂട്ടിയിട്ടാണ് കരാറുകാരൻ പണിനടത്തുന്നത്. ഇതിനടുത്തുതന്നെ ഒഴിഞ്ഞ സ്ഥലമുണ്ട്. എന്നാൽ സാധനങ്ങൾ അവിടെ ഇറക്കാതെ വാഹനം പോകാനാകാത്ത വിധമാണ് റോഡിൽ കൂട്ടിയിട്ടിട്ടുള്ളത്. ഇത്തരത്തിൽ വഴിമുടക്കി സാധനങ്ങൾ കൂട്ടിയിട്ട് ഒരാഴ്ച കഴിഞ്ഞു. പിന്നീട് ഇന്നലെയാണ് പണി ആരംഭിച്ചിട്ടുള്ളത്. ഇന്നലെ സ്കൂൾ വാഹനങ്ങളടക്കം വാഹനങ്ങളെല്ലാം വഴിയിൽ കുടുങ്ങി യാത്ര ചെയ്യാനാകാതെ ഏറെ കഷ്ടപ്പെടുന്ന സ്ഥിതിയുണ്ടായി. വാഹനങ്ങൾക്കുപോകാൻ തടസമില്ലാത്ത വിധം പണികൾ നടത്തണമെന്നു പഞ്ചായത്തിൽനിന്നും നിർദേശിച്ചിരുന്നെങ്കിലും അതു പരിഗണിക്കാതെയാണ് പണി നടത്തുന്നതെന്നു നാട്ടുകാർ പറയുന്നു. നിർമാണ സാധനങ്ങളെല്ലാം റോഡിൽനിന്നുംമാറ്റി വാഹനങ്ങൾക്കു കടന്നുപോകാനുള്ള സൗകര്യം ഒരുക്കണമെന്നാണു നാട്ടുകാരുടെ ആവശ്യം.

മലന്പുഴ സ്കൂളിൽ ലിറ്റിൽ കൈറ്റ്സ് ക്യാന്പ്

മലമ്പുഴ: ജിവിഎച്ച്എസ്എസ് മലമ്പുഴ സ്കൂളിലെ ലിറ്റിൽ കൈറ്റ്സ് വിദ്യാർഥികൾക്കായി ഏകദിന അവധിക്കാല ക്യാമ്പ് സംഘടിപ്പിച്ചു. റീൽസ് നിർമാണം, പ്രൊമോ വീഡിയോ നിർമാണം, കാമറ പരിശീലനം, വീഡിയോ എഡിറ്റിംഗ് എന്നീ മേഖലകളിലെ സാധ്യതകളിൽ വിദ്യാർഥികളിൽ താത്പര്യം ജനിപ്പിക്കുക എന്ന ലക്ഷ്യത്തോടെയാണ് ക്യാമ്പ് നടത്തിയത്. ഹെഡ് മിസ്ട്രസ് ഒ. സ്വപ്നകുമാരി ക്യാമ്പ് ഉദ്ഘാടനം ചെയ്തു. ജിഎച്ച്എസ് ഉമ്മിനിയിലെ ലിറ്റിൽ കൈറ്റ് മിസ്ട്രസ് അധ്യാപിക പി. ധന്യ, ജിവിഎച്ച് എസ്എസ് മലമ്പുഴ സ്കൂളിലെ ലിറ്റിൽ കൈറ്റ് മിസ്ട്രസ് അധ്യാപിക വി. സിന്ധു എന്നിവർ ക്യാമ്പിനു നേതൃത്വം നൽകി. ലിറ്റിൽ കൈറ്റ് ലീഡർ ദുർഗ രാജ് നന്ദി പറഞ്ഞു.

പുകയില വിരുദ്ധ ദിനാചരണവും കാൻസർ കാന്പയിൻ രണ്ടാംഘട്ടം ഉദ്ഘാടനവും

പാലക്കാട്: ലോക പുകയില വിരുദ്ധ ദിനാചരണത്തിന്‍റെയും ആരോഗ്യം ആനന്ദം അകറ്റാം അർബുദം കാൻസർ പ്രതിരോധ ജനകീയ കാന്പയിന്‍റെ രണ്ടാം ഘട്ടത്തിന്‍റെയും ജില്ലാതല ഉദ്ഘാടനം കെ.ഡി. പ്രസേനൻ എംഎൽഎ നിർവഹിച്ചു. ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ അധ്യക്ഷത വഹിച്ചു. ജില്ലാ മെഡിക്കൽ ഓഫീസ് (ആരോഗ്യം), ദേശീയാരോഗ്യദൗത്യം പാലക്കാട് സാമൂഹ്യാരോഗ്യകേന്ദ്രം കുഴൽമന്ദം എന്നിവരുടെ സംയുക്ത ആഭിമുഖ്യത്തിൽ കുഴൽമന്ദം സാമൂഹികാരോഗ്യകേന്ദ്രം കോണ്‍ഫറൻസ് ഹാളിലാണ് പരിപാടി സംഘടിപ്പിച്ചത്. കുഴൽമന്ദം ബ്ലോക്ക് പഞ്ചായത്ത് പ്രസിഡന്‍റ് ടി.കെ. ദേവദാസ് പുകയില ഉത്പന്നങ്ങളുടെ ഉപയോഗത്തിനെതിരെ അവബോധം സൃഷ്ടിക്കുന്ന പോസ്റ്ററുകളുടെ പ്രകാശനം നിർവഹിച്ചു. കുഴൽമന്ദം ഗ്രാമപഞ്ചായത്ത് പ്രസിഡന്‍റ് മിനി നാരായണൻ പുകയില വിരുദ്ധപ്രതിജ്ഞ ചൊല്ലിക്കൊടുത്തു. മെഡിക്കൽ ഓഫീസർ (ആരോഗ്യം) ഡോ.കെ.ആർ. വിദ്യ മുഖ്യപ്രഭാഷണം നടത്തി.

പാലക്കാട് പബ്ലിക് ലൈബ്രറി പ്ലാറ്റിനംജൂബിലി ആഘോഷത്തിനു തുടക്കം

പാലക്കാട്: പാലക്കാട് പബ്ലിക് ലൈബ്രറിയുടെ ഒരുവര്‍ഷം നീളുന്ന പ്ലാറ്റിനം ജൂബിലി ആഘോഷത്തിനു തുടക്കം. കവിയും പ്രഭാഷകനുമായ ആലംകോട് ലീലാകൃഷ്ണന്‍ ഉദ്ഘാടനം ചെയ്തു. ലൈബ്രറി പ്രസിഡന്‍റ് പ്രഫ.പി.കെ. ബാലകൃഷ്ണന്‍ അധ്യക്ഷനായി. മുണ്ടൂര്‍ സേതുമാധവന്‍ മുഖ്യപ്രഭാഷണം നടത്തി. ഡോ. പാര്‍വതിവാര്യര്‍, വി.കെ. ജയപ്രകാശ്, നോവലിസ്റ്റ് ജോര്‍ജ്ദാസ്, ഡോ.യു. ജയപ്രകാശ് എന്നിവര്‍ പ്രസംഗിച്ചു. സെക്രട്ടറി ടി.എസ്. പീറ്റര്‍ സ്വാഗതവും എം.വി. ഉണ്ണികൃഷ്ണന്‍ നന്ദിയും പറഞ്ഞു. ഡോക്ടറേറ്റ് നേടിയ സബീനാഭാനു, ടിഷ എന്നിവരെ ആദരിച്ചു.

ബിജെപി പ്രതിനിധിസംഘം റെയിൽവേ ഡിആർഎമ്മിനെ സന്ദർശിച്ചു

ഒലവക്കോട്: നടക്കാവ് റെയിൽവേ മേൽപ്പാലം പൂർത്തിയാക്കുന്നത്തിലുള്ള കാലതാമസം പരിഹരിക്കണമെന്നാവശ്യപ്പെട്ട് ബിജെപി സംസ്ഥാന ജനറൽ സെക്രട്ടറി സി. കൃഷ്ണകുമാറിന്‍റെ നേതൃത്വത്തിൽ റെയിൽവേ ഡിവിഷണൽ മാനേജരെ സന്ദർശിച്ചു. റെയിൽവേയുടെ ഭാഗത്തുള്ള പണികൾ വേഗത്തിലാക്കാമെന്നും റെയിൽവേ ക്രോസിന് മുകളിലുള്ള ഗാർഡറുകൾ ഈമാസം ആറുമുതൽ പത്തുവരെ ദിവസങ്ങളിൽ സ്ഥാപിക്കുന്നതിനു നിർദ്ദേശം നൽകിയിട്ടുണ്ടെന്നും ഡിആർഎം ഉറപ്പുനൽകി. നേതാക്കളായ ജി. സുജിത്ത്, കെ.എ. സുധീർ, കെ.കെ. അജയ്, നിമീഷ്, പി. ഉണ്ണികൃഷ്ണൻ, പി. ജയപ്രകാശ്, എൽ. രാമചന്ദ്രൻ, മണികണ്ഠൻ ആറ്റൂർ ഒപ്പമുണ്ടായിരുന്നു.

അകത്തേത്തറ നടക്കാവ് പ്രദേശത്തെ റോഡിലും വീടുകളിലും വെള്ളക്കെട്ട്

മലന്പുഴ: മഴക്കാലമായാൽ അകത്തേത്തറ നടക്കാവ് വാൽമീകി ദുർഗാക്ഷേത്ര പരിസരത്തെ വീട്ടുകാർക്ക് പുറത്തിറങ്ങാനും അകത്തിരിക്കാനും പറ്റാത്ത സ്ഥിതിയിൽ. പ്രദേശമാകെ വെള്ളക്കെട്ടാണ്. വീടുകളിലും വെള്ളംകയറും. ചില വീട്ടുകാർ ഒലവക്കോട് ലോഡ്ജിലേക്കു താമസം മാറ്റി. മുൻ സൈനികൻ രേവതിഹൗസ് കുമാരൻ, നിർമാല്യം വീട്ടിൽ പ്രസന്ന, വൈഷ്ണവത്തിലെ സന്തോഷ്കുമാർ തുടങ്ങിയവരുടെ വീടുകളിലും പ്രദേശത്തെ റോഡിലുമാണ് മുട്ടോളം വെള്ളം കെട്ടിനിൽക്കുന്നത്. മഴക്കാല രോഗങ്ങൾ വരുമോയെന്ന ഭീതിയിലാണ് പ്രദേശത്തുകാർ. ഈ പ്രദേശത്തെ വെള്ളം ക്ഷേത്രപറന്പുവഴി തൊട്ടടുത്ത അഴുക്കുചാൽ വഴിയാണ് പോയിരുന്നതെന്നും എന്നാൽ ക്ഷേത്രപറന്പ് മണ്ണിട്ടുയർത്തിയതോടെയാണ് വെള്ളക്കെട്ട് ആരംഭിച്ചതെന്നും വീട്ടുകാർ പറഞ്ഞു. മുന്പത്തെപോലെ വെള്ളം ഒഴുകിപ്പോകാൻ സൗകര്യമൊരുക്കണമെന്ന് പലതവണ അധികൃതരോടു പറഞ്ഞിട്ടും സമ്മതിക്കുന്നില്ലെന്നു വീട്ടുകാർ ആരോപിച്ചു. തുടർന്നു പഞ്ചായത്ത് അധികൃതർക്ക് പരാതി നൽകിയതിന്‍റെ അടിസ്ഥാനത്തിൽ മൂന്ന് തവണ അസിസ്റ്റന്‍റ് എൻജിനീയർ വന്ന് സർവേ നടത്തി. പ്രശ്നത്തിനു പരിഹാരം കാണാൻ ജില്ലാ കളക്ടർ, തദ്ദേശ സ്വയംഭരണ വകുപ്പുമന്ത്രി, ദേവസം മന്ത്രി, മനുഷ്യാവകാശ കമ്മീഷൻ തുടങ്ങിയവർക്കു പരാതി നൽകാനുള്ള തയാറെടുപ്പിലാണ് പ്രദേശവാസികൾ.

ഈസ്റ്റ് ഒറ്റപ്പാലം പാലത്തിനുസമീപം മണ്ണിടിച്ചിൽ തടയാൻ നിരീക്ഷണം

ഒറ്റപ്പാലം: ഈസ്റ്റ് ഒറ്റപ്പാലം പാലത്തിനുസമീപം മണ്ണിടിച്ചിലുണ്ടായ ഭാഗത്തു നിരീക്ഷണം തുടരും. ഇവിടെയുണ്ടായ മണ്ണിടിച്ചിൽ ഇനിയുമാവർത്തിക്കാതിരിക്കാനാണ് നിരീക്ഷണം. പാലത്തിലൂടെയുള്ള ഗതാഗതനിയന്ത്രണം ഇതിനകം പിൻവലിച്ചു. ഇടിഞ്ഞ ഭാഗത്ത് ഷീറ്റ് പൈലിംഗ് നടത്തി മണ്ണുനിറച്ചാണ് പ്രശ്‌നങ്ങൾ പരിഹരിച്ചത്. നാലടിയിലേറെ ഉയരത്തിലാണ് ഷീറ്റ് പൈലിംഗ് നടത്തിയിരിക്കുന്നത്. നാലുദിവസംകൊണ്ടാണ് അറ്റകുറ്റപ്പണികൾ നടത്തിയത്. കഴിഞ്ഞ ശനിയാഴ്ച രാത്രിയോടെയാണ് പാലവും അപ്രോച്ച് റോഡും ചേരുന്ന ഭാഗത്ത് നാലടിയോളം ഉയരത്തിൽ മണ്ണിടിഞ്ഞിരുന്നത്. പാലവും മഴവെള്ളച്ചാലും കൂടി ചേരുന്ന ഭാഗത്തായിരുന്നു ഈ പ്രശ്‌നം. ഇതോടെയാണ് ഗതാഗതനിയന്ത്രണം ഏർപ്പെടുത്തിയത് പട്ടണത്തിലും പാലക്കാട്- കുളപ്പുള്ളി പാതയിലും ഗതാഗതക്കുരുക്കുണ്ടാക്കി. നിലവിലെ അപകടാവസ്ഥ പരിഹരിച്ചെങ്കിലും പുതിയ പാലം നിർമാണം തുടങ്ങാനാകാത്ത സ്ഥിതിയാണ്. തോട് നിറഞ്ഞാണ് വെള്ളം ഒഴുകുന്നത്. മഴവിട്ട് തോട്ടിൽ വെള്ളം കുറഞ്ഞാലേ തൂണുകളുടെ പണി പുനരാരംഭിക്കാനാകൂ.

കേരള കോൺഗ്രസ്- എം ധർണയിൽ കർഷകരോഷം ഇരമ്പി

കല്ലടിക്കോട്: മൂന്നേക്കർ ജംഗ്ഷനിൽ നടത്തിയ ധർണയിൽ നൂറുകണക്കിനു മലയോര കർഷകർ പ്രതിഷേധമുയർത്തി. കഴിഞ്ഞ ഒരുമാസത്തിലേറെയായി മൂന്നേക്കർ മീൻവല്ലം,വാക്കോട് തുടങ്ങിയ പ്രദേശങ്ങളിൽ കാട്ടാന നൂറുകണക്കിനു വാഴ, തെങ്ങ്, കമുക്, റബർ തുടങ്ങിയ കാർഷികവിളകൾ നിശേഷം നശിപ്പിച്ചു. മഴ കനത്തതോടെ കാട്ടാന കൂട്ടമായി എത്തി കൃഷിയിടങ്ങൾ നിരപ്പാക്കി കൊണ്ടിരിക്കുകയാണ്. കർഷകർ ഉപജീവനത്തിനായി കൃഷി ചെയ്തവരുന്ന കാർഷിക ഉത്പന്നങ്ങളാണ് കാട്ടാന ഒരുനിമിഷംകൊണ്ട് തൂത്തെറിയുന്നത്. വനംവകുപ്പ് ആർആർടിയെ നിയോഗിച്ചു ആനയെ എത്രയും പെട്ടെന്ന് ഉൾക്കാട്ടിലേക്കു കയറ്റിവിടണമെന്നു സമരം ഉദ്ഘാടനം ചെയ്ത കേരള കോൺഗ്രസ്- എം സംസ്ഥാന ജനറൽ സെക്രട്ടറി അഡ്വ. ജോസ് ജോസഫ് ആവശ്യപ്പെട്ടു. മണ്ഡലം പ്രസിഡന്‍റ് സുരേഷ് കുമാർ അധ്യക്ഷത വഹിച്ചു. നിയോജകമണ്ഡലം പ്രസിഡന്‍റ് സജീവ് മാത്യു നെടുംപുറം, ജില്ലാ പഞ്ചായത്ത് മെംബർ റെജി ജോസ്, സംസ്ഥാന കമ്മിറ്റി അംഗങ്ങളായ ടി.ആർ. രാധാകൃഷ്ണൻ, കെ.എം. സന്തോഷ്, കർഷക യൂണിയൻ സംസ്ഥാന വൈസ് പ്രസിഡന്‍റ് ജോൺ മരങ്ങോലി, മണ്ഡലം വൈസ് പ്രസിഡന്‍റ് ടി.ആർ. രമേശ്,യൂത്ത് ഫ്രണ്ട് സംസ്ഥാന ജനറൽ സെക്രട്ടറി അഡ്വ. ശരത് ജോസ് പ്രസംഗിച്ചു.

നെന്മാറയിലെ പാടശേഖരങ്ങളിൽ വീണ്ടും ബംഗാളി സംഗീതം

നെന്മാറ: മഴ കിട്ടിയതോടെ പാടശേഖരങ്ങളിൽ നടീല്‍ പണികൾ സജീവമായി. നെന്മാറ, അയിലൂർ കൃഷിഭവനു കീഴിലെ പാടശേഖരങ്ങളിലാണ് ഇപ്പോള്‍ നടീല്‍ നടത്തുന്നത്. കഴിഞ്ഞ ദിവസങ്ങളില്‍ ലഭിച്ച നല്ല മഴയില്‍ വെള്ളംകെട്ടി നിര്‍ത്തി ഉഴുതു മറിച്ചാണ് കര്‍ഷകര്‍ നടീല്‍തുടങ്ങിയത്. തൊഴിലാളികളുടെ ക്ഷാമം മൂലം ഇത്തവണയും നടീല്‍ നടത്തുന്നതിന് ബംഗാളികളെയാണ് കര്‍ഷകര്‍ കൂടുതലും ആശ്രയിക്കുന്നത്. അയിലൂര്‍, കയ്പഞ്ചേരി, തിരുവഴിയാട് പാടശേഖരങ്ങളിൽ നടീല്‍ പണികൾക്കായി എത്തിയ ബംഗാളിലെ പശ്ചിമ കല്‍കത്തയില്‍ നിന്നുള്ള 50 പേരടങ്ങുന്ന സംഘമാണ് നടീല്‍ പണികൾ നടത്തുന്നത്. പോക്കറ്റിലെ മൊബൈലിൽ ബംഗാളിപാട്ട് ഉച്ചത്തിൽവച്ച് അതിനു ചുവടുവച്ചാണ് അതിവേഗം നടീൽ നടത്തുന്നത്. ഞാറ്റടി പറിച്ചുനടീല്‍ നടത്തുന്നതിന് ഏക്കറിന് 4500 രൂപയും ഒരുനേരത്തെ ഭക്ഷണവുമാണ് കൂലിയായി വാങ്ങുന്നതെന്ന് തിരുവഴിയാട് മങ്ങാട്ട് പാടത്തെ കൃഷിയിറക്കിയ എ. മുരളീധരൻ എന്ന കർഷകൻ പറഞ്ഞു. കൃഷിയിടത്തിന്റെ വലിപ്പമനുസരിച്ച് രാവിലെ ഏഴിനുതന്നെ ഇവർ ജോലിക്കിറങ്ങും. ഇക്കുറി കാലാവസ്ഥ അനുകൂലമല്ലാത്തതിനാൽ ബഹുഭൂരിപക്ഷം കൃഷിയിടങ്ങളിലും ബംഗാളി തൊഴിലാളികൾ പണിക്കെത്തിയതോടെ നടീല്‍ ആരംഭിക്കുകയായിരുന്നു.

പനംകുറ്റിയിൽ കാട്ടാനകളുടെ എണ്ണംകൂടി; ഭയപ്പാടിൽ പ്രദേശവാസികൾ

വടക്കഞ്ചേരി: വാൽകുളമ്പിനടുത്ത് പനംകുറ്റിയിൽ പ്രദേശത്ത് കറങ്ങിനടന്ന് കൃഷിനാശമുണ്ടാക്കിയിരുന്ന ഒറ്റയാനൊപ്പം കൂടുതൽ ആനകൾ സ്ഥലത്തെത്തിയതോടെ ഏറെ ഭയപ്പാടിലാണ് നാട്ടുകാർ. വീടുകൾക്കു തൊട്ടുള്ള കൃഷിയിടങ്ങളിലാണ് കഴിഞ്ഞദിവസങ്ങളിൽ ഒറ്റയാനെത്തി വിളകൾ നശിപ്പിച്ചിരുന്നത്. എന്നാൽ ശനിയാഴ്ച രാത്രിമുതൽ കൂടുതൽ ആനകൾ കൃഷിയിടത്തിൽ എത്തുന്നതായി ഇവിടുത്തെ താമസക്കാരനായ ചെറുനിലം ജോണി പറഞ്ഞു. ആനക്കൂട്ടമെത്തുന്നതു കൃഷിനാശത്തിനൊപ്പം മനുഷ്യർക്കും വലിയ ഭീഷണിയുണ്ടാക്കുകയാണ്. ഏതുസമയവും വീടുകളും ആനകൾ നശിപ്പിക്കുമെന്ന ഭീതിയാണുള്ളത്. ആനയെപേടിച്ച് വൈകുന്നേരമായാൽ ആളുകൾക്കു പുറത്തിറങ്ങാൻ കഴിയാത്ത സ്ഥിതിയായി. ആനക്കൂട്ടത്തെ തുരത്താൻ നടപടി സ്വീകരിച്ചു വരികയാണെന്നാണ് വ്യാപക കൃഷിനാശമുണ്ടായിട്ടും വനംവകുപ്പ് പറയുന്നത്. ഇടവേളക്കുശേഷമാണ് പനംകുറ്റിയിൽ ആനക്കൂട്ടമെത്തുന്നത്. പീച്ചി വനാതിർത്തിയിലെ വൈദ്യുതവേലികളെല്ലാം തകർത്താണ് ആനകൾ നാട്ടിലെത്തുന്നത്. കഴിഞ്ഞ ദിവസങ്ങളിൽ ചെറുനിലം ജോണിയുടെതുൾപ്പെടെ നിരവധി കർഷകരുടെ കൃഷികളാണ് ആന നശിപ്പിച്ചത്.

ടാറിംഗ് നടത്തി മാസംതികയുംമുമ്പേ റോഡിൽ കുഴികളുടെ കുരുതിക്കളം

വടക്കഞ്ചേരി: ടാറിംഗ് നടത്തി മാസംതികഞ്ഞില്ല അപ്പോഴേക്കും റോഡിൽ കുഴികളുടെ ബഹളമായി. പുതുക്കോട് അഞ്ചുമുറി- തച്ചനടി റോഡിനാണ് ഈ ദുർഗതി. സാമ്പിൾ മഴയ്ക്കുതന്നെ എണ്ണാൻ പറ്റാത്ത വിധമായി കുഴികൾ. ഇനി കാലവർഷം കനക്കുമ്പോൾ എന്താകുംസ്ഥിതി എന്നുകണ്ടറിയണം. നിലവിലുള്ള കുഴികളുടെ ആഴവും പരപ്പും കൂടുന്നതിനൊപ്പം പുതിയ കുഴികൾ രൂപപ്പെട്ട് റോഡ് പഴയ സ്ഥിതിയിലേക്കുമാറുമോ എന്ന ആശങ്കയിലാണ് നാട്ടുകാരിപ്പോൾ. വ്യാപാരികളും മറ്റും നിരന്തരമായി നടത്തിയ സമരങ്ങൾക്കും പ്രക്ഷോഭങ്ങൾക്കും നിവേദനങ്ങൾക്കും ഒടുവിലാണ് നാലുവർഷത്തിനുശേഷം 700 മീറ്റർദൂരം വരുന്ന റോഡ് റീടാറിംഗ് നടത്തിയത്. അത് ഇങ്ങനെയായില്ലേ എന്ന വിഷമമാണ് നാട്ടുകാരും വ്യാപാരികളും പങ്കുവയ്ക്കുന്നത്. മഴയിലായിരുന്നു ടാറിംഗ്. അതാണ് ഇത്രയും വേഗത്തിൽ റോഡു തകരാൻ കാരണമായതെന്നു പറയുന്നു. റോഡിനു ഇരുവശവുമുള്ള വെള്ളച്ചാലുകൾ ശരിയാക്കാത്തതു ഇനി റോഡ് കൂടുതൽ തകരാൻ കാരണമാകും. ഇത്രവേഗത്തിൽ റോഡിൽ കുഴികൾ രൂപപ്പെട്ടതു ഭരണക്കാർക്ക് ദോഷപ്പേരുണ്ടാക്കുന്നുണ്ട്. പി.പി. സുമോദ് എംഎൽഎ, പുതുക്കോട് പഞ്ചായത്ത് പ്രസിഡന്‍റ് ഹസീന ടീച്ചർ തുടങ്ങിയവർ സ്ഥലത്തെത്തി പരിശോധന നടത്തി. രൂപപ്പെടുന്ന കുഴികൾ അടിയന്തിര പ്രാധാന്യത്തോടെ അറ്റകുറ്റപ്പണികൾ നടത്തി കൂടുതൽ ഭാഗങ്ങൾ തകരുന്നതു തടയണമെന്ന് മർച്ചന്‍റ് അസോസിയേഷൻ യൂണിറ്റ് പ്രസിഡന്‍റ് ഗ്രീൻചാനൽ സുദേവൻ ആവശ്യപ്പെട്ടു.

ഷൊർണൂർ റെയിൽവേ സ്റ്റേഷനിൽ ഓപ്പറേറ്റർ കാർ സൗകര്യമായി

ഷൊർണൂർ: ജംഗ്ഷൻ റെയിൽവേ സ്റ്റേഷനിൽ വണ്ടിയിറങ്ങുന്നവർക്കും കയറുന്നവർക്കും സന്തോഷ വാർത്ത. ഭാരമേറിയ ബാഗുകളുടെ ചുമടേന്തി ഇനി വിയർക്കണ്ട. ട്രെയിനിനടുത്തേക്കും ബോഗിക്ക് അടുത്തേക്കും എത്താൻ ഇനി ഓപ്പറേറ്റഡ് കാറുകൾറെഡി. ചെറിയതുക നൽകിയാൽ ഈ ബാറ്ററി കാറിൽ യാത്രചെയ്യാം. നിലവിൽ രണ്ടു ബാറ്ററി ഓപ്പറേറ്റഡ് കാറുകളാണ് ഷൊർണൂർ ജംഗ്ഷൻ റെയിൽവേ സ്റ്റേഷനിൽ എത്തിച്ചിരിക്കുന്നത്. ഒരെണ്ണംകൂടി ഉടൻ വരികയും ചെയ്യും. പ്ലാറ്റ്ഫോമിൽ ഒരു ഭാഗത്തുനിന്നു മറുഭാഗത്തേക്കു പോകാൻ മാത്രമല്ല, ഒരു പ്ലാറ്റ്ഫോമിൽനിന്നു മറ്റൊരു പ്ലാറ്റ്ഫോമിലേക്കു പോകാനും ഇതു പ്രയോജനപ്പെടുത്താം. ഓരോ പ്ലാറ്റ്ഫോമിന്‍റെയും അവസാനഭാഗത്ത് ട്രാക്കിനു കുറുകെ പൂട്ടുകട്ടകൾ പതിച്ച ഭാഗത്തുകൂടിയാണ് വാഹനം ട്രാക്ക് മറികടന്ന് മറ്റു പ്ലാറ്റ്ഫോമുകളിലേക്കെത്തുക. ഗുഡ്സ് ട്രെയിനുകൾക്കു നീളം കൂടുതലായതിനാൽ ഇവ എത്തുന്ന സമയത്തുമാത്രം പ്ലാറ്റ്ഫോം മറികടന്നു പോകാൻ സാധിക്കില്ല. യാത്രക്കാർ വാഹനത്തിൽ കയറുന്നതിനു പ്രത്യേകം ബുക്ക് ചെയ്യുകയോ ടിക്കറ്റെടുക്കുകയോ വേണ്ട. വാഹനത്തിന്‍റെ ഓപ്പറേറ്റർക്കു പണംനൽകിയാൽ മതിയാകും. ഒരുയാത്രക്കാരന് 20 രൂപയും ഒരു ബാഗിന് 10 രൂപയുമാണു നിരക്ക്. ടെൻഡർ പ്രകാരമുള്ള ഏജൻസിയാണ് മൂന്നുവർഷത്തേക്ക് ബാറ്ററി ഓപ്പറേറ്റഡ് കാർ ഓടിക്കാൻ ഷൊർണൂരിൽ കരാർ എടുത്തിരിക്കുന്നത്. ദിവസവും നൂറോളം യാത്രക്കാർ ഇപ്പോൾതന്നെ ബാറ്ററി ഓപ്പറേറ്റഡ് കാർ ഉപയോഗിക്കുന്നുണ്ട്.

വെള്ളരിമേട് വെള്ളച്ചാട്ടം മേഖലയിൽ താത്കാലിക നിരോധനം

കൊല്ലങ്കോട്: വെള്ളരിമേട് വെള്ളച്ചാട്ടത്തിൽ നെണ്ടൻകിഴായ സ്വദേശിയുടെ ദാരുണമരണത്തെ തുടർന്ന് അടിയന്തിര നടപടിയുമായി വനംവകുപ്പ്. വെള്ളരിമേട് വെള്ളച്ചാട്ടം സന്ദർശനത്തിനു താത്കാലിക നിരോധനം ഏർപ്പെടുത്തി. നിർദിഷ്ട സ്ഥലത്ത് റിബൺകെട്ടി അതിർത്തി നിശ്ചയിക്കുകയും ഫോറസ്റ്റ് ഗാർഡിനെ നിയമിക്കുകയും ചെയ്തു. സന്ദർശകർക്കു ജില്ലാ കളക്ടറുടെ അപകട മുന്നറിയിപ്പു ബോർഡ് സ്ഥാപിച്ചു. എലവഞ്ചരി ഗ്രാമപഞ്ചായത്ത് പ്രസിഡന്‍റെ കെ. മണികണ്ഠന്‍റെ ഇടപെടലിനെ തുടർന്നാണ് സത്വരനടപടി. സമാനമായി കൊല്ലങ്കോട് പഞ്ചായത്ത് പരിധിയിലുള്ള സീതാർകുണ്ടിലും ശക്തമായ നിയന്ത്രണവും നിരീക്ഷണ കാമറകളും സ്ഥാപിക്കണമെന്ന ആവശ്യമുയരുന്നുണ്ട്. അന്യജില്ലയിൽനിന്നും വരുന്ന വിനോദസഞ്ചാരികൾ മദ്യം കഴിച്ച് പ്രകൃതിക്ക് ദോഷം വരുന്ന രീതിയിൽ പ്ലാസ്റ്റിക്ക് കുപ്പികളും ഭക്ഷണമാലിന്യങ്ങളും പ്രദേശത്തു തള്ളുന്നതു കണ്ടെത്തിയിട്ടുണ്ട്. കൂടുതൽ നിയന്ത്രണത്തിനു വനംവകുപ്പ് നീക്കം തുടങ്ങിയിട്ടുണ്ട്.

കുടുംബത്തിലെ നാലുകുരുന്നുകൾ ഇന്നു സ്കൂളിലേക്ക്

ചെർപ്പുളശ്ശേരി: കന്നിപ്രസവത്തിൽ ലഭിച്ച നാലു ആൺകൺമണികൾ നാളെ ക്ലാസ്മുറികളിലേക്ക്. ചളവറ കുന്നത്ത് മുഹമ്മദ് മുസ്തഫ- മുബീന ദന്പതികളുടെ മക്കളാണ് ഇന്നൊരുമിച്ച് വിദ്യാഭ്യാസത്തിന്‍റെ ആദ്യക്ഷരം കുറിക്കുന്നത്. ചളവറയിലെ ക്രസന്‍റ് പബ്ലിക് സ്കൂളാണ് നാലുപേർക്കും പ്രവേശനം ലഭിച്ചിട്ടുള്ളത്. നാലുപേരിൽ രണ്ടുപേർക്ക് എൽകെജി മുതൽ ഏഴാംക്ലാസ് വരെ പഠനം സൗജന്യമായിരിക്കുമെന്നു സ്കൂൾ അധികൃതരുടെ ഉറപ്പുമുണ്ട്.

ഒറ്റക്കെട്ടായി സമരത്തിനു രാഷ്ട്രീയകക്ഷികൾ

വടക്കഞ്ചേരി: വർഷങ്ങളേറെയായി അടഞ്ഞുകിടക്കുന്ന വടക്കഞ്ചേരി ടൗണിലെ ചെറുപുഷ്പം ജംഗ്ഷനിലുള്ള കംഫർട്ട് സ്റ്റേഷൻ തുറന്നു പ്രവർത്തിക്കണമെന്നാവശ്യപ്പെട്ട് ഭരണകക്ഷിയിലെ സിപിഐ ഉൾപ്പെടെ കോൺഗ്രസും ബിജെപിയും സമരം നടത്തും. നൂറുകണക്കിനു യാത്രക്കാർ വന്നുപോകുന്ന ജംഗ്ഷനിൽ പ്രാഥമികാവശ്യങ്ങൾക്കു സൗകര്യങ്ങളില്ലാതെ ഏറെ കഷ്ടപ്പെടുന്ന സ്ഥിതിയാണ്. നിരവധി ദൂരയാത്രികർ എത്തുന്ന ജംഗ്ഷനിലാണ് ഈ ദുരവസ്ഥ. ഏറെ വർഷങ്ങൾ പൂട്ടിക്കിടന്ന കംഫർട്ട് സ്റ്റേഷൻ ഈ വർഷം ജനുവരിയോടെ പ്രവർത്തനമാരംഭിക്കുമെന്നായിരുന്നു പഞ്ചായത്തധികൃതർ പറഞ്ഞിരുന്നത്. ഇതിനായി നടത്തിപ്പുകാരനെയും കണ്ടെത്തിയിരുന്നു. പഞ്ചായത്തിൽ നടന്ന ലേലത്തിൽ മാസം 85,000 രൂപയ്ക്കാണ് മംഗലംപാലം സ്വദേശി നടത്തിപ്പിനു കരാർ എടുത്തത്. കംഫർട്ട് സ്റ്റേഷൻ നടത്തിപ്പ്, ഫീസ് പിരിക്കൽ, ഇതുമായി ബന്ധപ്പെട്ട് മിൽമ ബൂത്തും ലഘുഭക്ഷണശാലയുമാണ് കരാർ വ്യവസ്ഥ. ഒരു വർഷത്തേക്കാണ് ലേലത്തിന് നൽകിയിട്ടുള്ളത്. എന്നാൽ കംഫർട്ട് സ്റ്റേഷൻ തുറക്കാൻ ഇനിയും നടപടിയായില്ല. ഉപയോഗശൂന്യമായ സ്ഥിതിയിലാണ് കംഫർട്ട് സ്റ്റേഷനുള്ളതെന്നും മതിയായ സൗകര്യങ്ങളുണ്ടാക്കണമെന്നും പഞ്ചായത്ത് അധികൃതരോട് പല തവണ ആവശ്യപ്പെട്ടെങ്കിലും സൗകര്യങ്ങളൊരുക്കിയില്ലെന്നും അതിനാൽ കരാറിൽനിന്ന് പിന്മാറുകയാണെന്ന് കാണിച്ച് പഞ്ചായത്തിന് കത്തുനൽകിയിട്ടുണ്ടെന്നും ലേലമെടുത്ത റഫീക് പറഞ്ഞു. ഇതിനാൽ കംഫർട്ട് സ്റ്റേഷൻ പ്രവർത്തനം ഇനിയും വൈകും. നഗരത്തിലെ കുരുക്ക് പഞ്ചായത്ത് തെരഞ്ഞെടുപ്പ് അടുത്തു വരുന്നതിലാണ് യാത്രക്കാരുടെ പ്രതീക്ഷ. പൊതുമരാമത്ത് വകുപ്പിലെ ഇലക്ട്രോണിക്സ് വിഭാഗമാണ് 13 വർഷം മുമ്പ് ഇ- ടോയ്‌ലറ്റുകൾ നിർമിച്ചത്. പക്ഷെ, ഉദ്ഘാടനത്തിനുശേഷം ടോയ്‌ലറ്റുകൾ പ്രവർത്തിച്ചത് ദിവസങ്ങൾ മാത്രം. സാങ്കേതിക പിഴവുകളിൽ ടോയ്‌ലറ്റുകളിൽ ആളുകൾ കുടുങ്ങി പലപ്പോഴും ഫയർഫോഴ്സ് എത്തി ഡോർ പൊളിച്ചായിരുന്നു ഉള്ളിൽ കുടുങ്ങിയവരെ പുറത്തെത്തിച്ചിരുന്നത്. പിന്നീട് ടോയ്‌ലറ്റുകൾ വർഷങ്ങളോളം അടച്ചിട്ടു. തുടർന്ന് 30 ലക്ഷം രൂപ ചെലവഴിച്ചു നിർമിച്ച നാല് ഇ - ടോയ്‌ലറ്റുകളും പൊളിച്ചു നീക്കി സാധാരണ ടോയ്ലറ്റുകൾ നിർമിക്കുകയായിരുന്നു. എന്നാൽ അതും വർഷങ്ങളായിട്ടും തുറന്നു പ്രവർത്തിച്ചില്ല. ഒറ്റയ്ക്കും ഒറ്റക്കെട്ടായും കംഫർട്ട് സ്റ്റേഷൻ തറന്നു പ്രവർത്തിക്കാൻ അടിയന്തര നടപടി സ്വീകരിച്ചില്ലെങ്കിൽ ശക്തമായ സമര പരിപാടികൾ ആരംഭിക്കുമെന്നു കോൺഗ്രസ് മണ്ഡലം പ്രസിഡന്‍റ് ഇല്ല്യാസ് പടിഞ്ഞാറേകളം, ബിജെപി നേതാവ് പി.കെ. ഗുരു, എഐടിയുസി മണ്ഡലം സെക്രട്ടറി എ.വി. അബാസ് എന്നിവർ പറഞ്ഞു. അഞ്ച് പഞ്ചായത്തുകളുടെ സംഗമകേന്ദ്രമാണ് വടക്കഞ്ചേരി. ഇതിനാൽ വിവിധ ആവശ്യങ്ങൾക്കായി ടൗണിലെത്തുന്നവർക്ക്‌ കണക്കില്ല. കംഫർട്ട് സ്റ്റേഷൻ തുറക്കാനുള്ള നടപടികൾ ത്വരിതപ്പെടുത്തിയില്ലെങ്കിൽ പാർട്ടികളുടെ വിദ്യാർഥി, യുവജന വിഭാഗങ്ങളെ പങ്കെടുപ്പിച്ച് സമരത്തിനിറങ്ങാനും തീരുമാനമുണ്ട്.

വാഹനാപകടത്തിൽ യുവാവ് മരിച്ചു

ചിറ്റൂർ: നല്ലേപ്പിള്ളിയിൽ മുന്നിൽ പോവുകയായിരുന്ന കാറിന്‍റെ പിൻഭാഗത്ത് ഇടിച്ച് ഇരുചക്രവാഹന യാത്രികൻ മരിച്ചു . കലയാട്ടുകുളമ്പ് ചന്ദ്രന്‍റെ മകൻ ജയൻ (40) ആണ് മരണപ്പെട്ടത്. ഇന്നലെ വൈകുന്നേരം അഞ്ചിന് മാട്ടുമൊന്തയിൽ വെച്ചാണ് അപകടം ഉണ്ടായത്. ഉടൻ താലുക്ക് ആശുപത്രിയിലെത്തിച്ചെങ്കിലും മരിച്ചു. കാർ പെട്ടെന്ന് ബ്രേക്ക് ചെയ്തതാണ് അപകടത്തിനു കാരണമായത്. ജില്ലാആശുപത്രി മോർച്ചറിയിലുള്ള മൃതദേഹം ഇന്ന് കാലത്ത് ചിറ്റൂർ പോലീസ് ഇൻക്വസ്റ്റിനു ശേഷം പോസ്റ്റുമോർട്ടം നടത്തും. അമ്മ: പങ്കജം. സഹോദരൻ: രഘു.

കാത്തലിക് സിറിയൻ ബാങ്കിന്‍റെ നവീകരിച്ച ശാഖ ഉദ്ഘാടനം ചെയ്തു

മണ്ണാർക്കാട്: കാത്തലിക് സിറിയൻ ബാങ്കിന്‍റെ നവീകരിച്ച ശാഖ മണ്ണാർക്കാട് ആശുപത്രിപ്പടി ബിഎസ്എൻഎൽ ഓഫീസിനു സമീപം പൂക്കുന്നം ബിൽഡിംഗിൽ നഗരസഭാ ചെയർമാൻ സി. മുഹമ്മദ്‌ ബഷീർ ഉദ്ഘാടനം ചെയ്തു. എടിഎം കൗണ്ടർ ഉദ്ഘാടനം യുജിഎസ് ഗ്രൂപ്പ്‌ മാനേജിംഗ് ഡയറക്ടർ അജിത്ത് പാലാട്ടും ഗോൾഡ് ലോൺ സെക‌്ഷൻ ഉദ്ഘാടനം അമാന ബെസ്റ്റ് ലെയ്ഡ് സൊസൈറ്റി മാനേജിംഗ് ഡയറക്ടർ കെ.വി.എ. റഹ‌്മാനും നിർവഹിച്ചു. വാർഡംഗം മുഹമ്മദ് ഇബ്രാഹിം, ഡോ.കെ.എ. കമ്മാപ്പ, ഡോ.ഷിഹാബുദീൻ, ഡോ.പരമേശ്വരൻ, ബാങ്ക് സോണൽ ഹെഡ് ജെയ്സൻ ജോസ്, ക്ലസ്റ്റർ ഹെഡ് ടി.വി. രാജഗോപാൽ, ശാഖാ മാനേജർ അനൂപ് പി. മേനോൻ തുടങ്ങിയവർ പങ്കെടുത്തു.

സ്കൂൾബസ് പരിശോധന; 85 ബസുകൾക്കു വിലക്ക്

ഒറ്റപ്പാലം: 85 സ്കൂൾ ബസുകൾക്ക് അധ്യയനവർഷാരംഭത്തിൽ സർവീസ് വിലക്ക്. പരിശോധന കർശനമാക്കി അധികൃതർ. പ്രത്യേക ക്യാന്പ് നടത്തിയുള്ള പരിശോധനയിലാണ് ജില്ലയിലാകെ 85 ബസുകൾക്ക് സർവീസ് നടത്താൻ അനുമതി നിഷേധിച്ചത്. ഈ ബസുകൾ ന്യൂനതകൾ പരിഹരിച്ചശേഷം ഹാജരാക്കിയാൽ അനുമതിനൽകും. ആകെ 647 വാഹനങ്ങളാണ് പരിശോധിച്ചത്. അതിൽ 562 ബസുകൾക്ക് പരിശോധനയ്ക്കുശേഷം സർവീസ് നടത്താനുള്ള അനുമതി നൽകി, ചെക്ക്ഡ് ഒകെ എന്ന സ്റ്റിക്കർ പതിപ്പിച്ചു. ഇന്നലയോടെ മോട്ടോർവാഹനവകുപ്പ് പരിശോധന പൂർത്തിയാക്കി. പട്ടാമ്പി താലൂക്കിലാണ് കൂടുതൽ വാഹനങ്ങൾ പരിശോധന പൂർത്തിയാക്കിയിട്ടുള്ളത്. 200 വാഹനങ്ങൾ പരിശോധിച്ചതിൽ 15 വാഹനങ്ങൾക്കാണ് ന്യൂനതകൾ കണ്ടെത്തിയത്. മണ്ണാർക്കാട്ട് 160 വാഹനങ്ങൾ പരിശോധിച്ചതിൽ 15 വാഹനങ്ങൾക്ക് അനുമതി നിഷേധിച്ചു. ചിറ്റൂരിൽ 137 വാഹനങ്ങൾ പരിശോധനയ്ക്ക് വിധേയമാക്കിയപ്പോൾ 28 വാഹനങ്ങൾക്ക് ന്യൂനതകൾ കണ്ടെത്തി തിരിച്ചയച്ചു. ഒറ്റപ്പാലത്ത് 90 വാഹനങ്ങൾ പരിശോധിച്ചപ്പോൾ 12 വാഹനങ്ങൾക്കാണ് അനുമതി നിഷേധിച്ചത്. ആലത്തൂരിൽ 60 വാഹനങ്ങൾ പരിശോധിച്ചപ്പോൾ 15 വാഹനങ്ങളെ തിരിച്ചയച്ചു. പാലക്കാട്ട് ഇന്നലെയാണ് പരിശോധന നടന്നത്. ഒറ്റപ്പാലം, പട്ടാമ്പി താലൂക്കുകളിലും രണ്ടാംഘട്ട പരിശോധന നടന്നു. ജിപിഎസ് സംവിധാനം കൃത്യമല്ലാത്തവ, അപകടമുണ്ടായാൽ കൺട്രോൾ റൂമിൽ അറിയിക്കാനുള്ള പാനിക് ബട്ടൺ പ്രവർത്തിക്കാതിരിക്കുക, ജനലിന്‍റെ ഗ്ലാസ് വാതിലുകൾ പ്രവർത്തിക്കാതിരിക്കുക, വൈപ്പർ കേടായവ, വിദ്യാവാഹൻ ആപ്പിൽ ബന്ധിപ്പിക്കാത്തവ തുടങ്ങിയവയ്ക്കാണ് അനുമതി നിഷേധിച്ചത്. പരിശോധനയ്ക്ക്‌ വിധേയമാക്കാത്തതോ അംഗീകാരം ലഭിക്കാത്തതോ ആയ സ്കൂൾ ബസുകൾ നിരത്തിലിറക്കിയാൽ കർശന നടപടിയെടുക്കുമെന്ന് മോട്ടോർ വാഹനവകുപ്പ് അധികൃതർ അറിയിച്ചു. സ്വകാര്യ വാഹനങ്ങളിൽ വിദ്യാലയങ്ങളിലേക്ക് കുട്ടികളെ കൊണ്ടുപോകുന്നതും കർശനമായി തടയാനാണ് അധികൃതരുടെ തീരുമാനം.

കല്ലടിക്കോടൻ മലയോരമേഖലയിലെ വന്യമൃഗശല്യം; ഡിഎഫ്ഒ യോഗം വിളിച്ചു

കല്ലടിക്കോട്: മൂന്നേക്കർ, മീൻവല്ലം, കരിമല, കല്ലടിക്കോട് ഭാഗങ്ങളിലെ നിലവിലെ വന്യജീവി ആക്രമണവുമായി ബന്ധപ്പെട്ട ലഘൂകരണ പ്രവൃത്തികൾ ആസൂത്രണം ചെയ്യുന്നതിനായി മണ്ണാർക്കാട് ഡിവിഷണൽ ഫോറസ്റ്റ് ഓഫീസറുടെ നേതൃത്വത്തിൽ യോഗം നടത്തി. ഇതുമായി ബന്ധപ്പെട്ട് പ്രദേശത്തെ കാട്ടാനകളുടെ ശല്യം പരിഹരിക്കുന്നതിന് നിർദേശങ്ങൾ ഉയർന്നുവരികയും അതനുസരിച്ച് പ്രവർത്തനങ്ങൾ ഏകോപിപ്പിക്കാനും തീരുമാനിച്ചു. കാട്ടാനകൾ ജനവാസ മേഖലകളിലേക്ക് ഇറങ്ങിവരുന്ന പാലക്കാട് ഡിവിഷനിലെ കേടുവന്ന 3.5 കിലോമീറ്റർ സോളാർ ഹാംഗിംഗ് ഫെൻസിംഗ് സന്നദ്ധപ്രവർത്തകരുടെയും വനംജീവനക്കാരുടെയും നേതൃത്വത്തിൽ ഇന്നുമുതൽ അറ്റകുറ്റപ്പണി നടത്തി പ്രവർത്തനക്ഷമമാക്കും. കാട്ടാന ജനവാസമേഖലകളിലേക്ക് ഇറങ്ങിവരുന്നതും നിലവിൽ സോളാർ ഫെൻസിംഗ് ഇല്ലാത്ത തുടിക്കോട് മുതൽ ചെറുമല വരെയുള്ള വനാതിർത്തിയിലെ സോളാർ ഹാംഗിംഗ് ഫെൻസിംഗ് നിർമാണ ജോലികൾ അടിയന്തരമായി പൂർത്തീകരിക്കും. കാട്ടാന ജനവാസമേഖലകളിലേക്ക് ഇറങ്ങിവരുന്നതും ഫെൻസിംഗിന് ബുദ്ധിമുട്ടേറിയതുമായ തരിപ്പപ്പതി പാലം മുതൽ ആറ്റില, കരിമല, പോത്തനട വനാതിർത്തികളിൽ സാധ്യമായ രീതിയിൽ സിംഗിൾ ലൈൻ ഫെൻസിംഗ് ചെയ്യാനും തീരുമാനിച്ചു. ഇതിലൂടെ പൂഴിക്കുന്ന് ഭാഗത്ത് തമ്പടിക്കുന്ന കാട്ടാനകളുടെ സഞ്ചാരം നിയന്ത്രിക്കാൻ ആവുമെന്നാണ് കണക്കാക്കുന്നത്. നിലവിലെ കാട്ടാന ആക്രമണങ്ങൾ തടയുന്നതിനായി മണ്ണാർക്കാട് ദ്രുതകർമസേന, പാലക്കയം ഫോറസ്റ്റ് സ്റ്റേഷൻ സ്റ്റാഫുകൾ, ഒലവക്കോട് റേഞ്ചിലെ സ്റ്റാഫുകൾ എന്നിവരടങ്ങുന്ന സംഘം മൂന്നേക്കർ കേന്ദ്രീകരിച്ച് ക്യാമ്പ് ചെയ്തു പ്രവൃത്തികൾ ഏകോപിപ്പിക്കും. പുതുക്കാട് പൂഴിക്കുന്ന് തമ്പടിക്കുന്ന കാട്ടാനകളെ തുരത്തി കരിമലയിലേക്കാക്കുന്ന പ്രവൃത്തികൾക്കായി മണ്ണാർക്കാട് ദ്രുതകർമസേനയെ ചുമതലപ്പെടുത്തി. ഈ മേഖലയിലെ വന്യജീവി ആക്രമണ ലഘൂകരണ പ്രവർത്തനങ്ങളിൽ ഒലവക്കോട് റേഞ്ച് സ്റ്റാഫുകളെ കൂടി ഉൾപ്പെടുത്താനും തീരുമാനിച്ചു.

പനംകുറ്റിയിൽ കാട്ടാനവിളയാട്ടം; വ്യാപകമായി കൃഷി നശിപ്പിച്ചു

വടക്കഞ്ചേരി: ഇടവേളക്കുശേഷം കിഴക്കഞ്ചേരി പനംകുറ്റിയിൽ കാട്ടാനയിറങ്ങി വ്യാപകമായി കൃഷിനശിപ്പിച്ചു. ചെറുനിലം ജോണി, ചെറുനിലം ജുബി, വരിക്കമാക്കൽ ബേബി, മുണ്ടൻചിറ റോയ് തുടങ്ങിയവരുടെ കൃഷികളാണ് നശിപ്പിച്ചിട്ടുള്ളത്. വാഴ, കുരുമുളക് കൊടികൾ, റബർ തുടങ്ങിയ വിളകളാണ് കൂടുതലും നശിപ്പിച്ചത്. വരിക്കമാക്കൽ ബേബിയുടെ തോട്ടത്തിലുണ്ടായിരുന്ന സ്പ്രേയറും ആന ചവിട്ടിനശിപ്പിച്ചിട്ടുണ്ട്. കുന്നേൽ എസ്റ്റേറ്റിലും കൃഷിനാശമുണ്ട്. കുലച്ചവാഴ തള്ളിയിട്ട് അതിലെ പിണ്ടി മാത്രമാണ് മുമ്പൊക്കെ ആന തിന്നിരുന്നത്. എന്നാൽ വാഴക്കുലകളും ആന തിന്നിട്ടുണ്ടെന്ന് ചെറുനിലം ജോണി പറഞ്ഞു. ഒറ്റയാനാണ് കൃഷിയിടങ്ങളിൽ കറങ്ങുന്നത്. വിവരമറിഞ്ഞ് വനപാലകർ സ്ഥലത്ത് എത്തിയെങ്കിലും ആനയെ കാടുകയറ്റാൻ നടപടിയൊന്നും എടുത്തിട്ടില്ലെന്നാണ് കർഷകരുടെ പരാതി. വീടുകൾക്ക് അടുത്തെത്തിയാണ് ആനകളുടെ ഈ വിളയാട്ടം. ഇതുമൂലം ആനയെ പേടിച്ച് രാത്രികാലങ്ങളിൽ വീടുകൾക്ക് കാവലിരിക്കുകയാണ് നാട്ടുകാർ. പരസ്പരം പഴിപറഞ്ഞ് വനപാലകർ നടപടിയെടുക്കാതെ പൊട്ടൻ കളി നടത്തുകയാണെന്നും കർഷകർ ആരോപിക്കുന്നു.

വിരമിക്കൽദിനത്തിൽ പ്രായം വെറുമൊരു നമ്പറല്ല സർ, അതൊരു യാഥാർഥ്യമാണ്..

മംഗലം ശങ്കരൻകുട്ടി ഷൊർണൂർ: പ്രായം വെറുമൊരു നമ്പറല്ല... വിങ്ങുന്ന മനസോടെ അവസാനത്തെ ഒപ്പും ചാർത്തി അവർ മൂന്നുപേരും ഒന്നിച്ച് പടിയിറങ്ങി. കുളപ്പുള്ളി ഗവ. പ്രസിൽനിന്നാണ് ആത്മസുഹൃത്തുക്കളുടെ ഒന്നിച്ചുള്ള പടിയിറക്കം ഇന്നലെ നടന്നത്. ഒരേ ക്ലാസ്മുറിയിൽ ഒരുമിച്ചിരുന്ന് പഠിച്ചുതുടങ്ങിയപ്പോൾ ആരംഭിച്ച ആത്മബന്ധത്തിന്‍റെ കാണാച്ചരട് ഔദ്യോഗികജീവിതത്തിൽനിന്ന് ഇന്നലെ പടിയിറങ്ങുംവരെ കാത്തുസൂക്ഷിച്ചവരാണ് ഈ മൂന്നുപേർ. സർക്കാർ പ്രസിലെ ഗസറ്റഡ് ഓഫീസറായ അഡ്മിനിസ്ട്രേറ്റീവ് അസിസ്റ്റന്‍റ് വാണിയംകുളം തൃക്കങ്ങോട് ലക്ഷ്മി നിവാസിൽ പി. വിജയകുമാർ, മണ്ണന്തല പ്രസിൽ ബൈൻഡർ സീനിയർ ഫോർമാനായ ഷൊർണൂർ കുളപ്പുള്ളി സ്വദേശി ഇ.എൻ. ബിനോയ്, ജനറൽ ഫോർമാനായ ഷൊർണൂർ കല്ലിപ്പാടം തുളസിനിലയത്തിൽ തുളസീധരൻ എന്നിവരാണ് ഇന്നലെ ഗവ. പ്രസിൽനിന്ന് വിരമിച്ചത്. ബിനോയിയും വിജയകുമാറും ഒന്നുമുതൽ ഏഴ് വരെ ആരിയഞ്ചിറ യുപി സ്കൂളിലാണ് പഠിച്ചത്. 1984-ൽ ഷൊർണൂർ കെവിആർ സ്കൂൾ, ഹൈസ്കൂൾ പഠനത്തിനെത്തിയ ഇവർക്കൊപ്പം തുളസീധരനും ചേർന്നു. ക്ലാസ് ലീഡറിനുവേണ്ടിയുള്ള മത്സരം വന്നപ്പോൾ വിജയൻ എസ്എഫ്ഐയിലും തുളസീധരൻ കെഎസ്‍യുവിലും മത്സരിച്ചു. തുളസീധനെ വിജയകുമാർ പരാജയപ്പെടുത്തിയെങ്കിലും സൗഹൃദം രാഷ്ട്രീയ കാഴ്ചപ്പാടുകൾപ്പുറമായിരുന്നു. സ്കൂൾ കാലഘട്ടത്തിനുശേഷം തുളസീധരനും ബിനോയും ഒറ്റപ്പാലം എൻഎസ്എസ് കോളജിലേക്കും വിജയകുമാർ ഷൊർണൂർ എസ്എൻ കോളജിലേക്കും വഴിപിരിഞ്ഞു. 1990 മാർച്ച് 16 ന് എൽഡി ക്ലർക്കായി വിജയകുമാറും 1989-ൽ കംപോസ്റ്റർ ഗെയിൻ സെക്കൻഡ്‌ തസ്തികയിലൂടെ തുളസീധരനും 1999-ൽ ബൈൻഡർ ഗ്രേഡ്-2 തസ്തികയിൽ ബിനോയിയും സർക്കാർ സർവീസിൽ കയറി. വിജയകുമാർ തിരുവനന്തപുരം, എറണാകുളം, തൃശൂർ, മലപ്പുറം, കോട്ടയം ജില്ലകളിലെ സർക്കാർ പ്രസിൽ ജോലിചെയ്തശേഷം 2024 മുതൽ അഡിമിനിസ്ട്രേറ്റീവ് അസിസ്റ്റന്‍റായി കുളപ്പുള്ളി പ്രസിൽ എത്തി. തുളസീധരൻ ആദ്യഘട്ടത്തിൽ വയനാട് പ്രസിലാണ് ജോലി ചെയ്തതെങ്കിലും 33 വർഷമായി ഷൊർണൂർ സർക്കാർ പ്രസിലുണ്ട്. 2019 മുതൽ ജനറൽ ഫോർമാനാണ്. ബിനോയ് എറണാകുളം, തിരുവനന്തപുരം, കോഴിക്കോട് തുടങ്ങിയ ജില്ലകളിൽ ജോലിചെയ്തു. 15 വർഷമായി ഷൊർണൂരിലാണ്. വിങ്ങുന്ന മനസോടെ ഈറനണിഞ്ഞ കണ്ണുകളുമായി പരസ്പരം കൈകൊടുത്ത് മൂവരും വഴിപിരിഞ്ഞു... ഇനിയും സൗഹൃദം പുറത്തുതുടരാമെന്ന വാഗ്ദാനത്തോടെ..

ഉയരങ്ങളിലെത്തിയാലും മനുഷ്യത്വം കൈവിടാത്തതു യഥാർഥമൂല്യം: വി.കെ. ശ്രീകണ്ഠൻ എംപി

പാലക്കാട്: പ്രയാസങ്ങളും പ്രതിസന്ധികളും അഭിമുഖീകരിച്ച് മുന്നേറിയവരാണ് ചരിത്രം സൃഷ്ടിച്ചിട്ടുള്ളതെന്നും ഏതു പദവികളിലെത്തിയാലും മനുഷ്യത്വം കൈവിടാതിരിക്കുന്നതാണ് യഥാർഥമൂല്യമെന്നും വി.കെ. ശ്രീകണ്ഠൻ എംപി. പാലക്കാട് ജില്ലയിലെ എസ്എസ്എൽസി, ഹയർസെക്കൻഡറി പരീക്ഷകളിൽ ഫുൾ എ പ്ലസ് നേടിയ വിദ്യാർഥികളെയും ഉന്നതവിജയം നേടിയ വിദ്യാലയങ്ങളെയും ആദരിക്കുന്ന ദീപിക ആദരം 2025 ഉദ്ഘാടനം ചെയ്ത് പ്രസംഗിക്കുകയായിരുന്നു എംപി. കഠിനാധ്വാനത്തിലൂടെയും സത്യസന്ധമായ പ്രവർത്തനത്തിലൂടെയും ആത്മാർഥമായ പരിശ്രമത്തിലൂടെയും വിജയിച്ചുവന്ന വിദ്യാർഥികളെ മലയാളത്തിലെ ഏറ്റവും പഴക്കമേറിയ ദിനപത്രമായ ദീപിക ആദരിക്കാൻ മുന്നോട്ടുവന്നതു ശ്ലാഘനീയമാണ്. വിജയത്തിന്‍റെ ഓരോ പടവുകൾ കയറുന്പോഴും അതിനുപിന്നിൽ പ്രയത്നിച്ച മാതാപിതാക്കളെയും അധ്യാപകരെയും സുഹൃത്തുക്കളെയും സ്മരിക്കണമെന്നും അദ്ദേഹം കുട്ടികളെ ഉദ്ബോധിപ്പിച്ചു. കാണിക്കമാത കോണ്‍വന്‍റ് ഇംഗ്ലീഷ് മീഡിയം ഹയർസെക്കൻഡറി സ്കൂളിൽ നടന്ന ചടങ്ങിൽ പാലക്കാട് ജയ് ക്രിസ്റ്റോ പ്രോവിൻസ് എഡ്യുക്കേഷണൽ കൗണ്‍സിലർ സിസ്റ്റർ ലത സിഎംസി അധ്യക്ഷത വഹിച്ചു. ദീപിക തൃശൂർ മാർക്കറ്റിംഗ് കോഓർഡിനേറ്റർ ഫാ. ജിയോ ചെരടായി സ്വാഗതവും സർക്കുലേഷൻ പാലക്കാട് ഏരിയ മാനേജർ സനൽ ആന്‍റോ നന്ദിയും പറഞ്ഞു. ദീപിക കോ- ഓർഡിനേറ്റിംഗ് എഡിറ്റർ ഫാ. റിന്‍റോ പയ്യപ്പിള്ളി പങ്കെടുത്തു. സാൻജോ കോളജ് ഓഫ് ഫാർമസ്യൂട്ടിക്കൽസ് സ്റ്റഡീസ് ഡയറക്ടർ ഫാ. സനിൽ കുറ്റിപ്പുഴക്കാരൻ ക്ലാസ് നയിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]