ADVERTISEMENT

ADVERTISEMENT

നിർമാണത്തിലെ അപാകത; മഴയിൽ കനാലിന്‍റെ ഭിത്തി ഇടിഞ്ഞു

കല്ലടിക്കോട്‌: നിർമാണത്തിലെ അപാകതയും മഴയും മണ്ണൊലിപ്പും മൂലം കനാലിന്‍റെ കോൺക്രീറ്റ്‌ ഭിത്തി ഇടിഞ്ഞ്‌ ലക്ഷങ്ങളുടെ നഷ്ടം. കാഞ്ഞിരപ്പുഴ ഇടതുകനാലിന്‍റെ ഇടക്കുർശി ഭാഗത്താണ് കോൺക്രീറ്റ്‌ ഇടിഞ്ഞിരിക്കുന്നത്‌.

രണ്ടുമാസം മുമ്പ്‌ ഒരു കോടി രൂപ ചെലവിൽ 89 മീറ്റർ നീളത്തിൽ നിർമിച്ച കോൺക്രീറ്റ്‌ ഭിത്തിയാണ് ‌വെള്ളത്തിന്‍റെ തള്ളൽ മൂലം പൊട്ടിത്തകർന്ന് കനാലിലേയ്ക്ക്‌ മറിഞ്ഞത്‌.

എട്ട് അടിയോളം ഉയരത്തിൽ നിർമിച്ച ഭിത്തിയുടെ നിർമാണത്തിലെ പിഴവാണെന്ന് കോൺഗ്രസ്‌ കരിമ്പ മണ്ഡലം കമ്മിറ്റി പ്രസിഡന്‍റ് സി.എം. നൗഷാദ്‌, യുഡിഎഫ്‌ കരിമ്പ മണ്ഡലം ചെയർമാൻ കെ.കെ. ചന്ദ്രൻ, ബാങ്ക്‌ പ്രസിഡന്‍റ് മുഹമ്മദുപ്പ കരിമ്പനയ്ക്കൽ, നവാസ്‌ മുഹമ്മദ്‌, മാത്യു കല്ലടിക്കോട്‌, അസർ എന്നിവർ പറഞ്ഞു.

അധികാരികളുടെ അനാസ്ഥയാണ് കനാൽ ഭിത്തി തകരാൻ കാരണമെന്നും നിർമാണത്തിലെ അഴിമതി അവസാനിപ്പിക്കണമെന്നും കമ്പി ഉപയോഗിച്ച്‌ കോൺക്രീറ്റ്‌ചെയ്ത്‌ ഭിത്തി പുനർനിർമിക്കണമെന്നും കോൺഗ്രസ്‌ ആവശ്യപ്പെട്ടു. ജലവിഭവവകുപ്പ്‌ ഓഫീസിലേയ്ക്ക്‌ മാർച്ചും ധർണയും നടത്തുമെന്നും മണ്ഡലം കമ്മിറ്റി പ്രസിഡന്‍റ് പറഞ്ഞു.

ADVERTISEMENT

മീറ്റ്ന തടയണയുടെ ഷട്ടറുകൾ ഉയർത്താനായില്ല; മഴ ശക്തമായാൽ വെള്ളപ്പൊക്ക ഭീഷണി

ഒറ്റപ്പാലം: ഭാരതപ്പുഴയിൽ നീരൊഴുക്ക് ശക്തം, മഴ ശക്തമായാൽ പരിസരപ്രദേശങ്ങളിലേക്ക് വെള്ളംകയറുമെന്ന് ആശങ്ക. മഴ തത്കാലത്തേക്ക് വിട്ടുനിൽക്കുന്നുണ്ടെങ്കിലും ശക്തമായ കാലവർഷം വരാനിരിക്കുകയാണ്. മീറ്റ്‌ന തടയണയിലെ ഷട്ടറുകൾ തുറക്കാനാവാത്തത് വെള്ളപ്പൊക്ക ഭീഷണി വർധിപ്പിക്കുന്നുണ്ട്. മഴ നേരത്തേയെത്തി ഷട്ടറുകളുള്ള ഭാഗത്ത് വെള്ളം നിറഞ്ഞതോടെയാണ് തുറക്കാനാകാത്ത സ്ഥിതിവന്നത്. ഇതുമൂലം നിയന്ത്രണാതീതമായി മഴവന്നാൽ വെള്ളം സമീപപ്രദേശങ്ങളിലേക്ക് കയറുമോയെന്നതാണ് ആശങ്ക. മഴക്കാലം അവസാനിക്കുന്നതോടെയാണ് മീറ്റ്‌ന തടയണയിലെ 26 ഷട്ടറുകൾ അടയ്ക്കാറുള്ളത്. വേനലിലേക്ക് കുടിവെള്ളവിതരണത്തിനായി സംഭരിക്കുക ലക്ഷ്യമിട്ടാണ് ഒക്ടോബറോടെ ഷട്ടർ അടയ്ക്കുക. ശേഷം വേനലിൽ ഒറ്റപ്പാലം നഗരസഭയിലേക്കും അമ്പലപ്പാറ പഞ്ചായത്തിലേക്കുമുള്ള കുടിവെള്ളവിതരണം ഇതുപയോഗിച്ച് നടത്തും. മറ്റ് പഞ്ചായത്തുകളിൽ ടാങ്കറിൽ വെള്ളമെത്തിക്കുന്നതിനും ഈ തടയണയെയാണ് ആശ്രയിക്കാറുള്ളത്. അതിനുശേഷം കാലവർഷം തുടങ്ങിയാൽ ജൂണിൽ ഷട്ടറുകൾ തുറക്കും. ചെളിയുൾപ്പെടെ ഒഴുക്കിക്കളഞ്ഞാണ് ഉപയോഗിക്കാറുള്ളത്. എന്നാൽ ഇത്തവണ പതിവിന് വിപരീതമായി മേയ്മാസത്തിൽ തന്നെ മഴ സജീവമായതോടെ തടയണ നിറഞ്ഞു. ഇതോടെ ജല അഥോറിറ്റിക്ക് തടയണയുടെ ഷട്ടറുകൾ ഉയർത്താനാകാതെ വന്നതാണ് പ്രതിസന്ധിയായത്. നിലവിൽ തടയണയും പരമാവധി സംഭരണശേഷിയും കവിഞ്ഞ് വെള്ളം ഒഴുകുന്ന സ്ഥിതിയാണ്. 2018ൽ പ്രളയകാലത്തും തടയണയുടെ ഷട്ടറുകൾ തുറക്കാനായിരുന്നില്ല. ഇതുമൂലം കൊണ്ടാഴി ഭാഗത്തും മീറ്റ്‌ന ഭാഗത്തേക്കും തടയണയിൽനിന്ന് വെള്ളം കയറുന്ന സ്ഥിതിയുണ്ടായിരുന്നു. കെഎസ്ഇബിയുടെ ട്രാൻസ്‌ഫോമറുൾപ്പെടെ വെള്ളത്തിലായിരുന്നു. തടയണയുടെ 20 ഷട്ടറുകളുടെ ആദ്യഭാഗം ഉയർത്താൻ നടപടി തുടങ്ങിയിരുന്നുവെന്നും എന്നാൽ അപ്പോഴേക്കും മഴ ശക്തമായെന്നും ജല അഥോറിറ്റി അധികൃതർ പറഞ്ഞു. മഴ അല്പം ഒന്ന് പിൻവാങ്ങിയാൽ തടയണയുടെ ഷട്ടറുകൾ ഏതുവിധേനയും ഉയർത്താൻ ഉള്ള ശ്രമത്തിലാണ് അധികൃതർ.

തൃശൂർ -പാലക്കാട് ദേശീയപാതയിൽ പതിനഞ്ചിടത്ത് നിർമാണപ്രവൃത്തികൾ

വടക്കഞ്ചേരി: തൃശൂർ - പാലക്കാട് ദേശീയപാതയിൽ പതിനഞ്ചിടത്ത് ഒരേസമയം നിർമാണപ്രവൃത്തികൾ നടക്കുന്നത് ഗതാഗതകുരുക്കിനും അപകടങ്ങൾക്കും കാരണമാകുന്നു. ദേശീയപാതയിൽ ഉണ്ടാകേണ്ട യാത്രാസൗകര്യം പാതയിൽ ഇല്ലാത്ത സാഹചര്യത്തിൽ പന്നിയങ്കരയിലെ ടോൾപിരിവ് താത്കാലികമായി നിർത്തിവയ്ക്കണമെന്നാണ് യാത്രക്കാർ ആവശ്യപ്പെടുന്നത്. അന്യസംസ്ഥാനങ്ങളിലേക്ക് പോകുന്ന ദൂരയാത്ര വാഹനങ്ങൾക്കാണ് കുരുക്കുകൾ ഏറെ ബുദ്ധിമുട്ടുണ്ടാക്കുന്നത്. തൃശൂർ മണ്ണുത്തിയിൽ നിന്നും പാലക്കാട്ടേക്ക് യാത്ര തുടങ്ങിയാൽ 65 കിലോമീറ്റർ വരുന്ന ദേശീയപാതയിൽ മുടിക്കോടും കല്ലിടുക്കിലും വാണിയംപാറയിലും മേൽപ്പാല നിർമാണമാണ്. ഇവിടെയെല്ലാം സർവീസ്റോഡിലൂടെ ഒറ്റവരിയായാണ് വാഹനങ്ങൾ കടത്തിവിടുന്നത്. വടക്കഞ്ചേരിവരെയും പലയിടത്തും അറ്റകുറ്റപണികൾ നടക്കുന്നുണ്ട്. കുത്തിപ്പൊളിച്ച് സ്ഥിരമായി അറ്റകുറ്റപ്പണി നടക്കുന്ന വടക്കഞ്ചേരി മേൽപ്പാലവും കടന്ന് മംഗലത്ത് എത്തിയാലും നിയന്ത്രണമുണ്ട്. ഇവിടെ പാലത്തിലൂടെയുള്ള വാഹനഗതാഗതം പൂർണമായും നിരോധിച്ചാണ് കുത്തിപ്പൊളിക്കൽ തകൃതിയായി നടക്കുന്നത്. പാലത്തിലെ നാല് വലിയ സ്ലാബുകളുടെയും ജോയിന്‍റുകളും കുത്തിപ്പൊളിച്ച് ബലപ്പെടുത്തുന്ന പണികളാണ് നടക്കുന്നത്. ഈ പണികൾ പൂർത്തിയായി ഗതാഗതം പുനഃസ്ഥാപിക്കാൻ ഇനി ആഴ്ചകളേറെയെടുക്കും. ഇവിടെ തൃശൂർ ലൈനിലൂടെയാണ് വാഹനങ്ങൾ ഒറ്റവരിയായി കടത്തിവിടുന്നത്. ആലത്തൂർ സ്വാതി ജംഗ്ഷനിലും കുഴൽമന്ദത്തുമെല്ലാം നിർമാണപ്രവൃത്തികളുണ്ട്. ഈ വാഹന കുരുക്കുകൾക്കു പുറമെ സിഗ്നലുകളും കടന്നുവേണം ദൂരയാത്രികർക്ക് മുന്നോട്ട് പോകാൻ. xലക്കാട് നിന്നും തൃശൂരിലേക്ക് പോകുമ്പോഴും ഇതേ ദുരിതയാത്ര തന്നെയാണ്. പാതനിർമാണ സമയത്ത് മതിയായ പരിശോധന നടക്കാത്തതിന്‍റെ ദുരിതമാണ് ഇപ്പോൾ യാത്രക്കാർ അനുഭവിക്കേണ്ടി വരുന്നത്. ടോൾപിരിവ് തുടങ്ങാനുള്ള തിടുക്കത്തിൽ തോന്നുംമട്ടിൽ പണികൾ നടത്തി പിന്നീട് എല്ലാം തകരുന്ന സ്ഥിതിയായി.

പനംകുറ്റിയിൽ വിളകളൊന്നും ശേഷിപ്പിക്കാതെ കാട്ടാനകളുടെ വിളയാട്ടം

വടക്കഞ്ചേരി: കിഴക്കഞ്ചേരി പനംകുറ്റി പ്രദേശത്ത് സ്ഥിരമായി കാട്ടാനക്കൂട്ടമിറങ്ങി വ്യാപകമായി വിളകൾ നശിപ്പിക്കുമ്പോഴും വനംവകുപ്പിന്‍റെ നിഷ്ക്രിയത്വത്തിനെതിരെ പ്രതികരിക്കാതെ ഭരണ -പ്രതിപക്ഷ രാഷ്ട്രീയ പാർട്ടികൾ. ഓരോദിവസവും രാവിലെ തോട്ടങ്ങളിൽ ചെല്ലുമ്പോൾ വേദനിപ്പിക്കുന്ന കാഴ്ചകളാണ് പനംകുറ്റിയിലെ തോട്ടങ്ങളിലെല്ലാം. തെങ്ങുകളെല്ലാം കൂട്ടത്തോടെ തള്ളിയിട്ടാണ് ആനകളുടെ വിളയാട്ടം. നൂറുകണക്കിന് വാഴയുണ്ടായിരുന്ന തോട്ടത്തിൽ ഇപ്പോൾ വാഴ ഇല്ലാതായെന്ന് പനംകുറ്റിയിൽ സ്ഥിരമായി ആനയെത്തുന്ന തോട്ടത്തിന്‍റെ ഉടമയായ ചെറുനിലം ജോണി പറഞ്ഞു. കഴിഞ്ഞദിവസം രാത്രിയും ആനയെത്തി ശേഷിച്ച വാഴകൾ കൂടി നശിപ്പിച്ചു. ജാതിമരങ്ങളും കുരുമുളകുകൊടികളും നശിപ്പിച്ചിട്ടുണ്ട്. പകലന്തിയോളം അധ്വാനിച്ചുണ്ടാക്കുന്ന കൃഷിയെല്ലാം രാത്രിയിൽ ആനകളെത്തി നശിപ്പിക്കും. ഇത് തുടരുകയാണ്. യുദ്ധക്കളം പോലെയാക്കുന്ന കൃഷിയിടത്തിലെ കാഴ്ചകൾ കണ്ടുനിൽക്കാൻ പോലും കഴിയുന്നില്ലെന്ന് കർഷകർ പറയുന്നു. വനംവകുപ്പിന്‍റെ ഈ അനാസ്ഥയ്ക്കെതിരെ രാഷ്ട്രീയ പാർട്ടികളോ സംഘടനകളോ രംഗത്ത് വരാത്തതും കർഷകരെ വിഷമിപ്പിക്കുന്നുണ്ട്. തുണയായി നിൽക്കേണ്ടവർപോലും തിരിഞ്ഞുനോക്കുന്നില്ലെന്ന പരാതിയാണ് കർഷകർ പങ്കുവയ്ക്കുന്നത്.

പറന്പിക്കുളത്തെ ദേശീയ മാതൃകയാക്കാവുന്ന ആദിവാസി മേഖലയാക്കി വളർത്തും: കെ. ശാന്തകുമാരി എംഎൽഎ

പാലക്കാട്: പറന്പിക്കുളത്തെ ദേശീയ മാതൃകയാക്കാവുന്ന തരത്തിലുള്ള ആദിവാസി മേഖലയാക്കി വളർത്തുമെന്ന് കേരള നിയമസഭാ പട്ടികജാതി-പട്ടികവർഗക്ഷേമ സമിതി ചെയർപേഴ്സണ്‍ കെ. ശാന്തകുമാരി എംഎൽഎ. ജില്ലയിലെ പട്ടികജാതി,പട്ടികവർഗ ക്ഷേമം സംബന്ധിച്ച് നിയമസഭ പട്ടികജാതി-പട്ടികവർഗ ക്ഷേമസമിതി പറന്പിക്കുളം ആനപ്പാടിയിലെ വനം വകുപ്പ് ഇൻഫർമേഷൻ സെന്‍ററിൽ നടത്തിയ വിവിധ വകുപ്പുകളുടെ അവലോകനയോഗത്തിൽ സംസാരിക്കുകയായിരുന്നു ചെയർപേഴ്സണ്‍. എല്ലാമേഖലയിലും പട്ടിക വർഗ വിഭാഗത്തെ മുന്നോട്ട് കൊണ്ടുവരാനുള്ള ഇടപെടൽ ഉണ്ടാവണമെന്നും ഇതിനായി ഉദ്യോഗസ്ഥർ പ്രയത്നിക്കണമെന്നും എംഎൽഎ അറിയിച്ചു. ഉന്നതികളിൽ ലഹരിവിരുദ്ധ ബോധവത്കരണപരിപാടികൾ നടത്തുന്നുണ്ടെന്ന് എക്സൈസ് വകുപ്പ് പറഞ്ഞു. ഇതിനായി ഉന്നതികൾ കേന്ദ്രീകരിച്ച് ജനകീയ സമിതി രൂപീകരിക്കണമെന്ന് സമിതി നിർദേശിച്ചു. ആറ് ഉന്നതികളിലായി ഇക്കോ ഡെവലപ്മെന്‍റ് കമ്മിറ്റികൾ പ്രവർത്തിക്കുന്നുണ്ട്. ആദിവാസികൾ നിർമിക്കുന്ന കരകൗശലവസ്തുക്കളും തേൻ, കുന്തിരിക്കം, കൂവപ്പൊടി തുടങ്ങി വിവിധ സാമഗ്രികളും ഇക്കോ ഷോപ്പുകൾവഴി വില്പന നടത്തുന്നതിലൂടെ ഇവർക്ക് വരുമാനം ലഭിക്കുന്നുണ്ടെന്നും വനംവകുപ്പ് ഉദ്യോഗസ്ഥൻ പറഞ്ഞു. തനത് ഉത്പന്നങ്ങൾ പ്രോത്സാഹിപ്പിക്കുന്നത്തിനായി പരിശീലന പരിപാടികൾ സംഘടിപ്പിക്കുന്നുണ്ടെന്നും മീൻപിടുത്തക്കാരായ പട്ടികവർഗക്കാരെ ഇക്കോ ഡെവലപ്മെന്‍റ് കമ്മിറ്റികളിൽ ഉൾപ്പെടുത്തി ആനുകൂല്യം അനുവദിക്കാനുള്ള നടപടിയുണ്ടാവുമെന്നുംവനംവകുപ്പ് ഉദ്യോഗസ്ഥർ പറഞ്ഞു. ഏറ്റവുംകൂടുതൽ ജൈവ കുരുമുളക് കൃഷിയുള്ള മേഖല പറന്പിക്കുളത്തെ പൂപ്പാറയാണെന്നും 2023 ൽ സംസ്ഥാനത്തെ ജൈവകൃഷിക്കുള്ള അവാർഡ് പൂപ്പാറ ഉന്നതിയിലുള്ള കുരുമുളക്കൃഷിക്ക് ലഭ്യമായെന്നും കൃഷിവകുപ്പ് അറിയിച്ചു. പൂപ്പാറ കുരുമുളക് കേരള അഗ്രോ ബ്രാൻഡിംഗിൽ കൊണ്ടുവരണമെന്നും കൃഷി വകുപ്പ് ആവശ്യപ്പെട്ടു. സമിതിഅംഗം കടകംപള്ളി സുരേന്ദ്രൻ, എംഎൽഎ മാരായ പി.പി. സുമോദ്, കെ. ബാബു എന്നിവരും പങ്കെടുത്തു.

കൊല്ലങ്കോട്ട് വീണ്ടും പുലി നായയെ കൊന്നു; നാട്ടുകാർ ഭീതിയിൽ

കൊല്ലങ്കോട്: ആറുമാസത്തെ ഇടവേളക്കുശേഷം കൊല്ലങ്കോട് പഞ്ചായത്ത് പ്രദേശത്ത് പുലിയിറങ്ങി നായയെ കൊന്നു. പാലയം കോട് ബാലന്‍റെ കാണാതായ നായയുടേതെന്ന് കരുതുന്ന അവശിഷ്ടവും വനപാലകർ കണ്ടെത്തി. പ്രദേശത്ത് പുലിയുടെ കാൽപാദത്തിന്‍റെ അടയാളങ്ങളും കണ്ടെത്തിയിട്ടുണ്ട്. കൊല്ലങ്കോട് ഗ്രാമപഞ്ചായത്ത് പ്രസിഡന്‍റ് കെ. സത്യപാലും പഞ്ചായത്തംഗങ്ങളും സ്ഥലത്തെത്തി അന്വേഷിച്ച് വിവരം നൽകിയതിന്‍റെ അടിസ്ഥാനത്തിൽ ചെറുകാൽ, ചേകോൽ ഭാഗത്ത് കാമറ സ്ഥാപിക്കാൻ നടപടി സ്വീകരിച്ചു. ആറുമാസം മുൻപ് ഈ സ്ഥലത്ത് നാട്ടുകാർ പല തവണ പുലിക്ക് സമീപം എത്തിരക്ഷപ്പെട്ട സംഭവം നടന്നിരുന്നു. പ്രഭാതസമയത്ത് പത്രവിതരണത്തിനു പോയ ഏജന്‍റും പുലിയെ നേരിൽ കണ്ടെത്തിയിരുന്നു. തുടർന്ന് വനംവകുപ്പ് സ്ഥലത്ത് കാമറകൾ സ്ഥാപിച്ച് ഒരു മാസത്തോളം തെരച്ചിൽ നടത്തിയിട്ടും പുലിയെ കണ്ടെത്തിയില്ല. ഈ സമയത്ത് അപ്രത്യക്ഷമായ പുലിയാണ് ഇപ്പോൾ വീണ്ടും പ്രത്യക്ഷപ്പെട്ടിരിക്കുന്നത്. വനംവകുപ്പ് പ്രദേശത്ത് പട്രോളിംഗ് ആരംഭിച്ചിട്ടുണ്ട്. കാമറയിൽ പുലിയുടെ സഞ്ചാരം കണ്ടെത്തിയാലേ കൂടുസ്ഥാപിക്കാൻ കഴിയൂ എന്ന് വനപാലകർ അറിയിച്ചു.

പരിസ്ഥിതിദിനം വ്യത്യസ്തമാക്കാനൊരുങ്ങി കുടുംബശ്രീ ജില്ലാ മിഷൻ

പാലക്കാട്: സുസ്ഥിര വികസന ലക്ഷ്യങ്ങളിൽ ഏറെ പ്രാധാന്യമുള്ള പുനരുപയോഗത്തിന്‍റെ വലിയ സന്ദേശം നൽകുന്ന സ്വാപ്പ് ഷോപ് കൂടുതൽ വിപുലമാക്കാനും സംരംഭതലത്തിലേക്ക് വികസിപ്പിക്കാനുമുള്ള പ്രവർത്തനങ്ങൾ നടന്നുവരികയാണ്. ഇതിന്‍റെ ഭാഗമായി ഈ വരുന്ന പരിസ്ഥിതി ദിനത്തിൽ പാലക്കാട് കുടുംബശ്രീ ജില്ലാ മിഷൻ കാന്പയിൻ സംഘടിപ്പിക്കുന്നു. പുനരുപയോഗം, ഉത്പന്നങ്ങളുടെ പരമാവധി ഉപയോഗം എന്നിവ പരിസ്ഥിതിക്ക് ഏറെ ഗുണമാകുന്നു എന്ന കാര്യം കൂടുതൽ ജനകീയമാക്കുകയാണ് ഈ കാന്പയിൻ വഴി ലക്ഷ്യമിടുന്നത്. മറ്റൊരാൾ ഉപയോഗിച്ച ഉപയോഗയോഗ്യമായ വസ്ത്രങ്ങൾ, ബാഗ്, ചെരുപ്പ്, ആഭരണങ്ങൾ, ഇലക്ട്രോണിക് ഉപകരണങ്ങൾ തുടങ്ങിയവ ഉപയോഗിച്ചുകൊണ്ടാണ് കുടുംബശ്രീ ജില്ലാമിഷൻ കാന്പയിന്‍റെ ഭാഗമാകുന്നത്. ജീവനക്കാർ ഉത്പന്നങ്ങൾ ജില്ലാമിഷനിൽ എത്തിച്ചും കൈമാറിയും പ്രവർത്തനങ്ങൾക്ക് തുടക്കം കുറിച്ചു.

ലോക പരിസ്ഥിതിദിനം ജില്ലാതല ഉദ്ഘാടനം മന്ത്രി കെ. കൃഷ്ണൻകുട്ടി നിർവഹിക്കും

പാലക്കാട്: ലോക പരിസ്ഥിതി ദിനാചരണത്തോടനുബന്ധിച്ച് ഒരു തൈ നടാം പനപർവ്വം പദ്ധതിയുടെ ജില്ലാതല ഉദ്ഘാടനം ഇന്ന് മന്ത്രി കെ. കൃഷ്ണൻകുട്ടി നിർവഹിക്കും. ജില്ലാ പഞ്ചായത്ത് ഹാളിൽ നീർധാര പദ്ധതിയുടെ ഉദ്ഘാടനത്തോടനുബന്ധിച്ചാണ് ലോക പരിസ്ഥിതിദിനാചരണ ഉദ്ഘാടനം നടക്കുക. ഗവ. വിക്ടോറിയ കോളജിലെ വിദ്യാർഥികൾ ശേഖരിച്ച കരിന്പനകളുടെ വിത്ത് മന്ത്രിക്ക് കൈമാറിയാണ് ഉദ്ഘാടനം നിർവഹിക്കുന്നത്. ഈ കരിന്പനകളുടെ വിത്തുകൾ ജില്ലാ പഞ്ചായത്തിന്‍റെ അധീനതയിലുള്ള പ്രദേശങ്ങളിൽ നട്ട് പരിപാലിക്കും. വൃക്ഷവത്കരണ കാന്പയിനു തുടക്കം ഹരിതകേരളം മിഷന്‍റെ നേതൃത്വത്തിൽ വൃക്ഷത്തൈകൾ നട്ടുപിടിപ്പിക്കുന്ന ഒരു തൈ നടാം ജനകീയ വൃക്ഷവത്കരണ കാന്പയിനും ജില്ലയിൽ ഇന്ന് തുടക്കംകുറിക്കും. ഹരിതകേരളം മിഷൻ 2019 മുതൽ നടപ്പിലാക്കി വരുന്ന പച്ചത്തുരുത്ത് പദ്ധതിയെ കൂടുതൽ ഇടങ്ങളിലേക്ക് വ്യാപിപ്പിക്കുന്നതിനോടൊപ്പം സമഗ്ര വൃക്ഷവത്കരണ പ്രവർത്തനവും ലക്ഷ്യമിട്ട് സെപ്റ്റംബർ 30 വരെയാണ് ഒരു തൈ നടാം കാന്പയിൻ. അപൂർവവും വംശനാശഭീഷണി നേരിടുന്നതുമായ വൃക്ഷങ്ങളുടെ തൈകൾ നട്ടുപിടിപ്പിക്കുന്നതിൽ കാന്പയിൻ പ്രത്യേകം ശ്രദ്ധ നൽകും. വിദ്യാർഥികൾ, കുടുംബശ്രീ പ്രവർത്തകർ, തൊഴിലുറപ്പ് തൊഴിലാളികൾ, ഹരിതകർമസേനാംഗങ്ങൾ, ജീവനക്കാർ, റസിഡന്‍റ്സ് അസോസിയേഷനുകൾ, ആരാധനാലയങ്ങൾ, വായനശാലകൾ, സാമൂഹ്യ രാഷ്ടീയ സംഘടനകൾ തുടങ്ങി സമസ്ത ജനവിഭാഗങ്ങളെയും പങ്കെടുപ്പിച്ചാണ് കാന്പയിൻ സംഘടിപ്പിക്കുന്നത്. കൃഷിവകുപ്പിന്‍റെ ഫലവൃക്ഷത്തെ വിതരണം ലോക പരിസ്ഥിതിദിനത്തോടനുബന്ധിച്ച് പഞ്ചായത്തുകൾക്കും സ്കൂളുകൾക്കും കൃഷികർഷകക്ഷേമവകുപ്പ് ഫലവൃക്ഷത്തൈകൾ നൽകും. കൃഷിവകുപ്പിൽ നിന്നും അഞ്ച് ഫലവൃക്ഷത്തൈകൾ വീതമാണ് സ്കൂളുകളിലേക്കും പഞ്ചായത്തുകളിലേക്കും നൽകുന്നത്. ജില്ലയിൽ കൃഷിവകുപ്പിന് കീഴിലുള്ള ഒന്പത് ഫാമുകളിൽ നിന്നുമാണ് അതത് മേഖലകളിലെ സ്കൂളുകളിലേക്കും പഞ്ചായത്തുകളിലേക്കും ഫലവൃക്ഷത്തൈകൾ എത്തിക്കുന്നത്.

വടക്കന്തറ താമരക്കുളത്തിനു വേണം നല്ലൊരു സംരക്ഷണഭിത്തി

പാലക്കാട്: വടക്കന്തറ താമരക്കുളത്തിന്‍റെ ജീർണാവസ്ഥ പരിഹരിക്കണമെന്നും ചെളി നീക്കംചെയ്തു ചുറ്റുമതിൽകെട്ടി കുളം സംരക്ഷിക്കണമെന്നും ആവശ്യം ശക്തമാകുന്നു. കഴിഞ്ഞ ദിവസം പരിസരത്തെ കുട്ടി കുളത്തിൽ അകപ്പെട്ടിരുന്നു. ഭാഗ്യംകൊണ്ടാണു രക്ഷപ്പെട്ടത്. വർഷങ്ങൾക്കുമുന്പും ഇത്തരത്തിൽ ചെറിയൊരു കുട്ടി അപകടത്തിൽപ്പെട്ടതായി നാട്ടുകാർ ഓർക്കുന്നു. പിന്നീട് സർക്കാറിനും ദേവസ്വത്തിനും നിരന്തരമായി നാട്ടുകാർ പരാതി നൽകിയിരുന്നു. തുടർന്ന് പാലക്കാട് നഗരസഭ അമൃത് പദ്ധതിയിൽ ഉൾപ്പെടുത്തി നവീകരണപ്രവൃത്തി നടക്കുന്നുണ്ടെങ്കിലും പൂർണമായും ചെളിനീക്കംചെയ്തു ചുറ്റുമതിൽ എല്ലാവശവും കെട്ടിയുള്ള പ്രവർത്തനമല്ല നടക്കുന്നതെന്നു നാട്ടുകാർ പറയുന്നു. കുളത്തിലെ സംരക്ഷണവേലി അഴിച്ചത് അപകടത്തിനു വഴിയൊരുക്കുന്നുവെന്നും അധികൃതർ അടിയിന്തരമായി ഇടപെട്ട് കുട്ടികളുടെ സംരക്ഷണം ഉറപ്പുവരുത്തണമെന്നും ആവശ്യപ്പെട്ടു നാട്ടുകാർ രംഗത്തെത്തിയിട്ടുണ്ട്. ഇതുസംബന്ധിച്ച് തദ്ദേശസ്വയംഭരണ വകുപ്പിനും മലബാർ ദേവസ്വംബോർഡിനും പരിസരവാസികൾ പരാതി അയച്ചിട്ടുമുണ്ട്. നിലവിൽ കുളത്തിന്‍റെ മൂന്നുഭാഗം മാത്രം കെട്ടാനാണ് കരാർ അനുവദിച്ചിരിക്കുന്നത്. കുളത്തിനുള്ളിൽ ചെളിയും കരിങ്കൽതൂണുകളടക്കം പലതും കിടക്കുന്നുണ്ടെങ്കിലും മാറ്റാൻ കരാർ നൽകിയിട്ടില്ലെന്നും സൂചനയുണ്ട്. ലക്ഷങ്ങൾ പൊടിപൊടിച്ചുള്ള നവീകരണത്തിൽ അന്വേഷണം വേണമെന്നും നാട്ടുകാർ ആവശ്യപ്പെട്ടു.

അളുവശേരിയിലെ ഉണക്കമരം മുറിച്ചുമാറ്റി; വാഹനയാത്രികർക്ക് ആശ്വാസം

നെന്മാറ: നെന്മാറ- പോത്തുണ്ടി റോഡിൽ അളുവശേരി കുരിശുപള്ളിക്കുസമീപം അപകടകരമായിനിന്ന ഉണക്കമരം മുറിച്ചുമാറ്റി. കഴിഞ്ഞദിവസം കെ. ബാബു എംഎൽഎ യുടെ നേതൃത്വത്തിൽ ദുരന്തനിവാരണ അവലോകനയോഗത്തിൽ പൊതുമരാമത്ത് അധികൃതരോടു മരം മുറിച്ചുനീക്കാൻ ആവശ്യപ്പെട്ടിരുന്നു. നെല്ലിയാമ്പതി ഉൾപ്പെടെ വിവിധ ഭാഗങ്ങളിലേക്കു പോകുന്ന റോഡരികിലെ ഉണങ്ങിയ പാലമരമാണ് പൊതുമരാമത്ത് അധികൃതർ വെട്ടിമാറ്റിയത്. മരം മുറിച്ചു മാറ്റുന്നതിന്‍റെ ഭാഗമായി വൈദ്യുതി ലൈനും, നെറ്റ് വർക്ക്, കേബിൾ ടിവി എന്നിവ അഴിച്ചുമാറ്റിയതിനെ തുടർന്ന് നാലുമണിക്കൂറോളം മേഖലയിൽ വൈദ്യുതി, നെറ്റ്‌വർക്ക് ബന്ധം തടസപ്പെട്ടു. രണ്ടുമണിക്കൂറോളം ഇടവേളയിൽ ഗതാഗതവും നിർത്തിവച്ചിരുന്നു. പോത്തുണ്ടിറോഡിൽ വിവിധ ഭാഗങ്ങളിലായി ഇതുകൂടാതെ പത്തോളം ഉണങ്ങിയ മരങ്ങൾ പലയിടത്തായി അപകടഭീഷണി ഉയർത്തിനിൽക്കുന്നുണ്ടെന്നു വാഹനയാത്രക്കാർ പരാതിപ്പെട്ടു.

പതിനഞ്ചുവർഷത്തിനുശേഷം സുന്ദരിയാകാനൊരുങ്ങി കടുക്കാംകുന്നം റെയിൽവേ മേൽപ്പാലം

മലമ്പുഴ: കേരളത്തിലെ പ്രധാന വിനോദസഞ്ചാര കേന്ദ്രത്തിലേക്കു പോകുന്ന മുഖ്യറോഡിലെ കടുക്കാംകുന്നം റെയിൽവേ മേൽപ്പാലം സുന്ദരിയാകാനൊരുങ്ങി. പാലംപണി പൂത്തിയായി പതിനഞ്ചുവർഷങ്ങൾ പിന്നിടുമ്പോഴാണ് പെയിന്‍റിംഗ് വർക്കുകൾ ആദ്യമായി നടത്തുന്നതെന്നു പരിസരവാസികൾ പറഞ്ഞു. പാലത്തിനടിയിൽ സാമൂഹ്യ വിരുദ്ധർ മാലിന്യംതള്ളുന്നത് സ്ഥിരംപതിവാണ്. ചപ്പുചവറുകൾ ഇട്ടുകത്തിക്കുമ്പോഴുണ്ടാകുന്ന പുകപടലങ്ങൾ പരിസരവാസികൾക്കും ഇതുവഴിപോകുന്ന യാത്രക്കാർക്കും പ്രശ്നങ്ങൾ സൃഷ്ടിക്കാറുണ്ട്. ഇതിനെല്ലാം തടയിടാനാണ് പുതിയ മിനുക്കുപണികളെന്നും സൂചനയുണ്ട്. മാലിന്യം തള്ളുന്നവരെ കണ്ടുപിടിക്കാൻ കാമറ സ്ഥാപിക്കണമെന്നാവശ്യപ്പെട്ട് പരിസരവാസികളായ മുപ്പതോളംപേർ ഒപ്പിട്ട അപേക്ഷ പഞ്ചായത്തിൽ സമർപ്പിച്ചിരുന്നതായി പൊതുപ്രവർത്തകൻ ജയജിത്ത് പറഞ്ഞു.

വന്യമൃഗശല്യം: എ. പ്രഭാകരൻ എംഎൽഎയുടെ നേതൃത്വത്തിൽ പ്രത്യേക യോഗം

മലമ്പുഴ: കാട്ടിൽനിന്നും നാട്ടിലേക്കിറങ്ങി മനുഷ്യരുടെ ജീവനും സ്വത്തിനും കൃഷിക്കും നാശംവരുത്തുന്ന വന്യമൃഗങ്ങളെ നിയന്ത്രിക്കാൻ മലമ്പുഴ എംഎൽഎ എ. പ്രഭാകരന്‍റെ ഇടപെടലിൽ പാലക്കാട് ഡിവിഷൻ ഫോറസ്റ്റ് ഓഫീസിൽ യോഗംചേർന്നു. യോഗത്തിൽ വന്യമൃഗങ്ങളെ തടയാൻ ഫെൻസിംഗ് സ്ഥാപിക്കൽ, അടിക്കാടുകൾ വെട്ടുക, കുളങ്ങൾ നിർമിക്കൽ, തേനീച്ചക്കൂട് നിർമിക്കുക തുടങ്ങിയ വിവിധങ്ങളായ പദ്ധതികളെകുറിച്ച് ചർച്ചചെയ്തു. വന്യജീവി സൗഹൃദ പദ്ധതിയിൽ ഉൾപ്പെടുത്തി ഫണ്ട് വകയിരുത്താൻ മലമ്പുഴ മണ്ഡലത്തിലെ എട്ടുപഞ്ചായത്തുകളും തീരുമാനിച്ചു. ഫോറസ്റ്റ് ഉദ്യോഗസ്ഥന്മാർ പഞ്ചായത്തുകളിൽചെന്ന് മാസ്റ്റർപ്ലാൻ തയാറാക്കുവാനും യോഗത്തിൽ തീരുമാനിച്ചു. ഡിഎഫ്ഒ ജോസഫ് തോമസ്, വാളയാർ റേഞ്ച് ഓഫീസർ മുഹമ്മദലി ജിന്ന, ഒലവക്കോട് റേഞ്ച് ഓഫീസർ ഇമ്രോസ്, വിവിധ പഞ്ചായത്തു പ്രസിഡന്‍റുമാരായ രാധികാമാധവൻ, പി. ഉണ്ണികൃഷ്ണൻ, എം.വി. സജിത, പ്രസീത, സുനിത അനന്തകൃഷ്ണൻ, രേവതി ബാബു തുടങ്ങിയവർ യോഗത്തിൽ പങ്കെടുത്തു.

ചുള്ളിമട ജിഎൽപി സ്കൂളിലെ എല്ലാ വിദ്യാർഥികൾക്കും കുടയും ബാഗും സമ്മാനിച്ച് യൂത്ത് ഫ്രണ്ട്- ജേക്കബ്

പാലക്കാട്: ചുള്ളിമട ജിഎൽപി സ്കൂളിലെ എല്ലാ വിദ്യാർഥികൾക്കും യൂത്ത് ഫ്രണ്ട് -കേരള കോണ്‍ഗ്രസ്‌ ജേക്കബ് സംസ്ഥാന കമ്മിറ്റിയുടെ ആഭിമുഖ്യത്തിൽ ബാഗും കുടയും വിതരണം ചെയ്തു. യൂത്ത് ഫ്രണ്ട് സംസ്ഥാന പ്രസിഡന്‍റ് സാജൻ ജോസഫ് അധ്യക്ഷത വഹിച്ചു. വിതരണോത്സവം കേരള കോണ്‍ഗ്രസ്‌- ജേക്കബ് സംസ്ഥാന വൈസ് ചെയർമാൻ വി.ഡി. ജോസഫ് നിർവഹിച്ചു. വന്യമൃഗങ്ങളുടെ പ്രത്യേകിച്ച് ആനയുടെശല്യം അനുഭവപ്പെടുന്ന ചുള്ളിമട സ്കൂൾപരിസരത്ത് കൂടുതൽ സുരക്ഷാനടപടികൾ ഒരുക്കണമെന്നു അദ്ദേഹം ഉദ്ഘാടന പ്രസംഗത്തിൽ ആവശ്യപ്പെട്ടു. പ്രധാനാധ്യാപിക പ്രീജാബായ് സ്വാഗതംപറഞ്ഞു. പാർട്ടി ഭാരവാഹികളായ എൻ.കെ. പുരുഷോത്തമൻ, വി.ഡി. ഉലഹന്നാൻ, കെ.വി. സുദേവൻ, വി. അനിൽകുമാർ, സാബു വെള്ളാരംകാലയിൽ, ജിജു മാത്യു. എസ്. ജയകൃഷ്ണൻ, പിരായിരി ശശികുമാർ, പഞ്ചായത്ത് മെംബർ ഗിരിഷ്, റിട്ടയേഡ് എഇഒ കുഞ്ഞിലക്ഷ്മി എന്നിവർ പ്രസംഗിച്ചു. പിടിഎ പ്രസിഡന്‍റ് നോബിൾ നന്ദി പറഞ്ഞു.

ജൂണിയർ, സീനിയർ വുഷു ജില്ലാ ചാമ്പ്യൻഷിപ്പ്

ചിറ്റൂർ: ജില്ലാ വുഷു അസോസിയേഷന്‍റെ ആഭിമുഖ്യത്തിൽ ചിറ്റൂർ കർമ്മ സ്പോർട്സ് അക്കാഡമിയിൽ നടത്തിയ ജില്ലാ വുഷു സീനിയർ, ജൂണിയർ ചാന്പ്യൻഷിപ്പ് അസോസിയേഷൻ ജില്ലാ വൈസ് പ്രസിഡന്‍റ് കെ.സി. പ്രീത് ഉദ്ഘാടനം ചെയ്തു. സംഘാടകസമിതി ചെയർമാൻ അർജുൻ പ്രേംകുമാർ അധ്യക്ഷതവഹിച്ചു. ജനറൽ കൺവീനർ എ. ആഷിഫ്, ജില്ലാ വുഷു അസോസിയേഷൻ സെക്രട്ടറി എം. വിദ്യാസാഗർ, ജോയിന്‍റ് സെക്രട്ടറി എസ്. പുഷ്പരാജ്, എം. അക്ഷയ്, എം.ബി. ശ്രീമോൻ, പി.എസ്. റഫീക്ക് എന്നിവർ പ്രസംഗിച്ചു.

സൗഹൃദ ജനകീയകൂട്ടായ്മയുടെ വാർഷികാഘോഷം

വടക്കഞ്ചേരി: തളരുന്നവർക്കു താങ്ങായിനിൽക്കുന്ന വള്ളിയോട് മിച്ചാരംകോട് സൗഹൃദ ജനകീയ കൂട്ടായ്മയുടെയും വായനശാലയുടെയും ഒമ്പതാം വാർഷികാഘോഷം വിവിധ പരിപാടികളോടെ നടന്നു. തേവർകാട് കൺവൻഷൻ സെന്‍ററിൽ നടന്ന പരിപാടികൾ പി.പി. സുമോദ് എംഎൽഎ ഉദ്ഘാടനം ചെയ്തു. സാംസ്കാരിക സമ്മേളനം ലൈബ്രറി കൗൺസിൽ ജില്ലാ ജോയിന്‍റ് സെക്രട്ടറി എംഎംഎ ബക്കർ ഉദ്ഘാടനം ചെയ്തു. സൗഹൃദ പ്രസിഡന്‍റ് പ്രീത രവി അധ്യക്ഷത വഹിച്ചു. പഞ്ചായത്ത്‌ പ്രസിഡന്‍റ് ലിസി സുരേഷ്, വാർഡ് മെംബർ എ.എം. സേതു, ലൈബ്രററി കൗൺസിൽ താലൂക്ക് ജോയിന്‍റ് സെക്രട്ടറി സി.സി. ചന്ദ്രബോസ്, സൗഹൃദ സെക്രട്ടറി പത്മദാസ്, വൈസ് പ്രസിഡന്‍റ് ബിജു ജോസഫ്, ശ്രീനാഥ്, അസീസ് എന്നിവർ പ്രസംഗിച്ചു. വിവിധ പ്രവർത്തനമേഖലകളിലെ ബിനേഷ്, സജോ ജോർജ് തേവർകാട്, അബ്ദുൾ മജീദ്, സെപക് ടാക്രോ നാഷണൽ താരം പൂജ എന്നിവരെ അനുമോദിച്ചു. പ്രദേശത്തെ എസ്എസ്എൽസി, പ്ലസ്ടു പരീക്ഷകളിൽ ഉന്നത വിജയം നേടിയവരേയും വയനാട് ദുരന്ത ഭൂമിയിൽ സേവനമനുഷ്ഠിച്ച സിവിൽ ഡിഫൻസ് പ്രവർത്തകരേയും ആദരിച്ചു. മെന്‍റലിസം ഷോയും മ്യൂസിക് ഫൂഷനുമുണ്ടായി.

ജില്ലയിൽ 1230 സ്കൂൾവാഹനങ്ങൾക്ക് ഫിറ്റ്നസ് നൽകി

പാലക്കാട്: ജില്ലയിൽ പുതിയ അധ്യയന വർഷത്തിൽ 1230 സ്കൂൾ വാഹനങ്ങൾക്ക് ഫിറ്റ്നസ് അനുവദിച്ചതായി മോട്ടോർ വാഹന വകുപ്പ് അറിയിച്ചു. ജില്ലയിൽ ചിറ്റൂർ, ആലത്തൂർ, പട്ടാന്പി, ഒറ്റപ്പാലം, മണ്ണാർക്കാട്, പാലക്കാട് താലൂക്കുകളിലെ റീജണൽ ട്രാൻസപോർട്ട് ഓഫീസുകളുടെ കീഴിലാണ് പരിശോധന നടക്കുന്നത്. ചിറ്റൂർ താലൂക്കിന് കീഴിൽ 186 സ്കൂൾ വാഹനങ്ങളിൽ 144 വാഹനങ്ങൾക്കും ആലത്തൂർ താലൂക്കിന് കീഴിൽ 186 സ്കൂൾ വാഹനങ്ങളിൽ 142 എണ്ണത്തിനും മണ്ണാർക്കാട് താലൂക്കിൽ 340 സ്കൂൾ വാഹനങ്ങളിൽ 220 വാഹനങ്ങൾക്കും ഫിറ്റ്നസ് അനുവദിച്ചു. പാലക്കാട് താലൂക്കിൽ 400 ഓളം വാഹനങ്ങളിൽ 212 വാഹനങ്ങൾക്കും പട്ടാന്പി താലൂക്കിൽ 325 വാഹനങ്ങളിൽ 275 വാഹനങ്ങൾക്കും ഒറ്റപ്പാലം താലൂക്കിൽ 323 വാഹനങ്ങളിൽ 237 വാഹനങ്ങൾക്കും ഫിറ്റനസ് അനുവദിച്ചതായി താലൂക്ക്തല ആർടിഒ മാർ അറിയിച്ചു. അതിൽ ചിറ്റൂർ 42, ആലത്തൂർ 36, മണ്ണാർക്കാട് 15, പാലക്കാട് 23, പട്ടാന്പി 59, ഒറ്റപ്പാലം 39 വാഹനങ്ങൾക്ക് ഫിറ്റ്നസ് നൽകാത്തവയാണ്. ജില്ലയിൽ ആകെ 1,760 ഓളം സ്കൂൾ വാഹനങ്ങളാണുള്ളത്. ചെറിയ പ്രശ്നങ്ങളുള്ള വാഹനങ്ങളുടെ പ്രശ്നങ്ങൾ പരിഹരിച്ചാൽ ഫിറ്റ്നസ് അനുവദിക്കും. ഫിറ്റ്നസ് പരിശോധന പുരോഗമിക്കുകയാണ്.

മഠത്തുക്കാരൻചള്ള മാരിയമ്മൻ ക്ഷേത്രം കുംഭാഭിഷേകം

കൊഴിഞ്ഞാമ്പാറ: മഠത്തുക്കാരൻചള്ള ശ്രീ മാരിയമ്മൻ ക്ഷേത്രം പുനരുദ്ധാരണ അഷ്ടബന്ധന മഹാകുംഭാഭിഷേകം രണ്ടു ദിവസങ്ങളിലായി ആഘോഷിച്ചു. മാവേലിക്കര തുരുത്തി ഇല്ലം ശങ്കരൻ നമ്പൂതിരി മുഖ്യകാർമികത്വം വഹിച്ചു. ഗണപതിഹോമം, സുദർശന ഹോമം, അഹോരഹോമം, പ്രത്വിഗിരി ഹോമം , മൃത്യുഞ്ജയഹോമം, തിലഹോമം, സായൂജ്യപൂജ, ആചാര്യവരണം, പ്രസാദശുദ്ധി, വാസ്തുബലി, ഭഗവത് സേവ, ഭിംഭശുദ്ധി, ഉഷപൂജ, കലശപൂജ, കലശാഭിഷേകം, ഉപദേവന്മാർക്ക് ഒറ്റകലശം തുടർന്നു കുംഭാഭിഷേകവും അന്നദാനവും നടന്നു. ചടങ്ങുകൾക്ക് നിറഞ്ഞ ഭക്തജന സാന്നിധ്യവും ഉണ്ടായിരുന്നു.

അരപ്പാറ സെന്‍റ് സെബാസ്റ്റ്യൻസ് പള്ളിയിൽ പരിസ്ഥിതി സംരക്ഷണ കാന്പയിൻ

അരപ്പാറ: സെന്‍റ് സെബാസ്റ്റ്യൻസ് പള്ളിയിൽ പരിസ്ഥിതിദിനത്തോടനുബന്ധിച്ച് കെസിവൈഎം സംഘടന നടത്തിയ പരിസ്ഥിതി സംരക്ഷണ കാന്പയിനിൽ ഇടവകയിലെ എല്ലാ കുടുംബാംഗങ്ങളും തങ്ങളുടെ വീടുകളിൽ ചെടികളും വൃക്ഷത്തൈകളും നട്ടുപിടിപ്പിച്ചു. ആധുനിക കാലഘട്ടത്തിലും ഭൂമിയെ ചേർത്തുപിടിക്കുക എന്ന ലക്ഷ്യം മുന്പോട്ടുവെച്ചാണ് ഇടവകയിലെ 135 ലേറെ വീട്ടുകാർ യുവജനങ്ങളുമായി സഹകരിച്ച് പനിക്കുന്ന ഭൂമിക്ക് പച്ചപ്പിന്‍റെ കുട എന്ന കാന്പയിനിൽ പങ്കെടുത്തത്. ഇടവകവികാരി ഫാ. ജിബിൻ കണ്ടത്തിലും അസീസി കോണ്‍വന്‍റിലെ സിസ്റ്റർമാരും ഇടവകയിലെ മുതിർന്നവരും യുവജനങ്ങളും കുട്ടികളും അടക്കം കാന്പയിനിൽ പങ്കെടുത്തു. മരങ്ങൾ വെട്ടി നശിപ്പിക്കുന്ന ഈ കാലഘട്ടത്തിൽ മരങ്ങൾ വെച്ചുപിടിപ്പിക്കുക എന്ന ലക്ഷ്യത്തോടെയാണ് കെസിവൈഎം സംഘടന മുന്നോട്ടുവന്നത്.

ഫുഡ് ക്രാഫ്റ്റ് ഇൻസ്റ്റിറ്റ്യൂട്ടിന്‍റെ വിവിധ കോഴ്സുകളിലേക്ക് അപേക്ഷിക്കാം

പാലക്കാട്: വിനോദസഞ്ചാര വകുപ്പിന്‍റെയും പട്ടികജാതി- പട്ടികവർഗ വകുപ്പിന്‍റെയും സംയുക്ത സംരംഭമായ ഫുഡ് ക്രാഫ്റ്റ് ഇൻസ്റ്റിറ്റ്യൂട്ട് പാലക്കാട് സെന്‍ററിൽ ഒരുവർഷം ദൈർഘ്യമുള്ള കോഴ്സിലേക്ക് അപേക്ഷ ക്ഷണിച്ചു. ഫുഡ് പ്രൊഡക്്ഷൻ, ഫുഡ് ആൻഡ് ബീവറേജ് സർവീസ് കോഴ്സുകളാണുള്ളത്. ഒന്പതുമാസം ക്ലാസ്റൂം പഠനവും മൂന്നുമാസം സ്റ്റാർ ഹോട്ടലിംഗ് ട്രെയിനിംഗുമാണ്. പിഎസ്‌സി അംഗീകൃത തൊഴിലധിഷ്ഠിത ഹോട്ടൽ മാനേജ്മെന്‍റ് കോഴ്സാണിതെന്നു പ്രിൻസിപ്പൽ ജേക്കബ് തോമസ് റോഷൻ വാർത്താസമ്മേളനത്തിൽ പറഞ്ഞു. പ്ലസ് ടു- തത്തുല്യം മാർക്ക് അടിസ്ഥാനമാക്കിയാണ് പ്രവേശനം. എല്ലാവർക്കും പ്രായപരിധിയില്ലാതെ കോഴ്സിന് അപേക്ഷിക്കാം. 60 ശതമാനം സീറ്റ് പട്ടികജാതി വിഭാഗത്തിനും 15ശതമാനം സീറ്റ് പട്ടികവർഗത്തിനും 25 ശതമാനം സീറ്റ് ഇതരവിഭാഗത്തിനും സംവരണം ചെയ്തിട്ടുണ്ട്. പട്ടികവിഭാഗ വിദ്യാർഥികൾക്കു സ്റ്റൈപ്പൻഡോടുകൂടി പഠിക്കാം. കോഴ്സ് വിജയകരമായി പൂർത്തിയാക്കുന്നവർക്ക് ജോലി സാധ്യത ഉറപ്പുവരുത്തുന്നുമുണ്ട്. സാങ്കേതിക വിദ്യാഭ്യാസ വകുപ്പിനു കീഴിലുള്ള സർട്ടിഫിക്കറ്റാണ് കോഴ്സ് പാസായവർക്ക് നൽകുന്നത്. www.fcikerala.org എന്ന വെബ്സൈറ്റ് വഴി ഓൺലൈനായും നേരിട്ടും അപേക്ഷ സമർപ്പിക്കാം എസ്‌സി- എസ്ടി വിദ്യാർഥികൾക്ക് 50 രൂപയും മറ്റു വിഭാഗത്തിലെ വിദ്യാർഥികൾക്ക് 100 രൂപയുമാണ് അപേക്ഷാഫീസ്. ഈമാസം പത്തുവരെ അപേക്ഷ സമർപ്പിക്കാം. വിവരങ്ങൾ 04922 256677, 9142190406, 9605724950 നമ്പറുകളിൽ.

വിവിധ സ്ഥാപനങ്ങളിൽ അധ്യാപക ഒഴിവുകൾ

മലന്പുഴ: ആനക്കൽ ഗവ. ട്രൈബൽ വെൽഫയർ ഹൈസ്കൂളിൽ എച്ച്എസ്ടി മാത്തമാറ്റിക്സ്, എച്ച്എസ്ടി സോഷ്യൽ സയൻസ് തസ്തികകളിൽ ദിവസവേതനടിസ്ഥാനത്തിൽ നിയമനം നടത്തുന്നു. കൂടിക്കാഴ്ച്ച ഇന്നുരാവിലെ പതിനൊന്നിനു സ്കൂൾഓഫീസിൽ നടക്കും. വിവരങ്ങൾക്ക് ഫോണ്‍: 9497123668. കുഴൽമന്ദം: കോട്ടായി ആണ്‍കുട്ടികളുടെ ഗവ. പ്രീമെട്രിക് ഹോസ്റ്റലിലേക്ക് മേട്രണ്‍ കം റസിഡന്‍റ് ട്യൂട്ടറെ കരാർ അടിസ്ഥാനത്തിൽ നിയമിക്കുന്നു. ബിരുദം, ബിഎഡ് യോഗ്യതയുള്ള കുഴൽമന്ദം ബ്ലോക്ക് പരിധിയിൽ സ്ഥിരതാമസക്കാരായവർക്ക് അപേക്ഷിക്കാം. ഇന്നുരാവിലെ പത്തിനു കുഴൽമന്ദം ബ്ലോക്ക് പട്ടികജാതി വികസന ഓഫീസിൽ കൂടിക്കാഴ്ച നടത്തും. ഫോണ്‍ :8547630127. അഗളി: അഗളി ഗവ. ഹൈസ്കൂളിലേക്ക് എച്ച്എസ്ടി (മലയാളം), മാത്തമാറ്റിക്സ്(മലയാളം, തമിഴ്), ഫിസിക്കൽ സയൻസ് (മലയാളം, തമിഴ്) എച്ച്എസ് ടി(തമിഴ്) യുപിഎസ് ടി (മലയാളം)എച്ച് എസ് ടി (തുന്നൽ)എന്നിവയിലേക്ക് ദിവസവേതന അടിസ്ഥാനത്തിൽ അധ്യാപക നിയമനം നടത്തുന്നു. ഇന്നു രാവിലെ പത്തിന് സ്കൂൾ ഓഫീസിൽ ഇന്‍റർവ്യു നടത്തും. കൊഴിഞ്ഞാന്പാറ: എരുത്തേന്പതി ശ്രീവിദ്യ വൊക്കേഷണൽ ഹയർസെക്കൻഡറി സ്കൂളിലെ വിഎച്ച്എസ്ഇ വിഭാഗത്തിൽ ദിവസ വേതനാടിസ്ഥാനത്തിൽ അധ്യാപക നിയമനം നടത്തുന്നു. അഗ്രികൾച്ചർ (യോഗ്യത: ബിഎസ്‌സി അഗ്രികൾച്ചർ), ഇംഗ്ലീഷ് (എം.എ ഇംഗ്ലീഷ്, ബി.എഡ്, സെറ്റ്) വിഷയങ്ങളിലാണ് ഒഴിവുകൾ. ഇന്നുരാവിലെ 11ന് മണിക്ക് സ്കൂളിൽ കൂടിക്കാഴ്ച നടക്കും. ഷൊർണൂർ: ഗവണ്‍മെന്‍റ് ടെക്നിക്കൽ ഹൈസ്കൂളിലെ വിഎച്ച്എസ്ഇ വിഭാഗത്തിൽ വൊക്കേഷണൽ ടീച്ചർ ഇൻ സിവിൽ കണ്‍സ്ട്രക്്ഷൻ ആന്‍റ് മെയിന്‍റനൻസ് തസ്തികയിൽ ഒഴിവ്. ദിവസവേതനടിസ്ഥാനത്തിലാണ് നിയമനം. സിവിൽ എൻജിനീയറിംഗ് ബ്രാഞ്ചിലുള്ള ബിടെക് ബിരുദമാണ് യോഗ്യത. പത്തിനു രാവിലെ 11ന് കൂടിക്കാഴ്ച നടത്തും.ഫോണ്‍: 7907798833, 9495921968. പാലക്കാട്: സർക്കാർ ടെക്നിക്കൽ ഹൈസ്കൂളിൽ വിവിധ തസ്തികകളിലേക്ക് താത്കാലിക നിയമനം നടത്തുന്നു. വർക്ക്ഷോപ്പ് ഇൻസ്ട്രക്ടർ (ഓട്ടോമൊബൈൽ), ട്രേഡ് ഇൻസ്ട്രക്ടർ (റഫ്രിജറേഷൻ ആൻഡ് എയർ കണ്ടീഷണിംഗ്), ട്രേഡ്സ്മാൻ (ഇലക്ട്രിക്കൽ) എന്നീ തസ്തികകളിലേക്കാണ് നിയമനം. കൂടിക്കാഴ്ച 11 ന് രാവിലെ പത്തിനു നടക്കും. ഫോണ്‍ : 9447522338. അഗളി: അട്ടപ്പാടി ഗവ ഐടിഐയിൽ ഡ്രാഫ്റ്റ്സ്മാൻ സിവിൽ, ഇലക്ട്രീഷ്യൻ, മെക്കാനിക്ക് മോട്ടോർ വെഹിക്കിൾ, മെക്കാനിക് ഡീസൽ, വെൽഡർ ട്രേഡുകളിലേക്കു 20 വരെ ഓണ്‍ലൈനായി അപേക്ഷിക്കാം. ഫോണ്‍: 9567 517822, 7907717337, 9633021932. പാലക്കാട്: മരുതറോഡ് പ്രവർത്തിക്കുന്ന ഗവ. കൊമേഴ്സ്യൽ ഇൻസ്റ്റിറ്റ്യൂട്ടിൽ ഇൻസ്ട്രക്ടർ, അസിസ്റ്റന്‍റ് ഇൻസ്ട്രക്ടർ തസ്തികകളിൽ ദിവസവേതനാടിസ്ഥാനത്തിൽ നിയമനം നടത്തുന്നു. ബികോം(റഗുലർ), ഡിപ്ലോമ ഇൻ സെക്രട്ടേറിയൽ പ്രാക്ടീസ്, ഡിപ്ലോമ ഇൻ ഷോർട്ഹാൻഡ് ആൻഡ് ടൈപ്പ് റൈറ്റിംഗ്, കന്പ്യൂട്ടർ വേർഡ് പ്രൊസസിംഗ് എന്നിവയാണ് യോഗ്യത. 11 ന് രാവിലെ പത്തിനു കൂടിക്കാഴ്ച്ചയ്ക്കെത്തണം. ഫോണ്‍: 0491 2532371, 8111874768.

മുടപ്പല്ലൂർ ഹൈസ്കൂളിൽ വിജയോത്സവം

വടക്കഞ്ചേരി: മുടപ്പല്ലൂർ ഗവ. ഹൈസ്കൂളിൽ വിജയോത്സവം എസ്എസ്എൽസി, യുഎസ്എസ് വിജയികളെ അനുമോദിച്ച് കെ.ഡി. പ്രസേനൻ എംഎൽഎ ഉദ്ഘാടനം ചെയ്തു. വണ്ടാഴി പഞ്ചായത്ത് പ്രസിഡന്‍റ് കെ.എൽ. രമേഷ് അധ്യക്ഷത വഹിച്ചു. ഹെഡ്മിസ്ട്രസ് എം. ശ്രീലത, പഞ്ചായത്ത് വൈസ് പ്രസിഡന്‍റ് പി. ശശികല, ബ്ലോക്ക് പഞ്ചായത്ത് മെംബർ നസീമ ഇസഹാക്ക്, പിടിഎ പ്രസിഡന്‍റ് കെ.അജയൻ, പിടിഎ വൈസ് പ്രസിഡന്‍റ് സുജാത, സീനിയർ അസിസ്റ്റന്‍റ് കെ. കവിത, സ്റ്റാഫ് സെക്രട്ടറി മേഴ്സി, സീനിയർ അധ്യാപിക പി. രജനി എന്നിവർ പ്രസംഗിച്ചു.

വീട്ടമ്മ ഷോക്കേറ്റ് മരിച്ചു

ചിറ്റൂർ: കുളത്തിൽ കുളിക്കാൻപോയ വീട്ടമ്മ ഷോക്കേറ്റ് മരിച്ചനിലയിൽ. പൊൽപ്പുള്ളി പരേതനായ ലക്ഷ്മണന്‍റെ ഭാര്യ തങ്കമണി(64)യാണ് മരിച്ചത്. ഇന്നലെ രാവിലെ പത്തുമണിയോടെ വീടിനുസമീപത്തെ കുളത്തിൽ കുളിക്കാൻ പോയതായിരുന്നു തങ്കമണി. കുളത്തിനു സമീപത്തെ മോട്ടോർ ഷെഡ്ഡിനടുത്തായി വീണുകിടന്നിരുന്ന മാങ്ങയെടുക്കാൻ ചെന്നപ്പോഴാണ് ഷോക്കേറ്റതെന്നു കരുതുന്നു. ഏറെനേരമായിട്ടും തങ്കമണിയെ കാണാത്തതിനെതുടർന്ന് ബന്ധുക്കൾ നടത്തിയ അന്വേഷണത്തിലാണ് മോട്ടോർഷെഡ്ഡിനുസമീപം കിടക്കുന്ന തങ്കമണിയെ കണ്ടത്. ഉടൻ ജില്ലാ ആശുപത്രിയിൽ എത്തിച്ചെങ്കിലും മരിച്ചിരുന്നു. പോസ്റ്റ്മോർട്ടത്തിനുശേഷം മൃതദേഹം ബന്ധുക്കൾക്കു വിട്ടുനൽകി. മക്കൾ: കലാധരൻ, കമലാധരൻ, കമലാവതി.

വയോധിക തടയണയിൽ മരിച്ചനിലയിൽ

ആലത്തൂർ: കാണാതായ വയോധികയെ തടയണയിൽ മരിച്ചനിലയിൽ കണ്ടെത്തി. പുതിയങ്കം പേഴുംപറന്പ് പരേതനായ കുഞ്ചന്‍റെ ഭാര്യ വേശു(84)വിനെയാണ് തൃപ്പാളൂർ പുള്ളോട് തടയണയിൽ മരിച്ചനിലയിൽ കണ്ടെത്തിയത്. ചൊവ്വാഴ്ച രാത്രി ഭക്ഷണംകഴിച്ചു കിടന്നതായിരുന്നു. രാവിലെ ഭക്ഷണം‌നൽകാൻ മകൻ ചെന്നപ്പോൾ അമ്മയെ കണ്ടില്ല. ഉച്ചവരെ തെരച്ചിൽ നടത്തിയെങ്കിലും കണ്ടെത്താനായില്ല. രണ്ടു മണിയോടെ തൃപ്പാളൂർ പുള്ളോട് തടയണയിൽ മരിച്ചനിലയിൽ കണ്ടെത്തുകയായിരുന്നു. മക്കൾ: ഗിരിജ, രവി. മരുമക്കൾ: രവി, വിശാലാക്ഷി.

തോറ്റു തുന്നംപാടി കുടുംബ പ്രാരബ്ധങ്ങൾ; പെൺകുഞ്ഞുങ്ങൾ പൊൻകുഞ്ഞുങ്ങളായി

ഷൊർണൂർ: കൃഷ്ണനും ലീലയ്ക്കും സമയംതെളിഞ്ഞു. മൂന്നുപെൺമക്കളും അധ്യാപികമാരായി. കൂലിപ്പണിക്കാരായ പെരുമണ്ണൂരിലെ കൃഷ്ണനും ലീലക്കും പറയാനുള്ളതു പെൺകുഞ്ഞ് പൊൻകുഞ്ഞെന്ന ആപ്തവാക്യം നിർവൃതിയായി മാറിയതിന്‍റെ കഥ. സ്കൂൾ തുറക്കുന്നതിന് ഒരാഴ്ചമുമ്പാണ് മൂന്നാമത്തെ മകൾ നിത്യയ്ക്കും സർക്കാർസ്കൂളിൽ അധ്യാപികയാകാൻ അറിയിപ്പ് കിട്ടിയത്. ഇതോടെയാണ് ദിവസക്കൂലിക്കാരനായ കൃഷ്ണന്‍റെയും തൊഴിലുറപ്പുജോലിക്കുപോകുന്ന ലീലയുടെയും ഭാഗ്യം ശരിക്കും തെളിഞ്ഞത്. മൂന്നുമക്കളും അധ്യാപികമാരായി. ധന്യ, ദിവ്യ എന്നിവർ നേരത്തേതന്നെ അധ്യാപകജോലിയിൽ പ്രവേശിച്ചിരുന്നു. സാക്ഷരതാ ക്ലാസിൽനിന്ന് നേടിയ വിദ്യാഭ്യാസംമാത്രമാണ് കൃഷ്ണനുള്ളതെങ്കിലും തന്‍റെ മൂന്നു മക്കളെയും മറ്റുള്ളവർക്ക് അക്ഷരം പകർന്നുനൽകാൻ യോഗ്യരാക്കിയതിൽ ആഹ്ലാദം. ലീലയ്ക്ക് അഞ്ചാം ക്ലാസ് വിദ്യാഭ്യാസമേയുള്ളൂ. മൂവരെയും അധ്യാപികരാക്കണമെന്ന സ്വപ്നയാഥാർഥ്യത്തിനു പിന്നിൽ മാതാപിതാക്കളുടെ വലിയ പ്രാരബ്ധങ്ങളുടെ കഥയുണ്ടെന്നു മകൾ ധന്യ സാക്ഷ്യപ്പെടുത്തുന്നു. മൂത്തമകൾ ധന്യ 2016ൽ കോതച്ചിറ ജിഎൽപിഎസിൽ അധ്യാപികയായി. രണ്ടാമത്തെ മകൾ ദിവ്യ 2021ൽ ചാത്തനൂർ ജിഎൽപിഎസിലും അധ്യാപികയായി. മൂന്നാമത്തെ മകളും പ്രതീക്ഷയോടെ പിഎസ്‌സി ഫലം കാത്തിരിക്കുന്നതിനിടയിലാണ് അഡ്വൈസ് മെമ്മോ വന്നത്. മൂന്നുമക്കളും സർക്കാർ വിദ്യാലയത്തിൽമാത്രമാണ് പഠിച്ചതെന്നും രക്ഷിതാക്കളുടെ ജീവിതപ്രയാസം അറിയാവുന്ന ഇവർ ഒരിക്കൽപ്പോലും ട്യൂഷനു പോയിട്ടില്ലെന്നും കൃഷ്ണൻ പറയുന്നു. മരുമക്കളായ സുധീഷ്, കൃഷ്ണൻകുട്ടി, മുരളീധരൻ എന്നിവരും പിന്തുണയുമായി ഇവരോടൊപ്പമുണ്ട്. മക്കൾ അധ്യാപികമാരായെങ്കിലും തങ്ങളുടെ ജോലി ഉപേക്ഷിക്കാൻ ഈ മാതാപിതാക്കൾ തയാറല്ല. ആരോഗ്യമുള്ള കാലം അധ്വാനിച്ചുതന്നെ ജീവിതം നയിക്കാനാണ് ഇവരുടെ തീരുമാനം.

മീൻവല്ലം വിനോദസഞ്ചാരകേന്ദ്രത്തിൽ മൊബൈൽടവർ സ്ഥാപിക്കാൻ നടപടി

കല്ലടിക്കോട്‌: കരിമ്പ പഞ്ചായത്തിലെ മീൻവല്ലം വിനോദസഞ്ചാരകേന്ദ്രത്തിൽ ബിഎസ്‌എൻഎൽ മൊബൈൽ ടവർ സ്ഥാപിക്കണമെന്ന പൊതുജനങ്ങളുടെ ആവശ്യത്തെത്തുടർന്ന് വി.കെ ശ്രീകണ്ഠൻ എംപിയുടെ ഇടപെടൽ ഫലം കണ്ടു. നിർമാണം ഉടൻ ആരംഭിക്കാൻവേണ്ട നടപടികൾ കൈക്കൊള്ളാൻ ഉദ്യോഗസ്ഥരോടാവശ്യപ്പെട്ടിട്ടുണ്ടെന്നു കഴിഞ്ഞ ദിവസം എംപിക്ക്‌ കേന്ദ്രമന്ത്രിയുടെ മറുപടി ലഭിച്ചു. നേരിട്ടു സ്ഥലംസന്ദർശിക്കുകയും കാര്യങ്ങൾ ബോധ്യപ്പെട്ടതിന്‍റെ അടിസ്ഥാനത്തിൽ കേന്ദ്രമന്ത്രി ജ്യോതിരാദിത്യ സിന്ധ്യയ്ക്ക് എംപി നേരത്തെ കത്തുനൽകിയിരുന്നു.മൊബൈൽ കണക്റ്റിവിറ്റിയുടെ ലഭ്യത വിനോദസഞ്ചാരികളുടെ എണ്ണംകുറയുവാൻ കാരണയായിട്ടുണ്ട്. മീൻവല്ലത്തിനും, മരുതുംകാടിനും ഇടയിൽ സ്ഥിതിചെയ്യുന്ന മൂന്നേക്കർ പ്രദേശത്ത് മൊബൈൽ ടവർ സ്ഥാപിക്കുകയാണെങ്കിൽ ടൂറിസം പ്രവർത്തനവുമായി ബന്ധപ്പെട്ടവർക്കും, പ്രദേശവാസികൾക്കും വളരെ ഉപകാരപ്രദമായിരിക്കുമെന്നും എംപി കത്തിലൂടെ ആവശ്യപ്പെട്ടിരുന്നു.

വെള്ളപ്പാറ സാൻജോ സെൻട്രൽ സ്കൂളിൽ പ്രവേശനോത്സവം

പാലക്കാട്: വെള്ളപ്പാറ സാൻജോ സെൻട്രൽ സ്കൂളിൽ 2025- 26 അധ്യായന വർഷത്തെ പ്രവേശനോത്സവം ആഘോഷിച്ചു. ചടങ്ങിൽ സാൻജോ ഫാർമസി കോളജ് പ്രിൻസിപ്പൽ ഡോ.കെ.ആർ. വിനോദ് ഉദ്ഘാടനം നിർവഹിച്ചു. രക്ഷിതാക്കളും അധ്യാപകരും വിദ്യാർഥികളും പങ്കെടുത്ത ചടങ്ങിൽ സ്കൂൾ പ്രിൻസിപ്പൽ ഡോ. സനിൽ ജോസ് അധ്യക്ഷത വഹിച്ചു. സ്കൂൾ അഡ്മിനിസ്ട്രേറ്റർ ഫാ. നിതിൻ ജോസഫ് സ്വാഗതം ആശംസിച്ചു. വൈസ് പ്രിൻസിപ്പൽമാരായ അരുൺ വൈശാഖ്, അജോ ജോസഫ്, പിടിഎ അംഗങ്ങളായ സിജു മാത്യു പുഷ്കല എന്നിവർ പ്രസംഗിച്ചു. മുൻവർഷത്തെ പഠനത്തിൽ മികവുപുലർത്തിയ വിദ്യാർഥികളെ ചടങ്ങിൽ അനുമോദിച്ചു.

പ്രവേശനോത്സവവും സ്കൂൾബസ് ഉദ്ഘാടനവും

മണ്ണാർക്കാട്: എടത്തനാട്ടുകര ഗവ. ഓറിയന്‍റൽ ഹയർസെക്കൻഡറി സ്കൂളിൽ പ്രവേശനോത്സവവും എംഎൽഎ യുടെ ആസ്തിവികസന ഫണ്ടിൽനിന്നും അനുവദിച്ച സ്കൂൾബസിന്‍റെ ഉദ്ഘാടനവും സ്കൂളിൽ വർണാഭമായി നടന്നു. എൻ. ഷംസുദ്ദീൻ എംഎൽഎ ഉദ്ഘാടനം ചെയ്തു. അലനല്ലൂർ ഗ്രാമപഞ്ചായത്ത് പ്രസിഡന്‍റ് സജ്ന സത്താർ അധ്യക്ഷത വഹിച്ചു. ഗ്രാമപഞ്ചായത്ത് അംഗം അക്ബറലി പാറോക്കോട്ട്, പിടിഎ പ്രസിഡന്‍റ് പി. അഹമ്മദ് സുബൈർ, വൈസ് പ്രസിഡന്‍റ് അബ്ദുസ്സലാം പടുകുണ്ടിൽ, എംപിടിഎ പ്രസിഡന്‍റ് ടി.പി. സൈനബ തുടങ്ങിയവർ പ്രസംഗിച്ചു.

മോർച്ചറി ഫ്രീസറും പുരുഷവാർഡും ഉദ്ഘാടനം ചെയ്തു

ചെര്‍പ്പുളശേരി: സാമൂഹികാരോഗ്യ കേന്ദ്രത്തില്‍ കൂടുതല്‍ സൗകര്യങ്ങള്‍ ഒരുക്കുന്നതിന്‍റെ ഭാഗമായി നവീകരിച്ച പുരുഷവാര്‍ഡും മോര്‍ച്ചറിയില്‍ സ്ഥാപിച്ച ഫ്രീസറും പി. മമ്മിക്കുട്ടി എംഎല്‍എ ഉദ്ഘാടനം ചെയ്തു. 29 ലക്ഷം രൂപ ചെലവഴിച്ചാണ് 20 പേരെ കിടത്തിച്ചികിത്സിക്കാവുന്ന വാര്‍ഡ് ചെര്‍പ്പുളശേരി സാമൂഹികാരോഗ്യ കേന്ദ്രത്തില്‍ നവീകരിച്ചത്. ഉദ്ഘാടന ചടങ്ങില്‍ നഗരസഭാ ചെയര്‍മാന്‍ പി. രാമചന്ദ്രന്‍ അധ്യക്ഷനായി. നഗരസഭാ ചെയര്‍പേഴ്സണ്‍ സി. കമലം, സ്ഥിരംസമിതി അധ്യക്ഷരായ മിനി ടീച്ചര്‍, കെ.ടി. പ്രമീള, സാദിഖ് ഹുസൈന്‍, കൗണ്‍സിലര്‍മാരായ പി. വിഷ്ണു, കെ.എം. ഇസ്ഹാക്ക്, നഗരസഭാ സെക്രട്ടറി വി.ടി. പ്രിയ, രാഷ്ട്രീയ പാര്‍ട്ടി പ്രതിനിധികള്‍ തുടങ്ങിയവര്‍ പ്രസംഗിച്ചു. മെഡിക്കല്‍ ഓഫീസര്‍ ഷാഹുല്‍ ഹമീദ്, അസിസ്റ്റന്‍റ് എന്‍ജിനീയര്‍ പ്രജിഷ എന്നിവര്‍ പങ്കെടുത്തു.

നടുവട്ടം ഹയർസെക്കൻഡറി സ്കൂളിനു പുതിയ കെട്ടിടമായി

ഷൊർണൂർ: നടുവട്ടം ഗവ. ജനതാ ഹയർസെക്കൻഡറി സ്‌കൂളിന് ഇനി പുതിയ കെട്ടിടം. വിദ്യാഭ്യാസ വകുപ്പിന്‍റെ വിദ്യാകിരണം പദ്ധതിയിൽ ഉൾപ്പെടുത്തി നിർമിക്കുന്ന കെട്ടിടം തറക്കല്ലിട്ട ശേഷം ഒരു വർഷത്തിനകമാണ് പണി പൂർത്തീകരിച്ചത്. ഹയർസെക്കൻഡറിക്ക് വേണ്ടി നിർമിച്ചതാണ് ഈ കെട്ടിടം. നേരത്തെ മുഹമ്മദ് മുഹ്‌സിൻ എംഎൽഎയുടെ 2016-17 വർഷത്തെ ആസ്തി വികസന ഫണ്ട് ഉപയോഗിച്ച് നിർമിച്ച കെട്ടിടം കഴിഞ്ഞവർഷം ഉദ്ഘാടനം ചെയ്തിരുന്നു. 14 ക്ലാസ് മുറികൾ ആവശ്യമുള്ള സ്‌കൂളിൽ ഏറെക്കാലമായി ക്ലാസ് റൂമുകളുടെ വലുപ്പക്കുറവും പരിമിതിയായിരുന്നു. ഹയർസെക്കൻഡറിക്ക് നിർദേശിക്കപ്പെട്ടിട്ടുള്ള വലുപ്പത്തിലുള്ള നിർദിഷ്ട ക്ലാസ് റൂം ഇല്ലാതെയായിരുന്നു നടുവട്ടം ജനതയിൽ ഒൻപത് ക്ലാസ് മുറികൾ പ്രവർത്തിച്ചിരുന്നത്. 2022 അധ്യയനവർഷത്തിൽ പഠനസൗകര്യമില്ലെന്ന് കാണിച്ച് വിദ്യാർഥികൾ ബാലാവകാശ കമ്മിഷനു പരാതി നൽകിയിരുന്നു. കമ്മീഷന്‍റെ നിർദേശപ്രകാരം സർക്കാർ രണ്ടുകോടി രൂപ പുതിയ കെട്ടിടം പണിയുന്നതിനായി നൽകി. തുടർന്നാണ് പുതിയ കെട്ടിടം വന്നത്.

നവകേരള സദസ്: ഷൊര്‍ണൂരിന് ഏഴുകോടി

ഷൊര്‍ണൂര്‍: മണ്ഡലത്തില്‍ മുഖ്യമന്ത്രിയുടെ നേതൃത്വത്തില്‍ നടന്ന നവകേരള സദസില്‍ നിര്‍ദേശിക്കപ്പെട്ട എട്ട് പ്രധാന പദ്ധതികള്‍ക്കായി ഏഴുകോടിരൂപ സര്‍ക്കാര്‍ അനുവദിച്ചു. യാത്രക്കാരായി വരുന്ന സ്ത്രീകള്‍ക്കും കുട്ടികള്‍ക്കും കുറഞ്ഞ ചെലവില്‍ സുരക്ഷിതമായി താമസിക്കാന്‍ ഷൊര്‍ണൂര്‍ റെയില്‍വേ സ്റ്റേഷന് മുന്‍വശത്ത് ഷീലോഡ്ജ് നിര്‍മിക്കുന്നതിന് മൂന്നരക്കോടി രൂപയും തൃക്കടീരി ഗ്രാമപഞ്ചായത്തിലെ കാക്കത്തോട് പാലം നിര്‍മാണത്തിനു ഒരുകോടി രൂപയുമാണ് അനുവദിച്ചത്. കൂടാതെ ചെര്‍പ്പുളശ്ശേരി നഗരസഭയില്‍ കച്ചേരിക്കുന്ന് പോലീസ് സ്റ്റേഷന്‍- ഐഡിയല്‍ കോളജ് റോഡില്‍ കാക്കാത്തോടിനുകുറുകെ പുതിയപാലം നിര്‍മാണം, വെള്ളിനേഴി ഗ്രാമപഞ്ചായത്തില്‍ മുതലമൂര്‍ഖന്‍കടവില്‍ തൂക്കുപാലം നിര്‍മ്മാണ പൂര്‍ത്തികരണം, നെല്ലായ കുടുംബാരോഗ്യകേന്ദ്രം പുതിയ കെട്ടിടനിര്‍മാണം, വാണിയംകുളം കുടുംബാരോഗ്യകേന്ദ്രം പുതിയ കെട്ടിടനിര്‍മാണം, ചളവറ മുണ്ടേക്കോട്ടുകുറിശ്ശി കുടുംബാരോഗ്യകേന്ദ്രം പുതിയ കെട്ടിടനിര്‍മാണം, അനങ്ങനടി ആയുര്‍വേദ ഡിസ്പെന്‍സറി പുതിയ കെട്ടിടം നിര്‍മാണം എന്നീ പദ്ധതികള്‍ക്കായി 50 ലക്ഷം രൂപ വീതവുമാണ് അനുവദിച്ചത്.

ദേശീയ കുടുംബക്ഷേമപദ്ധതി സഹായം 2014 വരെ നൽകിയതായി ജില്ലാ കളക്ടർ

പാലക്കാട്: ദേശീയ കുടുംബക്ഷേമപദ്ധതി പ്രകാരം അനുവദിക്കപ്പെട്ട തുക നിലവിൽ 2014 വരെയുള്ള അപേക്ഷകർക്കാണ് അനുവദിച്ചിട്ടുള്ളതെന്നു ജില്ലാ കളക്ടർ മനുഷ്യാവകാശ കമ്മീഷനെ അറിയിച്ചു. 2011 ൽ നൽകിയ അപേക്ഷയിൽ തീരുമാനമായില്ലെന്നു പരാതിപ്പെട്ട് സമർപ്പിച്ച അപേക്ഷയിൽ കമ്മീഷൻ ജുഡീഷ്യൽ അംഗം കെ. ബൈജുനാഥ് ആവശ്യപ്പെട്ട റിപ്പോർട്ടിലാണ് ഇക്കാര്യമുള്ളത്. പരാതിക്കാരിക്ക് 20,000 രൂപ അനുവദിക്കാൻ 2021 ജനുവരി ആറിന് തീരുമാനിച്ചിട്ടുണ്ടെന്നു ജില്ലാ കളക്ടർ കമ്മീഷനെ അറിയിച്ചു. 2014 വരെയുള്ള അപേക്ഷകർക്കാണ് ധനസഹായം അനുവദിച്ചിട്ടുള്ളതെന്നും ഫണ്ടിന്‍റെ അപര്യാപ്തത കാരണം അതിനുശേഷം ധനസഹായം അനുവദിച്ച ഗുണഭോക്താക്കൾക്ക് തുക വിതരണം ചെയ്യാൻ കഴിഞ്ഞിട്ടില്ലെന്നും റിപ്പോർട്ടിൽ പറഞ്ഞു. ഫണ്ട് ലഭ്യതക്കനുസരിച്ച് മുൻഗണനാ ക്രമത്തിൽ ധനസഹായം അനുവദിക്കുന്നതാണെന്നും റിപ്പോർട്ടിൽ പറയുന്നു. ആലത്തൂർ സ്വദേശി പ്രേമകുമാരി സമർപ്പിച്ച പരാതിയിലാണ് നടപടി. പരാതിക്കാരിയുടെ ഭർത്താവ് 2011 ൽ ഹൃദയാഘാതത്താൽ മരിച്ചു. ദേശീയ കുടുംബസഹായനിധി പദ്ധതി പ്രകാരം ആനുകൂല്യത്തിനായി അപേക്ഷിച്ചെങ്കിലും ലഭിച്ചില്ലെന്നാണ് പരാതി.

കടുവഭീഷണി: കടപ്പാറ,കടമപ്പുഴ ഭാഗത്തു സ്ഥാപിച്ച കാമറട്രാപ്പുകൾ മാറ്റിസ്ഥാപിക്കും

മംഗലംഡാം: കടുവയെ കാണപ്പെട്ടിരുന്ന കടപ്പാറക്കടുത്ത് കടമപ്പുഴ, രണ്ടാംപുഴ ഭാഗത്തെ തോട്ടങ്ങളിൽ വനംവകുപ്പ് സ്ഥാപിച്ചിരുന്ന കാമറട്രാപ്പുകൾ മാറ്റി സ്ഥാപിക്കും. വച്ചിരിക്കുന്ന സ്ഥലത്ത് വന്യമൃഗങ്ങളുടെ സഞ്ചാരമൊന്നും കാമറകളിൽ പതിഞ്ഞിട്ടില്ല. ഇതിനാലാണ് ഇന്നുകൂടി കാത്തിരുന്ന് കാമറകൾ ഇതിനടുത്ത് തന്നെ മറ്റിടങ്ങളിലേക്ക് മാറ്റി സ്ഥാപിക്കുകയെന്ന് മംഗലംഡാം ഡെപ്യൂട്ടി റേഞ്ച് ഓഫീസർ ഹാഷിം പറഞ്ഞു. കാമറ സ്ഥാപിച്ചശേഷം കടുവയെ കണ്ടതായി ആരും പറഞ്ഞിട്ടില്ല. കഴിഞ്ഞ വ്യാഴാഴ്ചയാണ് രണ്ടിടങ്ങളിലായി കാമറകൾ സ്ഥാപിച്ചിട്ടുള്ളത്. പ്രദേശത്ത് പലതവണ കടുവയെ കണ്ടതിനെ തുടർന്നാണ് മരങ്ങളിൽ കാമറട്രാപ്പുകൾ സ്ഥാപിച്ചത്.

ശ്മശാനവിഷയം: നഗരസഭായോഗത്തിൽ ബഹളം

പാലക്കാട്: മാട്ടുമന്ത ശ്മശാനത്തിലെ ജാതിമതിൽ വിവാദത്തെ ചൊല്ലി നഗരസഭ യോഗത്തിൽ ബഹളം. എൻഎസ്എസിനെ ഷെഡ് നിർമിക്കാൻ അനുമതി നൽകിയതിൽ ദൂരുഹതയുണ്ടെന്നാരോപിച്ചാണ് യുഡിഎഫ്- സിപിഎം അംഗങ്ങൾ ബഹളം വെച്ചത്. ആദ്യം മതിൽ നിർമിച്ചുവെങ്കിലും ഇപ്പോൾ വിവാദമായ പശ്ചാത്തലത്തിൽ നിർത്തിവെക്കുകയാണെന്നും തുടർന്ന് മതിൽകെട്ടാൻ ആർക്കും അനുമതി നൽകിയിട്ടില്ലെന്ന് നഗരസഭ വൈസ് ചെയർമാൻ ഇ. കൃഷ്ണദാസ് പറഞ്ഞു. കൗണ്‍സിൽ യോഗത്തിൽ വിഷയത്തെചൊല്ലി പ്രതിപക്ഷഅംഗങ്ങൾ പ്ലക്കാർഡുകൾ ഉയർത്തി ബഹളം ആരംഭിച്ചതോടെയാണ് വൈസ് ചെയർമാൻ എൻഎസ്എസിന് മാട്ടുമന്ത ശ്മശാനത്തിനകത്ത് മതിൽകെട്ടാൻ അനുമതി നൽകിയിട്ടില്ലെന്ന് വ്യക്തമാക്കിയത്. 2023 ൽ വലിയപാടത്തെ എൻഎസ്എസ് യൂണിറ്റ് മാട്ടുമന്ത പൊതുശ്മശാനത്തിൽ എല്ലാവിഭാഗം ആളുകൾക്ക് വേണ്ടിയും സ്വന്തം നിലക്കും ഒരു ഷെഡ് നിർമിച്ചു നൽകാമെന്ന് നഗരസഭയോട് സമ്മതിച്ചിരുന്നു. അന്ന് എല്ലാ കൗണ്‍സിലർമാരും ചേർന്ന കൗണ്‍സിൽ യോഗമാണ് എൻഎസ്എസിന് ഈ അനുമതി നൽകിയത്. പിന്നീട് സമുദായത്തിന് വേണ്ടി ശ്മശാനത്തിനകത്ത് ഷെഡും മതിലും ഉയർത്തിയ എൻഎസ്എസ് നഗരസഭയോട് പറഞ്ഞതിൽ നിന്ന് മാറി പ്രവർത്തിച്ചുവെന്ന് കണ്ടെത്തിയതിനെ തുടർന്ന് നിർമാണം നിർത്തിവെക്കാൻ ആവശ്യപ്പെടുകയായിരുന്നുവെന്നും അദ്ദേഹം പറഞ്ഞു. ജാതിതിരിച്ച് ശ്മശാനത്തിൽ ഇടം നൽകാൻ നഗരസഭ തീരുമാനിച്ചിട്ടില്ലെന്നും വൈസ് ചെയർമാൻ വ്യക്തമാക്കി. എല്ലാ കൗണ്‍സിൽ അംഗങ്ങളും ചേർന്നാണ് എൻഎസ്എസിന് അനുമതി നൽകിയത് എന്ന പരാമർശം വന്നതോടെ യോഗം വീണ്ടും ബഹളത്തിൽ മുങ്ങുകയായിരുന്നു. വിഷയത്തിൽ ചർച്ച അനുവദിക്കാം എന്ന നിലപാട് അധ്യക്ഷ സ്വീകരിച്ചത് പ്രതിപക്ഷ അംഗങ്ങൾ ഏറ്റെടുത്തു.

മുതലമട പഞ്ചായത്തിൽ സിപിഎം പിന്തുണയിൽ കോൺഗ്രസ് വിമതർക്കു വിജയം

മുതലമട: ഗ്രാമപഞ്ചായത്ത് ഭരണസമിതി ചേരിപ്പോരിന് തിരശീലയിട്ട് കോൺഗ്രസിൽനിന്നും പുറത്താക്കിയ പതിനാറാം വാർഡ് മെംബർ ജാസ്മിൻ ഷെയ്ക്കിനെ പ്രസിഡന്‍റായി തെരഞ്ഞെടുത്തു. 20 അംഗങ്ങളുള്ള പഞ്ചായത്തിൽ പ്രസിഡന്‍റ് തെരഞ്ഞെടുവിൽ 13 പേരാണ് പങ്കെടുത്തത്. എട്ട് സിപിഎം, രണ്ട് കോൺഗ്രസ്, മൂന്ന് വിമതകോൺഗ്രസ് അംഗങ്ങൾ എന്നിവരാണ് പങ്കെടുത്തത്. ഇതിൽ വിമത കോൺഗ്രസ് അംഗം ജാസ്മിൻ ഷെയ്ക്കിനു സിപിഎം പിന്തുണയോടെ പത്തും, കോൺഗ്രസിലെ എതിർസ്ഥാനാർഥി നസീമക്ക് മൂന്നും വോട്ടുകൾ ലഭിച്ചു. ഒരു കോൺഗ്രസ് അംഗം കൃഷ്ണമൂർത്തിയും വോട്ടെടുപ്പിൽ നിന്നും വിട്ടുനിന്നു. ഇതോടെ പത്ത് അംഗങ്ങളുടെ പിന്തുണലഭിച്ച ജാസ്മിൻ വിജയിച്ചതായി വരണാധികാരി കൃഷി അസിസ്റ്റന്‍റ് ഡയറക്ടർ സ്മിത സാമുവൽ പ്രഖ്യാപിച്ചു. തുടർന്ന് ജാസ്മിൻ അധികാരമേറ്റു. ഉച്ചക്ക്ശേഷം നടന്ന തെരഞ്ഞെടുപ്പിൽ കോൺഗ്രസ് വിമതപക്ഷ അംഗം പി. വിനേഷിനെ വൈസ്പ്രസിഡന്‍റായി തെരഞ്ഞെടുത്തു. വോട്ടിംഗിൽ പി. വിനേഷ് 15 ൽ 9 വോട്ടുകൾ നേടി വിജയിച്ചു. എതിർ സ്ഥാനാർഥിക്ക് 5 വോട്ട് ലഭിച്ചു. ഒരു വോട്ട് അസാധുവായി. പ്രസിഡന്‍റായി തെരഞ്ഞെടുക്കപ്പെട്ട ജാസ്മിൻ ഷെയ്ക്കിനെ സിപിഎം നേതാക്കൾ ഷാൾ അണിയിച്ച് അനുമോദിച്ചു. പ്രസിഡന്‍റ് തെരഞ്ഞെടുപ്പിൽ മുൻപഞ്ചായത്ത് പ്രസിഡന്‍റ്, വൈസ് പ്രസിഡന്‍റ് ഉൾപ്പെടെ മൂന്നു സ്വതന്ത്രരും മൂന്നു ബിജെപി അംഗങ്ങളും വിട്ടുനിന്നു.

പട്ടികവിഭാഗക്കാരുടെ ഭൂമി കൈയേറുന്നെന്ന പരാതി ഗൗരവമായി പരിശോധിക്കും: കെ. ശാന്തകുമാരി എംഎൽഎ

പാലക്കാട്: പട്ടികജാതി-പട്ടികവർഗ വിഭാഗക്കാർക്ക് അനുവദിച്ച ഭൂമി മറ്റുള്ളവർ കയ്യേറുന്നെന്ന പരാതി ഗൗരവമായി പരിശോധിക്കുമെന്ന് കേരള നിയമസഭ പട്ടികജാതി-പട്ടികവർഗ ക്ഷേമസമിതി ചെയർപേഴ്സണ്‍ കെ. ശാന്തകുമാരി എംഎൽഎ. ജില്ലയിലെ പട്ടികജാതി-പട്ടികവർഗ ക്ഷേമം സംബന്ധിച്ച് കേരള നിയമസഭ പട്ടികജാതി പട്ടികവർഗ ക്ഷേമ സമിതി നടത്തിയ സിറ്റിംഗിൽ സംസാരിക്കുകയായിരുന്നു ചെയർപേഴ്സണ്‍. വിവിധ നഗരസഭകളിലെ എസ്‌സി, എസ്ടി ഫണ്ട് വിനിയോഗത്തെ സംബന്ധിച്ച് വിശദമായ റിപ്പോർട്ട് നിയമസഭാ സമിതിക്ക് കൈമാറണമെന്ന് ചെയർപേഴ്സണ്‍ അറിയിച്ചു. അട്ടപ്പാടി കോട്ടത്തറ വില്ലേജിലെ ഭൂമി കയ്യേറ്റം സംബന്ധിച്ച് രണ്ട് മാസത്തിനകം റിപ്പോർട്ട് നൽകാൻ ഡെപ്യൂട്ടി കളക്ടർക്ക് ചെയർപേഴ്സണ്‍ നിർദ്ദേശം നൽകി. മൂന്ന് ഘട്ടമായി നടത്തുന്ന പരിശോധനയിൽ ഒന്നാംഘട്ടം പൂർത്തീകരിച്ചതായി ജില്ലാ കളക്ടർ സമിതിയെ അറിയിച്ചു. ചിറ്റൂർ ബ്ലോക്ക് പഞ്ചായത്ത് പരിധിയിൽ താമസിക്കുന്ന, പട്ടികജാതി വികസന ഫണ്ട് മുഖേന ഭൂമി ലഭ്യമാക്കാൻ കഴിയാത്ത ചക്കിളിയിൻ വിഭാഗത്തിൽപ്പെട്ടവർക്ക് പുതിയ പദ്ധതി ആവിഷ്കരിച്ച് ഫണ്ട് ലഭ്യമാക്കാനുള്ള നടപടി സ്വീകരിക്കുന്ന വിഷയം സർക്കാരിന്‍റെ ശ്രദ്ധയിൽപ്പെടുത്തും. അട്ടപ്പാടി പരിസ്ഥിതി പുനഃസ്ഥാപന പദ്ധതിയായ അഹാഡ്സിലെ പട്ടികജാതിപട്ടികവർഗ വിഭാഗക്കാരായ മുൻജീവനക്കാരെ സംരക്ഷിക്കണമെന്ന് ആവശ്യപ്പെട്ട് വനപരിപാലന സമിതി നൽകിയ പരാതിയിൽ പ്രത്യേകസിറ്റിംഗ് നടത്തുമെന്ന് ചെയർപേഴ്സണ്‍ അറിയിച്ചു. ആദിവാസി മേഖലകളിലെ തരിശായികിടക്കുന്ന സ്ഥലങ്ങളിൽ കൃഷി ഇറക്കുന്നതിന് വേണ്ട ജലസേചനസൗകര്യം ഒരുക്കാൻ ജലസേചന വകുപ്പിനോടാവശ്യപ്പെട്ടു. പെരിങ്ങോട്ടുകുറിശി ഗ്രാമപഞ്ചായത്തിലെ കണക്കത്തറ കോളനിയിൽ കുടിവെള്ളക്ഷാമം പരിഹരിക്കാൻ വേണ്ട നടപടി സ്വീകരിക്കാനും നിർദേശിച്ചു. പട്ടികജാതി, പട്ടികവർഗക്കാർ ജോലിചെയ്യുന്ന സേവക് സ്ഥാപനത്തിലെ തൊഴിലാളികൾക്ക് മാസംതോറുമുള്ള ശന്പളം അഞ്ചാംതിയതിക്കകം നൽകാനുള്ള നടപടി സ്വീകരിക്കണമെന്നും സമിതി നിർദേശിച്ചു. പാലക്കാട് ജില്ലയിലെ പരാതികളിൽ നടന്ന സിറ്റിംഗിൽ 24 പരാതികൾ പരിഗണിച്ചു. പുതിയതായി 21 പരാതികൾ ലഭിച്ചു. പുതുതായി ലഭിച്ചതിൽ 15 പരാതികൾ സമിതി പരിശോധിക്കും. ആറ്റെണ്ണം ജില്ലാതല പരിശോധനയ്ക്കായി കൈമാറി. കളക്ടറേറ്റ് കോണ്‍ഫറൻസ് ഹാളിൽ നടന്ന സിറ്റിംഗിൽ എംഎൽഎമാരായ പി.പി. സുമോദ്, വി. ശശി, കടകംപള്ളി സുരേന്ദ്രൻ, ജില്ലാ കളക്ടർ ജി. പ്രിയങ്ക, തുടങ്ങിയവർ പങ്കെടുത്തു.

സർവകക്ഷിയോഗം വിളിച്ച് പനയംപാടം റോഡ് നിർമാണം പുനരാരംഭിക്കണം: യുഡിഎഫ്

കല്ലടിക്കോട്: സ്ഥിരം അപകടമേഖലയായ പനയംപാടത്ത് സർവകക്ഷിയോഗം വിളിച്ച് റോഡ് നിർമാണം പുനരാരംഭിക്കണമെന്ന് യുഡിഎഫ് കരിമ്പ മണ്ഡലം കമ്മിറ്റി ആവശ്യപ്പെട്ടു. സിപിഎമ്മിന്‍റെ വികസനവിരുദ്ധ നയങ്ങളും അവരുടെ പ്രവർത്തികളും മറ്റുള്ളവർ അറിയാതിരിക്കുവാൻ വേണ്ടി പനയമ്പാടം റോഡിന്‍റെ കേടുപാടുകൾ തീർക്കാനുള്ള സംവിധാനം സിപിഎം തന്നെ ആട്ടിമറിക്കുകയും ചെയ്തു. എന്തൊക്കെ പണികൾ ആണ് നടത്തേണ്ടതെന്നും ഏതൊക്കെ രീതിയിൽ ചെയ്താലാണ് അവിടുത്തെ കാര്യങ്ങൾ വ്യക്തമായി നടപ്പാക്കാനാകുക എന്നറിയാതെ എംഎൽഎയെ വെച്ചുകൊണ്ട് ഉദ്ഘാടനം നടത്താൻ തീരുമാനിക്കുകയും അതിനെ യുഡിഎഫ് എതിർക്കുകയും ഉദ്ഘാടനം അല്ല വേണ്ടതെന്നും റോഡിന്‍റെ കൃത്യമായ പണികൾ നടത്തുകയാണ് വേണ്ടതെന്നും അതിനുശേഷം റോഡ് പണി തുടങ്ങിയാൽ മതി എന്ന് പറയുകയും ചെയ്തു. അതിന്‍റെ അടിസ്ഥാനത്തിൽ ഉദ്ഘാടനം മാറ്റിവയ്ക്കുകയുമാണുണ്ടായത്. പഞ്ചായത്തിൽ സർവകക്ഷിയോഗം വിളിക്കുകയും യോഗത്തിലെ തീരുമാനം യുഡിഎഫ് എതിർക്കുകയും ചെയ്തു. എംപി, എംഎൽഎ, എൻജിനീയർ തുടങ്ങിയവരെ ഉൾപ്പെടുത്തി സർവകക്ഷിയോഗം വിളിച്ച് നിർമാണ പ്രവർത്തനങ്ങൾ ആരംഭിച്ചാൽ മതി എന്നാണ് യുഡിഎഫ് ആവശ്യപ്പെട്ടത്. റോഡ് നിർമാണം യുഡിഎഫ് എതിർത്തു എന്ന് പറയുന്നത് വാസ്തവവിരുദ്ധമാണെന്നും ജനങ്ങളെ തെറ്റിദ്ധരിപ്പിക്കുന്ന രീതിയിലുള്ള പ്രസ്താവനകൾ അവസാനിപ്പിക്കണമെന്നും യുഡിഎഫ് ചെയർമാൻ കെ.കെ. ചന്ദ്രൻ ആരോപിച്ചു.

വിദ്യാർഥികൾക്കുള്ള യാത്രാകാർഡിൽ മാറ്റം

ഒറ്റപ്പാലം: വിദ്യാർഥികൾക്ക് ബസുകളിൽ യാത്രായിളവ് ലഭിക്കാനുള്ള കാർഡിൽ മാറ്റം വരുത്തി. ഇത്തവണ പച്ചക്കാർഡാണ് യാത്രായിളവിന് നൽകിയിരിക്കുന്നത്. നേരത്തെ പിങ്ക് കാർഡാണ് ഉപയോഗിച്ചിരുന്നത്. അടുത്തമാസം ഒന്നുമുതൽ കാർഡുള്ളവർക്ക് മാത്രമാകും സ്വകാര്യബസുകളിൽ യാത്രായിളവ് അനുവദിക്കുക. ഈമാസം യാത്രായിളവ് കാർഡ് വേണമെന്ന നിബന്ധനയില്ല. സർക്കാർ, എയ്ഡഡ്, സ്വാശ്രയ കോളജുകളിലെ വിദ്യാർഥികൾക്ക് കഴിഞ്ഞവർഷത്തേതുപോലെ കൺസഷൻ കാർഡ് നിർബന്ധമാണ്. ഈ കാർഡാണ് പച്ചനിറത്തിലുണ്ടാവുക. അതിനായി സ്ഥാപനമേധാവി അവരുടെ പരിധിയിലുള്ള ആർടി ഓഫീസിൽ അപേക്ഷ നൽകണം. അപേക്ഷ അംഗീകരിക്കുന്നതോടെ മോട്ടോർ വാഹനവകുപ്പ് തന്നെ പച്ചകാർഡ് വിതരണം ചെയ്യും. പ്ലസ്ടുവരെ വരെ പഠിക്കുന്ന വിദ്യാർഥികൾക്ക് അവരുടെ സ്ഥാപനമേധാവികൾ നൽകുന്ന തിരിച്ചറിയൽ കാർഡാണ് ഉപയോഗിക്കേണ്ടത്. ഗവേഷണം ഉൾപ്പെടെ സ്വകാര്യപഠനം നടത്തുന്ന വിദ്യാർഥികൾക്ക് അവരുടെ സ്ഥാപനത്തിന്‍റെ പ്രവർത്തനരേഖകൾ, സർവകലാശാല അഫിലിയേഷൻ എന്നിവ പരിശോധിച്ച് സർക്കാർ ഉത്തരവുകൾക്കു വിധേയമായി മോട്ടോർവാഹനവകുപ്പ് കാർഡ് അനുവദിക്കും. 27 വയസുവരെയുള്ളവർക്കാണ് കാർഡ് അനുവദിക്കുക. പ്ലസ് ടു വരെയുള്ള വിദ്യാർഥികൾക്ക് കെഎസ്ആർടിസി സൗജന്യമായി യാത്ര അനുവദിക്കും. ആവശ്യമുള്ളവർ കെഎസ്ആർടിസി ഓഫീസുമായി ബന്ധപ്പെട്ട് കൺസഷൻ കാർഡുകൾ ഉറപ്പാക്കണം. ഒരു ദിവസം താമസസ്ഥലത്തുനിന്നു വിദ്യാഭ്യാസ സ്ഥാപനംവരെയും തിരിച്ചും 40 കിലോമീറ്റർ ആണ് ദൂരപരിധി. വിദ്യാർഥികൾക്ക് ബുദ്ധിമുട്ട് നേരിടുന്നുണ്ടെങ്കിൽ പോലീസിലോ മോട്ടോർവാഹന വകുപ്പ് ഓഫീസുകളിലോ പരാതി നൽകാം.

കൂർക്കകൃഷിയുടെ തിരക്കുകളിൽ മണപ്പാടം, കണക്കന്നൂർ പ്രദേശങ്ങളിലെ കർഷകർ

വടക്കഞ്ചേരി: പുതുക്കോട് പഞ്ചായത്തിലെ മണപ്പാടം, കണക്കന്നൂർ, തോണിക്കടവ് പ്രദേശങ്ങളിൽ കൂർക്കകൃഷിയുടെ തിരക്കുകളിലാണ് കർഷകർ. കൂർക്കതല വില്പനയും നടീലുമായി എവിടേയും തിരക്കുകളാണ്. വേനലിലെ കനത്തമഴ പ്രശ്നമുണ്ടാക്കിയെങ്കിലും ഇപ്പോൾ പണികൾ സജീവമാണ്. വടക്കഞ്ചേരിയിൽ നിന്നും മണപ്പാടം വഴി തൃശൂർ ജില്ലയിലേക്ക് പ്രവേശിക്കുന്ന തോണിക്കടവ് റോഡിനിരുവശവുമായാണ് കൂർക്ക തലകളുടെ നേഴ്സറികളുള്ളത്. അര ഏക്കറിലും ഒരു ഏക്കറിലും കൂർക്ക നേഴ്സറികളുണ്ട്. വിത്ത് പാകി മുളപ്പിച്ചാണ് ഇവിടെ ആവശ്യത്തിനുള്ള കൂർക്കതല ഉണ്ടാക്കുന്നത്. ഒരു മൂടിന് 12 രൂപ മുതലാണ് വില. ഇതിൽ 20 മുതൽ 25 വരെ കൂർക്കതലയുണ്ടാകും. കൂർക്കകൃഷിക്ക് പേരുകേട്ട നാടാണ് ജില്ലാ അതിർത്തിക്കടുത്തെ ഈ പ്രദേശങ്ങൾ. ഇവിടെ ഇരുന്നൂറിലേറെ ഏക്കർ പാടത്ത് നെൽകൃഷിക്കൊപ്പം കൂർക്കകൃഷിയുമുണ്ടാകും. മണപ്പാടം ഭാഗങ്ങളിൽ മണൽ ചേർന്ന മണ്ണായതിനാൽ കൂർക്കകൃഷിക്ക് ഉത്തമമെന്നാണ് കർഷകർ പറയുന്നത്. ഇങ്ങനെയുള്ള മണ്ണിൽ കൂർക്കക്ക് നല്ല വിളവുണ്ടാകും. പറിക്കാൻ എളുപ്പമായതിനാൽ കൂലിചെലവും കുറയും. താലൂക്കിൽതന്നെ ഏറ്റവും കൂടുതൽ കൂർക്കകൃഷി ചെയ്യുന്ന പ്രദേശങ്ങളാണ് മണപ്പാടം, കണക്കന്നൂർ, തോണിക്കടവ് മേഖലകൾ. ഒന്നാംവിള നെല്ലിന് പകരം കൂർക്ക കൃഷിചെയ്യുന്ന പാടങ്ങളും ഇവിടെയുണ്ട്. രണ്ടാംവിള മാത്രമെ ഇവിടങ്ങളിൽ പൂർണമായുള്ള നെൽകൃഷിയുള്ളു. മംഗലംഡാം കനാലിന്‍റെ ഏറ്റവും വാലറ്റപ്രദേശങ്ങളായതിനാൽ ഇവിടെ കനാൽവെള്ളവും എത്താറില്ല. പാട്ടത്തിന് ഭൂമി എടുത്താണ് ഇവിടുത്തെ കൂർക്കകൃഷി. കൂർക്കയുടെ വിളവെടുപ്പും ആദ്യം മണപ്പാടത്തു നിന്നുതന്നെയാണ് ആരംഭിക്കുക. ഇതിനാൽ ഉയർന്നവിലയും കർഷകർക്ക് ലഭിക്കും.

പ്ലാവിൽനിന്നു വീണ യുവാവ് മരിച്ചു

വടക്കഞ്ചേരി: പ്ലാവിൽനിന്നു വീണ് തൃശൂരിലെ സ്വകാര്യ ആശുപത്രിയിൽ ചികിത്സയിലായിരുന്ന യുവാവ് മരിച്ചു. കിഴക്കഞ്ചേരി ആരോഗ്യപുരം ആലാകുന്നേൽ മാത്യുസാ(46)ണ് മരിച്ചത്. കഴിഞ്ഞ 12 നായിരുന്നു അപകടം. സമീപത്തെ പറമ്പിൽ ചക്കയിടാൻ പ്ലാവിൽ കയറിയപ്പോൾ കാൽ വഴുതി വീഴുകയായിരുന്നു. സംസ്കാരം ഇന്ന് 3.30ന് ആരോഗ്യപുരം സെന്‍റ് മേരീസ് പള്ളിയിൽ. ഭാര്യ: ബിന്ദു. മകൻ: അലക്സ്.

മംഗലംഡാം സെന്‍റ് സേവിയേഴ്സ് സെൻട്രൽ സ്കൂളിൽ വർണാഭമായി പ്രവേശനോത്സവം

മംഗലംഡാം: സെന്‍റ് സേവിയേഴ്സ് സെൻട്രൽ സ്കൂളിലെ പ്രവേശനോത്സവം ഗംഭീരമായി. സ്കൂൾ ജോയിന്‍റ് ഡയറക്ടർ ഫാ. സുമേഷ് നാല്പതാംകളം ഉദ്ഘാടനം ചെയ്തു. പ്രിൻസിപ്പൽ ഫാ. സിബിൻ തോമസ്, വൈസ് പ്രിൻസിപ്പൽ ജാൻസി ഷാജി, പിടിഎ പ്രസിഡന്‍റ് അജിത്കുമാർ, സ്റ്റാഫ് സെക്രട്ടറി സിൻഡ്രല തുടങ്ങിയവർ പ്രസംഗിച്ചു. പത്താംക്ലാസ് പരീക്ഷയിൽ നൂറുശതമാനം വിജയത്തിനൊപ്പം ഹരിതകേരള മിഷന്‍റെ ഏറ്റവുംമികച്ച ഹരിത സ്കൂളിനുള്ള അവാർഡും സ്കൂൾ നേടിയിരുന്നു. പത്താംക്ലാസിൽ ഉന്നത വിജയം കരസ്ഥമാക്കിയവർക്കും ക്ലാസുകളിലെ പഠന മികവുകൾക്കും കഴിഞ്ഞ അധ്യയന വർഷത്തിൽ മുഴുവൻദിവസവും ഹാജരായ വിദ്യാർഥിനി അന്ന തോമസിനേയും അനുമോദിച്ചു. കുട്ടികളുടെ വിവിധ കലാപരിപാടികളും അധ്യാപകർ അവതരിപ്പിച്ച സ്വാഗതഗാനവും ശ്രദ്ധേയമായി.

പന്നിയങ്കര ഗവ. എൽപി സ്കൂൾ പഴയ പ്രതാപത്തിലേക്ക്

വടക്കഞ്ചേരി: ക്ലാസിൽ കുട്ടികളുടെ ബഹളവും ആളനക്കവും കൂടിയതിന്‍റെ സന്തോഷത്തിലായിരുന്നു ഇന്നലെ പന്നിയങ്കര ഗവ. എൽപി സ്കൂളിലെ പ്രധാനാധ്യാപിക ബിന്ദു ടീച്ചർ. ഒന്നാം ക്ലാസിലേക്ക് ഏഴു കുട്ടികളെത്തി.രണ്ടാംക്ലാസിൽ നാലും മൂന്നാം ക്ലാസിൽ രണ്ടും നാലാം ക്ലാസിൽ അഞ്ചുകുട്ടികളുമായി 18 പേർ. പ്രീ പ്രൈമറി വിഭാഗത്തിൽ 17 കുട്ടികൾ വേറെയുമുണ്ട്. കഴിഞ്ഞ ഒരുപതിറ്റാണ്ടിനിടെ ക്ലാസ്മുറിയിൽ കുട്ടികൾ നിറഞ്ഞ പ്രതീതിയുണ്ടാകുന്നതു ഇതാദ്യം. കഴിഞ്ഞ വർഷവും പുറത്തു പറയാവുന്നവിധം കുട്ടികളുടെ എണ്ണമുണ്ടായിരുന്നു. എന്നാൽ കുട്ടികൾ കൂടിയപ്പോൾ അധ്യാപകരില്ല എന്ന വിഷമത്തിലാണ് രക്ഷിതാക്കൾ. പ്രധാനാധ്യാപിക ഉൾപ്പെടെ രണ്ടധ്യാപകരാണ് ഇപ്പോഴുള്ളത്. ഒരു ടീച്ചറെകൂടി കിട്ടിയിരുന്നെങ്കിൽ സ്കൂളിനെ പഴയ പ്രതാപത്തിലേക്കുതിരിച്ചു കൊണ്ടുവരാൻ കഴിയുമായിരുന്നെന്നാണ് കല്ലിങ്കൽപ്പാടം ഗവ.സ്കൂളിൽ നിന്നും പ്രമോഷനോടെ ഈ സ്കൂളിലെത്തിയ ബിന്ദു ടീച്ചർ പറയുന്നത്. സ്കൂൾ ലാഭകരമല്ല എന്നുപറഞ്ഞ് അധ്യാപകരെ നിയമിക്കാൻ വൈകരുതെന്ന അപേക്ഷയാണ് രക്ഷിതാക്കളും പങ്കുവയ്ക്കുന്നത്. വലിയൊരു ഇടവേളയ്ക്കുശേഷം സ്കൂൾ അന്തരീക്ഷം പുനഃസ്ഥാപിക്കാനാകുന്നതിന്‍റെ ആഹ്ലാദത്തിലായിരുന്നു എല്ലാവരും. ക്ലാസ്മുറിയിൽ കുട്ടികളെ നിറഞ്ഞുകണ്ടപ്പോൾ പ്രവേശനോത്സവത്തിനെത്തിയ വിശിഷ്ടാതിഥികൾക്കും അതു ആശ്ചര്യവും പ്രതീക്ഷയും നൽകുന്നതായി. ഇനിയും കൂടുതൽ കുട്ടികളെ സ്കൂളിലെത്തിക്കാനുള്ള ശ്രമം തുടരുമെന്നു വിശിഷ്ടാതിഥികളിൽ ഓരോരുത്തരും പറഞ്ഞു. ഒരുകോടി രൂപ ചെലവിൽ നിർമാണം പൂർത്തീകരിച്ച ഇരുനില കെട്ടിടത്തിലാണ് ഇപ്പോൾ ക്ലാസുകൾ നടക്കുന്നത്. പുതിയ കെട്ടിടം തന്നെയാണ് സ്കൂളിലെ പ്രധാന ആകർഷണവും. വാർഡ് മെംമ്പർ അമ്പിളി മോഹൻദാസ് പ്രവേശനോത്സവം ഉദ്ഘാടനം ചെയ്തു. സ്കൂളിന്‍റെ പഴയ പ്രതാപകാലം തിരിച്ചു വന്നില്ലെങ്കിലും സ്കൂളിനെ കൂടുതൽ മെച്ചപ്പെടുത്തിയെടുക്കാനുള്ള വലിയ ശ്രമത്തിലാണ് വടക്കഞ്ചേരി പഞ്ചായത്തും നാട്ടുകാരും. കുട്ടികളില്ലാതെ മൂന്നുവർഷം അടഞ്ഞുകിടന്ന സ്കൂൾ പിന്നീട് 2014ൽ ആറു കുട്ടികളുമായാണ് തുറന്നത്. പിന്നേയും സ്ഥിതിയിൽ വലിയ മാറ്റമുണ്ടായില്ല. പുതിയ കെട്ടിടവും മറ്റു ഭൗതിക സൗകര്യങ്ങളും ഒരുക്കിയതോടെയാണ് കൂടുതൽ കുട്ടികൾ എത്തിത്തുടങ്ങിയിട്ടുള്ളത്.

കമ്മാന്തറ മദർ തെരേസ സ്കൂൾ ഇക്കുറിയും മുന്നിൽ

വടക്കഞ്ചേരി: ആലത്തൂർ വിദ്യാഭ്യാസ ഉപജില്ലയിൽ എയ്ഡഡ് യുപി സ്കൂളുകളിൽ ഏറ്റവും കൂടുതൽ കുട്ടികൾ ഇക്കുറിയും കമ്മാന്തറ മദർ തെരേസ യുപി സ്കൂളിൽ. ഇക്കുറി 182 കുട്ടികൾ ഒന്നാം ക്ലാസിൽ ചേർന്നിട്ടുണ്ടെന്നു ഹെഡ്മിസ്ട്രസ് സി. രജനി പറഞ്ഞു. ഒന്നുമുതൽ ഏഴുവരെയുള്ള ക്ലാസുകളിലായി ഇപ്പോൾ 1975 കുട്ടികളുണ്ട്. ഇതിനുപുറമെ എൽകെജി, യുകെജി വിഭാഗങ്ങളിലായി 320 കുട്ടികളടക്കം കുട്ടികളുടെ എണ്ണം പുതിയ സ്കോറിലെത്തി. കുട്ടികൾക്കായുള്ള സ്വിമിംഗ് പൂൾ ഉൾപ്പെടെ അത്യാധുനികമായ ഭൗതിക സാഹചര്യങ്ങളോടെയാണ് സ്കൂൾ പ്രവർത്തിക്കുന്നത്. സ്കൂളിലെ അത്യാകർഷകമായ ഭൗതിക സാഹചര്യങ്ങളും പഠനത്തിലും പാഠ്യേതര രംഗത്തുമുള്ള മികവുകളുമാണ് സ്കൂളിനെ രക്ഷിതാക്കൾക്കും കുട്ടികൾക്കും പ്രിയപ്പെട്ടതാക്കുന്നത്. സ്റ്റീം അടുക്കള, മാലിന്യമുക്ത കലാലയമാക്കാൻ ലക്ഷ്യം വച്ചുള്ള പ്ലാന്‍റ്, കുട്ടികളുടെ പാർക്ക്, സമ്പൂർണ ഡിജിറ്റൽ ക്ലാസ്മുറികൾ തുടങ്ങി എല്ലാം മാറുന്ന കാലത്തിനനുസരിച്ചുള്ള മാറ്റങ്ങളുണ്ട്. സ്കൂളിലെ പ്രവേശനോത്സവം വാർഡ് മെംബർ സി. മുത്തു ഉദ്ഘാടനം ചെയ്തു. ഹെഡ്മിസ്ട്രസ് സി. രജനി, പിടിഎ പ്രസിഡന്‍റ് ബിനോയ് ജേക്കബ്, സ്കൂൾ മാനേജർ തോമസ് മാത്യു കാടൻകാവിൽ എന്നിവർ പ്രസംഗിച്ചു.

താഴെത്തട്ടിലുള്ള വിദ്യാര്‍ഥികളെ മുഖ്യധാരയിലെത്തിക്കണം: മന്ത്രി

പാലക്കാട്: സമൂഹത്തില്‍ താഴെ തട്ടിലുള്ള വിദ്യാര്‍ഥികളുടെ ജീവിതാവസ്ഥ പരിശോധിച്ച് സമൂഹത്തിനു മുന്നിലെത്തിക്കണമെന്നു മന്ത്രി കെ. കൃഷ്ണന്‍കുട്ടി. ഉമ്മിനി ഗവണ്‍മെന്‍റ് ഹൈസ്‌കൂളില്‍ ജില്ലാതല സ്കൂൾ പ്രവേശനോത്സവം ഉദ്ഘാടനം ചെയ്യുകയായിരുന്നു മന്ത്രി. കുട്ടികളുടെ ജീവിതാവസ്ഥ പരിശോധിക്കുന്നതില്‍ പട്ടികജാതി- പട്ടികവര്‍ഗ വിഭാഗത്തിലുള്ള വിദ്യാര്‍ഥികള്‍ക്കു പ്രാധാന്യം നല്‍കണം. ആര്‍ട്ടിഫിഷ്യല്‍ ഇന്‍റലിജന്‍സിന്‍റെ വരവ് വിദ്യാഭ്യാസ സമ്പ്രദായത്തില്‍ വലിയ മാറ്റം കൊണ്ടുവന്നു. ഇതിന്‍റെ സാധ്യതകള്‍ ഉപയോഗപ്പെടുത്തണം. കുട്ടികള്‍ ചോദ്യങ്ങള്‍ ചോദിക്കുന്നവരാവണം, അതിനായി വിദ്യാര്‍ഥികളെ പ്രാപ്തരാക്കണമെന്നും മന്ത്രി കൂട്ടിചേര്‍ത്തു. കൂടാതെ വിവിധ മേഖലകളില്‍ ഉന്നതിയിലെത്തിയവരുടെ ജീവിതം പ്രചോദനമാക്കണമെന്നും മന്ത്രി പറഞ്ഞു. എ. പ്രഭാകരന്‍ എംഎല്‍എ അധ്യക്ഷനായി. വി.കെ. ശ്രീകണ്ഠന്‍ എംപി മുഖ്യാതിഥിയായി. ജില്ലാ പഞ്ചായത്ത് പ്രസിഡന്‍റ് കെ. ബിനുമോള്‍ നവാഗതരെ സ്വാഗതംചെയ്തു. കായിക പ്രതിഭകള്‍ക്കുള്ള അനുമോദനം ജില്ലാ കളക്ടര്‍ ജി.പ്രിയങ്ക നിര്‍വഹിച്ചു. അകത്തേത്തറ ഗ്രാമപഞ്ചായത്ത് പ്രസിഡന്‍റ് സുനിത അനന്തകൃഷ്ണന്‍, വൈസ് പ്രസിഡന്‍റ് മോഹനന്‍, ജില്ലാ പഞ്ചായത്ത് അംഗം വി.കെ. ജയപ്രകാശ്, ഡിഡിഇ ഇന്‍ചാര്‍ജ് ടി.പി.സലീന, പാലക്കാട് ഡിഇഒ ആസിഫ് അലിയാര്‍, വിദ്യാകിരണം കോ-ഓര്‍ഡിനേറ്റര്‍ കെ.എന്‍. കൃഷ്ണകുമാര്‍, പിടിഎ പ്രസിഡന്‍റ് സി. ശിവരാമന്‍, എംപിടിഎ പ്രസിഡന്‍റ് ജെ.കെ. റീജ, പ്രധാന അധ്യാപിക കെ.പി. സുജാത എന്നിവര്‍ പങ്കെടുത്തു.

കത്തീഡ്രൽ സ്കൂളിൽ വർഷാരംഭം റോബോട്ടിക്‌സ് പഠനത്തിലൂടെ

പാലക്കാട്: സെന്‍റ് റാഫേൽസ് കത്തീഡ്രൽ സ്കൂളിന്‍റെ പുതിയ അക്കാദമിക് വർഷത്തിന്‍റെ ആദ്യദിനം വിദ്യാർഥികൾക്കും അധ്യാപകർക്കും ആവേശംനൽകുന്ന രീതിയിൽ ആഘോഷിച്ചു. പുതുതായി സ്കൂളിൽ റോബോട്ടിക്‌സ് പഠനപദ്ധതി ആരംഭിച്ചുകൊണ്ടാണ് ആദ്യദിനം ആഘോഷിച്ചത്. സ്കൂൾമാനേജർ ഫാ. ജോഷി പുലിക്കോട്ടിൽ നൂതന പഠനപദ്ധതിക്കൊപ്പം പുതിയ അധ്യയനവർഷം ഉദ്ഘാടനം ചെയ്തു. വൈസ് പ്രിൻസിപ്പൽ സന്ധ്യ തോമസ്, സ്കൂൾ പ്രിൻസിപ്പൽ ഫാ.കെ.വി. ആന്‍റോ, ഹയർസെക്കൻഡറി കോ-ഓർഡിനേറ്റർ ശ്രീജ എന്നിവർ പ്രസംഗിച്ചു.

കായികപരിശീലന ക്യാമ്പ് സമാപിച്ചു

വടക്കഞ്ചേരി: കണ്ണമ്പ്ര കൊട്ടേക്കാട് വായനശാലയുടെയും ക്ലബിന്‍റെയും സംയുക്താഭിമുഖ്യത്തിൽ കായിക പരിശീലന ക്യാമ്പ് നടത്തി. ക്യാമ്പിന്‍റെ സമാപനം വാർഡ് മെംബർ മേഘ അനിൽകുമാർ ഉദ്ഘാടനം ചെയ്തു. അത്‌ലറ്റിക് ക്ലബ് പ്രസിഡന്‍റ് വി. മോഹനൻ അധ്യക്ഷത വഹിച്ചു. എസ്ഐ കെ. ബാലസുബ്രഹ്്മണ്യൻ മുഖ്യപ്രഭാഷണം നടത്തി. ഫിസിക്കൽ ട്രെയ്നർ സി.സി. ചന്ദ്രബോസ്, വായനശാല പ്രസിഡന്‍റ് എ. രവീന്ദ്രൻ, സെക്രട്ടറി കെ.ആർ. ഷൺമുഖൻ, ബാലവേദി സെക്രട്ടറി വിസ്മയ രവീന്ദ്രൻ എന്നിവർ പ്രസംഗിച്ചു.

മണ്ണാർക്കാട് മണ്ഡലത്തിൽ ഏഴുകോടിയുടെ വികസന പദ്ധതികൾക്ക് അംഗീകാരം

മണ്ണാർക്കാട്: മുഖ്യമന്ത്രിയുടെ പ്രത്യേക മേൽനോട്ടത്തിൽ നടപ്പിലാക്കുന്നതും എംഎൽഎമാരിൽ നിന്ന് നിർദേശം സ്വീകരിച്ചതുമായ വികസനപ്രവർത്തനങ്ങളിൽ മണ്ണാർക്കാട് നിയോജക മണ്ഡലത്തിൽ നിന്ന് എൻ. ഷംസുദ്ദീൻ എംഎൽഎ സമർപ്പിച്ച ആറു വികസന പദ്ധതികൾക്ക് സർക്കാർ അംഗീകാരം നൽകി. അലനല്ലൂർ ഗ്രാമപഞ്ചായത്തിലെ എടത്തനാട്ടുകരയിലെ തടിയംപറമ്പ് - കൊമ്പംകല്ല് പാലം നിർമാണത്തിന് ഒരു കോടി രൂപ, തെന്നാരി മുക്കാട് മണ്ണാർക്കാട് മുൻസിപ്പാലിറ്റിയെയും തെങ്കര പഞ്ചായത്തിനെയും തമ്മിൽ ബന്ധിപ്പിക്കുന്ന പൊട്ടിതോടിനു കുറുകെ പാലം നിർമാണത്തിനു ഒരുകോടിരൂപ, മണ്ണാർക്കാട് പട്ടണത്തിൽ കുന്തിപ്പുഴക്കുസമീപം നഗരസൗന്ദര്യവത്കണത്തിന്‍റെ ഭാഗമായി വാക്ക്‌വേ നിർമാണത്തിനു ഒരുകോടിരൂപ, അട്ടപ്പാടിയിലെ പുതൂർ ജിടിവി എച്ച്എച്ച്എസിന് കെട്ടിടം നിർമാണത്തിനായി രണ്ടുകോടിരൂപ, കോട്ടോപ്പാടം ഗ്രാമപഞ്ചായത്തിലെ അരിയൂർ ജിഎംഎൽപി സ്കൂൾ ഗ്രൗണ്ട് നവീകരണത്തിന് ഒരുകോടിരൂപ, കുമരംപുത്തൂർ ഗ്രാമപഞ്ചായത്തിലെ ചങ്ങലീരിയിലെ പഞ്ചായത്ത് സിഎച്ച് മിനി സ്റ്റേഡിയം നവീകരണത്തിനു ഒരുകോടി രൂപ എന്നിങ്ങനെയാണ് തുക അനുവദിച്ചത്.

നന്ദിയോട് ആശുപത്രിയിൽ നവീകരിച്ച ലാബ് ഉദ്ഘാടനം

വണ്ടിത്താവളം: നന്ദിയോട് സാമൂഹ്യാരോഗ്യകേന്ദ്രത്തിൽ നവീകരിച്ച ലാബ് കൊല്ലങ്കോട് ബ്ലോക്ക് പഞ്ചായത്ത് പ്രസിഡന്‍റ് ആർ. ചിന്നക്കുട്ടനും പട്ടഞ്ചേരി ഗ്രാമപഞ്ചായത്ത് പ്രസിഡന്‍റ് പി.എസ്. ശിവദാസും സംയുക്തമായി ഉദ്ഘാടനം ചെയ്തു. യോഗത്തിൽ ബ്ലോക്ക് ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ നിസാർ അധ്യക്ഷത വഹിച്ചു. ബ്ലോക്ക് മെഡിക്കൽ ഓഫീസർ ഡോ.എം. ബിനു, പട്ടഞ്ചേരി പഞ്ചായത്ത് വൈസ് പ്രസിഡന്‍റ് അനില മുരളീധരൻ, പഞ്ചായത്ത് ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ ഷൈലജ പ്രദീപ്, വാർഡ് മെംബർമാരായ സുഷമ, ഗീത, വണ്ടിത്താവളം വ്യാപാര വ്യവസായി ഏകോപന സമിതി സെക്രട്ടറി കെ.കെ. ഷെറീഫ്, പ്രസിഡന്‍റ് സി. മണി, നഴ്സിംഗ് സൂപ്പർവൈസർ തുടങ്ങിയവർ പ്രസംഗിച്ചു

ലഹരിമുക്ത കാമ്പസ്: ബോധം കാമ്പയിനു തുടക്കം

മണ്ണാർക്കാട്: ലഹരി നിർമാർജന സമിതി സംസ്ഥാനകമ്മിറ്റിയുടെ നേതൃത്വത്തിൽ ലഹരിക്കെതിരെ നൂറുദിന കർമപദ്ധതിയുടെ ഭാഗമായി നടത്തുന്ന "ലഹരിമുക്ത കാമ്പസ് ബോധം കാമ്പയിൻ' ജില്ലാതല ഉദ്ഘാടനം എൻ. ഷംസുദീൻ എംഎൽഎ നിർവഹിച്ചു. എൽഎൻഎസ് ജില്ലാ പ്രസിഡന്‍റ് എം. ഹമീദ് ഹാജി അധ്യക്ഷനായി. ജനറൽസെക്രട്ടറി കെ.ടി. ജലീൽ, ഐ. മുഹമ്മദ്, ജമാലുദ്ദീൻ ആനക്കര, എസ്. മുഹമ്മദ്, ഹമീദ് കൊമ്പത്ത്, കെ. ഹസ്സൻ, കോട്ടോപ്പാടം ഗ്രാമപഞ്ചായത്ത് സ്ഥിരം സമിതി അധ്യക്ഷ കെ. റജീന, പി. മൻസൂറലി, കെ.എച്ച്. ഫഹദ്, കെ. അബ്ദുള്ള, സി.ടി. ഹംസ, കെ. ഫൈസൽ, എം. ഷഫീഖ്, എ. ഉനൈസ് പങ്കെടുത്തു.

ദേശീയപാതയിൽ പണിതീരുന്നതുവരെ ടോൾ ഒഴിവാക്കണം: കൺസ്യൂമർ ഫോറം

ആലത്തൂർ: ദേശീയപാതയിൽ നിർമാണ പ്രവൃത്തികൾ തീരുന്നതുവരെ വാഹനങ്ങളുടെ ടോൾ ഒഴിവാക്കണമെന്ന് ഫോറം ഫോർ കൺസ്യൂമർ ജസ്റ്റിസ് യോഗം കേന്ദ്ര സർക്കാരിനോടാവശ്യപ്പെട്ടു. ദേശീയപാതയിൽ പണിനടക്കുന്ന സ്ഥലങ്ങളിൽ ഗതാഗതക്കുരുക്ക് ഒഴിവാക്കാൻ കരാറുകളുടെ ചെലവിൽ അതാത് പോലീസ് സ്റ്റേഷൻ പരിധിയിലെ ഹോംഗാർഡുകളെ ഡ്യൂട്ടിക്ക് നിയോഗിക്കണമെന്നും ആവശ്യപ്പെട്ടു. കാവശ്ശേരി ഒന്ന് വില്ലേജ് ഓഫീസ് കെട്ടിടം, കാവശ്ശേരി ആരോഗ്യ ഉപകേന്ദ്രം കെട്ടിടം എന്നിവയുടെ നിർമാണം പ്രവർത്തി ത്വരിതപ്പെടുത്തുക, വന്യജീവി ആക്രമണത്തിൽ മരണപ്പെടുന്നവർക്ക് സർക്കാർ നൽകുന്ന ധനസഹായം പേവിഷ ബാധയേറ്റു മരിക്കുന്നവർക്കും നൽകുക എന്നീ ആവശ്യങ്ങളും യോഗം ഉന്നയിച്ചു. കെ.എസ്. ലക്ഷ്മീനാരായണൻ അധ്യക്ഷത വഹിച്ചു. സെക്രട്ടറി കെ. പഴനിമല റിപ്പോർട്ട് അവതരിപ്പിച്ചു. കെ. വേലുണ്ണി, പനക്കൽപറമ്പ് ഉസ്മാൻ, പി.കെ. മുഹമ്മദ് ബഷീർ, എസ്. ഗോപി, പി . വിജയൻ, കെ.ബി. തിലകേശൻ ്രസംഗിച്ചു.

ചിറ്റൂർ വാട്ടർ അഥോറിറ്റി എൻജിനീയറെ ഉപരോധിച്ച് കോൺഗ്രസ് പ്രവർത്തകർ

ചിറ്റൂർ: വാട്ടർ അഥോറിറ്റി എക്സിക്യൂട്ടീവ് എൻജിനീയറുടെ കാര്യാലയം പല്ലശ്ശന ഗ്രാമപഞ്ചായത്ത് അംഗങ്ങൾ, പല്ലശ്ശന മണ്ഡലം കോൺഗ്രസ്സ് കമ്മറ്റി,യൂത്ത് കോൺഗ്രസ് ഭാരവാഹികളുടെ നേതൃത്വത്തിൽ ഉപരോധിച്ചു. ജൽജീവൻ പദ്ധതിയുടെ ഭാഗമായി പൈപ്പിടാനായി പൊളിച്ച പല്ലശ്ശന- കരിപ്പോട് പിഡബ്ല്യുഡി റോഡിന്‍റെ പന്തപ്പുള്ളിമുതൽ കിഴക്കേഗ്രാമംവരെ തകർന്ന റോഡിന്‍റെ ശോചനീയാവസ്ഥ പരിഹരിക്കണമെന്നാവശ്യപ്പെട്ടാണ് ഉപരോധം നടത്തിയത്. അസിസ്റ്റന്‍റ് എക്സിക്യൂട്ടീവ് എൻജിനീയറും സൂപ്പർവൈസറും സമരക്കാരുമായി ചർച്ച നടത്തി. ഒരാഴ്ചക്കകം പരിഹാരം കാണാമെന്നു ഉറപ്പുനൽകി. സമയബന്ധിതമായി റോഡുപണി ചെയ്യാത്ത കരാറുകാരനെതിരെ ജില്ലാ കളക്ടർക്കും മറ്റു ബന്ധപ്പെട്ട അധികാരികൾക്കും പരാതി നൽകുമെന്നും എൻജിനീയർ സമരക്കാർക്ക് ഉറപ്പുനൽകിയതോടെ സമരക്കാർ പിരിഞ്ഞുപോയി. കോൺഗ്രസ് മണ്ഡലം പ്രസിഡന്‍റ് പി.എസ്. രാമനാഥൻ, ഗ്രാമപഞ്ചായത്ത് അംഗങ്ങളായ എസ്. അശോകൻ, മനു പല്ലാവൂർ, കോൺഗ്രസ് ബ്ലോക്ക് വൈസ് പ്രസിഡന്‍റ് സുധീർ, പ്രഭാകരൻ, ശ്യാം ദേവദാസ്, കെ.കെ. ഹരിദാസ്, എം. കുമാരൻ, വി. കുമാരൻ, ടി.എം. സുബ്രമഹ്ണ്യൻ, മനോജ് ഉണ്ണി, ഷിബു പല്ലാവൂർ എന്നിവർ പങ്കെടുത്തു.

നാട്ടുകാരുടെ വഴിമുടക്കി നിർമാണപ്രവൃത്തികൾ

വടക്കഞ്ചേരി: നിർമാണ സാമഗ്രികൾ റോഡിലിറക്കി ഗതാഗതം മുടക്കി. വണ്ടാഴി പഞ്ചായത്തിലെ ഒന്നാം വാർഡിൽപ്പെട്ട വള്ളിയോട് പടിഞ്ഞാറേക്കാട് തത്തനാടം റോഡിലാണ് പട്ടികവർഗ ഉന്നതിയിൽ വീട്ടുപറമ്പുകളുടെ സംരക്ഷണഭിത്തി നിർമിക്കാനുള്ള നിർമാണ സാമഗ്രികൾ റോഡിൽ ഇറക്കി നാട്ടുകാരുടെ വഴിമുടക്കിയിട്ടുള്ളത്. മെറ്റൽ, മണൽ, വാർപ്പ് സാധനങ്ങൾ, യന്ത്രസംവിധാനങ്ങൾ തുടങ്ങിയവയെല്ലാം റോഡിൽ കൂട്ടിയിട്ടാണ് കരാറുകാരൻ പണിനടത്തുന്നത്. ഇതിനടുത്തുതന്നെ ഒഴിഞ്ഞ സ്ഥലമുണ്ട്. എന്നാൽ സാധനങ്ങൾ അവിടെ ഇറക്കാതെ വാഹനം പോകാനാകാത്ത വിധമാണ് റോഡിൽ കൂട്ടിയിട്ടിട്ടുള്ളത്. ഇത്തരത്തിൽ വഴിമുടക്കി സാധനങ്ങൾ കൂട്ടിയിട്ട് ഒരാഴ്ച കഴിഞ്ഞു. പിന്നീട് ഇന്നലെയാണ് പണി ആരംഭിച്ചിട്ടുള്ളത്. ഇന്നലെ സ്കൂൾ വാഹനങ്ങളടക്കം വാഹനങ്ങളെല്ലാം വഴിയിൽ കുടുങ്ങി യാത്ര ചെയ്യാനാകാതെ ഏറെ കഷ്ടപ്പെടുന്ന സ്ഥിതിയുണ്ടായി. വാഹനങ്ങൾക്കുപോകാൻ തടസമില്ലാത്ത വിധം പണികൾ നടത്തണമെന്നു പഞ്ചായത്തിൽനിന്നും നിർദേശിച്ചിരുന്നെങ്കിലും അതു പരിഗണിക്കാതെയാണ് പണി നടത്തുന്നതെന്നു നാട്ടുകാർ പറയുന്നു. നിർമാണ സാധനങ്ങളെല്ലാം റോഡിൽനിന്നുംമാറ്റി വാഹനങ്ങൾക്കു കടന്നുപോകാനുള്ള സൗകര്യം ഒരുക്കണമെന്നാണു നാട്ടുകാരുടെ ആവശ്യം.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]