ADVERTISEMENT

ADVERTISEMENT

പാലക്കയത്തെ കോസ്‌വേകളിൽ ഇനി മഴവെള്ളംകയറി യാത്ര തടസപ്പെടില്ല

പാലക്കയം: പാലക്കയത്തുകാർക്ക്‌ എന്നും പേടിസ്വപ്നമായിരുന്ന കോസ്‌വേകളിലെ വെള്ളമൊഴുക്ക്‌ ഇനിയുണ്ടാവില്ല.

കഴിഞ്ഞ ദിവസം തച്ചമ്പാറ പഞ്ചായത്തിന്‍റെ നേതൃത്വത്തിൽ ചീനിക്കപ്പാറ, അച്ചിലട്ടി കോസ്‌വേകളിൽ അടിഞ്ഞുകൂടിയ കല്ലുകളും മണ്ണും മാലിന്യങ്ങളും നീക്കം ചെയ്തതോടെയാണിത്‌.കഴിഞ്ഞ വർഷം പുഴ നിറഞ്ഞ്‌ മഴവെള്ളം കയറിയ പ്രദേശങ്ങളിലെ പുഴയിലുള്ള മണ്ണും കല്ലുമാണ‌് നീക്കംചെയ്തത്‌.

തച്ചമ്പാറ ഗ്രാമപഞ്ചായത്ത് പ്രസിഡന്‍റ് നൗഷാദ് ബാബു, ബ്ലോക്ക്‌ പഞ്ചായത്ത്‌ മെംബർ കുര്യൻ പറക്കുടി, വാർഡുമെമ്പർമാരായ, കൃഷ്ണൻകുട്ടി, താനുജ രാധാകൃഷ്ണൻ, രാജി ജോണി, വില്ലജ് ഓഫീസർ പി.എ. സെബാസ്റ്റ്യൻ, എമർജൻസി റെസ്പോൺസ് ടീം ലീഡർ സച്ചു ജോസഫ് എന്നിവർ നേതൃത്വം നൽകി.

ADVERTISEMENT

വികസനപാതയിൽ പട്ടാമ്പി സെൻട്രൽ ഓർച്ചാഡ്

ഷൊർണൂർ: വികസനപാതയിൽ പട്ടാമ്പി സെൻട്രൽ ഓർച്ചാഡ്. കർഷകർക്കു പ്രയോജനപ്പെടുന്ന സമഗ്ര വികസനപദ്ധതികളുമായി പട്ടാമ്പി സെൻട്രൽ ഓർച്ചാഡ് ഒരുകോടിരൂപ ചെലവിൽ കർഷകപരിശീലന കേന്ദ്രവും, ഹൈടെക് പോളിഹൗസുകളും, സംയോജിത കൃഷി യൂണിറ്റുമടക്കമുള്ളവയാണ് തയാറാക്കിയിരിക്കുന്നത്. വിദേശഫലവൃക്ഷത്തോട്ടം, ഫുഡ് പാർക്ക് എന്നിവ വേറെയുണ്ട്. വൻ വികസന പദ്ധതികളുമായി 26 ഏക്കർ സ്ഥലത്താണ് സെൻട്രൽ ഓർച്ചാഡ് നവീകരിക്കപ്പെട്ടിരിക്കുന്നത്. കർഷകർക്ക് പ്രയോജനപ്പെടുന്ന സമഗ്ര വികസനപദ്ധതികളാണ് ഇവിടെ നടപ്പാക്കുന്നത്. ഫാം ടൂറിസത്തിന് പ്രാധാന്യം നൽകുന്നതോടൊപ്പം, കർഷകർക്കും യുവാക്കൾക്കും വിദ്യാർഥികൾക്കും ആധുനിക കൃഷിയിലുള്ള സാങ്കേതികവിദ്യകൾ പരിചയപ്പെടുത്താനും പദ്ധതികൾ തയാറാക്കിയിട്ടുണ്ട്. 2024-25 ബജറ്റിൽ അഞ്ചുകോടി രൂപ ഇതിന്അനുവദിച്ചിരുന്നു. മുഹമ്മദ് മുഹ്സിൻ എംഎൽഎയും കൃഷിവകുപ്പുദ്യോഗസ്ഥരും ചർച്ചകൾ നടത്തിയാണ് പദ്ധതികൾ തയാറാക്കിയത്. ഒരു കോടി രൂപ ചെലവിലാണ് കർഷകപരിശീലനകേന്ദ്രം ഓർച്ചാഡ് വളപ്പിൽ നിർമിക്കുന്നത്. ഇതിനായി മണ്ണുപരിശോധന പൂർത്തിയാക്കിക്കഴിഞ്ഞു. കേരള ലാൻഡ്‌ ഡെവലപ്പ്മെന്‍റ് കോർപ്പറേഷനാണ് നിർമാണച്ചുമതല. 25 ഇനം മികച്ച മാവിനങ്ങളുണ്ടായിരുന്ന ഈ മാന്തോപ്പ് മികച്ച കർഷകനായിരുന്ന കുഞ്ചു മേനോനിൽനിന്ന് 1962ൽ കൃഷിവകുപ്പ് ഏറ്റെടുത്തതാണ്. നിലവിൽ ഇവിടെയുള്ള പ്രായാധിക്യമുള്ള 300-ഓളം മാവുകൾ പ്രൂണിങ് നടത്തി നവജീവൻ നൽകി സംരക്ഷിക്കും. ലോക ബാങ്ക് സഹായത്തോടെ നടപ്പാക്കുന്ന കേര പദ്ധതിയിൽ ഓർച്ചാഡിനെ ഉൾപ്പെടുത്തും. ജൈവകീടനാശിനി നിർമാണവും പരിശീലനവും നടത്തിനുള്ള യൂണിറ്റും തുടങ്ങും. കാർഷികോത്‌പന്നങ്ങൾ സംസ്കരിക്കുന്നതിനാണ് ഫുഡ് പാർക്ക്. മൂന്നു കുഴൽക്കിണറുകൾ കുഴിക്കും. നിലവിലെ കിണർ നവീകരിക്കും. കണികാജലസേചനം പ്രാവർത്തികമാക്കുകയും ചെയ്യും.

അഴുക്കുചാൽമാലിന്യം റോഡരികിൽ തള്ളി

മലമ്പുഴ: ഒരു ഭാഗത്തെ റോഡരുകിലെ അഴുക്കുചാലിൽനിന്നം കോരിയ മാലിന്യം മറ്റൊരുഭാഗത്ത് റോഡരികിൽ കൊണ്ടുവന്ന് തള്ളിയതായി നാട്ടുകാരുടെ പരാതി. മലമ്പുഴ എസ്പി ലെയ്ൻ മധുരൈവീരൻ അമ്പലത്തിനു മുന്നിലെ റോഡരികു മുതൽ കുളപ്പരുത്തി, കുരിശടി, തുടങ്ങി മത്സ്യസ്റ്റാൾ വരെ പലയിടങ്ങളിലാണ് മാലിന്യമടക്കമുള്ള മണ്ണ് കൊണ്ടുവന്ന് തട്ടിയിരിക്കുന്നത്. മഴ പെയ്താൽ ഈ മാലിന്യമടങ്ങിയ മണ്ണ് ചെളിയായി റോഡിലേക്കൊഴുകുകയും ഇരുചക്ര വാഹനങ്ങൾ തെന്നിവീഴുക, കാൽ നടയാത്രക്കാരുടെ കാലിൽ കുപ്പിച്ചില്ല്, ആണി, തുടങ്ങിയവ കേറി അപകടമുണ്ടാവാനും സാധ്യതകൾ ഏറെയാണെന്നു നാട്ടുകാർ പറഞ്ഞു. മലമ്പുഴയിലേക്ക് വിനോദസഞ്ചാരികളും നാട്ടുകാരും സഞ്ചരിക്കുന്ന പ്രധാന റോഡാണിത്. പഞ്ചായത്ത് ആരോഗ്യവിഭാഗം നടപടിയെടുക്കണമെന്നാണു നാട്ടുകാരുടെയും വിനോദസഞ്ചാരികളുടേയും ശക്തമായ ആവശ്യം. മാലിന്യം റോഡരികിൽ തള്ളിയവരെ കണ്ടുപിടിച്ച് നടപടിയെടുക്കണമെന്നും അവർ ആവശ്യപ്പെട്ടു.

ആമക്കുളത്തിനു "ആശ്വാസം'

വടക്കഞ്ചേരി: ബ്യുട്ടിഫുൾ വടക്കഞ്ചേരിക്ക് തുടക്കം കുറിക്കാറുള്ള ആമകുളത്തേക്കു ഇത്തവണത്തെ പരിസ്ഥിതിദിനത്തിൽ ആരും തിരിഞ്ഞു നോക്കിയില്ല. പുൽക്കാട് മൂടി കിടക്കുന്ന പ്രദേശത്തെ എല്ലാവരും അവഗണിച്ചു. മിക്കവാറും വർഷങ്ങളിലും ഈ പ്രദേശത്തായിരുന്നു പരിസ്ഥിതി ദിനത്തിൽ പൂചെടികളും തണൽമരങ്ങളും നട്ടിരുന്നത്. ചെടികൾ നട്ട് പോവുകയല്ലാതെ പിന്നീട് പരിചരണമൊന്നും നടത്താറില്ല. അതിനാൽ വൈകാതെ ചെടികൾ നശിച്ചുപോകും. അങ്ങനെയാണ് വർഷാവർഷങ്ങളിൽ ഇവിടെ തന്നെ ചെടികൾ നടാൻ സൗകര്യമുണ്ടാക്കിയിരുന്നത്. എന്നാൽ ഈ വർഷത്തെ പരിസ്ഥിതി ദിനത്തിലെങ്കിലും തന്‍റെ നെഞ്ചു പിളർത്തി വേദനിപ്പിക്കല്ലേ എന്ന അപേക്ഷയാണ് വടക്കഞ്ചേരി ടൗണിനടുത്ത് മുടപ്പല്ലൂർ - നെന്മാറ റോഡിൽ ആമക്കുളത്തെ ഭൂമികക്കുണ്ടായിരുന്നത്. എന്തായാലും ആരുംതിരിഞ്ഞു നോക്കിയില്ലെന്നതു യാഥാർഥ്യം. പരിസ്ഥിതി ദിനത്തിലെ തൈ നടീൽ പ്രഹസനം ഇക്കുറിയും ആവർത്തിക്കല്ലേ എന്ന അപേക്ഷയാണ് നാട്ടുകാർക്കുമുണ്ടായിരുന്നത്. ഇതറിഞ്ഞിട്ടാകണം ഇത്തവണ ഉദ്ഘാടന സ്ഥലം മാറ്റിയത്. ഇത്രയും വർഷം വൃക്ഷത്തൈകൾ നട്ടിട്ടും ഇവിടെ ഒരു തൈ പോലും വളർന്നു വലുതായില്ലെന്നതാണ് വസ്തുത. ബ്യൂട്ടിഫുൾ വടക്കഞ്ചേരി എന്ന മുദ്രാവാക്യവുമായി വടക്കഞ്ചേരിയെ പൂന്തോട്ട നഗരമാക്കുന്നതിന്‍റെ ഭാഗമായിട്ടായിരുന്നു മുൻ വർഷത്തെ ലോക പരിസ്ഥിതി ദിനത്തിൽ ടൗൺ ബസാർ റോഡിൽ ആമക്കുളത്ത് തൈ നട്ട് ബ്യൂട്ടിഫുൾ വടക്കഞ്ചേരി എന്ന പദ്ധതി ഉദ്ഘാടനം ചെയ്തിരുന്നത്. തങ്കം ജംഗ്ഷനിലും പാതയോരത്ത് പൂന്തോട്ടം ഒരുക്കിയിരുന്നു. മിഷൻ സ്കൂളിനു പിറകിലെ പൊതു സ്ഥലത്തും തൈകൾ നട്ടു. ബോധവത്കരണ പരിപാടികൾക്കൊപ്പം മാലിന്യം വലിച്ചെറിയുന്നവർക്കെതിരെ ശിക്ഷാ നടപടികളും കടുപ്പിച്ചാണ് വടക്കഞ്ചേരിയെ മനോഹരമാക്കാനുള്ള പ്രവർത്തനങ്ങൾ ആരംഭിച്ചത്. അന്നു തൈ നടുമ്പോൾ കൂട്ടം കൂടി നിന്ന് ഫോട്ടോക്ക് പോസ് ചെയ്തവരിൽ ആരെങ്കിലും ഒരു കപ്പ് വെള്ളവുമായി വരുമെന്ന് വിചാരിച്ചതും വെറുതെയായി. വരി ഒപ്പിച്ച് നട്ട കുഞ്ഞു തൈകളെല്ലാം മൺമറഞ്ഞു. ഇപ്പോൾ പാതയോരത്തെ ഇവിടം ചെറു പൊന്തക്കാടുകളായി. തൈ സംരക്ഷണത്തിനായി സ്ഥാപിച്ചിരുന്ന നെറ്റ് കൂടുകളും താങ്ങു കാലുകൾ ക്ഷയിച്ച് മറിഞ്ഞു വീണ അവസ്ഥയിലാണ്.

ബഡ്സ് സ്കൂളിൽ യോഗ ക്ലാസും, റെയ്ക്കി ഹീലിംഗ് ക്ലാസും

പട്ടഞ്ചേരി: ബഡ്സ് സ്കൂളിൽ യോഗാ പഠനക്ലാസും റെയ്ക്കി ഹീലിംഗ് ക്ലാസും ആരംഭിച്ചു. പഞ്ചായത്ത് പ്രസിഡന്‍റ് പി.എസ്. ശിവദാസ് പരിപാടി ഉദ്ഘാടനം ചെയ്തു. ഇയർക്കൈ മിത്ര പ്രൊട്ടക്്ഷൻ സൊസൈറ്റിയുടെ സഹകരണത്തോടെയാണ് പദ്ധതി ആരംഭിച്ചത്. ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ ശൈലജ പ്രദീപ്, സെക്രട്ടറി എം.എസ് ബീന, വാർഡ് അംഗങ്ങളായ ശോഭന ദാസ്, കെ ചെന്പകം, ഐഎംപിഎസ് ജോയിന്‍റ് സെക്രട്ടറി മുരളീധരൻ, റെയ്ക്കി മാസ്റ്റർ മുരളിസ്വാമി, ഐ.എം.പി.എസ് എക്സിക്യൂട്ടീവ് അംഗം രാജീവൻ, ബഡ്സ് അധ്യാപിക സനിക, യോഗ മാസ്റ്റർ മുരളി, സ്റ്റേറ്റ് ലൈബ്രറി കൗണ്‍സിൽ അംഗം ജയകൃഷ്ണൻ എന്നിവർ പ്രസംഗിച്ചു.

ഒറ്റപ്പാലം നഗരസഭാ ബസ് സ്റ്റാൻഡിൽ സെക്യൂരിറ്റിയെ നിയോഗിക്കാൻ തീരുമാനം

ഒറ്റപ്പാലം: നഗരസഭാ ബസ് സ്റ്റാൻഡിൽ സുരക്ഷാ ക്രമീകരണത്തിനു സെക്യൂരിറ്റി ജീവനക്കാരെ നിയോഗിക്കുവാൻ തീരുമാനം. ഒറ്റപ്പാലം ബസ് സ്റ്റാന്‍റിലെ അനാശാസ്യ പ്രവർത്തനങ്ങളും നിയമവിരുദ്ധ നടപടികളും അവസാനിപ്പിക്കുന്നതിന്‍റെ ഭാഗമായാണ് നഗരസഭാധികൃതർ നടപടി സ്വീകരിക്കുന്നത്. ബസ് സ്റ്റാന്‍റിൽ മുഴുവൻ സമയവും സെക്യൂരിറ്റി നിയന്ത്രണത്തിലാക്കാനാണ് നഗരസഭാ ചെയർമാനും വൈസ് ചെയർമാനും വ്യാപാരികളും പങ്കെടുത്ത യോഗത്തിൽ ധാരണയായത്. തീരുമാനം ഉടൻ നടപ്പിലാകും. രാത്രിയിൽ രണ്ട് സെക്യുരിറ്റിക്കാരും പകൽ ഒരാളും എന്ന കണക്കിൽ ജീവനക്കാരെ താത്കാലിക അടിസ്ഥാനത്തിൽ നിയമിക്കാനാണ് ധാരണ. സെക്യൂരിറ്റിക്കാർക്കുള്ള ശമ്പളം ബസ് സ്റ്റാന്‍റിലെ വ്യാപാരികളും നഗരസഭയും ചേർന്ന് നൽകാനാണ് തീരുമാനം. രാത്രിസമയത്ത് ബസ് സ്റ്റാന്‍റിൽ നിർത്തിയിട്ടിരിക്കുന്ന ബസുകൾക്ക് ഉടൻ നോട്ടീസ് നൽകും. ബസ് സ്റ്റാൻഡിനകത്ത് യാതൊരു വിധ വാഹനങ്ങളും രാത്രിയിൽ പാർക്ക് ചെയ്യാൻ അനുവദിക്കില്ല. അന്തിയുറങ്ങുന്നവരെയും, മദ്യപിച്ച് ശല്യം ചെയ്യുന്നവർക്കെതിരെയും പോലീസ് കർശന നിയമ നടപടി സ്വീകരിക്കും. രാത്രിസമയങ്ങളിൽ ബസ് സ്റ്റാൻഡും പരിസരവും ഇനി പോലീസിന്‍റെ നിരീക്ഷണത്തിലായിരിക്കും.

കൊപ്പം റോഡ് നവീകരിക്കാൻ ടെൻഡർ നടപടി

ഷൊർണൂർ: കൊപ്പം റോഡിന്‍റെ നവീകരണത്തിനു നടപടികളായി. പാതയിലെ ആദ്യഘട്ട നവീകരണത്തിന് അഞ്ചരക്കോടി രൂപയുടെ ദർഘാസായി. പൊതുമരാമത്ത് വകുപ്പിന്‍റെ നേതൃത്വത്തിലാണ് രണ്ടരക്കിലോമിറ്ററോളം വരുന്ന ഭാഗം നവീകരിക്കുക. ഉടൻ തന്നെ നിർമാണ പ്രവൃത്തികൾ ആരംഭിക്കാനാവുമെന്ന് മുഹമ്മദ് മുഹ്‌സിൻ എംഎൽഎ പറഞ്ഞു. പട്ടാമ്പിയിൽനിന്നും കൊപ്പം ഭാഗത്തേക്കുളള എളുപ്പമാർഗമാണ് മുതുതല- പറക്കാട്- കൊപ്പം പാത. ഈ റോഡിന്‍റെ നവീകരണത്തിനായി 10കോടി രൂപ അനുവദിച്ചിരുന്നുവെങ്കിലും സാങ്കേതിക പ്രശ്‌നങ്ങളാൽ നടപടികളൊന്നുമായിരുന്നില്ല. പാതയുടെ കൊടുമുണ്ട യാറം മുതൽ മുതുതല പുതുപാലം വരെയുളള ഭാഗമാണ് ആദ്യഘട്ടത്തിൽ നവീകരിക്കുന്നത്. ഓവുപാലങ്ങളും, ആവശ്യമുളളയിടങ്ങളിൽ അഴുക്കുചാലുകളും നിർമിക്കും. ഏഴര മീറ്റർ വീതിയും റോഡിനുണ്ടാവും. ഇതോടൊപ്പം മുതുതല പുതുപാലം പുനർനിർമിക്കാനും പദ്ധതിയുണ്ട്. അഞ്ചു കോടിയോളം രൂപയുടെ പദ്ധതി രൂപരേഖ ഇതിനായി സർക്കാരിലേക്ക് സമർപ്പിച്ചിട്ടുണ്ട്. ഉടൻ തന്നെ അംഗീകാരം ലഭിക്കുമെന്നാണ് പ്രതീക്ഷ. പുതുപാലം മുതൽ തൃത്താലകൊപ്പം വരെയുളള ഭാഗം കിഫ്ബിയിൽ ഉൾപ്പെടുത്തിയാണ് നവീകരിക്കുന്നത്. ഇതിന്‍റെ നടപടികളും വേഗത്തിലാക്കുമെന്നും എംഎൽഎ പറഞ്ഞു.

ചിറ്റിലഞ്ചേരിയിൽ നിറ സ്റ്റോർ പ്രവർത്തനം തുടങ്ങി

ആലത്തൂർ: ചിറ്റിലഞ്ചേരിയിലെ നിറ കോംപ്ലക്‌സിൽ നിറ സ്റ്റോർ പ്രവർത്തനം ആരംഭിച്ചു. കെ.ഡി. പ്രസേനൻ എംഎൽഎ ഉദ്ഘാടനം ചെയ്തു. മേലാർകോട് പഞ്ചായത്ത് പ്രസിഡന്‍റ് ടി. വത്സല അധ്യക്ഷയായി. നിറ കൺവീനർ എം.വി. രശ്മി, നെന്മാറ ബ്ലോക്ക് പഞ്ചായത്ത് പ്രസിഡന്‍റ് സി. ലീലാമണി, എരിമയൂർ പഞ്ചായത്ത് പ്രസിഡന്‍റ് എ. പ്രേമകുമാർ, ജില്ലാ പഞ്ചായത്തംഗം വി. രജനി, മേലാർകോട് പഞ്ചായത്ത് വൈസ് പ്രസിഡന്‍റ് ഐ. മൻസൂർ അലി, മേലാർകോട് കൃഷി ഓഫീസർ എസ്.ജി. ലക്ഷ്മി ,നിറ ഹരിത മിത്ര സെക്രട്ടറി പി. പ്രദോഷ് കുമാർ എന്നിവർ പ്രസംഗിച്ചു.

പെട്രോൾ ഒഴിക്കുന്നതിനിടെ ബൈക്കിനു തീപിടിച്ചു

കുമരംപുത്തൂർ: പെട്രോൾ ഒഴിക്കുന്നതിനിടെ ബൈക്കിനു തീപിടിച്ചു. മണ്ണാർക്കാട്- അലനല്ലൂർ റൂട്ടിൽ ചുങ്കം ജംഗ്ഷനു സമീപമുള്ള സ്കൂൾപടിയിലാണ് റോഡരികിൽ നിർത്തിയിട്ടിരുന്ന ബൈക്കിന് തീപിടിച്ചത്. പെട്രോൾ കഴിഞ്ഞതിനെ തുടർന്ന് യുവാവ് സമീപത്തുള്ള പെട്രോൾപമ്പിൽനിന്നും പെട്രോൾ വാങ്ങി ബൈക്കിൽ ഒഴിക്കുന്നതിനിടയിലാണ് തീപിടിത്തമുണ്ടായത്. തീപിടിത്തത്തിൽ മൈലമ്പാടം പള്ളിക്കുന്ന് സ്വദേശിയായ യുവാവിനു നിസാര പൊള്ളലേറ്റു. ഓടിക്കൂടിയ നാട്ടുകാർ തീയണക്കാൻ ശ്രമിച്ചെങ്കിലും നടന്നില്ല. തുടർന്ന് മണ്ണാർക്കാട് അഗ്നിരക്ഷാനിലയത്തിൽ വിവരം അറിയിക്കുകയായിരുന്നു. അഗ്നിരക്ഷാനിലയത്തിൽനിന്നും എത്തിയ സീനിയർ ഫയർ ആൻഡ് റെസ്ക്യൂ ഓഫീസർ എസ്. വിമൽ കുമാർ, ഫയർ ആൻഡ് റസ്ക്യൂ ഓഫീസർമാരായ വി. സുരേഷ് കുമാർ, ഒ.എസ്. സുഭാഷ് , രാമകൃഷ്ണൻ, എന്നിവരടങ്ങുന്ന സംഘമാണ് തീ അണച്ചത്. ബൈക്ക് ഭാഗികമായി കത്തിനശിച്ചു.

മണ്ണ്, വെള്ളം സംരക്ഷണത്തിൽ പരിശീലനം നൽകി

അഗളി: കള്ളമല സെന്‍റ് സ്റ്റീഫൻസ് എൽപി സ്കൂളിൽ മണ്ണും വെള്ളവും സംരക്ഷിക്കുകയും പരിപാലിക്കുകയും ചെയ്യൽ എന്ന വിഷയത്തിൽ പരിശീലന പരിപാടി നടത്തി. നബാഡിന്‍റെ കള്ളമല നീരുറവ അടിസ്ഥാനമാക്കിയുള്ള നീർത്തട വികസന പദ്ധതിയുടെ ഭാഗമായാണ് അട്ടപ്പാടി സോഷ്യൽ സർവീസ് ഓർഗനൈസേഷൻ (ആസോ) പരിപാടി സംഘടിപ്പിച്ചത്. കള്ളമല സ്പ്രിംഗ്‌ഷെഡ് വില്ലേജ് വാട്ടർഷെഡ് കമ്മിറ്റി അംഗം റോബിൻ പി. ജോസഫ് സ്വാഗതം പറഞ്ഞു. കമ്മിറ്റി പ്രസിഡന്‍റ് ജോൺസൺ വിലങ്ങുപാറയിൽ അധ്യക്ഷത വഹിച്ചു. ആസോ എക്സിക്യൂട്ടീവ് സെക്രട്ടറി ഫാ. പോൾ പാറയിൽ സിഎംഐ പദ്ധതിയുടെ പ്രാധാന്യത്തെകുറിച്ച് വിശദീകരിച്ചു. ചടങ്ങിൽ കമ്മിറ്റിയുടെ സെക്രട്ടറി ലിസമ്മ പ്രസംഗിച്ചു. ഡോ.വി. ഹരിദാസ് മണ്ണും ജല സംരക്ഷണവും പരിപാലനവും എന്ന വിഷയത്തിൽ പരിശീലനം നൽകി. പരിപാടിയുടെ ഭാഗമായി ജാതി തൈകളുടെ വിതരണവും നടത്തി. കള്ളമലയിലെ ഗ്രാമീണർ, കർഷകർ, വിദ്യാർഥികൾ, വാട്ടർഷെഡ് സമിതിയംഗങ്ങൾ പങ്കെടുത്തു. ആസോയുടെ പ്രോജക്ട് മാനേജർ ഉദയഭാനു നന്ദി പറഞ്ഞു.

അവധിദിനം ആഘോഷമാക്കാൻ നെല്ലിയാമ്പതിയിലും പോത്തുണ്ടിയിലും വിനോദസഞ്ചാരികളുടെ തിരക്ക്

നെന്മാറ: ബക്രീദ് അവധിയിൽ നെല്ലിയാമ്പതിയിലും പോത്തുണ്ടിയിലും വിനോദസഞ്ചാരികളുടെ തിരക്ക്. കാലവർഷത്തിലെ മഴകുറഞ്ഞതും ബക്രീദ് അവധിയും ഒത്തുവന്നതോടെയാണ് തിരക്കു കൂടിയത്. പോത്തുണ്ടി വനംചെക്ക്പോസ്റ്റ് വഴി ഇരുചക്രവാഹനം ഉൾപ്പെടെ 1700 വാഹനങ്ങൾ ഉച്ചയ്ക്കു രണ്ടിനു മുമ്പായി നെല്ലിയാമ്പതിയിലേക്ക് പ്രവേശിച്ചതായി ചെക്ക്പോസ്റ്റ് അധികൃതർ പറഞ്ഞു. ഏകദേശം അയ്യായിരത്തോളം വിനോദസഞ്ചാരികൾ ഒരുദിവസത്തിനം നെല്ലിയാമ്പതിയിൽ എത്തിയതായാണ് അനുമാനിക്കുന്നത്. ഉച്ചയ്ക്കുശേഷം പോത്തുണ്ടി ഉദ്യാനത്തിലും വിനോദസഞ്ചാരികളുടെ തിരക്ക് അനുഭവപ്പെട്ടു. വിനോദസഞ്ചാരികളെ കൂടാതെ കെഎസ്ആർടിസി യുടെ വിവിധ ഡിപ്പോകളിൽ നിന്നുള്ള വിനോദയാത്രാ ബസുകളും സർവീസ് നടത്തി. നെല്ലിയാമ്പതി സീതാർകുണ്ട്, കാരപ്പാറ റൂട്ടുകളിൽ ഉച്ചയോടെ ഗതാഗതക്കുരുക്കുമുണ്ടായതായി വിനോദസഞ്ചാരികൾ പറഞ്ഞു. പോത്തുണ്ടി ഉദ്യാനത്തിന് മുൻവശത്ത് വനം ചെക്ക്പോസ്റ്റ് മുതൽ രണ്ടുകിലോമീറ്ററോളം ദൂരം വിനോദസഞ്ചാരികളുടെ വാഹനങ്ങൾ കാണാമായിരുന്നു.

കൃഷിയിടങ്ങളിൽനിന്ന് ആനകളെ തുരത്തണം: കേരള കോൺഗ്രസ്- എം

വടക്കഞ്ചേരി: കിഴക്കഞ്ചേരി പനംകുറ്റി മേഖലയിൽ കൃഷി നശിപ്പിക്കുന്ന കാട്ടാനകളെ തുരത്താൻ അടിയന്തര നടപടി സ്വീകരിക്കണമെന്നു കേരള കോൺഗ്രസ്- എം സർക്കാരിനോടാവശ്യപ്പെട്ടു. തെങ്ങും വാഴയും റബറും കവുങ്ങും നിരന്തരം നശിപ്പിക്കുന്ന കാട്ടാനകൾ പ്രദേശത്തെ കർഷകർക്കു പേടിസ്വപ്നമായി മാറിയിരിക്കുകയാണ്. ജീവനു തന്നെ ഭീക്ഷണിയായി വീടുകൾക്കു ചുറ്റുമാണ് ആനകളെത്തുന്നത്. ആനയെ പേടിച്ച് വീടു ഉപേക്ഷിച്ച് മാറിത്താമസിക്കേണ്ട ഗതികേടിലാണ് കർഷകരെന്നു നേതാക്കൾ ചൂണ്ടിക്കാട്ടി. കുരങ്ങ്, മലയണ്ണാൻ, പന്നി തുടങ്ങിയവയും കൃഷി നശിപ്പിക്കുന്ന സ്ഥിതിയുണ്ട്. കർഷകരുടെ നിസഹായാവസ്ഥയിൽ വനപാലകരും പുറം തിരിഞ്ഞു നിൽക്കുന്നു. കഴിഞ്ഞ ദിവസങ്ങളിൽ പനംകുറ്റി പ്രദേശത്ത് ജോണി ചെറുനിലം അടക്കമുള്ള കർഷകരുടെ വാഴയും തെങ്ങും കാട്ടാനകൾ നശിപ്പിച്ചു. കേരള കോൺഗ്രസ്- എം സംസ്ഥാന കമ്മിറ്റി അംഗങ്ങളായ ജോർജ് നെല്ലിശേരി, ബിജു പുലിക്കുന്നേൽ, ആലത്തൂർ നിയോജക മണ്ഡലം പ്രസിഡന്‍റ് പി. കെ. കൃഷ്ണൻ, തരൂർ നിയോജക മണ്ഡലം പ്രസിഡന്‍റ് സണ്ണി നടയത്ത്, വടക്കഞ്ചേരി മണ്ഡലം പ്രസിഡന്‍റ് ജോയ് കുന്നത്തേടത്ത് തുടങ്ങിയവർ ആന നശിപ്പിച്ച കൃഷിയിടങ്ങൾ സന്ദർശിക്കുകയും നാശനഷ്ടം സംഭവിച്ച കർഷകർക്ക് വേണ്ട നഷ്ടപരിഹാരം കൊടുക്കുവാൻ വനംവകുപ്പിനോടാവശ്യപ്പെടുകയും ചെയ്തു.

മനിശീരി ആറംകുളം പൂതംകുളത്തിൽ മീനുകൾ കൂട്ടത്തോടെ ചത്തുപൊങ്ങി

ഒറ്റപ്പാലം: മീനുകൾ കൂട്ടത്തോടെ ചത്തുപൊങ്ങി. മനിശീരി ആറംകുളം പൂതംകുളത്തിലാണ് മീനുകൾ കൂട്ടത്തോടെ ചത്തുപൊങ്ങിയത്. കുളിക്കാനായി എത്തിയവരാണ് മീൻ ചത്തുപൊങ്ങിയത് കണ്ടത്. കുളത്തിൽ അസഹ്യമായ ദുർഗന്ധമാണ്. ഇതു മൂലം കുളിക്കാനാവാത്ത സ്ഥിതിയുമുണ്ട്.പ്രദേശവാസികൾക്കെല്ലാം ഇത് ദുരിതമായിരിക്കുകയാണ്. മീനുകൾ കൂട്ടത്തോടെ പെട്ടെന്ന് ചത്തുപൊങ്ങാനുള്ള കാരണം വ്യക്തമല്ല. സമീപകാലത്തൊന്നും ഈ കുളത്തിലെ മീനുകൾ കൂട്ടത്തോടെ ചത്തുപൊങ്ങിയതായി അറിവില്ലെന്നു നാട്ടുകാർ പറയുന്നു. ഒരേക്കറിലേറെ പരന്നുകിടക്കുന്ന കുളമാണ് പൂതംകുളം. നിരവധിയാളുകൾ ദിനംപ്രതി കുളിക്കാനെത്തുന്നയിടമാണ് ഇത്. വേനലിലും വറ്റാത്ത കുളമാണ്. വെള്ളത്തിന്‍റെ ഘടനയിൽ വരുന്ന മാറ്റമോ, മറ്റു വല്ല വിഷപദാർഥങ്ങളോ ആകാം മീനുകൾ കൂട്ടത്തോടെ ചാകാൻ കാരണമെന്ന് ഫിഷറീസ് വകുപ്പ് അറിയച്ചതായി പഞ്ചായത്തംഗം യു. പ്രസീത പറഞ്ഞു.

പുളിയമ്പുള്ളിയിൽ കാട്ടാനശല്യം രൂക്ഷം; പ്രദേശവാസികൾ ദുരിതത്തിൽ

കല്ലടിക്കോട്‌: മലയോര മേഖലയായപുളിയമ്പുള്ളിയിൽ ഇടവേളയ്ക്കുശേഷം കാട്ടാനക്കൂട്ടമിറങ്ങി വിളകൾ നശിപ്പിക്കുന്നതായി പരാതി. കഴിഞ്ഞദിവസം പുളിയമ്പുള്ളിയിലെ കൊച്ചുപാലിയത്ത്‌ സജുവിന്‍റെ വീടിനോടുചേർന്ന് നിന്നിരുന്ന വാഴകളും തെങ്ങും കമുകുകളും കാട്ടാനക്കൂട്ടം നശിപ്പിച്ചിരുന്നു. ആനവാരി, ചേക്കര ഭഗങ്ങളിലെ വൈദ്യുത തൂക്കുവേലികൾ പ്രവർത്തനക്ഷമല്ലാതായതോടെയാണ് കാട്ടാനകൾ വീണ്ടും കൃഷിയിടത്തിലേയ്ക്കു എത്തിതുടങ്ങിയത്‌. ധോണി പയറ്റാംകുന്ന് മുതലരിമണി, കയ്യറ, ഞാറക്കോട്‌ പുളിയമ്പുള്ളി, വടക്കൻകാട്‌,മേപ്പാടം കോളനി, പരുത്തി മുട്ടിയംകാട്‌ തുടങ്ങിയ പ്രദേശങ്ങളിലാണ് കാട്ടാനശല്യം രൂക്ഷം. രണ്ടുമാസം മുമ്പ്‌ അമ്മയോടൊപ്പം വീട്ടിലേയ്ക്കു നടന്നുവന്ന യുവാവിനെ കാട്ടാന ചവിട്ടികൊന്നതും ഈ ഭാഗത്താണ്. പ്രദേശങ്ങളിലെ വീട്ടുകാർ രാത്രി വിളക്ക്ുകത്തിച്ച്‌ പാട്ടകൊട്ടി ശബ്ദമുണ്ടാക്കിയാണ് പലപ്പോഴും കാട്ടാനകളെ തുരത്തുന്നത്‌. വനംവകുപ്പിന്‍റെ ദ്രുകർമസേനയും, മുണ്ടൂർ സെക്്ഷൻ ഓഫീസിലെ ഉദ്യോഗസ്ഥരും പ്രദേശത്ത്‌ പട്രോളിംഗ്‌ നടത്തുന്നുണ്ടെങ്കിലും ഫലപ്രദമല്ല. കാട്ടാനകൾ വനത്തിനുള്ളിൽനിന്ന് കൃഷിയിടങ്ങളിലേയ്ക്കും വീടുകളിലേയ്ക്കും എത്തുമ്പോൾ വനം വകുപ്പ്‌ ഉദ്യോഗസ്ഥർ പഞ്ചായത്ത്‌ റോഡിലൂടെമാത്രമാണു പട്രോളിംഗ്‌ നടത്തുന്നതെന്നു നാട്ടുകാർ ആരോപിക്കുന്നു. പലപ്പോഴും കാട്ടാനകൾ കൃഷിയിടത്തിൽ എത്തിയാൽ വനംവകുപ്പിനെ അറിയിച്ചാലും അരമണിക്കൂറിലേറെ കഴിഞ്ഞാണ് കർമസേന എത്തുന്നതെന്നും നാട്ടുകാർ പറയുന്നു. കാട്ടാനകളെ പേടിച്ച്‌ ആരും വൈകുന്നേരം ആറുകഴിഞ്ഞാൽ പുറത്തിറങ്ങാറില്ല. രാവിലെ റബർ ടാപ്പ്‌ ചെയ്യാനോ, പത്രവിതരനം നടത്താനോ ആളുകൾ ഭയക്കുകയാണ്. മൂന്നുകാട്ടാനകളാണു പ്രദേശത്ത്‌ തമ്പടിച്ചിട്ടുള്ളത്‌. കേടുവന്ന വൈദ്യുത വേലികൾ അറ്റകുറ്റപ്പണികൾ നടത്തി പ്രവർത്തന ക്ഷമമാക്കണമെന്ന ആവശ്യം ശക്തമായിട്ടുണ്ട്‌.

വീണ്ടും കാട്ടാനകളുടെ വിളയാട്ടം ; കൽച്ചാടി മേഖലയിൽ റബർകൃഷി നശിപ്പിച്ചു

നെന്മാറ: കരിമ്പാറ കൽച്ചാടി മേഖലയിലെ തോട്ടങ്ങളിലെ റബർമരങ്ങളിൽ സ്ഥാപിച്ച മഴമറ കാട്ടാനകൾ നശിപ്പിച്ചു. കൽച്ചാടിയിലെ കർഷകനായ അബ്രഹാം പുതുശ്ശേരി (കുഞ്ഞുകുഞ്ഞ്), എം. അബ്ബാസ് കരിമ്പാറ, ഉണ്ണി കല്ലിങ്കൽപാടം, കബീർ പാഴഞ്ചേരി എന്നിവരുടെ കൃഷിയിടങ്ങളിൽ കഴിഞ്ഞ നാല് ദിവസമായി സ്ഥാപിച്ച മഴമറയും, റബർപാൽ എടുക്കാനുള്ള കമ്പി, ചിരട്ട, ചില്ല് എന്നിവയും കാട്ടാനകൾ നശിപ്പിച്ചു. നാലുപേരുടെ കൃഷിയിടത്തിലായി 70 ലേറെ റബർമരങ്ങളിലെ മഴമറയാണ് കഴിഞ്ഞ ദിവസം രാത്രിയിൽ എത്തിയ കാട്ടാനകൾ നശിപ്പിച്ചത്. പ്ലാസ്റ്റിക് ചിരട്ടകൾ ചവിട്ടി നശിപ്പിക്കുകയും കമ്പികൾ പറിച്ചു കളയുകയും ചെയ്തിട്ടുണ്ട്. ഭാഗികമായി വലിച്ചു കീറിയ നിലയിലും, ചിലത് മധ്യഭാഗം പറിച്ചു വലിച്ചു ഉയർത്തിയ നിലയിലും നാശം വരുത്തിയിട്ടുണ്ട്. കാട്ടാനകൾ നശിപ്പിച്ച മഴ മറകൾ വീണ്ടും സ്ഥാപിക്കാനുള്ള ശ്രമത്തിലാണ് കർഷകർ. നെന്മാറ വനം ഡിവിഷനിലെ തിരുവഴിയാട് സെക്്ഷനു കീഴിലുള്ള കൽച്ചാടി വനമേഖലയിൽ നിന്നാണ് കാട്ടാനകൾ കൃഷിയിടങ്ങളിൽ എത്തിയിരിക്കുന്നത്. പ്രദേശത്തെ സൗരോർജവേലി പ്രവർത്തിക്കാത്തതും കൽച്ചാടി പുഴയോരത്ത് സൗരോർജവേലി വളരെ ഉയരത്തിൽ നിൽക്കുന്നതിനാലും പുഴയിറങ്ങിയാണ് കാട്ടാനകൾ പ്രദേശത്തെ കൃഷിയിടങ്ങളിൽ എത്തുന്നത്.

സ്‌കൂളിൽ ജീവനക്കാരനെ മരിച്ചനിലയിൽ കണ്ടെത്തി

മണ്ണാർക്കാട്: പള്ളിക്കുറുപ്പ് ശബരി ഹയർ സെക്കൻഡറി സ്കൂൾ കെട്ടിടത്തിലെ മുറിയിൽ ജീവനക്കാരനെ തൂങ്ങി മരിച്ചനിലയിൽ കണ്ടെത്തി. മലപ്പുറം തൂവൂർ സ്വദേശിയായ അനൂപിനെ(37)യാണ് മരിച്ചനിലയിൽ കണ്ടെത്തിയത്. ശബരി ട്രസ്റ്റിനു കീഴിലെ സ്കൂളിലെ ഓഫിസ് അറ്റൻഡറായിരുന്നു. ശനിയാഴ്ച വൈകിട്ട് 7.30നാണ് മൃതദേഹം കണ്ടെത്തിയത്. സ്‌കൂളിൽ രാത്രി ഡ്യൂട്ടിക്കെത്തിയ വാച്ച്‌മാനാണ് സംഭവം ആദ്യം കണ്ടത്. പിന്നാലെ പോലീസിനെയും സ്‌കൂൾ അധികൃതരെയും വിവരമറിയിച്ചു. പോലീസ് സ്ഥലത്തെത്തി മൃതദേഹം താലൂക്ക് ആശുപത്രിയിലേക്ക് മാറ്റി. പള്ളിക്കുറുപ്പ് സ്കൂളിലായിരുന്നു ജോലി. ഈ അധ്യയന വർഷം ശബരി ട്രസ്റ്റിന്‍റെ തന്നെ അടക്കാപുത്തൂർ സ്‌കൂളിലേക്ക് സ്ഥലം മാറ്റിയിരുന്നു. അവിടെ ജോലിയിൽ പ്രവേശിച്ചു രണ്ടു ദിവസം ജോലി ചെയ്തിരുന്നു. ജനാർദ്ദനൻ-ഇന്ദിര ദമ്പതികളുടെ മകനാണ്. സഹോദരി: അരുണിമ.

പ്രകൃതിക്കു തണലൊരുക്കി പരിസ്ഥിതിദിനാഘോഷം

വടക്കഞ്ചേരി ചെറുപുഷ്പം സ്കൂൾ വടക്കഞ്ചേരി: ലോകപരിസ്ഥിതിദിനത്തോടനുബന്ധിച്ച് വടക്കഞ്ചേരി ചെറുപുഷ്പം ഗേൾസ് ഹയർ സെക്കൻഡറി സ്കൂളിൽ നടന്ന വൃക്ഷതൈ വിതരണോദ്ഘാടനം പ്രിൻസിപ്പൽ സിസ്റ്റർ ഡോ.ആഗ്നൽ ഡേവിഡ് വിദ്യാർഥിനികൾക്ക് തൈ നൽകി നിർവഹിച്ചു. പരിസ്ഥിതി ദിനത്തിന്‍റെ പ്രാധാന്യത്തെക്കുറിച്ചുള്ള ബോധവത്കരണ സ്കിറ്റുകളും ഡാൻസുകളും ഹൈസ്കൂൾ, ഹയർസെക്കൻഡറി വിദ്യാർഥിനികൾ അവതരിപ്പിച്ചു. സ്കൂളിലെ ബയോഡൈവേഴ്സിറ്റി, ഇക്കോ ക്ലബ് എന്നിവയുടെ നേതൃത്വത്തിൽ തോട്ടം വൃത്തിയാക്കലും പുതിയ ചെടികളുടെ നടീൽ പ്രവർത്തനങ്ങളും നടന്നു. ഗൂളിക്കടവ് മലവാരത്ത് പ്ലാസ്റ്റിക് നിർമാർജനം അഗളി: ലോക പരിസ്ഥിതിദിനത്തോടനുബന്ധിച്ച് അഗളി ഫോറസ്റ്റ് റേഞ്ചിന്‍റെ കീഴിൽ ഒമ്മല സ്റ്റേഷൻ പരിധിയിലുള്ള ഗൂളിക്കടവ് കാരറ വനഭാഗങ്ങളിൽ വനം വകുപ്പിന്‍റെ നേതൃത്വത്തിൽ പ്ലാസ്റ്റിക് നിർമാർജനവും ബോധവത്കരണവും നടത്തി. അഗളി ഗ്രാമപഞ്ചായത്ത് അംഗം പ്രീത ഉദ്ഘാടനം ചെയ്തു. അഗളി ഫോറസ്റ്റ് റേഞ്ച് ഓഫീസർ സി. സുമേഷ് മുഖ്യാതിഥിയായി. ഡെപ്യൂട്ടി റേഞ്ച് ഓഫീസർ വി.എ. സതീഷ്, ദുരൈ രാജ്, സെക്ഷൻ ഫോറസ്റ്റ് ഓഫീസർ വള്ളിയമ്മ പ്രസംഗിച്ചു. ഒമ്മല സ്റ്റേഷൻ പരിധിയിലെ മുഴുവൻ ജീവനക്കാരും പരിസ്ഥിതി ശുചീകരണ-പ്ലാസ്റ്റിക് നിർമാർജന പരിപാടിയിൽ പങ്കെടുത്തു. പല്ലാവൂർ ഗവ. എൽപി സ്കൂളിൽ നെന്മാറ: പല്ലാവൂർ ഗവ: എൽപി സ്കൂളിൽ ചങ്ങാതിക്കൊരു തൈ പദ്ധതിക്ക് തുടക്കമായി. കൂട്ടുകാർക്ക് 5 തൈകൾ കൈമാറിക്കൊണ്ടാണ് സെപ്തംബർ 30 വരെ പദ്ധതി നടപ്പിലാക്കുക പല്ലശന ഗ്രാമപഞ്ചായത്ത് പ്രസിഡന്‍റ് എൽ. സായ്രാധ ഉദ്ഘാടനം ചെയ്തു. വൈസ് പ്രസിഡന്‍റ് സി. അശോകൻ അധ്യക്ഷത വഹിച്ചു. ശുചിത്വമിഷൻ നെന്മാറ ബ്ലോക്ക് റിസോഴ്സ്പേഴ്സൺ എ. ഹാറൂൺ പ്രതിജ്ഞ ചൊല്ലിക്കൊടുത്തു. ഹെഡ്മിസ്ട്രസ് ടി.ഇ. ഷൈമ, തമിഴ്നാട് സയൻസ് ഫോറം തന്നാച്ചി പ്രവർത്തക നന്ദിനി, കെ. ശ്രീജാമോൾ, എം. പ്രവീണ, കെ.ഗിരിജ എന്നിവർ പ്രസംഗിച്ചു. കരിമ്പാറ എംഇഎസ് ട്രസ്റ്റ്‌ പബ്ലിക് സ്കൂളിൽ നെന്മാറ: കരിമ്പാറ എംഇഎസ് ട്രസ്റ്റ്‌ പബ്ലിക് സ്കൂളിൽ വൃക്ഷതൈ നടൽ സെക്ഷൻ ഫോറസ്റ്റ് ഓഫീസർ ജയിലാവുദ്ദീൻ നിർവഹിച്ചു. വൃക്ഷങ്ങൾ നട്ടുപിടിപ്പിക്കേണ്ടതിന്‍റെ പ്രാധാന്യത്തെക്കുറിച്ച് വിദ്യാർഥികൾക്ക് വിശദീകരിച്ചു. പിടിഎ പ്രസിഡന്‍റ് വിശ്വനാഥൻ, മാനേജർ ജമീർ, പ്രധാന അധ്യാപിക ബിന്ദു മാത്യു, ബീറ്റ് ഫോറസ്റ്റ് ഓഫീസർ തുടങ്ങിയവർ പ്രസംഗിച്ചു. അധ്യാപകരും വിദ്യാർഥികളും തൈകൾ നട്ടു. നെല്ലിപ്പതി മല്ലീശ്വര വിദ്യാനികേതനിൽ അഗളി: ഭൂമിയെ സംരക്ഷിക്കാം ജീവൻ രക്ഷിക്കാം എന്ന സന്ദേശമുയർത്തി നെല്ലിപ്പതി മല്ലീശ്വര വിദ്യാനികേതൻ ലോക പരിസ്ഥിതി ദിനം ആചരിച്ചു. റാലിയും മുദ്രാവാക്യങ്ങളും പോസ്റ്ററുകളുമായി കുട്ടികൾ അണിനിരന്നു. കാനഡയിൽ നിന്നും എത്തിയ അഭയ്, കൃഷ്ണപണിക്കർ എന്നിവർ സംയുക്തമായി ഉദ്ഘാടനം ചെയ്തു. വിദ്യാർഥിനി അനഘ പരിസ്ഥിതി പ്രതിജ്ഞ ചൊല്ലിക്കൊടുത്തു. പ്രിൻസിപ്പൽ ഷാജി സന്ദേശം നൽകി. മെഡിസിനൽ മാഗസിൻ ഉദ്ഘാടനവും നടത്തി. അധ്യാപകരായ കവിത സ്വാഗതവും അപർണ നന്ദിയും പറഞ്ഞു. തൊടുകാപ്പ്കുന്ന് ഇക്കോ ടൂറിസം സെന്‍ററിൽ മണ്ണാർക്കാട്: പരിസ്ഥിതി ദിനാചരണത്തിന്‍റെ ഭാഗമായി തിരുവിഴാംകുന്ന് ഫോറസ്റ്റ് സ്റ്റേഷൻ, മണ്ണാർക്കാട് എംഇഎസ് കല്ലടി കോളജ് ബോട്ടണി- കെമിസ്ട്രി ഡിപ്പാർട്ട്മെന്‍റ്, നാഷണൽ സർവീസ് സ്കീം എന്നിവ ചേർന്ന് തൊടുകാപ്പ്കുന്ന് ഇക്കോ ടൂറിസം സെന്‍ററിൽ പരിസ്ഥിതി പ്രവർത്തകസംഗമം സംഘടിപ്പിച്ചു. കെപിഎസ് പയ്യനെടം ഉദ്ഘാടനം ചെയ്തു. നക്ഷത്രവന പരിചരണം, പ്ലാസ്റ്റിക്മാലിന്യ നിർമാർജനം, ട്രക്കിംഗ് എന്നിവയും നടന്നു. കോളേജ് ബോട്ടണി-കെമിസ്ട്രി ഡിപ്പാർട്ട്മെന്‍റുകൾ തയ്യാറാക്കിയ വിത്തുണ്ടകൾ വനംവകുപ്പിന് കൈമാറി. മണ്ണാർക്കാട് റേഞ്ച് ഫോറസ്റ്റ് ഓഫീസർ എൻ. സുബൈർ അധ്യക്ഷത വഹിച്ചു. ഡെപ്യൂട്ടി റേഞ്ച് ഫോറസ്റ്റ് ഓഫീസർ സുനിൽകുമാർ, തൊടുകാപ്പ്കുന്ന് ഇക്കോ ടൂറിസം സെക്രട്ടറി കെ.കെ. സുബ്രമണ്യൻ, കച്ചേരിപ്പറമ്പ് വനസംരക്ഷണസമിതി കൺവീനർ കെ. ബിന്ദു, കാട്ടുതീ സംരക്ഷണസമിതി കൺവീനർ ഉണ്ണി വരദൻ, അസിസ്റ്റന്‍റ് പ്രൊഫസർമാരായ ഡോ. നസീമ, ഡോ. ജൂലിയ, ഡോ. ടി.എൻ. മുഹമ്മദ് മുസ്തഫ, ഡോ. ടി. സൈനുൽ ആബിദ് പ്രസംഗിച്ചു. സീഡ് ബൗൾ നിർമാണവും ഫലവൃക്ഷ വിത്തെറിയലും നെന്മാറ: സോഷ്യൽ വർക്കേഴ്സ് ഇന്ത്യ സർവീസ് സൊസൈറ്റി (സ്വിസ്), വനംവകുപ്പ് നെന്മാറ ഡിവിഷൻ എന്നിവയുടെ നേതൃത്വത്തിൽ നേതാജി മെമ്മോറിയൽ ആർട്സ് ആൻഡ് സയൻസ് കോളജ്, ഗംഗോത്രി ഇംഗ്ലീഷ് മീഡിയം സ്കൂൾ എന്നിവയുടെ സഹകരണത്തോടെ സീഡ് ബൗൾ നിർമാണവും ഫലവൃക്ഷ വിത്തെറിയലും സംഘടിപ്പിച്ചു. പോത്തുണ്ടി വനമേഖലയിലാണ് ഫലവൃക്ഷ വിത്തെറിയൽ നടത്തിയത്. പോത്തുണ്ടി സെക്ഷൻ ഫോറസ്റ്റ് ഓഫീസർ കെ. സുധീഷ്കുമാർ ഉദ്ഘാടനം നിർവഹിച്ച ചടങ്ങിൽ സോഷ്യൽ വർക്കേഴ്സ് ഇന്ത്യ സർവീസ് സൊസൈറ്റി എക്സിക്യൂട്ടീവ് ഡയറക്ടർ കെ. സതീഷ് അധ്യക്ഷത വഹിച്ചു. ബീറ്റ് ഫോറസ്റ്റ് ഓഫീസർ വി. ശിവശങ്കരൻ ക്ലാസ് നയിച്ചു. വനംവകുപ്പ് ഉദ്യോഗസ്ഥരായ ആർ.റിതു, എസ്. വിനോദ്, എം. മണിദാസ് അധ്യാപകരായ ബീന വിനോദ്, എസ്. സ്നേഹ, യു. രൂപിക വിദ്യാർഥികളായ ആർദ്ര, മനീഷ്, അലൻ സ്വിസ് കോ-ഓർഡിനേറ്റർ സി. പ്രശാന്ത് തുടങ്ങിയവർ നേതൃത്വം നൽകി. അട്ടപ്പാടി ബ്ലോക്ക് പഞ്ചായത്തിൽ അഗളി: ലോക പരിസ്ഥിതി ദിനാചരണത്തിന്‍റെ ഭാഗമായി അട്ടപ്പാടി ബ്ലോക്ക് പഞ്ചായത്ത്തല ദിനാചരണം മട്ടത്തുകാട് ജിടിഎച്ച്എസിൽ നടത്തി. സ്കൂൾ പരിസരത്ത് വിവിധ ഇനം വൃക്ഷതൈകൾ നട്ടു. ഷോളയൂർ ഗ്രാമപഞ്ചായത്ത് പ്രസിഡന്‍റ് പി. രാമമൂർത്തി അധ്യക്ഷത വഹിച്ച യോഗം ബ്ലോക്ക് പഞ്ചായത്ത് വൈസ് പ്രസിഡന്‍റ് കെ.കെ. മാത്യു ഉദ്ഘാടനം ചെയ്തു, വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺകാളിയമ്മ, കൃഷി അസിസ്റ്റന്‍റ് ഡയറക്ടർ രേഖ, നവകേരള മിഷൻ കോ-ഓർഡിനേറ്റർ എം. അരുൺ, അധ്യാപകർ, വിദ്യാർഥികൾ പങ്കെടുത്തു. നന്മ അകത്തേത്തറ ഒലവക്കോട്: നന്മ അകത്തേത്തറയുടെ നേതൃത്വത്തിൽ താണാവിൽ നിന്നും ആരംഭിച്ച പരിസ്ഥിതിദിന സന്ദേശ ഘോഷയാത്ര റെയിൽവേ കോളനി അക്ഷയ സെന്‍ററിന്‍റെ മുൻവശത്ത് സമാപിച്ചു. തുടർന്ന് നടന്ന പൊതുസമ്മേളനത്തിൽ വിക്ടോറിയ കോളജ് ജന്തുശാസ്ത്ര വിഭാഗം മേധാവി ഡോ.കെ.എ. റഷീദ് മുഖ്യപ്രഭാഷണം നടത്തി. നന്മ പ്രസിഡന്‍റ് മനോജ് കെ. മൂർത്തി അധ്യക്ഷത വഹിച്ചു ധോണി ലീഡ് കോളജ് ചെയർമാൻ ഡോ.തോമസ് ജോർജ,് നന്മ സെക്രട്ടറി സിബിച്ചൻ തോമസ,് വൈസ് പ്രസിഡന്‍റ്് അരവിന്ദാക്ഷൻ തുടങ്ങിയവർ പ്രസംഗിച്ചു. ഗ്രോബാഗ് നിറയ്ക്കുന്നതിന്‍റെ സാങ്കേതിക കാര്യങ്ങൾ ഗോപിനാഥൻ വിശദീകരിച്ചു. പച്ചക്കറി തൈകളും ഗ്രോബാഗും സൗജന്യവിതരണം നടത്തി. അയിലമുടി വനസംരക്ഷണസമിതി നെന്മാറ: അയിലമുടി വനസംരക്ഷണസമിതിയുടെ നേതൃത്വത്തിൽ തിരുവഴിയാട് സെക്ഷന് കീഴിൽ ഫലവൃക്ഷതൈകൾ നട്ടു. കണിമംഗലം ബോയ്സ് ഓഫ് കേരള ആർട്സ് ആൻഡ് സ്പോർട്സ് ക്ലബ്ബുമായി സഹകരിച്ച് ചെട്ടികുളമ്പ് വില്ലേജ് ഫോറസ്റ്റ് കമ്മിറ്റിയിൽ പഴവൃക്ഷതൈകൾ നട്ടുപിടിപ്പിച്ചു. അയിലമുടി വിഎസ്എസ് സെക്രട്ടറി പി.ബി. രതീഷ്, പ്രസിഡന്‍റ് കുട്ടൻ മണലാടി, ഷാജു, ബിഎഫ്ഒ സെന്തിൽ, ക്ലബ് സെക്രട്ടറി സുജിത്ത്, പ്രസിഡന്‍റ് ആർ. മനു, മുരളി രവി, ക്ലബ് അംഗങ്ങൾ എന്നിവർ നേതൃത്വം നൽകി. തുടർന്ന് മുൻകാലങ്ങളിൽ നട്ടുപിടിപ്പിച്ച വൃക്ഷതൈകൾ സംരക്ഷിക്കുന്നതിനുള്ള നടപടികളും കൈക്കൊണ്ടു. പരിസ്ഥിതിദിന പ്രതിജ്ഞയും എടുത്തു. പെരുമാട്ടി ഗ്രാമീണവായനശാല വണ്ടിത്താവളം: പെരുമാട്ടി ഗ്രാമീണ വായനശാലയും ,കെഎസ്എസ്പിയു പെരുമാട്ടി യൂണിറ്റും സംയുക്തമായി നടത്തിയ പരിസ്ഥിതി ദിനാചരണം നെന്മാറ ഡിഎഫ്ഒ പ്രവീൺ ഉദ്ഘാടനം ചെയ്തു.വിളയോടി വേണുഗോപാൽ അധ്യക്ഷനായി. എം. ബാലസുബ്രഹ്മണ്യൻ,പി. രതീഷ്, എം. മോഹനൻ, രഞ്ജിത്ത്, ഹരിശങ്കർ, രശ്മി, പീതാംബരൻ, ഹരിശങ്കർ പ്രസംഗിച്ചു. കൊല്ലങ്കോട് നെന്മേനി എഎൽപി സ്കൂളിൽ കൊല്ലങ്കോട്: നെന്മേനി എഎൽപി സ്കൂളിൽ പരിസ്ഥിതി ദിനാചരണത്തിന്‍റെ ഭാഗമായി വൃക്ഷതൈ നട്ടു. കൊല്ലങ്കോട് ഗ്രാമപഞ്ചായത്തും, കാർഷിക ക്ഷേമ, കാർഷിക വികസന വകുപ്പിന്‍റെയും സംയുക്താഭിമുഖ്യത്തിലാണ് പരിസ്ഥിതി ദിനം ആചരിച്ചത്. കൊല്ലങ്കോട് ഗ്രാമ പഞ്ചായത്ത് പ്രസിസന്‍റ് കെ.സത്യപാൽ തൈനട്ടു ഉദ്ഘാടനം ചെയ്തു. ഗ്രാമപഞ്ചായത്ത് അംഗം ജി. സുനിത, കൃഷി ഓഫീസർ ജ്യോതി, കൃഷിവകുപ്പ് ഉദ്യോഗസ്ഥരായ ശ്രീജിത്ത് പ്രസംഗിച്ചു. ആലത്തൂർ എഎസ്എംഎം ഹയർ സെക്കഡറി സ്കൂളിൽ ആലത്തൂർ: എഎസ്എംഎം ഹയർ സെക്കഡറി സ്കൂളിലെ എൻസിസി, സയൻസ്, ഇക്കോ ക്ലബ്ബുകളും ആലത്തൂർ ഫെഡറൽ ബാങ്കും സംയുക്തമായി പരിസ്ഥിതിദിനാഘോഷം സംഘടിപ്പിച്ചു. കുട്ടികൾക്ക് തണൽ വൃക്ഷതൈയും പോസ്റ്ററുകളും മധുരവും വിതരണം ചെയ്തായിരുന്നു ആഘോഷം. ഫെഡറൽബാങ്ക് സീനിയർ മാനേജർ അപർണ അരവിന്ദ് ഉദ്ഘാടനം ചെയ്തു. ഡപ്യൂട്ടി ഹെഡ്മിസ്ട്രസ് പി. സജിനി അധ്യക്ഷത വഹിച്ചു.

ബ്ലോക്ക് പഞ്ചായത്ത് അംഗത്തിന്‍റെ ഒറ്റയാൾപോരാട്ടം; ഉടൻ നടപടി

അഗളി: അട്ടപ്പാടി ബ്ലോക്ക് പഞ്ചായത്ത് അംഗം ജി. ഷാജു നടത്തിയ ഒറ്റയാൾപോരാട്ടത്തിൽ ഞൊടിയിടയിൽ നടപടി. റോഡുവക്കിൽ നിൽക്കുന്ന മരങ്ങളും ഉണക്കമുളക്കൂട്ടങ്ങളും മുറിച്ചുമാറ്റി ഗതാഗതവും വൈദ്യുതിതടസവും സുതാര്യമാക്കണമെന്ന് ആവശ്യപ്പെട്ട് ജി. ഷാജു ഉന്നതങ്ങളിൽ നിവേദനങ്ങൾ നൽകിയിട്ടും നടപടികൾ ഉണ്ടാകാത്ത പശ്ചാത്തലത്തിലാണ് അഗളി ഇറിഗേഷൻ വകുപ്പ് ഓഫീസിൽ കുത്തിയിരിപ്പ് സമരം നടത്തിയത്. വ്യാഴാഴ്ച രാവിലെ 10 മണിയോടെയാണ് ഷാജു ഇറിഗേഷൻ ഓഫീസിൽ കുത്തിയിരിപ്പ് സമരം നടത്തിയത്. സംഭവം അറിഞ്ഞതോടെ അഗളി പോലീസും റവന്യൂ സംഘവും ഇറിഗേഷൻ വകുപ്പ് ഉദ്യോഗസ്ഥരും സ്ഥലത്തെത്തി ഷാജുവുമായി ചർച്ച നടത്തി. അഗളി, ഷോളയൂർ പഞ്ചായത്തുകളിലെ ഒമ്പതോളം വാർഡുകളിലെ ജനങ്ങളെ ദുരിതത്തിൽ ആക്കുന്നവിധം നിൽക്കുന്ന മരങ്ങളും കൂട്ടങ്ങളും തടസങ്ങളും മുറിച്ചുനീക്കി വൈദ്യുതിവിതരണവും ഗതാഗതവും സുതാര്യമാക്കാതെ സമരത്തിൽനിന്ന് പിന്നോട്ടില്ലെന്ന് ഷാജു ഉദ്യോഗസ്ഥരോട് പറഞ്ഞു. വേണ്ട നടപടി ഉണ്ടായില്ലെങ്കിൽ മണ്ണാർക്കാട് പ്രധാന റോഡിൽ കുത്തിയിരുന്ന് സമരംനടത്തുമെന്നും ഷാജു പറഞ്ഞു. ഉദ്യോഗസ്ഥർ അനുകൂല നടപടികൾ സ്വീകരിച്ചതോടെ ബ്ലോക്ക് പഞ്ചായത്തംഗം സമരത്തിൽ നിന്ന് പിന്മാറി. തുടർന്ന് ഇറിഗേഷൻ വകുപ്പ് ഉദ്യോഗസ്ഥരും പോലീസും റവന്യൂ അധികൃതരും പ്രദേശങ്ങളിൽ പരിശോധന നടത്തി. മുളകൾ നീക്കുന്നതിനുള്ള നടപടി ഉടൻതന്നെ ആരംഭിച്ചു. പ്രദേശത്ത് നിൽക്കുന്ന മുളംകൂട്ടങ്ങൾക്കു പുറമേ 75 മരങ്ങളും മുറിച്ചുനീക്കണമെന്ന് ഷാജു ആവശ്യപ്പെട്ടു. അഗളി,ഷോളയൂർ പഞ്ചായത്തുകളിലെ ഒമ്പതോളം വാർഡുകളെ ബാധിക്കുന്ന പ്രശ്നങ്ങളാണിത്. കെഎസ്ആർടിസി അടക്കം സ്വകാര്യബസുകളും ടാക്സി ജീപ്പുകളും മറ്റ് നിരവധി വാഹനങ്ങളും ഓടുന്ന റോഡ് പലദിവസങ്ങളിലും മരംവീണു ഗതാഗതവും വൈദ്യുതിയും മുടങ്ങുക പതിവാണ്. ഇതിന് ഒരു ശാശ്വതപരിഹാരം തേടിയുള്ള ബ്ലോക്ക് പഞ്ചായത്ത് അംഗത്തിന്‍റെ ഒറ്റയാൾപോരാട്ടമാണ് ഫലപ്രാപ്തിയിലെത്തിയത്.

വിമാനത്താവള വികസനം: 12 ഏക്കർ അനുവദിക്കണമെന്ന് അഥോറിറ്റി

കോയമ്പത്തൂർ: വിമാനത്താവള വികസനത്തിന് 12 ഏക്കർ കൂടി അനുവദിക്കണമെന്ന് വിമാനത്താവള അഥോറിറ്റി ആവശ്യപ്പെട്ടു. വിമാനത്താവളം 632.95 ഏക്കർ ഭൂമിയിൽ വികസിപ്പിക്കാൻ പദ്ധതിയിട്ടിട്ടുണ്ട്. കഴിഞ്ഞവർഷം ഓഗസ്റ്റിൽ തമിഴ്നാട് സർക്കാർ എയർപോർട്ട് അഥോറിറ്റി ഓഫ് ഇന്ത്യയ്ക്ക് ആവശ്യമായ ഭൂമി യാതൊരു നിബന്ധനകളും കൂടാതെ നൽകിയിട്ടുണ്ട്. ഈ സാഹചര്യത്തിൽ ഏറ്റെടുത്ത സ്ഥലങ്ങൾക്ക് സമീപം 12 ഏക്കർ ഭൂമി വിപുലീകരണ പ്രവർത്തനങ്ങൾക്കായി നൽകണമെന്ന് എയർപോർട്ട് അഥോറിറ്റി ഓഫ് ഇന്ത്യ തമിഴ്‌നാട് സർക്കാരിനോട് അഭ്യർത്ഥിച്ചതായി റിപ്പോർട്ടുണ്ട്. സർക്കാർ ഇതുവരെ ഈ അഭ്യർഥന അംഗീകരിച്ചിട്ടില്ല. വിമാനത്താവള വികസന പ്രവർത്തനങ്ങൾക്കായി തമിഴ്‌നാട് സർക്കാർ ഏറ്റെടുത്ത് അഥോറിറ്റിക്ക് നൽകിയ ഭൂമിയിൽ 451.74 ഏക്കർ പാട്ടക്കാലാവധി ഭൂമിയിലും 20.58 ഏക്കർ പുറംഭൂമിയിലും പ്രവൃത്തി നടത്താൻ ഇതിനകം അനുമതി നൽകിയിട്ടുണ്ട്. അടുത്ത രണ്ടാഴ്ചയ്ക്കുള്ളിൽ ഈ പ്രവൃത്തിക്കായി 15 ഏക്കർ ഭൂമി അഥോറിറ്റിക്ക് നൽകാൻ റവന്യൂ വകുപ്പ് നടപടികൾ സ്വീകരിച്ചുവരികയാണ്. 134.32 ഏക്കർ സംരക്ഷണഭൂമി അഥോറിറ്റിക്ക് നൽകിയിട്ടുണ്ട്. നിയമപരമായ പ്രശ്നങ്ങൾ കാരണം 8 ഏക്കർ പാട്ടഭൂമി ഇപ്പോഴും കോടതിയുടെ പരിഗണനയിലാണ്. കേസ് അവസാനിച്ചതിനുശേഷം മാത്രമേ 8 ഏക്കർ ഭൂമി കൈമാറുകയുള്ളൂ. വിമാനത്താവള വികസനവുമായി ബന്ധപ്പെട്ട് പ്രാരംഭ ഘട്ട ജോലികൾക്കായി അഥോറിറ്റി ടെൻഡറുകൾ ക്ഷണിച്ചിട്ടുണ്ട്. വികസനവുമായി ബന്ധപ്പെട്ട എല്ലാ പ്രധാന ജോലികളും വരും ദിവസങ്ങളിൽ പൂർത്തിയാകുമെന്നാണ് പ്രതീക്ഷ.

നെല്ലിനു പ്രതിഫലം നൽകാൻ ഗാരന്‍റി ചോദിക്കുന്നതു ശരിയല്ല: മനുഷ്യാവകാശ കമ്മീഷൻ

പാലക്കാട്: കർഷകൻ ഉത്പാദിപ്പിക്കുന്ന നെല്ല് സർക്കാർ ഏജൻസിയായ സപ്ലൈകോയ്ക്ക് നൽകിയശേഷം പ്രതിഫലതുകയ്ക്ക് ഗാരന്‍റി ചോദിക്കുന്നത് ശരിയായ നടപടിയല്ലെന്ന് മനുഷ്യാവകാശ കമ്മീഷൻ ചെയർപേഴ്സണ്‍ ജസ്റ്റിസ് അലക്സാണ്ടർ തോമസ്. നെല്ല് കൈപ്പറ്റിയശേഷം തുക യഥാസമയം കൈമാറാനുള്ള ബാധ്യത സർക്കാരിനുണ്ടെന്നും കമ്മീഷൻ ഉത്തരവിൽ പറഞ്ഞു. കർഷകരെ കരാറിന്‍റെ പേരിൽ ബുദ്ധിമുട്ടിക്കുന്നതു ശരിയല്ലെന്നും ഉത്തരവിൽ പറഞ്ഞു. ഭക്ഷ്യപൊതുവിതരണ വകുപ്പ് സെക്രട്ടറിക്കാണ് ജസ്റ്റിസ് അലക്സാണ്ടർ തോമസ് നിർദേശം നൽകിയത്. 2022 നവംബർ 29 ന് 5550 കിലോ നെല്ല് സപ്ലൈകോയ്ക്ക് നൽകിയ കർഷകനായ മലന്പുഴ സ്വദേശി കെ. കൃഷ്ണൻ സമർപ്പിച്ച പരാതിയിലാണ് നടപടി. നെല്ലിന്‍റെ തുക നൽകാൻ കേരള ബാങ്കിനെയാണ് ചുമതലപ്പെടുത്തിയതെന്നും തുക കൈപ്പറ്റാൻ ബാങ്കിന്‍റെ കല്ലേപ്പുള്ളി ശാഖയിലെത്തിയപ്പോൾ കരാർ ഒപ്പിടണമെന്ന് നിർബന്ധംപിടിച്ചതായും പരാതിക്കാരൻ പറഞ്ഞു. സപ്ലൈകോ ബാങ്കിന് തുക നൽകിയില്ലെങ്കിൽ കർഷകൻ വായ്പയും പലിശയും തിരിച്ചടക്കണമെന്നാണ് കരാറിലെ വ്യവസ്ഥയെന്നും കർഷകരെ ചൂഷണം ചെയ്യുന്ന നടപടി അവസാനിപ്പിക്കണമെന്നും കർഷകൻ ആവശ്യപ്പെട്ടു. ഭക്ഷ്യപൊതുവിതരണ സെക്രട്ടറി റിപ്പോർട്ട് സമർപ്പിച്ചു. പരാതിക്കാരൻ നൽകിയ നെല്ലിന്‍റെ വിലയായ 1,57,176 രൂപ പിആർഎസ് വായ്പയായി കേരളബാങ്ക് മുഖേന നൽകിയിരുന്നെങ്കിലും തുക കൈപ്പറ്റാൻ പരാതിക്കാരൻ വിസമ്മതിച്ചതായി റിപ്പോർട്ടിൽ പറഞ്ഞു. തുടർന്ന് കനറാ ബാങ്ക് സുൽത്താൻപേട്ട് ശാഖയിലുള്ള പരാതിക്കാരന്‍റെ അക്കൗണ്ടിലേക്ക് തുക നേരിട്ട് നൽകിയെന്നും റിപ്പോർട്ടിൽ പറഞ്ഞു. ബാങ്കിന് തുക കൈമാറുന്നതിന് സർക്കാരിൽ നിന്നും താമസം നേരിടുന്നതുകൊണ്ട് കർഷകരോട് ഗാരന്‍റി ചോദിക്കുന്നത് ശരിയല്ലെന്നാണ് പരാതിക്കാരന്‍റെ വാദം.

ഈസ്റ്റ് ഒറ്റപ്പാലത്തു പുതിയ പാലംനിർമാണം സ്തംഭനത്തിൽ

ഒറ്റപ്പാലം: ഈസ്റ്റ് ഒറ്റപ്പാലം പുതിയ പാലത്തിന്‍റെ നിർമാണം അനിശ്ചിതാവസ്ഥയിൽ. തോടിൽ ശക്തമായ ഒഴുക്ക് നിലനിൽക്കുന്നതാണ് പാലംനിർമാണം തടസപ്പെടാൻ കാരണമായത്. അതേസമയം തോടിൽ ഒഴുക്കിന് തടസമായി കിടന്നിരുന്ന മണ്ണ് നീക്കി. തോട്ടിൽ പാലത്തിന് കീഴിൽ വെള്ളത്തിന്‍റെ ഒഴുക്കിന് വലിയ തടസമായിരുന്നു ഈ മണ്ണ്. പുതിയപാലം നിർമിക്കുന്നതിന്‍റെ ഭാഗമായി തോട്ടിലുണ്ടായിരുന്ന മണ്ണാണ് നീക്കിയത്. ഒഴുക്ക് തടസപ്പെട്ടാൽ തോട്ടിൽനിന്ന് വെള്ളം കരയിലേക്ക് കയറുമെന്ന ആശങ്ക പരിഹരിക്കാനായാണ് മഴ കുറഞ്ഞതോടെ മണ്ണുനീക്കൽ നടപടികൾ തുടങ്ങിയത്. കോൺക്രീറ്റ് തൂണുകളുടെ നിർമാണത്തിന്‍റെ പ്രാരംഭ പ്രവർത്തനങ്ങളുടെ ഭാഗമായി വശങ്ങൾ ഇടിച്ചുനിരത്തിയതിന് ശേഷം കൂട്ടിയിട്ട മണ്ണായിരുന്നു ഒഴുക്കിനു തടസം. പുതിയ പാലത്തിന്‍റെ നിർമാണം നടക്കുന്നതിനാൽ വെള്ളം തോട്ടിൽനിന്ന് കയറിയാൽ കൂടുതൽ മണ്ണിടിച്ചിലിനുള്ള സാധ്യതയുമുണ്ട്. ഇതുംകൂടി മുന്നിൽക്കണ്ടാണ് മണ്ണുനീക്കൽ തുടങ്ങിയിട്ടുള്ളത്. കാലവർഷം കനക്കുംമുൻപ് തോട്ടിലെ തടസങ്ങൾ നീക്കണമെന്ന്‌ പ്രദേശവാസികളും ആവശ്യമുന്നയിച്ചിരുന്നു. ഇതുംകൂടി പരിഗണിച്ചാണ് നടപടി. യന്ത്രസഹായത്തോടെയാണ് മണ്ണുനീക്കുന്നത്. പാലം നിർമാണം നടക്കുന്ന ഭാഗത്തേക്കു വേനലിൽ വെള്ളമെത്താതിരിക്കാൻ ഒരുക്കിയ തടസങ്ങളും നീക്കും. 2018-ലും 19-ലും പ്രളയകാലങ്ങളിൽ വെള്ളം കയറിയ ഭാഗമാണിത്.

കടപ്പാറ മേമലയിൽ രണ്ടുകിലോമീറ്റർ ദൂരത്തിൽ സൗരോർജ തൂക്കുവേലി സ്ഥാപിച്ചു

മംഗലംഡാം: കടപ്പാറ മേമലയിലെ കർഷകർക്ക് ഇനി സ്വൈര്യമായി അന്തിയുറങ്ങാം. ഇവിടെ വനാതിർത്തിയിൽ രണ്ട് കിലോമീറ്റർ ദൂരത്തിൽ സൗരോർജ തൂക്കുവേലി സ്ഥാപിച്ചു. ഇനി പകലന്തിയോളം അധ്വാനിച്ചുണ്ടാക്കുന്ന കൃഷികൾ ആനകളെത്തി നശിപ്പിക്കില്ല. മേഖലയിൽ ആദ്യമായാണ് ഇത്തരം തൂക്കുവേലി സ്ഥാപിക്കുന്നത് എന്ന പ്രത്യേകതയുമുണ്ട്. കർഷകരുടെ നിരന്തരമായ ആവശ്യത്തെ തുടർന്നാണ് വനംവകുപ്പ് വേലി സ്ഥാപിച്ചിട്ടുള്ളത്. പത്തടിയിലേറെ ഉയരമുള്ള ഇരുമ്പ് പോസ്റ്റുകൾ കോൺക്രീറ്റിൽ ഉറപ്പിച്ച് കമ്പികൾ തൂക്കിയിട്ടാണ് വേലി സ്ഥാപിച്ചിട്ടുള്ളത്. ആനകൾ വേലിയിലേക്ക് തള്ളിയിട്ട് വേലി തകർക്കാൻ സാധ്യതയുള്ള സമീപത്തെ ചെറുമരങ്ങളും കൊമ്പുകളും വെട്ടി മാറ്റിയിട്ടുണ്ട്. അതിനാൽ വൈദ്യുത തൂക്കുവേലി നിലനിൽക്കും എന്ന പ്രതീക്ഷയാണ് വനം വകുപ്പും കർഷകരും പങ്കുവക്കുന്നത്. കർഷകർതന്നെ വേലിയുടെ സംരക്ഷണം നടത്തണം. യഥാസമയങ്ങളിൽ വള്ളിപടർപ്പുകൾ വെട്ടിമാറ്റി വൈദ്യുതി പ്രവാഹം ഉറപ്പാക്കണം. സ്ഥിരമായി ആനകളെത്തി വീടുകളിൽ അന്തിയുറങ്ങാൻ കഴിയാത്ത സ്ഥിതിയായിരുന്നു പ്രദേശത്ത് ഉണ്ടായിരുന്നതെന്ന് പഞ്ചായത്ത് മുൻ മെംബർ ബെന്നി ജോസഫ് പറഞ്ഞു. ഇതിന് പരിഹാരം കാണാനായതിന്‍റെ സന്തോഷത്തിലാണ് പ്രദേശത്തുകാർ. ആനക്കുപുറമെ കടുവയും കാട്ടുപോത്തും എത്തുന്ന ചെമ്പൻകുന്ന് ഭാഗത്തും മൂന്ന് കിലോമീറ്റർ കൂടി വൈദ്യുതവേലി സ്ഥാപിക്കണമെന്നും കർഷകർ ആവശ്യപ്പെട്ടു.

മരം മുറിക്കുന്നതിനിടെ കുരിശുപള്ളിയുടെ മേൽക്കൂര തകർന്നു

നെന്മാറ: റോഡരികിലെ ഉണങ്ങിയ മരം വെട്ടിമാറ്റുന്നതിനിടെ മരക്കൊമ്പ് വീണ് കുരിശുപള്ളിയുടെ മേൽക്കൂര തകർന്നു. അളുവശേരി സെന്‍റ് സെബാസ്റ്റ്യൻസ് പള്ളിയുടെ കുരിശുപള്ളിക്കു മുകളിലേക്കാണ് മരക്കൊമ്പ് വീണത്. മേൽക്കൂര, ചില്ലുകൂട്, പ്രധാന സ്ലാബ്, മെഴുകുതിരി സ്റ്റാൻഡ്, സൗരോർജ ലൈറ്റ് എന്നിവയാണ് തകർന്നത്. നെന്മാറ-പോത്തുണ്ടി റോഡിലെ ഉണങ്ങിയ മരങ്ങൾ പൊതുമരാമത്ത് നിരത്ത് വിഭാഗത്തിന്‍റെ നേതൃത്വത്തിൽ മുറിച്ചുമാറ്റുന്നതിനിടെയാണ് അപകടം ഉണ്ടായത്. കയർകെട്ടി മണ്ണുമാന്തിയന്ത്രം ഉപയോഗിച്ച് ഒരു വശത്തേക്ക് വലിച്ചു മുറിച്ചുമാറ്റാനുള്ള ശ്രമത്തിനിടയാണ് കൊമ്പ് കുരിശുപള്ളിക്ക് മുകളിൽ വീണ് നാശം ഉണ്ടാക്കിയത്. മുപ്പതിനായിരം രൂപയുടെ നഷ്ടം കണക്കാക്കുന്നതായി പള്ളി ഭാരവാഹികൾ പറഞ്ഞു. മേൽക്കൂര പുനർനിർമിച്ച് അറ്റകുറ്റപ്പണികൾ നടത്തിക്കൊടുക്കാമെന്ന് അധികൃതർ പറഞ്ഞതായി പള്ളി കമ്മിറ്റി പറഞ്ഞു.

വാണിയംകുളം ചന്തയിൽ പത്തുകോടിയിലേറെ രൂപയുടെ പെരുന്നാൾകച്ചവടം

ഒറ്റപ്പാലം: വാണിയംകുളം കന്നുകാലിചന്തയിൽ പെരുന്നാൾ കച്ചവടത്തിന് ഇതരസംസ്ഥാനങ്ങളിൽനിന്ന് കന്നുകാലികളുടെ വരവിൽ ഇത്തവണ ഇടിവ്. ചെറുതും വലുതുമായി 50 ലോഡ് കന്നുകാലികളെയാണ് വില്പനക്കായി എത്തിച്ചത്. കഴിഞ്ഞവർഷം 80 ലേറെ ലോഡ് കന്നുകാലികളെ എത്തിച്ച സ്ഥാനത്താണിത്. ഇത്തവണ കാലികളുടെ എണ്ണം കുറഞ്ഞതിനാൽ വിലയും വർധിപ്പിച്ചിരുന്നു. പത്തുകോടിയിലേറെ രൂപയുടെ പെരുന്നാൾ കച്ചവടമാണ് വാണിയംകുളം ചന്തയിൽ നടന്നതെന്നു ചന്തനടത്തിപ്പുകാർ പറഞ്ഞു. അതേസമയം, കഴിഞ്ഞദിവസം ചെറുതും വലുതുമായി 70 ലോഡ് കന്നുകാലികളെ എത്തിച്ചിരുന്നു. അന്ന് മഴ കാരണം കച്ചവടം കുറഞ്ഞു. തുടർന്ന് നടന്ന ചന്തയിലാകട്ടെ കാലികളുടെ എണ്ണത്തിൽ കുറവും വന്നു. സ്ഥിരം സ്ഥലത്തിനു പുറമേ സമീപത്തെ ഗ്രൗണ്ടിലും ഇപ്പോൾ കന്നുകാലികച്ചവടം നടക്കുന്നുണ്ട്. മഴയില്ലാതെ കാലാവസ്ഥ അനുകൂലമായതും കച്ചവടക്കാർക്ക് ഗുണകരമാണ്. കണ്ണൂർ, തിരുവനന്തപുരം, കാസർകോട്, എറണാകുളം എന്നിവിടങ്ങളിലേക്കും കന്നുകാലികളെ ഇവിടെ നിന്ന് വിറ്റുപോകുന്നുണ്ട്. തമിഴ്‌നാട്, കർണാടക, ഹരിയാന തുടങ്ങിയ സംസ്ഥാനങ്ങളിൽനിന്നാണ് കന്നുകാലികളെത്തുന്നത്. ഇതിനുപുറമേ നാടൻ കന്നുകളെയും പെരുന്നാൾച്ചന്തയിൽ എത്തിച്ചിരുന്നു. തമിഴ്നാട്ടിൽനിന്നുള്ള ജെല്ലിക്കെട്ട് കാളകളെയും വില്പനക്കായി എത്തിച്ചിരുന്നു. കൂടുതലും മലബാർ മേഖലയിൽനിന്നുള്ള കച്ചവടക്കാരാണ് കഴിഞ്ഞദിവസം എത്തിയത്. കൂറ്റൻ പോത്തുകളെയും 500 കിലോയിലധികം തൂക്കം വരുന്ന കാളകളെയും പെരുന്നാൾ കച്ചവടത്തിനായി ചന്തയിലെത്തിച്ചിരുന്നു. പലരും മോഹവില നൽകിയാണ് ഇവയെ സ്വന്തമാക്കിയത്.

വടക്കഞ്ചേരി ടൗണിൽ അപകടക്കുഴികൾ

വടക്കഞ്ചേരി: ടൗണിലൂടെ നടക്കുന്നവർ ശ്രദ്ധിക്കണം. ഇത്തരം അപകടകുഴികൾ പലയിടത്തുമുണ്ട്. ടൗണിൽ തിരക്കേറിയ മന്ദംജംഗ്ഷനിൽ ഇക്കോഷോപ്പിനു മുന്നിലാണ് ഈ കുഴി. ഇതു വെറും റോഡ് തകർന്നുള്ള കുഴിയല്ല. ചവിട്ടിയാൽ താഴ്ന്നുപോകും. റോഡിനടിയിലെ നാലടി താഴ്ചയുള്ള അഴുക്കുചാലിലേക്ക് താഴ്ന്നുപോകുന്നതാണ് ഈ അപകട കുഴി. ഇതിനാൽ നടന്നുപോകുന്നവർ ശ്രദ്ധിച്ചില്ലെങ്കിൽ അപകടമുണ്ടാകും. വ്യത്യസ്ത ദിവസങ്ങളിലായി മൂന്നുപേർ കുഴിയിൽ പെട്ടെങ്കിലും കാലിന് ചെറിയ പരിക്കുകളോടെ രക്ഷപ്പെട്ടു. സമീപത്തെ വ്യാപാരികൾ വിവരം സമീപത്തെ പഞ്ചായത്ത് ഓഫീസിൽ പറഞ്ഞപ്പോൾ പൊതുമരാമത്ത് വകുപ്പിന്‍റെ റോഡാണെന്നും അവരാണ് അറ്റകുറ്റപണി നടത്തേണ്ടത് എന്നുമാണ് പറഞ്ഞത്. കച്ചവടക്കാർതന്നെ കുഴിമൂടാം എന്നുകരുതി കുറെ കല്ല് നിറച്ചെങ്കിലും അതെല്ലാം താഴ്ന്നു പോകുന്ന സ്ഥിതിയാണ്. കാര്യമായ പണികൊണ്ടു മാത്രമെ ഇത് പരിഹരിക്കാനാകൂ.

റബർതോട്ടങ്ങളിൽ മഴമറ സ്ഥാപിക്കൽ തകൃതി

നെന്മാറ: മലയോര റബർതോട്ടങ്ങളിൽ മഴക്കാലത്ത് ടാപ്പിംഗ് നടത്തുന്നതിന് മഴമറ (റെയിൻ ഗാർഡ്) സ്ഥാപിച്ചുതുടങ്ങി. സാധാരണ കാലവർഷം ആരംഭിക്കുന്നതിനു മുമ്പ് മെയ് അവസാനത്തോടെ ആരംഭിക്കുന്ന പണിയാണിത്. കാലവർഷം നേരത്തെ എത്തിയതോടെയാണ് മഴമറ സ്ഥാപിക്കാൻ വൈകിയത്. മഴക്കാലത്ത് റബർ ടാപ്പിംഗ് നടത്തുന്നതിനു വേണ്ടിയാണ് റബർ മരങ്ങളിൽ പ്ലാസ്റ്റിക് ഷീറ്റുകളും റെഡിമെയ്ഡ് റെയിൻ ഗാർഡുകളും കൊണ്ട് ടാർ രൂപത്തിലുള്ള പശ ഉപയോഗിച്ച് റെയിൻ ഗാർഡിംഗ് നടത്തുന്നത്. മഴസമയങ്ങളിൽ ടാപ്പിംഗ് നടത്തുമ്പോൾ മരങ്ങളിലെ വെട്ടുചാലുകളിൽ വെള്ളം ഒഴുകാതിരിക്കാനും മഴയിൽ റബർപാൽ ഒഴുകിപ്പോകാതിരിക്കാനും വേണ്ടിയാണ് റെയിൻ ഗാർഡിംഗ് നടത്തുന്നത്. നാലുദിവസമായി മഴകുറഞ്ഞതിനെ തുടർന്ന് ടാപ്പിംഗ് തൊഴിലാളികൾ സംഘംചേർന്നാണ് റബർതോട്ടങ്ങളിൽ മഴമറ സ്ഥാപിച്ചു തുടങ്ങിയത്. ഒരു മരത്തിൽ മഴമറ സ്ഥാപിക്കുന്നതിന് 12 മുതൽ 15 രൂപ വരെ കൂലി വാങ്ങുന്നുണ്ട്. ചുരുങ്ങിയത് അഞ്ചു തൊഴിലാളികളെങ്കിലും ഒരേ സമയത്ത് ജോലി എടുത്താലേ മഴമറ സ്ഥാപിക്കാൻ കഴിയുകയുള്ളൂ. തോട്ടം ഉടമകൾക്ക് മഴമറ പിടിപ്പിക്കുന്ന കൂലിചെലവിന് പുറമേ ഒരു മരത്തിന് 60 രൂപയിലേറെ പ്ലാസ്റ്റിക്കിനും പശയ്ക്കും മറ്റുമായി ചെലവഴിക്കേണ്ടി വരുന്നുണ്ട് എന്ന് കർഷകർ പറഞ്ഞു. ഒരു കിലോ മഴമറയ്ക്കുള്ള പ്ലാസ്റ്റിക് കടലാസ് ഷീറ്റിന് 18 ഇഞ്ച് വീതി മുതൽ 22 ഇഞ്ച് വീതി വരെ ഉള്ളതിന് 140 മുതൽ 160 വരെ വില വരുന്നുണ്ട്. മരത്തിൽ തേച്ചുപിടിപ്പിക്കുന്ന പശയും സമാനരീതിയിൽ വില നിലനിൽക്കുന്നു. അതോടൊപ്പം മറ്റ് അനുബന്ധസാമഗ്രികൾക്കും വില ഉയർന്നിട്ടുണ്ട്. മഴക്കാലത്ത് ടാപ്പിംഗ് നടത്തി അധികആദായം ഉണ്ടാക്കാനുള്ള പ്രയത്നത്തിലാണ് റബർ മേഖല. ഇപ്പോഴും 200 രൂപയിൽ താഴെ മാത്രമാണ് റബർ വില നിൽക്കുന്നത്. 250 രൂപയെങ്കിലും കിട്ടിയാൽ മാത്രമേ ലാഭകരമായി റബർ കൃഷി മാറുകയുള്ളൂ എന്ന് കർഷകർ പറയുന്നുണ്ടെങ്കിലും മറ്റു വരുമാനമാർഗങ്ങൾ ഇല്ലാത്തതിനാൽ കിട്ടുന്ന വരുമാനം എടുക്കുന്ന രീതിയിലേക്ക് കർഷകർ മാറി. കഴിഞ്ഞ നാല് ദിവസമായി കുറഞ്ഞ മഴയിൽ പ്രധാന റബർ ഉത്പാദനകേന്ദ്രങ്ങളായ കരിമ്പാറ, കൽച്ചാടി, ഒലിപ്പാറ, കൈതച്ചിറ, മാങ്കുറുശി, നേർച്ചപ്പാറ, ചക്രായി, ഓവുപാറ മേഖലകളിലും മഴമറ സ്ഥാപിക്കുന്ന ജോലി തിരക്കുപിടിച്ചുനടക്കുകയാണ്. മഴമറ സ്ഥാപിച്ചു നൽകുന്ന പരിചയസമ്പന്നരായ തൊഴിലാളികളുടെ ക്ഷാമംമൂലം റബർ കർഷകർ തൊഴിലാളികളെ മുൻകൂർ പറഞ്ഞ് ചുമതലപ്പെടുത്തി കാത്തിരിക്കുകയാണ്. മഴയില്ലാത്ത ദിവസം അഞ്ചു തൊഴിലാളികൾക്ക് ഏകദേശം 800 മരങ്ങൾ വരെ പ്ലാസ്റ്റിക് റെയിൻ ഗാർഡ് പിടിപ്പിച്ചു നൽകാൻ കഴിയുന്നുണ്ട്. രണ്ടുദിവസം കഴിഞ്ഞാൽ വീണ്ടും കനത്ത മഴ വരും എന്ന കാലാവസ്ഥാ പ്രവചനം മഴമറ സ്ഥാപിക്കാത്ത മേഖലയിൽ ആശങ്ക ഉയർത്തുന്നുണ്ട്.

വ്യാപാരസ്ഥാപനങ്ങളിൽനിന്ന് മോഷണം നടത്തിയയാളെ അറസ്റ്റ് ചെയ്തു

നെന്മാറ: പകൽസമയത്ത് നെന്മാറ-വല്ലങ്ങി മേഖലകളിലെ വ്യാപാരസ്ഥാപനങ്ങളിൽ നിന്ന് മോഷണം നടത്തിയയാളെ പിടികൂടി. വല്ലങ്ങിയിലെ മുരളീധരന്‍റെ ഓയിൽ കടയിൽ പ്രദർശനത്തിനായി വെളിയിൽ വച്ചിരുന്ന 10 ലിറ്റർ ഓയിൽ ടിന്നും സമീപത്തെ ഇലക്ട്രിക്കൽ ഷോപ്പിൽ നിന്ന് ഫാൻ, ഇലക്ട്രോണിക് ഷോപ്പിൽ നിന്ന് പെൻഡ്രൈവ് എന്നിവ മോഷ്ടിച്ചയാളെയാണ് വ്യാപാരികൾ പിടികൂടി പോലീസിൽ ഏൽപ്പിച്ചത്. പകൽസമയങ്ങളിൽ കടകൾക്ക് മുന്നിൽ വച്ചിരിക്കുന്ന സാധനങ്ങൾ മോഷ്ടിച്ചു കൊണ്ടുപോകുന്ന പതിവുള്ള എലവഞ്ചേരി പെരിങ്ങോട്ടുകാവ് കിഴക്കുമുറി സ്വദേശിയായ സെൽവരാജി(47) നെയാണ് നെന്മാറ പോലീസ് സബ് ഇൻസ്പെക്ടർ ഫാദിൽ റഹ്മാന്‍റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്ത് കേസെടുത്തത്. സമാനമായ രീതിയിൽ രണ്ടു ദിവസം മുമ്പ് മേഖലയിൽ പ്രതി മോഷണം നടത്തിയതായി വ്യാപാരികൾ പരാതിപ്പെട്ടിരുന്നു.

തൈനട്ട് മദ്യനിർമാണശാലയ്ക്കെതിരേ വേറിട്ട സമരം

എലപ്പുള്ളി: നിർദിഷ്ട മദ്യനിർമാണ ശാലക്കെതിരെ ലോക പരിസ്ഥിതിദിനത്തിൽ എലപ്പുള്ളി പോരാട്ട ജനകീയസമിതി വ്യത്യസ്തമായ സമരപരിപാടി സംഘടിപ്പിച്ചു. പദ്ധതി പ്രദേശത്ത് തൈകൾ നട്ടുകൊണ്ടായിരുന്നു സമരം. സമിതി കോ-ഓർഡിനേറ്റർ ജോർജ് സെബാസ്റ്റ്യന് കേരളപ്രഭ പുരസ്കാര ജേതാവ് പി. ഭുവനേശ്വരി സമ്മാനിച്ച തൈനട്ട് പഞ്ചായത്തു പ്രസിഡന്‍റും സമിതി അധ്യക്ഷയുമായ കെ. രേവതി ബാബു ഉദ്ഘാടനം നിർവഹിച്ചു. പഞ്ചായത്ത് വൈസ് പ്രസിഡന്‍റ് എസ്. സുനിൽകുമാർ, പഞ്ചായത്ത് അംഗങ്ങളായ സന്തോഷ് പള്ളത്തേരി, ഡി. രമേശൻ, ഗിരീഷ് ബാബു, പി. അനിത, സമിതി ഭാരവാഹികളായ പി. തങ്കച്ചൻ, വി. ശിവൻ, ഒ.കെ. മണികണ്ഠൻ തുടങ്ങിയവരും നിരവധി പ്രദേശവാസികളും തൈകൾ നട്ടു.

കാർഷികമേഖല ലാഭകരമാക്കുന്നതിൽ ജലസംരക്ഷണത്തിനു വലിയ പങ്ക്: മന്ത്രി

പാലക്കാട്: കാർഷികമേഖല ലാഭകരമാക്കുന്നതിൽ ജലസംരക്ഷണത്തിന് വലിയ പ്രാധാന്യമുണ്ടെന്ന് വൈദ്യുതിവകുപ്പ് മന്ത്രി കെ കൃഷ്ണൻകുട്ടി. പനപർവം പദ്ധതിയുടെ ജില്ലാതല ഉദ്ഘാടനം നിർവഹിച്ചു പ്രസംഗിക്കുകയായിരുന്നു മന്ത്രി. ജില്ലയിലെ എല്ലാ തദ്ദേശസ്വയംഭരണ സ്ഥാപനങ്ങളും ഹരിതകേരളം മിഷന്‍റെ ഏകോപനത്തിൽ ജൂണ്‍ അഞ്ചു മുതൽ സെപ്തംബർ 30 വരെ 10 ലക്ഷം വൃക്ഷത്തൈകൾ നട്ടുപിടിപ്പിക്കുക, വംശനാശഭീഷണി നേരിടുന്ന കരിന്പനകളെ തിരിച്ചു കൊണ്ടുവരിക എന്ന ദൗത്യത്തിന്‍റെയും ഭാഗമായാണ് പനപർവം പദ്ധതി നടപ്പാക്കുന്നത്. ജലസംരക്ഷണത്തിന്‍റെ ഭാഗമായി ചിറ്റൂർ മണ്ഡലത്തിൽ 19 തടയണകൾ നിർമിക്കാൻ സാധിച്ചെന്നും ഈ ജലം ഉപയോഗിച്ച് കേരളത്തിൽ ഏറ്റവും കൂടുതൽ പ്രിസിഷൻ ഫാമിംഗ് നടക്കുന്നത് ഇവിടെയാണെന്നും മന്ത്രി പറഞ്ഞു. തൃത്താല മണ്ഡലത്തിലെ വേസ്റ്റ് മാനേജ്മെന്‍റ് ഗൗരവമായി കണ്ട് ചിറ്റൂർ മണ്ഡലത്തിൽ എങ്ങനെ പ്രായോഗികമാക്കാൻ സാധിക്കും എന്നതിനെക്കുറിച്ച് പഠിക്കുമെന്നും മന്ത്രി കൂട്ടിച്ചേർത്തു. പാലക്കാട് വിക്ടോറിയ കോളജിലെ എൻഎസ്എസ് യൂണിറ്റ് ശേഖരിച്ച പനവിത്തുകൾ മന്ത്രിക്ക് പരിപാടിയിൽ വെച്ച് കൈമാറി. ഹോർത്തൂസ് ട്രൈബലിക്കസ് പ്രദർശനം ശ്രദ്ധേയമായി അഗളി: പരിസ്ഥിതി ദിനാചരണത്തിന്‍റെ ഭാഗമായി കൂക്കംപാളയം ഗവ. യുപി സ്കൂളിൽ നടത്തിയ ഹോർത്തൂസ് ട്രൈബലിക്കസ് പ്രദർശനം ശ്രദ്ധേയമായി. അട്ടപ്പാടിയുടെ ആദിവാസി ചികിത്സാ പാരന്പര്യവുമായി ബന്ധപ്പെട്ട അഞ്ഞൂറോളം ഔഷധസസ്യങ്ങളുടെ ചിത്രപ്രദർശനമാണ് ഒരുക്കിയത്. സ്വതന്ത്രഗവേഷകനായ ഡോ.എ.ഡി. മണികണ്ഠൻ ഒരുക്കിയ ചിത്രപ്രദർശനം കുട്ടികൾക്കു അക്ഷരാർഥത്തിൽ കൗതുകമായി. അട്ടപ്പാടിയുടെ പൈതൃക അറിവുകൾ അട്ടപ്പാടിയിലെ കുട്ടികളിലെത്തിക്കുക എന്നതായിരുന്നു പ്രദർശനത്തിന്‍റെ ലക്ഷ്യം. സ്കൂൾ ഹെഡ്മാസ്റ്റർ ജോസഫ് ആന്‍റണി, അധ്യാപകരായ വി.പി. മൻസൂർ, പ്രസാദ് എന്നിവർ പ്രദർശനത്തിനു നേതൃത്വം നൽകി. വടക്കഞ്ചേരി പഞ്ചായത്ത്തല ഉദ്ഘാടനം വടക്കഞ്ചേരി: പരിസ്ഥിതി ദിനാചരണത്തിന്‍റെ വടക്കഞ്ചേരി പഞ്ചായത്ത്തല ഉദ്ഘാടനം മംഗലം മൂച്ചിതൊടി പച്ചതുരുത്തിൽ പി.പി. സുമോദ് എംഎൽഎ ഉദ്ഘാടനം ചെയ്തു.പഞ്ചായത്ത് പ്രസിഡന്‍റ് ലിസി സുരേഷ് അധ്യക്ഷത വഹിച്ചു. ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ രശ്മി ഷാജി, മെംബർമാരായ എ.എം. സേതു, കെ. മോഹൻദാസ്, ഉഷാകുമാരി, ബിഎംസി കൺവീനർ കെ.എം. രാജു, ജൂണിയർ എൻജിനീയർ ശ്രീവിദ്യ, ഹെൽത്ത് ഇൻസ്പെക്ടർ രാജഗോപാൽ, എൻജിനീയർ ഫിനോയ്, പഞ്ചായത്ത് മുൻ പ്രസിഡന്‍റ് കെ. കുമാരൻ, ഡിഎംസി മെംബർ ഡയാന, വോളന്‍റിയർമാരായ ദിവ്യ, രഞ്ജിത, ശരണ്യ തുടങ്ങിയവർ പങ്കെടുത്തു. ജൻശിക്ഷൻ സൻസ്ഥാൻ പാലക്കാട്: കേന്ദ്രതൊഴിൽ മന്ത്രാലയത്തിന് കീഴിലുള്ള ഒൗദ്യോഗിക തൊഴിൽ പരിശീലനസ്ഥാപനമായ ജൻശിക്ഷൻ സൻസ്ഥാൻ പാലക്കാട്, ടൗണ്‍ റെയിൽവേസ്റ്റേഷൻ, ലീഡ് ബാങ്ക് എന്നിവർ സംയുക്തമായി ലോക പരിസ്ഥിതിദിനാഘോഷ പരിപാടികൾ സംഘടിപ്പിച്ചു. ടൗണ്‍ റെയിൽവേ സ്റ്റേഷനിൽ സംഘടിപ്പിച്ച ആചരണത്തിൽ പ്ലാസ്റ്റിക് നിർമാർജനത്തിന്‍റെ ബോധവത്കരണവും സ്റ്റേഷൻ പരിസര ശുചീകരണവും ഫലവൃക്ഷ തൈകളുടെ നടീലും വിതരണവും സംഘടിപ്പിച്ചു. ചടങ്ങിൽ റെയിൽവേ ട്രാഫിക് ഇൻസ്പെക്ടർ ബിനോയ് ജോർജ്, റെയിൽവേ ഡിവിഷൻ സീനിയർ സെഷൻ എൻജിനീയർ ജോണ്‍സണ്‍, ടൗണ്‍ സ്റ്റേഷൻ സൂപ്രണ്ട് എം.എ. മനോജ്, ആർപിഎഫ് ഓഫീസർ എം.ഡി. സണ്ണി, ജില്ലാ ലീഡ് ബാങ്ക് മാനേജർ അനിൽകുമാർ, ലീഡ് ബാങ്ക് ഓഫീസർ രൂപലേഖ, പിഎസ്എസ്പി എക്സിക്യൂട്ടീവ് സെക്രട്ടറി ഫാ. സീജോ കാരിക്കാട്ടിൽ, ജെഎസ്എസ് ഡയറക്ടർ സിജു മാത്യു പ്രസംഗിച്ചു. ജെഎസ്എസ് പാലക്കാടിന്‍റെ ഈ വർഷത്തെ തൊഴിൽപരിശീലനബാച്ചുകളിലെ അന്പതിലധികം പഠിതാക്കൾ സംബന്ധിച്ചു. ജെഎസ്എസ് ഉദ്യോഗസ്ഥരായ ജോയ് ജോസഫ്, ശ്വേത, ലൂയിസ് ജോർജ്, സുഹാസിനി, സോന പരിശീലകരായ ആതിര, പ്രഭ പരിപാടിക്ക് നേതൃത്വം നൽകി. പൊറ്റശേരി ഗവ. ഹയർ സെക്കൻഡറി സ്കൂളിൽ കാഞ്ഞിരപ്പുഴ: പൊറ്റശേരി ഗവ. ഹയർ സെക്കൻഡറി സ്കൂളിൽ ലോക പരിസ്ഥിതി ദിനാഘോഷം ഗ്രാമപഞ്ചായത്ത് പ്രസിഡന്‍റ് സതി രാമരാജൻ ഉദ്ഘാടനം ചെയ്തു. നാഷണൽ സർവീസ് സ്കീം യൂണിറ്റിന്‍റെ നേതൃത്വത്തിൽ കൽപ്പകം പരിപാടിയുടെ ഭാഗമായി സ്കൂൾ കോന്പൗണ്ടിൽ തെങ്ങിൻതൈകൾ നടുകയും സ്കൂൾ പരിസരങ്ങളിലും പൊതു സ്ഥലങ്ങളിലുമുള്ള പ്ലാസ്റ്റിക് മാലിന്യങ്ങൾ നീക്കം ചെയ്യുകയും ചെയ്തു. സ്കൗട്ട്സ് ആൻഡ് ഗൈഡ്സ് യൂണിറ്റുകളുടെ നേതൃത്വത്തിൽ സ്കൂൾപരിസരത്തും പൊതു സ്ഥലങ്ങളിലും ഫലവൃക്ഷതൈകൾ നട്ടുപിടിപ്പിച്ചു. സ്റ്റുഡന്‍റ് പോലീസ് കേഡറ്റുകളുടെ നേതൃത്വത്തിൽ സ്കൂൾ പച്ചക്കറിത്തോട്ടത്തിൽ കൃഷിക്ക് തുടക്കംകുറിച്ചു. വിദ്യാർഥികൾക്കായി നടത്തിയ പരിസ്ഥിതിദിന സെമിനാറിന് കാഞ്ഞിരപ്പുഴ കൃഷി ഓഫീസർ സഫീന നേതൃത്വം നൽകി. എൻഎസ്എസ് ലീഡർ ശ്വേത പരിസ്ഥിതിദിന പ്രതിജ്ഞ ചൊല്ലിക്കൊടുത്തു. പ്രിൻസിപ്പൽ പി. സന്തോഷ്കുമാർ അധ്യക്ഷത വഹിച്ചു. ഹെഡ്മിസ്ട്രസ് ടി. സബിത, പിടിഎ പ്രസിഡന്‍റ് കെ.എസ.് സുനേഷ്, അധ്യാപകരായ ദിവ്യ അച്യുതൻ, ടി. രാധാകൃഷ്ണൻ, മൈക്കിൾ ജോസഫ്, മഞ്ജു പി. ജോയ്, എച്ച്. അനീസ്, കെ.സി. മുരുകൻ, അനീഷ, ലീഡർമാരായ ഹൃദ്യ കൃഷ്ണ, എ. നന്ദു കൃഷ്ണൻ, ഗ്ളാഡ്വിൻ സിജിൻ, എൻ. ദിയ ഫാത്തിമ, എൻ. അർജുൻ എന്നിവർ നേതൃത്വം നൽകി. പിഎസ്എസ്പി ജില്ലാ വിമണ്‍സ് ഫെഡ് പാലക്കാട്: പീപ്പിൾസ് സർവീസ് സൊസൈറ്റിയുടെ ജില്ലാ വിമണ്‍സ് ഫെഡറേഷന്‍റെ നേതൃത്വത്തിൽ ഓഫീസ് കാന്പസിൽ വൃക്ഷതൈ നട്ട് പരിസ്ഥിതിദിനം ആചരിച്ചു. പിഎസ്എസ്പി അസിസ്റ്റന്‍റ് ഡയറക്ടർ ഫാ. ജോണ്‍സണ്‍ വലിയപാടത്ത്, വിമണ്‍സ് ഫെഡറേഷൻ പ്രസിഡന്‍റ് മഞ്ജു ബിനു, പിഎസ്എസ്പി ട്രഷറർ സി. മാഗി, സ്റ്റാഫ് അംഗങ്ങൾ, ജില്ലാ ഫെഡ് അംഗങ്ങൾ പങ്കെടുത്തു. ആയക്കാട് സിഎ സ്കൂളിൽ വടക്കഞ്ചേരി: ഗ്രാമപഞ്ചായത്തിന്‍റെയും കൃഷിഭവന്‍റെയും സംയുക്താഭിമുഖ്യത്തിൽ ആയക്കാട് സിഎ ഹയർ സെക്കൻഡറി സ്കൂളിൽ പരിസ്ഥിതി ദിനാചരണ പരിപാടികൾ നടന്നു. വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ അഡ്വ.കെ.പി. ശ്രീകല ഫലവൃക്ഷതൈ നട്ട് ഉദ്ഘാടനം ചെയ്തു. പിടിഎ പ്രസിഡന്‍റ് ലെനിൻ അധ്യക്ഷത വഹിച്ചു. കൃഷി ഓഫീസർ കെ.ആർ. ജ്യോതി, ഹെഡ്മിസ്ട്രസ് ജയവല്ലി, പ്രിൻസിപ്പൽ അനൂപ്, സ്റ്റാഫ് സെക്രട്ടറി അസനാർകുട്ടി, അസിസ്റ്റന്‍റ് കൃഷി ഓഫീസർ എം. ദാവൂദ്, പെസ്റ്റ് സ്കൗട്ട് എം. ഷീജ എന്നിവർ പ്രസംഗിച്ചു. മംഗലംഡാം ലൂർദ്മാതാ സ്കൂളിൽ മംഗലംഡാം: പരിസ്ഥിതി ദിനാചരണത്തിന്‍റെ ഭാഗമായി മംഗലംഡാം ലൂർദ്മാതാ ഹയർ സെക്കൻഡറി സ്കൂളിൽ എൻഎസ്എസിന്‍റെ ആഭിമുഖ്യത്തിൽ കല്പകം 2025 പരിപാടി ഫോറസ്റ്റ് ഡെപ്യൂട്ടി റേഞ്ച് ഓഫീസർ കെ. എം. മുഹമ്മദ് ഹാഷിം ഉദ്ഘാടനം ചെയ്തു. പിടിഎ പ്രസിഡന്‍റ് ഡിനോയ് കോമ്പാറ അധ്യക്ഷത വഹിച്ചു. പ്രിൻസിപ്പൽ സിസ്റ്റർ ആൽഫിൻ, എൻഎസ്എസ് ലീഡർ ജിതിൻ ബൈജു എന്നിവർ പ്രസംഗിച്ചു. സ്കൂൾ കോമ്പൗണ്ടിലും മംഗലംഡാം പോലീസ് സ്റ്റേഷനിൽ സിഐ ബിബിൻ മാത്യുവിന്‍റെ നേതൃത്വത്തിലും തെങ്ങിൻതൈ നടീൽ നടന്നു. വിദ്യാർഥികൾക്ക് വിത്തുകളും ഫലവൃക്ഷ തൈകളും വിതരണം ചെയ്തു. പരിസ്ഥിതി സംരക്ഷണത്തിന്‍റെ പ്രാധാന്യത്തെകുറിച്ചുള്ള വിവിധ പരിപാടികളും വിദ്യാർഥികൾ അവതരിപ്പിച്ചു. മംഗലംഡാം സെന്‍റ് സേവിയേഴ്സ് സെൻട്രൽ സ്കൂളിൽ മംഗലംഡാം: ലോക പരിസ്ഥിതിദിനത്തോടനുബന്ധിച്ച് മംഗലംഡാം സെന്‍റ് സേവിയേഴ്സ് സെൻട്രൽ സ്കൂളിൽ നടന്ന പരിപാടികൾ മംഗലംഡാം ഫോറസ്റ്റ് ഡെപ്യൂട്ടി റേഞ്ച് ഫോറസ്റ്റ് ഓഫീസർ മുഹമ്മദ് ഹാഷിം തൈനട്ട് ഉദ്ഘാടനം ചെയ്തു. പ്രിൻസിപ്പൽ ഫാ. സിബിൻ തോമസ് അധ്യക്ഷത വഹിച്ചു. വൈസ് പ്രിൻസിപ്പൽ ജാൻസി ഷാജി, അഖില എലിസബത്ത്, റോസ്റ്റ്യാനോ മാത്യു റോഷൻ, ആഗ്നൻ ബിനോയ് എന്നിവർ പ്രസംഗിച്ചു. പരിസ്ഥിതി സംരക്ഷണത്തിന്‍റെ പ്രാധാന്യത്തെക്കുറിച്ച് പ്രതിപാദിക്കുന്ന പദ്യംചൊല്ലൽ, മൂകാഭിനയം, പ്രച്ഛന്നവേഷ മത്സരങ്ങൾ, ഡിജിറ്റൽ പോസ്റ്റർ നിർമാണം, ആൽബം നിർമിക്കൽ, ചിത്ര നിർമാണം എന്നിവ നടന്നു. വടക്കഞ്ചേരി ചെറുപുഷ്പം ഗേൾസ് ഹയർ സെക്കൻഡറി സ്കൂളിൽ വടക്കഞ്ചേരി: ചെറുപുഷ്പം ഗേൾസ് ഹയർ സെക്കൻഡറി സ്കൂളിലെ എൻഎസ്എസിന്‍റെ നേതൃത്വത്തിൽ നടന്ന കല്പകവൃക്ഷ തൈനടീലിന്‍റെ ഉദ്ഘാടനം പഞ്ചായത്ത് വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ രശ്മി ഷാജി നിർവഹിച്ചു. പ്രിൻസിപ്പൽ സിസ്റ്റർ ഡോ. ആഗ്നൽ ഡേവിഡ്, അധ്യാപിക സിസ്റ്റർ ഡീന, എൻഎസ്എസ് പ്രോഗ്രാം ഓഫീസർ സോജ, മുൻ ഓഫീസർ വി.പി. ഷീനടീച്ചർ എന്നിവർ പ്രസംഗിച്ചു. എൻഎസ്എസ് വോളന്‍റിയർമാരും ഗൈഡ്സും വടക്കഞ്ചേരി ടൗണിൽ പരിസ്ഥിതി സംരക്ഷണ റാലിയും നടത്തി. ഓയിസ്ക പാലക്കാട് ചാപ്റ്റർ പാലക്കാട്: ഓയിസ്ക പാലക്കാട് ചാപ്റ്ററിന്‍റെ ആഭിമുഖ്യത്തിൽ കാണിക്കമാത സ്കൂളിൽ പരിസ്ഥിതി ദിനാഘോഷം നടത്തി. നഗരസഭ അധ്യക്ഷ പ്രമീള ശശിധരൻ ഉദ്ഘാടനം ചെയ്തു. ചാപ്റ്റർ പ്രസിഡന്‍റ് എ. സുരേന്ദ്രൻ അധ്യക്ഷനായി. പ്രഫ.കെ. സുരേഷ് ബാബു മുഖ്യപ്രഭാഷണം നടത്തി. സ്കൂൾ പ്രിൻസിപ്പൽ സിസ്റ്റർ ഡോ. നിർമൽ പരിസ്ഥിതി ദിനത്തിനോടനുബന്ധിച്ച് നടന്ന ക്വിസ്മത്സര വിജയികൾക്ക് സമ്മാനം നൽകി. സെക്രട്ടറി സാവിത്രി വത്സൻ, ട്രഷറർ ഡോ . സൗദാമിനി മേനോൻ, മുൻ പ്രസിഡന്‍റ് പി.എം. ശ്രീവൽസൻ എന്നിവർ പ്രസംഗിച്ചു. ജവഹർ നവോദയ വിദ്യാലയത്തിൽ സാവിത്രി വൽസന്‍റെ അധ്യക്ഷതയിൽ നടന്ന ചടങ്ങിൽ പ്രിൻസിപ്പൽ സുധാമണി ഉദ്ഘാടനം ചെയ്തു. പ്രഫ. സുരേഷ് ബാബു മുഖ്യപ്രഭാഷണം നടത്തി. ടീച്ചേഴ്സ് കോ-ഓർഡിനേറ്റർ സരിത പ്രസംഗിച്ചു. ഭാരതമാത ഹയർസെക്കൻഡറി സ്കൂളിൽ പ്രസിഡന്‍റ് എ. സുരേന്ദ്രന്‍റെ അധ്യക്ഷതയിൽ ചേർന്ന യോഗത്തിൽ വൈൽഡ് ലൈഫ് എഡ്യുക്കേഷൻ ഡെപ്യൂട്ടി ഡയറക്ടർ മനോജ് ബാലകൃഷ്ണൻ ഉദ്ഘാടനം ചെയ്തു. എസ്ഐസി എൻവയോൺമെന്‍റൽ പ്രോഗ്രാം ഡയറക്ടർ പ്രഫ. കെ സുരേഷ് ബാബു, ടി. ശ്രീധരൻ വൈസ് പ്രസിഡന്‍റ് സിഎഫ്പി കണ്‍വീനർ ഡോ.കെ. സുരേഷ് പ്രസംഗിച്ചു. ചിറ്റൂർ ഗവ. കോളജിൽ ചിറ്റൂർ: ലോക പരിസ്ഥിതിദിനത്തിൽ വിവിധ പഞ്ചായത്തുകളിൽ ബിഎംസി കളുടെ നേതൃത്വത്തിൽ വച്ചുപിടിപ്പിക്കുന്നതിനായി സൗജന്യത്തൈകൾ വിതരണം ചെയ്തു. സംസ്ഥാന ജൈവവൈവിധ്യ ബോർഡിന്‍റെ സഹായത്തോടെ കോളജ് കാമ്പസിൽ വളർത്തിയെടുത്ത പതിനായിരത്തോളം തൈകളാണ് വിതരണം ചെയ്തത്. ചിറ്റൂർ-തത്തമംഗലം മുനിസിപ്പാലിറ്റി, പെരുമാട്ടി, പട്ടഞ്ചേരി, പൊൽപ്പുള്ളി, പെരിങ്ങോട്ടുകുറിശി, പാലപ്പുറം പഞ്ചായത്തുകൾക്കാണ് തൈകൾ കൈമാറിയത്.

പൂഞ്ചോലയിൽ പട്ടാപ്പകൽ കാട്ടാന: ഭയന്ന് ജനം

കാഞ്ഞിരപ്പുഴ: പൂഞ്ചോലയിൽ ഒറ്റക്കൊമ്പന്‍റെ വിളയാട്ടം. മണിക്കൂറുകളോളം നാട്ടുകാരെ പരിഭ്രാന്തിയിലാക്കി. വ്യാപകമായി കൃഷി നശിപ്പിച്ചിട്ടുണ്ട്. ഇന്നലെ പുലർച്ചെ പെരുമലയിൽ നിന്നിറങ്ങിയ ഒറ്റക്കൊമ്പനാണ് നാട്ടുകാരെ വിറപ്പിച്ചത്. കാഞ്ഞിരം പള്ളിക്ക് സമീപവും സർക്കാർ എൽപി സ്കൂളിന് സമീപവും കൊമ്പനെത്തി. തുടർന്ന് കടുകുമാക്കൽ ബിജുമോന്‍റെ പൈനാപ്പിൾ തോട്ടത്തിൽ മണിക്കൂറുകളോളമാണ് ആന നിലയുറപ്പിച്ചത്. നൂറോളം പൈനാപ്പിൾ ചെടികൾ പിഴുതെടുത്തും ചവിട്ടിയും നശിപ്പിച്ചു. സജി മൈലംവേലിൽ, ജോർജ് വലിയപറമ്പിൽ, ജോണി കന്നുംകുളമ്പിൽ, സരോജിനി, പ്രകാശൻ പാട്ടുപാറയിൽ, റോയി ഇലവുങ്കൽ, വിജയൻ താഴെവീട്ടിൽ, മോഹനൻ കീന്തനാനിക്കൽ എന്നിവരുടെ തോട്ടത്തിലും വീടിന് സമീപവും കാട്ടാന പരിഭ്രാന്തി പരത്തി. വിവരം അറിഞ്ഞ് മണ്ണാർക്കാട് ഫോറസ്റ്റ് റേഞ്ച് ഓഫീസർ എൻ. സുബൈറിന്‍റെ നേതൃത്വത്തിലുള്ള വനംവകുപ്പ് സംഘം സ്ഥലത്തെത്തി. മണ്ണാർക്കാട് ആർആർടി അഖിലിന്‍റെ നേതൃത്വത്തിലുള്ള സംഘമാണ് ആനയെ പടക്കം എറിഞ്ഞും മറ്റും തുരത്തിയത്. ആനമൂളി ഫോറസ്റ്റ് സ്റ്റേഷനിലെ അഷ്റഫ്, ദീപ്തി, ഷിന്‍റോ എന്നിവരും ആനയെ കാട്ടിലേക്ക്തുരത്തുന്നതിന് നേതൃത്വം നൽകി.

മല്ലൻകുളമ്പ് റോഡരികിൽ അപകടക്കുഴി

വണ്ടിത്താവളം: ഇക്കഴിഞ്ഞ ദിവസങ്ങളിൽ പെയ്ത മഴയിൽ മല്ലൻകുളന്പ് പാതയിടിഞ്ഞുരൂപപ്പെട്ട കുഴി അടിയന്തിരമായി അറ്റകുറ്റപ്പണി നടത്തണമെന്നു നാട്ടുകാർ. രാത്രിയും പകലും ഒരുപോലെ അപകടഭീഷണി നിലനിൽക്കുന്നുണ്ട്. അപകടാവസ്ഥ തിരിച്ചറിയാൻ കുറ്റിച്ചെടികൾ സ്ഥാപിച്ചിട്ടുണ്ടെന്നതു മാത്രമാണ് ഏക ആശ്വാസം. എന്നാൽ ഏതുനിമിഷവും വാഹനങ്ങൾ അപകടത്തിൽപ്പെടാം എന്ന സ്ഥിതിയുണ്ട്. റോഡിന്‍റെ വീതിക്കുറവും രാത്രിയിൽ തെരുവുവിളക്കുകളില്ലാത്തതും അപകടസാധ്യത കൂട്ടുന്നു.

പൊൻപാറ- ചോലമണ്ണ് റോഡ് നാടിനു സമർപ്പിച്ചു

മണ്ണാർക്കാട്: എംഎൽഎ ആസ്തിവികസന ഫണ്ടുപയോഗിച്ച് നിർമാണം പൂർത്തീകരിച്ച അലനല്ലൂർ ഗ്രാമപഞ്ചായത്തിലെ പൊൻപാറ- ചോലമണ്ണ് റോഡ് എൻ. ഷംസുദ്ദീൻ എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് സജ്‌ന സത്താർ അധ്യക്ഷത വഹിച്ചു. ബ്ലോക്ക്‌ പഞ്ചായത്ത് പ്രസിഡന്‍റ് വി. പ്രീത, പഞ്ചായത്ത് വൈസ് പ്രസിഡന്‍റ് അയിഷാബി ആറാട്ടുതൊടി, പഞ്ചായത്ത് വികസനകാര്യ സ്റ്റാന്‍റിംഗ് കമ്മിറ്റി ചെയർമാൻ കെ. റംല, ആരോഗ്യ വിദ്യാഭ്യാസ സ്റ്റാന്‍റിംഗ് കമ്മിറ്റി ചെയർപേഴ്സൺ എം. ജിഷ, ബ്ലോക്ക്‌ പഞ്ചായത്ത് മെംബർ പി.പി. ഷാനവാസ്, വാർഡ് മെംബർ പി. ബഷീർ, മറ്റു ജനപ്രതിനിധികൾ പങ്കെടുത്തു.

മിന്നൽപരിശോധന തുടരുമെന്ന് ലീഗൽ മെട്രോളജി വകുപ്പ്

പാലക്കാട്: സപ്ലൈകോയുടെ നെല്ലുസംഭരണ പദ്ധതിയിൽ തൂക്കത്തിൽ കൃത്രിമം കാണിക്കുന്നതിനു വെയിംഗ് മെഷീനിൽ ക്രമക്കേട് നടത്തുകയാണെന്ന പരാതിയുയർന്ന സാഹചര്യത്തിൽ മിന്നൽപരിശോധന തുടരുമെന്നു ലീഗൽ മെട്രോളജി അധികൃതർ മനുഷ്യാവകാശ കമ്മീഷനെ അറിയിച്ചു. കമ്മീഷൻ ജുഡീഷൽ അംഗം കെ. ബൈജുനാഥ് ആവശ്യപ്പെട്ട റിപ്പോർട്ടിലാണ് പാലക്കാട് ലീഗൽ മെട്രോളജി ഡപ്യൂട്ടി കണ്‍ട്രോളർ ഇക്കാര്യം അറിയിച്ചത്. ഓരോ ചാക്കിലും നാലു മുതൽ അഞ്ചുകിലോ ഭാരം കുറയ്ക്കുന്നതുകാരണം കർഷകർക്കു നഷ്ടം സംഭവിക്കുകയാണെന്ന പരാതിയിലാണ് നടപടി. പാലക്കാട് ജില്ലയിലെ പാഡി ഏജന്‍റുമാർക്കും വെയ് ബ്രിഡ്ജ് ഉടമകൾക്കും എതിരെയുള്ള പരാതിയിൽ കുഴൽമന്ദം മേഖലയിൽ പ്രവർത്തിക്കുന്ന രണ്ട് വെയ് ബ്രിഡ്ജുകൾ പാലക്കാട് ലീഗൽ മെട്രോളജി ഫ്ലയിംഗ് സ്ക്വാഡ് പരിശോധിച്ചതായി റിപ്പോർട്ടിൽ പറയുന്നു. പരിശോധനയിൽ തൂക്കത്തിൽ ക്രമക്കേട് കണ്ടെത്തിയിട്ടില്ല. അനുവദനീയമായ പരിധിക്കുള്ളിൽതന്നെയാണ് തൂക്കവ്യത്യാസം കണ്ടെത്തിയത്. വെയ് ബ്രിഡ്ജുകളിൽ പുനഃപരിശോധന നടത്തിയിട്ടും ക്രമക്കേടുകൾ കണ്ടെത്താൻ കഴിഞ്ഞിട്ടില്ല. കണ്ണാടി, കഞ്ചിക്കോട്, എലപ്പുള്ളി വെയ് ബ്രിഡ്ജുകളിലും പരിശോധന നടത്തിയിട്ടുണ്ട്. ക്രമക്കേടുകൾ കണ്ടെത്തിയില്ലെങ്കിലും പരിശോധന തുടരുമെന്നും റിപ്പോർട്ടിൽ പറയുന്നു. നൊച്ചുള്ളി സ്വദേശി കെ. ഗിരീഷ് സമർപ്പിച്ച പരാതിയിലാണ് നടപടി.

തമിഴിൽ ക്ലാസുകളും ചോദ്യപേപ്പറുകളും വേണമെന്നു എഐഎഡിഎംകെ

ചിറ്റൂർ: താലൂക്കിൽ തമിഴ്ഭാഷാ ന്യൂനപക്ഷ വിഭാഗങ്ങൾ പഠിക്കുന്ന സ്കൂളുകളിൽ തമിഴിൽ ക്ലാസുകളും ചോദ്യപേപ്പറുകളും പ്രാവർത്തികമാക്കണമെന്നു എഐഎഡിഎംകെ ജില്ലാ പ്രവർത്തകസമിതിയോഗം ആവശ്യപ്പെട്ടു. ഈ ആവശ്യം ഉന്നയിച്ച് മുഖ്യമന്ത്രിക്കും വിദ്യാഭ്യാസമന്ത്രിക്കും നിവേദനം അയക്കാൻ തീരുമാനിച്ചു. കൊഴിഞ്ഞാമ്പാറ, വണ്ണാമട, മുതലമട, ചിറ്റൂർ, അട്ടപ്പാടി എന്നിവിടങ്ങളിൽ നിരവധി തമിഴ് വിദ്യാർഥികൾ പഠിച്ചു വരുന്നു. പ്ലസ്ടു ഫലം എത്തിയപ്പോൾ തമിഴ് പഠിക്കുന്ന വിദ്യാർഥികൾ 80 ശതമാനത്തോളം പരാജയപ്പെട്ടിരുന്നു. എസ്എസ്എൽസി വരെ തമിഴ് ക്ലാസിൽ പഠിച്ച വിദ്യാർഥികൾക്ക് ഹയർ സെക്കൻഡറിയിൽ മലയാളംപഠനവും ചോദ്യപേപ്പർ മനസ്സിലാക്കാനും കഴിയാത്ത സാഹചര്യമുണ്ട്. എസ്എസ്എൽസിയിൽ 90 ശതമാനം മാർക്കുവാങ്ങിയ തമിഴ് വിദ്യാർഥികൾ പ്ലസ്‌വൺ, പ്ലസ്ടു പരീക്ഷ കളിൽ സമ്പൂർണ പരാജയം ഏറ്റുവാങ്ങിയത് തമിഴ്‌വിദ്യാർഥികളെ ഏറെ തളർത്തുന്നുവെന്നും യോഗം കുറ്റപ്പെടുത്തി. യോഗത്തിൽ ജില്ലാ പ്രവർത്തകസമിതി അധ്യക്ഷൻ വി.എൽ. ദുരൈ അധ്യക്ഷത വഹിച്ചു. ഭാരവാഹികളായ എൻ. ദേവദാസ്, സി. സമ്പത്ത്, കെ. ഗംഗാധരൻ, രവി, ശ്രീധരൻ, ശിവകുമാർ, മേനക എന്നിവർ പ്രസംഗിച്ചു.

വിശ്വാസപരിശീലനവർഷം ഉദ്ഘാടനം

കോയമ്പത്തൂർ: കുനിയമുത്തൂർ സെന്‍റ് മാർക്സ് പള്ളിയിൽ പുതിയ വിശ്വാസ പരിശീലന പ്രവർത്തന വർഷ ഉദ്ഘാടനം ഇടവകവികാരി ഫാ. ബിജോ പാലായിൽ നിർവഹിച്ചു. ഫാ.ബിജോ പാലായിൽ പതാക ഉയർത്തി. കുട്ടികളുടെ നൃത്തപരിപാടികളും ബൈബിൾ ദൃശ്യാവിഷ്കരണവും ബൈബിൾ പ്രതിഷ്ഠയും നടത്തി. ദിവ്യകാരുണ്യ ആരാധനയും തുടർന്ന് കുട്ടികളുടെ പഠനോപകരണങ്ങൾ വെഞ്ചിരിക്കുകയും കുട്ടികളെ എഴുത്തിനിരുത്തുകയും ചെയ്തു. കൈക്കാരൻമാരായ ഷാജു ചാഴൂർ, റോബിൻ റാഫേൽ, വിശ്വാസ പരിശീലന പ്രധാന അധ്യാപിക സിസ്റ്റർ മേബിൾ എസ്എബിഎസ് എന്നിവർ പരിപാടികൾക്ക് നേതൃത്വം നൽകി.

വിളവെടുപ്പിനു പാകമായ പാവൽകൃഷിക്കു മഞ്ഞളിപ്പുരോഗം

നെന്മാറ: വിളവെടുപ്പിനു പാകമായ പാവൽകൃഷിയിടത്തിൽ മഞ്ഞളിപ്പുരോഗം വ്യാപകം. ചെടികൾ നട്ടു 45 ദിവസത്തിനുശേഷം ഒന്നാംവിളവെടുപ്പ് കഴിഞ്ഞതിനുശേഷമാണ് പന്തലിലെ പാവൽവള്ളികളിൽ മഞ്ഞളിപ്പുരോഗം പ്രത്യക്ഷപ്പെട്ടത്. പ്രത്യേക വൈറസ് ബാധയാണെന്ന് സംശയിക്കുന്നതായി കർഷകനായ കാട്ടൂർമാക്കിൽ കെ.എസ്. ശശി പറഞ്ഞു. ഒരേക്കറോളം വിസ്തൃതിയുള്ള പാവൽ കൃഷിയിടത്തിൽ വിളവെടുപ്പ് ആരംഭിച്ച ഉടനെയുണ്ടായ രോഗബാധ കർഷകനു വൻനഷ്ടമുണ്ടാക്കി. പതിനായിരങ്ങൾ ചെലവഴിച്ച് പന്തലൊരുക്കലും, വളമിടലും കഴിഞ്ഞശേഷമാണ് കൃഷിയിടത്തിൽ ഒന്നാകെ ഇലകളും തണ്ടുകളും മഞ്ഞളിക്കുന്ന രോഗം പടർന്നുപിടിച്ചത്. അയിലൂർ കൃഷിഭവൻ പരിധിയിലെ പനംങ്കുറയിലെ കൃഷിയിടത്തിലാണ് ഇപ്പോൾ രോഗബാധ പ്രത്യക്ഷപ്പെട്ടത്. മഞ്ഞളിപ്പ് രോഗം ഒരു തോട്ടത്തിൽ പ്രത്യക്ഷപ്പെട്ടതോടെ സമീപത്തെ മറ്റ് പച്ചക്കറി കർഷകരും ആശങ്കയിലാണ്. കീടനാശിനി പ്രയോഗങ്ങൾ മാറിമാറി ചെയ്തിട്ടും ഫലപ്രദമാകുന്നില്ലെന്ന് കർഷകർ പറഞ്ഞു. പലരും കൃഷിഭവൻ, കൃഷിവിദഗ്ധരുടെ പ്രതിവിധിക്കായി കാത്തിരിക്കുകയാണ്.

മംഗലം കൊടുംവളവിൽ ചരക്കുവാഹനങ്ങൾ കുടുങ്ങുന്നതു പതിവ്

ഒറ്റപ്പാലം: മംഗലം മുരുക്കുംപറ്റ പാതയിലെ കൊടുംവളവിൽ ചരക്കുലോറികൾ കുടുങ്ങുന്നതു പതിവാകുന്നു. കഴിഞ്ഞ ദിവസം രാത്രി ഏഴരയോടെ ചരക്കുമായി പാലക്കാട് ഭാഗത്തേക്ക് പോവുകയായിരുന്ന ലോറിയാണ് രണ്ടാമത്തെ ഹെയർപിൻ വളവിൽ കുടുങ്ങിയത്. ലോറി കുടുങ്ങിയതോടെ വലിയ വാഹനങ്ങളുടെ ഗതാഗതം തടസപ്പെട്ടു. ചെറിയ വാഹനങ്ങൾ മാത്രമേ പാതയിലൂടെ പോകുന്നുള്ളു. ഒരാഴ്ചയ്ക്കിടയിൽ മൂന്നാം തവണയാണ് മുരുക്കുംപറ്റ പാതയിൽ ചരക്കുലോറികൾ കുടുങ്ങി ഗതാഗതം തടസപ്പെടുന്നത്.

കരിമ്പാറയിലെ വീട്ടുവളപ്പിലും കൃഷിയിടങ്ങളിലും കാട്ടാനകൾ

നെന്മാറ: കരിമ്പാറ മേഖലയിലെ പൂഞ്ചേരി, ചള്ള, കൽച്ചാടി മേഖലകളിലെ വീട്ടുവളപ്പിലും കൃഷിയിടങ്ങളിലും കാട്ടാനകൾ രാത്രിവിഹാരം. കഴിഞ്ഞദിവസം രാത്രി പുഞ്ചേരിക്കളം ചെന്താമരാക്ഷന്‍റെ വീടിനുചുറ്റും മൂന്നുപ്രാവശ്യമാണ് ഒറ്റയും കൂട്ടമായും കാട്ടാനകൾ എത്തിയത്. പ്ലാവിൽ എത്താവുന്ന ഉയരത്തിലെ ചക്കകൾ മുഴുവൻ പറിച്ച് മരം കുലുക്കി ശേഷിക്കുന്നവ വീഴ്ത്തിയാണ് ആനക്കൂട്ടം രാവിലെ മടങ്ങിയത്. വീട്ടിൽ കാവൽക്കാരൻ മാത്രമാണുണ്ടായിരുന്നത്. കാട്ടാനയുടെ സാന്നിധ്യം അറിഞ്ഞതോടെ ആക്രമണഭീഷണി ഭയന്ന് പുറത്തിറങ്ങാതെ കഴിച്ചുകൂട്ടി. മഴക്കാലമായതോടെ ചക്ക കച്ചവടക്കാർ എത്താതായതോടെ മിക്കസ്ഥലത്തും പഴുത്ത ചക്കകൾവീണ് മണം വീശുന്നതാണ് കാട്ടാനകളെ ആകർഷിക്കുന്നതെന്നു പ്രദേശവാസികൾ പറഞ്ഞു. കഴിഞ്ഞ രണ്ടുദിവസമായി ഇവരുടെ കൃഷിയിടത്തിലെ പല സ്ഥലങ്ങളിലും കാട്ടാനകൾനടന്ന് നാശംവരുത്തിയിട്ടുണ്ട്. കാട്ടുപന്നി, മാൻ, കുരങ്ങ്, മുള്ളൻ പന്നി, മലയണ്ണാൻ, മയിൽ എന്നിവയുണ്ടാക്കുന്ന നാശത്തിനു പുറമേയാണ് സ്ഥിരമായി കാട്ടാനകളും കൃഷിയിടങ്ങളിൽ എത്തിത്തുടങ്ങിയത്. ചള്ളയിലുള്ള റബ്ബർ തോട്ടത്തിനകത്തും, കൽച്ചാടിയിലെ എം. അബ്ബാസിന്‍റെ റബർതോട്ടത്തിലും കാട്ടാനകൾ ചവിട്ടിമെതിച്ചുനടന്ന് നാശംവരുത്തിയിട്ടുണ്ട്. കഴിഞ്ഞയാഴ്ചയും പൂഞ്ചേരി, നിരങ്ങമ്പാറ, കൽച്ചാടി, കരിമ്പാറ മേഖലയിൽ കാട്ടാനകൾ വീട്ടുവളപ്പിലെ പ്ലാവുകൾ തേടി എത്തി വേലികളും മറ്റും നശിപ്പിച്ച് നാശം വരുത്തിയിരുന്നു.

പനയംപാടം ഇന്നും അപകടമേഖല

കല്ലടിക്കോട്‌: അധ്യയനവർഷം ആരംഭിച്ചു. അതിനു ഒരാഴ്‌ച മുന്പുതന്നെ മഴയുമെത്തി. എന്നാൽ പനയംപാടം അപകടമേഖലയിലെ പ്രശ്‌നങ്ങൾ പരിഹരിക്കാൻ അധികൃതർ നൽകിയ വാഗ്ദാനങ്ങൾ നീളുന്നു. കേന്ദ്രസർക്കാർ 1.35 കോടി നീക്കിവച്ചിട്ടും പനയംപാടത്തെ റോഡിന്‍റെ പ്രവൃത്തികൾ എങ്ങുമെത്തിയില്ല. ആശങ്കാകുലരാണ് നാട്ടുകാരും രക്ഷിതാക്കളും. പുതിയ അധ്യയനവർഷത്തിൽ എട്ടാം ക്ലാസിലെത്തിയ പുതിയ കുട്ടികൾക്കു പ്രദേശത്തെക്കുറിച്ച് അറിയില്ലെന്നതും ഭയപ്പാടുണ്ടാക്കുന്നു. കഴിഞ്ഞ ഡിസംബറിലായിരുന്നു കരിമ്പ ഹൈസ്കൂ‌ളിൽനിന്നും ക്ലാസുകഴിഞ്ഞു മടങ്ങുകയായിരുന്ന നാലുകുട്ടികൾ വാഹനാപകടത്തിൽ മരിച്ചത്. തുടർന്ന് മന്ത്രിമാരും മറ്റധികൃതരും സ്ഥലം സന്ദർശിച്ച് റോഡിലെ അപാകതകൾക്കു പരിഹാരമുണ്ടാക്കാമെന്നു വാഗ്ദാനം നൽകിയിരുന്നു. റോഡ് പരുക്കനാക്കി താത്കാലിക ഡിവൈഡറും കാമറയും സ്ഥാപിച്ചതൊഴിച്ചാൽ മറ്റൊന്നുംതന്നെ നടന്നിട്ടില്ല. അന്നു പരുക്കനാക്കിയ റോഡ് വീണ്ടും മിനുസമായി തുടങ്ങിയിട്ടുമുണ്ട്. താത്കാലിക ഡിവൈഡറുകളിൽ വാഹനമിടിച്ചു കേടുപാടുകൾ സംഭവിച്ചുതുടങ്ങി. മഴ പെയ്താൽ ഈമേഖലയിൽ അപകടങ്ങൾക്കു യാതൊരു കുറവുമില്ല. ഫണ്ടുകളുടെ അപര്യാപ്തയുടെ പേരിൽ റോഡ് നവീകരണവും മുടങ്ങിയിരിക്കുകയാണ്. ജനപ്രതിനിധികളെ ഉൾപ്പെടുത്തി യോഗംവിളിച്ച്‌ റോഡ്‌ അലൈൻമെന്‍റ് മാറ്റി പുതിയ റോഡ്‌ നിർമിക്കണമെന്ന ആവശ്യം ശക്തമായിട്ടുണ്ട്‌.

വയോധികൻ മരിച്ചനിലയിൽ

ചിറ്റൂർ: വയോധികനെ പുഴപ്പാലത്തിനു സമീപം മരത്തിൽ തൂങ്ങി മരിച്ചനിലയിൽ കണ്ടെത്തി. കല്യാണപ്പേട്ട നറണി ചാമിയുടെ മകൻ ചന്ദ്രൻ(65) ആണ് മരിച്ചത്. ഇന്നലെ വൈകുന്നേരം അഞ്ചിനാണ് സംഭവം. മിനാക്ഷിപുരം പോലീസ് ഇൻക്വസ്റ്റ് നടത്തി. ജില്ലാ ആശുപത്രി മോർച്ചറിയിലുള്ള മൃതദേഹം ഇന്ന് രാവിലെ പോസ്റ്റ്മോർട്ടം നടത്തും.

പതിനഞ്ചുകാരി മരിച്ചനിലയിൽ

ചിറ്റൂർ: നല്ലേപ്പിള്ളി ഒലവുംപൊറ്റ ശെൽവൻ-സജിത ദമ്പതികളുടെ മകൾ എസ്. സമൃത(15)യെ വീടിനകത്ത് തൂങ്ങി മരിച്ചനിലയിൽ കണ്ടെത്തി. ഇന്നലെ ഉച്ചയ്ക്കാണ് സംഭവം. ആശാരി പണിക്കാരനാണ് ദമ്പതിമാർ എരുത്തേമ്പതിയിലെ സ്വകാര്യ കമ്പനിയിലെ ജീവനക്കാരാണ്. ഇന്നലെ പതിവുപോലെ ജോലിക്ക് പോയ ശെൽവൻ മറ്റൊരു ആവശ്യത്തിനായി വീട്ടിൽ തിരിച്ചെത്തിയപ്പോൾ മുൻവശത്തെ വാതിൽ അകത്തുനിന്ന് കുറ്റിയിട്ട നിലയിലായിരുന്നു. അടുക്കളവാതിൽ തുറന്നതിനാൽ അതിലൂടെ അകത്തുകയറി നോക്കിയപ്പോഴാണ് വീട്ടിലെ കിടപ്പുമുറിയിൽ തൂങ്ങി മരിച്ചനിലയിൽ സമൃതയെ കണ്ടെത്തിയത്. നല്ലേപ്പിള്ളി ശ്രീകൃഷ്ണ സ്കൂളിൽ പത്താം ക്ലാസ് പൂർത്തികരിച്ചതാണ്. ചിറ്റൂർ പോലീസ് ഡോഗ് സ്ക്വാഡ്, വിരളടയാള വിദഗ്ദ്ധർ, സയിറ്റിഫിക് അസിസ്റ്റന്‍റ് എന്നിവർ തെളിവെടുപ്പ് നടത്തി. മൃതദേഹം ജില്ലാ ആശുപത്രിയിൽ. സഹോദരി: സംഗീത.

മീറ്റ്ന തടയണയുടെ ഷട്ടറുകൾ ഉയർത്താനായില്ല; മഴ ശക്തമായാൽ വെള്ളപ്പൊക്ക ഭീഷണി

ഒറ്റപ്പാലം: ഭാരതപ്പുഴയിൽ നീരൊഴുക്ക് ശക്തം, മഴ ശക്തമായാൽ പരിസരപ്രദേശങ്ങളിലേക്ക് വെള്ളംകയറുമെന്ന് ആശങ്ക. മഴ തത്കാലത്തേക്ക് വിട്ടുനിൽക്കുന്നുണ്ടെങ്കിലും ശക്തമായ കാലവർഷം വരാനിരിക്കുകയാണ്. മീറ്റ്‌ന തടയണയിലെ ഷട്ടറുകൾ തുറക്കാനാവാത്തത് വെള്ളപ്പൊക്ക ഭീഷണി വർധിപ്പിക്കുന്നുണ്ട്. മഴ നേരത്തേയെത്തി ഷട്ടറുകളുള്ള ഭാഗത്ത് വെള്ളം നിറഞ്ഞതോടെയാണ് തുറക്കാനാകാത്ത സ്ഥിതിവന്നത്. ഇതുമൂലം നിയന്ത്രണാതീതമായി മഴവന്നാൽ വെള്ളം സമീപപ്രദേശങ്ങളിലേക്ക് കയറുമോയെന്നതാണ് ആശങ്ക. മഴക്കാലം അവസാനിക്കുന്നതോടെയാണ് മീറ്റ്‌ന തടയണയിലെ 26 ഷട്ടറുകൾ അടയ്ക്കാറുള്ളത്. വേനലിലേക്ക് കുടിവെള്ളവിതരണത്തിനായി സംഭരിക്കുക ലക്ഷ്യമിട്ടാണ് ഒക്ടോബറോടെ ഷട്ടർ അടയ്ക്കുക. ശേഷം വേനലിൽ ഒറ്റപ്പാലം നഗരസഭയിലേക്കും അമ്പലപ്പാറ പഞ്ചായത്തിലേക്കുമുള്ള കുടിവെള്ളവിതരണം ഇതുപയോഗിച്ച് നടത്തും. മറ്റ് പഞ്ചായത്തുകളിൽ ടാങ്കറിൽ വെള്ളമെത്തിക്കുന്നതിനും ഈ തടയണയെയാണ് ആശ്രയിക്കാറുള്ളത്. അതിനുശേഷം കാലവർഷം തുടങ്ങിയാൽ ജൂണിൽ ഷട്ടറുകൾ തുറക്കും. ചെളിയുൾപ്പെടെ ഒഴുക്കിക്കളഞ്ഞാണ് ഉപയോഗിക്കാറുള്ളത്. എന്നാൽ ഇത്തവണ പതിവിന് വിപരീതമായി മേയ്മാസത്തിൽ തന്നെ മഴ സജീവമായതോടെ തടയണ നിറഞ്ഞു. ഇതോടെ ജല അഥോറിറ്റിക്ക് തടയണയുടെ ഷട്ടറുകൾ ഉയർത്താനാകാതെ വന്നതാണ് പ്രതിസന്ധിയായത്. നിലവിൽ തടയണയും പരമാവധി സംഭരണശേഷിയും കവിഞ്ഞ് വെള്ളം ഒഴുകുന്ന സ്ഥിതിയാണ്. 2018ൽ പ്രളയകാലത്തും തടയണയുടെ ഷട്ടറുകൾ തുറക്കാനായിരുന്നില്ല. ഇതുമൂലം കൊണ്ടാഴി ഭാഗത്തും മീറ്റ്‌ന ഭാഗത്തേക്കും തടയണയിൽനിന്ന് വെള്ളം കയറുന്ന സ്ഥിതിയുണ്ടായിരുന്നു. കെഎസ്ഇബിയുടെ ട്രാൻസ്‌ഫോമറുൾപ്പെടെ വെള്ളത്തിലായിരുന്നു. തടയണയുടെ 20 ഷട്ടറുകളുടെ ആദ്യഭാഗം ഉയർത്താൻ നടപടി തുടങ്ങിയിരുന്നുവെന്നും എന്നാൽ അപ്പോഴേക്കും മഴ ശക്തമായെന്നും ജല അഥോറിറ്റി അധികൃതർ പറഞ്ഞു. മഴ അല്പം ഒന്ന് പിൻവാങ്ങിയാൽ തടയണയുടെ ഷട്ടറുകൾ ഏതുവിധേനയും ഉയർത്താൻ ഉള്ള ശ്രമത്തിലാണ് അധികൃതർ.

തൃശൂർ -പാലക്കാട് ദേശീയപാതയിൽ പതിനഞ്ചിടത്ത് നിർമാണപ്രവൃത്തികൾ

വടക്കഞ്ചേരി: തൃശൂർ - പാലക്കാട് ദേശീയപാതയിൽ പതിനഞ്ചിടത്ത് ഒരേസമയം നിർമാണപ്രവൃത്തികൾ നടക്കുന്നത് ഗതാഗതകുരുക്കിനും അപകടങ്ങൾക്കും കാരണമാകുന്നു. ദേശീയപാതയിൽ ഉണ്ടാകേണ്ട യാത്രാസൗകര്യം പാതയിൽ ഇല്ലാത്ത സാഹചര്യത്തിൽ പന്നിയങ്കരയിലെ ടോൾപിരിവ് താത്കാലികമായി നിർത്തിവയ്ക്കണമെന്നാണ് യാത്രക്കാർ ആവശ്യപ്പെടുന്നത്. അന്യസംസ്ഥാനങ്ങളിലേക്ക് പോകുന്ന ദൂരയാത്ര വാഹനങ്ങൾക്കാണ് കുരുക്കുകൾ ഏറെ ബുദ്ധിമുട്ടുണ്ടാക്കുന്നത്. തൃശൂർ മണ്ണുത്തിയിൽ നിന്നും പാലക്കാട്ടേക്ക് യാത്ര തുടങ്ങിയാൽ 65 കിലോമീറ്റർ വരുന്ന ദേശീയപാതയിൽ മുടിക്കോടും കല്ലിടുക്കിലും വാണിയംപാറയിലും മേൽപ്പാല നിർമാണമാണ്. ഇവിടെയെല്ലാം സർവീസ്റോഡിലൂടെ ഒറ്റവരിയായാണ് വാഹനങ്ങൾ കടത്തിവിടുന്നത്. വടക്കഞ്ചേരിവരെയും പലയിടത്തും അറ്റകുറ്റപണികൾ നടക്കുന്നുണ്ട്. കുത്തിപ്പൊളിച്ച് സ്ഥിരമായി അറ്റകുറ്റപ്പണി നടക്കുന്ന വടക്കഞ്ചേരി മേൽപ്പാലവും കടന്ന് മംഗലത്ത് എത്തിയാലും നിയന്ത്രണമുണ്ട്. ഇവിടെ പാലത്തിലൂടെയുള്ള വാഹനഗതാഗതം പൂർണമായും നിരോധിച്ചാണ് കുത്തിപ്പൊളിക്കൽ തകൃതിയായി നടക്കുന്നത്. പാലത്തിലെ നാല് വലിയ സ്ലാബുകളുടെയും ജോയിന്‍റുകളും കുത്തിപ്പൊളിച്ച് ബലപ്പെടുത്തുന്ന പണികളാണ് നടക്കുന്നത്. ഈ പണികൾ പൂർത്തിയായി ഗതാഗതം പുനഃസ്ഥാപിക്കാൻ ഇനി ആഴ്ചകളേറെയെടുക്കും. ഇവിടെ തൃശൂർ ലൈനിലൂടെയാണ് വാഹനങ്ങൾ ഒറ്റവരിയായി കടത്തിവിടുന്നത്. ആലത്തൂർ സ്വാതി ജംഗ്ഷനിലും കുഴൽമന്ദത്തുമെല്ലാം നിർമാണപ്രവൃത്തികളുണ്ട്. ഈ വാഹന കുരുക്കുകൾക്കു പുറമെ സിഗ്നലുകളും കടന്നുവേണം ദൂരയാത്രികർക്ക് മുന്നോട്ട് പോകാൻ. xലക്കാട് നിന്നും തൃശൂരിലേക്ക് പോകുമ്പോഴും ഇതേ ദുരിതയാത്ര തന്നെയാണ്. പാതനിർമാണ സമയത്ത് മതിയായ പരിശോധന നടക്കാത്തതിന്‍റെ ദുരിതമാണ് ഇപ്പോൾ യാത്രക്കാർ അനുഭവിക്കേണ്ടി വരുന്നത്. ടോൾപിരിവ് തുടങ്ങാനുള്ള തിടുക്കത്തിൽ തോന്നുംമട്ടിൽ പണികൾ നടത്തി പിന്നീട് എല്ലാം തകരുന്ന സ്ഥിതിയായി.

പനംകുറ്റിയിൽ വിളകളൊന്നും ശേഷിപ്പിക്കാതെ കാട്ടാനകളുടെ വിളയാട്ടം

വടക്കഞ്ചേരി: കിഴക്കഞ്ചേരി പനംകുറ്റി പ്രദേശത്ത് സ്ഥിരമായി കാട്ടാനക്കൂട്ടമിറങ്ങി വ്യാപകമായി വിളകൾ നശിപ്പിക്കുമ്പോഴും വനംവകുപ്പിന്‍റെ നിഷ്ക്രിയത്വത്തിനെതിരെ പ്രതികരിക്കാതെ ഭരണ -പ്രതിപക്ഷ രാഷ്ട്രീയ പാർട്ടികൾ. ഓരോദിവസവും രാവിലെ തോട്ടങ്ങളിൽ ചെല്ലുമ്പോൾ വേദനിപ്പിക്കുന്ന കാഴ്ചകളാണ് പനംകുറ്റിയിലെ തോട്ടങ്ങളിലെല്ലാം. തെങ്ങുകളെല്ലാം കൂട്ടത്തോടെ തള്ളിയിട്ടാണ് ആനകളുടെ വിളയാട്ടം. നൂറുകണക്കിന് വാഴയുണ്ടായിരുന്ന തോട്ടത്തിൽ ഇപ്പോൾ വാഴ ഇല്ലാതായെന്ന് പനംകുറ്റിയിൽ സ്ഥിരമായി ആനയെത്തുന്ന തോട്ടത്തിന്‍റെ ഉടമയായ ചെറുനിലം ജോണി പറഞ്ഞു. കഴിഞ്ഞദിവസം രാത്രിയും ആനയെത്തി ശേഷിച്ച വാഴകൾ കൂടി നശിപ്പിച്ചു. ജാതിമരങ്ങളും കുരുമുളകുകൊടികളും നശിപ്പിച്ചിട്ടുണ്ട്. പകലന്തിയോളം അധ്വാനിച്ചുണ്ടാക്കുന്ന കൃഷിയെല്ലാം രാത്രിയിൽ ആനകളെത്തി നശിപ്പിക്കും. ഇത് തുടരുകയാണ്. യുദ്ധക്കളം പോലെയാക്കുന്ന കൃഷിയിടത്തിലെ കാഴ്ചകൾ കണ്ടുനിൽക്കാൻ പോലും കഴിയുന്നില്ലെന്ന് കർഷകർ പറയുന്നു. വനംവകുപ്പിന്‍റെ ഈ അനാസ്ഥയ്ക്കെതിരെ രാഷ്ട്രീയ പാർട്ടികളോ സംഘടനകളോ രംഗത്ത് വരാത്തതും കർഷകരെ വിഷമിപ്പിക്കുന്നുണ്ട്. തുണയായി നിൽക്കേണ്ടവർപോലും തിരിഞ്ഞുനോക്കുന്നില്ലെന്ന പരാതിയാണ് കർഷകർ പങ്കുവയ്ക്കുന്നത്.

പറന്പിക്കുളത്തെ ദേശീയ മാതൃകയാക്കാവുന്ന ആദിവാസി മേഖലയാക്കി വളർത്തും: കെ. ശാന്തകുമാരി എംഎൽഎ

പാലക്കാട്: പറന്പിക്കുളത്തെ ദേശീയ മാതൃകയാക്കാവുന്ന തരത്തിലുള്ള ആദിവാസി മേഖലയാക്കി വളർത്തുമെന്ന് കേരള നിയമസഭാ പട്ടികജാതി-പട്ടികവർഗക്ഷേമ സമിതി ചെയർപേഴ്സണ്‍ കെ. ശാന്തകുമാരി എംഎൽഎ. ജില്ലയിലെ പട്ടികജാതി,പട്ടികവർഗ ക്ഷേമം സംബന്ധിച്ച് നിയമസഭ പട്ടികജാതി-പട്ടികവർഗ ക്ഷേമസമിതി പറന്പിക്കുളം ആനപ്പാടിയിലെ വനം വകുപ്പ് ഇൻഫർമേഷൻ സെന്‍ററിൽ നടത്തിയ വിവിധ വകുപ്പുകളുടെ അവലോകനയോഗത്തിൽ സംസാരിക്കുകയായിരുന്നു ചെയർപേഴ്സണ്‍. എല്ലാമേഖലയിലും പട്ടിക വർഗ വിഭാഗത്തെ മുന്നോട്ട് കൊണ്ടുവരാനുള്ള ഇടപെടൽ ഉണ്ടാവണമെന്നും ഇതിനായി ഉദ്യോഗസ്ഥർ പ്രയത്നിക്കണമെന്നും എംഎൽഎ അറിയിച്ചു. ഉന്നതികളിൽ ലഹരിവിരുദ്ധ ബോധവത്കരണപരിപാടികൾ നടത്തുന്നുണ്ടെന്ന് എക്സൈസ് വകുപ്പ് പറഞ്ഞു. ഇതിനായി ഉന്നതികൾ കേന്ദ്രീകരിച്ച് ജനകീയ സമിതി രൂപീകരിക്കണമെന്ന് സമിതി നിർദേശിച്ചു. ആറ് ഉന്നതികളിലായി ഇക്കോ ഡെവലപ്മെന്‍റ് കമ്മിറ്റികൾ പ്രവർത്തിക്കുന്നുണ്ട്. ആദിവാസികൾ നിർമിക്കുന്ന കരകൗശലവസ്തുക്കളും തേൻ, കുന്തിരിക്കം, കൂവപ്പൊടി തുടങ്ങി വിവിധ സാമഗ്രികളും ഇക്കോ ഷോപ്പുകൾവഴി വില്പന നടത്തുന്നതിലൂടെ ഇവർക്ക് വരുമാനം ലഭിക്കുന്നുണ്ടെന്നും വനംവകുപ്പ് ഉദ്യോഗസ്ഥൻ പറഞ്ഞു. തനത് ഉത്പന്നങ്ങൾ പ്രോത്സാഹിപ്പിക്കുന്നത്തിനായി പരിശീലന പരിപാടികൾ സംഘടിപ്പിക്കുന്നുണ്ടെന്നും മീൻപിടുത്തക്കാരായ പട്ടികവർഗക്കാരെ ഇക്കോ ഡെവലപ്മെന്‍റ് കമ്മിറ്റികളിൽ ഉൾപ്പെടുത്തി ആനുകൂല്യം അനുവദിക്കാനുള്ള നടപടിയുണ്ടാവുമെന്നുംവനംവകുപ്പ് ഉദ്യോഗസ്ഥർ പറഞ്ഞു. ഏറ്റവുംകൂടുതൽ ജൈവ കുരുമുളക് കൃഷിയുള്ള മേഖല പറന്പിക്കുളത്തെ പൂപ്പാറയാണെന്നും 2023 ൽ സംസ്ഥാനത്തെ ജൈവകൃഷിക്കുള്ള അവാർഡ് പൂപ്പാറ ഉന്നതിയിലുള്ള കുരുമുളക്കൃഷിക്ക് ലഭ്യമായെന്നും കൃഷിവകുപ്പ് അറിയിച്ചു. പൂപ്പാറ കുരുമുളക് കേരള അഗ്രോ ബ്രാൻഡിംഗിൽ കൊണ്ടുവരണമെന്നും കൃഷി വകുപ്പ് ആവശ്യപ്പെട്ടു. സമിതിഅംഗം കടകംപള്ളി സുരേന്ദ്രൻ, എംഎൽഎ മാരായ പി.പി. സുമോദ്, കെ. ബാബു എന്നിവരും പങ്കെടുത്തു.

കൊല്ലങ്കോട്ട് വീണ്ടും പുലി നായയെ കൊന്നു; നാട്ടുകാർ ഭീതിയിൽ

കൊല്ലങ്കോട്: ആറുമാസത്തെ ഇടവേളക്കുശേഷം കൊല്ലങ്കോട് പഞ്ചായത്ത് പ്രദേശത്ത് പുലിയിറങ്ങി നായയെ കൊന്നു. പാലയം കോട് ബാലന്‍റെ കാണാതായ നായയുടേതെന്ന് കരുതുന്ന അവശിഷ്ടവും വനപാലകർ കണ്ടെത്തി. പ്രദേശത്ത് പുലിയുടെ കാൽപാദത്തിന്‍റെ അടയാളങ്ങളും കണ്ടെത്തിയിട്ടുണ്ട്. കൊല്ലങ്കോട് ഗ്രാമപഞ്ചായത്ത് പ്രസിഡന്‍റ് കെ. സത്യപാലും പഞ്ചായത്തംഗങ്ങളും സ്ഥലത്തെത്തി അന്വേഷിച്ച് വിവരം നൽകിയതിന്‍റെ അടിസ്ഥാനത്തിൽ ചെറുകാൽ, ചേകോൽ ഭാഗത്ത് കാമറ സ്ഥാപിക്കാൻ നടപടി സ്വീകരിച്ചു. ആറുമാസം മുൻപ് ഈ സ്ഥലത്ത് നാട്ടുകാർ പല തവണ പുലിക്ക് സമീപം എത്തിരക്ഷപ്പെട്ട സംഭവം നടന്നിരുന്നു. പ്രഭാതസമയത്ത് പത്രവിതരണത്തിനു പോയ ഏജന്‍റും പുലിയെ നേരിൽ കണ്ടെത്തിയിരുന്നു. തുടർന്ന് വനംവകുപ്പ് സ്ഥലത്ത് കാമറകൾ സ്ഥാപിച്ച് ഒരു മാസത്തോളം തെരച്ചിൽ നടത്തിയിട്ടും പുലിയെ കണ്ടെത്തിയില്ല. ഈ സമയത്ത് അപ്രത്യക്ഷമായ പുലിയാണ് ഇപ്പോൾ വീണ്ടും പ്രത്യക്ഷപ്പെട്ടിരിക്കുന്നത്. വനംവകുപ്പ് പ്രദേശത്ത് പട്രോളിംഗ് ആരംഭിച്ചിട്ടുണ്ട്. കാമറയിൽ പുലിയുടെ സഞ്ചാരം കണ്ടെത്തിയാലേ കൂടുസ്ഥാപിക്കാൻ കഴിയൂ എന്ന് വനപാലകർ അറിയിച്ചു.

പരിസ്ഥിതിദിനം വ്യത്യസ്തമാക്കാനൊരുങ്ങി കുടുംബശ്രീ ജില്ലാ മിഷൻ

പാലക്കാട്: സുസ്ഥിര വികസന ലക്ഷ്യങ്ങളിൽ ഏറെ പ്രാധാന്യമുള്ള പുനരുപയോഗത്തിന്‍റെ വലിയ സന്ദേശം നൽകുന്ന സ്വാപ്പ് ഷോപ് കൂടുതൽ വിപുലമാക്കാനും സംരംഭതലത്തിലേക്ക് വികസിപ്പിക്കാനുമുള്ള പ്രവർത്തനങ്ങൾ നടന്നുവരികയാണ്. ഇതിന്‍റെ ഭാഗമായി ഈ വരുന്ന പരിസ്ഥിതി ദിനത്തിൽ പാലക്കാട് കുടുംബശ്രീ ജില്ലാ മിഷൻ കാന്പയിൻ സംഘടിപ്പിക്കുന്നു. പുനരുപയോഗം, ഉത്പന്നങ്ങളുടെ പരമാവധി ഉപയോഗം എന്നിവ പരിസ്ഥിതിക്ക് ഏറെ ഗുണമാകുന്നു എന്ന കാര്യം കൂടുതൽ ജനകീയമാക്കുകയാണ് ഈ കാന്പയിൻ വഴി ലക്ഷ്യമിടുന്നത്. മറ്റൊരാൾ ഉപയോഗിച്ച ഉപയോഗയോഗ്യമായ വസ്ത്രങ്ങൾ, ബാഗ്, ചെരുപ്പ്, ആഭരണങ്ങൾ, ഇലക്ട്രോണിക് ഉപകരണങ്ങൾ തുടങ്ങിയവ ഉപയോഗിച്ചുകൊണ്ടാണ് കുടുംബശ്രീ ജില്ലാമിഷൻ കാന്പയിന്‍റെ ഭാഗമാകുന്നത്. ജീവനക്കാർ ഉത്പന്നങ്ങൾ ജില്ലാമിഷനിൽ എത്തിച്ചും കൈമാറിയും പ്രവർത്തനങ്ങൾക്ക് തുടക്കം കുറിച്ചു.

ലോക പരിസ്ഥിതിദിനം ജില്ലാതല ഉദ്ഘാടനം മന്ത്രി കെ. കൃഷ്ണൻകുട്ടി നിർവഹിക്കും

പാലക്കാട്: ലോക പരിസ്ഥിതി ദിനാചരണത്തോടനുബന്ധിച്ച് ഒരു തൈ നടാം പനപർവ്വം പദ്ധതിയുടെ ജില്ലാതല ഉദ്ഘാടനം ഇന്ന് മന്ത്രി കെ. കൃഷ്ണൻകുട്ടി നിർവഹിക്കും. ജില്ലാ പഞ്ചായത്ത് ഹാളിൽ നീർധാര പദ്ധതിയുടെ ഉദ്ഘാടനത്തോടനുബന്ധിച്ചാണ് ലോക പരിസ്ഥിതിദിനാചരണ ഉദ്ഘാടനം നടക്കുക. ഗവ. വിക്ടോറിയ കോളജിലെ വിദ്യാർഥികൾ ശേഖരിച്ച കരിന്പനകളുടെ വിത്ത് മന്ത്രിക്ക് കൈമാറിയാണ് ഉദ്ഘാടനം നിർവഹിക്കുന്നത്. ഈ കരിന്പനകളുടെ വിത്തുകൾ ജില്ലാ പഞ്ചായത്തിന്‍റെ അധീനതയിലുള്ള പ്രദേശങ്ങളിൽ നട്ട് പരിപാലിക്കും. വൃക്ഷവത്കരണ കാന്പയിനു തുടക്കം ഹരിതകേരളം മിഷന്‍റെ നേതൃത്വത്തിൽ വൃക്ഷത്തൈകൾ നട്ടുപിടിപ്പിക്കുന്ന ഒരു തൈ നടാം ജനകീയ വൃക്ഷവത്കരണ കാന്പയിനും ജില്ലയിൽ ഇന്ന് തുടക്കംകുറിക്കും. ഹരിതകേരളം മിഷൻ 2019 മുതൽ നടപ്പിലാക്കി വരുന്ന പച്ചത്തുരുത്ത് പദ്ധതിയെ കൂടുതൽ ഇടങ്ങളിലേക്ക് വ്യാപിപ്പിക്കുന്നതിനോടൊപ്പം സമഗ്ര വൃക്ഷവത്കരണ പ്രവർത്തനവും ലക്ഷ്യമിട്ട് സെപ്റ്റംബർ 30 വരെയാണ് ഒരു തൈ നടാം കാന്പയിൻ. അപൂർവവും വംശനാശഭീഷണി നേരിടുന്നതുമായ വൃക്ഷങ്ങളുടെ തൈകൾ നട്ടുപിടിപ്പിക്കുന്നതിൽ കാന്പയിൻ പ്രത്യേകം ശ്രദ്ധ നൽകും. വിദ്യാർഥികൾ, കുടുംബശ്രീ പ്രവർത്തകർ, തൊഴിലുറപ്പ് തൊഴിലാളികൾ, ഹരിതകർമസേനാംഗങ്ങൾ, ജീവനക്കാർ, റസിഡന്‍റ്സ് അസോസിയേഷനുകൾ, ആരാധനാലയങ്ങൾ, വായനശാലകൾ, സാമൂഹ്യ രാഷ്ടീയ സംഘടനകൾ തുടങ്ങി സമസ്ത ജനവിഭാഗങ്ങളെയും പങ്കെടുപ്പിച്ചാണ് കാന്പയിൻ സംഘടിപ്പിക്കുന്നത്. കൃഷിവകുപ്പിന്‍റെ ഫലവൃക്ഷത്തെ വിതരണം ലോക പരിസ്ഥിതിദിനത്തോടനുബന്ധിച്ച് പഞ്ചായത്തുകൾക്കും സ്കൂളുകൾക്കും കൃഷികർഷകക്ഷേമവകുപ്പ് ഫലവൃക്ഷത്തൈകൾ നൽകും. കൃഷിവകുപ്പിൽ നിന്നും അഞ്ച് ഫലവൃക്ഷത്തൈകൾ വീതമാണ് സ്കൂളുകളിലേക്കും പഞ്ചായത്തുകളിലേക്കും നൽകുന്നത്. ജില്ലയിൽ കൃഷിവകുപ്പിന് കീഴിലുള്ള ഒന്പത് ഫാമുകളിൽ നിന്നുമാണ് അതത് മേഖലകളിലെ സ്കൂളുകളിലേക്കും പഞ്ചായത്തുകളിലേക്കും ഫലവൃക്ഷത്തൈകൾ എത്തിക്കുന്നത്.

വടക്കന്തറ താമരക്കുളത്തിനു വേണം നല്ലൊരു സംരക്ഷണഭിത്തി

പാലക്കാട്: വടക്കന്തറ താമരക്കുളത്തിന്‍റെ ജീർണാവസ്ഥ പരിഹരിക്കണമെന്നും ചെളി നീക്കംചെയ്തു ചുറ്റുമതിൽകെട്ടി കുളം സംരക്ഷിക്കണമെന്നും ആവശ്യം ശക്തമാകുന്നു. കഴിഞ്ഞ ദിവസം പരിസരത്തെ കുട്ടി കുളത്തിൽ അകപ്പെട്ടിരുന്നു. ഭാഗ്യംകൊണ്ടാണു രക്ഷപ്പെട്ടത്. വർഷങ്ങൾക്കുമുന്പും ഇത്തരത്തിൽ ചെറിയൊരു കുട്ടി അപകടത്തിൽപ്പെട്ടതായി നാട്ടുകാർ ഓർക്കുന്നു. പിന്നീട് സർക്കാറിനും ദേവസ്വത്തിനും നിരന്തരമായി നാട്ടുകാർ പരാതി നൽകിയിരുന്നു. തുടർന്ന് പാലക്കാട് നഗരസഭ അമൃത് പദ്ധതിയിൽ ഉൾപ്പെടുത്തി നവീകരണപ്രവൃത്തി നടക്കുന്നുണ്ടെങ്കിലും പൂർണമായും ചെളിനീക്കംചെയ്തു ചുറ്റുമതിൽ എല്ലാവശവും കെട്ടിയുള്ള പ്രവർത്തനമല്ല നടക്കുന്നതെന്നു നാട്ടുകാർ പറയുന്നു. കുളത്തിലെ സംരക്ഷണവേലി അഴിച്ചത് അപകടത്തിനു വഴിയൊരുക്കുന്നുവെന്നും അധികൃതർ അടിയിന്തരമായി ഇടപെട്ട് കുട്ടികളുടെ സംരക്ഷണം ഉറപ്പുവരുത്തണമെന്നും ആവശ്യപ്പെട്ടു നാട്ടുകാർ രംഗത്തെത്തിയിട്ടുണ്ട്. ഇതുസംബന്ധിച്ച് തദ്ദേശസ്വയംഭരണ വകുപ്പിനും മലബാർ ദേവസ്വംബോർഡിനും പരിസരവാസികൾ പരാതി അയച്ചിട്ടുമുണ്ട്. നിലവിൽ കുളത്തിന്‍റെ മൂന്നുഭാഗം മാത്രം കെട്ടാനാണ് കരാർ അനുവദിച്ചിരിക്കുന്നത്. കുളത്തിനുള്ളിൽ ചെളിയും കരിങ്കൽതൂണുകളടക്കം പലതും കിടക്കുന്നുണ്ടെങ്കിലും മാറ്റാൻ കരാർ നൽകിയിട്ടില്ലെന്നും സൂചനയുണ്ട്. ലക്ഷങ്ങൾ പൊടിപൊടിച്ചുള്ള നവീകരണത്തിൽ അന്വേഷണം വേണമെന്നും നാട്ടുകാർ ആവശ്യപ്പെട്ടു.

അളുവശേരിയിലെ ഉണക്കമരം മുറിച്ചുമാറ്റി; വാഹനയാത്രികർക്ക് ആശ്വാസം

നെന്മാറ: നെന്മാറ- പോത്തുണ്ടി റോഡിൽ അളുവശേരി കുരിശുപള്ളിക്കുസമീപം അപകടകരമായിനിന്ന ഉണക്കമരം മുറിച്ചുമാറ്റി. കഴിഞ്ഞദിവസം കെ. ബാബു എംഎൽഎ യുടെ നേതൃത്വത്തിൽ ദുരന്തനിവാരണ അവലോകനയോഗത്തിൽ പൊതുമരാമത്ത് അധികൃതരോടു മരം മുറിച്ചുനീക്കാൻ ആവശ്യപ്പെട്ടിരുന്നു. നെല്ലിയാമ്പതി ഉൾപ്പെടെ വിവിധ ഭാഗങ്ങളിലേക്കു പോകുന്ന റോഡരികിലെ ഉണങ്ങിയ പാലമരമാണ് പൊതുമരാമത്ത് അധികൃതർ വെട്ടിമാറ്റിയത്. മരം മുറിച്ചു മാറ്റുന്നതിന്‍റെ ഭാഗമായി വൈദ്യുതി ലൈനും, നെറ്റ് വർക്ക്, കേബിൾ ടിവി എന്നിവ അഴിച്ചുമാറ്റിയതിനെ തുടർന്ന് നാലുമണിക്കൂറോളം മേഖലയിൽ വൈദ്യുതി, നെറ്റ്‌വർക്ക് ബന്ധം തടസപ്പെട്ടു. രണ്ടുമണിക്കൂറോളം ഇടവേളയിൽ ഗതാഗതവും നിർത്തിവച്ചിരുന്നു. പോത്തുണ്ടിറോഡിൽ വിവിധ ഭാഗങ്ങളിലായി ഇതുകൂടാതെ പത്തോളം ഉണങ്ങിയ മരങ്ങൾ പലയിടത്തായി അപകടഭീഷണി ഉയർത്തിനിൽക്കുന്നുണ്ടെന്നു വാഹനയാത്രക്കാർ പരാതിപ്പെട്ടു.

പതിനഞ്ചുവർഷത്തിനുശേഷം സുന്ദരിയാകാനൊരുങ്ങി കടുക്കാംകുന്നം റെയിൽവേ മേൽപ്പാലം

മലമ്പുഴ: കേരളത്തിലെ പ്രധാന വിനോദസഞ്ചാര കേന്ദ്രത്തിലേക്കു പോകുന്ന മുഖ്യറോഡിലെ കടുക്കാംകുന്നം റെയിൽവേ മേൽപ്പാലം സുന്ദരിയാകാനൊരുങ്ങി. പാലംപണി പൂത്തിയായി പതിനഞ്ചുവർഷങ്ങൾ പിന്നിടുമ്പോഴാണ് പെയിന്‍റിംഗ് വർക്കുകൾ ആദ്യമായി നടത്തുന്നതെന്നു പരിസരവാസികൾ പറഞ്ഞു. പാലത്തിനടിയിൽ സാമൂഹ്യ വിരുദ്ധർ മാലിന്യംതള്ളുന്നത് സ്ഥിരംപതിവാണ്. ചപ്പുചവറുകൾ ഇട്ടുകത്തിക്കുമ്പോഴുണ്ടാകുന്ന പുകപടലങ്ങൾ പരിസരവാസികൾക്കും ഇതുവഴിപോകുന്ന യാത്രക്കാർക്കും പ്രശ്നങ്ങൾ സൃഷ്ടിക്കാറുണ്ട്. ഇതിനെല്ലാം തടയിടാനാണ് പുതിയ മിനുക്കുപണികളെന്നും സൂചനയുണ്ട്. മാലിന്യം തള്ളുന്നവരെ കണ്ടുപിടിക്കാൻ കാമറ സ്ഥാപിക്കണമെന്നാവശ്യപ്പെട്ട് പരിസരവാസികളായ മുപ്പതോളംപേർ ഒപ്പിട്ട അപേക്ഷ പഞ്ചായത്തിൽ സമർപ്പിച്ചിരുന്നതായി പൊതുപ്രവർത്തകൻ ജയജിത്ത് പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]