ADVERTISEMENT

ADVERTISEMENT

അസംപ്ഷന്‍ കോളജില്‍ ബിരുദദാന ചടങ്ങ് ഇന്ന്

ചങ്ങനാശേരി: അസംപ്ഷന്‍ ഓട്ടോണമസ് കോളജില്‍ വിവിധ യുജി, പിജി കോഴ്‌സുകള്‍ പാസായ വിദ്യാര്‍ഥിനികള്‍ക്ക് ബിരുദദാന ചടങ്ങ് ഇന്നു രാവിലെ പത്തിനു നടക്കും. കോളജ് ഇന്‍ഡോര്‍ സ്റ്റേഡിയത്തില്‍ നടക്കുന്ന സമ്മേളനത്തില്‍ കോളജ് മാനേജര്‍ മോണ്‍. ആന്‍റണി എത്തയ്ക്കാട്ട് അധ്യക്ഷത വഹിക്കും. ഹയര്‍ എഡ്യൂക്കേഷന്‍ പ്രിന്‍സിപ്പല്‍ സെക്രട്ടറി ഡോ. ശര്‍മിള മേരി ജോസഫ് ഉദ്ഘാടനം ചെയ്യും.

പൂര്‍വ വിദ്യാര്‍ഥിനിയും 2024ലെ സിവില്‍ സര്‍വീസ് 569-ാം റാങ്ക് ജേതാവുമായ വി. ഹേമയെ സമ്മേളനത്തില്‍ ആദരിക്കും. ജോബ് മൈക്കിള്‍ എംഎല്‍എ മുഖ്യാതിഥി ആയിരിക്കും. പ്രിന്‍സിപ്പല്‍ ഡോ. റാണി മരിയ തോമസ്, വൈസ് പ്രിന്‍സിപ്പല്‍ ഡോ. ജിസി മാത്യു, വിദ്യാര്‍ഥി പ്രതിനിധി ഷൈന്‍ മരിയ ഷാജി എന്നിവര്‍ പ്രസംഗിക്കും.

ADVERTISEMENT

മോദിയുടെ ഖജാന്‍ജിയായി അദാനിയെ മാറ്റിയെടുത്തു: ആര്‍. രാജേന്ദ്രന്‍

ചങ്ങനാശേരി: മണ്‍മറഞ്ഞ ഇന്ത്യന്‍ നേതാക്കളെ സംഘപരിവാറിന്‍റെ പട്ടികയില്‍പ്പെടുത്താന്‍ കേന്ദ്ര ഭരണാധികാരികള്‍ ശ്രമിക്കുന്നതായും പ്രധാനമന്ത്രി മോദിയുടെ ഖജാന്‍ജിയായി അദാനിയെ മാറ്റിയെടുത്തിരിക്കുന്നതായും സിപിഐ സംസ്ഥാന എക്‌സിക്യുട്ടീവ് അംഗം ആര്‍. രാജേന്ദ്രന്‍. സിപിഐ ചങ്ങനാശേരി മണ്ഡലം സമ്മേളനത്തിന്‍റെ സമാപനത്തില്‍ പ്രസംഗിക്കുകയായിരുന്നു അദ്ദേഹം. മധ്യേഷ്യയിലുണ്ടായിരിക്കുന്ന യുദ്ധാന്തരീക്ഷം ഇന്ത്യക്ക് ആശങ്കാജനകമാണെന്ന് അദ്ദേഹം കൂട്ടിച്ചേര്‍ത്തു. ജില്ലാ സെക്രട്ടറി അഡ്വ. വി.ബി. ബിനു അധ്യക്ഷത വഹിച്ചു. ജില്ലാ എക്‌സിക്യൂട്ടീവ് അംഗങ്ങളായ ടി.എന്‍. രമേശന്‍, അഡ്വ. മാധവന്‍പിള്ള, ജോണ്‍ വി. ജോസഫ്, ഷേര്‍ലി ഹരികൃഷ്ണന്‍, എം.ആര്‍. രഘുദാസ്, കെ.ടി. തോമസ്, പി.എസ്. രാജേഷ്, കെ. രഞ്ജിത്, എം.കെ. രാജേന്ദ്രന്‍ എന്നിവര്‍ പ്രസംഗിച്ചു. മണ്ഡലം സെക്രട്ടറിയായി അഡ്വ.ജി. രാധാകൃഷ്ണനെ തെരഞ്ഞെടുത്തു.

തിരക്കേറിയ റോഡില്‍ മെറ്റില്‍ക്കൂനകളും വീപ്പകളും : പെരുമ്പനച്ചിയിലെ ഓട നിര്‍മാണം സുരക്ഷാ മാനദണ്ഡങ്ങള്‍ പാലിക്കാതെയെന്ന്

ചങ്ങനാശേരി: പെരുമ്പനച്ചിയില്‍ സുരക്ഷാ മാനദണ്ഡങ്ങള്‍ പാലിക്കാതെയുള്ള ഓട നിര്‍മാണം വാഹനങ്ങള്‍ക്കും കാല്‍നടയാത്രക്കാര്‍ക്കും അപകടഭീഷണിയാകുന്നതായി പരാതി. വാഴൂര്‍ റോഡിലെ പെരുമ്പനച്ചി മുതല്‍ പൂവത്തുംമൂട് വരെയുള്ള ഭാഗത്താണ് ഓടനിര്‍മാണം നടക്കുന്നത്. ഓട നിര്‍മാണത്തിനായുള്ള മെറ്റില്‍ക്കൂനകള്‍ തിരക്കേറിയ റോഡിന്‍റെ വശത്ത് അലക്ഷ്യമായി നിക്ഷേപിച്ചിരിക്കുന്നതാണ് അപകട കാരണമാകുന്നത്. രാത്രി വാഹനങ്ങള്‍ ഇതിലേക്ക് ഇടിച്ചു കയറി അപകടത്തില്‍പ്പെടാനും സാധ്യതയുണ്ട്. കഴിഞ്ഞദിവസം കനത്ത മഴയത്ത് ബൈക്കില്‍ ഇതു വഴിയെത്തിയ ദമ്പതികള്‍ റോഡരികില്‍ വച്ചിരുന്ന വീപ്പയില്‍ തട്ടി മറിഞ്ഞു വീണു. ഓടിക്കൂടിയ നാട്ടുകാരാണ് ഇവരെ രക്ഷിച്ചത്. വഴിവിളക്കുകളില്ലാത്തതിനാൽ രാത്രികാലങ്ങളില്‍ സ്ഥല പരിചയമില്ലാത്തവര്‍ വന്നാല്‍ ഓടയിലേക്ക് വീഴും. യാത്രക്കാരുടെ ശ്രദ്ധയ്ക്കായി റിഫ്‌ളക്ടര്‍ ടേപ്പുകളോ, റിബണോ, ബോര്‍ഡുകളോ ഒന്നും സ്ഥാപിച്ചിട്ടില്ല.

വെരൂര്‍ ഇന്‍ഡസ്ട്രിയല്‍ നഗറില്‍ റോഡിന്‍റെ വശങ്ങള്‍ ചെളിക്കുളം

ചങ്ങനാശേരി: ചങ്ങനാശേരി-വാഴൂര്‍ റോഡില്‍ വെരൂര്‍ ഇന്‍ഡസ്ട്രിയല്‍ നഗറില്‍ റോഡിന്‍റെ വശങ്ങളില്‍ വെള്ളക്കെട്ടും ചെളിയും നിറഞ്ഞു വാഹന സഞ്ചാരവും കാല്‍നട യാത്രയും ദുരിതമായി. എസ്‌റ്റേറ്റ് പടി ബസ്‌സ്റ്റോപ്പ് മുതല്‍ മൂന്നാംമൈല്‍ ബസ്‌സ്റ്റോപ്പ് വരെയുള്ള ഭാഗത്താണ് റോഡിന്‍റെ വശങ്ങള്‍ ചെളിക്കുളമായിരിക്കുന്നത്. വെരൂര്‍ പള്ളിയുടെ കുരിശടിക്കു മുമ്പില്‍ പൈപ്പ് അറ്റകുറ്റപ്പണിക്കായി ഫുട്പാത്തിലെ ടൈലുകള്‍ ഇളക്കിയ ഭാഗം പൂര്‍വസ്ഥിതിയില്‍ ആക്കിയിട്ടില്ല. ഇവിടത്തെ പെട്രോള്‍ പമ്പിന് എതിര്‍വശത്ത് റോഡരികില്‍ മുപ്പതുമീറ്ററോളം ദൂരത്തില്‍ വെള്ളംകെട്ടി നിൽക്കുന്നത് കാല്‍നടയാത്രക്കാര്‍ക്ക് ദുരിതമാകുന്നുണ്ട്. വേഗത്തിലെത്തുന്ന വാഹനങ്ങള്‍ യാത്രക്കാരുടെ ദേഹത്തേക്ക് ചെളിവെള്ളം തെറിപ്പിക്കുന്നതു പതിവാണ്. റോഡിന്‍റെ വശങ്ങളിലെ അനധികൃത വഴിവാണിഭങ്ങൾ വാഹനങ്ങള്‍ക്കും കാല്‍നടയാത്രക്കാര്‍ക്കും ബുദ്ധിമുട്ടാകുന്നുണ്ട്. റോഡരികിലെ ചിലമരങ്ങളും ചിലതിന്‍റെ കൂറ്റന്‍ ശാഖകളും അപകടഭീഷണി സൃഷ്ടിക്കുന്നതായും പരാതിയുണ്ട്.

കനത്ത മഴയില്‍ മണ്‍തിട്ട ഇടിഞ്ഞു, വീടിനു നാശം; ദുരന്തം ഒഴിവായി

മാമ്മൂട്: കനത്ത മഴയില്‍ മണ്‍തിട്ട ഇടിഞ്ഞുവീണു. വീടിനു നാശനഷ്ടം നേരിട്ടു. വന്‍ദുരന്തം ഒഴിവായി. കാല്‍നൂറ്റാണ്ട് മുമ്പ് മണ്ണു നീക്കം ചെയ്ത ഭാഗത്ത് അവശേഷിച്ച മണ്‍തിട്ടയാണ് ഇടിഞ്ഞു വീണത്. ഇന്നലെ പുലര്‍ച്ചെയാണ് സംഭവം. മാടപ്പള്ളി പഞ്ചായത്ത് എട്ടാംവാര്‍ഡില്‍ മാമ്മൂട് കാരയ്ക്കാട്ടുപടി-കുറ്റിക്കാട്ടുപടി റോഡിലാണ് സംഭവം. മണ്ണും കൂറ്റന്‍കല്ലുമാണ് ഇടിഞ്ഞുവീണത്. ചിറപ്പുരയിടത്തില്‍ ജോര്‍ജിന്‍റെ വീടിന്‍റെ വശത്തുള്ള ബാത്ത്‌റൂമും പൈപ്പ് ഫിറ്റിംഗുകളുമാണ് തകര്‍ന്നത്. അതേസമയം, അവശേഷിക്കുന്ന മൺതിട്ടയും അപകട ഭീഷണിയിലാണ്. ചുറ്റുപാടും താമസിക്കുന്നവരോട് മാറിത്താമസിക്കണമെന്ന് അധികൃതർ നിർദേശിച്ചിട്ടുണ്ട്. പഞ്ചായത്ത് പ്രസിഡന്‍റ് മണിയമ്മ രാജപ്പൻ, വാർഡ് മെംബർ ജി. അശോക് എന്നിവർ സ്ഥലം സന്ദർശിച്ചു.

കര്‍ഷകരുടെ പ്രശ്‌നങ്ങളില്‍ സര്‍ക്കാര്‍ ഇടപെടണം: കത്തോലിക്കാ കോണ്‍ഗ്രസ്

ചങ്ങനാശേരി: പ്രതികൂലമായ കാലാവസ്ഥയും വെള്ളപ്പൊക്കവും മൂലം കഷ്ടപ്പെടുന്ന കര്‍ഷകര്‍ക്ക് അവരുടെ നെല്ലിന്‍റെ വില നല്‍കാത്തത് പ്രതിഷേധാര്‍ഹമാണെന്നും അടിസ്ഥാന മേഖലയില്‍ തൊഴില്‍ ചെയ്യുന്ന കര്‍ഷകരെ അവരുടെ ന്യായമായ അവകാശങ്ങള്‍ക്കായിപ്പോലും സമരം ചെയ്യേണ്ട അവസ്ഥയിലേക്ക് സര്‍ക്കാര്‍ വലിച്ചിഴയ്ക്കരുതെന്നും അതിരൂപത കത്തോലിക്ക കോണ്‍ഗ്രസ്. ഈ വിഷയത്തില്‍ സര്‍ക്കാര്‍ നിസംഗത തുടര്‍ന്നാല്‍ സമരമാര്‍ഗങ്ങളിലേക്ക് പ്രവേശിക്കുവാന്‍ നിര്‍ബന്ധിതരാകുമെന്നും കത്തോലിക്ക കോണ്‍ഗ്രസ് മുന്നറിയിപ്പു നല്‍കി. അതിരൂപത പ്രസിഡന്‍റ് ബിജു സെബാസ്റ്റ്യന്‍റെ അധ്യക്ഷതയില്‍ ചേര്‍ന്ന നേതൃസമ്മേളനം അതിരൂപതാ ഡയറക്ടര്‍ ഫാ. സെബാസ്റ്റ്യന്‍ ചാമക്കാല ഉദ്ഘാടനം ചെയ്തു. അതിരൂപതാ ജനറല്‍ സെക്രട്ടറി ബിനു ഡൊമിനിക്, ട്രഷറര്‍ ജോസ് വെങ്ങാന്തറ, സി.ടി. തോമസ്, ജോര്‍ജുകുട്ടി മുക്കത്ത്, റോസിലിന്‍ കെ. കുരുവിള, ജിനോ ജോസഫ്, സെബാസ്റ്റ്യന്‍ വര്‍ഗീസ്, കുഞ്ഞ് കളപ്പുര, പി.സി. കുഞ്ഞപ്പന്‍ കെ.എസ്. ആന്‍റണി എന്നിവര്‍ പ്രസംഗിച്ചു.

കാറ്റിലും മഴയിലും വൻ നാശം

കുമരകം: ശക്തമായ കാറ്റിലും മഴയിലും ഇന്നലെ രാത്രി കുമരകത്ത് വ്യാപകമായ നാശനഷ്ടങ്ങൾ ഉണ്ടായി. മരങ്ങൾ കടപുഴകി വീണ് ഗതാഗതം സ്തംഭിച്ചു. കുമരകം-അട്ടിപ്പീടിക റോഡിൽ ബിവറേജസ് കോർപറേഷന്‍റെ സമീപത്തായാണ് ആദ്യം മരം വീണത്. കോട്ടയത്തുനിന്നു വരുന്ന ചെറിയ വാഹനങ്ങൾ കോണത്താറ്റു പാലം നിർമാണം നടക്കുന്നതിനാൽ വൺവേ സംവിധാനം വഴി അട്ടിപീടിക റോഡിലെത്തിയാണ് കുമരകത്തെ പ്രധാന റോഡിലേക്ക് വീണ്ടും പ്രവേശിക്കുന്നത്. അതിനാലാണ് അട്ടിപ്പീടിക റോഡിൽ വീണ മരം വലിയ ഗതാഗതക്കുരുക്കിനിടയാക്കിയത്. കൈപ്പുഴ: ഇന്നലെ വൈകുന്നേരമുണ്ടായ ശക്തമായ കാറ്റിലും മഴയിലും കൈപ്പുഴയിൽ വ്യാപക നാശം. കൈപ്പുഴ കുരിശുപള്ളിക്ക് സമീപം കണ്ടത്തിൽ വീട്ടിലെ തേക്കുമരം കടപുഴകി വീണ് കല്ലറ-കൈതക്കനാൽ റോഡിൽ ഗതാഗതം തടസപ്പെട്ടു. കോട്ടയത്തുനിന്നു ഫയർഫോഴ്സെത്തി മരം വെട്ടിമാറ്റി ഗതാഗതം പുനഃസ്ഥാപിച്ചു. കൈപ്പുഴ പുളിങ്കാല ഭാഗത്തും കുടിലിൽ കവല ഭാഗത്തും വീടുകളുടെ മുകളിലേക്കു മരം വീണു.പ്രദേശത്ത് വ്യാപക നാശമാണ് ഇന്നലെ സംഭവിച്ചത്.

പിക്കപ്പ് വാൻ നിയന്ത്രണംവിട്ട് മരത്തിലിടിച്ചു

വെച്ചൂർ: വൈക്കം- വെച്ചൂർ റോഡിലെ അച്ചിനകത്ത് നിയന്ത്രണംവിട്ട പിക്കപ്പ് വാൻ മരത്തിമിടിച്ചു.അപകടത്തിൽ ആർക്കും പരിക്കില്ല. അപകടം നടന്ന ഭാഗത്ത് ആഴമുള്ള തോടും വെള്ളം നിറഞ്ഞ പാടവുമാണ്. മരത്തിൽ തട്ടിനിന്നില്ലായിരുന്നെങ്കിൽ വാഹനം വെള്ളത്തിലേക്കു മറിയുമായിരുന്നു.നാലു മാസം മുമ്പ് ഇവിടെ വാഹനം ഇടിച്ച് കലിങ്കിന്‍റെ സംരക്ഷണഭിത്തി തകർന്ന ഭാഗത്തുതന്നെയാണ് ഇന്നലെ പുലർച്ചെയും അപകടമുണ്ടായത്. യാത്രാബസോ മറ്റു വാഹനങ്ങളോ അപകടത്തിൽപ്പെടാൻ സാധ്യതയുള്ളതിനാൽ സംരക്ഷണഭിത്തി നിർമിക്കാൻ അധികൃതർ ഉടൻ നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.

സംവിധായകൻ തരുൺ മൂർത്തിക്ക് ജന്മനാട്ടിൽ ആദരം

വൈക്കം: ചലച്ചിത്ര സംവിധായകൻ തരുൺ മൂർത്തിക്ക് ജന്മനാട്ടിൽ പുരോഗമന കലാസാഹിത്യ സംഘവും വൈക്കം പി. കൃഷ്ണപിള്ള സ്മാരക ഗ്രന്ഥശാലയും ചേർന്ന് ആദരമൊരുക്കി. വൈക്കത്തെ കലാപാരമ്പര്യമുള്ള ഒരു കുടുംബത്തിൽനിന്നു വരുന്ന തരുൺ മൂർത്തി ഇതോടകം ശ്രദ്ധേയമായ ഓപ്പറേഷൻ ജാവ, സൗദി വെള്ളയ്ക്ക, തുടരും എന്നീ സിനിമകൾ സംവിധാനം ചെയ്‌തിട്ടുണ്ട്. സൗദി വെള്ളയ്ക്ക നിരവധി ദേശീയ-അന്തർദേശീയ ബഹുമതികൾ നേടി. തുടരും ബോക്‌സ് ഓഫീസിൽ റിക്കാർഡുകൾ തകർത്തുകൊണ്ട് തിയറ്ററുകളിൽ പ്രദർശിപ്പിക്കുന്നു. വൈക്കം സത്യഗ്രഹ സ്മാരക മന്ദിരത്തിൽ നടന്ന സമ്മേളനത്തിൽ സാഹിത്യപ്രവർത്തക സഹകരണസംഘം പ്രസിഡന്‍റ് അഡ്വ.പി.കെ. ഹരികുമാർ തരുൺ മൂർത്തിയെ ആദരിച്ചു. പുകസ ഏരിയാ പ്രസിഡന്‍റ് കെ.സി. കുമാരൻ അധ്യക്ഷത വഹിച്ചു. ഡോ. അജു കെ. നാരായണൻ മുഖ്യപ്രഭാഷണം നടത്തി. ഗാനരചയിതാവ് അജീഷ് ദാസൻ, സംസ്ഥാന നാടക അവാർഡ് ജേതാവ് പ്രദീപ് മാളവിക, തബലവാദക രത്ന ശ്രീരാമചന്ദ്രൻ, ഡി. മനോജ്, പ്രഫ. പാർവതി ചന്ദ്രൻ, അഡ്വ. അംബരീഷ് ജി. വാസു തുടങ്ങിയവർ പ്രസംഗിച്ചു. തുടർന്ന് തരുൺ മൂർത്തിയുടെ പിതാവും നാടക പ്രവർത്തകനുമായ വൈക്കം ഡി. മധുമൂർത്തി സംവിധാനം നിർവഹിച്ച വിഘടിക്കാതെ, വിച്ഛേദിക്കാതെ, വിഹായസിലേക്ക് എന്ന നാടകം അവതരിപ്പിച്ചു. വൈക്കം: ചലച്ചിത്ര സംവിധായകൻ തരുൺ മൂർത്തിയെ വൈക്കം ടൗൺ മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ ആദരിച്ചു. പ്രസിഡന്‍റ് സോണി സണ്ണി തരുൺ മൂർത്തിയെ പൊന്നാടയണിയിക്കുകയും മെമന്‍റോ നൽകി ആദരിക്കുകയും ചെയ്തു. ബ്ലോക്ക് കോൺഗ്രസ് പ്രസിഡന്‍റ് പി.ഡി. ഉണ്ണി, ഡിസിസി ഭാരവാഹികളായ അബ്ദുൾ സലാം റാവുത്തർ, എ. സനീഷ് കുമാർ , ജയ് ജോൺ, വി. സമ്പത്ത് കുമാർ, കെ.പി. ശിവജി തുടങ്ങിയവർ പ്രസംഗിച്ചു.

എന്‍റെ ഉയർച്ചയ്ക്കു പിന്നിൽ അച്ഛൻ: തരുൺ മൂർത്തി

വൈക്കം: ചിത്രരചനയിൽ കലാപ്രവർത്തനം ഒതുങ്ങിപ്പോകുമായിരുന്ന തന്നെ ഗൗരവമായ വായനയിലേക്കും എഴുത്തിലേക്കും കഥകളി അഭ്യസനത്തിലേക്കും കൈപിടിച്ചു നടത്തിയത് അച്ഛൻ മധുമൂർത്തിയാണെന്ന് ചലച്ചിത്ര സംവിധായകൻ തരുൺ മൂർത്തി. അച്ഛൻ നിർബന്ധിച്ച് കഥകളി അഭ്യസിപ്പിച്ചത് തന്‍റെ സിനിമാജീവിതത്തിൽ ഏറെ ഗുണം ചെയ്തു. കുടുംബത്തിൽ അച്ഛനും സഹോദരൻമാരുമൊക്കെ കലാകാരൻമാരാണ്. വല്യച്ഛനും കെപിസിസി നിർവാഹക സമിതിയംഗവുമായ മോഹൻ ഡി. ബാബുവും തന്‍റെ കലാപ്രവർത്തനത്തിന് വലിയ പ്രോത്സാഹനം നൽകി. അഭിഭാഷകനായി ശ്രദ്ധേയനാകുമെന്ന് കുടുംബം കരുതിയ വല്യച്ഛൻ പൊതു പ്രവർത്തനത്തിലാണ് മുഴുകിയത്. ജോലിക്കൊപ്പം നാടകത്തെയും കൂടെക്കൂട്ടിയ അച്ഛന് അഭിനയത്തോടും വലിയ അഭിനിവേശമുണ്ടായിരുന്നു. അഭിനയിക്കാൻ ചെന്ന‍യിടങ്ങളിൽ തിക്താനുഭവമുണ്ടായ അച്ഛനെ തന്‍റെ മൂന്നു സിനിമകളിലും അഭിനയിപ്പിച്ചു. ഇപ്പോൾ വിജയകരമായി ഓടുന്ന തുടരും എന്ന മോഹൻലാൽ ചിത്രത്തിൽ പ്രശസ്തരായ മറ്റാരെയെങ്കിലും അഭിനയിപ്പിക്കാൻ അച്ഛൻ നിർബന്ധിച്ചെങ്കിലും ആ വേഷം അച്ഛനിലൂടെ പൂർണതയിലെത്തിക്കണമെന്ന തന്‍റെ മോഹസാക്ഷാത്കാരത്തിന് മോഹൻലാലും നിർമാതാവ് രഞ്ജിത്തും ഉറച്ച പിന്തുണ നൽകി. കോന്പിനേഷൻ സീനിൽ അച്ഛനിൽനിന്ന് ഏറ്റവും മികച്ച പ്രകടനം ലഭിക്കാൻ ലാലേട്ടൻ ഏറെ സഹായിച്ചെന്നും അദ്ദേഹം പറഞ്ഞു. ഫഹദ് ഫാസിൽ നായകനാകുന്ന അടുത്ത സിനിമ നവംബറിൽ തുടങ്ങും. തന്നെ കലാകാരനാക്കിയ അച്ഛനായി അതിലും ഒരു വേഷമൊരുക്കാൻ തരുണും മകന്‍റെ ഫഹദ് ചിത്രത്തിൽ അഭിനയിക്കാൻ ആകാംക്ഷയോടെ മധുമൂർത്തിയും കാത്തിരിക്കുകയാണ്.

കടുത്തുരുത്തിയിൽ ആഫ്രിക്കന്‍ ഒച്ച് ശല്യം

കടുത്തുരുത്തി: മഴ ശക്തമായതിന് പിന്നാലെ കടുത്തുരുത്തിയില്‍ ആഫ്രിക്കന്‍ ഒച്ചിന്‍റെ ശല്യം രൂക്ഷം. അലരി, മങ്ങാട് മേഖലകളിലാണ് ഇവ വ്യാപകമായിരിക്കുന്നത്. ഒച്ചിന്‍റെ മുട്ടകള്‍ വ്യാപകമായി വിരിഞ്ഞ് ഒച്ചുകള്‍ പെരുകുകയാണ്. കോട്ടയം മുന്‍സിപ്പാലിറ്റി ജീവനക്കാരനായ അലരി പുഴക്കരോട്ട് ടോജി ഫിലിപ്പിന്‍റെ വീട്ടിലും പരിസരത്തുമെല്ലാം ആഫ്രിക്കന്‍ ഒച്ചുകളെക്കൊണ്ടു നിറഞ്ഞിരിക്കുകയാണ്. ആഴ്ചകളായി ദിവസവും രാവിലെ പുരയിടത്തില്‍നിന്ന് ഒച്ചുകളെ കണ്ടെത്തി ഉപ്പിട്ട് നശിപ്പിക്കുകയാണ് ടോജി. സമീപത്തെ വീടുകളിലും ഒച്ചുകളെ കണ്ടെത്തിയിട്ടുണ്ട്. ചെടികളും വീട്ടിലെ ഫലവൃഷങ്ങളും പച്ചക്കറികളും ഉൾപ്പെടെ പൂര്‍ണമായും തിന്നു നശിപ്പിക്കുകയാണ് കൂട്ടത്തോടെയെത്തുന്ന ഒച്ചുകളെന്ന് ‌ടോജി പറയുന്നു. പഞ്ചായത്തിന്‍റെ വിവിധ പ്രദേശങ്ങളിലും ആഫ്രിക്കന്‍ ഒച്ചുകള്‍ വ്യാപിച്ചിരിക്കുകയാണെന്ന് നിരീക്ഷണത്തിലാണ് പ്രദേശവാസികള്‍. എന്നാല്‍, ഇക്കാര്യം കൃഷി വകുപ്പോ പഞ്ചായത്തോ ആരോഗ്യ വകുപ്പോ അറിഞ്ഞിട്ടില്ല. ഒച്ചിനെ കൂട്ടത്തോടെ നിര്‍മാര്‍ജനം ചെയ്യുന്നതിനുള്ള നടപടികള്‍ സ്വീകരിക്കണമെന്നാണ് നാട്ടുകാരുടെ ആവശ്യം.

കാരിക്കോട് കെപിപിഎല്‍ വളപ്പിലെ മണ്ണിടിഞ്ഞു റോഡിലേക്ക് വീണു

കടുത്തുരുത്തി: തലയോലപ്പറമ്പ് - വെള്ളൂര്‍ - മൂര്‍ക്കാട്ടിപ്പടി റോഡില്‍ കാരിക്കോട് മുടക്കാരി ദേവീക്ഷേത്രത്തിനു സമീപം കെപിപിഎല്‍ വക സ്ഥലത്തെ മണ്ണിടിഞ്ഞു റോഡിലേക്കു വീണു. കനത്ത മഴയെത്തുടര്‍ന്ന് കെപിപിഎല്‍ വക സ്ഥലത്തെ ഏകദേശം പത്ത് അടി ഉയരമുള്ള മണ്‍തിട്ട ഇടിഞ്ഞ് റോഡിലേക്ക് വീഴുകയായിരുന്നു. റോഡിന്‍റെ മധ്യഭാഗം വരെ മണ്ണും വലിയ മണ്‍കട്ടകളും നിറഞ്ഞിരിക്കുകയാണ്. വാഹനയാത്രക്കാര്‍ക്ക് മുന്നറിയിപ്പായി ഇവിടെ അപകട സൂചനാ ബോര്‍ഡ് സ്ഥാപിച്ചിട്ടുണ്ട്. ഇപ്പോഴും വലിയ മണ്‍കട്ടകള്‍ റോഡിലേക്ക് അടര്‍ന്നുവീഴാവുന്ന നിലയിലാണുള്ളത്. മുകളില്‍ നിരവധി മരങ്ങള്‍ നില്‍ക്കുന്നതും സ്ഥിതി കൂടുതല്‍ വഷളാക്കുന്നു. മഴ കനത്താല്‍ വീണ്ടും മണ്ണിടിച്ചില്‍ ഉണ്ടാകാന്‍ സാധ്യതയുണ്ട്. സ്‌കൂള്‍ വാഹനങ്ങള്‍ ഉള്‍പ്പെടെ നിരവധി വാഹനങ്ങള്‍ ഇതുവഴി കടന്നുപോകുന്നതിനാല്‍ മണ്ണിടിയുന്നത് വലിയ അപകടഭീഷണിയാണ് ഉയര്‍ത്തുന്നത്. മണ്ണ് നീക്കം ചെയ്യുകയും കൂടുതല്‍ മണ്ണിടിച്ചില്‍ ഉണ്ടാകാതിരിക്കാന്‍ ആവശ്യമായ നടപടികള്‍ സ്വീകരിക്കുകയും ചെയ്യണമെന്നാണ് യാത്രക്കാരുടെയും നാട്ടുകാരുടെയും ആവശ്യം. photo കാരിക്കോട് മുടക്കാരി ദേവീക്ഷേത്രത്തിനു സമീപം കെപിപിഎല്‍ വക സ്ഥലത്തെ മണ്ണിടിഞ്ഞു റോഡിലേക്കു വീണ നിലയില്‍.

എസ്.പി. പിള്ള സ്മാരക ലൈബ്രറിയിൽ സ്മൃതിദിനാചരണം

ഏറ്റുമാനൂർ: വടക്കേനട എസ്.പി. പിള്ള സ്മാരക വനിതാ ലൈബ്രറിയുടെ ആഭിമുഖ്യത്തിൽ എസ്.പി. പിള്ള സ്മൃതിദിനം ആചരിച്ചു. പ്രസിഡന്‍റ് സരസമ്മ ആർ. പണിക്കർ അധ്യക്ഷത വഹിച്ച അനുസ്മരണ സമ്മേളനം കോട്ടയം താലൂക്ക് ലൈബ്രറി കൗൺസിൽ സെക്രട്ടറി ഷൈജു തെക്കുംചേരി ഉദ്ഘാടനം ചെയ്തു. ഏറ്റുമാനൂർ എസ്എംഎസ്എം പബ്ലിക് ലൈബ്രറി പ്രസിഡന്‍റ് ജി. പ്രകാശ് അനുസ്മരണ പ്രഭാഷണം നടത്തി. അഡ്വ. പി. രാജീവ്‌ ചിറയിൽ, പി.ആർ. രാജേന്ദ്രകുമാർ, നഗരസഭാ കൗൺസിലർ സുരേഷ് ആർ. നായർ, ശ്രീമൂലം നേച്ചർ ക്ലബ്ബ് കമ്മിറ്റി അംഗം ജയിംസ് പുളിക്കൻ, ലൈബ്രറി സെക്രട്ടറി മായ സുജി, വൈസ് പ്രസിഡന്‍റ് വി. ജ്യോതി എന്നിവർ പ്രസംഗിച്ചു. എസ്.പി. പിള്ളയുടെ ചിത്രത്തിനു മുമ്പിൽ ഭദ്രദീപം തെളിച്ച് പുഷ്പാർച്ചന നടത്തി.

കോണത്താറ്റ് പാലം നിർമാണം അടിയന്തരമായി പൂർത്തിയാക്കണം

നീണ്ടൂർ: അപകടാവസ്ഥയിലായ നീണ്ടൂർ പ്രാലേൽ പാലത്തിന്‍റെ നിർമാണം നടക്കേണ്ട സാഹചര്യത്തിൽ കുമരകം കോണത്താറ്റ് പാലം നിർമാണം പൂർത്തിയാക്കാൻ അടിയന്തര നടപടി സ്വീകരിക്കണമെന്ന് കേരള കോൺഗ്രസ്-എം നീണ്ടൂർ മണ്ഡലം കമ്മിറ്റി ആവശ്യപ്പെട്ടു. നീണ്ടൂർ പ്രാലേൽ പാലം അപകടാവസ്ഥയിലാണ്. ഇക്കാര്യം സർക്കാരിന്‍റെ ശ്രദ്ധയിൽപ്പെടുത്തുകയും കഴിഞ്ഞ ബഡ്ജറ്റിൽ പാലം പുനർനിർമിക്കുന്നതിനും സ്ഥലം ഏറ്റെടുക്കുന്നതിനും ആവശ്യമായ ഫണ്ട് വകയിരുത്തുകയും ചെയ്തിട്ടുണ്ട്. കുമരകം കോണത്താറ്റ് പാലം പൂർത്തിയാക്കാതെ നീണ്ടൂർ പ്രാലേൽ പാലം പൊളിച്ചാൽ പടിഞ്ഞാറൻ മേഖലയിലെ ഗതാഗതസംവിധാനം താളം തെറ്റും. ഇപ്പോൾത്തന്നെ ധാരാളം വാഹനങ്ങളാണ് അപകടാവസ്ഥയിലുള്ള പ്രാലേൽ പാലത്തിലൂടെ കടന്നുപോകുന്നത്. അതിനാൽ കുമരകം കോണത്താറ്റ് പാലത്തിന്‍റെ നിർമാണം അതിവേഗം പൂർത്തീകരിച്ച് അപകടാവസ്ഥയിലുള്ള പ്രാലേൽ പാലത്തിന്‍റെ നിർമാണം അടിയന്തരമായി തുടങ്ങണമെന്ന് കേരള കോൺഗ്രസ് -എം നീണ്ടൂർ മണ്ഡലം കമ്മിറ്റി ആവശ്യപ്പെട്ടു. മണ്ഡലം പ്രസിഡന്‍റ് വി.സി. മത്തായി അധ്യക്ഷത വഹിച്ചു. സംസ്ഥാന കമ്മിറ്റി അംഗം തോമസ് കോട്ടൂർ ഉദ്ഘാടനം ചെയ്തു. പഞ്ചായത്ത് മെംബർമാരായ പുഷ്പമ്മ തോമസ്, ആലീസ് ജോസഫ്, സഹകരണ ബാങ്ക് ബോർഡ് മെംബർ വിനോദ് ചാമക്കാല, ജോസി സി. ജോസഫ്, ജയ്സൺ എബ്രാഹം, ജോസ്മോൻ ജോസ്, മനോജ് സുകുമാരൻ, ഗോപി മങ്ങാട്ടുകുഴി, പ്രസാദ് പറയൻകുന്ന്, ജയിംസ് മാക്കിൽ, നിഖിൽ ഫിലിപ്, സിജു പാലക്കാട്ട്, റെജി കുടിലിൽ, സിബി വയലുങ്കൽ, ജോസ്മോൻ തറയ്ക്കൽ, ലിൻസൺ പ്രാലേൽ തുടങ്ങിയവർ പ്രസംഗിച്ചു.

മുതിര്‍ന്ന പൗരന്മാരോടുള്ള അതിക്രമം: ബോധവത്കരണ ദിനാചരണം സംഘടിപ്പിച്ചു

കോട്ടയം: ജില്ലാ സാമൂഹ്യനീതി വകുപ്പിന്‍റെ നേതൃത്വത്തില്‍ മുതിര്‍ന്ന പൗരന്മാരോടുള്ള അതിക്രമങ്ങള്‍ക്കെതിരേയുള്ള ബോധവത്കരണ ദിനാചരണം സംഘടിപ്പിച്ചു. ജില്ലാതല ഉദ്ഘാടനം സിഎംഎസ് കോളജില്‍ ജില്ലാ പഞ്ചായത്തംഗം പി.എം. മാത്യു നിര്‍വഹിച്ചു. സംസ്ഥാന വയോജന കമ്മീഷന്‍ രൂപീകരണം ഉള്‍പ്പെടെ വിവിധ ചുവടുകളാണ് സര്‍ക്കാര്‍ മുന്നോട്ടുവയ്ക്കുന്നത്. യുവജനങ്ങളുടെ കരുതലോടെയുള്ള ഇടപെടലും വയോജന സംരക്ഷണത്തില്‍ അനിവാര്യമാണെന്ന് പി.എം. മാത്യു പറഞ്ഞു. സംസ്ഥാന വയോജന കൗണ്‍സില്‍ അംഗം തോമസ് പോത്തന്‍ അധ്യക്ഷത വഹിച്ചു. കോട്ടയം നഗരസഭാധ്യക്ഷ ബിന്‍സി സെബാസ്റ്റ്യന്‍ വയോജന സംരക്ഷണ പ്രതിജ്ഞ ചൊല്ലിക്കൊടുത്തു. വി.പി. സുനില്‍കുമാര്‍ ബോധവത്കരണ ക്ലാസ് നയിച്ചു. ജില്ലാ സാമൂഹ്യനീതി ഓഫീസര്‍ പി. പ്രദീപ്, ജില്ലാ സാമൂഹ്യനീതി ഓഫീസ് സീനിയര്‍ സൂപ്രണ്ട് എം.വി. സഞ്ജയന്‍, എസ്‌സിഎഫ്ഡബ്ല്യുഎ ജില്ലാ പ്രസിഡന്‍റ് ടി.വി. മോഹന്‍കുമാര്‍ എന്നിവര്‍ പങ്കെടുത്തു. നഗരത്തിലെ പ്രധാന ഇടങ്ങളില്‍ നടത്തിയ വാഹന പ്രചാരണ ജാഥയോടൊപ്പം സിഎംഎസ് കോളജ് വിദ്യാര്‍ഥികള്‍ അവതരിപ്പിച്ച ഫ്‌ളാഷ് മോബും ശ്രദ്ധേയമായിരുന്നു.

സ്കൂളിന്‍റെ ചുറ്റുമതിൽ ഇടിഞ്ഞുവീണു

അതിരമ്പുഴ: തുടർച്ചയായി പെയ്ത മഴയിൽ സ്കൂളിന്‍റെ ചുറ്റുമതിൽ ഇടിഞ്ഞുവീണു. അതിരമ്പുഴ സെന്‍റ് മേരീസ് എൽപി സ്കൂളിന്‍റെ ചുറ്റുമതിലാണ് ഇന്നലെ ഉച്ചകഴിഞ്ഞ് ഇടിഞ്ഞുവീണത്. ഏറ്റുമാനൂർ - അതിരമ്പുഴ റോഡിലേക്കാണ് മതിൽ വീണതെങ്കിലും മറ്റ് അനിഷ്ട സംഭവങ്ങൾ ഒന്നുമുണ്ടായില്ല.

കത്തോലിക്ക കോൺഗ്രസ് അതിരമ്പുഴ ഫൊറോന സമ്മേളനം

അതിരമ്പുഴ: കത്തോലിക്ക കോൺഗ്രസ് അതിരമ്പുഴ ഫൊറോന സമ്മേളനം നടത്തി. പ്രസിഡന്‍റ് ജോയി പാറപ്പുറത്ത് അധ്യക്ഷത വഹിച്ച സമ്മേളനം അതിരമ്പുഴ ഫൊറോന വികാരി റവ.ഡോ. ജോസഫ് മുണ്ടകത്തിൽ ഉദ്ഘാടനം ചെയ്തു. ക്രൈസ്തവരുടെ പിന്നാക്കാവസ്ഥയെപ്പറ്റി പഠിക്കാൻ നിയോഗിച്ച ജസ്റ്റീസ് ബെഞ്ചമിൻ കോശി കമ്മീഷൻ റിപ്പോർട്ട് എത്രയും വേഗം പ്രസിദ്ധീകരിക്കുകയും റിപ്പോർട്ടിൽ പറഞ്ഞിരിക്കുന്ന കാര്യങ്ങൾ നടപ്പിലാക്കുകയും ചെയ്യണമെന്ന് യോഗം സർക്കാരിനോട് ആവശ്യപ്പെട്ടു. ഫാ. ജോസഫ് ആലുങ്കൽ ആമുഖ സന്ദേശം നൽകി. ഫാ. ടോണി മണക്കുന്നേൽ, സെബാസ്റ്റ്യൻ പുല്ലാട്ടുകാല, അഡ്വ. പി.പി. ജോസഫ്, ബിജോ തുളിശേരിൽ, റോബിൻ ജോസഫ് ആലഞ്ചേരി മാനാട്ട്, സൂസൻ വർഗീസ് മാത്തശേരി, ജോയി കാരിക്കൊമ്പിൽ എന്നിവർ പ്രസംഗിച്ചു. അതിരമ്പുഴ പള്ളിയിൽനിന്നു കൊടിനാട്ടുംകുന്ന് പള്ളിയിലേക്കു സ്ഥലം മാറിപ്പോകുന്ന റവ.ഡോ. ജോസഫ് മുണ്ടകത്തിലിന് സമ്മേളനത്തിൽ യാത്രയയപ്പ് നൽകി.

പിതൃദിനാചരണം

മുടിയൂർക്കര: തിരുക്കുടുംബ പളളിയിൽ പിതൃദിനത്തോടനുബന്ധിച്ച് പതാക ഉയർത്തുകയും പിതാക്കന്മാരെ ആദരിക്കുകയും ചെയ്തു. വികാരി റവ.ഡോ. ഫിലിപ്പ് നെൽപ്പുരപ്പറമ്പിൽ പിതൃദിന സന്ദേശം നൽകി. പിതൃവേദി കുടമാളൂർ ഫൊറോന ഡയറക്ടർ ഫാ. മാത്യു പുത്തൻപുരയ്ക്കൽ അധ്യക്ഷത വഹിച്ചു. മാതൃവേദി അതിരൂപതാ പ്രസിഡന്‍റ് ഡോ. റോസമ്മ സോണി മുഖ്യപ്രഭാഷണം നടത്തി. യൂണിറ്റ് പ്രസിഡന്‍റ് ജോസ് പാറയ്ക്കൽ, ബിനു മുക്കുങ്കൽ, ബിനോയ് മടുക്കുനിൽക്കുംകാലാ, സണ്ണി ചെട്ടിശേരി, ഷാജി സി. മുകളേൽ, ജോർജുകുട്ടി മടുക്കുനിൽക്കുംകാലാ, ടോം തോമസ് കണ്ണാതറ, ബേബിച്ചൻ തടത്തേൽ, ടി.വി. സോണി, ജോസ് ജേക്കബ് കുന്നത്തേട്ട്, ബേബിച്ചൻ മുകളേൽ, റെജി പോങ്ങാനാംതടം, ഷാജി പുതിയാപറമ്പിൽ, ബെന്നി പടിഞ്ഞാറെപറമ്പിൽ, കൊച്ചുമോൾ ബേബി, അനു ലൂക്കോസ് കാരക്കട, ലാലി വെള്ളാകോട്ടിൽ എന്നിവർ പ്രസംഗിച്ചു.

കാറ്റിലും മഴയിലും വൻ നാശം

കുമരകം: ശക്തമായ കാറ്റിലും മഴയിലും ഇന്നലെ രാത്രി കുമരകത്ത് വ്യാപകമായ നാശനഷ്ടങ്ങൾ ഉണ്ടായി. മരങ്ങൾ കടപുഴകി വീണ് ഗതാഗതം സ്തംഭിച്ചു. കുമരകം-അട്ടിപ്പീടിക റോഡിൽ ബിവറേജസ് കോർപറേഷന്‍റെ സമീപത്തായാണ് ആദ്യം മരം വീണത്. കോട്ടയത്തുനിന്നു വരുന്ന ചെറിയ വാഹനങ്ങൾ കോണത്താറ്റു പാലം നിർമാണം നടക്കുന്നതിനാൽ വൺവേ സംവിധാനം വഴി അട്ടിപീടിക റോഡിലെത്തിയാണ് കുമരകത്തെ പ്രധാന റോഡിലേക്ക് വീണ്ടും പ്രവേശിക്കുന്നത്. അതിനാലാണ് അട്ടിപ്പീടിക റോഡിൽ വീണ മരം വലിയ ഗതാഗതക്കുരുക്കിനിടയാക്കിയത്. കുമരകത്തിന്‍റെ വിവിധ പ്രദേശങ്ങളിലെ ചെറു റോഡുകളിലെല്ലാം മരം വീണ് ഗതാഗതം താറുമാറായി. മഴക്കെടുതി മൂലം വിവിധ സ്ഥലങ്ങളിൽ ഫയർഫോഴ്സ് ഉദ്യോഗസ്ഥർ തിരക്കിലായതിനാൽ കുമരകം എസ്എച്ച്ഒയുടെ അഭ്യർഥനപ്രകാരം ബാക്ക് വാട്ടർ റിപ്പിൾസ് റിസോർട്ടിലെ ജീവനക്കാരാണ് അട്ടിപ്പീടിക റോഡിലെ മരം മുറിച്ചുമാറ്റിയത്. മരം വീണു തകർന്ന വൈദ്യുതി പോസ്റ്റുകളും ലൈനും പുനഃസ്ഥാപിക്കാൻ രാത്രി വൈകിയും ജോലികൾ തുടർന്നു. കുമരകം പെട്രോൾ പമ്പിന്‍റെ സമീപത്തും പോളക്കുളം ബാറിനും കൈപ്പുഴമുട്ട് പാലത്തിനുമിടയിലും മരങ്ങൾ വീണു. കുമരകം അഞ്ചാം വാർഡിൽ കണ്ണാടിച്ചാൽ പാടത്തിന്‍റെ തുരുത്തിൽ താമസിക്കുന്ന കുന്നക്കാട് കുര്യാക്കോസിന്‍റെ (കുഞ്ഞ്) വീടിന്‍റെ മേൽക്കൂര പൂർണമായും തകർന്നു. കുമരകം ആറാം വാർഡിൽ ഇടവട്ടം തെക്കേത്തറ വീട്ടിൽ ജോസഫിന്‍റെ ( ബാബു) വീട് ഭാഗികമായി തകർന്നു. മണിക്കൂറിൽ 52 കിലോമീറ്റർ വേഗത്തിൽ ആഞ്ഞടിച്ച കാറ്റ് കുമരകത്തിന്‍റെ പല ഭാഗങ്ങളിലും നാശം വിതച്ചതായി പറയുന്നു. അതിരന്പുഴയിൽ അതിരമ്പുഴ: കാറ്റിൽമരങ്ങൾ കടപുഴകി. വീടുകൾക്ക് നാശനഷ്ടം. വൈദ്യുതി ലൈനുകൾ തകർന്ന് വൈദ്യുതി വിതരണം തടസപ്പെട്ടു. അതിരമ്പുഴയിൽ ഇന്നലെ വൈകുന്നേരം ആഞ്ഞടിച്ച കാറ്റിൽ വൻ നാശനഷ്ടം. മരങ്ങൾ കടപുഴകി ഒട്ടേറെ വീടുകൾക്ക് നാശനഷ്ടമുണ്ടായി. അതിരമ്പുഴ - കുറ്റിയേൽ കവല - കൈപ്പുഴ റോഡിൽ മരങ്ങൾ വീണ് വൈദ്യുതി പോസ്റ്റുകൾ ഒടിഞ്ഞു. ഗതാഗതം തടസപ്പെട്ടു. വൈദ്യുതി വിതരണം നിലച്ചു. അതിരമ്പുഴ ടൗണിൽ ഫ്ലക്സ് ബോർഡുകൾ കാറ്റിൽ പറന്നു പോയി. ടൗൺ വാർഡിലും ശ്രീകണ്ഠമംഗലം ഭാഗത്തുമായി ഒട്ടേറെ വീടുകൾക്ക് മരങ്ങൾ വീണ് നാശനഷ്ടമുണ്ടായി. കൈപ്പുഴയിലും വ്യാപകനാശം കൈപ്പുഴ: ഇന്നലെ വൈകുന്നേരമുണ്ടായ ശക്തമായ കാറ്റിലും മഴയിലും കൈപ്പുഴയിൽ വ്യാപക നാശം. കൈപ്പുഴ കുരിശുപള്ളിക്ക് സമീപം കണ്ടത്തിൽ വീട്ടിലെ തേക്കുമരം കടപുഴകി വീണ് കല്ലറ-കൈതക്കനാൽ റോഡിൽ ഗതാഗതം തടസപ്പെട്ടു. കോട്ടയത്തുനിന്നു ഫയർഫോഴ്സെത്തി മരം വെട്ടിമാറ്റി ഗതാഗതം പുനഃസ്ഥാപിച്ചു. കൈപ്പുഴ പുളിങ്കാല ഭാഗത്തും കുടിലിൽ കവല ഭാഗത്തും വീടുകളുടെ മുകളിലേക്കു മരം വീണു നാശങ്ങൾ സംഭവിച്ചു. പ്രദേശത്ത് വ്യാപക നാശമാണ് ഇന്നലെ സംഭവിച്ചത്.

കുരുക്കഴിക്കാന്‍ ഇന്നുമുതല്‍ കോട്ടയത്ത് ഗതാഗതപരിഷ്‌കാരം

കോട്ടയം: നഗരത്തിലെ ഗതാഗതക്കുരുക്കഴിക്കാന്‍ ട്രാഫിക് പരിഷ്‌കാരം. ഇന്നുമുതലാണ് നഗരത്തില്‍ പോലീസ് ട്രാഫിക് പരിഷ്‌കാരം ഏര്‍പ്പെടുത്തുന്നത്. ചാലുകുന്നു ഭാഗത്തുനിന്നു വരുന്ന ബസുകള്‍ ഇനി ശാസ്ത്രി റോഡു വഴിയാകും നാഗമ്പടം ബസ്‌ സ്റ്റാന്‍ഡിലേക്ക് പോകുക. നിലവില്‍ ബേക്കര്‍ ജംഗ്ഷനു സമീപം ആളെയിറക്കി എംസി റോഡു വഴി സീസേഴ്‌സ് ജംഗ്ഷനിലെത്തിയാണ് ബസുകള്‍ നാഗമ്പടം സ്റ്റാന്‍ഡിലേക്ക് പോയിരുന്നത്. കുമരകം, ചുങ്കം, ചാലുകുന്ന് ഭാഗത്തുനിന്നുവരുന്ന ബസുകള്‍ ബേക്കര്‍ ജംഗ്ഷനിലെത്തി നേരേ ശാസ്ത്രി റോഡില്‍ പ്രവേശിക്കും. തുടർന്ന് ശാസ്ത്രി റോഡിലെ ബസ്‌ സ്റ്റോപ്പില്‍ ആളുകളെയിറക്കും. അവിടെനിന്നു ബസുകള്‍ കുര്യന്‍ ഉതുപ്പ് റോഡ് വഴി നാഗമ്പടം ബസ്‌സ്റ്റാന്‍ഡിലെത്തും. പരീക്ഷണാടിസ്ഥാനത്തില്‍ നടപ്പാക്കുന്ന ഈ പരിഷ്‌കാരംഎത്രമാത്രം വിജയിക്കുമെന്ന് പോലീസുകാര്‍ക്കും പറയാനാകുന്നില്ല. കോട്ടയം വെസ്റ്റ് പോലീസ് എസ്എച്ച്ഒയുടെ അധ്യക്ഷതയില്‍ കോട്ടയം ട്രാഫിക് യൂണിറ്റ് ഹൗസ് ഓഫീസര്‍, പ്രൈവറ്റ് ബസ് ഓപ്പറേറ്റേഴ്‌സ് അസോസിയേഷന്‍ എന്നിവരുമായി നടത്തിയ ചര്‍ച്ചയിലാണ് പുതിയ തീരുമാനം. സ്‌കൂള്‍ കൂടി തുറന്നതോടെ നഗരത്തില്‍ പലയിടത്തും ഗതാഗതക്കുരുക്ക് രൂക്ഷമാണ്. ചന്തക്കവലയില്‍ സിഗ്നല്‍ സംവിധാനമില്ലാത്തതിനാല്‍ ചന്തയ്ക്കുള്ളില്‍നിന്നു വാഹങ്ങള്‍ തോന്നുന്നതുപോലെ കയറുന്നതും ഇറങ്ങുന്നതും അപകടത്തിനിടയാക്കുന്നു. അതേപോലെ കുമരകം റോഡിലൂടെ വരുന്ന വാഹനങ്ങള്‍ എംസി റോഡിൽ ശക്തി ഹോട്ടലിനുസമീപത്ത് ഡിവൈഡറുകള്‍ തീരുന്നിടത്ത് ഇറക്കത്തില്‍ വച്ചു യു ടേണ്‍ എടുക്കുന്നതും ഗതാഗതക്കുരുക്കിനു കാരണമാകുന്നുണ്ട്. എംസി റോഡില്‍നിന്നു യാതൊരു നിയന്ത്രണവുമില്ലാതെ ശക്തി ഹോട്ടലിനു സമീപമുള്ള റോഡില്‍ കൂടി വാഹനങ്ങള്‍ കുമരകം റോഡിലേക്കും പ്രവേശിക്കുന്നുണ്ട്. ഇതും അപകടങ്ങള്‍ക്ക് കാരണമാകുന്നുണ്ട്. ബേക്കര്‍ ജംഗ്ഷനിലെ ട്രാഫിക് ഐലന്‍ഡിലാണ് എപ്പോഴും ഗതാഗതകുരുക്ക് അനുഭവപ്പെടുന്നത്. ഇവിടെ വലിയ വാഹനങ്ങള്‍ റോഡ് നിറഞ്ഞ് നിര്‍ത്തുന്നതും കുരുക്കിനു കാരണമാകുന്നുണ്ട്. നഗരത്തില്‍ പലയിടത്തും ട്രാഫിക് പോലീസിന്‍റെ സേവനം കാര്യക്ഷമല്ലെന്നും പരാതിയുണ്ട്. സീബ്രാലൈനുകള്‍ പലയിടത്തും മാഞ്ഞുകിടക്കുകയാണ്. ആളുകള്‍ തോന്നുംപടിയാണ് റോഡ് മുറിച്ചുകടക്കുന്നത്. നഗരത്തിലെ ട്രാഫിക് സംവിധാനങ്ങൾ അടിയന്തരമായി പരിഷ്കരിക്കണമെന്ന ആവശ്യം ശക്തമായിട്ടുണ്ട്.

അപകടഭീഷണിയിലായ എരുത്തുപുഴ പാലം വീതികൂട്ടി നവീകരിക്കണം

കൂരോപ്പട: ഒറവയ്ക്കൽ-കൂരാലി റോഡിലെ കൂരോപ്പട എരുത്തുപുഴയിൽ പന്നഗം തോടിനു കുറുകെയുള്ള എരുത്തുപുഴ പാലം യാത്രക്കാർക്ക് ഭീഷണിയാകുന്നു. കാലപ്പഴക്കം മൂലമുള്ള കേടുപാടുകൾ സംഭവിച്ചിട്ടുള്ള ഈ പാലത്തിന് കഷ്ടിച്ച് ഒരു ബസിന് കടന്നുപോകാവുന്നത്ര വീതി മാത്രമാണുള്ളത്. തിരക്കേറിയ രാവിലെയും വൈകുന്നേരവും പാലത്തിന്‍റെ ഇരുഭാഗത്തും രൂപപ്പെടുന്ന വാഹനങ്ങളുടെ നിര ഗതാഗതക്കുരുക്കിനും കാരണമാകുന്നുണ്ട്. വാഹനബാഹുല്യം മൂലം പാലത്തിലൂടെ കാൽനടയാത്രയും ദുഷ്‌കരമാണ്. നടപ്പാതയില്ലാത്തതിനാൽ കാൽനട യാത്രികർക്ക് മറ്റു മാർഗങ്ങളുമില്ല. പലപ്രാവശ്യം റോഡ് നവീകരിച്ചപ്പോഴും പാലം പഴയപടി തുടരുകയായിരുന്നു. 65 വർഷത്തെ പഴക്കമുള്ള ഈ പാലത്തിലൂടെ ദിവസേന 100 കണക്കിന് വാഹനങ്ങളാണ് കടന്നുപോകുന്നത്. ഇരുവശവും ഇറക്കമുള്ള വീതിയുള്ള റോഡ് ആ‍യതിനാൽ പലപ്പോഴും വാഹനങ്ങൾ അതിവേഗത്തിലാണ് പാലത്തിലേക്ക് പ്രവേശിക്കുക. പാലത്തിൽ ക‍യറുന്പോഴാണ് വീതിക്കുറവ് ശ്രദ്ധയിൽപ്പെടുക. കോൺക്രീറ്റിൽ നിർമിച്ച പാലത്തിന്‍റെ ഇരുവശത്തുമുള്ള കൈവരികൾ ഇപ്പോൾ വാഹനങ്ങൾ ഇടിച്ചു തകർന്നനിലയിലാണ്. 30 അടിയോളം ഉയരത്തിലുള്ള പാലത്തിൽനിന്ന് താഴേക്ക് പോയാൽ കുത്തൊഴുക്കുള്ള പന്നഗം തോട്ടിലേക്കാണ് വീഴുന്നത്. ഒരു മാസത്തിനിടെ രണ്ട് അപകടങ്ങൾ പാലത്തിൽ ഉണ്ടായി. എന്നാൽ അപകട മരണമുണ്ടായാലേ അധികൃതർ നടപടിയെടുക്കൂ എന്നുവരുന്നത് അനാസ്ഥയാണ്. കഴിഞ്ഞമാസം പൊതുമരാമത്ത് വകുപ്പിന്‍റെ കീഴിൽ നവീകരണം പൂർത്തിയാക്കിയ വിവിധ റോഡുകളുടെ ഉദ്ഘാടനം സർക്കാർ ഒരുമിച്ച് നടത്തിയതിൽ ഉൾപ്പെട്ട റോഡിലാണ് ഈ പാലമുള്ളത്. തകർന്ന കൈവരികളുടെ അറ്റകുറ്റപ്പണി അടിയന്തരമായി പൂർത്തിയാക്കുന്നതിനൊപ്പം അപകടമൊഴിവാക്കാൻ പാലം വീതികൂട്ടി പുനർനിർമിക്കണമെന്നാണ് നാട്ടുകാരുടെ ആവശ്യം.

റോഡുകളില്‍ അപകടകരമായ രീതിയില്‍ മരങ്ങള്‍

കോട്ടയം: മഴ ശക്തമായതോടെ ജില്ലയില്‍ മരങ്ങള്‍ ഒടിഞ്ഞുവീണുള്ള അപകടങ്ങള്‍ വര്‍ധിക്കുകയാണ്. ഇന്നലെ എരുമേലിയില്‍ ചെറുവള്ളി എസ്റ്റേറ്റില്‍ മരം വീണു തോട്ടം തൊഴിലാളി മരിച്ചതാണ് ദാരുണമായ സംഭവം. കോട്ടയത്തുനിന്ന് മെഡിക്കല്‍ കോളജിലേക്കുള്ള ബൈപാസ് റോഡില്‍ കൂറ്റന്‍ വാകമരം രാവിലെ വീണ് ഒരു പകല്‍ മുഴുവനാണ് ഗതാഗതം തടസപ്പെട്ടത്. ഓട്ടോറിക്ഷയുടെ മുകളിലേക്കാണ് മരം വീണത്. യാത്രക്കാര്‍ അത്ഭുതകരമായിട്ടാണ് രക്ഷപ്പെട്ടത്. വമ്പന്‍ മരത്തിന്‍റെ തടിയും ശിഖരങ്ങളും വെട്ടിമാറ്റാനായത് വൈകുന്നേരമാണ്. വൈക്കത്തിനു സമീപം വെള്ളൂരില്‍ തേക്കുമരം കോഴി ഫാമിനു മുകളില്‍ വീണ് 200 കോഴികള്‍ ചത്തതാണ് മറ്റൊരു സംഭവം. പാതയോരങ്ങളിലും പ്രധാനപ്പെട്ട കവലകളിലും മറ്റും നില്‍ക്കുന്ന കൂറ്റന്‍ മരങ്ങള്‍ യാത്രക്കാര്‍ക്ക് വലിയ അപകട ഭീഷണിയാണുയര്‍ത്തുന്നത്. കാലപ്പഴക്കത്താലും ശിഖരങ്ങളുടെ ഭാരത്താലുമാണ് മരങ്ങള്‍ ഒടിഞ്ഞുവീഴുന്നത്. കൂടാതെ വഴിയോരങ്ങളിലും മറ്റും നില്‍ക്കുന്ന മരങ്ങളുടെ വേരുകള്‍ കാര്യമായി മണ്ണിലേക്ക് ആഴ്ന്നിറങ്ങുന്നുമില്ല. കൂടാതെ ഒരു കാലം കഴിയുമ്പോള്‍ വാകമരത്തിന്‍റെ വേരുകള്‍ ചീയാന്‍ തുടങ്ങും. കേബിളുകള്‍ക്കും മറ്റുമായി മരത്തിന്‍റെ ചുവടുമാന്തി കുഴിയെടുക്കുന്നതും അപകടത്തിനു കാരണമാകുന്നു. മഴ മരം, ഉറക്കംതൂങ്ങിമരം എന്നു വിളിക്കുന്ന വാകമരം എന്നിവ ജില്ലയുടെ പ്രധാനപ്പെട്ട റോഡുകളിലെല്ലാം ധാരാളമായിട്ടുണ്ട്. പലതും അപകടാവസ്ഥയിലാണ്. സ്‌കൂളുകളുടെയും മറ്റും മുറ്റത്തുനിന്നിരുന്ന അപകട മരങ്ങള്‍ സ്കൂള്‍ തുറക്കലിനു മുമ്പായി വിദ്യാഭ്യാസ വകുപ്പ് അധികൃതര്‍ വെട്ടിമാറ്റിയിരുന്നു. റോഡുകളില്‍ നില്‍ക്കുന്ന അപകടകരമായ മരങ്ങള്‍ വെട്ടിമാറ്റേണ്ട ചുമതല പൊതുമരാമത്ത്, തദ്ദേശ സ്വയംഭരണ വകുപ്പുകള്‍ക്കാണ്. കഴിഞ്ഞ ഒരു മാസത്തിനിടയില്‍ ജില്ലയില്‍ അപകടകരമായ 400 മരങ്ങള്‍ വെട്ടിമാറ്റണമെന്നാണ് ജില്ലാ ട്രീ കമ്മിറ്റിക്കു മുമ്പാകെ അപേക്ഷ വന്നത്. അപേക്ഷകള്‍ വിശദമായി പരിശോധിച്ച് 400 മരങ്ങളും വെട്ടിമാറ്റാന്‍ ട്രീ കമ്മിറ്റി അനുമതി നല്‍കിയിരുന്നു. എന്നാല്‍ വെട്ടിമാറ്റേണ്ട വകുപ്പുകള്‍ ഇക്കാര്യത്തില്‍ നിസംഗത തുടരുകയാണ്. ചുങ്കം ബൈപാസിലെ മരം അപകടകരമായ രീതിയലാണെന്ന് ദീപിക പലതവണ ചിത്രം സഹിതം റിപ്പോര്‍ട്ട് ചെയ്തിരുന്നു. നാട്ടുകാരും വ്യാപാരികളും ബന്ധപ്പെട്ട അധികാരികള്‍ക്ക് പരാതിയും നല്‍കിയിരുന്നു. എന്നാല്‍, ഇതു വെട്ടിമാറ്റാന്‍ അധികൃതര്‍ തയാറായില്ല.

ചുങ്കം പാലത്തിനു സമീപം വൻമരം റോഡിലേക്ക് വീണു

കോട്ടയം: ശക്തമായ കാറ്റിലും മഴയത്തും ചുങ്കത്ത് പാലത്തിനു സമീപം കൂറ്റന്‍ വാകമരം റോഡിലേക്ക് കടപുഴകി വീണു. കോട്ടയം ചുങ്കം മെഡിക്കല്‍ കോളജ് ബൈപാസില്‍ ചുങ്കം പാലത്തിനു സമീപം ഇന്നലെ രാവിലെ 6.45 ഓടെയായിരുന്നു സംഭവം. മരത്തിന്‍റെ ശിഖരങ്ങള്‍ പതിച്ച് സമീപത്തെ ചുങ്കം കോയിക്കല്‍ ജോണിന്‍റെ വീട് ഭാഗികമായി തകർന്നു. രാവിലെ വീടിനു സമീപത്തെ കടയിലേക്ക് പോയി തിരികെ വീട്ടിലേക്ക് വരുമ്പോഴായിരുന്നു സംഭവമെന്ന് ജോണ്‍ പറയുന്നു. ശബ്ദം കേട്ട് മുകളിലേക്ക് നോക്കുമ്പോള്‍ വീടിനോട് ചേര്‍ന്നുനിന്ന വാകമരം ഒടിഞ്ഞ് വീഴുന്നതാണ് കണ്ടത്. ചില്ലകളില്‍ ചിലത് ദേഹത്തേക്കും വീണു. ഈ സമയം വീടിനുള്ളിൽ ഭാര്യ ലില്ലി മാത്രമാണുണ്ടായിരുന്നത്. പിന്നീട് അഗ്‌നിരക്ഷാസേന എത്തി മരച്ചില്ലകള്‍ മുറിച്ച് മാറ്റിയാണ് ഇവരെ പുറത്തിറക്കിയത്. ഇവര്‍ക്ക് മറ്റു പരിക്കുകളില്ല. വൈദ്യുതി കമ്പിയിലേക്ക് ചില്ലവീണ് ലൈനുകള്‍ കൂട്ടിമുട്ടി തീ കത്തി വൈദ്യുതി ബന്ധം വിച്ഛേദിക്കപ്പെട്ടു. മരം വീണതിനെത്തുടര്‍ന്ന് മണിക്കൂറുകളോളം ഗതാഗതക്കുരുക്കുണ്ടായി. റോഡരികില്‍നിന്നിരുന്ന മരം റോഡിനു കുറുകെയാണ് വീണത്. മരം വീഴുന്നതിന് അല്പം മുന്പ് പാലം കടന്ന ഓട്ടോറിക്ഷ സെക്കന്‍ഡുകളുടെ വ്യത്യാസത്തിലാണ് അപകടത്തില്‍നിന്ന് രക്ഷപ്പെട്ടതെന്ന് നാട്ടുകാര്‍ പറഞ്ഞു. ഞായറാഴ്ച ആയതിനാലും പുലർച്ചെ റോഡിൽ തിരക്കില്ലാതിരുന്നതിനാലും വലിയ ദുരന്തം ഒഴിവായി. മെഡിക്കല്‍ കോളജിലേക്കുള്ള ആംബുലന്‍സുകളടക്കം പോകുന്ന റൂട്ടാണിത്. വൈകുന്നേരത്തോടെയാണ് ഗതാഗതം പുനഃസ്ഥാപിച്ചത്. പ്രദേശത്തെ വൈദ്യുതി വിതരണവും വൈകിട്ടോടെ പുനഃസ്ഥാപിച്ചു. കോട്ടയം അഗ്‌നിരക്ഷാസേനയുടെ യും ഗാന്ധിനഗര്‍, കോട്ടയം വെസ്റ്റ് പോലീസ് സ്റ്റേഷനിലെ ഉദ്യോഗസ്ഥരുടെയും നേതൃത്വത്തില്‍ തൊഴിലാളികളെ ഉപയോഗിച്ച് ഒരു പകൽ മുഴുവന്‍ സമയമെടുത്താണ് മരം മുറിച്ചു നീക്കിയത്. ജെസിബി, ക്രെയിന്‍ എന്നിവയുടെ സഹായത്തോടെയാണ് കൂറ്റന്‍ മരത്തടികളും ശിഖരങ്ങളും പൂര്‍ണമായും വെട്ടിമാറ്റിയത്.

സ്കൂട്ടറിലേക്ക് മരം വീണ് തോട്ടം തൊഴിലാളി മരിച്ചു

എരുമേലി: സ്കൂട്ടറിൽ വരുമ്പോൾ റബർ മരം ഒടിഞ്ഞുവീണ് വൈദ്യുതി ലൈനിൽ തട്ടിയ ശേഷം സ്കൂട്ടറിലേക്കു വീണ് തോട്ടം തൊഴിലാളി മരിച്ചു. ചെറുവള്ളി എസ്റ്റേറ്റ് അഞ്ചാം ഡിവിഷനിൽ താമസിക്കുന്ന മുനിയ സ്വാമി (56) ആണ് മരിച്ചത്. ഇന്നലെ ഉച്ചകഴിഞ്ഞ് രണ്ടോടെയാണ് അപകടം. എസ്റ്റേറ്റ് തൊഴിലാളിയായ മുനിയ സ്വാമി വീട്ടിൽനിന്ന് എരുമേലിയിലേക്ക് സ്കൂട്ടറോടിച്ച് വരുമ്പോൾ എസ്റ്റേറ്റിലെ പഴയ ഫാക്ടറി ഭാഗത്തുവച്ച് റബർ മരം ഒടിഞ്ഞ് സ്കൂട്ടറിന് മുകളിൽ വീഴുകയായിരുന്നു. വൈദ്യുതി ലൈനിൽ തട്ടിയ ശേഷം മരം സ്കൂട്ടറിലേക്ക് വീണതിനൊപ്പം വൈദ്യുതി പ്രവാഹം ഉണ്ടായി. എരുമേലിയിലെ സർക്കാർ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. പോസ്റ്റ്മോർട്ടത്തിന് ശേഷം ഇന്ന് വൈകുന്നേരം നാലിന് എസ്റ്റേറ്റ് ശ്മശാനത്തിൽ മൃതദേഹം സംസ്‌കരിക്കും. വേലുതായി ആണ് ഭാര്യ. മക്കൾ: വിഷ്ണു, വിജയ്.

അപകടകരമായ മരങ്ങള്‍: പരാതി നൽകാം

കോട്ടയം: പൊതുസ്ഥലങ്ങളില്‍ അപകടകരമായ രീതിയില്‍ മരങ്ങള്‍ നില്‍പ്പുണ്ടെങ്കില്‍ തദ്ദേശസ്വയം ഭരണ സ്ഥാപനത്തിന്‍റെ പരിധയിലാണെങ്കിലും പൊതുമരാമത്ത് വകുപ്പിന്‍റെ പരിധിയിലാണെങ്കിലും ബന്ധപ്പെട്ട വകുപ്പില്‍ പരാതി നല്‍കാം. പരാതി അതതു വകുപ്പുകള്‍ ജില്ലാ ട്രീ കമ്മിറ്റിക്ക് നല്‍കും. ട്രീ കമ്മിറ്റി 15 ദിവസത്തിനകം ബന്ധപ്പെട്ട സ്ഥലത്ത് നേരിട്ട് സന്ദര്‍ശനം നടത്തി റിപ്പോര്‍ട്ട് സമര്‍പ്പിക്കും. ഇതനുസരിച്ചാണ് മരങ്ങള്‍ വെട്ടുന്നത്. നേരത്തേ വനം വകുപ്പിനായിരുന്നു ട്രീ കമ്മിറ്റിയുടെ ചുമതല. ഇപ്പോള്‍ ജില്ലാ പഞ്ചായത്ത് സെക്രട്ടറിമാരാണ് ട്രീ കമ്മിറ്റിയുടെ ചുമതല നിര്‍വഹിക്കുന്നത്. വ്യക്തമായ കാരണത്തിന്‍റെ അടിസ്ഥാനത്തില്‍ ഒരു കാരണവശാലും വെട്ടാന്‍ പാടില്ലെന്ന് ട്രീ കമ്മിറ്റി സത്യവാംഗ്മൂലം നല്‍കിയാല്‍ മാത്രമേ മരം വെട്ടാതിരിക്കുകയുള്ളൂ. നിലവില്‍ ട്രീ കമ്മറ്റിക്കു മുമ്പാകെ ഇതുവരെ വന്ന മുഴുവന്‍ പരാതികളിലും മരങ്ങള്‍ വെട്ടിമാറ്റാന്‍ അനുമതി നല്‍കിയിട്ടുണ്ട്. വീടുകൾക്ക് ഭീഷണിയായി മരങ്ങൾ നിൽപുണ്ടെങ്കിൽ പഞ്ചായത്തിലും നഗരസഭയിലും പരാതിപ്പെട്ടാൽ അധികൃതർ നടപടിയെടുക്കും. അപകടകരമായ രീതിയിലുള്ള മരങ്ങൾ സ്വന്തം ചെലവിൽ വെട്ടിമാറ്റണമന്നും അല്ലാത്ത പക്ഷം നഷ്ടപരിഹരം ഉൾപ്പെടെ അതതു വ്യക്തികളിൽ നിന്ന് ഈടാക്കുമെന്ന് പഞ്ചായത്തും നഗരസഭയും ഉത്തരവിറക്കിയിട്ടുണ്ട്.

കോഴിഫാമിനു മുകളിൽ മരംവീണ് 200 കോഴിക്കുഞ്ഞുങ്ങൾ ചത്തു

വെള്ളൂർ: ശക്തമായ കാറ്റിൽ തേക്ക് മരം കോഴിഫാമിന് മുകളിലേക്ക് വീണ് 200 കോഴിക്കുഞ്ഞുങ്ങൾ ചത്തു. മേവെള്ളൂർ പമ്പ് ഹൗസിനു സമീപം തേയത്ത് ടി.വി. മധുവിന്‍റെ ഉടമസ്ഥതയിലുള്ള കോഴി ഫാമിനു മുകളിലേക്ക് പുരയിടത്തിൽനിന്ന കൂറ്റൻ തേക്ക് മരം ഇന്നലെ പുലർച്ചെ കടപുഴകി വീണാണ് കോഴിക്കുഞ്ഞുങ്ങൾ കൂട്ടത്തോടെ ചത്തത്. മരം വീണ് കോഴിഫാമിന്‍റെ ഒരു വശം പൂർണമായും തകർന്നു. രണ്ടു ലക്ഷത്തിലധികം രൂപയുടെ നാശനഷ്ടമുണ്ടായതായി ഉടമ പറഞ്ഞു.

കാറ്റിനെ നേരിടാനുള്ള പൊതുജാഗ്രതാ നിര്‍ദേശങ്ങള്‍

കാറ്റും മഴയും ഉണ്ടാകുമ്പോള്‍ ഒരു കാരണവശാലും മരങ്ങളുടെ ചുവട്ടില്‍ നില്‍ക്കാന്‍ പാടുള്ളതല്ല. മരച്ചുവട്ടില്‍ വാഹനങ്ങളും പാര്‍ക്ക് ചെയ്യരുത്. വീട്ടുവളപ്പിലെ മരങ്ങളുടെ അപകടകരമായ രീതിയിലുള്ള ചില്ലകള്‍ വെട്ടിയൊതുക്കണം. അപകടാവസ്ഥയിലുള്ള മരങ്ങള്‍ പൊതുവിടങ്ങളില്‍ ശ്രദ്ധയില്‍ പെട്ടാല്‍ ബന്ധപ്പെട്ട തദ്ദേശ സ്ഥാപനങ്ങളെ അറിയിക്കുക. ഉറപ്പില്ലാത്ത പരസ്യബോര്‍ഡുകള്‍, ഇലക്‌ട്രിക് പോസ്റ്റുകള്‍, കൊടിമരങ്ങള്‍ തുടങ്ങിയവയും കാറ്റില്‍ വീഴാന്‍ സാധ്യതയുള്ളതിനാല്‍ കാറ്റും മഴയും ഇല്ലാത്ത സമയത്ത് അവ ശരിയായ രീതിയില്‍ ബലപ്പെടുത്തുകയോ അഴിച്ചു വയ്ക്കുകയോ ചെയ്യുക. കാറ്റും മഴയും ഉള്ളപ്പോള്‍ ഇതിന്‍റെ ചുവട്ടിലും സമീപത്തും നില്‍ക്കുകയോ വാഹനങ്ങള്‍ പാര്‍ക്ക് ചെയ്യുകയോ അരുത്. ചുമരിലോ മറ്റോ ചാരിവച്ചിട്ടുള്ള കോണി പോലെയുള്ള, കാറ്റില്‍ വീണുപോകാന്‍ സാധ്യതയുള്ള ഉപകരണങ്ങളും മറ്റ് വസ്തുക്കളും കയറുപയോഗിച്ച് കെട്ടിവയ്ക്കുക. കാറ്റ് വീശിത്തുടങ്ങുമ്പോള്‍തന്നെ വീടുകളിലെ ജനലുകളും വാതിലുകളും അടച്ചിടേണ്ടതാണ്. ജനലുകളുടെയും വാതിലുകളുടെയും സമീപത്ത് നില്‍ക്കാതിരിക്കുക. വീടിന്‍റെ ടെറസിലും നില്‍ക്കുന്നത് ഒഴിവാക്കുക. ഓല മേഞ്ഞതോ, ഷീറ്റ് പാകിയതോ, അടച്ചുറപ്പില്ലാത്തതോ ആയ വീടുകളില്‍ താമസിക്കുന്നവര്‍ മുന്നറിയിപ്പ് വരുന്ന ഘട്ടങ്ങളില്‍ അധികൃതര്‍ ആവശ്യപ്പെടുന്ന മുറയ്ക്ക് സുരക്ഷിതമായ കെട്ടിടങ്ങളിലേക്ക് മാറിത്താമസിക്കേണ്ടതാണ്. നിര്‍മാണ ജോലികളില്‍ ഏര്‍പ്പെടുന്നവര്‍ കാറ്റും മഴയും ശക്തമാകുമ്പോള്‍ ജോലി നിര്‍ത്തിവച്ച് സുരക്ഷിതമായ ഇടത്തേക്ക് മാറി നില്‍ക്കണം.

ജില്ലയില്‍ മഴ ശക്തം

കോട്ടയം: ജില്ലയില്‍ വീണ്ടും മഴ ശക്തിപ്രാപിച്ചു. കോട്ടയം, ചങ്ങനാശേരി, വൈക്കം താലൂക്കുകളില്‍ ശക്തമായ മഴയും കാറ്റുമുണ്ടായി. ശക്തമായ കാറ്റില്‍ മരങ്ങള്‍ ഒടിഞ്ഞ് നിരവധി അപടങ്ങളുമുണ്ടായി. മീനച്ചില്‍, മണിമല, മൂവാറ്റുപുഴയാറുകളില്‍ ജലനിരപ്പ് ഉയര്‍ന്നു. ചങ്ങനാശേരി താലൂക്കില്‍ ഒരു ദുരിതാശ്വാസ ക്യാമ്പ് പ്രവര്‍ത്തിക്കുന്നുണ്ട്. ഇവിടെ രണ്ടു കുടുംബങ്ങള്‍ കഴിയുന്നു. മാടപ്പള്ളി വില്ലേജില്‍ ജോര്‍ജ് തോമസ് എന്ന ആളിന്റെ വീടിനു മുകളില്‍ മണ്ണ് ഇടിഞ്ഞുവീണു, അതിരമ്പുഴ ജംഗ്ഷനിലുള്ള സെന്‍റ് മേരീസ് എല്‍പി സ്‌കൂളിന്‍റെ മതില്‍ തകര്‍ന്നുവീണു. മലയോര മേഖലയില്‍ രാത്രി യാത്ര നിരോധിച്ചിട്ടുണ്ട്. ജില്ലയില്‍ ഖനനവും നിരോധിച്ചു. രാത്രിയിലും ശക്തമായ മഴ തുടരുകയാണ്.

വൈദ്യുതി കമ്പികള്‍ പൊട്ടിവീണാല്‍...

കോട്ടയം: കാറ്റും മഴയും ശക്തമാകുമ്പോള്‍ വൈദ്യുതി കമ്പികളും പോസ്റ്റുകളും പൊട്ടിവീഴാനുള്ള സാധ്യത കൂടുതലാണ്. ഇത്തരത്തില്‍ ഏതെങ്കിലും അപകടം ശ്രദ്ധയില്‍ പെട്ടാല്‍ ഉടനെ തന്നെ കെഎസ്ഇബിയുടെ 1912 എന്ന കണ്‍ട്രോള്‍ റൂമിലോ 1077 എന്ന നമ്പറില്‍ ജില്ലാ ദുരന്ത നിവാരണ അഥോറിറ്റിയുടെ കണ്‍ട്രോള്‍ റൂമിലോ വിവരം അറിയിക്കുക. കെഎസ്ഇിബി ജീവനക്കാരുമായി പൊതുജനങ്ങള്‍ ക്ഷമയോടെ സഹകരിക്കുക. പൊതുജനങ്ങള്‍ നേരിട്ടിറങ്ങി ഇത്തരം അറ്റകുറ്റപ്പണികൾ ചെയ്യാതിരിക്കുക. പത്രം-പാല്‍ വിതരണക്കാര്‍ പോലെയുള്ള അതിരാവിലെ ജോലിക്ക് ഇറങ്ങുന്നവര്‍ പ്രത്യേക ജാഗ്രത പാലിക്കണം. വഴികളിലെ വെള്ളക്കെട്ടുകളിലും മറ്റും വൈദ്യുതി ലൈന്‍ പൊട്ടിവീണിട്ടില്ലെന്ന് ഉറപ്പാക്കാന്‍ ശ്രമിക്കണം. കൃഷിയിടങ്ങളില്‍കൂടി കടന്നുപോകുന്ന വൈദ്യുത ലൈനുകളും സുരക്ഷിതമാണെന്ന് പാടത്ത് ഇറങ്ങുന്നതിന് മുന്‍പ് ഉറപ്പ് വരുത്തുക.

സാനിട്ടേഷന്‍ ബ്ലോക്ക് ഉദ്ഘാടനം ചെയ്തു

പാദുവ: ജില്ലാ പഞ്ചായത്തിന്‍റെ പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബര്‍ ജോസ് മോന്‍ മുണ്ടയ്ക്കല്‍ അനുവദിച്ച അഞ്ചു ലക്ഷം രൂപ ഉപയോഗിച്ച് അകലക്കുന്നം പഞ്ചായത്തിലെ പാദുവ സെന്‍റ് ആന്‍റണീസ് എല്‍പി സ്‌കൂളില്‍ സാനിട്ടേഷന്‍ ബ്ലോക്കിന്‍റെ നിര്‍മാണം പൂര്‍ത്തീകരിച്ചു. ജോസ്മോന്‍ മുണ്ടയ്ക്കല്‍ സാനിട്ടേഷൻ ബ്ലോക്കിന്‍റെ ഉദ്ഘാടനം നിര്‍വഹിച്ചു. യോഗത്തില്‍ സ്‌കൂള്‍ മാനേജര്‍ ഫാ. തോമസ് ഓലായത്തില്‍ അധ്യക്ഷത വഹിച്ചു. പഞ്ചായത്ത് മെംബര്‍ മാത്തുക്കുട്ടി കൈമരപ്ലാക്കല്‍, ഹെഡ്മിസ്ട്രസ് സിസ്റ്റര്‍ പൗളിന്‍, മാത്യു ജോസഫ് കരിപ്പാമറ്റം, തങ്കച്ചന്‍ കടുപ്പില്‍ എന്നിവര്‍ പ്രസംഗിച്ചു.

ജില്ലാതല ലോക രക്തദായക ദിനാചരണവും മെഗാ രക്തദാന ക്യാമ്പും ഇന്നു പാലായില്‍

പാലാ: ജില്ലാ ആരോഗ്യ വകുപ്പിന്‍റെയും ആരോഗ്യ കേരളത്തിന്‍റെയും പാലാ ബ്ലഡ് ഫോറത്തിന്‍റെയും പാലാ സെന്‍റ് തോമസ് കോളജ് എന്‍എസ്എസ് യൂണിറ്റിന്‍റെയും നേതൃത്വത്തില്‍ ജില്ലാതല ലോക രക്തദായക ദിനാചരണവും മെഗാ രക്തദാന ക്യാമ്പും ഇന്നു പാലായില്‍ നടക്കും. പാലാ സെന്‍റ് തോമസ് കോളജ് ഓഡിറ്റോറിയത്തില്‍ രാവിലെ 9.30ന് ആരംഭിക്കുന്ന രക്തദാന ക്യാമ്പ് പാലാ ബ്ലഡ് ഫോറം ജനറല്‍ കണ്‍വീനര്‍ ഷിബു തെക്കേമറ്റം ഉദ്ഘാടനം ചെയ്യും. 11.45ന് ജില്ലാ മെഡിക്കല്‍ ഓഫീസര്‍ ഡോ. എന്‍. പ്രിയയുടെ അധ്യക്ഷതയില്‍ ചേരുന്ന സമ്മേളനത്തില്‍ ജോസ് കെ. മാണി എംപി ദിനാചരണം ഉദ്ഘാടനം ചെയ്യും. കോളജ് പ്രിന്‍സിപ്പല്‍ ഡോ. സിബി ജയിംസ്, മുനിസിപ്പല്‍ കൗണ്‍സിലര്‍ ജിമ്മി ജോസഫ്, ആരോഗ്യകേരളം ജില്ലാ പ്രോഗ്രാം മാനേജര്‍ ഡോ. വ്യാസ് സുകുമാരന്‍, ജനറല്‍ ആശുപത്രി സൂപ്രണ്ട് ഡോ. ടി.പി അഭിലാഷ്, എന്‍എസ്എസ് പ്രോഗ്രാം ഓഫീസര്‍മാരായ ഡോ. പ്രിന്‍സി ഫിലിപ്പ്, ഡോ. ആന്‍റോ മാത്യു, ആരോഗ്യകേരളം പ്രോഗ്രാം കോ-ഓര്‍ഡിനേറ്റര്‍ സി. ആര്‍. വിനീഷ്, ഡെപ്യൂട്ടി മാസ് ഇന്‍ ചാര്‍ജ് ജി. ജയരാജ്, സിബി മാത്യു പ്ലാത്തോട്ടം എന്നിവര്‍ പ്രസംഗിക്കും. പാലാ മരിയന്‍ മെഡിക്കല്‍ സെന്‍റര്‍ ബ്ലഡ് ബാങ്ക് ക്യാമ്പ് നയിക്കും.

വിദ്യാർഥികളിലൂടെ 2047ൽ വികസിത ഭാരതമെന്ന ലക്ഷ്യം നേടണം: ഗവർണർ സി.പി. രാധാകൃഷ്ണൻ

മാന്നാനം: വിദ്യാർഥികളിലൂടെ 2047ൽ വികസിത ഭാരതം എന്ന ലക്ഷ്യം സ്വായത്തമാക്കണമെന്ന് മഹാരാഷ്‌ട്ര ഗവർണർ ഡോ.സി.പി. രാധാകൃഷ്ണൻ. സിറ്റിസൺസ് ഫോറത്തിന്‍റെ നേതൃത്വത്തിൽ മാന്നാനം കുര്യാക്കോസ് ഏലിയാസ് ഇംഗ്ലീഷ് മീഡിയം സ്കൂളിൽ നടത്തിയ ‘വികസിത് ഭാരത് -2047’ സംവാദം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഇന്നത്തെ കുട്ടികൾ നാളത്തെ പൗരന്മാരാണെന്ന തിരിച്ചറിവോടെ കുഞ്ഞുങ്ങളെ രാജ്യത്തിന്‍റെ വികസനത്തിനും പുരോഗതിക്കും ഉതകുംവിധം ഉത്തമപൗരന്മാരായി വളർത്തിയെടുക്കണം. അധ്യാപകരിലൂടെ കുഞ്ഞുങ്ങൾ സ്വരാജ്യത്തിന്‍റെ മൂല്യങ്ങളും ലക്ഷ്യങ്ങളും തിരിച്ചറിയണമെന്ന് ഗവർണർ പറഞ്ഞു. എംജി യൂണിവേഴ്സിറ്റി മുൻ വൈസ് ചാൻസലർ ഡോ. സിറിയക് തോമസ് മോഡറേറ്ററായി. കോട്ടയം അതിരൂപത വികാരി ജനറാൾ മോൺ. മൈക്കിൾ വെട്ടിക്കാട്ട്, സിറ്റിസൺസ് ഫോറം ഓർഗനൈസിംഗ് സെക്രട്ടറിയും ദർശന കൾച്ചറൽ സെന്‍റർ ഡയറക്ടറുമായ ഫാ. എമിൽ പുള്ളിക്കാട്ടിൽ, സിറ്റിസൺസ് ഫോറം സെക്രട്ടറി ജനറലും കെഇ സ്കൂൾ പ്രിൻസിപ്പലുമായ റവ.ഡോ. ജയിംസ് മുല്ലശേരി സിഎംഐ, സിറ്റിസൺസ് ഫോറം പ്രോഗ്രാം കോ-ഓർഡിനേറ്റർ മാത്യു കൊല്ലമലക്കരോട്ട് തുടങ്ങിയവർ പങ്കെടുത്തു.

എരുമേലി തെക്ക് വില്ലേജിന്‍റെ സ്മാർട്ട്‌ ഓഫീസ് ഇനി തുറക്കാം

എരുമേലി: നിർമാണം പൂർത്തിയായി ഉദ്ഘാടനമായപ്പോൾ ഹൈക്കോടതിയിൽ കേസിൽ കുരുങ്ങി ഒന്നര വർഷമായി അടഞ്ഞുകിടന്ന എരുമേലി തെക്ക് വില്ലേജിന്‍റെ സ്മാർട്ട്‌ ഓഫീസ് ഇനി തുറക്കാം. സ്ഥലം ദേവസ്വം വക ആണെന്നായിരുന്നു എറണാകുളം സ്വദേശി അഭിഭാഷകൻ കോടതിയിൽ ഹർജിയിൽ ഉന്നയിച്ചിരുന്നത്. എന്നാൽ, ഇതിനു വ്യക്തമായ തെളിവുകൾ നൽകാൻ കഴിയാതെ വന്നതോടെ കേസ് കഴിഞ്ഞദിവസം കോടതി തീർപ്പാക്കുകയായിരുന്നു. റവന്യുഭൂമി ആണെന്ന സർക്കാർ വാദം പരിശോധിച്ച് ഉറപ്പുവരുത്താൻ കോടതി നിർദേശം നൽകിയാണ് കേസ് തീർപ്പാക്കിയത്. കോട്ടയം ജില്ലാ കളക്ടർക്കാണ് നിർദേശം നൽകിയിരിക്കുന്നത്. പൊതുമരാമത്ത് വകുപ്പിന്‍റെ അധീനതയിലുള്ള സ്ഥലത്തിൽനിന്നു പത്ത് സെന്‍റ് ഭൂമി റവന്യുവകുപ്പിന് വിട്ടുനൽകിയാണ് സ്മാർട്ട് വില്ലേജ് ഓഫീസ് നിർമിച്ചത്. മുൻ കളക്ടർ ഡോ. പി.കെ. ജയശ്രീ ആണ് സ്ഥലം ഏറ്റെടുത്തു കൈമാറിയത്. അന്ന് പരിശോധിച്ച രേഖകൾ തന്നെയാണ് നിലവിലുള്ളത്. ഇത് വീണ്ടും പരിശോധിച്ച് വ്യക്തത വരുത്താനാണ് കോടതി നിർദേശിച്ചിരിക്കുന്നതെന്നും സ്ഥലം റവന്യുഭൂമി ആണെന്ന് നേരത്തേ ബോധ്യപ്പെട്ടിട്ടുള്ളതുകൊണ്ട് ഒരു മാസത്തിനകം നടപടികൾ പൂർത്തിയാക്കി കെട്ടിടം തുറന്ന് ഉദ്ഘാടനം ചെയ്യാൻ കഴിയുമെന്ന് സെബാസ്റ്റ്യൻ കുളത്തുങ്കൽ എംഎൽഎ പറഞ്ഞു. എരുമേലിയിൽ പൊതുമരാമത്ത് റെസ്റ്റ് ഹൗസിന്‍റെ സ്ഥലത്തിനോട് ചേർന്നാണ് വില്ലേജ് ഓഫീസ് നിർമിച്ചിട്ടുള്ളത്. ഇതിനായി സ്ഥലം ഏറ്റെടുത്ത് ജില്ലാ കളക്ടർ ഉത്തരവിട്ടപ്പോൾ ആക്ഷേപങ്ങൾക്ക് സമയം അനുവദിച്ചിരുന്നെങ്കിലും ആക്ഷേപങ്ങൾ ലഭിച്ചില്ല. തുടർന്ന് നിർമാണം പൂർത്തിയായി ഉദ്ഘാടന നോട്ടീസ് ആയപ്പോളാണ് ഹൈക്കോടതിയിൽ കേസെത്തുകയും ഉദ്ഘാടനം നടത്തി കെട്ടിടം പ്രവർത്തനം ആരംഭിക്കുന്നതിന് കോടതിയിൽനിന്ന് വിലക്കുണ്ടായതും. റെസ്റ്റ് ഹൗസ് ഉൾപ്പെടെ തൊട്ടുചേർന്ന് സ്വകാര്യ ആശുപത്രി അടക്കം ഒട്ടേറെ വീടുകളും സ്ഥലങ്ങളുമുണ്ട്. ഇങ്ങനെയിരിക്കേ വില്ലേജ് ഓഫീസിന് ലഭിച്ച സ്ഥലം മാത്രം ദേവസ്വം വക ആണെന്ന ഹർജി നാട്ടുകാർക്കും അവിശ്വസനീയമായിരുന്നു. ദേവസ്വം ബോർഡ് ആകട്ടെ ഭൂമി തങ്ങളുടേതല്ലെന്ന് നേരത്തേ അറിയിച്ചിരുന്നു. വസ്തുതകൾ ഇതായിരിക്കെ നാട്ടുകാരൻ അല്ലാത്ത എറണാകുളം സ്വദേശിയായ ആൾ കേസ് നൽകിയത് ഏറെ ദുരൂഹത സൃഷ്ടിച്ചു. ഒടുവിൽ ഇപ്പോൾ ഓഫീസ് തുറക്കാൻ അനുകൂലമായ വിധി ഉണ്ടായതോടെ ആശ്വാസത്തിലാണ് റവന്യുവകുപ്പ്. കേസിൽ തിരിച്ചടി നേരിട്ടിരുന്നുവെങ്കിൽ കെട്ടിട നിർമാണത്തിന് ചെലവിട്ട 44 ലക്ഷം രൂപ നഷ്ടവും ബാധ്യതയുമായി മാറുമായിരുന്നു. കെട്ടിടം അടഞ്ഞുകിടന്നതുമൂലം കാട് വളർന്ന നിലയിൽ ഇഴജന്തുക്കളും തെരുവുനായ്ക്കളും താവളമാക്കിയിരിക്കുകയാണ്. 44 ലക്ഷം ചെലവിട്ട് 1250 ചതുരശ്ര അടിയിലാണ് കെട്ടിടം നിർമിച്ചത്. 2022 ഏപ്രിൽ 30നാണ് പുതിയ സ്മാർട്ട്‌ വില്ലേജ് ഓഫീസിന് ശിലയിട്ടത്. 2023 ഒക്ടോബറിൽ നിർമാണം പൂർത്തിയായി. നിലവിൽ പതിറ്റാണ്ടുകളായി എരുമേലി പ്രൈവറ്റ് ബസ് സ്റ്റാൻഡിൽ ഷോപ്പിംഗ് കോംപ്ലക്സിന്‍റെ രണ്ടാം നിലയിലെ ഒരു മുറിയിലാണ് വില്ലേജ് ഓഫീസ് പ്രവർത്തിച്ചു കൊണ്ടിരിക്കുന്നത്. ഇവിടെ അസൗകര്യങ്ങൾ ഏറെയാണ്. കോട്ടയം ജില്ലയിൽ വിസ്തൃതി കൂടിയ വലിയ വില്ലേജാണ് എരുമേലി. ജില്ലയിൽ ഏറ്റവും കൂടുതൽ റവന്യു റിക്കവറിയും വനഭൂമിയും ഈ വില്ലേജിലാണ്. കെട്ടിടം പ്രവർത്തനമാകുന്നതോടെ നിർദിഷ്ട എരുമേലി വിമാനത്താവള പദ്ധതി, ശബരി റെയിൽവേ പദ്ധതി എന്നിവയുടെ സ്ഥലം ഏറ്റെടുക്കുന്നതിനുള്ള ജോലികൾക്ക് ഓഫീസ് ഉപകരിക്കും.

ഡോ. ആന്‍റണി കല്ലമ്പള്ളിക്ക് ലൈഫ് ടൈം അച്ചീവ്മെന്‍റ് അവാർഡ്

പെരുവന്താനം: സെന്‍റ് ആന്‍റണീസ് കോളജ് പ്രിൻസിപ്പൽ ഡോ. ആന്‍റണി കല്ലമ്പള്ളിക്ക് ലൈഫ് ടൈം അച്ചീവ്മെന്‍റ് അവാർഡ് ഫോർ എഡ്യുക്കേഷണൽ എക്സലൻസ് സമ്മാനിച്ചു. കോട്ടയം മാമ്മൻ മാപ്പിള ഹാളിൽ നടന്ന സമ്മേളനത്തിൻ ഗോവ ഗവർണർ പി.എസ്. ശ്രീധരൻപിള്ള അവാർഡ് നൽകി. എഴുത്തുകാരനും മോട്ടിവേഷണൻ സ്പീക്കറും എംജി യൂണിവേഴ്സിറ്റിയുടെയും ഭാരതിയാർ യൂണിവേഴ്സിറ്റിയുടെയും റിസർച്ച് ഗൈഡും കോളമിസ്റ്റും ട്രെയിനറും പതിനാല് പുസ്തകങ്ങളുടെ രചയിതാവുമായ ഡോ. ആന്‍റണി കല്ലമ്പള്ളി നിരവധി സാമൂഹിക, സാംസ്കാരിക, സഹകരണ മേഖലയിലും അതുല്യ സംഭാവനകൾ നൽകി പ്രവർത്തിച്ചുവരുന്നു. ഈ വർഷം കേരള സർക്കാരിന്‍റെ ലഹരിവിരുദ്ധ പ്രവൃത്തനങ്ങൾക്ക് പിന്തുണ നൽകി നൂറിലേറെ സ്കൂളുകൾ സന്ദർശിച്ച് അവബോധ ക്ലാസുകൾ സംഘടിപ്പിച്ചു. 81 സൺഡേ സ്കൂളുകൾ സന്ദർശിച്ച് ലഹരിവിരുദ്ധ പ്രവർത്തനങ്ങൾക്ക് നേതൃത്വം നൽകി. കൂടാതെ 101 സ്കൂളുകൾ സന്ദർശിച്ച് പരീക്ഷാഭയം മാറ്റുന്നതിന് ഉൾപ്പെടെ നൽകിയ സമഗ്ര സംഭാവനകൾ പരിഗണിച്ചാണ് അവാർഡ് സമ്മാനിച്ചത്. പെരുവന്താനം സെന്‍റ് ആന്‍റണീസ് കോളജ് വിദ്യാഥികൾക്ക് 2021 മുതൽ തുടർച്ചയായി റാങ്ക് നേട്ടങ്ങൾ കൈവരിക്കുന്നതിനു പുലർത്തുന്ന വ്യത്യസ്തങ്ങളായ സമീപനങ്ങൾ ഏറെ ശ്രദ്ധേയമാണ്.

വാർഷിക പൊതുയോഗവും എസ്എസ്എൽസി അവാർഡ് ദാനവും

കാഞ്ഞിരപ്പള്ളി: കേരള വ്യാപാരി വ്യവസായി ഏകോപനസമിതി കാഞ്ഞിരപ്പള്ളി യൂണിറ്റ് 34-ാമത് വാർഷിക പൊതുയോഗവും എസ്എസ്എൽസി അവാർഡ് ദാനവും നടത്തി. വ്യാപാരി വ്യവസായി ഏകോപനസമിതി സംസ്ഥാന വൈസ് പ്രസിഡന്‍റും കോട്ടയം ജില്ലാ പ്രസിഡന്‍റുമായ എം.കെ. തോമസ്കുട്ടി സമ്മേളനം ഉദ്ഘാടനം ചെയ്തു. യൂണിറ്റ് പ്രസിഡന്‍റ് ബെന്നിച്ചൻ കുട്ടൻചിറയിൽ അധ്യക്ഷത വഹിച്ചു. ജനറൽ സെക്രട്ടറി ബിജു പത്യാല റിപ്പോർട്ടും ട്രഷറർ വി.എം. അബ്ദുസലാം കണക്കും അവതരിപ്പിച്ചു. ജില്ലാ ജനറൽ സെക്രട്ടറി എ.കെ.എൻ. പണിക്കർ, രക്ഷാധികാരി മാത്യു ചാക്കോ വെട്ടിയാങ്കൽ, വൈസ് പ്രസിഡന്‍റുമാരായ മനോജ് അമ്പാട്ട്, ജോജി ഗ്ലോബൽ, നജീബ് ഇസ്മായിൽ, സെക്രട്ടറിമാരായ സുരേഷ് കുമാർ, ഉണ്ണി ചെറിയാൻ ചീരൻവേലിൽ, അബ്ദുൾ ജബ്ബാർ, മുഹമ്മദ് ശരീഫ്, വനിതാ വിംഗ് പ്രസിഡന്‍റ് ലിസിയമ്മ ചാക്കോ, യൂത്ത് വിംഗ് പ്രസിഡന്‍റ് റിജോ ജോസ് ചീരാംകുഴിയിൽ എന്നിവർ പ്രസംഗിച്ചു.

മരംവീണ് മരണം: ഷോക്കേറ്റെന്നു സംശയം

എരുമേലി: ചെറുവള്ളി എസ്റ്റേറ്റിൽ തോട്ടം തൊഴിലാളിയുടെ ദാരുണ മരണത്തിൽ ദുഃഖാർത്തരായി നാട്ടുകാർ. അഞ്ചാം ഡിവിഷനിലെ ലയത്തിൽ താമസിക്കുന്ന എസ്റ്റേറ്റ് തൊഴിലാളി മുനിയ സ്വാമി (56) ആണ് ഇന്നലെ ഉച്ചയ്ക്ക് എസ്റ്റേറ്റിൽവച്ച് അപകടത്തിൽ മരിച്ചത്. മുനിയ സ്വാമി ഓടിച്ചുവന്ന സ്കൂട്ടറിലേക്ക് റബർ മരം ഒടിഞ്ഞുവീണാണ് അപകടം. വൈദ്യുതിലൈനുകൾ തകർത്താണ് മരം സ്കൂട്ടറിന് മുകളിലേക്ക് വീണത്. തത്സമയം വൈദ്യുതി പ്രവഹിച്ചിരുന്നോ എന്നു സംശയമുണ്ടെന്നും അപകടസ്ഥലത്തുതന്നെ മരണം സംഭവിച്ച നിലയിലായിരുന്നുവെന്നും നാട്ടുകാർ പറഞ്ഞു. എരുമേലി സർക്കാർ ആശുപത്രിയിൽ എത്തിച്ചതോടെ മരണം സ്ഥിരീകരിക്കുകയായിരുന്നു. ഗുരുതരമായ പരിക്കുകൾ ശരീരത്തിൽ ഇല്ലായിരുന്നു. പെട്ടെന്നുണ്ടായ വൈദ്യുതാഘാതമാകാം മരണകാരണമെന്ന് സംശയമുണ്ട്. പോസ്റ്റ്മോർട്ടത്തിനു ശേഷമേ മരണകാരണം വ്യക്തമാകുമെന്ന് എരുമേലി പോലീസ് പറഞ്ഞു. തമിഴ്‌നാട്ടിൽനിന്ന് എരുമേലി ചെറുവള്ളി എസ്റ്റേറ്റിൽ പതിറ്റാണ്ടുകൾക്ക് മുമ്പ് തൊഴിലാളികളായി താമസമാക്കിയ കുടുംബമാണ് മുനിയ സ്വാമിയുടേത്. മൃതദേഹം ഇന്നു വൈകുന്നേരം നാലിന് എസ്റ്റേറ്റിലെ പൊതുശ്മശാനത്തിൽ സംസ്‌കരിക്കും.

കെ. നാരായണക്കുറുപ്പ് ലളിതജീവിതത്താൽ മഹത്തായ സന്ദേശം പകർന്ന വ്യക്തി: മന്ത്രി റോഷി അഗസ്റ്റിൻ

കാഞ്ഞിരപ്പള്ളി: ലളിത ജീവിതംകൊണ്ടു മഹത്തായ സന്ദേശം പകർന്ന വ്യക്തിയായിരുന്നു മന്ത്രിയും ഡെപ്യൂട്ടി സ്പീക്കറുമായിരുന്ന പ്രഫ. കെ. നാരായണക്കുറുപ്പെന്ന് ജലവിഭവമന്ത്രി റോഷി അഗസ്റ്റിൻ. കുന്നുംഭാഗം സെന്‍റ് ജോസഫ്സ് പബ്ലിക് സ്കൂളിൽ നടത്തിയ പ്രഫ. കെ. നാരായണക്കുറുപ്പ് അനുസ്മരണവും എംഎൽഎ എക്സലൻസ് അവാർഡ് ദാനവും ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. നിയോജകമണ്ഡലത്തിലെ സാമൂഹിക, സാംസ്കാരിക മേഖലകളിൽ മികച്ച സേവനങ്ങൾ ചെയ്യുന്നവരെ മന്ത്രി ആദരിച്ചു. എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയ വിദ്യാർഥികൾക്ക് അവാർഡ് സമർപ്പിച്ചു. ലഹരിക്ക് ഒരു ചെക്ക് എന്ന പേരിൽ എല്ലാ സ്കൂളുകളിലും ചെസ് പരിശീലന പരിപാടികൾ ആരംഭിക്കുമെന്ന് ചടങ്ങിൽ അധ്യക്ഷത വഹിച്ച ചീഫ് വിപ്പ് ഡോ. എൻ. ജയരാജ് പറഞ്ഞു. വിവിധ മേഖലകളിൽ മികവു തെളിയിച്ച മേരിക്വീൻസ് ആശുപത്രി അഡ്മിനിസ്ട്രേറ്റർ ഫാ. മാർട്ടിൻ മണ്ണനാൽ സിഎംഐ, മെന്‍റലിസ്റ്റ് ഡോ. സജീവ് പള്ളത്ത്, സ്വരുമ ചാരിറ്റബിൾ സൊസൈറ്റി ഭാരവാഹികൾ, ഈരാറ്റുപേട്ട നന്മക്കൂട്ടം ടീം, അധ്യാപിക ജെ. ഷേർലി, ക്രൈംബ്രാഞ്ച് ഉദ്യോഗസ്ഥൻ എം. പ്രദീപ്, കാർ വെള്ളത്തിൽ വീണുണ്ടായ അപകടത്തിൽ രക്ഷാപ്രവർത്തനം നടത്തിയ ആസം സ്വദേശി ദീപക്, സിബിഎസ്ഇ പ്ലസ് ടു പരീക്ഷയിൽ 500ൽ 499 മാർക്ക് നേടിയ ട്രീസ ആന്‍റണി എന്നിവരെ അനുമോദിച്ചു. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗർ, ജില്ലാ പഞ്ചായത്തംഗം ടി.എൻ. ഗിരീഷ് കുമാർ, ബ്ലോക്ക് പഞ്ചായത്ത് പ്രസിഡന്‍റ് മുകേഷ് കെ. മണി, ചിറക്കടവ് പഞ്ചായത്ത് പ്രസിഡന്‍റ് സി.ആർ. ശ്രീകുമാർ, സെന്‍റ് ജോസഫ് പബ്ലിക് സ്കൂൾ പ്രിൻസിപ്പൽ സിസ്റ്റർ ലിറ്റിൽ റോസ് എസ്എബിഎസ്, പഞ്ചായത്ത് വൈസ് പ്രസിഡന്‍റ് സതി സുരേന്ദ്രൻ, ഷാജി പാമ്പൂരി, ആന്‍റണി മാർട്ടിൻ, സുമേഷ് ആൻഡ്രൂസ്, ജോളി മടുക്കക്കുഴി, മുണ്ടക്കയം സോമൻ, ഷാജി നല്ലേപറമ്പിൽ, കെ.എ. ഏബ്രഹാം, സതി സുരേന്ദ്രൻ, അമ്പിളി ശിവദാസ്, ഷാക്കി സജീവ് എന്നിവർ പ്രസംഗിച്ചു.

145 കോടിയുടെ ഗ്രീന്‍ ടൂറിസം പദ്ധതി ഇപ്പോഴും ഫയലില്‍

പാലാ: ജില്ലയുടെ കിഴക്കന്‍ മേഖലയിലുള്ള വിനോദസഞ്ചാര കേന്ദ്രങ്ങളെയും തീര്‍ഥാടന കേന്ദ്രങ്ങളെയും ബന്ധിപ്പിച്ച് നടപ്പാക്കാന്‍ ലക്ഷ്യമിടുന്ന ഗ്രീന്‍ ടൂറിസം സര്‍ക്യൂട്ട് പദ്ധതി നിശ്ചലാവസ്ഥയില്‍. വിനോദസഞ്ചാരത്തിന് അനുയോജ്യമായ കേന്ദ്രങ്ങളില്‍ ചെറിയ നിര്‍മിതികള്‍ തീര്‍ത്ത് സൗകര്യങ്ങളൊരുക്കി സഞ്ചാരികളെ എത്തിക്കാനാണ് പദ്ധതി ലക്ഷ്യമിട്ടിരുന്നത്. ഇതിനായി മാര്‍മല, ഇലവീഴാപൂഞ്ചിറ, ഇല്ലിക്കൽകല്ല് എന്നിവിടങ്ങളില്‍ റവന്യുഭൂമികള്‍ അനുവദിക്കുവാന്‍ സര്‍ക്കാര്‍ തീരുമാനമെടുത്തിരുന്നു. 2013ല്‍ പദ്ധതിക്കായി പാലാ ചെത്തിമറ്റത്ത് ഓഫീസ് തുടങ്ങുകയും ടൂറിസംവകുപ്പ് ജീവനക്കാരെ നിയമിക്കുകയും ചെയ്തിരുന്നുവെങ്കിലും മൂന്നു വര്‍ഷം മുമ്പ് ഓഫീസ് അടച്ചുപൂട്ടി ജീവനക്കാരെ സ്ഥലംമാറ്റി. 145 കോടിയുടെ പദ്ധതി നടപ്പാക്കാനായി ഗ്രീന്‍ ടൂറിസം സര്‍ക്യൂട്ട് സൊസൈറ്റി രൂപവത്കരിക്കുകയും ചെയ്തിരുന്നു. 2017ല്‍ ടൂറിസംമന്ത്രി ചെയര്‍മാനായി ഗ്രീന്‍ ടൂറിസം സര്‍ക്യൂട്ട് സൊസൈറ്റി പുനഃസംഘടിപ്പിക്കുകയും ചെയ്തു. പാലാ പ്രവേശന കവാടമായി വിഭാവനം ചെയ്ത് ജില്ലയിലെ വിവിധ കേന്ദ്രങ്ങളെ കോര്‍ത്തിണക്കിയാണ് പദ്ധതി നടപ്പാക്കാന്‍ ലക്ഷ്യമിട്ടത്. 2013ല്‍ ഭരണാനുമതി ലഭിച്ച ഈ പദ്ധതിയുടെ ആദ്യ ഘട്ടത്തില്‍ തീര്‍ഥാടന കേന്ദ്രങ്ങളായ രാമപുരം നാലമ്പലം, ഭരണങ്ങാനം ശ്രീകൃഷ്ണസ്വാമി ക്ഷേത്രം, ഇടപ്പാടി ആനന്ദഷണ്‍മുഖസ്വാമി ക്ഷേത്രം, ഏഴാച്ചേരി ഉമാമഹേശ്വര ക്ഷേത്രം എന്നിവിടങ്ങളില്‍ തീര്‍ഥാടകര്‍ക്കായി അടിസ്ഥാന സൗകര്യങ്ങള്‍ ഏര്‍പ്പെടുത്താന്‍ നിര്‍മാണങ്ങളും നടത്തി. പാലായിലെ പ്രവേശന കവാടത്തില്‍നിന്ന് ഗ്രീന്‍ ടൂറിസം സര്‍ക്യൂട്ട് സൊസൈറ്റിയുടെ ആഭിമുഖ്യത്തില്‍ വിവിധ കേന്ദ്രങ്ങളിലേക്ക് തീര്‍ഥാടകര്‍ക്കായി വാഹനസൗകര്യം ഏര്‍പ്പെടുത്താനും പദ്ധതി തയാറാക്കിയിരുന്നു. വിവിധ ക്ഷേത്രങ്ങളിലും പാലായിലെ പ്രവേശന കേന്ദ്രത്തിലും നിര്‍മാണം നടത്തിയതിനുശേഷം പദ്ധതി നിലയ്ക്കുകയായിരുന്നു. പ്രകൃതിരമണീയമായ മീനച്ചില്‍ താലൂക്കിലെ ഇല്ലിക്കല്‍കല്ല്, ഇലവീഴാപൂഞ്ചിറ, മാര്‍മല അരുവി വെള്ളച്ചാട്ടം, അയ്യന്പാറ, വാഗമണ്‍ ഉള്‍പ്പെടെയുള്ള വിനോദസഞ്ചാര മേഖലകള്‍ വികസിപ്പിച്ച് ആഭ്യന്തര ടൂറിസവും ഭരണങ്ങാനം, രാമപുരം, കുരിശുമല, നാലമ്പലം ഉള്‍പ്പെടെയുള്ള ആരാധനാലയങ്ങളെ ബന്ധിപ്പിക്കുന്ന തീര്‍ഥാടനവും പ്രോത്സാഹിപ്പിക്കുന്നതിനുവേണ്ടി വിഭാനം ചെയ്ത് ആരംഭം കുറിച്ചതാണ് ഗ്രീന്‍ ടൂറിസം സര്‍ക്യൂട്ട് പ്രോജക്‌ട്. തുടർനടപടികൾ ഉണ്ടായില്ല തുടര്‍ നടപടികളില്ലാത്തത് ഗ്രീന്‍ ടൂറിസം സര്‍ക്യൂട്ട് പ്രോജക്‌ടിനു തിരിച്ചടിയായെന്ന് കേരള കോണ്‍ഗ്രസ്-എം പാലാ നിയോജകമണ്ഡലം പ്രസിഡന്‍റ് ടോബിന്‍ കെ.അലക്സ് പറഞ്ഞു. കെ.എം. മാണി ധനകാര്യമന്ത്രിയായിരുന്നപ്പോള്‍ ഈ മേഖലയ്ക്കായി തുടക്കമിട്ട പദ്ധതി പിന്നീടുവന്ന ജനപ്രതിനിധിയുടെ അലംഭാവം മൂലം നിശ്ചലമാവുകയായിരുന്നുവെന്ന് അദ്ദേഹം ആരോപിച്ചു. പദ്ധതി നടപ്പാക്കുന്നതിന് സര്‍ക്കാരില്‍ സമ്മര്‍ദം ചെലുത്തുന്നതിനും തുടര്‍ നടപടികളെടുക്കുന്നതിനും ഇനിയെങ്കിലും തയ്യാറാവണമെന്നും അദ്ദേഹം ആവശ്യപ്പെട്ടു. സർക്കാരിന്‍റെ അവഗണനയെന്ന് ഇതേസമയം, ടൂറിസം വകുപ്പ് നടപടിയെടുക്കണമെന്ന് കേരള കോണ്‍ഗ്രസ് ഉന്നതാധികാര സമിതിയംഗം സന്തോഷ് കാവുകാട്ട് ആവശ്യപ്പെട്ടു. സര്‍ക്കാരിന്‍റെ പാലായോടുള്ള അവഗണനയുടെ നേര്‍സാക്ഷ്യമാണ് ഈ പദ്ധതി. ടൂറിസം വകുപ്പ് അനാസ്ഥ ഉപേക്ഷിക്കണമെന്നും പദ്ധതിക്കു വേണ്ടി നിര്‍മിച്ച കെട്ടിടങ്ങള്‍ പാഴാകുന്ന സാഹചര്യം ഒഴിവാക്കണമെന്നും അദ്ദേഹം ആവശ്യപ്പെട്ടു.

മുണ്ടക്കയത്ത് ഫയർ സ്റ്റേഷൻ വേണമെന്ന ആവശ്യം ശക്തം

മുണ്ടക്കയം: അപകടങ്ങളും അത്യാഹിതങ്ങളുമുണ്ടാകുമ്പോൾ രക്ഷാപ്രവർത്തനം വേഗത്തിലാക്കാൻ മുണ്ടക്കയം കേന്ദ്രീകരിച്ച് ഫയർ സ്റ്റേഷൻ വേണമെന്ന ആവശ്യം ശക്തമാകുന്നു. മുണ്ടക്കയത്ത് അഗ്നിശമനസേനാ യൂണിറ്റ് എന്ന ആവശ്യത്തിന് പതിറ്റാണ്ടുകളുടെ പഴക്കമുണ്ട്. പി.സി. ജോർജ് എംഎൽഎ ആയിരുന്ന കാലം മുതൽ മുണ്ടക്കയത്ത് ഉടൻ ഫയർ സ്റ്റേഷൻ ആരംഭിക്കുമെന്ന് പ്രഖ്യാപനം നടത്തിയിരുന്നു. പിന്നീട് വന്ന സെബാസ്റ്റ്യൻ കുളത്തുങ്കൽ എംഎൽഎയും ഇതിനുവേണ്ടി പരിശ്രമങ്ങൾ നടത്തി. എന്നാൽ, അഗ്നിശമനസേനാ യൂണിറ്റ് മാത്രം ആരംഭിക്കാൻ കഴിഞ്ഞില്ല. മുണ്ടക്കയം പുത്തൻചന്തയിൽ കെഎസ്ആർടിസി ബസ് സ്റ്റാൻഡിനായി പണിത സ്ഥലത്ത് ഫയർ സ്റ്റേഷൻ ആരംഭിക്കുമെന്നായിരുന്നു പ്രഖ്യാപനം. എന്നാൽ, പിന്നീട് തുടർനടപടികൾ ഒന്നുമുണ്ടാകുന്നില്ല. അത്യാഹിതങ്ങൾ തുടർക്കഥ മഴക്കാലത്തും വേനൽക്കാലത്തും മലയോര മേഖലയിൽ അത്യാഹിതങ്ങൾ പതിവാണ്. 2021 ഒക്ടോബർ 16ന് കൂട്ടിക്കൽ, മുണ്ടക്കയം, കൊക്കയാർ പഞ്ചായത്തുകളെ ദുരിതത്തിലാക്കിയ മഹാപ്രളയത്തിൽ രക്ഷാപ്രവർത്തനത്തിന് ആദ്യമെത്തിയത് ഈരാറ്റുപേട്ടയിൽനിന്നുള്ള ഫയർഫോഴ്സ് സംഘമാണ്. മുണ്ടക്കയത്ത് അഗ്നിശമനസേനാ യൂണിറ്റ് ഉണ്ടായിരുന്നെങ്കിൽ അന്നത്തെ അപകടത്തിന്‍റെ വ്യാപ്തി കുറയ്ക്കാമായിരുന്നു. ഉടൻ അഗ്നിരക്ഷാസേനയുടെ യൂണിറ്റ് ആരംഭിക്കുമെന്ന് അന്ന് അധികാരികൾ പ്രഖ്യാപനം നടത്തിയെങ്കിലും ഒന്നുമുണ്ടായില്ല. വേനൽക്കാലത്ത് മലയോര മേഖലയിൽ ചെറുതും വലുതുമായ നിരവധി തീപിടിത്തങ്ങളാണ് ഉണ്ടാകുന്നത്. പീരുമേട്ടിൽനിന്നും കാഞ്ഞിരപ്പള്ളിയിൽനിന്നും ഫയർഫോഴ്സ് യൂണിറ്റുകൾ എത്തുമ്പോഴേക്കും ഏക്കറുകണക്കിന് പുരയിടം അഗ്നിക്കിരയാകും. കഴിഞ്ഞ ദിവസം മുണ്ടക്കയം പഞ്ചായത്ത് ഷോപ്പിംഗ് കോംപ്ലക്സിൽ തീപിടിത്തമുണ്ടായപ്പോൾ അരമണിക്കൂറിന് ശേഷമാണ് അഗ്നിശമനസേനാ യൂണിറ്റ് സംഭവസ്ഥലത്ത് എത്തിയത്. നാട്ടുകാരുടെയും ജനപ്രതിനിധികളുടെയും കഠിന പരിശ്രമത്തെത്തുടർന്നാണ് വലിയ ദുരന്തം ഒഴിവായത്. ശബരിമല സീസണിൽ ശബരിമല സീസണിൽ ഏറ്റവും കൂടുതൽ അപകടമുണ്ടാകുന്ന പ്രദേശമാണ് ദേശീയപാതയിൽ മുണ്ടക്കയത്തിനും കുട്ടിക്കാനത്തിനുമിടയിലുള്ള പ്രദേശം. കൂടാതെ മുണ്ടക്കയം-കോരുത്തോട് റോഡിലും മുണ്ടക്കയം-എരുമേലി റോഡിലും നിരവധി അപകടങ്ങൾ ഉണ്ടാകാറുണ്ട്. പീരുമേട്ടിൽനിന്നും കാഞ്ഞിരപ്പള്ളിയിൽനിന്നും അഗ്നിശമനസേനാ യൂണിറ്റുകൾ എത്തുന്പോഴേക്കും അപകടത്തിന്‍റെ വ്യാപ്തി വർധിക്കും. നെഞ്ചിടിപ്പോടെ മലയോര മേഖല വീണ്ടുമൊരു കാലവർഷം കൂടി എത്തിയതോടെ മുണ്ടക്കയം, കൂട്ടിക്കൽ, പെരുവന്താനം, കോരുത്തോട് പഞ്ചായത്തുകളിലെ മലയോര മേഖലയിലെ ജനങ്ങൾ കടുത്ത ഭീതിയിലാണ്. ഒട്ടുമിക്ക വർഷങ്ങളിലും മലയോര മേഖലയിൽ ഉരുൾപൊട്ടൽ, മണ്ണിടിച്ചിൽ അടക്കമുള്ള പ്രകൃതിദുരന്തങ്ങൾ ഉണ്ടാകാറുണ്ട്. മണിമലയാർ കരകവിഞ്ഞൊഴുകി വീടുകളിലും വ്യാപാരസ്ഥാപനങ്ങളിലും വെള്ളം കയറുന്നത് പതിവാണ്. ഇത്തരം പ്രകൃതിദുരന്തങ്ങൾ നേരിടുന്ന സമയത്തും പലപ്പോഴും അഗ്നിശമനസേനയുടെ സേവനം ഏറെ വൈകിയാണ് ലഭിക്കുന്നതെന്നു പരാതി ഉയരുന്നുണ്ട്. മുണ്ടക്കയം കേന്ദ്രീകരിച്ച് ഫയർഫോഴ്സ് യൂണിറ്റ് ആരംഭിച്ചാൽ മലയോര മേഖലയ്ക്ക് വലിയ ആശ്വാസമാകും.

പ്രതിഭാസംഗമം

മണിമല: കറിക്കാട്ടൂർ സിസിഎം ഹയർ സെക്കൻഡറി സ്കൂളിൽ എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം കരസ്ഥമാക്കിയ വിദ്യാർഥികളെ അനുമോദിക്കുന്നതിനായി നടത്തിയ പ്രതിഭാസംഗമം ചീഫ് വിപ്പ് ഡോ. എൻ. ജയരാജ് ഉദ്ഘാടനം ചെയ്തു. കോർപറേറ്റ് മാനേജർ ഫാ. ബാസ്റ്റിൻ മംഗലത്തിൽ അധ്യക്ഷത വഹിച്ചു. സ്കൂൾ മാനേജർ ഫാ. സണ്ണി പൊരിയത്ത് സിഎംഐ അനുഗ്രഹ പ്രഭാഷണവും മണിമല പഞ്ചായത്ത് പ്രസിഡന്‍റ് സിറിൾ തോമസ് മുഖ്യപ്രഭാഷണവും നടത്തി. പ്രിൻസിപ്പൽ ഡോ. ഷാജി കുര്യാക്കോസ്, ഹെഡ്മാസ്റ്റർ ഷിനോജ് ജോസഫ്, പഞ്ചായത്തംഗം മോളി മൈക്കിൾ, പിടിഎ പ്രസിഡന്‍റ് ഡള്ളസ് ചാക്കോ തുടങ്ങിയവർ പ്രസംഗിച്ചു.

തിരുവനന്തപുരം ഫാസ്റ്റ് ഉൾപ്പെടെ ഏഴു ബസുകൾ ഓടിയില്ല

പൊൻകുന്നം: പൊൻകുന്നം കെഎസ്ആർടിസി ഡിപ്പോയിൽനിന്ന് തിരുവനന്തപുരം ഫാസ്റ്റ് ഉൾപ്പെടെ ഏഴു സർവീസുകൾ ഇന്നലെ മുടങ്ങി. രണ്ട് ബസ് ശബരിമല സ്‌പെഷൽ സർവീസിനായി കൊണ്ടുപോകുകയും ചെയ്തു. മഴയും രണ്ടാംശനിയും മൂലം യാത്രക്കാർ കുറവാകുമെന്ന കാരണത്താലാണ് ഏതാനും സർവീസുകൾ കുറച്ചതെന്നാണ് സൂചന. തിരുവനന്തപുരം ഫാസ്റ്റ് പാസഞ്ചർ, അഴങ്ങാട്, പാലപ്ര, പാലാ-മുണ്ടക്കയം ചെയിൻ സർവീസുകൾ എന്നിവയാണ് ഓടാതിരുന്നത്.

താലൂക്ക് റെസിഡന്‍റ്സ് അസോസിയേഷൻ വാര്‍ഷികം

ചങ്ങനാശേരി: താലൂക്ക് റെസിഡന്‍റ്സ് വെല്‍ഫെയര്‍ ആന്‍ഡ് ചാരിറ്റബിള്‍ അസോസിയേഷന്‍റെ 10-ാമത് വാര്‍ഷിക പൊതുയോഗം ജോബ് മൈക്കിള്‍ എംഎല്‍എ ഉദ്ഘാടനം ചെയ്തു. അസോസിയേഷന്‍ പ്രസിഡന്‍റ്് അഡ്വ. മധുരാജിന്‍റെ അധ്യക്ഷതയില്‍ ചേര്‍ന്ന സമ്മേളനത്തില്‍ താലൂക്കിലെ നൂറോളം റെസിഡന്‍റ്സ് അസോസിയേഷന്‍ ഭാരവാഹികള്‍ പങ്കെടുത്തു. ജില്ലാ പ്രസിഡന്‍റ് കെ.എം. രാധാകൃഷ്ണപിള്ള മുഖ്യപ്രഭാഷണം നടത്തി. സൗജന്യ നേത്രപരിശോധനാ ക്യാമ്പ് ചലച്ചിത്രതാരം കൃഷ്ണപ്രസാദ് ഉദ്ഘാടനം ചെയ്തു. കെ.ജെ. കൊച്ചുമോന്‍, എം.എസ്. അലി റാവുത്തര്‍, പ്രഫ. ആനന്ദക്കുട്ടന്‍, ഇന്ദിരാദേവി ടീച്ചര്‍, ഗോപാലകൃഷ്ണ പിള്ള , വിനോദ് പണിക്കര്‍, തുടങ്ങിയവര്‍ പ്രസംഗിച്ചു. പുതിയ ഭാരവാഹികളായി അഡ്വ. മധുരാജ് (പ്രസിഡന്‍റ്), അലി റാവുത്തര്‍ (ജനറല്‍ സെക്രട്ടറി, ജോണ്‍സണ്‍ പറപ്പള്ളി (ട്രഷറര്‍), കെ.ജെ. കൊച്ചുമോന്‍, ഇന്ദിരാദേവി ടീച്ചര്‍, മജീദ് ഖാന്‍, കുര്യാക്കോസ് കൈലാത്ത്, അബ്ദുല്‍ നിസാര്‍ (വൈസ് പ്രസിഡന്‍റുമാര്‍), ശശികുമാര്‍ വാരാപ്പുഴ, പി.ബി. അനില്‍ ബാബു, റഷീദ് ബീബി, പ്രഫ. ജയചന്ദ്രന്‍, ഗോപീകൃഷ്ണന്‍, ആര്‍ട്ടിസ്റ്റ് ദാസ് (സെക്രട്ടറിമാര്‍), അഡ്വ. ജാനി ബാവ (ലീഗല്‍ അഡ്വൈസര്‍) എന്നിവരെ യോഗം തെരഞ്ഞെടുത്തു.

റെസിഡന്‍റ്സ് അസോസിയേഷൻ ലഹരിവിരുദ്ധ ബോധവത്കരണം

തെങ്ങണ: വിവേകാനന്ദ റെസിഡന്‍റ്സ് വെല്‍ഫെയര്‍ അസോസിയേഷന്‍റെയും കോട്ടയം ജില്ലാ റെസിഡന്‍റ്സ് അപ്പെക്‌സ് കൗണ്‍സിലിന്‍റെയും സംയുക്താഭിമുഖ്യത്തില്‍ 17ന് രാവിലെ 10ന് ഗുഡ്‌ഷെപ്പേര്‍ഡ് പബ്ലിക് സ്‌കൂള്‍ ഓഡിറ്റോറിയത്തില്‍ നടക്കും. കേരള സംസ്ഥാന എക്‌സൈസ് വകുപ്പിന്‍റെ വിമുക്തി മിഷന്‍ അവതരിപ്പിക്കുന്ന ബോധവത്കരണ ക്ലാസും അതോടനുബന്ധിച്ച് അസി. എക്‌സൈസ് ഇന്‍സ്‌പെക്ടര്‍ വി. ജയരാജ് എറണാകുളം അവതരിപ്പിക്കുന്ന ഓട്ടൻതുള്ളലും ഉണ്ടായിരിക്കും. ഗുഡ്‌ഷെപ്പേര്‍ഡ് പബ്ലിക് സ്‌കൂള്‍ പ്രിന്‍സിപ്പല്‍ ഡോ. സുനിത സതീഷ് ഉദ്ഘാടനം ചെയ്യും. അസോസിയേഷന്‍ പ്രസിഡന്‍റ് പി.ആര്‍. ഗോപാലകൃഷ്ണപിള്ള അധ്യക്ഷത വഹിക്കും. സ്‌കൂള്‍ പബ്ലിക് റിലേഷന്‍ ഓഫീസര്‍ സിജോ ഫ്രാന്‍സിസ്, ചങ്ങനാശേരി എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ജെ.എസ്. ബിനു, ജില്ലാ റെസിഡന്‍റ്സ് അസോസിയേഷന്‍ അപ്പെക്‌സ് കൗണ്‍സില്‍ പ്രസിഡന്‍റ് ജോണ്‍ സി. ആന്‍റണി, സെക്രട്ടറി വി. കൃഷ്ണമൂര്‍ത്തി എന്നിവര്‍ പ്രസംഗിക്കും.

ബൈപാസ് എസ്എച്ച് ജംഗ്ഷനില്‍ ട്രാഫിക് സിഗ്നല്‍ തകരാറില്‍

ചങ്ങനാശേരി: വാഹനം ഓടിക്കുന്നവര്‍ ശ്രദ്ധിക്കുക; ചങ്ങനാശേരി ബൈപാസില്‍ എസ്എച്ച് ജംഗ്ഷനിലെ ട്രാഫിക് സിഗ്നല്‍ തകരാറിലാണ്. കഴിഞ്ഞ നാലു ദിവസമായാണ് സിഗ്നല്‍ തകരാറിലായിരിക്കുന്നത്. ട്രാഫിക് സിഗ്നൽ തകരാറിലായതോടെ ഈ ജംഗ്ഷനിലൂ‌ടെയുള്ള വാഹനസഞ്ചാരം ഏറെ അപകടഭീഷണിയിലാണ്. സിഗ്നല്‍ പ്രവര്‍ത്തനം തടസപ്പെടുമ്പോള്‍ ഈ ജംഗ്ഷനില്‍ മുഴുവന്‍ സമയവും പോലീസിന്‍റെ സഹായം ഉറപ്പുവരുത്തണമെന്ന ആവശ്യം ഉയര്‍ന്നിട്ടുണ്ട്. സിഗ്നല്‍ തകരാര്‍ പരിഹരിക്കുന്നതിനായി ടെക്‌നിഷന്‍മാര്‍ക്ക് നിര്‍ദേശം നല്‍കിയിട്ടുണ്ടെന്ന് ട്രാഫിക് പോലീസ് പറഞ്ഞു. ചങ്ങനാശേരി ബൈപാസിന്‍റെ തുടക്കത്തിലുള്ള ളായിക്കാട് ജംഗ്ഷനിലും സിഗ്നല്‍ ലൈറ്റിന്‍റെ പ്രവര്‍ത്തനം പലപ്പോഴും നിലയ്ക്കാറുണ്ട്. മഴ ശക്തമായതോടെയാണ് ട്രാഫിക് സിഗ്നലുകള്‍ വ്യാപകമായി തകരാറിലാകുന്നത്. സോളാര്‍ പാനലില്‍ ആവശ്യത്തിനു സൂര്യപ്രകാശം ലഭിക്കാത്തതു മൂലം ബാറ്ററി ചാര്‍ജാകാത്തതും ലൈറ്റുകളില്‍ വെള്ളം കയറുന്നതും കണ്‍ട്രോളറുകള്‍ക്ക് കേടുപാടുകള്‍ സംഭവിക്കുന്നതും സിഗ്നലുകളുടെ പ്രവര്‍ത്തനത്തെ ബാധിക്കുന്നുണ്ട്. മന്ത്രിമാരടക്കമുള്ള വിഐപികള്‍ക്ക് കടന്നുപോകാൻ സിഗ്നലുകള്‍ പോലീസ് ഓഫാക്കിയാല്‍ പിന്നീട് ഓണാക്കാന്‍ മറന്നുപോകുന്നതും ചില സമയങ്ങളിൽ സിഗ്നല്‍ പ്രവര്‍ത്തിക്കാതിരിക്കാന്‍ കാരണമാകുന്നതായി ചൂണ്ടിക്കാണിക്കപ്പെടുന്നു.

വിരലിൽ മോതിരം മുറുകി; വയോധികന് ഫയർ ഫോഴ്‌സ് ‌രക്ഷകരായി

വൈക്കം: വയോധികന്‍റെ കൈവിരലിൽ മുറുകിയ മോതിരം ഫയർഫോഴ്സ് കട്ടർ ഉപയോഗിച്ചു വേർപെടുത്തി. മാഞ്ഞൂർ പാലംപറമ്പിൽ പി.കെ. രാജന്‍റെ (68) കൈവിരലിൽ കിടന്ന മോതിരമാണ് വൈക്കം ഫയർ ഫോഴ്സ് എത്തി മുറിച്ചുനീക്കിയത്. കടുത്തവേദനയെത്തുടർന്ന് മാനസിക വെല്ലുവിളി നേരിടുന്ന വയോധികൻ വൈക്കം ഫയർഫോഴ്സിനെ സമീപിക്കുകയായിരുന്നു.

കുറവിലങ്ങാട് ശ്ലൈഹിക പാരമ്പര്യത്തിന്‍റെ തറവാട്: കർദിനാൾ മാർ ജോർജ് ആലഞ്ചേരി

കുറവിലങ്ങാട്: കുറവിലങ്ങാട് ശ്ലൈഹിക പാരമ്പര്യത്തിന്‍റെ തറവാടാണെന്ന് കർദിനാൾ മാർ ജോർജ് ആലഞ്ചേരി. മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന ദേവാലയത്തിൽ റംശാ പ്രാർഥന നടത്തി സന്ദേശം നൽകുകയായിരുന്നു കർദിനാൾ. വിശ്വാസത്തിന്‍റെ ഈറ്റില്ലമാണ് കുറവിലങ്ങാട്. ദൈവാത്മാവിനോടു ചേർന്ന് ജീവിക്കാൻ കഴിയണം. ദുഃഖങ്ങളും പ്രതിസന്ധികളും ഗ്രസിച്ചാൽ ദൈവാത്മാവിനോടു ചേർന്ന് നിൽക്കണം. വിശ്വാസം കൈവിടാതെ ദൈവസ്‌നേഹത്തിലും പരസ്‌നേഹത്തിലും ജീവിക്കണമെന്നും കർദിനാൾ പറഞ്ഞു. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, സീനിയർ അസി. വികാരി ഫാ. ജോസഫ് മണിയഞ്ചിറ, അസി. വികാരിമാരായ ഫാ. പോൾ കുന്നുംപുറത്ത്, ഫാ. ജോസഫ് ചൂരയ്ക്കൽ, ഫാ. തോമസ് താന്നിമലയിൽ, പാസ്റ്ററൽ അസിസ്റ്റന്‍റുമാരായ ഫാ. ജോസ് കോട്ടയിൽ, ഫാ. പോൾ മഠത്തിക്കുന്നേൽ എന്നിവർ പ്രാർഥനാശുശ്രൂഷകളിൽ കാർമികരായി. യോഗപ്രതിനിധികളുമായും കർദിനാൾ സംവദിച്ചു.

തെരുവുനായ്ക്കളുടെ ആക്രമണത്തില്‍ നാല് ആടുകള്‍ ചത്തു

കല്ലറ: തെരുവുനായ്ക്കളുടെ ആക്രമണത്തില്‍ നാല് ആടുകള്‍ ചത്തു. ക്ഷീരകര്‍ഷകയായ കല്ലറകാവിനു സമീപം താമസിക്കുന്ന കാക്കനാട്ട് വീട്ടില്‍ കെ.കെ. മിനിയുടെ ആടുകളാണ് ചത്തത്. വീടിനു സമീപത്തെ കൂട്ടില്‍ കെട്ടിയിരുന്ന ആടുകളെ തെരുവു നായ്ക്കള്‍ കടിച്ചു കൊല്ലുകയായിരുന്നു. കഴിഞ്ഞ ദിവസം രാത്രിയിലായിരുന്നു സംഭവം. കടിയേറ്റ മൂന്ന് ആടുകള്‍ രാത്രിയില്‍ത്തന്നെ ചത്തു. ഒരെണ്ണം രാവിലെയും ചത്തു. ശക്തമായ മഴയുള്ള സമയമായതിനാല്‍ വീട്ടുകാര്‍ വളരെ വൈകിയാണ് സംഭവം അറിഞ്ഞത്. ഒറ്റയ്ക്കു താമസിക്കുന്ന മിനി ആടുകളെ വളര്‍ത്തിയും തൊഴിലുറപ്പു ജോലി ചെയ്തുമാണ് ഉപജീവനം നടത്തിയിരുന്നത്. ജീവിതമാര്‍ഗമായ ആടുകളെ നഷ്ടപ്പെട്ടതോടെ എന്തുചെയ്യുമെന്നറിയാത്ത അവസ്ഥയിലാണ് 49കാരിയായ മിനി. കല്ലറയില്‍ സമീപകാലത്ത് തെരുവുനായ ശല്യം രൂക്ഷമാണെന്ന് നാട്ടുകാര്‍ പറയുന്നു.

ലിങ്ക് റോഡ് ജംഗ്ഷനിലെ കുഴിയടയ്ക്കണം

വൈക്കം: ദളവാക്കുളം ബസ് ടെർമിനലിനു സമീപം ലിങ്ക് റോഡ് ജംഗ്ഷനിൽ രൂപപ്പെട്ട വൻ കുഴി വാഹന യാത്രികർക്ക് ദുരിതമാകുന്നു. വീതി കുറഞ്ഞ റോഡിലെ കുഴി മറികടക്കാൻ വാഹനങ്ങൾ ഇവിടെ വേഗത കുറയ്ക്കുന്നതുമൂലം ഗതാഗതക്കുരുക്കും രൂക്ഷമാകുയാണ്. നൂറുകണക്കിന് വാഹനങ്ങൾ കടന്നുപോകുന്ന ജംഗ്ഷനിലെ കുഴിയടയ്ക്കാൻ അധികൃതർ നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.

സംരക്ഷണഭിത്തി കെട്ടാൻ തുക അനുവദിച്ചു

തലയോലപ്പറമ്പ്: വെള്ളൂർ പഞ്ചായത്തിലെ തട്ടാവേലി -വടകര റോഡിൽ പാറയ്ക്കൽക്കടവിൽ തീരം ഇടിഞ്ഞ ഭാഗത്ത് സംരക്ഷണഭിത്തി കെട്ടുന്നതിന് തുക അനുവദിച്ചു. തീരമിടിഞ്ഞ നാലിടങ്ങളിൽ സംരക്ഷണ ഭിത്തി കെട്ടുന്നതിനായി 89.50 ലക്ഷം രൂപയുടെ ടെൻഡറായി. കാലാവസ്ഥ അനുകൂലമായാലുടൻ നിർമാണ പ്രവർത്തനങ്ങൾ ആരംഭിക്കുമെന്ന് ഇറിഗേഷൻ വകുപ്പ് അധികൃതർ അറിയിച്ചു.

കാൽനട പ്രചാരണ ജാഥ നടത്തി

വൈക്കം:അഖിലേന്ത്യ ജനാധിപത്യ മഹിളാ അസോസിയേഷൻ വൈക്കം ഏരിയാ കമ്മിറ്റിയുടെ നേതൃത്വത്തിൽ കാൽനട പ്രചാരണ ജാഥ നടത്തി. വൈക്കം ഏരിയാതല കാൽനട പ്രചാരണ ജാഥ ഇടയാഴത്ത് നടന്ന യോഗത്തിൽ അഖിലേന്ത്യ ജനാധിപത്യ മഹിളാ അസോസിയേഷൻ ജില്ലാ സെക്രട്ടറി അഡ്വ.ഷീജ അനിൽ ഉദ്ഘാടനം ചെയ്തു. ഏരിയാ പ്രസിഡന്‍റ് കവിത റെജി അധ്യക്ഷത വഹിച്ചു. മഹിളാ അസോസിയേഷൻ ഏരിയാ സെക്രട്ടറി ബിന്ദു അജി ക്യാപ്റ്റനായും ജില്ലാ കമ്മിറ്റിയംഗം ഷീജ ബൈജു വൈസ് ക്യാപ്റ്റനായും ജില്ലാ കമ്മിറ്റിയംഗം എം.വൈ. ജയകുമാരി മാനേജരായുമാണ് ജാഥ ഏരിയയിൽ പര്യടനം നടത്തിയത്.

കടുത്തുരുത്തി പഞ്ചായത്തില്‍ ഭരണസ്തംഭനമെന്ന യുഡിഎഫ് ആരോപണം അടിസ്ഥാനരഹിതം

കടുത്തുരുത്തി: കടുത്തുരുത്തി പഞ്ചായത്തില്‍ ഭരണസ്തംഭനമെന്ന യുഡിഎഫ് ആരോപണം അടിസ്ഥാനരഹിതമെന്ന് പഞ്ചായത്ത് പ്രസിഡന്‍റ്. പഞ്ചായത്തില്‍നിന്ന് ലഭ്യമാക്കേണ്ട സേവനങ്ങള്‍, പദ്ധതി നടത്തിപ്പ് എന്നിവ ദൈനംദിന പ്രവര്‍ത്തനങ്ങളെ ബാധിക്കാതെ സമയബന്ധിതമായി ലഭ്യമാക്കുന്നുണ്ട്. ഫെബ്രുവരി മാസത്തില്‍ റിട്ടയര്‍ ചെയ്ത സീനിയര്‍ ക്ലര്‍ക്കിന്‍റെ ഒഴിവ് ഈ മാസത്തെ ജനറല്‍ ട്രാന്‍സ്ഫറിലൂടെ മാത്രമേ നികത്താനാവൂ. പ്ലാന്‍ ക്ലാര്‍ക്ക് കഴിഞ്ഞയാഴ്ച്ചയാണ് പ്രൊമോഷന്‍ കിട്ടി മറ്റൊരു പഞ്ചായത്തിലേക്കു ട്രാന്‍സ്ഫറായത്. എങ്കിലും വാര്‍ഷികപദ്ധതി സമര്‍പ്പണത്തെ ബാധിക്കാതെ ജൂണ്‍ 11ന് നടന്ന ഡിപിസിയില്‍ പദ്ധതികള്‍ക്ക് അംഗീകാരം നേടാന്‍ സാധിച്ചു. മേയ് മാസം തന്നെ ഗ്രാമസഭകള്‍ പൂര്‍ത്തീകരിച്ചു ഗുണഭോക്തൃ ലിസ്റ്റ് അന്തിമമാക്കി പ്രിന്‍റിംഗിന് അയയ്ക്കാന്‍ കഴിഞ്ഞിട്ടുണ്ട് . സേവനങ്ങള്‍ ലഭിക്കുന്നതിനു താമസം നേരിട്ടതായി ഇതുവരെ ഭരണസമിതിക്കു പരാതികള്‍ ലഭിച്ചിട്ടില്ലെന്നും പ്രസിഡന്‍റ് എന്‍.ബി. സ്മിത പറയുന്നു. കെ -സ്മാര്‍ട്ട് സോഫ്റ്റ്‌വേറിലൂടെയാണ് സംസ്ഥാന വ്യാപകമായി പഞ്ചായത്ത് സേവനങ്ങള്‍ നല്‍കുന്നത്. ഡിജിറ്റല്‍ സാക്ഷരത നേടിയ സംസ്ഥാനത്തു ജനങ്ങള്‍ക്കു സേവനം അവരുടെ വിരല്‍ത്തുമ്പിലൂടെ ലഭ്യമാക്കുന്ന ഈ സോഫ്റ്റ്‌വേറിലൂടെ കാര്യക്ഷമമായി അതിവേഗം സേവനങ്ങള്‍ നല്‍കാന്‍ പഞ്ചായത്തിന് സാധിക്കുന്നു. കെ സ്മാര്‍ട്ട് ഉപയോഗിച്ച് അപേക്ഷ അയക്കാന്‍ സാധിക്കാത്തവര്‍ക്ക് പഞ്ചായത്ത് ഏര്‍പ്പെടുത്തിയ സിറ്റിസണ്‍ ഫെസിലിറ്റേഷന്‍ സെന്‍ററിലൂടെ ഈ സേവനങ്ങള്‍ ഫലപ്രദമായി നല്‍കാന്‍ പര്യാപ്തമായ തരത്തില്‍ ജീവനക്കാരെ വിന്യസിപ്പിച്ചിട്ടുണ്ട്.

താഴ്ന്ന പ്രദേശങ്ങളില്‍ വെള്ളക്കെട്ട് രൂക്ഷം

കടുത്തുരുത്തി: മഴ ശക്തമായതോടെ കല്ലറ മുണ്ടാറിലും കടുത്തുരുത്തിയുടെ പടിഞ്ഞാറന്‍ മേഖലകളിലെയും താഴ്ന്ന പ്രദേശങ്ങളില്‍ വെള്ളക്കെട്ട് രൂക്ഷമായി. കരിയാറിലും കെവി കനാലിലും എഴുമാംകായലിലും ഇടത്തോടുകളിലും ജലനിരപ്പ് ഉയര്‍ന്നിട്ടുണ്ട്. മഴയ്ക്കൊപ്പം കിഴക്കന്‍ വെള്ളത്തിന്‍റെ വരവുകൂടി ശക്തമായതാണ് പുഴകളിലും തോടുകളിലും ജലനിരപ്പ് ഉയരാന്‍ കാരണമായത്. പല വീടുകളുടെയും മുറ്റത്ത് വെള്ളം കയറിയിട്ടുണ്ട്. മിക്ക പാടശേഖരങ്ങളിലും മോട്ടോര്‍ പ്രവര്‍ത്തിപ്പാക്കാനുള്ള നടപടികള്‍ തുടങ്ങിയിട്ടുണ്ടെന്ന് കല്ലറ പഞ്ചായത്തംഗം വി.കെ. ശശികുമാര്‍ പറഞ്ഞു. കഴിഞ്ഞ 26 മുതല്‍ മഴ കനത്തതോടെ കല്ലറ പഞ്ചായത്തിലെ മുണ്ടാര്‍ മേഖലയിലും കടുത്തുരുത്തി പഞ്ചായത്തിലെ പടിഞ്ഞാറന്‍ മേഖലയായ എഴുമാന്തുരുത്തിലും വെള്ളപ്പൊക്കമുണ്ടായിരുന്നു. കനത്ത മഴയില്‍ മുണ്ടാര്‍ ഒന്നാം നമ്പര്‍ ബ്ലോക്ക്, തട്ടാപറമ്പ് സൗത്ത്, പറമ്പന്‍-54, കങ്ങള-എട്ട്, പുലയ കോളനി എന്നീ പാടശേഖരങ്ങളുടെ പുറംബണ്ട് തകര്‍ന്നിരുന്നു. 65 ഏക്കര്‍ സ്ഥലത്തെ കപ്പ, ഏത്തവാഴ എന്നീ കൃഷികള്‍ നശിച്ചിരുന്നു. പല പാടശേഖരങ്ങളുടെയും തകര്‍ന്ന പുറംബണ്ട് സമീപ ദിവസങ്ങളിലാണ് കര്‍ഷകര്‍ പുനര്‍നിര്‍മിച്ചത്. വെള്ളപ്പൊക്കത്തെത്തുടര്‍ന്ന് നിരവധി കുടുംബങ്ങള്‍ ബന്ധുവീടുകളിലേക്കു താമസം മാറിയിരുന്നു. തിരികെ ഇവരെല്ലാം വീടുകളിലേക്കു കഴിഞ്ഞദിവസങ്ങളിലാണ് മടങ്ങിയെത്തിയത്. ഇതിനിടെ വീണ്ടും മഴ ശക്തിപ്രാപിച്ചതിനൊപ്പം കിഴക്കന്‍ വെള്ളത്തിന്‍റെ വരവും വര്‍ധിച്ചത് ജനങ്ങളെ ആശങ്കയിലാക്കിയിട്ടുണ്ട്.

മൂവാറ്റുപുഴയാറിന്‍റെ തീരം ഇടിയുന്നു : സംരക്ഷണഭിത്തി തീർക്കണമെന്ന് പുഴയോരവാസികൾ

തലയോലപ്പറമ്പ്: മഴ കനത്തതോടെ മൂവാറ്റുപുഴയാറിന്‍റെ തീരം വ്യാപകമായി ഇടിഞ്ഞുതാഴുന്നു. താഴ്ന്ന സ്ഥലങ്ങളിൽ സംരക്ഷണ ഭിത്തി നിർമിച്ചില്ലെങ്കിൽ വീടുൾപ്പെടെ പുരയിടം പുഴയെടുക്കുമെന്ന സ്ഥിതിയാണ്. വെള്ളൂർ, തലയോലപ്പറമ്പ്,ചെമ്പ്, മറവൻതുരുത്ത്, ഉദയ നാപുരം പഞ്ചായത്തുകളിലാണ് തീരമിടിച്ചിൽ കൂടുതലും. വെള്ളൂർ പഞ്ചായത്തിൽ വെള്ളപ്പൊക്കത്തിൽ തട്ടാവേലി പാലത്തിനു സമീപം ഇടിഞ്ഞുതാഴ്ന്ന റോഡ് ഇതുവരെ ഗതാഗതയോഗ്യമാക്കിയിട്ടില്ല. പലതവണ ഇറിഗേഷൻ അധികൃതർ വന്ന് അളന്നുപോകുന്നതല്ലാതെ തുടർനടപടി ഉണ്ടാകുന്നില്ലെന്ന് നാട്ടുകാർ ആരോപിക്കുന്നു. റോഡിന്‍റെ സംരക്ഷണ ഭിത്തി ഉൾപ്പെടെ പകുതിയിൽ അധികം ഇടിഞ്ഞുതാണതോടെ ഇതുവഴി വലിയ വാഹനങ്ങൾക്ക് കടന്നുപോകാൻ പറ്റാത്ത സ്ഥിതിയാണ്. പാറയ്ക്കൽ കടത്തുകടവിനു സമീപം സംരക്ഷണഭിത്തി ഉൾപ്പെടെ റോഡ് മൂവാറ്റുപുഴയാറ്റിലേക്ക് ഇടിഞ്ഞുതാഴ്ന്നിട്ടുണ്ട്. പുഴയിൽ ജലനിരപ്പ് ഉയരുമ്പോൾ സമീപത്തെ വീടുകളിൽ ആളുകൾ ഭയന്നാണ് കഴിയുന്നത്. മറവൻതുരുത്ത് പഞ്ചായത്തിൽ ഇടവട്ടം ചിറയിൽ കടത്തുകടവിനു സമീപം സംരക്ഷണഭിത്തിയടക്കം ആറ്റിലേക്ക് ഇടിഞ്ഞുതാഴ്ന്നിട്ട് രണ്ടു വർഷം കഴിഞ്ഞു. സമീപത്തെ വീടും കടത്തുകടവും ഏതു നിമിഷവും പുഴയിലേക്ക് ഇടിയുമെന്ന ഭീതിയിലാണ് കുടുംബവും നാട്ടുകാരും. ഇവിടെ 250 മീറ്ററിൽ അധികം ദൂരമാണ് ഇടിഞ്ഞുതാഴ്ന്നത് ഏതാനും മാസങ്ങൾക്കു മുമ്പ് ആറ്റുവേലക്കടവ് ക്ഷേത്രത്തിനു സമീപം സ്വകാര്യവ്യക്തിയുടെ പുരയിടം പുഴയിലേക്ക് ഇടിഞ്ഞുതാണു. ഇതോടെ ആറ്റുവേലക്കടവ്-കുലശേഖരമംഗലം റോഡും തകർച്ചാഭീഷണിയിലായി. പുഴയിലേക്ക് ഇടിഞ്ഞുതാഴുന്ന ഭാഗങ്ങളിൽ സംരക്ഷണ ഭിത്തി തീർക്കാൻ അധികൃതർ നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.

ജിഐടിയില്‍ മൂന്നുവര്‍ഷ എന്‍ജി. കാമ്പസ് പഠനം; പ്രഖ്യാപനം നടത്തി

കോട്ടയം: ജിഐടിയില്‍ 2025 അധ്യയന വര്‍ഷം മുതല്‍ കെടിയുവിന്‍റെ എന്‍ജിനിയറിംഗ് കോഴ്‌സുകള്‍ -മൂന്നു വര്‍ഷ കാമ്പസ് പഠനവും ഒരു വര്‍ഷ ശമ്പളത്തോടെയുള്ള ഇന്‍റേണ്‍ഷിപ്പും- സ്‌കീം പ്രഖ്യാപനവും കെടിയു അക്കാദമിക് ഡീന്‍ ഡോ. വിനു തോമസ് നടത്തി. ചെയര്‍മാന്‍ ജോജി തോമസ് അധ്യക്ഷത വഹിച്ചു. ഐഐടിഎം പ്രവര്‍ത്തകന്‍റെ ന്യൂ ഇനിഷ്യേറ്റീവ് തലവന്‍ രാജേന്ദ്ര മൂത്ത ഉദ്ഘാടനം ചെയ്തു. ജിഐടി നല്‍കുന്ന നാലാമത് ഗ്രിഗോറിയന്‍ എക്‌സലന്‍സ് അവാര്‍ഡ് ചെന്നൈയിലുള്ള അഗ്‌നികുള്‍ കോസ്‌മോസ് സ്ഥാപകന്‍ ശ്രീനാഥ് രവിചന്ദ്രനും, ഗരുഡ എയ്റോസ്പേസ് സ്ഥാപകന്‍ അഗ്‌നീശ്വര്‍ ജയപ്രകാശും ഏറ്റുവാങ്ങി. ഗ്രേഡ്‌സ്‌കീം സിഇഒ ഡോ. അച്യുതരാമന്‍ രംഗാചാരി പ്രസംഗിച്ചു.

മെഗാ രക്തദാന റാലി നടത്തി

കോട്ടയം. എസ്എച്ച് മെഡിക്കൽ സെന്‍ററും തിരുഹൃദയ കോളജ് ഓഫ് നഴ്സിംഗും ലയൺസ് 318ബിയും ലയൺസ് ക്ലബ്‌ ഓഫ് കോട്ടയം സെൻട്രലും ചേർന്ന് രക്തദാനദിനത്തോടനുബന്ധിച്ച് മെഗാ രക്തദാന റാലി സംഘടിപ്പിച്ചു. എസ്എച്ച് മെഡിക്കൽ സെൻററിൽനിന്നാരംഭിച്ച റാലി മെഡിക്കൽ സെന്‍റർ ഡയറക്ടർ സിസ്റ്റർ ജീന ഫ്ലാഗ് ഓഫ് ചെയ്തു. രക്തദാനത്തിന്‍റെ മഹത്വം വിളിച്ചോതുന്ന ഫ്ലാഷ് മോബ് തിരുഹൃദയ നഴ്സിംഗ് കോളജിലെ വിദ്യാർഥികൾ നാഗമ്പടത്ത് അവതരിപ്പിച്ചു. മാപന സമ്മേളനത്തിൽ മെഡിക്കൽ സെന്‍റർ സിഒഒ ഡോ.ടി.യു. ജിഷ, ലയൻസ് 318ബി മുൻ ഗവർണർ പ്രിൻസ് സ്കറിയ, ലയൺ ജില്ലാ ചീഫ് പ്രോജക്റ്റ്‌ കോ-ഓർഡിനേറ്റർ സിബി മാത്യു പ്ലാത്തോട്ടം, ഷിബു തെക്കേമറ്റം, ബ്ലഡ് ബാങ്ക് മെഡിക്കൽ ഓഫീസർ ഡോ. സില്‍വി എന്നിവർ പ്രസംഗിച്ചു. കോട്ടയം സെൻട്രൽ ലയൺസ് ക്ലബ്‌ സെക്രട്ടറി ധന്യ സി. എസ്., അഡ്മിനിസ്ട്രേറ്റർ റീന പ്രിൻസ്, ട്രഷറർ സാജൻ ഗോപാലൻ എന്നിവർ നേതൃത്വം നൽകി.

കുട്ടികളുടെ ആശുപത്രി ജംഗ്ഷനിൽ ടേക്ക് എ ബ്രേക്ക്

അതിരമ്പുഴ: അതിരമ്പുഴ പഞ്ചായത്ത് 16-ാം വാർഡിൽ കുട്ടികളുടെ ആശുപത്രി ജംഗ്ഷനിൽ നിർമിച്ച ടേക്ക് എ ബ്രേക്ക്‌ ടോ‌യ്‌ലറ്റ് സമുച്ചയത്തിന്‍റെ ഉദ്ഘാടനം ജില്ലാ പഞ്ചായത്തംഗം ഡോ. റോസമ്മ സോണി നിർവഹിച്ചു. അതിരമ്പുഴ പഞ്ചായത്ത്‌ പ്രസിഡന്‍റ് ജോസ് അമ്പലക്കുളം അധ്യക്ഷത വഹിച്ചു. കുട്ടികളുടെ ആശുപത്രി സൂപ്രണ്ട് ഡോ. കെ.പി. ജയപ്രകാശ് മുഖ്യപ്രഭാക്ഷണം നടത്തി. ബ്ലോക്ക്‌ പഞ്ചായത്തംഗം അന്നമ്മ മാണി, പഞ്ചായത്ത്‌ വൈസ് പ്രസിഡന്‍റ് ഷിമി സജി, പഞ്ചായത്ത്‌ അംഗങ്ങളായ ബിജു വലിയമല, ഐസി സാജൻ, അശ്വതിമോൾ, ജോസ് അഞ്ജലി, ഷാജി ജോസഫ്, ജോജോ ആട്ടേൽ, കെ.ടി. ജയിംസ്, പഞ്ചായത്ത്‌ അസിസ്റ്റന്‍റ് എൻജിനിയർ രാജേഷ് ഡി. നായർ, പഞ്ചായത്ത്‌ സെക്രട്ടറി നിസി ജോൺ എന്നിവർ പ്രസംഗിച്ചു.

വിദ്യാർഥികളിലൂടെ 2047ൽ വികസിത ഭാരതമെന്ന ലക്ഷ്യം നേടണം: ഗവർണർ സി.പി. രാധാകൃഷ്ണൻ

മാന്നാനം: വിദ്യാർഥികളിലൂടെ 2047ൽ വികസിത ഭാരതം എന്ന ലക്ഷ്യം സ്വായത്തമാക്കണമെന്ന് മഹാരാഷ്‌ട്ര ഗവർണർ ഡോ.സി.പി. രാധാകൃഷ്ണൻ. സിറ്റിസൺസ് ഫോറത്തിന്‍റെ നേതൃത്വത്തിൽ മാന്നാനം കുര്യാക്കോസ് ഏലിയാസ് ഇംഗ്ലീഷ് മീഡിയം സ്കൂളിൽ നടത്തിയ ‘വികസിത് ഭാരത് -2047’ സംവാദം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഇന്നത്തെ കുട്ടികൾ നാളത്തെ പൗരന്മാരാണെന്ന തിരിച്ചറിവോടെ കുഞ്ഞുങ്ങളെ രാജ്യത്തിന്‍റെ വികസനത്തിനും പുരോഗതിക്കും ഉതകുംവിധം ഉത്തമപൗരന്മാരായി വളർത്തിയെടുക്കണം. അധ്യാപകരിലൂടെ കുഞ്ഞുങ്ങൾ സ്വരാജ്യത്തിന്‍റെ മൂല്യങ്ങളും ലക്ഷ്യങ്ങളും തിരിച്ചറിയണമെന്ന് ഗവർണർ പറഞ്ഞു. എംജി യൂണിവേഴ്സിറ്റി മുൻ വൈസ് ചാൻസലർ ഡോ. സിറിയക് തോമസ് മോഡറേറ്ററായി. കോട്ടയം അതിരൂപത വികാരി ജനറാൾ മോൺ. മൈക്കിൾ വെട്ടിക്കാട്ട്, സിറ്റിസൺസ് ഫോറം ഓർഗനൈസിംഗ് സെക്രട്ടറിയും ദർശന കൾച്ചറൽ സെന്‍റർ ഡയറക്ടറുമായ ഫാ. എമിൽ പുള്ളിക്കാട്ടിൽ, സിറ്റിസൺസ് ഫോറം സെക്രട്ടറി ജനറലും കെഇ സ്കൂൾ പ്രിൻസിപ്പലുമായ റവ.ഡോ. ജയിംസ് മുല്ലശേരി സിഎംഐ, സിറ്റിസൺസ് ഫോറം പ്രോഗ്രാം കോ-ഓർഡിനേറ്റർ മാത്യു കൊല്ലമലക്കരോട്ട് തുടങ്ങിയവർ പങ്കെടുത്തു.

കാറ്റിൽ വീടിന്‍റെ മേൽക്കൂര തകർന്നു

കുമരകം: കുമരകം പഞ്ചായത്തിലെ രണ്ടാം വാർഡിൽപ്പെട്ട തെക്കേ മൂലേപ്പാടത്തിന്‍റെ ചിറയിൽ ഒറ്റയ്ക്കു താമസിക്കുന്ന വീട്ടമ്മയുടെ വീടിന്‍റെ മേൽക്കൂര ഇന്നലെ രാത്രി കാറ്റിൽ തകർന്നു. മൂലേപ്പാടംചിറ സിസിലിയമ്മയുടെ വീടിന്‍റെ ഷീറ്റാണ് ഇന്നലെ രാത്രി 10.30ന് ഉണ്ടായ കാറ്റിൽ പറത്തിക്കളഞ്ഞത്. വീടിനു ചുറ്റും വെള്ളം ആയതിനാൽ രാത്രിയിൽ സിസിലിയമ്മയുടെ സഹോദരന്‍റെ മകന്‍റെ വീട്ടിലാണ് കിടന്നത്. ഇന്നു പുലർച്ചെ തിരികെയെത്തിയപ്പോഴാണ് വീടിന്‍റെ ദുരവസ്ഥ മനസിലാക്കിയത്.

പ്രേഷിതപ്രവര്‍ത്തനത്തിന് ഊര്‍ജം തീക്ഷ്ണമായ പ്രാര്‍ഥന: മാര്‍ പെരുന്തോട്ടം

ചങ്ങനാശേരി: തീക്ഷ്ണതയേറിയ പ്രാര്‍ഥനയിലൂടെയാണ് പ്രേഷിത പ്രവര്‍ത്തനത്തിനുള്ള ഊര്‍ജം ആര്‍ജിക്കുന്നതെന്ന് ആര്‍ച്ച്ബിഷപ് മാര്‍ ജോസഫ് പെരുന്തോട്ടം. അതിരൂപത ചെറുപുഷ്പ മിഷന്‍ലീഗ് 2025-26 പ്രവര്‍ത്തനവര്‍ഷം എസ്ബി കോളജ് കാവുകാട്ട് ഹാളില്‍ ഉദ്ഘാടനം ചെയ്തു പ്രസംഗിക്കുകയായിരുന്നു ആര്‍ച്ച്ബിഷപ്. അതിരൂപത പ്രസിഡന്‍റ് ഫെബിന്‍ അഗസ്റ്റിന്‍ മാത്യു അധ്യക്ഷത വഹിച്ചു. അതിരൂപത വികാരി ജനറാള്‍ മോണ്‍. സ്‌കറിയ കന്യാകോണില്‍ മാര്‍ഗരേഖയും പഠനഗ്രന്ഥ പ്രകാശനവും നടത്തി. ചെറുപുഷ്പ മിഷന്‍ ലീഗ് അതിരൂപത ഡയറക്ടര്‍ റവ.ഡോ. വര്‍ഗീസ് പുത്തന്‍പുരയ്ക്കല്‍, അസിസ്റ്റന്‍റ് ഡയറക്ടര്‍ ഫാ. സെബാസ്റ്റ്യന്‍ മാമ്പ്ര, ഓര്‍ഗനൈസിംഗ് പ്രസിഡന്‍റ് ടിന്‍റോ സെബാസ്റ്റ്യന്‍, ജോയിന്‍റ് ഡയറക്ടര്‍ സിസ്റ്റര്‍ ജെസ്‌ലിന്‍ ജെഎസ്, ജനറല്‍ സെക്രട്ടറി എബിന്‍ ജോസഫ്, ഓഫീസ് സെക്രട്ടറി സിസ്റ്റര്‍ മേരി റോസ്, ജോണ്‍സണ്‍ കാഞ്ഞിരക്കാട്, ലൂക്ക് അലക്‌സ്, ആനിമേറ്റര്‍ ബോബി തോമസ്, റോഹന്‍ ബെന്നി, ജോയല്‍ ജോണ്‍, സാലിച്ചന്‍ തുമ്പേക്കളം എന്നിവര്‍ പ്രസംഗിച്ചു. കഴിഞ്ഞ പ്രവര്‍ത്തനവര്‍ഷ കാലയളവില്‍ നടത്തപ്പെട്ട വിവിധ മത്സരങ്ങളില്‍ മികച്ച പ്രകടനം കാഴ്ചവച്ച കുഞ്ഞുമിഷനറിമാരെ സമ്മാനങ്ങള്‍ നല്കി ആദരിച്ചു. കുഞ്ഞേട്ടന്‍ പുരസ്‌കാര ജേതാവ് ജോണ്‍സണ്‍ കാഞ്ഞിരങ്ങാട്ടിനെ ആദരിച്ചു. തുടര്‍ന്ന് നടന്ന സെമിനാറില്‍ റവ.ഡോ. മാണി പുതിയിടം കുട്ടികള്‍ക്കായി ക്ലാസ് നയിച്ചു.

മാര്‍ കുര്യാക്കോസ് കുന്നശേരി അനുസ്മരണം

കോട്ടയം: മാര്‍ കുര്യാക്കോസ് കുന്നശേരിയുടെ എട്ടാം ചരമവാര്‍ഷികത്തോടനുബന്ധിച്ചു കോട്ടയം ക്രിസ്തുരാജ കത്തീഡ്രലില്‍ അതിരൂപത സഹായമെത്രാന്‍ മാര്‍ ജോസഫ് പണ്ടാരശേരിലിന്‍റെ മുഖ്യകാര്‍മികത്വത്തില്‍ കൃതജ്ഞതാബലിയും അനുസ്മരണ പ്രാര്‍ഥനകളും നടത്തി. ദൈവവിശ്വാസത്തില്‍ അടിയുറച്ച് കാലാനുസൃതമായും ദീര്‍ഘവീക്ഷണത്തോടെയും സഭയെയും സമുദായത്തെയും കരുതലോടെ പരിപാലിച്ച ഇടയശ്രേഷ്ഠനായിരുന്നു മാര്‍ കുര്യാക്കോസ് കുന്നശേരിയെന്ന് മാര്‍ ജോസഫ് പണ്ടാരശേരില്‍ പറഞ്ഞു. അതിരൂപത പ്രൊ-പ്രോട്ടോ സിഞ്ചെല്ലൂസ് ഫാ. തോമസ് ആനിമൂട്ടില്‍, സിഞ്ചെല്ലൂസ് ഫാ. മൈക്കിള്‍ വെട്ടിക്കാട്ട്, ചാന്‍സലറും കത്തീഡ്രല്‍ വികാരിയുമായ ഫാ. തോമസ് ആദോപ്പിള്ളില്‍, പ്രൊക്കുറേറ്റര്‍ ഫാ. ഏബ്രഹാം പറമ്പേട്ട്, അസിസ്റ്റന്‍റ് വികാരി ഫാ. ഷാനി വലിയപുത്തന്‍പുരയ്ക്കല്‍ എന്നിവര്‍ സഹകാര്‍മികരായിരുന്നു.

ഓട്ടോറിക്ഷ തല്ലിത്തകര്‍ത്ത സംഭവം: അഞ്ചു പേർ അറസ്റ്റിൽ

കോട്ടയം: ബൈക്ക് ഓട്ടോറിക്ഷയില്‍ ഇടിച്ചതിനെത്തുടര്‍ന്ന് ഓട്ടോറിക്ഷ തല്ലിത്തകര്‍ത്ത സംഭവത്തില്‍ അഞ്ചു പേരെ കോട്ടയം ഈസ്റ്റ് പോലീസ് അറസ്റ്റ് ചെയ്തു. പുതുപ്പള്ളി ചാലുങ്കപ്പടി ഇഞ്ചക്കാട്ട് കുന്നേല്‍ എസ്. കാലേബ് (23), പ്രണിത്, മന്ദിരം കുറ്റിക്കാട്ട് സ്വദേശി എം. കാര്‍ത്തിക് (24), മാങ്ങാനം കരയില്‍ അഞ്ചേരിയില്‍ ബെച്ചു മോന്‍സി (24), കറുകച്ചാല്‍ ഉമ്പിടി തച്ചന്‍കുളം രാഹുല്‍മോന്‍ (24) എന്നിവരാണ് പിടിയിലായത്. കഴിഞ്ഞ 12ന് രാത്രി 6.45നു കളമ്പുകാട് - ജനത റോഡിലാണ് സംഭവം. പ്രണിത് അലക്ഷ്യമായി ഓടിച്ചു കൊണ്ടുവന്ന ബൈക്ക് മാങ്ങാനം സ്വദേശി മണികണ്ഠന്‍റെ ഓട്ടോറിക്ഷയില്‍ ഇടിക്കുകയായിരുന്നു. അപകടത്തില്‍ പ്രണിത്തിനും സുഹൃത്തിനും പരിക്കേറ്റു. പിന്നാലെ ബൈക്കില്‍ വന്ന സുഹൃത്തുക്കള്‍ പ്രണിത് പറഞ്ഞനുസരിച്ച് ഓട്ടോറിക്ഷ ഡ്രൈവറെ മര്‍ദിക്കുകയും കരിങ്കല്ലിന് ഇടിച്ചു പരിക്കേല്‍പ്പിക്കുകയും ഓട്ടോറിക്ഷ തല്ലിത്തകര്‍ത്ത് ഓടയില്‍ തള്ളുകയുമായിരുന്നു. തുടര്‍ന്നു കോട്ടയം ഈസ്റ്റ് പോലീസ് കേസ് രജിസ്റ്റര്‍ ചെയ്തു പ്രതികളെ അറസ്റ്റ് ചെയ്യുകയായിരുന്നു.

മെഡി. കോളജ് ആശുപത്രി ഒപി കൗണ്ടറിനു ‌സമീപം ടീ ഷോപ്പ്: തിരക്ക് വർധിപ്പിക്കുമെന്ന് ആക്ഷേപം

ഗാന്ധിനഗർ: കോട്ടയം മെഡിക്കൽ കോളജ് ആശുപത്രിയിൽ രോഗികൾ ഒപി ടിക്കറ്റെടുക്കുന്ന സ്ഥലത്തു പുതിയ ടീ ഷോപ്പ് ഏർപ്പെടുത്തുന്നു. ഇതിന്‍റെ നിർമാണപ്രവർത്തനം പുരോഗമിക്കുകയാണ്. രോഗികളുടെ വൻ തിരക്കുള്ള ഒപി കൗണ്ടറിനു സമീപം ടീ ഷോപ്പ് ഏർപ്പെടുത്തുന്നത് അസൗകര്യമാകുമെന്നാണ് ആരോപണം. രോഗികളുടെയും കൂട്ടിരിപ്പുകാരുടെയും ബാഹുല്യം മൂലം ഇവിടെ നിന്നുതിരിയാൻ ഇടമില്ലാത്ത സ്ഥിതിയാണ്. ദിവസേന1500 മുതൽ 2000 രോഗികൾ വരെയാണ് നാലു ജില്ലകളിൽനിന്നായി മെഡിക്കൽ കോളജ് ആശുപത്രി ഒപി കൗണ്ടിൽ ടിക്കറ്റെടുക്കാനെത്തുന്നത്. രോഗികളുടെ കൂടെ വരുന്ന ബന്ധുക്കളെകൂടി കൂട്ടുമ്പോൾ എണ്ണം വർധിക്കും. ഇത്തരത്തിൽ വൻ തിരക്കാണ് ഒപി കൗണ്ടർ നേരിടുന്നത്. ഇതിനിടയിൽ ടീ ഷോപ്പു കൂടി ഏർപ്പെടുത്തുമ്പോൾ ഇവിടെ വൻ തിരക്കിനിടയാക്കുമെന്ന് രോഗികൾതന്നെ സൂചിപ്പിക്കുന്നു.

നീണ്ടൂർ പ്രാലേൽ പാലം താത്കാലികമായി ബലപ്പെടുത്തണം

ഏറ്റുമാനൂർ: ദുർബലാവസ്ഥയിലായ നീണ്ടൂർ പ്രാലേൽ പാലം താൽക്കാലികമായി ബലപ്പെടുത്തണമെന്ന് ആവശ്യമുയരുന്നു. കാലപ്പഴക്കം മൂലം പാലം വർഷങ്ങളായി അപകട ഭീഷണിയിലാണ്. ഏറ്റുമാനൂർ - വെച്ചൂർ റോഡിൽ നീണ്ടൂരിനും കല്ലറയ്ക്കുമിടയിലാണ് പ്രാലേൽ പാലം. ഏറ്റുമാനൂർ, അതിരമ്പുഴ, മാന്നാനം, നീണ്ടൂർ, മെഡിക്കൽ കോളജ്, കുറുപ്പന്തറ പ്രദേശങ്ങളിൽ നിന്ന് വൈക്കം, ചേർത്തല, ആലപ്പുഴ ഭാഗങ്ങളിലേക്കുള്ള എളുപ്പവഴിയിലെ ഈ പാലത്തിലൂടെ ദിവസേന നൂറുകണക്കിന് വാഹനങ്ങളാണ് കടന്നു പോകുന്നത്. പാലം ദുർബലാവസ്ഥയിലായിട്ട് വർഷങ്ങളായി. ദീർഘകാലത്തെ സമരങ്ങൾക്കും സമ്മർദ്ദങ്ങൾക്കുമൊടുവിൽ പാലം പുതുക്കിപ്പണിയാൻ ഫണ്ട് അനുവദിച്ച് നടപടി ക്രമങ്ങൾ പൂർത്തീകരിച്ചിട്ട് രണ്ടു വർഷത്തോളമായി. പക്ഷേ പാലം നിർമാണം ആരംഭിക്കാൻ കഴിഞ്ഞിട്ടില്ല. പൊളിച്ചു നീക്കിയ കുമരകം കോണത്താറ്റ് പാലത്തിന്‍റെ പുനർനിർമാണം പൂർത്തീകരിക്കാൻ വൈകുന്നതാണ് പ്രാലേൽ പാലത്തിന്‍റെ നിർമാണം ആരംഭിക്കുന്നതിന് തടസമാകുന്നത്. ആലപ്പുഴ, ചേർത്തല, വൈക്കം ഭാഗത്തുനിന്ന് കുമരകം വഴി കോട്ടയത്തേക്ക് പോകേണ്ട വാഹനങ്ങൾ ഇപ്പോൾ കല്ലറ - നീണ്ടൂർ റോഡിലൂടെയാണ് പോകുന്നത്. കോണത്താറ്റ് പാലം നിർമാണം അനന്തമായി നീളുന്ന സാഹചര്യത്തിൽ പ്രാലേൽ പാലം താത്കാലികമായി ബലപ്പെടുത്താൻ അടിയന്തര നടപടി വേണമെന്ന ആവശ്യമാണ് ഇപ്പോൾ ഉയർന്നിരിക്കുന്നത്. പാലം തീർത്തും ദുർബലമാണെന്നും പാലത്തിന്‍റെ സമീപന പാതയുടെ കൽക്കെട്ടുകളും തകർന്നിരിക്കുകയാണെന്നും നാട്ടുകാർ ചൂണ്ടിക്കാട്ടുന്നു.

ലഹരിക്കെതിരായ പോരാട്ടം രാജ്യമൊന്നാകെ ഏറ്റെടുക്കേണ്ട ദൗത്യം: മഹാരാഷ്‌ട്ര ഗവർണർ

കോട്ടയം: ലഹരി വിപത്തിനെതിരായ പോരാട്ടം രാജ്യമൊന്നടങ്കം ഏറ്റെടുക്കേണ്ട ദൗത്യമെന്ന് മഹാരാഷ്‌ട്ര ഗവര്‍ണര്‍ സി.പി. രാധാകൃഷ്ണന്‍. മലങ്കര ഓര്‍ത്തഡോക്‌സ് സഭ സംഘടിപ്പിച്ച ലഹരിവിരുദ്ധ ഉച്ചകോടി ഡ്രക്‌സിറ്റ് സമ്മിറ്റ് ഉദ് ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ലോകത്തിലെ ഏറ്റവും വലിയ മാഫിയയായി ലഹരി മാഫിയ മാറി. ചെറിയ ഉത്പന്നം വഴി വലിയ ലാഭം കൊയ്യുന്ന ലഹരി മാഫിയകളെ ഉന്മൂലനം ചെയ്യാന്‍ ബോധവത്കരണമാണ് വേണ്ടത്. ജീവിതത്തില്‍ ലഹരി ഉപയോഗിക്കില്ലെന്ന് യുവാക്കള്‍ പ്രതിജ്ഞയെടുക്കണമെന്നും ഗവര്‍ണര്‍ ഓര്‍മിപ്പിച്ചു. സമൂഹത്തെ ബാധിച്ചിരിക്കുന്ന കാന്‍സറായി മദ്യ-മയക്കുമരുന്ന് ഉപയോഗം മാറിക്കഴിഞ്ഞെന്ന് അധ്യക്ഷ പ്രസംഗത്തില്‍ സഭാധ്യക്ഷനും മലങ്കര മെത്രാപ്പോലീത്തായുമായ ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാബാവാ പറഞ്ഞു. ആരോഗ്യമുള്ള തലമുറയെ വാര്‍ത്തെടുക്കുന്നതിനായി കോട്ടയം നഗരത്തോട് ചേര്‍ന്നുള്ള സഭയുടെ 14 ഏക്കര്‍ സ്ഥലത്ത് വെല്‍നസ് പാര്‍ക്ക് സ്ഥാപിക്കുമെന്നും കാതോലിക്കാ ബാവാ പ്രഖ്യാപിച്ചു. മാര്‍ത്തോമ്മാ സഭ നിലയ്ക്കല്‍ ഭദ്രാസനാധിപന്‍ ഡോ. ജോസഫ് മാര്‍ ബര്‍ണബാസ് സഫഗ്രന്‍ മെത്രാപ്പോലീത്ത, മാര്‍ ജേക്കബ് മുരിക്കന്‍, കോട്ടയം താഴത്തങ്ങാടി ജുമാ മസ്ജിദ് ചീഫ് ഇമാം ഷഫീഖ് മന്നാനി, തിരുവഞ്ചൂര്‍ രാധാകൃഷ്ണന്‍ എംഎല്‍എ, ഗീവര്‍ഗീസ് മാര്‍ കൂറിലോസ് മെത്രാപ്പോലീത്ത, ഫാ. പി.എ. ഫിലിപ്പ് എന്നിവര്‍ പ്രസംഗിച്ചു. ഡോ. യൂഹാനോന്‍ മാര്‍ ക്രിസോസ്റ്റമോസ്, യൂഹാനോന്‍ മാര്‍ പോളിക്കാര്‍പ്പോസ്, മാത്യൂസ് മാര്‍ തേവോദോസിയോസ്, ഡോ. യൂഹാനോന്‍ മാര്‍ ദീയസ്‌ക്കോറോസ്, ഡോ. ഗീവര്‍ഗീസ് മാര്‍ ബര്‍ണബാസ്, വൈദിക ട്രസ്റ്റി ഫാ. ഡോ. തോമസ് വര്‍ഗീസ് അമയില്‍, അല്‍മായ ട്രസ്റ്റി റോണി വര്‍ഗീസ് ഏബ്രഹാം, മലങ്കര അസോസിയേഷന്‍ സെക്രട്ടറി ബിജു ഉമ്മന്‍, വിവിധ ആധ്യാത്മിക സംഘടനകളുടെ ചുമതലക്കാര്‍, വൈദികര്‍, അധ്യാപകര്‍, വിദ്യാര്‍ഥികള്‍ തുടങ്ങിയവര്‍ ഉച്ചകോടിയില്‍ പങ്കെടുത്തു. കോണ്‍ക്ലേവിന്‍റെ ആദ്യ സെഷന്‍ സംവിധായകന്‍ ബ്ലസി ഉദ്ഘാടനം ചെയ്തു. വിഴിഞ്ഞം പോര്‍ട്ട് മാനേജിംഗ് ഡയറക്ടര്‍ ഡോ. ദിവ്യ എസ്. അയ്യര്‍, ഡോ. റൂബിള്‍ രാജ്, പ്രഫ. സി. മാമച്ചന്‍, ഡോ. വര്‍ഗീസ് പി. പുന്നൂസ് എന്നിവര്‍ പ്രസംഗിച്ചു.

നാളികേരവില വീണ്ടും ഉയരുന്നു

കോട്ടയം: നാളികേരവില വീണ്ടും ഉയരുന്നു. ഹോള്‍സെയില്‍ വില 75 രൂപയിലേക്കും ചില്ലറവില 82 രൂപയിലേക്കും കയറി. ബ്രാന്‍ഡഡ് വെളിച്ചെണ്ണയ്ക്ക് 350 രൂപയിലെത്തി. നിലവിലെ സാഹചര്യത്തില്‍ ഓണം എത്തുമ്പോള്‍ നാളികേരവില 100 രൂപയിലെത്തിയാലും അതിശയിക്കാനില്ലെന്നാണ് വ്യാപാരികള്‍ പറയുന്നത്. വെളിച്ചെണ്ണയ്ക്ക് അടുത്ത മാസത്തോടെ 500 രൂപയിലെത്താം. കേരളത്തില്‍ നാളികേരം ഉത്പാദനം കുത്തനെ ഇടിയുകയാണ്. തമിഴ്നാട്ടില്‍നിന്നുള്ള നാളികേരം മറ്റ് സംസ്ഥാനങ്ങളിലേക്ക് കയറിപ്പോവുകയും ചെയ്യുന്നു. കാങ്കയം, പൊള്ളാച്ചി, ഉദുമല്‍പേട്ട, തേനി, കന്യാകുമാരി എന്നിവിടങ്ങളില്‍ നിന്നാണ് കൂടുതലായി നാളികേരം കൊണ്ടുവരുന്നത്. കേരളത്തില്‍ തെങ്ങുകൃഷി ഓരോ വര്‍ഷവും കുറയുകയാണ്. കൃഷിച്ചെലവ് കൂടി വരികയും ചെയ്യുന്നു. കാലാവസ്ഥാവ്യതിയാനവും ചെല്ലി, വണ്ട് ശല്യവും സങ്കരയിനം തെങ്ങുകളെ നശിപ്പിക്കുന്നു. വളം, കീടനാശിനി തുടങ്ങിയവയ്ക്കും വന്‍ ചെലവാണ്. നാലുമുതല്‍ അഞ്ചുവര്‍ഷം എടുക്കും കായ്ക്കാന്‍. ചെല്ലി, വണ്ട് എന്നിവയുടെ ശല്യമാണ് കര്‍ഷകര്‍ നേരിടുന്ന മറ്റൊരു പ്രതിസന്ധി. തെങ്ങ് കയറ്റക്കൂലി നൂറു രൂപയിലെത്തി. തെങ്ങിന്‍റെ മുകള്‍ഭാഗം വൃത്തിയാക്കി മരുന്ന് തളിക്കുന്നതിന് 150 രൂപ നല്‍കണം. ഒരു വര്‍ഷത്തിനുള്ളില്‍ നാളികേരവില കിലോയ്ക്ക് 40 രൂപയുടെ കയറ്റമാണുണ്ടായത്. വെളിച്ചെണ്ണ വില ഇരട്ടിയായി. തമിഴ്‌നാട്ടിലും കര്‍ണാടകയിലും നാളികേര മൂല്യവര്‍ധിത ഉത്പന്നക്കമ്പനികള്‍ പെരുകിയതും കേരളത്തില്‍ തേങ്ങാക്ഷാമത്തിനും വിലക്കയറ്റത്തിനും കാരണമാണ്. ഇരുസംസ്ഥാനങ്ങളിലേക്കും വടക്കന്‍ കേരളത്തില്‍നിന്നുള്ള നാളികേരം വ്യാപകമായി കൊണ്ടുപോകുകയാണ്. കര്‍ണാടകത്തില്‍ തേങ്ങാപ്പാല്‍ അധിഷ്ഠിത കമ്പനികളാണ് മുഖ്യ ആവശ്യക്കാര്‍. തമിഴ്‌നാട്ടില്‍ തേങ്ങാപ്പൊടി ഉത്പാദന കമ്പനികളും. വിദേശവിപണികളിലേക്കാണ് ഈ ഉത്പന്നങ്ങള്‍ പോകുന്നത്. കോഴിക്കോടുമുതല്‍ വടക്കോട്ടുള്ള ജില്ലകളിലെ നാളികേരം കര്‍ണാടകയിലേക്കും മധ്യകേരളത്തിലെ നാളികേരം തമിഴ്‌നാട്ടിലേക്കുമാണ് പോകുന്നത്. കൂടിയവില നല്‍കി കമ്പനികള്‍ സംഭരണം തുടങ്ങിയതോടെ കേരളത്തില്‍ വില വന്‍തോതില്‍ ഉയര്‍ന്നു. കേര കര്‍ഷകരെ വലച്ച് തുരപ്പന്‍ പുഴുക്കൾ കോട്ടയം: തെങ്ങുകളില്‍ വെള്ളയ്ക്കാ തിന്നുന്ന തുരപ്പന്‍ പുഴുക്കളുടെ ശല്യം രൂക്ഷമാകുന്നു. ജില്ലയിലെ ഒട്ടുമിക്ക സ്ഥലങ്ങളിലും തുപ്പന്‍ പുഴുക്കളുടെ ശല്യം പതിവായിരിക്കുകയാണ്. ഇവയുടെ പതിവായ ആക്രമണത്തില്‍ നൂറുകണക്കിനു തെങ്ങുകളാണ് നശിച്ചു പോകുന്നത്. പുഴുക്കള്‍ കേര കര്‍ഷകര്‍ക്കു വലിയ ഭീഷണിയായി മാറിയിരിക്കുകയാണ്.

തെങ്ങുകളില്‍ പുതിയ തേങ്ങകള്‍ ഉണ്ടായി വെള്ളയ്ക്കാ വലിപ്പമാകുമ്പോഴേക്കും പുഴുക്കള്‍ ശല്യം തുടങ്ങും. രണ്ടിഞ്ച് നീളം വരുന്ന പുഴുക്കള്‍ വെള്ളയ്ക്ക തുരന്ന് കാമ്പ് വ്യാപകമായി നശിപ്പിക്കുകയാണ് ചെയ്യുന്നത്. പുഴുക്കളുടെ ശല്യം ആദ്യകാലങ്ങളില്‍ കര്‍ണാടകയിലെ മൈസൂരു, മാണ്ഡ്യ തുടങ്ങിയിടങ്ങളിലാണ് കണ്ടിരുന്നത്. എന്നാല്‍ അടുത്തനാളിലാണ് ഇവരെ നാട്ടിലും കണ്ടുതുടങ്ങിയത്. ഒട്ടുമിക്ക തെങ്ങുകളിലും വെള്ളയ്ക്ക വ്യാപകമായി നശിച്ചതോടെ കര്‍ഷകര്‍ നടത്തിയ പരിശോധനയിലാണ് തുരപ്പന്‍ പുഴുവിനെ കണ്ടെത്തിയത്. ഓറഞ്ച് കലര്‍ന്ന ബ്രൗണ്‍ നിറത്തോടെ മുന്‍ ഭാഗവും തവിട്ടു കലര്‍ന്ന കറുപ്പു നിറത്തോടെ പിന്‍ ഭാഗവുമാണ് പുഴുക്കള്‍ക്ക്. മുന്നിലത്തെ ചിറകുകളില്‍ മധ്യഭാഗത്തായി കറുത്ത നിറത്തിലുള്ള പൊട്ടു കാണാം. സൈക്ലോഡസ് ഒമ്മ എന്ന ശാസ്ത്രീയനാമത്തിലാണ് ഇവ അറിയപ്പെടുന്നത്. തെങ്ങില്‍ മാത്രമല്ല തെങ്ങിന്‍റെ കുടുംബത്തില്‍പ്പെടുന്ന മറ്റു വൃക്ഷങ്ങളെയും ഇവ ആക്രമിക്കുമെന്ന് വിദഗ്ധര്‍ പറയുന്നു. ഇവ ഒരു തെങ്ങില്‍ പിടിച്ചാല്‍ വെള്ളയ്ക്കകള്‍ പൂര്‍ണമായും തുരന്നുനശിപ്പിക്കും. ജില്ലയുടെ വിവിധഭാഗങ്ങളില്‍ തുരപ്പന്‍ പുഴുക്കളുടെ ശല്യം രൂക്ഷമായിരിക്കുന്ന സാഹചര്യത്തില്‍ കൃഷി വകുപ്പ് അടിയന്തരമായി ഇടപെടണമെന്ന് കര്‍ഷക കോണ്‍ഗ്രസ് ജില്ലാ ജനറല്‍ സെക്രട്ടറി എബി ഐപ്പ് ആവശൃപ്പെട്ടു.

കോവിഡിനു പിന്നാലെ എലിപ്പനിയും

കോട്ടയം: ജില്ലയിൽ കോവിഡിനു പിന്നാലെ എലിപ്പനിയും വ്യാപകമാകുന്നു. സംസ്ഥാനത്തുതന്നെ ഏറ്റവും ഉയര്‍ന്ന മരണനിരക്കുള്ള എലിപ്പനി തോട്ടം, കൈത മേഖയിലാണ് കൂടിവരുന്നത്. മാരകമായാല്‍ മരണകാരണമാകാവുന്ന എലിപ്പനിക്ക് സ്വയംചികിത്സ പാടില്ല. കൈതത്തോട്ടങ്ങളിൽ പണിയെടുക്കുമ്പോഴും വിളവെടുക്കുമ്പോഴും ജാഗ്രത പാലിക്കണം. ജില്ലയില്‍ കൈതക്കൃഷി വര്‍ധിച്ചതോടെ എലികളുടെ എണ്ണത്തിലും വർധന‍യുണ്ടായിട്ടുണ്ട്. ഇവയുടെ വിസര്‍ജ്യങ്ങളില്‍നിന്നാണ് ബാക്ടീരിയ മനുഷ്യരുടെ ശരീരത്തില്‍ ചെറിയ മുറിവുകളിലൂടെ പ്രവേശിക്കുന്നത്. ലെപ്റ്റോസ്പൈറ വിഭാഗത്തില്‍പ്പെട്ട 260 ബാക്ടീരിയകളാണ് എലിപ്പനി അഥവാ ലെപ്റ്റോസ്പൈറോസിസ് രോഗമുണ്ടാ ക്കുന്നത്. മനുഷ്യരിലെന്നപോലെ മൃഗങ്ങളിലും എലിപ്പനി മരണകാരണമാകാം. എലി, കന്നുകാലി, നായ, പന്നി, കുറുക്കന്‍, പക്ഷികള്‍ എന്നിവ രോഗവാഹകരാണ്. എലിമൂത്രം കുടിവെള്ളത്തിലൂടെയോ ഭക്ഷണത്തിലൂടെയോ മുറിവുകളിലൂടെയോ ഉള്ളില്‍ കടന്നാല്‍ രോഗബാധയുണ്ടാകാം. കൃഷിപ്പണിക്കാര്‍, മൃഗങ്ങളുമായി ഇടപഴകുന്നവര്‍, കശാപ്പുശാല ജോലിക്കാര്‍, ശുചീകരണത്തൊഴിലാളികള്‍, കുളത്തിലും ഒഴുക്കില്ലാത്ത ഇടങ്ങളിലും കുളിക്കുന്നവര്‍ തുടങ്ങിയവരിലാണ് സാധ്യത കൂടുതല്‍. കടുത്ത പനി, തലവേദന, പേശിവേദന, കണ്ണ് ചുവക്കല്‍, മൂക്കിലൂടെ രക്തസ്രാവം എന്നിവയാണ് ലക്ഷണങ്ങള്‍. അണുബാധയുള്ള മൃഗങ്ങളുടെ മൂത്രം ശരീരഭാഗങ്ങളില്‍ വീണാല്‍ സോപ്പിട്ട് കഴുകി അണുനാശിനി ഉപയോഗിച്ച് വൃത്തിയാക്കണം. രോഗബാധയുള്ള മൃഗങ്ങളുടെ പാല്‍ കൈയിലോ ശരീരഭാഗങ്ങളിലോ വീണാലും അണുനാശിനി ഉപയോഗിച്ച് കഴുകണം. പശു, ആട്, എരുമ, നായ എന്നീ മൃഗങ്ങളിലാണ് ജില്ലയില്‍ എലിപ്പനി റിപ്പോര്‍ട്ട് ചെയ്തത്. രോഗം ഭേദമായ മൃഗങ്ങളുടെ മൂത്രത്തില്‍ മൂന്ന് മാസം വരെ അണുക്കള്‍ ഉണ്ടാകുമെന്ന് ആരോഗ്യപ്രവര്‍ത്തകര്‍ പറഞ്ഞു. ശരീരത്തില്‍ മുറിവുകളുണ്ടെങ്കില്‍ കെട്ടിക്കിടക്കുന്ന വെള്ളത്തില്‍ ഇറങ്ങരുത്. മലയോരത്ത് മലേറിയ കടനാട് പഞ്ചായത്തിലെ മാനത്തൂര്‍ വാര്‍ഡിലാണു മലേറിയ സ്ഥിരീകരിച്ചത്. ജില്ലയില്‍ ആദ്യമായാണു മലേറിയ രോഗബാധ സ്ഥിരീകരിച്ചിരിക്കുന്നത്. മലയോരമേഖലയായ പാട്ടത്തിപ്പറമ്പ് ഉണ്ണിക്കനോലി ഭാഗത്തെ സ്ത്രീക്കാണ് രോഗബാധ. മലേറിയ നിയന്ത്രണ അഥോറിറ്റി അധികൃതര്‍ സ്ഥലത്തെത്തി കൊതുകുകളുടെ ഉറവിട നശീകരണത്തിനായി സ്‌പ്രേയിംഗ് നടത്തി. കടനാട് പിഎച്ച്‌സി, ഉള്ളനാട് സിച്ച്‌സി എന്നിവിടങ്ങളില്‍ നിന്നുള്ള ആരോഗ്യവകുപ്പ് അധികൃതര്‍ എത്തി പരിസരവാസികള്‍ ഉള്‍പ്പെടെ അമ്പതില്‍പ്പരം പേരുടെ രക്തസാമ്പിള്‍ ശേഖരിച്ച് പരിശോധനയ്ക്ക് അയച്ചു. പഞ്ചായത്ത് ആരോഗ്യവിഭാഗം കഴിഞ്ഞദിവസം പ്രദേശത്ത് ഫോഗിംഗും നടത്തി.ഇരുപതോളം കുടുംബങ്ങള്‍ താമസിക്കുന്ന മേഖലയില്‍ ഒരാളിലാണ് രോഗബാധ കണ്ടെത്തിയത്.

ഗുണ്ടാ-മാഫിയ സംഘത്തിന്‍റെ ഇടപെടലില്‍ ഇറച്ചിവില ഉയരുന്നു

കോട്ടയം: കന്നുകാലി വ്യാപാരത്തില്‍ ഗുണ്ടാ മാഫിയ സംഘത്തിന്‍റെ ഇടപെടലില്‍ ഇറച്ചി വില ഗണ്യമായി ഉയരുന്നു. ഇതരസംസ്ഥാനങ്ങളില്‍നിന്നു വാങ്ങുന്ന കാലികള്‍ക്ക് വന്‍തുക ഗുണ്ടാപ്പിരിവ് നല്‍കിയാണ് സംസ്ഥാനത്തെത്തിക്കുന്നതെന്നും ഇത് ഇറച്ചി വില വര്‍ധിക്കാന്‍ ഇടയാക്കുമെന്നും മീറ്റ് ഇന്‍ഡസ്ട്രീസ് വെല്‍ഫെയര്‍ അസോസിയേഷന്‍. ഇറച്ചി വില്പനയിലും ഉപഭോഗത്തിലും മുന്‍പന്തിയിലുള്ള ജില്ലയില്‍ നല്ല ഇറച്ചിക്കായി നെട്ടോട്ടമോടുകയാണ് ജനം. ആവശ്യക്കാരേറിയെങ്കിലും മാത്സ്യം കുറവായതിനാല്‍ പല സ്ഥാപനങ്ങളും പൂട്ടേണ്ട സാഹചര്യമാണെന്നു വ്യാപാരികള്‍ പറയുന്നു. കന്നുകാലി ക്ഷാമത്തെത്തുടര്‍ന്ന് ബീഫ് വില കുത്തനെ വര്‍ധിക്കുകയാണ്. ജില്ലയിലുള്ളവര്‍ പോത്ത്, കാള ഇറച്ചികള്‍ക്കായി പൂര്‍ണമായി ഇതരസംസ്ഥാനങ്ങളെയാണ് ആശ്രയിക്കുന്നത്. പശു ഇറച്ചിക്ക് തീരെ ഡിമാന്‍ഡില്ല. നാട്ടിന്‍ പുറത്ത് പോത്തിനെ വളര്‍ത്തിയവരെല്ലാം വിലകിട്ടാത്തതിനാല്‍ പിന്‍വലിഞ്ഞു. മുന്‍പ് ആന്ധ്ര, കര്‍ണാടക എന്നിവിടങ്ങളില്‍നിന്ന് തമിഴ്‌നാട് വഴി വ്യാപകമായി കന്നുകാലികളെ എത്തിച്ചിരുന്നെങ്കിലും ഇവിടങ്ങളിലെ കാലി സമ്പത്ത് കുറഞ്ഞു. മഹാരാഷ്‌ട്ര, മധ്യപ്രദേശ്, പഞ്ചാബ് എന്നിവിടങ്ങളില്‍നിന്നു കന്നുകാലികളെ എത്തിക്കുന്നുണ്ട്. ബീഫിന്‍റെ വില 440-460 രൂപ വരെയായി. കാര്‍ഷിക മേഖലയില്‍ യന്ത്രവത്കരണം പൂര്‍ണമായതോടെ കാലിവളര്‍ത്തല്‍ കുറഞ്ഞു. വിദൂര സംസ്ഥാനങ്ങളില്‍നിന്നു കന്നുകാലികളെ കൊണ്ടുവരേണ്ടി വരുമ്പോള്‍ ചെലവേറുന്നതായി വ്യാപാരികള്‍ പറയുന്നു. ആന്ധ്ര, തെലുങ്കാന, തമിഴ്‌നാട്, കര്‍ണാടക മുതലായ സംസ്ഥാനങ്ങളിലെ കന്നുകാലി വ്യാപാരം പൂര്‍ണമായും ഗുണ്ടാ മാഫിയ ഗ്രൂപ്പുകളാണ് നിയന്ത്രിക്കുന്നത്. ഒരു വര്‍ഷം 5,000 കോടി രൂപയുടെ മാടുകള്‍ കേരളത്തിലെത്തുമ്പോള്‍ (പ്രതിമാസം ഒന്നര ലക്ഷം കന്നുകാലികള്‍) ഇതില്‍ 2,000 കോടിയും ഗുണ്ടാ, ഉദ്യോഗസ്ഥ സംഘത്തിനുള്ള പിരിവാണെന്ന് എംഐഡബ്ല്യുഎ ആരോപിക്കുന്നു. കേരളത്തിന്‍റെ കാലിസമ്പത്ത് സംരക്ഷിക്കാനും മേഖല സംരക്ഷിക്കാനും സര്‍ക്കാര്‍ കമ്മീഷനെ നിയമിച്ച് വിഷയങ്ങള്‍ പഠിച്ചു പരിഹാരം കണ്ടെത്തണമെന്ന് മീറ്റ് ഇന്‍ഡസ്ട്രീസ് വെല്‍ഫെയര്‍ അസോസിയേഷന്‍ ഭാരവാഹികള്‍ പറഞ്ഞു. കന്നുകാലി കടത്തിലെ പ്രശ്‌നങ്ങള്‍ പരിഹരിക്കാന്‍ കേന്ദ്ര ഏജന്‍സിയുടെ അന്വേഷണം പ്രഖ്യാപിക്കണം. വിലവർധനയിൽ പ്രതിഷേധിച്ച് ഇറച്ചിക്കടകള്‍ അനിശ്ചിത കാലത്തേക്ക് അടച്ചിടുമെന്ന് ജനറല്‍ സെക്രട്ടറി ബിനോ ജോസഫ്, പ്രസിഡന്‍റ് എം.എം. സലിം, കണ്‍വീനര്‍ അജീഷ് ജോസഫ് എന്നിവര്‍ പറഞ്ഞു.

ബഷീർ ബാല്യകാലസഖി പുരസ്കാരം കെ.വി. മോഹൻകുമാറിന്

തലയോലപ്പറമ്പ്: വൈക്കം മുഹമ്മദ് ബഷീർ സ്മാരക സമിതിയുടെ ആഭിമുഖ്യത്തിൽ നൽകുന്ന ബഷീർ ബാല്യകാലസഖി പുരസ്കാരം നോവലിസ്റ്റും റിട്ട. ഐഎഎസ് ഉദ്യോഗസ്ഥനുമായ കെ.വി. മോഹൻകുമാറിനും ബഷീർ അമ്മ മലയാളം പുരസ്കാരം ചലച്ചിത്ര സംവിധായകൻ തരുൺ മൂർത്തിക്കും നൽകും. സാഹിത്യ നിരൂപകൻ ഡോ. എം.എം. ബഷീർ, വൈക്കം മുഹമ്മദ് ബഷീർ സ്മാരക സമിതി ചെയർമാൻ കിളിരൂർ രാധാകൃഷ്ണൻ, ഡോ. പോൾ മണലിൽ, ഡോ. എസ്. ലാലിമോൾ, ഡോ.യു. ഷംല,ഡോ. അംബിക എ. നായർ, ഡോ. വി.ടി. ജലജാകുമാരി എന്നിവർ അടങ്ങുന്ന ജൂറിയാണ് പുരസ്കാര ജേതാക്കളെ തെരഞ്ഞെടുത്തത്. ആർട്ടിസ്റ്റ് ശ്രീജേഷ് ഗോപാൽ രൂപകൽപന ചെയ്ത ശിൽപവും പ്രശസ്തി പത്രവും 10,001 രൂപയുംഅടങ്ങുന്നതാണ് ബഷീർ പുരസ്കാരങ്ങൾ. ബഷീറിന്‍റെ 31-ാം ചരമവാർഷികമായ ജൂലൈ അഞ്ചിന് രാവിലെ 10.30ന് തലയോലപ്പറമ്പ് ഫെഡറൽ നിലയത്തിൽ നടക്കുന്ന അനുസ്മരണ സമ്മേളനത്തിൽ പുരസ്കാരങ്ങൾ നൽകുമെന്ന് വൈക്കം മുഹമ്മദ് ബഷീർ സ്മാരക സമിതി ജനറൽ സെക്രട്ടറി പി.ജി. ഷാജിമോൻ അറിയിച്ചു.

മലയോരജനത പൊരുതി നേടിയ യാത്രാസ്വാതന്ത്ര്യത്തിന് കാൽ നൂറ്റാണ്ട്

മുണ്ടക്കയം ഈസ്റ്റ്: ഒരു ജനത ഒന്നാകെ രംഗത്തിറങ്ങി നടത്തിയ സമര പോരാട്ടങ്ങൾക്കൊടുവിൽ ലഭിച്ച സഞ്ചാരസ്വാതന്ത്ര്യത്തിന് കാൽ നൂറ്റാണ്ട് തികയുന്നു. മുണ്ടക്കയത്തിന്‍റെ മലയോര മേഖലയായ പാലൂർകാവ്, തെക്കേമല, കാരിവര, മാടന്തറ, കാനം മല, വാഗമല അടക്കമുള്ള പ്രദേശങ്ങളിലേക്ക് സഞ്ചരിക്കുന്നതിന് ട്രാവൻകൂർ റബർ ആൻഡ് ടി കമ്പനി ലിമിറ്റഡ് അനുവാദം നിഷേധിച്ചിരുന്നു. ഇവരുടെ ഭൂമിയിലൂടെയുള്ള റോഡിലൂടെ സർവീസ് നടത്തിയിരുന്ന ബസുകളിൽനിന്ന് തോട്ടം മാനേജ്മെന്‍റ് സെക്യൂരിറ്റി തുകയും ദിവസേന ടോളും പിരിച്ചിരുന്നു. മറ്റു സ്വകാര്യ വാഹനങ്ങളിൽനിന്നും ടോൾ ഈടാക്കിയിരുന്നു. എങ്കിലും റോഡിന്‍റെ അറ്റകുറ്റപ്പണികൾ യഥാസമയം നടത്തിയിരുന്നില്ല. 1971 മുതൽ റോഡ് പൊതുമരാമത്ത് വകുപ്പിന് വിട്ടുനൽകണമെന്ന് ആവശ്യപ്പെട്ട് ശക്തമായ പ്രതിഷേധങ്ങൾ ആരംഭിച്ചു. തുടർനടപടികൾ ഒന്നും ഉണ്ടാകാതെയായതോടെ പ്രതിഷേധത്തിന്‍റെ ഭാഗമായി 1985ലെ നിയമസഭാ തെരഞ്ഞെടുപ്പ് ജനങ്ങൾ ബഹിഷ്കരിച്ചു. 1990 നവംബർ 18ന് പീരുമേട് എംഎൽഎ ആയിരുന്ന കെ.കെ. തോമസ് എസ്റ്റേറ്റ് മാനേജ്മെന്‍റ് നടപടിക്കെതിരേയും റോഡ് വിട്ടു നൽകണമെന്ന് ആവശ്യപ്പെട്ടും നിരാഹാര സമരം ആരംഭിച്ചു. മൂന്നാം ദിവസം സ്പീക്കർ വർക്കല രാധാകൃഷ്ണൻ, ഉമ്മൻ ചാണ്ടി എന്നിവർ മുൻകൈയെടുത്ത് വിഷയത്തിൽ തീർപ്പുണ്ടാക്കി. ദേശീയപാതയിലെ മരുതുംമൂട്ടിൽനിന്നു പാലൂർകാവ് റോഡിലേക്ക് ബദൽ റോഡ് നൽകാമെന്ന കമ്പനിയുടെ തീർപ്പ് പാലിച്ചില്ല. ഇതോടെ വീണ്ടും സമരം ശക്തമായി. സബ് കളക്ടറുടെയും മുതിർന്ന പോലീസ് ഉദ്യോഗസ്ഥന്മാരുടെയും സാന്നിധ്യത്തിൽ റോഡിലൂടെ ടോൾപിരിവില്ലാതെ സ്വതന്ത്രമായി സഞ്ചരിക്കാനുള്ള സാഹചര്യം ഒരുക്കിക്കൊടുത്തു. ഇതുമായി ബന്ധപ്പെട്ട ചർച്ചകളിൽ ഫാ. എബി പുതുമന, ഫാ. ആന്‍റണി കൊച്ചാക്കൽ, പഞ്ചായത്ത് പ്രസിഡന്‍റുമാരായിരുന്ന പി.ഇ. വർക്കി, കെ. വാസുദേവൻ, പൊതുപ്രവർത്തകരായ എൻ.വി. മൈക്കിൾ നരിക്കാട്ട്, ടി.പി. കുര്യാക്കോസ്, മാത്യു മത്തായി, പി.ഡി. തോമസ് പള്ളിക്കുന്നേൽ, ഖാൻ സി.പി. മഠത്തിൽ, വി.എൻ. കൃഷ്ണൻകുട്ടി എന്നിവർ മുൻകൈയെടുത്തു. എന്നാൽ, റോഡ് വിട്ടുനൽകുവാൻ ടിആർ ആൻഡ് ടി കമ്പനി തയാറായില്ല. സമരം ശക്തമായതോടെ എസ്റ്റേറ്റ് ഭൂമി പൊന്നുംവിലയ്ക്ക് ഏറ്റെടുക്കാൻ സർക്കാർ തീരുമാനിക്കുകയായിരുന്നു. കെ.കെ. തോമസ് എംഎൽഎ ആയിരുന്ന കാലത്ത് ഉമ്മൻ ചാണ്ടി മുൻകൈയെടുത്താണ് പ്രാരംഭ നടപടികളാക്കിയത്. തുടർന്ന് പീരുമേട് എംഎൽഎയും ഡെപ്യൂട്ടി സ്പീക്കറുമായിരുന്ന സി.എ. കുര്യൻ, പൊതുമരാമത്ത് മന്ത്രി പി.ജെ. ജോസഫ് എന്നിവർ ഇടപെട്ട് തുടർനടപടികൾ സ്വീകരിച്ച് റോഡ് പൊന്നുംവിലയ്ക്ക് ഏറ്റെടുത്തു. ഇതിനായുള്ള സങ്കീർണമായ സർക്കാർ നടപടികൾക്ക് ചുക്കാൻ പിടിച്ചത് ഫാ. എബി പുതുമന, ബേബി സെബാസ്, വർക്കി തകടിയേൽ എന്നിവരായിരുന്നു. 1999 മേയ് മൂന്നിന് റോഡ് നാട്ടുകാർക്ക് വിട്ടുകിട്ടി. അന്നത്തെ മന്ത്രിയായിരുന്ന പി.ജെ. ജോസഫ് റോഡിന്‍റെ ഉദ്ഘാടനം നിർവഹിച്ചു. അന്നത്തെ സമര കാലഘട്ടത്തെ ഇപ്പോഴും ഓർത്തെടുക്കുകയാണ് 35ലെ വ്യാപാരി സംഘടനാ ഭാരവാഹി കൂടിയായ ബേബി സെബാസ്. ഇപ്പോൾ ബിഎം ആൻഡ് ബിസി നിലവാരത്തിൽ നിർമാണം പൂർത്തീകരിച്ചിരിക്കുന്ന റോഡിന്‍റെ ഉദ്ഘാടനം കഴിഞ്ഞ മേയിൽ മുഖ്യമന്ത്രി പിണറായി വിജയൻ ഓൺലൈനായി നിർവഹിച്ചിരുന്നു. ഇന്ന് ഈ റോഡ് നൂറുകണക്കിന് വാഹനങ്ങൾ കടന്നുപോകുന്ന മേഖലയിലെ തന്നെ പ്രധാനപ്പെട്ട ഒരു റോഡായി മാറി. പാഞ്ചാലിമേട് അടക്കമുള്ള ടൂറിസം കേന്ദ്രത്തിലേക്കും എത്തുന്നതിനുള്ള ഏറ്റവും എളുപ്പവഴി കൂടിയായി ഈ റോഡ് മാറിയിരിക്കുകയാണ്. ഒരു തലമുറയുടെ മുഴുവൻ പോരാട്ടവീര്യമാണ് ഇന്ന് ഒരു നാടിന്‍റെയാകെ വികസനത്തിന് മുതൽക്കൂട്ടായി നിൽക്കുന്നത്.

അന്താരാഷ്‌ട്ര ഫുട്ബോൾ ടർഫ് ഒരുക്കി മുണ്ടക്കയം സെന്‍റ് ജോസഫ് സെൻട്രൽ സ്കൂൾ

മുണ്ടക്കയം: വിദ്യാർഥികളിൽ കായികക്ഷമത വർധിപ്പിക്കുകയെന്ന ലക്ഷ്യത്തോടെ അന്താരാഷ്‌ട്ര നിലവാരത്തിലുള്ള ഫു ട്ബോൾ ടർഫ് ഒരുക്കിയിരിക്കുകയാണ് മുണ്ടക്കയം സെന്‍റ് ജോസഫ് സെൻട്രൽ സ്കൂൾ. ഫുട്ബോൾ ടർഫിന്‍റെ ഉദ്ഘാടനം നാളെ ഉച്ചയ്ക്ക് 12ന് തിരുവല്ല അതിരൂപതാധ്യക്ഷൻ തോമസ് മാർ കുറിലോസ് മെത്രാപ്പോലീത്ത നിർവഹിക്കും. ചടങ്ങിൽ നാഷണൽ ഗെയിംസ് വെങ്കല മെഡൽ ജേതാവും കേരള സന്തോഷ് ട്രോഫി പ്ലയറുമായ നിതിൻ മധു, കേരള ബ്ലാസ്റ്റേഴ്സ് പ്ലയർ നിഹാൽ സുധീഷ് എന്നിവർ വിശിഷ്ടാതിഥികളായെത്തും. ഉദ്ഘാടനത്തിനുശേഷം എറണാകുളം മഹാരാജാസ് കോളജ്, ചങ്ങനാശേരി എസ്ബി കോളജ് ഫുട്ബോൾ ടീമുകൾ തമ്മിലുള്ള സൗഹൃദ മത്സരം ഉച്ചയ്ക്ക് 1.30 ന് നടക്കും. കഴിഞ്ഞവർഷം ഫെഡറേഷൻ ഓഫ് പ്രൈവറ്റ് സ്കൂൾസ് ആൻഡ് അസോസിയേഷന്‍റെ മികച്ച കായിക സ്കൂളിനുള്ള അവാർഡ് മുണ്ടക്കയം സെന്‍റ് ജോസഫ്സ് സെൻട്രൽ സ്കൂൾ കരസ്ഥമാക്കിയിരുന്നു. ചുരുങ്ങിയ കാലയളവിനുള്ളിൽ വിവിധ കായികമത്സരങ്ങളിൽ സുവർണ നേട്ടങ്ങൾ കൊയ്യാൻ സ്കൂളിനായി. അന്താരാഷ്‌ട്ര നിലവാരത്തിലുള്ള പരിശീലന സൗകര്യങ്ങൾ, സുരക്ഷാസംവിധാനങ്ങൾ, വാട്ടർ ഡ്രെയിനേജ് സംവിധാനം, നൈറ്റ് ഗെയിം സംവിധാനം തുടങ്ങി അത്യാധുനിക സൗകര്യങ്ങളോടുകൂടിയ ടർഫാണ് ഉദ്ഘാടനത്തിനായി ഒരുങ്ങിയിരിക്കുന്നത്. പഠനത്തോടൊപ്പം വിദ്യാർഥികളുടെ സമഗ്ര വികസനത്തിനും കായികരംഗത്തെ വളർച്ചയ്ക്കും ഉന്നത നിലവാരത്തിൽ കായികപ്രതിഭകളെ വാർത്തെടുക്കുവാനുമായിട്ടാണ് ഇത്തരം സംവിധാനങ്ങൾ ഒരുക്കിയിരിക്കുന്നതെന്ന് സ്കൂൾ മാനേജർ ഫാ. മത്തായി മണ്ണൂർവടക്കേതിൽ, പ്രിൻസിപ്പൽ ഫാ. തോമസ് നാലന്നടിയിൽ എന്നിവർ അറിയിച്ചു.

ഡിസിഎംഎസ് സപ്തതി ആഘോഷം: വനിതാ സെമിനാര്‍ നടത്തി

കോട്ടയം: മാതൃസ്‌നേഹം എല്ലാ സ്‌നേഹത്തിനും മുകളിലാണെന്ന് ബിഷപ് മാര്‍ സെബാസ്റ്റ്യന്‍ വാണിയപ്പുരയ്ക്കല്‍. ഡിസിഎംഎസ് സപ്തതി ആഘോഷങ്ങളുടെ ഭാഗമായി കോട്ടയം ലൂര്‍ദ് ഫൊറോന ഓഡിറ്റോറിയത്തില്‍ നടന്ന വനിതാ സെമിനാര്‍ ഉദ്ഘാടനം ചെയ്തു പ്രസംഗിക്കുകയായിരുന്നു കെസിബിസി, എസ്‌സി, എസ്ടി, ബിസി കമ്മീഷന്‍ ചെയര്‍മാന്‍ ബിഷപ് മാര്‍ സെബാസ്റ്റ്യന്‍ വാണിയപ്പുരയ്ക്കല്‍. ഡിസിഎംഎസ് സംസ്ഥാന പ്രസിഡന്‍റ് ജയിംസ് ഇലവുങ്കല്‍ അധ്യക്ഷത വഹിച്ചു. കോട്ടയം മുനിസിപ്പല്‍ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍ മുഖ്യപ്രഭാഷണം നടത്തി. ഫൊറോന വികാരി ജേക്കബ് വട്ടക്കാട്, ഡിസിഎംഎസ് സംസ്ഥാന ഡയറക്ടര്‍ ഫാ. ജോസുകുട്ടി ഇടത്തിനകം, ചങ്ങനാശേരി അതിരൂപത ഡിസിഎംഎസ് ഡയറക്‌ടര്‍ ഫാ. ബെന്നി കുഴിയടി, ഡിസിഎംഎസ് സംസ്ഥാന ഓര്‍ഗനൈസര്‍ ത്രേസ്യാമ്മ മത്തായി, ത്രേസ്യാമ്മ ജോസഫ് എന്നിവര്‍ പ്രസംഗിച്ചു. ഡോ. സാലിക്കുട്ടി തോമസ്, ഡോ. ബിന്‍സി മരിയ വിന്‍സെന്‍റ് എന്നിവര്‍ ക്ലാസുകള്‍ നയിച്ചു.ആരോഗ്യമേഖലയില്‍ പ്രവര്‍ത്തിക്കുന്ന വനിത ഡോക്‌ടര്‍മാര്‍ വിവിധ വിഷയങ്ങളില്‍ പിഎച്ച്ഡി നേടിയിട്ടുള്ള വനിതകള്‍ എന്നിവരെ ഫലകം നല്‍കി ഫൊറോന വികാരി ഫാ. ജേക്കബ് വട്ടക്കാട് ആദരിച്ചു.

ദൂരം രേഖപ്പെടുത്തിയ ബോർഡ് മരച്ചില്ലകളാൽ മറഞ്ഞു

പൊൻകുന്നം: സംസ്ഥാനപാതയായ പാലാ-പൊൻകുന്നം റോഡിന് കുറുകെ വഴിയും ദൂരവും രേഖപ്പെടുത്തി സ്ഥാപിച്ച ബോർഡ് മരച്ചില്ലകളാൽ മറഞ്ഞ് പ്രയോജനമില്ലാതായി. പൊൻകുന്നത്ത് ദേശീയപാതയിൽനിന്ന് സംസ്ഥാനപാതയിലേക്ക് പ്രവേശിച്ച് നൂറുമീറ്റർ പിന്നിടുമ്പോഴുള്ള ബോർഡ് തണൽമരത്തിന്‍റെ ചില്ലകളുടെ മറവിലാണ്. എയർപോർട്ട്, തൃശൂർ, പാലാ തുടങ്ങിയ സ്ഥലങ്ങളും ദൂരവും രേഖപ്പെടുത്തിയ ബോർഡാണ് ഡ്രൈവർമാർക്ക് ഉപകാരപ്പെടാതെ മറഞ്ഞുപോയത്. പുനലൂർ-മൂവാറ്റുപുഴ സംസ്ഥാനപാതയുടെ ഭാഗമായ പൊൻകുന്നം-പാലാ റോഡിലെ മറ്റ് നിരവധി ദിശാസൂചക ബോർഡുകളും കാടുകയറി മൂടിയ നിലയിലാണ്.

റബര്‍ ഉത്പാദനത്തിൽ കേരളം പിന്നോട്ട്‌: വടക്കുകിഴക്കന്‍ സംസ്ഥാനങ്ങളിൽ ഇരട്ടി വര്‍ധന

കോട്ടയം: വടക്കുകിഴക്കന്‍ സംസ്ഥാനങ്ങളില്‍ റബര്‍ ഉത്പാദനം കഴിഞ്ഞ ഒരു പതിറ്റാണ്ടിനുള്ളില്‍ ഇരട്ടിയായി. ഇന്ത്യയിലെ ആകെ റബര്‍ ഉത്പാദനത്തില്‍ 7.8 ശതമാനമായിരുന്നു 2013-14ല്‍ വടക്കുകിഴക്കന്‍ വിഹിതം. 2023-24ല്‍ അത് ആകെ ഉത്പാദനത്തിന്‍റെ 17.5 ശതമാനമായി വര്‍ധിച്ചു. റബര്‍ കൃഷിയില്‍ ഒന്നാമതുള്ള കേരളത്തിലെ ഉത്പാദനം ഇതേ കാലത്ത് 6.5 ലക്ഷത്തില്‍നിന്ന് 6.1 ലക്ഷമായി കുറയുകയും ചെയ്തു. കഴിഞ്ഞ സാമ്പത്തിക വര്‍ഷത്തെ ഉത്പാദനം 5.75 ലക്ഷമായിരുന്നെന്നാണ് വിലയിരുത്തല്‍. ത്രിപുര, ആസാം, മേഘാലയ, മണിപ്പുര്‍ സംസ്ഥാനങ്ങളില്‍ റബര്‍ ബോര്‍ഡിന്‍റെ മേല്‍നോട്ടത്തിലും ടയര്‍ കമ്പനികളുടെ മുതല്‍മുടക്കിലും നടത്തിവരുന്ന കൃഷി വ്യാപനത്തിന്‍റെ ഫലമാണ് അവിടത്തെ മുന്നേറ്റം. രണ്ടു ലക്ഷം ഹെക്ടറില്‍ അധികമായി റബര്‍ നടാനുള്ള യജ്ഞമാണ് അവിടെ നടന്നുവരുന്നത്. നടപ്പുവര്‍ഷം 75,000 ഹെക്ടറിലാണ് പുതുകൃഷി നടത്തിവരുന്നത്. മുന്‍പ് കോവിഡ് വ്യാപനം വന്നപ്പോള്‍ കൃഷി വ്യാപനത്തില്‍ മാന്ദ്യം നേരിട്ടിരുന്നു. റബര്‍ തൈ, കൂലിച്ചെലവ്, വളം, കീടനാശിനി, ടാപ്പിംഗ്-സംസ്‌കരണ ഉപകരണങ്ങള്‍ തുടങ്ങി എല്ലാം വ്യവസായികളാണ് വഹിക്കുന്നത്. ഇതിനൊപ്പം ടയര്‍ വ്യവസായികള്‍ റബര്‍ വാങ്ങുന്നതില്‍ കേരളം, തമിഴ്നാട് ഉള്‍പ്പെടുന്ന പരമ്പരാഗത സംസ്ഥാനങ്ങളെക്കാള്‍ വടക്കു കിഴക്കന്‍ സംസ്ഥാനങ്ങള്‍ പരിഗണനയും നല്‍കിത്തുടങ്ങി. അവിടെ തോട്ടം ഉടമകളായ ഗോത്രവാസികള്‍ നേരിട്ട് ടാപ്പിംഗ് നടത്തുന്നതിനാല്‍ ടാപ്പിംഗിന് അധികച്ചെലവ് വരുന്നില്ല. അതിനാല്‍ വില താഴ്ത്തി അവിടെ ചരക്ക് വാങ്ങാമെന്നതാണ് വ്യവസായികളുടെ നേട്ടം. ഇതില്‍ ഒന്നാമതുള്ള ത്രിപുരയിലെ ഉത്പാദനം പതിറ്റാണ്ടിനുള്ളില്‍ 39,000 ടണ്ണില്‍നിന്ന് 91,000 ടണ്ണിലെത്തി. അവിടെ ഇക്കൊല്ലം ഒരു ലക്ഷം ടണ്ണിലെത്തും. ആസാമില്‍ 13,600 ടണ്ണില്‍നിന്ന് 46,500 ടണ്ണും മേഘാലയത്തില്‍ 7,570 ടണ്ണില്‍നിന്ന് 11,775 ടണ്ണുമായി വര്‍ധിച്ചു. റബറിന്‍റെ ദേശീയ ഉത്പാദനമായ 8.5 ലക്ഷം ടണ്ണില്‍ 1.5 ലക്ഷം ടണ്ണും ഇപ്പോള്‍ വടക്കു കിഴക്കന്‍ മേഖലയിലാണ്. ഇന്ത്യയിലെ ആകെ ആവശ്യകതയാവട്ടെ 15 ലക്ഷം ടണ്ണും. ഈ സാഹചര്യത്തില്‍ ഇക്കൊല്ലവും കുറഞ്ഞത് ഏഴു ലക്ഷം ടണ്‍ ഇറക്കുമതി പ്രതീക്ഷിക്കാം. പശ്ചിമ ബംഗാളിലും വടക്കു കിഴക്കന്‍ സംസ്ഥാനങ്ങളിലുമായി 94 ജില്ലകളിലായി 1.25 ലക്ഷം ഹെക്ടറില്‍ വ്യവസായികളുടെ റബര്‍ കൃഷി യജ്ഞം നടപ്പാക്കിക്കഴിഞ്ഞു.

കാഞ്ഞിരപ്പള്ളി ജനറൽ ആശുപത്രിയിലെ വാട്ടർ എടിഎം ഉദ്ഘാടനം ചെയ്തു

കാഞ്ഞിരപ്പള്ളി: കാഞ്ഞിരപ്പള്ളി ജനറൽ ആശുപത്രിയിൽ സ്ഥാപിച്ചിരിക്കുന്ന വാട്ടർ എടിഎമ്മിന്‍റെ ഉദ്ഘാടനം ജലവിഭവമന്ത്രി റോഷി അഗസ്റ്റിൻ നിർവഹിച്ചു. ചീഫ് വിപ്പ് ഡോ. എൻ. ജയരാജ് അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് മുകേഷ് കെ. മണി മുഖ്യപ്രഭാഷണം നടത്തി. ജില്ലാ പഞ്ചായത്തംഗം ടി.എൻ. ഗിരീഷ് കുമാർ, ബ്ലോക്ക് പഞ്ചായത്തംഗങ്ങളായ ഷാജി പാമ്പൂരി, പി.എം. ജോൺ, ലതാ ഷാജൻ, ബി. രവീന്ദ്രൻ നായർ, മിനി സേതുനാഥ്, പഞ്ചായത്ത് പ്രസിഡന്‍റ് സി.ആർ. ശ്രീകുമാർ, വാർഡ് മെംബർ ആന്‍റണി മാർട്ടിൻ, ആശുപത്രി സൂപ്രണ്ട് ഡോ. സാവൻ സാറാ മാത്യു എന്നിവർ പ്രസംഗിച്ചു. വാഴൂർ ബ്ലോക്ക് പഞ്ചായത്ത് 2024-25 വാർഷിക പദ്ധതിയിൽ ഉൾപ്പെടുത്തി കാഞ്ഞിരപ്പള്ളി ജനറൽ ആശുപത്രി, ഇടയിരിക്കപ്പുഴ, കറുകച്ചാൽ കുടുംബാരോഗ്യ കേന്ദ്രങ്ങൾ എന്നിവിടങ്ങളിലാണ് മൂന്ന് വാട്ടർ എടിഎമ്മുകൾ സ്ഥാപിച്ചിരിക്കുന്നത്. പൊതുജനങ്ങൾക്ക് ഒരു രൂപ നാണയം നിക്ഷേപിക്കുമ്പോൾ ഒരു ലിറ്റർ വെള്ളവും അഞ്ചു രൂപ നാണയം നിക്ഷേപിക്കുമ്പോൾ അഞ്ചു ലിറ്റർ വെള്ളവും ലഭിക്കത്തക്കവിധമാണ് മെഷീൻ ക്രമീകരിച്ചിരിക്കുന്നത്. ഗൂഗിൽ പേ സംവിധാനത്തിലും ക്യുആർ കോഡ് ഉപയോഗിച്ചും വെള്ളം എടുക്കാം.

എസ്എംവൈഎം വനിതാ രക്തദാന ക്യാന്പ്

കാഞ്ഞിരപ്പള്ളി: ലോക രക്തദാനദിനത്തോടനുബന്ധിച്ച് കാഞ്ഞിരപ്പള്ളി ഫൊറോന എസ്എംവൈഎം വുമൺ സെല്ലിന്‍റെയും കാഞ്ഞിരപ്പള്ളി മേരിക്വീൻസ് മിഷൻ ആശുപത്രിയുടെയും കാഞ്ഞിരപ്പള്ളി സെന്‍റ് ഡൊമിനിക്‌സ് കോളജ് എൻഎസ്എസ് യൂണിറ്റിന്‍റെയും ആഭിമുഖ്യത്തിൽ മേരിക്വീൻസ് ആശുപത്രിയിൽ വനിതാ രക്തദാന ക്യാമ്പ് നടത്തി. മേരിക്വീൻസ് ആശുപത്രി ഫിനാൻഷ്യൽ അഡ്മിനിസ്ട്രേറ്റർ ഫാ. മാർട്ടിൻ മണ്ണനാൽ സിഎംഐ ക്യാന്പ് ഉദ്ഘാടനം ചെയ്തു. എസ്എംവൈഎം വൈസ് പ്രസിഡന്‍റ് റോഷ്നി ജോർജ് അധ്യക്ഷത വഹിച്ചു. എസ്എംവൈഎം ഡയറക്ടർ ഫാ. ജോസഫ് ആലപ്പാട്ടുകുന്നേൽ, പ്രസിഡന്‍റ് അലൻ എസ്. വെള്ളൂർ, സെന്‍റ് ഡൊമിനിക്സ് കോളജ് എൻഎസ്എസ് പ്രോഗ്രാം ഓഫീസർ ഡോ. ജിനു എലിസബത്ത് സെബാസ്റ്റ്യൻ, എൻഎസ്എസ് വോളണ്ടിയര്‍ സെക്രട്ടറി ദിയ തെരേസ് ജോഷി എന്നിവർ പ്രസംഗിച്ചു. എസ്എംവൈഎം ഭാരവാഹികൾ ക്യാന്പിന് നേതൃത്വം നൽകി. 25ഓളം വനിതകൾ രക്തദാന ക്യാന്പിൽ പങ്കെടുത്തു.

ആരോട് പറയാന്‍...കോഫി ഷോപ്പ് ബസിന് നാഥനില്ലാതായി

പാലാ: കോഫി ഷോപ്പ് നടത്തുന്നതിനായി സ്വകാര്യ വ്യക്തിക്ക് നല്‍കിയ ബസ് കെഎസ്ആര്‍ടിസി സ്റ്റാന്‍ഡില്‍ അപകടഭീഷണി ഉയര്‍ത്തുന്നതായി സമീപത്തെ ഓട്ടോറിക്ഷാ സ്റ്റാന്‍ഡിലെ തൊഴിലാളികള്‍. അഞ്ചു വര്‍ഷം മുമ്പാണ് കോഫി ഷോപ്പ് നടത്തുന്നതിനായി പഴയ ബസ് സ്വകാര്യ വ്യക്തിക്ക് വാടകയ്ക്ക് നല്‍കിയത്. ഏറ്റെടുത്ത വ്യക്തിക്ക് നഗരസഭയില്‍നിന്നു ഷോപ്പ് നടത്തുന്നതിന് അനുവാദം ലഭിച്ചില്ല. ലക്ഷങ്ങള്‍ ചെലവഴിച്ച് ബസില്‍ കോഫി ഷോപ്പ് നടത്തുന്നതിന് ആവശ്യമായ പണികളും പൂര്‍ത്തീകരിച്ചിരുന്നു. ഇങ്ങനെ കിടക്കുന്ന ബസ് മണ്ണില്‍ താഴ്ന്നുകൊണ്ടിരിക്കുകയാണ്. ബസ് പാര്‍ക്ക് ചെയ്തിരിക്കുന്ന സ്ഥലം ചെളിക്കുഴിയാണ്. തൊട്ടടുത്തായി ഓട്ടോ സ്റ്റാന്‍ഡും നിലവിലുണ്ട്. ബസ് മണ്ണിലേക്ക് കൂടുതലായി താഴ്ന്നാല്‍ റോഡിലേക്കു വീണ് അപകടമുണ്ടാകാൻ സാധ്യതയുണ്ടെന്നാണ് ഓട്ടോറിക്ഷാ തൊഴിലാളികള്‍ പറയുന്നത്. ഉപയോഗശൂന്യമായി കിടക്കുന്ന ബസ് ഇഴജന്തുക്കളുടെയും താവളമാണ്. മഴക്കാലം കൂടി ആരംഭിച്ചതോടെ ബസ് ഏതു സമയവും മണ്ണിലേക്കു കൂടുതല്‍ താഴ്ന്നു പോകാവുന്ന നിലയിലാണെന്നും ഇത് സമീപത്തെ സംരക്ഷണഭിത്തിക്കു ഭീഷണിയാണെന്നും പ്രശ്‌നത്തില്‍ അടിയന്തര നടപടി ഉണ്ടാവണമെന്നും തൊഴിലാളികള്‍ ആവശ്യപ്പെട്ടു.

ഭാരത്‌മാതാ കോളജ് കനകജൂബിലി ആഘോഷങ്ങൾക്ക് തിരിതെളിഞ്ഞു

കുറവിലങ്ങാട്: സമാന്തര വിദ്യാഭ്യാസരംഗത്ത് അരനൂറ്റാണ്ട് പിന്നിടുന്ന ഭാരത്‌മാതാ കോളജ് കനകജൂബിലി ആഘോഷങ്ങൾക്ക് ഉജ്വല തുടക്കം. ഒരു വർഷം നീണ്ടുനിൽക്കുന്ന ആഘോഷങ്ങൾ മോൻസ് ജോസഫ് എംഎൽഎ ഉദ്ഘാടനം ചെയ്തു. 1976 മേയ് 26ന് തുടക്കമിട്ട ഭാരത്‌മാതാ കോളജിൽ സംസ്ഥാന സർക്കാരിന് കീഴിൽ ഹെൽത്ത് ഇൻസ്‌പെക്ടർ കോഴ്‌സുകളടക്കം ഇന്ന് ലഭ്യമാണ്. ഭാരത്‌മാതാ കോളജ് ഡയറക്ടർ ജോസഫ് പുതിയിടം അധ്യക്ഷത വഹിച്ചു. സെന്‍റ് മേരീസ് സ്‌കൂളുകളിൽനിന്ന് എസ്എസ്എൽസി, പ്ലസ് ടു വിഷയങ്ങൾക്ക് എ പ്ലസ് നേടിയ 55 വിദ്യാർഥികൾക്ക് 1000 രൂപയുടെ വീതം കാഷ് അവാർഡും ഷീൽഡും നൽകി. സെന്‍റ് മേരീസ് സ്‌കൂളുകളിൽ ഈ വർഷം പത്താക്ലാസിൽ പഠിക്കുന്ന 238 വിദ്യാർഥികൾക്ക് ഡിക്‌ഷണറി നൽകി. മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന കേന്ദ്രം ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, പഞ്ചായത്ത് പ്രസിഡന്‍റ് മിനി മത്തായി, വൈസ് പ്രസിഡന്‍റ് അൽഫോൻസ ജോസഫ്, ബ്ലോക്ക് പഞ്ചായത്തംഗം പി.സി. കുര്യൻ, ബിജു കുര്യൻ താന്നിക്കതറപ്പേൽ, ഡോ. കെ.എം. ബെന്നി, സെന്‍റ് മേരീസ് ഹയർ സെക്കൻഡറി സ്‌കൂൾ പ്രിൻസിപ്പൽ സിജി സെബാസ്റ്റ്യൻ, ഹെഡ്മാസ്റ്റർ കെ.എം. തങ്കച്ചൻ, സെന്‍റ് മേരീസ് ഗേൾസ് ഹൈസ്‌കൂൾ ഹെഡ്മിസ്ട്രസ് സിസ്റ്റർ ജയിൻ റോസ്, ഡോ. സജിത് കുമാർ, ജയിംസ് പുല്ലാപ്പള്ളി, ഇമ്മാനുവൽ ജോൺ നിധീരി, ബിജു മൂലങ്കുഴ, സിബി മാണി, സനോജ് മിറ്റത്താനി, പി.എൻ. ശശി, യു.ഡി. മത്തായി, പൂർവവിദ്യാർഥി സംഘടനാ സെക്രട്ടറി ജാൻസി തോനാശേരി എന്നിവർ പ്രസംഗിച്ചു. കാഥികൻ എ.ജെ. പാറ്റാനി, കോളജ് പൂർവഅധ്യാപക സംഘടനാ പ്രസിഡന്‍റ് മാത്യു പാറ്റാനി എന്നിവരെ മോൻസ് ജോസഫ് എംഎൽഎ ആദരിച്ചു.

മെഗാ രക്തദാന ക്യാമ്പും രക്തദായക ദിനാചരണവും

കൊഴുവനാല്‍: സെന്‍റ് ജോണ്‍ നെപുംസ്യാന്‍സ് ഫൊറോന പള്ളി സണ്‍ഡേ സ്‌കൂള്‍ ഹാളില്‍ ലോക രക്തദായക ദിനാചരണവും മെഗാ രക്തദാന ക്യാമ്പും നടത്തി. ജില്ലാ ആരോഗ്യവകുപ്പ്, ആരോഗ്യ കേരളം, പാലാ ബ്ലഡ് ഫോറം, കോട്ടയം എസ്എച്ച് മെഡിക്കല്‍ സെന്‍റർ, കൊഴുവനാല്‍ എസ്എംവൈഎം എന്നിവയുടെ നേതൃത്വത്തിലായിരുന്നു പരിപാടി. ളാലം ബ്ലോക്ക് പഞ്ചായത്ത് പ്രസിഡന്‍റ് ജെസി ജോര്‍ജ് ദിനാചരണം ഉദ്ഘാടനം ചെയ്തു. ഫൊറോന വികാരി ഫാ. ജോസ് നെല്ലിക്കത്തെരുവില്‍ അധ്യക്ഷത വഹിച്ചു. ജില്ലാ പഞ്ചായത്ത് മെംബര്‍ ജോസ്‌മോന്‍ മുണ്ടയ്ക്കല്‍, പാലാ ബ്ലഡ് ഫോറം ജനറല്‍ കണ്‍വീനര്‍ ഷിബു തെക്കേമറ്റം, എസ്എംവൈഎം ഫൊറോന ഡയറക്ടര്‍ ഫാ. ജയിംസ് ആണ്ടാശേരി, ബ്ലഡ് ഫോറം ഡയറ്കടര്‍ ബോര്‍ഡ് മെംബര്‍ അരുണ്‍ പോള്‍, എസ്എംവൈഎം അനിമേറ്റര്‍ ആല്‍ബിന്‍ ജോസഫ്, പ്രസിഡന്‍റ് ജോമല്‍ ജോജി, സെക്രട്ടറി ജില്‍സ് ജോബി, ഡോ. ജോജി ആലുങ്കല്‍, എസ്എച്ച് മെഡിക്കല്‍ സെന്‍റര്‍ ബ്ലഡ് ബാങ്ക് ഇന്‍ ചാര്‍ജ് സിസ്റ്റര്‍ അനിലിറ്റ് എസ്എച്ച്, സേറാ തെരേസ് ജോസഫ്, എയ്ഞ്ചല്‍ മരിയ എബി, എയ്ജിന്‍ എബി, ടോണി ഷാജി എന്നിവര്‍ പ്രസംഗിച്ചു. ക്യാമ്പില്‍ അന്‍പതോളം പേര്‍ രക്തം ദാനം ചെയ്തു. പാലാ: ലോക രക്തദാന ദിനത്തോടനുബന്ധിച്ചു മാര്‍ സ്ലീവാ മെഡിസിറ്റിയുടെ നേതൃത്വത്തില്‍ പാലാ ഹെഡ് പോസ്റ്റ്ഓഫീസുമായി സഹകരിച്ച് ഹെഡ് പോസ്റ്റ്ഓഫീസില്‍ രക്തദാന ക്യാമ്പ് നടത്തി. ജീവനക്കാര്‍ രക്തം ദാനം ചെയ്തു. പാലാ നഗരസഭാ ചെയര്‍മാന്‍ തോമസ് പീറ്റര്‍ ഉദ്ഘാടനം ചെയ്തു. പോസ്റ്റ്മാസ്റ്റര്‍ എം.എസ്. രഞ്ജിത്ത്, സി.ബി. വിഷ്ണു, ബ്ലഡ് ബാങ്ക് അസിസ്റ്റന്‍റ് മാനേജര്‍ കെ.എം. മനു എന്നിവര്‍ പ്രസംഗിച്ചു.

കുറവിലങ്ങാട് ശ്ലൈഹിക പാരമ്പര്യത്തിന്‍റെ തറവാട്: കർദിനാൾ മാർ ജോർജ് ആലഞ്ചേരി

കുറവിലങ്ങാട്: കുറവിലങ്ങാട് ശ്ലൈഹിക പാരമ്പര്യത്തിന്‍റെ തറവാടാണെന്ന് കർദിനാൾ മാർ ജോർജ് ആലഞ്ചേരി. മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന ദേവാലയത്തിൽ റംശാ പ്രാർഥന നടത്തി സന്ദേശം നൽകുകയായിരുന്നു കർദിനാൾ. വിശ്വാസത്തിന്‍റെ ഈറ്റില്ലമാണ് കുറവിലങ്ങാട്. ദൈവാത്മാവിനോട് ചേർന്ന് ജീവിക്കാൻ കഴിയണം. ദുഃഖങ്ങളും പ്രതിസന്ധികളും ഗ്രസിച്ചാൽ ദൈവാത്മാവിനോടു ചേർന്ന് നിൽക്കണം. വിശ്വാസം കൈവിടാതെ ദൈവസ്‌നേഹത്തിലും പരസ്‌നേഹത്തിലും ജീവിക്കണമെന്നും കർദിനാൾ പറഞ്ഞു. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, സീനിയർ അസി. വികാരി ഫാ. ജോസഫ് മണിയഞ്ചിറ, അസി. വികാരിമാരായ ഫാ. പോൾ കുന്നുംപുറത്ത്, ഫാ. ജോസഫ് ചൂരയ്ക്കൽ, ഫാ. തോമസ് താന്നിമലയിൽ, പാസ്റ്ററൽ അസിസ്റ്റന്‍റുമാരായ ഫാ. ജോസ് കോട്ടയിൽ, ഫാ. പോൾ മഠത്തിക്കുന്നേൽ എന്നിവർ പ്രാർഥനാശുശ്രൂഷകളിൽ കാർമികരായി. യോഗപ്രതിനിധികളുമായും കർദിനാൾ സംവദിച്ചു.

ഓപ്പണ്‍ ജിം ഉദ്ഘാടനം നാളെ

പൂവരണി: ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍ അനുവദിച്ച പന്ത്രണ്ട് ലക്ഷം രൂപ ഉപയോഗിച്ച് മീനച്ചില്‍ പഞ്ചായത്തിലെ പൂവരണിയില്‍ പൂര്‍ത്തിയായ വയോജന സൗഹൃദ ഓപ്പണ്‍ ജിമ്മിന്‍റെ ഉദ്ഘാടനം നാളെ രാവിലെ പത്തിന് ജോസ് കെ. മാണി എംപി നിര്‍വഹിക്കും. പഞ്ചായത്ത് പ്രസിഡന്‍റ് സോജന്‍ തൊടുക അധ്യക്ഷത വഹിക്കും. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍, ബ്ലോക്ക് പഞ്ചായത്ത് പ്രസിഡന്‍റ് ജെസി ജോര്‍ജ്, പഞ്ചായത്ത് മെംബര്‍ ബിജു കുമ്പളന്താനം, ജനപ്രതിനിധികള്‍ തുടങ്ങിയവര്‍ പ്രസംഗിക്കും.

സിഗരറ്റ് നല്‍കാന്‍ വൈകി; കടയില്‍ കൂട്ടത്തല്ല്, ഒരാള്‍ക്ക് കുത്തേറ്റു

രാമപുരം: സിഗരറ്റ് നല്‍കാൻ താമസിച്ചതിന് രാമപുരത്ത് കടയില്‍ കൂട്ടത്തല്ല്. കടയില്‍ സാധനം വാങ്ങാന്‍ വന്നയാള്‍ക്ക് കത്തികൊണ്ടുള്ള വെട്ടില്‍ പരിക്കേല്‍ക്കുകയും ചെയ്തു. വെള്ളിയാഴ്ച രാത്രി പത്തിന് രാമപുരം ബസ് സ്റ്റാൻഡിന് സമീപത്തുള്ള കടയിലാണ് സംഭവം നടന്നത്. സംഭവവുമായി ബന്ധപ്പെട്ട് രാമപുരം മങ്കുഴിച്ചാലില്‍ അമലിനെ (25) പോലീസ് അറസ്റ്റ് ചെയ്തു. കടയില്‍ സിഗരറ്റ് വാങ്ങിക്കാനെത്തിയ ഇയാള്‍ അതിക്രമം കാട്ടിയെന്നാണ് പരാതി. സിഗരറ്റ് നല്‍കാന്‍ താമസിച്ചതിന് ആദ്യം കട ഉടമയായ ബെന്‍സായിക്കാണ് മര്‍ദനമേറ്റത്. കടയുടമയെ ആക്രമിക്കുന്നത് കണ്ട് തടയാനെത്തിയ ആളുകളെയും അമല്‍ ആക്രമിച്ചു. ഇതിനിടയില്‍ വാഴക്കുല മുറിക്കുന്ന കത്തികൊണ്ട് അമല്‍ ആക്രമണം നടത്തി. ആക്രമണത്തില്‍ കളപ്പുരയില്‍ കെ.ആര്‍. വിനോദിന്‍റെ കഴുത്തിന് മുറിവേറ്റു. നാട്ടുകാര്‍ വിളിച്ചറിയിച്ചതിനെത്തുടര്‍ന്ന് പോലീസെത്തി പ്രതിയെ പിടികൂടി. പരിക്കു പറ്റിയ വിനോദിനെ പാലാ ഗവ. ആശുപത്രിയില്‍ പ്രവേശിപ്പിച്ചു. പ്രതിയെ മജിസ്ട്രേറ്റിന് മുന്‍പില്‍ ഹാജരാക്കി റിമാൻഡു ചെയ്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]