വെരൂര്‍ ഇന്‍ഡസ്ട്രിയല്‍ നഗറില്‍ റോഡിന്‍റെ വശങ്ങള്‍ ചെളിക്കുളം
1567833
Monday, June 16, 2025 7:32 AM IST
ചങ്ങനാശേരി: ചങ്ങനാശേരി-വാഴൂര്‍ റോഡില്‍ വെരൂര്‍ ഇന്‍ഡസ്ട്രിയല്‍ നഗറില്‍ റോഡിന്‍റെ വശങ്ങളില്‍ വെള്ളക്കെട്ടും ചെളിയും നിറഞ്ഞു വാഹന സഞ്ചാരവും കാല്‍നട യാത്രയും ദുരിതമായി. എസ്റ്റേറ്റ് പടി ബസ്‌സ്റ്റോപ്പ് മുതല്‍ മൂന്നാംമൈല്‍ ബസ്‌സ്റ്റോപ്പ് വരെയുള്ള ഭാഗത്താണ് റോഡിന്‍റെ വശങ്ങള്‍ ചെളിക്കുളമായിരിക്കുന്നത്.
വെരൂര്‍ പള്ളിയുടെ കുരിശടിക്കു മുമ്പില്‍ പൈപ്പ് അറ്റകുറ്റപ്പണിക്കായി ഫുട്പാത്തിലെ ടൈലുകള്‍ ഇളക്കിയ ഭാഗം പൂര്‍വസ്ഥിതിയില്‍ ആക്കിയിട്ടില്ല. ഇവിടത്തെ പെട്രോള് പമ്പിന് എതിര്‍വശത്ത് റോഡരികില്‍ മുപ്പതുമീറ്ററോളം ദൂരത്തില്‍ വെള്ളംകെട്ടി നിൽക്കുന്നത് കാല്‍നടയാത്രക്കാര്‍ക്ക് ദുരിതമാകുന്നുണ്ട്. വേഗത്തിലെത്തുന്ന വാഹനങ്ങള്‍ യാത്രക്കാരുടെ ദേഹത്തേക്ക് ചെളിവെള്ളം തെറിപ്പിക്കുന്നതു പതിവാണ്.
റോഡിന്‍റെ വശങ്ങളിലെ അനധികൃത വഴിവാണിഭങ്ങൾ വാഹനങ്ങള്‍ക്കും കാല്‍നടയാത്രക്കാര്‍ക്കും ബുദ്ധിമുട്ടാകുന്നുണ്ട്. റോഡരികിലെ ചിലമരങ്ങളും ചിലതിന്‍റെ കൂറ്റന്‍ ശാഖകളും അപകടഭീഷണി സൃഷ്ടിക്കുന്നതായും പരാതിയുണ്ട്.