ADVERTISEMENT

ADVERTISEMENT

60-ാം വിവാഹവാര്‍ഷികം ഭിന്നശേഷിക്കാർക്കൊപ്പം ആഘോഷിക്കാൻ ദന്പതികൾ

ചങ്ങനാശേരി: എന്‍എസിസി ഉദ്യോഗസ്ഥരായിരുന്ന ഫാത്തിമാപുരം മുരിക്കനാട്ട് ജോര്‍ജ് തോമസ്-സെലിന്‍ ദമ്പതികളുടെ അറുപതാം വിവാഹവാര്‍ഷികാഘോഷം ഭിന്നശേഷിക്കാരോടൊപ്പമാണ്. കുന്നന്താനം ദൈവപരിപാലന ഭവനില്‍ ഇന്നാണ് ആഘോഷപരിപാടികള്‍.

ജോര്‍ജ് തോമസ് എന്‍സിസി വിഭാഗത്തിലെ സൂപ്രണ്ടും സെലിന്‍ അതേവിഭാഗത്തിലെ തന്നെ ഉദ്യോഗസ്ഥയുമായിരുന്നു. സമുദായ, സാമൂഹിക, സാംസ്‌കാരിക, രംഗത്തെ സജീവ പ്രവര്‍ത്തകരാണ് ഈ ദമ്പതികള്‍.

ഉദ്യോഗകാണ്ഡം, മൈത്രി, മനാസേ(നോവല്‍), എമ്പയര്‍ സ്റ്റേറ്റ് തുടങ്ങിയ പുസ്തകങ്ങളുടെ രചയിതാവും എസ്‌വിഡി സെമിനാരി സ്ഥാപകന്‍ ആര്‍നോള്‍ഡ് ജാന്‍സന്‍റെ ജീവചരിത്രത്തിന്‍റെ മലയാള വിവര്‍ത്തകനുമാണ്.

മക്കള്‍: ഡോ. ഷൈന്‍ ജോര്‍ജ്, നിഷ സന്തോഷ്, ഡോ. നിമിഷ ആനി ഫിലിപ്പ്.

ADVERTISEMENT

അതിരൂപതാ സണ്‍ഡേസ്‌കൂള്‍ ബൈബിള്‍ കലോത്സവം ഇന്നാരംഭിക്കും

ചങ്ങനാശേരി: അതിരൂപതാ മതബോധനകേന്ദ്രമായ സന്ദേശനിലയത്തിന്‍റെ ആഭിമുഖ്യത്തിലുള്ള ബൈബിള്‍ കലോത്സവം എസ്ബി കോളജില്‍ (കാവുകാട്ട് നഗറില്‍) ഇന്ന് ആരംഭിക്കും. 18 ഫൊറോനകളില്‍നിന്നുള്ള രണ്ടായിരത്തിലധികം കലാപ്രതിഭകള്‍ കലോത്സവത്തില്‍ പങ്കെടുക്കും. രാവിലെ ഒമ്പതിന് ജോമ്മ കാട്ടടി പതാക ഉയര്‍ത്തുന്നതോടെ സമ്മേളനത്തിനു തുടക്കമാകും. ഫാ. ഷെറിന്‍ കുറശേരി ബൈബിള്‍ പ്രതിഷ്ഠ നടത്തും. തുടര്‍ന്നു നടക്കുന്ന സമ്മേളനം വികാരി ജനറാള്‍ മോണ്‍. മാത്യു ചങ്ങങ്കരി ഉദ്ഘാടനം ചെയ്യും. ഡയറക്ടര്‍ ഫാ. ബാബു പുത്തന്‍പുരയ്ക്കല്‍ അധ്യക്ഷത വഹിക്കും. എസിസി സെക്രട്ടറി പ്രിന്‍സ് ചിറ്റേട്ടുകളം പ്രസംഗിക്കും. തുടർന്ന് കലാമത്സരങ്ങള്‍ ആരംഭിക്കും. 20ന് വൈകുന്നേരം 4.30ന് നടക്കുന്ന സമാപന സമ്മേളനം ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്യും. ഡയറക്ടര്‍ ഫാ. ബാബു പുത്തന്‍പുരയ്ക്കല്‍ അധ്യക്ഷത വഹിക്കും. എസിസി കണ്‍വീനര്‍ ബോബി തോമസ്, സിജോ ആന്‍റണി എന്നിവര്‍ പ്രസംഗിക്കും. പ്രോലൈഫ് ട്രെയിനിംഗ് 20ന് ചങ്ങനാശേരി: അതിരൂപതയില്‍ പ്രോലൈഫ് പ്രവര്‍ത്തനങ്ങള്‍ ആരംഭിച്ചിട്ട് 25 വര്‍ഷം തികയുന്ന വേളയില്‍ അതിരൂപതാ ജീവന്‍ ജ്യോതിസ് പ്രോലൈഫ്‌ സെല്‍ ശുശ്രൂഷകര്‍, മാതൃ-പിതൃ വേദി നേതൃനിര, ജീവസംരക്ഷണ പ്രേഷിതര്‍ എന്നിവര്‍ക്കായുള്ള ഏകദിന പ്രോലൈഫ് ട്രെയിനിംഗ് 20നു രാവിലെ 10 മുതല്‍ മൂന്നുവരെ ചങ്ങനാശേരി പാസ്റ്ററല്‍ സെന്‍ററില്‍ നടക്കും. ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്യും. ഫാമിലി അപ്പൊസ്തലേറ്റ് ഡയറക്ടര്‍ ഫാ. സെബാസ്റ്റ്യന്‍ ചാമക്കാല, കോ-ഓര്‍ഡിനേറ്റര്‍ ഏബ്രഹാം പുത്തന്‍കളം എന്നിവര്‍ ജീവന്‍റെ ഉത്ഭവവും വളര്‍ച്ചയും മനുഷ്യജീവന്‍ നേരിടുന്ന വെല്ലുവിളികള്‍, ഗര്‍ഭഛിദ്രം, വലിയ കുടുംബങ്ങളുടെ പ്രസക്തി, ജീവന്‍റെ മൂല്യവും മനഃസാക്ഷി രൂപീകരണവും, പ്രോലൈഫ് ശുശ്രൂഷയുടെ പ്രസക്തി, സമൂഹത്തില്‍ പ്രചരിക്കുന്ന ജീവവിരുദ്ധത എന്നീ വിഷയങ്ങളില്‍ ക്ലാസുകള്‍ നയിക്കും.

കങ്ങഴയില്‍ വികസനസദസ്

കോട്ടയം: കങ്ങഴ പഞ്ചായത്തിലെ വികസന സദസ് ചീഫ് വിപ്പ് ഡോ.എന്‍. ജയരാജ് ഉദ്ഘാടനം ചെയ്തു. പഞ്ചായത്ത് കമ്യൂണിറ്റി ഹാളില്‍ നടന്ന ചടങ്ങില്‍ പ്രസിഡന്‍റ് കെ.എസ്. റാംലാ ബീഗം അധ്യക്ഷത വഹിച്ചു. സംസ്ഥാന സര്‍ക്കാരിന്‍റെ വികസന നേട്ടങ്ങള്‍ റിസോഴ്‌സ് പേഴ്‌സണ്‍ എസ്.കെ. ശ്രീനാഥും പഞ്ചായത്തിന്‍റെ വികസന നേട്ടങ്ങള്‍ സെക്രട്ടറി കെ.എം. ഷീബാമോളും അവതരിപ്പിച്ചു. വാഴൂര്‍ ബ്ലോക്ക് പഞ്ചായത്ത് പ്രസിഡന്‍റ് മുകേഷ് കെ. മണി, പഞ്ചായത്ത് വൈസ് പ്രസിഡന്‍റ് ഷിബു ഫിലിപ്പ്, പഞ്ചായത്തംഗങ്ങളായ ജയാ സാജു, എം.എ. ആന്ത്രയോസ്, വത്സലകുമാരി എ.എം. മാത്യു എന്നിവര്‍ പങ്കെടുത്തു.

ആലംപറമ്പ് - കോയിപ്പുറം റോഡ് നിര്‍മാണം പൂര്‍ത്തിയാക്കി

തൃക്കൊടിത്താനം: പഞ്ചായത്ത് പതിനൊന്നാം വാര്‍ഡിലെ ആലംപറമ്പ് - കോയിപ്പുറം റോഡ് നിര്‍മാണം പൂര്‍ത്തിയാക്കി. ജോബ് മൈക്കിള്‍ എംഎല്‍എ ഉദ്ഘാടനം നിര്‍വഹിച്ചു. എംഎല്‍എയുടെ ആസ്തി വികസന ഫണ്ടില്‍നിന്നും 27 ലക്ഷം രൂപ മുതല്‍മുടക്കിയാണ് റോഡ് നിര്‍മാണം പൂര്‍ത്തിയാക്കിയത്. വര്‍ഷങ്ങളായി തകര്‍ന്നു കിടന്ന് യാത്രയോഗ്യമല്ലായിരുന്ന റോഡാണിത്. യോഗത്തില്‍ വാര്‍ഡ് മെംബര്‍ പി.ടി. ബിനു, ഷാജി കോലേട്ട്, സജി ചാക്കോ തുടങ്ങിയവര്‍ പ്രസംഗിച്ചു.

റോഡുകളുടെ റീടാറിംഗിന് ഒരു കോടി 60 ലക്ഷം അനുവദിച്ചു: ഡോ.എന്‍. ജയരാജ്

കറുകച്ചാല്‍: കാഞ്ഞിരപ്പള്ളി നിയോജക മണ്ഡലത്തിലെ പ്രകൃതിക്ഷോഭത്തില്‍ തകര്‍ന്ന റോഡുകളുടെ പുനരുദ്ധാരണ പദ്ധതിയില്‍പ്പെടുത്തി അറ്റകുറ്റപ്പണികള്‍ നടത്തുന്നതിന് ഒരു കോടി 60 ലക്ഷം രൂപ അനുവദിച്ചതായി ചീഫ് വിപ്പ് ഡോ.എന്‍. ജയരാജ് അറിയിച്ചു. പ്രസ്തുത പദ്ധതിയില്‍ ഉള്‍പ്പെടുത്തുന്നതിന് റോഡുകളുടെ പട്ടിക റവന്യൂമന്ത്രിക്ക് നല്‍കിയിരുന്നതിന്‍റെ അടിസ്ഥാനത്തിലാണ് അനുമതി ലഭിച്ചത്. ടെന്‍ഡര്‍ നടപടികള്‍ പൂര്‍ത്തിയാക്കി നിര്‍മാണ പ്രവൃത്തികള്‍ എത്രയും വേഗം ആരംഭിക്കാനാകുമെന്ന് പ്രതീക്ഷിക്കുന്നതായി ചീഫ് വിപ്പ് അറിയിച്ചു.

പുനര്‍ജനിക്കുമോ, ചങ്ങനാശേരിയിലെ പടിഞ്ഞാറന്‍ ബൈപാസ്...?

ചങ്ങനാശേരി: ചങ്ങനാശേരിയിലെ പടിഞ്ഞാറന്‍ ബൈപാസ് എന്ന ജനകീയ ആഗ്രഹം ഇനിയും അകലെ. ചങ്ങനാശേരി നഗരത്തിലെ ഗതാഗതക്കുരുക്കഴിക്കാന്‍ വര്‍ഷങ്ങള്‍ക്കുമുമ്പ് പദ്ധതിയിട്ടതായിരുന്നു പടിഞ്ഞാറന്‍ ബൈപാസ്. എംസി റോഡില്‍ (ഇപ്പോഴത്തെ എന്‍എച്ച്-183) ചങ്ങനാശേരി നഗരപരിധിയിലെ പാലാത്രച്ചിറയില്‍ ആരംഭിച്ച് വാഴപ്പള്ളി, പായിപ്പാട്, പെരിങ്ങര പഞ്ചായത്തുകളെ ബന്ധിപ്പിച്ച് ഇടിഞ്ഞില്ലത്തിനു സമീപം എംസി റോഡില്‍(എന്‍എച്ച്-183) എത്തിച്ചേരുന്ന വിധത്തിലായിരുന്ന ഈ ബൈപാസ് വിഭാവനം ചെയ്തിരുന്നത്. ളായിക്കാട്-പാലാത്രച്ചിറ ചങ്ങനാശേരി കിഴക്കന്‍ ബൈപാസ് പൂര്‍ത്തിയായതിനു പിന്നാലെ 2012 കാലഘട്ടത്തില്‍ അന്നത്തെ എംഎല്‍എയായിരുന്ന സി.എഫ്. തോമസാണ് പടിഞ്ഞാറന്‍ ബൈപാസിനുള്ള പദ്ധതി വിഭാവനം ചെയ്തത്. ബൈപാസ് നിര്‍മാണത്തിനായി 57 കോടി രൂപയും സര്‍ക്കാര്‍ അനുവദിച്ചിരുന്നു. വീടുകള്‍ പൊളിക്കേണ്ട സാഹചര്യം പരമാവധി ഒഴിവാക്കി ചതുപ്പുനിലം നികത്തി ബൈപാസ് നിര്‍മിക്കാനായിരുന്നു പൊതുമരാമത്തുവകുപ്പ് അന്ന് അലൈന്‍മെന്‍റ് തയാറാക്കിയത്. നിയമക്കുരുക്കുകളും കേസുകളും ഒഴിവാക്കാനാണ് പാടശേഖരങ്ങളിലൂടെ പദ്ധതി ആവിഷ്‌കരിച്ചത്. റോഡു കടന്നുപോകുന്ന ഭാഗത്ത് പൊതുമരാമത്തു വകുപ്പ് കല്ലുകള്‍ വരെ സ്ഥാപിച്ച് സര്‍വേ നടപടികളും പൂര്‍ത്തിയാക്കി ഫാസ്റ്റ് ട്രാക്കില്‍പ്പെടുത്തി സ്ഥലം ഏറ്റെടുക്കുന്ന നടപടിയുടെ അന്ത്യഘട്ടംവരെ എത്തിയിരുന്നു. ബൈപാസിന്‍റെ രൂപരേഖ ഇപ്രകാരമായിരുന്നു എംസി റോഡില്‍ പാലാത്രച്ചിറയില്‍ ആരംഭിച്ച് കോണത്തോട്, കുറ്റിശേരിക്കടവ്, പറാല്‍, വെട്ടിത്തുരുത്ത് ഭാഗങ്ങളിലൂടെ കടന്ന് ചങ്ങനാശേരി-ആലപ്പുഴ റോഡിലെത്തി എസി കനാലിനു കുറുകെ പാലം നിര്‍മിച്ച് പെരുമ്പുഴക്കടവു വഴി ളായിക്കാടിനു സമീപം എത്തിച്ചേരുന്ന വിധമായിരുന്ന ബൈപാസിന്‍റെ രൂപരേഖ. മുപ്പതുമീറ്റര്‍ വീതിയില്‍ എട്ടു കിലോമീറ്റര്‍ ദൂരം വരുന്നതായിരുന്നു പദ്ധതി. ളായിക്കാട്-പാലാത്രച്ചിറ കിഴക്കന്‍ ബൈപാസും നിര്‍ദിഷ്‌ട പടിഞ്ഞാറന്‍ ബൈപാസും ബന്ധിപ്പിച്ച് ചങ്ങനാശേരി നഗരത്തിലെ റിംഗ് റോഡ് എന്ന നിലയില്‍ നിര്‍മിക്കാനായിരുന്ന ആസൂത്രണം. ബൈപാസിന് പ്രതിസന്ധിയായി നീര്‍ത്തട-നെല്‍വയല്‍ സംരക്ഷണ നിയമം ബൈപാസ് രൂപകല്പന ചെയ്തിരുന്നത് ഭൂരിഭാഗവും ചതുപ്പും നെല്‍വയലും നിറഞ്ഞ പ്രദേശത്തുകൂടിയായിരുന്നു. നീര്‍ത്തട നെല്‍വയല്‍ സംരക്ഷണ സമിതിയുടെ അനുമതി പദ്ധതിക്ക് അനിവാര്യമായിരുന്നു. നീര്‍ത്തട നെല്‍വയല്‍ സംരക്ഷണ നിയമാണ് ബൈപാസ് നിര്‍മാണത്തിനു പ്രതിസന്ധിയായത്. പടിഞ്ഞാറന്‍ മേഖലയുടെ വികസനത്തിന് ഏറെ ഉപകരിക്കുന്നതായിരുന്നു ഈ ബൈപാസ് പദ്ധതി. ആളുകള്‍ക്ക് വലിയതോതില്‍ പ്രതിസന്ധി സൃഷ്ടിക്കാത്ത ഈ പദ്ധതി പുനരാവിഷ്‌കരിച്ചാല്‍ ചങ്ങനാശേരിക്ക് ഏറെ ഉപകാരപ്പെടുമെന്ന നിര്‍ദേശമാണ് നിലനില്‍ക്കുന്നത്.

അഞ്ചുവിളക്കിന്‍റെ നാട് എങ്ങോട്ട് ?

തെക്കുംകൂര്‍ രാജഭരണത്തിലായിരുന്ന ചങ്ങനാശേരി സാസ്‌കാരിക, വിദ്യാഭ്യാസ പാരമ്പര്യങ്ങൾക്കും മതമൈത്രിക്കും ഖ്യാതി കേട്ട നഗരമാണ്. പുരാതനപ്രശസ്തമായ ചങ്ങനാശേരി അതിരൂപതയുടെയും നായര്‍ സര്‍വീസ് സൊസൈറ്റിയുടെയും ആസ്ഥാനങ്ങള്‍ ചങ്ങനാശേരി ഇവിടെയാണെന്നതും അഞ്ചുവി ളക്കിന്‍റെ നാടിനെ അതുല്യമാക്കുന്നു. പുണ്യപിതാക്കന്മാരുടെ കബറിടംകൊണ്ട് പവിത്രമായ കത്തീഡ്രല്‍ പള്ളിയും, തങ്ങള്‍മാരുടെ ഓര്‍മകള്‍ നിലനില്‍ക്കുന്ന മുസ്‌ലിം പഴയ പള്ളിയും മഹാത്മജിയുടെയും ശ്രീനാരായണഗുരുവിന്‍റെയും പാദസ്പര്‍ശത്താല്‍ ധന്യമായ ആനന്ദാശ്രമവും അതിപ്രശസ്തമായ വിദ്യാഭ്യാസ സ്ഥാപനങ്ങളും ചങ്ങനാശേരിയുടെ അഭിമാനസ്തംഭങ്ങളാണ്. 1805ല്‍ വേലുത്തമ്പി ദളവ ചങ്ങനാശേരി ചന്ത ഉദ്ഘാടനം ചെയ്തതിന്‍റെ ഓര്‍മയ്ക്കായി സ്ഥാപിച്ച അഞ്ചുവിളക്ക് ചരിത്ര പ്രസിദ്ധമാണ്. നൂറ്റാണ്ടു പിന്നിട്ട മുനിസിപ്പല്‍ നഗരമെന്ന പ്രശസ്തിയും പ്രഗത്ഭരായ ഭരണാധികാരികള്‍ നയിച്ചുവെന്ന ബഹുമതിയും ചങ്ങനാശേരി നഗരസഭയ്ക്കുണ്ട്. മധ്യതിരുവിതാംകൂറില്‍ കോട്ടയം ജില്ലയുടെ തെക്കേയറ്റത്തുള്ള ചങ്ങനാശേരിയുടെ മൂന്നുവശവും പുഞ്ചപ്പാടങ്ങൾ അതിരിട്ട ദ്വീപു പോലെ യാണ്്. കുട്ടനാടിന്‍റെയും മലനാടിന്‍റെയും സംഗമഭൂമി കൂടിയാണ് മതമൈത്രിക്കും പേരുകേട്ട ചങ്ങനാശേരി. കഴിഞ്ഞ കാല്‍ നൂറ്റാണ്ടിനിടെ കാലുമാറ്റത്തിലും കൂറുമാറ്റത്തിലും ഇടതു-വലതു ഭരണങ്ങള്‍ അട്ടിമറിക്കപ്പെട്ട് സ്ഥിരതയില്ലാത്ത സമിതികള്‍ മാറിമാറി ഭരണത്തിലെത്തിയ രാഷ്‌ട്രീയചരിത്രവും ചങ്ങനാശേരി നഗരസഭയ്ക്കുണ്ട്. ഒറ്റനോട്ടത്തില്‍ വിസ്തീര്‍ണം: 13.5 ച.മീ. ആകെ ജനസംഖ്യ: 47,694. വാര്‍ഡുകൾ: 37. പുനര്‍വിഭജനത്തില്‍ വാര്‍ഡുകളിലെ വീടുകള്‍ തമ്മില്‍ മാറ്റങ്ങള്‍ ഉണ്ടായെങ്കിലും വാര്‍ഡുകളുടെ എണ്ണത്തില്‍ മാറ്റമില്ല. 2020 ഡിസംബറിലെ തെരഞ്ഞെടുപ്പിനുശേഷം യുഡിഎഫിന്‍റെ പിന്തുണയോടെ സ്വതന്ത്രാംഗങ്ങളായ സന്ധ്യ മനോജ് -ചെയര്‍പേഴ്‌സണ്‍, ബെന്നി ജോസഫ് -വൈസ് ചെയര്‍മാന്‍ എന്നിവരുടെ നേതൃത്വത്തില്‍ ഭരണസമിതി നിലവില്‍ വന്നു. 31 മാസം തികഞ്ഞപ്പോള്‍ യുഡിഎഫ് പക്ഷത്തായിരുന്ന ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണും സ്വതന്ത്രാംഗവുമായ ബീന ജോബിയും രണ്ട് കോണ്‍ഗ്രസ് അംഗങ്ങളും എല്‍ഡിഎഫ് കൊണ്ടുവന്ന അവിശ്വാസത്തെ പിന്തുണച്ചതോടെ യുഡിഎഫിന് ഭരണം നഷ്ടപ്പെട്ടു. ബീനാ ജോബി ചെയര്‍പേഴ്‌സണും മാത്യൂസ് ജോര്‍ജ് വൈസ് ചെയര്‍മാനുമായ ഇടതു ഭരണസമിതി നിലവില്‍ വന്നു. ഒരു വര്‍ഷത്തിനുശേഷം ബീന ജോബി രാജിവച്ചു. സിപിഎം അംഗമായ കൃഷ്ണകുമാരി രാജശേഖരന്‍ ചെയര്‍പേഴ്‌സണാകുകയും ചെയ്തു. ആദ്യ കക്ഷിനില അംഗങ്ങള്‍: 37 കോണ്‍ഗ്രസ്-ഒമ്പത്. കേരള കോണ്‍ഗ്രസ്-നാല്, ലീഗ്-ഒന്ന്, സ്വതന്ത്രര്‍-നാല്, സിപിഎം-13, കേരള കോണ്‍-എം-ഒന്ന്, ജനാധിപത്യ കേരള കോണ്‍ഗ്രസ്-ഒന്ന്, സിപിഐ-ഒന്ന്, ബിജെപി-മൂന്ന്. ഇപ്പോഴത്തെ കക്ഷിനില അംഗങ്ങള്‍: 35 കോണ്‍ഗ്രസ്-ഏഴ്, കേരള കോണ്‍ഗ്രസ്-നാല്, ലീഗ്-ഒന്ന്, സ്വതന്ത്രര്‍-നാല്, സിപിഎം-13, കേരള കോണ്‍ഗ്രസ് എം-ഒന്ന്, ജനാധിപത്യ കേരള കോണ്‍ഗ്രസ്-ഒന്ന്, സിപിഐ-ഒന്ന്, ബിജെപി-മൂന്ന്. കൂറുമാറി എല്‍ഡിഎഫിനെ പിന്തുണച്ച രണ്ട് കോണ്‍ഗ്രസ് അംഗങ്ങളെ തെരഞ്ഞെടുപ്പ് കമ്മീഷന്‍ പുറത്താക്കി. നേട്ടങ്ങള്‍ കേരളത്തില്‍ ആദ്യമായി ചങ്ങനാശേരി നഗരസഭയില്‍ സിഎന്‍ജി പ്ലാന്‍റിന് 23.50 കോടിയുടെ ലോകബാങ്കിന്‍റെ ധനസഹായ അംഗീകാരം. കുടിവെള്ളത്തിന് 15 കോടിയുടെ പദ്ധതി. ഏഴുകിലോമീറ്റര്‍ പുതിയ പൈപ്പും ആറു കിലോമീറ്റര്‍ പൈപ്പുകളുടെ അറ്റകുറ്റപ്പണികളും. 255 കുടുംബങ്ങള്‍ക്ക് സൗജന്യ കുടിവെള്ള കണക‌്ഷന്‍. 448 കുടുംബങ്ങള്‍ക്ക് ലൈഫ് വീടുകള്‍. 37 വാര്‍ഡുകളിള്‍ 23 കോടിയുടെ റോഡ് നവീകരണം. 15 ഹൈമാസ്റ്റ് വിളക്കുകള്‍, 57 മിനിമാസ്റ്റ്‌ വിളക്കുകള്‍. വിവിധ വാര്‍ഡുകളില്‍ വഴിവിളക്കുകള്‍ തെളിക്കാന്‍ സയമബന്ധിത നടപടി. ശുചിമുറി മാലിന്യസംസ്‌കരണം ആധുനികവത്കരിക്കാന്‍ മൊബൈല്‍ സെപ്‌റ്റേജ് ട്രീറ്റ്‌മെന്‍റ് യൂണിറ്റ്. ഹരിതകര്‍മസേനയുടെ കാര്യക്ഷമമായ പ്രവര്‍ത്തനം. പ്ലാസ്റ്റിക് മാലിന്യനിര്‍മാജനത്തില്‍ മുന്നേറ്റം. തുമ്പൂര്‍മൂഴി മാതൃക മാലിന്യ സംസ്‌കരണം വിജയകരം. മാലിന്യ സംസ്‌കരണ വികേന്ദ്രീകരണത്തിന്‍റെ ഭാഗമായി 5000 കുടുംബങ്ങളില്‍ ജി-ബിന്നുകള്‍. നഗരത്തിലെ ആറു കുളങ്ങളുടെ നവീകരണം. നഗരത്തില്‍ വാഴപ്പള്ളി, കുന്നക്കാട്, ആനന്ദാശ്രമം എന്നിവിടങ്ങളില്‍ ആരോഗ്യ കേന്ദ്രങ്ങള്‍. കൃഷ്ണകുമാരി രാജശേഖരന്‍ ചെയര്‍പേഴ്‌സണ്‍, ചങ്ങനാശേരി നഗരസഭ കോട്ടങ്ങള്‍ യുഡിഎഫ് തുടങ്ങിവച്ച പദ്ധതികള്‍ പൂര്‍ത്തീകരിച്ചില്ല. അവസാന രണ്ടുവര്‍ഷങ്ങളില്‍ വാര്‍ഡ് വികസന ഫണ്ടുകള്‍ 80 ശതമാനവും വിനിയോഗിച്ചിട്ടില്ല. കഴിഞ്ഞ മാര്‍ച്ചില്‍ ബജറ്റില്‍ പ്രഖ്യാപിച്ച പത്തുലക്ഷം രൂപ വീതം വാര്‍ഡ് വര്‍ക്കുകളുടെ പ്രാരംഭഘട്ടം പോലുമായില്ല. ബജറ്റുകളില്‍ പ്രഖ്യാപിച്ച വേഴക്കാട്ടുചിറയിലെ ഗസ്റ്റ് ഹൗസ് സമുച്ചയം തുടങ്ങിയില്ല. മാലിന്യമുക്ത പദ്ധതി പ്രഖ്യാപനത്തില്‍ മാത്രം. ബയോറമഡിയേഷന്‍, തുമ്പൂര്‍മൂഴി മാലിന്യസംസ്‌കരണം പദ്ധതികള്‍ കാര്യക്ഷമമല്ല. നഗരത്തിലെ മിനിമാസ്റ്റുകളടക്കം വഴിവിളക്കുകള്‍ അണഞ്ഞിട്ട് പത്തുമാസം. റോഡുകളുടെ അറ്റകുറ്റപ്പണികള്‍ നടത്തിയിട്ടില്ല. വാഹനപാര്‍ക്കിംഗിന് ക്രമീകരണങ്ങൾ ഏര്‍പ്പെടുത്താനായില്ല. ഓടകളും തോടുകളും മാലിന്യപൂരിതം. മാര്‍ക്കറ്റിലേതടക്കം നഗരസഭയുടെ കടമുറികളുടെ അറ്റകുറ്റപ്പണികള്‍ ശ്രദ്ധിച്ചിട്ടില്ല. നഗരത്തിലെ ഒന്നാംനമ്പര്‍ ബസ്‌സ്റ്റാന്‍ഡ് വികസനവും പെരുന്ന ബസ് സ്റ്റാന്‍ഡ് പരിപാലനവും നടന്നില്ല. ജോമി ജോസഫ് യുഡിഎഫ് പാര്‍ലമെന്‍ററി പാര്‍ട്ടി ലീഡര്‍, ചങ്ങനാശേരി നഗരസഭ.

പണം വാങ്ങിയിട്ടും റോഡുപണി ആരംഭിക്കാത്തതിൽ പ്രതിഷേധം

വൈക്കം: അംഗപരിമിത ദമ്പതികൾക്ക് യാത്രാസൗകര്യം ഒരുക്കുന്നതിന് തൊഴിലുറപ്പ് പദ്ധതിയിൽപ്പെടുത്തി റോഡ് നിർമിച്ചു നൽകാമെന്ന് വാഗ്ദാനം നൽകി റോഡുനിർമിക്കുന്നതിനുഅംഗപരിമിത ദമ്പതികളിൽ നിന്നടക്കം പണം വാങ്ങിയിട്ടും പണി ആരംഭിക്കാത്തതിൽ പ്രതിഷേധം. അംഗപരിമിതനായ തലയാഴം അമ്പാനപ്പള്ളി കാട്ടുതറ രമേശൻ,സമീപസ്ഥലം ഉടമകളായ രണ്ടു പേർ എന്നിവരിൽ നിന്നടക്കം 15-ാം വാർഡ് മെംബർ ഇടപ്പെട്ട് 20,000 രൂപ നിർമാണം നടത്താമെന്നേറ്റയാൾക്ക് നൽകി ഒരുമാസം കഴിഞ്ഞിട്ടും പണി ആരംഭിച്ചില്ലെന്നാണ് ആരോപണം. 130 മീറ്റർ ദൈർഘ്യമുള്ള റോഡ് മണ്ണിട്ടുയർത്തി സഞ്ചാരയോഗ്യമാക്കാൻ 4,44,000 രൂപയുടെ പദ്ധതിയാണ് പഞ്ചായത്ത് വിഭാവനം ചെയ്തത്. രമേശനും പൊതുപ്രവർത്തകനായ ജിതിനും പണി ആരംഭിക്കാത്തകാര്യം പഞ്ചായത്തിലെത്തി സംസാരിച്ചപ്പോൾ പ്രസിഡന്‍റടക്കം ഇവരോട് കയർത്ത് സംസാരിച്ചെന്നും രമേശൻ ആരോപിച്ചു. കാഴ്ചത്തകരാർ വന്നതോടെ രമേശന്‍റെ ഭാര്യ കുത്തുമണി വീട്ടിലിരിപ്പായി. മുച്ചക്ര വാഹനത്തിൽ പുറത്തു പോയിവരുന്ന രമേശൻ വീട്ടിലേക്കുള്ള വഴി ചെളിക്കുളമായതോടെ വീട്ടിൽനിന്നു കുറച്ച് അകലെയുള്ള വീട്ടുവളപ്പിൽ വാഹനം വച്ചശേഷം വടിയിലൂന്നി ചെറുവള്ളത്തിൽ കയറിയാണ് കരിയാറിന്‍റെ തീരത്തുള്ള വീട്ടിൽ എത്തുന്നത്. വീട് താഴ്ന്ന പ്രദേശത്തായതിനാൽ കരിയാറിൽ ജലനിരപ്പുയർന്നാൽ രമേശന്‍റെ വീടും പരിസരവും വെള്ളക്കെട്ടിലാകും. കൂലിപ്പണിക്കാരനായ മകന്‍റെ വരുമാനത്തിലാണ് കുടുംബം കഴിയുന്നത്. നൂറുവർഷത്തിലധികമായി രമേശന്‍റെ കുടുംബം ഇവിടെയാണ് താമസിക്കുന്നത്. നവകേരള സദസിൽ വഴിക്കായി രമേശൻ പരാതി നൽകിയപ്പോൾ ഉടൻ വഴി നിർമിക്കാമെന്ന് സർക്കാരിന് പഞ്ചായത്ത് ഉറപ്പു നൽകി രണ്ടു വർഷം കഴിഞ്ഞിട്ടും പാലിച്ചില്ലെന്ന് രമേശൻ പറഞ്ഞു. എൽഡിഎഫ് സമരം നടത്തി അംഗപരിമിത ദമ്പതികൾക്ക് യാത്രാ സൗകര്യം ഒരുക്കുന്നതിൽ വീഴ്ച വരുത്തിയ വാർഡ് മെമ്പറും പഞ്ചായത്ത് പ്രസിഡന്‍റും രാജിവയ്ക്കണമെന്നാവശ്യപ്പെട്ടു എൽഡിഎഫ് തലയാഴം പഞ്ചായത്ത് കമ്മിറ്റിയുടെ നേതൃത്വത്തിൽ പഞ്ചായത്ത് ഓഫീസിലേക്ക് പ്രതിഷേധ മാർച്ചും ധർണയും നടത്തി. മാർച്ചും ധർണയും സി പി ഐ മണ്ഡലം സെക്രട്ടറി എം.ഡി.ബാബുരാജ് ഉദ്ഘാടനം ചെയ്തു. സിപിഎം ഏരിയാ കമ്മിറ്റി അംഗം എസ്.ദേവരാജൻ അധ്യക്ഷത വഹിച്ചു.

ലോഗോസ് ക്വിസ് : അമ്മയും മക്കളും രൂപതാതല വിജയികൾ

കുറവിലങ്ങാട്: മാതാപിതാക്കളും മക്കളും ഒരുമിച്ചിരുന്ന് വചനം പഠിച്ചു. ഫലം വന്നപ്പോൾ അമ്മയ്ക്കും മക്കൾക്കും പാലാ രൂപതാതലത്തിൽ മിന്നുന്ന വിജയം. ലോഗോസ് ക്വിസിലാണ് രൂപതാതലത്തിലെ രണ്ട് ഒന്നാംസ്ഥാനങ്ങളും ഒരു മൂന്നാംസ്ഥാനവും ഒരു വീട്ടിലേക്ക് എത്തിയത്. മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന ഇടവകയിലെ വടക്കേവെള്ളാക്കൽ വീട്ടിലാണ് വചനമനനത്തിന്‍റെ ഒന്നാംസ്ഥാനങ്ങൾ ഒരുമിച്ചെത്തിയത്. പുത്തൻകുരിശ് മുത്തൂറ്റ് എൻജിനിയറിംഗ് കോളജ് അധ്യാപകനായ വടക്കേവെള്ളാക്കൽ ഡോ. റിജോ സെബാസ്റ്റ്യന്‍റെ ഭാര്യ ഡിന്‍റ ഫ്രാൻസിസ്, മക്കളായ ആൽബർട്ട് റിജോ, ആഗ്‌നസ് റിജോ എന്നിവരാണ് മിന്നും വിജയം നേടിയത്. ഡി വിഭാഗത്തിൽ ഒന്നാംസ്ഥാനം നേടിയ ഡിന്‍റ ഫ്രാൻസിസ് മോനിപ്പള്ളി പോസ്റ്റ്ഓഫീസിൽ പോസ്റ്റ് മിസ്ട്രസാണ്. ആൽബർട്ടും ആഗ്‌നസും നസ്രത്ത്ഹിൽ ഡി പോൾ സ്‌കൂൾ വിദ്യാർഥികളാണ്. എ കാറ്റഗറിയിലാണ് ആൽബർട്ടിന്‍റെ ഒന്നാംസ്ഥാനം. ആഗ്‌നസ് ബി കാറ്റഗറിയിൽ രൂപതാതലത്തിൽ മൂന്നാം സ്ഥാനത്താണ്. 2023ൽ സംസ്ഥാനതലത്തിൽ നാലാം സ്ഥാനം ആഗ്‌നസ് നേടിയിരുന്നു. വിജയികളെ ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, അസി. വികാരി ഫാ. ജോസഫ് ചൂരയ്ക്കൽ, സോൺ ലീഡർ ജിയോ കരികുളം, സോൺ സെക്രട്ടറി ഷൈനി സാബു മഞ്ഞപ്പള്ളിൽ, പള്ളിയോഗ പ്രതിനിധി ട്രീസ മാൻകൂട്ടത്തിൽ, കുടുംബകൂട്ടായ്മ യൂണിറ്റ് ഭാരവാഹികൾ, വിശ്വാസപരിശീലകർ എന്നിവർ അഭിനന്ദിച്ചു.

വിശുദ്ധ യൂദാതദേവൂസിന്‍റെ നൊവേനയും തിരുനാളും

കടുത്തുരുത്തി: വലിയപള്ളിയുടെ ഐടിഐ ജംഗ്ഷനിലുള്ള കപ്പേളയില്‍ വിശുദ്ധ യൂദാ തദേവൂസിന്‍റെ നൊവേനയും തിരുനാളും നാളെ മുതല്‍ 28 വരെ ‍ നടക്കും. എല്ലാ ദിവസവും വൈകുന്നേരം ആറിന് ജപമാല, നൊവേന, ലദീഞ്ഞ്, വചനപ്രഘോഷണം എന്നിവ നടക്കും. പ്രധാന തിരുനാള്‍ദിനമായ 28നു വൈകുന്നേരം 5.30ന് ജപമാല, ആറിന് തിരുനാള്‍ കുര്‍ബാന-ഫാ.തോമസ് കരിമ്പുംകാലായില്‍, തിരുനാള്‍ സന്ദേശം-ഫാ.ലൂക്ക് പൂതൃക്കയില്‍, ലദീഞ്ഞ്, പ്രദക്ഷിണം, പാച്ചോര്‍നേര്‍ച്ച.

കിഴതടിയൂര്‍ പള്ളിയില്‍ വിശുദ്ധ യൂദാശ്ലീഹായുടെ തിരുനാളിന് നാളെ കൊടിയേറും

പാലാ: പ്രസിദ്ധ തീര്‍ഥാടന കേന്ദ്രമായ കിഴതടിയൂര്‍ പള്ളിയില്‍ വിശുദ്ധ യൂദാശ്ലീഹായുടെ നൊവേനത്തിരുനാളിന് നാളെ കൊടിയേറും. 28നാണ് പ്രധാന തിരുനാള്‍. നാളെ രാവിലെ 9.45ന് കൊടിയേറ്റ് - റവ.ഡോ. ജോസ് കാക്കല്ലില്‍. പത്തിന് വിശുദ്ധ കുര്‍ബാന.19 മുതല്‍ രാവിലെ 5.30, 7.00, 10.00, 12.00, ഉച്ചകഴിഞ്ഞ് 3.00, 5.00, രാത്രി 7.00 എന്നീ സമയങ്ങളില്‍ വിശുദ്ധ കുര്‍ബാനയും നൊവേനയും. വൈകുന്നേരം 6.30ന് ദേവാലയത്തില്‍ ജപമാല. 26നു രാവിലെ 9.30ന് തിരുസ്വരൂപ പ്രതിഷ്ഠ - മാര്‍ ജോസഫ് പള്ളിക്കാപറമ്പില്‍. 27നു വൈകുന്നേരം 4.30ന് പ്രസുദേന്തി സമര്‍പ്പണം. 6.30ന് ജപമാല പ്രദക്ഷിണം. പ്രധാന തിരുനാള്‍ ദിനമായ 28നു രാവിലെ 5.15ന് നെയ്യപ്പനേര്‍ച്ച വെഞ്ചരിപ്പ്. പത്തിന് വിശുദ്ധ കുര്‍ബാന - മാര്‍ ജോസഫ് കല്ലറങ്ങാട്ട്. ഉച്ചയ്ക്ക് 12ന് തിരുനാള്‍ പ്രദക്ഷിണം. വികാരി ഫാ. തോമസ് പുന്നത്താനത്ത്, ഫാ. മാത്യു വെണ്ണായപ്പിള്ളില്‍, ഫാ. സെബാസ്റ്റ്യന്‍ ആലപ്പാട്ടുകുന്നേല്‍, കൈക്കാരന്മാരായ പ്രഫ. കെ.കെ. ടോമി കട്ടുപ്പാറയില്‍, പ്രഫ. കെ.സി. ജോസഫ് കൂനംകുന്നേല്‍, ജോജി ജോര്‍ജ് പൊന്നാടംവാക്കല്‍, ടോമി സെബാസ്റ്റ്യന്‍ ഞാവള്ളിമംഗലത്തില്‍, പബ്ലിസിറ്റി കണ്‍വീനര്‍മാരായ സോജന്‍ കല്ലറക്കല്‍, പ്രഫ. ജോസഫ് മറ്റം, പോളച്ചന്‍ പകലോമറ്റം, ജിബിന്‍ ബേബി മൂഴിപ്ലാക്കല്‍ എന്നിവര്‍ നേതൃത്വം നല്‍കും.

യുവാവിനെ മർദിച്ച് പണവും ഫോണും തട്ടിയെടുത്തവർ പിടിയിൽ

ഗാന്ധിനഗർ: യുവാവിനെ തട്ടിക്കൊണ്ടുപോയി മര്‍ദിക്കുകയും കൈവശമുണ്ടായിരുന്ന 5000 രൂപയും 20,000 രൂപ വിലമതിക്കുന്ന മൊബൈല്‍ ഫോണും കവരുകയും ചെയ്ത കേസിലെ പ്രതികളെ ഗാന്ധിനഗര്‍ പോലീസ് അറസ്റ്റ് ചെയ്തു. പനച്ചിക്കാട്, പൂവന്തുരുത്ത് സ്വദേശികളാണ് പിടിയിലായത്. പൂവന്തുരുത്ത് സ്വദേശി കടുവാക്കുളം പുത്തൻപറമ്പ് വികാസ് (25) പനച്ചിക്കാട് മൂലേടം ഇല്ലിപ്പറമ്പിൽ രാഹുൽ (38 ), പൂവന്തുരുത്ത് പള്ളം ഭാഗത്ത് പനയിൽ ജിഷ്ണു (30) പൂവന്തുരുത്ത് സൗപർണിക രൂപക് വിജയൻ (39) എന്നിവരെയാണ് ഗാന്ധിനഗർ പോലീസ് സ്റ്റേഷൻ എസ്എച്ച്ഒ ടി. ശ്രീജിത്തിന്‍റെ നേതൃത്വത്തില്‍ എസ്ഐ ജയപ്രകാശ് എന്‍., ബിജുമോന്‍ ആര്‍., എസ്‌സിപിഒ രഞ്ജിത്ത് ടി.ആര്‍., സിപിഒമാരായ അനൂപ്‌ പി.ടി., ശ്രീനിഷ് തങ്കപ്പന്‍, വേണുഗോപാല്‍ എ.എന്‍. എന്നിവരടങ്ങിയ പോലീസ് സംഘം അറസ്റ്റ് ചെയ്തത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.പ്രതികളായ ജിഷ്ണുവിനും വികാസിനുമെതിരേ ചിങ്ങവനം സ്റ്റേഷനിൽ കേസുകൾ നിലവിലുണ്ട്.

രാഷ്‌ട്രപതിയുടെ സന്ദർശനം : റോഡുകളിൽ കുഴിയടയ്ക്കൽ യജ്ഞം; ഗതാഗതക്കുരുക്കിൽ ജനം

കോട്ടയം: രാഷ്‌ട്രപതി ദ്രൗപതി മുര്‍മു 21ന് ജില്ലയില്‍ എത്തുമെന്നതിനാൽ നഗരത്തിലെ പ്രധാന റോഡുകളിലെ കുഴികളടയ്ക്കാന്‍ പണിപ്പെട്ട് പൊതുമരാമത്ത് വകുപ്പ്. എംസി റോഡിലാണു തിടുക്കത്തിലുള്ള കുഴിയടയ്ക്കല്‍ പ്രവൃ‍ത്തികള്‍ പുരോഗമിക്കുന്നത്. കഴിഞ്ഞദിവസം ആരംഭിച്ച കുഴിയടയ്ക്കല്‍ യജ്ഞം ഇന്നലെയും തുടര്‍ന്നു. അറ്റകുറ്റപ്പണിയുടെ ഭാഗമായി കുഴികളും റോഡ് മാര്‍ക്കിംഗ് പ്രവൃത്തികളുമാണു പുരോഗമിക്കുന്നത്. ഒരു വശത്തെ ഗതാഗതം പൂര്‍ണമായി നിരോധിച്ചാണ് പുനരുദ്ധാരണ പ്രവൃത്തികള്‍ നടക്കുന്നത്. ഇതു യാത്രക്കാരെ കുറച്ചൊന്നുമല്ല വലയ്ക്കുന്നത്. ഇതുമൂലം രണ്ട് ദിവസമായി നഗരത്തിലെ എല്ലാ പ്രധാന റോഡുകളിലെല്ലാം വന്‍ ഗതാഗതക്കുരുക്കാണ്. വ്യാഴാഴ്ച നാഗമ്പടം റൗണ്ടാനയിലെ കുഴിയടച്ചപ്പോള്‍ എംസി റോഡില്‍ ഏറ്റുമാനൂര്‍ ഭാഗത്തുനിന്നുള്ള വാഹനങ്ങള്‍ കുടുങ്ങി. ഈ ബ്ലോക്ക് സംക്രാന്തി വരെ നീണ്ടു. നാഗമ്പടം-ബേക്കര്‍ ജംഗ്ഷന്‍-ചുങ്കം റോഡിലും സമാനമായി ഗതാഗതം സ്തംഭിച്ചു. നാഗമ്പടം മുതല്‍ ഏറ്റുമാനൂര്‍ സെന്‍ട്രല്‍ ജംഗ്ഷന്‍ വരെയാണു കുഴികളടയ്ക്കുന്നത്. 50 ലക്ഷം രൂപ മുതല്‍മുടക്കിലാണ് റോഡുകളുടെ പുനരുദ്ധാരണം. അടിയന്തര സാഹചര്യമെന്ന നിലയില്‍ പിഡബ്ല്യുഡി റോഡ്‌സ് വിഭാഗത്തിനാണ് നിര്‍മാണച്ചുമതല. രാഷ്‌ട്രപതിയുടെ യാത്ര അടിയന്തര സാഹചര്യത്തില്‍ റോഡ് മാര്‍ഗമാക്കേണ്ട സാഹചര്യമുണ്ടായാല്‍ മുന്‍കരുതലെന്ന നിലയിലയിലാണ് റോഡ് നന്നാക്കുന്നത്. ഇന്നലെ ബേക്കര്‍ ജംഗ്ഷനിലെയും നാഗമ്പടം പാലത്തിലെയും കുഴികളടച്ചു. ഗാന്ധിനഗര്‍ മുതല്‍ കാരിത്താസ് വരെയുള്ള ഭാഗത്തും അറ്റകുറ്റപ്പണി നടത്തി. രാവിലെ നാഗമ്പടം പാലത്തില്‍ നടത്തിയ കുഴിയടയ്ക്കല്‍ നഗരത്തില്‍ രൂക്ഷമായ ഗതാഗതക്കുരുക്കിനു കാരണമായി.

അതിരൂപത സണ്‍ഡേസ്‌കൂള്‍ ബൈബിള്‍ കലോത്സവം ഇന്ന് ആരംഭിക്കും

ചങ്ങനാശേരി: അതിരൂപത മതബോധന കേന്ദ്രമായ സന്ദേശനിലയത്തിന്‍റെ ആഭിമുഖ്യത്തിലുള്ള ബൈബിള്‍ കലോത്സവം എസ്ബി കോളജില്‍ (കാവുകാട്ട് നഗറില്‍) ഇന്ന് ആരംഭിക്കും. 18 ഫൊറോനകളില്‍നിന്നുള്ള രണ്ടായിരത്തിലധികം കലാപ്രതിഭകള്‍ കലോത്സവത്തില്‍ പങ്കെടുക്കും. രാവിലെ ഒമ്പതിന് ജോമ്മ കാട്ടടി പതാക ഉയര്‍ത്തുന്നതോടെ സമ്മേളനത്തിനു തുടക്കമാകും. ഫാ. ഷെറിന്‍ കുറശേരി ബൈബിള്‍ പ്രതിഷ്ഠ നടത്തും. തുടര്‍ന്ന് നടക്കുന്ന സമ്മേളനം വികാരി ജനറാള്‍ മോണ്‍. മാത്യു ചങ്ങങ്കരി ഉദ്ഘാടനം ചെയ്യും. ഡയറക്ടര്‍ ഫാ. ബാബു പുത്തന്‍പുരയ്ക്കല്‍ അധ്യക്ഷത വഹിക്കും. എസിസി സെക്രട്ടറി പ്രിന്‍സ് ചിറ്റേട്ടുകളം പ്രസംഗിക്കും. തുടർന്ന് കലാമത്സരങ്ങള്‍ ആരംഭിക്കും. 20ന് വൈകുന്നേരം 4.30ന് നടക്കുന്ന സമാപന സമ്മേളനം ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്യും. ഡയറക്ടര്‍ ഫാ. ബാബു പുത്തന്‍പുയ്ക്കല്‍ അധ്യക്ഷത വഹിക്കും. എസിസി കണ്‍വീനര്‍ ബോബി തോമസ്, സിജോ ആന്‍റണി എന്നിവര്‍ പ്രസംഗിക്കും.

മലങ്കര ഓര്‍ത്തഡോക്സ് സഭ വിവാഹസഹായ വിതരണം 27ന് പരുമലയില്‍

കോട്ടയം: മലങ്കര ഓര്‍ത്തഡോക്സ് സഭയുടെ വിവാഹസഹായ പദ്ധതിയുടെ ഭാഗമായി ജാതി-മത ഭേദമെന്യ നിര്‍ധനരായ യുവതീ-യുവാക്കള്‍ക്കുള്ള വിവാഹ സഹായ വിതരണം 27ന് ഉച്ചകഴിഞ്ഞ് മൂന്നിന് പരുമലയില്‍ നടക്കും. വിവാഹ സഹായ വിതരണ ഉദ്ഘാടനം ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാബാവ നിര്‍വഹിക്കും. സമിതി പ്രസിഡന്‍റ് യൂഹാനോന്‍ മാര്‍ പോളിക്കാര്‍പോസ് മെത്രാപ്പോലീത്താ അധ്യക്ഷത വഹിക്കും. വൈദികട്രസ്റ്റി റവ.ഡോ. തോമസ് വര്‍ഗീസ് അമയില്‍, അല്മായ ട്രസ്റ്റി റോണി വര്‍ഗീസ് ഏബ്രഹാം, സഭ സെക്രട്ടറി ബിജു ഉമ്മന്‍ എന്നിവര്‍ പ്രസംഗിക്കും. അറിയിപ്പു ലഭിച്ചവര്‍ വികാരിയുടെ സാക്ഷ്യപത്രവും വിവാഹ സര്‍ട്ടിഫിക്കറ്റിന്‍റെ കോപ്പിയും സഹിതം ഉച്ചകഴിഞ്ഞ് ഒന്നിന് പരുമലയില്‍ എത്തിച്ചേരണമെന്ന് വിവാഹസഹായ സമിതി കണ്‍വീനര്‍ എ.കെ. ജോസഫ് അറിയിച്ചു.

രാഷ്‌ട്രപതിയുടെ സന്ദർശനം: ഇല്ലിക്കൽ-കൈപ്പുഴമുട്ട് റോഡിൽ ഓട്ടോ, ടാക്സി നിയന്ത്രണം

കുമരകം: രാഷ്‌ട്രപതിയുടെ സന്ദർശനത്തിനോടനുബന്ധിച്ചുള്ള സുരക്ഷാ ക്രമീകരണങ്ങളുടെ ഭാഗമായി ഇല്ലിക്കൽ മുതൽ കൈപ്പുഴമുട്ട് വരെയുള്ള റോഡിൽ ഗതാഗത തടസം ഒഴിവാക്കുന്നതിലേക്കായി 23ന് ഉച്ചകഴിഞ്ഞ് മൂന്നു മുതൽ 6.30 വരെയും, 24ന് രാവിലെ എട്ടുമുതൽ ഉച്ചയ്ക്ക് 11.00 വരെയും കോട്ടയം- കൈപ്പുഴമുട്ട് റോഡിന്‍റെ ഇരുവശങ്ങളിലെയും ഓട്ടോ, ടാക്സി സ്റ്റാൻഡുകളിൽ ഓട്ടോകളും ടാക്സികളും നിർത്തിയിടരുതെന്ന് കുമരകം പോലീസ് സ്റ്റേഷൻ ഹൗസ് ഓഫീസർ കെ. ഷിജി അറിയിച്ചു.

‘വിഷന്‍-2031’ സെമിനാര്‍ ഇന്ന്

കോട്ടയം: ഉന്നത വിദ്യാഭ്യാസ വകുപ്പ് സംഘടിപ്പിക്കുന്ന വിഷന്‍ 2031 സംസ്ഥാനതല സെമിനാര്‍ ഇന്ന് കോട്ടയത്ത് നടക്കും. രാവിലെ 10നു മാമ്മന്‍മാപ്പിള ഹാളില്‍ മന്ത്രി ഡോ. ആര്‍. ബിന്ദു സെമിനാറില്‍ സമീപന രേഖ അവതരിപ്പിക്കും. മന്ത്രി വി.എന്‍. വാസവന്‍ അധ്യക്ഷത വഹിക്കും. എംജി സര്‍വകലാശാല വൈസ് ചാന്‍സലര്‍ പ്രഫ. സി.ടി. അരവിന്ദകുമാര്‍, ഉന്നത വിദ്യാഭ്യാസ വകുപ്പ് പ്രിന്‍സിപ്പല്‍ സെക്രട്ടറി ഡോ. ശര്‍മിളാ മേരി ജോസഫ്, കോളജ് വിദ്യാഭ്യാസ ഡയറക്ടര്‍ കെ. സുധീര്‍ എന്നിവര്‍ പ്രസംഗിക്കും. ഉന്നത വിദ്യാഭ്യാസ കൗണ്‍സില്‍ വൈസ് ചെയര്‍മാന്‍ പ്രഫ. രാജന്‍ ഗുരുക്കള്‍ അധ്യക്ഷത വഹിക്കുന്ന പ്ലീനറി സെഷനില്‍ പ്രഫസര്‍മാരായ എന്‍.വി. വര്‍ഗീസ്, ഗംഗന്‍ പ്രതാപ്, സജി ഗോപിനാഥ്, ശ്യാം ബി. മേനോന്‍ എന്നിവര്‍ പ്രസംഗിക്കും. ബസേലിയസ്, ബിസിഎം കോളജുകളിലായി വിവിധ വിഷയങ്ങളില്‍ സമാന്തര സെഷനുകളും നടക്കും. പാനല്‍ സംഗ്രഹങ്ങളുടെ അവതരണം നടക്കും. ഉന്നത വിദ്യാഭ്യാസ കൗണ്‍സില്‍ മെംബര്‍ സെക്രട്ടറി പ്രഫ. രാജന്‍ വര്‍ഗീസ് മോഡറേറ്റര്‍ അയിരിക്കും. മന്ത്രി ഡോ. ആര്‍. ബിന്ദു ക്രോഡീകരണവും ഉപസംഹാരവും നടത്തും.

മണ്ഡലം കൺവൻഷൻ നാളെ

അയര്‍ക്കുന്നം: കേരള കോണ്‍ഗ്രസ് അയര്‍ക്കുന്നം മണ്ഡലം കണ്‍വന്‍ഷനും പ്രതിഭാ സംഗമവും 19ന് വൈകുന്നേരം 5.30ന് ഔസേപ്പച്ചന്‍ കുന്നപ്പള്ളിയുടെ വസതിയില്‍ നടക്കും. മണ്ഡലം പ്രസിഡന്‍റ് സേവ്യര്‍ കുന്നത്തേട്ടിന്‍റെ അധ്യക്ഷതയില്‍ പാര്‍ട്ടി എക്‌സിക്യൂട്ടീവ് ചെയര്‍മാന്‍ മോന്‍സ് ജോസഫ് എംഎല്‍എ ഉദ്ഘാടനം ചെയ്യും. സംസ്ഥാന സെക്രട്ടറി ജനറല്‍ ജോയ് ഏബ്രഹാം മുഖ്യപ്രഭാഷണവും മുന്‍കാല പ്രവര്‍ത്തകര്‍, മികച്ച കര്‍ഷകര്‍, പ്രതിഭകള്‍ എന്നിവരെ ആദരിക്കല്‍ ഡെപ്യൂട്ടി ചെയര്‍മാന്‍ ഫ്രാന്‍സിസ് ജോര്‍ജ് എംപി, സ്റ്റേറ്റ് കോ-ഓര്‍ഡിനേറ്റര്‍ അപു ജോണ്‍ ജോസഫ് എന്നിവരും നിര്‍വഹിക്കും. ജില്ലാ പ്രസിഡന്‍റ് ജെയ്‌സണ്‍ ജോസഫ്, സെക്രട്ടറി സന്തോഷ് കാവുകാട്ട്, നിയോജക മണ്ഡലം പ്രസിഡന്‍റ് ആന്‍റണി തുപ്പലഞ്ഞി, സാബു ഒഴുങ്ങാലില്‍ തുടങ്ങിയവര്‍ പ്രസംഗിക്കും.

സർക്കാർ സ്ഥാപനങ്ങൾ വാടകക്കെട്ടിടത്തിലേക്ക് മാറ്റുന്നതിനെതിരേ കോൺഗ്രസ്

കുമരകം: കുമരകം കൃഷിഭവൻ, മൃഗാശുപത്രി, മത്സ്യഭവൻ എന്നിവ സ്വകാര്യ വാടകകെട്ടിടത്തിലേക്ക് മാറ്റുന്നതിൽ പഞ്ചായത്ത് കമ്മിറ്റിയിൽ പ്രതിഷേധം. കോൺഗ്രസിന്‍റെ പഞ്ചായത്തംഗങ്ങളായ ജോഫി ഫെലിക്‌സും ദിവ്യ ദാമോദരനുമാണ് വിയോജിച്ചത്. കുമരകം പഞ്ചായത്തിന്‍റെ ബോട്ട് ദുരന്ത സ്മാരകത്തിലെ ഇരുനിലകളിലും പല മുറികൾ വർഷങ്ങളായി പൂട്ടിക്കിടക്കുമ്പോൾ സ്വകാര്യ വാടകക്കെട്ടിടത്തിലേക്കു സർക്കാർ സ്ഥാപനങ്ങൾ മാറ്റാനുള്ള തീരുമാനത്തെയാണ് കോൺഗ്രസ് അംഗങ്ങൾ എതിർത്തത്. പഞ്ചായത്തിന്‍റെ അധീനതയിലുള്ള കെട്ടിടമുള്ളപ്പോൾ സ്വകാര്യ കെട്ടിടത്തിലേക്ക് സർക്കാർ സ്ഥാപനങ്ങൾ മാറ്റുന്നതിൽ വൻ അഴിമതി ഉണ്ടെന്ന് കോൺഗ്രസ് മണ്ഡലം കമ്മിറ്റി ആരോപിച്ചു. വാടകക്കെട്ടിടത്തിലേക്ക് മാറുന്ന നടപടികളുമായി മുമ്പോട്ടു പോയാൽ ശക്തമായ പ്രതിഷേധ പരിപാടികൾ സംഘടിപ്പിക്കുമെന്ന് കോൺഗ്രസ് മണ്ഡലം പ്രസിഡന്‍റ് സി.ജെ. സാബു അറിയിച്ചു.

എക്‌സ്‌പോ അപ്പച്ചന് ഇന്ന് യാത്രാമൊഴി

കോട്ടയം: ആറു പതിറ്റാണ്ടു മുന്പ് ഗ്രാമീണ ജീവിതത്തിന് വേഗം കൂട്ടാന്‍ ബസുമായി നിരത്തിലിറങ്ങിയ മനുഷ്യസ്‌നേഹിയായിരുന്നു കഴിഞ്ഞദിവസം അന്തരിച്ച കുടമാളൂര്‍ കുന്നത്തുകുഴി ജോര്‍ജ് തോമസ് എന്ന എക്‌സ്‌പോ അപ്പച്ചന്‍. തന്‍റെ കൈവശമുണ്ടായിരുന്ന പണം അപ്പാടെ വിനിയോഗിച്ചാണു ജനങ്ങളുടെ യാത്രാക്ലേശത്തിനു പരിഹാരമായി ജോര്‍ജ് തോമസ് ബസ് സര്‍വീസിനു തുടക്കംകുറിച്ചത്. പിന്നീടത് ബസ് വ്യവസായത്തിലേക്ക് മാറിയതോടെ ഗ്രാമങ്ങള്‍ ഉണര്‍ന്നു, പ്രദേശങ്ങള്‍ വളര്‍ന്നു. പലചരക്കു വ്യാപാരത്തില്‍നിന്നു ബസ് വ്യവസായത്തിലേക്ക് വളര്‍ന്നത് അപ്പച്ചന്‍റെ നിശ്ചയദാര്‍ഢ്യമാണ്. ഒരു കാലത്ത് എക്‌സ്‌പോ ബസുകള്‍ ഗ്രാമങ്ങളെ കോട്ടയം നഗരവുമായി ബന്ധിക്കുന്ന പാലമായിരുന്നു. പിന്നീട് ടൂറിസ്റ്റ് ബസ് വ്യവസായത്തിലേക്ക് എക്‌സ്‌പോയെ മക്കള്‍ മാറ്റിയെങ്കിലും അപ്പച്ചന്‍ റൂട്ട് ബസില്‍ തുടര്‍ന്നു. കൈക്കാശ് നുള്ളിപ്പെറുക്കി 59 വര്‍ഷം മുമ്പാണ് അദ്ദേഹം ആദ്യ ബസ് വാങ്ങിയത്. 1.20 ലക്ഷം രൂപയാണ് ബസിനു ചെലവായതെന്ന് പിന്നീട് മക്കളോട് അദ്ദേഹം പറഞ്ഞിട്ടുണ്ട്. കോട്ടയം, കുടമാളൂര്‍, അതിരമ്പുഴ, ഏറ്റുമാനൂര്‍ വഴി പുന്നത്തറയിലേക്കായിരുന്നു സര്‍വീസ്. പുന്നത്തറ ഗ്രാമത്തിലേക്കുള്ള ആദ്യബസായിരുന്നു അത്. പിന്നീട് മെഡിക്കല്‍ കോളജും യൂണിവേഴ്‌സിറ്റിയും വന്നപ്പോള്‍ കോട്ടയത്തുനിന്നു രാവിലെയും വൈകുന്നേരം എക്‌സ്‌പോ കാത്ത് സ്ഥിരംയാത്രക്കാര്‍ ഉണ്ടായിരുന്നു. എന്നും ബസ് കൃത്യസമയത്ത് എത്തുമെന്നുറപ്പാക്കാന്‍ അദ്ദേഹം ശ്രമിച്ചിരുന്നുവെന്നു മകന്‍ സുനില്‍ പറഞ്ഞു. ഏതെങ്കിലും ബസ് കേടായാല്‍ ഉടന്‍ സ്‌പെയര്‍ ബസ് എത്തിച്ച് യാത്ര മുടങ്ങാതെ നോക്കും. ബസ് കാത്തുനിന്ന ആരും ലക്ഷ്യസ്ഥാനത്ത് എത്താതെ പോകരുതെന്ന് നിര്‍ബന്ധമായിരുന്നു. ആ നിർബന്ധബുദ്ധിയെ നാട്ടുകാർ സ്‌നേഹത്തോടെ എക്‌സ്‌പോ അപ്പച്ചന്‍ എന്നു വിളിച്ചു. 15 ബസ് വരെ ഓടിച്ച കാലമുണ്ടായിരുന്നു. പുന്നത്തറ അടക്കം ഗ്രാമങ്ങളിലേക്കുള്ള രാത്രിയിലെ അവസാന സര്‍വീസ് ഒരിക്കലും മുടക്കരുതെന്ന നിലപാടും അദ്ദേഹത്തിനുണ്ടായിരുന്നു. തിയറ്ററുകളില്‍ ഫസ്റ്റ് ഷോ അവസാനിക്കുമ്പോഴായിരുന്നു ആ ബസുകള്‍ കോട്ടയത്തുനിന്നു പുറപ്പെട്ടിരുന്നത്. ജപ്പാനിലെ ടോക്കിയോയില്‍ എക്‌സ്‌പോ നടന്ന സമയത്താണ് അപ്പച്ചന്‍ ബസ് വാങ്ങിയത്. കെഎസ്ഇബി എന്‍ജിനിയറായിരുന്ന അപ്പച്ചന്‍റെ അനുജന്‍ മത്തായിച്ചന്‍ എക്‌സ്‌പോ എന്നുപേരിട്ടു. ഫുട്ബോളിനെ ഏറെ സ്‌നേഹിച്ച അപ്പച്ചന്‍ നല്ലൊരു കളിക്കാരനുമായിരുന്നു. ചാക്കോളാ ട്രോഫി കാണാന്‍ തൃശൂര്‍ക്കും നാഗ്ജി കാണാന്‍ കോഴിക്കോട്ടും അദ്ദേഹം പോകുമായിരുന്നു. സംസ്ഥാനത്തു നടന്ന സന്തോഷ് ട്രോഫി മത്സരങ്ങള്‍ എല്ലാം തന്നെ നേരില്‍ക്കണ്ട് ആസ്വദിച്ചിരുന്നു. ദീര്‍ഘകാലം ബസ് ഓപ്പറേറ്റേഴ്‌സ് ഫെഡറേഷന്‍റെ ജില്ലാ പ്രസിഡന്‍റായിരുന്ന അദ്ദേഹം സംസ്ഥാന കമ്മിറ്റികളിലും അംഗമായി. മുതിര്‍ന്ന പൗരന്മാരുടെ സംഘടനകളുടെ നേതൃത്വത്തിലും പ്രവര്‍ത്തിച്ചു. ജോര്‍ജ് തോമസിന്‍റെ സംസ്‌കാരം ഇന്ന് ഉച്ചകഴിഞ്ഞ് 2.30നു ഭവനത്തില്‍ ആരംഭിച്ച് കുടമാളൂര്‍ സെന്‍റ് മേരീസ് മേജര്‍ ആര്‍ക്കി എപ്പിസ്‌കോപ്പല്‍ തീര്‍ഥാടന പള്ളിയില്‍ നടക്കും.

മെഡി. കോളജ് ആശുപത്രിയിൽ പുതിയ ബയോഗ്യാസ് പ്ലാന്‍റ്

ഗാന്ധിനഗർ: മെഡിക്കൽ കോളജ് ആശുപത്രിയിൽ പുതിയ ബയോഗ്യാസ് പ്ലാന്‍റ് സ്ഥാപിക്കുന്നു. ആശുപത്രിയിൽനിന്നും പുറന്തള്ളുന്ന ഭക്ഷണ അവശിഷ്ടം അടക്കമുള്ള മലിനവസ്തുക്കളാണ് ബയോഗ്യാസ് പ്ലാന്‍റിൽ സംസ്കരിക്കുന്നത്. കേരള പിന്നാക്ക വികസന കോർപറേഷന്‍റെ സിഎസ്ആർ ഫണ്ടിൽനിന്ന് അനുവദിച്ച 40 ലക്ഷം രൂപ മുടക്കിയാണ് പ്ലാന്‍റ് ഏർപ്പെടുത്തുന്നത്. ആശുപത്രി വളപ്പിലെ ഇന്ത്യൻ കോഫി ഹൗസിന് സമീപത്തായാണ് പ്ലാന്‍റ് ഏർപ്പെടുത്തുന്നത്. പുതിയ പ്ലാന്‍റിൽനിന്ന് ഉത്പാദിപ്പിക്കുന്ന ഗ്യാസ് ഇന്ത്യൻ കോഫി ഹൗസിന്‍റെ പ്രവർത്തനങ്ങൾക്കാണ് ഉപയോഗിക്കുക. നിലവിൽ ഗൈനക്കോളജി വിഭാഗത്തിന് സമീപത്തായി ഒരു ബയോഗ്യാസ് പ്ലാന്‍റ് പ്രവർത്തിക്കുന്നുണ്ട്. ഇവിടെനിന്ന് ഉത്പാദിപ്പിക്കുന്ന ഗ്യാസ് ഗൈനക്കോളജി വിഭാഗത്തിന് സമീപത്തെ കാന്‍റീനാണ് നൽകുന്നത്. പുതിയ പ്ലാന്‍റിന്‍റെ നിർമാണ പ്രവർത്തനം തുടങ്ങി. അടുത്തമാസം പ്ലാന്‍റിന്‍റെ പ്രവർത്തനമാരംഭിക്കാൻ കഴിയുമെന്നാണ് പ്രതീക്ഷിക്കുന്നത്. ആശുപത്രിയിൽനിന്നു പുറന്തള്ളുന്ന ഭക്ഷണാവശിഷ്ടം, പ്ലാസ്റ്റിക് കുപ്പി, കടലാസ്, ഓപ്പറേഷൻ തിയറ്ററിൽ നിന്നു പുറന്തള്ളുന്ന ശരീരാവശിഷ്ടങ്ങൾ അടങ്ങിയ ബയോമെഡിക്കൽ മാലിന്യം എന്നിവ ശേഖരിക്കുന്നതിനും സംസ്കരിക്കുന്നതിനും പ്രത്യേക സംവിധാനമാണുള്ളത്. മാലിന്യം ശേഖരിക്കുന്നതിന് 2019ൽ മാലിന്യ ശേഖരണ കേന്ദ്രം ആരംഭിച്ചിരുന്നു. മാലിന്യങ്ങൾ വേർതിരിച്ചാണ് ശേഖരണ കേന്ദ്രത്തിൽ എത്തിക്കുന്നത്. ഇതിനു പ്രത്യേക നിറത്തിലുള്ള പ്ലാസ്റ്റിക് കവറുകളുണ്ട്. ബയോ മെഡിക്കൽ മാലിന്യം എറണാകുളം കേന്ദ്രീകരിച്ചുള്ള സ്ഥാപനത്തിന്‍റെ വാഹനം എല്ലാ ദിവസവുമെത്തി കൊണ്ടുപോകും. പ്ലാസ്റ്റിക് കുപ്പി, കടലാസ് എന്നിവ അംഗീകൃത എജൻസിക്ക് കൈമാറും. ഭക്ഷണാവശിഷ്ടങ്ങളാണ് ആശുപത്രിയിലെ ബയോഗ്യാസ് പ്ലാന്‍റിൽ സംസ്കരിച്ച് ഗ്യാസ് ഉത്പാദിപ്പിക്കുന്നത്.

നാഷണല്‍ റിക്കാര്‍ഡും ഭേദിച്ച് ജുവല്‍ സ്വര്‍ണത്തിളക്കമായി

പാലാ: മുണ്ടക്കയം ബോയ്‌സ് എസ്‌റ്റേറ്റിലെ കല്ലും മുള്ളും നിറഞ്ഞ ചെറിയ പിറ്റില്‍ ചാടി പരിശീലിച്ച് ഹൈജംപില്‍ അന്തര്‍ദേശീയ താരമായി ജുവല്‍ തോമസ്. സീനിയര്‍ ബോയ്‌സ് ഹൈജംപില്‍ മുരിക്കുംവയല്‍ ഗവ. വിഎച്ച്എസ് സ്‌കൂളിലെ ജുവല്‍ തോമസ് ദേശീയ റിക്കാര്‍ഡും ഭേദിച്ചു. ദേശീയ റിക്കാര്‍ഡായ 2.11 കടന്ന് 2.12 ഇന്നലെ ജുവല്‍ ചാടി. ജൂണിയര്‍ വിഭാഗത്തില്‍ ജുവലിന്‍റെ പേരിലായിരുന്നു നാഷണല്‍ സ്‌കൂള്‍ റിക്കാര്‍ഡും. രണ്ടാമത്തെ ചാട്ടത്തിലാണ് ജുവല്‍ റിക്കാര്‍ഡിട്ടത്. തൃശൂര്‍ എ.ആര്‍. ക്യാമ്പിലെ സിഐ മുണ്ടക്കയം ചിറ്റടി ചെറുവത്തൂര്‍ തോമസിന്‍റെയും പീരുമേട് ചിദംബരം മെമ്മോറിയില്‍ സ്‌കൂളിലെ അധ്യാപിക ജിതയുടെയും മകനാണ് ജുവല്‍. കഴിഞ്ഞ മൂന്നു തവണയായി ജില്ലാ മീറ്റിലും സംസ്ഥാനതലത്തിലും ജുവല്‍ ചാമ്പ്യനാണ്. ഹൈറേഞ്ച് സ്‌പോര്‍ട്‌സ് അക്കാദമിയിലെ സന്തോഷ് ജോര്‍ജാണ് ജുവലിന്‍റെ പരിശീലകന്‍. സ്‌കൂള്‍ വര്‍ഷത്തിലെ അവസാന കായികമേളയായ ഇത്തവണ സംസ്ഥാന തലത്തിലും സ്വര്‍ണം നേടാനാണ് ജുവലിന്‍റെ ശ്രമം.

ട്രാക്കിലെ പൊന്‍താരമായി സാബിന്‍

പാലാ: ട്രാക്കിലേ അതിവേഗക്കാരനായി സാബിന്‍ ജോര്‍ജ്. പങ്കെടുത്ത മത്സരങ്ങളിലെല്ലാം ഒന്നാം സ്ഥാനം നേടിയാണ് സാബിന്‍ കായിക മേളയിലെ താരമായത്. അവസാന ലാപ് ദിനമായ ഇന്നലെ പങ്കെടുത്ത സീനിയര്‍ ആണ്‍കുട്ടികളുടെ വിഭാഗത്തില്‍ 100 മീറ്റര്‍, 200 മീറ്റര്‍ ഇനങ്ങളിലും ഒന്നാം സ്ഥാനം വിട്ടുകൊടുത്തില്ല. രണ്ടാം ദിനത്തില്‍ നടന്ന 400 മീറ്റര്‍ ഹർഡിസി ലും 800 മീറ്ററിലും ഒന്നാം സ്ഥാനം കൈവരിച്ചിരുന്നു. പാലാ സെന്‍റ് തോമസ് എച്ച്എസ്എസ് പ്ലസ് ടു ഹ്യുമാനിറ്റീസ് വിദ്യാര്‍ഥിയാണ്. ഇടുക്കി വെള്ളാരംകുന്ന് സ്വദേശിനി. രണ്ട് തവണ ജൂണിയര്‍ വിഭാഗത്തില്‍ നാഷണല്‍ ലെവലില്‍ രണ്ടാം സ്ഥാനം നേടിയിട്ടുണ്ട്. മത്സ്യക്കച്ചവടക്കാരനാണ് പിതാവ് ഷൈജു ജോര്‍ജ്, അമ്മ ശാലിനി. ട്രിപ്പിള്‍ ജംപിലും നേടി അയോണ പാലാ: ഹര്‍ഡില്‍സിന് പിന്നാലെ ട്രിപ്പിള്‍ ജംപിലും ഒന്നാം സ്ഥാനം നേടി അയോണ മേരി സോജന്‍. സീനിയര്‍ പെണ്‍കുട്ടികളുടെ വിഭാഗം ട്രിപ്പിള്‍ ജംപിലാണ് മത്സരിച്ചത്. 9.16 മീറ്റര്‍ ആണ് ദൂരം. 100 മീറ്റര്‍ ഹര്‍ഡില്‍സിലും സ്വര്‍ണം കൈവരിച്ചിരുന്നു. കാഞ്ഞിരപ്പള്ളി സെന്‍റ് മേരീസ് ജിഎച്ച്എസ് പത്താം ക്ലാസ് വിദ്യാര്‍ഥിനിയാണ്. ചോറ്റി അമ്പലത്തിറയില്‍ സോജന്‍ റീന ദമ്പതികളുടെ മകളാണ്. വ്യക്തിഗത ചാമ്പ്യന്മാര്‍ സബ് ജൂണിയര്‍ ബോയ്‌സ്-അലന്‍ സാബു 15 പോയിന്‍റ്(സെന്‍റ് തോമസ് എസ്എച്ച്എസ് പാലാ) 400, 200, 600 മീറ്ററുകളില്‍ ഒന്നാം സ്ഥാനം. സബ് ജൂണിയര്‍ ഗേള്‍സ്-അന്നാ ജിജോ 15 പോയിന്‍റ് (സിഎസ്എച്ച് എസ് എച്ച് ജിഎച്ച്എസ് ഭരണങ്ങാനം) ലോംഗ് ജംപ്, ഹൈജംപ്, 80 എംഎച്ച് ഒന്നാം സ്ഥാനം. ജൂണിയര്‍ ബോയ്‌സ്-ശ്രീഹരി സി. ബിനു 15 പോയിന്‍റ് (ഗവ. വിഎച്ച് എസ് മുരിക്കുംവയല്‍) 110 മീറ്റര്‍ ഹര്‍ഡില്‍സ്, 100, 200 മീറ്റര്‍ ഒന്നാം സ്ഥാനം. ജൂണിയര്‍ ഗേള്‍സ്-അയന ലൈക്ക് 13 പോയിന്‍റ് (എസ്എംവിഎച്ച്എസ്എസ് പൂഞ്ഞാര്‍), മൂന്നു കിലോമീറ്റര്‍ നടത്തം ഒന്നാം സ്ഥാനം, 3000 മീറ്റര്‍ ഓട്ടം ഒന്നാം സ്ഥാനം, 1500 മീറ്റര്‍ ഓട്ടം രണ്ടാം സ്ഥാനം. സീനിയര്‍ ബോയ്സ്-സാബിന്‍ ജോര്‍ജ് 15 പോയിന്‍റ് (സെന്‍റ് തോമസ് എസ്എച്ച്എസ് പാലാ). 400 മീറ്റര്‍ ഹര്‍ഡില്‍സ്, 200, 400 മീറ്റര്‍ ഓട്ടം ഒന്നാം സ്ഥാനം. സീനിയര്‍ ഗേള്‍സ്-സിഖാ എം. സോബിന്‍ 15 പോയിന്‍റ് (സെന്‍റ് മേരീസ് ജിഎച്ച്എസ് കാഞ്ഞിരപ്പള്ളി) 800 മീറ്റര്‍, 400 മീറ്റര്‍, 400 മീറ്റര്‍ ഹര്‍ഡില്‍സ് ഒന്നാം സ്ഥാനം.

ട്രാക്കിലും ഫീല്‍ഡിലും സ്വര്‍ണം വാരിക്കൂട്ടി പാലായിലെ പിള്ളേര്‍ പെന്നായി

പാലാ: ട്രാക്കിലും ഫീല്‍ഡിലും സ്വര്‍ണം വാരിക്കൂട്ടി പാലായിലെ പിള്ളേര്‍ പെന്നായി. റവന്യു ജില്ലാ കായിക മേളയില്‍ പാലാ വിദ്യഭ്യാസ ജില്ലയ്ക്ക് ഓവറോള്‍ ചാമ്പ്യന്‍ഷിപ്പ്. ആദ്യ ദിനം മുതല്‍ എതിരാളികളെ ബഹുദൂരം പിന്നിലാക്കി കുതിപ്പ് തുടങ്ങി പാലാ ഉപജില്ല അവസാന മത്സരത്തില്‍ വരെ വിജയകുതിപ്പ് തുടര്‍ന്നു. 38 സ്വര്‍ണവും 25 വെള്ളിയും 16 വെങ്കലവുമായി 327 പോയിന്‍റുമായാണ് പാലായുടെ കിരീടം. 18 സ്വര്‍ണവും 16 വെള്ളിയും 14 വെങ്കലവുമായി 167 പോയിന്‍റ് നേടി കാഞ്ഞിരപ്പള്ളി ഉപജില്ലയാണ് രണ്ടാം സ്ഥാനത്ത്. 12 സ്വര്‍ണവും 16 വെള്ളിയും 11 വെങ്കലവുമായി 132 പോയിന്‍റ് നേടി ഈരാറ്റുപേട്ട ഉപജില്ല മൂന്നാമതെത്തി. സ്‌കൂള്‍ വിഭാഗത്തില്‍ പാലാ സെന്‍റ് തോമസ് സ്‌കൂള്‍ ഓവറോള്‍ ചാമ്പ്യന്‍മാരായി. 23 സ്വര്‍ണവും 16 വെള്ളിയും ഏഴു വെങ്കലവുമായി 170 പോയിന്‍റുമായാണ് പാലാ സെന്‍റ് തോമസ് ഒന്നാമതെത്തിയത്. 10 സ്വര്‍ണവും 12 വെള്ളിയും ഏഴു വെങ്കലുവമായി 93 പോയിന്‍റ് നേടി പൂഞ്ഞാര്‍ എസ്എംവി രണ്ടാമതും അഞ്ചു സ്വര്‍ണവും നാലു വെള്ളിയും അഞ്ചു വെങ്കലവുമായി 42 പോയിന്‍റ് നേടി സെന്‍റ് പീറ്റേഴ്‌സ് കുറമ്പനാടം മൂന്നാമതുമെത്തി. മുരിക്കുംവയല്‍ ഗവ. വിഎച്ച്എസ്ഇ, കാഞ്ഞിരപ്പള്ളി സെന്‍റ് മേരീസ് ഗേള്‍സ്, ചേര്‍പ്പുങ്കല്‍ ഹോളിക്രോസ് എന്നീ സ്‌കൂളുകള്‍ യഥാക്രമം നാലും അഞ്ചും ആറും സ്ഥാനത്തെത്തി. വന്നു, എറിഞ്ഞു, നേടി പാലാ: വന്നു, എറിഞ്ഞു ഒന്നാംസ്ഥാനവുമായി അവിനാഷ് അനീഷിന്‍റെ മടക്കം. സീനിയര്‍ ആണ്‍കുട്ടികളുടെ ജാവലിന്‍ ചങ്ങനാശേരി പെരുന്ന എന്‍എസ്എസ് സ്‌കൂബളിലെ അവിനാഷാണ് ഒന്നാമതെത്തിയത്. 36.87 മീറ്ററാണ് അവിനാഷ് എറിഞ്ഞത്. പ്ലസ് ടു കംപ്യൂട്ടര്‍ സയന്‍സ് വിദ്യാര്‍ഥിയാണ്. ഫൈനല്‍ മത്സരത്തില്‍ പങ്കെടുക്കുന്നതിന് മുന്‍പ് കൈ ഇടറിയെങ്കിലും മത്സരത്തില്‍നിന്നു പിന്മാറാതെ വിജയവുമായാണ് അവിനാശിന്‍റെ മടക്കം. ജില്ലാ കായികമേളയില്‍ ചാമ്പ്യനായതോടെ ഇനി ജാവലിനില്‍ ഒരു കൈ നോക്കാമെന്നാണ് അവിനാഷ് പറയുന്നത്. ആലപ്പുഴ കണ്ണാടി അനീഷ്-ലാവണ്യ ദമ്പതികളുടെ മകനാണ്.

കടനാട്ടിൽ മോഷണം വ്യാപകം; പോലീസ് ഇരുട്ടിൽ‌ത്തപ്പുന്നു

കടനാട്: പ്രദേശത്ത് മോഷണവും മോഷണശ്രമവും വ്യാപകമാകുമ്പോള്‍ നാട്ടുകാരുടെ സ്വൈരജീവിതം ഉറപ്പുവരുത്തേണ്ട പോലീസ് ഇരുട്ടില്‍ തപ്പുന്നതായി ആക്ഷേപം. ഇന്നലെ കടനാട് പുന്നിലത്തുകാവ് ശ്രീധര്‍മശാസ്താ ക്ഷേത്രത്തില്‍ മോഷണം നടന്നു. വഴിപാട് കൗണ്ടറിന്‍റെ കതക് തകര്‍ത്ത് അകത്തു കടന്ന മോഷ്ടാവ് 2600 രൂപയും വഴിപാട് സ്വര്‍ണവും അപഹരിച്ചു. കൗണ്ടറിനുള്ളിലെ സാധനസാമഗ്രികള്‍ വാരിവലിച്ച് അലങ്കോലമാക്കിയ നിലയിലാണ്. താഴിന്‍റെ ഓടാമ്പല്‍ നശിപ്പിച്ചാണ് മോഷ്ടാവ് ഉള്ളില്‍ കടന്നത്. മേലുകാവ് പോലീസ് സ്ഥലത്തെത്തി അന്വേഷണം ആരംഭിച്ചിട്ടുണ്ട്. കടനാടിന് സമീപപ്രദേശമായ പിഴകിലും കുറുമണ്ണിലും മോഷണം നടന്നിട്ട് അധികദിവസമായില്ല. പിഴക് നിര്‍മല പബ്ലിക് സ്‌കൂളില്‍ കഴിഞ്ഞ രാത്രിയാണ് മോഷണം നടന്നത്. രാത്രി 11.30ഓടെയാണ് മോഷ്ടാവ് ക്ലാസുകളില്‍ കയറിയത്. കുട്ടികള്‍ ടൂര്‍ പോകുന്നതിനായി സമാഹരിച്ച പണമാണ് അപഹരിച്ചത്. സ്‌കൂളിലെ സിസിടിവി ദൃശ്യത്തില്‍ മോഷണം നടത്തുന്ന ദൃശ്യം പതിഞ്ഞെങ്കിലും പോലീസിന് മോഷ്ടാവിനെ പിടികൂടാന്‍ സാധിച്ചില്ല. സമീപപ്രദേശമായ കുറുമണ്ണില്‍ കഴിഞ്ഞ ചെവ്വാഴച രാത്രിയാണ് മോഷണം നടന്നത്. കുറുമണ്ണ് പള്ളിയുടെ ഇടിമിന്നല്‍ രക്ഷാചാലക ചെമ്പുകമ്പിയും ഓടയ്ക്കന്‍ സുബിയുടെ വീടിനു സമീപത്തെ പുകപ്പുരയില്‍നിന്നു മുന്നൂറു കിലോ റബര്‍ ഷീറ്റും ഒട്ടുപാലും കല്ലറക്കല്‍ ജോസിന്‍റെ 200 കിലോയിലധികം റബര്‍ ഷീറ്റും ഒട്ടുപാലും മോഷ്ടാക്കള്‍ അപഹരിച്ചു. പല വീടുകളിലും മോഷണശ്രമവും നടന്നിരുന്നു. മേലുകാവ് പോലീസില്‍ പരാതി നൽകിയെങ്കിലും ആവശ്യമായ അന്വേഷണം നടത്തിയില്ലെന്ന് നാട്ടുകാര്‍ ആരോപിക്കുന്നു.

ലോഗോസ് ക്വിസ്: അമ്മയും മക്കളും രൂപതാതല വിജയികൾ

കുറവിലങ്ങാട്: മാതാപിതാക്കളും മക്കളും ഒരുമിച്ചിരുന്ന് വചനം പഠിച്ചു. ഫലം വന്നപ്പോൾ അമ്മയ്ക്കും മക്കൾക്കും പാലാ രൂപതാതലത്തിൽ മിന്നുന്ന വിജയം. ലോഗോസ് ക്വിസിലാണ് രൂപതാതലത്തിലെ രണ്ട് ഒന്നാംസ്ഥാനങ്ങളും ഒരു മൂന്നാംസ്ഥാനവും ഒരു വീട്ടിലേക്ക് എത്തിയത്. മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന ഇടവകയിലെ വടക്കേവെള്ളാക്കൽ വീട്ടിലാണ് വചനമനനത്തിന്‍റെ ഒന്നാംസ്ഥാനങ്ങൾ ഒരുമിച്ചെത്തിയത്. പുത്തൻകുരിശ് മുത്തൂറ്റ് എൻജിനിയറിംഗ് കോളജ് അധ്യാപകനായ വടക്കേവെള്ളാക്കൽ ഡോ. റിജോ സെബാസ്റ്റ്യന്‍റെ ഭാര്യ ഡിന്‍റ ഫ്രാൻസിസ്, മക്കളായ ആൽബർട്ട് റിജോ, ആഗ്‌നസ് റിജോ എന്നിവരാണ് മിന്നും വിജയം നേടിയത്. ഡി വിഭാഗത്തിൽ ഒന്നാംസ്ഥാനം നേടിയ ഡിന്‍റ ഫ്രാൻസിസ് മോനിപ്പള്ളി പോസ്റ്റ്ഓഫീസിൽ പോസ്റ്റ് മിസ്ട്രസാണ്. ആൽബർട്ടും ആഗ്‌നസും നസ്രത്ത്ഹിൽ ഡി പോൾ സ്‌കൂൾ വിദ്യാർഥികളാണ്. എ കാറ്റഗറിയിലാണ് ആൽബർട്ടിന്‍റെ ഒന്നാംസ്ഥാനം. ആഗ്‌നസ് ബി കാറ്റഗറിയിൽ രൂപതാതലത്തിൽ മൂന്നാം സ്ഥാനത്താണ്. 2023ൽ സംസ്ഥാനതലത്തിൽ നാലാം സ്ഥാനം ആഗ്‌നസ് നേടിയിരുന്നു. വിജയികളെ ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, അസി. വികാരി ഫാ. ജോസഫ് ചൂരയ്ക്കൽ, സോൺ ലീഡർ ജിയോ കരികുളം, സോൺ സെക്രട്ടറി ഷൈനി സാബു മഞ്ഞപ്പള്ളിൽ, പള്ളിയോഗ പ്രതിനിധി ട്രീസ മാൻകൂട്ടത്തിൽ, കുടുംബകൂട്ടായ്മ യൂണിറ്റ് ഭാരവാഹികൾ, വിശ്വാസപരിശീലകർ എന്നിവർ അഭിനന്ദിച്ചു.

കിഴതടിയൂര്‍ പള്ളിയില്‍ വിശുദ്ധ യൂദാശ്ലീഹായുടെ തിരുനാളിന് നാളെ കൊടിയേറും

പാലാ: പ്രസിദ്ധ തീര്‍ഥാടന കേന്ദ്രമായ കിഴതടിയൂര്‍ പള്ളിയില്‍ വിശുദ്ധ യൂദാശ്ലീഹായുടെ നൊവേനത്തിരുനാളിന് നാളെ കൊടിയേറും. 28നാണ് പ്രധാന തിരുനാള്‍. നാളെ രാവിലെ 9.45ന് കൊടിയേറ്റ് - റവ.ഡോ. ജോസ് കാക്കല്ലില്‍. പത്തിന് വിശുദ്ധ കുര്‍ബാന.19 മുതല്‍ രാവിലെ 5.30, 7.00, 10.00, 12.00, ഉച്ചകഴിഞ്ഞ് 3.00, 5.00, രാത്രി 7.00 എന്നീ സമയങ്ങളില്‍ വിശുദ്ധ കുര്‍ബാനയും നൊവേനയും. വൈകുന്നേരം 6.30ന് ദേവാലയത്തില്‍ ജപമാല. 26നു രാവിലെ 9.30ന് തിരുസ്വരൂപ പ്രതിഷ്ഠ - മാര്‍ ജോസഫ് പള്ളിക്കാപറമ്പില്‍. 27നു വൈകുന്നേരം 4.30ന് പ്രസുദേന്തി സമര്‍പ്പണം. 6.30ന് ജപമാല പ്രദക്ഷിണം. പ്രധാന തിരുനാള്‍ ദിനമായ 28നു രാവിലെ 5.15ന് നെയ്യപ്പനേര്‍ച്ച വെഞ്ചരിപ്പ്. പത്തിന് വിശുദ്ധ കുര്‍ബാന - മാര്‍ ജോസഫ് കല്ലറങ്ങാട്ട്. ഉച്ചയ്ക്ക് 12ന് തിരുനാള്‍ പ്രദക്ഷിണം. വികാരി ഫാ. തോമസ് പുന്നത്താനത്ത്, ഫാ. മാത്യു വെണ്ണായപ്പിള്ളില്‍, ഫാ. സെബാസ്റ്റ്യന്‍ ആലപ്പാട്ടുകുന്നേല്‍, കൈക്കാരന്മാരായ പ്രഫ. കെ.കെ. ടോമി കട്ടുപ്പാറയില്‍, പ്രഫ. കെ.സി. ജോസഫ് കൂനംകുന്നേല്‍, ജോജി ജോര്‍ജ് പൊന്നാടംവാക്കല്‍, ടോമി സെബാസ്റ്റ്യന്‍ ഞാവള്ളിമംഗലത്തില്‍, പബ്ലിസിറ്റി കണ്‍വീനര്‍മാരായ സോജന്‍ കല്ലറക്കല്‍, പ്രഫ. ജോസഫ് മറ്റം, പോളച്ചന്‍ പകലോമറ്റം, ജിബിന്‍ ബേബി മൂഴിപ്ലാക്കല്‍ എന്നിവര്‍ നേതൃത്വം നല്‍കും. കുറിച്ചിത്താനം വില്ലേജ് ജംഗ്ഷൻ കപ്പേളയിൽ കുറിച്ചിത്താനം: കുറിച്ചിത്താനം വില്ലേജ് ജംഗ്ഷനിലുള്ള മാര്‍ തോമ്മാശ്ലീഹാ കപ്പേളയില്‍ വിശുദ്ധ യൂദാശ്ലീഹായുടെ നൊവേനയും തിരുനാളും ആരംഭിച്ചു. ഇന്നു വൈകുന്നേരം അഞ്ചിന് വിശുദ്ധ കുര്‍ബാന, പ്രസംഗം, നൊവേന. നാളെ 10.30ന് വിശുദ്ധ കുര്‍ബാന. 12.15ന് ഊട്ടുനേര്‍ച്ച.

അവകാശ സംരക്ഷണജാഥ 21ന് പാലായില്‍

പാലാ: നീതി ഔദാര്യമല്ല, അവകാശമാണ് എന്ന മുദ്രാവാക്യവുമായി കത്തോലിക്ക കോണ്‍ഗ്രസ് ഗ്ലോബല്‍ സമിതിയുടെ നേതൃത്വത്തില്‍ നടത്തുന്ന അവകാശ സംരക്ഷണജാഥ 21ന് പാലായിലെത്തും. ഭരണഘടനയും ഭരണഘടന വിഭാവനം ചെയ്യുന്ന മതേതരത്വവും സംരക്ഷിക്കുക, ക്രൈസ്തവ പിന്നാക്കാവസ്ഥയെപ്പറ്റി പഠിക്കാന്‍ നിയോഗിച്ച ജസ്റ്റീസ് ജെ.ബി. കോശി കമ്മീഷന്‍ റിപ്പോര്‍ട്ട് പുറത്തുവിടുകയും അതിലെ നിര്‍ദേശങ്ങള്‍ നടപ്പാക്കുകയും ചെയ്യുക, വന്യമൃഗങ്ങളുടെ ആക്രമണവും തെരുവുനായ ശല്യവും പരിഹരിക്കാന്‍ നടപടികള്‍ സ്വീകരിക്കുക, കര്‍ഷകര്‍ക്ക് ദ്രോഹകരമായ ഭൂനിയമങ്ങള്‍ കാലാനുസൃതമായി പരിഷ്‌കരിക്കുക, കാര്‍ഷിക ഉത്പന്നങ്ങളുടെ വിലത്തകര്‍ച്ച പരിഹരിക്കാന്‍ നടപടിയെടുക്കുക, വിദ്യാഭ്യാസ മേഖലയിലെ ന്യൂനപക്ഷ അവഗണന അവസാനിപ്പിക്കുക എന്നീ ആവശ്യങ്ങള്‍ ഉയര്‍ത്തിയാണ് കത്തോലിക്ക കോണ്‍ഗ്രസ് ഗ്ലോബല്‍ പ്രസിഡന്‍റ് പ്രഫ. രാജീവ് കൊച്ചുപറമ്പില്‍ കാസര്‍ഗോട്ടുനിന്നു തിരുവനന്തപുരത്തേക്ക് ജാഥ ആരംഭിച്ചത്. വിവിധ രൂപതകളിലൂടെ കാഞ്ഞിരപ്പള്ളി രൂപതയില്‍ പ്രവേശിക്കുന്ന ജാഥ ചെമ്മലമറ്റത്തുനിന്നു പാലാ രൂപതയില്‍ പ്രവേശിക്കും. രൂപത ഭാരവാഹികള്‍ ജാഥയെ സ്വീകരിക്കും. തുടര്‍ന്ന് അരുവിത്തുറ, രാമപുരം ഫൊറോനകളിലെ സ്വീകരണങ്ങള്‍ ഏറ്റുവാങ്ങി വൈകുന്നേരം 4.30ന് പാലാ മുനിസിപ്പല്‍ സ്റ്റേഡിയം ജംഗ്ഷനില്‍ എത്തിച്ചേരും. വിവിധ ഭാഗങ്ങളില്‍നിന്ന് എത്തുന്നവര്‍ ജാഥയെ സ്വീകരിച്ച് റാലിയോടുകൂടി കുരിശുപള്ളിക്കവലയിലേക്ക് ആനയിക്കും. റാലി മോണ്‍. സെബാസ്റ്റ്യന്‍ വേത്താനത്ത് ഫ്‌ളാഗ് ഓഫ് ചെയ്യും. കുരിശുപള്ളിക്കവലയില്‍ രൂപത പ്രസിഡന്‍റ് ഇമ്മാനുവല്‍ നിധീരിയുടെ അധ്യക്ഷതയില്‍ ചേരുന്ന പൊതുസമ്മേളനം സീറോമലബാര്‍ സഭ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍ ഉദ്ഘാടനം ചെയ്യും. സമ്മേളനത്തില്‍ പങ്കെടുക്കാന്‍ എത്തുന്നവരുടെ വാഹനങ്ങള്‍ പാര്‍ക്ക് ചെയ്യുന്നതിനായി ളാലം പഴയപള്ളിയിലും പുത്തന്‍പള്ളിയിലും പാര്‍ക്കിംഗ് ഗ്രൗണ്ടുകള്‍ ക്രമീകരിച്ചിട്ടുണ്ട്. വിവിധ രൂപതാധ്യക്ഷന്മാര്‍ പങ്കെടുക്കുന്ന റാലിയോടെ 24ന് തിരുവനന്തപുരം സെക്രട്ടേറിയറ്റില്‍ ജാഥ സമാപിക്കും. പത്രസമ്മേളനത്തില്‍ രൂപത പ്രസിഡന്‍റ് ഇമ്മാനുവല്‍ നിധീരി, ഡയറക്ടര്‍ റവ. ഡോ. ജോര്‍ജ് വര്‍ഗീസ് ഞാറക്കുന്നേല്‍, രൂപത ജനറല്‍ സെക്രട്ടറി ജോസ് വട്ടുകുളം, ജോയി കണിപറമ്പില്‍, ജോണ്‍സണ്‍ വീട്ടയാങ്കല്‍, രജേഷ് പാറയില്‍ തുടങ്ങിയവര്‍ പങ്കെടുത്തു.

വെളിയന്നൂരിൽ വിളയുന്നതെന്ത്?

വീണ്ടുമൊരു തദ്ദേശ തെരഞ്ഞെടുപ്പ് പടിവാതിൽക്കൽ. കഴിഞ്ഞ അഞ്ചു വർഷം നമ്മുടെ തദ്ദേശസ്ഥാപനങ്ങളിൽ നടന്നതെന്ത്? ഭരണപക്ഷവും പ്രതിപക്ഷവും എന്തു പറയുന്നു? പഞ്ചായത്തിന്‍റെ ചിത്രം എങ്ങനെ? വെളിയന്നൂർ ഗ്രാമപഞ്ചായത്ത് കോട്ടയം, എറണാകുളം ജില്ലകൾ അതിര് പങ്കിടുന്ന ഗ്രാമപ്രദേശം. കാർഷിക സംസ്‌കൃതിയുടെ ചരിത്രമാണ് വെളിയന്നൂരിന്‍റെ കരുത്ത്. കുന്നും സമതലങ്ങളും നിറഞ്ഞ പഞ്ചായത്ത് പ്രദേശത്ത് പാറമടകളുടെ എണ്ണം വർധിക്കുന്നത് ആശങ്കൾ സൃഷ്ടിക്കാതില്ല. നേട്ടങ്ങൾ സജേഷ് ശശി (പഞ്ചാ‍യത്ത് പ്രസിഡന്‍റ്) 4സംസ്ഥാനത്തെ മികച്ച ഗ്രാമപഞ്ചായത്തിനുള്ള സ്വരാജ് ട്രോഫി നേടി. 4അഞ്ചു വർഷവും 100 ശതമാനം നികുതിപിരിവും പദ്ധതി ചെലവാക്കലും. 4ആർദ്രകേരളം പുരസ്‌കാരം ലഭിച്ചു. 4സംസ്ഥാനത്തെ മികച്ച മാതൃക ബഡ്‌സ് സ്‌കൂൾ. 4സംരംഭകവർഷം പദ്ധതിയിൽ നേട്ടം. 4സ്ഥിരം കൃഷിക്കു ധനസഹായം. മഞ്ഞൾ ഗ്രാമം, സൗജന്യ വാഴവിത്ത് വിതരണം, പാൽവില/കാലിത്തീറ്റ ഇൻസെന്‍റീവ് പദ്ധതികൾ. 4പഞ്ചായത്ത് നിയന്ത്രണ സ്‌കൂളുകളിൽ സ്മാർട്ട് ക്ലാസ്മുറികൾ. കോട്ടങ്ങൾ ബിന്ദു സുരേന്ദ്രൻ (പ്രതിപക്ഷ അംഗം) 4പഞ്ചായത്തിലെ ഒന്നാം വാർഡിൽ വർഷങ്ങളായി മെംബറല്ല. 4പുതുവേലി എംവിഐപി കനാൽ കാടുകയറി, വെള്ളമില്ല. 4ഗ്രാമീണറോഡുകൾ മിക്കതും സഞ്ചാരയോഗ്യമല്ല. തെരുവുവിളക്കുകൾ കത്തുന്നില്ല. 20 ലക്ഷം മുടക്കിയ എംസിഎഫ് കേന്ദ്രം കൂടുമൂടി. സ്വാശ്രയ സംരംഭങ്ങൾ എല്ലാം പ്രവർത്തനം നിലച്ചു. ജനവാസ കേന്ദ്രങ്ങളിൽ പ്ലൈവുഡ്, കുടിവെള്ള കമ്പനികൾക്ക് അനുവാദം നൽകി ജനജീവിതം ദുരിതത്തിലാക്കി. അരീക്കരയിലെ ചെക്ക്ഡാം നിർമാണം ഉപേക്ഷിച്ച നിലയിൽ. പുതിയ പദ്ധതികൾ ഒന്നുമില്ല. ആളൊഴിഞ്ഞ ഇടങ്ങളിൽ ലഹരിസംഘങ്ങൾ. ഒറ്റനോട്ടത്തിൽ 13 വാർഡുകളുണ്ടായിരുന്ന പഞ്ചായത്തിൽ പുനർനിർണയത്തിൽ 14 വാർഡുകളായി. കഴിഞ്ഞ തെരഞ്ഞെടുപ്പിൽ പ്രസിഡന്‍റായിരുന്ന സിപിഐ സ്ഥാനാർഥി മാത്രമാണ് ഇടതുമുന്നണിയിൽ തോറ്റത്. വിദേശ രാജ്യങ്ങളിലേക്കു കുടിയേറുന്ന കുടുംബങ്ങളുടെ എണ്ണം വർധിക്കുന്ന പഞ്ചാത്തുകളിലൊന്ന്. തെരഞ്ഞെടുപ്പ് രംഗത്തെ ആവേശത്തെയും പങ്കാളിത്തത്തെയും ഇതു ബാധിക്കുമെന്ന ആശങ്ക ശക്തം. ജോസഫ് ചാഴികാടനിലൂടെ പൊതുരംഗത്ത് ശ്രദ്ധേയമായ വെളിയന്നൂർ സംസ്ഥാനതലത്തിൽതന്നെ ശ്രദ്ധിക്കപ്പെടുന്ന പഞ്ചായത്താണ്. കക്ഷിനില: ഭരണപക്ഷം-12, (സിപിഎം-6, കേരള കോൺഗ്രസ്-എം-5, സിപിഐ -1), പ്രതിപക്ഷം-ഒന്ന് (കോൺഗ്രസ്-1).

തീർഥാടകത്തിരക്കിൽ എരുമേലി

എരുമേലി: തുലാമാസ പൂജയ്ക്കായി ശബരിമലനട തുറന്നതോടെ എരുമേലി-പമ്പ റോഡിൽ അയ്യപ്പ ഭക്തരുടെ വൻ തിരക്ക്. പതിവിലും കൂടുതൽ തീർഥാടകരാണ് എത്തിക്കൊണ്ടിരിക്കുന്നത്. ഇന്നലെ രാവിലെ എരുമേലി ടൗണിൽ ഗതാഗതത്തിരക്ക് വലിയ തോതിൽ അനുഭവപ്പെട്ടു. ദേവസ്വം ബോർഡിന്‍റെ പാർക്കിംഗ് ഗ്രൗണ്ടുകളിൽ വാഹനത്തിരക്ക് വർധിച്ച നിലയിലായിരുന്നു. മണ്ഡല - മകരവിളക്ക് സീസണിന് ഒരു മാസം കൂടിയാണുള്ളത്. അതിനുള്ള ക്രമീകരണങ്ങൾ നടക്കുന്നതിനാൽ അയ്യപ്പഭക്തർക്ക് നിലവിൽ വിശ്രമ സൗകര്യങ്ങൾ പരിമിതമാണ്. പാർക്കിംഗ് ഗ്രൗണ്ടുകളിൽ ഇന്‍റർ ലോക്ക് കട്ടകൾ പതിപ്പിക്കുന്ന ജോലികൾ പുരോഗമിക്കുകയാണ്. തുലാമാസ പൂജയുടെ അവസാന ദിവസമായ 22ന് രാഷ്‌ട്രപതി ദൗപദി മുര്‍മു ശബരിമലയില്‍ ദര്‍ശനത്തിന് എത്തുന്നുണ്ട്.

സൗജന്യ യൂറോളജി മെഡിക്കൽ ക്യാമ്പ്

മുണ്ടക്കയം: മുണ്ടക്കയം മെഡിക്കൽ ട്രസ്റ്റ് ആശുപത്രിയിൽ മൂത്രാശയ സംബന്ധമായ രോഗങ്ങളുടെ നിർണയത്തിനും ചികിത്സയ്ക്കുമായി 20 മുതൽ 25 വരെ സൗജന്യ മെഡിക്കൽ ക്യാമ്പ് നടത്തുമെന്ന് പിആർഒ അരുൺ ആണ്ടൂർ പത്രസമ്മേളനത്തിൽ അറിയിച്ചു. എംഎംടി ഹോസ്പിറ്റൽ യൂറോളജി വിഭാഗം മേധാവി ഡോ. എസ്.എസ്. അഭിനന്ദ് നേതൃത്വം നൽകും. വിട്ടുമാറാത്ത മൂത്രത്തിൽ പഴുപ്പ്, അറിയാതെയുള്ള മൂത്രംപോക്ക്, മൂത്രത്തിൽ രക്തത്തിന്‍റെ അംശം കാണപ്പെടുക, പ്രോസ്റ്റേറ്റ്ഗ്രന്ഥിയുടെ വീക്കം, പുരുഷന്മാരിലെ ലൈംഗിക രോഗങ്ങൾ, കിഡ്നിയിലെ കല്ലുകൾ, മൂത്രാശയങ്ങളിലെ കല്ലുകൾ തുടങ്ങിയ രോഗങ്ങളുടെ നിർണയവും ചികിത്സയും സൗജന്യമായിരിക്കും. ക്യാമ്പിൽ പങ്കെടുക്കുന്ന എല്ലാവർക്കും അൾട്രാസൗണ്ട് സ്കാനിംഗ്, രക്ത പരിശോധനകൾ തുടങ്ങിയവ പൂർണമായും സൗജന്യമായിരിക്കും. പത്രസമ്മേളനത്തിൽ സീനിയർ യൂറോളജി കൺസൾട്ടന്‍റ് ഡോ. എസ്.എസ്. അഭിനന്ദ്, സ്റ്റെഫി ബയർ, ഡോണി തുടങ്ങിയവരും പങ്കെടുത്തു.

കനത്ത മഴ: കാഞ്ഞിരപ്പള്ളി-ഈരാറ്റുപേട്ട റോഡിൽ വെള്ളം കയറി

കാഞ്ഞിരപ്പള്ളി: കനത്ത മഴയിൽ കാഞ്ഞിരപ്പള്ളി-ഈരാറ്റുപേട്ട റോഡിൽ വെള്ളം കയറി ഗതാഗതം തടസപ്പെട്ടു. ആനക്കല്ല്, കപ്പാട്, മഞ്ഞപ്പള്ളി, നാലാംമൈൽ പ്രദേശങ്ങളിലാണ് വെള്ളം കയറിയത്. ഇന്നലെ വൈകുന്നേരം 4.30ഓടെ ആരംഭിച്ച മഴ മണിക്കൂറോളം പെയ്തതോടെയാണ് ചിറ്റാർ പുഴയുടെ കൈത്തോട് കരകവിഞ്ഞ് റോഡിൽ വെള്ളം കയറിയത്. രണ്ടു മണിക്കൂറോളം ഗതാഗതം തടസപ്പെട്ടു. പ്രദേശത്തെ വീടുകളിലും കടകളിലും വെള്ളം കയറി.

മുണ്ടക്കയത്ത് വൈദ്യുതിമുടക്കം പതിവ്; ദുരിതത്തിലായി നാട്ടുകാരും വ്യാപാരികളും

മുണ്ടക്കയം: മുണ്ടക്കയം, മുപ്പത്തൊന്നാംമൈൽ, പൈങ്ങന മേഖലയിൽ വൈദ്യുതിമുടക്കം പതിവാകുന്നു. യാതൊരു മുന്നറിയിപ്പുമില്ലാതെ മണിക്കൂറുകളോളം വൈദ്യുതി മുടങ്ങുന്നത് പൊതുജനങ്ങളെ വലയ്ക്കുകയാണ്. കഴിഞ്ഞ ഒരു മാസത്തിനിടെ നിരവധി ദിവസങ്ങളിലാണ് പകൽ സമയങ്ങളിൽ വൈദ്യുതി പൂർണമായും മുടങ്ങിയത്. മുന്പ് പത്രങ്ങളിലൂടെയും മറ്റ് മീഡിയകളിലൂടെയും മുൻകൂട്ടി ഉപഭോക്താക്കൾക്ക് മുന്നറിയിപ്പ് നൽകിയിരുന്നെങ്കിൽ ഇപ്പോൾ ഇതുണ്ടാകാറില്ലെന്ന് നാട്ടുകാർ കുറ്റപ്പെടുത്തുന്നു. പ്രമേഹരോഗികൾക്കുള്ള ഇൻസുലിൻ ഉൾപ്പെടെ പല ഗുരുതര രോഗങ്ങൾക്കുമുള്ള മരുന്നുകൾ കേടുകൂടാതെ ഫ്രിഡ്ജിൽ സൂക്ഷിക്കേണ്ടതുണ്ട്. എന്നാൽ, മുന്നറിയിപ്പില്ലാതെ വൈദ്യുതി മുടങ്ങുന്നതുമൂലം പലരുടെയും ജീവൻരക്ഷാ മരുന്നുകൾ വരെ കേടുവന്ന് നശിക്കുന്നതായി പരാതി ഉയരുന്നുണ്ട്. അതോടൊപ്പം തുടരെ വൈദ്യുതി പോകുകയും വരികയും ചെയ്യുന്നത് വീടുകളിലെ ഗൃഹോപകരണങ്ങൾക്ക് കേടുപാട് സംഭവിക്കാൻ ഇടയാക്കുന്നതായും ആക്ഷേപ്പമുണ്ട്. നിർമാണ പ്രവർത്തനങ്ങൾക്കായി തുടർച്ചയായ സമയങ്ങളിൽ വൈദ്യുതി കട്ട് ചെയ്യുമ്പോൾ ഉപഭോക്താക്കൾക്ക് മുൻകൂട്ടി വ്യക്തമായ സന്ദേശം നൽകണമെന്നും നാട്ടുകാർ ആവശ്യപ്പെടുന്നു. അതേസമയം, പൈങ്ങന മേഖലയിൽ നടക്കുന്ന അറ്റകുറ്റപ്പണികളുടെ ഭാഗമായാണ് പലപ്പോഴും വൈദ്യുതി മുടങ്ങുന്നതെന്നും ഇത് കൃത്യമായി ഉപഭോക്താക്കളെ അറിയിക്കുന്നുണ്ടെന്നുമാണ് കെഎസ്ഇബി ഉദ്യോഗസ്ഥർ പറയുന്നത്.

പൂഞ്ഞാറിൽ ഗ്രാമീണ റോഡുകളുടെ പുനരുദ്ധാരണത്തിന് 79 ലക്ഷം

ഈരാറ്റുപേട്ട: പൂഞ്ഞാർ നിയോജകമണ്ഡലത്തിലെ വിവിധ പഞ്ചായത്തുകളിലായി പ്രളയത്തിൽ തകർന്ന 11 ഗ്രാമീണ റോഡുകളുടെ പുനരുദ്ധാരണ പ്രവൃത്തികൾക്കായി റവന്യു വകുപ്പിന് കീഴിൽ സംസ്ഥാന ദുരന്ത പ്രതികരണനിധിയിൽനിന്ന് 79 ലക്ഷം രൂപ അനുവദിച്ച് ഭരണാനുമതി ലഭിച്ചതായി സെബാസ്റ്റ്യൻ കുളത്തുങ്കൽ എംഎൽഎ അറിയിച്ചു. തിടനാട് പഞ്ചായത്തിലെ കൊണ്ടൂർ-മുക്കാലടിക്കടവ് റോഡ് - 10 ലക്ഷം, പിണ്ണാക്കനാട്-വാരിയാനിക്കാട് റോഡ് - 10 ലക്ഷം, പിണ്ണാക്കനാട്-സിഎംഎസ് കോളനി റോഡ് - ആറു ലക്ഷം, അമ്പാറനിരപ്പേൽ-പരവരാകത്ത് കടവ് റോഡ് - അഞ്ചു ലക്ഷം, കൂട്ടിക്കൽ ഗ്രാമപഞ്ചായത്തിലെ ഗുരുമന്ദിരം-കൂപ്പ് റോഡ് - 10 ലക്ഷം, ഇളംകാട്-ഇളകാട് ടോപ്പ് റോഡ് -10 ലക്ഷം, തീക്കോയി ഗ്രാമപഞ്ചായത്തിലെ വെള്ളികുളം ഗ്രോട്ടോ ജംഗ്ഷൻ-സെന്‍റ് ആന്‍റണീസ് ഹൈസ്കൂൾ റോഡ് - അഞ്ചു ലക്ഷം, ഞണ്ടുകല്ല്-തേവരുപാറ റോഡ് - നാലു ലക്ഷം, കോരുത്തോട് ഗ്രാമപഞ്ചായത്തിലെ കുഴിമാവ് ജംഗ്ഷൻ-കോസ്‌വേ റോഡ് - അഞ്ചു ലക്ഷം, പൂഞ്ഞാർ തെക്കേക്കര ഗ്രാമപഞ്ചായത്തിലെ പൂഞ്ഞാർ എൻജിനിയറിംഗ് കോളജ് ലിങ്ക് റോഡ് - 10 ലക്ഷം, വണ്ടൻപ്ലാവ്-ഇടമല റോഡ് - നാലു ലക്ഷം എന്നിങ്ങനെയാണ് തുക അനുവദിച്ചത്.

കാഞ്ഞിരപ്പള്ളിയിൽ റോഡുകളുടെ റീടാറിംഗിന് 1.60 കോടി

കാഞ്ഞിരപ്പള്ളി: പ്രകൃതിക്ഷോഭത്തില്‍ തകര്‍ന്ന റോഡുകളുടെ പുനരുദ്ധാരണ പദ്ധതിയില്‍പ്പെടുത്തി അറ്റകുറ്റപ്പണികള്‍ നടത്തുന്നതിന് കാഞ്ഞിരപ്പള്ളി നിയോജക മണ്ഡലത്തിലെ വിവിധ റോഡുകള്‍ക്ക് 1.60 കോടി രൂപ അനുവദിച്ചതായി ചീഫ് വിപ്പ് ഡോ. എന്‍. ജയരാജ് അറിയിച്ചു. കാഞ്ഞിരപ്പള്ളി പഞ്ചായത്തിലെ മൂന്നാംമൈല്‍-കോഴിയാനി റോഡ് (10 ലക്ഷം), അടിച്ചിലാവ് മിഷന്‍ പറമ്പ് റോഡ് (10 ലക്ഷം), ആല്‍മാവ്-മരുതോലിപ്പടി റോഡ് (10 ലക്ഷം), പുത്തന്‍പള്ളിപ്പടി-ഗവൺമെന്‍റ് ആശുപത്രിപ്പടി റോഡ് (10 ലക്ഷം), തവിട്ടനാംകുഴി-കുറുങ്കണ്ണി റോഡ് (10 ലക്ഷം), തമ്പലക്കാട്-തൊണ്ടുവേലി റോഡ് (അഞ്ച് ലക്ഷം), പൂതക്കുഴി-ചെക്ക്ഡാം റോഡ് (10 ലക്ഷം), വാഴൂര്‍ പഞ്ചായത്തിലെ പാറാംതോട്-കളപ്പുരയിടം റോഡ് (10 ലക്ഷം), കാപ്പുകാട് പേര്‍ഷ്യന്‍ കോളനി-പതിനഞ്ചാംമൈല്‍ (10 ലക്ഷം), പ്രസ്പടി-മുട്ടമ്പലം റോഡ് (അഞ്ച് ലക്ഷം), മര്‍ത്തോമ്മാ പള്ളി കോണേക്കടവ് റോഡ് (10 ലക്ഷം), ചിറക്കടവ് പഞ്ചായത്തിലെ ചേപ്പുംപാറ-ആനക്കയം റോഡ് (10 ലക്ഷം), നെടുങ്കുന്നം പഞ്ചായത്തിലെ കൊച്ചോലി-മുക്കവല റോഡ് (10 ലക്ഷം), വെള്ളാവൂര്‍ പഞ്ചായത്തിലെ എട്ടാംമൈല്‍-വട്ടക്കാവ് റോഡ് (10 ലക്ഷം), കോത്തലപ്പടി-പുത്തന്‍പീടിക റോഡ് (10 ലക്ഷം), ഷാജിസദനം മുണ്ടോലിക്കടവ് റോഡ് (10 ലക്ഷം) എന്നിങ്ങനെയാണ് തുക അനുവദിച്ചിരിക്കുന്നത്.

കാഞ്ഞിരപ്പള്ളി ബൈപാസിന്‍റെ ബ്ലോക്ക് നീക്കാൻ പുതിയ സർജറി!

കാഞ്ഞിരപ്പള്ളി: കുറെക്കാലമായി ബ്ലോക്കായി നിൽക്കുന്ന കാഞ്ഞിരപ്പള്ളി ബൈപാസിന്‍റെ നിർമാണം മുന്നോട്ടു കൊണ്ടുപോകാൻ അടിയന്തര ശസ്ത്രക്രിയ. ആദ്യം കരാർ ഏറ്റെടുത്ത കന്പനിയെ ഒഴിവാക്കി പുതിയ ടെൻഡർ ക്ഷണിച്ചുകൊണ്ടാണ് നീക്കങ്ങൾ ത്വരിതപ്പെടുത്തിയത്. മെല്ലെപ്പോക്കിനെത്തുടർന്നാണ് ആദ്യ കന്പനിയെ ഒഴിവാക്കാൻ തീരുമാനിച്ചത്. ബൈപാസിനു റീടെൻഡര്‍ ക്ഷണിച്ചതായി ചീഫ് വിപ്പ് ഡോ. എന്‍. ജയരാജ് അറിയിച്ചു. ആദ്യം കരാര്‍ ഏറ്റെടുത്ത കമ്പനിയെ കിഫ്ബി കരാറില്‍നിന്ന് ഒഴിവാക്കി ഉത്തരവായിരുന്നു. തുടര്‍ന്ന് കിഫ്ബിയുടെ പ്രത്യേക ടെക്‌നിക്കല്‍ ഇവാലുവേഷന്‍ കമ്മിറ്റി വിളിച്ചുകൂട്ടി അടിയന്തര പ്രാധാന്യത്തോടെ സാങ്കേതിക അനുമതി ലഭ്യമാക്കാൻ ശ്രമിച്ചതിന്‍റെ ഫലമായിട്ടാണ് ഇപ്പോള്‍ റീ ടെൻഡര്‍ ആയതുമെന്ന് ചീഫ് വിപ്പ് പറഞ്ഞു. 78.69 കോടി 78.69 കോടി രൂപയാണ് പദ്ധതിക്കായി ആകെ ഭരണാനുമതി കിഫ്ബിയില്‍നിന്നു ലഭിച്ചിട്ടുള്ളത്. 24.76 കോടി രൂപ സ്ഥലമേറ്റെടുക്കലിനു ചെലവായി. റോഡ് രൂപീകരിക്കാനും ഫ്ലൈഓവര്‍ നിര്‍മാണത്തിനുമായി ആകെ കണക്കാക്കിയ തുക 26.17 കോടി രൂപയായിരുന്നു. ഇപ്പോള്‍ പുതുക്കിയ നിരക്ക് പ്രകാരം 35.30 കോടി രൂപയാണ് എസ്റ്റിമേറ്റ്. ഡിസംബര്‍ ഒന്നിന് ടെൻഡര്‍ തുറക്കും. എത്രയും വേഗം പദ്ധതി യാഥാർഥ്യമാകാന്‍ എല്ലാ ശ്രമങ്ങളും നടന്നുവരുന്നതായും ചീഫ് വിപ്പ് അറിയിച്ചു. 1.80 കിലോമീറ്റർ ദേശീയപാത 183ല്‍ കാഞ്ഞിരപ്പള്ളി പഞ്ചായത്ത് ഓഫീസിനു മുന്പിലെ വളവില്‍നിന്നാരംഭിച്ച് പൂതക്കുഴിയില്‍ ഫാബീസ് ഓഡിറ്റോറിയത്തിനു സമീപം ദേശീയപാതയില്‍ പ്രവേശിക്കുന്ന ബൈപാസിന്‍റെ ദൂരം 1.80 കിലോമീറ്ററാണ്. ചിറ്റാര്‍ പുഴയ്ക്കും മണിമല റോഡിനും കുറുകെ നിര്‍മിക്കുന്ന പാലത്തിന്‍റെ ദേശീയപാതയ്ക്കു സമീപമുള്ള ആദ്യത്തെ തൂണിന്‍റെ കോണ്‍ക്രീറ്റിംഗ് ആരംഭിച്ചിരുന്നു. നാലു പില്ലറുകളിലായാണ് മേല്‍പ്പാലം നിര്‍മിക്കുന്നത്. ഇതില്‍ രണ്ടെണ്ണത്തിന്‍റെ നിര്‍മാണം നടന്നുകൊണ്ടിരിക്കേയാണ് കരാറുകാരനെ ഒഴിവാക്കിയത്. ദ്രുതഗതിയിൽ നിര്‍ദിഷ്ട പദ്ധതി പ്രദേശത്തെ ഉയര്‍ന്ന ഭാഗം ഇടിച്ചുനിരത്തിയും താഴ്ന്ന ഭാഗങ്ങളില്‍ മണ്ണിട്ടു നികത്തിയും റോഡ് വെട്ടിയിരുന്നു. ദേശീയപാതയിൽനിന്നു ബൈപാസിലേക്കു തിരിയുന്ന പഞ്ചായത്ത് ഓഫീസിനു മുന്പിൽ റൗണ്ടാന നിർമിക്കാനായി മണ്ണും മാറ്റിയിരുന്നു. ഇവിടെനിന്നാണ് മണിമല റോഡിനും ചിറ്റാർപുഴയ്ക്കും മീതയുള്ള മേൽപ്പാലം നിർമിക്കുന്നത്. ബൈപാസ് അവസാനിക്കുന്ന ഫാബീസ് ഓഡിറ്റോറിയത്തിനു സമീപം ടാറിംഗ് ജോലികളുടെ ഭാഗമായി മെറ്റൽ നിരത്തുന്ന പ്രവർത്തനങ്ങളും തുടങ്ങിയിരുന്നു. റോഡ്‌സ് ആന്‍ഡ് ബ്രിഡ്ജസ് ഡെവലപ്‌മെന്‍റ് കോര്‍പറേഷനാണു പദ്ധതിയുടെ നിര്‍മാണച്ചുമതല.

അരുവിത്തുറ കോളജിൽ നിന്നും ഭക്ഷ്യസുരക്ഷാ പരിശീലനം നേടി അധ്യാപക വിദ്യാർഥികൾ

അരുവിത്തുറ: ലോക ഭക്ഷ്യദിനത്തോട് അനുബന്ധിച്ച് അരുവിത്തുറ സെന്‍റ് ജോർജസ് കോളജിലെ ഫുഡ് സയൻസ് ഡിപ്പാർട്ട്മെന്‍റ് സംഘടിപ്പിച്ച ഭക്ഷ്യ സുരക്ഷ പരിശീലന ക്ലാസിൽ പങ്കെടുത്ത് പരിശീലനം നേടി സിപിഎഎസ് കോളജ് ഓഫ് ടീച്ചർ എജുക്കേഷൻ ഈരാറ്റുപേട്ടയിലെ വിദ്യാർഥികൾ. ദൈനംദിന ജീവിതത്തിന്‍റെ ഭാഗമായി ഭക്ഷ്യസുരക്ഷ ഉറപ്പുവരുത്തുകയും "മെച്ചപ്പെട്ട ഭക്ഷണത്തിലൂടെ മെച്ചപ്പെട്ട ഭാവിക്കായി കൈകോർക്കാം' എന്ന ലോക ഭക്ഷ്യദിനത്തിന്‍റെ സന്ദേശം മുൻനിർത്തിയായിരുന്നു പരിശീലനം സംഘടിപ്പിച്ചത്. ഫുഡ് സയൻസ് ഡിപ്പാർട്ട്മെന്‍റിലെ അധ്യാപകനായ ബിൻസ് കെ. തോമസ്, എംഎസ‌്സി ഫുഡ് ടെക്നോളജി വിദ്യാർഥി കെവിൻ തോമസ് മാത്യു, ബിഎസ്‌സി ഫുഡ് സയൻസ് വിദ്യാർഥികളായ അഗസ്റ്റിൻ വടക്കേൽ, എലിസബത്ത് ഷൈജു എന്നിവർ ക്ലാസുകൾ നയിച്ചു. പരിശീലന പരിപാടിയിൽ പങ്കെടുത്തവർക്കുള്ള സർട്ടിഫിക്കറ്റുകൾ അരുവിത്തുറ സെന്‍റ് ജോർജസ് കോളജ് പ്രിൻസിപ്പൾ പ്രഫ.ഡോ. സിബി ജോസഫ് വിതരണം ചെയ്തു.

പായിപ്പാട് പഞ്ചായത്ത് വികസനസദസ് സംഘടിപ്പിച്ചു

പായിപ്പാട്: പായിപ്പാട് പഞ്ചായത്തിലെ വികസനസദസ് ജോബ് മൈക്കിള്‍ എംഎല്‍എ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് കെ.ഡി. മോഹനന്‍ അധ്യക്ഷത വഹിച്ചു. ജില്ലാ പഞ്ചായത്തംഗം മഞ്ജു സുജിത്ത് മുഖ്യപ്രഭാഷണം നടത്തി. സംസ്ഥാന സര്‍ക്കാരിന്‍റെ വികസന പ്രവര്‍ത്തനങ്ങള്‍ റിസോഴ്സ് പേഴ്സണ്‍ കെ.കെ. മിനിയും പഞ്ചായത്തിന്‍റെ വികസന നേട്ടങ്ങള്‍ പഞ്ചായത്ത് സെക്രട്ടറി കെ. ജയസിംഹനും അവതരിപ്പിച്ചു. പായിപ്പാട് പഞ്ചായത്ത് വൈസ് പ്രസിഡന്‍റ് ഷൈനി ജോജോ, അനിജ ലാലന്‍, എബി വര്‍ഗീസ്, ജയന്‍ ഗോപാലന്‍, സിബിച്ചന്‍ ഒട്ടത്തില്‍, ആനി രാജു, ഗീതാ ശശിധരന്‍, ഗീതാ തോമസ്, ടി.കെ. കരുണാകരന്‍, മാടപ്പള്ളി ബ്ലോക്ക് പഞ്ചായത്ത് സെക്രട്ടറി കെ. വിനോദ് എന്നിവര്‍ പ്രസംഗിച്ചു.

കുറിച്ചിയില്‍ പൊടിപ്പാറ കുടിവെള്ള പദ്ധതി ആരംഭിച്ചു

കുറിച്ചി: കുറിച്ചി പഞ്ചായത്ത് പന്ത്രണ്ടാം വാര്‍ഡില്‍ പൊടിപ്പാറ കുടിവെള്ള പദ്ധതി ജോബ് മൈക്കിള്‍ എംഎല്‍എ ഉദ്ഘാടനം ചെയ്തു. പഞ്ചായത്ത് 2023-24 വികസന ഫണ്ടില്‍നിന്ന് അഞ്ച്‌ലക്ഷം രൂപ വകയിരുത്തി ആരംഭിച്ച പദ്ധതി കേരള സംസ്ഥാന ഭൂജല വകുപ്പില്‍നിന്ന് അഞ്ച് ലക്ഷം രൂപകൂടി ലഭ്യമാക്കി ആകെ 10 ലക്ഷം രൂപ മുടക്കിയാണ് പദ്ധതി നടപ്പാക്കിയത്. 42 കുടുംബങ്ങള്‍ക്ക് കുടിവെള്ളം ലഭ്യമാകും. പഞ്ചായത്ത് പ്രസിഡന്‍റ് സുജാത സുശീലന്‍ അധ്യക്ഷത വഹിച്ചു. പള്ളം ബ്ലോക്ക് പഞ്ചായത്ത് പ്രസിഡന്‍റ് പ്രഫ. ടോമിച്ചന്‍ ജോസഫ് മുഖ്യപ്രഭാഷണം നടത്തി. പള്ളം ബ്ലോക്ക് പഞ്ചായത്തംഗം ഷീലമ്മ ജോസഫ്, വാര്‍ഡ് മെമ്പര്‍ ബിജു എസ്. മേനോന്‍, പഞ്ചായത്തംഗം അഭിജിത്ത് മോഹനന്‍, ഇത്തിത്താനം ജനതാ സര്‍വീസ് സഹകരണ ബാങ്ക് പ്രസിഡന്‍റ് പി.കെ. അനില്‍കുമാര്‍, ജോസുകുട്ടി കണ്ണന്തറ എന്നിവര്‍ പ്രസംഗിച്ചു.

ചാരിറ്റി വേള്‍ഡിന്‍റെ അന്നദാന വിതരണം പത്താം വര്‍ഷത്തിലേക്ക്

ചങ്ങനാശേരി: ജനറല്‍ ആശുപത്രിയിലെ രോഗികള്‍ക്കും കൂട്ടിരിപ്പുകാര്‍ക്കുമായി ചങ്ങനാശേരി അതിരൂപതയുടെ കീഴിലുള്ള ജീവകാരുണ്യപ്രസ്ഥാനമായ ചാരിറ്റി വേള്‍ഡിന്‍റെ സൗജന്യ ഉച്ചഭക്ഷണ വിതരണ പരിപാടി പത്താംവര്‍ഷത്തിലേക്ക്. സുമനസുകളായ ഇരുനൂറോളം പേരാണ് ഭക്ഷണ വിതരണത്തിനുള്ള ആഹാരസാധനങ്ങള്‍ സ്‌പോണ്‍സര്‍ ചെയ്യുന്നത്. ദിവസവും മുന്നൂറോളം പേര്‍ക്കാണ് ആഹാരം വിതരണം ചെയ്യുന്നത്. എട്ടുപേരാണ് മുടങ്ങാതെ ദിവസവും ജനറല്‍ ആശുപത്രിയില്‍ ഭക്ഷണം വിളമ്പുന്നത്.ലോകഭക്ഷ്യദിനത്തോടനുബന്ധിച്ച് ചാരിറ്റി വേള്‍ഡ് ചങ്ങനാശേരി നിയോജക മണ്ഡലത്തിലെ പതിനഞ്ചോളം അഗതിമന്ദിരങ്ങളിലേക്ക് സൗജന്യ ഭക്ഷ്യകിറ്റുകള്‍ വിതരണം ചെയ്തു. കിറ്റുകള്‍ എത്തിക്കുന്ന വണ്ടിയുടെ ഫ്ലാഗ് ഓഫ് കര്‍മം ജോബ് മൈക്കിള്‍ എംഎല്‍എ നിര്‍വഹിച്ചു. മീഡിയാ വില്ലേജ് ഗ്രൂപ്പ് ഓഫ് ഇന്‍സ്റ്റിറ്റ്യൂഷന്‍സ് എക്‌സിക്യൂട്ടീവ് ഡയറക്ടര്‍ ഫാ. ജോഫി പുതുപ്പറമ്പ് അധ്യക്ഷനായിരുന്നു. ചാരിറ്റി വേള്‍ഡ് ഡയറക്ടര്‍ ഫാ. ലിബിന്‍ തുണ്ടുകളം, വാര്‍ഡ് കൗണ്‍സിലര്‍ ബീനാ ജോബി, ആശുപത്രി സൂപ്രണ്ട് ഡോ. അനില്‍കുമാര്‍, മര്‍ച്ചന്‍റ്സ് അസോസിയേഷന്‍ പ്രസിഡന്‍റ് ജോണ്‍സന്‍ ജോസഫ്, അനിമേറ്റര്‍ സിസ്റ്റര്‍ ജാന്‍സി ഓണംകുളം, അന്നദാനം എക്‌സിക്യൂട്ടീവ് കമ്മിറ്റി അംഗങ്ങളായ സി.ജെ. ജോസ്ഥ്, ജോണ്‍സന്‍ പെരുമ്പായില്‍ എന്നിവര്‍ പ്രസംഗിച്ചു.

ലോറിയുമായി കൂട്ടിയിടിച്ച കാര്‍ ചതുപ്പിൽ വീണു

ചങ്ങനാശേരി: എംസി റോഡില്‍ പാലാത്രച്ചിറയ്ക്ക് സമീപം ലോറിയുമായി കൂട്ടിയിടിച്ച കാര്‍ ചതുപ്പിലേക്ക് വീണു. ഇന്നലെ പുലര്‍ച്ചെയാണ് സംഭവം. തമിഴ്‌നാട് സ്വദേശികള്‍ സഞ്ചരിച്ച കാറാണ് അപകടത്തില്‍പ്പെട്ടത്. യാത്രക്കാര്‍ നിസാര പരിക്കുകളോടെ രക്ഷപ്പെട്ടു.

ജപമാലറാലി നാളെ പാറേല്‍ പള്ളിയിലേക്ക്

ചങ്ങനാശേരി: ആലപ്പുഴ പുന്നപ്ര ഐഎംഎസ് ധ്യാനഭവനില്‍നിന്നു പാറേല്‍ മരിയന്‍ തീര്‍ഥാടന കേന്ദ്രത്തിലേക്ക് നാളെ ജപമാലറാലി നടക്കും. പുലര്‍ച്ചെ 4.30ന് ഐഎംഎസില്‍നിന്നാരംഭിക്കുന്ന റാലി ഉച്ചയ്ക്ക് 12.30ന് പാറേല്‍ പള്ളിയില്‍ എത്തിച്ചേരും. ഐഎംഎസ് ധ്യാനകേന്ദ്രം ഡയറക്ടര്‍ ഫാ. പ്രശാന്ത് റാലി നയിക്കും. ആര്‍ച്ച്ബിപ് മാര്‍ തോമസ് തറയില്‍ സന്ദേശം നല്‍കും. വികാരി ഫാ. ജേക്കബ് വാരിക്കാട്ട് വിശുദ്ധകുര്‍ബാന അര്‍പ്പിക്കും. ഫാ. തോമസ് പുത്തന്‍പുരയ്ക്കല്‍ സന്ദേശം നല്‍കും.

നാലുകോടി സെന്‍റ് തോമസ് പള്ളിയില്‍ തിരുനാള്‍

നാലുകോടി: നാലുകോടി സെന്‍റ് തോമസ് പള്ളിയില്‍ വിശുദ്ധ യൂദാശ്ലീഹായുടെ തിരുനാള്‍ ഇന്നു മുതല്‍ 26 വരെ ആഘോഷിക്കും. ഇന്നു വൈകുന്നേരം 4.45 ന് വികാരി ഫാ. സഖറിയാസ് കരിവേലില്‍ കൊടിയേറ്റുകര്‍മം നിര്‍വഹിക്കും. ഫാ. സെബാസ്റ്റ്യന്‍ പുന്നശേരി വിശുദ്ധകുര്‍ബാന അര്‍പ്പിക്കും. 26വരെ ദിവസങ്ങളില്‍ രാവിലെ ആറിനും 10നും വൈകുന്നേരം 4.30നും മധ്യസ്ഥ പ്രാര്‍ഥന, വിശുദ്ധകുര്‍ബാന. വിവിധ ദിവസങ്ങളില്‍ ഫാ. ടോണി കൊച്ചുമലയില്‍, ഫാ. ബോണി ചോരേട്ട്, ഫാ. മോട്ടിലാല്‍ വേഷ്ണാല്‍, ഫാ. പ്രിന്‍സ് എതിരേറ്റുകുടിലില്‍, ഫാ. സോണി ഇടശേരില്‍, ഫാ. സാം കായലിപറമ്പില്‍, ഫാ. ജോജോ പള്ളിച്ചിറ, ഫാ. ജോണിക്കുട്ടി തറക്കുന്നേല്‍, ഫാ. സഖറിയാസ് കുന്നക്കാട്, ഫാ. ജയിംസ് കുന്നില്‍, ഫാ. ജോസഫ്കുട്ടി നെടുമ്പറമ്പില്‍, ഫാ. റെനി കളത്തില്‍, ഫാ. റോജിന്‍ തുണ്ടിപ്പറമ്പില്‍, ഫാ. ജോമോന്‍ കടപ്രാക്കുന്നേല്‍, ഫാ. പയസ് പായിക്കാട്ടുമറ്റത്തില്‍, ഫാ. എല്‍ജിന്‍ മടിക്കിയാങ്കല്‍ എന്നിവര്‍ വിശുദ്ധകുര്‍ബാന അര്‍പ്പിക്കും. പ്രധാന തിരുനാള്‍ ദിനമായ 26ന് രാവിലെ 5.30നും 7.30നും പത്തിനും വൈകുന്നേരം 3.45നും വിശുദ്ധകുര്‍ബാന. ഫാ. റോബിന്‍ അനന്തക്കാട്ട്, മോണ്‍.മാത്യു ചങ്ങങ്കരി, ഫാ. ലിജിന്‍ മൂഴിയില്‍, ഫാ. സെബാസ്റ്റ്യന്‍ ചാമക്കാല എന്നിവര്‍ വിശുദ്ധകുര്‍ബാന അര്‍പ്പിക്കും. അഞ്ചിന് പ്രദക്ഷിണം, കൊടിയിറക്ക്, ആകാശവിസ്മയം.

നെടുംകുന്നം-മാന്തുരുത്തി റോഡ് നവീകരണത്തിന് 4.69 കോടി അനുവദിച്ചു

നെടുംകുന്നം: മാന്തുരുത്തി-നെടുങ്കുന്നം റോഡ് ബിഎം ബിസി നവീകരണത്തിന് നാല് കോടി 69 ലക്ഷം രൂപയുടെ പുതുക്കിയ ഭരണാനുമതിയായതായി ചീഫ് വിപ്പ് ഡോ.എന്‍. ജയരാജ് അറിയിച്ചു. 2019 -20 ബജറ്റില്‍ ഉള്‍പ്പെടുത്തി 3.50 കോടി രൂപ അനുവദിച്ചിരുന്നു എങ്കിലും മാന്തുരുത്തി ഭാഗത്തെ സംരക്ഷണഭിത്തിയുടെ ഡിസൈന്‍ നടപടികള്‍ വൈകിയതിനാല്‍ തുടര്‍നടപടികള്‍ സാധിച്ചിരുന്നില്ല. തുടര്‍ന്ന് ചീഫ് ടെക്‌നിക്കല്‍ എക്‌സാമിനറുടെ നേരിട്ടുള്ള പരിശോധനയിലാണ് സാങ്കേതികത്വം പരിഹരിച്ചത്. അതിന്‍റെ അടിസ്ഥാനത്തില്‍ നാല് കോടി അഞ്ച് ലക്ഷം രൂപയുടെ ഭരണാനുമതി ലഭ്യമാക്കി. തുടര്‍ന്ന് ജൽജീവന്‍ മിഷന്‍ പദ്ധതിയുടെ ഭാഗമായുള്ള പൈപ്പ് ലൈന്‍ സ്ഥാപിക്കുന്നതിന് റോഡ് വാട്ടര്‍ അഥോറിറ്റിക്ക് വിട്ടുകൊടുത്തതിനാല്‍ ആ നിര്‍മാണ പ്രവൃത്തിയും ആരംഭിക്കാന്‍ സാധിച്ചിരുന്നില്ല. പ്രസ്തുത പ്രവൃ‍ത്തി പൂര്‍ത്തീകരിച്ച് പൊതുമരാമത്ത് വകുപ്പിന് തിരികെ ലഭിച്ചിരുന്നു. ഇപ്പോഴത്തെ പുതുക്കിയ നിരക്കില്‍ അന്തിമ ഉത്തരവിന് നടത്തിയ ശ്രമങ്ങളുടെ അടിസ്ഥാനത്തിലാണ് ഇപ്പോള്‍ പുതുക്കിയ ഭരണാനുമതി ലഭിച്ചത്. മറ്റ് തടസങ്ങളൊന്നും വരാതെ ഉടന്‍ ടെണ്ടര്‍ നടപടികളിലേക്ക് കടന്ന് നിര്‍മാണം ആരംഭിക്കാനാകുമെന്ന് പ്രതീക്ഷിക്കുന്നതായും ചീഫ് വിപ്പ് അറിയിച്ചു.

വാഴപ്പള്ളിയിൽ വാശിയേറും പോരാട്ടം

ചങ്ങനാശേരി നഗരസഭയോടു ചേര്‍ന്നു ചുറ്റിപ്പടര്‍ന്നുകിടക്കുന്ന പഞ്ചായത്ത്. വാഴപ്പള്ളി പടിഞ്ഞാറ്, വാഴപ്പള്ളി കിഴക്കു വില്ലേജുകള്‍ ചേര്‍ന്നതാണ്. വാഴപ്പള്ളി ശാസനം കണ്ടുകിട്ടിയത് വാഴപ്പള്ളി മഹാദേവര്‍ ക്ഷേത്രത്തില്‍നിന്നുമാണ്. പഞ്ചായത്ത് ഓഫീസ് സ്ഥിതി ചെയ്യുന്നത് ചെത്തിപ്പുഴയിലാണെങ്കിലും തെങ്ങണയ്ക്കടുത്ത് കണ്ണവട്ട തോടിനു സമീപം ആരംഭിച്ച് ചീരഞ്ചിറ, ഇടത്തറക്കടവ്, പുതുച്ചിറ, ഏനാചിറ, വടക്കേക്കര, തുരുത്തിയിലെത്തി അപ്പര്‍ കുട്ടനാടന്‍ അതിര്‍ത്തികളായ നീലംപേരൂര്‍, മുളയ്ക്കാംതുരുത്തി പ്രദേശങ്ങളും പറാലും വെട്ടിത്തുരുത്തും ഉള്‍പ്പെടുന്ന കരപ്രദേശവും താലൂക്കില്‍ ഏറ്റവും കൂടുതല്‍ നെല്‍കൃഷിയുള്ള പുഞ്ചപ്പാടങ്ങളും നിറഞ്ഞ പ്രദേശം. ഒറ്റനോട്ടത്തിൽ ആകെ ജനസംഖ്യ 41216. പുരുഷന്‍-19463. സ്ത്രീ-21753. വെരൂര്‍ ഇന്‍ഡസ്ട്രിയല്‍ എസ്റ്റേറ്റ് ഈ പഞ്ചായത്ത് പരിധിയിലാണ്. 21 വാര്‍ഡുകളായിരുന്ന വാഴപ്പള്ളി പുനര്‍ വിഭജനത്തിലൂടെ 22 വാര്‍ഡുകളായി വളര്‍ന്നു. കഴിഞ്ഞ കാല്‍ നൂറ്റാണ്ടായി പഞ്ചായത്ത് യുഡിഎഫ് ഭരണത്തിൽ. കക്ഷിനില കോണ്‍ഗ്രസ്-എട്ട്, കേരള കോണ്‍ഗ്രസ്-അഞ്ച്, സിപിഎം-നാല് കേരള കോണ്‍. എം-രണ്ട് എല്‍ഡിഎഫ് സ്വതന്ത്രര്‍-രണ്ട് നേട്ടങ്ങള്‍ 140 ലൈഫ് വീടുകള്‍ പൂര്‍ത്തിയാക്കി. 21 വാര്‍ഡുകളിലും റോഡുകള്‍ നവീകരിച്ചു. ജല്‍ജീവന്‍ മിഷന് 13.50 കോടി. പുതുച്ചിറ പ്രൈമറി ഹെല്‍ത്ത് സെന്‍റര്‍ കുടുംബാരോഗ്യകേന്ദ്രമാക്കി. ആയുര്‍വേദാശുപത്രി മികച്ച നിലവാരത്തിൽ. മൂന്ന് അങ്കണവാടി കെട്ടിടത്തിനു സ്വന്തമായി സ്ഥലം.രണ്ടാം വാര്‍ഡ് തുരുത്തിയില്‍ അങ്കണവാടി കെട്ടിടം. പത്താം വാര്‍ഡില്‍ അങ്കണവാടി കെട്ടിടം പൂര്‍ത്തിയാകുന്നു. ഹരിതകര്‍മസേനയ്ക്ക് ചീരഞ്ചിറയില്‍ 28 സെന്‍റ് സ്ഥലം വാങ്ങി. 1.50 കോടി മുടക്കി കെട്ടിടവും അനുബന്ധസംവിധാനങ്ങളും സജ്ജമാക്കി. ചീരഞ്ചിറയില്‍ 13 ലക്ഷം മുടക്കി സങ്കേതം ഓഡിറ്റോറിയം. പറാലില്‍ കുടുംബാരോഗ്യകേന്ദ്രം സബ്സെന്‍ററിന് അനുമതി. മിനി വിജയകുമാര്‍ ഗ്രാമപഞ്ചായത്ത് പ്രസിഡന്‍റ് കോട്ടങ്ങള്‍ പഞ്ചായത്ത് ഫണ്ട് വീതം വയ്ക്കുന്നതില്‍ നീതി പുലര്‍ത്തിയില്ല. രണ്ടായിരത്തിലധികം വീടുകള്‍ പഞ്ചായത്തു രേഖകളില്‍നിന്ന് ഇല്ലാതായിട്ട് പരിഹരിച്ചില്ല. ജനങ്ങള്‍ക്കു സേവനങ്ങള്‍ ലഭിക്കുന്നതില്‍ കാലതാമസം. എല്ലാ മേഖലകളിലും കുടിവെള്ളം എത്തിക്കുന്നതില്‍ പരാജയം. സംസ്ഥാന സര്‍ക്കാര്‍, എന്‍ആര്‍എച്ച്എം ഫണ്ട് ഉപയോഗിച്ച് പിഎച്ച്സിയെ എഫ്എച്ച്സിയാക്കിയതു മാത്രം വികസനം. പഞ്ചായത്തിന് കീഴിലുള്ള സ്‌കൂളുകള്‍ക്ക് അവഗണന. അങ്കണവാടികളുടെ ശോച്യാവസ്ഥ പരിഹരിച്ചില്ല. അനിതാ സാബു (എല്‍ഡിഎഫ് പാര്‍ലന്‍ററി പാര്‍ട്ടി ലീഡര്‍)

ഏറ്റുമാനൂർ ക്ഷേത്രത്തിലെ ദുരൂഹമായ തീപിടിത്തം അന്വേഷിക്കണം: നാട്ടകം സുരേഷ്

ഏറ്റുമാനൂർ: ഏറ്റുമാനൂർ മഹാദേവ ക്ഷേത്രത്തിൽ നടന്ന ദുരൂഹമായ തീപിടിത്തങ്ങളെക്കുറിച്ച് അന്വേഷണം നടത്തണമെന്ന് ഡിസിസി പ്രസിഡന്‍റ് നാട്ടകം സുരേഷ് ആവശ്യപ്പെട്ടു. മഹാദേവക്ഷേത്രത്തിലെ ഏറ്റവും പവിത്രമായ ഏഴരപ്പൊന്നാനയെ പുറത്തുകൊണ്ടുപോകാനുള്ള ശ്രമം ഭക്തജനങ്ങളുടെ എതിർപ്പിനെത്തുടർന്ന് നടക്കാതെ പോകുകയായിരുന്നു. വിവാദത്തിൽപ്പെട്ട ഉദ്യോഗസ്ഥന്‍റെ കാലത്താണിത്. താത്കാലിക ജീവനക്കാരനായി ദേവസ്വത്തിൽ എത്തിയ ഈ ഉദ്യോഗസ്ഥൻ എങ്ങനെ ഉന്നത സ്ഥാനത്തെത്തിയെന്നതിലും അന്വേഷണം വേണം. ക്ഷേത്രത്തിൽ തുടർച്ചയായി ആചാരലംഘനം നടക്കുന്നു. ഉത്സവത്തിനുള്ള കൊടിക്കൂറയും കൊടിക്കയറും ഏറ്റുവാങ്ങേണ്ടത് ആചാര വിധിപ്രകാരം തന്ത്രിയാണ്. എന്നാൽ ഇപ്പോൾ തന്ത്രിക്കു പകരം മന്ത്രിയാണ് ഏറ്റുവാങ്ങുന്നതെന്ന് നാട്ടകം സുരേഷ് പറഞ്ഞു.

മാത്താംകരി എ പാടശേഖരത്ത് ഡ്രോണ്‍ ഉപയോഗിച്ച് സമ്പൂര്‍ണ മള്‍ട്ടിമിക്‌സ് തളിച്ചു

കടുത്തുരുത്തി: കാര്‍ഷിക വികസന കര്‍ഷകക്ഷേമ വകുപ്പ് കടുത്തുരുത്തി കൃഷിഭവന്‍ ആത്മ പദ്ധതിയില്‍ ഉള്‍പ്പെടുത്തി മാത്താംകരി എ പാടശേഖരത്ത് ഡ്രോണ്‍ ഉപയോഗിച്ച് സമ്പൂര്‍ണ മള്‍ട്ടി മിക്‌സ് തളിച്ചു. അഞ്ച് ഏക്കര്‍ സ്ഥലത്താണ് ഡ്രോണ്‍ ഉപയോഗിച്ചു മള്‍ട്ടിമിക്‌സ് തളിച്ചത്. നെല്‍ച്ചെടിയിലെ സൂക്ഷ്മ മൂലകങ്ങളുടെ അഭാവം പരിഹരിച്ചു നല്ല രീതിയിലുള്ള കായിക വളര്‍ച്ചയ്ക്കും ഉത്പാദന വര്‍ധനവിനും രോഗ കീടാക്രമണം കുറയ്ക്കുന്നതിനും സഹായിക്കുന്നതിനായി കേരള കാര്‍ഷിക സര്‍വകലാശാല പുറത്തിറക്കിയ സൂക്ഷ്മ മൂലക മിശ്രിതമാണ് സമ്പൂര്‍ണ മള്‍ട്ടി മിക്‌സ്. പടശേഖര സമിതിയംഗം ശ്രീജ ജോയ് തൈമൂട്ടില്‍, കൃഷി ഓഫീസര്‍ ആര്‍. സിദ്ധാര്‍ഥ, വാര്‍ഡ് മെമ്പര്‍ പൗളി ജോര്‍ജ് തുടങ്ങിയവര്‍ പ്രസംഗിച്ചു. മാത്താംകരി പടശേഖര സമിതിയംഗങ്ങള്‍, കൃഷി അസിസ്റ്റന്‍റ് പി.പി. ബിജു, ആത്മ ബിഡിഎം പി.യു. ജിയോമോള്‍, ആത്മ എഡിഎം ടി.എസ്. ശ്രീജാമോള്‍ തുടങ്ങിയവര്‍ പങ്കെടുത്തു.

കുന്നപ്പള്ളി -പാറശേരി റോഡ് നവീകരണത്തിന് 20 ലക്ഷം അനുവദിച്ചു

പെരുവ: പൊതുമരാമത്ത് വകുപ്പ് കടുത്തുരുത്തി നിയോജകമണ്ഡലത്തില്‍ നടപ്പാക്കുന്ന റണ്ണിംഗ് കോണ്‍ട്രാക്ട് പദ്ധതിയില്‍ ഉള്‍പ്പെടുത്തി കുന്നപ്പള്ളി-പാറശേരി റോഡ് നവീകരണത്തിന് 20 ലക്ഷം രൂപയുടെ വികസനപദ്ധതി നടപ്പാക്കാന്‍ നടപടി സ്വീകരിച്ചതായി മോന്‍സ് ജോസഫ് എംഎല്‍എ അറിയിച്ചു. തലയോലപ്പറമ്പ് റോഡ്‌സ് സെക്‌ഷനു കീഴില്‍ റീടാറിംഗ് ജോലികള്‍ ആരംഭിച്ച് ഒരാഴ്ചയ്ക്കുള്ളില്‍ പണികൾ പൂര്‍ത്തീകരിക്കുന്നതിനാണ് തീരുമാനിച്ചിട്ടുള്ളത്. അറുനൂറ്റിമംഗലം-കുന്നപ്പള്ളി റോഡിന്‍റെ അറ്റകുറ്റപ്പണികള്‍ നടത്തി സഞ്ചാരയോഗ്യമാക്കും. പെരുവ-ശാന്തിപുരം-മരങ്ങോലി-മോനിപ്പള്ളി റോഡിന്‍റെ അറ്റകുറ്റപ്പണികള്‍ പൂര്‍ത്തീകരിച്ചു റോഡ് സഞ്ചാരയോഗ്യമാക്കിയതായും എംഎല്‍എ അറിയിച്ചു.

വാക്കേത്തറ-കപിക്കാട് റോഡ് നിര്‍മാണത്തിന് 25.02 കോടി രൂപ

വൈക്കം: കല്ലറ, തലയാഴം പഞ്ചായത്തുകളിലൂടെ കടന്നുപോകുന്ന വാക്കേത്തറ-കപിക്കാട് റോഡ് നിര്‍മാണ പ്രവൃത്തികള്‍ക്കായി കിഫ്ബിയില്‍നിന്ന് 25.02 കോടി രൂപയുടെ അന്തിമ സാമ്പത്തിക അനുമതി ലഭിച്ചതായി സി.കെ.ആശ എംഎല്‍എ. 2024മാര്‍ച്ചിൽ ഈ റോഡ് നിര്‍മാണത്തിനായി കിഫ്ബിയില്‍നിന്ന് 19.64 കോടി രൂപ അനുവദിച്ചിരുന്നു. എന്നാല്‍ വാക്കേത്തറ പാലത്തിന്‍റെ സമീപന പാതയുടെ നിര്‍മാണവുമായി ബന്ധപ്പെട്ടുണ്ടായ സാങ്കേതിക പ്രശ്‌നങ്ങളാൽ റോഡ് നിര്‍മാണം വൈകി. ഈ പ്രശ്‌നങ്ങള്‍ പരിഹരിച്ചു പുതുക്കിയ ഡിസൈനിലെ സമീപനപാതയുടെ നിര്‍മാണമടക്കം ഉള്‍ക്കൊള്ളിച്ചാണ് 25.02 കോടി രൂപയുടെ പുതുക്കിയ സാമ്പത്തികാനുമതി ലഭിച്ചത്. കിഫ്ബി-കെആര്‍എഫ്ബി ഉന്നത ഉദ്യോഗസ്ഥ തലത്തില്‍ എംഎല്‍എ വിളിച്ചുചേര്‍ത്ത യോഗങ്ങള്‍ക്കും സമ്മര്‍ദങ്ങള്‍ക്കും ഒടുവിലാണ് തുക അനുവദിച്ച് ഉത്തരവായത്. 2016-17 സാമ്പത്തിക വര്‍ഷത്തിലെ ബജറ്റ് പ്രഖ്യാപനം കല്ലറ-കപിക്കാട്-വാക്കേത്തറ റോഡ് ഭൂമി ഏറ്റെടുക്കലുമായി ബന്ധപ്പെട്ട് ഉയര്‍ന്നുവന്ന സാങ്കേതിക പ്രശ്നങ്ങളെത്തുടര്‍ന്ന് തടസപ്പെട്ടിരുന്നു. വിഷയത്തില്‍ സി.കെ.ആശ എംഎല്‍എയുടെ നിരന്തരമായ ഇടപെടലിനെത്തുടര്‍ന്ന് ഭൂമി ഏറ്റെടുക്കല്‍ അപ്രായോഗികമാണെന്ന് കണ്ടെത്തിയ തോട്ടകം-വാക്കേത്തറ, കല്ലറ-കപിക്കാട് റീച്ചുകള്‍ ഒഴിവാക്കി വാക്കേത്തറ-കപിക്കാട് റോഡ് മെച്ചപ്പെടുത്തലെന്നു പേരു മാറ്റിയാണ് പദ്ധതി മുന്നോട്ടുപോയത്. കേരള റോഡ് ഫണ്ട് ബോര്‍ഡ് (കെആര്‍എഫ്ബി) സമര്‍പ്പിച്ച വിശദമായ നിര്‍ദേശങ്ങള്‍ക്കനുസരിച്ച് 5.775 കിലോമീറ്റര്‍ നീളത്തിലും മൂന്നു മീറ്റര്‍ വീതിയിലുമായി ഉന്നത നിലവാരത്തിലുള്ള റോഡ് നിര്‍മാണത്തിനാണ് കിഫ്ബി തുക അനുവദിച്ചിട്ടുള്ളത്. കെആര്‍എഫ്ബി ഡ്െ്പോസിറ്റ് വര്‍ക്ക് എന്ന രീതിയിലാണ് റോഡിന്‍റെ നിര്‍മാണ നിര്‍വഹണം നടത്തുക. നിര്‍മാണം പൂര്‍ത്തീകരിക്കുന്നതോടെ ഒരു പ്രദേശത്തെ കാലങ്ങളായുള്ള യാത്രാ ദുരിതത്തിനു പരിഹാരമാകും. ടെണ്ടര്‍ നടപടികള്‍ പൂര്‍ത്തിയാക്കി റോഡു നിര്‍മാണം ആരംഭിക്കാന്‍ ആവശ്യമായ നടപടികള്‍ സ്വീകരിക്കുമെന്ന് സി.കെ.ആശ എംഎല്‍എ അറിയിച്ചു.

ആയാംകുടി മലപ്പുറം പള്ളിയില്‍ തിരുനാളിനു കൊടിയേറി

കടുത്തുരുത്തി: ആയാംകുടി മലപ്പുറം പള്ളിയില്‍ വിശുദ്ധ അമ്മത്രേസ്യയുടെ തിരുനാളിന് കൊടിയേറി. മോണ്‍ ഡോ. ജോസഫ് കണിയോടിക്കല്‍ കാര്‍മികത്വം വഹിച്ചു. ഇന്നു വൈകുന്നേരം 4.30 ന് ജപമാല, അഞ്ചിന് സുറിയാനി പാട്ടുകുര്‍ബാന-ഫാ.സിറില്‍ തോമസ് തയ്യില്‍, സെമിത്തേരി സന്ദര്‍ശനം, ഒപ്പീസ്, സ്നേഹവിരുന്ന്, 7.30 ന് നാടകം. നാളെ വൈകുന്നേരം 5.30ന് ജപമാല, ആറിന് വിശുദ്ധ കുര്‍ബാന, ലദീഞ്ഞ്-ഫാ.മാത്യു ചെന്നകുടി എസ്‌വിഡി, ആറിന് ലദീഞ്ഞ്-ഫാ.പോള്‍ ചാലാവീട്ടില്‍, തുടര്‍ന്ന് പ്രദക്ഷിണം, 8.40ന് പ്രസംഗം-റവ.ഡോ. ഏബ്രഹാം പാലയ്ക്കാത്തടത്തില്‍, ഒമ്പതിന് വിശുദ്ധ കുര്‍ബാനയുടെ ആശീര്‍വാദം. 19നു രാവിലെ 5.30ന് ജപമാല, വിശുദ്ധ കുര്‍ബാന, ലദീഞ്ഞ്-ഫാ.തോമസ് ചില്ലയ്ക്കല്‍, 7.30 ന് വിശുദ്ധ കുര്‍ബാന, ലദീഞ്ഞ്-റവ.ഡോ. ജോസഫ് മഠത്തിപ്പറമ്പില്‍, പത്തിന് തിരുനാള്‍ റാസ-ഫാ.സെബാസ്റ്റ്യന്‍ വേലംപറമ്പില്‍, ഫാ.മാത്യു ചെന്നകുടി എസ്‌വിഡി, സന്ദേശം-ഫാ.ജോസഫ് അരി മുറ്റത്ത്, 12.30 ന് പ്രദക്ഷിണം, സമാപനാശീര്‍വാദം, തിരുശേഷിപ്പ് ചുംബനം, ആറിന് കൊടിയിറക്കല്‍. 20 മുതല്‍ 31 വരെ രാവിലെ 5.30ന് ജപമാല, വിശുദ്ധ കുര്‍ബാന. 31നു രാവിലെ ഏഴിന് അഖണ്ഡ ജപമാല, വൈകുന്നേരം 5.30ന് വിശുദ്ധ കുര്‍ബാന, ഏഴിന് ജപമാല പ്രദക്ഷിണം, തുടര്‍ന്ന് നവീകരിച്ച വെബ്സൈറ്റിന്‍റെ പ്രകാശനവും കമ്പ്യൂട്ടറൈസേഷന്‍ ഉദ്ഘാടനവും-ഫാ.സിറിയക് കൊച്ചുകൈപ്പെട്ടിയില്‍, എട്ടിന് സ്നേഹവിരുന്ന്.

സംവരണ വാര്‍ഡുകള്‍: ഗ്രാമപഞ്ചായത്തുകളിലെ നറുക്കെടുപ്പു പൂര്‍ത്തിയായി

കോട്ടയം: തദ്ദേശ സ്വയംഭരണ തെരഞ്ഞെടുപ്പിനു മുന്നോടിയായി ജില്ലയിലെ ഗ്രാമപഞ്ചായത്തുകളിലെയും നഗരസഭകളിലെയും സംവരണ വാര്‍ഡ് നിര്‍ണയം പൂര്‍ത്തിയായി. വാഴൂര്‍, കാഞ്ഞിരപ്പള്ളി, പള്ളം ബ്ലോക്കുകളില്‍ വരുന്ന ഗ്രാമപഞ്ചായത്തുകളിലെ സംവരണ വാര്‍ഡുകള്‍ ജില്ലാ കളക്ടര്‍ ചേതന്‍കുമാര്‍ മീണയുടെ നേതൃത്വത്തില്‍ നറുക്കെടുപ്പിലൂടെ തീരുമാനിച്ചു. പനച്ചിക്കാട് പട്ടികജാതി സ്ത്രീ സംവരണം: ആലപ്പുഴ (2) പട്ടികജാതി സംവരണം: പനച്ചിക്കാട് (9) സ്ത്രീ സംവരണം: കണിയാമല (5), ചോഴിയക്കാട് (6), പരത്തുംപാറ (7), വെള്ളൂത്തൂരുത്തി (10), പടിയറ (11), വിളക്കാംകുന്ന് (12), ഹൈസ്‌കൂള്‍ (16), സായിപ്പുകവല (17), തോപ്പില്‍ (20), കടുവാക്കുളം (23), കുന്നംപള്ളി (24). പുതുപ്പള്ളി പട്ടികജാതി സംവരണം: തോട്ടയ്ക്കാട് (10). സ്ത്രീ സംവരണം: കീച്ചാല്‍ (3), വെണ്ണിമല (4), പയ്യപ്പാടി (5), വെള്ളൂക്കുട്ട (6), പുതുപ്പള്ളി ടൗണ്‍ (7), പിണ്ണാക്കുമല (8), കൈതേപ്പാലം (12), അങ്ങാടി (14), കൊച്ചാലുംമൂട് (15), എള്ളുകാല (18). വിജയപുരം പട്ടികജാതി സ്ത്രീ സംവരണം: എംആര്‍എഫ് (16) പട്ടികജാതി സംവരണം: പെരിങ്ങള്ളൂര്‍ (4). സ്ത്രീ സംവരണം: നാല്‍പ്പാമറ്റം (4), പാറമ്പുഴ (3), ചെമ്മരപ്പള്ളി (9), മക്രോണി (12), താമരശേരി (13), പുതുശേരി (14), കളത്തിപ്പടി (14), ഗിരിദീപം (17), മീന്തറ (20). അയര്‍ക്കുന്നം പട്ടികജാതി സ്ത്രീ സംവരണം: പാറപ്പുറം (13). പട്ടികജാതി സംവരണം: മെത്രഞ്ചേരി (9). സ്ത്രീ സംവരണം: അറമാനൂര്‍ നോര്‍ത്ത് (1), പുന്നത്തുറ (2), കൊച്ചുകൊങ്ങാണ്ടൂര്‍ (3), കൊങ്ങാണ്ടൂര്‍ (5), നരിവേലി (6), പൂതിരി (10), വടക്കമണ്ണൂര്‍ (11), വല്ലല്ലൂര്‍ക്കര (17), നീറിക്കാട് (18), അയ്യന്‍കോയിക്കല്‍ (19). കുറിച്ചി പട്ടികജാതി സ്ത്രീ സംവരണം: സ്വാമിക്കവല (5), ചെറുവേലിപ്പടി (20). പട്ടികജാതി സംവരണം: അമ്പലക്കോടി (12). സ്ത്രീ സംവരണം: പുളിമൂട് (9), ചാക്കരിമുക്ക് (10), കല്ലുകടവ് (11), മലകുന്നം (13), ചാമക്കുളം (14), ആനക്കുഴി (15), ചെമ്പുചിറ (16), പുലിക്കുഴി (18), ശങ്കരപുരം (19). വാഴൂര്‍ പട്ടികജാതി സംവരണം: ഉള്ളായം (12) സ്ത്രീ സംവരണം: പുളിക്കല്‍കവല (1), വൈരമല (4), തെക്കാനിക്കാട് (6), ശാസ്താംകാവ് (7), ഇളങ്ങോയി (11), ചാമംപതാല്‍ (13), കാനം (14), കണ്‍ട്രാച്ചി (15), ചെല്ലിമറ്റം (17). കങ്ങഴ പട്ടികജാതി സംവരണം: പ്ലാക്കല്‍പ്പടി (9). സ്ത്രീ സംവരണം: കാനം (3), കാരമല (7), ഇടയിരിക്കപ്പുഴ (8), മുണ്ടത്താനം (11), മുള്ളങ്കുഴി (12), തണ്ണിപ്പാറ (13), കോവൂര്‍ (14), പടനിലം (15).

ആം ആദ്മി പ്രതിഷേധിച്ചു

ഏറ്റുമാനൂർ: ശബരിമലയുടെ വിശുദ്ധിക്ക് തുരങ്കംവയ്ക്കുന്നതിലും സ്വർണക്കൊള്ളയിലും ആം ആദ്മി പാർട്ടി പ്രതിഷേധിച്ചു. ആം ആദ്മി പാർട്ടി അതിരമ്പുഴ പഞ്ചായത്ത്‌ കമ്മിറ്റി പ്രസിഡന്‍റ് ജോയി ചാക്കോ അധ്യക്ഷത വഹിച്ചു. നിയോജകമണ്ഡലം വൈസ് പ്രസിഡന്‍റ് ത്രേസ്യാമ്മ അലക്സ് ഉദ്ഘാടനം ചെയ്തു. സെക്രട്ടറി സുജിത് കുമാർ കെ.ജി, പി.ജെ. ജോസഫ്, ടോമി പാറപ്പുറം, ബെന്നി ലൂക്കാ, റോയ് കുര്യൻ, പോൾ മാത്യു തുടങ്ങിയവർ പ്രസംഗിച്ചു.

പതിനേഴുകാരി പ്രസവിക്കാനിടയായ സംഭവത്തില്‍ പോക്സോ കേസ്

ചിങ്ങവനം: പതിനേഴുകാരി പ്രസവിക്കാനിടയായ സംഭവത്തില്‍ ചിങ്ങവനം പോലീസ് കേസെടുത്തു. പോക്‌സോ അടക്കമുള്ള വകുപ്പുകള്‍ ചുമത്തിയാണ് കേസെടുത്തത്. പൂര്‍ണ ഗര്‍ഭിണിയായ പെണ്‍കുട്ടിയെ വാര്‍ഡ് മെംബറും ആരോഗ്യപ്രവര്‍ത്തകരും ചേര്‍ന്നാണ് ജില്ലാ ആശുപത്രിയില്‍ പ്രവേശിപ്പിച്ചത്. താമസിയാതെ പെണ്‍കുട്ടി ആണ്‍കുഞ്ഞിനു ജന്മം നല്‍കുകയും ചെയ്തു. പ്രതിയെപ്പറ്റി പോലീസിനു സൂചന ലഭിച്ചിട്ടുണ്ടെന്നറിയുന്നു.

ലോക ഭക്ഷ്യദിനത്തിലും വിശപ്പുരഹിത കോട്ടയത്തിന്‍റെ അമരക്കാരനായി പി.യു. തോമസ്

ഗാന്ധിനഗര്‍: കോട്ടയം നഗരത്തെ വിശപ്പ് രഹിത നഗരമായി പ്രഖ്യാപിച്ചതിനു പിന്നില്‍ ആര്‍പ്പൂക്കരയില്‍ പ്രവര്‍ത്തിക്കുന്ന നവജീവന്‍ ട്രസ്റ്റി പി.യു. തോമസിന്‍റെ പങ്ക് നിര്‍ണായകമാണ്. 1966 ല്‍ 17-ാം വയസില്‍ കോട്ടയം മെഡിക്കല്‍ കോളജില്‍ ചികിത്സയില്‍ കഴിയുമ്പോള്‍ സമീപത്തു കിടന്നിരുന്ന രാമചന്ദ്രന് ഒരു പൊതിച്ചോര്‍ നല്‍കാന്‍ കാരണമായതാണ് 77-ാവയസിലും വിശക്കുന്നവരെ കണ്ടെത്തി ആഹാരം നല്‍കാന്‍ തോമസിനു പ്രേരണയായത്. ഒരു പൊതിച്ചോറില്‍ നിന്നാരംഭിച്ച കാരുണ്യപ്രവര്‍ത്തനം ഇന്ന് ഒരു ദിവസം 5000 ത്തിലേറെപ്പേരുടെ വിശപ്പ് ഇല്ലാതാക്കുന്നു. കോട്ടയം മെഡിക്കല്‍ കോളജ് ആശുപത്രി, കുട്ടികളുടെ ആശുപത്രി, ജില്ലാ ആശുപത്രി, ജില്ലാ ആയുര്‍വേദ ആശുപത്രി എന്നിവിടങ്ങളിലെ രോഗികള്‍കളുടെയും കൂട്ടിരിപ്പുകാരുടെയും വിശപ്പ് മാറ്റുന്നതും നവജീവന്‍ ട്രസ്റ്റാണ്. വിശപ്പ് മാറ്റുന്നതോടൊപ്പം ആരോരുമില്ലാത്തവരുടെയും നാഥനാണ് ഇദ്ദേഹം. മാനസിക വെല്ലുവിളികള്‍ നേരിടുന്നവരും മക്കളാല്‍ ഉപേക്ഷിക്കപ്പെട്ടവരുമായ 160ല്‍ അധികം ആളുകള്‍ നവജീവന്‍റെ സന്തതികളാണ്. കൂടാതെ കിഡ്നി, കാന്‍സര്‍ രോഗം മൂലം ഒരു നേരത്തിന് വകയില്ലാത്ത 130 കുടുംബങ്ങള്‍ക്ക് മാസം 3000 രൂപ വീതം നൽകുന്നുണ്ട്. ഇവരുടെ മരണശേഷം മറ്റൊരു ജീവത മാര്‍ഗം കുടുംബത്തിന് ഉണ്ടാകുന്നതു വരെ ഇത് തുടര്‍ന്ന് കൊണ്ടേയിരിക്കും. ഇതിനൊക്കെ പുറമേ ചികിത്സാ സഹായങ്ങളും വീട്ടുചെലവിനും ഇവരില്‍ ചിലര്‍ക്ക് വീട്ടുവാടകയും കുട്ടികളുടെ വിദ്യാഭ്യാസ വിവാഹ ആവശ്യങ്ങള്‍ക്കും സഹായം നല്‍കിവരുന്നതും നവജീവനാണ്.

പിന്നിലേക്ക് ഉരുണ്ട കാര്‍ കയറി മരിച്ച ഗൃഹനാഥയുടെ സംസ്‌കാരം ഞായറാഴ്ച

പുതുപ്പള്ളി: വീടിന്‍റെ പോര്‍ച്ചില്‍നിന്നു പിന്നിലേക്ക് ഉരുണ്ട കാര്‍ കയറി മരിച്ച ഗൃഹനാഥയുടെ സംസ്‌കാരം ഞായറാഴ്ച. മീനടം നാരകത്തോട് കാവാലിച്ചിറ കുറ്റിക്കല്‍ തോമസ് കോരയുടെ ഭാര്യ അന്നമ്മ തോമസാ (വത്സമ്മ-53, എല്‍ഐസി ഏജന്‍റ്) ണു മരിച്ചത്. മന്ദിരം ആശുപത്രി മോര്‍ച്ചറിയില്‍ സൂക്ഷിച്ചിരിക്കുന്ന മൃതദേഹം ഞായറാഴ്ച രാവിലെ എട്ടിനു വീട്ടിലെത്തിക്കും. ഉച്ചയ്ക്ക് 12നു ഭവനത്തിലെ ശുശ്രൂഷയ്ക്കുശേഷം നിലയ്ക്കല്‍ ഓര്‍ത്തഡോക്‌സ് പള്ളിയില്‍ സംസ്‌കരിക്കും. പരിക്കേറ്റ് ശസ്ത്രക്രിയയ്ക്കു വിധേയനാക്കിയ ഇളയമകന്‍ ഷിജിന്‍ കെ. തോമസ്(25) കാരിത്താസ് ആശുപത്രിയില്‍ ചികിത്സയിലാണ്. തിങ്കളാഴ്ച വൈകുന്നേരം 6.30നായിരുന്നു സംഭവം.

ഏറ്റുമാനൂർ ക്ഷേത്രത്തിലെ ദുരൂഹമായ തീപിടിത്തം അന്വേഷിക്കണം: നാട്ടകം സുരേഷ്

ഏറ്റുമാനൂർ: ഏറ്റുമാനൂർ മഹാദേവ ക്ഷേത്രത്തിൽ നടന്ന ദുരൂഹമായ തീപിടിത്തങ്ങളെക്കുറിച്ച് അന്വേഷണം നടത്തണമെന്ന് ഡിസിസി പ്രസിഡന്‍റ് നാട്ടകം സുരേഷ് ആവശ്യപ്പെട്ടു. മഹാദേവക്ഷേത്രത്തിലെ ഏറ്റവും പവിത്രമായ ഏഴരപ്പൊന്നാനയെ പുറത്തുകൊണ്ടുപോകാനുള്ള ശ്രമം ഭക്തജനങ്ങളുടെ എതിർപ്പിനെത്തുടർന്ന് നടക്കാതെ പോകുകയായിരുന്നു. വിവാദത്തിൽപ്പെട്ട ഉദ്യോഗസ്ഥന്‍റെ കാലത്താണിത്. താത്കാലിക ജീവനക്കാരനായി ദേവസ്വത്തിൽ എത്തിയ ഈ ഉദ്യോഗസ്ഥൻ എങ്ങനെ ഉന്നത സ്ഥാനത്തെത്തിയെന്നതിലും അന്വേഷണം വേണം. ക്ഷേത്രത്തിൽ തുടർച്ചയായി ആചാരലംഘനം നടക്കുന്നു. ഉത്സവത്തിനുള്ള കൊടിക്കൂറയും കൊടിക്കയറും ഏറ്റുവാങ്ങേണ്ടത് ആചാര വിധിപ്രകാരം തന്ത്രിയാണ്. എന്നാൽ ഇപ്പോൾ തന്ത്രിക്കു പകരം മന്ത്രിയാണ് ഏറ്റുവാങ്ങുന്നതെന്ന് നാട്ടകം സുരേഷ് പറഞ്ഞു.

അതിവേഗം രക്ഷാപ്രവര്‍ത്തനം; കളക്ടറേറ്റില്‍ അഗ്നിസുരക്ഷാ മോക്ഡ്രില്‍ നടത്തി

കോട്ടയം: തീപിടിത്തമുണ്ടായാല്‍ അതിവേഗം രക്ഷാപ്രവര്‍ത്തനം നടത്തുന്നതിനുള്ള സംവിധാനങ്ങളുടെ കാര്യക്ഷമത വിലയിരുത്തുന്നതിന്‍റെ ഭാഗമായി കോട്ടയം കളക്ടറേറ്റില്‍ ജില്ലാ ദുരന്തനിവാരണ അഥോറിറ്റിയുടെ നേതൃത്വത്തില്‍ മോക്ഡ്രില്‍ നടത്തി. കളക്ടറേറ്റിന്‍റെ രണ്ടാംനിലയില്‍ തീപിടിത്തമുണ്ടാകുന്നതും അഗ്നിരക്ഷാ സേനയെത്തി മുകള്‍നിലയില്‍ കുടുങ്ങിക്കിടന്ന ജീവനക്കാരെ രക്ഷിക്കുന്നതും ആംബുലന്‍സില്‍ ആശുപത്രിയിലേക്കു മാറ്റുന്നതും വരെയുള്ള നടപടികളാണ് മോക്ഡ്രില്ലിന്‍റെ ഭാഗമായുണ്ടായിരുന്നത്. തീപിടിത്തം ശ്രദ്ധയില്‍പ്പെട്ട ഉടനേ അലാറം മുഴക്കി ജീവനക്കാരെ ഓഫീസ് മുറികളില്‍നിന്ന് താഴെയിറക്കി. അഞ്ചുമിനിറ്റിനുള്ളില്‍ തന്നെ എത്തിയ അഗ്നിരക്ഷാസേന ഗോവണി ഉപയോഗിച്ച് മുകളില്‍ കയറുകയും കുടുങ്ങിക്കിടന്നിരുന്നവരെ താഴെ എത്തിക്കുകയും ചെയ്തു. ജില്ലാ ഫയര്‍ ഓഫീസര്‍ എസ്.കെ. ബിജു, അഗ്നിരക്ഷാസേന ചങ്ങനാശേരി സ്റ്റേഷന്‍ ഓഫീസര്‍ അനൂപ് രവീന്ദ്രന്‍ എന്നിവരുടെ നേതൃത്വത്തിലുള്ള നടപടികളില്‍ രണ്ടു യൂണിറ്റ് ഫയര്‍ എന്‍ജിനുകളും ആംബുലന്‍സുകളുമുണ്ടായിരുന്നു. സിവില്‍ ഡിഫന്‍സ് ഫോഴ്‌സ് അംഗങ്ങള്‍ വോളണ്ടിയര്‍മാരായി പ്രവര്‍ത്തിച്ചു. പോലീസ് അധികൃതര്‍ ഗതാഗതം നിയന്ത്രിച്ചു. ജില്ലാ മെഡിക്കല്‍ ഓഫീസിന്‍റെ നേതൃത്വത്തില്‍ ആംബുലന്‍സ് ഉള്‍പ്പെടെ മെഡിക്കല്‍ സംഘത്തെയും നിയോഗിച്ചിരുന്നു. അഡീഷണല്‍ ജില്ലാ മജിസ്ട്രേറ്റ് എസ്. ശ്രീജിത്ത്, എല്‍എസ്ജിഡി പ്ലാന്‍ കോ-ഓര്‍ഡിനേറ്റര്‍ ശ്രീനിധി രാമചന്ദ്രന്‍ എന്നിവര്‍ നടപടികള്‍ ഏകോപിപ്പിച്ചു.

രാത്രി ലിമിറ്റഡ് സ്റ്റോപ്പ് ബസുകള്‍ നിര്‍ത്തുന്നില്ല : കുട്ടികളുടെ ആശുപത്രിയിൽ എത്തുന്ന യാത്രക്കാർ ദുരിതത്തിൽ

കോട്ടയം: രാത്രികാലങ്ങളില്‍ കുട്ടികളുടെ ആശുപത്രിക്ക് മുന്‍പില്‍ ലിമിറ്റഡ് സ്റ്റോപ്പ് ബസുകള്‍ നിര്‍ത്താത്തത് രോഗികളായ കുട്ടികളെയും മാതാപിതാക്കളെയും വലയ്ക്കുന്നു. രാത്രി ഏഴിന് ശേഷമാണ് പ്രധാനമായും ഇത്തരം സംഭവങ്ങള്‍ നടക്കുന്നത്. ഇതുമൂലം രാത്രികാലങ്ങളില്‍ കുട്ടികളുമായി ആശുപത്രിയിലെത്തുന്നവര്‍ തിരികെ മടങ്ങണമെങ്കില്‍ ഓട്ടോയെയോ, ടാകിസിയെയോ ആശ്രയിക്കേണ്ട അവസ്ഥയാണ്. ഐസിഎച്ച് ജംഗ്ഷനിലെത്തുന്ന ബസ് അമിത വേഗത്തില്‍ നിര്‍ത്താതെ പോകുകയാണെന്നും കൂടുതല്‍ യാത്രക്കാര്‍ ഉണ്ടെങ്കില്‍ പോലും നിര്‍ത്താറില്ലെന്നുമാണ് നാട്ടുകാര്‍ പറയുന്നത്. ബസ് നിര്‍ത്തിക്കാന്‍ പലപ്പോഴും നാട്ടുകാരും ബസ് ജീവനക്കാരും തമ്മില്‍ വാക്കുതര്‍ക്കത്തിലേര്‍പ്പെടുന്നത് നിത്യസംഭവമാണ്. സാധാരണക്കാരായ രോഗികളുടെ യാത്രാ പ്രതിസന്ധി പരിഹരിക്കാന്‍ അധികാരികള്‍ എത്രയും വേഗം ഇടപെടണമെന്നാണ് നാട്ടുകാര്‍ ആവശ്യപ്പെടുന്നത്.

ഉടമസ്ഥാവകാശം മാറ്റാതെ കാർ വിറ്റു; വെട്ടിലായി വയോധികൻ

കുമരകം: തന്‍റെ പഴയ കാര്‍ ഏഴുമാസം മുമ്പ് വിറ്റിട്ടും ഇപ്പോഴും പിഴ അടയ്ക്കാന്‍ നോട്ടീസ് വരുന്നത് 70 കാരനായ വയോധികന്. ഉടമസ്ഥാവകാശം രേഖാമൂലം മാറ്റം ചെയ്യാത്തതാണ് ചെങ്ങളം മൂന്നുമൂല സ്വദേശിയായ ടി.എസ്. മണിക്ക് വിനയായത്. വാഹനം വാങ്ങിയ ഈരാറ്റുപേട്ട സ്വദേശിയായ വി.എച്ച്. അസീസ് ഇപ്പോള്‍ ഫോണ്‍ വിളിച്ചാല്‍ പോലും എടുക്കുന്നില്ലെന്നാണ് മണി പറയുന്നത്. മോട്ടോര്‍ വാഹന വകുപ്പ് ആര്‍സി ബുക്ക് പ്രിന്‍റ് ചെയ്യാതിരുന്ന സാഹചര്യത്തില്‍ എഗ്രിമെന്‍റ് പ്രകാരമാണ് കാര്‍ കൈമാറിയത്. എലിപ്പനി ബാധിച്ച് ചികിത്സയിലായിരുന്നതിനാല്‍ പണം അത്യാവശ്യമായി വന്ന സാഹചര്യത്തിലാണ് ഉടമസ്ഥാവകാശം മാറ്റാതെ കാര്‍ വില്‌ക്കേണ്ടി വന്നതെന്ന് മണി പറയുന്നു. കാര്‍ നല്‍കിയപ്പോള്‍ കാറിന് ഇന്‍ഷ്വറന്‍സ് ഉണ്ടായിരുന്നെങ്കിലും പിന്നീട് അസീസ് ഇന്‍ഷ്വറന്‍സ്പുതുക്കിയിട്ടില്ല. ആറു മാസമായി ഇന്‍ഷ്വറന്‍സില്ലാത്ത കാര്‍ ഉണ്ടാക്കുന്ന എല്ലാ അപകടങ്ങളുടെയും ഉത്തരവാദിത്വം മണിയുടെ തലയിലായ സാഹചര്യമാണ് നിലവിലുള്ളത്. ആഴ്ചയില്‍ കുറഞ്ഞത് രണ്ട് നിയമലംഘനത്തിനെങ്കിലും മണിക്ക് ഇപ്പോള്‍ നോട്ടീസ് ലഭിക്കുന്നുണ്ട്. രോഗിയായ ഇയാള്‍ക്ക് പിഴ ഒടുക്കാന്‍ യാതൊരു വരുമാനമാര്‍ഗവും ഇല്ല. വിറ്റ വാഹനത്തിന്‍റെ ഉടമസ്ഥാവകാശം നിയമപരമായി കൈമാറാന്‍ സഹായം അഭ്യര്‍ഥിച്ച് പോലീസ് അധികൃതര്‍ക്കും മോട്ടോര്‍ വാഹന വകുപ്പിനും അപേക്ഷ നല്‍കി അലയുകയാണ് മണി.

കോട്ടയിൽ പൊരിഞ്ഞ പോരാട്ടം

വീണ്ടുമൊരു തദ്ദേശ തെരഞ്ഞെടുപ്പ് പടിവാതിൽക്കൽ. കഴിഞ്ഞ അഞ്ചു വർഷം നമ്മുടെ തദ്ദേശസ്ഥാപനങ്ങളിൽ നടന്നതെന്ത്? ഭരണപക്ഷവും പ്രതിപക്ഷവും എന്തു പറയുന്നു? പഞ്ചായത്തിന്‍റെ ചിത്രം എങ്ങനെ? അതിരമ്പുഴ ഗ്രാമപഞ്ചായത്ത് 1953ൽ രൂപീകരിക്കപ്പെട്ടു. കോട്ടയം ജില്ലയിൽ ഏറ്റവും കൂടുതൽ വരുമാനമുള്ള ഗ്രാമപഞ്ചായത്ത്. ഒരു വർഷത്തെ തനതുഫണ്ട് 10 കോടിയിലേറെ.അതിരമ്പുഴ ചന്തക്കടവിൽനിന്ന് ഉത്ഭവിച്ച് വേമ്പനാട് കായലിൽ എത്തുന്ന പെണ്ണാർതോടിനെ കേന്ദ്രീകരിച്ചു ടൂറിസം സാധ്യതകളുണ്ട്. തീർഥാടനകേന്ദ്രങ്ങളായ അതിരമ്പുഴ പള്ളിയും വിശുദ്ധ ചാവറയച്ചന്‍റെ കബറിടം സ്ഥിതി ചെയ്യുന്ന മാന്നാനം ആശ്രമദേവാലയവും ഐതിഹ്യ പ്രാധാന്യമുള്ള വേദവ്യാസഗിരി എന്ന വേദഗിരി മലയും ഉൾപ്പെടുന്ന പഞ്ചായത്ത് യുഡിഎഫ് മാത്രം ഭരിച്ചിട്ടുള്ള പഞ്ചായത്ത് എന്ന പ്രത്യേകതയുണ്ട്. നേട്ടങ്ങൾ ജോസ് അമ്പലക്കുളം (പഞ്ചായത്ത് പ്രസിഡന്‍റ്) 22 വാർഡുകളിലും റോഡുകൾ 90 ശതമാനം പൂർത്തീകരിച്ചു. 50ലധികം റോഡുകൾക്ക് ടെൻഡർ. ജൽജീവൻ വഴി എല്ലാ വാർഡുകളിലും കുടിവെള്ളം. 90 ശതമാനം പൂർത്തിയായി. 3.5 കിലോമീറ്റർ ദൂരത്തിൽ പെണ്ണാർതോട് ആഴം കൂട്ടി വൃത്തിയാക്കുന്ന ജോലി അവസാനഘട്ടത്തിൽ. ലൈഫ് പദ്ധതിയിൽ വീടുകൾ. സ്ഥലം വാങ്ങി വീടു നിർമിക്കാൻ പദ്ധതി. 48.5 സെന്‍റ് സ്ഥലം വാങ്ങി എംസിഎഫ് ഷെഡ് നിർമാണം. മുഴുവൻ വാർഡുകളിലും തെരുവു വിളക്കുകൾ. 32.5 ലക്ഷം മുടക്കി സസ്യമാർക്കറ്റിൽ ടേക്ക് എ ബ്രേക്ക് സമുച്ചയം. പഞ്ചായത്ത് ഓഫീസ് പുനരുദ്ധാരണം, ആധുനിക സൗകര്യങ്ങൾ. ബോട്ട് എത്താൻ നടയ്ക്കൽ പാലം ഉയർത്തി നിർമിക്കാൻ പദ്ധതി. സസ്യമാർക്കറ്റിൽ ഷോപ്പിംഗ് കോംപ്ലക്സും മത്സ്യമാർക്കറ്റിൽ തകർന്ന ഷെഡിന്‍റെ നവീകരണവും ഉടൻ. കോട്ടങ്ങൾ ജോഷി ഇലഞ്ഞിയിൽ (എൽഡിഎഫ് പാർലമെന്‍ററി പാർട്ടി ലീഡർ) തുടർച്ചയായ പ്രസിഡന്‍റ് മാറ്റം മൂലം വികസന മുരടിപ്പ്. അഞ്ചു വർഷത്തിനിടയിൽ മൂന്നു പ്രസിഡന്‍റുമാർ. വാർഷിക വരുമാനത്തിന് അനുസൃതമായി ക്ഷേമ - വികസന പദ്ധതികളില്ല. ദേശീയ പാതയായി പെണ്ണാർ തോട് പ്രഖ്യാപിക്കപ്പെട്ടെങ്കിലും തുടർ നടപടിയുണ്ടായില്ല. വിവിധ മേഖലകളിൽ കാര്യമായ ഒരു വികസന നേട്ടങ്ങളും ഭരണസമിതികൾക്ക് അവകാശപ്പെടാനില്ല. പഞ്ചായത്ത് ഓഫീസിനായി സ്ഥലം വാങ്ങി പാർക്കിംഗ് സൗകര്യമോടെ പുതിയ കെട്ടിടം നിർമിക്കാതെ 200 ലക്ഷം രൂപ മുടക്കി പഴയ കെട്ടിടം നവീകരിക്കുന്നത് ധൂർത്ത് ആകുന്നു. അതിരമ്പുഴയിൽ ആവശ്യത്തിനു ശൗചാലയങ്ങളില്ല. ഷോപ്പിംഗ് കോംപ്ലക്സ് പദ്ധതി അട്ടിമറിക്കപ്പെട്ടു. പഞ്ചായത്തിന് 25 ലക്ഷം രൂപയുടെ ബാധ്യത. അതിരമ്പുഴ ചന്തക്കുളത്തിന് സമീപം ടേക് എ ബ്രേക്ക് കാര്യക്ഷമമായി നടപ്പിലാക്കാൻ സാധിച്ചില്ല. പൊതുജനങ്ങൾക്കു വിശ്രമിക്കാൻ ഒരു പാർക്കോ യുവജനങ്ങൾക്ക് കളിസ്ഥലമോ ഇല്ല. അഞ്ചു വർഷത്തിനിടയിൽ ഒരു കുടുംബത്തിനു പോലും ഭൂമി വാങ്ങി നൽകിയിട്ടില്ല. ഏക്കർ കണക്കിനു നിലം തരിശു കിടക്കുന്നു. മാർക്കറ്റുകൾ ഉൾപ്പെടെ പൊതുസ്ഥലങ്ങൾ മലിനം. മാലിന്യനിർമാർജനവും ശുചീകരണവും നടക്കുന്നില്ല. ഒറ്റനോട്ടത്തിൽ വിസ്തീർണം: 20.1 ച.കി.മീ. ജനസംഖ്യ: 40,438. പുരുഷന്മാർ: 20,122. സ്ത്രീകൾ: 20,316. പട്ടികജാതി വിഭാഗം: 728. പട്ടിക വർഗം: 25 കുടുംബങ്ങൾ. സാക്ഷരത: 96.5 ശതമാനം. എംജി യൂണിവേഴ്സിറ്റിയുടെ ആസ്ഥാനം. മെഡിക്കൽ കോളജിന്‍റെ ഭാഗമായ ഇൻസ്റ്റിറ്റ്യൂട്ട് ഓഫ് ചൈൽഡ് ഹെൽത്തും കുട്ടികളുടെ ആശുപത്രിയും ഗവ. ഐടിഐ, ട്രെയ്നിംഗ് കോളജ്, മൂന്നു കോളജുകൾ, മൂന്ന് ഗവ. എൽപി സ്കൂളുകൾ ഉൾപ്പെടെ അനേകം സ്കൂളുകളും.

ആവേശമായി വാക്ക് എഗെന്‍സ്റ്റ് ഡ്രഗ്സ്

കോട്ടയം: ലഹരിയുടെ നീരാളികൈകള്‍ക്കെതിരേ ജനകീയപ്രതിരോധത്തിന്‍റെ കരുത്തു കുറിച്ച് രമേശ് ചെന്നിത്തലയുടെ നേതൃത്വത്തില്‍ നടന്ന പ്രൗഡ് കേരളയുടെ വാക്ക് എഗെന്‍സ്റ്റ് ഡ്രഗ്സ് ആവേശമായി. രാവിലെ ആറിന് ആരംഭിച്ച വാക്കത്തോണ്‍ ഓര്‍ത്തഡോക്സ് സഭ ഭദ്രാസനാധിപന്‍ യൂഹാനോന്‍ മാര്‍ ദിയസ്‌കോറോസ് ഫ്‌ളാഗ് ഓഫ് ചെയ്തു. ലഹരിയില്ലാത്ത കേരളത്തിനുവേണ്ടിയുള്ള പോരാട്ടം തുടരുകതന്നെ ചെയ്യുമെന്ന് രമേശ് ചെന്നിത്തല പ്രഖ്യാപിച്ചു. ജില്ലകളിലെ പരിപാടികള്‍ അവസാനിച്ചാല്‍ സംസ്ഥാനത്തെ എല്ലാ സ്‌കൂളുകളിലും കോളജുകളിലും പ്രൗഡ് കേരളയുടെ പ്രവര്‍ത്തനങ്ങള്‍ എത്തുമെന്ന് രമേശ് ചെന്നിത്തല അറിയിച്ചു. ജാഥാംഗങ്ങള്‍ക്ക് ഗാന്ധി സ്‌ക്വയറില്‍ ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. കോട്ടയം അതിരൂപത സഹായ മെത്രാന്‍ ഗീവര്‍ഗീസ് മാര്‍ അപ്രേം, യാക്കോബായ സുറിയാനി സഭ കോട്ടയം ഭദ്രാസന സെക്രട്ടറി ഫാ. ഷൈജു ജോസ് ചെന്നിക്കര, എന്‍എസ്എസ് താലൂക്ക് യൂണിയന്‍ പ്രസിഡന്‍റ് ബി. ഗോപകുമാര്‍, സിനിമാ നിര്‍മാതാവ് പ്രേം പ്രകാശ് തുടങ്ങിയവര്‍ വാക്കത്തോണിന്‍റെ ഭാഗമായി. എംഎല്‍എമാരായ തിരുവഞ്ചൂര്‍ രാധാകൃഷ്ണന്‍, മോന്‍സ് ജോസഫ്, മാണി സി. കാപ്പന്‍, ചാണ്ടി ഉമ്മന്‍, എംപിമാരായ ഫ്രാന്‍സിസ് ജോര്‍ജ്, ആന്‍റോ ആന്‍റണി, കെപിസിസി രാഷ്ട്രീയകാര്യ സമിതി അംഗം കെ.സി. ജോസഫ്, ജോസഫ് വാഴയ്ക്കന്‍, നഗരസഭാ അധ്യക്ഷ ബിന്‍സി സെബാസ്റ്റ്യന്‍, ഡിസിസി അധ്യക്ഷന്‍ നാട്ടകം സുരേഷ്, കെപിസിസി ജനറല്‍ സെക്രട്ടറി പി.എ. സലീം, ജോഷി ഫിലിപ്പ്, ടോമി കല്ലാനി, ജോസി സെബാസ്റ്റ്യന്‍, ഫിലിപ് ജോസഫ്, പ്രൗഡ് കേരള ചെയര്‍മാന്‍ മലയിന്‍കീഴ് വേണുഗോപാല്‍, ആര്‍. വത്സലന്‍, ബിജു പുന്നത്താനം, നീണ്ടൂര്‍ മുരളി, യൂജിന്‍ തോമസ് തുടങ്ങിയവര്‍ നേതൃത്വം നല്‍കി.

മാർ ക്രിസോസ്റ്റം പകരം വയ്ക്കാനില്ലാത്ത അപൂര്‍വ പ്രതിഭ: ഓര്‍ത്തഡോക്‌സ് സഭാധ്യക്ഷന്‍

കോട്ടയം: ആത്മീയവും ഭൗതികവുമായ മണ്ഡലത്തില്‍ പ്രകാശിക്കുന്ന അപൂര്‍വം നക്ഷത്രങ്ങളില്‍ ഒന്നാണ് മാർ ക്രിസോസ്റ്റമെന്ന് മലങ്കര ഓര്‍ത്തഡോക്‌സ് സഭാധ്യക്ഷന്‍ ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാ ബാവാ. ശങ്കരപുരി ഗ്ലോബല്‍ എക്യുമെനിക്കല്‍ ഫോറത്തിന്‍റെ മാര്‍ ക്രിസോസ്റ്റം സ്മൃതി സംഗമവും മാര്‍ ക്രിസോസ്റ്റം എക്യുമെനിക്കല്‍ പുരസ്‌കാര സമര്‍പ്പണവും നിര്‍വഹിച്ചു പ്രസംഗിക്കുകയായിരുന്നു അദ്ദേഹം. പകരംവയ്ക്കാനില്ലാത്ത അപൂര്‍വം പ്രതിഭയായിട്ടു ലോകത്തിനു സമ്മാനിക്കപ്പെട്ടയാളാണ് ക്രിസോസ്റ്റം തിരുമേനി. സര്‍വ മനുഷ്യരെയും ജീവജാലങ്ങളെയും പ്രപഞ്ചത്തെയും ഉള്‍ക്കൊള്ളാന്‍ തിരുമേനിക്കു പ്രത്യേക കൃപയുണ്ടായിരുന്നുവെന്നും കാതോലിക്കാ ബാവാ അനുസ്മരിച്ചു. തുടര്‍ന്നു പുരസ്‌കാരം ഡോ. തിയഡോഷ്യസ് മാര്‍ത്തോമ്മാ മെത്രാപ്പോലീത്തയ്ക്കു ബാവാ സമ്മാനിച്ചു. എല്ലാം തിരുവചനങ്ങളില്‍ ചാലിച്ചെടുത്ത സുന്ദരമായ ചിന്തകളും ദൈവികമായ മാനുഷികതയും കൊണ്ടുനടന്ന വ്യക്തിയായിരുന്നു ക്രിസോസ്റ്റം തിരുമേനിയെന്നും അദ്ദേഹത്തിന്‍റെ സ്മരണകള്‍ ഒരു ജ്വാലപോലെ എല്ലാവരുടെയും മനസിലുണ്ടെന്നും മാര്‍ ജോസഫ് കല്ലറങ്ങാട്ട് അനുസ്മരണപ്രസംഗത്തില്‍ പറഞ്ഞു. ക്രിസോസ്റ്റം തിരുമേനി എക്യുമെനിസത്തിന്‍റെ മനുഷ്യനായിരുന്നു. അദ്ദേഹത്തെ സ്‌നേഹത്തോടെ കരുതാത്ത വ്യക്തികളില്ലെന്നും നാനാജാതി മതസ്ഥര്‍ക്കു സ്വന്തമെന്നു തോന്നിയ വ്യക്തിയായിരുന്നു അദ്ദേഹമെന്നും ആര്‍ച്ച്ബിഷപ് മാര്‍ തോമസ് തറയില്‍ അനുഗ്രഹപ്രഭാഷണത്തില്‍ അനുസ്മരിച്ചു. എക്യുമെനിക്കല്‍ ഫോറം ചെയര്‍മാന്‍ ഡോ. സിറിയക് തോമസ് അധ്യക്ഷത വഹിച്ചു. മാര്‍ത്തോമ്മ സെമിനാരി പ്രിന്‍സിപ്പല്‍ റവ.ഡോ. എം.സി. തോമസ്, ജനറല്‍ കണ്‍വീനര്‍ തോമസ് കണ്ണന്തറ, സെക്രട്ടറി സിജി ആന്‍റണി, ട്രഷറര്‍ ബാബു ശങ്കുരിക്കല്‍, ഡോ. ഏബ്രഹാം കലമണ്ണില്‍, ഡോ. ജോസ് കാലായില്‍, ഡോ. റൂബിള്‍ രാജ് തുടങ്ങിയവര്‍ പ്രസംഗിച്ചു. അവാര്‍ഡ് തന്നെ കൂടുതല്‍ വിനയാന്വിതനാക്കുന്നുവെന്ന് ഡോ. തിയഡോഷ്യസ് മാര്‍ത്തോമ്മാ മെത്രാപ്പോലീത്ത മറുപടി പ്രസംഗത്തില്‍ പറഞ്ഞു. സമാനതകളില്ലാത്ത വലിയ വ്യക്തിത്വത്തിനുടമയായിരുന്ന ക്രിസോസ്റ്റം മെത്രാപ്പോലീത്ത, ചിരിപ്പിക്കുകയും ചിന്തിപ്പിക്കുകയും ചെയ്ത മഹത് വ്യക്തിയായിരുന്നുവെന്നും ഡോ. തിയഡോഷ്യസ് മാര്‍ത്തോമ്മാ മെത്രാപ്പോലീത്ത പറഞ്ഞു.

അനന്തു അജിയുടെ മരണം: പ്രതിഷേധം ശക്തമാക്കി യൂത്ത് കോൺഗ്രസ്, ഡിവൈഎഫ്ഐ

പൊൻകുന്നം: അനന്തു അജിയുടേത് ആത്മഹത്യയല്ലെന്നും കൊലപാതകമാണെന്നും കേരള പോലീസിന്‍റെ അന്വേഷണത്തിൽ വിശ്വാസമില്ലെന്നും ഡിസിസി പ്രസിഡന്‍റ് നാട്ടകം സുരേഷ്. അനന്തു അജിയുടെ മരണത്തിന് കാരണക്കാരായവരെ അറസ്റ്റ് ചെയ്യണമെന്ന് ആവശ്യപ്പെട്ട് യൂത്ത് കോൺഗ്രസ് കാഞ്ഞിരപ്പള്ളി, പൂഞ്ഞാർ, പാലാ നിയോജകമണ്ഡലം കമ്മിറ്റികളുടെ നേതൃത്വത്തിൽ നടത്തിയ ഡിവൈഎസ്പി ഓഫീസ് മാർച്ച് ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. യൂത്ത് കോൺഗ്രസ്‌ കാഞ്ഞിരപ്പള്ളി നിയോജക മണ്ഡലം പ്രസിഡന്‍റ് കെ.എസ്. ഷിനാസ് അധ്യക്ഷത വഹിച്ചു. ഡിസിസി ജനറൽ സെക്രട്ടറി പ്രഫ. റോണി കെ. ബേബി മുഖ്യപ്രഭാഷണം നടത്തി. പൂഞ്ഞാർ നിയോജകമണ്ഡലം പ്രസിഡന്‍റ് റെമിൻ രാജൻ, പാലാ നിയോജകമണ്ഡലം പ്രസിഡന്‍റ് ആൽബിൻ ഇടമണ്ണശേരിൽ, ജില്ലാ വൈസ് പ്രസിഡന്‍റ് ഷിയാസ് മുഹമ്മദ്‌ തുടങ്ങിവർ പ്രസംഗിച്ചു.

പ്രതിഷേധ മാർച്ച് പോലീസ് ബസ് സ്റ്റാൻഡിന് സമീപം തടഞ്ഞു. തുടർന്ന് യൂത്ത് കോൺഗ്രസ് പ്രവർത്തകർ ദേശീയപാത ഉപരോധിച്ചു. ഇതോടെ പോലീസ് പ്രവർത്തകരെ അറസ്റ്റ് ചെയ്തു നീക്കി. ദേശീയ ഉപരോധിച്ചതിന് 10 യൂത്ത് കോൺഗ്രസ് പ്രവർത്തകർക്കെതിരേ പോലീസ് കേസെടുത്തു. പൊൻകുന്നം: എലിക്കുളം വഞ്ചിമല സ്വദേശി അനന്തു അജിയുടെ മരണമൊഴിയിൽ ആരോപണ വിധേയനായ ആർഎസ്എസ് പ്രവർത്തകനെ അറസ്റ്റ് ചെയ്യണമെന്ന് ആവശ്യപ്പെട്ടു ഡിവൈഎഫ്ഐ പൊൻകുന്നത്ത് പ്രതിഷേധ പ്രകടനവും യോഗവും നടത്തി. പൊൻകുന്നം ടൗണിൽ നടന്ന പ്രതിഷേധ പ്രകടനത്തിൽ നിരവധി പ്രവർത്തകർ പങ്കെടുത്തു. ഡിവൈഎഫ്ഐ വാഴൂർ ബ്ലോക്ക് കമ്മിറ്റിയുടെ നേതൃത്വത്തിലായിരുന്നു പ്രതിഷേധം. ഡിവൈഎഫ്ഐ കേന്ദ്ര കമ്മിറ്റി അംഗം ജെയ്ക് സി. തോമസ് പ്രതിഷേധയോഗം ഉദ്ഘാടനം ചെയ്തു. ബ്ലോക്ക് പ്രസിഡന്‍റ് എസ്. ദീപു അധ്യക്ഷത വഹിച്ചു. ഡിവൈഎഫ്ഐ സംസ്ഥാന കമ്മിറ്റി അംഗം അർച്ചന സദാശിവൻ, ബ്ലോക്ക് സെക്രട്ടറി ബി. ഗൗതം, എസ്എഫ്ഐ ജില്ലാ പ്രസിഡന്‍റ് വൈഷ്ണവി ഷാജി, ഡിവൈഎഫ്ഐ ജില്ലാ കമ്മിറ്റികളായ ശ്രീകാന്ത് പി. തങ്കച്ചൻ, ഷാമില ഷാജി തുടങ്ങിയവർ പ്രസംഗിച്ചു. അനന്തു അജിയുടെ ആത്മഹത്യയില്‍ ആരോപണം നേരിടുന്ന നിധീഷ് മുരളീധരന്‍റെ കടയുടെ ബോർഡ് ഡിവൈഎഫ്ഐ പ്രവർത്തകർ അടിച്ചുതകർത്തു. കാഞ്ഞിരപ്പള്ളി കപ്പാട് ഉള്ള ആശുപത്രി ഉപകരണം വിൽക്കുന്ന കടയാണ് തകർത്തത്. പോലീസും ഡിവൈഎഫ്ഐ പ്രവർത്തകരുമായി സംഘർഷവുമുണ്ടായി. 15 ഡിവൈഎഫ്ഐ പ്രവർത്തകർക്കെതിരേ പോലീസ് കേസെടുത്തു.

അമല്‍ജ്യോതി കോളജ് ഓഫ് എന്‍ജിനിയറിംഗും തിരുഹൃദയ കോളജ് ഓഫ് നഴ്‌സിംഗും തമ്മില്‍ ധാരണാപത്രം ഒപ്പിട്ടു

കോട്ടയം: ആരോഗ്യരംഗത്തും എന്‍ജിനിയറിംഗ് മേഖലയിലും വിജ്ഞാനവും വിഭവങ്ങളും പങ്കുവയ്ക്കുന്നതിനായി കാഞ്ഞിരപ്പള്ളി അമല്‍ജ്യോതി കോളജ് ഓഫ് എന്‍ജിനിയറിംഗും കോട്ടയം എസ്എച്ച് മെഡിക്കല്‍ സെന്‍ററിനു കീഴിലുള്ള തിരുഹൃദയ കോളജ് ഓഫ് നഴ്‌സിംഗും തമ്മില്‍ ധാരണാപത്രം ഒപ്പിട്ടു. കുറഞ്ഞ ചെലവില്‍ രോഗികള്‍ക്ക് ഉപകാരപ്രദമായ ആരോഗ്യ സാങ്കേതികവിദ്യകള്‍ വികസിപ്പിക്കുകയാണ് ബയോമെഡിക്കല്‍ ഇന്‍സ്ട്രുമെന്‍റേഷനായുള്ള ഷ്മിറ്റ് സെന്‍റര്‍ ഉപയോഗിച്ചുള്ള സഹകരണത്തിന്‍റെ ലക്ഷ്യം. നഴ്‌സിംഗ്, ഇലക്ട്രിക്കല്‍, കംപ്യൂട്ടര്‍ സയന്‍സ് വിദ്യാര്‍ഥികളെ ഉള്‍പ്പെടുത്തി കേന്ദ്ര, സംസ്ഥാന സര്‍ക്കാര്‍ ഏജന്‍സികളുടെ ഫണ്ടോടെ സംയുക്ത ഗവേഷണ പ്രോജക്റ്റുകള്‍ പ്രോത്സാഹിപ്പിക്കും. സാങ്കേതികവിദ്യ, നൂതനാശയങ്ങള്‍, സംരംഭകത്വം, ബയോമെഡിക്കല്‍ സിസ്റ്റം അവബോധം എന്നിവയില്‍ വിദ്യാര്‍ഥികള്‍ക്കും ഫാക്കല്‍റ്റികള്‍ക്കുമായി വിജ്ഞാന കൈമാറ്റ പരിപാടികളും പരിശീലനങ്ങളും ഇന്‍റേണ്‍ഷിപ്പുകളും ലഭ്യമാക്കും. ബയോമെഡിക്കല്‍ എന്‍ജിനിയറിംഗ് പോലുള്ള മേഖലകളില്‍ ഹ്രസ്വകാല, ദീര്‍ഘകാല കോഴ്‌സുകള്‍ ഉള്‍പ്പെടുത്തി പാഠ്യപദ്ധതി രൂപകല്‍പ്പന ചെയ്യുന്നതിനും സംയുക്ത ഗവേഷണ പ്രസിദ്ധീകരണങ്ങള്‍ ഒരുക്കുന്നതിനും ഇരുസ്ഥാപനങ്ങളിലെയും ഫാക്കല്‍റ്റികള്‍ സഹകരിക്കും. അമല്‍ജ്യോതി കോളജിനെ പ്രതിനിധീകരിച്ചു കംപ്യൂട്ടര്‍ സയന്‍സ് എന്‍ജിനിയറിംഗിലെ റവ.ഡോ. സിജു ജോണ്‍ പുല്ലംപ്ലായില്‍, ഇലക്ട്രിക്കല്‍ ആന്‍ഡ് ഇലക്ട്രോണിക്‌സ് എന്‍ജിനിയറിംഗിലെ ഡോ. എസ്.എന്‍. കുമാര്‍ എന്നിവരാണ് ധാരണാപത്രത്തില്‍ ഒപ്പിട്ടത്.

സൈബര്‍ തട്ടിപ്പ് : ആശാ പ്രവര്‍ത്തകയ്ക്ക് ഒന്നേകാല്‍ ലക്ഷം നഷ്ടമായി

കടുത്തുരുത്തി: സൈബര്‍ തട്ടിപ്പിലൂടെ ആശാ പ്രവര്‍ത്തകയുടെ അക്കൗണ്ടില്‍നിന്ന് 1,24,845 രൂപ നഷ്ടപ്പെട്ടതായി പരാതി. മുളക്കുളം പഞ്ചായത്തിലെ ഒമ്പതാം വാര്‍ഡിലെ ആശാ പ്രവര്‍ത്തകയായ അറുനൂറ്റിമംഗലം വള്ളോന്തോട്ടത്തില്‍ എം.എസ്. സുജയുടെ അക്കൗണ്ടില്‍ നിന്നാണ് പണം നഷ്ടപ്പെട്ടിരിക്കുന്നത്. ഇതു സംബന്ധിച്ചു സുജ വെള്ളൂര്‍ പോലീസിലും സൈബര്‍ സെല്ലിലും ബാങ്കിലും പരാതി നല്‍കി. ഓസ്ട്രേലിയയില്‍ ജോലി ചെയ്യുന്ന മകള്‍ വീട് നിര്‍മാണ ജോലികളുമായി ബന്ധപ്പെട്ട് അയയ്ക്കുന്ന പണവും സുജയുടെ ശമ്പളം അടക്കമുള്ള തുകയും എസ്ബിഐ അറുന്നൂറ്റിമംഗലം ശാഖയിലുള്ള അക്കൗണ്ടിലേക്കാണ് വന്നിരുന്നത്. പത്തിന് സുജ മൊബൈല്‍ഫോണ്‍ നന്നാക്കാനായി നല്‍കിയിരുന്നു. സിം തിരികെ വാങ്ങിയ ശേഷമാണ് ഫോണ്‍ നല്‍കിയത്. 15-ന് ഫോണ്‍ തിരികെ വാങ്ങിയ ശേഷം ഗൂഗിള്‍ പേയില്‍ ബാലന്‍സ് പരിശോധിച്ചപ്പോഴാണ് അക്കൗണ്ടിൽ 100 രൂപയേ ഉള്ളൂവെന്ന് മനസിലായത്. ബാങ്കിലെത്തി വിശദമായി പരിശോധിച്ചപ്പോഴാണ് 1,24,845 രൂപ നഷ്ടപ്പെട്ട വിവരം സുജ അറിയുന്നത്. രണ്ട്, മൂന്ന് തീയതികളിലായി 900 രൂപ വച്ച് 19 തവണയായി 17,100 രൂപയും 13, 14 തീയതികളിലായി 1,07,745 രൂപയും യുപിഐ ഇടപാട് വഴിയാണ് പോയതെന്നാണ് രേഖകള്‍ വ്യക്തമാക്കുന്നത്. വെള്ളൂര്‍ പോലീസ് ഇതുസംബന്ധിച്ചു എഫ്ഐആര്‍ രജിസ്റ്റര്‍ ചെയ്തിട്ടുണ്ട്. യുപിഐ ഇടപാടിലുണ്ടായ ട്രാന്‍സാക്‌ഷന്‍ ആയതിനാല്‍ ബാങ്കിന്‍റെ ഉന്നതാധികാരികള്‍ക്ക് പരാതി കൈമാറുമെന്ന് ബാങ്ക് മാനേജര്‍ കെ.ആര്‍. പ്രസാദ് പറഞ്ഞു.

പെരുമഴ പോലെ വിശ്വാസികൾ; രാമപുരത്ത് തിരുനാൾ ഭക്തിസാന്ദ്രം

രാമപുരം: വാഴ്ത്തപ്പെട്ട കുഞ്ഞച്ചന്‍റെ തിരുനാളില്‍ പങ്കെടുത്ത് പതിനായിരങ്ങള്‍. പ്രധാന തിരുനാള്‍ ദിനമായിരുന്ന ഇന്നലെ പ്രതികൂലമായ കാലാവസ്ഥയിലും നിരവധി വിശ്വാസികൾ കുഞ്ഞച്ചന്‍റെ കബറിടത്തിങ്കലേക്ക് ഒഴുകിയെത്തി. ബിഷപ് മാര്‍ ജോസഫ് കല്ലറങ്ങാട്ട് വിശുദ്ധ കുര്‍ബാന അര്‍പ്പിച്ച് സന്ദേശം നല്‍കി. അര നൂറ്റാണ്ടുകാലം പുരോഹിതനായി രാമപുരം പള്ളിയില്‍ താമസിച്ചു ശുശ്രൂഷ ചെയ്ത സംഭവബഹുലമായ ഒരു ജീവിതത്തെയാണ് നാം ഓര്‍ക്കുന്നതെന്നു മാര്‍ കല്ലറങ്ങാട്ട് പറഞ്ഞു. ദളിത് സമൂഹത്തിന്‍റെ അസ്ഥിത്വത്തിനും വളര്‍ച്ചയ്ക്കും കാരണക്കാരായ പ്രധാന വ്യക്തികളില്‍ ഒരാളാണ് കുഞ്ഞച്ചന്‍. അവരുടെ കൂട്ടത്തിലായിരിക്കാന്‍ കുഞ്ഞച്ചന്‍ ശ്രദ്ധിച്ചു.

നമ്മുടെ ഭരണഘടനയുടെ ഏറ്റവും വലിയ സവിശേഷതകളിലൊന്ന് തുല്യതയാണ്. പക്ഷേ, ദളിത് കത്തോലിക്കര്‍ക്ക് ഇന്ന് ഈ നീതി ലഭ്യമല്ല. ഈ അനീതിക്കെതിരെയുള്ള ഒരു പ്രാര്‍ഥന കൂടിയാണ് തിരുനാള്‍. കുഞ്ഞച്ചന്‍ തുറന്നുവായിക്കേണ്ട ഒരു പഠപുസ്തകമാണ്. വിശുദ്ധിമൂലം കാന്തിക ശക്തിയുള്ള ഇടമാണ് കുഞ്ഞച്ചന്‍റെ കബറിടം എന്നും അദ്ദേഹം തുടര്‍ന്ന് പറഞ്ഞു. പാലാ രൂപതയിലെ വിവിധ പ്രദേശങ്ങളില്‍നിന്നാരംഭിച്ച ഡിസിഎംഎസ് പദയാത്രക്കു പള്ളി മൈതാനിയില്‍ സ്വീകരണം നല്‍കി. ഉച്ചയ്ക്കു കുരിശുപള്ളി ചുറ്റിയുള്ള തിരുനാള്‍ പ്രദക്ഷിണം നടന്നു. തീര്‍ഥാടകര്‍ക്കായി കെഎസ്ആര്‍ടിസി പ്രത്യേക സര്‍വീസ് നടത്തിയിരുന്നു. ആംബുലന്‍സ് സേവനവും പോലീസ് സേനയുടെ സേവനവും രാവിലെ മുതല്‍ ലഭ്യമായിരുന്നു. വൈകുന്നേരം ആറു വരെ നേര്‍ച്ച ഭക്ഷണ വിതരണം തുടര്‍ന്നു. എല്ലാം അടുക്കും ചിട്ടയുമായി; വിശ്രമമില്ലാതെ വോളന്‍റിയർമാർ നേര്‍ച്ച വിതരണത്തിനും തിരക്ക് നിയന്ത്രിക്കാനുമായി വോളന്‍റിയേഴ്സിന്‍റെ നേതൃത്വത്തില്‍ ചിട്ടയായ പ്രവര്‍ത്തനങ്ങളാണ് നടന്നത്. 3000 കിലോ അരിയും 900 കിലോ പയറുമുപയോഗിച്ചാണ് നേര്‍ച്ച ഭക്ഷണം പാചകം ചെയ്തത്. രാമപുരത്ത് പ്രവര്‍ത്തിക്കുന്ന ഓര്‍ക്കിഡ് കാറ്ററിംഗ് ഉടമ സണ്ണി കാര്യപ്പുറത്തിന്‍റെ നേതൃത്വത്തിലുള്ള സംഘമാണ് നേര്‍ച്ച ഭക്ഷണം തയാറാക്കിയത്.

വികാരി ഫാ. ബര്‍ക്കുമാന്‍സ് കുന്നുംപുറം, വൈസ് പോസ്റ്റുലേറ്റര്‍ ഫാ. തോമസ് വെട്ടുകാട്ടില്‍, സഹവികാരിമാരായ ഫാ. അബ്രാഹം കുഴിമുള്ളില്‍, ഫാ. ജോവാനി കുറുവാച്ചിറ, ഹോസ്റ്റല്‍ വാര്‍ഡന്‍ ഫാ. ജോര്‍ജ് പറമ്പിത്തടത്തില്‍, കൈക്കാരന്മാരായ തോമസ് പുളുക്കപ്പടവില്‍, സജി മിറ്റത്താനക്കല്‍, മാത്തുക്കുട്ടി തെങ്ങുംപള്ളില്‍, സിബി മുണ്ടപ്ലാക്കല്‍ എന്നിവരുടെ നിര്‍ദേശപ്രകാരം തിരുനാള്‍ കര്‍മങ്ങള്‍ അടുക്കും ചിട്ടയുമായിട്ടാണ് നടന്നത്. ഭക്തസംഘടനാ ഭാരവാഹികളും പ്രവര്‍ത്തകരും നേതൃത്വനിരയിലുണ്ടായിരുന്നു.

തീക്കോയി കുടുംബാരോഗ്യ കേന്ദ്രത്തിന്‍റെ പുതിയ കെട്ടിടം ഉദ്ഘാടനം 23ന്

തീക്കോയി: പഞ്ചായത്ത് തീക്കോയി ടൗണില്‍ നിലവിലുള്ള പ്രാഥമിക ആരോഗ്യകേന്ദ്രത്തിന്‍റെ കെട്ടിടത്തിനോടു ചേര്‍ന്നു പുതുതായി പണി പൂര്‍ത്തിയാക്കിയ ആശുപത്രി സമുച്ചയത്തിന്‍റെ ഉദ്ഘാടനം 23ന് ഉച്ചയ്ക്ക് 12.30ന് നടക്കും. പ്രാഥമികാരോഗ്യകേന്ദ്രത്തെ കുടുംബാരോഗ്യകേന്ദ്രമായി പ്രഖ്യാപിക്കും. കുടുംബാരോഗ്യ കേന്ദ്രത്തിന് ആവശ്യമായ അടിസ്ഥാന സൗകര്യങ്ങള്‍ ഉറപ്പുവരുത്തിക്കൊണ്ടാണ് ആശുപത്രിയുടെ പുതിയ കെട്ടിടം നിര്‍മിച്ചിട്ടുള്ളത്. പ്രാഥമികാരോഗ്യകേന്ദ്രം കുടുംബാരോഗ്യകേന്ദ്രമായി മാറുന്നതോടുകൂടി പൊതുജനങ്ങള്‍ക്ക് കൂടുതല്‍ സേവനങ്ങളും ചികില്‍സാസൗകര്യങ്ങളും ലഭ്യമാകും. ഗ്രാമപഞ്ചായത്ത് 42 ലക്ഷം, ബ്ലോക്ക് പഞ്ചായത്ത് 13 ലക്ഷം, ജില്ലാ പഞ്ചായത്ത് 10 ലക്ഷം, നാഷണല്‍ ഹെല്‍ത്ത് മിഷന്‍ 15 ലക്ഷം ഉള്‍പ്പെടെ 80 ലക്ഷം രൂപ മുതല്‍മുടക്കിലാണ് കെട്ടിടം നിര്‍മിച്ചിട്ടുള്ളത്. ജില്ലാ നിര്‍മിതി കേന്ദ്രത്തിനായിരുന്നു നിര്‍മാണച്ചുമതല. ആശുപത്രിയുടെ ചുറ്റുമതില്‍, കിണര്‍ നവീകരണം, റോഡ്, സോക് പിറ്റ്, ഫര്‍ണിച്ചര്‍ തുടങ്ങിയ അടിസ്ഥാന സൗകര്യങ്ങള്‍ക്കായി പഞ്ചായത്ത് 25 ലക്ഷം രൂപ കൂടി ചെലവഴിച്ചു. കുടുംബാരോഗ്യ കേന്ദ്രത്തിന്‍റെ അങ്കണത്തില്‍ ചേരുന്ന സമ്മേളനത്തില്‍ സെബാസ്റ്റ്യന്‍ കുളത്തുങ്കല്‍ എംഎല്‍എ അധ്യക്ഷത വഹിക്കും. കുടുംബാരോഗ്യ കേന്ദ്രമാക്കിക്കൊണ്ടുള്ള പ്രഖ്യാപനവും കെട്ടിടത്തിന്‍റെ ഉദ്ഘാടനവും മന്ത്രി വീണാ ജോര്‍ജ് നിര്‍വഹിക്കും. ആന്‍റോ ആന്‍റണി എംപി മുഖ്യാതിഥിയാകും. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ മുഖ്യപ്രഭാഷണം നടത്തും. ബ്ലോക്ക് പഞ്ചായത്ത് പ്രസിഡന്‍റ് മറിയാമ്മ ഫെര്‍ണാണ്ടസ്, പഞ്ചായത്ത് പ്രസിഡന്‍റ് കെ.സി. ജയിംസ്, ജില്ലാ പഞ്ചായത്ത് അംഗങ്ങളായ ഷോണ്‍ ജോര്‍ജ്, പി.ആര്‍. അനുപമ തുടങ്ങിയവര്‍ പ്രസംഗിക്കും.

പറഞ്ഞുമടുത്തിട്ടും അധികൃതർ കേട്ടില്ല ഒടുവിൽ നാട്ടുകാർ സംഘടിച്ച് റോഡിനെ രക്ഷിച്ചു

കുറവിലങ്ങാട്: പലതവണ പറഞ്ഞിട്ടും അധികൃതർ കേട്ടഭാവം പോലും കാണിക്കാതെ വന്നതോടെ നാട്ടുകാർ സംഘടിച്ച് രംഗത്തിറങ്ങി യാത്ര സുഗമമാക്കി. പള്ളിത്താഴെ- മുണ്ടൻവരമ്പ് റോഡിലെ അപകടഭീഷണിയെച്ചൊല്ലിയുള്ള പ്രതിഷേധങ്ങൾ ഫലം കാണാതെ വന്നതോടെയാണ് നാട്ടുകാർ രംഗത്തിറങ്ങി സേവനനിരതരായത്. കൂട്ടായ ശ്രമങ്ങൾക്ക് സ്‌നേഹവേദി സൊസൈറ്റി, ബാപ്പുജി സ്വാശ്രയസംഘം, ഐക്യവേദി എസ്എച്ച് ഗ്രൂപ്പ്, കുറവിലങ്ങാട് ഇടവകയിലെ വിശുദ്ധ ഇരണെവൂസ് കുടുംബ കൂട്ടായ്മ യൂണിറ്റ് എന്നിവയും നേതൃത്വം നൽകി. ടിക്‌സൺ മണിമലത്തടം, ജോജി ഒറ്റക്കണ്ടം, ഷൈജു പാവുത്തിയേൽ, എം.വി. ജോൺ കുന്നേൽ, ജയകുമാർ കാഞ്ഞിരവേലിൽ, ബോബിച്ചൻ നിധീരി, ജോസ് കൊച്ചുപുരയ്ക്കൽ എന്നിവരുടെ നേതൃത്വത്തിൽ പൊതുമരാമത്ത് വിഭാഗത്തിലും ജനപ്രതിനിധികൾക്കും പരാതി നൽകിയിരുന്നുവെങ്കിലും ഫലമുണ്ടായില്ല. മഴവെള്ളം റോഡിലൂടെ ഒഴുകിയതിലൂടെ റോഡരിക് കുഴിഞ്ഞ് വലിയ അപകടഭീഷണിയിലായിരുന്നു. അനധികൃത നിർമാണവും റോഡിൽ അപകടഭീഷണി സൃഷ്ടിച്ചിരുന്നതായി പരാതികൾ ഉയർന്നിരുന്നു. റോഡിന്‍റെ വശങ്ങളിൽ മണ്ണും കല്ലുമെത്തിച്ചിട്ടാണ് അപകടഭീഷണി ഒഴിവാക്കിയത്.

സംവരണവാർഡുകൾ വ്യക്തമായി സീറ്റുറപ്പിക്കാൻ പടയോട്ടം

കുറവിലങ്ങാട്: ഗ്രാമപഞ്ചായത്തുകളിലെ സംവരണവാർഡുകൾ സംബന്ധിച്ച ചിത്രം വ്യക്തമായതോടെ സീറ്റുറപ്പിക്കാനുള്ള നീക്കങ്ങൾ സജീവമായി. സ്വന്തം സീറ്റുറപ്പിക്കാൻ പരിശ്രമിക്കുന്നതിനിടയിൽ പഞ്ചായത്ത് വാർഡുകളിൽ മികച്ച സ്ഥാനാർഥികളെ രംഗത്തിറക്കാനും നേതാക്കൾ സജീവമാണ്. ബ്ലോക്ക്, ജില്ലാ ഡിവിഷനുകളിലെ സംവരണവാർഡുകൾ വ്യക്തമായാൽ മാത്രമേ മുതിർന്ന നേതാക്കളുടെ ചങ്കിടിപ്പ് വർധിക്കൂ എന്നതാണ് സ്ഥിതി. സംവരണവാർഡുകളുടെ സാധ്യത കൂട്ടിയും കിഴിച്ചും പഠിച്ചിട്ടും ഭാഗ്യം കടാക്ഷിക്കുമോ എന്നതാണ് പ്രധാന സംശയം. സ്വന്തം ഡിവിഷനുകൾ ജനറലായാൽ മത്സരസാധ്യത കുറയുമോ എന്ന് ആശങ്കപ്പെടുന്ന വനിതാ നേതാക്കളും ഇല്ലാതില്ല. ജില്ലാ പഞ്ചായത്ത് ഡിവിഷനിൽ പലയിടങ്ങളിലും അര ഡസൻ സ്ഥാനാർഥികൾ വരെ സീറ്റുമോഹവുമായി രംഗത്തുണ്ട്. രാഷ്‌ട്രീയ പാർട്ടികളുടെയും മുന്നണികളുടെയും ഓഫീസുകളും വിവിധ വീടുകൾ കേന്ദ്രീകരിച്ചുള്ള യോഗങ്ങളും സജീവമായിക്കഴിഞ്ഞു. സീറ്റുകൾ മോഹിച്ചിരുന്നവരെല്ലാം മറനീക്കി പുറത്തെത്തിക്കഴിഞ്ഞു. അണികളെ രംഗത്തിറക്കി നേതൃത്വത്തെ സ്വാധീനിച്ച് സീറ്റുറപ്പിക്കാനുള്ള അടവുനയങ്ങളും ആരംഭിച്ചിട്ടുണ്ട്. വാർഡുകൾ മാറിയും നേരിയ നീക്കുപോക്കുകൾ വരുത്തിയും സീറ്റുറപ്പിക്കാനുള്ള സാധ്യതകൾ മങ്ങിയാൽ മുന്നണി മാറുന്നതടക്കമുള്ള ചർച്ചകളും കാഴ്ചകളുമൊക്കെ പതിവുതെറ്റാതെ ഇക്കുറിയും നടന്നേക്കാം.

വെള്ളിയേപ്പള്ളികണ്ടം-നെല്ലിക്കച്ചാൽ റോഡ് തകർന്നു

പൂഞ്ഞാര്‍: പൂഞ്ഞാര്‍ പഞ്ചായത്തിലെ വെള്ളിയേപ്പള്ളികണ്ടം - നെല്ലിക്കച്ചാല്‍ റോഡ് തകര്‍ന്ന് കാല്‍നട യാത്രപോലും ദുഷ്‌കരമായി. നിരവധി സ്‌കൂള്‍ ബന്ധുകള്‍ ഉള്‍പ്പെടെ ദിനംപ്രതി ഒട്ടേറെ വാഹനങ്ങള്‍ സഞ്ചരിക്കുന്ന റോഡ് റീടാറിംഗ് നടത്തി ഗതാഗതയോഗ്യമാക്കണമെന്ന് ബിഎംഎസ് പൂഞ്ഞാര്‍ മേഖലാ കമ്മിറ്റി ആവശ്യപ്പെട്ടു.

തലപ്പലം ബാങ്കിന് തുടർച്ചയായി മൂന്നാം വർഷവും എക്സലൻസ് അവാർഡ്

തലപ്പലം: പ്രവര്‍ത്തന മികവിന്‍റെ അടിസ്ഥാനത്തില്‍ കേരള ബാങ്ക് നല്‍കുന്ന എക്‌സലന്‍സ് അവാര്‍ഡ് തുടര്‍ച്ചയായി മൂന്നാം വര്‍ഷവും തലപ്പലം സര്‍വീസ് സഹകരണ ബാങ്കിന് ലഭിച്ചു. തിരുവനന്തപുരത്ത് കേരള ബാങ്ക് ഹെഡ് ഓഫീസ് ഓഡിറ്റോറിയത്തില്‍ നടന്ന ചടങ്ങില്‍ കേരള ബാങ്ക് ഡയറക്ടര്‍ എ. പ്രഭാകരന്‍ എംഎല്‍എയില്‍നിന്നു പുരസ്‌കാരം ബാങ്ക് പ്രസിഡന്‍റ് ഷിബി ജോസഫ് ഈരൂരിക്കല്‍, വൈസ് പ്രസിഡന്‍റ് അനില്‍കുമാര്‍ മത്തപ്പള്ളില്‍, സെക്രട്ടറി പി.പി. അനില്‍കുമാർ എന്നിവരും മറ്റു ഭരണസമിതി അംഗങ്ങളും ചേര്‍ന്ന് ഏറ്റുവാങ്ങി. കഴിഞ്ഞ 31 വര്‍ഷം തുടര്‍ച്ചയായി ലാഭത്തില്‍ പ്രവര്‍ത്തിക്കുന്ന ക്ലാസ് ഒന്ന് സൂപ്പര്‍ ഗ്രേഡ് ബാങ്ക് ഓഹരി ഉടമകള്‍ക്ക് എല്ലാ വര്‍ഷവും ലാഭവിഹിതവും നല്‍കിവരുന്നു.

കടപ്ലാമറ്റം, കുറവിലങ്ങാട്, മീനച്ചിൽ പഞ്ചായത്തുകളിൽ വികസനസദസ്

പാലാ: കടപ്ലാമറ്റം, കുറവിലങ്ങാട് പഞ്ചായത്തുകളുടെ വികസനസദസ് ഇന്നു നടക്കും. കടപ്ലാമറ്റം പഞ്ചായത്തിലെ വികസനസദസ് രാവിലെ 9.30ന് സര്‍ക്കാര്‍ ചീഫ് വിപ്പ് ഡോ. എന്‍. ജയരാജ് ഉദ്ഘാടനം ചെയ്യും. പഞ്ചായത്ത് കമ്യൂണിറ്റി ഹാളില്‍ നടക്കുന്ന പരിപാടിയില്‍ പഞ്ചായത്ത് പ്രസിഡന്‍റ് മത്തായി മാത്യു അധ്യക്ഷത വഹിക്കും. കുറവിലങ്ങാട് പഞ്ചായത്തിലെ വികസനസദസ് ഉഴവൂര്‍ ബ്ലോക്ക് പഞ്ചായത്ത് വൈസ് പ്രസിഡന്‍റ് സിന്ധുമോള്‍ ജേക്കബ് രാവിലെ 10ന് ഉദ്ഘാടനം ചെയ്യും. പി.ഡി. പോള്‍ ഹാളില്‍ നടക്കുന്ന ചടങ്ങില്‍ പഞ്ചായത്ത് വികസനകാര്യ സ്ഥിരംസമിതി അധ്യക്ഷ സന്ധ്യാ ശശികുമാര്‍ അധ്യക്ഷത വഹിക്കും. ജില്ലാ പഞ്ചായത്തംഗം നിര്‍മല ജിമ്മി പ്രോഗ്രസ് റിപ്പോര്‍ട്ട് പ്രകാശനം ചെയ്യും. മീനച്ചില്‍ പഞ്ചായത്ത് വികസന സദസ് ഇന്നു രാവിലെ 10.30ന് സെന്‍റ് മൈക്കിള്‍സ് പാരിഷ് ഹാളില്‍ നടക്കും. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ ഉദ്ഘാടനം ചെയ്യും. പഞ്ചായത്ത് പ്രസിഡന്‍റ് അധ്യക്ഷത വഹിക്കും. ജില്ലാ പഞ്ചായത്തംഗം രാജേഷ് വാളിപ്ലാക്കല്‍, ബ്ലോക്ക് പഞ്ചായത്ത് പ്രസിഡന്‍റ് ജെസി ജോര്‍ജ്, ബ്ലോക്ക് പഞ്ചായത്തംഗം ജോസ് ചെമ്പകശേരില്‍, പഞ്ചായത്തംഗങ്ങൾ, സാമൂഹിക, രാഷ്ട്രീയ, സാംസ്‌കാരിക രംഗത്തെ ആളുകള്‍ തുടങ്ങിയവർ പങ്കെടുക്കും.

മരം വെട്ടുന്നതിനിടയിൽ തടിവീണു തൊഴിലാളി മരിച്ചു

ഹരിപ്പാട്: മരം വെട്ടുന്നതിനിടയിൽ തടിവീണു തൊഴിലാളി മരിച്ചു. മഹാദേവികാട് നികത്തിൽ പുത്തൻ കണ്ടത്തിൽ കെ. സന്തോഷ്‌ (52) ആണ് മരിച്ചത്. ഇന്നലെ വൈകുന്നേരം ആറിന് ഹരിപ്പാട് കെഎസ്ആർടിസി ബസ് സ്റ്റാൻഡിന് പടിഞ്ഞാറുവശത്തുള്ള വീട്ടിൽ മരം മുറിക്കുന്നതിനിടയിലാണ് അപകടമുണ്ടായത്. മുറിച്ച മരം വലിച്ചു താഴെക്കിട്ടപ്പോൾ ശരീരത്തേക്കു വീഴുകയായിരുന്നു. കാൽ മണ്ണിൽ പുതഞ്ഞതിനാൽ സന്തോഷിന് ഓടിമാറാൻ കഴിഞ്ഞില്ല. ഒപ്പമുണ്ടായിരുന്നവർ ഉടൻതന്നെ ഹരിപ്പാട് താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം ഹരിപ്പാട് താലൂക്ക് ആശുപത്രി മോർച്ചറിയിൽ. മാതാവ്: ലക്ഷ്മിക്കുട്ടി. ഭാര്യ: ബിന്ദു. മക്കൾ: സന്ദീപ്, അപർണ.

ജില്ലാ കായികമേള: മത്സരത്തിനിടെ വിദ്യാര്‍ഥിനിക്ക് പരിക്ക്

പാലാ: മത്സരത്തിനിടെ വിദ്യാര്‍ഥിനിയുടെ കാലിന് പരിക്കേറ്റു. നൈസാ സെബാസ്റ്റ്യനാണ് പരിക്കേറ്റത്. ഇന്നലെ ഉച്ചയോടെ ജൂണിയര്‍ വിഭാഗം പെണ്‍കുട്ടികളുടെ ഹൈജംപ് മത്സരത്തില്‍ പങ്കെടുക്കുന്നതിനിടെയാണ് കാലിന് പരിക്കേറ്റത്. ചാടുന്നതിനിടെ വലതുകാല്‍ മുട്ട് തെറ്റുകയായിരുന്നു. അടിയന്തര വൈദ്യസഹായം നല്‍കിയ ശേഷം ആശുപത്രിയിലേക്ക് മാറ്റി. ഭരണങ്ങാനം എസ്.എച്ച് സ്‌കൂളിലെ ഒന്‍പതാം ക്ലാസ് വിദ്യാര്‍ഥിനിയാണ്.

എഎസ്‌ഐഎസ്‌സി കേരള റീജണല്‍ സ്‌കൂള്‍ കലോത്സവം ഇന്നും നാളെയും മാന്നാനം കെഇ സ്‌കൂളില്‍

കോട്ടയം: അസോസിയേഷന്‍ ഓഫ് സ്‌കൂള്‍സ് ഫോര്‍ ഇന്ത്യന്‍ സ്‌കൂള്‍ സര്‍ട്ടിഫിക്കറ്റ് (എഎസ്‌ഐഎസ്‌സി) കേരള റീജണല്‍ സ്‌കൂള്‍ കലോത്സവം രംഗോത്സവ് ഇന്നും നാളെയും മാന്നാനം കെഇ ഇംഗ്ലീഷ് മീഡിയം സ്‌കൂളില്‍ നടക്കും. സംസ്ഥാനത്തെ 160 ഐസിഎസ്ഇ, ഐഎസ് സി സ്‌കൂളുകളില്‍നിന്നായി 2000 വിദ്യാര്‍ഥികള്‍ പങ്കെടുക്കും. ആറ് സോണുകളിലായി നടന്ന സോണല്‍തല മത്സരങ്ങളില്‍ വിജയികളായവരാണ് റീജണല്‍ മത്സരങ്ങളില്‍ മാറ്റുരയ്ക്കുന്നത്. 10 വേദികളിലായി 33 വ്യത്യസ്ത മത്സരങ്ങളാണ് നടക്കുക. ഇന്നുച്ചയ്ക്ക് 12ന് ഉദ്ഘാടന സമ്മേളനത്തില്‍ ചലച്ചിത്ര താരം റോണി ഡേവിഡ് വിശിഷ്ടാതിഥിയായിരിക്കും. കേരള റീജണ്‍ പ്രസിഡന്‍റ് ഫാ. സില്‍വി ആന്‍റണി അധ്യക്ഷതവഹിക്കും. മാന്നാനം സെന്‍റ് ജോസഫ്സ് ആശ്രമാധിപന്‍ റവ.ഡോ. കുര്യന്‍ ചാലങ്ങാടി സിഎംഐ, കെഇ റസിഡന്‍റ്സ് പ്രിഫക്ട് ഫാ. ഷൈജു സേവ്യര്‍ സിഎംഐ, കെഇ സ്‌കൂള്‍ ബര്‍സാര്‍ ഫാ. ബിബിന്‍ തോമസ് സിഎംഐ, കേരള റീജണല്‍ സ്‌കൂള്‍ കലോത്സവം കോഓര്‍ഡിനേറ്റര്‍ ഫാ. ഷിനോ കളപ്പുരയ്ക്കല്‍, സ്‌കൂള്‍ പിടിഎ പ്രസിഡന്‍റ് ജയ്സണ്‍ ജോസഫ്, പിടിഎ പ്രതിനിധികള്‍ തുടങ്ങിയവര്‍ പ്രസംഗിക്കും. 18നു വൈകുന്നരം അഞ്ചിനു നടക്കുന്ന സമാപന സമ്മേളനത്തില്‍ തിരുവനന്തപുരം സെന്‍റ് ജോസഫസ് പ്രൊവിന്‍സ് പ്രൊവിന്‍ഷ്യാള്‍ ഫാ. ആന്‍റണി ഇളന്തോട്ടം സിഎംഐ വിജയികള്‍ക്കുള്ള സമ്മാനദാനം നിര്‍വഹിക്കും. രണ്ട് ദിവസങ്ങളിലായി നടക്കുന്ന കലാമാമാങ്കത്തിനു വിപുലമായ സജ്ജീകരണങ്ങളാണ് ഒരുക്കിയിരിക്കുന്നതെന്ന് എഎസ്‌ഐഎസ് സി കേരള റീജണ്‍ സെക്രട്ടറിയും ട്രഷററും മാന്നാനം കെഇ ഇംഗ്ലീഷ് മീഡിയം സ്‌കൂള്‍ പ്രിന്‍സിപ്പലുമായ റവ.ഡോ. ജയിംസ് മുല്ലശേരി സിഎംഐ, വൈസ്പ്രിന്‍സിപ്പല്‍ റോയി മൈക്കിള്‍, അക്കാഡമിക് ഡയറക്ടര്‍ ഡോ. കെ.കെ. മോനിച്ചന്‍, കോഓഡിനേറ്റര്‍ ലെജി ഭാസ്‌കര്‍ എന്നിവര്‍ അറിയിച്ചു.

വിഷന്‍ 2031 സെമിനാര്‍ നാളെ

കോട്ടയം: സംസ്ഥാന രൂപീകരണത്തിനുശേഷം 75 വര്‍ഷങ്ങള്‍ പൂര്‍ത്തിയാകുന്ന 2031ല്‍ ഉന്നത വിദ്യാഭ്യാസ മേഖലയില്‍ ഉണ്ടാകേണ്ട മാറ്റങ്ങളെക്കുറിച്ച് ആശയങ്ങള്‍ സമാഹരിക്കാന്‍ ഉന്നത വിദ്യാഭ്യാസ വകുപ്പ് സംഘടിപ്പിക്കുന്ന ഏകദിന സെമിനാര്‍ നാളെ കോട്ടയത്തു നടക്കും. മാമ്മന്‍ മാപ്പിള ഹാള്‍, ബിസിഎം കോളജ്, ബസേലിയോസ് കോളജ് എന്നിവയാണ് വേദികള്‍. വിഷന്‍ 2031; ഉന്നത വിദ്യാഭ്യാസ വകുപ്പിന്‍റെ ഭാവി ലക്ഷ്യങ്ങള്‍ എന്ന സെമിനാര്‍ രാവിലെ 9.30ന് മാമ്മന്‍ മാപ്പിള ഹാളില്‍ മന്ത്രി വി.എന്‍. വാസവന്‍റെ അധ്യക്ഷതയില്‍ ചേരുന്ന ചടങ്ങോടെയാണ് ആരംഭിക്കുക.മന്ത്രി ഡോ. ആര്‍. ബിന്ദു സമീപനരേഖ അവതരിപ്പിക്കും. കഴിഞ്ഞ ഒന്‍പതു വര്‍ഷം ഉന്നത വിദ്യാഭ്യാസ മേഖലയില്‍ സംസ്ഥാനം കൈവരിച്ച നേട്ടങ്ങള്‍ വകുപ്പ് പ്രിന്‍സിപ്പല്‍ സെക്രട്ടറി ഡോ. ഷര്‍മിള മേരി ജോസഫ് വിശദമാക്കും. എംജി യൂണിവേഴ്‌സിറ്റിവൈസ് ചാന്‍സലര്‍ ഡോ. സി.ടി. അരവിന്ദകുമാര്‍, കോളജ് വിദ്യാഭ്യാസ ഡയറക്ടര്‍ കെ. സുധീര്‍ എന്നിവര്‍ പ്രസംഗിക്കും. തുടര്‍ന്ന് ഉന്നത വിദ്യാഭ്യാസ കൗണ്‍സില്‍ വൈസ് ചെയര്‍മാന്‍ പ്രഫ. രാജന്‍ ഗുരുക്കളുടെ അധ്യക്ഷതയില്‍ പ്ലീനറി സെഷൻ നടക്കും.

കോട്ടയം അതിരൂപത ജൂബിലി ബൈബിള്‍ കണ്‍വന്‍ഷന്‍ 24 മുതല്‍ ഉഴവൂരില്‍

ഉഴവൂര്‍: കോട്ടയം അതിരൂപതയുടെ ജൂബിലി ബൈബിള്‍ കണ്‍വന്‍ഷന്‍ 24 മുതല്‍ 27 വരെ വൈകുന്നേരം 4.30 മുതല്‍ രാത്രി ഒന്‍പതുവരെ ഉഴവൂര്‍ ഇ.ജെ. ലൂക്കോസ് എള്ളങ്കില്‍ മെമ്മോറിയല്‍ സ്‌റ്റേഡിയത്തില്‍ നടക്കും. ഫാ. ഡാനിയേല്‍ പൂവണ്ണത്തില്‍ കണ്‍വന്‍ഷന്‍ നയിക്കും. 24നു വൈകുന്നേരം അഞ്ചിനു അതിരൂപത സഹായ മെത്രാന്‍ മാര്‍ ജോസഫ് പണ്ടാരശേരില്‍ ഉദ്ഘാടനം ചെയ്തു വിശുദ്ധ കുര്‍ബാനയര്‍പ്പിക്കും. ഫാ. സ്റ്റീഫന്‍ കണ്ടാരപ്പള്ളില്‍, ഫാ. ജോണ്‍സണ്‍ നീലാനിരപ്പേല്‍ എന്നിവര്‍ സഹകാര്‍മികത്വം വഹിക്കും. രാത്രി 8.30നു ദിവ്യകാരുണ്യ ആരാധന. 25നു വൈകുന്നേരം അഞ്ചിനു വികാരി ജനറാള്‍ ഫാ. തോമസ് ആനിമൂട്ടില്‍ വിശുദ്ധ കുര്‍ബാനയര്‍പ്പിക്കും. ഫാ. സൈമണ്‍ പുല്ലാട്ട്, ഫാ. റെനി കട്ടേല്‍ എന്നിവര്‍ സഹകാര്‍മികത്വം വഹിക്കും. 26നു വൈകുന്നേരം അഞ്ചിനു വികാരി ജനറാള്‍ ഫാ. മൈക്കിള്‍ വെട്ടിക്കാട്ട് വിശുദ്ധ കുര്‍ബാനയര്‍പ്പിക്കും. ഫാ. തോമസ് പ്രാലേല്‍, ഫാ. സാബു മാലിത്തുരുത്തേല്‍ എന്നിവര്‍ സഹകാര്‍മികരായിരിക്കും. 27നു വൈകുന്നേരം അഞ്ചിനു ആര്‍ച്ച്ബിഷപ് മാര്‍ മാത്യു മൂലക്കാട്ട് വിശുദ്ധ കുര്‍ബാനയര്‍പ്പിക്കും. ഫാ. തോമസ് ഇടത്തിപ്പറമ്പില്‍, ഫാ. സൈജു പുത്തന്‍പറമ്പില്‍ എന്നിവര്‍ സഹകാര്‍മിത്വം വഹിക്കും. 8.30നു ദിവ്യകാരുണ്യ ആരാധന. 8.45നു ദിവ്യകാരുണ്യ പ്രദക്ഷിണത്തിന് സഹായമെത്രാന്‍ ഗീവര്‍ഗീസ് മാര്‍ അപ്രേം കാര്‍മികത്വം വഹിക്കും.

മാന്നാനം ബൈബിൾ കൺവൻഷൻ നവംബർ 19 മുതൽ 25 വരെ

മാന്നാനം: സെന്‍റ് ജോസഫ്സ് ആശ്രമ ദേവാലയത്തിൽ എട്ടാമത് മാന്നാനം ബൈബിൾ കൺവൻഷൻ നവംബർ 19 മുതൽ 25 വരെ നടക്കും. അട്ടപ്പാടി സെഹിയോൻ ധ്യാനകേന്ദ്രം ഡയറക്ടർ ഫാ. സേവ്യർഖാൻ വട്ടായിലും ഫാ. സാംസൺ ക്രിസ്റ്റി മണ്ണൂരും കൺവൻഷൻ നയിക്കും. കൺവൻഷൻ ദിനങ്ങളിലെ തിരുക്കർമങ്ങളിൽ യഥാക്രമം കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ, സിഎംഐ സഭയുടെ തിരുവനന്തപുരം പ്രൊവിൻഷൽ ഫാ. ആന്‍റണി ഇളംതോട്ടം, കുടമാളൂർ സെന്‍റ് മേരീസ് ആർക്കിഎപ്പിസ്കോപ്പൽ പള്ളി ആർച്ച്പ്രീസ്റ്റ് റവ.ഡോ. ജോർജ് മംഗലത്തിൽ, ദീപിക മാനേജിംഗ് ഡയറക്ടർ ഫാ. മൈക്കിൾ വെട്ടിക്കാട്ട്, ബംഗളൂരു ക്രൈസ്റ്റ് യൂണിവേഴ്സിറ്റി വൈസ് ചാൻസലർ റവ.ഡോ. ജോസ് ചേന്നാട്ടുശേരി എന്നിവർ കാർമികത്വം വഹിക്കും. കൺവൻഷനു മുന്നോടിയായുള്ള ആദ്യത്തെ ഒരുക്കധ്യാനം നാളെ വൈകുന്നേരം ആറിന് നടക്കും. നാഗമ്പടം സെന്‍റ് ആന്‍റണീസ് തീർഥാടന കേന്ദ്രം ഡയറക്ടർ മോൺ. സെബാസ്റ്റ്യൻ പൂവത്തിങ്കൽ ധ്യാനം നയിക്കും. കൺവൻഷൻ പന്തലിന്‍റെ കാൽനാട്ടു കർമം ഞായറാഴ്ച രാവിലെ 11 നുള്ള വിശുദ്ധ കുർബാനയെ തുടർന്ന് എംഎസ്ടി കോൺഗ്രിഗേഷൻ ഡയറക്ടർ ജനറൽ ഫാ. വിൻസന്‍റ് കദളിക്കാട്ടിൽ നിർവഹിക്കും. കൺവൻഷന്‍റെ വിജയത്തിനായി മാന്നാനം ആശ്രമം പ്രിയോർ റവ. ഡോ. കുര്യൻ ചാലങ്ങാടി (മുഖ്യ രക്ഷാധികാരി), തീർഥാടന കേന്ദ്രം അസി. ഡയറക്ടർ ഫാ. റെന്നി കളത്തിൽ (സഹരക്ഷാധികാരി), ബ്രദർ മാർട്ടിൻ പെരുമാലിൽ (ചെയർമാൻ), കുഞ്ഞുമോൻ കുറുമ്പനാടം (വൈസ് ചെയർമാൻ), ജോണി കുര്യാക്കോസ്, കെ.സി. ജോയി (ജനറൽ കൺവീനർമാർ), ഫാ. ജയിംസ് മുല്ലശേരി, ഫാ. മാത്യു പോളച്ചിറ, ഫാ. ബിജു തെക്കെക്കുറ്റ് തുടങ്ങിയവരുടെ നേതൃത്വത്തിൽ വിവിധ കമ്മിറ്റികൾ രൂപീകരിച്ച് പ്രവർത്തനം ആരംഭിച്ചു.

പാറത്തോട് - പാലപ്ര റോഡ് ബിഎം ആൻഡ് ബിസി റീടാറിംഗിന് ടെൻഡർ ക്ഷണിച്ചു

കാഞ്ഞിരപ്പള്ളി: പാറത്തോട് പഞ്ചായത്തിലെ ഒന്ന്, രണ്ട്, മൂന്ന്, 18,19 വാർഡുകളിലെ ജനങ്ങളുടെ ഗതാഗത മാർഗമായ പാറത്തോട് - പാലപ്ര - കള്ളുവേലി - വേങ്ങത്താനം റോഡ് ബിഎം ആൻഡ് ബിസി നിലവാരത്തിൽ റീടാറിംഗ് നടത്തുന്നതിന് ടെൻഡർ ക്ഷണിച്ചതായി സെബാസ്റ്റ്യൻ കുളത്തുങ്കൽ എംഎൽഎ അറിയിച്ചു. 25 വരെയാണ് ടെൻഡർ സമർപ്പിക്കാവുന്നത്. പൊതുമരാമത്ത് വകുപ്പിൽനിന്ന് അനുവദിച്ച 9.7 കോടി രൂപ വിനിയോഗിച്ചാണ് റോഡ് നവീകരിക്കുന്നത്. പ്രളയക്കെടുതികൾ മൂലവും കേരള വാട്ടർ അഥോറിറ്റി ജൽജീവൻ മിഷൻ പദ്ധതിയുടെ പൈപ്പ് ലൈനുകൾ സ്ഥാപിക്കുന്നതിന് റോഡ് കുഴിച്ചതിനാലും മറ്റും ഏറെ താറുമാറായ അവസ്ഥയിലാണ് റോഡിന്‍റെ നിലവിലെ സ്ഥിതി. പാറത്തോട് പഞ്ചായത്തിന്‍റെ ഏകദേശം നാലിലൊന്ന് ഭാഗത്തോളം വരുന്ന പാലപ്ര മേഖലയുടെ ഏക ഗതാഗതമാർഗമായ ഈ റോഡ് ബിഎം ആൻഡ് ബിസി നിലവാരത്തിൽ റീടാർ ചെയ്യുകയും ആവശ്യമായ സ്ഥലങ്ങളിൽ സംരക്ഷണഭിത്തികൾ, ഓടകൾ, കലുങ്കുകൾ മുതലായവയും റോഡ് സുരക്ഷാ സംവിധാനങ്ങളും ഒരുക്കി ഏറ്റവും മികച്ച നിലയിലാണ് പുനർനിർമിക്കുകയെന്ന് എംഎൽഎ അറിയിച്ചു. ഇതോടൊപ്പം ഈ റോഡിന്‍റെ ഒരു അനുബന്ധ റോഡായ പാറത്തോട് - പഴൂത്തടം - ചേറ്റുതോട് - പിണ്ണാക്കനാട് റോഡ് ബിഎം ആൻഡ് ബിസി നിലവാരത്തിൽ റീടാർ ചെയ്യുന്നതിന് ഒന്പത് കോടി രൂപ അനുവദിച്ച് ടെൻഡർ നടപടികൾ പൂർത്തീകരിച്ച് പ്രവർത്തി ആരംഭിച്ചതായും എംഎൽഎ അറിയിച്ചു.

മുണ്ടക്കയം-വാഗമൺ റോഡ് നിർമാണോദ്ഘാടനം നാളെ

മുണ്ടക്കയം: ഇന്ത്യയിലെ പ്രധാന വിനോദ സഞ്ചാര കേന്ദ്രമായ വാഗമണിലേക്കു മധ്യകേരളത്തിൽനിന്ന് ഏറ്റവും എളുപ്പം എത്തിച്ചേരാവുന്ന മുണ്ടക്കയം - ഇളങ്കാട് - വാഗമൺ റോഡിന്‍റെ നിർമാണോദ്ഘാടനം നാളെ വൈകുന്നേരം നാലിന് നടക്കുമെന്നു സെബാസ്റ്റ്യൻ കുളത്തുങ്കൽ എംഎൽഎ പത്രസമ്മേളനത്തിൽ അറിയിച്ചു. പൊതുമരാമത്ത് - ടൂറിസം മന്ത്രി പി.എ. മുഹമ്മദ് റിയാസ് റോഡിന്‍റെ നിർമാണോദ്ഘാടനം നിർവഹിക്കും. സെബാസ്റ്റ്യൻ കുളത്തുങ്കൽ എംഎൽഎ അധ്യക്ഷത വഹിക്കും. ആന്‍റോ ആന്‍റണി എംപി മുഖ്യപ്രഭാഷണം നടത്തും. ജില്ലാ പഞ്ചായത്തംഗങ്ങളായ പി.ആർ. അനുപമ, ശുഭേഷ് സുധാകരൻ, ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ്, പഞ്ചായത്ത് പ്രസിഡന്‍റ് ബിജോയ് ജോസ്, വൈസ് പ്രസിഡന്‍റ് രജനി സുധീർ, കെ.ജെ തോമസ്, പഞ്ചായത്തംഗങ്ങൾ തുടങ്ങിയവർ പ്രസംഗിക്കും. 17 കോടിയുടെ പദ്ധതി മുണ്ടക്കയത്തുനിന്ന് ആരംഭിച്ച് നിലവിൽ ഇളംകാടിനു സമീപം വല്യേന്തവരെ എത്തിനിൽക്കുന്ന റോഡ് തുടർന്ന് പുതിയതായി ഏഴു കിലോമീറ്റർ നിർമിച്ചാണ് വാഗമണിൽ എത്തിച്ചേരുക. ഇതിനായി സെബാസ്റ്റ്യൻ കുളത്തുങ്കൽ എംഎൽഎ മുൻകൈയെടുത്ത് സംസ്ഥാന ബജറ്റിൽ രണ്ടു ഘട്ടമായി 17 കോടി രൂപ അനുവദിപ്പിച്ചിരുന്നു. ഈ തുക വിനിയോഗിച്ചാണ് ഇപ്പോൾ റോഡ് നിർമാണം നടത്തുന്നത്. ഈ റോഡ് യാഥാർഥ്യമാകുന്നതോടുകൂടി മുണ്ടക്കയത്തുനിന്ന് 22 കിലോമീറ്റർ മാത്രം സഞ്ചരിച്ചു വിനോദ സഞ്ചാര കേന്ദ്രമായ വാഗമണിൽ എത്തിച്ചേരാൻ കഴിയും. കൂടാതെ എരുമേലി ശബരിവിമാനത്താവളം യാഥാർഥ്യമാകുമ്പോൾ ദേശീയ - അന്താരാഷ്‌ട്ര തലങ്ങളിൽനിന്ന് എത്തിച്ചേരുന്ന വിനോദസഞ്ചാരികൾക്ക് 36 കിലോമീറ്റർ മാത്രം സഞ്ചരിച്ച് ഇതുവഴി വാഗമണ്ണിൽ എത്തിച്ചേരാൻ കഴിയും. ഇതു ഭാവിയിൽ വാഗമണിന്‍റെ ടൂറിസം സാധ്യതകൾ കൂടുതൽ വർധിപ്പിക്കും. പത്രസമ്മേളനത്തിൽ കൂട്ടിക്കൽ പഞ്ചായത്ത് പ്രസിഡന്‍റ് ബിജോയി ജോസ് മുണ്ടുപാലം, വൈസ് പ്രസിഡന്‍റ് രജനി സുധീർ, പി.കെ. സണ്ണി എന്നിവരും പങ്കെടുത്തു.

നറുക്കെടുപ്പു പൂര്‍ത്തിയായി, ഇനി കളം മുറുകും

സംവരണ വാര്‍ഡുകള്‍ കോട്ടയം: തദ്ദേശ സ്വയംഭരണ തെരഞ്ഞെടുപ്പിനു മുന്നോടിയായി ജില്ലയിലെ ഗ്രാമപഞ്ചായത്തുകളിലെയും നഗരസഭകളിലെയും സംവരണ വാര്‍ഡുകള്‍ നിര്‍ണയം പൂര്‍ത്തിയായി. വാഴൂര്‍, കാഞ്ഞിരപ്പള്ളി, പള്ളം ബ്ലോക്കുകളില്‍ വരുന്ന ഗ്രാമപഞ്ചായത്തുകളിലെ സംവരണ വാര്‍ഡുകള്‍ ജില്ലാ കളക്ടര്‍ ചേതന്‍കുമാര്‍ മീണയുടെ നേതൃത്വത്തില്‍ നറുക്കെടുപ്പിലൂടെ തീരുമാനിച്ചു. ചിറക്കടവ് പട്ടികജാതി സംവരണം: ചിത്രാഞ്ജലി (4). സ്ത്രീ സംവരണം: കോയിപ്പള്ളി (2), കുന്നുംഭാഗം (6), മണ്ണാറക്കയം (7), ഗ്രാമദീപം (8), മണ്ണംപ്ലാവ് (9), മൂലേപ്ലാവ് (14), തെക്കേത്തുകവല (17), മന്ദിരം (19), കാവാലിമാക്കല്‍ (20), തോണിപ്പാറ (21), ഇരുപതാം മൈല്‍ (22). മണിമല പട്ടികജാതി സ്ത്രീ സംവരണം: മണിമല (1), കറിക്കാട്ടൂര്‍ (9). പട്ടികജാതി സംവരണം: കറിക്കാട്ടൂര്‍ സെന്റര്‍ (3), വെച്ചുകുന്ന് (12) സ്ത്രീ സംവരണം: പൂവത്തോലി (2), കൊന്നക്കുളം (4), മുക്കട (6), പൊന്തന്‍പുഴ (8), മേലേക്കവല (13), കറിക്കാട്ടൂര്‍ നോര്‍ത്ത് (15). വാഴൂര്‍ പട്ടികജാതി സംവരണം: ഉള്ളായം (12). സ്ത്രീ സംവരണം: പുളിക്കല്‍കവല (1), വൈരമല (4), തെക്കാനിക്കാട് (6), ശാസ്താംകാവ് (7), ഇളങ്ങോയി (11), ചാമംപതാല്‍ (13), കാനം (14), കണ്‍ട്രാച്ചി (15), ചെല്ലിമറ്റം (17). വെള്ളാവൂര്‍ പട്ടികജാതി സ്ത്രീ സംവരണം: കുളത്തൂര്‍മൂഴി (14). പട്ടികജാതി സംവരണം: പാറയ്ക്കാട് (4). സ്ത്രീ സംവരണം: പൊട്ടുകുളം (2), കടയിനിക്കാട് (3), എട്ടാം മൈല്‍ (8), തോണിപ്പാറ (9), അംബേദ്കര്‍ (10), ഏറത്തുവടകര (11). എരുമേലി പട്ടികജാതി സ്ത്രീ സംവരണം: പഴയിടം (1), നേര്‍ച്ചപ്പാറ (6). പട്ടികജാതി സംവരണം: കാരിശേരി (7). പട്ടികവര്‍ഗ സംവരണം: ഉമിക്കുപ്പ (13). സ്ത്രീ സംവരണം: ചേനപ്പാടി (2), മൂക്കന്‍പെട്ടി (9), എയ്ഞ്ചല്‍വാലി (10), തുമരംപാറ (17), പ്രപ്പോസ് (18), എരുമേലി ടൗണ്‍ (19), മണിപ്പുഴ (20), ശ്രീനിപുരം (22), കനകപ്പലം (23), ചെറുവള്ളി എസ്റ്റേറ്റ് (24). കാഞ്ഞിരപ്പള്ളി പട്ടികജാതി സംവരണം: വിഴിക്കത്തോട് (17). സ്ത്രീ സംവരണം: മഞ്ഞപ്പള്ളി (4), ആനക്കല്ല് (5), കാഞ്ഞിരപ്പള്ളി ടൗണ്‍ (6), വട്ടകപ്പാറ (9), പൂതക്കുഴി (10), കാഞ്ഞിരപ്പള്ളി സൗത്ത് (11), മണങ്ങല്ലൂര്‍ (16), അഞ്ചലിപ്പ (19), മണ്ണാറക്കയം (20), കടമപ്പുഴ (22), മാനിടുംകുഴി (23), തമ്പലക്കാട് (24). മുണ്ടക്കയം പട്ടികജാതി സ്ത്രീ സംവരണം: വണ്ടന്‍പതാല്‍ ഈസ്റ്റ് (7), കരിനിലം (8). പട്ടികജാതി സംവരണം: മുണ്ടക്കയം ടൗണ്‍ സൗത്ത് (3). പട്ടികവര്‍ഗ സംവരണം: താന്നിക്കപ്പതാല്‍ (18). സ്ത്രീ സംവരണം: വേലനിലം (1), മുണ്ടക്കയം ടൗണ്‍ ഈസ്റ്റ് (2), മൈക്കോളജി (5), വരിക്കാനി (6), വണ്ടന്‍പതാല്‍ (9), അംസംബനി (10), മുരിക്കുംവയല്‍ (11), ആനിക്കുന്ന് (14), വട്ടക്കാവ് (19), പൈങ്ങന (21). കോരുത്തോട് പട്ടികജാതി സ്ത്രീ സംവരണം: അഞ്ഞൂറ്റിനാല് ഐഎച്ച്ഡിപി കോളനി (12). പട്ടികജാതി സംവരണം: മൂന്നോലി അഞ്ഞൂറ്റിനാല് ഐഎച്ച്ഡിപി കോളനി (13). പട്ടികവര്‍ഗ സംവരണം: കൊമ്പുകുത്തി (3). സ്ത്രീ സംവരണം: മുണ്ടക്കയം ബ്ലോക്ക് (4), ചണ്ണപ്ലാവ് (6), കോരുത്തോട് (7), പള്ളിപ്പടി (9), കോസടി (10), മടുക്ക (11). കൂട്ടിക്കല്‍ പട്ടികജാതി സ്രീ സംവരണം: ഇളംകാട് ടോപ്പ് (7). പട്ടികജാതി സംവരണം: കൂട്ടിക്കല്‍ ചപ്പാത്ത് (13). സ്ത്രീ സംവരണം: പറത്താനം (1), താളുങ്കല്‍ (2), പ്ലാപ്പള്ളി (3), ചാത്തന്‍ പ്ലാപ്പള്ളി (4), തേന്‍പുഴ ഈസ്റ്റ് (10), വെട്ടിക്കാനം (11). പാറത്തോട് പട്ടികജാതി സംവരണം: നാടുകാണി (9). സ്ത്രീ സംവരണം: വേങ്ങത്താനം (1), പാലപ്ര (2), ചോറ്റി (4), മാങ്ങാപ്പാറ (6), വടക്േല (7), കട്ടുപ്പാറ (8), കൂരംതൂക്ക് (11), കൂവപ്പള്ളി (12), മുക്കാലി (15), വണ്ടന്‍പാറ (19), പഴൂമല (13).

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]