ADVERTISEMENT

ADVERTISEMENT

ഫീറ്റോമാറ്റ് 2025 ആരംഭിച്ചു

തിരുവനന്തപുരം: മെറ്റേണൽ-ഫീറ്റൽ മെഡിസിൻ വിദഗ്ധരുടെ അന്താരാഷ്ട്ര സമ്മേളനാമായ 'ഫീറ്റോമാറ്റ് 2025' തിരുവനന്തപുരം ഓ ബൈ താമരയിൽ ആരംഭിച്ചു. ഇംഗ്ലണ്ടിലെ റോയൽ കോളജ് ഓഫ് ഒബ്‌സ്റ്റട്രിഷ്യൻസ് ആൻഡ് ഗൈനക്കോളജിസ്റ്റ്‌സുമായി സഹകരിച്ചു, കിംസ്ഹെൽത്തിലെ മെറ്റേണൽ ആൻഡ് ഫീറ്റൽ മെഡിസിൻ വിഭാഗവും ഒബ്‌സ്റ്റട്രിക്‌സ് ആൻഡ് ഗൈനക്കോളജി വിഭാഗവും സംയുക്തമായാണ് ദ്വിദിന സമ്മേളനം സംഘടിപ്പിക്കുന്നത്. സ്വകാര്യ മേഖലയിൽ ആദ്യത്തെ സമഗ്രമായ പെരിനാറ്റൽ മെന്‍റൽ ഹെൽത്ത് ക്ലിനിക്കായ മാനസിയുടെ ഉദ്ഘാടനം എഐസിസി ആർസിഒജി ഓൾ ഇന്ത്യചെയർ ഡോ. ഉമാ റാം നിർവഹിച്ചു.

ഫീറ്റോമാറ്റിന്‍റെ ഓർഗനൈസിംഗ് സെക്രട്ടറിയും കിംസ്ഹെൽത്തിലെ ഹൈ-റിസ്‌ക് പ്രെഗ്നൻസി ആൻഡ് പെരിനാറ്റോളജി വിഭാഗം സീനിയർ കൺസൾട്ടന്‍റുമായ ഡോ. ആർ.
വിദ്യാലക്ഷ്മി സ്വാഗതവും ഒബ്‌സ്റ്റെട്രിക്‌സ് ആൻഡ് ഗൈനക്കോളജി വിഭാഗം കൺസൾട്ടന്‍റ് ഡോ. ആർ. സജിത് മോഹൻ നന്ദിയും രേഖപ്പെടുത്തി.

ഓസ്‌ട്രേലിയയിലെ ലിവർപൂൾ ഹോസ്പിറ്റ്ലിലെ മെറ്റേണൽ ഫീറ്റൽ മെഡിസിൻ കൺജോയിന്‍റ് പ്രഫസറായ ഡോ. ജോൺ സ്മോളെനിയേക്, ചെന്നൈ മെഡിസ്‌കാൻ ഡയറക്ടറും ഇന്ത്യയിലെ പ്രശസ്ത ഫീറ്റൽ മെഡിസിൻ വിദഗ്ദ്ധനുമായ ഡോ. എസ്. സുരേഷ് എന്നിവർ ചടങ്ങിൽ പങ്കെടുത്തു.

ADVERTISEMENT

ഊബര്‍ ഡ്രൈവര്‍ക്കുനേരേ ആക്രമണം; നാലുപേര്‍ ഒളിവില്‍

പേരൂര്‍ക്കട: ഊബര്‍ ടാക്‌സി ഡ്രൈവറെ ഓട്ടം വിളിച്ച് മര്‍ദിച്ച് പണം കവര്‍ന്ന സംഭവത്തില്‍ നാലുപേര്‍ ഒളിവില്‍. കാപ്പ പ്രതി കാപ്പിരി ജിതിന്‍റെ സംഘത്തിൽപ്പെട്ട നാലുപേരെയാണ് ഇനി പിടികൂടാനുള്ളത്. സംഭവദിവസം പാറോട്ടുകോണത്ത് എത്തിയ ഊബര്‍ ടാക്‌സി ഡ്രൈവര്‍ അരുണ്‍ രാജിന്‍റെ കാറില്‍ ജിതിനൊപ്പം മൂന്നുപേര്‍ കയറുകയും രണ്ടുപേര്‍ ബൈക്കില്‍ ഇവരെ പിന്തുടരുകയും നാലുപേര്‍ ഒരു ഓട്ടോറിക്ഷയില്‍ മുന്നേ പോകുകയും ചെയ്തിരുന്നു. ബൈക്കില്‍ സഞ്ചരിച്ചിരുന്നവര്‍ പകുതിവഴിക്കുവച്ച് കാറില്‍ക്കയറി. ഇവര്‍ ആറുപേരാണ് ഇപ്പോള്‍ റിമാന്‍ഡിലായിരിക്കുന്നത്. അതേസമയം ഓട്ടോയില്‍ സഞ്ചരിച്ച നാലുപേരെക്കുറിച്ച് വിവരമില്ല. ടാക്‌സി ഡ്രൈവറെ ആക്രമിക്കാനുള്ള പദ്ധതി എന്തെങ്കിലും കാരണവശാല്‍ പരാജയപ്പെട്ടാല്‍ സഹായിക്കുന്നതിനാണ് ഓട്ടോയില്‍ നാലുപേര്‍ ഇവരുടെ മുന്നേ പോയത്. എഴുകന്യാവൂര്‍ റോഡിനടുത്തുവച്ച് ഓട്ടോ നിര്‍ത്തുകയും ഇതിലുള്ളവര്‍ കാറിലുണ്ടായിരുന്നവര്‍ തിരികെവരുന്നതും പ്രതീക്ഷിച്ച് നില്‍ക്കുകയുമായിരുന്നു. കാര്‍ ഓടയ്ക്കുള്ളില്‍ വീണപ്പോള്‍ കാപ്പിരി ജിതിനും സംഘവും ഓടിമറഞ്ഞു. ഇവര്‍ക്കൊപ്പം ഓട്ടോയിലെത്തിയവരും രക്ഷപ്പെടുകയായിരുന്നു.

കഞ്ചാവും ബ്രൗണ്‍ ഷുഗറുമായി വെസ്റ്റ് ബംഗാള്‍ സ്വദേശി പിടിയില്‍

തിരുവല്ലം: തിരുവല്ലത്തിനു സമീപം വണ്ടിത്തടത്തില്‍ എക്‌സൈസ് തിരുവനന്തപുരം ഡിവിഷന്‍ റേഞ്ച് ഓഫീസിന്‍റെ നേതൃത്വത്തില്‍ നടത്തിയ പരിശോധനയില്‍ 2.100 കിലോഗ്രാം കഞ്ചാവും 10.68 ഗ്രാം ബ്രൗണ്‍ ഷുഗറുമായി വെസ്റ്റ് ബംഗാള്‍ സ്വദേശി മജ്‌റൂല്‍ ഹഖ് (38) പിടിയില്‍. ഞായറാഴ്ച രാവിലെ അധികൃതര്‍ക്ക് ലഭിച്ച രഹസ്യ വിവരത്തിനന്‍റെ അടിസ്ഥാനത്തിലായിരുന്നു പരിശോധന നടത്തിയതും കഞ്ചാവും ബ്രൗണ്‍ ഷുഗറും പിടിച്ചെടുത്തതും. തിരുവനന്തപുരം എക്‌സൈസ് റേഞ്ച് ഇന്‍സ്‌പെക്ടര്‍ ഷഫീക്കിന്‍റെ നേതൃത്വത്തില്‍ അസിസ്റ്റന്‍റ് എക്‌സൈസ് ഇന്‍സ്‌പെക്ടര്‍ സന്തോഷ്.ഡി, ഗ്രേഡ് അസിസ്റ്റന്‍റ് എക്‌സൈസ് ഇന്‍സ്‌പെക്ടര്‍ പ്രേമനാഥന്‍, സിഇഒമാരായ ജി. സെ ല്‍വം, വി. ബിജു, ബിനു മാമച്ചന്‍, ഡബ്ല്യുസിഇഒ ആശ എന്നിവരുള്‍പ്പെട്ട സംഘമാണ് ലഹരി വസ്തുക്കൾ പിടികൂടിയത്.

ലക്ഷങ്ങള്‍ മുടക്കിയിട്ടും ‍ തുറക്കാതെ പകല്‍ വീടുകള്‍

വെള്ളറട: ലക്ഷക്കണക്കിന് രൂപ ചെലവഴിച്ച് നിര്‍മാണം പൂര്‍ത്തിയായിട്ടും തുറന്നുകൊടുക്കാതെ മലയോര പ്രദേശത്തെ പകല്‍ വീടുകള്‍. വയോധിക വിശ്രമകേന്ദ്രങ്ങള്‍ മിക്കയിടങ്ങളിലും ഉപകാരപ്രദമാകുന്നില്ലെന്നാണ് പരാതി. വെള്ളറട പഞ്ചായത്തില്‍ പകല്‍വീട് ഉദ്ഘാടനം കഴിഞ്ഞു വര്‍ഷങ്ങള്‍ കഴിഞ്ഞിട്ടും ഇപ്പോഴും അനാഥമായി കിടക്കുകയാണ്. ഇത് തുറന്നു കൊടുക്കുന്നതിനു ബന്ധപ്പെട്ട അധികാരികള്‍ ആരും തയാറാകുന്നില്ല. വെള്ളറട കൃഷിഭവന്‍റെ ഒപ്പം ഉണ്ടായിരുന്ന 10 സെന്‍റ് സ്ഥലത്തില്‍ അഞ്ചു സെന്‍റ് സ്ഥലം വേര്‍തിരിച്ചാണ് പകല്‍വീട് നിര്‍മാണം പൂര്‍ത്തിയാക്കിയത്. ലക്ഷങ്ങള്‍ ചെലവഴിച്ച് ഇരുനില മന്ദിരം മണി പൂര്‍ത്തിയാക്കിയെങ്കിലും കെട്ടിടം വെറുതെ കിടന്നു നശിക്കുകയാണ്. എത്രയും വേഗം പകല്‍വീട് തുറന്നു കൊടുക്കണമെന്നു പ്രദേശ വാസികള്‍ ആവശ്യപ്പെട്ടു.

സിനിമ നാടക അഭിനയ പഠന കളരി തളിര്

വെഞ്ഞാറമൂട്: സംസ്കാര സാഹിതി വാമനപുരം നിയോജക മണ്ഡലം കമ്മിറ്റി തളിര് 2025 എന്ന പേരിൽ സംഘടിപ്പിച്ച ദ്വിദിന സിനിമ നാടക അഭിനയ കളരി വെഞ്ഞാമൂട് ആലുന്തറ രംഗപ്രഭാത് നാടക കളരിയിൽ എഴുത്തുകാരനും, നടനും സംവിധായകനുമായ ദീപു കരുണാകരൻ ഉദ്ഘാടനം ചെയ്തു. നിയോജക മണ്ഡലം ചെയർമാൻ ലാൽ വെള്ളാഞ്ചിറ അധ്യക്ഷത വഹിച്ചു. മുൻ ഡപ്യൂട്ടി സ്പീക്കർ പാലോട് രവി മുഖ്യപ്രഭാഷണം നടത്തി. സിനി ആർട്ടിസ്റ്റ് മൃൺമയി എ, മൃദുൽ മുഖ്യാതിഥിയായിരുന്നു. ബിനു എസ്. നായർ, ഒ.എസ്. ഗിരീഷ്, ജിജി കലാമന്ദിർ, വിതുര സുധാകരൻ, കെ.എസ്. ഗീത രംഗപ്രഭാത്, മധു മടത്തിച്ചിറ, ഉണ്ണി മാധവ് , അനിൽ പിരപ്പൻകോട്, രാജി. രാജാറാം, വി.എസ്. വിജിൽ എന്നിവർ പ്രസംഗിച്ചു.

പ്രവർത്തനമില്ലാതെ കാട്ടാക്കട ഖരമാലിന്യ സംസ്‌കരണ പ്ലാന്‍റ്

കാട്ടാക്കട : ലക്ഷങ്ങൾ മുടക്കി, പക്ഷേ ഇനിയും പ്രവർത്തമില്ലാതെ ഖരമാലിന്യ സംസ്‌കരണ പ്ലാന്‍റ്. അമ്പൂരി മുതൽ വിളപ്പിൽ വരെയും അഗസ്ത്യവനത്തിലെ ആദിവാസി മേഖല മുതൽ തലസ്ഥാന അതിർത്തിവരെയുള്ള വിശാലമായ പ്രദേശത്തിന്‍റെ വാണിജ്യകേന്ദ്രമായിരുന്ന കാട്ടാക്കട പബ്ലിക്ക് മാർക്കറ്റിന്‍റെ അവസ്ഥയാണിത്. കാട്ടാക്കട താലൂക്കിലെ ഏറ്റവും വലുതും 200 വർഷത്തോളം പഴക്കമുള്ളതുമാണ് കാട്ടാക്കട മാർക്കറ്റ്. അവിടെയാണു നോക്കുകുത്തിയായി ഒടുവിൽ മണ്ണിൽ മൂടാൻ ഊഴം കാത്തു കിടക്കുന്ന പ്ലാന്‍റ് ഉള്ളത്. ദിനംപ്രതി മാർക്കറ്റിനുള്ളിൽ വൻതോതിലാണ് മാലിന്യം കുന്നുകൂടുന്നത്. കച്ചവടക്കാരുടേയും സമീപത്തെ കടകളിലേയും മാലിന്യങ്ങൾ എത്തുന്നത് ഇവിടയൊണ് കുന്നുകൂടുന്നത്. എന്നാൽ അതു സംസ്‌കരിക്കാത്തതു കാരണം വൻ ഭീഷണിയാണ് ഉയരുന്നത്. മഴയത്ത് മാലിന്യങ്ങൾ ചീഞ്ഞ് ഒലിച്ചിറങ്ങി പ്രദേശത്ത് പുഴുക്കൾ നിറഞ്ഞിരുന്നു. തുടർന്നാണ് ചന്തയുടെ ഉടമസ്ഥരായ പൂവച്ചൽ പഞ്ചായത്ത് ഇവിടെ ഖരമാലിന്യ സംസ്‌ക്കാരണ പ്ലാന്‍റിനുള്ള സാഹചര്യം ആലോചിച്ചതും അതിനായി 15 ലക്ഷം രൂപ ഫണ്ട് അനുവദിച്ചതും. തുടർന്ന് കെട്ടിടവും ഉപകരണങ്ങളും കൊണ്ടു വന്നു സ്ഥാപിച്ചു. എന്നാൽ മാലിന്യം സംസ്‌കരണത്തിനായി നിർമിച്ച കെട്ടിടം പോലും ഇതേവരെ തുറന്നിട്ടില്ല. പ്ലാന്‍റിനായി കൊണ്ടുവന്ന ഉപകരണങ്ങൾ ഇപ്പോൾ മണ്ണു മൂടാൻ കാത്തിരിക്കുന്ന സ്ഥിതിയാണിപ്പോൾ. മാലിന്യങ്ങൾ നീക്കം ചെയ്യാനാകട്ടെ പഞ്ചായത്തിന് വേറെ സംവിധാനവുമില്ല. പഴയ പഞ്ചായത്ത് സമിതി സ്ഥാപിച്ച പദ്ധതിയോട് പുതിയ പഞ്ചായത്ത് സമിതി വിമുഖത കാട്ടുന്നുവെന്നു പരാതിയും നിലനിൽക്കുകയാണ്. വർഷം 25 ലക്ഷത്തോളം രൂപയുടെ നികുതി വരുമാനം എത്തിയിരുന്ന ചന്തയാണിത്. അവിടെയാണ് ഖരമാലിന്യ പ്ലാന്‍റിന്‍റെ ഇന്നത്തെ നില ചർച്ചയാകുന്നത്. അതിനിടെ പത്ത് വർഷം മുമ്പ് കാട്ടാക്കട മാർക്കറ്റിനെ അന്താരാഷ്ട മാർക്കറ്റായി ഉയർത്തുന്നതിലേക്കായി സംസ്ഥാന സർക്കാർ ബജറ്റിൽ തുക വകയിരുത്തിയിരുന്നു. കാട്ടാക്കട അന്താരാഷ്ട്ര മാർക്കറ്റായി ഉയർത്തുന്നതിനായി പ്രാഥമിക നടപടികളും ആരംഭിച്ചു. എന്നാൽ പിന്നീട് തർക്കങ്ങൾ വന്നതോടെ അന്താരാഷ്ട്ര മാർക്കറ്റ് എന്നത് ഫയലുകളിൽ കുരുങ്ങുകയും ചെയ്തു.

യൂത്ത് കോൺഗ്രസ് മാർച്ച് നടത്തി

വിഴിഞ്ഞം : ഷാഫി പറമ്പിൽ എംപിക്കെതിരെ പോലീസ് നടത്തിയ ആക്രമണത്തിൽ പ്രതിഷേധിച്ച് യൂത്ത് കോൺഗ്രസ് കോവളം നിയോജകമണ്ഡലം കമ്മിറ്റി വിഴിഞ്ഞം പോലീസ് സ്റ്റേഷനിലേക്ക് മാർച്ച് നടത്തി. തീയറ്റർ ജംഗ്ഷനിൽ നിന്നും ആരംഭിച്ച മാർച്ച് വിഴിഞ്ഞം ജംഗ്ഷനിൽ പോലീസ് ബാരിക്കേഡ് കെട്ടി തടഞ്ഞു. കെപിസിസി മെമ്പർ വിൻസൺ ഡി. പോൾ മാർച്ച് ഉദ്ഘാടനം ചെയ്തു. ബ്ലോക്ക് പ്രസിഡന്‍റ് സി.എസ്. അരുൺ, കുമാരി ഷാജിന, ജില്ലാ വൈസ് പ്രസിഡന്‍റ് സുൽഫി, കോട്ടുകാൽ ശരത്, യൂത്ത് കോൺഗ്രസ് നേതാക്കന്മാരായ ഷമീർ, നൗഫൽ മുനീർ, അനീഷ്, ആദർശ്, കോൺഗ്രസ് നേതാക്കളായ മുജീബ് റഹ്മാൻ, ഗ്ലാഡിസ് അലക്സ്, ആമ്പ്രോസ്, ഹസീന എന്നിവർ നേതൃത്വം നൽകി.

വിഴിഞ്ഞം അന്താരാഷ്ട്ര തുറമുഖം : രണ്ടാംഘട്ട നിർമാണ കാര്യത്തിൽ തീരുമാനമായി

വിഴിഞ്ഞം: വിഴിഞ്ഞം അന്താരാഷ്ട്ര തുറമുഖത്തിന്‍റെ രണ്ടാം ഘട്ട നിർമാണ കാര്യത്തിൽ തീരുമാനമായി. അടുത്ത മാസം അഞ്ചിനു മുഖ്യമന്ത്രി പിണറായി വിജയൻ ഉദ്ഘാടനം നിർവഹിക്കുന്നതോടെ കേരളത്തിന്‍റെ സ്വപ്ന പദ്ധതിയുടെ അവസാനഘട്ടം വരെയുള്ള കാര്യത്തിനു തുടക്കമാകും. കടലിലെ നിർമാണ പ്രവർത്തനത്തിനു ശക്തി പകരാനായി ബാർജുകളായ എം.വി.മർജാൻ, എം.ടി. നൗട്ടി - 2എന്നിവ ഇന്നലെ വിഴിഞ്ഞത്തെ മാരിടൈം ബോർഡിന്‍റെ തുറമുഖത്ത് തങ്കുരമിട്ടു. മഹാരാഷ്ട്രയിലെ വേലാപ്പൂരിൽനിന്ന് സാങ്കേതിക വിദഗ്ദരായ ആറു തൊഴിലാളികളുമായാണ് വരവ്. ഇതോടൊപ്പം വിഴിഞ്ഞത്ത് അറ്റകുറ്റപ്പണിക്കായി നങ്കൂരമിട്ടിരിക്കുന്ന ബാർബി -9 ന്‍റെ പണികൾ പൂർത്തിയാക്കി രണ്ടാഴ്ചക്കുള്ളിൽ പ്രവർത്തന സജ്ജമാകും. 2028 ഡിസംബറിൽ രണ്ടും മൂന്നും ഘട്ടങ്ങൾ പൂർത്തിയാക്കാനുദ്ദേശിക്കുന്ന പദ്ധതിയുടെ വികസനങ്ങൾക്കായി പ്രതീക്ഷിക്കുന്ന 10,000 മുതൽ 15,000 കോടി രൂപ വരെയുള്ള ചിലവ് അദാനി പോർട്ട് വഹിക്കും. പിപിപി മോഡലിൽ സംസ്ഥാനത്തെ ഏറ്റവും വലിയ നിക്ഷേപമായിരിക്കുമെന്നു സർക്കാർ കരുതുന്നു. 1200 മീറ്റർ ബർത്ത്, ഒരു കിലോമീറ്റർ പുലിമുട്ട്, കണ്ടെയ്നർ യാർഡ്, മറ്റടിസ്ഥാന സൗകര്യങ്ങളുടെ വികസനം, കടൽ നികത്തി 77.17 സെക്ടർ ഭൂമിയുണ്ടാക്കൽ എന്നിങ്ങനെയുള്ള കാര്യങ്ങൾ കൂടി പൂർത്തിയാകുന്നതോടെ വിഴിഞ്ഞം തുറമുഖം വികസനത്തിന്‍റെ പാതയിലാകും. ഇതോടെ വർഷം 40 ലക്ഷം കണ്ടെയ്നർ കൈകാര്യം ചെയ്യാമെന്ന വിശ്വാസത്തിലാണ് അധികൃതർ. 2024 ജൂലൈ 11ന് പ്രവർത്തനം ആരംഭിച്ച തുറമുഖത്ത് 525 ചരക്ക് കപ്പലുകൾ എത്തി ദൗത്യം പൂർത്തിയാക്കി മടങ്ങി. ചുരുങ്ങിയ കാലയളവിനുള്ളിൽ 11.5 ലക്ഷം കണ്ടെയ്നർ കൈകാര്യം ചെയ്ത വിഴിഞ്ഞം തുറമുഖം ഇന്ത്യയിലെ പ്രമുഖ പോർട്ടുകളെയും പിന്തള്ളി മുന്നേറ്റം തുടരുകയാണ്. രണ്ടാംഘട്ട നിർമാണ ഉദ്ഘാടനം കഴിയുന്നതോടെ പുലിമുട്ടിനു തുടക്കമാറും. ഒരുകിലോമീറ്റർ കൂടി ദൂരത്ത് കടൽ ഭിത്തി നിർമിക്കുന്നതിന് ഏകദേശം 50 ലക്ഷത്തോളം ടൺ കരിങ്കല്ലു വേണ്ടി വരുമെന്നാണ് വിലയിരുത്തൽ. ടൺ കണക്കിന് കല്ല് തുറമുഖത്ത് ശേഖരിച്ച് കഴിഞ്ഞു.

മകനെ തലയ്ക്കടിച്ചു പരിക്കേല്‍പ്പിച്ച പിതാവ് കീഴടങ്ങി

മെഡിക്കല്‍കോളജ്: മകനെ തലയ്ക്കടിച്ചു പരിക്കേല്‍പ്പിച്ച ശേഷം ഒളിവില്‍പ്പോയ പിതാവ് സ്റ്റേഷനില്‍ കീഴടങ്ങി. ഇയാളുടെ അറസ്റ്റ് വഞ്ചിയൂര്‍ പോലീസ് രേഖപ്പെടുത്തി. വഞ്ചിയൂര്‍ തോപ്പില്‍ ലെയിന്‍ ശ്രീവിഹാറില്‍ വിദ്യാനന്ദന്‍ (54) ആണ് പോലീസ് സ്റ്റേഷനില്‍ കീഴടങ്ങിയത്. വിദ്യാനന്ദന്‍ തന്‍റെ മകന്‍ ഹൃദികിനെ (28)യാണ് കമ്പിപ്പാരയെടുത്ത് തലയ്ക്കടിച്ചത്. ഒക്ടോബര്‍ ഒമ്പതിനായിരുന്നു സംഭവം. ആഡംബര ബൈക്ക് വാങ്ങിനല്‍കാത്തതിലുള്ള വിരോധംമൂലം മാതാപിതാക്കളെ നിരന്തരം ഉപദ്രവിച്ചുവന്നതാണ് ആക്രമണത്തിനു കാരണമായത്. ഗുരുതരാവസ്ഥയിലായ ഹൃദികിനെ തിരുവനന്തപുരം മെഡിക്കല്‍കോളജ് ആശുപത്രിയിലെ ഐസിയുവില്‍ പ്രവേശിപ്പിച്ചിരുന്നു. ഇയാള്‍ അപകടനില തരണം ചെയ്തിട്ടുണ്ട്. വിദ്യാനന്ദന്‍റെ അറസ്റ്റ് പോലീസ് രേഖപ്പെടുത്തി. ഇയാളെ തിങ്കളാഴ്ച കോടതിയില്‍ ഹാജരാക്കും.

റവന്യൂ ജില്ലാ സ്കൂൾ കായികമേള നാളെ മുതൽ ആറ്റിങ്ങലിൽ

തിരുവനന്തപുരം: റവന്യൂ ജില്ല സ്കൂൾ കായിക മേളയ്ക്ക് നാളെ തുടക്കും. ആറ്റിങ്ങൽ ശ്രീപാദം സ്റ്റേഡിയത്തിൽ നാളെ ആരംഭിക്കുന്ന കായിമമേള 16ന് അവസാനിക്കും. സബ് ജൂനിയർ, ജൂണിയർ, സീനിയർ എന്നീ മൂന്നു കാറ്റഗറികളിലായി 96 ഇനങ്ങളിലാണ് മത്സരങ്ങൾ. 2,000 ത്തോളം താരങ്ങളാണ് ആറ്റിങ്ങലിൽ പോരാട്ടത്തിന് ഇറങ്ങുന്നത്. തിരുവനന്തപുരം സായ്, ജി.വി. രാജ സ്പോർട്സ് സ് കൂൾ, അയ്യങ്കാളി സ്പോർട്സ് സ് കൂൾ തുടങ്ങിയ കായിക സ്കൂളുകളിലെ വിദ്യാർഥികളും ജനറൽ സ്കൂളുകളിലെ വിദ്യാർഥികളും പോരാട്ടത്തിന് ഇറങ്ങുന്നു. രാവിലേയും വൈകുന്നേരവും ഫൈനൽ മത്സരങ്ങളും മറ്റു സമയങ്ങളിൽ ഹീറ്റ്സ് മത്സരങ്ങളും എന്ന നിലയിലായിരിക്കും മത്സരങ്ങൾ ക്രമീകരിക്കുക. നാളെ രാവിലെ 8.30ന് സീനിയർ ആണ്‍കുട്ടികളുടെ 3,000 മീറ്റർ ഓട്ടമത്സരത്തോടെ മത്സരങ്ങൾക്ക് തുടക്കമാകും. 36 ഫൈനലുകൾക്ക് ഒന്നാം ദിനം ശ്രീപാദം സ്റ്റേഡിയം സാക്ഷ്യം വഹിക്കും.

അടിമലത്തുറ ഫാത്തിമ മാതാ പള്ളി തിരുനാൾ: ചപ്രപ്രദക്ഷിണം നടത്തി

വിഴിഞ്ഞം: തിരുവനന്തപുരം ലത്തീൻ അതിരൂപതയിൽ അടിമലത്തുറ ഇടവക മധ്യസ്ഥയായ പരിശുദ്ധ ഫാത്തിമ മാതാ ദേവാലയത്തിലെ പരിശുദ്ധ ഫാത്തിമ മാതാവിന്‍റെ തിരുനാളിന്‍റെ ഭാഗമായി സന്ധ്യാവന്ദനവും ചപ്രപ്രദ ക്ഷിണം നടത്തി. സന്ധ്യാവന്ദനത്തിന് ഫാ. ആൻഡ്രൂസ് കോസ്മോസ് മുഖ്യകാർമികനായിരുന്നു. ഫാ. യൂജിൻ ബ്രിട്ടോ വചനപ്രഘോഷണം നടത്തി. പരിശുദ്ധ ഫാത്തിമ മാതാവിന്‍റെ രൂപം അടിമലത്തുറ ഇടവക വികാരി ഫാ. ഷാബിൻ ലീൻ ആശീർവദിച്ചു. രാത്രി 10.30ന് കേരള കാത്തലിക് യൂത്ത് മൂവ്മെന്‍റ് അടിമലത്തുറ യൂണിറ്റ് തരംഗ് എന്ന കലാവിരുന്നും അവതരിപ്പിച്ചു. തിരുനാൾ ദിനമായ ഇന്നു രാവിലെ എട്ടിനു പ്രഥമ ദിവ്യകാരുണ്യ ദിവ്യബലി അടിമലത്തുറ ഇടവക വികാരി ഫാ. ഷാബിൻ ലീൻ നടത്തും. വൈകുന്നേരം അഞ്ചിന് ജപമാല, ലിറ്റിനി, നൊവേന. തുടർന്ന് ആഘോഷമായ തിരുനാൾ സമൂഹ ദിവ്യബലിക്ക് പുല്ലുവിള ഇടവക വികാരി ഫാ. ആന്‍റണി എസ്ബി മുഖ്യകാർമികത്വം വഹിക്കും, ലത്തീൻ അതിരൂപത ശുശ്രൂഷ സമിതി കോ-ഓ ർഡിനേറ്റർ റവ. ഡോ. ലോറൻസ് കുലാസ് വചന പ്രഘോഷണം നടത്തും. അടിമലത്തുറ ഇടവക വികാരി ഫാ. ഷാബിൻ ലീൻ തിരുനാൾ കൊടിയിറക്കു നടത്തും. രാത്രി പത്തിനു മാഗ്നസ് തിരുവനന്തപുരം പ്രീമിയർ ഫെസ്റ്റിവൽ മെഗാ ഷോയും നടത്തും.

ശബരിമല: പ്രമുഖരുടെ മൗനം പ്രവാസികളെ വേദനിപ്പിക്കുന്നെന്ന് മുരളീധരപണിക്കര്‍

തിരുവനന്തപുരം: ശബരിമലയിലെ സ്വര്‍ണക്കൊള്ളയുമായി ബന്ധപ്പെട്ട് സാമുദായിക നേതാക്കളുടെയും സാംസ്‌കാരിക നായകരുടെയും മൗനം പ്രവാസി മലയാളി വിശ്വാസികളെ വേദനിപ്പിക്കുന്നതായി പ്രവാസി വ്യവസായി എന്‍. മുരളീധരപണിക്കര്‍. ലോകമെമ്പാടുമുള്ള അയ്യപ്പ വിശ്വാസികളെ ഞെട്ടിപ്പിക്കുന്ന തരത്തിലാണ് ദിവസം ചെല്ലുന്തോറും ശബരിമലയിലെ സ്വര്‍ണ അപഹരണത്തെക്കുറിച്ച് കൂടുതല്‍ വാര്‍ത്തകള്‍ പുറത്തു വന്നുകൊണ്ടിരിക്കുന്നത്. മലയാളികളെ സംബന്ധിച്ചിടത്തോളം വിശ്വാസത്തിനപ്പുറം വളരെയേറെ പ്രാധാന്യമുള്ളതും ലോകശ്രദ്ധ നേടിയതുമായ ഒരു തീര്‍ഥാടന കേന്ദ്രമാണ് ശബരിമല. പ്രവാസികളുടെ മനസില്‍ കേരളത്തെക്കുറിച്ച് ചിന്തിക്കുമ്പോള്‍ ആദ്യം ഓര്‍മയിലെത്തുന്ന ആധ്യാത്മിക കേന്ദ്രങ്ങളില്‍ ഒന്നുകൂടിയാണ് ശബരിമല. അവിടെ ഇത്തരത്തിലൊരു ഭീകരമായ സ്വര്‍ണ അപഹരണം നടക്കുമ്പോള്‍ അതില്‍ പ്രതിഷേധിക്കാനോ പ്രതികരിക്കാനോ സര്‍ക്കാര്‍ സംവിധാനങ്ങളോ രാഷ്ട്രീയ പാര്‍ട്ടികളോ ആത്മീയ പ്രസ്ഥാനങ്ങളോ മത സംഘടനകളോ രംഗത്തു വരുന്നില്ല എന്നത് പ്രവാസികളെ സംബന്ധിച്ചിടത്തോളം വളരെ വേദനാജനകമാണ്. വിദേശ രാജ്യങ്ങളില്‍ നിന്നും വ്രതമെടുത്ത് വളരെയധികം പണം ചെലവാക്കി ആചാരമര്യാദകള്‍ ഒട്ടും തെറ്റിക്കാതെ ഇവിടെയെത്തി ശാസ്താവിനെ ദര്‍ശിച്ചു പോകുന്ന ലക്ഷക്കണക്കിന് ഭക്തരാണ് പ്രവാസി സമൂഹത്തിലുള്ളതെന്നും അദ്ദേഹം പറഞ്ഞു.

കാട്ടാക്കടയിൽ കവർച്ച: 15 പവനോളം സ്വർണവും പണവും നഷ്ടപ്പെട്ടു

കാട്ടാക്കട: കാട്ടാക്കട പോലീസ് സ്റ്റേഷൻ പരിധിയിൽ രണ്ടിടങ്ങളിൽ ആളില്ലാത്ത വീട്ടിൽ മോഷണം. ഇക്കഴിഞ്ഞ ഏഴാം തീയതിക്കും 11-ാം തീയതിക്കും ഇടയിലാണ് മോഷണം നടന്നിരിക്കുന്നത്. പൂവച്ചൽ കൊണ്ണിയൂർ നസറുദീന്‍റെ മദീനാ മൻസിൽ മുൻ വാതിൽ കുത്തിപ്പൊളിച്ച് അകത്തു കടന്ന മോഷ്ടാവ് കിടപ്പുമുറിയിലെ അലമാരകൾ വെട്ടിപ്പൊളിച്ചാണ് മോഷണം നടത്തിയത്. ഇവിടെ നിന്നും രണ്ടര പവന്‍റെ രണ്ടു ബംഗാളി മോഡൽ സ്വർണവള, ഒന്നര പവന്‍റെ ഒരു കമ്പിവള, ഒന്നര പവൻ ഒരു സച്ചിൻ മോഡൽ ബ്രേസ്‌ലെറ്റ്, ഒരു പവന്‍റെ ഒരു ജോഡി സ്വർണ തൂക്കു കമ്മൽ എന്നിവ ഉൾപ്പെടെ എട്ടു ലക്ഷത്തോളം രൂപയുടെ ഒന്പതു പവൻ സ്വർണമാണ് മോഷ്ടാവ് കൊണ്ടുപോയത്. നസറുദ്ദീനും കുടുംബവും മകളുടെ ചികിത്സാർഥം ആശുപത്രിയിലായിരുന്നു. ഏഴാം തീയതി മുതൽ 11 വരെ ഇവിടെ ആളില്ലായിരുന്നു ഈ സമയമാണ് ഇവിടെ മോഷണം നടന്നിരിക്കുന്നത്. ഇതോടൊപ്പം പൂവച്ചൽ വഴുതനമുകൾ സുവിൻ സുകുമാരന്‍റെ സുരഭി എന്ന വീട്ടിൽ നിന്നും സ്വർണവളകളും, കമ്മലുകളും, 10 കുഞ്ഞുമോതിരങ്ങളും, ഒരു ബ്രേസ്‌ലെറ്റും, നാണയവും നോട്ടുമായി പതിനായിരത്തോളം രൂപയും മോഷ്ടാവ് കൊണ്ടുപോയി. ഇവിടെ 5,10,000 രൂപയുടെ നഷ്ടമാണ് ഉണ്ടായത്. കൂടാതെ വീടിന്‍റെ വാതിലുകൾക്കും നാശം സംഭവിച്ചു. വീടിന്‍റെ മുൻ വാതിൽ കുത്തിപ്പൊളിച്ച് അകത്തു കടന്ന മോഷ്ടാവ് വീടിനുള്ളിൽ ഉണ്ടായിരുന്ന മേശകളും അലമാ രകളും തുറന്നു വാരിവലിച്ചിട്ട നിലയിലായിരുന്നു. സുവിൻ കുടുംബവുമായി ഭാര്യവീട്ടിൽ പോയി വന്നപ്പോഴാണു മോഷണം അറിയുന്നത്. കാട്ടാക്കട പോലീസ് കേസെടുത്തു അന്വേഷണം ആരംഭിച്ചു. മോഷണം നടന്ന സ്ഥലങ്ങളിൽ ഫോറൻസിക് സംഘം പരിശോധന നടത്തി.

ഇടിയും മിന്നലും: വീട്ടമ്മയ്ക്ക് പരിക്കേറ്റു

നെടുമങ്ങാട്: ആര്യനാട് പഞ്ചായത്തിലെ കൊക്കോട്ട ലായിൽ ശക്തമായ ഇടിയും മിന്നലും ഉണ്ടായി. ഒരു വീട്ടമ്മയ്ക്ക് പരിക്കേറ്റു. ഇഞ്ചപ്പൂരി ചെറുമഞ്ച മാടച്ചിക്കോണം ബിജു സദനത്തിൽ കെ. വത്സല (75) ക്കാണ് മിന്നലേറ്റു പരിക്കേറ്റത്. ഇന്നലെ ഉച്ചയ്ക്ക് രണ്ട് മണിയോടെയായിരുന്നു സംഭവം. സംഭവസമയത്ത് വീട്ടിൽ വത്സലയും മരുമകളും മാത്രമേ ഉണ്ടായിരുന്നുള്ളു. ഭാഗ്യവശാൽ മരുമകൾക്ക് അപകടം ഒന്നും സംഭവിച്ചില്ല. വത്സലയെ ഉടൻ ആര്യനാട് സർക്കാർ ആശുപത്രിയിൽ പ്രവേശിപ്പിച്ചു. ഇവർ ഇപ്പോഴും ചികിത്സയിലാണ്. മിന്നലേറ്റതിനെ തുടർന്നു വീട്ടിലെ വൈദ്യുത വയറുകളും ഉപകരണങ്ങളും പൂർണ്ണമായും നശിച്ചു, വീടിന്റെ ഭിത്തികളിൽ വിള്ളലുകൾ ഉണ്ടായി.

തിരുവനന്തപുരം രാജ്യാന്തര വിമാനത്താവളത്തിൽ 40 ലക്ഷം രൂപയുടെ സ്വര്‍ണവുമായി തമിഴ്‌നാട് സ്വദേശി പിടിയില്‍

വലിയതുറ: തിരുവനന്തപുരം രാജ്യാന്തര വിമാനത്താവളത്തില്‍ ഞായറാഴ്ച രാവിലെ എയര്‍ കസ്റ്റംസ് ഇന്‍റലിജന്‍സ് വിഭാഗം അധികൃതര്‍ നടത്തിയ പരിശോധനയില്‍ ക്വലാലംപൂരില്‍ നിന്നും എത്തിയ തമിഴ്‌നാട് സ്വദേശിയില്‍ നിന്നും അനധികൃതമായി കടത്തികൊണ്ട് വന്ന 360 ഗ്രാം സ്വര്‍ണാഭരണങ്ങള്‍ പിടിച്ചെടുത്തു. തമിഴ്‌നാട് സ്വദേശി സെന്തില്‍കുമാര്‍ രാജേന്ദ്രനില്‍ നിന്നുമാണ് സ്വര്‍ണം പിടിച്ചെടുത്തത്. വിവിധ തൂക്കത്തിലുളള 13 സ്വര്‍ണ ചെയിനുകള്‍ പ്രത്യേകം തയാറാക്കിയ രണ്ട് ജീന്‍സ് കഷ്ണങ്ങള്‍ക്കുള്ളിലാക്കി ധരിച്ചിരുന്ന ജീന്‍സിനോടൊപ്പം തുന്നിച്ചേര്‍ത്താണ് സെന്തില്‍കുമാര്‍ സ്വര്‍ണം കൊണ്ടുവന്നത്. കസ്റ്റംസ് അധികൃതര്‍ നടത്തിയ വിശദമായ പരിശോധനയിലാണ് സ്വര്‍ണം കണ്ടെത്തിയത്. പൊതുവിപണിയില്‍ പിടിച്ചെടുത്ത സ്വര്‍ണത്തിന് 40 ലക്ഷം രൂപ വിലമതിക്കുന്നു. കസ്റ്റംസ് അധികൃതരുടെ വെളിപ്പെടുത്തല്‍ അനുസരിച്ച് അടുത്തിടെ വിദേശ രാജ്യങ്ങളില്‍ നിന്നും ഏറ്റവും കൂടുതല്‍ സ്വര്‍ണം നികുതി വെട്ടിച്ചും മറ്റ് അനധികൃത മാർഗത്തിലൂടെയും കൊണ്ടുവന്നിട്ടുള്ളതു തിരുവനന്തപുരം രാജ്യാന്തര വിമാനത്താവളം വഴിയാണ്. ദിവസങ്ങള്‍ക്കുമുമ്പു രണ്ട് വ്യത്യസ്ഥ കേസുകളിലായി വിദേശത്തുനിന്നും തിരുവനന്തപുരം വിമാനത്താവളത്തിലെത്തിയ രണ്ട് തമിഴ്‌നാട് സ്വദേശികളില്‍ നിന്നും 1.6 കോടി രൂപയുടെ സ്വര്‍ണം എയര്‍ കസ്റ്റംസ് അധികൃതര്‍ പിടിച്ചെടുത്തിരുന്നു. തിരുവനന്തപുരം വിമാനത്താവളത്തില്‍ പിടിച്ചെടുക്കുന്ന സ്വര്‍ണത്തിലധികവും ബാര്‍ രൂപത്തിലുളളതും ഇവ വ്യക്തികളുടെ ശരീരത്തിലോ വസ്ത്രത്തിലോ ഒളിപ്പിച്ച നിലയിലുമാണ് കൊണ്ടുവരുന്നത്. ഇത് കുടാതെ പേളായും നെക്ലേസ് ആയും കൊണ്ടുവരുന്നുണ്ട്. സ്വര്‍ണത്തിനു പുറമെ തിരുവനന്തപുരം വിമാനത്താവളത്തില്‍ കഴിഞ്ഞ നാലുമാസത്തിനുളളില്‍ കസ്റ്റംസ് അധികൃതര്‍ നടത്തിയ പരിശോധനയില്‍ മൂന്ന് വ്യത്യസ്ഥ കേസുകളിലായി ബാങ്കോക്കില്‍ നിന്നും എത്തിയ യാത്രക്കാരില്‍ നിന്നും 26.51 കോടി രൂപയുടെ ഹൈബ്രിഡ് കഞ്ചാവ് പിടികൂടിയിരുന്നു. കൊച്ചി കസ്റ്റംസ് പ്രിവന്റീവ് ഹെഡ് ക്വാര്‍ട്ടേഴ്‌സില്‍ നിന്നുളള നിര്‍ദ്ദേശ പ്രകാരമായിരുന്നു പരിശോധന.

ഡ്രില്ലിംഗ് മെഷീന്‍റെ ബിറ്റ് നെറ്റിയില്‍ തുളച്ചുകയറിയ രണ്ടരവയസുകാരന്‍ മരിച്ചു

പേരൂര്‍ക്കട: ഡ്രില്ലിംഗ് മെഷീന്‍റെ ബിറ്റ് നെറ്റിയില്‍ തുളച്ചുകയറി ഗുരുതരമായി പരിക്കേറ്റ രണ്ടരവയസ്‌സുകാരന്‍ മരിച്ചു. ഫോര്‍ട്ട് പത്മനാഭസ്വാമി ക്ഷേത്രം പടിഞ്ഞാറേനട നടരാജ് ഭവനില്‍ മഹേഷ്-സുനിത ദമ്പതികളുടെ മകന്‍ ധ്രുവ് നാഥ് ആണ് മരിച്ചത്. കഴിഞ്ഞ ഒൻപതിന് രാവിലെ 11 ഓടുകൂടിയായിരുന്നു സംഭവം. വീടിന്‍റെ മെയിന്‍റനന്‍സിനുവേണ്ടി വാങ്ങിയ ഡ്രില്ലിംഗ് മെഷീന്‍ കവറിനുള്ളിലിട്ട് അടുക്കള ഭാഗത്തെ സ്ലാബിനു മുകളില്‍ വച്ചിരുന്നു. ഇതെടുക്കുന്നതിനുവേണ്ടി മെഷീന്‍റെ കേബിളില്‍ പിടിച്ചുവലിച്ചപ്പോള്‍ സ്ലാബില്‍ നിന്നു മെഷീന്‍ താഴേക്കും പതിച്ചു. മെഷീനിലുണ്ടായിരുന്ന ബിറ്റ് ധ്രുവ് നാഥിന്‍റെ നെറ്റിയുടെ വശത്ത് തുളച്ചുകയറുകയായിരുന്നു. ചികിത്സയിലിരിക്കെ ശനിയാഴ്ച രാത്രി 11.30 നോടടുത്തായിരുന്നു മരണം. മസ്ക്കറ്റില്‍ ജോലിചെയ്യുന്ന മഹേഷ് ഒരുമാസം മുമ്പാണ് നാട്ടിലെത്തിയത്.

മർദനമേറ്റ് ചികിത്സയിലായിരുന്നയാൾ മരിച്ചു

വിതുര : മർദനമേറ്റ് ചികിത്സയിലായിരുന്ന വയോധികൻ മരിച്ചു. തൊളിക്കോട് മാങ്കൂട്ടുകോണം കിഴക്കുംകര ചരുവിള പുത്തൻവീട്ടിൽ റഫീഖ് (70) ആണ് തിരുവനന്തപുരം മെഡിക്കൽ കോളജിൽ മരിച്ചത്. തൊളിക്കോട് ബാർബർ ഷോപ്പിലെ ജോലിക്കാരനായിരുന്നു. റഫീഖിനെ ഒരാഴ്ച മുമ്പ് അജ്ഞാതർ വീട്ടിൽ കയറി ആക്രമിച്ചിരുന്നു. നാട്ടുകാർ വിതുര താലൂക്ക് ആശുപത്രിയിലും തുടർന്ന് മെഡിക്കൽ കോളജ് ആശുപത്രിയിൽ പ്രവേശിപ്പിക്കുകയായിരുന്നു. ഭാര്യയും മക്കളും ഉപേക്ഷിച്ച ഇയാൾ ഒറ്റയ്ക്കായിരുന്നു താമസം. വിതുര പോലീസ് കേസെടുത്തു അന്വേഷണം ആരംഭിച്ചു.

മാരായമുട്ടം പോലീസ് സ്റ്റേഷന്‍ മാര്‍ച്ച്

വെള്ളറട: കോഴിക്കോട് പേരാമ്പ്രയില്‍ കോണ്‍ഗ്രസ് വര്‍ക്കിംഗ് പ്രസിഡന്‍റ് ഷാഫി പറമ്പില്‍ എംപിയെ പോലീസ് മര്‍ദിച്ചതില്‍ പ്രതിഷേധിച്ച് കോണ്‍ഗ്രസ് മാരായമുട്ടം മണ്ഡലം കമ്മിറ്റിയും യൂത്ത് കോണ്‍ഗ്രസ് മണ്ഡലം കമ്മിറ്റിയും സംയുക്തമായി മാരായമുട്ടം പോലീസ് സ്റ്റേഷനിലേക്കു മാര്‍ച്ച് സംഘടിപ്പിച്ചു. കോണ്‍ഗ്രസ് മാരായമുട്ടം മണ്ഡലം പ്രസിഡന്‍റ് ബിനില്‍ മണലുവിളയുടെ നേതൃത്വത്തില്‍ മാരായമുട്ടം ചിറ്റാറ്റിന്‍കരയില്‍നിന്ന് ആരംഭിച്ച് മാരായമുട്ടം ജംഗ്ഷനില്‍ എത്തിയശേഷം അവിടെനിന്ന് പോലിസ് സ്റ്റേഷനു മുന്നിലെത്തി. പ്രതിഷേധ ധർണ കര്‍ഷക കോണ്‍ഗ്രസ് സംസ്ഥാന വൈസ് പ്രസിഡന്‍റ് എം.എസ്. അനില്‍ ഉദ്ഘാടനം ചെയ്തു. യൂത്ത് കോണ്‍ഗ്രസ് മണ്ഡലം പ്രസിഡന്‍റ് അനന്തന്‍ മാരായമുട്ടം, കര്‍ഷക കോണ്‍ഗ്രസ് ജില്ലാ സെക്രട്ടറി അരുവിക്കര മണികണ്ഠന്‍, ബ്ലോക്ക് ഭാരവാഹികളായായ മണ്ണൂര്‍ ശ്രീകുമാര്‍, അഡ്വ. ഷിബു ശ്രീധര്‍, തത്തിയൂര്‍ സുരേന്ദ്രന്‍, തൃപ്പലവൂര്‍ ജയപ്രകാശ്, വടകര സുര, കാക്കണം മധു, ശ്രീരാഗം ശ്രീകുമാര്‍, കോട്ടയ്ക്കല്‍ വിനോദ്, വടകര രാജേഷ്, അനീഷ് അമ്പലത്തറയില്‍, തുളസീധരന്‍ ആശാരി, കാക്കണം രാജേഷ്, കോട്ടയ്ക്കല്‍ വിനോദ്, അനീഷ് ചുള്ളിയൂര്‍, അരുണ്‍ പ്രകാശ്, നിഷാദ് മാരായമുട്ടം എന്നിവര്‍ നേതൃത്വം നല്‍കി.

പാറശാലയില്‍ കോൺഗ്രസ് പ്രതിഷേധ ജ്വാല സംഘടിപ്പിച്ചു

പാറശാല: വിശ്വാസികളെ വഞ്ചിച്ച് ശബരിമലയിലെ സ്വര്‍ണം മോഷ്ടിച്ച സര്‍ക്കാരിനും ദേവസ്വം ബോര്‍ഡിനുമെതിരേ കോണ്‍ഗ്രസ് പാറശാല മണ്ഡലം കമ്മിറ്റിയുടെ നേതൃത്വത്തില്‍ പ്രതിഷേധ ജ്വാല നടത്തി. ഡിസിസി ജനറല്‍ സെക്രട്ടറി പാറശാല സുധാകരന്‍ ഉദ്ഘാടനം ചെയ്തു. മണ്ഡലം കോണ്‍ഗ്രസ് കമ്മിറ്റി പ്രസിഡന്‍റ് ജസ്റ്റിൻ രാജ് അധ്യക്ഷതവഹിച്ചു. പവതിയാന്‍വിള സുരേന്ദ്രന്‍, വേലപ്പന്‍ നായര്‍, എസ്. രാജന്‍ രാജേന്ദ്രപ്രസാദ്, സ്റ്റീഫൻ ജോയ്, ദേവരാജ്, രാമചന്ദ്രന്‍, സുമേഷ് എന്നിവർ പ്രസംഗിച്ചു.

ശബരിമല: കോൺഗ്രസ് പ്രതിഷേധ ജ്വാല നടത്തി

നേമം: വിശ്വാസികളെ വഞ്ചിച്ച് ശബരിമലയിലെ സ്വർണം മോഷ്ടിച്ച സർക്കാരിനും ദേവസ്വം ബോർഡിനുമെതിരെ കോൺഗ്രസ് പാപ്പനംകോട് മണ്ഡലം കമ്മിറ്റി പ്രതിഷേധ ജാല സംഘടിപ്പിച്ചു. നേമം ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് കെ.പി. അജിത് ലാൽ ഉദ്ഘാടനം ചെയ്തു. പാപ്പനംകോട് മണ്ഡലം പ്രസിഡന്‍റ് ജയ്മോൻ, കരുമം ശശികുമാർ, പദ്മകുമാർ, ദീപു, സുജി സുരേഷ്, സുഗതൻ, മധുപാലം സുനിൽ രമാദേവി, സത്യൻ, എൻ. മനോജ് കുമാർ, ആർ. ശശിധരൻ നായർ എന്നിവർ പങ്കെടുത്തു.

കവിയാകോടിൽ പൈപ്പ് പൊട്ടി കുടിവെള്ളം പാഴാകുന്നു

നെടുമങ്ങാട്: ചെറുകുളം കവിയാകോടിൽ പൈപ്പ് പൊട്ടി കുടിവെള്ളം പാഴാകുന്നു. അഞ്ചു ദിവസമായി കുടിവെള്ളം പാഴായിട്ടും അധികൃതർ അനങ്ങുന്നില്ലെന്ന് നാട്ടുകാർ. വെള്ളനാട്-ആര്യനാട് പഞ്ചായാത്തുകളുടെ അതിർത്തി പ്രദേശമായ ചെറുകുളത്തെയും പ്രദേശങ്ങളിലെയും ഉയർന്ന പ്രദേശങ്ങളിൽ കുടിവെള്ളക്ഷാമം രൂക്ഷമായിരിക്കുമ്പോഴാണ് ഇവിടെ വെള്ളം പാഴാകുന്നത്. പൈപ്പ് പൊട്ടിയ വിവരം ആര്യനാട്ടെ വാട്ടർ അഥോറിറ്റി അധികൃതരെ പലതവണ അറിയിച്ചിട്ടും ആരും തിരിഞ്ഞു നോക്കുന്നില്ലെന്നും നാട്ടുകാർ പറയുന്നു. 35ലേറെ കുടുംബങ്ങൾ കുടിവെള്ളത്തിനായി ഈ പൈപ്പ് ലൈനിനെയാണ് ആശ്രയിക്കുന്നത്. പ്രധാനപൈപ്പിൽനിന്നു വെള്ളം ചോരുന്നതിനാൽ വീട്ടിലെ പൈപ്പുകളിൽ വേണ്ടവിധം വെള്ളം വരുന്നില്ലെന്നും നാട്ടുകാർ പറഞ്ഞു. പൈപ്പിലെ ചോർച്ച പരിഹരിച്ച് കുടിവെള്ള വിതരണം കാര്യക്ഷമമാക്കണമെന്ന് നാട്ടുകാർ ആവശ്യപ്പെട്ടു.

സൂപ്പർമാർക്കറ്റിൽ മോഷണം: കാഷ്യർ പിടിയിൽ

നെടുമങ്ങാട്: രാമചന്ദ്ര സൂപ്പർ മാർക്കറ്റിൽ നിന്നും തുണിത്തരങ്ങളും സൗന്ദര്യവർധക വസ്തുക്കളും ഉൾപ്പെടെ 50,000 രൂപവില വരുന്ന സാധനങ്ങൾ മോഷ്ടിച്ച ഹെഡ് കാഷ്യർ തെങ്കാശി മാവട്ടം പാവൂർ ചത്തിരത്തിൽ പൊൻഷീല (21) യെ നെടുമങ്ങാട് പോലീസ് അറസ്റ്റ് ചെയ്തു. സൂപ്പർമാർക്കറ്റിൽനിന്നും ജൂലൈ മാസം മുതൽ ഒക്ടോബർ മാസം വരെയുള്ള കാലയളവിൽ മോഷ്ടിച്ച സാധനങ്ങൾ പ്രതി താമസിച്ചു വന്നിരുന്ന നെടുമങ്ങാട് കുറക്കോട് ഉള്ള ഹോസ്റ്റലിൽ സൂക്ഷിച്ചുവരികയായിരുന്നു. സൂപ്പർമാർക്കറ്റിലെ സ്റ്റോക്ക് ക്ലിയറൻസ് നടത്തിയപ്പോൾ കുറവുള്ളതായി കാണ്ടെത്തിയതിനെ തുടർന്നു ഹോസ്റ്റലിലെ ജീവനക്കാരുടെ ബാഗ് പരിശോധിച്ചതിൽ പ്രതിയുടെ ബാഗിൽനിന്നും മോഷ്ടിച്ച സാധനങ്ങൾ കണ്ടെടുക്കുകയായിരുന്നു. കഴിഞ്ഞ അഞ്ചുമാസതോളമായി പ്രതി ഇവിടെ ജോലി ചെയ്തു വരികയായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

ശുചീകരണവും സംരക്ഷണവുമില്ല; മാലിന്യപൂരിതമായി കണ്ണമ്മൂല തോട്

മെഡിക്കല്‍കോളജ്: ശുചീകരണവും സംരക്ഷണവും ഇല്ലാതെ വര്‍ഷങ്ങള്‍ കഴിഞ്ഞതോടെ മാലിന്യപൂരിതമായി കണ്ണമ്മൂല തോട്. കണ്ണമ്മൂല വാര്‍ഡില്‍ക്കൂടി കടന്നുപോകുന്ന പ്രസ്തുത തോട് ഞാണ്ടൂര്‍ക്കോണം ഭാഗത്തുകൂടി കടന്നു കണ്ണമ്മൂല പാലം പിന്നിട്ടു വേളി കായലിലേക്ക് ചെന്നു ചേരുന്നതാണ്. വര്‍ഷങ്ങളായി അനസ്യൂതം ഒഴുകിക്കൊണ്ടിരിക്കുന്ന തോട്ടില്‍ മാലിന്യങ്ങള്‍ ദിനംപ്രതി അടിഞ്ഞുകൂടിക്കൊണ്ടിരിക്കുന്നു. ഏകദേശം അഞ്ചു മീറ്റര്‍ വീതിയില്‍ ജലത്തെ ഉള്‍ക്കൊള്ളാന്‍ കഴിയുന്ന തോട്ടിലേക്കു സമീവാസികളായ ചിലരാണ് മാലിന്യം വലിച്ചെറിയുന്നത്. കിലോമീറ്ററുകള്‍ അകലെനിന്നു മാലിന്യവും വഹിച്ചെത്തുന്ന തോട്ടില്‍ ജലം കുറയുന്ന സാഹചര്യത്തിലാണു മാലിന്യം കരയിലേക്ക് അടിയുന്നത്. കരയില്‍ പ്ലാസ്റ്റിക് മാലിന്യവും ആഹാരാവശിഷ്ടങ്ങളും കാണാനാകും. മത്സ്യങ്ങള്‍ ചത്തുപൊങ്ങുന്നതും ഇവിടെ കാണാറുണ്ട്. തോടിനു സമാന്തരമായി രണ്ടുചെറിയ റോഡുകള്‍ കടന്നുപോകുന്നുണ്ട്. ഈ ഭാഗത്തുകൂടി വാഹനങ്ങളും സഞ്ചരിക്കുന്നു. കണ്ണമ്മൂല തോട്ടില്‍ മാലിന്യനിക്ഷേപം ഒഴിവാക്കുന്നതിനുവേണ്ടി സ്ഥാപിച്ച സംരക്ഷണവേലികള്‍ക്ക് ഉയരം കുറവായതിനാല്‍ യഥേഷ്ടം മാലിന്യങ്ങള്‍ വലിച്ചെറിയുന്നുണ്ട്. കടകംപള്ളി ഹെല്‍ത്ത് സോണിന്‍റെ പരിധിയിലാണ് കണ്ണമ്മൂല തോട് വരുന്നത്. ഹെല്‍ത്ത് അധികൃതര്‍ വേണ്ടുന്ന നടപടികള്‍ സ്വീകരിച്ചിരുന്നുവെങ്കില്‍ തോട്ടിലേക്കുള്ള മാലിന്യനിക്ഷേപം ഒരുപരിധിവരെ കുറയ്ക്കാന്‍ സാധിക്കുമായിരുന്നു. ഇതു സംബന്ധിച്ച് തിരക്കുന്നതിന് ഹെല്‍ത്ത് ഇന്‍സ്‌പെക്ടര്‍ ഉള്‍പ്പെടെയുള്ളവരെ ബന്ധപ്പെടാന്‍ ശ്രമിച്ചുവെങ്കിലും അവരില്‍നിന്നു മറുപടി ലഭിച്ചിട്ടില്ല.

മലങ്കര കാത്തലിക് ബൈബിള്‍ കണ്‍വന്‍ഷന്‍ ഇന്നു സമാപിക്കും

തിരുവനന്തപുരം: 33-ാമത് മലങ്കര കാത്തലിക് ബൈബിള്‍ കണ്‍വന്‍ഷന്‍ ഇന്നു സമാപിക്കും. സമാപനദിവസമായ ഇന്നു വൈകുന്നേരം തിരുവനന്തപുരം ലത്തീന്‍ അതിരൂപത സഹായ മെത്രാന്‍ ഡോ.ആര്‍. ക്രിസ്തുദാസ് സമാപന സന്ദേശം നല്‍കും. ഫാ.ഡാനിയേല്‍ പൂവണ്ണത്തിലാണ് മൂന്നു ദിവസത്തെ മലങ്കര കാത്തലിക് ബൈബിള്‍ കണ്‍വന്‍ഷനു നേതൃത്വം നല്‍കുന്നത്. പട്ടം സെന്‍റ് മേരീസ് ഹാളില്‍ സംഘടിപ്പിക്കുന്ന കണ്‍വന്‍ഷന്‍ തിരുവനന്തപുരം വൈദിക ജില്ലാ സമിതിയാണ് സംഘടിപ്പിക്കുന്നത്.

വീട് കുത്തിത്തുറന്ന് പതിനഞ്ചുപവന്‍ കവര്‍ന്നു

പേരൂര്‍ക്കട: മണ്ണന്തല സ്റ്റേഷന്‍ പരിധിയില്‍ ഒരുവാതില്‍ക്കോണത്ത് വീട് കുത്തിത്തുറന്ന് 15 പവന്‍ ആഭരണങ്ങള്‍ കവര്‍ന്നു. ശനിയാഴ്ച പുലര്‍ച്ചെ ഒന്നരയോടടുത്തായിരുന്നു സംഭവം. ഒരുവാതില്‍ക്കോണം ആനന്ദവല്ലീശ്വരം ക്ഷേത്രത്തിനു സമീപം ശ്രീകുമാറിന്‍റെ വീട്ടിലായിരുന്നു മോഷണം. ഇരുനില വീടിന്‍റെ താഴത്തെ നില കുത്തിപ്പൊളിച്ചശേഷം ഇവിടെ വിവിധ സ്ഥലങ്ങളിലായി സൂക്ഷിച്ചിരുന്ന സ്വര്‍ണമാല, നെക്‌ലെസ്, വള, കമ്മല്‍ എന്നിവയാണ് മോഷ്ടിക്കപ്പെട്ടത്. കമ്പിപ്പാര ഉപയോഗിച്ചാണു വീടിന്‍റെ വാതില്‍ കുത്തിപ്പൊളിച്ചത്. ഡല്‍ഹിയില്‍ ആര്‍ക്കിടെക്ടായ ശ്രീകുമാര്‍ കഴിഞ്ഞ ഓഗസ്റ്റ് മാസത്തിലാണ് ഡല്‍ഹിക്ക് പോയത്. വീട്ടുജോലിക്കാരി മാത്രമാണ് പിന്നീട് ഇവിടെയുണ്ടായിരുന്നത്. വെള്ളിയാഴ്ചയും ശനിയാഴ്ച രാവിലെ വരെയും ഇവര്‍ ഇവിടെ വന്നിരുന്നില്ല. അതിനിടെ ശ്രീകുമാറിന്‍റെ ഒരു ബന്ധു ശനിയാഴ്ച വീട്ടില്‍ വന്നിരുന്നു. തുടര്‍ന്നു നടത്തിയ പരിശോധനയിലാണു വീട് കുത്തിപ്പൊളിച്ചിരിക്കുന്നതായി ശ്രദ്ധയില്‍പ്പെട്ടത്. പിന്നീടാണ് സ്വര്‍ണാഭരണങ്ങള്‍ നഷ്ടപ്പെട്ടതായി അറിയുന്നത്. വീട്ടില്‍ സ്ഥാപിച്ചിരുന്ന സിസിടിവി കാമറകളും ഹാര്‍ഡ് ഡിസ്‌കും മോഷ്ടാവ് കൊണ്ടുപോയി. ഫിംഗര്‍ പ്രിന്‍റ് വിദഗ്ധരും ഡോഗ്‌സ്‌ക്വാഡും സ്ഥലത്തെത്തി പരിശോധന നടത്തി. 23 വിരലടയാളങ്ങള്‍ വീട്ടില്‍ നിന്നു വിദഗ്ധ സംഘത്തിനുലഭിച്ചിട്ടുണ്ട്. മണ്ണന്തല പോലീസ് കേസെടുത്ത് അന്വേഷണം ആരംഭിച്ചു.

നെഞ്ചിൽ കുടുങ്ങിയ ഗൈഡ് വയറുമായി സുമയ്യ ആശുപത്രിവിട്ടു; ഇനി പോരാട്ടം നിയമത്തിന്‍റെ വഴിയിൽ

കാട്ടാക്കട: നെഞ്ചിൽ കുടുങ്ങിയ ഗൈഡ് വയറുമായി കാട്ടാക്കട കിള്ളി സ്വദേശി എസ്. സുമയ്യ ആശുപത്രി വിട്ടു. വലിയ പ്രതീക്ഷയോടെയാണ് ആശുപത്രിയിൽ എത്തിയതെന്നും ദുഃഖത്തോടെയാണ് മടങ്ങുന്നതെന്നും സുമയ്യ പറഞ്ഞു. അർഹമായ നഷ്ടപരിഹാരവും സർക്കാർ ജോലിയും വേണമെന്നും ഇല്ലെങ്കിൽ നിയമനടപടിയുമായി മുന്നോട്ടു പോകുമെന്നും അവർ പറഞ്ഞു. ഗൈഡ് വയറിന്‍റെ രണ്ടറ്റവും രക്തധമനിയിൽ ഒട്ടിപ്പോയതു കൊണ്ട് എടുക്കാതിരിക്കുകുന്നതാണ് നല്ലതെന്നു ഡോക്ടർമാർ പറഞ്ഞതായി സുമയ്യ പറഞ്ഞു. അതുകൊണ്ട് ഭാവിയിൽ ആരോഗ്യപ്രശ്നങ്ങൾ ഉണ്ടാകില്ലെന്നാണ് ഡോക്ടർമാർ പറഞ്ഞിരിക്കുന്നതെന്നും സുമയ്യ പറയുന്നു. രണ്ടര വർഷമായി സുമയ്യയുടെ ശരീരത്തിൽ കിടക്കുന്ന ഗൈഡ് വയർ പുറത്തെടുക്കാൻ മെഡിക്കൽ കോളജ് ആശുപത്രിയിൽ ഇന്നലെ നടത്തിയ ശ്രമം പരാജയപ്പെട്ടിരുന്നു. ശരീരത്തിൽ കത്തീറ്റർ കടത്തി അതിൽ ഗൈഡ് വയറിനെ കുടുക്കി പുറത്തേക്ക് എടുക്കാനാണു ശ്രമിച്ചത്. പക്ഷേ, അതു ശരീരത്തിൽ നിന്നു വേർപെട്ടു പോന്നില്ല. രണ്ടു തവണ കത്തീറ്റർ കടത്തി ശ്രമിച്ചെങ്കിലും വിഫലമായി. തുടയിൽ നിന്നു കഴുത്തിനു താഴെ വരെ 70 സെന്‍റീ മീറ്റർ നീളത്തിലാണ് ഗൈഡ് വയർ കിടക്കുന്നത്. ഇതു വയറിന്‍റെ താഴെയും വയറിലും കഴുത്തിന്‍റെ താഴെയും ഒട്ടിച്ചേർന്നിരിക്കുകയാണ്. ശക്തമായി വലിച്ചെടുത്താൽ ഗൈഡ് വയർ പൊട്ടാനോ ഒട്ടിച്ചേർന്നിരിക്കുന്ന ഞരമ്പിനു ക്ഷതമുണ്ടാകാനോ സാധ്യതയുള്ളതിനാൽ ഡോക്ടർമാർ അതു ചെയ്തില്ല.

സ്വത്തുതര്‍ക്കം : ക്രിമിനല്‍ക്കേസ് പ്രതി അമ്മാവനെ തലയ്ക്കടിച്ചു കൊലപ്പെടുത്തി

പേരൂര്‍ക്കട: സ്വത്തുതര്‍ക്കത്തിന്‍റെ പേരില്‍ ക്രിമിനല്‍ക്കേസ് പ്രതി അമ്മാവനെ തലയ്ക്കടിച്ചു കൊലപ്പെടുത്തി. കുടപ്പനക്കുന്ന് അമ്പഴംകോട് പുതുച്ചിവീട്ടില്‍ പറട്ട രാജേഷ് എന്നുവിളിക്കുന്ന രാജേഷ് (47) ആണ് സംഭവത്തില്‍ അറസ്റ്റിലായത്. ശനിയാഴ്ച പുലര്‍ച്ചെയായിരുന്നു സംഭവം. രാജേഷിന്‍റെ വീട്ടില്‍ താമസിച്ചുവന്ന സുധാകരന്‍ (81) ആണ് കൊല്ലപ്പെട്ടത്. സ്വത്തുസംബന്ധിച്ച് അമ്മാവനുമായി ഉണ്ടായ തര്‍ക്കമാണ് ആക്രമണത്തില്‍ കലാശിച്ചത്. വാക്കുതര്‍ക്കം മൂത്തതോടെ രാജേഷ് ക്രിക്കറ്റ് ബാറ്റ് എടുത്ത് അമ്മാവന്‍റെ തലയ്ക്കടിക്കുകയായിരുന്നു. സുധാകരന്‍ സംഭവസ്ഥലത്തുതന്നെ മരണപ്പെട്ടു. സുധാകരന്‍റെ സഹോദരി വിനോദിനി അഞ്ചു ദിവസത്തിനു മുമ്പ് മരണപ്പെട്ടിരുന്നു. ഇതിന്‍റെ ചടങ്ങുകള്‍ കഴിഞ്ഞദിവസം വീട്ടില്‍ നടത്തിയിരുന്നു. ചടങ്ങിനുശേഷം രാജേഷ് മദ്യലഹരിയിലായിരുന്നുവെന്നു പോലീസ് പറഞ്ഞു. ഇതിനിടെയാണ് സുധാകരനുമായി സ്വത്ത് സംബന്ധിച്ച് വാക്കുതര്‍ക്കമുണ്ടാകുന്നതും ആക്രമിക്കുന്നതും. മൃതദേഹത്തില്‍നിന്നു വീണ രക്തക്കറ രാജേഷു തന്നെ കഴുകി വൃത്തിയാക്കി. അതിനുശേഷം ആരും കാണാതെ മൃതദേഹം തന്‍റെ മുറിയില്‍ ഒളിപ്പിച്ചു. സംഭവം നടക്കുമ്പോള്‍ അകത്തെ മുറിക്കുള്ളില്‍ പ്രായമുള്ള വല്യമ്മയും രണ്ടുകുട്ടികളുമാണ് ഉണ്ടായിരുന്നത്. വല്യമ്മ മുറിക്കുള്ളില്‍ ഉറങ്ങുകയായിരുന്നു. സംഭവം പിന്നീട് ഇവരുടെ ശ്രദ്ധയില്‍പ്പെട്ടതോടെയാണ് വിവരം പുറംലോകമറിയുന്നത്. കൃത്യം നടത്തിയശേഷം വീട്ടില്‍നിന്നു രക്ഷപ്പെട്ട രാജേഷിനെ കന്‍റോൺമെന്‍റ് എസി സ്റ്റ്യുവര്‍ട്ട് കീലറിന് ലഭിച്ച രഹസ്യവിവരത്തെ തുടര്‍ന്ന് മണ്ണന്തല സിഐ കണ്ണന്‍, എസ്ഐ ആര്‍.എസ്. വിപിന്‍, സിപിഒമാരായ പ്രദീപ്, അനീഷ്, അഭിലാഷ്, ഷജീര്‍, മുജീബ്, വിനോദ്, പാര്‍ഥന്‍, രാജേഷ് എന്നിവര്‍ ചേര്‍ന്്്നു കുടപ്പനക്കുന്ന് ഇരപ്പുകുഴി ഭാഗത്തുവച്ച് പിടികൂടുകയായിരുന്നു. ആഴ്ചകള്‍ക്കു മുമ്പാണ് ക്രിമിനല്‍ക്കേസ് പ്രതികള്‍ ചേര്‍ന്ന് രാജേഷിന്‍റെ വീട്ടിലേക്ക് ബോംബ് എറിയുകയും വാഹനങ്ങള്‍ അടിച്ചു തകര്‍ക്കുകയും ഇയാളെ ആക്രമിക്കുകയും ചെയ്തിരുന്നു. അറസ്റ്റിലായ രാജേഷിനെ ഞായറാഴ്ച മജിസ്‌ട്രേറ്റിനു മുന്നില്‍ ഹാജരാക്കും.

പി.ജെ. ആന്‍റണി കാലംതെറ്റിയ സാന്നിധ്യം: കെ.പി. കുമാരൻ

തിരുവനന്തപുരം: കാലം തെറ്റിയ സാന്നിധ്യമായിരുന്നു അസാമാന്യ കലാകാരനായിരുന്ന പി.ജെ. ആന്‍റണിയുടേതെന്ന് പ്രശസ്ത ചലച്ചിത്ര സംവിധായകൻ കെ.പി. കുമാരൻ. പി.ജെ. ആന്‍റണി എന്ന വ്യക്തി നമ്മുടെ സാംസ്കാരിക ജീവിതത്തിന്‍റെ ഇരട്ടമുഖത്തിന്‍റെ ഇരയായിരുന്നുവെന്നും കെ.പി. കുമാരൻ ചൂണ്ടിക്കാട്ടി. കേരള സാഹിത്യ അക്കാദമി തിരുവനന്തപുരം നാട്യഗൃഹം, ഭാരത് ഭവൻ എന്നിവയുടെ സംയുക്താഭിമുഖ്യത്തിൽ നടന്ന പി.ജെ. ആന്‍റണി ജന്മ ശതാബ്ദി ആഘോഷം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. തൈക്കാട് ഭാരത് ഭവനിലായിരുന്നു രണ്ടുദിവസം നീണ്ടുനിൽക്കുന്ന ആഘോഷ ചടങ്ങ്. 51 വർഷങ്ങൾക്ക് മുൻപ് തന്‍റെ ആദ്യ കഥാസിനിമയായ അതിഥിയുടെ ചിത്രീകരണ സമയത്ത് ഇരുപത്തി അഞ്ച് ദിവസമാണ് പി.ജെ. ആന്‍റണിയുമായി ഒന്നിച്ച് പ്രവർത്തിച്ചത്. അതിഥിയിൽ അഭിനയിക്കാനായി പി.ജെ. ആന്‍റണിയെ ക്ഷണിക്കാൻ വയലാറും സിനിമയുടെ നിർമാതാവായ പൊന്നപ്പനും താനും ചേർന്നു എറണാകുളത്തെത്തിയ അനുഭവവും കെ.പി. കുമാരൻ പങ്കുവച്ചു. ചടങ്ങിൽ പ്രശസ്ത സാഹിത്യകാരനും കേരള സാഹിത്യ അക്കാദമി മലയാളം ഉപദേശക സമിതി കൺവീനറുമായ കെ.പി രാമനുണ്ണി അധ്യക്ഷത വഹിച്ചു. ചലച്ചിത്ര നടനും സംവിധായകനുമായ മധുപാൽ മുഖ്യപ്രഭാഷണം നടത്തി. ഭാരത് ഭവൻ മെന്പർ സെക്രട്ടറി ഡോ. പ്രമോദ് പയ്യന്നൂർ, നാട്യഗൃഹം പ്രസിഡന്‍റ് പി.വി. ശിവൻ എന്നിവർ ആശംസാ പ്രഭാഷണം നടത്തി. കേരള സാഹിത്യ അക്കാദമി ഉപദേശക സമിതി അംഗം സാബു കോട്ടുക്കൽ സ്വാഗതം ആശംസിച്ചു. നാട്യഗൃഹം ചെയർമാൻ എം.വി. ഗോപകുമാർ നന്ദിയും പറഞ്ഞു. ‌പി.ജെ. ആന്‍റണിയുടെ എഴുത്ത്, നാടകലോകം എന്നിവയെക്കുറിച്ചുള്ള സെമിനാറിൽ, ടി.എം. ഏബ്രഹാം, ഷംഷാദ് ഹുസൈൻ, പോൾ മണലിൽ, ഡോ. രാജാ വാര്യാർ, അജു കെ. നാരായണൻ എന്നിവർ പങ്കെടുത്തു.

ബൈബിള്‍ കൈയ്യെഴുത്തു പ്രതിയാക്കാനുള്ള ഉദ്യമവുമായി തുമ്പ ഇടവക

തിരുവനന്തപുരം: ഒരു മണിക്കൂര്‍ കൊണ്ട് ബൈബിള്‍ കൈയ്യെഴുത്തു പ്രതി തയാറാക്കാനുള്ള ഉദ്യമവുമായി തുമ്പ വിശുദ്ധ സ്‌നാപക യോഹന്നാന്‍ ദേവാലയത്തിലെ ഇടവകാംഗങ്ങള്‍. ലോക സമാധാനം, കുടുംബങ്ങളിലെ ശാന്തി, ലഹരി മോചനം എന്നീ ലക്ഷ്യങ്ങളോടെയാണ് വിശുദ്ധ ബൈബിള്‍ മുഴുവന്‍ കൈയ്യെഴുത്തു പ്രതിയാക്കാന്‍ തയാറെടുക്കുന്നത്. ബൈബിള്‍ കൈയ്യെഴുത്ത് പുസ്തക ചരിത്രത്തില്‍ ആദ്യമായാണ് പ്രത്യേക നിയോഗങ്ങള്‍ സമര്‍പ്പിച്ച് വ്യത്യസ്തതയാര്‍ന്ന മുന്നൊരുക്കങ്ങളിലൂടെ മലയാളം പിഒസി ബൈബിളിന്‍റെ എല്ലാ അധ്യായങ്ങളും ആമുഖങ്ങളും ഒരു മണിക്കൂര്‍ കൊണ്ട് കൈയ്യെഴുത്ത് പ്രതിയാക്കുന്നത്. തുമ്പ ഇടവക വികാരി ഫാ. ജോസ്‌മോന്‍ ബെഞ്ചമിന്‍റെ നേതൃത്വത്തിലാണ് തിരുവെഴുത്ത് 2025 എന്ന ഈ മിഷന്‍ പൂര്‍ത്തിയാക്കുന്നത്. ഇന്നു രാവിലെ 11ന് ഇതുമായി ബന്ധപ്പെട്ട പ്രവര്‍ത്തനങ്ങള്‍ ആരംഭിക്കും. ആറു മുതല്‍ 83 വയസുവരെയുള്ള 986 ഇടവകാംഗങ്ങള്‍ ചേര്‍ന്നാണ് ബൈബിള്‍ ഒരു മണിക്കൂര്‍ കൊണ്ട് പകര്‍ത്തിയെഴുതുന്നത്. ഓരോരുത്തര്‍ക്കും ബൈബിളിന്‍റെ നിര്‍ദിഷ്ട ഭാഗങ്ങള്‍ മുന്‍കൂട്ടി നിശ്ചയിച്ച് നല്‍കിയിട്ടുണ്ട്. ഈ കൈയെഴുത്ത് ബൈബിള്‍ വിശുദ്ധ യൂദാ തദ്ദേവൂസിന്‍റെ തിരുനാളിന്‍റെ അവസാന ദിനമായ ഈ മാസം 28നു നടക്കുന്ന ആഘോഷമായ പൊന്തിഫിക്കല്‍ സമൂഹ ബലിയില്‍ ബിഷപ്പ് സെല്‍വസ്റ്റര്‍ പൊന്നുമുത്തന്‍ ആശീര്‍വദിച്ച് പ്രകാശിപ്പിക്കും. ‌ഇടവക ദേവാലയത്തില്‍ സ്ഥിരപ്രതിഷ്ഠ നടത്തുന്ന ഈ കൈയ്യെഴുത്തു ബൈബിള്‍ സമാധാനത്തിന്‍റെയും മോചനത്തിന്റെയും ഒരു പുതിയ ഉഷസാകുമെന്നു പ്രത്യാശിക്കുന്നതായി തുമ്പ ഇടവക വികാരി ഫാ. ജോസ്‌മോനും ഇടവക സെക്രട്ടറി തങ്കച്ചന്‍ എം. ഡിക്രൂസും അറിയിച്ചു.

വെട്ടുകാട് ക്രിസ്തുരാജത്വ തിരുനാൾ: പന്തൽ കാൽനാട്ട് കർമം ഇന്ന്

തിരുവനന്തപുരം: കേരളത്തിലെ പ്രശസ്ത തീർഥാടന കേന്ദ്രമായ വെട്ടുകാട് മാദ്രെ ദെ ദേവൂസ് ദേവാലയത്തിലെ ഈ വർഷത്തെ ക്രിസ്തുരാജത്വ തിരുനാൾ ഒരുക്കങ്ങളുടെ ഭാഗമായി പന്തൽ കാൽനാട്ടു കർമ്മം ഇന്നു രാവിലെ ആറിമണിക്കുള്ള ദിവ്യബലിക്കു ശേഷം ക്രിസ്തുരാജ പാദത്തിന് സമീപം ഇടവക വികാരി റവ.ഫാ. വൈ.എം. എഡിസണ്‍ നിർവഹിക്കും. തിരുനാളിനോടനുബന്ധിച്ച് തീർഥാടകർക്ക് ആവശ്യമായ സൗകര്യങ്ങളും ഒരുക്കുന്നതിനായി സർക്കാരിന്‍റെ എല്ലാ വകുപ്പുകളെയും ഉൾപ്പെടുത്തിയുള്ള പ്രാഥമികതല ചർച്ചായോഗം നടന്നു. സുരക്ഷ, ഗതാഗതം, ശുചിത്വം ആരോഗ്യം തുടങ്ങിയ വിഷയങ്ങൾ യോഗം വിലയിരുത്തി. മന്ത്രി വി. ശിവൻകുട്ടിയുടെ അധ്യക്ഷതയിൽ കൂടിയ യോഗത്തിൽ മന്ത്രി ജി.ആർ.അനിൽ, എംഎൽഎ ആന്‍റണി രാജു, ജില്ലാ കളക്ടർ എന്നിവരും പങ്കെടുത്തു. പോലീസ്, അഗ്നിരക്ഷാ, പൊതുമരാമത്ത്, ആരോഗ്യം തുടങ്ങിയ എല്ലാ വകുപ്പിലെയും ഉദ്യോഗസ്ഥരും സംബന്ധിച്ചു. യോഗത്തിൽ വെട്ടുകാട് ഇടവക വികാരി ഫാ. വൈ.എം. എഡിസണ്‍, സെക്രട്ടറി പി.എം. സക്കറിയ എന്നിവർ പ്രസംഗിച്ചു. വൈസ് പ്രസിഡന്‍റ് ക്രിസ്തുദാസ്, കോ-ഓർഡിനേറ്റർ എച്ച്. അനിൽ, ധനകാര്യ കണ്‍വീനർ ബോബൻ ഫെർണാണ്ടസ് എന്നീ കൗണ്‍സിൽ പ്രതിനിധികും യോഗത്തിൽ പങ്കെടുത്തു. കൊടിയേറ്റ് കർമം നവംബർ 14ന് വൈകുന്നേരം നടക്കും.

ഊബര്‍ ടാക്‌സി ഡ്രൈവറെ ആക്രമിച്ച് പണവും ഫോണും കവര്‍ന്നു

ആറംഗ സംഘത്തെ അറസ്റ്റുചെയ്തു പേരൂര്‍ക്കട: ഊബര്‍ ടാക്‌സി വിളിച്ചെത്തിയ സംഘം യുവാവിന്‍റെ കഴുത്തില്‍ പ്ലാസ്റ്റിക് വയര്‍ മുറുക്കി ഭീഷണിപ്പെടുത്തി പണവും മൊബൈല്‍ ഫോണും കവര്‍ന്നു. സംഭവവുമായി ബന്ധപ്പെട്ട് ആറംഗസംഘത്തെ മണ്ണന്തല പോലീസ് പിടികൂടി. നാലാഞ്ചിറ അക്ഷയ ഗാര്‍ഡന്‍സ് അമരത്തില്‍ വീട്ടില്‍ കാപ്പിരി ജിതിന്‍ എന്നുവിളിക്കുന്ന ജിതിന്‍ (35), ഉള്ളൂര്‍ ജനശക്തി നഗര്‍ ജെഎന്‍ആര്‍എ 83 പണയില്‍ വീട്ടില്‍ വിഷ്ണു (31), ഇടവക്കോട് വല്ലുണ്ണി സജി ഭവനില്‍ ജിത്ത് (28), മണ്ണന്തല ചെഞ്ചേരി ലക്ഷംവീട്ടില്‍ ജിഷ്ണു (24), കല്ലിയൂര്‍ കുളക്കോട്ടുകോണം കുന്നുംപുറത്ത് വീട്ടില്‍ യദു (18), ശ്രീകാര്യം ചെറുവയ്ക്കല്‍ ഇളംകുളംവിള ചാമവിള വീട്ടില്‍ സൂരജ് (18) എന്നിവരാണ് പിടിയിലായത്. കുരിശടി ജംഗ്ഷനു സമീപം എഴുകന്യാ റോഡില്‍ എഴുകന്യാ ക്ഷേത്രത്തിന്‍റെ ആര്‍ച്ചിനു സമീപം ഇടവഴിയില്‍ ശനിയാഴ്ച രാവിലെയാണ് സംഭവം. പാറോട്ടുകോണത്തുനിന്നു യൂബര്‍ ടാക്‌സി വിളിച്ചെത്തിയ ആറംഗസംഘമാണു കവര്‍ച്ച നടത്തിയത്. സംഘം ആള്‍ട്ടോ കാറില്‍ കയറിയശേഷം നാലാഞ്ചിറയിലേക്കു പോകാന്‍ ആവശ്യപ്പെട്ടു. ഇതിനിടെ പാറോട്ടുകോണത്തുനിന്ന് കഷ്ടിച്ച് ഒരുകിലോമീറ്റര്‍ പിന്നിട്ടപ്പോള്‍ ടാക്‌സി ഡ്രൈവറും കരകുളം സ്വദേശിയുമായ അരുണിനെ (42) കഴുത്തില്‍ വയര്‍ ഉപയോഗിച്ച് കുരുക്കിയശേഷം പണം കവരാന്‍ ശ്രമിച്ചു. ഇതിനിടെ അരുണ്‍ കാറില്‍നിന്ന് ഇറങ്ങിയോടി. പ്രതികള്‍ ചേര്‍ന്ന് ഇയാളെ ബലമായി പിടിച്ചു കാറിനുള്ളില്‍ ഇട്ടശേഷം ഇവരില്‍ ഒരാള്‍ കാര്‍ ഓടിച്ച് കുരിശടി ജംഗ്ഷനിലേക്കു പോകുകയായിരുന്നു. അവിടെനിന്നാണ് എഴുകന്യാ റോഡിലേക്കു തിരിഞ്ഞത്. ആളനക്കമില്ലാത്ത സ്ഥലത്ത് എത്തിയതോടെ പ്രതികള്‍ ചേര്‍ന്ന് അരുണിനെ മര്‍ദിച്ചശേഷം 6,200 രൂപയും മൊബൈല്‍ ഫോണും കവരുകയായിരുന്നു. തിരികെപ്പോകാനുള്ള ശ്രമത്തിനിടെ കാര്‍ ഇടറോഡിലെ ഓടയില്‍ വീണു. പരിഭ്രാന്തരായ പ്രതികള്‍ കാര്‍ ഉപേക്ഷിച്ച് ഓടി രക്ഷപ്പെടുകയായിരുന്നു. സംഭവമറിഞ്ഞെത്തിയ നാട്ടുകാരാണ് കാര്‍ ഓടയില്‍ വീണുകിടക്കുന്നതും അതിനുള്ളില്‍ ഡ്രൈവര്‍ ഉണ്ടെന്നും അറിയുന്നത്. തുടര്‍ന്ന് പോലീസില്‍ വിവരമറിയിച്ചു. കന്‍റോൺമെന്‍റ് എസി സ്റ്റ്യുവര്‍ട്ട് കീലറിന്‍റെ നിര്‍ദേശപ്രകാരം മണ്ണന്തല സിഐ കണ്ണന്‍, എസ്.ഐ ആര്‍.എസ്. വിപിന്‍, സിപിഒമാരായ പ്രദീപ്, അനീഷ്, അഭിലാഷ്, ഷജീര്‍, മുജീബ്, വിനോദ്, പാര്‍ഥന്‍, രാജേഷ് എന്നിവര്‍ ചേര്‍ന്ന് പരുത്തിപ്പാറ, പാറോട്ടുകോണം തിലക് നഗര്‍ എന്നിവിടങ്ങളിൽ നിന്നാണ് പ്രതികളെ പിടികൂടിയത്. ഇതില്‍ കാപ്പിരി ജിതിന്‍ നിരവധി ക്രിമിനല്‍ക്കേസുകളിലെ പ്രതിയാണ്. ഇയാളുടെ സുഹൃത്തുക്കളാണ് ഒപ്പം പിടിയിലായത്. പ്രതികളെ കോടതിയില്‍ ഹാജരാക്കി.

എട്ടു വയസസുകാരൻ തൂങ്ങി മരിച്ച നിലയിൽ

ചെമ്പഴന്തി: എട്ടുവയസസുകാരനെ വീട്ടിൽ തൂങ്ങി മരിച്ച നിലയിൽ കണ്ടെത്തി. ചാരിയാട്ടുകുളത്തിനു സമീപം അക്കരവിള വീട്ടിൽ പ്രമോദ് -സിനി ദന്പതികളുടെ മകൻ ശ്രേയസ് (8) ആണ് മരിച്ചത്. മണക്കൽ എൽപിഎസിലെ രണ്ടാം ക്ലാസ് വിദ്യാർഥിയാണ്. ഇന്നലെ വീട്ടിൽ പഠിക്കുന്നതിനിടെ ബഹളം വച്ചതിന് അമ്മ ശ്രേയസിനെ വഴക്കു പറഞ്ഞിരുന്നു.തുടർന്ന് ശ്രേയസ് മുറിയിൽ കയറി കതക് അകത്തു നിന്നും പൂട്ടി. ഉറങ്ങുകയായിരിക്കും എന്നു വിചാരിച്ചു അമ്മ മിനി വിളിച്ചില്ല. ഏറെ കഴിഞ്ഞിട്ടും കാണാത്തതിനാൽ വാതിൽ ചവിട്ടി പൊളിച്ചു നോക്കുമ്പോൾ ജനാല കമ്പിയിൽ തൂങ്ങിയ നിലയിലായിരുന്നു. ശരവണനാണ് ശ്രേയസിന്‍റെ സഹോദരൻ.

കേരളം ഭരിക്കുന്നത് ശബരിമലയിലെ സ്വർണം മോഷ്ടിച്ചവർ: അഡ്വ. ചാണ്ടി ഉമ്മൻ എംഎൽഎ

കിളിമാനൂർ: വിശ്വാസികളെ വഞ്ചിച്ച് ശബരിമലയിലെ സ്വർണം മോഷ്ടിച്ച ആളുകളാണ് കേരളം ഭരിക്കുന്നതെന്ന് അഡ്വ. ചാണ്ടി ഉമ്മൻ എംഎൽഎ. അഴിമതിക്ക് കുടപിടിക്കുന്നവരാണ് ഇപ്പോൾ സംസ്ഥാനവും ദേവസ്വവും ഭരിക്കുന്നത് എന്നും അദ്ദേഹം കൂട്ടിച്ചേർത്തു. കാരേറ്റ് കേന്ദ്രമാക്കി പ്രവർത്തിക്കുന്ന പ്രിയദർശിനി എഡ്യുക്കേഷണൽ ആൻഡ് ചാരിറ്റബിൾ ട്രസ്റ്റിന്‍റെ 2025 പ്രിയദർശിനി വിദ്യാഭ്യാസ അവാർഡ് വിതരണവും സാമ്പത്തികമായി പിന്നോക്കം നിൽക്കുന്ന കുടുംബങ്ങൾക്കുള്ള ഭക്ഷ്യധാന്യ വസ്തുക്കളുടെ വിതരണവും ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. കാരേറ്റ് ആർ കെ വി ഓഡിറ്റോറിയത്തിൽ നടന്ന പരിപാടിയിൽ ട്രസ്റ്റ് ചെയർമാൻ എ.അഹമ്മദ് കബീർ അധ്യക്ഷനായിരുന്നു. നഗരൂർ എ. ഇബ്രാഹീംകുട്ടി, ജില്ലാ കോൺഗ്രസ് കമ്മിറ്റി ജനറൽ സെക്രട്ടറി എ. ഷിഹാബുദ്ദീൻ, മുൻ ബ്ലോക്ക് പ്രസിഡണ്ട് എം. കെ.ഗംഗാധര തിലകൻ, ജനപ്രതിനിധികളായ ജി.രവീന്ദ്ര ഗോപാൽ ബി.ജയചന്ദ്രൻ, ജി. ശാന്തകുമാരി, എ. എസ്. ആശ, ട്രസ്റ്റ് വൈസ് ചെയർമാൻ പുല്ലയിൽ ശ്രീധരൻപിള്ള, യുഡിഎഫ് ചെയർമാൻ എസ് വിശ്വംഭരൻ, ട്രസ്റ്റ് സെക്രട്ടറി എസ്.സുസ്മിത, സി.എസ്.സൈജു എന്നിവർ പങ്കെടുത്തു.

കുടിശിക അടച്ചില്ല;പോലീസ് സ്റ്റേഷനിലെ ഫോൺ വിഛേദിച്ചു

പേരൂര്‍ക്കട: തമ്പാനൂര്‍ പോലീസ് സ്റ്റേഷനിലെ ലാന്‍ഡ് ലൈന്‍ വിഛേദിച്ചു. കുടിശിക തുക അടയ്ക്കാത്തതാണ് ഫോണ്‍ ബന്ധം വിഛേദിക്കാന്‍ കാരണമെന്നാണു സൂചന. മേട്ടുക്കട ബിഎസ്എന്‍എല്‍ സെക്‌ഷന്‍ പരിധിയിലുള്ള സ്ഥലമാണ് സ്റ്റേഷന്‍. സ്റ്റേഷന്‍ ലാന്‍ഡ് ലൈന്‍ നമ്പരായ 0471 2326543 രണ്ടാഴ്ചയായി പ്രവര്‍ത്തനരഹിതമാണ്. സ്റ്റേഷന്‍റെ സേവനം ലഭിക്കുന്നതിന് പൊതുജനങ്ങള്‍ പ്രധാനമായി ആശ്രയിക്കുന്ന ലാന്‍ഡ് ലൈന്‍ കണക്ഷന്‍ എത്രയും വേഗം പുനസ്ഥാപിക്കുമെന്നാണു പോലീസുകാരുടെ പ്രതീക്ഷ.

ഗേറ്റിൽ കുടുങ്ങിയ തെരുവ് നായയെ ഫയർഫോഴ്സ് രക്ഷപെടുത്തി

വിഴിഞ്ഞം : വീടിന്‍റെ ഗേറ്റിൽ കുടുങ്ങിയ തെരുവ് നായയെ വിഴിഞ്ഞം ഫയർ ഫോഴ്സ് രക്ഷപ്പെടുത്തി.വിഴിഞ്ഞം, കോട്ടപ്പുറം സ്വദേശി ജാസിയുടെ വീടിന്‍റെ ഗേറ്റിൽ തല കുടുങ്ങി അവശനായ നായയെയാണ് ഫയർ & റെസ്ക്യൂ ഫോഴ്സ് എത്തി രക്ഷപ്പെടുത്തിയത്. രാവിലെ വീട്ടുകാർ ഉറക്കം എണീറ്റപ്പോഴാണ് നായകുടുങ്ങിയ വിവരം അറിഞ്ഞത്. വീട്ടുകാർക്ക് വീടിന്‍റെ ഗേറ്റിന് പുത്തിറങ്ങാൻ കഴിയാത്ത അവസ്ഥയായി.അങ്ങനെയാണ് സേനയുടെ സഹായം തേടിയത്. സേന എത്തി കട്ടർ ഉപയോഗിച്ച് ഗേറ്റിന്‍റെ ഇരുമ്പ് കമ്പികൾ മുറിച്ച് നീക്കി നായയെ രക്ഷിച്ചു.അതിന് ശേഷമാണ് വീട്ടുകാർക്ക് പുറത്ത് ഇറങ്ങാനായത്

വീട്ടമ്മയുടെ മരണം ആത്മഹത്യയെന്ന് പോലീസ്

നെയ്യാറ്റിന്‍കര : മുട്ടയ്ക്കാട് സ്വദേശിനി സലിതകുമാരി (50) ആത്മഹത്യ ചെയ്തതാണെന്ന് പോലീസിന്‍റെ പ്രാഥമിക നിഗമനം. ശരീരത്തില്‍ മണ്ണെണ്ണയുടെ അംശമുണ്ടായിരുന്നായും ആത്മഹത്യാക്കുറിപ്പ് കണ്ടെടുത്തുവെന്നും പോലീസ് അറിയിച്ചു. മുട്ടയ്ക്കാട് കെന്‍സായില്‍ പരേതനായ സ്റ്റെല്ലസ് ഗബ്രിയേലിന്‍റെ ഭാര്യ സലിതകുമാരി വീട്ടില്‍ രാവിലെ ചായ തയാറാക്കുന്നതിനിടയില്‍ പാചകവാതക അടുപ്പില്‍ നിന്ന് തീ പടര്‍ന്ന് മരണമടഞ്ഞുവെന്നായിരുന്നു ആദ്യ നിഗമനം . പിന്നീട് പോലീസ് വീട്ടില്‍ നിന്നും സലിതകുമാരി എഴുതിയതെന്ന് കരുതപ്പെടുന്ന ആത്മഹത്യാക്കുറിപ്പ് കണ്ടെടുത്തു. മകന് എഴുതിയിരിക്കുന്ന കത്തില്‍ പ്രാദേശിക കോണ്‍ഗ്രസ് നേതാവിനെക്കുറിച്ച് പരാമര്‍ശമുണ്ട്. നഗരസഭ കൗണ്‍സിലര്‍ കൂടിയായ അദ്ദേഹം സലിതകുമാരിയോട് മുന്പ് മോശമായി പെരുമാറിയിട്ടുണ്ടെന്ന് മകന്‍ രാഹുല്‍ മാധ്യമങ്ങളോട് കഴിഞ്ഞ ദിവസം പറഞ്ഞു. ആത്മഹത്യാക്കുറിപ്പ് വിശദമായി പരിശോധിക്കുമെന്നും സലിതകുമാരിയുടെ കൈപ്പടയാണെന്ന് വ്യക്തമായാല്‍ കൗണ്‍സിലര്‍ക്കെതിരെ ആത്മഹത്യാ പ്രേരണാ കുറ്റം ചുമത്തി കേസെടുക്കുമെന്നും പോലീസ് അറിയിച്ചു.

പെട്രോളുമായി ആത്മഹത്യാഭീഷണി; പിന്തിരിപ്പിച്ച് ഫയർഫോഴ്സ്

നെടുമങ്ങാട് : പെട്രോൾ ഒഴിച്ച് ആത്മഹത്യ ഭീഷണി മുഴക്കിയ ആളെ ഫയർഫോഴ്സ് അനുനയിപ്പിച്ച് പിന്തിരിപ്പിച്ചു. കേശവദാസപുരം വിവേകാനന്ദ നഗറിൽ കുര്യാക്കോസ് (55)ആണ് പെട്രോളുമായി ാത്മഹത്യ ഭീഷണി മുഴക്കിയത്. നെടുമങ്ങാട് ഹിന്ദ് മെഡിക്കൽസിൽ ഇന്നലെ ഉച്ചക്ക് 12നാണ് സംഭവം. ഹിന്ദ് മെഡിക്കൽസ് മുൻ ഉടമയുമായുമുള്ള സാന്പത്തിക ഇടപാടാണ് ആത്മഹത്യാഭീഷണിക്കു കാരണം. മുൻ മെഡിക്കൽ ഷോപ്പ് ഉടമ 58 ലക്ഷം രൂപ കൊടുക്കാനുണ്ടെന്ന് ആരോപിച്ചാണ് രണ്ട് കന്നാസ് പെട്രോളുമായി കുര്യാക്കോസ് എത്തി ആത്മഹത്യ ഭീഷണി മുഴക്കിയത്. മെഡിക്കൽ സ്റ്റോറിന് മുന്നിൽ ഉണ്ടായിരുന്ന ട്രാഫിക് പോലീസ് ഫയർഫോഴ്സിനെ വിവരം അറിയിച്ചു. ഫയർഫോഴ്സ് മെഡിക്കൽ സ്റ്റോറിന് പുറകിൽ കൂടെ എത്തി കുര്യാക്കോസിനെ അനുനയിപ്പിച്ചു കീഴടക്കുകയായിരുന്നു. നെടുമങ്ങാട് : പെട്രോൾ ഒഴിച്ച് ആത്മഹത്യ ഭീഷണി മുഴക്കിയ ആളെ ഫയർഫോഴ്സ് അനുനയിപ്പിച്ച് പിന്തിരിപ്പിച്ചു. കേശവദാസപുരം വിവേകാനന്ദ നഗറിൽ കുര്യാക്കോസ് (55)ആണ് പെട്രോളുമായി ാത്മഹത്യ ഭീഷണി മുഴക്കിയത്. നെടുമങ്ങാട് ഹിന്ദ് മെഡിക്കൽസിൽ ഇന്നലെ ഉച്ചക്ക് 12നാണ് സംഭവം. ഹിന്ദ് മെഡിക്കൽസ് മുൻ ഉടമയുമായുമുള്ള സാന്പത്തിക ഇടപാടാണ് ആത്മഹത്യാഭീഷണിക്കു കാരണം. മുൻ മെഡിക്കൽ ഷോപ്പ് ഉടമ 58 ലക്ഷം രൂപ കൊടുക്കാനുണ്ടെന്ന് ആരോപിച്ചാണ് രണ്ട് കന്നാസ് പെട്രോളുമായി കുര്യാക്കോസ് എത്തി ആത്മഹത്യ ഭീഷണി മുഴക്കിയത്. മെഡിക്കൽ സ്റ്റോറിന് മുന്നിൽ ഉണ്ടായിരുന്ന ട്രാഫിക് പോലീസ് ഫയർഫോഴ്സിനെ വിവരം അറിയിച്ചു. ഫയർഫോഴ്സ് മെഡിക്കൽ സ്റ്റോറിന് പുറകിൽ കൂടെ എത്തി കുര്യാക്കോസിനെ അനുനയിപ്പിച്ചു കീഴടക്കുകയായിരുന്നു.

ശാസ്താംകോട്ടയുടെ ചരിത്ര ഏടുകളില്‍ ബ്രൂക്കിനും സ്ഥാനം: മാര്‍ ക്ലീമിസ് ബാവ

ശാസ്താംകോട്ട : ശാസ്താംകോട്ടയുടെ ചരിത്ര ഏടുകളില്‍ ബ്രൂക്കിനും സ്ഥാനം രേഖപ്പെടുത്തിരിക്കുന്നുവെന്നു മലങ്കര കത്തോലിക്കാ സഭാ മേജർ ആർച്ച് ബിഷപ് കർദിനാൾ മാര്‍ ബസേലിയോസ് ക്ലീമിസ് കാതോലിക്കാബാവ. രാജഗിരി ബ്രൂക്ക് ഇന്‍റര്‍നാഷണല്‍ സ്‌കൂളിന്‍റെ വാര്‍ഷികവും ബ്രൂക്കിന്‍റെ സ്ഥാപക ഡയറക്ടര്‍ റവ.ഡോ. ജി.ഏബ്രഹാം തലോത്തിലിന്‍റെ നാമഹേതുക തിരുനാള്‍ ആഘോഷവും ഉദ്ഘാടനം ചെയ്തു പ്രസംഗിക്കുകയായിരുന്നു കതോലിക്കബാവ. പത്തനംതിട്ട ബിഷപ് ഡോ. സാമുവല്‍ മാര്‍ ഐറേനിയോസ് അധ്യക്ഷത വഹിച്ചു. മാര്‍ത്താണ്ഡം ബിഷപ് ഡോ. വിന്‍സെന്‍റ് മാര്‍ പൗലോസ് അനുഗ്രഹ പ്രഭാഷണം നടത്തി. മാവേലിക്കര വികാരി ജനറാൾ മോൺ. ജോബ് കല്ലുവിളയില്‍, ശാസ്താംകോട്ട പഞ്ചായത്ത് പ്രസിഡന്‍റ് ആര്‍.ഗീത, പിടിഎ പ്രസിഡന്‍റ് ആര്‍.ഗിരികുമാര്‍ തുടങ്ങിയവർ പ്രസംഗിച്ചു. സമൂഹത്തിൽ നാനാതുറകളിലുള്ളവരുടെ സ്നേ ഹവും സഹകരണവുമാണ് ബ്രൂക്കിന്‍റെ ഈ വളർച്ചയ്ക്ക് കാരണമെന്ന് മറുപടി പ്രസംഗത്തിൽ ഫാ.ഏബ്രഹാം തലോത്തില്‍ പറഞ്ഞു. കായംകുളം ചേതന സോഷ്യല്‍ സര്‍വീസ് സൊസൈറ്റി സിഇഒ ഫാ. തോമസ് ചെറുപുഷ്പം സ്വാഗതം പറഞ്ഞു. പ്രിന്‍സിപ്പല്‍ ബോണിഫെസിയ വിന്‍സെന്‍റ്, അഡ്മിനിസ്‌ട്രേറ്റര്‍ കൊച്ചുമോള്‍ കെ. സാമുവല്‍, സെക്രട്ടറി ജോജി ടി. കോശി തുടങ്ങിയവർ നേതൃത്വം നല്‍കി.

മയക്കുമരുന്ന് കേസ് പ്രതിയുടെ വസ്തുവകകൾ കണ്ടുകെട്ടി

തിരുവനന്തപുരം: നഗരത്തിൽ സ്ഥിരമായി മയക്കുമരുന്ന് കച്ചവടം നടത്തി നിരവധി കേസുകളിൽ ഉൾപ്പെട്ട തന്പാനൂർ ഫയർഫോഴ്സ് സ്റ്റേഷനു സമീപം കീഴേപുളിക്കൽ വീട്ടിൽ താമസിക്കുന്ന വിഷ്ണു എസ്. കുമാർ (25) ന്‍റെ വാഹനങ്ങളുൾപ്പടെയുള്ള വസ്തുവകകൾ എൻഡിപിഎസ് നിയമപ്രകാരമുള്ള കോംപീറ്റന്‍റ് അഥോറിറ്റി ഉത്തരവ് പ്രകാരം പോലീസ് കണ്ടു കെട്ടി. 2024 നവംബറിൽ 10 ഗ്രാം എംഡിഎംഎയുമായി സിറ്റി ഡാൻസാഫ് സംഘവും തുന്പ പോലീസും സംയുക്തമായി നടത്തിയ റെയിഡിൽ വിഷ്ണുവിനെ പിടികൂടിയിരുന്നു. ജാമ്യത്തിൽ ഇറങ്ങിയ വിഷ്ണു വീണ്ടും മയക്കുമരുന്ന് കച്ചവടത്തിലേർപ്പെട്ടു. ജൂണിൽ ബംഗളൂരുവിൽ നിന്ന് കാർ മാർഗം 47 ഗ്രാം എംഡിഎംഎ കടത്തുന്നതിനിടെ മോഷണ കേസുകളിൽ പ്രതിയായ രമേഷിനോടൊപ്പം ഡാൻസാഫ് സംഘം പേരൂർക്കട പോലീസ് സ്റ്റേഷൻ പരിധിയിൽ വച്ച് പിടികൂടിയിരുന്നു. വിഴിഞ്ഞം പോലീസ് സ്റ്റേഷനിലും മയക്കുമരുന്ന് കേസിൽ ഇയാൾ ഉൾപ്പെട്ടിട്ടുണ്ട്. ഇയാൾക്കെതിരെ പേരൂർക്കട ഐഎസ്എച്ച്ഒ എം. ഉമേഷ് നൽകിയ വിവരങ്ങളുടെ അടിസ്ഥാനത്തിൽ ഡിഐജിയും സിറ്റി പോലീസ് കമ്മീഷണറുമായ തോംസണ്‍ ജോസ് കോംപീറ്റന്‍റ് അഥോറിറ്റിക്ക് സമർപ്പിച്ച റിപ്പോർട്ടിന്‍റെ അടിസ്ഥാനത്തിലാണ് വാഹനങ്ങളും നിക്ഷേപങ്ങളും കണ്ടുകെട്ടിയത്. തിരുവനന്തപുരം നഗരത്തിൽ മയക്കുമരുന്ന് കച്ചവടത്തിലേർപ്പെട്ടിരിക്കുന്ന ചില്ലറ, മൊത്ത ലഹരി വിൽപ്പനക്കാർക്കെതിരെ വരും ദിവസങ്ങളിലും ഇത്തരത്തിലുള്ള ശക്തമായ നടപടികൾ തുടരുമെന്ന് സിറ്റി പോലീസ് കമ്മീഷണർ അറിയിച്ചു.

ഇക്ബാൽ കോളജിൽ സംഘർഷം: പോലീസുകാരന് പരിക്കേറ്റു

പാലോട്: കോളജ് യൂണിയൻ തെര‍ഞ്ഞെടുപ്പുമായി ബന്ധപ്പെട്ട് ഫലപ്രഖ്യാപനം വന്നതിനു പിന്നാലെ പെരിങ്ങമ്മല ഇക്ബാൽ കോളജിൽ എസ്എഫ്ഐ -കെഎസ്‌യു പ്രവർത്തകർ തമ്മിലുണ്ടായ സംഘട്ടനത്തിൽ പോലീസുകാരന് പരിക്കേറ്റു. കമ്പ് കൊണ്ടുള്ള ഏറിൽ വിതുര പോലീസ് സ്റ്റേഷനിലെ സിവിൽ പോലീസ് ഓഫിസർ വി.എസ്. വിജിത്തിന്‍റെ തലയ്ക്കാണ് പരിക്കേറ്റത്. ആദ്യം പാലോട് ആശുപത്രിയിലും പിന്നീട് ശസ്ത്രക്രിയയ്ക്കായി മെഡിക്കൽ കോളജ് ആശുപത്രിയിലേക്കും മാറ്റി. ഇരുവിഭാഗം പ്രവർത്തകർക്കും പരിക്കുണ്ട്. നെടുമങ്ങാട് ഡിവൈഎസ്പിയുടെ നേതൃത്വത്തിൽ പാലോട്, വിതുര, വലിയമല സ്റ്റേഷനുകളിലെപോലീസ് എത്തിയാണ് സംഘട്ടനം അവസാനിപ്പിച്ചത്. തെര‍ഞ്ഞെടുപ്പിൽ കെഎസ്‌യു മുഴുവൻ ജനറൽ സീറ്റും പിടിച്ചെടുത്തു. തുടർന്ന് ആഹ്ളാദ പ്രകടനം നടത്താൻ ശ്രമിക്കവെ എസ്എഫ്ഐ മുദ്രാവാക്യങ്ങളുമായി രംഗത്തിറങ്ങി തടസപ്പടുത്തിയത് കെഎസ് യുക്കാരെ ചൊടിപ്പിച്ചു. ഇതോടെ സ്ഥിഗതികൾ വഷളായി. ഇതിനിടെയാണ് ആരോ വലിച്ചെറിഞ്ഞ കമ്പ് കൊണ്ട് പൊലീസുകാരന് തലയിൽ ആഴത്തിലുള്ള മുറിവേറ്റത്. സംഘർഷം അയവ് വന്നതിനെ തുടർന്ന് കെഎസ് യു കോളജിൽ നിന്നും പ്രകടനം നടത്തി പാലോട് അവസാനിപ്പിച്ചു. ഇക്ബാൽ കോളജിൽ മുഴുവൻ സീറ്റും കെഎസ് യു നേടി പാലോട്: പെരിങ്ങമ്മല ഇക്ബാൽ കോളജ് യൂണിയൻ തെരഞ്ഞെടുപ്പിൽ മുഴുവൻ ജനറൽ സീറ്റും നേടി കെഎസ്‌യുവിന് തിളക്കമാർന്ന വിജയം. എസ്എഫ്ഐയിൽ നിന്നും യൂണിയൻ തിരിച്ചു പിടിക്കുകയായിരുന്നു. വിജയിച്ച കെഎസ് യു യൂണിയൻ ഭാരവാഹികൾ: മുഹമ്മദ് എസ്. ഫൈസ്( ചെയർമാൻ), അസ്ന നവാസ്( വൈസ്. ചെയർമാൻ), എസ്. അംജത് മുഹമ്മദ്( ജനറൽ സെക്രട്ടറി), ആർ. അഭിഷേക്, എസ്.മുഹമ്മദ് ഹാരിസ് ( യൂണിയൻ കൗൺസിലർ), അൽ അമീൻ( ആർട്സ് ക്ലബ് സെക്രട്ടറി), എസ്. മുഹമ്മദ് സഹിൽ( മാഗസിൻ എഡിറ്റർ), എ. ആഷിഫ, എസ്.എസ്. ആമിന( ലേഡി റെപ്).

എസ്എംടിഎഫിന്‍റെ "സംസ്ക്കാര'യുടെ പ്രഖ്യാപനം നടത്തി

തിരുവനന്തപുരം: സ്വതന്ത്ര മത്സ്യ തൊഴിലാളി ഫെഡറേഷന്‍റെ കലാസാഹിത്യസാംസ്കാരിക വിഭാഗമായ സംസ്കാരയുടെ പ്രഖ്യാപനം നടത്തി. തീരദേശവും ഉൾനാടൻ മേഖലയിലുമുളള മത്സ്യ തൊഴിലാളി സമൂഹത്തിലെ കലാസാംസ്കാരിക പാരന്പര്യങ്ങളെ സംരക്ഷിക്കുകയും പ്രോത്സാഹിപ്പിക്കുകയും, പുതുതലമുറയിൽ സൃഷ്ടി ബോധം വളർത്തുകയും ചെയ്യുക എന്നതാണ് സംഘടനയുടെ ലക്ഷ്യം. സംഘം ആരംഭിക്കുന്ന ആദ്യഘട്ട പ്രവർത്തനങ്ങളായി തീരദേശ കലാകാരന്മാരെ കണ്ടെത്തി പ്രോത്സാഹിപ്പിക്കുന്ന കലാസംഗമം, സാംസ്കാരിക പഠന ക്യാന്പുകൾ, മത്സ്യത്തൊഴിലാളികളുടെ ജീവിതാനുഭവങ്ങളെ ആസ്പദമാക്കിയ ഡോക്യുമെന്‍ററികൾ എന്നിവ ഉൾപ്പെടുത്തി. സംഘടനയുടെ ചെയർമാനായി ആർട്ടിസ്റ്റ് ഡഗ്ളസ് വി. ഹരിഹരപുരത്തെയും കണ്‍വീനർമാരായി മരിയക്കുട്ടി ജസ്റ്റിനെയും ജോയ് എം. സക്കറിയയെയും നിയോഗിച്ചു. തീരദേശ മേഖലകളിലെ ഫെഡറേഷൻ യൂണിറ്റുകളുമായി സഹകരിച്ച് ഈ പ്രവർത്തനങ്ങളുടെ ഒൗദ്യോഗിക ഉദ്ഘാടനം അടുത്ത മാസം തിരുവനന്തപുരത്ത് നടക്കുമെന്ന് ഫെഡറേഷൻ സംസ്ഥാന പ്രസിഡന്‍റ് പി. സ്റ്റെല്ലസ്, സ്റ്റേറ്റ് ചീഫ് കോ-ഓർഡിനേറ്റർ ഡോ. എഫ്.എം. ലാസർ എന്നിവർ അറിയിച്ചു.

കോവളത്തെ കൊലപാതകം: തെളിവെടുപ്പ് നടത്തി

കോവളം: കോവളത്ത് സഹോദരിയുടെ വീട്ടിൽ താമസിച്ചിരുന്നയാളെ ടെറസിൽ കൊല്ലപ്പെട്ട നിലയിൽ കണ്ടെത്തിയ സംഭവത്തിൽ റിമാൻഡിലായിരുന്ന പ്രതിയെ പോലീസ് കസ്റ്റഡിയിൽ വാങ്ങി സ്ഥലത്ത് എത്തിച്ച് തെളിവെടുപ്പ് നടത്തി. കോവളം നെടുമം പറമ്പിൽ വീ ട്ടിൽ രാജേന്ദ്രൻ(60) കൊല്ലപ്പെട്ട കേസിൽ റിമാൻഡിലായിരുന്ന ഓട്ടോ ഡ്രൈവർ വെള്ളാർ മുക്കോട്ട് വീട്ടിൽ രാജീവിനെ(42) ആണ് കോവളം സി. ഐ ജയപ്രകാശിന്‍റെ നേതൃത്വത്തിലുള്ള പ്രത്യേക അന്വേഷണ സംഘം ഇന്നലെ തെളിവെടുപ്പിന് കൊണ്ടുവന്നത്. സംഭവങ്ങൾ പ്രതി പോലീസിനോടു വിശദീകരിച്ചു. സ്വാഭാവിക മരണമെന്ന് പോലീസ് ആദ്യം കരുതിയെങ്കിലും പോസ്‌റ്റ്മോർട്ടത്തിലെ കണ്ടെത്തലാണ് കേസിൽ വഴിത്തിരിവായത്. പ്രതിയെ തിരികെ കോടതി ഹാജരാക്കുമെന്ന് എസ്എച്ച്‌ഒ അറിയിച്ചു.

ഓട്ടോറിക്ഷ മറിഞ്ഞ് മൂന്ന് പേർക്ക് പരിക്ക്

വിഴിഞ്ഞം: നിയന്ത്രണം തെറ്റിയ ഓട്ടോ മറിഞ്ഞ് ഡ്രൈവർ ഉൾപ്പെടെ മൂന്ന് മത്സ്യത്തൊഴിലാളികൾക്ക് പരിക്കേറ്റു. ഇന്നലെ വൈകുന്നേരം നാലോടെ വിഴിഞ്ഞം തെന്നൂർക്കോണത്തായിരുന്നു അപകടം. മത്സ്യബന്ധനത്തിനായി പുതിയതുറ സ്വദേശികളുമായി വന്ന ഓട്ടോ നിയന്ത്രണം തെറ്റി റോഡിന്‍റെ വശത്തേക്ക് മറിയുകയായിരുന്നു. സമീപത്ത് നിർത്തിയിരുന്ന സ്കൂട്ടറിനെയും ഇടിച്ച് തെറിപ്പിച്ചു. ഡ്രൈവർ പുതിയ തുറ സ്വദേശി സുനിലിനും മറ്റ് രണ്ട് പേർക്കും പരിക്കേറ്റു. ഇവരെ വിഴിഞ്ഞം സർക്കാർ ആശുപത്രിയിൽ പ്രവേശിപ്പിച്ചു. വിഴിഞ്ഞം പോലീസ് കേസെടുത്തു

നെടുമങ്ങാട് ഗവ.കോളജ് യൂണിയൻ കെഎസ്‌യുവിന് : ആഹ്ലാദപ്രകടനത്തിനിടെ കെഎസ്‌യു-എസ്എഫ്ഐ സംഘർഷം

നെടുമങ്ങാട് : ഗവൺമെന്‍റ് കോളജ് യൂണിയൻ തെരഞ്ഞെടുപ്പിൽ കെഎസ്‌യു പ്രധാന സീറ്റുകളിൽ വിജയിച്ചു. തുടർന്നുള്ള ആഹ്ലാദപ്രകടനം സംഘർഷത്തിൽ കലാശിച്ചു.ചെയർമാനായി കെഎസ്‌യുവിലെ മുഹമ്മദ്‌ അമീൻ, വൈസ് ചെയർപേഴ്സൺ ഗൗരി നന്ദന(കെഎസ്യു)ജന.സെക്രട്ടറി എ.എസ്.കാഷ്യപ്(കെഎസ്‌യു)ആർട്സ് ക്ലബ്‌ സെക്രട്ടറി വി.എസ്.ശ്രീജ (കെഎസ്‌യു)മാഗസിൻ എഡിറ്റർ ഹബിൻ മുഹമ്മദ്‌ (എസ്എഫ്ഐ) യൂണിവേഴ്സിറ്റി യൂണിയൻ കൗൺസിലർമാരായി ആദിത്യ കൃഷ്ണൻ,ഗംഗാ രാജേഷ്(എസ്എഫ്ഐ) എന്നിവരെ തെരഞ്ഞെടുത്തു. കോളജ് യൂണിയൻ തെരഞ്ഞെടുപ്പിനുശേഷം ടൗണിൽ നടത്തിയ ആഹ്ലാദപ്രകടനത്തിനിടെയാണ് സംഘർഷം നടന്നത്. നെടുമങ്ങാട് ഗവ.കോളജിലെ പ്രധാനപ്പെട്ട സീറ്റുകൾ നേടിയ കെഎസ്‌യു പ്രകടനത്തിനു പിന്നാലെ എസ്എഫ്ഐ പ്രവർത്തകരും പ്രകടനമായെത്തി. തുടർന്ന് കച്ചേരി ജംഗ്‌ഷനിൽ ഒത്തു കൂടിയവർ പരസ്പരം പോർ വിളികളുമായി ഏറെ നേരം സംഘർഷാവസ്ഥ സൃഷ്ടിച്ചു. പിരിഞ്ഞു പോകലിനിടയിൽ എസ്എഫ്ഐ പ്രവർത്തകരുടെ ഭാഗത്തുനിന്ന് കല്ലേറ് നടത്തിയെന്ന് ആരോപിച്ച് കെഎസ്‌യു- യൂത്ത് കോൺഗ്രസ് പ്രവർത്തകർ പ്രതിഷേധവുമായി രംഗത്തുവന്നു. വീണ്ടും സംഘർഷാവസ്ഥയായി. തുടർന്ന് പോലീസ് ഇരു വിഭാഗങ്ങളിളെയും പ്രവർത്തകരെ അനുനയിച്ച് പിരിച്ചുവിട്ടു. എന്നാൽ, പിരിഞ്ഞ് പോകവെ കോടതി പരിസരത്തെ മറവിൽ നിന്ന് ഡിവൈഎഫ്ഐ നേതാക്കളെ കല്ലെറിഞ്ഞന്നാരോപിച്ചു നേതാക്കൾ പ്രതിഷേധവുമായി വന്നു.പൊലീസ് ഇടപെട്ട് ഇരു വിഭാഗത്തെയും പിരിച്ചു വിട്ട ശേഷം സ്ഥലത്തു ക്യാമ്പ് ചെയ്യുന്നു.

അപ്രതീക്ഷിതമായി പായ്ക്കപ്പൽ; ആദ്യം ആശങ്ക, പിന്നെ ആശ്വാസം

വിഴിഞ്ഞം: തുറമുഖത്തിന് സമീപം അപ്രതീക്ഷിതമായി കൂറ്റൻ പായ്ക്കപ്പൽ പ്രത്യക്ഷപ്പെട്ടു. പരിചിതമല്ലാത്ത തരത്തിലുള്ള കടൽ യാനം കണ്ട് സംശയം തോന്നിയ മത്സ്യത്തൊഴിലാളികൾ മറൈൻ എൻഫോഴ്സ്മെന്‍റിലും തീരദേശ പോലീസിലും വിളിച്ച് തിരക്കി. സേനകളും അറിയില്ലെന്ന് പറഞ്ഞതോടെ സംശയം ആശങ്കയ്ക്ക് വഴിമാറി. ഒടുവിൽ കോസ്റ്റൽ പോലീസ് ബോട്ടുമായി കടലിൽ ഇറങ്ങി നടത്തിയ പരിശോധനയിൽ നേവിയുടെ ട്രെയിനികളാണെന്ന് കണ്ടെത്തിയതോടെയാണ് ആശങ്കയകന്നത്. ഇന്നലെ ഉച്ചക്ക് പന്ത്രണ്ടോടെയാണ് നേവിയുടെ പായ്ക്കപ്പൽ സുദർശിനി വിഴിഞ്ഞം തുറമുഖത്തിന് സമീപം നങ്കൂരമിട്ടത്. കൊച്ചിയിൽ നിന്ന് തമിഴ്നാട്ടിലേക്ക് പോകുന്നതിനിടയിൽ വിഴിഞ്ഞം അന്താരാഷ്ട്ര തുറമുഖം കാണണമെന്നുള്ള ട്രെയിനികളുടെ ആഗ്രഹമാണ് പായ്ക്കപ്പൽ തീരത്തോട് ചേർന്ന് അടുപ്പിക്കാനുള്ള കാരണം. തുറമുഖത്തിന്‍റെ അതിർത്തിക്കുള്ളിൽ പ്രവേശിക്കുന്നതിന് മുൻപ് ഇത്തരം യാനങ്ങൾ പോർട്ട് അധികൃതരെ അറിയിക്കണമെന്നുണ്ട്. വിഴിഞ്ഞത്ത് അന്താരാഷ്ട്ര തുറമുഖത്തിന്‍റെയും മാരിടൈം ബോർഡിന്‍റെയും തുറമുഖത്തിന് സമീപം പായ്ക്കപ്പൽ നങ്കൂരമിട്ടെങ്കിലും അധികൃതർ അറിഞ്ഞില്ല. ഇതും തുടക്കത്തിൽ സംശയത്തിനിടവരുത്തി. എന്നാൽ തീരസംരക്ഷണ സേനക്ക് നിർദ്ദേശം നൽകിയതായും അറിയുന്നു. കടലിൽ സംശയകരമായ സാഹചര്യത്തിൽ ഏതെങ്കിലും യാനങ്ങളെ കണ്ടാൽ ഉടൻ വിവരമറിയിക്കണമെന്ന് മത്സ്യത്തൊഴിലാളികൾക്ക് അധികൃതർ നേരത്തെ നിർദ്ദേശം നൽകിയിരുന്നു. ഇതനുസരിച്ചാണ് ഇന്നലെയും വിവരം കൈമാറിയത്. കുറച്ച് സമയം ചിലവഴിച്ചശേഷം പായ്ക്കപ്പൽ കൊച്ചിയിലേക്ക് മടങ്ങി. എന്നാൽ തീരത്ത് നിന്ന് കഷ്ടിച്ച് നാല് കിലോമീറ്ററിന് സമീപം വരെ പായ്ക്കപ്പൽ അടുത്തിട്ടും അധികൃതർ അറിഞ്ഞില്ല. കപ്പൽ വന്ന് മടങ്ങിയത് അന്താരാഷ്ട്ര തുറമുഖത്ത് ചരക്കുമായി വന്ന് വാർഫിൽ അടുക്കാൻ ഊഴം കാത്ത് നങ്കൂരമിട്ടിരുന്ന കണ്ടെയ്നർ കപ്പലുകൾക്ക് സമീപത്തിലൂടെയെന്ന് മത്സ്യത്തൊഴിലാളികൾ പറയുന്നു. ഏറെ സുരക്ഷവേണ്ട തീരത്ത് അപ്രതീക്ഷിതമായി വ്യത്യസ്ത തരത്തിലുള്ള കപ്പൽ എത്തിയതാണ് മത്സ്യത്തൊഴിലാളികളുടെ സംശയത്തിനും ആശങ്കക്കും വഴിതെളിച്ചത്.

ലഹരിക്കെതിരെ ബോധവത്ക്കരണം

വിഴിഞ്ഞം : കേരള മത്സ്യ തൊഴിലാളി ക്ഷേമനിധി ബോർഡ്‌ - പൂവാർ മത്സ്യ ഭവൻ എന്നിവരുടെ നേതൃത്വത്തിൽ മത്സ്യത്തൊഴിലാളികളുടെ കൂട്ടായ്മയിൽ ലഹരിക്കെതിരെ ബോധവത്ക്കരണവും വാഹന പ്രചരണ ജാഥയും സംഘടിപ്പിച്ചു. പൊഴിയൂർ മുതൽ വിഴിഞ്ഞം വരെയുള്ള തീരദേശ മേഖലയിൽ സഞ്ചരിച്ച നടത്തിയ ബോധവത്കരണ പരിപാടി കുളത്തൂർ പഞ്ചായത്ത് പ്രസിഡന്‍റ് ഗീതാ സുരേഷ് ഉദ്ഘാടനം ചെയ്തു. പൂവാർ പഞ്ചായത്ത് പ്രസിഡന്‍റ് ലോറൻസ് അധ്യക്ഷത വഹിച്ചു. പ്രചരണ റാലി മത്സ്യത്തൊഴിലാളി ക്ഷേമനിധി ബോർഡ് കമ്മീഷണർ സലിം ഫ്ലാഗ് ഓഫ് ചെയ്തു. സന്നദ്ധ പ്രവർത്തകർക്കുള്ള ജേഴ്സി റീജണൽ എക്സിക്യൂട്ടീവ് അനിത പുറത്തിറക്കി. ജാഥ ക്യാപ്റ്റൻ രാഹുൽ പ്രതിജ്ഞ ചൊല്ലിക്കൊടുത്തു. എക്സൈസ് ഇൻസ്പെക്ടർ ഷംസുദ്ദീൻ ലഹരിക്കെതിരെ ബോധവൽക്കരണ ക്ലാസെടുത്തു. പരുത്തിയൂർ പൂവാർ പള്ളം അടിമലത്തുറ വിഴിഞ്ഞം എന്നീ പ്രദേശങ്ങളിലെ ജനപ്രതിനിധികളും ഉദ്യോഗസ്ഥരും റാലിക്ക് വൻ വരവേൽപ്പ് നൽകി പങ്കാളികളായി.

സത്യം തുറന്നുപറയുന്നതിനാല്‍ വേട്ടയാടപ്പെടുന്നു: വെള്ളാപ്പള്ളി നടേശൻ

നെയ്യാറ്റിന്‍കര : സത്യം തുറന്നു പറയുന്നതിനാല്‍ വേട്ടയാടപ്പെടുന്നുവെന്ന് എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍. നെയ്യാറ്റിന്‍കര എസ്എന്‍ ഓഡിറ്റോറിയത്തില്‍ ഇന്നലെ സംഘടിപ്പിച്ച എസ്എന്‍ഡിപി യോഗം ശാഖാ നേതൃസംഗമത്തില്‍ അധ്യക്ഷപ്രസംഗം നടത്തുകയായിരുന്നു അദ്ദേഹം. ശ്രീനാരായണീയര്‍ എന്നൊരു ജാതിയില്ല. ഈഴവരെന്ന് തന്നെ വ്യക്തമായി പറയണം. പ്രതിഫലേച്ഛയില്ലാതെ എസ്എന്‍ഡിപി യോഗത്തില്‍ പ്രവര്‍ത്തിച്ചവരാരും നശിച്ചിട്ടില്ല. ജനസംഖ്യാനുപാതത്തില്‍ അര്‍ഹതപ്പെട്ട രാഷ്ട്രീയാധികാരം വേണം. എന്നാല്‍ പലരും എസ്എന്‍ഡിപി യോഗത്തെ രാഷ്ട്രീയവളര്‍ച്ചയ്ക്കായി ഏണിപ്പടിയായി ഉപയോഗിച്ചിട്ടുണ്ട്. മലപ്പുറം ബാലികേറാമലയെന്ന് അറിയില്ലായിരുന്നുവെന്നും വെള്ളാപ്പള്ളി കൂട്ടിച്ചേര്‍ത്തു. നെയ്യാറ്റിന്‍കര, നേമം, പാറശാല, കുഴിത്തുറ യൂണിയനുകള്‍ സംയുക്തമായി സംഘടിപ്പിച്ച നേതൃസംഗമത്തില്‍ എസ്എന്‍ഡിപി യോഗം വൈസ് പ്രസിഡന്‍റ് തുഷാര്‍ വെള്ളാപ്പളി സംഘടനാ വിശദീകരണം നടത്തി. മൈക്രോഫിനാന്‍സിന് എസ്എന്‍ഡിപി യോഗവുമായി നേരിട്ട് ഒരു ബന്ധവുമില്ലെന്നും യോഗത്തെ കേരളത്തിലെ എല്ലാ രാഷ്ട്രീയകക്ഷികളും സമുദായങ്ങളും ഭയക്കുന്നുവെന്നും ഗുരുദേവന്‍ കേവലം വിപ്ലവകാരിയാണെന്ന് പ്രചരിപ്പിക്കുന്നവര്‍ക്ക് വ്യക്തമായ ഗൂഢോദ്ദേശ്യമുണ്ടെന്നും അദ്ദേഹം കൂട്ടിച്ചേര്‍ത്തു. യോഗം ദേവസ്വം സെക്രട്ടറി അരയക്കണ്ടി സന്തോഷ്, നേതൃ സംഗമം കോര്‍ഡിനേറ്റര്‍ പത്മകുമാര്‍, വിവിധ യൂണിയനുകളുടെ ഭാരവാഹികളായ കെ.വി സൂരജ് കുമാര്‍, ആവണി ബി. ശ്രീകണ്ഠന്‍, സുപ്രിയാ സുരേന്ദ്രന്‍, മേലാംകോട് വി. സുധാകരന്‍, ജയന്‍ എസ്. ഊരന്പ്, ഹിന്ദുസ്ഥാന്‍ ബി. മണികണ്ഠന്‍ എന്നിവര്‍ പ്രസംഗിച്ചു. നാലായിരത്തോളം അംഗങ്ങള്‍ പങ്കെടുത്തുവെന്ന് സംഘാടകര്‍ അറിയിച്ചു.

പീഡനത്തിനു ശേഷം മോഷണം: പ്രതി പിടിയിൽ

മാറനല്ലൂർ: പ്രായപൂർത്തിയാകാത്ത പെൺകുട്ടിയെ പീഡിപ്പിച്ച ശേഷം മോഷണം നടത്തിയ പ്രതി പിടിയിൽ. തിരുവനന്തപുരം ആറ്റുകാൽ ശിങ്കാരത്തോപ്പ് എംഎസ്ടി നഗറിൽ സുധീഷ് (28) ആണ് പിടിയിലായത്. കാട്ടാക്കട വീരണ കാവ്സ്വദേശിയായ 16 കാരിയെ പീഡിപ്പിച്ച ശേഷം ഓഗസ്റ്റ് 25 ന് മാറനല്ലൂർ പോലീസ് സ്റ്റേഷൻ പരിധിയിലെ മൊബൈൽ ഷോപ്പിൽ മോഷണം നടത്തിയിരുന്നു ശേഷം ഇയാൾ തമിഴ്നാട്ടിലേക്ക് കടക്കുകയായിരുന്നു. പെൺകുട്ടിയെ ഇയാൾ ഇൻസ്റ്റാഗ്രാം വഴി പരിചയപ്പെടുകയായിരുന്നു എന്നാണ് പോലീസിൽ മൊഴി നൽകിയിട്ടുള്ളത്. മോഷണവുമായി ബന്ധപ്പെട്ട് ഇയാളുടെ ബന്ധുവായ കൂട്ടുപ്രതി ഷിനുമോൻ (25) നേരത്തെ പോലീസ് പിടിയിലായിരുന്നു. പ്രായപൂർത്തി ആകാത്ത പെൺകുട്ടിയെ പീഡിപ്പിച്ചതിന് കാട്ടാക്കട പോലീസ് കേസ് രജിസ്റ്റർ ചെയ്തിട്ടുണ്ട്. സുധീഷ് തിരുവനന്തപുരം ഫോർട്ട് പോലീസ് സ്റ്റേഷനിലെ റൗഡി ലിസ്റ്റിൽ പെട്ട പ്രതിയാണ്. പിടിച്ചുപറി കേസിൽ ഇയാൾ ദിണ്ടിക്കൽ ജയിലിൽ ശിക്ഷ അനുഭവിച്ചിരുന്നു. നേരത്തെ രണ്ടു പോക്സോ കേസുകളിലും തിരുവനന്തപുരത്തെ നിരവധി മോഷണകേസുകളിലെയും പ്രതിയാണ് പിടിയിലായ സുധീഷ്. തമിഴ്നാട് തിരുനെൽവേലിയിൽ നിന്നുമാണ് മാറനല്ലൂർ എസ് ഏച്ച് ഓ ഷിബുവിന്‍റെ നേതൃത്വത്തിൽ പോലീസ് ഇയാളെ പിടികൂടിയത് .പ്രതിയെ കോടതിയിൽ ഹാജരാക്കും

കോടതി സന്ദർശിച്ച് വിദ്യാർഥികൾ

കാട്ടാക്കട: ലീഗൽ സർവീസ് അഥോറിറ്റിയുടെ നിയമാവബോധ പരിപാടി 'സംവാദ'യുടെ ഭാഗമായി കുളത്തുമ്മൽ ഗവ. ഹയർ സെക്കൻഡറി സ്‌കൂൾ വിദ്യാർഥികൾ കാട്ടാക്കട ഒന്നാം ക്ലാസ് കോടതിയുടെ പ്രവർത്തനങ്ങൾ കണ്ട് വിലയിരുത്തി. അതിവേഗ പോക്‌സോ സ്‌പെഷ്യൽ കോടതി ജഡ്ജി എസ്. രമേഷ് കുമാർ പരിപാടി ഉദ്ഘാടനം ചെയ്തു. കാട്ടാക്കട ബാർ അസോസിയേഷൻ സെക്രട്ടറി പി.ബൈജു അധ്യക്ഷനായി. അഭിഭാഷകരായ എം.എസ്. ചിത്രാറാണി, ജയകുമാർ എന്നിവർ ക്ലാസെടുത്തു. ഒന്നാം ക്ലാസ് കോടതി ജഡ്ജി ശിവ ശരത്, പഞ്ചായത്ത് പ്രസിഡന്‍റ് കെ.അനിൽകുമാർ, അഡ്വേക്കറ്റ് ക്ലാർക്ക് അസോസിയേഷൻ പ്രസിഡന്‍റ് ഷാജഹാൻ, ജയകുമാർ, പ്രിയങ്ക തുടങ്ങിയവർ സംസാരിച്ചു.

മാർ ഗ്രിഗോറിയോസ് അനുസ്മരണം: അവർ 150 പേർ അധ്യാപകരായി

തിരുവനന്തപുരം: അവർ150 പേർ ഒരു ദിനത്തേക്ക് അധ്യാപകരായി. നാലാഞ്ചിറ സെന്‍റ് ജോൺസ് മോഡൽ ഹയർ സെക്കൻഡറി സ്കൂളിലാണ് സ്കൂൾ ഭരണം പൂർണമായി വിദ്യാർഥികൾക്ക് നൽകി മാതൃക ആയത്. സ്കൂൾ സ്ഥാപകനും രക്ഷാധികാരിയുമായിരുന്ന ബനഡിക്ട് മാർ ഗ്രിഗോറിയോസ് മെത്രാപോലീത്തായുടെ മുപ്പത്തി ഒന്നാമത് ഓർമ ദിനത്തിന്‍റെയും സ്കൂൾ ഹയർ സെക്കൻഡറി വിഭാഗത്തിന്‍റെ രജത ജൂബിലി ആഘോഷങ്ങളുടേയും ഭാഗമായിട്ടായിരുന്നു ഒരു ദിനം സ്കൂൾ ഭരണം വിദ്യാർത്ഥികൾക്ക് എന്ന പരിപാടി സംഘടിപ്പിച്ചതെന്ന് പ്രിൻസിപ്പൽ ഫാ. ജോസ് ചരുവിൽ പറഞ്ഞു. ഈ വർഷത്തെ അന്താരാഷ്ട്ര അധ്യാപക ദിനാചരണത്തിന്‍റെ മുഖ്യ സന്ദേശമായ അധ്യാപനത്തെ ഒരു സഹകരണ തൊഴിലായി പുനർരൂപകൽപ്പന ചെയ്യുക മുൻ നിർത്തി ആയിരുന്നു വിദ്യാർഥികൾക്ക് അധ്യാപകരാൻ അവസരം നൽകിയത്. വിദ്യാഭ്യാസത്തിൽ ടീം വർക്കിന്‍റെ പരിവർത്തന ശക്തിക്ക് ഊന്നൽ നൽകുക എന്നതാണ് ഈ വർഷം അന്താരാഷ്‌ ട്ര തലത്തിൽ മുന്നോട്ടു വക്കുന്ന പ്രമേയം. സ്കൂൾ ഭരണത്തിന്‍റെ പ്രതീകമായി താക്കോൽ പ്രിൻസിപ്പൽ ഫാ. ജോസ് ചരുവിൽ സ്റ്റുഡന്‍റ് പ്രിൻസിപ്പൽ അലൻ സജിക്കും സ്റ്റുഡന്‍റ്സ് വൈസ് പ്രിൻസിപ്പൽ സൂര്യ നന്ദക്കും കൈമാറി. വൈസ് പ്രിൻസിപ്പൽ അജീഷ് കുമാർ, പിടിഎ പ്രസിഡന്‍റ് ഡോ.ആൻജലോ മാത്യു എന്നിവർ പങ്കെടുത്തു.

ദൈവാശ്രയ ബോധം നഷ്ടപ്പെടരുത്: കര്‍ദിനാള്‍ മാര്‍ ബസേലിയോസ് ക്ലീമിസ് കാതോലിക്കാ ബാവ

തിരുവനന്തപുരം: വിശ്വാസ ജീവിതത്തില്‍ ദൈവാശ്രയ ബോധം നഷ്ടപ്പെടരുതെന്നു മലങ്കര കത്തോലിക്കാ സഭ മേജര്‍ ആര്‍ച്ച് ബിഷപ്പ് കര്‍ദിനാള്‍ മാര്‍ ബസേലിയോസ് ക്ലീമിസ് കാതോലിക്കാ ബാവ. മലങ്കര സുറിയാനി കത്തോലിക്കാ സഭയുടെ തിരുവനന്തപുരം മേജര്‍ അതിഭദ്രാസനം നടത്തുന്ന 33-ാമത് മലങ്കര കാത്തലിക് ബൈബിള്‍ കണ്‍വെന്‍ഷന്‍ പട്ടം സെന്‍റ് മേരീസ് ഹാളില്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. നഷ്ടമായ രക്ഷയുടെ ആനന്ദം തിരികെ എത്തിക്കുന്നതിന് ഈ ബൈബിള്‍ കണ്‍വെന്‍ഷന്‍ സഹായിക്കും. യുവതീയുവാക്കളും കുഞ്ഞുങ്ങളും ദൈവാശ്രയ ബോധത്തില്‍ വളരണം. ചെറുപ്രായത്തില്‍ മയക്കുമരുന്നിന് അടിമകളാകുന്ന കുഞ്ഞുങ്ങള്‍ നമ്മെ വേദനിപ്പിക്കുന്നു. നമുക്ക് ആശ്രയിക്കാവുന്നത് മാറ്റമില്ലാത്തവനായ യേശുക്രിസ്തുവില്‍ മാത്രമാണ്. സ്വര്‍ഗത്തിലും ഭൂമിയിലും അധികാരമുള്ളവന്‍റെ കൈപിടിച്ച് നമുക്ക് മുന്നേറാമെന്നും കര്‍ദിനാള്‍ മാര്‍ ബസേലിയോസ് ക്ലീമിസ് കാതോലിക്കാ ബാവ പറഞ്ഞു. ഫാ.ഡാനിയേല്‍ പൂവണ്ണത്തിലാണ് മൂന്നു ദിവസം നീണ്ടു നില്‍ക്കുന്ന മലങ്കര കാത്തലിക് ബൈബിള്‍ കണ്‍വെന്‍ഷനു നേതൃത്വം നല്‍കുന്നത്. ഇന്നു വൈകുന്നേരം തിരുവനന്തപുരം മേജര്‍ അതിഭദ്രാസനത്തിന്റെ നിയുക്ത സഹായ മെത്രാന്‍ മോണ്‍. ജോണ്‍ കുറ്റിയില്‍ അനുഗ്രഹ പ്രഭാഷണം നടത്തും. സമാപനദിവസമായ നാളെ തിരുവനന്തപുരം ലത്തീന്‍ അതിരൂപത സഹായ മെത്രാന്‍ ഡോ.ആര്‍. ക്രിസ്തുദാസ് സമാപന സന്ദേശം നല്‍കും. തിരുവനന്തപുരം വൈദിക ജില്ലാ സമിതിയാണ് കണ്‍വെന്‍ഷന് നേതൃത്വം നല്‍കുന്നത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]