ADVERTISEMENT

ADVERTISEMENT

സാമൂഹ്യശാസ്ത്ര അധ്യാപകരുടെ ഭക്ഷ്യമേള ശ്രദ്ധേയമായി

വൈക്കം: അവധിക്കാല അധ്യാപക പരിശീലന പരിപാടിയോടനുബന്ധിച്ച് സാമൂഹ്യശാസ്ത്ര അധ്യാപകർ ഒരുക്കിയ ഭക്ഷ്യമേള ശ്രദ്ധേയമായി. വൈക്കം ബിആർസിയുടെ അധ്യാപക പരിശീലനക്കളരിയിലാണ് സാമൂഹ്യശാസ്ത്ര അധ്യാപകർ കേരളത്തിലെ നാടൻ ഭക്ഷണങ്ങളുടെ വിപുലമായ ശേഖരമൊരുക്കിയത്.

കേരളത്തിന്‍റെ രുചിയേറിയ നാടൻവിഭവങ്ങളാണ് തനിമ ചോരാതെ അധ്യാപകർ ഒരുക്കിയത്. കപ്പ, വാഴയ്ക്ക, ചക്ക തുടങ്ങിയവ ഉപയോഗിച്ചുള്ള വിവിധ ഭക്ഷ്യവസ്തുക്കളും വിവിധയിനം പാനീയങ്ങളും പായസങ്ങളുമൊക്കെ ഏറെ ശ്രദ്ധ പിടിച്ചുപറ്റി.

വിവിധ ഇനം ഉപ്പേരികൾ മുതൽ വിവിധതരം പായസങ്ങൾ, പലഹാരങ്ങൾ, പാനീയങ്ങളടക്കം നൂറോളം വിഭവങ്ങളാണ് അധ്യാപകർ തയ്യാറാക്കിയത്. വൈക്കം തെക്കേനട ഗവൺമെന്‍റ് ഹയർ സെക്കൻഡറി സ്കൂളിലാണ് പരിശീലന ക്യാമ്പ് സംഘടിപ്പിച്ചത്.

ഭക്ഷ്യമേള തെക്കേനട ഗവൺമെന്‍റ് ഹയർ സെക്കൻഡറി സ്കൂൾ പ്രിൻസിപ്പൽ എഫ്. ജോൺ ഉദ്ഘാടനം ചെയ്തു. വൈക്കം ബിആർസിബിപിസി പി.എസ്. സന്തോഷ് അധ്യക്ഷത വഹിച്ചു. ബിആർസി കോ-ഓർഡിനേറ്റർ ആർ.വി. ധന്യ, അധ്യാപകരായ പി. പ്രദീപ്, ജയൻ, സി. ബെന്നി ജോർജ് തുടങ്ങിയവർ പ്രസംഗിച്ചു.

ADVERTISEMENT

ഇരുള്‍ ലോകത്ത് ജാസ്മിന്‍ ഏഴു ലക്ഷം ഉണ്ണിയപ്പം തയാറാക്കുകയാണ്

റെജി ജോസഫ് കോട്ടയം: അന്ധതയെ തോല്‍പ്പിച്ച് ജാസ്മിന്‍ ഏഴു ലക്ഷം ഉണ്ണി യപ്പം ഒരുക്കുന്ന തിരക്കിലാണ്. ഭരണങ്ങാനത്ത് നാളെ വിശുദ്ധ അല്‍ഫോന്‍സാമ്മയുടെ തിരുനാളിന് കൊടിയേറുന്നതു മുതല്‍ പ്രധാന തിരുനാളായ 28വരെ കബറിട പള്ളിയിലേക്ക് അയ്യായിരം കിലോ ഉണ്ണിയപ്പമാണ് തയാറാക്കുന്നത്. ഇരുള്‍ നിറഞ്ഞ ലോകത്തിരുന്ന് രുചിയപ്പത്തിന് ജാസ്മിന്‍ കുഴയ്ക്കുന്ന മാവ് ചുട്ടെട്ടുക്കാന്‍ പാചകപ്പുരയില്‍ മുപ്പതു വനിതാ ജീവനക്കാരുമുണ്ട്. തൊടുപുഴയ്ക്കു സമീപം തുടങ്ങനാട് വിച്ചാട്ട് അജിയുടെ ഭാര്യ അന്‍പത്തിമൂന്നുകാരിയായ ജാസ്മിന്‍റെ കണ്ണുകളില്‍ ഇരുള്‍ പടരാന്‍ തുടങ്ങിയിട്ട് ഇരുപതു വര്‍ഷത്തോളമായി. സഹനം ഒരു ബലിയും ജീവിതം വെല്ലുവിളിയുമാക്കിയ ജാസ്മിന്‍റെ അതിജീവന ജോലിയാണ് പലഹാരനിര്‍മാണം. ബൗദ്ധിക വെല്ലുവിളിയോടെ ജനിച്ച ഏക മകന്‍ അഖിലിന്‍റെ ചികിത്സയ്ക്ക് ആശുപത്രികള്‍ കയറിയിറങ്ങുന്ന കാലത്ത് 2002ലാണ് ജാസ്മിന്‍റെ കണ്ണിന് മങ്ങല്‍ തുടങ്ങിയത്. വിവിധ ചികിത്സകളും ശസ്ത്രക്രിയകളും നടത്തിയെങ്കിലും കാഴ്ച മങ്ങിമങ്ങിവന്നു. ജാസ്മിന് റെറ്റിനിറ്റിസ് പിഗ്‌മെന്‍റോസ എന്ന അപൂര്‍വ നേത്രരോഗമാണെന്നു വൈദ്യം വിധിയെഴുതി. 2011ല്‍ കാഴ്ച പൂര്‍ണമായി നഷ്ടമായി. കാഴ്ച മങ്ങിത്തുടങ്ങിയ ഘട്ടത്തില്‍തന്നെ അടുക്കളക്കാര്യങ്ങളൊക്കെ ജാസ്മിന്‍ തനിയെ പരിശീലിച്ചു. ഇതേ കാലത്താണ് ജാസ്മിനെ ട്രൈജീമിനല്‍ ന്യൂറാള്‍ജിയ എന്ന അപൂര്‍വ രോഗവും വേട്ടയാടിയിത്. കവിളില്‍ ഉള്‍പ്പെടെ മുഖത്തെ ഞരമ്പുകള്‍ വലിഞ്ഞുമുറുകുന്ന അസഹനീയ വേദന. മകനെ താങ്ങിയെടുത്ത് വേദനകള്‍ക്കും ദുഃഖങ്ങള്‍ക്കും ആശ്വാസം തേടി അജിക്കൊപ്പം ഒരിക്കല്‍ വേളാങ്കണ്ണി പള്ളിയിലെത്തിയപ്പോള്‍ ഒരു വൈദികന്‍ ജാസ്മിനു നല്‍കിയ ഉപദേശവും പ്രത്യാശയുമാണ് എല്ലാറ്റിനും നിമിത്തമായത്. അച്ചന്‍ പ്രാര്‍ഥിച്ചുകൊണ്ടിരിക്കേ ജാസ്മിന്‍റെ മനസില്‍ തെളിഞ്ഞ ആശയമായിരുന്നു ഉണ്ണിയപ്പം തയാറാക്കി വില്‍ക്കുകയെന്നത്. കിടപ്പിലായ മകനെ നോക്കാനും വീടുപോറ്റാനും സാധിക്കാതെ വലഞ്ഞ കാലത്ത് ചെറിയ തോതില്‍ ഉണ്ണിയപ്പമുണ്ടാക്കി. അജി അത് അവരുടെ പലചരക്ക് കടയില്‍ വില്‍ക്കാന്‍ വച്ചപ്പോള്‍ ആവശ്യക്കാരേറെ. ഒരു കിലോ ഉണ്ണിയപ്പമുണ്ടാക്കി തുടങ്ങിയ സംരംഭം ഇന്ന് അപ്പൂസ് ഫുഡ് പ്രോഡക്ട്‌സ് എന്നപേരില്‍ മെച്ചപ്പെട്ട സംരംഭമായി വളര്‍ന്നിരിക്കുന്നു. കൈയകലത്തില്‍ ചേരുവകള്‍ അടുപ്പിച്ചശേഷം വിഭവങ്ങള്‍ക്കുള്ള കൂട്ട് കുഴയ്ക്കുന്നത് ജാസ്മിന്‍ തന്നെയാണ്. ഉണ്ണിയപ്പവും അവലോസുപൊടിയും ധാന്യപ്പൊടികളും ഇതേ ബ്രാന്‍ഡില്‍ വിറ്റഴിക്കുന്നു. 2009ല്‍ ഭരണങ്ങാനം പള്ളിയില്‍ അല്‍ഫോന്‍സാമ്മയുടെ തിരുനാളിന് ആയിരം കിലോ ഉണ്ണി യപ്പത്തിന് അപ്രതീക്ഷിതമായി ഓര്‍ഡര്‍ ലഭിച്ചു. പാത്രങ്ങള്‍ വാടകയ്‌ക്കെടുത്ത് ചേരുവകള്‍ കടം വാങ്ങി ജാസ്മിനും സഹായികളും 1200 കിലോ ഉണ്ണിയപ്പം തയാറാക്കി. ഭരണങ്ങാനം, മാന്നാനം തീര്‍ഥാടന കേന്ദ്രങ്ങളിലും കുറവിലങ്ങാട്, അരുവിത്തുറ, കാഞ്ഞിരപ്പള്ളി, നാഗപ്പുഴ, കൂത്താട്ടുകുളം, കിഴതടിയൂര്‍, ചങ്ങനാശേരി പള്ളികളിലും ലഭിക്കുന്ന ഉണ്ണിയപ്പം ജാസ്മിന്‍റെ കൈപ്പുണ്യമാണ്. അജി സ്വന്തം വാഹനത്തില്‍ ഇവിടങ്ങളില്‍ ഉണ്ണി യപ്പം പാക്കറ്റിലാക്കി എത്തിക്കുന്നു. ഇതു കൂടാതെ കോട്ടയം, ഇടുക്കി ജില്ലകളിലും‍ ഇവര്‍ വിഭവങ്ങള്‍ വിറ്റഴിക്കുന്നുണ്ട്. പാചകപ്പുരയില്‍ മൊബൈല്‍ കോളുകള്‍ അറ്റന്‍റ്ഡ് ചെയ്യുന്നതും ഓര്‍ഡറെടുക്കുന്നതുമൊക്കെ ജാസ്മിന്‍തന്നെ. പരിഭവങ്ങളും നൈരാശ്യവുമില്ലാതെ സദാ പുഞ്ചിരി വിതറി ലോകത്തിന് പ്രത്യാശ സമ്മാനക്കുകയാണ് മേരിലാന്‍ഡ് കാരിയാങ്കല്‍ കുടുംബാംഗമായ ജാസ്മിന്‍. പ്രതിസന്ധികളെ എങ്ങനെ തരണം ചെയ്യാം എന്നതില്‍ ‍ 2014 ലും 2015ലും കോഴിക്കോട് ഐഐഎമ്മിലെ വിദ്യാര്‍ഥികള്‍ക്കു മുമ്പിലും മറ്റ് വേദികളിലും ജാസ്മിന്‍ അനുഭവം പങ്കുവച്ചിരുന്നു.

ഭരണങ്ങാനത്ത് വിപുലമായ ക്രമീകരണങ്ങള്‍; റെക്ടർ റവ.ഡോ. അഗസ്റ്റിന്‍ ദീപികയോട്

വിശുദ്ധ അല്‍ഫോന്‍സാമ്മയുടെ തിരുനാളിന് ഇന്നു ഭരണങ്ങാനത്ത് കൊടിയേറുന്നു. 28 വരെയാണ് തിരുനാള്‍. തീര്‍ഥാടനകേന്ദ്രവും സെന്‍റ് മേരീസ് ഫൊറോന പള്ളിയും തീര്‍ഥാടകര്‍ക്കായി വിപുലമായ ക്രമീകരണങ്ങളാണ് ഒരുക്കിയിരിക്കുന്നത്. തിരുനാള്‍ ഒരുക്കങ്ങളെക്കുറിച്ച് തീര്‍ഥാടന കേന്ദ്രം റെക്‌ടര്‍ റവ.ഡോ. അഗസ്റ്റിന്‍ പാലയ്ക്കപ്പറമ്പില്‍ ദീപികയോട് സംസാരിക്കുന്നു. ഇത്തവണത്തെ തിരുനാള്‍ പ്രത്യേകത അല്‍ഫോന്‍സാമ്മയെ വിശുദ്ധയായി പ്രഖ്യാപിച്ച 2008 മുതല്‍ വിശുദ്ധയുടെ തിരുനാളായിട്ടാണ് ആഘോഷിച്ചുവരുന്നത്. അതിനു മുമ്പ് ശ്രാദ്ധതിരുനാളായിരന്നു. ഇന്ന് ആഗോളസഭ മുഴുവന്‍ വിശുദ്ധ അല്‍ഫോന്‍സാമ്മയുടെ തിരുനാള്‍ ആഘോഷിക്കുന്നുണ്ട്. ഇത്തവണ തീര്‍ഥാടകര്‍ സംഘങ്ങളായി എത്തുന്നു എന്നതാണ് ഒരു പ്രത്യേകത. ഇന്നലെ പാലാ രൂപതയിലെ മാതൃജ്യോതി അംഗങ്ങളാണ് ജപമാല ചൊല്ലി കബറിങ്കലെത്തി പ്രാര്‍ഥിച്ച് വിശുദ്ധ കുര്‍ബാനയില്‍ പങ്കെടുത്തത്. വിവിധ ഇടവകകള്‍, ഭക്ത സംഘടനകള്‍, തീര്‍ഥാടക സംഘങ്ങള്‍ ഇത്തവണയെത്തുന്നുണ്ട്. ലളിതം, ആത്മീയതയ്ക്കു പ്രാധാന്യം ലളിതജീവിതം നയിച്ച് സഹനത്തിലൂടെ വിശുദ്ധിയുടെ കിരീടം അണിഞ്ഞവളാണ് വിശുദ്ധ അല്‍ഫോന്‍സാമ്മ. അതിനാല്‍ തിരുനാള്‍ ആഘോഷവും ലളിതമാണ്. ചെണ്ട, ബാന്‍ഡ് തുടങ്ങിയവയില്ല. ആത്മീയതയ്ക്കാണ് പ്രധാന്യം. വിവിധ റീത്തുകളില്‍ നിന്നായി 13 പിതാക്കന്മാരും 140 വൈദികരും വിശുദ്ധ കുര്‍ബാന അര്‍പ്പിക്കും. ദിവസവും രാവിലെ 5.30 മുതല്‍ രാത്രി ഏഴുവരെ വിശുദ്ധ കുര്‍ബാനയുണ്ട്. വൈകുന്നേരങ്ങളില്‍ ജപമാല-മെഴുകുതിരി പ്രദക്ഷിണവും. 28ന് പുലര്‍ച്ചെ 4.45 മുതല്‍ രാത്രി 9.30 വരെ വിശുദ്ധ കുര്‍ബാനയുണ്ട് പാര്‍ക്കിംഗ് സൗകര്യം തീര്‍ഥാടകര്‍ക്കായി കൂടുതല്‍ പാര്‍ക്കിംഗ് സൗകര്യം ഏര്‍പ്പെടുത്തിയിട്ടുണ്ട്. പാരീഷ് ഹാളിനു സമീപം 200 വാഹനങ്ങള്‍ അധികമായി പാര്‍ക്ക് ചെയ്യാം. ഷ്‌റൈന്‍ ഗ്രൗണ്ട്, സ്‌കൂള്‍ ഗ്രൗണ്ട്, ഗേള്‍സ് സ്‌കൂള്‍ ഗ്രൗണ്ട്, കാന്‍റീനിനു സമീപം എന്നിവിടങ്ങളിലും പാര്‍ക്കിംഗ് സൗകര്യം വര്‍ധിപ്പിച്ചിട്ടുണ്ട്. അത്ഭുതങ്ങള്‍ കാഴ്ച, ശ്രവണ സൗഖ്യം, പഠനം, വിദേശ ജോലി, സന്താനഭാഗം എന്നിങ്ങനെ ഏറെപ്പേര്‍ക്ക് അനുഗ്രഹങ്ങള്‍ ലഭിക്കുന്നുണ്ട്. പള്ളി അടയ്ക്കില്ല പാലാ രൂപത പ്ലാറ്റിനം ജൂബിലി ഭാഗമായി ഇത്തവണ തിരുനാള്‍ ദിവസങ്ങളില്‍ 24 മണിക്കൂറും കബറിട പള്ളി തുറന്നിടും. രാത്രി നിശബ്ദപ്രാര്‍ഥനയ്ക്ക് നിരവധിപ്പേരാണ് എത്തുന്നത്. ഇവര്‍ക്ക് സുരക്ഷിതമായി പ്രാര്‍ഥിക്കുന്നതിനും പ്രാഥമിക കാര്യങ്ങള്‍ നിര്‍വഹിക്കുന്നതിനും സൗകര്യമുണ്ട്. താമസ സൗകര്യവും വര്‍ധിപ്പിച്ചിട്ടുണ്ട്.

ഉമ്മന്‍ ചാണ്ടിയെ അനുസ്മരിച്ചും ഓര്‍മകള്‍ പങ്കുവച്ചും നേതാക്കള്‍

കോട്ടയം: ഉമ്മന്‍ ചാണ്ടിയെ അനുസ്മരിച്ചും ഓര്‍മകള്‍ പങ്കുവച്ചും നേതാക്കള്‍. സമ്മേളനത്തില്‍ നിരവധി നേതാക്കളാണ് പങ്കെടുത്തത്. എഐസിസി ജനറല്‍ സെക്രട്ടറി ദീപാ ദാസ് മുന്‍ഷി, സെക്രട്ടറി പി.വി. മോഹനന്‍, യുഡിഎഫ് കണ്‍വീനര്‍ അടൂര്‍ പ്രകാശ് എംപി, യൂഹാനോന്‍ മാര്‍ ദീയസ്‌കോറോസ് മെത്രാപ്പോലീത്ത, ഫാ. തോമസ് ഏബ്രഹാം കുന്നേല്‍, ഫാ. ആന്‍ഡ്രൂ ടി. ജോണ്‍, സിഎസ്ഡിഎസ് ജനറല്‍ സെക്രട്ടറി പി.ഡി. സുരേഷ്, പിആര്‍ഡിഎസ് ഉപരക്ഷാധികാരി കെ. ദേവകുമാര്‍, എംപിമാരായ ബെന്നി ബഹനാന്‍, കൊടിക്കുന്നില്‍ സുരേഷ്, ആന്‍റോ ആന്‍റണി, ഡീന്‍ കുര്യാക്കോസ്, ഫ്രാന്‍സിസ് ജോര്‍ജ്, ഷാഫി പറമ്പില്‍, എംഎല്‍എമാരായ പി.സി. വിഷ്ണുനാഥ്, തിരുവഞ്ചൂര്‍ രാധാകൃഷ്ണന്‍, പി.ജെ. ജോസഫ്, അനൂപ് ജേക്കബ്, മോന്‍സ് ജോസഫ്, രാഹുല്‍ മാങ്കൂട്ടത്തില്‍, മാണി സി. കാപ്പന്‍, സനീഷ് കുമാര്‍ ജോസഫ്, ഉമാ തോമസ്, റോജി എം. ജോണ്‍, അന്‍വര്‍ സാദത്ത്, ടി. സിദ്ദിഖ്, കെ.സി. ജോസഫ്, എ.പി. അനില്‍ കുമാര്‍, എം.എം. ഹസന്‍, സി.പി. ജോണ്‍, രാജ്‌മോഹന്‍ ഉണ്ണിത്താന്‍, ഷിബു ബേബി ജോണ്‍, കുര്യന്‍ ജോയി, ഫില്‍സണ്‍ മാത്യൂസ്, ജോഷി ഫിലിപ്പ്, ജോസി സെബാസ്റ്റ്യന്‍, പി.എ. സലിം, ടോമി കല്ലാനി, ജോസഫ് വാഴക്കന്‍, എം. ലിജു, അലോഷ്യസ് സേവ്യര്‍, വി.പി. സജീന്ദ്രന്‍, ഷാനിമോള്‍ ഉസ്മാന്‍, പി.സി. തോമസ്, പി.ആര്‍. സോന, എം.പി. ജോസഫ്, ഗിരീഷ് കോനാട്ട് തുടങ്ങി ഒട്ടേറെ പ്രമുഖര്‍ പങ്കെടുത്തു. രാജ്യത്തിന്‍റെ ഐക്യം ഭീഷണി നേരിടുമ്പോള്‍ രാഹുല്‍ ഗാന്ധിയുടെ സാന്നിധ്യം ആശ്വാസം പകരുന്നു: മാര്‍ തോമസ് തറയില്‍ പുതുപ്പള്ളി: രാജ്യത്തിന്‍റെ ഐക്യം ഭീഷണി നേരിടുമ്പോള്‍ രാഹുല്‍ ഗാന്ധിയുടെ സാന്നിധ്യം ആശ്വാസം പകരുന്നതായി ചങ്ങനാശേരി ആര്‍ച്ച്ബിഷപ് മാര്‍ തോമസ് തറയില്‍. ഉമ്മന്‍ ചാണ്ടി അനുസ്മരണ സമ്മേളനത്തില്‍ പ്രസംഗിക്കുകയായിരുന്നു അദ്ദേഹം. ഉമ്മന്‍ ചാണ്ടി രാഷ്‌ട്രീയത്തില്‍ ആത്മീയമൂല്യങ്ങള്‍ മുറുകെ പിടിച്ച മതേതരവാദിയാണ്. രാഷ്‌ട്രതന്ത്രജ്ഞത നന്നായി അറിയാമായിരുന്ന രാഷ്‌ട്രീയക്കാരനായിരുന്നു അദ്ദേഹമെന്നും മാർ തറയില്‍ പറഞ്ഞു. ബൈബിളില്‍ യേശുക്രിസ്തുവിന്‍റെ പൊതുജീവിതത്തെക്കുറിച്ച് പറയുന്നത് ‘’അവന്‍ നന്മ ചെയ്തുകൊണ്ടു സഞ്ചരിച്ചു’’ എന്നാണ്. ഉമ്മന്‍ ചാണ്ടിയുടെ രാഷ്‌ട്രീയ ജീവിതത്തെയും ഇത് അടയാളപ്പെടുത്തുന്നു. പരമാവധി പേര്‍ക്ക് നന്മ ചെയ്യാന്‍ അദ്ദേഹം എപ്പോഴും തിടുക്കം കാണിച്ചു. നിരാശരായവര്‍ക്ക് അഭയസ്ഥാനവും ദുരിതമനുഭവിക്കുന്നവര്‍ക്ക് ആശ്വാസവുമായിരുന്നു ഉമ്മന്‍ ചാണ്ടി. അദ്ദേഹം പരിഹാരങ്ങളുടെ മനുഷ്യനായിരുന്നു. വികസന ഫണ്ട് എങ്ങനെ കണ്ടെത്താമെന്ന് അദ്ദേഹത്തിന് അറിയാമായിരുന്നു. പ്രശ്‌നങ്ങള്‍ പരിഹരിക്കാന്‍ എപ്പോഴും മാര്‍ഗങ്ങള്‍ അന്വേഷിച്ചു. ഉമ്മന്‍ ചാണ്ടിയെപ്പോലെ ഒരോ വിഷയവും ആഴത്തില്‍ പഠിച്ച മറ്റൊരു നേതാവുണ്ടോ എന്നു സംശയിക്കണം. വിവിധ പ്രശ്‌നങ്ങളില്‍ ഉഴലുകയാണ് ഇക്കാലത്ത് ജനങ്ങള്‍. വനം-വന്യജീവി സംഘര്‍ഷം, തെരുവ് നായ ആക്രമണം, മലയോര തീരദേശ പ്രശ്‌നങ്ങള്‍, യുവജന കുടിയേറ്റം തുടങ്ങിവയ്‌ക്കൊന്നും പരിഹാരമില്ല. പ്രശ്‌നങ്ങള്‍ക്ക് യഥാര്‍ഥ പരിഹാരം കാണാന്‍ ഉമ്മന്‍ ചാണ്ടിയെപ്പോലുള്ള നേതാക്കളെ ആവശ്യമാണ്. ഉമ്മന്‍ ചാണ്ടി സെന്‍റ് ബര്‍ക്കുമാന്‍സ് കോളജിലെ പൂര്‍വ വിദ്യാര്‍ഥിയായതില്‍ ചങ്ങനാശേരി അതിരൂപത അഭിമാനിക്കുന്നു. ആര്‍ച്ച്ബിഷപ് മാര്‍ ജോസഫ് പവ്വത്തിലിന്‍റെ വിദ്യാര്‍ഥിയായിരുന്നു ഉമ്മന്‍ചാണ്ടി. മാർ പവ്വത്തിലിന്‍റെ വാക്കുകള്‍ അദ്ദേഹം അങ്ങേയറ്റം ബഹുമാനത്തോടെ ശ്രദ്ധിച്ചിരുന്നതായും മാര്‍ തറയില്‍ അനുസ്മരിച്ചു. =മലയോരവും കടലോരവുമടക്കം കേരളത്തെ കണ്ടറിഞ്ഞ ജനകീയ നേതാവായിരുന്നു ഉമ്മൻ ചാണ്ടി. വിഴിഞ്ഞം തുറമുഖ പദ്ധതിയുടെ പേരില്‍ നന്ദിയോടെ ഓര്‍മിക്കേണ്ട ആദ്യ പേര് ഉമ്മന്‍ ചാണ്ടിയുടേതാണ്. കൊച്ചി മെട്രോ അടക്കമുള്ള വികസനപദ്ധതികള്‍ അദ്ദേഹത്തിന്‍റെ നേതൃപാടവത്തിന്‍റെ ഭരണനേട്ടങ്ങളാണ്. സണ്ണി ജോസഫ് കെപിസിസി പ്രസിഡന്‍റ് =ഒരു പുരുഷായസ് ജനസേവനത്തിനു മാറ്റിവച്ചു. രണ്ടു തവണത്തെ ഭരണത്തിലും ജനക്ഷേമ പ്രര്‍ത്തനങ്ങള്‍ക്ക് ഊന്നല്‍ നല്‍കി. ജനസമ്പര്‍ക്ക പരിപാടി ലോകം ശ്രദ്ധിച്ചു. സയ്യദ് സാദിഖലി ശിഹാബ് തങ്ങള്‍ മുസ്‌ലിം ലീഗ് സംസ്ഥാന അധ്യക്ഷന്‍ =മറ്റുള്ളവരുടെ സങ്കടങ്ങള്‍ പരിഹരിക്കാനാണ് അദ്ദേഹം അധ്വാനിച്ചത്. ആരായിരിക്കണം, എങ്ങനെയയായിരിക്കണം മുഖ്യമന്ത്രിയെന്ന് അദ്ദേഹം കാട്ടിത്തന്നു. ഡോ. ജോസഫ് മാര്‍ ബര്‍ണബാസ് മാര്‍ത്തോമ സഭ സഫ്രഗന്‍ മെത്രാപ്പോലീത്ത =ജാതിക്കും മതത്തിനും അപ്പുറം കേരളം കണ്ട ഏറ്റവും മികച്ച ഭരണാധികാരിയായിരുന്നു ഉമ്മന്‍ ചാണ്ടി. സ്വാമി വീരേശ്വരാനന്ദ ഗുരുധര്‍മ പ്രചാരണസഭ ജോയിന്‍റ് സെക്രട്ടറി =ഉമ്മന്‍ ചാണ്ടി നമ്മിലൊരാളായി ഇപ്പോഴും ജീവിക്കുന്നു. ആ ഓര്‍മകള്‍ കേരളത്തെ ശക്തിപ്പെടുത്തുന്നു. രമേശ് ചെന്നിത്തല =പാവങ്ങളുടെ കണ്ണീരൊപ്പുക, പാര്‍ശ്വവത്കരിക്കപ്പെട്ടവരെ ചേര്‍ത്തുപിടിക്കുക എന്ന സന്ദേശം വ്രതമാക്കിയ നേതാവാണ് ഉമ്മന്‍ ചാണ്ടി. വി.ഡി. സതീശന്‍ പ്രതിപക്ഷനേതാവ് =അസാധാരണമായ ഭരണനിര്‍വഹണശേഷി കാണിച്ച ഭരണാധികാരി ആയിരുന്നു ഉമ്മന്‍ ചാണ്ടി. എതിര്‍ ശബ്ദം ഉയർത്തുന്നവരെ വകവരുത്തുന്ന രാഷ്‌ട്രീയ കാലാവസ്ഥയുള്ള നാട്ടില്‍ എതിര്‍ക്കുന്നവരെപ്പോലും പുഞ്ചിരിച്ചുകൊണ്ട് നേരിട്ടു. ഓരോ വ്യക്തിയുടെയും ജീവിതത്തില്‍ ഓരോ കഥയായി ഉമ്മന്‍ ചാണ്ടിയുണ്ട്. കെ.സി. വേണുഗോപാല്‍ എഐസിസി ജന. സെക്രട്ടറി =നാനാജാതി മതസ്ഥരെ കരുതലോടെ സ്‌നേഹിച്ച വ്യക്തിയായിരുന്നു ഉമ്മന്‍ ചാണ്ടി. ഒരു തികഞ്ഞ മനുഷ്യസ്‌നേഹിയായിരുന്ന അദ്ദേഹം ജീവിതം മുഴുവന്‍ ചെലവഴിച്ചത് സാധാരണക്കാര്‍ക്കുവേണ്ടിയാണ്. ഇന്ന് പുരോഗതി പ്രാപിക്കുന്ന പദ്ധതികള്‍ക്ക് തുടക്കംകുറിച്ചത് അദ്ദേഹമാണ്. ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാ ബാവാ മലങ്കര ഓര്‍ത്തഡോക്‌സ് സഭാധ്യക്ഷന്‍ =പൊതുസേവനം ഒരു ജനസേവനമാണെന്ന് ജീവിച്ചു തെളിയിച്ച വ്യക്തിയായിരുന്നു ഉമ്മന്‍ ചാണ്ടി. ഷിബു ബേബി ജോണ്‍ =കുട്ടിക്കാലം മുതല്‍ അന്ത്യവിശ്രമ സമയം വരെ ഒപ്പം നടക്കാന്‍ സാധിച്ചു. തിരുവഞ്ചൂര്‍ രാധാകൃഷ്ണന്‍ എംഎല്‍എ =ജാതിമത ചിന്തകള്‍ക്കതീതമായി ഉമ്മന്‍ ചാണ്ടി ചെയ്ത പ്രവര്‍ത്തനങ്ങളെയും ഓര്‍മകളെയും മറക്കാനാകില്ല. ഉമ്മന്‍ ചാണ്ടിയുടെ സേവനം ജാതിമത രാഷ്‌ട്രീയം നോക്കാതെയുമാണ്. അടൂര്‍ പ്രകാശ് എംപി യുഡിഎഫ് കണ്‍വീനര്‍ =ജീവിച്ചിരുന്ന ഉമ്മന്‍ ചാണ്ടിയെക്കാള്‍ എത്രയോ ശക്തനാണെന്ന് വിലാപയാത്രയും ഈ അനുസ്മരണ യോഗവും സൂചിപ്പിക്കുന്നു. കെ.സി. ജോസഫ്‌

ആവേശത്തോടെ ജനാവലി രാഹുല്‍ ഗാന്ധിയെ വരവേറ്റു

ഉമ്മൻ ചാണ്ടിയുടെ സ്മരണയിൽ പുതുപ്പള്ളി ജനസാഗരമായി കോട്ടയം: ഉമ്മന്‍ ചാണ്ടിയുടെ രാഷ്‌ട്രീയതറവാടായിരുന്ന പുതുപ്പള്ളി ഒരിക്കല്‍ക്കൂടി ജനസാഗരമായി. കാരുണ്യത്തിന്‍റെ ആള്‍രൂപമായി മാറിയ, ജനസമ്പര്‍ക്ക പരിപാടിയിലൂടെ പതിനായിരങ്ങളുടെ കണ്ണീരൊപ്പിയ മുന്‍ മുഖ്യമന്ത്രി ഉമ്മന്‍ ചാണ്ടിയുടെ രണ്ടാം ചരമവാര്‍ഷിക ദിനമായിരുന്ന ഇന്നലെ രാവിലെ മുതല്‍ പുതുപ്പള്ളി ജ്വലിക്കുന്ന ഓര്‍മകള്‍ അയവിറക്കുന്ന ജനസമ്പര്‍ക്ക സദസായി മാറി. ‘ഇല്ലായില്ല മരിച്ചിട്ടില്ല, ഉമ്മന്‍ ചാണ്ടി മരിച്ചിട്ടില്ല’’ എന്ന വൈകാരിക മുദ്രാവാക്യവുമായി അനേകായിരങ്ങള്‍ സമ്മേളനവേദിയിലേക്ക് ഒഴുകിയെത്തി. ആരാധ്യനേതാവ് അന്ത്യവിശ്രമം കൊള്ളുന്ന സെന്‍റ് ജോര്‍ജ് ഓര്‍ത്തഡോക്‌സ് പള്ളിയി ലെ കബറിടത്തില്‍ പുലര്‍ച്ചെ മുതല്‍ പുഷ്പചക്രങ്ങള്‍ നിറഞ്ഞു. അണമുറിയാതെ ജനാവലിയുടെ ആദരമർപ്പിക്കൽ ഇന്നലെ രാത്രിയോളം നീണ്ടു. ലോക്‌സഭാ പ്രതിപക്ഷനേതാവ് രാഹുല്‍ ഗാന്ധി രാവിലെ 10ന‌് കെപിസിസി പ്രസിഡന്‍റ് സണ്ണി ജോസഫ്, പ്രതിപക്ഷ നേതാവ് വി.ഡി. സതീശന്‍, ചാണ്ടി ഉമ്മന്‍ തുടങ്ങിയവര്‍ക്കൊപ്പം എത്തി കബറിടത്തില്‍ പ്രാര്‍ഥനിരതനായി നിന്നതിനുശേഷം പുഷ്പചക്രം അര്‍പ്പിച്ചു. തുടര്‍ന്ന് പള്ളിയിലും സന്ദര്‍ശനം നടത്തി. അനുസ്മരണ സമ്മേളന വേദിയിലെത്തിയ രാഹുല്‍ ഗാന്ധിയെ കരഘോഷത്തോടെയാണ് സദസ് എതിരേറ്റത്. അനുസ്മരണത്തില്‍ ഉമ്മന്‍ ചാണ്ടിയെക്കുറിച്ച് അദ്ദേഹം പറഞ്ഞ ഓരോ സന്ദര്‍ഭത്തിലും കൈയടിയും ആരവവും ഉയര്‍ന്നു. ഉമ്മന്‍ ചാണ്ടി ഫൗണ്ടേഷന്‍റെ നേതൃത്വത്തില്‍ ശ്രവണപരിമിതരായ കുട്ടികള്‍ക്കുള്ള സ് മൃതിതരംഗം പദ്ധതിയുടെ ഉദ് ഘാടന വേളിയില്‍ ചികിത്സാ രേഖകള്‍ രാഹുല്‍ ഗാന്ധിയില്‍നിന്ന് ഏറ്റുവാങ്ങാനെത്തിയ കുട്ടിയുടെ ചെരിപ്പ് വഴുതിപ്പോയപ്പോള്‍ അത് കൈയിലെടുത്ത് കുട്ടിയുടെ കാലില്‍ അണിയിച്ചതിനുശേഷമാണ് രാഹുല്‍ രേഖകള്‍ കൈമാറിയത്. രേഖകള്‍ കൈപ്പറ്റാനും ഭവനപദ്ധതിയുടെ തക്കോല്‍ ഏറ്റുവാങ്ങാനും എത്തിയവരെ ചേര്‍ത്തുനിര്‍ത്തി രാഹുല്‍ സ്‌നേഹവും സന്തോഷവും പ്രകടിപ്പിച്ചു. കെപിസിസിയും ഡിസിസിയും സംയുക്തമായി സംഘടിപ്പിച്ച അനുസ്മരണ സമ്മേളനത്തിനായി കൂറ്റന്‍ പന്തലാണ് ഒരുക്കിയിരുന്നത്. കോണ്‍ഗ്രസ് നേതാക്കളും പ്രവര്‍ത്തകരുമായി കാല്‍ലക്ഷത്തോളം പേരാണ് പുതുപ്പള്ളിയിലെത്തിയത്. പന്തലിലും പുറത്തുനില്‍ക്കുന്നവര്‍ക്ക് സമ്മേളനം വീക്ഷിക്കുന്നതിന് വലിയ സ്‌ക്രീനുകളും ഒരുക്കിയിരുന്നു.

ഉമ്മൻ ചാണ്ടിയെ അനുസ്മരിച്ച് നാട്

കുറവിലങ്ങാട്: മുൻ മുഖ്യമന്ത്രി ഉമ്മൻ ചാണ്ടിയെ അനുസ്മരിച്ച് നാട്. ഉമ്മൻചാണ്ടി പഠന ഗവേഷണ കേന്ദ്രത്തിന്‍റെ ആഭിമുഖ്യത്തിലാണ് അനുസ്മരണം നടത്തിയത്. അനുസ്മരണ സമ്മേളനം ജോസഫ് പുതിയിടം ഉദ്ഘാടനം ചെയ്തു. ജോസഫ് സെബാസ്റ്റ്യൻ തെന്നാട്ടിൽ, ബേബി തൊണ്ടാംകുഴി, വി.യു. ചെറിയാൻ, ഷാജി പുതിയിടം, തോമസ് കുര്യൻ, എം.എം. ജോസഫ്, ജോർജുകുട്ടി വെള്ളായിപ്പറമ്പിൽ തുടങ്ങിയവർ പ്രസംഗിച്ചു. പാലാ: കോണ്‍ഗ്രസ് പാലാ ബ്ലോക്ക് കമ്മിറ്റിയുടെ നേതൃത്വത്തില്‍ ഉമ്മന്‍ ചാണ്ടി അനുസ്മരണം നടത്തി. ബ്ലോക്ക് പ്രസിഡന്‍റ് എന്‍. സുരേഷ് ഉദ്ഘാടനം ചെയ്തു. യുഡിഎഫ് ചെയര്‍മാന്‍ പ്രഫ.സതീശ് ചൊള്ളാനി, ആനി ബിജോയി, വക്കച്ചന്‍ മേനാംപറമ്പില്‍ തുടങ്ങിയവര്‍ പ്രസംഗിച്ചു. പാലാ: മഹിളാ കോണ്‍ഗ്രസ് പാലാ ബ്ലോക്ക് കമ്മിറ്റിയുടെ നേതൃത്വത്തില്‍ ഉമ്മന്‍ ചാണ്ടി അനുസ്മരണം നടത്തി. ബ്ലോക്ക് പ്രസിഡന്‍റ് ആനി ബിജോയി ഉദ്ഘാടനം ചെയ്തു. പാലാ: കോണ്‍ഗ്രസ് കരൂര്‍ മണ്ഡലം കമ്മിറ്റിയുടെ നേതൃത്വത്തില്‍ ഉമ്മന്‍ ചാണ്ടി അനുസ്മരണം നടത്തി. മണ്ഡലം പ്രസിഡന്‍റ് പയസ് മാണി അനുസ്മരണം ഉദ്ഘാടനം ചെയ്തു. പാലാ: കോൺഗ്രസ് പാലാ മണ്ഡലം 18-ാം വാര്‍ഡ് കമ്മറ്റിയുടെ ആഭിമുഖ്യത്തില്‍ ഉമ്മന്‍ ചാണ്ടിയുടെ രണ്ടാം ചരമവാര്‍ഷികം ആചരിച്ചു. ഉമ്മന്‍ ചാണ്ടിയുടെ ഛായാചിത്രത്തില്‍ പുഷ്പാര്‍ച്ചനയും തുടര്‍ന്ന് അനുസ്മരണവും നടത്തി. അനുസ്മരണ യോഗം യുഡിഎഫ് പാലാ നിയോജകമണ്ഡലം ചെയര്‍മാന്‍ പ്രഫ. സതീശ് ചൊള്ളാനി ഉദ്ഘാടനം ചെയ്തു. വാര്‍ഡ് പ്രസിഡന്‍റ് വി.എം. ആന്‍റണി വള്ളിക്കാട്ടില്‍ അധ്യക്ഷത വഹിച്ചു. പുഞ്ഞാർ: ഉമ്മൻ ചാണ്ടിയുടെ രണ്ടാം ചരമവാർഷികം കോൺഗ്രസ്‌ പൂഞ്ഞാർ തെക്കേക്കര മണ്ഡലം കമ്മിറ്റിയുടെ ആഭിമുഖ്യത്തിൽ പൂഞ്ഞാർ ടൗണിൽ പുഷ്പാർച്ചന നടത്തി ആചരിച്ചു. മണ്ഡലം പ്രസിഡന്‍റ് റോജി തോമസ് മുതിരേന്തിക്കൽ, ഡിസിസി മെംബർ ജോർജ് സെബാസ്റ്റ്യൻ, എം.സി. വർക്കി, ടോമി മാടപ്പള്ളി, പൂഞ്ഞാർ മാത്യു, സണ്ണി കല്ലാറ്റ്, സജി കൊട്ടാരം തുടങ്ങിയവർ നേതൃത്വം നൽകി. തിടനാട്: കോൺഗ്രസ് തിടനാട് മണ്ഡലം കമ്മിറ്റിയുടെ ആഭിമുഖ്യത്തിൽ ഉമ്മൻ ചാണ്ടിയുടെ രണ്ടാം ചരമവാർഷികത്തോടനുബന്ധിച്ച് പിണ്ണാക്കനാട് ടൗണിൽ പുഷ്പാർച്ചന നടത്തി. മണ്ഡലം പ്രസിഡന്‍റ് റോയി തുരുത്തിയിൽ, ഡിസിസി മെംബർ വർക്കിച്ചൻ വയംപോത്തനാൽ, ബിനോ മുളങ്ങാശേരി, ബെന്നി കൊല്ലിയിൽ, ജോയി പാതാഴ തുടങ്ങിയവർ പങ്കെടുത്തു.

ടി.വി. ഏബ്രഹാം പൊതുപ്രവർത്തകർക്ക് ഉത്തമ മാതൃക: ചീഫ് വിപ്പ് ഡോ. എൻ. ജയരാജ്

പാലാ: രാഷ്‌ട്രീയ പ്രവര്‍ത്തകര്‍ക്കും പൊതുപ്രവര്‍ത്തകര്‍ക്കും ഉത്തമ മാതൃകയായിരുന്നു അഡ്വ. ടി.വി. ഏബ്രഹാമിന്‍റെ ജീവിതമെന്ന് ചീഫ് വിപ്പ് ഡോ. എന്‍. ജയരാജ് പറഞ്ഞു. കേരള രാഷ്‌ട്രീയമണ്ഡലത്തിലും പൊതുപ്രവര്‍ത്തന മേഖലയിലും വ്യക്തിമുദ്ര പതിപ്പിച്ച ടി.വി. ഏബ്രഹാമിന്‍റെ അനുസ്മരണ സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കൊഴുവനാല്‍ സെന്‍റ് ജോണ്‍ നെപുംസ്യാന്‍സ് ഹയര്‍ സെക്കന്ററി സ്‌കൂള്‍ ഹാളില്‍ നടന്ന സമ്മേളനത്തില്‍ മാണി സി. കാപ്പന്‍ എംഎല്‍എ അധ്യക്ഷത വഹിച്ചു. ടി.വി ഏബ്രഹാം ഫൗണ്ടേഷന്‍ ഏര്‍പ്പെടുത്തിയിരിക്കുന്ന ഈ വര്‍ഷത്തെ എക്‌സലന്‍സ് അവാര്‍ഡ് വിതരണം ചീഫ് വിപ്പ് ഡോ. എന്‍. ജയരാജ് എംഎല്‍എയും മാണി സി. കാപ്പന്‍ എംഎല്‍എയും നടത്തി. മുന്‍ എംപി പി.സി. തോമസ്, കൊഴുവനാല്‍ ഫൊറോന പള്ളി വികാരി ഫാ. ജോസ് നെല്ലിക്കത്തെരുവില്‍, ളാലം ബ്ലോക്ക് പഞ്ചായത്ത് പ്രസിഡന്‍റ് ജെസി ജോര്‍ജ്, കൊഴുവനാല്‍ പഞ്ചായത്ത് പ്രസിഡന്‍റ് ലീലാമ്മ ബിജു, ടെല്‍ക്ക കോര്‍പറേഷന്‍ ചെയര്‍മാന്‍ പി.സി. ജോസഫ്, മെറ്റല്‍ ഇന്‍ഡസ്ട്രീസ് ചെയര്‍മാന്‍ ഫ്രാന്‍സിസ് തോമസ്, ട്രിവാന്‍ഡ്രം സ്പിന്നിംഗ് മില്‍ ചെയര്‍മാന്‍ സണ്ണി തോമസ്, ഫൗണ്ടേഷന്‍ മാനേജിംഗ് ട്രസ്റ്റി പ്രഫ. കൊച്ചുത്രേസ്യാ ഏബ്രാഹം, ജില്ലാ ലൈബ്രറി കൗണ്‍സില്‍ പ്രസിഡന്‍റ് ബാബു കെ. ജോര്‍ജ്, സ്‌കൂള്‍ പ്രിന്‍സിപ്പൽ ഡോ. ബെല്ലാ ജോസഫ്, ഹെഡ്മാസ്റ്റര്‍ സോണി തോമസ്, കൊഴുവനാല്‍ ലയണ്‍സ് ക്ലബ് പ്രസിഡന്‍റ് ഡൈനോ ജയിംസ്, പിടിഎ പ്രസിഡന്‍റ് ഷിബു തെക്കേമറ്റം, നോബി ഏബ്രഹാം എന്നിവര്‍ പ്രസംഗിച്ചു. ചടങ്ങിൽ കൊഴുവനാല്‍ ഹയര്‍ സെക്കന്‍ഡറി സ്‌കൂളിനെയും ഹൈസ്‌കൂളിനെയും കിര്‍ഗിസ്ഥാനില്‍ നടന്ന ലോക വനിതാ ഗുസ്തിയില്‍ ഏഴ് സ്വര്‍ണം നേടിയെ ഇന്ത്യന്‍ ടീമിനെ നയിച്ച കോച്ച് ബിജുവിനെയും ആദരിച്ചു.

സുരക്ഷാസംവിധാനങ്ങളില്ല; ഗതാഗതക്കുരുക്കേറി ആര്‍വി ജംഗ്ഷന്‍

പാലാ: ബൈപാസും പാലാ-കോഴാ റോഡും സന്ധിക്കുന്ന ആര്‍വി ജംഗ്ഷനില്‍ സുരക്ഷാ സംവിധാനങ്ങളൊരുക്കുവാന്‍ നടപടികളില്ല. ഇവിടെ ഗതാഗതക്കുരുക്കും അപകടങ്ങളും പതിവാകുകയാണ്. ഗതാഗതം നിയന്ത്രിക്കാന്‍ പോലീസ് സംവിധാനവുമില്ല. ‌ ‌വീതിയേറിയ ബൈപാസ് റോഡ് വീതി കുറഞ്ഞ പാലാ-കോഴാ റോഡിനെ മറികടക്കുന്നത് രണ്ടു കുന്നുകള്‍ക്ക് ഇടയിലുള്ള ആര്‍വി ജംഗ്ഷന്‍ ഭാഗത്താണ്. വീതിയേറിയ ബൈപാസിലൂടെ വാഹനങ്ങള്‍ കയറ്റമിറങ്ങി മറുഭാഗത്തേക്ക് കയറ്റം കയറാനൊരുങ്ങി പോകുമ്പോള്‍ പാലാ-കോഴാ റോഡിലൂടെ വാഹനങ്ങള്‍ കുറുകെ പോകുന്നത് പലപ്പോഴും ശ്രദ്ധയില്‍പ്പെടില്ല. നാലു ഭാഗത്തു നിന്നുമുള്ള വാഹനങ്ങള്‍ ഇവിടെയെത്തി കുരുങ്ങിക്കിടക്കുന്നത് പതിവ് കാഴ്ചയാണ്. പാലാ-കോഴാ റോഡില്‍നിന്ന് വാഹനങ്ങള്‍ ബൈപാസിലെ രണ്ടു ഭാഗത്തേക്ക് തിരിയുമ്പോഴും മറ്റു വശങ്ങളില്‍നിന്നു വരുന്ന വാഹനങ്ങളെ കാണാന്‍ തടസമുണ്ട്. ബൈപാസ് രൂപകല്പന ചെയ്തപ്പോള്‍ പാലാ-കോഴാ റോഡിനു മുകളിലൂടെ മേല്‍പ്പാലം തീര്‍ക്കുവാന്‍ പദ്ധതിയിട്ടിരുന്നു. പിന്നീട് ഇത് ഉപേക്ഷിക്കുകയായിരുന്നു. ഇവിടെ ഗതാഗത നിയന്ത്രണ സംവിധാനങ്ങളും സുരക്ഷാ സംവിധാനങ്ങളും ഇല്ലാത്തത് അപകടസാധ്യത വര്‍ധിപ്പിക്കുന്നു. ജംഗ്ഷന്‍ വികസിക്കാന്‍ തുടങ്ങിയതോടെ നിരവധി വ്യാപാര സ്ഥാപനങ്ങള്‍ ഇവിടെ പ്രവര്‍ത്തനം തുടങ്ങിയതും തിരക്കു വര്‍ധിക്കുന്നതിനിടയാക്കി. ഗതാഗതക്കുരുക്ക് ഒഴിവാക്കാന്‍ റൗണ്ടാനയും ട്രാഫിക് സിഗ്‌നല്‍ ലൈറ്റുകളും സ്ഥാപിക്കണമെന്ന ആവശ്യം ശക്തമായി.

മാതൃവേദി അല്‍ഫോന്‍സ തീര്‍ഥാടനം ഭക്തിസാന്ദ്രമായി

പാലാ: വിശുദ്ധ അല്‍ഫോന്‍സാമ്മയുടെ പുണ്യകുടീരം സ്ഥിതിചെയ്യുന്ന ഭരണങ്ങാനത്തേക്കു പാലാ രൂപത മാതൃവേദി അംഗങ്ങള്‍ നടത്തിയ തീര്‍ഥാടനം ഭക്തിസാന്ദ്രമായി. മൂവായിരത്തോളം അമ്മമാരാണ് 171 ഇടവകകളില്‍നിന്നായി എത്തിച്ചേര്‍ന്നത്. വിശുദ്ധ അല്‍ഫോന്‍സാമ്മയുടെ തിരുനാളിനോടനുബന്ധിച്ച് പാലാ രൂപത മാതൃവേദിയാണ് ചടങ്ങുകള്‍ക്ക് നേതൃത്വം നല്‍കിയത്. രാവിലെ 9.30ന് നടന്ന ജപമാലയ്ക്കുശേഷം ഭരണങ്ങാനം അല്‍ഫോന്‍സ ഷ്റൈന്‍ റെക്ടര്‍ റവ. ഡോ.അഗസ്റ്റിന്‍ പാലയ്ക്കപ്പറമ്പില്‍ സ്വാഗതം പറഞ്ഞു. തുടര്‍ന്ന് നടന്ന വിശുദ്ധ കുര്‍ബാനയ്ക്ക് ഫാമിലി അപ്പൊസ്തലേറ്റ് അസിസ്റ്റന്‍റ് ഡയറക്ടര്‍ ഫാ. മാത്യു മുതുപ്ലാക്കല്‍ നേതൃത്വം നല്‍കി. പാലാ രൂപത മാതൃവേദി ഡയറക്ടര്‍ ഫാ. ജോസഫ് നരിതൂക്കില്‍ വചനസന്ദേശം നല്‍കി. മാതൃവേദി ഭരണങ്ങാനം മേഖലയുടെയും യൂണിറ്റിന്‍റെയും നേതൃത്വത്തില്‍ ഫൊറോന പള്ളിലേക്ക് ആഘോഷമായ ജപമാല പ്രദക്ഷിണം നടത്തി. കൈയില്‍ ജപമാലയേന്തി അമ്മമാര്‍ നടത്തിയ റാലി ഭക്തിസാന്ദ്രമായി. സെന്‍റ് മേരീസ് ഫൊറോന പള്ളിയില്‍ എത്തിച്ചേര്‍ന്ന റാലിയുടെ സമാപനത്തില്‍ വികാരി ഫാ. സഖറിയാസ് ആട്ടപ്പാട്ട് ആശീര്‍വാദം നല്‍കി. പാരിഷ് ഹാളില്‍ നടന്ന സ്‌നേഹവിരുന്നോടെയാണ് ചടങ്ങുകള്‍ അവസാനിച്ചത്. പാലാ രൂപത മാതൃവേദി ഭാരവാഹികളായ ഷേര്‍ളി ചെറിയാന്‍, സബീന സക്കറിയാസ്, മേഴ്‌സി മാണി, ലൗലി ബിനു, ഡയാന രാജു, ഭരണങ്ങാനം മേഖലാ-യൂണിറ്റ് ഭാരവാഹികള്‍ എന്നിവര്‍ നേതൃത്വം നല്‍കി. എസ്എംവൈഎം അല്‍ഫോന്‍സ തീര്‍ഥാടനം നാളെ പാലാ: പാലാ രൂപത എസ്എംവൈഎമ്മിന്‍റെ നേതൃത്വത്തില്‍ നാളെ ഭരണങ്ങാനത്തേക്ക് അല്‍ഫോന്‍സ തീര്‍ഥാടനം നടത്തും. രൂപതയിലെ 20 ഫൊറോനകളില്‍ നിന്നുള്ള എസ്എംവൈഎം പ്രവര്‍ത്തകര്‍ തീര്‍ഥാടനത്തില്‍ പങ്കെടുക്കും. വൈകുന്നേരം 4.30ന് ഭരണങ്ങാനം അല്‍ഫോന്‍സ തീര്‍ഥാടനകേന്ദ്രത്തില്‍ റംശ പ്രാര്‍ഥന. എസ്എംവൈഎം രൂപത ഡയറക്ടര്‍ ഫാ. മാണി കൊഴുപ്പന്‍കുറ്റി നയിക്കും. അഞ്ചിന് വിശുദ്ധ കുര്‍ബാന - വികാരി ജനറാള്‍ മോണ്‍. സെബാസ്റ്റ്യന്‍ വേത്താനത്ത്. തുടര്‍ന്ന് ആറിന് ജപമാല പ്രദക്ഷിണം. രൂപത പ്രസിഡന്‍റ് അന്‍വിന്‍ സോണി ഓടച്ചുവട്ടില്‍, ജനറല്‍ സെക്രട്ടറി റോബിന്‍ താന്നിമല, വൈസ് പ്രസിഡന്‍റ് ബില്‍ന സിബി, ജോസഫ് തോമസ് തുടങ്ങിയവര്‍ നേതൃത്വം നല്‍കും.

പാലായുടെ പ്രവാസിമക്കള്‍ ഇന്ന് സംഗമിക്കുന്നു

പാലാ: രൂപതയുടെ പ്ലാറ്റിനം ജൂബിലി ആഘോഷങ്ങളെ ഏറ്റുവാങ്ങി പ്രവാസിമക്കള്‍ സംഗമിക്കുന്നു. വിവിധ രാജ്യങ്ങളില്‍ നടത്തിയ സമ്മേളനങ്ങളില്‍നിന്ന് ഊര്‍ജം ഉള്‍ക്കൊണ്ടാണ് രൂപതാതലത്തില്‍ പ്രവാസിസംഗമം ഇന്ന് ചൂണ്ടച്ചേരി സെന്‍റ് ജോസഫ് എന്‍ജിനിയറിംഗ് കോളജില്‍ നടക്കുന്നത്. നൂറുകണക്കായ പ്രവാസികള്‍ ഒരുമിച്ച് ചേര്‍ന്ന് വിശുദ്ധ കുര്‍ബാനയോടെയാണ് സംഗമത്തിന് തുടക്കമിടുന്നത്. തുടര്‍ന്ന് രൂപതാധ്യക്ഷനൊപ്പം ചിന്തോദ്ദീപകമായ സമ്മേളനത്തിന് പ്രവാസികള്‍ സാക്ഷ്യം വഹിക്കും. നിലവില്‍ പ്രവാസികളായിട്ടുള്ളവരും മുന്‍പ് പ്രവാസജീവിതം നയിച്ചവരുമാണ് രൂപതയുടെ പ്രവാസി അപ്പൊസ്തലേറ്റിനോട് ചേര്‍ന്ന് പ്രവര്‍ത്തിക്കുന്നത്. രൂപതാതലത്തിലുള്ള നാലാമത് സംഗമമാണ് ഇക്കുറി നടക്കുന്നത്. സംഗമത്തില്‍ ഡോക്കുമെന്‍ററി പ്രകാശനവും വിവിധ കര്‍മപരിപാടികളുടെ അവതരണവും ഒരുക്കിയിട്ടുണ്ട്. മാതാപിതാക്കളും മക്കളുമുള്‍പ്പെടെ വിവിധ തലമുറകള്‍ പങ്കെടുക്കുന്ന കലാപരിപാടികള്‍ സംഗമത്തിനു കൂടുതല്‍ നിറംപകരും. രൂപതാതലത്തില്‍ നടത്തിയ വിവിധ മത്സരങ്ങളില്‍ വിജയികളായവര്‍ക്കുള്ള സമ്മാനങ്ങളുടെ വിതരണവും നടക്കും. വിവിധ കര്‍മ മേഖലകളില്‍ മികച്ച പ്രവര്‍ത്തനം നടത്തിയിട്ടുള്ളവരെ ആദരിക്കുന്ന പരിപാടിയും സംഗമത്തിന്‍റെ ഭാഗമാണ് . വിവിധ രാജ്യങ്ങളില്‍നിന്നുള്ള പ്രതിനിധികള്‍ ഉള്‍ക്കൊള്ളുന്ന കമ്മിറ്റികളാണ് ക്രമീകരണങ്ങള്‍ക്ക് നേതൃത്വം നല്‍കിയിട്ടുള്ളത്. പ്രവാസ ജീവിതത്തിലേക്ക് പ്രവേശിക്കുന്നവര്‍ക്ക് വിവിധ രാജ്യങ്ങളില്‍ രൂപത പ്രവാസി അപ്പൊസ്തലേറ്റ് നല്‍കുന്ന നിര്‍ദേശങ്ങളും സഹായവും ഇതിനോടകംതന്നെ ഏറെ ശ്രദ്ധിക്കപ്പെട്ടിട്ടുണ്ട്. പ്രവാസി ജീവിതം കൂടുതല്‍ ശക്തമായതോടെ നാട്ടില്‍ ഒറ്റപ്പെടുന്ന മുതിര്‍ന്ന ദമ്പതികള്‍ക്ക് ആവശ്യമായ പാലിയേറ്റീവ് പരിചരണമടക്കം പ്രവാസി കാര്യാലയം സമ്മാനിക്കുന്നുണ്ട്. വിദേശരാജ്യങ്ങളില്‍ ആയിരിക്കുന്ന യുവതലമുറയ്ക്ക് സംസ്ഥാനത്തെയും രാജ്യത്തെയും വിവിധ തൊഴിലവസരങ്ങള്‍ പരിചയപ്പെടുത്തുകയും പരിശീലനം നല്‍കുകയും ചെയ്യുന്ന പദ്ധതികളും നടപ്പിലാക്കി വരുന്നുണ്ട്. സംഗമത്തിനുള്ള മുഴുവന്‍ ക്രമീകരണങ്ങളും പൂര്‍ത്തീകരിച്ചതായി പ്രവാസി കാര്യാലയം രൂപത ഡയറക്ടര്‍ ഫാ. കുര്യാക്കോസ് വെള്ളച്ചാലില്‍, അസിസ്റ്റന്‍റ് ഡയറക്ടര്‍മാരായ ഫാ. ജോര്‍ജ് നെല്ലിക്കല്‍, ഫാ. മാണി കൊഴുപ്പന്‍കുറ്റി എന്നിവര്‍ അറിയിച്ചു.

കണമല അപകടം: ഡ്രൈവിംഗിലെ അപാകത കാരണമെന്ന് മോട്ടോർ വാഹനവകുപ്പ്

കണമല: ശബരിമല തീർഥാടകർ സഞ്ചരിച്ച ബസുകൾ തമ്മിൽ കഴിഞ്ഞ ദിവസം കണമല ഇറക്കത്തിൽ ഇടിച്ച് അപകടമുണ്ടായത് സംബന്ധിച്ച് മോട്ടോർ വാഹനവകുപ്പ് ഉദ്യോഗസ്ഥർ ഇന്നലെ പ്രാഥമിക പരിശോധന നടത്തി. വകുപ്പിന്‍റെ എൻഫോഴ്സ്മെന്‍റ് വിഭാഗമാണ് പരിശോധന നടത്തിയത്. മിനി ബസിലെ ഡ്രൈവർ അലസതയോടെ വാഹനം ഓടിച്ചതാണ് അപകടത്തിന് കാരണമെന്ന് ഉദ്യോഗസ്ഥർ പറയുന്നു. മിനി ബസിന് ഓട്ടത്തിൽ ബ്രേക്ക്‌ പ്രവർത്തിക്കാതെ വന്നതോടെ നിയന്ത്രണം തെറ്റി എതിരേ വന്ന ബസിൽ ഇടിക്കുകയായിരുന്നുവെന്നാണ് മിനി ബസിലെ ഡ്രൈവർ തമിഴ്നാട് മധുര സ്വദേശി രാജ്‌കുമാർ പറഞ്ഞത്. എന്നാൽ, താഴ്ന്ന ഗിയറിൽ ഇറക്കത്തിൽ സഞ്ചരിച്ചപ്പോൾ തുടർച്ചയായി ബ്രേക്ക്‌ ചെയ്തത് മൂലം ബ്രേക്ക് കുറഞ്ഞു എന്നതല്ലാതെ ബ്രേക്ക് സിസ്റ്റം പ്രവർത്തനരഹിതമായിട്ടില്ലെന്ന് പരിശോധനയിൽ കണ്ടെത്തിയെന്നും മിനി ബസ് ഇടിച്ച ബസിന് ബ്രേക്ക്‌ തകരാറില്ലെന്നും ഉദ്യോഗസ്ഥർ പറഞ്ഞു. പ്രാഥമിക പരിശോധനയാണ് നടത്തിയതെന്നും പൂർണമായ പരിശോധന പോലീസിൽനിന്ന് കത്ത് ലഭിക്കുമ്പോൾ കാഞ്ഞിരപ്പള്ളി ജോയിന്‍റ് ആർടിഒയുടെ മേൽനോട്ടത്തിൽ നടത്തുമെന്നും ഉദ്യോഗസ്ഥർ പറഞ്ഞു. തീർഥാടകരുമായി ശബരിമല ദർശനത്തിന് പോവുകയായിരുന്ന മിനി ബസ് ഇറക്കത്തിലെ അട്ടിവളവിൽ വച്ചാണ് ശബരിമല ദർശനം കഴിഞ്ഞു വരികയായിരുന്ന തീർഥാടകർ സഞ്ചരിച്ച ബസിൽ ഇടിച്ചത്. മിനി ബഡിലെ ഡ്രൈവർ ഉൾപ്പടെ ബസിലെ തീർഥാടകർ അടക്കം നാല് പേർക്ക് പരിക്കേറ്റിരുന്നു. ഡ്രൈവിംഗ് സീറ്റിനിടയിൽ കാൽ കുടുങ്ങി ഗുരുതര പരിക്കേറ്റ ഡ്രൈവറെ ബസിന്‍റെ ബോഡി വെട്ടിപ്പൊളിച്ചാണ് പുറത്തെടുത്തത്. കോട്ടയം മെഡിക്കൽ കോളജിൽ ചികിത്സയിലായ ഡ്രൈവർ അപകടനില തരണം ചെയ്‌തെന്ന് പോലീസ് അറിയിച്ചു.

ഫ്യൂച്ചർ ഷൈനിംഗ് സ്റ്റാർസ് ഗ്ലോബൽ പ്രോഗ്രാം സംഘടിപ്പിച്ചു

പെരുവന്താനം: സെന്‍റ് ആന്‍റണീസ് കോളജ് എഐസിടിഇ കമ്യൂണിറ്റി എംപവർമെന്‍റിന്‍റെ ഭാഗമായി ഹയർ സെക്കൻഡറി സ്കൂൾ വിദ്യാർഥികൾക്കായി ഏകദിന പ്രദർശന പരിപാടി സംഘടിപ്പിച്ചു. ചെയർമാൻ ബെന്നി തോമസ് ഉദ്ഘാടനം ചെയ്തു. പ്രിൻസിപ്പൽ ഡോ. ആന്‍റണി ജോസഫ് കല്ലമ്പള്ളി അധ്യക്ഷത വഹിച്ചു. കോളജ് സെക്രട്ടറി ടിജോമോന്‍ ജേക്കബ്, വൈസ് പ്രിന്‍സിപ്പല്‍മാരായ സുപർണ രാജു, പി.ആർ. രതീഷ്, ഫാ. ജോസഫ് വാഴപ്പനാടി, ജിനു തോമസ്‌, അഞ്ജലി ആര്‍. നായര്‍, മിന്നു പ്രമോദ്, എം. മെര്‍ലിന്‍, നാന്‍സി ഡിക്രൂസ്, ജെസ്മി ജോര്‍ജ്, മരിയ റോയ് തുടങ്ങിയവർ നേതൃത്വം നൽകി. സൈബർ സെക്യൂരിറ്റി, ആർട്ടിഫിഷൽ ഇന്‍റലിജന്‍സ്, റോബോട്ടുകൾ, ഫാഷൻ ഡിസൈനിംഗിന്‍റെ ഭാഗമായി ഫാഷന്‍ റണ്‍വേ, ഹോട്ടൽ മാനേജ്മെന്‍റ് ഡിപ്പാർട്ട്മെന്‍റിന്‍റെ ഭാഗമായി മിനി ഫുഡ്‌ ഫെസ്റ്റിവല്‍, സൈക്കോളജി വിഭാഗങ്ങളുടെ പ്രദർശനങ്ങളും ചടങ്ങിൽ നടത്തി. പരിപാടിയിൽ പങ്കെടുത്തവർക്ക് സർട്ടിഫിക്കറ്റുകളും വിതരണം ചെയ്തു.

ഉമ്മൻ ചാണ്ടിയെ അനുസ്മരിച്ച് നാട്

ആനക്കല്ല്: കോൺഗ്രസ് ആനക്കല്ല് വാർഡ് കമ്മിറ്റിയുടെ നേതൃത്വത്തിൽ ഉമ്മൻ ചാണ്ടിയെ അനുസ്മരിച്ചു. കോൺഗ്രസ് വാർഡ് പ്രസിഡന്‍റ് ഷാജി പെരുന്നേപ്പറമ്പിൽ അധ്യക്ഷത വഹിച്ചു. ഡിസിസി ജനറൽ സെക്രട്ടറി റോണി കെ. ബേബി ഉമ്മൻ ചാണ്ടി അനുസ്മരണം നടത്തി. പെരുവന്താനം: കോൺഗ്രസ് പെരുവന്താനം വാർഡ് കമ്മിറ്റിയുടെ നേതൃത്വത്തിൽ പെരുവന്താനത്ത് ഉമ്മൻചാണ്ടി അനുസ്മരണവും പുഷ്പാർച്ചനയും നടത്തി. ഏലപ്പാറ ബ്ലോക്ക് സെക്രട്ടറി ഷിയാസ് മുത്തേടത്ത്, എൻ.എ. വഹാബ്, കെ.ആർ. വിജയൻ, ഒ.എ. ഷെമീർ എന്നിവർ പ്രസംഗിച്ചു. കൂരാലി: മുൻ മുഖ്യമന്ത്രി ഉമ്മൻ ചാണ്ടിയുടെ രണ്ടാം ചരമവാർഷിക ദിനത്തിൽ കോൺഗ്രസ് എലിക്കുളം മണ്ഡലം കമ്മിറ്റി പുഷ്പാർച്ചനയും അനുസ്മരണയോഗവും നടത്തി. മണ്ഡലം പ്രസിഡന്‍റ് ജയിംസ് ചാക്കോ ജീരകത്തിൽ അധ്യക്ഷത വഹിച്ചു. നേതാക്കളായ വി.ഐ. അബ്ദുൾ കരിം, തോമസ് പാലക്കുഴയിൽ, കെ.എം. ചാക്കോ, ഗീതാ രാജു, ജിഷ്ണു പറപ്പള്ളിൽ, ആർ. അഭിജിത്ത്, മനീഷ് കൊച്ചാങ്കൽ, കെ.സി. വിനോദ്, കെ.ജി. കുമാരൻ, ഗോപകുമാർ ഏലപ്പള്ളിൽ, സിജോ ചാമനാട്ട്, മാർട്ടിൻ ജോർജ്, ബിനു തലച്ചിറ തുടങ്ങിയവർ പ്രസംഗിച്ചു. പൊൻകുന്നം: മുൻ മുഖ്യമന്ത്രി ഉമ്മൻചാണ്ടിയുടെ രണ്ടാം ചരമവാർഷികദിനത്തിൽ കോൺഗ്രസ് ചിറക്കടവ് മണ്ഡലം കമ്മിറ്റിയുടെ നേതൃത്വത്തിൽ പൊൻകുന്നം ടൗണിൽ അനുസ്മരണ യോഗവും പുഷ്പാർച്ചനയും നടത്തി. മണ്ഡലം പ്രസിഡന്‍റ് സേവ്യർ മൂലകുന്ന് ഉദ്ഘാടനം ചെയ്തു. വൈസ് പ്രസിഡന്‍റ് ശ്യാം ബാബു അധ്യക്ഷത വഹിച്ചു.

ഇൻസ്പെയർ സിവിൽ സർവീസ് പ്രോഗ്രാം

മണിമല: സെന്‍റ് ജോർജ് ഹൈസ്കൂളിൽ മണിമല എക്സിക്യൂട്ടീവ് ക്ലബ് ആവിഷ്കരിച്ച് നടപ്പാക്കിവരുന്ന ഇൻസ്പെയർ സിവിൽ സർവീസ് പ്രോഗ്രാമിന്‍റെ നാലാമത് ബാച്ച് ജില്ലാ കളക്ടർ ജോൺ വി. സാമുവൽ ഉദ്ഘാടനം ചെയ്തു. പട്ടണങ്ങളിലെ സ്കൂളുകളിൽ മാത്രം കാണുന്ന ഇത്തരം പ്രോഗ്രാം മണിമല എന്ന ഗ്രാമത്തിൽ നടപ്പാക്കിയ എക്സിക്യൂട്ടീവ് ക്ലബ്ബിനെ കളക്ടർ അഭിനന്ദിച്ചു. കുട്ടികൾക്ക് ആവശ്യമായ മോട്ടിവേഷനുകൾ, പഠനമികവിന് ഉതകുന്ന തരത്തിലുള്ള പ്രോഗ്രാമുകൾ, ആവശ്യമായ കുട്ടികൾക്ക് പഠനസഹായങ്ങൾ ഉൾപ്പെടെ നിരവധി പദ്ധതികളാണ് മണിമല എക്സിക്യൂട്ടീവ് ക്ലബ് നടപ്പാക്കി വരുന്നത്. റിട്ടയേർഡ് ഐപിഎസ്, ഐഎഎസ് തലത്തിലുള്ള ഉദ്യോഗസ്ഥരാണ് ക്ലബ്ബിലെ അംഗങ്ങൾ. യോഗത്തിൽ സ്കൂൾ അസിസ്റ്റന്‍റ് മാനേജർ ഫാ. വർഗീസ് ചിറയിൽ അധ്യക്ഷത വഹിച്ചു. ഡോ. ബിനു കണ്ണന്താനം മുഖ്യപ്രഭാഷണം നടത്തി. വാഴൂർ എസ്‌വിആർ എൻഎസ്എസ് കോളജ് പ്രിൻസിപ്പൽ ഡോ. ഗംഗാദത്തൻ നായർ, ഹെഡ്മിസ്ട്രസ് പി.എസ്. മിനിമോൾ, പിടിഎ പ്രസിഡന്‍റ് എൻ.എ. ബിനോയി ഞാറക്കാട്ടിൽ, പ്രോഗ്രാം കൺവീനർ ജോസഫ് ആന്‍റണി ആലപ്പാട്ട്, അധ്യാപകരായ ജിജി കെ. ജോസ്, മനോജ് ചാക്കോ, ജെറിൻ തോമസ്, അനീഷ് കെ. തോമസ്, ദിവ്യമോൾ വർഗീസ്, എം.എ. ത്രേസ്യാമ്മ , എബിൻ മാത്യു തുടങ്ങിയവർ എന്നിവർ പ്രസംഗിച്ചു.

ഫിറ്റ്നസ് നഷ്ടപ്പെട്ട സ്കൂൾ കെട്ടിടം വിദ്യാർഥികളുടെ ജീവന് ഭീഷണിയാകുന്നു

കാഞ്ഞിരപ്പള്ളി: കപ്പാട് ഗവ. ഹൈസ്കൂളിലെ ഫിറ്റ്നസ് നഷ്ടപ്പെട്ട കെട്ടിടം വിദ്യാർഥികളുടെ ജീവന് ഭീഷണിയാകുന്നു. കെട്ടിടം പൊളിച്ചുമാറ്റാൻ ഇതുവരെ നടപടിയില്ല. അര നൂറ്റാണ്ടിലേറെ പഴക്കമുള്ള കെട്ടിടത്തിന്‍റെ ഒരു ഭാഗത്തെ മേൽക്കൂര അടക്കം തകർന്ന നിലയിലാണ് ഇപ്പോൾ. മുന്പ് എൽപി വിഭാഗം പ്രവർത്തിച്ചിരുന്ന കെട്ടിടമാണ് ഫിറ്റ്നസ് നഷ്ടപ്പെട്ട് അപകടാവസ്ഥയിൽ സ്ഥിതി ചെയ്യുന്നത്. കഴിഞ്ഞ അധ്യയന വർഷാരംഭത്തിൽ ഇതിന് ഫിറ്റ്നസ് ലഭിച്ചിരുന്നെങ്കിലും ജൂലൈ ആദ്യവാരമുണ്ടായ മഴയിൽ മേൽക്കൂരയുടെ ഒരു ഭാഗം നിലംപൊത്തുകയായിരുന്നു. ഇതോടെ ഫിറ്റ്നസ് നഷ്ടമായ കെട്ടിടം പൊളിച്ചുനീക്കാൻ തീരുമാനിച്ചു. തുടർ നടപടികൾക്കായി സ്കൂൾ അധികൃതർ പലതവണ ജില്ലാ പഞ്ചായത്ത്, പഞ്ചായത്ത് അധികാരികൾക്ക് കത്ത് നൽകിയെങ്കിലും നടപടികൾ ഒന്നും ഉണ്ടായിട്ടില്ല. കെട്ടിടത്തിന് വിലയിട്ട് നൽകാത്താതാണ് പൊളിക്കൽ നടപടികൾ വൈകാൻ കാരണമെന്നാണ് ആക്ഷേപം. ഏതു നിമിഷവും നിലംപൊത്താവുന്ന കെട്ടിടം സ്കൂളിലെ വിദ്യാർഥികളുടെ ജീവനുതന്നെ ഭീഷണിയാകുന്ന സ്ഥിതിയാണ്. കുട്ടികൾ കൈ കഴുകാനായി എത്തുന്ന വാഷ്ബേസിനടക്കം ഉള്ളത് ഈ കെട്ടിടത്തിലാണ്. കൂടാതെ ഇടവേളകളെല്ലാം കുട്ടികൾ ചെലവഴിക്കുന്നതും അപകടാവസ്ഥയിലായ ഈ കെട്ടിടത്തിന് സമീപമാണ്. 2019ൽ പണികഴിപ്പിച്ച പുതിയ കെട്ടിടവും ഇതിനോടു ചേർന്നാണ് സ്ഥിതിചെയ്യുന്നത്. 50 വർഷത്തിലേറെ പഴക്കമുള്ള മറ്റൊരു കെട്ടിടം കൂടി ഈ സ്കൂളിലുണ്ട്. ജില്ലാ പഞ്ചായത്തിൽ നിന്നനുവദിച്ച 15 ലക്ഷം രൂപ വിനിയോഗിച്ച് ഇതിന്‍റെ മേൽക്കൂരയിലെ ഓടുകൾ മാറ്റി ഷീറ്റുകൾ മേയുന്ന ജോലികൾ നടന്നുവരുന്നുണ്ട്. എന്നാൽ, ഈ കെട്ടിടത്തിലെ തകരാറിലായ വയറിംഗ് മാറ്റി സ്ഥാപിക്കാനോ സീലിംഗ് ചെയ്യാനോ ഫണ്ടനുവദിക്കാത്ത സ്ഥിതിയാണ്. പ്രീ പ്രൈമറി മുതൽ ഹൈസ്കൂൾ വിഭാഗങ്ങളിൽ വരെയായി 198 വിദ്യാർഥികൾ ഇവിടെ പഠിക്കുന്നുണ്ട്.

പ്രതിപക്ഷ ആരോപണം രാഷ്‌ട്രീയപ്രേരിതം: ചീഫ് വിപ്പ് ഡോ. എൻ. ജയരാജ്

കാഞ്ഞിരപ്പള്ളി: കാഞ്ഞിരപ്പള്ളി ബൈപാസിന്‍റെ നിർമാണം നിര്‍ത്തിവച്ചതുമായി ബന്ധപ്പെട്ട് പുറത്തുവന്നിട്ടുള്ള ആരോപണങ്ങള്‍ അവാസ്തവവും രാഷ്‌ട്രീയപ്രേരിതവുമാണെന്ന് ചീഫ് വിപ്പ് ഡോ. എൻ. ജയരാജ്. അനുവദിച്ച തുക അപര്യാപ്തമാണെന്ന ആരോപണം യാഥാർഥ്യം മനസിലാക്കാതെയുള്ളതാണ്. 78.69 കോടി രൂപയാണ് പദ്ധതിക്കായി ആകെ ഭരണാനുമതി കിഫ്ബിയില്‍നിന്ന് ലഭിച്ചിട്ടുള്ളത്. 24.76 കോടി രൂപയാണ് സ്ഥലമേറ്റെടുക്കലിന് ആകെ ചെലവായിട്ടുള്ളത്. റോഡ് രൂപീകരിക്കുന്നതിനും ഫ്ലൈഓവര്‍ നിര്‍മാണത്തിനുമായി ആകെ കണക്കാക്കിയിട്ടുള്ള തുക 26.17 കോടി രൂപയാണ്. പദ്ധതിയുമായി ബന്ധപ്പെട്ട് ദേശീയതലത്തില്‍ ഇ-ടെൻഡര്‍ ചെയ്തതില്‍ പ്രസ്തുത തുകയില്‍നിന്ന് 1.63 ശതമാനം കുറവ് ക്വോട്ട് ചെയ്ത കരാറുകാരന് എഗ്രിമെന്‍റ് ഒപ്പിട്ട ശേഷം തുക അപര്യാപ്തമാണെന്ന വാദത്തിന് യാതൊരു അടിസ്ഥാനവുമില്ല. 2023 ഓഗസ്റ്റ് മൂന്നിന് എഗ്രിമെന്‍റ് ഒപ്പിട്ട കരാറുകാരന് പദ്ധതി പൂര്‍ത്തിയാക്കാന്‍ അനുവദിച്ച സമയം 2025 ഫെബ്രുവരി ഒന്പതിന് അവസാനിച്ചതാണ്. കിഫ്ബിയുടെ ഗുണപരിശോധനാ സെല്‍ പരിശോധിച്ചതില്‍ നിര്‍മാണത്തിന്‍റെ 40 ശതമാനം മാത്രമാണ് പൂര്‍ത്തിയാക്കിയതായി കണ്ടെത്തിയത്. തുടര്‍ന്ന് ശക്തമായ താക്കീത് നല്‍കുകയും 2025 ജൂണ്‍ 30 വരെ താത്കാലികമായി കാലാവധി നീട്ടിക്കൊടുക്കുകയും ചെയ്തു. എന്നിട്ടും കരാറുകാരന്‍ പ്രവൃത്തി ചെയ്യുന്നതില്‍ ലക്ഷ്യം കൈവരിക്കാന്‍ സാധിക്കാത്ത സ്ഥിതി എംഎല്‍എ എന്ന നിലയില്‍ കിഫ്ബിയുടെ ശ്രദ്ധയില്‍ കൊണ്ടുവരികയും കരാറുകാരനെ ഒഴിവാക്കാന്‍ തീരുമാനത്തിലെത്തുകയും ചെയ്തു. നിലവിലെ കരാറുകാരനെ തന്നെ ചുമതല ഏല്‍പ്പിച്ചാല്‍ ഒരു വര്‍ഷം കഴിഞ്ഞാലും പദ്ധതി ഇതേ നിലവാരത്തില്‍ മാത്രമേ തുടരൂ എന്ന ബോധ്യത്തിലാണ് കരാറുകാരനെതിരേ നടപടികള്‍ സ്വീകരിച്ചത്. വസ്തുതകള്‍ ഇതായിരിക്കേ പ്രതിപക്ഷം ഇക്കാര്യത്തില്‍ കരാറുകാരന്‍റെ ഭാഗം കേട്ടില്ലെന്ന ആരോപണം ഉന്നയിക്കുന്നതിലെ സാംഗത്യം മനസിലാകുന്നില്ല. സമയബന്ധിതമായി പദ്ധതി പൂര്‍ത്തിയാക്കാത്ത കരാറുകാരനെ സംരക്ഷിക്കേണ്ട ബാധ്യത സര്‍ക്കാരിനില്ല. എത്രയും വേഗം പദ്ധതി യാഥാർഥ്യമാകാന്‍ റീടെൻഡര്‍ നടപടികള്‍ ത്വരിതപ്പെടുത്തുന്നതിന് എല്ലാ ശ്രമങ്ങളും നടന്നുവരുന്നതായും ചീഫ് വിപ്പ് ഡോ. എൻ. ജയരാജ് അറിയിച്ചു.

കാഞ്ഞിരപ്പള്ളി ബൈപാസ്: യുഡിഎഫ് റീത്ത് വച്ച് പ്രതിഷേധിച്ചു

കാഞ്ഞിരപ്പള്ളി: കാഞ്ഞിരപ്പള്ളിയുടെ സ്വപ്ന പദ്ധതിയായ ബൈപാസ് നിർമാണം അട്ടിമറിക്കുന്നുവെന്ന് ആരോപിച്ച് യുഡിഎഫ് കാഞ്ഞിരപ്പള്ളി മണ്ഡലം കമ്മിറ്റിയുടെ നേതൃത്വത്തിൽ ബൈപാസിനു വേണ്ടി ഭാഗികമായി നിർമിച്ച പാലത്തിന്‍റെ പില്ലറുകളിൽ റീത്ത് വച്ച് പ്രതിഷേധിച്ചു. സിവിൽ സ്റ്റേഷനു മുന്നിൽനിന്നു പ്രകടനമായി എത്തിയാണ് യുഡിഎഫ് പ്രവർത്തകർ പ്രതിഷേധിച്ചത്. തുടർന്ന് നടന്ന പ്രതിഷേധ യോഗം കേരള കോൺഗ്രസ് സംസ്ഥാന സമിതി അംഗം തോമസ് കുന്നപ്പള്ളി ഉദ്ഘാടനം ചെയ്തു. യുഡിഎഫ് മണ്ഡലം ചെയർമാൻ ജോയ് മുണ്ടാംപള്ളി അധ്യക്ഷത വഹിച്ചു. ഡിസിസി ജനറൽ സെക്രട്ടറി പി.എ. ഷമീർ മുഖ്യപ്രഭാഷണം നടത്തി. മുസ്‌ലിം ലീഗ് സംസ്ഥാന സമിതി അംഗം വി.എസ്. അജ്മൽ ഖാൻ, ഡിസിസി ജനറൽ സെക്രട്ടറി പ്രഫ. റോണി കെ. ബേബി, യുഡിഎഫ് മണ്ഡലം കൺവീനർ ബിജു പത്യാല , സെക്രട്ടറി നാസർ കോട്ടവാതുക്കൽ, യുഡിഎഫ് നേതാക്കളായ രഞ്ജു തോമസ്, ഒ.എം. ഷാജി, നായിഫ് ഫൈസി, സ്റ്റനിസ്ലാവോസ് വെട്ടിക്കാട്ട്, ലാൽജി മാടത്താനിക്കുന്നേൽ, ബിനു കുന്നുംപുറം, ദിലീപ് ചന്ദ്രൻ, അജ്മൽ പാറക്കൽ, ഡാനി ജോസ്, ബിജു ശൗര്യാംകുഴിയിൽ, വി.എസ്. അനുഷു മോൻ, നസീമ ഹാരിസ്, ജാൻസി ജോർജ്, ഫസിലി കോട്ടവാതിൽക്കൽ, സജി ഇല്ലത്തുപറമ്പിൽ എന്നിവർ പ്രസംഗിച്ചു.

അങ്കണവാടിക്ക് പുതിയ കെട്ടിടം

മാടപ്പള്ളി: മാടപ്പള്ളി പഞ്ചായത്ത് മോസ്‌കോയിലെ 34-ാം നമ്പര്‍ അങ്കണവാടിയുടെ പുതിയ കെട്ടിടം നാളെ ഉച്ചയ്ക്ക് 12ന് മന്ത്രി വി.എന്‍. വാസവന്‍ ഉദ്ഘാടനം ചെയ്യും. ജോബ് മൈള്‍ എംഎല്‍എ അധ്യക്ഷത വഹിക്കും. ജില്ലാ പഞ്ചായത്തംഗം മഞ്ജു സുജിത്ത്, മാടപ്പള്ളി ബ്ലോക്ക് പഞ്ചായത്ത് പ്രസിഡന്‍റ് എന്‍. രാജു, മാടപ്പള്ളി പഞ്ചായത്ത് പ്രസിഡന്‍റ് മണിയമ്മ രാജപ്പന്‍, വൈസ് പ്രസിഡന്‍റ് തങ്കമ്മ ശശിധര മേനോന്‍, പഞ്ചായത്തംഗങ്ങളായ പി.എ. ബിന്‍സണ്‍, ആന്‍സി ജോസഫ്, ബാബു പാറയില്‍, ബ്ലോക്ക് പഞ്ചായത്തംഗം ബിന്ദു ജോസഫ്, പഞ്ചായത്തംഗങ്ങളായ പി.എം. നൗഫീല്‍, സെലീനാമ്മ തോമസ്, അന്നമ്മ, ജി. അശോക്, സുജാത സാബു, ജോര്‍ജുകുട്ടി കൊഴുപ്പക്കളം, വി.വി. വിനയകുമാര്‍ തുടങ്ങിയവര്‍ പങ്കെടുക്കും. മോസ്‌കോ ചേരിയ്ക്കലില്‍ ഡോ. മാത്യു മാത്യു സൗജന്യമായി വിട്ടുനല്‍കിയ മൂന്നു സെന്‍റ് സ്ഥലത്താണ് കെട്ടിടം നിര്‍മിച്ചിരിക്കുന്നത്.

ലഹരിക്കെതിരേ പ്രതിജ്ഞയെടുത്തു

ചങ്ങനാശേരി: കേരള സ്റ്റേറ്റ് ഭാരത് സ്‌കൗട്‌സ് ആന്‍ഡ് ഗൈഡ്‌സ് ചങ്ങനാശേരി ലോക്കല്‍ അസോസിയേഷന്‍റെ നേതൃത്വത്തില്‍ ലഹരിവിരുദ്ധ റാലിയും ബോധവത്കരണ സെമിനാറും സംഘടിപ്പിച്ചു. നഗരസഭാ കവാടത്തില്‍നിന്നാരംഭിച്ച റാലി മുനിസിപ്പല്‍ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍ ഫ്‌ളാഗ് ഓഫ് ചെയ്തു. നഗരത്തില്‍ നൂറുകണക്കിന് സ്‌കൗട്ട്-ഗൈഡ് അംഗങ്ങള്‍ മനുഷ്യച്ചങ്ങല നിര്‍മിച്ചതിനെത്തുടര്‍ന്ന് സെന്‍റ് ജോസഫ് ഹയര്‍ സെക്കന്‍ഡറി സ്‌കൂള്‍ ഓഡിറ്റോറിയത്തില്‍ പൊതുസമ്മേളനം നടന്നു. എഇഒ കെ.എ. സുനിത അധ്യക്ഷത വഹിച്ച സമ്മേളനം ജോബ് മൈക്കിള്‍ എംഎല്‍എ ഉദ്ഘാടനം ചെയ്തു. എക്‌സൈസ് പ്രിവന്‍റീവ് ഓഫീസര്‍ രാജേഷ് യുവജനങ്ങളിലെ ലഹരി ദുരുപയോഗം എന്ന വിഷയത്തില്‍ സെമിനാര്‍ നയിച്ചു. മുന്‍സിപ്പല്‍ കൗണ്‍സിലര്‍ ബീനാ ജോബി, ഡിസ്ട്രിക് കമ്മീഷണര്‍ ആന്‍സി മേരി ജോണ്‍, സിസ്റ്റര്‍ ധന്യ തെരേസ്, അമ്പിളി വി, നന്ദകുമാര്‍ സി, പി.ആര്‍. സുധീര്‍, ജോസഫ് വര്‍ഗീസ് എന്നിവര്‍ പ്രസംഗിച്ചു.

നഗരസഭയില്‍ എല്‍ഡിഎഫ്-യുഡിഎഫ് അഡ്ജസ്റ്റ്‌മെന്‍റ്: പി.സി. ജോര്‍ജ്

ചങ്ങനാശേരി: നഗരസഭയില്‍ എല്‍ഡിഎഫും യുഡിഎഫും തമ്മില്‍ അന്തര്‍ധാര പ്രവര്‍ത്തനവും അഡ്ജസ്റ്റുമെന്‍റുകളും നടക്കുന്നുണ്ടെന്നും നഗരസഭയില്‍ അഴിമതി നടത്തുന്നവര്‍ ആരായാലും അവരെ പിടിച്ചിറക്കണമെന്നും ബിജെപി ദേശീയ സമിതി അംഗം പി.സി. ജോര്‍ജ്. നഗരസഭയിലെ അഴിമതിക്കും കെടുകാര്യസ്ഥതയ്ക്കുമെതിരേ ബിജെപി നഗര കമ്മിറ്റികളുടെ നേതൃത്വത്തില്‍ പെരുന്ന ബസ് സ്റ്റാന്‍ഡില്‍ സംഘടിപ്പിച്ച സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. കെടുകാര്യസ്ഥതയ്ക്കും നിസംഗ നിലപാടുകള്‍ക്കുമെതിരേ തുടര്‍സമരങ്ങളുണ്ടാകണം. യുഡിഎഫില്‍നിന്നു മൂന്നു കൗണ്‍സിലര്‍ കൂറുമാറി എല്‍ഡിഎഫിലേക്കു പോയിട്ട് കോണ്‍ഗ്രസ് എന്താണ് അനങ്ങാതെയിരിക്കുന്നതെന്നും പി.സി. ജോര്‍ജ് ചോദിച്ചു. മണ്ഡലം പ്രസിഡന്‍റ് ഗോപന്‍ മണിമുറി അധ്യക്ഷത വഹിച്ചു. സംസ്ഥാന സമിതി അംഗം ബി. രാധാകൃഷ്ണമേനോന്‍, എം.ബി. രാജഗോപാല്‍, പി.എസ്. ശ്രീധരന്‍, എന്‍.പി. കൃഷ്ണകുമാര്‍, പി.ആര്‍. വിഷ്ണു ദാസ്, പ്രസന്നകുമാരി, വിജയലക്ഷ്മി കൃഷ്ണകുമാര്‍, പി.പി. ധീരസിംഹന്‍ തുടങ്ങിയവര്‍ പ്രസംഗിച്ചു.

ദൈവദാസന്‍ മാര്‍ കാവുകാട്ടിന്‍റെ 121-ാം ജന്മദിനാചരണം

ചങ്ങനാശേരി: ദൈവദാസന്‍ മാര്‍ മാത്യു കാവുകാട്ടിന്‍റെ 121-ാം ജന്മദിനം ചങ്ങനാശേരി മെത്രാപ്പോലീത്തന്‍ പള്ളിയിലുള്ള മര്‍ത്ത്മറിയം കബറിട പള്ളിയില്‍ ആചരിച്ചു. അതിരൂപത വികാരി ജനറാൾ മോണ്‍. സ്‌കറിയാ കന്യാകോണില്‍ തിരുക്കര്‍മങ്ങള്‍ക്ക് മുഖ്യകാര്‍മികത്വം വഹിച്ചു. വിശുദ്ധ കുര്‍ബാനയ്ക്ക് മുമ്പായി ദൈവദാസന്‍റെ കബറിടത്തിങ്കല്‍ പ്രത്യേക പ്രാര്‍ഥന ശുശ്രൂഷകള്‍ നടത്തി. നേര്‍ച്ചഭക്ഷണം കത്തീഡ്രല്‍ വികാരി ഫാ. ജോസഫ് വാണിയപ്പുരയ്ക്കല്‍ ആശീര്‍വദിച്ചു. നാമകരണ നടപടികളുടെ വൈസ് പോസ്റ്റുലേറ്റര്‍ ഫാ. ജോണ്‍ പ്ലാത്താനം, കത്തീഡ്രല്‍ പള്ളി അസിസ്റ്റന്‍റ് വികാരിമാര്‍, കൈക്കാരന്മാര്‍ എന്നിവര്‍ വിവിധ പരിപാടികള്‍ക്കു നേതൃത്വം നല്‍കി.

ളായിക്കാട്-പാലാത്രച്ചിറ ബൈപാസില്‍ യാത്ര സുരക്ഷിതമല്ലെന്ന്

ചങ്ങനാശേരി: ളായിക്കാട്-പാലാത്രച്ചിറ ബൈപാസില്‍ വാഹനസഞ്ചാരികള്‍ക്കും കാല്‍നടയാത്രക്കാര്‍ക്കും സുരക്ഷയില്ലെന്ന ആക്ഷേപം ഉയരുന്നു. വര്‍ധിച്ചുവരുന്ന തട്ടുകടകളും തട്ടുകടകള്‍ക്കു മുമ്പില്‍ റോഡിലേക്കിറക്കി വയ്ക്കുന്ന വാഹനങ്ങളും വഴിവിളക്കുകള്‍ തെളിയാത്തതുമാണ് പ്രധാന പ്രശ്നം. തട്ടുകടകള്‍ക്കു മുമ്പില്‍ അലക്ഷ്യമായി പാര്‍ക്ക് ചെയ്യുന്ന വാഹനങ്ങളും വട്ടംകൂടി നില്‍ക്കുന്ന ആളുകളുമാണ് വേഗത്തില്‍ റോഡിലൂടെയെത്തുന്ന വാഹനങ്ങള്‍ ക്ക് അപകടഭീഷണിയാകുന്നത്. കഴിഞ്ഞദിവസം രാത്രി തട്ടുകടകള്‍ക്കു മുമ്പില്‍ അലക്ഷ്യമായി പാര്‍ക്ക് ചെയ്തിരുന്ന സ്‌കൂട്ടറുകളില്‍ ബൈക്കിടിച്ചു മറിഞ്ഞ് റോഡിലേക്കു തെറിച്ചുവീണ ബൈക്ക് യാത്രികനു ഗുരുതര പരിക്കേറ്റിരുന്നു. രാത്രി ഒമ്പതിന് മോര്‍ക്കുളങ്ങരയ്ക്കും പാലാത്രച്ചിറയ്ക്കുമിടയിലാണ് അപകടം. പോലീസ് എത്തിയാണ് യുവാവിനെ ആംബുലന്‍സില്‍ ആശുപത്രിയില്‍ പ്രവേശിപ്പിച്ചത്. ബൈപാസില്‍ രാത്രികാല പോലീസ് പട്രോളിംഗ് വേണം ബൈപാസില്‍ രാത്രികാലങ്ങളില്‍ ക്രിമിനല്‍, ലഹരി സംഘങ്ങൾ പ്രവര്‍ത്തിക്കുന്നതായി വ്യാപകമായ പരാതിയുണ്ട്. റെയില്‍വേ സ്റ്റേഷനു സമീപത്തും ളായിക്കാട് ഭാഗത്തും രാത്രികാലങ്ങളില്‍ വ്യാപകമായ രീതിയില്‍ കക്കൂസ് മാലിന്യങ്ങളും മറ്റും തള്ളുന്ന സംഘങ്ങളും പ്രവര്‍ത്തിക്കുന്നുണ്ട്. ബൈപാസിൽ രാത്രികാലത്ത് പോലീസ് പട്രോളിംഗും നഗരസഭാ ആരോഗ്യസ്‌ക്വാഡിന്‍റെ പരിശോധനയും വേണമെന്ന ആവശ്യം ശക്തമാണ്. ചങ്ങനാശേരി-വാഴൂര്‍ റോഡിന്‍റെ വിവിധ ഭാഗങ്ങളിലും റോഡിലേക്കിറക്കി പ്രവര്‍ത്തിക്കുന്ന വഴിവാണിഭങ്ങള്‍ വാഹനസഞ്ചാരികള്‍ക്ക് ഭീഷണിയാകുന്നുണ്ട്. വാഹനങ്ങള്‍ക്കും കാല്‍നട സഞ്ചാരികള്‍ക്കും ബുദ്ധിമുട്ടുണ്ടാകുന്ന തരത്തിലുള്ള വഴിവാണിഭങ്ങള്‍ക്കും തട്ടുകടകള്‍ക്കുമെതിരേ പോലീസും തദ്ദേശസ്ഥാപനങ്ങളും കര്‍ശന നടപടി സ്വീകരിക്കണമെന്നാണ് ആവശ്യം.

ബ്ലഡ് ഡോണേഴ്‌സ് ഫോറം കേരള സ്ഥാപകന്‍ വിനോദ് ഭാസ്‌കരന് നാടിന്‍റെ അന്ത്യാഞ്ജലി

ചങ്ങനാശേരി: ബ്ലഡ് ഡോണേഴ്‌സ് ഫോറം കേരളയുടെ സ്ഥാപകനും കെഎസ്ആര്‍ടിസി കണ്ടക്ടറുമായ വിനോദ് ഭാസ്‌കരന് നാടിന്‍റെ പ്രണാമം. രാവിലെ ചങ്ങനാശേരി മുനിസിപ്പല്‍ ടൗണ്‍ ഹാളിലും കെഎസ്ആര്‍ടിസി ഡിപ്പോയിലും തുടര്‍ന്ന് പുഴവാത് വേട്ടടി മന്ദാരമംഗലം വീട്ടിലും പൊതുദര്‍ശനത്തിനു വച്ച അദ്ദേഹത്തിന്‍റെ മൃതദേഹത്തില്‍ കെഎസ്ആര്‍ടിസി ജീവനക്കാരും രാഷ്‌ട്രീയ, സാമൂഹിക, സാംസ്‌കാരിക നേതാക്കളും രക്തദാനക്കൂട്ടായ്മയിലെ സന്നദ്ധ ഭടന്മാരും ബന്ധുമിത്രാദികളും ആദരവര്‍പ്പിച്ചു. സംസ്ഥാനത്തിന്‍റെ വിവിധ ഭാഗങ്ങളില്‍നിന്നുള്ള ബ്ലഡ് ഡോണേഴ്‌സ് ഫോറം പ്രവര്‍ത്തകര്‍ ചേര്‍ന്നാണ് ഭൗതികദേഹം ടൗണ്‍ഹാളിലും കെഎസ്ആര്‍ടിസി ഡിപ്പോയിലും എത്തിച്ചത്. ജോബ് മൈക്കിള്‍ എംഎല്‍എ, മുനിസിപ്പല്‍ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍, ട്രിവാന്‍ട്രം സ്പിന്നിംഗ് മില്‍സ് ചെയര്‍മാന്‍ സണ്ണി തോമസ്, കേരള കോണ്‍ഗ്രസ് ഉന്നതാധികാരസമിതിയംഗം വി.ജെ. ലാലി, ഐഎന്‍ടിയുസി ജില്ലാ സെക്രട്ടറി ജോബ് വിരുത്തിക്കരി, മര്‍ച്ചന്‍റ് അസോസിയേഷന്‍ പ്രസിഡന്‍റ് ജോണ്‍സണ്‍ പ്ലാന്തോട്ടം, കെഎസ്ആര്‍ടിസി എടിഒ എസ്. രമേശ്, ഡിപ്പോ ജനറല്‍ കണ്‍ട്രോളിംഗ് ഇന്‍സ്‌പെക്ടര്‍ കെ.എ. തങ്കച്ചന്‍ തുടങ്ങിയവര്‍ ആദരവുകളര്‍പ്പിച്ചു. തുടര്‍ന്ന് കെഎസ്ആര്‍ടിസി ജീവനക്കാര്‍ വിനോദ് ഭാസ്‌കരന്‍റെ മൃതദേഹം പുഴവാതിലുള്ള വീട്ടിലെത്തിച്ചു. മൃതദേഹം എത്തിച്ചപ്പോള്‍ മാതാപിതാക്കളായ ഭാസ്‌കരന്‍-ഗോമതിയമ്മ, ഭാര്യ ഉഷ, മക്കളായ ആദിത്യന്‍, അനഘ, ആദര്‍ശ് എന്നിവരുടെ ദുഃഖം അണപൊട്ടിയൊഴുകി. ഉച്ചകഴിഞ്ഞു മൂന്നിന് വീട്ടുവളപ്പില്‍ മൃതദേഹം സംസ്‌കരിച്ചു. ബ്ലഡ് ഡോണേഴ്‌സ് ഫോറം കേരളയില്‍നിന്നു രക്തം സ്വീകരിച്ച നൂറുകണക്കിനാളുകളും ദീര്‍ഘദൂരം താണ്ടി സംസ്‌കാര ചടങ്ങിനെത്തി.

പൂവം നിവാസികള്‍ക്കു പ്രതീക്ഷ : അപ്രോച്ച് റോഡ് പുനര്‍നിര്‍മാണത്തിന് ₹ 5.1 കോടിയുടെ പുതുക്കിയ ഭരണാനുമതി

ചങ്ങനാശേരി: ചങ്ങനാശേരി താലൂക്കിലെ പെരുമ്പഴക്കടവ് പാലത്തിന്‍റെ അപ്രോച്ച് റോഡ് പുനര്‍നിര്‍മാണത്തിന് 5.1 കോടി രൂപയുടെ പുതുക്കിയ ഭരണാനുമതി നല്കി ഉത്തരവിറങ്ങിയതായി ജോബ് മൈക്കിള്‍ എംഎല്‍എ അറിയിച്ചു. ഈ പ്രവൃത്തി സംബന്ധിച്ച് മൂന്നരക്കോടി രൂപയുടെ ഭരണാനുമതിയു‌ടെ കാലാവധി അവസാനിച്ചതിനെത്തുടര്‍ന്ന് നാലു കോടി രൂപയുടെ ഭരണാനുമതിയും ഇറങ്ങിയിരുന്നു. ഈ പ്രവൃത്തി സംബന്ധിച്ച് നിരവധി തവണ ടെന്‍ഡര്‍ വിളിച്ചിരുന്നെങ്കിലും ആരും ടെന്‍ഡര്‍ നടപടികളില്‍ പങ്കെടുത്തിരുന്നില്ല. അതിന്‍റെ കാലാവധി അവസാനിച്ച ഘട്ടത്തിലാണ് ഒരു കോടി ഒരു ലക്ഷം കൂടി അധികമായി ലഭ്യമാക്കിക്കൊണ്ട് ഇപ്പോള്‍ പുതിയ ഭരണാനുമതി ലഭിച്ചിരിക്കുന്നത്. പൂവം പ്രദേശത്തെ ചങ്ങനാശേരിയുമായി ബന്ധിപ്പിക്കുന്ന ഏക പൊതുഗതാഗത മാര്‍ഗമായതിനാല്‍ പ്രവൃത്തിയുടെ അടിയന്തര പ്രാധാന്യം അധികാരികാരികളുടെ ശ്രദ്ധയില്‍ തുടര്‍ച്ചയായി പെടുത്തിയതിന്‍റെ ഫലമായാണ് അധിക തുക അനുവദിക്കാന്‍ ഉത്തരവായത്.

വിധവകളും രോഗികളുമായ രണ്ട് അമ്മമാരെക്കൂടി ഏറ്റെടുത്ത് നിത്യസഹായകന്‍റെ അമ്മവീട്

കടുത്തുരുത്തി: നിര്‍ധനരും ദരിദ്ര വിധവകളുമായ രണ്ടു കിടപ്പുരോഗികളെ ഏറ്റെടുത്ത് നിത്യസഹായകന്‍റെ അമ്മവീട്. മറവന്‍തുരുത്ത് പഞ്ചായത്തിലെ പത്താം വാര്‍ഡില്‍ ബ്ലാവില്‍ വീട്ടില്‍ താമസിച്ചിരുന്ന കവിത (50), മുളക്കുളം പഞ്ചായത്ത് രണ്ടാം വാര്‍ഡില്‍ ചന്ദ്രപ്പുരയ്ക്കല്‍ വീട്ടില്‍ ജന്മനാ അന്ധയും കിടപ്പുരോഗിയുമായ ലീലാമ്മ (62) എന്നിവരെയാണ് നിത്യസഹായകന്‍റെ അമ്മവീട് ഏറ്റെടുത്തത്. മറവന്തുരുത്ത് പഞ്ചായത്ത് പ്രസിഡന്‍റ് പ്രീതിയാണ് ഇവരുടെ ദയനീയാവസ്ഥ നിത്യസഹായകന്‍റെ ശ്രദ്ധയില്‍പ്പെടുത്തിയത്. കവിതയുടെ ഭര്‍ത്താവ് വേണുക്കുട്ടന്‍ വര്‍ഷങ്ങള്‍ക്കുമുമ്പ് പ്ലാവില്‍നിന്ന് വീണുണ്ടായ അപകടത്തിലാണ് മരിച്ചത്. വിധവയായ കവിത ഏറെ ദുരിതത്തിൽ കഴിയവെ ശരീരം തളര്‍ന്നു കിടപ്പിലായി. മുളക്കുളം പഞ്ചായത്ത് രണ്ടാം വാര്‍ഡ് വടുകുന്നപ്പുഴയില്‍ ലീലാമ്മ ജന്മനാ അന്ധയായിരുന്നു. സഹോദരന്‍റെ സംരക്ഷണയിലായിരുന്നു കഴിഞ്ഞിരുന്നത്. കിടപ്പിലായ സഹോദരിയെ നോക്കുവാനും ഉപജീവനമാര്‍ഗമായ ലോട്ടറിക്കച്ചവടത്തിനു പോകുവാനും സഹോദരന്‍ കൃഷ്ണന് കഴിയാത്ത അവസ്ഥയായി. ഇവരുടെ ദയനീയ സ്ഥിതി വാര്‍ഡ് മെംബര്‍ അജിത് കുമാറാണ് അറിയിച്ചത്. ട്രസ്റ്റ് പ്രസിഡന്‍റ് അനില്‍ ജോസഫും അമ്മവീട് സെക്രട്ടറി സിന്ധുവും കവിതയുടെയും ലീലാമ്മയുടെയും വീടുകള്‍ സന്ദര്‍ശിച്ചു. ഇരുവരെയും അമ്മവീട് പ്രവര്‍ത്തകര്‍ ഏറ്റെടുത്തു.

ജീവിതത്തിൽ എല്ലാ രംഗത്തും ഉമ്മൻചാണ്ടി എപ്ലസ് നേടി: മാത്യു കുഴൽനാടൻ എംഎൽഎ

വൈക്കം: ജീവിതത്തിൽ എല്ലാ രംഗത്തും എ പ്ലസ് നേടിയ വ്യക്തിയായിരുന്നു അന്തരിച്ച മുൻ മുഖ്യമന്ത്രി ഉമ്മൻ ചാണ്ടിയെന്ന് മാത്യു കുഴൽനാടൻ എംഎൽഎ. ടിവിപുരം മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ ടിവിപുരം പഞ്ചായത്ത് കമ്യൂണിറ്റി ഹാളിൽ സംഘടിപ്പിച്ച ഉമ്മൻ ചാണ്ടി അനുസ്മരണവും മെറിറ്റ് അവാർഡ് വിതരണവും നിർവഹിച്ചു പ്രസംഗിക്കുകയായിരുന്നു അദ്ദേഹം. കർമമണ്ഡലത്തിൽ നിതാന്ത പരിശ്രമത്തിലൂടെയാണ് ഉമ്മൻ ചാണ്ടി എപ്ലസ് നേടിയത്. വിദ്യാർഥികൾ അഭിരുചിക്കനുസരിച്ച് ഉപരിപഠനം നടത്തി സ്വപ്നങ്ങൾ സഫലമാക്കണമെന്നും മാത്യു കുഴൽനാടൻ കൂട്ടിച്ചേർത്തു. മണ്ഡലം കോൺഗ്രസ് കമ്മിറ്റി പ്രസിഡന്‍റ് ടി.എസ്. സെബാസ്റ്റ്യൻ അധ്യക്ഷത വഹിച്ചു. വിവിധ രംഗങ്ങളിൽ മികവ് തെളിയിച്ചവർക്ക് ഉപഹാരം നൽകി. മോഹൻ ഡി. ബാബു, പി.ഡി. ഉണ്ണി, ബി. അനിൽകുമാർ, അഡ്വ. എ. സനീഷ്കുമാർ, ആർ. ചന്ദ്രസേനൻ, കെ.ആർ. ഷൈലകുമാർ, എസ്. സാനു, പി.എ. സുധീരൻ, ടി. അനിൽകുമാർ, ഇടവട്ടം ജയകുമാർ,ശ്രീരാജ് ഇരുമ്പേപള്ളിൽ, വർഗീസ് പുത്തൻചിറ, ആർ. റോയ്, സ്കറിയആന്‍റണി, ബിജു കൂട്ടുങ്കൽ, വി.ടി. സത്യജിത്ത്, സന്തോഷ് ആഞ്ഞിലിക്കൽ, രമണൻ പയറാട്ട് തുടങ്ങിയവർ പ്രസംഗിച്ചു.

11 കെവി ലൈനില്‍ ഒടിഞ്ഞുതൂങ്ങിക്കിടക്കുന്ന മരക്കമ്പ് അപകടഭീഷണി ഉയര്‍ത്തുന്നു

ഞീഴൂര്‍: 11 കെവി ലൈനില്‍ ഒടിഞ്ഞുതൂങ്ങിക്കിടക്കുന്ന മരക്കമ്പ് അപകടഭീഷണി ഉയര്‍ത്തുന്നു. പലതവണ കെഎസ്ഇബിയെ അറിയിച്ചിട്ടും പ്രശ്‌നപരിഹാരത്തിന് നടപടിയില്ലെന്ന് നാട്ടുകാര്‍. കൂവേലി ജംഗ്ഷനില്‍ ഞീഴൂര്‍ സര്‍വീസ് സഹകരണ ബാങ്കിന് മുന്‍വശത്താണ് സംഭവം. 12 അടിയിലേറെ ഉയരമുള്ള തേക്കിന്‍റെ കമ്പാണ് വൈദ്യുതി ലൈനില്‍ തങ്ങിനില്‍ക്കുന്നത്. താഴോട്ടുള്ള ഭാഗം കൂര്‍ത്ത് നില്‍ക്കുന്നതാണ്. കാറ്റടിച്ചു താഴേക്കു വീഴൂന്ന കമ്പ് ആരുടെയെങ്കിലുംമേല്‍ വീണാല്‍ വലിയ അപകടത്തിന് സാധ്യതയുണ്ട്. വിദ്യാര്‍ഥികളടക്കം നിരവധിയാളുകള്‍ കടന്നുപോകുന്നത് ഇതുവഴിയാണെന്നത് അപകടസാധ്യത വര്‍ധിപ്പിക്കുന്നു.

വര്‍ണക്കൂടാരമൊരുക്കി മാഞ്ഞൂര്‍ ഗവ. എല്‍പി സ്‌കൂള്‍

കടുത്തുരുത്തി: പ്രീ -പ്രൈമറി രംഗത്ത് രാജ്യാന്തര നിലവാരമുള്ള പഠനസൗകര്യം ഒരുക്കുന്നതിനായി പൊതുവിദ്യാഭ്യാസ വകുപ്പ് സമഗ്ര ശിക്ഷ കേരള സ്റ്റാര്‍സ് പദ്ധതിയില്‍ പത്ത് ലക്ഷം രൂപ ചെലവഴിച്ചു നടപ്പാക്കുന്ന വര്‍ണക്കൂടാരം മാഞ്ഞൂര്‍ ഗവണ്‍മെന്‍റ് എല്‍പി സ്‌കൂളില്‍ ആരംഭിച്ചു. മോന്‍സ് ജോസഫ് എംഎല്‍എ വര്‍ണക്കൂടാരം ഉദ്ഘാടനം ചെയ്തു. മാഞ്ഞൂര്‍ പഞ്ചായത്ത് പ്രസിഡന്‍റ് കോമളവല്ലി രവീന്ദ്രന്‍ അധ്യക്ഷത വഹിച്ചു. ജില്ലാ പഞ്ചായത്ത് വൈസ് പ്രസിഡന്‍റ് ജോസ് പുത്തന്‍കാലാ, പഞ്ചായത്ത് വൈസ് പ്രസിഡന്‍റ് ബിജു സെബാസ്റ്റ്യന്‍, എസ്എസ്‌കെ ജില്ലാ പ്രോഗ്രാം കോ-ഓര്‍ഡിനേറ്റര്‍ കെ.ജെ. പ്രസാദ്, കുറവിലങ്ങാട് ഉപജില്ലാ വിദ്യാഭ്യാസ ഓഫീസര്‍ ജയചന്ദ്രന്‍പിള്ള, കുറവിലങ്ങാട് ബ്ലോക്ക് പ്രോഗ്രാം കോ-ഓര്‍ഡിനേറ്റര്‍ സതീഷ് ജോസഫ്, ഹെഡ്മിസ്ട്രസ് ജൂബി ജേക്കബ്, പിടിഎ പ്രസിഡന്‍റ് ദിനീഷ് കെ. പുരുഷോത്തമന്‍, അധ്യാപിക എ.ആര്‍. ലേഖ എന്നിവര്‍ പ്രസംഗിച്ചു.

ജാമ്യവ്യവസ്ഥ ലംഘിച്ച് ഒളിവില്‍ കഴിഞ്ഞിരുന്ന പ്രതിയെ പിടികൂടി

കോട്ടയം: ജാമ്യവ്യവസ്ഥ ലംഘിച്ച് ഒളിവില്‍ കഴിഞ്ഞിരുന്ന ഇരട്ടക്കൊലപാതകക്കേസിലെ പ്രതിയെ ബംഗളൂരുവില്‍നിന്നു കോട്ടയം വെസ്റ്റ് പോലീസ് പിടികൂടി. 2020 ജൂലൈയില്‍ മോഷണത്തിനായി കോട്ടയം താഴത്തങ്ങാടി പാറപ്പാടം ഷാനി മന്‍സിലില്‍ മുഹമ്മദ് സാലി (65), ഭാര്യ ഷീബ (60) എന്നിവരെ കൊല്ലപ്പെടുത്തിയ താഴത്തങ്ങാടി സ്വദേശി മുഹമ്മദ് ബിലാലിനെ (27)യാണ് പോലീസ് പിടികൂടിയത്. കേസില്‍ ജാമ്യത്തിലിറങ്ങിയശേഷം ബിലാല്‍ ഒളിവില്‍പ്പോകുകയായിരുന്നു. കഴിഞ്ഞ ഒരുവര്‍ഷമായി ഇയാള്‍ ഒളിവിലായിരുന്നു. ഇയാള്‍ ബംഗളൂരുവില്‍ ഉണ്ടെന്ന് വിവരം ലഭിച്ച പോലീസ് സൈബര്‍ സെല്ലിന്‍റെ സഹായത്തോടെ പ്രതിയെ അറസ്റ്റ് ചെയ്യുകയായിരുന്നു.

വൈക്കം-വെച്ചൂർ റോഡ് പുനരധിവാസ പാക്കേജിന് അംഗീകാരം

വൈക്കം: വൈക്കം - വെച്ചൂർ റോഡിനായി ഭൂമി ഏറ്റെടുക്കൽ പുനരധിവാസ പാക്കേജിന് അംഗീകാരം. കീഫ്ബി ധനസഹായത്തോടെ വീതികൂട്ടി ആധുനികരീതിയിൽ നിർമിക്കുന്ന വൈക്കം - വെച്ചൂർ റോഡിന്‍റെ ഭൂമി ഏറ്റെടുക്കൽ നടപടികളുടെ ഭാഗമായി വീടുകൾ, കടകൾ എന്നിവ പൂർണമായും നഷ്ടപ്പെടുന്നവർക്കും ഇതുമൂലം തൊഴിൽ നഷ്ടപ്പെടുന്നവർക്കും നൽകുന്ന പുനരധിവാസ പാക്കേജിന് ലാൻഡ് റവന്യു കമ്മീഷണർ അന്തിമ അനുമതി നൽകി. 95.28 ലക്ഷം രൂപയുടെ പുനരധിവാസ പാക്കേജിനാണ് അനുമതി ലഭിച്ചിരിക്കുന്നത്. തലയാഴം, വെച്ചൂർ പഞ്ചായത്തുകളിൽപ്പെട്ട 103 ഗുണഭോക്താക്കളെ കഴിഞ്ഞ ഫെബ്രുവരി 17 മുതൽ 20വരെ തീയതികളിലായി നേരിൽകണ്ട് ഡെപ്യൂട്ടി കളക്ടറുടെ നേതൃത്വത്തിലുള്ള സംഘം ആവശ്യമായ രേഖകൾ നേരിട്ടു പരിശോധിച്ചാണ് പുനരധിവാസ പാക്കേജിന് അന്തിമ രൂപം നൽകിയത്. വൈക്കം - വെച്ചൂർ റോഡിനായി 963 പേരിൽനിന്നായി ഏറ്റെടുക്കുന്ന 15 ഏക്കർ ഭൂമിയുടെ അവകാശികൾക്ക് ഭൂമിവില നൽകുന്നതിനുള്ള നടപടികൾ അന്തിമ ഘട്ടത്തിലാണ്. അതിനായി 85.77 കോടി രൂപ കിഫ്ബിയിൽനിന്നും റോഡ് നിർമിക്കുന്ന കെആർഎഫ്ബിക്ക് കൈമാറിക്കഴിഞ്ഞു. ഈ തുക കിഫ്ബി (എൽഎ) തഹസിൽദാർക്ക് കൈമാറിയശേഷം വസ്തു ഏറ്റെടുക്കക്കൽ സംബന്ധിച്ച് അന്തിമ ഗസറ്റ് വിജ്ഞാപനം പുറപ്പെടുവിക്കും. തുടർന്ന് 963 ഭൂവുടമകളുടെ രേഖകളുടെ നേരിട്ടുള്ള പരിശോധനയ്ക്കു ശേഷം ഉടൻതന്നെ വസ്തു ഉടമകൾക്ക് പണം കൈമാറാൻ കഴിയുമെന്ന് സി.കെ. ആശ അറിയിച്ചു.

പാലാ രൂപത ആഗോള പ്രവാസി സംഗമം "കൊയ്നോനിയ-2025' നാളെ

പാലാ: പാലാ രൂപത പ്രവാസി അപ്പൊസ്തലേറ്റിന്‍റെ നേതൃത്വത്തിലുള്ള ആഗോള പ്രവാസി സംഗമം "കൊയ്നോനിയ-2025' നാളെ ചൂണ്ടച്ചേരി സെന്‍റ് ജോസഫ് എൻജിനിയറിംഗ് കോളജില്‍ നടക്കും. വിവിധ രാജ്യങ്ങളില്‍നിന്നുള്ള പാലാ രൂപതാംഗങ്ങളായ പ്രവാസികളുടെ നാലാമത് ആഗോളസംഗമത്തിനുള്ള ഒരുക്കങ്ങള്‍ പൂര്‍ത്തീകരിച്ചു. നാളെ രാവിലെ ഒന്‍പതിന് സംഗമത്തിനെത്തുന്നവരുടെ രജിസ്ട്രേഷന്‍ ആരംഭിക്കും. 9.30ന് വിശുദ്ധ കുര്‍ബാന. 10.30ന് സമ്മേളനം ആരംഭിക്കും. സംഗമം പാലാ ബിഷപ് മാര്‍ ജോസഫ് കല്ലറങ്ങാട്ട് ഉദ്ഘാടനം ചെയ്യും. രൂപതാ മുഖ്യവികാരി ജനറാള്‍ മോണ്‍. ഡോ. ജോസഫ് തടത്തില്‍ അധ്യക്ഷത വഹിക്കും. പാലാ രൂപത പ്രവാസി അപ്പൊസ്തലേറ്റ് ഡയറക്ടര്‍ ഫാ. കുര്യാക്കോസ് വെള്ളച്ചാലില്‍ ആമുഖപ്രഭാഷണം നടത്തും. രൂപതാ വികാരി ജനറാള്‍ മോണ്‍. ഡോ. ജോസഫ് കണിയോടിക്കല്‍ സന്ദേശം നല്‍കും. പ്രവാസീ ഹെല്‍ത്ത് കെയര്‍ പദ്ധതി മിഡില്‍ ഈസ്റ്റ് കോ-ഓര്‍ഡിനേറ്റര്‍ സി.വി. പോള്‍ സംഗമത്തില്‍ അവതരിപ്പിക്കും. മിഡില്‍ ഈസ്റ്റ് സെക്രട്ടറി രജിത് മാത്യു സംവിധാനം ചെയ്ത ഡോക്യുമെന്‍ററി സംഗമത്തില്‍ പ്രദര്‍ശിപ്പിക്കും. വിവിധ മേഖലകളിലെ പ്രതിഭകളെ സംഗമത്തില്‍ ആദരിക്കും. കലാപരിപാടികളും നടത്തും. പാലാ രൂപത പ്രവാസി അപ്പൊസ്തലേറ്റ് അസിസ്റ്റന്‍റ് ഡയറക്ടര്‍മാരായ ഫാ. ജോര്‍ജ് നെല്ലിക്കല്‍, ഫാ. മാണി കൊഴുപ്പന്‍കുറ്റി,ഗ്ലോബല്‍ കോ-ഓര്‍ഡിനേറ്റര്‍ ഷാജിമോന്‍ മങ്കുഴിക്കരി, ജനറല്‍ കണ്‍വീനര്‍ മനോജ് പി. മാത്യു, സെന്‍ട്രല്‍ കോ-ഓര്‍ഡിനേറ്റര്‍ ജോഷി മാത്യു എന്നിവരുടെ നേതൃത്വത്തിലുള്ള കമ്മിറ്റികളാണ് സംഗമത്തിനുള്ള ക്രമീകരണങ്ങള്‍ പൂര്‍ത്തീകരിച്ചിട്ടുള്ളത്. പാലാ രൂപതയുടെ പ്ലാറ്റിനം ജൂബിലി വര്‍ഷത്തിലെ സംഗമമെന്നത് ഇക്കുറി ഇരട്ടി മധുരം സമ്മാനിച്ചിട്ടുണ്ട്. വിവിധ രാജ്യങ്ങളില്‍ ചെറിയ സമ്മേളനങ്ങള്‍ പൂര്‍ത്തീകരിച്ചാണ് രൂപതാതല സംഗമത്തിലേക്ക് പ്രവേശിക്കുന്നത്. കഴിഞ്ഞ വര്‍ഷം ഒട്ടേറെ വേറിട്ട കര്‍മപരിപാടികള്‍ പൂര്‍ത്തീകരിച്ചാണ് വാര്‍ഷിക സംഗമത്തിന് ആതിഥ്യമരുളന്നതെന്നതും ശ്രദ്ധേയം. പ്രഗത്ഭരായ അധ്യാപകര്‍ നേതൃത്വം നല്‍കുന്ന ട്രെയിനിംഗ് ആൻഡ് ഓറിയന്‍റേഷന്‍ പ്രോഗ്രാം (ടോപ്പ് ) ഫോര്‍ പ്രവാസി സ്റ്റുഡന്‍റ്സ്, പാലാ മെഡിസിറ്റിയുമായി ചേര്‍ന്ന് പ്രവാസി മെഡികെയര്‍ പ്രോഗ്രാം, ഓണ്‍ലൈന്‍ മെഡി ടോക്ക്സ്, 100 നിര്‍ധനര്‍ക്ക് വീല്‍ചെയര്‍, രൂപതാ ഭവനനിര്‍മാണ പദ്ധതിയായ ഹോം പാലായുമായി ചേര്‍ന്നുള്ള ഭവനനിര്‍മാണം എന്നിവ കഴിഞ്ഞ വര്‍ഷം നടപ്പിലാക്കാൻ കഴിഞ്ഞതായി രൂപതാ ഡയറക്ടര്‍ ഫാ. കുര്യാക്കോസ് വെള്ളച്ചാലില്‍ അറിയിച്ചു.

ജാമ്യവ്യവസ്ഥ ലംഘിച്ച് ഒളിവില്‍ കഴിഞ്ഞിരുന്ന പ്രതിയെ പിടികൂടി

കോട്ടയം: ജാമ്യവ്യവസ്ഥ ലംഘിച്ച് ഒളിവില്‍ കഴിഞ്ഞിരുന്ന ഇരട്ടക്കൊലപാതകക്കേസിലെ പ്രതിയെ ബംഗളൂരുവില്‍നിന്നു കോട്ടയം വെസ്റ്റ് പോലീസ് പിടികൂടി. 2020 ജൂലൈയില്‍ മോഷണത്തിനായി കോട്ടയം താഴത്തങ്ങാടി പാറപ്പാടം ഷാനി മന്‍സിലില്‍ മുഹമ്മദ് സാലി (65), ഭാര്യ ഷീബ (60) എന്നിവരെ കൊല്ലപ്പെടുത്തിയ താഴത്തങ്ങാടി സ്വദേശി മുഹമ്മദ് ബിലാലിനെ (27)യാണ് പോലീസ് പിടികൂടിയത്. കേസില്‍ ജാമ്യത്തിലിറങ്ങിയശേഷം കോടതി നടപടികള്‍ പുരോഗമിക്കവേ ബിലാല്‍ ഒളിവില്‍പ്പോകുകയായിരുന്നു. കഴിഞ്ഞ ഒരുവര്‍ഷമായി ഇയാള്‍ ഒളിവിലായിരുന്നു. ഇയാള്‍ ബംഗളൂരുവില്‍ ഉണ്ടെന്ന് വിവരം ലഭിച്ച പോലീസ് സൈബര്‍ സെല്ലിന്‍റെ സഹായത്തോടെ പ്രതിയെ അറസ്റ്റ് ചെയ്യുകയായിരുന്നു.

അതിരൂപത പ്രവാസി അപ്പൊസ്തലേറ്റ് 10-ാം വാര്‍ഷികവും പ്രവാസി സംഗമവും നാളെ

ചങ്ങനാശേരി: ചങ്ങനാശേരി അതിരൂപത പ്രവാസി അപ്പൊസ്തലേറ്റിന്‍റെ 10-ാമത് വാര്‍ഷികവും പ്രവാസി സംഗമവും നാളെ ചങ്ങനാശേരി സെന്‍റ് മേരീസ് കത്തീഡ്രല്‍ ഓഡിറ്റോറിയത്തില്‍ നടക്കും. കേന്ദ്രമന്ത്രി ജോര്‍ജ് കുര്യന്‍ ഉദ്ഘാടനം ചെയ്യും. ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിക്കും. ആര്‍ച്ച്ബിഷപ് മാര്‍ ജോസഫ് പെരുന്തോട്ടം, ആര്‍ച്ച്ബിഷപ് മാര്‍ ജോര്‍ജ് കോച്ചേരി എന്നിവര്‍ അനുഗ്രഹപ്രഭാഷണം നടത്തും. ജോബ് മൈക്കിള്‍ എംഎല്‍എ, അതിരൂപത വികാരി ജനറാള്‍മാരായ മോണ്‍. ആന്‍റണി എത്തക്കാട്ട്, മോണ്‍. മാത്യു ചങ്ങങ്കരി, ദേവമാതാ പ്രോവിന്‍സ് പ്രൊവിന്‍ഷ്യല്‍ സുപ്പീരിയര്‍ സിസ്റ്റര്‍ ബ്രിജി എഫ്‌സിസി, പ്രവാസി അപ്പൊസ്തലേറ്റ് അസിസ്റ്റന്‍റ് ഡയറക്ടര്‍ ഫാ. ജിജോ മാറാട്ടുകളം, ഗ്ലോബല്‍ കോ-ഓര്‍ഡിനേറ്റര്‍ ജോ കാവാലം, സെന്‍ട്രല്‍ കമ്മിറ്റി സെക്രട്ടറി ലൈസമ്മ ജോസ് എന്നിവര്‍ പ്രസംഗിക്കും. സമൂഹത്തില്‍ ക്രിയാത്മകമായ സേവനങ്ങള്‍ ചെയ്ത 13 പ്രവാസികളെയും പ്ലസ്ടു പരീക്ഷയില്‍ ഉന്നതവിജയം നേടിയ പ്രവാസികളുടെ മക്കളെയും സമ്മേളനത്തില്‍ ആദരിക്കും.

എഎസ്ഐഎസ്‌സി പൊതുയോഗം കെഇ സ്കൂളിൽ ചേർന്നു

മാന്നാനം: അസോസിയേഷൻ ഓഫ് സ്കൂൾസ് ഫോർ ദി ഇന്ത്യൻ സ്കൂൾ സർട്ടിഫിക്കറ്റ് (എഎസ്ഐഎസ്‌സി) പൊതുയോഗം മാന്നാനം കെഇ സ്കൂളിൽ ചേർന്നു. എഎസ്ഐഎസ്‌സി കേരള റീജൺ പ്രസിഡന്‍റ് ഫാ. സിൽവി ആന്‍റണി അധ്യക്ഷത വഹിച്ചു. സിഐഎസ്‌സി സെക്രട്ടറിയും ചീഫ് എക്സിക്യൂട്ടീവുമായ ഡോ. ജോസഫ് ഇമ്മാനുവൽ വിശിഷ്ടാതിഥിയായിരുന്നു. എഎസ്ഐഎസ്‌സി കേരള റീജൺ സെക്രട്ടറിയും ട്രഷററുമായ റവ. ഡോ. ജയിംസ് മുല്ലശേരി സിഎംഐ, വൈസ് പ്രസിഡന്‍റ് സിസ്റ്റർ ലിൻസി ജോർജ്, ഐസിഎസ്ഇ സ്കൂൾ പ്രിൻസിപ്പൽമാർ, അധ്യാപകർ തുടങ്ങിയവർ പങ്കെടുത്തു. എൻഇപി, സ്പോർട്സ്, ഗെയിംസ്, കല, പരിസ്ഥിതി പഠനം, കരിയർ-സൈക്കോളജിക്കൽ കൗൺസലിംഗ് തുടങ്ങിയ മേഖലകൾക്ക് പ്രാധാന്യം കൊടുത്തുകൊണ്ടുള്ള വിദ്യാഭ്യാസ രീതിക്ക് പ്രാമുഖ്യം കൊടുക്കുമെന്നും 2027 എത്തുമ്പോഴേക്കും പരീക്ഷകളിൽ 50 ശതമാനത്തോളം മത്സരാധിഷ്ഠിത ചോദ്യങ്ങൾക്ക് പ്രാധാന്യം നൽകിക്കൊണ്ടുള്ള വിദ്യാഭ്യാസമായിരിക്കും നടത്തുകയെന്നും ഡോ. ജോസഫ് ഇമ്മാനുവൽ പറഞ്ഞു.

ദേശീയതലത്തില്‍ ശുചിത്വ റാങ്കിംഗ് തിളക്കത്തില്‍ ജില്ലയിലെ നഗരസഭകള്‍

കോട്ടയം: ദേശീയതലത്തില്‍ നഗരസഭകള്‍ക്കുള്ള ശുചിത്വ സര്‍വേയായ സ്വച്ഛ് സര്‍വേഷനില്‍ ജില്ലയില്‍നിന്ന് ആദ്യമായി സിംഗിള്‍ സ്റ്റാര്‍ പദവി നേടി ഏറ്റുമാനൂര്‍, ഈരാറ്റുപേട്ട നഗരസഭകള്‍. തുറസായ സ്ഥലങ്ങളെ മലമൂത്ര വിസര്‍ജനരഹിത പ്രദേശങ്ങളാക്കി നിലനിര്‍ത്തിയതിലൂടെ ജില്ലയിലെ അഞ്ചു നഗരസഭകള്‍ ഒഡിഎഫ് പ്ലസ് പദവിയും കരസ്ഥമാക്കി. ശുചിത്വ മിഷനും നഗരസഭകളും സംയുക്തമായി പ്രവര്‍ത്തിച്ചതില്‍ ഹരിതകര്‍മസേന, ശുചീകരണത്തൊഴിലാളികള്‍ എന്നിവരുടെ സജീവമായ പ്രവര്‍ത്തനവും ചങ്ങനാശേരി നഗരസഭയിലും കുമരകത്തുമുള്ള മൊബൈല്‍ സെപ്‌റ്റേജ് ട്രീറ്റ്‌മെന്‍റ് യൂണിറ്റിന്‍റെ പ്രവര്‍ത്തനവും റാങ്കിംഗ് മുന്‍ വര്‍ഷത്തേക്കാള്‍ മെച്ചപ്പെടാന്‍ കാരണമായി. ഉറവിടമാലിന്യ സംസ്‌കരണ സംവിധാനങ്ങള്‍, എംസിഎഫ്, മിനി എംസിഎഫുകള്‍, ബോട്ടില്‍ ബൂത്തുകള്‍, പൊതുശൗചാലയങ്ങള്‍, ഹരിതടൗണ്‍, ഹരിതസ്ഥാപനങ്ങള്‍, ഇ-മാലിന്യശേഖരണം എന്നിവയും റാങ്കിംഗ് ഉയര്‍ത്തി. ചങ്ങനാശേരി നഗരസഭയില്‍ ജൈവമാലിന്യ സംസ്‌കരണത്തിനായി പ്രതിദിനം 30 ടണ്‍ ശേഷിയുള്ള സിഎന്‍ജി പ്ലാന്‍റ് സ്ഥാപിക്കല്‍, സാനിറ്ററി മാലിന്യങ്ങള്‍ ശാസ്ത്രീയമായി സംസ്‌കരിക്കുന്നതിനുള്ള ഡബിള്‍ ചേംബര്‍ ഇന്‍സിനറേറ്ററുകള്‍, സെപ്‌റ്റേജ് മാലിന്യങ്ങള്‍ സംസ്‌കരിക്കുന്നതിനുള്ള എഫ്എസ്ടിപി പദ്ധതി, ഹരിതകര്‍മസേന വഴി നഗരസഭാതലത്തില്‍ ഇ-മാലിന്യശേഖരണം മുതലായവയാണ് തുടര്‍ന്നുവരുന്ന പ്രവര്‍ത്തനങ്ങള്‍.

കെഎസ്ആര്‍ടിസി ബസും ബൈക്കും കൂട്ടിയിടിച്ച് യുവാവ് മരിച്ചു

വാഴൂര്‍: കെഎസ്ആര്‍ടിസി ബസും ബൈക്കും കൂട്ടിയിടിച്ച് ബൈക്ക് യാത്രികന്‍ മരിച്ചു. വാഴൂര്‍ നെടുമാവില്‍ താമസിക്കുന്ന ചാമംപതാല്‍ പനമൂട് സ്വദേശി കുമ്പുക്കല്‍ പരേതനായ സത്യന്‍റെ മകന്‍ സത്യരാജാ (ഗോപാലകൃഷ്ണന്‍, 33) ണു മരിച്ചത്. കൊടുങ്ങൂരിലെ ബിഎസ്എന്‍എല്‍ കരാര്‍ ജീവനക്കാരനാണ്. വ്യാഴാഴ്ച രാത്രി ഒന്പതിന് ദേശീയപാതയില്‍ ഇളപ്പുങ്കല്‍ പെന്‍ഷന്‍ ഭവന് സമീപമായിരുന്നു അപകടം. കൊടുങ്ങൂരില്‍നിന്നും നെടുമാവിലെ വീട്ടിലേക്ക് പോകുമ്പോള്‍ സത്യരാജ് സഞ്ചരിച്ച ബൈക്കും കോട്ടയത്തുനിന്നും വന്ന ബസുമായി കൂട്ടിയിടിക്കുകയായിരുന്നു. ഗുരുതരമായി പരിക്കേറ്റ സത്യരാജിനെ നാട്ടുകാര്‍ ചേര്‍ന്ന് കൊടുങ്ങൂരിലെ സ്വകാര്യാശുപത്രിയില്‍ പ്രവേശിപ്പിച്ചെങ്കിലും മരണപ്പെട്ടു. അമ്മ: ശ്യാമള. സഹോദരങ്ങള്‍: സത്യഭാമ, സത്യവതി. മൃതദേഹം മോര്‍ച്ചറിയില്‍.

ഉമ്മന്‍ ചാണ്ടി അനുസ്മരണം ഇന്ന്

അയര്‍ക്കുന്നം: അയര്‍ക്കുന്നം വികസനസമിതി ആറുമാനൂര്‍ വാര്‍ഡ്, ബൂത്ത് കോണ്‍ഗ്രസ് കമ്മിറ്റി, ഐഎന്‍ടിയുസി യൂണിയനുകള്‍ സംയുക്തമായി ഉമ്മന്‍ ചാണ്ടി അനുസ്മരണം സംഘടിപ്പിക്കും. ഇന്നു രാവിലെ 6.30ന് ആറുമാനൂര്‍ പാറേക്കാട് ജംഗ്ഷനിലെ സ്മൃതി മണ്ഡപത്തില്‍ പ്രാര്‍ഥന, തുടര്‍ന്നു പുഷ്പാര്‍ച്ചന, ലഘുഭക്ഷണം. ഉച്ചയ്ക്ക് ആറുമാനൂരിലെ ആകാശപ്പറവ അന്തേവാസികള്‍ക്ക് അന്നദാനവും നടത്തും. പരിപാടികള്‍ക്ക് അയര്‍ക്കുന്നം വികസനസമിതി പ്രസിഡന്‍റ് ജോയി കൊറ്റത്തില്‍, വൈസ് പ്രസിഡന്‍റ് ജോസ് വാതല്ലൂര്‍, സെക്രട്ടറി കെ.എസ്. മുരളീകൃഷ്ണന്‍, ജോയിന്‍റ്‍ സെക്രട്ടറി ഏബ്രഹാം ഫിലിപ്പ് കൊറ്റത്തില്‍, ബാബു തോട്ടം തുടങ്ങിയവര്‍ നേതൃത്വം നല്കും.

മെഡിക്കൽ കോളജ് ആശുപത്രിയിൽ രോഗികൾ തുണി അലക്കിയിടുന്നത് ശോച്യാവസ്ഥയിലായ കെട്ടിടത്തിനു സമീപം

ഗാന്ധിനഗർ: മെഡിക്കൽ കോളജ് ആശുപത്രിയിൽ ശോച്യാവസ്ഥയിലെന്നു കണ്ടെത്തിയ കെട്ടിടത്തിനു സമീപം രോഗികളും ബന്ധുക്കളും തുണിയലക്കി ഇടുകയും ഇരുചക്ര വാഹനങ്ങൾ പാർക്ക് ചെയ്യുകയും ചെയ്യുന്നു. മുമ്പ് 12, 13, 15, 17 വാർഡുകൾ പ്രവർത്തിച്ചിരുന്ന കെട്ടിടമാണ് ശോച്യാവസ്ഥയിലെന്നു കണ്ടെത്തിയിരിക്കുന്നത്. ഇതേത്തുടർന്ന് ഇവിടത്തെ രോഗികളെ പുതിയ സർജറി ബ്ലോക്കിലേക്ക് മാറ്റിയിരിക്കുകയാണ്. കെട്ടിടം അപകടാവസ്ഥയിലാണെന്നും വാഹനങ്ങൾ പാർക്ക് ചെയ്യരുതെന്നും ആശുപത്രി അധികൃതർ ഇവിടെ നോട്ടീസ് പതിച്ചിട്ടുണ്ട്. എന്നാൽ വിവിധ വാർഡുകളിലുള്ളവർ തുണിയലക്കി ഇടുന്നതും ഇരുചക്ര വാഹനങ്ങൾ പാർക്ക് ചെയ്യുന്നതും ഇവിടെയാണ്. ഈ കെട്ടിടത്തിന്‍റെ കിഴക്കേ ഭാഗമാണ് മൂന്നാഴ്ച മുമ്പ് ഇടിഞ്ഞുവീണ് തലയോലപ്പറമ്പ് സ്വദേശി ബിന്ദുവെന്ന വീട്ടമ്മ മരിച്ചത്. 10, 11, 14 വാർഡുകൾ പ്രവർത്തിച്ചിരുന്നത് ഇടിഞ്ഞുവീണ കെട്ടിടത്തിലായിരുന്നു. അവിടെയുണ്ടായിരുന്ന രോഗികളെയും സർജിക്കൽ ബ്ലോക്കിലേക്ക് മാറ്റിയിരിക്കുകയാണ്. കെട്ടിടത്തിന്‍റെ അപകടാവസ്ഥ കണക്കിലെടുത്താണ് ഇവിടെ വാഹനങ്ങൾ പാർക്ക് ചെയ്യരുതെന്ന നോട്ടീസ് പതിച്ചിരിക്കുന്നത്. എന്നാൽ, ഇതു ഗൗരവമായെടുക്കാതെയാണ് രോഗികളും ബന്ധുക്കളും ഇവിടെ തുണി അലക്കിയിടുന്നതും ഇരുചക്ര വാഹനം പാർക്ക് ചെയ്യുന്നതും.

എംസിഎച്ച്: വെള്ളക്കെട്ടിന് കാരണം പൈപ്പിന്‍റെ ജോയിന്‍റ് വിട്ടുപോയത്

ഗാന്ധിനഗർ: മെഡിക്കൽ കോളജിലെ പുതിയ സർജറി ബ്ലോക്കിലെ എ-വൺ മുറിയിൽ വെള്ളക്കെട്ടുണ്ടാകാൻ കാരണം മുകളിൽനിന്നു വരുന്ന പൈപ്പുലൈനിന്‍റെ എൽബോ ജോയിന്‍റ് വിട്ടുപോയതാണെന്ന് ആശുപത്രി അധികൃതർ. പഴയ സർജറി ബ്ലോക്കിന്‍റെ ശുചിമുറി തകർന്ന് വീട്ടമ്മ മരിക്കാനിടയായതിനെത്തുടർന്ന് ഈ കെട്ടിടത്തിൽ പ്രവർത്തിച്ചിരുന്ന ആറു വാർഡുകളും ഒരു തീവ്രപരിചരണ വിഭാഗവും പ്രധാന ശസ്ത്രക്രിയാ തിയറ്ററും ശസ്ത്രക്രിയാ ഉപകരണങ്ങൾ അണുവിമുക്തമാക്കുന്ന മുറിയും പുതിയ സർജറി ബ്ലോക്കിലേക്കു മാറ്റിയിരുന്നു. ശസ്ത്രക്രിയാ ഉപകരണങ്ങൾ അണുവിമുക്തമാക്കുന്ന സിഎസ്ആർ മുറിയിലേക്കാണ് മുകളിലത്തെ നിലകളിൽനിന്നു വെള്ളം ഒഴുകിപ്പതിച്ചത്. പൈപ്പുവെള്ളം ശക്തമായി ഒഴുകിയപ്പോൾത്തന്നെ സീലിംഗ് ഇളകിയത് എന്താണെന്ന് അന്വേഷിക്കുമെന്നും അധികൃതർ പറഞ്ഞു.

മെഡി. കോളജ് ആശുപത്രിയിൽ അറ്റകുറ്റപ്പണികളാരംഭിച്ചു

ഗാന്ധിനഗർ: മെഡിക്കൽ കോളജ് ആശുപത്രിയിൽ കെട്ടിടം തകർന്നു വീട്ടമ്മ മരിച്ചതോടെ വാർഡുകളുടെ അറ്റകുറ്റപ്പണി നടത്തുന്നതിനു തുടക്കമായി. കാലപ്പഴക്കത്തെത്തുടർന്ന് വാർഡുകളിലെ വാർക്ക പൊട്ടിപ്പൊളിഞ്ഞു കമ്പി കാണാവുന്നിടത്തെല്ലാം സിമന്‍റ് തേച്ച് അടയ്ക്കുകയാണ്. ഡയാലിസിസ് മുറിയുടെ സമീപത്താണ് ഇന്നലെ അറ്റകുറ്റപ്പണി നടന്നത്. അതേസമയം പൊട്ടിത്തകർന്ന ഭാഗത്ത് സിമന്‍റ് തേച്ച് മിനുക്കിയാൽ പോരാ കെട്ടിടത്തിന് ബലക്ഷയം ഉണ്ടോയെന്ന് പരിശോധിക്കണമെന്ന ആവശ്യമുയർന്നിട്ടുണ്ട്.

റോബോട്ടിക്‌സ് ആര്‍ട്ടിഫിഷല്‍ ഇന്‍റലിജന്‍റ്സ് സെന്‍റര്‍ സ്ഥാപിച്ചു

കോട്ടയം: ബിസിഎം കോളജില്‍ യുണീക് വേള്‍ഡ് റോബോട്ടിക്‌സിന്‍റെ സഹകരണത്തോടെ റോബോട്ടിക്‌സ് ആര്‍ട്ടിഫിഷല്‍ ഇന്‍റലിജന്‍റ്സ് സെന്‍റര്‍ സ്ഥാപിച്ചു. ഗവേഷണങ്ങള്‍ക്കും നൂതന പഠനത്തിനും വാതില്‍ തുറക്കുന്ന പ്ലാറ്റ്‌ഫോമായി സെന്‍റര്‍ പ്രവര്‍ത്തിക്കും. വിദ്യാര്‍ഥികള്‍ക്ക് പ്രയോഗിക പരിശീലനം, വ്യവസായതലത്തിലുള്ള ഉപകരണങ്ങള്‍ ഉപയോഗിക്കുന്ന അവസരങ്ങള്‍, കൂടാതെ ഇന്‍റര്‍ഡിസിപ്ലിനറി അനുഭവങ്ങള്‍ എന്നിവയും സെന്‍ററിലുണ്ടാവും. സെന്‍ററിന്‍റെ ഭാഗമായി ശില്പശാലകള്‍, സര്‍ട്ടിഫിക്കേഷന്‍ കോഴ്‌സുകള്‍, ഗവേഷണ പദ്ധതികള്‍, ടെക്നോളജി ഇവന്‍റുകള്‍ തുടങ്ങിയവയും സംഘടിപ്പിക്കും. വിദ്യാര്‍ഥികളുടെ സാങ്കേതിക കഴിവുകള്‍ വികസിപ്പിക്കുകയും റോബോട്ടിക്‌സ് ആര്‍ട്ടിഫിഷല്‍ ഇന്‍റലിജന്‍സ് മേഖലയിലെ തൊഴില്‍ സാധ്യതകളിലേക്കുള്ള പ്രവേശന സൗകര്യമൊരുക്കുകയുമാണ് ലക്ഷ്യം.

തിരുനക്കര ബസ്‌സ്റ്റാന്‍ഡ് കോംപ്ലക്‌സിലെ വ്യാപാരികള്‍ കോടതിയലക്ഷ്യ നടപടിക്ക്

കോട്ടയം: തിരുനക്കര ബസ്‌സ്റ്റാന്‍ഡ് കോംപ്ലക്‌സിലെ വ്യാപാരികള്‍ കോടതിയലക്ഷ്യ നടപടിയിലേക്ക്. തിരുനക്കര ബസ്‌സ്റ്റാന്‍ഡ് കോംപ്ലക്‌സില്‍നിന്ന് ഒഴിപ്പിക്കപ്പെട്ട വ്യാപാരികള്‍ക്ക് അനുകൂല ഉത്തരവ് ഹൈക്കോടതിയില്‍നിന്നുണ്ടായിട്ടും നഗരസഭ മേല്‍നടപടി സ്വീകരിക്കാത്തതിനാലാണ് കോടതിയലക്ഷ്യ നടപടികള്‍ സ്വീകരിക്കണമെന്നാവശ്യപ്പെട്ട് വ്യാപാരികള്‍ വീണ്ടും ഹൈക്കോടതിയെ സമീപിക്കുന്നത്. വ്യാപാരികളുടെ കേസ് ഇന്നലെ കോടതി വീണ്ടും പരിഗണിച്ചിരുന്നു. 22-10-2022 ല്‍ കൂടിയ കൗണ്‍സിലും 11-03-2025 ല്‍ കൂടിയ കൗണ്‍സിലും വ്യാപാരികളെ പുനരധിവസിപ്പിക്കാന്‍ തീരുമാനിച്ച സാഹചര്യത്തിലാണ് കോടതി മേല്‍നടപടി സ്വീകരിക്കാന്‍ നഗരസഭാ സെക്രട്ടറിക്ക് ഉത്തരവ് നല്‍കിയത്. എന്നാല്‍, കൗണ്‍സിലില്‍ തീരുമാനമുണ്ടാകണമെന്ന സെക്രട്ടറിയുടെ നിലപാടിനെതിരേയാണ് കോടതിയെ സമീപിക്കുന്നത്. കൗണ്‍സില്‍ തീരുമാനം നടപ്പിലാക്കാനാണ് കോടതി സെക്രട്ടറിക്ക് നിര്‍ദേശം നല്‍കിയത്. സെക്രട്ടറി ആവശ്യപ്പെട്ടപ്രകാരം താത്കാലിക കടമുറികളുടെ പ്ലാനും വ്യാപാരികള്‍ സെക്രട്ടറിക്കു നല്‍കിയിരുന്നു. വീണ്ടും കൗണ്‍സിലില്‍നിന്ന് അനുമതി വേണമെന്നുപറഞ്ഞു നീട്ടിക്കൊണ്ടു പോകുന്നതിനാലാണ് വ്യാപാരികള്‍ കോടതിയലക്ഷ്യ നടപടികളുമായി മുന്നോട്ടുപോകുവാന്‍ തീരുമാനിച്ചത്. 2022 ഓഗസ്റ്റ് മൂന്നിനാണ് കെട്ടിടത്തിലെ 52 കടകള്‍ ഒഴിപ്പിച്ചത്. സെപ്റ്റംബര്‍ 14ന് കെട്ടിടം പൊളിച്ചുനീക്കുകയും ചെയ്തു. പുതിയ ഷോപ്പിംഗ് കോംപ്ലക്‌സ് പണിയുന്നതിനുവേണ്ടിയാണ് നഗരസഭ കെട്ടിടം പൊളിച്ചത്. ഒഴിപ്പിച്ച വ്യാപാരികള്‍ക്കു താത്കാലിക സംവിധാനം ഉറപ്പാക്കുമെന്നു പറഞ്ഞെങ്കിലും നടന്നില്ല. ഇതോടെയാണ് വ്യാപാരികള്‍ കോടതിയെ സമീപിച്ചത്. വ്യാപാരികളെ ഒരു മാസത്തികനം പുനരധിവസിപ്പിക്കണമെന്ന് കഴിഞ്ഞ 17നാണ് കോടതി ഉത്തരവിട്ടത്.

തീർഥാടകബസുകൾ കൂട്ടിയിടിച്ചു; അപകടപാതയായി വീണ്ടും കണമല

കണമല: കണമല ഇറക്കത്തിൽ മിനി ബസ് നിയന്ത്രണം തെറ്റി എതിരേ കയറ്റം കയറിവന്ന ബസിൽ ഇടിച്ച് അപകടം. മിനി ബസിന്‍റെ ഡ്രൈവർക്ക് ഗുരുതരമായി പരിക്കേറ്റു. ഈ ബസിലെ മൂന്നു പേർക്കും പരിക്കുണ്ട്. എതിരേ വന്ന ബസിലുണ്ടായിരുന്ന ആർക്കും പരിക്കില്ല. ഇന്നലെ ഉച്ചകഴിഞ്ഞ് മൂന്നോടെ എരുമേലി - പമ്പ ശബരിമല പാതയിൽ കണമല ഇറക്കത്തിലെ അട്ടിവളവിലാണ് അപകടം. മിനി ബസിന്‍റെ ഡ്രൈവർ തമിഴ്നാട് മധുര സ്വദേശി രാജ്‌കുമാറിനാണ് (32) ഗുരുതരമായ നിലയിൽ പരിക്കേറ്റത്. ഇയാളുടെ കാൽ ഡ്രൈവിംഗ് സീറ്റിനിടയിൽ കുടുങ്ങിയ നിലയിലായിരുന്നു. നാട്ടുകാരും ശബരിമല ഡ്യൂട്ടിയിലുണ്ടായിരുന്ന പോലീസുകാരും ചേർന്ന് ഡ്രൈവിംഗ് സീറ്റിലെ വാതിലും മുൻവശത്തെ ഭാഗങ്ങളും പൊളിച്ച്ഇളക്കിമാറ്റിയാണ് ഡ്രൈവറെ പുറത്തെടുത്തത്. ഈ ബസിലുണ്ടായിരുന്ന തമിഴ്നാട് സ്വദേശികളായ മുനിയാണ്ടി (62), അംബിക (53), കരുമലൈ (64) എന്നിവർക്ക് പരിക്കേറ്റിരുന്നു. ഡ്രൈവർ ഉൾപ്പെടെ പരിക്കേറ്റവരെ എരുമേലി സർക്കാർ ആശുപത്രിയിൽ എത്തിച്ച് പ്രാഥമിക ചികിത്സ നൽകി. ഡ്രൈവറെ വിദഗ്ധ ചികിത്സയ്ക്കായി കോട്ടയം മെഡിക്കൽ കോളജ് ആശുപത്രിയിലേക്ക് പിന്നീട് മാറ്റി. അപകടത്തിന് കാരണം മിനി ബസ് അമിത വേഗത്തിൽ സഞ്ചരിച്ച് നിയന്ത്രണം തെറ്റിയതു മൂലമാണെന്ന് നാട്ടുകാർ പറയുന്നു. മിനി ബസുകൾ പരമാവധി വേഗം കുറച്ച് സഞ്ചരിക്കേണ്ട ഇറക്കം ആണ് കണമലയിലേത്. ശബരിമല തീർഥാടകരായ തമിഴ്നാട് സ്വദേശികളാണ് രണ്ട് ബസിലും ഉണ്ടായിരുന്നത്. മിനി ബസിൽ 17 പേരും എതിരെ വന്ന് അപകടത്തിൽപ്പെട്ട ബസിൽ 38 പേരുമാണ് ഉണ്ടായിരുന്നത്. ശബരിമല ദർശനത്തിന് പോവുകയായിരുന്നു മിനി ബസിലെ തീർഥാടകർ. ശബരിമല ദർശനം കഴിഞ്ഞു മടങ്ങുന്ന തീർഥാടകരാണ് എതിരേ കയറ്റത്തിൽ വന്ന ബസിലുണ്ടായിരുന്നത്. അപകടം സംബന്ധിച്ച് അന്വേഷണം ആരംഭിച്ചെന്ന് എരുമേലി പോലീസും മോട്ടോർ വാഹന വകുപ്പും അറിയിച്ചു. ശബരിമല സീസണുകളിലും മലയാള മാസാദ്യ പൂജാസമയത്തെ തീർഥാടന ദിവസങ്ങളിലും ശബരിമല തീർഥാടകരുടെ തിരക്കേറുന്ന കണമല പാതയിൽ ഇതിനോടകം നിരവധി അപകടങ്ങളും മരണങ്ങളുമാണ് സംഭവിച്ചിട്ടുള്ളത്. വാഹനങ്ങളുടെ വേഗതയാണ് അപകടകാരണം.

പൊൻകുന്നം ടൗണിലും പരിസരത്തും തെരുവുനായശല്യം രൂക്ഷം

പൊൻകുന്നം: ടൗണിലും പരിസരങ്ങളിലുമായി നൂറോളം നായ്ക്കൾ നാട്ടുകാർക്ക് ശല്യമാകുന്നതായി പരാതി. തെരുവ്നായ്ക്കൾ മൂലം ഇരു ചക്രവാഹന യാത്രക്കാരും നാട്ടുകാരും ഭീതിയിലാണ്. പോസ്റ്റ് ഓഫീസ് ജംഗ്ഷനിൽ മാത്രം പത്തോളം നായ്ക്കളാണുള്ളത്. പ്രൈവറ്റ് ബസ് സ്റ്റാൻഡ്, രാജേന്ദ്ര മൈതാനം, പാലാ റോഡ്, കെഎസ്ആർടിസി ജംഗ്ഷൻ, അട്ടിക്കൽ, ചിറക്കടവ് റോഡ് തുടങ്ങിയ സ്ഥലങ്ങളിലും ഇടവഴികളിലും ഇടറോഡുകളിലുമാണ് തെരുവുനായശല്യം രൂക്ഷമായിരിക്കുന്നത്. സംഘം ചേർന്ന് നടക്കുന്ന തെരുവ് നായ്ക്കൾ പുലർച്ചയും രാത്രി കാലങ്ങളിലും കാൽനടയാത്രക്കാർക്ക് ഭീഷണിയാണ്. തെരുവിൽ അലയുന്ന നായ്ക്കൾക്ക് ചില സ്ഥലങ്ങളിൽ കുറച്ചുപേർ ഇറച്ചിയും മീനും എല്ലുകക്ഷണങ്ങളും ഇട്ടു കൊടുത്ത് വളർത്തുന്നുണ്ടെന്നും ഇവരെ ചുറ്റിപ്പറ്റിയാണ് നായ്ക്കൾ വിലസുന്നതെന്നും നാട്ടുകാർ ആരോപിച്ചു. ഇതു മൂലം മറ്റുള്ളവർക്ക് റോഡിലൂടെയും ഇടവഴിയിലൂടെയും നടക്കാൻ സാധിക്കാത്ത അവസ്ഥയാണ്. സ്കൂളിൽ പോകുന്ന കൊച്ചുകുട്ടികൾ പലപ്പോഴും നായ്ക്കളുടെ ശല്യം പേടിച്ച് മുതിർന്നവരുടെ സഹായത്തോടെയാണ് പോകുന്നത്. രാത്രിയിലും പകൽ സമയത്തും നായകൾ കൂട്ടത്തോടെ ഓടിയെത്തുമെന്ന് നാട്ടുകാർ പരാതിപ്പെടുന്നു. കാൽനട യാത്രക്കാർക്ക് ഭീഷണിയായി മാറിയിരിക്കുന്ന തെരുവ് നായകൾക്കെതിരേ അധികൃതർ നടപടി സ്വീകരിക്കണമെന്ന ആവശ്യം ശക്തമായിരിക്കുകയാണ്.

പാതിവഴിയിൽ സർവീസ് നിർത്തിയ ബസിനെതിരേ നടപടിയെടുത്ത് മോട്ടോർ വാഹന വകുപ്പ്

മുണ്ടക്കയം: സർവീസ് പൂർത്തിയാക്കാതെ ഓട്ടം നിർത്തിയ സ്വകാര്യ ബസ് അധികൃതർക്കെതിരേ നടപടി സ്വീകരിച്ച് മോട്ടോർ വാഹന വകുപ്പ്. ചങ്ങനാശേരി -മുണ്ടക്കയം-പുഞ്ചവയല്‍ റൂട്ടില്‍ സര്‍വീസ് നടത്തിവന്നിരുന്ന സ്വകാര്യ ബസാണ് മുണ്ടക്കയത്തുവച്ച് സർവീസ് നിർത്തുന്നതായി നാട്ടുകാർ പരാതി നൽകിയത്. തുടര്‍ന്ന് ഇന്നലെ ഉച്ചയ്ക്ക് മുണ്ടക്കയം സ്റ്റാൻഡില്‍ സര്‍വീസ് നിര്‍ത്തി ബസ് പാര്‍ക്ക് ചെയ്യുന്ന സമയം കാഞ്ഞിരപ്പളളി മോട്ടോര്‍ വെഹിക്കിള്‍ ഇന്‍സ്‌പെക്ടര്‍ എം.കെ. മനോജ് കുമാറിന്‍റെ നേതൃത്വത്തില്‍ പിടികൂടുകയായിരുന്നു. പുഞ്ചവയലിലേക്ക് സര്‍വീസ് ഇല്ലെന്നു ജീവനക്കാര്‍ അറിയിച്ചതോടെ വാഹനത്തിനെതിരേ കേസെടുക്കാനും 7500 രൂപ പിഴ അടയ്ക്കാനും നിര്‍ദേശം നല്‍കി. എഎംവിമാരായ എം.എസ്. രാജേഷ്, ദീപു ആര്‍. നായര്‍ എന്നിവരുടെ നേതൃത്വത്തിലായിരുന്നു മിന്നല്‍ പരിശോധന. അതേസമയം മുണ്ടക്കയം - പുഞ്ചവയൽ റൂട്ടിൽ സർവീസിനെ ചൊല്ലി ബസ് ജീവനക്കാരും ഓട്ടോറിക്ഷ ഡ്രൈവർമാരും തമ്മിൽ തർക്കവും പതിവാണ്. ബസ് സർവീസിന് മുൻപായി ഓട്ടോറിക്ഷകൾ ട്രിപ്പടിക്കുന്നത് തങ്ങളുടെ സർവീസിനെ ബാധിക്കുന്നതായി ബസ് ജീവനക്കാർ പറയുന്നു. ഇതു പലപ്പോഴും മേഖലയിലേക്കുള്ള സർവീസ് നഷ്ടത്തിലാക്കാൻ ഇടയാക്കുന്നതായും ഇവർ പറയുന്നു. അതേസമയം ബസുകൾ സർവീസ് നടത്താത്ത സമയങ്ങളിലാണ് തങ്ങൾ ട്രിപ്പടിക്കുന്നതെന്നാണ് ഓട്ടോറിക്ഷ ഡ്രൈവർമാരുടെ വാദം. മുണ്ടക്കയത്തിന്‍റ പല മലയോര മേഖലകളിലേക്കുമുള്ള ബസ് സർവീസുകൾ ഇത്തരത്തിൽ മുടങ്ങുന്നുണ്ടെന്നു നാട്ടുകാർ പറയുന്നു.

കോഴികൊത്തി, പുളിമാക്കൽ പാലങ്ങൾ പുനർനിർമിക്കണമെന്ന് കോൺഗ്രസ്

ആനക്കല്ല്: മാസങ്ങളായി പൊളിച്ചിട്ടിരിക്കുന്ന വില്ലണി കോഴികൊത്തി പാലവും മഞ്ഞപ്പള്ളി പുളിമാക്കൽ പാലവും അടിയന്തരമായി പുനർനിർമിക്കണമെന്നാവശ്യപ്പെട്ട് കോൺഗ്രസ് ആനക്കല്ല്, മഞ്ഞപ്പള്ളി വാർഡ് കമ്മിറ്റികളുടെ നേതൃത്വത്തിൽ വില്ലണിയിൽനിന്നു മഞ്ഞപ്പള്ളിയിലേക്ക് പ്രതിഷേധ മാർച്ചും ധർണയും നടത്തി. തമ്പലക്കാട്, എറികാട്, തുമ്പമട പ്രദേശങ്ങളിലെ നൂറുകണക്കിന് ആളുകൾ കാഞ്ഞിരപ്പള്ളി ഈരാറ്റുപേട്ട റോഡിലേക്കെത്താൻ ഉപയോഗിച്ചിരുന്ന പാലങ്ങൾ പുനർനിർമിക്കാനെന്ന പേരിൽ മാസങ്ങളായി പൊളിച്ചിട്ടിരിക്കുകയാണ്. ഇതു മൂലം പൊതുജനങ്ങൾ വളരെയേറെ ബുദ്ധിമുട്ടുകയാണ്. പാലങ്ങൾ അടിയന്തരമായി പുനർനിർമിച്ച് ജനങ്ങളുടെ ബുദ്ധിമുട്ടിന് ശാശ്വത പരിഹാരം കാണണമെന്ന് യോഗം ആവശ്യപ്പെട്ടു. വില്ലണിയിൽനിന്നാരംഭിച്ച പ്രതിഷേധ മാർച്ച് ഡിസിസി ജനറൽ സെക്രട്ടറി റോണി കെ. ബേബി ഫ്ലാഗ് ഓഫ് ചെയ്തു. കോൺഗ്രസ് ആനക്കല്ല് വാർഡ് പ്രസിഡന്‍റ് ഷാജി പെരുന്നേപ്പറമ്പിൽ അധ്യക്ഷത വഹിച്ചു. മഞ്ഞപ്പള്ളിയിൽ നടന്ന പ്രതിഷേധ ധർണ ഡിസിസി ജനറൽ സെക്രട്ടറി പി.എ. ഷെമീർ ഉദ്ഘാടനം ചെയ്തു. കോൺഗ്രസ് മഞ്ഞപ്പള്ളി വാർഡ് പ്രസിഡന്‍റ് റോബിൻ വെങ്ങാലൂരിന്‍റെ അധ്യക്ഷതയിൽ ബ്ലോക്ക് പഞ്ചായത്ത് അംഗം ഡാനി ജോസ് മുഖ്യപ്രഭാഷണം നടത്തി. കോൺഗ്രസ് മണ്ഡലം പ്രസിഡന്‍റ് ബിജു പത്യാല, ബ്ലോക്ക് ഭാരവാഹികളായ സിബു ദേവസ്യ, മാത്യു കുളങ്ങര, നായിഫ് ഫൈസി , അബ്ദുൾ ഫത്താക്ക്, രാജു തേക്കുംതോട്ടം, ദിലീപ് ചന്ദ്രൻ, അജ്മൽ പാറക്കൽ, ടി. കെ. ജയപ്രകാശ് , യൂത്ത് കോൺഗ്രസ് നിയോജകമണ്ഡലം പ്രസിഡന്‍റ് കെ.എസ്. ഷിനാസ്, വൈസ് പ്രസിഡന്‍റ് നെൽസൺ ജോസഫ്, കർഷക കോൺഗ്രസ് ബ്ലോക്ക് സെക്രട്ടറി പി . അശോക് ദാസ് തുടങ്ങിയവർ പ്രസംഗിച്ചു.

കൂൺകൃഷിയിൽ വിജയഗാഥ രചിച്ച് സുധീഷും അമലും

മുണ്ടക്കയം: സ്വന്തമായി ഒരു സംരംഭമെന്ന ആഗ്രഹം കഠിനാധ്വാനത്തിലൂടെ സാക്ഷാത്കരിച്ചിക്കുകയാണ് രണ്ടു യുവാക്കൾ. വ്യാവസായിക അടിസ്ഥാനത്തിൽ കൂൺകൃഷി ആരംഭിച്ച് മികച്ച വരുമാനം നേടുകയാണിവർ. മുണ്ടക്കയം ചെളിക്കുഴി പൗരസമിതിയിൽ സുഹൃത്തുക്കളായ പുതുപ്പറമ്പിൽ പി.സി. സുധീഷും പൂതക്കുഴിയിൽ അമൽ പി. അനുജനും ചേർന്നാണ് ഫാൻ ആൻഡ് പാഡ് സിസ്റ്റം കൂൺ എന്ന പേരിൽ വ്യത്യസ്തമായ സംരംഭത്തിന് തുടക്കം കുറിച്ചിരിക്കുന്നത്. അമൽ നോട്ടിക്കൽ സയൻസിലും സുധീഷ് ബിഎ ഇക്കണോമിക്സിലും ഡിഗ്രിയുള്ളവരാണ്. സ്വന്തമായൊരു സംരംഭം തുടങ്ങണമെന്ന ആഗ്രഹമാണ് ഇരുവരെയും പുതിയ ആശയത്തിലേക്ക് എത്തിച്ചത്. ആദ്യം കൂൺ കൃഷിയെപ്പറ്റിയും അതിന്‍റെ വരുമാന സാധ്യതകളെക്കുറിച്ചും വിശദമായ പഠനം നടത്തി. അതോടൊപ്പം മുണ്ടക്കയം പഞ്ചായത്തിന്‍റെ സംരംഭക ലോണായി നാലുലക്ഷം രൂപയും ഉറപ്പാക്കി. പിന്നീട് മലപ്പുറം സ്വദേശിയായ വ്യക്തിയുടെ കമ്പനിയുമായി ചേർന്ന് കൂൺകൃഷി ആരംഭിക്കുകയായിരുന്നു. ഇവരുടെ സഹായത്തോടെ വീടിന്‍റെ ടെറസിൽ പ്രത്യേകം തയാറാക്കിയിരിക്കുന്ന മുറിയിൽ ഇതിനുള്ള സജ്ജീകരണം ഒരുക്കി. പ്രത്യേകം ഊഷ്മാവ് ക്രമീകരിച്ചിരിക്കുന്ന മുറിയിൽ 200 സ്ക്വയർഫീറ്റിലാണ് ഇപ്പോൾ കൂൺ കൃഷി നടത്തുന്നത്. വിത്ത് പാകി 20 മുതൽ 25 ദിവസത്തിനിടയിൽ വിളവെടുപ്പ് ആരംഭിക്കാം. നാല് മാസം വരെ ഓരോ ബെഡിൽ നിന്നും വിളവ് ലഭിക്കും. ഇത്തരത്തിൽ 900 ബെഡുകളാണ് ഇവർ 200 സ്ക്വയർ ഫീറ്റുള്ള മുറിയിൽ ക്രമീകരിച്ചിരിക്കുന്നത്. ഇതിലൂടെ മികച്ച വരുമാനം നേടുവാൻ കഴിയുന്നുണ്ടെന്ന് സുധീഷും അമലും പറയുന്നു. ചിപ്പിക്കൂൺ എന്ന ഇനമാണ് ഇവർ കൃഷി ചെയ്യുന്നത്. ഓരോ ദിവസവും നാലു മുതൽ അഞ്ചു കിലോവരെ കൂൺ ലഭിക്കും. ഓർഡർ അനുസരിച്ച് വ്യാപാര സ്ഥാപനങ്ങളിലും വീടുകളിലും എത്തിച്ചാണ് വിൽപ്പന നടത്തുന്നത്. കൂടാതെ ഇവരുടെ അടുക്കൽ നേരിട്ടെത്തി വാങ്ങുന്നവരുമുണ്ട്. കൊളസ്ട്രോളും ഷുഗറും നിയന്ത്രിക്കുന്നതിന് ഉത്തമമായ ചിപ്പിക്കൂണിൽ ധാരാളം നാരും അടങ്ങിയിരിക്കുന്നതിനാൽ മാർക്കറ്റിൽ ഇതിന് നല്ല ഡിമാന്‍ഡാണ്. കൂൺകൃഷിയിൽ അമലിനെയും സുധീഷിനെയും സഹായിക്കാൻ മാതാപിതാക്കളും ഒപ്പമുണ്ട്. തങ്ങളുടെ സംരംഭം കൂടുതൽ മേഖലയിലേക്ക് വ്യാപിപ്പിക്കാനാണ് ഇരുവരുടെയും പരിശ്രമം.

വിശുദ്ധ അല്‍ഫോന്‍സാമ്മയുടെ തിരുനാളിനു നാളെ കൊടിയേറും

ഭരണങ്ങാനം: സഹനങ്ങളെ ആത്മബലിയായി അര്‍പ്പിച്ച വിശുദ്ധ അല്‍ഫോന്‍സാമ്മയുടെ തിരുനാളിന് നാളെ കൊടിയേറും. ഭരണങ്ങാനം ക്ലാരമഠത്തില്‍ വേദനകളുടെ കിടക്കയില്‍നിന്ന് സ്വര്‍ഗീയ പറുദീസയിലേക്കു വിളിക്കപ്പെട്ട വിശുദ്ധയുടെ എഴുപത്തിയൊന്‍പതാം ചരമവാര്‍ഷികത്തിന് മുന്നോടിയായി നാളെമുതല്‍ കബറിട ദേവാലയം തീര്‍ഥാടകരാല്‍ നിറയും. വിവിധ ദേശങ്ങളില്‍നിന്ന് നാനാജാതിമതസ്ഥരായ പതിനായിരങ്ങള്‍ അനുഗ്രഹവും ആശ്വാസവും ചൊരിയുന്ന വിശുദ്ധയുടെ മാധ്യസ്ഥ്യം തേടി ഭരണങ്ങാനത്തെത്തും. രാവിലെ 11.15ന് മാര്‍ ജോസഫ് കല്ലറങ്ങാട്ട് തിരുനാളിന് കൊടിയേറ്റും. പ്രധാന തിരുനാളായ ജൂലൈ 28 വരെ കബറിട ദേവാലയത്തില്‍ രാപകല്‍ പ്രാര്‍ഥനകള്‍ക്ക് സൗകര്യമുണ്ടാകും. തിരുനാൾ ദിനങ്ങളിൽ രാവിലെ 5.30 മുതല്‍ വൈകുന്നേരം ഏഴുവരെ തുടര്‍ച്ചയായി വിശുദ്ധ കുര്‍ബാന അര്‍പ്പിക്കപ്പെടും. വൈകുന്നേരം 6.15ന് ജപമാലപ്രദക്ഷിണമുണ്ടായിരിക്കും. ക്രമീകരണങ്ങളൊരുക്കി തീര്‍ഥാടന കേന്ദ്രം വിശുദ്ധ അല്‍ഫോന്‍സാ തീര്‍ഥാടന കേന്ദ്രത്തില്‍ വിപുലമായ ക്രമീകരണങ്ങളാണ് ഭക്തജനങ്ങളുടെ സൗകര്യാര്‍ഥം ഒരുക്കിയിട്ടുള്ളത്. ദൂരസ്ഥലങ്ങളില്‍നിന്നു വരുന്നവര്‍ക്ക് തീര്‍ഥാടന കേന്ദ്രത്തിന്‍റെ വിവിധ ബ്ലോക്കുകളിലായി താമസസൗകര്യം ഒരുക്കിയിട്ടുണ്ട്. ആവശ്യമുള്ളവര്‍ തീര്‍ഥാടന കേന്ദ്രം ഓഫീസുമായി ബന്ധപ്പെടണം. തീര്‍ഥാടകര്‍ക്ക് വേണ്ട എല്ലാ സഹായസഹകരണങ്ങളും നല്‍കുന്നതിനായി 101 വോളണ്ടിയർമാർ പ്രവര്‍ത്തിക്കും. ട്രാഫിക് നിയന്ത്രണത്തിന് പോലീസിനോട് ചേര്‍ന്നും ഇവരുടെ സഹായമുണ്ടായിരിക്കും. വിവിധ ഭാഷകളില്‍ വിശുദ്ധ കുര്‍ബാന വിശുദ്ധ അല്‍ഫോന്‍സാമ്മയുടെ തിരുനാളില്‍ പങ്കെടുക്കാന്‍ വിവിധ സംസ്ഥാനങ്ങളില്‍നിന്നു ഭക്തജനങ്ങള്‍ എത്തിച്ചേരുന്നുണ്ട്. ഇവരുടെ സൗകര്യാര്‍ഥം വിവിധ ഭാഷകളില്‍ വിശുദ്ധ കുര്‍ബാന ക്രമീകരിച്ചിട്ടുണ്ട്. 20ന് ഉച്ചയ്ക്ക് ഒന്നിന് ഫാ. ബാബു കാക്കാനിയില്‍ ഹിന്ദിയിലും 2.30ന് ഫാ. ജോര്‍ജ് ചീരാംകുഴിയില്‍ ഇംഗ്ലീഷിലും വിശുദ്ധ കുര്‍ബാന അര്‍പ്പിക്കും. 27ന് ഉച്ചകഴിഞ്ഞ് 3.30ന് ഫാ. കെവിന്‍ മുണ്ടക്കല്‍ ഇംഗ്ലീഷിൽ വിശുദ്ധ കുര്‍ബാന അര്‍പ്പിക്കും. 26 രാവിലെ 8.30ന് ഫാ. ജിനോയ് തൊട്ടിയില്‍ തമിഴ് ഭാഷയില്‍ വിശുദ്ധ കുര്‍ബാന അര്‍പ്പിക്കും. ഉച്ചകഴിഞ്ഞ് 2.30 ന് ശ്രവണ പരിമിതര്‍ക്കുവേണ്ടി ഫാ. ബിജു മൂലക്കര വിശുദ്ധകുര്‍ബാന അര്‍പ്പിക്കും. കബറിട ദേവാലയം 24 മണിക്കൂറും തുറന്നിടും പാലാ രൂപതയുടെ പ്ലാറ്റിനം ജൂബിലി വര്‍ഷമായതിനാല്‍ തിരുനാളിന്‍റെ 10 ദിവസങ്ങളിലും കബറിട ദേവാലയം 24 മണിക്കൂറും തുറന്നിടും. ഭക്തജനങ്ങള്‍ക്ക് രാത്രിയെന്നോ പകലെന്നോ വ്യത്യാസമില്ലാതെ ഏതു സമയത്തും കബറിട ദേവാലയത്തിലെത്തി പ്രാര്‍ഥിക്കുന്നതിനും നേര്‍ച്ചകാഴ്ചകള്‍ സമര്‍പ്പിക്കുന്നതിനും സൗകര്യമുണ്ട്. പ്രഥമശുശ്രൂഷാ സൗകര്യം പ്രഥമശുശ്രൂഷ നല്‍കുന്നതിനായി പാലാ ഫയര്‍ഫോഴ്സ് ഓഫീസർമാർ പരിശീലനം നല്‍കിയ 30 അംഗ ടീം സജ്ജമായിരിക്കും. കൂടാതെ നാല് ആംബുലന്‍സുകളും തയാറായി നില്‍ക്കും. പാലാ മെഡിസിറ്റി, ഭരണങ്ങാനം മേരിഗിരി, ഉള്ളനാട് ഹെല്‍ത്ത് സെന്‍റര്‍ എന്നിവിടങ്ങളില്‍ നിന്നുള്ള മെഡിക്കല്‍ ടീം തിരുനാള്‍ ദിവസങ്ങളില്‍ ക്യാമ്പ് ചെയ്യും. ഒരുക്കങ്ങള്‍ പൂര്‍ത്തീകരിച്ചതായി തീര്‍ഥാടന കേന്ദ്രം റെക്ടര്‍ റവ.ഡോ.അഗസ്റ്റിന്‍ പാലയ്ക്കപ്പറമ്പില്‍, ഫൊറോന വികാരി ഫാ. സഖറിയാസ് ആട്ടപ്പാട്ട്, അഡ്മിനിസ്ട്രേറ്റര്‍ ഫാ. മാത്യു കുറ്റിയാനിക്കല്‍, വൈസ് റെക്ടര്‍മാരായ ഫാ.ജോസഫ് അമ്പാട്ട്, ഫാ.ആന്‍റണി തോണക്കര എന്നിവര്‍ അറിയിച്ചു. പാര്‍ക്കിംഗ് ക്രമീകരണം തീര്‍ഥാടകര്‍ക്ക് വാഹനങ്ങള്‍ സുരക്ഷിതമായും സൗകര്യപ്രദമായും പാര്‍ക്കു ചെയ്യുന്നതിന് എല്ലാവിധ ക്രമീകരണങ്ങളും ഏര്‍പ്പെടുത്തിയിട്ടുണ്ട്. ഫൊറോനപള്ളിയുടെ പാരിഷ് ഹാളിനോട് ചേര്‍ന്നുള്ള പാര്‍ക്കിംഗ് ഗ്രൗണ്ടിലും തീര്‍ഥാടനകേന്ദ്രത്തിന്‍റെ പാര്‍ക്കിംഗ് ഗ്രൗണ്ടിലും കാന്‍റീനിന്‍റെ മുന്‍ഭാഗത്തും ഗേള്‍സ് ഹൈസ്‌കൂളിന്‍റെ ഗ്രൗണ്ടിലും വാഹനങ്ങള്‍ പാര്‍ക്ക് ചെയ്യാം. കൂടാതെ അരുവിത്തുറ ഭാഗത്തുനിന്നും വരുന്ന വാഹനങ്ങള്‍ക്ക് വട്ടോളിക്കടവ് പാലത്തിന്‍റെ ഭാഗത്തും പാര്‍ക്ക് ചെയ്യാം. സ്പിരിച്വാലിറ്റി സെന്‍ററിന്‍റെ മുന്‍വശത്തും കോട്ടവഴിയുടെ വശങ്ങളിലും പാര്‍ക്കിംഗ് സൗകര്യമുണ്ട്.

രാഹുല്‍ ഗാന്ധിയുടെ സന്ദര്‍ശനം: ഗതാഗത ക്രമീകരണം ഏര്‍പ്പെടുത്തി

കോട്ടയം: മുന്‍ മുഖ്യമന്ത്രി ഉമ്മന്‍ ചാണ്ടിയുടെ രണ്ടാം ചരമ വാര്‍ഷിക ചടങ്ങുകളിൽ പങ്കെടു ക്കാൻ ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധി എത്തുന്നതോടനുബന്ധിച്ച് ഇന്നു രാവിലെ 8.30 മുതല്‍ 12 വരെ ഗതാഗത ക്രമീകരണം ഏര്‍പ്പെടുത്തി. കോട്ടയത്തുനിന്നു പുതുപ്പള്ളി, കറുകച്ചാല്‍, തെങ്ങണ ഭാഗത്തേക്ക് പോകേണ്ട വാഹനങ്ങള്‍ ലോഗോസ് ജംഗ്ഷന്‍, പോലീസ് ക്ലബ്, റബര്‍ ബോര്‍ഡ്, കഞ്ഞിക്കുഴി, മണര്‍കാട് വഴി കാഞ്ഞിരത്തുംമൂട്ടില്‍നിന്നും ഇടത്തേക്ക് തിരിഞ്ഞ് ആറാട്ടുചിറ, നാരകത്തോട്, വെട്ടത്തുകവല, കൈതേപ്പാലം വഴി പോകണം. കോട്ടയം ഭാഗത്തുനിന്നും കാഞ്ഞിരപ്പള്ളി, മുണ്ടക്കയം ഭാഗത്തേക്ക് പോകേണ്ട വാഹനങ്ങള്‍ ലോഗോസ് ജംഗ്ഷന്‍, പോലീസ് ക്ലബ്, റബര്‍ ബോര്‍ഡ് വഴി കഞ്ഞിക്കുഴിയില്‍ എത്തി കെകെ റോഡ് വഴി പോകണം. അയര്‍ക്കുന്നം, കിടങ്ങൂര്‍ ഭാഗത്തേക്ക് പോകേണ്ട വാഹനങ്ങള്‍ ലോഗോസ് ജംഗ്ഷന്‍, പോലീസ് ക്ലബ് വഴി, ഇറഞ്ഞാല്‍ ജംഗ്ഷനില്‍നിന്നും ഇടത്തേക്ക് തിരിഞ്ഞ് കൊശമറ്റം കവലവഴി പോകണം. കൊശമറ്റം കവല ഭാഗത്തുനിന്നും കളക്ടറേറ്റ് ഭാഗത്തേക്ക് പോകേണ്ട വാഹനങ്ങള്‍ കൊശമറ്റം കവലയില്‍നിന്നു തിരിഞ്ഞ് വട്ടമൂട് റോഡ് വഴി മംഗളം ജംഗ്ഷനില്‍ എത്തി പോകണം. തെങ്ങണ ഭാഗത്തുനിന്നു കോട്ടയം ഭാഗത്തേക്ക് വരുന്ന വാഹനങ്ങള്‍ ഞാലിയാകുഴി ജംഗ്ഷനില്‍നിന്ന് ഇടത്തേക്ക് തിരിഞ്ഞ് പരുത്തുംപാറ, ചിങ്ങവനം വഴി പോകണം. തെങ്ങണ ഭാഗത്തുനിന്നു മണര്‍കാട്, അയര്‍ക്കുന്നം ഭാഗത്തേക്ക് പോകേണ്ട വാഹനങ്ങള്‍ ഞാലിയാകുഴി ജംഗ്ഷനില്‍നിന്നു നേരേ ബൈറോഡില്‍ കൂടി കൈതേപ്പാലം ജംഗ്ഷനില്‍ എത്തി പുതുപ്പള്ളി, കാഞ്ഞിരത്തുംമൂട് വഴി പോകണം. പാറക്കല്‍കടവ്, നാല്‍ക്കവല, ദിവാന്‍കവല, മൂലേടം ഭാഗത്തുനിന്നും കോട്ടയം ടൗണില്‍ എത്തേണ്ട വാഹനങ്ങള്‍ ദിവാന്‍കവല, റെയില്‍വേ ഓവര്‍ബ്രിഡ്ജ് വഴി മണിപ്പുഴയിലെത്തി കോട്ടയം ഭാഗത്തേക്ക് പോകണം. പാര്‍ക്കിംഗ് ക്രമീകരണം പുതുപ്പള്ളി പള്ളിയില്‍ സമ്മേളനത്തില്‍ പങ്കെടുക്കാന്‍ തെങ്ങണ ഭാഗത്തുനിന്നും എത്തിച്ചേരുന്ന വാഹനങ്ങള്‍ എരമല്ലൂര്‍ കലുങ്കിന് സമീപമുള്ള ഗ്രൗണ്ടിലും ഗ്രീന്‍വാലി ക്ലബ് ഗ്രൗണ്ടിലും പാര്‍ക്ക് ചെയ്യണം. കോട്ടയം, മണര്‍കാട്, കറുകച്ചാല്‍ ഭാഗത്തുനിന്നും എത്തുന്ന വാഹനങ്ങള്‍ നിലയ്ക്കല്‍ പള്ളി ഗ്രൗണ്ട്, ഡോണ്‍ ബോസ്‌കോ സ്‌കൂള്‍ ഗ്രൗണ്ട്, ഗവണ്‍മെന്‍റ് വിഎച്ച്എസ്എസ് സ്‌കൂള്‍ ഗ്രൗണ്ട്, ജോര്‍ജിയന്‍ പബ്ലിക് സ്‌കൂള്‍ ഗ്രൗണ്ട് എന്നിവിടങ്ങളില്‍ പാര്‍ക്ക് ചെയ്യണം. പാലൂര്‍പടി - പുതുപ്പള്ളി റോഡില്‍ ആംബുലന്‍സ്, ഫയര്‍ഫോഴ്‌സ് തുടങ്ങിയ അവശ്യ സര്‍വീസ് വാഹനങ്ങൾക്ക് മാത്രമായി നിയന്ത്രണം ഏര്‍പ്പെടുത്തി. ഈ റോഡില്‍ പാര്‍ക്കിംഗ് നിരോധിച്ചു. പുതുപ്പള്ളി ജംഗ്ഷന്‍-എരമല്ലൂര്‍ കലുങ്ക് റോഡിലും അങ്ങാടി-കൊട്ടാരത്തുംകടവ് റോഡിലും പാര്‍ക്കിംഗ് നിരോധിച്ചു.

ഉമ്മന്‍ ചാണ്ടിയുടെ രണ്ടാം ചരമ വാര്‍ഷികം: വിവിധ കാരുണ്യപദ്ധതികളുമായി മന്ന ചാരിറ്റബിള്‍ ട്രസ്റ്റ്

കോട്ടയം: മുന്‍ മുഖ്യമന്ത്രി ഉമ്മന്‍ ചാണ്ടിയുടെ രണ്ടാം ചരമ വാര്‍ഷികത്തോടനുബന്ധിച്ചു തിരുവനന്തപുരം ആസ്ഥാനമായ മന്ന ചാരിറ്റബിള്‍ ട്രസ്റ്റിന്‍റെ നേതൃത്വത്തില്‍ ജൂലൈ, ഓഗസ്റ്റ് മാസങ്ങളിലായി വിവിധ പരിപാടികള്‍ നടത്തുമെന്ന് മന്ന ചാരിറ്റബിള്‍ ട്രസ്റ്റ് മാനേജിംഗ് ട്രസ്റ്റി ഡോ. മറിയം ഉമ്മന്‍. ഇന്നു വൈകുന്നേരം ആറിനു കോട്ടയം മെഡിക്കല്‍ കോളജിലും നാളെ ഉച്ചയ്ക്ക് 12.30ന് കോട്ടയം ജനറല്‍ ആശുപത്രിയിലും സൗജന്യ ഭക്ഷണവിതരണം നടത്തും. നാളെ ഉച്ചകഴിഞ്ഞ് മൂന്നിന് നവജീവന്‍ ട്രസ്റ്റ് സന്ദര്‍ശനവും അനുസ്മരണ സമ്മേളനവും ഉണ്ടായിരിക്കും. 20ന് കുറുമ്പനാടം സെന്‍റ് ആന്‍റണീസ് പള്ളിയില്‍ സൗജന്യ മെഗാ മെഡിക്കല്‍ ക്യാമ്പും 26ന് തിരുവനന്തപുരത്ത് സൗജന്യ തയ്യല്‍ മെഷീന്‍ വിതരണവും നടക്കും. 27ന് തിരുവനന്തപുരം ബാലരാമപുരത്ത് ഉമ്മന്‍ചാണ്ടി ഭവനത്തിന്‍റെ തറക്കല്ലിടീല്‍ നടക്കും. ഓഗസ്റ്റ് രണ്ടിന് പത്തനംതിട്ടയില്‍ സൗജന്യ വീല്‍ചെയര്‍ വിതരണവും ഉണ്ടായിരിക്കും. 2012ല്‍ ഉമ്മന്‍ ചാണ്ടിയുടെ പ്രത്യേക താത്പര്യ പ്രകാരം തിരുവനന്തപുരത്ത് ആരംഭിക്കുകയും 14 ജില്ലകളിലും വിവിധ സേവന സന്നദ്ധ - ചാരിറ്റി പ്രവര്‍ത്തനങ്ങള്‍ നടത്തിവരികയും ചെയ്യുന്ന സംഘടനയാണ് മന്ന ചാരിറ്റബിള്‍ ട്രസ്റ്റ്. ഉമ്മന്‍ ചാണ്ടിയുടെ വേര്‍പാടിനെ തുടര്‍ന്ന് അദ്ദേഹത്തിന്‍റെ സ്മരണ നിലനിര്‍ത്തുന്നതിനു ഭാര്യ മറിയാമ്മ ഉമ്മനും മകള്‍ ഡോ. മറിയം ഉമ്മനും ചേര്‍ന്ന് ട്രസ്റ്റിന്‍റെ പ്രവര്‍ത്തങ്ങള്‍ വിപുലപ്പെടുത്തി ഉമ്മന്‍ ചാണ്ടി സ്‌നേഹസ്പര്‍ശം എന്ന പേരില്‍ സംസ്ഥാനത്തുടനീളം വിവിധ ജീവകാരുണ്യ പ്രവര്‍ത്തനങ്ങളാണ് കഴിഞ്ഞ രണ്ടു വര്‍ഷക്കാലമായി നടത്തിവരുന്നത്. 14 ജില്ലകളിലും മെഡിക്കല്‍ ക്യാമ്പ് എന്ന ലക്ഷ്യവുമായിട്ടാണ് മന്ന മുന്നോട്ടുപോകുന്നത്. ഇതിനോടകം ഒമ്പതു ജില്ലകളില്‍ ക്യാമ്പ് നടന്നുകഴിഞ്ഞു. സ്‌നേഹസ്പര്‍ശത്തിന് പുറമേ കൈത്താങ്ങ്, കരുതല്‍ എന്നീ പേരുകളില്‍ കൂടിയാണു വിവിധ പ്രവര്‍ത്തനങ്ങള്‍ ഏകോപിപ്പിച്ച് നടത്തിവരുന്നത്. പത്രസമ്മേളനത്തില്‍ ഡോ. മറിയം ഉമ്മന്‍, സോബിച്ചന്‍ കണ്ണമ്പള്ളി, അമല്‍ ജി. പോള്‍, റോണി കുരുവിള, ഡാനി രാജു എന്നിവര്‍ പങ്കെടുത്തു.

ഉമ്മന്‍ ചാണ്ടി അനുസ്മരണം

മുണ്ടക്കയം: പകരക്കാരനില്ലാത്ത നീതിമാനായ ഭരണാധികാരിയായിരുന്നു ഉമ്മന്‍ ചാണ്ടിയെന്ന് എഐസിസി അംഗം റോയ് കെ.പൗലോസ് പറഞ്ഞു. പെരുവന്താനം ഐഎന്‍ടിയുസി മണ്ഡലം കമ്മിറ്റിയുടെ നേതൃത്വത്തില്‍ മുണ്ടക്കയം മുപ്പത്തഞ്ചാംമൈലില്‍ സംഘടിപ്പിച്ച ഉമ്മന്‍ചാണ്ടി അനുസ്മരണ സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മണ്ഡലം പ്രസിഡന്‍റ് കെ.ആര്‍. ജയന്‍ അധ്യക്ഷത വഹിച്ചു. ഐഎന്‍ടിയുസി ജില്ലാ പ്രസിഡന്‍റ് രാജു മാട്ടുക്കാരന്‍ മുഖ്യപ്രഭാഷണം നടത്തി. സംസ്ഥാന സെക്രട്ടറിമാരായ സിറിയക് തോമസ്, പി.ആര്‍. അയ്യപ്പന്‍ എന്നിവര്‍ കിറ്റുകൾ വിതരണം നടത്തി. മികച്ച ആരോഗ്യ പ്രവര്‍ത്തന അവാര്‍ഡ് ജേതാക്കളായ പെരുവന്താനം പ്രഥമികാരോഗ്യ കേന്ദ്രത്തിലെ ജീവനക്കാര്‍, നേതൃത്വം നല്‍കിയ പഞ്ചായത്ത് ഭരണ സമിതി എന്നിവര്‍ക്ക് ഉമ്മന്‍ ചാണ്ടി സ്മാരക അവാര്‍ഡുകള്‍ വിതരണം ചെയ്തു. നീറ്റ് പരീക്ഷയില്‍ കേരളത്തില്‍നിന്ന് അഞ്ചാം റാങ്കു നേടിയ ചെല്‍സി എസ്. തെരേസ, കോണ്‍ഗ്രസ് മുന്‍ മണ്ഡലം പ്രസിഡന്‍റുമാര്‍, മുന്‍ പഞ്ചായത്തു പ്രസിഡന്‍റുമാര്‍ എന്നിവരെ സമ്മേളനത്തില്‍ ആദരിച്ചു. ജോര്‍ജ് കൂറുമ്പുറം, ഷാജഹാന്‍ മഠത്തില്‍, വി.സി. ജോസഫ് വെട്ടിക്കാട്ടിൽ, ടി.എന്‍. മധുസുദനന്‍, സണ്ണി തട്ടുങ്കല്‍, ജോണ്‍പി. തോമസ്, നിജിനി ഷംസുദീന്‍, ടോണി തോമസ്, കെ.എ. സിദ്ദിഖ്, സണ്ണി തുരുത്തിപ്പളളി, ഡൊമിന സജി, സി.ടി.മാത്യു, ശരത് ഒറ്റപ്ലാക്കല്‍, കെ.എന്‍.രാമദാസ് എന്നിവര്‍ പ്രസംഗിച്ചു.

സെന്‍റ് ഡൊമിനിക്സ് കത്തീഡ്രലിൽ കാർഷിക സെമിനാർ

കാഞ്ഞിരപ്പള്ളി: സെന്‍റ് ഡൊമിനിക്സ് കത്തീഡ്രൽ ഇടവകയുടെ ദ്വിശതാബ്ദി ആഘോഷങ്ങളുടെ ഭാഗമായി 20ന് ഉച്ചകഴിഞ്ഞ് മൂന്നിന് മഹാ ജൂബിലി ഹാളിൽ കാർഷിക സെമിനാർ നടക്കും. വികാരി റവ. ഡോ. കുര്യൻ താമരശേരി ഉദ്ഘാടനം ചെയ്യും. ഇൻഫാം ദേശീയ ചെയർമാൻ ഫാ. തോമസ് മറ്റമുണ്ടയിൽ, കെ.എസ്. തോമസ് എന്നിവർ ക്ലാസുകൾ നയിക്കും. അന്നേദിവസം ദേശീയ കർഷക സംഘടനയായ ഇൻഫാമിന്‍റെ പ്രവർത്തനങ്ങൾക്ക് കത്തീഡ്രൽ ഇടവകയിൽ തുടക്കം കുറിക്കും. ഫാ. തോമസുകുട്ടി ആലപ്പാട്ട്, ഫാ. ടോണി മുളങ്ങാശേരി, റെജി കൈപ്പൻപ്ലാക്കൽ, ജയിംസ്കുട്ടി ആശാരിപറമ്പിൽ, സെബാസ്റ്റ്യൻ കുരിശുകുന്നേൽ, മാത്യുച്ചൻ മാളിയേക്കൽ, ജിജി പുതിയിടം, സുനു മുത്തിയപ്പാറ, ജോസഫ് പണ്ടാരക്കളം, പയസ് കിഴക്കേനെടുംങ്ങട്ടിൽ എന്നിവർ നേതൃത്വം നൽകുമെന്ന് പബ്ലിസിറ്റി കൺവീനർ ഫിലിപ്പ് നിക്കോളാസ് പള്ളിവാതുക്കൽ അറിയിച്ചു.

പരിമിതികൾ മറന്ന് കൃത്രിമ അവയവ നിര്‍മാണവുമായി റെനി പോള്‌

പാലാ: മുട്ടിനു താഴെ മുറിച്ച ഇടതുകാലിന്‍റെ വേദന ശരീരത്തിലും മനസിലും നിറഞ്ഞപ്പോള്‍ കൈകാലുകള്‍ നഷ്ടപ്പെടുന്നവരെ ഏതുവിധേനയും സഹായിക്കുക എന്നത് വിമുക്ത ഭടനായ റെനി പോളിന്‍റെ ജീവിതാഭിലാഷമായി. പാലാ കെ.എം. മാണി സ്മാരക ഗവണ്‍മെന്‍റ് ആശുപത്രിയിലെ കൃത്രിമ അവയവ നിര്‍മാണ കേന്ദ്രത്തിലേക്ക് കടന്നുചെല്ലുന്നവര്‍ക്ക് ഓടിനടക്കുന്ന റെനി പോളിനെ കണ്ടാല്‍ അംഗപരിമിതനാണെന്ന് തോന്നുകയേയില്ല. എന്നാല്‍, മുട്ടിനു താഴെ മുറിച്ച ഇടതുകാലിനു പകരം സ്വന്തമായി കൃത്രിമ കാലുണ്ടാക്കി ധരിച്ച് നടക്കുന്നയാളാണ് ഇദ്ദേഹം. മകന്‍ എല്‍ദോ റെനി എയ്ഞ്ചലും കൃത്രിമ അവയവ നിര്‍മാണ മേഖലയില്‍ എന്‍ജിനിയറിംഗ് പാസായശേഷം അച്ഛനെ സഹായിക്കുകയാണ്. അപകടത്തിലോ അല്ലാതെയോ കൈകാലുകള്‍ നഷ്ടപ്പെട്ടവരുടെ വേദന നന്നായി അറിയാവുന്ന റെനി പോള്‍ അതുകൊണ്ടുതന്നെ അവര്‍ക്കുവേണ്ടി എന്തെങ്കിലും ചെയ്യണമെന്ന് തീരുമാനിക്കുകയും കൃത്രിമ അവയവ നിര്‍മാണ രംഗത്തേക്ക് കടന്നു വരികയുമായിരുന്നു. കൂത്താട്ടുകുളം കരിമ്പന വല്യാനപറമ്പില്‍ റെനി പോളിന് ബോര്‍ഡര്‍ സെക്യൂരിറ്റി ഫോഴ്സിലായിരുന്നു ജോലി. 1993ല്‍ ശ്രീനഗറില്‍ മറ്റു സൈനികര്‍ക്കൊപ്പം പതിവു പട്രോളിംഗ് നടത്തവേ മൈന്‍ സ്ഫോടനമുണ്ടായി. റെനിയുടെ ഇടതുകാലിന്‍റെ മുട്ടിനു താഴെ മുറിഞ്ഞുപോയി. ആറു മാസത്തോളം നീണ്ട ചികിത്സയ്ക്കു ശേഷം ജയ്പൂരിലെ കൃത്രിമ അവയവ നിര്‍മാണ കേന്ദ്രത്തില്‍നിന്നാണ് കൃത്രിമ കാലുവച്ചത്. 2000ല്‍ സര്‍വീസില്‍നിന്നു പിരിഞ്ഞു. തുടര്‍ന്ന് ഇങ്ങനെ കൈകാലുകള്‍ നഷ്ടപ്പെട്ടവരെ സഹായിക്കുക എന്ന ലക്ഷ്യത്തോടെ ഇതിനായുള്ള പി ആൻഡ് ഒ കോഴ്സ് പഠിക്കുകയും 2008ല്‍ കോട്ടയം മെഡിക്കല്‍ കോളജിലെ കൃത്രിമ അവയവനിര്‍മാണ കേന്ദ്രത്തില്‍ ജോലിയില്‍ പ്രവേശിക്കുകയും ചെയ്തു. വിരമിച്ചശേഷം സ്വന്തമായൊരു കേന്ദ്രം കോട്ടയത്ത് തുടങ്ങി. പാലാ കെ.എം. മാണി സ്മാരക ജനറല്‍ ആശുപത്രിയില്‍ കൃത്രിമ അവയവ നിര്‍മാണ കേന്ദ്രത്തിനായി എത്തിച്ച കാല്‍ കോടിയുടെ ഉപകരണങ്ങള്‍ പൊടിപിടിച്ചു നശിക്കുന്ന സാഹചര്യം ഒഴിവാക്കാന്‍ സൂപ്രണ്ട് ഡോ. ടി.പി. അഭിലാഷാണ് മുന്‍പരിചയമുള്ള റെനി പോളിനെ പാലായിലേക്കു ക്ഷണിച്ചത്. കഴിഞ്ഞ ജനുവരി മുതല്‍ ഇവിടെ റെനി പ്രവര്‍ത്തനം ആരംഭിച്ചു. ഇതിനോടകം നിരവധി പേര്‍ക്കു കൃത്രിമകൈകാലുകള്‍ നിര്‍മിച്ചു നല്‍കി. അതോടൊപ്പം പോളിയോ ബാധിതര്‍ക്കും മുട്ടുവേദന, നട്ടെല്ലിന് ക്ഷതമേറ്റവര്‍, കഴുത്തുവേദനക്കാര്‍ എന്നിവര്‍ക്കും ആവശ്യമായ ഉപകരണങ്ങള്‍ ഇവിടെനിന്നു വിതരണം ചെയ്തു തുടങ്ങി. അവയവങ്ങള്‍ നഷ്ടപ്പെട്ടവരുടെ വേദന എനിക്കറിയാം. അതുകൊണ്ടുതന്നെ ഈ രംഗത്ത് സജീവമായി പ്രവര്‍ത്തിക്കണമെന്നാണ് എനിക്കാഗ്രഹം. 58കാരനായ റെനി പോള്‍ ഇപ്പോള്‍ അതിരമ്പുഴയിലാണ് താമസം. ഷൈജിയാണ് ഭാര്യ. മക്കൾ: എല്‍ദോ, എയ്ഞ്ചല്‍ മേരി റെനി.

പൊതുമരാമത്ത് റോഡുകളോടു ചേർന്നുള്ള ഭൂമിയുടെ പട്ടയപ്രശ്നത്തിന് പരിഹാരം

മുണ്ടക്കയം: കർഷകർ കൈവശ ഭൂമിക്ക് പട്ടയ അപേക്ഷകൾ നൽകുമ്പോൾ ഭൂമിയുടെ ഏതെങ്കിലും അതിര് ചേർന്ന് പൊതുമരാമത്ത് വകുപ്പ് റോഡുകൾ കടന്നു പോകുന്നുണ്ടെങ്കിൽ അത്തരം ഭൂമികൾക്ക് പട്ടയം നൽകുന്നതിനുണ്ടായിരുന്ന തടസ്സം പരിഹരിച്ചതായി അഡ്വ. സെബാസ്റ്റ്യൻ കുളത്തുങ്കൽ എംഎൽഎ അറിയിച്ചു. പൊതുമരാമത്ത് വകുപ്പിന്‍റെ 2009- ലെ ഉത്തരവ് പ്രകാരം പൊതുമരാമത്ത് വകുപ്പ് റോഡിനോട് ചേർന്നുള്ള കൈവശ ഭൂമികൾക്ക് പട്ടയം നൽകുന്നതിന് പൊതുമരാമത്ത് വകുപ്പ് തടസ്സം ഉന്നയിച്ചിരുന്നു. ആയതിനാൽ റോഡിനോട് ചേർന്നുള്ള ഭൂമിക്ക് പട്ടയം നൽകിയിരുന്നില്ല. ഇതുമൂലം നിരവധി ചെറുകിട-നാമമാത്ര കർഷകർക്ക് തങ്ങളുടെ കൈവശ ഭൂമിക്ക് പട്ടയം ലഭിക്കാതെ പ്രതിസന്ധി നേരിട്ടിരുന്നു. പലരുടെയും ഭവന നിർമ്മാണം അടക്കമുള്ള ജീവിതാവശ്യങ്ങളും തടസ്സം നേരിട്ടിരുന്നു. പൂഞ്ഞാർ നിയോജകമണ്ഡലത്തിൽ ഇപ്രകാരം നിരവധി ആളുകൾക്ക് തങ്ങളുടെ കൈവശ ഭൂമിക്ക് പട്ടയം ലഭിക്കുന്നതിന് കഴിയാതെ വന്നിരുന്നു. ഗൗരവമായ ഈ പ്രശ്നം അഡ്വ. സെബാസ്റ്റ്യൻ കുളത്തുങ്കൽ എംഎൽഎ നിയമസഭയിൽ സബ്മിഷനായി ഉന്നയിക്കുകയും അതേ തുടർന്ന് ഈ പ്രശ്നം പരിഹരിക്കുന്നതിന് നടപടികൾ സ്വീകരിക്കുമെന്ന് റവന്യൂ മന്ത്രി കെ.രാജൻ നിയമസഭയിൽ മറുപടി നൽകിയിരുന്നു. തുടർന്ന് പ്രശ്ന പരിഹാരത്തിനായി റവന്യൂ മന്ത്രി കെ. രാജന്‍റെ അധ്യക്ഷതയിൽ അഡ്വ. സെബാസ്റ്റ്യൻ കുളത്തുങ്കൽ എംഎൽയുടെ സാന്നിധ്യത്തിൽ റവന്യൂ, പൊതുമരാമത്ത് വകുപ്പുകളുടെ ഉന്നത ഉദ്യോഗസ്ഥരുടെ യോഗം ചേർന്നു. യോഗത്തിൽ വിഷയം ചർച്ച ചെയ്ത് പൊതുമരാമത്ത് വകുപ്പിന്റെ റോഡ് പുറമ്പോക്കുകളിൽ പെടാത്ത റവന്യൂഭൂമികൾക്ക് കൈവശക്കാർക്ക് പട്ടയം നൽകുന്നതിന് നടപടികൾ സ്വീകരിക്കുന്നതിന് നിശ്ചയിച്ചു. ഇതുസംബന്ധിച്ച് സർക്കാർ ഉത്തരവ് പുറപ്പെടുവിക്കുന്നതിനും തീരുമാനമെടുത്തു. യോഗത്തിൽ മന്ത്രിയെയും, എംഎൽഎയും കൂടാതെ ലാൻഡ് റവന്യൂ ജോയിന്റ് കമ്മീഷണർ എ.ഗീത ഐഎഎസ്, റവന്യൂ വകുപ്പ് ഡെപ്യൂട്ടി സെക്രട്ടറി അനു എസ്. നായർ ഐഎഎസ്, പൊതുമരാമത്ത് വകുപ്പ് ചീഫ് എൻജിനീയർ അജിത്ത് രാമചന്ദ്രൻ തുടങ്ങിയവർ ഉൾപ്പെടെയുള്ള ഉദ്യോഗസ്ഥരും പങ്കെടുത്തു.

പത്രവിതരണത്തിനിടയിൽ ബൈക്കിടിച്ച് ദീപിക ഏജന്‍റിന് പരിക്ക്

ചേന്നാട്: ബൈക്കിടിച്ച് ദീപിക ഏജന്‍റിന് പരിക്കേറ്റു. ചേന്നാട് മുണ്ടിയത്ത് എം.സി. ജോസഫിനാണ് (ഔസേപ്പച്ചൻ) ഇന്നലെ രാവിലെ ഏഴിന് പത്രവിതരണത്തിനിടയിൽ പനച്ചികപ്പാറ - വാഴേക്കാട് റോഡിലുണ്ടായ അപകടത്തിൽ പരിക്കേറ്റത്. ദിശതെറ്റി വന്ന ബൈക്ക് ഏജന്‍റിന്‍റെ ബൈക്കുമായി കൂട്ടിയിടിച്ചാണ് അപകടം. അപകടത്തിൽ കാലിന് ഗുരുതര പരിക്കേറ്റ ഔസേപ്പച്ചനെ പാലായിലെ സ്വകാര്യ ആശുപത്രിയിൽ പ്രവേശിപ്പിച്ചു.

പുഷ്പചക്രം സമര്‍പ്പിച്ചു

കോട്ടയം: തൃണമൂല്‍ കോണ്‍ഗ്രസ് ജില്ലാ കമ്മിറ്റിയുടെ നേതൃത്വത്തില്‍ ഉമ്മന്‍ ചാണ്ടിയുടെ കബറിടത്തില്‍ തൃണമൂല്‍ കോണ്‍ഗ്രസ് സംസ്ഥാന കോ -ഓര്‍ഡിനേറ്റര്‍ സജി മഞ്ഞക്കടമ്പില്‍ പുഷ്പചക്രം സമര്‍പ്പിച്ചു. ജില്ലാ കോ-ഓര്‍ഡിനേറ്റര്‍ ഗണേഷ് ഏറ്റുമാനൂര്‍ അധ്യക്ഷത വഹിച്ചു. ബിബിന്‍ ശൂരനാടന്‍, ബിജു തെക്കേടം, സുനി സുബിച്ചന്‍, സന്തോഷ് മൂക്കിലിക്കാട്ട്, ബിജു കണിയാമല, ജി. ജഗദീഷ് സ്വാമിആശാന്‍, സുബിച്ചന്‍ പുതുപ്പള്ളി, കെ.എം. കുര്യന്‍, സുരേഷ് ബാബു, ശ്രീലക്ഷ്മി, മണി കിടങ്ങൂര്‍, ഷാജി താഴത്തുകുന്നേല്‍ തുടങ്ങിയവര്‍ പ്രസംഗിച്ചു.

ദേശീയതലത്തില്‍ ശുചിത്വ റാങ്കിംഗ് തിളക്കത്തില്‍ ജില്ലയിലെ നഗരസഭകള്‍

കോട്ടയം: ദേശീയതലത്തില്‍ നഗരസഭകള്‍ക്കുള്ള ശുചിത്വ സര്‍വേയായ സ്വച്ഛ് സര്‍വേഷനില്‍ ജില്ലയില്‍നിന്ന് ആദ്യമായി സിംഗിള്‍ സ്റ്റാര്‍ പദവി നേടി ഏറ്റുമാനൂര്‍, ഈരാറ്റുപേട്ട നഗരസഭകള്‍. തുറസായ മലമൂത്ര വിസര്‍ജന രഹിത പ്രദേശങ്ങളാക്കി നിലനിര്‍ത്തിയതിലൂടെ ജില്ലയിലെ അഞ്ചു നഗരസഭകള്‍ ഒഡിഎഫ് പ്ലസ് പദവിയും കരസ്ഥമാക്കി. ശുചിത്വമിഷനും നഗരസഭകളും സംയുക്തമായി പ്രവര്‍ത്തിച്ചതില്‍ ഹരിതകര്‍മസേന, ശുചീകരണ തൊഴിലാളികള്‍ എന്നിവരുടെ സജീവമായ പ്രവര്‍ത്തനവും ചങ്ങനാശേരി നഗരസഭയിലും കുമരകത്തുമുള്ള മൊബൈല്‍ സെപ്‌റ്റേജ് ട്രീറ്റ്‌മെന്‍റ്് യൂണിറ്റി‌ന്‍റെ പ്രവര്‍ത്തനവും റാങ്കിംഗ് മുന്‍ വര്‍ഷത്തേക്കാള്‍ മെച്ചപ്പെടാന്‍ കാരണമായി. ഉറവിട മാലിന്യസംസ്‌കരണ സംവിധാനങ്ങള്‍, എംസിഎഫ്, മിനി എംസിഎഫുകള്‍, ബോട്ടില്‍ ബൂത്തുകള്‍, പൊതുശൗചാലയങ്ങള്‍, ഹരിതടൗണ്‍, ഹരിതസ്ഥാപനങ്ങള്‍, ഇ-മാലിന്യ ശേഖരണം എന്നിവയും റാങ്കിംഗ് ഉയര്‍ത്തി. ചങ്ങനാശേരി നഗരസഭയില്‍ ജൈവമാലിന്യ സംസ്‌കരണത്തിനായി പ്രതിദിനം 30 ടണ്‍ ശേഷിയുള്ള സിഎന്‍ജി പ്ലാന്‍റ് സ്ഥാപിക്കല്‍, സാനിറ്ററി മാലിന്യങ്ങള്‍ ശാസ്ത്രീയമായി സംസ്‌കരിക്കുന്നതിനുള്ള ഡബിള്‍ ചേമ്പര്‍ ഇന്‍സിനറേറ്ററുകള്‍, സെപ്‌റ്റേജ് മാലിന്യങ്ങള്‍ സംസ്‌കരിക്കുന്നതിനുള്ള എഫ്എസ്ടിപി പദ്ധതി, ഹരിതകര്‍മസേന വഴി നഗരസഭാതലത്തില്‍ ഇ-മാലിന്യം ശേഖരണം മുതലായവയാണ് തുടര്‍ന്നുവരുന്ന പ്രവര്‍ത്തനങ്ങള്‍.

ദേവമാതാ കോളജ് ലൈബ്രറിയിൽ ഡിജിറ്റൽ തരംഗം

കുറവിലങ്ങാട്: നൂതന ശാസ്ത്ര സാങ്കേതിക രംഗത്തെ പുത്തൻ ആശയങ്ങളും വിവരസാങ്കേതിക വിദ്യകളും പ്രയോജനപ്പെടുത്തി ദേവമാതാ കോളജ് ലൈബ്രറി. ലൈബ്രറിയിൽ ഡിജിറ്റലൈസേഷൻ പ്രവർത്തനങ്ങളുടെ ആദ്യഘട്ടം പൂർത്തീകരിച്ച് വിദ്യാർഥികൾക്ക് കൈമാറി. മോൻസ് ജോസഫ് എംഎൽഎ പ്രാദേശിക വികസന ഫണ്ടിൽനിന്ന് 27 കമ്പ്യൂട്ടറുകൾ ലൈബ്രറിക്കായി അനുവദിച്ചു നൽകി. ഇതിന്‍റെ സ്വിച്ച് ഓൺ എംഎൽഎ നിർവഹിച്ചു. മാനേജർ ആർച്ച്പ്രീസ്റ്റ് റവ.ഡോ. തോമസ് മേനാച്ചേരി അധ്യക്ഷത വഹിച്ചു. പ്രിൻസിപ്പൽ ഡോ. സുനിൽ സി. മാത്യു, വൈസ് പ്രിൻസിപ്പൽ ഫാ. ഡിനോയ് മാത്യു കവളമ്മാക്കൽ, ബർസാർ ഫാ. ജോസഫ് മണിയൻചിറ, പഞ്ചായത്തംഗം ജോയിസ് അലക്‌സ് എന്നിവർ പ്രസംഗിച്ചു.

രാമപുരത്ത് നാലമ്പല ദര്‍ശനത്തിന് തുടക്കം

രാമപുരം: രാമപുരം നാലമ്പലദര്‍ശന തീർഥാടനത്തിന് തുടക്കമായി. ഇന്നലെ രാവിലെ വിവിധ ജില്ലകളില്‍നിന്ന് രാമപുരത്തെത്തിയ തീര്‍ഥാടകര്‍ക്ക് ജോസ് കെ. മാണി എംപിയുടെ നേതൃത്വത്തില്‍ വരവേല്‍പ്പ് നല്‍കി. വിവിധ ജില്ലകളില്‍നിന്നെത്തിയ കെഎസ്ആര്‍ടിസി ഡ്രൈവര്‍മാരെ മാലയിട്ട് അദ്ദേഹം സ്വീകരിച്ചു. തന്‍റെ പിതാവ് കെ.എം. മാണിയുടെ സ്വപ്നപദ്ധതിയായിരുന്നു രാമപുരം നാലമ്പല സര്‍ക്യൂട്ട് എന്ന് ജോസ് കെ. മാണി പറഞ്ഞു. രാമപുരത്ത് കൂടുതല്‍ വികസന പ്രവര്‍ത്തനങ്ങള്‍ക്കു നേതൃത്വം നല്‍കുമെന്നും അദ്ദേഹം പറഞ്ഞു. ശ്രീ ഭരതസ്വാമി ക്ഷേത്രത്തിനു പുതിയ ഹൈമാസ്റ്റ് ലൈറ്റും അദ്ദേഹം അനുവദിച്ചു. രാമപുരത്ത് 65 കോടി രൂപയുടെ വികസന പ്രവര്‍ത്തനങ്ങള്‍ക്ക് കെ.എം. മാണിസാറിന്‍റെ ഭരണകാലത്ത് നേതൃത്വം നല്‍കിയതായി ക്ഷേത്രം ഭാരവാഹികള്‍ പറഞ്ഞു. രാമപുരത്ത് ശ്രീരാമസ്വാമി ക്ഷേത്രത്തിലും കൂടപ്പുലം ശ്രീലക്ഷ്മണ സ്വാമി ക്ഷേത്രത്തിലും അമനകര ശ്രീ ഭരതസ്വാമി ക്ഷേത്രത്തിലും മേതിരി ശ്രീ ശത്രുഖന സ്വാമി ക്ഷേത്രത്തിലും രാവിലെ മുതല്‍ തീർഥാടകരുടെ തിരക്ക് അനുഭവപ്പെട്ടിരുന്നു. നാലമ്പലദര്‍ശനം ഒരുക്കങ്ങളില്‍ പൂര്‍ണ തൃപ്തി രേഖപ്പെടുത്തി മാണി സി. കാപ്പന്‍. രാമപുരം കര്‍ക്കടകം ഒന്നുമുതല്‍ ഒരു മാസക്കാലം നീണ്ടുനില്‍ക്കുന്ന രാമായണ മാസത്തോടനുബന്ധിച്ച് രാമപുരത്തെ നാലമ്പല ദര്‍ശനമായി ഭക്തജനങ്ങള്‍ക്ക് എല്ലാ സൗകര്യങ്ങളും ഒരുക്കുന്നതിനായി ബന്ധപ്പെട്ട ഉദ്യോഗന്ഥരുടെയും ജനപ്രതിനിധികളുടെയും ക്ഷേത്ര കമ്മിറ്റി ഭാരവാഹികളുടെയും യോഗം വിളിച്ചു ചേര്‍ത്ത് ആവശ്യമായ നിര്‍ദേശങ്ങള്‍ നല്കിയിരുന്നു. ക്ഷേത്ര പരിസരത്ത് വെളിച്ചം ഉറപ്പാക്കുന്നതിന് എംഎല്‍എയുടെ ആസ്തി വികസന ഫണ്ടില്‍നിന്ന് തുക വകയിരിത്തിയിരിന്നതായും അദ്ദേഹം പറഞ്ഞു.

പൈക്കാട് ജംഗ്ഷനിൽ പുത്തൻ ട്രാൻസ്‌ഫോർമർ

മണ്ണയ്ക്കനാട്: മരങ്ങാട്ടുപിള്ളി പഞ്ചായത്ത് പത്താം വാർഡിലെ നെടുമ്പാറ, വട്ടപ്പാറ, പടിക്കുഴ പ്രദേശത്തെ വോൾട്ടേജ് ക്ഷാമത്തിന് പരിഹാരമായി. 150 ഓളം കുടുംബാംഗങ്ങൾക്ക് ആശ്വാസമേകി പൈക്കാട് ജംഗ്ഷനിൽ പുതിയ ട്രാൻസ്‌ഫോർമർ പ്രവർത്തനം ആരംഭിച്ചു. പഞ്ചായത്ത് പ്രസിഡന്‍റ് ബെൽജി ഇമ്മാനുവൽ ഉദ്ഘാടനം നിർവഹിച്ചു. പഞ്ചായത്തംഗം ബെനറ്റ് പി. മാത്യു അധ്യക്ഷത വഹിച്ചു. ജോസഫ് ജോസഫ്, സലിമോൾ ബെന്നി, ഗംഗാധരൻ തുടങ്ങിയവർ പ്രസംഗിച്ചു.

വീട്ടമ്മമാർക്ക് ഭക്ഷ്യസുരക്ഷാ പരിശീലനം

അരുവിത്തുറ: മാതൃവേദി അരുവിത്തുറ യൂണിറ്റിന്‍റെ ആഭിമുഖ്യത്തിൽ അരുവിത്തുറ സെന്‍റ് ജോർജ് കോളജ് ഫുഡ് സയൻസ് വിഭാഗത്തിലെ അധ്യാപകരും വിദ്യാർഥികളും ചേർന്ന് അടുക്കളയും ഭക്ഷ്യസുരക്ഷയും എന്ന വിഷയത്തിൽ ഏകദിന സെമിനാർ സംഘടിപ്പിച്ചു. സെമിനാറിന്‍റെ ഉദ്ഘാടനം അരുവിത്തുറ ഫൊറോന പള്ളി വികാരി ഫാ. സെബാസ്റ്റ്യൻ വെട്ടുകല്ലേൽ നിർവഹിച്ചു. അടുക്കളയിലെ ഭക്ഷ്യസുരക്ഷ മാർഗങ്ങൾ സംബന്ധിച്ച പ്രായോഗിക പരിശീലനമാണ് വീട്ടമ്മമാർക്ക് നൽകയത്. മാതൃജ്യോതി യൂണിറ്റ് ഡയറക്ടർ ഫാ. ലിബിൻ പാലയ്ക്കത്തടത്തിൽ, ഫുഡ് സയൻസ് വിഭാഗം അധ്യാപകൻ ബിൻസ് കെ. തോമസ്, ഷോണി കിഴക്കേത്തോട്ടം, എന്നിവരും ഒ.ബി. ആരതി, കെ. ഫാത്തിമ എന്നീ വിദ്യാർഥിനികളുംപരിശീലനപരിപാടിയിൽ ക്ലാസുകൾ നയിച്ചു.

സെന്‍റ് തോമസ് കോളജില്‍ സ്റ്റുഡന്‍റ്സ് ക്വാളിറ്റി അഷ്വറന്‍സ് സെല്‍

പാലാ: സെന്‍റ് തോമസ് കോളജ് ഓട്ടോണമസില്‍ വിദ്യാര്‍ഥികളുടെ വിവിധ തലങ്ങളിലുള്ള അക്കാദമിക് പ്രവര്‍ത്തനങ്ങളുടെയും നേട്ടങ്ങളുടെയും വിവരശേഖരണവും ക്രോഡീകരിക്കലും ഏകോപിപ്പിക്കുക എന്ന ലക്ഷ്യത്തോടെ സ്റ്റുഡന്‍റ്സ് ക്വാളിറ്റി അഷ്വറന്‍സ് സെല്‍ രൂപീകരിച്ചു. പഠനപ്രവര്‍ത്തനങ്ങള്‍, ഗവേഷണങ്ങള്‍, പാഠ്യേതര വിഷയങ്ങളിലെ പങ്കാളിത്തം, കലാ-കായിക നേട്ടങ്ങള്‍ എന്നിവയുള്‍പ്പെടെയുള്ള വിവരങ്ങള്‍ ശേഖരിക്കുകയും ക്രോഡീകരിക്കുകയും ഏകോപിപ്പിക്കുകയും ചെയ്യുക എന്നതാണ് ഈ സെല്ലിന്‍റെ പ്രധാന ലക്ഷ്യം. ഓരോ ക്ലാസില്‍ നിന്നും തെരഞ്ഞെടുക്കപ്പെടുന്ന വിദ്യാര്‍ഥികളെ ഉള്‍പ്പെടുത്തി ഡിപ്പാര്‍ട്ടുമെന്‍റ് തലത്തിലും വിവിധ ഡിപ്പാര്‍ട്ടുമെന്‍റുകളില്‍നിന്ന് തെരഞ്ഞെടുക്കപ്പെടുന്ന ഓരോ വിദ്യാര്‍ഥിയെയും ഉള്‍പ്പെടുത്തി കോളജ് തലത്തിലുമായാണ് സെല്‍ പ്രവര്‍ത്തിക്കുന്നത്. പ്രിന്‍സിപ്പല്‍ ഡോ. സിബി ജയിംസ് ഉദ്ഘാടനം നിര്‍വഹിച്ചു. വൈസ് പ്രിന്‍സിപ്പല്‍ റവ.ഡോ. സാല്‍വിന്‍ തോമസ് കാപ്പിലിപ്പറമ്പില്‍ അധ്യക്ഷത വഹിച്ച സമ്മേളനത്തില്‍ ബര്‍സാര്‍ ഫാ. മാത്യു ആലപ്പാട്ടുമേടയില്‍, ഐക്യുഎസി കോ-ഓര്‍ഡിനേറ്റര്‍ ഡോ. തോമസ് വി. മാത്യു, കോ-ഓര്‍ഡിനേറ്റര്‍ ഡോ. ജയേഷ് ആന്‍റണി, പ്രഫ. ജെ. അഗസ്റ്റിന്‍ . എടക്കര, ഡോണ്‍ സിജു തുടങ്ങിയവര്‍ പ്രസംഗിച്ചു.

പാലാ രൂപത ആഗോള പ്രവാസിസംഗമം "കൊയ്നോനിയ-2025' നാളെ ചൂണ്ടച്ചേരി സെന്‍റ് ജോസഫ് കോളജില്‍

പാലാ: പാലാ രൂപത പ്രവാസി അപ്പൊസ്തലേറ്റിന്‍റെ നേതൃത്വത്തിലുള്ള ആഗോള പ്രവാസി സംഗമം "കൊയ്നോനിയ-2025' നാളെ ചൂണ്ടച്ചേരി സെന്‍റ് ജോസഫ് എൻജിനിയറിംഗ് കോളജില്‍ നടക്കും. വിവിധ രാജ്യങ്ങളില്‍നിന്നുള്ള പാലാ രൂപതാംഗങ്ങളായ പ്രവാസികളുടെ നാലാമത് ആഗോളസംഗമത്തിനുള്ള ഒരുക്കങ്ങള്‍ പൂര്‍ത്തീകരിച്ചു. നാളെ രാവിലെ ഒന്പതിന് സംഗമത്തിനെത്തുന്നവരുടെ രജിസ്ട്രേഷന്‍ ആരംഭിക്കും. 9.30ന് വിശുദ്ധ കുര്‍ബാന. 10.30ന് സമ്മേളനം ആരംഭിക്കും. സംഗമം പാലാ ബിഷപ് മാര്‍ ജോസഫ് കല്ലറങ്ങാട്ട് ഉദ്ഘാടനം ചെയ്യും. രൂപത മുഖ്യ വികാരി ജനറാള്‍ മോണ്‍. ഡോ. ജോസഫ് തടത്തില്‍ അധ്യക്ഷത വഹിക്കും. പാലാ രൂപത പ്രവാസി അപ്പൊസ്തലേറ്റ് ഡയറക്ടര്‍ ഫാ. കുര്യാക്കോസ് വെള്ളച്ചാലില്‍ ആമുഖപ്രഭാഷണം നടത്തും. രൂപത വികാരി ജനറാള്‍ മോണ്‍. ഡോ. ജോസഫ് കണിയോടിക്കല്‍ സന്ദേശം നല്‍കും. പ്രവാസി ഹെല്‍ത്ത് കെയര്‍ പദ്ധതി മിഡില്‍ ഈസ്റ്റ് കോ-ഓര്‍ഡിനേറ്റര്‍ സിവി പോള്‍ സംഗമത്തില്‍ അവതരിപ്പിക്കും. മിഡില്‍ ഈസ്റ്റ് സെക്രട്ടറി രജിത് മാത്യു സംവിധാനം ചെയ്ത ഡോക്യുമെന്‍ററി സംഗമത്തില്‍ പ്രദര്‍ശിപ്പിക്കും. വിവിധ മേഖലകളിലെ പ്രതിഭകളെ സംഗമത്തില്‍ ആദരിക്കും. കലാപരിപാടികളും നടത്തും. പാലാ രൂപത പ്രവാസി അപ്പൊസ്തലേറ്റ് അസിസ്റ്റന്‍റ് ഡയറക്ടര്‍മാരായ ഫാ. ജോര്‍ജ് നെല്ലിക്കല്‍, ഫാ. മാണി കൊഴുപ്പന്‍കുറ്റി, ഗ്ലോബല്‍ കോ-ഓര്‍ഡിനേറ്റര്‍ ഷാജിമോന്‍ മങ്കുഴിക്കരി, ജനറല്‍ കണ്‍വീനര്‍ മനോജ് പി. മാത്യു, സെന്‍ട്രല്‍ കോ-ഓര്‍ഡിനേറ്റര്‍ ജോഷി മാത്യു എന്നിവരുടെ നേതൃത്വത്തിലുള്ള കമ്മിറ്റികളാണ് സംഗമത്തിനുള്ള ക്രമീകരണങ്ങള്‍ പൂര്‍ത്തീകരിച്ചിട്ടുള്ളത്. പാലാ രൂപതയുടെ പ്ലാറ്റിനം ജൂബിലി വര്‍ഷത്തിലെ സംഗമമെന്നത് ഇക്കുറി ഇരട്ടി മധുരം സമ്മാനിച്ചിട്ടുണ്ട്. വിവിധ രാജ്യങ്ങളില്‍ ചെറിയ സമ്മേളനങ്ങള്‍ പൂര്‍ത്തീകരിച്ചാണ് രൂപതാതലസംഗമത്തിലേക്ക് പ്രവേശിക്കുന്നത്. കഴിഞ്ഞവര്‍ഷം ഒട്ടേറെ വേറിട്ട കര്‍മപരിപാടികള്‍ പൂര്‍ത്തീകരിച്ചാണ് വാര്‍ഷിക സംഗമത്തിന് ആതിഥ്യമരുളുന്നതെന്നതും ശ്രദ്ധേയം. പ്രഗത്ഭരായ അധ്യാപകര്‍ നേതൃത്വം നല്‍കുന്ന ട്രെയിനിംഗ് ആൻഡ് ഓറിയന്‍റേഷന്‍ പ്രോഗ്രാം (ടോപ്പ് ) ഫോര്‍ പ്രവാസി സ്റ്റുഡന്‍റ്സ്, പാലാ മെഡിസിറ്റിയുമായി ചേര്‍ന്ന് പ്രവാസി മെഡിക്കെയര്‍ പ്രോഗ്രാം, ഓണ്‍ലൈന്‍ മെഡി ടോക്ക്സ്, 100 നിര്‍ധനര്‍ക്ക് വീല്‍ചെയര്‍, രൂപത ഭവന നിര്‍മാണ പദ്ധതിയായ ഹോം പാലായുമായി ചേര്‍ന്നുള്ള ഭവനനിര്‍മാണം എന്നിവ കഴിഞ്ഞ വര്‍ഷം നടപ്പിലാക്കാൻ കഴിഞ്ഞതായി രൂപത ഡയറക്ടര്‍ ഫാ. കുര്യാക്കോസ് വെള്ളച്ചാലില്‍ അറിയിച്ചു.

മെഡിക്കല്‍ സ്‌പെഷാലിറ്റി ക്യാമ്പ്

പാലാ : ഇലവനാല്‍ ഹെല്‍ത്ത് സെന്‍റർ, റോട്ടറി ക്ലബ് എന്നിവയുടെ ആഭിമുഖ്യത്തില്‍ 20ന് രാവിലെ 8.30 മുതല്‍ ഒന്നുവരെ പാലാ ഗവണ്‍മെന്‍റ് ആശുപത്രി ജംഗ്ഷനിലുള്ള ഇലവനാല്‍ ഹെല്‍ത്ത് സെന്‍ററില്‍ സൗജന്യ മെഡിക്കല്‍ സ്‌പെഷാലിറ്റി ക്യാമ്പ് നടത്തും. പ്രമേഹം, രക്തസമ്മര്‍ദം, തൈറോയ്ഡ്, ലിപിഡ് പ്രൊഫൈല്‍, കാല്പാദത്തിന്‍റെ ന്യൂറോപ്പതി, അസ്ഥിബലക്ഷയം, യൂറിക് ആസിഡ്, വൃക്കരോഗം നേരത്തേ മനസിലാക്കുവാനുള്ള മൈക്രോ ആല്‍ബുമിന്‍ തുടങ്ങിയവയുടെ പരിശോധന സൗജന്യമായി നടത്തുന്നതാണ്. പ്രമേഹരോഗികള്‍ പിന്തുടരേണ്ട ആഹാര ക്രമീകരണങ്ങളുടെ പ്രദര്‍ശനവും ബോധവത്കരണ സെമിനാറും ഉണ്ടായിരിക്കും. ഡോ. ജോര്‍ജ് ആന്‍റണി, ഡോ. ഹരീഷ്‌കുമാര്‍, ഡോ. ജയിംസ് ജോസഫ്, ഡോ. സാം സ്‌കറിയ, ഡോ ദീപക് മോഹന്‍, ഡോ. വി.എന്‍. സുകുമാരന്‍, റോട്ടറി പ്രസിഡന്‍റ് ജോഷി വെട്ടുകാട്ടില്‍ തുടങ്ങിയവര്‍ നേതൃത്വം നല്‍കും. പേര് രജിസ്റ്റര്‍ ചെയ്യാന്‍ നിരപ്പേല്‍ മെഡിക്കല്‍സ് - 7559927020 , ഡിവൈന്‍ മെഡിക്കല്‍സ് - 9446983048, ഇലവനാല്‍ ഹെല്‍ത്ത് സെന്‍റര്‍ - 8848903821.

രാമപുരത്ത് നാലമ്പല ദർശനത്തിന് തുടക്കം; തീർഥാടകരെ വരവേറ്റ് ജോസ് കെ. മാണി

രാമപുരം: കർക്കടകം ഒന്നിന് രാമപുരം നാലമ്പല തീർഥാടനത്തിന് തുടക്കമായി. രാവിലെ വിവിധ ജില്ലകളിൽനിന്ന് രാമപുരത്തെത്തിയ തീർഥാടകർക്ക് ജോസ് കെ. മാണി എംപിയുടെ നേതൃത്വത്തിൽ വരവേൽപ്പ് നൽകി. വിവിധ ജില്ലകളിൽ നിന്നെത്തിയ കെഎസ്ആർടിസി ഡ്രൈവർമാരെ അദ്ദേഹം മാലയണിയിച്ച് സ്വീകരിച്ചു. രാമപുരത്തെ നാലമ്പലങ്ങളെ ഹൃദയത്തോട് ചേർത്തുവച്ച തന്‍റെ പിതാവ് കെ.എം. മാണിയുടെ സ്വപ്ന പദ്ധതിയായിരുന്നു രാമപുരം നാലമ്പല സർക്യൂട്ട് എന്ന് ജോസ് കെ. മാണി പറഞ്ഞു. രാമപുരത്ത് കൂടുതൽ വികസന പ്രവർത്തനങ്ങൾക്ക് നേതൃത്വം നൽകുമെന്നും അദ്ദേഹം കൂട്ടിച്ചേർത്തു. ശ്രീ ഭരതസ്വാമി ക്ഷേത്രത്തിന് പുതിയ ഹൈമാസ്റ്റ് ലൈറ്റും അദ്ദേഹം അനുവദിച്ചു. രാമപുരത്ത് 65 കോടി രൂപയുടെ വികസന പ്രവർത്തനങ്ങൾ കെ.എം. മാണിയു‌‌ടെ ഭരണകാലത്ത് ന‌ടന്നിരുന്നതായി ക്ഷേത്രം ഭാരവാഹികൾ പറഞ്ഞു. രാമപുരം ശ്രീരാമസ്വാമി ക്ഷേത്രത്തിലും കൂടപ്പിലം ശ്രീലക്ഷ്മണ സ്വാമി ക്ഷേത്രത്തിലും അമനകര ശ്രീഭരത സ്വാമി ക്ഷേത്രത്തിലും മേതിരി ശ്രീശത്രുഖന സ്വാമി ക്ഷേത്രത്തിലും രാവിലെ മുതൽ തന്നെ തീർഥാ‌ടക തിരക്ക് അനുഭവപ്പെട്ടിരുന്നു. രാമപുരത്തെ നാലമ്പലങ്ങളിൽ തീർഥാടകർക്ക് വിപുലമായ സൗകര്യങ്ങളാണ് ഏർപ്പെടുത്തിയിരിക്കുന്നത്.

മെഡിക്കൽ കോളജിലെ ചോർച്ച: വലിയ അഴിമതി നടന്നെന്ന് തെളിഞ്ഞതായി യുഡിഎഫ് നേതൃയോഗം

കോട്ടയം: മെഡിക്കല്‍ കോളജിലെ പുതിയ മന്ദിരത്തില്‍ വ്യാപകമായി ചോര്‍ച്ച കാണപ്പെട്ടതോടെ നിര്‍മാണത്തില്‍ വലിയ അഴിമതി നടന്നെന്ന് തെളിഞ്ഞിരിക്കുകയാണെന്ന് യുഡിഎഫ് ജില്ലാ നേതൃയോഗം. തിരുവഞ്ചൂര്‍ രാധാകൃഷ്ണന്‍ എംഎല്‍എ ഉദ്ഘാടനം ചെയ്തു. യുഡിഎഫ് ജില്ലാ ചെയര്‍മാന്‍ ഇ.ജെ. അഗസ്തി അധ്യക്ഷതവഹിച്ചു. ഫ്രാന്‍സിസ് ജോര്‍ജ് എംപി, യുഡിഎഫ് ജില്ലാ കണ്‍വീനര്‍ ഫില്‍സണ്‍ മാത്യൂസ്, ജോയി ഏബ്രഹാം, കുര്യന്‍ ജോയി, അസീസ് ബസായില്‍, ജയ്‌സണ്‍ ജോസഫ്, കുഞ്ഞ് ഇല്ലംപള്ളി, സലിം പി. മാത്യു, ടി.സി. അരുണ്‍, തമ്പി ചന്ദ്രന്‍, വി.ജെ. ലാലി, മദന്‍ലാല്‍, നിബു ഏബ്രഹാം, ടോമി വേദഗിരി, സാജു എം. ഫിലിപ്പ്, ഷാനവാസ് പാഴൂര്‍, അജ്മല്‍ ഖാന്‍ തുടങ്ങിയവര്‍ പ്രസംഗിച്ചു.

നഗ്നതാ പ്രദർശനം: യുവാവ് അറസ്റ്റിൽ

പാമ്പാടി: പ്രായപൂര്‍ത്തിയാകാത്ത പെണ്‍കുട്ടിയോട് ലൈംഗികാതിക്രമം. യുവാവ് പിടിയിൽ. ആലപ്പുഴ തെക്കേക്കര കൈപ്പള്ളിമുക്ക് കുറത്തിക്കാട് കളക്കാട്ട് ദേവദത്തനാ (കണ്ണന്‍, 21) ണു മാവേലിക്കരയില്‍നിന്ന് പാമ്പാടി പോലീസിന്‍റെ പിടിയിലായത്. കഴിഞ്ഞ രണ്ടിന് രാവിലെ ഏഴാം ക്ലാസില്‍ പഠിക്കുന്ന അതിജീവിത സ്‌കൂള്‍ ബസ് കാത്തുനില്‍ക്കുകയായിരുന്ന പാമ്പാടി പള്ളിക്കുന്ന് ഭാഗത്ത് റോഡില്‍ ബൈക്കിലെത്തിയ പ്രതി ബൈക്കില്‍ ഇരുന്നു നഗ്‌നത പ്രദര്‍ശിപ്പിച്ച് അതിജീവിതയോട് ലൈംഗിക അതിക്രമം കാണിക്കുകയായിരുന്നു. പിന്നീട് സ്ഥലത്തുനിന്നു രക്ഷപ്പെട്ട പ്രതിയെ കാഞ്ഞിരപ്പള്ളി ഡിവൈഎസ്പിയുടെ നിര്‍ദേശാനുസരണം പാമ്പാടി എസ്എച്ച്ഒ റിചാര്‍ഡ് വര്‍ഗീസ്, എസ്‌ഐ ഉദയകുമാര്‍ എന്നിവരുടെ നേതൃത്വത്തിലുള്ള അന്വേഷണസംഘം സിസിടിവി ദൃശ്യങ്ങളും സാക്ഷിമൊഴികളും ശേഖരിച്ചു മാവേലിക്കരയില്‍നിന്ന് കസ്റ്റഡിയിലെടുക്കുകയായിരുന്നു.

ഗൃഹാതുര സ്മരണയിൽ സംക്രാന്തി സംക്രമണ വാണിഭം

സംക്രാന്ത്രി: പഴമയുടെ ഓർമത്താളുകൾ നിവർത്തി സംക്രാന്തി സംക്രമണ വാണിഭത്തിന് തുടക്കമായി. പതിറ്റാണ്ടുകളുടെ പഴക്കമുണ്ട് സംക്രാന്തി സംക്രമണ വാണിഭത്തിന്. താഴപ്പായ, വള്ളിക്കൊട്ട, മുറം, മുളം പുട്ടുകുറ്റി, മൺകലം, മൺകുടം, ചട്ടി, ചിരട്ടത്തവി തുടങ്ങിയവ സംക്രമണ വാണിഭത്തിന്‍റെ പ്രത്യേകതയാണ്. ഇന്നലെ വൈക്കത്തിന്‍റെ വിവിധ പ്രദേശത്തുനിന്നു തഴയിലും ഇറ്റയിലും കളിമണ്ണിലും തീർത്ത വീട്ടുസാധനങ്ങളുമായി സ്ത്രീകൾ അടക്കമുള്ള കച്ചവടക്കാർ എത്തിയിരുന്നു. ഇതിനു പുറമെ പിച്ചാത്തി, വാക്കത്തി, പല തരത്തിലുള്ള കത്തികൾ, അത്തർ, കളിപ്പാട്ടങ്ങൾ, പച്ചക്കറി തൈകൾ, പട്ടുസാരികൾ, ചാമ, തെന അരി, കമ്പ് ചോളം, മണിച്ചോളം, നാടൻ മുതിര തുടങ്ങിയ വിവിധയിനം വിത്തുകളുമായും കച്ചവടക്കാർ എത്തിയിരുന്നു. പാലക്കാട് നെന്മാറ സ്വദേശി പ്രസാദാണ് വിവിധയിനം അരികളുടെ വിത്തുമായി എത്തിയത്. എല്ലാ വർഷവും സംക്രമണ വാണിഭത്തിൽ കച്ചവടത്തിന് എത്തിയതിന് ആദരിക്കപ്പെട്ടിട്ടുള്ള മുണ്ടക്കയം സ്വദേശി ഒ.ജെ. കുഞ്ഞുമോൻ ഇത്തവണയും പച്ചക്കറികളുടെയും പൂച്ചെടികളുടെയും തൈകളുമായി എത്തിയിരുന്നു. ഇന്നലെ രാവിലെ മുതൽ വിവിധ സ്ഥലങ്ങളിൽനിന്നു കുടുംബാഗങ്ങൾ ഒന്നിച്ച് വീട്ടുസാധനങ്ങൾ വാങ്ങാനെത്തി. പഴയ കാലത്ത് വീട്ടുസാധനങ്ങളും കാർഷികോത്‌പന്നങ്ങളുമായി സംസ്ഥാനത്തിന്‍റെ വിവിധ ഭാഗങ്ങളിൽനിന്ന് നിരവധി കച്ചവടക്കാരാണ് സംക്രമണത്തിൽ പങ്കെടുക്കാൻ എത്തിയിരുന്നത്. കാളവണ്ടിയിലാണ് സാധനങ്ങളുമായി കച്ചവടക്കാർ വന്നിരുന്നത്. ഒരു മാസത്തിനടുത്ത് വാണിഭം നീണ്ടു പോകും. അതുവരെ കച്ചവടക്കാർ ഇവിടെ താമസിക്കും. നിലവിൽ മൂന്നോ നാലോ ദിവസം മാത്രമേ കച്ചവടക്കാർ ഇവിടെ ഉണ്ടാവുകയുള്ളൂ. സംക്രമത്തോടനുബന്ധിച്ച് ഇന്നലെ വൈകുന്നേരം സാംസ്കാരിക ഘോഷയാത്രയും സമ്മേളനവും നടന്നു. ഇന്ന് പാക്കിൽ സംക്രമണ വാണിഭത്തിന് തുടക്കമാകും.

ക്ലബ്ബുകളുടെ പ്രവര്‍ത്തനം ആരംഭിച്ചു

ചങ്ങനാശേരി: വാഴപ്പള്ളി സെന്‍റ് തെരേസാസ് ഹൈസ്‌കൂളില്‍ വിവിധ ക്ലബ്ബുകളുടെ പ്രവര്‍ത്തനങ്ങള്‍ ഡിഎഫ്‌സി അതിരൂപത ഡയറക്ടര്‍ ഫാ. ജോര്‍ജ് ഉദ്ഘാടനം ചെയ്തു. സ്‌കൂള്‍ മാനേജര്‍ സിസ്റ്റര്‍ ലിന്‍സി വലിയപ്ലാക്കല്‍ അധ്യക്ഷത വഹിച്ചു. ജോഷി കൊല്ലാപുരം, ജീന്‍ വി. സോജന്‍, സെല്‍വി റീന തോമസ്, ലക്‌സി മാത്യു, എന്‍. സജിന്‍, സിസ്റ്റര്‍ എല്‍സീന, ജോമ എന്‍. തോമസ്, തോംസണ്‍ ടോം എന്നിവര്‍ പ്രസംഗിച്ചു.

പാലാക്കുന്നേല്‍ ജോസഫ് സക്കറിയയുടെ കരുതലില്‍ കുറുമ്പനാടം സ്‌കൂളിലെ 50 വിദ്യാര്‍ഥികള്‍ക്ക് സ്‌കോളര്‍ഷിപ്പ്

കുറുമ്പനാടം: സെന്‍റ് പീറ്റേഴ്‌സ് ഹയര്‍ സെക്കന്‍ഡറി സ്‌കൂളിലെ 50 പ്ലസ് വണ്‍, പ്ലസ്ടു വിദ്യാര്‍ഥികള്‍ക്കായി പൂര്‍വ വിദ്യാര്‍ഥിയായ പാലാക്കുന്നേല്‍ ജോസഫ് സക്കറിയ ഏര്‍പ്പെടുത്തിയ 5000 രൂപ വീതമുള്ള സ്‌കോളര്‍ഷിപ്പ് സമ്മാനിച്ചു. സ്‌കൂള്‍ ഓഡിറ്റോറിയത്തില്‍ ചേര്‍ന്ന സമ്മേളനത്തില്‍ സ്‌കൂള്‍ മാനേജര്‍ റവ. ഡോ. ജോബി കറുകപ്പറമ്പില്‍ സ്‌കോളര്‍ഷിപ്പുകള്‍ വിതരണം ചെയ്തു. പാലാക്കുന്നേല്‍ ജോസഫ് സക്കറിയയുടെ സ്‌കൂള്‍ അധ്യാപികയായിരുന്ന സിസ്റ്റര്‍ നെസ്‌തോര്‍ എഫ്‌സിസിയുടെ കാരുണ്യ പ്രവര്‍ത്തനങ്ങളുടെ സ്മരണാര്‍ഥമാണ് ഇദ്ദേഹം കഴിഞ്ഞ 22 വര്‍ഷമായി 50 കുട്ടികള്‍ക്ക് വീതം പഠനസഹായമായി സ്‌കോളര്‍ഷിപ്പ് നല്‍കുന്നത്. സാമ്പത്തിക പിന്നാക്കാവസ്ഥയും പഠനമികവും സല്‍സ്വഭാവവുമുള്ള വിദ്യാര്‍ഥികളെയാണ് സ്‌കോളര്‍ഷിപ്പിനായി പരിഗണിക്കുന്നത്. ഇദ്ദേഹത്തിന്‍റെ മകൻ സൗദിയില്‍ അരാംകോ കമ്പനി മാനേജരായ ജോര്‍ജ് ജോസഫിനെയും തന്‍റെ കാരുണ്യ പ്രവര്‍ത്തനത്തിന്‍റെ പാത പിന്തുടരുന്നതിനായി വര്‍ഷംതോറും നടത്തുന്ന ഈ പരിപാടിയില്‍ പങ്കെടുപ്പിക്കാറുണ്ട്. സ്‌കൂള്‍ പ്രിന്‍സിപ്പല്‍ ജയിംസ് കെ. മാളിയേക്കല്‍, സീനിയര്‍ അസി. മഞ്ജു ഗ്ലാഡി, പ്രോഗ്രാം കണ്‍വീനര്‍ അഞ്ജു സോജന്‍ എന്നിവര്‍ പ്രസംഗിച്ചു.

സ്‌കൂട്ടറുകളില്‍ ബൈക്കിടിച്ച് അപകടം: യുവാവിനു പരിക്കേറ്റു

ചങ്ങനാശേരി: തട്ടുകടക്കു മുമ്പില്‍ റോഡിലേക്കിറക്കിവച്ച സ്‌കൂട്ടറുകളില്‍ ബൈക്കിടിച്ചുമറിഞ്ഞു. റോഡിലേക്കു തെറിച്ചുവീണ ബൈക്ക് യാത്രക്കാരനായ യുവാവിനു ഗുരുതരമായി പരിക്കേറ്റു. ഇന്നലെ രാത്രി ഒമ്പതിന് മോര്‍ക്കുളങ്ങരയ്ക്കും പാലാത്രച്ചിറക്കുമിടയിലാണ് അപകടം. വാര്‍ഡ് കൗണ്‍സിലര്‍ എത്സമ്മ ജോബ് ചങ്ങനാശേരി പോലീസില്‍ അറിയിച്ചതിനെത്തുടര്‍ന്ന് പോലീസ് എത്തിയാണ് യുവാവിനെ ചങ്ങനാശേരി ജനറല്‍ ആശുപത്രിയില്‍ പ്രവേശിപ്പിച്ചത്. ചങ്ങനാശേരി ബൈപാസിന്‍റെ പാലാത്രച്ചിറ ഭാഗത്ത് റോഡരുകില്‍ വര്‍ധിച്ചുവരുന്ന തട്ടുകടകള്‍ അപകടങ്ങള്‍ക്ക് കാരണമാകുന്നതായി പരാതിയുണ്ട്. തട്ടുകടകള്‍ക്കുമുമ്പില്‍ അലക്ഷ്യമായി പാര്‍ക്ക് ചെയ്യുന്ന വാഹനങ്ങളും വട്ടംകൂടിനില്‍ക്കുന്ന ആളുകളുമാണ് വേഗതയില്‍ റോഡിലൂടെ എത്തുന്ന വാഹനങ്ങള്‍ക്ക് അപകടഭീഷണിയാകുന്നത്. വാഹനങ്ങള്‍ക്കും കാല്‍നട സഞ്ചാരികള്‍ക്കും ബുദ്ധിമുട്ടുണ്ടാകുന്ന തരത്തിലുള്ള വഴിവാണിഭങ്ങള്‍ക്കും തട്ടുകടകള്‍ക്കുമെതിരേ പോലീസും തദ്ദേശസ്ഥാപനങ്ങളും കര്‍ശന നടപടി സ്വീകരിക്കണമെന്ന ആവശ്യം ശക്തമാണ്.

പെരുന്ന ബസ് സ്റ്റാന്‍ഡിലെ ടേക്ക് എ ബ്രേക്ക് പൂട്ടിയിട്ട് മാസങ്ങള്‍: മാര്‍ക്കറ്റിലെ കടമുറികള്‍ നാശോന്മുഖം

ചങ്ങനാശേരി: പെരുന്ന ബസ് സ്റ്റാന്‍ഡിലെ ടേക്ക് എ ബ്രേക്ക് പൂട്ടിയിട്ട് മാസങ്ങള്‍ പിന്നിടുന്നു. ബസ് സ്റ്റാന്‍ഡിലെത്തുന്ന സ്ത്രീകളടക്കം യാത്രക്കാര്‍ ദുരിതത്തിലാണ്. അറ്റകുറ്റപ്പണികള്‍ ആരംഭിച്ചെങ്കിലും അനിശ്ചിതമായി നീളുകയാണ്. ഒന്നാംനമ്പര്‍ ബസ് സ്റ്റാന്‍ഡിലും സൗകര്യങ്ങള്‍ ദുര്‍ല്ലഭമാണ്. മുനിസിപ്പല്‍ റസ്റ്റ്ഹൗസ് പൊളിച്ചുനീക്കിയിട്ട് വര്‍ഷങ്ങള്‍ പിന്നിട്ടെങ്കിലും നിര്‍മാണം ആരംഭിച്ചിട്ടില്ല. 37 വാര്‍ഡുകളിലായി നൂറുകണക്കിന് വഴിവിളക്കുകള്‍ പ്രകാശിക്കുന്നില്ല. ഒരുകോടിയോളം രൂപ മുടക്കി ഫാത്തിമാപുരത്ത് നിര്‍മിച്ച ക്രിമിറ്റോറിയം ഉപയോഗയോഗ്യമല്ല. ഒന്നരക്കോടി രൂപ മുടക്കി പെരുന്ന ബസ് സ്റ്റാന്‍ഡില്‍ നിര്‍മിച്ച ഇഎംഎസ് ഹാള്‍ നാശോന്മുഖമാണ്. ചങ്ങനാശേരി മാര്‍ക്കറ്റിലെ നഗരസഭവക കടമുറികള്‍ തകര്‍ച്ചയുടെ വക്കിലാണ്. ഇത് സംരക്ഷിക്കാന്‍ നടപടിയില്ല. മുനിസിപ്പല്‍ ടൗണ്‍ഹാളില്‍ അടിസ്ഥാന സൗകര്യങ്ങളില്ല. നഗരത്തിലെ നിരവധി റോഡുകള്‍ തകര്‍ന്നടിഞ്ഞ് സഞ്ചാരം ദുരിതമായ അവസ്ഥയിലാണ്. നഗരത്തില്‍ തെരുവ് നായ്ക്കളുടെ നിയന്ത്രണത്തിനു കാര്യക്ഷമമായ നടപടികളില്ല. നഗരസഭയുടെ അധീനതയിലുള്ള കടമുറികള്‍ ലേലംകൊണ്ടവര്‍ മറിച്ചുവിറ്റ് ലാഭം നേടുന്നതിലും ആക്ഷേപം ഉയര്‍ന്നിട്ടുണ്ട്. ഈ വിഷയങ്ങള്‍ ഉന്നയിച്ചാണ് ഇന്ന് ബിജെപിയുടെ നേതൃത്വത്തില്‍ പ്രതിഷേധം സംഘടിപ്പിച്ചിരിക്കുന്നത്.

ചങ്ങനാശേരി-ഹൈറേഞ്ച് സര്‍വീസുകള്‍ നിര്‍ത്തലാക്കുന്നു

ചങ്ങനാശേരി: ചങ്ങനാശേരി ഡിപ്പോയില്‍നിന്നു ഹൈറേഞ്ച് സെക്ടറിലേക്കുള്ള സര്‍വീസുകള്‍ റദ്ദുചെയ്യുന്നു. കഴിഞ്ഞ ഏതാനും വര്‍ഷങ്ങള്‍ക്കിടയിലാണ് അര ഡസനോളം സര്‍വീസുകള്‍ വെട്ടിക്കുറച്ചത്. രാവിലെ 9.20ന് ചങ്ങനാശേരിയില്‍നിന്നു പുറപ്പെട്ടിരുന്ന കുമളി-നെടുങ്കണ്ടം, ഉച്ചകഴിഞ്ഞ് 3.10നുള്ള മുരിക്കാശേരി ഫാസ്റ്റ് പാസഞ്ചര്‍ സര്‍വീസുകളാണ് അകാരണമായി ഏറ്റവും ഒടുവില്‍ നിര്‍ത്തലാക്കിയ സര്‍വീസുകള്‍. രാവിലെ 9.20നുള്ള സര്‍വീസ് കുമളിയിലെത്തി അവിടെനിന്നു നെടുങ്കണ്ടത്തിനു പോയിരുന്നു. കുമളിയില്‍നിന്നും ബസ് സര്‍വീസുകള്‍ കുറവുള്ള കമ്പംമെട്ട്, കരുണാപുരം, ബാലന്‍പിള്ളസിറ്റി, തൂക്കുപാലംവഴി നെടുങ്കണ്ടത്തിനു സര്‍വീസ് നടത്തിയിരുന്ന ഈ ബസിനു നല്ല കളക്‌ഷന്‍ ലഭിച്ചിരുന്നു. വിവിധ സ്‌കൂളുകളിലെ അധ്യാപകര്‍ ഉള്‍പ്പെടെ യാത്രക്കാര്‍ക്ക് ഈ സര്‍വീസ് ഉപകാരപ്പെട്ടിരുന്നു. ഈ സര്‍വീസിനു പകരം ചങ്ങനാശേരിയില്‍നിന്ന് ഉച്ചയ്ക്ക് 12.50ന് കുമളിക്കു മാത്രമായി സര്‍വീസ് ഇപ്പോള്‍ അയയ്ക്കുന്നുണ്ട്. എന്നാല്‍ ഈ സര്‍വീസിനു പറയത്തക്ക കളക്‌ഷന്‍ ലഭിക്കുന്നില്ലെന്നും ചൂണ്ടിക്കാണിക്കപ്പെടുന്നു. 3.10നുള്ള മുരിക്കാശേരി സര്‍വീസ് എന്തിനാണ് നിര്‍ത്തലാക്കിയതെന്ന് അധികൃതര്‍ക്ക് ഉത്തരമില്ല. കോവിഡ്: സര്‍വീസുകള്‍ പുനരാരംഭിച്ചില്ല കോവിഡ്കാലത്ത് നിര്‍ത്തലാക്കിയ രാവിലെ 6.10നുള്ള മുണ്ടക്കയം, 6.20നുള്ള കട്ടപ്പന, 7.30നുള്ള മുണ്ടക്കയം സര്‍വീസുകളും പുനരാരംഭിക്കുന്ന കാര്യത്തില്‍ ഡിപ്പോ അധികൃതര്‍ നിസംഗനിലപാടാണ് സ്വീകരിച്ചിരിക്കുന്നത്. രാവിലെ 8.40ന് നടത്തിയിരുന്ന കുമളി സര്‍വീസ് ആറുമാസംമുമ്പും 8.10നുള്ള മുണ്ടക്കയം സര്‍വീസ് ഒന്നരമാസം മുമ്പും നിര്‍ത്തിയിരുന്നു. കളക്‌ഷന്‍ കുറവായതിന്‍റെ പേരിലാണ് ഹൈറേഞ്ച് സര്‍വീസുകള്‍ വെട്ടിക്കുറയ്ക്കുന്നതെന്നാണ് ഡിപ്പോ അധികൃതര്‍ ചൂണ്ടിക്കാട്ടുന്നതെങ്കിലും ചില സ്വകാര്യ ബസ് സര്‍വീസുകളെ സഹായിക്കാനാണിതെന്നകാര്യം തെളിവുസഹിതം പുറത്തകൊണ്ടുവരുമെന്ന് പാസഞ്ചേഴ്‌സ് അസോസിയേഷനും യാത്രക്കാരും പറഞ്ഞു.

ഭാര്യാമാതാവിനെ യുവാവ് തലയ്ക്കടിച്ച് കൊലപ്പെടുത്തി

മുക്കൂട്ടുതറ: വെച്ചൂച്ചിറയിൽ ഭാര്യാമാതാവിനെ യുവാവ് തലയ്ക്കടിച്ച് കൊലപ്പെടുത്തി. അഴുതാ കോളനിയിലെ താമസക്കാരി ഉഷാമണി (54) യാണ് കൊല്ലപ്പെട്ടത്. സംഭവവുമായി ബന്ധപ്പെട്ട് ഉഷയുടെ മരുമകൻ സുനിലിനെ വെച്ചൂച്ചിറ പോലീസ് കസ്റ്റഡിയിലെടുത്തു. കുടുംബപ്രശ്നമാണ് തർക്കത്തിലേക്കും കൊലപാതകത്തിലേക്കും നയിച്ചതെന്നാണ് പ്രാഥമികവിവരം. മൺവെട്ടി ഉപയോഗിച്ചാണ് കൊലപാതകം നടത്തിയത്. ഇന്നലെ ഉച്ചകഴിഞ്ഞ് മൂന്നോടെയാണ് സംഭവം. എരുമേലി എലിവാലിക്കര സ്വദേശിയാണ് സുനിൽ. ഭാര്യയുമായി സുനിൽ അകന്നു കഴിയുകയായിരുന്നു. ഇരുവരും തമ്മിലുള്ള പ്രശ്നങ്ങളാണ് ഭാര്യാമാതാവിന്‍റെ കൊലപാതകത്തിലേക്ക് നയിച്ചതെന്ന് പോലീസ് പറയുന്നു. കുടുംബപ്രശ്നങ്ങളെ തുടർന്ന് സുനിലും ഭാര്യയും കഴിഞ്ഞ നാലുവർഷത്തോളമായി പിരിഞ്ഞുതാമസിക്കുകയായിരുന്നു. അമ്മ ഉഷയോടൊപ്പമാണ് ഭാര്യയും രണ്ടുമക്കളും കഴിഞ്ഞിരുന്നത്. ഇന്നലെ ഉച്ചയോടെ, കുട്ടികളെ കാണണമെന്ന ആവശ്യവുമായാണ് സുനിൽ ഉഷയുടെ വീട്ടിലെത്തിയത്. വൈകാതെ ഇരുവരും വഴക്കായി. പിന്നാലെ സുനിൽ മൺവെട്ടി ഉപയോഗിച്ച് ഉഷയുടെ തലയ്ക്കടിച്ച് കൊലപ്പെടുത്തുകയായിരുന്നു. തലയ്ക്ക് മാരകമായി മുറിവേറ്റ് രക്തം വാർന്ന് മരിച്ച നിലയിൽ വീടിന്‍റെ പരിസരത്തുതന്നെയാണ് ഉഷയുടെ മൃതദേഹം കിടന്നത്. ഇവിടെനിന്നു മാറാൻ സുനിൽ തയാറായിരുന്നില്ലെന്ന് പരിസരവാസികൾ പറയുന്നു. സ്ഥലത്തെത്തിയ പഞ്ചായത്ത് വൈസ് പ്രസിഡന്‍റ് അടക്കമുള്ള ആളുകളോട് സുനിൽ കൊലപാതകത്തെക്കുറിച്ച് ഏറ്റുപറഞ്ഞതായാണ് വിവരം. തന്‍റെ സ്വത്തുക്കൾ ഉഷാമണി കൈക്കലാക്കിയെന്നും ഇവർ മരിക്കുന്നതാണ് നല്ലതെന്നും സുനിൽ പറഞ്ഞതായി നാട്ടുകാർ പറയുന്നു. പോലീസ് എത്തിയാണ് സുനിലിനെ സംഭവസ്ഥലത്തുനിന്നു കസ്റ്റഡിയിൽ എടുത്തത്. സംഭവം നടക്കുന്ന സമയത്ത് സുനിലിന്‍റെ ഭാര്യ ജോലിക്ക് പോയിരിക്കുകയായിരുന്നു. ഇവരുടെ മക്കൾ സ്കൂളിൽ ആയിരുന്നുവെന്നും പരിസരവാസികൾ പറയുന്നു. സംഭവത്തിൽ കേസെടുത്ത് അന്വേഷണം ആരംഭിച്ചതായി വെച്ചൂച്ചിറ പോലീസ് അറിയിച്ചു.

മണര്‍കാട് ഫാമില്‍ കോഴിക്കുഞ്ഞുങ്ങളുടെ പ്രവേശനോത്സവം

കോട്ടയം: കോഴിക്കുഞ്ഞുങ്ങള്‍ക്ക് പ്രവേശനോത്സവം. പോഷകസമൃദ്ധമായ തീറ്റയും തണുപ്പില്‍ നിന്നും രക്ഷിക്കാന്‍ ചൂടും തിളപ്പിച്ചാറിയ വെള്ളവുമൊക്കെ നല്‍കി പ്രവേശന ദിവസംതന്നെ കോഴിക്കുഞ്ഞുങ്ങള്‍ ഹാപ്പി. ജില്ലാ പഞ്ചായത്തിന്‍റെ കീഴിലുള്ള മണര്‍കാട് കോഴിവളര്‍ത്തല്‍ കേന്ദ്രത്തിലെ കവാടത്തില്‍ ഇന്നലെ സ്ഥാപിച്ച ഫ്‌ളക്‌സ് ബോര്‍ഡ് ഇങ്ങനെയായിരുന്നു. പക്ഷിപ്പനി ബാധയെത്തുടര്‍ന്ന് കഴിഞ്ഞ ഒരു വര്‍ഷമായി അടച്ചിട്ട ഫാം ഇന്നലെ തുറന്നു. പ്രവേശനോത്സവ ദിവസത്തില്‍ തൊടുപുഴ കോലാനി ഫാമില്‍നിന്നും ഒരുദിവസം പ്രായമായ ഗ്രാമശ്രീ ഇനത്തില്‍പെട്ട 1372 കോഴിക്കുഞ്ഞുങ്ങളെയാണ് എത്തിച്ചത്. ബ്രൂഡിംഗ് നഴ്‌സറിയിലാണ് ഇപ്പോള്‍ കോഴിക്കുഞ്ഞുങ്ങളെ സംരക്ഷിക്കുന്നത്. 150 കോഴിക്കുഞ്ഞുങ്ങളെ ഒരു ബ്രൂഡറിലാക്കി 150 വാട്ട് കൃത്രിമ ചൂടു നല്‍കിയാണ് സംരക്ഷണം. ഇതിനൊപ്പം തീറ്റയും തിളപ്പിച്ചാറിയ വെള്ളവും നല്‍കും. ഒരു മാസം വരെ കുഞ്ഞുങ്ങളെ ഇങ്ങനെ സംരക്ഷിക്കും. 46-ാം ദിവസം ഒരു കോഴിക്ക് 130 രൂപ നിരക്കില്‍ വില്‍ക്കാന്‍ തുടങ്ങും. അടുത്ത മാസം മാതൃപിതൃ ശേഖരത്തിനായി മണ്ണുത്തി യൂണിവേഴ്സിറ്റി പൗള്‍ട്രിഫാമില്‍നിന്ന് ഒരു ദിവസം പ്രായമായ 1800 കോഴിക്കുഞ്ഞുങ്ങളെയും കൊണ്ടുവരുന്നുണ്ട്. ഫാമിന്‍റെ പ്രവര്‍ത്തനം പൂര്‍ണതോതില്‍ ആരംഭിച്ചുകഴിഞ്ഞാല്‍ സെന്‍ട്രല്‍ പൗള്‍ട്രി ഡെവലപ്മെന്‍റ് ഓര്‍ഗനൈസേഷനില്‍നിന്ന് കാവേരിയിനത്തില്‍പെട്ട കോഴികളുടെ 4000 മുട്ടകള്‍ വിരിയിക്കാനായി എത്തിക്കും. പക്ഷിപ്പനി തടയാന്‍ കൂടുതല്‍ സുരക്ഷാക്രമീകരണങ്ങളോടെയാണ് ഫാം തുറന്നിരിക്കുന്നത്.

പാരമ്പര്യം കൈവിടാതെ സംക്രാന്തി വാണിഭം

ഗാന്ധിനഗര്‍: സംക്രാന്തി ഗ്രാമത്തിന്‍റെ പാരമ്പര്യവും പഴമയും വിളിച്ചറിയിച്ച സംക്രമവാണിഭത്തില്‍ തലമുറകള്‍ സംഗമിച്ചു. ഒപ്പം സംക്രാന്തി വിളക്കമ്പലത്തില്‍ കര്‍ക്കിടക സംക്രമ ഉത്സവവും ഇന്നലെ നടന്നു. കുമാരനല്ലൂര്‍ ഊരാണ്മ ദേവസ്വത്തിന്‍റെയും സാമൂഹിക സാംസ്‌കാരിക സംഘടനകളുടെയും സഹകരണത്തോടെ നഗരസഭയുടെ നേതൃത്വത്തിലായിരുന്നു വാണിഭം. കാര്‍ഷിക പണിയായുധങ്ങള്‍, ഫര്‍ണിച്ചര്‍, മണ്‍ചട്ടികള്‍, ഇരുമ്പ് സാധനങ്ങള്‍ തുടങ്ങി കാലം മറന്നുകൊണ്ടിരിക്കുന്ന ഒട്ടേറെ സാമഗ്രികള്‍ ഇന്നലെ വില്‍ക്കാനുണ്ടായിരുന്നു. ഈറ്റകൊണ്ടുള്ള മീന്‍കൂട, വാലന്‍ കുട്ട, വട്ടക്കുട്ട, ചോറ്റുകുട്ട, മുറം, ഭരണി, തഴപ്പായ, കുട്ട, വട്ടി, തവി, കോടാലിക്കൈ, പായ തുടങ്ങിയവയുമായി വിവിധ പ്രദേശങ്ങളില്‍ നിന്നുള്ള കച്ചവടക്കാരും കുലത്തൊഴിലാളികളും അണിനിരന്നു. കാര്‍ഷിക ഉപകരണങ്ങളായ തൂമ്പ, വാക്കത്തി, അരിവാള്‍, ഇരുമ്പ് ഉപകരണങ്ങള്‍, കോടാലിക്കൈ തുടങ്ങിയവയും വഴിയോര വാണിഭത്തില്‍ നിരന്നു.

പാക്കില്‍ വാണിഭത്തിന് ഇന്നു തുടക്കം

പഴമയുടെയും ഗൃഹാതുരത്വത്തിന്‍റെയും ഓര്‍മകളുണര്‍ത്തി പാക്കില്‍ വാണിഭത്തിന് ഇന്നു തുടക്കം. കര്‍ക്കിടകം ഒന്നു മുതല്‍ ചിങ്ങം വരെ നീളുന്ന പാക്കില്‍ വാണിഭമേള കാര്‍ഷികപ്പെരുമയുടെ ഉത്സവംകൂടിയാണ്. ചിങ്ങവനത്തിനു സമീപം പാക്കില്‍ ധര്‍മശാസ്താ ക്ഷേത്ര മൈതാനത്താണ് നാട്ടുചന്ത പഴമ തെറ്റാതെ നടക്കുന്നത്. ഈ വാണിഭത്തിനു പിന്നില്‍ ഒരു ഐതിഹ്യം നിലനില്ക്കുന്നതായി പഴമക്കാര്‍ പറയുന്നു. പാക്കില്‍ ക്ഷേത്രത്തില്‍ പരശുരാമന്‍ വിഗ്രഹം പ്രതിഷ്ഠിക്കാന്‍ ശ്രമിച്ചിട്ടും ഉറപ്പിക്കാനായില്ലെന്നും അപ്പോള്‍ അതുവഴി മുറം വില്‍ക്കാനെത്തിയ പാക്കനാര്‍ വിഗ്രഹം പിടിച്ചുറപ്പിച്ചുവെന്നുമാണ് ഐതിഹ്യം. ഇവിടെ പാര്‍ക്ക് എന്നു പറഞ്ഞാണ് പാക്കനാര്‍ വിഗ്രഹമുറപ്പിച്ചതത്രെ. എല്ലാ വര്‍ഷവും കര്‍ക്കിടകം ഒന്ന് മുതല്‍ ഇവിടെ മുറം വില്‍ക്കാന്‍ പരശുരാമന്‍ പാക്കനാര്‍ക്ക് അനുമതിയും നല്‍കിയത്രെ. അങ്ങനെ അവിടം പാക്കിലായി പരിണമിച്ചു. പാക്കനാരുടെ പിന്‍മുറക്കാര്‍ എത്തി തിരിതെളിച്ചാണ് പാക്കില്‍ വാണിഭം എല്ലാ വര്‍ഷവും ആരംഭിക്കുക. ഈറ്റ ഉത്പന്നങ്ങള്‍ ക്ഷേത്രത്തില്‍ സമര്‍പ്പിച്ച ശേഷമാണ് വാണിഭത്തിന് തുടക്കമാവുക. മുന്‍കാലങ്ങളില്‍ മധ്യതിരുവിതാംകൂറിലെ ഏറ്റവും വലിയ തുറന്ന വിപണിയായിരുന്നു പാക്കില്‍ സംക്രമ വാണിഭം. എല്ലാത്തരം വീട്ടുപകരണങ്ങളും സ്റ്റാളുകളില്‍ വാങ്ങാനുണ്ടാവും. ഉരല്‍, ഉലക്ക, അമ്മിക്കല്ല്, അരകല്ല്, ആട്ടുകല്ല്, കല്‍ചട്ടി, മണ്‍ചട്ടി, തൈര് കടഞ്ഞ് വെണ്ണയെടുക്കുന്ന മത്ത്, ചോറ് വാര്‍ക്കുന്ന തടിപ്പലക, നാഴി, ഇടങ്ങഴി, പറ, നെല്ല് ഉണക്കുന്ന ചിക്കുപായ, കിടക്കപ്പായ, വിശറി, ചാരുകസേര, അരകല്ല് തുടങ്ങിവയ്ക്കു പുറമെ ഫര്‍ണിച്ചറുകളും ഇവിടെയുണ്ടാകും. ഇവിടെ ലഭിക്കുന്ന നാടന്‍ കുടംപുളിക്ക് ആവശ്യക്കാര്‍ ഏറെയാണ്. അവില്‍, മലര്, നാടന്‍കുത്തരി, പച്ചരി, കരിപ്പട്ടി, ശര്‍ക്കര, പഞ്ഞപ്പുല്ല്, കൂവപ്പൊടി എന്നിവയും വാങ്ങാം. നാടന്‍ വിത്തിനങ്ങളും കാര്‍ഷികോപകരണങ്ങളും സ്റ്റാളുകളില്‍ ലഭ്യമാണ്. കാലം മാറിയതോടെ വസ്ത്രം മുതല്‍ മൊബൈല്‍ വരെ വിറ്റഴിയുന്നു. കുടുംബശ്രീ, കൃഷിഭവന്‍, തൊഴിലുറപ്പ് വിഭാഗങ്ങളുടെയും സ്റ്റാളുകളുമുണ്ടാകും.

പരിക്കേറ്റ വീട്ടമ്മയെ ആംബുലൻസിൽനിന്ന് ഇറക്കിവിട്ടതായി പരാതി

എരുമേലി: പുല്ലരിവാൾ കൈയിൽ കൊണ്ട് ഞരമ്പ് മുറിഞ്ഞ വീട്ടമ്മയെ 108 ആംബുലൻസിൽ കയറ്റാതെ ഇറക്കിവിട്ടെന്ന് പരാതി. വെച്ചൂച്ചിറയിലെ സ്വകാര്യ ആശുപത്രിയിൽ പ്രാഥമിക ചികിത്സയ്ക്കുശേഷം കോട്ടയം മെഡിക്കൽ കോളജിൽ എത്തിക്കുന്നതിന് ആംബുലൻസ് എത്തിച്ചപ്പോഴാണ് വീട്ടമ്മയെ കൊണ്ടുപോകാതെ ആംബുലൻസ് മടങ്ങിപ്പോയത്. വീട്ടമ്മയെ ആംബുലൻസിൽനിന്നിറക്കി വിടുന്നതിന്‍റെ ദൃശ്യങ്ങൾ സമൂഹ മാധ്യമങ്ങളിൽ പ്രചരിച്ചതോടെ പ്രതിഷേധം വ്യാപകമായി. ഒടുവിൽ ബൈക്കിൽ ഒരാളുടെ പിന്നിലിരുന്ന് മെഡിക്കൽ കോളജിലെത്തിയ വീട്ടമ്മയ്ക്ക് അടിയന്തര പ്ലാസ്റ്റിക് സർജറി വേണ്ടിവന്നു. സംഭവത്തിൽ ആരോഗ്യ മന്ത്രി ഇടപെട്ട് അന്വേഷണം നടത്തി നടപടി സ്വീകരിക്കണമെന്ന് ആവശ്യമുയർന്നു. കഴിഞ്ഞ ദിവസം വെച്ചൂച്ചിറ ബിഎംസി ആശുപത്രിയിലാണ് സംഭവം. പ്രാഥമിക ചികിത്സ നൽകിയ ശേഷം ഓപ്പറേഷൻ വേണ്ടിവരുമെന്നതിനാൽ കോട്ടയം മെഡിക്കൽ കോളജിൽ എത്തിക്കാൻ 108 ആംബുലൻസിൽ രോഗിയെ കയറ്റിയെങ്കിലും കൊണ്ടുപോകാൻ ഡ്രൈവറും മെയിൽ നഴ്‌സും വിസമ്മതിച്ചെന്ന് ഡോ. മനു പറയുന്നു. ഡ്യൂട്ടി ഷിഫ്റ്റ്‌ ചെയ്ഞ്ച് ചെയ്യുന്നതുമൂലം രോഗിയെ കൊണ്ടുപോകാനാവില്ലെന്ന് പറഞ്ഞ് നിർധനയായ വീട്ടമ്മയെ ഇവർ ഇറക്കി വിടുകയായിരുന്നുവെന്നാണ് പരാതി. ഒടുവിൽ ഭർത്താവ് തന്‍റെ ബൈക്കിൽ വീട്ടമ്മയെ കയറ്റി കോട്ടയം മെഡിക്കൽ കോളജിൽ എത്തിക്കുകയായിരുന്നു. സംഭവം സബന്ധിച്ച് ആരോഗ്യ മന്ത്രിക്ക് നാട്ടുകാർ പരാതി നൽകിയിട്ടുണ്ട്.

കോട്ടയത്തെ പഠന നഗരമാക്കാന്‍ യുനെസ്‌കോയ്ക്ക് അപേക്ഷ സമര്‍പ്പിച്ചു

കോട്ടയം: ഐക്യരാഷ്‌ട്ര വിദ്യാഭ്യാസ ശാസ്ത്രീയ സാംസ്‌കാരിക സംഘടനയായ യുനെസ്‌കോയുടെ ലോക പഠന നഗര ശൃംഖലയില്‍ കോട്ടയം നഗരത്തെ ഉള്‍പ്പെടുത്താന്‍ കേന്ദ്ര മാനവ വിഭവശേഷി വികസന മന്ത്രാലയം അപേക്ഷ സമര്‍പ്പിച്ചതായി ഫ്രാന്‍സിസ് ജോര്‍ജ് എംപി അറിയിച്ചു. കോട്ടയം നഗരസഭയാണ് കേന്ദ്ര മാനവ വിഭവശേഷി മന്ത്രാലയത്തിന് ഇത് സംബന്ധിച്ച അപേക്ഷ നല്‍കിയത്. ആജീവനാന്ത പഠനത്തെ പ്രോത്സാഹിപ്പിക്കുന്ന പ്രവര്‍ത്തനങ്ങള്‍, വിദ്യാഭ്യാസ, സാമൂഹ്യ സാംസ്‌കാരിക രംഗത്തെ നേട്ടങ്ങള്‍, പ്രസിദ്ധീകരണങ്ങള്‍ എന്നിവയെല്ലാം വിലയിരുത്തിയാണ് പഠന നഗരമെന്ന ശ്രേണിയില്‍ യുനെസ്‌കോ നഗരങ്ങള്‍ക്ക് പ്രത്യേക പദവി നല്‍കി ഉള്‍പ്പെടുത്തുന്നത്. 100 ശതമാനം സാക്ഷരത നേടിയ ഇന്ത്യയിലെ ആദ്യത്തെ നഗരമായ കോട്ടയം അക്ഷരനഗരി എന്ന പേരില്‍ അറിയപ്പെടുന്നു. മലയാളത്തിലെ ആദ്യ പത്രമായ ദീപികയ്ക്കു തുടക്കം കുറിച്ച നഗരം, ആദ്യത്തെ ഇംഗ്ലീഷ് സ്‌കൂള്‍, എഴുത്തുകാരെ പ്രോത്സാഹിപ്പിക്കുന്നതിനായി രൂപീകരിച്ച സാഹിത്യ പ്രവര്‍ത്തക സഹകരണ സംഘം, അക്ഷര മ്യൂസിയം എന്നിവയെ സംബന്ധിച്ചുള്ള വിവരങ്ങള്‍ അപേക്ഷയില്‍ ചേര്‍ത്തിട്ടുണ്ട്. കോട്ടയത്തെ പുരാതന ദേവാലയങ്ങള്‍, നവോത്ഥാന നായകന്മാര്‍, യൂണിവേഴ്‌സിറ്റി, കോളജുകള്‍, സ്‌കൂളുകള്‍ എന്നിവയെക്കുറിച്ചും അപേക്ഷയില്‍ ഉള്‍ക്കൊള്ളിച്ചിട്ടുണ്ട്. യുനെസ്‌കോ അംഗീകരിച്ച കൂടിയാട്ടം, മുടിയാട്ടം എന്നീ അനുഷ്ഠാനകലകളെക്കുറിച്ചുള്ള വിവരങ്ങളും ചേര്‍ത്തിട്ടുണ്ട്. അപേക്ഷ വിലയിരുത്തിയതിനുശേഷം യുനെസ്‌കോ തീരുമാനം കൈക്കൊള്ളുമെന്ന് ഫ്രാന്‍സിസ് ജോര്‍ജ് എംപി അറിയിച്ചു.

പോളിസി നിരസിച്ചിട്ടും പണം മടക്കിനല്‍കിയില്ല; ഇന്‍ഷ്വറന്‍സ് കന്പനിക്ക് പിഴ

കോട്ടയം: പ്രീമിയം അടച്ച് ആരോഗ്യ ഇന്‍ഷ്വറന്‍സ് എടുത്തയാളുടെ പോളിസി നിരസിച്ചിട്ടും പണം മടക്കിനല്‍കുന്നതില്‍ വീഴ്ച വരുത്തിയ ഇന്‍ഷ്വറന്‍സ് കന്പനിയോടു പ്രീമിയം തുക പലിശ സഹിതം തിരിച്ചുനല്‍കാനും നഷ്ടപരിഹാരത്തിനും ഉത്തരവിട്ട് ജില്ലാ ഉപഭോക്തൃ തര്‍ക്കപരിഹാര കമ്മീഷന്‍. മുട്ടമ്പലം സ്വദേശി എസ്.പി. മത്തായി സ്റ്റാര്‍ ഹെല്‍ത്ത് ആന്‍ഡ് അലൈഡ് ഇന്‍ഷ്വറന്‍സ് കമ്പനിയില്‍നിന്ന് 1,26,381 രൂപ പ്രീമിയം അടച്ച് 2024 സെപ്റ്റംബര്‍ രണ്ടിനാണ് ആരോഗ്യ ഇന്‍ഷ്വറന്‍സ് പോളിസി വാങ്ങിയത്. പ്രൊപ്പോസല്‍ ഫോം നിരസിച്ചതിനെത്തുടര്‍ന്ന് 15 ദിവസത്തിനകം തുക ബാങ്ക് അക്കൗണ്ടിലേക്ക് മടക്കിനല്‍കുമെന്ന് പറഞ്ഞെങ്കിലും ലഭിച്ചില്ല. തുക അക്കൗണ്ടിലേക്ക് ഇട്ടുകൊടുത്തതായാണ് ഇന്‍ഷ്വറന്‍സ് കമ്പനി അറിയിച്ചത്. തുക ലഭിക്കാതെ വന്നതോടെ മത്തായി കോട്ടയം ഉപഭോക്തൃ തര്‍ക്കപരിഹാര കമ്മിഷനെ സമീപിക്കുകയായിരുന്നു. അക്കൗണ്ടിലേക്ക് തുക വന്നിട്ടുണ്ടോ എന്നു പരിശോധിക്കാന്‍ പരാതിക്കാരന്‍റെ ബാങ്ക് സ്റ്റേറ്റ്‌മെന്‍റ് വേണമെന്ന് ഇന്‍ഷ്വറന്‍സ് കമ്പനി ആവശ്യപ്പെട്ടിരുന്നു. ഇടപാടുരേഖകള്‍ സൂക്ഷിക്കേണ്ടത് ഇന്‍ഷ്വറന്‍സ് കമ്പനിയുടെ ഉത്തരവാദിത്വമാണെന്നും പരാതിക്കാരന്‍റെ ബാങ്ക് സ്റ്റേറ്റ്‌മെന്‍റ് ആവശ്യപ്പെടുന്നത് ഇന്‍ഷ്വറന്‍സ് കമ്പനിയുടെ ഭാഗത്തുനിന്നുള്ള അശ്രദ്ധയുടെ ഉദാഹരണമാണെന്നും കമ്മീഷന്‍ അഭിപ്രായപ്പെട്ടു. ഇന്‍ഷ്വറന്‍സ് പ്രീമിയവും 2024 സെപ്റ്റംബര്‍ രണ്ടുമുതല്‍ 2025 ജനുവരി 30 വരെ 9 ശതമാനം നിരക്കില്‍ പലിശയും നല്‍കാനാണ് അഡ്വ. വി.എസ്. മനുലാല്‍ പ്രസിഡന്‍റായും അഡ്വ. ആര്‍. ബിന്ദു, കെ.എം. ആന്‍റോ എന്നിവര്‍ അംഗങ്ങളുമായുള്ള ഉപഭോക്തൃ തര്‍ക്കപരിഹാര കമ്മീഷന്‍ വിധിച്ചത്. സേവന ന്യൂനതയ്ക്ക് നഷ്ടപരിഹാരമായി 35,000 രൂപയും നല്‍കണം.

ഷോൺ ജോർജിന് സ്വീകരണം നൽകി

പൂഞ്ഞാർ: ബിജെപി സംസ്ഥാന വൈസ് പ്രസിഡന്‍റായി നിയോഗിക്കപ്പെട്ട ഷോൺ ജോർജിനു പൂഞ്ഞാറിൽ ഉജ്വല വരവേൽപ്പ്. വൈസ് പ്രസിഡന്‍റായി ചുമതലയേറ്റശേഷം ആദ്യമായി പൂഞ്ഞാറിലെത്തിയ ഷോൺ ജോർജിനെ പനച്ചിപ്പാറ ടൗണിൽ നൂറുകണക്കിന് പ്രവർത്തകർ ചേർന്ന് ഹാരാർപ്പണം ചെയ്തു സ്വീകരിച്ചു. തുടർന്ന് പുതിയ പഞ്ചായത്ത്‌ കമ്മിറ്റി ഓഫീസിലേക്ക് ആനയിച്ചു. പഞ്ചായത്ത്‌ കമ്മിറ്റി ഓഫീസിന്‍റെ ഉദ്ഘാടനം ബിജെപി ദേശീയ നിർവാഹക സമിതിയംഗം പി.സി. ജോർജ് നിർവഹിച്ചു. പഞ്ചായത്ത്‌ കമ്മിറ്റി പ്രസിഡന്‍റ് ജി. ഗോപകുമാർ അധ്യക്ഷത വഹിച്ചു. മണ്ഡലം പ്രസിഡന്‍റ് ജോ ജിയോ ജോസഫ്, ജനറൽ സെക്രട്ടറി എം.എസ്. ശ്രീകാന്ത്, ടോമി ഈറ്റത്തോട്, മധു കാലായിൽ, അനിയമ്മ സണ്ണി, ലെൽസ് ജേക്കബ്, ബേബിച്ചൻ ആലക്കപ്പറമ്പിൽ, ജിനോയ് കടപ്ലാക്കൽ തുടങ്ങിയവർ നേതൃത്വം നൽകി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]