ADVERTISEMENT

ADVERTISEMENT

സായുധസേനാ പതാക വിതരണ ഉദ്ഘാടനവും സെമിനാറും

കട്ടപ്പന: ജില്ലാ സൈനികക്ഷേമ ഓഫീസിന്‍റെ നേതൃത്വത്തിൽ സായുധസേനാ പതാക വിതരണ ഉദ്ഘാടനവും വിമുക്തഭട·ാർക്കുള്ള ബോധവത്കരണ സെമിനാറും നാളെ കട്ടപ്പന മുൻസിപ്പൽ ടൗണ്‍ഹാളിൽ നടക്കും. കട്ടപ്പന മുൻസിപ്പൽ ചെയർപേഴ്സണ്‍ ഷൈനി സണ്ണി ചെറിയാൻ രാവിലെ 10.30ന് പരിപാടി ഉദ്ഘാടനം ചെയ്യും. ഇടുക്കി സബ് കളക്ടർ അരുണ്‍ എസ്. നായർ അധ്യക്ഷത വഹിക്കും.
ജില്ലാ സൈനികക്ഷേമ ഓഫീസർ എ. കിഷൻ, ജില്ലാ സൈനിക ബോർഡ് വൈസ് പ്രസിഡന്‍റ് എം.പി. ശിവരാമൻ, അഖില ഭാരതീയ പൂർവ സൈനിക് സേവ പരിഷത്ത് ജില്ല പ്രസിഡന്‍റ് ഹരി സി. ശേഖർ, കേരള സ്റ്റേറ്റ് എക്സ് സർവീസസ് ലീഗ് ജില്ലാ പ്രസിഡന്‍റ് പി.സി. ഐസക്, കേരള പ്രദേശ് എക്സ് സർവീസ്മെൻ കോണ്‍ഗ്രസ് ജില്ലാ പ്രസിഡന്‍റ് റജി ജി. നായർ തുടങ്ങിയവർ പങ്കെടുക്കും.
തുടർന്ന് ഡിജിറ്റൽ ബാങ്കിംഗ്, സ്പർശ് എന്നിവയെക്കുറിച്ച് ബോധവത്കരണ ക്ലാസ് നടക്കും.

ADVERTISEMENT

നെടുങ്കണ്ടത്ത് മാലിന്യസംസ്‌കരണം നിലച്ചു, പകര്‍ച്ചവ്യാധിക്ക് സാധ്യത

നെടുങ്കണ്ടം: പകര്‍ച്ചവ്യാധികള്‍ക്ക് വഴിയൊരുക്കി നെടുങ്കണ്ടം പഞ്ചായത്തിന്‍റെ മാലിന്യസംസ്‌കരണ പ്ലാന്‍റ്. ബേഡുമെട്ട് മാലിന്യ സംസ്‌കരണ പ്ലാന്‍റില്‍ പ്രവര്‍ത്തനങ്ങള്‍ മന്ദഗതിയിലായതോടെ സംസ്‌കരിക്കാത്ത മാലിന്യങ്ങള്‍ പ്ലാന്‍റിന് ചുറ്റും കൂട്ടിയിട്ട നിലയിലാണ്. ജില്ലയിലെയും സംസ്ഥാനത്തെയും മികച്ച മാലിന്യ സംസ്‌കരണത്തിന് അവാര്‍ഡ് നേടിയ നെടുങ്കണ്ടം പഞ്ചായത്തിലാണ് അധികൃതരുടെ അനാസ്ഥമൂലം പ്രദേശവാസികള്‍ക്കു ദുരിതമായി മാലിന്യങ്ങള്‍ പഞ്ചായത്തുതന്നെ തള്ളുന്നത്. പഞ്ചായത്തിലെ വിവിധ സ്ഥലങ്ങളില്‍നിന്നും എത്തിക്കുന്ന മാലിന്യങ്ങള്‍ തരംതിരിച്ച് സംസ്‌കരിക്കുകയും ഇവ ജൈവവളമാക്കി സംസ്‌കരിക്കുകയും ചെയ്തിരുന്ന പ്ലാന്‍റിനാണ് ഈ ദുര്‍ഗതി. ഹരിതകര്‍മ സേനാംഗങ്ങള്‍ ശേഖരിക്കുന്ന മാലിന്യങ്ങള്‍ വാഹനത്തില്‍ എത്തിച്ച് പ്ലാന്‍റിന്‍റെ സമീപത്തെ റോഡില്‍ തള്ളിയ നിലയിലാണ്. റോഡിലും കെട്ടിടത്തിന്‍റെ വശങ്ങളിലും ഉള്ളിലുമായി ടണ്‍കണക്കിന് മാലിന്യമാണ് കൂട്ടിയിട്ടിരിക്കുന്നത്. മഴക്കാലമായതോടെ ഇവ ചീഞ്ഞളിഞ്ഞ് പ്രദേശത്ത് ദുര്‍ഗന്ധം വ്യാപിച്ചിരിക്കുകയാണ്. മഴവെള്ളത്തോടൊപ്പം മാലിന്യം കലര്‍ന്ന വെള്ളം ജലസ്രോതസുകളിലേക്കും ഒഴുകിയെത്തുന്നുണ്ട്. അസഹനീയമായ ദുര്‍ഗന്ധംമൂലം വീടുകളില്‍ താമസിക്കാന്‍ സാധിക്കുന്നില്ലെന്ന് പ്രദേശവാസികള്‍ പറഞ്ഞു. പ്ലാസ്റ്റിക് റീസൈക്ലിംഗ് യൂണിറ്റ്, വേസ്റ്റ് മാനേജ്മെന്‍റ് സിസ്റ്റം, വളം നിര്‍മാണ യൂണിറ്റ് ഉള്‍പ്പെടെ പ്ലാന്‍റിലെ സംവിധാനങ്ങളെല്ലാം നിശ്ചലമായ നിലയിലാണ്. പ്ലാന്‍റിനാവശ്യമായ ജലം ലഭ്യമാക്കുന്നതിനായി സ്ഥാപിച്ച മോട്ടോര്‍ വര്‍ഷങ്ങളായി പ്രവര്‍ത്തനരഹിതമാണ്. ആറു ജീവനക്കാരാണ് ഇപ്പോള്‍ പ്ലാന്‍റിലുള്ളത്. ഇവര്‍ക്ക് സുരക്ഷിതമായി ജോലിചെയ്യുന്നതിന് ആവശ്യമായ സൗകര്യങ്ങളും പഞ്ചായത്ത് ഒരുക്കി നൽകിയിട്ടില്ല. അതിനാൽ ഇവരും രോഗഭീഷണിയിലാണ്. കൂട്ടിയിട്ടിരിക്കുന്ന മാലിന്യങ്ങള്‍ നായ്ക്കളുടെ വിഹാരകേന്ദ്രമായും മാറിയിട്ടുണ്ട്. അഞ്ചു വര്‍ഷം മുമ്പ് പ്ലാന്‍റിലെ മുഴുവന്‍ മാലിന്യങ്ങളും യഥാസമയം സംസ്‌കരിച്ച് വളവും മറ്റ് ഉത്പന്നങ്ങളുമാക്കി മാറ്റിയിരുന്നു. പ്ലാന്‍റ് മനോഹരമാക്കുന്നതിനായി പൂച്ചെടികള്‍ ഉള്‍പ്പെടെ വച്ചുപിടിപ്പിച്ചിരുന്നു. ഇപ്പോൾ ഈ പൂന്തോട്ടത്തില്‍വരെ മാലിന്യങ്ങള്‍ തള്ളിയിരിക്കുകയാണ്.

ജില്ലയിൽ കിടത്തി ചികിത്സ നിലച്ചത് 18 ആശുപത്രികളിൽ

തൊടുപുഴ: ജില്ലയിൽ ആരോഗ്യരംഗത്ത് വലിയ മുന്നേറ്റം അധികൃതർ അവകാശപ്പെടുന്പോഴും രോഗികൾക്ക് പല ആശുപത്രികളിലും കിടത്തി ചികിത്സ നിഷേധിക്കപ്പെടുന്നു. കഴിഞ്ഞ പത്തുവർഷത്തിനുള്ളിൽ 18 ആശുപത്രികളിലാണ് കിടത്തി ചികിൽസ നിലച്ചത്. തോട്ടം, ആദിവാസി വിഭാഗത്തിൽ നിന്നുള്ള ഒട്ടേറെ പേർ ചികിൽസ തേടിയെത്തിയിരുന്ന ആശുപത്രികളാണ് പലതും. സാധാരണക്കാരായ രോഗികൾ കിലോമീറ്ററുകൾ താണ്ടി മറ്റ് സർക്കാർ ആശുപത്രികളെയോ സ്വകാര്യ ആശുപത്രികളെയോ ആശ്രയിക്കേണ്ട അവസ്ഥയാണ്. ഈ യാത്രക്കിടയിൽ ജീവൻ നഷ്ടമായ ഒട്ടേറെ രോഗികളുമുണ്ട്. നേരത്തെ കിടത്തി ചികിൽസ സൗകര്യം ഉണ്ടായിരുന്ന കോടിക്കുളം ,കരിമണ്ണൂർ, പുറപ്പുഴ, മുട്ടം, കുമാരമംഗലം, കെപികോളനി, അറക്കുളം, കാഞ്ചിയാർ , വണ്ടിപ്പെരിയാർ, ഉപ്പുതറ, കുമളി, രാജാക്കാട്, ഇളംദേശം, ദേവികുളം, രാജകുമാരി, മറയൂർ, വാത്തിക്കുടി,കഞ്ഞിക്കുഴി കുടുംബാരോഗ്യകേന്ദ്രം എന്നിവിടങ്ങളിൽ കിടത്തിചികിൽസ നിലച്ചു. ഇവിടെയൊക്കെ കിടത്തി ചികിത്സ തേടി എത്തിയിരുന്ന രോഗികൾനിരവധിയായിരുന്നു. ഇന്നത്തെ സ്റ്റാഫ്പാറ്റേണ്‍ ഇല്ലാതിരുന്ന കാലത്താണ് ഇത് സുഗമമായി നടന്നിരുന്നത് എന്നാൽ ആശുപത്രികളിൽ കൂടുതൽ തസ്തികകൾ അനുവദിക്കുകയും അടിസ്ഥാന സൗകര്യങ്ങൾ വർധിയ്ക്കകയും ചെയ്തപ്പോൾ രോഗികൾക്ക് ലഭിച്ചിരുന്ന നിലയ്ക്കുന്ന സ്ഥിതിയായി. പല ആശുപത്രികളും കുടുബാരോഗ്യ കേന്ദ്രങ്ങളായി ഉയർത്തിയതോടെയാണ് ഇവിടങ്ങളിലെല്ലാം പൂർണമായും കിടത്തി ചികിൽസ നിലച്ചത് . എന്നാൽ കുടുബാരോഗ്യ കേന്ദ്രങ്ങളിൽ സർക്കാർ കൂടുതലായി ഒന്നുവീതം ഡോക്ടറുടെയും നഴ്സിന്‍റയും തസ്തിക അനുവദിച്ചു. ലാബോറട്ടറി ഇല്ലാതിരുന്ന കേന്ദ്രങ്ങളിൽ അതും ആരംഭിച്ചു. ഇതിനായി ലാബ്ടെക്നീഷ്യൻ തസ്തികയും അനുവദിച്ചു. ഫാർമസിസ്റ്റിന്‍റ ഒരു തസ്തികയിൽ പഞ്ചായത്തുകൾക്ക് നിയമനം നടത്താൻ അനുമതിയും നൽകി . മുന്പുണ്ടായിരുന്നതിന് പുറമേ ഇത്രയും തസ്തികകൾ കൂടിയപ്പോൾ സർക്കാരിനും പഞ്ചായത്തുകൾക്കും വലിയ ചെലവ് ശന്പള ഇനത്തിൽവന്നു. എന്നാൽ രോഗികൾക്ക് മുന്പു കിട്ടിയിരുന്ന സേവനങ്ങൾ കുറയുകയും ചെയ്തു. സായഹ്ന ഒപി വിദൂരസ്വപ്നം മാത്രം കിടത്തിചികിൽസ ഉണ്ടായിരുന്ന ആശുപത്രികൾ ഉൾപ്പെടെ കുടുംബാരോഗ്യകേന്ദ്രങ്ങളാക്കിയതോടെ പകരം സായാഹ്ന ഒപി തുടങ്ങുമെന്ന് പ്രഖ്യാപനം വന്നു. ഇതിനായി കുടുബാരോഗ്യകേന്ദ്രങ്ങിൽ ഓരോ ഡോക്ടറെ വീതം നിയമിക്കാൻ പഞ്ചായത്തുകൾക്ക് അനുമതി നൽകി . പഞ്ചായത്തുകൾ ഇങ്ങനെ നിയമനവും നടത്തിയെങ്കിലും ഒരിടത്തും വൈകുന്നേരം ആറു വരെ ഡോക്ടറുടെ സേവനം ലഭ്യമല്ലാതായി. ചിലയിടങ്ങളിൽ നാലു വരെ ഡോക്ടറുടെ സേവനം ലഭിക്കും. കിടത്തി ചികിൽസ നിർത്തിയ ആശുപത്രികളിൽ ജീവനക്കാരുടെ എണ്ണം വെട്ടിക്കുറയ്ക്കാത്തതിനാൽ സംഘടനകൾക്കും ഇക്കാര്യത്തിൽ പരാതിയില്ല.

ഉപ്പുതറ കണ്ണംപടി സ്കൂളിന് ഫണ്ടുണ്ട്; പക്ഷേ, രേഖയില്ല

ഉപ്പുതറ: കണ്ണംപടി സ്കൂളിന് ഫണ്ട് ലഭിച്ചപ്പോൾ ഭൂമിക്ക് രേഖയില്ല. സ്കൂളിന്‍റെ ഭൂമിയുടെ രേഖയ്ക്കായി ജില്ലാ കളക്ടറെ സമീപിച്ചിരിക്കുകയാണ് പിടിഎ. 1956ലാണ് സ്കൂൾ ആരംഭിച്ചത്. കണ്ണംപടി നിവാസി ഇഷ്ടദാനമായി നൽകിയ ഭൂമിയിലാണ് സ്കൂൾ സ്ഥാപിച്ചത്. വനംവകുപ്പിന്‍റെ അധീനതയിലുള്ള പ്രദേശത്തായതിനാൽ ഭൂമി സംബന്ധിച്ച രേഖ നൽകേണ്ടത് വനംവകുപ്പാണെന്നാണ് റവന്യു വകുപ്പ് പറയുന്നത്. രേഖയ്ക്കായി വനംവകുപ്പിൽ അപേക്ഷ നൽകി കാത്തിരിക്കുകയാണ് പിടിഎയും അധ്യാപകരും.‌ 1956 ലാണ് കണ്ണംപടിയിൽ സ്കൂളിനായി സ്ഥലം ലഭിച്ചത്. കണ്ണംപടി സ്വദേശി ഇഷ്ടദാനമായി നൽകിയ ഭൂമിയിൽ കെട്ടിടം പണിയുകയായിരുന്നു. പിന്നീടു വന്ന പിടിഎയോ അധ്യാപകരോ ഭൂമിയുടെ രേഖയ്ക്കായി ശ്രമിച്ചില്ല. കണ്ണംപടി അറക്കുളം പഞ്ചായത്തിലായിരുന്നപ്പോഴാണ് സ്കൂൾ നിർമിച്ചത്. ഇപ്പോൾ പ്രദേശം ഉപ്പുതറ പഞ്ചായത്ത് പരിധിയിലായതിനാൽ സ്കൂളിന്‍റെ ഒരു രേഖയും ഇവിടെ ലഭ്യമല്ലാത്ത അവസ്ഥയാണ്. നിലവിലെ പിടിഎ രേഖകൾക്കായി ജില്ലാ കളക്ടറെ സമീപിച്ചെങ്കിലും റവന്യു വകുപ്പിൽ രേഖകൾ ഉണ്ടായിരുന്നില്ല. എസ്എസ്കെയിൽനിന്നു മൂന്നു കോടി 20 ലക്ഷം രൂപ ആൺകുട്ടികളുകളുടെ ഹോസ്റ്റൽ നിർമിക്കാൻ അനുവദിച്ചു. സ്കൂൾ കെട്ടിടം നിർമിക്കാൻ ട്രൈബൽ വകുപ്പും നടപടി ആരംഭിച്ചിട്ടുണ്ട്. എന്നാൽ, ഭൂമിയുടെ രേഖ ലഭിക്കാത്തത് തടസമാകുകയാണ്. ഭൂമിയുടെ രേഖയ്ക്കായി ഡിഎഫ്ഒയെയും റേയ്ഞ്ച് ഓഫീസറെയും സമീപിച്ചെങ്കിലും ഉടൻ ശരിയാക്കാമെന്ന മറുപടിയല്ലാതെ രേഖ ഇനിയും ലഭിച്ചിട്ടില്ല. അടിയന്തരമായി രേഖ നൽകാൻ നടപടിയുണ്ടാകണമെന്നാണ് പിടിഎയുടെയും ഊരുമൂപ്പന്മാരുടെയും ആവശ്യം.

സെക്രട്ടേറിയറ്റ് ധർണ 23ന്

തൊടുപുഴ: മുല്ലപ്പെരിയാർ അണക്കെട്ട് ഡീ കമ്മിഷൻ ചെയ്യണമെന്ന് ആവശ്യപ്പെട്ട് 23 ന് സെക്രട്ടറിയേറ്റ് ധർണ നടത്തുമെന്ന് മുല്ലപ്പെരിയാർ ജനസംരക്ഷണ സമിതി ഭാരവാഹികൾ അറിയിച്ചു. ചെയർമാൻ അഡ്വ. റോയി വാരികാട്ട് അധ്യക്ഷത വഹിക്കും. മുൻ പ്രതിപക്ഷ നേതാവ് രമേശ് ചെന്നിത്തല ഉദ്ഘാടനം ചെയ്യും. സമാപന സമ്മേളനം ശോഭാ സുരേന്ദ്രൻ ഉദ്ഘാടനം ചെയ്യും. തുഷാർ വെള്ളാപ്പള്ളി, മുൻ എംഎൽഎ പ്രഫ. എ.വി താമരാക്ഷൻ , തോമസ് മാർ അത്തനാസിയോസ് മെത്രാപോലീത്ത, ഡോ. മുഹമ്മദ് സഖാഫി തുടങ്ങിയവർ പങ്കെടുക്കും. ആറിലധികം വിദഗ്ധ സമിതികൾ ഡാമിന്‍റെ അപകടാവസ്ഥയും ഭൂകന്പ സാധ്യത മുന്നറിയിപ്പും നൽകിയിട്ടുണ്ട്. ഡാമിൽ വിള്ളലുകളും കണ്ടെത്തിയിട്ടുണ്ട്. ഡാം സുരക്ഷിതമാണെന്ന് ഒരു വിദഗ്ധ സമിതിയുടെയും റിപ്പോർട്ടിലില്ല. മുല്ലപ്പെരിയാറുമായി ബന്ധപ്പെട്ട് സുപ്രീം കോടതിയിലെ കേസിൽ കേരളത്തിന്‍റെ വാദം പരാജയപ്പെട്ടതിനു പിന്നിൽ ഇക്കാര്യം വ്യക്തമായി ഉന്നയിക്കാത്തതിനാലാണ്. ഡാം ഡീ കമ്മീഷൻ ചെയ്യുക, 999 വർഷത്തെ പാട്ടക്കരാർ റദ്ദാക്കുക, ജലനിരപ്പ് കുറയ്ക്കുക, പ്രശ്നത്തിൽ കേന്ദ്ര സർക്കാർ അടിയന്തരമായി ഇടപെടുക, മാധ്യമപ്രവർത്തകരെ ഡാം സന്ദർശിക്കാൻ അനുവദിക്കുക എന്നി ആവശ്യങ്ങൾ ഉന്നയിച്ചാണ് സമരമെന്ന് ജനറൽ കണ്‍വീനർ പി.ടി ശ്രീകുമാർ അറിയിച്ചു.

റോഡ് കുണ്ടും കുഴിയുമായി, വാഴ നട്ട് പ്രതിഷേധിച്ചു

മുട്ടം: മീനച്ചിൽ കുടിവെള്ള പദ്ധതിക്കായി ജൽ ജീവൻ മിഷൻ അധികൃതർ കുത്തിപ്പൊളിച്ച തോട്ടുങ്കര-വള്ളിപ്പാറ റോഡ് അറ്റകുറ്റപ്പണി നടത്താത്തതിൽ പ്രതിഷേധിച്ച് തോട്ടുങ്കര വികസനസമിതിയുടെ നേതൃത്വത്തിൽ ജനകീയ സമരത്തിന് ഒരുങ്ങുന്നു. ഇതിനു മുന്നോടിയായി റോഡിൽ വാഴ നട്ട് പ്രതിഷേധിച്ചു. പൈപ്പുകൾ സ്ഥാപിക്കുന്നതിന് ആദ്യ ഘട്ടത്തിൽ തോട്ടുങ്കര മുതൽ ചള്ളാവയൽ വരെയുള്ള റോഡാണ് പൊളിച്ചത്. രണ്ടാം ഘട്ടത്തിലാണ് വള്ളിപ്പാറ പ്രദേശത്തെ റോഡ് കുത്തിപ്പൊളിച്ചത്. പൈപ്പുകൾ സ്ഥാപിച്ചിട്ട് ഒരു വർഷം കഴിഞ്ഞിട്ടും ടാറിംഗ് നടത്തി റോഡ് പുനസ്ഥാപിക്കാൻ അധികൃതർ താത്പര്യപ്പെട്ടില്ല. വാഹനങ്ങൾ കടന്നുപോയതിനെത്തുടർന്നും മഴവെള്ളം ഒഴുകിയും റോഡിൽ വ്യാപകമായി ഗർത്തങ്ങൾ രൂപപ്പെട്ട നിലയിലാണ്. ഇവിടെ ഇരുചക്രവാഹന യാത്രികർ ഉൾപ്പെടെ അപകടങ്ങളിൽപ്പെട്ട് ഗുരുതരമായ പരിക്കുകൾ സംഭവിക്കുന്നതും ആവർത്തിക്കുകയാണ്. മുട്ടം-ഈരാറ്റുപേട്ട, മുട്ടം-പാലാ റൂട്ടുകളിലേക്ക് നിത്യവും നൂറുകണക്കിനു വാഹനങ്ങൾ കടന്നുപോകുന്ന പാതയായതിനാൽ പ്രദേശത്ത് ഗതാഗതക്കുരുക്കും അതി രൂക്ഷമാണ്. പ്രശ്നപരിഹാരത്തിന് മന്ത്രി, എംപി, എൽഎൽഎ, കളക്ടർ എന്നിവർ അടിയന്തരമായി ഇടപെടണമെന്നാണ് നാട്ടുകാരുടെ ആവശ്യം.

റവന്യു ക്വാർട്ടേഴ്സ് ഉദ്ഘാടനം ഇന്ന്

ഇടുക്കി: പൈനാവിൽ നിർമിച്ച റവന്യു സ്റ്റാഫ് ക്വാർട്ടേഴ്സിന്‍റെ ഉദ്ഘാടനം ഇന്നു വൈകുന്നേരം 3.30ന് മന്ത്രി കെ. രാജൻ നിർവഹിക്കും. മന്ത്രി റോഷി അഗസ്റ്റിൻ അധ്യക്ഷത വഹിക്കും. റീബിൽഡ് കേരള ഇനീഷ്യേറ്റീവ് പ്രകാരമുള്ള പദ്ധതിക്ക് 12 കോടിയുടെ ഭരണാനുമതി ലഭിച്ചിരുന്നു. 32 ക്വാർട്ടേഴ്സുകളിൽ 28 എണ്ണം നിർമാണം പൂർത്തീകരിച്ചു. ഡീൻ കുര്യാക്കോസ് എംപി, എംഎൽഎമാരായ പി.ജെ. ജോസഫ്, എം.എം. മണി, വാഴൂർ സോമൻ, എ. രാജ, ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാക്കുന്നേൽ, ജില്ലാ കളക്ടർ വി.വിഗ്നേശ്വരി എന്നിവർ പ്രസംഗിക്കും.

മുല്ലക്കാനം-കൊച്ചുപ്പ് റോഡിൽ ലോറി കുടുങ്ങി വാഹനഗതാഗതം തടസപ്പെട്ടു

രാജാക്കാട്: മുല്ലക്കാനം - കൊച്ചുപ്പ് റോഡിൽ തുണ്ടിയിൽ വളവിൽ ലോറി കുടുങ്ങി വാഹനഗതാഗതം തടസപ്പെട്ടു. വെള്ളിയാഴ്ച രാവിലെ എട്ടിനാണ് പൊള്ളാച്ചിയിൽനിന്നു കോൺക്രീറ്റ് വൈദ്യുതി പോസ്റ്റുകളുമായി ചിത്തിരപുരത്തേക്ക് പോവുകയായിരുന്ന വലിയ ലോറി തുണ്ടിയിൽ വളവ് തിരിയാതെ ക്രാഷ് ബാരിയറിൽ തട്ടിനിന്ന് ഗതാഗതം തടസപ്പെട്ടത്. രാജാക്കാട്ടുനിന്ന് മണ്ണുമാന്തി യന്ത്രം എത്തിച്ച് ഒന്നര മണിക്കൂർ ശ്രമിച്ചാണ് ലോറി വലിച്ചുമാറ്റി ഗതാഗത തടസം ഒഴിവാക്കിയത്. ലോറി ഇടിച്ചതിനെത്തുടർന്ന് ക്രാഷ് ബാരിയറിന് സമീപം റോഡിൽ വിള്ളൽ വീണിട്ടുണ്ട്. തുണ്ടിയിൽ വളവിൽ നിരവധി വാഹനങ്ങൾ മുൻപും കുടുങ്ങിയിട്ടുണ്ട്.

കെണിയായി വൈദ്യുതി ട്രാൻസ്ഫോർമർ

കുമളി: പഞ്ചായത്ത്, ആരോഗ്യ വകുപ്പുകളുടെ മൂക്കിനു കീഴെയാണ് കെഎസ്ഇബി മനുഷ്യ ജീവന് കെണിയൊരുക്കിയിരിക്കുന്നത്. ഇരുപത് വർഷങ്ങൾക്ക് മുൻപ് തേക്കടിക്കവലയിലെ ഈ ട്രാൻസ്ഫോർമറിന് തൊട്ടടുത്തായി ഏകദേശം 30 മീറ്റർ അകലെ കെട്ടിട നിർമാണത്തിനിടയിൽ തൊഴിലാളിക്ക് 11 കെവി ലൈനിൽ തട്ടി ജീവൻ നഷ്ടമായിരുന്നു. വൈദ്യുതി ലൈനിന്‍റെ കീഴെ ബഹുനില കെട്ടിടം അപകടകരമാംവിധം ഉയർന്നിട്ടും അന്ന് കെഎസ്ഇബി ഒരു സ്റ്റോപ്പ് മെമ്മോപോലും നൽകുവാൻ തയാറായില്ല. കെഎസ്ഇബി ഓഫീസിന്‍റെ ഏതാനും വാര അകലെയാണ് ഈ കെട്ടിടം ഉയർത്തിയത്. റോഡരികിനോടു ചേർന്ന് വർഷങ്ങൾക്ക് മുൻപ് സ്ഥാപിച്ച ട്രാൻസ്ഫോർമറിന് സമീപം നടപ്പാതയ്ക്കുപോലും സ്ഥലമില്ല. റോഡിന്‍റെ വശത്തെ വെള്ള വരയിൽ നിന്നും ഏതാനും അടി ദൂരം മാത്രമാണുള്ളത്. പണ്ട് കരിങ്കൽ കെട്ടിൽ സ്ഥാപിച്ച ട്രാൻസ്ഫോർമർ ഉയർത്തി സ്ഥാപിക്കാനോ അല്ലെങ്കിൽ മതിയായ സ്ഥലം കണ്ടെത്തി മാറ്റിസ്ഥാപിക്കാനോ നടപടിയില്ല. നൂറുകണക്കിന് വാഹനങ്ങൾ കടന്നുപോകുന്ന ദേശീയ പാതയോരത്താണ് അപകടക്കെണിയായ ട്രാൻസ്ഫോർമർ ഉള്ളത്. ആളുകൾക്ക് കൈയെത്താവുന്ന ദൂരത്തിലും പൊക്കത്തിലുമാണ് ട്രാൻസ് ഫോമറിന്‍റെ സ്ഥാനം. റോഡിന്‍റെ വശത്തെ വെള്ള വരയോട് ചേർന്ന് ഓടയും തൊട്ടടുത്തായി ട്രാൻസ്ഫോർമറുമാണുള്ളത്. വഴിയാത്രക്കാരന് കാലൊന്ന് പിഴച്ചാലും അപകടമുണ്ടാകാം.

സംസ്ഥാന ധനകാര്യ കമ്മീഷൻ ജില്ലയിൽ സന്ദർശനം നടത്തി

ഇടുക്കി: ജില്ലയിലെ ധനവിന്യാസവും ധനനിർവഹണവും സംബന്ധിച്ച വിഷയങ്ങൾ സർക്കാരിന് കൃത്യമായി ശിപാർശ ചെയ്യുമെന്ന് ഏഴാം ധനകാര്യ കമ്മീഷൻ അധ്യക്ഷൻ കെ.എൻ. ഹരിലാൽ. ധനകാര്യ കമ്മീഷൻ ജില്ലയിൽ നടത്തിയ സന്ദർശനത്തോടനുബന്ധിച്ച് നടന്ന യോഗത്തിൽ പ്രസംഗിക്കുകയായിരുന്നു അദ്ദേഹം. പദ്ധതി നടത്തിപ്പുമായി ബന്ധപ്പെട്ട് ജില്ലാ ആസൂത്രണസമിതി അംഗങ്ങളുടെ നിർദേശങ്ങളും അഭിപ്രായങ്ങളും അറിയുന്നതിനായാണ് ധനകാര്യ കമ്മീഷൻ ജില്ല സന്ദർശിച്ചത്. ജില്ലയിലെ വിവിധ പദ്ധതികളുടെ നടത്തിപ്പും പദ്ധതികളുടെ സാന്പത്തിക വിനിയോഗവും കമ്മീഷൻ അവലോകനം ചെയ്തു. വനം, കൃഷി, പട്ടികജാതി, പട്ടികവർഗ വികസനം, പൊതുമരാമത്ത് തുടങ്ങി വിവിധ വകുപ്പുകളുടെ പദ്ധതികളും ഫണ്ടുകളുമായി ബന്ധപ്പെട്ട ധനവിനിയോഗ പ്രശ്നങ്ങൾ, ഓഡിറ്റിംഗ് സംബന്ധിച്ച പരാതികൾ തുടങ്ങി വിവിധ വിഷയങ്ങൾ ജനപ്രതിനിധികൾ കമ്മീഷന് മുന്നിൽ ഉന്നയിച്ചു. കർഷകരുടെ ഉത്പന്നങ്ങൾക്ക് മിനിമം വില ഉറപ്പാക്കാൻ കാർഷിക വിപണനകേന്ദ്രങ്ങൾ ബ്ലോക്ക് പഞ്ചായത്ത് തലങ്ങളിൽ ആരംഭിക്കുന്നതിനുള്ള സാധ്യതകൾ പരിശോധിക്കണമെന്ന് ജനപ്രതിനിധികൾ ആവശ്യപ്പെട്ടു. സിഎസ്ആർ ഫണ്ട് വിനിയോഗം, മനുഷ്യ-വന്യജീവി സംഘർഷം, തദ്ദേശ സ്ഥാപനങ്ങളിലെ ജീവനക്കാരുടെ അഭാവം, വിധവ പുനരധിവാസ പദ്ധതി, ഗോത്രവർഗ മേഖലകളിൽ പദ്ധതി നടത്തിപ്പിൽ നേരിടുന്ന ബുദ്ധിമുട്ടുകൾ, മാർഗനിർദേശങ്ങളിൽ വരുത്തേണ്ട മാറ്റം തുടങ്ങി നിരവിധി വിഷയങ്ങൾ കമ്മീഷനു മുന്നിലെത്തി. ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാക്കുന്നേൽ അധ്യക്ഷത വഹിച്ചു. ജില്ലാ കളക്ടർ വി. വിഗ്നേശ്വരി, ധനകാര്യ കമ്മീഷൻ സെക്രട്ടറി അനിൽ പ്രസാദ്, ജോയിന്‍റ് സെക്രട്ടറി എം. പ്രശാന്ത്, ജില്ലാ പ്ലാനിംഗ് ഓഫീസർ ദീപ ചന്ദ്രൻ എന്നിവർ പ്രസംഗിച്ചു.

‘ആനവണ്ടിയിലെ’ഫീൽഡ് വർക്ക് കാര്യം

കുട്ടിക്കാനം: മരിയൻ കോളജിലെ രണ്ടാം വർഷ സോഷ്യൽ വർക്ക് ഡിഗ്രി വിദ്യാർഥികൾക്ക് പഠനത്തിന്‍റെ ഭാഗമായ ഫീൽഡ് വിസിറ്റ് ഇത്തവണ "ആന വണ്ടിയിലെ’ ഫീൽഡ് വർക്ക് കാര്യം കൂടി ആയിരുന്നു. കെഎസ്ആർടിസി ആവിഷ്കരിച്ച ചാർട്ടേഡ് സർവീസിന്‍റെ സാധ്യത മനസിലാക്കിയ അധ്യാപകരും വിദ്യാർഥികളും ഈ സെമസ്റ്ററിലെ ഫീൽഡ് സന്ദർശനങ്ങൾ കെഎസ്ആർടിസി ചാർട്ടേഡ് സർവീസ് വഴി നടത്താൻ തീരുമാനിക്കുകയായിരുന്നു. കുമളി കെഎസ്ആർടിസി ഡിപ്പോയിലെ ഉദ്യോഗസ്ഥർ പൂർണ പിന്തുണയും നിർദേശങ്ങളും നൽകി ഈ ഉദ്യമത്തെ കുട്ടികളിലേക്ക് എത്തിച്ചു. കേരളത്തിലെ വിവിധ ജില്ലകളിലുള്ള സന്നദ്ധ സംഘടനകൾ സന്ദർശിച്ച് അവിടത്തെ സോഷ്യൽ വർക്ക് പ്രവർത്തനങ്ങൾ പഠിക്കുക എന്ന ലക്ഷ്യത്തിൽ തുടർന്നും പൊതുഗതാഗത സംവിധാനങ്ങൾ ഉപയോഗപ്പെടുത്താനാണ് കോളജ് സോഷ്യൽ വർക്ക് ഡിപ്പാർട്ട്മെന്‍റിന്‍റെ തീരുമാനമെന്ന് സോഷ്യൽ വർക്ക് വിഭാഗം മേധാവി ഡോ. പി.ജെ. ജസ്റ്റിൻ, ഫീൽഡ് വർക്ക് കോ-ഓർഡിനേറ്റർമാരായ ഡോ. ജോബി ബാബു, വിശാഖ് മോഹൻ എന്നിവർ അറിയിച്ചു.

ഭൂപ്രശ്നം: കർഷകസംഘം മാർച്ച് നടത്തും

തൊടുപുഴ: ഭൂനിയമ ഭേദഗതിയുടെ തുടർച്ചയായി ചട്ടഭേദഗതി വരാനിരിക്കെ ചില ഉദ്യോഗസ്ഥരും കപട പരിസ്ഥിതി സംഘടനകളും ചേർന്ന് ജില്ലയിലെ ഭൂപ്രശ്നങ്ങൾ സങ്കീർണമാക്കാൻ ശ്രമിക്കുകയാണെന്ന് കർഷകസംഘം ഭാരവാഹികൾ പത്രസമ്മേളനത്തിൽ ആരോപിച്ചു. വിനോദസഞ്ചാര മേഖലയായ പരുന്തുംപാറയിൽ സർക്കാർ ഭൂമി കൈയേറ്റം എന്ന നിലയിൽ റവന്യു ഉദ്യോഗസ്ഥർ നടത്തുന്നത് ജനദ്രോഹ നടപടികളാണ്. ഒരു നൂറ്റാണ്ടിലേറെയായി ഇവിടെ താമസിച്ചുവരുന്ന ആളുകൾക്കെതിരേയാണ് നടപടി എടുക്കാനൊരുങ്ങുന്നത്. മഞ്ചുമല വില്ലേജിലും പീരുമേട് വില്ലേജിലുമുള്ള ചില സർവേ നന്പരുകളിലെ പട്ടയങ്ങൾ പരിശോധനയ്ക്ക് വിധേയമാക്കാനുള്ള റവന്യു വകുപ്പിന്‍റെ നടപടി പട്ടയയുടമകളിൽ ഇവരിൽ പലർക്കും 10 സെന്‍റിൽ താഴെ മാത്രമാണ് ഭൂമിയുള്ളത്. പീരുമേട് പഞ്ചായത്തിലെ കല്ലാർ, പീരുമേട്, വണ്ടിപ്പെരിയാറിലെ ഗ്രാന്പി വാർഡുകളിൽ കളക്ടർ പൂർണ നിർമാണ നിരോധനം പ്രഖ്യാപിച്ചതിനാൽ തൊഴിലുറപ്പ് പദ്ധതിപോലും നടക്കാത്ത സ്ഥിതിയായി. ഇക്കാര്യത്തിൽ റവന്യു, വനം, തദ്ദേശ സ്വയംഭരണ വകുപ്പുകളുടെ സംയുക്ത പരിശോധന വേണമെന്നാണ് കർഷകസംഘം ആവശ്യപ്പെടുന്നത്. ചിന്നക്കനാലിൽ പതിറ്റാണ്ടുകളായി താമസിച്ച് കൃഷിചെയ്തു വരുന്ന കർഷകരുടെ പട്ടയഭൂമിയിൽ ദിവസങ്ങൾക്ക് മുന്പ് ഉദ്യോഗസ്ഥർ ബോർഡ് സ്ഥാപിച്ചത് ശരിയായ നടപടിയല്ല. ഇക്കാര്യങ്ങൾ ചൂണ്ടിക്കാണിച്ച് മുഖ്യമന്ത്രി, റവന്യു, തദ്ദേശ മന്ത്രിമാർക്ക് കർഷകസംഘം ജില്ലാ കമ്മിറ്റി നിവേദനം നൽകും. ഓഗസ്റ്റ് അഞ്ചിന് പീരുമേട് താലൂക്ക് ഓഫീസിലേക്ക് നടത്തുന്ന മാർച്ചും ധർണയും എം.എം. മണി എംഎൽഎ ഉദ്ഘാടനംചെയ്യുമെന്നും ഭാരവാഹികൾ പറഞ്ഞു. പത്രസമ്മേളനത്തിൽ ജില്ലാ സെക്രട്ടറി റോമിയോ സെബാസ്റ്റ്യൻ, പി.പി. ചന്ദ്രൻ, മുഹമ്മദ് ഫൈസൽ, സി.എസ്. ഷാജി, ആശാ വർഗീസ് എന്നിവർ പങ്കെടുത്തു.

ഉമ്മൻ ചാണ്ടി അനുസ്മരണം നടത്തി

രാജാക്കാട്: കോൺഗ്രസ് രാജാക്കാട് മണ്ഡലം കമ്മിറ്റിയുടെ നേതൃത്വത്തിൽ ഉമ്മൻ ചാണ്ടി അനുസ്മരണവും പുഷ്പാർച്ചനയും മണ്ഡലം കമ്മിറ്റി ഓഫീസിൽ നടത്തി. മണ്ഡലം പ്രസിഡന്‍റ് ജോഷി കന്യാക്കുഴി അധ്യക്ഷത വഹിച്ചു. കെപിസിസി മെംബർ ആർ. ബാലൻപിള്ള ഉദ്ഘാടനം ചെയ്തു. ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് എം.പി. ജോസ് മുഖ്യപ്രഭാഷണം നടത്തി. കെ.പി. ഗോപിദാസ്, ബെന്നി പാലക്കാട്ട്, ലിജോ മുണ്ടപ്ലാക്കൽ, കിങ്ങിണി രാജേന്ദ്രൻ തുടങ്ങിയവർ നേതൃത്വം നൽകി. തങ്കമണി: മുൻ മുഖ്യ മന്ത്രി ഉമ്മൻ ചാണ്ടിയുടെ രണ്ടാം വാർഷിക അനുസ്മരണം കാമാക്ഷി മണ്ഡലം കോണ്‍ഗ്രസ് കമ്മിറ്റിയുടെ നേതൃത്വത്തിൽ തങ്കമണി ദൈവദാൻ സെന്‍ററിൽ നടന്നു. ഡിസിസി ജനറൽ സെക്രട്ടറി എസ്.ടി. അഗസ്റ്റിൻ അനുസ്മരണ യോഗം ഉദഘാടനം ചെയ്തു. മണ്ഡലം പ്രസിഡന്‍റ് പി.എം. ഫ്രാൻസിസ് അധ്യക്ഷത വഹിച്ചു. ഡിസിസി മെംബർ ജോസഫ് മാണി, ബ്ലോക്ക് കോണ്‍ഗ്രസ് കമ്മിറ്റി വൈസ് പ്രസിഡന്‍റ്മാരായ അപ്പച്ചൻ അയ്യുന്നിക്കൽ,സന്തോഷ് കൊള്ളികൊളവിൽ, ബ്ലോക്ക് കോണ്‍ഗ്രസ് കമ്മിറ്റി സെക്രട്ടറി രഘു നാഥ് നെല്ലാങ്കുഴിയിൽ തുടങ്ങിയവർ പ്രസംഗിച്ചു. തുടർന്നു ദൈവദാൻ സെന്‍ററിലെ അമ്മമാർക്ക് സ്നേഹവിരുന്നും നൽകി.

സി-ആപ്റ്റിന് സ്ഥിരം എംഡിയെ നിയമിക്കണമെന്ന്

തൊടുപുഴ: സി-ആപ്റ്റിന് സ്ഥിരം എംഡിയെ നിയമിക്കണമെന്ന് എംപ്ലോയീസ് ഫെഡറേഷൻ കെടിയുസി സംസ്ഥാന പ്രസിഡന്‍റ് അഡ്വ. മോൻസ് ജോസഫിന്‍റെ അധ്യക്ഷതയിൽ ചേർന്ന യോഗം ആവശ്യപ്പെട്ടു. സർക്കാർ ഉടമസ്ഥതയിലുള്ള എല്ലാ സ്ഥാപനങ്ങളുടെയും പ്രിന്‍റിംഗ് ജോലികൾ സി-ആപ്റ്റിന് നൽകണം. ഇതോടൊപ്പം ആധുനിക പ്രിന്‍റിംഗ് യന്ത്രങ്ങൾ വാങ്ങുന്നതിന് ഫണ്ട് അനുവദിക്കണമെന്നും യോഗം ആവശ്യപ്പെട്ടു. യൂണിയന്‍റെ വർക്കിംഗ് പ്രസിഡന്‍റായി അപു ജോണ്‍ ജോസഫിനെ തെരഞ്ഞെടുത്തു. ശതാഭിഷേകനിറവിലെത്തിയ യൂണിയൻ രക്ഷാധികാരി പി.ജെ. ജോസഫ് എംഎൽഎയെയും നിയമസഭയിൽ 25 വർഷം പൂർത്തിയാക്കിയ മോൻസ് ജോസഫ് എംഎൽഎയേയും ഭാരവാഹികൾ പൊന്നാടയണിയിച്ച് ആദരിച്ചു.

പിന്തുണ പ്രഖ്യാപിച്ച് അടിമാലി മഹല്ല് മേഖലാ കോ-ഓർഡിനേഷൻ കമ്മിറ്റി

അടിമാലി: ദേശീയപാത 85ലെ നിർമാണ പ്രതിസന്ധി പരിഹരിക്കണമെന്നാവശ്യപ്പെട്ട് 31ന് എൻഎച്ച് സംരക്ഷണസമിതിയുടെ നേതൃത്വത്തിൽ നടക്കുന്ന പ്രതിഷേധ മാർച്ചിന് അടിമാലി മഹല്ല് മേഖലാ കോ-ഓർഡിനേഷൻ കമ്മിറ്റിയും പിന്തുണ പ്രഖ്യാപിച്ചു. വനംവകുപ്പിന്‍റെ ബിനാമി കൊടുത്ത പൊതുതാത്പര്യ ഹർജിയിലാണ് ഇപ്പോഴത്തെ ഹൈക്കോടതി വിധി ഉണ്ടായിരിക്കുന്നതെന്ന് കമ്മിറ്റി ആരോപിച്ചു. ദേശീയപാത വനമാണെന്ന് വനം അഡീഷണൽ ചീഫ് സെക്രട്ടറി കൊടുത്ത റിപ്പോർട്ടിന്‍റെ അടിസ്ഥാനത്തിലാണ് ഇപ്പോഴത്തെ കോടതി വിധി ഉണ്ടായതെന്നും കോ-ഓർഡിനേഷൻ കമ്മിറ്റി ചെയർമാൻ കെ.എച്ച്. അലി, അടിമാലി ടൗൺ ജുമാ മസ്ജിദ് രക്ഷാധികാരി ഇമാം ഹാഫിസ് മുഹമ്മദ് ശരീഫ് അൽ അർഷാദി, ഡികെഎൽഎം മേഖലാ പ്രസിഡന്‍റ് നൗഷാദ് മിഫ്താഹി, മന്നാംകാല ജുമാ മസ്ജിദ് ഇമാം അഷറഫ് ഫൈസി, വി.കെ. യൂനസ്, സി.എസ്. നാസർ, സി.എച്ച്. അഷറഫ്, സുനീർ കാരിമറ്റം, കരിം പാറേക്കാട്ടിൽ എന്നിവർ പറഞ്ഞു.

മണ്‍സൂണ്‍ ഫിലിം ഫെസ്റ്റിവൽ 21ന്

തൊടുപുഴ: ഫിലിം സൊസൈറ്റിയുടെ ആഭിമുഖ്യത്തിൽ സംഘടിപ്പിക്കുന്ന മണ്‍സൂണ്‍ ഫിലിം ഫെസ്റ്റിവൽ 21 മുതൽ 24 വരെ തൊടുപുഴ സിൽവർ ഹിൽസ് തിയറ്ററിൽ നടക്കും. കേരള ചലച്ചിത്ര അക്കാദമിയുടെയും എഫ്എഫ്എസ്ഐയുടെയും സഹകരണത്തോടെയാണ് മണ്‍സൂണ്‍ ചലച്ചിത്രമേള സംഘടിപ്പിക്കുന്നതെന്ന് ഭാരവാഹികൾ പത്രസമ്മേളനത്തിൽ അറിയിച്ചു. അന്തരിച്ച സംവിധായകൻ ഷാജി എൻ. കരുണ്‍ അനുസ്മരണവും ഇതോടൊപ്പം നടക്കും. തിങ്കളാഴ്ച വൈകുന്നേരം അഞ്ചിന് തൊടുപുഴ മുനിസിപ്പൽ ചെയർമാൻ കെ. ദീപക് മേള ഉദ്ഘാടനം ചെയ്യും. ഫിലിം സൊസൈറ്റി പ്രസിഡന്‍റ് എൻ. രവീന്ദ്രൻ അധ്യക്ഷത വഹിക്കും. നഗരസഭാ വൈസ് ചെയർപേഴ്സണ്‍ പ്രഫ. ജെസി ആന്‍റണി, എഫ്എഫ്എസ്ഐ റീജണൽ കൗണ്‍സിൽ അംഗം യു.എ. രാജേന്ദ്രൻ, ഫിലിം സൊസൈറ്റി സെക്രട്ടറി എം.എം. മഞ്ജുഹാസൻ എന്നിവർ പ്രസംഗിക്കും. തുടർന്ന് 5.45ന് ഫ്രഞ്ച് ചലച്ചിത്രമായ ദി കോറസ്, രാത്രി എട്ടിന് റഷ്യൻ സിനിമയായ സല്യൂട്ട് -7 എന്നിവ പ്രദർശിപ്പിക്കും. 22ന് ടർക്കിഷ് ചലച്ചിത്രം ബാൽ, ദക്ഷിണകൊറിയൻ സിനിമ വേൾഡ് ഓഫ് അസ് എന്നിവ പ്രദർശിപ്പിക്കും. 23ന് വൈകുന്നേരം 5.30ന് ഷാജി എൻ. കരുണ്‍ അനുസ്മരണം നടക്കും. തുടർന്ന് അദ്ദേഹത്തിന്‍റെ കുട്ടിസ്രാങ്ക് എന്ന ചിത്രവും അമേരിക്കൻ ചലച്ചിത്രമായ എറ്റേർണൽ സണ്‍ഷൈൻ ഓഫ് ദി സ്പോട്ട്ലെസ് മൈൻഡ് എന്ന സിനിമയും പ്രദർശിപ്പിക്കും. 24ന് പോളണ്ടിൽനിന്നുള്ള ദി പിയാനിസ്റ്റ്, ജർമൻ സിനിമയായ ബലൂണ്‍ എന്നിവയുടെ പ്രദർശനവും നടക്കും. പത്രസമ്മേളനത്തിൽ ഫിലിം സൊസൈറ്റി ഭാരവാഹികളായ എൻ. രവീന്ദ്രൻ, എം.എം. മഞ്ജുഹാസൻ, അനിത മുരളി, വിൽസൻ ജോണ്‍, യു.എ. രാജേന്ദ്രൻ, ഡയസ് ജോസഫ് എന്നിവർ പങ്കെടുത്തു. ഫോണ്‍: 9447753482.

കെസിവൈഎം ഇടുക്കി രൂപത യുവപ്രതിഭാ ഐക്കൺ പുരസ്‌കാരം വിതരണം ചെയ്തു

ചെറുതോണി: കെസിവൈഎം ഇടുക്കി രൂപത ഏർപ്പെടുത്തിയ യുവപ്രതിഭ യൂത്ത് ഐക്കൺ പുരസ്‌കാരം വിതരണം ചെയ്തു. രണ്ട് കാറ്റഗറികളിൽ മികച്ച പ്രവർത്തനങ്ങൾ കാഴ്ചവച്ചവരെയാണ് യുവപ്രതിഭാ യൂത്ത് ഐക്കൺ പുരസ്‌കാരത്തിനായി തെരഞ്ഞെടുത്തത്. രാജാക്കാട് ഇടവകാംഗം എബിൻ അഗസ്റ്റിൻ കച്ചിറയിലും ആയിരമേക്കർ ഇടവകാംഗം അനു പി. ബെന്നി പാട്ടപ്പറമ്പിലുമാണ് ഈ വർഷത്തെ പുരസ്കാര ജേതാക്കൾ. എബിൻ രണ്ടു വർഷക്കാലമായി കെസിവൈഎം രാജാക്കാട് - കുഞ്ചിത്തണ്ണി മേഖലാ പ്രസിഡന്‍റാണ്. അനു കെസിവൈഎം രൂപത മുൻ വൈസ് പ്രസിഡന്‍റാണ്. കല, സാഹിത്യം, സാമൂഹികം, ഇടവക-മേഖലാ-രൂപതാതല പ്രവർത്തനങ്ങൾ, സഭാത്മക കാര്യങ്ങളിലെ ഇതര പ്രവർത്തനങ്ങൾ എന്നിവയാണ് പുരസ്കാരത്തിനായി പരിഗണിച്ചത്. കെസിവൈഎം പ്രവർത്തനവർഷ ഉദ്ഘാടനവേദിയിൽ ഇടുക്കി രൂപത മുഖ്യ വികാരി ജനറാൾ മോൺ. ജോസ് കരിവേലിക്കൽ ഇരുവരെയും അവാർഡ് നൽകി ആദരിച്ചു. യോഗത്തിൽ കെസിവൈഎം ഇടുക്കി രൂപതാ പ്രസിഡന്‍റ് സാം സണ്ണി പുള്ളിയിൽ, ഡയറക്ടർ ഫാ. സെബാസ്റ്റ്യൻ മനക്കലേട്ട്, അനിമേറ്റർ സിസ്റ്റർ ലിൻഡ എസ്എബിഎസ്, ജനറൽ സെക്രട്ടറി അമൽ ജിജു ജോസഫ് എന്നിവർ പ്രസംഗിച്ചു.

ഭരണങ്ങാനത്ത് വിശുദ്ധ അല്‍ഫോന്‍സാമ്മയുടെ തിരുനാളിന് ഇന്നു കൊടിയേറ്റ്

ഭരണങ്ങാനം: സഹനങ്ങളെ ആത്മബലിയായി അര്‍പ്പിച്ച വിശുദ്ധ അല്‍ഫോന്‍സാമ്മയുടെ തിരുനാളിന് ഇന്നു കൊടിയേറും. രാവിലെ 11.15ന് പാലാ ബിഷപ് മാര്‍ ജോസഫ് കല്ലറങ്ങാട്ട് തിരുനാളിന് കൊടിയേറ്റും. മാര്‍ ജോസഫ് പള്ളിക്കാപ്പറമ്പിലും സന്നിഹിതനായിരിക്കും. തുടര്‍ന്ന് 11.30ന് ബിഷപ് മാര്‍ മാത്യു അറയ്ക്കല്‍ വിശുദ്ധ കുര്‍ബാന അര്‍പ്പിച്ച് സന്ദേശം നല്‍കും. പ്രധാന തിരുനാളായ 28 വരെ കബറിട പള്ളിയില്‍ രാപകല്‍ പ്രാര്‍ഥനകള്‍ക്ക് സൗകര്യമുണ്ടാകും. രാവിലെ 5.30 മുതല്‍ വൈകുന്നേരം ഏഴു വരെ തുടര്‍ച്ചയായി വിശുദ്ധ കുര്‍ബാന അര്‍പ്പിക്കപ്പെടും. എല്ലാ ദിവസും വൈകുന്നേരം 6.15ന് ജപമാലപ്രദക്ഷിണമുണ്ടായിരിക്കും. തിരുനാള്‍ ദിനമായ ഇന്നു മുതല്‍ കബറിട പള്ളിയിൽ തീര്‍ഥാടകരാല്‍ നിറയും. വിവിധ ദേശങ്ങളില്‍നിന്ന് നാനാജാതിമതസ്തരായ പതിനായിരങ്ങള്‍ അനുഗൃഹവും ആശ്വാസവും ചൊരിയുന്ന വിശുദ്ധയുടെ മാധ്യസ്ഥം തേടി ഭരണങ്ങാനത്തെത്തും.

പാറക്കടവിലെ മാലിന്യനീക്കം ഇഴയുന്നു

തൊടുപുഴ: നഗരസഭയുടെ പാറക്കടവ് ഡംപിംഗ് യാർഡിലെ മാലിന്യനീക്കം വൈകുന്നു. ബയോ മൈനിംഗ് പ്രക്രിയയിലൂടെ മാലിന്യം വേർതിരിച്ച് ഇവ പുനരുപയോഗം നടത്തി നീക്കംചെയ്ത് ഭൂമി വീണ്ടെടുക്കാനാണ് നഗരസഭയുടെ പദ്ധതി. എന്നാൽ മാലിന്യനീക്കവുമായി ബന്ധപ്പെട്ട് സ്വകാര്യ കന്പനിയുമായി കരാർ ഒപ്പിട്ട് ഒരു വർഷത്തോളമെത്തിയിട്ടും പകുതിയോളം മാത്രമേ ഇവിടെനിന്നും നീക്കാൻ കഴിഞ്ഞിട്ടുള്ളൂ. കരാർ കാലാവധി തീർന്നിട്ടും മാലിന്യത്തിന്‍റെ നല്ലൊരു ഭാഗവും ഇവിടെ കിടക്കുകയാണ്. വേഗത്തിൽ പൂർത്തിയാക്കേണ്ട മാലിന്യ നീക്കം ഇപ്പോൾ മന്ദഗതിയിലാണ് നടന്നുവരുന്നത്. മഴ മൂലമാണ് മാലിന്യനീക്കം തടസപ്പെട്ടതെന്നാണ് നഗരസഭാ അധികൃതർ പറയുന്നത്. ശുചിത്വ മിഷന്‍റെ സഹകരണത്തോടെയാണ് പദ്ധതി നടപ്പാക്കുന്നത്. മാലിന്യം ശാസ്ത്രീയമായി വേർതിരിച്ച് സംസ്കരിക്കുകയും ഭൂമി ഉപയോഗ്യമാക്കുകയുമാണ് നഗരസഭയുടെ ലക്ഷ്യം. നാൽപ്പത് വർഷത്തോളമായി തൊടുപുഴ നഗരസഭയിൽനിന്നുള്ള മാലിന്യങ്ങൾ പാറക്കടവിലെ ഡംപിംഗ് യാർഡിലാണ് നിക്ഷേപിക്കുന്നത്. വർഷങ്ങളോളം മാലിന്യം നിക്ഷേപിച്ച് ഇവിടെ മാലിന്യമലതന്നെ രൂപപ്പെട്ടിരുന്നു. ഈ സാഹചര്യത്തിലാണ് പദ്ധതിയുമായി നഗരസഭാധികൃതർ രംഗത്തെത്തിയത്. കോഴിക്കോട് ആസ്ഥാനമായ സ്വകാര്യ സ്ഥാപനത്തിനാണ് മാലിന്യം നീക്കാൻ കോടികളുടെ കരാർ നൽകിയത്. ഇതുവരെ 18,000 ക്യൂബിക് മീറ്ററോളം മാലിന്യം ശാസ്ത്രീയമായി വേർതിരിച്ചെന്നാണ് നഗരസഭാ അധികൃതർ പറയുന്നത്. ആദ്യഘട്ടത്തിൽ തരംതിരിച്ച മാലിന്യം ലോറിയിൽ കയറ്റിയയച്ചാണ് പദ്ധതിക്കു തുടക്കമിട്ടത്. എന്നാൽ പിന്നീട് തരം തിരിക്കുന്ന ജോലി നടക്കുന്നുണ്ടെങ്കിലും മാലിന്യം കൂടുതലായി ഇവിടെനിന്നും കയറിപ്പോകുന്നില്ലെന്നാണ് ആക്ഷേപം. ബയോ മൈനിംഗ് പ്രവർത്തനം നടക്കുന്നതിനാൽ ടൗണിൽനിന്നുള്ള മാലിന്യം ഇപ്പോൾ ഡംപിംഗ് യാർഡിൽ നിക്ഷേപിക്കപ്പെടുന്നില്ല. നേരത്തെ വ്യാപാര സ്ഥാപനങ്ങളിൽനിന്നും മറ്റുമുള്ള ഭക്ഷ്യ മാലിന്യങ്ങൾ ഉൾപ്പെടെ നഗരസഭ ശേഖരിച്ചിരുന്നു. ഇത് നിലവിൽ നിർത്തിവച്ചിരിക്കുകയാണ്. പാറക്കടവിലെ മാലിന്യ നീക്കം വേഗത്തിലാക്കണമെന്നാണ് പാറക്കടവ് ആർവി റെസിഡന്‍റ്സ് അസോസിയേഷൻ ആവശ്യപ്പെടുന്നത്. മാലിന്യനീക്കത്തിനു തടസം മഴ: ചെയർമാൻ കനത്ത മഴ മൂലമാണ് പാറക്കടവിലെ മാലിന്യനീക്കം തടസപ്പെട്ടതെന്ന് മുനിസിപ്പൽ ചെയർമാൻ കെ. ദീപക് പറഞ്ഞു. നിലവിലുണ്ടായിരുന്നതിൽ 60 ശതമാനത്തോളം മാലിന്യം നീക്കംചെയ്തു. പിന്നീട് ശക്തമായ മഴയായതിനാൽ മാലിന്യം തരംതിരിന്നതിന് തടസം നേരിടുകയാണ്. സ്വകാര്യ കന്പനിയുമായുള്ള കരാർ അവസാനിച്ചെങ്കിലും ഇത് നീട്ടി നൽകിയിട്ടുണ്ട്. മാലിന്യം പ്രദേശത്തുതന്നെ വേർതിരിച്ചെടുക്കാൻ മതിയായ സ്ഥല സൗകര്യമില്ലാത്തത് പ്രതിസന്ധിയാണ്. പരമാവധി വേഗത്തിൽ മാലിന്യം നീക്കം ചെയ്ത് ഭൂമി വീണ്ടെടുത്ത് ഉപയോഗ പ്രദമാക്കാനാണ് നഗരസഭ ശ്രമിക്കുന്നതെന്നും അദ്ദേഹം പറഞ്ഞു.

ആയുര്‍വേദ ആശുപത്രിയുടെ ജനല്‍ച്ചില്ലുകള്‍ എറിഞ്ഞുതകര്‍ത്തു

നെടുങ്കണ്ടം: മരുന്നു വാങ്ങാനെത്തിയ യുവാവ് ആശുപത്രി ആക്രമിക്കുകയും വനിതാ ജീവനക്കാരെ അസഭ്യം പറയുകയും ചെയ്തതായി പരാതി. സംഭവത്തില്‍ ചാറല്‍മേട് കല്ലേലുങ്കല്‍ ബിജുമോന്‍ ബാബു(29)വിനെ നെടുങ്കണ്ടം പോലീസ് അറസ്റ്റ് ചെയ്തു. നെടുങ്കണ്ടം പഞ്ചായത്തിന്‍റെ ചാറല്‍മേട്ടിലുള്ള ഗവ.ആയുര്‍വേദ ആശുപത്രിയില്‍ ഇന്നലെ രാവിലെ 11 നാണ് സംഭവം. ശരീരവേദനയ്ക്ക് മരുന്നുവാങ്ങാനായി ആശുപത്രിയിലെത്തിയ യുവാവ് ഡോക്ടറെ കാണണമെന്ന് ആവശ്യപ്പെട്ടു. ഈ സമയം ഡോക്ടര്‍ മീറ്റിംഗില്‍ പങ്കെടുക്കാന്‍ പോയിരുന്നു. തുടർന്ന് തനിക്ക് മരുന്ന് നല്‍കണമെന്ന് ആവശ്യപ്പെട്ട് ബിജുമോന്‍ പ്രശ്‌നങ്ങള്‍ സൃഷ്ടിക്കുകയായിരുന്നു. ജീവനക്കാര്‍ ഇയാള്‍ക്ക് കുഴമ്പ് നല്‍കി. കുഴമ്പ് വാങ്ങി പുറത്തിറങ്ങിയ ബിജുമോന്‍ വനിതാ ജീവനക്കാരെ അസഭ്യം പറയുകയും റോഡിൽനിന്നു വലിയ കല്ലുകള്‍ പെറുക്കി ജനല്‍ ചില്ലുകള്‍ എറിഞ്ഞുതകര്‍ക്കുകയും ചെയ്തു. ആശുപത്രി കെട്ടിടത്തിന്‍റെ പത്തോളം ജനല്‍ച്ചില്ലുകളാണ് ഇയാള്‍ തകര്‍ത്തത്. മുകളിലത്തെ നിലയിലെ യോഗ ഹാളില്‍ കല്ലുകളും ചില്ലും നിരന്നുകിടക്കുകയാണ്. അക്രമം കണ്ട് ഭയന്ന ജീവനക്കാരും രോഗികളും ആശുപത്രിക്കുള്ളില്‍ കയറി വാതിലടച്ചു. തുടര്‍ന്ന് ഇവര്‍ പഞ്ചായത്തില്‍ വിളിച്ച് കാര്യം അറിയിച്ചു. പഞ്ചായത്ത് അധികൃതര്‍ അറിയിച്ചതനുസരിച്ച് സ്ഥലത്തെത്തിയ പോലീസ് ഇയാളെ പിടികൂടി. മദ്യലഹരിയിലായിരുന്നു ആക്രമണമെന്നും ഇയാള്‍ മദ്യപിച്ച് പ്രശ്നമുണ്ടാക്കുന്നത് പതിവാണെന്നും നാട്ടുകാര്‍ പറഞ്ഞു. സ്ഥിരം മദ്യപാനിയും ലഹരിക്ക് അടിമയുമായ ഇയാള്‍ മേഖലയില്‍ ഭീകരാന്തരീക്ഷം സൃഷ്ടിക്കുന്നത് പതിവാണ്. സ്ത്രീകള്‍ മാത്രമുള്ളപ്പോള്‍ വീടുകളിലെത്തി ബഹളം വയ്ക്കുകയും അസഭ്യം പറയുകയും ചെയ്യുന്നതിനാല്‍ സ്വയരക്ഷയ്ക്കായി മുളക് കലക്കിയ വെള്ളം വീടുകളില്‍ സൂക്ഷിക്കുകയാണെന്നും നാട്ടുകാര്‍ പറഞ്ഞു. സ്ത്രീകള്‍ക്കു നേരേ ഇയാള്‍ നഗ്നതാ പ്രദര്‍ശനവും നടത്താറുണ്ടെന്നും ആരോപണമുണ്ട്. സംഭവമറിഞ്ഞ് പഞ്ചായത്ത് പ്രസിഡന്‍റ് പ്രീമി ലാലിച്ചന്‍, പഞ്ചായത്തംഗങ്ങളായ ഡി. വിജയകുമാര്‍, എം.എസ്. മഹേശ്വരന്‍ തുടങ്ങിയവര്‍ സ്ഥലത്തെത്തി.

മകളെ ലൈംഗികമായി പീഡിപ്പിച്ച പിതാവിന് ട്രിപ്പിൾ ജീവപര്യന്തം തടവും മൂന്നുലക്ഷം രൂപ പിഴയും

ചെറുതോണി: സ്വന്തം മകളെ അഞ്ചു വയസു മുതൽ എട്ടു വയസുവരെ ലൈംഗിക പീഡനത്തിന് ഇരയാക്കിയ കേസിൽ പിതാവിന് മൂന്നു ജീവപര്യന്തം തടവും മൂന്നു ലക്ഷം രൂപ പിഴയും വിധിച്ചു. ഇടുക്കി പൈനാവ് അതിവേഗ കോടതിയുടെ അധിക ചുമതല വഹിക്കുന്ന ജഡ്ജ് വി. മഞ്ജുവാണ് ശിക്ഷ വിധിച്ചത്. 2020 ൽ കുട്ടിക്ക് എട്ടു വയസ് പ്രായമുള്ളപ്പോഴാണ് സംഭവം പുറത്തറിയുന്നത്. പെൺകുട്ടി ഒന്നാം ക്ലാസിൽ പഠിക്കുന്ന കാലം മുതൽ പിതാവ് വീട്ടിൽവച്ച് നിരന്തരമായി ലൈംഗിക പീഡനത്തിന് ഇരയാക്കിയതായാണ് കുട്ടിയുടെ മൊഴി. സ്ഥിരമായി വയറുവേദന അനുഭവപ്പെട്ടിരുന്ന കുട്ടി നിരന്തരമായി ചികിത്സയിലായിരുന്നു. 2020 ൽ ഒരു ദിവസം അമ്മ കുട്ടിയുമായി ആശുപത്രിയിൽ പോകാൻ ബസ് കാത്തു നിൽകുമ്പോഴാണ് കുട്ടി അമ്മയോട് സംഭവം പറയുന്നത്. തുടർന്നു നടന്ന കൗൺസലിംഗിലാണ് പീഡനവിവരം പുറത്തുവന്നത്. തുടർന്ന് കരിമണ്ണൂർ പോലീസ് കേസ് രജിസ്റ്റർ ചെയ്ത് അന്വേഷണം നടത്തി പ്രതിക്കെതിരേ അന്തിമ റിപ്പോർട്ട്‌ നൽകി. സ്വന്തം പിതാവിൽനിന്ന് മകൾക്ക് ഏൽക്കേണ്ടിവന്ന ക്രൂരമായ ലൈംഗികാതിക്രമത്തിനു പരമാവധി ശിക്ഷ നൽകണമെന്ന പ്രോസിക്യൂഷൻ വാദം കോടതി അംഗീകരിക്കുകയായിരുന്നു. പ്രതിയും കുടുംബവും വാടകയ്ക്കു താമസിച്ചിരുന്ന രണ്ടു വീടുകളിൽ വച്ചും സംഭവം ഉണ്ടായി എന്നാണ് കുട്ടിയുടെ മൊഴി. കോടതിയിൽ മൊഴി പറയാൻ വന്ന ദിവസം കുട്ടിയുടെ അമ്മ കോടതിയിൽ ബോധരഹിതയായി വീണിരുന്നു. പിഴ ഒടുക്കുന്നപക്ഷം കുട്ടിക്ക് നൽകണമെന്നും അല്ലാത്തപക്ഷം ആറു വർഷം അധിക തടവിനും കോടതി വിധിച്ചു. കൂടാതെ കുട്ടിക്ക് മതിയായ നഷ്ടപരിഹാരം നൽകാൻ ജില്ലാ ലീഗൽ സർവീസ് അഥോറിറ്റിയോടും കോടതി നിർദേശിച്ചു. സമീപകാലത്ത് ഇതേ കോടതിയിൽനിന്ന് ഇത്തരം കേസുകളിൽ രണ്ടുപേർക്ക് ഇരട്ട ജീവപര്യന്തവും മറ്റൊരാൾക്ക്‌ ഈ കേസ് കൂടാതെ ട്രിപ്പിൾ ജീവപര്യന്തവും ശിക്ഷ വിധിച്ചിരുന്നു. പ്രോസിക്യൂഷനുവേണ്ടി സ്‌പെഷ്യൽ പബ്ലിക് പ്രോസിക്യൂട്ടർ ഷിജോമോൻ ജോസഫ് കണ്ടത്തിങ്കരയിൽ കോടതിയിൽ ഹാജരായി.

3.8 കിലോ കഞ്ചാവുമായി യുവാവ് പിടിയിൽ

തൊടുപുഴ: ആലക്കോട് മീൻമുട്ടിൽ 3.8 കിലോ ഉണക്ക കഞ്ചാവുമായി യുവാവ് എക്സൈസിന്‍റെ പിടിയിലായി. ആലക്കോട് മീൻമുട്ടി മേക്കുന്നൽ മിഥുൻ ജയിംസി (27) നെയാണ് മൂലമറ്റം എക്സൈസ് റേഞ്ച് ഇൻസ്പെക്ടർ അർജുൻ ഷാജുവിന്‍റെ നേതൃത്വത്തിൽ അറസ്റ്റ് ചെയ്തത്. ആലക്കോട് കേന്ദ്രീകരിച്ച് ലഹരി കച്ചവടം നടക്കുന്നതായി എക്സൈസ് ഉദ്യോഗസ്ഥർക്ക് രഹസ്യവിവരം ലഭിച്ചിരുന്നു. ഇതിന്‍റെ അടിസ്ഥാനത്തിൽ നടത്തിയ പരിശോധനയിലാണ് ഇയാൾ കുടുങ്ങിയത്. വിൽപ്പനയ്ക്കായാണ് കഞ്ചാവ് എത്തിച്ചതെന്നും ഇയാൾക്ക് കഞ്ചാവ് ലഭിച്ച ഉറവിടത്തെക്കുറിച്ചും കഞ്ചാവ് വിതരണത്തെക്കുറിച്ചും അന്വേഷിച്ചുവരികയാണെന്ന് ഉദ്യോഗസ്ഥർ പറഞ്ഞു. പരിശോധനയിൽ മൂലമറ്റം എക്സൈസ് അസിസ്റ്റന്‍റ് ഇൻസ്പെക്ടർമാരായ വി.എസ്.നിസാർ, അജിത് കുമാർ, പ്രിവന്‍റീവ് ഓഫീസർമാരായ പി.ആർ. അനുരാജ് , സുബൈർ, വി.ആർ. രാജേഷ്, സുരേന്ദ്രൻ, എ.കെ. ദിലീപ്, സിവിൽ എക്സൈസ് ഓഫീസറായ ടി.എസ്. സുനിൽ, വനിത സിവിൽ എക്സൈസ് ഓഫീസർ എം.ടി. ബിന്ദു എന്നിവർ പങ്കെടുത്തു.

ചിന്നാർ വനത്തിന്‍റെ കാവൽക്കാരൻ സുധാകരൻ ചാപ്ലി അന്തരിച്ചു

മറയൂർ: ചിന്നാർ വന്യജീവി സങ്കേതത്തിന്‍റെ അടയാളമായിരുന്ന ചന്പക്കാട് ഉന്നതി സ്വദേശി സുധാകരൻ ചാപ്ലി (53) അന്തരിച്ചു. ചിന്നാറിന്‍റെ മുക്കും മൂലയും അറിയാവുന്ന വനസംരക്ഷണ സേനയിലെ പ്രമുഖനായിരുന്നു. ചാപ്ലി കനകമ്മയുടെ മകനായ ഇദ്ദേഹം, 20 വർഷത്തിലധികം സേവനമനുഷ്ഠിച്ചതിനാൽ സർക്കാരിന്‍റെ സ്പെഷൽ റിക്രൂട്ട്മെന്‍റ്‌വഴി ട്രൈബൽ വാച്ചറായും പ്രവർത്തിച്ചു. തിരുവനന്തപുരം മെഡിക്കൽ കോളജിൽ ചികിത്സയിലിരിക്കെയാണ്അന്ത്യം. വനംവകുപ്പ് ഉദ്യോഗസ്ഥർ മൂന്നാർ വൈൽഡ് ലൈഫ് വാർഡൻ, ചിന്നാർ അസി. വൈൽഡ്‌ലൈഫ് വാർഡൻ എന്നിവരെത്തി ഗാർഡ് ഓഫ് ഓണർ നൽകി സംസ്കാര ചടങ്ങുകൾക്ക് നേതൃത്വം നൽകി. ഭാര്യ: പാപ്പ. മക്കൾ: സുഭാഷ്, സുവർണ. സംസ്കാരം നടത്തി.

ദേശീയപാത-85ന്‍റെ നിർമാണത്തിൽ സർക്കാർ അടിയന്തരമായി ഇടപെടണം: ഇടുക്കി രൂപത

ചെറുതോണി: കൊച്ചി - ധനുഷ്കോടി ദേശീയപാതയിൽ നേര്യമംഗലം മുതൽ വാളറവരെയുള്ള 14.5 കി.മീ. പ്രദേശത്തെ നിർമാണ പ്രവർത്തനങ്ങൾ നിർത്തിവച്ച കേരള ഹൈക്കോടതി വിധി അത്യന്തം ദൗർഭാഗ്യകരമാണെന്ന് ഇടുക്കി രൂപത മീഡിയാ കമ്മീഷൻ ഡയറക്ടർ ഫാ. ജിൻസ് കാരയ്ക്കാട്ട് വാർത്താക്കുറിപ്പിൽ അറിയിച്ചു. കേരള സർക്കാരിനുവേണ്ടി വനം വകുപ്പ് അഡീഷണൽ സെക്രട്ടറി കൊടുത്ത റിപ്പോർട്ടിന്‍റെ അടിസ്ഥാനത്തിലാണ് ചീഫ് ജസ്റ്റീസ് ഉൾപ്പെട്ട ഡിവിഷൻ ബെഞ്ച് വിധി പറഞ്ഞത്. എം.എൻ. ജയചന്ദ്രൻ എന്നയാൾ 2024ൽ കേരള ഹൈക്കോടതിയിൽ സമർപ്പിച്ച പൊതുതാൽപര്യ ഹർജിയിൽ റോഡ് നവീകരണം നടക്കുന്ന നേര്യമംഗലം മുതൽ വാളറ വരെയുള്ള 14.5 കി.മീ. ഭാഗം മലയാറ്റൂർ - ഇടിയറ റിസർവ് വനഭൂമിയാണെന്നും എൻഎച്ച് - 85ൽ അനുമതിയില്ലാതെ നടക്കുന്ന നിർമാണ പ്രവർത്തനങ്ങൾ അടിയന്തരമായി നിർത്തിവയ്ക്കണമെന്നുമാണ് ആവശ്യപ്പെട്ടത്. 1932ലെ രാജഭരണകാലത്തെ ഉത്തരവിന്‍റെയും 1996ലെ സംസ്ഥാന സർക്കാരിന്‍റെ ഉത്തരവിന്‍റെയും അടിസ്ഥാനത്തിൽ കിരണ്‍ സിജു / സ്റ്റേറ്റ് ഓഫ് കേരള കേസിൽ റോഡിന്‍റെ മധ്യഭാഗത്തുനിന്ന് 50 അടി വീതം ഇരുവശത്തേക്കും റോഡ് പുറന്പോക്ക് ആണെന്നും ആയത് പൊതുമരാമത്ത് വകുപ്പിന് അവകാശപ്പെട്ടതാണെന്നും റോഡിന്‍റെ യാതൊരുവിധ നിർമാണ പ്രവർത്തനങ്ങളും വനംവകുപ്പ് തടസ്‌സപ്പെടുത്തരുതെന്നും ഹൈക്കോടതി ഡിവിഷൻ ബെഞ്ച് 28-05-2024ൽ ഉത്തരവിട്ടിട്ടുള്ളതാണ്. ഹൈക്കോടതി ഡിവിഷൻ ബെഞ്ചിന്‍റെ ഉത്തരവിനെതിരേ എം.എൻ. ജയചന്ദ്രൻ റിവ്യൂ പെറ്റീഷൻ നൽകിയെങ്കിലും അതും തള്ളിയിരുന്നു. പിന്നീട് എം.എൻ. ജയചന്ദ്രൻ വീണ്ടും നൽകിയ പൊതു താത്പര്യ ഹർജിയിൽ ഹൈക്കോടതിയുടെ 07/07/2025ലെ സിറ്റിംഗിൽ നേര്യമംഗലം മുതൽ വാളറ വരെ വനമേഖലയാണെന്ന് വനം വകുപ്പ് അഡീഷണൽ സെക്രട്ടറി സത്യവാങ്മൂലം സമർപ്പിക്കുകയായിരുന്നു. രാജഭരണ കാലത്ത് റോഡിനായി നീക്കിയിട്ടിട്ടുള്ള 100 അടി വീതിയിലുള്ള സ്ഥലം വനംവകുപ്പിന്‍റേതല്ലെന്ന് റവന്യൂ രേഖകൾ പ്രകാരം വ്യക്തമായിട്ടുള്ള സാഹചര്യത്തിൽ സംസ്ഥാന സർക്കാരിന്‍റെ താത്പര്യത്തിന് വിരുദ്ധമായി തെറ്റായ സത്യവാങ്മൂലം വനം വകുപ്പ് സെക്രട്ടറി നൽകിയിട്ടുണ്ടെങ്കിൽ അത് തിരുത്തിക്കുന്നതിന് സർക്കാ ർ അടിയന്തരമായി ഇടപെടണം. മലയോര മേഖലകളിൽ (റോളിംഗ് ടെറയിൻ) അപകടരഹിതമായി എങ്ങനെ റോഡ് നിർമിക്കാമെന്ന് വിദഗ്ധ പഠനം നടത്തിയതിന്‍റെ അടിസ്ഥാനത്തിൽ സെൻട്രൽ ഗവണ്‍മെന്‍റ് നിഷ്കർഷിച്ചിട്ടുള്ള മാനദണ്ഡങ്ങൾ പാലിച്ചും വാലി സൈഡിലും കട്ടിംഗ് സൈഡിലും ബലവത്തായ സംരക്ഷണഭിത്തികൾ നിർമിച്ചുമാണ് റോഡ് വികസന പ്രവർത്തനങ്ങൾ നടന്നു വരുന്നതെന്നും അതിനായി ചുമതലപ്പെടുത്തിയ സമിതികൾ റിപ്പോർട്ട് നൽകിയിട്ടുള്ളതുമാണ്. ചില സ്വാർഥ താത്പര്യങ്ങൾക്കായി പ്രവർത്തിക്കുന്ന ഉദ്യോഗസ്ഥരുടെ പ്രവർത്തനങ്ങൾകൊണ്ട് ഹൈറേഞ്ച് മേഖല പ്രതിസന്ധി നേരിടുന്ന ഈ കാലഘട്ടത്തിൽ സർക്കാർ നിലപാടുകൾക്കു വിരുദ്ധമായി പ്രവർത്തിക്കുന്ന ഉദ്യോഗസ്ഥരെ നിയന്ത്രിക്കണമെന്നും ജനത്തിനും നാടിനും ഉപകാരപ്രദമായ തീരുമാനങ്ങളെടുത്ത് ദേശീയപാതയുടെ നിർമാണം പുനരാരംഭിക്കാൻ സംസ്ഥാന സർക്കാർ നടപടി സ്വീകരിക്കണമെന്നും രൂപത മീഡിയാ കമ്മീഷൻ ഡയറക്ടർ ഫാ. ജിൻസ് കാരയ്ക്കാട്ട് ആവശ്യപ്പെട്ടു.

മികവിന്‍റെ കേന്ദ്രങ്ങളാകാൻ കുടുംബശ്രീ സിഡിഎസുകൾ

തൊടുപുഴ: ജില്ലയിൽ കുടുംബശ്രീ സിഡിഎസുകൾ മികവിന്‍റെ കേന്ദ്രങ്ങളാകാനൊരുങ്ങുന്നു. സംസ്ഥാന തലത്തിൽ കുടുംബശ്രീയും കിലയും ചേർന്ന് സിഡിഎസുകളെ ഐഎസ്ഒ നിലവാരത്തിലേക്ക് ഉയർത്തുന്നതിന്‍റെ ഭാഗമായി ജില്ലയിൽ പരിശീലനം തുടങ്ങി. ആദ്യ ഘട്ടത്തിൽ ജില്ലയിലെ തെരഞ്ഞെടുത്ത 23 സിഡിഎസുകളെയാണ് ഐഎസ്ഒ നിലവാരത്തിലെത്തിക്കുകയെന്ന് അധികൃതർ പറഞ്ഞു. 22 ഗ്രാമ സിഡിഎസുകളും ഒരു നഗര സിഡിഎസുമാണ് തെരഞ്ഞെടുക്കപ്പെട്ടത്. കില ഐഎസ്ഒ മാനേജർ ദീപ്തി ചന്ദ്രന്‍റെ മേൽനോട്ടത്തിൽ ജില്ലയിൽ മൂന്ന് ഘട്ടം പരിശീലനം പൂർത്തിയായി. കരിമണ്ണൂർ, ഇരട്ടയാർ, ശാന്തൻപാറ എന്നിവിടങ്ങളിലാണ് പരിശീലനം നടത്തുന്നത്. ജില്ലയിലെ സിഡിഎസുകളെ മൂന്ന് ബാച്ചുകളായി തിരിച്ചാണ് പരിശീലനം. ഓരോ പരിശീലനത്തിന് ശേഷവും ഗുണനിലവാരം ഉയർത്താൻ ആവശ്യമായ ക്രമീകരണങ്ങൾ സിഡിഎസുകളിൽ നടപ്പാക്കുന്നുണ്ട്. ചെയർപേഴ്സണ്‍, മെംബർ സെക്രട്ടറി, വൈസ് ചെയർപേഴ്സണ്‍, അക്കൗണ്ടന്‍റ് എന്നിങ്ങനെ ഒരു സിഡിഎസിൽനിന്ന് നാലുപേർക്ക് വീതമാണ് പരിശീലനം നൽകുന്നത്. ഗുണമേന്മാ നയം കൃത്യമായി നടപ്പാക്കിയാണ് ഐഎസ്ഒ സർട്ടിഫിക്കേഷൻ നൽകുന്നത്. സിഡിഎസ് ഓഫീസ് സംവിധാനത്തിന്‍റെയും വിഭവങ്ങളുടെയും കാര്യക്ഷമതയും ഫലപ്രാപ്തിയും ഗുണനിലവാരവും ഉറപ്പാക്കണം. തദ്ദേശ സ്വയംഭരണ വകുപ്പ് അംഗീകരിച്ച ബൈലോ പ്രകാരം ചെയ്യേണ്ട പ്രവർത്തനങ്ങൾ പൂർത്തിയാക്കണം. സേവനങ്ങൾ സമയബന്ധിതമായി നൽകണം. പശ്ചാത്തല സൗകര്യങ്ങളുടെയും സംവിധാനങ്ങളുടെയും നിലവാരം നിർണയിച്ച് നിലനിർത്തണം. സ്ത്രീകൾ, ഭിന്നശേഷിയുള്ളവർ, കുട്ടികൾ, വയോജനങ്ങൾ, സാമൂഹ്യസാന്പത്തിക പിന്നാക്കാവസ്ഥയുള്ളവർ ഉൾപ്പെടെ എല്ലാ വിഭാഗങ്ങൾക്കും സമത്വം ഉറപ്പാക്കണം. ഇവയ്ക്കു പുറമേ ജനങ്ങളിൽനിന്ന് അഭിപ്രായം ശേഖരിക്കാൻ സിറ്റിസണ്‍ സർവേയും പുരോഗമിക്കുകയാണ്. സിഡിഎസിനെക്കുറിച്ചും സേവനങ്ങളെക്കുറിച്ചും മികവും പോരായ്മകളും ചോദിച്ചറിയും. പോരായ്മകൾ പരിഹരിക്കും. സർട്ടിഫിക്കേഷൻ ലഭിച്ചാൽ അതാത് കാലാകാലങ്ങളിൽ പുതുക്കുകയും വേണമെന്നും അധികൃതർ പറഞ്ഞു.

അനധികൃത മദ്യവില്പന: രണ്ടു പേർ പിടിയിൽ

രാജകുമാരി: ഖജനാപ്പാറ മേഖലയിൽ അനധികൃത മദ്യവില്പന നടത്തിയ രണ്ടു പേർ പിടിയിൽ. ഉടുമ്പൻചോല എക്സൈസ് റേഞ്ച് ഇൻസ്പെക്ടർ എം.പി. പ്രമോദിന്‍റെ നേതൃത്വത്തിൽ രാജകുമാരി, ഖജനാപ്പാറ ഭാഗത്ത് നടത്തിയ പരിശോധനയിലാണ് ഖജനാപ്പാറ വെള്ളിവെളുന്താൻ ചാലുവരമ്പിൽ സുരേഷി(60)നെ 3.100 ലിറ്റർ മദ്യവുമായി പിടികൂടിയത്. തുടർന്നു നടന്ന പരിശോധനയിൽ 25 ലിറ്റർ മദ്യവുമായി ഖജനാപാറ ജയമന്ദിരം ബോധുരാജി(50)നെയും അറസ്റ്റ് ചെയ്തു. പരിശോധനകളിൽ അസിസ്റ്റൻറ് എക്സൈസ് ഇൻസ്പെക്ടർമാരായ പി.ഡി. സേവ്യർ,കെ.എൻ. രാജൻ, പ്രിവന്‍റീവ് ഓഫീസർമാരായ കെ. രാധാകൃഷ്ണൻ, വി.ജെ. ജോഷി, സിവിൽ എക്സൈസ് ഓഫീസർ ടിൽസ് ജോസഫ് , കെ. പി. അരുൺ,വനിത സിവിൽ എക്സൈസ് ഓഫീസർ ചിത്രാഭായി, ഡ്രൈവർ ഷിബു ജോസഫ് എന്നിവർ പങ്കെടുത്തു.

ദേശീയപാത വികസനം തടസപ്പെട്ടത് സംസ്ഥാന സർക്കാരിന്‍റെ കെടുകാര്യസ്ഥതയെന്ന് ബിജെപി

കട്ടപ്പന: കൊച്ചി - ധനുഷ്കോടി ദേശീയ പാതയുടെ നേര്യമംഗലം മുതൽ വാളറ വരെയുള്ള നിർമാണ തടസപ്പെടാൻ കാരണം സംസ്ഥാന സർക്കാരിന്‍റെ കെടുകാര്യസ്ഥതയാണെന്ന് ബിജെപി സൗത്ത് ജില്ലാ കമ്മിറ്റി ആരോപിച്ചു. കേന്ദ്ര സർക്കാരിന്‍റെ ഭാരതിമാല പദ്ധതി പ്രകാരം 5000 കോടി രൂപ അനുവദിച്ചു നിർമാണം നടക്കുന്ന പദ്ധതിയാണ് കൊച്ചി-ധനുഷ്കോടി പാത. 590 കിലോ മീറ്റർ നീളമുള്ള കേരളത്തിനും തമിഴ്നാടിനും ഒരുപോലെ ഗുണം ചെയ്യുന്ന റോഡ് വികസനമാണ് തടസപ്പെട്ടിരിക്കുന്നത്. കെ. എൻ. ജ്യോതിലാൽ, അഡീഷണൽ ചീഫ് സെക്രട്ടറിക്കുവേണ്ടി ഹൈക്കോടതിയിൽ സമർപ്പിച്ച സത്യവാങ്മൂലമാണ് നിലവിലെ തടസത്തിനു കാരണം. ഇത് മറച്ചു വച്ച് ബിജെപിയെ കുറ്റപ്പെടുത്താൻ ചിലർ ശ്രമിക്കുകയാണെന്ന് ബിജെപി സൗത്ത് ജില്ലാ പ്രസിഡന്‍റ് വി.സി.വർഗീസ്, ജില്ലാ ജനറൽ സെക്രട്ടറി സുനിൽ കുരുവിക്കാട്ട്, കട്ടപ്പന മണ്ഡലം പ്രസിഡന്‍റ് അഡ്വ.സുജിത് ശശി, മുൻ മണ്ഡലം പ്രസിഡന്‍റ് പി.എൻ. പ്രസാദ് എന്നിവർ ആരോപിച്ചു.

അഞ്ചുരുളി റോഡിന് 1.47 കോടി: മന്ത്രി റോഷി

കട്ടപ്പന: കാഞ്ചിയാർ പഞ്ചായത്തിലെ അഞ്ചുരുളി നഗറിലേക്കുള്ള കക്കാട്ടുകട - അഞ്ചുരുളി റോഡ് നിർമാണത്തിനായി 1.47 ലക്ഷം അനുവദിച്ചതായി മന്ത്രി റോഷി അഗസ്റ്റിൻ അറിയിച്ചു. 3.024 കീലോമീറ്റർ ദൈർഘ്യമാണ് റോഡിനുള്ളത് . ആറു മീറ്റർ വീതിയുള്ള ഗ്രാമീണ റോഡാണ് നിലവിലുള്ളത് .പട്ടിക വർഗ വിഭാഗത്തിൽപ്പെടുന്ന അൻപതിലധികം കുടുംബങ്ങളാണ് ഈ മേഖലയിലുള്ളത്. നേരത്തേ അംബേദ്കർ ഗ്രാമവികസന പദ്ധതിയിൽ ഉൾപ്പെടുത്തി ഒരു കോടിയുടെ വികസന പ്രവർത്തനങ്ങൾ നടത്തിയിരുന്നു . റോഡിന്‍റെ ടാറിംഗ്, കലുങ്കുകളുടെ നിർമാണം, ഓട നിർമാണം തുടങ്ങിയ പ്രവർത്തനങ്ങളാണ് പദ്ധതിയിൽ ഉൾപ്പെടുത്തിയത്. ജില്ലയിലെ പട്ടികജാതി പട്ടികവർഗ ഉന്നതികളുടെ വികസനത്തിന് കാഞ്ചിയാർ പഞ്ചായത്തിൽ വിവിധ ഇടങ്ങളിൽ അംബേദ്കർ ഗ്രാമവികസന പദ്ധതിയിൽ ഉൾപ്പെടുത്തി ഇതിനോടകം തുക അനുവദിച്ചതായും മന്ത്രി പറഞ്ഞു.

മരം മുറിക്കാൻ വൈദ്യുതി ലൈൻ അഴിച്ചുമാറ്റുന്നില്ലെന്ന് പരാതി

കാഞ്ഞാർ: ജില്ലാ കളക്ടർ ഉത്തരവിട്ടതിനെത്തുടർന്ന് കാഞ്ഞാർ ടൗണിൽ അപകടാവസ്ഥയിൽ നിൽക്കുന്ന മരങ്ങൾ വെട്ടിമാറ്റാൻ പൊതുമരാമത്ത് അധികൃതർ എത്തിയപ്പോൾ വൈദ്യുതി വകുപ്പ് ജീവനക്കാർ ലൈൻ മാറ്റിക്കൊടുക്കാൻ തയാറായില്ലെന്ന് ആക്ഷേപം. ലൈൻ അഴിച്ചുമാറ്റി വൈദ്യുതി ബന്ധം വിച്ഛേദിച്ചാൽ മാത്രമേ മരംവെട്ടാൻ കഴിയൂ. മരം മുറിക്കുന്ന വിവരം രണ്ടു ദിവസം മുന്പ് വൈദ്യുതി വകുപ്പ് ഓഫീസിൽ അറിയിച്ച ശേഷം ഇന്നലെ മരം മുറിക്കാൻ പൊതുമരാമത്ത് വകുപ്പ് നിയോഗിച്ച ജോലിക്കാർ വന്നപ്പോഴാണ് വൈദ്യുതി ലൈൻ അഴിച്ചുമാറ്റി നൽകാതിരുന്നത്. ഇതോടെ ജോലിക്കാർ മരം മുറിക്കാതെ തിരിച്ചുപോയി. തൊടുപുഴ- ഇടുക്കി റോഡിൽ നിരവധി സ്ഥലങ്ങളിൽ അപകടാവസ്ഥയിലുള്ള മരങ്ങളുണ്ട്. ഇവയ്ക്കു സമീപത്തുകൂടെയാണ് വൈദ്യുതിലൈൻ കടന്നു പോകുന്നത്. ലൈൻ അഴിച്ചുമാറ്റാതെ ഈ മരങ്ങൾ മുറിക്കാനാവില്ല. വാഹനങ്ങൾക്കും യാത്രക്കാർക്കും ഭീഷണിയായി നിൽക്കുന്ന മരങ്ങൾ വെട്ടിമാറ്റാൻ ജില്ലാ ദുരന്തനിവാരണ അഥോറിറ്റി ചെയർപേഴ്സണ്‍ കൂടിയായ ജില്ലാ കളക്ടർ ഉത്തരവിട്ടെങ്കിലും ഇത് അവഗണിക്കുന്ന നിലപാടാണ് വൈദ്യുതി ബോർഡ് സ്വീകരിക്കുന്നതെന്ന് നാട്ടുകാർ പറയുന്നു.

പി. പളനിവേൽ തൊഴിലാളികൾക്കായി നിലയുറപ്പിച്ച നേതാവ്

മൂന്നാർ: അന്തരിച്ച മുതിർന്ന സിപിഐ നേതാവ് പി. പളനിവേലിന്‍റെ വിയോഗത്തോടെ തൊഴിലാളികൾക്കുവേണ്ടി നിരന്തരം ഉയർന്നിരുന്ന ശബ്ദമാണ് നിലച്ചത്. ഹൈറേഞ്ചിലെ തോട്ടം മേഖലയിൽ പ്രത്യേകിച്ച് തേയിലത്തോട്ടത്തിൽ പണിയെടുക്കുന്ന ആയിരക്കണക്കിന് തൊഴിലാളികൾക്ക് ഏതു സമയത്തും സമീപിക്കാവുന്ന സൗമ്യ മുഖമായിരുന്നു. ദേവികുളത്തെ ട്രേഡ് യൂണിയനുകളിൽ ഏറ്റവും പ്രബലമായ എഐടിയുസിയുടെ ഭാഗമായി എന്നും സമരമുഖത്ത് ഉണ്ടായിരുന്ന പളനിവേൽ ഹൈറേഞ്ചിന്‍റെ കമ്യൂണിസ്റ്റ് മുഖമായിരുന്നു. തൊഴിലാളികളുടെ അവകാശ സമരങ്ങളിൽ എന്നും മുൻപന്തിയിൽ ഉണ്ടായിരുന്ന അദ്ദേഹം അവസാന സമയം വരെയും രാഷ്ട്രീയ മേഖലയിൽ സജീവമായിരുന്നു. വി.എസ്.അച്യുതാനന്ദൻ സർക്കാരിന്‍റെ കാലത്ത് മൂന്നാർ ഒഴിപ്പിക്കൽ നടപടിക്കെതിരേ ശക്തമായി രംഗത്തുവന്നിരുന്നു. സിപിഐ യുടെ ഓഫീസ് കെട്ടിടം അനധികൃതമായി നിർമിച്ചതാണെന്ന് ചൂണ്ടിക്കാണിച്ച് കെട്ടിടത്തിനെതിരേ നടപടി എടുത്തതോടെ ശക്തമായ പ്രതിരോധം ഒരുക്കുന്നതിൽ അദ്ദേഹം നേതൃത്വം നൽകി. പൊന്പുള ഒരുമൈ സമരത്തിലും തൊഴിലാളികൾക്കൊപ്പം നിലകൊണ്ടു. സമരമുഖങ്ങളിൽ അണിയറ നീക്കങ്ങൾ നടത്തുന്നതിൽ പ്രാഗത്ഭ്യം പുലർത്തിയിരുന്നു. ജില്ലാ പഞ്ചായത്ത് പ്രസിഡന്‍റായും മികവ് തെളിയിച്ചു.

സിപിഐ ജില്ലാ സമ്മേളനത്തിൽ മാറ്റം

തൊടുപുഴ : പി. പളനിവേലിന്‍റെ മരണത്തെത്തുടർന്നു കട്ടപ്പന ടൗണ്‍ഹാളിൽ ഇന്നലെ മുതൽ 20 വരെ നടത്താൻ നിശ്ചയിച്ചിരുന്ന ജില്ലാ സമ്മേളന പരിപാടികളിൽ മാറ്റംവരുത്തിയതായി ജില്ലാ സെക്രട്ടറി കെ.സലിംകുമാർ അറിയിച്ചു. ഇന്നലെ നടത്താനിരുന്ന പതാക, കൊടിമര, ദീപശിഖാ ജാഥകളും പൊതുസമ്മേളനവും ഉപേക്ഷിച്ചു. ഇന്ന് ആരംഭിക്കേണ്ട പ്രതിനിധി സമ്മേളനം നാളെ ആരംഭിച്ച് 20നു സമാപിക്കും. സിപിഐ ജില്ലാ അസി.സെക്രട്ടറിയും ദേവികുളം എസ്‌റ്റേറ്റ് വർക്കേഴ്സ് യൂണിയൻ ജനറൽ സെക്രട്ടറിയുമായിരുന്നു പളനിവേൽ. നേരത്തേ ജില്ലാ പഞ്ചായത്ത് പ്രസിഡന്‍റ്, ബ്ലോക്ക് പ്രസിഡന്‍റ് എന്നീ നിലകളിലും പ്രവർത്തിച്ചിട്ടുണ്ട്. ഇന്നലെ വൈകുന്നേരം നാലോടെ മൂന്നാറിലെ വസതിയിൽ എത്തിച്ച മൃതദേഹം ഇന്നു രാവിലെ ഒന്പതുമുതൽ ഉച്ചയ്ക്ക് ഒന്നുവരെ മൂന്നാറിലെ സിപിഐ ഓഫീസിൽ പൊതുദർശനത്തിനു വയ്ക്കും. ഉച്ചയക്ക് രണ്ടിന് സംസ്കാരം നടത്തും.

എംപി സത്യഗ്രഹം അനുഷ്ഠിക്കും

അടിമാലി: എൻഎച്ച് -85ന്‍റെ നിർമാണംനിരോധിച്ച ഹൈക്കോടതി വിധിക്ക് കാരണക്കാരായ കേന്ദ്ര- സംസ്ഥാന സർക്കാരുകൾക്കെതിരേ ആരംഭിക്കുന്ന ജനകീയ പ്രക്ഷോഭത്തിന്‍റെ ഭാഗമായി അഡ്വ.ഡീൻ കുര്യാക്കോസ് എംപി നാളെ അടിമാലിയിൽ സത്യഗ്രഹം അനുഷ്ഠിക്കും. ഹൈക്കോടതിയിൽ നേര്യമഗംലം മുതൽ വാളറ വരെ വനമാണെന്ന നിലപാടാണ് സർക്കാർ അഭിഭാഷകനും വനം അഡീഷണൽ ചീഫ് സെക്രട്ടറിയും സ്വീകരിച്ചത്. ഇതാണ് കോടതിവിധി എതിരാകാൻ മുഖ്യകാരണം. രാവിലെ 10ന് അഡ്വ. കെ.ഫ്രാൻസിസ് ജോർജ് എംപി സത്യഗ്രഹ സമരം ഉദ്ഘാടനം ചെയ്യും.വൈകുന്നേരം സമാപന സമ്മേളനം തിരുവഞ്ചൂർ രാധാകൃഷ്ണൻ എംഎൽഎ ഉദ്ഘാടനം ചെയ്യുമെന്ന് യുഡിഎഫ് ദേവികുളം നിയോജക മണ്ഡലം ചെയർമാൻ എം.ബി.സൈനുദീൻ, കൺവീനർ ഒ.ആർ.ശശി എന്നിവർ അറിയിച്ചു.

ദേശീയപാത നിർമാണം: പിന്തുണ അറിയിച്ച് യാക്കോബായ സഭ

അടിമാലി: ദേശീയപാത - 85ന്‍റെ നിർമാണ പ്രതിസന്ധിയിൽ പരസ്യ പ്രതിഷേധവുമായി യാക്കോബായ സഭ. 31ന് എൻ എച്ച് സംരക്ഷണ സമിതിയുടെ നേതൃത്വത്തിൽ നടക്കുന്ന പ്രതിഷേധ മാർച്ചിന് എല്ലാവിധ പിന്തണയുമുണ്ടാകുമെന്ന് യാക്കോബായ സഭ ഹൈറേഞ്ച് മേഖല മെത്രാപ്പോലീത്ത ഡോ. ഏലിയാസ് മോർ അത്താനാസിയോസ് അടിമാലിയിൽ അറിയിച്ചു. ദേവാലയങ്ങളിൽ പ്രതിഷേധ ധർണയുമായി ബന്ധപ്പെട്ട സർക്കുലർ വായിക്കുമെന്നും സമരസമിതിക്കൊപ്പം നിന്ന് പ്രതിഷേധത്തിനിറങ്ങുമെന്നും മെത്രാപ്പോലീത്ത വ്യക്തമാക്കി.വിഷയത്തിൽ രാഷ്‌ട്രീയ ഭിന്നത മറന്ന് എല്ലാവിഭാഗം ജനങ്ങളും പ്രതിഷേധിക്കണമെന്നും നിയമ സംവിധാനത്തെപോലും വനംവകുപ്പുദ്യോഗസ്ഥർ വെല്ലുവിളിക്കുന്നുവെന്നതിനു തെളിവാണ് ഇപ്പോഴത്തെ സംഭവവികാസങ്ങളെന്നും മെത്രാപ്പോലീത്ത അറിയിച്ചു.

രാജകുമാരി മാങ്ങാത്തൊട്ടി ജംഗ്ഷനിൽ റോഡിനു വീതി വർധിപ്പിക്കണമെന്ന്

രാജകുമാരി:ശാന്തൻപാറ - പൊട്ടൻകാട് റോഡിന്‍റെ ഭാഗമായുള്ള രാജകുമാരി കുരിശുപള്ളി ജംഗ്ഷനിൽ റോഡിനു വീതി വർധിപ്പിക്കണമെന്ന് സീനിയർ സിറ്റിസൺ വെൽഫെയർ ഫ്രണ്ട്സ് അസോസിയേഷൻ ഭാരവാഹികൾ ആവശ്യപ്പെട്ടു. ഇതു സംബന്ധിച്ച് പൊതുമരാമത്ത് വകുപ്പ് മന്ത്രിക്കും ഉദ്യോഗസ്ഥർക്കും നിവേദനം നൽകി. 40 വർഷം മുന്പ് പൊതുമരാമത്ത് ഏറ്റെടുത്ത റോഡാണ് ശാന്തൻപാറയിൽനിന്ന് ആരംഭിച്ച് സേനാപതി, രാജകുമാരി, കജനാപ്പാറ, ബൈസൺവാലിവഴി പൊട്ടൻകാട്ടിലെത്തുന്നത്. ജനപ്രതിനിധികൾ ഇടപെട്ട് മൂന്നു വർഷം മുമ്പ് റോഡ് എട്ടു മീറ്റർ വീതിയിൽ ടാർ ചെയ്തു. എന്നാൽ, രാജകുമാരി കുരിശുപള്ളി കവലയിൽ പ്രധാന റോഡിൽനിന്നു മാങ്ങാത്തൊട്ടിക്ക് തിരിയുന്ന ഭാഗത്ത് റോഡിനു നാലുമീറ്റർ മാത്രമാണ് വീതിയുള്ളത്.ഇതുമൂലം വലിയ വാഹനങ്ങൾ തിരിയുന്നതിനു വലിയ ബുദ്ധിമുട്ടാണ്. വീതിയേറിയ റോഡിൽനിന്നു വരുമ്പോൾ പെട്ടെന്ന് റോഡ് ഇടുങ്ങിവരുന്നതിനാൽ നിരവധി അപകടങ്ങൾ ഉണ്ടായിട്ടുണ്ട്. മൂന്നു വർഷം മുമ്പ് സ്കൂട്ടർ ഇടിച്ചുമറിഞ്ഞ് ഒരാൾ മരിച്ചിരുന്നു. ആവശ്യമായ സ്ഥലം നഷ്ടപരിഹാരം നൽകി ഏറ്റെടുത്ത് റോഡിന് വീതി കൂട്ടി അപകടസാധ്യത കുറയ്ക്കണമെന്ന് അസോസിയേഷൻ സെക്രട്ടറി മാത്യു കുത്തുകല്ലുങ്കൽ,ജോയിന്‍റ് സെക്രട്ടറി സണ്ണി തുമ്പനിരപ്പേൽ എന്നിവർ ആവശ്യപ്പെട്ടു.

പാലത്തിനു വീതിയില്ല; മൂലമറ്റം-ഇലപ്പള്ളി റോഡിൽ ദുരിതയാത്ര

മൂലമറ്റം: കെഎസ്ആർടിസിക്കു സമീപം മൂലമറ്റം - ഇലപ്പള്ളി റോഡിൽ വൈദ്യുതിബോർഡ് ജനറേഷൻ സർക്കിളിന്‍റെ മുന്നിലുള്ള പാലം വീതി കൂട്ടി നിർമിക്കണമെന്ന ആവശ്യം ശക്തമാകുന്നു. പാലത്തിലൂടെ ഒരു വാഹനം കടന്നുപോയ ശേഷമേ എതിർവശത്തുനിന്നുള്ള വാഹനത്തിനു പോകാൻ കഴിയൂ. പതിറ്റാണ്ടുകൾക്കു മുന്പ് ഇടുക്കി പദ്ധതിയുടെയും മൂലമറ്റം പവർ ഹൗസിന്‍റെയും നിർമാണം നടന്ന സമയത്ത് ജീവനക്കാർക്ക് താമസിക്കാനായി വനംവകുപ്പിൽനിന്ന് ഏറ്റെടുത്ത സ്ഥലത്താണ് ക്വാർട്ടേഴ്സും സർക്കിൾ ഓഫീസും നിർമിച്ചത്. അന്ന് വൈദ്യുതി ബോർഡിന്‍റെ ആവശ്യത്തിനായി നിർമിച്ച പാലമാണിത്. വീതി കുറച്ചാണ് പാലം നിർമിച്ചത്. വർഷങ്ങൾക്കു ശേഷം മണപ്പാടി, ഇലപ്പള്ളി, കണ്ണിക്കൽ, പുത്തേട്, മൂന്നുങ്കവയൽ, ഇടാട് തുടങ്ങിയ പ്രദേശങ്ങളിലേക്കുള്ള റോഡ് മുറിച്ച് കനാൽ നിർമിച്ചതോടെ മറ്റു യാത്രാമാർഗങ്ങൾ ഇല്ലാതായി. ഇതോടെ ഈ പാലത്തിലൂടെയാണ് വാഗമണ്‍, പതിപ്പള്ളി, കണ്ണിക്കൽ, പുത്തേട്, ഇലപ്പള്ളി തുടങ്ങിയ മേഖലകളിലേക്കുള്ള യാത്രക്കാർ സഞ്ചരിക്കുന്നത്. ബസുകൾ ഉൾപ്പെടെയുള്ള വാഹനങ്ങളും ഇതുവഴിയാണ് കടന്നുപോകുന്നത്. ഇപ്പോൾ എറണാകുളം - തേക്കടി സംസ്ഥാന പാതയുടെ ഭാഗമാണ് പാലം. പതിപ്പള്ളി ആദിവാസി മേഖലയിലേക്കും വാഗമണ്‍ റൂട്ടിലേക്കും ബസ് സർവീസുകൾ നടത്തിവരുന്നുണ്ട്. ഇതിനു പുറമേ കുമളി, തേക്കടി, വാഗമണ്‍ തുടങ്ങിയ പ്രദേശങ്ങളിലേക്കുള്ള നൂറു കണക്കിന് വിനോദ സഞ്ചാരികളുടെ വാഹനങ്ങളും ഇതു വഴിയാണ് സഞ്ചരിക്കുന്നത്. പാലത്തിന്‍റെ വീതി കുറവ് വാഹന ഗതാഗതത്തിനു തടസമുണ്ടാക്കുന്നു. വാഹനങ്ങൾ വർധിച്ചപ്പോഴും പാലത്തിന് വീതിയില്ലാത്തതാണ് ദുരിതം സൃഷ്ടിക്കുന്നത്. പഴയ റോഡ് വൈദ്യുതിബോർഡ് മുറിച്ചെടുത്തതോടെ പാലം വീതി കൂട്ടി നിർമിക്കേണ്ടത് വൈദ്യുതി ബോർഡിന്‍റെ ഉത്തരവാദിത്വമാണെന്ന് നാട്ടുകാർ പറയുന്നു. അടിയന്തരമായി പാലം വീതികൂട്ടി നിർമിക്കണമെന്നാണ് ആവശ്യം.

രാജഭരണകാലത്തെ തോട്ടാപ്പുര തകർന്നു

പീരുമേട്: രാജരണകാലത്തിന്‍റെ സ്മരണകൾ പേറുന്ന തോട്ടാപ്പുര തകർന്നുവീണു. തിരുവിതാംകൂർ രാജഭരണകാലത്ത് വെടിക്കോപ്പുകൾ സൂക്ഷിക്കാൻ നിർമിച്ച ഒറ്റമുറി കെട്ടിടമാണ് തോട്ടാപ്പുര എന്ന് അറിയിപ്പെട്ടിരുന്നത്. ഒരു നൂറ്റാണ്ടോളം പഴക്കംചെന്ന തോട്ടാപ്പുരയെ സംരക്ഷിച്ചിരുന്നത് കൂറ്റൻ ആൽമരത്തിന്‍റെ വേരുകളായിരുന്നു. ആൽമരം ഉണങ്ങിയതോടെ കെട്ടിടം തകർച്ചയുടെ വക്കിലായി. കഴിഞ്ഞദിവസത്തെ ശക്തമായ മഴയിൽ കെട്ടിടം പൂർണമായും ഇടിഞ്ഞുവീഴുകയായിരുന്നു. റാണി ലക്ഷ്മിഭായി തമ്പുരാട്ടിയുടെ കാലത്താണ് പീരുമേട്ടിൽ തോട്ടാപ്പുര നിർമിച്ചത്. ക്ഷേത്ര നിർമാണം, കെകെ റോഡ് നിർമാണം എന്നിവയ്ക്ക് ആവശ്യമുള്ള വെടിക്കോപ്പുകൾ സൂക്ഷിക്കുക എന്നതായിരുന്നു പ്രധാന ലക്ഷ്യം. കുമ്മായം ചേർത്ത മിശ്രിതമാണ് തോട്ടാപ്പുരയുടെ നിർമാണത്തിന് ഉപയോഗിച്ചത്. ജനവാസമില്ലാത്ത കാടായിരുന്ന പ്രദേശം തെരഞ്ഞെടുത്താണ് അന്ന് കെട്ടിടം പണികഴിപ്പിച്ചത്.സ്ഫോടകവസ്തുക്കളിൽ ഇടിമിന്നലിൽ ഏൽക്കാതിരിക്കാൻ മിന്നൽരക്ഷാകവചവും സ്ഥാപിച്ചിരുന്നു.

ഉമ്മൻ ചാണ്ടി അനുസ്മരണം

തൊടുപുഴ: ബ്ലോക്ക് കോണ്‍ഗ്രസ് കമ്മിറ്റിയുടെ നേതൃത്വത്തിൽ രാജീവ് ഭവനിൽ ഉമ്മൻചാണ്ടി അനുസ്മരണം നടത്തി. ഡിസിസി പ്രസിഡന്‍റ് സി.പി. മാത്യു ഉദ്ഘാടനം ചെയ്തു. ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് ഷിബിലി സാഹിബ് അധ്യക്ഷത വഹിച്ചു. കെപിസിസി ജനറൽ സെക്രട്ടറി എസ്. അശോകൻ , ടി.ജെ.പീറ്റർ, ജോയി മൈലാടി, ജാഫർഖാൻ മുഹമ്മദ്, കെ.ജി. സജിമോൻ, പി.വി.അച്ചാമ്മ, സി.എസ്. മഹേഷ്, ബ്ലോക്ക് പഞ്ചായത്ത് പ്രസിഡന്‍റ് സുനി സാബു, റോബിൻ മൈലാടി എന്നിവർ പ്രസംഗിച്ചു. തൊടുപുഴ: മുനിസിപ്പൽ വൃദ്ധസദനത്തിൽ കോണ്‍ഗ്രസ് മുനിസിപ്പൽ ഈസ്റ്റ് മണ്ഡലം കമ്മിറ്റി നടത്തിയ ഉമ്മൻചാണ്ടി അനുസ്മരണം മുൻ ഡിസിസി പ്രസിഡന്‍റ് റോയ് കെ. പൗലോസ് ഉദ്ഘാടനം ചെയ്തു. മണ്ഡലം പ്രസിഡന്‍റ് എം.എച്ച്.സജീവ് അധ്യക്ഷത വഹിച്ചു. മുനിസിപ്പൽ ചെയർമാൻ കെ. ദീപക് മുഖ്യപ്രഭാഷണം നടത്തി. ടി.ജെ. പീറ്റർ, ചാർളി ആന്‍റണി, ജാഫർ ഖാൻ മുഹമ്മദ്, രാജു ഓടയ്ക്കൽ, ജോർജ് തന്നിക്കൽ, വി.ജി. സന്തോഷ് കുമാർ, കെ.എം. ഷാജഹാൻ, ജോർജ് ജോണ്‍, ടോണി തോമസ്, നിതിൻ ലൂക്കോസ് എന്നിവർ പ്രസംഗിച്ചു.

ചിലവ്-മാരാന്പാറ റോഡ്: ആരോപണം അടിസ്ഥാനരഹിതമെന്ന്

തൊടുപുഴ: ഇളംദേശം ബ്ലോക്ക് പഞ്ചായത്ത് പരിധിയിൽ ആലക്കോട് പഞ്ചായത്തിന്‍റെ ആസ്തി രജിസ്റ്ററിലുള്ള ചിലവ്-മാരാന്പാറ റോഡ് നിർമാണത്തിൽ ത്രിതല പഞ്ചായത്തുകൾ അനാസ്ഥ കാണിക്കുന്നതായ ആരോപണം അടിസ്ഥാനരഹിതമാണെന്ന് ബ്ലോക്ക് പഞ്ചായത്ത് പ്രസിഡന്‍റ് ടോമി കാവാലം, ബ്ലോക്ക് ഡിവിഷനംഗം മാത്യു കെ. ജോണ്‍, വാർഡംഗം ജാൻസി മാത്യു എന്നിവർ അറിയിച്ചു. റോഡ് സഞ്ചാരയോഗ്യമല്ലാതായതോടെ ത്രിതല പഞ്ചായത്തംഗങ്ങൾ ഇടപെട്ട് നിർമാണത്തിന് ഫണ്ട് അനുവദിച്ചിരുന്നു. പി.ജെ. ജോസഫ് എംഎൽഎ 20 ലക്ഷവും ബ്ലോക്ക് പഞ്ചായത്ത് 10 ലക്ഷവും ആലക്കോട് പഞ്ചായത്ത് 13 ലക്ഷവും വീതം അനുവദിച്ച തുക ഉപയോഗിച്ച് റോഡിന്‍റെ ഭൂരിഭാഗം ജോലികളും പൂർത്തിയാക്കിയിരുന്നു. ശേഷിക്കുന്ന ഭാഗത്തെ നിർമാണത്തിനായി ജില്ലാ പഞ്ചായത്തംഗം പ്രഫ. എം.ജെ. ജേക്കബ് 10 ലക്ഷവുംകൂടി അനുവദിച്ച് പ്രവൃത്തി ടെൻഡർ ചെയ്തിട്ടുള്ളതാണ്. കാലാവസ്ഥ പ്രതികൂലമായതിനാലാണ് കരാറുകാരൻ നിർമാണം തുടങ്ങാൻ താമസിക്കുന്നത്. റോഡ് പൊതുമരാമത്ത് വകുപ്പ് ഏറ്റെടുക്കണമെന്നാവശ്യപ്പെട്ട് ബ്ലോക്ക് പഞ്ചായത്ത് ഭരണസമിതി പ്രമേയം പാസാക്കി പൊതുമരാമത്ത് മന്ത്രിക്കും തദ്ദേശവകുപ്പ് മന്ത്രിക്കും എംപി, എംഎൽഎ, പൊതുമരാമത്ത് വകുപ്പ് അസി. എക്സിക്യൂട്ടീവ് എൻജിനിയർ എന്നിവർക്കും കത്ത് നൽകിയിട്ടുള്ളതാണ്. കാലാവസ്ഥ അനുകൂലമാകുന്നതോടെ റോഡിന്‍റെ നിർമാണ ജോലി ആരംഭിക്കുമെന്ന് ബ്ലോക്ക് ഡിവിഷൻ മെംബർ മാത്യു കെ. ജോണ്‍ അറിയിച്ചു.

തെരുവുവിളക്കുകൾ മിഴിയടച്ചു

കാഞ്ഞാർ: കുടയത്തൂർ മങ്കൊന്പുകാവിന് മുന്നിലൂടെ ഗവ. ന്യൂ എൽപി സ്കൂളിനു സമീപത്തേക്കുള്ള റോഡിലെ വഴിവിളക്കുകൾ തെളിയുന്നില്ലെന്ന് പരാതി. നിരവധി വീടുകളുള്ള ഈ ഭാഗത്ത് വഴിവിളക്കുകൾ പ്രകാശിക്കാതായിട്ട് നാളുകളായി. ഗുണനിലവാരം കുറഞ്ഞ ലൈറ്റുകളാണ് പലപ്പോഴും സ്ഥാപിക്കുന്നത്. ഇതാണ് ലൈറ്റുകൾ പെട്ടെന്ന് തകരാറിലാകാൻ കാരണം. മലങ്കര ജലസംഭരണിയോട് ചേർന്നാണ് റോഡ് കടന്നുപോകുന്നത്. അതിനാൽ ഈ ഭാഗങ്ങളിൽ ഇഴജന്തുക്കളുടെ ശല്യം രൂക്ഷമാണ്. തെരുവുവിളക്കുകൾ പ്രകാശിക്കാതായതോടെ നാട്ടുകാർ ഭീതിയോടെയാണ് ഇതുവഴി സഞ്ചരിക്കുന്നത്. തകരാറിലായ വൈദ്യുതി വിളക്കുകൾ മാറ്റി ഗുണനിലവാരമുള്ളവ സ്ഥാപിച്ച് ഇവിടെ വെളിച്ചമെത്തിക്കണമെന്ന് നാട്ടുകാർ ആവശ്യപ്പെട്ടു.

അനധികൃതമായി മണ്ണ് കടത്തിയ ലോറി കസ്റ്റഡിയിലെടുത്തു

ശാന്തൻപാറ: അനധികൃതമായി മണ്ണ് കടത്തിയ ലോറി കസ്റ്റഡിയിലെടുത്തു. ശാന്തൻപാറ പോലീസാണ് ലോറി പിടികൂടിയത്.കഴിഞ്ഞ രാത്രി കരമണ്ണ് കടത്തിയ ലോറി ശാന്തൻപാറ ഭാഗത്തുനിന്നാണ് എസ്ഐ ഹാഷിം കസ്റ്റഡിയിലെടുത്തത്. പിടിച്ചെടുത്ത ലോറി ജില്ലാ കളക്ടർക്ക് കൈമാറി.

റോഡ് ഉപരോധിച്ചു

രാജാക്കാട്: ഐഎൻടിയുസി ഡ്രൈവേഴ്സ് യൂണിയൻ രാജാക്കാട് യൂണിറ്റിന്‍റെ നേതൃത്വത്തിൽ റോഡ് ഉപരോധിച്ചു. രാജാക്കാട് ടൗണിനു സമീപം മലയോര ഹൈവേയുടെ ഭാഗമായ റോഡിന്‍റെ വശമിടിഞ്ഞിട്ട് ഒരു വർഷമായിട്ടും നന്നാക്കാത്തതിൽ പ്രതിഷേധിച്ചായിരുന്നു സമരം. ചെമ്മണ്ണാർ ഗ്യാപ് റോഡിൽ രാജാക്കാട് ടൗണിനു സമീപം കളിയിക്കൽ പടിയിൽ റോഡ് വശമിടിഞ്ഞ് അപകടാവസ്ഥയിലായിട്ട് ഒരു വർഷം പിന്നിടുമ്പോഴും സംരക്ഷണഭിത്തി നിര്‍മിച്ച് റോഡ് ഗതാഗതയോഗ്യമാക്കാന്‍ നടപടി ഉണ്ടായിട്ടില്ല. റോഡിന്‍റെ ബാക്കി ഭാഗത്തും വിള്ളല്‍ രൂപപ്പെട്ടിട്ടുണ്ട്. മഴ ശക്തമാകുന്നതോടെ റോഡ് പൂര്‍ണമായി ഇടിഞ്ഞുതാഴാനുള്ള സാധ്യതയും നിലനില്‍ക്കുന്നു.ദിവസേന നൂറുകണക്കിനു വിനോദസഞ്ചാരികളും സ്കൂള്‍ ബസുകളും ഇതര വാഹനങ്ങളും കടുന്നുപോകുന്ന ജില്ലയിലെ പ്രധാന റോഡാണ് അധികൃതരുടെ അനാസ്ഥയില്‍ അപകടക്കെണിയായി മാറിയിരിക്കുന്നത്. ടൗണിൽനിന്നു പ്രകടനമായി എത്തിയ പ്രവർത്തകർ അരമണിക്കൂറോളം റോഡ് ഉപരോധിച്ചു.ഐഎൻടിയുസി ജില്ലാ ജനറൽ സെക്രട്ടറി ജോഷി കന്യാക്കുഴി ഉപരോധ സമരം ഉദ്ഘാടനം ചെയ്‌തു. സമരത്തെത്തുടർന്ന് ഗതാഗതം തടസപ്പെട്ടതോടെ രാജാക്കാട് പോലീസ് പ്രവർത്തകരെ ബലം പ്രയോഗിച്ചു മാറ്റി. ഭാരവാഹികളായ അജി കാട്ടുമന,ജേക്കബ് മച്ചാനിക്കൽ, അനീഷ് പുത്തൻപുരയ്ക്കൽ, ബിനു ഊന്നാരംകല്ലേൽ, അലിയാർ, ഷിനോ കന്യാക്കുഴിയിൽ, സി.ഐ ജോർജ് എന്നിവർ നേതൃത്വം നൽകി.

ലൈഫ് ഭവനപദ്ധതി പ്രഖ്യാപനം നടത്തി

കുമാരമംഗലം: പഞ്ചായത്ത് ലൈഫ് ഭവനപദ്ധതിയുടെ പൂർത്തീകരണ പ്രഖ്യാപനവും കുടുംബസംഗമവും നടത്തി. പി.ജെ. ജോസഫ് എംഎൽഎ ഉദ്ഘാടനം ചെയ്തു. ഭവന നിർമാണ പൂർത്തീകരണ പ്രഖ്യാപനവും താക്കോൽദാനവും ഡീൻ കുര്യാക്കോസ് എംപി നിർവഹിച്ചു. പഞ്ചായത്തു പ്രസിഡന്‍റ് ഗ്രേസി തോമസ് അധ്യക്ഷത വഹിച്ചു. ലൈഫ് മിഷൻ ജില്ലാ കോ -ഓർഡിനേറ്റർ എസ്.സബൂറാ ബീവി മുഖ്യപ്രഭാഷണം നടത്തി. ബ്ലോക്ക് പഞ്ചായത്ത് പ്രസിഡന്‍റ് സുനി സാബു, ജില്ലാ പഞ്ചായത്ത് മെംബർ ഇന്ദു സുധാകരൻ, പഞ്ചായത്ത് വൈസ് പ്രസിഡന്‍റ് സിബിൻ വർഗീസ്, സ്റ്റാൻഡിംഗ് കമ്മിറ്റി ചെയർപേഴ്സണ്‍മാരായ ഷെമീന നാസർ, സാജൻ ചിമ്മിനിക്കാട്ട്, ഉഷാ രാജശേഖരൻ , ബ്ലോക്ക് പഞ്ചായത്ത് മെംബർമാരായ ബിന്ദു ഷാജി, നീതുമോൾ ഫ്രാൻസിസ്, എൽഎസ്ജിഡി ഇടുക്കി ജോയിന്‍റ് ഡയറക്ടർ ട്രീസ ജോസ്, എൽഎസ്ജി ഡി പ്രോജക്ട് ഡയറക്ടർ ജെയ് പി.ബാൽ, കെ.എം. മുഹമ്മദ് എന്നിവർ പ്രസംഗിച്ചു.

വിദ്യാരംഗം കലാസാഹിത്യവേദി ഉദ്ഘാടനം

ഏഴല്ലൂർ: സെന്‍റ് സെബാസ്റ്റ്യൻസ് യുപി സ്കൂളിൽ വിദ്യാരംഗം കലാസാഹിത്യവേദിയുടെ പ്രവർത്തനോദ്ഘാടനവും ലഹരിവിരുദ്ധ ബോധവത്കരണ ക്ലാസും നടത്തി. സാജൻ ചിമ്മിണിക്കാട്ട് അധ്യക്ഷത വഹിച്ചു. പൂർവ വിദ്യാർഥിയും സൗണ്ട് എൻജിനിയറുമായ ബേബിച്ചൻ പോൾ ഉദ്ഘാടനം ചെയ്തു. തൊടുപുഴ സബ് ഇൻസ്പെക്ടർ വി.എ. ബിജു ക്ലാസ് നയിച്ചു.പ്രധാനാധ്യാപിക സൗമ്യ എസ്. നെടുങ്ങാട്ട്, പിടിഎ പ്രസിഡന്‍റ് ജോർജ് തണ്ടേൽ, സ്കൂൾ വിദ്യാരംഗം ക്ലബ് കോ-ഓർഡിനേറ്റർ റിയ മാത്യു എന്നിവർ പ്രസംഗിച്ചു.

ചെക്ക് കേസ്: പ്രതിയെ വെറുതേവിട്ടു

തൊടുപുഴ: കടം വാങ്ങിയ എട്ടു ലക്ഷം രൂപ തിരികെ ചോദിച്ചപ്പോൾ തൊടുപുഴ ഐഡിബിഐ ബാങ്കിന്‍റെ എട്ടുലക്ഷം രൂപയുടെ വണ്ടിച്ചെക്ക് നൽകി കബളിപ്പിച്ചുവെന്ന് ആരോപിച്ച് കുമാരമംഗലം സ്വദേശി രജീഷിനെതിരേ കരിങ്കുന്നം സ്വദേശി മഠത്തുംകാട്ടിൽ മോഹനൻ തൊടുപുഴ മജിസ്ട്രേറ്റ് കോടതിയിൽ ഫയൽ ചെയ്ത കേസിൽ പ്രതി കുറ്റക്കാരനല്ലെന്ന് കണ്ട് തൊടുപുഴ ജുഡീഷൽ ഫസ്റ്റ് ക്ലാസ് മജിസ്ട്രേറ്റ് നിമിഷ അരുണ്‍ വെറുതേവിട്ടു. വാദി പണം പലിശയ്ക്ക് കൊടുക്കുന്ന ആളാണെന്നും ബ്ലാങ്ക് ചെക്ക് ദുരുപയോഗം ചെയ്ത് ഫയൽ ചെയ്തിട്ടുള്ള കള്ളക്കേസാണെന്നുമുള്ള പ്രതിഭാഗം വാദം പരിഗണിച്ചാണ് വെറുതേവിട്ടത്. പ്രതിക്കുവേണ്ടി അഭിഭാഷകരായ ബിജു പറയന്നിലം, ജെറിൻ തോമസ്, ഡെൽവിൻ പറയന്നിലം എന്നിവർ ഹാജരായി.

സഹോദരനെ തേടി ഈശ്വർ മുർമു സ്നേഹമന്ദിരത്തിൽ

ചെറുതോണി: അടിമാലി പ്രദേശത്തുകൂടി അലഞ്ഞുനടന്നിരുന്ന ഈശ്വർ മുർമുവിനെ അടിമാലി പോലീസ് പടമുഖം സ്നേഹമന്ദിരത്തിലെത്തിച്ചു. മാനസികാസ്വാസ്ഥ്യം പ്രകടിപ്പിക്കുന്ന ഏകദേശം 40 വയസ് പ്രായം തോന്നിക്കുന്ന ഈശ്വർ മുർമു സ്നേഹമന്ദിരത്തിലെത്തുമ്പോൾ തീർത്തും അവശനിലയിലായിരുന്നു. കാലിനു സാരമായ പരിക്കുണ്ട്. ജാർബണ്ഡ് സ്വദേശിയാണന്ന് കരുതുന്നു. ഹിന്ദിയാണ് സംസാരിക്കുന്നത്.നാടിനെക്കുറിച്ചോ വീടിനെക്കുറിച്ചോ വ്യക്തതയില്ല. അടിമാലിയിലെ ബസ് സ്റ്റോപ്പുകളിലും കടത്തിണ്ണയിലുമാണ് നാളുകളായി അന്തിയുറങ്ങിയിരുന്നത്. നാട്ടുകാർ പോലീസിൽ അറിയിച്ചതിനെത്തുടർന്ന് അടിമാലി പോലീസ് ഇയാളെ സ്നേഹമന്ദിരത്തിൽ എത്തിക്കുകയായിരുന്നു. സ്നേഹമന്ദിരം ഡയറക്ടർ വി.സി.രാജു യുവാവിനെ ഏറ്റെടുത്തു. ഈശ്വറിന്‍റെ സഹോദരൻ കട്ടപ്പന പ്രദേശത്തുണ്ടെന്നു പറയപ്പെടുന്നു. ഇയാളെക്കുറിച്ച് എന്തെങ്കിലും വിവരങ്ങൾ അറിയുന്നവർ സ്നേഹമന്ദിരവുമായി ബന്ധപ്പെടണമെന്ന് ഡയറക്ടർ വി.സി. രാജു അറിയിച്ചു. ഫോൺ : 9447463933, 9744287214.

ട്രാവലറിനു മുകളിൽ മരം വീണു

തൊടുപുഴ: കാറ്റിലും മഴയിലും പാതയോരത്തു നിന്നിരുന്ന മരം ഒടിഞ്ഞ് ട്രാവലറിനു മുകളിലേയ്ക്ക് വീണു. തൊടുപുഴ കോതായിക്കുന്ന് ബൈപാസിൽ ഇന്നലെ രാവിലെ 6.15 ഓടെയായിരുന്നു സംഭവം. മരം ഒടിഞ്ഞ് വൈദ്യുതി ലൈനിലേക്കും വാഹനത്തിനു മുകളിലേക്കും വീഴുകയായിരുന്നു. വാഹനത്തിന്‍റെ ചില്ലിനു കേടുപാടു സംഭവിച്ചു. തൊടുപുഴ അഗ്നിരക്ഷാ സേനയെത്തി മരം വെട്ടി നീക്കിയ ശേഷമാണ് വാഹനം മാറ്റി ഗതാഗതം പുനഃസ്ഥാപിച്ചത്.

ജില്ലയിൽ വീണ്ടും മഴ കനത്തു

തൊടുപുഴ: ജില്ലയിൽ ഇന്നലെ മുതൽ മഴ വീണ്ടും ശക്തി പ്രാപിച്ചു. കഴിഞ്ഞ ദിവസങ്ങളിൽ ഇടവിട്ടുള്ള മഴ ലഭിച്ചിരുന്നെങ്കിലും ഇന്നലെ മുതൽ കനത്ത മഴയാണ് ജില്ലയുടെ വിവിധ മേഖലകളിൽ ലഭിച്ചത്. ഇന്നലെ ജില്ലയിൽ കാലാവസ്ഥാവകുപ്പ് ഓറഞ്ച് അലർട്ട് പ്രഖ്യാപിച്ചിരുന്നു. തൊടുപുഴ ഉൾപ്പെടെ ലോറേഞ്ച് മേഖലകളിൽ ഇടവേളയില്ലാതെ ശക്തമായ മഴയാണ് പെയ്തത്. ഹൈറേഞ്ചിന്‍റെ വിവിധ ഭാഗങ്ങളിലും ഇടവിട്ട് ശക്തമായ മഴ ലഭിച്ചു. കാര്യമായ കെടുതികൾ ഇന്നലെ റിപ്പോർട്ട് ചെയ്തിട്ടില്ലെങ്കിലും കനത്ത മഴ തുടരുന്നതിനാൽ പല പ്രദേശങ്ങളിലും ആശങ്ക നിലനിൽക്കുന്നുണ്ട്. ജില്ലയിൽ ഇന്നു മുതൽ 19 വരെ യെലോ അലർട്ടുണ്ട്. ഒറ്റപ്പെട്ട ശക്തമായ മഴ തുടരുമെന്നാണ് കാലാവസ്ഥാ പ്രവചനം. മഴയ്ക്കൊപ്പം കാറ്റിനും സാധ്യതയുണ്ട്. ഈ സാഹചര്യത്തിൽ ജനങ്ങൾ ജാഗ്രത പാലിക്കണമെന്ന് നിർദേശമുണ്ട്. ജൂണ്‍ ഒന്നു മുതൽ ഇന്നലെ രാവിലെ വരെ ജില്ലയിൽ 738.6 മില്ലിമീറ്റർ മഴയാണ് ലഭിച്ചത്. സാധാരണ ലഭിക്കാറുള്ളത് 1149 മില്ലിമീറ്ററാണ്. കാലവർഷത്തിൽ നിലവിൽ 36 ശതമാനം മഴക്കുറവാണ് രേഖപ്പെടുത്തിയത്. കാറ്റും മഴയും ശക്തമായതോടെ വൈദ്യുതി മുടക്കവും പതിവായിട്ടുണ്ട്. മരങ്ങൾ ലൈനിൽ വീണാണ് കൂടുതലായും വൈദ്യുതിത്തകരാറുകൾ സംഭവിക്കുന്നത്. കഴിഞ്ഞ ദിവസം വിവിധ മേഖലകളിൽ വൈദ്യുതി മുടങ്ങിയിരുന്നു. എന്നാൽ വൈദ്യുതി മുടങ്ങുന്നതോടെ ഉപഭോക്താക്കൾ കെഎസ്ഇബി ഓഫീസിൽ വിളിച്ചു പറയുമെങ്കിലും സമയബന്ധിതമായി തകരാർ പരിഹരിക്കുന്നില്ലെന്ന് പരാതി ഉയരുന്നുണ്ട്. പരാതി ലഭിച്ചാലും കെഎസ്ഇബി അധികൃതർ എത്തുന്നത് ഏറെ സമയം കഴിഞ്ഞായിരിക്കും. ചിലപ്പോൾ അടുത്ത ദിവസമായിരിക്കും ഇവർ എത്തുക. എന്നാൽ ജീവനക്കാരുടെ കുറവു മൂലമാണ് തകരാർ പരിഹരിക്കൽ വൈകുന്നതെന്നാണ് കെഎസ്ഇബിയുടെ വിശദീകരണം.

കരിങ്കല്ല് ഉത്പന്നങ്ങളുമായി തമിഴ്നാട്ടിൽനിന്നു വരുന്ന വാഹനങ്ങൾ തടഞ്ഞുനിർത്തി ഗുണ്ടാപ്പിരിവെന്ന് പരാതി

നെടുങ്കണ്ടം: തമിഴ്നാട്ടിൽനിന്നു കരിങ്കല്ല് ഉത്പന്നങ്ങളുമായി വരുന്ന കേരള രജിസ്ട്രേഷൻ വാഹനങ്ങൾ തടഞ്ഞുനിർത്തി ഗുണ്ടാ പിരിവെന്ന് പരാതി. ഹൈറേഞ്ചിൽ നിലവിൽ ക്വാറികൾ പ്രവർത്തിക്കുന്നില്ലാത്തിനാൽ തമിഴ്നാട്ടിലെ ക്വാറികളെ ആശ്രയിച്ചാണ് ഇവിടെ നിർമാണപ്രവർത്തങ്ങൾ നടക്കുന്നത്. നൂറിലധികം കേരള രജിസ്ട്രേഷൻ വാഹനങ്ങൾ മേഖലയിൽ സർവീസ് നടത്തുന്നുണ്ട്. ഇവ കൂടാതെ തമിഴ്നാട്ടിൽനിന്നുള്ള വാഹനങ്ങളും ഉണ്ട്. അംഗീകൃത പാസും എല്ലാവിധ രേഖകളുമായി ലോഡ് എടുക്കുന്ന കേരള രജിസ്ട്രേഷൻ വാഹനങ്ങളാണ് കൊള്ളയടിപ്പിക്കപ്പെടുന്നത്. ഒരു ലോഡിന് 3000 മുതൽ 5000 രൂപ വരെ ആവശ്യപ്പെട്ടാണ് ഉദ്യോഗസ്ഥർ എന്ന വ്യാജേന ഗുണ്ടാസംഘം പിരിവ് നടത്തുന്നത് .കമ്പംമെട്ട്, ബോഡിമെട്ട്, കുമളി പാതകളിലൂടെ അതിർത്തി കടക്കുന്ന വാഹനങ്ങൾ തടയുന്നുണ്ട്. കേരളത്തിൽനിന്നുള്ള വാഹനങ്ങൾ അംഗീകൃത പാസുമായി സർവീസ് നടത്തുമ്പോൾ തമിഴ്നാട് വാഹനങ്ങളിൽ പലതിനും പാസ് ഉണ്ടാവാറില്ല. കേരളത്തിലെ ചെക്ക് പോസ്റ്റുകളിൽ ഇവരുടെ വാഹനങ്ങൾ പരിശോധിക്കാത്തതിനാൽ നടപടിയും ഉണ്ടാകുന്നില്ല. ഏതെങ്കിലും വാഹനം കേരള ചെക്ക് പോസ്റ്റിൽ തടഞ്ഞാൽ ഉപരോധം അടക്കമുള്ള സമരങ്ങൾ നടത്തി വാഹനങ്ങൾ കൊണ്ടുപോവുകയാണ് പതിവ്. പാസ് സംവിധാനത്തെ തടസപ്പെടുത്തി മുഴുവൻ വാഹനങ്ങളും അനധികൃതമായി ലോഡ് കടത്താനുള്ള നീക്കമാണ് തമിഴ്നാട് കേന്ദ്രീകരിച്ചു നടത്തുന്നതെന്നാണ് സൂചന. വിഷയത്തിൽ ഇടുക്കി, തേനി കളക്ടർമാർ ഇടപെട്ട് പരിഹാരം കണ്ടെത്തണമെന്നാണ് ആവശ്യം. കേരളത്തിൽനിന്നുള്ള വാഹങ്ങൾക്കു നേരെ ആക്രമണങ്ങളും നടക്കുന്നതായി പരാതി ഉണ്ട്. ഓടിക്കൊണ്ടിരിക്കുന്ന വാഹനങ്ങൾക്കു നേരേ കല്ല് എറിയുന്നതടക്കമുള്ള ആക്രമണങ്ങൾ ഉണ്ടായിട്ടുള്ളതിനാൽ ഡ്രൈവർമാരും ആശങ്കയിലാണ്.

ദേശീയപാത വികസനത്തിൽ സർക്കാർ നടപടി സ്വീകരിക്കണം: ബിജെപി

തൊടുപുഴ: ദേശീയപാത-85ന്‍റെ ഭാഗമായ നേര്യമംഗലം-വാളറ റോഡിന്‍റെ വികസനപ്രവർത്തനം തടഞ്ഞ ഹൈക്കോടതി ഇടക്കാല ഉത്തരവിനെതിരേ റിവ്യുഹർജി നൽകി നിർമാണം പൂർത്തീകരിക്കാൻ ആവശ്യമായ നടപടി സ്വീകരിക്കണമെന്ന് ബിജെപി സംസ്ഥാന സെക്രട്ടറി അഡ്വ. പന്തളം പ്രതാപൻ പത്രസമ്മേളനത്തിൽ ആവശ്യപ്പെട്ടു. വികസനപ്രവർത്തനങ്ങൾക്ക് പാർട്ടി എതിരല്ല. ബിജെപിയുടെ മുൻ ജില്ലാ അധ്യക്ഷൻ എം.എൻ.ജയചന്ദ്രൻ ഹൈക്കോടതിയിൽ നൽകിയ ഹർജി സംബന്ധിച്ച് ജില്ലാ കമ്മിറ്റി സംസ്ഥാന കമ്മിറ്റിക്ക് റിപ്പോർട്ട് നൽകിയിട്ടുണ്ട്. അദ്ദേഹത്തിന്‍റെ ഭരണഘടനാപരമായ അവകാശത്തെ ചോദ്യം ചെയ്യാനാവില്ല. ഹൈക്കോടതിയെ കാര്യങ്ങൾ ബോധ്യപ്പെടുത്താൻ സർക്കാരിനുണ്ടായ വീഴ്ചയാണ് പാതയുടെ നിർമാണം നിർത്തിവയ്ക്കേണ്ട സാഹചര്യം സൃഷ്ടിച്ചത്. ഇതു ബന്ധപ്പെട്ട ഉദ്യോഗസ്ഥരുടെ ഭാഗത്തെ ഗുരുതരമായ വീഴ്ചയാണ്. നിർമാണം പൂർത്തീകരിക്കാൻ ദേശീയപാത അഥോറിറ്റിയും ആവശ്യമായ നടപടികൾ സ്വീകരിക്കണമെന്നും അദ്ദേഹം ആവശ്യപ്പെട്ടു. ബിജെപി നോർത്ത് ജില്ലാ പ്രസിഡന്‍റ് പി.പി.സാനു, വൈസ് പ്രസിഡന്‍റുമാരായ പി.ജി.രാജശേഖരൻ, കെ.പി.രാജേന്ദ്രൻ, മീഡിയ കണ്‍വീനർ ഗോപി പഴുക്കാകുളം എന്നിവരും പത്രസമ്മേളനത്തിൽ പങ്കെടുത്തു.

മാണി വിഭാഗവുമായി ചർച്ച നടത്തിയിട്ടില്ല: അപു ജോൺ ജോസഫ്

തൊടുപുഴ: കേരള കോണ്‍ഗ്രസ് മാണി വിഭാഗവുമായി യുഡിഎഫ് ചർച്ച നടത്തിയിട്ടില്ലെന്ന് കേരള കോണ്‍ഗ്രസ് സംസ്ഥാന കോ-ഓർഡിനേറ്റർ അപു ജോണ്‍ ജോസഫ്. യുഡിഎഫ് ജില്ലാ കമ്മിറ്റിയുടെ നേതൃത്വത്തിൽ സേവ്യേഴ്സ് ഹോമിൽ സംഘടിപ്പിച്ച മുൻ മുഖ്യമന്ത്രി ഉമ്മൻചാണ്ടിയുടെ രണ്ടാമത് അനുസ്മരണ സമ്മേളനത്തിൽ പങ്കെടുക്കാനെത്തിയ അദ്ദേഹം മാധ്യമങ്ങളോട് പ്രതികരിക്കുകയായിരുന്നു. മാണി വിഭാഗം യുഡിഎഫ് വിട്ടപ്പോഴുള്ള സാഹചര്യം ഇപ്പോഴും നിലനിൽക്കുകയാണ്. എൽഡിഎഫിൽ സന്തോഷവനാണെന്നു ജോസ് കെ.മാണിതന്നെ പറയുന്നു. യുഡിഎഫ് ശക്തിപ്പെടുത്തുന്ന തീരുമാനങ്ങളിൽ ജോസഫ് വിഭാഗത്തിന് എതിർപ്പില്ല. തൊടുപുഴയിൽ താൻ മത്സരിക്കുമോ എന്നത് പാർട്ടിയാണ് തീരുമാനിക്കേണ്ടതെന്നും അദ്ദേഹം പറഞ്ഞു.

പുരസ്കാര നിറവിൽ ജില്ലയിലെ ആയുഷ് കേന്ദ്രങ്ങൾ

ഇടുക്കി: പ്രഥമ സംസ്ഥാന ആയുഷ്, കായകൽപ് അവാർഡിന്‍റെ നിറവിൽ ജില്ലയിലെ പത്ത് ആയുഷ് സ്ഥാപനങ്ങൾ. ആയുഷ് ഹെൽത്ത് ആന്‍ഡ് വെൽനസ് സെന്‍ററുകളിൽ കുടയത്തൂർ ഗവ. ആയുർവേദ ഡിസ്പെൻസറിയും ഹോമിയോപ്പതി വിഭാഗത്തിൽ പഴയരിക്കണ്ടം ഗവ. ഹോമിയോപതി ഡിസ്പെൻസറിയും ജില്ലയിൽ ഒന്നാം സ്ഥാനം നേടി. ആലക്കോട്, വഴിത്തല, കോടിക്കുളം ആയുർവേദ ഡിസ്പെൻസറികൾക്കും ചുരുളി, ചില്ലിത്തോട്, കൊന്നത്തടി ഹോമിയോപതി ഡിസ്പെൻസറികൾക്കും 30,000 രൂപ വീതവും ജില്ലാ ഹോമിയോപ്പതി ആശുപത്രിക്ക് 1.5 ലക്ഷം രൂപയും പുഷ്പകണ്ടം സബ് ജില്ലാ ഹോമിയോപ്പതി ആശുപത്രിക്ക് ഒരു ലക്ഷം രൂപയും കമാൻഡേഷനായി പ്രഖ്യാപിച്ചു. ജില്ലയിലെ 18 ആയുഷ് ഹെൽത്ത് ആൻഡ് വെൽനസ് സ്ഥാപനങ്ങൾക്ക് എൻഎബിഎച്ച് അംഗീകാരം ലഭിക്കാനായി പ്രയത്നിച്ച 150 ജീവനക്കാരെ ആദരിച്ചു. ജില്ലാ കളക്ടർ വി. വിഗ്നേശ്വരി യോഗം ഉദ്ഘാടനം ചെയ്തു. ജില്ലാ ഹോമിയോപ്പതി വകുപ്പ് മേധാവി ഡോ. വിനീത ആർ.പുഷ്കരൻ അധ്യക്ഷത വഹിച്ചു. ജില്ലാ പ്രോഗ്രാം മാനേജർ ഡോ. കെ.എസ്. ശ്രീദർശൻ, ജില്ലാ പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻമാരായ കെ. ജി.സത്യൻ, എം. ഭവ്യ, ഡോ. കെ.കെ. ജീന, ഡോ.ഇ.കെ. ഖയസ്, ഡോ. എം.എസ്. നൗഷാദ് , വി.എസ്. പ്രവീണ്‍ വി.എസ് എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]