ADVERTISEMENT

ADVERTISEMENT

ടാക്സ് പ്രാക്‌ടീഷണേഴ്സസ് അസോ. ജില്ലാ സമ്മേളനം നടത്തി

തൊടുപുഴ: കേരള ടാക്സ് പ്രാക്‌ടീഷണേഴ്സസ് അസോസിയേഷൻ ജില്ലാ സമ്മേളനം അടിമാലിയിൽ നടന്നു. സംസ്ഥാന സെക്രട്ടറി എൻ.കെ. ശിവൻകുട്ടി ഉദ്ഘാടനം ചെയ്തു.

ജില്ലാ പ്രസിഡന്‍റ് ടി.ജെ. തോമസ് അധ്യക്ഷത വഹിച്ചു. സംസ്ഥാന പ്രസിഡന്‍റ് പി.എസ്. ജോസഫ് മുഖ്യാതിഥിയായിരുന്നു. സെക്രട്ടറി കെ.പി. ഹരീഷ്, ജില്ലാ സെക്രട്ടറി സുനീർ ഇബ്രാഹിം, വി.കെ. യുനുസ്, എ.എസ്. അഭിലാഷ്, ടി.ജെ. തോമസ്, മുഹമ്മദ് റാഫി തുടങ്ങിയവർ പ്രസംഗിച്ചു. ടാക്സ് പ്രാക്‌ടീഷണർമാരായി 25 വർഷം പൂർത്തിയാക്കിയവരെ സമ്മേളനത്തിൽ ആദരിച്ചു. ഭാരവാഹികളായി ടി.ജെ. തോമസ്-പ്രസിഡന്‍റ്, മുഹമ്മദ് റാഫി-സെക്രട്ടറി, കെ.എം. ശിവകുമാർ-വൈസ് പ്രസിഡന്‍റ്, വി.കെ. യൂനസ്-ജോയിന്‍റ് സെക്രട്ടറി, ജോളി ജോണ്‍-ട്രഷറർ എന്നിവരെ തെരഞ്ഞെടുത്തു.

ADVERTISEMENT

അനുശ്രീ സത്യന് ജന്മനാട്ടിൽ സ്വികരണം നല്‍കി

അടിമാലി: സിവില്‍ സര്‍വീസ് പരീക്ഷയില്‍ 603-ാം റാങ്ക് നേടിയ അനുശ്രീ സത്യന് ജന്മനാടായ മുക്കുടത്ത് സ്വികരണം നല്‍കി. എസ്എന്‍ഡിപി ശാഖയുടെയും വ്യാപാരി വൃവാസായി ഏകോപന സമിതിയുടെയും വിവിധ സംഘടനകളുടെയും രാഷ്ട്രിയപാര്‍ട്ടികളുടെയും ആഭിമുഖ്യത്തിലായിരുന്നു സ്വീകരണം ഒരുക്കിയത്. മുക്കുടത്ത് നടന്ന സ്വീകരണത്തിനു ശേഷം വാഹനങ്ങളുടെ അകമ്പടികളോടെ അനുശ്രീയെ ചരുതക്കള്ളിപ്പാറയിലെ വീട്ടിലേക്കാനയിച്ചു. തുടര്‍ന്ന് വീട്ടില്‍ അനുമോദന സമ്മേളനം നടന്നു. പഞ്ചായത്തംഗം ടി.പി. മല്‍ക്ക അധ്യക്ഷത വഹിച്ചു. അടിമാലി എസ്എൻഡിപി യൂണിയന്‍ കണ്‍വീനര്‍ സജി പറമ്പത്ത്, കെ.എസ്. ലതിഷ് കുമാര്‍, പഞ്ചായത്തംഗം പി. കെ. ഉണ്ണികൃഷ്ണന്‍ തുടങ്ങിയവർ പ്രസംഗിച്ചു. വിവിധ സംഘടനകളുടെ പ്രതിനിധികള്‍ അനുശ്രീക്ക് ഉപഹാരങ്ങളും നൽകി.

ക്രിസ്തീയ ജീവിതമാർഗവും ശൈലിയും വിശ്വാസത്തിന്‍റെ മുഖമുദ്ര: മാർ ബെന്നി ഇടത്തട്ടേൽ

ചെറുതോണി: കത്തോലിക്ക മിഷൻപ്രദേശങ്ങളിൽ ക്രൈസ്തവ വിശ്വാസം വളർന്നതിനു പിന്നിൽ മിഷനറിമാർ വഹിച്ച പങ്ക് വളരെ വലുതാണെന്ന് ഇറ്റാനഗർ ബിഷപ് മാർ ബെന്നി ഇടത്തട്ടേൽ. മുളകുവള്ളി സെന്‍റ് ജോസഫ് പള്ളി രജത ജൂബിലി ദിനത്തിൽ വിശുദ്ധ ബലി അർപ്പിച്ചു സന്ദേശം നൽകുകയായിരുന്നു മാർ ബെന്നി ഇടത്തട്ടേൽ. ഈ കാലഘട്ടത്തിൽ യേശുവിനെ പകർന്നുകൊടുക്കാനും പറഞ്ഞുകൊടുക്കാനും ഓരോ വിശ്വാസിയും കടപ്പെട്ടിരിക്കുന്നു. വ്യക്തികളിൽ ആരംഭിച്ച് ഇന്ന് ആയിരക്കണക്കിന് വിശ്വാസികളുടെ സമൂഹമായി ക്രൈസ്തവർ മാറിയതിനു കാരണം ക്രിസ്തീയ ജീവിത‌ശൈലിയും ജീവിതമാർഗവും കലർപ്പുകൂടാതെ പകർന്നുനൽകിയതുകൊണ്ടാണെന്ന് അദ്ദേഹം പറഞ്ഞു.

പുഴയോര ബൈപാസ് സൗന്ദര്യവത്കരണം പാളി

തൊടുപുഴ: തൊടുപുഴയാറിന്‍റെ തീരം വഴി നഗര സൗന്ദര്യവത്കരണത്തിന്‍റെ ഭാഗമായി നിർമിച്ച പുഴയോര ബൈപാസിന് അധികൃതരുടെ അവഗണന. ഗതാഗതത്തിനായി തുറന്നു കൊടുത്തതോടെ നൂറു കണക്കിന് വാഹനങ്ങളാണ് ഇതു വഴി സഞ്ചരിക്കുന്നത്. എന്നാൽ, തിരക്കേറിയ ബൈപാസിന്‍റെ ഇരു വശങ്ങളും ഇപ്പോൾ കാടു കയറിയ നിലയിലാണ്. വഴി വിളക്കുകൾ സ്ഥാപിക്കാത്തതിനാൽ രാത്രിയായാൽ ബൈപാസിൽ കൂരിരുട്ടാകും. പുഴയോരം വഴി നിർമിച്ചിരിക്കുന്ന റോഡായതിനാൽ സന്ധ്യയാകുന്നതോടെ ഒട്ടേറെ പേർ ഇവിടെ വിശ്രമത്തിനും സമീപത്തെ ഹോട്ടലുകളിൽ ഭക്ഷണം കഴിക്കാനുമെത്തുന്നുണ്ട്. എന്നാൽ രാത്രിയായാൽ പാതയോരത്ത് ഇഴ ജന്തുക്കളും സാമൂഹ്യ വിരുദ്ധരുമാണ് സ്വൈര വിഹാരം നടത്തുന്നത്. കൂടാതെ കാടു പിടിച്ചു കിടക്കുന്നതിനാൽ മാലിന്യവും ഇവിടെ നിക്ഷേപിക്കപ്പെടുന്നു. വെങ്ങല്ലൂർ പാലത്തിനു സമീപത്ത് നിന്ന് ആരംഭിച്ച് തൊടുപുഴയാറിന്‍റെ തീരത്ത് കൂടി തൊടുപുഴ - പാലാ റോഡിലെ ധന്വന്തരി ജംഗ്ഷനിൽ എത്തിച്ചേരുന്നതാണ് ബൈപാസ്. നഗരത്തിരക്കിൽ നിന്നും മാറി പുഴയുടെ സൗന്ദര്യം ആസ്വദിച്ച് സഞ്ചരിക്കാവുന്ന വിധത്തിലാണ് പുഴയോര ബൈപാസ് വിഭാവനം ചെയ്തത്. പ്രഭാത വ്യായാമത്തിനും, വൈകുന്നേരങ്ങളിൽ കുടുംബമായി എത്തി സമയം ചെലവഴിക്കാനും ബൈപാസ് പ്രയോജനപ്പെടുത്താനാണ് റോഡ് വിഭാവനം ചെയ്തിരുന്നത്. 1.7 കിലോമീറ്റർ നീളത്തിലും 12 മീറ്റർ വീതിയിലുമാണ് ബൈപാസ് നിർമിച്ചത്. വാഹന ഗതാഗതത്തിന് പുറമേ, വ്യായാമത്തിനും വിനോദത്തിനും കൂടി ഉപയോഗപ്പെടുത്തുക എന്ന ലക്ഷ്യത്തോടെയായിരുന്നു രൂപകൽപന. ഇതിനായി പുഴയോരത്തോടു ചേർന്ന് ജോഗിംഗ് ട്രാക്ക് നിർമിക്കാനും പദ്ധതിയിട്ടിരുന്നു. കൂടാതെ റോഡിന്‍റെ മുഴുവൻ വശത്തും പുഴയോരത്ത് ഹാൻഡ് റെയിലുകൾ സ്ഥാപിക്കാനും പുഴയോരത്തും, മറുവശത്തും പൂമരങ്ങൾ പിടിപ്പിച്ചു മനോഹരമാക്കാനും അലങ്കാര സ്ട്രീറ്റ് ലൈറ്റുകൾ സ്ഥാപിക്കാനുമായിരുന്നു പദ്ധതി. എന്നാൽ ബൈപാസ് നിർമാണം പൂർത്തിയാക്കി റോഡ് തുറന്നു കൊടുത്തെങ്കിലും സൗന്ദര്യവത്കരണം നടപ്പാക്കിയിട്ടില്ല. സാമൂഹ്യ വിരുദ്ധരും ലഹരി മാഫിയ സംഘങ്ങളും ബൈപാസ് താവളമാക്കിയതോടെ ഇവിടെ വഴിവിളക്കുകൾ സ്ഥാപിക്കണമെന്ന് പ്രദേശവാസികൾ ആവശ്യപ്പെട്ടെങ്കിലും എൽഡിഎഫ് നേതൃത്വത്തിലുണ്ടായിരുന്ന നഗരസഭാ ഭരണ സമിതി ഇക്കാര്യത്തിൽ നടപടിയെടുത്തില്ല. ഇപ്പോഴത്തെ നഗരസഭാ ചെയർമാനും മുൻ സ്റ്റാൻഡിംഗ് കമ്മിറ്റി ചെയർമാനുമായ കെ.ദീപക് മുൻ കൈയെടുത്ത് വഴിവിളക്ക് സ്ഥാപിക്കാൻ ഇപ്പോൾ 15 ലക്ഷം രൂപ വകയിരുത്തിയിട്ടുണ്ട്. അമിത വേഗത്തിൽ വാഹനങ്ങൾ സഞ്ചരിച്ച് അപകടം കൂടിയതോടെ ഇവിടെ ട്രാഫിക് പോലീസിന്‍റെ നേതൃത്വത്തിൽ സ്പീഡ് ബ്രേക്കർ സ്ഥാപിച്ചിട്ടുണ്ട്. എന്നാൽ പൂർണമായ തോതിൽ ക്രാഷ് ബാരിയർ സ്ഥാപിച്ചിട്ടില്ല. ബേബി മെമ്മോറിയൽ ആശുപത്രിക്കു സമീപം ക്രാഷ് ബാരിയർ സ്ഥാപിക്കാത്ത ഭാഗത്ത് കാർ പുഴയിലേയ്ക്ക് മറിഞ്ഞിരുന്നു. നിലവിൽ സ്ഥാപിച്ചിരിക്കുന്ന ക്രാഷ് ബാരിയർ കാടു മൂടിയ നിലയിലുമാണ്. അതിനാൽ വാഹനങ്ങൾ ഇതിൽ ഇടിക്കാനും സാധ്യതയേറെയാണ്. കാടു വളർന്നു നിൽക്കുന്നതിനാൽ റോഡിലേയ്ക്ക് പാന്പുകളും മറ്റും കയറി വരുന്നുണ്ട്. സ്ത്രീകളുൾപ്പെടെ ഒട്ടേറെ പേർ രാവിലെ പ്രഭാത സവാരിയ്ക്കിറങ്ങുന്ന പാതയാണ് പുഴയോര ബെപാസ്. വഴിവിളക്കിന് 15 ലക്ഷം :ചെയർമാൻ പുഴയോര ബൈപാസിൽ വഴിവിളക്കുകൾ സ്ഥാപിക്കുന്നതിനുള്ള നടപടികൾ ഉടൻ പൂർത്തിയാക്കുമെന്നും ഇതിനായി 15 ലക്ഷം രൂപയുടെ പദ്ധതി തയാറാക്കിയിട്ടുണ്ടെന്നും നഗരസഭ ചെയർമാൻ കെ.ദീപക് പറഞ്ഞു. റോഡിലെ കാട് ഉടൻ വെട്ടി നീക്കും. നഗരത്തിലെ എല്ലാ റോഡുകളിലും കാടു വെട്ടി നീക്കുന്ന ജോലികൾ നടന്നു വരികയാണ്. മഴക്കാലമെത്തുന്നതിനു മുന്പു തന്നെ നഗരസഭയിൽ ഇത്തരം പ്രവർത്തനങ്ങളെല്ലാം പൂർത്തിയാക്കും. നാലു വർഷത്തോളമായി അധികാരത്തിലിരുന്ന ഇടതു ഭരണ സമിതി നടപ്പാക്കാതിരുന്ന വികസന പ്രവർത്തനങ്ങളാണ് യുഡിഎഫിന്‍റെ നേതൃത്വത്തിലുള്ള ഭരണ സമിതി നടപ്പാക്കുന്നതെന്ന് അദ്ദേഹം പറഞ്ഞു.

ബൈസൺവാലി പള്ളിയിൽ തിരുനാൾ

ബൈസൺവാലി: സെന്‍റ് ആന്‍റണീസ് ടൗൺ പള്ളിയിൽ ഇടവക മധ്യസ്ഥനായ വിശുദ്ധ അന്തോനീസിന്‍റെയും വിശുദ്ധ സെബസ്ത്യാനോസിന്‍റെയും പരിശുദ്ധ കന്യക മറിയത്തിന്‍റെയും സംയുക്ത തിരുനാൾ നാളെ തുടങ്ങുമെന്ന് വികാരി ഫാ. ജെറിൻ കുഴിയാംപ്ലാവിൽ അറിയിച്ചു. വൈകുന്നേരം നാലിന് കൊടിയേറ്റ്, തിരുസ്വരൂപ പ്രതിഷ്ഠ, ലദീഞ്ഞ്, 4.30ന് ആഘോഷമായ തിരുനാൾ കുർബാന, സന്ദേശം-ഫാ. ജോസഫ് തൊട്ടിയിൽ, സെമിത്തേരി സന്ദർശനം, വീട്ടമ്പ് എഴുന്നള്ളിക്കൽ. മൂന്നിന് ഉച്ചകഴിഞ്ഞ് മൂന്നിന് അമ്പു പ്രദക്ഷിണം, 4.15ന് നോവേന, ലദീഞ്ഞ്, 4.45ന് ആഘോഷമായ തിരുനാൾ കുർബാന-ഫാ. പ്രിൻസ് പരത്തനാൽ സിഎംഐ, ടൗൺ ചുറ്റി തിരിപ്രദക്ഷിണം. നാലിന് രാവില 9.30ന് ലദീഞ്ഞ്, ആഘോഷമായ തിരുനാൾ റാസ കുർബാന, സന്ദേശം - ഫാ. പോളി മണിയാട്ട്, തുടർന്ന് സമാപന ആശീർവാദം, സ്നേഹവിരുന്ന്. തള്ളക്കാനം കപ്പേളയിൽ തിരുനാൾ കഞ്ഞിക്കുഴി: സെന്‍റ് മേരീസ് കത്തോലിക്ക പള്ളിയുടെ തള്ളക്കാനം കപ്പേളയിൽ വിശുദ്ധ യൗസേപ്പിതാവിന്‍റെ തിരുനാൾ നാളെ ആഘോഷിക്കുമെന്ന് വികാരി ഫാ. ടോമി ആനിക്കുഴിക്കാട്ടിൽ, സഹവികാരി ഫാ. നിർമൽ കളത്തിക്കാട്ടിൽ എന്നിവർ അറിയിച്ചു. രാവിലെ 10.30ന് വിശുദ്ധ കുർബാന -ഫാ. വിനീത് മേക്കൽ. പാച്ചോർ നേർച്ച.

ദേശീയപണിമുടക്ക്: സംയുക്ത ട്രേഡ് യൂണിയന്‍ ജില്ലാ കണ്‍വന്‍ഷന്‍ നടത്തി

കട്ടപ്പന: ലേബര്‍ കോഡുകള്‍ പിന്‍വലിക്കുക, വിലക്കയറ്റം തടയുക, പൊതുമേഖല ഓഹരി വില്‍പ്പന അവസാനിപ്പിക്കുക, സ്‌കീം വര്‍ക്കര്‍മാരെ തൊഴിലാളികളായി അംഗീകരിക്കുക, കുറഞ്ഞ വേതനം 26,000 രൂപയും പെന്‍ഷന്‍ 9,000 രൂപയുമായി നിശ്ചയിക്കുക തുടങ്ങിയ ആവശ്യങ്ങളുന്നയിച്ച് സംയുക്ത ട്രേഡ് യൂണിയന്‍ മേയ് 20ന് ദേശീയ പണിമുടക്കു നടത്തും. ബിജെപി സര്‍ക്കാരിന്‍റെ തൊഴിലാളി വിരുദ്ധ, കര്‍ഷകദ്രോഹ നയങ്ങള്‍ക്കെതിരേ നടത്തുന്ന ദേശീയ പണിമുടക്കിന് മുന്നോടിയായി സംയുക്ത ട്രേഡ് യൂണിയന്‍ സമരസമിതി കട്ടപ്പനയിൽ ജില്ലാ കണ്‍വന്‍ഷന്‍ നടത്തി. സിഐടിയു ജില്ലാ സെക്രട്ടറി കെ.എസ്. മോഹനന്‍ കൺവൻഷൻ ഉദ്ഘാടനം ചെയ്തു. എഐടിയുസി ജില്ലാ പ്രസിഡന്‍റ് ജോസ് ഫിലിപ്പ് അധ്യക്ഷത വഹിച്ചു. സിഐടിയു സംസ്ഥാന കമ്മിറ്റിയംഗം പി.എസ്. രാജന്‍, ടിയുസിഐ ജില്ലാ സെക്രട്ടറി ബാബു മഞ്ഞള്ളൂര്‍, ജി. വിജയാനന്ദ്, വി.ആര്‍. സജി, സോമന്‍, കുഞ്ഞുമോന്‍, ടി. എസ്. ബിസി, മുരളി, സിന്ധു വിനോദ്, വി.ആര്‍. ശശി എന്നിവര്‍ പ്രസംഗിച്ചു.

പ്രദർശന മേള: സ്റ്റാളുകളിൽ സന്ദർശക പ്രവാഹം

ഇടുക്കി: എന്‍റെ കേരളം പ്രദർശന വിപണന മേളയിൽ പൊതുമരാമത്ത് വകുപ്പ് ഒരുക്കിയ സ്റ്റാൾ ശ്രദ്ധേയമായി. ഹൈവേ വികസന പദ്ധതികളോടൊപ്പം സംസ്ഥാന റോഡുകളും ഗ്രാമീണ റോഡുകളായ ചെമ്മണ്ണാർ ഗ്യാപ്പ് റോഡ്, രാജാക്കാട് -മൈലാടുംപാറ -പുപ്പാറ റോഡ്, മൂന്നാർ ഗ്യാപ് റോഡ് തുടങ്ങിയ ഇടുക്കിയിലെ റോഡുകൾ രാജ്യാന്തര നിലവാരത്തിലേക്ക് ഉയർന്നു. ഗുണനിലവാരം ഉറപ്പുവരുത്തുന്ന ത്രീ ടയർ ക്വാളിറ്റി സിസ്റ്റം, റോഡുകൾ അപകടകരഹിതമാക്കി നിലനിർത്തുന്ന റണ്ണിംഗ് കോണ്‍ട്രാക്ട് സിസ്റ്റം തുടങ്ങി ആധുനിക രൂപകല്പനയിൽ പ്രകൃതിക്ഷോഭങ്ങളെ പ്രതിരോധിക്കുന്ന തരത്തിലുള്ള നിർമിതികളുടെ നേർക്കാഴ്ചയാണ് സ്റ്റാളിൽ ഒരുക്കിയിരിക്കുന്നത്. കുടുംബശ്രീയുടെ നേതൃത്വത്തിൽ ആരംഭിച്ച ഫുഡ് സ്റ്റാളിന്‍റെ ഉദ്ഘാടനം മന്ത്രി റോഷി അഗസ്റ്റിൻ നിർവഹിച്ചു. കുടുംബശ്രീ പ്രവർത്തകർ തയാറാക്കിയ നാടൻ വിഭവങ്ങൾ, പലഹാരങ്ങൾ, ബിരിയാണി, തണുത്ത പാനീയങ്ങൾ തുടങ്ങി രുചികരമായ ഭക്ഷണസാധനങ്ങൾ സ്റ്റാളിൽ ലഭിക്കും. ജില്ലാ ഇൻഫർമേഷൻ വകുപ്പ് ഒരുക്കിയ സ്റ്റാളിലെ എൽഇഡി സ്ക്രീനിൽ കേരളത്തിലെ വികസന പ്രവർത്തനങ്ങളുടെ രൂപരേഖ ജനങ്ങൾക്ക് അടുത്തറിയാം. എന്‍റെ കേരളം മാഗസിന്‍റെ മുഖചിത്രമാകാൻ അവസരമൊരുക്കുന്ന ഫോട്ടോ പോയിന്‍റും ഒരുക്കിയിട്ടുണ്ട്. കാർഷികം, പട്ടയം, വിദ്യാഭ്യാസം, ആരോഗ്യം, നവകേരളം എന്നിങ്ങനെ രേഖപ്പെടുത്തിയിരിക്കുന്ന നേട്ടങ്ങളുടെ ക്യൂബും ഇവിടെയുണ്ട്. സിവിൽ സപ്ലൈസ് വകുപ്പിന്‍റെ സ്റ്റാളും മേളയോടനുബന്ധിച്ച് ഒരുക്കിയിട്ടുണ്ട്.

മൂന്നാർ പുഷ്പമേളയ്ക്ക് ഇന്നു തുടക്കം

മൂന്നാർ: മൂന്നാർ ഗവണ്‍മെന്‍റ് ബൊട്ടാണിക്കൽ ഗാർഡനിൽ മൂന്നാർ പുഷ്പമേളയ്ക്ക് ഇന്നു തുടക്കം കുറിക്കും. രാവിലെ അഡ്വ.എ.രാജാ എംഎൽഎ ഉദ്ഘാടനം നിർയഹിക്കും. മേയ് 10 വരെയാണ് പുഷ്പമേള. ജില്ലാ ടൂറിസം വകുപ്പിന്‍റെ നേതൃത്വത്തിലാണ് പുഷ്പമേള ഒരുങ്ങുന്നത്. അവധിക്കാലത്ത് മൂന്നാറിലെത്തുന്ന സന്ദർശകരെ ആകർഷിക്കുക എന്ന ഉദ്ദേശ്യതോടെയാണ് മേള സംഘടിപ്പിക്കപ്പെട്ടിട്ടുള്ളത്. പുഷ്പമേളയ്ക്കു പുറമേ മ്യൂസിക്കൽ ഫൗണ്ടൻ, ഭക്ഷ്യമേള, സെൽഫി പോയിന്‍റ്, കലാപരിപാടികൾ, വിപണനമേള എന്നിവയും നടക്കും. ജമന്തി, മേരിഗോൾഡ്, ഡയാന്‍റിസ്, വിട്രോണി, പുത്തിൻ സെത്തിയ, ക്രിസാന്തിസം, ഹിഗോണി, സലേഷ്യ, വിങ്ക തുടങ്ങിയ പതിവ് ഇനം പൂക്കൾക്കൊപ്പം വൈവിധ്യമാർന്ന നാനൂറിൽ അധികം പൂക്കൾ മേളയുടെ ആകർഷണമാണ്. വിദേശത്തുനിന്ന് എത്തിക്കുന്ന അലീസിയ, റോസ്, ഓർക്കിഡ്, ആന്തൂറിയം എന്നിവയും പ്രദർശനത്തിനുണ്ടാകും. ഒരു ദിവസം രണ്ടു തവണയാണ് മ്യൂസിക്കൽ ഫൗണ്ടൻ ഉണ്ടാവുക, വൈകുന്നേരം ആറു മുതൽ വ്യത്യസ്ത കലാപരിപാടികളും ഉണ്ടാവും. കുട്ടികൾക്ക് 50 രൂപയും മുതിർന്നവർക്ക് 100 രൂപയും ആണ് പ്രവേശന ഫീസ്.

ജില്ലാ കളക്ടര്‍ സ്ഥലം സന്ദര്‍ശിച്ചു

നെടുങ്കണ്ടം: കേന്ദ്രാവിഷ്‌കൃത പദ്ധതിയായ പ്രധാന്‍മന്ത്രി ജന്‍ വികാസ് കാര്യക്രം പദ്ധതി പ്രകാരം നെടുങ്കണ്ടം ബ്ലോക്ക് പഞ്ചായത്തില്‍ അനുവദിച്ച സദ്ഭാവനാ മണ്ഡപത്തിന്‍റെ നിര്‍മാണം നീളുന്നതായി ബ്ലോക്ക് പഞ്ചായത്ത് നല്‍കിയ പരാതിയെ തുടര്‍ന്ന് ജില്ലാ കളക്ടര്‍ വിഗ്‌നേശ്വരി സ്ഥലം സന്ദര്‍ശിച്ചു. നിര്‍മാണ ജോലികളുടെ ചുമതല സംസ്ഥാന നിര്‍മിതി കേന്ദ്രത്തെയാണ് ഏല്‍പ്പിച്ചിരുന്നത്. ഇതു ടെന്‍ഡര്‍ ചെയ്ത് കരാറുകാരനുമായി എഗ്രിമെന്‍റ് വച്ചിട്ട് മാസങ്ങള്‍ പിന്നിട്ടിട്ടും നിര്‍മാണ പ്രവൃത്തിയില്‍ പുരോഗതി ഉണ്ടാകാത്തതിനെത്തുടര്‍ന്നാണ് ബ്ലോക്ക് പഞ്ചായത്ത് ജില്ലാ കളക്ടര്‍ക്കു പരാതി നല്‍കിയത്. സ്ഥലം സന്ദര്‍ശിച്ച കളക്ടര്‍ നിര്‍മാണ പ്രവൃത്തികള്‍ വേഗത്തിലാക്കാനുള്ള നിര്‍ദ്ദേശം നല്‍കി. കേന്ദ്ര-സംസ്ഥാന സംസ്ഥാന സര്‍ക്കാരും ബ്ലോക്ക് പഞ്ചായത്തും ചേര്‍ന്ന് നടപ്പാക്കുന്ന സംയുക്ത പദ്ധതിയാണ് നെടുങ്കണ്ടം ബ്ലോക്ക് പഞ്ചായത്ത് ഓഫീസിന് സമീപം നിര്‍മിക്കുന്ന സദ്ഭാവനാ മണ്ഡപം. 1000 പേര്‍ക്ക് ഇരിക്കാവുന്ന ഓഡിറ്റോറിയമാണിത്. 1.40 കോടി രൂപയാണ് നിര്‍മാണച്ചെലവ്. 60 ശതമാനം കേന്ദ്ര വിഹിതവും 40 ശതമാനം സംസ്ഥാന വിഹിതവുമാണ്. കൂടാതെ ചുറ്റുമതില്‍ നിര്‍മിക്കുന്നതിനായി ബ്ലോക്ക് പഞ്ചായത്തിന്‍റെ കഴിഞ്ഞ ബജറ്റില്‍ 28 ലക്ഷം രൂപയും അനുവദിച്ചിരുന്നു. എന്നിട്ടും പദ്ധതി എങ്ങും എത്തിയില്ല. നിര്‍മാണ ജോലികള്‍ പുരോഗമിക്കവെ ഉണ്ടായ അപ്രതീക്ഷിത ചെലവുകള്‍ മൂലം നിലവിലെ എസ്റ്റിമേറ്റ് പ്രകാരം പദ്ധതി പൂര്‍ത്തിയാക്കാന്‍ സാധിക്കാതെ വന്നതായാണ് കരാറുകാരന്‍ പറയുന്നത്.

മൂലമറ്റം-കോട്ടമല റോഡിന് അനുമതി: മന്ത്രി റോഷി

മൂലമറ്റം: ടൂറിസത്തിനും കാർഷിക മേഖലയ്ക്കും ഒരുപോലെ പ്രയോജനപ്പെടുന്ന മൂലമറ്റം-കോട്ടമല റോഡിന് 6.86 കോടിയുടെ എസ്റ്റിമേറ്റിന് മന്ത്രിസഭാ യോഗം അംഗീകാരം നൽകിയതായി മന്ത്രി റോഷി അഗസ്റ്റിൻ അറിയിച്ചു. റോഡിന്‍റെ ആദ്യഭാഗമായ അശോക കവല മുതൽ മൂലമറ്റം വരെയുള്ള 2.5 കിലോമീറ്റർ ദൂരവും തുടർന്നുള്ള അഞ്ചു കിലോമീറ്റർ ദൂരവും ബിഎം ആന്‍ഡ് ബിസി നിലവാരത്തിൽ പുനർനിർമിക്കും. ടാറിംഗ് നടത്താനുള്ള ഭാഗം പൂർത്തീകരിച്ച് റോഡ് ഗതാഗത യോഗ്യമാകുന്നതോടെ കൊച്ചി അടക്കമുള്ള സ്ഥലങ്ങളിൽ നിന്ന് തേക്കടി ഉൾപ്പെടെയുള്ള വിനോദ സഞ്ചാര മേഖലകളിലേക്ക് എത്തുന്നതിനു 42 കിലോമീറ്റർ ദൂരം ലാഭിക്കാനാകും. കർഷകർക്ക് തങ്ങളുടെ ഉത്പന്നങ്ങൾ പ്രധാന വിപണന കേന്ദ്രങ്ങളിലേക്ക് എത്തിക്കുന്നതിനും ഏറ്റവും ലാഭകരമായ പാതയായി ഇതു മാറും.രാജ്യാന്തര നിലവാരത്തിൽ പുനർ നിർമിക്കുന്ന റോഡിൽ ആവശ്യമുള്ള സ്ഥലങ്ങളിൽ കലുങ്കുകളും സംരംക്ഷണ ഭിത്തികളും സൂചനാ ബോർഡുകളും ക്രാഷ് ബാരിയറുകളും സ്ഥാപിക്കും. ജില്ലയിലെ പ്രധാന ടൂറിസം കേന്ദ്രമായ വാഗമണ്ണിലേക്ക് മൂലമറ്റത്തുനിന്നു ഉളുപ്പൂണി വഴി എത്തുന്നതിന് നവീകരിച്ച പുതിയ പാത ഏറെ പ്രയോജനകരമാകും. റോഡ് പൂർത്തിയാകുന്നതോടെ 15 കിലോമീറ്ററോളം ലാഭിച്ച് ചോറ്റുപാറ-വാഗമണ്‍ റോഡിലേക്ക് സഞ്ചാരികൾക്ക് എത്താനും കഴിയും. ഏതാനും മാസങ്ങൾക്ക് മുൻപ് തുക അനുവദിച്ചിരുന്നെങ്കിലും ടെൻഡർ നിരക്ക് അധികമായിരുന്നതിനാലാണ് മന്ത്രിസഭയുടെ അഗീകാരം ആവശ്യമായി വന്നത്. റോഡിന്‍റെ പ്രാധാന്യവും ടൂറിസം സാധ്യതയും കണക്കിലെടുത്താണ് മന്ത്രിസഭാ യോഗം റോഡ് നിർമാണത്തിന് അനുമതി നൽകിയതെന്നും മന്ത്രി റോഷി അറിയിച്ചു.

സുഹൃത്തിനെ കൊലപ്പെടുത്തിയ കേസിൽ പ്രതിയെ വെറുതെ വിട്ടു

തൊടുപുഴ: ഒന്നിച്ച് മദ്യപിക്കുന്നതിനിടെ ഉണ്ടായ വാക്കു തർക്കത്തെ തുടർന്ന് സുഹൃത്തിനെ തീ കൊളുത്തി കൊലപ്പെടുത്തിയ കേസിൽ പ്രതിയെ വെറുതെ വിട്ടു. വണ്ടിപ്പെരിയാർ തങ്കമല മാട്ടുപ്പെട്ടി ബഥേൽ എസ്റ്റേറ്റിൽ അനിൽകുമാറിനെയാണ് അയൽവാസിയായ മുരുകയ്യയെ കൊലപ്പെടുത്തിയ കേസിൽ തൊടുപുഴ പ്രിൻസിപ്പൽ സെഷൻസ് ജഡ്ജി പി.എസ്.ശശികുമാർ തെളിവുകളുടെ അഭാവത്തിൽ വെറുതെ വിട്ടത്. 2017 സെപ്റ്റംബർ നാലിനായിരുന്നു സംഭവം. അനിൽകുമാറിന്‍റെ വീട്ടിൽ ഇരുവരും ചേർന്ന് മദ്യപിച്ചതിനെ തുടർന്ന് മുരുകയ്യ അവിടെ തന്നെ കിടന്നുറങ്ങി. രാത്രിയിൽ പ്രതിയുടെ വീട്ടിൽ വൈദ്യുതി ഇല്ലാത്തതിനാൽ മുരുകയ്യ മണ്ണെണ്ണ വിളക്ക് കത്തിക്കാൻ പറയുകയും എന്നാൽ മെഴുകുതിരി കത്തിച്ചാൽ മതിയെന്ന് അനിൽകുമാറും പറഞ്ഞു. ഇതു സംബന്ധിച്ച് ഇരുവരും തമ്മിലുണ്ടായ വാക്കു തർക്കത്തിനൊടുവിൽ മുറിയിലിരുന്ന മണ്ണെണ്ണ എടുത്ത് മുരുകയ്യയുടെ ദേഹത്തൊഴിച്ച് തീ കൊളുത്തിയെന്നാണ് കേസ്. കോട്ടയം മെഡിക്കൽ കോളജിൽ ചികിൽസയിലിരിക്കെയാണ് മുരുകയ്യ മരിച്ചത്. കേസിൽ 14 സാക്ഷികളെ വിസ്തരിക്കുകയും മുരുകയ്യയുടെ മരണമൊഴി അടക്കം 22 രേഖകളും പ്രതിയുടെ ലയമുറിയിൽ നിന്ന് കണ്ടെത്തിയ പായ, കന്പിളി, ലുങ്കി, പ്ലാസ്റ്റിക് കുപ്പി എന്നിവ തൊണ്ടിയായും കോടതിയിൽ ഹാജരാക്കി. പ്രോസിക്യൂഷൻ വിസ്തരിച്ച എല്ലാ സാക്ഷികളും പ്രതിക്കെതിരെ മൊഴി നൽകി. എന്നാൽ സംശയാതീതമായി കുറ്റം തെളിയിക്കാൻ പ്രോസിക്യൂഷന് സാധിക്കാതെ വന്നതിനാലാണ് പ്രതി അനിൽകുമാറിനെ വെറുതെ വിട്ടതെന്ന് കോടതി പറഞ്ഞു. ജാമ്യം എടുക്കാൻ ആരുമെത്താത്തതിനാൽ വർഷങ്ങളായി വിചാരണ തടവുകാരനായി കഴിഞ്ഞിരുന്ന പ്രതി മോചിതനായി. പ്രതിക്ക് വേണ്ടി അഭിഭാഷകരായ സാബു ജേക്കബ്, മനേഷ് പി. കുമാർ, ഡെൽവിൻ പൂവത്തിങ്കൽ, സാന്ത്വന സനൽ എന്നിവർ ഹാജരായി.

അധ്യാപകർക്ക് സ്നേഹാദരവുമായി പൂർവവിദ്യാർഥികളുടെ ഓർമക്കൂട്ടം

അണക്കര: മൂന്നു പതിറ്റാണ്ടു മുന്പ് പത്താം ക്ലാസ് പഠനം പൂർത്തിയാക്കി പടിയിറങ്ങിയ വിദ്യാർഥികൾ വീണ്ടും ഒത്തുചേർന്നു. ഗുരു-ശിഷ്യ ബന്ധത്തിന്‍റെ ഉൗഷ്മളത ഉൗട്ടിയുറപ്പിച്ച സംഗമത്തിൽ കുടുംബാംഗങ്ങളും പങ്കാളികളായി. ചക്കുപള്ളം ഗവ.ട്രൈബൽ സ്കൂളിലെ 1994-95 വർഷം എസ്എസ്എൽസി പൂർത്തിയാക്കി പടിയിറങ്ങിയ വിദ്യാർഥികളാണ് തങ്ങളുടെ അധ്യാപകരെ ആദരിക്കുന്നതിനായി ഓർമക്കൂട്ടം-2025 എന്ന പേരിൽ സംഗമം നടത്തിയത്. കുമളി സെറീൻ ഹൊറൈസണ്‍ റിസോർട്ടിൽ നടന്ന ചടങ്ങിൽ 15 വർഷത്തോളം ചക്കുപള്ളം സ്കൂൾ അധ്യാപകരായിരുന്ന ഗോപാലകൃഷ്ണൻ, സിസിലിക്കുട്ടി, ഗിരിജ എന്നിവരെ ആദരിച്ചു. പൂർവ വിദ്യാർഥികളുടേയും അവരുടെ മക്കളുടേയും കലാപരിപാടികളും അരങ്ങേറി. സ്കൂളിൽ നിന്നു പഠനം പൂർത്തിയാക്കി ഇപ്പോൾ ഇതേ സ്കൂളിൽ അധ്യാപകനായി സേവനം ചെയ്യുന്ന ജോളിമോൻ മാത്യു, തമിഴ്നാട്ടിൽ വിദ്യാഭ്യാസ വകുപ്പ് ബ്ലോക്ക് ഓഫീസറായ ധനലക്ഷ്മി, ഇന്ത്യൻ നേവിയിലെ പി.ആർ. രാജീവ് എന്നിവരെയും ചടങ്ങിൽ ആദരിച്ചു.

ഭീകരാക്രമണത്തിൽ മരിച്ചവർക്ക് ആദരാഞ്ജലി

തൊടുപുഴ: മർച്ചന്‍റ് അസോസിയേഷന്‍റെ ആഭിമുഖ്യത്തിൽ ജമ്മു കാശ്മീരിലെ പഹൽഗാമിൽ ഭീകരരുടെ ആക്രമണത്തിൽ വെടിയേറ്റ് മരിച്ചവർക്ക് ആദരാഞ്ജലി അർപ്പിച്ചു. മർച്ചന്‍റ് അസോസിയേഷൻ പ്രസിഡന്‍റ് രാജു തരണിയിലിന്‍റെ നേതൃത്വത്തിൽ ഗാന്ധി പ്രതിമയ്ക്കു മുന്നിൽ മെഴുകുതിരി തെളിച്ചാണ് കൊല്ലപ്പെട്ടവർക്ക് ആദരം അർപ്പിച്ചത്. ജനറൽ സെക്രട്ടറി സി.കെ.നവാസ്, ട്രഷറർ അനിൽകുമാർ, നാസർ സൈര, ആർ. രമേശ് , എം.എൻ ബാബു, ജോസ് കളരിക്കൽ, ഷെരീഫ് സർഗം, കെ.പി.ശിവദാസ്, എം.എച്ച്. ഷിയാസ്, ലിജോണ്‍സ് സെബാസ്റ്റ്യൻ, പ്രശാന്ത് കുട്ടപ്പാസ്, ലാലി വിൽസണ്‍ എന്നിവർ പ്രസംഗിച്ചു.

നഗരസഭയിൽ മഴക്കാല പൂർവ ശുചീകരണം

തൊടുപുഴ: നഗരസഭയിൽ മഴക്കാലപൂർവ ശുചീകരണ പ്രവർത്തനങ്ങൾ ആരംഭിക്കുന്നതിനു മുന്നോടിയായി വകുപ്പുതല ഉദ്യോഗസ്ഥരുടെ യോഗം ചേർന്നു. നഗരസഭ ചെയർമാൻ കെ.ദീപക് അധ്യക്ഷത വഹിച്ചു. മഴക്കാലം ആരംഭിക്കുന്നതിനു മുന്പായി നഗരത്തിലെ ഓടകളിലെ മണ്ണു നീക്കം ചെയ്ത് ജലം ഒഴുകുന്നതിനുള്ള സാഹചര്യമുണ്ടാക്കും. അപകടസ്ഥിതിയിൽ റോഡിന്‍റെ ഇരു വശങ്ങളിലായി നിലനിൽക്കുന്ന മരങ്ങൾ എത്രയും പെട്ടെന്ന് മുറിച്ചു മാറ്റുന്നതിനുള്ള നടപടികളും സ്വീകരിക്കും. വൈദ്യുതി ലൈനിലേക്കു മുട്ടി നിൽക്കുന്ന മരത്തിന്‍റെ ശിഖരങ്ങൾ മുറിച്ചുനീക്കുന്നതിന് കെഎസ്ഇബിക്ക് നിർദ്ദേശം നൽകി. ഓടകൾക്കു മുകളിലുള്ള പൊളിഞ്ഞ സ്ലാബുകൾ എത്രയും പെട്ടെന്ന് മാറ്റി പുതിയത് സ്ഥാപിക്കുന്നതിനും, നഗരത്തിലെ പാതയോരങ്ങളിൽ അനധികൃതമായി സ്ഥാപിച്ചിരിക്കുന്ന കടകൾ നീക്കം ചെയ്യുന്നതിന് പിഡബ്ല്യുഡിയോട് ആവശ്യപ്പെട്ടു. ഇക്കാര്യങ്ങളിൽ പിഡബ്ല്യൂഡിക്കു നഗരസഭയുടെയും പോലീസിന്‍റെയും പിന്തുണ ഉണ്ടാകുമെന്നും ചെയർമാൻ അറിയിച്ചു. കൂടാതെ മഴക്കാലത്ത് പകർച്ചവ്യാധികൾ പടരുന്നത് തടയുന്നതിനായി പ്രതിരോധ പ്രവർത്തനങ്ങൾ നടത്തുന്നതിന് ആരോഗ്യ വിഭാഗത്തെ സജ്ജമാക്കുമെന്നും അദ്ദേഹം പറഞ്ഞു. വൈസ് ചെയർപേഴ്സണ്‍ പ്രഫ. ജെസി ആന്‍റണി, സ്റ്റാൻഡിംഗ് കമ്മിറ്റി ചെയർമാൻമാരായ എം.എ. കരിം, ബിന്ദു പത്മകുമാർ, ഷീജ ഷാഹുൽ, പി.ജി. രാജശേഖരൻ, വിവിധ വകുപ്പ് ഉദ്യോഗസ്ഥർ എന്നിവർ പങ്കെടുത്തു.

തുടർച്ചയായി വൈദ്യുതി മുടക്കം: പ്രതിഷേധവുമായി നാട്ടുകാർ

കട്ടപ്പന: കാഞ്ചിയാർ പഞ്ചായത്തിൽ ഉൾപ്പെട്ട പള്ളിക്കവല ഒറ്റമരം മേഖലയിൽ ഉണ്ടാകുന്ന തുടർച്ചയായ വൈദ്യുതി മുടക്കത്തിനെതിരേ പ്രദേശവാസികൾ പ്രതിഷേധവുമായി രംഗത്തെത്തി. പ്രത്യക്ഷ സമരപരിപാടികൾക്കു മുന്നോടിയായി പ്രദേശവാസികൾ പ്രതിഷേധയോഗം ചേർന്നു. മഴ പെയ്യുന്നതോടെ വൈദ്യുതി മുടക്കം സ്ഥിരമാകുമെന്നും നാട്ടുകാർ പറയുന്നു. പലപ്പോഴും വൈദ്യുതി മുടക്കം മണിക്കൂറുകളോളം നീളുന്ന അവസ്ഥയാണ്. ലബ്ബക്കടയിൽ പ്രവർത്തിക്കുന്ന വൈദ്യുതി വകുപ്പ് ഓഫീസിൽ ബന്ധപ്പെട്ടാൽ യഥാസമയം ഫോൺ ലഭ്യമാവുകയോ ഉദ്യോഗസ്ഥർ ഉപഭോക്താക്കളോട് മാന്യമായി പെരുമാറുകയോ ചെയ്യുന്നില്ലെന്നും പരാതിയുണ്ട്. സ്ഥിരമായിട്ടുള്ള വൈദ്യുതി മുടക്കം മൂലം വിദ്യാർത്ഥികളുടെ പഠനം മുടങ്ങുന്ന സ്ഥിതിയും ഉണ്ട്, അതോടൊപ്പം വാർദ്ധക്യസഹജമായ അസുഖങ്ങളിൽ കഴിയുന്നവർക്കും രോഗികൾക്കും വലിയ ബുദ്ധിമുട്ടുണ്ടാകുന്നു. കൂടാതെ വീട്ടാവശ്യങ്ങളും മറ്റ് നിർമാണ പ്രവർത്തനങ്ങളും അടക്കം മുടങ്ങുന്നു. കാഞ്ചിയാർ പള്ളിക്കവല മുതൽ ഒറ്റമരം പാതയ്ക്ക് വശങ്ങളിലൂടെയുള്ള വൈദ്യുതി ലൈനുകൾ പലയിടങ്ങളിലും മരച്ചില്ലകളിലും ഇലകളിലും തട്ടിയാണ് നിലകൊള്ളുന്നത്. ജീവനക്കാർ സ്വീകരിക്കുന്ന നിഷേധാത്മക നടപടിയിൽ പ്രതിഷേധിച്ച് വൈദ്യുതി വകുപ്പ് ഓഫീസ് പടിക്കൽ ഉപരോധം അടക്കം നടത്താനുള്ള തയാറെടുപ്പിലാണ് നാട്ടുകാർ. അതിനു മുന്നോടിയായി ഇടുക്കി എംഎൽഎ, ജില്ലാ കളക്ടർ, കൺസ്യൂമർ റീഡ്രസൽ ഫോറം, വകുപ്പ് മന്ത്രി എന്നിവർക്ക് പരാതി നൽകി. ഒറ്റമരത്ത് നടന്ന പ്രതിഷേധ യോഗത്തിന് എ.ആർ. ഗോപിനാഥൻ, ജോസ് ആന്‍റണി, എ. ജയിംസ്, ഷാജി തോമസ്, എൻ.ജി. തോമസുകുട്ടി എന്നിവർ നേതൃത്വം നൽകി.

വികസന ഭൂപടത്തിൽ ഇടുക്കിക്ക് സവിശേഷ സ്ഥാനം: മന്ത്രി റോഷി

ഇടുക്കി: കേരളത്തിന്‍റെ വികസന ഭൂപടത്തിൽ സവിശേഷമായ സ്ഥാനം നേടിയെടുത്ത പദ്ധതികളാണ് സംസ്ഥാന സർക്കാർ ജില്ലയിൽ നടപ്പാക്കുന്നതെന്ന് മന്ത്രി റോഷി അഗസ്റ്റിൻ. സംസ്ഥാന സർക്കാരിന്‍റെ നാലാം വാർഷികത്തോടനുബന്ധിച്ച് സംഘടിപ്പിക്കുന്ന എന്‍റെ കേരളം പ്രദർശന വിപണന മേളയുടെ ഉദ്ഘാടനം നിർവഹിക്കുകയായിരുന്നു അദ്ദേഹം. റോഡ് വികസനം, ഗതാഗതം, ടൂറിസം ഉൾപ്പെടെ എല്ലാ മേഖലകളിലും ഇടുക്കി മാറുകയാണ്. മെഡിക്കൽ കോളജിന്‍റെ വികസനം പൂർത്തീകരണത്തിലേക്ക് കടക്കുകയാണ്. കുറ്റിയാർ ഡൈവേർഷൻ സ്കീം, നാടുകാണി പവലിയൻ വികസനം, മൂന്നാർ-കുമളി-ഇടുക്കി എന്നിവ ചേർത്ത് ഏരിയൽ ടൂറിസം പദ്ധതി ഉൾപ്പടെ വിവിധ പദ്ധതികൾക്ക് രൂപം നൽകും. സംസ്ഥാനത്ത് 17 ലക്ഷം കുടുംബങ്ങൾക്കു മാത്രമായിരുന്ന കുടിവെള്ള കണക‌്‌ഷനുകൾ മൂന്നുവർഷം കൊണ്ട് 40 ലക്ഷം കുടുംബങ്ങൾക്ക് ലഭ്യമാക്കി. 40 ദശലക്ഷം ലിറ്റർ കുടിവെള്ളം ലഭ്യമാക്കുന്ന പ്ലാന്‍റിന്‍റെ നിർമാണം ജില്ലയിൽ പൂർത്തിയായി വരികയാണെന്നും എല്ലാവർക്കും കുടിവെള്ളം ലഭ്യമാക്കുക എന്നതാണ് സർക്കാർ നയമെന്നും മന്ത്രി പറഞ്ഞു. എ. രാജ എംഎൽഎ അധ്യക്ഷത വഹിച്ചു. വാഴൂർ സോമൻ എംഎൽഎ, ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ, ജില്ലാ കളക്ടർ വി. വിഗ്നേശ്വരി, ജില്ലാ പോലീസ് മേധാവി ടി.കെ. വിഷ്ണു പ്രദീപ്, എഡിഎം ഷൈജു പി. ജേക്കബ്, ജില്ലാ ആസൂത്രണ സമിതി ഉപാധ്യക്ഷൻ സി.വി. വർഗീസ്, വാഴത്തോപ്പ് പഞ്ചായത്ത് പ്രസിഡന്‍റ് ജോർജ് പോൾ, പഞ്ചായത്ത് വൈസ് പ്രസിഡന്‍റ് ഉഷാകുമാരി മോഹൻ കുമാർ, ത്രിതല പഞ്ചായത്തംഗങ്ങളായ കെ.ജി. സത്യൻ, ഡിറ്റാജ് ജോസഫ്, നിമ്മി ജോസ് എന്നിവർ പ്രസംഗിച്ചു.

എന്‍റെ കേരളം പ്രദർശന വിപണന മേളയ്ക്ക് തുടക്കം

ഇടുക്കി: സംസ്ഥാന സർക്കാരിന്‍റെ നാലാം വാർഷികാഘോഷങ്ങളുടെ ഭാഗമായി സംഘടിപ്പിക്കുന്ന എന്‍റെ കേരളം പ്രദർശന വിപണന മേളയ്ക്കു തുടക്കം. ചെറുതോണി പുതിയ ബസ്‌സ്റ്റാൻഡ് പരിസരത്തുനിന്ന് ആരംഭിച്ച വർണാഭമായ ഘോഷയാത്രയോടെയാണ് മേളയ്ക്കു തുടക്കമായത്. ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ ഫ്ളാഗ് ഓഫ് ചെയ്തു. ത്രിതല പഞ്ചായത്തുകളുടെയും വിവിധ വകുപ്പുകളുടെയും കുടുംബശ്രീയുടെയും നേതൃത്വത്തിൽ സംഘടിപ്പിച്ച വിളംബര ഘോഷയാത്രയിൽ നൂറുകണക്കിന് ആളുകൾ അണിനിരന്നു. വാദ്യമേളങ്ങൾ, മന്നാംകൂത്ത്, മയിലാട്ടം, തെയ്യം തുടങ്ങിയ തനത് കലാരൂപങ്ങൾ, നൃത്ത ആവിഷ്കാരങ്ങൾ എന്നിവ ഘോഷയാത്രയ്ക്കു മാറ്റുകൂട്ടി. ഹരിത കർമ സേനാംഗങ്ങളും വിളംബര ജാഥയിൽ അണിചേർന്നു.

കാണികൾക്ക് വിസ്മയമായി ശ്വാനപ്രദർശനം

ഇടുക്കി: എന്‍റെ കേരളം പ്രദർശന വിപണന മേളയിൽ കേരള പോലീസ് ഒരുക്കിയ ശ്വാനപ്രദർശനം ഏറെ ശ്രദ്ധ നേടുന്നു. അതിശയിപ്പിക്കുന്ന കുറ്റാന്വേഷണ മികവുകൾ കാഴ്ച വയ്ക്കുന്ന കെ 9 സ്ക്വാഡിലെ ശ്വാനവീരന്മാരുടെ പ്രകടനം കാണികളിൽ വിസ്മയം തീർത്തു. വയനാട് ദുരന്തത്തിൽ മണ്ണിനടിയിൽപ്പെട്ടവരെ കണ്ടെത്തി കേരള പോലീസിനെ സഹായിച്ച എയ്ഞ്ചൽ എന്ന പോലീസ് നായ ഏറെ ശ്രദ്ധ നേടി. കാണികൾക്ക് കൗതുകമായ കാഴ്ചയിൽ കുഞ്ഞനായ ബീഗിൽ ഇനത്തിൽപ്പെട്ട ഡോളി മാരകശേഷിയുള്ള സ്ഫോടക വസ്തുക്കൾ കണ്ടെത്താൻ പരിശീലനം ലഭിച്ച നായയാണ്. കൂടാതെ ട്രാക്കർ നായകളായ ജൂണോ, എക്സ്പ്ലോസീവ് സ്നിഫർ ഡോഗായ മാഗി , നാർക്കോട്ടിക് വിഭാഗത്തിൽ നിന്ന് ലൈക്ക, സെർച്ച് റെസ്ക്യൂ ഡോഗായ ഡോണ എന്നീ നായകളും പ്രദർശനത്തിൽ പങ്കെടുക്കുന്നുണ്ട്. ബെൽജിയം, ലാബ്രഡോർ, ബീഗിൾ, ജർമൻ ഷെപ്പേഡ് എന്നിങ്ങനെ വിവിധ ഇനത്തിലുള്ള നായ്ക്കളാണ് കാണികൾക്ക് മുന്നിൽ അണിനിരക്കുന്നത്. കോ-ഓർഡിനേറ്റർ ജെറി ജോർജിന്‍റെ മേൽനോട്ടത്തിലാണ് പ്രദർശനം ഒരുക്കിയിരിക്കുന്നത്. പ്രദർശനത്തിനുശേഷം കാഴ്ചക്കാർക്ക് നായ്ക്കളെ പരിചയപ്പെടാനും അവയോടൊപ്പം സെൽഫി എടുക്കാനുമുള്ള സൗകര്യവും ഉണ്ടായിരുന്നു. കാണികളെ പങ്കെടുപ്പിച്ചുള്ള പ്രകടനങ്ങളും ഉൾപ്പെടുത്തിയിട്ടുണ്ട്.

കാറ്റിലും മഴയിലും അറക്കുളത്ത് വ്യാപക നാശം

അറക്കുളം: ശക്തമായ കാറ്റിലും മഴയിലും അറക്കുളത്ത് വ്യാപക നാശനഷ്ടം. മൈലാടിയിൽ ഇല്ലിമൂട്ടിൽ പെണ്ണമ്മയുടെ വീട് മരം കടപുഴകി വീണ് ഭാഗികമായി തകർന്നു. വീട്ടിൽ ഉണ്ടായിരുന്ന പെണ്ണമ്മയുടെ മകന്‍റെ ഭാര്യ ആനിമോളുടെ തലയിൽ ആസ്ബസ്‌റ്റോസ് ഷീറ്റ് പൊട്ടിവീണ് പരിക്കേറ്റു. ആനിമോളെ മൂലമറ്റത്തെ സ്വകാര്യ ആശുപത്രിയിൽ പ്രവേശിപ്പിച്ചു. നിരവധി വീട്ടുപകരണങ്ങൾ ഷീറ്റു വീണു തകർന്നു. പഞ്ചായത്ത് പ്രസിഡന്‍റ് കെ.എസ്. വിനോദ്, സ്റ്റാൻഡിംഗ് കമ്മിറ്റി ചെയർമാൻ ഷിബു ജോസഫ് എന്നിവർ സ്ഥലത്തെത്തി. മൂലമറ്റം ഫയർഫോഴ്സ് സ്ഥലത്ത് എത്തിയെങ്കിലും ഷീറ്റിനു മുകളിലേക്ക് മരം വീണതിനാൽ വെട്ടിമാറ്റാൻ സാധിക്കില്ലെന്ന് പറഞ്ഞ് തിരികെ പോയി. പഞ്ചായത്തിൽ നിരവധി സ്ഥലങ്ങളിൽ മരം വീണ് വൈദ്യുതി ബന്ധം തകരാറിലായി. അറക്കുളം പുത്തൻപള്ളിക്കു സമീപം അറക്കുളം-വെള്ളിയാമറ്റം റോഡിൽ മരം വീണ് ഗതാഗതം തടസപ്പെട്ടു. ഫയർഫോഴ്സ് എത്തി മരം വെട്ടിമാറ്റി ഗതാഗതം പുനഃസ്ഥാപിച്ചു.

സഞ്ചാരികൾക്ക് കൗതുകമായി വരയാടിൻ കുഞ്ഞുങ്ങൾ

മൂന്നാർ: ഇരവികുളം ദേശീയ ഉദ്യാനത്തിലെ രാജമല സന്ദർശിക്കാനെത്തുന്നവർക്ക് കൗതുകക്കാഴ്ചയായി മാറുകയാണ് സമീപനാളിൽ പിറന്ന വരയാടിൻ കുഞ്ഞുങ്ങൾ. വരയാടുകളുടെ പ്രജനനകാലമായ ഫെബ്രുവരി, മാർച്ച് മാസങ്ങളിൽ ഉദ്യാനം അടച്ചിട്ടിരിക്കുകയായിരുന്നു. പിന്നീട് ഈ മാസം ആദ്യമാണ് തുറന്നത്. കൂട്ടമായി എത്തുന്ന വരയാടിൻ കുഞ്ഞുങ്ങളെ തൊട്ടടുത്ത് കാണാനാവുന്നതിൽ സഞ്ചാരികളും ഏറെ സന്തോഷത്തിലാണ്. കഴിഞ്ഞ ഒരാഴ്ചയായി വരയാടിൻ കുഞ്ഞുങ്ങളെ കാണാൻ ആയിരക്കണക്കിന് സഞ്ചാരികളാണ് എത്തിയത്. കഴിഞ്ഞ ഒരാഴ്ചയ്ക്കിടെ 30,000 സഞ്ചാരികൾ വരയാടുകളെ കണ്ടു മടങ്ങി. ഈ വർഷം പാർക്കിൽ പിറന്ന വരയാടിൻ കുഞ്ഞുങ്ങളുടെ സെൻസസ് കഴിഞ്ഞ ദിവസം ആരംഭിച്ചിരുന്നു. ചീഫ് വൈൽഡ് ലൈഫ് വാർഡൻ പ്രമോദ് ജി. ക ൃഷ്ണൻ ഉദ്ഘാടനം ചെയ്തു. കേരളം, തമിഴ്നാട് എന്നിവടങ്ങളിലുള്ള 265 സെൻസസ് ബ്ലോക്കുകളിലെ കണക്കെടുപ്പ് ഇരു സംസ്ഥാനങ്ങളും സംയുക്തമായാണ് പൂർത്തിയാക്കുന്നത്. ഇതിൽ 176 ബ്ലോക്കുകൾ തമിഴ്നാടിലും 89 ബ്ലോക്കുകൾ കേരളത്തിലുമാണ്. സന്നദ്ധപ്രവർത്തകരുടെ സഹായത്തോടെ വനം വകുപ്പിന്‍റെ നേതൃത്വത്തിൽ 1300 പേരടങ്ങുന്ന ആളുകൾ വിവിധ സംഘങ്ങളായി തിരിഞ്ഞാണ് കണക്കെടുപ്പ് നടത്തുന്നത്. ഈ വർഷം കുഞ്ഞുങ്ങളുടെ എണ്ണത്തിൽ വർധനവുണ്ടായിട്ടുണ്ടെന്നാണ് നിഗമനം.

കാർഷിക കാഴ്ചകളുമായി കൃഷിവകുപ്പിന്‍റെ സ്റ്റാൾ

ഇടുക്കി: വാഴത്തോപ്പ് വിഎച്ച്എസ് സ്കൂൾ മൈതാനത്ത് ആരംഭിച്ച എന്‍റെ കേരളം പ്രദർശന വിപണന മേളയിൽ ഒരുക്കിയ കൃഷിവകുപ്പിന്‍റെ സ്റ്റാളുകൾ ശ്രദ്ധേയമായി. മന്ത്രി റോഷി അഗസ്റ്റിൻ സ്റ്റാൾ ഉദ്ഘാടനം ചെയ്തു. ഡ്രോണ്‍ സംവിധാനത്തിന്‍റെ കൃഷിയിടത്തിലെ സാധ്യതകളെക്കുറിച്ച് കർഷകർക്കും പൊതുജനങ്ങൾക്കും അവബോധം സൃഷ്ടിക്കുന്നതിനും ഡ്രോണ്‍ പ്രവർത്തനം അടുത്തറിയുന്നതിനും ലൈവ് ഡെമോണ്‍സ്ട്രഷനും സ്റ്റാളിൽ ഒരുക്കിയിട്ടുണ്ട്. കേരളഗ്രോ ഉത്പന്നങ്ങളുടെയും മില്ലറ്റ് ഉത്പന്നങ്ങളുടെയും പ്രദർശനവും ഒരുക്കിയിട്ടുണ്ട്. കതിർ ആപ്പ് രജിസ്ട്രേഷൻ ഹെൽപ് ഡെസ്ക്കും കൃഷി വകുപ്പ് നടപ്പാക്കുന്ന വിവിധ ഫ്ളാഗ്ഷിപ്പ് പദ്ധതികളെ സംബന്ധിച്ച വിവരങ്ങൾ ലഭ്യമാക്കുന്ന ഹെൽപ്പ് ഡെസ്ക്കുകളും തീം പവലിയനിൽ സജ്ജീകരിച്ചിട്ടുണ്ട്. വിളകളിലെ രോഗ കീടനിയന്ത്രണം സംബന്ധിച്ച് സമഗ്ര വിവരങ്ങൾ ലഭ്യമാക്കുന്ന ക്രോപ്പ് ഹെൽത്ത് ക്ലിനിക്കും പ്ലാൻ ഡോക്ടർ സേവനവും ലഭിക്കും. ഇതിന് പുറമെ നടീൽ വസ്തുക്കളുടെയും കാർഷിക മൂല്യ വർധിത ഉത്പന്നങ്ങളുടെ പ്രദർശനവും ഒരുക്കിയിട്ടുണ്ട്.

നെടുങ്കണ്ടം വികസന സമിതി മുഖ്യമന്ത്രിക്ക് നിവേദനം നല്‍കി

നെടുങ്കണ്ടം: നെടുങ്കണ്ടത്തെ വിവിധ പദ്ധതികളുടെ പൂര്‍ത്തീകരണവുമായി ബന്ധപ്പെട്ട് അടിയന്തര ഇടപെടല്‍ ആവശ്യപ്പെട്ട് നെടുങ്കണ്ടം വികസന സമിതി മുഖ്യമന്ത്രി പിണറായി വിജയന് നിവേദനം നല്‍കി. ജില്ലാ ആശുപത്രിയുടെ നിര്‍മാണം അടിയന്തരമായി പൂര്‍ത്തീകരിക്കുക, സിവില്‍, മുന്‍സിഫ് കോടതികള്‍ പ്രവര്‍ത്തനം ആരംഭിക്കുക തുടങ്ങിയവയാണ് പ്രധാന ആവശ്യങ്ങള്‍. ജില്ലയിലെ പ്രധാന പട്ടണങ്ങളില്‍ ഒന്നും, താലൂക്ക് ആസ്ഥാനവുമാണ് നെടുങ്കണ്ടം. അതിന് അനുസൃതമായ വികസന പ്രവര്‍ത്തനങ്ങള്‍ അനിവാര്യമാണ്. ജില്ലാ ആശുപത്രിയുടെ നിര്‍മാണം നിലച്ച അവസ്ഥയിലാണ്. വര്‍ഷങ്ങള്‍ക്കുമുമ്പ് അനുവദിച്ച സിവില്‍, മുന്‍സിഫ് കോടതികള്‍ സാങ്കേതിക പ്രശ്‌നങ്ങള്‍ ചൂണ്ടിക്കാട്ടി പ്രവര്‍ത്തനം ആരംഭിച്ചിട്ടില്ല. പച്ചടിയില്‍ ആരംഭിക്കുന്ന ഇന്‍ഡോര്‍ സ്‌റ്റേഡിയത്തോട് അനുബന്ധിച്ച് നീന്തല്‍കുളം അനുവദിക്കണമെന്നും നിവേദനത്തില്‍ ആവശ്യപ്പെട്ടു.

അടിമാലി ഫെസ്റ്റിനൊപ്പം | കൈകോര്‍ക്കാന്‍ അടിമാലിയിലെ വ്യാപാരികളും

അടിമാലി: ഏറെ വര്‍ഷത്തെ ഇടവേളയ്ക്കുശേഷം അടിമാലി ഫെസ്റ്റ് മേയ് ഒന്നു മുതൽ 11 വരെ നടക്കും. ഫെസ്റ്റിനെ കൂടുതല്‍ സ്വീകാര്യമാക്കാന്‍ അടിമാലിയിലെ വ്യാപാരി സമൂഹവും ഒരുങ്ങുകയാണ്. വ്യാപാര ശാലകള്‍ ദീപാലങ്കാരത്താല്‍ അണിയിച്ചൊരുക്കിയും സമ്മാനപദ്ധതികളൊരുക്കിയും വ്യാപാര മേഖലയെ കൂടുതല്‍ സജീവമാക്കാനാണ് ലക്ഷ്യമിടുന്നതെന്ന് വ്യാപാരി വ്യവസായി ഏകോപനസമിതി അടിമാലി യൂണിറ്റ് പ്രസിഡന്‍റ് പി.എം. ബേബി പറഞ്ഞു. അടിമാലി സര്‍ക്കാര്‍ ഹൈസ്‌കൂള്‍ ഗ്രൗണ്ട് കേന്ദ്രീകരിച്ചാണ് ഫെസ്റ്റ് നഗരി ക്രമീകരിച്ചിട്ടുള്ളത്. എക്സിബിഷനുകള്‍, പെറ്റ് ഷോ, സെമിനാറുകള്‍, വിപണന-പ്രദര്‍ശന മേളകള്‍ എന്നിവ ഫെസ്റ്റിന്‍റെ ഭാഗമായി ഒരുക്കും. ദിവസവും കലാസന്ധ്യയും ഉണ്ടാകും. 1992ലാണ് വിവിധ സാംസ്‌കാരിക സംഘടനകള്‍ മുന്‍കൈയെടുത്ത് ഫെസ്റ്റിന് തുടക്കം കുറിച്ചത്. 2016ലാണ് ഒടുവില്‍ അടിമാലി ഫെസ്റ്റ് നടന്നത്.

കുരിശ് നശിപ്പിച്ച സംഭവം: യുഡിഎഫ് സമരം നാളെ

വണ്ണപ്പുറം: നാരങ്ങാനത്തെ കുരിശു തകർത്തതിനും കർഷകരുടെ കൈവശ ഭൂമി റിസർവ് വനമാക്കാനുള്ള വനം, റവന്യു വകുപ്പുകളുടെ ഗൂഢ നീക്കത്തിനുമെതിരേ യുഡിഎഫ് മുണ്ടൻ മുടി വാർഡ് കമ്മിറ്റിയുടെ നേതൃത്വത്തിൽ നാളെ വൈകുന്നേരം നാലിന് അച്ചൻകവലയിൽ പ്രതിഷേധം സംഘടിപ്പിക്കും. മാത്യു കുഴൽനാടൻ എംഎൽഎ ഉദ്ഘാടനം ചെയ്യും. ബ്ലോക്ക് പഞ്ചായത്ത് മെംബർ ആൽബർട്ട് ജോസ് അധ്യക്ഷത വഹിക്കും. യുഡിഎഫ് നേതാക്കളായ പ്രഫ. എം.ജെ. ജേക്കബ്, നിസാർ മൗലവി, ജില്ലാ പഞ്ചായത്തംഗം ഇന്ദു സുധാകരൻ, ബ്ലോക്ക് പഞ്ചായത്ത് പ്രസിഡന്‍റ് ടോമി കാവാലം, പഞ്ചായത്ത് പ്രസിഡന്‍റ് എം.എ. ബിജു, പി.എം. ഇല്യാസ്, ബേബി വട്ടക്കുന്നേൽ, സണ്ണി കളപ്പുര എന്നിവർ പ്രസംഗിക്കും.

യുവാക്കൾ ചേരിതിരിഞ്ഞ് ഏറ്റുമുട്ടി

കാഞ്ഞാർ: യുവാക്കൾ ചേരിതിരിഞ്ഞ് ഏറ്റുമുട്ടിയ സംഭവത്തിൽ പോലീസ് കേസെടുത്തു. തിങ്കളാഴ്ച വൈകുന്നേരം കാഞ്ഞാർ ടൗണിലായിരുന്നു സംഭവം. സംഭവത്തിൽ മുട്ടം സ്വദേശി അലൻ (22), കറുകപ്പള്ളി സ്വദേശി അനു സജി (21) എന്നിവർക്കു പരിക്കേറ്റു. സംഘർഷത്ത െതുടർന്ന് ബൈക്കിൽ രക്ഷപ്പെട്ടവരെ ഒരു സംഘം പിക്കപ്പ് ജീപ്പിൽ പിന്തുടർന്ന് ബൈക്ക് ഇടിച്ചുമറിച്ച് വീണ്ടും ആക്രമിച്ചതായി പറയുന്നു. കുടയത്തൂർ സംഗമം ജംഗ്ഷനിലാണ് വാഹനം ഇടിച്ച് ബൈക്കിൽ വന്നവരെ ആക്രമിച്ചത്. പിന്നീട് അക്രമിച്ചവർ എത്തിയ വാഹനത്തിൽ തന്നെ ഇവരെ കയറ്റി കൊണ്ടുപോയതായി നാട്ടുകാർ പറഞ്ഞു. സംഘർഷത്തിൽ പരിക്കേറ്റവരെ കാഞ്ഞാർ പോലീസാണ് തൊടുപുഴ ജില്ലാ ആശുപത്രിയിൽ എത്തിച്ചത്.

സ്പോർട്സ് ആയുർവേദ ബോധവത്കരണ ക്ലാസ് നടത്തി

തൊടുപുഴ: ജില്ലാ സൈക്ലിംഗ് അസോസിയേഷനുമായി ചേർന്ന് ആയുർവേദ ആശുപത്രിയിലെ സ്പോർട്സ് ആയുർവേദ റിസർച്ച് സെൽ, ആശുപത്രിയിലെ യോഗാ ഹാളിൽ സംഘടിപ്പിച്ച ബോധവത്കരണ ക്ലാസ് ദേശീയ ആയുർവേദ മിഷൻ ജില്ലാ പ്രോഗ്രാം മാനേജർ ഡോ. കെ.എസ്. ശ്രീദർശൻ ഉദ്ഘാടനം ചെയ്തു. കായികതാരങ്ങൾക്ക് പരിശീലന-മത്സര സമയങ്ങളിൽ ഉണ്ടാകുന്ന പരിക്കുകൾക്ക് മികച്ച രീതിയിലുള്ള ആയുർവേദ ചികിത്സാ സൗകര്യം തൊടുപുഴയിലെ ജില്ലാ ഗവ.ആയുർവേദ ആശുപത്രിയിൽ ഒരുക്കിയിട്ടുണ്ടെന്ന് അദ്ദേഹം പറഞ്ഞു. ആശുപത്രി സൂപ്രണ്ടിന്‍റെ ചുമതല വഹിക്കുന്ന ഡോ. എസ്. ശ്രീജ അധ്യക്ഷത വഹിച്ചു. കായികതാരങ്ങൾക്ക് പരിക്കുകൾ ഉണ്ടാകാതിരിക്കാനും ഉണ്ടാകുന്ന പരിക്കുകൾക്ക് ശാശ്വത പരിഹാരം കണ്ടെത്താനും ഉതകുന്ന ആഹാരക്രമം സംബന്ധിച്ചും ഡോ. മിനു റോസമ്മ ജോസഫ്, ഡോ. അരുണ്‍ രാജേന്ദ്രൻ, ഡോ. അനുപ്രിയ പി. മണി എന്നിവർ ക്ലാസ് നയിച്ചു. ദേശീയ വെറ്ററൻസ് അത്‌ലറ്റിക് മീറ്റിൽ മൂന്നു സ്വർണമെഡലുകൾ കരസ്ഥമാക്കിയ ചിന്നമ്മ ജോസഫിനെ കേരള സൈക്ലിംഗ് അസോസിയേഷൻ വൈസ് പ്രസിഡന്‍റ് എൻ. രവീന്ദ്രനും ജില്ലാ സൈക്ലിംഗ് അസോസിയേഷൻ സെക്രട്ടറി എ.പി. മുഹമ്മദ് ബഷീറും ചേർന്ന് ഷാൾ അണിയിച്ച് ആദരിച്ചു. എ.ജെ. നിവാസ്, പി.കെ. രാജേഷ്, ജില്ലാ ആയുർവേദ ആശുപത്രി ലേ സെക്രട്ടറി കെ.ആർ. ഗോപി എന്നിവർ പ്രസംഗിച്ചു. 40ഓളം കായികതാരങ്ങൾ ക്ലാസിൽ പങ്കെടുത്തു.

ടീച്ചേഴ്സ് സൊസൈറ്റി ബ്രാഞ്ച് ഉദ്ഘാടനം ചെയ്തു

രാജാക്കാട്: എയ്ഡഡ് സ്കൂൾ ടീച്ചേഴ്സ് കോ-ഓപ്പറേറ്റീവ് സൊസൈറ്റിയുടെ മൂന്നാമത്തെ ബ്രാഞ്ചിന്‍റെ ഉദ്ഘാടനം രാജാക്കാട്ട് എം.എം. മണി എംഎൽഎ നിർവഹിച്ചു. സൊസൈറ്റി പ്രസിഡന്‍റ് എം.വി. ജോർജുകുട്ടി അധ്യക്ഷത വഹിച്ചു. ജില്ലാ പഞ്ചായത്ത് വൈസ് പ്രസിഡന്‍റ് ഉഷാകുമാരി മോഹൻകുമാർ മുഖ്യപ്രഭാഷണം നടത്തി. ഇടുക്കി സഹകരണ സംഘം അസി. രജിസ്ട്രാർ ജനറൽ സി.ആർ. വിൽസണ്‍ പ്രഥമ നിക്ഷേപ വിതരണവും സൊസൈറ്റി മുൻ പ്രസിഡന്‍റ് വി.ഡി. ഏബ്രഹാം വായ്പാ വിതരണോദ്ഘാനവും നിർവഹിച്ചു. ബ്ലോക്ക് പഞ്ചായത്തംഗം കിങ്ങിണി രാജേന്ദ്രൻ, പഞ്ചായത്തംഗം കെ.പി. സുബീഷ്, മുരളീധരൻനായർ, സൊസൈറ്റി വൈസ് പ്രസിഡന്‍റ് ഷേർളി കെ. പോൾ, സെക്രട്ടറി ഏബ്രഹാം ഡൊമിനിക്ക് എന്നിവർ പ്രസംഗിച്ചു.

വ്യാപാരികൾക്കായി സൗജന്യ ആരോഗ്യ പരിശോധന

തൊടുപുഴ: മർച്ചന്‍റ്സ് അസോസിയേഷൻ അൽ അസ്ഹർ മെഡിക്കൽ കോളജ് ആന്‍ഡ് സൂപ്പർ സ്പെഷാലിറ്റി ആശുപത്രിയുടെ സഹകരണത്തോടെ 25 ലക്ഷം രൂപയുടെ സൗജന്യ ആരോഗ്യ പരിശോധന പാക്കേജ് അസോസിയേഷൻ അംഗങ്ങൾക്കായി നടത്തുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. തൊടുപുഴയിലെ മുഴുവൻ വ്യാപാരികൾക്കുമായി മേയ് ഒന്നു മുതൽ ജൂണ്‍ 30 വരെയുള്ള കാലയളവിലാണ് ഹെൽത്ത് ചെക്കപ്പ് പാക്കേജ് ഒരുക്കുന്നത്. കൂടാതെ, ജനറൽ മെഡിസിൻ, ത്വക്ക്, ഇഎൻടി, ഓർത്തോ, സൈക്യാട്രി, നേത്രം, സർജറി, എമർജൻസി മെഡിസിൻ, ശ്വാസകോശം, ഗൈനക്കോളജി, നെഫ്രോളജി, ന്യൂറോളജി, ന്യൂറോ സർജറി, ദന്തൽ തുടങ്ങി പന്ത്രണ്ടോളം വിഭാഗങ്ങളിലെ ഡോക്ടർമാരെ സൗജന്യമായി കണ്‍സൾട്ട് ചെയ്യാം. രക്തത്തിലെ ടോട്ടൽ കൗണ്ട്, രക്തത്തിലെ പഞ്ചസാരയുടെ അളവ്, കരളിന്‍റെ പ്രവർത്തന ക്ഷമത, കിഡ്നി പ്രവർത്തന പരിശോധന, ബ്ലഡ് യൂറിയ, സിറം ക്രിയാറ്റിനൻ തുടങ്ങിയ ലാബ് പരിശോധനകളും സൗജന്യമാണ്. പാക്കേജ് ഉപയോഗപ്പെടുത്തുന്ന വ്യാപാരികൾ മർച്ചന്‍റ്സ് അസോസിയേഷന്‍റെ ഓഫീസിൽനിന്നു കൂപ്പണ്‍ കൈപ്പറ്റി ആശുപത്രിയിലെത്തണം. കൂടാതെ കിടത്തി ചികിൽസിക്കുന്ന രോഗികൾക്ക് ചികിത്സാ ഫീസിൽ ഇളവും ലഭിക്കും. പത്ര സമ്മേളനത്തിൽ അസോസിയേഷൻ പ്രസിഡന്‍റ് ടി.സി. രാജു തരണിയിൽ, അൽ അസ്ഹർ ഗ്രൂപ്പ് ഓഫ് ഇൻസ്റ്റിറ്റ്യൂഷൻ എക്സിക്യൂട്ടീവ് ഡയറക്ടർ ഡോ. പൈജാസ് മൂസ, സിഇഒ സുധീർ ബാസൂരി, അസോസിയേഷൻ ഭാരവാഹികളായ സി.കെ. നവാസ്, അനിൽ പീടികപറന്പിൽ, നാസർ സൈര, കെ.പി. ശിവദാസ്, ജോസ് കളരിക്കൽ, പ്രശാന്ത് കുട്ടപ്പാസ് എന്നിവർ പങ്കെടുത്തു.

തെരഞ്ഞെടുപ്പു കമ്മീഷനെതിരേ നടപടി വേണമെന്ന്

ചെറുതോണി: സംസ്ഥാനത്തെ തദ്ദേശസ്വയംഭരണ സ്ഥാപനങ്ങളിലെ വാര്‍ഡ് വിഭജനവുമായി ബന്ധപ്പെട്ട് കോണ്‍ഗ്രസ് ജനപ്രതിനിധികള്‍ രാജീവ് ഗാന്ധി പഞ്ചായത്തിരാജ് സംഘടനയെ പ്രതിനിധാനം ചെയ്ത് നല്‍കിയ റിട്ട് പെറ്റീഷനില്‍ (42624/24)കേരള ഹൈക്കോടതി മാര്‍ച്ച് 21 ന് പുറപ്പെടുവിച്ച മൂന്ന് ഉത്തരവുകള്‍ പൂര്‍ണമായി അവഗണിച്ച് അവധിക്കാല കോടതിയുടെ സമയത്തുതന്നെ അന്തിമ വിജ്ഞാപനം ഇറക്കാൻ ഗൂഢമായി ശ്രമിക്കുന്ന കമ്മീഷന്‍ ചെയര്‍മാന്‍ എ. ഷാജഹാനെതിരേ കർശന നടപടി സ്വീകരിക്കണമെന്ന് രാജീവ് ഗാന്ധി പഞ്ചായത്തിരാജ് സംഘടനാ ചെയര്‍മാന്‍ എം.മുരളി ആവശ്യപ്പെട്ടു.

തേവാരം-തേവാരംമെട്ട് റോഡിനായി ഇരുസംസ്ഥാനങ്ങളിലെയും ജനപ്രതിനിധികള്‍ ഒന്നിക്കുന്നു

നെടുങ്കണ്ടം: ജില്ലയെ ഏറ്റവും കുറഞ്ഞ ദൂരത്തില്‍ തമിഴ്‌നാടുമായി ബന്ധിപ്പിക്കുന്ന തേവാരം-തേവാരംമെട്ട് റോഡ് യാഥാര്‍ഥ്യമാക്കുന്നതിനായി ഇരു സംസ്ഥാനങ്ങളിലെയും ജനപ്രതിനിധികള്‍ കൈകോര്‍ക്കുന്നു. ഇടുക്കി, തേനി എംപിമാര്‍ ഒന്നിന് തേവാരംമെട്ടില്‍ എത്തും. റോഡിന്‍റെ സാധ്യതകളെക്കുറിച്ചു പഠിക്കുന്നതിനായി തേനി എംപി തങ്കത്തമിഴ് സെല്‍വന്‍റെ നേതൃത്വത്തിലുള്ള ഉന്നത ഉദ്യോഗസ്ഥര്‍ തേവാരത്തുനിന്നും തേവാരംമെട്ടിലേക്കു കാല്‍നടയായി എത്തും. തേനി ജില്ലാ കളക്ടര്‍, ഡിഎഫ്ഒ തുടങ്ങിയയവർ എംപിയെ അനുഗമിക്കും. തേവാരംമെട്ടിലെത്തുന്ന സംഘത്തെ ഡീന്‍ കുര്യാക്കോസ് എംപിയുടെ നേതൃത്വത്തിലുള്ള ജനപ്രതിനിധികള്‍ സ്വീകരിക്കും. 1980കള്‍ വരെ സജീവമായിരുന്ന പാത തമിഴ്‌നാട് വനംവകുപ്പ് അടയ്ക്കുകയായിരുന്നു. നിലവില്‍ കാടുമൂടിയ നിലയിലാണ് ഈ പാത. പാത വീണ്ടും തുറക്കണമെന്നാവശ്യപ്പെട്ട് ഇരു സംസ്ഥാനങ്ങളിലും ജനകീയ മുന്നേറ്റം തുടരുകയാണ്. തമിഴ്‌നാട് വനമേഖലയില്‍ ഉള്‍പ്പെടുന്ന മൂന്നു കിലോമീറ്റര്‍ മാത്രം ദൂരമാണ് പുനര്‍ നിര്‍മിക്കേണ്ടത്. മുമ്പ് ജീപ്പ് സവാരി നടത്തിയിരുന്ന റോഡിന്‍റെ മറ്റു ഭാഗമെല്ലാം അറ്റകുറ്റപ്പണികളിലൂടെ ഗതാഗത യോഗ്യമാക്കാന്‍ കഴിയും. പാത യാഥാര്‍ഥ്യയാല്‍ തമിഴ്‌നാട്ടില്‍നിന്ന് ഇടുക്കിയില്‍ ജോലിക്ക് എത്തുന്ന നൂറുകണക്കിന് തൊഴിലാളികള്‍ക്കും അന്തര്‍സംസ്ഥാന വാണിജ്യത്തിനും ഗുണകരമാവും. മലയോര മേഖലകളിലെ ഏലമലക്കാടുകളില്‍ ദിവസേന ജോലിക്കെത്തുന്ന പതിനായിരകണക്കിനു തമിഴ് തൊഴിലാളികള്‍ക്കാണ് റോഡിന്‍റെ പ്രയോജനം കൂടുതല്‍ ലഭിക്കുക. തേനി മെഡിക്കല്‍ കോളജിലേക്കുള്ള ദൂരം മുപ്പതു കിലോമീറ്ററിലധികം കുറയുമെന്നതിനാല്‍ നെടുങ്കണ്ടത്തു നിന്നും ഒരു മണിക്കൂറിനുള്ളില്‍ തേനി മെഡിക്കല്‍ കോളജില്‍ എത്താനുമാകും. ഏറ്റവും കുറഞ്ഞ ദൂരത്തില്‍ തമിഴ്‌നാട്ടല്‍നിന്നും കേരളത്തില്‍ പ്രവേശിക്കാന്‍ കഴിയുന്ന പാതയെന്ന നിലയില്‍ ശബരിമല തീര്‍ഥാടകര്‍ക്കും റോഡ് പ്രയോജനം ചെയ്യും. കര്‍ണാടക, തെലുങ്കാന, ആന്ധ്രപ്രദേശ്, മഹാരാഷ്ട്ര തുടങ്ങിയ സംസ്ഥാനങ്ങളില്‍ നിന്നുമെത്തുന്ന ശബരിമല തീര്‍ഥാടകര്‍ക്ക് തേവാരം ഇടത്താവളമായും ഉപയോഗപ്പെടുത്താന്‍ കഴിയും. ശബരിമല തീര്‍ഥാടകര്‍ക്ക് കൂടുതല്‍ സൗകര്യം ഒരുക്കുക എന്ന ലക്ഷ്യത്തോടെ 2018ല്‍ പാതയുടെ പുനര്‍നിര്‍മാണത്തിന് ആലോചനകള്‍ നടന്നിരുന്നു. പ്രാഥമിക പഠനത്തിനായി 25 കോടി രൂപ അനുവദിച്ചെങ്കിലും നടപടികള്‍ എങ്ങുമെത്തിയില്ല. തേവാരംമെട്ടിനു സമീപം തമിഴ്‌നാട് വനത്തിനുള്ളില്‍ അയ്യപ്പപ്രതിഷ്ഠയുള്ള അമ്പലവുമുണ്ട്. ഇവിടെ 1980 വരെ പൂജയും ഉത്സവവും സജീവമായിരുന്നെങ്കിലും തമിഴ്‌നാട് വനം വകുപ്പ് അനുമതി നിഷേധിച്ചതോടെ ഉത്സവം പൂര്‍ണമായും മുടങ്ങുകയായിരുന്നു. റോഡ് തുറന്നു നല്‍കണമെന്നാവശ്യപ്പെട്ട് കേന്ദ്ര ഉപരിതല ഗതാഗത വകുപ്പ് മന്ത്രി നിതിന്‍ ഗഡ്ഗരിക്കും വനം പരിസ്ഥിതി വകുപ്പ് മന്ത്രി ഭൂപേന്ദ്ര യാദവിനും ഡീന്‍ കുര്യാക്കോസ് എംപി മുന്‍പ് കത്ത് നല്‍കിയിരുന്നു. രണ്ട് എംപിമാരുടെയും പൊതുപ്രവര്‍ത്തകരുടെയും ശ്രമഫലമായി തേവാരം-തേവാരമെട്ട് റോഡ് യാഥാര്‍ഥ്യമാകുമെന്ന പ്രതീക്ഷയിലാണ് ഇരുസംസ്ഥാനങ്ങളിലെയും ജനങ്ങള്‍.

മഴയിലും കാറ്റിലും കനത്ത നാശം

തൊടുപുഴ: ഇന്നലെ വൈകുന്നേരം പെയ്ത കനത്ത മഴയിലും വീശിയടിച്ച കാറ്റിലും പുറപ്പുഴ പഞ്ചായത്തിന്‍റെ വിവിധ സ്ഥലങ്ങളിൽ വ്യാപക നാശനഷ്ടം. നിരവധി മരങ്ങളും വൈദ്യുതി പോസ്റ്റുകളും ഒടിഞ്ഞുവീണു. പ്രദേശത്തെ റോഡുകളിലേക്ക് മരങ്ങളും പോസ്റ്റുകളും വീണ് ഏറെ നേരം ഗതാഗതം തടസപ്പെട്ടു. പുറപ്പുഴ പാലത്തിനാടിയിൽ ജോണിന്‍റെ വീടിനു മുകളിലേക്ക് ആഞ്ഞിലി മരം വീണു. റോഡിനു കുറുകെയും വീടിനു മുകളിലേക്കുമായി വീണു കിടന്ന മരം മുറിച്ചു മാറ്റി. കിഴക്കനാട്ട് ഗോപാലകൃഷ്ണൻ, വട്ടളായിൽ ബേബി എന്നിവരുടെ പുരയിടങ്ങളിൽ നിന്നിരുന്ന മരങ്ങൾ മറിഞ്ഞുവീണ് വൈദ്യുതി പോസ്റ്റുകളും ലൈനുകളും തകർന്നു. ഇതിനു പുറമേ നിരവധിയാളുകളുടെ കൃഷിയിടങ്ങളിൽ മരങ്ങൾ കടപുഴകി വീണ് നാശനഷ്ടം ഉണ്ടായി. തൊടുപുഴയിൽ നിന്നും ഫയർ സ്റ്റേഷൻ അസിസ്റ്റന്‍റ് സ്റ്റേഷൻ ഓഫീസർ കെ.എ. ജാഫർഖാന്‍റെ നേതൃത്വത്തിൽ മരങ്ങൾ മുറിച്ച് മാറ്റി ഗതാഗതം പുനഃസ്ഥാപിച്ചു. ഇതിന് പുറമേ മലങ്കര പെരുമറ്റം തടിപ്പാലം ഭാഗത്ത് റോഡിലേക്ക് മരം കടപുഴകി വീണു. സ്റ്റേഷൻ ഓഫീസർ ബിനു സെബാസ്റ്റ്യന്‍റെ നേതൃത്വത്തിൽ സേനാംഗങ്ങളെത്തി മുറിച്ചുമാറ്റി. ഉപ്പുതറ: ചൊവ്വാഴ്ച വൈകിട്ടുണ്ടായ ശക്തമായ കാറ്റിലും മഴയിലും ചീന്തലാർ മേഖലയിൽ വ്യാപക നാശനഷ്ടം. വീടിനു മുകളിൽ മരം വീണ് ആനപ്പള്ളം നെല്ലിക്കുന്നേൽ അന്നപ്പാപ്പ എന്ന വീട്ടമ്മയുടെ കൈക്കു പരിക്കേറ്റു. ഇവരെ പീരുമേട് താലൂക്ക് ആശുപത്രിയിൽ പ്രവേശിപ്പിച്ചു. ചീന്തലാർ, മൂന്നാം ഡിവിഷൻ, ആനപ്പള്ളം, ആലമ്പള്ളി, ലോൺട്രി, അമ്പലപ്പാറ, കൈതപ്പതാൽ, പുളിങ്കട്ട എന്നീ പ്രദേശങ്ങളിലാണ് നാശനഷ്ടം ഉണ്ടായത്. മരങ്ങൾ വീണ് നിരവധി വീടുകൾ ഭാഗികമായി തകർന്നു. വ്യാപക കൃഷിനാശവും ഉണ്ടായി. രണ്ടു ട്രാൻസ്ഫോർമറുകൾ തകർന്നു. നിരവധി വൈദ്യൂതിത്തൂണുകൾ ഒടിഞ്ഞു വീണു. പ്രദേശമാകെ ഇരുട്ടിലായി. മരങ്ങൾ റോഡിൽ വീണു കിടക്കുന്നതിനാൽ ഗതാഗത സൗകര്യവും ഇല്ലാതായി. വെള്ളത്തൂവൽ: കനത്ത കാറ്റും മഴയും വെള്ളത്തൂവലിലും പരിസരപ്രദേശങ്ങളിലും നാശം വിതച്ചു. വെള്ളത്തൂവൽ ടൗണിന് സമീപം മങ്ങാട്ട് ഫക്രുദീന്‍റെ വീടിനു മുകളിലേക്ക് മരം കടപുഴകി വീണ് വീട് ഭാഗികമായി തകർന്നു. വെള്ളത്തൂവൽ വില്ലേജ് ഓഫീസിനു സമീപം വൻ മരം വൈദ്യൂതി ലൈനിലേക്ക്ഒടിഞ്ഞുവീണ് ലൈനുകൾ തകർന്നു. ഇതു മൂലം പരിസരപ്രദേശങ്ങളിലെ വൈദ്യുതി വിതരണം നിലച്ചു. വെള്ളത്തൂവൽ കടപ്പലാരിൽ റിസോർട്ടിനു സമീപം റോഡിൽ മരം കടപുഴകി വീണ് അടിമാലി-വെള്ളത്തൂവൽ റൂട്ടിൽ ഏതാനും സമയം ഗതാഗതം നിലച്ചു. പൂത്തലനിരപ്പിൽ കാഞ്ഞിരത്തിങ്കൽ ശ്രീധരന്‍റെ തൊഴുത്തും വിറകുപുരയും കനത്ത കാറ്റിൽ തകർന്നു വീണു.

നെടുങ്കണ്ടത്ത് പെട്രോള്‍ പമ്പില്‍ ഉണ്ടായ അപകടത്തില്‍ യുവാവ് മരിച്ച സംഭവം: പിതാവ് എസ്പിക്ക് പരാതി നല്‍കി

നെടുങ്കണ്ടം: നെടുങ്കണ്ടത്ത് പെട്രോള്‍ പമ്പിലെ അറ്റകുറ്റപ്പണികള്‍ക്കിടെ ആലപ്പുഴ സ്വദേശിയായ യുവാവ് മരിച്ച സംഭവത്തില്‍ പിതാവ് ജില്ലാ പോലീസ് സൂപ്രണ്ടിന് പരാതി നല്‍കി. കരാറുകാരന്‍ തൊഴിലാളികളുടെ സുരക്ഷയ്ക്ക് ആവശ്യമായ ക്രമീകരണങ്ങള്‍ ഏര്‍പ്പെടുത്തിയിരുന്നില്ലെന്നു ചൂണ്ടിക്കാട്ടിയാണ് പരാതി നല്‍കിയത്. പരാതിയെത്തുടര്‍ന്ന് കേസ് അന്വേഷണം കട്ടപ്പന ഡിവൈഎസ്പിക്ക് കൈമാറി. കഴിഞ്ഞ എട്ടിനാണ് നെടുങ്കണ്ടം എച്ച്പി പെട്രോള്‍ പമ്പില്‍ ഇലക്‌ട്രിക് ജോലികള്‍ ചെയ്തുകൊണ്ടിരിക്കേ ചേര്‍ത്തല കാരിക്കാട്ട് വീട്ടില്‍ ജെബിന്‍(24) മരിച്ചത്. കൂടെയുണ്ടായിരുന്ന മറ്റൊരു യുവാവിനും ഗുരുതരമായി പരിക്കേറ്റിരുന്നു. ഈ സംഭവത്തില്‍ നെടുങ്കണ്ടം പോലീസ് കേസെടുക്കാന്‍ വിമുഖത കാട്ടിയതായും കേസുമായി മുന്നോട്ടുപോയാല്‍ യാതൊരു പ്രയോജനവും ഉണ്ടാകില്ലെന്ന് പോലീസ് പറഞ്ഞതായും ജെബിന്‍റെ പിതാവ് ബെന്നി എസ്പിക്ക് നല്‍കിയ പരാതിയില്‍ പറയുന്നു. കരാറുകാരന്‍റെ അശ്രദ്ധയും അലംഭാവവും മൂലമാണ് തനിക്കു മകനെ നഷ്ടപ്പെട്ടത്. ഭാരം കുറഞ്ഞ പൈപ്പ് ഉപയോഗിച്ച് നിര്‍മിച്ച സ്‌കഫോൾഡിംഗിന് ആവശ്യമായ നീളമോ ബലമോ ഉണ്ടായിരുന്നില്ല. ഇതിന്‍റെ അടിയില്‍ ഘടിപ്പിച്ചിട്ടുള്ള വീല്‍ ലോക്ക് ചെയ്താലും ചെറിയ ചലനം ഉണ്ടായാല്‍ തനിയെ തെന്നിമാറുമായിരുന്നു. ഉയരത്തില്‍ നിന്ന് ജോലി ചെയ്യുന്ന തൊഴിലാളികള്‍ക്ക് സേഫ്റ്റി ബെല്‍റ്റും ഹെല്‍മറ്റും നല്‍കേണ്ടതാണ്. ഇവ രണ്ടും കരാറുകാരന്‍ നല്‍കിയിരുന്നില്ല. അപകടത്തില്‍ തലയ്‌ക്കേറ്റ മാരകമായ പരിക്കാണ് മരണകാരണമായത്. അപകടം നടന്ന ശേഷം കരാറുകാരന്‍റെ പ്രതിനിധികള്‍ സംഭവസ്ഥലത്ത് സേഫ്റ്റി ഉപകരണങ്ങള്‍ കൊണ്ടുവയ്ക്കുകയായിരുന്നു. തൊഴിലാളികള്‍ക്ക് ഇഎസ്ഐയും പിഎഫും പേഴ്‌സണല്‍ ആക്‌സിഡന്‍റ് ഇന്‍ഷ്വറന്‍സും എടുക്കേണ്ട ഉത്തരവാദിത്വവും കരാറുകാരനുണ്ട്. ഇവയൊന്നും പാലിച്ചിട്ടില്ല. ഇവയൊക്കെ അന്വേഷണത്തിന്‍റെ ഭാഗമാക്കണമെന്നും നെടുങ്കണ്ടം പോലീസ് സ്‌റ്റേഷന്‍ ഉദ്യോഗസ്ഥരെ കേസ് അന്വേഷണത്തില്‍ നിന്നും മാറ്റിനിർത്തണമെന്നും പരാതിയില്‍ പറയുന്നു. ഈ പരാതിയുടെ അടിസ്ഥാനത്തിലാണ് കേസിന്‍റെ അന്വേഷണം കട്ടപ്പന ഡിവൈഎസ്പിയെ ഏല്‍പ്പിച്ചത്.

വ്യാപാരിയുടെ കട ജപ്തി ചെയ്ത കേരള ബാങ്കിന്‍റെ നടപടിക്ക് തിരിച്ചടി

അടിമാലി: അടിമാലിയില്‍ ഏത്തക്കാ വ്യാപാരം നടത്തുന്ന വ്യാപാരിയുടെ കട ജപ്തി ചെയ്ത കേരള ബാങ്കിന്‍റെ നടപടിക്ക് തിരിച്ചടി.തൊടുപുഴ സിജെഎം കോടതിയുടെ ഉത്തരവിന്‍റെ അടിസ്ഥാനത്തില്‍ ബാങ്ക് അധികൃതര്‍ എത്തി ഇന്ന് വ്യാപാര സ്ഥാപനം തുറന്നു നല്‍കി. അടിമാലി ടൗണില്‍ സര്‍ക്കാര്‍ ഹൈസ്‌കൂള്‍ പരിസരത്ത് ഏത്തക്കാ മൊത്തവ്യാപാരം നടത്തുന്ന പെരുമ്പാവൂര്‍ സ്വദേശി അക്ബറിനാണ് കോടതി ഉത്തരവ് ആശ്വാസമായത്. മാര്‍ക്കറ്റിംഗ് സൊസൈറ്റിയില്‍ നിന്ന് സ്ഥലം വാടകയ്ക്കെടുത്ത് സ്ഥാപനം നിര്‍മിച്ചായിരുന്നു അക്ബര്‍ ഇവിടെ വ്യാപാരം നടത്തിയിരുന്നത്. അക്ബറിന് ബാങ്കുമായി ഇടപാടില്ലെങ്കിലും മാര്‍ക്കറ്റിംഗ് സൊസൈറ്റിക്കുള്ള കുടിശിഖ ഈടാക്കുന്നതിന് കഴിഞ്ഞ 10ന് കേരള ബാങ്കധികൃതര്‍ എത്തി അക്ബറിന്‍റെ സ്ഥാപനം സീല്‍ ചെയ്തു പൂട്ടി. പിന്നീട് അക്ബര്‍ കോടതിയെ സമീപിച്ച് സാധനങ്ങള്‍ നീക്കാന്‍ രണ്ട് ദിവസത്തെ സാവകാശം നേടിയെടുത്തിരുന്നു. ഇതിന് പിന്നാലെയാണ് കട ജപ്തി ചെയ്ത കേരള ബാങ്കിന്‍റെ നടപടി തൊടുപുഴ സിജെഎം കോടതി തടഞ്ഞത്.

ഹാഷിഷ് ഓയിൽ കടത്തിയ പ്രതികൾക്ക് കഠിന തടവ്

തൊടുപുഴ: ഹാഷിഷ് ഓയിൽ കടത്തിക്കൊണ്ടു വന്ന പ്രതികൾക്ക് കഠിന തടവും പിഴയും. ആലുവ ചൂർണിക്കര എലഞ്ഞികയിൽ അഹമ്മദ് കബീർ(31), ചൂർണികര തായ്ക്കാട്ടുകര കുന്നുംപുറത്ത് ഷാരൂഖ് സലിം (31) ചൂർണികര ഗാരേജ് ജംഗ്ഷൻ മനക്കപ്പറന്പിൽ എം.കെ.ഷാമിൽ (32) എന്നിവരെയാണ് അഞ്ചു വർഷം കഠിന തടവിനും 25,000 രൂപ പിഴ അടക്കുന്നതിനും പിഴ അടച്ചില്ലെങ്കിൽ ഒരു വർഷം കൂടി കഠിന തടവിനും തൊടുപുഴ എൻഡിപിഎസ് സ്പെഷൽ കോടതി ജഡ്ജി കെ.എൻ. ഹരികുമാർ ശിക്ഷിച്ചത്.

കോമാളിക്കുടിക്ക് സമീപം വിനോദസഞ്ചാരികൾ സഞ്ചരിച്ചിരുന്ന ബസ് മറിഞ്ഞ് അപകടം

അടിമാലി: ബൈസണ്‍വാലി കോമാളിക്കുടിക്ക് സമീപം വിനോദസഞ്ചാരികൾ സഞ്ചരിച്ചിരുന്ന ബസ് മറിഞ്ഞ് അപകടം. ഇന്നലെ ഉച്ചയോടെ ഖജനാപ്പാറ-ബൈസണ്‍വാലി റൂട്ടില്‍ കോമാളിക്കുടിക്കു സമീപം കര്‍ണാടക കോളാറില്‍ നിന്നുള്ള വിനോദ സഞ്ചാരികള്‍ യാത്ര ചെയ്തിരുന്ന വാഹനം പാതയോരത്തെ താഴ്ചയിലേക്കു മറിയുകയായിരുന്നു. വളവു തിരിയുന്നതിനിടെ ബസ് നിയന്ത്രണം നഷ്ടപ്പെട്ടതാണ് അപകടകാരണമെന്നാണ് പ്രാഥമിക നിഗമനം. സമീപവാസികള്‍ എത്തി രക്ഷാപ്രവര്‍ത്തനം നടത്തി. വാഹനത്തില്‍ മുപ്പതോളം ആളുകള്‍ ഉണ്ടായിരുന്നതായാണ് വിവരം. ഇവരെ നാട്ടുകാര്‍ ചേര്‍ന്ന് വിവിധ ആശുപത്രികളില്‍ പ്രവേശിപ്പിച്ചു. വാഹനം മണ്ണില്‍ പൂണ്ടുനിന്നതിനാല്‍ കൂടുതല്‍ താഴ്ചയിലേക്കു പതിക്കുന്നത് ഒഴിവായി.അപകടത്തില്‍ വാഹനത്തിന്‍റെ മുന്‍ ഭാഗം തകര്‍ന്നു.

ജൈവവൈവിധ്യ ക്വിസ്: മഹാലക്ഷ്മിക്ക് ഒന്നാം സ്ഥാനം

തൊടുപുഴ: ഹരിതകേരളം മിഷൻ ജൈവവൈവിധ്യ പഠനോത്സവത്തിന്‍റെ ഭാഗമായി നടത്തിയ ജില്ലാതല ക്വിസ് മത്സരത്തിൽ അട്ടപ്പളം സെന്‍റ് തോമസ് സ്കൂളിലെ ജി. മഹാലഷ്മി ഒന്നാം സ്ഥാനം നേടി. ശാന്തിഗ്രാം ഗാന്ധിജി ഗവ. ഇംഗ്ലീഷ് മീഡിയം ഹൈസ്കൂളിലെ ഹൃദ്യ ബിനോ, സന ഫാത്തിമ, ആർ. ആദ്യലഷ്മി എന്നിവർ രണ്ടു മുതൽ നാലു വരെ സ്ഥാനങ്ങൾ നേടി. ഹരിത കേരളം മിഷൻ ജില്ലാ കോ-ഓർഡിനേറ്റർ ഡോ. അജയ് പി. കൃഷ്ണ മത്സരം ഉദ്ഘാടനം ചെയ്തു. വിജയികൾക്കുള്ള സർട്ടിഫിക്കറ്റ് വിതരണം എഎസ്പി ഗിരീഷ് പി. സാരഥി നിർവഹിച്ചു.

കട്ടപ്പന ലയൺസ് റീജിയണൽ കൺവെൻഷൻ ഇന്ന്

കട്ടപ്പന: ലയൺസ് ക്ലബ് ഡിസ്ട്രിക്ട് 318 സിയുടെ ഭാഗമായി ഹൈറേഞ്ച് മേഖലയിൽ പ്രവർത്തിക്കുന്ന 16 ലയൺസ് ക്ലബുകൾ ഉൾപ്പെടുന്ന റീജിയൻ മൂന്നിന്‍റെ വാർഷിക കൺവൻഷൻ ഇന്ന് വൈകുന്നേരം 5.30 മുതൽ കട്ടപ്പന വള്ളക്കടവ് സിബീസ് ഗാർഡനിൽ നടത്തും. 2024-25 ലയണിസ്റ്റിക് വർഷത്തിൽ റീജിയന്‍റെ നേതൃത്വത്തിൽ സാമൂഹ്യ, സാംസ്കാരിക, സേവന രംഗങ്ങളിൽ നടത്തിയ പ്രവർത്തനങ്ങൾ കൺവൻഷനിൽ വിലയിരുത്തും. ഈ വർഷം ചിറ്റിലപ്പള്ളി ഫൗണ്ടേഷനുമായി ചേർന്നു ലയൺസ്‌ ക്ലബ് റീജിയൻ മൂന്ന് ഹൈറേഞ്ച് മേഖലയിൽ 27 വീടുകളാണ് നിർമിച്ചു നൽകിയത്. ഈ വീടുകളുടെ താക്കോൽദാനം മുഖ്യാതിഥി ലയൺസ് ഡിസ്ട്രിക്ട് ഗവർണർ രാജൻ എൻ. നമ്പൂതിരി നിർവഹിക്കും . റീജിയൻ ചെയർമാൻ രാജീവ് ജോർജ് അധ്യക്ഷത വഹിക്കും .

മൂന്നാർ ഗ്രാമ പഞ്ചായത്തിൽ വീണ്ടും അവിശ്വാസ പ്രമേയനീക്കം

മൂന്നാർ: ഭരണത്തിലെത്തുന്നതിനും നിലനിർത്തുന്നതിനും ഇടതു മുന്നണിയും കോണ്‍ഗ്രസു നടത്തുന്ന നീക്കങ്ങൾ മൂലം ഭരണ അസ്ഥിരത നേരിടുന്ന മൂന്നാർ ഗ്രാമ പഞ്ചായത്തിൽ വീണ്ടും അവിശ്വാസ പ്രമേയനീക്കം. മൂന്നാർ ഗ്രാമപഞ്ചായത്ത് പ്രസിഡന്‍റ് ദീപ രാജ്കുമാറിനെതിരേയാണ് സ്വന്തം മുന്നണിയിലുള്ള പത്ത് അംഗങ്ങൾ അവിശ്വാസ പ്രമേയ കത്തു നൽകിയത്. ദേവികുളം ബ്ലോക്ക് ഡവലപ്മെന്‍റ് ഓഫീസർക്കാണ് കത്തു നൽകിയിട്ടുള്ളത്. സന്തം മുന്നണിയിലുള്ള മറ്റൊരാളെ പ്രസിഡന്‍റ് ആക്കുന്നതിനു വേണ്ടിയാണ് ഈ നീക്കം. നാടകീയ സംഭവങ്ങൾക്ക് ഒടുവിൽ തെരഞ്ഞെടുപ്പ് കമ്മീഷൻ നേരിട്ട് ഇടപെട്ടതോടെയാണ് അനിശ്ചിതത്വത്തിലായ പ്രസിഡന്‍റ് പദം ദീപയ്ക്ക് ലഭിച്ചത്. കഴിഞ്ഞ മാസം 28 ് നടന്ന നാടകീയ സംഭവങ്ങൾക്ക് ഒടുവിലാണ് കോണ്‍ഗ്രസ് ഭരണനേതൃത്വം നൽകുന്ന പഞ്ചായത്തിൽ ദീപയുടെ പ്രസിഡന്‍റ് പദവി അനിശ്ചിതത്വത്തിൽ ആയത്. മൂന്നാർ ഗ്രാമ പഞ്ചായത്ത് സെക്രട്ടറിക്ക് ദീപ രാജിവച്ചതായുള്ള കത്തു ലഭിച്ചിരുന്നു. എന്നാൽ, ഈ കത്ത് തന്‍റേതല്ലെന്നും പഞ്ചായത്ത് വൈസ് പ്രസിഡന്‍റ് തന്‍റെ മുറിയിൽ കയറി വാതിൽ പൂട്ടിയിട്ട് ബലമായി രാജിക്കത്തിൽ ഒപ്പുവയ്ക്കാൻ ആവശ്യപ്പെടുകയും അത് നിരസിച്ചപ്പോൾ വ്യാജ ഒപ്പിട്ട് സെക്രട്ടറിക്കു നൽകുകയും ചെയ്യുകയായിരുന്നു എന്നായിരുന്നു പ്രസിഡന്‍റ് വ്യക്തമാക്കിയത്. രാജി സ്വീകരിക്കരുതെന്ന് ആവശ്യപ്പെട്ട് പ്രസിഡന്‍റ് തെരഞ്ഞെടുപ്പ് കമ്മീഷന് പരാതി നൽകിയതോടെ പ്രസിഡന്‍റിനെയും സെക്രട്ടറിയെയും കമ്മീഷൻ വിളിച്ചുവരുത്തി. രാജിക്കത്തിൽ സെക്രട്ടറിയുടെ മുന്പിൽ വച്ച് ഒപ്പിടണമെന്ന പഞ്ചായത്ത് രാജ് ആക്ടാണ് ദീപയ്ക്ക് തുണയായത്. കൂറുമാറ്റ നിരോധന നിയമം വഴി രണ്ട് അംഗങ്ങൾ അയോഗ്യരാക്കപ്പെട്ടതോടെ 21 അംഗങ്ങൾ ഉള്ള മൂന്നാർ പഞ്ചായത്തിൽ കോണ്‍ഗ്രസിന് 11 അംഗങ്ങളും ഇടതു മുന്നണിക്ക് എട്ട് അംഗങ്ങളുമാണുള്ളത്.

വെള്ളത്തൂവൽ പള്ളിയിൽ ആദ്യ വെള്ളിയാഴ്ച കണ്‍വൻഷൻ

വെള്ളത്തൂവൽ: വെള്ളത്തൂവൽ സെന്‍റ് ജോർജ് പള്ളിയിൽ ആദ്യ വെള്ളിയാഴ്ച കണ്‍വൻഷനും സൗഖ്യ ശുശ്രൂഷയും മേയ് രണ്ടിനു നടക്കും. രാവിലെ ഒൻപതിന് ജപമാല, 9.30ന് സ്തുതി ആരാധന, 10ന് ദൈവവചന പ്രഘോഷണം, 11ന് കുന്പസാരം, 11.30ന് ദിവ്യകാരുണ്യ ആരാധന, സൗഖ്യ പ്രാർത്ഥന, നിയോഗ സമർപ്പണം, 12.30ന് വിശുദ്ധ ഗീവർഗീസിന്‍റെ നൊവേന, ഒന്നിന് ആഘോഷമായ വിശുദ്ധ കുർബാന, രണ്ടിന് നേർച്ചക്കഞ്ഞിവിതരണം. വിവിധ ശുശ്രൂഷകൾക്ക് വിജു കൊച്ചുപുരക്കൽ ചെമ്മണ്ണാർ നേതൃത്വം നൽകുമെന്ന് വികാരി ഫാ. സാൻജോ കൊച്ചുപറന്പിൽ, ബിജു വർഗീസ് പെരുന്പനാനിക്കൽ എന്നിവർ അറിയിച്ചു.

ബൈസണ്‍വാലി പള്ളിയിൽ തിരുനാൾ

ബൈസണ്‍വാലി: സെന്‍റ് ആന്‍റണീസ് ടൗണ്‍ പള്ളിയിൽ ഇടവക മധ്യസ്ഥനായ വിശുദ്ധ അന്തോനീസിന്‍റെയും വിശുദ്ധ സെബസ്ത്യാനോസിന്‍റെയും പരിശുദ്ധ കന്യകാമറിയത്തിന്‍റെയും സംയുക്ത തിരുനാൾ മേയ് രണ്ട്, മൂന്ന്, നാല് തീയതികളിൽ ആഘോഷിക്കുമെന്ന് വികാരി ഫാ. ജെറിൻ കുഴിയാംപ്ലാവിൽ അറിയിച്ചു. രണ്ടിനു വൈകുന്നേരം നാലിനു കൊടിയേറ്റ്, തിരുസ്വരൂപ പ്രതിഷ്ഠ, ലദീഞ്ഞ്, 4.30ന് ആഘോഷമായ തിരുനാൾ കുർബാന, സന്ദേശം-ഫാ. ജോസഫ് തൊട്ടിയിൽ, സെമിത്തേരി സന്ദർശനം, വീട്ടന്പ് എഴുന്നള്ളിക്കൽ. മൂന്നിന് ഉച്ചകഴിഞ്ഞ് മൂന്നിന് അന്പു പ്രദക്ഷിണം, ലദീഞ്ഞ്, 4.15ന് ആഘോഷമായ തിരുനാൾ കുർബാന-ഫാ. പ്രിൻസ് പരത്തനാൽ സിഎംഐ, 5.45ന് പ്രദക്ഷിണം അന്പൂക്കട കുരിശടിയിലേക്ക്. നാലിന് രാവിലെ 9.15ന് ലദീഞ്ഞ്, ആഘോഷമായ തിരുനാൾ കുർബാന, സന്ദേശം-ഫാ. പോളി മണിയാട്ട്, ഉച്ചക്ക് 12.10ന് പ്രദക്ഷിണം ഹോളിക്രോസ് കുരിശടിയിലേക്ക്, ഒന്നിന് സമാപന പ്രാർഥന. പച്ചടി സെന്‍റ് ജോസഫ് പള്ളിയിൽ തിരുനാള്‍ നെടുങ്കണ്ടം: പച്ചടി സെന്‍റ് ജോസഫ് പള്ളിയില്‍ ഇടവക മധ്യസ്ഥനായ വിശുദ്ധ യൗസേപ്പുപിതാവിന്‍റെയും പരിശുദ്ധ കന്യകമറിയത്തിന്‍റെയും വിശുദ്ധ ഗീവര്‍ഗീസിന്‍റെയും വിശുദ്ധ സെബസ്ത്യാനോസിന്‍റെയും സംയുക്ത തിരുനാള്‍ നാളെ മുതല്‍ നാലുവരെ നടക്കുമെന്ന് വികാരി ഫാ. ആന്‍റണി പനച്ചിക്കല്‍ അറിയിച്ചു. നാളെ വൈകുന്നേരം അഞ്ചിന് കൊടിയേറ്റ്. 5.30 ന് ആഘോഷമായ തിരുനാള്‍ കുര്‍ബാന, സന്ദേശം-ഫാ. ജോസഫ് (ടിനോ) പാറക്കടവില്‍. രണ്ടിനു വൈകുന്നേരം അഞ്ചിന് ആഘോഷമായ തിരുനാള്‍ കുര്‍ബാന, സന്ദേശം-ഫാ. ജോസഫ് മേനംമൂട്ടില്‍. മൂന്നിന് രാവിലെ എട്ടിന് അമ്പ് പ്രയാണം വീടുകളിലേക്ക്. വൈകുന്നേരം 4.30ന് ആഘോഷമായ തിരുനാള്‍ കുര്‍ബാന, സന്ദേശം-ഫാ. മാത്യു പുതുപ്പറമ്പില്‍, തുടര്‍ന്ന് പ്രദക്ഷിണം (തൂവല്‍ കപ്പേളയിലേക്ക്). സമാപന ദിവസമായ നാലിന് രാവിലെ 6.30ന് വിശുദ്ധ കുര്‍ബാന, വൈകുന്നേരം 4.30ന് ആഘോഷമായ തിരുനാള്‍ പാട്ടുകുര്‍ബാന- ഫാ. ജോസഫ് കട്ടക്കയം, സന്ദേശം-ഫാ. ജോസഫ് പൈമ്പിള്ളില്‍, തുടര്‍ന്ന് പ്രദക്ഷിണം. രാത്രി 7.30ന് കോട്ടയം കമ്യൂണിക്കേഷന്‍സിന്‍റെ സൂപ്പര്‍ ഹിറ്റ് ഗാനമേള എന്നിവയാണ് പരിപാടികള്‍. വാഴത്തോപ്പ് കത്തീഡ്രലിൽ തിരുനാൾ ചെറുതോണി: വാഴത്തോപ്പ് സെന്‍റ് ജോർജ് കത്തീഡ്രലിൽ ഇടവക മധ്യസ്ഥനായ വിശുദ്ധ ഗീവർഗീസിന്‍റെയും വിശുദ്ധ സെബസ്ത്യാനോസിന്‍റെയും പരിശുദ്ധ കന്യാമറിയത്തിന്‍റെയും തിരുനാൾ ഏപ്രിൽ 2, 3, 4, 5 തീയതികളിൽ ആഘോഷിക്കുമെന്ന് വികാരി ഫാ. ഫ്രാൻസിസ് ഇടവക്കണ്ടം, സഹവികാരി ഫാ. തോമസ് മടിക്കാങ്കൽ എന്നിവർ അറിയിച്ചു. ഫ്രാൻസിസ് മാർപാപ്പയുടെ വിയോഗത്തെതുടർന്ന് ഏപ്രിൽ 25 ,26, 27 തീയതികളിൽ നിശ്ചയിച്ചിരുന്ന തിരുനാൾ പുതിയ തീയതികളിലേക്കു മാറ്റുകയായിരുന്നു. രണ്ടിനു രാവിലെ 6നും 7നും വിശുദ്ധ കുർബാന, നൊവേന. വൈകുന്നേരം നാലിന് കൊടിയേറ്റ്, തിരുസ്വരൂപ പ്രതിഷ്ഠ. ലദീഞ്ഞ്, ആഘോഷമായ തിരുനാൾ കുർബാന, സന്ദേശം, നൊവേന-ഫാ. ജോസഫ് കട്ടക്കയം, തിരുനാൾ പ്രദക്ഷിണം-വാഴത്തോപ്പ് സെന്‍റ് മേരീസ് കപ്പേളയിലേക്ക്, തിരുനാൾ സന്ദേശം കപ്പേളയിൽ -റവ. ഡോ. തോമസ് ആനിക്കുഴിക്കാട്ടിൽ. മൂന്നിന് രാവിലെ ആറിനും ഏഴിനും വിശുദ്ധ കുർബാന, നൊവേന, വൈകുന്നേരം നാലിന് ലദീഞ്ഞ്, ആഘോഷമായ തിരുനാൾ കുർബാന, സന്ദേശം, നൊവേന-ഫാ. ജോസ് കിഴക്കേൽ, തടിയമ്പാട് സെന്‍റ് ജോർജ് കപ്പേളയിലേക്ക് പ്രദക്ഷിണം, സന്ദേശം -സണ്ണി കടൂത്താഴെ. നാലിനു രാവിലെ ആറിനും എട്ടിനും 10നും വിശുദ്ധ കുർബാന, നൊവേന, വൈകുന്നേരം 4.30ന് റവ.ഡോ. അനൂപ് മഠത്തിശ്ശേരിയുടെ മുഖ്യ കാർമികത്വത്തിൽ ആഘോഷമായ തിരുനാൾ കുർബാന. റവ. ഡോ. പോളി മണിയാട്ട് തിരുനാൾ സന്ദേശം നൽകും. തുടർന്ന് 6.30ന് പ്രസിദ്ധമായ തിരുനാൾ രഥ പ്രദക്ഷിണം. അഞ്ചിന് വൈകുന്നേരം ഏഴിന് കാഞ്ഞിരപ്പള്ളി അമല കമ്മ്യൂണിക്കേഷൻസ് അവതരിപ്പിക്കുന്ന നാടകം - തച്ചൻ.

സെന്‍റ് ആന്‍റണീസ് കോളജിൽ നാഷണൽ സൈബർ ഫോറൻസിക് ആൻഡ് സൈബര്‍ സെക്യൂരിറ്റി ഗവേഷണ കേന്ദ്രം

പെരുവന്താനം: സെന്‍റ ആന്‍റണീസ് കോളജില്‍ നാഷണൽ സൈബർ സെക്യൂരിറ്റി സ്റ്റാന്‍ഡേര്‍ഡ്സിന്‍റെ കീഴില്‍ ഗവേഷണ കേന്ദ്രം അനുവദിച്ചു. രാജ്യത്താകമാനം വർധിച്ചുവരുന്ന സൈബർ സാമ്പത്തിക തട്ടിപ്പുകൾ വ്യാപകമാകുന്ന സാഹചര്യത്തില്‍ വിദഗ്ദ്ധരുടെ മേല്‍നോട്ടത്തിൽ ഗവേഷണങ്ങൾ നടത്തുന്നതിനാണ് നാഷണൽ സൈബർ സെക്യൂരിറ്റി സ്റ്റാൻഡേർഡ്സിന്‍റെ കീഴില്‍ ഗവേഷണ കേന്ദ്രം അനുവദിച്ചത്. കാർഷിക പിന്നോക്ക ജില്ലയായ ഇടുക്കിയിൽ ഇത്തരത്തിൽ ഒരു ഗവേഷണ കേന്ദ്രം ആരംഭിക്കുന്ന ആദ്യ കോളജാണ് പെരുവന്താനം സെന്‍റ് ആന്‍റണീസ് കോളജ്. നിലവിൽ സൈബര്‍ ഫോറന്‍സിക്കിന് മികച്ച പ്ലെയിസ്മെന്‍റോടു കൂടിയ ബിരുദ പ്രോഗ്രാമുകൾ ഉണ്ടായിരിക്കെ പുതിയ ഗവേഷണ കേന്ദ്രം വഴി ആഗോള തലത്തിലുള്ള ജോലി സാധ്യതകൾ ഉപയോഗപ്പെടുത്തുവാൻ സാധിക്കുമെന്ന് ഗവേഷണ കേന്ദ്രം ഡയറക്ടർ പി.കെ. സുഭാഷ് ബാബു, കോളജ് ചെയർമാൻ ബെന്നി തോമസ്‌, പ്രിന്‍സിപ്പല്‍ ഡോ. ആന്‍റണി ജോസഫ് കല്ലമ്പള്ളി, സെന്‍റര്‍ കോ-ഓർഡിനേറ്റർ സുപർണ രാജു എന്നിവര്‍ അറിയിച്ചു. അടുത്തമാസം ഗവേഷണ കേന്ദ്രം പ്രവർത്തനം ആരംഭിക്കുമെന്ന് കോളജ് അധികാരികൾ അറിയിച്ചു.

കാറ്റും മഴയും: തൊടുപുഴ മേഖലയിൽ കനത്ത നാശം

തൊടുപുഴ: കനത്ത കാറ്റിലും മഴയിലും തൊടുപുഴ മേഖലയിൽ വ്യാപക നാശനഷ്ടം. ഇന്നലെ വൈകുന്നേരം നാലരയോടെയാണ് തൊടുപുഴയിലും പരിസര പ്രദേശങ്ങളിലും ഇടിയോടു കൂടിയ ശക്തമായ മഴ പെയ്തത്. കനത്ത കാറ്റിലും മഴയിലും കീരികോട് ഫ്രണ്ട്സ് നഗർ കോളനിയിൽ തോണ്ടുകുഴിയിൽ വിശ്വംഭരൻ, കോലോത്ത് ഹരിദാസ് എന്നിവരുടെ വീടുകൾക്കു മുകളിലേയ്ക്ക് മരം മറിഞ്ഞു വീണു. കൂറ്റൻ മഹാഗണി മരം മറിഞ്ഞു വീണ് വിശ്വംഭരന്‍റെ വീടിന് കേടുപാടും സംഭവിച്ചു. സമീപത്തുണ്ടായിരുന്ന രണ്ടു പ്ലാവാണ് ഹരിദാസിന്‍റെ വീടിനു മുകളിലേയ്ക്ക് വീണത്. ഇവിടെയുണ്ടായിരുന്ന വൈദ്യുതി ലൈനുകളും മരം വീണ് പൂർണമായും തകർന്നു. കെഎസ്ഇബി അധികൃതരെത്തി വൈദ്യുതി വിച്ഛേദിച്ച് അപകടം ഒഴിവാക്കി. ഈ മേഖലയിൽ വൈദ്യുതി ബന്ധം പൂർണമായി നിലച്ചിരിക്കുകയാണ്. ഇടവെട്ടി പഞ്ചായത്തിലും കനത്ത മഴയിൽ വ്യാപക നാശം സംഭവിച്ചു. കൊട്ടാരത്തിൽ സരസ്വതി ഗോപാലകൃഷ്ണന്‍റെ വീടിന് മുകളിലേക്ക് അയൽവാസിയുടെ പുരയിടത്തിൽ നിന്ന മരം കടപുഴകി വീണു. ശക്തമായ കാറ്റിൽ നിരവധി മേഖലയിൽ മരങ്ങൾ കടപുഴകി വീണ് ഗതാഗതം തടസപ്പെട്ടു. പഞ്ചായത്തിന്‍റെ ഒന്ന്, 13, വാർഡുകളിലാണ് കൂടുതൽ നഷ്ടം ഉണ്ടായിരിക്കുന്നത്. ഇടവെട്ടി കനാൽ റോഡിലേക്ക് മരങ്ങൾ വീണ് ഗതാഗതം പൂർണമായും തടസപ്പെട്ടു. വനത്തിനുള്ളിലെ മരങ്ങൾ ഒഴികെ റോഡിലേയ്ക്ക് വീണ സ്വകാര്യ വ്യക്തികളുടെ മരങ്ങൾ അഗ്നിരക്ഷാസേന മുറിച്ചുമാറ്റി. തൊടുപുഴ മേഖലയിൽ ഏതാനും ദിവസങ്ങളായി തുടരുന്ന ശക്തമായ വേനൽ മഴ പല മേഖലകളിലും നാശം വിതച്ചിട്ടുണ്ട്. ശക്തമായ ഇടിമിന്നലിന്‍റെയും കാറ്റിന്‍റെയും അകന്പടിയോടെയാണ് വൈകുന്നേരങ്ങളിൽ വേനൽ മഴ പെയ്യുന്നത്.

ഇടുക്കിയിലെ ജനങ്ങളെ വഞ്ചിച്ച സർക്കാർ: പി.ജെ. ജോസഫ്

കട്ടപ്പന: മുഖ്യമന്ത്രി പിണറായി വിജയന്‍റെ ഒമ്പതു വർഷത്തെ ജന വഞ്ചനകൾക്കെതിരേ യുഡിഎഫ് പ്രതിഷേധക്കൂട്ടായ്മ നടത്തി. കട്ടപ്പനയിൽ സംഘടിപ്പിച്ച പ്രതിഷേധ കൂട്ടായ്മ പി.ജെ. ജോസഫ് എം എൽ എ ഉദ്ഘാടനം ചെയ്തു. ഇടുക്കിയിലെ ജനങ്ങളെ വഞ്ചിച്ച സർക്കാരാണ് സംസ്ഥാനം ഭരിക്കുന്നത്. പൊള്ളയായ വാഗ്ദാനങ്ങൾ നൽകി ഹൈറേഞ്ചിലെ ജനങ്ങളെ കബളിപ്പിക്കുകയാണ് സർക്കാർ. ഇടുക്കി പാക്കേജ് എന്തായി എന്ന് വ്യക്തമാക്കണമെന്നും അദ്ദേഹം ആവശ്യപ്പെട്ടു. ജില്ലയിലെ കർഷകർ പ്രതിസന്ധിയിലാണ്. അവ പരിഹരിക്കാനുള്ള യാതൊരുവിധ നടപടിയും സ്വീകരിച്ചിട്ടില്ല. ഭൂനിയമ ഭേദഗതി കൊണ്ടുവന്ന് ഗവർണർ അംഗീകരിച്ചിട്ട് ഒന്നരവർഷം കഴിയുന്നു.എന്നാൽ, ചട്ടങ്ങൾ ഉണ്ടാക്കാൻ സർക്കാരിന് സാധിച്ചിട്ടില്ല. പട്ടയ നടപടികളിലും കാർഷിക പ്രതിസന്ധികളിൽ ഉൾപ്പെടെ ജനങ്ങൾ വലിയ പ്രതിസന്ധിയിലാണ് ഇവയ്ക്കെല്ലാം പരിഹാരം കാണേണ്ടതുണ്ട്. ഐക്യ ജനാധിപത്യ മുന്നണി അധികാരത്തിലെത്തിയാൽ ഭൂപ്രശ്നങ്ങൾ പരിഹരിക്കുമെന്നും പി.ജെ. ജോസഫ് പറഞ്ഞു. ഇടുക്കിയുടെ വികസനത്തെ പിറകോട്ട് അടിപ്പിച്ച സർക്കാരാണ് എൽഡിഎഫ് സർക്കാർ. ഇടുക്കിയിലെ ഭൂപ്രശ്നങ്ങൾ വഷളാക്കി ഇടുക്കിയിലെ ജനങ്ങളെ കൂടി ഇറക്കാൻ ശ്രമിക്കുകയാണ്, അതോടൊപ്പം കൊള്ള പിരിവ് നടത്തുകയുമാണ് പിണറായി വിജയൻ സർക്കാരെന്ന് അഡ്വ. ഡീൻ കുര്യാക്കോസ് എംപി ആരോപിച്ചു. ചിറ്റമ്മ നയമാണ് ഇടുക്കി ജില്ലയോട് സംസ്ഥാന സർക്കാർ കാണിക്കുന്നതെന്ന് അദ്ദേഹം കൂട്ടി ചേർത്തു. യൂ ഡി എഫ് ജില്ലാ ചെയർമാൻ ജോയി വെട്ടിക്കുഴി അദ്ധ്യക്ഷത വഹിച്ചു. പ്രഫ. എം ജെ ജേക്കബ്. ഇ. എം. ആഗസ്തി . റോയി കെ. പൗലോസ്. കെ.എസ്. സിയാദ് . കെ. സുരേഷ് ബാബു, എം. എൻ. ഗോപി, തോമസ് രാജൻ,അഡ്വ. സിറിയക് തോമസ്, എം. മോനിച്ചൻ ,തോമസ് പെരുമന,എം.കെ. പുരുഷോത്തമൻ തുടങ്ങിയവർ പ്രസംഗിച്ചു.

മുഖ്യമന്ത്രിയുടെ സന്ദർശനം: യൂത്ത് കോൺഗ്രസ് ജില്ലാ പ്രസിഡന്‍റ് അടക്കം കരുതൽ തടങ്കലിൽ

കട്ടപ്പന: യൂത്ത് കോൺഗ്രസ് ജില്ലാ പ്രസിഡന്‍റ് ഉൾപ്പെടെ മൂന്നു പേരെ പോലീസ് കരുതൽ തടങ്കലിലാക്കി. മുഖ്യമന്ത്രി പിണറായി വിജയനെതിരേ പ്രതിഷേധം ഉയരാൻ സാധ്യതയുണ്ടെന്ന സൂചനയെത്തുടർന്നാണ് കരുതൽ തടങ്കൽ. യൂത്ത് കോൺഗ്രസ് ഇടുക്കി ജില്ലാ പ്രസിഡന്‍റ് ഫ്രാൻസിസ് അറയ്ക്കപറമ്പിൽ, ഉടുമ്പൻചോല നിയോജകമണ്ഡലം പ്രസിഡന്‍റ് ആനന്ദ് തോമസ്, കട്ടപ്പന മണ്ഡലം പ്രസിഡന്‍റ് അലൻ സി. മനോജ് എന്നിവരെയാണ് പോലീസ് കസ്റ്റഡിയിലെടുത്തത്. നെടുങ്കണ്ടത്ത് സംസ്ഥാന സർക്കാരിന്‍റെ നാലാം വാർഷികം ജില്ലാതല യോഗത്തിൽ മുഖ്യമന്ത്രി പിണറായി വിജയൻ പങ്കെടുത്ത് കട്ടപ്പന വഴി മടങ്ങുന്ന വേളയിൽ കരിങ്കൊടി അടക്കമുള്ള പ്രതിഷേധം ഉണ്ടാകാനുള്ള സാധ്യതയുടെ അടിസ്ഥാനത്തിലാണ് യൂത്ത് കോൺഗ്രസ് നേതാക്കളെ കരുതൽ തടങ്കലിലാക്കിയത്. മുഖ്യമന്ത്രിയുടെ യോഗം നെടുങ്കണ്ടത്ത് നടക്കുന്പോൾ കട്ടപ്പനയിൽ യുഡിഎഫിന്‍റെ നേതൃത്വത്തിൽ ഇതേ യോഗത്തിനെതിരേ പ്രതിഷേധ കൂട്ടായ്മ സംഘടിപ്പിച്ചിരുന്നു. ഇതിനു ശേഷമാണ് നേതാക്കളെ പോലീസ് തടങ്കലിലാക്കിയത്. പ്രതിഷേധ കൂട്ടായ്മ നടക്കുമ്പോൾ മുതൽ യൂത്ത് കോൺഗ്രസ് നേതാക്കൾ സ്പെഷൽ ബ്രാഞ്ചിന്‍റെ നിരീക്ഷണത്തിലായിരുന്നു. തുടർന്ന് കട്ടപ്പനയിൽ നിലയുറപ്പിച്ച നേതാക്കളെ ഹൗസിംഗ് ബോർഡ് ഷോപ്പിംഗ് കോംപ്ലക്സിനുള്ളിൽ വച്ച് തടങ്കലിലാക്കുകയായിരുന്നു. പോലീസിന്‍റെ നടപടിക്കെതിരേ ശക്തമായ പ്രതിഷേധവും ഉയരുന്നുണ്ട്. സർവതിനെയും ഭയമുള്ള ഭീരുവായ മുഖ്യമന്ത്രിയാണ് ഇപ്പോൾ കേരളം ഭരിക്കുന്നതെന്ന് എഐസിസി അംഗം ഇ. എം. ആഗസ്തി ആരോപിച്ചു.

സർക്കാരിന്‍റെ നാലാം വാർഷികം; അധ്യാപകർ നിർബന്ധമായും പങ്കെടുക്കണമെന്ന് ഡിഇഒ

തൊടുപുഴ: സംസ്ഥാന സർക്കാരിന്‍റെ നാലാം വാർഷികത്തോടനുബന്ധിച്ച് ഇന്നു നടക്കുന്ന പരിപാടികളിൽ പ്രഥമാധ്യാപകരും അധ്യാപകരും നിർബന്ധമായും പങ്കെടുക്കണമെന്ന് ജില്ലാ വിദ്യാഭ്യാസ ഓഫീസറുടെ ഉത്തരവ്. കട്ടപ്പന ഡിഇഒ കെ.വി. ആൻസൻ ജോസഫാണ് പ്രധാനാധ്യാപകർക്ക് ഇക്കാര്യം ആവശ്യപ്പെട്ട് കത്തയച്ചത്. വിദ്യാഭ്യാസ ജില്ലയിലെ പത്തു സ്കൂളുകളുടെ പട്ടിക സഹിതമാണ് കത്തയച്ചിരിക്കുന്നത്. ഈ സ്കൂളുകളിലെ പ്രധാനാധ്യാപകരും അധ്യാപകരും ഇന്നു ചെറുതോണിയിൽ നടക്കുന്ന സർക്കാരിന്‍റെ വാർഷികാഘോഷ പരിപാടികളിൽ നിർബന്ധമായും പങ്കെടുക്കണമെന്നാണ് ഉത്തരവിൽ പറയുന്നത്. എന്നാൽ തൊടുപുഴ വിദ്യാഭ്യാസ ജില്ലയിലെ പ്രധാനാധ്യാപകർക്ക് ഇത്തരത്തിൽ കത്തു നൽകിയിട്ടില്ല. സർക്കാർ സ്പോണ്‍സർ പരിപാടി വിജയിപ്പിക്കാനാണ് ഡിഇഒ ഇത്തരമൊരു വിചിത്ര ഉത്തരവ് ഇറക്കിയിരിക്കുന്നതെന്നാണ് വിവിധ അധ്യാപക സംഘടനകൾ ആരോപിക്കുന്നത്. സർക്കാർ വാർഷികത്തിന് അധ്യാപകരെ വിളിച്ചുവരുത്തുന്ന ഡിഇഒയുടെ നിർദേശം അംഗീകരിക്കില്ലെന്ന് കെപിഎസ്ടിഎ ജില്ലാ കമ്മിറ്റി അറിയിച്ചു. അവധിക്കാലത്ത് പേപ്പർ വാലുവേഷൻ, എട്ടാം ക്ലാസിലെ അധിക പിന്തുണ ക്ലാസ് , എസ്ആർജി പരിശീലനം എന്നിവ നടക്കുന്പോൾ അധ്യാപകരെ സർക്കാർ പരിപാടികളിൽ നിർബന്ധ പൂർവം വിളിച്ചുവരുത്തുന്നത് അംഗീകരിക്കാനാവില്ലെന്നും പരിപാടി ബഹിഷ്കരിക്കുമെന്നും ജില്ലാ കമ്മിറ്റി അറിയിച്ചു. യോഗത്തിൽ ജില്ലാ പ്രസിഡന്‍റ് ജോബിൻ കളത്തിക്കാട്ടിൽ , സംസ്ഥാന സെക്രട്ടറി പി.എം നാസർ , സുനിൽ ടി.തോമസ്, ബിജോയ് മാത്യു, ഷിന്‍റോ ജോർജ്, ജോർജ് ജേക്കന്പ് , വി.കെ ആറ്റ്‌ലി, സജി മാത്യു, ടി. ശിവകുമാർ എന്നിവർ പ്രസംഗിച്ചു.

എല്‍ഡിഎഫ് സര്‍ക്കാരിന്‍റെ ലക്ഷ്യം നവകേരള സൃഷ്ടിയെന്ന് മുഖ്യമന്ത്രി

നെടുങ്കണ്ടം: എല്‍ഡിഎഫ് സര്‍ക്കാരിന്റെ ലക്ഷ്യം നവകേരള സൃഷ്ടിയാണെന്നും അത് സങ്കല്‍പ്പമല്ല, വര്‍ത്തമാനകാലത്തെ യാഥാര്‍ഥ്യമാണെന്നും മുഖ്യമന്ത്രി പിണറായി വിജയന്‍. സര്‍ക്കാരിന്‍റെ ഒമ്പതാം വാര്‍ഷികാഘോഷങ്ങളുടെ ഭാഗമായി എല്‍ഡിഎഫിന്‍റെ നേതൃത്വത്തില്‍ നെടുങ്കണ്ടത്ത് സംഘടിപ്പിച്ച പൊതുസമ്മേളനത്തില്‍ പ്രസംഗിക്കുകയായിരുന്നു മുഖ്യമന്ത്രി. നവകേരളത്തിനായി എല്ലാവരും ഒന്നിച്ചു നില്‍ക്കുകയാണ് വേണ്ടത്. ഒമ്പതു വര്‍ഷം മുന്‍പുവരെ കേരളത്തിന്‍റെ അവസ്ഥ എന്തായിരുന്നുവെന്ന് പരിശോധിക്കണം. വിവിധ മേഖലകളില്‍ ധാരാളം പ്രശ്‌നങ്ങള്‍ ഉണ്ടായിരുന്നു. ജനം നിരാശരായിരുന്നു. 2016ല്‍ കേരളത്തില്‍ എല്‍ഡിഎഫ് അല്ല അധികാരത്തില്‍ വന്നിരുന്നതെങ്കില്‍ ഇക്കാണുന്ന മാറ്റങ്ങള്‍ എന്തെങ്കിലും സംസ്ഥാനത്ത് ഉണ്ടാകുമായിരുന്നോ എന്നും മുഖ്യമന്ത്രി ചോദിച്ചു. ആരോഗ്യം, വിദ്യാഭ്യാസം, കൃഷി, വ്യവസായം തുടങ്ങി സമസ്ത മേഖലകളിലും സമാനതകള്‍ ഇല്ലാത്ത വികസനമാണ് ഒമ്പത് വര്‍ഷം കൊണ്ട് ഉണ്ടായത്. എല്‍ഡിഎഫ് സംസ്ഥാനത്തെ പശ്ചാത്തല വികസനത്തിന് കിഫ്ബി ഫണ്ട് ചെലവഴിച്ചു. എന്നാല്‍, അതിനെ എതിര്‍ക്കാനും ഒരു കൂട്ടരുണ്ടായി. പക്ഷേ ജനം ആഗ്രഹിച്ചത് വികസനമായിരുന്നു. 90,000 കോടി രൂപയുടെ വികസന പദ്ധതികളാണ് നാട് ഏറ്റെടുത്തിരിക്കുന്നത്. എവിടെ നോക്കിയാലും കിഫ്ബിയിലൂടെ സാധ്യമായ വികസനത്തിന്റെ സാക്ഷ്യപത്രം ഉണ്ട്. ഒരു തരത്തിലും നടക്കില്ലെന്ന് പറഞ്ഞ പദ്ധതികള്‍ വരെ നടപ്പിലായി. എല്ലാ വര്‍ഷവും പ്രോഗ്രസ് റിപ്പോര്‍ട്ട് അവതരിപ്പിച്ചതോടെ നാട് പുരോഗമിക്കുകയാണെന്ന് ജനത്തിന് ബോധ്യമായി. 2016നു ശേഷം പ്രകൃതി ദുരന്തം, മഹാമാരി, നിപ്പ തുടങ്ങിയ ദുതിന്തങ്ങളെ നമ്മള്‍ അതിജീവിച്ചു. നമ്മെ സഹയിക്കേണ്ടിയിരുന്നവര്‍ സഹായിച്ചില്ലെന്നും ന്യായമായ വിഹിതം നല്‍കാന്‍ കേന്ദ്രം തയ്യാറായില്ലെന്നും അത്തരം സമീപനം സ്വീകരിച്ച ബിജെപിക്കൊപ്പം നിന്ന് സംസ്ഥാനത്തെ കുറ്റപ്പെടുത്താനാണ് യുഡിഎഫ് ശ്രമിച്ചതെന്നും മുഖ്യമന്ത്രി പറഞ്ഞു. നെടുങ്കണ്ടം ബസ് സ്റ്റാന്‍ഡില്‍ നടന്ന പൊതുസമ്മേളനത്തില്‍ എല്‍ഡിഎഫ് ജില്ലാ കണ്‍വീനര്‍ കെ. സലിംകുമാര്‍ അധ്യക്ഷത വഹിച്ചു. മന്ത്രിമാരായ റോഷി അഗസ്റ്റിന്‍, രാമചന്ദ്രന്‍ കടന്നപ്പള്ളി, എംഎല്‍എമാരായ എം.എം. മണി, എ രാജ, വാഴൂര്‍ സോമന്‍ തുടങ്ങിയവർ പൊതുസമ്മേളനത്തില്‍ പങ്കെടുത്തു.

മുഖ്യമന്ത്രിക്കു മുന്നിൽ നിവേദനവുമായി കർഷകർ

തൊടുപുഴ: തൊമ്മൻകുത്ത് നാരങ്ങാനത്ത് കൈവശഭൂമിയിലെ കുരിശ് തകർത്തതിനെത്തുടർന്ന് വണ്ണപ്പുറം വില്ലേജിനു കീഴിലുള്ള 4,005 ഏക്കർ റിസർവ് വനഭൂമിയാണെന്ന റിപ്പോർട്ട് നൽകിയ വില്ലേജ് ഓഫീസറുടെ നടപടി റദ്ദുചെയ്യണമെന്ന് ആവശ്യപ്പെട്ട് പ്രദേശവാസികളായ നൂറുകണക്കിനു കർഷകർ ഒപ്പിട്ട നിവേദനം മുഖ്യമന്ത്രിക്കു കൈമാറി. എൽഡിഎഫ് സർക്കാരിന്‍റെ നാലാംവാർഷികത്തോടനുബന്ധിച്ച് നെടുങ്കണ്ടത്തു നടന്ന ജില്ലാതല യോഗത്തിൽ പങ്കെടുക്കാനെത്തിയ മുഖ്യമന്ത്രിയെ നേരിൽക്കണ്ടാണ് നിവേദനം നൽകിയത്. സർക്കാർ സ്ഥാപനങ്ങളും നിരവധി പൊതുസ്ഥാപനങ്ങളും ആരാധനാലയങ്ങളും റോഡുകളുമുള്ള സ്ഥലത്ത് പതിറ്റാണ്ടുകളായി കുടിയേറി കൃഷിചെയ്ത് ജീവിക്കുന്ന കർഷകർക്ക് പട്ടയംനൽകാൻ സർക്കാർ അടിയന്തര നടപടി സ്വീകരിക്കണമെന്നും നിവേദനത്തിൽ ചൂണ്ടിക്കാട്ടി. വനംവകുപ്പ് ജണ്ട സ്ഥാപിച്ചതിന് പുറത്തേക്കും അവകാശവുമായി എത്തുന്നതു കടുത്ത നീതി നിഷേധവും യാതൊരു കാരണവശാലും അംഗീകരിക്കാൻ കഴിയാത്തതുമായ കാര്യമാണ്. ജോയിന്‍റ് വേരിഫിക്കേഷൻ നടത്തുന്നതിനു വിട്ടുപോയ പ്രദേശത്ത് അതിനുള്ള നടപടി ഉടൻ പുനരാരംഭിക്കണം. കൈവശഭൂമിയിൽ തൊമ്മൻകുത്ത് ഇടവക സ്ഥാപിച്ച കുരിശ് വനംവകുപ്പധികൃതർ പിഴുതെറിഞ്ഞ നടപടി ധിക്കാരപരവും മതവിശ്വാസത്തിന്‍റെ പേരിലുള്ള കടന്നുകയറ്റവുമാണെന്ന് നിവേദനത്തിൽ പറയുന്നു. തെറ്റായ റിപ്പോർട്ട് നൽകിയ വില്ലേജ് ഓഫീസർക്കെതിരേയും കുരിശ് തകർത്ത കാളിയാർ റേഞ്ച് ഓഫീസർക്കെതിരേയും നടപടി സ്വീകരിക്കണമെന്നും ഇവർ ആവശ്യപ്പെട്ടു. പ്രശ്നത്തിൽ ആവശ്യമായ ഇടപെടൽ നടത്താമെന്ന് മുഖ്യമന്ത്രി ഉറപ്പു നൽകിയിട്ടുണ്ട്.

കുരിശ് തകർക്കൽ: മൗനം തുടർന്ന് മുഖ്യമന്ത്രി

തൊടുപുഴ: തൊമ്മൻകുത്ത് സെന്‍റ് തോമസ് പള്ളിയുടെ നാരങ്ങാനത്തെ കൈവശഭൂമിയിൽ സ്ഥാപിച്ച കുരിശ് വനംവകുപ്പധികൃതർ തകർത്ത സംഭവത്തിൽ പ്രതികരിക്കാതെ ജില്ലയിലെത്തിയ മുഖ്യമന്ത്രി പിണറായി വിജയൻ. രാവിലെ നെടുങ്കണ്ടം ഗവ. വൊക്കേഷണൽ എച്ച്എസ്എസിൽ നടന്ന ജില്ലാതല യോഗത്തിലും വൈകുന്നേരം ടൗണിൽ നടന്ന പൊതുസമ്മേളനത്തിലും ഏറെ നേരം പ്രസംഗിച്ച മുഖ്യമന്ത്രി സമീപനാളിൽ ഏറെ കോളിളക്കം സൃഷ്ടിച്ച കുരിശു പൊളിക്കലും വണ്ണപ്പുറം വില്ലേജ് ഓഫീസർ നൽകിയ തെറ്റായ റിപ്പോർട്ട് സംബന്ധിച്ചും യാതൊന്നും പറയാൻ തയാറായില്ല. കഴിഞ്ഞ ദിവസം കുരിശു തകർത്ത സ്ഥലം സന്ദർശിച്ച സിപിഎം ജില്ലാ സെക്രട്ടറി വനംവകുപ്പിനെതിരേയും വില്ലേജ് ഓഫീസർക്കെതിരേയും രൂക്ഷമായി പ്രതികരിച്ചിരുന്നു. നാട്ടുകാരിൽനിന്നു വിവരങ്ങൾ ചോദിച്ചറിഞ്ഞ അദ്ദേഹം മുഖ്യമന്ത്രിയെ കാര്യങ്ങൾ ബോധ്യപ്പെടുത്തുമെന്ന് ഉറപ്പുനൽകിയാണ് മടങ്ങിയത്. എന്നാൽ ജില്ലയിൽനിന്നുള്ള ജനപ്രതിനിധികളോ രാഷ്‌ട്രീയകക്ഷി നേതാക്കളോ മുഖ്യമന്ത്രിയെ വിവരം ധരിപ്പിക്കുകയോ വിഷയത്തിൽ സർക്കാർ നിലപാട് വ്യക്തമാക്കുകയോ ചെയ്തില്ലെന്ന് ആക്ഷേപമുയർന്നിട്ടുണ്ട്. അതേ സമയം അടുത്തമാസം ഭൂപതിവ് ചട്ടഭേദഗതി നടപ്പാക്കുമെന്നും അതോടെ ജില്ലയിലെ ഭൂപ്രശ്നം പരിഹരിക്കപ്പെടുമെന്നുമുള്ള ഉറപ്പു മാത്രമാണ് മുഖ്യമന്ത്രി രണ്ടു യോഗങ്ങളിലും പ്രസംഗിച്ചത്. തൊമ്മൻകുത്തിൽ നിന്നു നിവേദനവുമായി എത്തിയ കർഷക പ്രതിനിധികൾക്കും വിഷയത്തിൽ കൃത്യമായ മറുപടി നൽകാൻ മുഖ്യമന്ത്രിക്ക് കഴിഞ്ഞില്ല. സർക്കാരിന്‍റെ അറിവോടെയാണ് സംഭവങ്ങൾ നടന്നതെന്ന ജനങ്ങളുടെ ആരോപണം ശരിവയ്ക്കുന്നതാണ് മുഖ്യമന്ത്രിയുടെ മൗനമെന്നും കർഷകർ പറഞ്ഞു. വനംവകുപ്പിന്‍റെയും വില്ലേജ് ഓഫീസറുടെയും നടപടിയിൽ പ്രതിഷേധം ശക്തമാക്കാനുള്ള തീരുമാനത്തിലാണ് പ്രദേശവാസികൾ. മേയ് ഒന്നിന് കോണ്‍ഗ്രസിന്‍റെ നേതൃത്വത്തിൽ മുണ്ടൻമുടി അച്ചൻകവലയിൽ പ്രതിഷേധ യോഗം സംഘടിപ്പിച്ചിട്ടുണ്ട്. വിവിധ ക്രൈസ്തവ സംഘടനകളും പ്രത്യക്ഷ സമരവുമായി രംഗത്തിറങ്ങാനുള്ള ഒരുക്കത്തിലാണ്.

കുരിശ് പൊളിച്ച സംഭവം; വനംവകുപ്പിനും വില്ലേജ് ഓഫീസർക്കും എതിരേ മുഖ്യമന്ത്രിക്ക് പരാതി നൽകി ബിജോ മാണി

തൊടുപുഴ: നാരങ്ങാനത്തെ കൈവശഭൂമിയിലെ കുരിശ് പൊളിച്ച വനം വകുപ്പ് ഉദ്യോഗസ്ഥർക്കെതിരേയും ഈപ്രദേശം വനമാണെന്ന് തെറ്റായ റിപ്പോർട്ട് നൽകിയ വണ്ണപ്പുറം വില്ലേജ് ഓഫീസർക്കെതിരേയും നടപടി സ്വീകരിക്കണമെന്നാവശ്യപ്പെട്ട് ഡിസിസി ജനറൽ സെക്രട്ടറി ബിജോ മാണി മുഖ്യമന്ത്രിക്ക് പരാതി നൽകി. കുരിശ് സ്ഥാപിച്ചത് ജോയിന്‍റ് വെരിഫിക്കേഷനിൽ ഉൾപ്പെടാത്ത വനഭൂമിയിൽ ആയതിനാലാണ് പൊളിച്ചുമാറ്റിയതെന്നാണ് വനം വകുപ്പ് പറഞ്ഞത്. എന്നാൽ വനംവകുപ്പിന്‍റെ വാദം തെറ്റാണെന്ന് ഈ സ്ഥലത്ത് പരിശോധന നടത്തുന്പോഴും ഇതുമായി ബന്ധപ്പെട്ട രേഖകൾ പരിശോധിക്കുന്പോഴും വ്യക്തമാകും. കുരിശ് സ്ഥാപിച്ചിരുന്ന നാരങ്ങാനം, ജോയിന്‍റ് വെരിഫിക്കേഷനിൽ ഉൾപ്പെടാതെ പോയതായി പരാതിയുണ്ടെന്നു ജില്ലയിലെ ഭൂ പ്രശ്നങ്ങൾ പരിഹരിക്കാൻ 2016 ജനുവരി ഒന്നിനു മുഖ്യമന്ത്രി വിളിച്ചു ചേർത്ത യോഗത്തിൽ ജില്ലാ കളക്ടർ റിപ്പോർട്ട് ചെയ്യുകയും ജോയിന്‍റ് വെരിഫിക്കേഷനിൽ ഉൾപ്പെടാതെ പോയ പ്രാദേശങ്ങളിൽ ഇതു നടത്താൻ തീരുമാനിക്കുകയും ചെയ്തിരുന്നു. ഈ മേഖലയിൽ വനം വകുപ്പിന്‍റെ സ്ഥലം 1980 കാലഘട്ടത്തിൽ ജണ്ട കെട്ടി തിരിച്ചിട്ടുണ്ട്. കുരിശ് സ്ഥാപിച്ചിരുന്നത് ജണ്ടയ്ക്ക് പുറത്താണ്. ജോയിന്‍റ് വെരിഫിക്കേഷനിൽ ഉൾപ്പെടാത്ത കൈവശഭൂമിക്ക് പട്ടയം നൽകുന്നതിന് 2020 ജൂണ്‍ രണ്ടിന് 2020/2020 നന്പരായി റവന്യുവകുപ്പ് ഇറക്കിയ ഉത്തരവിൽ വനം വകുപ്പിന് ആവശ്യമുള്ള സ്ഥലം ജണ്ടകെട്ടി തിരിച്ചിട്ടുണ്ടെന്നും ജണ്ടയ്ക്ക് പുറത്തുള്ള സ്ഥലത്ത് വനം വകുപ്പിന് അവകാശമില്ലെന്നും വ്യക്തമാക്കിയിട്ടുണ്ട്. വനം വകുപ്പ് നടത്തിയ നിയമവിരുദ്ധ നടപടിയെ ന്യായീകരിക്കാൻ കുരിശ് സ്ഥാപിച്ചിരുന്ന പ്രാദേശമുൾപ്പെടെ 4005 ഏക്കർ വില്ലേജ് രേഖകൾ പ്രകാരം ജോയിന്‍റ് വെരിഫിക്കേഷനിൽ ഉൾപ്പെടാത്ത വനഭൂമിയാണെന്ന് 2025 ഏപ്രിൽ 15ന് വണ്ണപ്പുറം വില്ലേജ് ഓഫീസർ കാളിയർ റേഞ്ച് ഓഫീസർക്ക് തെറ്റായ റിപ്പോർട്ട് നൽകുകയുണ്ടായി. കാളിയാർ റേഞ്ചിലെ ജോയിന്‍റ് വെരിഫിക്കേഷൻ റിപ്പോർട്ട് വനം-റവന്യു വകുപ്പുകൾ അംഗീകാരം നൽകി പ്രസിദ്ധപ്പെടുത്തുന്നത് 1983 ഒക്‌ടോബർ 31 നാണ്. ഇതിന് 50 വർഷം മുൻപ് തയാറാക്കിയ വില്ലേജ് രേഖകൾ പ്രകാരം ഈ പ്രദേശം ജോയിന്‍റ് വെരിഫിക്കേഷൻ ലിസ്റ്റിൽ ഉൾപ്പെട്ടിട്ടില്ലന്ന് വില്ലേജ് ഓഫീസർക്ക് എങ്ങനെ പറയാൻ കഴിയും. 1983-ൽ പ്രസിദ്ധപ്പെടുത്തിയ ജോയിന്‍റ് വെരിഫിക്കേഷൻ ലിസ്റ്റിൽ വില്ലേജ് ഓഫീസർ 4005 ഏക്കർ വനമാണെന്ന് റിപ്പോർട്ട് നൽകിയ പ്രദേശങ്ങളിലെ നൂറുകണക്കിന് കൈവശങ്ങൾ ഉൾപ്പെടുകയും സർക്കാർ ഈ ഭൂമിക്ക് പട്ടയം നൽകുകയും ചെയ്തിട്ടുണ്ട്. ഈ വസ്തുതകൾ മറച്ചുവച്ചാണ് വില്ലേജ് ഓഫീസർ തെറ്റായ റിപ്പോർട്ട് നൽകിയത്. ജോയിന്‍റ് വെരിഫിക്കേഷനിൽ ഉൾപ്പെടാതെപോയ പ്രാദേശങ്ങളിൽ ജോയിന്‍റ് വെരിഫിക്കേഷൻ നടത്തി കൈവശഭൂമിക്ക് പട്ടയം നൽകാൻ സർക്കാർ തീരുമാനമെടുക്കുകയും ഇതു സംബന്ധിച്ച് സർക്കാർ ഉത്തരവിറക്കിയതിനു ശേഷം കൈവശഭൂമിയിൽ കടന്നുകയറി കുരിശ് പൊളിച്ച വനം വകുപ്പിന്‍റെ നടപടിയും ഇതിനെ ന്യായീകരിക്കാൻ വില്ലേജ് ഓഫീസർ തെറ്റായ റിപ്പോർട്ട് നൽകിയതും ഗൂഢാലോചനയാണ്. വനം-റവന്യു വകുപ്പുകളുടെ വാദം അംഗീകരിച്ചാൽ ഈ പ്രാദേശത്ത് കുടിയേറി നൂറ്റാണ്ടുകളായി താമസിച്ചുവരുന്ന ആയിരകണക്കിനു കർഷകർക്ക് പട്ടയം ലഭിക്കാതെവരും. ഇവർ ഇവിടെനിന്ന് കുടിയിറക്കപ്പെടുകയും ചെയ്യും. ഈ സാഹചര്യത്തിൽ കുറ്റക്കാർക്കെതിരെ കർശന നടപടി സ്വീകരിക്കണമെന്നും മുഖ്യമന്ത്രിക്ക് നൽകിയ പരാതിയിൽ ബിജോ മാണി ആവശ്യപ്പെട്ടു.

മലയോര ജനതയുടെ പ്രശ്നങ്ങൾ ചർച്ചചെയ്ത് മുഖ്യമന്ത്രി

നെടുങ്കണ്ടം: ജില്ലയിലെ മലയോര ജനതയുടെ വിവിധ പ്രശ്നങ്ങളും പരിഹാരങ്ങളും ചർച്ച ചെയ്ത് മുഖ്യമന്ത്രിയുടെ ജില്ലാതല യോഗം. തോട്ടം മേഖല, പുതിയ കോഴ്സുകൾ, മൂന്നാറിലെ ടൂറിസം വികസനം, പ്രകൃതി ദുരന്തങ്ങളെ പ്രതിരോധിക്കാനുള്ള കർമ സമിതി രൂപീകരണം, ഭിന്നശേഷിക്കാരുടെ പ്രശ്നങ്ങൾ, ഇടുക്കി മെഡിക്കൽ കോളജിന്‍റെയും ജില്ലാ ആശുപത്രിയുടെയും വികസനം, ക്ഷീര വികസനം, വന്യമൃഗ ആക്രമണം തുടങ്ങി വിവിധ മേഖലകളുമായി ബന്ധപ്പെട്ട് ചർച്ച നടന്നു. സംസ്ഥാനത്തെ വിദ്യാഭ്യാസമേഖല രാജ്യത്തിന് മാതൃകയാണെന്ന് മുഖ്യമന്ത്രി പിണറായി വിജയൻ പറഞ്ഞു. സ്കൂളുകളിലും കോളജുകളിലും അടിസ്ഥാനവികസനം ഉൾപ്പെടെ നൂതന കോഴ്സുകൾ ആരംഭിച്ച് വിദ്യഭ്യാസ രംഗത്ത് സമഗ്രമാറ്റമാണ് സർക്കാർ നടപ്പാക്കുന്നത്. കുട്ടികൾ രാജ്യത്തിനു പുറത്തുപോയി പഠിക്കുന്നത് അവരുടെ തീരുമാനമാണ്. നിർമാണ മേഖല സംബന്ധിച്ച ക്വാറികളുടെ പ്രവർത്തനം ഹൈക്കോടതി തടഞ്ഞതിനാലാണ് പ്രശ്നങ്ങൾ ഉണ്ടായത്. എന്നാൽ ഇതു സംബന്ധിച്ചു സർക്കാർ തുടർനടപടികൾ സ്വീകരിച്ചുവരികയാണ്. വിവിധ പ്രദേശങ്ങളിൽനിന്ന് നിർമാണ സാമഗ്രികൾ ഇവിടെ എത്തിക്കുക പ്രയാസമാണ്. അതിനാൽ നിർമാണ പ്രവർത്തനങ്ങൾക്ക് ക്വാറികൾ പ്രവർത്തിക്കേണ്ടത് ആവശ്യമാണെന്നും മുഖ്യമന്ത്രി പറഞ്ഞു. ഏലത്തോട്ടവുമായി ബന്ധപ്പെട്ട വിഷയങ്ങളിൽ ആശങ്കകൾ വേണ്ട. വന്യജീവി ആക്രമണം പ്രതിരോധിക്കാൻ തദ്ദേശ സ്വയംഭരണ സ്ഥാപനങ്ങളും വനംവകുപ്പും സംയുക്തമായി വിവിധ പദ്ധതികൾ നടപ്പാക്കുന്നുണ്ട്. വന്യജീവികൾക്ക് വനത്തിനുള്ളിൽത്തന്നെ വെള്ളവും ഭക്ഷണവും ലഭ്യമാക്കാൻ വനം വകുപ്പ് നടപടി സ്വീകരിച്ചു വരികയാണ്. ഇതിന്‍റെ ഭാഗമായി കുളങ്ങളും മഴവെള്ള സംഭരണികളും നിർമിക്കുന്നുണ്ട്. വന്യജീവികൾ നാട്ടിലേക്ക് ഇറങ്ങാതിരിക്കാൻ കിടങ്ങുകളും വൈദ്യുത സോളാർ ഫെൻസിംഗുകളും സ്ഥാപിക്കുന്നുണ്ട്. വനം വന്യജീവി സംരക്ഷണ നിയമത്തിൽ കാലാനുസൃതമായി മാറ്റം വരുത്തണമെന്ന് നിരന്തരമായി കേന്ദ്ര സർക്കാരിനോട് സംസ്ഥാന സർക്കാർ ആവശ്യപ്പെടുന്നുണ്ട്. വനാതിർത്തിയിലുള്ളവരെ ഒഴിപ്പിക്കുന്ന നടപടി സർക്കാർ സ്വീകരിക്കില്ലെന്നും പുനരധിവാസത്തിനാണ് പ്രാധാന്യമെന്നും മുഖ്യമന്ത്രി വ്യക്തമാക്കി. ജില്ലയിൽ പരിസ്ഥിതി സൗഹാർദ അന്തരീക്ഷം നിലനിർത്തി ടൂറിസം ശക്തിപ്പെടുത്തുന്നതാണ് സർക്കാർ നയം. ടൂറിസം കേന്ദ്രങ്ങളെ അന്താരാഷ്‌ട്ര നിലവാരത്തിലേക്ക് ഉയർത്തുന്നതിനാവശ്യമായ നടപടികളാണ് സ്വീകരിച്ചു വരുന്നത്. തോട്ടംമേഖല, ദുരന്ത നിവാരണ ടാസ്ക് ഫോഴ്സ്, ആരോഗ്യ മേഖല, ക്ഷീരമേഖല, കാർഷിക മേഖല, ഭൂപ്രശ്നം തുടങ്ങി വിവിധ മേഖലയുമായി ബന്ധപ്പെട്ട് ഉയർന്നുവന്ന ചോദ്യങ്ങൾക്കും മുഖ്യമന്ത്രി മറുപടി നൽകി. ജില്ലാ ഇൻഫർമേഷൻ ഓഫീസ് പുറത്തിറക്കിയ ജില്ലയുടെ വികസന പുരോഗതി രേഖ വികസന വഴിയിൽ എന്‍റെ ഇടുക്കി മുഖ്യമന്ത്രി പിണറായി വിജയൻ മന്ത്രി റോഷി അഗസ്റ്റിന് നൽകി പ്രകാശനം ചെയ്തു.

മുളകുവള്ളി പള്ളി തിരുനാളിനും രജതജൂബിലിക്കും കൊടിയേറി

ചെറുതോണി: മുളകുവള്ളി പള്ളിയിൽ സെന്‍റ് ജോസഫ് പള്ളി രജത ജൂബിലിക്കും തിരുനാൾ ആഘോഷങ്ങൾക്കും കൊടിയേറിയതായി ഇടവക വികാരി ഫാ. ജോബി പൂവത്തിങ്കൽ, അസിസ്റ്റന്‍റ് വികാരി ഫാ. ജസ്റ്റിൻ കൈമലയിൽ എന്നിവർ അറിയിച്ചു. 21ന് ആരംഭിച്ച തിരുനാൾ ഫ്രാൻസിന് മാർപ്പാപ്പയുടെ ദേഹവിയോഗത്തത്തുടർന്ന് ആഘോഷങ്ങൾ ഒഴിവാക്കിയാണ് നടത്തിയത്. ഇന്ന് ഇടവകയിലെ വൈദിക -സമർപ്പിത സംഗമം. വൈകുന്നേരം 4.30 ന് ലദീഞ്ഞ്, നൊവേന, തിരുനാൾ കുർബാന, സന്ദേശം - ഫാ. പ്രിൻസ് ഉറുമ്പിൽ, ഫാ. ജോസഫ് വട്ടപ്പാറ. 6.30ന് ഭക്തസംഘടനകളുടെ വാർഷികം. മതബോധന ഡയറക്ടർ ഫാ. ഫിലിപ് ഐക്കര മുഖ്യാതിഥിയായി പങ്കെടുക്കും. നാളെ വൈകുന്നേരം 4.30ന് പൊന്തിഫിക്കൽ കുർബാന - ഇറ്റാനഗർ രൂപത മെത്രാൻ മാർ ബെന്നി ഇടത്തട്ടേൽ. ആറിന് പ്രദക്ഷിണം, സ്നേഹവിരുന്ന്, ആകാശവിസ്മയം. 7.30 ന് പാലാ കമ്യൂണിക്കേഷൻസ് അവതരിപ്പിക്കുന്ന നാടകം. മേയ് ഒന്നിനു ജൂബിലി സമാപനം. വൈകുന്നേരം 4.30ന് ആഘോഷമായ പൊന്തിഫിക്കൽ കുർബാന, സന്ദേശം - ഇടുക്കി മെത്രാൻ മാർ ജോൺ നെല്ലിക്കുന്നേൽ. ആറിന് രജത ജൂബിലി സമാപന സമ്മേളനം. മന്ത്രി റോഷി അഗസ്റ്റിൻ ഉദ്ഘാടനം ചെയ്യും. മാർ ജോൺ നെല്ലിക്കുന്നേൽ അധ്യക്ഷത വഹിക്കും. ഡീൻ കുര്യാക്കോസ് എം പി സ്മരണിക പ്രകാശനം ചെയ്യും. 7ന് സ്നേഹ വിരുന്ന്. 7.30 ന് പത്തനംതിട്ട സാരംഗിന്‍റെ ഗാനമേള.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]