ADVERTISEMENT

ADVERTISEMENT

മികച്ച വിദ്യാർഥികൾക്ക് കെമിസ്ട്രി അധ്യാപകരുടെ ആദരം

തൃശൂർ: അസോസിയേഷന്‍ ഓഫ് കെമിസ്ട്രി ടീച്ചേഴ്സ് (ആക്റ്റ്) തൃശൂരിന്‍റെ നേതൃത്വത്തില്‍ ഹയര്‍സെക്കൻഡറി പൊതുപരീക്ഷയില്‍ 1200 മാര്‍ക്കും നേടിയ നാലു വിദ്യാര്‍ഥികളെയും രസതന്ത്രത്തില്‍ മുഴുവന്‍ മാര്‍ക്ക് വാങ്ങിയ 86 വിദ്യാര്‍ഥികളെയും ആദരിച്ചു.

വിവേകോദയം ഹയര്‍ സെക്കൻഡറി സ്കൂളില്‍ നടന്ന അനുമോദനയോഗം മന്ത്രി ഡോ. ആർ. ബിന്ദു ഉദ്ഘാടനം ചെയ്തു. ആക്റ്റ് പ്രസിഡന്‍റ് ഡോ. എസ്. സിന്ധു അധ്യക്ഷയായി. എറണാകുളം റീജണല്‍ ഡെപ്യൂട്ടി ഡയറക്ടര്‍ പി.ജി. ദയ മുഖ്യാതിഥിയായി.

ക്രൈസ്റ്റ് എന്‍ജിനിയറിംഗ് കോളജ് വൈസ് പ്രിന്‍സിപ്പല്‍ ഡോ. വി.ഡി. ജോണ്‍ മുഖ്യപ്രഭാഷണം നടത്തി. ഡോ. അബി പോൾ, ജി. റസൽ, സി.ജെ. ഷീന, സിന്ധു എം.ചന്ദ്രൻ, പി.വി. മരിയജിനി എന്നിവർ പ്രസംഗിച്ചു.

ADVERTISEMENT

തമിഴ്നാട് സ്വദേശിക്കു സുരക്ഷയൊരുക്കി സാമൂഹികനീതിവകുപ്പ്

എടത്തിരുത്തി: ചൂലൂരിൽ നിർധനനായി കഴിഞ്ഞിരുന്ന തമിഴ്നാട് സ്വദേശി മൂർത്തിക്ക് സുരക്ഷയൊരുക്കി സാമൂഹികനീതിവകുപ്പ്. വകുപ്പിന്‍റെ കീഴിൽ പ്രവർത്തിക്കുന്ന ഗുരുവായൂർ കോട്ടപ്പടി അഭയഭവനിലാണ് 64 വയസുള്ള മൂർത്തിക്ക് അഭയമൊരുക്കിയത്. വർഷങ്ങൾക്കുമുമ്പ് തമിഴ്നാട്ടിൽനിന്ന് കയ്പമംഗലം ഭാഗത്തെത്തി തന്നാലാകുന്ന ചെറിയ ജോലികൾ ചെയ്തുകഴിയുകയായിരുന്നു മൂർത്തി. ഇപ്പോൾ വാർധക്യത്തിന്‍റെ അവശതകൾകാരണം തൊഴിലെടുക്കുവാൻ സാധിക്കാതെ നാട്ടുകാരുടെ കരുണയിലാണ് കഴിയുന്നത്. കൂടാതെ പഞ്ചായത്ത് അതിദരിദ്രരുടെ പട്ടികയിൽ ഉൾപ്പെടുത്തി ഭക്ഷ്യധാന്യങ്ങൾ നൽകിയിരുന്നു. നടക്കാനും സംസാരിക്കാനും ബുദ്ധിമുട്ടുള്ള മൂർത്തിക്ക് മറ്റു അവശതകൾ ഉണ്ടാകുന്നതിനുമുൻപേ അഭയം ഒരുക്കുകയാണ് ചെയ്തത്. എടത്തിരുത്തി ചൂലൂർ ഭാഗത്ത് വാട്ടർടാങ്കിനുതാഴെ കഴിഞ്ഞിരുന്ന മൂർത്തിയെ എടത്തിരുത്തി ഗ്രാമപഞ്ചായത്ത് അധികൃതരുടെ അറിയിപ്പിൽ ജില്ലാ സാമൂഹികനീതി ഓഫീസർ കെ.ആർ. പ്രദീപന്‍റെ നിർദേശപ്രകാരമാണ് അഭയകേന്ദ്രത്തിലേക്ക് മാറ്റിയിട്ടുള്ളത്. എടത്തിരുത്തി ഗ്രാമപഞ്ചായത്ത് പ്രസിഡന്‍റ് ടി.കെ. ചന്ദ്രബാബു, വാർഡ് മെമ്പർ എ.വി. ഗിരിജ, സാമൂഹികനീതി വകുപ്പ് കൗൺസിലർ ദിവ്യ, കയ്പമംഗലം എസ്ഐ ഹരിഹരൻ തുടങ്ങിയവരുടെ നേതൃത്വത്തിലാണ് അഭയകേന്ദ്രത്തിലേക്ക് മാറ്റിയത്.

ഇതരസംസ്ഥാനതൊഴിലാളിയെ ആക്രമിച്ച കേസിൽ കത്തി രാജേഷ് അറസ്റ്റിൽ

കയ്പമംഗലം: ഇതരസംസ്ഥാന തൊഴിലാളിയെ ആക്രമിച്ചു പരിക്കേൽപ്പിച്ച കേസിൽ വലപ്പാട് സ്വദേശി അറസ്റ്റിൽ. പനച്ചിച്ചുവട് ഉന്നതി സ്വദേശി പുത്തൻവീട്ടിൽ രാജേഷിനെ(കത്തി രാജേഷ്-43)യാണ് പോലീസ് അറസ്റ്റ് ചെയ്തത്. കയ്പമംഗലം ചാമക്കാല ബീച്ച് പാലസ് ഓഡിറ്റോറിയത്തിനുസമീപംവച്ച് വെസ്റ്റ് ബംഗാൾ സ്വദേശി റാബിയൂർ ഹുസൈൻ ധബക്കിനോട് പ്രതി ബീഡി ചോദിക്കുകയും നൽകാത്തതിലുള്ള വൈരാഗ്യത്താൽ മരവടികൊണ്ട് ആക്രമിച്ച് കൊലപ്പെടുത്താൻ ശ്രമിച്ചുവെന്നാണ് കേസ്. രാജേഷിനെതിരേ പഴയന്നൂർ പോലീസ് സ്റ്റേഷനിൽ ഒരു കവർച്ചാക്കേസും വലപ്പാട് പോലീസ് സ്റ്റേഷനിൽ ഒരു വധശ്രമക്കേസും ഏഴ് അടിപിടിക്കേസുകളും കയ്പമംഗലം പോലീസ് സ്റ്റേഷനിൽ ഒരു അടിപിടിക്കേസും ലഹരി ഉപയോഗിച്ച് പൊതുജനശല്യമുണ്ടാക്കിയതിനു ഒരു കേസുമുണ്ട്. ഈ കേസിലെ പ്രതികളായ ചാമക്കാല സ്വദേശികളായ ചാരിച്ചെട്ടിവീട്ടിൽ രതീഷ് എന്ന് വിളിക്കുന്ന രമേഷ്, പടവലപ്പറമ്പിൽ വീട്ടിൽ ബാദുഷ എന്നിവരെ നേരത്തെ കയ്പമംഗലം പോലീസ് അറസ്റ്റ് ചെയ്തു. കയ്പമംഗലം സ്റ്റേഷൻ ഇൻസ്പെക്ടർ കെ.ആർ. ബിജു, സബ് ഇൻസ്പെക്ടർ അഭിലാഷ്, സീനിയർ സിപിഒ ഗിരീശൻ, സിപിഒ സൂരജ്, വിനുകുമാർ എന്നിവർചേർന്നാണ് പ്രതികളെ അറസ്റ്റ് ചെയ്തത്.

ഇരിങ്ങാലക്കുട റെയില്‌വേ സ്റ്റേഷന്‌: കാടുകയറി നശിക്കാന്‍ ഒരു ഗുഡ്‌സ് യാര്‍ഡ്

കല്ലേറ്റുംകര: ഇരിങ്ങാലക്കുട റെയില്‍വേ സ്‌റ്റേഷനോടുള്ള അധികൃതരുടെ അവഗണനയുടെ മറ്റൊരു മുഖമാണ് കാടുകയറിനശിക്കുന്ന റെയില്‍വേ ഗുഡ്‌സ് യാര്‍ഡ്. ഒരുകാലത്ത് തൃശൂര്‍ കഴിഞ്ഞാല്‍ ഏറ്റവുംകൂടുതല്‍ ചരക്ക് ഉത്പന്നങ്ങള്‍ കയറ്റിറക്കുനടന്നിരുന്ന ഗുഡ്‌സ് യാര്‍ഡ് നാല്പതുവര്‍ഷത്തിലേറെയായി ഉപയോഗശൂന്യമായി കിടക്കുകയാണ്. വെയ്റ്റിംഗ് ബ്രിഡ്ജ്, സാധനങ്ങള്‍ സൂക്ഷിക്കാനുള്ള മുറി, ഇലക്ട്രിക് ലൈന്‍വരെ നേരത്തെ റെയില്‍വേ ഇതിലേക്കായി വലിച്ചിട്ടിട്ടുണ്ട്. എന്നിട്ടും ഇപ്പോഴും ഗുഡ്‌സ് യാര്‍ഡ് പുനഃരാരംഭിക്കാനുള്ള നടപടികള്‍ ആരംഭിക്കാന്‍ അധികൃതര്‍ക്ക് സാധിച്ചിട്ടില്ല. ചുമട്ടുതൊഴിലാളി സംഘടനകള്‍ തമ്മിലുള്ള പ്രശ്‌നങ്ങളെത്തുടര്‍ന്നുണ്ടായ ചില രാഷ്ട്രീയ ഇടപെടലുകളാണ് ഗുഡ്‌സ് യാര്‍ഡ് പ്രവര്‍ത്തനംനിലയ്ക്കാന്‍ കാരണമായത്. കല്ലേറ്റുംകരയിലുള്ള പൊതുമേഖലാസ്ഥാപനമായ കേരള ഫീഡ്‌സ്, ഇരിങ്ങാലക്കുടയിലുള്ള കെഎസ്ഇ അടക്കമുള്ള വലിയ സ്ഥാപനങ്ങളിലേക്കും സമീപത്തുള്ള ഇന്‍ഡസ്ട്രിയല്‍ എസ്റ്റേറ്റ് അടക്കമുള്ള സ്ഥലങ്ങളിലേക്കും മറ്റ് ചെറുകിട സ്ഥാപനങ്ങളിലേക്കുമുള്ള അസംസ്‌കൃത ഉത്പന്നങ്ങള്‍ വന്നിരുന്നതും അതുപോലെ ഇവിടെയുണ്ടാക്കുന്ന ഉത്പന്നങ്ങള്‍ കയറ്റി അയച്ചിരുന്നതും ഇവിടെ നിന്നായിരുന്നു. തേങ്ങ ഉള്‍പ്പടെയുള്ള കാര്‍ഷികവിളകളും വലിയ തോതില്‍ ഇവിടെനിന്ന് കയറ്റി അയച്ചിരുന്നു. എന്നാലിപ്പോള്‍ ചരക്കുനീക്കത്തിന് തൃശൂരിനേയും ചാലക്കുടിയേയും ആശ്രയിക്കേണ്ട അവസ്ഥയാണ്. യാത്രാ ട്രെയിനുകളിലുള്ള ഗുഡ്‌സ് വാഗണില്‍ ഇരിങ്ങാലക്കുടയില്‍നിന്ന് കാര്‍ഷികോത്പന്നങ്ങള്‍ കൊണ്ടുപോയിരുന്നു. ഒന്നരകോടിയോളംരൂപയാണ് ഈ ഇനത്തില്‍ മാസംതോറും റെയില്‍വേയ്ക്ക് ലഭിച്ചുകൊണ്ടിരുന്നത്. എന്നാല്‍ രണ്ടുമിനിറ്റില്‍ താഴെ ട്രെയിനുകള്‍ നിര്‍ത്തുന്ന സ്റ്റേഷനുകളില്‍നിന്ന് ചരക്കുകള്‍ കയറ്റേണ്ടതില്ലെന്ന തീരുമാനം വന്നതോടെ ഗുഡ്‌സ് വാഗണിലൂടെയുള്ള ചരക്കുനീക്കവും നിലച്ചു. കൂടാതെ പത്തുപോര്‍ട്ടര്‍മാരുടെ ജോലിയും ഇതോടൊപ്പം നഷ്ടപ്പെട്ടു. കാടുവെട്ടിത്തെളിച്ച് റെയില്‍വേയുടെ സ്ഥലങ്ങള്‍ ഉപയോഗപ്പെടുത്തി വലിയ ഗോഡൗണുകളും നിര്‍മിച്ച് യാര്‍ഡിന്‍റെ പ്രവര്‍ത്തനം ആരംഭിച്ചാല്‍ കോടിക്കണക്കിന് രൂപയുടെ വരുമാനം ഇതിലൂടെ റെയില്‍വേയ്ക്ക് ഉണ്ടാക്കാന്‍ കഴിയും. അതിന് അധികൃതരുടെ ഭാഗത്തുനിന്ന് അനുകൂല നടപടിയുണ്ടാകണമെന്നാണ് നാട്ടുകാരുടെ ആവശ്യം.

കാട്ടിക്കുളം ഭരതന്‌: അനുശോചനയോഗം ഇന്ന്

ഇരിങ്ങാലക്കുട: മനുഷ്യസ്‌നേഹപ്രേരിതവും ജീവകാരുണ്യപരവുമായ എല്ലാ പ്രവര്‍ത്തനങ്ങളിലും മുന്നില്‍നിന്ന വ്യക്തിത്വമാണ് കാട്ടിക്കുളം ഭരതനെന്ന് മന്ത്രി ഡോ. ആര്‍. ബിന്ദു. സാമ്പത്തികവും സാമൂഹ്യവുമായി പിന്‍നിലയിലുള്ളവര്‍ക്ക് സഹായഹസ്തം നീട്ടുകയും അത്തരം കുടുംബങ്ങളില്‍നിന്നുള്ള കുട്ടികള്‍ക്ക് മികച്ച വിദ്യാഭ്യാസ സാഹചര്യങ്ങള്‍ ഉറപ്പാക്കാന്‍ പരിശ്രമിക്കുകയും ചെയ്ത വ്യക്തിയാണ്. ഇരിങ്ങാലക്കുടയിലെ ഏതു വികസനപ്രവര്‍ത്തനത്തിലും സഹകരിച്ചു. കോവിഡ് കാലത്തുള്‍പ്പടെ നാടിനെയും നാട്ടുകാരെ യും ചേര്‍ത്തുപിടിച്ചു. ശ്രീനാരായണ സന്ദേശങ്ങളുടെ ഉത്തമപ്രചാരകനായി മാനുഷികമൂല്യങ്ങള്‍ ഉയര്‍ത്തിപ്പിടിച്ചു. കാണുമ്പോഴൊക്കെയും സ്‌നേഹത്തോടെ കരംപിടിക്കുകയും കണ്ണീര്‌ വാര്‍ക്കുകയും ചെയ്തിരുന്ന ഭരതേട്ടന്‍ വ്യക്തിപരമായി പ്രകടിപ്പിച്ചിരുന്ന സവിശേഷവാത്സല്യം വല്ലാത്ത നഷ്ടബോധത്തോടെ ഓര്‍ക്കുന്നതായി മന്ത്രി സൂചിപ്പിച്ചു. ഇരിങ്ങാലക്കുടയെന്ന നാടിനെ ഹൃദയത്തോടുചേര്‍ത്തുവച്ച മനുഷ്യസ്‌നേഹിയാണ് കാട്ടിക്കുളം ഭരതനെന്ന എല്ലാവരുടെയും പ്രിയപ്പെട്ട ഭരതേട്ടനെന്നു തോമസ് ഉണ്ണിയാടന്‍ പറഞ്ഞു. ഇരിങ്ങാലക്കുടയുടെ സാമൂഹിക, സാംസ്‌കാരിക, വിദ്യാഭ്യാസമേഖലകളിലെ നിറസാന്നിധ്യമായിരുന്നു. ശ്രീനാരായണീയ പ്രസ്ഥാനങ്ങളിലൂടെയും ശ്രദ്ധേയമായ പ്രവര്‍ത്തനങ്ങളാണ് ഇദ്ദേഹം സംഘടിപ്പിച്ചിട്ടുള്ളതെന്നും ഉണ്ണിയാടന്‍ പറഞ്ഞു. കാട്ടിക്കുളം ഭരതന്‍റെ വിയോഗത്തില്‍ ഇരിങ്ങാലക്കുട പൗരാവലിയുടെ ആഭിമുഖ്യത്തില്‍ ഇന്ന് അനുശോചനയോഗം ചേരും. സംസ്‌കാര ചടങ്ങുകള്‍ക്കുശേഷം വൈകീട്ട് 5.30ന് ഇരിങ്ങാലക്കുട ടൗണ്‍ഹാളില്‍ അനുശോചനയോഗം നടക്കുമെന്നു മന്ത്രി ഡോ.ആര്‍. ബിന്ദു അറിയിച്ചു.

പേരാമ്പ്ര പള്ളിയിൽ ഊട്ടുതിരുനാളിനു കൊടിയേറി

കൊടകര: പേരാമ്പ്ര സെന്‍റ് ആന്‍റണീസ് ദേവാലയത്തിലെ ഇടവകമധ്യസ്ഥനായ വിശുദ്ധ അന്തോണീസിന്‍റെ ഊട്ടുതിരുനാളാഘോഷങ്ങള്‍ക്കു കൊടിയേറി. വികാരി ഫാ. ഷാജു കാച്ചപ്പിള്ളി കൊടികയറ്റം നിര്‍വഹിച്ചു. 15നാണ് ഊട്ടുതിരുനാള്‍. പതിനൊന്നായിരംപേര്‍ക്കാണ് ഈ വര്‍ഷം ഊട്ടുതിരുനാളിന് നേര്‍ച്ചഭക്ഷണം ഒരുക്കുന്നത്. 14 വരെ നവനാള്‍തിരുക്കര്‍മങ്ങള്‍ നടക്കും. 14നു വൈകീട്ട് ഫാ. ജോസഫ് മാളിയേക്കലിന്‍റെ കാര്‍മികത്വത്തിലുള്ള വിശുദ്ധ കുര്‍ബാനയ്ക്കുശേഷം വിശുദ്ധ അന്തോണീസിന്‍റെ തിരുസ്വരൂപം പുറത്തേക്ക് എഴുന്നള്ളിക്കും. അന്തോണിനാമധാരികളുടെ സംഗമവും ഉണ്ടാകും. തിരുനാള്‍ദിനമായ 15ന് രാവിലെ ഫാ. ജോബി കുര്യന്‍ വട്ടക്കുന്നേലിന്‍റെ കാര്‍മികത്വത്തില്‍ വിശുദ്ധകുര്‍ബാന, ഊട്ടുനേര്‍ച്ച വെഞ്ചരിപ്പ്, 10.30ന് ഫാ. അമല്‍ മാളിയേക്കലിന്‍റെ കാര്‍മികത്വത്തില്‍ ആഘോഷമായ തിരുനാള്‍കുര്‍ബാന, ലദീഞ്ഞ്, നൊവേന, ഫാ. ജിജി കുന്നേലിന്‍റെ സന്ദേശം. തുടര്‍ന്ന് പ്രദക്ഷിണം, തിരുസ്വരൂപം അള്‍ത്താരയില്‍ തിരികെ പ്രതിഷ്ഠിക്കല്‍, നേര്‍ച്ചസദ്യ എന്നിവ നടക്കും. പത്രസമ്മേളനത്തില്‍ വികാരി ഫാ. ഷാജു കാച്ചപ്പിള്ളി, കൈക്കാരന്‍ ബാബു ഐസക്, ജനറല്‍ കണ്‍വീനര്‍ പോള്‍സന്‍ ആലപ്പാട്ട്, പബ്ലിസിറ്റി കണ്‍വീനര്‍ വര്‍ഗീസ് പന്തല്ലൂക്കാരന്‍ എന്നിവര്‍ പങ്കെടുത്തു.

പെര്‍മിറ്റ് ലംഘനം; ഇരിങ്ങാലക്കുട - തൃപ്രയാര്‍ റൂട്ടില്‍ മൂന്നു ബസുകള്‍ക്കു പിഴ

ഇരിങ്ങാലക്കുട: തൃപ്രയാര്‍ റൂട്ടില്‍ സര്‍വീസ് നടത്താതെ പെര്‍മിറ്റ് ലംഘനം നടത്തിയ ബസുകള്‍ കണ്ടെത്തി മോട്ടോര്‍ വാഹനവകുപ്പ് എന്‍ഫോഴ്സ്മെന്‍റ് വിഭാഗം പിഴ ഈടാക്കി. തൃപ്രയാര്‍ - ഇരിങ്ങാലക്കുട റൂട്ടിലോടുന്ന കൃഷ്ണസിന്‍റെ രണ്ടു ബസുകളും മംഗലത്ത് ബസുമാണ് എന്‍ഫോഴ്സ്മെന്‍റ് വിഭാഗം ഇന്‍സ്പെക്ടര്‍ പി.വി. ബിജു, അസി. ഇന്‍സ്പെക്ടര്‍ കെ. വിപിന്‍ എന്നിവരുടെ നേതൃത്വത്തില്‍ പിടികൂടിയത്. രാത്രി ബസുകള്‍ സര്‍വീസ് നടത്താത്തതുമൂലം വ്യാപാരസ്ഥാപനങ്ങളില്‍നിന്നുള്ള ജീവനക്കാര്‍ക്ക് യാത്രാ ബുദ്ധിമുട്ട് നേരിടുന്നതായി പരാതി ലഭിച്ചതിനെത്തുടര്‍ന്നാണ് കഴിഞ്ഞദിവസം എന്‍ഫോഴ്സ്മെന്‍റ് പരിശോധന നടത്തി വണ്ടികള്‍ പിടികൂടിയത്. കാട്ടൂര്‍ പെട്രോള്‍പമ്പിനു സമീപത്തുനിന്ന് കൃഷ്ണസിന്‍റെ രണ്ടുബസുകളും വെള്ളാനിയിലുള്ള മംഗലത്തിന്‍റെ ഷെഡില്‍നിന്ന് മറ്റൊരു ബസുമാണ് പിടികൂടിയത്. മൂന്നു ബസുകളുടെ ഉടമസ്ഥരില്‍നിന്നായി മുപ്പതിനായിരത്തോളംരൂപ പിഴയും ഈടാക്കിയിട്ടുണ്ട്. കഴിഞ്ഞയാഴ്ചയും പെര്‍മിറ്റിലുള്ളതുപോലെ സര്‍വീസ് നടത്താതിരുന്ന സ്വകാര്യ ബസില്‍നിന്ന് എന്‍ഫോഴ്സ്മെന്‍റ് വിഭാഗം പിഴ ഈടാക്കിയിരുന്നു.

കൊരട്ടി കോൺഗ്രസിലെ പോര് മറനീക്കി പുറത്തേക്ക്

കൊരട്ടി: മുമ്പെങ്ങുമില്ലാത്തവിധം കൊരട്ടി കോൺഗ്രസിൽ ഗ്രൂപ്പ് പോര് മറനീക്കി പുറത്തേക്ക്. മണ്ഡലം പ്രസിഡന്‍റിന്‍റെ ചുമതല കൈമാറ്റം ചെയ്യുന്നതിനായി ഏദൻ ഓഡിറ്റോറിയത്തിൽ കഴി ഞ്ഞ ദിവസം ചേർന്ന യോഗം വാഗ്വാദങ്ങൾക്കുപിന്നാലെ ഏറ്റുമുട്ടലിന്‍റെ വക്കോളമെത്തിയാണ് പിരിഞ്ഞത്. യോഗത്തിന്‍റെ തുടക്കംമുതൽ തർക്കത്തിലേക്കുനീങ്ങി. എംഎൽഎ അടക്കമുള്ള നേതാക്കളെ ഒരുവിഭാഗം തടഞ്ഞുവച്ചു. പിന്നീട് പ്രതിഷേധസ്വരം ഉയർത്തിയവർ പിരിഞ്ഞുപോയതിനുശേഷം പ്രസിഡന്‍റ് ചുമതല കൈമാറിയെന്നു നേതാക്കൾ പ്രഖ്യാപിക്കുകയായിരുന്നു. ഇതോടെ പ്രതിഷേധക്കാർ നിലപാട് കടുപ്പിക്കാനും ഇവർക്കെതിരേ ജില്ലാ നേതൃത്വം കടുത്ത നടപടിയിലേക്ക് നീങ്ങാനും സാധ്യതയേറി. പഞ്ചായത്ത് തെരഞ്ഞെടുപ്പ് ആസന്നമായിരിക്കെ കൊരട്ടി കോൺഗ്രസ് ഗുരുതരമായ പ്രതിസന്ധിയിലേക്ക് കടക്കുമെന്ന് ഉറപ്പായി. സംഭവത്തിലേക്ക് നയിച്ചത്: കൊരട്ടി മണ്ഡലം കോൺഗ്രസ് പ്രസിഡന്‍റ് അവധിയെടുത്ത് വിദേശത്തേക്കു പോകുന്നതിനെത്തുടർന്ന് പകരക്കാരനെ നിയമിക്കുന്നതുമായി ബന്ധപ്പെട്ടാണ് തർക്കം രൂപപ്പെട്ടത്. നിലവിൽ എ ഗ്രൂപ്പാണ് പ്രസിഡന്‍റ് സ്ഥാനം കൈയാളുന്നത്. ഐ ഗ്രൂപ്പിന്‍റെ മുൻനിരയിൽനിന്ന് വർഷങ്ങളായി പ്രവര്‌ത്തിച്ച വ്യക്തിയെ അടർത്തിയെടുത്ത് മണ്ഡലം പ്രസിഡന്‍റിന്‍റെ ചാർജ് കൊടുക്കാനുള്ള നീക്കമാണ് മറുവിഭാഗത്തെ ചൊടിപ്പിച്ചത്. യാതൊരു കൂടിയാലോചനകളുമില്ലാതെ തന്‍റെ ഗ്രൂപ്പ് ശക്തീകരിക്കുന്നതിനുള്ള എംഎൽഎയുടെ വഴിവിട്ട ഇടപെടലാണ് ഇതിനുപിന്നിലെന്നാണ് ആരോപണം. എന്നാൽ ആരോപണം എംഎൽഎ നിഷേധിച്ചിരുന്നു. കെഎസ്‌യു കാലഘട്ടം മുതൽ നാളിതുവരെ പ്രസ്ഥാനത്തിലെ പല സ്ഥാനങ്ങളും വഹിച്ചുപോന്ന വ്യക്തി സ്ഥാനമോഹത്തിന്‍റെ പേരിൽ സ്വന്തം ടീമിനെ തള്ളിപ്പറഞ്ഞതായും ഇവർ ആരോപിച്ചിരുന്നു. ഇക്കഴിഞ്ഞ 27നു പുതിയ മണ്ഡലം പ്രസിഡന്‍റിന്‍റെ സ്ഥാനാരോഹണച്ചടങ്ങ് ഒരു വിഭാഗത്തിന്‍റെ ശക്തമായ എതിർപ്പിനെതുടർന്നു നടന്നില്ല. തർക്കം വാഗ്വാദത്തിനപ്പുറത്തേക്കു നീങ്ങുന്ന സ്ഥിതിവന്നപ്പോൾ കൂടിയാലോചനയ്ക്കുശേഷം മറ്റൊരു ദിവസം നടത്താമെന്ന മണ്ഡലത്തിന്‍റെ ചാർജ് വഹിക്കുന്ന നേതാവിന്‍റെ ഉറപ്പിൽ നെഹ്റു അനുസ്മരണത്തിലൊതുക്കി മീറ്റിംഗ് അവസാനിപ്പിക്കുകയായിരുന്നു. എന്നാൽ പ്രതിഷേധസ്വരമുയർത്തിയ സിബി തെക്കിനിയത്ത്, ലിജോയ് ചാമക്കാല, ഷാജു കള്ളിയത്ത് എന്നിവരെ 31ന് ജില്ലാ പ്രസിഡന്‍റ് അന്വേഷണവിധേയമായി സസ്പെൻഡ് ചെയ്തു. മനേഷ് സെബാസ്റ്റ്യൻ, ജോമോൻ ആട്ടോക്കാരൻ എന്നിവരുടെപേരിൽ കാരണം കാണിക്കൽ നോട്ടീസും നൽകി. തുടർന്നാണ് വ്യാഴാഴ്ച വൈകീട്ട് അഞ്ചരയോടെ നിർദിഷ്ട വ്യക്തിയെത്തന്നെ ചുമതല ഏൽപിക്കാൻചേർന്ന യോഗം ഏറ്റുമുട്ടലിന്‍റെ വക്കോളമെത്തിയത്. സനീഷ്കുമാർ ജോസഫ് എംഎൽഎ, കെപിസിസി സെക്രട്ടറി എ. പ്രസാദ്, ബ്ലോക്ക് പ്രസിഡന്‍റ് വി.ഒ. പൈലപ്പൻ, ഒ.എസ്. ചന്ദ്രൻ എന്നിവരെയാണ് ഒരുവിഭാഗം തടഞ്ഞുവച്ചത്. എൺപതോളംപേർ പങ്കെടുത്ത യോഗത്തിൽ ആരേയും മിനിറ്റ്സിൽ ഒപ്പിടാനും സമ്മതിച്ചില്ല.

പാര്‍ശ്വവത്കരിക്കപ്പെട്ടവരുടെ ശബ്ദമാണ് ദീപിക: ബിഷപ് മാര്‍ പോളി കണ്ണൂക്കാടന്‍

ഇരിങ്ങാലക്കുട: സമൂഹത്തില്‍ പാര്‍ശ്വവത്കരിക്കപ്പെട്ടവരുടെ പക്ഷംനിന്ന് അവരുടെ ശബ്ദമായി അവര്‍ക്കുവേണ്ടി എന്നും നിലകൊണ്ട പത്രമാണ് ദീപികയെന്നു ബിഷപ് മാര്‍ പോളി കണ്ണൂക്കാടന്‍. ഇരിങ്ങാലക്കുട മേഖലയില്‍നിന്നും എസ്എസ്എല്‍സി, ഹയര്‍സെക്കന്‍ഡറി പരീക്ഷകളില്‍ ഉന്നതവിജയം കരസ്ഥമാക്കിയ വിദ്യാലയങ്ങളെയും വിദ്യാര്‍ഥികളെയും ആദരിക്കുന്ന ചടങ്ങ് ഉദ്ഘാടനംചെയ്തു പ്രസംഗിക്കുകയായിരുന്നു ബിഷപ്. കര്‍ഷകര്‍ക്കുവേണ്ടി, നീതിക്കുവേണ്ടി, സത്യത്തിനുവേണ്ടി, തിന്മയ്ക്കെതിരേ എന്നും പോരാടിയ ചരിത്രമാണ് ദീപികയ്ക്കുള്ളത്. വിദ്യാഭ്യാസ സാമൂഹിക മേഖലകളില്‍ ഏവര്‍ക്കും പ്രചോദനമാകുവാനും ദീപികയ്ക്കു സാധിച്ചിട്ടുണ്ടെന്നു ബിഷപ് കൂട്ടിച്ചേര്‍ത്തു. സെന്‍റ് ജോസഫ്‌സ് കോളജില്‍ നടന്ന ചടങ്ങില്‍ പ്രിന്‍സിപ്പല്‍ സിസ്റ്റര്‍ ഡോ. ബ്ലെസി അധ്യക്ഷത വഹിച്ചു. നഗരസഭ ചെയര്‍പേഴ്‌സണ്‍ മേരിക്കുട്ടി ജോയ്, ദീപിക ഫ്രണ്ട്സ് ക്ലബ് രൂപത പ്രസിഡന്‍റ് ജോസഫ് വാസുപുരത്തുകാരന്‍, ദീപിക മാര്‍ക്കറ്റിംഗ് കോ- ഓര്‍ഡിനേറ്റര്‍ ഫാ. ജിയോ ചെരടായി എന്നിവര്‍ ആശംസകളര്‍പ്പിച്ചു. ദീപിക കോ ഓര്‍ഡിനേറ്റിംഗ് എഡിറ്റര്‍ ഫാ. റിന്‍റോ പയ്യപ്പിള്ളി സ്വാഗതവും റിപ്പോര്‍ട്ടര്‍ ഷോബി കെ. പോള്‍ നന്ദിയും പറഞ്ഞു. എഡ്യുപോര്‍ട്ട് ഫാക്കല്‍റ്റി ബിലാല്‍ മുഹസിന്‍ ക്ലാസ് നയിച്ചു.

നഗരപ്രദേശങ്ങളിലെ വെളളക്കെട്ട്; മാസ്റ്റർ പ്ലാൻ വേണം: സുരേഷ്ഗോപി

തൃശൂർ: നഗരപ്രദേശങ്ങളിൽ വർഷക്കാലത്തു ദുരിതംവിതയ്ക്കുന്ന വെള്ളക്കെട്ടിനു ശാശ്വതപരിഹാരം കാണാൻ മാസ്റ്റർ പ്ലാൻ തയാറാക്കണമെന്നു കേന്ദ്രമന്ത്രി സുരേഷ്ഗോപി. കുട്ടനാട്ടിലെ വെള്ളക്കെട്ടിനു പരിഹാരം കാണാൻ പഠനം നടത്തി റിപ്പോർട്ട് തയാറാക്കിയ വിദഗ്ധൻ ഡോ. കെ.ജി. പദ്മകുമാറിനെ ഇതിനായി കൊണ്ടുവരുമെന്നും അദ്ദേഹം പെരിങ്ങാവ് ഗാന്ധിനഗർ റസിഡൻസ് അസോസിയേഷൻ ഹാളിൽ നടന്ന റസിഡന്‍റ്സ് അസോസിയേഷനുകളുടെ കൂട്ടായ്മയിൽ ഉറപ്പുനൽകി. 20 വർഷംമുൻപ് നഗരത്തിലെ വെള്ളക്കെട്ടുനിവാരണത്തിനു പഠനം നടത്തിയ റിട്ട. എൻജിനീയർ നാരായണസ്വാമി കമ്മിറ്റി റിപ്പോർട്ടിലെ നിർദേശങ്ങൾകൂടി ഉൾപ്പെടുത്തി, കാലാനുസൃതമായ പുതിയ പരിഹാരമാർഗങ്ങൾകൂടി ചേർക്കണമെന്നും മന്ത്രി നിർദേശിച്ചു. ജലനിർഗമനം സുഗമമാക്കുന്നതിനു കൈയേറ്റം ഒഴിവാക്കി തോടുകളുടെ ആഴവും വീതിയും കൂട്ടണം. ഇതിനായി ഡിജിറ്റൽ സർവേ നടത്താൻ തിങ്കളാഴ്ച മേയറെ നേരിൽകണ്ട് ആവശ്യപ്പെടും. വെള്ളക്കെട്ടിൽ അടിയന്തരരക്ഷാപ്രവർത്തനത്തിനു ഫൈബർ ബോട്ടും രണ്ടു പല്ലക്കും എംപി ഫണ്ടിൽനിന്ന് അനുവദിക്കുമെന്നും അദ്ദേഹം പറഞ്ഞു. കൗണ്‍സിലർമാരായ പൂർണിമ സുരേഷ്, ഡോ. ആതിര, നിജി, എൻ. പ്രസാദ്, എൻ.വി. രാധിക, റസിഡൻസ് അസോസിയേഷനുകളെ പ്രതിനിധീകരിച്ച് സൈമണ്‍ പുളിക്കൽ, പി. കൃഷ്ണകുമാർ, ജയൻ തോമസ്, ബിജെപി ഭാരവാഹികളായ അഡ്വ. ബി. ഗോപാലകൃഷ്ണൻ, അഡ്വ. ഉല്ലാസ് ബാബു, അഡ്വ. കെ.കെ. അനീഷ്കുമാർ, ജസ്റ്റിൻ ജേക്കബ് എന്നിവരും പങ്കെടുത്തു.

അപകടാവസ്ഥയിലുള്ള കെട്ടിടം നിലനിർത്താൻ കുറുക്കുവഴി കാട്ടിക്കൊടുത്ത് കോർപറേഷൻ

തൃശൂർ: അപകടാവസ്ഥയിലുള്ള കെട്ടിടങ്ങളുടെ പട്ടികയിലുള്ളവ പൊളിക്കാനുള്ള നടപടികൾ സ്വീകരിക്കാതെ കെട്ടിടം നിലനിർത്താനുള്ള കുറുക്കുവഴി കാണിച്ചുകൊടുത്ത് കോർപറേഷൻ സൂപ്രണ്ടിംഗ് എൻജിനീയറുടെ കത്ത്. കെട്ടിട ഉടമയോടു സ്ട്രക്ചറൽ സ്റ്റബിലിറ്റി സർട്ടിഫിക്കറ്റ് സംഘടിപ്പിക്കാനാണു നിർദേശിച്ചിട്ടുള്ളത്. ജീർണാവസ്ഥയിലുള്ള കെട്ടിടങ്ങൾ പൊളിക്കാൻ കോർപറേഷന് അധികാരമുണ്ടെന്നിരിക്കെയാണ് കോർപറേഷന്‍റെ നിരുത്തരവാദപരമായ നടപടി. അപകടാവസ്ഥയിലുള്ള കെട്ടിടങ്ങളുടെ ഉടമകൾ മേയറെയും സിപിഎം നേതാക്കളെയും സമീപിക്കുമ്പോൾ അവരോടു കോർപറേഷന് അപേക്ഷ നൽകാൻ നിർദേശിക്കുകയാണെന്നു കൗൺസിലർ ജോൺ ഡാനിയൽ ആരോപിച്ചു. ഇങ്ങനെ ലഭിക്കുന്ന അപേക്ഷയിൽ എൻജിനീയറിംഗ് കോളജിലെ സ്ട്രക്ചറൽ ഡിപ്പാർട്ട്മെന്‍റിനെ സമീപിച്ച് ബലക്ഷമതാ സർട്ടിഫിക്കറ്റ് സംഘടിപ്പിക്കാൻ കോർപറേഷൻ സൂപ്രണ്ടിംഗ് എൻജിനീയർ കത്തുനല്കും. കോർപറേഷന്‍റെ ഔദ്യോഗിക കത്തുകൂടിയാകുന്പോൾ എൻജിനീയറിംഗ് കോളജിൽനിന്നു ബലക്ഷമതാ സർട്ടിഫിക്കറ്റുകൾ സന്പാദിക്കുന്നതു കെട്ടിട ഉടമയ്ക്ക് എളുപ്പമാകുമെന്നും ജോൺ‌ ഡാനിയൽ കുറ്റപ്പെടുത്തി. വ്യാജ സ്റ്റബിലിറ്റി സർട്ടിഫിക്കറ്റ് ആരോപണം കഴിഞ്ഞദിവസം പുറത്തുവന്നിരുന്നു. അപകടാവസ്ഥയിൽ കെട്ടിടം നിലനിർത്താനുള്ള നടപടികൾ കോർപറേഷൻ സ്വീകരിക്കില്ലെന്നും എൻജിനീയറിംഗ് കോളജ് ബലക്ഷമതാ സർട്ടിഫിക്കറ്റുകൾ കൊടുക്കുന്നതിലെ അപാകതകൾക്കെതിരേ വിജിലൻസിനെ സമീപിക്കുമെന്നും മേയർ പറഞ്ഞിരുന്നു. ഇതിനിടെയാണ് മേയറുടെ പ്രസ്താവനകൾക്കു വിരുദ്ധമായ നടപടികൾ കോർപറേഷൻ സ്വീകരിക്കുന്നത്.

ചരിത്രവിജയം നേടി തൃശൂർ ‌ജനറൽ ആശുപത്രി

തൃശൂർ: ഹൃദ്രോഗചികിത്സയിൽ ചരിത്രംകുറിച്ച് ജനറൽ ആശുപത്രിയിലെ കാർഡിയോളജി വിഭാഗം. 48 വയസുള്ള സ്ത്രീക്കാണ് ആശുപത്രിയിൽ അട്രിയൽ സെപ്റ്റൽ ഡിഫെക്ട് (എഎസ്ഡി) ഡിവൈസ് ക്ലോഷർ എന്ന ഹൃദയശസ്ത്രക്രിയ വിജയകരമായി നടത്തിയത്. ജന്മനാ ഹൃദയഭാഗത്ത് ഉണ്ടാകുന്ന ദ്വാരം ഒരു ഉപകരണംവച്ച് അടയ്ക്കുന്ന അപൂർവമായിട്ടുള്ള ശസ്ത്രക്രിയയ്ക്കു കീഹോൾ ശസ്ത്രക്രിയാരീതിയാണ് സ്വീകരിച്ചത്. 2022 ഏപ്രിൽ 20 ന് ആരംഭിച്ച തൃശൂർ ജനറൽ ആശുപത്രിയിലെ കാത്ത്‌ലാബിൽ നടത്തിയ വിജയകരമായ 3500 ഓളം ശസ്ത്രക്രിയകളിൽ വേറിട്ടതായിരുന്നു ഈ അപൂർവശസ്ത്രക്രിയ. കണ്‍സൾട്ടന്‍റ് കാർഡിയോളജിസ്റ്റുമാരായ ഡോ. എ. കൃഷ്ണകുമാർ, ഡോ. വിവേക് തോമസ് എന്നിവരാണ് ശസ്ത്രക്രിയ നയിച്ചത്. ഡോ. ആദർശ്, ഡോ. അശ്വതി, കാത്ത്‌ലാബ് ടെക്നീഷൻമാരായ ദിവ്യ, ശ്രീലക്ഷ്മി, നഴ്സിംഗ് ഓഫീസർമാരായ ജിന്‍റോ, ശ്രുതി, ഷഹീദ എന്നിവരടങ്ങിയ സംഘത്തിന്‍റെ കഠിന‌പ്രയത്നമാണ് വിജയപൂർത്തീകരണത്തിനു പിന്നിൽ. ഡോ. ആന്‍റണി പാത്താടൻ, ആശുപത്രി സൂപ്രണ്ട് ഡോ. താജ് പോൾ പനയ്ക്കൽ എന്നിവർ എല്ലാ സംവിധാനങ്ങളും പിന്തുണയും വിദഗ്ധോപദേശങ്ങളും നൽകിയത് ഉയർന്ന നിലവാരമുള്ള ചികിത്സ വിജയകരമാക്കാൻ നിർണായകമായ പങ്ക് വഹിച്ചുവെന്നു ശസ്ത്രക്രിയയ്ക്കു നേതൃത്വം നൽകിയവർ പറഞ്ഞു. സാധാരണക്കാർക്കും ഉയർന്ന നിലവാരത്തിലുള്ള ചികിത്സ ലഭ്യമാക്കുന്നവിധത്തിൽ സർക്കാർ ആശുപത്രികളെ ശക്തിപ്പെടുത്തിയതിന്‍റെ ഉദാഹരണമാണ് ഈ വിജയമെന്ന് അഭിപ്രായപ്പെട്ട മേയർ എം.കെ. വർഗീസ് സംഘത്തെ അഭിനന്ദിച്ചു.

ഇരട്ടിമധുരമായി തേറന്പിലിന്‍റെ പിറന്നാൾ ആഘോഷം

സ്വന്തം ലേഖകൻ തൃശൂർ: സൗഹൃദങ്ങൾ സന്പാദ്യമാക്കിയ തൃശൂരിന്‍റെ "സ്പീക്കർ'ക്ക് ശതാഭിഷേകനിറവിൽ ആശംസാപ്രവാഹം. രാഷ്ട്രീയ സാംസ്കാരിക മേഖലകളിൽനിന്നുള്ളവരും സാമൂഹികപ്രവർത്തകരുമടക്കം നൂറുകണക്കിനുപേർ 84-ാംപിറന്നാൾനിറവിൽ തേറന്പിൽ രാമകൃഷ്ണന് ആയുരാരോഗ്യസൗഖ്യം നേർന്നു. തിരുവന്പാടി കൗസ്തുഭം ഓഡിറ്റോറിയത്തിൽ സുഹൃത്തുക്കൾക്കും സഹപ്രവർത്തകർക്കുമായി ഒരുക്കിയ വിരുന്ന് രാഷ്ട്രീയംമറന്നുള്ള സൗഹൃദക്കാഴ്ചകൾക്കും വേദിയായി. ഭാര്യ ചന്ദ്രമതിക്കൊപ്പമാണ് തന്നെ കാണാനെത്തിയ വിവിധ തലമുറകളിലുള്ള സ്നേഹിതരെ തേറന്പിൽ സ്വീകരിച്ചത്. തിരക്കേറിയതോടെ പൊന്നാടകളും സമ്മാനങ്ങളുമായി എത്തിയവർ ഏറെനേരം കാത്തിരുന്നാണ് തേറന്പിലിനെ കണ്ടുമടങ്ങിയത്. രാവിലെ 10.45ന് തേറന്പിൽ രാമകൃഷ്ണൻ കുടുംബസമേതം എത്തുന്പോഴേക്കും കോണ്‍ഗ്രസ് പ്രവർത്തകരും നേതാക്കളും എത്തിയിരുന്നു. ഭാര്യ ചന്ദ്രയ് ക്കൊപ്പം നിലവിളക്ക് കൊളുത്തി തുടക്കം. പിന്നാലെ ആദ്യമെത്തിയ അതിഥികൾക്കൊപ്പം ഊണ്. ജില്ലയുടെ വിവിധ ഭാഗങ്ങളിൽനിന്നുള്ള കോണ്‍ഗ്രസ് പ്രവർത്തകർ, പ്രാദേശികനേതാക്കൾ, പ്രവർത്തകർ, സാംസ്കാരികപ്രവർത്തകർ തുടങ്ങി ജീവിതത്തിന്‍റെ സമസ്തമേഖലകളിലുള്ളവരും തേറന്പിലിന് അനുമോദനവുമായെത്തി. കേന്ദ്രമന്ത്രിയും തൃശൂർ എംപിയുമായ സുരേഷ് ഗോപി തൃശൂരിനെ പതിറ്റാണ്ടുകൾ നിയമസഭയിൽ പ്രതിനിധീകരിച്ച തേറന്പിലിനെ ആശ്ലേഷിച്ചാണ് ആദരമറിയിച്ചത്. മന്ത്രി ആർ. ബിന്ദു തേറന്പിലിന്‍റെ കാൽക്കൽ വീണതു രാഷ്ട്രീയഭേദങ്ങളെ മറികടന്ന കാഴ്ചയായി. മന്ത്രിയുടെ അമ്മയുടെ പ്രീഡിഗ്രികാലത്തെ സഹപാഠിയായിരുന്നു തേറന്പിൽ. മന്ത്രി കെ. രാജൻ, തൃശൂർ അതിരൂപത സഹായമെത്രാൻ മാർ ടോണി നീലങ്കാവിൽ, സ്വാമി ഗഭീരാനന്ദ, ഫുട്ബോൾ താരം ഐ.എം. വിജയൻ, ഡിസിസി പ്രസിഡന്‍റ് ജാസഫ് ടാജറ്റ്, യുഡിഎഫ് ജില്ലാ ചെയർമാൻ ടി.വി. ചന്ദ്രമോഹൻ, സനീഷ്കുമാർ ജോസഫ് എംഎൽഎ, മേയർ എം.കെ. വർഗീസ്, ഡെപ്യൂട്ടി മേയർ എം.എൽ. റോസി, സിപിഎം ജില്ലാ സെക്രട്ടറി കെ.വി. അബ്ദുൾഖാദർ, സിപിഐ ജില്ലാ സെക്രട്ടറി കെ.കെ. വത്സരാജ്, കെപിസിസി രാഷ്ട്രീയകാര്യസമിതി അംഗം ടി.എൻ. പ്രതാപൻ, മുൻ എംപി രമ്യ ഹരിദാസ്, ഹൈക്കോടതി ജഡ്ജി ജസ്റ്റീസ് ജയകുമാർ, ജോസ് ആലുക്കാസ്, എം.കെ. കണ്ണൻ, പെരുവനം കുട്ടൻമാരാർ, വൈദ്യരത്നം നീലകണ്ഠൻ മൂസ്, സി.കെ. നാരായണൻ നന്പൂതിരിപ്പാട്, കെ.പി. നന്പൂതിരീസ് ഭവദാസൻ, ടി.എസ്. കല്യാണരാമൻ, ഡി. മൂർത്തി, അഡ്വ. എ. സുരേശൻ, പി.എ. മാധവൻ, ഒ.അബ്ദുറഹിമാൻകുട്ടി, ജോസഫ് ചാലിശേരി, എം.പി. ജാക്സണ്‍, ഡോ. പി.വി. കൃഷ് ണൻനായർ, ഡോ. എസ്.കെ. വസന്തൻ, ഡോ. വി.എം. മനോഹരൻ, കലാമണ്ഡലം ക്ഷേമാവതി, വിദ്യാധരൻമാസ്റ്റർ, മുൻമന്ത്രി പ്രഫ. സി. രവീന്ദ്രനാഥ്, തിരുവന്പാടി ദേവസ്വം സെക്രട്ടറി കെ. ഗിരീഷ്കുമാർ, മുൻ മേയർമാരായ ഐ.പി. പോൾ, രാജൻ പല്ലൻ, തുടങ്ങി ഒട്ടേറെ പ്രമുഖർ പങ്കെടുത്തു.

എരുമപ്പെട്ടി തിരുഹൃദയ പാരിഷ് ഹാളിന്‍റെ വെഞ്ചരിപ്പുകർമവും ഉദ്ഘാടനവും

എരുമപ്പെട്ടി: തിരുഹൃദയ ഫൊറോന പള്ളിയിൽ നിർമാണം പൂർത്തീകരിച്ച തിരുഹൃദയ പാരിഷ് ഹാളിന്‍റെ വെഞ്ചരിപ്പും ഉദ്ഘാടനവും ആർച്ച്ബിഷപ് മാർ ആൻഡ്രൂസ് താഴത്ത് നിർവഹിച്ചു. വികാരി ഫാ. ജോഷി ആളൂർ, അസി. വികാരി ഫാ. ജീസ് അക്കരപട്ടേ്യക്കൽ, ഇടവകാംഗം ഫാ. മനോജ് കിഴൂർമുട്ടിക്കൽ എന്നിവർ സഹ കാർമികരായി. കൈക്കാരന്മാരായ എം.വി. ഷാ ന്‍റോ, എം.കെ. ജോൺസൺ, ജെയ്സൺ താണിക്കൽ, ഷൈജു തൈക്കാടൻ, നിർമാണകമ്മിറ്റി ജനറൽ കൺവീനർ കെ.സി. ഡേവിസ്, സെക്രട്ടറി എം.ഡി. ജോജി, ട്രഷറർ പി. ബിജു ജോർജ്, ജോയിന്‍റ് കൺവീനർമാരായ ബാബു ജോർജ്, മാത്യൂസ് എം. രാജൻ, എം.വി. ജെയ്സൺ, എം.കെ. ജോ ഷി, എം.വി. തോമസ് എന്നിവർ നേതൃത്വം നൽകി.

ദേവാലയങ്ങളിൽ തിരുനാൾ

ഒല്ലൂർ ഫൊറോന പള്ളി ഒല്ലൂർ: സെന്‍റ് ആന്‍റണീസ് ഫൊറോന പള്ളിയിലെ ഇടവകമധ്യസ്ഥനായ വിശുദ്ധ അന്തോണീസിന്‍റെ 307 -ാം തിരുനാളിനു ഫൊ റോനവികാരി ഫാ. വർഗീസ് കുത്തൂർ കൊടിയേറ്റി. ഇതോടനുബന്ധിച്ച് വിശുദ്ധ കുർബാനയും ഉണ്ടായിരുന്നു. അസി. വികാരിമാരായ ഫാ. അഡ്വിൻ ഐനിക്കൽ, ഫാ. തേജസ് കുന്നംപിള്ളിൽ, ഡീക്കൻ ആഷിസ് പെരുംപുഴയിൽ എന്നിവർ സഹകാർമികരായി. കൈക്കാരന്മാരായ സെബി വല്ലച്ചിറക്കാരൻ, പോൾ കുണ്ടുകുളം, ആന്‍റണി ചുങ്കത്ത്, റാഫി ചെമ്മണം എന്നിവർ നേതൃത്വം നൽകി. നടത്തറ പള്ളി തൃശൂർ: നടത്തറ തിരുഹൃദയ ദേവാലയത്തിലെ ഈശോയുടെ തിരുഹൃദയത്തിന്‍റെയും വിശുദ്ധ അന്തോണീസിന്‍റെയും സംയുക്ത ഊട്ടുതിരുനാൾ കൊടിയേറ്റം വികാരി ഫാ. നോബി അന്പൂക്കൻ നിർവഹിച്ചു. ഊട്ടുതിരുനാൾ കണ്‍വീനർ ലാസർ കവലക്കാട്ട്, കൈക്കാരൻമാർ, തിരുനാൾ കമ്മിറ്റി അംഗങ്ങൾ പങ്കെടുത്തു. ഫാ. ബിജു പാണേങ്ങാടന്‍റെ മുഖ്യകാർമികത്വത്തിൽ മാസാദ്യാചരണവും നടന്നു. 15 നാണ് തിരുനാൾ. മുണ്ടൂർ പള്ളി മുണ്ടൂർ: പരിശുദ്ധ കർമലമാതാ പള്ളിയിൽ വിശുദ്ധ അന്തോണീസിന്‍റെ കപ്പേള തിരുനാളിന്‍റെ കൊടിയേറ്റവും തിരുശേഷിപ്പുപ്രതിഷ്ഠയും വികാരി ജനറാൾ മോണ്‍. ജെയ്സണ്‍ കൂനംപ്ലാക്കൽ നിർവഹിച്ചു. തുടർന്നുനടന്ന വിശുദ്ധ കുർബാനയ്ക്കും അദ്ദേഹം മുഖ്യകാർമികത്വം വഹിച്ചു. സഹവികാരി ഫാ. സാൽവിൻ കണ്ണനായ്ക്കൽ സഹകാർമികനായിരുന്നു. വിശുദ്ധ അന്തോണീസിന്‍റെ കപ്പേളയിൽ ലദീഞ്ഞ്, നൊവേന തിരുക്കർമങ്ങൾക്ക് ഇടവകവികാരി ഫാ. ബാബു അപ്പാടൻ മുഖ്യകാർമികത്വം നൽകി. ട്രസ്റ്റിമാരായ ബെന്നി ജോസഫ്, പി.കെ. മിറാഷ്, സി.എ. പോൾ, ജോഷി വെള്ളറ എന്നിവർ നേതൃത്വം നൽകി. 14,15 തീയതികളിലാണ് തിരുനാൾ. കക്കാട് കപ്പേള കുന്നംകുളം: സെന്‍റ് സെബാസ്റ്റ്യൻ ഇടവകയിലെ കക്കാട് സെന്‍റ് ആന്‍റണീസ് കപ്പേളയിൽ 13 ന് ആഘോഷിക്കുന്ന വിശുദ്ധ അന്തോണീസിന്‍റെ തിരുനാളിനു കൊടിയേറി. തിരുക്കർമങ്ങൾക്കു ഫാ. ഡോണ്‍ ഡൊമിനിക് എംസിബിഎസ്, ഇടവകവികാരി ഫാ. ഡെയ്സൻ മുണ്ടോപുറം എന്നിവർ നേതൃത്വം നൽകി. വ്യാഴാഴ്ചവരെ രാവിലെ ഇടവകപ്പള്ളിയിൽ തിരുനാളിനൊരുക്കമായി വിശുദ്ധ കുർബാനയും നേർച്ചവിതരണവും വൈകീട്ട് 6.30 ന് സെന്‍റ് ആന്‍റണീസ് കപ്പേളയിൽ ലദീഞ്ഞും നൊവേനയും നേർച്ചവിതരണവും ഉണ്ടായിരിക്കും. തിരുനാൾദിനമായ വെള്ളിയാഴ്ച രാവിലെ 6.30 ന് ഇടവകപ്പള്ളിയിൽ ആഘോഷമായ തിരുനാൾകുർബാനയും തുടർന്നു കപ്പേളയിലേക്കു ബൈക്ക് റാലിയുടെ അകന്പടിയോടെ വിശുദ്ധ അന്തോണീസിന്‍റെ തിരുശേഷിപ്പ് എഴുന്നള്ളിപ്പും ഉണ്ടായിരിക്കും. തിരുനാൾകുർബാനയ്ക്കു ഫാ. ലിൻസ് വെട്ടുവയലിൽ കാർമികനാകും. വൈകീട്ട് 6.30 ന് സെന്‍റ് ആന്‍റണീസ് കപ്പേളയിൽ ആരാധനയോടെ തിരുനാൾവേസ്പര, കുഞ്ഞന്തോണിമാരുടെ പ്രസുദേന്തിവാഴ്ച, ആഘോഷമായ തിരുശേഷിപ്പുപ്രയാണം, വർണമഴ, നേർച്ചഊട്ട് കിറ്റ് വിതരണം എന്നിവ ഉണ്ടായിരിക്കും. തിരുനാളാഘോഷങ്ങളുടെ വിജയത്തിനായി ഫാ. ഡെയ്സൻ മുണ്ടോപുറം, സുപ്പീരിയർ സിസ്റ്റർ ബെൻസി, കൈക്കാരൻമാരായ കെ.ജി. ബാബു, പേൾജു ബി. ചുങ്കത്ത്, സി.എൻ. ഇമ്മാനുവൽ, ജനറൽ കണ്‍വീനർ സി.എം. സാംസണ്‍, ഫ്ലോറൻസ് ലോയ്ഡ്, എം.എൽ. സുനിൽ, എം.എൽ. മാണി, പി.ആർ. സജി, പോയിസ് ജേബി, വി.സി. ജോസി എന്നിവരുടെ നേതൃത്വത്തിൽ വിപുലമായ കമ്മറ്റി പ്രവർത്തിച്ചുവരുന്നു.

വാടാനപ്പിള്ളി സെന്‍റ് ഫ്രാൻസിസ് സേവിയേഴ്‌സ് ആർസിയുപി സ്‌കൂളിന്‍റെ കെട്ടിടം ഉദ്ഘാടനം

വാടാനപ്പിള്ളി: സെന്‍റ്് ഫ്രാൻസിസ് സേവിയേഴ്‌സ് ആർസിയുപി സ്‌കൂളിന്‍റെ നവീകരിച്ച കെട്ടിടസമുച്ചയം കേന്ദ്ര സഹമന്ത്രി സുരേഷ് ഗോപി ഉദ്ഘാടനം ചെയ്തു. പഞ്ചായത്ത് പ്രസിഡന്‍റ്് ശാന്തി ഭാസി അധ്യക്ഷത വഹിച്ചു. അതിരൂപത വികാരി ജനറാൾ മോൺ. ജോസ് കോനിക്കര, കണ്ടശാംകടവ് ഫൊറോന വികാരി ഫാ. ഡോ. റാഫേൽ ആക്കാമറ്റത്തിൽ, സ്‌കൂൾ മാനേജർ ഫാ. ഏബിൾ ചിറമ്മൽ, പഞ്ചായത്ത് അംഗം സന്തോഷ് പണിക്കശേരി, പിടിഎ പ്രസിഡന്‍റ് സി.എസ്. സുനിൽകുമാർ എന്നിവർ പ്രസംഗിച്ചു. കുട്ടികളുടെ നവീകരിച്ച പാർക്ക് ഉദ് ഘാടനവും മന്ത്രി നിർവഹിച്ചു.

"ഒരു തൈ നടാം' ജനകീയ കാന്പയിൻ തുടങ്ങി

ഒല്ലൂർ: ഹരിതകേരളം മിഷന്‍റെ "ഒരു തൈ നടാം' ജനകീയ വൃക്ഷവത്കരണ കാന്പയിന്‍റെ ജില്ലാതല ഉദ്ഘാടനവും ലോഗോ പ്രകാശനവും റവന്യൂ മന്ത്രി അഡ്വ. കെ. രാജൻ നിർവഹിച്ചു. 365 ദിവസവും പരിസ്ഥിതിയുടെ സംരക്ഷകരാകേണ്ട ചുമതലയാണ് നമ്മൾ ഏറ്റെടുക്കേണ്ടതെന്ന് മന്ത്രി പറഞ്ഞു. പരിസ്ഥിതി ദിനാചരണത്തിന്‍റെ ഭാഗമായ തൈ നടൽ കേവലം സാമൂഹ്യ മാധ്യമങ്ങളിലെ ചിത്രം പങ്കുവയ്ക്കലിൽ ഒതുങ്ങരുതെന്നും അദ്ദേഹം ഓർമിപ്പിച്ചു. 15 ലക്ഷം വൃക്ഷങ്ങളാണ് കാന്പയിന്‍റെ ഭാഗമായി ജില്ലയിലാകെ നടാൻ ലക്ഷ്യമിടുന്നതെന്നും മന്ത്രി പറഞ്ഞു. മാലിന്യ മുക്ത നവകേരളത്തിൽ ഹരിതകർമസേനയുടെ പങ്ക്, മാലിന്യ നിർമാർജന പ്രവർത്തനങ്ങളിൽ കുഞ്ഞുങ്ങൾക്കു വഹിക്കാവുന്ന പങ്ക്, വിദ്യാലയത്തിൽ നടത്താനിരിക്കുന്ന വികസനപ്രവർത്തനങ്ങൾ തുടങ്ങിയവയെക്കുറിച്ചും മന്ത്രി സംസാരിച്ചു. വൈലോപ്പിള്ളി ശ്രീധരമേനോൻ സ്മാരക ഗവ. വൊക്കേഷണൽ ഹയർസെക്കൻഡറി സ്കൂളിൽ നടന്ന പരിപാടിയിൽ ജില്ലാ പഞ്ചായത്ത് പ്രസിഡന്‍റ് വി.എസ്. പ്രിൻസ് അധ്യക്ഷത വഹിച്ചു. നവകേരളം കർമപദ്ധതി 2 ജില്ലാ കോ-ഒാർഡിനേറ്റർ സി. ദിദിക കാമ്പയിൻ അവതരണം നടത്തി. വൈലോപ്പിള്ളി ശ്രീധരമേനോൻ സ്മാരക ജിവി എച്ച്എസ്എസ് വിദ്യാർഥിനി ശ്രീനന്ദന പരിസ്ഥിതിദിന പ്രതിജ്ഞചൊല്ലിക്കൊടുത്തു. ഒല്ലൂർ ഗവ. ആർട്സ് ആൻഡ് സയൻസ് കോളജ് പ്രിൻസിപ്പൽ പ്രഫ. ജോൺ, വൈലോപ്പിള്ളി ശ്രീധരമേനോ ൻ സ്മാരക ഗവ. വൊക്കേഷണൽ ഹയർ സെക്കൻഡറി സ്കൂൾ പ്രിൻസിപ്പൽ എ. വി. വിജന, പ്രധാനാധ്യാപിക ഗീതദേവി തുടങ്ങിയവർ പ്രസംഗിച്ചു.

കാട്ടിക്കുളം ഭരതൻ അന്തരിച്ചു

ഇരിങ്ങാലക്കുട: സാമൂഹ്യ, വിദ്യാഭ്യാസ, കലാ, സാംസ്‌കാരികരംഗങ്ങളിലെ സജീവസാന്നിധ്യമായിരുന്ന കിഴുത്താണി കാട്ടിക്കുളം വീട്ടില്‍ കുമാരന്‍റെ മകന്‍ കാട്ടിക്കുളം ഭരതന്‍(79) അന്തരിച്ചു. സംസ്‌കാരം ഇന്നു വൈകീട്ട് അഞ്ചിനു കിഴുത്താണിയിലെ വീട്ടുവളപ്പില്‍. ഭാര്യ സുധ കാട്ടൂര്‍ ഇടക്കാട്ടുപറമ്പില്‍ കുടുംബാംഗം. മക്കള്‍: ലിന്‍റ (ബിസിനസ്), ലക്കി (ലണ്ടന്‍), ലാല്‍ (ബിസിനസ്). മരുമക്കള്‍: ഡോ. രാകേഷ്, അമിത് (ലണ്ടന്‍), ഡോ. ശൃംഗ. പ്രവാസിവ്യവസായി ആയിരുന്ന കാട്ടിക്കുളം ഭരതന്‍ ഇരിങ്ങാലക്കുട ഉണ്ണായിവാര്യര്‍ സ്മാരക കലാനിലയം പ്രസിഡന്‍റ്, എസ്എന്‍ ക്ലബ് പ്രസിഡന്‍റ്, എസ്എന്‍ബിഎസ് സമാജം പ്രസിഡന്‍റ്, ലയണ്‍സ് ക്ലബ് പ്രസിഡന്‍റ്, എസ്എന്‍ഇഎസ് വൈസ് ചെയര്‍മാന്‍ എന്നീ സ്ഥാനങ്ങള്‍ വഹിച്ചിട്ടുണ്ട്. വൊക്കേഷണല്‍ ഹയര്‍ സെക്കന്‍ഡറി സ്‌കൂള്‍, എഎല്‍പി സ്‌കൂള്‍ കാറളം, ജനത യുപിഎസ് പന്തല്ലൂര്‍, എഎല്‍പിഎസ് പോങ്കോത്ര എന്നീ വിദ്യാലയങ്ങളുടെ മാനേജരാണ്. ശ്രീനാരായണദര്‍ശനങ്ങള്‍ പ്രാവര്‍ത്തികമാക്കാനുള്ള ശ്രമങ്ങള്‍ക്ക് അംഗീകാരമായി ന്യൂയോര്‍ക്ക് ആസ്ഥാനമായി പ്രവര്‍ത്തിക്കുന്ന ശ്രീനാരായണ വേള്‍ഡ് കൗണ്‍സിലിന്‍റെ പുരസ്‌കാരം ലഭിച്ചിട്ടുണ്ട്. 2001 ല്‍ കേരള സിറ്റിസണ്‍ ഫോറത്തിന്‍റെ മാന്‍ ഓഫ് ദ ഇയര്‍ പുരസ്‌കാരവും ലഭിച്ചു.

ഇരിങ്ങാലക്കുട ക്രൈസ്റ്റ് എന്‍ജിനീയറിംഗ് കോളജില്‍ ലഹരിവിരുദ്ധ മാരത്തണ്‍

ഇരിങ്ങാലക്കുട: ഇരിങ്ങാലക്കുട എക്‌സൈസ് സര്‍ക്കിള്‍ ഓഫീസ് ക്രൈസ്റ്റ് എന്‍ജിനീയറിംഗ് കോളജുമായി സഹകരിച്ച് ലഹരിക്കെതിരേ ബോധവത്കരണ സന്ദേശവുമായി മാരത്തണ്‍ സംഘടിപ്പിച്ചു. എക്‌സൈസ് സര്‍ക്കിള്‍ ഇന്‍സ്‌പെക്ടര്‍ എന്‍. ശങ്കര്‍ അധ്യക്ഷത വഹിച്ചു. കോളജ് എക്‌സിക്യൂട്ടീവ് ഡയറക്ടര്‍ ഫാ. ജോണ്‍ പാലിയേക്കര സിഎംഐ മാരത്തണ്‍ ഫ്ലാഗ് ഓഫ് ചെയ്തു. എന്‍എസ്എസ് പ്രോഗ്രാം ഓഫീസര്‍ ഫെബിന്‍ രാജു, വിമുക്തി കോ ഓര്‍ഡിനേറ്റര്‍ സി.വി. രാജേന്ദ്രന്‍, ഇരിങ്ങാലക്കുട എക്‌സൈസ് റേഞ്ച് ഇന്‍സ്‌പെക്ടര്‍ പി.ആര്‍. അനുകുമാര്‍ എന്നിവര്‍ സംസാരിച്ചു.

വികസനരേഖ വ്യാജരേഖയെന്ന എൽഡിഎഫ് ആരോപണം ജാള്യത മറയ്ക്കാൻ: എംഎൽഎ

ചാലക്കുടി: വികസനത്തിന്‍റെ നാലു വർഷങ്ങൾ എന്ന പേരിൽ പുറത്തിറക്കിയത് 2021 മുതൽ 2025 വരെ നിയോജകമണ്ഡലത്തിൽ നിർമാണം പൂർത്തികരിച്ചതും നിർമാണം പുരോഗമിക്കുന്നതും ഭരണാനുമതി ലഭിച്ച് തുടർനടപടികൾ പുരോഗമിക്കുന്ന പദ്ധതികളും പ്രവൃത്തികളുമാണെന്ന് സനീഷ്കുമാർ ജോസഫ് എം എൽഎ അറിയിച്ചു. നാലുവർഷത്തിനുള്ളിൽ 1482 കോടി രൂപയുടെ വികസന പ്രവർത്തനങ്ങൾക്ക് നേതൃത്വപരമായ പങ്ക് വഹിക്കുവാൻ സാധിച്ചുവെന്ന് അദ്ദേഹം പത്രസമ്മേളനത്തിൽ അറിയിച്ചു. പ്രതിപക്ഷ അംഗമായിരുന്നിട്ടും ഇത്രയും തുകയുടെ വികസനപ്രവർത്തനങ്ങൾ നിയോജക മണ്ഡലത്തിൽ നടത്തിവരുന്നതിന്‍റെ ജാള്യത മറയ്ക്കാൻവേണ്ടിയാണ് രാഷ്ട്രിയ അന്ധത ബാധിച്ച എൽഡിഎഫ് നേതാക്കൾ വികസനരേഖ വ്യാജരേഖയാണെന്ന ആരോപണവുമായി രംഗത്തുവന്നതെന്നും അദ്ദേഹം പറഞ്ഞു. പനമ്പിള്ളി ഗോവിന്ദമേനോൻ മുതൽ തുടർന്നു വന്ന ഒരോ ജനപ്രതിനിധികളും അതാത് കാലത്തെ വികസനപ്രവർത്തനങ്ങൾക്കു നേതൃത്വം നൽകിയിട്ടുണ്ടെന്നും അദ്ദേഹം പറഞ്ഞു. 10 വർഷക്കാലം പൂർത്തിയാകാതെകിടന്ന അടിപ്പാത നിർമാണം, ഇൻഡോർ സ്റ്റേഡിയത്തിൽ മേപ്പിൾ വുഡ് ഫ്ലോറിംഗ്, കലാഭവൻ മണി സ്മാരകനിർമാണം, വിദ്യാർഥികൾക്കായി ചിറക് പദ്ധതി. കെഎസ്ആർടിസി ബസ്‌ സ്റ്റാൻഡ് നവീകരണം തുടങ്ങി നിയോജകമണ്ഡലത്തിൽ നടപ്പിലാക്കിയ 1482.67 കോടി രൂപയുടെ വികസനപ്രവർത്തനങ്ങൾ വിശദീകരിച്ചു. കോൺഗ്രസ് ബ്ലോക്ക് പ്രസിഡന്‍റുമായ വി.ഒ. പൈലപ്പൻ, എം.ടി. ഡേവീസ്, യുഡിഎഫ് ചെയർമാൻ അഡ്വ. സി.ജി. ബാലചന്ദ്രൻ, മുൻ നഗരസഭ ചെയർമാൻ എബി ജോർജ് എന്നിവരും പത്രസമ്മേളനത്തിൽ പങ്കെടുത്തു.

ചാരായം വാറ്റുകേസിൽ ഒളിവിലായിരുന്ന പ്രതി അറസ്റ്റിൽ

ചാലക്കുടി: പോട്ട ചാരായംവാറ്റുകേസിൽ ജാമ്യത്തിലിറങ്ങി മുങ്ങിനടന്നിരുന്ന പ്രതി അറസ്റ്റിൽ. പോട്ട സ്വദേശി ഒല്ലൂക്കാരൻ ഗിരീഷ് (45) എന്നയാളെയാണ് ചാലക്കുടി പോലീസ് പിടികൂടിയത്. ഗിരീഷിനെ റിമാൻഡ് ചെയ്തു. ചാലക്കുടി എസ്ഐമാരായ ഋഷി പ്രസാദ്, ഷാജഹാൻ, സിപിഒമാരായ ബൈജു, രതീഷ്, സജിത്ത് എന്നിവർ ചേർന്നാണ് പ്രതിയെ അറസ്റ്റ് ചെയ്തത്.

അവണൂരിൽ ഇടവകദിനം ആഘോഷിച്ചു

അവണൂർ: സെന്‍റ് സെബാസ്റ്റ്യൻ പള്ളിയിൽ ഇടവകദിനം ആചരിച്ചു. വിശ്വാസപരിശീലനദിനം, ഭക്തസംഘടനകളുടെ വാർഷികം, കുടുംബയൂണിറ്റ് വാർഷികം എന്നിവയും സംയുക്തമായി ആഘോഷിച്ചു. വികാരി ഫാ. അനീഷ് ചിറ്റിലപ്പിള്ളി അധ്യക്ഷത വഹിച്ചു. ഫാ. ദിജോ ഒലക്കേങ്കിൽ ഉദ്ഘാടനം ചെയ്തു. വിവാഹത്തിന്‍റെ 25, 50 ജൂബിലി ആഘോഷിക്കുന്ന ദന്പതിമാരെയും ലോഗോസ് ക്വിസിൽ അതിരൂപതാതലത്തിൽ അഞ്ചാംറാങ്ക് നേടിയ ഷിജിൻ ജെയ്സനെയും ആദരിച്ചു. ജോജി ജോസ് അക്കര, ലീന ജോർജ്, അലൻ സൈമണ്‍, ഷാന്‍റി സൈമണ്‍ എന്നിവർ പ്രസംഗിച്ചു. വിശ്വാസപരിശീലനത്തിന്‍റെ ഡെപ്യൂട്ടി പ്രിൻസിപ്പൽ എ.എം.ജെയ്സണ്‍ സ്വാഗതവും ജനറൽ കണ്‍വീനർ ജയൻ അക്കര നന്ദിയും പറഞ്ഞു.

കൊലപാതകക്കേസിൽ ജാമ്യത്തിലിറങ്ങി മുങ്ങിയ പ്രതിയെ പിടികൂടി

കയ്പമംഗലം: കൊലപാതകക്കേസിൽ ജാമ്യത്തിലിറങ്ങി മുങ്ങിയ കൂളിമുട്ടം സ്വദേശി കാരയിൽ വീട്ടിൽ അരുണിനെ (40) പിടികൂടി. ശ്രീനാരായണപുരം പൊരിബസാറിലുള്ള വാടകവീട്ടിൽവച്ച് മദ്യപിക്കുന്നതിനിടെ ഉണ്ടായ കലഹത്തിനിടയിൽ അഴീക്കോട് സ്വദേശി നടുമുറി വീട്ടിൽ രാജേഷ് കൊല്ലപ്പെട്ടെന്നാണ് കേസ്. 2020 ഒക്ടാബർ ആറി നാണ് സം ഭവം. തുടർന്ന് നടത്തിയ അന്വേഷണത്തിലാണ് അരുണിനെ അറസ്റ്റ് ചെയ്തത്. കോടതിയിൽനിന്ന് ജാമ്യത്തിലിറങ്ങി വീട്ടിൽ വരാതെ പല സ്ഥലങ്ങളിലായി ഒളിവിൽ കഴിഞ്ഞുവരികയായിരുന്ന അരുണിനെ കൊടുങ്ങല്ലൂരിൽനിന്നാണ് അറസ്റ്റ് ചെയ്തത്‌. മതിലകം സ്റ്റേഷൻ ഇൻസ്പെക്ടർ ഷാജി, എസ്ഐ മുഹമ്മദ് റാഫി, സിപിഒമാരായ സബീഷ്, സനീഷ് എന്നിവർ ചേർന്നാണ് പ്രതിയെ അറസ്റ്റ് ചെയ്തത്.

കെട്ടിടത്തിന്‍റെ ബലക്ഷയം മറച്ചുവച്ച മേയർക്കെതിരേ ക്രിമിനൽ കേസെടുക്കണം: ജോണ്‍ ഡാനിയൽ

തൃശൂർ: സ്ട്രക്ചറലി അണ്‍ഫിറ്റ് (ബലക്ഷമതയില്ലായ്മ) സർട്ടിഫിക്കറ്റ് ലഭിച്ച കോർപറേഷൻ കെട്ടിടത്തിന്‍റെ അപകടാവസ്ഥ ജനങ്ങളിൽനിന്നു മറച്ചുവച്ച മേയർക്കെതിരേ ക്രിമിനൽ കേസെടുക്കണമെന്ന് യുഡിഎഫ് കൗണ്‍സിലർ ജോണ്‍ ഡാനിയൽ. കോർപറേഷൻ ഓഫീസിനുമുൻപിലുള്ള കെട്ടിടത്തിനാണ് സ്ട്രക്ചറലി അണ്‍ഫിറ്റ് സർട്ടിഫിക്കറ്റ് ലഭിച്ചത്. എന്നിട്ടും അതിൽ നടപടിയെടുക്കുന്നില്ല. ‌കെട്ടിടത്തിൽ തൊഴിലെടുക്കുന്നവരുടെയും വന്നുപോകുന്നവരുടെയും സുരക്ഷയ്ക്ക് ആരു സമാധാനം പറയുമെന്നും സ്വന്തം കെട്ടിടത്തിന്‍റെ അപകടാവസ്ഥ മറച്ചുവച്ച മേയർക്ക് എങ്ങനെയാണ് അപകടാവസ്ഥയിലായ മറ്റു കെട്ടിടങ്ങൾ പൊളിക്കാനുള്ള ആത്മാർഥത ഉണ്ടാവുകയെന്നും അദ്ദേഹം ചോദിച്ചു. മേയറുടെ കപടനിലപാടാണ് ഇതിലൂടെ പുറത്തുവരുന്നത്. അനാസ്ഥ ഇനിയും തുടർന്നാൽ മേയർക്കെതിരേ ക്രിമിനൽ കേസ് കൊടുക്കും. കോർപറേഷന്‍റെ അനാസ്ഥയിൽ ജില്ലാ ഭരണകൂടം മൗനം തുടരുന്നതിനാൽ ജനങ്ങളുടെ സുരക്ഷ കണക്കിലെടുത്തു മന്ത്രി കെ. രാജൻ വിഷയത്തിൽ അടിയന്തരമായി ഇടപെടണമെന്നും ജോണ്‍ ഡാനിയൽ ആവശ്യപ്പെട്ടു.

ഓടിക്കൊണ്ടിരുന്ന സ്വകാര്യബസിന്‍റെ ചില്ല് തകർന്നുവീണ് അഞ്ചുപേർക്കു പരിക്ക്

അരിമ്പൂർ: ഓടിക്കൊണ്ടിരുന്ന സ്വകാര്യബസിന്‍റെ മുൻവശത്തെ ചില്ല് തകർന്നുവീണ് ഒരു കുട്ടിയടക്കം അഞ്ചുപേർക്കു പരിക്കേറ്റു. മൂന്നു സ്ത്രീകൾ, ഒരു കുട്ടി, ബസ് ഡ്രൈവർ വാടാനപ്പിള്ളി സ്വദേശി ആലപ്പി വീട്ടിൽ അബി എന്നിവർക്കാണ് പരിക്കേറ്റത്. പരിക്കേറ്റവരെ ഒളരിയിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇന്നലെ ഉച്ചയ്ക്ക് പന്ത്രണ്ടേമുക്കാലോടെയായിരുന്നു സംഭവം. തൃശൂരിൽനിന്ന് തൃപ്രയാറിലേക്കു യാത്രക്കാരുമായി വന്ന ശ്രീറാം എന്ന ബസിന്‍റെ മുൻവശത്തെ ചില്ലാണ് അരിമ്പൂർ അഗ്രോ കോർപറേഷനുസമീപം തകർന്നുവീണത്. റോഡിലെ കുഴിയിൽ വീണപ്പോഴാണ് ചില്ല് പൊട്ടിവീണതെന്നാണ് പറയുന്നത്. അപകടത്തെതുടർന്ന് ഡ്രൈവർ പരിഭ്രാന്തിയിലായെങ്കിലും ബ്രേക്ക് ചവിട്ടി ബസ് ഒതുക്കിനിർത്തി. ഇതിനിടയിലാണ് ബസിനുള്ളിൽ ചിതറിവീണ ചില്ലിൽ ചവിട്ടി ഡ്രൈവറുടെ കാലിൽ ചില്ലുകൾ കയറി പരിക്കുപറ്റിയത്. ഉടൻതന്നെ പരിക്കേറ്റവരെ ആശുപത്രിയിൽ എത്തിച്ചു. ആരുടെയും പരിക്ക് സാരമുള്ളതല്ല.

"ദേവാങ്കണം ചാരുഹരിതം' പദ്ധതിക്കു തുടക്കം

തൃശൂർ: ലോക പരിസ്ഥിതിദിനത്തിൽ കൊച്ചിൻ ദേവസ്വം ബോർഡിന്‍റെ "ദേവാങ്കണം ചാരുഹരിതം' പദ്ധതിക്കു തുടക്കം. വടക്കുന്നാഥക്ഷേത്രം തെക്കേഗോപുരനടയിലെ നൂറ്റാണ്ടുകൾ പഴക്കമുള്ള പേരാലിന് ആദരമർപ്പിച്ചാണ് പദ്ധതിക്കു തുടക്കമായത്. കൊച്ചിൻ ദേവസ്വം ബോർഡ് പ്രസിഡന്‍റ് കെ. രവീന്ദ്രന്‍റെ നേതൃത്വത്തിൽ പേരാലിനെ പൊന്നാടയണിയിച്ചു. അപൂർവവൃക്ഷമായ ശിംശപയുടെ തൈയും നട്ടു. ശ്രീമൂലസ്ഥാനത്ത് അരയാലിന്‍റെ മൂന്നാംഘട്ട പുനർജീവനചികിത്സയ്ക്കും തുടക്കമിട്ടു. ശ്രീമൂലസ്ഥാനത്തെ ആൽമരത്തിന്‍റെ ഫംഗസുകളെയും കീടങ്ങളെയും നശിപ്പിച്ച് മുറിച്ചുമാറ്റേണ്ട ഭാഗങ്ങൾ നീക്കംചെയ്ത് വേരുകളെ ഉത്തേജിപ്പിക്കുന്ന ചികിത്സ നൽകും. പോഷണംകിട്ടാൻ പഞ്ചഗവ്യവും നൽകും. ദേവസ്വം കമ്മീഷണർ എസ്.ആർ. ഉദയകുമാർ, സെക്രട്ടറി പി. ബിന്ദു, ഡെപ്യൂട്ടി കമ്മീഷണർ കെ. സുനിൽ കുമാർ, അസി. കമ്മീഷണർ എം. മനോജ് കുമാർ, ദേവസ്വം മാനേജർ വി.ആർ. രമ, കെഎഫ്ആർഐ ശാസ്ത്രജ്ഞൻ ഡോ. സുജനപാൽ, ബ്രാഹ്മണസഭ ജോയിന്‍റ് സെക്രട്ടറി ഹരിഹരൻ എന്നിവർ പങ്കെടുത്തു. ബോർഡിന്‍റെ കീഴിലുള്ള എല്ലാ ക്ഷേത്രങ്ങളിലും "ദേവാങ്കണം ചാരുഹരിതം' പദ്ധതിക്കു തുടക്കമിട്ടു. പെരുവൻമല ക്ഷേത്രത്തോടുചേർന്ന് കൊച്ചിൻ ദേവസ്വം ബോർഡിന്‍റെ 50 ഏക്കറിൽ ഔഷധവനം ഒരുക്കുന്നുണ്ട്. കൊടുങ്ങല്ലൂർ ശ്രീകുരുംബ ഭഗവതിക്ഷേത്രത്തിലെയും സമീപക്ഷേത്രങ്ങളിലെയും ഇല്ലംനിറയ്ക്കും പുത്തരിനിവേദ്യത്തിനും ആവശ്യമായ നെൽക്കതിരും അരിയും വിളയിക്കുന്ന കരനെൽകൃഷിക്കും തുടക്കമായി.

മൾട്ടിലെവൽ പാർക്കിംഗിലും ബലക്ഷയം?

തൃശൂർ: നഗരത്തിലെ കെട്ടിടങ്ങൾക്കുമാത്രമല്ല ഒരുകോടിയിലധികം ചെലവഴിച്ചുനിർമിച്ച കോർപറേഷൻ ഓഫീസിലെ മൾട്ടിലെവൽ പാർക്കിംഗിലും ബലക്ഷയമെന്ന് ആക്ഷേപം. പാർക്കിംഗിനു കയറ്റിയ കാർ ഫൗണ്ടേഷൻ ഒടിഞ്ഞു ചെരിഞ്ഞുവെന്ന് കോണ്‍ഗ്രസ് ആരോപിച്ചു. നിഷേധിച്ച് ഭരണപക്ഷവും രംഗത്തെത്തി. കഴിഞ്ഞ ഡിസംബറിൽ ഉദ്ഘാടനംകഴിഞ്ഞ പാർക്കിംഗ് സംവിധാനം മാസങ്ങൾ പിന്നിട്ടിട്ടും തുറന്നുനൽകാത്തത് വിവാദങ്ങൾക്കും പ്രതിഷേധങ്ങൾക്കും വഴിയൊരുക്കിയിരുന്നു. രണ്ടാഴ്ചമുന്പ് തുറന്നുനൽകിയ സംവിധാനത്തിലാണ് കഴിഞ്ഞദിവസം കാർ ചെരിഞ്ഞുവെന്നു കോണ്‍ഗ്രസ് ആരോപിച്ചത്. കാർ നിൽക്കുന്ന ഫൗണ്ടേഷന്‍റെ 13 കന്പികളാണ് പൊട്ടിയത്. ഇതേത്തുടർന്ന് കാറിന്‍റെ ബാലൻസ് തെറ്റുകയും വടം പൊട്ടുകയുമായിരുന്നു. കോർപറേഷൻ ജീവനക്കാരന്‍റെ കാറാണ് അപകടത്തിൽപ്പെട്ടതെന്നും അപകടസമയത്തു മൂന്നു കാറുകൾ ഇതിലുണ്ടായിരുന്നുവെന്നും അതിനാൽതന്നെയാണ് ഇക്കാര്യം അധികൃതർ പുറത്തറിയിക്കാതെ ഇരുന്നതെന്നുമാണ് കോണ്‍ഗ്രസ് ആരോപണം. വിഷയത്തിൽ ഇന്നലെ കോണ്‍ഗ്രസ് പ്രതിഷേധത്തിന് ഒരുങ്ങിയത് അറിഞ്ഞതോടെ പൊട്ടിയ ഭാഗം വെൽഡ് ചെയ്തു, തിടുക്കത്തിൽ ആ ഭാഗം പെയിന്‍റടിച്ചു, കാറും കയറ്റിയിട്ടു. പ്രതിപക്ഷനേതാവ് രാജൻ ജെ. പല്ലൻ, ഉപനേതാവ് ഇ.വി. സുനിൽ രാജ്, സ്റ്റാൻഡിംഗ് കമ്മിറ്റി ചെയർമാൻ ജയപ്രകാശ് പൂവത്തിങ്കൽ, കൗണ്‍സിലർ മേഫി ഡെൽസണ്‍ എന്നിവർ പാർക്കിംഗ് സംവിധാനത്തിനു റീത്തുവച്ചു പ്രതിഷേധിച്ചു. കോണ്‍ഗ്രസിനു വിഷയ ദാരിദ്ര്യം: മേയർ മൾട്ടിലെവൽ പാർക്കിംഗ് സംവിധാനത്തെച്ചൊല്ലി കോണ്‍ഗ്രസ് ആരോപിക്കുന്ന കാര്യങ്ങളിൽ യാതൊരു കഴന്പുമില്ലെന്നും ആരോപണങ്ങൾ നടത്തുന്നതു വിഷയദാരിദ്ര്യം കൊണ്ടാണെന്നും മേയർ എം.കെ. വർഗീസ്. നിലവിൽ കാറിൽനിന്ന് ഇറങ്ങുന്നവരുടെ കാൽ കുടുങ്ങാതിരിക്കാൻ പുതിയ പൈപ്പുകൾ സ്ഥാപിക്കലും അവയിൽ പെയിന്‍റടിക്കലുമാണ് നടന്നത്. പാർക്കിംഗ് സംവിധാനത്തിന് എന്തെങ്കിലും അപാകത ഉണ്ടെങ്കിൽ താൻ നേരിട്ടു നടപടികൾ സ്വീകരിക്കും. വിജിലൻസ് അന്വേഷണം വേണം: രാജൻ പല്ലൻ നിർമാണത്തിനുശേഷം പാർക്കിംഗ് സംവിധാനത്തിനു ബലക്ഷയമുണ്ടെന്നു പരാതി ഉന്നയിച്ചപ്പോൾ തന്നെ കളിയാക്കിവിട്ടവർക്ക് ഇപ്പോൾ മൗനമാണ്. ജനങ്ങളുടെ ജീവനും സ്വത്തിനും സുരക്ഷ ഒരുക്കുന്നതിൽ കോർപറേഷൻ പരാജയമാണെന്നു വീണ്ടും തെളിയിച്ചു. വിഷയത്തിൽ വിജിലൻസ് അന്വേഷണം നടത്തണമെന്നു പ്രതിപക്ഷനേതാവ് രാജൻ ജെ. പല്ലൻ ആവശ്യപ്പെട്ടു. പാർക്കിംഗിൽ പരീക്ഷണത്തിനു കയറ്റിയ കാറും കുടുങ്ങി തൃശൂർ: പ്രതിപക്ഷ പ്രതിഷേധത്തിനുശേഷം മൾട്ടിലെവൽ പാർക്കിംഗിൽ പരീക്ഷണാടിസ്ഥാനത്തിൽ കയറ്റിയ കാർ കുടുങ്ങിയതു മൂന്നുമണിക്കൂർ. തുടർന്ന് രാജൻ ജെ. പല്ലന്‍റെ നേതൃത്വത്തിൽ ഉച്ചകഴിഞ്ഞു മൂന്നുമുതൽ അഞ്ചുവരെ കാർ പാർക്കിംഗിനുമുന്നിൽ കുത്തിയിരുന്നു പ്രതിഷേധിച്ചു. ഇന്നലെ ഉച്ചയ്ക്കുശേഷം കോർപറേഷൻ വൈദ്യുതിവിഭാഗത്തിൽ ഇടപാടുകൾക്കെത്തിയ എറണാകുളം സ്വദേശി ജിതിൻ ജോസഫിന്‍റെ കാറാണു പരീക്ഷണത്തിന് ഉപയോഗിച്ചത്. കാർ കയറ്റിയപ്പോൾ ഇരുമ്പുപൈപ്പുകൾ വീണ്ടും വളയുകയായിരുന്നു. ഏറെ പണിപ്പെട്ടു വൈകീട്ട് അഞ്ചോടെയാണ് പാർക്കിംഗിൽനിന്നു കാർ പുറത്തിറക്കാനായത്. പരീക്ഷണം നടത്താൻ മേയറുടെ സെക്രട്ടറിയുടെയും ഉദ്യോഗസ്ഥന്മാരുടെയും കൗൺസിലർമാരുടെയും വാഹനങ്ങളുള്ളപ്പോൾ ഇടാപാടിനെത്തിയയാളുടെ കാർ ഉപയോഗിച്ചതു കൊലച്ചതിയാണെന്നു രാജൻ പല്ലൻ കുറ്റപ്പെടുത്തി. പ്രതിഷേധസമരത്തിനു സുനിൽരാജ്, ലാലി ജെയിംസ്, മേഫി ഡെൽസൻ, സുനിത വിനു, എബി വർഗീസ്, മുകേഷ് കുളപറമ്പിൽ, ജയപ്രകാശ് പൂവത്തിങ്കൽ എന്നിവർ നേതൃത്വം നൽകി.

പനിബാധിതരുടെ എണ്ണമേറുന്നു

തൃശൂർ: ജില്ലയിൽ പനിബാധിതരുടെ എണ്ണം കുതിക്കുന്നു. ഇക്കഴിഞ്ഞ നാലുദിവസത്തിനുള്ളിൽ പനിക്കു ചികിത്സ തേടിയത് 2747 പേർ. ഈ മാസം ഒന്നുമുതൽ നാലുവരെ ഓരോ ദിവസവും പനിബാധിതരുടെ എണ്ണം കൂടിവരികയാണ്. ഒന്നാംതീയതി 408 പേരാണ് ചികിത്സതേടിയതെങ്കിൽ രണ്ടാംതീയതി 719 ആയി. മൂന്നിന് 783 പേരും നാലിന് 837 പേരും പനിക്കു ചികിത്സ തേടിയെത്തി. ഇക്കഴിഞ്ഞ നാലു ദിവസത്തിനുള്ളിൽ ജില്ലയിൽ 21 ഡെങ്കിപ്പനി കേസുകൾ സ്ഥിരീകരിച്ചു. അളഗപ്പനഗർ, കോടശേരി, കൊരട്ടി, മേലൂർ, നെൻമണിക്കര, പാണഞ്ചേരി, എടത്തിരുത്തി, എരുമപ്പെട്ടി, മുളങ്കുന്നത്തുകാവ്, നടത്തറ, വള്ളത്തോൾനഗർ, വേളൂക്കര, വെങ്കിടങ്ങ്, അടാട്ട്, നാട്ടിക, കാട്ടകാന്പാൽ എന്നിവിടങ്ങളിലാണ് ഡെങ്കിപ്പനികേസുകൾ സ്ഥിരീകരിച്ചത്. മറ്റത്തൂരിൽ ഒരു എലിപ്പനി കേസും സ്ഥിരീകരിച്ചിട്ടുണ്ട്.

നാക് എ+ തിളക്കത്തിൽ സെന്‍റ് അലോഷ്യസ് കോളജ്

തൃശൂർ: നാഷണൽ അസസ്മെന്‍റ് ആൻഡ് അക്രഡിറ്റേഷൻ കൗണ്‍സിലിന്‍റെ (നാക്) എ പ്ലസ് നേട്ടത്തിൽ എൽത്തുരുത്ത് സെന്‍റ് അലോഷ്യസ് കോളജ്. അഞ്ചുവർഷംമുന്പ് നടന്ന നാക് അസസ്മെന്‍റിൽ ബി പ്ലസ്പ്ലസ് ലഭിച്ചിരുന്നു. സെന്‍റ് ചാവറ സെന്‍റർ ഫോർ ടീച്ചിംഗ് എക്സലൻസ് ആൻഡ് എഡ്യുക്കേഷൻ ഇന്നവേഷൻ, അലോഷ്യൻ സെന്‍റർ ഫോർ കോൾ വെറ്റ്ലാൻഡ് സ്റ്റഡീസ് ആൻഡ് റിസർച്ച്, അലോഷ്യൻ സെന്‍റർ ഫോർ ലൈഫ്‌ലോംഗ് ലേണിംഗ് എന്നിവയിലൂടെ നടത്തിയ മികവാർന്ന പ്രവർത്തനങ്ങളാണ് എ പ്ലസ് ഗ്രേഡ് ലഭിക്കുന്നതിൽ മുഖ്യപങ്ക് വഹിച്ചത്. യുഎന്നിന്‍റെ 17 സുസ്ഥിരവികസനലക്ഷ്യങ്ങൾ മുൻനിർത്തിയുള്ള കോളജിന്‍റെ പ്രവർത്തനങ്ങൾക്കു നാക് കമ്മിറ്റിയുടെ പ്രത്യേക പരാമർശം ലഭിച്ചു. സന്പൂർണ സോളാർ അധിഷ്ഠിത കാന്പസ്, ഗ്രീൻ കാന്പസ്, മികച്ച റിസോഴ്സും സേവനങ്ങളും, നൂതനസാങ്കേതികവിദ്യയിലുള്ള ല്രൈബറി, ഇംഗ്ലീഷ് റിസർച്ച് വിഭാഗത്തിന്‍റെ മികവുറ്റ പ്രവർത്തനങ്ങൾ, പ്ലേസ്മെന്‍റ്, ഇന്‍റേണ്‍ഷിപ്പ് സഹായങ്ങൾ, എൻഎസ്എസ്, എൻസിസി എന്നിവ മുഖേന നടത്തുന്ന സാമൂഹികസേവനങ്ങൾ, കോളജ് പരിസരത്തുള്ള സാന്പത്തികമായി പിന്നാക്കംനിൽക്കുന്ന കുടുംബങ്ങളിലെ ഇടപെടലുകൾ എന്നിവയ്ക്കും പ്രത്യേകം അഭിനന്ദനം ലഭിച്ചു. വിദ്യാർഥി സ്കോളർഷിപ്പുകൾ, പഠനത്തോടൊപ്പം സന്പാദ്യവും ലക്ഷ്യമിടുന്ന ഗുരുകുല പോലുള്ള സംവിധാനങ്ങളും കോളജിന്‍റെ വേറിട്ട മേഖലകളായി വിലയിരുത്തപ്പെട്ടു. മാനേജർ ഫാ. തോമസ് ചക്രമാക്കിൽ സിഎംഐ, മുൻപ്രിൻസിപ്പൽ പ്രഫ. പി. ചാക്കോ ജോസ്, പ്രിൻസിപ്പൽ ഇൻ ചാർജ് ഡോ. ഇ.ഡി. ഡയസ്, ഐക്യുഎസി കോ-ഓർഡിനേറ്റർ ഡോ. കെ.ബി. ലിബിസണ്‍, അഡ്മിനിസ്ട്രേറ്റർ ഫാ. കെ. അരുണ്‍ ജോസ് സിഎംഐ എന്നിവരുടെ നേതൃത്വത്തിലുള്ള അധ്യാപക, വിദ്യാർഥി, പൂർവവിദ്യാർഥിസമൂഹത്തിന്‍റെ ഒന്നിച്ചുള്ള പ്രവർത്തങ്ങളാണ് നേട്ടത്തിനു വഴിയൊരുക്കിയത്.

വീട്ടിൽ യുവാവിനെ മരിച്ചനിലയിൽ കണ്ടെത്തി

വടക്കാഞ്ചേരി: എങ്കക്കാട് റെയിൽവേ ഗേറ്റിനു സമീപം വാടകവീട്ടിലെ കിടപ്പുമുറിയിൽ വടക്കാഞ്ചേരി സ്വദേശിയായ യുവാവിനെ മരിച്ചനിലയിൽ കണ്ടെത്തി. മാത്തൂർ വീട്ടിൽ പ്രകാശന്‍റെ മകൻ ആകാശ് (25)ആണ് മരിച്ചത്. കഴിഞ്ഞദിവസം ബന്ധുവാണ് തൂങ്ങിയനിലയിൽ കണ്ടെത്തിയത്. വിവരമറിയിച്ചതിനെ തുടർന്ന് വടക്കാഞ്ചേരി ആകട്സ് പ്രവർത്തകർ ജില്ലാ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. തിരുവില്വാമലയിലെ മൊബൈൽ ഷോപ്പ് ജീവനക്കാരനാണ്. വടക്കാഞ്ചേരി പോലീസ് സ്ഥലത്തെത്തി മേൽനടപടികൾ സ്വീകരിച്ചു. സംസ്കാരം നടത്തി. അമ്മ: വസന്ത. സഹോദരങ്ങൾ: വൈശാഖ്, കിരൺ.

സ്റ്റാൻഡ് ഫീസ് കുത്തനേ കൂട്ടി, ശക്തനിൽ സംഘർഷം

സ്വന്തം ലേഖകൻ തൃശൂർ: മുന്നറിയിപ്പില്ലാതെ കുത്തനേ കൂട്ടിയ സ്റ്റാൻഡ് ഫീസ് പിരിക്കാൻ എത്തിയ കരാറുകാരനും സംഘവും ബസ് അസോസിയേഷൻ പ്രസിഡന്‍റിന്‍റെ ബസുകൾ തടഞ്ഞു. ശക്തൻ സ്റ്റാൻഡിൽ പ്രതിഷേധം ശക്തമാക്കി ബസ് ജീവനക്കാർ. കൂട്ടിയ ഫീസ് നൽകില്ലെന്നും ഫീസ് പിരിക്കൽ തുടർന്നാൽ സർവീസ് നിർത്തിവയ്ക്കുമെന്നും ബസ് ഓപ്പറേറ്റേഴ്സ് അസോസിയേഷൻ മുന്നറിയിപ്പുനൽകി. ഇന്നലെ രാവിലെ ഒന്പതോടെയാണ് സംഭവം. തൃശൂർ - കൊടുങ്ങല്ലൂർ റൂട്ടിൽ സർവീസ് നടത്തുന്ന ബസ് ഓപ്പറേറ്റേഴ്സ് അസോസിയേഷൻ ജില്ലാ പ്രസിഡന്‍റ് എം.എസ്. പ്രേം കുമാറിന്‍റെ ബസാണ് യാത്ര പുറപ്പെടുംമുന്പ് കരാറുകാരനും സംഘവും ചേർന്നു തടഞ്ഞത്. ഇതോടെ യാത്രക്കാരും ജീവനക്കാരും നട്ടംതിരിഞ്ഞു. വിവരമറിഞ്ഞു പോലീസ് സ്ഥലത്തെത്തി, യാത്രക്കാരുള്ള ബസ് തടയാൻ അനുവാദമില്ലെന്നു പറഞ്ഞെങ്കിലും കരാറുകാരനും സംഘവും ബസിനു മുന്പിൽനിന്നു മാറിയില്ല. ഇതോടെ സംഘർഷാവസ്ഥ ഉടലെടുത്തു. തുടർന്നു കരാറുകാരെ തള്ളിനീക്കിയാണ് ബസ് സർവീസ് തുടർന്നത്. നേരത്തേയും സ്റ്റാൻഡിൽ മുന്നറിയിപ്പില്ലാതെ ഫീസ് കുത്തനേ ഉയർത്തിയതു വൻപ്രതിഷേധങ്ങൾക്കു വഴിവച്ചതോടെ പിൻവലിച്ചിരുന്നു. 25 രൂപയായിരുന്ന സ്റ്റാൻഡ് ഫീസ് 40 രൂപയായാണ് ഉയർത്തിയത്. മതിയായ അടിസ്ഥാനസൗകര്യങ്ങൾ ഒരുക്കാതെ ഫീസ് വർധിപ്പിക്കുന്നത് അംഗീകരിക്കാൻ കഴിയില്ലെന്നു ജീവനക്കാർ പറഞ്ഞു. വടക്കേ ബസ് സ്റ്റാൻഡ് നവീകരണത്തിനുശേഷം സ്റ്റാൻഡ് ഫീസ് വർധിപ്പിക്കുകയും പാർക്കിംഗിനായി സ്ഥലം ഇല്ലാതാകുകയും ചെയ്തതോടെ 70 രൂപ അധികം നൽകിയാണ് ബസുകൾ പാർക്ക് ചെയ്യുന്നത്. മഴയും ജില്ലയിലെ വിവിധ ഇടങ്ങളിൽ റോഡുപണികൾ നടക്കുന്നതുംമൂലം യാത്രക്കാരില്ലാതെ ബസ് സർവീസുകൾ ദുരിതത്തിലാണെന്നും ഇതിനിടെയാണ് ഫീസ് കുത്തനേ കൂട്ടിയതെന്നും അസോസിയേഷൻ പ്രസിഡന്‍റ് എം.എസ്. പ്രേംകുമാറും ജനറൽ സെക്രട്ടറി കെ.കെ. സേതുമാധവനും അറിയിച്ചു. മുന്നറിയിപ്പില്ലാതെ ഫീസ് കുത്തനേ വർധിപ്പിക്കുകയോ ബസ് തടയാൻ ശ്രമിക്കുകയോ ചെയ്താൽ ജില്ലയിൽ ബസുകൾ ഒന്നടങ്കം സർവീസ് നിർത്തിവയ്ക്കുമെന്നും അവർ മുന്നറിയിപ്പ് നൽകി. വിഷയത്തിൽ അസോസിയേഷനും കരാറുകാരും എസിപിയുമായി ചർച്ച നടത്തി. പുതുക്കിയ നിരക്കിൽനിന്നും വിട്ടുവീഴ്ച നടത്താൻ കരാറുകാരോട് ആവശ്യപ്പെട്ടിട്ടുണ്ട്. പത്തുദിവസത്തേക്കു പിരിവു പാടില്ലെന്നും തുടർന്ന് അസോസിയേഷനു കോടതിയെ സമീപിക്കാമെന്നും അറിയിച്ചതായും നേതാക്കൾ പറഞ്ഞു. അതേസമയം, നാലുമാസമായി കരാർ എടുത്ത സംഘത്തിന് ഇതുവരെ ഫീസ് പിരിക്കാൻ സാധിച്ചിട്ടില്ല. കോർപറേഷനു മുൻകൂട്ടി തുകനൽകിയിട്ടും ഫീസ് പിരിക്കാൻ കഴിയാത്തതു കരാർകാരെയും ബുദ്ധിമുട്ടിലാക്കുന്നതായി പരാതിയുണ്ട്.

ആദ്യം പക്ഷിശല്യം, ഇപ്പോൾ പാന്പുശല്യം; ഇവിടെ ദുരിതമൊഴിയുന്നില്ല

സി.ജി. ജിജാസൽ തൃശൂർ: നടക്കാനും ഇരിക്കാനും ഇടമില്ല. അയ്യന്തോൾ ചിൽഡ്രൻസ് പാർക്കിൽ കുന്നുകൂടി വിറകുകളും മരച്ചില്ലകളും. കുട്ടികളെ കാത്തിരിക്കുന്നതു വിഷപ്പാന്പുകളും പകർച്ചവ്യാധികൾ പടർത്തുന്ന കൊതുകുകളും. കളക്ടറേറ്റിനുമുന്പിലെ പാർക്കിലാണ് കുട്ടികളുടെയും ജനങ്ങളുടെയും ആരോഗ്യത്തിനും ജീവനും ഗുരുതരഭീഷണിയാകുംവിധം മരക്കൊന്പുകളും വിറകുകളും കൂട്ടിയിട്ടിരിക്കുന്നത്. നേരത്തേ പക്ഷിശല്യത്താൽ പൊറുതിമുട്ടിയ ജനം പലതവണ പരാതികൾ നൽകിയതിന്‍റെ അടിസ്ഥാനത്തിൽ മരക്കൊന്പുകൾ മുറിച്ചുമാറ്റിയിരുന്നു. അടിയന്തരമായി ഇവ നീക്കംചെയ്യുമെന്ന് അന്ന് അറിയിച്ചിരുന്നെങ്കിലും അവ നീക്കംചെയ്യാത്തതാണ് പുതിയ പ്രശ്‍നങ്ങൾക്കു വഴിയൊരുക്കിയത്. മുറിച്ചുനീക്കിയ കൊന്പുകളും വിറകുകളും പാർക്കിലെ മതിലിനും നടപ്പാതകൾക്കും ചാരുബഞ്ചുകൾക്കും കളിയുപകരണങ്ങൾക്കും സമീപം കൂട്ടിയിട്ടതോടെ കുട്ടികൾക്കു കളിക്കുന്നതിനോ മുതിർന്നവർക്കു വ്യായാമംചെയ്യാനോ കഴിയുന്നില്ല. ഇതോടെ സന്ദർശകർ കുറഞ്ഞ പാർക്കിൽ അണലി അടക്കമുള്ള വിഷപ്പാന്പുകളും ഇടംപിടിച്ചു. ഇതിനുപുറമെ ഇലകൾ ചീഞ്ഞു ദുർഗന്ധം വമിക്കുന്ന ഇവിടെ കൊതുകുശല്യവും രൂക്ഷമായി. പകർച്ചവ്യാധികൾ പടർന്നുപിടിക്കുന്ന സാഹചര്യത്തിലും സന്ദർശകരുടെ സുരക്ഷയുടെ ഭാഗമായും ഇവ നീക്കംചെയ്യണമെന്നും ഭീതി ഒഴിവാക്കണമെന്നും ആവശ്യപ്പെട്ട് പൊതുപ്രവർത്തകൻ ജെയിംസ് മുട്ടിക്കൽ ജില്ലാ കളക്ടർക്കു നിവേദനം നൽകിയിട്ടുണ്ട്. നേരത്തേയും നിവേദനം സമർപ്പിച്ചെങ്കിലും നടപടിയുണ്ടാക്കാത്ത സാഹചര്യത്തിലാണ് വീണ്ടും നിവേദനം സമർപ്പിച്ചതെന്ന് അദ്ദേഹം പറഞ്ഞു.

എസ്ബിഐ സ്റ്റാഫ് സൊസൈറ്റി ക്രമക്കേട് : മുൻ ഭരണസമിതി അംഗങ്ങളിൽനിന്ന് 11 കോടി ഈടാക്കാൻ ഉത്തരവ്

തൃശൂർ: എസ്ബിഐ സ്റ്റാഫ് കോ-ഓപ്പറേറ്റീവ് സൊസൈറ്റിയിലെ കോടികളുടെ ക്രമക്കേടിൽ മുൻ ഭരണസമിതി അംഗങ്ങളിൽനിന്ന് 11 കോടി ഈടാക്കാൻ ഉത്തരവ്. തൃശൂർ ആർ. 345 ശാഖയിലെ ക്രമക്കേടിന് ഉത്തരവാദികളായ 28 പേരിൽനിന്നു തുകയീടാക്കണമെന്നാണു തൃശൂർ ജോയിന്‍റ് രജിസ്ട്രാറുടെ ഉത്തരവ്. ഒരുമാസത്തിനുള്ളിൽ പണമടച്ചില്ലെങ്കിൽ ജപ്തിനടപടി സ്വീകരിക്കും. 1999 മുതൽ 2015 വരെയാണു ഭൂരിപക്ഷം ക്രമക്കേടും നടന്നത്. സ്റ്റേറ്റ് ബാങ്ക് ജീവനക്കാരുടെ സഹകരണസംഘമാണെങ്കിലും ബാങ്കുമായി ബന്ധമില്ല. 1973ൽ രൂപീകരിച്ച സംഘത്തിന്‍റെ പുതിയ ഭരണസമിതി 2018ൽ അധികാരമേറ്റപ്പോൾ എട്ടുകോടിയുടെ ക്രമക്കേട് കണ്ടെത്തി, നൽകിയ പരാതിയിലാണു സഹകരണവകുപ്പിന്‍റെ നടപടി. വായ്പകൾ തിരിച്ചുപിടിക്കാൻ കഴിയില്ലെന്നു കണ്ടെത്തി ഭരണസമിതി പിരിച്ചുവിട്ട് അഡ്മിസ്ട്രേറ്റീവ് ഭരണവും ഏർപ്പെടുത്തി. 29 വർഷം സൊസൈറ്റിയുടെ പ്രസിഡന്‍റായിരുന്ന കെ.വി. ഉക്രുവിൽനിന്ന് 3.01 കോടിയും മുൻ ഇന്‍റേണൽ ഓഡിറ്റർ നന്ദകുമാരിയിൽനിന്ന് 1.06 കോടിയും ഈടാക്കണം. വിവിധ കാലങ്ങളിൽ ഭരണസമിതിയിലുള്ളവരിൽനിന്ന് നാലുലക്ഷം മുതൽ 69 ലക്ഷംവരെ ഈടാക്കണമെന്നും ഉത്തരവിൽ പറയുന്നു. സഹകരണവകുപ്പിലെ ഉന്നത ഉദ്യോഗസ്ഥന്‍റെ സഹായത്തിലാണു ക്രമക്കേട് നടന്നതെന്നു ഡയറക്ടർ ബോർഡ് അംഗങ്ങൾ മൊഴിനൽകിയിട്ടുണ്ട്. മൂന്നുവർഷമായി സംഘം നിക്ഷേപകർക്കു പണം തിരികെനൽകുന്നില്ല. 600 അംഗങ്ങളുള്ള സംഘത്തിൽ 2023-ലെ ഓഡിറ്റ് പ്രകാരം 70 പേർക്കായി 7.07 കോടി തിരികെനൽകാനുണ്ട്. ബാങ്കിൽനിന്നു വിരമിച്ചപ്പോൾ ലഭിച്ച ആനുകൂല്യമാണു നിക്ഷേപിച്ചത്. ഇവരെല്ലാം പ്രായക്കൂടുതലിന്‍റെ അവശതകൾ അനുഭവിക്കുന്നവരും രോഗികളുമാണ്.

ധനലക്ഷ്മി ഗ്രൂപ്പ് പഠനകിറ്റുകൾ വിതരണംചെയ്തു

തൃശൂർ: ധനലക്ഷ്മി ഗ്രൂപ്പിലെ ആയിരത്തോളം ജീവനക്കാരുടെ കുട്ടികൾക്കുള്ള പഠനോപകരണവിതരണ ഉദ്ഘാടനം ചെയർമാനും ഫൗണ്ടറുമായ ഡോ. വിബിൻദാസ് കടങ്ങോട്ട് നിർവഹിച്ചു. ഗ്രൂപ്പ് ഡയറക്ടർ സൂരജ്, കണ്‍സൾട്ടന്‍റ് ആൽബർട്ട്, അഡ്വൈസറി ബോർഡ് അംഗങ്ങളായ ഹരികൃഷ്ണൻ, വിമൽ വിജയ്, ബിനൻ, സുനിൽ, സുഹാസ്, ഡോ. സുഭാഷ് കുമാർ തുടങ്ങിയവർ പങ്കെടുത്തു.

ദീപിക ആദരം 2025 ഇരിങ്ങാലക്കുടയിൽ നാളെ

ഇരിങ്ങാലക്കുട: എസ്എസ്എല്‍സി, പ്ലസ് ടു പരീക്ഷകളിൽ ഉന്നതവിജയം നേടിയ വിദ്യാര്‍ഥികളെ ആദരിക്കുന്ന ദീപിക ആദരം 2025 നാളെ ഇരിങ്ങാലക്കുടയിൽ നടക്കും. രാവിലെ 9.30നു സെന്‍റ് ജോസഫ്സ് കോളജില്‍ ബിഷപ് മാര്‍ പോളി കണ്ണൂക്കാടന്‍ ഉദ്ഘാടനം ചെയ്യും. കോളജ് പ്രിന്‍സിപ്പല്‍ സിസ്റ്റര്‍ ഡോ. ബ്ലെസി സിഎച്ച്എഫ് അധ്യക്ഷത വഹിക്കും. മുനിസിപ്പല്‍ ചെയര്‍പേഴ്സണ്‍ മേരിക്കുട്ടി ജോയ്, എഡ്യുപോര്‍ട്ട് ഫാക്കല്‍റ്റി ഡോ. ബിലാല്‍ മുഹസിന്‍ എന്നിവര്‍ ആശംസകളര്‍പ്പിക്കും. ദീപിക കോ-ഓര്‍ഡിനേറ്റിംഗ് എഡിറ്റര്‍ ഫാ. റിന്‍റോ പയ്യപ്പിള്ളി സ്വാഗതവും ദീപിക ഇരിങ്ങാലക്കുട റിപ്പോര്‍ട്ടര്‍ ഷോബി കെ. പോള്‍ നന്ദിയും പറയും. 100 ശതമാനം വിജയം കൈവരിച്ച സ്‌കൂളുകളെയും ചടങ്ങില്‍ ആദരിക്കും.

വനത്തിൽ 25,000 സീഡ്ബോളുകൾ വർഷിക്കാൻ ലയൺസ്

തൃശൂർ: ലോക പരിസ്ഥിതിദിനത്തോടനുബന്ധിച്ച് ലയൺസ് ഡിസ്ട്രിക്ട് 318 ഡിയുടെ ആഭിമുഖ്യത്തിൽ തൃശൂർ, പാലക്കാട്, മലപ്പുറം ജില്ലകളിലെ വനഭൂമികളിൽ 25,000 സീഡ്ബോളുകൾ വർഷിക്കുന്നതിന്‍റെ ജില്ലാതല ഉദ്ഘാടനം ഇന്ന് ഉച്ചകഴിഞ്ഞു മൂന്നിന് വാഴാനി അസുരൻകുണ്ട് ഡാം പരിസരത്ത് ഡിഎഫ്ഒ രവീന്ദ്രകുമാർ മീണ നിർവഹിക്കും. ലയൺസ് ഡിസ്ട്രിക്ട് ഗവർണർ ജെയിംസ് വളപ്പില അധ്യക്ഷത വഹിക്കും. മലവേപ്പ്, വാക, അത്തി, അരയാൽ, പുളി തുടങ്ങി പതിനഞ്ചോളം വ്യത്യസ്തമായ വൃക്ഷങ്ങളുടെ വിത്തുകളാണ് സീഡ്ബോളുകളിൽ നിറച്ചിരിക്കുന്നത്. പൂമല, വാഴാനി, അതിരപ്പിള്ളി, മലക്കപ്പാറ, പീച്ചി, ചിമ്മിനി ഡാം, മലമ്പുഴ, അട്ടപ്പാടി, പൂക്കോട്ടുംപാടം, നിലമ്പൂർ തുടങ്ങിയ വനഭൂമികളിൽ 22 ലയൺസ് റീജിയൻ ചെയർമാൻമാരുടെ നേതൃത്വത്തിലായിരിക്കും സീഡ് ബോൾ പദ്ധതി നടപ്പാക്കുക. പരിസ്ഥിതിദിനമായ ഇന്നു രാവിലെ ലയൺസ് ഡിസ്ട്രിക്ടിന്‍റെ നേതൃത്വത്തിൽ വിയ്യൂർ ജയിലിൽ അന്പതിനം വ്യത്യസ്തഫലവൃക്ഷങ്ങളടങ്ങുന്ന തോട്ടം നിർമിക്കും. ഉദ്ഘാടനം ജില്ല പഞ്ചായത്ത് പ്രസിഡന്‍റ് വി.എസ്. പ്രിൻസ് നിർവഹിക്കും. മുൻഗവർണർമാരായ ഇ.ഡി. ദീപക്, എം.ഡി. ഇഗ്നേഷ്യസ്, പരിസ്ഥിതി ഡിസ്ട്രിക്ട് കോ ഓർഡിനേറ്റർ നാരായണൻ ഉണ്ണി, റീജണൽ ചെയർമാൻമരായ പി.എം. രവീന്ദ്രനാഥൻ, പി. മത്തായി എന്നിവർ പങ്കെടുക്കും.

വായിച്ചറിഞ്ഞ പ്രകൃതിദുരന്തങ്ങൾ ഇന്ന് നേരനുഭവങ്ങളായി മാറി: ജില്ലാ കളക്ടർ

തൃശൂർ: വായിച്ചറിഞ്ഞ പ്രകൃതിദുരന്തങ്ങൾ ഇന്നു നേരനുഭവങ്ങളായി മാറിയെന്നു ജില്ലാ കളക്ടർ അർജുൻ പാണ്ഡ്യൻ. ലോക പരിസ്ഥിതിദിനത്തിനോടനുബന്ധിച്ച് സാമ്പത്തികസ്ഥിതിവിവരകണക്ക് വകുപ്പിന്‍റെ നേതൃത്വത്തിൽ സംഘടിപ്പിച്ച സെമിനാർ ഉദ്ഘാടനം ചെയ്യുകയായിരുന്നു അദ്ദേഹം. കാലംതെറ്റുന്ന കാലാവസ്ഥ എന്ന വിഷയത്തിൽ റിട്ട. അഗ്രോ ക്ലൈമറ്റോളജിസ്റ്റ് ഡോ. ഗോപകുമാർ ചോലയിൽ സെമിനാർ അവതരിപ്പിച്ചു. സാമ്പത്തികസ്ഥിതിവിവരവകുപ്പ് ജില്ലാ ഓഫീസ് തയാറാക്കിയ എ റിപ്പോർട്ട് ഓഫ് പൊല്യൂഷൻ ഇംപാക്ട് അപ്പോൺ എൻവയൺമെന്‍റ് എന്ന പുസ്തകം ജില്ലാ കളക്ടർ പ്രകാശനംചെയ്തു. പരിസ്ഥിതിസംരക്ഷണ പ്രതിജ്ഞയും ക്വിസ് മത്സരവും നടത്തി. ക്വിസ് മത്സരത്തിൽ തലപ്പിള്ളി താലൂക്കിലെ സ്റ്റാറ്റിസ്റ്റിക്കൽ ഇൻവെസ്റ്റിഗേറ്റർമാരായ ജോയൽ - സ്വാലിഹ ടീം ഒന്നാംസ്ഥാനം കരസ്ഥമാക്കി. കളക്ടറേറ്റ് എക്സിക്യൂട്ടീവ് കോൺഫറൻസ് ഹാളിൽ നടന്ന സെമിനാറിൽ ഡെപ്യൂട്ടി ഡയറക്ടർ എ.പി. ഷോജൻ അധ്യക്ഷത വഹിച്ചു. സാമ്പത്തികസ്ഥിതിവിവര കണക്ക് വകുപ്പ് ഡയറക്ടർ ജി.എസ്. രജത് പരിസ്ഥിതിദിനസന്ദേശം നൽകി. റിസർച്ച് ഓഫീസർ എം.ജെ. ജസ്റ്റിൻ, എഡിഎം ടി. മുരളി, നവകേരളം കർമപദ്ധതി ജില്ലാ കോഓർഡിനേറ്റർ സി. ദിദിക, സീനിയർ സ്റ്റാറ്റിസ്റ്റിക്കൽ ഓഫീസർ ഡോളി വർഗീസ്, റിസർച്ച് ഓഫീസർ വി. മനോജ്, അഡീഷണൽ ജില്ലാ ഓഫീസർ എം. പ്രകാശൻ എന്നിവർ പ്രസംഗിച്ചു.

സമരത്തിനിടയിലൂടെ കടന്നുപോവാൻ ശ്രമിച്ച ഭരണപക്ഷ അംഗത്തെ തള്ളിയിട്ടതായി പരാതി

നടത്തറ: ഗ്രാമസഭ യോഗവുമായി ബന്ധപ്പെട്ട കാര്യങ്ങൾ ചർച്ചചെയ്യാൻ വിളിച്ച യോഗം പ്രതിപക്ഷത്തിന്‍റെ ഇറങ്ങിപ്പോക്കിലും ഉപരോധസമരത്തിലും കലാശിച്ചു. ഓഫീസിൽ നിന്നും സ്ഥലംമാറിപോയ അസി. എൻജിനീയർക്ക് പകരം ആളെ നിയമിക്കാത്തത് മൂലം തസ്തിക ഒഴിഞ്ഞുകിടക്കുകയാണെന്നും, ഇതിനാൽ പഞ്ചായത്തിലെ മരാമത്തുപണികളും, വീടുകൾക്ക് നമ്പർ നൽക്കലും നടക്കാതെ ജനങ്ങൾ വലയുകയാണെന്നും, മഴക്കാല പൂർവ ശുചീകരണ പ്രവർത്തനങ്ങൾ പാതിവഴിയിൽ മുടങ്ങിയിരിക്കുകയാണെന്നും ആരോപിച്ചാണ് പ്രതിപക്ഷമെമ്പർമാർ യോഗത്തിൽ നിന്നും ഇറങ്ങിപ്പോയി പ്രതിഷേധിച്ചത്. പഞ്ചായത്ത് ഓഫീസിനു മുന്നിൽ നടത്തിയ ഉപരോധ സമരം ബ്ലോക്ക് കോൺഗ്രസ് പ്രസിഡന്‍റ്് കെ.എൻ. വിജയകുമാർ ഉദ്ഘാടനം ചെയ്തു. ഇതിനിടെ കോൺഗ്രസ് പ്രവർത്തകരുടെ ഉപരോധ സമരത്തിനിടയിലൂടെ കടന്നുപോവാൻ ശ്രമിച്ച പഞ്ചായത്ത് ഭരണസമതി അംഗം ജിനിത സുഭാഷ് നിലത്തുവീണു. കോൺഗ്രസ് മെമ്പർമാർ തള്ളിയിട്ടതാണെന്ന് ആരോപിച്ച് ജിനിത മണ്ണുത്തി പോലീസിൽ പരാതി നൽകി. എന്നാൽ ആരോപണം തെറ്റാണെന്നും ഉപരോധ സമരത്തിനിടയിലൂടെ കടക്കാൻ ശ്രമിച്ച ജിനിത സ്വയം നിലത്ത് വീഴുകയാണ് ഉണ്ടായതെന്നും വീഴുന്ന സമയം ജിനിതയുടെ കൈവശം ഉണ്ടായിരുന്ന ചൂടുവെള്ളം തങ്ങളുടെ ദേഹത്ത് തെറിച്ചുവെന്നും ഇത് കാമറ ദൃശ്യങ്ങളിൽ വ്യക്തമാണെന്നും കോൺഗ്രസ് മെമ്പർമാർ പറഞ്ഞു. ജിനി വീണതിനെ തുടർന്ന് കോൺഗ്രസ് അംഗം മിനി വിനോദിന് കാലിലും പരിക്കേറ്റു എന്നും കോൺഗ്രസ് പ്രവർത്തകരും ആരോപിച്ചു. പരിക്കേറ്റ മിനി വിനോദ് തൃശൂരിലെ ആശുപത്രിയിൽ ചികിത്സ തേടി. തന്‍റെ ദേഹത്ത് ചൂടുവെള്ളം ഒഴിച്ചു എന്ന് കാണിച്ച് മിനി വിനോദും മണ്ണുത്തി പോലീസിന് ജിനിതയ്ക്കെതിരെ പരാതി നൽകി. മണ്ഡലം പ്രസിഡന്‍റ്് ജേക്കബ് പോൾ അധ്യക്ഷത വഹിച്ച പ്രതിഷേധ പരിപാടിയിൽ ഡി സിസി സെക്രട്ടറി എം.എൽ. ബേബി, ഇ.എസ്. അനിരുദ്ധൻ, ജിത്ത് ചാക്കൊ, പഞ്ചായത്ത് പ്രതിപക്ഷ നേതാവ് ബിന്ദു കാട്ടുങ്ങൽ, പഞ്ചായത്തംഗങ്ങളായ മിനി വിനോദ്, ടി.പി. മാധവൻ, ദീപ അനീഷ് എന്നിവർ പങ്കെടുത്തു.

ഇരുട്ടിന്‍റെ മറവിൽ സാമൂഹ്യവിരുദ്ധർ മലിനജലം തുറന്നുവിട്ടു

കേച്ചേരി: ദുർഗന്ധം വമിക്കുന്ന കറുത്ത നിറമുള്ള മലിനജലം രാത്രിയുടെ മറവിൽ സാമൂഹ്യദ്രോഹികൾ തള്ളിയതിൽ പ്രദേശവാസികളും നാട്ടുകാരും പ്രതിഷേധിച്ചു. നാലു കുടുംബങ്ങളുടെ പറമ്പിലും വീട്ടുമുറ്റത്തും കിണറുകളിലുമാണ് കറുത്ത നിറമുള്ള ദുർഗന്ധം വമിക്കുന്ന മലിനജലം കാണപ്പെട്ടത്. കേച്ചേരി - പന്നിത്തടം ബൈപ്പാസ് റോഡിലെ പട്ടിക്കരയിലാണു സംഭവം. വൃത്തിഹീനമായ മലിനജലം രാത്രിയിലെ മഴയുടെ മറവിൽ ടാങ്കറുകളിൽ കൊണ്ടുവന്നു തള്ളാനാണു സാധ്യതകളെന്ന് നാട്ടുകാർ പറയുന്നു. താഴ്ന്ന പ്രദേശമായതിനാൽ കിണറുകൾ നിറഞ്ഞു കിടക്കുന്ന കാരണത്താൽ പമ്പു ചെയ്തു മാറ്റാൻ ഏറെ പ്രയാസപ്പെടുമെന്നും പരിസരവാസികളും പറഞ്ഞു. ചൂണ്ടൽ പഞ്ചായത്തിലെ ആറാം വാർഡിലാണ് ഇരുട്ടിന്‍റെ മറവിൽ മലിനജലം തുറന്നു വിട്ടിട്ടുള്ളത്. വാർഡ് മെമ്പർ ആന്‍റോ പോളിന്‍റെ നേതൃത്വത്തിൽ കുന്നംകുളം പോലീസും ചൂണ്ടൽ ആരോഗ്യവകുപ്പും പഞ്ചായത്ത് ഉദ്യോഗസ്ഥരും സ്ഥലം സന്ദർശിച്ചു. ഇന്നലെ രാവിലെ മുറ്റത്തേക്കിറങ്ങിയപ്പോഴാണ് എല്ലാ വീട്ടുകാരും കറുത്ത ദുർഗന്ധം വമിക്കുന്ന മാലിന്യം പറമ്പുകളിലും വീട്ടുമുറ്റത്തു കിണറുകളിലും കാണാൻ കഴിഞ്ഞത്. ഊട്ടുമഠത്തിൽ രാജീവ്, ഷാജി, സുകുമാരൻ, മമ്മ സ്രാ ഇല്ലത്ത് ഹാരിസ് എന്നിവർക്കാണ് ഏറെയും മലിനജല ദുരിതം ബാധിച്ചിരിക്കുന്നത്. കേച്ചേരി - അക്കിക്കാവ് ബൈപ്പാസ് റോഡായതോടെ ഇടതടവില്ലാതെയാണ് കൂറ്റൻ വാഹനങ്ങൾ യാത്ര ചെയ്യുന്നത്. മലിനജലവുമായി വന്ന് ഉയർച്ചയുള്ള പട്ടിക്കരയിൽ വാഹനം പാർക്കു ചെയ്ത രീതിയിൽ നിറുത്തി ടാങ്കർതുറന്നു വിട്ടിരിക്കാനും സാധ്യതയുണ്ട്. ഈ പ്രദേശങ്ങളിൽ രാത്രി കാലങ്ങളിൽ പോലീസ് പട്രോളിംഗ് ആവശ്യമാണെന്ന് വാർഡ് മെമ്പറും പ്രദേശവാസികളും ആവശ്യപ്പെട്ടു. കുന്നംകുളം പോലീസ് പരിസരങ്ങളിലെ സിസിടിവി ദൃശ്യങ്ങൾ പരിശോധിച്ചതിൽ രാത്രി രണ്ടുമണിക്കു ശേഷം ടാങ്കർ വാഹനം കടന്നുപോകുന്ന ദൃശ്യം കണ്ടതായി നാട്ടുകാർ പറഞ്ഞു.

യോഗം വിളിക്കുമെന്ന് എംഎൽഎ; അസി. എൻജിനീയർ സ്ഥലം സന്ദർശിച്ചു

തിരുവില്വാമല: പാമ്പാടി ഗവ. ഹയർ സെക്കൻഡറി സ്കൂളിലെ യുപി വിഭാഗത്തിലെ അപകടാവസ്ഥയിലായ കെട്ടിടത്തിന്‍റെ കാര്യത്തിൽ ബന്ധപ്പെട്ടവരുടെ യോഗം ഉടൻ വിളിച്ച് വേണ്ട നടപടി സ്വീകരിക്കുമെന്ന് യു.ആർ. പ്രദീപ് എംഎൽഎ. കെട്ടിടത്തിന്‍റെ ശോച്യാവസ്ഥയെക്കുറിച്ച് ഇന്നലെ ദീപികയിൽ വന്ന വാർത്തയോട് പ്രതികരിക്കുകയായിരുന്നു എംഎൽഎ. ഇന്നലെ പഞ്ചായത്ത് അസി. എൻഞ്ചിനിയർ സ്ഥലം സന്ദർശിച്ച് ജില്ല വിദ്യാഭ്യാസ ഓഫീസർക്ക് റിപ്പോർട്ട് കൈമാറി. ജില്ല പഞ്ചായത്ത് എക്സിക്യുട്ടീവ് എൻജിനീയറേയും വിവരം ധരിപ്പിച്ചതായി അദ്ദേഹം പറഞ്ഞു. കഴിഞ്ഞ വർഷം അപകടാവസ്ഥയിലായ ഈ കെട്ടിടത്തിന്‍റെ ഒരു ഭാഗത്ത് പ്രവർത്തിച്ചിരുന്ന ഓഫീസ് മാറ്റിയിരുന്നു. കെട്ടിടം പുതുക്കിപ്പണിയുന്നതുവരെ ഇതിന് തൊട്ടടുത്തു പ്രവർത്തിക്കുന്ന ക്ലാസ് മുറികളിലെ കുട്ടികളെ മാറ്റാനും നിർദേശിച്ചിട്ടുണ്ട്. കെട്ടിടത്തിന്‍റെ ഒരു വശത്തെ മേൽക്കൂരയുടെ കഴുക്കോലും പട്ടികയും ഓടുമെല്ലാം ഏത് നിമിഷവും നിലം പൊത്താവുന്ന അവസ്ഥയെക്കുറിച്ച് ദീപിക ഇന്നലെ റിപ്പോർട്ട് ചെയ്തിരുന്നു. മേൽക്കൂര പുതുക്കി പണിയാൻ 12 ലക്ഷം രൂപയും ടോയ്‌ലറ്റ് ബ്ലോക്ക് നിർമിക്കാൻ ആവശ്യമായ തുകയും അനുവദിച്ചിട്ടുണ്ടെന്ന് ജില്ലാ പഞ്ചായത്ത് സ്റ്റാൻഡിംഗ് കമ്മിറ്റി ചെയർപേഴ്സൺ ദീപ എസ്. നായർ പറഞ്ഞു. അപകടാവസ്ഥയിലായ കെട്ടിടത്തിലെ ക്ലാസ്മുറികളിൽ അധ്യയനം നടത്തേണ്ട കാര്യമില്ലെന്നും പഴയ ഹയർ സെക്കൻഡറി കെട്ടിടത്തിൽ ആവശ്യമായ സൗകര്യങ്ങൾ ഉണ്ടെന്നും അവർ പറഞ്ഞു. സ്കൂളിൽ നിന്ന് നിരവധി കുട്ടികളാണ് ഈ വർഷം ടിസി വാങ്ങി പോകാൻ തയ്യാറായി നിൽക്കുന്നത്. രണ്ടുവർഷം മുൻപ് പണി കഴിപ്പിച്ച സ്കൂളിലെ ലൈബ്രറി കെട്ടിടത്തിന്‍റെ അവസ്ഥയും ഏറെ ശോചനീയമാണ്. മഴയിൽ ചോർന്നൊലിക്കുന്ന കെട്ടിടത്തിൽ വിദ്യാർഥികൾക്ക് ലൈബ്രറി ഉപയോഗിക്കാൻ പറ്റാത്ത അവസ്ഥയാണ്. ഷീറ്റ് മേഞ്ഞ ഭാഗം ചോർന്നൊലിച്ച് സീലിംഗ് അടർന്നു വീഴാറായ നിലയിലാണ്.

കുടുംബത്തിലെ മൂന്നുപേരെ ആക്രമിച്ച കേസിൽ യുവാക്കൾ അറസ്റ്റിൽ

വലപ്പാട്: കഴിമ്പ്രം തവളക്കുളം സ്വദേശിയുടെ വീടിന് സമീപം കഴിഞ്ഞദിവസം രാത്രി മദ്യപിച്ച് വീട്ടുടമയെയും ഭാര്യയെയും മകളെയും ആക്രമിച്ച് പരിക്കേൽപ്പിച്ച കേസിൽ മൂന്നുപേർ അറസ്റ്റിൽ. വലപ്പാട് കഴിമ്പ്രം സ്വദേശികളായ കോലാട്ടുപുരയ്ക്കൽ വിട്ടിൽ അനന്തു (24), ചളിങ്കാട്ടിൽ വീട്ടിൽ ശൈഷ്ണവ് (25), വെള്ളാനി വീട്ടിൽ ശ്രീരാം (20) എന്നിവരെയാണ് വലപ്പാട് പോലീസ് അറസ്റ്റ് ചെയ്തത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു. വലപ്പാട് പോലീസ് സ്റ്റേഷൻ ഇൻസ്പെക്ടർ എം.കെ. രമേഷ്, സബ് ഇൻസ്പെക്ടർ എബിൻ, സിപിഒമാരായ സുനീഷ്, ജെസ്‌ലിൻ തോമസ്, ശ്രാവൺ എന്നിവരാണ് പ്രതികളെ അറസ്റ്റ് ചെയ്തത്.

യുവാവിനെ ആക്രമിച്ച് പരിക്കേൽപ്പിച്ച പ്രതി അറസ്റ്റിൽ

വലപ്പാട്: മുറ്റിച്ചൂർ പാലത്തിന് പടിഞ്ഞാറുള്ള യാർഡിന് സമീപം യുവാവിനെ ആക്രമിച്ച് പരിക്കേൽപ്പിച്ച കേസിൽ പ്രതി അറസ്റ്റിൽ. നാട്ടിക ചേർക്കര സ്വദേശി കുറുപ്പത്ത് വീട്ടിൽ ഹരിനന്ദനെ(23) ആണ് വലപ്പാട് പോലീസ് അറസ്റ്റ് ചെയ്തത്. നാട്ടിക ചേർക്കര സ്വദേശി പീഴി വീട്ടിൽ ദേശം ബിബാഷ് (29)നെയാണ് ഹരിനന്ദനും മറ്റു രണ്ടുപേരും ചേർന്ന് ആക്രമിച്ച് പരിക്കേൽപ്പിച്ചത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. വലപ്പാട് പോലീസ് സ്റ്റേഷൻ ഇൻസ്പെക്ടർ എം.കെ. രമേഷ്, എസ്ഐ എബിൻ, എഎസ്ഐ ചഞ്ചൽ, സിപിഒ സുനീഷ് എന്നിവരാണ് അന്വേഷണ സംഘത്തിലുണ്ടായിരുന്നത്.

മസ്ജിദ് ഭണ്ഡാരമോഷണം: മുറ്റിച്ചൂർ സ്വദേശി അറസ്റ്റിൽ

തൃപ്രയാർ: ഇസ്ലാമിക് സെന്‍റർ ജുമാ മസ്ജിദിന്‍റെ ഭണ്ഡാരം കുത്തിപ്പൊളിച്ച് 10,000 രൂപ മോഷ്ടിച്ച കേസിൽ യുവാവ് അറസ്റ്റിൽ. മുറ്റിച്ചൂർ കോക്കാൻമുക്ക് സ്വദേശി കരിക്കപ്പീടിക വീട്ടിൽ ഷജീർ(27) ആണ് അറസ്റ്റിലായത്. മുറ്റിച്ചൂരുള്ള വീട്ടിൽനിന്നും വലപ്പാട് പോലീസാണ് അറസ്റ്റ് ചെയ്തത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. വലപ്പാട് പോലീസ് സ്റ്റേഷൻ ഇൻസ്പെക്ടർ എം.കെ. രമേഷ്, എസ്ഐ സി.എൻ. എബിൻ സിപിഒമാരായ സുനീഷ്, സന്ദീപ് എന്നിവരാണ് അന്വേഷണ സംഘത്തിലുണ്ടായിരുന്നത്.

വാഹനങ്ങൾ വഴിതിരിച്ചുവിടുന്നു; ഗ്രാമീണറോഡുകൾ തകരുന്നു

കൊരട്ടി: നിർമാണപ്രവൃത്തികൾ നടക്കുന്ന ദേശീയപാത കൊരട്ടി മേഖലയിൽ ഗതാഗതക്കുരുക്ക് രൂക്ഷമാകുമ്പോൾ വാഹനങ്ങൾ വഴിതിരിച്ചുവിടുന്നതുമൂലം ഗ്രാമീണറോഡുകൾ തകരുകയാണ്. ഭാരവണ്ടികൾ അടക്കമുള്ള വാഹനങ്ങളുടെ ബാഹുല്യവും ഒരാഴ്ചയിലേറെയായി തുടരുന്ന മഴയും റോഡുകൾ തകരാൻ കാരണമായി. കൊരട്ടി മംഗലശേരി റോഡ്, ചെറ്റാരിക്കൽ, വഴിച്ചാൽ, നൈപുണ്യ - താമര കപ്പേള റോഡ്, ആറ്റപ്പാടം, പള്ളിക്കുളം അടക്കമുള്ള ഗ്രാമീണ റോഡുകളിൽ ചതിക്കുഴികൾ രൂപപ്പെട്ടു‌കഴിഞ്ഞു. കാതിക്കുടം ചാത്തൻചാൽ പാടശേഖരത്തിനിടയിലൂടെ കടന്നുപോകുന്ന പാതയിൽ കുഴികൾ നിറഞ്ഞിരിക്കുകയാണ്. ഈ റോഡിലുള്ള കലുങ്ക് അപകടാവസ്ഥയിലാണ്. കോൺക്രീറ്റ് സ്ലാബുകൾക്ക് കേടുപാടു സംഭവിച്ചിട്ടുണ്ടെന്നു മാത്രമല്ല കൾവർട്ടിന് ഇരുഭാഗത്തും കെട്ടിയിരിക്കുന്ന കരിങ്കൽഭിത്തികളും ഇളകിയ നിലയിലാണ്. പ്രളയത്തിനുമുമ്പ് ഭാഗികമായും പ്രളയത്തോടെ ഏറെക്കുറെ പൂർണമായും തകർന്നിരിക്കുകയാണ്. ദേശീയപാതയിൽനിന്നും വഴിതിരിച്ചുവിടുന്ന വണ്ടികളും ഇതിലൂടെ കടന്നുപോകുന്നുണ്ട്. മേലൂർ ഗ്രാമപഞ്ചായത്തിലെ പല റോഡുകളിലും സമാനമായ സാഹചര്യമാണു നിലനിൽക്കുന്നത്. മഴയെത്തുടർന്ന് കുഴികളിൽ വെള്ളം കെട്ടുന്നതുമൂലം ഇരുചക്രവാഹനങ്ങൾ അപകടത്തിൽപ്പെടുകയാണ്. അമിതഭാരവുമായിവരുന്ന ഭാരവണ്ടികളെ അതിജീവിക്കാനുള്ള ശേഷി ഗ്രാമീണറോഡുകൾക്കില്ല. താത്കാലികമായെങ്കിലും അറ്റകുറ്റപ്പണികൾ ചെയ്ത് റോഡുകളിൽ രൂപപ്പെട്ട കുണ്ടുംകുഴികൾക്കും പരിഹാരം കാണണമെന്നാണു നാട്ടുകാരുടെ ആവശ്യം.

റോഡരികിൽ 200 വൃക്ഷത്തൈകൾനട്ട് പറപ്പൂക്കര സെന്‍റ്് ജോണ്‍സ് പബ്ലിക് സ്കൂൾ

പറപ്പൂക്കര: ലോക പരിസ്ഥിതിദിനത്തോടനുബന്ധിച്ച് സെന്‍റ് ജോ ണ്‍സ് പബ്ലിക് സ്കൂൾ, തദ്ദേശസ്വയംഭരണ വകുപ്പ്, പിഡബ്ല്യുഡി, മാനേജ്മെന്‍റ്, സ്റ്റാഫ് എന്നിവരുടെ സഹകരണത്തോടെ മുത്രത്തിക്കര കിഴക്കുംമുറി പാടം, കോന്തിപുലം പാടം എന്നിവിടങ്ങളിൽ 200 ഓളം വൃക്ഷത്തൈകൾ ഒരേസമയത്ത് വിശിഷ്ട വ്യക്തികൾ നട്ടുപിടിപ്പിച്ചു. കെ. കെ. രാമചന്ദ്രൻ എംഎൽഎ തൈനട്ട് ഉദ്ഘാടനം ചെയ് തു. പറപ്പൂക്കര പഞ്ചായത്ത് പ്രസിഡന്‍റ് ് ഇ.കെ. അനൂപ്, സ്കൂൾ മാനേജർ ഫാ. റാഫേൽ പഞ്ഞിക്കാരൻ, അസിസ്റ്റന്‍റ്് മാനേജർ ഫാ. ആൽബിൻ പുതുശേരി എന്നിവരുടെ സാന്നിധ്യത്തിൽ സമീപസ്ഥാപനങ്ങളിലെ വിശിഷ്ടവ്യക്തികൾ പങ്കെടുത്തു. കൂടാതെ സ്കൂളിന്‍റെ മുൻ മാനേജർമാർ, സഹകാരികൾ എന്നിവർ സന്നിഹിതരായിരുന്നു. ഇതോടനുബന്ധിച്ച് പറപ്പൂക്കര പാരിഷ് ഹാളിൽ നടന്ന യോഗം കെ. കെ. രാമചന്ദ്രൻ എംഎൽഎ ഉദ്ഘാടനം ചെയ്തു. ഫാ. റാഫേൽ പഞ്ഞിക്കാരൻ അധ്യക്ഷത വഹിച്ചു. ഫാ. ആൽബിൻ പുതുശേരി, പഞ്ചായത്ത് പ്രസിഡന്‍റ്് ഇ.കെ. അനൂപ്, സെക്രട്ടറി വർഗീസ് ചുള്ളിപ്പറന്പിൽ, ട്രഷറർ ജോസ് യു. ആന്‍റണി, പ്രിൻസിപ്പൽ ബാബു കോയിക്കര എന്നിവർ പ്രസംഗിച്ചു.

ശാസ്താംപൂവം ആദിവാസി ഉന്നതിയില്‍ ഹരിതവത്്കരണപദ്ധതി നടപ്പാക്കുന്നു

വെള്ളിക്കുളങ്ങര: കാടര്‍വിഭാഗക്കാര്‍ താമസിക്കുന്ന വെള്ളിക്കുളങ്ങര ശാസ്താംപൂവം ആദിവാസി ഉന്നതിയില്‍ വേനല്‍ക്കാലത്ത് അനുഭവപ്പെടുന്ന ജലക്ഷാമത്തിന് പരിഹാരം കാണാന്‍ ഹരിതവത്്കരണം നടപ്പാക്കുന്നു. വനംവകുപ്പ്, കേരള ഫോറസ്റ്റ് റിസര്‍ച്ച് ഇന്‍സ്റ്റിറ്റ്യൂട്ട്, ശാസ്ത്രസാഹിത്യപരിഷത്ത്, മറ്റത്തൂര്‍ പഞ്ചായത്ത്, സന്നദ്ധ പ്രവര്‍ത്തകര്‍ എന്നിവരുടെ സഹകരണത്തോടെയാണ് പദ്ധതി നടപ്പാക്കുന്നത്. ഇതിന്‍റെ ഭാഗമായി ഉന്നതിയിലെ അമ്പതേക്കറോളം വരുന്ന ഭൂമിയില്‍ വിവിധതരം വൃക്ഷത്തൈകള്‍ വച്ചുപിടിപ്പിക്കും. വനത്തിനു നടുവിലുള്ള ഉന്നതിയില്‍ കാട്ടാനകളെ ആകര്‍ഷിക്കാനിടയുള്ള ഫലവൃക്ഷങ്ങള്‍ ഒഴിവാക്കി മറ്റ് ഇനങ്ങളിലുള്ള വൃക്ഷങ്ങളാണു നടുന്നത്. മഴക്കാലത്ത് ഉന്നതിയിലെ ഭൂമിയില്‍നിന്ന് മേല്‍മണ്ണ് ഒലിച്ചുപോകുന്നതു തടയാനും പദ്ധതി നടപ്പാക്കുന്നതിലൂടെ സാധിക്കും. ഹരിതവത്കരണ പദ്ധതിയുടെ ഭാഗമായി ഉന്നതിയിലെ ഒഴിഞ്ഞ സ്ഥലങ്ങളില്‍ വൃക്ഷതൈകള്‍ നട്ടു. പീച്ചിയിലെ കേരള ഫോറസ്റ്റ് റിസര്‍ച്ച് ഇന്‍സ്റ്റിറ്റ്യൂട്ടിലെ ശാസ്ത്രജ്ഞന്‍ ഡോ. ടി.വി. സജീവ്, വനംവകുപ്പിനു കീഴിലെ വനവികസന വിഭാഗം ചാലക്കുടി ഡിവിഷണല്‍ കോ-ഓഡിനേറ്റര്‍ പ്രസീദ എന്നിവര്‍ വൃക്ഷതൈ നട്ടു. പഞ്ചായത്തംഗം ചിത്ര സുരാജ്, കേരള ശാസ്ത്രസാഹിത്യപരിഷത്ത് ജില്ല കമ്മിറ്റി അംഗം എം.കെ. ബാബു, കൊടകര മേഖല ജോയിന്‍റ് സെക്രട്ടറി കെ.കെ. അനീഷ്‌കുമാര്‍, സാമൂഹിക പ്രവര്‍ത്തകന്‍ ജോയ് കാവുങ്ങല്‍, ഊരുമൂപ്പന്‍ സേവ്യര്‍, ആനപ്പാന്തം വനവികസനസമതി സെക്രട്ടറി വിനോദ് എന്നിവര്‍ പ്രസംഗിച്ചു.

പായമ്മല്‍ - പുളിക്കലച്ചിറ പാലം കേന്ദ്രമന്ത്രി സുരേഷ് ഗോപി സന്ദര്‍ശിച്ചു

പായമ്മല്‍: നാലമ്പല തീര്‍ഥാടനകാലത്ത് ഏറ്റവും കൂടുതല്‍ തീര്‍ഥാടക വാഹനങ്ങള്‍ കടന്നുപോകുന്ന പായമ്മല്‍ - പുളിക്കലച്ചിറ പാലം, കോടംകുളം റോഡ് കേന്ദ്രമന്ത്രി സുരേഷ് ഗോപി സന്ദര്‍ശിച്ചു. അപാകംമൂലം പുളിക്കലച്ചിറ പാലത്തിന്‍റെ നിര്‍മാണം നിര്‍ത്തിവച്ചതിനെ തുടര്‍ന്നുണ്ടായ പ്രതിസന്ധികള്‍ ബിജെപി നേതാക്കളും പഞ്ചായത്തംഗങ്ങളും സുരേഷ് ഗോപിയോടു വിശദീകരിച്ചു. പാലം പണിയുടെ ഭാഗമായി നിര്‍മിച്ച ബദല്‍ റോഡില്‍ പൈപ്പിട്ടിട്ടുണ്ടെങ്കിലും വെള്ളം ഒഴുകിപ്പോകാത്തതിനാല്‍ പുളിക്കലച്ചിറ പാടത്തോടുചേര്‍ന്നുള്ള പടിയൂര്‍ പൂമംഗലം പഞ്ചായത്തിലെ താഴ്ന്ന ഭാഗങ്ങളെല്ലാം വെള്ളക്കെട്ടിലാണ്. ഇതിനെ തുടര്‍ന്ന് പൊതുമരാമത്ത് വകുപ്പ് നാലിടത്ത് റോഡ് പൊളിച്ചാണ് വെള്ളം തുറന്നുവിട്ടിരിക്കുന്നത്. പ്രസാദം പദ്ധതിയില്‍ ഉള്‍പ്പെടുത്തി പായമ്മൽ ക്ഷേത്രത്തിലേക്കു പുതിയ രണ്ടുറോഡുകള്‍ നിര്‍മിക്കണമെന്നാവശ്യപ്പെട്ട് ക്ഷേത്ര സേവാസമിതി കേന്ദ്രമന്ത്രി സുരേഷ് ഗോപിക്ക് നിവേദനം നല്‍കി. പായമ്മല്‍ ശത്രുഘ്നക്ഷേത്രത്തില്‍ ദര്‍ശനത്തിനെത്തിയപ്പോഴാണ് ക്ഷേത്രസമിതി ഇതിനുള്ള പദ്ധതി കേന്ദ്രമന്ത്രിക്കു സമര്‍പ്പിച്ചത്. നാലമ്പല തീര്‍ഥാടനകാലത്ത് ഗതാഗതക്കുരുക്കില്ലാതെ യാത്രചെയ്യാന്‍ പുതിയ റോഡുകള്‍ക്കു കഴിയുമെന്ന് സമിതി ഭാരവാഹികള്‍ പറഞ്ഞു. പുളിക്കലച്ചിറ പാലം നിര്‍മാണവുമായി ബന്ധപ്പെട്ട് റോഡ് പൊളിച്ചിട്ടിരിക്കുന്നതിനാല്‍ ഈ വര്‍ഷം തീര്‍ഥാടനം പ്രതിസന്ധിയിലാകുമോയെന്ന ആശങ്കയുണ്ട്. അതുകൊണ്ട് പായമ്മല്‍ ക്ഷേത്രത്തിന്‍റെ മുന്‍പില്‍നിന്ന് നേരിട്ട് ചേലൂര്‍ - അരിപ്പാലം റോഡില്‍ എടക്കുളം പള്ളിക്ക് മുന്‍പിലെത്താവുന്ന രീതിയിലും ക്ഷേത്രത്തിന്‍റെ പിറകിലൂടെ എടതിരിഞ്ഞി വളവനങ്ങാടി റോഡില്‍ പടിയൂര്‍ നിലംപതിയിലേക്കും പുതിയ റോഡുകള്‍ക്കാണു പദ്ധതി സമര്‍പ്പിച്ചിരിക്കുന്നത്. നിവേദനം സ്വീകരിച്ച സുരേഷ് ഗോപി റോഡുകളുടെ കാര്യം ആലോചിച്ച് വേണ്ടതുചെയ്യാമെന്ന് ഉറപ്പുനല്‍കിയതായി ഭാരവാഹികള്‍ പറഞ്ഞു. കേന്ദ്രമന്ത്രിയായശേഷം ആദ്യമായി ക്ഷേത്രത്തിലെത്തിയ സുരേഷ് ഗോപിയെ ക്ഷേത്രം തന്ത്രി സതീശന്‍ നമ്പൂതിരിപ്പാട്, സമിതി പ്രസിഡന്‍റ്് സുലേഷ് സുബ്രഹ്മണ്യന്‍, ദേവസ്വം സെക്രട്ടറി ജയന്‍ ഇഞ്ചിപ്പുള്ളിക്കാട്ടില്‍ തുടങ്ങിയവര്‍ സ്വീകരിച്ചു.

സർക്കാർ ആയുർവേദ ഡിസ്പെൻസറിക്ക് എൻഎബിഎച്ച് എൻട്രി ലെവൽ സർട്ടിഫിക്കേഷൻ

വെള്ളാങ്കല്ലൂർ: പഞ്ചായത്തിൽ പ്രവർത്തിക്കുന്ന സർക്കാർ ആയുർവേദ ഡിസ്പെൻസറിക്ക് ലഭിച്ച എൻഎബിഎച്ച് എൻട്രി ലെവൽ സർട്ടിഫിക്കറ്റ് തിരുവനന്തപുരം ടാഗോർ തിയറ്ററിൽ നടന്ന ചടങ്ങിൽ കേരള ആരോഗ്യമന്ത്രി വീണ ജോർജിൽനിന്നു വെള്ളാങ്കല്ലൂർ പഞ്ചായത്ത് പ്രസിഡന്‍റ്് നിഷ ഷാജി, ആരോഗ്യ സ്റ്റാൻഡിംഗ് കമ്മിറ്റി ചെയർമാൻ ഷീല സജീവ്, മുൻ പഞ്ചായത്ത് പ്രസിഡന്‍റ് എം.എം. മുകേഷ്, കമ്യൂണിറ്റി ഹെൽത്ത് ഓഫീസർ ഡോ. കെ.വി. ശ്രീജ, മുൻ കമ്യൂണിറ്റി ഹെൽത്ത് ഓഫീസർ ഡോ. മുഹസ്. കെ. കരീം എന്നിവർ ചേർന്ന് ഏറ്റുവാങ്ങി. യോഗ ഹാൾ നിർമിച്ച് പ്രവർത്തന സജ്ജമാക്കൽ, ബയോമെഡിക്കൽ മാലിന്യ സംസ്കരണത്തിന് കേരള സംസ്ഥാന മലിനീകരണ നിയന്ത്രണ ബോർഡിന്‍റെ മാനദണ്ഡങ്ങൾ പാലിച്ചുകൊണ്ട് ഇമേജുമായി കരാറിലേർപ്പടൽ എന്നിങ്ങനെ നിരവധി നാഴികക്കല്ലുകൾ പിന്നിടുവാൻ ഈ സ്ഥാപനത്തിനു കഴിഞ്ഞു. കേരള സർക്കാർ ആയുർവേദ വകുപ്പിന്‍റെയും നാഷണൽ ആയുഷ് മിഷന്‍റെയും പഞ്ചായത്ത് ഭരണസമിതിയുടെയും സഹകരണത്തോടെ ആശുപത്രി വികസനസമിതിയുടെ മേൽനോട്ടത്തിൽ ജീവനക്കാരും ആശാപ്രവർത്തകരും നടത്തിയ കൂട്ടായ പരിശ്രമത്തിന്‍റെ ഫലമായാണ് ചുരുങ്ങിയ കാലയളവിനുള്ളിൽ ഈ നേട്ടങ്ങളെല്ലാം കൈവരിക്കാൻ സാധിച്ചത്.

ഹരിതകർമസേന ശേഖരിച്ച മാലിന്യങ്ങൾ പെരുമ്പിയിലെ പാതവക്കിൽ

കൊരട്ടി: ദേശീയപാത പെരുമ്പിയിലെ പ്ലാസ്റ്റിക് സംസ്കരണ യൂണിറ്റിനുമുന്നിൽ മാലിന്യ ക്കൂന്പാരം. റിസൺ ചർച്ചിലേക്കും മുസ്‌ലിം പള്ളിയിലേക്കും ക്രിമറ്റോറിയത്തിലേക്കുമുള്ള പാതവക്കിൽ മാലിന്യം സംഭരിച്ചിരിക്കുന്നതു പഞ്ചായത്തിനു കീഴിൽ പ്രവർത്തിക്കുന്ന ഹരിതകർമസേനയാണ്. ഹരിതകർമസേനയ്്ക്കു സുരക്ഷിതമായി മാലിന്യം സംഭരിക്കാൻ സ്ഥലം സജ്ജമാക്കി കൊടുക്കാത്തതു പഞ്ചായത്തിന്‍റെ വീഴ്ചയായാണു നാട്ടുകാർ ആരോപിക്കുന്നത്. മാലിന്യവിമുക്ത പഞ്ചായത്ത് എന്ന് അധികൃതർ കൊട്ടിഘോഷിക്കുമ്പോഴും കാലവർഷം ശക്ത മായിരിക്കെ പാതവക്കിൽ നിക്ഷേപിച്ചിരിക്കുന്ന മാലിന്യം തൊട്ടടുത്ത ചാലിലും പാടശേഖരത്തിലുമെത്തി ഗുരുതരമായ ആരോഗ്യപ്രശ്നത്തിനു വഴിവയ്ക്കുമോയെന്ന ഭീതിയാണു പ്രദേശവാസികൾ പങ്കുവയ്ക്കുന്നത്.

ലഹരിവിരുദ്ധ ബോധവത്കരണ സെമിനാർ

ഇരിങ്ങാലക്കുട: ഡോൺ ബോസ് കോ സ്കൂളിൽ ലഹരിവിരുദ്ധ സെമിനാർ നടത്തി. സ്പെഷൽ ബ്രാഞ്ച് ഡിവൈഎസ്പി പി. ആർ. ബിജോയ് ഉദ്ഘാടനം ചെയ് തു. ലഹരിയുടെ ദൂഷ്യവശങ്ങളെക്കുറിച്ചും അതു കുട്ടികളെ എങ്ങനെ സ്വാധീനിക്കുന്നുവെന്നും സെമിനാറിൽ വിശദീകരിച്ചു. ലഹരി ഉപയോഗിക്കില്ലയെന്ന് കുട്ടികൾ പ്രതിജ്ഞയെടുത്തു. ഹയർ സെക്കൻഡറി സ്കൂൾ പ്രിൻസിപ്പൽ ഫാ. ഷിനോ കളപ്പുരയ്ക്കൽ അധ്യക്ഷത വഹിച്ചു. വിദ്യാർഥി പ്രതിനിധി അരുദ്ര നന്ദി പറഞ്ഞു.

സ്‌കൂള്‍പരിസരങ്ങളില്‍ പരിശോധന; 21 പേരെ അറസ്റ്റുചെയ്തു

ഇരിങ്ങാലക്കുട: തൃശൂര്‍ റൂറല്‍ പോലീസ് ജില്ലയില്‍ സ്‌കൂള്‍പരിസരത്തുള്ള കടകളിലും സ്ഥാപനങ്ങളിലും പ്രത്യേക പരിശോധന നടത്തി. നിരോധിത പുകയില ഉത്പന്നങ്ങള്‍ വിറ്റതിനും ഉപയോഗിച്ചതിനുമായി 16 കേസുകളും കഞ്ചാവുബീഡി വലിച്ചതിനു മൂന്നു കേസുകളും കഞ്ചാവ് വില്പനയ്ക്കായി സൂക്ഷിച്ചതിന് ഒരു കേസും രജിസ്റ്റര്‍ ചെയ്തു. 21 പേരെ അറസ്റ്റ് ചെയ്തു. 302 സ്ഥാപനങ്ങളും മയക്കുമരുന്നും നിരോധിത ലഹരിപദാര്‍ഥങ്ങളും സ്ഥിരമായി കടത്തുന്നവരുടെ 81 വാഹനങ്ങളും ഇതിന്‍റെ ഭാഗമായി പോലീസ് പരിശോധിച്ചു.

ഗുരുവായൂരിലെ ഭൂമി ഏറ്റെടുക്കൽ; വിജ്ഞാപനം ഉടൻ ഇറങ്ങും

ഗുരുവായൂർ: ക്ഷേത്രത്തിനുചുറ്റും നൂറുമീറ്റർ ഭൂമി ഏറ്റെടുക്കുന്നതിന്‍റെ നടപടിക്രമങ്ങൾ അവസാനഘട്ടത്തിലെത്തി. റവന്യൂ - ദേവസ്വം തഹസിൽദാർമാരുടെ നേതൃത്വത്തിൽ ഏറ്റെടുക്കാനുള്ള ഭൂമിയിൽ ഇന്നലെ സംയുക്തപരിശോധന നടത്തി. ഏറ്റെടുക്കാനുള്ള ഭൂമി സംബന്ധിച്ച നടപടിക്രമങ്ങൾ ഇതോടെ പൂർത്തിയായി. ഭൂമി ഏറ്റെടുക്കലിന്‍റെ അവസാനനടപടിയായ 11/1 വിജ്ഞാപനം ഉടൻ ഇറങ്ങും. ക്ഷേത്രമതിൽക്കെട്ടിൽനിന്ന് 100 മീറ്റർ ചുറ്റളവിൽ 6.95 ഏക്കർ ഭൂമിയാണ് ഏറ്റെടുക്കുന്നത്. നേരത്തേ സാമൂഹ്യാഘാതപഠനം പൂർത്തീകരിച്ചിരുന്നു. ഭൂമി ഏറ്റെടുക്കൽനിയമത്തിലെ 2013 ആക്ട് പ്രകാരമാണ് ഏറ്റെടുക്കൽ. ന്യായമായ നഷ്ടപരിഹാരം, പുനരധിവാസം, പുനഃസ്ഥാപനം എന്നിവ ഉറപ്പാക്കും. ഭൂമിക്കു നഷ്ടപരിഹാരം നൽകുന്നതിനായി ഗുരുവായൂർ ദേവസ്വം 200 കോടി ബജറ്റിൽ ഉൾപ്പെടുത്തി നീക്കിവച്ചിട്ടുണ്ട്. ഇതിനു സർക്കാരിന്‍റെയും കമ്മീഷണറുടെയും അനുമതി ലഭിച്ചിട്ടുമുണ്ട്. ലാൻഡ് അക്വിസിഷൻ തഹസിൽദാർ ടി.ജി. ബിന്ദു, ദേവസ്വം തഹസിൽദാർ ടി.കെ. ഷാജി എന്നിവരുടെ നേതൃത്വത്തിലാണ് സംയുക്തപരിശോധന നടത്തിയത്.

ഠാണ - ബസ് സ്റ്റാന്‍ഡ് റോഡിലെ തകര്‍ന്ന സ്ലാബ് മാറ്റിസ്ഥാപിച്ചു

ഇരിങ്ങാലക്കുട: ഠാണ - ബസ് സ്റ്റാന്‍ഡ് റോഡിലെ തകര്‍ന്ന സ്ലാബ് നഗരസഭ മാറ്റിസ്ഥാപിച്ചു. ബസ് സ്റ്റാന്‍ഡ് റോഡില്‍ ഹെഡ് പോസ്റ്റ് ഓഫീസിനു മുന്നിലെ കാനയുടെ കോണ്‍ക്രീറ്റ് സ്ലാബാണ് രണ്ടുദിവസംമുമ്പ് തകര്‍ന്നത്. നഗരസഭ അധികൃതരുടെ മേല്‍നോട്ടത്തില്‍ പുതിയ സ്ലാബിട്ട് കോണ്‍ക്രീറ്റ് ചെയ്തത്. ഇരിങ്ങാലക്കുട ബസ് സ്റ്റാന്‍ഡിനു മുന്നിലൂടെ ഠാണാവിലേക്കുപോകുന്ന നഗരസഭയുടെ പ്രധാനപ്പെട്ട റോഡിലായിരുന്നിട്ടുകൂടി സ്ലാബ് മാറ്റി സ്ഥാപിക്കാത്തതില്‍ പ്രതിഷേധമുയര്‍ന്നിരുന്നു. റോഡിന് കുറുകേ കാട്ടൂര്‍ റോഡിലേക്ക് നിര്‍മിച്ചിരിക്കുന്ന കാനയുടെ കോണ്‍ക്രീറ്റ് സ്ലാബുകളിലൊന്നാണ് പഴക്കംകൊണ്ട് ഒടിഞ്ഞുവീണത്. സംഭവത്തെത്തുടര്‍ന്ന് ഇരുവശത്തുമായി മുന്നറിയിപ്പ് കോണുകള്‍ സ്ഥാപിച്ചിരുന്നെങ്കിലും മാറ്റിസ്ഥാപിക്കാന്‍ നടപടിയെടുത്തിരുന്നില്ല.

മച്ചാട് പള്ളിയിൽ തിരുനാൾ

പുന്നംപറമ്പ്: മച്ചാട് സെന്‍റ് ആന്‍റ്ണീസ് ദേവാലയത്തിൽ ഇടവകമധ്യസ്ഥനായ വിശുദ്ധ അന്തോണീസിന്‍റെ ഊട്ടുതിരുനാളിന് വടക്കാഞ്ചേരി ഫൊറോന വികാരി ഫാ. വർഗീസ് തരകൻ കൊടിയേറ്റി. ഇന്നലെ വൈകീട്ട് പള്ളിയിൽ നടന്ന തിരുക്കർമങ്ങൾക്കിടയിലായിരുന്നു കൊടിയേറ്റചടങ്ങുകൾ നടന്നത്. ഇന്നുമുതൽ തിരുനാൾ ദിനം വരെ വൈകീട്ട് 5.30ന് ദിവ്യബലിയും നൊവേനയും നടക്കും. രൂപതയിലെ വിവിധ വൈദികർ തിരുക്കർമങ്ങൾക്കു കാർമികരാകും. തിരുനാൾദിവസം രാവിലെ പത്തിന് ആഘോഷമായ തിരുനാൾ പാട്ടുകുർബാനയ്ക്ക് പൂമല ലിറ്റിൽ ഫ്‌ളവർ ദേവാലയത്തിലെ വികാരി ഫാ. സിന്‍റൊ തൊറയൻ മുഖ്യകാർമികത്വം വഹിക്കും. ജൂബിലി മിഷൻ ആശുപത്രി അസി. ഡയറക്ടർ ഫാ.ജസ്റ്റിൻ പൂഴിക്കൽ തിരുനാൾസന്ദേശം നൽകും. തുടർന്ന് ഹാർമണി ഹാളിൽ ഊട്ടുനേർച്ച ആശീർവാദവും വിതരണവും നടക്കും. ചടങ്ങുകൾക്ക് വികാരി ഫാ. ജോജോ എടത്തിരുത്തി, മദർ സിസ്റ്റർ സെലസ്റ്റി (സിഎസ്എസ്), ജനറൽ കൺവീനർ സി.ആർ. വർഗീസ്, കൈക്കാരൻമാരായ വിൻസെന്‍റ്് തോമസ്, വി.പി. സാൻജോ, വി.ടി. ജിനോ, വി.ജെ. ഡേവീസ്, കൺവീനർമാരായ ജോണി ചിറ്റിലപ്പിള്ളി, ടോമി ആന്‍റോ, വി.ജെ.ജോജു, ജോൺസൻ ചിറക്കേക്കാരൻ, പി.പി. ഡേവീസ്, റീസൺ അക്കര, ടി.വി. റപ്പായി, കെ.ജി. സിംസൺ തുടങ്ങിയവർ നേതൃത്വം നൽകും. 13നാണ് ഊട്ടുതിരുനാൾ.

ഗുരുവായൂര്‍ നഗരസഭയ്ക്ക് പരിസ്ഥിതിമിത്രം പുരസ്‌കാരം

ഗുരുവായൂർ: സംസ്ഥാന പരിസ്ഥിതി-കാലാവസ്ഥാവ്യതിയാന ഡയറക്ടറേറ്റ് നല്‍കുന്ന സംസ്ഥാന പരിസ്ഥിതിമിത്രം പുരസ്‌കാരം ഗുരുവായൂര്‍ നഗരസഭയ്ക്ക്. ഒരുലക്ഷം രൂപയും പ്രശസ്തിപത്രവും അടങ്ങുന്നതാണ് പുരസ്‌കാരം. പരിസ്ഥിതി സംരക്ഷണ രംഗത്ത് ശ്രദ്ധേയമായ പ്രവര്‍ത്തനങ്ങള്‍ കാഴ്ചവയ്ക്കുന്ന വ്യക്തികളെയും സംഘടനകളെയും തദ്ദേശ സ്ഥാപനങ്ങളെയും ആദരിക്കുന്നതിനുള്ളതാണ് ഈ പുരസ്‌കാരം. പരിസ്ഥിതിദിനമായ ഇന്ന് രാവിലെ 10.30ന് തിരുവനന്തപുരത്തു നടക്കുന്ന സംസ്ഥാനതല പരിസ്ഥിതിദിനാചരണ ചടങ്ങില്‍ മുഖ്യമന്ത്രി പിണറായി വിജയന്‍ പുരസ്‌കാരം നല്‍കും. സംസ്ഥാന സർക്കാരിന്‍റെ മികച്ച നഗരസഭക്കുള്ള സ്വരാജ് ട്രോഫി ഇക്കഴിഞ്ഞ രണ്ടു വർഷവും തുടർച്ചയായി നേടിയതും ഗുരുവായൂർ നഗരസഭയാണ്. എം.കൃഷ്ണദാസ് ചെയർമാനായ ഇടതുപക്ഷമുന്നണിയാണ് നഗരസഭ ഭരിക്കുന്നത്.

ബൈക്കിലെത്തി മാല കവർന്നു

കുന്നംകുളം: പെരുമ്പിലാവ് കൊരട്ടിക്കരയിൽ ബൈക്കിലെത്തിയ സംഘം വീട്ടമ്മയുടെ മാലകവർന്നു. ഇന്നു വൈകീട്ട് അഞ്ചരയോടെ കൊരട്ടിക്കര പെട്രോൾ പമ്പിനു സമീപമുള്ള വഴിയിൽവെച്ചായിരുന്നു സംഭവം. കൊരട്ടിക്കര സ്വദേശിനി ആത്രപ്പുള്ളി വീട്ടിൽ ശ്രീനിവാസന്‍റെ ഭാര്യ സുമയുടെ സ്വർണമാലയാണ് കവർന്നത്. സ്വർണ്ണമാല ആറര പവൻ ഉണ്ടെന്ന് ഇവർ പറഞ്ഞു. സംഘത്തിന്‍റെ അക്രമത്തിൽ ഇവർ നിലത്ത് വീഴുകയും ചെയ്തു. ബൈക്കിൽ ഹെൽമെറ്റ് ധരിച്ച് എത്തിയ രണ്ടംഗസംഘമാണ് കവർച്ച നടത്തിയത്. കുന്നംകുളം സിഐ ഷാജഹാന്‍റെ നേതൃത്വത്തിലുള്ള പോലീസ്‌സംഘം സ്ഥലത്തെത്തി അന്വേഷണം നടത്തി.വിവിധ സിസിടിവികൾ കേന്ദ്രീകരിച്ചും അന്വേഷണം നടക്കുന്നുണ്ട്.

കയ്‌പമംഗലത്ത് കാറും ബസും കൂട്ടിയിടിച്ച് അപകടം

മൂന്നുപീടിക: ദേശീയപാതയിൽ കയ്‌പമംഗലം അറവുശാലയിൽ കാറും ബസും കൂട്ടിയിടിച്ച് അപകടം. യാത്രക്കാർ പരിക്കേൽക്കാതെ രക്ഷപ്പെട്ടു. ഇന്നലെ ഉച്ചയോടെയായിരുന്നു അപകടം. ഗുരുവായൂരിൽനിന്ന് കൊടുങ്ങല്ലൂരിലേക്കുപോയിരുന്ന സ്വകാര്യബസും വടക്കുഭാഗത്തേക്കു വന്നിരുന്ന കാറുമാണ് അപകടത്തിൽ പെട്ടത്. കാറിന്‍റെ മുൻഭാഗം തകർന്ന നിലയിലാണ്. ഇടിച്ച കാർ നിരങ്ങിനീങ്ങി റോഡരികിൽ നിർത്തിയിരുന്ന ബൈക്കിലും ഇടിച്ചിട്ടുണ്ട്. ബൈക്കിനും കേടുപാടുകൾ സംഭവിച്ചു.

ടി.കെ. ഉണ്ണികൃഷ്ണന്‍ മുകുന്ദപുരം സര്‍ക്കിള്‍ സഹ. യൂണിയന്‍ ചെയര്‍മാന്‍

ഇരിങ്ങാലക്കുട: മുകുന്ദപുരം സര്‍ക്കിള്‍ സഹകരണ യൂണിയന്‍ ചെയര്‍മാനായി ടി.കെ. ഉണ്ണികൃഷ്ണന്‍ തെരഞ്ഞെടുക്കപ്പെട്ടു. നിലവില്‍ സിപിഎം മാള ഏരിയാ കമ്മിറ്റി അംഗവും കര്‍ഷകസംഘം ജില്ലാ കമ്മിറ്റി അംഗവും മാള ഏരിയ പ്രസിഡന്‍റുമാണ്. സ്വീകരണച്ചടങ്ങില്‍ സിപിഎം ജില്ലാ സെക്രട്ടറിയേറ്റ് അംഗവും മുന്‍ ജില്ലാ പഞ്ചായത്ത് പ്രസിഡന്‍റു മായ പി.കെ. ഡേവിസ്, ജില്ലാ കമ്മിറ്റി അംഗം എം. രാജേഷ്. സിപിഎം ഇരിങ്ങാലക്കുട ഏരിയ സെക്രട്ടറി വി.എ. മനോജ് കുമാര്‍, സിപിഐ മണ്ഡലം സെക്രട്ടറി എന്‍.കെ. ഉദയപ്രകാശ്, തെരഞ്ഞെടുപ്പ് കമ്മറ്റി ചെയര്‍മാന്‍ എം.ബി. ലത്തീഫ് എന്നിവര്‍ പങ്കെടുത്തു.

ചേന്ദംകുളം റോഡ് മന്ത്രി നാടിനു സമര്‍പ്പിച്ചു

കാട്ടൂര്‍: ചേന്ദംകുളം റോഡ് മന്ത്രി ഡോ. ആര്‍. ബിന്ദു നാടിനുസമര്‍പ്പിച്ചു. മന്ത്രിയുടെ നിയോജകമണ്ഡലം പ്രത്യേക വികസന ഫണ്ടില്‍നിന്നും തുക വിനിയോഗിച്ചാണു റോഡ് നിര്‍മാണം പൂര്‍ത്തീകരിച്ചത്. കാട്ടൂര്‍ പഞ്ചായത്തില്‍ പന്ത്രണ്ടാം വാര്‍ഡിലെ ചേന്ദംകുളം റോഡിന് ഏഴ് ലക്ഷം രൂപയാണ് മന്ത്രി അനുവദിച്ചത്. ചേന്ദംകുളം റോഡ് പരിസരത്ത് നടന്ന ചടങ്ങില്‍ പഞ്ചായത്ത് പ്രസിഡന്‍റ്് ടി.വി. ലത അധ്യക്ഷത വഹിച്ചു. പഞ്ചായത്ത് അംഗങ്ങളായ സ്വപ്ന ജോര്‍ജ്, രമഭായ് ടീച്ചര്‍, ജയശ്രീ സുബ്രഹ്മണ്യന്‍, പി.എസ്. അനീഷ്, പഞ്ചായത്ത് സെക്രട്ടറി വി.എന്‍. ഉണ്ണികൃഷ്ണന്‍ തുടങ്ങിയവര്‍ പ്രസംഗിച്ചു.

ഗാന്ധിനഗർ റോഡ് ഗതാഗതയോഗ്യമാക്കണം

ചാലക്കുടി: ട്രാംവേ റോഡിൽ കട്ടിപ്പൊക്കം സെന്‍ററിൽനിന്ന് ഗാന്ധിനഗറിലേക്കുള്ള റോഡിന്‍റെ കാന ഇടിഞ്ഞ് ഗതാഗതക്കുരുക്ക് ഉണ്ടാകുന്നതിനാൽ കാന പുതുക്കിപ്പണിത് കവർസ്ലാബ് ഇട്ട് ഗതാഗതയോഗ്യമാക്കണമെന്നും കമ്യൂണിറ്റി ഹാളിന്‍റെ മെയിന്‍റനൻസ് വർക്കുകൾ ഉടൻ തീർക്കണമെന്നും 13-ാം വാർഡ് കോൺഗ്രസ് കമ്മിറ്റിയോഗം നഗരസഭയോടും എംഎൽഎയോടും ആവശ്യപെട്ടു. ബൂത്ത് പ്രസിഡന്‍റ് ബാബു തെക്കേക്കരയുടെ അധ്യക്ഷതയിൽ കൂടിയ സമ്മേളനം യുഡിഎഫ് കൺവീനർ ഒ. എസ്. ചന്ദ്രൻ ഉദ് ഘാടനം ചെയ്തു. കെ.വി. ദാസൻ, രാജേഷ് കങ്ങാടൻ, നിധിൻ കുരിശിങ്കൽ, ശരത് ഷാജു, ഷൈബി റൈജു എന്നിവർ പ്രസംഗിച്ചു.

ചെന്ത്രാപ്പിന്നിയിൽ മതില്‍ ഇടിഞ്ഞുവീണ് ദമ്പതികള്‍ക്കു പരിക്ക്

കയ്പമംഗലം: ചെന്ത്രാപ്പിന്നിയില്‍ മതില്‍ ഇടിഞ്ഞ് ദേഹത്തേക്കുവീണ് ദമ്പതികള്‍ക്കു പരിക്ക്. ചെന്ത്രാപ്പിന്നി അലുവത്തെരുവിന് കിഴക്ക് മാണിയംതാഴം സ്റ്റോപ്പിനുസമീപത്ത് ഇന്നലെ രാത്രി ഏഴരയോടെയാണ് അപകടമുണ്ടായത്. പോത്താംപറമ്പില്‍ ഗോപിനാഥ് (60), ഭാര്യ ബേബി എന്നിവര്‍ക്കാണു പരിക്ക്. വീട്ടുപറമ്പിന്‍റെ മതില്‍ചരിഞ്ഞതുനോക്കാൻ മതിലിനടുത്ത് എത്തിയതായിരുന്നു ഇരുവരും. പെട്ടെന്ന് മതില്‍ ഇരുവരുടെയും ദേഹത്തേക്കു മറിഞ്ഞുവീഴുകയായിരുന്നു. ദേഹമാസകലം പരിക്കേറ്റ ഇരുവരെയും മൂന്നുപീടികയിലെ ആംബുലന്‍സ് പ്രവര്‍ത്തകര്‍ കൊടുങ്ങല്ലൂരിലെ സ്വകാര്യആശുപത്രിയില്‍ പ്രവേശിപ്പിച്ചു.

സൗജന്യ മെഗാ മെഡിക്കല്‍ ക്യാമ്പ് 14ന്

ഇരിങ്ങാലക്കുട: ഒഎസ്എആര്‍എച്ച്എസ് തുമ്പൂര്‍, കൊമ്പൊടിഞ്ഞാമാക്കല്‍ ലയണ്‍സ് ക്ലബ്, അങ്കമാലി അപ്പോളോ ആശുപത്രി, ഗുരുധര്‍മ മിഷന്‍ ആശുപത്രി മാള എന്നിവയുടെ സഹകരണത്തോടെ ആവിഷ്‌കരിക്കുന്ന ഹൃദ്യം സൗജന്യ മെഗാ മെഡിക്കല്‍ ക്യാമ്പ് 14ന് ലയണ്‍സ് ക്ലബ് ഹാളില്‍ സംഘടിപ്പിക്കും. കാര്‍ഡിയോളജി, പൾമനോളജി, ഓഡിയോളജി, ഓര്‍ത്തോ, ജനറല്‍ മെഡിസിന്‍ എന്നീ വിഭാഗത്തില്‍ ഡോക്ടര്‍മാരുടെ സേവനം ഉണ്ടായിരിക്കും. ബിപി, ബ്ലഡ് ഷുഗര്‍, ഇസിജി ആന്‍ഡ്് പിഎഫ്്ടി, കേള്‍വി പരിശോധന എന്നീ ടെസ്റ്റുകള്‍ സംഘടിപ്പിക്കും. ക്യാമ്പില്‍ പങ്കെടുക്കുവാന്‍ താല്പര്യമുള്ളവര്‍ 10നകം രജിസ്റ്റര്‍ ചെയ്യണം. ഒഎസ്എ പ്രസിഡന്‍റ്് - എം.സി. പ്രദീപ് : 8156845676, സെക്രട്ടറി - എം.വി. പീറ്റര്‍: 7389241153, ലയണ്‍സ് ക്ലബ് മെഡിക്കല്‍ ക്യാമ്പ് കോ-ഓര്‍ഡിനേറ്റര്‍ - ജോണ്‍സണ്‍ കോലങ്കണ്ണി: 9446540890 എന്നിവരുമായി ബന്ധപ്പെടുക.

അച്ഛന്‍റെ കരളും തുണച്ചില്ല; ദൈവിക് മരിച്ചു

പുന്നംപറമ്പ്: കരൾരോഗത്തെതുടർന്നു കരൾമാറ്റശസ്ത്രക്രിയയ്ക്കു വിധേയയായ ആറുമാസം പ്രായമുള്ള പിഞ്ചുകുഞ്ഞ് മരിച്ചു. തെക്കുംകര പുന്നംപറമ്പ് ഉന്നതിയിൽ വയലാലെ വീട്ടിൽ ഗോപി - പ്രവീണ ദമ്പതികളുടെ‌ ഏകമകൾ ദൈവിക് ആണ് മരിച്ചത്. കരൾസംബന്ധമായ അസുഖത്തെതുടർന്ന് എറണാകുളം അമൃത ആശുപത്രിയിൽ ചികിത്സയിലായിരുന്നു. നാട്ടുകാരുടെ സഹകരണത്തോടെ ചികിത്സാച്ചെലവിനായി പണം കണ്ടെത്തുകയും മൂന്നുദിവസംമുന്പ് പിതാവ് ഗോപിയുടെ കരൾ മാറ്റിവയ്ക്കുകയും ചെയ്തിരുന്നു. ചികിത്സ തുടരുന്നതിനിടെയാണ് ഇന്നലെ ദൈവിക് മരിച്ചത്. കുഞ്ഞിന്‍റെ മരണം ഗോപിയെ അറിയിച്ചിട്ടില്ല. സംസ്കാരം പിന്നീട്.

പ്ലസ്ടു വിദ്യാർഥി മുങ്ങിമരിച്ചു

പെരുന്പടപ്പ്: കൂട്ടുകാരുമൊത്ത് കുളിക്കാൻ കായലിൽ ഇറങ്ങിയ വിദ്യാർഥി മുങ്ങിമരിച്ചു. അയിലക്കാട് കള്ളിതുടി യിൽ സൈനുദീന്‍റെ മകൻ മുഹമ്മദ് സിയാൻ(17) ആണ് മരിച്ചത്. വെള്ളത്തിൽ മുങ്ങിയ മുഹമ്മദ് സിയാനെ കൂട്ടുകാരും നാട്ടുകാരും കൂടി എടുത്ത് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പോലീസ് നടപടികൾക്കു ശേഷം കബറടക്കം നടത്തി. പൂക്കരത്തറ സ്കൂൾ പ്ലസ് ടു വിദ്യാർഥിയായിരുന്നു.

വിദ്യാലയങ്ങൾക്കു മുൻപിൽ ലഹരിക്കെതിരേ ബോർഡുകൾ സ്ഥാപിച്ചു

ചാലക്കുടി: നഗരസഭ നടപ്പിലാക്കുന്ന നന്മ ലഹരി പദ്ധതിയുടെ ഭാഗമായി വിദ്യാലയങ്ങൾക്ക് മുൻപിൽ ലഹരിക്കെതിരെ മുന്നറിപ്പ് ബോർഡുകൾ സ്ഥാപിക്കുന്നു. 25 വിദ്യാഭ്യാസ സ്ഥാപനങ്ങൾക്കു മുൻപിലാണ് സ്ഥിരമായ ബോർഡുകൾ സ്ഥാപിക്കുന്നത്. ലഹരി ഉപയോഗം സംബന്ധിച്ച് വിദ്യാർഥികൾക്കുള്ള സന്ദേശവും വിദ്യാലയ പരിസരത്ത് ഇതിന്‍റെ വിപണനവും ഉപയോഗവും കർശനമായി നിരോധിച്ചതായ അറിയിപ്പും ബോർഡിൽ രേഖപ്പെടുത്തിയിട്ടുണ്ട്. ഇത്തരം സാഹചര്യങ്ങൾ ശ്രദ്ധയിൽ പെട്ടാൽ അറിയിക്കുന്നതിന് നഗരസഭ, പോലീസ്, എക്സൈസ് എന്നിവയുടെ ഫോൺ നമ്പറും ബോർഡിൽ ഉൾപ്പെടുത്തിയിട്ടുണ്ട്. നഗരസഭയും പൗരാവലിയും ചേർന്ന് നടപ്പാക്കുന്ന പദ്ധതിയുടെ ഭാഗമായി വിദ്യാർഥികൾക്കും രക്ഷിതാക്കൾക്കുമുള്ള ബോധവത്കരണ ക്ലാസുകൾ, കൗൺസിലിംഗ് എന്നിവയും വിദ്യാലയങ്ങളിൽ നടത്തും. നഗരസഭ അതിർത്തിയിലെ 25 വിദ്യാഭ്യാസ സ്ഥാപനങ്ങൾക്ക് മുന്നിൽ ഒരു ലക്ഷം രൂപ ചെലവിൽ ബോർഡുകൾ സ്ഥാപിക്കുന്ന പ്രവൃത്തി ചാലക്കുടി സർവീസ് സഹകരണ ബാങ്കിന്‍റെ സഹകരണത്തോടെയാണ് നഗരസഭ നടപ്പാക്കുന്നത്. മുന്നറിയിപ്പ് ബോർഡുകൾ സ്ഥാപിക്കുന്ന പരിപാടി, പടിഞ്ഞാറേ ചാലക്കുടി ഐആർഎംഎൽപി സ്കൂളിൽ സനീഷ്കുമാർ ജോസഫ് എംഎൽഎ ഉദ്ഘാടനം ചെയ്തു. നഗരസഭ ചെയർമാൻ ഷിബു വാലപ്പൻ അധ്യക്ഷനായി. കോ -ഓർഡിനേറ്റർ പി.എ. സുഭാഷ് ചന്ദ്രദാസ്, വൈസ് ചെയർപേഴ്സൻ സി. ശ്രീദേവി, സ്റ്റാൻഡിംഗ് കമ്മിറ്റി ചെയർമാൻമാരായ കെ.വി. പോൾ, എം.എം. അനിൽകുമാർ, എക്സൈസ് ഓഫീസർമാരായ സി.യു. ഹരീഷ്, കെ.കെ. രാജു, വാർഡ് കൺസിലർമാരായ സുധ ഭാസ്കരൻ, ആലീസ് ഷിബു, ജിതി രാജൻ, ബിജി സദാനന്ദൻ, റോസി ലാസർ, കെ.പി. ബാലൻ, ബിന്ദു ശശികുമാർ, എച്ച്എം ഇൻ ചാർജ് പി.ആർ. നീരജ, മർച്ചന്‍റ്് അസോസിയേഷൻ പ്രസിഡന്‍റ് ജോയ് മൂത്തേടൻ, പടിഞ്ഞാറെ ചാലക്കുടി സഹകരണ ബാങ്ക് പ്രസിഡന്‍റ് ഇട്ടൂപ്പ് ഐനിക്കാടൻ, ചാലക്കുടി സഹകരണ ബാങ്ക് ഡയറക്ടർ റിന്‍റോസ് കണ്ണംമ്പുഴ, പിടിഎ പ്രസിഡന്‍റ് എം.കെ. സതീഷ് എന്നിവർ പ്രസംഗിച്ചു.

കുലച്ച 1700 വാഴകൾ കാറ്റിൽ വീണു

മാള: കുലവെട്ടാൻ ഒരുമാസം ശേഷിക്കെ 1700 വാഴകൾ കാറ്റിൽ നിലം പൊത്തി. കുഴൂർ പഞ്ചായത്തിലെ കുണ്ടൂർ താഴുത്തമുറി പാലമിറ്റം യോഹന്നാൻ കൃഷിയിറക്കിയ വാഴകളാണ് കഴിഞ്ഞ ദിവസത്തെ കാറ്റിൽ ഒടിഞ്ഞു വീണത്. പാട്ടത്തിനെടുത്ത രണ്ടര ഏക്കർ ഭൂമിയിലാണ് 1800 വാഴകൾ നട്ടത്. കുലകൾ ഒരു മാസം കൂടി കഴിഞ്ഞ് വെട്ടാവുന്ന വളർച്ചയിലായിരുന്നു. നിലവിൽ കറിക്ക് ഉപയോഗിക്കാവുന്ന മൂപ്പുപോലും ആയിട്ടില്ല. കഴിഞ്ഞ വർഷം കുഴൂർ പഞ്ചായത്തിലെ മികച്ച കർഷകനുള്ള അവാർഡ് നേടിയ വ്യക്തിയാണ് യോഹന്നാൻ. പ്രായം 70 പിന്നിട്ടെങ്കിലും ഇപ്പോഴും ഭാര്യ കൊച്ചുത്രേസ്യ, മക്കളായ ജോബി, എബി എന്നിവർക്കൊപ്പം കൃഷിയിൽ സജീവമാണ് യോഹന്നാൻ. കുണ്ടൂർ മേഖലയിൽ കൂടാതെ കൊരട്ടി, കാതികുടം, ചാലക്കുടി എന്നിവിടങ്ങളിലായി 20 ഏക്കർ സ്ഥലത്ത് ഇവർ കൃഷി ചെയ്യുന്നുണ്ട്. വാഴ, ചേന, വെള്ളരി ഉൾപ്പെടെയുള്ളവയാണു കൃഷി. കൃഷിയിൽനിന്നും ലഭിക്കുന്ന വരുമാനംകൊണ്ട് ജീവിതം കരുപ്പിടിപ്പിച്ച ഈ കുടുംബം നിലവിൽ വല്ലാത്ത പ്രതിസന്ധിയിലാണ്. അന്നമനട സഹകരണ ബാങ്കിൽ നിന്നെടുത്ത വായ്പ എങ്ങനെ തിരിച്ചടയ്ക്കുമെന്ന ആധിയിലാണിവർ.

പരാതിയില്‍ കേസെടുത്തു; സ്വകാര്യബസുകള്‍ പണിമുടക്കി

ഇരിങ്ങാലക്കുട: സ്വകാര്യ ബസുകളുടെ മിന്നല്‍ പണിമുടക്കില്‍ വിദ്യാര്‍ഥികള്‍ ഉള്‍പ്പടെയുള്ളവര്‍ ദുരിതത്തിലായി. സംഘട്ടനത്തെത്തുടര്‍ന്ന് നാട്ടുകാര്‍ നല്‍കിയ പരാതിയില്‍ ബസ് ജീവനക്കാര്‍ക്കെതിരെ കേസെടുത്തതാണ് മിന്നല്‍ പണിമുടക്കിനു കാരണം. തൃശൂര്‍ - കൊടുങ്ങല്ലൂര്‍ റൂട്ടില്‍ ഇന്നലെ രാവിലെ മുതലാണ് സ്വകാര്യ ബസുകളുടെ മിന്നല്‍ പണിമുടക്ക് നടന്നത്. കഴിഞ്ഞ മാസം അവസാനം കെഎസ്ടിപി റോഡ് നിര്‍മാണത്തിനെത്തുടര്‍ന്ന് റൂട്ടില്‍ ഏര്‍പ്പെടുത്തിയിരിക്കുന്ന ഗതാഗതനിയന്ത്രണങ്ങള്‍ തെറ്റിച്ചുവന്ന കാര്‍ യാത്രക്കാരും ഈ റൂട്ടിലോടുന്ന ലക്ഷ്മി എന്ന സ്വകാര്യബസിലെ ജീവനക്കാരുമായി കരുവന്നൂര്‍ ചെറിയ പാലം പരിസരത്ത് ഉണ്ടായ തര്‍ക്കം സംഘര്‍ഷത്തില്‍ കലാശിച്ചിരുന്നു. വിഷയത്തില്‍ ഇടപെട്ട നാട്ടുകാര്‍ ബസ് ജീവനക്കാര്‍ക്ക് എതിരെയും ജീവനക്കാര്‍ വിഷയത്തില്‍ ഇടപെട്ട കരുവന്നൂര്‍ സ്വദേശിക്ക് എതിരെയും ചേര്‍പ്പ് പോലീസില്‍ പരാതി നല്‍കിയിരുന്നു. പരാതിയില്‍ ലക്ഷ്മി ബസിലെ ഡ്രൈവര്‍ മനു മാത്യു, കണ്ടക്ടര്‍ ആഷിക് എന്നിവര്‍ക്കെതിരെയാണ് കേസ് എടുത്തത്. കേസെടുത്തതില്‍ പ്രതിഷേധിച്ചാണ് മിന്നല്‍ സമരം നടത്തിയത്. അധ്യയനവര്‍ഷം ആരംഭിച്ച് രണ്ടാം ദിനത്തില്‍ത്തന്നെ ബസുകളുടെ മിന്നല്‍ പണിമുടക്ക് നടത്തിയത് വിദ്യാര്‍ഥികള്‍ ഉള്‍പ്പടെയുള്ളവര്‍ക്കും ജോലിക്കായും മറ്റ് ആവശ്യങ്ങള്‍ക്കുമായി ദൂരയാത്രകള്‍ക്കായി പോകേണ്ടവര്‍ക്കും ഏറെ ക്ലേശകരമായി. ഇന്നലെ ഉച്ചയ്ക്ക് റൂറല്‍ ജില്ലാ പോലീസ് മേധവി ബി. കൃഷ്ണകുമാര്‍ നടത്തിയ ചര്‍ച്ചയില്‍ സമരം പിന്‍വലിച്ചു. റോഡ് പണി തുടരുന്ന സാഹചര്യത്തില്‍ വണ്‍വേ സമ്പ്രദായം കൃത്യമായി പാലിക്കണമെന്നും ഇതുനിരീക്ഷിക്കുവാന്‍ വിവിധയിടങ്ങളില്‍ പോലീസിനെ നിയോഗിക്കണമെന്നും ബസുടമകള്‍ ആവശ്യപ്പെട്ടു. സൂചനാ ബോര്‍ഡുകള്‍ സ്ഥാപിക്കുന്നതടക്കമുള്ള നടപടികള്‍ സ്വീരിക്കാമെന്നു ധാരണയിലെത്തി. ബസ് ഉടമ കോ-ഓര്‍ഡിനേഷന്‍ കമ്മിറ്റി ചെയര്‍മാന്‍ എം.എസ്. പ്രേംകുമാര്‍, കണ്‍വീനര്‍ പ്രദീപ്, വൈസ് ചെയര്‍മാന്‍ സുരേഷ്, തൊഴിലാളി യൂണിയനുകളെ പ്രതിനിധീകരിച്ച് സണ്ണി (സിഐടിയു), ഹാരിഷ് (ബിഎംഎസ്) എന്നിവര്‍ ചര്‍ച്ചയില്‍ പങ്കെടുത്തു. സമരത്തിന്‍റെ പശ്ചാത്തലത്തില്‍ റൂട്ടില്‍ രണ്ടുസര്‍വീസുകള്‍ കൂടുതല്‍ കെഎസ്ആര്‍ടിസി നടത്തിയിരുന്നുവെങ്കിലും യാത്രക്കാര്‍ പെരുവഴിയില്‍ തന്നെയായിരുന്നു.

മൂന്നുമുറി ഇടവക വാര്‍ഷികം ആഘോഷിച്ചു

മറ്റത്തൂര്‍: മൂന്നുമുറി സെന്‍റ്് ജോണ്‍ ദി ബാപ്റ്റിസ്റ്റ് ഇടവകയുടെ വാര്‍ഷികം കൊടകര ഫൊറോന വികാരി ഫാ. ജെയ്‌സണ്‍ കരിപ്പായി ഉദ്ഘാടനം ചെയ്തു. ഇടവകവികാരി ഫാ. ജോര്‍ജ് വേഴപ്പറമ്പില്‍ അധ്യക്ഷത വഹിച്ചു. കേന്ദ്രസമിതി പ്രസിഡന്‍റ് റോയ് കല്ലമ്പി, അസി.വികാരി ഫാ. ജെയ്‌സണ്‍ ചൊവ്വൂര്‍, കൈക്കാരന്‍ ജോണ്‍ ചേനത്തുപറമ്പിൽ, സിസ്റ്റര്‍ സ്മിത മരിയ, സിസ്റ്റര്‍ ലീലാമ്മ, സ്മിത ഷാജു, ഷാജു കാട്ടുമാത്ത് എന്നിവര്‍ പ്രസംഗിച്ചു.

കൊരട്ടി വിശുദ്ധ അന്തോണീസിന്‍റെ തീർഥാടനകേന്ദ്രത്തിൽ തിരുനാളിനു കൊടിയേറി

കൊരട്ടി: വിശുദ്ധ അന്തോണീസിന്‍റെ തീർഥാടനകേന്ദ്രമായ കൊരട്ടി അമലോത്ഭവമാതാ പള്ളിയിൽ ഊട്ടുനേർച്ചതിരുനാളിനു കൊടിയേറി. ഇന്നലെ രാവിലെ 10.30ന് വരാപ്പുഴ അതിരൂപത വികാരി ജനറാൾ മോൺ. മാത്യു കല്ലിങ്കലാണ് കൊടിയേറ്റ് നിർവഹിച്ചത്. തുടർന്ന് ദിവ്യബലി, നൊവേന, ആരാധന എന്നിവ നടന്നു. ഉച്ചതിരിഞ്ഞ് മൂന്നിനും 4.45നും ആറിനും ദിവ്യബലിയും നൊവേനയും ആ രാധനയും ഉണ്ടായിരുന്നു. തീർഥാടനകേന്ദ്രം റെക്ടർ ഫാ. ബിജു തട്ടാരശേരി, അസി. വികാരി ഫാ. ലിപിൻ ജോസ് കൂളിയത്ത്, സനീഷ്കുമാർ ജോസഫ് എംഎൽഎ, ബ്ലോക്ക് പഞ്ചായത്ത് പ്രസിഡന്‍റ്് വേണു കണ്ടരുമഠത്തിൽ, വാർഡ് മെമ്പർ റെയ്മോൾ ജോസ് എന്നിവർക്കുപുറമെ നൂറുകണക്കിന് ഭക്തജനങ്ങളാണു കൊടിയേറ്റുകർമത്തിൽ പങ്കെടുത്തത്. ഇന്നു മുതൽ എട്ടുവരെ രാവിലെ 6.30, 8.30, 10.45, വൈകീട്ട് 6.30 എന്നീ സമയങ്ങളിൽ ദിവ്യബലിയും നൊവേനയും ആരാധനയും ഉണ്ടായിരിക്കും. ഓരോ ദിവസങ്ങളിലും യഥാക്രമം ഫാ. മിഥുൻ ചെമ്മായത്ത്, ഫാ. നിജിൻ കാട്ടിപ്പറമ്പിൽ, റവ. മോൺ. റോക്കി റോബിൻ കളത്തിൽ, ഫാ. ഫോസ്റ്റിൻ ഫെർണാണ്ടസ്, ഫാ. എബിൻ വാരിയത്ത് എന്നിവർ വചനപ്രഘോഷണം നടത്തും. ദിവ്യകാരുണ്യദിനമായ ഒമ്പതിന് രാവിലെ 6.30 ന് തീർഥാടനകേന്ദ്രം റെക്ടർ ഫാ. ബിജു തട്ടാരശേരിയുടെ കാർമികത്വത്തിൽ ദിവ്യബലി, വൈകീട്ട് 6.30ന് ഫാ. ബൈജു കുറ്റിക്കലിന്‍റെ നേതൃത്വത്തിൽ ദിവ്യബലി, വചനപ്രഘോഷണം, ആരാധന, ദിവ്യകാരുണ്യ പ്രദക്ഷിണം എന്നിവ ഉണ്ടായിരിക്കും. തിരുനാൾദിനമായ 10 ന് രാവിലെ 6.30 മുതൽ രാത്രി 9.30 വരെ തുടർച്ചയായി തിരുക്കർമങ്ങൾ ഉണ്ടായിരിക്കും. ഒന്നരലക്ഷം വിശ്വാസികൾക്കുള്ള നേർച്ചഭക്ഷണമാണ് ക്രമീകരിക്കുക. 25,000 പേർക്കുള്ള പാർസൽ ഭക്ഷണവും 20,000 പേർക്കുള്ള പാർസൽ പായസവും ഒരുക്കുന്നുണ്ട്. തിരുനാൾ ദിനം രാവിലെ 9.30ന് തീർഥാടനകേന്ദ്രം അസി. റെക്ടർ ഫാ. ലിപിൻ ജോസ് കൂളിയത് നേർച്ചഭക്ഷണം ആശീർവദിക്കും.10.30 ന് വരാപ്പുഴ അതിരൂപത സഹായമെത്രാൻ മാർ ആന്‍റണി വാലുങ്കൽ തിരുക്കർമങ്ങൾക്കു മുഖ്യകാർമികത്വം വഹിക്കും. തുടർന്ന് വർഷത്തിൽ ഒരിക്കൽ മാത്രം ദേവാലയത്തിൽ നിന്നും പുറത്തിറക്കുന്ന പരിശുദ്ധ അമ്മയുടെയും വിശുദ്ധ അന്തോണീസിന്‍റെയും തിരുസ്വരൂപങ്ങൾ വഹിച്ചുകൊണ്ടുള്ള പ്രദക്ഷിണവും ഉണ്ടായിരിക്കും. വാഹനങ്ങൾ പാർക്ക് ചെയ്യുവാൻ വിപുലമായ ക്രമീകരണങ്ങൾ ഏർപ്പെടുത്തിയിട്ടുണ്ട്. ഒരുക്കങ്ങൾ പുരോ ഗമിക്കുന്നതായി സംഘാടകർ പറഞ്ഞു.

വഴിവിളക്ക് പകൽ മിഴിതുറക്കും; രാത്രി മിഴിയടയ്ക്കും

കൊരട്ടി: ചിറങ്ങര റെയിൽവേ മേൽപ്പാലത്തിനു മുകളിൽ സ്ഥാപിച്ചിരിക്കുന്ന വഴിവിളക്കുകൾ ഒരാഴ്ചയിലേറെയായി പകൽ മുഴുവൻ പ്രഭ ചൊരിയും. എന്നാൽ നേരം ഇരുട്ടിത്തുടങ്ങിയാൽ മിഴിയടയ്ക്കും. വാഹനങ്ങളുടെ വെളിച്ചത്തിൽ വേണം രാത്രികാലങ്ങളിൽ ഇതിലൂടെ കടന്നുപോകാൻ. സം ഭവം അധികൃതരുടെ ശ്രദ്ധയിൽപ്പെടുത്തിയിട്ടും നടപടിയില്ല. ദേശീയപാതയിൽ ഗതാഗതക്കുരുക്ക് രൂക്ഷമാകുമ്പോൾ വഴിതിരിച്ചുവിടുന്നത് ഈ മേൽപ്പാലത്തിലൂടെയാണ്.

സിപിഎം ജില്ലാഘടകം പിരിച്ചുവിടണമെന്നാവശ്യപ്പെട്ട് ബാങ്കിനുമുന്നില്‍ ബിജെപിയുടെ പ്രതിഷേധസമരം

ഇരിങ്ങാലക്കുട: ഇഡി നടപടികളുടെ പശ്ചാത്തലത്തില്‍ സിപിഎം തൃശൂര്‍ ജില്ലാ ഘടകം പിരിച്ചുവിടുക, കെ. രാധാകൃഷ്ണന്‍ എംപി രാജിവയ്ക്കുക, സഹകാരികള്‍ക്ക് ഉടന്‍ പണം തിരിച്ചുനല്‍കുക എന്നീ ആവശ്യങ്ങളുന്നയിച്ച് കരുവന്നൂര്‍ ബാങ്ക് ഹെഡ് ഓഫീസിന് മുന്‍പില്‍ ബിജെപി മണ്ഡലം കമ്മിറ്റിപ്രതിഷേധ സമരം നടത്തി. മുന്‍ ജില്ലാ പ്രസിഡന്‍റ് അഡ്വ. കെ.കെ. അനീഷ്‌കുമാര്‍ ഉദ്ഘാടനം ചെയ്തു. മണ്ഡലം പ്രസിഡന്‍റ് ആര്‍ച്ച അനീഷ് അധ്യക്ഷത വഹിച്ചു. ജില്ല ജനറല്‍ സെക്രട്ടറിമാരായ കൃപേഷ് ചെമ്മണ്ട, കെ.പി. ഉണ്ണികൃഷ്ണന്‍, ജില്ല വൈസ് പ്രസിഡന്‍റ് പി.എസ്. അനില്‍കുമാര്‍, സംസ്ഥാന കമ്മിറ്റിയംഗം സന്തോഷ് ചെറാക്കുളം, ജില്ലാ സെക്രട്ടറിമാരായ ശ്യാംജി മാടത്തിങ്കല്‍, അജീഷ് പൈക്കാട്ട്, മണ്ഡലം ജനറല്‍ സെക്രട്ടറിമാരായ ഷൈജു കുറ്റിക്കാട്ട്, വി.സി. രമേഷ്, മീഡിയ സെല്‍ ജില്ലാ കണ്‍വീനര്‍ ശ്രീജേഷ്, എം.വി. സുരേഷ് എന്നിവര്‍ പ്രസംഗിച്ചു. മണ്ഡലം ഭാരവാഹികളായ ജോജന്‍ കൊല്ലാട്ടില്‍, അമ്പിളി ജയന്‍, അജയന്‍ തറയില്‍, ടി.കെ. ഷാജു, ടൗണ്‍,പൊറത്തിശേരി ഏരിയ പ്രസിഡന്‍റുമാരായ ലിഷോണ്‍ ജോസ്, സൂരജ് കടുങ്ങാടന്‍, മായ അജയന്‍, വിജയകുമാരി അനിലന്‍, സരിത സുഭാഷ്, റീജ സന്തോഷ് എന്നിവര്‍ നേതൃത്വം നല്‍കി.

ഫിറ്റ്നസ് സർട്ടിഫിക്കറ്റുമായി, തകര്‌ന്നുവിഴാറായ പാമ്പാടി ഗവ. യുപി സ്കൂൾ കെട്ടിടം

സ്വന്തം ലേഖകൻ തിരുവില്വാമല: പുതിയ അധ്യയനവർഷത്തിന് തുടക്കമായെങ്കിലും പാമ്പാടി ഗവ. ഹയർസെക്കൻഡറി സ്കൂളിലെ യുപി വിഭാഗത്തിലെ കുട്ടികളുടെ അധ്യയനം അപകടാവസ്ഥയിലായ കെട്ടിടത്തിനകത്ത്. ഈവർഷം കെട്ടിടത്തിന് ഉറപ്പുള്ളതാണെന്നുള്ള സാക്ഷ്യപത്രം കിട്ടിയതിൽ അദ്ഭുതപ്പെടുകയാണ് അധ്യാപകരും രക്ഷിതാക്കളും. മേൽക്കുരയുടെ കഴുക്കോലും പട്ടികയും ഓടുമെല്ലാം ഏതുനിമിഷവും നിലംപൊത്താവുന്ന അവസ്ഥയിലാണ്. ക്ലാസ് മുറിക്കകത്ത് സീലിംഗ് ചെയ്ത് ഭംഗിയായി, തകർച്ച കാണാത്തവിധം മറച്ചിട്ടുണ്ടെങ്കിലും കെട്ടിടത്തിന്‍റെ പല ഭാഗങ്ങളും അടർന്നുവീഴാറായ നിലയിലാണ്. 128 വർഷത്തോളം പഴക്കമുണ്ടെന്ന് പറയുന്ന ഈ കെട്ടിടത്തിനുപകരം പുതിയ കെട്ടിടം പണിയുമെന്നൊക്കെ പറഞ്ഞുകേട്ടിരുന്നെങ്കിലും ഇതുവരെ ഒന്നും നടപ്പായില്ലെന്ന് അധ്യാപകരും രക്ഷിതാക്കളും പറയുന്നു. മാത്രമല്ല സ്കൂളിൽനടന്ന പ്രവേശനോത്സവത്തിൽ ജനപ്രതിനിധികളാരും പങ്കെടുക്കാത്തതിൽ നാട്ടുകാർക്ക് അമർഷമുണ്ട്. തദ്ദേശ സ്ഥാപനങ്ങളിലെ മെമ്പർമാരെ ക്ഷണിച്ചിരുന്നെങ്കിലും ആരും എത്തിച്ചേർന്നില്ല. പത്തുമണിക്ക് എത്താമെന്നാണത്രെ തലേന്നുവരെ പറഞ്ഞിരുന്നത്. അധ്യാപകരും രക്ഷിതാക്കളും കുട്ടികളുമെല്ലാം വിശിഷ്ടതിഥികളെ കാത്തിരിപ്പായിരുന്നു. കരുന്നുകളടക്കം കാത്തിരുന്നു മുഷിഞ്ഞു. ഒടുവിൽ 10.45 നാണ് ചടങ്ങ് നടത്തിയത്. പാമ്പാടി വില്വാദ്രി ലയൺസ് ക്ലബ് പുതിയ കുട്ടികൾക്ക് പഠനോപകരണങ്ങൾ വിതരണംചെയ്തു.

ജില്ലാതല അങ്കണവാടി പ്രവേശനോത്സവം

വെണ്ടോര്‍: അളഗപ്പനഗര്‍ പഞ്ചായത്തിലെ ആറാംനമ്പര്‍ അങ്കണവാടിയില്‍ നടന്ന ജില്ലാതല പ്രവേശനോത്സവം ജില്ലാ പഞ്ചായത്ത് പ്രസിഡന്‍റ് വി.എസ്. പ്രിന്‍സ് ഉദ്ഘാടനംചെയ് തു. പഞ്ചായത്ത് അംഗം സനല്‍ മഞ്ഞളി അധ്യക്ഷത വഹിച്ചു. അങ്കണവാടി വര്‍ക്കര്‍ കെ. ജയ, ഹെല്‍പര്‍ നിഷ തോമസ്, സിഡിഎസ് അംഗം റോസ്‌മേരി ജെയിംസ് എന്നിവര്‍ സംസാരിച്ചു. ജില്ലയിലെ ഏറ്റവും മികച്ച അങ്കണവാടിയായി തെരഞ്ഞെടുക്കപ്പെട്ടതാണ് രണ്ടാം വാര്‍ഡിലെ ആറാംനമ്പര്‍ അങ്കണവാടി.

മേജർ രാഹുലിനു കോൺഗ്രസിന്‍റെ ആദരം

പുത്തൂർ: ഓപ്പറേഷൻ സിന്ദൂറിൽ പങ്കെടുത്ത പുത്തൂർ പോലുവളപ്പിൽ രവീന്ദ്രനാഥൻ - ഷീജ ദമ്പതികളുടെ മകൻ മേജർ രാഹുൽ രവീന്ദ്രനെ ഡിസിസി പ്രസിഡന്‍റ് അഡ്വ. ജോസഫ് ടാജറ്റ് വീട്ടിലെത്തി ആദരിച്ചു. എട്ടുവർഷമായി ഇന്ത്യൻ ആർമിയിൽ സേവനം അനുഷ്ഠിക്കുന്നു. ജമ്മുവിലെ ആർട്ടിലെറി റെജിമെന്‍റിലാണ് സേവനം ചെയ്യുന്നത്. യുദ്ധമുഖത്തെ അനുഭവങ്ങൾ രാഹുൽ പങ്കുവച്ചു. ഇനി ലേ ലാഡാക്കിലാണ് നിയമനം. ഭാര്യ മേജർ പല്ലവി ഡോക്ടറാണ്. മാതാപിതാക്കളെ അറിയിക്കാതെയാണ് കഴിഞ്ഞദിവസം രാഹുൽ എത്തിയത്. മുൻ പഞ്ചായത്ത്‌ പ്രസിഡന്‍റ് ജോണി ചിറയത്ത്, മണ്ഡലം കോൺഗ്രസ്‌ പ്രസിഡന്‍റ് സിനോയ് സുബ്രഹ്മണ്യൻ, വാർഡ് മെമ്പർ ബിന്ദു സേതുമാധവൻ, ചന്ദ്രാനന്ദൻ, മുൻ മെമ്പർ ചന്ദ്രൻ തെങ്ങുംപിള്ളി, രാംദാസ് കുടുംബാംഗങ്ങൾ എന്നിവർ സന്നിഹിതരായിരുന്നു.

പുറനാട്ടുകര ഊട്ടുതിരുനാൾ എട്ടിന്

പുറനാട്ടുകര: സെന്‍റ് സെബാസ്റ്റ്യൻസ് ഇടവകയിലെ വിശുദ്ധ അന്തോണീസിന്‍റെ ഊട്ടുതിരുനാൾ ഞായറാഴ്ച ആചരിക്കും. ശനിയാഴ്ച രാവിലെ തിരുക്കർമങ്ങൾക്കുശേഷം വൈകുന്നേരംആറിന് അടാട്ട് ചന്ത സെന്‍റർ കപ്പേളയിൽ ലദീഞ്ഞ്, നൊവേന, നേർച്ചപ്പായസവിതരണം, തുടർന്ന് ഇടവകപ്പള്ളിയിലേക്കു പ്രദക്ഷിണം, ബാൻഡ് മേളം, വാദ്യഘോഷം. തിരുനാൾദിനമായ ഞായറാഴ്ച രാവിലെ ആറിനു വിശുദ്ധകുർബാന, 8.30നുള്ള ആഘോഷമായ വിശുദ്ധകുർബാനയ്ക്ക് ആലുവ സെന്‍റ് തോമസ് കപ്പൂച്ചിൻ പ്രൊവിൻഷ്യലേറ്റിലെ ഫാ. ഗോഡ്‌വിൻ ചെമ്മണ്ട മുഖ്യകാർമികത്വം വഹിച്ച് സന്ദേശം നല്കും. നേർച്ചവെഞ്ചരിപ്പിനുശേഷം തുടങ്ങുന്ന ഊട്ടുസദ്യ ഉച്ചകഴിഞ്ഞു മൂന്നുവരെ തുടരും. വൈകുന്നേരം 5.30നു വിശുദ്ധ കുർബാനയോടെ തിരുനാൾ സമാപിക്കും. പരിപാടികളുടെ വിജയത്തിനായി വികാരി ഫാ. ജോണ്‍സൻ അയിനിക്കൽ, അസി. വികാരി ഫാ. പ്രിന്‍റോ മാണിപ്പറന്പിൽ ഒഎംഎം കപ്പൂച്ചിൻ, കൈക്കാരന്മാരായ ഡേവിസ് ചിറ്റിലപ്പിള്ളി, ജോസഫ് അക്കരപട്ട്യേക്കൽ, ജോയ് അക്കരപട്ട്യേക്കൽ, ജനറൽ കണ്‍വീനർ സൈമണ്‍ കാഞ്ഞിരത്തിങ്കൽ എന്നിവരുടെ നേതൃത്വത്തിൽ വിവിധ കമ്മിറ്റികൾ പ്രവർത്തിച്ചുവരുന്നു.

പ്രവേശനോത്സവദിനത്തിൽ വിദ്യാലയത്തിന് സ്നേഹസമ്മാനമൊരുക്കി എംഎൽഎ

വടക്കാഞ്ചേരി: പ്രവേശനോത്സവദിനത്തിൽ വിദ്യാലയത്തിന് സ്നേഹസമ്മാനമൊരുക്കി സേവ്യർ ചിറ്റിലപ്പള്ളി എംഎൽഎ. വടക്കാഞ്ചേരി സെന്‍റ് പയസ് യുപി സ്കൂളിലെ വിദ്യാർഥികൾക്ക് യാത്രാസൗകര്യത്തിനുവേണ്ടി തന്‍റെ സ്പെഷൽ വികസന ഫണ്ടിൽനിന്നാണ് സ്കൂൾ ബസ് അനുവദിച്ചത്. ബസിന്‍റെ ഫ്ലാഗ്ഓഫ് വിദ്യാലയത്തിലെ പൂർവ വിദ്യാർഥികൂടിയായ സേവ്യർ ചിറ്റിലപ്പിള്ളി നിർവഹിച്ചു. ചടങ്ങിൽ നഗരസഭ ചെയർമാൻ പി.എൻ. സുരേന്ദ്രൻ മുഖ്യപ്രഭാഷണംനടത്തി. വടക്കാഞ്ചേരി ഉപജില്ല ഓഫീസർ ഷീജ കുനിയിൽ അധ്യക്ഷതവഹിച്ചു. മുൻ പ്രധാനാധ്യാപിക സിസ്റ്റർ റോസ് ആൻ, പിടിഎ പ്രസിഡന്‍റ് ജോബി പാറക്കൽ, മാനേജർ സിസ്റ്റർ അർപ്പിത, ഒഎസ്എ പ്രസിഡന്‍റ് പ്രസാദ് എന്നിവർ പ്രസംഗിച്ചു.

വടക്കാഞ്ചേരി നഗരസഭയിൽ ഓഫീസ് പ്രവർത്തനം സ്തംഭനാവസ്ഥയിലെന്ന് ആരോപണം

വടക്കാഞ്ചേരി: നഗരസഭയിൽ ജീവനക്കാർ തമ്മിലുള്ള ശീതസമരംമൂലം ഓഫീസ് പ്രവർത്തനം താറുമാറായതായി നഗരസഭ പ്രതിപക്ഷനേതാവ് എസ്.എ.എ. ആസാദ് പറഞ്ഞു. കുറച്ചുനാളുകളായി ഉദ്യോഗസ്ഥരെ വിശ്വാസത്തിലെടുക്കാതെ തന്നിഷ്ട പ്രകാരം സെക്രട്ടറി മുന്നോട്ടുപോകുകയാണ്. സ്ഥിരം ജീവനക്കാർ ഉള്ളപ്പോൾ താൽക്കാലികമായി നിയമിച്ചവർക്ക് പ്രധാനപ്പെട്ട ചുമതലകൾ നൽകിയിരിക്കുകയാണ്. തങ്ങളുടെ സ്വാർഥതാൽപര്യങ്ങൾക്ക് വഴങ്ങാത്തവരെ പ്രധാന ജോലികളിൽനിന്ന് ഒഴിവാക്കിയതിൽ ദുരൂഹതയുണ്ട്. വഴിവിട്ട പല സാമ്പത്തിക ഇടപാടുകളും സെക്രട്ടറി നേരിട്ടാണ് കൈകാര്യംചെയ്യുന്നതെന്നും ആരോപിച്ചു. പുതുതായി നിർമിച്ച ഓഫീസ് കെട്ടിടം ഗാരന്‍റി പിരീഡ് കഴിയുന്നതിനു മുമ്പ് മെയിന്‍റനസ് നടത്തുകയാണ്. ഇതിൽ ധനദുർവിനിയോഗം നടത്തിയിട്ടുണ്ട്. മാലിന്യസംസ്കരണ പ്ലാന്‍റിന്‍റെ പേരിൽ വലിയ ക്രമക്കേടുകളുണ്ട്. താത്കാലിക ചുമതലയുള്ള സെക്രട്ടറിയുടെ ധിക്കാരപരമായ പ്രവൃത്തികൾക്കെതിരെ ശക്തമായ സമരപരിപാടികളുമായി മുന്നോട്ടുപോകുമെന്ന് എസ്.എ.എ. ആസാദ് അറിയിച്ചു.

മണലൂരിൽ ഏഴുകോടിയുടെ വികസനപ്രവർത്തനങ്ങൾക്ക് അനുമതി

കാഞ്ഞാണി: മണലൂർ നിയോജകമണ്ഡലത്തിൽ നടത്തിയ നവകേരളസദസിൽവന്ന വികസന നിർദേശങ്ങളിൽനിന്നു മണ്ഡലത്തിലേക്ക് ഏഴുകോടി രൂപയുടെ വികസന ്രവർത്തനങ്ങൾക്ക് തുക അനുവദിച്ചു. ഇവയുടെ ഭരണാനുമതിയും ലഭിച്ചു. അരിമ്പൂർ എഫ്എച്ച്സിക്ക് പുതിയ ഒപി ബ്ലോക്ക് 30 ലക്ഷം, അരിമ്പൂർ പഞ്ചായത്ത് വാർഡ് 16 അങ്കണവാടി നമ്പർ 134ന് പുതിയ കെട്ടിടം 25 ലക്ഷം, അരിമ്പൂർ പഞ്ചായത്ത് കിഴക്കുംപുറം - ലാലൂർ ബണ്ട് റോഡ് നിർമാണം 70 ലക്ഷം, മുല്ലശേരി പഞ്ചായത്ത് പറമ്പന്തളി നട(പൊതുമരാമത്ത് റോഡ്) മുതൽ മാനിന വരെയുള്ള റോഡ് നവീകരണം ഒരുകോടി, മുല്ലശേരി പഞ്ചായത്ത് കോഴിത്തോട് തിരുനെല്ലൂർ റോഡ് 25 ലക്ഷം, മുല്ലശേരി പഞ്ചായത്ത് അന്നകര - എലവത്തൂർ - ഊരകം മങ്കുഴി റോഡ് 70 ലക്ഷം, മുല്ലശേരി കൃഷിഭവന് പുതിയ കെട്ടിടം 40 ലക്ഷം, വാടാനപ്പള്ളി പഞ്ചായത്ത് വാർഡ് തൃത്തല്ലൂർ ഹെൽത്ത് സെന്‍റർ റോഡ് നവീകരണം 25 ലക്ഷം, വാടാനപ്പള്ളി പഞ്ചായത്ത് വാർഡ് എട്ട് മേപ്രങ്ങാട്ട് - ഗണേശമംഗലം റോഡ് നവീകരണം 25 ലക്ഷം, പാവറട്ടി പഞ്ചായത്ത് വെമ്പേനാട് അമ്പലനട - ചുക്കുബസാർ റോഡ് 40 ലക്ഷം, എളവള്ളി ഹയർസെക്കന്‌ഡറി സ്കൂളിന്‍റെ പുതിയ കെട്ടിടത്തിന് മുകളിൽ പുതിയ ക്ലാസ് മുറികൾ നിർമിക്കുന്നതിന് 115 ലക്ഷം, ഗുരുവായൂർ നഗരസഭ വാർഡ് 20 അങ്കണവാടി 30 ലക്ഷം, കണ്ടാണശേരി പഞ്ചായത്ത് വാർഡ് 9,10 മാർക്കറ്റ് റോഡ് നവീകരണം 30 ലക്ഷം, കണ്ടാണശേരി പഞ്ചായത്ത് വാർഡ് 16 അങ്കണവാടി നമ്പർ 41ന് പുതിയ കെട്ടിടം 25 ലക്ഷം, ചൂണ്ടൽ പഞ്ചായത്ത് എരനെല്ലൂർ പള്ളി മുതൽ മഴുവഞ്ചേരി സെന്‍റർ വരെയുള്ള റോഡ് 25 ലക്ഷം, മണലൂർ പഞ്ചായത്ത് വാർഡ് എട്ട്,12,13- പാറക്കുളം - ഗവ. ഐടി ലിങ്ക് റോഡ് 25 ലക്ഷം എന്നിങ്ങനെയാണ് അനുവദിച്ചത് തദ്ദേശ റോഡ് പുനരുദ്ധാരണ പദ്ധതിയിൽ ഉൾപ്പെടുത്തി മണലൂർ മണ്ഡലത്തിലെ 28 റോഡുകൾക്ക് 6.54 കോടിരൂപ അനുവദിച്ച് കഴിഞ്ഞ ജനുവരിയിൽ ഭരണാനുമതി ലഭിച്ച പദ്ധതികൾക്ക് പുറമെയാണ് ഈ പദ്ധതികൾക്ക് തുകയനുവദിച്ചത്. 28 റോഡുകളുടെ പ്രവൃത്തികൾ ടെന്‌ഡർ നടപടികളിലാണ്.

കാർഷിക - വെറ്ററിനറി സർവകലാശാല ഭൂമിതർക്കം മരങ്ങൾക്കു സംരക്ഷണകവചം ഒരുക്കാൻ രാഖികെട്ടാൻ ഒരുങ്ങി ചക്കക്കൂട്ടം

തൃശൂർ: മണ്ണുത്തി കാർഷികഗവേഷണകേന്ദ്രം നിലനിൽക്കുന്ന സ്ഥലം വെറ്റിനറി സർവകലാശാലയുടെ ആണെന്ന അവകാശവാദത്തിനെതിരേയും അതു വിട്ടുകിട്ടണമെന്ന ആവശ്യത്തിനെതിരേയും ഫാമിലെ മരങ്ങൾ നശിപ്പിക്കുമെന്ന ആശങ്കയിലും പ്രതിഷേധം ശക്തം. കാർഷികസർവകലാശാലയുടെ 100 ഏക്കറോളം വരുന്ന ഭൂമിയുടെ ഉടമസ്ഥാവകാശവുമായി ബന്ധപ്പെട്ടുള്ള തർക്കം നിലനിൽക്കുന്ന സാഹചര്യത്തിലാണ് അതിനെതിരെ പ്രതിരോധം തീർക്കാൻ ചക്കസംരക്ഷണ കൂട്ടയ്മയായായ ചക്കക്കൂട്ടം രംഗത്തുവന്നിരിക്കുന്നത്. അഞ്ചു പതിറ്റാണ്ടോളം പ്രായമുള്ള 193 ൽ പ്പരം നാടൻപ്ലാവുകളുള്ള ഭൂമിയിൽനിന്ന് അവ മുറിച്ചുമാറ്റാനാണ് ശ്രമമെന്നു കൂട്ടായ്മ ആരോപിച്ചു. ഇത് അംഗീകരിക്കാൻ കഴിയില്ലെന്നും ഭാരവാഹികൾ പത്രസമ്മേളനത്തിൽ പറഞ്ഞു. പ്രതിഷേധങ്ങളുടെ ഭാഗമായി ചക്കക്കൂട്ടവും മോഡൽ ഓർഗാനിക് ഫാം സംരക്ഷണസമിതിയും സംയുക്തമായി നാളെ രാവിലെ 11 നു മണ്ണുത്തി മാർക്കറ്റിൽ പൊതുയോഗം നടത്തും. തുടർന്നു തോട്ടത്തിലുള്ള പ്ലാവിന്‍റെയും മാവിന്‍റെയും ജാതിയുടെയും ജൈവവൈവിധ്യം മനസിലാക്കാൻ അവസരം ഒരുക്കുമെന്നും അവയ്ക്കു സംരക്ഷണം ഒരുക്കാൻ മരങ്ങളിൽ രാഖികെട്ടുമെന്നും ഭാരവാഹികൾ പറഞ്ഞു. വിഷയത്തിൽ ഒൻപതിനു മുഖ്യമന്ത്രിയുടെ നേതൃത്വത്തിൽ ഒത്തുതീർപ്പുചർച്ച നടക്കാനിരിക്കെയാണ് പ്രതിഷേധവുമായി കൂട്ടായ്മ രംഗത്തുവന്നിരിക്കുന്നത്. പത്രസമ്മേളനത്തിൽ അനിൽ ജോസ്, സി.ഡി. സുനീഷ്, ഡോ. കെ.വൈ. ഷാജു, അഞ്ജന ശ്രീധരൻ എന്നിവർ പങ്കെടുത്തു.

ട്രോളിംഗ് നിരോധനം; ജില്ലയിൽ കർശന ക്രമീകരണം

തൃശൂർ: ഒന്പതിന് അർധരാത്രിമുതൽ ജൂലൈ 31 അർധരാത്രിവരെ ട്രോളിംഗ് നിരോധനം നടപ്പാക്കുന്നതിനു മുന്നോടിയായി ജില്ലാ ദുരന്തനിവാരണ ഡെപ്യൂട്ടി കളക്ടർ സി.എസ്. സ്മിതാറാണിയുടെ അധ്യക്ഷതയിൽ യോഗം ചേർന്നു. നിരോധനം നിലവിൽ വരുന്നതിനുമുന്പായി ജില്ലയുടെ തീരപ്രദേശത്തു പ്രവർത്തിക്കുന്ന ഇതരസംസ്ഥാന യന്ത്രവത്കൃതബോട്ടുകൾ തീരംവിട്ടുപോകണം. മറ്റു ബോട്ടുകൾ അതതു പ്രദേശങ്ങളിൽ നങ്കൂരമിടണം. വള്ളങ്ങൾ ഉപയോഗിച്ചുള്ള ട്രോളിംഗ്, ഡബിൾനെറ്റ് എന്നിവ ഈ കാലയളവിൽ അനുവദിക്കില്ല. കടലിൽ പോകുന്ന വലിയ വള്ളത്തോടൊപ്പം ഒരു കാരിയർ വള്ളംമാത്രമേ അനുവദിക്കുകയുള്ളൂ. ജില്ലയുടെ തീരപ്രദേശത്തും ഹാർബറുകളിലും മറ്റും പ്രവർത്തിക്കുന്ന ഡീസൽ ബങ്കുകൾ യന്ത്രവത്കൃതബോട്ടുകൾക്ക് ഇന്ധനം നൽകരുത്. ഇന്ധനം നൽകുന്ന ബങ്കുകൾക്കെതിരേ കർശനനടപടി സ്വീകരിക്കും. കായലിനോടോ ജെട്ടിയോടോ ചേർന്നുപ്രവർത്തിക്കുന്ന ബങ്കുകൾ ട്രോളിംഗ് കാലയളവിൽ പ്രവർത്തിക്കാൻ പാടില്ല. പട്രോളിംഗ് ശക്തമാക്കാൻ അഴീക്കോട് ചേറ്റുവ ഹാർബർ കേന്ദ്രീകരിച്ചു രണ്ടു പട്രോളിംഗ് ബോട്ട്, സീ റെസ്ക്യൂ ഗാർഡുമാർ, പോലീസ് പട്രോളിംഗ് എന്നിവ നടപ്പാക്കും. മത്സ്യത്തൊഴിലാളികൾ നിരോധന കാലയളവിൽ കടലിൽ പോകുന്പോൾ നിർബന്ധമായും ക്യുആർ കോഡ് സ്കാൻ ചെയ്യാൻ സാധിക്കുന്ന ആധാർ കാർഡ് കൈവശംവയ്ക്കണം. ബോട്ടുകളുടെ കളർ കോഡിംഗ് ഉടൻ പൂർത്തിയാക്കണം. ട്രോളിംഗ് നിരോധനകാലത്തു തൊഴിൽ നഷ്ടപ്പെടുന്ന മത്സ്യത്തൊഴിലാളികൾക്കും അനുബന്ധ തൊഴിലാളികൾക്കും സൗജന്യ റേഷൻ വിതരണംചെയ്യാനുള്ള നടപടികൾ ജില്ലാ സപ്ലൈ ഓഫീസർ സ്വീകരിക്കണമെന്നു നിർദേശം നൽകി. ഫിഷറീസ് സ്റ്റേഷൻ കേന്ദ്രീകരിച്ച് 24 മണിക്കൂർ പ്രവർത്തിക്കുന്ന കണ്‍ട്രോൾ റൂം മേയ് 15 മുതൽ ആരംഭിച്ചിട്ടുണ്ട്. കണ്‍ട്രോൾ റൂം നന്പർ 0480 2996090. യോഗത്തിൽ ഫിഷറീസ് ഡെപ്യൂട്ടി ഡയറക്ടർ പി. അബ്ദുൾ മജീദ്, ഫിഷറീസ് സ്റ്റേഷൻ അഴീക്കോട് അസിസ്റ്റന്‍റ് ഡയറക്ടർ ഓഫ് ഫിഷറീസ് ഡോ. സി. സീമ, ബന്ധപ്പെട്ട വകുപ്പുതല ഉദ്യോഗസ്ഥർ, മത്സ്യത്തൊഴിലാളി സംഘടനാപ്രതിനിധികൾ എന്നിവർ പങ്കെടുത്തു.

ആശങ്കയായി മഞ്ഞപ്പിത്തം

തൃശൂർ: ജില്ലയിൽ മഞ്ഞപ്പിത്തം കുത്തനേ ഉയരുന്നു. കഴിഞ്ഞമാസംമാത്രം 57 പേർക്കാണു മഞ്ഞപ്പിത്തം ബാധിച്ചത്. മേയ് 28നു മാത്രം ഏഴുപേർക്കു രോഗം സ്ഥിരീകരിച്ചു. മഴക്കാലമായതിനാലും ജില്ലയിൽ ഹെപ്പറ്റൈറ്റിസ് കേസുകൾ കൂടിവരുന്ന സാഹചര്യത്തിലും പൊതുജനം പകർച്ചവ്യാധികൾക്കെതിരേ അതീവജാഗ്രത പുലർത്തണമെന്നും തിളപ്പിച്ചാറിയ വെള്ളംമാത്രമേ കുടിക്കാവൂ എന്നും പഴകിയ ഭക്ഷണം ഒഴിവാക്കണമെന്നും ജില്ലാ മെഡിക്കൽ ഓഫീസർ ഡോ. ടി.പി. ശ്രീദേവി അറിയിച്ചു. കരളിനെ ബാധിക്കുന്ന വൈറസ് രോഗമായ ഹെപ്പറ്റൈറ്റിസ് എ, ഇ എന്നിവ മലിനമായ ആഹാരവും കുടിവെള്ളവും വഴിയാണു പകരുന്നത്. ഈ സാഹചര്യത്തിൽ ഹോട്ടലുകളിലും മറ്റും പച്ചവെള്ളത്തിൽ ചൂടുവെള്ളം കലർത്താതെ നിർബന്ധമായും കുടിവെള്ളം പൂർണമായും തിളപ്പിച്ചാറ്റിമാത്രം വിതരണം ചെയ്യുന്നു എന്ന് ഉറപ്പുവരുത്തണം. രോഗബാധയ്ക്കു മഴക്കാലത്ത് അനുകൂലസാഹചര്യങ്ങൾ ഉള്ളതിനാൽ വയറിളക്കരോഗങ്ങൾക്കെതിരേയും ജാഗ്രത പുലർത്തണമെന്നു ഡിഎംഒ അറിയിച്ചു. കരുതൽ വേണം *ആഹാരം കഴിക്കുന്നതിനുമുന്പും മലവിസർജനത്തിനുശേഷവും കൈകൾ സോപ്പ് ഉപയോഗിച്ചു കഴുകുക. * കൈയിലെ നഖം വൃത്തിയായി വെട്ടിസൂക്ഷിക്കുക. * മലമൂത്രവിസർജനം കക്കൂസിൽമാത്രം ചെയ്യുക. * തിളപ്പിച്ചാറ്റിയ വെള്ളംമാത്രം കുടിക്കുക. * കുഞ്ഞുങ്ങളുടെ വിസർജ്യങ്ങൾ സുരക്ഷിതമായി നീക്കംചെയ്യുക. * ആഹാരസാധനങ്ങളും കുടിവെള്ളവും അടച്ചുസൂക്ഷിക്കുക. * പഴകിയതും മലിനമായതുമായ ആഹാരം കഴിക്കാതിരിക്കുക. * പഴവർഗങ്ങളും പച്ചക്കറികളും നല്ലവണ്ണം കഴുകിയശേഷംമാത്രം ഉപയോഗിക്കുക. * കുടിവെള്ള പന്പിംഗ് സ്റ്റേഷനുകളിൽ ക്ലോറിനേഷനും ശുദ്ധീകരണപ്രവർത്തനങ്ങളും ഉറപ്പുവരുത്തുക. * കിണർവെള്ളം ഇടയ്ക്കിടെ ക്ലോറിനേറ്റ് ചെയ്യുക. ഓർക്കുക രോഗപ്രതിരോധപ്രവർത്തനങ്ങൾ തുടക്കത്തിൽതന്നെ ആരംഭിക്കുകവഴി രോഗം കൂടുതൽ പ്രദേശങ്ങളിലേക്കു വ്യാപിക്കുന്നതു തടയാനാകും. ആഘോഷാവസരങ്ങളിലും യാത്രപോകുന്പോഴും ഭക്ഷ്യപാനീയശുചിത്വത്തിൽ പ്രത്യേകം ശ്രദ്ധ ചെലുത്തുക. വയറിളക്കരോഗങ്ങൾ കണ്ടെത്തിയാൽ സ്വയംചികിത്സ ഒഴിവാക്കി ഉടൻ വിദഗ്ധചികിത്സ തേടുക.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]