അര്‍ജുനെ വീഴ്ത്തി നിഹാല്‍
Tuesday, August 12, 2025 2:31 AM IST
ചെന്നൈ: ചെന്നൈ ഗ്രാന്‍ഡ് മാസ്റ്റേഴ്‌സ് 2025 ചെസില്‍ ടോപ് സീഡായ ഇന്ത്യയുടെ അര്ജുന് എറിഗയ്‌സിയെ അട്ടിമറിച്ച് മലയാളി ഗ്രാന്‍ഡ് മാസ്റ്റര്‍ നിഹാല്‍ സരിന്‍. നാലാം റൗണ്ടിലാണ് നിഹാല്‍ അട്ടിമറി ജയം സ്വന്തമാക്കിയത്.
ചെന്നൈ ഗ്രാന്‍ഡ് മാസ്റ്റേഴ്‌സില്‍ നിഹാലിന്‍റെ ആദ്യ ജയമാണ്. ആദ്യ മൂന്നു മത്സരങ്ങളില്‍ രണ്ടിലും നിഹാല്‍ പരാജയപ്പെട്ടിരുന്നു. നാലു മണിക്കൂറില്‍ അധികം നീണ്ട, 70 നീക്കങ്ങള്‍ നടന്ന മത്സരത്തിലാണ് അര്ജുന് എതിരേ നിഹാല്‍ ജയം സ്വന്തമാക്കിയത്.
അഞ്ചാം റൗണ്ടില്‍ ഇന്ത്യയുടെ ഒന്നാം നമ്പര്‍ താരമായ അര്ജുന് 18കാരനായ വി. പ്രണവിനു മുന്നില്‍ സമനിലയില്‍ കുടുങ്ങി. അഞ്ചാം റൗണ്ടില്‍ നിഹാല്‍ സരിന്‍ അമേരിക്കയുടെ അവോണ്ടര്‍ ലിയാങുമായി സമനിലയില്‍ പിരിഞ്ഞു. ജര്‍മനിയുടെ വിന്‍സെന്‍റ് കീമറാണ് പോയിന്‍റ് നിലയില്‍ ഒന്നാം സ്ഥാനത്ത്.