ശന്പള പരിഷ്കരണം നടക്കാത്തത് ധൂർത്തുമൂലം: കെ. മുരളീധരൻ

നേമം: സർക്കാർ ജീവനക്കാർക്കുള്ള ശമ്പള പരിഷ്കരണവും സ്ഥാനക്കയറ്റവും നടക്കാത്തതു സർക്കാരിന്‍റെ ധൂർത്ത് മൂലമെന്നു കെ.പിസിസി മുൻ പ്രസിഡന്‍റ്് കെ. മുരളീധരൻ. പാപ്പനംകോട് ശ്രീചിത്തിര തിരുനാൾ എൻജീനിയറിംഗ് കോളജ് എംപ്ലോയീസ് അസോസിയേഷന്‍റെ വാർഷിക സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.

സാമ്പത്തിക പ്രയാസം എന്ന ഒരൊറ്റ വാക്കുകൊണ്ടു ശന്പള വർധനവും നടക്കുന്നില്ല. എല്ലാം കാര്യത്തിനും കേന്ദ്രത്തെ പഴി പറയുക മാത്രമാണു ചെയ്യുന്നത്. അസോസിയേഷൻ വർക്കിംഗ് പ്രസിഡന്‍റ് കെ. എസ്. ഗോപകുമാർ, കെടിയു മുൻ രജിസ്ട്രാർ ഡോ. ജി.പി. പദ്മകുമാർ, കേപ്പ് എംപ്ലോയിസ് അസോസിയേഷൻ ജനറൽ സെക്രട്ടറി ആർ. തുളസീധരൻ, വിപിൻദാസ്, ഡോ. സി.കെ. സുമേഷ്, എൽ.ബി. സുരേഷ് എന്നിവർ പങ്കെടുത്തു.

ADVERTISEMENT

മാര്‍ ബസേലിയസ് ഇംഗ്ലീഷ് മീഡിയം സ്‌കൂളില്‍ കർഷകദിനാചരണം

വെള്ളറട: കര്‍ഷക ദിനാചരണത്തിന്‍റെ ഭാഗമായി മാര്‍ ബസേലിയോസ് ഇംഗ്ലീഷ് മീഡിയം സ്‌കൂളില്‍ വിദ്യാര്‍ഥികള്‍ വൃക്ഷത്തൈകള്‍ നട്ടു. ഫാ. സാമുവേല്‍ തിരുഹൃദയം, പ്രിന്‍സിപ്പല്‍ സി. ഡബ്ലിയു. ജീന്‍, അധ്യാപകര്‍, രക്ഷകര്‍ത്താക്കള്‍ എന്നിവര്‍ പങ്കെടുത്തു. ‌ഹരിത കേരള മിഷന്‍ അംഗം പി. ചാള്‍സ് വൃക്ഷത്തൈ നടീല്‍ ഉദ്ഘാടനം നിര്‍വഹിച്ചു. വിദ്യാര്‍ഥികൾ വീടുകളില്‍നിന്ന് വൃക്ഷത്തൈകള്‍ കൊണ്ടുവരികയും സ്‌കൂള്‍ പരിസരത്തു നട്ടുപിടിപ്പിക്കുകയും ചെയ്തു. വിദ്യാര്‍ഥികളുടെ നേതൃത്വത്തില്‍ നാടന്‍പാട്ട് അവതരണം, ലഘുനാടകം, പ്രസംഗം, നൃത്താവിഷ്‌കാരം എന്നിവയും ഉണ്ടായിരുന്നു. സ്‌കൂള്‍ ക്വയറിന്‍റെ നേതൃത്വത്തില്‍ നടന്ന ദേശഭക്തിഗാനത്തോടെ ചടങ്ങുകള്‍ സമാപിച്ചു.

ബസില്‍നിന്നു വീണ് കണ്ടക്ടര്‍ക്ക് ഗുരുതര പരിക്ക്

പേരൂര്‍ക്കട: ഓടിക്കൊണ്ടിരുന്ന ബസില്‍നിന്നു വീണു കെഎസ്ആര്‍ടിസി കണ്ടക്ടര്‍ക്ക് പരിക്കേറ്റു. വട്ടിയൂര്‍ക്കാവ് വാഴോട്ടുകോണം സുലൈഖ മന്‍സിലില്‍ എം.ബി. മുഹമ്മദ് ഷബീറാ(50)ണു പരിക്കേറ്റത്. ശാസ് തമംഗലത്തെ ശ്രീരാമകൃഷ് ണ മിഷന്‍ ആശുപത്രിയില്‍ ചികിത്സയില്‍ കഴിയുന്നത്. വ്യാഴാഴ്ച വൈകുന്നേരം 5.25 നാണ് സംഭവം. ചൊവ്വള്ളൂരില്‍നിന്നു കിഴക്കേക്കോട്ടയിലേക്കു സര്‍വീസ് നടത്തുകയായിരുന്ന തിരുവനന്തപുരം സിറ്റി ഡിപ്പോയിലെ ബസിലെ കണ്ടക്ടറായിരുന്നു മുഹമ്മദ് ഷബീര്‍. ബസില്‍ തിരക്കായിരുന്നതിനാല്‍ മുന്‍വശത്തുനിന്ന യാത്രക്കാര്‍ക്ക് ടിക്കറ്റു കൊടുത്തശേഷം ഡോര്‍വഴി ഇറങ്ങി. പിറകിലത്തെ ഡോര്‍ തുറന്നു കയറുകയായിരുന്നു ഇദ്ദേഹം. ശേഷം ചവിട്ടുപടിയില്‍ നില്‍ക്കുന്നതിനിടെ ഡോര്‍ തുറന്ന് മുഹമ്മദ് ഷബീര്‍ പുറത്തേക്കു വീഴുകയായിരുന്നു. ഇറങ്ങിക്കയറിയപ്പോള്‍ പിറകിലത്തെ ഡോര്‍ നന്നായി അടയ്ക്കാത്തതാണ് സംഭവത്തിനു കാരണമെന്നാണു സൂചന. ബസ് വളവിലെത്തിയപ്പോഴാണ് കണ്ടക്ടര്‍ ഡോറിനു സമീപത്തേക്ക് ചാഞ്ഞുവരികയും തുറന്നിരുന്ന ഡോറില്‍നിന്നു പുറത്തേക്കു പതിക്കുകയും ചെയ്തത്. മുഖത്തിനും കൈകള്‍ക്കും വീഴ്ചയില്‍ പരിക്കേറ്റിട്ടുണ്ട്. ആശുപത്രിയില്‍ നിരീക്ഷണത്തിലുള്ള മുഹമ്മദ് ഷബീറിന് ഇന്ന് ആശുപത്രി വിടാനായേക്കും.

സാമൂഹ്യക്ഷേമ പെന്‍ഷന്‍ മസ്റ്ററിംഗ് വീടുകളിലും

വെള്ളറട: സാമൂഹ്യ സുരക്ഷ പെന്‍ഷന്‍ മാസ്റ്ററിംഗ് വീടുകളിലെത്തി നിര്‍വഹിക്കുന്നത് കിടപ്പുരോഗികള്‍ക്ക് ആശ്വാസമാകുന്നു. വെള്ളറട അക്ഷയ സംരംഭകനായ ബിനുകുമാറാണു കിടപ്പുരോഗികൾക്ക് സഹായമാകുന്നത്. വെള്ളറട പഞ്ചായത്തിലെ വാര്‍ഡ് മെമ്പര്‍മാരുടെ നേതൃത്വത്തിലാണു വീടുകളിലെത്തി മസ്റ്ററിംഗ് നിര്‍വഹിക്കുന്നത്. പൊതുഅവധി ദിവസങ്ങളിലും മസ്റ്ററിംഗ് നടത്തുന്നുണ്ട്. കേരളത്തില്‍ 3000 ത്തോളം വരുന്ന അക്ഷയ സെന്‍ററുകള്‍ വീടുകളില്‍ പോയി മസ്റ്ററിംഗ് നടത്തി വരുന്നുണ്ട്. 24 വരെ മസ്റ്ററിംഗ് നടത്താന്‍ അക്ഷയകേന്ദ്രങ്ങളെ സര്‍ക്കാര്‍ ചുമതല പ്പെടുത്തിയിരിക്കുന്നത്.

വിദ്യാർഥികൾ കോടതി സന്ദർശിച്ചു

വിതുര: കോടതി പ്രവർത്തനങ്ങൾ മനസിലാക്കാനായി വിതുര എംജിഎം പൊന്മുടിവാലി സ്കൂളിലെ വിദ്യാർഥികൾ നെടുമങ്ങാട് കോടതി സന്ദർശിച്ചു. വിദ്യാർഥികളുടെ നിയമപരിജ്ഞാന യാത്ര "സംവാദ'യുടെ ഭാഗമായായിരുന്നു സന്ദർശനം. സബ് ജഡ്ജ് സി.ആർ. രാജശ്രീ വിദ്യാർഥികളോടു സംവദിച്ചു. തുടർന്നു കോടതിയിലെ വിവിധ സെഷനുകൾ കുട്ടികൾ നേരിട്ടുകണ്ടു. ക്വിസ് മത്സര വിജയികൾക്ക് ലീഗൽ സർവീസ് അധികൃതർ സമ്മാനങ്ങൾ വിതരണം ചെയ്തു. "സംവാദ' താലൂക്ക് കോ-ഓർഡിനേറ്റർ കെ. ഉവൈസ് ഖാൻ, അഭിഭാഷകരായ കെ.പി. അനില, ലസ്ളി ദാസ്, കെ.എസ്. അശോക്, ജയകുമാർ തീർഥം, രമ്യ ആർ. നായർ, നൂർജി, സജിത, പാരാ ലീഗൽ വോളന്‍റിയർമാരായ പ്രിയങ്ക, ജ്യോതി തുടങ്ങിയവർ വിവിധ സെഷനുകൾക്കു നേതൃത്വം നല്കി.

അനില്‍ തമ്പിക്കായുള്ള അന്വേഷണം അവസാനിപ്പിച്ചിട്ടില്ലെന്നു പോലീസ്

പേരൂര്‍ക്കട: വസ്തുതട്ടിപ്പ് കേസിലെ സൂത്രധാരനും വ്യവസായിയുമായ അനില്‍തമ്പിയെ കണ്ടെത്തുന്നതിനുള്ള അന്വേഷണം അവസാനിപ്പിച്ചിട്ടില്ലെന്നു മ്യൂസിയം പോലീസ്. ഇന്ത്യയിലെ ഒട്ടുമിക്ക സംസ്ഥാനങ്ങളില്‍ ഇയാളെ കണ്ടെത്തുന്നതിനായി അരിച്ചുപെറുക്കിയ പ്രത്യേക സംഘം നാട്ടില്‍ തിരിച്ചെത്തിയിരുന്നു. വിമാനത്താവളംവഴി അനില്‍തമ്പി രക്ഷപ്പെടാതിരിക്കാന്‍ വേണ്ടുന്ന മാര്‍ഗങ്ങള്‍ പോലീസ് സ്വീകരിച്ചിരുന്നു. അതേസമയം അനില്‍തമ്പി റോഡുമാര്‍ഗം എത്തി നേപ്പാള്‍, ഭൂട്ടാന്‍ രാജ്യങ്ങള്‍ വഴി അന്യരാജ്യത്തേക്ക് കടന്നിരിക്കാമെന്നാണു പോലീസ് കരുതുന്നത്. പൂര്‍ണമായും പഴുതടച്ചുള്ള അന്വേഷണത്തിനു സാധ്യമല്ലാതായ സാഹചര്യത്തിലാണ് അനില്‍തമ്പി ഇപ്പോഴും കാണാമറയത്തായിരിക്കുന്നത്. ഇയാള്‍ ഡല്‍ഹിയിലെ ഫ്‌ളാറ്റില്‍ ഒളിവില്‍ക്കഴിയുന്ന വേളയില്‍ പോലീസ് പിടിക്കുമെന്ന ഘട്ടത്തില്‍നിന്നു കഷ്ടിച്ചാണ് രക്ഷപ്പെട്ടത്. പിന്നീട് അനില്‍തമ്പി എവിടെ എന്നതിനെക്കുറിച്ച് യാതൊരു വിവരവുമില്ല.

വിദാധിരാജ കർമശ്രേഷ്ഠ പുരസ്കാരം സമ്മാനിച്ചു

തിരുവനന്തപുരം: പ്രഥമ ശ്രീ വിദാധിരാജ കർമശ്രേഷ്ഠ പുരസ്കാരം എൻഎസ്എസ് വൈസ് പ്രസിഡന്‍റ് എം. സംഗീത് കുമാറിനു സമ്മാനിച്ചു. ശ്രീ വിദ്യാധിരാജാ വിശ്വകേന്ദ്രത്തിന്‍റെ 40-ാം വാർഷിക സമ്മേളനത്തോടനുബന്ധിച്ചു ട്രിവാൻഡ്രം ചേംബർ ഓഫ് കോമേഴ്സ് ഹാളിൽ നടന്ന ചടങ്ങിൽ ശാന്തിഗിരി ആശ്രമം ജനറൽ സെക്രട്ടറി ഗുരുരത്നം ജ്ഞാനതപസ്വി പുരസ്കാരം സമ്മാനിച്ചു. ചട്ടമ്പിസ്വാമികൾക്ക് കാലഘട്ടത്തിന് അനുസരിച്ച് പൊതു സമൂഹത്തിൽ വേണ്ടത്ര സ്ഥാനം ലഭിച്ചിട്ടില്ലെന്നു സമ്മേളനം ഉദ്ഘാടനം ചെയ്തു സ്വാമി ഗുരുരത്നം ജ്ഞാനതപസ്വി പറഞ്ഞു.ശ്രീ വിദ്യാധിരാജ വിശ്വകേന്ദ്രം പ്രസിഡന്‍റ് ഡി. ചന്ദ്രസേനനൻ നായർ അധ്യക്ഷത വഹിച്ചു. മുൻ സ്പീക്കർ എം. വിജയകുമാർ, മുൻമന്ത്രി വി.എസ്. ശിവകുമാർ, പദ്മന ഗിരീഷ്, എസ്.ആർ. കൃഷ്ണകുമാർ, തളിയൽ രാജശേഖരൻ പിള്ള, എസ്.എസ്. മനോജ്, ജി.എസ്. മഞ്ജു എന്നിവർ പങ്കെടുത്തു.

വനംവകുപ്പ് കാമറകൾ സ്ഥാപിച്ചു

പാലോട്: പെരിങ്ങമ്മല വെങ്കിട്ടയിൽ പുലി പോത്തിനെ കൊന്ന സംഭവവുമായി ബന്ധപ്പെട്ടു വനം വകുപ്പ് കാമറകൾ സ്ഥാപിച്ചു. വെങ്കട്ട മുട്ടിലാണു രണ്ടു കാമറകൾ സ്ഥാപിച്ചത്. പുലിയുടെ ദൃശ്യം കാമറയിൽ പതിഞ്ഞാൽ കൂടുവച്ചു പിടികൂടുന്നതടക്കമുള്ള നടപടികൾ സ്വീകരിക്കുമെന്നു വനം വകുപ്പ് അറിയിച്ചു. എന്നാൽ പുലിയുടെ ഭീതി നിലനിൽക്കുന്ന ആദിച്ച കോണിൽ കാമറ സ്ഥാപിക്കാത്തതിനെതിരെ ആദിവാസികൾ പ്രതിഷേധിച്ചു. ഇതിനിടെ പെരിങ്ങമല കലയപുരം ഡീസന്‍റ്മുക്കിനു സമീപം പുലിയെ കണ്ടതായി നാട്ടുകാർ പറഞ്ഞു. ടാപ്പിംഗ് തൊഴിലാളികളാണ് കണ്ടത്. വഴിയിൽ രക്തക്കറകൾ ഉണ്ടായിരുന്നതായും ഏതോ ജീവിയെ പിടിച്ചതാണെന്നും നാട്ടുകാർ പറയുന്നു . അധികൃതർ രക്തക്കറയുടെ സാമ്പിൾ ശേഖരിച്ചിട്ടുണ്ട്. കഴിഞ്ഞ ദിവസം ഡി കെ മുരളി എംഎൽഎ സ്ഥലം സന്ദർശിച്ചിരുന്നു.

ഗവ. ടിടിഐയില്‍ "ഓണത്തിന് ഒരു വട്ടി പൂ' വിളവെടുപ്പ് 26ന്

നെയ്യാറ്റിൻകര : ഊരൂട്ടുകാലയില്‍ സ്ഥിതി ചെയ്യുന്ന നെയ്യാറ്റിന്‍കര ഗവ. ഇന്‍സ്റ്റിറ്റ്യൂട്ട് ഓഫ് ടീച്ചര്‍ എഡ്യൂക്കേഷന്‍ (ടിടിഐ) കാന്പസില്‍ `ഓണത്തിന് ഒരു വട്ടി പൂ` പദ്ധതി പ്രകാരം കൃഷി ചെയ്ത ചെടികൾ പൂവിട്ടു. നെയ്യാറ്റിന്‍കര നഗരസഭയുടെയും കൃഷി ഭവന്‍റെയും സഹകരണത്തോടെ ഗവ. ടിടിഐയുടെ നേതൃത്വത്തില്‍ ആരംഭിച്ച `ഓണത്തിന് ഒരു വട്ടി പൂ` പദ്ധതിയുടെ വിളവെടുപ്പ് 26ന് നടക്കും. ഗവ. ടിടിഐ കാന്പസില്‍ പ്രത്യേകമായി ഒരുക്കിയ പൂ കൃഷിയിടത്തിലാണ് ജമന്തി നട്ടുപിടിപ്പിച്ചത്. കാന്പസിലെ അധ്യാപക വിദ്യാര്‍ഥികള്‍ക്കായിരുന്നു പരിപാലനച്ചുമതല. ടിടിഐയിലെ അധ്യാപകരും കൃഷി ഭവന്‍ അധികൃതരും ആവശ്യമായ മാര്‍ഗനിര്‍ദേശം നല്‍കി. വിളവെടുപ്പ് മഹോത്സവത്തിന്‍റെ ഉദ്ഘാടനം 26 ന് രാവിലെ 9.45 ന് കെ. ആന്‍സലന്‍ എംഎല്‍എ നിര്‍വഹിക്കും. നഗരസഭ ചെയര്‍പേഴ്സണ്‍ പി.കെ. രാജമോഹനന്‍ അധ്യക്ഷനാകും.

സർവോദയ വിദ്യാലയത്തിൽ ബഹിരാകാശദിനം ആഘോഷിച്ചു

തിരുവനന്തപുരം: അനന്തപുരം ഫൗണ്ടേഷൻ, ഉന്നത് ഭാരത് അഭിയാൻ, സർവോദയ സെൻട്രൽ വിദ്യാലയം എന്നിവരുടെ സംയുക്താഭിമുഖ്യത്തിൽ നാലാഞ്ചിറ സർവോദയ സെൻട്രൽ വിദ്യാലയത്തിൽ ലോക ബഹിരാവകാശദിനം സംഘടിപ്പിച്ചു ഡിജിറ്റൽ യൂണിവേഴ്സിറ്റി വൈസ് ചാൻസലർ ഡോ. സിസ തോമസ്, സർവോദയ സ്കൂൾ പ്രിൻസിപ്പൽ ഫാ. കരിക്കൽ ചാക്കോ വിൻസന്‍റ്, ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് എഡ്യൂക്കേഷൻ ആൻഡ് റിസർച്ചിലെ പ്രഫ. രാജൻ, ഇന്ത്യൻ ഇൻസ്റ്റിറ്റ്യൂട്ട് ഓഫ് സ്പേസ് ടെക്നോളജിയിലെ പ്രഫ. ജോസഫ് കുരുവിള, അനന്തപുരം ഫൗണ്ടേഷൻ ട്രസ്റ്റിനെ പ്രതിനിധീകരിച്ച് ആനന്ദ് എസ്‌. നായർ എന്നിവർ ചേർന്നു പരിപാടി ഉദ്ഘാടനം ചെയ്തു. പ്രഫ. ജോസഫ് കുരുവിള ദേശീയ ബഹിരാകാശ ദിന സന്ദേശം നൽകി. വിഎസ്എസ്‌സിയിലെ മുതിർന്ന ശാസ്ത്രജ്ഞൻ അരുൺ മുഖ്യപ്രഭാഷണം നടത്തി. ഇതിനുപുറമെ, വിദ്യാർഥികൾക്കായി ശാസ്ത്ര പ്രദർശനവും ക്വിസ്, പ്രസംഗ മത്സരങ്ങളും സംഘടിപ്പിച്ചു.

നെയ്യാര്‍മേളയ്ക്കു തിരിതെളിയാന്‍ ഇനി ഒരാഴ്ച മാത്രം ബാക്കി

നെയ്യാറ്റിൻകര: ത്രീ ഡി പ്ലാനറ്റോറിയം ഷോ മുതല്‍ റോബോട്ടിക് ഫെസ്റ്റ് വരെ. ബിസിനസ് എക്സലന്‍സ് അവാര്‍ഡ് നൈറ്റ് മുതല്‍ വ്യാവസായിക ഉത്പന്ന പ്രദര്‍ശനം വരെ. ഭക്ഷ്യമേള മുതല്‍ പുസ്തകോത്സവവും കാര്‍ണിവലും വരെ. പ്രമുഖ കലാകാരന്മാര്‍ അണി നിരക്കുന്ന കലാവിരുന്ന് മുതല്‍ പരന്പരാഗത കലാരൂപങ്ങളുടെ അവതരണങ്ങള്‍ വരെ..... നെയ്യാര്‍ മേളയുടെ പത്താമത് എഡിഷന്‍ മുന്‍കാലങ്ങളെക്കാള്‍ മികവാര്‍ന്ന രീതിയില്‍ സന്ദര്‍ശകരെ വരവേല്‍ക്കാനുള്ള ഒരുക്കങ്ങള്‍ കാര്യക്ഷമമായി മുന്നോട്ടു പോകുന്നുവെന്ന് സംഘാടകര്‍. വിനോദസഞ്ചാര വകുപ്പിന്‍റെയും തദ്ദേശ സ്വയംഭരണ സ്ഥാപനങ്ങളുടെയും സഹകരണത്തോടെ കേരള സംസ്ഥാന വ്യാപാരി വ്യവസായി സമിതി നെയ്യാറ്റിൻകര ഏരിയ കമ്മിറ്റി സംഘടിപ്പിക്കുന്ന നെയ്യാർ മേളയുടെ തലസ്ഥാനജില്ലയുടെ തെക്കന്‍ പ്രദേശത്തെ ഏറ്റവും വിപുലമായ ഓണാഘോഷവും വ്യാപാരമേളയും സാംസ്കാരികോത്സവവുമായി കീര്‍ത്തിയാര്‍ജ്ജിച്ചുകഴിഞ്ഞു. നെയ്യാറ്റിന്‍കര മുനിസിപ്പല്‍ സ്റ്റേഡിയത്തിലെ പഴയ വേദിയില്‍നിന്ന് ആറാലുംമൂട് മാര്‍ക്കറ്റ് ഗ്രൗണ്ടിലേയ്ക്ക് മേളയുടെ അരങ്ങ് എത്തിയിട്ട് മൂന്നു വര്‍ഷമായി. നൂറ്റാണ്ടുകളുടെ പഴക്കമുള്ള ആറാലുംമൂട് മാര്‍ക്കറ്റ് ഗ്രൗണ്ടിനെ മേളയ്ക്കു വേണ്ടി ആകര്‍ഷകമായി ഒരുക്കിയെടുത്തിട്ടുണ്ട്. പ്രധാന വേദിയുടെയും പ്രദര്‍ശന സ്റ്റാളുകളുടെയുമൊക്കെ നിര്‍മാണ പ്രവര്‍ത്തനങ്ങള്‍ ദ്രുതഗതിയില്‍ പുരോഗമിക്കുന്നു. 29നു വൈകുന്നേരം ആരംഭിക്കുന്ന മേളയില്‍ വിവിധ സര്‍ക്കാര്‍ വകുപ്പുകളും പങ്കെടുക്കും. ഓരോ വര്‍ഷവും മേളയിലെത്തുന്ന സന്ദര്‍ശകരുടെ എണ്ണം വര്‍ധിച്ചു വരുന്നതായി സംഘാടകസമിതി ഭാരവാഹികള്‍ അറിയിച്ചു. മേളയുടെ ഭാഗമായി ഇക്കുറി സമ്മാനപ്പെരുമഴ എന്ന പേരില്‍ ലക്കി ഡ്രോ കൂപ്പണും ക്രമീകരിച്ചിട്ടുണ്ടെന്ന് സംഘാടകര്‍ കൂട്ടിച്ചേര്‍ത്തു.

യൂത്ത് കോൺഗ്രസ് രാപ്പകല്‍ സമരം ആരംഭിച്ചു

പെരുങ്കടവിള: കോണ്‍ഗ്രസ് പെരുങ്കടവിള മണ്ഡലം കമ്മിറ്റിയുടെ നേതൃത്വത്തില്‍ രാപ്പകല്‍ സമരത്തിനു തുടക്കമായി. മണ്ഡലം പ്രസിഡന്‍റ് അഡ്വ: അനന്തന്‍റെ നേൃത്വത്തിൽ പെരുങ്കടവിള ജംഗ്ഷനില്‍ ആരംഭിച്ച രാപ്പകല്‍ സമരം കെപിസിസി ജനറൽ സെക്രട്ടറി അഡ്വ. സി.ആര്‍. പ്രണകുമാര്‍ ഉദ്ഘാടനം ചെയ്തു. കര്‍ഷക കോണ്‍ഗ്രസ് സംസ്ഥാന വൈസ് പ്രസിഡന്‍റ് മാരായമുട്ടം എം. എസ്. അനില്‍ മുഖ്യപ്രഭാഷണം നടത്തി. മാരായമുട്ടം മണ്ഡലം പ്രസിഡന്‍റ് ബിനില്‍ മണലുവിള, ബ്ലോക്ക് വൈസ് പ്രസിഡന്‍റ് സത്യദാസ്, ബ്ലോക്ക്‌ സെക്രട്ടറിമാരായ അഡ്വ. ഷിബു ശ്രീധര്‍, മണ്ണൂര്‍ ശ്രീകുമാര്‍, അയിരൂര്‍ ബാബു, പഞ്ചായത്ത്‌ മെമ്പര്‍മാരായ അമ്പലത്തറയില്‍ ഗോപകുമാര്‍, കാക്കണം മധു, ധന്യ, സേവാദള്‍ പാറശാല ബ്ലോക്ക് പ്രസിഡന്‍റ് തത്തിയൂർ സുരേന്ദ്രന്‍, കൊറ്റാമം മോഹനന്‍, ശ്രീരാഗം ശ്രീകുമാര്‍, ആരാമം മധുസൂദനന്‍ നായര്‍, ജോണി മാലകുളങ്ങര, ലാലു മാലകുളങ്ങര, ബിജു ലാല്‍, അരുവിപ്പുറം സദാനന്ദന്‍, അനില്‍കുമാര്‍ തത്തയൂര്‍, യൂത്ത്‌കോണ്‍ഗ്രസ് നേതാക്കളായ കൊല്ലയില്‍ ശ്യാംലാല്‍, കൃഷ്ണശേഖര്‍, സതീഷ് കോട്ടുക്കോണം, അഖില്‍ തൃപ്പലവൂര്‍, അഭിജിത്ത് ചുള്ളിയൂര്‍, അഖില്‍ നിരപ്പില്‍, ഹരിപ്രസാദ്, വിനോദ് കോട്ടയക്കല്‍, അലക്‌സ്, അഖില്‍ തെള്ളുക്കുഴി, എന്നിവര്‍ നേതൃത്വം നല്‍കി.

വിദ്യാര്‍ഥികള്‍ ഏറ്റുമുട്ടി; നിരവധി പേര്‍ക്ക് പരിക്ക്

നാലുപേരെ ജുവനൈല്‍ കോടതിയില്‍ ഹാജരാക്കി പേരൂര്‍ക്കട: സ്‌കൂള്‍ വിദ്യാര്‍ഥികള്‍ തമ്മിലുണ്ടായ അടിപിടിയില്‍ നിരവധി പേര്‍ക്കു പരിക്കേറ്റു. സംഭവത്തില്‍ നാലുപേരെ പോലീസ് കസ്റ്റഡിയിലെടുത്തശേഷം ജുവനൈല്‍ കോടതിയില്‍ ഹാജരാക്കി. പേരൂര്‍ക്കട സ്റ്റേഷന്‍ പരിധിയിലെ ഒരു സ്‌കൂളില്‍ പഠിക്കുന്ന 16-ഉം 17-ഉം വയസു പ്രായമുള്ള ആണ്‍കുട്ടികളാണു ചേരിതിരിഞ്ഞ് ഏറ്റുമുട്ടിയത്. ഇരുവിഭാഗം വിദ്യാർഥികള്‍ തമ്മില്‍ നിലനിന്നിരുന്ന വാക്കുതര്‍ക്കവും പ്രകോപനവുമാണ് ആക്രമണത്തിനു കാരണമായത്. പ്ലസ്ടു ഹ്യുമാനിറ്റീസിന് പഠിക്കുന്ന നാലു വിദ്യാർഥികളെ പ്ലസ്‌വണ്‍ വിദ്യാർഥികളായ മൂന്നുപേര്‍ ചേര്‍ന്ന് ആക്രമിക്കുകയായിരുന്നു. സ്‌കൂളിലെത്തിയ ഇവര്‍ വിദ്യാർഥികളെ ക്ലാസിനുള്ളില്‍ക്കയറി മര്‍ദിക്കുകയും തുടർന്നു ചേരിതിരിഞ്ഞ് ഏറ്റുമുട്ടുകയുമായിരുന്നു. ഇതില്‍ ഒരു പ്ലസ്‌വണ്‍ വിദ്യാർഥി തലയ്ക്കു പരിക്കേറ്റു പേരൂര്‍ക്കട ഗവ. ജില്ലാ ആശുപത്രിയില്‍ ചികിത്സയിലാണ്. മറ്റൊരാളെ തിരുവനന്തപുരം മെഡിക്കല്‍കോളജ് ആശുപത്രിയിലും പ്രവേശിപ്പിച്ചു. മര്‍ദനമേറ്റ 16കാരന്‍ നല്‍കിയ പരാതിയില്‍ തൊളിക്കോട് സ്വദേശിയായ ഒരു 17-കാരനെയും നെടുമങ്ങാട് സ്വദേശിയായ മറ്റൊരു 17-കാരനെയും ആനാട്, അരുവിക്കര സ്വദേശികളായ രണ്ടുപേരെയും കസ്റ്റഡിയിലെടുക്കുകയായിരുന്നു. ജുവനൈല്‍ കോടതിയില്‍ ഹാജരാക്കിയ ഒരു 17-കാരന്‍റെ സഹോദരനും പേരൂര്‍ക്കട ആശുപത്രിയില്‍ തലയ്ക്കു പരിക്കേറ്റു ചികിത്സയിലുണ്ട്. ഹ്യുമാനിറ്റീസിലെ ഒരു വിദ്യാർഥിക്കു കൈക്ക് പൊട്ടലേറ്റതിനാല്‍ പോലീസ് മാതാപിതാക്കളെ വരുത്തി അവര്‍ക്കൊപ്പം വിട്ടയച്ചു.

കടന്നൽ കുത്തേറ്റ് ഏഴ് പേർക്ക് പരിക്ക്

നെടുമങ്ങാട്: തെ‌ാഴിലുറപ്പ് തൊഴിലാളികൾക്ക് ജോലിക്കിടെ കടന്നലിന്‍റെ കുത്തേറ്റു. ഏഴ് പേർക്ക് പരുക്ക്. ഉഴമലയ്ക്കൽ മങ്ങാട്ടുപാറ സ്വദേശികളായ ഓമനയമ്മ (75), പെ‌ാടിമോൾ (44), ദേവനേശം (62), ലളിതമ്മ (65), മഞ്ചു (44), ശാന്തമ്മ (75), വസന്ത (75) എന്നിവർക്കാണ് പരുക്കേറ്റത്. ഓമനയമ്മ, പെ‌ാടിമോൾ, ദേവനേശം എന്നിവർ മെഡിക്കൽ കോളജ് ആശുപത്രിയിലും ബാക്കിയുള്ളവർ ആര്യനാട് ആശുപത്രിയിലും ചികിത്സതേടി. ഇന്നലെ മങ്ങാട്ടുപാറയിൽ തൊഴിലുറപ്പ് ജോലിക്കിടെയാണ് സംഭവം. കുരുമുളക് വള്ളിയുടെ ഇടയിൽ ‍ഉണ്ടായിരുന്ന കൂട്ടിൽ നിന്നാണ് കടന്നലുകൾ ഒന്നിച്ച് ഇളകിയത്.

എൻആർഐ കൗണ്‍സിൽ ഓഫ് ഇന്ത്യയുടെ വാർഷികം

തിരുവനന്തപുരം: എൻആർഐ കൗണ്‍സിൽ ഒഫ് ഇന്ത്യയുടെ 21-ാമത് വാർഷികവും ഓൾ കേരള ഗൾഫ് റിട്ടേണീസ് ഓർഗനൈസേഷന്‍റെ 40-ാം സ്ഥാപക ദിനവും ഇന്ന് ഉച്ചയ്ക്ക് രണ്ടു മുതൽ തന്പാനൂർ അപ്പോളോ ഡിമോറോ ഹോട്ടലിൽ നടക്കും. വൈകുന്നേരം 5.30ന് നടക്കുന്ന സുവർണസംഗമം മുൻ ഗോവ ഗവർണർ പി.എസ്.ശ്രീധരൻപിള്ള ഉദ്ഘാടനം ചെയ്യും. സ്ഥാപകദിന വിളംബരം മന്ത്രി ജി.ആർ അനിൽ നടത്തും. പ്രഫ. പി.ജെ. കുര്യൻ അധ്യക്ഷത വഹിക്കും. എംഎൽഎമാരായ വി.ജോയ്, സി.കെ. ഹരീന്ദ്രൻ സിപിഐ നേതാവ് പന്ന്യൻ രവീന്ദ്രൻ, മുൻ മന്ത്രി വി.എസ്. ശിവകുമാർ, ടി. ശരത്ചന്ദ്രപ്രസാദ്, കരമന ജയൻ എന്നിവർ പങ്കെടുക്കും.

എസ്. ബീനാമോൾ ഇൻഫർമേഷൻ ഓഫീസർ

തിരുവനന്തപുരം: ജില്ലാ ഇൻഫർമേഷൻ ഓഫീസറായി എസ്. ബീനാമോൾ ചുമതലയേറ്റു. നിലവിൽ പിആർഡി ഡയറക്ടറേറ്റിൽ സെൻട്രൽ ന്യൂസ് ഡെസ്ക് കോ ഓർഡിനേറ്റിംഗ് ന്യൂസ് എഡിറ്ററായിരുന്നു. ലേബർ പബ്ലിസിറ്റി ഓഫീസർ, അസിസ്റ്റന്‍റ് ഫോറസ്റ്റ് പബ്ലിസിറ്റി ഓഫീസർ, അസിസ്റ്റന്‍റ് ലേബർ പബ്ലിസിറ്റി ഓഫീസർ, തിരുവനന്തപുരം ജില്ലാ അസിസ്റ്റന്‍റ് ഇൻഫർമേഷൻ ഓഫീസർ എന്നീ തസ്തികകളിൽ സേവനം അനുഷ്ഠിച്ചിട്ടുണ്ട്.

പോങ്ങുംമൂട് സെന്‍റ് ആന്‍റണീസ് പള്ളിയിൽ സുവർണ ജൂബിലി സമാപനവും തിരുനാളും

തിരുവനന്തപുരം: പോങ്ങുംമൂട് സെന്‍റ് ആന്‍റണീസ് മലങ്കര കത്തോലിക്കാ പള്ളിയുടെ സുവർണ ജൂബിലി ആഘോഷ സമാപനവും ഇടവക തിരുനാളും 24 മുതൽ 31 വരെ നടത്തും. ജൂബിലി സമാപനത്തിൽ മലങ്കര കത്തോലിക്കാ സഭ മേജർ ആർച്ച്ബിഷപ് കർദിനാൾ മാർ ബസേലിയോസ് ക്ലീമിസ് കാതോലിക്കാബാവ മുഖ്യകാർമികനാകും. തിരുനാളിന്‍റെ തുടക്കദിവസമായ 24നു രാവിലെ 6.30ന് പ്രഭാത നമസ്കാരവും വിശുദ്ധ കുർബാനയും വിശുദ്ധ അന്തോണീയോസിന്‍റെ നൊവേനയും. ഇടവക വികാരി റവ. ഡോ. വർഗീസ് പുല്ലുംവിള തെക്കേതിൽ തിരുനാളിനു കൊടിയേറ്റും. തുടർന്ന് 30 വരെ വൈകുന്നേരം ആറിനു സന്ധ്യാ നമസ്കാരം, നൊവേന, വിശുദ്ധ കുർബാന എന്നിവ നടക്കും. 29നു ഭക്തസംഘടനകളുടെ വാർഷിക സമ്മേളനവും 30നു വൈദിക സന്യസ്ത സംഗമവും നടക്കും. പ്രധാന തിരുനാൾ ദിനമായ 31 ന് രാവിലെ 7.30 ന് പ്രഭാത നമസ്കാരം, എട്ടിന് ആഘോഷമായ വിശുദ്ധ കുർബാന. കർദിനാൾ മാർ ബസേലിയോസ് ക്ലീമിസ് കാതോലിക്കാബാവ മുഖ്യകാർമികനാകും. തുടർന്ന് ആദ്യകുർബാന സ്വീകരണം. സുവർണ ജൂബിലി സമാപന സമ്മേളനത്തിനു ശേഷം കൊടിയിറക്കുന്നതോടെ തിരുനാൾ സമാപിക്കും.

മാർ ബസേലിയോസ് കോളജിൽ ചങ്ങാതിക്കൊരു തൈ പദ്ധതി

തിരുവനന്തപുരം: മാർ ബസേലിയോസ് കോളജ് ഓഫ് എൻജിനീയറിംഗ് ആൻഡ് ടെക്‌നോളജിയിൽ ഹരിത സർട്ടിഫിക്കറ്റ് വിതരണവും ചങ്ങാതിക്കൊരു തൈ പരിപാടിയും സംഘടിപ്പിച്ചു. കോളജിലെ മാലിന്യ സംസ്കരണ സെല്ലിന്‍റെ നേതൃത്വത്തിൽ സംഘടിപ്പിച്ച പരിപാടിക്കു ഡയറക്ടർ ഫാ. ജോൺ വർഗീസ്, പ്രിൻസിപ്പൽ ഡോ. എസ്. വിശ്വനാഥ റാവു, സംസ്ഥാന പ്രോഗ്രാം ഓഫീസർ അജയകുമാർ, നവകേരള മിഷൻ റിസോഴ്സ് പേഴ്സൺ റസീന തുടങ്ങിയവർ നേതൃത്വം നൽകി. കോളജ് ഓഡിറ്റോറിയത്തിൽ നടന്ന ചടങ്ങിൽ കാമ്പസിലെ ശുചിത്വ പരിപാലനത്തിൽ മികച്ച പ്രകടനം കാഴ്ചവെച്ച സ്ഥാപനങ്ങൾക്ക് ഹരിത സർട്ടിഫിക്കറ്റുകൾ വിതരണം ചെയ്തു. ഹരിത കാമ്പസ് എന്ന ലക്ഷ്യത്തോടെ മാലിന്യ സംസ് കരണ പ്രവർത്തനങ്ങളിലേർപ്പെടുന്നവരെ പ്രോത്സാഹിപ്പിക്കുന്നതിന്‍റെ ഭാഗമായാണ് ഈ സർട്ടിഫിക്കറ്റുകൾ നൽകിയത്. തുടർന്നു നടന്ന "ചങ്ങാതിക്കൊരു തൈ' എന്ന പരിപാടിയും ശ്രദ്ധേയമായി. സൗഹൃദത്തിന്‍റെ പ്രതീകമായി സുഹൃത്തുക്കൾക്ക് ഒരു തൈ സമ്മാനിക്കുന്നതായിരുന്നു പരിപാടി. കോളജ് അധികൃതരും അധ്യാപകരും വിദ്യാർഥികളും പങ്കെടുത്തു. പരിപാടികൾക്ക് മാലിന്യ സംസ്കരണ സെൽ ഭാരവാഹികൾ നേതൃത്വം നൽകി.

"എം. കൃഷ്ണൻ നായർ എന്നെ കെ. മധുവാക്കി'

തിരുവനന്തപുരം: നൂറു പൂന ഫിലിം ഇൻസ്റ്റിറ്റ്യൂട്ടുകൾക്ക് സമാനമാണ് എം. കൃഷ്ണൻ നായർ എന്ന ഗുരുനാഥൻ. പ്രശസ്ത ചലച്ചിത്ര സംവിധായകൻ എം. കൃഷ്ണൻ നായരുടെ ശിഷ്യനും ചലച്ചിത്ര സംവിധായകനും കെഎസ്എഫ്ഡിസി ചെയർമാനുമായ കെ. മധുവിന്‍റേ താണ് ഈ വാക്കുകൾ. എം. കൃഷ്ണൻ നായർ സംവിധാനം ചെയ്ത കറുത്തകൈ എന്ന പ്രേംനസീറിന്‍റെ ആദ്യ സിഐഡി സിനിമയുടെ അറുപതാം വാർഷികാഘോഷത്തിൽ പങ്കെടുത്ത് പ്രസംഗിക്കുകയായിരുന്നു അദ്ദേഹം. പ്രേംനസീർ സുഹൃത് സമിതി സംഘടിപ്പിച്ച ചടങ്ങ് ലെനിൻ ബാലവാടിയിൽ നടന്നു. എം. കൃഷ്ണൻ നായർ എന്ന ചലച്ചിത്ര പ്രതിഭയുടെ കീഴിൽ സംവിധാന സഹായിയായി ജീവിതം ആരംഭിച്ചതുകൊണ്ടാണ് കെ. മധു എന്ന സംവിധായകൻ ഉണ്ടായത്. പ്രേംനസീർ എന്ന നിത്യഹരിത നായകന്‍റെ നല്ല മനസും തന്നെ ഒരു സംവിധായകനാക്കി തീർക്കുന്നതിൽ വലിയ പങ്കുവഹിച്ചിട്ടുണ്ട- കെ. മധു പറഞ്ഞു. എം. കൃഷ്ണൻ നായരുടെ കീഴിൽ സംവിധാന സഹായിയായി ചേർന്ന കാലത്തെ അനുഭവങ്ങളും അദ്ദേഹം പങ്കുവച്ചു. കൃഷ്ണൻ നായരുടെ അസിസ്റ്റന്‍റ് ഡയറക്ടർ എന്ന മേൽവിലാസം സ്വതന്ത്ര ഡയറക്ടറായി മാറുന്നതിനു വലിയ രീതിയിൽ തന്നെ സഹായിച്ചിട്ടുണ്ട്. തന്‍റെ ഒരു സിബിഐ ഡയറി കുറിപ്പ് പരന്പരയിലെ സിനിമ കണ്ടശേഷം, സിനിമ നന്നായിട്ടുണ്ട്. എന്നാൽ ചില ഭാഗങ്ങളിൽ ചെറിയ പ്രശ്നങ്ങളുണ്ട്. അത് എനിക്കു മാത്രമേ മനസിലാകൂ എന്ന് ഒരു ഗുരുനാഥന്‍റെ സ്നേഹത്തോടെ എം. കൃഷ്ണൻ നായർ പറഞ്ഞ കാര്യവും കെ. മധു ഓർമിച്ചു. ചടങ്ങിന്‍റെ ഉദ്ഘാടനം എം. കൃഷ്ണൻ നായരുടെ മകനും മുൻ ചീഫ് സെക്രട്ടറിയുമായ കെ. ജയകുമാർ നിർവഹിച്ചു. ചടങ്ങിൽ ചലച്ചിത്ര-നാടക നടൻ ഡോ. ഷാനവാസ് പ്രേംനസീറിന്‍റെ ചിത്രങ്ങളിലെ ഗാനങ്ങൾ കോർത്തിണക്കിയ നിത്യവസന്ത ഗീതങ്ങൾ എന്ന പുസ്തകം രചിച്ച വയലാർ വിനോദ് എന്നിവരെ ആദരിച്ചു. പ്രേംനസീർ സുഹൃദ്സമിതി പ്രസിഡന്‍റ് പനച്ചമൂട് ഷാജഹാൻ ചടങ്ങിൽ അധ്യക്ഷത വഹിച്ചു. ഡോ. വാഴമുട്ടം ചന്ദ്രബാബു, റഹിം പനവൂർ, ഡോ. ഗീത ഷാനവാസ്, സൈനുലാബ്ദീൻ തുടങ്ങിയവർ പ്രസംഗിച്ചു. പ്രേംനസീർ സുഹൃദ് സമിതി സെക്രട്ടറി തെക്കൻ സ്റ്റാർ ബാദുഷ സ്വാഗതം ആശംസിച്ചു. ട്രഷറർ ഗോപൻ ശാസ്തമംഗലം നന്ദി പറഞ്ഞു. തുടർന്ന് പി. സുബ്രഹ്മണ്യം നിർമിച്ച കറുത്തകൈ എന്ന ചിത്രം പ്രദർശിപ്പിച്ചു.

തണല്‍മരം വീണ് സ്‌കൂള്‍ മതില്‍ തകര്‍ന്നു

പേരൂര്‍ക്കട: തണല്‍മരം വേരോടെ പിഴുതുവീണ് സ്‌കൂള്‍മതില്‍ തകര്‍ന്നു. പേരൂര്‍ക്കട ഗവ. ഗേള്‍സ് ഹയര്‍സെക്കന്‍ഡറി സ്‌കൂൾ മതിലിന്‍റെ ഒരുമീറ്ററോളം ഭാഗമാണ് ഇളകി വീണത്. ഇന്നലെ രാവിലെയാണ് സംഭവം. സ്‌കൂള്‍ കോമ്പൗണ്ടില്‍നിന്ന തണല്‍മരമാണ് കടപുഴകി വീണത്. സംഭവസമയം സമീപത്ത് ആരുമില്ലാതിരുന്നതിനാല്‍ അത്യാഹിതം ഒഴിവാകുകയായിരുന്നു. തിരുവനന്തപുരം ഫയര്‍‌സ്റ്റേഷനില്‍നിന്ന് ഫയര്‍ ആൻഡ് റസ്‌ക്യു ഓഫീസര്‍ ഷഹീര്‍, എഫ്ആര്‍ഒ ഡ്രൈവര്‍ സജി, ഫയര്‍ ആൻഡ് റസ്‌ക്യു ഓഫീസര്‍മാരായ മനു, വിഷ്ണു, നാരായണന്‍, വനിത എഫ്ആർഒമാരായ ജിത, രശ്മി എന്നിവര്‍ പങ്കെടുത്തു.

എസ്എടി ആശുപത്രിയിൽ ഉപകരണങ്ങൾ സ്ഥാപിക്കണം: ബാലാവകാശ കമ്മീഷൻ

തിരുവനന്തപുരം: എസ്എടി ആശുപത്രിയിൽ എംആർഐ, സിടി, യുഎസ്എസ് മാമോഗ്രാം എന്നിവ സ്ഥാപിക്കുന്നതിനുള്ള അടിയന്തര നടപടി സ്വീകരിക്കാൻ ബാലാവകാശ കമ്മീഷൻ ഉത്തരവായി. കമ്മീഷൻ അംഗം എൻ. സുനന്ദ ആശുപത്രി സന്ദർശിച്ചതിന്‍റെയും വിവിധ റിപ്പോർട്ടുകളുടെയും അടിസ്ഥാനത്തിലാണ് ആശുപത്രി സൂപ്രണ്ടിനും ആരോഗ്യ കുടുംബക്ഷേമ വകുപ്പ് പ്രിൻസിപ്പൽ സെക്രട്ടറിക്കും നിർദ്ദേശം നൽകിയത്. പരിശോധനയിൽ ദിവസേന അയ്യായിരത്തിലധികം കുട്ടികളും ഗർഭിണികളും ചികിത്സയ്ക്ക് എത്തുന്ന എസ്എടി ആശുപത്രിയിൽ എംആർഐ, സിടി സ്കാൻ എടുക്കാൻ സർക്കാർ സംവിധാനമില്ല. ഈ രോഗികൾ മെഡിക്കൽ കോളജിനെയും സ്വകാര്യ സ്ഥാപനങ്ങളെയുമാണ് ആശ്രയിക്കുന്നത്. പാർക്കിംഗ് സ്ഥലം കുറവായതിന്‍റെ പേരിൽ സ്കാനിംഗ് സെന്‍റർ തുടങ്ങുന്നതിനുള്ള തീരുമാനം മാറ്റിവയ്ക്കുന്നത് ശരിയല്ല. സെന്‍റർ തുടങ്ങേണ്ടത് കുട്ടികളുടെ അവകാശമാണ്. ആവശ്യ മെഡിക്കൽ ഉപകരണങ്ങളുടെ അഭാവം ശിശു മരണങ്ങൾക്ക് കാരണമാകാം. എസ്.എ.റ്റിയിൽ ബാലസൗഹൃദവും ഉത്തരവാദത്തോടെയുള്ള പ്രവർത്തനവുമാണ് ആവശ്യം. മെഡിക്കൽ കോളേജിലും എസ്എടി ആശുപത്രിയിലും സ്കാനിംഗ് സംവിധാനങ്ങൾ കൂടുതലായി വരുന്നത് ദുർബലരും അതിദരിദ്രരുമായ രോഗികൾക്കും കുട്ടികൾക്കും ഉപകാരപ്രദമായിരിക്കും എന്ന് കമ്മീഷൻ വിലയിരുത്തുന്നു. കമ്മീഷന്‍റെ ശിപാർശകളിന്മേൽ സ്വീകരിച്ച നടപടി റിപ്പോർട്ട് രണ്ടു മാസത്തിനകം ബന്ധപ്പെട്ട ഉദ്യോഗസ്ഥർ കമ്മീഷന് ലഭ്യമാക്കണം.

ബസ് യാത്രകളുടെ ഓർമ പുതുക്കി മോഹൻലാൽ

തിരുവനന്തപുരം: കെഎസ്ആർടിസി നിരത്തുകളിൽ എത്തിക്കാൻ പോകുന്ന പുതിയ ബസുകളുടെ ഫ്ലാഗ്‌ ഓഫ് ആനയറ സ്വിഫ്റ്റ് ആസ്ഥാനത്ത് മുഖ്യമന്ത്രി പിണറായി വിജയൻ നിർവഹിച്ചു. ഫ്ലാഗ്ഓഫിന് മുന്നോടിയായി ഗതാഗത വകുപ്പ് സംഘടിപ്പിച്ച ഓർമ എക്സ്പ്രസിന്‍റെ ഭാഗമാകാൻ നടൻ മോഹൻലാൽ എത്തിയത് ഏറെ ശ്രദ്ധേയമായി. കെഎസ്ആർടിസി പുതിയതായി വാങ്ങിയ 143 ബസുകളുടെ ഫ്ലാഗ്ഓഫാണ് മുഖ്യമന്ത്രി നിർവഹിച്ചത്. ടാറ്റ, അശോക് ലെയ്‌ലാൻഡ്, ഐഷർ, വോൾവോ തുടങ്ങിയ പ്രമുഖ കമ്പനികളുടെ പ്രീമിയം ബസുകളാണ് നിരത്തുകളിൽ കെഎസ്ആർടിസി ഇനിമുതൽ ഓടിക്കുകയെന്ന് ഗതാഗത മന്ത്രി കെ.ബി. ഗണേഷ് കുമാർ ഫ്ലാഗ്‌ഓഫ് ചടങ്ങിൽ പറഞ്ഞു. തിരുവനന്തപുരത്ത് ബസ്സിൽ സഞ്ചരിക്കുക എന്നത് ഒരു പ്രത്യേക അനുഭവമാണെന്ന് മോഹൻലാൽ പറഞ്ഞു. കോളജിൽ പഠിക്കുന്ന കാലത്താണ് കൂടുതലായി ബസിൽ സഞ്ചരിച്ചിട്ടുള്ളത്. അന്ന് ഇന്നത്തേതുപോലെയുള്ള ബസുകൾ ഒന്നുമില്ലായിരുന്നു. ട്രാൻസ്‌പോർട്ട് സൗകര്യങ്ങൾ ഇ്നു വളരെ മെച്ചപ്പെട്ടിട്ടുണ്ടെന്നും മോഹൻലാൽ പറഞ്ഞു. ഒരു നാട്ടിലെ യാത്രാസൗകര്യങ്ങൾ മെച്ചപ്പെടുന്നതിനനുസരിച്ച് ആ നാട് ഒരുപാട് മുന്നോട്ടുപോകുമെന്നും മോഹൻലാൽ കൂട്ടിച്ചേർത്തു. പ്രത്യേകം സജ്ജമാക്കിയിരുന്ന പഴയ കെഎസ്ആർടിസി ബസിന്‍റെ ചവിട്ടുപടിയിൽ ഗണേഷ് കുമാറും മോഹൻലാലും ഒരുമിച്ചു നിന്ന് പഴയകാല ബസ് യാത്രാ ഓർമ്മകൾ പുതുക്കി. അതിനുശേഷം പുതിയ വോൾവോ ബസിൽ കയറി ആധുനിക സൗകര്യങ്ങൾ മനസിലാക്കി. കെഎസ്ആർടിസി എക്‌സ്‌പോയുടെ ഭാഗമാണ് "ഓർമ എക്‌സ്പ്രസ്' സംഘടിപ്പിക്കുന്നത്. ആദ്യ യാത്രയിൽ സംവിധായകൻ പ്രിയദർശനും നടന്മാരായ മണിയൻപിള്ള രാജുവും നന്ദുവും ഉൾപ്പെടെയുള്ളവർ മന്ത്രി ഗണേഷ് കുമാറിനൊപ്പം സഞ്ചരിച്ചിരുന്നു.

നെട്ടയത്തെ ഫ്‌ളാറ്റിലെ ലിഫ്റ്റില്‍ സ്ത്രീകള്‍ കുടുങ്ങി

പേരൂര്‍ക്കട: നെട്ടയം സെന്‍ട്രല്‍ പോളിടെക്‌നിക്കിനു സമീപത്തെ പേള്‍ മാനര്‍ ഫ്‌ളാറ്റിലെ ലിഫ്റ്റില്‍ മൂന്നു സ്ത്രീകള്‍ കുടുങ്ങി. ഇന്നലെ രാവിലെ 9.10 നായിരുന്നു സംഭവം. ഏകദേശം 10 നിലകളുള്ള ഫ്‌ളാറ്റിലെ മുകളിലത്തെ നിലയില്‍നിന്നു താഴേക്കു വരുന്നതിനാണ് ഇവര്‍ കയറിയത്. ഗ്രൗണ്ട് ഫ്‌ളോറില്‍ എത്തിയപ്പോഴാണ് ഫ്‌ളാറ്റ് കേടായി നിന്നുപോയത്. തിരുവനന്തപുരം ഫയര്‍‌സ്റ്റേഷനില്‍നിന്ന് ഫയര്‍ ആൻഡ് റസ്‌ക്യു ഓഫീസര്‍മാരായ ഷഹീര്‍, മനു, വിഷ്ണു, നാരായണന്‍, ചിത്രസേനന്‍, എഫ്.ആര്‍.ഒ ഡ്രൈവര്‍ സജി എന്നിവര്‍ ചേര്‍ന്നാണു സ്ത്രീകളെ സുരക്ഷിതമായി പുറത്തെത്തിച്ചത്.

ബാങ്കിന്‍റെ ലേല നടപടി : വട്ടിയൂര്‍ക്കാവില്‍ വീട്ടമ്മ ആത്മഹത്യാ ഭീഷണി മുഴക്കി

പേരൂര്‍ക്കട: ബാങ്കിന്‍റെ ലേല നടപടിയില്‍ പ്രതിഷേധിച്ച് വട്ടിയൂര്‍ക്കാവില്‍ വീട്ടമ്മ ആത്മഹത്യാ ഭീഷണി മുഴക്കി. വാഴോട്ടുകോണം മൂന്നാംമൂട് മഞ്ചംപാറ സ്വദേശിനിയാണ് ആത്മഹത്യാ ഭീഷണി മുഴക്കിയത്. ഇന്നലെ രാവിലെ ഒന്പതു മണിക്കാണ് സംഭവം. 2014ല്‍ സൂസി ജോര്‍ജ് വട്ടിയൂര്‍ക്കാവ് അര്‍ബന്‍ കോ-ഓപ്പറേറ്റീവ് ബാങ്കില്‍നിന്നു 9.5 ലക്ഷം രൂപ വായ്പയെടുത്തിരുന്നു. 10 വര്‍ഷംകൊണ്ടു പണം തിരിച്ചടയ്ക്കണമെന്നതായിരുന്നു വ്യവസ്ഥ. എന്നാല്‍ കോവിഡ് കാലത്ത് തവണയില്‍ മുടക്കം വരികയുണ്ടായി. മൊത്തം 14 ലക്ഷം രൂപയാണ് വീട്ടമ്മയ്ക്കു ബാങ്കില്‍ അടയ്ക്കാന്‍ സാധിച്ചത്. മുഴുവന്‍ തുകയും അടച്ചുതീര്‍ക്കാതെ വന്നതോടെ രണ്ടരവര്‍ഷത്തിനു മുമ്പ് ബാങ്ക് അധികൃതര്‍ ജപ്തിനോട്ടീസ് പതിച്ചി രുന്നു. ഇതിനെത്തുടര്‍ന്ന് ബന്ധുവീടുകളിലാണു വീട്ടമ്മയും ഭര്‍ത്താവും മകളും താമസിച്ചുവന്നിരുന്നത്. അതിനിടെ മുതലും പലിശയും ഉള്‍പ്പെടെ 13 ലക്ഷത്തോളം രൂപ ഇനിയും അടയ് ക്കാനുണ്ടെന്നും അഞ്ചു ലക്ഷം രൂപയെങ്കിലും ഒണ്‍ടൈം സെറ്റില്‍മെന്‍റ് എന്ന നിലയില്‍ അടച്ചാല്‍ മാത്രമേ ലേല നടപടികള്‍ ഒഴിവാക്കാന്‍ സാധിക്കുകയുള്ളൂവെന്നും ബാങ്ക് അറിയിച്ചു. വ്യാഴാഴ്ച രാവിലെ 11 മണിക്കാണ് ലേല നടപടികള്‍ നിശ്ചയിച്ചിരുന്നത്. അതിനിടെ സൂസിയും ഇവരുടെ ബന്ധുക്കളും ചേര്‍ന്ന് തങ്ങള്‍ വീട്ടില്‍ക്കയറി താമസിക്കാന്‍ പോകുന്നുവെന്നു ബാങ്കിനെയും വട്ടിയൂര്‍ക്കാവ് പോലീസിനെയും അറിയിച്ചു. വീട്ടില്‍ക്കയറിയ വീട്ടമ്മ ബാങ്ക് ജീവനക്കാര്‍ ലേല നടപടിക്കെത്തിയാല്‍ ആത്മഹത്യചെയ്യുമെന്നു ഭീഷണിപ്പെടുത്തി. ഇതിനായി പാചകവാതക സിലിന്‍ഡറിനു സമീപം തീപ്പെട്ടിയുമായി നിന്നു. എന്നാല്‍ 11 മണി കഴിഞ്ഞിട്ടും ബാങ്ക് അധികൃതര്‍ ലേല നടപടിക്ക് എത്തിയില്ല. പ്രശ്‌നം അവസാനിച്ചിട്ടില്ലെന്നും ബാങ്ക് അധികൃതരുമായി വിഷയം ഒന്നുകൂടി സംസാരിച്ചശേഷം ഒത്തുതീർ പ്പിനു ശ്രമിക്കാന്‍ കുടുംബത്തോട് ആവശ്യപ്പെട്ടിട്ടുണ്ടെന്നും വാര്‍ഡ് കൗണ്‍സിലര്‍ റാണി വിക്രമന്‍ അറിയിച്ചു.

ബൈക്കപകടം; ചികിത്സയിലായിരുന്ന യുവാവ് മരിച്ചു

വിഴിഞ്ഞം : ബൈക്കും മിനിലോറിയും കൂട്ടിയിടിച്ച് പരിക്കേറ്റ് ചികിത്സയിലായിരുന്ന യുവാവ് മരിച്ചു. വിഴിഞ്ഞം മുല്ലൂർ നെല്ലിക്കുന്ന് പള്ളി നടവീട്ടിൽ സോമന്‍റെയും വിജയമ്മയുടെയും മകൻ സോജൻ (35) ആണ് മരിച്ചത്. ബുധനാഴ്ച രാവിലെ വിഴിഞ്ഞം -കളിയിക്കാവിള റോഡിൽ തെന്നൂർക്കോണംപട്രോൾ പമ്പിന് സമീപമായിരുന്നു അപകടം. കോവളത്തെ സ്വകാര്യ ഹോട്ടൽ ജീവനക്കാരനായിരുന്ന സോജൻ ജോലിക്ക് പോകുന്നതിനിടയിലായിരുന്നു സംഭവം. ഭാര്യ: രേഷ്മ.എക മകൾ: ഇസഅന്നാഗബ്രിയേൽ.

വനിതാരത്‌നം പുരസ്‌കാരം സമ്മാനിച്ചു

തിരുവനന്തപുരം: വനിതാ സംരംഭങ്ങള്‍ക്ക് ആശ്വാസമേകിയ നടപടികളും സ്ത്രീശാക്തീകരണവും ഇടതു സര്‍ക്കാരിന്‍റെ മുഖമുദ്രയാണെന്നു മന്ത്രി ജി.ആര്‍. അനില്‍. ജയനാദം കാസര്‍ഗോഡ് ഏര്‍പ്പെടുത്തിയ വനിതാരത്‌ന പുരസ്‌കാരം പത്രപ്രവര്‍ത്തകയും കൃപാ ചാരിറ്റീസ് കണ്‍വീനറുമായ പി. സുബിഹ മാഹീനു സമ്മാനിച്ചു പ്രസംഗിക്കുകയായിരുന്നു മന്ത്രി. കവടിയാര്‍ അജന്തയില്‍ നടന്ന ചടങ്ങില്‍ ജില്ലാ പഞ്ചായത്ത് സ്റ്റാന്‍ഡിംഗ് കമ്മിറ്റി ചെയര്‍മാന്‍ വിളപ്പില്‍ രാധാകൃഷ്ണന്‍ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് ലില്ലി മോഹന്‍, കേരള പ്രവാസി സംഘം വൈസ് പ്രസിഡന്‍റ് കലാപ്രേമി ബഷീര്‍ ബാബു, എസ്എന്‍ഡിപി വനിതാ കണ്‍വീനര്‍ ആതിര രതീഷ്, പടവന്‍കോട് മുസ്‌ലിം ജമാഅത്ത് പ്രസിഡന്‍റ് എം. എ. റഹീം, സ്‌നേഹ സാന്ദ്രം ട്രസ്റ്റ് സെക്രട്ടറി ഷീജ സാന്ദ്ര തുടങ്ങിയവര്‍ പ്രസംഗിച്ചു. ഖാലിദ് പൂവല്‍ സ്വാഗതവും സുമാമത്ത് നന്ദിയും രേഖപ്പെടുത്തി.

17.5 ലക്ഷം രൂപയുടെ ഭരണ അനുമതിയായി

നെടുമങ്ങാട്: ആനാട് പഞ്ചായത്തിലെ പാണയം ഗ്രാമോദ്ധാരണി ഗ്രന്ഥശാലയ്ക്ക് പുതിയ കെട്ടിടം നിർമിക്കുന്നതിന് എംഎൽ എയുടെ പ്രത്യേക വികസന പദ്ധതിയിലുൾപ്പെടുത്തി 17.5 ലക്ഷം രൂപയുടെ ഭരണാനുമതി ലഭിച്ചു. പാണയം പ്രദേശത്തെ നാട്ടുകാരുടേയും ഗ്രന്ഥശാലാ പ്രവർത്തകരുടേയും നിരന്തര ആവശ്യത്തെ തുടർന്നാണ് എംഎൽഎ ഫണ്ടിൽ നിന്ന് തുക അനുവദിച്ചു പുതിയ കെട്ടിടം നിർമിക്കുന്നത്. 60 വർഷത്തോളം പഴക്കമുള്ള കെട്ടിടത്തിൽ പ്രവർത്തിക്കാനാകാത്തതിനാൽ വാടക കെട്ടിടത്തിലാണ് ഗ്രന്ഥശാല നിലവിൽ പ്രവർത്തിക്കുന്നത്. ബ്ലോക്ക് പഞ്ചായത്ത് സെക്രട്ടറിക്കും ബ്ലോക്ക് പഞ്ചായത്ത് എൻജിനീയറിംഗ് വിഭാഗത്തിനുമാണ് നിർമാണ ചുമതല. സാങ്കേതികാനുമതി കൂടി ലഭ്യമാക്കി വളരെ വേഗത്തിൽ തന്നെ നിർമാണം ആരംഭിക്കാനാകുമെന്നു ഡി.കെ മുരളി എംഎൽഎ അറിയിച്ചു.

ജനകീയ റോഡ് സഞ്ചാര യോഗ്യമാക്കണമെന്ന് ആവശ്യം

പൂവാർ: കരുംകുളം പഞ്ചായത്തിൽ പരണിയം വഴിമുക്ക് മുതൽ കൊച്ചുതുറ വരെയുള്ള ഒന്നര കിലോമീറ്റർ ദൂരം വരുന്ന ജനകീയ റോഡ് സഞ്ചാരയോഗ്യമാക്കണമെന്ന ആവശ്യം ശക്തമാകുന്നു. റോഡ് പൂർണമായും കുത്തിപ്പൊളിച്ച നിലയിലാണ്. ഓട നിർമിക്കുന്നതിനും പൈപ്പ് കുഴിച്ചിടുന്നതിനും നടത്തിയ ജോലികളാണ് റോഡിനെ പൂർണമായും തകർത്തതെന്ന് നാട്ടുകാർ പറയുന്നു. കാൽനട യാത്രപോലും അതുവഴി ദുസഹമാണ്. റോഡിന്‍റെ നവീകരണത്തിന് 47 ലക്ഷം രൂപ അനുവദിച്ച എംഎൽഎയ്ക്കും കരുംകുളം പഞ്ചായത്ത് പ്രസിഡന്‍റിനും അഭിനന്ദനം അറിയിച്ചുകൊണ്ടു പടംവച്ചു ഫ്ലക്സുകൾ ഉയർന്നിട്ട് ആറുമാസം പിന്നിട്ടു. 50 മീറ്റർ ദൂരം ഓട നിർമിച്ചശേഷം, വളവിൽ സ്ലാബ് ഇട്ടത് ഒരുപാട് അപകടങ്ങൾക്കും കാരണമായിട്ടുണ്ട്. ഒരു മീറ്റർ വീതിയിൽ, അര മീറ്റർ താഴ്ചയിൽ, ഒന്നര കിലോമീറ്റർ ദൂരം ചാലുവെട്ടി മണ്ണു കടത്തൽ കൂടി നടത്തിയതോടെ ജനം തീരാദുരിതത്തിൽ ആയിരിക്കുകയാണ്. രോഗികൾക്കും കുട്ടികകൾക്കും മുതിർന്നവർക്കുപോലും നടക്കാൻ പറ്റാത്ത സാഹചര്യമാണ് ഇപ്പോഴുള്ളതെന്നും നാട്ടുകാർ പറയുന്നു. പ്രദേശവാസികൾ അനുഭവിക്കുന്ന ദുരിതത്തിന് അടിയന്തരമായി പരിഹാരം കണ്ടെത്തണമെന്നും നാട്ടുകാർ ആവശ്യപ്പെട്ടു.

തൊഴിലുറപ്പ് പദ്ധതി ക്രമക്കേട്: പ്രതിഷേധ പ്രകടനം നടത്തി

നെടുമങ്ങാട്: പനവൂർ പഞ്ചായത്ത് തൊഴിലുറപ്പ് പദ്ധതിയിലെ ക്രമക്കേടിലും അഴിമതിയിലും പ്രതിഷേധിച്ചു പനവൂർ യൂത്ത് കോൺഗ്രസ് മണ്ഡലം കമ്മിറ്റിയുടെ ആഭിമുഖ്യത്തിൽ പനവൂർ ജംഗ്ഷനിൽ പ്രതിഷേധിച്ചു. യൂത്ത് കോൺഗ്രസ് മണ്ഡലം പ്രസിഡന്റ് ഡാഡുഷാ മണക്കാട്ടിൽ നേതൃത്വം കൊടുത്ത പ്രതിഷേധ പ്രകടനം യൂത്ത് കോൺഗ്രസ് നിയോജക മണ്ഡലം പ്രസിഡന്റ് യൂസുഫ് കല്ലറ ഉത്ഘാടനം ചെയ്തു. യൂത്ത് കോൺഗ്രസ്‌ നിയോജക മണ്ഡലം സെക്രട്ടറിമാരായ ഉണ്ണികൃഷ്ണൻ, അൻസൽ ആറ്റിൻപുറം,അൻവർഷ പാമ്പാടി, രാഹുൽ കല്ലിയോട് പനവൂർ മണ്ഡലം സെക്രട്ടറി മാരായ ഷാൻ കല്ലിയോട്, ജുനൈഫ് പനവൂർ, സിദ്ധീഖ്,പ്രിയദർശിനി എന്നിവർ സംസാരിച്ചു. സിപിഎം,ഡി വൈ എഫ് നേതാക്കൾ ഓവർസിയർമാരായി പ്രവർത്തിക്കുന്ന തൊഴിലുറപ്പ് വകുപ്പിലെ ക്രമക്കേട് നീതി പൂർവ്വം അന്വേഷിച്ച് നടപടി സ്വീകരിക്കണമെന്ന് യൂത്ത് കോൺഗ്രസ്‌ ആവശ്യപ്പെട്ടു.

കൊപ്പത്ത് ബസ് കാത്തിരിപ്പ് കേന്ദ്രമില്ല

വിതുര: പൊളിച്ചു നീക്കിയ ബസ് കാത്തിരിപ്പു കേന്ദ്രം പുനർ നിർമിക്കാൻ കഴിയാതെ വന്നതോടെ കൊപ്പം ജംഗ്ഷനിൽ യാത്രക്കാർ പെരുവഴിയിൽ. കടുത്ത വെയിലും മഴയും സഹിച്ചു ബസ് കാത്ത് നിൽക്കേണ്ട സ്ഥിതിയാണ് യാത്രക്കാർക്ക്. അല്ലെങ്കിൽ വ്യാപാര സ്ഥാപനങ്ങളുടെ വരാന്തയിലും മുന്നിലുമായി ബസ് കാത്ത് നിൽക്കേണ്ട സ്ഥിതിയാണ്. മഴ പെയ്താൽ പല കടകളുടെയും മുന്നിൽ ഒതുങ്ങുകയല്ലാതെ വേറെ വഴിയില്ല. റോഡ് നിർമാണവുമായി ബന്ധപ്പെട്ടാണ് ബസ് കാത്തിരിപ്പ് കേന്ദ്രം പൊളിച്ചു നീക്കിയത്. വിതുര ഗവ: യുപിഎസ്, വിച്ച്എസ്എസ്, താലൂക്ക് ആശുപത്രി, പഞ്ചായത്ത് ഓഫീസ്, വില്ലേജ് എക്സ്റ്റൻഷൻ ഓഫീസ്, മൃഗാശുപത്രി, സബ് ട്രഷറി ഉൾപ്പെടെ സമീപത്ത് ആയതിനാൽ ബസ് കാത്തിരിപ്പു കേന്ദ്രം ഇല്ലാത്തതു ഒരു ബുദ്ധിമുട്ടാണ്. വിദ്യാർഥികൾ അടക്കം ഒട്ടേറെ പേരാണ് വൈകുന്നേരങ്ങളിൽ ഇവിടെ ബസ് കാത്തു നിൽക്കുന്നത്. മഴ പെയ്തു കഴിഞ്ഞാൽ നനഞ്ഞു കുതിരാതെ ബസ് കയറാൻ പറ്റില്ലെന്നാണ് വിദ്യാർഥികളുടെ പരാതി. പാലോട്, നന്ദിയോട്, പെരിങ്ങമ്മല, ഇക്ബാൽ കോളേജ്, ചെറ്റച്ചൽ, തെന്നൂർ, ആനപ്പെട്ടി, മരുതുംമൂട്, പുളിച്ചാമല ഭാഗത്തേയ്ക്കുള്ള യാത്രക്കാർ കൊപ്പം ജംഗ്ഷനിലാണ് പ്രധാനമായും ബസ് കാത്ത് നിൽക്കുന്നത്. കൊപ്പത്ത് ബസ് കാത്തിരിപ്പ് കേന്ദ്രം നിർമിക്കാൻ 2023ൽ പഞ്ചായത്ത് ഫണ്ടിൽ നിന്നും 3.75 ലക്ഷം രൂപ അനുവദിച്ചിരുന്നു. പ്രാരംഭഘട്ട പ്രവർത്തനങ്ങൾ തുടങ്ങിയെങ്കിലും അനുയോജ്യമായ സ്ഥലം ഏറ്റെടുക്കാൻ കഴിയാതെ വന്നതോടെ പദ്ധതി നടപ്പിലായില്ല.

സിവില്‍സ്റ്റേഷനിലെ ഓണം വിപണനമേളയില്‍ തിരക്കേറുന്നു

പേരൂര്‍ക്കട: കുടപ്പനക്കുന്ന് സിവില്‍സ്റ്റേഷനിലെ ഓണം വിപണനമേളയില്‍ ജനത്തിരക്കേറുന്നു. കളക്ടറേറ്റിനു സമീപം ഒരുക്കിയിരിക്കുന്ന മേളയില്‍ നിരവധി വീട്ടുപകരണങ്ങള്‍ പ്രദര്‍ശനത്തിനുണ്ട്. കുപ്പിവളകള്‍, കുത്താമ്പുള്ളി കൈത്തറി വസ്ത്രങ്ങള്‍, രാജസ്ഥാന്‍ കരകൗശല വസ്തുക്കള്‍ എന്നിവയാണ് പ്രധാന ആകര്‍ഷണം. സൗന്ദര്യവര്‍ധക ഉത്പ ന്നങ്ങള്‍, അടുക്കള ഉപകരണങ്ങള്‍, ആഭരണങ്ങള്‍, വിവിധതരം മണ്‍പാത്രങ്ങള്‍, കുട്ടികള്‍ക്കുള്ള കളിപ്പാട്ടങ്ങള്‍ എന്നിവ മേളയില്‍ ലഭ്യമാണ്. ചെടിച്ചട്ടികള്‍, പുഷ് പിക്കുന്ന ചെടികള്‍, പച്ചക്കറി വിത്തുകള്‍ എന്നിവ ഇവിടെനിന്നു ലഭിക്കും. സ്റ്റാര്‍ ബുക്ക്സിന്‍റെ പുസ്തക മേളയും വിപണന മേളയുടെ ഭാഗമാണ്. കൂടാതെ പായസ മേളയും ഒരുക്കിയിട്ടുണ്ട്. നടുവേദന, കൈമുട്ട് വേദന, മസില്‍ വേദന തുടങ്ങിയവയ്ക്കുള്ള അക്ക്യുപ്രഷര്‍ തെറാപ്പി മെഷീന്‍ പരിചയപ്പെടുന്നതിനുള്ള സൗകര്യവുമുണ്ട്. കളക്ടറേറ്റ് സ്റ്റാഫ് വെല്‍ഫെയര്‍ ആന്‍ഡ് റിക്രിയേഷന്‍ ക്ലബിന്‍റെ ആഭിമുഖ്യത്തില്‍ സംഘടിപ്പിച്ചിരിക്കുന്ന മേള 23നു സമാപിക്കും. മേള കാണുന്നതിനും വീട്ടുപകരണങ്ങള്‍ വാങ്ങുന്നതിനും ഇന്നലെ രാവിലെ മുതലാണ് ജനത്തിരക്കു വര്‍ധിച്ചത്.

ജീവിതം കരുപിടിപ്പിക്കാൻ ഉണ്ണിയപ്പം കച്ചവടം നടത്തി റാങ്ക് ജേതാവ്

ആർ.സി. ദീപു നെടുമങ്ങാട്: ഉപജീവനത്തിനും പഠനത്തിനുമായി ഉണ്ണിയപ്പ കച്ചവടം നടത്തി ഒരു വിദ്യാർഥി. നെടുമങ്ങാട് മുക്കോലയ്ക്കൽ ഗോവിന്ദത്തിൽ എസ്. സനൽകുമാറിന്‍റെയും വി. റാണിയുടേയും ഇളയമകൻ ഗോവിന്ദ് ആണ് താൻ ഉണ്ടാക്കുന്ന ഉണ്ണിയപ്പം ചൂടാറും മുന്പ് കിലോമീറ്ററുകൾ സ്‌കൂട്ടറോടിച്ച് കടകളിലെത്തിച്ചു ഉപജീവനം നടത്തുന്നത്. ശരാശരി 300 ഉണ്ണിയപ്പമെങ്കിലും ദിവസേനെ കടകളിൽ വിറ്റഴിയും. എട്ടുമണിക്ക് മുമ്പേ ഇത്രയും ചുട്ടെടുത്ത് ബേക്കറികളിൽ എത്തിക്കും. മഴയായാലും മഞ്ഞായാലും കൃത്യസമയത്ത് മടങ്ങിയെത്തി യൂണിഫോമണിഞ്ഞു പഠിക്കാൻ പോകും. എൽപി ക്ലാസ് മുതൽ അമ്മ റാണി പരിശീലിപ്പിച്ചതാണ് ഈ ദിനചര്യ. ഇന്നിപ്പോൾ കേരള സർവകലാശാല പരീക്ഷയിൽ ജ്യോതിഷത്തിൽ ഒന്നാം റാങ്ക് കരസ്ഥമാക്കിയപ്പോഴും ഗോവിന്ദിന്‍റെ ദിനചര്യകളിൽ മാറ്റമില്ല. തിരുവനന്തപുരം സർക്കാർ സംസ്കൃത കോളേജിൽ ബി.എ സംസ്കൃതം സ്‌പെഷൽ ജ്യോതിഷ വിഭാഗത്തിലാണ് സംസ്ഥാന തലത്തിൽ ഗോവിന്ദ് ഒന്നാം റാങ്കു നേടിയത്.പിതാവ് സനൽ സെക്യൂരിറ്റി ജോലിക്കാരനായിരുന്നു. ഡ്യൂട്ടിക്കിടയിൽ കുഴഞ്ഞുവീണു ചികിത്സയിലായിട്ട് വർഷങ്ങളായി. അച്ഛനു ജോലിക്ക് പോകാൻ കഴിയാതെ വന്നതോടെ പഠനച്ചെലവിനും വീട്ടാവശ്യങ്ങൾക്കും പോംവഴിയില്ലാതെ അമ്മ റാണി തുടങ്ങിവെച്ചതാണ് ഉണ്ണിയപ്പം വില്പന.എൽപി, യുപി പഠനം നെടുമങ്ങാട് മഹാരാജ പബ്ലിക് സ്‌കൂളിലും ഹൈസ്‌കൂൾ പഠനം ദർശന ഹൈസ്‌കൂളിലും ഹയർ സെക്കൻഡറി പഠനം പൂവത്തൂർ ഗവ. സ്‌കൂളിലുമായിരുന്നു. എ പ്ലസ് വിജയത്തോടെയാണ് ഗോവിന്ദ് പഠനം പൂർത്തിയാക്കിയത്. എംഎ സംസ്കൃതം ജനറൽ പഠിച്ച് ഒരു മാതൃകാ അധ്യാപകനാകണം എന്നതാണ് ഗോവിന്ദിന്‍റെ ആഗ്രഹം. വീട്ടിൽ പത്രം വരുത്താൻ കഴിയാത്തതിനാൽ നെടുമങ്ങാട്ടെ ഒട്ടുമിക്ക ഗ്രന്ഥശാലകളിലെയും സ്ഥിരം സാന്നിധ്യം കൂടിയാണ് ഈ യുവാവ്.

ധനുവച്ചപുരം കോളജില്‍ വിദ്യാര്‍ഥിക്കുനേരെ ആക്രമണം

ആക്രമിച്ചത് എബിവിപി പ്രവർത്തകർ പാറശാല: ധനുവച്ചപുരം വിടിഎം എന്‍എസ്എസ് കോളജില്‍ വിദ്യാര്‍ഥിക്കുനേരെ എബിവിപി ആക്രമണം. കാട്ടാക്കട കൊറ്റംപള്ളി സ്വദേശിയും കോളജിലെ മൂന്നാംവര്‍ഷ ബിഎ ബിരുദവിദ്യാര്‍ഥിയുമായ ദേവജിത്തിനെയാണ് ആക്രമിച്ചത്. എബിവിപി സംഘത്തോടൊപ്പം ചേര്‍ന്നു പ്രവര്‍ത്തിക്കാത്തതിന്‍റെ വിരോധത്താലാണ് ആക്രമണം നടന്നതെന്ന് ദേവജിത്ത് പറഞ്ഞു. കോളജ് കാമ്പസിനു സമീപം ചൊവ്വാഴ്ച ഉച്ചയോടെയായിരുന്നു ആക്രമണം. എബിവിപി നേതാക്കളായ അനന്തന്‍, ശബരി, നിഖില്‍ തുടങ്ങിയവരുടെ നേത്യത്വത്തിലുള്ള 15 ഓളം വരുന്ന സംഘമാണ് ആക്രമണം നടത്തിയതെന്നു ദേവജിത്തിന്‍റെ ബന്ധുക്കള്‍ പറഞ്ഞു. ദേവജിത്തിനെ കോളജിനുള്ളില്‍വച്ച് ഒരു സംഘം ഓടിച്ചിട്ട് പിടിച്ച് കുനിച്ചു നിര്‍ത്തി മുതുകില്‍ ക്രൂരമായി ഇടിച്ചു തറയില്‍ തള്ളിയിടുകയും തലയിലും ദേഹമാസകലവും ക്രൂരമായി ചവിട്ടുകയായിരുന്നു. ഗുരുതര പരിക്കേറ്റ ദേവജിത്തിനെ നെയ്യാറ്റിന്‍കര സ്വകാര്യ ആശുപത്രിയില്‍ പ്രവേശിപ്പിച്ച് അടിയന്തിര ശസ്ത്രക്രിയക്ക് വിധേയമാക്കി. പാറശാല പോലീസില്‍ പരാതി നല്‍കി. കോളജില്‍ എബിവിപി സംഘടനയില്‍ ചേര്‍ന്നു പ്രവര്‍ത്തിക്കാത്ത വിദ്യാര്‍ഥികള്‍ക്കു നേരെ ഇത്തരം സംഘങ്ങളുടെ വലുതും ചെറുതുമായ ആക്രമണവും ഭീഷണിയും അടിക്കടി പതിവാണെന്ന് പരാതിയുണ്ട്.

ലോക ഫോട്ടോഗ്രഫി ദിനം ആചരിച്ചു

തിരുവനന്തപുരം: മാറനല്ലൂർ ക്രൈസ്റ്റ് നഗർ കോളജിൽ ലോക ഫോട്ടോഗ്രഫി ദിനവുമായി ബന്ധപെട്ടു മാധ്യമപഠന വിഭാഗം സംഘടിപ്പിച്ച "ന്യൂസ് ലെൻസ്' പരിപാടിയിൽ പ്രശസ്ത ഫോട്ടോഗ്രാഫർ ശ്രീലക്ഷ്മി ശിവദാസ് വിദ്യാർഥികളുമായി സംവദിച്ചു. കോളജ് മാനേജറും ഡയറക്ടറുമായ ഫാ. സിറിയക് മഠത്തിൽ സിഎംഐ, പ്രിൻസിപ്പൽ ഡോ. ജോളി ജേക്കബ്, മാധ്യമ പഠന വിഭാഗം മേധാവി മഞ്ജു റോസ് മാത്യൂസ് എന്നിവർ പങ്കെടുത്തു. അധ്യാപകരായ എമിൽ എസ്. ഏബ്രഹാം, ഡോ. എസ്. അഖില, വി. ബിന്ദുജ, വിദ്യാർഥികളായ എസ്.ആർ.കെ ശിവാനി, ആർ. മഹിമ എന്നിവർ നേതൃത്വം നൽകി.

പെട്രോൾ പമ്പിൽനിന്നും യുവാവിനെ തട്ടിക്കൊണ്ടുപോയ സംഭവത്തിൽ ഒരാൾ പിടിയിൽ

കാട്ടാക്കട: പെട്രോൾ പമ്പിൽ നിന്നും യുവാവിനെ തട്ടിക്കൊണ്ടുപോയി ഉപേക്ഷിച്ച സംഭവത്തിൽ ഒരാൾ പിടിയിൽ. മൈലോട്ടുമൂഴി സ്വദേശിയായ യുവാവിനെ കാറുൾപ്പെടെ തട്ടിക്കൊണ്ടുപോയ ശേഷം മണിക്കൂറുകൾക്കകം വഴിയിലുപേക്ഷിച്ചു മുങ്ങിയ സംഘത്തിലെ അഞ്ചാം പ്രതിയായ ഒറ്റശേഖരമംഗലം ചേനാട് ഇ ടക്കോണത്തു വീട്ടിൽ വിഷ് ണു (31)വാണ് പിടിയിലായത്. കാട്ടാക്കട എസ്ഐ മനോജിന്‍റെ നേതൃത്വത്തിലുള്ള പോലീസ് സംഘം മണക്കാലയുള്ള വീട്ടിൽനിന്നാണു വിഷ് ണുവിനെ പിടികൂടിയത്. ഇക്കഴിഞ്ഞ പത്താം തീയതി വൈകുന്നേരമാണ് കേസിനാസ്പദമായ സംഭവം നടന്നത്. ചായ് ക്കുളത്ത് വാടകയ്ക്ക് താമസിക്കുന്ന ബിജുവിനെ(36)യാ ണു സംഘം തട്ടിക്കൊണ്ടു പോയത്. കള്ളിക്കാട് പെട്രോൾ പമ്പിൽനിന്നും അഞ്ചംഗ സംഘം തട്ടിക്കൊണ്ടു പോയെന്ന് ബിജുവിന്‍റെ ഭാര്യ കാട്ടാക്കട പോലീസിൽ പരാതി നൽകിയതോടെയാണു സംഭവം പുറത്ത് അറിഞ്ഞത്. എന്നാൽ മണിക്കൂറുകൾക്കകം തട്ടിക്കൊണ്ടുപോയവർ ബിജുവിനെ നെടുമങ്ങാട് ഭാഗത്ത് ഉപേക്ഷിച്ചു രക്ഷപ്പെട്ടുപോയി. സംഭവം അറിഞ്ഞു കാട്ടാക്കട പോലീസ് സ്ഥലത്തെത്തി ബുജുവിനെ രാത്രിയോടെ കാട്ടാക്കടയിൽ എത്തിച്ചു.ശേഷം ഇയാളെ ആശുപത്രിയിലേക്കു മാറ്റിയിരുന്നു. കൊല്ലം സ്വദേശിക്കു മൂന്നു ലക്ഷത്തോളം രൂപ കൊടുക്കാനുണ്ടന്നും ഇതുമായി ബന്ധപ്പെട്ട തർക്കമാണ് തട്ടിക്കൊണ്ടു പോകലിനു പിന്നിലെന്നും പോലീസ് കണ്ടെത്തി. തട്ടിക്കൊണ്ടുപോയ സമയം കാറിൽവച്ച് ബിജു ഗൂഗിൾ പേ വഴി രണ്ടു ലക്ഷത്തോളം അയച്ചു നൽകിയിരുന്നു. ഇതാണ് ഇയാളെ വഴിയിൽ ഉപേക്ഷിച്ചു പോകാൻ കാരണമായത്. കള്ളിക്കാട് പെട്രോൾ പമ്പിൽ കെഎൽ- 29 ക്യു 9928-ാം നമ്പർ ഹോണ്ട സിറ്റി വെള്ള നിറത്തിലെ കാറിൽ പെട്രോളടിക്കാൻ എത്തിയതായിരുന്നു ബിജു. ഈ സമയം ഒരു സംഘം ആളുകൾ സ്ഥലത്തെത്തുകയും ബിജുവിന്‍റെ കാറിൽ കയറി പോകുന്നതുമാണ് സിസി ടിവി ദൃശ്യങ്ങളിൽ ഉണ്ടായിരുന്നത്. വീരണകാവ് മൈലോട്ടുമൂഴി ഗ്രന്ഥശാലയ്ക്ക് സമീപമാണ് ബിജുവും ഭാര്യ ഷിജി മോളും രണ്ടുമക്കളും താമസിക്കുന്നത്. അമരവിളയിൽ ഓൺലൈൻ ട്രേഡിംഗ്, എയർ ടിക്കറ്റ് ബുക്കിംഗ് എന്നിവ നടത്തുന്ന ജോലി ചെയ്യുകയാണ് ബിജു. വിസയുമായി ബന്ധപ്പെട്ട വിഷയമാണ് തട്ടിക്കൊണ്ടു പോകലിൽ എത്തിയത്.

സിവിൽ സപ്ലൈസ് ഗോഡൗണിൽനിന്നും അരി കടത്താനുള്ള ശ്രമം തൊഴിലാളികൾ തടഞ്ഞു

വെഞ്ഞാറമൂട്: സിവിൽ സപ്ലൈസ് ഗോഡൗണില്‍ നിന്നും 45 ചാക്ക് അരികടത്താനുള്ള ശ്രമം ചുമട്ടു തൊഴിലാളികളുടെ ഇടപെടലില്‍ വിഫലമായി. സിവിൽ സപ്ലൈസിന്‍റെ വെഞ്ഞാറമൂട് ചന്തക്കു സമീപമുള്ള ഗോഡൗണില്‍ നിന്നാണ് അരി കടത്താനുള്ള ശ്രമമുണ്ടായത്. ഇന്നലെ രാവിലെ ഗോഡൗണില്‍ ഒരു ലോഡ് അരി വന്നിരുന്നു. അത് ഇറക്കിയശേഷം സപ്ലൈകോയുടെ തന്നെ വെഞ്ഞാറമൂട് ജംഗ്ഷനിലുള്ള ഗോഡൗണിലേക്കു തൊഴിലാളികള്‍ പോയി. തുടർന്നു 10.30ഓടെ മടങ്ങിയെത്തുമ്പോല്‍ ഗോഡൗണിന്‍റെ ഉള്ളില്‍നിന്നും ഒരു പിക്കപ്പ് വാനില്‍ അരിയും കയറ്റി പുറത്തിറങ്ങി വരുന്നതു കാണാനിടയായി. ബുധനാഴ്ച റേഷന്‍ കടകളിലേക്കുള്ള അരി വിതരണം ഇല്ലെന്നു തൊഴിലാളികള്‍ക്ക് അറിയാമായിരുന്നതു കൊണ്ടുതന്നെ സംശയം തോന്നി അവര്‍ വാഹനം തടഞ്ഞിടുകയും പോലീസില്‍ അറിയിക്കുകയും ചെയ്തു. തുടര്‍ന്നു വെഞ്ഞാറമൂട് പോലീസ് എസ്എച്ച്ഒ ആസാദ് അബ്ദുൾ കലാമിന്‍റെ നേത്വത്വത്തിലുള്ള പോലീസ് സംഘം എത്തുകയും സപ്ലൈകോ അധികൃതരെ വിവരമറിയിക്കുകയും ചെയ്തു. ഇതിന്‍റെ അടിസ്ഥാനത്തില്‍ താലൂക്ക് സപ്ലൈ ഓഫീസര്‍ സീമ, നെടുമങ്ങാട് സബ്കോ ജൂനിയര്‍ മാനേജര്‍ ടി.എ. അനിത കുമാരി, റേഷനിംഗ് ഓഫീസര്‍മാരായ ബിന്ദു, ദീപ്തി എന്നിവരടങ്ങുന്ന സംഘം എത്തുകയും ചെയ്തു. തുടര്‍ന്നു നടന്ന പരിശോധനയിലാണ് കുത്തരി, പച്ചരി, പുഴുങ്ങല്ലരി എന്നിവയടങ്ങുന്ന 45 ചാക്ക് അരി വാഹനത്തിലുണ്ടെന്നു കണ്ടെത്തിയത്. തുടര്‍ന്ന് വെഞ്ഞാറമൂട് പോലീസില്‍ പരാതി നൽകി. ഇതിന്‍റെ അടിസ്ഥാനത്തില്‍ പോലീസ് കേസെടുക്കുകയും അരിയുൾപ്പെടെ വാഹനം കസ്റ്റഡിയിലെടുക്കുകയും ചെയ്തു.

കവർച്ച: മോഷ്ടാവ് ജയിലുമായി ബന്ധമുള്ള ആളെന്നു പോലീസ്

പേരൂര്‍ക്കട: പൂജപ്പുരയിലെ കഫറ്റേറിയയില്‍നിന്നു പണം കവര്‍ന്ന സംഭവത്തില്‍ അന്വേഷണം നിര്‍ണായക ഘട്ടത്തിലെന്നു പോലീസ്. സെന്‍ട്രല്‍ ജയിലുമായി അടുത്ത ബന്ധമുള്ളയാളാണ് മോഷ്ടാവെന്നു സൂചന ലഭിച്ചു. ദിവസങ്ങള്‍ക്കുമുമ്പ് പൂജപ്പുര-ചാടിയറ റോഡില്‍ പ്രവര്‍ത്തിക്കുന്ന ജയില്‍വകുപ്പിന്‍റെ തന്നെ കഫറ്റേറിയയില്‍ നിന്നാണ് നാലുലക്ഷം രൂപ മോഷണം പോയത്. ഓഫീസ് റൂം കുത്തിത്തുറന്ന് മോഷണം നടത്തിയതോടെയാണ് മോഷ്ടാവിന്‍റെ വിരലടയാളങ്ങള്‍ അന്വേഷണസംഘത്തിന് ലഭിക്കുന്നത്. വളരെ വിദഗ്ധമായി സിസിടിവി കാമറയുടെ ദിശമാറ്റിയശേഷമാണു മോഷണം നടത്തിയിരിക്കുന്നത്. അതുകൊണ്ടുതന്നെ മതില്‍ച്ചാടിയാണു മോഷ്ടാവ് എത്തിയതെന്നാണ് പോലീസ് കരുതുന്നത്. കഫറ്റേറിയയിലെ ചില്ലുകൂട് തകര്‍ത്താണ് താക്കോല്‍ കൈക്കലാക്കി ഓഫീസ് റൂം തുറന്നിട്ടുള്ളത്. ജയിലില്‍നിന്നു ശിക്ഷകഴിഞ്ഞ് അടുത്തിടെ പുറത്തിറങ്ങിയവരെക്കുറിച്ചും ജയില്‍ജീവനക്കാരില്‍ ചിലരെക്കുറിച്ചും പോലീസ് തുടക്കത്തില്‍ അന്വേഷിച്ചിരുന്നു. കഫറ്റേറിയയുടെ പ്രവര്‍ത്തനങ്ങളെക്കുറിച്ചു വ്യക്തമായി അറിയാവുന്നയാളാണ് മോഷ്ടാവെന്ന് അന്നുതന്നെ പോലീസ് കണ്ടെത്തുകയുണ്ടായി. മോഷ്ടാവിനെക്കുറിച്ചു വ്യക്തമായ സൂചന ലഭിച്ചിട്ടുണ്ടെന്നും അറസ്റ്റ് ഉടന്‍ ഉണ്ടാകുമെന്നും പൂജപ്പുര സിഐ അറിയിച്ചു.

സ്വപ്നവീട് കൈമാറി എസ്‌സിടി കോളജ് എൻഎസ്എസ് യൂണിറ്റ്

നേമം: ശ്രീ ചിത്തിര തിരുനാൾ എൻജി കോളജിലെ എൻഎസ്എസ് യൂണിറ്റും ചിറ്റിലപ്പിള്ളി ഫൗണ്ടേഷനുമായി ചേർന്നു നിർമി ച്ച പുതിയ വീട് ബൈജുവിനും കുടുംബത്തിനും കൈമാറി. ഇവർക്ക് മലയിൻകീഴിൽ ഉണ്ടായിരുന്ന മൂന്നു സെന്‍റ് സ്ഥലത്താണ് വീട് നിർമിച്ചു നൽകിയത്. മന്ത്രി കെ.ബി. ഗണേഷ്കുമാർ താക്കോൽ കൈമാറി. പ്രിൻസിപ്പൽ ഡോ. സി. സതീഷ് കുമാർ, എൻഎസ്എസ് പ്രോഗ്രാം ഓഫീസർ കെ. ബാജി, വോളന്‍റിയർമാരായ അഭയ്, ഗംഗ, ഷാഹിർ, അന്നു എന്നിവർ പങ്കെടുത്തു. കേരള ശാസ്ത്ര സാങ്കേതിക സർവകലാശാല, കൊച്ചൗസേപ്പ് ചിറ്റിലപ്പള്ളി ഫൗണ്ടേഷനുമായി ചേർന്നു നടപ്പിലാക്കുന്ന സ്വപ്നക്കൂട് പദ്ധതിയുടെ ഭാഗമായാണ് വീട് നിർമിച്ചു നൽകിയത്. എട്ടു ലക്ഷം രൂപയാണ് പദ്ധതി ചെലവ്. നാലുലക്ഷം രൂപ ചിറ്റിലപ്പിള്ളി ഫൗണ്ടേഷൻ വിഹിതമായി നൽകി. ബാക്കി തുക വിദ്യാർഥികൾ, സ്ക്രാപ്പ് കളക്്ഷൻ, ബിരിയാണി ചലഞ്ച് എന്നിവയിലൂടെ സമാഹരിച്ച് നൽകുകയായിരുന്നു. പദ്ധതിയുടെ ഭാഗമായി കോളജ് നിർമിച്ചു നൽകിയ രണ്ടാമത്തെ വീടാണിത്.

700 എംഎം പ്രിമോ പൈപ്പ് അറ്റകുറ്റപ്പണി പൂർത്തിയായി: ജലവിതരണം പുനഃരാരംഭിച്ചു

പേരൂര്‍ക്കട: നഗരത്തില്‍ കുടിവെള്ളം വിതരണം ചെയ്യുന്ന 700 എംഎം പ്രിമോ പൈപ്പിന്‍റെ അറ്റകുറ്റപ്പണി വാട്ടര്‍ അഥോറിറ്റി പൂര്‍ത്തീകരിച്ചു. ഇന്നലെ വൈകുന്നേരം നാലോടെയാണ് അറ്റകുറ്റപ്പണി പൂര്‍ത്തിയായത്. പിടിപി നഗറില്‍നിന്നു വെള്ളയമ്പലം ഒബ്‌സര്‍വേറ്ററിയിലേക്കു ജലമെത്തിക്കുന്നതാണ് പ്രിമോ പൈപ്പ്. കിലോമീറ്ററുകള്‍ നീളുന്ന പൈപ്പിന്‍റെ വെള്ളയമ്പലം ജംഗ്ഷനിലെ ഭാഗത്തു ചോര്‍ച്ച കണ്ടെത്തിയതോടെയാണ് അടിയന്തര അറ്റകുറ്റപ്പണി വേണ്ടിവന്നത്. ജെസിബി ഉപയോഗിച്ച് കുഴിച്ചാണ് ഇന്നലെ പുലര്‍ച്ചെ മുതല്‍ പണി ആരംഭിച്ചത്. പുതിയ പ്രിമോ പൈപ്പ് വിളക്കിച്ചേര്‍ക്കുകയായിരുന്നു. പമ്പിംഗ് നിര്‍ത്തിവച്ചതുമൂലം ശാസ്തമംഗലം, പൈപ്പിന്‍മൂട്, വെള്ളയമ്പലം, ആല്‍ത്തറ, വഴുതക്കാട്, തൈക്കാട്, മേട്ടുക്കട, വലിയശാല, കൊച്ചാര്‍ റോഡ്, ജഗതി, ജവഹര്‍നഗര്‍, നന്തന്‍കോട്, കുന്നുകുഴി ഭാഗങ്ങളില്‍ ചില സ്ഥലങ്ങളില്‍ പൂര്‍ണ്ണമായും മറ്റുചില സ്ഥലങ്ങളില്‍ ഭാഗികമായും ജലവിതരണം തടസപ്പെട്ടു. ആവശ്യപ്പെട്ട സ്ഥലങ്ങളില്‍ വാട്ടര്‍ അഥോറിറ്റി ടാങ്കര്‍ലോറികളില്‍ ജലമെത്തിക്കുകയുണ്ടായി. വ്യാഴാഴ്ച രാവിലെ 10 മണിയോടുകൂടി ഉയര്‍ന്ന സ്ഥലങ്ങളില്‍ ഉള്‍പ്പെടെ ജലവിതരണം സാധാരണനിലയിലാകുമെന്നു വാട്ടര്‍ അഥോറിറ്റി സൂപ്രണ്ടിംഗ് എന്‍ജിനീയര്‍ അറിയിച്ചു.

തീരദേശ ബൈപ്പാസ് നിർമാണം : നഷ്ടപരിഹാരം: പൊതുജന അഭിപ്രായംതേടി അധികൃതർ

വിഴിഞ്ഞം: തീരദേശ ബൈപ്പാസ് നിർമാണവുമായി ബന്ധപ്പെട്ട് സ്ഥാപന ഉടമകൾക്കും തൊഴിലാളികൾക്കുമുള്ള നഷ്ടപരിഹാരത്തിനായി പൊതുജനാഭിപ്രായം തേടി അധികൃതർ. ഇന്നലെ വിഴിഞ്ഞം അർച്ചന ഓഡിറ്റോറിയത്തിൽ അധികൃതർ വിളിച്ചു ചേർത്ത യോഗത്തിൽ നിരവധി പേർ പങ്കെടുത്തു. അധികൃതർ പ്രഖ്യാപിച്ച നഷ്ടപരിഹാരത്തിൽ ഭിന്നാഭിപ്രായമുണ്ടായതായി സ്ഥാപന ഉടമകൾ പറയുന്നു. കാസർകോഡ് മുതൽ സംസ്ഥാന അതിർത്തിയായ പൊഴിയൂർ കൊല്ലംകോടു വരെ നീളുന്ന തീരദേശ ബൈപ്പാസിനായി അളവ് കഴിഞ്ഞ് പിങ്ക് കുറ്റികൾ സ്ഥാപിച്ചെങ്കിലും ഭൂമി ഏറ്റെടുക്കലിനു നടപടികൾ ആകുന്നതിനു മുൻപാണ് ആദ്യപടിയായി റോഡു കടന്നുപോകുന്ന മേഖലയിലെ കടകൾ നടത്തുന്നവരുടെയും തൊഴിലാളികളുടെയും അഭിപ്രായരൂപീകരണം നടന്നത്. സ്ഥാപനം നടത്തുന്നവർക്ക് ഒരു ലക്ഷം മുതൽ രണ്ടര ലക്ഷം വരെയും തൊഴിൽ നഷ്ടപ്പെടുന്ന തൊഴിലാളികൾക്ക് മുപ്പത്താറായിരം രൂപയുമാണ് അധികൃതർ മുന്നോട്ട് വച്ച നഷ്ടപരിഹാരമെന്നറിയുന്നു. എന്നാൽ ഭീമമായ അഡ്വാൻസും നൽകി കൂടുതൽ മോഡി പിടിപ്പിച്ചും നടത്തുന്ന സ്ഥാപനങ്ങൾക്കും പതിറ്റാണ്ടുകളായി പണിയെടുക്കുന്ന തൊഴിലാളികൾക്കും നിലവിലെ പാക്കേജ് വൻ നഷ്ടമാന്നെന്നും മേഖലയിലുള്ളവർ പറയുന്നു. കോവളം മുതൽ കൊല്ലംകോട് വരെയുള്ള അവസാന ഘട്ടത്തിൽപ്പെടുന്നവരെയാണ് ഇന്നലെ വിളിച്ച് ചേർത്തത്. പൊഴിയൂർ, പൂവാർ, കരിംകുളം, കോട്ടുകാൽ, വിഴിഞ്ഞം വില്ലേജുകളിൽ കൂടി കടന്നുപോകുന്ന റോഡിൽ ഏറ്റവും കൂടുതൽ സ്ഥാനങ്ങൾ നഷ്ടമാകുന്നത് കോവളം വരെ അതിർത്തിയുള്ള വിഴിഞ്ഞം വില്ലേജിലാണ്. രണ്ടാമത് കോട്ടുകാലിലും, പൂവാർ, പൊഴിയൂർ, കരിംകുളം വില്ലേജുകളിൽ പൂർണമായും കടൽക്കര വഴിയാണ് ബൈപ്പാസിന്‍റെ സ്ഥാനമെങ്കിലും റോഡ് കടന്നു പോകുന്ന ഭാഗത്തെ പുറംപോക്ക് ഭൂമിയിൽ വർഷങ്ങളായി താമസിക്കുന്ന കുടുംബങ്ങളുണ്ട്. ഇവരുടെ കാര്യത്തിലും കൃത്യമായ തീരുമാനം ഉണ്ടായിട്ടില്ല. കൂടാതെ നഷ്ടമാകുന്ന വ്യപാര സ്ഥാപനകെട്ടിട ഉടമകളുടെയും ഭൂഉടമകളുടെയും വീടു നഷ്ടപ്പെടുന്നവരുടെ കാര്യത്തിലും അന്തിമ തീരുമാനമുണ്ടാകണം. കല്ലിട്ട റോഡ് വികസനം നടന്നില്ലെങ്കിലും കോടികൾ മുടക്കിയുള്ള വിഴിഞ്ഞം - കളിയിക്കാവിള തീരദേശ റോഡിലെ ടാറിംഗ് തുടരുന്നു. ആറു മാസം മുൻപ് ഒരു ലയർ ടാറിംഗ് നടത്തിയശേഷം നിർത്തിവച്ച രണ്ടാംഘട്ടത്തിന്‍റെ പണികളാണ് ദേശീയപാതാ അധികൃതർ കഴിഞ്ഞ ദിവസം മുതൽ പുനരാരംഭിച്ചത്. പ്രതികൂലമായ കാലാവസ്ഥയും ഫണ്ടിന്‍റെ ലഭ്യതക്കുറവുമാണ് ടാറിംഗിനെ ബാധിച്ചതെന്നു പറയപ്പെടുന്നു. ടാറിംഗ് നടക്കുന്ന റോഡിന്‍റെ വളവുകളും തിരിവുകളും മാറ്റി വീതി കൂട്ടിയാണ് തീരദേശ ബൈപ്പാസാക്കി മാറ്റുന്നത്.

മുക്കുപണ്ടം പണയംവച്ചു പണം തട്ടുന്ന അഞ്ചംഗ സംഘം അറസ്റ്റില്‍

മുഖ്യ സൂത്രധാരൻ പിടിയിലായത് തൃശൂരിൽനിന്ന് പേരൂര്‍ക്കട: മുക്കുപണ്ടം പണയംവച്ച് പണംതട്ടുന്ന അഞ്ചംഗ സംഘത്തെ പേരൂര്‍ക്കട പോലീസ് അറസ്റ്റുചെയ്തു. കൊല്ലം മുണ്ടോലില്‍താഴത്തില്‍ ചാരിക്കോട് കോട്ടാംകര സ്വദേശി അഖില്‍ ക്ലീറ്റസ് (30), പേരൂര്‍ക്കട വഴയില എം.ജി. നഗര്‍ 57 എച്ച് ധന്യ ഹൗസില്‍ ജെ.ആര്‍. പ്രതീഷ്‌കുമാര്‍ (57), പത്തനംതിട്ട തണ്ണിത്തോട് തേക്കുതോട് ആശാരിപ്പറമ്പില്‍ സണ്ണി (69), ഇയാളുടെ മകന്‍ സ്മിജു സണ്ണി (40), കുടപ്പനക്കുന്ന് ചെട്ടിവിളാകം എന്‍സിസി റോഡ് ബിഎന്‍ആര്‍എ 73 ഷിനില ഭവനില്‍ ജിത്തു എന്ന ഷെജിന്‍ (30) എന്നിവരാണ് പിടിയിലായത്. ഈ വര്‍ഷം ജനുവരി മാസത്തിലാണ് കേസിനാസ്പദമായ സംഭവം. എറണാകുളം കേന്ദ്രമായുള്ള സംഘങ്ങളുടെ സഹായത്തോടെയാണ് മുക്കുപണ്ടം ശേഖരിച്ചശേഷം അതില്‍ സ്വര്‍ണംപൂശി പ്രതികള്‍ തട്ടിപ്പു നടത്തിയത്. നിരവധി ക്രിമിനല്‍ കേസുകളും ഒരു കൊലപാതകക്കേസുമുള്ള അഖില്‍ ക്ലീറ്റസാണു സംഭവത്തിന്‍റെ സൂത്രധാരന്‍. ഇയാള്‍ തിരുവനന്തപുരത്തു താമസിക്കുമ്പോഴാണ് മറ്റുള്ള പ്രതികളുമായി പരിചയപ്പെടുന്നത്. വഴയില, മണ്ണാമ്മൂല എന്നിവിടങ്ങളിലെ സ്വകാര്യ പണമിടപാടു സ്ഥാപനങ്ങളിലാണ് നിരവധി മുക്കുപണ്ടങ്ങളില്‍ സ്വര്‍ണംപൂശി പണയംവച്ച് പണം തട്ടിയത്. ആറുമാസത്തിനുശേഷം പ്രസ്തുത സ്ഥാപനങ്ങളില്‍ ഇവര്‍ എത്തുകയും ആഭരണങ്ങള്‍ വില്‍പ്പന നടത്തുകയും ചെയ്തു. പണമിടപാടു സ്ഥാപന ഉടമകള്‍ ചാലയിലെ ഒരു ജ്വല്ലറിയില്‍ വില്‍പ്പന നടത്താന്‍ എത്തിയപ്പോള്‍ അവര്‍ നടത്തിയ വിശദമായ പരിശോധനയിലാണ് മുക്കുപണ്ടങ്ങളാണെന്നു തെളിഞ്ഞത്. പേരൂര്‍ക്കട സ്റ്റേഷനില്‍ 2025 ഓഗസ്റ്റ് 14നാണ് ഇതുസംബന്ധിച്ച പരാതി ലഭിക്കുന്നത്. സണ്ണി, മകന്‍ സ്മിജു സണ്ണി എന്നിവരാണ് വ്യാജസ്വര്‍ണം മറ്റുള്ളവര്‍ക്ക് എത്തിച്ചു നല്‍കിയത്. സംസ്ഥാനം മുഴുവന്‍ വ്യാജസ്വര്‍ണവിതരണം നടത്തുന്ന കണ്ണിയാണ് അഖില്‍ ക്ലീറ്റസ്. നിരവധി ക്രിമിനല്‍ക്കേസുകളും തട്ടിപ്പുകേസുകളും അഖിലിനെതിരേയുണ്ട്. പ്രതികളില്‍ സൂത്രധാരനെ തൃശൂര്‍ ചാലക്കുടിയില്‍നിന്നും മറ്റൊരാളെ കൊല്ലം കിളികൊല്ലൂരില്‍നിന്നും മറ്റുള്ളവരെ പേരൂര്‍ക്കട ഭാഗത്തുനിന്നുമാണ് പോലീസ് പിടികൂടിയത്. സംഭവത്തില്‍ വന്‍ റാക്കറ്റുതന്നെയുണ്ടെന്നും അന്വേഷണം തുടര്‍ന്നു വരുന്നുണ്ടെന്നും പേരൂര്‍ക്കട പോലീസ് അറിയിച്ചു. ഡെപ്യൂട്ടി പോലീസ് കമ്മീഷണര്‍ ഫറാഷിന്‍റെ നിര്‍ദ്ദേശപ്രകാരം കന്‍റോൺമെന്‍റ് എസി സ്റ്റ്യുവര്‍ട്ട് കീലര്‍, പേരൂര്‍ക്കട സിഐ ഉമേഷ്, എസ്ഐ ജഗ്‌മോഹന്‍ ദത്തന്‍, ഗ്രേഡ് എസ്ഐ മനോജ്, എസ്‌സിപിഒമാരായ അനീഷ്, അജിത്ത്, സിപിഒമാരായ അരുണ്‍, രഞ്ജിത്ത് എന്നിവര്‍ അന്വേഷണസംഘത്തില്‍ ഉണ്ടായിരുന്നു. പ്രതികളെ കോടതി റിമാന്‍ഡ് ചെയ്തു.

കരമനയാറ്റിൽ കാണാതായ യുവതിയുടെ മൃതദേഹം കണ്ടെത്തി

പേയാട്: പേയാട് കാവടിക്കടവ് അരുവിപ്പുറം ആറ്റിൻകടവ് കുളിക്കടവിൽ കാണാതായ യുവതിയുടെ മൃതദേഹം കണ്ടെത്തി. പേയാട് ചീലപ്പാറ കെഎസ്ഇബി ഓഫീസിനു സമീപം അതിഥി ഹൗസിൽ ഷാജി (54)യുടെ മൃതദേഹമാണ് കാട്ടാക്കട അഗ്‌നി രക്ഷാ സേനയും സ്‌കൂബ സംഘവും ചേർന്ന് കണ്ടെത്തിയത്. ചൊവ്വാഴ്ചയാണ് ഷാജിയെ വീട്ടിൽ നിന്നും കാണാതാകുന്നത്. തുടർന്ന് വീട്ടുകാരുടെ പരാതിയിൽ പോലീസ് ഇവരുടെ മൊബൈൽ കേന്ദ്രീകരിച്ച് നടത്തിയ അന്വേഷത്തിനൊടുവിലാണ് പേയാട് അരുവിപ്പുറത്തെ കുളിക്കടവിനു സമീപം മൊബൈലും ചെരിപ്പുകളും കവറും കണ്ടെത്തുന്നത്. തുറന്നു അഗ്‌നി രക്ഷാസേന ഇവിടെ പരിശോധന നടത്തിയെങ്കിലും കണ്ടെത്താൻ കഴിഞ്ഞിരുന്നില്ല. പ്രതികൂല സാഹചര്യമായിരുന്നു തിരച്ചിലിന് തടസം. ഇന്നലെ രാവിലെ തിരുവനന്തപുരത്തു നിന്നും സ്‌കൂമ്പാ ടീം എത്തി നടത്തിയ തെരച്ചിലിലാണ് മൃതദേഹം കണ്ടെത്തിയത്. ഒഴുക്കിൽപ്പെട്ട് അപകടത്തിൽ പെടുന്ന നിരവധി സംഭവങ്ങൾ ഇവിടെ ഉണ്ടായിട്ടുണ്ട് .

പാളയത്തെ മോഷണം: രണ്ടുപേർ പിടിയിൽ

പേരൂർക്കട: പാളയം സാഫല്യം കോംപ്ലക്സിലെ കടകൾ കുത്തിപ്പൊളിച്ച് മോഷണം നടത്തിയ സംഭവത്തിൽ പ്രായപൂർത്തിയാകാത്ത രണ്ടുപേരെ കന്‍റോൺമെന്‍റ് പോലീസ് പിടികൂടി. വഞ്ചിയൂർ സ്വദേശികളായ 15ഉം 17ഉം വയസു പ്രായമുള്ള ആൺകുട്ടികളാണ് പിടിയിലായത്. ശനിയാഴ്ച പുലർച്ചെയാണ് കേസിന് ആസ്പദമായ സംഭവം. കോംപ്ലക്സിനു പിറകുവശത്തുള്ള മെൻസ് വെയർ ഷോപ്പുകളിൽനിന്ന് വസ്ത്രങ്ങൾ, ഷൂസ്, സൺഗ്ലാസുകൾ തുടങ്ങി 80,000 രൂപ വില വരുന്ന സാധനസാമഗ്രികളാണ് ഇവർ കവർന്നത്. ഓരോ കടയുടെയും പൂട്ട് തല്ലിത്തകർത്തശേഷം ഷട്ടർ ഉയർത്തിയാണ് ഇവർ അകത്തുകടന്നത്. സമീപത്തെ മറ്റൊരു കടയുടെ പൂട്ടു പൊളിക്കാൻ ശ്രമവും നടത്തിയിരുന്നു. കോംപ്ലക്സിൽ സ്ഥാപിച്ചിരുന്ന സിസിടിവി ദൃശ്യങ്ങളാണ് മോഷ്ടാക്കളെ പിടികൂടാൻ സഹായകമായത്. മോഷണ വസ്തുക്കൾ ഇവരിൽനിന്നു കണ്ടെടുത്തു. കസ്റ്റഡിയിലെടുത്ത മോഷ്ടാക്കളെ ജുവനൈൽ കോടതിയിൽ ഹാജരാക്കി.

സിപിഐ സമ്മേളന പതാകദിനം

നെടുമങ്ങാട് : പി. കൃഷ്ണപിള്ള ദിനമായ മായിരുന്ന ഇന്നലെ അരുവിക്കര മണ്ഡലത്തിലെ ആര്യനാട് സിപിഐ അരുവിക്കര മണ്ഡലം സെക്രട്ടറി എം.എസ്. റഷീദ് പി. കൃഷ്ണപിള്ളയുടെ ഫോട്ടോ അനാവരണം ചെയ്തു പതാകദിനം ആചരിച്ചു. അരുവിക്കര മണ്ഡലത്തിലെ വിവിധ കേന്ദ്രങ്ങളിൽ ജില്ലാ കൗൺസിൽ അംഗം ഈഞ്ചപ്പുലി സന്തു, എഐവൈഎഫ് ജില്ലാ പ്രസിഡന്‍റ് കണ്ണൻ എസ് ലാൽ, ഉഴമലയ്ക്കൽ ശേഖരൻ, വെള്ളനാട് സതീശൻ, പൂവച്ചൽ ഷാഹുൽ, ജി രാജീവ്, കളത്തറ മധു, ജി രാമചന്ദ്രൻ, വിതുര പഞ്ചായത്ത് പ്രസിഡന്‍റ് മഞ്ജു ഷാജി ആനന്ദ്, അഡ്വ. എസ്. റഹീം, ജില്ലാ പഞ്ചായത്തംഗം അഡ്വ. വി. രാധിക, പൂവച്ചൽ ഷാജി, ഷിജു സുധാകർ, ഉഴമലയ്ക്കൽ സുനിൽ, കിടങ്ങുമ്മൽ മധു, ഷമീം പുളിമൂട്, മധു സി. വാര്യർ, വിനോദ് കടയറ, ഒ. ശ്രീകുമാരി, രേണുക രവി തുടങ്ങിയവരുടെ നേതൃത്വത്തി ൽ പതാകാദിനം ആചരിച്ചു.

വസ്തു തട്ടിപ്പ്: അനില്‍ തമ്പി നേപ്പാളിലേക്കോ ഭൂട്ടാനിലേക്കോ കടന്നിരിക്കാമെന്നു പോലീസ്

ഡല്‍ഹിയില്‍ നിന്നു മുങ്ങി പേരൂര്‍ക്കട: ജവഹര്‍ നഗറിലെ വസ്തുതട്ടിപ്പ് കേസിലെ വമ്പന്‍ സ്രാവ് അനില്‍ തമ്പി ഡല്‍ഹിയില്‍ നിന്ന് മുങ്ങിയശേഷം നേപ്പാളിലേക്കോ ഭൂട്ടാനിലേക്കോ കടന്നേക്കാമെന്ന നിഗമനത്തില്‍ പോലീസ്. ലുക്ക് ഔട്ട് നോട്ടീസ് പുറപ്പെടുവിച്ചിരിക്കുന്നതിനാല്‍ വിമാനത്താവളങ്ങള്‍ വഴി ഇയാള്‍ക്ക് ഇന്ത്യവിടാന്‍ സാധിക്കില്ല. എന്നാല്‍ തിരിച്ചറിയല്‍ രേഖ മാത്രം മതി നേപ്പാളിലേക്കോ ഭൂട്ടാനിലേക്കോ പോകാന്‍. അതു തടയിടാന്‍ സാധിക്കാത്തതിനാല്‍ അനില്‍ തമ്പിയെ ഇനി പിടികൂടാന്‍ സാധിക്കുമോയെന്ന കാര്യത്തില്‍ പോലീസിനു തന്നെ യാതൊരു ഉറപ്പുമില്ല. അനില്‍ തമ്പിയുടെ ജവഹര്‍ നഗറിലെ ഫ്ളാറ്റില്‍ ഇദ്ദേഹത്തിന്റെ ഭാര്യ മാത്രമാണ് താമസിച്ചുവരുന്നത്. മകള്‍ ജര്‍മ്മനിയിലാണ്. അതുകൊണ്ടുതന്നെ അനില്‍ തമ്പി ജര്‍മ്മനിയിലേക്കു കടക്കാനുള്ള സാദ്ധ്യത പോലീസ് തള്ളിക്കളയുന്നില്ല. ഏതായാലും അനില്‍ തമ്പി ഇന്ത്യയില്‍ നിന്നു മുങ്ങിയെന്ന് ഏറെക്കുറെ ഉറപ്പിച്ച നിലയിലാണ് പോലീസ്. ഏറെ രാഷ്ട്രീയ ബന്ധങ്ങളും ഉന്നതങ്ങളിലെ ബന്ധങ്ങളും വ്യക്തിബന്ധങ്ങളും സൂക്ഷിച്ചുവരുന്ന അനില്‍ തമ്പിയെ പിടികൂടാതെ വസ് തുതട്ടിപ്പ് കേസ് ഇനി മുന്നോട്ടുകൊണ്ടുപോകാന്‍ സാധിക്കില്ല.

രാഷ്ട്രപതിക്കും പ്രധാനമന്ത്രിക്കും ഓണക്കോടി നെയ്ത് പെരിങ്ങമ്മല ഗ്രാമം

നേമം: ഓണത്തിന് പ്രധാനമന്ത്രിക്കും രാഷ്ട്രപതിക്കും ഓണക്കോടി ഒരുങ്ങുന്നത് കല്ലിയൂര്‍ പഞ്ചായത്തിലെ കൈത്തറിയുടെ ഈറ്റില്ലമായ പെരിങ്ങമ്മല ഗ്രാമത്തില്‍ നിന്നും. രാഷ്ട്രപതിക്ക് ബാലരാമപുരം കൈത്തറിയുടെ റോയല്‍സാരിയും പ്രധാനമന്ത്രിക്ക് പൊന്നാടയുമാണ് തയാറാക്കുന്നത്. പ്രധാനമന്ത്രിക്കും കേന്ദ്രമന്ത്രിമാര്‍ക്കും ഉള്‍പ്പെടെ ബാലരാമപുരം കൈത്തറിയിലെ ഓണക്കോടിയുമുണ്ട്. സംസ്ഥാന കൈത്തറി ഡയറക്ടറേറ്റ് ഹാന്‍റക്സിനു നല്‍കിയ ഓര്‍ഡര്‍ പ്രകാരമാണ് കല്ലിയൂര്‍ പെരിങ്ങമ്മല കേന്ദ്രമായ ജയ്കിഷ് ഹാന്‍റ്‌ലും വീവേഴ്‌സ് കോ-ഓപ്പറേറ്റീവ് സൊസൈറ്റിക്ക് ഓര്‍ഡര്‍ ലഭിച്ചത്. നാലാം വര്‍ഷമാണ് പ്രധാനമന്ത്രി ഉള്‍പ്പെട്ട കേന്ദ്ര മന്ത്രിമാര്‍ക്ക് കൈത്തറി വസ്ത്രങ്ങള്‍ നെയ്തു നല്‍കുന്നതെന്നു സൊസൈറ്റി സെക്രട്ടറി വി.സന്തോഷ് പറഞ്ഞു. രാഷ്ട്രപതി ദ്രൗപതി മുര്‍മുവിനു സ്വര്‍ണ്ണകസവില്‍ ടിഷ്യു മെറ്റീരിയലിലാണ് സാരി തയാറായത്. 15 റോയല്‍സാരികള്‍, 110 പൊന്നാടകള്‍, 15 റോയല്‍ പൊന്നാടകള്‍ എന്നിവയാണ് കൈത്തറി കലാകാരന്മാര്‍ നെയ്‌തെടുത്തത്. 15 കൈത്തറി നെയ്ത്തുകാര്‍ 23 ദിവസം കൊണ്ടാണ് ഇവ നെയ്‌തെടുത്തത്. നെയ്‌തെടുത്ത വസ്ത്രങ്ങള്‍ നാളെ ഹാന്‍റക്സിന് കൈമാറും. ഇവിടെ നിന്നും സംസ്ഥാനത്തെ വിവിധ കലാശില്പങ്ങളോടൊപ്പമാണ് ഇവ കൈമാറുന്നത്. പ്രധാനമന്ത്രിക്കുള്ള പൊന്നാട ടിഷ്യു മെറ്റീരിയലില്‍ സ്വര്‍ണ കസവ് കള്ളികളായി നെയ്തതാണ്. അമിത് ഷാ ഉള്‍പ്പെടെയുള്ളവര്‍ക്ക് സ്വര്‍ണവും വെള്ളിയും കസവുകള്‍ ഇടകലര്‍ത്തി കള്ളികളായി നെയ്തതാണ്.

നെടുമങ്ങാട് ഗവ.ബോയ്സ് ഹൈസ്കൂളിൽ വോട്ടെടുപ്പ്

നെടുമങ്ങാട്: ഐക്യരാഷ്ട്രസഭ പ്രഖ്യാപിച്ച അന്താരാഷ്ട്ര ക്വാണ്ടം ശാസ്ത്ര സാങ്കേതിക ആശയങ്ങൾ വിദ്യാർഥികളിലെത്തിക്കുന്നതിനു സ്കൂൾ പാർലമെന്‍റ് തെരഞ്ഞെടുപ്പിനെ വേദിയാക്കി നെടുമങ്ങാട് ഗവ. ബോയ്സ് ഹൈസ്കൂൾ. 'വോട്ട് ഫോർ ദ ഫ്യൂച്ചർ - പവേർഡ് ബൈ ക്വാണ്ടം ഐഡിയാസ്" എന്ന ടാഗ്‌ലൈനോടെ നടന്ന തെരഞ്ഞെടുപ്പ് പ്രചാരണത്തിൽ സൂപ്പർപൊസിഷൻ ക്യാറ്റ്, ക്യുബിറ്റ് ക്യൂബ്, ക്വാണ്ടം വേവ്, ക്വാണ്ടം ലീപ് ഫ്രോഗ് തുടങ്ങിയ ആശയങ്ങൾ ഉൾക്കൊള്ളുന്ന ചിഹ്നങ്ങൾ സ്ഥാനാർഥികൾക്ക് അനുവദിച്ചു. ജിഎസ്എൽവി മുൻ പ്രോജക്ട് ഡയറക്ടർ എൻ.പി. ഗിരി സ്കൂൾ റേഡിയോ മുഖേനെ അന്താരാഷ്ട്ര ക്വാണ്ടം ശാസ്ത്രസാങ്കേതിക വാർഷികാഘോഷങ്ങൾ ഉദ്ഘാടനം ചെയ്തു. ഡോ. ഇ.ഹരികുമാർ "ഭൗതികശാസ്ത്രം നിത്യജീവിതത്തിൽ' എന്ന റേഡിയോ പ്രഭാഷണപരമ്പരയ്ക്കു നേതൃത്വം നൽകി. മീറ്റ് ദ കാൻഡിഡേറ്റ് പരിപാടിയും ബാലറ്റിൽ നിഷേധവോട്ട് ചെയ്യുന്നതിനുള്ള അവസരവും ഒരുക്കിയിരുന്നു. പേപ്പർ ബാലറ്റാണ് വോട്ടെടുപ്പിനു വേണ്ടി ഉപയോഗിച്ചത്. കേരള യൂണിവേഴ്സിറ്റി ടീച്ചർ എഡ്യൂക്കേഷൻ കോളജിലെ വിദ്യാർഥിനികളും വോട്ടെടുപ്പിനു നേതൃത്വം വഹിച്ചു.

എംഡിഎംഎ വില്‍പ്പന; ഓട്ടോഡ്രൈവര്‍ പിടിയില്‍

പേരൂര്‍ക്കട: മാരക ലഹരിമരുന്നായ എംഡിഎംഎ വില്‍പ്പനയുമായി ബന്ധപ്പെട്ട് ഒരാള്‍കൂടി വഞ്ചിയൂര്‍ പോലീസിന്‍റെ പിടിയിലായി. വട്ടിയൂര്‍ക്കാവ് പിടിപി നഗര്‍ മാറാംകോട് ചീനിവിള വീട്ടില്‍ സഞ്ജു (25) ആണ് പോലീ സിന്‍റെ പിടിയിലായത്. സ്റ്റേഷന്‍ പരിധിയില്‍ എംഡിഎംഎ എത്തിച്ചതുമായി ബന്ധപ്പെട്ടു തിരുവനന്തപുരം സ്വദേശി സില്‍വസ്റ്റര്‍ നേരത്തെ പോലീസ് പിടിയിലായിരുന്നു. ഇയാളെ കേന്ദ്രീകരിച്ചു നടത്തിയ തുടരന്വേഷണത്തിലാണ് ഏറ്റവുമൊടുവില്‍ സഞ്ജു പിടിയിലായിരിക്കുന്നത്. സില്‍വസ്റ്ററെ 108 ഗ്രാം എംഡിഎംഎ കമ്പ്യൂട്ടര്‍ പാര്‍ട്ട്‌സിനുള്ളില്‍ ഒളിപ്പിച്ച നിലയിലാണ് പിടികൂടിയത്. സില്‍വസ്റ്ററില്‍നിന്നു ലഭിച്ച വിവരങ്ങളുടെ അടിസ്ഥാനത്തില്‍ ഇയാളുടെ സുഹൃത്തായ കുമാരപുരം സ്വദേശി ശ്രീകാന്തിനെ അറസ്റ്റുചെയ്തതോടെയാണ് എംഡിഎംഎ വിദേശത്തുനിന്നും എത്തിച്ച് ഇന്ത്യയില്‍ വില്‍പ്പന നടത്തുന്ന പ്രധാന കണ്ണിയും നൈജീരിയന്‍ സ്വദേശിയുമായ ഡുമോ ലിയോണല്‍ ബാംഗ്ലൂരില്‍ നിന്നു പിടിയിലായത്. ശ്രീകാന്തും സഞ്ജുവും സുഹൃത്തുക്കളാണ്. സഞ്ജുവിനുവേണ്ടിയാണ് എംഡിഎംഎ തിരുവനന്തപുരത്ത് എത്തിച്ചതെന്നു ചോദ്യം ചെയ്യലില്‍ ശ്രീകാന്ത് സമ്മതിച്ചിരുന്നു. സഞ്ജു ഇത് ചില്ലറ വില്‍പ്പന നടത്തുകയാണ് ചെയ്തുവരുന്നത്. വട്ടിയൂര്‍ക്കാവിലെ ഓട്ടോഡ്രൈവറാണ് സഞ്ജു. ഇതോടെ എംഡിഎംഎ കടത്തുമായി ബന്ധപ്പെട്ട് അറസ്റ്റിലായവരുടെ എണ്ണം നാലായി. വഞ്ചിയൂര്‍ സിഐ എച്ച്.എസ്. ഷാനിഫ്, ഡാന്‍സാഫ് എസ്ഐ അജേഷ്‌കുമാര്‍, ജിഎസ്ഐ സാബു, എസ്സിപിഒമാരായ ഷാജി, നസിമുദ്ദീന്‍, രഞ്ജിത്ത് തുടങ്ങിയവര്‍ അന്വേഷണസംഘത്തില്‍ ഉണ്ടായിരുന്നു. അറസ്റ്റിലായ പ്രതിയെ കോടതിയില്‍ ഹാജരാക്കി.

കെഎസ്ആര്‍ടിസി ബസ് സര്‍വീസ് ആരംഭിച്ചു

പാറശാല: ലോക റിക്കോര്‍ഡില്‍ ഇടം നേടിയ ലോകത്തിലെ ഏറ്റവും ഉയരം കൂടിയ ശിവലിംഗം സ്ഥിതി ചെയ്യുന്ന ദക്ഷിണ കൈലാസം മഹേശ്വരം ശ്രീ ശിവപാര്‍വതി ക്ഷേത്രത്തില്‍നിന്നും ആരംഭിച്ച കെഎസ്ആര്‍ടിസി സിറ്റി ഫാസ്റ്റ് സര്‍വീസ് ക്ഷേത്രം മഠാധിപതി സ്വാമി മഹേശ്വരാനന്ദ സരസ്വതിയുടെ സാന്നിധ്യത്തില്‍ കെ. ആന്‍സലന്‍ എംഎല്‍ എ ഫ്‌ലാഗ് ഓഫ് ചെയ്തു. ക്ഷേത്രത്തില്‍ നിന്ന് ആരംഭിച്ചു നെയ്യാറ്റിന്‍കര തിരുവനന്തപുരം ചാക്ക ബൈപ്പാസ് ലുലു മാള്‍ ടെക്‌നോപാര്‍ക് വഴി കഴക്കൂട്ടം വരെയും തിരിച്ചും ദിവസേന മൂന്നു സര്‍വീസാണ് ക്രമീകരിച്ചിരിക്കുന്നത്. ഉദ്ഘാടന പരിപാടിയില്‍ ക്ഷേത്ര മേല്‍ശാന്തി കുമാര്‍ മഹേശ്വരം, നെയ്യാറ്റിന്‍കര കെഎസ്ആര്‍ടിസി ആർടിഒ സൈജു, ബ്ലോക്ക് മെമ്പര്‍ ജോജി, പഞ്ചായത്ത് വൈസ് പ്രസിഡന്‍റ് അജിത് കുമാര്‍, കേശവന്‍കുട്ടി, ഗാന്ധി മിത്ര മണ്ഡലം പ്രസിഡന്‍റ് അഡ്വ. ജയചന്ദ്രന്‍ നായര്‍, ക്ഷേത്ര ഭാരവാഹികള്‍ തുടങ്ങിയവര്‍ പങ്കെടുത്തു.

വയോധികയെ ഭീഷണിപ്പെടുത്തി കവര്‍ച്ച; പ്രതി പിടിയില്‍

മെഡിക്കല്‍കോളജ്: വയോധികയെ കത്തികാട്ടി ഭീഷണിപ്പെടുത്തി കവര്‍ച്ച നടത്തിയ ആളെ മെഡിക്കല്‍കോളജ് സിഐ ബി.എം. മുഹമ്മദ് ഷാഫിയുടെ നേതൃത്വത്തിലുള്ള സംഘം പിടികൂടി. ആക്കുളം പ്രശാന്ത് നഗര്‍ അയിത്തടി ലെയിന്‍ സുരഭി ഗാര്‍ഡന്‍സില്‍ ഗൗരി നന്ദനം വീട്ടില്‍ വാടകയ് ക്കു താമസിക്കുന്ന ടി.പി. മധു (58) ആണ് പിടിയിലായത്. തിങ്കളാഴ്ച ഉച്ചയ്ക്ക് 2.30നാണ് പരാതിക്കാധാരമായ സംഭവമുണ്ടായത്. പ്രശാന്ത് നഗറില്‍ ഒറ്റയ്ക്കു താമസിച്ചുവന്നിരുന്ന ഉഷാകുമാരി (65) യെയാണ് പ്രതി ആക്രമിച്ചത്. വീട്ടില്‍ അതിക്രമിച്ചു കയറിയ മധു വയോധികയുടെ മുഖത്തു മുണ്ടുകൊണ്ട് ചുറ്റുകയും കട്ടിലില്‍ കിടത്തിയശേഷം സാരി ഉപയോഗിച്ച് ഇവരുടെ കൈകള്‍ കൂട്ടിക്കെ ട്ടുകയും ചെയ്തു. ശബ്ദമുണ്ടാക്കാതിരിക്കാന്‍ വായില്‍ തുണി കുത്തിത്തിരുകിയശേഷം കത്തികാട്ടി കൊല്ലുമെന്നു ഭീഷണിപ്പെടുത്തി ഇവരുടെ സ്വര്‍ണാഭരണങ്ങള്‍ കവരുകയായിരുന്നു. കഴുത്തിലണിഞ്ഞിരുന്ന രണ്ടുപവന്‍ സ്വര്‍ണമാലയും കൈവിരലില്‍ ഉണ്ടായിരുന്ന ഒരു മോതിരവുമാണ് പ്രതി അപഹരിച്ചത്. വയോധികയെ ദേഹോപദ്രവം ഏല്‍പ്പിച്ചശേഷമാണ് ഇയാള്‍ സ്ഥലത്തുനിന്നു രക്ഷപ്പെട്ടത്. തൊണ്ടിമുതല്‍ ചാലയിലെ ഒരു ജ്വല്ലറിയില്‍ വിറ്റശേഷം അതില്‍നിന്നു ലഭിച്ച പണവുമായി ഇയാള്‍ ഒളിവില്‍പ്പോകുകയായിരുന്നു. സിസിടിവി ദൃശ്യങ്ങള്‍ കേന്ദ്രീകരിച്ചു പോലീസ് നടത്തിയ അന്വേഷണത്തില്‍ ഒളിവിനുശേഷം തിരികെ ചാലയിലെത്തിയ പ്രതി ഇവിടെനിന്നുതന്നെ പിടിയിലാകുകയായിരുന്നു. മോഷണമുതല്‍ പോലീസ് ജ്വല്ലറിയില്‍ നിന്നു കണ്ടെത്തി. എസ്ഐമാരായ വിഷ്ണു, ഗോപകുമാര്‍, ഗ്രേഡ് എസ്ഐമാരായ അനില്‍കുമാര്‍, ബിജു, സിപിഒമാരായ മുകേഷ്, ബല്‍റാം, റിയാസ്, മുബാറക്, നൗഫല്‍, ഹരികൃഷ്ണന്‍, മനു എന്നിവര്‍ അന്വേഷണസംഘത്തില്‍ ഉണ്ടായിരുന്നു. പ്രതിയെ കോടതി റിമാന്‍ഡ് ചെയ്തു.

അയ്യപ്പഭക്തർ സഞ്ചരിച്ചിരുന്ന വാഹനത്തിന് തീപിടിച്ചു

വെഞ്ഞാറമൂട്: അയ്യപ്പ ഭക്തർ സഞ്ചരിച്ചിരുന്ന വാഹനത്തിന് തീപിടിച്ചു. ആളപായമില്ല. നേമത്തുനിന്നും ശബരിമലയിൽ പോയി മടങ്ങിയ അയ്യപ്പ ഭക്തരുടെ മഹീന്ദ്ര ടൂറിസ്റ്റ് വാഹനത്തിനാണു തീ പിടിച്ചത്. ഫയർഫോഴ്സിന്‍റെ അവസരോചിതമായ ഇടപെടലിൽ വൻ ദുരന്തം ഒഴിവായി. വെഞ്ഞാറമൂട് പിരപ്പൻകോട് ജംഗ്ഷന് സമീപം സംസ്ഥാന പാതയിലായിരുന്നു അപകടം. ബാറ്ററിയിൽ നിന്നുള്ള വയർ ഷോർട്ടായി തീപിടിക്കുകയായിരുന്നു. പുക ഉയരുന്നതു കണ്ട ഡ്രൈവർ വാഹനം നിർത്തി യാത്രക്കാരെ പുറത്തിറക്കി. രണ്ടുകുട്ടികൾ ഉൾപ്പെടെ 14 യാത്രക്കാരാണ് വാഹനത്തിലുണ്ടായിരുന്നത്. നാട്ടുകാർ വിവരം അറിയിച്ചതിനെ തുടർന്ന് വെഞ്ഞാറമൂട് ഫയർഫോഴ്സ് സ്ഥലത്ത് എത്തി തീ നിയന്ത്രണ വിധേയമാക്കുകയായിരുന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]