ADVERTISEMENT

ADVERTISEMENT

അഞ്ചാം തവണയും ബെസ്റ്റ് ഗൈഡ് യൂണിറ്റായി സെന്‍റ് ആന്‍സ്

ചങ്ങനാശേരി: സെന്‍റ് ആന്‍സ് സ്‌കൂളിലെ ഗൈഡ് യൂണിറ്റ് 2023-24 പ്രവര്‍ത്തന വര്‍ഷത്തെ സ്‌കൂള്‍, ലോക്കല്‍, ജില്ലാ സംസ്ഥാന ഘടകങ്ങളിലെ മികച്ച പ്രകടനങ്ങളുടെ അടിസ്ഥാനത്തില്‍ ബെസ്റ്റ് യൂണിറ്റായി തെരഞ്ഞെടുക്കപ്പെട്ടു. സ്‌കൂള്‍, ലോക്കല്‍ തലങ്ങള്‍ കൂടാതെ ജില്ലാ തലത്തില്‍ നടക്കുന്ന റാലികള്‍, ദിനാചരണങ്ങള്‍, ക്യാമ്പുകള്‍ ഇവയിലെല്ലാം സജീവമായിരുന്നു ഈ യൂണിറ്റ്.

സംസ്ഥാനതലത്തില്‍ നടന്ന കാമ്പൂരിയിലും യൂണിറ്റിലെ ഗൈഡ് അംഗങ്ങള്‍ പങ്കെടുത്തു. മൂന്ന് ഗൈഡ് കമ്പനികളുള്ള ഈ യൂണിറ്റിന് മികച്ച ഗൈഡ് ക്യാപ്റ്റനും ലോംഗ് സര്‍വീസ് അവാര്‍ഡ് ജേതാവുമായ സിസ്റ്റര്‍ എല്‍സാ ജോസ്, ഡയാനാ വര്‍ഗീസ്, മിനി എം. കുര്യന്‍ എന്നിവര്‍ നേതൃത്വം നല്‍കുന്നു.

ADVERTISEMENT

വിശ്വാസപരിശീലനത്തിന് സാധ്യതാ മാർഗരേഖയുമായി റവ.ഡോ. തോമസ് മൂലയിൽ

പാലാ: റവ.ഡോ. തോമസ് മൂലയിൽ രചിച്ച് പാലായിലെ വിശ്വാസ പരിശീലന കേന്ദ്രം പ്രസിദ്ധീകരിക്കുന്ന "മാറിയ സാഹചര്യത്തിൽ വിശ്വാസക്കൈമാറ്റം ഒരു സാധ്യതാ മാർഗരേഖ' പാലാ രൂപതാധ്യക്ഷൻ മാർ ജോസഫ് കല്ലറങ്ങാട്ട് പാലാ രൂപത മെത്രാസന മന്ദിരത്തിൽ വച്ച് പ്രകാശനം ചെയ്തു. പാലാ രൂപത മുൻ അധ്യക്ഷൻ മാർ ജോസഫ് പള്ളിക്കാപറമ്പിൽ പുസ്തകത്തിന്‍റെ ആദ്യപകർപ്പ് ഏറ്റുവാങ്ങി. സഭയുടെ കാതൽ മനസിലാക്കിയിട്ടുള്ള വ്യക്തിയാണ് റവ.ഡോ. തോമസ് മൂലയിലെന്ന് മാർ ജോസഫ് കല്ലറങ്ങാട്ട് പറഞ്ഞു. പാലാ രൂപത വികാരിജനറാൾ വെരി റവ.ഡോ. ജോസഫ് മലേപ്പറമ്പിൽ, വിശ്വാസ പരിശീലന കേന്ദ്രം ഡയറക്‌ടർ റവ.ഡോ. ജോർജ് വർഗീസ് ഞാറക്കുന്നേൽ തുടങ്ങിയവർ ചടങ്ങിൽ സംസാരിച്ചു. റവ.ഡോ. തോമസ് മൂലയിലച്ചനിൽ നിന്ന് പരിശീലനം നേടിയ നിരവധി വൈദികരും സന്യസ്തരും സമൂഹത്തിന്‍റെ നാനാമേഖലകളിൽനിന്നുള്ള പ്രമുഖരും ചടങ്ങിൽ സംബന്ധിച്ചു. റവ.ഡോ. തോമസ് മൂലയിൽ തന്‍റെ ദീർഘകാലത്തെ വിശ്വാസപരിശീലനാനുഭവങ്ങളിൽ നിന്ന് രൂപപ്പെടുത്തിയ പ്രായോഗിക നിർദേശങ്ങളും മാർഗങ്ങളുമാണ് പുസ്തകത്തിൽ ഉൾപ്പെടുത്തിയിരിക്കുന്നത്. ഇടവകയിലും കുടുംബത്തിലും വിശ്വാസം എങ്ങനെ അർഥവത്തായി പരിശീലിപ്പിക്കാം എന്ന് പുസ്തകം പറയുന്നു.

നാടകരചന ശില്പശാല സംഘടിപ്പിച്ചു

കടുത്തുരുത്തി: നാടക് കോട്ടയം ജില്ലാ കമ്മിറ്റിയുടെ നേതൃത്വത്തില്‍ നാടക രചന, സംവിധാനം എന്നിവ ഉള്‍കൊള്ളിച്ച് കളിത്തട്ട് എന്ന നാടക ശില്‍പ്പശാല നടത്തി. കടുത്തുരുത്തി ഗൗരീശങ്കരം ഓഡിറ്റോറിയത്തില്‍ നടന്ന ശില്‍പ്പശാല നാടക് കോട്ടയം ജില്ലാ സെക്രട്ടറി കെ.എസ്. സോമശേഖരന്‍ ഉദ്ഘാടനം ചെയ്തു. ജില്ലാ പ്രസിഡന്റ് കെ.രമേശന്‍ വൈക്കം അധ്യക്ഷത വഹിച്ച യോഗത്തില്‍ ക്യാമ്പ് ഡയറക്ടര്‍ ജോസ് കല്ലറക്കല്‍ നാടകരചനാ സങ്കേതങ്ങളെയും എഴുത്തിന്‍റെ വഴികളെയും നാടക സംവിധാന നിര്‍വഹണത്തെക്കുറിച്ചും ക്ലാസെടുത്തു. സംസ്ഥാന ജോയിന്‍റ് സെക്രട്ടറി സി.കെ. അജയന്‍, കോട്ടയം മേഖലാ പ്രസിഡന്‍റ് കെ.പി. പ്രസാദ്, തലയോലപ്പറമ്പ് മേഖലാ സെക്രട്ടറി കെ.ജി. ചന്ദ്രന്‍, കടുത്തുരുത്തി മേഖലാ പ്രസിഡന്‍റ് കെ.എം. വിജയന്‍ എന്നിവര്‍ ക്യാമ്പില്‍ വിവിധ വിഷയങ്ങള്‍ അവതരിപ്പിച്ചു. ബാബുരാജ് വട്ടക്കാട്ടില്‍, ജോഷി ചാക്കോ എന്നിവര്‍ ക്യാമ്പ് ഡിസൈനിംഗ് നടത്തി.

പുന്നത്തുറ സെന്‍റ് തോമസ് ക്‌നാനായ കത്തോലിക്കാ പള്ളി ചതുര്‍ശതാബ്ദി ആഘോഷ സമാപനം ഇന്ന്

കോട്ടയം: പുന്നത്തുറ സെന്‍റ് തോമസ് ക്‌നാനായ കത്തോലിക്ക പള്ളിയില്‍ ചതുര്‍ശതാബ്ദി ആഘോഷ സമാപനം ഇന്നു നടക്കും. വൈകുന്നേരം 5.15നു ചേരുന്ന സമ്മേളനം സീറോ മലബാര്‍ സഭാ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍ ഉദ്ഘാടനം ചെയ്യും. കോട്ടയം ആര്‍ച്ച്ബിഷപ് മാര്‍ മാത്യു മൂലക്കാട്ട് അധ്യക്ഷത വഹിക്കും. തുടര്‍പദ്ധതികളുടെ ഉദ്ഘാടനം മന്ത്രി വി.എന്‍. വാസവനും പ്രതിപക്ഷ നേതാവ് വി.ഡി. സതീശന്‍ മുഖ്യപ്രഭാഷണവും നടത്തും. ചാണ്ടി ഉമ്മന്‍ എംഎല്‍എ സുവനീര്‍ പ്രകാശനം ചെയ്യും.

പോളയും പുല്ലും ചെളിയും കെവി കനാലിലെ നീരൊഴുക്ക് തടസപ്പെട്ടു

വൈക്കം: കരിയാറിനെയും വേമ്പനാട്ടുകായലിനെയും കൂട്ടിയിണക്കുന്ന കെവി കനാലിൽ മാലിന്യങ്ങളും ചെളിയും പോളപ്പായലും പുല്ലും അടിഞ്ഞു നീരൊഴുക്കു തടസപ്പെട്ടത് വെള്ളപ്പൊക്ക ദുരിതം വർധിപ്പിക്കുന്നു.തോട്ടുവക്കം പാലത്തിന്‍റെ മുൻവശത്താണ് വൻതോതിൽ മാലിന്യം അടിഞ്ഞുതിങ്ങി തോട് നികന്ന നിലയിലായത്. തോട്ടരികിൽ നിന്ന മരങ്ങളുടെ ഭാഗങ്ങളും തോട്ടിൽ വീണു കിടക്കുന്നത് നീരൊഴുക്കു തടസപ്പെടുത്തുന്നുണ്ട്. അടിഞ്ഞുകൂടിയ ചെളിയുംമാലിന്യങ്ങളും പാലത്തിന്‍റെ അടിത്തട്ടിൽ മൂടപ്പെട്ടതിനാൽ പാലത്തിന്‍റെ തെക്കേ അറ്റത്തുകൂടി മാത്രമാണ് വെള്ളമൊഴുകുന്നത്. നീരൊഴുക്കു തടസപ്പെടുന്നത് കാർഷിക മേഖലയിൽ ശുദ്ധജലഭ്യത കുറയ്ക്കുന്നു.തോട്ടിലെ നീരൊഴുക്കു തടസപ്പെട്ടത് ജലമലിനീകരണത്തിനിടയാക്കുന്നതിനാൽ സാംക്രമികരോഗ ഭീഷണിയുണ്ടെന്ന് തോട്ടുവക്കം നിവാസികൾ ആരോപിക്കുന്നു. തോടടഞ്ഞതോടെ ചെറുവള്ളങ്ങളിൽ കായലിലും കരിയാറിലും തുഴഞ്ഞെത്തുന്ന മത്സ്യ-കക്കാ തൊഴിലാളികളുടെയും പുല്ലുചെത്തുതൊഴിലാളികളുടേയും സഞ്ചാരം തടസപ്പെട്ടു.കെവി കനാലിലെ നീരൊഴുക്കു സുഗമമാക്കുന്നതിന് ഹിറ്റാച്ചി ഉപയോഗിച്ചു ആഴത്തിൽ ചെളി നീക്കണമെന്നാണ് തോട്ടുവക്കം നിവാസികളുടെ ആവശ്യം. തോട് തെളിക്കുന്നതിന് അധികൃതർ നടപടി സ്വീകരിച്ചില്ലെങ്കിൽ പ്രദേശവാസികളെയും ബഹുജന സംഘടനകളെയും ഉൾപ്പെടുത്തി സമരപരിപാടികൾ ആരംഭിക്കുമെന്ന് കേരള കർഷകസംഘം ഭാരവാഹി ബി.ഗോപാലകൃഷ്ണൻ പറഞ്ഞു.

പിതാവിനെ ആക്രമിച്ചു പരിക്കേൽപ്പിച്ച പ്രതി അറസ്റ്റിൽ

തലയോലപ്പറമ്പ്:പിതാവിനെ ആക്രമിച്ചു പരിക്കേൽപ്പിച്ച പ്രതി അറസ്റ്റിൽ. വടയാർ ചാക്കാല കോളനി മഞ്ഞക്കണ്ടത്തിൽ അൻസാരിയാ(37)ണ് പോലീസ് പിടിയിലായത്. പിതാവ് ബഷീർ വിരമിച്ച ഒഴിവിൽ മാർക്കറ്റിൽ ചുമട്ടുജോലി വാങ്ങി നൽകാത്തതിലുള്ള വിരോധത്തിൽ അൻസാരി പിതാവിനെ മർദിക്കുകയും ഫ്ലാസ്ക് ഉപയോഗിച്ച് തലയ്ക്ക് അടിച്ച് മുറിവേൽപ്പിക്കുകയും ചെയ്തു. സംഭവത്തിൽ കേസെടുത്ത് അന്വേഷണം നടത്തിയ തലയോലപ്പറമ്പ് പോലീസ് അൻസാ രിയെ അറസ്റ്റ് ചെയ്തു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

പി.ജെ. ജോസഫിന് കോട്ടയം പൗരാവലിയുടെ സ്‌നേഹാദരവ് ഇന്ന്

കോട്ടയം: ശതാഭിഷിക്തനായ മുന്‍ മന്ത്രി പി.ജെ. ജോസഫിന് കോട്ടയം പൗരാവലി‍ ഇന്ന് പൗരസ്വീകരണം നല്‍കും. ഉച്ചകഴിഞ്ഞ് 2.30ന് നാഗമ്പടം ഹോട്ടല്‍ സീസര്‍ പാലസ് ഓഡിറ്റോറിയത്തിലാണ് സ്വീകരണ പരിപാടി. ഗോവ ഗവര്‍ണര്‍ പി.എസ്. ശ്രീധരന്‍പിള്ള ഉദ്ഘാടനം ചെയ്യും. തിരുവഞ്ചൂര്‍ രാധാകൃഷ്ണന്‍ എംഎല്‍എ അധ്യക്ഷതവഹിക്കും. ഗവണ്‍മെന്‍റ് ചീഫ് വിപ്പ് ഡോ. എന്‍. ജയരാജ്, ഫ്രാന്‍സിസ് ജോര്‍ജ് എംപി, വൈക്കം വിശ്വന്‍, കോട്ടയം അതിരൂപത വികാരി ജനറാള്‍ ഫാ. മൈക്കിള്‍ വെട്ടിക്കാട്ട്, മോന്‍സ് ജോസഫ് എംഎല്‍എ, നഗരസഭാ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍, ചലച്ചിത്രതാരം പ്രേം പ്രകാശ്, ദര്‍ശന സാംസ്‌കാരിക കേന്ദ്രം ഡയറക്ടര്‍ ഫാ. എമില്‍ പുള്ളിക്കാട്ടില്‍, പ്രോഗ്രാം കോ -ഓര്‍ഡിനേറ്റര്‍ മാത്യു കൊല്ലമലക്കരോട്ട് എന്നിവര്‍ പ്രസംഗിക്കും. പൗരാവലിയുടെ ഉപഹാരം ഗവര്‍ണര്‍ സമ്മാനിക്കും. പി.ജെ. ജോസഫ് മറുപടി പ്രസംഗം നടത്തും. പങ്കെടുക്കാനെത്തുന്നവര്‍ ഉച്ചകഴിഞ്ഞ് രണ്ടിന് ഓഡിറ്റോറിയത്തില്‍ പ്രവേശിക്കണം.

കുട്ടിയുടെ കൈയിൽ വിൽപ്പനയ്ക്കായി കഞ്ചാവ് നൽകിയ യുവാവ് അറസ്റ്റിൽ

തലയോലപ്പറമ്പ്: പ്രായപൂർത്തിയാകാത്ത കുട്ടിയുടെ കൈവശം വിൽപ്പനയ്ക്കായി കഞ്ചാവ് ഏൽപ്പിച്ച പ്രതി അറസ്റ്റിൽ. വെള്ളൂർ വടകര മൂലയിടത്ത് വിപിൻദാസാ(24)ണ് തലയോലപ്പറമ്പ് പോലീസിന്‍റെ പിടിയിലായത്. കഴിഞ്ഞ 11നു വൈകുന്നേരം ഏഴോടെ തോന്നയ്ക്കൽ വടകര റോഡിൽ പയ്യപ്പള്ളി ഭാഗത്ത് പ്രായപൂർത്തിയാകാത്ത ഒരു കുട്ടി പോലീസ് വാഹനം കണ്ടു പരുങ്ങുകയും പാന്‍റിന്‍റെ പോക്കറ്റിൽനിന്ന് എന്തോ പുറത്തേക്ക് എടുക്കുന്നതും കണ്ട് പോലീസ് പരിശോധന നടത്തി. പോക്കറ്റിൽനിന്ന് കണ്ടെടുത്ത പൊതിയിൽ 90 ഗ്രാം കഞ്ചാവാണെന്നു മനസിലാക്കി ചോദ്യം ചെയ്തപ്പോഴാണ് വിപിൻദാസ് വിൽപ്പനയ്ക്കായി കുട്ടിയുടെ കൈയിൽ ഏൽപ്പിച്ചതാണെന്ന് ബോധ്യപ്പെട്ടത്. സംഭവത്തിൽ കേസെടുത്ത് അന്വേഷണം നടത്തിയ തലയോലപ്പറമ്പ് പോലീസ് വിപിൻദാസിനെ അറസ്റ്റ് ചെയ്തു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

വിശ്വകർമസഭ പ്രതിഷേധിച്ചു

കോട്ടയം: മെഡിക്കൽ കോളജ് ആശുപത്രിയിൽ കെട്ടിടം തകർന്ന് കേരള വിശ്വകർമ സഭ തലയോലപ്പറമ്പ് ശാഖാ അംഗം മേപ്പാട്ടുകുന്നേൽ ഡി.ബി. ബിന്ദു മരിക്കാൻ ഇടയായ സംഭവത്തിൽ കേരള വിശ്വകർമ സഭ കോട്ടയം താലൂക്ക് യൂണിയൻ പ്രതിഷേധിച്ചു. പിന്നാക്കാവസ്ഥയിൽ നിൽക്കുന്ന കുടുംബത്തിന്‍റെ ഏക ആശ്രയമായിരുന്നു മരണപ്പെട്ട ബിന്ദു. അവരുടെ മകനോ മകൾക്കോ സർക്കാർ ജോലി നൽകണമെന്നും മകളുടെ വിദ്യാഭ്യാസ ലോൺ എഴുതിത്തള്ളുകയും കുടുംബത്തിന്‍റെ സംരക്ഷണം സർക്കാർ ഏറ്റെടുക്കുകയും ചെയ്യണമെന്ന് യോഗം ആവശ്യപ്പെട്ടു. പ്രസിഡന്‍റ് മുരളി തകിടിയേൽ, സെക്രട്ടറി വി.കെ. അനൂപ് കുമാർ, ട്രഷറർ കെ.കെ. അനിൽകുമാർ, ദിലീപ് നാട്ടകം, സാബു മറ്റക്കര തുടങ്ങിയവർ പ്രസംഗിച്ചു.

സാംസണ്‍ ജേക്കബ് പ്രസിഡന്‍റ്, മെജോ ഫ്രാന്‍സിസ് സെക്രട്ടറി

ചേര്‍ത്തല: റോട്ടറി ക്ലബ് ഓഫ് ചേര്‍ത്തലയുടെ പുതിയ പ്രവര്‍ത്തനവര്‍ഷത്തെ ഭാരവാഹികളുടെ സ്ഥാനാരോഹണം ആറിനു വൈകിട്ട് റോട്ടറി ഹാളില്‍ നടക്കും. സാംസണ്‍ ജേക്കബ് പ്രസിഡന്‍റും മെജോ ഫ്രാന്‍സിസ് സെക്രട്ടറിയും അജീഷ്‌ ഗോപിനാഥ് ട്രഷററുമായുള്ള ഭരണസമിതിയാണ് ചുമതലയേല്‍ക്കുന്നത്. സ്ത്രീ ശക്തീകരണത്തിനു പ്രാധാന്യം നല്‍കിയുള്ള സാമൂഹിക സേവന പദ്ധതികളാണ് പുതിയ വര്‍ഷത്തില്‍ ക്ലബ് ഏറ്റെടുക്കുന്നതെന്ന് പ്രസിഡന്‍റ് സാംസണ്‍ ജേക്കബ്, സെക്രട്ടറി മെജോ ഫ്രാന്‍സിസ്, ട്രഷറര്‍ അജീഷ്‌ ഗോപിനാഥ്, പദ്ധതികള്‍ക്കു നേതൃത്വം നല്‍കുന്ന ഡോ. കെ. ഷൈലമ്മ, ഡോ. ബിജു മല്ലാരി, ശിവന്‍കുട്ടി നായര്‍ എന്നിവര്‍ പത്രസമ്മേളനത്തില്‍ അറിയിച്ചു. സ്ത്രീകള്‍ക്കായി ഓപ്പോള്‍ എന്ന പേരില്‍ വിവിധ പദ്ധതികളാണ് നടപ്പാക്കുന്നത്. കാന്‍സര്‍ രോഗനിര്‍ണയത്തിനായി മാമോഗ്രാം യൂണിറ്റുകളടക്കം സ്ഥാപിക്കാന്‍ പിന്‍കത്തോണ്‍ പദ്ധതി നടപ്പാക്കും. ഡോ. ചിത്രതാര ഗംഗാധരനാണ് ഇതിന്‍റെ ബ്രാന്‍ഡ് അംബാസഡറായി പ്രവര്‍ത്തിക്കുന്നത്. തൊഴിലില്ലായ്മക്കു പരിഹാരം കാണാന്‍ മെഗാ തൊഴില്‍മേളയും നിര്‍ധനരായവര്‍ക്കു വീടു നിര്‍മിച്ചു നല്‍കുന്ന ഉദയകിരണ്‍ പദ്ധതിയും നടപ്പാക്കുന്നുണ്ട്. ചുമതലയേല്‍ക്കല്‍ സമ്മേളനത്തില്‍ ഡോ.വി.പി. ഗംഗാധരന്‍ മുഖ്യാതിഥിയായി ഉദയകിരണ്‍ പദ്ധതി ഉദ്ഘാടനം ചെയ്യും. പുതിയ വര്‍ഷത്തെ സേവന പ്രവര്‍ത്തനങ്ങള്‍ റോട്ടറി ഡിസ്ട്രിക്ട് ഗവര്‍ണര്‍ ഡോ. ടീന ആന്‍റണി ഉദ്ഘാടനം ചെയ്യും.

തുരുത്തി-മുളയ്ക്കാംതുരുത്തി-കാവാലം റൂട്ടില്‍ കെഎസ്ആര്‍ടിസി ബസ് സർവീസ് പുനരാരംഭിച്ചു

ചങ്ങനാശേരി: തുരുത്തി-മുളയ്ക്കാംതുരുത്തി-വാലടി റൂട്ടില്‍ ബസ് സര്‍വീസ് പുനരാരംഭിച്ചു. ഇന്നലെ നാല് ബസ് 16 ട്രിപ്പ് വീതം സര്‍വീസ് നടത്തി. റോഡ് തകര്‍ന്നതിനെത്തുടര്‍ന്ന് കഴിഞ്ഞ നാലു ദിവസങ്ങളായി ബസ് സര്‍വീസ് നിലച്ചിരുന്നു. ഇതിനെതിരേ പ്രതിഷേധ പരിപാടികളുമായി ജനങ്ങള്‍ രംഗത്തെത്തിയതോടെ ജനപ്രതിനിധികളുടെ ഇടപെടലിലാണ് ബസ് സര്‍വീസുകള്‍ പുനരാരംഭിച്ചത്. റോഡ് നിര്‍മാണം വൈകുന്നതിനെതിരേ നാട്ടുകാര്‍ യൂദാപുരത്തു റോഡിലെ വെള്ളക്കെട്ടില്‍ വള്ളവും വലയുമിറക്കി പ്രതിഷേധം സംഘടിപ്പിച്ചിരുന്നു. അപകടാവസ്ഥ ഉണ്ടെങ്കിലും ബസ് സര്‍വീസുകള്‍ പുനരാരംഭിച്ചത് വിദ്യാര്‍ഥികളടക്കം യാത്രക്കാര്‍ക്കു വലിയ ആശ്വാസമായി. ബസ് സർവീസ് നിലച്ചതിനെത്തുടർന്ന് ഈ പ്രദേശത്തെ യാത്രക്കാർ അനുഭവിക്കുന്ന ദുരിതം ദീപിക റിപ്പോര്‍ട്ട് ചെയ്തിരുന്നു. മഴ കുറഞ്ഞാല്‍ ചൊവ്വാഴ്ച മുതല്‍ റോഡിന്‍റെ ലെവല്‍സ് എടുത്ത് നിരപ്പാക്കി അടിയന്തരമായി ഗതാഗതയോഗ്യമാക്കാന്‍ ഉദ്യോഗസ്ഥര്‍ക്ക് ജോബ് മൈക്കിള്‍ എംഎല്‍എ നിര്‍ദേശം നല്‍കി. റോഡ് നിര്‍മാണ നടപടികള്‍ വേഗത്തിലാക്കുമെന്ന് എംഎല്‍എ തുരുത്തി: തുരുത്തി-വാലടി-വീയപുരം റോഡിന്‍റെ പുനര്‍നിര്‍മാണവുമായി ബന്ധപ്പെട്ട് ആദ്യഘട്ടമായി ലെവല്‍സ് എടുത്തു നിരപ്പാക്കി അടിയന്തരമായി ഗതാഗതയോഗ്യമാക്കാന്‍ ജോബ് മൈക്കിള്‍ എംഎല്‍എയുടെ അധ്യക്ഷതയില്‍ ചേര്‍ന്ന യോഗത്തില്‍ ധാരണയായി. അടുത്തഘട്ടത്തില്‍ രണ്ടാംലെയര്‍ ടാറിംഗും മൂന്നാംഘട്ടത്തില്‍ ടാറിംഗ് ഉള്‍പ്പെടെ നിര്‍മാണം പൂര്‍ത്തീകരിക്കും. ആവശ്യമായ സ്ഥലങ്ങളില്‍ ഓടകള്‍ പുനക്രമീകരണം നടത്തും. 109 കോടി രൂപയ്ക്കാണ് എസ്പിഎല്‍ ഇന്‍ഫ്രാ എന്ന കരാര്‍ കമ്പനി റോഡ് നിര്‍മാണം ഏറ്റെടുത്തിരിക്കുന്നത്. തുരുത്തി -വാലടി-വീയപുരം റോഡിന്‍റെ പുനര്‍നിര്‍മാണവുമായി ബന്ധപ്പെട്ട് നാട്ടുകാരുടെ അഭിപ്രായം അറിയുന്നതിനായി തുരുത്തി ഡെവലപ്പ്‌മെന്‍റ് ആൻഡ് കള്‍ച്ചറല്‍ സൊസൈറ്റിയുടെ നേതൃത്വത്തില്‍ മുളയ്ക്കാംതുരുത്തി സെന്‍റ് ജോര്‍ജ് ക്‌നാനായ പള്ളി ഹാളില്‍ ചേര്‍ന്ന യോഗത്തിലാണ് ഇക്കാര്യങ്ങള്‍ തീരുമാനിച്ചത്.

ദന്പതികളെ അനന്തരവനും സംഘവും വീടുകയറി ആക്രമിച്ചു

കടുത്തുരുത്തി: ലഹരിയുപയോഗവും സാമൂഹ്യവിരുദ്ധ പ്രവര്‍ത്തനവുമായി നടന്ന മരുമകനെ നേര്‍വഴി ഉപദേശിച്ചു മടങ്ങിയ അമ്മാവനെയും ഭാര്യയെയും അനന്തരവനും സുഹൃത്തുക്കളും ചേര്‍ന്ന് വീടുകയറി ആക്രമിച്ചു ഗുരുതരമായി പരിക്കേല്‍പ്പിച്ചു. ചുറ്റികകൊണ്ട് തലയ്ക്കടിയേറ്റ അമ്മാവനെ ഗുരുതര പരിക്കുകളോടെ ആശുപത്രിയില്‍ പ്രവേശിപ്പിച്ചു. സംഭവവുമായി ബന്ധപ്പെട്ട് അന്തരവന്‍ ആറുപേരെ ഉള്‍പ്പെടെ കടുത്തുരുത്തി പോലീസ് അറസ്റ്റ് ചെയ്തു കോടതിയില്‍ ഹാജരാക്കി റിമാന്‍ഡ് ചെയ്തു. ഞീഴൂര്‍ കണക്കഞ്ചേരി ഭാഗത്ത് താമസിക്കുന്ന മനയത്ത് പറമ്പില്‍ ശ്രീജിത്ത് (36), ഭാര്യ അശ്വതി (32) എന്നിവര്‍ക്കാണ് മര്‍ദനമേറ്റത്. സംഭവവുമായി ബന്ധപ്പെട്ട് ശ്രീജിത്തിന്‍റെ അനന്തരവന്‍ വടക്കേനിരപ്പ് മനയത്തുപറമ്പില്‍ അശ്വിന്‍ രാജേഷ് (18), സുഹൃത്തുക്കളായ ഇലഞ്ഞി കുരിശുമല ഭാഗത്ത് മയിലണംതടത്തില്‍ ജിനു റെജി (22), മരങ്ങോലി ചാലുകര തെങ്ങുംപള്ളില്‍ ഡോണ്‍ സാബു (22), ഞീഴൂര്‍ കണക്കഞ്ചേരി മേപ്പാടം വീട്ടില്‍ അക്ഷയ് മനോജ് (23), മരങ്ങോലി ചാലുകര ഭാഗം ചെമ്മനാനില്‍ ആല്‍ബി ജോണി (18), കാട്ടാമ്പാക്ക് തോട്ടുപ്പറമ്പില്‍ അഭിജിത്ത് സാബു (26) എന്നിവരാണ് റിമാന്‍ഡിലായത്. ബുധനാഴ്ച വൈകൂന്നേരം ആറോടെ കണക്കഞ്ചേരിയിലാണ് സംഭവം. സഹോദരി പറഞ്ഞതനുസരിച്ചാണ് ഇവരുടെ വീട്ടിലെത്തി മകന്‍ അശ്വിനെ, ശ്രീജിത്ത് ഉപദേശിച്ചത്. തുടര്‍ന്ന് ശീജിത്തും ഭാര്യയും വീട്ടിലേക്കു മടങ്ങി. ഇതിനുശേഷമാണ് അക്രമിസംഘം വീട്ടിലെത്തി ആക്രമണം അഴിച്ചുവിട്ടത്. പരിക്കേറ്റ ശ്രീജിത്തും അശ്വതിയും കുറവിലങ്ങാട് താലൂക്കാശുപത്രിയില്‍ ചികിത്സയിലാണ്.

നിരണം തീര്‍ഥാടനം നാളെ

ചങ്ങനാശേരി: അതിരൂപതയുടെ ആഭിമുഖ്യത്തില്‍ യുവദീപ്തി-എസ്എംവൈഎം നേതൃത്വം നല്‍കുന്ന 19-ാമത് നിരണം തീര്‍ഥാടനം നാളെ നടത്തും. രാവിലെ ഏഴിന് മെത്രാപ്പോലീത്തന്‍ പള്ളിയിലെ അഭിവന്ദ്യ പിതാക്കന്മാരുടെ കബറിടപള്ളിയില്‍ അര്‍പ്പിക്കുന്ന വിശുദ്ധ കുര്‍ബാനയ്ക്കുശേഷം തീര്‍ഥാടനം ആരംഭിക്കും. കത്തിച്ചതിരി പ്രസിഡന്‍റ് അരുണ്‍ ടോം തോപ്പിലിനും യുവദീപ്തി പതാക ഡെപ്യൂട്ടി പ്രസിഡന്‍റ് എലിസബത്ത് വര്‍ഗീസിനും നല്‍കി അതിരൂപത വികാരി ജനറാൾ മോണ്‍. ആന്‍റണി എത്തയ്ക്കാട്ട് തീര്‍ഥാടനം ഉദ്ഘാടനം ചെയ്യും. അതിരൂപത ഡയറക്ടര്‍ ഫാ. സാവിയോ മാനാട്ട് ആമുഖപ്രസംഗവും കത്തീഡ്രല്‍ വികാരി ഫാ. ജോസഫ് വാണിയപ്പുരയ്ക്കല്‍ അനുഗ്രഹ പ്രഭാഷണം നടത്തും. ചങ്ങനാശേരി സെന്‍ട്രല്‍ ജംഗ്ഷന്‍, ളായിക്കാട്, ഇടിഞ്ഞില്ലം, വേങ്ങല്‍, കാവുംഭാഗം, പൊടിയാടി വഴി നിരണത്ത് എത്തും. തുടര്‍ന്ന് കല്‍വിളക്കില്‍ തിരി തെളിയിക്കും. തീര്‍ഥാടകര്‍ തിരുശേഷിപ്പ് കൂടാരത്തിലെ പ്രാര്‍ഥനയ്ക്കുശേഷം നേര്‍ച്ച ഭക്ഷണം സ്വീകരിക്കും. അതിരൂപത ഡയറക്ടര്‍ ഫാ. സാവിയോ മാനാട്ട് എന്താനാ പ്രാര്‍ഥനയും സന്ദേശവും നല്‍കും. ഫാ. ടോണി പുതുവീട്ടില്‍ക്കളം, ക്രിസ്റ്റി കെ. കുഞ്ഞുമോന്‍, സിസ്റ്റര്‍ തെരസിന, അലക്‌സ് മഞ്ഞുമേല്‍, ലാലിച്ചന്‍ മറ്റത്തില്‍, ക്രിസ്റ്റിന്‍ സേവ്യര്‍, ജോയല്‍ ജോണ്‍ റോയി, ലൂസി ഫിലിപ്പോസ്, ഡെന്നി തോമസ്, റിയ പുന്നശേരി എന്നിവര്‍ നേതൃത്വം നല്‍കും.

പി.ജെ. ജോസഫിന് കോട്ടയം പൗരാവലിയുടെ സ്‌നേഹാദരവ് ഇന്ന്

കോട്ടയം: ശതാഭിഷിക്തനായ മുന്‍ മന്ത്രി പി.ജെ. ജോസഫിന് കോട്ടയം പൗരാവലി‍ ഇന്ന് പൗരസ്വീകരണം നല്‍കും. ഉച്ചകഴിഞ്ഞ് 2.30ന് നാഗമ്പടം ഹോട്ടല്‍ സീസര്‍ പാലസ് ഓഡിറ്റോറിയത്തിലാണ് സ്വീകരണ പരിപാടി. ഗോവ ഗവര്‍ണര്‍ പി.എസ്. ശ്രീധരന്‍പിള്ള ഉദ്ഘാടനം ചെയ്യും. തിരുവഞ്ചൂര്‍ രാധാകൃഷ്ണന്‍ എംഎല്‍എ അധ്യക്ഷതവഹിക്കും. ഗവണ്‍മെന്‍റ് ചീഫ് വിപ്പ് ഡോ. എന്‍. ജയരാജ്, ഫ്രാന്‍സിസ് ജോര്‍ജ് എംപി, വൈക്കം വിശ്വന്‍, കോട്ടയം അതിരൂപത വികാരി ജനറാള്‍ ഫാ. മൈക്കിള്‍ വെട്ടിക്കാട്ട്, മോന്‍സ് ജോസഫ് എംഎല്‍എ, നഗരസഭാ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍, ചലച്ചിത്രതാരം പ്രേം പ്രകാശ്, ദര്‍ശന സാംസ്‌കാരിക കേന്ദ്രം ഡയറക്ടര്‍ ഫാ. എമില്‍ പുള്ളിക്കാട്ടില്‍, പ്രോഗ്രാം കോ -ഓര്‍ഡിനേറ്റര്‍ മാത്യു കൊല്ലമലക്കരോട്ട് എന്നിവര്‍ പ്രസംഗിക്കും. പൗരാവലിയുടെ ഉപഹാരം ഗവര്‍ണര്‍ സമ്മാനിക്കും. പി.ജെ. ജോസഫ് മറുപടി പ്രസംഗം നടത്തും. പങ്കെടുക്കാനെത്തുന്നവര്‍ ഉച്ചകഴിഞ്ഞ് രണ്ടിന് ഓഡിറ്റോറിയത്തില്‍ പ്രവേശിക്കണം.

പുന്നത്തുറ സെന്‍റ് തോമസ് ക്‌നാനായ കത്തോലിക്കാ പള്ളി ചതുര്‍ശതാബ്ദി ആഘോഷ സമാപനം ഇന്ന്

കോട്ടയം: പുന്നത്തുറ സെന്‍റ് തോമസ് ക്‌നാനായ കത്തോലിക്ക പള്ളിയില്‍ ചതുര്‍ശതാബ്ദി ആഘോഷ സമാപനം ഇന്നു നടക്കും. വൈകുന്നേരം 5.15നു ചേരുന്ന സമ്മേളനം സീറോ മലബാര്‍ സഭാ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍ ഉദ്ഘാടനം ചെയ്യും. കോട്ടയം ആര്‍ച്ച്ബിഷപ് മാര്‍ മാത്യു മൂലക്കാട്ട് അധ്യക്ഷത വഹിക്കും. തുടര്‍പദ്ധതികളുടെ ഉദ്ഘാടനം മന്ത്രി വി.എന്‍. വാസവനും പ്രതിപക്ഷ നേതാവ് വി.ഡി. സതീശന്‍ മുഖ്യപ്രഭാഷണവും നടത്തും. ചാണ്ടി ഉമ്മന്‍ എംഎല്‍എ സുവനീര്‍ പ്രകാശനം ചെയ്യും. പള്ളി വികാരി ഫാ. ബിബിന്‍ കണ്ടോത്ത്, മോന്‍സ് ജോസഫ് എംഎല്‍എ, സിനിമാതാരം ദിലീഷ് പോത്തന്‍, ഫാ. സ്റ്റാനി ഇടത്തിപ്പറമ്പില്‍, ശ്രീജിത്ത് കെ. നമ്പൂതിരി, ഫാ. ജയിംസ് ചെരുവില്‍, ഫാ. അബ്രഹാം കരിപ്പിങ്ങാംപുറം, സിസ്റ്റര്‍ കൊച്ചുറാണി, ബിനു പല്ലോന്നില്‍ എന്നിവര്‍ പ്രസംഗിക്കും. ഇന്ന് ഉച്ചകഴിഞ്ഞ് 3.15നു കിടങ്ങൂരില്‍നിന്നു പുന്നത്തുറയിലേക്ക് റാലി നടക്കും. കിടങ്ങൂര്‍ എസ്എച്ച്ഒ കെ.എല്‍. മഹേഷ് റാലി ഫ്‌ളാഗ് ഓഫ് ചെയ്യും. പത്രസമ്മേളനത്തില്‍ ഫാ. ബിബിന്‍ കണ്ടോത്ത്, ബിനു സ്റ്റീഫന്‍ പല്ലോന്നില്‍, ബിബീഷ് ഒലീക്കമുറി, സാബു ഒഴുങ്ങാലില്‍, സാബു വയലില്‍ എന്നിവര്‍ പങ്കെടുത്തു.

ഓര്‍മപ്പെരുന്നാള്‍

കോട്ടയം: ബസേലിയോസ് മാര്‍ത്തോമ്മാ പൗലോസ് ദ്വിതീയന്‍ കാതോലിക്കാ ബാവയുടെ നാലാം ഓര്‍മപ്പെരുന്നാള്‍ 6 മുതല്‍ 12 വരെ ദേവലോകം കാതോലിക്കേറ്റ് അരമനയില്‍ ആചരിക്കും. നാളെ രാവിലെ 6.30നു പ്രഭാത നമസ്‌കാരം, 7.30ന് വിശുദ്ധ കുര്‍ബാന, പെരുന്നാള്‍ കൊടിയേറ്റ്. ഏഴിന് രാവിലെ 7ന് വിശുദ്ധ കുര്‍ബാന ഫാ.കെ.കെ. വര്‍ഗീസ്. എട്ടിനു രാവിലെ ഏഴിന് വിശുദ്ധ കുര്‍ബാന ഫാ. ജോര്‍ജ് ഡേവിഡ്. ഒന്പതിന് രാവിലെ 7ന് വിശുദ്ധ കുര്‍ബാന ഫാ. ജോസഫ് ചെറുവത്തൂര്‍. 10ന് രാവിലെ 7നു വിശുദ്ധ കുര്‍ബാനയ്ക്ക് ഡോ. ഗീവര്‍ഗീസ് മാര്‍ യൂലിയോസ് മുഖ്യകാര്‍മികത്വം വഹിക്കും. 11നു വിശുദ്ധ കുര്‍ബാന: ഫാ. അശ്വിന്‍ ഫെര്‍ണാണ്ടസ്. 11നു വൈകുന്നേരം അഞ്ചിന് തീര്‍ഥാടകസംഗമം. ആറിന് യാക്കോബ് റമ്പാന്‍റെ നേതൃത്വത്തില്‍ സ്വീകരിക്കും. 6.15നു സന്ധ്യാനമസ്‌കാരത്തിനു കാതോലിക്കാ ബാവായും മെത്രാപ്പോലീത്തമാരും നേതൃത്വം നല്‍കും. 7.15ന് അനുസ്മരണപ്രഭാഷണം: ഡോ. ഏബ്രഹാം മാര്‍ സെറാഫിം. 7.45ന് കബറിങ്കല്‍ ധൂപപ്രാര്‍ഥന. 12നു രാവിലെ 6.30നു പ്രഭാത നമസ്‌കാരം, 7.30നു വിശുദ്ധ മൂന്നിന്‍മേല്‍ കുര്‍ബാനയ്ക്ക് ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാബാവ മുഖ്യകാര്‍മികത്വം വഹിക്കും.

കെപിസിസി പ്രസിഡന്‍റ് ദേവലോകം കാതോലിക്കേറ്റ് അരമനയില്‍

കോട്ടയം: കെപിസിസി പ്രസിഡന്‍റ് സണ്ണി ജോസഫ് എംഎല്‍എ ഓര്‍ത്തഡോക്‌സ് സഭാ ആസ്ഥാനമായ ദേവലോകം കാതോലിക്കേറ്റ് അരമനയില്‍ ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാബാവയെ സന്ദര്‍ശിച്ചു. കെപിസിസി വര്‍ക്കിംഗ് പ്രസിഡന്‍റുമാരായ പി.സി. വിഷ്ണുനാഥ് എംഎല്‍എ, എ.പി. അനില്‍കുമാര്‍ എംഎല്‍എ, എംഎല്‍എമാരായ തിരുവഞ്ചൂര്‍ രാധാകൃഷ്ണന്‍, ചാണ്ടി ഉമ്മന്‍ എന്നിവരും കെ.സി. ജോസഫ്, ജോസഫ് വാഴയ്ക്കന്‍, ഡിസിസി പ്രസിഡന്‍റ് നാട്ടകം സുരേഷ്, ടോം കോര, സിബി ജോണ്‍ തുടങ്ങിയ നേതാക്കളും ഒപ്പമുണ്ടായിരുന്നു. ദേവലോകം അരമനയില്‍ മാനേജര്‍ യാക്കോബ് റമ്പാന്‍, സഭാ സെക്രട്ടറി ബിജു ഉമ്മന്‍, ബാവയുടെ പ്രിന്‍സിപ്പല്‍ സെക്രട്ടറി റവ.ഡോ. ജോണ്‍സ് ഏബ്രഹാം കോനാട്ട് റീശ് കോര്‍ എപ്പിസ്‌കോപ്പാ എന്നിവര്‍ ചേര്‍ന്ന് കെപിസിസി അധ്യക്ഷനെ സ്വീകരിച്ചു.

നന്പർ മാറി മഹാരാഷ്‌ട്രയിലെ അക്കൗണ്ടിലെത്തിയ 50,000 രൂപ തിരികെയെടുത്ത് കോട്ടയം സൈബർ പോലീസ്

കോട്ടയം: നമ്പര്‍ മാറി മഹാരാഷ്‌ട്രയിലുള്ള യുവതിയുടെ അക്കൗണ്ടിലേക്കു പോയ 50,000 രൂപ തിരികെയെടുത്ത് കോട്ടയം സൈബര്‍ പോലീസ്. ഇന്നലെ ഉച്ചകഴിഞ്ഞ് 1.30നാണ് സംഭവം. പുതുപ്പള്ളി സ്വദേശി ഷിബു ജോലിചെയ്യുന്ന ഏറ്റുമാനൂരിലെ റബര്‍ കമ്പനിക്കുവേണ്ടി ഗൂഗിള്‍ പേ ചെയ്ത 50,000 രൂപയാണ് നമ്പര്‍ മാറി വേറൊരു അക്കൗണ്ടിലേക്കു ചെന്നത്. അബദ്ധം മനസിലാക്കിയ ഷിബു ഉടന്‍തന്നെ അക്കൗണ്ട് കൈകാര്യം ചെയ്യുന്ന ഇന്ത്യന്‍ ഓവര്‍സീസ് ബാങ്കിനെ സമീപിച്ചു. പരാതി സ്വീകരിച്ച ബാങ്ക് 15നു മുന്പായി പണം തിരികെയെത്തിക്കാമെന്നും എന്നാല്‍, അക്കൗണ്ട് ഹോള്‍ഡര്‍ പണം പിന്‍വലിച്ചാല്‍ പണം തിരികെ ക്കിട്ടുന്നത് ബുദ്ധിമുട്ടാകുമെന്നും അറിയിച്ചു. കോട്ടയം സൈബര്‍ പോലീസില്‍ ഒരു പരാതി നല്‍കാൻ ബാങ്കില്‍നിന്നു നിര്‍ദേശിച്ചതിന്‍റെ അടിസ്ഥാനത്തിലാണ് ഷിബു പോലീസിന്‍റെ സഹായം തേടിയത്. പോലീസ് നടത്തിയ അന്വേഷണത്തില്‍ മഹാരാഷ്‌ട്രയിലെ സൊണാലി എന്ന സ്ത്രീയുടെ അക്കൗണ്ടിലേക്കാണ് പണം പോയതെന്നു കണ്ടെത്തി. തുടര്‍ന്ന് ഫോണിലൂടെ അക്കൗണ്ട് ഉടമയുമായി സംസാരിക്കുകയും ബാങ്കിംഗ് സമയം തീരുന്നതിനു മുന്പ് പണം തിരികെ അയയ്ക്കാന്‍ സമ്മര്‍ദം ചെലുത്തുകയുമായിരുന്നു. സൈബര്‍ പോലീസിന്‍റെ സമയോചിത ഇടപെടലിലൂടെ ഒരു മണിക്കൂറിനുള്ളില്‍ 50,000 രൂപ തിരികെ അക്കൗണ്ടിൽ എത്തി.

തെരുവുനായശല്യം : കടുത്തുരുത്തി പോളിടെക്നിക്കിന് അവധി നൽകി

കടുത്തുരുത്തി: തെരുവുനായശല്യംമൂലം ആപ്പാഞ്ചിറയില്‍ പ്രവര്‍ത്തിക്കുന്ന കടുത്തുരുത്തി ഗവണ്‍മെന്‍റ് പോളിടെക്നിക്ക് കോളജിന് അവധി നല്‍കി കോളജ് അധികൃതര്‍. തെരുവുനായയുടെ ആക്രമണത്തില്‍ വ്യാഴാഴ്ച കോളജിലെ സെക്യൂരിറ്റി ജീവനക്കാരന് കടിയേറ്റിരുന്നു. കൂടാ തെ സമീപവാസിക്കും സമീപത്തെ വീടുകളില്‍ വളര്‍ത്തുന്ന നായ്ക്കള്‍ക്കും തെരുവുനായയുട കടിയേറ്റതോടെയാണ് ഇന്നലെ കോളജില്‍ വിദ്യാര്‍ഥികളോട് വരേണ്ടെന്ന് അധികൃതര്‍ അറിയിച്ചത്. ഇന്നലെ നല്‍കിയ അവധിക്കു പകരം മറ്റൊരു ദിവസം കോളജില്‍ ക്ലാസ് നടത്തുമെന്നു പ്രിന്‍സിപ്പൽ സി.എം. ഗീത അറിയിച്ചു. ഇതേ നായ ഇന്നലെ കോളജിനു സമീപത്തുവച്ചു മറ്റൊരാളെയും കടിച്ചു പരിക്കേല്‍പ്പിച്ചു. നാലുകണ്ടത്തില്‍ ജസ്റ്റിന്‍ ജോയി(30)ക്കാണ് കടിയേറ്റത്. ഇന്നലെ രാവിലെ 9.30 നാണ് സംഭവം. ജസ്റ്റിനെ കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. പിന്നീട് പഞ്ചായത്തിന്‍റെ നേതൃത്വത്തില്‍ വാര്‍ഡ് മെംബര്‍ നോബി മുണ്ടയ്ക്കന്‍ ഇടപെട്ട് നായപിടിത്തക്കാരെ എത്തിച്ച് നായയെ പിടികൂടിയാണ് അപകടഭീഷണി ഒഴിവാക്കിയത്. പോളിടെക്നിക്ക് കോളജിലെ ജീവനക്കാരന്‍ റെജിനാ(25)ണ് വ്യാഴാഴ്്ച കോളജിനു സമീപത്ത് വച്ചു കടിയേറ്റത്. വൈകുന്നേരം ആറോടെയാണ് സംഭവം. പോളിടെക്നിക്ക് കോളജിനു സമീപത്ത് നില്‍ക്കുകയായിരുന്ന സെക്ക്യൂരിറ്റി ജീവനക്കാരനെ കടിച്ച നായ ഓടി വന്ന് സമീപത്തുതന്നെ നില്‍ക്കുകയായിരുന്ന പടിഞ്ഞാറേമുക്ക് തങ്കപ്പനെ(70)യും കടിച്ചു. തുടര്‍ന്ന് ഇവിടെനിന്ന് ഓടിപ്പോയ നായ വഴിയിലുണ്ടായിരുന്ന മറ്റു നായ്ക്കളെയും കടിച്ചു. ഈ ഭാഗത്ത് തെരുവുനായശല്യം രൂക്ഷമാണെന്ന് നാട്ടുകാര്‍ പറയുന്നു.

ചക്കാമ്പുഴ-കൊണ്ടാട് വഴി കൂടുതല്‍ ട്രിപ്പുകളുമായി കെഎസ്ആര്‍ടിസി

ചക്കാമ്പുഴ: അറയാനിക്കല്‍ കവല, കൊണ്ടാട് പ്രദേശങ്ങളിലെ ജനങ്ങളുടെ ദീര്‍ഘകാലത്തെ ആവശ്യമായിരുന്ന കെഎസ്ആര്‍ടിസി ബസ് ട്രിപ്പ് മന്ത്രി റോഷി അഗസ്റ്റിന്‍റെ ഇടപെടലിനെത്തുടര്‍ന്ന് യാഥാര്‍ഥ്യമായി. നിലവിലുള്ള ബസിനു പുറമേ ഒരു ബസ് കൂടി അനുവദിച്ചാണ് കൂടുതല്‍ ട്രിപ്പുകള്‍ ഈ റൂട്ടില്‍ നടത്തുന്നത്. പുതിയ ഷെഡ്യൂള്‍ അനുസരിച്ച് രാവിലെ 6.30ന് പാലാ-ചക്കാമ്പുഴ-കൊണ്ടാട് -രാമപുരത്തിനും തിരിച്ച് വെള്ളിലാപ്പള്ളി-ചക്കാമ്പുഴ വഴി പാലായിലേക്കും, 7.40 ന് പാലാ-ചക്കാമ്പുഴ-കൊണ്ടാട് -രാമപുരത്തിനും തിരിച്ച് വെള്ളിലാപ്പള്ളി-ചക്കാമ്പുഴ-പാലാ -ഏറ്റുമാനൂര്‍ വഴി കോട്ടയത്തേക്കും സര്‍വീസ് നടത്തും. വൈകുന്നേരം 4.05നും 5.20 നും പുറപ്പെടുന്ന സര്‍വീസുകള്‍ ചക്കാമ്പുഴ-കൊണ്ടാട് വഴി രാമപുരത്ത് എത്തും. ബസുകള്‍ ഓടിത്തുടങ്ങിയതോടെ സ്‌കൂള്‍, ഓഫീസ് സമയങ്ങളില്‍ ഈ മേഖലയില്‍ നിലനിന്നിരുന്ന യാത്രാക്ലേശത്തിന് പരിഹാരമായി. കാലങ്ങളായി മുടങ്ങിക്കിടന്ന ട്രിപ്പുകള്‍ പുനരാരംഭിക്കുന്നതിന് മുന്‍കൈയെടുത്ത മന്ത്രി റോഷി അഗസ്റ്റിനെ നാട്ടുകാര്‍ അഭിനന്ദിച്ചു.

വെള്ളപ്പൊക്ക നിവാരണത്തിന് ബദല്‍ നിര്‍ദേശങ്ങളുമായി എംഎല്‍എ

പാലാ: കേരളത്തിലുണ്ടാകുന്ന വെള്ളപ്പൊക്കദുരിതത്തില്‍നിന്നു നാടിനെ രക്ഷിക്കാന്‍ നിരവധി മാര്‍ഗങ്ങളുണ്ടെന്ന് മാണി സി. കാപ്പന്‍ എംഎല്‍എ . തദ്ദേശസ്വയംഭരണ സ്ഥാപനങ്ങളുടെ ആസ്തി രജിസ്റ്ററിലുള്ള വിസ്തീര്‍ണമനുസരിച്ച് ആറുകളുടെയും തോടുകളുടെയും വീതി കൂട്ടിയും അടിഞ്ഞുകൂടിയിരിക്കുന്ന ചെളിയും മണ്ണും മണലും നീക്കം ചെയ്തും വെള്ളത്തിന്‍റെ ഒഴുക്ക് വര്‍ധിപ്പിച്ച് ഒരു പരിധിവരെ വെള്ളപ്പൊക്കം തടയാം. ഡാമുകളില്‍ അടിഞ്ഞിരിക്കുന്ന മണലും ചെളിയും ലേലം ചെയ്തു 40 ശതമാനം വരുമാനം തദ്ദേശസ്വയംഭരണ സ്ഥാപനങ്ങള്‍ക്കും 60 ശതമാനം വരുമാനം സര്‍ക്കാരിനുമാ‍യി നിശ്ചയിക്കാം. മണല്‍ വാരുന്നതിന് നിരോധനം നിലനില്‍ക്കുന്നതുകൊണ്ട് സര്‍ക്കാര്‍ ഖജനാവിലേക്ക് പണം വരുന്നില്ല. എന്നാല്‍ അനധികൃതമായി മണല്‍ഖനനവും ശേഖരണവും നടക്കുന്നുവെന്നുള്ളത് യാഥാര്‍ഥ്യമാണ്. ഇതിന് പരിഹാരമായി പരസ്യമായി ലേലം ചെയ്ത് മണലും മണ്ണും നീക്കംചെയ്ത് താഴ്ന്ന പ്രദേശങ്ങള്‍ ഉയര്‍ത്തിയെടുക്കണമെന്ന് എംഎൽഎ നിർദേശിച്ചു.

റോഡില്‍ ചെളിമണ്ണ്; യാത്രക്കാര്‍ ദുരിതത്തില്‍

പാലാ: ഭൂമി മണ്ണിട്ട് ഉയര്‍ത്തുന്നതിനായി അലക്ഷ്യമായി കൊണ്ടുവന്ന മണ്ണ് ഏറ്റുമാനൂര്‍-പൂഞ്ഞാര്‍ ഹൈവേയില്‍ നിരന്നതു മൂലം പുലിയന്നൂര്‍ ജംഗ്ഷന്‍ മുതല്‍ മുത്തോലി ജംഗ്ഷന്‍ വരെ ചെളിമണ്ണ് നിറഞ്ഞു വഴിയാത്രക്കാര്‍ക്കും ടുവീലര്‍ യാത്രക്കാര്‍ക്കും യാത്ര ദുരിതമാകുന്നു. മണ്ണ് ഉണങ്ങി വഴിയോരത്തെ കടകളില്‍ പൊടി നിറയുന്നത് കച്ചവടക്കാര്‍ക്കും ബുദ്ധിമുട്ട് ഉണ്ടാക്കുന്നു. ദിവസേന ആയിരക്കണക്കിന് വാഹനങ്ങള്‍ കടന്നുപോകുന്ന തിരക്കേറിയ റോഡില്‍ പിഡബ്ല്യുഡി ഓഫീസിന് സമീപത്താണ് സംഭവം.

സിവില്‍ സ്റ്റേഷന്‍ കോമ്പൗണ്ടിലെ ശുചിമുറികള്‍ കാടുകയറി നശിക്കുന്നു

പാലാ : അഞ്ചു ലക്ഷം രൂപ ചെലവാക്കി പാലാ നഗരസഭ നിര്‍മിച്ച സിവില്‍ സ്റ്റേഷന്‍ കോമ്പൗണ്ടിലെ ശുചിമുറികള്‍ കാടുകയറി നശിക്കുന്നു. സിവില്‍ സ്റ്റേഷനിലെ ജീവനക്കാരുടെയും നാട്ടുകാരുടെയും നിരന്തരമായ ആവശ്യപ്രകാരം 2019ല്‍ ശുചിത്വ മിഷന്‍ ഫണ്ടില്‍നിന്ന് അനുവദിച്ച് നിര്‍മിച്ചതാണ് അഞ്ച് മുറികളുള്ള കംഫര്‍ട്ട് സ്റ്റേഷന്‍. സിവില്‍ സ്റ്റേഷനിലെ റവന്യുവകുപ്പ് അധികാരികളുടെ പിടിവാശിയും ഉത്തരവാദിത്വക്കുറവുമാണ് നൂറുകണക്കിന് ആളുകള്‍ക്ക് പ്രയോജനപ്പെടുമായിരുന്ന ശുചിമുറിയെ ഇല്ലാതാക്കിയതെന്നാണ് ആരോപണം. റവന്യു വകുപ്പാണെങ്കില്‍ നഗരസഭയ്ക്കു നേരേയാണ് ആക്ഷേപം ഉന്നയിക്കുന്നത്. നഗരസഭ നിര്‍മിച്ച് നല്‍കിയ ശൗചാലയങ്ങളിലേക്ക് ആവശ്യമായ വെള്ളം നല്‍കാനോ, വൈദ്യുതി നല്‍കാനോ വൃത്തിയായി സൂക്ഷിക്കുന്നതിന് ആളെ വയ്ക്കാനോ റവന്യുവകുപ്പ് തയാറായില്ലെന്ന് നഗരസഭ പറയുന്നു. എന്നാല്‍, ഇക്കാര്യങ്ങളെല്ലാം നഗരസഭ ചെയ്തു നല്‍കണമെന്ന പിടിവാശിയിലായിരുന്നു റവന്യു വകുപ്പ്. സിവില്‍ സ്റ്റേഷന്‍റെ കോമ്പൗണ്ടിലുള്ള ശൗചാലയത്തിലേക്ക് മുനിസിപ്പാലിറ്റിയുടെ പേരില്‍ വെള്ളം നല്‍കാന്‍ ജലവകുപ്പും തയാറായില്ല. സിവില്‍ സ്റ്റേഷനിലേക്കുള്ള കണക്‌ഷനില്‍നിന്നു വെള്ളം നല്‍കാന്‍ നഗരസഭ ആവശ്യപ്പെട്ടു. ഇതിന് ഫീസ് ഈടാക്കാനും അനുവാദം നല്‍കി. എന്നാല്‍, റവന്യു ഉദ്യോഗസ്ഥര്‍ നിരസിക്കുകയായിരുന്നു. കൂടാതെ ഇവയെല്ലാം നഗരസഭ നടപ്പാക്കണമെന്ന് ആവശ്യപ്പെട്ട് തഹസില്‍ദാര്‍ നഗരസഭയ്ക്ക് കത്തു നല്‍കുകയാണുണ്ടായത്. ഇതോടെ പദ്ധതി കെട്ടിടം മാത്രമെന്ന അവസ്ഥയിലായി. സിവില്‍ സ്റ്റേഷനില്‍ വിവിധ ആവശ്യങ്ങള്‍ക്കെത്തുന്നവരും നാട്ടുകാരും നിരന്തരം നഗരസഭയുമായി ബന്ധപ്പെട്ടെങ്കിലും പ്രശ്നപരിഹാരമായില്ല. പാലാ പൗരസമിതി പ്രവര്‍ത്തകനായ പി. പോത്തന്‍ നല്‍കിയ വിവരാവകാശ പരാതിയില്‍ നഗരസഭ നല്‍കിയ മറുപടിയിലാണ് റവന്യു ഉദ്യോഗസ്ഥരുടെ കടുത്ത അനാസ്ഥ പുറത്തുവന്നിരിക്കുന്നത്. കഴിഞ്ഞ ആറു വര്‍ഷത്തോളമായി അടഞ്ഞുകിടക്കുന്ന കംഫര്‍ട്ട് സ്റ്റേഷന്‍ തകര്‍ന്ന അവസ്ഥയിലാണ്. സിവില്‍ സ്റ്റേഷനിലെത്തുന്ന പൊതുജനങ്ങള്‍ക്ക് ഉപകാരപ്രദമാകുന്ന രീതിയിലാണ് ശുചിമുറി സ്ഥാപിച്ചിരുന്നത്. പരിസരമാകെ കാടുപിടിച്ച് ആകെ നശിച്ച അവസ്ഥയിലാണ്.

പ്രതിഷേധപ്രകടനം നടത്തി

മുണ്ടക്കയം: കോട്ടയം മെഡിക്കൽ കോളജിൽ കെട്ടിടം തകർന്നുവീണ് ഒരാൾ മരിച്ച സംഭവത്തിൽ ആരോഗ്യമന്ത്രി വീണാ ജോർജ് രാജിവയ്ക്കണമെന്നാവശ്യപ്പെട്ട് കോൺഗ്രസ് കൊക്കയാർ മണ്ഡലം കമ്മിറ്റിയുടെ നേതൃത്വത്തിൽ മുണ്ടക്കയം 35-ാം മൈലിൽ പ്രതിഷേധപ്രകടനം നടത്തി. മണ്ഡലം പ്രസിഡന്‍റ് സണ്ണി ആന്‍റണി തുരുത്തിപ്പള്ളി, സണ്ണി തട്ടുങ്കൽ, സുരേഷ് ഓലിക്കൽ, സ്വർണലത അപ്പുക്കുട്ടൻ, അയൂബ് ഖാൻ കട്ടപ്ലാക്കൽ, സ്റ്റാൻലി സണ്ണി, സുനിത ജയപ്രകാശ്, ഷാഹുൽ തുടങ്ങിയവർ നേതൃത്വം നൽകി.

പി.ജെ. ജോസഫിന് കോട്ടയം പൗരാവലിയുടെ സ്‌നേഹാദരവ് ഇന്ന്

കോട്ടയം: ശതാഭിഷിക്തനായ മുന്‍ മന്ത്രി പി.ജെ. ജോസഫിന് കോട്ടയം പൗരാവലിയുടെ ആഭിമുഖ്യത്തില്‍ ഇന്ന് പൗരസ്വീകരണം നല്‍കും. ഉച്ചകഴിഞ്ഞ് 2.30ന് നാഗമ്പടം ഹോട്ടല്‍ സീസര്‍ പാലസ് ഓഡിറ്റോറിയത്തിലാണ് സ്വീകരണപരിപാടി. ഗോവ ഗവര്‍ണര്‍ പി.എസ്. ശ്രീധരന്‍പിള്ള ഉദ്ഘാടനം ചെയ്യും. തിരുവഞ്ചൂര്‍ രാധാകൃഷ്ണന്‍ എംഎല്‍എ അധ്യക്ഷത വഹിക്കും. ചീഫ് വിപ്പ് ഡോ. എന്‍. ജയരാജ്, ഫ്രാന്‍സിസ് ജോര്‍ജ് എംപി, വൈക്കം വിശ്വന്‍, കോട്ടയം അതിരൂപത വികാരി ജനറാള്‍ ഫാ. മൈക്കിള്‍ വെട്ടിക്കാട്ട്, മോന്‍സ് ജോസഫ് എംഎല്‍എ, നഗരസഭാ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍, ചലച്ചിത്രതാരം പ്രേം പ്രകാശ്, ദര്‍ശന സാംസ്‌കാരികകേന്ദ്രം ഡയറക്ടര്‍ ഫാ. എമില്‍ പുള്ളിക്കാട്ടില്‍, പ്രോഗ്രാം കോ -ഓര്‍ഡിനേറ്റര്‍ മാത്യു കൊല്ലമലക്കരോട്ട് എന്നിവര്‍ പ്രസംഗിക്കും. പൗരാവലിയുടെ ഉപഹാരം ഗവര്‍ണര്‍ സമ്മാനിക്കും. പി.ജെ. ജോസഫ് മറുപടി പ്രസംഗം നടത്തും. പങ്കെടുക്കാനെത്തുന്നവര്‍ ഉച്ചകഴിഞ്ഞ് രണ്ടിന് ഓഡിറ്റോറിയത്തില്‍ പ്രവേശിക്കണം.

എരുമേലി‌‌യിലും മുക്കൂ‌ട്ടുതറ‌യിലും പഞ്ചായത്ത്‌ കെട്ടിടങ്ങൾ അപകടാവസ്ഥ‍യിൽ

എരുമേലി: കോട്ടയം മെഡിക്കൽ കോളജിലുണ്ടായ അപകടത്തിന്‍റെ സാഹചര്യത്തിൽ, അപകട സാധ്യതയുള്ള എരുമേലി പഞ്ചായത്തിന്‍റെ രണ്ടു കെട്ടിടങ്ങൾ സുരക്ഷിതമാക്കണമെന്ന് ആവശ്യം. എരുമേലി പ്രൈവറ്റ് ബസ് സ്റ്റാൻഡിലും മുക്കൂട്ടുതറ ടൗണിലുമുള്ള പഞ്ചായത്ത്‌ ഷോപ്പിംഗ് കോംപ്ലക്സ് കെട്ടിടങ്ങളാണ് കാലപ്പഴക്കം മൂലം ദുർബലാവസ്ഥയിലുള്ളത്. രണ്ടു കെട്ടിടത്തിലും മേൽക്കൂരയിലെ കോൺക്രീറ്റ് പാളികൾ കമ്പി തെളിഞ്ഞ നിലയിലാണ്. തുടർച്ചയായി കോൺക്രീറ്റ് കഷണങ്ങൾ അടർന്നു വീഴുന്നുമുണ്ട്. പ്രൈവറ്റ് ബസ് സ്റ്റാൻഡിലെ കെട്ടിടത്തിൽ വില്ലേജ് ഓഫീസിലേക്കുള്ള പടിക്കെട്ടുകളിൽ മേൽക്കൂരയിലെ കോൺക്രീറ്റ് കഷണങ്ങൾ അടർന്നുവീഴുന്നതു പതിവാണ്. മുക്കൂട്ടുതറയിലെ കെട്ടിടം അൺഫിറ്റാണെന്നു രണ്ട് വർഷം മുമ്പ് എൻജിനിയറിംഗ് വിഭാഗം അറിയിച്ചതാണ്. മുക്കൂട്ടുതറയിൽ ഏതാനും വർഷം മുമ്പ് ഷോപ്പിംഗ് കോംപ്ലക്സിൽ നിന്നയാളുടെ സമീപത്ത് വലിയ കോൺക്രീറ്റ് കഷണം അടർന്നുവീണ സംഭവമുണ്ടായിരുന്നു. എരുമേലി പ്രൈവറ്റ് ബസ് സ്റ്റാൻഡിൽ യാത്രക്കാർ നിൽക്കുന്ന ഭാഗത്തും സമാനമായ സംഭവങ്ങൾ നിരവധി തവണയുണ്ടായി. കോൺക്രീറ്റ് കഷണങ്ങൾ തുടർച്ചയായി അടർന്നുവീഴുമ്പോഴും എരുമേലിയിലെയും മുക്കൂട്ടുതറയിലെയും കെട്ടിടങ്ങളിൽ നിലവിൽ സുരക്ഷാ ക്രമീകരണങ്ങൾ ഏർപ്പെടുത്തിയിട്ടില്ല. രണ്ടു കെട്ടിടങ്ങളും പൊളിച്ചുമാറ്റി പുതിയവ നിർമിക്കാൻ ഒട്ടേറെത്തവണ ബജറ്റിൽ പദ്ധതികൾ പ്രഖ്യാപിച്ചതുമാണ്. എന്നാൽ, നടപടികൾ മാത്രമുണ്ടാകുന്നില്ല. കോട്ടയം മെഡിക്കൽ കോളജിൽ കഴിഞ്ഞ ദിവസം കെട്ടിടം ഇടിഞ്ഞുവീണ് സംഭവിച്ച അപകടംപോലെ എരുമേലിയിലും മുക്കൂട്ടുതറയിലും സംഭവിക്കാതിരിക്കാൻ കെട്ടിടങ്ങളുടെ ഉറപ്പും അപകടസാധ്യതകളും പരിശോധിക്കണമെന്ന ആവശ്യം ശക്തമാണ്.

വെളിച്ചിയാനി ഫൊറോന മാതൃവേദി അസംബ്ലി

കാഞ്ഞിരപ്പള്ളി: വെളിച്ചിയാനി ഫൊറോന മാതൃവേദിയുടെ അസംബ്ലി മെസഞ്ചർ മീറ്റ് എന്ന പേരിൽ വെളിച്ചിയാനി സെന്‍റ് തോമസ് ഫൊറോന പള്ളിയിൽ നടത്തി. ഫൊറോന വികാരി റവ.ഡോ. സെബാസ്റ്റ്യൻ പാലമൂട്ടിൽ ഉദ്ഘാടനം ചെയ്തു. ഫൊറോന ഡയറക്ടർ ഫാ. തോമസ് പാലൂക്കുന്നേൽ അധ്യക്ഷത വഹിച്ചു. രൂപതാ ഡയറക്ടർ ഫാ. മാത്യു ഓലിക്കൽ ആമുഖസന്ദേശം നൽകി. രൂപത അനിമേറ്റർ സിസ്റ്റർ റോസ്മി വെട്ടിപ്ലാക്കൽ എസ്എബിഎസ്, ഫൊറോന അനിമേറ്റർ സിസ്റ്റർ മരിയ ടോം എഫ്സിസി, ജൂബി ആന്‍റണി എന്നിവർ പ്രസംഗിച്ചു. ഫൊറോനയിലെ എല്ലാ ഇടവകകളിൽനിന്നുമുള്ള എക്സിക്യൂട്ടീവ് അംഗങ്ങൾ പങ്കെടുത്തു.

എയർപോർട്ട് സർവേ: ഉടമസ്ഥാവകാശം തെളിഞ്ഞില്ലെങ്കിൽ നഷ്ടപരിഹാരം കോടതിയിൽ

എരുമേലി: നിർദിഷ്ട ശബരി ഗ്രീൻഫീൽഡ് വിമാനത്താള പദ്ധതിക്കായി കണ്ടെത്തിയ ഭൂമിയിൽ റവന്യു വകുപ്പിന്‍റെ സർവേ പരിശോധന പുരോഗമിക്കുന്നു. പദ്ധതിക്കായി ഏറ്റെടുക്കുന്ന ഭൂമിയിൽ അതിർത്തികൾ പരിശോധിച്ചതിനുശേഷം ഓരോരുത്തരുടെയും ഭൂമി സബ്‌ഡിവിഷൻ ചെയ്തു രേഖകൾ തയാറാക്കുന്നതാണ് സർവേയിൽ പ്രധാനമായും ചെയ്യുകയെന്ന് റവന്യു അധികൃതർ അറിയിച്ചു. ഇതിനുശേഷം ഭൂവുടമകളുടെ അഭിപ്രായം കേൾക്കും. ഉടമകൾ സ്ഥലത്തിന്‍റെ ഉടമസ്ഥാവകാശമുൾപ്പെടെയുള്ള രേഖകൾ ഹാജരാക്കണം. തിട്ടപ്പെടുത്തിയതിൽ പൂർണമായി ഏറ്റെടുക്കുന്ന വസ്തുക്കളുടെ ആധാരം റവന്യു വകുപ്പ് ഓഫീസിൽ സൂക്ഷിക്കും. വസ്തുവിൽ ഏറ്റെടുക്കുന്നതു കഴിഞ്ഞു ഭൂമിയുണ്ടെങ്കിൽ ഏറ്റെടുത്ത ഭൂമിയുടെ അളവ് ആധാരത്തിൽ കുറവുചെയ്ത് ഉടമ അതിരു കൃത്യമാക്കണം. ഉടമയ്ക്ക് ഭൂമിയിൽ ഉടമസ്ഥാവകാശം തെളിയിക്കാൻ കഴിഞ്ഞില്ലെങ്കിൽ നഷ്ടപരിഹാരത്തുക കോടതിയിൽ കെട്ടിവയ്ക്കാനാണ് നിർദേശം. ഓരോ സ്ഥലത്തും സർവേ നടത്തുമ്പോൾ അടുത്തുള്ള സ്ഥലമുടമകളെ അറിയിക്കും. നിലവിൽ മണിമല, എരുമേലി വില്ലേജുകളിൽ ഡിജിറ്റൽ സർവേ നടക്കുന്നുണ്ട്. റവന്യു സർവേ പൂർത്തിയായ ശേഷം ഈ രേഖകൾ ഡിജിറ്റൽ സർവേയുമായി ഒത്തുനോക്കും. എരുമേലി തെക്ക്, മണിമല വില്ലേജുകളിൽനിന്ന് 1039.876 ഹെക്ടർ സ്ഥലമാണ് ഗ്രീൻ ഫീൽഡ് വിമാനത്താവളത്തിനായി ഏറ്റെടുക്കുന്നത്. സർവേക്കുശേഷം സ്ഥലം ഏറ്റെടുക്കൽ നടപടികൾക്കു മുമ്പായി 19(ഒന്ന്) വിജ്ഞാപനമുണ്ടാവും. ചാരുവേലിയിൽ റൺവേക്കുശേഷം 450 മീറ്റർ ലൈറ്റ് പോയിന്‍റ് വരുന്ന ഭാഗത്താണ് ഇപ്പോൾ പരിശോധന പുരോഗമിക്കുന്നത്. മറുസൈഡിൽ 900 മീറ്റർ ലൈറ്റ് പോയിന്‍റ് വരും. മുക്കട റോഡിൽനിന്നാവും റൺവേയുടെ പ്രവേശന ഭാഗം. അവസാന ഭാഗം ഓരുങ്കൽക്കടവിനു സമീപം ചക്കാലയ്ക്കൽ പുരയിടമാണ്. ഇവിടമാണ് ടേക്ക് ഓഫ് പോയിന്‍റിനുശേഷം സിഗ്‌നൽ ലൈറ്റ് വരുന്നയിടം. ഏറ്റെടുക്കേണ്ട സ്ഥലങ്ങൾ സംബന്ധിച്ച് മുമ്പ് ഏജൻസി തയാറാക്കിയ സ്കെച്ച് അനുസരിച്ച് അതിരടയാളങ്ങൾ കൃത്യമാക്കുന്ന ജോലി പൂർത്തിയായ ശേഷമേ ഏറ്റെടുക്കേണ്ട ഓരോ സ്ഥലങ്ങളും സർവേ നമ്പർ പ്രകാരം അളന്നുതിരിക്കൂ. എരുമേലി തെക്ക് വില്ലേജിലെ ബ്ലോക്ക് നമ്പർ 23ൽ ഉൾപ്പെട്ട 366 പേരുടെയും മണിമല വില്ലേജിൽ ബ്ലോക്ക് നമ്പർ 19ൽ ഉൾപ്പെട്ട 73 പേരുടെയും സ്ഥലങ്ങൾ കൂടാതെ ബ്ലോക്ക് നമ്പർ 22ൽ ഉൾപ്പെട്ട, ഗോസ്റ്റൽ ഫോർ ഏഷ്യയും (ചെറുവള്ളി എസ്റ്റേറ്റ്) സർക്കാരുമായി ഉടമസ്ഥാവകാശത്തർക്കം നിലനിൽക്കുന്ന 811.4200 ഹെക്ടർ സ്ഥലം, 22-ാം നമ്പർ ബ്ലോക്കിൽ ഉൾപ്പെട്ട 42.5800 ഹെക്ടർ സ്ഥലം, രണ്ടാം ബ്ലോക്കിൽ ഉൾപ്പെട്ട മലയാളം പ്ലാന്‍റേഷൻ ലിമിറ്റഡും സർക്കാരും തമ്മിൽ ഉടമസ്ഥാവകാശത്തർക്കം നിലനിൽക്കുന്ന 1.8300 ഹെക്ടർ സ്ഥലം, മണിമല വില്ലേജിൽ 210-ാം ബ്ലോക്കിൽ ഉൾപ്പെട്ടതും ഗോസ്റ്റൽ ഫോർ ഏഷ്യയും സർക്കാരും തമ്മിൽ ഉടമസ്ഥാവകാശത്തർക്കം നിലനിൽക്കുന്ന 60.4375 ഹെക്ടർ സ്ഥലം എന്നിവയാണ് ഏറ്റെടുക്കുന്നത്. റവന്യു വകുപ്പ് നിയോഗിച്ച അഞ്ചു താത്കാലിക സർവേയർമാരും ഒരു റവന്യു സർവേയറും ഉൾപ്പെടെ ആറു പേരാണ് സംഘത്തിലുള്ളത്. രണ്ടു താത്കാലിക സർവേയർമാരെ കൂടി നിയമിച്ച് സർവേ വേഗത്തിലാക്കുന്നതിനു നടപടികളായിട്ടുണ്ടെന്നു റവന്യു ഉദ്യോഗസ്ഥർ പറഞ്ഞു.

കെ. ദാമോദരൻ അനുസ്മരണം

പൊൻകുന്നം: കാഞ്ഞിരപ്പള്ളി താലൂക്ക് ലൈബ്രറി കൗൺസിലിന്‍റെ ആഭിമുഖ്യത്തിൽ കെ. ദാമോദരൻ അനുസ്മരണം ജനകീയ വായനശാലയിൽ നടത്തി. പനമറ്റം ദേശീയ വായനശാലാ സെക്രട്ടറി കെ. ഷിബു അനുസ്മരണപ്രഭാഷണം നടത്തി. താലൂക്ക് ലൈബ്രറി കൗൺസിൽ പ്രസിഡന്‍റ് പി.കെ. ബാബുലാൽ അധ്യക്ഷത വഹിച്ചു. ജില്ലാ ആസൂത്രണ സമിതിയംഗം കെ. രാജേഷ് മുഖ്യപ്രഭാഷണം നടത്തി. എസ്. സന്ദീപ് ലാൽ, സന്തോഷ്‌കുമാർ, രാഹുൽ പ്രസാദ്, ജോർജ് സെബാസ്റ്റ്യൻ തുടങ്ങിയവർ പ്രസംഗിച്ചു. ഗ്രന്ഥശാലാ പ്രവർത്തകനും വേലകളി ആശാനുമായിരുന്ന ഇരിക്കാട്ട് എ.ആർ. കുട്ടപ്പൻനായരുടെ നിര്യാണത്തിൽ അനുശോചിച്ചു.

വീഴാറായ കെ‌ട്ടിടവും ചെരിഞ്ഞ വിളക്കുകാലും അപകടം വിളിച്ചോതുന്നു

പാലാ: സംസ്ഥാന പാതയിലെ കൊട്ടാരമറ്റം ജംഗ്ഷനില്‍ പതിറ്റാണ്ടുകള്‍ മുന്‍പ് സ്ഥാപിച്ച ട്രാഫിക് സിഗ്‌നല്‍ തൂണും ലൈറ്റുകളും കാലപ്പഴക്കത്തില്‍ ചുവടറ്റ് ഏതു നിമിഷവും നിലംപൊത്താവുന്ന വിധം ചെരിഞ്ഞുനില്‍ക്കുന്നു. തിരക്കേറിയ ജംഗ്ഷനിൽ യാത്രക്കാര്‍ക്കും വാഹനങ്ങള്‍ക്കും ഭീഷണിയായി നില്‍ക്കുന്ന വളരെ ഉയരമുള്ള ഈ ഇരുമ്പ് വിളക്കുതൂണ്‍ എത്രയുംവേഗം പിഴുതു മാറ്റണമെന്ന ആവശ്യമുയര്‍ന്നു. നിരവധി വാഹനങ്ങൾ കടന്നുപോകുന്ന വഴിയിലാണ് ഇതുനിൽക്കുന്നത്. കുട്ടികളും വഴിയാത്രക്കാരും ഇതുവഴി സഞ്ചരിക്കുന്നു. അപകടം സംഭവിച്ചതിനുശേഷം പൊതുജനശ്രദ്ധ ആകർഷിക്കാനുള്ള പ്രഖ്യാപനത്തിനു പകരം പ്രശ്നപരിഹാരത്തിനു ശ്രമിക്കുകയാണ് വേണ്ടെന്നാണ് നാട്ടുകാർ പറയുന്നത്. കെഎസ്ആർ‌‌ടിസി‌യുടെ അവസ്ഥ കെഎസ്ആര്‍ടിസിയുടെ പാലാ ഡിപ്പോ മന്ദിരത്തിന്‍റെ മുന്‍ഭാഗത്ത് മഴവെള്ളം ഒലിച്ചിറങ്ങി കോണ്‍ക്രീറ്റ് തകര്‍ന്ന് അടര്‍ന്നു വീണുകൊണ്ടിരിക്കുകയാണ്. അധികൃതര്‍ തിരിഞ്ഞു നോക്കുന്നില്ല. ബസ് കാത്തിരിപ്പുകാര്‍ക്കും പാര്‍ക്ക് ചെയ്യുന്ന ബസുകള്‍ക്കും മീതേ അടര്‍ന്നുവീഴാവുന്ന ഗുരുതര സാഹചര്യമാണ് നിലനില്‍ക്കുന്നത്. ആവശ്യമായ അറ്റകുറ്റപ്പണികളില്ലാതെ മഴവെള്ളം കെട്ടിനിന്ന് ഒലിച്ചിറങ്ങി കമ്പികള്‍ തുരുമ്പിച്ച് വികസിച്ച് കോണ്‍ക്രീറ്റ് തകര്‍ന്ന് അപകടകരമാകുംവിധം അടര്‍ന്നു വീണുകൊണ്ടിരിക്കുകയാണ്. കോര്‍പറേഷന്‍റെ സിവില്‍ വിഭാഗം തിരിഞ്ഞുനോക്കുന്നില്ലെന്നും ചുമതലപ്പെട്ട അധികൃതര്‍ കണ്ട ഭാവം പോലും നടിക്കുന്നില്ലെന്നും ആക്ഷേപം ഉയര്‍ന്നു. പലതവണ ജില്ലാ വികസനസമിതിയിൽ ഉന്നയിച്ച വിഷയമാണിതെന്ന് പാസഞ്ചേഴ്‌സ് അസോസിയേന്‍ പ്രസിഡന്‍റ് ജെയ്‌സണ്‍ മാന്തോട്ടം പറഞ്ഞു.

ഈരാറ്റുപേട്ട കടുവാമൂഴിയിൽ കുളിക്കടവ് നശിപ്പിച്ചതായി പരാതി

ഈരാറ്റുപേട്ട: പി.സി. ജോര്‍ജ് എംഎല്‍എയുടെ ആസ്തി വികസനഫണ്ട് ഉപയോഗിച്ച് 2017ല്‍ മീനച്ചിലാറ്റില്‍ കടുവാമൂഴിയില്‍ പണിത കുളിക്കടവ് നശിപ്പിച്ചതായും ഭൂമി സ്വകാര്യവ്യക്തി കൈവശപ്പെടുത്തിയതായും നാട്ടുകാര്‍ റവന്യുമന്ത്രി, മീനച്ചില്‍ തഹസില്‍ദാര്‍ എന്നിവര്‍ക്ക് പരാതി നല്‍കി. 2017ലാണ് അഞ്ചുലക്ഷം രൂപ മുടക്കി കടുവാമൂഴി മസ്ജിദ് നൂറിനു സമീപം ഹൈടെക് കുളിക്കടവ് പണിതത്. നൂറുക്കണക്കിന് ആളുകള്‍ ഉപയോഗിച്ചുകൊണ്ടിരുന്ന കുളിക്കടവ് എതാനും മാസം മുമ്പാണ് സ്വകാര്യവ്യക്തി കൈയേറി നശിപ്പിച്ച് സ്ഥലം സ്വന്തമാക്കിയത്. അവിടെയുണ്ടായിരുന്ന ശിലാഫലകവും നശിപ്പിച്ചു.കുളിക്കടവ് പുനര്‍നിര്‍മിക്കണമെന്നും ഇതു കൈയേറി നശിപ്പിച്ച വ്യക്തിക്കെതിരേ നിയമനടപടി സ്വീകരിക്കണമെന്നും നാട്ടുകാര്‍ ആവശ്യപ്പെട്ടു.

ബിന്ദുവിന്‍റെ കുടുംബത്തെ ചേർത്തുനിർത്തും: മന്ത്രി വി.എൻ. വാസവൻ

കോട്ടയം: കോട്ടയം മെഡിക്കൽ കോളജ് ആശുപത്രിയിലുണ്ടായ അപകടത്തിൽ മരിച്ച തലയോലപ്പറമ്പ് സ്വദേശിനി ഡി. ബിന്ദുവിന്‍റെ കുടുംബത്തെ സർക്കാർ ചേർത്തുനിർത്തുമെന്ന് മന്ത്രി വി.എൻ. വാസവൻ. തലയോലപ്പറമ്പിലെ വീട്ടിലെത്തി മന്ത്രി ബിന്ദുവിന്‍റെ ഭർത്താവ് വിശ്രുതനെയും അമ്മ സീതാലക്ഷ്മിയെയും മക്കളെയും ആശ്വസിപ്പിച്ചു. മെഡിക്കൽ കോളജ് ആശുപത്രിയിൽ ചികിത്സയിലായിരുന്ന മകൾ നവമിയുടെ തുടർ ചികിത്സ പൂർണമായും സർക്കാർ ഏറ്റെടുത്തു നടത്തും. അടുത്ത ദിവസം തന്നെ വീണ്ടും ആശുപത്രിയിൽ പ്രവേശിപ്പിച്ച് വിദഗ്ധ ചികിത്സയ്ക്കുവേണ്ട എല്ലാ സൗകര്യങ്ങളും ഒരുക്കും. ശസ്ത്രക്രിയയ്ക്ക് ആവശ്യമായ നടപടി സ്വീകരിക്കുമെന്നും മന്ത്രി പറഞ്ഞു. ബിന്ദുവിന്‍റെ മകൻ നവനീതിന് മെഡിക്കൽ കോളജിൽതന്നെ താത്കാലികമായി ജോലി നൽകുന്ന കാര്യം ആശുപത്രി വികസന സമിതി ചേർന്ന് തീരുമാനിക്കും. സ്ഥിരമായി ജോലി നൽകുന്ന കാര്യം മന്ത്രിസഭ പരിഗണിക്കും. സംസ്കാരച്ചടങ്ങുകൾക്കുള്ള ചെലവെന്ന നിലയിൽ ആദ്യ സഹായമായി 50,000 രൂപയുടെ ചെക്ക് മന്ത്രി ബിന്ദുവിന്‍റെ അമ്മ സീതാലക്ഷ്മിക്ക് കൈമാറി. ആശുപത്രി വികസന സമിതിയിൽനിന്നുള്ള സഹായമാണ് നൽകിയത്. കൂടുതൽ സഹായധനം നൽകുന്ന കാര്യം അടുത്ത മന്ത്രിസഭാ യോഗത്തിൽ തന്നെ തീരുമാനിക്കുമെന്നും അദ്ദേഹം പറഞ്ഞു. മുഖ്യമന്ത്രി പിണറായി വിജയൻ വ്യാഴാഴ്ചതന്നെ ഇതു സംബന്ധിച്ച നിർദേശം നൽകിയിരുന്നു. ജില്ലാ കളക്ടർ ജോൺ വി. സാമുവൽ, മെഡിക്കൽ കോളജ് പ്രിൻസിപ്പൽ ഡോ. വർഗീസ് പി. പുന്നൂസ്, സൂപ്രണ്ട് ഡോ. ടി.കെ. ജയകുമാർ എന്നിവരും മന്ത്രിയോടൊപ്പമുണ്ടായിരുന്നു.

ജില്ലാ കളക്ടറുടെ റിപ്പോര്‍ട്ട് ഏഴു ദിവസത്തിനുള്ളില്‍

കോട്ടയം: മെഡിക്കല്‍ കോളജ് ആശുപത്രി കെട്ടിടം തകര്‍ന്നുവീണതു സംബന്ധിച്ചു വിശദമായ റിപ്പോര്‍ട്ട് നല്‍കാന്‍ ജില്ലാ കളക്ടര്‍ ജോണ്‍ വി. സാമുവിലിന്‍റെ നേതൃത്വത്തിലുള്ള സംഘം അപകടസ്ഥലം സന്ദര്‍ശിച്ചു. ഏഴു ദിവസത്തിനുള്ളില്‍ റിപ്പോര്‍ട്ട് സമര്‍പ്പിക്കും. 60 വര്‍ഷം പഴക്കമുള്ള കെട്ടിടത്തിന് 12 വര്‍ഷങ്ങള്‍ക്കു മുമ്പു തന്നെ ബലക്ഷയമുണ്ടെന്നു പഞ്ചായത്ത് അധികൃതര്‍ അറിയിച്ചിരുന്നതാണ്. കെട്ടിടം ഉപയോഗിച്ചിരുന്നില്ലെന്നു ബന്ധപ്പെട്ട അധികൃതര്‍ പറയുമ്പോഴും ആയിരക്കണക്കിനു പേര്‍ എത്തുന്ന സ്ഥലത്തെ ഉപയോഗശൂന്യമായി കെട്ടിടത്തില്‍ ആളുകള്‍ പ്രവേശിക്കാതിരിക്കാനുള്ള മുന്‍കരുതല്‍ അധികൃതര്‍ സ്വീകരിച്ചിരുന്നില്ല. സംഭവത്തില്‍ വ്യാപക പ്രതിഷേധം ഉയര്‍ന്നതോടെയാണ് അതിവേഗത്തില്‍ സംഭവത്തെക്കുറിച്ചുള്ള വിശദമായി അന്വേഷണം നടത്തി റിപ്പോര്‍ട്ട് സമര്‍പ്പിക്കാന്‍ ജില്ലാ കളക്ടര്‍ ജോണ്‍ വി. സാമുവേലിന് സര്‍ക്കാര്‍ നിര്‍ദേശം നല്‍കിയത്. ഫയര്‍ എൻജിന്‍ കടന്നുവരാന്‍ വഴിയുണ്ടാകണമെന്ന പുതിയ കെട്ടിട നിര്‍മാണ ചട്ടങ്ങള്‍ പ്രാബല്യത്തിലാകും മുമ്പ് നിര്‍മിച്ച കെട്ടിടമാണ് ഇതെന്നും ബലക്ഷയം സംബന്ധിച്ചുള്ള തദ്ദേശ സ്ഥാപന റിപ്പോര്‍ട്ട് പരിശോധിച്ച ശേഷം വ്യക്തമാക്കാമെന്നും കളക്ടര്‍ പറഞ്ഞു. മെഡിക്കല്‍ കോളജ് ആശുപത്രി സൂപ്രണ്ട് ഡോ. വി. ജയകുമാര്‍, പ്രിന്‍സിപ്പല്‍ ഡോ. വര്‍ഗീസ് പി. പുന്നൂസ്, റവന്യു, പിഡബ്ല്യുഡി ഉദ്യോഗസ്ഥരാണ് കളക്ടറുടെ സംഘത്തില്‍ ഉണ്ടായിരുന്നത്.

ഭീതി വിട്ടുമാറാതെ രോഗികള്‍

ഗാന്ധിനഗര്‍: മെഡിക്കല്‍ കോളജ് ആശുപത്രിയിലുണ്ടായ അപകടത്തിന്‍റെ ഭീതി വിട്ടുമാറാതെ രോഗികള്‍. വ്യാഴാഴ്ച രാവിലെ 10.45നാണ് പതിനാലാം വാര്‍ഡിനു സമീപം ശുചിമുറി നിലംപൊത്തി തലയോലപ്പറമ്പ് സ്വദേശിനി ബിന്ദു മരിച്ചത്. ആ വാര്‍ഡില്‍നിന്ന് മറ്റ് വാര്‍ഡുകളിലേക്ക് മാറ്റിയ രോഗികളുടെ ആശങ്ക ഇപ്പോഴും വിട്ടുമാറിയിട്ടില്ല. സംഭവത്തിന്‍റെ ഞെട്ടലിലാണ് അവിടെ ചികിത്സയില്‍ കഴിഞ്ഞിരുന്ന എറണാകുളം എളക്കര സ്വദേശി സജുകുമാറും ഭാര്യ ഷൈലജയും. സജുവിന് പ്രമേഹം കൂടി കാൽപ്പാദം പഴുത്തതിനെത്തുടര്‍ന്നാണ് ഇവിടെയെത്തിയത്. വ്യാഴാഴ്ച രാവിലെ എട്ടിനാണ് ഇവരെ അഡ്മിറ്റ് ചെയ്തത്. സജുവിന് ശുചിമുറിക്ക് സമീപമാണ് കട്ടില്‍ കിട്ടിയത്. ഇവര്‍ കിടക്കയിലിരിക്കുമ്പോഴാണു കെട്ടിടം ഇടിഞ്ഞുവീണത്. കല്ലുകള്‍ ഇളകി താഴേക്ക് വീഴുന്നത് കണ്ടപ്പോള്‍ ഭയന്നുപോയി. വാര്‍ഡിലുള്ള എല്ലാവരും നിലവിളിച്ചോടാന്‍ തുടങ്ങി. എന്തുചെയ്യണമെന്നറിയാതെ കുഴയുമ്പോഴാണ് തൊട്ടടുത്ത് തന്നെ മറ്റൊരാള്‍ ഇട്ടിട്ടു പോയ സ്ട്രെച്ചര്‍ കണ്ടത്. ഒരു ബന്ധുവിന്‍റെ സഹായത്തോടെ സജുവിനെ സ്ട്രെച്ചറില്‍ കിടത്തി തള്ളിക്കൊണ്ട് ഓടുകയായിരുന്നെന്ന് ഷൈലജ പറഞ്ഞു. ഇതിനിടെ സജുവിന്‍റെ കാലിലെ മുറവിന് പരിക്ക് പറ്റി ചോര പൊട്ടിയൊലിക്കാന്‍ തുടങ്ങി. പിന്നീട് ഡ്രസ് ചെയ്താണു പരിഹരിച്ചത്. ഏതാനും നിമിഷങ്ങള്‍ക്ക് മുമ്പ് സജുവിനെ ബാത്ത്റൂമില്‍ കൊണ്ടുപോകാന്‍ ഷൈലജ ഈ മുറിയില്‍ കയറി വീല്‍ചെയര്‍ എടുത്താണ്. വീല്‍ ചെയര്‍ തിരിച്ചു കൊണ്ടിട്ട് അധികം താമസിക്കാതെ ആ മുറി വീഴുന്നതാണു കണ്ടത്.

ബിന്ദുവിന് നാട് കണ്ണീരോടെ യാത്രാമൊഴിയേകി

തലയോലപ്പറമ്പ്: കോട്ടയം മെഡിക്കല്‍ കോളജ് ആശുപത്രി കെട്ടിടം തകര്‍ന്നുണ്ടായ അപകടത്തില്‍ മരണപ്പെട്ട തലയോലപ്പറമ്പ് ഉമ്മാംകുന്ന് മേപ്പോത്തുകുന്നേല്‍ വിശ്രുതന്‍റെ ഭാര്യ ബിന്ദുവി(52)ന് നാട് കണ്ണീരോടെ വിടയേകി. പോസ്റ്റ്മോര്‍ട്ടത്തിനുശേഷം മുട്ടുചിറയിലെ സ്വകാര്യ ആശുപത്രിയില്‍ സൂക്ഷിച്ചിരുന്ന മൃതദേഹം ഇന്നലെ രാവിലെ 8.45ന് വീട്ടിലെത്തിച്ചപ്പോള്‍ മുതല്‍ ഉമ്മാംകുന്നിലെ വീട്ടിലേക്ക് നാടിന്‍റെ നാനാഭാഗത്തുനിന്നായി വന്‍ജനാവലിയാണ് ബിന്ദുവിന് അന്ത്യാഞ്ജലി അര്‍പ്പിക്കാനായി എത്തിയത്. വിവിധ സ്ഥലങ്ങളില്‍നിന്നു നൂറുകണക്കിനാളുകള്‍ എത്തിയതോടെ ഉള്‍പ്രദേശത്തിലെ വീട്ടിലേക്ക് ജനത്തിനു സുഗമമായി എത്താന്‍ തലയോലപ്പറമ്പ് സെന്‍റ് ജോര്‍ജ് പള്ളിയുടെ മുന്‍വശം മുതല്‍ ബിന്ദുവിന്‍റെ വീടുവരെയുള്ള നിരത്തിലും മൃതദേഹം പൊതുദര്‍ശനത്തിനുവച്ച വീടിനു സമീപത്തെ പുരയിടത്തിലും വൈക്കം ഡിവൈഎസ്പി ടി.ബി. വിജയന്‍റെ നേതൃത്വത്തില്‍ വൈക്കം, തലയോലപ്പറമ്പ്, വെള്ളൂര്‍ പോലീസ് സ്റ്റേഷനിലെ സേനാംഗങ്ങള്‍ ക്രമീകരണം ഏര്‍പ്പെടുത്തി. വീട്ടില്‍ സ്ഥലപരിമിതി ഉള്ളതിനാല്‍ സമീപത്ത് താമസിക്കുന്ന സഹോദരിയുടെ വീട്ടുവളപ്പിലാണു ചിതയൊരുക്കിയത്. ഉച്ചയ്ക്ക് ഒന്നോടെ ആയിരങ്ങളുടെ സാന്നിധ്യത്തില്‍ സംസ്‌കാരം നടത്തി. ജില്ലാ കളക്ടര്‍ രാവിലെ 10.30നു വീട്ടിലെത്തി അന്ത്യോപചാരമര്‍പ്പിച്ചു. പ്രതിപക്ഷ നേതാവ് വി.ഡി. സതീശന്‍, കെപിസിസി പ്രസിഡന്‍റ് സണ്ണി ജോസഫ്, എംഎല്‍എമാരായ സി.കെ. ആശ, മോന്‍സ് ജോസഫ്, തിരുവഞ്ചൂര്‍ രാധാകൃഷ്ണന്‍, എ.പി. അനില്‍കുമാര്‍, ചാണ്ടി ഉമ്മന്‍, പി.സി. വിഷ്ണുനാഥ്, സിപിഐ ജനറല്‍ സെക്രട്ടറി ബിനോയ് വിശ്വം, കെ.സി. ജോസഫ്, പി.സി. തോമസ്, ഷാനിമോള്‍ ഉസ്മാന്‍, നാട്ടകം സുരേഷ്, ഫില്‍സണ്‍ മാത്യൂസ്, ബിജെപി നേതാവ് ശോഭാ സുരേന്ദ്രന്‍ തുടങ്ങി സമൂഹത്തിന്‍റെ നാനാതുറകളിലുള്ളവര്‍ അന്ത്യമോപചാരമര്‍പ്പിച്ചു.

രക്ഷാപ്രവർത്തനം മനഃപൂർവം വൈകിച്ചു: ചാണ്ടി ഉമ്മൻ

കോട്ടയം: ദുരന്തം നടന്നയുടന്‍ രക്ഷാപ്രവര്‍ത്തനം നടത്തിയിരുന്നെങ്കില്‍ ബിന്ദുവിനെ രക്ഷിക്കാമായിരുന്നെന്ന് ചാണ്ടി ഉമ്മന്‍ എംഎല്‍എ. സംഭവമറിഞ്ഞ് ഓടിയെത്തുമ്പോള്‍ ഒരാള്‍ അവശിഷ്ടങ്ങള്‍ക്കടിയില്‍ ഉണ്ടാകാനുള്ള സാധ്യത ആര്‍പ്പൂക്കര പഞ്ചായത്തംഗം റോയി പുതുശേരി സൂചിപ്പിച്ചിരുന്നു. പതിനാലാം വാര്‍ഡിലുണ്ടായിരുന്ന ഒരു കൂട്ടിരിപ്പുകാരിയെ കാണാനില്ലെന്നു കേള്‍ക്കുന്നതായി റോയി പറഞ്ഞപ്പോള്‍ ഒരാളും അകപ്പെട്ടിട്ടില്ലെന്നായിരുന്നു അവിടെയെത്തിയ മന്ത്രിമാരുടെയും ആശുപത്രി അധികൃതരുടെയും ഉറച്ച നിലപാട്. കെട്ടിട അവശിഷ്ടങ്ങളിലുണ്ടായിരുന്ന ഒരു ടൈലില്‍ രക്തക്കറ കണ്ടത് സംശയം വര്‍ധിപ്പിച്ചു. കാണാതായതായി സംശയിക്കുന്ന സ്ത്രീയുടെ ചികിത്സയില്‍ കഴിയുന്ന മകള്‍ നവമിയെ നേരില്‍ കണ്ട് സംശയനിവാരണം വരുത്താന്‍ പതിനാലാം വാര്‍ഡിലേക്ക് പോയി. കുളിക്കാന്‍ പോയ അമ്മ തിരികെ വന്നിട്ടില്ലെന്ന് നവമി പറഞ്ഞു. അര മണിക്കൂര്‍ കാത്തുനിന്നിട്ടും ബിന്ദു മടങ്ങിവരാതായതോടെയാണ് മണ്ണ് മാറ്റി തെരച്ചില്‍ നടത്തണമെന്ന് നിലപാട് താന്‍ കടുപ്പിച്ചത്. തുടര്‍ന്ന് രണ്ടു മണിക്കൂര്‍ വൈകി മണ്ണുമാന്തിയന്ത്രം ആശുപത്രി വാര്‍ഡിലൂടെ കയറ്റിക്കൊണ്ടുവന്നാണ് തെരയാന്‍ തുടങ്ങിയത്. ആ ശ്രമത്തിൽ പതിനഞ്ച് മിനിറ്റ് കഴിഞ്ഞപ്പോള്‍ ബിന്ദുവിന്‍റെ ശരീരം കണ്ടെത്തുകയും ചെയ്തു. അപകടം നടന്നയുടന്‍ ഇത് നടത്തിയിരുന്നെങ്കില്‍ ആ വിലപ്പെട്ട ജീവന്‍ നഷ്ടപ്പെടില്ലായിരുന്നെന്നും ചാണ്ടി ഉമ്മന്‍ പറഞ്ഞു.

ആരോഗ്യവകുപ്പിനോടും ആശുപത്രി അധികൃതരോടും ചോദ്യങ്ങൾ ബാക്കി

കോട്ടയം: ആരോഗ്യവകുപ്പിനോടും മെഡിക്കല്‍ കോളജ് ആശുപത്രി അധികൃതരോടും ചോദ്യങ്ങള്‍ ബാക്കി. നിര്‍മാണം പൂര്‍ത്തിയാക്കിയ കെട്ടിടം തുറന്നുകൊടുക്കാന്‍ വൈകിയതിന് അധികൃതര്‍ ഉത്തരം പറഞ്ഞേപറ്റുവെന്ന് രോഗികളും കൂട്ടിരിപ്പുകാരും പറയുന്നു. കാലപ്പഴക്കം ചെന്ന കെട്ടിടത്തിനു പകരം പണി പൂര്‍ത്തിയാക്കിയ എല്ലാ സജ്ജീകരണങ്ങളോടും കൂടിയ സര്‍ജിക്കല്‍ ബ്ലോക്ക് പൊതുജനങ്ങള്‍ക്ക് തുറന്നുകൊടുക്കാതിരുന്നത് എന്തുകൊണ്ട്. അപകടമുണ്ടായപ്പോള്‍ ധൃതിപിടിച്ചാണ് രോഗികളെ മാറ്റിയത്. നേരത്തെ ഇതാകാമായിരുന്നു. എന്തിനായിരുന്നു കാലതാമസം. ഉദ്ഘാടന മാമാങ്കത്തിന് കാത്തുനില്‍ക്കാതെ പുതിയ കെട്ടിടം പൊതുജനത്തിന് തുറന്നു കൊടുക്കുകയും രോഗികളെ നേരത്തെ മാറ്റുകയും ചെയ്തിരുന്നെങ്കില്‍ ബിന്ദുവിന് ഈ ഗതിയുണ്ടാകില്ലായിരുന്നു.

"വെൽനസ് സമ്മിറ്റ്' ആരോഗ്യ സെമിനാർ നാളെ

കാഞ്ഞിരപ്പള്ളി: സെന്‍റ് ഡൊമിനിക്സ് കത്തീഡ്രലിന്‍റെ ദ്വിശതാബ്ദി ആഘോഷങ്ങളുടെ ഭാഗമായി നാളെ വെൽനസ് സമ്മിറ്റ് എന്ന പേരിൽ ആരോഗ്യ സെമിനാർ നടക്കും. രാവിലെ പത്തുമുതൽ ഉച്ചയ്ക്ക് ഒന്നുവരെ കത്തീഡ്രൽ മഹാജൂബിലി ഹാളിൽ ലൂർദ് ചാരിറ്റബിൾ ട്രസ്റ്റിന്‍റെ നേതൃത്വത്തിൽ നടത്തുന്ന സെമിനാർ ആർച്ച്പ്രീസ്റ്റും കത്തീഡ്രൽ വികാരിയുമായ റവ.ഡോ. കുര്യൻ താമരശേരി ഉദ്ഘാടനം ചെയ്യും. ആതുര സേവനരംഗത്ത് പ്രാഗത്ഭ്യം തെളിയിച്ച ഡോക്ടർമാർ പങ്കെടുക്കും. സമ്മർദങ്ങളെ അതിജീവിക്കാനുള്ള മാർഗങ്ങളെപ്പറ്റി കോട്ടയം മെഡിക്കൽ കോളജ് പ്രിൻസിപ്പൽ ഡോ. വർഗീസ് പുന്നൂസ്, ആഘാതവും മറവിയുമില്ലാത്ത ജീവിതത്തെപ്പറ്റി കോട്ടയം കാരിത്താസ് ആശുപത്രിയിലെ ഡോ. ജോസഫ് സെബാസ്റ്റ്യൻ, ഹൃദയാരോഗ്യത്തെക്കുറിച്ച് കാരിത്താസ് ആശുപത്രിയിലെ ഡോ. ജോണി ജോസഫ് എന്നിവർ സെമിനാർ നയിക്കും. അസിസ്റ്റന്‍റ് വികാരിമാരായ ഫാ. തോമസ് ആലപ്പാട്ടുകുന്നേൽ, ഫാ. ടോണി മുളങ്ങാശേരി, ഡോ. ജോളി പുത്തനങ്ങാടി, മാത്തച്ചൻ മാളിയേക്കൽ എന്നിവർ നേതൃത്വം നൽകുമെന്ന് ദ്വിശതാബ്ദി ആഘോഷങ്ങളുടെ പബ്ലിസിറ്റി കൺവീനർ ഫിലിപ്പ് നിക്കോളാസ് പള്ളിവാതുക്കൽ അറിയിച്ചു.

സെന്‍റ് ഡൊമിനിക്സ് കോളജിൽ സസ്യശാസ്ത്ര ഗവേഷണകേന്ദ്രം ഉദ്ഘാടനവും ദേശീയ സെമിനാറും

കാഞ്ഞിരപ്പള്ളി: സെന്‍റ് ഡൊമിനിക്സ് കോളജിലെ സസ്യശാസ്ത്ര വിഭാഗം എംജി യൂണിവേഴ്സിറ്റിയുടെ കീഴിലെ ഗവേഷണ കേന്ദ്രമായി ഉയർത്തപ്പെടുന്നതിന്‍റെ ഉദ്ഘാടനം കേരള സയൻസ് അക്കാദമി പ്രസിഡന്‍റും പാലോട് ട്രോപ്പിക്കൽ ബൊട്ടാണിക്കൽ ഗാർഡൻ മുൻ ഡയറക്ടറുമായ ഡോ. ജി.എം. നായർ നിർവഹിച്ചു. ഈ ഭൂമിയിലെ ഓരോ ജീവവർഗത്തിനും ആരോഗ്യകരമായ ഒരു പരിസ്ഥിതി സൃഷ്ടിക്കപ്പെടുന്ന ഒറ്റ ആരോഗ്യം എന്ന നൂതനമായൊരു ജൈവവൈവിധ്യ സങ്കല്പമാണ് ഇരുപത്തിയൊന്നാം നൂറ്റാണ്ടിൽ നാം സ്വീകരിക്കേണ്ടതെന്ന് അദ്ദേഹം പറഞ്ഞു. "ജനറ്റിക് ഡൈവേഴ്സിറ്റി: മൈക്രോബ് ടു മെഗാ ഫ്ലോറ' എന്ന വിഷയത്തിൽ കോളജിലെ സസ്യശാസ്ത്ര വിഭാഗം സംസ്ഥാന ജൈവവൈവിധ്യ ബോർഡുമായി സഹകരിച്ച് സംഘടിപ്പിക്കുന്ന ദ്വിദിന ദേശീയ സെമിനാറിന്‍റെ ഉദ്ഘാടനം സംസ്ഥാന ജൈവവൈവിധ്യ ബോർഡ് ഡയറക്ടർ ഡോ. എൻ. അനിൽകുമാർ നിർവഹിച്ചു. മനുഷ്യൻ ഉൾപ്പെടുന്ന മനോഹരമായ ഒരു ജൈവവൈവിധ്യ സങ്കല്പമാണ് മാറുന്ന കാലഘട്ടത്തിന് അനിവാര്യമെന്ന് അദ്ദേഹം അഭിപ്രായപ്പെട്ടു. ജൈവവൈവിധ്യംകൊണ്ട് അനുഗൃഹീതമായ കാഞ്ഞിരപ്പള്ളിയിലെ ഭൂപ്രകൃതിയുടെ പ്രാധാന്യം ഉൾക്കൊണ്ട്, സാമൂഹികപ്രസക്തിയുള്ള ഗവേഷണങ്ങൾക്ക് ഊന്നൽ നൽകാൻ ബോട്ടണി ഡിപ്പാർട്ട്മെന്‍റ് ശ്രമിക്കണമെന്ന് അനുഗ്രഹപ്രഭാഷണം നടത്തിയ മാനേജർ റവ.ഡോ. കുര്യൻ താമരശേരി അഭിപ്രായപ്പെട്ടു. കോളജിന്‍റെ വജ്രജൂബിലി ആഘോഷിക്കുന്ന അവസരത്തിൽ നടക്കുന്ന പ്രസ്തുത സെമിനാറിൽ സസ്യശാസ്ത്ര വിഭാഗത്തിൽ ദീർഘകാല സേവനത്തിനുശേഷം വിരമിച്ച അധ്യാപകരെ ആദരിച്ചു. സസ്യശാസ്ത്ര വിഭാഗത്തിലെ വിദ്യാർഥികൾ ഗവേഷണത്തിലൂടെ നിർമിച്ച ഔഷധമൂല്യവും രുചിയുമേറിയ ഭക്ഷ്യോത്പന്നങ്ങളുടെ പ്രദർശനവും വിപണനവും സെമിനാറിനൊപ്പം ക്രമീകരിച്ചിട്ടുണ്ട്. വിവിധ നെല്ലിനങ്ങളുടെ പ്രദർശനവും സെമിനാറിന്‍റെ ഭാഗമായി സംഘടിപ്പിച്ചിട്ടുണ്ടെന്ന് പരിപാടിയുടെ കൺവീനർ ഡോ. ആർ.ബി. സ്മിത അറിയിച്ചു. രാജ്യത്തിന്‍റെ വിവിധ ഭാഗങ്ങളിൽനിന്നുള്ള വിദഗ്ധർ ക്ലാസുകൾ നയിക്കും. യോഗത്തിൽ പ്രിൻസിപ്പൽ ഡോ. സീമോൻ തോമസ് അധ്യക്ഷത വഹിച്ചു. ബർസാർ റവ.ഡോ. മനോജ് ജോസഫ്, സസ്യശാസ്ത്രവിഭാഗം മുൻ മേധാവിയും മുൻ പ്രിൻസിപ്പലുമായ പ്രഫ. വി.എ. ഇമ്മാനുവൽ, കോളജ് ഐക്യുഎസി കോ-ഓർഡിനേറ്റർ ഡോ. അനൂപ് ടോം തോമസ്, ഡിപ്പാർട്ട്മെന്‍റ് മേധാവി ഡോ. സാലിക്കുട്ടി തോമസ്, കോ-ഓർഡിനേറ്റർ ഡോ. ജ്യോതി ഏബ്രഹാം എന്നിവർ പ്രസംഗിച്ചു.‌

ഫിലാഡല്‍ഫിയയില്‍ മരിച്ച യുവാവിന്‍റെ സംസ്‌കാരം ഇന്ന്

ചങ്ങനാശേരി: അമേരിക്കയിലെ ഫിലാഡല്‍ഫിയയില്‍ കാറപകടത്തില്‍ മരിച്ച പറാല്‍ ചിക്കു മന്ദിറില്‍ ചിക്കു എം. രഞ്ജിത്തിന്‍റെ (39) സംസ്‌കാരം ഇന്ന് നടക്കും. ഇന്നു രാവിലെ 10ന് വീട്ടില്‍ എത്തിക്കുന്ന മൃതദേഹം വൈകുന്നേരം നാലിന് പറാല്‍ എസ്എന്‍ഡിപി ശ്മാനത്തില്‍ സംസ്‌കരിക്കും. ജൂണ്‍ ഒന്നിന് അമേരിക്കയിലാണ് അപകടമുണ്ടായത്. അപകടത്തില്‍ ഭാര്യ രമ്യയ്ക്കും രണ്ടു മക്കള്‍ക്കും പരിക്കേറ്റിരുന്നു. ചിക്കുവിനെ ആശുപത്രിയിലെത്തിച്ചെങ്കിലും മരിച്ചിരുന്നു. രമ്യ അപകടനില തരണം ചെയ്തു. മക്കളുടെ പരിക്ക് ഗുരുതരമല്ല. കുടുംബം സഞ്ചരിച്ച കാറിൽ അമിതവേഗത്തിലെത്തിയ മറ്റൊരു കാര്‍ ഇടിക്കുകയായിരുന്നു. രഞ്ജിത്- ധനികമ്മ ദമ്പതികളുടെ മകനാണ്. സഹോദരന്‍: ചിന്‍റു എം. രഞ്ജിത്. (തൃക്കൊടിത്താനം പഞ്ചായത്ത് ജീവനക്കാരന്‍).

ക്ഷീരവികസന വകുപ്പ് വിവിധ പദ്ധതികളിലേക്ക് അപേക്ഷ ക്ഷണിച്ചു

കോട്ടയം: ക്ഷീര വികസന വകുപ്പിന്‍റെ 2025-26 സാമ്പത്തിക വര്‍ഷത്തിലെ വിവിധ പദ്ധതികള്‍ നടപ്പിലാക്കാന്‍ താത്പര്യമുള്ളവരില്‍നിന്ന് ഓണ്‍ലൈനായി അപേക്ഷ ക്ഷണിച്ചു. 20 വരെ ക്ഷീര വികസന വകുപ്പിന്‍റെ www. ksheerasree.kerala.gov.in എന്ന പോര്‍ട്ടല്‍ മുഖേന രജിസ്റ്റര്‍ ചെയ്ത് അപേക്ഷിക്കാം. പുല്‍കൃഷി വികസനം, മില്‍ക്ക് ഷെഡ് വികസനം, ഡയറി ഫാം ശുചിത്വം മെച്ചപ്പെടുത്തുന്നതിനുള്ള പദ്ധതി തുടങ്ങിയവയ്ക്ക് ഇപ്പോള്‍ അപേക്ഷിക്കാം. 20 സെന്‍റിന് മുകളിലേക്കുള്ള പുല്‍കൃഷി, തരിശുഭൂമിയിലുള്ള പുല്‍കൃഷി, ചോളകൃഷി പദ്ധതികളും, പുല്‍കൃഷിക്ക് വേണ്ടിയുള്ള യന്ത്രവത്കരണ ധനസഹായം, ജലസേചന ധനസഹായം എന്നിവയും ഉള്‍പ്പെടുന്നതാണ് പുല്‍കൃഷി വികസന പദ്ധതി. ഡയറി ഫാമുകളുടെ ആധുനികവത്കരണവും യന്ത്രവത്കരണവും കയര്‍-മത്സ്യബന്ധന മേഖലകള്‍ക്കായുള്ള പ്രത്യേക പുനരധിവാസ പദ്ധതി, പശു യൂണിറ്റ് പദ്ധതികള്‍, യുവജനങ്ങള്‍ക്കായി 10 പശു അടങ്ങുന്ന സ്മാര്‍ട്ട് ഡയറി ഫാം പദ്ധതി, കറവയന്ത്രം വാങ്ങിക്കുന്നതിനുള്ള ധനസഹായം, തൊഴുത്ത് നിര്‍മാണ ധനസഹായം എന്നിവ ഉള്‍പ്പെടുന്ന മില്‍ക്ക് ഷെഡ് വികസന പദ്ധതികള്‍ക്കും ഡയറി ഫാമിന്‍റെ ശുചിത്വം മെച്ചപ്പെടുത്തുന്നതിനായുള്ള പദ്ധതികള്‍ക്കും ksheerasree.kerala.gov. in എന്ന പോര്‍ട്ടലിലൂടെ അപേക്ഷിക്കാം. കൂടുതല്‍വിവരങ്ങള്‍ക്ക് ബ്ലോക്ക് തലത്തില്‍ പ്രവര്‍ത്തിക്കുന്ന ക്ഷീരവികസന യൂണിറ്റുമായി ബന്ധപ്പെടണമെന്ന് ക്ഷീരവികസന വകുപ്പ് ഡയറക്ടര്‍ അറിയിച്ചു.

"ഫാ. ഗ്രിഗറി പരുവപ്പറമ്പില്‍ സഭയ്ക്കും സമൂഹത്തിനും വെളിച്ചം പകര്‍ന്ന കര്‍മയോഗി'

ചങ്ങനാശേരി: സഭയ്ക്കും സമൂഹത്തിനും വെളിച്ചം പകര്‍ന്നു കടന്നുപോയ കര്‍മയോഗിയായിരുന്നു ഫാ. ഗ്രിഗറി പരുവപ്പറമ്പിലെന്ന് അതിരൂപത വികാരിജനറാൾ മോണ്‍. മാത്യു ചങ്ങങ്കേരി. ചെത്തിപ്പുഴ സെന്‍റ് തോമസ് നഴ്‌സിംഗ് കോളജ് സ്ഥാപക ഡയറക്ടറും അതിരൂപത പ്രൊക്യുറേറ്ററുമായിരുന്ന ഫാ. പരുവപ്പറമ്പില്‍ അനുസ്മരണ സമ്മേളനവും സംസ്ഥാനതല ക്വിസ് മത്സരവും ഉദ്ഘാടനം ചെയ്യുകയായിരുന്നു വികാരി ജനറാള്‍. കേരളത്തിലെ നഴ്‌സിംഗ് വിദ്യാഭ്യാസരംഗത്തും അതിരൂപതയ്ക്കും അദ്ദേഹത്തിന്‍റെ സേവനങ്ങള്‍ അവിസ്മരണീയമാണെന്നും അദ്ദേഹം കൂട്ടിച്ചേര്‍ത്തു. കോളജ് എക്‌സിക്യുട്ടീവ് ഡയറക്ടര്‍ ഫാ. ജയിംസ് പി. കുന്നത്ത് അധ്യക്ഷനായിരുന്നു. അസിസ്റ്റന്‍റ് ഡയറക്ടര്‍ ഫാ. ജേക്കബ് അത്തിക്കളം, പ്രിന്‍സിപ്പല്‍ പ്രഫ.ഡോ. ഷൈല ഐപ്പ് വര്‍ഗീസ്, ഫൗണ്ടേഷന്‍ സെക്രട്ടറി ജസ്റ്റിന്‍ ബ്രൂസ്, ഫിലിപ്പ് പരുവപ്പറമ്പില്‍, ജറില്‍ ചെറിയാന്‍, വൈസ് പ്രിന്‍സിപ്പല്‍ ഷേര്‍ളി സെബാസ്റ്റ്യന്‍, ജോമോള്‍ സ്‌ക്കറിയ എന്നിവര്‍ പ്രസംഗിച്ചു ഫാ. പരുവപ്പറമ്പില്‍ മെമ്മോറിയല്‍ ക്വിസ് മത്സരത്തില്‍ ഒന്നും രണ്ടും മൂന്നും സ്ഥാനങ്ങള്‍ ഗവൺമെന്‍റ് കോളജ് ഓഫ് നഴ്‌സിംഗ് തിരുവനന്തപുരം, ഹോളിഫാമിലി കോളജ് ഓഫ് നഴ്‌സിംഗ് മുതലക്കോടം, ലൂര്‍ദ് കോളജ് ഓഫ് നഴ്‌സിംഗ് എറണാകുളം. എന്നിവരാണ് നേടിയത്.

ചെത്തിപ്പുഴ ആശുപത്രിയില്‍ മള്‍ട്ടി ഡിസിപ്ലിനറി ഐസിയു തുറന്നു; മധ്യകേരളത്തിൽ ആദ്യം

ചങ്ങനാശേരി: ചെത്തിപ്പുഴ സെന്‍റ് തോമസ് ആശുപത്രിയില്‍ അന്തര്‍ദേശീയ നിലവാരമുള്ള മധ്യകേരളത്തിലെ ആദ്യ മള്‍ട്ടി ഡിസിപ്ലിനറി ഐസിയു തുറന്നു. മന്ത്രി വി.എന്‍. വാസവന്‍ ഉദ്ഘാടനം ചെയ്തു. ഓര്‍ഗന്‍ ഫേയ്‌ലിയര്‍, സെപ്‌സിസ്ട്രാമ, സ്‌ട്രോക് എന്നീ ഗുരുതരാവസ്ഥയിലുള്ള രോഗികള്‍ക്ക് സമഗ്രചികിത്സ വേഗത്തില്‍ ലഭ്യമാക്കുന്ന അത്യാധുനിക സംവിധാനമാണ് മള്‍ട്ടി ഡിസിപ്ലിനറി ഐസിയുവില്‍ ക്രമീകരിച്ചിരിക്കുന്നത്. പ്രത്യേക പരിശീലനം നേടിയ ക്രിട്ടിക്കല്‍ കെയര്‍ ഡോക്ടേഴ്‌സിന്റെ സേവനം ഇരുപത്തിനാല് മണിക്കൂറും ലഭ്യമാണ്. പക്ഷാഘാതം, പരിക്ക്, ശസ്ത്രക്രിയ എന്നിവക്കുശേഷം ദൈനംദിന ജീവിതത്തില്‍ ശാരീരിക ശേഷി വീണ്ടെടുക്കാന്‍ സഹായിക്കുന്ന ഫിസിക്കല്‍ മെഡിസിന്‍ റീഹാബിറ്റേഷന്‍ യൂണിറ്റ്, ഉറക്കത്തെ ബാധിക്കുന്ന പ്രശ്‌നങ്ങളെ കണ്ടെത്തുകയും ചികിത്സ ലഭ്യമാക്കുകയും ചെയ്യുന്ന സ്ലിപ് ലാബ് എന്നിവയും ഉദ്ഘാടനം ആരംഭിച്ചു. ആശുപത്രി ദിനാചരണത്തിന്‍റെ ഭാഗമായി സംഘടിപ്പിച്ച സമ്മേളനത്തില്‍ ആര്‍ച്ച്ബിഷപ് മാര്‍ ജോസഫ് പെരുന്തോട്ടം അധ്യക്ഷത വഹിച്ചു. ഹോസ്പിറ്റല്‍ എക്‌സിക്യൂട്ടീവ് ഡയറക്ടര്‍ ഫാ. ജയിംസ് പി കുന്നത്ത്, അസോസിയേറ്റ് ഡയറക്ടറുമാരായ ഫാ. ജോഷി മുപ്പതില്‍ച്ചിറ, ഫാ. ജേക്കബ് അത്തിക്കളം, ഫാ. ജോസ് പുത്തന്‍ച്ചിറ, മെഡിക്കല്‍ സൂപ്രണ്ട് ഡോ. തോമസ് സഖറിയ, വയലാര്‍ ശരത് ചന്ദ്ര വര്‍മ എന്നിവര്‍ പ്രസംഗിച്ചു.

തുരുത്തി-മുളയ്ക്കാംതുരുത്തി-വാലടി റോഡില്‍ ബസ് സര്‍വീസ് നിലച്ചിട്ട് അഞ്ചുനാൾ

ചങ്ങനാശേരി: തുരുത്തി-മുളയ്ക്കാംതുരുത്തി-വാലടി റോഡില്‍ ബസ് സര്‍വീസ് നിലച്ചിട്ട് അഞ്ചുദിനം; പ്രതിഷേധ പരിപാടികളുമായി ജനങ്ങള്‍ രംഗത്ത്. റോഡ് തകര്‍ന്നു യാത്ര അപകട ഭീഷണിയിലായതിനെത്തുടര്‍ന്നാണ് കെഎസ്ആര്‍ടിസി ബസ് സര്‍വീസ് നിര്‍ത്തിവച്ചത്. ബസ് നിര്‍ത്തിയതോടെ വിദ്യാര്‍ഥികളടക്കം യാത്രക്കാരുടെ യാത്രാദുരിതം വര്‍ധിച്ചു. തകര്‍ന്നു ചെളിക്കുളമായ റോഡിലൂടെ കിലോമീറ്ററുകളോളം സഞ്ചരിച്ച് തുരുത്തി, പുന്നമൂട് ജംഗ്ഷനിലെത്തിയാണ് ആളുകള്‍ ചങ്ങനാശേരി, കോട്ടയം ഭാഗങ്ങളിലേക്കു പോകുന്നത്. തകര്‍ന്ന റോഡിലൂടെ അത്യാഹിത രോഗികള്‍, ഗര്‍ഭിണികള്‍ തുടങ്ങിയവരെ യഥാസമയം ആശുപത്രികളിലെത്തിക്കാനും കഴിയുന്നില്ല. അടിയന്തരമായി റോഡിലെ കുഴികളടച്ച് ബസ് സര്‍വീസുകള്‍ പുനരാരംഭിച്ച് ജനങ്ങളുടെ യാത്രാക്ലേശം പരിഹരിക്കണമെന്നാണ് നാട്ടുകാര്‍ ആവശ്യപ്പെടുന്നത്. ചങ്ങനാശേരിയില്‍നിന്നുള്ള കെഎസ്ആര്‍ടിസി ബസുകള്‍ പറാല്‍-കുമരങ്കരി-വാലടി വഴി കാവാലത്തേക്ക് സര്‍വീസ് നടത്തുന്നുണ്ട്. നാരകത്ര, കൃഷ്ണപുരം ഉള്‍പ്പെടെ വിവിധ ഭാഗങ്ങളില്‍ പാടശേഖരങ്ങളിലെ വെള്ളക്കെട്ട് റോഡിലേക്ക് കയറിയ നിലയിലാണ്. തുരുത്തി-പുന്നമൂട് ജംഗ്ഷനില്‍ ഇന്ന് പ്രതിഷേധ സദസ് തുരുത്തി-മുളയ്ക്കാംതുരുത്തി-വാലടി-കാവാലം റോഡ് നിര്‍മാണം അനിശ്ചിതമായി നീണ്ടുപോകുന്നതില്‍ പ്രതിഷേധിച്ച് യുഡിഎഫ് തുരുത്തി മേഖലാ കമ്മിറ്റിയുടെ നേതൃത്വത്തില്‍ ഇന്നു കരിദിനം ആചരിക്കും. വൈകുന്നേരം നാലിന് തുരുത്തി പുന്നമൂട് ജംഗ്ഷനില്‍ പ്രതിഷേധ സായാഹ്ന സദസ് സംഘടിപ്പിക്കും. കൊടിക്കുന്നില്‍ സുരേഷ് എംപി ഉദ്ഘാടനം ചെയ്യും. തുടര്‍ന്ന് പന്തംകൊളുത്തി പ്രകടനം നടത്തും. സമരപരിപാടികള്‍ക്ക് രൂപം നല്‍കുന്നതിനായി ചേര്‍ന്ന യോഗത്തില്‍ കോണ്‍ഗ്രസ് മണ്ഡലം പ്രസിഡന്‍റ് റോജി ആന്‍റണി അധ്യക്ഷത വഹിച്ചു. ബ്ലോക്ക് പഞ്ചായത്ത് മെംബർമാരായ മാത്തുക്കുട്ടി പ്ലാത്താനം, വര്‍ഗീസ് ആന്‍റണി, പാപ്പച്ചന്‍ നേര്യംപറമ്പില്‍, സുരേഷ് തോട്ടയില്‍, തങ്കച്ചന്‍ പാലത്ര, ബെറ്റ്‌സി തോമസ്, ബാബുക്കുട്ടന്‍ മുയ്യപ്പള്ളി, വി.കെ. വിജയന്‍, ടോം ജേക്കബ്, പ്രദീപ് പുളിന്താനം, ബാബുരാജ് ശങ്കരമംഗലം, മെജി വര്‍ഗീസ്, സുനില്‍ കവിതാഴെ എന്നിവര്‍ പ്രസംഗിച്ചു. റോഡ് നിര്‍മാണം: ജനാഭിപ്രായം അറിയാൻ യോഗം ഇന്ന് തുരുത്തി-വാലടി-വീയപുരം റോഡിന്‍റെ പുനര്‍നിര്‍മാണവുമായി ബന്ധപ്പെട്ട് ജനങ്ങളുടെ അഭിപ്രായം അറിയുന്നതിനായി തുരുത്തി ഡെവലപ്പ്‌മെന്‍റ് ആൻഡ് കള്‍ച്ചറല്‍ സൊസൈറ്റിയുടെ നേതൃത്വത്തില്‍ ജോബ് മൈക്കിള്‍ എംഎല്‍എയുടെ അധ്യക്ഷതയില്‍ ഇന്നു മൂന്നിന് മുളയ്ക്കാംതുരുത്തി സെന്‍റ് ജോര്‍ജ് ക്‌നാനായ പള്ളി ഹാളില്‍ യോഗം വിളിച്ചുചേര്‍ത്തിട്ടുണ്ട്. റോഡിലെ വെള്ളക്കെട്ടില്‍ വള്ളമിറക്കി യൂദാപുരം ഇടവകയുടെ വേറിട്ട പ്രതിഷേധം തുരുത്തി: തുരുത്തി-മുളയ്ക്കാംതുരുത്തി-വാലടി റോഡ് പുനര്‍നിര്‍മാണം വൈകുന്നതിനെതിരേ യൂദാപുരം സെന്‍റ് ജൂഡ് ഇടവകയുടെ നേതൃത്വത്തില്‍ റോഡിലെ വെള്ളക്കെട്ടില്‍ വള്ളം ഇറക്കി പ്രതിഷേധിച്ചു. റോഡിന്‍റെ പുനര്‍നിര്‍മാണം ഉടനെ ആരംഭിക്കണമെന്നും അല്ലെങ്കില്‍ ശക്തമായ സമരപരിപാടികള്‍ ആരംഭിക്കുമെന്നും ഇടവകാംഗങ്ങള്‍ പറഞ്ഞു. സെന്‍റ് ജൂഡ് പള്ളിയില്‍ നിന്നാരംഭിച്ച മാര്‍ച്ച് ആലുംമൂട് ഭാഗത്ത് സമാപിച്ചു. തുടര്‍ന്നാണ് വള്ളം ഇറക്കി പ്രതിഷേധിച്ചത്. സെന്‍റ് ജൂഡ് പള്ളി വികാരി ഫാ. ഫിലിപ്പ് കാഞ്ചിക്കല്‍ ഉദ്ഘാടനം ചെയ്തു. പഞ്ചായത്തംഗം ശശികുമാര്‍ തത്തനപ്പള്ളി, അരവിന്ദാക്ഷന്‍ നായര്‍, അഡ്വ. ആന്‍റണി വര്‍ഗീസ്, ജോസി ആലഞ്ചേരി എന്നിവര്‍ പ്രസംഗിച്ചു.

കടുത്തുരുത്തിയിൽ നാളെ ചരിത്രസെമിനാർ

കടുത്തുരുത്തി: കടുത്തുരുത്തി കേന്ദ്രമായി പ്രവര്‍ത്തിക്കുന്ന വടക്കുംകൂര്‍ ഹിസ്റ്ററി പ്രമോഷന്‍ സൊസൈറ്റി കൗണ്‍സിലിന്‍റെ നേതൃത്വത്തില്‍ നാളെ കടുത്തുരുത്തിയില്‍ വടക്കുംകൂര്‍ രാജ്യവും കടുത്തുരുത്തിയും എന്ന വിഷയത്തില്‍ സംസ്ഥാനതല ചരിത്രസെമിനാറും വടക്കുംകൂറിന്‍റെ ചരിത്രവും കടുത്തുരുത്തിയുമായുള്ള പൗരാണിക ബന്ധങ്ങളും വ്യക്തമാക്കാന്‍ കഴിയുന്ന വിധത്തില്‍ തയാറാക്കിയ ചരിത്രഗ്രന്ഥത്തിന്‍റെ പ്രീ പബ്ലിക്കേഷന്‍ പ്രഖ്യാപനവും നടക്കും. എഡി 1100 മുതല്‍ 1800 വരെ 700 വര്‍ഷക്കാലം വടക്കുംകൂര്‍ രാജ്യഭരണം നടത്തിയിരുന്നതായി പറയുന്നു. കടുത്തുരുത്തി സെന്‍റ് മേരീസ് ഫൊറോന താഴത്തുപള്ളി പാരിഷ് ഹാളില്‍ രാവിലെ 11.30നു നടക്കുന്ന സെമിനാർ ഉദ്ഘാടനം ഗോവ ഗവര്‍ണര്‍ പി.എസ്. ശ്രീധരന്‍പിള്ള നിര്‍വഹിക്കും. മോന്‍സ് ജോസഫ് എംഎല്‍എ അധ്യക്ഷത വഹിക്കുന്ന സമ്മേളനത്തില്‍ ആര്‍ച്ച്ബിഷ്പ് മാര്‍ മാത്യൂ മൂലക്കാട്ട്, ബിഷപ് മാര്‍ ജോസഫ് കല്ലറങ്ങാട്ട് എന്നിവര്‍ അനുഗ്രഹപ്രഭാഷണം നടത്തും. ജസ്റ്റിസ് സിറിയക് ജോസഫ്, മുന്‍ ഡിജിപി ഡോ.അലക്‌സാണ്ടര്‍ പി.ജേക്കബ്, സ്വാഗതസംഘം ചെയര്‍മാന്‍ കടുത്തുരുത്തി സെന്‍റ് മേരീസ് ഫൊറോനാ താഴത്തുപള്ളി വികാരി ഫാ.മാത്യു ചന്ദ്രന്‍കുന്നേല്‍, വടക്കുംകൂര്‍ രാജവംശ കുടുംബാംഗം കെ.എസ്. സോമവര്‍മരാജ, സൂര്യകാലടിമനയിലെ സൂര്യന്‍ സുബ്രഹ്‌മണ്യന്‍ നമ്പൂതിരിപ്പാട് എന്നിവര്‍ പ്രസംഗിക്കും. സെമിനാറിനു മുന്നോടിയായി 10.30ന് ശില്‍പശാലയോടെ പരിപാടി ആരംഭിക്കും. മുന്‍ ഡിജിപി ഡോ.അലക്‌സാണ്ടര്‍ പി. ജേക്കബ് വടക്കുംകൂര്‍ വിഷയാവതരണം നടത്തും. കേരള പ്രാദേശിക ചരിത്രപഠനസമിതി സംസ്ഥാന സെക്രട്ടറി രാജീവ് പള്ളിക്കോണം പ്രതികരണ പ്രഭാഷണം നടത്തും. വലിയപള്ളി വികാരി ഫാ.ജോണ്‍സണ്‍ നീലനിരപ്പേല്‍, കെ.ജി. രാജു ഐഎഎസ്, സണ്ണി എം. കപിക്കാട്, ശ്രീകുമാര്‍ തെക്കേടത്ത്, പ്രസാദ് ആരിശേരില്‍, ഡോ. വേണുഗോപാല്‍, എം.കെ. സാംബുജി, രാധാകൃഷ്ണപ്പണിക്കര്‍ ചന്ദ്രത്തില്‍ എന്നിവര്‍ പ്രസംഗിക്കും.

ബഷീർ അനുസ്മരണം നാളെ

തലയോലപ്പറമ്പ്: വൈക്കം മുഹമ്മദ് ബഷീറിന്‍റെ 31-ാം ചരമദിനമായ നാളെ തലയോലപ്പറമ്പിൽ ബഷീർ അനുസ്മരണം വിവിധ പരിപാടികളോടെ ആചരിക്കും. രാവിലെ 9.30ന് തലയോലപ്പറമ്പ് ഫെഡറൽ നിലയത്തിനുള്ളിൽ ബഷീർ ഉപയോഗിച്ചിരുന്ന ചാരുകസേരയിൽ ബഷീർ ഛായാചിത്രമൊരുക്കി പുഷ്പാർച്ചനയും ബഷീർ കൃതികളുടെ വായനയും നടക്കും. വൈകുന്നേരം നാലിനു ബഷീർ അനുസ്മരണ സമ്മേളനം പ്രതിപക്ഷ നേതാവ് വി.ഡി.സതീശൻ ഉദ്ഘാടനം ചെയ്യും.

സ്വീകരണം നൽകി

വൈക്കം: ചെമ്പ് സെന്‍റ് തോമസ് യാക്കോബായ സുറിയാനിപള്ളിയിൽ ശ്രേഷ്ഠ കാതോലിക്ക മാർ ബസേലിയോസ് ജോസഫ് ബാവയ്ക്ക് സ്വീകരണം നൽകി. കണ്ടനാട് ഭദ്രാസനാധിപൻ ഡോ. മാത്യൂസ് മാർ ഈവാനിയോസ് മെത്രാപ്പോലീത്തയുടെ അധ്യക്ഷതയിൽ നടന്ന അനുമോദന സമ്മേളനം സി.കെ. ആശ എംഎൽഎ ഉദ്ഘാടനം ചെയ്തു. മോൻസ് ജോസഫ് എംഎൽഎ, ഫാ.ഹോർമീസ് തോട്ടക്കാട്ട്ക്കര, പഞ്ചായത്ത് പ്രസിഡന്‍റ് സുകന്യ സുകുമാരൻ തുടങ്ങിയ വർ പ്രസംഗിച്ചു.

ദുക്റാന തിരുനാൾ ഭക്തിനിർഭരമായി

ചെമ്പ്: വൈക്കം ചെമ്പ് സെന്‍റ് തോമസ് കത്തോലിക്ക പളളിയിലും സെന്‍റ് തോമസ് യാക്കോബായപള്ളികളിലേയും ദുഖ്റാന തിരുനാൾ ആഘോഷം ഭക്തിനിർഭരമായി. ഇരു ദേവാലയങ്ങളിലും വിശുദ്ധന്‍റെ അനുഗ്രഹം തേടി തിരുനാൾ കുർബാനയിലും പ്രദക്ഷിണത്തിലും നൂറുക ണക്കിനാളുകൾ പങ്കെടുത്തു. കുരിശടികളിലേക്കു നടന്ന പ്രദക്ഷിണത്തിന് വർണക്കുടകൾ , വാദ്യഘോഷം എന്നിവ മിഴിവേകി.വിശുദ്ധന്‍റെ തിരുസ്വരൂപത്തിൽ പുഷ്പവൃഷ്ടി നടത്തിയും മെഴുകുതിരി തെളിച്ചും നേർച്ചകൾ സമർപിച്ചും വിശ്വാസികൾ അനുഗ്രഹം തേടി. തിരുനാളിനോടനുബന്ധച്ചു നടന്ന നേർച്ചസദ്യയിലും നൂറുകണക്കിനു വിശ്വാസികൾ പങ്കെടുത്തു. സെന്‍റ് തോമസ് കത്തോലിക്ക പള്ളിയിൽ തിരുക്കർമങ്ങൾക്ക് വികാരി ഫാ. ഹോർമിസ് തോട്ടക്കര,സഹവികാരി ഫാ. ഷൈജുആട്ടോക്കാരൻ സിഎംഐഎന്നിവർ കാർമികത്വം വഹിച്ചു. സെന്‍റ് തോമസ് യാക്കോബായ പള്ളിയിൽ വികാരി ഫാ.ജോയി ആനക്കുഴി, ഫാ. പോൾ തോട്ടയ്ക്കാട്ട്, റവ.ഡോ. മാത്യൂസ് മോർ ഇവാനിയോസ്, ട്രസ്റ്റി കുര്യാക്കോസ് പാലത്തിങ്കൽ, സെക്രട്ടറി ഇ.എം.സാബു തുടങ്ങിയവർ നേതൃത്വം നൽകി.

കല്ലറയില്‍ വിരിപ്പുകൃഷി ഉപേക്ഷിക്കേണ്ടിവരുമോ?

കടുത്തുരുത്തി: തുടര്‍ച്ചയായ മഴയും വെള്ളക്കെട്ടും കല്ലറയില്‍ ഈ വര്‍ഷത്തെ വിരിപ്പ് (വര്‍ഷ) കൃഷി ആരംഭിക്കാന്‍ വൈകും. പാടശേഖരത്തെ വെള്ളം വറ്റാത്തതിനാല്‍ വിത്ത് വിതയ്ക്കാൻ നിലം ഒരുക്കുന്നതുള്‍പ്പെടെയുള്ള അടിസ്ഥാന സൗകര്യങ്ങള്‍ ഉറപ്പാക്കുന്നതിനുള്ള തടസമാണ് കൃഷി വൈകാന്‍ കാരണമാകുന്നത്. ജൂണ്‍ പകുതിയോടെ വിത തുടങ്ങണമെന്നായിരുന്നു കര്‍ഷകരുടെയും കൃഷിവകുപ്പ് ഉദ്യോഗസ്ഥരുടെയും തീരുമാനം. കാലാവസ്ഥയില്‍ വന്ന മാറ്റം കര്‍ഷകരുടെ കണക്കുകൂട്ടലാകെ താളം തെറ്റിച്ച അവസ്ഥയാണ്. ഇരുപ തിലധികം പാടങ്ങളിലായി 685 ഹെക്ടറിലാണ് ഈ വര്‍ഷം വിരിപ്പുകൃഷി ചെയ്യാൻ തീരുമാനിച്ചിരുന്നത്. വിരിപ്പുകൃഷി ചെയ്യുന്ന പാടശേഖരങ്ങളിലധികവും മുണ്ടാര്‍ മേഖലയിലാണ്. ചില പാടശേഖരങ്ങളില്‍ വിരിപ്പുകൃഷിക്കുള്ള ഒരുക്കങ്ങളെല്ലാം നടന്നിരുന്നതാണ്. ഇതിനിടെയാണ് കഴിഞ്ഞ മേയ് 26ന് മഴ തുടങ്ങിയത്. ഇതോടെ കരിയാറും കെവി കനാലും ഉള്‍പ്പെടെയുള്ള പുഴകളും തോടുകളും കരകവിഞ്ഞു. പല പാടശേഖരങ്ങളിലും ബണ്ട് കവിഞ്ഞ് വെള്ളം കയറി. മുണ്ടാര്‍ ഒന്നാം ബ്ലോക്ക്, പുലയ കോളനി, കങ്ങള-രണ്ട് എന്നീ പാടശേഖരങ്ങളില്‍ പെട്ടിയും പറയും തള്ളിപ്പോയതോടെ പാടങ്ങള്‍ വെള്ളത്തില്‍ മുങ്ങി. കോലത്തുകരി-വലിയകരി, ആനച്ചാംകുഴി, തട്ടാപറമ്പ് തെക്ക്, കങ്ങഴ-എട്ട് എന്നിങ്ങനെ നിരവധി പാടശേഖരങ്ങളില്‍ മടവീഴ്ചയുണ്ടായി. വെള്ളം കുറഞ്ഞാല്‍ മാത്രമേ പാടശേഖരത്തെ മോട്ടോറുകള്‍ പ്രവര്‍ത്തിപ്പിക്കാനാകൂവെന്നാണ് കര്‍ഷകര്‍ പറയുന്നത്. ഉയരമുള്ള ശക്തമായ പുറംബണ്ടുകള്‍ ഇല്ലാത്തതാണ് കര്‍ഷകര്‍ നേരിടുന്ന മറ്റൊരു പ്രതിസന്ധി. പരിഹാരം കാണണം തോടുകളെല്ലാം പോളയും പായലും വളര്‍ന്ന് അടഞ്ഞുകിടക്കുകയാണ്. ഇത് തെളിക്കാത്തതുമൂലം വെള്ളം കായലിലേക്ക് ഒഴുകിപ്പോകാന്‍ മാര്‍ഗമില്ല. കാര്‍ഷിക മേഖലയെ ആശ്രയിച്ചു ജീവിക്കുന്നവരാണിവിടുത്തെ ജനങ്ങള്‍. കൃഷി മുടങ്ങിയാല്‍ കര്‍ഷകരുടെ ഉപജീവനമാര്‍ഗമാണ് ഇല്ലാതാവുന്നത്. സര്‍ക്കാരും കൃഷി വകുപ്പും അടിയന്തരമായി ഇടപെട്ടില്ലെങ്കില്‍ വിരിപ്പുകൃഷി ഉപേക്ഷിക്കേണ്ട അവസ്ഥയാണുള്ളതെന്ന് മുണ്ടാര്‍ പറമ്പന്‍കരി പാടശേഖരത്തിലെ കര്‍ഷകനായ സലി കാക്കത്തുരുത്തേല്‍ പറഞ്ഞു.

തെരുവുനായ ആക്രമണം: രണ്ടുപേർക്ക് കടിയേറ്റു

കടുത്തുരുത്തി: ആപ്പാഞ്ചിറ പോളിടെക്‌നിക്ക് കോളജിനു സമീപം തെരുവുനായയുടെ ആക്രമണം. പോളിടെക്‌നിക്ക് ജീവനക്കാരനും മുക്കം സ്വദേശിക്കുമാണ് നായയുടെ കടിയേറ്റത്. ഇന്നലെ വൈകുന്നേരം ആറോടെയാണ് സംഭവം. പോളിടെക്നിക്ക് കോളജിനു സമീപത്ത് നില്‍ക്കുകയായിരുന്ന സെക്യൂരിറ്റി ജീവനക്കാരനെ കടിച്ച നായ സമീപത്തു നിന്ന പടിഞ്ഞാറേമുക്ക് തങ്കപ്പ (70) നെയും കടിക്കുകയായിരുന്നുവെന്ന് ദൃക്‌സാഷികള്‍ പറഞ്ഞു. തുടര്‍ന്ന് ഇവിടെനിന്ന് ഓടിപ്പോയ നായ വഴിയിലുണ്ടായിരുന്ന മറ്റു നായ്ക്കളെയും കടിച്ചതായി പറയുന്നു. നായയെ കണ്ടെത്താനായിട്ടില്ല. ഈ ഭാഗത്ത് തെരുവ് നായശല്യം രൂക്ഷമാണെന്ന് നാട്ടുകാര്‍ പറയുന്നു. കടിയേറ്റ ഇരുവരും വൈക്കം താലൂക്ക് ആശുപത്രിയില്‍ ചികിത്സ തേടി.

കടുത്തുരുത്തി സെന്‍റ് മേരീസ് ഫൊറോനാ താഴത്തുപള്ളിയില്‍ ദുക്റാന തിരുനാള്‍ ആഘോഷിച്ചു

കടുത്തുരുത്തി: കടുത്തുരുത്തി സെന്‍റ് മേരീസ് ഫൊറോനാ താഴത്തുപള്ളിയില്‍ ദുക്റാന തിരുനാള്‍ ആഘോഷിച്ചു. ഭാരതസഭയുടെ പിതാവായ വിശുദ്ധന്‍റെ ഓര്‍മദിനം സഭാദിനമായിട്ടാണ് ആചരിക്കുന്നത്. ഇന്നലെ രാവിലെ നടന്ന വിശുദ്ധ കുര്‍ബാനയ്ക്കു ഫൊറോനാ വികാരി ഫാ. മാത്യു ചന്ദ്രന്‍കുന്നേല്‍ കാര്‍മികത്വം വഹിച്ചു സന്ദേശം നല്‍കി. വിശുദ്ധ കുര്‍ബാനയെത്തുടര്‍ന്ന് വിശുദ്ധന്‍റെ തിരുസ്വരൂപവും വഹിച്ചുക്കൊണ്ടു നടന്ന പ്രദക്ഷിണത്തില്‍ നൂറുകണക്കിന് വിശ്വാസികള്‍ പങ്കെടുത്തു. തിരുനാള്‍ റാസയ്ക്കു സഹവികാരി ഫാ.ജോണ്‍ നടുത്തടം കാര്‍മികത്വം വഹിച്ചു. സഹവികാരി ഫാ.ഏബ്രഹാം പെരിയപ്പുറം സന്ദേശം നല്‍കി.

വനമഹോത്സവം സംസ്ഥാനതല ഉദ്ഘാടനം നിർവഹിച്ചു

കോട്ടയം: കേരളത്തില്‍ വനവിസ്തൃതി വര്‍ധിപ്പിക്കുക എന്നത് സാധ്യമല്ലെങ്കിലും ട്രീ ബാങ്കിംഗ് പോലുള്ള പദ്ധതികളിലൂടെ മരം നടാനുള്ള പ്രേരണ ഉണര്‍ത്തി മരങ്ങളെ മനുഷ്യന്‍റെ മിത്രങ്ങളാക്കണമെന്ന് മന്ത്രി എ.കെ. ശശീന്ദ്രന്‍. കോട്ടയം സിഎംഎസ് കോളജില്‍ വനം-വന്യജീവി വകുപ്പ് സംഘടിപ്പിച്ച വനമഹോത്സവം 2025ന്‍റെ സംസ്ഥാനതല ഉദ്ഘാടനം നിര്‍വഹിച്ച് പ്രസംഗിക്കുകയായിരുന്നു അദ്ദേഹം. അഡീഷണല്‍ പ്രിന്‍സിപ്പല്‍ ചീഫ് ഫോറസ്റ്റ് കണ്‍സര്‍വേറ്റര്‍ ആന്‍ഡ് ഹെഡ് ഓഫ് ഫോറസ്റ്റ് ഫോഴ്സ് ഡോ. പി. പുകഴേന്തി അധ്യക്ഷത വഹിച്ചു. വനംവകുപ്പ് നടപ്പാക്കുന്ന ട്രീ ബാങ്കിംഗ് പദ്ധതിയുടെ സംസ്ഥാനതല ഉദ്ഘാടനം പദ്ധതിയുടെ അഞ്ചു ഗുണഭോക്താക്കള്‍ക്ക് ചന്ദനത്തൈ വിതരണം ചെയ്തു മന്ത്രി നിര്‍വഹിച്ചു. ഇക്കോ - ടൂറിസം വെബ്സൈറ്റ് ഉദ്ഘാടനം, മറയൂര്‍ ചന്ദന സംരക്ഷണ പ്രവര്‍ത്തനങ്ങള്‍ സംബന്ധിച്ച മിസ്റ്റിക് മറയൂര്‍ എന്ന ഡോക്യുമെന്‍ററിയുടെ പ്രകാശനം എന്നിവയും നടന്നു.

‘ഫാ. ഗ്രിഗറി പരുവപ്പറമ്പില്‍ സഭയ്ക്കും സമൂഹത്തിനും വെളിച്ചം പകര്‍ന്ന കര്‍മയോഗി’

ചങ്ങനാശേരി: സഭയ്ക്കും സമൂഹത്തിനും വെളിച്ചം പകര്‍ന്നു കടന്നുപോയ കര്‍മയോഗിയായിരുന്നു ഫാ. ഗ്രിഗറി പരുവപ്പറമ്പിലെന്ന് അതിരൂപത വികാരിജനറാൾ മോണ്‍. മാത്യു ചങ്ങങ്കേരി. ചെത്തിപ്പുഴ സെന്‍റ് തോമസ് നഴ്‌സിംഗ് കോളജ് സ്ഥാപക ഡയറക്ടറും അതിരൂപത പ്രൊക്യുറേറ്ററുമായിരുന്ന ഫാ. പരുവപ്പറമ്പില്‍ അനുസ്മരണ സമ്മേളനവും സംസ്ഥാനതല ക്വിസ് മത്സരവും ഉദ്ഘാടനം ചെയ്യുകയായിരുന്നു വികാരി ജനറാള്‍. കേരളത്തിലെ നഴ്‌സിംഗ് വിദ്യാഭ്യാസ രംഗത്തും അതിരൂപതയ്ക്കും അദ്ദേഹത്തിന്‍റെ സേവനങ്ങള്‍ അവിസ്മരണീയമാണെന്നും അദ്ദേഹം കൂട്ടിച്ചേര്‍ത്തു. കോളജ് എക്‌സിക്യുട്ടീവ് ഡയറക്ടര്‍ ഫാ. ജയിംസ് പി. കുന്നത്ത് അധ്യക്ഷനായിരുന്നു. അസിസ്റ്റന്‍റ് ഡയറക്ടര്‍ ഫാ. ജേക്കബ് അത്തിക്കളം, പ്രിന്‍സിപ്പല്‍ പ്രഫ.ഡോ. ഷൈല ഐപ്പ് വര്‍ഗീസ്, ഫൗണ്ടേഷന്‍ സെക്രട്ടറി ജസ്റ്റിന്‍ ബ്രൂസ്, ഫിലിപ്പ് പരുവപ്പറമ്പില്‍, ജറില്‍ ചെറിയാന്‍, വൈസ് പ്രിന്‍സിപ്പല്‍ ഷേര്‍ളി സെബാസ്റ്റ്യന്‍, ജോമോള്‍ സ്‌ക്കറിയ എന്നിവര്‍ പ്രസംഗിച്ചു. ഫാ. പരുവപ്പറമ്പില്‍ ഫൗണ്ടേഷന്‍ മെമ്മോറിയല്‍ സംസ്ഥാന തല ക്വിസ് മത്സരത്തില്‍ ഒന്നും രണ്ടും മൂന്നും സ്ഥാനങ്ങള്‍ നേടിയവര്‍. ഗവൺമെന്‍റ് കോളജ് ഓഫ് നഴ്‌സിംഗ് തിരുവനന്തപുരം, ഹോളിഫാമിലി കോളജ് ഓഫ് നഴ്‌സിംഗ് മുതലക്കോടം, ലൂര്‍ദ് കോളജ് ഓഫ് നഴ്‌സിംഗ് എറണാകുളം.

ക്ഷീരവികസന വകുപ്പിന്‍റെ വിവിധ പദ്ധതികൾ നടപ്പാക്കാൻ അപേക്ഷ ക്ഷണിച്ചു

കോട്ടയം: ക്ഷീര വികസന വകുപ്പിന്‍റെ 2025-26 സാമ്പത്തിക വര്‍ഷത്തിലെ വിവിധ പദ്ധതികള്‍ നടപ്പാക്കാന്‍ താത്പര്യമുള്ളവരില്‍നിന്ന് ഓണ്‍ലൈനായി അപേക്ഷ ക്ഷണിച്ചു. 20 വരെ ക്ഷീര വികസന വകുപ്പിന്‍റെ www.kshee rasree.kerala.gov.in എന്ന പോര്‍ട്ടല്‍ മുഖേന രജിസ്റ്റര്‍ ചെയ്ത് അപേക്ഷിക്കാം. പുല്‍കൃഷി വികസനം, മില്‍ക്ക് ഷെഡ് വികസനം, ഡയറി ഫാം ശുചിത്വം മെച്ചപ്പെടുത്തുന്നതിനുള്ള പദ്ധതി തുടങ്ങിയവയ്ക്ക് ഇപ്പോള്‍ അപേക്ഷിക്കാം. 20 സെന്‍റിന് മുകളിലേക്കുള്ള പുല്‍കൃഷി, തരിശുഭൂമിയിലുള്ള പുല്‍കൃഷി, ചോളകൃഷി പദ്ധതികളും, പുല്‍കൃഷിക്ക് വേണ്ടിയുള്ള യന്ത്രവത്കരണ ധനസഹായം, ജലസേചന ധനസഹായം എന്നിവയും ഉള്‍പ്പെടുന്നതാണ് പുല്‍കൃഷി വികസന പദ്ധതി. ഡയറി ഫാമുകളുടെ ആധുനികവത്കരണവും യന്ത്രവത്കരണവും കയര്‍-മത്സ്യബന്ധന മേഖലകള്‍ക്കായുള്ള പ്രത്യേക പുനരധിവാസ പദ്ധതി, പശു യൂണിറ്റ് പദ്ധതികള്‍, യുവജനങ്ങള്‍ക്കായി 10 പശു അടങ്ങുന്ന സ്മാര്‍ട്ട് ഡയറി ഫാം പദ്ധതി, കറവയന്ത്രം വാങ്ങിക്കുന്നതിനുള്ള ധനസഹായം, തൊഴുത്ത് നിര്‍മാണ ധനസഹായം എന്നിവ ഉള്‍പ്പെടുന്ന മില്‍ക്ക് ഷെഡ് വികസന പദ്ധതികള്‍ക്കും ഡയറി ഫാമിന്‍റെ ശുചിത്വം മെച്ചപ്പെടുത്തുന്നതിനായുള്ള പദ്ധതികള്‍ക്കും ksheerasree.kerala.gov.in എന്ന പോര്‍ട്ടലിലൂടെ അപേക്ഷിക്കാം. കൂടുതല്‍ വിവരങ്ങള്‍ക്ക് ബ്ലോക്ക് തലത്തില്‍ പ്രവര്‍ത്തിക്കുന്ന ക്ഷീരവികസന യൂണിറ്റുമായി ബന്ധപ്പെടണമെന്ന് ക്ഷീരവികസന വകുപ്പ് ഡയറക്ടര്‍ അറിയിച്ചു.

റോഡിലെ കട്ടിംഗ് ഭീഷണിയായി

പള്ളിക്കത്തോട്: റോഡിലെ ടാറിംഗിന്‍റെ കട്ടിംഗ് കാൽനടയാത്രക്കാർക്കും ഇരുചക്ര വാഹനയാത്രികർക്കും ഭീഷണിയാകുന്നു. പള്ളിക്കത്തോട് ടൗണിൽ കോട്ടയം റോഡിലാണ് ടാറിംഗ് അരികിലെ കട്ടിംഗ് ഭീഷണിയായി മാറിയിരിക്കുന്നത്. റീ ടാറിംഗ് കഴിഞ്ഞപ്പോൾ ഒരടിയോളം റോഡ് ഉയർന്നതാണ് പ്രശ്നമായത്. കുഴി കോൺക്രീറ്റ് ചെയ്യാതെ മണ്ണിട്ടു നികത്തിയത് മഴ ആരംഭിച്ചതോടെ വെള്ളമൊഴുകി മണ്ണൊലിച്ചു പോയി. ഇപ്പോൾ മിറ്റിലിളികി കുഴിഞ്ഞു കിടക്കുന്ന ഇവിടെ സ്ത്രീകളും പ്രായമായവരും കുട്ടികളും ഉൾപ്പെടെയുള്ളവർ വീണു പരിക്കേൽക്കുന്നത് പതിവായിരിക്കുകയാണ്. ഇരുചക്ര വാഹനയാത്രികരും അപകടത്തിൽപ്പെടുന്നു. പിഡബ്ല്യുഡി അധികൃതരും പഞ്ചായത്തും പ്രശ്നപരിഹാരത്തിനായി ഇടപെടണമെന്നും അപകടാവസ്ഥ ഒഴിവാക്കണമെന്നും കേരള കോൺഗ്രസ് മണ്ഡലം കമ്മിറ്റി യോഗം ആവശ്യപ്പെട്ടു. അടിയന്തര പരിഹാരം ഉണ്ടാകുന്നില്ലെങ്കിൽ ശക്തമായ പ്രതിഷേധ സമരം സംഘടിപ്പിക്കുമെന്ന് മണ്ഡലം പ്രസിഡന്‍റ് സജി ആക്കിമാട്ടേൽ പറഞ്ഞു. റോയപ്പൻ കരിപ്പാപറമ്പിൽ, ജോസ് തയ്യിൽ, മനോജ് തുടങ്ങിയവർ പ്രസംഗിച്ചു.

ചാര്‍ട്ടേഡ് അക്കൗണ്ടന്‍റ്സ് ദിനം ആഘോഷിച്ചു

കോട്ടയം: ഇന്‍സ്റ്റിറ്റ്യൂട്ട് ഓഫ് ചാര്‍ട്ടേഡ് അക്കൗണ്ടന്‍റ്സ് ഓഫ് ഇന്ത്യയുടെ കോട്ടയം ബ്രാഞ്ചില്‍ ചാര്‍ട്ടേഡ് അക്കൗണ്ടന്‍റ്സ് ദിനം ആഘോഷിച്ചു. തോമസ് ചാഴികാടന്‍ ഉദ്ഘാടനം ചെയ്തു. ഇന്‍സ്റ്റിറ്റ്യൂട്ടിന്‍റെ സാമൂഹിക ഉത്തരവാദിത്വ പ്രവര്‍ത്തനങ്ങള്‍ കെ. സുരേഷ് കുറുപ്പ് ഉദ്ഘാടനം ചെയ്തു. ഫാ. അലക്സ് പ്രായിക്കളം സിഎംഐ, തിരക്കഥാകൃത്ത് സഞ്ജയ് ചെറിയാന്‍, എന്‍. രമ്യ, എബ്രാഹാം കെ. തോമസ്, വിജു ചാക്കോ എന്നിവര്‍ പ്രസംഗിച്ചു.

നിലമ്പൂര്‍ റോഡ് കോട്ടയം എക്‌സ്പ്രസ് : പുനലൂരിലേക്ക് നീട്ടിയേക്കും

വേളാങ്കണ്ണി ട്രെയിന്‍ എല്ലാ ദിവസവും സര്‍വീസ് നടത്താന്‍ സാധ്യത ചങ്ങനാശേരി: മലബാറില്‍നിന്നും മധ്യകേരളത്തിലേക്ക് ഏറ്റവും അധികം യാത്രക്കാര്‍ ഉപയോഗപ്പെടുത്തുന്ന നിലമ്പൂര്‍ റോഡ് കോട്ടയം എക്‌സ്പ്രസ് കൊല്ലം വഴി പുനലൂരിലേക്ക് സര്‍വീസ് നീട്ടണമെന്ന് കൊടിക്കുന്നില്‍ സുരേഷ് എംപി കേന്ദ്ര റെയില്‍വേ മന്ത്രി അശ്വിനി വൈഷ്ണവിനെയും റെയില്‍വേ ബോര്‍ഡ് ഓപ്പറേഷന്‍ ഡയറക്ടറെയും നേരില്‍ക്കണ്ട് ആവശ്യപ്പെട്ടു. ഈ ട്രെയില്‍ ആരംഭിച്ചാല്‍ ഈ വഴി രാത്രികാലങ്ങളില്‍ ട്രെയിനില്ലെന്നുള്ള പ്രശ്‌നത്തിനു പരിഹാരമാകും. ട്രെയിന്‍ പുനലൂരിലേക്ക് നീട്ടുന്നതിനെ സംബന്ധിച്ചുള്ള റിപ്പോര്‍ട്ട് റെയില്‍വേ ബോര്‍ഡില്‍ നിന്നും ദക്ഷിണ റെയില്‍വേയോട് ആവശ്യപ്പെട്ടിട്ടുണ്ട്. അതോടൊപ്പം രാത്രിയില്‍ ഈ റൂട്ടില്‍ ഏര്‍പ്പെടുത്തുന്ന ഫിക്‌സഡ് ടൈം കോറിഡോര്‍ ബ്ലോക്ക് നിലമ്പൂര്‍ റോഡ് കോട്ടയം എക്‌സ്പ്രസ് പുനലൂരിലേക്ക് നീട്ടുന്നതിന് ആവശ്യമായ തരത്തില്‍ ക്രമീകരിക്കുവാനും നിര്‍ദേശം നല്‍കിയിട്ടുണ്ട്. വേളാങ്കണ്ണി ട്രെയിന്‍ എല്ലാദിവസവും നിലവില്‍ ആഴ്ചയില്‍ രണ്ട് ദിവസം സര്‍വീസ് നടത്തുന്ന എറണാകുളം-വേളാങ്കണ്ണി എക്‌സ്പ്രസ് ആഴ്ചയില്‍ എല്ലാ ദിവസവും സര്‍വീസ് നടത്തുന്ന തരത്തില്‍ ഡെയ്‌ലി എക്‌സ്പ്രസായി മാറ്റണമെന്ന ആവശ്യത്തിലും റെയില്‍വേ മന്ത്രിയുടെ ഭാഗത്തുനിന്നും അനുകൂല നിലപാടാണെന്ന് എംപി പറഞ്ഞു. നേരത്തെ ഇതു സംബന്ധിച്ച് നിവേദനം നല്‍കിയിരുന്നതായും എംപി പറഞ്ഞു. നിലവില്‍ ഉപയോഗിച്ചുകൊണ്ടിരുന്ന റേക്ക് കാലപ്പഴക്കം മൂലം യാത്രക്കാര്‍ക്ക് ബുദ്ധിമുട്ടുണ്ടാക്കിയിരുന്നതിനാല്‍ ആധുനിക എല്‍എച്ച്ബി കോച്ചുകള്‍ അനുവദിക്കണമെന്നാവശ്യപ്പെട്ടതിന്‍റെ അടിസ്ഥാനത്തില്‍ പുതിയ കോച്ചുകളും ലഭ്യമാക്കിയിട്ടുണ്ട്. മധുര ഡിവിഷന്‍റെ പരിധിയിലുള്ള റെയില്‍വേ സ്റ്റേഷനുകളിലെ പ്ലാറ്റ്‌ഫോമുകളുടെ നീളം വര്‍ധിപ്പിക്കുന്ന നടപടി പൂര്‍ത്തിയാകുന്നതോടുകൂടി വേളാങ്കണ്ണി എക്‌സ്പ്രസ് 22 കോച്ചുകള്‍ ഉള്ള ട്രെയിനായി ഉയര്‍ത്താമെന്നും മന്ത്രി ഉറപ്പു നല്‍കിയിട്ടുണ്ട്. നേരത്തെ മീറ്റര്‍ ഗേജ് പാതയുടെ കാലത്ത് സര്‍വീസ് നടത്തിയിരുന്ന കൊല്ലം-കോയമ്പത്തൂര്‍ ട്രെയിനിന് പകരമായി പ്ലാറ്റ്‌ഫോം ലഭ്യതയുള്ള കോട്ടയത്തനിന്നും സര്‍വീസ് ആരംഭിച്ച് കൊല്ലം, പുനലൂര്‍, മധുര, പളനി വഴി ഈറോഡിലേക്ക് പുതിയ എക്‌സ്പ്രസ് ട്രെയിന്‍ എന്ന ആവശ്യവും റെയില്‍വേ മന്ത്രിയും ബോര്‍ഡും അംഗീകരിച്ചു. ഈ സര്‍വീസ് ആരംഭിക്കുന്നതോടുകൂടി മധ്യകേരളത്തില്‍നിന്നും മധുര, പളനി തുടങ്ങിയ ക്ഷേത്രങ്ങിലേക്ക് ചുരുങ്ങിയ ചെലവില്‍ തീര്‍ഥാടകര്‍ക്ക് എത്താന്‍ ആകും. കോയമ്പത്തൂരില്‍ പ്ലാറ്റ്‌ഫോം ലഭ്യമല്ലാത്തതിനാലാണ് ഈറോഡില്‍ സര്‍വീസ് അവസാനിപ്പിക്കുന്നത്. മെമുവിൽ കോച്ചുകള്‍ വര്‍ധിപ്പിക്കും കേരളത്തില്‍ നിലവില്‍ സര്‍വീസ് നടത്തുന്ന ഭൂരിഭാഗം മെമു ട്രെയിനുകളിലും കോച്ചുകളുടെ എണ്ണം എട്ടെണ്ണം മാത്രമാണ്. വലിയ തിരക്കുള്ള ഈ ട്രെയിനുകളില്‍ എട്ടു കോച്ചുകള്‍ എന്നുള്ളത് സ്ഥിരം യാത്രക്കാര്‍ക്ക് കടുത്ത ബുദ്ധിമുട്ടാണ് സൃഷ്ടിക്കുന്നത്. ഇതിന് പരിഹാരമായി നിലവില്‍ എട്ടു കോച്ചുള്ള മെമു ട്രെയിനുകള്‍ 12 കോച്ചുകളായും 12 കോച്ചുകള്‍ ഉള്ളവ 16 കോച്ചുള്ള ട്രെയിനുകളായി ഉയര്‍ത്താമെന്നും എംപിയുടെ ആവശ്യത്തിൽ മന്ത്രി ഉറപ്പു നല്‍കി. ചെന്നൈ എഗ‌്മൂര്‍ സ്റ്റേഷനിലെ പുനരുദ്ധാരണ പ്രവര്‍ത്തനങ്ങള്‍ പൂര്‍ത്തീകരിക്കുന്ന മുറയ്ക്ക് കോട്ടയത്ത് നിന്നും കൊല്ലം വഴി താമ്പരത്തേക്ക് പുതിയ എസി വീക്കിലി എക്‌സ്പ്രസ് ട്രെയിന്‍ ആരംഭിക്കണമെന്നുള്ള ആവശ്യം അനുഭാവപൂര്‍വം പരിഗണിക്കാമെന്നും മന്ത്രി അറിയിച്ചതായി എംപി പറഞ്ഞു. പാര്‍ക്കിംഗ് ഫീസ് വര്‍ധന കുറയ്ക്കണം മന്ത്രിയുമായി നടത്തിയ ചര്‍ച്ചയില്‍ തിരുവനന്തപുരം ഡിവിഷനില്‍ അനിയന്ത്രിതമായി ഉയര്‍ത്തിയ പാര്‍ക്കിംഗ് ഫീവര്‍ധനവ് പുനഃപരിശോധിക്കണമെന്നും നിലവിലെ വര്‍ധനവ് സ്ഥിരംയാത്രക്കാര്‍ക്ക് കടുത്ത സാമ്പത്തിക ബാധ്യത ഉണ്ടാക്കുമെന്നും മന്ത്രിയെ ബോധ്യപ്പെടുത്തി. ഇതിന്‍റെ അടിസ്ഥാനത്തില്‍ മന്ത്രിയുടെ ഓഫീസില്‍നിന്നും തിരുവനന്തപുരം ഡിവിഷന്‍ ജനറല്‍ മാനേജര്‍രോട് മന്ത്രിയുടെ ഓഫീസ് അടിയന്തര റിപ്പോര്‍ട്ട് തേടിയതായും എംപി പറഞ്ഞു.

വലിയ ശബ്ദം; പിന്നാലെ നിലവിളി, കൂട്ടക്കരച്ചിൽ

കോട്ടയം: മെഡിക്കല്‍ കോളജ് ആശുപത്രി പതിനാലാം വാര്‍ഡ് ഇടിഞ്ഞുവീണെന്ന വാര്‍ത്ത ഞെട്ടലോടെയാണു കേട്ടറിഞ്ഞത്. വാര്‍ഡ് അപ്പാടെ ഇടിഞ്ഞുവീണെന്ന് വാര്‍ത്തകള്‍ പരന്നു. കൂട്ടനിലവിളി കേട്ട് സമീപ വാര്‍ഡുകളിലെ രോഗികളും കൂട്ടിരുപ്പുകാരും മെഡിക്കല്‍ കോളജ് ജീവനക്കാരുമാണ് പതിനാലാം വാര്‍ഡിലേക്ക് ഓടിയെത്തിയത്. അവരെത്തുമ്പോള്‍ ശുചിമുറി നടുമുറ്റത്തേക്ക് ഇടിഞ്ഞുവീണിരിക്കുന്നു. ജീവനക്കാര്‍ ആദ്യം രോഗികളെ മറ്റു വാര്‍ഡുകളിലേക്ക് സുരക്ഷിതമായി മാറ്റി. പോലീസും ഫയര്‍ഫോഴ്‌സും പാഞ്ഞെത്തി. തെള്ളകത്തെ മുഖ്യമന്ത്രിയുടെ അവലോകന യോഗ സ്ഥലത്തുനിന്ന് മന്ത്രിമാരായ വീണാ ജോര്‍ജും വി.എന്‍. വാസവനും സ്ഥലത്തെത്തി. നാലുഭാഗവും കെട്ടിടങ്ങളാല്‍ മറഞ്ഞ നടുമുറ്റത്തേക്കാണ് ശുചിമുറി ഭാഗം ഇടിഞ്ഞുവീണത്. നടുമുറ്റം നിറയെ ചെടികളാണ്. ആരും അപകടത്തില്‍പ്പെട്ടിട്ടില്ലെന്നും ഉപയോഗശൂന്യമായ കെട്ടിടത്തില്‍ ആരുമില്ലെന്നുമായിരുന്നു മന്ത്രിമാരുടെ വിശദീകരണം. എന്നാല്‍, ഇതേസമയം മണ്ണിനടിയില്‍ ആളുണ്ടെന്ന് പലരും പറഞ്ഞിരുന്നു. ഒടുവില്‍ രണ്ടര മണിക്കൂറിനുശേഷം മെഡിക്കല്‍ കോളജ് രണ്ടാം കവാടത്തിലൂടെ ചെറുമതിലുകളും നടകളും ഇടിച്ചുനിരത്തി അകത്തെത്തിച്ച മൂന്നു ഹിറ്റാച്ചികള്‍ അവശിഷ്ടങ്ങള്‍ മാറ്റിയാണ് ബിന്ദുവിന്‍റെ മൃതദേഹം പുറത്തെടുത്തത്. രക്ഷാപ്രവര്‍ത്തനം വൈകിയതിനെ ചൊല്ലി നാട്ടുകാരും പൊതുപ്രവര്‍ത്തകരും ഫയര്‍ഫോഴ്‌സ് അധികൃതരുമായി ബഹളമുണ്ടായി. പ്രതിഷേധം ശമിച്ചതിനുശേഷമാണ് അവശിഷ്ടങ്ങള്‍ മാറ്റിത്തുടങ്ങിയത്. ജനങ്ങളെ അകത്തേക്ക് കടത്താതെ പോലീസ് കയറുകെട്ടി വേര്‍തിരിച്ചിരുന്നു. ഈ സമയം മന്ത്രിമാരായ വി.എന്‍. വാസവനും വീണാ ജോര്‍ജും മെഡിക്കല്‍ കോളജ് പ്രിന്‍സിപ്പല്‍ ഓഫീസിലിരുന്നു കാര്യങ്ങള്‍ വിലിയിരുത്തി. സ്ഥലത്തെത്തിയ ജനപ്രതിനിധികളും രാഷ്‌ട്രീയ നേതാക്കളും ആശുപത്രി അധികൃതരുടെയും സര്‍ക്കാരിന്‍റെയും അനാസ്ഥയെ കുറ്റപ്പെടുത്തി. എംഎല്‍എമാരായ ചാണ്ടി ഉമ്മനും തിരുവഞ്ചൂര്‍ രാധാകൃഷ്ണനും ക്ഷോഭത്തോടെയാണ് കുറ്റപ്പെടുത്തിയത്. ആളുകള്‍ ഉപയോഗിച്ചിരുന്ന കെട്ടിടം എങ്ങനെ ഉപയോഗശൂന്യമായ കെട്ടിടമാണെന്ന് പറയാന്‍ മന്ത്രിമാര്‍ക്ക് കഴിഞ്ഞെന്നും രക്ഷാ പ്രവര്‍ത്തനത്തില്‍ ഗുരുതരമായ വീഴ്ച സംഭവിച്ചെന്നും ഇരുവരും പറഞ്ഞു. കെട്ടിടത്തിന്‍റെ കാലപ്പഴക്കവും പൊട്ടിപ്പൊളിഞ്ഞതും പലരും ചൂണ്ടിക്കാണിക്കുന്നുണ്ടായിരുന്നു. അവശിഷ്ടങ്ങള്‍ ഭൂരിഭാഗം നീക്കം ചെയ്തശേഷം മന്ത്രിമാര്‍ മാധ്യമ പ്രവര്‍ത്തകരെ കണ്ടു. പല നായീകരണങ്ങളും മന്ത്രിമാര്‍ നിരത്തിയെങ്കിലും ചോദ്യശരങ്ങള്‍ക്കു മുമ്പില്‍ മന്ത്രിമാര്‍ക്ക് ഉത്തരം മുട്ടി. ഇതിനിടയില്‍ മെഡിക്കല്‍ കോളജിലേക്ക് വിവിധ സംഘടനകളുടെ നേതൃത്വത്തില്‍ പ്രതിഷേധ സമരപരിപാടികളും നടന്നു. വൈകുന്നേരത്തോടെ മുഖ്യമന്ത്രിയും സ്ഥലത്തെത്തി. പ്രിന്‍സിപ്പല്‍ ഓഫീസില്‍ അവലോകന യോഗം നടത്തി മുഖ്യമന്ത്രി പിരിയുമ്പോഴും പുറത്ത് പ്രതിഷേധം തുടര്‍ന്നു. റോഡില്‍ മുഖ്യമന്ത്രിയെ വിവിധ സംഘടനകള്‍ കരിങ്കൊടി കാട്ടി പ്രതിഷേധിച്ചു. ആശുപത്രിയില്‍നിന്നു മടങ്ങിയ ആരോഗ്യമന്ത്രി വീണാ ജോര്‍ജിനെയും മുഖ്യമന്ത്രി യെയും പുതുപ്പള്ളിയില്‍ യൂത്ത് കോണ്‍ഗ്രസ് പ്രവര്‍ത്തകര്‍ കരിങ്കൊടി കാണിച്ചു. കെട്ടിടത്തിലേക്ക് പ്രവേശനം നിരോധിച്ചിരുന്നു: മെഡി. കോളജ് പ്രിൻസിപ്പൽ കോട്ടയം: കിഫ്ബിയുടെ ഫണ്ട് ഉപയോഗിച്ച് പുതുതായി പണികഴിപ്പിച്ച സര്‍ജിക്കല്‍ ബ്ലോക്കിലേക്ക് പൂര്‍ണമായും മാറുന്ന പ്രക്രിയ നടക്കുന്നതിനിടയിലാണ് 11, 14, 10 വാര്‍ഡുകളോടു ചേര്‍ന്നുള്ള ടോയ്‌ലറ്റ് കോംപ്ലക്സ് ഇടിഞ്ഞുവീണതെന്ന് മെഡിക്കല്‍ കോളജ് പ്രിന്‍സിപ്പല്‍ ഡോ. വര്‍ഗീസ് പി. പുന്നൂസ്. ഈ കോംപ്ലക്‌സിലേക്ക് 11, 14 വാര്‍ഡുകളില്‍നിന്നുള്ള പ്രവേശനം നിരോധിച്ചതും ഉപയോഗത്തിലില്ലാത്തതുമാണെന്നും ഡോ. വര്‍ഗീസ് പി. പുന്നൂസ് പറഞ്ഞു. അപകടത്തിന്‍റെ പശ്ചാത്തലത്തില്‍ ഈ വാര്‍ഡുകളിലെ കിടപ്പുരോഗികളെ മറ്റ് വാര്‍ഡുകളിലേക്ക് മാറ്റുകയും ഐസിയു, ഓപ്പറേഷന്‍ തിയറ്റര്‍ തുടങ്ങിയവ പുതുതായി പണികഴിപ്പിച്ച സര്‍ജിക്കല്‍ ബ്ലോക്കിലേക്ക് മാറ്റുന്നതിനുള്ള പ്രവര്‍ത്തനങ്ങള്‍ നടക്കുകയായിരുന്നെന്നും ഡോ. വര്‍ഗീസ് പി. പുന്നൂസ് പറഞ്ഞു. ആറു വാര്‍ഡുകളിലെ രോഗികളെ പുതുതായി നിര്‍മിച്ച സര്‍ജിക്കല്‍ ബ്ലോക്കിലേക്ക് മാറ്റുമെന്നും അപകടം പറ്റിയ വാര്‍ഡ് പൂര്‍ണമായി അടയ്ക്കുമെന്നും മന്ത്രിമാരായ വീണ ജോര്‍ജും വി.എന്‍. വാസവനും പറഞ്ഞു.

മകളുടെ സുരക്ഷയ്ക്കെത്തി; അമ്മയ്ക്കു ദാരുണാന്ത്യം

തലയോലപ്പറമ്പ്: രോഗബാധിതയായ മകൾക്ക് കൂട്ടിരിക്കാനെ ത്തിയ അമ്മയ്ക്ക് ആശുപത്രി ക്കെട്ടിടം തകര്‍ന്നുണ്ടായ അപകടത്തില്‍ ദാരുണാന്ത്യം സംഭവിച്ചത് നാടിനെ നടുക്കി. കഴുത്തിന് കലശലായ വേദനയെത്തുടര്‍ന്ന് മകളും അവസാനവര്‍ഷ നഴ്‌സിംഗ് വിദ്യാര്‍ഥിയായ നവമിയെ കഴിഞ്ഞ ഒന്നിനാണു കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചത്. ഇന്നലെ രാവിലെ മകളെ കുളിപ്പിച്ച് വാര്‍ഡിലാക്കിയശേഷം മാതാവ് ബിന്ദു കുളിക്കാനായിപോയപ്പോഴായിരുന്നു കെട്ടിടം തകര്‍ന്നു വന്‍ അപകടമുണ്ടായത്. തലയോലപ്പറമ്പ് ഉമ്മാംകുന്നില്‍ പണിതീരാത്ത വീട്ടിലാണ് നിര്‍ധന കുടുംബം താമസിക്കുന്നത്. ഭര്‍ത്താവ് വിശ്രുതനും മക്കളായ നവനീത്, നവമി എന്നിവര്‍ക്ക് പുറമെ 90 കാരിയായ അമ്മ സീതാലക്ഷ്മിയും ബിന്ദുവിന്‍റെ സംരക്ഷണയിലായിരുന്നു. പ്രിയപ്പെട്ട മകളുടെ മരണ വിവരമറിഞ്ഞ് നിര്‍ത്താതെ അലമുറയിട്ടു കരഞ്ഞുകൊണ്ടിരിക്കുന്ന മാതാവിന്‍റെ നൊമ്പരം കാണാനാവാതെ വീട്ടില്‍ തടിച്ചുകൂടിയ സ്ത്രീകളടക്കമുള്ളവര്‍ കണ്ണീര്‍വാര്‍ത്തു.

ശ്യാമും ജോയലും കണ്ടു; നടുക്കുന്ന ആ കാഴ്ച

ഗാന്ധിനഗര്‍: അടുത്തടുത്ത കട്ടിലുകളില്‍ കിടന്ന് സംസാരിച്ചുകൊണ്ടിരിക്കെ ശ്യാം സുബിനും ജോയലും ആ കാഴ്ച കണ്‍മുന്‍പില്‍ കണ്ടു. കൂറ്റന്‍ അലമാര നിലംപൊത്തുന്നപോലെ പതിനാലാം വാര്‍ഡിനോടു ചേര്‍ന്ന ടോയ്‌ലറ്റ് ചെരിഞ്ഞുമറിയുന്നു. പിന്നാലെ വലിയൊരു ശബ്ദവും. സംഭവിച്ചതോ തോന്നിയതോ എന്നറിയാന്‍ കട്ടിലില്‍നിന്ന് ഇറങ്ങി നോക്കുമ്പോള്‍ ശൗചാലം ഇരുന്ന കെട്ടിടം അവിടെയില്ല. ഉദരസംബന്ധമായ രോഗത്തിന് ചികിത്സ തേടിയെത്തിയ ഇരുവരും ഭയന്ന് പുറത്തേക്ക് ഓടി. ശ്യാമിന്‍റെ അമ്മ അഗിയും ജോയലിന്‍റെ അമ്മ ആനന്ദയും കൂടെ ഓടി. തിരികെയെത്തുമ്പോള്‍ ശസ്ത്രിക്രിയ കഴിഞ്ഞുകിടക്കുന്ന രോഗികളുടെ നിലവിളി കേള്‍ക്കാം. അവരെ അതിവേഗം പുറത്തെത്തിക്കാന്‍ ജീവനക്കാരുടെയും കൂട്ടിരിപ്പുകാരുടെയും തീവ്രശ്രമം നടക്കുന്നു. വയറുവേദന മറന്ന് ശ്യാമും ജോയലും വയോധികാരായ രോഗികളെ ട്രോളിയിലും സ്ട്രെച്ചറിലും പുറത്തെത്തിക്കാനുള്ള ശ്രമത്തില്‍ പങ്കുചേര്‍ന്നു. ഒളശ കോയിമാടത്ത് സുബിന്‍റെ മകനായ ശ്യാം ഒളശ സ്‌കൂളില്‍ എട്ടാം ക്ലാസ് വിദ്യാര്‍ഥിയാണ്. ജോയല്‍ എറണാകുളം കുമ്പളങ്ങി സ്വദേശിയും. മരിച്ച ബിന്ദു അപകടത്തിന് തൊട്ടുമുന്‍പ് കുളിമുറിയിലേക്ക് പോകുന്നത് ജോയലിന്‍റെ അമ്മ ആനന്ദ കണ്ടിരുന്നു. ബിന്ദു അവിടേക്കു പോയിട്ടുണ്ടെന്നും തിരികെ വന്നിട്ടില്ലെന്നും ഉറ്റവരോടൊക്കെ ഇവര്‍ തീര്‍ച്ച പറഞ്ഞതോടെയാണ് തെരച്ചില്‍ ഊര്‍ജിതമാക്കാനിടയായത്. ബംഗളൂരുവില്‍ അവസാന വര്‍ഷ നഴ്‌സിംഗ് വിദ്യാര്‍ഥിയാണ് ജോയല്‍. പതിനാലാം വാര്‍ഡില്‍ ഇവര്‍ കിടന്ന കട്ടിലിന് വിളിപ്പാടകലെയായിരുന്നു ശൗചാലയം. ഇവ രോഗികളും കൂട്ടിരിപ്പുകാരും രാപകല്‍ ഉപയോഗിച്ചിരുന്നതായും ആ ഭാഗത്ത് കൂട്ടിരിപ്പുകാര്‍ രാത്രി കിടക്കാറുണ്ടെന്നും തുണി ഉണങ്ങാനിടുന്നുണ്ടെന്നും ഇവര്‍ പറഞ്ഞു.

ആശുപത്രിക്കെട്ടിടം അത്യാസന്ന നിലയില്‍

കോട്ടയം: അറുപതുവര്‍ഷം പഴക്കമുള്ളതാണ് ആര്‍പ്പൂക്കരയില്‍ ഇന്നലെ അപകടമുണ്ടായ മെഡിക്കല്‍ കോളജ് കെട്ടിടം. പലപ്പോഴായി വിപുലീകരിക്കുകയും നവീകരിക്കുകയും ചെയ്ത കെട്ടിടം പത്തു വര്‍ഷം മുന്‍പ് പൊളിച്ചുമാറ്റേണ്ടതാണ്. 10, 11, 14 വാര്‍ഡുകള്‍ ഈ കെട്ടിടത്തിലുണ്ട്. അതായത് ഒരേസമയം മൂന്നു വാര്‍ഡുകളിലായി നാനൂറോളം രോഗികളും കൂട്ടിരിപ്പുകാരും സന്ദര്‍ശകരും ഡോക്ടര്‍മാരും നഴ്‌സുമാരും മെഡിക്കല്‍ വിദ്യാര്‍ഥികളും മറ്റ് ജീവനക്കാരും ഉള്‍പ്പെടെ കുറഞ്ഞത് ആയിരത്തോളം പേർ ഈ കെട്ടിടത്തിലുണ്ടാകും. ശൗചാലയത്തിന് സമീപത്തു തന്നെയാണ് പതിനൊന്നാം വാര്‍ഡ്. ശസ്ത്രക്രിയ കഴിഞ്ഞവരും അതിനായി കാത്തിരിക്കുന്നവരുമാണ് ഇവിടത്തെ രോഗികള്‍. ശൗചാലയം വീണ ആഘാതത്തില്‍ കെട്ടിടത്തിനു പൂര്‍ണമോ ഭാഗികമോ ആയ തകര്‍ച്ചസംഭവിച്ചിരുന്നെങ്കില്‍ ദുരന്തത്തിന്‍റെ വ്യാപ്തി അചിന്ത്യമാകുമാ യിരുന്നു. കേരളത്തിലെ മൂന്നാമത്തെ മെഡിക്കല്‍ കോളജായി 1962 ഡിസംബര്‍ മൂന്നിനാണ് അന്നത്തെ ആരോഗ്യമന്ത്രി എം.പി. ഗോവിന്ദന്‍ നായരുടെ സാന്നിധ്യത്തില്‍ മുഖ്യമന്ത്രി ആര്‍. ശങ്കര്‍ ഉദ്ഘാടനം നിര്‍വഹിച്ചത്. കോട്ടയം, ഇടുക്കി, ആലപ്പുഴ, പത്തനംതിട്ട, എറണാകുളം ജില്ലകളിലെ രോഗികള്‍ക്ക് സേവനം നല്‍കുന്ന ആശുപത്രിയില്‍ ദിവസേന മൂവായിരം ഒപിയും അഞ്ഞൂറിലേറെ അത്യാഹിത രോഗികളും എത്തുന്നു. കോട്ടയം മെഡിക്കല്‍ കോളജിലെ ആദ്യ ബാച്ച് എംബിബിഎസ് വിദ്യാര്‍ഥികള്‍ പഠനം തുടങ്ങിയത് തിരുവനന്തപുരം മെഡിക്കല്‍ കോളജിലാണ്. ഒന്നര വര്‍ഷത്തെ പഠനത്തിനുശേഷം കോട്ടയത്ത് മടങ്ങിയെത്തി ആദ്യകാല ക്ലിനിക്കല്‍ പരിശീലനം കോട്ടയം ജില്ലാ ആശുപത്രിയിലായിരുന്നു. പിന്നീടാണ് ആര്‍പ്പൂക്കരയില്‍ ഗാന്ധിനഗര്‍ എന്ന പേരില്‍ മെഡിക്കല്‍ കോളജ് ആശുപത്രി സജീവപ്രവര്‍ത്തനം തുടങ്ങിയത്. അക്കാലത്ത് പണിത കെട്ടിടത്തിന്‍റെ ഭാഗമാണ് ഇന്നലെ തകര്‍ന്നത്. പുതിയ സർജിക്കൽ ബ്ലോക്കിൽ മൂന്നു വാർഡുകൾ പ്രവർത്തനം ആരംഭിച്ചു

കോട്ടയം: മെഡിക്കൽ കോളജിലെ 12, 13, 15 വാർഡുകൾ പുതുതായി നിർമിച്ച സർജിക്കൽ ബ്ലോക്കിലേക്ക് മാറ്റി പ്രവർത്തനം ആരംഭിച്ചു. മൂന്നാം നിലയിലാണ് പ്രവർത്തിക്കുന്നത്. ഇന്നലെ വൈകുന്നേരം തന്നെ വാർഡുകൾ പൂർണ സജ്ജമായി. 10, 17, സിഎൽ 4-1 എന്നീ വാർഡുകൾ മാറ്റാനുള്ള നടപടിയായി. മാറ്റി പ്രവർത്തനം ആരംഭിച്ചു കോട്ടയം: മെഡിക്കൽ കോളജിലെ 10,11,12,13,14, 15,17,24 എന്നീ വാർഡുകളും റേഡിയോ ഡയഗ്നോസിസ് വകുപ്പും സെൻട്രൽ സ്റ്റെറൈൽ സപ്ലൈ വകുപ്പും പുതിയ സർജിക്കൽ ബ്ലോക്കിലേക്കും സി.എൽ. 4 വാർഡിലേക്കുമായി മാറ്റി പ്രവർത്തനം ആരംഭിച്ചു. രോഗികളെ പുതിയ വാർഡുകളിലേക്ക് മാറ്റി.

അത് ബിന്ദുവാകരുതേ എന്നു പ്രാർഥിച്ചു, പക്ഷേ...

ഗാന്ധിനഗര്‍: എന്‍റെ അടുത്തുനിന്നു ചികിത്സയിലുള്ള മകള്‍ക്ക് ഭക്ഷണം കൊടുക്കാന്‍ പോയ അവള്‍ മരണത്തിലേക്കാണു പോയതെന്ന് അറിഞ്ഞിരുന്നില്ല. 14-ാം വാര്‍ഡിലെ ശുചിമുറി അടക്കമുള്ള കെട്ടിടഭാഗങ്ങള്‍ ഇടിഞ്ഞുവീണു മരണപ്പെട്ട ബിന്ദുവിന്‍റെ ഭര്‍ത്താവ് വിശ്രുതന്‍റെ വാക്കുകളാണിത്. ഇതു പറയുമ്പോള്‍ വിശ്രുതന്‍ നെഞ്ച് പൊട്ടിക്കരയുകയായിരുന്നു. ഇന്നലെ രാവിലെ വരെ കൂടെയുണ്ടായിരുന്ന ഭാര്യയുടെ വേര്‍പാട് അയാള്‍ക്ക് താങ്ങാവുന്നതിലു മധികമായിരുന്നു. ഇവരുടെ മകള്‍ നവമിയെ ചികിത്സയ്ക്കായി അഡ്മിറ്റ് ചെയ്തതോടെയാണ് ബിന്ദുവിനൊപ്പം വിശ്രുതന്‍ ആശുപത്രിയില്‍ എത്തുന്നത്. ഇന്നലെ രാവിലെ ഡോക്ടര്‍മാര്‍ വിവിധ രക്തപരിശോധനയ്ക്കായി കുറിച്ചുനല്‍കിയിരുന്നു. ഇതിനുള്ള രക്തസാമ്പിളുമായി വിശ്രുതനും ബിന്ദുവുമാണ് ലാബിലേക്ക് പോയത്. ലാബില്‍ ചെന്നപ്പോള്‍ തിരക്കായതിനാല്‍ വിശ്രുതനെ ക്യൂവില്‍ നിര്‍ത്തി മകള്‍ക്ക് ഭക്ഷണം കൊടുക്കാനായി ബിന്ദു വാര്‍ഡിലേക്ക് പോയി. പിന്നീട് ബാത്ത് റൂമിലേക്ക് പോയപ്പോഴാണ് അപകടമുണ്ടായത്. ആശുപത്രിയില്‍നിന്നു ബഹളവും നിലവിളിയുമൊക്കെ കേട്ട് ഓടിയെത്തുമ്പോള്‍ വാര്‍ഡില്‍നിന്ന് എല്ലാവരെയും പുറത്തേക്കിറക്കുകയായിരുന്നു. മകളെ കണ്ടു അമ്മയെ തിരക്കിയപ്പോള്‍ അമ്മ ബാത്ത്റൂമില്‍ പോയിരുന്നെന്നും ഇതുവരെ തിരിച്ചു വന്നിട്ടില്ലന്നും നവമി പറഞ്ഞു. ഇതോടെ ബിന്ദു അപകടത്തില്‍പ്പെട്ടിട്ടുണ്ടെന്ന് ഉറപ്പായെന്ന് വിശ്രുതന്‍ പറഞ്ഞു. ഭാര്യയെ കാണാനില്ലെന്ന് പോലീസുകാരെയും മറ്റും അറിയിച്ചു. ഇടിഞ്ഞുവീണ കെട്ടിടഭാഗങ്ങള്‍ ജെസിബി കൊണ്ട് നീക്കം ചെയ്തപ്പോള്‍ ഒരു സ്ത്രീയുടെ മൃതദേഹം കിട്ടിയിട്ടുണ്ടെന്നും ഇതു ഭാര്യയാണോയെന്ന് തിരിച്ചറിയാന്‍ മോര്‍ച്ചറിയിലേക്ക് വരണമെന്ന് പോലീസ് അറിയിച്ചപ്പോള്‍ വിശ്രുതന്‍റെ നെഞ്ച് പിടഞ്ഞു. അതു തന്‍റെ ബിന്ദുവാകരുതേ എന്ന് ഉള്ളുരുകി പ്രാര്‍ഥിച്ചു. എന്നാല്‍, വിധി മറ്റൊന്നായിരുന്നു. മോര്‍ച്ചറിയില്‍ ബിന്ദുവിന്‍റെ മൃതദേഹം കണ്ടു വിശ്രുതന്‍ അലമുറയിട്ട് കരഞ്ഞു. തന്‍റെ ഒപ്പം ലാബില്‍ നില്‍ക്കുകയായിരുന്നെങ്കില്‍ അവള്‍ അപകടത്തില്‍പെടില്ലായിരുന്നെന്ന് വിശ്രുതന്‍ തേങ്ങലോടെ പറഞ്ഞു.

ജുഡീഷല്‍ അന്വേഷണം വേണം: യുഡിഎഫ്

കോട്ടയം: കോട്ടയം മെഡിക്കല്‍ കോളജില്‍ കെട്ടിടം തകർന്നുവീണ് രോഗിയുടെ അമ്മ മരിച്ച സംഭവത്തില്‍ ജുഡീഷല്‍ അന്വേഷണം വേണമെന്ന് യുഡിഎഫ്. രക്ഷാപ്രവര്‍ത്തനം ഏകോപിപ്പിക്കുന്നതില്‍ ഗുരുതര വീഴ്ച സംഭവിച്ചു. രണ്ടു മന്ത്രിമാര്‍ സ്ഥലത്തെത്തി സംഭവത്തെ നിസാരവത്കരിച്ചതാണു കൂടുതല്‍ പ്രശ്‌നങ്ങള്‍ സൃഷ്ടിച്ചത്. നിലവില്‍ ആ കെട്ടിടത്തിലുള്ള രോഗികളെ എല്ലാം ഡിസ്ചാര്‍ജ് ചെയ്യാനാണ് അധികൃതര്‍ ശ്രമിക്കുന്നത്. അത് ഒരു കാരണവശാലും നമ്മതിക്കില്ല. രോഗികളെ ഡിസ്ചാര്‍ജ് ചെയ്താല്‍ മെഡിക്കല്‍ കോളജിന് മുന്നില്‍ സമരം ആരംഭിക്കുമെന്ന് യുഡിഎഫ് നേതാക്കള്‍ പറഞ്ഞു. എംഎല്‍എമാരായ തിരുവഞ്ചൂര്‍ രാധകൃഷ്ണന്‍, ചാണ്ടി ഉമ്മന്‍, മാണി സി. കാപ്പന്‍, മോന്‍സ് ജോസഫ്, ഫ്രാന്‍സിസ് ജോര്‍ജ് എംപി, ഡിസിസി പ്രസിഡന്‍റ് നാട്ടകം സുരേഷ്, യുഡിഎഫ് ജില്ലാ കണ്‍വീനര്‍ ഫില്‍സണ്‍ മാത്യൂസ്, കോട്ടയം നഗരസഭാ അധ്യക്ഷ ബിന്‍സി സെബാസ്റ്റ്യന്‍ തുടങ്ങിയവരാണ് യുഡിഎഫ് സംഘത്തിലുണ്ടായിരുന്നത്. കോൺഗ്രസ് മാർച്ച് ഇന്ന് കോട്ടയം: മെഡിക്കൽ കോളജിൽ നടന്ന ദാരുണമായ സംഭവത്തിന് ഉത്തരവാദികളെ കണ്ടെത്തി നടപടിയെടുക്കണമെന്ന് ആവശ്യപ്പെട്ട് ജില്ലാ കോൺഗ്രസ് കമ്മിറ്റിയുടെ ആഭിമുഖ്യത്തിലുള്ള ബഹുജന മാർച്ച് ഇന്ന് രാവിലെ 10ന് മെഡിക്കൽ കോളജ് കവാടത്തിൽ കെപിസിസി പ്രസിഡന്‍റ് സണ്ണി ജോസഫ് എംഎൽഎ ഉദ്ഘാടനം ചെയ്യുമെന്ന് ഡിസിസി പ്രസിഡന്‍റ് നാട്ടകം സുരേഷ് അറിയിച്ചു. ഉത്തരവാദി സംസ്ഥാന സര്‍ക്കാര്‍: ഫ്രാന്‍സിസ് ജോര്‍ജ് എംപി കോട്ടയം: മെഡിക്കല്‍ കോളജിലെ കെട്ടിടം ഇടിഞ്ഞുവീണ് വീട്ടമ്മ മരണപ്പെട്ടത് സംസ്ഥാന സര്‍ക്കാരിന്‍റെ അനാസ്ഥയും കെടുകാര്യസ്ഥതയും മൂലമാണന്ന് ഫ്രാന്‍സിസ് ജോര്‍ജ് എംപി ആരോപിച്ചു. അപകടമുണ്ടായ ഉടൻ രക്ഷാപ്രവര്‍ത്തനം നടത്തിയിരുന്നെങ്കില്‍ വീട്ടമ്മയുടെ ജീവന്‍ രക്ഷിക്കാന്‍ കഴിയുമായിരുന്നെന്നും എംപി പറഞ്ഞു. കെടുകാര്യസ്ഥതയുടെ ഉദാഹരണം: ബിജെപി കോട്ടയം: ആരോഗ്യമേഖലയിലെ കെടുകാര്യസ്ഥതയുടെയും അഴിമതിയുടെയും ഏറ്റവും പുതിയ ഉദാഹരണമാണു കോട്ടയം മെഡിക്കല്‍ കോളജിലെ കെട്ടിടത്തിന്‍റെ തകര്‍ച്ചയിലൂടെയും രോഗിയുടെ മരണത്തിലൂടെയും പുറത്തു വന്നിരിക്കുന്നതെന്ന് ബിജെപി വെസ്റ്റ് ജില്ലാ പ്രസിഡന്‍റ് ജി. ലിജിന്‍ലാല്‍. ദുരന്ത സ്ഥലത്തെത്തിയ മന്ത്രിമാര്‍ സംഭവത്തെ അങ്ങേയറ്റം നിസാരവത്കരിക്കുകയാണു തുടക്കം മുതല്‍ ചെയ്തത്. അതാണ് ഒരുജീവനെടുത്തത്. ജി. ലിജിന്‍ലാല്‍ പറഞ്ഞു. ആരോഗ്യവകുപ്പിന് വിദഗ്ധചികിത്സ അനിവാര്യം: എൻ. ഹരി കോട്ടയം: സംസ്ഥാന സര്‍ക്കാരിനും ആരോഗ്യവകുപ്പിനും അതിവിദഗ്ധ ചികിത്സ അനിവാര്യമാണെന്ന് അരക്കിട്ടുറപ്പിക്കുന്നതാണ് കോട്ടയം മെഡിക്കല്‍ കോളജ് കെട്ടിടം തകര്‍ന്നുള്ള ദുരന്തമെന്ന് ബിജെപി നേതാവ് എന്‍. ഹരി. മന്ത്രിമാരുടെ നിസംഗ നിലപാടാണ് രക്ഷാപ്രവര്‍ത്തനം വൈകിച്ചതെന്നും എന്‍. ഹരി കുറ്റപ്പെടുത്തി. സമഗ്ര അന്വേഷണം നടത്തണം: സജി മഞ്ഞക്കടമ്പില്‍ കോട്ടയം: കോട്ടയം മെഡിക്കല്‍ കോളജ് കെട്ടിടം തകര്‍ന്നുവീണ് ബിന്ദു എന്ന സ്ത്രീ മരണമടഞ്ഞ സംഭവത്തില്‍ സമഗ്ര അന്വേഷണം നടത്തണമെന്ന് തൃണമൂല്‍ കോണ്‍ഗ്രസ് ചീഫ് കോ-ഓര്‍ഡിനേറ്റര്‍ സജി മഞ്ഞക്കടമ്പില്‍ ആവശ്യപ്പെട്ടു.

മുഖ്യമന്ത്രിയെ യൂത്ത് കോണ്‍ഗ്രസ് കരിങ്കൊടി കാട്ടി

കോട്ടയം: കോട്ടയം മെഡിക്കല്‍ കോളജിലെ കെട്ടിടം തകര്‍ന്നുവീണ സ്ഥലം സന്ദര്‍ശിച്ച മുഖ്യമന്ത്രി പിണറായി വിജയനെ യൂത്ത് കോണ്‍ഗ്രസ് പ്രവര്‍ത്തകര്‍ കരിങ്കൊടി കാട്ടി. ഇന്നലെ വൈകുന്നേരം അപകടം നടന്ന മെഡിക്കല്‍ കോളജില്‍ സന്ദര്‍ശനം നടത്തിയപ്പോള്‍ ആശുപത്രിക്ക് മുമ്പില്‍ വച്ചായിരുന്നു കരിങ്കൊടി കാട്ടിയത്. മുഖ്യമന്ത്രിയുടെ വാഹനവ്യൂഹത്തിന് മുന്നിലേക്ക് വന്ന പ്രവര്‍ത്തകരെ പോലീസ് ഇടപെട്ട് പ്രദേശത്തുനിന്നു നീക്കാന്‍ ശ്രമം നടത്തിയെങ്കിലും പ്രതിഷേധം വകവയ്ക്കാതെ ഇവര്‍ കരിങ്കൊടി കാട്ടുകയായിരുന്നു. മന്ത്രിമാരായ വീണ ജോര്‍ജും വി.എന്‍. വാസവനും മുഖ്യമന്ത്രിയോടൊപ്പം വാഹനത്തില്‍ ഉണ്ടായിരുന്നു. ആരോഗ്യമന്ത്രി വീണാ ജോര്‍ജിന്‍റെ രാജി ആവശ്യപ്പെട്ടാണ് കരിങ്കൊടി കാണിച്ചത്.

അധികാരികള്‍ ഇരുട്ടുകൊണ്ട് ഓട്ടയടയ്ക്കുന്നു

കോട്ടയം: മെഡിക്കല്‍ കോളജില്‍ ഇടിഞ്ഞുവീണ കെട്ടിടത്തില്‍ രോഗികള്‍ ആരുമില്ലെന്നും ചെറിയ അപകടമാണെന്നും ഉപയോഗശൂന്യമായ സാമഗ്രികള്‍ തള്ളുന്ന ഭാഗമാണെന്നുമുള്ള മന്ത്രിമാരുടെയും ആശുപത്രി സൂപ്രണ്ടിന്‍റെയും വാദം തള്ളി രോഗികളും കൂട്ടിരിപ്പുകാരും ആശുപത്രി ജീവനക്കാരും. കഴിഞ്ഞ ദിവസവും രാത്രി ഇവിടെ ഭക്ഷണം വിതരണം നടന്നതായും രോഗികളും കൂട്ടിരിപ്പുകാരും വാര്‍ഡില്‍ ഉണ്ടായിരുന്നതായും ആശുപത്രി വികസന സമിതിയംഗവും നഗരസഭാ കൗണ്‍സിലറുമായ സാബു മാത്യു പറഞ്ഞു. സ്ട്രെച്ചറും ട്രോളിയും ഉള്‍പ്പെടെ ഇവിടെയാണ് സൂക്ഷിക്കുന്നത്. ശുചിമുറിയിലെ ലൈറ്റുകള്‍ തെളിഞ്ഞാണ് കിടന്നിരുന്നതെന്നും സാബു മാത്യു പറഞ്ഞു. ആശുപത്രി ജീവനക്കാര്‍ വിശ്രമിക്കാന്‍ ഇവിടെയാണ് എത്തുന്നതെന്നും രോഗികളും കൂട്ടിരുപ്പുകാരും വാര്‍ഡുകളിലുണ്ടായിരുന്നതായും വാര്‍ഡിനോടു ചേര്‍ന്നു കാപ്പിക്കട നടത്തുന്ന അനില പറഞ്ഞു. വലിയ ശബ്ദം കേട്ടാണ് ഓടിയെത്തിയതെന്നും ഈ സമയം വാര്‍ഡുകളില്‍നിന്ന് രോഗികളെ നീക്കം ചെയ്യുന്നതു കണ്ടെന്നും താനും രക്ഷാപ്രവര്‍ത്തനത്തിനു നേതൃത്വം നല്‍കിയെന്നും കുഴിമറ്റം സ്വദേശി ജോയി വാഴച്ചാല്‍ പറഞ്ഞു. ബന്ധുവിന്‍റെ മൃതദേഹം മോര്‍ച്ചറിയില്‍നിന്നു കൊണ്ടുപോകാന്‍ എത്തിയതായിരുന്നു ജോയി. പല കാര്യങ്ങളിവും അധികൃതര്‍ കള്ളം പറയുകയാണെന്നും രോഗികളും കൂട്ടിരിപ്പുകാരും പറഞ്ഞു.

ദേശീയ പാതയോരത്ത് കോൺക്രീറ്റ്, ടാറിംഗ് അവശിഷ്ടങ്ങൾ വ്യാപകമായി തള്ളുന്നു

മുണ്ടക്കയം: മാലിന്യനിർമാർജനമെന്ന ലക്ഷ്യത്തോടെ നാടൊന്നാകെ കൈകോർത്ത് വിവിധ പ്രവർത്തനങ്ങൾ നടത്തുമ്പോൾ തങ്ങൾക്കിതൊന്നും ബാധകമല്ലെന്ന് മട്ടിലാണ് ചിലരുടെ പ്രവർത്തനം. ദേശീയപാതയിൽ ചോറ്റിക്കും ചിറ്റടിക്കുമിടയിലുള്ള റോഡിന്‍റെ വശങ്ങളിൽ വ്യാപകമായാണ് കോൺക്രീറ്റിംഗ്, ടാറിംഗ് അവശിഷ്ടങ്ങൾ തള്ളുന്നത്. സ്ഥിരം അപകട മേഖലയായ ഇവിടെ കഴിഞ്ഞ വർഷം റോഡിന്‍റെ വശങ്ങളിൽ കൂടിക്കിടുന്ന മാലിന്യങ്ങളും കല്ലും മണ്ണും നീക്കം ചെയ്ത് വാഹനയാത്ര സുഗമമാക്കിയിരുന്നു. ഇതിന് പിന്നാലെയാണ് ഇപ്പോൾ യാതൊരു നിയന്ത്രണവുമില്ലാതെ രാത്രിയും പകലും നിർമാണം നടക്കുന്ന പലസ്ഥലങ്ങളിലെയും കോൺക്രീറ്റ് അവശിഷ്ടങ്ങൾ തള്ളുന്നത്. ഈ ഭാഗത്ത് കൂടാതെ 31ാം മൈലിന് സമീപവും ദേശീയപാതയുടെ വശത്ത് വ്യാപകമായി ഇത്തരത്തിലുള്ള മാലിന്യങ്ങൾ നിക്ഷേപിച്ചിരിക്കുകയാണ്. മുണ്ടക്കയം ടൗണിനോട് ചേർന്ന് നടക്കുന്ന കലുങ്ക് നിർമാണത്തിന്‍റെ ഭാഗമായുള്ള അവശിഷ്ടങ്ങളാണ് ഇത്തരത്തിൽ ദേശീയപാതയുടെ വശങ്ങളിൽ തള്ളുന്നതെന്നും ദേശീയപാത വിഭാഗം അധികാരികളുടെ അറിവോടെയാണ് പാതിയോരത്ത് മാലിന്യ നിക്ഷേപം നടക്കുന്നതെന്നും ആക്ഷേപമുയരുന്നുണ്ട്. മഴക്കാലമായതോടെ ദിവസങ്ങൾക്കുള്ളിൽ കൂടിക്കിടക്കുന്ന മാലിന്യത്തിന് മുകളിൽ കാടുപടലങ്ങൾ പടർന്നുപിടിക്കും. ഇതു വാഹന യാത്രക്കാരുടെ കാഴ്ച മറക്കുകയും അപകടങ്ങൾക്ക് ഇടയാക്കുകയും ചെയ്യും. വാഹനങ്ങളുടെ എണ്ണം ക്രമാതീതമായി വർധിച്ചതുമൂലം പരാധീനതകളുടെ നടുവിലാണ് ദേശീയപാത. വർഷങ്ങളായി നവീകരണ പ്രവർത്തനങ്ങൾ ഒന്നും നടക്കാത്ത ദേശീയപാതയുടെ വശങ്ങളിൽ ഇത്തരത്തിൽ മാലിന്യങ്ങൾ കൂടിക്കിടക്കുന്നതോടെ അപകട സാധ്യത വർധിപ്പിക്കുകയാണ്. അടിയന്തര ഘട്ടങ്ങളിൽ വാഹനങ്ങൾ വെട്ടിച്ചുമാറ്റുമ്പോൾ ഇത്തരത്തിൽ റോഡിന്‍റെ വശത്ത് കൂട്ടിയിട്ടിരിക്കുന്ന കോൺക്രീറ്റ് അവശിഷ്ടങ്ങളിൽ ഇടിച്ച് അപകടമുണ്ടാകാനുള്ള സാധ്യതയും ഏറെയാണ്. കാമറകൾ സ്ഥാപിച്ചും പരിശോധനകൾ നടത്തിയും മാലിന്യ നിക്ഷേപകരെ കണ്ടെത്തി ഇവർക്കെതിരെ കർശന നടപടിയെടുക്കുമ്പോൾ പട്ടാപ്പകൽ യാതൊരു നിയന്ത്രണവുമില്ലാതെ റോഡിന്‍റെ വശങ്ങളിൽ മാലിന്യം തള്ളുന്നവർക്കെതിരേ എന്തുകൊണ്ട് നടപടി സ്വീകരിക്കുന്നില്ലെന്നും പൊതു സമൂഹത്തിൽനിന്നും ചോദ്യങ്ങളുയരുന്നുണ്ട്.

കാഞ്ഞിരപ്പള്ളി ജനറൽ ആശുപത്രിയിൽ ഡയാലിസിസ് സെന്‍റർ നിർമാണം തുടങ്ങി

കാഞ്ഞിരപ്പള്ളി: ജനറൽ ആശുപത്രിയിൽ ഡയാലിസിസ് സെന്‍റർ നിർമാണം ആരംഭിച്ചു. ജില്ലാ - ബ്ലോക്ക് - പഞ്ചായത്തുകൾ സംയുക്തമായി ഒരു കോടി രൂപയോളം ചെലവഴിച്ചാണ് നിർമാണം. 15 ബെഡുകളോട് കൂടിയതാണ് ഡയാലിസിസ് സെന്‍റർ. ഏഴ് ബെഡുകൾ സ്ത്രീകൾക്കും ഏഴു ബെഡുകൾ പുരുഷന്മാർക്കും ഒരു ഐസൊലേഷൻ ബെഡും അടങ്ങുന്നതാണ് സെന്‍റർ. ഡയാലിസിസ് സെന്‍ററിന്‍റെ നിർമാണോദ്ഘാടനം ചീഫ് വിപ്പ് ഡോ.എൻ. ജയരാജ് നിർവഹിച്ചു. എംഎൽഎയുടെ ആസ്തി വികസന ഫണ്ടിൽനിന്ന് ഒരു കോടി രൂപ ചെലവഴിച്ച് നിർമാണം പൂർത്തിയായ പോസ്റ്റുമോർട്ടം മോർച്ചറി കോംപ്ലക്‌സിന്‍റെ ഉദ്ഘാടനവും ചീഫ് വിപ്പ് ഡോ.എൻ. ജയരാജ് നിർവഹിച്ചു. വാഴൂർ ബ്ലോക്ക് പഞ്ചായത്ത് പ്രസിഡന്‍റ് മുകേഷ് കെ. മണി അധ്യക്ഷത വഹിച്ചു. ജില്ലാ പഞ്ചായത്തംഗം ടി.എൻ. ഗിരീഷ് കുമാർ, വാഴൂർ ബ്ലോക്ക് പഞ്ചായത്ത് വൈസ് പ്രസിഡന്‍റ് ഗീത എസ്. പിള്ള, ചിറക്കടവ് പഞ്ചായത്ത് പ്രസിഡന്‍റ് സി.ആർ ശ്രീകുമാർ, ബ്ലോക്ക് പഞ്ചായത്തംഗങ്ങളായ ഷാജി പാമ്പൂരി, ലതാ ഷാജൻ, പി.എം ജോൺ, ബി. രവീന്ദ്രൻ നായർ, പഞ്ചായത്തംഗം ആന്‍റണി മാർട്ടിൻ, ആശുപത്രി സൂപ്രണ്ട് സാവൻ സാറാ മാത്യു, എക്‌സിക്യൂട്ടീവ് എൻജിനിയർ ആർ. ദീപ, ബ്ലോക്ക് പഞ്ചായത്ത് സെക്രട്ടറി എസ്. ഫൈസൽ, രാഷ്ട്രീയ പാർട്ടി പ്രതിനിധികളായ വി.ജി. ലാൽ, സി.ജി. ജ്യോതിരാജ്, എ.എം. മാത്യു, പി.എ. താഹ, പി.എ. ഷെമീർ എന്നിവർ പ്രസംഗിച്ചു.

കാഞ്ഞിരപ്പള്ളി ബ്ലോക്ക് പഞ്ചായത്ത് ഖാദി നൂല്‍ നിര്‍മാണകേന്ദ്രം ഉദ്ഘാടനം നാളെ

കാഞ്ഞിരപ്പള്ളി: സംസ്ഥാന സര്‍ക്കാരിന്‍റെ ഒരു പഞ്ചായത്തില്‍ ഒരു സംരംഭം പദ്ധതി പ്രകാരം കാഞ്ഞിരപ്പള്ളി ബ്ലോക്ക് പഞ്ചായത്തിന്‍റെ നേതൃത്വത്തില്‍ 2024-25 വാര്‍ഷിക പദ്ധതിയില്‍ നാല് ലക്ഷം രൂപ ചെലവഴിച്ച് നടപ്പിലാക്കുന്ന ഖാദി നൂല്‍ നിര്‍മാണകേന്ദ്രത്തിന്‍റെ ഉദ്ഘാടനം നാളെ രാവിലെ 10.30ന് മണിമലയിൽ ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ് നിര്‍വഹിക്കും. 10 നൂല്‍നൂല്‍പ്പ് യന്ത്രങ്ങളില്‍ 11 പേര്‍ക്ക് നേരിട്ട് തൊഴില്‍ ലഭിക്കുന്ന പദ്ധതിയാണ് വിഭാവനം ചെയ്തിരിക്കുന്നത്. കോട്ടയം ജില്ലയിലെ എല്ലാ ഖാദി സെന്‍ററുകളിലേക്കും ആവശ്യമായ നൂല്‍ ഇവിടെ ഉത്പാദിപ്പിക്കും. നൂല്‍ നിര്‍മാണകേന്ദ്രത്തിന്‍റെ പൂര്‍ണനിയന്ത്രണം ഖാദി ബോര്‍ഡിന്‍റെ നേതൃത്വത്തിലാണ്. കാഞ്ഞിരപ്പള്ളി വ്യവസായ വകുപ്പ് ഓഫീസര്‍ കെ.കെ. ഫൈസല്‍ പദ്ധതി നിര്‍വഹണത്തിന് മേല്‍നോട്ടം വഹിക്കും. 2500 കിലോ നൂല്‍ എല്ലാ മാസം ഇവിടെ ഉത്പാദിപ്പിക്കും. ഇവിടെ തൊഴില്‍ ചെയ്യുന്നവര്‍ക്ക് പ്രതിമാസം 15,000 രൂപയുടെ വരുമാനം ലഭ്യമാക്കും. നൂല്‍നൂല്‍പ്പ് കേന്ദ്രം കറിക്കാട്ടൂര്‍ ഖാദി ഭവനിലാണ് പ്രവര്‍ത്തിക്കുന്നത്. മണിമല പഞ്ചായത്ത് പ്രസിഡന്‍റ് സിറിള്‍ തോമസ് അധ്യക്ഷത വഹിക്കും. ജില്ലാ പഞ്ചായത്തംഗം ജെസി ഷാജൻ, ബ്ലോക്ക് പഞ്ചായത്ത് വൈസ് പ്രസിഡന്‍റ് ജോളി മടുക്കക്കുഴി, ഖാദി ബോർഡ് മെംബർ കെ.എസ്. രമേശ് ബാബു, കോട്ടയം ഖാദി പ്രോജക്ട് ഓഫീസർ എം.വി. മനോജ് കുമാർ, സെക്രട്ടറി എസ്. ഫൈസല്‍, ജോയിന്‍റ് ബിഡിഒ ടി.ഇ. സിയാദ്, വ്യവസായ വികസന ഓഫീസര്‍ കെ.കെ. ഫൈസല്‍, ബ്ലോക്ക് പഞ്ചായത്തംഗങ്ങൾ, മണിമല പഞ്ചായത്തംഗങ്ങൾ തുടങ്ങിയവർ പ്രസംഗിക്കും.

വന്യജീവി ആക്രമണ പ്രതിരോധം: സെമിനാര്‍ നടത്തി

കാഞ്ഞിരപ്പള്ളി: വന്യജീവി ആക്രമണ പ്രതിരോധത്തിനും ലഘൂകരണത്തിനുമായി സംസ്ഥാന സര്‍ക്കാര്‍ രൂപീകരിച്ചിരിക്കുന്ന വിവിധ പരിപാടികളെക്കുറിച്ച് വിശദീകരിക്കുന്നതിനും ഈ വിഷയത്തില്‍ ജനപ്രതിനിധികള്‍ക്കുള്ള അഭിപ്രായങ്ങള്‍ അറിയിക്കുന്നതിനും ചര്‍ച്ചചെയ്യുന്നതിനുമായി ജനപ്രതിനിധികളും വനം വകുപ്പ് ഉദ്യോഗസ്ഥരും, തദ്ദേശസ്വയംഭണ വകുപ്പ് ഉദ്യോഗസ്ഥരും പങ്കെടുത്ത സെമിനാര്‍ കാഞ്ഞിരപ്പള്ളി ബ്ലോക്ക് പഞ്ചായത്ത് ഹാളില്‍ നടത്തി. ജനവാസമേഖലയില്‍ ജനങ്ങളുടെ ജീവനും സ്വത്തിനും കൃഷിക്കും അപകടകാരികളായ കാട്ടുപന്നികളെ നിയന്ത്രിക്കുന്നതിന് സംസ്ഥാന സര്‍ക്കാര്‍ ആവിഷ്കരിച്ചിരിക്കുന്ന മിഷന്‍ വൈല്‍ഡ് പിഗ്‌നെ കുറിച്ച് അസിസ്റ്റന്‍റ ഫോറസ്റ്റ് കണ്‍സര്‍വേറ്ററും സ്റ്റേറ്റ് നോഡല്‍ ഓഫീസറുമായ ശ്യാം മോഹന്‍ലാല്‍ ഐഎഫ്എസ്, കോട്ടയം ഡെപ്യൂട്ടി ഫോറസ്റ്റ് കണ്‍സര്‍വേറ്ററും ജില്ലാ കോ-ഓഡിനേറ്ററുമായ ജോണ്‍ മാത്യു എന്നിവര്‍ വിശദീകരിച്ചു. കാട്ടുപന്നികളെ നിയന്ത്രിക്കുന്നതിന് ഓരോ പഞ്ചായത്തിലും കൂടുതല്‍ ഷൂട്ടര്‍മാര്‍ക്ക് ലൈസന്‍സ് നല്‍കണമെന്നും നിയമ വ്യവസ്ഥകള്‍ ലഘൂകരിക്കണമെന്നും കുരങ്ങുശല്യം രൂക്ഷമായതിനാല്‍ കുരങ്ങിനെ ഒന്നാം പട്ടികയില്‍ പെടുത്തുകയും നിയന്ത്രിക്കാന്‍ പറ്റാത്ത തരത്തിലേക്കാക്കി മാറ്റുകയും ചെയ്ത കേന്ദ്ര വനം പരിസ്ഥിതി നിയമം പിന്‍വലിക്കണമെന്നും ജനപ്രതിനിധികള്‍ യോഗത്തില്‍ ആവശ്യമുന്നയിച്ചു. ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ് സെമിനാര്‍ ഉദ്ഘാടനം ചെയ്തു. വൈസ് പ്രസിഡന്‍റ് ജോളി മടുക്കക്കുഴി അധ്യക്ഷത വഹിച്ചു. പഞ്ചായത്ത് പ്രസിഡന്‍റുമാരായ കെ.കെ. ശശികുമാര്‍, സുബി സണ്ണി, സിറില്‍ തോമസ്, ജാന്‍സി സാബു, രേഖ ദാസ്, വൈസ് പ്രസിഡന്‍റുമാരായ സുമി ഇസ്മയില്‍, ഷീലമ്മ ഡൊമിനിക്ക്, പി.എന്‍. സുകുമാരന്‍, ബ്ലോക്ക് പഞ്ചായത്ത് ആരോഗ്യ സ്റ്റാന്‍ഡിംഗ് കമ്മിറ്റി ചെയര്‍പേഴ്സണ്‍ ടി.ജെ. മോഹനന്‍, ബിഡിഒ എസ്. ഫൈസല്‍, ജോയിന്‍റ് ബിഡിഒ ടി.ഇ. സിയാദ്, ഡപ്യൂട്ടി റേജ് ഓഫീസര്‍ വിനോദ്, പഞ്ചായത്ത് സെക്രട്ടിമാര്‍ തുടങ്ങിയവര്‍ സെമിനാറില്‍ പങ്കെടുത്തു.

ഉന്നത വിദ്യാഭ്യാസരംഗം മുൻഗണനാ മേഖല: മന്ത്രി ഡോ. ആർ. ബിന്ദു

വാഴൂർ: ഉന്നത വിദ്യാഭ്യാസ മേഖലയ്ക്ക് സർക്കാർ മുന്തിയ പരിഗണന നൽകി പദ്ധതികൾ നടപ്പിലാക്കി വരികയാണെന്ന് ഉന്നത വിദ്യാഭ്യാസ മന്ത്രി ഡോ.ആർ. ബിന്ദു. വാഴൂർ എസ്‌വിആർ എൻഎസ്എസ് കോളജിൽ റൂസാ പദ്ധതി പ്രകാരം നിർമിച്ച ഓഡിറ്റോറിയത്തിന്‍റെ ഉദ്ഘാടനം നിർവഹിച്ച് പ്രസംഗിക്കുകയായിരുന്നു മന്ത്രി. കഴിഞ്ഞ നാല് വർഷത്തിനുള്ളിൽ ഈ മേഖലയുടെ വികസനത്തിന് ആറായിരം കോടി രൂപ ചെലവഴിച്ചു. കേരളം 60 ശതമാനവും കേന്ദ്രം 40 ശതമാനവും എന്ന നിലയിലാണ് റൂസാ പദ്ധതിയുടെ ചെലവ് വിഹിതം വകയിരുത്തിയിരിക്കുന്നത്. വിദ്യാഭ്യാസ കാര്യത്തിൽ ഓരോ കുട്ടിക്കും തുക വകയിരുത്തിയിരിക്കുന്ന വിഭാഗത്തിൽ കേരളം ഒന്നാം സ്ഥാനത്താണ്. രാജ്യത്ത് മുൻ നിരയിൽ നിൽക്കുുന്ന ഉന്നത വിദ്യാഭ്യാസ സ്ഥാപനങ്ങളിൽ 21 ശതമാനവും കേരളത്തിലാണെന്നും മന്ത്രി ആർ. ബിന്ദു കൂട്ടിച്ചേർത്തു. ചീഫ് വിപ്പ് ഡോ.എൻ. ജയരാജ് അധ്യക്ഷത വഹിച്ചു. പഞ്ചായത്ത് പ്രസിഡന്‍റ് തോമസ് വെട്ടുവേലി, പ്രിൻസിപ്പൽ ഡോ.ബി. ഗോപകുമാർ, വാർഡ് മെംബർ സൗദ ഇസ്മയിൽ, വി. സിന്ധു, എസ്. ശ്രീകല, വി. ബബിൻ, ഡോ.കെ.എൻ. പ്രീതി, ടി.പി. ശ്രീനിവാസ് എന്നിവർ പ്രസംഗിച്ചു.

സഭാദിനത്തിൽ പാരമ്പര്യങ്ങളിൽ വിളങ്ങി കുറവിലങ്ങാട്ട് മെഗാ മാർഗംകളി

കുറവിലങ്ങാട്: സഭാദിനത്തിൽ പാരമ്പര്യങ്ങളുണർത്തി കലാവിരുന്ന്. മേജർ ആർക്കിഎപ്പിസ്കോപ്പൽ മർത്ത്മറിയം അർക്കദിയാക്കോൻ തീർഥാടന ദേവാലയത്തിലെ യുവജനങ്ങളാണ് പാരമ്പര്യത്തനിമ സമ്മാനിച്ച് സംഘശക്തിയിൽ തിളങ്ങിയത്. മെഗാ മാർഗംകളി സമ്മാനിച്ചായിരുന്നു യുവതയുടെ വേറിട്ട ശ്രദ്ധ നേടൽ. എസ്എംവൈഎം യൂണിറ്റിന്‍റെ സുവർണജൂബിലി ആഘോഷ സമാപനങ്ങളുടെ ആരംഭമായാണ് കലാവിരുന്നൊരുക്കിയത്. കൊച്ചുകുട്ടികൾ മുതൽ മുതിർന്നവർ വരെയുള്ള നൂറോളം പേർ മാർഗംകളിയുടെ ഭാഗമായി. ദ്രുതപദചലനങ്ങളും സംഗീത മികവും പാരമ്പര്യത്തനിമയും സമ്മേളിച്ച കലാവിരുന്ന് ആസ്വദിക്കാൻ ആയിരത്തോളം പേരാണ് എത്തിയത്. ദൈവമാതാവ് ഉയർത്തിനാട്ടിയ കൽക്കുരിശിനു സമീപമായിരുന്നു മെഗാ മാർഗംകളി. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി മാർഗംകളിയുടെ ദീപം തെളിച്ച് സന്ദേശം നൽകി. സീനിയർ അസിസ്റ്റന്‍റ് വികാരി ഫാ. ജോസഫ് മണിയഞ്ചിറ, അസിസ്റ്റന്‍റ് വികാരിമാരായ ഫാ. പോൾ കുന്നുംപുറത്ത്, ഫാ. ആന്‍റണി വാഴക്കാലയിൽ, ഫാ. ജോസഫ് ചൂരയ്ക്കൽ, ഫാ. തോമസ് താന്നിമലയിൽ, പാസ്റ്ററൽ അസിസ്റ്റന്‍റ് ഫാ. ജോസ് കോട്ടയിൽ, എസ്എംവൈഎം യൂണിറ്റ് പ്രസിഡന്‍റുമാരായ സെബാസ്റ്റ്യൻ പൊയ്യാനി, അമല ആൻ ബെന്നി എന്നിവർ പ്രസംഗിച്ചു.

360 ഡിഗ്രി മെറ്റബോളിക് ഡിസീസ് മാനേജ്മെന്‍റ് സെന്‍റര്‍ ആരംഭിച്ചു

പാലാ: കെ.എം. മാണി സ്മാരക ഗവണ്‍മെന്‍റ് ജനറല്‍ ആശുപത്രിയില്‍ 360 ഡിഗ്രി മെറ്റബോളിക് ഡിസീസ് മാനേജ്മെന്‍റ് സെന്‍ററിന്‍റെ ഉദ്ഘാടനം ജോസ് കെ. മാണി എംപി നിര്‍വഹിച്ചു. ജീവിതശൈലീ രോഗലക്ഷണങ്ങള്‍ ഗുരുതരമാകും മുന്‍പ് സങ്കീര്‍ണതകള്‍ തിരിച്ചറിഞ്ഞ് പ്രാരംഭ ദിശയില്‍ കണ്ടെത്തി ചികിത്സിക്കാനുള്ള സംവിധാനമാണിത്. പ്രമേഹം, ഹൃദ്രോഗം, കാന്‍സര്‍ അടക്കമുള്ള ജീവിതശൈലീ രോഗങ്ങളും ഭക്ഷണക്രമം നിശ്ചയിക്കല്‍, മാനസികാരോഗ്യം എന്നിവയും ഇതുവഴി തുടക്കത്തില്‍ത്തന്നെ കണ്ടെത്തി ചികിത്സ ഒരുക്കാന്‍ സാധിക്കും. നഗരസഭയ്ക്കു ലഭിച്ച ഹെല്‍ത്ത് ഗ്രാന്‍ഡ് 43 ലക്ഷം രൂപ വിനിയോഗിച്ചാണ് ചികിത്സാവിഭാഗം പ്രവര്‍ത്തനം ആരംഭിച്ചത്. ജീവിതശൈലീ രോഗ പരിശോധനകളെ ഒരു കുടക്കീഴിലാക്കുന്നതിന്‍റെ ഭാഗമായി സര്‍ക്കാരിന്‍റെ നേതൃത്വത്തില്‍ സംസ്ഥാനത്തുടനീളം നടപ്പാക്കുന്ന പദ്ധതിയുടെ ഭാഗമായാണ് പാലാ ജനറല്‍ ആശുപത്രിയെയും ഉള്‍പ്പെടുത്തിയിരിക്കുന്നത്. പ്രമേഹം പോലുള്ള ജീവിതശൈലീ രോഗങ്ങള്‍ സാര്‍വത്രികമായി മാറുന്ന ഈ കാലഘട്ടത്തില്‍ രോഗം പ്രാരംഭ ദിശയില്‍ത്തന്നെ കണ്ടെത്തി ചികിത്സ ഉറപ്പാക്കുകയാണ് നോണ്‍ കമ്യൂണിക്കബിള്‍ ഡിസീസ് കെയര്‍ സെന്‍ററിന്‍റെ ലക്ഷ്യം. ഇവിടെ ഡയബറ്റിക് ഫ്യൂട്ട്, റെറ്റിനോപ്പതി, നെഫ്രോപ്പതി എന്നിവയില്‍ അടിസ്ഥാന രോഗനിര്‍ണയങ്ങളും ചികിത്സയും ലഭ്യമാക്കുന്നതിനോടൊപ്പം ഡയറ്റ്, പുകവലിനിര്‍ത്തല്‍ എന്നിവയ്ക്കായി കൗണ്‍സലിംഗും മെഡിക്കല്‍ കണ്‍സള്‍ട്ടേഷനും സൗകര്യം ഏര്‍പ്പെടുത്തിയിട്ടുണ്ട്. ബയോ ടെസ്റ്റിയോ മീറ്റര്‍, ഹാന്‍സ് ഹെല്‍ഡ് ഡോപ്പര്‍, ഫാറ്റ് ഇന്‍വെസസ് മെഷീന്‍, മെട്രിയാടിക് കാമറ, മിനി സൈറോ മീറ്റര്‍ എന്നീ ഉപകരണങ്ങളും സജ്ജമാക്കിയിട്ടുണ്ട്. പാലാ നഗരസഭാ അധ്യക്ഷന്‍ തോമസ് പീറ്റര്‍ അധ്യക്ഷത വഹിച്ചു. വെളിയന്നൂര്‍ പഞ്ചായത്ത് പ്രസിഡന്‍റ് സജേഷ് ശശി, നഗരസഭാ വൈസ് ചെയര്‍പേഴ്സണ്‍ ബിജി ജോജോ, നഗരസഭാംഗങ്ങളായ സാവിയോ കാവുകാട്ട്, ജോസ് ചീരാംകുഴി, പ്രഫ. സതീഷ് ചൊള്ളാനി, ജോസിന്‍ ബിനോ, ലീന സണ്ണി, സിജി പ്രസാദ്, സതി ശശികുമാര്‍ തുടങ്ങിയവര്‍ പങ്കെടുത്തു.

സീറോ മലബാര്‍ സഭാദിനം ആചരിച്ചു

ചേര്‍പ്പുങ്കല്‍: പൈതൃകം തലമുറകള്‍ക്ക് പകര്‍ന്നുനല്‍കാന്‍ നമുക്കു കടമയുണ്ടെന്നും ചരിത്രം പഠിച്ച് വിശ്വാസത്തിന് ധൈര്യപൂര്‍വം സാക്ഷ്യം നല്‍കണമെന്നും ചേര്‍പ്പുങ്കല്‍ ഫൊറോന വികാരി ഫാ. മാത്യു തെക്കേല്‍. കത്തോലിക്ക കോണ്‍ഗ്രസ്് പാലാ രൂപതാ സമിതിയുടെ ആഭിമുഖ്യത്തില്‍ സീറോ മലബാര്‍ സഭാദിനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ആദ്യമായാണ് മാര്‍ത്തോമ്മാ സ്മാരകത്തില്‍ സഭാദിനം ആചരിക്കുന്നത്. രൂപതാ പ്രസിഡന്‍റ് ഇമ്മാനുവല്‍ നിധീരിയുടെ അധ്യക്ഷതയില്‍ ചേര്‍ന്ന സമേളനത്തില്‍ ഡോ. പി.സി. അനിയന്‍കുഞ്ഞ്, റവ. ഡോ. ജോര്‍ജ് വര്‍ഗീസ് ഞാറക്കുന്നേല്‍, ജോസ് വട്ടുകുളം, ജോയി കണിപ്പറമ്പില്‍, ആന്‍സമ്മ സാബു, അഡ്വ. ജോണ്‍സണ്‍ വീട്ടിയാങ്കല്‍, സി.എം. ജോര്‍ജ്, പയസ് കവളംമാക്കല്‍, സിന്ധു ജയ്ബു, ഫാ. തോമസ് പരിയാരത്ത്, ജോര്‍ജ് മണിയങ്ങാട്ട്, മാര്‍ട്ടിന്‍ കോലടി, സാബു പൂണ്ടിക്കുളം, ടോമി കണ്ണീറ്റുമാലില്‍, ബെന്നി കിണറ്റുകര, രാജേഷ് പാറയില്‍, ജോബിന്‍ പുതിയിടത്തുചാലില്‍, ബെല്ലാ സിബി, കുര്യാക്കോസ് തുടങ്ങിയവര്‍ പ്രസംഗിച്ചു.

മാലിന്യനിക്ഷേപകേന്ദ്രം ഇനി മുതല്‍ മിനിപാര്‍ക്ക്

കിടങ്ങൂര്‍: പഞ്ചായത്തിലെ കട്ടച്ചിറ ചെക്ക്ഡാം പരിസരം മാലിന്യങ്ങള്‍ വലിച്ചെറിഞ്ഞും സാമൂഹ്യവിരുദ്ധ ശല്യങ്ങളിലൂടെയും നാട്ടുകാരുടെ സ്വൈരജീവിതത്തിന് തടസമായിരുന്ന പ്രദേശം ഇപ്പോള്‍ മീനച്ചിലാറിന്‍റെ മനോഹര തീരമായി മാറി. ജില്ലാ പഞ്ചായത്തിന്‍റെ പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബർ‍ ജോസ്മോന്‍ മുണ്ടയ്ക്കല്‍ അനുവദിച്ച 10 ലക്ഷം രൂപയില്‍നിന്ന് അഞ്ചു ലക്ഷം രൂപ ഉപയോഗിച്ചുള്ള ഒന്നാംഘട്ട പ്രവര്‍ത്തനങ്ങള്‍ പൂര്‍ത്തീകരിച്ചാണ് ചെക്ക്ഡാമിന്‍റെ കിടങ്ങൂര്‍ പതിമൂന്നാം വാര്‍ഡിന്‍റെ ഭാഗം മനോഹരമാക്കിയത്. ചെക്ക്ഡാമിലേക്ക് ഇറങ്ങുന്ന ഭാഗത്ത് സംരക്ഷണഭിത്തികളും സ്റ്റീല്‍ പൈപ്പ് ഉപയോഗിച്ചുള്ള വേലികളും ഗെയ്റ്റും സ്ഥാപിക്കുകയും ചെക്ക്ഡാമിലേക്കുള്ള നടപ്പാത കോണ്‍ക്രീറ്റിംഗ് നടത്തുകയും അപകടസൂചനാ ബോര്‍ഡുകള്‍ സ്ഥാപിക്കുകയും ചെയ്തു. കൂടാതെ ചെക്ക്ഡാമിലെ വെള്ളച്ചാട്ടം ദര്‍ശിക്കുന്നതിനായി സ്റ്റീല്‍ പൈപ്പുകൊണ്ടുള്ള ഇരിപ്പിടങ്ങള്‍ ക്രമീകരിക്കുകയും ടൈല്‍ വിരിച്ച് പരിസരം മനോഹരമാക്കുകയും ചെയ്തു. രാത്രികാലങ്ങളിലെ സാമൂഹ്യവിരുദ്ധശല്യങ്ങള്‍ പൂര്‍ണമായും ഒഴിവാക്കുന്നതിനായി ജില്ലാ പഞ്ചായത്ത് മെംബർ‍ ജോസ്മോന്‍ മുണ്ടയ്ക്കല്‍ ചെക്ക്ഡാമിന് മുമ്പില്‍ മിനിമാസ്റ്റ് ലൈറ്റ് സ്ഥാപിക്കുകയും പാമ്പാടി ബ്ലോക്ക് പഞ്ചായത്തിന്‍റെ പദ്ധതിയില്‍ ഉള്‍പ്പെടുത്തി ബ്ലോക്ക് പഞ്ചായത്ത് മെംബർ പ്രഫ. ഡോ. മേഴ്സി ജോണ്‍ മുഖേന അനുവദിച്ച ഫണ്ട് ഉപയോഗിച്ച് സിസിടിവിയും സ്ഥാപിച്ചു. ഈ പ്രവര്‍ത്തനങ്ങള്‍ എല്ലാം പൂര്‍ത്തീകരിച്ചതോടെ മാലിന്യം വലിച്ചെറിയുന്ന കേന്ദ്രമായിരുന്ന ചെക്ക്ഡാം പരിസരം മനോഹരമായ മിനിപാര്‍ക്കായി മാറി. വൈകുന്നേരങ്ങളില്‍ പരിസരവാസികള്‍ക്കും മറ്റും മീനച്ചിലാറിന്‍റെ കിടങ്ങൂര്‍ ചെക്ക്ഡാം ഭാഗത്തെ മനോഹാരിത ദര്‍ശിക്കാനുള്ള സുരക്ഷിതസ്ഥാനമായി ഈ ഭാഗം മാറി. രണ്ടാം ഘട്ടമായി ചെക്ക്ഡാമിന്‍റെ മറുകരയില്‍ പന്ത്രണ്ടാം വാര്‍ഡിന്‍റെ ഭാഗത്തും ആവശ്യമായ സുരക്ഷാക്രമീകരണങ്ങള്‍ ഏര്‍പ്പെടുത്തിക്കൊണ്ട് മനോഹരമാക്കുന്നതാണ്. കിടങ്ങൂര്‍ പഞ്ചായത്ത് പതിമൂന്നാം വാര്‍ഡില്‍ പ്രവര്‍ത്തിച്ചുവരുന്ന പുഴയോരം റെസിഡന്‍റ്സ് അസോസിയേഷനാണ് ഈ പ്രവര്‍ത്തനങ്ങള്‍ ഏകോപിപ്പിക്കുന്നതിന് നേതൃത്വം വഹിച്ചത്. ഒന്നാംഘട്ട നിര്‍മാണം പൂര്‍ത്തീകരിച്ച മിനി പാര്‍ക്കിന്‍റെ ഉദ്ഘാടനം ഇന്നു വൈകുന്നേരം അഞ്ചിന് ജില്ലാ പഞ്ചായത്ത് മെമ്പര്‍ ജോസ്മോന്‍ മുണ്ടയ്ക്കല്‍ നിര്‍വഹിക്കും. പഞ്ചാത്ത് പ്രസിഡന്‍റ് അഡ്വ. ഇ.എം. ബിനു അധ്യക്ഷനാകും. പുഴയോരം റെസിഡന്‍റ്സ് അസോസിയേഷന്‍ പ്രസിഡന്‍റും ബ്രില്യന്‍റ് സ്റ്റഡി സെന്‍റര്‍ ഡയറക്ടറുമായ ബി. സന്തോഷ് കുമാര്‍, ബ്ലോക്ക് പഞ്ചായത്ത് മെമ്പര്‍ പ്രഫ. ഡോ. മേഴ്സി ജോണ്‍, പഞ്ചായത്ത് മെമ്പര്‍ രശ്മി രാജേഷ് എന്നിവര്‍ പ്രസംഗിക്കും.

അന്ത്യാളത്ത് മിനി മാസ്റ്റ് ലൈറ്റ് സ്ഥാപിച്ചു

പയപ്പാര്‍ :ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബർ രാജേഷ് വാളിപ്ലാക്കല്‍ അനുവദിച്ച ഫണ്ട് ഉപയോഗിച്ച് കരൂര്‍ പഞ്ചായത്തിലെ അന്ത്യാളം വാര്‍ഡില്‍ പുഴയോരത്ത് എലിപ്പുലിക്കാട്ട് പാലം ജംഗ്ഷനില്‍ മിനിമാസ്റ്റ് ലൈറ്റ് സ്ഥാപിച്ചു. പഞ്ചായത്ത് മെംബർ‍ ലിന്‍റണ്‍ ജോസഫിന്‍റെ അധ്യക്ഷതയില്‍ ചേര്‍ന്ന യോഗത്തില്‍ ജില്ലാ പഞ്ചായത്ത് മെംബർ‍ രാജേഷ് വാളിപ്ലാക്കല്‍ ലൈറ്റിന്‍റെ സ്വിച്ച് ഓണ്‍ കര്‍മം നിര്‍വഹിച്ചു. ബ്ലോക്ക് പഞ്ചായത്ത് മെംബർ ലിസമ്മ ബോസ്, ഡോ. രാജു സണ്ണി, ബോസ് വരകില്‍പറമ്പില്‍, സിബി ഓടയ്ക്കല്‍ തുടങ്ങിയവര്‍ പ്രസംഗിച്ചു.

രാഷ്‌ട്രീയ ചിന്തകൾ വഴിമാറി; ജോസ് കെ. മാണിക്ക് ആശംസാപ്രവാഹം

കുറവിലങ്ങാട്: രാഷ്ട്രീയ എതിരാളികൾ പോലും ജോസ് കെ. മാണിക്ക് കലവറയില്ലാത്ത ആശംസകൾ സമ്മാനിച്ചു. സയൻസ് സെന്‍റർ ഉദ്ഘാടനവേളയിൽ സ്വാഗതപ്രസംഗം മുതൽ നന്ദി വരെ എല്ലാ പ്രസംഗകരും ജോസ് കെ. മാണിയുടെ നേതൃത്വത്തെ വാനോളം പുകഴ്ത്തി. സയൻസ് സിറ്റിയുടെ ശില്പി എന്നാണ് സ്വാഗത പ്രസംഗകയായ മന്ത്രി ഡോ.ആർ. ബിന്ദു വിശേഷിപ്പിച്ചത്. സയൻസ് സെന്‍റർ യാഥാർഥ്യമാക്കാൻ ജോസ് കെ. മാണിയുടെ ഇടപെടൽ എടുത്തുപറയുന്നു എന്നായിരുന്നു മുഖ്യമന്ത്രിയുടെ നിലപാട്. ഫ്രാൻസിസ് ജോർജ് എംപിയും ജോസ് കെ. മാണി മുൻഗാമി എന്ന നിലയിൽ നടത്തിയ പരിശ്രമങ്ങൾക്ക് ആശംസകളും നന്ദിയും നേർന്നു. മോൻസ് ജേസഫ് എംഎൽഎയും ജോസ് കെ .മാണി എംപിയുടെ ഇടപെടലുകൾ പരാമർശിച്ചു. ജോസ് കെ. മാണി എംപിയെക്കുറിച്ചുള്ള പരാമർശങ്ങൾ നിറഞ്ഞ കരഘോഷത്തോടെയാണ് സദസ് ഏറ്റുവാങ്ങിയത് ഉദ്ഘാടന സമ്മേളനത്തിന് മണിക്കൂറുകൾക്കു മുമ്പുതന്നെ സമ്മേളന വേദിയിൽ എത്തിയ ജോസ് കെ. മാണി നാട്ടുകാരുമായി സൗഹൃദം പങ്കിട്ടും തുടർപ്രവർത്തനങ്ങൾ സംബന്ധിച്ച് വിശദീകരിച്ചും സജീവമായിരുന്നു. ആമുഖപ്രഭാഷണത്തിൽ ഈ പദ്ധതി ആരുടെ എന്ന സ്വയം ചോദ്യത്തിന് ജനങ്ങളുടേതെന്ന ഉത്തരവും ജോസ് കെ. മാണി സമ്മാനിച്ചു. മുഖ്യമന്ത്രിയായിരുന്ന ഉമ്മൻചാണ്ടിയെയും മന്ത്രിയായിരുന്ന കെ. എം. മാണിയെയും പ്രത്യേകം പരാമർശിച്ചു. പൊതുപ്രവർത്തകനെന്ന നിലയിൽ അമൂല്യമായ ഒരു നിമിഷമാണ് സയൻസ് സെന്‍ററിന്‍റെ ഉദ്ഘാടനം എന്ന് ജോസ് കെ. മാണി പറഞ്ഞു.

ഐക്യം നിലനിർത്തേണ്ടത് ക്രൈസ്തവ സഭകളുടെ ദൗത്യം: ബിഷപ് മാർ ഇഗ്നാത്തിയോസ്

നിലയ്ക്കൽ: ഐക്യം നിലനിർത്തുകയെന്നത് എല്ലാ ക്രൈസ്തവ സഭകളുടെയും ദൗത്യമാണെന്ന് നിലയ്ക്കൽ എക്യുമെനിക്കൽ ട്രസ്റ്റ് വൈസ് ചെയർമാൻ ബിഷപ് ഡോ. ജോഷ്വ മാർ ഇഗ്നാത്തിയോസ് പറഞ്ഞു. മലങ്കര കത്തോലിക്കാ സഭ മാവേലിക്കര രൂപതാ ഭരണ ചുമതലയൊഴിഞ്ഞ ജോഷ്വാ മാർ ഇഗ്നാത്തിയോസിനു നിലയ്ക്കൽ സെന്‍റ് തോമസ് എക്യൂമെനിക്കൽ ചർച്ചിൽ ദുക്റാനാ തിരുനാൾ സമാപനത്തിനു ശേഷം സീതത്തോട്, ചിറ്റാർ, തുലാപ്പള്ളി പൗരാവലിയുടെ നേതൃത്വത്തിൽ നൽകിയ സ്നേഹാദരവിന് മറുപടി സന്ദേശം നൽകുകയായിരുന്നു അദ്ദേഹം. മാർത്തോമ്മ ശ്ലീഹായുടെ പാരന്പര്യമുള്ള ഭാരത ക്രൈസ്തവ സഭകൾ ഒരേ ലക്ഷ്യത്തോടെ മുന്നേറുന്നവരാണെന്നും ക്രിസ്തു സാക്ഷ്യം നിർവഹിക്കാൻ ഐക്യത്തിൽ വളരുകയാണ് വേണ്ടതെന്നും ബിഷപ് മാർ ഇഗ്നാത്തിയോസ് അഭിപ്രായപ്പെട്ടു. കെ.യു. ജനീഷ് കുമാർ എംഎൽഎ സമ്മേളനം ഉദ്ഘാടനം ചെയ്തു. കെസിസി മുൻ അധ്യക്ഷൻ ബിഷപ് ഉമ്മൻ ജോർജ് കോശി അധ്യക്ഷത വഹിച്ചു. സീതത്തോട് യുസിഎ പ്രസിഡന്‍റ് ഫാ. ഗീവർഗീസ് പാലമൂട്ടിൽ, ബഥനി ആശ്രമം സുപ്പീരിയർ ഫാ. ഗീവർഗീസ് കുറ്റിയിൽ, നിലയ്ക്കൽ ചർച്ച് അഡ്മിനിസ്ട്രേറ്റർ ഫാ. ഷൈജു മാത്യു, ക്നാനായ സമുദായ ഭദ്രാസന സെക്രട്ടറി ഫാ.നോബിൻ ഇളകുറ്റൂർ, ഫാ. ഐവാൻ ജോസഫ്, ജൂബി ചരുവിൽ, സി.ടി.തോമസ്, ജോർജ് ജേക്കബ്, ബോബി ഏബ്രഹാം, ഡോ. ഏബ്രഹാം മലമണ്ണേൽ, തോമസ് കുട്ടി തേവർമുറിയിൽ എന്നിവർ പ്രസംഗിച്ചു.

ജോസ്‌കോ ആശുപത്രിയില്‍ പാരാമെഡിക്കല്‍ കോഴ്സ്: അഡ്മിഷന്‍ ആരംഭിച്ചു

പന്തളം: ഇടപ്പോണ്‍ ജോസ്‌കോ മള്‍ട്ടി സ്പെഷാലിറ്റി ആശുപത്രിയില്‍ പാരാമെഡിക്കല്‍ തൊഴിലധിഷ്ഠിത കോഴ്സുകളിലേക്ക് അഡ്മിഷന്‍ ആരംഭിച്ചു. ഇന്ത്യയിലും വിദേശ രാജ്യങ്ങളിലും വളരെയധിയകം തൊഴിലവസരമുള്ള കോഴ്സിലേക്ക് പത്താം ക്ലാസ് പാസായവര്‍ക്കും പഠിക്കാം. ലിങ്കയാസ് യൂണിവേഴ്സിറ്റി നടത്തുന്ന ദ്വിവത്സര ഡിപ്ലോമയ്ക്കും ത്രിവത്സര ഡിഗ്രിക്കും പഠിക്കാന്‍ പ്ലസ്ടു പാസാകണം. പ്ലസ്ടു ഏത് ഗ്രൂപ്പില്‍ ഉള്ളവര്‍ക്കും പഠിക്കാം. എന്‍സിവിആര്‍ടി നടത്തുന്ന ദ്വിവത്സര മെഡിക്കല്‍ ലബോറട്ടറി ടെക്നീഷ്യൻ, റേഡിയോളജി, ഇമേജിംഗ് ടെക്നോളജി, എന്നീ കോഴ്സുകളുടെ ഡിപ്ലോമയും നടത്തും. കേരള സര്‍ക്കാരിന്‍റെയും പാരാ മെഡിക്കല്‍ കൗണ്‍സിലിന്‍റെയും അംഗീകാരമുള്ള ഹെല്‍ത്ത് ഇന്‍സ്‌പെക്ടര്‍ ഡിപ്ലോമ കോഴ്സുമുണ്ട്. സയന്‍സ് ഗ്രൂപ്പില്‍ പ്ലസ്ടു പാസായവര്‍ക്ക് അപേക്ഷിക്കാം. പഠനത്തോടൊപ്പം ജോസ്‌കോയില്‍ പ്രായോഗിക പരിശീലനവും നല്‍കും. ഹോസ്പിറ്റല്‍ അഡ്മിനിസ്‌ട്രേഷന്‍, ഹോം നഴ്‌സിംഗ് എന്നീ ഒരു വര്‍ഷ കോഴ്സുകളുമുണ്ട്. പത്താം ക്ലാസ് പാസായവര്‍ക്ക് അഡ്മിഷന്‍ ലഭിക്കും. 0479 -237 4982 / 95444 60920

മേലേക്കുളം ഉദ്ഘാടനം നാളെ

കാഞ്ഞിരപ്പള്ളി: ബ്ലോക്ക് പഞ്ചായത്തിന്‍റെയും മണിമല പഞ്ചായത്തിന്‍റെയും നേതൃത്വത്തില്‍ മണിമല പഞ്ചായത്ത് 12ാം വാര്‍ഡില്‍ അമൃത് സരോവര്‍ പദ്ധതിയില്‍ പുനരുദ്ധാരണം നടത്തി ഉപയോഗ്യമാക്കിയ മേലേക്കുളത്തിന്‍റെ ഉദ്ഘാടനം നാളെ രാവിലെ 11.30ന് ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ് നിര്‍വഹിക്കും. പ്രളയത്തിലും പ്രകൃതി ക്ഷോഭത്തിലും പെട്ട് മൂടിപ്പോയി മാലിന്യ നിക്ഷേപ കേന്ദ്രമായി മാറിയിരുന്ന മേലേക്കുളം മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി വഴിയാണ് ഉപയോഗ്യമാക്കി പൊതുജനങ്ങള്‍ക്കായി സമര്‍പ്പിക്കുന്നത്. യോഗത്തിൽ മണിമല പഞ്ചായത്ത് പ്രസിഡന്‍റ് സിറിള്‍ തോമസ് അധ്യക്ഷത വഹിക്കും. ജില്ലാ പഞ്ചായത്തംഗം ജെസി ഷാജൻ, ബ്ലോക്ക് പഞ്ചായത്ത് വൈസ് പ്രസിഡന്‍റ് ജോളി മടുക്കക്കുഴി, ബ്ലോക്ക് പഞ്ചായത്തംഗങ്ങൾ, മണിമല പഞ്ചായത്തംഗങ്ങൾ തുടങ്ങിയവർ പ്രസംഗിക്കും.

പൊതുപണിമുടക്ക്; വാഹനജാഥ ഇന്നും നാളെയും

കാഞ്ഞിരപ്പള്ളി: ഒന്പതിന് നടക്കുന്ന പൊതുപണിമുടക്കിന്‍റെ പ്രചാരണാർഥം സംയുക്ത ട്രേഡ് യൂണിയൻ സംഘടിപ്പിച്ചിട്ടുള്ള വാഹന പ്രചാരണ ജാഥകൾ ഇന്നും നാളെയും നടക്കും. പൂഞ്ഞാർ നിയോജക മണ്ഡലം ജാഥ ഇന്നു രാവിലെ ഒന്പതിന് ഇളങ്കാട് സിഐടിയു ജില്ലാ വൈസ് പ്രസിഡന്‍റ് ലാലിച്ചൻ ജോർജ് ഉദ്ഘാടനം ചെയ്യും. കെ. രാജേഷ് ക്യാപ്റ്റനും വി.പി. സുഗതൻ, സുരേഷ് ബാബു എന്നിവർ വൈസ് ക്യാപ്റ്റൻമാരായിരിക്കും. രാവിലെ 11ന് മുണ്ടക്കയം, 12ന് മടുക്ക, ഉച്ചകഴിഞ്ഞ് രണ്ടിന് മുക്കൂട്ടുതറ, മൂന്നിന് എരുമേലി എന്നിവിടങ്ങളിൽ പര്യടനം നടത്തി വൈകുന്നേരം അഞ്ചിന് പാറത്തോട്ടിൽ പൊതുസമ്മേളനത്തോടെ സമാപിക്കും. കാഞ്ഞിരപ്പള്ളി നിയോജക മണ്ഡലം ജാഥ നാളെ രാവിലെ ഒന്പതിന് കാഞ്ഞിരപ്പള്ളി പേട്ട കവലയിൽ സിഐടിയു അഖിലേന്ത്യാ വർക്കിംഗ് കമ്മിറ്റിയംഗം കെ.ജെ. തോമസ് ഉദ്ഘാടനം ചെയ്യും. രാവിലെ 10.30ന് പൊന്തൻപുഴ, 11.30ന് മണിമല ബസ് സ്റ്റാൻഡ്, 12ന് പത്തനാട്, 12.30ന് നെടുംകുന്നം, 1.30ന് കറുകച്ചാൽ, ഉച്ചകഴിഞ്ഞ് 3.30ന് കൊടുങ്ങൂർ, വൈകുന്നേരം 4.30ന് പള്ളിക്കത്തോട് എന്നിവിടങ്ങളിൽ പര്യടനം നടത്തി വൈകുന്നേരം അഞ്ചിന് പൊതുസമ്മേളനത്തോടെ പൊൻകുന്നത്ത് സമാപിക്കും. സിജി ജോതിരാജ് ക്യാപ്റ്റനും പി.കെ. നസീർ വൈസ് ക്യാപ്റ്റനും സണ്ണിക്കുട്ടി അഴകംപ്രായിൽ മാനേജരുമായിരിക്കും.

സയൻസ് സിറ്റി ഉദ്ഘാടനം ആഘോഷമാക്കി നാട്

കുറവിലങ്ങാട് : ശാസ്ത്രവും കൗതുകവും വിനോദവും വിജ്ഞാനവും സമ്മാനിക്കുന്ന സയൻസ് സിറ്റിയുടെ ആദ്യഘട്ടമായ സയൻസ് സെന്‍ററിന്‍റെ ഉദ്ഘാടനത്തെ നാട് ആവേശത്തോടെ വരവേറ്റു. ദിവസങ്ങളായി ഉദ്ഘാടനം ആഘോഷമാക്കാനുള്ള തയാറെടുപ്പുകളിലായിരുന്നു നാടും പ്രാദേശിക ജനപ്രതിനിധികളും. പള്ളിക്കവല വരെ കൊടിതോരണങ്ങൾകൊണ്ട് എംസി റോഡ് അലങ്കരിച്ചിരുന്നു. എം സി റോഡിലെ വലിയ കുഴികൾ അടച്ച് യാത്രായോഗ്യമാക്കി എന്നത് നാടിന് ഏറെ നേട്ടമായി. സയൻസ് സിറ്റിയിലെ കെട്ടിടങ്ങൾ മുഴുവൻ വൈദ്യുതദീപങ്ങളാൽ അലങ്കരിച്ചിരുന്നു. മുഖ്യമന്ത്രി പങ്കെടുക്കുന്ന സമ്മേളനം എന്ന നിലയിൽ വലിയ സുരക്ഷാക്രമീകരണങ്ങളും ഏർപ്പെടുത്തിയിരുന്നു. രണ്ടു ദിവസമായി നാടുനീളെ വലിയ അനൗൺസ്മെന്‍റ് ഉണ്ടായിരുന്നു. വിവിധ പഞ്ചായത്തുകളുടെയും സംഘടനകളുടെയും നേതൃത്വത്തിൽ വാഹനങ്ങളിൽ ആൾക്കാരെ ഉദ്ഘാടനത്തിൽ എത്തിക്കാനുള്ള ക്രമീകരണങ്ങളും നടത്തിയിരുന്നു. പരാതികളില്ലാതെ ഗതാഗതക്രമീകരണങ്ങളും നടത്താൻ കഴിഞ്ഞു. ആദ്യദിനംതന്നെ സയൻസ് സെന്‍റർ സന്ദർശിക്കുക എന്ന ആവേശത്തോടെയായിരുന്നു നാട്ടുകാരുടെ ഒഴുക്ക് . മഴ മാറിനിന്ന് അനുകൂല കാലാവസ്ഥ സംഘാടകർക്ക് വലിയ ആശ്വാസമായി. കൂറ്റൻ പന്തൽ നിറഞ്ഞുകവിഞ്ഞതോടെ ആളുകളെ സയൻസ് സിറ്റിയുടെ കാമ്പസിൽ കസേരയിട്ട് ഇരുത്തുകയായിരുന്നു. സ്റ്റേജിന്‍റെ ക്രമീകരണങ്ങളിൽ അവസാന നിമിഷം നേരിയ മാറ്റങ്ങൾ വരുത്തേണ്ടിവന്നത് മാത്രമാണ് നേരിയ അസ്വസ്ഥതകൾ സൃഷ്ടിച്ചത്. മുഖ്യമന്ത്രിയും വിശിഷ്ടാതിഥികളും എത്തുന്നതിന് ഒരു മണിക്കൂറോളം മുമ്പാണ് സ്റ്റേജിന്‍റെ ക്രമീകരണങ്ങൾ പൂർത്തീകരിച്ചത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]