ADVERTISEMENT

ADVERTISEMENT

ഭാര്യാമാതാവിനെ യുവാവ് തലയ്ക്കടിച്ച് കൊലപ്പെടുത്തി

മുക്കൂട്ടുതറ: വെച്ചൂച്ചിറയിൽ ഭാര്യാമാതാവിനെ യുവാവ് തലയ്ക്കടിച്ച് കൊലപ്പെടുത്തി. അഴുത കോളനിയിലെ താമസക്കാരി ഉഷാമണി (54) യാണ് കൊല്ലപ്പെട്ടത്. സംഭവവുമായി ബന്ധപ്പെട്ട് ഉഷയുടെ മരുമകൻ സുനിലിനെ വെച്ചൂച്ചിറ പോലീസ് കസ്റ്റഡിയിലെടുത്തു.

കുടുംബപ്രശ്നമാണ് തർക്കത്തിലേക്കും കൊലപാതകത്തിലേക്കും നയിച്ചതെന്നാണ് പ്രാഥമികവിവരം. മൺവെട്ടി ഉപയോഗിച്ചാണ് കൊലപാതകം നടത്തിയത്. ഇന്നലെ ഉച്ചകഴിഞ്ഞ് മൂന്നോടെയാണ് സംഭവം.

എരുമേലി എലിവാലിക്കര സ്വദേശിയായസുനിൽ നാലുവർഷ മായി ഭാര്യയുമായി അകന്നു കഴിയുകയായിരുന്നു. ഇരുവരും തമ്മിലുള്ള പ്രശ്നങ്ങളാണ് ഭാര്യാമാതാവിന്‍റെ കൊലപാതകത്തിലേക്ക് നയിച്ചതെന്ന് പോലീസ് പറയുന്നു. അമ്മ ഉഷയോടൊപ്പമാണ് ഭാര്യയും രണ്ടുമക്കളും കഴിഞ്ഞിരുന്നത്. ഇന്നലെ ഉച്ചയോടെ, കുട്ടികളെ കാണണമെന്ന ആവശ്യവുമായാണ് സുനിൽ ഉഷയുടെ വീട്ടിലെത്തിയത്. വൈകാതെ ഇരുവരും തമ്മിൽ വഴക്കായി. പിന്നാലെ സുനിൽ മൺവെട്ടികൊണ്ട് ഉഷയുടെ തലയ്ക്കടിക്കുകയായിരുന്നു.

തലയ്ക്ക് മാരകമായി മുറിവേറ്റ് രക്തം വാർന്ന് മരിച്ച നിലയിൽ വീടിന്‍റെ പരിസരത്തുതന്നെയാണ് ഉഷയുടെ മൃതദേഹം കിടന്നത്. ഇവിടെനിന്നു മാറാൻ സുനിൽ തയാറായിരുന്നില്ലെന്ന് പരിസരവാസികൾ പറയുന്നു. തന്‍റെ സ്വത്തുക്കൾ ഉഷാമണി കൈക്കലാക്കിയെന്നും ഇവർ മരിക്കുന്നതാണ് നല്ലതെന്നും സുനിൽ പറഞ്ഞതായി നാട്ടുകാർ പറയുന്നു. പോലീസ് എത്തിയാണ് സുനിലിനെ സംഭവസ്ഥലത്തുനിന്നു കസ്റ്റഡിയിൽ എടുത്തത്. സംഭവം നടക്കുന്ന സമയത്ത് സുനിലിന്‍റെ ഭാര്യ ജോലിക്ക് പോയിരിക്കുകയായിരുന്നു.

ADVERTISEMENT

സഹോദരനെ തേടി ഈശ്വർ മുർമു സ്നേഹമന്ദിരത്തിൽ

ചെറുതോണി: അടിമാലി പ്രദേശത്തുകൂടി അലഞ്ഞുനടന്നിരുന്ന ഈശ്വർ മുർമുവിനെ അടിമാലി പോലീസ് പടമുഖം സ്നേഹമന്ദിരത്തിലെത്തിച്ചു. മാനസികാസ്വാസ്ഥ്യം പ്രകടിപ്പിക്കുന്ന ഏകദേശം 40 വയസ് പ്രായം തോന്നിക്കുന്ന ഈശ്വർ മുർമു സ്നേഹമന്ദിരത്തിലെത്തുമ്പോൾ തീർത്തും അവശനിലയിലായിരുന്നു. കാലിനു സാരമായ പരിക്കുണ്ട്. ജാർബണ്ഡ് സ്വദേശിയാണന്ന് കരുതുന്നു. ഹിന്ദിയാണ് സംസാരിക്കുന്നത്.നാടിനെക്കുറിച്ചോ വീടിനെക്കുറിച്ചോ വ്യക്തതയില്ല. അടിമാലിയിലെ ബസ് സ്റ്റോപ്പുകളിലും കടത്തിണ്ണയിലുമാണ് നാളുകളായി അന്തിയുറങ്ങിയിരുന്നത്. നാട്ടുകാർ പോലീസിൽ അറിയിച്ചതിനെത്തുടർന്ന് അടിമാലി പോലീസ് ഇയാളെ സ്നേഹമന്ദിരത്തിൽ എത്തിക്കുകയായിരുന്നു. സ്നേഹമന്ദിരം ഡയറക്ടർ വി.സി.രാജു യുവാവിനെ ഏറ്റെടുത്തു. ഈശ്വറിന്‍റെ സഹോദരൻ കട്ടപ്പന പ്രദേശത്തുണ്ടെന്നു പറയപ്പെടുന്നു. ഇയാളെക്കുറിച്ച് എന്തെങ്കിലും വിവരങ്ങൾ അറിയുന്നവർ സ്നേഹമന്ദിരവുമായി ബന്ധപ്പെടണമെന്ന് ഡയറക്ടർ വി.സി. രാജു അറിയിച്ചു. ഫോൺ : 9447463933, 9744287214.

ട്രാവലറിനു മുകളിൽ മരം വീണു

തൊടുപുഴ: കാറ്റിലും മഴയിലും പാതയോരത്തു നിന്നിരുന്ന മരം ഒടിഞ്ഞ് ട്രാവലറിനു മുകളിലേയ്ക്ക് വീണു. തൊടുപുഴ കോതായിക്കുന്ന് ബൈപാസിൽ ഇന്നലെ രാവിലെ 6.15 ഓടെയായിരുന്നു സംഭവം. മരം ഒടിഞ്ഞ് വൈദ്യുതി ലൈനിലേക്കും വാഹനത്തിനു മുകളിലേക്കും വീഴുകയായിരുന്നു. വാഹനത്തിന്‍റെ ചില്ലിനു കേടുപാടു സംഭവിച്ചു. തൊടുപുഴ അഗ്നിരക്ഷാ സേനയെത്തി മരം വെട്ടി നീക്കിയ ശേഷമാണ് വാഹനം മാറ്റി ഗതാഗതം പുനഃസ്ഥാപിച്ചത്.

ജില്ലയിൽ വീണ്ടും മഴ കനത്തു

തൊടുപുഴ: ജില്ലയിൽ ഇന്നലെ മുതൽ മഴ വീണ്ടും ശക്തി പ്രാപിച്ചു. കഴിഞ്ഞ ദിവസങ്ങളിൽ ഇടവിട്ടുള്ള മഴ ലഭിച്ചിരുന്നെങ്കിലും ഇന്നലെ മുതൽ കനത്ത മഴയാണ് ജില്ലയുടെ വിവിധ മേഖലകളിൽ ലഭിച്ചത്. ഇന്നലെ ജില്ലയിൽ കാലാവസ്ഥാവകുപ്പ് ഓറഞ്ച് അലർട്ട് പ്രഖ്യാപിച്ചിരുന്നു. തൊടുപുഴ ഉൾപ്പെടെ ലോറേഞ്ച് മേഖലകളിൽ ഇടവേളയില്ലാതെ ശക്തമായ മഴയാണ് പെയ്തത്. ഹൈറേഞ്ചിന്‍റെ വിവിധ ഭാഗങ്ങളിലും ഇടവിട്ട് ശക്തമായ മഴ ലഭിച്ചു. കാര്യമായ കെടുതികൾ ഇന്നലെ റിപ്പോർട്ട് ചെയ്തിട്ടില്ലെങ്കിലും കനത്ത മഴ തുടരുന്നതിനാൽ പല പ്രദേശങ്ങളിലും ആശങ്ക നിലനിൽക്കുന്നുണ്ട്. ജില്ലയിൽ ഇന്നു മുതൽ 19 വരെ യെലോ അലർട്ടുണ്ട്. ഒറ്റപ്പെട്ട ശക്തമായ മഴ തുടരുമെന്നാണ് കാലാവസ്ഥാ പ്രവചനം. മഴയ്ക്കൊപ്പം കാറ്റിനും സാധ്യതയുണ്ട്. ഈ സാഹചര്യത്തിൽ ജനങ്ങൾ ജാഗ്രത പാലിക്കണമെന്ന് നിർദേശമുണ്ട്. ജൂണ്‍ ഒന്നു മുതൽ ഇന്നലെ രാവിലെ വരെ ജില്ലയിൽ 738.6 മില്ലിമീറ്റർ മഴയാണ് ലഭിച്ചത്. സാധാരണ ലഭിക്കാറുള്ളത് 1149 മില്ലിമീറ്ററാണ്. കാലവർഷത്തിൽ നിലവിൽ 36 ശതമാനം മഴക്കുറവാണ് രേഖപ്പെടുത്തിയത്. കാറ്റും മഴയും ശക്തമായതോടെ വൈദ്യുതി മുടക്കവും പതിവായിട്ടുണ്ട്. മരങ്ങൾ ലൈനിൽ വീണാണ് കൂടുതലായും വൈദ്യുതിത്തകരാറുകൾ സംഭവിക്കുന്നത്. കഴിഞ്ഞ ദിവസം വിവിധ മേഖലകളിൽ വൈദ്യുതി മുടങ്ങിയിരുന്നു. എന്നാൽ വൈദ്യുതി മുടങ്ങുന്നതോടെ ഉപഭോക്താക്കൾ കെഎസ്ഇബി ഓഫീസിൽ വിളിച്ചു പറയുമെങ്കിലും സമയബന്ധിതമായി തകരാർ പരിഹരിക്കുന്നില്ലെന്ന് പരാതി ഉയരുന്നുണ്ട്. പരാതി ലഭിച്ചാലും കെഎസ്ഇബി അധികൃതർ എത്തുന്നത് ഏറെ സമയം കഴിഞ്ഞായിരിക്കും. ചിലപ്പോൾ അടുത്ത ദിവസമായിരിക്കും ഇവർ എത്തുക. എന്നാൽ ജീവനക്കാരുടെ കുറവു മൂലമാണ് തകരാർ പരിഹരിക്കൽ വൈകുന്നതെന്നാണ് കെഎസ്ഇബിയുടെ വിശദീകരണം.

കരിങ്കല്ല് ഉത്പന്നങ്ങളുമായി തമിഴ്നാട്ടിൽനിന്നു വരുന്ന വാഹനങ്ങൾ തടഞ്ഞുനിർത്തി ഗുണ്ടാപ്പിരിവെന്ന് പരാതി

നെടുങ്കണ്ടം: തമിഴ്നാട്ടിൽനിന്നു കരിങ്കല്ല് ഉത്പന്നങ്ങളുമായി വരുന്ന കേരള രജിസ്ട്രേഷൻ വാഹനങ്ങൾ തടഞ്ഞുനിർത്തി ഗുണ്ടാ പിരിവെന്ന് പരാതി. ഹൈറേഞ്ചിൽ നിലവിൽ ക്വാറികൾ പ്രവർത്തിക്കുന്നില്ലാത്തിനാൽ തമിഴ്നാട്ടിലെ ക്വാറികളെ ആശ്രയിച്ചാണ് ഇവിടെ നിർമാണപ്രവർത്തങ്ങൾ നടക്കുന്നത്. നൂറിലധികം കേരള രജിസ്ട്രേഷൻ വാഹനങ്ങൾ മേഖലയിൽ സർവീസ് നടത്തുന്നുണ്ട്. ഇവ കൂടാതെ തമിഴ്നാട്ടിൽനിന്നുള്ള വാഹനങ്ങളും ഉണ്ട്. അംഗീകൃത പാസും എല്ലാവിധ രേഖകളുമായി ലോഡ് എടുക്കുന്ന കേരള രജിസ്ട്രേഷൻ വാഹനങ്ങളാണ് കൊള്ളയടിപ്പിക്കപ്പെടുന്നത്. ഒരു ലോഡിന് 3000 മുതൽ 5000 രൂപ വരെ ആവശ്യപ്പെട്ടാണ് ഉദ്യോഗസ്ഥർ എന്ന വ്യാജേന ഗുണ്ടാസംഘം പിരിവ് നടത്തുന്നത് .കമ്പംമെട്ട്, ബോഡിമെട്ട്, കുമളി പാതകളിലൂടെ അതിർത്തി കടക്കുന്ന വാഹനങ്ങൾ തടയുന്നുണ്ട്. കേരളത്തിൽനിന്നുള്ള വാഹനങ്ങൾ അംഗീകൃത പാസുമായി സർവീസ് നടത്തുമ്പോൾ തമിഴ്നാട് വാഹനങ്ങളിൽ പലതിനും പാസ് ഉണ്ടാവാറില്ല. കേരളത്തിലെ ചെക്ക് പോസ്റ്റുകളിൽ ഇവരുടെ വാഹനങ്ങൾ പരിശോധിക്കാത്തതിനാൽ നടപടിയും ഉണ്ടാകുന്നില്ല. ഏതെങ്കിലും വാഹനം കേരള ചെക്ക് പോസ്റ്റിൽ തടഞ്ഞാൽ ഉപരോധം അടക്കമുള്ള സമരങ്ങൾ നടത്തി വാഹനങ്ങൾ കൊണ്ടുപോവുകയാണ് പതിവ്. പാസ് സംവിധാനത്തെ തടസപ്പെടുത്തി മുഴുവൻ വാഹനങ്ങളും അനധികൃതമായി ലോഡ് കടത്താനുള്ള നീക്കമാണ് തമിഴ്നാട് കേന്ദ്രീകരിച്ചു നടത്തുന്നതെന്നാണ് സൂചന. വിഷയത്തിൽ ഇടുക്കി, തേനി കളക്ടർമാർ ഇടപെട്ട് പരിഹാരം കണ്ടെത്തണമെന്നാണ് ആവശ്യം. കേരളത്തിൽനിന്നുള്ള വാഹങ്ങൾക്കു നേരെ ആക്രമണങ്ങളും നടക്കുന്നതായി പരാതി ഉണ്ട്. ഓടിക്കൊണ്ടിരിക്കുന്ന വാഹനങ്ങൾക്കു നേരേ കല്ല് എറിയുന്നതടക്കമുള്ള ആക്രമണങ്ങൾ ഉണ്ടായിട്ടുള്ളതിനാൽ ഡ്രൈവർമാരും ആശങ്കയിലാണ്.

ദേശീയപാത വികസനത്തിൽ സർക്കാർ നടപടി സ്വീകരിക്കണം: ബിജെപി

തൊടുപുഴ: ദേശീയപാത-85ന്‍റെ ഭാഗമായ നേര്യമംഗലം-വാളറ റോഡിന്‍റെ വികസനപ്രവർത്തനം തടഞ്ഞ ഹൈക്കോടതി ഇടക്കാല ഉത്തരവിനെതിരേ റിവ്യുഹർജി നൽകി നിർമാണം പൂർത്തീകരിക്കാൻ ആവശ്യമായ നടപടി സ്വീകരിക്കണമെന്ന് ബിജെപി സംസ്ഥാന സെക്രട്ടറി അഡ്വ. പന്തളം പ്രതാപൻ പത്രസമ്മേളനത്തിൽ ആവശ്യപ്പെട്ടു. വികസനപ്രവർത്തനങ്ങൾക്ക് പാർട്ടി എതിരല്ല. ബിജെപിയുടെ മുൻ ജില്ലാ അധ്യക്ഷൻ എം.എൻ.ജയചന്ദ്രൻ ഹൈക്കോടതിയിൽ നൽകിയ ഹർജി സംബന്ധിച്ച് ജില്ലാ കമ്മിറ്റി സംസ്ഥാന കമ്മിറ്റിക്ക് റിപ്പോർട്ട് നൽകിയിട്ടുണ്ട്. അദ്ദേഹത്തിന്‍റെ ഭരണഘടനാപരമായ അവകാശത്തെ ചോദ്യം ചെയ്യാനാവില്ല. ഹൈക്കോടതിയെ കാര്യങ്ങൾ ബോധ്യപ്പെടുത്താൻ സർക്കാരിനുണ്ടായ വീഴ്ചയാണ് പാതയുടെ നിർമാണം നിർത്തിവയ്ക്കേണ്ട സാഹചര്യം സൃഷ്ടിച്ചത്. ഇതു ബന്ധപ്പെട്ട ഉദ്യോഗസ്ഥരുടെ ഭാഗത്തെ ഗുരുതരമായ വീഴ്ചയാണ്. നിർമാണം പൂർത്തീകരിക്കാൻ ദേശീയപാത അഥോറിറ്റിയും ആവശ്യമായ നടപടികൾ സ്വീകരിക്കണമെന്നും അദ്ദേഹം ആവശ്യപ്പെട്ടു. ബിജെപി നോർത്ത് ജില്ലാ പ്രസിഡന്‍റ് പി.പി.സാനു, വൈസ് പ്രസിഡന്‍റുമാരായ പി.ജി.രാജശേഖരൻ, കെ.പി.രാജേന്ദ്രൻ, മീഡിയ കണ്‍വീനർ ഗോപി പഴുക്കാകുളം എന്നിവരും പത്രസമ്മേളനത്തിൽ പങ്കെടുത്തു.

മാണി വിഭാഗവുമായി ചർച്ച നടത്തിയിട്ടില്ല: അപു ജോൺ ജോസഫ്

തൊടുപുഴ: കേരള കോണ്‍ഗ്രസ് മാണി വിഭാഗവുമായി യുഡിഎഫ് ചർച്ച നടത്തിയിട്ടില്ലെന്ന് കേരള കോണ്‍ഗ്രസ് സംസ്ഥാന കോ-ഓർഡിനേറ്റർ അപു ജോണ്‍ ജോസഫ്. യുഡിഎഫ് ജില്ലാ കമ്മിറ്റിയുടെ നേതൃത്വത്തിൽ സേവ്യേഴ്സ് ഹോമിൽ സംഘടിപ്പിച്ച മുൻ മുഖ്യമന്ത്രി ഉമ്മൻചാണ്ടിയുടെ രണ്ടാമത് അനുസ്മരണ സമ്മേളനത്തിൽ പങ്കെടുക്കാനെത്തിയ അദ്ദേഹം മാധ്യമങ്ങളോട് പ്രതികരിക്കുകയായിരുന്നു. മാണി വിഭാഗം യുഡിഎഫ് വിട്ടപ്പോഴുള്ള സാഹചര്യം ഇപ്പോഴും നിലനിൽക്കുകയാണ്. എൽഡിഎഫിൽ സന്തോഷവനാണെന്നു ജോസ് കെ.മാണിതന്നെ പറയുന്നു. യുഡിഎഫ് ശക്തിപ്പെടുത്തുന്ന തീരുമാനങ്ങളിൽ ജോസഫ് വിഭാഗത്തിന് എതിർപ്പില്ല. തൊടുപുഴയിൽ താൻ മത്സരിക്കുമോ എന്നത് പാർട്ടിയാണ് തീരുമാനിക്കേണ്ടതെന്നും അദ്ദേഹം പറഞ്ഞു.

പുരസ്കാര നിറവിൽ ജില്ലയിലെ ആയുഷ് കേന്ദ്രങ്ങൾ

ഇടുക്കി: പ്രഥമ സംസ്ഥാന ആയുഷ്, കായകൽപ് അവാർഡിന്‍റെ നിറവിൽ ജില്ലയിലെ പത്ത് ആയുഷ് സ്ഥാപനങ്ങൾ. ആയുഷ് ഹെൽത്ത് ആന്‍ഡ് വെൽനസ് സെന്‍ററുകളിൽ കുടയത്തൂർ ഗവ. ആയുർവേദ ഡിസ്പെൻസറിയും ഹോമിയോപ്പതി വിഭാഗത്തിൽ പഴയരിക്കണ്ടം ഗവ. ഹോമിയോപതി ഡിസ്പെൻസറിയും ജില്ലയിൽ ഒന്നാം സ്ഥാനം നേടി. ആലക്കോട്, വഴിത്തല, കോടിക്കുളം ആയുർവേദ ഡിസ്പെൻസറികൾക്കും ചുരുളി, ചില്ലിത്തോട്, കൊന്നത്തടി ഹോമിയോപതി ഡിസ്പെൻസറികൾക്കും 30,000 രൂപ വീതവും ജില്ലാ ഹോമിയോപ്പതി ആശുപത്രിക്ക് 1.5 ലക്ഷം രൂപയും പുഷ്പകണ്ടം സബ് ജില്ലാ ഹോമിയോപ്പതി ആശുപത്രിക്ക് ഒരു ലക്ഷം രൂപയും കമാൻഡേഷനായി പ്രഖ്യാപിച്ചു. ജില്ലയിലെ 18 ആയുഷ് ഹെൽത്ത് ആൻഡ് വെൽനസ് സ്ഥാപനങ്ങൾക്ക് എൻഎബിഎച്ച് അംഗീകാരം ലഭിക്കാനായി പ്രയത്നിച്ച 150 ജീവനക്കാരെ ആദരിച്ചു. ജില്ലാ കളക്ടർ വി. വിഗ്നേശ്വരി യോഗം ഉദ്ഘാടനം ചെയ്തു. ജില്ലാ ഹോമിയോപ്പതി വകുപ്പ് മേധാവി ഡോ. വിനീത ആർ.പുഷ്കരൻ അധ്യക്ഷത വഹിച്ചു. ജില്ലാ പ്രോഗ്രാം മാനേജർ ഡോ. കെ.എസ്. ശ്രീദർശൻ, ജില്ലാ പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻമാരായ കെ. ജി.സത്യൻ, എം. ഭവ്യ, ഡോ. കെ.കെ. ജീന, ഡോ.ഇ.കെ. ഖയസ്, ഡോ. എം.എസ്. നൗഷാദ് , വി.എസ്. പ്രവീണ്‍ വി.എസ് എന്നിവർ പ്രസംഗിച്ചു.

ഇ-മാലിന്യശേഖരണ പദ്ധതിക്ക് ജില്ലയിൽ തുടക്കം

തൊടുപുഴ: വീടുകളിൽനിന്നും സ്ഥാപനങ്ങളിൽനിന്നും ഇ-മാലിന്യങ്ങൾ ശേഖരിക്കുന്ന പദ്ധതി ജില്ലയിൽ ആരംഭിച്ചു. ആധുനിക കാലഘട്ടത്തിൽ വെല്ലുവിളിയാകുന്ന ഇ- മാലിന്യങ്ങൾ (ഇലക്‌ട്രോണിക് മാലിന്യം) വില നിശ്ചയിച്ചായിരിക്കും ശേഖരിക്കുക. ആദ്യഘട്ടത്തിൽ ഹരിതകർമസേനവഴി തൊടുപുഴ, കട്ടപ്പന നഗരസഭകളിലാണ് മാലിന്യം ശേഖരിക്കുക. ഇതിന്‍റെ ഭാഗമായി കഴിഞ്ഞ ദിവസം രണ്ടു നഗരസഭകളിലെയും ഹരിതകർമസേനാംഗങ്ങൾക്ക് പരിശീലനം നൽകി. 43 ഇനങ്ങളാണ് ശേഖരിക്കുന്നത്. ഫ്രിഡ്ജ്, ലാപ്ടോപ്പ്, എൽസിഡി, എൽഇഡി ടിവി, വാഷിംഗ് മെഷീൻ, സീലിംഗ് ഫാൻ, മെബൈൽ ഫോണ്‍, സ്വിച്ച് ബോർഡ്, എയർകണ്ടീഷണർ, മിക്സർ ഗ്രൈൻഡർ, ടേബിൾ ഫാൻ, കന്പ്യൂട്ടർ സിപിയു, മോണിറ്റർ, മൗസ്, കീ ബോർഡ്, മോഡം, എൽസിഡി മോണിറ്റർ, പ്രിന്‍റർ, ഫോട്ടോസ്റ്റാറ്റ് മെഷീൻ, അയണ്‍ബോക്സ്, മോട്ടോർ, ടെലിഫോണ്‍, റേഡിയോ, ഇലക്‌ട്രിക് കേബിൾ, ബാറ്ററി, ഇൻവർട്ടർ, യുപിഎസ്, സ്റ്റെബിലൈസർ, വാട്ടർ ഹീറ്റർ, വാട്ടർ കൂളർ, ഇൻഡക്ഷൻ കുക്കർ, മൈക്രോവേവ് ഓവൻ, എസ്എംപിഎസ്, ഹാർഡ് ഡിസ്ക്, സിഡി ഡ്രൈവ്, സ്പീക്കർ, ഹെഡ്ഫോണ്‍, പിസിബി ബോർഡ്, എമർജൻസി ലാംപ് എന്നിവ ശേഖരിക്കുന്നവയിൽ ഉൾപ്പെടും. ശേഖരിക്കുന്ന സാധനങ്ങളുടെ വില ഇനം തിരിച്ച് കണക്കാക്കി ഹരിതകർമസേന നൽകും. ഇതിനു പുറമേയുള്ളവ പലവക വിഭാഗത്തിൽപ്പെടുത്തി നിശ്ചിത തുക നൽകും. ക്ലീൻ കേരള കന്പനിയുമായി സഹകരിച്ചാണ് പദ്ധതി നടപ്പാക്കുന്നത്. ശുചിത്വമിഷൻ, തദ്ദേശ സ്ഥാപനങ്ങൾ, ഹരിതകർമസേന, കുടുംബശ്രീ, സ്കൂളുകൾ, കോളജുകൾ, റസിഡന്‍റ്സ് അസോസിയേഷനുകൾ, ഇലക്‌ട്രോണിക് റീട്ടെയിലർമാർ എന്നിവരും പദ്ധതിയുമായി സഹകരിക്കും. ശേഖരിക്കുന്ന മാലിന്യങ്ങൾ ക്ലീൻ കേരളയ്ക്ക് നൽകും. പുനഃചംക്രമണം ചെയ്യാൻ സാധിക്കുന്ന ഇ-മാലിന്യങ്ങൾക്ക് ക്ലീൻ കേരള കന്പനി നിശ്ചയിച്ച വിലയും ലഭിക്കും. വർഷത്തിൽ രണ്ട് തവണയാണ് ഇ-മാലിന്യ ശേഖരണം. ഈ മാസം 31 വരെ ആദ്യതവണത്തെ ശേഖരണമുണ്ടാകും. വാർഡുകളിൽനിന്നു ശേഖരിക്കുന്നവ ഏതെങ്കിലും ഒരു സെന്‍ററിൽ സംഭരിച്ച് സുരക്ഷിതമായി സൂക്ഷിക്കും. ഇത്തരത്തിൽ മൂന്നോ, നാലോ വാർഡുകൾ ചേർന്നതാകും ഒരു സെന്‍റർ. ഇവിടെനിന്ന് കന്പനി നേരിട്ടെത്തി ഇവ കൊണ്ടുപോകും. മുന്പും ഹരിതകർമസേന ഇ-മാലിന്യം ശേഖരിച്ചിരുന്നെങ്കിലും ഏറ്റെടുക്കാൻ ആരും വരാഞ്ഞതിനാൽ പദ്ധതി വിജയകരമായില്ല. എന്നാൽ ഇത്തവണ ക്ലീൻ കേരള ഏറ്റെടുക്കുന്നതിനാൽ അത്തരമൊരു പ്രശ്നമുണ്ടാകില്ല. ഇ-മാലിന്യങ്ങളിലുള്ള മാരകമായ ചില രാസ പദാർഥങ്ങൾ ജലാശയങ്ങളിലും മറ്റും കലരുന്നത് ഗുരുതരമായ ആരോഗ്യപ്രശ്നങ്ങൾക്കിടയാക്കിയിരുന്നു. ഇത്തരം പാരിസ്ഥിതിക പ്രശ്നങ്ങൾ ഒഴിവാക്കുകയെന്നതും പദ്ധതിയുടെ ലക്ഷ്യമാണ്.

ജാമ്യത്തിൽ ഇറങ്ങി മുങ്ങിയ പ്രതി പിടിയിൽ

ശാന്തൻപാറ: ഭാര്യയെ ഉപദ്രവിച്ച കേസിൽ അറസ്റ്റിലായി ജാമ്യത്തിൽ ഇറങ്ങി മുങ്ങിയ പ്രതി പിടിയിൽ. ഭാര്യയെ വാക്കത്തികൊണ്ട് ഉപദ്രവിച്ച കേസിൽ ജാമ്യത്തിൽ ഇറങ്ങി കോടതിയിൽ ഹാജരാകാതെ 13 വർഷമായി മുങ്ങിനടന്ന പ്രതിയെ ശാന്തൻപാറ പോലീസ് പിടികൂടി കോടതിയിൽ ഹാജരാക്കി. രാജകുമാരി മുട്ടുകാട് കൊങ്ങിണിസിറ്റി പവൻരാജി(52)നെയാണ് ശാന്തൻപാറ സി ഐ ശരലാലിന്‍റെ നിർദേശാനുസരണം ഗ്രേഡ് എസ്ഐ രാജ് നാരായണൻ, എഎസ്ഐ സുരേഷ്, സിവിൽ പോലീസ് ഓഫീസർമാരായ അനീഷ്, മഹേഷ് എന്നിവർ ഉൾപ്പെട്ട സ്ക്വാഡ് ഇന്ന് പുലർച്ചെ പിടികൂടിയത്.പ്രതിയെ കോടതിയിൽ ഹാജരാക്കി.

രണ്ടു മഹാപ്രളയം കണ്ട മുത്തശി യാത്രയായി

ചെറുതോണി: രണ്ട് മഹാപ്രളയങ്ങൾക്ക് സാക്ഷ്യം വഹിച്ച മുത്തശി യാത്രയായി. കഞ്ഞിക്കുഴി പഞ്ചായത്തിലെ ഏറ്റവും പ്രായം കൂടിയ വനിതയാണ് വിടവാങ്ങിയത്. ചേലച്ചുവട് പുത്തൂക്കുടിയിൽ പരേതനായ ശങ്കരൻ കുടിയുടെ ഭാര്യ കുട്ടിയമ്മ (108) യാണ് വിടവാങ്ങിയത്. 1917ൽ ജനിച്ച കുട്ടിയമ്മക്ക് 99ലെ (1924)വെള്ളപ്പൊക്കം നല്ല ഓർമയുണ്ടായിരുന്നു. 99ലെയും 2018ലെയും വെള്ളപ്പൊക്കം ഓർമിക്കുന്ന അപൂർവം വ്യക്തികളിലൊരാളായിരുന്നു കുട്ടിയമ്മ. ഇടയ്ക്കിടെ പ്രളയകാലത്തെ വിശേഷങ്ങൾ കുട്ടിയമ്മ പറയുമായിരുന്നെന്ന് മാധ്യമ പ്രവർത്തകൻ കൂടിയായ മകൻ ധനപാലൻ മങ്കുവ പറഞ്ഞു. കൊല്ലവർഷം 1099-ലെ വെള്ളപ്പൊക്കത്തിന്‍റെ 101-ാം വാർഷികമാണ് ഇന്ന്. പ്രളയകാലത്തെ ഓർമകളുമായി പ്രളയ വാർഷികത്തലേന്ന് കുട്ടിയമ്മ യാത്രയായി. 108 വയസുണ്ടെങ്കിലും ഒരാഴ്ച മുമ്പുവരെ പരസഹായമില്ലാതെ സ്വന്തം കാര്യങ്ങൾ നിർവഹിക്കുമായിരുന്നു. കോതമംഗലം തൃക്കാരിയൂർ സ്വദേശിനിയായ കുട്ടിയമ്മ ഹൈറേഞ്ചിലെത്തിയിട്ട് 80 വർഷങ്ങൾ കഴിഞ്ഞു. ഭർത്താവ് ശങ്കരൻകുട്ടി 40 വർഷം മുമ്പ് മരണമടഞ്ഞു.

കായികാധ്യാപകർ ധർണ നടത്തി

തൊടുപുഴ: കായിക മേഖലയിലെ പ്രശ്നങ്ങൾക്ക് ശാശ്വത പരിഹാരം കാണണമെന്ന് ആവശ്യപ്പെട്ട് കായികാധ്യാപകർ ജില്ലാ വിദ്യാഭ്യാസ ഓഫീസിനു മുന്നിൽ ധർണ നടത്തി. കായികാധ്യാപക സംരക്ഷണ ഉത്തരവ് പുനഃസ്ഥാപിക്കുക, നിയമന മാനദണ്ഡങ്ങൾ കാലോചിതവും ശാസ്ത്രീയവുമായി പരിഷ്കരിക്കുക, ഹയർ സെക്കൻഡറിയിൽ നിയമനം നടത്തുക, യോഗ്യത പരിഷ്കരിക്കുക, തുല്യ ജോലിക്ക് തുല്യവേതനം ഉറപ്പാക്കുക എന്നീ ആവശ്യങ്ങൾ ഉന്നയിച്ചായിരുന്നു സമരം. ഡിപിഇടിഎ സംസ്ഥാന വൈസ് പ്രസിഡന്‍റ് ഡോ.സജീവ് സി.നായർ അധ്യക്ഷത വഹിച്ചു. ദേശീയ കായികാധ്യാപക അവാർഡ് ജേതാവ് കെ.വി.ദേവസ്യ ഉദ്ഘാടനം ചെയ്തു. ജില്ലാ പ്രസിഡന്‍റ് ഇ.ജെ. ഫ്രാൻസിസ്, മുൻ സംസ്ഥാന പ്രസിഡന്‍റ് റെജി ഇട്ടൂപ്പ്, ജില്ലാ സ്പോർട്സ് കോ-ഓർഡിനേറ്റർ കെ.ജി. ബിജു, നോബിൾ ജോസ്, എം.എസ്.അജോ എന്നിവർ പ്രസംഗിച്ചു.

തപാൽ ജീവനക്കാരിയെ ശല്യം ചെയ്ത യുവാവ് അറസ്റ്റിൽ

തൊടുപുഴ: തപാൽ വകുപ്പ് ജീവനക്കാരിയെ അപമാനിക്കാൻ ശ്രമിച്ച കേസിൽ യുവാവിനെ പോലീസ് അറസ്റ്റ് ചെയ്തു. മടക്കത്താനം ഇലവുംതറയ്ക്കൽ ഷാബിൻ ഹനീഫ(36) യെയാണ് മണക്കാട് സ്വദേശിനിയായ യുവതിയുടെ പരാതിയിൽ തൊടുപുഴ പോലീസ് അറസ്റ്റ് ചെയ്തത്. ഇയാൾ നിരന്തരമായി യുവതിയെ ശല്യപ്പെടുത്തുകയും ലൈംഗികചുവയോടെ സംസാരിച്ചതായും പരാതിയിൽ പറയുന്നു. പലതവണ ഇയാൾക്ക് മുന്നറിയിപ്പ് നൽകിയിട്ടും ശല്യപ്പെടുത്തുന്നത് തുടർന്നതോടെയാണ് യുവതി പരാതി നൽകിയത്. യുവതിയുടെ പരാതിയിൽ കഴിഞ്ഞ ഏഴിന് ഷാബിനെതിരേ കേസടുത്തു. ചൊവ്വാഴ്ച ഇയാളുടെ അറസ്റ്റ് രേഖപ്പെടുത്തി ഇന്നലെ കോടതിയിൽ ഹാജരാക്കി റിമാൻഡ് ചെയ്തു.

മുള്ളരിങ്ങാട്ട് കാട്ടാന കൃഷി നശിപ്പിച്ചു

വണ്ണപ്പുറം: മുള്ളരിങ്ങാട് കാട്ടാനകൾ വീണ്ടും വ്യാപകമായി കൃഷി നശിപ്പിച്ചു. മുള്ളരിങ്ങാട് സെറ്റിൽമെന്‍റിലെ മോഹനൻ പുലിയനാനിക്കൽ, മൂത്താശേരിൽ ബാലകൃഷ്ണൻ, മുരിയ്ക്കനാനിക്കൽ മനോജ് എന്നിവരുടെ കൃഷിയിടത്തിലാണ് ആനയുടെ ആക്രമണം ഉണ്ടായത്. തെങ്ങ്, കമുക്, വാഴ, പ്ലാവ് ഉൾപ്പെടെയാണ് കാട്ടാനകൾ നശിപ്പിച്ചത്. ചൊവ്വാഴ്ച രാത്രി ഏഴോടെ കൃഷിയിടത്തിൽ എത്തിയ കാട്ടാനക്കൂട്ടം ഇന്നലെ പുലർച്ചെ നാലോടെയാണ് മടങ്ങിയത്. കാട്ടാനകൾ പുരയിടത്തിൽ എത്തുന്പോൾ വനംവകുപ്പ് അധികൃതരെ വിവരം അറിയിച്ചാലും ഇവർ എത്താറില്ലെന്ന് പ്രദേശവാസികൾ പറഞ്ഞു. സന്ധ്യ കഴിയുന്നതോടെ തലക്കോട്- വെള്ളക്കയം റോഡിൽ പതിവായി കാട്ടാനകൾ ഇറങ്ങുന്നത് മൂലം ഭീതിയോടെയാണ് നാട്ടുകാർ ഇതുവഴി സഞ്ചരിക്കുന്നത്.

ജീവനക്കാരില്ല; തൊടുപുഴ നഗരസഭാ ഭരണം പ്രതിസന്ധിയിൽ

തൊടുപുഴ: ജീവനക്കാരില്ലാത്തതു മൂലം തൊടുപുഴ നഗരസഭാ ഭരണം പ്രതിസന്ധിയിലായതോടെ അടിയന്തരമായി ഒഴിവുകൾ നികത്തണമെന്നാവശ്യപ്പെട്ട് ചെയർമാൻ കെ. ദീപക് തദ്ദേശ വകുപ്പ് മന്ത്രി, മുനിസിപ്പൽ ഡയറക്ടർ, അഡീഷണൽ ഡയറക്ടർ എന്നിവർക്ക് നിവേദനം നൽകി. നഗരസഭയുടെ നിരന്തരമായ ആവശ്യപ്രകാരം ഒരു അസിസ്റ്റന്‍റ് എൻജിനിയറെ നിയമിച്ചതായി ചെയർമാൻ അറിയിച്ചു. ഇദ്ദേഹം 21ന് ചാർജെടുക്കും. നഗരസഭയിൽ രണ്ട് ഫസ്റ്റ് ഗ്രേഡ് ഓവർസിയർമാരുടെയും രണ്ട് തേർഡ് ഗ്രേഡ് ഓവർസിയർമാരുടെയും ഒഴിവാണുള്ളത്. എൻജനിയർമാരുടെയും ഓവർസിയർമാരുടെയും തസ്തിക ഒഴിഞ്ഞുകിടക്കുന്നത് നഗരസഭയിലെ നിർമാണ പ്രവർത്തനങ്ങൾ പ്രതിസന്ധിയിലാക്കുന്നു. നഗരസഭ ആരോഗ്യ വിഭാഗത്തിലും ഉദ്യോഗസ്ഥരുടെ കുറവുണ്ട്. ഇതിനു പുറമേ അസിസ്റ്റന്‍റ് സെക്രട്ടറി, റവന്യു ഇൻസ്പെക്ടർ എന്നീ തസ്തികകളിലും ജീവനക്കാരില്ലാത്ത സ്ഥിതിയാണ്. പഞ്ചായത്തുകളിൽപോലും ഇത്തരത്തിലുള്ള തസ്തികകൾ ഒഴിവില്ലാത്തപ്പോഴാണ് ജില്ലയിൽ ഏറ്റവും കൂടുതൽ ജനസാന്ദ്രതയേറിയ നഗരസഭയായ തൊടുപുഴ ആവശ്യത്തിന് ഉദ്യോഗസ്ഥരുടെ കുറവുമൂലം വീർപ്പുമുട്ടുന്നത്. 1978-ലെ സ്റ്റാഫ് പാറ്റേണ്‍ ആണ് ഇപ്പോഴും നഗരസഭയ്ക്കുള്ളത്. 2015-ൽ തൊടുപുഴയെ ഒന്നാം ഗ്രേഡ് നഗരസഭയായി ഉയർത്തിയിരുന്നു. എന്നാൽ ഇതിന് ആനുപാതികമായ ജീവനക്കാരെ നഗരസഭയിൽ ഇതുവരെയും വിന്യസിച്ചിട്ടില്ല. ആരോഗ്യവിഭാഗത്തിലും ജനറൽ വിഭാഗത്തിലും നിലവിലുള്ള ഒഴിവുകൾ അടിയന്തരമായി നികത്തണമെന്ന് നിവേദനത്തിൽ ആവശ്യപ്പെട്ടെന്നും എത്രയും വേഗം നടപടി ഉണ്ടാകുമെന്ന് അധികൃതർ ഉറപ്പ് നൽകിയതായും ചെയർമാൻ അറിയിച്ചു.

ദൃശ്യവിരുന്നായി ശ്രീലങ്കൻ നൃത്താവിഷ്കാരം

തൊടുപുഴ: ശ്രീലങ്കൻ സംസ്കാരം പ്രചരിപ്പിക്കുന്നതിന്‍റെ ഭാഗമായി തൊടുപുഴ വെങ്ങല്ലൂർ ടിഎംയുപി സ്കൂളിൽ ശ്രീലങ്കയിൽ നിന്നെത്തിയ കലാസംഘം നൃത്തവിരുന്ന് അവതരിപ്പിച്ചു. തൊടുപുഴ മർച്ചന്‍റ്സ് അസോസിയേഷനും മൂവാറ്റുപുഴ സൈറക്സ് എഡ്യൂക്കേഷനും ചേർന്നാണ് പരിപാടി സംഘടിപ്പിച്ചത്. മർച്ചന്‍റ്സ് അസോസിയേഷൻ പ്രസിഡന്‍റ് രാജു തരണിയിൽ ഉദ്ഘാടനം ചെയ്തു. സ്കൂൾ പ്രധാനാധ്യാപിക എം.ആർ. സ്വപ്ന, സൈറസ് എഡ്യുക്കേഷൻ ഡയറക്ടർ അരുണ്‍ രാധാകൃഷ്ണ, മർച്ചന്‍റ്സ് അസോസിയേഷൻ ജനറൽ സെക്രട്ടറി സി.കെ.നവാസ്, വൈസ് പ്രസിഡന്‍റ് കെ.പി.ശിവദാസ്, സെക്രട്ടറി ലിജോണ്‍സ് ഹിന്ദുസ്ഥാൻ എന്നിവർ പ്രസംഗിച്ചു.

റീൽസ് കണ്ടിട്ടെങ്കിലും അധികൃതർ കണ്ണുതുറക്കുമോ?

തൊടുപുഴ: പന്ത്രണ്ടു വർഷമായി തകർന്നുകിടക്കുന്ന റോഡ് അറ്റകുറ്റപ്പണി നടത്തി ഗതാഗത യോഗ്യമാക്കാത്തതിനെത്തുടർന്ന് വ്യത്യസ്ത സമരമുറയുമായി നാട്ടുകാർ രംഗത്ത്. കുണ്ടും കുഴിയുമായി കിടക്കുന്ന റോഡിൽ റീൽസ് ചിത്രീകരിച്ച് ഇതു സമൂഹമാധ്യമ പേജുകളിൽ പോസ്റ്റു ചെയ്താണ് ഇവരുടെ വ്യത്യസ്തമായ പ്രതിഷേധം. നൂറുകണക്കിന് കുടുംബങ്ങൾ യാത്രചെയ്യുന്ന ചിലവ്-മാരാംപാറ റോഡിന്‍റെ ദുരവസ്ഥയ്ക്കു പരിഹാരം കാണണമെന്നാവശ്യപ്പെട്ടാണ് റീൽസ് ചിത്രീകരണം. ആലക്കോട്, കരിമണ്ണൂർ പഞ്ചായത്തുകളിലൂടെയാണ് റോഡ് കടന്നുപോകുന്നത്. വർഷങ്ങൾക്കു മുന്പ് പൊതുമരാമത്ത് വകുപ്പിനു കീഴിലായിരുന്ന റോഡ് പിന്നീട് ആലക്കോട് പഞ്ചായത്തിന്‍റെ ആസ്തി രജിസ്റ്ററിൽ ഉൾപ്പെടുത്തി. പന്ത്രണ്ടു വർഷം മുന്പ് പിഡബ്ല്യുഡി റോഡിൽ ടാറിംഗ് നടത്തിയതിനു ശേഷം ഇതുവരെ നിർമാണ ജോലികൾ ഒന്നും പൂർണമായി നടത്തിയിട്ടില്ല. ഇതിനിടെ എംഎൽഎ ഫണ്ടിൽനിന്ന് 24 ലക്ഷവും ബ്ലോക്ക് പഞ്ചായത്തിന്‍റെ 10 ലക്ഷവും വിനിയോഗിച്ച് 2023-ൽ 900 മീറ്റർ ടാറിംഗ് നടത്തി. ബാക്കിവരുന്ന ഒരു കിലോമീറ്ററോളം ദൂരമാണ് പൂർണമായും തകർന്നുകിടക്കുന്നത്. മാരാംപാറ മുതൽ ഓലിക്കാമറ്റം ജംഗ്ഷൻ വരെയുള്ള 1.55 കിലോമീറ്റർ ദൂരവും തകർന്ന നിലയിലാണ്. വെള്ളിയാമറ്റം, അറക്കുളം, ആലക്കോട് പഞ്ചായത്തുകളിൽനിന്നുള്ളവർക്ക് തൊടുപുഴയിൽ എത്താതെ കരിമണ്ണൂർ, ഉടുന്പന്നൂർ , വണ്ണപ്പുറം ഭാഗത്തേക്ക് എത്താനുള്ള എളുപ്പവഴിയാണ് ഇത്. അഞ്ഞൂറോളം കുട്ടികളും 13 സ്കൂൾ വാഹനങ്ങളും നൂറുകണക്കിന് യാത്രക്കാരും വാഹനങ്ങളും ദിനംപ്രതി ഇതുവഴി സഞ്ചരിക്കുന്നുണ്ട്. റോഡ് പൊതുമരാമത്ത് വകുപ്പ് ഏറ്റെടുത്ത് ബിഎംബിസി നിലവാരത്തിൽ നിർമിക്കണമെന്നും ഐറിഷ് ഓട നിർമിക്കണമെന്നുമാണ് നാട്ടുകാരുടെ ആവശ്യം. റോഡിന്‍റെ ശോച്യാവസ്ഥ ചൂണ്ടിക്കാട്ടി നിരവധി നിവേദനങ്ങൾ അധികൃതർക്ക് നൽകിയിട്ടും നടപടിയുണ്ടായിട്ടില്ലെന്ന് ചിലവ് ക്രിസ്തുരാജ് പള്ളി വികാരി ഫാ. ജോസഫ് താന്നിക്കൽ പറഞ്ഞു. ഇതേത്തുടർന്നാണ് ഇടവക പരിധിയിലെ റോഡിന്‍റെ അവസ്ഥ എന്ന വിഷയം ആസ്പദമാക്കി റീൽസ് മത്സരം സംഘടിപ്പിച്ചത്. ഇതു പള്ളിയുടെ ഇൻസ്റ്റഗ്രാം പേജിൽ പോസ്റ്റ് ചെയ്തു. ഇന്നലെ വരെയുള്ള വ്യൂസിന്‍റെ എണ്ണവും ആശയവും കണക്കിലെടുത്തായിരിക്കും സമ്മാനാർഹരെ തെരഞ്ഞെടുക്കുക. റോഡിലൂടെ ദുരിതയാത്ര നടത്തി പൊറുതിമുട്ടിയ നാട്ടുകാരുടെ ദുരവസ്ഥ റീൽസിലൂടെയെങ്കിലും അധികൃതരുടെ കണ്ണുതുറപ്പിക്കുമെന്നാണ് ഇവരുടെ പ്രതീക്ഷ.

പഴമയുടെ പാരന്പര്യം മുറുകെപ്പിടിച്ച് പച്ചപ്പിന്‍റെ പരവതാനി വിരിച്ച് കാരയൂർ

ജിതേഷ് ചെറുവള്ളിൽ മറയൂർ: കാന്തല്ലൂർ, മറയൂർ മേഖലകളിൽ നെൽകൃഷിയിലൂടെ നാടിന്‍റെ പച്ചപ്പ് വീണ്ടും പുനർജനിക്കുന്നു. പച്ചപ്പിന്‍റെ പരവതാനിവിരിച്ച പാടങ്ങൾ ഗ്രാമീണജനതയുടെ ജീവിതതാളമായിരുന്നു. പിന്നീട് കരിന്പുകൃഷി ഈ പ്രദേശത്ത് വ്യാപകമായതോടെ നെൽപ്പാടങ്ങൾ അപ്രത്യക്ഷമായി. ഭൂരിഭാഗം കർഷകരും കൂടുതൽ വരുമാനം പ്രതീക്ഷിച്ച് കരിന്പുകൃഷിയിലേക്കു തിരിഞ്ഞതാണ് നെൽകൃഷി അന്യമാകാൻ കാരണം. എന്നാൽ, തങ്ങളെ അന്നമൂട്ടുന്ന നെൽകൃഷി തുടരാൻ ഏതാനും കർഷകർ രംഗത്തുവന്നതോടെയാണ് വീണ്ടും ഇവിടെ പച്ചപ്പ് പ്രത്യക്ഷപ്പെട്ടുതുടങ്ങിയത്. പഴയ കൃഷിരീതികൾ കൈവിടാതെ, മണ്ണിനോടും പ്രകൃതിയോടും ചേർന്നാണ് ഇവരുടെ കൃഷി. നെൽകൃഷി ചെയ്യുന്നതിനുള്ള പാടം ഉഴുതുമറിക്കലും മറ്റും കാരയൂരിന്‍റെ ചരിത്രത്തിന്‍റെ ഭാഗമാണ്. പാടങ്ങൾ ഒരുക്കുന്നതിന്‍റെ ഭാഗമായി നിലം ഉഴുത്, വിത്ത് തയാറാക്കി, പരന്പരാഗതരീതിയിൽ കൃഷിചെയ്യുകയാണ് പതിവ്. ഇതു ഗ്രാമത്തിലെ ജനങ്ങൾ തമ്മിലുള്ള ഐക്യവും കൂട്ടായ്മയും ഊട്ടിയുറപ്പിക്കുന്നു. നെൽകൃഷി കാരയൂരിന്‍റെ ഭക്ഷ്യസുരക്ഷ ഉറപ്പാക്കുക മാത്രമല്ല, സാംസ്കാരിക പൈതൃകം കാത്തുസൂക്ഷിക്കുകയും ചെയ്യുന്നു. ഇവിടത്തെ മറ്റു ഗ്രാമങ്ങൾ കരിന്പുകൃഷിയിലേക്ക് തിരിഞ്ഞപ്പോൾ കാരയൂർ മാത്രം പഴമവിടാതെ പിടിച്ചുനിന്നു. ഇവിടം മണ്ണിന്‍റെ മണമുള്ള പഴമയുടെ ശീലുകൾ ഏറ്റുപാടുന്ന കർഷകഗ്രാമമായി ഇന്നും നിലകൊള്ളുന്നു. കർഷകർ ഒരുമിച്ച് പാടങ്ങൾ ഒരുക്കുകയും വിളവെടുപ്പ് വലിയ ആഘോഷമായി നടത്തുകയും ചെയ്യുന്ന പതിവാണ് ഇവിടെയുള്ളത്. എന്നാൽ, കരിന്പ് കൃഷിയിലേക്കുള്ള മാറ്റം ഈ കൂട്ടായ്മയെ ദുർബലപ്പെടുത്തിയിരുന്നു. മറ്റു കൃഷിയുടെ രംഗപ്രവേശത്തോടെ പരന്പരാഗത കൃഷിരീതികളും ഗ്രാമീണ സംസ്കാരവും കാലത്തിന്‍റെ കുത്തൊഴുക്കിൽ മണ്‍മറയാൻ കാരണമായി. എന്നാൽ, കാരയൂർ ഉൾപ്പെടെയുള്ള അപൂർവം ചില ഗ്രാമങ്ങൾ നെൽകൃഷിയിലേക്ക് മടങ്ങിയതോടെ കണ്ണിലെ കൃഷ്ണമണിപോലെ ഇവിടുത്തെ സാംസ്കാരിക പൈതൃകം കാത്തുസൂക്ഷിക്കാനുള്ള പരിശ്രമത്തിനാണ് തുടക്കംകുറിച്ചിരിക്കുന്നത്.

ബാംബൂനഗറിൽ കാട്ടാന ആക്രമണം രൂക്ഷം

മറയൂർ: ജനവാസ മേഖലയിൽ കാട്ടാന ആക്രമണം വീണ്ടും രൂക്ഷമായി. കഴിഞ്ഞ രാത്രി ഒരു കാട്ടാന ഈ പ്രദേശത്ത് ഇറങ്ങി വീടുകൾക്കും വിളകൾക്കും വലിയ നാശം വരുത്തി. വനം വകുപ്പ് കാട്ടന ശല്യം തടയാൻ പദ്ധതികൾ ആവിഷ്കരിച്ചിട്ടുണ്ടെങ്കിലും ഫലപ്രദമാകുന്നില്ല. കൃഷിസ്ഥലങ്ങളിൽനിന്ന് മൃഗങ്ങളെ അകറ്റാൻ ശ്രമിക്കുന്നുണ്ടെങ്കിലും അവയുടെ സഞ്ചാര പാതകൾ മാറ്റാൻ കഴിയുന്നില്ലെന്ന് വനം വകുപ്പ് ഉദ്യോഗസ്ഥർ പറയുന്നു. ദേശീയ പാതയോടു ചേർന്നുള്ള മേഖലകളിൽ പോലും കാട്ടാനകൾ ഇറങ്ങി യാത്രക്കാർക്കും പ്രദേശവാസികൾക്കും അപകടം സൃഷ്ടിക്കുകയാണ്. സമീപത്തെ വനത്തിൽനിന്ന് ഭക്ഷണത്തിനായാണ് വന്യമൃഗങ്ങൾ മനുഷ്യവാസ മേഖലയിലേക്ക് എത്തുന്നത്. വനത്തിലെ ഭക്ഷണസ്രോതസ്‌സുകൾ കുറയുന്പോൾ ദീർഘകാല പരിഹാരമായി കൂടുതൽ ഫലപ്രദമായ പദ്ധതികൾ ഒരുക്കണമെന്നാണ് നാട്ടുകാർ ആവശ്യപ്പെടുന്നത്. നാട്ടുകാർ സ്വയം സംരക്ഷണത്തിനായി രാത്രി പട്രോൾ നടത്തുന്നുണ്ട്. ഇത് അപകടകരവും അപര്യാപ്തവുമാണെന്ന് അവർ പറയുന്നു.

27 ഗ്രാം എംഡിഎംഎയുമായി യുവാവ് പിടിയിൽ

കട്ടപ്പന: 27 ഗ്രാം എംഡിഎംഎയുമായി ബംഗളൂരുവില്‍നിന്ന് കട്ടപ്പനയിലെത്തിയ യുവാവ് പിടിയിൽ. കോഴിക്കോട് കൊയിലാണ്ടി പയാറ്റുവളപ്പില്‍ ഷാലീന ഹൗസില്‍ ഫാരിസ് മുഹമ്മദി (31) നെയാണ് കട്ടപ്പന ഡിവൈഎസ്പി വി.എ. നിഷാദ്‌മോനും സംഘവും പിടികൂടിയത്. പോലീസിനു ലഭിച്ച രഹസ്യവിവരത്തെത്തുടര്‍ന്ന് കട്ടപ്പന ബൈപാസ് റോഡില്‍ നടത്തിയ പരിശോധനയിൽ സംശയാസ്പദമായ സാഹചര്യത്തില്‍ കണ്ട യുവാവിനെ പരിശോധിച്ചപ്പോഴാണ് ദേഹത്ത് ഒളിപ്പിച്ചുവച്ചിരുന്ന എംഡിഎംഎ കണ്ടെടുത്തത്. ചൊവ്വാഴ്ച രാവിലെ ബംഗളൂരുവില്‍നിന്ന് എത്തിയ യുവാവ് മറ്റാര്‍ക്കോ നല്‍കാനാണ് രാസലഹരി എത്തിച്ചത്. ലഹരിയുടെ ഉറവിടവും ആര്‍ക്കാണ് വില്‍ക്കാന്‍ കൊണ്ടുവന്നതെന്നും ഉള്‍പ്പെടെയുള്ള വിവരങ്ങള്‍ അറിയാന്‍ പോലീസ് ചോദ്യംചെയ്യല്‍ ആരംഭിച്ചു. കോഴിക്കോട് സ്വദേശിയായ ഫാരിസ് മുഹമ്മദ് അന്തര്‍ സംസ്ഥാന ലഹരിക്കടത്ത് സംഘത്തില്‍പ്പെട്ടയാളാണെന്നും പോലീസ് സംശയിക്കുന്നു. കോഴിക്കോട് പോലീസുമായി ബന്ധപ്പെട്ട് ഇയാളെക്കുറിച്ചുള്ള കൂടുതല്‍ വിവരങ്ങള്‍ അന്വേഷണസംഘം ശേഖരിച്ചുവരുന്നു. ജില്ലാ പോലീസ് മേധാവി ടി.കെ. വിഷ്ണുപ്രദീപിന്‍റെ കീഴിലുള്ള ഡാന്‍സാഫ് ടീമും കട്ടപ്പന ഡിവൈഎസ്പി വി.എ. നിഷാദ്‌മോന്‍, എസ്‌ഐമാരായ ഷാജി ഏബ്രഹാം, ബെര്‍ട്ടിന്‍ ജോസ്, പി.വി. മഹേഷ്, എസ് സിപിഒ ഷെമീര്‍, സിപിഒമാരായ ബിബിന്‍ മാത്യു, ആര്‍. ഗണേഷ്, സിനോജ് ജോസഫ് എന്നിവരും ചേര്‍ന്നാണ് പ്രതിയെ അറസ്റ്റ് ചെയ്തത്.

മറയൂർ ചന്ദനം മൗറിഷ്യസിൽ സുഗന്ധം പരത്തും; 1000 കിലോ വിത്തുകൾ കടൽകടന്നു

മറയൂർ: കേരളത്തിന്‍റെ ചന്ദനസുഗന്ധം ഇനി മൗറിഷ്യസിന്‍റെ മണ്ണിലും പരക്കും. മറയൂർ ചന്ദനത്തിന്‍റെ മഹിമയിൽ ആകൃഷ്ടരായ മൗറിഷ്യസിലെ സൗത്ത് ആഫ്രിക്കൻ കന്പനിയായ ഓഷ്യൻ അരോമാറ്റിക്സ് ആൻഡ് എസൻഷൽ ഓയിൽസ് ലിമിറ്റഡ് മറയൂരിൽനിന്ന് 1000 കിലോ ചന്ദനവിത്തുകൾ സ്വന്തമാക്കി. മറയൂരിന്‍റെ തനതായ ചന്ദനക്കാടിന്‍റെ പ്രത്യേകതകളും വളർച്ചാരീതികളും മനസിലാക്കാൻ മാസങ്ങൾക്ക് മുൻപ് കന്പനി പ്രതിനിധികൾ മറയൂർ സന്ദർശിച്ചിരുന്നു. മറയൂർ ചന്ദന ഡിവിഷൻ മുൻ ഡിഎഫ്ഒ എം.ജി. വിനോദ് കുമാറുമായി നടത്തിയ ചർച്ചയിൽ മൗറിഷ്യസിന്‍റെ കാലാവസ്ഥയും മണ്ണിന്‍റെ ഘടനയും മറയൂരിനോട് സാമ്യമുള്ളതാണെന്ന് കന്പനി അധികൃതർ വ്യക്തമാക്കി. രണ്ടു മാസം മുന്പ് വീണ്ടും മറയൂരിലെത്തിയ സംഘം ചന്ദനവിത്തുകൾ ശേഖരിച്ച് മൗറിഷ്യസിലേക്ക് കൊണ്ടുപോയി. മറയൂർ പള്ളനാട് സ്വദേശിയും വനംവകുപ്പിലെ താത്കാലിക ജീവനക്കാരനുമായ എൽ. പ്രഭാകരന്‍റെ വൈദഗ്ധ്യം തിരിച്ചറിഞ്ഞ സംഘം അദ്ദേഹത്തെ ചന്ദനവിത്തുകൾ മുളപ്പിക്കുന്നതിനായി മൗറിഷ്യസിലേക്ക് കൊണ്ടുപോയിരുന്നു. അവിടെയെത്തി കാടുപിടിച്ചു കിടന്ന സ്ഥലം ഒരുക്കിയ പ്രഭാകരൻ 1000 കിലോ ചന്ദനവിത്തുകൾ മണ്ണു നിറച്ച പാക്കറ്റുകളിൽ നട്ടു. രണ്ടു മാസത്തിനുള്ളിൽ തൈകൾ മുളച്ച് എട്ട് ഇലകൾ വരെ വളർന്നുതുടങ്ങി. ഏഴ്-എട്ട് മാസത്തിനു ശേഷം ഈ തൈകൾ പറിച്ചു നടാൻ പദ്ധതിയിട്ടിരിക്കുകയാണ്.

സഹോദയ കലോത്സവം: മാനുവൽ പ്രകാശനം ചെയ്തു

തൊടുപുഴ: സെൻട്രൽ കേരള സഹോദയ കലോത്സവ് സർഗധ്വനി 2025ന്‍റെ മാനുവൽ പ്രകാശനം ചെയ്തു. സിനിമ -സീരിയൽ ആർട്ടിസ്റ്റ് ഡെല്ല ജോർജ് പ്രകാശനം നിർവഹിച്ചു. കലോത്സവ വേദിയായ തൊടുപുഴ വിമല പബ്ലിക് സ്കൂളിൽ ഒക്ടോബർ 16, 17, 18 തീയതികളിലാണ് കലോത്സവം. സെൻട്രൽ കേരള സഹോദയ പ്രസിഡന്‍റ് ഫാ. മാത്യു കരീത്തറ സിഎംഐ അധ്യക്ഷത വഹിച്ചു. സ്കൂൾ പ്രിൻസിപ്പലും ജനറൽ കണ്‍വീനറുമായ സിസ്റ്റർ എലൈസ് സിഎംസി, സഹോദയ കോ-ഓർഡിനേറ്റർ ഗിരീഷ് ബാലൻ, പിടിഎ പ്രസിഡന്‍റ് സിജോ ജെ. തൈച്ചേരിയിൽ, വൈസ് പ്രിൻസിപ്പൽ സിസ്റ്റർ ലിസ്ബത്ത്, അക്കാദമിക് കോ-ഓർഡിനേറ്റർ മഞ്ജു ജോസ് എന്നിവർ പ്രസംഗിച്ചു. ഇടുക്കി,എറണാകുളം, തൃശൂർ ജില്ലകളിലെ നൂറോളം സിബിഎസ്ഇ സ്കൂളുകളിൽനിന്നും 5,000ത്തിലധികം കുട്ടികൾ മൽസരത്തിൽ പങ്കെടുക്കും.

എംപിയുടെ കത്തിൽ നടപടി ആവശ്യപ്പെട്ട് ദേശീയ മനുഷ്യാവകാശ കമ്മീഷൻ

തൊടുപുഴ: ഡീൻ കുര്യാക്കോസ് എംപി നൽകിയ കത്തിന്‍റെ അടിസ്ഥാനത്തിൽ, വനംവകുപ്പിന്‍റെ അനാസ്ഥയിൽ ദേശീയ മനുഷ്യാവകാശ കമ്മീഷൻ വിശദീകരണം ആവശ്യപ്പെട്ടു. 2024 ഡിസംബർ 16ന് കുട്ടന്പുഴയിൽ കാട്ടാനയുടെ ആക്രമണത്തിൽ എൽദോസ് എന്ന 40കാരൻ മരിച്ച സംഭവത്തിലാണ് എംപി കമ്മീഷനെ സമീപിച്ചത്. കാട്ടാനയെ കണ്ട വിവരം അറിയിച്ചിട്ടും വനംവകുപ്പ് ഉദ്യോഗസ്ഥർ സ്ഥലത്തെത്താൻ തയാറായില്ലെന്ന് എംപി കത്തിൽ ആരോപിച്ചു. വാഹനത്തിൽ ഇന്ധനമില്ലെന്ന് പറഞ്ഞാണ് ഉദ്യോഗസ്ഥർ എത്താതിരുന്നത്. ഈ അനാസ്ഥയാണ് എൽദോസിന്‍റെ മരണത്തിന് കാരണമായതെന്നും ഇതു ക്രിമിനൽ അനാസ്ഥയാണെന്നും എംപി കത്തിൽ ചൂണ്ടിക്കാട്ടി. കേരളത്തിൽ വന്യജീവി ആക്രമണം വർധിച്ചുവരികയാണ്. ഇതിൽ സർക്കാർ അടിയന്തരമായി ഇടപെടണമെന്നും എംപി കത്തിൽ ആവശ്യപ്പെട്ടു. ഇതേ തുടർന്നു 2025 ഏപ്രിൽ 29ന് ചീഫ് ഫോറസ്റ്റ് കണ്‍സർവേറ്ററോട് ദേശീയ മനുഷ്യാവകാശ കമ്മീഷൻ റിപ്പോർട്ട് ആവശ്യപ്പെട്ടിരുന്നു. എന്നാൽ, ഇതുവരെ റിപ്പോർട്ട് ലഭിച്ചിട്ടില്ലെന്ന് കമ്മീഷൻ അറിയിച്ചു. റിപ്പോർട്ട് സമർപ്പിക്കാൻ ആറാഴ്ചത്തെ സമയം നൽകിയിട്ടുണ്ടെന്നും ഈ കാലയളവിനുള്ളിൽ റിപ്പോർട്ട് ലഭിച്ചില്ലെങ്കിൽ മനുഷ്യാവകാശ സംരക്ഷണ നിയമം സെക്ഷൻ 13 പ്രകാരം നിർബന്ധിത നടപടി സ്വീകരിക്കുമെന്നും കമ്മീഷൻ മുന്നറിയിപ്പു നൽകി.

ദേശീയപാത വികസനം അട്ടിമറിച്ചതിനു പിന്നിൽ സംസ്ഥാന സർക്കാർ: എംപി

തൊടുപുഴ: ദേശീയ പാത-85ന്‍റെ ഭാഗമായ നേര്യമംഗലം മുതൽ വാളറവരെയുള്ള റോഡിന്‍റെ വികസനം ഹൈക്കോടതി ഇടക്കാല ഉത്തരവിലൂടെ തടഞ്ഞ സംഭവത്തിൽ തങ്ങളുടെ ഭാഗത്തുനിന്നു വീഴ്ചസംഭവിച്ചിട്ടില്ലെന്ന് വരുത്തിത്തീർക്കാനുള്ള ശ്രമമാണ് സർക്കാർ നടത്തുന്നതെന്ന് ഡീൻ കുര്യാക്കോസ് എംപി പത്രസമ്മേളനത്തിൽ ആരോപിച്ചു. വനംവകുപ്പ് പറയുന്നതുപോലെ പ്രവർത്തിക്കുന്ന സർക്കാർ പാതയുടെ നിർമാണം തടസപ്പെടുത്താൻ ഒത്താശചെയ്യുകയായിരുന്നു. സർക്കാർ വീഴ്ച മറച്ചുവച്ച് മന്ത്രിമാരായ റോഷി അഗസ്റ്റിനും എ.കെ. ശശീന്ദ്രനും തെറ്റുചെയ്ത ഉദ്യോഗസ്ഥരെ ന്യായീകരിക്കുകയാണ്. ഇവർ ജനാധിപത്യത്തിന്‍റെ വില കളയുകയാണ്. ചീഫ് സെക്രട്ടറി തലത്തിൽ സ്വീകരിച്ച തീരുമാനം അട്ടിമറിച്ചതിൽ മന്ത്രിമാർക്കോ ഉന്നത ഉദ്യോഗസ്ഥർക്കോ പങ്കില്ലെങ്കിൽ തെറ്റു ചെയ്തവർക്കെതിരേ നടപടി സ്വീകരിക്കുകയാണു വേണ്ടത്. ഇതിനു കഴിയുന്നില്ലെങ്കിൽ രാജിവച്ചൊഴിയണം. അഡീഷണൽ ചീഫ് സെക്രട്ടറി കെ.ആർ. ജ്യോതിലാൽ ഹൈക്കോടതിയിൽ ചീഫ് സെക്രട്ടറിക്കുവേണ്ടിയെന്നു പറഞ്ഞ് നൽകിയ സത്യവാങ്മൂലം സർക്കാരിന്‍റെ നിലപാടായി മാറി. ഇതിലെ പരാമർശങ്ങൾ വസ്തുതകൾക്കു നിരക്കാത്തതും 2024 ഓഗസ്റ്റ് രണ്ടിനു ചീഫ്സെക്രട്ടറി വിളിച്ചുചേർത്ത യോഗത്തിൽ സ്വീകരിച്ച തീരുമാനത്തിന് കടകവിരുധവുമായിരുന്നു. ഇതേത്തുടർന്നു പുറപ്പെടുവിച്ച ഇടക്കാല വിധിയനുസരിച്ച് പരിവേഷ് പോർട്ടലിൽ നൽകിയ അപേക്ഷയ്ക്ക് പുറമേ നടക്കുന്ന നിർമാണപ്രവർത്തനങ്ങളെല്ലാം നിയമവിരുദ്ധവും നിർത്തിവയ്ക്കപ്പെടേണ്ടതുമാണെന്നായിരുന്നു കോടതിയുടെ നിരീക്ഷണം. ഇതേത്തുടർന്നു മരംമുറിയും റോഡ് നിർമാണപ്രവർത്തനങ്ങളും നിർത്തിവയ്ക്കേണ്ടി വന്നു. ചീഫ് സെക്രട്ടറി 2024 ഓഗസ്റ്റ് രണ്ടിനു വീഡിയോ കോണ്‍ഫറൻസ് മുഖേന കൂടിയ യോഗത്തിൽ വനംവകുപ്പ് സെക്രട്ടറിയായ കെ.ആർ. ജ്യോതിലാലും പങ്കെടുത്തിരുന്നു. ഈ യോഗതീരുമാനമനുസരിച്ച് റോഡ് വികസനവുമായി ബന്ധപ്പെട്ട് വനംവകുപ്പ് യാതൊരു തരത്തിലുള്ള തടസവും സൃഷ്ടിക്കാൻ പാടില്ലെന്ന് നിർദേശിച്ചിരുന്നു. സർക്കാരും കിരണ്‍ സിജുവും തമ്മിലുള്ള കേസുമായി ബന്ധപ്പെട്ട് പുറപ്പെടുവിച്ച വിധിയിൽ 30 മീറ്റർ വീതി റോഡിനുണ്ട്. ഇതു മറികടക്കാൻ സർക്കാർ അപ്പീലോ റിവ്യൂ പെറ്റീഷനോ നൽകേണ്ടതില്ല. ദേശീയപാത അഥോറിറ്റി പരിവേഷ് പോർട്ടലിൽ നൽകിയ അപേക്ഷയനുസരിച്ച് 0.95 ഹെക്ടർ സ്ഥലം ലഭ്യമാക്കുന്നതിനുള്ള നടപടികൾ തുടരാമെന്നും തീരുമാനിച്ചിരുന്നു. എന്നാൽ അഡീഷണൽ ചീഫ് സെക്രട്ടറി കോടതിയിൽ കഴിഞ്ഞ ദിവസം നൽകിയ സത്യവാങ്മൂലത്തിൽ ഈ മേഖല ഉൾപ്പെടുന്ന പ്രദേശം റവന്യു-പിഡബ്ല്യുഡി വകുപ്പുകളുടെ റിക്കാർഡ് പ്രകാരം പുറന്പോക്കാണെന്നിരിക്കേ ഈ പ്രദേശം മലയാറ്റൂർ റിസർവാണെന്നു സ്ഥാപിക്കാനായിരുന്നു ശ്രമം. ഇതിനിടെ ദേശീയപാത അഥോറിറ്റി ആവശ്യപ്പെട്ട സ്ഥലത്തിനു പകരമായും മനുഷ്യ-വന്യജീവി സംഘർഷം പരിഹരിക്കാനെന്ന പേരിലും വനംവകുപ്പ് 5.5 കോടി കൈപ്പറ്റിയെന്നും എംപി പറഞ്ഞു. ഈ തുക ഉപയോഗിച്ച് മനുഷ്യ-വന്യജീവി സംഘർഷം പരിഹരിക്കാൻ എന്ത് നടപടിയാണ് വനംവകുപ്പ് സ്വീകരിച്ചതെന്നു വ്യക്തമാക്കണം. വനം ഉദ്യോഗസ്ഥർക്ക് വാഹനവും, ഡ്രൈവർമാരുടെ ശന്പളവുമെല്ലാം ഈ ഇനത്തിൽ ആവശ്യപ്പെട്ട് പണം വാങ്ങിയെടുത്ത സംഭവം വിചിത്രമാണെന്നും എംപി പറഞ്ഞു. ജില്ലയെ ഗുരുതരമായി ബാധിക്കുന്ന വിഷയത്തിൽ മുഖ്യമന്ത്രി അടിയന്തര ഇടപെടൽ നടത്തി റോഡ് വികസനം സാധ്യമാക്കണമെന്ന് എംപി ആവശ്യപ്പെട്ടു. പൊതുപ്രവർത്തകൻ സിജുമോൻ ഫ്രാൻസിസും പത്രസമ്മേളനത്തിൽ പങ്കെടുത്തു.

കല്ലാര്‍ ഗവ. എച്ച്എസ്എസ് സപ്തതി ആഘോഷങ്ങളുടെ ഉദ്ഘാടനം നാളെ

നെടുങ്കണ്ടം: കല്ലാര്‍ ഗവ. ഹയര്‍ സെക്കൻഡറി സ്‌കൂളിന്‍റെ സപ്തതി ആഘോഷങ്ങളുടെ ഉദ്ഘാടനം നാളെ മന്ത്രി റോഷി അഗസ്റ്റിന്‍ നിര്‍വഹിക്കുമെന്ന് സംഘാടകസമിതി ഭാരവാഹികള്‍ അറിയിച്ചു. 1956 ജൂലൈ 17ന് ഏകാധ്യാപക വിദ്യാലയമായി ആരംഭിച്ച് ഇപ്പോള്‍ ഹയര്‍ സെക്കൻഡറിയായി പ്രവര്‍ത്തിക്കുന്ന സ്‌കൂള്‍ പൊതുവിദ്യാഭ്യാസ മേഖലയില്‍ ജില്ലയിലെ ഏറ്റവും വലിയ സ്‌കൂളാണ്. സപ്തതി ആഘോഷങ്ങളുടെ ഭാഗമായി ഒരു വര്‍ഷം നീണ്ടുനില്‍ക്കുന്ന പരിപാടികളാണ് ആസൂത്രണം ചെയ്തിരിക്കുന്നത്. പൂര്‍വ അധ്യാപക - വിദ്യാര്‍ത്ഥീ സംഗമം, ലഹരിവിരുദ്ധ കാമ്പയിന്‍, കലാകായിക മത്സരങ്ങള്‍, പഠനയാത്രകള്‍, പട്ടംകോളനി ചരിത്ര ഗവേഷണം, സാംസ്‌കാരിക കേന്ദ്രം സ്ഥാപിക്കല്‍, ടാലന്‍റ് ഹണ്ട്, അഗ്രി ഫെസ്റ്റ്, സ്‌നേഹവീട് നിര്‍മാണം തുടങ്ങിയവയാണ് പ്രധാനപ്പെട്ട പരിപാടികള്‍. നാളെ രാവിലെ 10ന് ലഹരിക്കെതിരേ രക്ഷിതാക്കളും വിദ്യാര്‍ഥികളും അധ്യാപകരും പൊതുജനങ്ങളും ചേര്‍ന്ന് മനുഷ്യച്ചങ്ങല തീര്‍ക്കും. ഉച്ചകഴിഞ്ഞ് രണ്ടിന് നടക്കുന്ന പൊതുസമ്മേളനത്തില്‍ പിടിഎ പ്രസിഡന്‍റ് രമേഷ് കൃഷ്ണന്‍ അധ്യക്ഷത വഹിക്കും. എം.എം. മണി എംഎല്‍എ സപ്തതി പദ്ധതി പ്രകാശനവും ഡീന്‍ കുര്യാക്കോസ് എംപി മുഖ്യപ്രഭാഷണവും നടത്തും. ത്രിതല പഞ്ചായത്ത് അംഗങ്ങള്‍, വിവിധ രാഷ്ട്രീയകക്ഷി പ്രതിനിധികള്‍ തുടങ്ങിയവര്‍ പങ്കെടുക്കുമെന്ന് പിടിഎ പ്രസിഡന്‍റ് രമേഷ് കൃഷ്ണന്‍, സിഎംസി ചെയര്‍മാന്‍ വിജയന്‍പിള്ള, പ്രിന്‍സിപ്പൽ കെ.വി. ഹല്ലോക്ക്, ഹെഡ്മാസ്റ്റര്‍ ജോണ്‍ മാത്യു, സിറാജ് മുണ്ടിയെരുമ, ഷംസുദീന്‍, എന്‍. അജിത, എന്‍. പ്രജിത, അംബുജാക്ഷന്‍ എന്നിവര്‍ അറിയിച്ചു.

കോവിൽക്കടവിലെ ഏക എടിഎം 20 ദിവസമായി പ്രവർത്തനരഹിതം

മറയൂർ: പ്രധാന വിനോദസഞ്ചാര കേന്ദ്രമായ കാന്തല്ലൂരിന്‍റെ കവാടമായ കോവിൽക്കടവിൽ സ്ഥിതിചെയ്യുന്ന ഏക എടിഎം കേന്ദ്രം കഴിഞ്ഞ 20 ദിവസമായി അടഞ്ഞുകിടക്കുന്നത് പ്രദേശവാസികൾക്കും ഇവിടെയെത്തുന്ന വിനോദസഞ്ചാരികൾക്കും വലിയ ബുദ്ധിമുട്ട് സൃഷ്ടിക്കുന്നു. എസ്ബിഐയുടെ ഉടമസ്ഥതയിലുള്ള എടിഎം, കരാറുകാരനും കെട്ടിടഉടമയും തമ്മിലുള്ള വാടകയുമായി ബന്ധപ്പെട്ട തർക്കം മൂലമാണ് പ്രവർത്തനരഹിതമായത്. കോവിൽക്കടവ്, കാന്തല്ലൂർ എന്നിവിടങ്ങളിലേക്ക് എത്തുന്ന സഞ്ചാരികൾക്ക് പണം പിൻവലിക്കാൻ ഈ എടിഎമ്മായിരുന്നു പ്രധാന ആശ്രയം. ഏറ്റവും അടുത്ത എടിഎം അഞ്ചു കിലോമീറ്റർ അകലെയുള്ള മറയൂർ ടൗണിലാണ്. എടിഎം അടഞ്ഞുകിടക്കുന്ന സാഹചര്യം മുതലെടുത്ത് സമീപത്തുള്ള ചില വ്യക്തികൾ കമ്മീഷൻ വാങ്ങി പണം നൽകുന്ന രീതി വ്യാപകമായിട്ടുണ്ട്.

കേണൽ പ്രശാന്ത് നായർക്ക് യാത്രയയപ്പ്

തൊടുപുഴ: കേരള എൻസിസി ബറ്റാലിയൻ കമാൻഡിംഗ് ഓഫീസർ കേണൽ പ്രശാന്ത് നായർക്ക് തൊടുപുഴ ന്യൂമാൻ കോളജിൽ വർണ ശബളമായ യാത്രയയപ്പ് നൽകി. 18 കേരള ബറ്റാലിയന്‍റെ കമാൻഡിംഗ് ഓഫീസറായി രണ്ടു വർഷത്തോളമായി പ്രവർത്തിച്ചുവരികയായിരുന്നു കേണൽ പ്രശാന്ത് നായർ. മികച്ച സൈനിക സേവനത്തിന് സേനാമെഡലും വിശിഷ്ട സേനാമെഡലും നേടിയ അദ്ദേഹം കേരള എൻസിസിക്ക് ഒട്ടേറെ സംഭാവനകൾ നൽകിയിരുന്നു. കേരളത്തിൽ നിന്ന് ആദ്യമായി ഡൽഹിയിൽ റിപ്പബ്ലിക് ദിന ക്യാന്പിൽ പങ്കെടുത്ത ന്യൂമാൻ എൻസിസി ബാന്‍റിന്‍റെ പരിശീലനത്തിലും അദ്ദേഹം പങ്കുവഹിച്ചു. സമ്മേളനത്തിൽ 18 കേരള ബറ്റാലിയൻ അഡ്മിനിസ്ട്രേറ്റീവ് ഓഫീസർ കേണൽ അനിരുദ്ധ് സിംഗ്, വൈസ് പ്രിൻസിപ്പൽ ഡോ. സാജു ഏബ്രഹാം, അസോസിയേറ്റ് എൻസിസി ഓഫീസർ ക്യാപ്റ്റൻ പ്രജീഷ് സി. മാത്യു, ബർസാർ ഫാ. ബെൻസണ്‍ എൻ. ആന്‍റണി, ഫസ്റ്റ് ഓഫീസർ ഡോ.സജീവ് കെ. വാവച്ചൻ, ഫസ്റ്റ് ഓഫീ സർ അനിൽ കെ. നായർ, സർജന്‍റ് എസ്.ദേവികൃഷ്ണ എന്നിവർ പ്രസംഗിച്ചു. 18 കേരള ബറ്റാലിയൻ ഗാർഡ് ടീം കേണലിന് ഗാർഡ് ഓഫ് ഓണർ നൽകി ആദരിച്ചു. തുടർന്ന് നടന്ന പുള്ളിങ് ഒൗട്ട് സെറിമണിയിൽ എൻസിസി ഓഫീസേഴ്സ്, സൈനിക ഉദ്യോഗസ്ഥർ, കേഡറ്റുകൾ എന്നിവർ പങ്കെടുത്തു.

വെള്ളയാംകുടി യുപി സ്കൂളിൽ ലഹരിക്കെതിരേ "എന്‍റെ കൈവിരൽച്ചാർത്ത് ’

കട്ടപ്പന: വെള്ളയാംകുടി സെന്‍റ് ജെറോംസ് യുപി സ്കൂളിൽ ലഹരിവിരുദ്ധ പ്രവർത്തനങ്ങളുടെ രണ്ടാം ഘട്ട പ്രവർത്തനങ്ങൾക്ക് തുടക്കമായി. ലഹരിവിരുദ്ധ പ്രവർത്തനങ്ങളുടെ ഉദ്ഘാടനം ഇടുക്കി രൂപത വികാരി ജനറാൾ മോണ്‍. ഏബ്രഹാം പുറയാറ്റ് നിർവഹിച്ചു. ലഹരിവിരുദ്ധ പ്രവർത്തനങ്ങളുടെ ഭാഗമായി കുട്ടികളുടെ സൂംബ ഡാൻസ് അരങ്ങേറി. സ്കൂൾ ചെയർപേഴ്സൻ അമല സജേഷ് ലഹരിവിരുദ്ധ സത്യപ്രതിജ്ഞ ചൊല്ലിക്കൊടുത്തു. ലഹരിവിരുദ്ധ പ്രവർത്തനത്തിന്‍റെ ഭാഗമായി പൊതു സ്ഥാപനങ്ങളിലും കടകളിലും പൊതു വാഹനങ്ങളിലും സ്റ്റിക്കർ പതിക്കുന്ന പ്രവർത്തനങ്ങളും ആരംഭിച്ചു. ലഹരിവിരുദ്ധ സന്ദേശം എത്തിക്കുന്നതിന്‍റെ ഭാഗമായാണ് സ്റ്റിക്കർ പ്രചാരണം നടത്തുന്നത്. വെള്ളയാംകുടി സെന്‍റ് ജെറോംസ് യുപി സ്കൂളിൽ നടന്ന ചടങ്ങിൽ കട്ടപ്പന ഉപജില്ലാ വിദ്യാഭ്യാസ ഓഫീസർ സി. രാജശേഖരൻ, കട്ടപ്പന മുനിസിപ്പൽ കൗണ്‍സിലർ ബീന സിബി, സ്കൂൾ ഹെഡ്മാസ്റ്റർ ബിനോയി മഠത്തിൽ, പിടിഎ പ്രസിഡന്‍റ് ജയിംസ് വർഗീസ്, പിടിഎ വൈസ് പ്രസിഡന്‍റ് പ്രശാന്ത് രാജു തുടങ്ങിയവർ പ്രസംഗിച്ചു. ലഹരിക്കെതിരേ കൈയൊപ്പ് ചാർത്തി വിദ്യാർഥികൾ ലഹരിവിരുദ്ധ സന്ദേശത്തിന്‍റെ അംബാസഡർമാരായി മാറുമെന്ന് പ്രതിജ്ഞയെടുത്തു.

മറയൂർ സർവീസ് സഹകരണ ബാങ്കിന് സംസ്ഥാനതലത്തിൽ വീണ്ടും അംഗീകാരം

മറയൂർ: നബാർഡിന്‍റെ പ്രൈമറി അഗ്രികൾച്ചറൽ ക്രെഡിറ്റ് സൊസൈറ്റി, മൾട്ടി സർവീസ് സെന്‍റർ എന്നീ പദ്ധതിയിൽ സംസ്ഥാനത്തെ മികച്ച പ്രാഥമിക സഹകരണ ബാങ്കായി മറയൂർ സർവീസ് സഹകരണ ബാങ്ക് തെരഞ്ഞെടുക്കപ്പെട്ടു. സഹകരണ സംഘങ്ങളുടെ വൈവിധ്യവത്കരണത്തിലൂടെ വിവിധോദ്ദേശ സംഘങ്ങളാകാനുള്ള നബാർഡിന്‍റെ നയത്തിന്‍റെ ഭാഗമായാണ് അംഗീകാരം. നബാർഡിന്‍റെ 44-ാം സ്ഥാപക ദിനത്തോടനുബന്ധിച്ച് തിരുവനന്തപുരം റീജണൽ ഓഫീസ് ഓഡിറ്റോറിയത്തിൽ നടന്ന ചടങ്ങിൽ സഹകരണ വകുപ്പ് മന്ത്രി വി.എൻ. വാസവൻ അവാർഡ് സമ്മാനിച്ചു. റിസർവ് ബാങ്ക് ജനറൽ മാനേജർ മുഹമ്മദ് സജീദ്, കാനറാ ബാങ്ക് ജനറൽ മാനേജർ സുനിൽകുമാർ, നബാർഡ് ചീഫ് ജനറൽ മാനേജർ നാഗേഷ്കുമാർ അലുവാല തുടങ്ങിയയവരുടെ സാന്നിധ്യത്തിലായിരുന്നു ചടങ്ങ്.

ട്രാഫിക് പോലീസിന്‍റെ നടപടിയിൽ വലഞ്ഞ് വ്യാപാരികൾ

തൊടുപുഴ: നഗരത്തിൽ ട്രാഫിക് പോലീസിന്‍റെ നടപടിയിൽ തൊടുപുഴയിലെ വ്യാപാരികൾ പൊറുതി മുട്ടിയിരിക്കുകയാണെന്ന് മർച്ചന്‍റ്സ് അസോസിയേഷൻ എക്സിക്യൂട്ടീവ് യോഗം കുറ്റപ്പെടുത്തി. നഗരത്തിൽ കൂടി രാവിലെ മുതൽ സഞ്ചരിച്ച് കടകളിലേക്ക് വരുന്ന സാധാരണക്കാരുടെ വാഹനങ്ങളുടെ ചിത്രം ഫോണിൽ പകർത്തി പെറ്റിക്കേസ് ചാർജ് ചെയ്യുന്ന രീതിയാണ് ഇവരുടേത്. ഡ്രൈവർമാരുള്ള വാഹനങ്ങൾക്കെതിരേയും കേസെടുക്കുന്നുണ്ട്. കച്ചവടമാന്ദ്യം മൂലം വാടക കൊടുക്കാനും വായ്പകൾ തിരിച്ചടയ്ക്കാനും ബുദ്ധിമുട്ടുന്ന വ്യാപാരികളെ ഈ നടപടി പ്രതികൂലമായി ബാധിച്ചിരിക്കുകയാണ്. പോലീസും വ്യാപാരികളും നല്ല ബന്ധത്തിലാണ് ഇതു വരെ മുന്നോട്ടു പോയിരുന്നത്. എന്നാൽ ചില ഉദ്യോഗസ്ഥർ മൂലം ഈ ബന്ധം ഇല്ലാതാവുകയാണ്. ഇടുങ്ങിയ പല റോഡുകളിലും പാർക്കിംഗ് സൗകര്യങ്ങൾ പരിമിതമായതിനാൽ വ്യാപാരസ്ഥാപനങ്ങളുടെ മുന്നിൽ ഉപഭോക്താക്കൾ വാഹനം നിർത്തുന്നത് സ്വാഭാവികമാണ്. ഈ വാഹനങ്ങൾക്കാണ് ഭീമമായ തുക പിഴയായി നൽകുന്നത്. ഇത്തരം നടപടിക്കെതിരെ പോലീസ് സ്റ്റേഷൻ മാർച്ച് ഉൾപ്പെടെ സമരം സംഘടിപ്പിക്കുമെന്ന് ഭാരവാഹികൾ പറഞ്ഞു. അസോസിയേഷൻ പ്രസിഡന്‍റ് രാജു തരണിയിൽ യോഗത്തിൽ അധ്യക്ഷത വഹിച്ചു. ജില്ലാ ട്രഷറർ ആർ.രമേശ് ഉദ്ഘാടനം ചെയ്തു. ടി.എൻ. പ്രസന്നകുമാർ, സി.കെ.നവാസ്, അനിൽ പീടികപ്പറന്പിൽ, നാസർ സൈര, സാലി എസ്. മുഹമ്മദ്, ഷെരീഫ് സർഗം, കെ.പി. ശിവദാസ്, ജോസ് തോമസ് കളരിക്കൽ എന്നിവർ പ്രസംഗിച്ചു.

കാട്ടുപന്നിശല്യത്തിനെതിരേ തദ്ദേശസ്ഥാപനങ്ങള്‍ സര്‍ക്കാര്‍ ഉത്തരവ് നടപ്പാക്കണം: ഇന്‍ഫാം

പാറത്തോട് (കാഞ്ഞിരപ്പള്ളി): ജനവാസമേഖലകളിലിറങ്ങി മനുഷ്യജീവനും സ്വത്തിനും നാശനഷ്ടങ്ങളുണ്ടാക്കുന്ന കാട്ടുപന്നികളെ വെടിവച്ചോ അനുവദനീയമായ മറ്റു മാര്‍ഗങ്ങളിലൂടെയോ തടയുന്നതിന് തദ്ദേശ സ്ഥാപനങ്ങള്‍ക്ക് സര്‍ക്കാര്‍ നല്‍കിയ ഉത്തരവാദിത്വം ഫലപ്രദമായി നടപ്പിലാക്കുന്നതില്‍ പഞ്ചായത്തു ഭരണസമിതികള്‍ വീഴ്ച വരുത്താന്‍ പാടില്ലെന്ന് ഇന്‍ഫാം ദേശീയ ചെയര്‍മാന്‍ ഫാ. തോമസ് മറ്റമുണ്ടയില്‍. ഇന്‍ഫാം കാഞ്ഞിരപ്പള്ളി കാര്‍ഷികജില്ല എക്സിക്യൂട്ടീവ് യോഗം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. മനുഷ്യവാസ മേഖലയിലെ ആളുകളുടെ ജീവനും സ്വത്തിനും കൃഷിക്കും ഭീഷണിയായ കാട്ടുപന്നികളെ വെടിവച്ച് കൊല്ലുന്നതിനുവേണ്ടി ലൈസന്‍സുള്ള ഷൂട്ടര്‍മാരെ നിയോഗിക്കാന്‍ കേരള ഗവണ്‍മെന്‍റിന്‍റെ ഡിസാസ്റ്റര്‍ മാനേജ്‌മെന്‍റ് ഡിപ്പാര്‍ട്ട്‌മെന്‍റിന്‍റെ ജിഒ (ആർടി) നന്പർ 108/2025/ ഡിഎംഡി ഉത്തരവു പ്രകാരം തദ്ദേശ സ്വയംഭരണ സ്ഥാപനങ്ങളുടെ അധ്യക്ഷന്മാര്‍ക്ക് അധികാരം നല്‍കിയിട്ടുണ്ട്. മുഖ്യമന്ത്രിയും വനംമന്ത്രിയും ഇക്കാര്യത്തില്‍ കര്‍ഷക അനുകൂലമായ നിലപാടുകള്‍ സ്വീകരിച്ചിട്ടും നടപടികള്‍ കൈക്കൊള്ളാത്ത പഞ്ചായത്തുകള്‍ അക്ഷന്തവ്യമായ കൃത്യവിലോപമാണ് ഇക്കാര്യത്തില്‍ സ്വീകരിക്കുന്നത്. ഈ ഉത്തരവ് ഫലപ്രദമായി നടപ്പാക്കാന്‍ പല തദ്ദേശ സ്ഥാപനങ്ങളും വേണ്ടത്ര ജാഗ്രത കാണിക്കുന്നില്ലെന്ന് വനംമന്ത്രിപോലും പരിതപിക്കുന്നതായി മാധ്യമങ്ങള്‍ റിപ്പോര്‍ട്ട് ചെയ്തിട്ടുണ്ട്. കാട്ടുപന്നികള്‍ മൂലമുള്ള അപകടങ്ങളും കൃഷിനാശവും തുടര്‍ച്ചയായി സംഭവിക്കുകയാണ്. കാട്ടുപന്നി ശല്യം നിയന്ത്രിക്കുന്നതില്‍ ഉത്തരവാദിത്വം ഏറ്റെടുക്കാത്ത തദ്ദേശ സ്വയംഭരണസ്ഥാപനങ്ങളിലെ ജനപ്രതിനിധികള്‍ക്കെതിരേ കക്ഷി രാഷ്‌ട്രീയ ഭേദമെന്യേ അടുത്ത തെരഞ്ഞെടുപ്പില്‍ കര്‍ഷകര്‍ നിലപാടെടുക്കണം. തദ്ദേശ സ്വയംഭരണ സ്ഥാപനങ്ങളിലെ തെരഞ്ഞെടുപ്പിന് മുമ്പുള്ള ഈ നാളുകള്‍ പഞ്ചായത്തുകളുടെ നിലപാടുകളും നടപടികളും പഠിക്കുന്നതിനും പരസ്യമാക്കുന്നതിനും അത് പൊതുജന സമൂഹ മധ്യേ എത്തിക്കുന്നതിനും ഇന്‍ഫാം പഞ്ചായത്തുകള്‍ തോറും ജാഗ്രതാ സമിതികള്‍ രൂപീകരിച്ച് നിരീക്ഷണം നടത്തും. ഇപ്രകാരം നിരീക്ഷണം നടത്തുന്നതിനുവേണ്ടി ഇന്‍ഫാം കാര്‍ഷിക താലൂക്ക് എക്‌സിക്യൂട്ടീവ് അംഗങ്ങളെയും ഗ്രാമസമിതി എക്‌സിക്യൂട്ടീവ് അംഗങ്ങളെയും ചേര്‍ത്ത് താലൂക്ക് അടിസ്ഥാനത്തില്‍ ജാഗ്രതാസമിതികള്‍ രൂപീകരിക്കും. താലൂക്ക് ഡയറക്ടര്‍മാര്‍ പ്രസ്തുത സമിതികളുടെ രക്ഷാധികാരികളുംഓരോ താലൂക്കില്‍ നിന്നുള്ള ജില്ലാ എക്‌സിക്യൂട്ടീവ് അംഗങ്ങള്‍ അധ്യക്ഷന്മാരുമായിരിക്കുമെന്നും ഫാ. തോമസ് മറ്റമുണ്ടയില്‍ കൂട്ടിച്ചേര്‍ത്തു. യോഗത്തില്‍ ഇന്‍ഫാം കാഞ്ഞിരപ്പള്ളി കാര്‍ഷികജില്ല പ്രസിഡന്‍റ് അഡ്വ. ഏബ്രഹാം മാത്യു പന്തിരുവേലില്‍, കേരള സംസ്ഥാന സെക്രട്ടറി ഡോ.പി.വി. മാത്യു, നാഷണല്‍ എക്‌സിക്യൂട്ടീവ് അംഗങ്ങളായ ജെയ്‌സണ്‍ ചെംബ്ലായില്‍, നെല്‍വിന്‍ സി. ജോയ്, സംസ്ഥാന ട്രഷറര്‍ തോമസ് തുപ്പലഞ്ഞിയില്‍, ജില്ലാ ജോയിന്‍റ് ഡയറക്ടര്‍മാരായ ഫാ. റോബിന്‍ പട്രകാലായില്‍, ഫാ. ആല്‍ബിന്‍ പുല്‍ത്തകിടിയേല്‍, ഫാ. ജിന്‍സ് കിഴക്കേല്‍, സെക്രട്ടറി തോമസുകുട്ടി വാരണത്ത്, ജോയിന്‍റ് സെക്രട്ടറി ബോബന്‍ ഈഴക്കുന്നേല്‍ തുടങ്ങിയവര്‍ പ്രസംഗിച്ചു.

ജീപ്പ് സഫാരി നിരോധനം പൂർണമായും പിൻവലിക്കണം: കത്തോലിക്ക കോൺഗ്രസ്

കുഴിത്തൊളു: ഹൈറേഞ്ചിന്‍റെ ജീവനാഡിയായ ജീപ്പ് സഫാരി നിരോധിച്ച ഇടുക്കി ജില്ലാ ഭരണകൂടത്തിന്‍റെ തീരുമാനം പൂർണമായും പിൻവലിക്കണമെന്ന് കത്തോലിക്ക കോൺഗ്രസ് കുഴിത്തൊളു യൂണിറ്റ് വാർഷിക പൊതുയോഗം ആവശ്യപ്പെട്ടു. പുതിയ ഉത്തരവു മൂലം ആയിരക്കണക്കിന് സാധാരണക്കാരുടെ ഉപജീവനം മാർഗമാണ് ഇല്ലാതായിരിക്കുന്നത്. ഇടുക്കി ജില്ലയിലെ പ്രധാന വിനോദസഞ്ചാര കേന്ദ്രങ്ങളുടെ ഉൾപ്രദേശങ്ങൾ കണ്ട് ആസ്വദിക്കുന്നതിന് ഓഫ് റോഡുകളിലൂടെയുള്ള ജീപ്പുയാത്രയും ട്രക്കിംഗും പ്രധാന ആകർഷക ഘടകമാണ്. പുതിയ ഉത്തരവോടെ ഈ അവസരമാണ് വിനോദസഞ്ചാരികൾക്ക് നഷ്ടമായിരിക്കുന്നത്. സഫാരി നിരോധനം ഏർപ്പെടുത്തിയതോടെ മേഖലയിലെ തൊഴിലാളികളും വ്യാപാരികളും പ്രതിസന്ധിയിലായിരിക്കുകയാണ്. തീരുമാനം പുനഃപരിശോധിക്കണമെന്നും യോഗത്തിൽ ആവശ്യമുയർന്നു. കുഴിത്തൊളു ദീപ ഹൈസ്കൂൾ ഓഡിറ്റോറിയത്തിൽ ചേർന്ന കത്തോലിക്ക കോൺഗ്രസ് യൂണിറ്റിന്‍റെ വാർഷിക പൊതുയോഗം വികാരി ഫാ. തോമസ് കപ്പിയാങ്കൽ ഉദ്ഘാടനം ചെയ്തു. യൂണിറ്റ് പ്രസിഡന്‍റ് സണ്ണി പൊട്ടനാനി അധ്യക്ഷത വഹിച്ചു. കാഞ്ഞിരപ്പള്ളി രൂപത ഡയറക്ടർ ഫാ. ജസ്റ്റിൻ മതിയത്ത് മുഖ്യപ്രഭാഷണം നടത്തി. സിഎ, പ്ലസ് ടു പരീക്ഷകളിൽ ഉന്നതവിജയം നേടിയ അമൽ ജോളി വെട്ടുപറമ്പിൽ, ഇസബെൽ കളപ്പുരയ്ക്കൽ എന്നിവരെ യോഗത്തിൽ ആദരിച്ചു. കത്തോലിക്ക കോൺഗ്രസ് ഗ്ലോബൽ വൈസ് പ്രസിഡന്‍റ് ജോമി കൊച്ചുപറമ്പിൽ, കാഞ്ഞിരപ്പള്ളി രൂപത ജനറൽ സെക്രട്ടറി ജോസഫ് പണ്ടാരക്കളം, രൂപത സമിതി അംഗം ജോസ് മടുക്കക്കുഴി, അഗസ്റ്റിൻ കുറുമണ്ണ്, മാത്യു തോട്ടുപുറത്ത്, ജോൺ കാരക്കുന്നേൽ, മിനി കൂടല്ലിൽ, ജിൻസമ്മ കണ്ണംകുളത്ത് എന്നിവർ പ്രസംഗിച്ചു.

സ്വര്‍ഗംമേട് മലനിരകളിൽ കൈയേറ്റമെന്ന് പരാതി

രാജാക്കാട്: സേനാപതി പഞ്ചായത്തിലെ സ്വർഗംമേട്ടില്‍ കൈയേറ്റമെന്ന് പരാതി. കാന്തിപ്പാറ വില്ലേജിന്‍റെ ഭാഗമായുള്ള മലമുകളില്‍ വലിയ രീതിയില്‍ കൈയേറ്റം നടക്കുന്നതായാണ് ആരോപണം. മുമ്പ് ചൊക്രമുടി മലനിരകളില്‍ വ്യാപകമായി ഉണ്ടായ കൈയേറ്റത്തിനെതിരേ റവന്യു വകുപ്പ് കര്‍ശന നടപടി സ്വീകരിച്ചിരുന്നു. ഇതിനു പിന്നാലെയാണ് സമാനമായ ഭൂപ്രകൃതി നിലനില്‍ക്കുന്ന സ്വര്‍ഗംമേട് മലനിരയില്‍ കൈയേറ്റം നടക്കുന്നത്. മലമുകളില്‍ ഭൂമി പ്ലോട്ട് തിരിച്ചാണ് കൈയേറ്റം നടക്കുന്നത്. പുല്‍മേടുകള്‍ വ്യാപകമായി നശിപ്പിച്ചിട്ടുണ്ട്. മുമ്പും ഇതേ മലമുകളില്‍ അനധികൃതമായി റോഡ് നിര്‍മാണം നടത്തിയത് റവന്യൂ വകുപ്പ് കണ്ടെത്തുകയും നടപടികള്‍ സ്വീകരിക്കുകയും ചെയ്തിരുന്നു. പ്രകൃതി മനോഹാരിത നിറഞ്ഞു നില്‍ക്കുന്ന മലമുകളിലെ ടൂറിസം സാധ്യത മുന്നില്‍ കണ്ടാണ് റിസോര്‍ട്ട് - ഭൂ മാഫിയാ ഇവിടെ കടന്നുകയറ്റം നടത്തുന്നതെന്നും ഇതു തടയണമെന്നും ആവശ്യപ്പെട്ട് പരിസ്ഥിതി സംഘടനയായ ഗ്രീന്‍കെയര്‍ കേരള ജില്ലാകളക്ടര്‍, റവന്യു മന്ത്രി, വിജിലന്‍സ് ഡയറക്ടര്‍, കേന്ദ്ര വനം പരിസ്ഥിതി മന്ത്രാലയം എന്നിവര്‍ക്ക് പരാതിയും നല്‍കി.

വിശ്വാസജീവിത അധ്യാപക പരിശീലനം

കാഞ്ഞിരപ്പള്ളി: വിശ്വാസജീവിത പരിശീലകര്‍ക്കായി കാഞ്ഞിരപ്പള്ളി രൂപത വിശ്വാസ ജീവിത പരിശീലന കേന്ദ്രം ഒരുക്കിയ അധ്യാപക പരിശീലനം രൂപതാധ്യക്ഷന്‍ മാര്‍ ജോസ് പുളിക്കല്‍ ഉദ്ഘാടനം ചെയ്തു. സെന്‍റ് ഡൊമിനിക്‌സ് കത്തീഡ്രല്‍ വികാരി റവ.ഡോ. കുര്യന്‍ താമരശേരി, രൂപത വിശ്വാസ ജീവിത പരിശീലന ഡയറക്ടര്‍ ഫാ. തോമസ് വാളന്മനാല്‍ എന്നിവര്‍ പ്രസംഗിച്ചു. സഭാത്മക ജീവിതത്തില്‍ അടിത്തറപാകി, അറിവിലൂടെ അനുഭവത്തിലേക്കു കുട്ടികളെ നയിക്കാന്‍ നൂതനശൈലിയിലുള്ള ബോധനരീതി പരിചയപ്പെടുത്തുകയാണ് പരിശീലന പരിപാടിയിലൂടെ ലക്ഷ്യമിടുന്നത്.

വനംവകുപ്പിന്‍റെ വാഹനങ്ങൾ റോഡിൽ തടയും: കത്തോലിക്ക കോണ്‍ഗ്രസ്

കോതമംഗലം: നാടിന്‍റെ സമഗ്ര വളർച്ചയ്ക്കും പൊതുഗതാഗത വികസനത്തിനും തുരങ്കം വയ്ക്കുന്ന വനംവകുപ്പിന്‍റെയും കപട പരിസ്ഥിതി വാദികളുടെയും ജനദ്രോഹനിലപാട് തുടർന്നാൽ വനം വകുപ്പിന്‍റെ വാഹനങ്ങൾ റോഡിൽ തടയേണ്ടി വരുമെന്ന് കത്തോലിക്ക കോണ്‍ഗ്രസ് കോതമംഗലം രൂപത കമ്മിറ്റി മുന്നറിയിപ്പു നൽകി. ദേശീയപാതയുടെ ഭാഗമായ നേര്യമംഗലം മുതൽ വാളറ വരെയുള്ള ഭാഗത്തെ റോഡു വികസനം തടസപ്പെടാൻ ഇടയാക്കിയ ആസൂത്രിത ഗൂഢാലോചന ഇനിയും അനുവദിക്കാനാവില്ല. നിരന്തരമായി ഗതാഗതക്കുരുക്കും അപകടങ്ങളും ഉണ്ടാകുന്ന നേര്യമംഗലം-വാളറ മേഖലയിൽ റോഡ് വികസിപ്പിക്കേണ്ടതില്ലെന്നാണ് വനംവകുപ്പിന്‍റെ നിലപാടെങ്കിൽ ആ റോഡിലൂടെ വനം വകുപ്പിന്‍റെ വാഹനങ്ങൾ ഓടിക്കേണ്ടതുണ്ടോയെന്ന് പൊതുജനം തീരുമാനിക്കും. ആഡംബര വാഹനങ്ങൾ ഉൾപ്പെടെയുള്ള വനം വകുപ്പിന്‍റെ നിരവധി വാഹനങ്ങൾ ദിനംപ്രതി ഈ റോഡിലൂടെ സഞ്ചരിക്കുന്നുണ്ട്. റോഡ് ആവശ്യമില്ലാത്തവർ കാട്ടിലൂടെ നടന്നു പോയാൽ മതിയെന്ന് നിലപാടെടുക്കേണ്ടി വരും. സമാന ചിന്താഗതിയുള്ള സംഘടനകളുടെയും വ്യക്തികളുടെയും സഹകരണത്തോടെ കർമപദ്ധതികൾ ആസൂത്രണം ചെയ്ത് വനംവകുപ്പിന്‍റെ ജനദ്രോഹ നടപടികളെ ചെറുക്കുമെന്ന് കത്തോലിക്ക കോണ്‍ഗ്രസ് അറിയിച്ചു. വനത്തിന് സമീപത്തെ റോഡുകളുടെ വികസനം, വന്യമൃഗ ശല്യം, പട്ടയ പ്രശ്നങ്ങൾ എന്നിവയിലെല്ലാം ജനവിരുദ്ധവും മനുഷ്യത്വ രഹിതവുമായ നിലപാടാണ് വനം വകുപ്പ് സ്വീകരിക്കുന്നത്. വനംവകുപ്പ് ഉദ്യോഗസ്ഥർ ജനദ്രോഹ നിലപാട് സ്വീകരിക്കുന്പോൾ ഭരണ നേതൃത്വവും ജനപ്രതിനിധികളും എന്തെടുക്കുകയാണെന്ന് അറിയാൻ ജനത്തിന് താത്പര്യമുണ്ട്. ഉത്തരവാദിത്വപ്പെട്ട ഭരണ, രാഷ്ട്രീയ നേതൃത്വങ്ങൾ അറിഞ്ഞു കൊണ്ടാണ് വനംവകുപ്പുകാർ ഇത്തരം നിലപാട് സ്വീകരിക്കുന്നതെന്നു വേണം കരുതാൻ. അങ്ങനെയല്ലെങ്കിൽ വനം വകുപ്പധികൃതരുടെ തെറ്റായ നിലപാടുകൾ തിരുത്തിക്കാനുള്ള ഇച്ഛാശക്തി ഭരണത്തിന് നേതൃത്വം നൽകുന്നവർ കാണിക്കണം. രാഷ്ട്രീയ രംഗത്തും പരിസ്ഥിതി പ്രവർത്തനരംഗത്തും പൊതുപ്രവർത്തന മേഖലയിലുമുള്ള ചിലർ ചേർന്നുള്ള ഉപജാപക സംഘത്തിന്‍റെ പ്രവർത്തനങ്ങൾ പൊതുജനം തിരിച്ചറിയണമെന്നും കത്തോലിക്ക കോണ്‍ഗ്രസ് ആവശ്യപ്പെട്ടു. രൂപത പ്രസിഡന്‍റ് സണ്ണി കടൂത്താഴെ യോഗത്തിൽ അധ്യക്ഷത വഹിച്ചു. രൂപത ഡയറക്ടർ റവ.ഡോ. മാനുവൽ പിച്ചളക്കാട്ട്, രൂപത ജനറൽ സെക്രട്ടറി മത്തച്ചൻ കളപ്പുരയ്ക്കൽ, രൂപത ട്രഷറർ തന്പി പിട്ടാപ്പിള്ളിൽ, സി.എ. തോമസ്, അഡ്വ. യു.വി. ചാക്കോ, ബിന്ദു ജോസ്, മേരി ആന്‍റണി, ഷൈജു ഇഞ്ചയ്ക്കൽ, ജിജി പുളിക്കൽ, ആന്‍റണി പുല്ലൻ, ജോർജ് മങ്ങാട്ട്, അബി കാഞ്ഞിരപ്പാറ, ജോണ്‍ മുണ്ടൻകാവിൽ, ജോയ്സ് മേരി ആന്‍റണി, ബേബിച്ചൻ നിധീരിക്കൽ, ബെന്നി തോമസ്, ജോർജ് കുര്യാക്കോസ്, ജിനു ആന്‍റണി, ജോണി ജേക്കബ്, കെ.എം. ജോസഫ്, ഇ.ആർ. പൈലി, വി.ജെ. റോജോ, സനിൽ പി. ജോസ്, അമിത ജോണി, ജോസ് കുര്യൻ, റോയി മാത്യു, അഞ്ജു ജോസ് എന്നിവർ പ്രസംഗിച്ചു.

സേവനപ്രവർത്തനങ്ങളുടെ ഉദ്ഘാടനം നടത്തി

തൊടുപുഴ: ലയണ്‍സ് ക്ലബ് ഓഫ് തൊടുപുഴ ഗോൾഡന്‍റെ സേവന പ്രവർത്തനങ്ങളുടെ ഉദ്ഘാടനവും പുതിയ ഭാരവാഹികളുടെ സ്ഥാനാരോഹണവും നടന്നു. നഗരസഭ ചെയർമാൻ കെ. ദീപക് ഉദ്ഘാടനം ചെയ്തു. പ്രസിഡന്‍റ് ഷിബു സി. നായർ അധ്യക്ഷത വഹിച്ചു. ലയണ്‍സ് ഡിസ്ട്രിക്ട് ജിഎൽടി കോ-ഓർഡിനേറ്റർ പ്രഫ. സാംസണ്‍ തോമസ് ഭാരവാഹികളുടെ സ്ഥാനരോഹണം നിർവഹിച്ചു. പ്രസിഡന്‍റായി ഷിബു സി. നായർ, സെക്രട്ടറിയായി എൻ. ആനന്ദ്, ട്രഷററായി അനിൽ എസ്. കോയിക്കൽ, വൈസ് പ്രസിഡന്‍റുമാരായി നിവേദ് കെ. ശ്യാം, കിരണ്‍ ജോസ് എന്നിവർ സ്ഥാനമേറ്റു. സൈജൻ സ്റ്റീഫൻ, സി.സി. അനിൽകുമാർ, വിനോദ് കണ്ണോളിൽ, പി.വി. ഷാജു, എം.എൻ. സുരേഷ്, പി.എസ്. രാജേഷ്, ബാബു പള്ളിപ്പാട്ട് എന്നിവർ പ്രസംഗിച്ചു.

‘ഞങ്ങളും പച്ചക്കറി കൃഷിയിലേക്ക്’

കുമാരമംഗലം: കൃഷി വകുപ്പിന്‍റെ നേതൃത്വത്തിൽ ഞങ്ങളും കൃഷിയിലേക്ക് പദ്ധതിയുടെ ഭാഗമായി ജോയിന്‍റ് കൗണ്‍സിൽ തൊടുപുഴ മേഖല കമ്മിറ്റിയുടെ നേതൃത്വത്തിൽ കുമാരമംഗലം പഞ്ചായത്തിൽ പച്ചക്കറി കൃഷി ആരംഭിച്ചു. മുപ്പത് സെന്‍റ് സ്ഥലം പാട്ടത്തിനെടുത്താണ് ഹൈബ്രിഡ് പച്ചക്കറി തൈകളായ മുളക്, വെണ്ട, പീച്ചിങ്ങ, വഴുതന, തക്കാളി തുടങ്ങിയവ കൃഷി ചെയ്തിരിക്കുന്നത്. രാവിലെയും വൈകുന്നേരവും ഒഴിവുദിവസങ്ങളിലുമാണ് പ്രവർത്തകർ തൈകളെ പരിപാലിക്കാൻ സമയം കണ്ടെത്തുന്നത്. വിളവെടുക്കുന്ന പച്ചക്കറികൾ ഓണത്തോടനുബന്ധിച്ച് അനാഥാലയങ്ങൾക്ക് നൽകും. സംസ്ഥാന കമ്മിറ്റി അംഗം എസ്.കെ.എം. ബഷീർ ഉദ്ഘാടനം ചെയ്തു. മേഖല സെക്രട്ടറി മുഹമ്മദ് നിസാർ അധ്യക്ഷത വഹിച്ചു. ജില്ലാ സെക്രട്ടറി ആർ. ബിജുമോൻ, വി.കെ. ജിൻസ്, വി.എം. ഷൗക്കത്തലി, എ.കെ. സുഭാഷ്, എൻ.എസ്. ഇബ്രാഹിം, കെ.ആർ. ലോമിമോൾ, ബിജു ചന്ദ്രൻ, ബിനു വി. ജോസ്, സുരേഷ് കുമാർ, സി.ജി. അജീഷ, എം.എസ്. ശ്രീകുമാർ എന്നിവർ പ്രസംഗിച്ചു.

വിദ്യാമൃതം പദ്ധതിയുമായി ഉടുന്പന്നൂർ പഞ്ചായത്ത്

ഉടുന്പന്നൂർ: പഞ്ചായത്തിന്‍റെ നേതൃത്വത്തിൽ വിദ്യാഭ്യാസമേഖലയിൽ നടപ്പാക്കുന്ന "വിദ്യാമൃതം' പദ്ധതിക്കു തുടക്കമായി. ജില്ലാ വിദ്യാഭ്യാസ ഓഫീസർ ഷീബ മുഹമ്മദ് ഉദ്ഘാടനം ചെയ്തു. മനഃശാസ്ത്ര വിദ്യാഭ്യാസ പഠനസഹായ പദ്ധതി, കായികക്ഷമതാ പരിശീലനം, എൽഎസ്എസ് സ്കോളർഷിപ് പരിശീലനം, പ്രവൃത്തിപരിചയ, കരകൗശല പരിശീലനം, മാലിന്യനിർമാർജന പദ്ധതികൾ, മികവ് തെളിയിക്കുന്ന കുട്ടികളെ ആദരിക്കൽ, പഠനോപകരണ, സ്കോളർഷിപ് വിതരണം, കുടിവെള്ളവിതരണം തുടങ്ങി 49 ലക്ഷം രൂപയുടെ പദ്ധതികളാണ് ഉൾപ്പെടുന്നത്. പഞ്ചായത്ത് പ്രസിഡന്‍റ് എം. ലതീഷ് അധ്യക്ഷത വഹിച്ചു. വൈസ് പ്രസിഡന്‍റ് ആതിര രാമചന്ദ്രൻ, സ്റ്റാൻഡിംഗ് കമ്മിറ്റി ചെയർപേഴ്സണ്‍മാരായ സുലൈഷ സലിം, ബീന രവീന്ദ്രൻ, ശാന്തമ്മ ജോയി, അംഗങ്ങളായ രമ്യ അജീഷ്, കെ.ആർ. ഗോപി, ബിന്ദു രവീന്ദ്രൻ, ശ്രീമോൾ ഷിജു, ഉല്ലാസക്കൂട് കമ്മിറ്റി പ്രസിഡന്‍റ് വി.വി. ഫിലിപ്പ്, ഹെഡ്മാസ്റ്റർ ബിജു ഐസക്ക് എന്നിവർ പ്രസംഗിച്ചു.

വളം വിലവർധന പിൻവലിക്കണം: കേരള കോൺഗ്രസ്

ചെറുതോണി: കാർഷിക മേഖലക്ക് പ്രതിസന്ധിയായി മാറിയ രാസവളം വില വർധന പിൻവലിക്കാൻ കേന്ദ്രസർക്കാർ തയാറാകണമെന്ന് കേരള കോൺഗ്രസ് മരിയാപുരം മണ്ഡലം നേതൃയോഗം ആവശ്യപ്പെട്ടു. 50 കിലോ പൊട്ടാഷിന് ജൂലൈ ഒന്നു മുതൽ 250 രൂപയാണ് വർധിപ്പിച്ചത്. ഫാക്ടം ഫോസിന് രണ്ടു മാസം മുമ്പ് 100 രൂപയും ഈ മാസം 25 രൂപയും ഉൾപ്പെടെ 125 രൂപയുടെ വർധനവാണുണ്ടായിട്ടുള്ളത്. പൊട്ടാഷിനുണ്ടായ വില വർധന പൊട്ടാഷ് ചേരുന്ന കൂട്ട് വളങ്ങൾക്കും വില വർധനക്ക് കാരണമായിരിക്കുന്നു. വിലവർധനവിനു പിന്നാലെ വളത്തിന്‍റെ ലഭ്യതയും കുറഞ്ഞിരിക്കുകയാണ്. ഇതോടെ കർഷകർ ഏറെ ബുദ്ധിമുട്ടുകയാണെന്ന് യോഗം ചൂണ്ടിക്കാട്ടി. ചെറുതോണി ഓഫീസിൽ കൂടിയ യോഗത്തിൽ മണ്ഡലം പ്രസിഡന്‍റ് സണ്ണി പുൽക്കുന്നേൽ അധ്യക്ഷത വഹിച്ചു. കേരള കർഷക യൂണിയൻ സംസ്ഥാന പ്രസിഡന്‍റ് വർഗീസ് വെട്ടിയാങ്കൽ, കേരള കോൺഗ്രസ് നിയോജകമണ്ഡലം വൈസ് പ്രസിഡന്‍റ് ലാലു ജോൺ കുമ്മിണിയിൽ, നിയോജകമണ്ഡലം ജനറൽ സെക്രട്ടറി ടോമി ജോസഫ് തൈലംമനാൽ, പഞ്ചായത്ത് വൈസ് പ്രസിഡന്‍റ് ബിൻസി റോബി, പഞ്ചായത്തംഗം പ്രിജിനി ടോമി, വനിതാ കോൺഗ്രസ് ജില്ലാ സെക്രട്ടറി ജോളി ജോയി തുടങ്ങിയവർ പ്രസംഗിച്ചു.

റബർമരം ഒടിഞ്ഞുവീണ് ‌സ്കൂട്ടർയാത്രികന് ദാരുണാന്ത്യം

കരിമണ്ണൂർ: മരം ഒടിഞ്ഞുവീണ് സ്കൂട്ടർ യാത്രികൻ മരിച്ചു. കരിമണ്ണൂർ വാരാംപാറ ഇടവക്കണ്ടത്തിൽ ദേവസ്യ വർക്കി (ബേബി -63) യാണ് മരിച്ചത്. ഇന്നലെ രാത്രി രാത്രി ഏഴോടെ മാരാംപാറ കമ്പിപ്പാലത്തിനു സമീപമാണ് സംഭവം. പെയിന്‍റിംഗ് തൊഴിലാളിയായ ദേവസ്യ വൈകുന്നേരം കമ്പിപ്പാലത്തെ കടയിൽനിന്ന് സാധനങ്ങൾ വാങ്ങി സ്കൂട്ടറിൽ വീട്ടിലേക്കു പോകുമ്പോൾ വഴിയരുകിൽ നിന്ന റബർമരം ഒടിഞ്ഞ് സ്കൂട്ടറിൽ പതിക്കുകയായിരുന്നു. സ്കൂട്ടർ നിയന്ത്രണംവിട്ട് ദേവസ്യ റോഡിൽ തലയടിച്ചു വീണു. മൃതദേഹം റോഡിൽ കമിഴ്ന്നു കിടന്ന നിലയിലാണ് ആളുകൾ കണ്ടത്. സ്കൂട്ടർ അടുത്ത പാടത്ത് മറിഞ്ഞുകിടക്കുന്ന നിലയിലും റോഡിൽ രക്തം തളംകെട്ടിയ നിലയിലുമായിരുന്നു. കരിമണ്ണൂർ പോലീസ് തൊടുപുഴയിലെ ജില്ലാ ആശുപത്രിയിൽ മൃതദേഹം എത്തിച്ചു. ഭാര്യ: ലിസി (മേരി). മക്കൾ: ലിബി, ലിജി.

സിപിഐ ജില്ലാ സമ്മേളനം 17 മുതൽ കട്ടപ്പനയിൽ

തൊടുപുഴ: സിപിഐ ജില്ലാ സമ്മേളനം 17 മുതൽ 20 വരെ കട്ടപ്പന മുനിസിപ്പൽ ടൗണ്‍ഹാളിൽ നടക്കുമെന്ന് സിപിഐ ജില്ലാ സെക്രട്ടറി കെ. സലിംകുമാർ പത്രസമ്മേളനത്തിൽ അറിയിച്ചു. ചണ്ഡീഗഡിൽ നടക്കുന്ന 25-ാം പാർട്ടി കോണ്‍ഗ്രസിന്‍റെ മുന്നോടിയായി നടക്കുന്ന സമ്മേളനം രാജ്യത്തെ രാഷ്ട്രീയ സാഹചര്യങ്ങളും ജില്ലയിലെ ജനങ്ങൾ നേരിടുന്ന ജീവിതപ്രശ്നങ്ങളും ചർച്ച ചെയ്യും. 17നു വാഴൂർ സോമൻ എംഎൽഎ പതാകജാഥയും വി.ആർ. പ്രമോദ് ബാനർ ജാഥയും ജോസ് ഫിലിപ്പ് കൊടിമര ജാഥയും എം.വൈ.ഒൗസേപ്പ് ഛായാചിത്രജാഥയും പ്രിൻസ് മാത്യു ദീപശിഖ ജാഥയും ഉദ്ഘാടനം ചെയ്യും. വൈകുന്നേരം നാലിന് ജാഥകൾ സമ്മേളന നഗറിൽ സംഗമിക്കും. സി.കെ. കൃഷ്ണൻകുട്ടി വൈകുന്നേരം 4.30നു പതാക ഉയർത്തും. അഞ്ചിനു നടക്കുന്ന സമ്മേളനത്തിൽ ജില്ലാ സെക്രട്ടറി കെ. സലിംകുമാർ അധ്യക്ഷത വഹിക്കും. മന്ത്രി കെ. രാജൻ ഉദ്ഘാടനം ചെയ്യും. 18നു കെ.കെ. ശിവരാമൻ പതാക ഉയർത്തും. പത്തിനു പ്രതിനിധി സമ്മേളനം നടക്കും. കെ.പി. രാജേന്ദ്രൻ ഉദ്ഘാടനം ചെയ്യും. വൈകുന്നേരം മൂന്നിന് ഇന്ത്യൻ സ്വാതന്ത്ര്യസമരവും രാഷ്ട്രീയ പാർട്ടികളും എന്ന വിഷയത്തിൽ സെമിനാർ നടക്കും. പി.പി. സുനീർ എംപി ഉദ്ഘാടനം ചെയ്യും. മന്ത്രി പി. പ്രസാദ് വിഷയാവതരണം നടത്തും. കെപിസിസി വക്താവ് സേനാപതി വേണു, കെ.എസ്. അരുണ്‍കുമാർ എന്നിവർ പ്രസംഗിക്കും. 1 9നു ഉച്ചയ്ക്ക് 12ന് ആദ്യകാല പാർട്ടിപ്രവർത്തകരെ സത്യൻ മൊകേരി ആദരിക്കും. 20ന് രാവിലെ 9.30നു പ്രമേയ അവതരണം നടക്കും. 10.30നു മന്ത്രി പി. പ്രസാദ് പ്രസംഗിക്കും. 12നു സംസ്ഥാന സമ്മേളന പ്രതിനിധികളെയും ജില്ലാ കൗണ്‍സിൽ അംഗങ്ങളെയും തെരഞ്ഞെടുക്കും. പത്രസമ്മേളനത്തിൽ മുൻ ജില്ലാ സെക്രട്ടറി കെ.കെ. ശിവരാമൻ, തൊടുപുഴ മണ്ഡലം സെക്രട്ടറി വി.ആർ. പ്രമോദ്, മൂലമറ്റം മണ്ഡലം സെക്രട്ടറി സുനിൽ സെബാസ്റ്റ്യൻ തുടങ്ങിയവർ പങ്കെടുത്തു.

വാത്തിക്കുടി പഞ്ചായത്ത് ഓഫീസിലേക്ക് എൽഡിഎഫ് മാർച്ചും ധർണയും

ചെറുതോണി: വാത്തിക്കുടി പഞ്ചായത്തിൽ ഭരണസമിതിയുടെ നേതൃത്യത്തിൽ മാല്യന്യപ്പെട്ടി സ്ഥാപിച്ചതിൽ അഴിമതി നടത്തിയ പഞ്ചായത്ത് പ്രസിഡന്‍റ് ജോസ്മി ജോർജ് രാജിവച്ച് നിയമപരമായ അന്വേഷണം നേരിടണമെന്നാവശ്യപ്പെട്ട് എൽഡിഎഫ് വാത്തിക്കുടി പഞ്ചായത്ത് കമ്മിറ്റിയുടെ നേതൃത്വത്തിൽ പഞ്ചായത്താഫീസിലേക്ക് മാർച്ചും ധർണയും നടത്തി. മുരിക്കാശേരി സ്കൂൾ ജംഗ്ഷനിൽനിന്ന് ആരംഭിച്ച മാർച്ചിൽ നിരവധി പേർ പങ്കെടുത്തു. തുടർന്ന് മുരിക്കാശേരി പഞ്ചായത്ത് ഓഫീസ് പടിക്കൽ നടത്തിയ ധർണ സിപിഎം ജില്ലാ സെക്രട്ടറി സി.വി. വർഗീസ് ഉദ്ഘാടനം ചെയ്തു. കേരള കോൺഗ്രസ് (എം) മണ്ഡലം പ്രസഡിന്‍റ് ബേബി കാഞ്ഞിരത്താംകുന്നേൽ അധ്യക്ഷത വഹിച്ചു. ജില്ലാ സെക്രട്ടറി ഷിജോ തടത്തിൻ, സിപിഎം ജില്ലാ സെക്രട്ടേറിയറ്റംഗം റോമിയോ സെബാസ്റ്റ്യൻ, സിപിഐ ജില്ലാ എക്സിക്യൂട്ടീവ് അംഗം അപ്പച്ചൻ കടവിൽ, ഇ.എൻ. ചന്ദ്രൻ, കെ.യു. ബിനു, ജോമോൻ ജേക്കബ്, ജോർജ് അമ്പഴം, ഷൈൻ കല്ലേക്കുളം, റോണിയോ ഏബ്രാഹം, ബിജു മറ്റത്തിൽ തുടങ്ങിയവർ പ്രസംഗിച്ചു. മാലിന്യനിർമാർജനത്തിനായി സംസ്ഥാന സർക്കാർ അനുവദിച്ച 40 ലക്ഷം രൂപ നിയമാനുസൃതമായ മാനദണ്ഡങ്ങൾ പാലിക്കാതെ പഞ്ചായത്ത് ജനറൽ കമ്മിറ്റി, ധനകാര്യ സ്റ്റാന്റിംഗ് കമ്മിറ്റി, പർച്ചെയ്സ് കമ്മിറ്റി എന്നിവയുടെ തീരുമാനം ഇല്ലാതെയും ഗുണ- വിലനിലവാരം പരിശോധിക്കാതെയും വാങ്ങിയാണ് അഴിമതി നടത്തിയിരിക്കുന്നതെന്ന് നേതാക്കൾ ആരോപിച്ചു. പൊതുവിപണിയിൽ 1550 രൂപ മുതൽ 2850 രൂപ വരെ വിലവരുന്ന 4.100 കിലോഗ്രാം തൂക്കം വരുന്ന സ്റ്റീൽ വേസ്റ്റ് ബിന്നുകൾ 11694 രൂപ വീതം നൽകി 340 എണ്ണം വാങ്ങി. 3976086 രൂപയാണ് ഇതിനായ് പഞ്ചായത്ത് ഭരണസമിതി ചെലവഴിച്ചിരിക്കുന്നത്. നൂറിൽ താഴെ മാത്രം മാലിന്യപ്പെട്ടികൾ ആവിശ്യമുള്ളുവെന്നിരിക്കെ 340 എണ്ണം വാങ്ങിയതിലൂടെ 30 ലക്ഷം രൂപയുടെ വ്യക്തമായ അഴിമതിയാണ് നടന്നിട്ടുള്ളതെന്ന് നേതാക്കൾ ആരോപിച്ചു.

ചിന്നാർ വന്യജീവി സങ്കേതത്തിൽ പുനർജീവനം കൃഷിക്ക് തുടക്കം

മറയൂർ: മൂന്നാർ വൈൽഡ് ലൈഫ് ഡിവിഷനിലെ ചിന്നാർ വന്യജീവി സങ്കേതത്തിൽ ഉൾപ്പെട്ട തായണ്ണൻകുടി, ഇരുട്ടളക്കുടി, പുതുക്കുടി, വെള്ളക്കൽക്കുടി, മാങ്ങാപ്പാറക്കുടി എന്നീ അഞ്ച് ഉന്നതികളിൽ ആനമുടി വന വികസന ഏജൻസിയുടെ ധനസഹായത്തോടെ പുനർജീവനം കൃഷി പദ്ധതിക്കു തുടക്കമായി. ഓരോ ഉന്നതിയിലും ഒരേക്കർ വീതം ഭൂമിയിൽ റാഗി, തിന, ചാമ, വരക്, ബീൻസ് തുടങ്ങിയ 33 ഇനം വിളകളാണ് ജൈവരീതിയിൽ കൃഷി ചെയ്യുന്നത്. ജൂലൈയിൽ തുടങ്ങുന്ന കൃഷി ഒക്ടോബറിൽ വിളവെടുക്കും. ബീൻസ് കൃഷി ഡിസംബറിൽ ആരംഭിച്ച് ഫെബ്രുവരിയിൽ വിളവെടുക്കും. ആനമുടി വനവികസന ഏജൻസി, ഇഡിസി വഴി ഉന്നതി നിവാസികളുടെ ഭൂമി പാട്ടത്തിനെടുത്ത് അവർക്ക് തൊഴിൽ നൽകിയാണ് പദ്ധതി നടപ്പാക്കുന്നത്. ഉത്പാദിപ്പിക്കുന്ന ധാന്യങ്ങൾ നിവാസികൾക്കു ഭക്ഷണത്തിനും വിത്തുശേഖരണത്തിനും സൗജന്യമായി നൽകും. റാഗി, മറ്റു ധാന്യങ്ങൾ എന്നിവ പൊടിച്ച് വനം വകുപ്പിന്‍റെ ഇക്കോ ഷോപ്പുകൾ വഴി വിൽപ്പനയ്ക്ക് എത്തിക്കും. റാഗി ഉപയോഗിച്ചുണ്ടാക്കുന്ന ലഡു ഉൾപ്പെടെയുള്ള ഉത്പന്നങ്ങൾക്കു വിപണിയിൽ വൻ ഡിമാൻഡാണ്. കഴിഞ്ഞ വന്യജീവി വാരാഘോഷത്തിൽ തിരുവനന്തപുരത്ത് നടന്ന വനം വകുപ്പിന്‍റെ പ്രദർശന-വിപണന മേളയിൽ മൂന്നാർ വൈൽഡ് ലൈഫ് ഡിവിഷന്‍റെ സ്റ്റാളിലെ റാഗി ലഡുവും പൊടിയും വലിയ ശ്രദ്ധ നേടി. മറ്റു മേളകളിലും ഈ ഉത്പന്നങ്ങൾ ജനപ്രീതി ആകർഷിച്ചിട്ടുണ്ട്. ഈ പദ്ധതി ഉന്നതി നിവാസികൾക്ക് സാന്പത്തിക പുരോഗതിയും ഭക്ഷ്യലഭ്യതയും ഉറപ്പാക്കുന്നുവെന്ന് ഉൗരു മൂപ്പന്മാരായ കാന്തിരാജും സൂര്യനും പറഞ്ഞു. റാഗിത്തൈ നടീൽ ഉദ്ഘാടനം ചിന്നാർ അസി. വൈൽഡ് ലൈഫ് വാർഡൻ ജി. അജികുമാർ നിർവഹിച്ചു. കരിമുട്ടി ഡെപ്യൂട്ടി റേഞ്ച് ഫോറസ്റ്റ് ഓഫീസർ കെ.ബി. അശോകൻ, ഇഡിസി സെക്രട്ടറിമാരായ നിത്യ ധർമൻ, ഡിനോ ജോസഫ്, സോഷ്യൽ വർക്കർ മിനി കാശി, വനം വകുപ്പ് ഉദ്യോഗസ്ഥർ, ഉന്നതി നിവാസികൾ എന്നിവർ പങ്കെടുത്തു.

എസ്ടി ഫണ്ട് ദുർവിനിയോഗം അന്വേഷിക്കണമെന്ന് ഫ്രാൻസിസ് അറയ്ക്കപ്പറമ്പിൽ

കട്ടപ്പന: എസ്ടി ഫണ്ട് ദുര്‍വിനിയോഗം ചെയ്ത് ഉപ്പുതറ പഞ്ചായത്ത് പ്രസിഡന്‍റ് സ്വന്തം വീട്ടിലേക്ക് റോഡ് നിര്‍മിച്ചതായും ഇതുസംബന്ധിച്ച് അന്വേഷണം നടത്തണമെന്നും യൂത്ത് കോണ്‍ഗ്രസ് ജില്ലാ പ്രസിഡന്‍റും ഉപ്പുതറ പഞ്ചായത്തംഗവുമായ ഫ്രാന്‍സിസ് അറയ്ക്കപ്പറമ്പില്‍. ക്രമക്കേടിന് കൂട്ടുനിന്ന ഉദ്യോഗസ്ഥര്‍ക്കെതിരേ നടപടി സ്വീകരിക്കണം. കരിഞ്ഞാറ്റില്‍പ്പടി- കാരിയാടിപ്പടി റോഡിന്‍റെ പേരിലാണ് ബ്ലോക്ക് പഞ്ചായത്തില്‍നിന്ന് അനുവദിച്ച നാലു ലക്ഷം രൂപ വിനിയോഗിച്ച് റോഡ് നിര്‍മിച്ചത്. ഈ റോഡ് പഞ്ചായത്ത് കമ്മിറ്റിയുടെ തീരുമാനമില്ലാതെ ആസ്തി രജിസ്റ്ററില്‍ ഉള്‍പ്പെടുത്തി. എസ്ടി ഫണ്ട് വിനിയോഗിക്കണമെങ്കില്‍ ട്രൈബല്‍ ഡെവലപ്‌മെന്‍റ് ഓഫീസറുടെ ഫീസിബിലിറ്റി സര്‍ട്ടിഫിക്കറ്റ് അനിവാര്യമാണ്. കൂടാതെ, റോഡിന്‍റെ ഇരുവശങ്ങളിലുമായി പട്ടികവര്‍ഗ വിഭാഗത്തില്‍പ്പെട്ട അഞ്ചു കുടുംബങ്ങളെങ്കിലും താമസിക്കണം. എന്നാല്‍, പഞ്ചായത്ത് പ്രസിഡന്‍റ് മാത്രം ഗുണഭോക്താവായ റോഡിന് എങ്ങനെ ഫീസിബിലിറ്റി സര്‍ട്ടിഫിക്കറ്റ് ലഭിച്ചുവെന്ന് അന്വേഷിക്കണം. ഇക്കാര്യങ്ങള്‍ കാട്ടി വകുപ്പ് മന്ത്രിക്കു പരാതി നല്‍കും. പഞ്ചായത്തില്‍ പ്രസിഡന്‍റിന്‍റെ നേതൃത്വത്തില്‍ നിരവധി അഴിമതികളും അധികാര ദുര്‍വിനിയോഗവും നടന്നിട്ടുണ്ടെന്നും ഫ്രാന്‍സിസ് അറയ്ക്കപ്പറമ്പില്‍ ആരോപിച്ചു. ഇതു ചോദ്യം ചെയ്തതിന് തനിക്കെതിരേ അടിസ്ഥാനരഹിതമായ ആരോപണം ഉന്നയിക്കുകയാണെന്നും ഫ്രാൻസിസ് ആരോപിച്ചു.

പൊതു ഉപയോഗത്തിനുള്ള ഭൂമി ഡി-റിസർവ് ചെയ്ത് വനഭൂമിയിൽനിന്ന് ഒഴിവാക്കണം: ബിജോ മാണി

കട്ടപ്പന: പൊതു ആവശ്യങ്ങൾക്ക് ഉപയോഗിക്കുന്ന ഭൂമിയിലും വ്യക്തികൾക്ക് പതിച്ച് നൽകിയ ഭൂമിയിലും വനംവകുപ്പ് ഉന്നയിക്കുന്ന അവകാശവാദം അവസാനിപ്പിക്കാൻ ഈ ഭൂമി ഡി - റിസർവ് ചെയ്യാൻ സർക്കാർ അടിയന്തര നടപടി സ്വീകരിക്കണമെന്ന് ഡിസിസി ജനറൽ സെക്രട്ടറി ബിജോ മാണി ആവശ്യപ്പെട്ടു. വിവരാവകാശ നിയമം അനുസരിച്ച് ലഭിച്ച രേഖകൾ പ്രകാരം റവന്യു വകുപ്പ് പറയുന്നത് ഡി - റിസർവ് ചെയ്യാൻ നടപടി സ്വീകരിക്കേണ്ടത് വനം വകുപ്പാണെന്നാണ്. വനം വകുപ്പ് പറയുന്നത് ഭൂമി ഡി - റിസർവ് ചെയ്യുന്നതിന് യൂസർ ഏജൻസിയായ ജില്ലാകളക്ടർ പരിവേഷ് പോർട്ടൽ മുഖേന അപേക്ഷ സമർപ്പിക്കുന്ന മുറയ്ക്കാണ് നടപടി സ്വീകരിക്കുന്നതെന്നാണ്. എന്നാൽ,ഡി - റിസർവിന്‍റെ വിവരങ്ങൾ കളക്‌ടറേറ്റിൽ ലഭ്യമല്ലന്നും ഇത് വനം വകുപ്പുമായി ബന്ധപ്പെട്ടതാണെന്നും ജില്ലാ കളക്ടർ പറയുന്നു. നേര്യമംഗലത്ത് ദേശീയപാത വികസനത്തിനുള്ള ഭൂമി മലയാറ്റൂർ ഇടിയറ റിസർവുകളിൽ ഉൾപ്പെട്ടതാണെങ്കിൽ ഡി - നോട്ടീഫൈ ചെയ്യാൻ നടപടി സ്വീകരിക്കുമെന്ന് ചീഫ് സെക്രട്ടറി പറഞ്ഞിട്ടും ഇതിനുള്ള നടപടി സ്വീകരിച്ചിട്ടില്ല. സർക്കാർ ഈ വിഷയത്തിൽ അടിയന്തരമായി ഇടപെടണം. പഴയ സംരക്ഷിത വനങ്ങളുടെ പട്ടികയിലുള്ള ജില്ലയിലെ പട്ടയ/ കൈവശഭൂമികളും വിവിധ വികസന പദ്ധതികൾക്കായി സർക്കാർ ഏറ്റെടുത്തിട്ടുള്ള ഭൂമിയും ഡി- റിസർവ് ചെയ്ത് സംരക്ഷിത വനത്തിന്‍റെ പട്ടികയിൽനിന്ന് ഒഴിവാക്കി വനം വകുപ്പിന്‍റെ കടന്നുകയറ്റത്തിൽനിന്ന് മലയോരജനതയെ സംരക്ഷിക്കണം. ജില്ലയിലെ പട്ടയ / കൈവശ ഭൂമികളെല്ലാം സംരക്ഷിത വനത്തിന്‍റെ വിജ്ഞാപനത്തിൽ ഇപ്പോഴും ഉൾപ്പെട്ടു കിടക്കുകയാണ്. ഏതെങ്കിലും കാലത്തെ വിജ്ഞാപനങ്ങളുടെ പേരിൽ എല്ലാ ഭൂമിയിലും വനം വകുപ്പ് അവകാശം സ്ഥാപിക്കാൻ ശ്രമിക്കുന്നതാണ് ജില്ലയിലെ വികസന പദ്ധതികൾ തടസപ്പെടാനും ഭൂ പ്രശ്നങ്ങളിൽ പരിസ്ഥിതി സംഘടനകൾക്ക് അനുകൂലമായ കോടതി വിധികൾ ഉണ്ടാകാനും കാരണം. നേര്യമംഗലത്ത് ദേശീയപാത വികസനം തടസപ്പെടുത്തിയതും തൊമ്മൻകുത്തിൽ കൈവശ ഭൂമിയിലെ കുരിശ് പൊളിച്ചതും സിഎച്ച്ആറിലെ പട്ടയ വിതരണം സുപ്രീംകോടതി തടഞ്ഞതും ഏതോ കാലത്തെ സംരക്ഷിത വന വിജ്ഞാപനങ്ങളിൽ ഉൾപ്പെട്ട ഭൂമിയാണ് ഇവ എന്ന വനം വകുപ്പിന്‍റെ അവകാശവാദത്തിന്‍റെ പേരിലാണ്. കാർഡമം ഹിൽ, മലയാറ്റൂർ ഇടിയറ, തൊടുപുഴ, തെങ്കോത്തുമല, മൂളിമല, കുര്യൻകുന്ന്, അയ്യപ്പൻകോവിൽ, നഗരംപാറ എന്നീ റിസർവുകളിൽ ഉൾപ്പെട്ട ഭൂമിക്കാണ് ജില്ലയിൽ വിവിധ ഭൂപതിവ് നിയമപ്രകാരം പട്ടയം നൽകിയിട്ടുള്ളത്. ഇതിൽ സിഎച്ച്ആറിൽ ഉൾപ്പെട്ട 20363.159 ഹെക്ടർ ഭൂമിക്ക് പട്ടയം നൽകാൻ 2009ൽ സുപ്രീംകോടതി അനുമതി നൽകിയതാണ്. ഈ ഭൂമി പോലും ഇതുവരെ ഡി - റിസർവ് ചെയ്തിട്ടില്ല. സംരക്ഷിത വനത്തിന്‍റെ പട്ടികയിലുള്ളതും എന്നാൽ, റവന്യു വകുപ്പ് പട്ടയം നൽകിയിട്ടുള്ളതുമായ ഭൂമികളൊന്നും ഡി - റിസർവ് ചെയ്തിട്ടില്ല. കൂടാതെ കൊച്ചി - ധനുഷ്കോടി ദേശീയപാതയ്ക്ക് അനുവദിച്ച ഭൂമിയും റവന്യു വകുപ്പ് ജില്ലാ പഞ്ചായത്തിന് കൈമാറി ഇടുക്കി വികസന അഥോറിറ്റിക്ക് അനുവദിച്ച ഭൂമിയും ഈ സംരക്ഷിത വനങ്ങളിൽ ഉൾപ്പെട്ടതാണ്. ഈ ഭൂമിയും നാളിതുവരെ ഡി - റിസർവ് ( ഡി നോട്ടീഫൈ ) ചെയ്തിട്ടില്ല. ഡി - റിസർവ് ചെയ്യാനുള്ള നടപടി സ്വീകരിക്കാത്തത് റവന്യു- വനം വകുപ്പുകൾ പരസ്പരം പഴിചാരി ജനങ്ങളെ കുടുക്കി ഇടാനാണെന്നും ബിജോ മാണി ആരോപിച്ചു. പത്രസമ്മേളനത്തിൽ ഡിസിസി വൈസ്പ്രസിഡന്‍റ് മുകേഷ് മോഹൻ, യൂത്ത് കോണ്‍ഗ്രസ് ജില്ലാ പ്രസിഡന്‍റ് ഫ്രാൻസിസ് ദേവസ്യ, കോണ്‍ഗ്രസ് കട്ടപ്പന മണ്ഡലം പ്രസിഡന്‍റ് സിജു ചക്കുംമൂട്ടിൽ, യൂത്ത് കോണ്‍ഗ്രസ് ഉടുന്പഞ്ചോല നിയോജകമണ്ഡലം പ്രസിഡന്‍റ് ആനന്ദ് തോമസ് എന്നിവരും പങ്കെടുത്തു.

ലോറിഡ്രൈവർക്കു മർദനം: അഞ്ചുപേർ റിമാൻഡിൽ

ശാന്തൻപാറ: ലോറി ഡ്രൈവർക്കു മർദനമേറ്റ സംഭവത്തിൽ അഞ്ചു പേർ അറസ്റ്റിൽ. പെരിയകനാൽ തേയില ഫാക്ടറിയിൽ വിറകുമായി എത്തിയ ലോറി ഡ്രൈവർ അടിമാലി പ്രിയദർശനി കോളനി ചേന്നാട്ട് വീട്ടിൽ സുമേഷിനെ(25) മർദിച്ച കേസിലാണ് പെരിയകനാൽ എസ്റ്റേറ്റ് സെൻട്രൽ ഡിവിഷൻ മുരുകപാണ്ടി (40), മുകേഷ് കുമാർ (25), മണികണ്ഠൻ (കരിമണി -33), പാണ്ടീശ്വരൻ (31), ലോവർ ഡിവിഷൻ നന്ദകുമാർ (നന്ദ-25) എന്നിവരെ വിവിധ സ്ഥലങ്ങളിൽനിന്നായി ശാന്തൻപാറ പോലീസ് പിടികൂടിയത്. കഴിഞ്ഞ ശനിയാഴ്ച വൈകുന്നേരമാണ് കേസിനാസ്പദമായ സംഭവം. ലോഡ് ഇറക്കുന്നതിനായി ലോറി മാറ്റിയിടുന്നതിനെച്ചൊല്ലി ഉണ്ടായ തർക്കത്തെത്തുടർന്ന് യൂണിയൻ തൊഴിലാളികൾ ചേർന്നു ലോറി ഡ്രൈവറെ മർദിച്ച് അവശനാക്കുകയായിരുന്നു. ലോറി ഡ്രൈവറുടെ പരാതിയിൽ കേസെടുത്ത ശാന്തൻപാറ പോലീസ്, സംഭവത്തിനുശേഷം ഒളിവിൽ പോയ പ്രതികളെ അറസ്റ്റ് ചെയ്യുകയായിരുന്നു. ശാന്തൻപാറ സിഐ എസ്. ശരലാൽ, ഗ്രേഡ് എസ്ഐ റെജി ജോസഫ്, സിവിൽ പോലീസ് ഓഫീസർമാരായ ആർ. രമേഷ്, വി. ജയകൃഷ്ണൻ, വിൻസന്‍റ്, ജിനോ ജോർജ് എന്നിവരടങ്ങിയ സംഘമാണ് പ്രതികളെ പിടികൂടിയത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.

തേക്കടി റോട്ടറി ക്ലബ് മൂന്ന് ഇലക്‌ട്രിക് ബസുകള്‍ നല്‍കും

കുമളി: റോട്ടറി ക്ലബ് ഓഫ് തേക്കടിയുടെ ഈ വര്‍ഷത്തെ സേവന പദ്ധതികളുടെ ഭാഗമായി തേക്കടിയില്‍ എത്തുന്ന സഞ്ചാരികള്‍ക്ക് യാത്രയ്ക്കായി മൂന്ന് ഇലക്‌ട്രിക് ബസുകള്‍ നല്‍കും. തേക്കടി ആനവച്ചാലിലെ വനംവകുപ്പിന്‍റെ പാര്‍ക്കിംഗ് ഗ്രൗണ്ടില്‍നിന്നു സഞ്ചാരികളെ തേക്കടി ബോട്ട് ലാൻഡിംഗില്‍ എത്തിക്കാനാണ് ബസുകള്‍ ഉപയാഗിക്കുന്നത്. റോട്ടറി ഫൗണ്ടേഷന്‍റെ സഹായത്തോടെ ഒന്നരക്കോടി രൂപ ചെലവുവരുന്ന പദ്ധതിയാണ് തയാറാക്കിയിരിക്കുന്നത്. കുമളി കാര്‍ഡ് ബി നെസ്റ്റ് ഹാളില്‍ റോട്ടറി ക്ലബ് ഓഫ് തേക്കടിയുടെ പുതിയ ഭാരവാഹികളുടെ സ്ഥാനാരോഹണം നടന്നു. നിയുക്ത റോട്ടറി ഡിസ്ട്രിക്‌ട് ഗവര്‍ണര്‍ ജോഷി ചാക്കോ നേതൃത്വം നല്‍കി. റോട്ടറി ക്ലബ്ബിന്‍റെ ഈ വര്‍ഷത്തെ ഭരവാഹികളായി ഡോ. ബോബി ഏബ്രഹാം-പ്രസിഡന്‍റ്, തോമസ് മാത്യു-ജനറല്‍ സെക്രട്ടറി, സുബാഷ്-ട്രഷറര്‍, എം.കെ. ദിലീപ്-ജോയിന്‍റ് സെക്രട്ടറി എന്നിവരും പന്ത്രണ്ട് അംഗ ഡയറക്ടര്‍ ബോര്‍ഡും ചുമതലയേറ്റു.

വൈദ്യുതിലൈനിൽനിന്ന് ഷോക്കേറ്റ് വീട്ടമ്മ മരിച്ചു

അടിമാലി: അടിമാലി കല്ലാറിൽ വൈദ്യുതി ലൈനിൽനിന്ന് ഷോക്കേറ്റ് വീട്ടമ്മ മരിച്ചു. കല്ലാർ തോട്ടുങ്കൽ സണ്ണിയുടെ ഭാര്യ ബിന്ദു (48) ആണ് മരിച്ചത്. ചക്ക ഇടുന്നതിനിടയിൽ ഇരുമ്പുതോട്ടി വൈദ്യുതിലൈനിൽ തട്ടി ഷോക്കേൽക്കുകയായിരുന്നു. ഇന്നലെ വൈകുന്നേരമായിരുന്നു സംഭവം. പോലീസ് സ്ഥലത്തെത്തി തുടർനടപടികൾ സ്വീകരിച്ചും. മൃതദേഹം ആശുപത്രിയിലേക്കു മാറ്റി.

വാന്‍ നിയന്ത്രണംവിട്ടു മറിഞ്ഞു

കുടയത്തൂര്‍: തൊടുപുഴ-പുളിയന്‍മല സംസ്ഥാന പാതയില്‍ ശരംകുത്തിക്കു സമീപം വാന്‍ നിയന്ത്രണംവിട്ടു മറിഞ്ഞ് അഞ്ചു പേര്‍ക്ക് പരിക്കേറ്റു. ഇന്നലെ വൈകുന്നേരം 5.45ഓടെയായിരുന്നു അപകടം. വാഗമണ്‍ സന്ദര്‍ശിക്കാന്‍ പോയ പെരുമ്പാവൂര്‍ സ്വദേശികളാണ് വാനില്‍ ഉണ്ടായിരുന്നത്. റോഡില്‍നിന്നു തെന്നിമാറി താഴ്ചയിലേക്ക് വാഹനത്തിന്‍റെ മുന്‍ഭാഗം പതിക്കുകയായിരുന്നു. വാന്‍ പൂര്‍ണമായും താഴ്ചയിലേക്കു മറിയാതിരുന്നതിനാല്‍ വലിയ അപകടം ഒഴിവായി. പരിക്കേറ്റവരെ തൊടുപുഴയിലെ സ്വകാര്യ ആശുപത്രിയില്‍ പ്രവേശിപ്പിച്ചു.

റോഡ് മുറിച്ചുകടക്കുന്നതിനിടെ കാർ ഇടിച്ച് വയോധികന് പരിക്കേറ്റു

വണ്ടിപ്പെരിയാർ: റോഡ് മുറിച്ചുകടക്കുന്നതിനിടെ കാർ ഇടിച്ച് വയോധികന് പരിക്കേറ്റു. ഏലപ്പാറ കോഴിക്കാനം സ്വദേശി വർഗീസി (71)നാണ് പരിക്കേറ്റത്. ശനിയാഴ്ച രാത്രി 12ഓടെയാണ് അപകടമുണ്ടായത്. കോഴിക്കാനം സ്വദേശികളായ ഒരു കുടുംബത്തിലെ അഞ്ചുപേർ കുമളിയിൽനിന്ന് ഓട്ടോറിക്ഷയിൽ കോഴിക്കാനത്തേക്ക് പോകുന്നതിനിടെ വണ്ടിപ്പെരിയാർ കക്കി കവലയ്ക്കു സമീപം തട്ടുകടയിൽ ഭക്ഷണം കഴിക്കുന്നതിനായി ഇറങ്ങിയപ്പോഴാണ് അപകടമുണ്ടായത്. റോഡു മുറിച്ചുകടന്ന വർഗീസിനെ വണ്ടിപ്പെരിയാറിൽനിന്നു കുമളിയിലേക്ക് പോവുകയായിരുന്ന എർട്ടിഗ കാർ ഇടിക്കുകയായിരുന്നു. തലയ്ക്കും കൈക്കും കാലിനും ഗുരുതരമായി പരിക്കേറ്റ വർഗീസിനെ നാട്ടുകാർ സഹകരണ ആശുപത്രിയിൽ പ്രവേശിപ്പിച്ചു. വിദഗ്ധ ചികിത്സയ്ക്കായി തുടർന്ന് കോട്ടയം മെഡിക്കൽ കോളജ് ആശുപത്രിയിലേക്കു മാറ്റി. വണ്ടിപ്പെരിയാർ പോലീസ് കേസെടുത്തു.

കെട്ടിട നിര്‍മാണ സാമഗ്രികള്‍ മോഷ്ടിച്ച നാലു പേര്‍ പിടിയിൽ

കട്ടപ്പന: പുതിയ ബസ് സ്റ്റാന്‍ഡിനു സമീപം നിര്‍മാണത്തിലിരുന്ന കെട്ടിടത്തില്‍നിന്ന് നിര്‍മാണ സാമഗ്രഹികള്‍ മോഷ്ടിച്ച സംഭവത്തില്‍ നാലു പേരെ കട്ടപ്പന പോലീസ് അറസ്റ്റ് ചെയ്തു. ശനിയാഴ്ച ഉച്ചയോടെയാണ് നിര്‍മാണത്തിലിരുന്ന കെട്ടിടത്തില്‍നിന്ന് ആറ് ഇരുമ്പ് ജനല്‍പാളികള്‍ മോഷ്ടിച്ചു കടത്തിയത്. കട്ടപ്പന കുന്തളംപാറ സ്വദേശി സുനില്‍ തങ്കച്ചന്‍, തങ്കമണി നീലിവയല്‍ സ്വദേശി വിപിന്‍ വിജയന്‍, വെട്ടിക്കുഴക്കവല സ്വദേശി റിനു റെജി, ആക്രിക്കട ഉടമയായ സ്‌കറിയ ജോസഫ് എന്നിവരെയാണ് അറസ്റ്റ് ചെയ്തത്.പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു. സാധനസാമഗ്രികള്‍ കാണാതായതോടെ സിസിടിവിയില്‍ കെട്ടിട ഉടമ നടത്തിയ പരിശോധനയിലാണ് മോഷണം നടന്ന വിവരമറിയുന്നത്. തുടര്‍ന്ന് കട്ടപ്പന പോലീസില്‍ പരാതി നല്‍കുകയായിരുന്നു. സിസിടിവി ദൃശ്യങ്ങളുടെ അടിസ്ഥാനത്തില്‍ കട്ടപ്പന പോലീസ് കേസെടുത്തു നടത്തിയ അന്വേഷണത്തില്‍ രാത്രി പത്തോടെ കട്ടപ്പന വെട്ടിക്കുഴക്കവലയിലെ സര്‍ക്കാര്‍ മദ്യവില്പനശാലയ്ക്കു സമീപത്തുനിന്നു മോഷ്ടാക്കളെ പിടികൂടുകയായിരുന്നു. കട്ടപ്പന സിഐ ടി.സി. മുരുകന്‍, എസ്ഐ ഡജി വര്‍ഗീസ്, എഎസ്ഐ ലെനിന്‍, എസിപിഒമാരായ അനൂപ് ബിജു എന്നിവരുടെ നേതൃത്വത്തിലാണ് പ്രതികളെ പിടികൂടിയത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]