ADVERTISEMENT

ADVERTISEMENT

ട്രെയിനിടിച്ച് ‌മധ്യവയസ്കൻ മരിച്ചു

തൃശൂർ: വടൂക്കര റെയിൽവേ ഗേറ്റിനും സോമിൽ റോഡ് മിഠായി ഗേറ്റിനുമിടയിൽ ട്രെയിനിടിച്ചു മധ്യവയസ്കൻ മരിച്ചു. ആളെ തിരിച്ചറിഞ്ഞിട്ടില്ല

ADVERTISEMENT

പ്രതിഭാദരം 2025 സംഘടിപ്പിച്ചു

എടത്തിരുത്തി: ചാമക്കാല ഗവ. മാപ്പിള ഹയർസെക്കന്‌റി സ്കൂളിലെ പൂർവ വിദ്യാർഥിസംഘടനയായ ഒസാക്സിന്‍റെ നേതൃത്വത്തിൽ പ്രതിഭാദരം 2025 സംഘടിപ്പിച്ചു. എസ്എസ്എൽസി, പ്ലസ് ടു പരീക്ഷകളിൽ ഉന്നതവിജയം നേടിയ വിദ്യാർഥികൾക്കും പതിനാലുവർഷങ്ങളായി എസ്എസ്എൽസി പരീക്ഷയിൽ നൂറുശതമാനം വിജയംനേടിയ സ്കൂളിനെയുമാണ് ഉപഹാരംനൽകി ആദരിച്ചത്. എടത്തിരുത്തി ഗ്രാമപഞ്ചായത്ത് പ്രസിഡന്‍റ് ടി.കെ. ചന്ദ്രബാബു ഉദ്ഘാടനംചെയ്തു. ഒസാക്സ് പ്രസിഡന്‍റ് എം.സി.എം. താജുദ്ദീൻ അധ്യക്ഷതവഹിച്ചു. സി.പി. ട്രസ്റ്റ് ചെയർമാൻ സി.പി. സാലിഹ് മുഖ്യാതിഥിയായി. മതിലകം ബ്ലോക്ക് പഞ്ചായത്തംഗം വി.എസ്. ജിനേഷ്, വാർഡ് മെമ്പർ കെ.എസ്. അനിൽകുമാർ, എഴുത്തുകാരൻ ആർ.എം. മുഹമ്മദ്‌ ഹുസൈർ, പ്രിൻസിപ്പല്‌ രഞ്ജി ടി.പരമേശ്വരൻ, പ്രധാനധ്യാപകൻ എം. രാജേഷ് തുടങ്ങിയവർ പ്രസംഗിച്ചു.

ബൈക്ക് റാലി സംഘടിപ്പിച്ചു

കൊടകര: അന്താരാഷ്ട്ര ലഹരിവിരുദ്ധ ദിനത്തിനു മുന്നോടിയായി കൊടകര സെന്‍റ് ജോസഫ് ഫൊറോന ദേവാലയത്തിലെ കെസിബിസി മദ്യ, ലഹരിവിരുദ്ധ സമിതിയും കെസിവൈഎം യൂണിറ്റും സംയുക്തമായി ബൈക്ക്‌റാലി സംഘടിപ്പിച്ചു. ഫൊറോന വികാരി ഫാ. ജെയ്‌സണ്‍ കരിപ്പായി ഉദ്ഘാടനംചെയ്തു. മദ്യ, ലഹരിവിരുദ്ധ സമിതി സംസ്ഥാന സെക്രട്ടറി അന്തോണിക്കുട്ടി ചെതലന്‍ സന്ദേശംനല്‍കി. അസിസ്റ്റന്‍റ് വികാരി ഫാ. ലിന്‍റോ കാരേക്കാടന്‍, കേരള കാത്തലിക് യൂത്ത് മൂവ്‌മെന്‍റ് കൊടകര ഇടവക പ്രസിഡന്‍റ് ആബേല്‍ ജേക്കബ്, ജോസ് കോച്ചേക്കാടന്‍, ബിനോയ് മംഗലന്‍, ഷേര്‍ളി ഷിജു, ലില്ലി ജോസഫ് തുടങ്ങിയവര്‍ സംസാരിച്ചു. കെസിവൈഎം പ്രവര്‍ത്തകര്‍ ലഹരിവിരുദ്ധ ഫ്ലാഷ് മോബ് അവതരിപ്പിച്ചു. സിജോ ചിറയത്ത് ലഹരിവിരുദ്ധ പ്രതിജ്ഞ ചൊല്ലിക്കൊടുത്തു.

യോഗ കാമ്പയിന്‍ തുടങ്ങി

കൊടകര: സഹൃദയ കോളജ് ഓഫ് അഡ്വാന്‍സ്ഡ് സ്റ്റഡീസിലെ ഇന്ത്യന്‍ നോളജ് സിസ്റ്റം സെന്‍റര്‍, എന്‍എസ്എസ്, ഐക്യുഎസി, ഡിപ്പാര്‍ട്ട്‌മെന്‍റ് ഓഫ് ഫിസിക്കല്‍ എഡ്യുക്കേഷന്‍ എന്നിവയുടെ സംയുക്താഭിമുഖ്യത്തില്‍ യോഗ കാമ്പയിന്‍ ആരംഭിച്ചു. കാലിക്കറ്റ് യൂണിവേഴ്‌സിറ്റി യോഗ ടീം കോച്ച് ബെന്നി കൊള്ളന്നൂര്‍ ഉദ്ഘാടനംചെയ്തു. ഇന്‍റര്‍ യൂണിവേഴ്‌സിറ്റി ചാമ്പ്യന്‍ ഹിബ മറിയം യോഗ അവതരിപ്പിച്ചു. പ്രിന്‍സിപ്പല്‍ ഡോ.കെ.എല്‍. ജോയ് അധ്യക്ഷതവഹിച്ചു. കോളജ് എക്‌സിക്യൂട്ടീവ് ഡയറക്ടര്‍ റവ.ഡോ. ഡേവിസ് ചെങ്ങിനിയാടന്‍, വൈസ് പ്രിന്‍സിപ്പല്‍ ഡോ.കെ. കരുണ എന്നിവര്‍ പ്രസംഗിച്ചു. എന്‍എസ്എസ് പ്രോഗ്രാം ഓഫിസര്‍ കെ. ജയകുമാര്‍, വോളന്‍റിയര്‍മാരായ വി.ആര്‍. പാര്‍വതി, മിലാന ജയ്‌സണ്‍, ഗോപിക മുരളീധരന്‍, ആതിര ഷൈജു എന്നിവര്‍ നേതൃത്വംനല്‍കി.

ലഹരി ഉപയോഗിക്കുന്നത് തടഞ്ഞതിന്്‌ ആക്രമണം: ഒളിവിലായിരുന്ന മുഖ്യപ്രതി അറസ്റ്റില്‍

ആളൂര്‍: ലഹരിവസ്തുക്കള്‍ ഉപയോഗിക്കുന്നത് തടഞ്ഞതിലുള്ള ആക്രമണത്തില്‍ ഒളിവിലായിരുന്ന മുഖ്യപ്രതി അറസ്റ്റില്‍. ആളൂര്‍ കാരൂര്‍ സ്വദേശി ഇല്ലത്തുപറമ്പില്‍ വീട്ടില്‍ ഷാഫി(23)യെയാണ് പോലീസ് അറസ്റ്റ് ചെയ്തത്. ഫെബ്രുവരി 18ന് വൈകീട്ട് ആറുമണിയോടെയാണ് സംഭവം. പുന്നേലിപ്പടിയിലുള്ള കാറ്ററിംഗ് യൂണിറ്റിലെ ജീവനക്കാരനായ കൈപ്പമംഗലം സ്വദേശി തലാശേരി വീട്ടില്‍ ജിബി(41)യെ പ്രതികള്‍ ലഹരി ഉപയോഗിക്കുന്നത് തടഞ്ഞതിലുള്ള വൈരാഗ്യത്താല്‍ ആക്രമിച്ച് ഗുരുതരമായി പരിക്കേല്‍പ്പിക്കുകയായിരുന്നു. ഈ കേസിലെ മറ്റ് പ്രതികളായ അമല്‍(20), മുഹമ്മദ് ഷഹിന്‍(18), രതുല്‍ രമേഷ്(19) എന്നിവരെ മുമ്പ് റിമാന്‌ഡ് ചെയ്തിരുന്നു. ഷാഫി ആളൂര്‍, നോര്‍ത്ത് പറവൂര്‍ പോലീസ് സ്റ്റേഷനുകളിലായി വധശ്രമം, അടിപിടി, മദ്യലഹരിയില്‍ മറ്റുള്ളവരുടെ ജീവന് അപകടംവരുത്തുന്ന തരത്തില്‍ വാഹനമോടിക്കല്‍ തുടങ്ങി നാല് ക്രിമിനല്‍കേസിലെ പ്രതിയാണ്. ആളൂര്‍ പോലീസ് സ്റ്റേഷന്‍ സബ് ഇന്‍സ്‌പെക്ടര്‍മാരായ അഫ്‌സല്‍, സുമേഷ്, സിപിഒമാരായ ആഷിക്, ഹരികൃഷ്ണന്‍, മന്നാസ് എന്നിവര്‍ചേര്‍ന്നാണ് പ്രതിയ അറസ്റ്റ് ചെയ്തത്.

ദേശീയപാത: പരാതിക്കെട്ടഴിച്ച് നാട്ടുകാർ, വാഗ്ദാനങ്ങളുമായി അധികൃതർ

കൊരട്ടി: ദേശീയപാത നിർമാണപരിശോധനയ്ക്കായി മുരിങ്ങൂർ ജംഗ്ഷനിലെത്തിയ കളക്ടർക്കും സംഘത്തിനും മുന്നിൽ സങ്കടങ്ങളും ആവലാതികളുമായി നിരവധി നാട്ടുകാരാണ് എത്തിയത്. ഗതാഗതക്കുരുക്കിലും വെള്ളക്കെട്ടിലും വലയുന്നതിന്‍റെ നേർക്കാഴ്ചയാണ് നാട്ടുകാർ പങ്കുവച്ചത്. കൃത്യമായ പഠനത്തിന്‍റെ പിൻബലത്തിലാണ് പ്രസിഡന്‍റ് എം.എസ്. സുനിതയുടെ നേതൃത്വത്തിൽ പഞ്ചായത്ത് അംഗങ്ങളും നാട്ടുകാരും കാര്യങ്ങൾ ബോധിപ്പിച്ചത്. തികച്ചും വ്യത്യസ്തമായിരുന്നു കൊരട്ടിയിലെത്തിയപ്പോൾ ജനങ്ങളുടെ പ്രതികരണം. മാസങ്ങളായി കൊരട്ടി ജംഗ്ഷൻ വെള്ളക്കെട്ടിന്‍റെ പിടിയിലാണെന്നും എൻഎച്ച്എഐയുടെയും കരാർ കമ്പനിയുടെയും നാടകം ഇനി അനുവദിക്കാനാകില്ലെന്നും അതിരൂക്ഷമായ വാക്കുകളിലാണ് ജനങ്ങൾ പ്രതികരിച്ചത്. പ്രോജക്ട് ഡയറക്ടർക്കു നാട്ടുകാരുടെ ശകാരവർഷം നേരിടേണ്ടിവന്നു എന്നതാണ് യാഥാർഥ്യം. കൊരട്ടി എംഎഎം ഹയർസെക്കൻഡറി വിദ്യാലയത്തിലെ പ്രിൻസിപ്പലും പ്രധാനാധ്യാപികയും കുട്ടികൾ നേരിടുന്ന ദുരിതങ്ങൾക്കു പരിഹാരംതേടി നിവേദനം നൽകി. വെള്ളക്കെട്ടിനു സത്വരപരിഹാരം ഉണ്ടാകുമെന്നു പ്രോജക്ട് ഡയറക്ടർ അൻസിൽ ഹസൻ ഉറപ്പുനൽകി. നാട്ടുകാരുടെ പ്രതിഷേധസ്വരങ്ങൾക്കു ചെവികൊടുക്കാതെ കേവലം മൂന്നു മിനിറ്റിനുള്ളിൽ കളക്ടർ അടുത്ത സ്ഥലമായ ചിറങ്ങരയിലേക്കു പോയി. ചിറങ്ങരയിലെ ജനങ്ങളുമായി ഏറെ സംവദിച്ച കളക്ടർ അവർ ഉന്നയിച്ച പരാതികൾക്കു സാധ്യമായ പരിഹാരം ഉണ്ടാക്കാമെന്നു മറുപടി നൽകി. കൽവർട്ട് വിഷയത്തിലും ഹൈവേയോടുചേർന്നു താമസിക്കുന്ന രണ്ടു കുടുംബങ്ങൾ മുന്നോട്ടുവച്ച സങ്കടങ്ങളോടും അനുഭാവപൂർവമായ പരിഹാരം കാണാമെന്ന ഉറപ്പിലായിരുന്നു കളക്ടർ മടങ്ങിയത്.

നഗരസഭാ യോഗത്തില്‍ വീണ്ടും വിമര്‍ശനം; റോഡുകളില്‌ അറ്റകുറ്റപ്പണി നടത്തും

ഇരിങ്ങാലക്കുട: ഇരിങ്ങാലക്കുടയിലെ കുഴികളെചൊല്ലി നഗരസഭാ യോഗത്തില്‍ വീണ്ടും വിമര്‍ശനം. നഗരസഭ പരിധിയില്‍ സണ്ണി സില്‍ക്ക്‌സ് റോഡിലുള്‍പ്പടെയുള്ള കുഴികളുടെ അറ്റകുറ്റപ്പണികളുമായി ബന്ധപ്പെട്ട അജന്‌ഡകള്‍ യോഗത്തില്‍ എത്തിയപ്പോഴായിരുന്നു പ്രതിപക്ഷത്തിന്‍റെ വിമര്‍ശനം. റോഡുകളിലെ മരണക്കുഴികള്‍ക്കെതിരേ വൈദികരും ബസുകാരുംവരെ രംഗത്തിറങ്ങിയിരിക്കുന്നത് നഗരസഭയില്‍ ആദ്യമായിട്ടാണെന്നും വിഷയത്തില്‍ റവന്യൂ, ജൂഡീഷ്യല്‍ അധികാരികള്‍ക്കുവരെ പരാതി ലഭിച്ചിരിക്കുകയാണെന്നും ബിജെപി അംഗം ടി.കെ. ഷാജു പറഞ്ഞു. തലയില്‍ മുണ്ടിട്ട് നടക്കേണ്ട സാഹചര്യമാണെന്നും ബൈപ്പാസ് റോഡിലെ കുഴികള്‍ അടയ്ക്കാനും നടപടികള്‍ സ്വീകരിക്കണമെന്ന് എല്‍ഡിഎഫ് പാര്‍ലമെന്‍ററി പാര്‍ട്ടി ലീഡര്‍ കെ.ആര്‍. വിജയ ആവശ്യപ്പെട്ടു. എല്ലാ വാര്‍ഡുകളിലെ റോഡുകളിലും കുഴികളുടെ പ്രശ്‌നമുണ്ടെന്നും പൊതുമരാമത്ത് സ്റ്റാന്‍ഡിംഗ് കമ്മിറ്റി ചെയര്‍മാന്‍റെ വാര്‍ഡുമായി ബന്ധപ്പെട്ട് മാത്രമാണ് അറ്റകുറ്റപ്പണികള്‍ നടക്കുന്നതെന്ന് ബിജെപി അംഗം സന്തോഷ് ബോബനും വിമര്‍ശിച്ചു. എല്ലാ വാര്‍ഡുകളിലെയും അപകടമായ കുഴികള്‍ പരിശോധിക്കാനും അടയ്ക്കാനും എന്‍ജിനീയറിംഗ് വിഭാഗത്തിന് ചെയര്‍പേഴ്‌സണ്‍ നിര്‍ദേശംനല്‍കി. കംഫേര്‍ട്ട് സ്റ്റേഷന്‍റെ മാത്രം സേവനം ലഭ്യമാക്കി നഗരസഭ നേരിട്ട് ഠാണാവിലെ പൂതംകുളത്ത് ടേക്ക് എ ബ്രേക്ക് പദ്ധതി പ്രവര്‍ത്തനം ആരംഭിച്ചതായുള്ള അജന്‌ഡയിലും വിമര്‍ശനങ്ങള്‍ ഉയര്‍ന്നു. വാടക കുറച്ച് ടേക്ക് എ ബ്രേക്ക് കുടുംബശ്രീയെ എല്‍പിക്കണമെന്നും സ്ഥലത്തെ ടോയ്‌ലറ്റ് സംവിധാനങ്ങള്‍ ശരിയല്ലെന്നും നിര്‍മാണ പ്രവര്‍ത്തനങ്ങളിലെ പാളിച്ചകള്‍ വ്യക്തമാണെന്നും പ്രതിപക്ഷ അംഗങ്ങള്‍ പറഞ്ഞു. പദ്ധതിയുടെ നടത്തിപ്പ് കുടുംബശ്രീ സിഡിഎസിനെയാണ് എല്പിച്ചതെന്നും എന്നാല്‍ എറ്റെടുക്കാന്‍വന്ന വ്യക്തിക്ക് അവിടെ ഹോട്ടല്‍ നടത്താനായിരുന്നു താല്‍പര്യമെന്നും സെക്രട്ടറി അറിയിച്ചു. കുടുംബശ്രീയുടെ അപേക്ഷകള്‍ വന്നാല്‍ പരിഗണിക്കാമെന്ന് ചെയര്‍പേഴ്‌സണ്‍ അറിയിച്ചു. യോഗത്തില്‍ ചെയര്‍പേഴ്‌സണ്‍ മേരിക്കുട്ടി ജോയ് അധ്യക്ഷതവഹിച്ചു.

ദീപിക നന്മനിറഞ്ഞ ലോകത്തേക്കു സ്വപ്‌നം കാണാൻ കുട്ടികൾക്കു വഴികാട്ടി: മാര്‍ പോളി കണ്ണൂക്കാടന്‍

ഇരിങ്ങാലക്കുട: നന്മനിറഞ്ഞ ലോകത്തേക്കു സ്വപ്‌നം കാണുവാൻ കുട്ടികൾക്കു വഴികാട്ടിയാണ് ദീപിക ദിനപത്രമെന്നു ഇരിങ്ങാലക്കുട രൂപത ബിഷപ് മാര്‍ പോളി കണ്ണൂക്കാടന്‍. ദീപിക നമ്മുടെ ഭാഷ പദ്ധതിയുടെ രൂപതാതല ഉദ്ഘാടനം നിര്‍വഹിച്ച് പ്രസംഗിക്കുകയായിരുന്നു ബിഷപ്. ഇരിങ്ങാലക്കുട സെന്‍റ് മേരീസ് ഹൈസ്‌കൂളില്‍ നടന്ന ചടങ്ങില്‍ വിദ്യാര്‍ഥിപ്രതിനിധി ക്രിസ്റ്റ ഡിയോണിനു പത്രത്തിന്‍റെ കോപ്പി കൈമാറിക്കൊണ്ടാണ് ബിഷപ് ഉദ്ഘാടനം നിര്‍വഹിച്ചത്. ശബ്ദമില്ലാത്തവരുടെ ശബ്ദമായി മാറി പാര്‍ശ്വവത്കരിക്കപ്പെട്ടവര്‍ക്കു പ്രത്യാശനല്‍കുന്ന പത്രമാണ് ദീപിക. സാമൂഹിക സാംസ്‌കാരിക രാഷ്ട്രീയതലങ്ങള്‍ നിഷ്പക്ഷമായി വിലയിരുത്തി വാര്‍ത്തകള്‍ വിശകലനംചെയ്യുന്ന പത്രമുത്തശിയുമാണ് ദീപിക. മൂല്യങ്ങളില്‍ അധിഷ്ഠിതമായ ഭാവിജീവിതം പ്രശോഭിതമാകുവാന്‍ വായനയിലൂടെ ലഭിക്കുന്ന അറിവുകള്‍ സഹായകരമാകണമെന്നും ബിഷപ് കൂട്ടിച്ചേര്‍ത്തു. കത്തീഡ്രല്‍ വികാരിയും സ്‌കൂള്‍മാനേജരുമായ റവ.ഡോ. ലാസര്‍ കുറ്റിക്കാടന്‍ അധ്യക്ഷത വഹിച്ചു. ദീപിക കോ ഓര്‍ഡിനേറ്റിംഗ് എഡിറ്റര്‌‍ ഫാ. റിന്‍റോ പയ്യപ്പിള്ളി ആമുഖപ്രസംഗം നടത്തി. പിടിഎ പ്രസിഡന്‍റ് അജോ ജോണ്‍, ദീപിക ഫ്രണ്ട്‌സ് ക്ലബ് രൂപത പ്രസിഡന്‍റ് ജോസഫ് വാസപുരത്തുകാരന്‍, കത്തീഡ്രല്‍ ട്രസ്റ്റി തിമോസ് പാറേക്കാടന്‍, പ്രധാനാധ്യാപിക റീജ ജോസ്, സ്റ്റാഫ് പ്രതിനിധി സ്മിത തോമസ് എന്നിവര്‍ പ്രസംഗിച്ചു.

കാരമുക്ക് പുതൃക്കോവ് ക്ഷേത്രത്തിൽ മോഷണം; അഞ്ചാംതവണ

കാഞ്ഞാണി: കാരമുക്ക് പുതൃക്കോവ് നരസിംഹമൂർത്തി ക്ഷേത്രത്തിൽ വീണ്ടും മോഷണം. അഞ്ചാം തവണയാണ് ഇവിടെ മോഷണം നടക്കുന്നത്. ക്ഷേത്രനടപ്പുരയിലും മുൻവശത്തെ റോഡിനോടു ചേർന്ന ഭണ്ഡാരങ്ങളിലുമാണു തിങ്കളാഴ്ച പുലർച്ചെ നാലോടെ മോഷണം നടന്നത്. സമീപത്തെ എവണ്‍ ബേക്കറിയിലും മോഷണശ്രമം നടന്നു. മോഷണത്തിനുപയോഗിച്ചിട്ടുള്ള ഇരുന്പുവടിയും മോഷ്ടാവിന്‍റെതെന്നു സംശയിക്കുന്ന തോർത്തുമുണ്ടും ബേക്കറിയുടെ സമീപത്തുനിന്നു കണ്ടെടുത്തു. ക്ഷേത്രത്തിൽ സ്ഥാപിച്ചിട്ടുള്ള സിസിടിവി കാമറയിൽ മോഷ്ടാവിന്‍റെ ചിത്രങ്ങൾ പതിഞ്ഞിട്ടുണ്ട്. അന്തിക്കാട് പോലീസിൽ സിസിടിവി ദൃശ്യങ്ങൾസഹിതം ക്ഷേത്രസംരക്ഷണസമിതി പരാതി നൽകി. നേരത്തെ നാലുതവണ ഇവിടെ മോഷണം നടന്നെങ്കിലും ആരെയും പിടികൂടാൻ കഴിഞ്ഞിട്ടില്ല. ആഴ്ചയിൽ ഭണ്ഡാരങ്ങൾ തുറന്ന് വരവ് എണ്ണിത്തിട്ടപ്പെടുത്തുന്നതിനാൽ ഒരാഴ്ചത്തെ പണം മാത്രമാണു നഷ്ടപ്പെട്ടിട്ടുള്ളത്. മോഷ്ടാവിനെ ഉടൻ പിടികൂടണമെന്നു ക്ഷേത്രസംരക്ഷണ സമിതി പ്രസിഡന്‍റ് ഷാജി കുറുപ്പത്ത്, സെക്രട്ടറി പി.ബി. വേണു, ട്രഷറർ കെ. സൂര്യനാരായണൻ, വൈസ് പ്രസിഡന്‍റ് സുഷമ സുനിൽ എന്നിവർ ആവശ്യപ്പെട്ടു.

ലോറി അപകടത്തിൽപെട്ടു; ടാങ്ക് വേർപെട്ട് ഡീസൽ ഒഴുകിയത് ആശങ്കയായി

ചേലക്കര: കൽത്തൊട്ടിയിൽ ടോറസ് ലോറിക്കു പിന്നിൽ മിനി ലോറിയിടിച്ചു. ടോറസ് ലോറിയുടെ ഡീസൽ ടാങ്ക് തകർന്നുവീഴുകയും ഡീസൽ റോഡിൽ പരക്കുകയും ചെയ്തത് ആശങ്ക പരത്തി. ഇന്നലെ രാവിലെയായിരുന്നു അപകടം. ഡീസൽ റോഡിൽ വ്യാപകമായി പരന്നതതിനെത്തുടർന്ന് ചേലക്കര പോലീസും നാട്ടുകാരും ചേർന്ന് വെള്ളം പന്പ് ചെയ്ത് അപകടസാധ്യത ഒഴിവാക്കി. അപകടത്തെത്തുടർന്ന് അൽപനേരം ഗതാഗതം തടസപ്പെട്ടു.

തിരുനാളിനു കൊടിയേറി

പുത്തൂർ: സെന്‍റ് തോമസ് ഫൊറാന ദേവാലയത്തിൽ ഇടവകമധ്യസ്ഥനായ വിശുദ്ധ തോമാശ്ലീഹായുടെ ദുക്റാന തിരുനാളിനു കൊടിയേറി. ഫൊറോന വികാരി ഫാ. ജോജു പനയ്ക്കൽ കൊടിയേറ്റി. 29ന് വിശുദ്ധ തോമാശ്ലീഹായുടെയും വിശുദ്ധ അന്തോണിസിന്‍റെയും സംയുക്ത ഉൗട്ടുതിരുനാൾ ആചരിക്കും. രാവിലെ 10നു നടക്കുന്ന ആഘോഷമായ തിരുനാൾ പാട്ടുകുർബാനയ്ക്ക് ഫാ. നിർമൽ അക്കര പട്ട്യേക്കൽ മുഖ്യകാർമികത്വം വഹിക്കും. ദുക്റാന തിരുനാളിനോടുനുബന്ധിച്ച് ജൂലൈ രണ്ടിന് വൈകിട്ട് കൂടുതുറക്കൽ ശുശ്രൂഷ. മുൻ വികാരി ഫാ. ഡോ. ജോണ്‍ മൂലൻ മുഖ്യകാർമികത്വം വഹിക്കും. തിരുനാൾദിനമായ ജൂലൈ മൂന്നിനു രാവിലെ ആറിന് വിശുദ്ധ കുർബാന. രാവിലെ 10നു നടക്കുന്ന ആഘോഷമായ തിരുനാൾ പാട്ടുകുർബാനയ്ക്ക് മുൻ വികാരി ഫാ. ജോർജ് തേർമഠം മുഖ്യകാർമികത്വം വഹിക്കും. ഫാ. ഫ്രാൻസിസ് പള്ളിക്കുന്നത്ത് സന്ദേശം നൽകും. തിരുനാൾ ആഘോഷങ്ങൾക്ക് അസിസ്റ്റന്‍റ് വികാരി ഫാ. റെജി തോമസ്, കണ്‍വീനർ ടോണി അന്തിക്കാടൻ, ജനറൽ കണ്‍വീനർ പ്രിൻസ് ഐനിക്കൽ, കൈകാര·ാരായ സണ്ണി മാളിയേക്കൽ, ഷോയി മാളിയേക്കൽ, സന്തോഷ് ആട്ടോക്കാരൻ, ഷാജി തട്ടിൽ എന്നിവർ നേതൃത്വം നൽകും.

കാഞ്ഞാണി, മണലൂർത്താഴം ബണ്ടുകൾ പൊളിക്കും

അന്തിക്കാട്: ബ്ലോക്ക് പഞ്ചായത്ത് പരിധിയിലുള്ള അന്തിക്കാട്, താന്ന്യം, ചാഴൂർ, മണലൂർ, അരിന്പൂർ പഞ്ചായത്തുകളിലെ വെള്ളക്കെട്ട് ഒഴിവാക്കാൻ അടിയന്തര നടപടിയെടുക്കാൻ ഇന്നലെ കളക്ടറേറ്റിൽ സബ് കളക്ടറുടെ നേതൃത്വത്തിൽ നടന്ന എംഎൽഎമാരുടെയും ബന്ധപ്പെട്ട ഉദ്യോഗസ്ഥരുടെയും പാടശേഖരപ്രതിനിധികളുടെയും സംയുക്ത യോഗത്തിൽ തീരുമാനമായി. കാഞ്ഞാണി കോൾ, മണലൂർത്താഴം കോൾ പാടശേഖരങ്ങളുടെ ബണ്ടുകൾ താൽകാലികമായി പൊളിക്കുന്നതുൾപ്പടെയുള്ള തീരുമാനങ്ങളാണ് ഉണ്ടായത്. ഇരു ബണ്ടുകളും പൊളിക്കുന്പോൾ പാടശേഖരങ്ങൾക്കുണ്ടാകുന്ന നഷ്ടം നികത്തുന്നതിനുള്ള മാർഗനിർദ്ദേങ്ങളും ഉത്തരവിലുണ്ടാകുമെന്ന് സബ് കളക്ടർ അഖിൽ വി. മേനോൻ യോഗത്തെ അറിയിച്ചു. ജലസേചന കനാലുകളിൽനിന്ന് ഒഴുക്കിനു തടസമാകുന്ന കരുവേലി ചണ്ടിയുൾപ്പടെയുള്ള എല്ലാ തടസവും ഒഴിവാക്കാൻ ജില്ല കളക്ടർ കർശന ഉത്തരവ് നൽകിയതായും അത് ഉടൻ നടപ്പിലാക്കുമെന്നും സബ് കളക്ടർ അറിയിച്ചു. പാടശേഖരങ്ങളുമായി ബന്ധപ്പെട്ട സ്ളൂയിസുകൾ സമയബന്ധിതമായി അടയ്ക്കുകയും തുറക്കുകയും വേണമെന്നും പ്രദേശത്തെ കൃഷി ഓഫീസർമാർ ഇത് ഉറപ്പുവരുത്തണമെന്നും ആവശ്യപ്പെട്ടു. ഇതിനാവശ്യമായ നിർദേശങ്ങൾ ബന്ധപ്പെട്ട ഉദ്യോഗസ്ഥർക്കു നൽകുമെന്ന് സബ് കളകടർ ഉറപ്പുനൽകി. കളക്ടറേറ്റിൽ നടന്ന യോഗത്തിൽ എംഎൽഎമാരായ മുരളി പെരുനെല്ലി, സി.സി. മുകുന്ദൻ, അന്തിക്കാട് ബ്ലോക്ക് പഞ്ചായത്ത് പ്രസിഡന്‍റ് കെ.കെ. ശശിധരൻ, അന്തിക്കാട്, താന്ന്യം, ചാഴൂർ, മണലൂർ, അരിന്പൂർ പഞ്ചായത്തുകളിലെ പ്രസിഡന്‍റുമാർ, വൈസ് പ്രസിഡന്‍റുമാർ, ജനപ്രതിനിധികൾ, കോൾ പാടശേഖരപ്രതിനിധികൾ, കൃഷി, വില്ലേജ് ഓഫീസർമാർ, ഇറിഗേഷൻ, കെ എൽഡിസി ഉദ്യോഗസ്ഥർ തുടങ്ങിയവർ പങ്കെടുത്തു.

പൊതുമരാമത്ത് റോഡിലെ അടച്ച കുഴികൾ ഒരാഴ്ചയ്ക്കുള്ളിൽ വീണ്ടും തകർന്നു

മുല്ലശേരി: സെന്‍ററിൽ പൊതുമരാമത്ത് റോഡിൽ നാട്ടുകാരുടെയും ജനപ്രതിനിധികളുടെയും പരാതിയെത്തുടർന്ന് അടച്ച കുഴികൾ ഒരാഴ്ചക്കുള്ളിൽ വീണ്ടും തകർന്നു. സെന്‍ററിൽ പാടൂർ റോഡിലേക്കു തിരിയുന്ന ഭാഗത്ത് കലുങ്കിന്‍റെ സ്ലാബ് തകർന്നതുമൂലമുണ്ടായ കുഴി കഴിഞ്ഞദിവസം മൂടിയിരുന്നു. നിരവധി അപകടങ്ങൾ ഉണ്ടായതിനെത്തുടർന്ന് നാട്ടുകാർ പഞ്ചായത്ത് അധികൃതർക്ക് പരാതി നൽകിയതിന്‍റെ അടിസ്ഥാനത്തിൽ കുഴി അടച്ചെങ്കിലും അടച്ചഭാഗത്തെ മെറ്റലും ടാറും വീണ്ടും ഇളകി കാനയിലേക്കു വീണതിനെത്തുടർന്നാണ് വീണ്ടും കുഴിരൂപപ്പെട്ടത്. പ്രധാന റോഡിലൂടെ നൂറുകണക്കിനു വാഹനങ്ങളാണു കടന്നുപോകുന്നത്. ഇരുചക്രവാഹനങ്ങൾ കുഴിയിൽചാടി അപകടത്തിൽപെടുക പതിവാണ്. വിദ്യാർഥികൾ അടക്കമുള്ള കാൽനടയാത്രക്കാർക്കും കുഴി ഭീഷണിയാണ്. പൊതുമരാമത്ത് വകുപ്പിന്‍റെ അനങ്ങാപ്പാറനയത്തിൽ നാട്ടുകാരും ജനപ്രതിനിധികളും കടുത്ത പ്രതിഷേധത്തിലാണ്. റോഡിലെ കുഴികൾ അടച്ച് പ്രശ്നത്തിനു ശാശ്വതപരിഹാരം കാണണമെന്നാണു നാട്ടുകാരുടെ ആവശ്യം.

പാഞ്ഞാളിൽ കണ്ട കാൽപ്പാട് പുലിയുടേതല്ല; കാട്ടുപൂച്ചയുടേത്

ചേലക്കര: പാഞ്ഞാളിൽ കണ്ടെത്തിയ കാൽപ്പാടുകൾ പുലിയുടേതല്ല, കാട്ടുപൂച്ചയുടേതാണെന്നു വനംവകുപ്പ് സ്ഥിരീകരിച്ചു. ഇതോടെ പ്രദേശത്തു നിലനിന്ന ആശങ്ക ഒഴിവായി. ചൊവ്വാഴ്ച രാവിലെയാണ് പാഞ്ഞാൾ ഗ്രാമപഞ്ചായത്ത് പരിധിയിൽ പുലിയുടെ കാൽപ്പാടുകളോടു സാമ്യമുള്ള അടയാളങ്ങൾ കണ്ടത്. ഇതോടെ ജനം ഭീതിയിലാവുകയും വിവരം വനംവകുപ്പിനെയും പോലീസിനെയും അറിയിക്കുകയും ചെയ്തു. പാഞ്ഞാൾ ഗ്രാമപഞ്ചായത്ത് വൈസ് പ്രസിഡന്‍റ് പി. കൃഷ്ണൻകുട്ടി അറിയിച്ചതിനെത്തുടർന്ന് അധികൃതർ ഉടൻ സ്ഥലത്തെത്തി പരിശോധന ആരംഭിച്ചു. വിശദമായ പരിശോധനകൾക്കുശേഷം കാൽപ്പാടുകൾ കാട്ടുപൂച്ചയുടേതാണെന്ന് വനംവകുപ്പ് അധികൃതർ സ്ഥിരീകരിക്കുകയായിരുന്നു. ഇതോടെയാണ് പ്രദേശവാസികൾക്ക് ആശ്വാസമായത്.

കർഷകർക്കു നൂതനസാങ്കേതികവിദ്യകൾ ലഭ്യമാക്കി കുടുംബശ്രീ കെ-ടാപ്പ് പദ്ധതി

തൃശൂർ: കാർഷികമേഖലയിൽ സുസ്ഥിരവികസനം ലക്ഷ്യമിട്ടു കുടുംബശ്രീ ടെക്നോളജി അഡ്വാൻസ്മെന്‍റ് പ്രോഗ്രാം (കെ-ടാപ്പ്) സാങ്കേതികവിദ്യകളും ആശയങ്ങളും കർഷകർക്കും സംരംഭകർക്കും ലഭ്യമാക്കുന്നു. ഇന്ത്യയിലെ പ്രമുഖ കാർഷിക-ഭക്ഷ്യ ഗവേഷണസ്ഥാപനങ്ങളുടെ 180 സാങ്കേതികവിദ്യകൾ പരിചയപ്പെടുത്തി ടൗണ്‍ഹാളിൽ സംഘടിപ്പിച്ച ടെക്നോളജി ഡിസെമിനേഷൻ ക്ലിനിക്കിൽ 350 കർഷകരും സംരംഭകരും പങ്കെടുത്തു. കുടുംബശ്രീ സ്റ്റേറ്റ് മിഷൻ പ്രോഗ്രാം മാനേജർ ഡോ. എസ്. ഷാനവാസ് സാങ്കേതികവിദ്യകൾ പരിചയപ്പെടുത്തി. ജില്ലാ മിഷൻ കോ-ഓർഡിനേറ്റർ ഡോ. യു. സലിൽ, കെ. രാധാകൃഷ്ണൻ, ജില്ലാ പ്രോഗ്രാം മാനേജർ കെ.എൻ. ദീപ എന്നിവർ പ്രസംഗിച്ചു. കേന്ദ്ര കിഴങ്ങുവിള ഗവേഷണകേന്ദ്രം, കേന്ദ്ര തോട്ടവിള ഗവേഷണകേന്ദ്രം, തഞ്ചാവൂർ നാഷണൽ ഇൻസ്റ്റിറ്റ്യൂട്ട് ഫോർ ഫുഡ് ടെക്നോളജി എൻട്രപ്രണർഷിപ്പ് ആൻഡ് മാനേജ്മെന്‍റ്, കേന്ദ്ര വാഴഗവേഷണകേന്ദ്രം, സെൻട്രൽ ഫുഡ് ടെക്നോളജി റിസർച്ച് ഇൻസ്റ്റിറ്റ്യൂട്ട്, നാഷണൽ ഇൻസ്റ്റിറ്റ്യൂട്ട് ഫോർ ഇന്‍റർഡിസിപ്ലിനറി സയൻസ് ആൻഡ് ടെക്നോളജി, കേരള കാർഷികസർവകലാശാല തുടങ്ങിയ സ്ഥാപനങ്ങൾ കുടുംബശ്രീ മിഷനുമായി ധാരണാപത്രത്തിൽ ഒപ്പുവച്ചു. പ്രമേഹസൗഹൃദ ഇൻസ്റ്റന്‍റ് കേക്ക് മിക്സ്, തേൻ അധിഷ്ഠിത ഉത്പന്നങ്ങൾ, ഹൈ പ്രോട്ടീൻ ലഘുഭക്ഷണങ്ങൾ, ഷുഗർഫ്രീ ഭക്ഷ്യ ഉത്പന്നങ്ങൾ, ലോ ഗ്ലൈസെമിക് ഇൻഡക്സ് ഉത്പന്നങ്ങൾ, നാച്ചുറൽ ഫുഡ് കളറുകൾ, മൾട്ടിഗ്രെയിൻ ബ്രെഡുകൾ, പലതരം ഫ്രൂട്ട് ജ്യൂസുകൾ, മുരിങ്ങ, നാളികേര, കിഴങ്ങുവിളകളുടെ മൂല്യവർധിത ഉത്പന്നങ്ങൾ, ചെറുധാന്യങ്ങൾ, അച്ചാറുകൾ, ഐസ്ക്രീമുകൾ, ഇൻസ്റ്റന്‍റ് ഫുഡ് മിക്സുകൾ തുടങ്ങി വൈവിധ്യമാർന്നവ പദ്ധതിയിലൂടെ തയാറാക്കാൻ കഴിയും.

വായനയും വിജ്ഞാനസമ്പാദനവും സംസ്കാരത്തിന്‍റെ അടിസ്ഥാനം: വൈശാഖൻ

തൃശൂർ: വായനയും വിജ്ഞാനസമ്പാദനവും സംസ്കാരത്തിന്‍റെ അടിസ്ഥാനമാണെന്നു സാഹിത്യകാരൻ വൈശാഖൻ പറഞ്ഞു. അമല മെഡിക്കല്‍ കോളജ്, നഴ്സിംഗ് കോളജ്, നഴ്സിംഗ് സ്കൂള്‍, പാരമെഡിക്കല്‍, ആയുര്‍വേദം പഠനവിഭാഗങ്ങളുടെ സംയുക്താഭിമുഖ്യത്തില്‍ നടത്തിയ വായനവാരാഘോഷം ഉദ്ഘാടനം ചെയ്യുകയായിരുന്നു അദ്ദേഹം. അമല ഡയറക്ടര്‍ ഫാ. ജൂലിയസ് അറയ്ക്കല്‍ സിഎംഐ അധ്യക്ഷത വഹിച്ചു. വായനയും മാനസിക ആരോഗ്യവും എന്ന വിഷയത്തിലുള്ള സെമിനാര്‍ അമല കമ്യൂണിറ്റി മെഡിസിന്‍ വിഭാഗം തലവന്‍ പ്രഫ.ഡോ. സി.ആര്‍. സാജു അവതരിപ്പിച്ചു. പി.എന്‍. പണിക്കര്‍ അനുസ്മരണം കൊടകര സഹൃദയ കോളജ് ലൈബ്രേറിയന്‍ ഡോ. ബി. ഷാജി നിർവഹിച്ചു. ഡെപ്യൂട്ടി ലൈബ്രേറിയന്‍ ജിക്കൊ ജെ. കോടങ്കണ്ടത്ത് വായനപ്രതിജ്ഞയ്ക്കു നേതൃത്വം നല്കി. അമല ഓങ്കോളജി വാർഡിലേക്കു പ്രജ്യോതിനികേതൻ കോളജ് സംഭാവനചെയ്ത പുസ്തകങ്ങൾ ഏറ്റുവാങ്ങി. ചീഫ് ലൈബ്രേറിയൻ പ്രഫ.ഡോ. എ.ടി. ഫ്രാന്‍സിസ്, ഡോ. ലോല ഭാസ്, സിസ്റ്റർ ലിത ലിസ്ബത്ത്, ഡോ. എം.സി. സാവിത്രി, സിസ്റ്റർ മിനി എസ്‌സിവി, ഡോ. ജയദീപ്, ലൈബ്രേറിയന്‍ വി.ജെ. ലിറ്റി, അയന ബേബി, മാക്ക് ലോഫ് മാത്യു മാർട്ടിൻ, ആൻ മരിയ ജോഷി, എസ്. ഹരിപ്രിയ, ഇ.എസ്. ശ്രീലേഖ എന്നിവര്‍ പ്രസംഗിച്ചു.

കണ്ണന്‍റെ കൊമ്പന്മാർ പുന്നത്തൂരിൽ എത്തിയിട്ട് അരനൂറ്റാണ്ട്

ഗുരുവായൂർ: കണ്ണന്‍റെ കൊമ്പന്മാർ പുന്നത്തൂർ ആനക്കോട്ടയിലെത്തിയിട്ട് നാളെ അരനൂറ്റാണ്ട് തികയും. 1975 ജൂൺ 26 നു ഗജരാജൻ കേശവന്‍റെ നേതൃത്വത്തിൽ ക്ഷേത്രനടയിൽനിന്ന് 25 ആനകളിൽ 19 ആനകൾ ഘോഷയാത്രയായി പുന്നത്തൂർ ആനക്കോട്ടയിൽ എത്തി ഗൃഹപ്രവേശം നടത്തുകയായിരുന്നു. പുന്നത്തൂർ കോവിലകത്തിന്‍റെ ആസ്ഥാനമായിരുന്ന പുന്നത്തൂർ കോട്ടയിലെ 9.75 ഏക്കർ സ്ഥലം 1.60 ലക്ഷം രൂപയ്ക്കു ഗുരുവായൂർ ദേവസ്വം വാങ്ങി. ഇപ്പോഴത്തെ ശ്രീവത്സം അതിഥിമന്ദിരം, പാഞ്ചജന്യം ടൂറിസ്റ്റ് ഹോം എന്നിവ സ്ഥിതിചെയ്യുന്ന സാമൂതിരിക്കോവിലകം പറമ്പിലായിരുന്നു അതുവരെ ആനകളുടെ ആസ്ഥാനം. ഗുരുവായൂർ ദേവസ്വത്തിന്‍റെ 36 ആനകളാണ് ഇപ്പോൾ ആനക്കോട്ടയിലുള്ളത്.

തെരുവുനായ്ശല്യം രൂക്ഷം: മേയർക്കു കത്തു നൽകി

തൃശൂർ: തെരുവുനായ്ശല്യം പരിഹരിക്കാൻ കോർപറേഷൻ അടിയന്തരനടപടിയെടുക്കണമെന്നു കൗണ്‍സിലർ ജോണ്‍ ഡാനിയൽ. ഷെൽട്ടർ ഒരുക്കി നായ്ക്കളെ പിടിച്ചുകെട്ടണം. അതാതു ഡിവിഷനിലെ വിഷയമെന്നുപറഞ്ഞു കൗണ്‍സിലർമാരുടെ തലിയിലിടാനാണു മേയർ ശ്രമിക്കുന്നത്. വിദ്യാർഥികളെ നായ്ക്കൾ ആക്രമിക്കാൻ വരുന്നെന്ന പരാതി രക്ഷിതാക്കൾ കൗണ്‍സിലർമാരെ അറിയിക്കുന്നുണ്ട്. പ്രായമായവർക്ക് ഓടിരക്ഷപ്പെടാൻപോലും കഴിയാത്ത സ്ഥിതിയാണ്. അനുയോജ്യമായ സ്ഥലംകണ്ടെത്തി ഷെൽട്ടർ സ്ഥാപിച്ചു നായ്ക്കളെ പിടിച്ചുകെട്ടാൻ കോർപറേഷൻ നടപടിയെടുക്കണം. സോൺ തിരിച്ചു സ്ഥലം കണ്ടെത്താം. ജനങ്ങളുടെ സഞ്ചാരസ്വാതന്ത്ര്യം തെരുവുനായ്ക്കളുടെ ശല്യംമൂലം നിഷേധിക്കപ്പെടുന്ന ഗുരുതരസാഹചര്യമാണുള്ളതെന്നും അടുത്ത കൗണ്‍സിൽ യോഗത്തിൽ വിഷയം സപ്ലിമെന്‍ററി അജൻഡയായി ഉൾപ്പെടുത്തി തീരുമാനമെടുക്കണമെന്നും ആവശ്യപ്പെട്ട് ജോണ്‍ ഡാനിയൽ മേയർ എം.കെ. വർഗീസിനു കത്തു നൽകി. പേപ്പട്ടികളെ കൊല്ലാൻ നിയമനിര്‍മാണം വേണമെന്ന് തൃശൂര്‍: പേവിഷബാധയുള്ള തെരുവുനായ്ക്കളെ കൊല്ലാന്‍ നിയമംകൊണ്ടുവരണമെന്നു ടോംയാസ് അഡ്വര്‍ടൈസിംഗ് ഉടമ തോമസ് പാവറട്ടി ആവശ്യപ്പെട്ടു. നായ്ക്കളുടെ കടിയേല്‍ക്കുന്നവരുടെ ചികിത്സയ്ക്കായി കോടിക്കണക്കിനു രൂപയുടെ മരുന്നുകളാണ് വേണ്ടിവരുന്നത്. സാധാരണ മനുഷ്യര്‍ക്കു തെരുവില്‍ കടിയേല്‍ക്കുമ്പോള്‍ മരുന്നുകമ്പനികളുടെ ലാഭം കൂടുകമാത്രമാണ് ചെയ്യുന്നതെന്ന് അദ്ദേഹം ആരോപിച്ചു.

അപകടമേൽക്കൂരയും ഷെഡും പൊളിച്ചുനീക്കി

തൃശൂർ: നഗരത്തിൽ അപകടഭീഷണി ഉയർത്തി നിലനിന്നിരുന്ന ഇരുമ്പുമേൽക്കൂരയും ഷെഡും പൊളിച്ചുനീക്കി. പുത്തൻപള്ളിക്കു മുൻപിൽ തിരക്കേറെയുള്ള റോഡിലേക്കു ചാഞ്ഞുനിന്നിരുന്ന തുരുന്പുപിടിച്ച ഇരുമ്പുമേൽക്കൂരയും ഷെഡുമാണ് പൊളിച്ചുനീക്കിയത്. അപകടഭീതി ഉയർത്തുന്ന ഇതിനെക്കുറിച്ച് ദീപിക വാർത്ത പ്രസിദ്ധീകരിച്ചിരുന്നു. തുടർന്നു വിഷയത്തിൽ നേരിട്ട് ഇടപെട്ട ഡിവിഷൻ കൗൺസിലർ സിന്ധു ആന്‍റോ ചാക്കോള ബന്ധപ്പെട്ട അധികാരികളെ ഇക്കാര്യം അറിയിക്കുകയും ഷെഡും മേൽക്കൂരയും പൊളിച്ചുനീക്കാൻ ഉടമയ്ക്കു നിർദേശം നൽകുകയുമായിരുന്നു. ഒരാഴ്ചയ്ക്കകം പൊളിച്ചുനീക്കാനായിരുന്നു നിർദേശമെങ്കിലും ശക്തമായ മഴയെതുടർന്ന് പൊളിച്ചുനീക്കൽ വൈകി. മഴ മാറിയതോടെയാണ് ഇവ പൊളിച്ചുനീക്കിയത്.

പൂങ്കുന്നം - പുഴയ്ക്കൽ വഴിയിലെ പ്രവേശനോത്സവം എന്ന്...?

തൃശൂർ: സ്കൂളുകളിലെല്ലാം പ്രവേശനോത്സവം കഴിഞ്ഞെങ്കിലും പൂങ്കുന്നം-പുഴയ്ക്കൽ വഴിയിലെ പ്രവേശനോത്സവം എന്നാണെന്ന് ആർക്കും പിടിയില്ല. റോഡുപണിയുടെ പേരിൽ മാസങ്ങളായി അടച്ചിട്ട ഈ വഴിയിൽ ഇപ്പോൾ പുഴയ്ക്കൽ ഭാഗത്തുനിന്നു തൃശൂരിലേക്കു വരുന്ന വാഹനങ്ങളെ കടത്തിവിടുന്നുണ്ടെങ്കിലും രണ്ടുഭാഗത്തേക്കും വാഹനഗതാഗതം തുറന്നുകൊടുത്താൽമാത്രമേ ഇപ്പോൾ അയ്യന്തോൾ-കുറിഞ്ഞ്യാക്കൽ മേഖലയിലും പുഴയ്ക്കലിലും അനുഭവപ്പെടുന്ന ഗതാഗതക്കുരുക്കിനു ശമനമുണ്ടാവുകയുള്ളു. മാസങ്ങളായി തൃശൂരിൽനിന്നു കോഴിക്കോട്, ഗുരുവായൂർ, കുന്നംകുളം വഴി മൈസൂർക്കും ബംഗളൂരുവിലേക്കുംവരെ പോകുന്ന സകല സ്വകാര്യ, കെഎസ്ആർടിസി ബസുകളും പൂങ്കുന്നംവഴി പോകാൻ സാധിക്കാത്തതിനാൽ അയ്യന്തോൾവഴിയാണ് പോകുന്നത്. ബസുകൾ പടിഞ്ഞാറേകോട്ട വഴി കളക്ടറേറ്റിനുമുന്നിലൂടെ അയ്യന്തോൾവഴി പുഴയ്ക്കലിലേക്കു പോകുന്പോൾ മറ്റു വാഹനങ്ങൾ അയ്യന്തോളിലേക്കു പോകുന്നത് ശങ്കരംകുളങ്ങര-ഉദയനഗർ വഴിയാണ്. ഭാരവാഹനങ്ങളും അസംഖ്യം ചെറുവാഹനങ്ങളും കടന്നുപോകുന്ന ഉദയനഗർ റോഡ് പൂർണമായും തകർന്നുതരിപ്പണമായി. സ്കൂളുകൾ, ഗവ.ലോ കോളജ്, കാർത്യായനി ക്ഷേത്രം എന്നിവിടങ്ങളിലേക്കുള്ള വാഹനങ്ങളും നഗരത്തിലെ പല സ്കൂളുകളിലേക്കുമുള്ള ബസുകളും സ്വകാര്യവാഹനങ്ങളുംകൂടി ഇതുവഴി പോകുന്നതിനാൽ മഴയ്ക്കു മുൻപ് അറ്റകുറ്റപ്പണി നടത്തിയ ഉദയനഗർ റോഡ് പൂർണമായും തകർന്നുകഴിഞ്ഞു. അമല ആശുപത്രിയിലേക്കും മറ്റും രോഗികളെയും കൊണ്ടുപോകുന്ന ആംബുലൻസുകളടക്കമുള്ളവയും തകർന്ന റോഡിന്‍റെ ദുരവസ്ഥയിൽ കുടുങ്ങാറുണ്ട്. ഉദയനഗർവഴിയുള്ള യാത്രയ്ക്കുപകരം മറ്റു വാഹനങ്ങളും പടിഞ്ഞാറേകോട്ട വഴി അയ്യന്തോളിലേക്കു തിരിയാൻ തുടങ്ങിയതോടെ കളക്ടറേറ്റ് മുതൽ പുഴയ്ക്കൽവരെയുള്ള റോഡിൽ വാഹനങ്ങളുടെ നീണ്ട ക്യൂ ദൃശ്യമാണ്.

കളക്ടറും എംപിയും എംഎൽഎയുമെത്തി; അത്രതന്നെ, സങ്കടങ്ങൾ ബാക്കി

കൊരട്ടി: ദേശീയപാത വികസനത്തിന്‍റെ ഭാഗമായി അടിപ്പാത/മേൽപ്പാല നിർമാണപ്രവൃത്തികൾ നടക്കുന്ന ചാലക്കുടി താലൂക്ക് പരിധിയിലെ കൊരട്ടി, ചിറങ്ങര, മുരിങ്ങൂർ, പേരാമ്പ്ര ഭാഗങ്ങളിൽ ബെന്നി ബഹനാൻ എംപിയുടെയും സനീഷ്കുമാർ ജോസഫ് എംഎൽഎയുടെയും ജില്ലാ കളക്ടർ അർജുൻ പാണ്ഡ്യന്‍റെയും നേതൃത്വത്തിൽ ഇന്നലെ നടന്ന സൈറ്റ് ഇൻസ്പെക്‌ഷനിൽ പരാതികളുടെ ഭാണ്ഡക്കെട്ടഴിച്ച് പ്രദേശവാസികൾ. നിർമാണപ്രവൃത്തികളിലെ അശാസ്ത്രീയതയും മേഖലകളിൽ മാസങ്ങളായി തുടരുന്ന ഗതാഗതക്കുരുക്കും പരിഹരിക്കാൻ കളക്ടറുടെ സാന്നിധ്യത്തിലും എസപി, ഡിവൈസിപി തലങ്ങളിലും നടന്ന ചർച്ചകളിൽ ഉരുത്തിരിഞ്ഞ നിർദേശങ്ങൾ നടപ്പാക്കിയിട്ടില്ലെന്നും എൻഎച്ച്എഐ പ്രോജക്ട് ഡയറക്ടറെ അടക്കം പങ്കെടുപ്പിച്ചുകൊണ്ടുള്ള ഈ സൈറ്റ് ഇൻസ്പെക്‌ഷൻ കേവലം പ്രഹസനം മാത്രമാണെന്നും നാട്ടുകാർ പറഞ്ഞു. ഇന്നലെ ഉച്ചകഴിഞ്ഞു 3.30 ഓടെ ചാലക്കുടി പിഡബ്ല്യുഡി റസ്റ്റ് ഹൗസിൽ ചേർന്ന യോഗത്തിൽ കൊരട്ടി, മേലൂർ, കാടുകുറ്റി, കൊടകര പഞ്ചായത്തുകളിലെ പ്രസിഡന്‍റുമാരായ പി.സി. ബിജു, എം.എസ്. സുനിത, പ്രിൻസി ഫ്രാൻസിസ്, അമ്പിളി സോമൻ എന്നിവർ അതിരൂക്ഷമായ വിമർശനങ്ങളാണ് ഉന്നയിച്ചത്‌. ഓരോ യോഗങ്ങളിലും തങ്ങൾ മുന്നോട്ടുവയ്ക്കുന്ന ഓരോ ആവശ്യങ്ങളും ഇപ്പ ശരിയാക്കിത്തരാമെന്ന വാഗ്ദാനവും നൽകി പോകുന്നതല്ലാതെ നടപ്പാക്കാറില്ലെന്നും കരാർ കമ്പനിയിൽ തങ്ങൾക്കു വിശ്വാസമില്ലെന്നും അവർ പറഞ്ഞു. ഉന്നതതലങ്ങളിലെടുക്കുന്ന യോഗതീരുമാനങ്ങളും നിർദേശങ്ങളും ആവർത്തിക്കുന്നതല്ലാതെ നടപടി ഉണ്ടാകാറില്ലെന്നും വിമർശിച്ചു. വിമർശനങ്ങൾ ക്ഷമയോടെ കേട്ടിരുന്ന ജില്ലാ കളക്ടർ തുടർന്ന് എൻഎച്ച്എഐക്കും കരാർ കമ്പനിക്കും കൃത്യമായ നിർദേശം നൽകി. പ്രധാന നിർദേശങ്ങൾ: 1. മെല്ലെപ്പോക്ക് ഒഴിവാക്കി നിർമാണം വേഗത്തിലാക്കണം. 2. സർവീസ് റോഡുകളിലെ കുണ്ടുംകുഴികളുമടച്ച് ടാറിംഗ് ജോലികൾ അടിയന്തരമായി പൂർത്തിയാക്കണം. 3. ഗതാഗതക്കുരുക്ക് ഒഴിവാക്കാൻ വാഹനങ്ങൾ വഴിതിരിച്ചുവിടുന്നതുമൂലം തകർന്ന ഗ്രാമീണ/പൊതുമരാമത്ത് റോഡുകൾ എൻഎച്ച്എഐയുടെ ചെലവിൽ നവീകരിക്കണം. (ഇതുസംബന്ധിച്ച് എന്തെങ്കിലും സാങ്കേതികതടസം ഉണ്ടെങ്കിൽ ഇടപെടാനുള്ള സന്നദ്ധതയും കളക്ടർ അറിയിച്ചു). 4. അപകടസ്ഥലങ്ങളിൽ ബാരിക്കേഡുകൾ നിർബന്ധമായും സ്ഥാപിക്കണം. 5. നിർമാണപ്രവൃത്തികൾ നടക്കുന്ന നിർദിഷ്ട ഇടങ്ങളിൽ ഹൈവേ അഥോറിറ്റിയുടെ സ്ഥിരമായ നിരീക്ഷണം ഉറപ്പാക്കണം. 6. വെള്ളക്കെട്ടുകൾ ഒഴിവാക്കുവാൻ ഡ്രെയ്നേജുകൾ കുറ്റമറ്റതാക്കണം. ഇവ പൂർണമായി പരിശോധിച്ച് പോരായ്മകൾ പരിഹരിക്കണം. 7. നിർമാണപ്രവൃത്തികൾക്കു കാലതാമസമോ തടസമോ ഇറിഗേഷൻ വകുപ്പിന്‍റെയോ വാട്ടർ അഥോറിറ്റിയുടെയോ ഭാഗത്തുനിന്നുണ്ടെങ്കിൽ യോഗംവിളിച്ച് പരിഹാരം കാണാമെന്നും കളക്ടർ പറഞ്ഞു. 8.എൻഎച്ച്എഐ ഉദ്യോഗസ്ഥരും പോലീസും അടക്കമുള്ള ഗ്രൂപ്പിൽ നിർമാണത്തിലെ അപാകതകളും നിർദേശങ്ങളും അറിയിക്കാൻ അതതു ഗ്രാമപഞ്ചായത്തിലെ പ്രസിഡന്‍റുമാരെയും ഉൾപ്പെടുത്താനും തീരുമാനിച്ചിട്ടുണ്ട്. പതിവുയോഗങ്ങളിലെ തീരുമാനങ്ങൾക്കപ്പുറം ഈ യോഗത്തിനു യാതൊരു പുതുമയും ഇല്ലെന്ന വിലയിരുത്തലിലാണ് യോഗത്തിൽ പങ്കെടുത്ത ജനപ്രതിനിധികളും മറ്റുള്ളവരും.

സൗദിയിൽ വാഹനാപകടം: നാട്ടിക സ്വദേശിനി മരിച്ചു

തൃപ്രയാർ: സൗദിയിൽ വാഹനാപകടത്തിൽ നാട്ടിക സ്വദേശിയായ വിദ്യാർഥി മരിച്ചു. നാട്ടിക വെള്ളാഞ്ചേരി ക്ഷേത്രത്തിനു വടക്ക് കല്ലിപ്പറമ്പിൽ സിദ്ധിഖ് ഹസൈനാരുടെ മകൾ ഫർഹാന ഷെറിൻ(18) ആണ് മരിച്ചത്. ചൊവ്വാഴ്ച പുലർച്ചെയാണ് അപകടം. അപകടത്തിൽ സിദ്ധിഖിന്‍റെ ഇരട്ടക്കുട്ടികളിൽ ഒരാളായ ഫർഹാന ഷെറിൻ സംഭവസ്ഥലത്ത് വച്ചുതന്നെ മരിച്ചു. സിദ്ധിഖും ഭാര്യയും മറ്റു രണ്ടു കുട്ടികളും പരിക്കുകളോടെ ആശുപത്രിയിൽ ചികിത്സയിലാണ്. ഇവരിൽ ഒരാളുടെ നില ഗുരുതരമാണെന്നാണ് ലഭിക്കുന്ന വിവരം. സന്ദർശക വിസയിലെത്തിയ കുടുംബത്തിന്‍റെ വിസ പുതുക്കുന്നതിനായി ബഹറിനിൽ പോയി തിരിച്ച് റിയാദിലേക്ക് വരുന്നതിനിടെയാണ് അപകടം. ദമാം-റിയാദ് ഹൈവേയിൽ ഖുറൈസിനു സമീപം ഹുറൈറയിൽ ഇവർ സഞ്ചരിച്ചിരുന്ന വാഹനം അപകടത്തിൽപ്പെടുകയായിരുന്നു. മൃതദേഹം അടുത്ത ദിവസങ്ങളിൽ നാട്ടിലെത്തിച്ച് കബറടക്കും. മാതാവ്: ഷമീറ. സഹോദരങ്ങൾ: റിസ്‌വാന നസ്‌റിൻ, റിഷാന പർവിൻ, ഫർസാന യാസ്മിൻ, മുഹമ്മദ്‌ അക്സം.

ഓട്ടോഡ്രൈവർ ക്ഷേത്രക്കുളത്തിൽ മുങ്ങിമരിച്ചു

വടക്കാഞ്ചേരി: ഓട്ടോറിക്ഷഡ്രൈവർ പട്ടിച്ചിറക്കാവ് ക്ഷേത്രക്കുളത്തിൽ മുങ്ങിമരിച്ചു. തെക്കുംകര തിരുവോണംസ്വദേശി കല്ലിപറമ്പിൽ വീട്ടിൽ വേലായുധൻ (മണിനായർ) മകൻ സുനിൽകുമാർ (46) ആണ് മരിച്ചത്. വടക്കാഞ്ചേരി നഗരസഭയിലെ പട്ടിച്ചിറക്കാവ് ക്ഷേത്രക്കുളത്തിൽ സുഹൃത്തുക്കളോടൊപ്പം നീന്തുന്നതിനിടെ മുങ്ങിത്താഴുകയായിരുന്നു. കൂട്ടുകാർ വിവരമറിയിച്ചതിനെ തുടർന്ന് വടക്കാഞ്ചേരി ഫയർ ഫോഴ്‌സും സ്കൂബടീമും നടത്തിയ തെരച്ചിലിൽ മൃതദേഹം കണ്ടെത്തുകയായിരുന്നു. വടക്കാഞ്ചേരി പോലീസ് മേൽനടപടികൾ സ്വീകരിച്ചു. സംസ്കാരം നടത്തി. അമ്മ: മണി. മകൻ: അഭിനവ്.

മെറിറ്റ് ഡേയും വിവിധ ക്ലബ്ബുകളുടെ ഉദ്ഘാടനവും

ഇരിങ്ങാലക്കുട: ഡോൺ ബോസ്കോ ഹയർ സെക്കൻഡറി സ്കൂളിൽ എസ്എസ്എൽസി, പ്ലസ്‌ടു ഫുൾ എപ്ലസ് കരസ്ഥമാക്കിയ വിദ്യാർഥികളെ ആദരിച്ചു. അതോടൊപ്പം സ്കൂളിലെ ഹൗസ് സിസ്റ്റത്തിന്‍റേയും വിവിധ ക്ലബുകളുടേയും ഉദ്ഘാടനം ഫാ. സന്തോഷ് മാത്യു നിർവഹിച്ചു. പ്രിൻസിപ്പൽ ഫാ. ഷിനോ കളപ്പുരയ്ക്കൽ സ്വാഗതം പറഞ്ഞു. സ്കൂൾ മാനേജർ ഫാ. ഇമ്മാനുവൽ വട്ടക്കുന്നേൽ, സെൻട്രൽ സ്കൂൾ പ്രിൻസിപ്പൽ ഫാ. ജിതിൻ മൈക്കിൾ, അഡ്‌മിനിസ്ട്രേറ്റർ ഫാ. ജീനോ കുഴിതൊട്ടിയിൽ, എൽപി ഹെഡ്മിസ്ട്രസ് സിസ്റ്റർ വി.പി. ഓമന, പിടിഎ പ്രസിഡന്‍റ് എം.ബി. സജിത്ത്, സ്റ്റാഫ് സെക്രട്ടറി സിൽജി ജോൺസൺ എന്നിവർ സന്നിഹിതരായിരുന്നു. വിദ്യാർഥി പ്രതിനിധികളായ അലൻ പോൾ, അലീന അമർ എന്നിവർ നന്ദി പറഞ്ഞു.

പെരുംതോടിന്‍റെ സംരക്ഷണഭിത്തി തകർന്നു

കൊറ്റംകുളം: പെരുംതോട് ഇറിഗേഷൻ ചീപ്പിന്‍റെ കരിങ്കൽ ഭിത്തി തകർന്നു. പെരിഞ്ഞനം കൊറ്റംകുളം പെരുംതോട് പാലത്തിനോട് ചേർന്ന് ഇക്കഴിഞ്ഞ മേയ്‌ മാസത്തിൽ ഹിറ്റാച്ചി ഉപയോഗിച്ച് കുളവാഴമാലിന്യം നീക്കം ചെയ്തപ്പോളായിരുന്നു പെരുംതോടിന്‍റെ സംരക്ഷണ ഭിത്തിയിൽ ആദ്യം വിള്ളൽ വീണത്. മഴ ശക്തിയായപ്പോൾ വിള്ളലുകൾക്കിടയിലൂടെ മഴവെള്ളം ഒലിച്ചിറങ്ങി ഭിത്തി പലയിടത്തും ഇടിഞ്ഞു താഴുകയായിരുന്നു. ഇപ്പോൾ ഇവിടെ റോഡ് തകർച്ചാഭീഷണി നേരിടുന്ന അവസ്ഥയാണ്. മഴ കനക്കുമെന്ന മുന്നറിയിപ്പ് പ്രദേശവാസികൾക്ക് ആശക ഉണ്ടാക്കുന്നു. കരിങ്കൽ ഭിത്തി തകർന്ന വിഷയത്തിൽ ബന്ധപ്പെട്ട അധികൃതർ ഇടപെട്ട് പ്രശ്നപരിഹാരം കാണണമെന്ന ആവശ്യം ഉയർന്നിട്ടുണ്ട്.

വിദ്യാഭ്യാസത്തിലൂടെ ജ്ഞാനമെന്ന ആറാമിന്ദ്രിയം തുറക്കണം: ജസ്റ്റീസ് കുര്യന്‍ ജോസഫ്

ഇരിങ്ങാലക്കുട: വിദ്യാഭ്യാസമെന്നത് വിവരങ്ങളുടെ ലഭ്യതയല്ല, ജ്ഞാനത്തിലുള്ള വളര്‍ച്ചയാണ് എന്ന് ജസ്റ്റീസ് കുര്യന്‍ ജോസഫ് അഭിപ്രായപ്പെട്ടു. ഇരിങ്ങാലക്കുട സെന്‍റ് ജോസഫ്സ് കോളജില്‍ നടന്ന സസ്‌നേഹം പരിപാടി ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഉന്നതവിദ്യാഭ്യാസ രംഗത്ത് നമ്മുടെ അച്ചടക്കം നമ്മുടെ ഭാവിയെ നിര്‍ണയിക്കും. പുതിയ കാലത്തെ വിദ്യാര്‍ഥികള്‍ക്കൊപ്പം സഞ്ചരിച്ചുകൊണ്ട് മാതാപിതാക്കളും അധ്യാപകരും വഴികാട്ടികളാവണം. ഭരണഘടനയിലെ അവകാശങ്ങള്‍ മാത്രമല്ല കടമകളും യഥാവിധി നിര്‍വഹിക്കുന്ന തലമുറയാണ് പ്രതീക്ഷ തരുന്നതെന്ന് അദ്ദേഹം കൂട്ടിച്ചേര്‍ത്തു. ചടങ്ങില്‍ പ്രിന്‍സിപ്പല്‍ സിസ്റ്റര്‍ ഡോ. ബ്ലെസി അധ്യക്ഷത വഹിച്ചു. ഐക്യുഎസി കോ-ഓര്‍ഡിനേറ്റര്‍ ഡോ. ടി.വി. ബിനു, പിടിഎ വൈസ് പ്രസിഡന്‍റ്് പി.എന്‍. ഗോപകുമാര്‍, സന ബാബു തട്ടില്‍, ഷിജി തോമസ് എന്നിവര്‍ സംസാരിച്ചു. മാതാപിതാക്കള്‍ക്കായി സംഘടിപ്പിച്ച ഓറിയന്‍റേഷന്‍ ക്ലാസ് ഫാ. സിബു കള്ളാംപറമ്പില്‍ നയിച്ചു.

വൈദ്യുതി പോസ്റ്റിൽ തീപിടിത്തം പരിഭ്രാന്തി പരത്തി

കൊരട്ടി: കൊരട്ടി - കാടുകുറ്റി പൊതുമരാമത്ത് റോഡിൽ കാതിക്കുടം സൗത്ത് ഇന്ത്യൻ ബാങ്കിനു സമീപം വൈദ്യുതി പോസ്റ്റിലെ കമ്പികളിൽ തീപിടിച്ചത് പ്രദേശവാസികൾക്കിടയിലും വാഹന - കാൽനട യാത്രക്കാർക്കിടയിലും പരിഭ്രാന്തി പരത്തി. ഇന്നലെ ഉച്ചയ്ക്ക് 12.30 മണിയോടെയായിരുന്നു സംഭവം. 11 കെവി ലൈനും എൽടി ലൈനും കടന്നുപോകുന്ന പോസ്റ്റിൽ നിരവധി കേബിൾ ടിവി, ഇന്‍റർനെറ്റ് കണക്‌ഷനുകൾക്കായുള്ള ലൈനുകളും ബന്ധിപ്പിച്ചിട്ടുണ്ട്. സ്വകാര്യ കേബിൾ ശൃംഖലയുടെ ബോക്സിൽ നിന്നുള്ള ഷോർട്ട് സർക്യൂട്ട് ആയിരിക്കാം തീപിടുത്തത്തിന് കാരണമായതെന്നാണ് നിഗമനം. സംഭവസമയത്ത് അതിലൂടെ കടന്നുപോയ കെഎസ്ഇബി ജീവനക്കാരൻ ലൈൻ ഓഫ് ചെയ്യുന്നതിന് ഓഫീസിലേക്കും തത്സമയം സംഭവസ്ഥലത്തുണ്ടായിരുന്ന കൊരട്ടി പോലീസ് സ്റ്റേഷനിലെ ഉദ്യാേഗസ്ഥൻ ചാലക്കുടി ഫയർഫോഴ്സിനെയും വിവരമറിയിച്ചു. ഇതിനിടയിൽ തീ അണയ്ക്കാൻ പ്രദേശവാസികൾ ശ്രമിച്ചെങ്കിലും നടന്നില്ല. ഫയർഫാേഴ്സ് സ്ഥലത്തെത്തിയതിനു ശേഷമാണ് തീ നിയന്ത്രണ വിധേയമാക്കാനായത്. സംഭവമറിഞ്ഞ് കെഎസ്ഇബി ഉദ്യാേഗസ്ഥരും സ്ഥലത്തെത്തിയിരുന്നു.

യുവാവിനെ കുത്തിപ്പരിക്കേൽപ്പിച്ച കേസിലെ പ്രതി അറസ്റ്റിൽ

ചാലക്കുടി: സൗത്ത് മേല്പാലത്തിന്‍റെ അടിയിൽ എലിഞ്ഞിപ്ര മടത്തിപ്പറമ്പിൽ രാജനെ (32) കുത്തിപ്പരിക്കേൽപ്പിച്ച കേസിൽ പ്രതി അറസ്റ്റിൽ. ചേർത്തല മുരുകൻ (47) നെയാണ് അറസ്റ്റ് ചെയ്തത്. കഴിഞ്ഞദിവസം രാത്രി 9.30ന് പണം ചോദിച്ചതിനെ തുടർന്നുള്ള തർക്കത്തേയും സ്ഥിരമായി പണം ചോദിക്കുന്നതിലുള്ള വൈരാഗ്യത്തിൽ കത്തി കൊണ്ട് കുത്തി പ്പരിക്കേൽപ്പിക്കുകയായിരുന്നു. ഗുരുതരമായി പരിക്കേറ്റ രാജനെ തൃശൂർ മെഡിക്കൽ കോളജ് ആ ശൂപത്രിയിൽ പ്രവേശിപ്പിച്ചു. ചാലക്കുടി പോലീസ് വധശ്രമത്തിന് കേസ് എടുത്തു. സംഭവശേഷം സ്ഥലത്ത് നിന്ന് രക്ഷപ്പെട്ട പ്രതിയെ ചാലക്കുടി റെയിൽവേ സ്റ്റേഷനിൽ നിന്നുമാണ് പോലീസ് അറസ്റ്റ് ചെയ്തത്. പ്രതിയായ മുരുകൻ ചാലക്കുടി സൗത്ത് മേൽപാലത്തിന് താഴെ ചെരുപ്പും, ബാഗും തുന്നുന്ന ജോലി ചെയ്യുന്നയാളാണ്. പരിക്കേറ്റ രാജൻ പാലത്തിന് താഴെയാണ് കിടന്നുറങ്ങുന്നത്. അതിരപ്പിള്ളി പോലീസ് സ്റ്റേഷൻ ഇൻസ്പെക്ടർ വി. ബിജു ചാലക്കുടി പോലീസ് സ്റ്റേഷൻ എസ്ഐ മാരായ പി.വി. പാട്രിക്. ജോഫി ജോസ്, എഎസ്ഐ ബൈജു, സിപിഒമാരായ മാർട്ടിൻ പോൾ, അഗസ്റ്റിൻ, കെ.എ. അജിൻ എന്നിവരാണ് അന്വേഷണ സംഘത്തിൽ ഉണ്ടായിരുന്നത്.

കൂടല്‍മാണിക്യം ക്ഷേത്രത്തിലെ കഴകവിവാദം പ്രബുദ്ധകേരളത്തിന് അപമാനം: കെ.പി. രാജേന്ദ്രന്‍

ഇരിങ്ങാലക്കുട: കൂടല്‍മാണിക്യം ക്ഷേത്രത്തില്‍ ഈയിടെ ഉണ്ടായ കഴക വിവാദം പ്രബുദ്ധകേരളത്തിന് അപമാനമാണെന്ന് സിപിഐ ദേശീയ എക്‌സി. അംഗം കെ.പി. രാജേന്ദ്രന്‍ പ്രസ്താവിച്ചു. കുട്ടംകുളം സമരത്തിന്‍റെ 79-ാം വാര്‍ഷികാചരണത്തിന്‍റെ ഭാഗമായി സംഘടിപ്പിച്ച സമര സ്മരണ ഉദ്ഘാടനം ചെയ്യുകയായിരുന്നു അദ്ദേഹം. സമരഭൂമിയില്‍ സിപിഐ ജില്ലാ സെക്രട്ടറി കെ.കെ. വത്സരാജ് പതാക ഉയര്‍ത്തി. സംഘാടക സമിതി കണ്‍വീനര്‍ ടി.കെ. സുധിഷ് അധ്യക്ഷത വഹിച്ചു. കെ.ജി. ശിവാനന്ദന്‍, പി. മണി, അഡ്വ. പി.ജെ. ജോബി, ഷീനപറയങ്ങാട്ടില്‍, കെ.എസ്. ജയ, എന്‍.കെ. ഉദയപ്രകാശ്, ബിനോയ് ഷബീര്‍, അനിത രാധാകൃഷ്ണന്‍, മിഥുന്‍ പോട്ടക്കാരന്‍ തുടങ്ങിയവര്‍ സംസാരിച്ചു.

ബഡ്സ് സ്‌കൂള്‍ വിദ്യാര്‍ഥികള്‍ക്കായി പരിശീലനമൊരുക്കി ക്രൈസ്റ്റ് എന്‍ജിനീയറിംഗ് കോളജ്

ഇരിങ്ങാലക്കുട: ബഡ്സ് സ്‌കൂള്‍ വിദ്യാര്‍ഥികളെ സ്വയപര്യാപ്തതയിലേക്ക് നയിക്കാന്‍ ലക്ഷ്യമിട്ട് ഇരിങ്ങാലക്കുട ക്രൈസ്റ്റ് എന്‍ജിനീയറിംഗ് കോളജിന്‍റെ ആഭിമുഖ്യത്തില്‍ പരിശീലന പരിപാടി സംഘടിപ്പിച്ചു. ഇ- വേസ്റ്റില്‍ നിന്ന് ആഭരണങ്ങള്‍, കീ ചെയിനുകള്‍ മുതലായ കര കൗശല വസ്തുക്കള്‍ നിര്‍മിക്കുന്നതിനുള്ള പരിശീലനമാണ് എന്‍ജിനീയറിംഗ് കോളജ് വിദ്യാര്‍ഥികളും അധ്യാപകരും ചേര്‍ന്ന് ഒരുക്കിയത്. ചേര്‍പ്പ് ബ്ലോക്ക് പഞ്ചായത്തിന്‍റെ കീഴില്‍ പ്രവര്‍ത്തിക്കുന്ന വെങ്ങിണിശേരി സാന്ത്വനം ബഡ്സ് സ്‌കൂളിലെ വിദ്യാര്‍ഥികള്‍ക്കായി അഞ്ച് ദിവസങ്ങളിലായാണ് പരിശീലനം സംഘടിപ്പിച്ചത്. പരിശീലനത്തിന്‍റെ ഭാഗമായി വിദ്യാര്‍ഥികള്‍ നിര്‍മിച്ച ഉത്പന്നങ്ങളുടെ പ്രദര്‍ശനം ജില്ലാതല ബഡ്സ് പ്രവേശനോത്സവത്തോടനുബന്ധിച്ചു സംഘടിപ്പിച്ചു. പരിശീലന പരിപാടിക്ക് നേതൃത്വം നല്‍കിയതിന് ക്രൈസ്റ്റ് എന്‍ജിനീയറിംഗ് കോളജിനുള്ള സാക്ഷ്യ പത്രം മന്ത്രി ഡോ. ആര്‍. ബിന്ദുവില്‍ നിന്ന് കോളജ് എക്‌സിക്യൂട്ടീവ് ഡയറക്ടര്‍ ഫാ. ജോണ്‍ പാലിയേക്കര സിഎംഐ ഏറ്റുവാങ്ങി. ക്രൈസ്റ്റ് കോളജ് ഓഫ് എന്‍ജിനീയറിംഗ് ഔട്ട് റീച് ഡയറക്ടര്‍ ഡോ. സുധ ബാലഗോപാലന്‍റെ നേതൃത്വത്തില്‍ അധ്യാപകരായ ഡോ. വിഷ്ണു പി. മദന്‍മോഹന്‍, പി.എം. സ്വാതി, ഫെബിന്‍ രാജു തുടങ്ങിയവര്‍ പരിശീലനത്തിന് നേതൃത്വം നല്‍കി.

പുല്ലൂര്‍ സേക്രഡ് ഹാര്‍ട്ട് മിഷന്‍ ഹോസ്പിറ്റലില്‍ പുതിയ സിടി സ്‌കാന്‍ സെന്‍റർ ഉദ്ഘാടനം നാളെ

ഇരിങ്ങാലക്കുട: പുല്ലൂര്‍ സേക്രഡ് ഹാര്‍ട്ട് മിഷന്‍ ഹോസ്പിറ്റലില്‍ പുതിയതായി ആരംഭിക്കുന്ന സിടി സ്‌കാന്‍ സെന്‍ററിന്‍റെ ഉദ്ഘാടനവും അമ്പത്തിയെട്ടാം ഹോസ്പിറ്റല്‍ ഡേ ആഘോഷം ഉദ്ഘാടനവും നാളെ രാവിലെ 11ന് ഇരിങ്ങാലക്കുട രൂപത ബിഷപ് മാര്‍ പോളികണ്ണൂക്കാടന്‍ നിര്‍വഹിക്കും. സമരിറ്റന്‍ സിസ്റ്റേഴ്സ് സ്നേഹോദയ പ്രൊവിന്‍ഷ്യല്‍ സുപ്പീരിയറും ഹോസ്പിറ്റല്‍ ഡയറക്ടറും മെഡിക്കല്‍ സൂപ്രണ്ടുമായ സിസ്റ്റര്‍ ഡോ. ‍ റിറ്റ സി എസ്എസ് അധ്യക്ഷത വഹിക്കും. ഇരിങ്ങാലക്കുട ജോയിന്‍റ്് റീജണല്‍ ട്രാന്‍സ്പോര്‍ട്ട് ഓഫീസര്‍ ബിജു ഐസക് മുഖ്യ പ്രഭാഷണം നടത്തും. മുരിയാട് പഞ്ചായത്ത് പ്രസിഡന്‍റ് ജോസ് ചിറ്റിലപ്പിള്ളി, ഇരിങ്ങാലക്കുട രൂപത ഫിനാന്‍സ് ഓഫീസര്‍ ഫാ. ലിജോ കോങ്കോത്ത്, ഹോസ്പിറ്റലിലെ സീനിയര്‍ ഡോക്ടര്‍ എം.വി. വാറുണ്ണി, വാര്‍ഡ് മെമ്പര്‍ മാണി സജയന്‍ എന്നിവര്‍ ആശംസകള്‍ നേരും. മാഗ്നസ് ഡയഗ്നോസ്റ്റിക്സുമായി സഹകരിച്ചാണ് പുല്ലൂര്‍ മിഷന്‍ ആശുപത്രിയില്‍ ഏറ്റവും ആധുനിക സവിശേഷതകളോടുകൂടിയ ഇരുപത്തിനാലു മണിക്കൂറും പ്രവര്‍ത്തിക്കുന്ന സിടി സ്‌കാന്‍ സെന്‍ററും അള്‍ട്രാ സൗണ്ട് സ്‌കാനിംഗും അനുബന്ധസൗകര്യങ്ങളും ഒരുക്കിയിരിക്കുന്നത്. ഇതോടെ ആശുപത്രിയിലെ എമര്‍ജന്‍സി ഡിപ്പാര്‍ട്മെന്‍റിന്‍റെ സേവനങ്ങളും രോഗിവിശകലനവും പരിചരണവും കൂടുതല്‍ കാര്യക്ഷമമാക്കാന്‍ സാധിക്കുമെന്ന് ഹോസ്പിറ്റല്‍ അഡ്മിനിസ്ട്രേറ്റര്‍ സിസ്റ്റര്‍ ഫ്ലോറി സിഎസ്എസ്, നഴ്സിംഗ് സൂപ്രണ്ട് സിസ്റ്റര്‍ വിന്‍സി സിഎസ്എസ്, മാനേജര്‍ ഓപ്പറേഷന്‍സ് ആന്‍ജോ ജോസ് എന്നിവര്‍ പത്രസമ്മേളനത്തില്‍ അറിയിച്ചു.

യൂത്ത് കോൺഗ്രസിന്‍റെ റോഡ് ഉപരോധത്തില്‌ സംഘര്‌ഷം

ചേർപ്പ്: തൃശൂർ - കൊടുങ്ങല്ലൂർ - തൃപ്രയാർ റൂട്ടിലെ ബസുകളുടെ അമിത വേഗതയും ഗുണ്ടായിസവുംമൂലം ഉണ്ടാകുന്ന അപകടപരമ്പരയിൽ പ്രതിഷേധിച്ച് ഇന്നലെ രാവിലെ പെരുമ്പിള്ളിശേരി സെന്‍ററിൽ യൂത്ത് കോൺഗ്രസ് ചേർപ്പ് മണ്ഡലം കമ്മിറ്റി പ്രതിഷേധ മാർച്ച് നടത്തി. ചേർപ്പ് സിഐ സി. രമേഷിന്‍റെ നേതൃത്വത്തിലുള്ള പോലീസ് പ്രതിഷേധ മാർച്ച് തടയാൻ ശ്രമിച്ചത് കോൺഗ്രസ് പ്രവർത്തകരും പോലീസും തമ്മിൽ ബലപ്രയോഗത്തിനിടയാക്കി. പോലീസ് ഇവരെ അറസ്റ്റ് ചെയ്തു നീക്കി. ഗതാഗതതടസം സൃഷ്ടിച്ചതിന് പോലീസ് ഇവർക്കെതിരേ കേസെടുത്തു. ഉപരോധസമരം മുൻ ചേർപ്പ് ഗ്രാമപഞ്ചായത്ത് പ്രസിഡന്‍റ് സി.കെ. വിനോദ് ഉദ്ഘാടനംചെയ്തു. യൂത്ത് കോൺഗ്രസ് മണ്ഡലം പ്രസിഡന്‍റ് സുജിത്ത് തേറമ്പത്ത് അധ്യക്ഷനായി. ബ്ലോക്ക് കോൺഗ്രസ് പ്രസിഡന്‍റ് സിജോ ജോർജ്, വൈസ് പ്രസിഡന്‍റ് എം. സുജിത്ത്കുമാർ, മണ്ഡലം പ്രസിഡന്‍റ് കെ. രാമചന്ദ്രൻ, ജോർജ് ആന്‍റോ, ബാലു കനാൽ, മജീദ് മുത്തുള്ളിയാൽ സംസാരിച്ചു.

താക്കീതുമായി ഡിവൈഎഫ്ഐ പ്രവർത്തകർ

ചേർപ്പ്: തൃശൂർ - കൊടുങ്ങല്ലൂർ - തൃപ്രയാർ റൂട്ടുകളിൽ സ്വകാര്യ ബസുകളുടെ അമിതവേഗതമൂലം വർധിച്ചുവരുന്ന അപകടങ്ങളിൽ പ്രതിഷേധിച്ച് ഡിവൈഎഫ്ഐ ചേർപ്പ് മേഖല കമ്മിറ്റിയുടെ നേതൃത്വത്തിൽ പെരുമ്പിള്ളിശേരിയിൽ ബസ് തടഞ്ഞ് ജീവനക്കാർക്ക് ബോധവൽകരണ നിർദേശംനൽകി. സിപിഎം ചേർപ്പ് ലോക്കൽ സെക്രട്ടറി എ.വി. സഹദേവൻ ഉദ്ഘാടനംചെയ്തു. ബ്ലോക്ക് പഞ്ചായത്ത്‌ മെമ്പർ ജെറിൻ ജോസ്, ലോക്കൽ കമ്മിറ്റി അംഗം എം.എച്ച്. സജീർ, എ.ജെ. ജോഷോ, എം.ജെ. ജയിൻസൺ രാഹുൽ ജയപ്രകാശ്, പി.ഡി. ജിതിൻ, സി.ഡി. അജിൽ തുടങ്ങിയവർ നേതൃത്വംനൽകി. സംസ്ഥാനപാതയിൽ മാർഗതടസം സൃഷ്ടിച്ചതിന് പോലീസ് ഇവർക്കെതിരേ കേസെടുത്തു.

മദ്യപന്‌‌ സംസ്ഥാനപാതയിലെ ഗതാഗതം സ്തംഭിപ്പിച്ചു

വടക്കാഞ്ചേരി: മദ്യപിച്ചെത്തിയ യുവാവ് സംസ്ഥാനപാതയിൽ ഗതാഗതം സ്തംഭിപ്പിച്ചു. ഇന്നലെ ഉച്ചകഴിഞ്ഞ് 2.30ന് തൃശുർ - ഷൊർണൂർ സംസ്ഥാനപാതയിൽ ഓട്ടുപാറ സെന്‍ററിലായിരുന്നു യുവാവിന്‍റെ പരാക്രമം. ശരീരം മുഴുവൻ രക്തമൊലിക്കുന്ന നിലയിലായിരുന്നു. യുവാവ് സംസ്ഥാനപാതയിൽ വിലങ്ങനെ കിടന്നതോടെയാണ് വാഹനഗതാഗതം തടസപ്പെട്ടത്. പ്രദേശത്തെ ഓട്ടോറിക്ഷ ഡ്രൈവർമാരും നാട്ടുകാരുംചേർന്ന് റോഡിന്‍റെ ഓരത്തേക്കു മാറ്റി കിടത്തിയെങ്കിലും യുവാവ് വീണ്ടും റോഡിന്‍റെ നടുവിൽകിടന്നു. നാട്ടുകാർ വിവരമറിയിച്ചതിനെ തുടർന്ന് വടക്കാഞ്ചേരി പോലീസ് സ്ഥലത്തെത്തി യുവാവിനെ കീഴ്പെടുത്തി വടക്കാഞ്ചേരി ജില്ലാ ആശുപത്രിയിലെത്തിച്ചു. പിന്നീട് സ്റ്റേഷനിലേക്കു കൊണ്ടുപോയി.

സ്കൂളിലെ ഭക്ഷ്യവിഷബാധ; പിടിഎ പ്രസിഡന്‍റിനുനേരേ ആക്രമണം

എരുമപ്പെട്ടി: ഭക്ഷ്യവിഷബാധയുണ്ടായ എരുമപ്പെട്ടി ഗവ.എൽപി സ്കൂളിലെ പിടിഎ പ്രസിഡന്‍റ് പി.ടി. സുശാന്തിനുനേരെ ആക്രമണം. സ്കൂളിലെത്തിയ നെല്ലുവായ് മുണ്ടൻകോട് സ്വദേശി പ്രമോദാണ് ആക്രമണം നടത്തിയത്. ഇയാൾ മദ്യപിച്ചിരുന്നതായി സുശാന്തും പിടിഎ കമ്മറ്റി അംഗങ്ങളും പറഞ്ഞു. ഇന്നലെ രാവിലെ 10.30 ഓടെയായിരുന്നു സംഭവം. സ്കൂളിലെ കിണർവെള്ളത്തിൽ കോളിഫോം ബാക്ടീരിയയുടെ സാന്നിധ്യം കണ്ടെത്തിയതിനെ തുടർന്ന് കിണർ ശുചീകരണം നടത്താൻ സ്കൂളിൽ പിടിഎ അംഗങ്ങളോടൊപ്പം നിൽക്കുകയായിരുന്നു സുശാന്ത്. ഈ സമയം സ്കൂൾ കോമ്പൗണ്ടിലെത്തിയ പ്രമോദ് സുശാന്തിനെ അസഭ്യംപറയുകയും മർദിക്കുകയും സ്റ്റീൽ വള ഉപയോഗിച്ച് മുഖത്ത് ഇടിക്കുകയുംചെയ്തു. പ്രമോദിന്‍റെ കുട്ടി ഈ സ്കൂളിൽ പഠിക്കുന്നുണ്ട്. ഈ കുട്ടിയും ഭക്ഷ്യ വിഷബാധയേറ്റ് ചികിത്സയിൽ കഴിഞ്ഞിരുന്നു. ഭക്ഷ്യവിഷബാധയ്ക്കുകാരണം പിടിഎ പ്രസിഡന്‍റാണെന്ന് ആരോപിച്ചായിരുന്നു മർദനം. അതേസമയം സുശാന്തിന്‍റെ കുട്ടിയും ഭക്ഷ്യവിഷബാധയേറ്റ് ചികിത്സയിലായിരുന്നു. ഇതിനിടയിലും ശുചീകരണത്തിനും മറ്റു പ്രവർത്തനങ്ങൾക്കുമായി സുശാന്ത് മഴുവൻസമയവും സ്കൂളിലുണ്ടായിരുന്നു. പരിക്കുപറ്റിയ സുശാന്ത് എരുമപ്പെട്ടി സർക്കാർ ആശുപത്രിയിൽ ചികിത്സതേടി. എരുമപ്പെട്ടി പോലീസിൽ സുശാന്ത് പരാതിനൽകിയിട്ടുണ്ട്. സ്കൂൾ കോമ്പൗണ്ടിൽ കയറി പ്രസിഡന്‍റിനെ ആക്രമിച്ച സംഭവത്തിൽ പിടിഎ അംഗങ്ങൾ പ്രതിഷേധം അറിയിച്ചു. ശക്തമായ നിയമനടപടിയുണ്ടാകണമെന്ന് എസ്എംസി ചെയർമാൻ എ.യു. മനാഫ് ആവശ്യപ്പെട്ടു.

നടൻ മോഹൻലാൽ ക്ഷേത്രങ്ങളിൽ ദർശനം നടത്തി

ഗുരുവായൂര്‌: നടൻ മോഹൻലാൽ ഗുരുവായൂർ ക്ഷേത്രത്തില്‌ ദർശനംനടത്തി. ഇന്നലെ പുലർച്ചെ നിർമാല്യദർശനത്തിനായാണ് മോഹൻലാൽ എത്തിയത്. അദ്ദേഹത്തെ അഡ്മിനിസ്ട്രേറ്റർ ഒ.ബി. അരുൺകുമാർ, ക്ഷേത്രം ഡെപ്യൂട്ടി അഡ്മിനിസ്ട്രേറ്റർ പ്രമോദ് കളരിക്കൽ, അസിസ്റ്റന്‍റ് മാനേജർ ലെജുമോൾ എന്നിവർ സ്വീകരിച്ചു. തൃപ്രയാർ: ശ്രീരാമ ക്ഷേത്രത്തിൽ നടൻ മോഹൻലാൽ ദർശനം നടത്തി. ഇന്നലെ പുലർച്ചെ 4.30ന് രണ്ടുസുഹൃത്തുക്കൾക്കൊപ്പം ആയിരുന്നു ദർശനം. തിരുനടയിൽ അമ്പും വില്ലും സമർപ്പിച്ചു. മീനൂട്ട്, വെടി, അവിൽനിവേദ്യം എന്നീ വഴിപാടുകളും സമർപ്പിച്ചു. മേൽശാന്തിയിൽനിന്ന് തീർഥവും പ്രസാദവും വാങ്ങി ഉപദേവന്മാരെ തൊഴുത് അഞ്ചേകാലോടു കൂടി മടങ്ങി. മാനേജർ മനോജ്. കെ. നായർ, തൃപ്രയാർ തേവരുടെ ഫോട്ടോയും ചാർത്തിയ കളഭവും ക്ഷേത്രത്തിന്‍റെ ഐതിഹ്യം വിവരിക്കുന്ന പുസ്തകവും ഉപഹാരമായി നൽകി.

മനക്കൊടി - പുള്ള് റോഡ് വെള്ളംനിറഞ്ഞ് ഗതാഗതം നിർത്തുന്നത് ഒഴിവാക്കും: എംഎൽഎ

അരിമ്പൂർ: മഴയെത്തുടര്‌ന്നു മനക്കൊടി - പുള്ള് റോഡ് വെള്ളംനിറഞ്ഞു ഗതാഗതം നിർത്തിവയ്ക്കുന്ന സാഹചര്യം ഒഴിവാക്കാൻ നടപടി യുണ്ടാകുമെന്ന് മുരളി പെരുനെല്ലി എംഎൽഎ പറഞ്ഞു. എല്ലാവർഷക്കാലത്തും റോഡില്‌ വെള്ളംനിറഞ്ഞ് ഗതാഗതംനിർത്തിവയ്ക്കുന്ന സാഹചര്യമാണ് നിലവിലുള്ളത്. ഇതിന് പരിഹാരമെന്നോണം ഇറിഗേഷൻ കനാലിന്‍റെ റോഡിനോടുചേർന്ന് 850 മീറ്റർ നീളത്തിൽ കോൺക്രീറ്റ് വാൾ നിർമിക്കുന്നതിന് 62 ലക്ഷം രൂപയുടെ ഡിപിആർ തയാറാക്കിയിട്ടുള്ളതായും നിർമാണ പ്രവർത്തനങ്ങൾ വെള്ളമൊഴിയുന്നമുറയ്ക്ക് വേഗത്തിൽ നടത്തുമെന്നും അദ്ദേഹം പറഞ്ഞു. സ്ഥലം സന്ദർശിച്ചശേഷം സംസാരിക്കുകയായിരുന്നു എംഎൽഎ.തൃശൂർ - തൃപ്രയാർ - ചേർപ്പ് - അമ്മാടം ഭാഗത്തേക്കുള്ള എളുപ്പവഴിയിലും വെള്ളംനിറഞ്ഞതോടെ യാത്രക്കാർ ഏറെ ദുരിതത്തിലായി. വർഷക്കാലം കഴിഞ്ഞാലും ചെറിയ മഴ പെയ്താൽപോലും വാരിയംകോൾ പാടശേഖരത്തിലേക്ക് ഇറിഗേഷൻ കനാൽ കരകവിഞ്ഞൊഴുകി കൃഷി നശിക്കുന്നതും പതിവാണ്. വാർഡ് അംഗം കെ. രാഗേഷ്, ടി.വി. വിദ്യാധരൻ, അഭിലാഷ് ചേർക്കര, പടവ് ഭാരവാഹികൾ തുടങ്ങിയവരും എംഎൽഎയോടൊപ്പം ഉണ്ടായിരുന്നു.

ലഹരിക്കെതിരേ ഫുട്ബോൾ: ജഴ്സി പ്രകാശനം

തൃശൂർ: തൃശൂർ സിറ്റി പോലീസിന്‍റെ നേതൃത്വത്തിൽ ലോക ലഹരിദിനത്തിൽ ഫുട്ബോളാണ് ആവേശം എന്ന സന്ദേശവുമായി സംഘടിപ്പിക്കുന്ന സൗഹൃദ ടൂർണമെന്‍റിന്‍റെ ജഴ്സി പ്രകാശനം സിറ്റി പോലീസ് കമ്മിഷണർ ആർ. ഇളങ്കോ നിർവഹിച്ചു. പ്രസ് ക്ലബ് സെക്രട്ടറി രഞ്ജിത്ത് ബാലൻ, എസിപി സലീഷ് എൻ. ശങ്കർ, എക്സൈസ് സിഐ വി.ജെ. ജോയി, കോർപറേഷൻ എൻജിനീയർ മഹേന്ദ്ര, ഇസാഫ് എക്സിക്യൂട്ടിവ് വൈസ് പ്രസിഡന്‍റ് ജോർജ് തോമസ്, പ്രസ് ക്ലബ് ജോയിന്‍റ് സെക്രട്ടറി ബി. സതീഷ്, നർക്കോട്ടിക് സെൽ എഎസ്ഐ സനീഷ് ബാബു എന്നിവർ പ്രസംഗിച്ചു. കോർപറേഷൻ സ്റ്റേഡിയത്തിൽ 26നു വൈകീട്ട് നാലിനാണ് മത്സരം. തൃശൂർ പ്രസ് ക്ലബ് ടീം പോലീസ് ടീമുമായും എക്സൈസ് ടീം കോർപറേഷൻ ടീമുമായും ഏറ്റുമുട്ടും.

മധുരംനൽകിയും പടക്കംപൊട്ടിച്ചും തൃശൂരിൽ ആഹ്ലാദപ്രകടനം

തൃശൂർ: നിലമ്പൂർ ഉപതെരഞ്ഞെടുപ്പുവിജയം തൃശൂരിൽ ആഘോഷമാക്കി കോൺഗ്രസ്. ഡിസിസിയിൽ മധുരം വിതരണംചെയ്തും പടക്കംപൊട്ടിച്ചും പ്രവർത്തകർ ആഹ്ലാദം പ്രകടിപ്പിച്ചു. യുഡിഎഫ് സ്ഥാനാർഥി ആര്യാടൻ ഷൗക്കത്തിന്‍റെ മിന്നുന്ന ജയം തദ്ദേശ, നിയമസഭാ തെരഞ്ഞെടുപ്പുകളിൽ തൃശൂരിൽ കോൺഗ്രസിനു വലിയ നേട്ടം കരസ്ഥമാക്കാൻ ഊർജം പകരുന്നതാണെന്നു ഡിസിസി പ്രസിഡന്‍റ് അഡ്വ. ജോസഫ് ടാജറ്റ് പറഞ്ഞു. നേതാക്കളായ എം.പി. വിൻസെന്‍റ്, രാജേന്ദ്രൻ അരങ്ങത്ത്, സുനിൽ അന്തിക്കാട്, ഷാജി കോടങ്കണ്ടത്ത്, ഡോ. നിജി ജസ്റ്റിൻ, കെ.കെ. ബാബു, കെ.എച്ച്. ഉസ്മാൻഖാൻ, കല്ലൂർ ബാബു, എൻ.എസ്. അയൂബ്, സജി പോൾ മാടശേരി, ടി. നിർമല, ഫ്രാൻസിസ് ചാലിശേരി, ജേക്കബ് പുലിക്കോട്ടിൽ, കെ. ഗോപാലകൃഷ്ണൻ, ആശിഷ് മൂത്തേടത്ത് എന്നിവർ നേതൃത്വം നൽകി.

അനുജനെ കൊലപ്പെടുത്തിയ ജ്യേഷ്ഠനു ജീവപര്യന്തം തടവ്

ഇരിങ്ങാലക്കുട: അനുജനെ കൊലപ്പെടുത്തിയ കേസില്‍ പ്രതിയായ സഹോദരനു തടവും പിഴയും ശിക്ഷവിധിച്ചു. മാള - കുമ്പിടി സ്വദേശി നാലുകണ്ടന്‍ പോളി(67)നെയാണ് ജീവപര്യന്തം തടവിനും ഒരു ലക്ഷം രൂപ പിഴയൊടുക്കാനും ശിക്ഷിച്ചത്. ഇരിങ്ങാലക്കുട അഡിഷണല്‍ ജില്ലാ സെഷന്‍സ് കോടതി ജഡ്ജ് എന്‍. വിനോദ്കുമാര്‍ വിധി പ്രസ്താവിച്ചു. 2020 സെപ്റ്റംബര്‍ 22 നാണ് കേസിനാസ്പദമായ സംഭവം. സ്വത്തുതര്‍ക്കത്തെതുടര്‍ന്നുള്ള വൈരാഗ്യത്താല്‍ പ്രതി സഹോദരനായ ആന്‍റു(56)വിനെ കൊലപ്പെടുത്തിയെന്നാണ് കേസ്. സ്വത്ത് ഭാഗംവയ്ക്കാത്ത പറമ്പില്‍ പ്രതി വാഴക്കുഴി ഉണ്ടാക്കിയതു ആന്‍റു മണ്ണിട്ടുമൂടിയിരുന്നു. തുടര്‍ന്നുണ്ടായ തര്‍ക്കത്തില്‍ ഇരുമ്പുവടികൊണ്ട് ആന്‍റുവിന്‍റെ മുഖത്തും കഴുത്തിലും തലയിലും അടിച്ച് മാരകമായി പരിക്ക് ഏല്പിച്ചു. തുടര്‍ന്ന് ചാലക്കുടിയിലെ സ്വകാര്യ ആശുപത്രിയില്‍ ചികിത്സയില്‍ കഴിയുമ്പോഴാണ് ആന്‍റു മരണപ്പെട്ടത്. മാള എസ്എച്ച്ഒ ആയിരുന്ന വി സജിന്‍ ശശിയാണ് അന്വേഷണം നടത്തി കുറ്റപത്രം സമര്‍പ്പിച്ചത്. പ്രോസിക്യൂഷനുവേണ്ടി സ്പെഷല്‍ പബ്ലിക് പ്രോസിക്യൂട്ടര്‍ അഡ്വ. വിജു വാഴക്കാല, അഡ്വ. ജോജി ജോര്‍ജ (പബ്ലിക് പ്രോസിക്യൂട്ടര്‍ ഇരിങ്ങാലക്കുട), അഡ്വ. ശ്രീദേവ് തിലക്, അഡ്വ. റെറ്റൊ വിന്‍സന്‍റ് എന്നിവര്‍ ഹാജരായി. ലെയ്സണ്‍ ഓഫീസര്‍ സിപിഒ കെ.വി. വിനീഷ് പ്രോസിക്യൂഷന്‍ നടപടികള്‍ ഏകോപിപ്പിച്ചു. പിഴയൊടുക്കാത്തപക്ഷം ഒരു വര്‍ഷംകൂടി കഠിനതടവ് അനുഭവിക്കണം. പിഴസംഖ്യ ഈടാക്കുന്നപക്ഷം കൊല്ലകെട്ട ആന്‍റുവിന്‍റെ ഭാര്യക്കു നഷ്ടപരിഹാരമായി നല്‍കുവാനും വിധിയില്‍ വ്യവസ്ഥചെയ്തിട്ടുണ്ട്. കൂടാതെ, കൊല്ലപ്പെട്ട ആന്‍റുവിന്‍റെ കൂടുംബത്തിനു മതിയായ നഷ്ടപരിഹാരം നല്‍കുന്നതിനു ജില്ലാ ലീഗല്‍ സര്‍വീസ് അഥോറിറ്റിക്കു നിര്‍ദേശവും നല്‍കിയിട്ടുണ്ട്. പ്രതിയെ തൃശൂര്‍ ജില്ലാ ജയിലിലേക്കു റിമാന്‍ഡ് ചെയ്തു. പ്രതിയായ പോള്‍ കുമ്പിടി സ്വദേശി ജോസ് എന്നയാളെ കൊലപ്പെടുത്തിയ കേസില്‍ ഇപ്പോള്‍ വിചാരണ നേരിട്ടുകൊണ്ടിരിക്കുകയാണ്.

ദീപിക ലോകത്തെ കാണാൻ പഠിപ്പിക്കുന്ന പത്രം: മാർ ടോണി നീലങ്കാവിൽ

തൃശൂർ: ലോകപരിചയവും കാഴ്ചപ്പാടുമുള്ള പത്രമുത്തശിയാകുന്ന ദീപിക നമ്മുടെ വീട്ടിലേക്കു കടന്നുവരുന്പോൾ ഒരുപാടു വാസ്തവങ്ങൾ അറിയാൻ സാധിക്കുമെന്നു തൃശൂർ അതിരൂപത സഹായമെത്രാൻ മാർ ടോണി നീലങ്കാവിൽ പറഞ്ഞു. ദീപിക നമ്മുടെ ഭാഷ പദ്ധതിയുടെ ജില്ലാതല ഉദ്ഘാടനം തൃശൂർ സെന്‍റ് മേരീസ് ലൂർദ് യുപി സ്കൂളിലെ വിദ്യാർഥികൾക്കു പത്രം കൈമാറി നിർവഹിക്കുകയായിരുന്നു ബിഷപ്. ഈ ലോകത്തിലേക്കുള്ള വാതായനം തുറന്നിടുന്ന ദീപിക അതിലൂടെ ലോകത്തെ കാണാൻ പഠിപ്പിക്കുന്നുവെന്നും അദ്ദേഹം കൂട്ടിച്ചേർത്തു. ലൂർദ് കത്തീഡ്രൽ വികാരി ഫാ. ജോസ് വല്ലൂരാൻ അധ്യക്ഷത വഹിച്ചു. ദീപിക മാർക്കറ്റിംഗ് കോ ഓർഡിനേറ്റർ ഫാ. ജിയോ ചെരടായി ആമുഖപ്രസംഗം നടത്തി. ലൂർദ് കത്തീഡ്രൽ അസിസ്റ്റന്‍റ് വികാരി ഫാ. പ്രിജോവ് വടക്കേത്തല, കോർപറേഷൻ കൗൺസിലർ ജോൺ ഡാനിയൽ, പിടിഎ പ്രസിഡന്‍റ് ബെനറ്റ് അഗസ്റ്റിൻ, ഒഎസ്എ പ്രസിഡന്‍റ് ജോഷി ചിറമ്മൽ എന്നിവർ പ്രസംഗിച്ചു. സെന്‍റ് തോമസ് കോളജ് റിട്ട. പ്രിൻസിപ്പൽ ഡോ. ഇഗ്നേഷ്യസ് ആന്‍റണി കൊള്ളന്നൂർ, സ്കൂൾ എംപിടിഎ പ്രസിഡന്‍റ് സോഫിയ മനോജ് എന്നിവർ പങ്കെടുത്തു. സ്കൂൾ ഹെഡ്മിസ്ട്രസ് കെ.ആർ. ഷീജ സ്വാഗതവും ദീപിക സർക്കുലേഷൻ മാനേജർ കെ.എൽ. ഡേവിസ് നന്ദിയും പറഞ്ഞു. സ്കൂളിലെ ഓൾഡ് സ്റ്റുഡന്‍റ്സ് അസോസിയേഷനും (ഒഎസ്എ) സെന്‍റ് തോമസ് കോളജ് റിട്ട. പ്രിൻ സിപ്പൽ ഡോ. ഇഗ്നേഷ്യസ് ആന്‍റണി കൊള്ളന്നൂരുമാണ് പത്രം സ് പോൺസർ ചെയ്തിരിക്കുന്നത്.

യുവാവ് മരിച്ചനിലയിൽ

ആൽപ്പാറ: പുതുവീട്ടിൽ ഷാജി മകൻ ഷാബു(27)വിനെ തൂങ്ങി മരിച്ചനിലയിൽ കണ്ടെത്തി. സംസ്‌കാരം നടത്തി. അമ്മ: ഷാജിത. ഞായറാഴ്ച രാത്രി 10 ഓടെയാണ് വീടിനുള്ളിൽ തൂങ്ങി മരിച്ചനിലയിൽ കണ്ടെത്തിയത്. സംഭവസമയം വീട്ടിൽ ആരും ഉണ്ടായിരുന്നില്ല. മരണകാരണം വ്യക്തമല്ല. പീച്ചി പോലീസ് സ്ഥലത്തെത്തി മേൽനടപടികൾ സ്വീകരിച്ചു.

യുവതിയെ കിണറ്റിൽ മരിച്ചനിലയിൽ കണ്ടെത്തി

ഏനാമാവ്: യുവതിയെ കിണറ്റിൽ മരിച്ച നിലയിൽ കണ്ടെത്തി. ഏനാമാവ് കരുവന്തലയ്ക്ക് കിഴക്ക് തെക്കേടത്ത് സന്തോഷിന്‍റെ മകൾ അശ്വതിയെയാണ് കിണറ്റിൽ മരിച്ചനിലയിൽ കണ്ടെത്തിയത്. ഇന്നലെ രാവിലെ പത്തോടെ അശ്വതിയെ കാണാതെ വീട്ടുകാരും നാട്ടുകാരും ബന്ധുവീടുകളിൽ തെരച്ചിൽ നടത്തിയെങ്കിലും കണ്ടെത്താനായില്ല. വൈകീട്ട് സമിപത്തെ കിണറ്റിനരികിൽ വളർന്നു നിന്നിരുന്ന പാഴ്ചെടികൾ ഒടിഞ്ഞു കിടക്കുന്നതും പെൺകുട്ടികൾ മുടിയിൽ ഇടുന്ന ബൺ വെള്ളത്തിൽ പൊന്തി കിടക്കുന്നതും ശ്രദ്ധയിൽപെട്ടതിനെ തുടർന്ന് കിണറ്റിൽ നടത്തിയ തെരച്ചിലിലാണ് മൃതദേഹം കണ്ടെത്തിയത്. ഗുരുവായൂരിൽ നിന്നെത്തിയ അഗ്നിശമന സേനാംഗങ്ങൾ മൃതദേഹം പുറത്തെടുത്ത് ചാവക്കാട് താലൂക്ക് ആശുപത്രിയിൽ എത്തിച്ചു. പോലീസ് നടപടികൾക്കും പോസ്റ്റുമോർട്ടത്തിനും ശേഷം മൃതദേഹം ഇന്ന് സംസ്ക്കരിക്കും. അമ്മ: സിന്ദു. സഹോദരൻ: അക്ഷയ്.

കൃഷി അസിസ്റ്റന്‍റ് ഡയറക്ടറുടെ കാര്യാലയം നാടിന് സമർപ്പിച്ചു

വെള്ളാങ്കല്ലൂർ: ബ്ലോക്ക് പഞ്ചായത്തിന്‍റെ ഘടകസ്ഥാപനമായ കൃഷി അസിസ്റ്റന്‍റ് ഡയറക്ടർ ഓഫീസിനായി പുതിയതായി നിർമിച്ച കെട്ടിടം റവന്യു മന്ത്രി കെ. രാജൻ നാടിന് സമർപ്പിച്ചു. അഡ്വ. വി.ആർ സുനിൽകുമാർ എംഎൽഎ ചടങ്ങിൽ അധ്യക്ഷത വഹിച്ചു. ഉദ്ഘാടനത്തോടനുബന്ധിച്ച് ഇന്നലെ രാവിലെ മുതൽ ബ്ലോക്ക് കോമ്പൗണ്ടിൽ വിവിധ കാർഷിക വിപണന പ്രദർശനമേളയും സെമിനാറുകളും കലാപരിപാടികളും നടന്നു. കാർഷിക പ്രദർശന മേളയിൽ കാർഷിക സർവകലാശാലയുടെ വിത്തുവണ്ടി, അഗ്രോ സർവീസ് സെന്‍റർ, കാർഷിക ഉത്പന്നങ്ങൾ, കുടുംബശ്രീ ഉത്പന്നങ്ങൾ, തേനറിവ്, വിത്ത്, നടീൽ വസ്തുക്കൾ, മറ്റു കാർഷിക ഉത്പാദനോപാദികളുടെ പ്രദർശനവും വിപണവും, കാർഷിക യന്ത്രോപകരണങ്ങളുടെ പ്രദർശനം, ചെറു ധാന്യങ്ങളുടെ സ്റ്റാളുകൾ, വിവിധ പ്രാദേശിക ഉത്പ്പാദകരുടെയും മൂല്യവർധിത ഉത്പന്നങ്ങളുടെയും സ്റ്റാളുകൾ, കാർഷിക ക്ലിനിക്ക് എന്നിവ ഒരുക്കിയത് ശ്രദ്ധേയമായി. എൽഎസ്ജിഡി അസിസ്റ്റന്‍റ് എൻജിനീയർ ഒ.ആർ. ജയ റിപ്പോർട്ട് അവതരിപ്പിച്ചു. കൃഷി അസിസ്റ്റന്‍റ് ഡയറക്ടർ എം.കെ. സ്മിത പദ്ധതി വിശദീകരണം നടത്തി.ജില്ലാ പഞ്ചായത്ത് മെമ്പർമാരായ പി.കെ. ഡേവിസ്, ഷീല അജയഘോഷ്, വെള്ളാങ്കല്ലൂർ ബ്ലോക്ക് പഞ്ചായത്ത് പ്രസിഡന്‍റ് സുധ ദിലീപ്, വെള്ളാങ്കല്ലൂർ ബ്ലോക്ക് പഞ്ചായത്ത് വൈസ് പ്രസിഡന്‍റ് ഉണ്ണികൃഷ്ണൻ കുറ്റിപ്പറമ്പിൽ, ആരോഗ്യ വിദ്യാഭ്യാസ സ്ഥിരം സമിതി അധ്യക്ഷ അസ്മാബി ലത്തീഫ്, ക്ഷേമകാര്യ സ്ഥിരം സമിതി അധ്യക്ഷ സുരേഷ് അമ്മനത്ത്, ഗ്രാമപഞ്ചായത്ത് പ്രസിഡന്‍റുമാരായ നിഷ ഷാജി, കെ.എസ്. തമ്പി, റോമി ബേബി, ബ്ലോക്ക് പഞ്ചായത്ത് സെക്രട്ടറി പി.എം. ഹസീബ് അലി, ബ്ലോക്ക് പഞ്ചായത്ത് മെമ്പർമാർ, ജനപ്രതിനിധികൾ, വിവിധ രാഷ്ട്രീയപാർട്ടി പ്രതിനിധികൾ, കർഷകർ, കൃഷിവകുപ്പ് ഉദ്യോഗസ്ഥർ തുടങ്ങിയവർ പങ്കെടുത്തു.

കൊരട്ടി പള്ളിക്ക് മുന്നിലെ റോഡിൽ കുണ്ടും കുഴിയും

കൊരട്ടി: ആധുനിക രീതിയിൽ നവീകരിച്ച കൊരട്ടി - അന്നമനട പൊതുമരാമത്ത് റോഡിൽ കൊരട്ടി പള്ളിക്കു സമീപമുള്ള ചതിക്കുഴികളിൽ നിയന്ത്രണം വിട്ട് ഇന്നലെ മാത്രം മറിഞ്ഞു വീണത് രണ്ടു ബൈക്ക് യാത്രികർ. ഗതാഗതമേറെയുള്ള ഈ വഴിയിൽ കൂടുതൽ ഭാരവണ്ടികൾ കടന്നു പോകുന്നതും തുടർച്ചയായ മഴയിൽ രൂപപ്പെടുന്ന വെള്ളക്കെട്ടും കുഴികൾ പെരുകാൻ കാരണമായി. ഇവിടത്തെ അപകടകരമായ വളവും ഇരുചക്രവാഹനങ്ങൾ അപകടത്തിൽപ്പെടുവാൻ ആക്കം കൂട്ടുന്നു. ആധുനിക രീതിയിൽ ബിഎംബിസി ടാറിംഗിലൂടെ കോടികൾ മുടക്കി പുനരുദ്ധരിച്ച പൊതുമരാമത്ത് റോഡുകളിലൊന്നാണിത്. റെയിൽവേ മേൽപ്പാലത്തിന്‍റെ തെക്കേക്കവാടത്തിലും കുഴികളുണ്ട്. കുഴികളടയ്ക്കാൻ അധികൃതരുടെ ഭാഗത്ത് നിന്ന് സത്വര നടപടി ഉണ്ടാകണമെന്നാണ് നാട്ടുകാരുടെ ആവശ്യം.

റോഡുകൾ ശോചനീയാവസ്ഥയിൽ; പ്രതിഷേധം അലയടിക്കുന്നു

ഇരിങ്ങാലക്കുട കത്തീഡ്രല്‍ കത്തോലിക്ക കോണ്‍ഗ്രസ് ഇരിങ്ങാലക്കുട: നഗരത്തിലെ റോഡുകളുടെ ശോചനീയ അവസ്ഥയില്‍ പ്രതിഷേധിച്ചുകൊണ്ടും ഇക്കാര്യത്തില്‍ അധികാരികള്‍ ശാശ്വത പരിഹാരം കാണണമെന്ന് ആവശ്യപ്പെട്ടുകൊണ്ടും കത്തീഡ്രല്‍ കത്തോലിക്ക കോണ്‍ഗ്രസ് പ്രതിഷേധ സമരം നടത്തി. ബസ്റ്റാൻഡ്് -എകെപി ജംഗ്ഷന്‍ റോഡില്‍ നടന്ന പ്രതിഷേധ ധര്‍ണ കത്തീഡ്രല്‍ വികാരി റവ. ഡോ. ലാസര്‍ കുറ്റിക്കാടന്‍ ഉദ്ഘാടനം ചെയ്തു. പ്രസിഡന്‍റ്് സാബു കൂനന്‍ അധ്യക്ഷത വഹിച്ചു. കുടുംബസമ്മേളന കേന്ദ്രസമിതി പ്രസിഡന്‍റ് ജോമി ചേറ്റുപുഴക്കാരന്‍, കത്തീഡ്രല്‍ ട്രസ്റ്റി തീമോസ് പാറേക്കാടന്‍, സെക്രട്ടറി റോബി കാളിയങ്കര, ട്രഷറര്‍ ഡേവിസ് ചക്കാലയ്ക്കല്‍, വൈസ് പ്രസിഡനന്‍റുമാരായ ഷാജു കണ്ടംകുളത്തി, ബീന രാജേഷ്, ജെയിന്‍റ് സെക്രട്ടറി വര്‍ഗീസ് ജോണ്‍, രൂപത പ്രതിനിധി ടെല്‍സണ്‍ കോട്ടോളി, ജനറല്‍ കണ്‍വീനര്‍ സുനില്‍ ആന്‍റപ്പന്‍, ജോയിന്‍റ്് കണ്‍വീനര്‍ ഫാൻഡം പല്ലിശേരി, രഞ്ജി അക്കരകാരന്‍, വിന്‍സെന്‍റ് കോമ്പാറക്കാരന്‍, ബാബു ചേലക്കാട്ടുപറമ്പില്‍ എന്നിവര്‍ പ്രസംഗിച്ചു. മുരിങ്ങൂർ എൽഡിഎഫ് പഞ്ചായത്ത് കമ്മിറ്റി മേലൂർ: മുരിങ്ങൂർ അടിപ്പാത നിർമാണത്തിലെ അപാകതക്കെതിരെയും എംപിയുടെയും എംഎൽ.എയുടെയും നിസംഗതക്കെതിരെയും പ്രതിഷേധ കൂട്ടായ്മ സംഘടിപ്പിച്ചു. എൽഡിഎഫ് മേലൂർ പഞ്ചായത്ത് കമ്മിറ്റിയുടെ നേതൃത്വത്തിൽ മുരിങ്ങൂരിൽ നടന്ന പ്രതിഷേധ കൂട്ടായ്മ സിപിഎം ചാലക്കുടി ഏരിയ സെക്രട്ടറി കെ.എസ്. അശോകൻ ഉദ്ഘാടനം ചെയ്തു. സിപിഐ മേലൂർ ലോക്കൽ സെക്രട്ടറി മധു തൂപ്രത്ത് അധ്യക്ഷത വഹിച്ചു. എം.എം. രമേശൻ, എം.എസ്. സുനിത, പി.പി. ബാബു, എൻ.ജി. സതീഷ്കുമാർ, ഗീത ശശി എന്നിവർ പ്രസംഗിച്ചു.

ഇരിങ്ങാലക്കുട സ്മാര്‍ട്ട് വില്ലേജ് ഓഫീസ് നാടിന് സമര്‍പ്പിച്ചു

ഇരിങ്ങാലക്കുട: കേരള സര്‍ക്കാരിന്‍റെ പ്ലാന്‍ഫണ്ടില്‍ നിന്നും അനുവദിച്ച 44 ലക്ഷം രൂപ വിനിയോഗിച്ച് നിര്‍മിച്ച ഇരിങ്ങാലക്കുട സ്മാര്‍ട്ട് വില്ലേജ് ഓഫീസ് നാടിന് സമര്‍പ്പിച്ചു. ടൗണ്‍ ഹാളില്‍ നടന്ന ചടങ്ങില്‍ കെട്ടിടത്തിന്‍റെ ഉദ്ഘാടനം റവന്യൂ മന്ത്രി കെ. രാജന്‍ നിര്‍വഹിച്ചു. ഉന്നത വിദ്യാഭ്യാസ വകുപ്പ് മന്ത്രി ഡോ. ആര്‍. ബിന്ദു അധ്യക്ഷയായിരുന്നു. മുനിസിപ്പല്‍ ചെയര്‍പേഴ്‌സണ്‍ മേരിക്കുട്ടി ജോയ് മുഖ്യാതിഥിയായിരുന്നു. വിവിധ രാഷ്ട്രീയ പാര്‍ട്ടി പ്രതിനിധികളായ ജയന്‍ അരിമ്പ്ര, ബെന്നി വിന്‍സന്‍റ്, സോമന്‍ ചിറ്റേത്ത്, രാജു ജോണ്‍ പാലത്തിങ്കല്‍, ഗിരീഷ് മണപ്പെട്ടി, പാപ്പച്ചന്‍ വാഴപ്പിള്ളി തുടങ്ങിയവര്‍ പങ്കെടുത്തു. ജില്ലാ കളക്ടര്‍ അര്‍ജുന്‍ പാണ്ഡ്യന്‍ ഐഎഎസ് സ്വാഗതവും ഇരിങ്ങാലക്കുട റവന്യു ഡിവിഷണല്‍ ഓഫീസര്‍ പി. ഷിബു നന്ദിയും പറഞ്ഞു.

വിജയോത്സവം സംഘടിപ്പിച്ചു

ചാലക്കുടി കാർമൽ എച്ച്എസ്എസ് ചാലക്കുടി: കാർമൽ എച്ച്എസ്എസ് വിജയോത്സവം നടത്തി. ഇരിങ്ങാലക്കുട ബിഷപ് മാർ പോളി കണ്ണൂക്കാടൻ ഉദ്ഘാടനം ചെയ്തു. മാനേജർ ഫാ. അനുപ് പുതുശേരി അധ്യക്ഷത വഹിച്ചു. നഗരസഭ ചെയർമാൻ ഷിബു വാലപ്പൻ ഉന്നതവിജയം നേടിയ വിദ്യാർഥികൾക്ക് ഉപഹാരങ്ങൾ നൽകി. പ്രിൻസിപ്പൽ ഫാ. ജോസ് താണിക്കൽ, ഫാ. സന്തോഷ് മുണ്ടൻമാണി, കൗൺസിലർ ബിന്ദു ശശികുമാർ, അഡ്വ. കെ.എസ്. സുഗതൻ, സ്കൂൾ ലീഡർ അനറ്റ് ഷിജു എന്നിവർ പ്രസംഗിച്ചു. ഇരിങ്ങാലക്കുട നാഷണല്‍ ഹയർ സെക്കൻഡറി സ്‌കൂൾ ഇരിങ്ങാലക്കുട: നാഷണല്‍ ഹയര്‍ സെക്കന്‍ഡറി സ്‌കൂളിലെ വിജയോത്സവം മന്ത്രി ഡോ. ആര്‍. ബിന്ദു ഉദ്ഘാടനം നിര്‍വഹിച്ചു. ഇരിങ്ങാലക്കുട നഗരസഭാ ചെയര്‍പേഴ്സണ്‍ മേരിക്കുട്ടി ജോയി അധ്യക്ഷത വഹിച്ചു. തൃശൂര്‍ റൂറല്‍ എഎസ്പി ടി.എസ്. സിനോജ് വിശിഷ്ടാതിഥിയായിരുന്നു. പ്രിന്‍സിപ്പല്‍ കെ. ജയലക്ഷ്മി, ഹെഡ്മിസ്ട്രസ് കെ.പി. സീന, നഗരസഭാ കൗണ്‍സിലര്‍ സ്മിത കൃഷ്ണകുമാര്‍, പിടിഎ വൈസ് പ്രസിഡന്‍റ് ടിന്‍റു സുഭാഷ്, മാനേജര്‍ രുക്മണി രാമചന്ദ്രന്‍, മാനേജ്മെന്‍റ്് പ്രതിനിധി വിപിആര്‍ മേനോന്‍, വി.എ. ഹരിദാസ്, സാലി സഖറിയ തുടങ്ങിയവര്‍ സംസാരിച്ചു. കല്‌പറമ്പ് ബിവിഎം ഹയര്‍ സെക്കന്‍ഡറി സ്‌കൂൾ കല്‌പറമ്പ്: ബിവിഎം ഹയര്‍ സെക്കന്‍ഡറി സ്‌കൂളില്‍ മെറിറ്റ്ഡേ ഇരിങ്ങാലക്കുട കോ ഓര്‍പ്പറേറ്റ് മാനേജര്‍ ഫാ. സീജോ ഇരിമ്പന്‍ ഉദ്ഘാടനം ചെയ്തു. പ്ലസ്ടു ഹയര്‍ സെക്കന്‍ഡറി പരീക്ഷയില്‍ ഉന്നത വിജയം നേടിയ വിദ്യാര്‍ഥികളെ എന്‍ഡോവ്‌മെന്‍റുകളും കാഷ് അവാര്‍ഡുകളും നല്‍കി അനുമോദിച്ചു. സ്‌കൂള്‍ മാനേജര്‍ ഫാ. ജോസ് മഞ്ഞളി അധ്യക്ഷത വഹിച്ചു. പ്രിന്‍സിപ്പല്‍ ബിജു ആന്‍റണി, പൂമംഗലം പഞ്ചായത്ത് പ്രസിഡനന്‍റ് കെ.എസ്. തമ്പി, ആരോഗ്യ വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ കത്രീന ജോര്‍ജ്, വാര്‍ഡ് മെമ്പര്‍ ജൂലി ജോയ്, പിടിഎ പ്രസിഡന്‍റ്് ടി.സി. ബെന്നി, മാനേജ്‌മെന്‍റ് ട്രസ്റ്റി ജോസ് പാലത്തിങ്കല്‍, ജയ്‌സന്‍ പയസ്, ടെസ തോമസ്, സി.കെ. റോസ്‌മേരി എന്നിവര്‍ സംസാരിച്ചു. എടത്തിരുത്തി സർവീസ് സഹകരണ ബാങ്ക് ചൂലൂർ: എടത്തിരുത്തി സർവീസ് സഹകരണ ബാങ്കിന്‍റെ ആഭിമുഖ്യത്തിൽ വിദ്യാഭ്യാസ അവാർഡ് വിതരണവും പ്രതിഭാ സംഗമവും സംഘടിപ്പിച്ചു. എടത്തിരുത്തി ഗ്രാമപഞ്ചായത്ത് പ്രസിഡന്‍റ്് ടി.കെ.ചന്ദ്രബാബു ഉദ്ഘാടനം ചെയ്തു. ബാങ്ക് പ്രസിഡന്‍റ് ഡോ. കെ.ബി. സജു അധ്യക്ഷത വഹിച്ചു. ജില്ലാ പഞ്ചായത്ത് വികസന കാര്യ സ്റ്റാൻഡിംഗ് കമ്മിറ്റി ചെയർപേഴ്സൺ മഞ്ജുള അരുണൻ വിദ്യാഭ്യാസ അവാർഡ് വിതരണം നടത്തി. പഞ്ചായത്ത് വികസന കാര്യ സ്റ്റാൻഡിംഗ് കമ്മിറ്റി ചെയർമാൻ പി.ആർ. നിഖിൽ, ബാങ്ക് വൈസ് പ്രസിഡന്‍റ്് ഡേവിസ് തട്ടിൽ, സിപിഎം ലോക്കൽ സെക്രട്ടറി എ.വി. സതീഷ്, ബാങ്ക് സെക്രട്ടറി പി.സി. അജിത, ബാങ്ക് ഡയറക്ടർമാർ തുടങ്ങിയവർ പങ്കെടുത്തു. ചാലക്കുടി ടൗൺ കൊ ഒാപ്പറേറ്റീവ് ബാങ്ക് ചാലക്കുടി: എസ്എസ്എൽസി പ്ലസ് ടു ഉന്നത വിജയം കരസ്ഥമാക്കിയ വിദ്യാർഥികളെ ടൗൺ കൊ ഒാപ്പറേറ്റീവ് ബാങ്ക് അനുമോദിച്ചു. പ്രസിഡന്‍റ് ജോയ് മൂത്തേടൻ അധ്യക്ഷത വഹിച്ചു. സഹകരണ സംഘം അസിസ്റ്റന്‍റ് രജിസ്ട്രാർ എ.ജെ. രാജി ഉദ്ഘാടനം ചെയ്തു. വിദ്യാർഥികൾക്ക് ട്രോഫിയും കാഷ്അവാർഡ് വിതരണവും നടത്തി. വൈസ് പ്രസിഡന്‍റ് മേരി നളൻ, ഭരണസമിതി അംഗങ്ങളായ ബിജു പുത്തിരിക്കൽ തോമസ് ഐ കണ്ണത്ത്, കെ. എസ്.അനിൽ, കെ.ജെ. ജോയ് , സാജൻ വി സലാം, ഗിരിശൻ, ഉഷ മോഹൻ, സണ്ണി വർഗീസ്, ഷൈജു പുത്തൻപുരയ്ക്കൽ, റൈസൻ ആലുക്ക, ബാങ്ക് സെക്രട്ടറി സോയി പോൾ എന്നിവർ പ്രസംഗിച്ചു. ഇരിങ്ങാലക്കുട ഗവ. മോഡല്‍ ബോയ്സ് ഹയര്‍ സെക്കന്‍ഡറി സ്‌കൂൾ ഇരിങ്ങാലക്കുട: ഇരിങ്ങാലക്കുട ഗവ. മോഡല്‍ ബോയ്സ് ഹയര്‍ സെക്കന്‍ഡറി സ്‌കൂളില്‍ നടന്ന വിജയോത്സവം നഗരസഭ ചെയര്‍പേഴ്സണ്‍ മേരിക്കുട്ടി ജോയ് ഉദ്ഘാടനം ചെയ്തു. വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍പേഴ്സണ്‍ അഡ്വ. ജിഷ ജോബി അധ്യക്ഷത വഹിച്ചു. പ്ലസ്ടു, പ്ലസ് വണ്‍ പരീക്ഷയില്‍ ഉന്നത വിജയം നേടിയ വിദ്യാര്‍ഥികള്‍ക്കുള്ള അനുമോദനവും സമ്മാനദാനവും ഡിവൈഎസ്പി പി.ആര്‍. ബിജോയ് നിര്‍വഹിച്ചു. പ്രിന്‍സിപ്പല്‍ എം.കെ. മുരളി, സ്റ്റാഫ് സെക്രട്ടറി സി.പി. ഷാജി എന്നിവര്‍ സംസാരിച്ചു. പോട്ട ലിറ്റിൽഫ്ലവർ ചർച്ച് സോഷ്യൽ ആക്‌ഷൻ ഫോറം പോട്ട: ലിറ്റിൽഫ്ലവർ ചർച്ച് സോഷ്യൽ ആക്ഷൻ ഫോറത്തിന്‍റെ ആഭിമുഖ്യത്തിൽ ഇടവകയിലെ എല്ലാ വിഷയങ്ങളിലും എപ്ലസ് നേടിയവർക്ക് വിദ്യാഭ്യാസ അവാർഡ് ദാനം നടത്തി. കാഷ് അവാർഡും മെമന്‍റോയും നൽകി ആദരിച്ചു. വികാരി ഫാ. ടോം മാളിയേക്കൽ അധ്യക്ഷത വഹിച്ചു. സോഷ്യൽ ആക്ഷൻ ഫോറം രൂപത എക്സിക്യൂട്ടീവ് ഡയറക്ടർ ഫാ. തോമസ് നട്ടേക്കാടൻ ഉദ്ഘാടനം നിർവഹിച്ചു.പ്രസിഡന്‍റ്് പോൾ പുല്ലൻ ജോയിൻ സെക്രട്ടറി ജാൻസി വിത്സൺ, അസി. വികാരി ഫാ. റെയ്സൺ തട്ടിൽ, ട്രസ്റ്റി സെബി പേരപ്പാടൻ, കേന്ദ്ര സമിതി പ്രസിഡന്‍റ് ഡെയ്സൻ മേനാച്ചേരി, ഹെഡ്മാസ്റ്റർ പി.സി മെസ്റ്റിൻ എന്നിവർ പ്രസംഗിച്ചു.

കൊറ്റംകുളത്ത് അടച്ചിട്ട വീട് കുത്തിത്തുറന്ന് മോഷണം

കയ്പമംഗലം: പെരിഞ്ഞനം കൊറ്റംകുളത്ത് അടച്ചിട്ട വീട് കുത്തിത്തുറന്ന് മോഷണം. കൊറ്റംകുളം കിഴക്ക് എസ്എസ്ഡിപി സമാജം ക്ഷേത്രത്തിനടുത്ത് മാഞ്ഞോളി രവീന്ദ്രന്‍റെ വീട്ടിലാണ് മോഷണം നടന്നത്. വീട്ടുകാർ വിദേശത്താണ്. ഇന്നലെ രാവിലെ ബന്ധു എത്തിയപ്പോഴാണ് മോഷണവിവരം അറിയുന്നത്. വീടിന്‍റെ മുൻഭാഗത്തെ വാതിൽ തകർത്താണ് മോഷ്ടാക്കൾ അകത്തു കടന്നത്. അലമാരകളെല്ലാം കുത്തിത്തുറന്ന നിലയിലാണ്. നിലവിളക്കുകൾ, ഓട്ട് ഉരുളി, അലുമിനിയ പാത്രങ്ങൾ എന്നിവയാണ് മോഷ്‌ടിക്കപ്പെട്ടിട്ടുള്ളത്. കയ്പമംഗലം പോലീസ് സ്ഥലത്തെത്തി അന്വേഷണം ആരംഭിച്ചു.

വല്ലൂരിൽ ഇടതടവില്ലാതെ വൈദ്യുതി എത്തും

ഒല്ലൂർ: മരോട്ടിച്ചാൽ- വല്ലൂർ ഇന്‍റർലിങ്ക് വൈദ്യുതി കണക്ഷൻ എത്തിയതോടെ വല്ലൂർ ഗ്രാമത്തിൽ ഇടതടവില്ലാതെ വൈദ്യുതിയെത്തും. സ്ഥലം എംഎൽഎയായ മന്ത്രി കെ. രാജന്‍റെ ഇടപെടലിൽ 57 ലക്ഷം രൂപ ചെലവിട്ടാണു പുത്തൂർ പഞ്ചായത്തിലെ വല്ലൂരിൽ വൈദ്യുതിയെത്തിയത്. നേരത്തേ പുതുക്കാട് വരന്തരപ്പിള്ളി ഇലക്ട്രിക്കൽ സെക്ഷന്‍റെ പരിധിയിലായിരുന്നു പുത്തൂരിലെ വനാതിർത്തിയിലുള്ള മൂന്ന് വാർഡുകൾ ഉൾപ്പെടുന്ന വല്ലൂർപ്രദേശം. വൈദ്യുതി തകരാറുണ്ടായാൽ ആഴ്ചകൾ കഴിഞ്ഞായിരുന്നു പരിഹരിക്കപ്പെട്ടിരുന്നത്. ആനയും പുലിയും അടക്കം വന്യമൃഗങ്ങളുടെ ശല്യമുള്ള പ്രദേശത്തെ 569 കുടുംബങ്ങൾ, വൈദ്യുതിതടസം നേരിട്ടിരുന്ന ദിവസങ്ങളിൽ ഭീതിയോടെയാണു കഴിഞ്ഞിരുന്നത്. വല്ലൂരിലെ വൈദ്യുതി കണക്ഷനുകളുടെ നിയന്ത്രണം പുത്തൂർ ഇലക്ട്രിക് സെക്ഷന്‍റെ പരിധിയിലേക്കു മാറ്റണമെന്ന ആവശ്യത്തിന് വർഷങ്ങളുടെ പഴക്കമുണ്ട്. 2024 മേയ് 23ന് അനുകൂല ഉത്തരവ് ലഭ്യമാക്കി. പദ്ധതിക്കുള്ള ഫണ്ട് ഈ വർഷം തന്നെ ഉറപ്പാക്കുകയും പ്രവൃത്തികൾ ആരംഭിക്കുകയും ചെയ്തു. മേഖലയെ പുത്തൂർ സെക്്ഷനിലേക്കു മാറ്റാൻ 2.1 കിലോമീറ്റർ ഇൻസുലേഷൻ കേബിളാണു വലിച്ചിരിക്കുന്നത്. കാഞ്ഞിരമറ്റം, കള്ളായിക്കുന്ന്, വല്ലൂർകുന്ന്, വിയറ്റ്നാം കോളനി എന്നീ പ്രദേശങ്ങളിലായി നാല് ട്രാൻസ്ഫോർമറുകളും ആയിരത്തിനടുത്ത് പോസ്റ്റുകളും സ്ഥാപിച്ചാണ് പുത്തൂർ സെക്ഷന്‍റെ പരിധിയിലേക്കു മേഖലയെ ബന്ധിപ്പിച്ചത്. പദ്ധതിയുടെ ഉദ്ഘാടനം റവന്യൂമന്ത്രി കെ. രാജൻ ഉദ്ഘാടനം ചെയ്തു. ഗ്രാമ പഞ്ചായത്ത് പ്രസിഡന്‍റ് മിനി ഉണ്ണികൃഷ്ണൻ അധ്യക്ഷത വഹിച്ചു. ബ്ലോക്ക് പഞ്ചായത്ത് അംഗം മിനി സാബു, തൃശൂർ ഈസ്റ്റ് ഇലക്ട്രിക് ഡിവിഷൻ എക്സി. എൻജിനീയർ - ഇൻ ചാർജ് ജിനു കെ. ജോസഫ്, പുത്തൂർ ഇലക്ട്രിക് സെക്ഷൻ അസി. എക്സിക്യൂട്ടീവ് എൻജിനീയർ കെ.വി. സ്വീറ്റി, ഒല്ലൂർ ഇലക്ട്രിക് സെക്ഷൻ അസി. എക്സി. എൻജിനീയർ നിക്സണ്‍ പി. മഞ്ഞളി തുടങ്ങിയവർ പ്രസംഗിച്ചു.

ബണ്ട് തകർന്ന് തോട് ഗതിമാറിഒഴുകി; വ്യാപക കൃഷിനാശം

മണ്ണംപേട്ട: അളഗപ്പനഗർ പഞ്ചായത്തിലെ പച്ചളിപ്പുറം പൂക്കോട് ഭാഗത്ത് പടുക്കപ്പറമ്പ് തടയണയ്ക്കുസമീപം വലിയതോടിന്‍റെ ബണ്ട് തകർന്ന് വ്യാപക കൃഷിനാശം. തോട് ഗതിമാറിയൊഴുകി സ്വകാര്യ വ്യക്തികളുടെ പറമ്പിലെ ജാതിയും തെങ്ങും കവുങ്ങുകളും കടപുഴകി. ചീരമ്പത്ത് രാമചന്ദ്രൻ, പതിയാരപ്പാട്ട് വത്സല എന്നിവരുടെ പറമ്പുകളിലാണ് കൃഷിനാശം സംഭവിച്ചത്. കഴിഞ്ഞദിവസത്തെ ശക്തമായ മഴയിലാണ് തോടിന്‍റെ വശം തകർന്നത്. പീച്ചി ഇടതുകര കനാലിലേയ്ക്ക് എത്തുന്ന തോടാണ് അപകട ഭീഷണിയായത്. മഴ ശക്തമായാൽ തോടിന്‍റെ കൂടുതൽ ഭാഗം തകരാൻ സാധ്യതയേറെയാണ്. നിലവിൽ സ്വകാര്യ വ്യക്തികളുടെ പറമ്പിലൂടെ ഒഴുകുന്ന വെള്ളം വട്ടണാത്ര പാടശേഖരത്തിലേക്കാണ് എത്തുന്നത്. നീരൊഴുക്ക് കൂടിയാൽ പാടശേഖരത്തിന്‍റെ താഴ്ന്ന പ്രദേശത്തുള്ള വീടുകളിലേക്ക് വെള്ളംകയറുമെന്ന ആശങ്കയും നാട്ടുകാർക്കുണ്ട്. തോടിന്‍റെ കുറച്ചുഭാഗങ്ങൾ കയർഭൂവസ്ത്രം വിരിച്ച് സംരക്ഷിച്ചുവെങ്കിലും അപകടാവസ്ഥയിലായ ഭാഗത്ത് നിർമാണ ജോലികൾ നടത്താതിരുന്നതാണ്‌ പ്രശ്നത്തിന് കാരണമായതെന്ന് ആക്ഷേപമുണ്ട്. അധികൃതർ ഇടപെട്ട് തോടിന്‍റെ തകർന്ന ബണ്ട് താത്കാലികമായി കെട്ടിസംരക്ഷിക്കണമെന്നാണ് നാട്ടുകാരുടെ ആവശ്യം.

ശ്രദ്ധിക്കാൻ ഉദ്യോഗസ്ഥരില്ല: ബസ് സ്റ്റാന്‌ഡ് കെട്ടിടത്തിൽ മരം വളർന്നു

വടക്കാഞ്ചേരി: ബസ് സ്റ്റാന്‌ഡ് കെട്ടിടത്തിൽ മരം വളർന്നു. ഓട്ടുപാറ ബസ് സ്റ്റാന്‌ഡിനുമുകളിലാണ് മരം വളർന്നുനിൽക്കുന്നത്. 40 വർഷത്തിലധികമായ മൂന്നുനില കെട്ടിടമാണ് ഓട്ടുപാറ ബസ് സ്റ്റാന്‌ഡ് കെട്ടിടം. ദിനംപ്രതി നൂറുകണക്കിനു യാത്രക്കാരും അത്രതന്നെ വാഹനങ്ങളും എത്തുന്നുണ്ട്. കാലവർഷം ശക്തമായതോടെ കെട്ടിടംതന്നെ പലഭാഗത്തും അടർന്നുവീഴുന്നുണ്ട്. കെട്ടിടത്തിന്‍റെ ഇപ്പോഴത്തെ അവസ്ഥയെകുറിച്ച് വ്യാപാരികളും നാട്ടുകാരും നിരവധി തവണ നഗരസഭ അതികൃതരെ അറിയിച്ചെങ്കിലും നാളിതുവരെ ഒരു നടപടിയും ഉണ്ടായില്ലെന്ന് നാട്ടുകാർ പറയുന്നു. വർഷാവർഷം നടത്തിവരാറുള്ള അറ്റകുറ്റപ്പണികളും ഇപ്പോൾ നടത്താറില്ലെന്നും ജനം പറയുന്നു. കാലവർഷം ശക്തമായതോടെ പഴക്കംചെന്ന കെട്ടിടങ്ങൾ തകർന്നുവീഴുന്നത് നിത്യസംഭവമായിരിക്കുന്ന സാഹചര്യത്തിൽ ഓട്ടുപാറ ബസ് സ്റ്റാന്‌ഡ് കെട്ടിടത്തിന്‍റെ അറ്റകുറ്റപ്പണികൾ ഉടൻ ആരംഭിക്കണമെന്നും നാട്ടുകാർ ആവശ്യപ്പെട്ടു.

ഒല്ലൂര്‍ ലൈബ്രറി കോർപറേഷൻ സോണൽ ഓഫീസ് കെട്ടിടത്തിൽ

ഒല്ലൂര്‍: വായനദിനത്തില്‍ ഒല്ലൂര്‍ ലൈബ്രറി കോർപറേഷൻ സോണല്‍ ഓഫീസ് കെട്ടിടത്തില്‍ പ്രവര്‍ത്തനം ആരംഭിച്ചു. ലൈബ്രറിയുടെ ഔപചാരിക ഉദ്ഘാടനം കോര്‍പറേഷന്‍ മേയര്‍ എം.കെ. വര്‍ഗീസ് നിര്‍വഹിച്ചു. യോഗത്തില്‍ ഡെപ്യൂട്ടി മേയര്‍ എം.എല്‍. റോസി അധ്യക്ഷത വഹിച്ചു. വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ വര്‍ഗീസ് കണ്ടംകുളത്തി ലൈബ്രറിക്കു പുതിയതായി ലഭിച്ച പുസ്തകങ്ങൾ ഏറ്റുവാങ്ങി. കൗണ്‍സിലര്‍മാരായ കരോളിന്‍ ജെറിഷ്, ശ്യാമള വേണുഗോപാല്‍, ഒല്ലൂർ ലൈബ്രറി പ്രസിഡന്‍റും കൗൺസിലറുമായ സി.പി. പോളി, ലൈബ്രറി സെക്രട്ടറി ഡോ. രമാദേവി, കെ.എസ്. ശ്രീജിത്ത് തുടങ്ങിയവര്‍ സംസാരിച്ചു. തുടര്‍ന്നു വായനദിനാചരണത്തിന്‍റെ ഭാഗമായി സാഹിത്യ നിരൂപകന്‍ വി.യു. സുരേന്ദ്രന്‍ പ്രഭാഷണം നടത്തി.

സുരക്ഷയില്ല; അമിതവേഗതയും ബസുകളുടെ മത്സര ഓട്ടവും

ചേർപ്പ്: തൃശൂർ - ഇരിങ്ങാലക്കുട - കൊടുങ്ങല്ലൂർ റൂട്ടിൽ വാഹന അപകടങ്ങൾ പതിവാകുന്നു. അമിതവേഗവും ബസുകളുടെ മത്സര ഓട്ടവുമാണ് അപകടത്തിന് കാരണമാകുന്നത്. ഇതിനിടയില്‌ നിരപരാധികളായ സാധാരണ ജനങ്ങളുടെ ജീവൻ പൊലിയുകയാണ്. കഴിഞ്ഞദിവസം ചൊവ്വൂരിൽ ബസ് കാത്തിരിപ്പുകേന്ദ്രത്തിലേക്ക് ബസ് പാഞ്ഞുകയറിയുണ്ടായ ആഘാതത്തിൽനിന്ന് യാത്രക്കാർ മോചിതരായിട്ടില്ല. അപകടനില തരണംചെയ്യാതെ സ്വകാര്യ ആശുപത്രിയിൽ ചികിത്സയിൽ കഴിയുകയാണ് അപകടത്തിൽപ്പെട്ട മൂന്ന് സ്ത്രീകളും. സംസ്ഥാന റോഡിലെ അശാസ്ത്രീയപണികളും കുണ്ടും കുഴിയും ഈ മേഖലകളിലെ യാത്രാദുരിതംകൂട്ടി. റോഡിന്‍റെ ഇരു വശങ്ങളിലും വേണ്ടത്ര നടപ്പാതകൾ ഇല്ലാത്തതു ഇരുചക്ര വാഹനക്കാര്‌‌ക്കും വഴിയാത്രക്കാർക്കും ദുരിതം അരികിലാക്കുന്നു. പാലക്കൽ മാർക്കറ്റ് ജംഗ്ഷന്‌ റോഡിലെ കുഴികൾ ഗതാഗതക്കുരുക്ക് ഉണ്ടാക്കുന്ന സ്ഥിതിയും നിലനിൽക്കുന്നു. അധികൃതരുടെ അനാസ്ഥയാണെന്ന് നാട്ടുകാർ ആരോപിച്ചു. യാത്രക്കാർക്ക് മതിയായ റോഡ് സുരക്ഷ ഒരുക്കാൻ ബന്ധപ്പെട്ട വകുപ്പുകൾ തയാറകണം. ആവശ്യമായ ഗതാഗതപരിഷ്കാരങ്ങൾ വരുത്തണമെന്നും ജനങ്ങൾ ആവശ്യപ്പെടുന്നു.

ചൊവ്വൂർ ബസപകടം; ഡ്രൈവര്‌ക്കെതിരേ വധശ്രമത്തിനു കേസ്

ചേർപ്പ്: ചൊവ്വൂരിൽ അഞ്ചാംകല്ല് പഞ്ചിംഗ് ബൂത്തിനടുത്ത് ബസ് കാത്തിരിപ്പുകേന്ദ്രത്തിലേക്ക് ബസ് പാഞ്ഞുകയറി മൂന്നുസ്ത്രീകൾക്ക് പരിക്കുപറ്റിയ സംഭവത്തിൽ ഡ്രൈവര്‌ക്കെതിരേ വധശ്രമത്തിന് കേസെടുത്തു. സംഭവം നടന്നയുടനെ ഓടിരക്ഷപ്പെട്ട ഡ്രൈവറായ പുത്തൻചിറ സ്വദേശി ഒലവക്കോട്‌ വീട്ടിൽ നാസർ(53)നേയും സംഭവത്തിൽ ഉൾപ്പെട്ട ബസും പോലീസ് കസ്റ്റഡിയിലെടുത്തിരുന്നു. ബസിന് സ്റ്റോപ്പ് ഉണ്ടായിട്ടും ആളുകള്‌ കയറാൻ നിൽക്കുന്നതുകണ്ടിട്ടും വേഗത കുറയ്ക്കാൻ ഡ്രൈവർ ശ്രമിച്ചില്ല. ബസ് കാത്തുനിൽക്കുന്നവർ ഓടിമാറാൻ ശ്രമിച്ചെങ്കിലും അവരെ ഇടിച്ചുതെറിപ്പിച്ച് സമീപത്തെ ഇലക്ട്രിക് പോസ്റ്റിലും ബസ് സ്റ്റോപ്പിലും ഇടിച്ചാണ് ബസ് നിന്നത്. ബസ് ഡ്രൈവർക്കെതിരേ തൃശൂർ റൂറൽ ജില്ലാ പോലീസ് മേധാവി ബി. കൃഷ്ണകുമാറിന്‍റെ നിർദേശപ്രകാരം അശ്രദ്ധമായി, മനുഷ്യജീവന് അപകടംവരുത്തുന്ന തരത്തിൽ വാഹനമോടിച്ച് ഗുരുതര പരിക്കേൽപ്പിച്ചതിനും വധശ്രമത്തിനുമുള്ള വകുപ്പുകൾ ചേർത്താണ് കേസ് രജിസ്റ്റർ ചെയ്തിട്ടുള്ളത്. കോടതിയിൽ ഹാജരാക്കിയ പ്രതിയെ റിമാന്‌ഡ് ചെയ്തു. നാസർ മാള പോലീസ് സ്റ്റേഷനിൽ 2010ൽ അശ്രദ്ധമായി വാഹനമോടിച്ചതിൽ ഒരാള്‌ക്ക് ഗുരുതരമായി പരിക്കേൽക്കാൻ ഇടയായ കേസിലും ഇരിങ്ങാലക്കുട പോലീസ് സ്റ്റേഷനിൽ 2019ൽ അശ്രദ്ധമായി വാഹനമോടിച്ചതിൽ ഒരാൾക്ക് മരണം സംഭവിക്കാൻ ഇടയായ കേസിലെയും പ്രതിയാണ്. ചേർപ്പ് പോലീസ് സ്റ്റേഷൻ ഇൻസ്പെക്ടർ സി. രമേഷ്, സബ് ഇൻസ്പെക്ടർ ടി.എൻ. പ്രദീപൻ, എഎസ്ഐ പി.എൻ. ഷീജ, സി നീഷ്എന്നിവർ ചേർന്നാണ് പ്രതിയെ അറസ്റ്റ് ചെയ്തത്.

ധനവകുപ്പിന്‍റെ പ്രതികാരനടപടി അവസാനിപ്പിക്കണം: കെജിഒയു

തൃശൂർ: തദ്ദേശവകുപ്പിലെ ബിഡിഒ, ബ്ലോക്ക് പഞ്ചായത്ത് സെക്രട്ടറി തസ്തികയിലുള്ള ജീവനക്കാരുടെ പെർമനന്‍റ് എംപ്ലോയി നന്പർ എടുത്തുമാറ്റി ജീവനക്കാരെ താത്കാലിക ജീവനക്കാരുടെ ഗണത്തിൽപെടുത്തും വിധം ധനകാര്യവകുപ്പ് നടത്തുന്ന പ്രതികാരനടപടി അവസാനിപ്പിക്കണമെന്നു കേരള ഗസറ്റഡ് ഓഫീസേഴ്സ് യൂണിയൻ(കെജിഒയു) സംസ്ഥാന പ്രസിഡന്‍റ് കെ.സി. സുബ്രഹ്മണ്യൻ. സംഘടനയുടെ തൃശൂർ പ്രവർത്തകസമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഇന്‍റഗ്രേഷന്‍റെ ഭാഗമായി പഞ്ചായത്തുവകുപ്പിൽനിന്നു ബ്ലോക്ക് ഡെവലപ്മെന്‍റ് ഓഫീസർമാരായ ഉദ്യോഗസ്ഥർക്കാണു ധനകാര്യവകുപ്പിന്‍റെ ഇടപെടലിൽ ശന്പളവും മറ്റ് ആനുകൂല്യങ്ങളും നഷ്ടപ്പെടുന്നത്. വിരമിക്കുന്ന ജീവനക്കാർക്കു സർവീസ് ആനുകൂല്യങ്ങളുമില്ല. ഉത്തരവ് പിൻവലിച്ചില്ലെങ്കിൽ സമരവുമായി മുന്നോട്ടുപോകുമെന്നും സുബ്രഹ്മണ്യൻ പറഞ്ഞു. ജില്ല പ്രസിഡന്‍റ് ഡോ. സി.ബി. അജിത് കുമാർ, സംസ്ഥാന സെക്രട്ടറി പി. രാമചന്ദ്രൻ, ജില്ല സെക്രട്ടറി ഇ.കെ. സുധീർ, ട്രഷറർ സി.എം. അനീഷ്, സെക്രട്ടേറിയറ്റ് അംഗം ജനീഷ്, കെ.പി. ഗിരീഷ്, വി.എസ്. സുബിത എന്നിവർ പ്രസംഗിച്ചു. പുതിയ ജില്ല സെക്രട്ടറിയായി വടക്കാഞ്ചേരി റീസർവേ സീനിയർ സൂപ്രണ്ട് ഇ.കെ. സുധീറിനെ തെരഞ്ഞെടുത്തു.

ഉച്ചഭക്ഷണ മെനു പരിഷ്കരണത്തിനു തുക അനുവദിക്കണം: ചന്ദ്രമോഹൻ

തൃശൂർ: ഉച്ചഭക്ഷണ മെനു പരിഷ്കരണത്തിന് ആവശ്യമായ തുക അനുവദിക്കണമെന്നു മുൻ എംഎൽഎ ടി.വി. ചന്ദ്രമോഹൻ. ഉച്ചഭക്ഷണത്തിനുള്ള തുക കണ്ടെത്തുക എന്നത് ഇപ്പോൾ പ്രധാനാധ്യാപകരുടെ ബാധ്യതയായിമാറുകയാണ്. കൈയടിനേടാൻ പ്രഖ്യാപനങ്ങൾകൊണ്ടു പറ്റുമെങ്കിലും നടപ്പിലാക്കാൻ ബുദ്ധിമുട്ടാണെന്നും കെപിഎസ്ടിഎ ക്യാന്പിന്‍റെ സമാപനസമ്മേളനം ഉദ്ഘാടനം ചെയ്ത് അദ്ദേഹം പറഞ്ഞു. ജില്ലാ പ്രസിഡന്‍റ് പി.സി. ശ്രീപദ്മനാഭൻ അധ്യക്ഷത വഹിച്ചു. സംസ്ഥാന വൈസ് പ്രസിഡന്‍റ് സാജു ജോർജ് മുഖ്യപ്രഭാഷണം നടത്തി. സെക്രട്ടറി ജയപ്രകാശ് പാറപ്പുറത്ത്, ട്രഷറർ മുഹമ്മദ് സി.എ. റാഫി, ടി.യു. ജയ്സണ്‍, റെയ്ജു പോൾ, കെ.ജെ. ജോബി, സി.ജെ. റെയ്മണ്ട്, ജസ്‌ലിൻ തുടങ്ങിയവർ പ്രസംഗിച്ചു.

കണ്ണിൽ പൊടിയിടാൻ മിനുക്കുപണികൾ തകൃതി; പരിശോധന ഇന്ന്

കൊരട്ടി: ദേശീയപാത വികസനത്തിന്‍റെ ഭാഗമായി അടിപ്പാത/ മേൽപ്പാല നിർമാണ പ്രവൃത്തികൾ നടക്കുന്ന സ്ഥലങ്ങളിൽ എംഎൽഎയുടെയും ജില്ലാ കളക്ടറുടെയും നേതൃത്വത്തിൽ പരിശോധന ഇന്ന്. സംഘം സ്ഥലത്തെത്തുന്നതിനുമുമ്പ് കണ്ണിൽ പൊടിയിടാൻ കൊരട്ടി മേഖലയിലും പെരുമ്പിയിലും മുരിങ്ങൂരിലും മിനുക്കുപണികൾ തകൃതിയായി നടക്കുന്നതായി നാട്ടുകാർ. ചെറിയ മഴയ്ക്കുപോലും വെള്ളക്കെട്ട് രൂക്ഷമാകുകയും ഇരുചക്രവാഹനങ്ങളടക്കം അപകടത്തിൽപ്പെടുന്നതുമായ കൊരട്ടി ജംഗ്ഷനിൽ ചെളി കുമിഞ്ഞുകൂടുന്നത് ഒഴിവാക്കാൻ ലോറിയിൽ മെറ്റലും പാറപ്പൊടിയുമടങ്ങിയ മിശ്രിതം കൊണ്ടുവന്ന് മണ്ണുമാന്തിയന്ത്രം ഉപയോഗിച്ച് നിരത്തുകയാണ്. ജംഗ്ഷനിലെ വെള്ളക്കെട്ട് വിവാദങ്ങൾക്കുവഴിമാറി മാസങ്ങൾ പിന്നിട്ടിട്ടും യാതൊരു പരിഹാര നടപടികൾക്കും നിർമാണകമ്പനിയോ നാഷണൽ ഹൈവേ അഥോറിറ്റിയോ തയാറായില്ലെന്ന ഗുരുതരമായ പരാതിയാണ് നാട്ടുകാർ ഉന്നയിക്കുന്നത്. കാന നിർമാണത്തിന്‍റെ പ്രാരംഭഘട്ടത്തിൽത്തന്നെ അശാസ്ത്രീയത ചോദ്യം ചെയ്ത് ജനങ്ങളും വിവിധ സംഘടനകളും രംഗത്തുവന്നെങ്കിലും കുറ്റമറ്റ രീതിയിലാക്കാൻ ക്രിയാത്മകമായ ഇടപെടൽ ഉന്നതതലങ്ങളിൽനിന്നും ഉണ്ടായില്ലെന്നതാണു യഥാർഥ്യം. കാലവർഷത്തിന്‍റെ തീവ്രതയോ പ്രദേശത്തിന്‍റെ ഭൂമിശാസ്ത്രപരമായ കിടപ്പോ പരിഗണിക്കാതെയുള്ള നിർമാണമാണു വെള്ളക്കെട്ടിനു കാരണമായത്. ചതിക്കുഴികളും ടാർ ഉരുണ്ടുകൂടി മുഴച്ചുനിന്നതുമായ പെരുമ്പി പാതയിൽ ചെറിയ തോതിൽ അറ്റകുറ്റപ്പണികൾ ഇന്നലെ നടന്നു. കഴിഞ്ഞദിവസം എട്ടംഗ‌സംഘം സഞ്ചരിച്ച കാർ കുഴിയിൽവീണ് നിയന്ത്രണംവിട്ട് മീഡിയനിൽ ഇടിച്ചുകയറിയിരുന്നു. പൊങ്ങം മുതൽ മുരിങ്ങൂർ വരെ റോഡിന് ഇരുഭാഗത്തും സർവീസ് റോഡ് ഉണ്ടായിരുന്നുവെങ്കിൽ നിർമാണത്തിന്‍റെ ഒരു ഘട്ടത്തിലും ഗതാഗതക്കുരുക്ക് ഇത്ര രൂക്ഷമാകുമായിരുന്നില്ല. ഗ്രാമീണ - പൊതുമരാമത്ത് റോഡുകളിലൂടെ ബദൽ സംവിധാനമൊരുക്കിയാലും അവിടെയും കുരുക്ക് രൂപപ്പെടുകയും റോഡുകൾ തകരുകയും ചെയ്യുന്നതല്ലാതെ ദേശീയപാതയിലെ കുരുക്കിനു യാതൊരു ശമനവുമുണ്ടാകുന്നില്ല. ദീർഘദൂര യാത്രികർ നേരിടുന്ന ദുരിതങ്ങൾക്ക് സമാനതകളില്ല. വിദ്യാർഥികളും കച്ചവടക്കാരും ജോലി,ഓഫീസ് എന്നിവിടങ്ങളിലെ‌ത്താ ൻ ദേശീയപാതയെ ആശ്രയിക്കു ന്നവരും മാസങ്ങളായി ഗതാഗതകുരുക്കിൽപ്പെട്ട് കഷ്ടപ്പെടുകയാണ്. പാതയിൽ നീണ്ടനിരകൾക്കിടയിലൂടെ തലങ്ങും വിലങ്ങും ആംബുലൻസിൽ രോഗികളുമായി പോകുന്നവരുടെ നെഞ്ചിടിപ്പിനെക്കുറിച്ചുള്ള ബോധ്യവും അധികാരികൾക്കില്ല. നിർമാണ പ്രവൃത്തികൾക്കിടെ സ്വാഭാവികമായി ഉണ്ടായേക്കാവുന്ന ബുദ്ധിമുട്ടുകൾക്കപ്പുറം സഞ്ചാര സ്വാതന്ത്ര്യം നിഷേധിക്കുന്നതിനെതിരെ സഹികെട്ട് പ്രതിഷേധ വുമായി വരുംദിവസങ്ങളിൽ ജനം രംഗത്തിറങ്ങിയാലും അത്ഭുതപ്പെടാനില്ല. പൊതുജനങ്ങളെ സാരമായി ബാധിക്കുന്ന വിഷയത്തോട് ഉദ്യോഗസ്ഥ വൃന്ദവും ജനപ്രതിനിധികളും പുലർത്തുന്ന നിശബ്ദതയാണ് ഏറെ സങ്കടകരം. പൊങ്ങം - മുതൽ മുരിങ്ങൂർ‌വരെ പൂർണമായി സർവീസ് റോഡ് ഒരുക്കി അതിലൂടെ വഴിതിരിച്ചുവിട്ടാൽ മാത്രമേ ഗതാഗതക്കരുക്കിനു പരിഹാരം ഉണ്ടാകുകയുള്ളൂ. നിർമാണക്കമ്പനിയെ ന്യായീകരിക്കാതെ മാനദണ്ഡങ്ങൾ പാലിച്ചുള്ള നിർമാണം ഉറപ്പുവരുത്താനും സമയബന്ധിതമായി പൂർത്തിയാക്കാനും കൃത്യമായ ഇടപെടൽ എൻഎച്ച്എഐയുടെ ഭാഗത്തുനിന്നുണ്ടാകണമെന്ന്് നാട്ടുകാർ ആവശ്യപ്പെട്ടു. ഇന്ന് ഉച്ചതിരിഞ്ഞ് 3.30ന് നടക്കുന്ന സൈറ്റ് ഇൻസ്പെക്ഷനിൽ ജില്ലാ പോലീസ് മേധാവി, എൻഎച്ച്എഐ പ്രൊജക്ട് ഡയറക്ടർ, ആർടിഒ, ചാലക്കുടി തഹസിൽദാർ അടക്കം പ്രാദേശിക ഭരണകൂടങ്ങളിലെ പ്രസിഡന്‍റ്് / സെക്രട്ടറി തുടങ്ങിയവരും പങ്കെടുക്കും.

പ്രതിഷേധ ഫുട്‍ബോൾകളിയുമായി യൂത്ത് കോണ്‍ഗ്രസ്

തൃശൂർ: ഇന്ത്യൻ യൂത്ത് കോണ്‍ഗ്രസ് ഒല്ലൂക്കര മണ്ഡലം കമ്മിറ്റിയുടെ നേതൃത്വത്തിൽ പറവട്ടാനിയിലുള്ള കോർപറേഷൻ പെലെ ദ ലെജൻഡ് ഫുട്ബോൾ ഗ്രൗണ്ടിനു മുൻവശം പ്രതിഷേധ കാൽപ്പന്തുകളി നടത്തി. കഴിഞ്ഞ ഒൻപതുവർഷക്കാലമായി പണി തുടരുന്ന പറവട്ടാനി ഗ്രൗണ്ട് രണ്ടു ഭരണകാലം തീരാറായിട്ടും പൂർത്തീകരിക്കപ്പെട്ടിട്ടില്ല. സ്ഥിരമായി ടൂർണമെന്‍റ് നടന്നിരുന്ന ഗ്രൗണ്ട് കോടികൾ ചെലവിട്ടശേഷം 2023ൽ പേരിനുമാത്രം ഉദ്ഘാടനംചെയ്ത് യുവജനങ്ങളെ വിഡ്ഢികളാക്കി. ഈ ദുരവസ്ഥയ്ക്ക് അവസാനം ഉണ്ടാകണമെന്ന് യൂത്ത് കോണ്‍ഗ്രസ് ആവശ്യപ്പെട്ടു. ജില്ലാ യൂത്ത് കോണ്‍ഗ്രസ് പ്രസിഡന്‍റ് ഹരീഷ് മോഹൻ ഉദ്ഘാടനം ചെയ്തു. യൂത്ത് കോണ്‍ഗ്രസ് മണ്ഡലം പ്രസിഡന്‍റ് ലിയോ രാജൻ അധ്യക്ഷത വഹിച്ചു. നിയോജകമണ്ഡലം പ്രസിഡന്‍റ് കെ. സുമേഷ് മുഖ്യപ്രഭാഷണം നടത്തി. സി.കെ. ഫ്രാൻസിസ്, പ്രഭുദാസ് പാണേങ്ങാടൻ, ജെൻസൻ ജോസ് കാക്കശേരി, സജോ സണ്ണി, പ്രിയൻ ജോർജ്, കെ.കെ. ജയ്ക്കോ, ലിന്‍റോ രാജൻ, ലിയാസ് ബാബു, ജിബി വേണുഗോപാൽ, ലിജോ തോമസ്, മിന്‍റോ സി. ആന്‍റോ, അനീഷ്, ഷഹീർ എന്നിവർ പ്രസംഗിച്ചു.

മുന്നറിയിപ്പുമായി ഫയർഫോഴ്സ്

സി.ജി. ജിജാസൽ തൃശൂർ: കാലവർഷം സജീവമാണ്. നദികളും പുഴകളും തോടുകളും കുളങ്ങളും നിറഞ്ഞു. ഈ വേളയിൽ മഴയുടെ കുളിരുള്ള അനുഭൂതി നുകരാൻ ജലാശയങ്ങളിൽ ഇറങ്ങുന്പോൾ കരുതൽ വേണമെന്ന് അഗ്നിരക്ഷാസേന. കാരണം, പെയ്തുവീഴുന്ന മഴ കാണാൻ രസമാണെങ്കിലും, ഉറ്റവരുടെയും ഉടയവരുടെയും കണ്ണുകളിൽനിന്നു കണ്ണീർമഴ വീഴ്ത്തുന്നതു സങ്കടകരമാണ്. വർഷംപിറന്ന് ആറുമാസം പിന്നിടുന്പോഴേക്കും ജില്ലയിൽ മുങ്ങിമരിച്ചത് 50-ലേറെപ്പേരാണ്. അഗ്നിരക്ഷാസേനയുടെ കണക്കിൽപ്പെടാത്തവർ ഇനിയുമുണ്ട്. തൃശൂർ ഫയർ സ്റ്റേഷനു കീഴിലാണ് കൂടുതൽ മുങ്ങിമരണങ്ങൾ റിപ്പോർട്ട് ചെയ്തത്. ഗുരുവായൂർ സ്റ്റേഷനുകീഴിൽ മുങ്ങിമരണം റിപ്പോർട്ട് ചെയ്തിട്ടില്ല. ഇവയിൽതന്നെ കിണറ്റിൽവീണുള്ള മരണമാണ് കൂടുതൽ. കിണറ്റിൽവീണ വളർത്തുമൃഗങ്ങളെ രക്ഷിക്കാൻ ഇറങ്ങി അപകടത്തിൽപ്പെടുന്നവരും നിരവധിയാണ്. അപകടങ്ങളിൽനിന്നു രക്ഷപ്പെടുന്നവരുടെയും രക്ഷപ്പെടുത്തുന്നവരുടെയും കണക്കുകൾ ഇതിലേറെയാണ്. പുഴ, ഡാം, തോട്, കുളം, പാറമട എന്നിവയിൽ മുങ്ങിമരിക്കുന്നവരുടെ എണ്ണവും വർധിച്ചു. കഴിഞ്ഞവർഷത്തെ അപേക്ഷിച്ച് ഈവർഷവും മുങ്ങിമരണങ്ങളുടെ എണ്ണം വർധിക്കാൻ ഇടയാക്കുന്നതു ജനങ്ങളുടെ അറിവില്ലായ്മകൊണ്ടാണെന്നു സേന പറയുന്നു. പെരുന്നാൾആഘോഷത്തിനായി എത്തിയ മൂന്നു വിദ്യാർഥിനികൾ പീച്ചി ഡാമിൽ വീണുമരിച്ചതും, കുട്ടിയെ രക്ഷിക്കാൻ ശ്രമിക്കവേ ചെറുതുരുത്തി ഭാരതപ്പുഴയിൽ ഒരു കുടുംബത്തിലെ നാലുപേർ മരിച്ചതും കോട്ടപ്പുറം കായലിൽ വള്ളം മറിഞ്ഞു രണ്ടുപേർ മരിച്ചതുമാണ് ഈ വർഷത്തെ വലിയ അപകടങ്ങൾ. പൂളിലെ പരിശീലനം മാത്രം പോരാ... അനിൽകുമാർ (അസിസ്റ്റന്‍റ് സ്റ്റേഷൻ ഓഫീസർ, തൃശൂർ അഗ്നിരക്ഷാസേന) നീന്തൽ അറിയാമെന്നുപറഞ്ഞ് മഴക്കാലത്തു ജലാശയങ്ങളിൽ ഇറങ്ങുന്നവരാണ് കൂടുതൽ അപകടങ്ങളിൽപ്പെടുന്നതെന്നു തൃശൂർ അഗ്നിരക്ഷാസേന അസിസ്റ്റന്‍റ് സ്റ്റേഷൻ ഓഫീസർ അനിൽകുമാർ. സ്വിമ്മിംഗ് പൂളിലെ പരിശീലനംകൊണ്ടുമാത്രം ജലാശയങ്ങളിൽ ഇറങ്ങരുത്. പൂളിലെ 15-20 മീറ്റർമാത്രം ദൂരമല്ല ജലാശയങ്ങളിലേത്. അവയുടെ കാഠിന്യത്തെയോ സ്വഭാവത്തെയോ മനസിലാകാതെ ഇറങ്ങുന്നതാണ് അപകടങ്ങൾ വർധിപ്പിക്കുന്നത്. നീന്തൽ പഠിച്ചതുകൊണ്ടുമാത്രം കിണറിൽ നീന്താൻ സാധിക്കുമെന്നു കരുതരുതെന്നും മൂന്നുമിനിറ്റിൽ അധികം വെള്ളത്തിൽ മുങ്ങിയാൽ മരണം ഉറപ്പാണെന്നും ജലാശയങ്ങളിലേക്കു പോകുന്പോൾ ഒറ്റയ്ക്കുപോകാതിരിക്കണമെന്നും അദ്ദേഹം പറഞ്ഞു. ജലാശയങ്ങളിൽ അകപ്പെടുന്പോൾ... l വെള്ളത്തിലേക്ക് എടുത്തുചാടരുത്. l വെള്ളത്തിൽ മുങ്ങിത്താഴുന്നതുകണ്ടാൽ കന്പ്, തുണി എന്നിവ എറിഞ്ഞുനൽകുക. l ഒച്ചവച്ച് ആളുകളെ വിളിച്ചുകൂട്ടുക. l ആത്മവിശ്വാസം ഉണ്ടെങ്കിൽമാത്രമേ വെള്ളത്തിൽ ഇറങ്ങാവൂ. l വെള്ളത്തിൽ അകപ്പെടുന്നവരെ പിറകിൽകൂടി ചെന്നു മുടിപിടിച്ചു കരയ്ക്കു കയറ്റണം. l വെള്ളത്തിൽ അകപ്പെട്ടവരെ ബാക്സ്ട്രോക്ക് ചെയ്തു രക്ഷപ്പെടുത്താൻ ശ്രമിക്കുക. കരയ്ക്കു കയറ്റിയാൽ... l തല ചെരിച്ചുവച്ച് വയറിൽ അമർത്തി വെള്ളം, ചെളി എന്നിവ കളയുക. lസിപിആർ നൽകുക. l ഉടൻ വൈദ്യസഹായം നൽകുക. ഒഴിവാക്കുക... l മഴക്കാലങ്ങളിൽ പരമാവധി ജലാശയങ്ങളിൽ ഇറങ്ങാതിരിക്കുക. l രക്ഷിക്കാനെത്തുന്നവരുടെ തോളിൽ പിടിച്ച് അമർത്തുന്നത് അവരെക്കൂടി അപകടത്തിൽപ്പെടുത്തും. l തെരച്ചിലിനിടെ അനാവശ്യമായി ഫയർ, സ്കൂബ ഉദ്യോഗസ്ഥരെ തെറ്റിദ്ധരിപ്പിക്കാതിരിക്കുക.

അമല കാൻസർ ഗവേഷണ കേന്ദ്രത്തിൽനിന്നു 115 പിഎച്ച്ഡി

തൃശൂർ: അമല കാൻസർ റിസർച്ച് സെന്‍ററിൽനിന്നു 115 പേർ പിഎച്ച്ഡി ബിരുദം നേടി. ഗവേഷണമേഖലയിൽ കൈവരിച്ച ഈ നേട്ടത്തോടനുബന്ധിച്ചു സംഘടിപ്പിച്ച ചടങ്ങ് അമല ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് ഡയറക്ടർ ഫാ. ജൂലിയസ് അറയ്ക്കൽ സിഎംഐ ഉദ്ഘാടനം ചെയ്തു. റിസർച്ച് ഡയറക്ടർ ഡോ.വി. രാമൻകുട്ടി അധ്യക്ഷത വഹിച്ചു. കേരള ശാസ്ത്രസാങ്കേതിക പരിസ്ഥിതി കൗണ്‍സിലിനു കീഴിലുള്ള സെന്‍റർ ഫോർ എക്സലൻസ് ഇൻ ന്യൂട്രസൂട്ടിക്കൽസ് ചീഫ് സയന്‍റിസ്റ്റ് ഡോ. റൂബി ജോണ്‍ ആന്‍റോ മുഖ്യപ്രഭാഷണം നടത്തി. കേരള സർവകലാശാല ബയോകെമിസ്ട്രി പ്രഫസറും ആരോഗ്യസർവകലാശാല ഗവേണിംഗ് കൗണ്‍സിൽ മെന്പറുമായ ഡോ. പി.ആർ. സുധാകരൻ, ഡോ. ടി.ഡി. ബാബു, ഡോ. സി.ആർ. അച്യുതൻ, ഡോ. സൂരജ്, ഡോ. മനു കെ. ആര്യൻ എന്നിവർ പ്രസംഗിച്ചു. കഴിഞ്ഞവർഷത്തെ മികച്ച ഗവേഷണപ്രസിദ്ധീകരണങ്ങൾക്കുള്ള ഫാ. ഗബ്രിയേൽ ഗോൾഡൻ ജൂബിലി മെമ്മോറിയൽ അവാർഡ്, ഡോ. രാമദാസൻ കുട്ടൻ എൻഡോവ്മെന്‍റ് അവാർഡ് എന്നിവയ്ക്ക് അർഹയായ ഡോ. പി.കെ. ശ്രുതിയെ സർട്ടിഫിക്കറ്റുകളും ഉപഹാരങ്ങളും നൽകി ആദരിച്ചു.

കുറുനരി, തെരുവുനായ് ആക്രമണങ്ങളിൽ പകച്ച് ജനം

പാലയൂരിൽ കുറുനരി ആക്രമണം; ആറുപേർക്കു പരിക്ക് ചാവക്കാട്: തെക്കൻ പാലയൂരിൽ കുറുനരി ആക്രമണം ആറു പേർക്കുപരിക്കേറ്റു. മൂരക്കൽ നിർമല (60), കവര വാസു ( 64), ലളിത (71) എന്നിവരെയാണ് ഇന്നലെ രാവിലെ കുറുനരി കടിച്ചത്. നിർമല, ലളിത എന്നിവരെ തൃശൂർ മെഡിക്കൽ കോളജ് ആശുപത്രിയിലും വാസുവിനെ ചാവക്കാട് താലൂക്ക് ആ‌ശുപത്രിയിലും പ്രവശിപ്പിച്ചു. വെങ്കിടങ്ങ് സ്വദേശി ശ്രാവണി (18)നെ യാണ് ആദ്യം ആക്രമിച്ചത്. വെള്ളിയാഴ്ച വൈകീട്ട് ബൈക്കിൽ പോകുമ്പോൾ ബൈക്കിലേക്ക് ചാടി ശ്രാവണിന്‍റെ കാലിന്‍റെ ഉപ്പുറ്റിയിൽ കടിച്ചു. കുറച്ചു കഴിഞ്ഞു അതു വഴി വന്നിരുന്ന കറുപ്പം വീട്ടിൽ വെട്ടത്ത് ആദിലിന് (17) കടിയേറ്റു. ഇവിടെ വാടകയ്ക്ക് താമസിക്കുന്ന തമിഴ്നാട് സ്വദേശി കമലി (40) നെ രാത്രി പത്തോടെ ആക്രമിച്ചു. രണ്ടുപേരെയും താലൂക്ക് ആശുപത്രിയിൽ പ്രവേശിപ്പിച്ചു. ഒരാഴച് മുമ്പ് പട്ടച്ചാവിൽ നബീസയെ കുറുനരി കടിച്ചിരുന്നു. കൈക്ക് ഗുരുതരമായി കടിയേറ്റ ഇവർ ചികിത്സയിലാണ്. തെക്കൻ പാലയൂർ 13, 14 വാർഡുകളിൽ വ്യാപകമായി കുറുനരിയുണ്ടെന്നും ഇവയെ പിടിക്കാൻ അടിയന്തര നടപടി സ്വീകരിക്കണമെന്നും പൊതു പ്രവർത്തകരായ അനീഷ് പാലയൂർ, നൗഷാദ് തെക്കുംപുറം എന്നിവർ ആവശ്യപ്പെട്ടു. ഇതിനിടെ മൂന്നുദിവസം മുമ്പ് ഒഴിഞ്ഞുകിടക്കുന്ന പറമ്പിൽ രണ്ടു കുറുനരിയെ ചത്തനിലയിൽ കണ്ടെത്തിയിരുന്നെന്നു നാട്ടുകാർ പറഞ്ഞു. തെക്കഞ്ചേരിയിൽ കുറുനരി ആക്രമണത്തെ തുടർന്ന് ഒരു പശു ചത്തു. ഈ പ്രത്യേക സാഹചര്യത്തിൽ ഇന്നലെ പട്ടിക്കാട് ഡെപ്യൂട്ടി റേഞ്ച് ഓഫീസർ,ബീറ്റ് ഫോറസ്റ്റ് ഓഫീസർമാർ എന്നിവരുടെ സാന്നിധ്യത്തിൽ നഗരസഭ ഓഫീസിൽ വച്ച് യോഗം ചേരുകയും പ്രശ്നബാധിത പ്രദേശങ്ങളിലും കുറുനരിയുടെ ആക്രമണത്തിനിരയായ കുടുംബങ്ങളിലും സന്ദർശനം നടത്തുകയും ചെയ്തു. ആക്രമണത്തിനിരയായ എല്ലാവർക്കും വനം- വന്യജീവി സംരക്ഷണ വകുപ്പിൽ നിന്നും ധനസഹായം ലഭ്യമാക്കുന്നതിനുവേണ്ട നടപടികൾ സ്വീകരിക്കുവാൻ തീരുമാനിച്ചു. ചാവക്കാട് നഗരസഭയിൽ നിന്നും താത്കാലികാശ്വാസമായി ചെയർമാൻ റിലീഫ് ഫണ്ടിൽ നിന്നും 5000 രൂപ വീതം അനുവദിക്കുന്നതിനും തീരുമാനിച്ചു. യോഗത്തിൽ ചെയർപേഴ്സൺ ഷീജ പ്രശാന്ത് അധ്യക്ഷയായിരുന്നു. തെരുവുനായ്ക്കൾ അമ്പതോളം കോഴികളെ കൊന്നു ചേർപ്പ്: മാടക്കായി ജെയ്സൺ ആന്‍റണി വീട്ടിൽ വളർത്തുന്ന കോഴികളെ തെരുവുനായ്ക്കൾ കടിച്ചു കൊന്ന നിലയിൽ. ഇന്നലെ പുലർച്ചെയാണ് കോഴികളെ തെരുവുനായ്ക്കൾ ആക്രമിച്ചത്. വീട്ടുകാർ സ്ഥലത്തുണ്ടായിരുന്നില്ല. വീടിന്‍റെ പിന്നിലെ കോഴിക്കൂടിന്‍റെ ഇരുമ്പ് നെറ്റ് കൂട് കടിച്ചുപൊളിച്ചാണ് നായ്ക്കൾ അമ്പതോളം കോഴികളെ കടിച്ചുകൊന്നത്. മുന്പും കോഴികളെ നായ്ക്കൾ കൊന്നതായി വീട്ടുകാർ പറഞ്ഞു.

കാത്തിരിപ്പുകേന്ദ്രത്തിലേക്കു ബസ് പാഞ്ഞുകയറി; മൂന്നുപേർക്കു പരിക്ക്, ഒരാളുടെ നില ഗുരുതരം

ചേർപ്പ്: ചൊവ്വൂർ അഞ്ചാംകല്ലിൽ സ്വകാര്യ ബസ് നിയന്ത്രണം വിട്ട് ബസ് സ്റ്റോപ്പിലേക്ക് പാഞ്ഞുകയറി, അധ്യാപികയുൾപ്പടെ മൂന്നു സ്ത്രീകൾക്കു പരിക്കേറ്റു. ഒരാളുടെ നില ഗുരുതരം. ചൊവ്വൂർ ചെറുവത്തേരി കാര്യാട്ടുപറന്പിൽ ബേബി കുമാറിന്‍റെ ഭാര്യ സംഗീത (47), ചെറുവത്തേരി വീട്ടിൽ പ്രേമാവതി (61), ഇവരുടെ മകൾ സയ്ന (36) എന്നിവർക്കാണു പരിക്കേറ്റത്. തലയ്ക്ക് പരിക്കേറ്റ പ്രേമാവതിയുടെ നില ഗുരുതരമാണ്. പരിക്കേറ്റവരെ കൂർക്കഞ്ചേരി എലൈറ്റ് ആശുപത്രിയിൽ പ്രവേശിപ്പിച്ചു. പിഎസ്‌സി പരീക്ഷ ഡ്യൂട്ടിക്ക് സ്കൂളിലേക്കു പോകാനായി ബസ് കാത്തുനിൽക്കുകയായിരുന്നു അധ്യാപികയായ സംഗീത. അപകടത്തെ തുടർന്ന് ഓടി രക്ഷപ്പെട്ട ബസ് ഡ്രൈവർ പുത്തൻചിറ സ്വദേശി ഒലവക്കോട് വീട്ടിൽ നാസറി (52)നെയും ബസും ചേർപ്പ് പോലീസ് കസ്റ്റഡിയിലെടുത്തു. ഇന്നലെ ഉച്ചയ്ക്ക് 12.10 ന് ട്രാഫിക് പഞ്ചിംഗ് സ്റ്റേഷനുസമീപമായിരുന്നു അപകടം. കൊടുങ്ങല്ലൂരിൽ നിന്ന് തൃശൂരിലേക്കു പോകുകയായിരുന്ന അൽ‌അസാ സ്വകാര്യ ബസാണ് നിയന്ത്രണം വിട്ട് അപകടത്തിൽപ്പെട്ടത്. ബസ് പാഞ്ഞുവരുന്നതുകണ്ട് ബസ് കാത്തുനിന്നവർ ഓടി മാറിയതുമൂലം വൻ ദുരന്തം ഒഴിവായി. ഇടിയുടെ ആഘാതത്തിൽ ഇരുന്പുതകിടുകൊണ്ട് നിർമിച്ച ബസ് സ്റ്റോപ്പും സമീപത്തെ വൈദ്യുതി പോസ്റ്റും തകർന്നു. വൈദ്യുതി ബന്ധം നിലയ്ക്കുകയും വാഹനഗതാഗതം തടസപ്പെടുകയും ചെയ്തു.

മറ്റത്തൂര്‍ ലേബര്‍ സൊസൈറ്റി സംസ്ഥാനവ്യാപകമായി കുറുന്തോട്ടികൃഷി നടപ്പാക്കുന്നു

കൊടകര: സംസ്ഥാന ഔഷധസസ്യബോര്‍ഡും മറ്റത്തൂര്‍ ലേബര്‍ കോണ്‍ട്രാക്ട് കോ-ഓപ്പറേറ്റീവ് സൊസൈറ്റിയും സഹകരിച്ച് കേരളത്തില്‍ നടപ്പിലാക്കുന്ന കുറുന്തോട്ടി കൃഷിയുടെ ഭാഗമായി സംസ്ഥാനത്തെ ആറു ജില്ലകളിലെ തെരഞ്ഞെടുക്കപ്പെട്ട പഞ്ചായത്തുകള്‍ക്ക് കുറുന്തോട്ടി തൈകള്‍ വിതരണം ചെയ്്തു. ദേശീയ ആയുഷ് മിഷന്‍ സംസ്ഥാന ഡയറക്ടറും സഹകരണസംഘം രജിസ്ട്രാറുമായ ഡോ. ഡി. സജിത്ത് ബാബു വിതരണോദ്ഘാടനം നിര്‍വഹിച്ചു. സംസ്ഥാന ഔഷധസസ്യ ബോര്‍ഡ് ചീഫ് എക്‌സിക്യൂട്ടീവ് ഓഫീസറും ഔഷധി മാനേജിംഗ് ഡയറക്ടറുമായ ഡോ. ടി.കെ. ഹൃദിക് അധ്യക്ഷത വഹിച്ചു. അന്നമനട ഗ്രാമപഞ്ചായത്ത് പ്രസിഡന്‍റ് പി.വി. വിനോദ് കുറുന്തോട്ടിത്തൈകള്‍ ഏറ്റുവാങ്ങി. സൊസൈറ്റി സെക്രട്ടറി കെ.പി. പ്രശാന്ത് പദ്ധതി വിശദീകരിച്ചു. ഔഷധസസ്യബോര്‍ഡ് സയന്‍റിഫിക് ഓഫീസര്‍ ഡോ. ഒ.എല്‍. പയസ്, ഡോ. ജയനാരായണന്‍, സൊസൈറ്റി പ്രസിഡന്‍റ് ടി.എ. ഉണ്ണികൃഷ്ണന്‍, വൈസ് പ്രസിഡന്‍റ് എ. സുനില്‍കുമാര്‍ എന്നിവര്‍ പ്രസംഗിച്ചു. മറ്റത്തൂര്‍ ലേബര്‍ സൊസൈറ്റിയുടെ കൊടകര നഴ്‌സറിയില്‍ ഉത്പാദിപ്പിച്ച ഒരു കോടി ഇരുപതുലക്ഷം കുറുന്തോട്ടിത്തൈകളാണ് ആറു ജില്ലകളിലെ അമ്പതുഗ്രാമപഞ്ചായത്തുകള്‍ക്കായി വിതരണം ചെയ്യുന്നത്.

തടിലോറിയും കാറും കൂട്ടിയിടിച്ചു; ഗതാഗതം തടസപ്പെട്ടു

മുളങ്കുന്നത്തുകാവ്: മരത്തടി കയറ്റിവന്ന ലോറിയും കാറും കൂട്ടിയിടിച്ചു. കാർഡ്രൈവർ അത്ഭുതകരമായി രക്ഷപ്പെട്ടു. മരത്തടികളുടെ കെട്ട് പൊട്ടിയതിനെത്തുടർന്ന് വാഹനം നീക്കാൻ കഴിയാതെയായതോടെ സംസ്ഥാനപാതയിൽ ഏറെനേരം ഗതാഗതം തടസപ്പെട്ടു. തടിലോറിയിലെ മരങ്ങൾ മറ്റൊരു ലോറിയിലേക്കു മാറ്റിക്കയറ്റിയും തകർന്ന കാർ ക്രെയിൻ ഉപയോഗിച്ചുനീക്കിയുമാണ് ഗതാഗതം പുനരാരംഭിച്ചത്. ‌മുളങ്കുന്നത്തുകാവ് അന്പലനടയിൽ ഇന്നലെ രാവിലെയായിരുന്നു അപകടം. നിസാരപരിക്കുകളോടെ രക്ഷപ്പെട്ട കാർയാത്രികൻ സ്വകാര്യ ആശുപത്രിയിൽ ചികിത്സതേടി. തൃശൂർ ഭാഗത്തുനിന്നു ഷൊർണൂർ ഭാഗത്തേക്കു സഞ്ചരിച്ച കാറും എതിർദിശയിൽ നിന്നുവന്ന ലോറിയുമാണ് അപകടത്തിൽപ്പെട്ടത്.

ഗുരുവായൂർ ക്ഷേത്ര ഭണ്ഡാരവരവ് 7.25 കോടി രൂപ

ഗുരുവായൂർ: ക്ഷേത്രത്തിൽ ഭണ്ഡാ രവരവായി 7,25,24,602 രൂപയും രണ്ടു കിലോ 672 ഗ്രാം 600 മില്ലി ഗ്രാം സ്വർണവും 14 കിലോഗ്രാം 240 ഗ്രാം വെള്ളിയും ലഭിച്ചു. കേന്ദ്ര സർക്കാർ പിൻവലിച്ച രണ്ടായിരം രൂപയുടെ 29 ഉം നിരോധിച്ച ആയിരം രൂപയുടെ 19 ഉം അഞ്ഞൂറിന്‍റെ 48 കറൻസിയും ലഭിച്ചു. എസ്ഐബി ഗുരുവായൂർ ശാഖയ്ക്കായിരുന്നു എണ്ണൽ ചുമതല. കിഴക്കേനടയിലെ എസ്ബി ഐ ഇ ഭണ്ഡാരംവഴി 4,06304രൂപയും കിഴക്കേനട പഞ്ചാബ് നാഷണൽ ബാങ്ക് ഇ ഭണ്ഡാരംവഴി 23, 766രൂപയും പടിഞ്ഞാറെ നടയിലെ യുബിഐ ഇ ഭണ്ഡാരം വഴി 1,67, 354രൂപയും ഇന്ത്യൻ ബാങ്ക് ഇ ഭണ്ഡാരംവഴി 2663 രൂപ യും ഐസിഐസിഐ ഇ ഭണ്ഡാരം വഴി 1,25,343 രൂപയും ലഭിച്ചു.

സിഐഎസ്‌സിഇ ഇ- സോണ്‍ നീന്തല്‍ ഡോണ്‍ ബോസ്‌കോ ജേതാക്കള്‍

ഇരിങ്ങാലക്കുട: സിഐഎസ്‌സിഇ സ്‌പോര്‍ട്‌സ് ആന്‍ഡ് ഗെയിംസിന്‍റെ ഭാഗമായി ഇ- സോണ്‍ തലത്തില്‍ സംഘടിപ്പിച്ച നീന്തല്‍ മത്സരത്തില്‍ ഇരിങ്ങാലക്കുട ഡോണ്‍ ബോസ്‌കോ സെൻട്ര ൽ സ്‌കൂള്‍ 215 പോയിന്‍റ് നേടി ചാമ്പ്യന്മാരായി. 125 പോയിന്‍റുമായി പൂങ്കുന്നം ഹരിശ്രീ വിദ്യാനിധി രണ്ടാം സ്ഥാനവും ഇരിങ്ങാലക്കുട ക്രൈസ്റ്റ് വിദ്യാനികേതന്‍ മൂന്നാം സ്ഥാനവും നേടി. ഇരിങ്ങാലക്കുട ഡോണ്‍ ബോ സ്‌കോ സ്‌കൂളില്‍ നടന്ന മത്സരം സ്‌കൂളിന്‍റെ റെക്ടറും മാനേജരു മായ ഫാ. ഇമ്മാനുവല്‍ വട്ടക്കുന്നേല്‍ ഉദ്ഘാടനം ചെയ്തു. സിഐഎസ്‌സിഇ കേരള റീജിയന്‍ സ്‌പോര്‍ട്‌സ് കോ ഓര്‍ഡിനേര്‍ ഫാ. ഷിനോ കളപ്പുരക്കല്‍, ഇ- സോണ്‍ പിടി കോ-ഓര്‍ഡിനേറ്റര്‍ എം.പി. ഷാജു, സ്‌കൂള്‍ സ്‌പോര്‍ട്‌സ് കോ-ഓര്‍ഡിനേറ്റര്‍ ബിന്ദു ജോണ്‍സണ്‍, ഫാ. ജിതിന്‍ മൈക്കിള്‍, ഫാ. ജിനോ കുഴിത്തൊട്ടിയില്‍, ശിവപ്രസാദ് ശ്രീധരന്‍, ഫിസിക്കല്‍ എഡ്യൂക്കേഷന്‍ ഇന്‍സ്ട്രക്ടര്‍ വി.വി. ദിവ്യേഷ്, നീന്തല്‍ പരിശീലകനായ രാജീവ് ശിവന്‍ എന്നിവര്‍ പ്രസംഗിച്ചു.

അസുരൻകുണ്ട് ഡാമിൽ ജലനിരപ്പ് ഉയരുന്നു; ജാഗ്രതാനിർദേശം

തൃശൂർ: അസുരൻകുണ്ട് ഡാം റിസർവോയറിൽ ജലനിരപ്പ് 8.60 മീറ്റർ എത്തിയതിനാൽ രണ്ടാംഘട്ട മുന്നറിയിപ്പ് നൽകിയതായി മൈനർ ഇറിഗേഷൻ എക്സിക്യുട്ടീവ് എൻജിനീയർ അറിയിച്ചു.ജലനിരപ്പ് 8.80 മീറ്ററായാൽ ഡാമിലെ ഷട്ടറുകൾ ഉയർത്തി അധികജലം പുറത്തേക്ക് ഒഴുക്കുമെന്നും പുതുപ്പാലം, കൂളിത്തോട് തോടുകളുടെ ഇരുകരകളിലും താമസിക്കുന്നവർ ജാഗ്രത പാലിക്കണമെന്നും അറിയിച്ചു.

കോർപറേഷൻ കെട്ടിടം തകർച്ചാഭീഷണിയിൽ

തൃശൂർ: നാലാംനിലയിലെ ഇരുന്പുമേൽക്കൂര കാറ്റിൽ നിലംപൊത്തിയതോടെ ജീർണാവസ്ഥയിലുള്ള കെട്ടിടത്തിലെ ഒന്നാംനിലയിലേക്കു മഴവെള്ളം ഒലിച്ചിറങ്ങി തകർച്ചാഭീഷണിയിലായി കോർപറേഷന്‍റെ ഉടമസ്ഥതയിലുള്ള ഷോപ്പിംഗ് കോംപ്ലക്സ്. കഴിഞ്ഞമാസം 23നു മേൽക്കൂര റോഡിലേക്കുവീണു വിവാദമായ മുനിസിപ്പൽ ഓഫീസ് റോഡിലെ കെട്ടിടത്തിന്‍റെ ഒന്നാംനിലയിൽ പ്രവർത്തിക്കുന്ന ജില്ലാ മുനിസിപ്പൽ ആൻഡ് കോർപറേഷൻ എംപ്ലോയീസ് സഹകരണസംഘം ഓഫീസിനകത്തേക്കാണു മഴവെള്ളം എത്തുന്നത്. ഇരുന്പുമേൽക്കൂര വീണതോടെ ടെറസിൽ കെട്ടിക്കിടക്കുന്ന വെള്ളമാണ് ചുമരിലൂടെ താഴോട്ടിറങ്ങുന്നത്. ഓഫീസിനകത്തു കെട്ടിക്കിടക്കുന്ന വെള്ളം പലപ്പോഴും ജീവനക്കാരാണു കോരിക്കളയുന്നത്. കെട്ടിടം തകർന്നുവീഴുമോയെന്ന പേടിയിലാണ് സഹകരണസംഘം ജീവനക്കാരും കെട്ടിടത്തിലെ മറ്റു സ്ഥാപനങ്ങളിലുള്ളവരും. അഡീഷണൽ സബ് ട്രഷറി, പത്രം ഓഫീസ്, സഹകരണസംഘം ഓഫീസുകൾ എന്നിവയും കെട്ടിടത്തിന്‍റെ താഴത്തെനിലയിൽ കടകളും നിലവിൽ പ്രവർത്തിക്കുന്നുണ്ട്. സംഭവത്തെക്കുറിച്ചു മേയർക്കു രേഖാമൂലം പരാതി നൽകിയിട്ടും നടപടിയുണ്ടായിട്ടില്ല. ജീവനക്കാർക്കു സുരക്ഷിതമായി ജോലിചെയ്യാനുള്ള ക്രമീകരണങ്ങൾ ഒരുക്കിത്തരണമെന്നു സഹകരണ ജീവനക്കാരുടെ സംഘടനയായ കേരള കോ- ഓപ്പറേറ്റീവ് എംപ്ലോയീസ് സെന്‍റർ സംസ്ഥാന ജനറൽ സെക്രട്ടറി ഷോബിൻ തോമസ് ആവശ്യപ്പെട്ടു.

കെ.യു. ബിജു സ്മാരക സൗത്ത് ഇന്ത്യൻ യൂത്ത് ചെസ് ടൂർണമെന്‍റ് ഇന്ന്

തൃശൂർ: ഡിവൈഎഫ്ഐ കൊടുങ്ങല്ലൂർ ബ്ലോക്ക് വൈസ് പ്രസിഡന്‍റായിരുന്ന കെ.യു. ബിജുവിന്‍റെ സ്മരണാർഥം ഡിവൈഎഫ്ഐ ജില്ലാ കമ്മിറ്റി സംഘടിപ്പിക്കുന്ന സൗത്ത് ഇന്ത്യൻ യൂത്ത് ചെസ് ടൂർണമെന്‍റ് ഇന്നു വികെഎൻ മേനോൻ ഇൻഡോർ സ്റ്റേഡിയത്തിൽ നടക്കും. രാവിലെ 9.30നു മുൻവിദ്യാഭ്യാസമന്ത്രി പ്രഫ. സി. രവീന്ദ്രനാഥ് ഉദ്ഘാടനം ചെയ്യും. ഡിവൈഎഫ്ഐ കേന്ദ്ര സെക്രട്ടേറിയറ്റ് അംഗം ജെയ്ക്ക് സി. തോമസ് മുഖ്യാതിഥിയാകും. 750 മത്സരാർഥികൾ പങ്കെടുക്കും. രണ്ടുലക്ഷം രൂപയുടെ കാഷ് അവാർഡുകൾ നല്കും. വൈകീട്ട് ആറിനു നടക്കുന്ന ചടങ്ങിൽ യു.ആർ. പ്രദീപ് എംഎൽഎ സമ്മാനങ്ങൾ വിതരണം ചെയ്യും. അണ്ടർ 10, 15 വിഭാഗങ്ങളിലായി ബോയ്‌സ്, ഗേൾസ്, ഓപ്പൺ മത്സരങ്ങൾ നടക്കും. ചെസ് തൃശൂരിന്‍റെ സഹകരണത്തോടെയാണു പരിപാടി സംഘടിപ്പിക്കുന്നത്. പത്രസമ്മേളനത്തിൽ പ്രഫ. എൻ.ആർ. അനിൽകുമാർ, വി.പി. ശരത്പ്രസാദ്, ആർ.എൽ. ശ്രീലാൽ, സുകന്യ ബൈജു, ഡോ. ഫസീല തരകത്ത് എന്നിവർ പങ്കെടുത്തു.

എടതിരിഞ്ഞി സ്മാര്‍ട്ട് വില്ലേജ് ഓഫീസ് നിര്‍മാണത്തിനു തുടക്കമായി

ഇരിങ്ങാലക്കുട: നിയോജകമണ്ഡലത്തിലെ എടതിരിഞ്ഞി സ്മാര്‍ട്ട് വില്ലേജ് ഓഫീസ് ഉള്‍പ്പടെ സംസ്ഥാനത്തെ 45 സ്മാര്‍ട്ട് വില്ലേജ് ഓഫീസുകളുടെ നിര്‍മാണ ഉദ്ഘാടനം റവന്യൂ മന്ത്രി കെ. രാജന്‍ എടതിരിഞ്ഞിയില്‍ നിര്‍വഹിച്ചു. ഓണ്‍ലൈന്‍ ആയാണ് മറ്റു സ്ഥലങ്ങളിലെ നിര്‍മാണോദ്ഘാടനം മന്ത്രി നിര്‍വഹിച്ചത്. ഉന്നത വിദ്യാഭ്യാസ മന്ത്രി ഡോ. ആര്‍. ബിന്ദു അധ്യക്ഷത വഹിച്ചു. കേരള സര്‍ക്കാരിന്‍റെ പ്ലാന്‍ സ്‌കീമില്‍ ഉള്‍പ്പെടുത്തി 50 ലക്ഷം രൂപ വിനിയോഗിച്ചാണ് എടതിരിഞ്ഞി വില്ലേജ് ഓഫീസ് സ്മാര്‍ട്ട് വില്ലേജ് ഓഫീസായി നിര്‍മിക്കുന്നത്. എടതിരിഞ്ഞി വില്ലേജിലെ ഫെയര്‍വാല്യൂ വിഷയം ഉടന്‍ പരിഹരിക്കാന്‍ ആവശ്യമായ നടപടികള്‍ സ്വീകരിക്കണമെന്ന് യോഗത്തില്‍ അധ്യക്ഷത വഹിച്ച ഉന്നത വിദ്യാഭ്യാസ വകുപ്പ് മന്ത്രി ഡോ. ആര്‍. ബിന്ദു ആവശ്യപ്പെട്ടു. ഫെയര്‍വാല്യൂ വിഷയം ഉടന്‍ സമയബന്ധിതമായി പൂര്‍ത്തിയാക്കുമെന്നും ഇരിങ്ങാലക്കുട ആര്‍ഡിഒയെ ഇതിന്‍റെ ഉത്തരവാദിത്വമുള്ള ഓഫീസര്‍ ആയി നിയമിച്ചതായും റവന്യൂ മന്ത്രി കെ. രാജന്‍ ഉദ്ഘാടന പ്രസംഗത്തില്‍ അറിയിച്ചു. ജില്ലാകളക്ടര്‍ പ്രവര്‍ത്തനങ്ങള്‍ ഏകോപിക്കുമെന്നും റവന്യൂ മന്ത്രി അറിയിച്ചു. എടതിരിഞ്ഞി എച്ച്ഡിപി സമാജം ഹാളില്‍ നടന്ന ചടങ്ങില്‍ വെള്ളാങ്കല്ലൂര്‍ ബ്ലോക്ക് പഞ്ചായത്ത് പ്രസിഡന്‍റ് സുധ ദിലീപ്, പടിയൂര്‍ പഞ്ചായത്ത് പ്രസിഡന്‍റ് ലിജി രതീഷ്, ജനപ്രതിനിധികള്‍ ജില്ലാ കളക്ടര്‍ അര്‍ജന്‍ പാണ്ഡ്യന്‍ അഡീഷണല്‍ ഡിസ്ട്രിക്ട് മജിസ്‌ട്രേറ്റ് ടി. മുരളി, മുകുന്ദപുരം തഹസില്‍ദാര്‍ സിമീഷ് കെ.എം സാഹു, റവന്യൂ ഡിവിഷണല്‍ ഓഫീസര്‍ പി. ഷിബു, തൃശൂര്‍ പൊതുമരാമത്ത് വകുപ്പ് കെട്ടിട വിഭാഗം എക്‌സിക്യൂട്ടീവ് എന്‍ജിനീയര്‍ ടി.കെ. സന്തോഷ് കുമാര്‍, വിവിധ രാഷ്ട്രീയ പാര്‍ട്ടി നേതാക്കളായ വി.എ. മനോജ് കുമാര്‍, എന്‍.കെ. ഉദയപ്രകാശ്, ടി.കെ. വര്‍ഗീസ് മാസ്റ്റര്‍, തുടങ്ങിയവര്‍ പങ്കെടുത്തു.

വില്ലേജ് ഓഫീസ് കെട്ടിടത്തിന്‍റെ ശിലാസ്ഥാപന ചടങ്ങ് കോണ്‍ഗ്രസ് ബഹിഷ്‌കരിച്ചു

എടതിരഞ്ഞി: അശാസ്ത്രീയമായ ഫെയര്‍ വാല്യു പ്രശ്നം ഉടനെ പരിഹരിക്കണം എന്ന് ആവശ്യപ്പെട്ടുകൊണ്ട് അദാലത്തല്ല സര്‍ക്കാര്‍ ഉത്തരവാണ് വേണ്ടത് എന്ന മുദ്രാവാക്യം ഉയര്‍ത്തി പടിയൂര്‍ മണ്ഡലം കോണ്‍ഗ്രസ് കമ്മിറ്റിയുടെ നേതൃത്വത്തില്‍ എടതിരിഞ്ഞി പോസ്റ്റോഫീസ് സെന്ററില്‍ പ്രതിഷേധ കൂട്ടായ്മ സംഘടിപ്പിച്ചു. മണ്ഡലം പ്രസിഡന്‍റ് എ.ഐ. സിദ്ധാര്‍ത്ഥന്‍ അധ്യക്ഷത വഹിച്ചു. ഡിസിസി ജനറല്‍ സെക്രട്ടറി ആന്‍റോ പെരുമ്പിള്ളി ഉദ്ഘാടനം ചെയ്തു. കാട്ടൂര്‍ ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് ഷാറ്റോ കുര്യന്‍ മുഖ്യപ്രഭാഷണം നടത്തി. കാട്ടൂര്‍ ബ്ലോക്ക് കോണ്‍ഗ്രസ് കമ്മിറ്റി മുന്‍ വൈസ് പ്രസിഡന്‍റ് അഡ്വ.ജോസ് മൂഞ്ഞേലി, ബ്ലോക്ക് കോണ്‍ഗ്രസ് വൈസ് പ്രസിഡന്‍റ് എം.ഐ. അഷ്റഫ്, കാട്ടൂര്‍ ബ്ലോക്ക് കോണ്‍ഗ്രസ് കമ്മിറ്റി ജനറല്‍ സെക്രട്ടറി കെ.കെ. ഷൗക്കത്തലി, മുന്‍ മണ്ഡലം പ്രസിഡന്‍റ് മാരായ കെ.ആര്‍. പ്രഭാകരന്‍, ബിജു ചാണാശേരി, പഞ്ചായത്ത് മെമ്പര്‍മാരായ സുനന്ദ ഉണ്ണികൃഷ്ണന്‍, ജോയ്സി ആന്‍റണി, മണ്ഡലം വൈസ് പ്രസിഡന്‍റ് ഒ.എന്‍. ഹരിദാസ് തുടങ്ങിയവര്‍ പ്രസംഗിച്ചു. മണ്ഡലം ഭാരവാഹികളായ എ.യു. വേണുഗോപാല്‍, എം.സി. നീലാംബരന്‍, വി.കെ. നൗഷാദ്, പി.എസ്. ജയരാജന്‍, ഒ.എസ്. ലക്ഷ്മണന്‍, സി.ക. ജമാല്‍, മജീദ് പോത്താനി തുടങ്ങിയവര്‍ നേതൃത്വം നല്‍കി. കാലങ്ങളായുള്ള എടതിരിഞ്ഞിയിലെ ഫെയര്‍ വാല്യൂ പ്രശ്നം പരിഹരിക്കാത്തതില്‍പ്രതിഷേധിച്ച് എടതിരിഞ്ഞി സ്മാര്‍ട്ട് വില്ലേജ് ഓഫീസ് കെട്ടിടത്തിന്‍റ്െ ശിലാസ്ഥാപന ചടങ്ങ് കോണ്‍ഗ്രസ് ബഹിഷ്‌കരിച്ചു.

പട്ടാപ്പകൽ മാല പൊട്ടിക്കല്‍; രണ്ട് യുവാക്കള്‍ പിടിയില്‍

ഇരിങ്ങാലക്കുട: നഗരമധ്യത്തില്‍ പട്ടാപ്പകല്‍ ബുള്ളറ്റിലെത്തി മാല പൊട്ടിച്ച കേസില്‍ രണ്ട് യുവാക്കള്‍ പിടിയില്‍. എറണാകുളം ചേരാനെല്ലൂര്‍ സ്വദേശി തൃക്കൂക്കാരന്‍ വീട്ടില്‍ റോഷന്‍ (27), വരാപ്പുഴ ചിറക്കകം സ്വദേശി ഗാര്‍ഡിയന്‍ പറമ്പ് വീട്ടില്‍ ശരത്ത് (27) എന്നിവർ പിടിയിൽ. റോഷനെ വെള്ളിയാഴ്ച ചേരാനെല്ലൂരില്‍ നിന്നും ശരത്തിനെ ഇന്നലെ വരാപ്പുഴയില്‍ നിന്നുമാണ് പോലീസ് സംഘം അറസ്റ്റ് ചെയ്തത്. നിരവധി മാല പൊട്ടിക്കല്‍ ബൈക്ക് മോഷണ കേസുകളില്‍ പ്രതിയായ റോഷനാണ് സംഘത്തലവന്‍. കൊടുങ്ങല്ലൂരില്‍ ബൈക്ക് മോഷണക്കേസില്‍ പോലിസ് അറസ്റ്റു ചെയ്യപ്പെട്ട് ജയിലില്‍ കഴിഞ്ഞിരുന്ന റോഷന്‍ ഈ മാസം 13 നാണ് ജാമ്യത്തിലിറങ്ങിയത്. ഇടപ്പിള്ളി പാലത്തിന് താഴെ പാര്‍ക്ക് ചെയ്തു വച്ചിരുന്ന ബുള്ളറ്റ് മോഷ്ടിച്ച് പറവൂര്‍ വഴികുളങ്ങര പമ്പില്‍ നിന്ന് പെട്രോള്‍ പണം നല്‍കാതെ പോവുകയും തുടര്‍ന്ന് വ്യാജ നമ്പര്‍ പ്ലെയിറ്റ് വെച്ചാണ് സുഹൃത്ത് ശരത്തിനേയും കൂട്ടി ഇയാള്‍ മാല പൊട്ടിക്കാന്‍ ഇറങ്ങിയത്. പെട്രോള്‍ പമ്പില്‍ പണം നല്‍കാത്തതിന് പറവൂര്‍ സ്റ്റേഷനില്‍ പരാതി നിലവിലുണ്ട്. ബുധനാഴ്ച വൈകീട്ട് മൂന്നുമണിയോടെ ഇരിങ്ങാലക്കുട സിവില്‍ സ്റ്റേഷന്‍ പരിസരത്ത് എത്തിയ പ്രതികള്‍ റോഡരികിലൂടെ നടന്ന് പോവുകയായിരുന്ന ഇരിങ്ങാലക്കുട കൂത്തുപറമ്പ് സ്വദേശിനിയായ വയോധികയെ കണ്ട് റോഷന്‍ ബുള്ളറ്റില്‍ നിന്ന് ഇറങ്ങി അവരുടെ പുറകെ ചെന്ന് ഒരു പവന്‍ തൂക്കം വരുന്ന സ്വര്‍ണ്ണമാല പൊട്ടിച്ചോടി ബുള്ളറ്റില്‍ കയറി രക്ഷപ്പെട്ടു. പത്ത് മിനിറ്റിനുള്ളില്‍ ഇരിങ്ങാലക്കുടകത്തീഡ്രല്‍ പള്ളിയുടെ മുന്നിലുള്ള റോഡിന്റെ അരികിലൂടെ നടന്ന് പോവുകയായിരുന്ന കാറളം വെള്ളാനി സ്വദേശിനിയുടെ മൂന്നു പവന്‍ മാലയും പൊട്ടിച്ച് രക്ഷപ്പെടുകയായിരുന്നു. റോഷന്‍ ആളൂര്‍, ഇരിങ്ങാലക്കുട, കൊരട്ടി, കൊടുങ്ങല്ലൂര്‍, എറണാകുളം ഇന്‍ഫോപാര്‍ക്ക്, എളമക്കര, ചേരാനെല്ലൂര്‍ എന്നീ പോലീസ് സ്റ്റേഷനുകളിലായി മാല പൊട്ടിച്ച് കവര്‍ച്ച ചെയ്തതിനും മോട്ടോര്‍ സൈക്കിള്‍ മോഷ്ടിച്ചതിനും ആയി 17 ക്രമിനല്‍ കേസുകളില്‍ പ്രതിയാണ്. ശരത്തും വിവിധ സ്റ്റേഷനുകളിലെ വിവിധ കേസുകളിൽ പ്രതിയാണ്. പ്രതികളെ പിടികൂാനെത്തിയ പോലീസിനുനേരെ നായക്കളെ അഴിച്ചുവിട്ടിരുന്നു.

എടത്തിരുത്തിയിൽ കാറും, പിക്കപ്‌ വാഹനവും കൂട്ടിയിടിച്ചു

കയ്പമംഗലം: എടത്തിരുത്തിയിൽ കാറും, പിക്കപ് വാഹനവും കൂട്ടിയിടിച്ചു. അപകടത്തിൽ ആർക്കും പരിക്കില്ല. ഇന്നലെ വൈകീട്ട് നാലോടെ എടത്തിരുത്തി കൊപ്രക്കളത്തായിരുന്നു അപകടം. എടമുട്ടം ഭാഗത്ത് നിന്ന് വന്നിരുന്ന പാർസൽ സർവീസ് വാഹനവും, എതിരെ വന്ന കാറുമാണ് കൂട്ടിയിടിച്ചത്. ഇടിയുടെ ആഘാതത്തിൽ പാർസൽ സർവീസ് വാഹനം മറിഞ്ഞു. ആമ്പല്ലൂർ കല്ലൂർ സ്വദേശികളാണ് കാറിലുണ്ടായിരുന്നത്.

വിവാഹാവശ്യത്തിനുപോയ സംഘം സഞ്ചരിച്ച കാർ പെരുമ്പിയിൽ അപകടത്തിൽപ്പെട്ടു

കൊരട്ടി: അപകടത്തുരുത്തായി മാറിയ ദേശീയപാത പെരുമ്പിയിൽ വിവാഹാവശ്യത്തിനു പോയ എട്ടംഗസംഘം സഞ്ചരിച്ചിരുന്ന കാർ അപകടത്തിൽപ്പെട്ടു. യാത്രികർ നിസാര പരിക്കുകളോടെ രക്ഷപ്പെട്ടു. കോഴിക്കോട് നിന്നും തിരുവനന്തപുരത്തേക്ക് പോയ സംഘം യാത്ര ചെയ്ത കാർ നിയന്ത്രണം വിട്ട് മീഡിയനിൽ ഇടിച്ചു കയറി. ഇന്നലെ വൈകീട്ട് 6.20 മണിയോടെ ആയിരുന്നു സംഭവം. പെരുമ്പി മുതൽ ചിറങ്ങര വരെ രൂപപ്പെട്ട ചതിക്കുഴികളിൽ വെള്ളം നിറഞ്ഞതും ടാർ ഉരുകി മുഴച്ചുനിൽക്കുന്ന ഭാഗത്ത് കയറിയിറങ്ങിയതുമാണ് കാർ നിയന്ത്രണം വിടാൻ കാരണമായതെന്നാണ് നിഗമനം. വാഹനം ഉലഞ്ഞതോടെ വാഹനത്തിനു മുകളിൽ വച്ച ലഗേജുകൾ തൃശൂർ ഭാഗത്തേക്കുള്ള ട്രാക്കിൽ തെറിച്ചുവീണു. ഇതുകണ്ട് പൊടുന്നനെ ബ്രേക്കിട്ടതിനെതുടർന്ന് ആ ട്രാക്കിൽ സഞ്ചരിച്ചിരുന്ന ബൈക്ക് യാത്രികൻ നിയന്ത്രണം വിട്ട് വീണു. പ്രദേശത്തെ അപകടസാധ്യതകൾ മുന്നിൽ കണ്ട് ഇക്കഴിഞ്ഞ രണ്ടിന് മേഖലയിലെ കുണ്ടും കുഴിയും ടാർ മുഴച്ചു നിൽക്കുന്നതും സംബന്ധിച്ച് ദീപിക വാർത്ത നൽകിയിരുന്നു.

മക്കളെ മനുഷ്യരാക്കാൻ മാതാപിതാക്കൾ തയാറാകണം: മന്ത്രി കെ. രാജൻ

മാള: മാത്സര്യത്തിന്‍റെ ലോകത്ത് തങ്ങളുടെ മക്കളെ മനുഷ്യരാക്കാൻ മാതാപിതാക്കൾ തയാറാകണമെന്ന് റവന്യൂ മന്ത്രി കെ. രാജൻ പറഞ്ഞു. മാളയിൽ കൊടുങ്ങല്ലൂർ നിയോജക മണ്ഡലം എംഎൽഎ വി.ആർ. സുനിൽകുമാറിന്‍റെ വിദ്യാഭ്യാസ അവാർഡ് "മികവ് - 2025' ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി . എഐ സാങ്കേതിക വിദ്യയുടെ ഇക്കാലത്ത് മനുഷ്യനാണ് ഓരോ വ്യക്തിയും എന്ന തിരിച്ചറിവുള്ളവരാക്കി മാനവികതയും സർഗാത്മകതയും പ്രതിഫലിപ്പിക്കാൻ ഓരോരുത്തർക്കും ആകട്ടെ എന്നും മന്ത്രി കൂട്ടിച്ചേർത്തു. മാള കാർമൽ കോളജ് ഓഡിറ്റോറിയത്തിൽ നടന്ന അവാർഡ് ദാന ചടങ്ങിൽ എസ്എസ്എൽസി, പ്ലസ്ടു, ടിഎച്ച്എസ്എൽസി, വിഎച്ച്എസ്‌സി, സിബിഎസ് സി, ഐസിഎസ്‌സി പരീക്ഷകളിൽ ഉന്നത വിജയം നേടിയ ആയിരത്തോളം വിദ്യാർഥികളെയും 100 ശതമാനം വിജയം നേടിയ വിദ്യാലയങ്ങളെയും അവാർഡുകൾ നൽകി ആദരിച്ചു. ബെന്നി ബഹനാൻ എംപി, രാജ്യസഭ എംപി പി. പി. സുനീർ എന്നിവർ മുഖ്യാതിഥികളായിരുന്നു. വി.ആർ. സുനിൽകുമാർ എംഎൽഎ അധ്യക്ഷത വഹിച്ചു. ഗ്രാമപഞ്ചായത്ത് പ്രസിഡന്‍റുമാരായ ബിന്ദു ബാബു, റോമി ബേബി, പി.വി. വിനോദ്, ജനപ്രതിനിധികൾ, വിദ്യാഭ്യാസ വകുപ്പിലെ വിവിധ ഉദ്യോഗസ്ഥർ തുടങ്ങിയവർ ചടങ്ങിൽ പങ്കെടുത്തു. സംഘാടകസമിതി ജനറൽ കൺവീനർ കെ. വി. വസന്തകുമാർ സ്വാഗതവും ട്രഷറർ കെ.കെ. സുരേഷ് നന്ദിയും പറഞ്ഞു.

ഭാര്യയെ കൊലപ്പെടുത്താൻ ശ്രമിച്ച പ്രതി അറസ്റ്റിൽ

ചാലക്കുടി: ഭാര്യയെ കൊലപ്പെടുത്താൻ ശ്രമിച്ച കേസിൽ ഒളിവിൽ പോയ പ്രതി ആറു വർഷങ്ങൾക്കു ശേഷം അറസ്റ്റിലായി. പരിയാരം ആന്ത്രക്കാംപാടം പടമാടൻ വീട്ടിൽ ഷാജു (51) എന്നയാളാണ് പിടിയിലായത്. ഇടുക്കി വാഗമണ്ണിൽ നിന്നാണ് ഇയാളെ അറസ്റ്റ് ചെയ്തത്. 2019 ഡിസംബർ 31നാണ് സംഭവം ഉണ്ടായത്. പരിയാരം ആന്ത്രക്കാംപാടത്തുള്ള വീട്ടിലേക്ക് അതിക്രമിച്ച് കയറിചെന്ന് ഭാര്യയെ ദേഹോപദ്രവമേൽപ്പിച്ച് കൊലപ്പെടുത്താൻ ശ്രമിച്ച കേസിൽ അറസ്റ്റിലായി ജയിലിൽ കഴിഞ്ഞുവരവെ ജാമ്യത്തിലിറങ്ങി കോടതിയിൽ ഹാജരാകാതെ ഒളിവിൽ പോവുകയായിരുന്നു. തുടർന്ന് ഇയാളെ പിടികൂടുന്നതിന് വേണ്ടി ഇരിങ്ങാലക്കുട പ്രിൻസിപ്പൽ അസിസ്റ്റന്‍റ്് സെഷൻസ് കോടതി പിടികിട്ടാപുള്ളിയായി പ്രഖ്യാപിച്ച് വാറണ്ട് പുറപ്പെടുവിച്ചിരുന്നു. തൃശൂർ റൂറൽ ജില്ല പോലീസ് മേധാവി ബി. കൃഷ്ണകുമാറിന്‍റെമേൽനോട്ടത്തിൽ ചാലക്കുടി ഡിവൈഎസ്പി പി.സി. ബിജു കുമാറിന്‍റെ നേതൃത്വത്തിൽ സബ് ഇൻസ്പെക്ടർമാരായ സതീശൻ മടപ്പാട്ടിൽ, റോയ് പൗലോസ്, പി.എം. മൂസ, എഎസ്ഐ വി.യു. സിൽജോ. സീനിയർ സിവിൽ പോലീസ് ഓഫീസർമാരായ എ.യു റെജി എം. ജെ ബിനു , ഷിജോ തോമസ്, സിവിൽ പോലീസ് ഓഫീസർ സുർജിത് സാഗർ, ചാലക്കുടി സ്റ്റേഷനിലെ എഎസ്ഐ ജോഫി ജോസ്, സിവിൽ പോലീസ് ഓഫീസർ പി.കെരതീഷ് എന്നിവരാണ് അന്വേഷണ സംഘത്തിലുണ്ടായിരുന്നത്.

എടത്തിരുത്തിയിൽ കാട്ടുപന്നിശല്യം രൂക്ഷം

എടത്തിരുത്തി: കാട്ടുപന്നികൾ കൃഷി നശിപ്പിക്കുന്നതു പതിവാകുന്നു. കഴിഞ്ഞദിവസം രാത്രിയിൽ കുന്പളപറന്പിൽ പൊന്നന്പുള്ളി ഷാജിയുടെ കൃഷിയിടത്തിലെ വാഴകൾ കാട്ടുപന്നികൾ കുത്തിമറിച്ചിട്ടു നശിപ്പിച്ചു. ഇലയ്ക്കായി നട്ടുവളർത്തിയിരുന്ന വാഴകളാണ് നശിപ്പിച്ചത്. കുറച്ചുനാളുകളായി പ്രദേശത്തു കാട്ടുപന്നിശല്യം വർധിച്ചിട്ടും ബന്ധപ്പെട്ട അധികാരികൾ ഇടപെടുന്നില്ലെന്ന ആക്ഷേപം നിലനിൽക്കെയാണ് ജനവാസമേഖലയിൽ ഇറങ്ങി ഇവ കൃഷിയും മറ്റും നശിപ്പിക്കുന്നതു തുടരുന്നത്. രാത്രികാലങ്ങളിൽ കാട്ടുപന്നികൾ റോഡുകളിൽകൂടി സഞ്ചരിക്കുന്നതും ഇരുചക്രവാഹനയാത്രികർക്കും അപകടഭീതി ഉയർത്തുന്നുണ്ട്.

വഴി ചോദിച്ച് എത്തി, വൃദ്ധയുടെ മാലയും പൊട്ടിച്ചുകടന്നു

കൊടുങ്ങല്ലൂർ: വഴി ചോദിച്ച് എത്തിയ ബൈക്ക് യാത്രക്കാരൻ വൃദ്ധയുടെ മാലകവർന്നു. എടവിലങ്ങ് മാവുകൂട്ടത്തിൽ ശാന്ത (75)യുടെ മൂന്നു പവൻ തൂക്കമുള്ള മാലയാണ് നഷ്ടപ്പെട്ടത്. എടവിലങ്ങ് ചന്ത യൂബസാർ റോഡിൽ ഇന്നലെ ഉച്ചയോടെയായിരുന്നു സംഭവം. വീട്ടിലേക്ക് നടന്നു പോവുകയായിരുന്ന ശാന്തയോട് വഴി ചോദിക്കാന്നെന്ന വ്യാജ എത്തിയ ബൈക്ക് യാത്രക്കാരൻ മാല പൊട്ടിച്ചെടുത്ത് കടന്നുകളയുകയായിരുന്നു. പരാതിയെ തുടർന്ന് കൊടുങ്ങല്ലൂർ പൊലീസ് കേസ് എടുത്ത് അന്വേഷണം ആരംഭിച്ചു. മോഷ്ടാവിന്‍റേതെന്ന് കരുതുന്ന ദൃശ്യങ്ങൾ പൊലീസിന് ലഭിച്ചിട്ടുണ്ട്. എടവിലങ്ങിൽ ഒരാഴ്ച മുമ്പ് സമാനമായ രീതിയിൽ മാല മോഷണം നടന്നിരുന്നു. വീട്ടുജോലിക്ക് പോകുകയായിരുന്ന കാര അഞ്ചലശേരി തമ്പിയുടെ ഭാര്യ ലളിതയുടെ മാലയാണ് അന്ന് എടവിലങ്ങ് മരമില്ലിന് സമീപം ബൈക്കിൽ വന്ന മോഷ്ടാവ് കവർന്നത്.

നാലുവർഷംമുമ്പ്് പുതുക്കിപ്പണിത പാലം; പെരുമ്പുഴ പാലത്തിൽ വിള്ളൽ

കാഞ്ഞാണി: തൃശൂർ - കാഞ്ഞാണി - വാടാനപ്പള്ളി സംസ്ഥാനപാതയിൽ പെരുമ്പുഴ ചാലിന് മുകളിലൂടെപോകുന്ന ഒന്നാം നമ്പർ പാലത്തിൽ വിള്ളൽ. ബലക്ഷയം മൂലം നാലുവർഷം മുമ്പ്് പുതുക്കിപ്പണിത പാലത്തിൽ രണ്ടിടത്താണ് വിള്ളൽ രൂപപ്പെട്ടത്. വാഹനങ്ങൾ ഇടതടവില്ലാതെ ചീറ്റിപ്പായുന്ന സംസ്ഥാനപാതയിലാണ് ഒരു കിലോമീറ്റർ നീളമുള്ള പെരുമ്പുഴ പാടശേഖരം. പാടശേഖരങ്ങളിലേക്ക് കൃഷിക്കാവശ്യമായ വെള്ളം എത്തിക്കുന്ന ചാലുകൾകൾക്കു മീതെയായി രണ്ടുപാലങ്ങളുമുണ്ട്. ഇതിൽ ഒന്നാമത്തെ പാലത്തിലാണ് വിള്ളൽ കണ്ടെത്തിയത്. റോഡിൽ നീളത്തിലും പാലത്തിന് കുറുകെയുമാണ് വിള്ളൽവീണത്. നാലുവർഷംമുമ്പ്് ബലക്ഷയം വന്നതിനെ തുടർന്ന് 60 ലക്ഷത്തിൽപ്പരം രൂപ ചിലവിലാണ് പാലം പുനർനിർമിച്ചത്. ഭിലായ് സ്റ്റീൽ പ്ലാന്‍റിൽനിന്ന് കൊണ്ടുവന്ന ഗർഡറുകൾ ഉപയോഗിച്ചാണ് അന്ന് പാലത്തിൽ അറ്റകുറ്റപ്പണി നടത്തിയത്. വീണ്ടും പാലത്തിൽ വിള്ളൽ കണ്ടെത്തിയതോടെ നാട്ടുകാർ ആശങ്കയിലാണ്. പിഡബ്യുഡി ഉദ്യോഗസ്ഥരെത്തി പരിശോധിച്ചാൽ മാത്രമാണ് കാര്യങ്ങൾക്ക് കൂടുതൽ വ്യക്തത വരികയുള്ളൂ. ഇതിന് സമീപത്ത് സ്വകാര്യ ബൈക്ക് ഷോറൂമിന് സമീപത്തുള്ള കൾവർട്ടും ഉൾഭാഗംതകർന്ന നിലയാണ്.

വെള്ളക്കെട്ട്: ലൈഫ് ജാക്കറ്റ് ധരിച്ച് പ്രതിപക്ഷബഹളം

ചാവക്കാട്: നഗരസഭാപരിധിയിലെ വിവിധ വാർഡുകളിലെ വെള്ളക്കെട്ടിന് പരിഹാരംകാണുന്നില്ലെന്ന് ആരോപിച്ച് പ്രതിപക്ഷ അംഗങ്ങൾ ലൈഫ് ജാക്കറ്റ് അണിഞ്ഞാണ് കൗൺസിൽ യോഗത്തിൽ എത്തിയത്. പ്രതിപക്ഷത്തെ ഷാഹിദ മുഹമ്മദ് വെള്ളംകയറിയ വിഷയത്തിൽ നടപടി ഉണ്ടാകണമെന്നും വിഷയം ചർച്ചചെയ്യണമെന്നും ആവശ്യപ്പെട്ടു. യുഡിഎഫിലെ മറ്റ് അംഗങ്ങളും ഇതേ ആവശ്യം ഉന്നയിച്ചു. ഇതോടെ ഭരണപക്ഷ എൽഡിഎഫ് അംഗങ്ങൾ 'യുഡിഎഫ് കള്ളപ്രചരണം അവസാനിപ്പിക്കുക 'എന്ന പോസ്റ്റർ ഉയർത്തി. ഇതോടെ യോഗം ബഹളത്തിലായി. അജന്‌ഡകളെല്ലാം പാസായതായി ചെയർപേഴ്സൺ ഷീജ പ്രശാന്ത് പ്രഖ്യാപിച്ചതോടെ പ്രതിപക്ഷ അംഗങ്ങൾ മുദ്രാവാക്യംവിളിച്ച് ഇറങ്ങിപ്പോയി. വെള്ളക്കെട്ട് സ്ഥലത്ത് നഗരസഭ തിരിഞ്ഞുനോക്കിയില്ലെന്നും ദുരിതമനുഭവിക്കുന്നവർക്ക് സാമ്പത്തിക, മെഡിക്കൽ പരിരക്ഷ നഗരസഭ നൽകണമെന്നും പ്രതിപക്ഷ അംഗങ്ങൾ ആവശ്യപ്പെട്ടു. സമയത്തിന് കൗൺസിൽ യോഗത്തിനെത്തിയ പ്രതിപക്ഷനേതാവ് കെ. വി. സത്താറിനും കൗൺസിലർ ബേബി ഫ്രാൻസിസിനും ഒപ്പിടാൻ അനുവാദംനൽകാതെ ചെയർമാൻ മിനിറ്റ്സ് ബുക്ക് ഒളിപ്പിച്ചുവച്ചതായി ആരോപിച്ച പ്രതിപക്ഷം വിവിധ വകുപ്പകൾക്ക് പരാതി നൽകുമെന്നറിയിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]