ട്രെയിനില്‍ ഓടിക്കയറാന്‍ ശ്രമിക്കവേ ട്രാക്കില്‍ വീണ യുവാവിന്‍റെ കാൽ അറ്റു
Wednesday, June 4, 2025 1:21 AM IST
കാഞ്ഞങ്ങാട്: കാഞ്ഞങ്ങാട് റെയില്‍വേ സ്റ്റേഷനില്‍ ട്രെയിനിനടിയില്‍പ്പെട്ട യുവാവിന്‍റെ കാല്‍ അറ്റു. പാലക്കാട് കുലുക്കല്ലൂര്‍ സ്വദേശി സുന്ദരന്‍ (39) ആണ് അപകടത്തില്‍പ്പെട്ടത്.
ഇന്നലെ രാവിലെ 8.20നാണ് അപകടം. കല്‍പ്പണിക്കാരനായ സുന്ദരന്‍ മംഗളൂരുവില്‍നിന്ന് പാലക്കാട്ടേക്ക് എഗ്മോര്‍ എക്‌സ്പ്രസില്‍ യാത്ര ചെയ്യുകയായിരുന്നു.
കാഞ്ഞങ്ങാട് സ്റ്റേഷനിലെത്തിയപ്പോള്‍ പലഹാരം വാങ്ങാന്‍ ഇറങ്ങിയതാണ്. നീങ്ങിത്തുടങ്ങിയ ട്രെയിനില്‍ ഓടിക്കയറാന്‍ ശ്രമിക്കവേയാണ് അപകടം. ട്രാക്കില്‍ വീണ യുവാവിന്‍റെ കാലില്‍ക്കൂടി ട്രെയിന്‍ കയറി പോയി. ഇടതു കാല്‍പ്പാദത്തിന് മുകളില്‍നിന്നു വേര്‍പെട്ട് പോയി.