ADVERTISEMENT

ADVERTISEMENT

നിർമല യുപിഎസ് കാറ്റുള്ളമല

കൂരാച്ചുണ്ട്: കാറ്റുള്ളമല നിർമല യുപി സ്കൂളിൽ ദീപിക നമ്മുടെ ഭാഷ പദ്ധതിയ്ക്ക് തുടക്കമായി. സ്കൂൾ മാനേജർ ഫാ. ജോസ് പെണ്ണാപറമ്പിൽ സ്കൂൾ ലീഡർ അലീഷ്യ മിത്രയ്ക്ക് പത്രം കൈമാറി ഉദ്ഘാടനം നിർവഹിച്ചു.

പ്രധാനാധ്യാപിക പി. ശ്രുതി, സീനിയർ അസിസ്റ്റന്‍റ് ജസ്നി ജോസ്, പിടിഎ പ്രസിഡന്‍റ് സി.പി. സുനിൽകുമാർ, ദീപിക സർക്കുലേഷൻ ഏരിയ മാനേജർ ജോഷി ജോർജ് എന്നിവർ ചടങ്ങിൽ പങ്കെടുത്തു.

ADVERTISEMENT

കാറും ബൈക്കും കൂട്ടിയിടിച്ച് യുവാവ് മരിച്ചു

പെരിന്തൽമണ്ണ: പെരിന്തൽമണ്ണ - ചെർപ്പുളശേരി റോഡിൽ ആനമങ്ങാട് കൃഷ്ണപ്പടിയിൽ കാറും ബൈക്കും കൂട്ടിയിടിച്ച് യുവാവ് മരിച്ചു. ആനമങ്ങാട് ഓടമല വട്ടപ്പറന്പിൽ മുഹമ്മദലിയുടെ മകൻ മുഹമ്മദ് ആഷിഖ് (23) ആണ് മരിച്ചത്. ഇൻഡസ്ട്രിയൽ ജോലിക്കാരനാണ്ആഷിക്. മാതാവ്: ഹാജറ. സഹോദരങ്ങൾ: അർഷിദ (മാവുണ്ടിരി), ഹാഷിം (വിദ്യാർഥി).

മലയാളി വിദ്യാർഥി മടിക്കേരിയിൽ വാഹനാപകടത്തിൽ മരിച്ചു

എടക്കര: പോത്തുകൽ സ്വദേശിയയ വിദ്യാർഥി കർണാടകയിലെ മടിക്കേരിയിൽ വാഹനാപകടത്തിൽ മരിച്ചു. മുണ്ടേരി കല്ലുങ്ങൽ സെയ്നുദീന്‍റെ മകൻ സെയ്നുൽ ഫാരിസാണ് (21) മരിച്ചത്. പഠനത്തിന്‍റെ ഭാഗമായുള്ള ഇന്േ‍റണ്‍ഷിപ്പിനാണ് യുവാവ് കർണാടകയിലെ കൂർഗിലെത്തിയത്. ബുധനാഴ്ച രാവിലെ സുഹൃത്തിനെ യാത്രയാക്കാൻ ബൈക്കിൽ പോകുന്പോൾ മടിക്കേരിയിൽ വച്ച് ബൈക്ക് തെന്നി മറിഞ്ഞ് അപകത്തിൽപെടുകയായിരുന്നു. അപകട സ്ഥലത്ത് തന്നെ സെയ്നുൽ ഫാരിസ് മരിച്ചു. പുലർച്ചെ അഞ്ചരക്കായിരുന്നു അപകടം. ഒപ്പമുണ്ടായിരുന്ന സുഹൃത്തുക്കൾക്ക് പരിക്കേറ്റു. വീട്ടിലേക്ക് വരാനിരിക്കെയാണ് ഇന്നലെ അപകടമുണ്ടായത്. സൈറാബാനുവാണ് മാതാവ്. സഹോദരങ്ങൾ: സൈബാൻ യൂസുഫ്, ഷഹല ജാസ്മിൻ. കബറടക്കം ഇന്ന് രാവിലെ പത്തിന് മുണ്ടേരി മഹല്ല് കബർസ്ഥാനിൽ.

ചാലിയാർ പഞ്ചായത്തിൽ പന്നിവേട്ട തുടങ്ങി

നിലന്പൂർ: ചാലിയാർ പഞ്ചായത്തിൽ കാട്ടുപന്നി വേട്ട തുടങ്ങി. ഒറ്റരാത്രി കൊണ്ട് വെടിവച്ചിട്ടത് 12 കാട്ടുപന്നികളെ. വൈലാശേരി ഭാഗത്തെ കൃഷിയിടങ്ങളിലേക്ക് എത്തിയ പന്നികളെയാണ് ചാലിയാർ ഗ്രാമപഞ്ചായത്ത് ചുമതലപ്പെടുത്തിയ ഷൂട്ടർമാർ വെടിവച്ച്് വീഴ്ത്തിയത്. ശല്യക്കാരായ മുഴുവൻ കാട്ടുപന്നികളെയും ഒരു മാസത്തിനുള്ളിൽ വെടിവച്ച് കൊല്ലുന്ന പദ്ധതിക്കാണ് പഞ്ചായത്തിൽ തുടക്കമായത്. തോക്ക് ലൈസൻസുള്ള 17 ഷൂട്ടർമാരെയാണ് ഇതിനായി നിയമിച്ചിട്ടുള്ളത്. ജില്ലയിൽ തന്നെ ഇത്രയേറെ ഷൂട്ടർമാരെ ഒന്നിച്ചിറക്കി കാട്ടുപന്നികളെ വെടിവച്ച് കൊല്ലുന്നത് ആദ്യമായാണ്. പന്നി ശല്യം രൂക്ഷമായ പഞ്ചായത്തുകളിൽ ഒന്നാണ് ചാലിയാർ പഞ്ചായത്ത്. വനമേഖലകളോട് അതിർത്തി പങ്കിടുന്ന പഞ്ചായത്താണിത്. നിലന്പൂർ മേഖലയിലെ പ്രധാന രണ്ട് വനമേഖലകളായ മൂവായിരം, പന്തീരായിരം വനമേഖലകൾ ഈ പഞ്ചായത്തിലാണ്. മലപ്പുറം ജില്ലയിലെ പ്രധാന ഷൂട്ടർമാരിൽ ഒരാളായ വഴിക്കടവ് സ്വദേശി മൂച്ചിക്കോടൻ ഗഫൂർ ഉൾപ്പെടെ ഷൂട്ടർ സംഘത്തിലുണ്ട്.

ഏഴു താലൂക്കുകളിലായി 2187 പട്ടയങ്ങൾ വിതരണം ചെയ്തു

മലപ്പുറം: എല്ലാവർക്കും ഭൂമി, എല്ലാ ഭൂമിക്കും രേഖ, എല്ലാ സേവനങ്ങളും സ്മാർട്ട്, രഹിതരായ മുഴുവൻ ആളുകളെയും ഭൂമിയുടെ അവകാശികളാക്കുക എന്നീ ലക്ഷ്യങ്ങളോടെ ജില്ലയിലെ ഏഴു താലൂക്കുകളിലായി നടന്ന പട്ടയമേളയിൽ 2187 പട്ടയങ്ങൾ വിതരണം ചെയ്തു. എല്ലാ താലൂക്കുകളിലെയും പട്ടയമേളയുടെ ഉദ്ഘാടനം റവന്യൂ-ഭവന നിർമാണ വകുപ്പു മന്ത്രി കെ.രാജൻ ഓണ്‍ലൈനായി നിർവഹിച്ചു. മലപ്പുറം ജില്ലയിൽ ഇന്നലെ 2187 പട്ടയങ്ങൾ വിതരണം ചെയ്തു. ഇതിൽ 2032 ലാൻഡ് ട്രിബ്യൂണൽ പട്ടയങ്ങളും 155 ഭൂപതിവ് പട്ടയങ്ങളും ഉൾപ്പെടും. തിരൂരിൽ 258, മഞ്ചേരിയിൽ 410, തിരൂരങ്ങാടിയിൽ 750 ലാൻഡ് ട്രിബ്യൂണൽ പട്ടയങ്ങളും 614 ദേവസ്വം പട്ടയങ്ങളുമാണ് വിതരണം ചെയ്തത്. കൊണ്ടോട്ടി മോയിൻകുട്ടി വൈദ്യർ അക്കാഡമി ഹാളിൽ നടന്ന കൊണ്ടോട്ടി താലൂക്ക് പട്ടയമേളയിൽ 110 പട്ടയങ്ങൾ വിതരണം ചെയ്തു. ഇതിൽ 23 എൽഎ പട്ടയങ്ങളും മൂന്ന് ലക്ഷംവീട് പട്ടയങ്ങളും 84 ലാൻഡ് ട്രിബ്യൂണൽ പട്ടയങ്ങളും ഉൾപ്പെടുന്നു. ചടങ്ങിൽ ജില്ലാ കളക്ടർ വി.ആർ. വിനോദ്, ബ്ലോക്ക് പഞ്ചായത്ത് പ്രസിഡന്‍റ് കെ. ബിന്ദു, പള്ളിക്കൽ ഗ്രാമപഞ്ചായത്ത് പ്രസിഡന്‍റ് സി.കെ. അബ്ബാസ്, വിവിധ രാഷ്ട്രീയ പാർട്ടി പ്രതിനിധികളായ മോഹൻദാസ്, അഡ്വ. കെ.കെ. സമദ്, ചുക്കാൻ മുഹമ്മദലി, പി.കെ.സി. അബ്ദുറഹിമാൻ, കൊണ്ടോട്ടി തഹസിൽദാർ ജി. അനിത, എൽആർ തഹസിൽദാർ എ. മുഹമ്മദ് മുനീർ തുടങ്ങിയവർ പങ്കെടുത്തു. തിരൂർ സാംസ്കാരിക സമുച്ചയത്തിൽ നടന്ന തിരൂർ താലൂക്ക്തല പട്ടയമേളയിൽ 215 പട്ടയങ്ങൾ വിതരണം ചെയ്തു. കുറുക്കോളി മൊയ്തീൻ എംഎൽഎ അധ്യക്ഷനായിരുന്നു. 61 എൽഎ പട്ടയങ്ങളും 154 ലാൻഡ് ട്രിബ്യൂണൽ പട്ടയങ്ങളുമാണ് വിതരണം ചെയ്തത്. തിരൂരങ്ങാടി ബ്ലോക്ക് പഞ്ചായത്ത് ഓഡിറ്റോറിയത്തിൽ നടന്ന പട്ടയമേളയിൽ 272 പട്ടയങ്ങൾ വിതരണം ചെയ്തു. കെ.പി.എ.മജീദ് എംഎൽഎ അധ്യക്ഷത വഹിച്ചു. തിരൂരങ്ങാടി നിയോജക മണ്ഡലത്തിലെ 44 പട്ടയങ്ങളും വേങ്ങര നിയോജകമണ്ഡലത്തിലെ 51 പട്ടയങ്ങളും വള്ളിക്കുന്ന് നിയോജകമണ്ഡത്തിലെ 81 പട്ടയങ്ങളും വിതരണം ചെയ്തു. മലപ്പുറം കളക്ടറേറ്റ് കോണ്‍ഫറൻസ് ഹാളിൽ നടന്ന ഏറനാട് താലൂക്ക് പട്ടയമേളയിൽ 219 പട്ടയങ്ങൾ വിതരണം ചെയ്തു. ഇതിൽ 140 ലാൻഡ് ട്രിബ്യൂണൽ പട്ടയങ്ങളും 78 ദേവസ്വം പട്ടയങ്ങളും ഒരു ലക്ഷംവീട് പട്ടയവും ഉൾപ്പെടുന്നു. പി. ഉബൈദുള്ള എംഎൽഎ അധ്യക്ഷനായിരുന്നു. നിലന്പൂർ വ്യാപാര ഭവനിൽ നടന്ന പട്ടയമേളയിൽ 116 പട്ടയങ്ങൾ വിതരണം ചെയ്തു. 105 ലാൻഡ് ട്രിബ്യൂണൽ പട്ടയങ്ങളും 11 ദേവസ്വം പട്ടയങ്ങളും വിതരണം ചെയ്തു. ആര്യാടൻ ഷൗക്കത്ത് എംഎൽഎ അധ്യക്ഷത വഹിച്ചു. പൊന്നാനി താലൂക്കിൽ 145 പട്ടയങ്ങൾ വിതരണം. ചെയ്തു. പി. നന്ദകുമാർ എംഎൽഎ അധ്യക്ഷത വഹിച്ചു. മങ്കട ബ്ലോക്ക് പഞ്ചായത്ത് ഹാളിൽ നടന്ന പെരിന്തൽമണ്ണ പട്ടയ മേളയിൽ 162 പട്ടയങ്ങൾ വിതരണം ചെയ്തു. എംഎൽഎമാരായ നജീബ് കാന്തപുരം, മഞ്ഞളാംകുഴി അലി, ഗ്രാമപഞ്ചായത്ത് പ്രസിഡന്‍റുമാരായ കെ. സോഫിയ, അഡ്വ. അസ്കറലി സബ് കളക്ടർ അപൂർവ ത്രിപാഠി രാഷ്ട്രീയ പാർട്ടി പ്രതിനിധികൾ പങ്കെടുത്തു.

‘കെഎൻജി റോഡിലെ കുഴികളടച്ച് സഞ്ചാര യോഗ്യമാക്കണം’

നിലന്പൂർ: ചന്തക്കുന്ന് മുതൽ വെളിയംതോട് ഭാഗം വരെയുള്ള കഐൻജി റോഡിലെ കുഴികൾ അടിയന്തരമായി അടച്ച് ഗതാഗത യോഗ്യമാക്കണമെന്ന് ഓൾ കേരള ബസ് ഓപ്പറേറ്റേഴ്സ് ഓർഗനൈസേഷൻ നിലന്പൂർ താലൂക്ക് കമ്മിറ്റി ആവശ്യപ്പെട്ടു. നിലവിൽ വാഹനങ്ങൾ ഈ ഭാഗത്ത് നിർത്തി കയറിയിറങ്ങി പോകുന്നതിനാൽ റോഡിൽ വലിയ ഗതാഗതകുരുക്കാണ് നേരിടുന്നത്. കോഴിക്കോട് - നിലന്പൂർ -ഗൂഢല്ലൂർ പാതയായതിനാൽ ആയിരക്കണക്കിന് വാഹനങ്ങൾ പോകുന്ന റോഡാണിത്. റോഡ് തകർന്നതിനാൽ വെളിയംതോട് മുതൽ ചന്തക്കുന്ന് വരെയുള്ള ഒരു കിലോമീറ്റർ ഭാഗം കടന്നുപോകാൻ 15 മിനിറ്റിലേറെ വേണ്ടിവരുന്നു. കുഴികളിലൂടെ പോകുന്ന ചെറുവാഹനങ്ങളുടെ പിന്നിൽ വരുന്ന ബസുകൾക്ക് ഏറെ സമയം ഗതാഗതക്കുരുക്കിൽപ്പെട്ട് നിർത്തിയിടേണ്ടി വരുന്നതിനാൽ ബസുകളുടെ ട്രിപ്പുകൾ മുടങ്ങുകയാണെന്ന് ഭാരവാഹികൾ പറഞ്ഞു. കുഴികളിൽ വെള്ളം കെട്ടി നിൽക്കുന്നതിനാൽ റോഡും കുഴികളും തിരിച്ചറിയാനാകുന്നില്ല. ഇതുകാരണം വാഹനങ്ങൾ അപകടത്തിൽപ്പെടുന്നു. ഈ ഭാഗത്ത് നേരത്തെ അപകട മരണങ്ങൾ സംഭവിച്ചിട്ടുണ്ട്. റോഡിന്‍റെ അടിഭാഗം പൂർണമായും തകർന്ന സ്ഥിതിയാണെന്നും മഴക്കാലമാകുന്പോൾ ഈ ഭാഗത്തുണ്ടാകുന്ന റോഡ് തകർച്ചക്ക് ശാശ്വത പരിഹാരം വേണമെന്നും യോഗം ആവശ്യപ്പെട്ടു. പ്രശ്ന പരിഹാരം ആവശ്യപ്പെട്ട് പൊതുമരാമത്ത് റോഡ് വിഭാഗം സെക്ഷൻ എൻജിനീയർക്ക് ഓൾ കേരള ബസ് ഓപ്പറേറ്റേഴ്സ് ഓർഗനൈസേഷൻ നിലന്പൂർ താലൂക്ക് കമ്മിറ്റി നിവേദനവും നൽകി. ജില്ലാ പ്രസിഡന്‍റ് മുസ്തഫ കളത്തുംപടിക്കൽ അധ്യക്ഷത വഹിച്ചു. താലൂക്ക് വൈസ് പ്രസിഡന്‍റ് നിയാസ് ചാലിയാർ, താലൂക്ക് ഭാരവാഹികളായ ഷൗക്കത്തലി ഉള്ളാട്ട് പറന്പൻ, കെ.ടി. മെഹബൂബ്, എ വണ്‍ ബാബു മന്പാട്, ഹമീദ് കുരിക്കൾ, എ. ഷെമീർ ബാബു, ജസ്‌ല കുട്ടൻ എന്നിവർ പ്രസംഗിച്ചു.

മരം കടപുഴകി വീടിന് മുകളിൽ വീണു; ആദിവാസി കുടുംബം രക്ഷപ്പെട്ടു

എടക്കര: വഴിക്കടവിൽ കൂറ്റൻ മരം കടപുഴകി വീടിന് മുകളിൽ വീണു. കൈക്കുഞ്ഞ് ഉൾപ്പെടെയുള്ള ആദിവാസി കുടുംബം പരിക്കേൽക്കാതെ രക്ഷപ്പെട്ടു. വനംവകുപ്പ് താൽക്കാലിക വാച്ചറായ പുഞ്ചക്കൊല്ലി നഗറിലെ പാലക്കടവ് കണ്ണന്‍റെ വീടിന് മുകളിലാണ് വൻ പുളിമരം കടപുഴകി വീണത്. ചൊവ്വാഴ്ച രാവിലെ ഒന്പതരയോടെയാണ് അപകടം. മരം കടപുഴകി വീഴുന്ന സമയത്ത് കൈക്കുഞ്ഞടക്കം പത്തോളം പേരാണ് വീടിനുള്ളിലുണ്ടായിരുന്നത്. ശബ്ദം കേട്ട് കാരണവരായ കണ്ണൻ മൂന്ന് മാസം പ്രായമുള്ള പേരക്കുട്ടിയുമായി പുറത്തേക്ക് ഓടുകയായിരുന്നു. വീടിന് സമീപത്തെ വൈദ്യുതി ലൈനിലേക്ക് വീണ മരം സാവധാനം വീടിന് മുകളിലേക്ക് പതിച്ചതിനാൽ വൻദുരന്തം ഒഴിവായി. ഇവരുടെ വീടിനോട് ചേർന്ന് ചുവട് ഭാഗത്ത് നിന്ന് രണ്ടായി വളർന്ന പുളിമരമാണ് ഉള്ളിലെ കേട് കാരണം മറിഞ്ഞ് വീണത്. മരത്തിന്‍റെ ഒരു ഭാഗം വീടിന് മുകളിലേക്കും മറുഭാഗം എതിർദിശയിലേക്കുമാണ് വീണത്. വിവരമറിഞ്ഞ് നെല്ലിക്കുത്ത് സെക്ഷൻ ഫോറസ്റ്റ് ഓഫീസർ ലാൽ വി. നാഥിന്‍റെ നേതൃത്വത്തിൽ വനപാലകരും നാട്ടുകാരും നിലന്പൂരിൽ നിന്ന് അഗ്നിരക്ഷാ സേനയുമെത്തി വൈകിട്ട് നാല് മണിയോടെ മരം മുറിച്ച് മാറ്റി.

സുരക്ഷാ സിഗ്നലുകൾ തകർത്തു; ആറുവരി ദേശീയപാതയിൽ യാത്രക്കാരുടെ നിയമലംഘനം

തേഞ്ഞിപ്പലം: ആറുവരി ദേശീയപാതയിൽ നിയന്ത്രണങ്ങൾ ലംഘിച്ച് യാത്രക്കാരുടെ നിയമലംഘനം. ഇരുചക്ര-മുചക്ര വാഹനങ്ങൾ, ട്രാക്ടർ എന്നിവ പ്രധാനപാതയിലേക്ക് പ്രവേശിക്കുന്നതിന് നിരോധനം ഏർപ്പെടുത്തി ബോർഡുകൾ സ്ഥാപിച്ചിട്ടും നിയന്ത്രണവും നിരോധനവും മറികടന്നാണ് പലരുടെയും യാത്ര. ചേളാരി അടക്കമുള്ള മേഖലകളിൽ ദേശീയപാതയിൽ സ്ഥാപിച്ച നിയന്ത്രണ സംവിധാനങ്ങളും വാഹന യാത്രക്കാർ തകർത്തിട്ടുണ്ട്. സിഗ്നൽ സംവിധാനങ്ങളിലെ നിർദേശങ്ങൾ പാലിച്ചുള്ള യാത്ര ലംഘിക്കപ്പെടുന്പോൾ അപകട സാധ്യത കൂടുതലാണ്. ആറുവരി പാതയിലെ നിയന്ത്രണങ്ങൾ അറിയാതെ യാത്ര ചെയ്യുന്നവരാണ് നിയമങ്ങൾ ലംഘിക്കുന്നത്. എന്നാൽ ദേശീയപാത പ്രവൃത്തി പൂർത്തിയാക്കി പൂർണമായും തുറന്നുകൊടുക്കുന്നതോടെ നിരീക്ഷണ കാമറകൾ സ്ഥാപിച്ചും പിഴ ചുമത്തിയും ഗതാഗത നിയമലംഘനങ്ങൾ തടയുമെന്നാണ് ദേശീയപാത അഖോറിറ്റി അധികൃതരും പോലീസും വ്യക്തമാക്കുന്നത്. അതേസമയം സർവീസ് റോഡുകളിൽ ഗതാഗതകുരുക്ക് തുടരുന്നത് യാത്രക്കാർക്ക് ബുദ്ധിമുട്ടാകുകയാണ്.

കുളത്തിൽ വീണ മൂന്നുപേരെ രക്ഷിച്ച മുഹമ്മദ് ഷാമിൽ നാടിന്‍റെ താരമായി

മങ്കട: കുളത്തിൽ മുങ്ങിതാഴ്ന്ന 12 വയസുള്ള മൂന്ന് കുട്ടികളെ തന്‍റെ മന:സാന്നിധ്യം കൊണ്ട് ജീവിതത്തിലേക്ക് തിരിച്ചുകൊണ്ടുവന്നിരിക്കുകയാണ് മങ്കട വെള്ളില പുത്തൻവീട് സ്വദേശിയായ ചാളക്കത്തൊടി മുഹമ്മദ് ഷാമിൽ. കഴിഞ്ഞ ഞായറാഴ്ചയാണ് ഈ സാഹസത്തിന് ആസ്പദമായ സംഭവം. അയൽവീട്ടിൽ എത്തിയ മൂന്ന് പെണ്‍കുട്ടികൾ കുളിക്കാനായി ഷാമിലിന്‍റെ വീടിനു സമീപത്തെ കുളത്തിൽ എത്തുകയായിരുന്നു. ഇതിനിടെ അബദ്ധത്തിൽ കുളത്തിൽ വീണ ഒരു കുട്ടിയെ രക്ഷിക്കാനുള്ള ശ്രമത്തിനിടെ മൂന്നുപേരും വെള്ളത്തിൽ മുങ്ങിതാണു. ഈ സമയം അത് വഴി വന്ന ആശാവർക്കർ പള്ളിയാൽതൊടി ഹഫ്സത്ത് വിവരമറിയിച്ചതിനെത്തുടർന്നാണ് മുഹമ്മദ് ഷാമിലും പിതാവും സഹോദരനും സംഭവസ്ഥലത്ത് എത്തിയത്. ഉടൻ മുഹമ്മദ് ഷാമിൽ കുളത്തിൽ എടുത്ത്ചാടി മുങ്ങിതാഴുന്ന രണ്ട് പേരെ പെട്ടെന്ന് കരയ്ക്ക് കയറ്റിയെങ്കിലും ഒരാൾ കുളത്തിന്‍റെ അടിയിലേക്ക് താണിരുന്നു. മൂന്നാമത്തെ ശ്രമത്തിനൊടുവിലാണ് ഈ കുട്ടിയെ കരയ്ക്ക് എത്തിക്കാനായത്. പുറത്തെത്തിച്ചപ്പോഴേക്കും അവശയായ കുട്ടിക്ക് സിപിആർ നൽകിയതും മുഹമ്മദ് ഷാമിൽ തന്നെ. ഇങ്ങനെ മൂന്ന് ജീവൻ രക്ഷിച്ച ഈ വിദ്യാർഥി നാടിന്‍റെ അഭിമാനമായി മാറിയിരിക്കുകയാണ്. വെള്ളില പിടിഎം ഹയർ സെക്കൻഡറി സ്കൂൾ പ്ലസ്ടു വിദ്യാഥിയായ ഷാമിൽ, ചാളക്കത്തൊടി അഷ്റഫിന്‍റെയും മങ്കട 19-ാം വാർഡ് വനിതാ ലീഗ് വൈസ് പ്രസിഡന്‍റ് ഷാഹിദയുടെയും രണ്ടാമത്തെ മകനാണ്. സ്കൂളിൽ നിന്ന് ലഭിച്ച പരിശീലനമാണ് സിപിആർ നൽകാനും മറ്റും തന്നെ സഹായിച്ചതെന്ന് ഷാമിൽ പറഞ്ഞു.

നാല് വർഷത്തിനിടയിൽ വിതരണം ചെയ്തത്് 2,23,887 പട്ടയങ്ങൾ: മന്ത്രി കെ. രാജൻ

മലപ്പുറം: നാല് വർഷത്തിനിടയിൽ സംസ്ഥാനത്ത് 2,23,887 പട്ടയങ്ങൾ വിതരണം ചെയ്തതായി റവന്യു മന്ത്രി കെ. രാജൻ പറഞ്ഞു. മലപ്പുറം ജില്ലയിലെ വിവിധ താലൂക്കുകളിലായി നടന്ന പട്ടയ മേള ഓണ്‍ലൈനായി ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. കഴിഞ്ഞ ഒന്പത് വർഷക്കാലയളവിൽ കേരളത്തിൽ നാലു ലക്ഷത്തിലേറെ ഭൂവുടമകളെ സൃഷ്ടിക്കാൻ സർക്കാരിന് കഴിഞ്ഞു. ‘എല്ലാവർക്കും ഭൂമി, എല്ലാ ഭൂമിക്കും രേഖ, രേഖ എല്ലാ സേവനങ്ങളും സ്മാർട്ട് ’ എന്ന മുഖമുദ്രാവാക്യത്തോടെ റവന്യു വകുപ്പ് നടത്തുന്ന പ്രവർത്തനം ശ്രദ്ധേയമാണ്. ഭൂരഹിതരായ മുഴുവൻ ആളുകളെയും ഭൂമിയുടെ ഉടമകളാക്കി മാറ്റുക എന്നതാണ് സർക്കാരിന്‍റെ ലക്ഷ്യം. അതിവേഗവും സുതാര്യവുമായ റവന്യു നടപടി ക്രമങ്ങളിലേക്ക് കടക്കാൻ ഉതകുന്ന ഡിജിറ്റൽ റീസർവേയിലൂടെ ചരിത്രത്തിൽ ആദ്യമായി ഒന്നര വർഷത്തിനുള്ളിൽ നാലരലക്ഷം ഹെക്ടറോളം ഭൂമി അളന്നു തിട്ടപ്പെടുത്തി. കൈയേറ്റക്കാരെയും കൈവശ ഭൂമിക്കാരെയും കുടിയേറ്റക്കാരെയും ഒരുപോലെയല്ല സർക്കാർ കാണുന്നതെന്നും കുടിയേറ്റക്കാരുടെയും കൈവശം ഭൂമിക്കാരുടെയും പ്രശ്നങ്ങൾ അനുതാപപൂർവം പരിഗണിക്കും എന്നും മന്ത്രി പറഞ്ഞു. നിറം മങ്ങിയ വില്ലേജ് ഓഫീസ് കെട്ടിടങ്ങൾ ഏറെ ശ്രദ്ധയോടെ വലുപ്പത്തിൽ മനോഹരമായി പുനർനിർമിക്കുകയാണ്. 600 ഓളം വില്ലേജ് ഓഫീസുകൾ സ്മാർട്ടായി. സമഗ്രവും ജനകീയവും ആധുനികവത്ക്കരിക്കപ്പെട്ടതുമായ റവന്യു സേവനങ്ങളിലേക്ക് കടക്കുന്ന കാലത്ത് വില്ലേജുകൾ സ്മാർട്ട് ആകേണ്ടത് പ്രധാനമണ്. ജനങ്ങൾക്ക് ഏറ്റവും സുതാര്യമായി വേഗതയിൽ സേവനങ്ങൾ ലഭ്യമാക്കാൻ ഡിജിറ്റൽ റവന്യൂ കാർഡ് ഒരുക്കുകയാണ് വകുപ്പ്. ഇതുവഴി വില്ലേജ് ഓഫീസുകളിൽ നിന്ന് ലഭിക്കുന്ന 14 ഓളം വിവരങ്ങൾ ചിപ്പുകൾ പതിപ്പിച്ച ഒറ്റ കാർഡിൽ പൊതുജനങ്ങൾക്ക് ലഭ്യമാകും. മലപ്പുറം ജില്ലയിൽ ഇന്നലെ 2187 പട്ടയങ്ങൾ വിതരണം ചെയ്തു. ഇതിൽ 2032 ലാൻഡ് ട്രിബ്യൂണൽ പട്ടയങ്ങളും 155 ഭൂപതിവ് പട്ടയങ്ങളും ഉൾപ്പെടും. തിരൂരിൽ 258, മഞ്ചേരിയിൽ 410, തിരൂരങ്ങാടിയിൽ 750 ലാൻഡ് ട്രിബ്യൂണൽ പട്ടയങ്ങളും 614 ദേവസ്വം പട്ടയങ്ങളുമാണ് വിതരണം ചെയ്തത്.

പോഷക ഭക്ഷണത്തിന്‍റെ മറവിൽ കോർപറേറ്റ് സ്ഥാപനങ്ങളുടെ കിടമത്സരം

തേഞ്ഞിപ്പലം: ഭക്ഷ്യസുരക്ഷാ മാനദണ്ഡങ്ങൾ കാറ്റിൽ പറത്തി പോഷക ഉത്പന്നങ്ങളുടെ വിൽപ്പന സജീവമാക്കാൻ കിടമത്സരം നടത്തുന്ന കോർപ്പറേറ്റ് സ്ഥാപനങ്ങൾ നിരീക്ഷണത്തിൽ. ആരോഗ്യജീവിതത്തിലേക്കുള്ള ‘ന്യൂട്രീഷ്യൻ ഡയറ്റുകൾ’ എന്ന പേരിൽ മണിചെയിൻ മാതൃകയിൽ പ്രവർത്തിക്കുന്ന കോർപ്പറേറ്റ് കന്പനികളെക്കുറിച്ച് അന്വേഷിച്ച് നടപടിയെടുക്കുന്നതിന്‍റെ ഭാഗമായാണ് ബന്ധപ്പെട്ട അധികൃതർ നിരീക്ഷണം തുടരുന്നത്. തടി കുറക്കാമെന്നും മറ്റും പ്രലോഭിപ്പിച്ച് വൻ തുക ജനങ്ങളിൽ നിന്ന് ഈടാക്കുകയാണ് ഇത്തരത്തിലുള്ള കോർപ്പറേറ്റ് കന്പനികൾ. വലിയ ഡിസ്ക്കൗണ്ട് തുകക്ക് ലഭ്യമാകുന്നു എന്നതിനാൽ ആ ഉത്പന്നങ്ങളുടെ ലൈസൻസിയായി മാറുന്നവരുമുണ്ട്. പ്രോട്ടീൻ പൗഡർ, വിറ്റമിൻ ഡ്രിങ്ക്സ് പോലുള്ള ഉത്പന്നങ്ങൾ അശാസ്ത്രീയമായി ഉപയോഗിക്കുന്നതിലൂടെ വൃക്ക തകരാർ, ലിവർ സിറോസിസ് പോലുള്ള ഗുരുതര രോഗങ്ങൾ വരാൻ സാധ്യതയുണ്ടെന്ന് ആരോഗ്യവിദഗ്ധർ മുന്നറിയിപ്പ് നൽകുന്പോഴും പലരും ഇതിന്‍റെയെല്ലാം കെണിയിൽപ്പെടുകയാണ്. നിശ്ചിത വിദ്യാഭ്യാസ യോഗ്യതയുള്ളവരുടെ മേൽനോട്ടത്തിൽ കടകളിൽ മാത്രമേ ഇത്തരം ഉത്പന്നങ്ങൾ വിൽക്കാൻ പാടുള്ളൂവെന്നിരിക്കെ അതൊന്നുമില്ലാതെ എഫ്എസ്എസ്എഐയുടെ വിൽപ്പന രജിസ്ട്രേഷനിൽ മാത്രമായി ഇത്തരം കോർപ്പറേറ്റ് ന്യൂട്രീഷ്യൻ ഫുഡ് ലൈസൻസികൾ പ്രവർത്തിക്കുകയാണ്. ഓരോ ഉത്പന്നത്തിനും ഉപയോഗിക്കാൻ അംഗീകാരം നൽകുന്ന ‘പ്രൊഡക്ട് അപ്രൂവൽ സർട്ടിഫിക്കറ്റ്’ വേണം. എന്നാൽ ഭൂരിഭാഗത്തിനും ഇവയില്ല. വീടുകളിൽ പോലും ഇത്തരം ഉത്പന്നങ്ങൾ വിൽക്കുന്നതായി പരാതി ലഭിച്ചിട്ടുണ്ടെന്ന് ഭക്ഷ്യസുരക്ഷ വകുപ്പ് അധികൃതർ പറയുന്നു. ന്യൂട്രി ഫുഡ്സ് പ്രചാരണത്തിൽ ഇത്തരം അവകാശവാദങ്ങൾ ഉപയോഗിക്കരുതെന്ന് ഭക്ഷ്യസുരക്ഷ നിയമം നിഷ്കർഷിക്കുന്നുണ്ട്. ഇവ കാറ്റിൽ പറത്തി പ്രവർത്തിക്കുന്ന ഇത്തരം ന്യൂട്രി-ഹെൽത്ത് ഡ്രിങ്ക് സ്ഥാപനങ്ങൾക്കെതിരെ നടപടിയെടുക്കുമെന്നും ഭക്ഷ്യസുരക്ഷ വകുപ്പ് അധികൃതർ വ്യക്തമാക്കുന്നു.

പിഎംജെവികെ പദ്ധതിയിൽ നിർമിച്ച കെട്ടിടങ്ങളുടെ ഉദ്ഘാടനം 17, 18 തീയതികളിൽ

നിലന്പൂർ: പ്രധാൻമന്ത്രി ജാൻ വികാസ് കാര്യക്രം പദ്ധതിയിലൂടെ (പിഎംജെവികെ) കേന്ദ്ര മൈനോറിറ്റി മന്ത്രാലയം നിലന്പൂർ മൈനോറിറ്റി കോണ്‍സെൻട്രേഷൻ ബ്ലോക്കിലേക്ക് അനുവദിച്ച സ്കിൽ ഡെവലപ്മെന്‍റ് സെന്‍ററിന്‍റെയും ഗേൾസ് ഹോസ്റ്റലിന്‍റെയും ഉദ്ഘാടനം 17, 18 തിയതികളിൽ നിലന്പൂർ അമൽകോളജ് കാന്പസിൽ നടക്കുമെന്ന് അധികൃതർ വാർത്താസമ്മേളനത്തിൽ അറിയിച്ചു. സ്കിൽ സെന്‍റർ 17 ന് രാവിലെ ഒന്പതിന് കേന്ദ്രമന്ത്രി ജയന്ത് ചൗധരി ഉദ്ഘാടനം ചെയ്യും. പി.വി. അബ്ദുൾ വഹാബ് എംപി അധ്യക്ഷതവഹിക്കും. പെണ്‍കുട്ടികളുടെ ഹോസ്റ്റൽ കെട്ടിടം 18ന് ഉച്ചയ്ക്കുശേഷം മൂന്നിന് കേന്ദ്ര ന്യൂനപക്ഷകാര്യമന്ത്രി ജോർജ് കുര്യൻ ഉദ്ഘാടനം ചെയ്യും. മന്ത്രി വി. അബ്ദുറഹ്മാൻ അധ്യക്ഷത വഹിക്കും. പി.വി. അബ്ദുൾ വഹാബ് എംപി, എംഎൽഎമാരായ പി.കെ. ബഷീർ, ആര്യാടൻ ഷൗക്കത്ത് തുടങ്ങിയവർ സംബന്ധിക്കും. 7.92 കോടി രൂപയാണ് സ്കിൽ സെന്‍ററിന് അനുവദിച്ചത്. മൈലാടിയിൽ 37,900 ചതുരശ്ര അടി വിസ്തൃതിയിൽ നിർമിച്ച ഈ കേന്ദ്രം തൊഴിലധിഷ്ഠിത വിദ്യാഭ്യാസത്തിനും പരിശീലനത്തിനും ലോകനിലവാരത്തിലുള്ള സൗകര്യങ്ങളാണ് ഒരുക്കുന്നത്. പ്രായോഗിക പഠനത്തിന്‍റെയും തൊഴിൽ പരിശീലനത്തിന്‍റെയും പുതുമയുടെയും കേന്ദ്രമായി മാറും. സെമിനാർഹാൾ, ഇലക്ട്രോണിക്സ് ലാബ്, സർവേ ആൻഡ് ജിപിഎസ് ലാബ്, ഐടി ലാബ്, കൗണ്‍സിലിംഗ് റൂം, സ്റ്റോറൂമുകൾ, വനിതകൾക്കായി വിശ്രമമുറി, ഭിന്നശേഷിക്കാരായവർക്ക് സൗഹൃദമായ ശൗചാലയം തുടങ്ങി വിവിധ സൗകര്യങ്ങളാണ് ഒരുക്കിയിരിക്കുന്നത്. പുതിയ തൊഴിലവസരങ്ങൾക്ക് വിദ്യാർഥികളെ സജ്ജമാക്കുകയും രാജ്യനിർമാണത്തിൽ അവരെ പങ്കാളികളാക്കുകയും ചെയ്യുകയാണ് ഇതിലൂടെ ലക്ഷ്യമിടുന്നത്. വാർത്താസമ്മേളനത്തിൽ പി.വി. അബ്ദുൾ വഹാബ് എംപി, നിലന്പൂർ ബ്ലോക്ക് പഞ്ചായത്ത് പ്രസിഡന്‍റ് പി.പുഷ്പവല്ലി, വൈസ് പ്രസിഡന്‍റ് പാത്തുമ്മ ഇസ്മായിൽ, ബ്ലോക്ക് പഞ്ചായത്തംഗം സഹിൽ അകന്പാടം തുടങ്ങിയവർ പങ്കെടുത്തു.

മെഡിക്കൽ കോളജിലെ ജനൽ വീണത് പുനഃസ്ഥാപനത്തിലെ പിഴവ് കാരണം

മഞ്ചേരി: മഞ്ചേരി ഗവണ്‍മെന്‍റ് മെഡിക്കൽ കോളജ് കെട്ടിടത്തിന്‍റെ ജനൽ കാറ്റിൽ അടർന്നു വീണതിന് കാരണം പുനഃസ്ഥാപനത്തിലെ പിഴവെന്ന് കണ്ടെത്തൽ. ജനലിലൂടെ താഴത്തെ നിലയിൽ നിന്ന് എന്തെങ്കിലും സാധനങ്ങൾ കയറ്റാനായി അഴിച്ചെടുത്ത ജനൽ ഉൗരി തിരികെ വച്ചപ്പോൾ ഉറപ്പിക്കാത്തതാണ് പെട്ടെന്ന് കാറ്റിൽ വീഴാൻ കാരണമായതെന്നാണ് കണ്ടെത്തൽ. ഏത് വകുപ്പിലേക്കാണ് സാധനങ്ങൾ കയറ്റിയതെന്ന് അറിയില്ലെന്ന് ആശുപത്രി അധികൃതർ പറഞ്ഞു. ജനൽ വീണ് പരിക്കേറ്റ ഒന്നാംവർഷ നഴ്സിംഗ് വിദ്യാർഥികളായ ബി.ആദിത്യ, പി.നയന എന്നിവർ ആശുപത്രി വിട്ടു. മെഡിക്കൽ കോളജ് കെട്ടിടത്തിന്‍റെ ഒന്നാംനിലയിലെ ഫിസിയോളജി ഡെമോണ്‍സ്ട്രേഷൻ ഹാളിലെ ഇരുന്പ് ജനലാണ് തിങ്കളാഴ്ച വൈകിട്ട് 3.45 ന് ക്ലാസ്മുറിയിലേക്ക് നിലംപൊത്തിയത്. അഞ്ച് നില കെട്ടിടത്തിൽ എല്ലാനിലകളിലും ഇരുന്പ് ജനലുകൾ ഭദ്രമായി ഉറപ്പിച്ചിട്ടുണ്ട്. ഒന്നാം നിലയിലെ ഒരു ജനലാണ് കാറ്റിൽ വീണത്. മെഡിക്കൽ കോളജിലും ആശുപത്രിയിലും അറ്റകുറ്റ പ്രവൃത്തികൾ നടത്താൻ ഫണ്ട് ലഭിക്കാത്തത് പ്രയാസം സൃഷ്ടിക്കുന്നതായി പൊതുമരാമത്ത് വകുപ്പ് അധികൃതർ കളക്ടറെ അറിയിച്ചു. ഒരു വർഷം മുന്പ് ഒരു കോടി രൂപയുടെ എസ്റ്റിമേറ്റ് തയാറാക്കി സമർപ്പിച്ചിരുന്നു. ഇത് പരിഗണിച്ചില്ലെന്നും അറിയിച്ചു.

നവീകരിച്ച പെരിന്തൽമണ്ണ ടൗണ്‍ഹാൾ 27ന് തുറക്കും

പെരിന്തൽമണ്ണ: നവീകരിച്ച പെരിന്തൽമണ്ണ മുനിസിപ്പൽ ടൗണ്‍ഹാൾ 27ന് വൈകുന്നേരം നാലിന്മന്ത്രി എം.ബി. രാജേഷ് ഉദ്ഘാടനം ചെയ്യും. മൂസക്കുട്ടി സ്മാരക ടൗണ്‍ഹാൾ എന്ന് നാമകരണം ചെയ്തിരുന്ന ടൗണ്‍ഹാളിന് കൗണ്‍സിൽ യോഗ തീരുമാന പ്രകാരം നഗരസഭ മുൻ പ്രസിഡന്‍റായിരുന്ന കെ.ടി. നാരായണന്‍റെ പേരാണ് നൽകിയിട്ടുള്ളത്. പണമില്ലാതെ നിർമാണ പ്രവൃത്തി നിലച്ചിരുന്ന ടൗണ്‍ഹാൾ പിന്നീട് നഗരസഭ വായ്പ എടുത്താണ് പദ്ധതി പൂർത്തിയാക്കിയത്. ഓഡിറ്റോറിയം പൂർത്തിയാകുന്നതോടെ പൊതുപരിപാടികൾക്ക് നൽകാനുള്ള നിരക്കും നഗരസഭ തീരുമാനിച്ചു. ഇതുപ്രകാരം വിവാഹങ്ങൾക്ക് എസി ഹാളിന് 55,000 രൂപയും നോണ്‍ എസിക്ക് 40,000 രൂപയും വാടക ഈടാക്കും. പട്ടികജാതി- വർഗം, ബിപിഎൽ കുടുംബങ്ങൾക്ക് നോണ്‍ എസിക്ക് 30,000 രൂപ നൽകിയാൽ മതി. ആറ്മണിക്കൂർ നേരത്തേക്കുള്ള മറ്റു ഉപയോഗങ്ങൾക്ക് എസിക്ക് 20,000 രൂപയും നോണ്‍ എസിക്ക് 15,000 രൂപയുമാണ് വാടക. രാഷ്ട്രീയ പാർട്ടികൾക്കും സർവീസ് സംഘടനകൾക്കും മറ്റും എസിക്ക് 15,000 രൂപയും നോണ്‍ എസിക്ക് 10,000 രൂപയും നൽകണം. ഭക്ഷണഹാൾ ഉൾപ്പെടെ ആകുന്പോൾ എസിക്ക് 5000 രൂപയും നോണ്‍ എസിക്ക് 3500 രൂപയും അധികചാർജ് ഈടാക്കും. ഇതു സംബന്ധിച്ച് നഗരസഭാ കൗണ്‍സിലിന് യുക്തമായ തീരുമാനങ്ങൾ എടുക്കാമെന്നും നിയമാവലിയിൽ വ്യവസ്ഥയുണ്ട്.

തെരുവ് വിളക്കുകൾ കത്തുന്നില്ല; നിവേദനം നൽകി

മഞ്ചേരി: തൃക്കലങ്ങോട് മരത്താണി 22-ാം വാർഡിൽ തെരുവു വിളക്കുകൾ മിഴിചിമ്മിയിട്ട് മാസങ്ങളായി. രാത്രിയായാൽ പ്രദേശമാകെ ഇരുട്ടിലാകുന്നതിനാൽ പ്രദേശവാസികളും യാത്രക്കാരും ഏറെ ദുരിതത്തിലാണ്. പുലിഭീതി നിലനിൽക്കുന്ന മരത്താണിയിൽ രാത്രി കാലത്ത് വാഹനങ്ങളിൽ സഞ്ചരിക്കുന്നതു പോലും ഏറെ ആശങ്കയോടെയാണ്. തെരുവ് വിളക്കുകൾ പ്രകാശിപ്പിക്കുന്നതിനു സത്വര നടപടികൾ സ്വീകരിക്കണമെന്നാവശ്യപ്പെട്ട് മരത്താണി ജനകീയ സമിതിയുടെ നേതൃത്വത്തിൽ തൃക്കലങ്ങോട് ഗ്രാമപഞ്ചായത്ത് പ്രസിഡന്‍റ് യു.കെ. മഞ്ജുഷക്ക് നിവേദനം നൽകി. ജനകീയ സമിതി ജനറൽ കണ്‍വീനർ സലിം മേച്ചേരി, ഡിവൈഎഫ്ഐ മരത്താണി യൂണിറ്റ് പ്രസിഡന്‍റ് എൻ.ടി. സാലി, പിഡിപി മരത്താണി വാർഡ് കൗണ്‍സിൽ അംഗം കെ.ടി. അബ്ദുൾഗഫൂർ, പൊതുപ്രവർത്തകൻ ചെമ്മരം അസീസ് എന്നിവരുടെ നേതൃത്വത്തിലാണ് നിവേദനം നൽകിയത്.

പുഴക്കടവ് ശുചീകരിച്ചു

ഏലംകുളം: ജീവനം റസിഡന്‍റ്സ് അസോസിയേഷന്‍റെ നേതൃത്വത്തിൽ കുന്തിപ്പുഴയുടെ തീരത്തെ ഏലംകുളം മനയ്ക്ക് സമീപമുള്ള പുഴക്കടവ് വൃത്തിയാക്കി. പുല്ലും കാടും ചെളിയും നിറഞ്ഞ് ക്ഷുദ്രജീവികളുടെ ആവാസകേന്ദ്രമായി മാറിയിരുന്നു പുഴക്കടവ് പരിസരം. തുടർന്ന് ’ജീവന’ത്തിന്‍റെ പ്രവർത്തകരും നാട്ടുകാരും പരിസരവാസികളായ സ്ത്രീകളും ചേർന്ന് വൃത്തിയാക്കുകയായിരുന്നു. ഏലംകുളം മനയോട് ചേർന്നുള്ള കീഴ്ത്രിക്കോവിൽ ശ്രീരാമ ക്ഷേത്രത്തിന്‍റെ മുന്നിലുള്ള നൂറ്റാണ്ട് പഴക്കമുള്ള ഈ കടവ് കരിങ്കല്ല് കൊണ്ട് പടുത്ത് ഇരുന്പ് റാഡുകൾ ഉപയോഗിച്ച് ബന്ധിച്ച് നിർമിച്ചതായിരുന്നു. അറ്റകുറ്റപ്പണികൾ യഥാസമയങ്ങളിൽ നടത്താൻ കഴിയാതെ വന്നതാണ് വൃത്തിഹീനമായത്. ജീവനം ഭാരവാഹികളുടെ നേതൃത്വത്തിൽ ശ്രമദാനമായി നടത്തുകയായിരുന്നു ശൂചീകരണം.

ഡിവൈഎഫ്ഐ പ്രതിഷേധിച്ചു

പാതായ്ക്കര: പെരിന്തൽമണ്ണ വിദ്യാഭവൻ സ്കൂളിൽ വിദ്യാർഥികളെ കൊണ്ട് അധ്യാപകരുടെ കാല് കഴുകിച്ച സംഭവത്തിൽ പ്രതിഷേധിച്ച് ഡിവൈഎഫ്ഐ പെരിന്തൽമണ്ണ ബ്ലോക്ക് കമ്മിറ്റി പ്രതിഷേധ മാർച്ച് നടത്തി. സംസ്ഥാന കമ്മിറ്റി അംഗം കെ.പി. അനീഷ് ഉദ്ഘാടനം ചെയ്തു. ബ്ലോക്ക് പ്രസിഡന്‍റ് എം. ഷാഹിദ് അധ്യക്ഷത വഹിച്ചു. ഇത്തരം പരിപാടികൾ വിദ്യാഭ്യാസ സ്ഥാപനങ്ങളിൽ അനുവദിക്കരുതെന്നും ഈ പരിപാടി സംഘടിപ്പിച്ചവർക്കെതിരേ കർശനമായ നിയമ, അച്ചടക്ക നടപടികൾ സ്വീകരിക്കണമെന്നും ഡിവൈഎഫ്ഐ ആവശ്യപ്പെട്ടു. ബ്ലോക്ക് സെക്രട്ടറി ഇ. ഷിജിൽ സ്വാഗതവും ജില്ലാ കമ്മിറ്റി അംഗം കെ. ഹരിമോൻ നന്ദിയും പറഞ്ഞു.

മെൻസ്ട്രൽ ഹൈജീൻ: സ്കൂളിൽ ബോധവത്കരണം

എക്കര: മൂത്തേടം ഗവണ്‍മെന്‍റ് ഹയർ സെക്കൻഡറി സ്കൂളിൽ വിദ്യാർഥിനികൾക്കായി മെൻസ്ട്രൽ ഹൈജീൻ വിഷയത്തെ ആസ്പദമാക്കി ബോധവത്ക്കരണം നൽകി. ജില്ലാ വനിതാ ശിശുവികസന ഓഫീസ്, ഹബ്ബ് ഫോർ എംപവർമെന്‍റ് ഓഫ് വുമണ്‍ എന്നിവയുടെ ആഭിമുഖ്യത്തിലാണ് ഔട്ട് റീച്ച് ബോധവത്ക്കരണ പരിപാടി സംഘടിപ്പിച്ചത്. മൂത്തേടം ഗ്രാമപഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ അനീസ് കാറ്റാടി ഉദ്ഘാടനം ചെയ്തു. പ്രധാനാധ്യാപിക ബീന മണ്ണിങ്ങ പള്ളിയാളി മുഖ്യപ്രഭാഷണം നടത്തി. ഐസിഡിഎസ് സിഡിപിഒ ഷാഹിന മുഖ്യാതിഥിയായിരുന്നു. മെൻസ്ട്രൽ ഹൈജീൻ വിഷയത്തിൽ മാനസിക പ്രശ്നങ്ങളെക്കുറിച്ചും അത് എങ്ങനെ തരണം ചെയ്യാം, പാലിക്കേണ്ട ശുചിത്വം, ആരോഗ്യകരമായ ഭക്ഷണക്രമങ്ങൾ എന്നിവയെക്കുറിച്ച് മൂത്തേടം മെഡിക്കൽ ഓഫീസർ ഡോ. എം. ഷമീഹ ക്ലാസെടുത്തു. സ്കൂൾ എംടിഎ ചെയർപേഴ്സണ്‍ ഇ. സൈറാബാനു അധ്യക്ഷത വഹിച്ചു. യു.പി. സലാം, മൂത്തേടം സെക്ടർ സൂപ്പർവൈസർ സുലൈഖ, ജൂണിയർ പബ്ലിക് ഹെൽത്ത് നഴ്സ് രജീഷ, സൈക്കോ സോഷ്യോ കൗണ്‍സിലർ എ.എം. സിനി, പിടിഎ അംഗം മുഹമ്മദ്, സീനിയർ അസിസ്റ്റന്‍റ് ജോജി ഫ്രാൻസിസ്, സ്റ്റാഫ് സെക്രട്ടറി പി. അഷ്റഫ്, ഹബ്ബ് ഫിനാഷ്യൽ ലിറ്ററസി സ്റ്റാഫ് ജിജി എന്നിവർ പ്രസംഗിച്ചു.

നെല്ല് സംഭരണ തുകയും സബ്സിഡിയും ഉടൻ ലഭ്യമാക്കണം: കർഷകസഭ

പെരിന്തൽമണ്ണ: ബ്ലോക്ക് പഞ്ചായത്തിന്‍റെയും കൃഷിവകുപ്പ്, ആത്മ എന്നിവയുടെയും ആഭിമുഖ്യത്തിൽ പെരിന്തൽമണ്ണ ബ്ലോക്ക് പഞ്ചായത്തിൽ സംഘടിപ്പിച്ച കർഷകസഭ ബ്ലോക്ക് പഞ്ചായത്ത് പ്രസിഡന്‍റ് അഡ്വ.എ.കെ.മുസ്തഫ ഉദ്ഘാടനം ചെയ്തു. 2024 -25 വർഷത്തെ നെൽകൃഷി കൂലി ചെലവിലേക്കുള്ള സബ്സിഡിയും നെല്ല് സംഭരിച്ച വകയിൽ സർക്കാരിൽ നിന്ന് ലഭിക്കേണ്ട തുകയും ഉടൻ അനുവദിക്കണമെന്ന് കർഷകസഭ ആവശ്യപ്പെട്ടു. സംഭരണ വില നൽകാനുള്ളത് സർക്കാരും കൂലി ചെലവിലേക്കുള്ള സബ്സിഡി നൽകാനുള്ളത് ജില്ലാ പഞ്ചായത്തുമാണ്. മനുഷ്യനും കാർഷിക ഉത്പന്നങ്ങൾക്കും പുല്ലുവില കൽപ്പിക്കുകയും അക്രമകാരികളായ വന്യമൃഗങ്ങളെ തടയാനുള്ള മാർഗങ്ങൾ സർക്കാർ അവലംബിക്കാത്തതിലും കർഷകസഭ പ്രതിഷേധിച്ചു. ബ്ലോക്ക് പഞ്ചായത്തിന് കീഴിലുള്ള അങ്ങാടിപ്പുറത്തെ അഗ്രോ സർവീസ് സെന്‍ററിന് ഗവണ്‍മെന്‍റ് തലത്തിലുള്ള ആക്രഡിറ്റേഷൻ ഉടൻ ലഭ്യമാക്കും. ഇതോടെ വിവിധ പദ്ധതികൾക്ക് ആവശ്യമായ കരാറുകളിൽ ഏർപ്പെടുവാനും വിത്ത്, വളം, തൈ എന്നിവ ക്വട്ടേഷനുകൾ കൂടാതെ സമർപ്പിക്കുവാനും സാധിക്കുമെന്ന് അസിസ്റ്റന്‍റ് കൃഷി വികസന ഓഫീസർ അറിയിച്ചു. യോഗത്തിൽ ബ്ലോക്ക് പഞ്ചായത്ത് വൈസ് പ്രസിഡന്‍റ് വനജ കുന്നംകുലത്ത് അധ്യക്ഷത വഹിച്ചു. കീഴാറ്റൂർ ഗ്രാമപഞ്ചായത്ത് പ്രസിഡന്‍റ് ജമീല ചാലിയത്തൊടി, കൃഷി അസിസ്റ്റന്‍റ് ഡയറക്ടർ റിയ ജോസഫ്, ബ്ലോക്ക് പഞ്ചായത്ത് മെംബർമാർ, പഞ്ചായത്ത് കൃഷി ഓഫീസർമാർ, കർഷകർ എന്നിവർ പങ്കെടുത്തു.

വീട്ടിൽ കയറി അതിക്രമം കാണിച്ച പ്രതിക്ക് തടവും പിഴയും

പെരിന്തൽമണ്ണ: അശ്ലീല ആംഗ്യം കാണിച്ച് വീട്ടിൽ അതിക്രമിച്ചു കയറി സ്ത്രീത്വത്തെ അപമാനിച്ച പ്രതിക്ക് തടവും പിഴയും. കക്കൂത്ത് വലിയപറന്പിൽ സദാനന്ദനെ (39) യാണ് പെരിന്തൽമണ്ണ മജിസ്ട്രേറ്റ് കെ.എൻ. ആശ വിവിധ വകുപ്പുകളിലായി ഒരു വർഷവും ഏഴ് മാസവും തടവിനും പതിനായിരം രൂപ പിഴ അടക്കുവാനും ശിക്ഷിച്ചത്. പിഴ അടച്ചില്ലെങ്കിൽ ഒരു മാസം കൂടി തടവനുഭവിക്കണം. 2016 ലാണ് സംഭവം. പെരിന്തൽമണ്ണ പോലീസ് രജിസ്റ്റർ ചെയ്ത കേസിൽ അഞ്ച് സാക്ഷികളെയും അഞ്ച് രേഖകളും കോടതിയിൽ ഹാജരാക്കി. പരാതിക്കാരിക്ക് വേണ്ടി അസിസ്റ്റന്‍റ് പബ്ലിക് പ്രോസിക്യൂട്ടർ ഇ. നവാബ്ഖാൻ ഹാജരായി.

ആദിവാസി യുവാക്കൾക്ക് ഡ്രൈവിംഗ് ലൈസൻസ് വിതരണം ചെയ്തു

നിലന്പൂർ: ആദിവാസി ഗോത്രവിഭാഗത്തിലെ 65 പേർക്ക് ഡ്രൈവിംഗ് ലൈസൻസ് നൽകി. ജില്ലാ പോലീസിന്‍റെ നേതൃത്വത്തിൽ എസ്ആർഇ ഫണ്ട് ഉപയോഗിച്ച് ജില്ലയിലെ വനത്തിനകത്തും വനത്തിനോട് ചേർന്നും താമസിക്കുന്ന ആദിവാസി ഗോത്രവിഭാഗങ്ങളിലെ യുവതി,യുവാക്കൾക്കാണ് ഡ്രൈവിംഗ് ലൈസൻസ് നൽകിയത്. പരിശീലനം നൽകി ഡ്രൈവിംഗ് ലൈസൻസ് നൽകുന്ന പദ്ധതി പ്രകാരമാണ് നിലന്പൂർ ഡിവൈഎസ്പി ഓഫീസിൽ നടന്ന ചടങ്ങിൽ 65 പേർക്ക് ഡ്രൈവിംഗ് ലൈസൻസ് വിതരണം ചെയ്തത്. ജില്ലാ പോലീസ് മേധാവി ആർ. വിശ്വനാഥ് വിതരണോദ്ഘാടനം നിർവഹിച്ചു. രണ്ട് തവണകളായി 140 പേർക്ക് ലൈസൻസ് നൽകാൻ കഴിഞ്ഞതിൽ സന്തോഷമുണ്ടെന്ന് അദ്ദേഹം പറഞ്ഞു. ആദ്യഘട്ടത്തിൽ 75 പേർക്ക് ലൈസൻസ് നൽകിയിരുന്നു. രണ്ടാംഘടത്തിൽ എട്ട് പേർക്ക് ജീപ്പിന്‍റെ ലൈസൻസാണ് നൽകിയത്. ഇത് അവർക്ക് ഉപജീവനത്തിനു കൂടി സഹായകമാകും. ഉൾവനത്തിൽ കഴിയുന്ന ആദിവാസി വിഭാഗത്തിന് വാഹനം ഓടിക്കാൻ ലൈൻസൻസ് നൽകുന്നതിലൂടെ നിയമതടസം ഒഴിവാക്കാനും സുരക്ഷ ഉറപ്പാക്കാനും കഴിയുമെന്നും എസ്പി പറഞ്ഞു. മോട്ടോർ വാഹനവകുപ്പും ജില്ലാ പോലീസും ചേർന്നാണ് പദ്ധതി നടപ്പാക്കിയത്. മാവോയിസ്റ്റ് ഇടപെടൽ ഉണ്ടായപ്പോൾ പൊതുസമൂഹത്തിനൊപ്പം നിന്നവരാണ് കരുളായി ഉൾവനത്തിലെ ആദിവാസി സമൂഹമെന്നും അദ്ദേഹം പറഞ്ഞു. ഇതിൽ നാലുപേർ പ്രാക്തന ഗോത്രവർഗമായ മാഞ്ചീരി ചോലനായ്ക്ക വിഭാഗത്തിൽപ്പെട്ടവരും മൂന്നുപേർ സ്ത്രീകളുമാണ്. പ്രാക്തന ഗോത്രത്തിലെ ചോലനായ്ക്ക വിഭാഗത്തിൽപ്പെട്ടവർക്ക് ഡ്രൈവിംഗ് ലൈസൻസ് ലഭിക്കുന്നത് ആദ്യമാണെന്ന് വനംവകുപ്പ് ഉദ്യോഗസ്ഥനും മാഞ്ചീരി ചോലനായ്ക്ക നഗറിലെ അംഗവുമായ ബാലനും പറഞ്ഞു. നിലന്പൂർ ഡിവൈഎസ്പി സാജു കെ. ഏബ്രഹാം അധ്യക്ഷത വഹിച്ചു. ജോയിന്‍റ് ആർടിഒ കെ.പി. ദീലിപ് മുഖ്യപ്രഭാഷണം നടത്തി. നിലന്പൂർ പോലീസ് ഇൻസ്പെക്ടർ സുനിൽ പുളിക്കൽ, കരുവാരകുണ്ട് സിഐ ജയൻ, എടക്കര സിഐ ബാബു, ആദിവാസി വിഭാഗത്തിൽ നിന്ന് ബാലൻ മാഞ്ചീരി, ഗോപാലൻ പാട്ടക്കരിന്പ്, വീരൻ ഉച്ചക്കുളം എന്നിവർ പ്രസംഗിച്ചു. ഇതോടൊപ്പം ബോധവത്കരണ ക്ലാസും സംഘടിപ്പിച്ചു.

ജീവനും സ്വത്തിനും ഭീഷണിയായി വന്യമൃഗങ്ങൾ

കാളികാവ്: കാട്ടാനയുടെ ആക്രമണമുണ്ടായ ചോക്കാട് നാല്പത് സെന്‍റ് ആദിവാസി നഗറിലെ സൊസൈറ്റിയുടെ ഭൂമിയിലെ കാട് വെട്ടിത്തെളിക്കണമെന്ന ആവശ്യത്തിന് പരിഹാരമായില്ല. റബർ മരങ്ങൾ മുറിച്ചുമാറ്റിയെങ്കിലും റീ പ്ലാന്‍റിംഗ് നടത്താത്തതാണ് വലിയ തോതിൽ അടിക്കാട് വളർന്ന് വനമായി മാറാൻ കാരണം. ചോക്കാട് നാല്പത് സെന്‍റ് ആദിവാസി നഗറിലെ ഏക്കർക്കണക്കിനു ഭൂമി ആദിവാസികളുടെ ക്ഷേമത്തിനുവേണ്ടി സ്ഥാപിച്ച സൊസൈറ്റിയാണ് കൈകാര്യം ചെയ്യുന്നത്. ആദിവാസികൾക്ക് നിത്യവരുമാനത്തിനായുള്ള റബർ തോട്ടമാണ് ഇപ്പോൾ വലിയ തോതിൽ കാടായി കിടക്കുന്നത്. കൊട്ടൻ ചോക്കാടൻ മലവാരത്തിന് താഴെയുള്ള ഭൂമി വനമായി മാറിയ അവസ്ഥയിലാണ്. ആദിവാസികളുടെ ജീവനും സ്വത്തിനും ഭീഷണിയായിട്ടും സൊസൈറ്റി സെക്രട്ടറി കാട് വെട്ടിമാറ്റുന്നത് പരിഗണിക്കുന്നില്ലെന്നാണ് പരാതി. ഏതാനും വർഷങ്ങളായി സൊസൈറ്റി ഭരിക്കുന്നത് സെക്രട്ടറി മാത്രമാണ് എന്നാണ് ആദിവാസികൾ പറയുന്നത്. റബർ മരങ്ങൾ മുറിച്ചുമാറ്റി റീ പ്ലാന്‍റിംഗ് നടത്താതെ തരിശായി ഇട്ടതാണ് വലിയതോതിൽ കാട് വളരാൻ ഇടയായത്. ഈ കാട്ടിലൂടെയാണ് കാട്ടാനകൾ കോളനിയിലേക്ക് എത്തുന്നത്. തൊട്ടടുത്ത് നിന്നാൽ പോലും കാട്ടാനകളെ കാണാൻ കഴിയാത്ത വിധം കാടായിട്ടും സൊസൈറ്റി സെക്രട്ടറി നടപടി സ്വീകരിക്കുന്നില്ലെന്നാണ് പരാതി. കഴിഞ്ഞദിവസം ആദിവാസി നഗറിൽ കാട്ടാന ഇറങ്ങിയത് കാണാനെത്തിയ എ.പി. അനിൽകുമാർ എംഎൽഎയോടും ആദിവാസികൾ പരാതി പറഞ്ഞെങ്കിലും ഒരു നടപടിയും ഉണ്ടായിട്ടില്ല. വനംവകുപ്പും ഗ്രാമപഞ്ചായത്തും പോലീസും എല്ലാം ഇടപെട്ട് ആദിവാസികളുടെ സുരക്ഷയ്ക്കായി സൊസൈറ്റി ഭൂമിയിലെ കാട് വെട്ടിക്കുന്നതിന് ഇടപെടൽ നടത്തണമെന്നാണ് ആദിവാസികളുടെ ആവശ്യം.

നിലന്പൂർ ബൈപാസ് ഇരകളുടെ നഷ്ടപരിഹാരം രണ്ടുമാസത്തിനകം നൽകാമെന്ന് കളക്ടർ

നിലന്പൂർ: നിലന്പൂർ ബൈപാസ് ഇരകൾക്ക് രണ്ട് മാസത്തിനുള്ളിൽ നഷ്ടപരിഹാര തുക നൽകുമെന്ന് ജില്ലാ കളക്ടറുടെ ഉറപ്പ്. നിലന്പൂർ ബൈപാസ് കൂട്ടായ്മ പ്രതിനിധികൾ മലപ്പുറം കളക്ടറേറ്റിലെത്തി നടത്തിയ ചർച്ചയിലാണ് കളക്ടർ വി.ആർ. വിനോദ് രണ്ട് മാസത്തിനുള്ളിൽ നഷ്ടപരിഹാര തുക വിതരണം ചെയ്യുമെന്ന് ഉറപ്പ് നൽകിയത്. നിലന്പൂർ ഉപതെരഞ്ഞെടുപ്പിന് മുന്നോടിയായി സംസ്ഥാന സർക്കാർ 227.18 കോടി രൂപ നിലന്പൂർ ബൈപാസിനായി അനുവദിച്ചിരുന്നു. ഇതിൽ 74 കോടി രൂപ ബൈപാസിനായി ഭൂമി വിട്ടുനൽകിയവർക്ക് നഷ്ടപരിഹാരമായി നൽകാനുള്ള തുകയായിരുന്നു. വളരെ പെട്ടെന്ന് തന്നെ തുക കൈമാറുമെന്ന് അന്ന് ഉറപ്പും നൽകിയിരുന്നു. കഴിഞ്ഞ ഏപ്രിലിൽ ധനകാര്യമന്ത്രി കെ.എൻ. ബാലഗോപാലാണ് തുക അനുവദിച്ചത്. എന്നാൽ ജൂലൈ മാസമായിട്ടും നടപടി എങ്ങുമെത്താത്ത സാഹചര്യത്തിലാണ് ബൈപാസ് കൂട്ടായ്മ പ്രതിനിധികളായ ഉമ്മർ, ഹസീന, രാധ, കോമളം തുടങ്ങിയവരുടെ നേതൃത്വത്തിൽ ബൈപാസ് ഇരകൾ കളക്ടറെ കണ്ടത്. ചില സങ്കേതിക പ്രശ്നങ്ങൾ കൂടി ബാക്കി നിൽക്കുന്ന സാഹചര്യത്തിൽ രണ്ട് മാസം കൂടി കഴിയുമെന്നാണ് കളക്ടർ നൽകിയ മറുപടിയെന്ന് ബൈപാസ് ജനകീയ കൂട്ടായ്മ അംഗങ്ങൾ പറഞ്ഞു. മന്ത്രിമാരും കളക്ടറും നിരവധി തവണ ഉറപ്പ് നൽകിയിട്ടും നഷ്ടപരിഹാര തുക ഇനിയും ലഭിക്കാത്തതിനാൽ കളക്ടറുടെ ഉറപ്പ് എന്താകുമെന്ന കാര്യത്തിൽ ഇവരുടെ ആശങ്ക വർധിക്കുകയാണ്. 1996ൽ നിലന്പൂർ ബൈപാസിനായി ഭൂമി വിട്ടുനൽകിയ കുടുംബങ്ങളെയാണ് സങ്കേതികത്വത്തിന്‍റെ നൂലാമാലകൾ പറഞ്ഞ് 29 വർഷമായി അധികൃതർ വട്ടം കറക്കുന്നത്. നിലന്പൂർ ജ്യോതിപ്പടി മുതൽ വെളിയംതോട് വരെയുള്ള ആറു കിലോമീറ്റർ റോഡാണ് നിലന്പൂർ ബൈപാസിനായുള്ളത്. ഇതിൽ നിലന്പൂർ ജ്യോതിപ്പടി മുതൽ ചക്കാലക്കുത്ത് വരെയുളള രണ്ട് കിലോമീറ്റർ ഭാഗത്ത് സ്ഥലം വിട്ടുനൽകിയവർക്ക് മാത്രമാണ് നഷ്ടപരിഹാരം ലഭിച്ചത്. നാലു കിലോമീറ്റർ ഭാഗത്ത് സ്ഥലം വിട്ടുനൽകിയ കുടുംബങ്ങളാണ് നഷ്ടപരിഹാരത്തിനായി നെട്ടോട്ടം ഓടുന്നത്. ഇതിൽ 49 കുടുംബങ്ങൾ താമസിക്കുന്നത് ഏത് സമയത്തും നിലംപൊത്താവുന്ന വീടുകളിലാണ്. ഉപതെരഞ്ഞെടുപ്പ് കഴിഞ്ഞതോടെ രാഷ്ട്രീയ പാർട്ടികൾ നിലന്പൂർ ബൈപാസ് വിഷയത്തിൽ പിന്നോട്ടും പോയി. തുടർന്നാണ് ബൈപാസ് കൂട്ടായ്മ പ്രതിനിധികൾ കളക്ടറെ സമീപിച്ചത്.

കേരളത്തിന്‍റെ ആരോഗ്യമേഖല ഏറ്റവും മികച്ചത്: മന്ത്രി എ.കെ. ശശീന്ദ്രൻ

എടവണ്ണ: കേരളത്തിന്‍റെ ആരോഗ്യമേഖല ഏറ്റവും മികച്ചതാണെന്ന് മന്ത്രി എ.കെ. ശശീന്ദ്രൻ. എടവണ്ണ ഗ്രാമപഞ്ചായത്തിലെ പടിഞ്ഞാറെ ചാത്തല്ലൂർ കുടുംബാരോഗ്യ കേന്ദ്രത്തിന്‍റെ പുതിയ കെട്ടിടം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. 30 ലക്ഷം രൂപ ചെലവിലാണ് കെട്ടിട നിർമാണം പൂർത്തികരിച്ചത്. ഒപി, ലാബ് സൗകര്യങ്ങളാണ് പുതിയ കെട്ടിടത്തിലുള്ളത്.സംസ്ഥാനത്ത് രണ്ട് ഹെൽത്ത് സെന്‍ററുകളുള്ള ഏക പഞ്ചായത്താണ് എടവണ്ണ. സംസ്ഥാനത്തിന്‍റെ ആരോഗ്യമേഖല കഴിഞ്ഞ കുറെ വർഷങ്ങളായി മികച്ച നിലവാരം പുലർത്തുന്നതായി മന്ത്രി പറഞ്ഞു. എടവണ ഗ്രാമപഞ്ചായത്ത് പ്രസിഡന്‍റ് ടി. അഭിലാഷ് അധ്യക്ഷത വഹിച്ചു. ആരോഗ്യ കേരളം ജില്ലാ പ്രോഗ്രാം മാനേജർ ഡോ. ടി.എൻ. അനൂപ് റിപ്പോർട്ട് അവതരിപ്പിച്ചു. പഞ്ചായത്ത് വൈസ് പ്രസിഡന്‍റ് നുസ്രത് വലീദ്, വികസനകാര്യ സ്റ്റാൻഡിംഗ് കമ്മിറ്റി ചെയർമാൻ കെ.പി. ബാബുരാജൻ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപെഴ്സണ്‍ ഹംന അക്ബർ, ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ കെ.ടി.അൻവർ, മെന്പർമാരായ ശിഹാബ് കാഞ്ഞിരാല, ജമീല ലത്തീഫ്, ഡോ. ജനീഫ്, എം. ജാഫർ, പി.കെ.മുഹമ്മദലി, ഇ.എ. മജീദ്, തരിയോറ സുരേഷ് ബാബു, യു.സുലൈമാൻ, വി.ടി.വീരാനുണ്ണി, സി.ടി. മുസ്തഫ എന്നിവർ പങ്കെടുത്തു.

ലഹരിക്കെതിരേ നാടകവുമായി വിദ്യാരംഗം പ്രവർത്തകർ

പെരിന്തൽമണ്ണ: പെരിന്തൽമണ്ണ ഉപജില്ല വിദ്യാരംഗം കലാസാഹിത്യവേദിയുടെ നേതൃത്വത്തിൽ ലഹരിക്കെതിരേ നാടക ശില്പശാല സംഘടിപ്പിച്ചു. ലഹരി മരുന്നുകൾ ജീവിതത്തിൽ നിന്ന് തുടച്ചുനീക്കുക എന്ന ലക്ഷ്യവുമായി ജീവിതമാണ് ലഹരി എന്ന ആശയം കുട്ടികളിലെത്തിക്കാനാണ് ഇത്തരമൊരു ശില്പശാല സംഘടിപ്പിച്ചതെന്ന് കണ്‍വീനർ ബിന്ദു പരിയാപുരത്ത് അറിയിച്ചു. എഴുത്തുകാരനും നാടക പ്രവർത്തകനുമായ വി.വി. രാമകൃഷ്ണൻ രചിച്ച നാടകത്തിൽ ഗാനരചന നിർവഹിച്ചിരിക്കുന്നത് അധ്യാപിക ഇന്ദു ശ്രീനാഥാണ്. എസ്എംയുപി സ്കൂളിൽ നടന്ന ചടങ്ങ് ഹെഡ്മിസ്ട്രസ് എം. സിന്ധു ഉദ്ഘാടനം ചെയ്തു. മുഹമ്മദ് ബഷീർ, ഇ.കെ. ഷാജാറാം, ഇന്ദുശ്രീ, പി. രാജേഷ്, ടി.കെ. ഹസ്ന എന്നിവർ പ്രസംഗിച്ചു. ഉപജില്ലയിലെ യുപി, ഹൈസ്കൂൾ ക്ലാസുകളിൽ നിന്ന് അഭിനയത്തിൽ കഴിവു തെളിയിച്ച 30 ലധികം കുട്ടികൾ അണിനിരക്കുന്ന നാടകം വിദ്യാലയങ്ങളിലും മറ്റു വേദികളിലുമായി അവതരിപ്പിക്കുമെന്ന് സംഘാടകർ അറിയിച്ചു.

ഓട്ടിസം ബാധിച്ച ആറു വയസുകാരനെ മർദിച്ച കേസിൽ രണ്ടാനമ്മ അറസ്റ്റിൽ

പെരിന്തൽമണ്ണ: ഓട്ടിസം ബാധിച്ച ഭിന്നശേഷിക്കാരനായ ആറുവയസുകാരനെ ശാരീരികമായി മർദിച്ച കേസിൽ രണ്ടാനമ്മയായ അധ്യാപികയെ പെരിന്തൽമണ്ണ പോലീസ് അറസ്റ്റ് ചെയ്തു. നിലന്പൂർ വടപുറം സ്വദേശി ഉമൈറയാണ് (34) അറസ്റ്റിലായത്. ഒളിവിലായിരുന്ന ഇവർ തിങ്കളാഴ്ച രാവിലെ ഒന്പതോടെ സ്റ്റേഷനിലെത്തി കീഴടങ്ങുകയായിരുന്നു. ഇവരുടെ അറസ്റ്റ് രേഖപ്പെടുത്തി പോലീസ് എരവിമംഗലത്തെ ഭർത്താവിന്‍റെ വീട്ടിലെത്തിച്ച് തെളിവെടുത്തു. സംഭവത്തിൽ ജൂലൈ രണ്ടിന് ചൈൽഡ് ലൈൻ റിപ്പോർട്ടിന്‍റെ അടിസ്ഥാനത്തിൽ പെരിന്തൽമണ്ണ പോലീസ് കുട്ടിയുടെ മൊഴി രേഖപ്പെടുത്തി കേസെടുത്തിരുന്നു. കുട്ടിയുടെ മാതാവ് മരിച്ച ശേഷം കോടതി വിധി പ്രകാരം ഇടയ്ക്ക് മാതാവിന്‍റെ കുടുംബത്തിനും കുട്ടിയെ വിട്ടു നൽകിയിരുന്നു. ഇവിടെ വച്ചാണ് കുട്ടിയുടെ ദേഹത്ത് മർദനത്തിന്‍റെ പാടുകൾ കാണുന്നത്. കുട്ടിയെ രണ്ടാനമ്മ പട്ടിണിക്കിട്ടതായും പൊള്ളൽ ഏൽപ്പിച്ചതായും കാണിച്ച് മാതാവിന്‍റെ കുടുംബം പരാതി നൽകുകയായിരുന്നു. തുടർന്ന് മൊബൈൽ ഫോണ്‍ സ്വിച്ച് ഓഫ് ചെയ്ത് അമീറ ഒളിവിൽ പോവുകയായിരുന്നു.

"നിറവ് ’ ഏഴാം വാർഷികം ആഘോഷിച്ചു

എടക്കര: മലങ്കര സുറിയാനി കത്തോലിക്ക സഭയുടെ തലവൻ കർദിനാൾ ക്ലീമീസ് കാത്തോലിക്ക ബാവയുടെ ഷഷ്ടിപൂർത്തിയോ‌ടനുബന്ധിച്ച് ആരംഭിച്ച സൗജന്യ ഉച്ചഭക്ഷണ പദ്ധതിയായ "നിറവി'ന്‍റെ ഏഴാം വാർഷികം ചുങ്കത്തറയിൽ നടന്നു. മൂത്തേടം ഫാത്തിമ ആർട്സ് ആൻഡ് സയൻസ് കോളജ് പ്രിൻസിപ്പൽ ഫാ. ഡോ. ലാസർ പുത്തൻകണ്ടത്തിൽ ഉദ്ഘാടനം ചെയ്തു. നിറവ് ചെയർമാൻ ഫാ. റോയി വലിയപറന്പിൽ അധ്യക്ഷത വഹിച്ചു. ഫാ. ഏബ്രഹാം പതാക്കൽ, വി.പി.മത്തായി, ബാബു തയ്യിൽപീടിക, സാബു പൊൻമേലിൽ, ടി.ജി. രാജു എന്നിവർ പ്രസംഗിച്ചു. കഴിഞ്ഞ ഏഴ് വർഷമയി നിലന്പൂർ താലൂക്കിലെ ഏഴ് പഞ്ചായത്തുകളിലും ചുങ്കത്തറ സാമൂഹികാരോഗ്യ കേന്ദ്രത്തിലും നിറവിന്‍റെ ഭാഗമായി ഭക്ഷണം വിതരണം ചെയ്യുന്നുണ്ട്.

മക്കരപ്പറന്പിൽ വവ്വാലുകളുടെ ശല്യം രൂക്ഷം

മക്കരപ്പറന്പ്: നിപ്പ വൈറസിന്‍റെ വാഹകരായി കരുതുന്ന വവ്വാലുകളുടെ ശല്യം രൂക്ഷമായതിനെ തുടർന്ന് നാട്ടുകാർ പഞ്ചായത്ത് അധികൃതർക്ക് പരാതി നൽകി. മക്കരപ്പറന്പ് പഞ്ചായത്തിലെ രണ്ടാം വാർഡിൽ കാവ്മേലു വീട്ടിൽതൊടിയിലാണ് ആയിരക്കണക്കിന് വവ്വാലുകൾ വസിക്കുന്നത്. ഇതിനു സമീപത്തെ വീട്ടുകാർക്കാണ് വവ്വാലുകളുടെ ശല്യം നേരിടേണ്ടി വരുന്നത്. വീട്ടുപരിസരത്തെ കിണറുകളിലും ജലസ്രോതസുകളിലും ഇവ വിസർജിക്കുന്നത് ആശങ്ക ഉളവാക്കുന്നു. ഇതിനെതിരേ പരിഹാരം ആവശ്യപ്പെട്ടാണ് അൻവർ പെരിഞ്ചേരി, എം.പി.ഹൈദർസ്, നാണി പെരിഞ്ചേരി എന്നിവരുടെ നേതൃത്വത്തിൽ പരാതി നൽകിയത്.

തീരദേശ മേഖലയുടെ സമഗ്ര വികസനത്തിന് പുതിയ പദ്ധതി

മലപ്പുറം: തീരദേശ മേഖലയുടെ സമഗ്ര വികസനം ലക്ഷ്യമിട്ട് പുതിയ പദ്ധതി വരുന്നു. ജൻ ശിക്ഷണ്‍ സൻസ്ഥാന്‍റെ കീഴിൽ വിവിധ സർക്കാർ ഏജൻസികളുടെയും തദ്ദേശസ്ഥാപനങ്ങളുടെയും സഹകരണത്തോടെയാണ് പദ്ധതി നടപ്പാക്കുന്നത്. പദ്ധതി നടത്തിപ്പ് സംബന്ധിച്ച് ജെഎസ്എസ് ചെയർമാൻ കൂടിയായ പി.വി. അബ്ദുൾ വഹാബ് എംപിയുടെ അധ്യക്ഷതയിൽ യോഗം ചേർന്നു. പൊന്നാനി മുതൽ വള്ളിക്കുന്ന് വരെയുള്ള പത്ത് ഗ്രാമപഞ്ചായത്തുകളും മൂന്ന് നഗരസഭകളും പദ്ധതിയുടെ കീഴിൽ വരും. നബാർഡിന്‍റെ പട്ടികവർഗ വികസന മാതൃകയിലാണ് പദ്ധതി നടപ്പാക്കുക. അഞ്ച് വർഷമാണ് പദ്ധതിയുടെ കാലയളവ്. തീരദേശ മേഖലയിലുള്ളവരുടെ തൊഴിൽ, നൈപുണ്യ വികസനം, സംരംഭം, പരന്പരാഗത വ്യവസായ പ്രോത്സാഹനം, തീരമിടിച്ചൽ തടയുന്നതിനുള്ള നടപടികൾ, ആരോഗ്യ സംരക്ഷണം, വിദ്യാഭ്യാസം എന്നിവ പദ്ധതിയിലുൾപ്പെടും. പുതുതലമുറയിൽ പെട്ടവർക്കുള്ള നൈപുണ്യ വികസനം പുത്തൻ തലമുറ കോഴ്സുകളിൽ പരിശീലനം, സംരംഭകത്വ പരിശീലനം എന്നിവ നൽകും. ഇതോടൊപ്പം പരന്പരാഗത തൊഴിലുകളിലും പരിശീലനം നൽകും. ഇതു സംബന്ധിച്ച് എല്ലാ തദ്ദേശ സ്ഥാപനങ്ങളിലും പങ്കാളിത്ത പഠന പദ്ധതി നടത്താൻ യോഗത്തിൽ തീരുമാനിച്ചു. സ്റ്റാർട്ടപ് കന്പനിയായ നയനീതി പോളിസി കളക്ടീവും തിരുവനന്തപുരം ആസ്ഥാനമായ സുസ്ഥിര ഫൗണ്ടേഷനുമാണ് ഇതു സംബന്ധിച്ച പഠനം നടത്തുന്നത്. ഓഗസ്റ്റ് 15നകം പഠനം പൂർത്തിയാക്കി പദ്ധതി തുടങ്ങാനാണ് ലക്ഷ്യമിടുന്നത്. അഡ്വ. യു.എ. ലത്തീഫ് എംഎൽഎ, ജില്ലാ പഞ്ചായത്ത് പ്രസിഡന്‍റ് എം.കെ. റഫീഖ, വൈസ് പ്രസിഡന്‍റ് ഇസ്മയിൽ മൂത്തേടം, സ്ഥിരംസമിതി അധ്യക്ഷ സറീന ഹസീബ്, അംഗം വി.കെ.എം. ഷാഫി, ജെഎസ്എസ് ഡയറക്ടർ വി. ഉമ്മർകോയ, വിവിധ വകുപ്പുകളുടെ മേധാവികൾ എന്നിവർ പങ്കെടുത്തു.

റോഡിലെ കുഴികളിൽ വീണ് രണ്ട് ബൈക്ക് യാത്രികർക്ക് പരിക്കേറ്റു

എടക്കര: വ്യത്യസ്ത അപകടങ്ങളിൽ റോഡിലെ കുഴികളിൽ വീണ് രണ്ട് ബൈക്ക് യാത്രികർക്ക് പരിക്കേറ്റു. ഞായറാഴ്ച രാത്രിയാണ് കോഴിക്കോട്- നിലന്പൂർ-ഊട്ടി റോഡിൽ രണ്ട് അപകടങ്ങളിലായി രണ്ട് പേർക്ക് പരിക്കേറ്റത്. ഇവർ എടക്കര സ്വകാര്യ ആശുപത്രിയിൽ ചികിത്സ തേടി. സംഭവത്തെത്തുടർന്ന് യൂത്ത് കോണ്‍ഗ്രസ് പ്രവർത്തകർ കുഴി നികത്തി പ്രതിഷേധിച്ചു. എടക്കര മുസ്ലിയാരങ്ങാടിയിൽ ഞായറാഴ്ച രാത്രി പത്തിനും പതിനൊന്നരക്കും ഇടയിലാണ് അപകടം. മഴ ശക്തമായതോടെ കെഎൻജി റോഡിൽ രൂപപ്പെട്ട കുഴിയാണ് അപകടക്കെണിയായി മാറിയത്. വെള്ളം കെട്ടിനിന്നത് കാരണം ബൈക്ക് യത്രക്കാർക്ക് കുഴികൾ അറിയാൻ കഴിഞ്ഞില്ല. ഇവിടെ അപകടങ്ങൾ പതിവാണെന്ന് നാട്ടുകാർ പറയുന്നു. കാരപ്പുറം, മഞ്ചേരി സ്വദേശികൾക്കാണ് പരിക്കേറ്റത്. സംഭവം അറിഞ്ഞെത്തിയ നാട്ടുകാർ ഇവരെ എടക്കര സ്വകാര്യ ആശുപത്രിയിൽ എത്തിക്കുകയായിരുന്നു. തുടർന്ന് യൂത്ത് കോണ്‍ഗ്രസ് പ്രവർത്തകരായ നിയാസ് എടക്കര, ശാമിൽ ബാർബർമുക്ക്, കെ.പി. ദിൽഷാദ്, സജാദ്, ഹർഷദ് എന്നിവരുടെ നേതൃത്വത്തിൽ കുഴി കോണ്‍ക്രീറ്റ് ചെയ്ത് താൽകാലിക പരിഹാരം കണ്ടെത്തി.

എംഎൽഎ ഓഫീസിലേക്ക് സിപിഎം മാർച്ച് നടത്തി

മങ്കട: മങ്കട നിയോജക മണ്ഡലം എംഎൽഎയുടെ വികസന അനാസ്ഥക്കെതിരേ സിപിഎം മങ്കട ഏരിയ കമ്മിറ്റിയുടെ നേതൃത്വത്തിൽ പനങ്ങാങ്ങരയിലെ മഞ്ഞളാംകുഴി അലി എംഎൽഎയുടെ ഓഫീസിലേക്ക് ബഹുജന മാർച്ച് സംഘടിപ്പിച്ചു. സിപിഎം ജില്ലാ സെക്രട്ടറിയേറ്റ് മെന്പറും മുൻ എംഎൽഎയുമായ വി. ശശികുമാർ ഉദ്ഘാടനം ചെയ്തു. ഏരിയാ കമ്മിറ്റി അംഗം അഡ്വ. ടി.കെ. റഷീദലി അധ്യക്ഷത വഹിച്ചു. മണ്ഡലം നേരിടുന്ന വികസന പ്രശ്നങ്ങൾ പരിഹരിക്കുന്നതിൽ പരാജയപ്പെട്ട സ്ഥലം എംഎൽഎ സർക്കാരിനെ പഴിചാരുന്നത് അപഹാസ്യമാണെന്നും അങ്ങാടിപ്പുറത്തെ അതിരൂക്ഷമായ ഗതാഗതകുരുക്ക് പരിഹരിക്കുന്നതിന് ജനപ്രതിനിധി എന്ന നിലയിൽ സംസ്ഥാന സർക്കാരിനെ വിശ്വാസത്തിലെടുത്ത് പ്രവർത്തിക്കണമെന്നും ശശികുമാർ ആവശ്യപ്പെട്ടു. ജില്ലാ കമ്മിറ്റി അംഗങ്ങളായ വി. രമേശൻ, പി.കെ. അബ്ദുള്ള നവാസ്, സിപിഎം മങ്കട ഏരിയാ സെക്രട്ടറി മോഹനൻ പുളിക്കൽ, വി.പി. അയ്യപ്പൻ എന്നിവർ പ്രസംഗിച്ചു. മങ്കട ഏരിയാ കമ്മിറ്റി അംഗങ്ങളായ എ. ഹരി, കെ.ടി. നാരായണൻ, സി. സജി, പി. പദ്മജ, പി.പി. സുഹറാബി എന്നിവർ മാർച്ചിന് നേതൃത്വം നൽകി.

നാടുകാണിച്ചുരത്തിൽ മരംവീണ് ഗതാഗതം തടസപ്പെട്ടു

എടക്കര: അന്തർസംസ്ഥന പാതയായ നാടുകാണിച്ചുരത്തിൽ മരംവീണ് രണ്ട് മണിക്കൂറോളം ഗതാഗതം തടസപ്പെട്ടു. ചുരത്തിലെ അന്പലമുക്കിൽ ഇന്നലെ വൈകുന്നേരം അഞ്ചോ‌ടെയാണ് കനത്ത മഴയെത്തുടർന്ന് കൂറ്റൻ മരം പാതയോരത്തെ റോഡിന് കുറുകെ പതിച്ചത്. ഇതോടെ ഇതുവഴിയുള്ള ഗതാഗതം പൂർണമായി തടസപ്പെട്ടു. ബൈക്ക് യാത്രക്കാർക്ക് പോലും കടന്ന് പോകാൻ പറ്റാത്ത തരത്തിലായിരുന്നു മരം വീണത്. വിവരമറിഞ്ഞെത്തിയ വനം, പോലീസ് സേനകളും നാട്ടുകാരും യാത്രക്കാരും ചേർന്ന് രണ്ടുമണിക്കൂർ സമയമെടുത്താണ് മരം വെട്ടിമാറ്റി ഗതാഗതം പുനഃസ്ഥാപിച്ചത്. ഈ സമയം നൂറ് കണക്കിന് വാഹനങ്ങളും യാത്രക്കാരുമാണ് ചുരത്തിൽ കുടുങ്ങിയത്.

ദളിത് കോണ്‍ഗ്രസ് "മുന്നൊരുക്കം’പരിപാടി നടത്തി

അങ്ങാടിപ്പുറം: ത്രിതല പഞ്ചായത്ത് തെരഞ്ഞെടുപ്പിന് മുന്നോടിയായി ദളിത് കോണ്‍ഗ്രസ് അങ്ങാടിപ്പുറം ബ്ലോക്ക് സംഘടിപ്പിച്ച "മുന്നൊരുക്കം’ പരിപാടി ജില്ലാ പ്രസിഡന്‍റ് കെ.പി. വേലായുധൻ ഉദ്ഘാടനം ചെയ്തു. ബ്ലോക്ക് പ്രസിഡന്‍റ് കേശവദാസ് അധ്യക്ഷത വഹിച്ചു. ജില്ലാ കോണ്‍ഗ്രസ് എക്സിക്യൂട്ടീവ് അംഗം കെ.എസ്. അനീഷ് മുഖ്യപ്രഭാഷണം നടത്തി. ദളിത് കോണ്‍ഗ്രസ് ജില്ലാ ജനറൽ സെക്രട്ടറി ദിനേശ് മണ്ണാർമല, മണ്ഡലം കോണ്‍ഗ്രസ് പ്രസിഡന്‍റ് കെ.ടി. ജബ്ബാർ, മഹിളാ കോണ്‍ഗ്രസ് ജില്ലാ സെക്രട്ടറി കെ.ടി. ഗീത, സേവാദൾ വനിതാ വിഭാഗം ജില്ലാ പ്രസിഡന്‍റ് സിബി, ഐഎൻടിയുസി മണ്ഡലം പ്രസിഡന്‍റ് മാത്യു, യുഡിഎഫ് ചെയർമാൻ മുസ്തഫ, യൂത്ത് കെയർ പ്രസിഡന്‍റ് ഫൈസൽ വലന്പൂർ, മണ്ഡലം ദളിത് കോണ്‍ഗ്രസ് പ്രസിഡന്‍റ് മുകേഷ് നന്നന്പ്ര, ബാലൻ വലന്പൂർ എന്നിവർ പ്രസംഗിച്ചു.

"സഹകരണ ആശുപത്രി ജീവനക്കാരുടെ ശന്പള പരിഷ്കരണം നടപ്പാക്കണം’

പെരിന്തൽമണ്ണ: 2022 ജനുവരി 31ന് കാലാവധി അവസാനിച്ച സഹകരണ ആശുപത്രി ജീവനക്കാരുടെ ശന്പള പരിഷ്കരണം ഉടൻ നടപ്പാക്കണമെന്ന് കേരള കോ ഓപറേറ്റീവ് എംപ്ലോയീസ് യൂണിയൻ (സിഐടിയു) ഇഎംഎസ് ഹോസ്പിറ്റൽ ഏരിയ സമ്മേളനം ഗസർക്കാരിനോടാവശ്യപ്പെട്ടു. ഇഎംഎസ് അക്കാഡമിക് കാന്പസിൽ ചേർന്ന സമ്മേളനം സിഐടിയു സംസ്ഥാന വൈസ് പ്രസിഡന്‍റ് യു.പി. ജോസഫ് ഉദ്ഘാടനം ചെയ്തു. പി. സുബോധ് അധ്യക്ഷത വഹിച്ചു. യൂണിയൻ സംസ്ഥാന സെക്രട്ടറി പി. ഷിബു സംഘടനാ റിപ്പോർട്ടും ഏരിയ സെക്രട്ടറി ഐ. ശ്രീധരൻ പ്രവർത്തന റിപ്പോർട്ടും അവതരിപ്പിച്ചു. യൂണിയൻ ജില്ലാ സെക്രട്ടറി കെ.വി. പ്രസാദ്, പ്രസിഡന്‍റ് പി. പദ്മജ, ജില്ലാ ട്രഷറർ പ്രസാദൻ കാവുങ്ങൽ, സിഐടിയു പെരിന്തൽമണ്ണ ഏരിയ സെക്രട്ടറി എം.എം. മുസ്തഫ എന്നിവർ പ്രസംഗിച്ചു. ഭാരവാഹികൾ: വി. ദീപ (പ്രസിഡന്‍റ്), പി. ജയപ്രകാശൻ (സെക്രട്ടറി), പി. സുബോധ് (ട്രഷറർ).

മഞ്ചേരി ജനറൽ ആശുപത്രി: ലീഗ് പ്രക്ഷോഭത്തിലേക്ക്

മഞ്ചേരി: മഞ്ചേരി ജനറൽ ആശുപത്രി താനൂരിലേക്ക് മാറ്റുന്നതിനായി ആരോഗ്യവകുപ്പ് നടത്തുന്ന ശ്രമം അവസാനിപ്പിക്കണമെന്നാവശ്യപ്പെട്ട് പ്രക്ഷോഭം ആരംഭിക്കുമെന്ന് മണ്ഡലം മുസ്‌ലിം ലീഗ് കമ്മിറ്റി. ജില്ലയിൽ ജനസംഖ്യാനുപാതികമായും രോഗികളുടെ എണ്ണം അനുസരിച്ചും ആരോഗ്യ സ്ഥാപനങ്ങളും ഡോക്ടർമാരെയും മറ്റു സ്റ്റാഫിനെയും നിയമിക്കണം. ദിനംപ്രതി ആയിരങ്ങൾ ചികിത്സ തേടുന്ന മഞ്ചേരി ജനറൽ ആശുപത്രിക്ക് അടിസ്ഥാന സൗകര്യങ്ങൾ നൽകാതെയും മഞ്ചേരി മെഡിക്കൽ കോളജിന്‍റെ സമഗ്ര വികസനത്തിന് മഞ്ചേരി എംഎൽഎയുടെയും മറ്റു ജനപ്രതിനിധികളും രാഷ്ട്രീയപാർട്ടി നേതാക്കളും ഹോസ്പിറ്റൽ മാനേജ്മെന്‍റ് കമ്മിറ്റിയും സർക്കാരിന് നൽകിയ റിപ്പോർട്ടുകൾ പരിഗണിക്കാതെ ജനറൽ ആശുപത്രി മാറ്റാൻ ശ്രമിച്ചാൽ നിയമപരമായും രാഷ്ട്രീയമായും നേരിടുമെന്ന് യോഗം മുന്നറിയിപ്പു നൽകി. പ്രസിഡന്‍റ് കണ്ണിയൻ അബൂബക്കർ അധ്യക്ഷത വഹിച്ചു ജനറൽ സെക്രട്ടറി പി.എച്ച്. ഷമീം റിപ്പോർട്ട് അവതരിപ്പിച്ചു. എൻ.പി. മുഹമ്മദ്, എ.പി. മജീദ്, കെ. ഉസ്മാൻ, എൻ.കെ. ഹംസ, നിസാർ, ആഷിക് പയ്യനാട്, ഗഫൂർ പട്ടിക്കാട്, മൂസക്കുട്ടി കിഴാറ്റൂർ, ആസ്യ പാണ്ടിക്കാട് തുടങ്ങിയവർ പ്രസംഗിച്ചു.

റോഡ് തകർച്ചയ്ക്കെതിരേ സിപിഎം സമരയാത്ര നടത്തി

എടക്കര: റോഡ് തകർച്ചയിൽ പ്രതിഷേധിച്ച് സിപിഎം പഞ്ചായത്ത് ഓഫീസിലേക്ക് സമര യാത്ര നടത്തി. മൂത്തേടം പഞ്ചായത്തിലെ പാലാങ്കര കല്ലന്തോട്മുക്ക് കാരപ്പുറം റോഡ് തകർച്ചയിൽ പ്രതിഷേധിച്ചായിരുന്നു സമരയാത്ര. സിപിഎം ഏരിയ സെക്രട്ടറി ടി. രവീന്ദ്രൻ ഫ്ളാഗ് ഓഫ് ചെയ്തു. പനോലൻ ബഷീർ അധ്യക്ഷത വഹിച്ചു. തകർന്ന റോഡിലെ ചീരപ്പാടം, വട്ടപ്പാടം, വെള്ളാരമുണ്ട, ചോളമുണ്ട, കുരിശുപടി എന്നിവിടങ്ങളിലെ സ്വീകരണശേഷം കാരപ്പുറത്ത് പഞ്ചായത്ത് ഓഫീസിലേക്ക് മാർച്ച് നടത്തി. വിവിധ കേന്ദ്രങ്ങളിൽ നിന്ന് ഒപ്പ് ശേഖരണവും നടത്തി പഞ്ചായത്ത് സെക്രട്ടറിക്ക് സമർപ്പിച്ചു. പഞ്ചായത്ത് ഓഫീസിന് മുന്നിൽ സമരം ഏരിയ കമ്മിറ്റി അംഗം എ.ടി. റെജി ഉദ്ഘാടനം ചെയ്തു. സി.എ. ചന്ദ്രൻ അധ്യക്ഷത വഹിച്ചു. ഏരിയ കമ്മിറ്റി അംഗം വി.കെ. ഷാനവാസ്, ലോക്കൽ സെക്രട്ടറി എ.പി. അനിൽ, ഡിവൈഎഫ്ഐ ബ്ലോക്ക് പ്രസിഡന്‍റ് ജെ.എം. ഷെബീബ്, സി.കെ. ബിൻഷാദ് എന്നിവർ പ്രസംഗിച്ചു.

പട്ടിക്കാട്, ചിറമംഗലം റെയിൽവേ മേൽപ്പാലത്തിന് ഭൂമി ഏറ്റെടുക്കൽ പൂർത്തിയായി

മലപ്പുറം: ജില്ലയിലെ പട്ടിക്കാട്, ചിറമംഗലം റെയിൽവേ മേൽപ്പാലത്തിന്‍റെ നിർമാണത്തിനുള്ള ഭൂമി ഏറ്റെടുക്കൽ നടപടി പൂർത്തിയായി. നിലന്പൂർ-ഷൊർണൂർ റൂട്ടിലുള്ള പട്ടിക്കാട് ഓവർ ബ്രിഡ്ജിന് ആകെ 1.0500 ഹെക്ടർ ഭൂമിയാണ് ആവശ്യം. ഇതിൽ സ്വകാര്യവ്യക്തികളുടെ ഉടമസ്ഥതയിലുള്ള 0.1803 ഹെക്ടർ ഭൂമിയാണ് ഏറ്റെടുത്തത്. ബാക്കി 0.8697 ഹെക്ടർ ഭൂമി സർക്കാർ ഉടമസ്ഥതയിലുള്ളതാണ്. ഇതും വൈകാതെ ഏറ്റെടുക്കും. 3,84,28567 രൂപ കക്ഷികൾക്ക് നൽകി. താനൂർ-പരപ്പനങ്ങാടി റെയിൽവേ സ്റ്റേഷനുകൾക്കിടയിൽ വരുന്ന ചിറമംഗലം മേൽപ്പാലത്തിന് മൊത്തം ആവശ്യം 0.6614 ഹെക്ടർ ഭൂമിയാണ്. ഇതിൽ സ്വകാര്യവ്യക്തികളുടെ ഉമടസ്ഥതയിലുള്ള 0.4462 ഹെക്ടർ ഭൂമി ഏറ്റെടുത്തു. സർക്കാർ ഉടമസ്ഥതയിലുള്ള ഭൂമി ഉടൻ ഏറ്റെടുക്കും. 4,19,61,674 രൂപയാണ് മൊത്തം വിതരണം ചെയ്തത്. കെ-റെയിൽ നിർമിക്കുന്ന നിലന്പൂർ യാർഡ് റെയിൽവേ അണ്ടർ ബ്രിഡ്ജിന്‍റെ നിർമാണം അന്തിമ ഘട്ടത്തിലാണ്. സംസ്ഥാനത്തുടനീളം 66 റെയിൽവേ ഓവർ ബ്രിഡ്ജുകളുടെ നിർമാണ ചുമതല കെ-റെയിലിനാണ്. തിരുവനന്തപുരം ജില്ലയിലെ കരമന, കണ്ണൂർ ജില്ലയിലെ ഏഴിമല എന്നീ റെയിൽവേ ഓവർ ബ്രിഡ്ജുകളുടെ സ്ഥലം ഏറ്റെടുക്കൽ നടപടികൾ നേരത്തെ പൂർത്തിയായിരുന്നു.

ബൈക്കുകൾ കൂട്ടിയിടിച്ച് യുവാവ് മരിച്ചു

മഞ്ചേരി: ബൈക്കുകൾ കൂട്ടിയിടിച്ച് യുവാവ് മരിച്ചു. പയ്യനാട് മുക്കം ചുണ്ടിയൻമൂച്ചി പരേതനായ അബ്ദുള്ളയുടെ മകൻ ഷമീമുൽ ഹസൻ (25) ആണ് മരിച്ചത്. ഞായറാഴ്ച രാത്രി 8.30ന് പയ്യനാട് മുക്കം - പുല്ലഞ്ചേരി റോഡിലായിരുന്നു അപകടം. പുല്ലഞ്ചേരി ഭാഗത്തേക്ക് പോവുകയായിരുന്ന ഷമീം ഓടിച്ച ബൈക്കും എതിരെ വന്ന ബൈക്കും തമ്മിൽ കൂട്ടിയിടിക്കുകയായിരുന്നു. റോഡിൽ തലയടിച്ച് വീണ ഷമീമിനെ ഉടൻ മഞ്ചേരിയിലെ സ്വകാര്യ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. പോസ്റ്റ്മോർട്ടത്തിന് ശേഷം മൃതദേഹം പയ്യനാട് വലിയ ജുമാ മസ്ജിദിൽ കബറടക്കി. മാതാവ്: ഖദീജ. സഹോദരങ്ങൾ: നൗഷാദ്, ഷിബിലി, ജിംഷാദ്, ബുഷ്റ, ജമീല, ഷബ്ന, പരേതനായ നിസാർ.

അലിഫ് അറബിക് ടാലന്‍റ് ടെസ്റ്റ് സംഘടിപ്പിച്ചു

പെരിന്തൽമണ്ണ: കെഎടിഎഫ് സംസ്ഥാന കമ്മിറ്റിയുടെ ഭാഗമായ അലിഫ് വിംഗിന്‍റെ ആഭിമുഖ്യത്തിൽ സംസ്ഥാനത്തെ 163 ഉപജില്ലകളിലും അലിഫ് അറബിക് ടാലന്‍റ് ടെസ്റ്റും ഭാഷാസമര അനുസ്മരണവും സംഘടിപ്പിച്ചു. പെരിന്തൽമണ്ണ ഉപജില്ലാ മത്സരം കെഎംഎംയുപി സ്കൂളിൽ ബ്ലോക്ക് പഞ്ചായത്ത് വിദ്യാഭ്യാസ സ്റ്റാൻഡിംഗ് കമ്മറ്റി ചെയർമാൻ അസീസ് പട്ടിക്കാട് ഉദ്ഘാടനം ചെയ്തു. ഉപജില്ലാ പ്രസിഡന്‍റ് സി.എച്ച്. അബ്ദുൽ ഷമീർ അധ്യക്ഷത വഹിച്ചു.നഗരസഭാ കൗൺസിലർ പത്തത്ത് ജാഫർ സമ്മാനവിതരണം നടത്തി. സംസ്ഥാന എക്സിക്യൂട്ടീവ് അഗം ഹുസൈൻ പാറൽ അനുസ്മരണ പ്രഭാഷണം നടത്തി. ജില്ലാ സീനിയർ വൈസ് പ്രസിഡന്‍റ് പി.കെ. സിയാദ്,സ്കൂൾ മാനേജർ സക്കീർഹുസൈൻ, മുസ്തഫ വളപുരം,അൻവർ ഷവീം തങ്ങൾ, പി.പി. സക്കീർ ഹുസൈൻ, കെ. മുഹമ്മദ് അഷ്റഫ്, കെ.വി. മുഹമ്മദലി, വി. അനീസ്ബാബു, ഉപജില്ലാ സെക്രട്ടറി പി. മുഹ്സിൻ അഹമ്മദ്, ട്രഷറർ എം. നൗഫൽ നസീർ എന്നിവർ പ്രസംഗിച്ചു.

കുടുംബാരോഗ്യ കേന്ദ്രത്തിലേക്ക് പ്രതിഷേധ മാര്‍ച്ച് സംഘടിപ്പിച്ചു

ചങ്ങരംകുളം: ബിജെപി ആലംകോട് കുടുംബാരോഗ്യ കേന്ദ്രത്തിലേക്ക് പ്രതിഷേധ മാര്‍ച്ച് സംഘടിപ്പിച്ചു. കേരളത്തിലെ ആരോഗ്യമേഖലയുടെ തകര്‍ച്ചയില്‍ ബിജെപി സംസ്ഥാന വ്യാപകയായി നടത്തുന്ന പ്രതിഷേധങ്ങളുടെ ഭാഗമായാണ് ബിജെപി ആലംകോട് പഞ്ചായത്ത് കമ്മിയുടെ നേതൃത്വത്തില്‍ കുടുംബാരോഗ്യ കേന്ദ്രത്തിന് മുന്നില്‍ മാർച്ച് സംഘടിപ്പിച്ചത്. മണ്ഡലം പ്രസിഡന്‍റ് അനീഷ് മൂക്കുതല മാര്‍ച്ച് ഉദ്ഘാടനം ചെയ്തു.വിപിന്‍ കോക്കൂര്‍ അധ്യക്ഷത വഹിച്ചു. റിനില്‍ കാളാച്ചാല്‍, കൃഷ്ണന്‍ പാവിട്ടപ്പുറം, ബിജു മാന്തടം, ബിപിന്‍ മുല്ലക്കല്‍,വി. ലക്ഷ്മണന്‍, മണി പന്താവൂര്‍, രാജീവ് പെരുമുക്ക് എന്നിവര്‍ സംസാരിച്ചു.

ഉന്നത വിജയികളെ അനുമോദിച്ചു

പെരിന്തൽമണ്ണ: മർച്ചന്‍റ്സ് അസോസിയേഷന്‍റെ വിദ്യാഭ്യാസ പ്രോത്സാഹന പദ്ധതിയുടെ ഭാഗമായി എസ്എസ്എൽസി, പ്ലസ് ടു പരീക്ഷകളിലും മറ്റു മേഖലകളിലും ഉയർന്ന റാങ്കോടുകൂടി വിജയിച്ച വ്യാപാരികളുടെ മക്കളെ അവാർഡുകൾ നൽകി അനുമോദിച്ചു. വ്യാപാര ഭവനിൽവച്ച് നടന്ന അനുമോദന സദസ് പെരിന്തൽമണ്ണ സർക്കിൾ ഇൻസ്പെക്ടർ സുമേഷ് സുധാകർ ഉദ്ഘാടനം ചെയ്തു. പ്രസിഡന്‍റ് പി.ടി.എസ്. മൂസു അധ്യക്ഷത വഹിച്ചു. യോഗത്തിൽ സെക്രട്ടറി സി.പി. മുഹമ്മദ് ഇക്ബാൽ, ലത്തീഫ് ടാലന്‍റ്, ചമയം ബാപ്പു, ഷാലിമാർ ഷൗക്കത്ത്, യൂസഫ് രാമപുരം, ലിയാകത്തലിഖാൻ, വാരിയർ ദാസ്, പി.പി. സൈതലവി, ഗഫൂർ വള്ളൂരാൻ, ഹാരിസ് ഇന്ത്യൻ, ഷൈജൽ, ഒമർശരീഫ്, ഖാജാ മുഹിയുദ്ദീൻ, ഇബ്രാഹിം കാരയിൽ, ജമീല ഇസുദ്ദീൻ, റഷീദ ഡാലിയ തുടങ്ങിയവർ സംസാരിച്ചു.

സങ്കര വൈദ്യത്തിനെതിരേ ഐഎംഎ

പെരിന്തൽമണ്ണ: സങ്കരവൈദ്യം നടപ്പാക്കുന്നതിന് അനുമതി നൽകരുതെന്ന് ഐഎംഎ ശക്തമായി ആവശ്യപ്പെട്ടു. സങ്കരവൈദ്യം ശാസ്ത്രീയമല്ലെന്നും രോഗികളുടെ ആരോഗ്യത്തിന് അതു ഗുണം ചെയ്യില്ലെന്നും ഐഎംഎ സംസ്ഥാന പ്രസിഡന്‍റ് ഡോ. ശ്രീവിലാസൻ പറഞ്ഞു. ഡോക്ടർമാർക്കായുള്ള തുടർവിദ്യാഭ്യാസപരിപാടി പെരിന്തൽമണ്ണയിൽ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ആധുനിക വൈദ്യശാസ്ത്രത്തിന്‍റെ അടിസ്ഥാന തത്വങ്ങളെ ലംഘിക്കുന്നതും കൃത്യമായ ശാസ്ത്രീയ അടിത്തറയില്ലാത്തതുമായ ചികിത്സാരീതീകളെ പ്രോത്സാഹിപ്പിക്കരുതെന്നും ഐഎംഎ ആവശ്യപ്പെടുന്നു. മിക്സോപതി നടപ്പാക്കുന്നതിന്‍റെ പ്രത്യാഘാതങ്ങളെ കുറിച്ച് കേന്ദ്രസർക്കാരിനെ അറിയിച്ചിട്ടുണ്ടെന്നും ഡോ. ശ്രീവിലാസൻ പറഞ്ഞു. യോഗത്തിൽ സ്റ്റേറ്റ് സെക്രട്ടറി ഡോ. ശശിധരൻ, സിജിപി ഡയറക്ടർ ഡോ. മുരുകേശൻ, സെക്രട്ടറി ഡോ. ദീപിക, നോർത്ത് സോൺ വൈസ്‌പ്രസിഡന്‍റ് ഡോ.പി. എൻ.അജിത, ഡോ. നിഷ, ബ്രാഞ്ച് പ്രസിഡന്‍റ് ഡോ. സന്തോഷ്കുമാർ, പ്രോഗ്രാം കമ്മിറ്റി ചെയർമാൻ ഡോ. നിളാർ മുഹമ്മദ്, കൺവീനർ ഡോ. ഷംജിത്ത് എന്നിവർ പ്രസംഗിച്ചു. ഡോ. ആർ. രമേഷ് സുവനീർ പ്രകാശനം ചെയ്തു. ഡോക്ടർമാരായ അനീഷ്‌ അഹ്‌മദ്‌, കെ. ദിപു, രമ കൃഷ്ണകുമാർ, പ്രദോഷ് ഗംഗാധർ, അസിം ആദിർ, അഹമ്മദ് കബീർ, അനീഷ അശോക് കുമാർ, കെ.യു. കുഞ്ഞുമോയ്‌തീൻ, ടി. മുജീബ് റഹ്മാൻ, വിഷ്ണു വാസുദേവൻ, ജിതിൻ ബെനോയ് ജോർജ് എന്നിവർ വിവിധ വിഷയങ്ങളെക്കുറിച്ച് പ്രബന്ധങ്ങൾ അവതരിപ്പിച്ചു.

പാലാങ്കര കല്ലന്തോട്മുക്ക് കാരപ്പുറം റോഡ് തകര്‍ന്നു; ജനങ്ങള്‍ ദുരിതത്തില്‍

എടക്കര: മൂത്തേടം പഞ്ചായത്തിലെ പാലാങ്കര കല്ലന്തോട്മുക്ക് കാരപ്പുറം റോഡ് തകര്‍ന്നതോടെ ജനങ്ങള്‍ ദുരിതത്തില്‍. വര്‍ഷങ്ങളായി തകര്‍ന്ന് കിടക്കുന്ന റോഡിലൂടെ മഴക്കാലം ആരംഭിച്ചതോടെ കാല്‍നടയാത്രപോലും അസാധ്യമായിരിക്കുകയാണ്. ആശുപത്രി ആവശ്യങ്ങള്‍ക്ക് പേലും വാഹനം വിളിച്ചാല്‍ വരാത്ത സാഹചര്യമാണ് നിലവിലുള്ളതെന്ന് നാട്ടുകാര്‍ പറയുന്നു. റോഡ് റീ ടാറിംഗിനായി മൂന്ന് വര്‍ഷം മുന്പ് ജില്ലാ പഞ്ചായത്ത് ഒരുകോടി രൂപ അനുവദിച്ചിരുന്നു. രണ്ട് തവണ നിര്‍മാണോദ്ഘാടനവും നടത്തി. എന്നാല്‍ നാളിതുവരെയായി പ്രവൃത്തി ആരംഭിക്കാന്‍ അധികൃതര്‍ തയാറായിട്ടില്ല. ഈ റോഡിലൂടെയുള്ള ഗതാഗതം ദുഷ്കരമായ സാഹചര്യത്തില്‍ ഗ്രാമപഞ്ചായത്ത് അധികൃതരെ പലതവണ വിവരം ധരിപ്പിച്ചിട്ടും യാതൊരു നടപടിയുമുണ്ടായിട്ടില്ല. ഇതിന് പുറമെ പഞ്ചായത്തിലെ ഗ്രാമീണ റോഡുകള്‍ ജൽജീവന്‍ മിഷന്‍ കുടിവെള്ള പദ്ധതിക്കായി കീറിമുറിച്ചതും നന്നാക്കാന്‍ തയാറായിട്ടില്ല. പഞ്ചായത്തിന്‍റെ നിരുത്തരവാദ സമീപനം മുതലെടുത്ത് കരാറുകാര്‍ അനാസ്ഥ കാണിക്കുകയാണെന്ന് ആരോപണമുയര്‍ന്നിട്ടുണ്ട്. റോഡില്‍ പലയിടങ്ങളിലും കുഴികള്‍ രൂപപ്പെടുകയും വെള്ളം കെട്ടിനിന്ന് വാഹനങ്ങള്‍ അപകടത്തില്‍പെടുന്നതും നിത്യസംഭവമായി മാറിയിരിക്കുകയാണ്. അധികൃതരുടെ നിസംഗ നിലപാടിനെതിരേ പ്രതിഷേധം ശക്തമായിട്ടുണ്ട്.

വിജയോത്സവം സംഘടിപ്പിച്ചു

എടക്കര: മണിമൂളി ക്രിസ്തുരാജാ ഹയര്‍ സെക്കന്‍ഡറി സ്‌കൂളില്‍ വിജയോത്സവം സംഘടിപ്പിച്ചു. പഞ്ചായത്ത് വൈസ് പ്രസിഡന്‍റ് റെജി ജോസഫ് കണ്ടത്തില്‍ ഉദ്ഘാടനം ചെയ്തു. തുടര്‍ച്ചയായ നൂറ് ശതമാനം വിജയങ്ങള്‍ക്ക് നേതൃത്വം വഹിച്ച മുന്‍ ഹെഡ്മാസ്റ്റര്‍ എ.ടി. ഷാജി പ്രതിഭകള്‍ക്ക് മെമന്‍റോ നല്‍കി. മത്സരപ്പരീക്ഷയില്‍ സംസ്ഥാനത്ത് ഒന്നാം സ്ഥാനം നേടിയ ആല്‍ബിന്‍ ജോണ്‍സണ്‍ സ്‌കൂളിന്‍റെ പ്രത്യേക സമ്മാനം ഏറ്റുവാങ്ങി. എല്‍എസ്എസ്, യുഎസ്എസ്, എന്‍എംഎംഎസ് സ്‌കോളര്‍ഷിപ്പ് പരീക്ഷാ വിജയികളെയും രാജ്യപുരസ്‌കാര്‍ വിജയികളെയും യോഗത്തില്‍ അനുമോദിച്ചു. പിടിഎ പ്രസിഡന്‍റ് ജൂഡി തോമസ് അധ്യക്ഷത വഹിച്ചു. പ്രധാനാധ്യാപകന്‍ സജി ആന്‍റണി, വാര്‍ഡ് മെമ്പര്‍ പി.പി. ഷിയാജ്, സ്‌കൂള്‍ പ്രിന്‍സിപ്പാള്‍ ആന്‍റോ വി. തോമസ്, സികെഎല്‍പി പ്രധാനാധ്യാപിക ടാജ് വി. തോമസ്, മുന്‍ സ്‌കൗട്ട് മാസ്റ്റര്‍ ജോര്‍ജ് കുട്ടി, അധ്യാപിക ജെസി ജേക്കബ്, വിജയഭേരി കോഓർഡിനേറ്റര്‍ ഷൈനി ജോര്‍ജ് എന്നിവര്‍ സംസാരിച്ചു.

കുറുമ്പലങ്ങോട് വില്ലേജ് ഓഫീസ് കെട്ടിടം ജീർണാവസ്ഥയിൽ

നിലമ്പൂർ: കുറുമ്പലങ്ങോട് വില്ലേജ് ഓഫീസ് ജീർണാവസ്ഥയിൽ. ഓഫീസ് പ്രവർത്തിക്കുന്നത് 43 വർഷം പഴക്കമുള്ള പൊളിഞ്ഞ കെട്ടിടത്തിലാണ്. നിലവിൽ ചുറ്റുമതിൽ തകർന്നുവീണതോടെ കെട്ടിടം ഏതു സമയത്തും നിലംപൊത്താവുന്ന അവസ്ഥയിലാണ്. കഴിഞ്ഞ മാസം ഉണ്ടായ കനത്ത മഴയിൽ സംരക്ഷണ ഭിത്തിയും ചുറ്റുമതിലും തകർന്നിരുന്നു. ദിവസവും നൂറുകണക്കിന് ആളുകളാണ് വിവിധ ആവശ്യങ്ങൾക്കായി ഇവിടെയത്തുന്നത്. ഓഫീസിന്‍റെ പല ഭാഗങ്ങളിലുമുള്ള ചുമരുകൾ അടർന്ന് വീഴാറായ നിലയിലാണ്. 1982 ലാണ് കുറുമ്പലങ്ങോട് വില്ലേജ് ഓഫീസ് കെട്ടിടവും ചുറ്റുമതിലും നിർമിച്ചത്. കെട്ടിടത്തിന്‍റെ ശോചനീയാവസ്ഥ ഓഫീസ് പ്രവർത്തനങ്ങളെയും പൊതുജനങ്ങളുടെ സുരക്ഷയെയും സാരമായി ബാധിക്കുമെന്ന ആശങ്കയും ഉയർന്നിട്ടുണ്ട്.

എരവിമംഗലം ഹെൽത്ത് സെന്‍ററിന് വീണ്ടും സംസ്ഥാന കായകൽപ്പ് അവാർഡ്

പെരിന്തൽമണ്ണ: സംസ്ഥാന കായകൽപ്പ് അവർഡ് നേടി പെരിന്തൽമണ്ണ നഗരസഭ എരവിമംഗലം ഹെൽത്ത് സെന്‍റർ. നഗര കുടുംബാരോഗ്യകേന്ദ്രം വിഭാഗത്തിൽ 90.8 ശതമാനം മാർക്കോടെയാണ് ഒന്നാം സ്ഥാനം കൈവരിച്ചത്. രണ്ടാം തവണയാണ് കായകൽപ്പ് അവർഡിന് ഹെൽത്ത് സെന്‍റർ അർഹമാകുന്നത്. രാജ്യത്തെ മികച്ച ആരോഗ്യകേന്ദ്രങ്ങളുടെ പട്ടികയിൽ ഇടംനേടിയ ജില്ലയിലെ ആരോഗ്യസ്ഥാപനങ്ങൾക്ക് നൽകുന്ന എൻക്യുഎസ് അവാർഡ് രണ്ട് തവണയും ആരോഗ്യസ്ഥാപനങ്ങളുടെ ഗുണനിലവാരം ഉയർത്തുന്നതിനായി സംസ്ഥാന സർക്കാർ നൽകുന്ന കെഎഎസ്എച്ച് അംഗീകാരം, 2023ൽ കായകൽപ്പ് അവാർഡിന്‍റെ ഭാഗമായുള്ള കമന്‍റേഷൻ പുരസ്‌കാരം തുടങ്ങി വിവിധ പുരസ്‌കാരങ്ങൾ എരവിമംഗലം ഹെൽത്ത് സെന്‍ററിന് ലഭിച്ചിരുന്നു. മെഡിക്കൽ ഓഫീസർ, ജനറൽ ഡോക്ടർ, ദന്ത ഡോക്ടർ, കുട്ടികളുടെ ഡോക്ടർ, ഗൈനക് വിഭാഗം രണ്ട് ഫാർമസിസ്റ്റ് എന്നിവരുടെ സേവനവും എല്ലാ മാസവും ആദ്യ തിങ്കളാഴ്ച കാഴ്ച്ച പരിശോധന, ലാബ് സൗകര്യം, മരുന്ന്, പ്രതിരോധ കുത്തിവയ്പ്പുകൾ എന്നിവ നിലവിൽ ഹെൽത്ത് സെന്‍ററിൽ ലഭ്യമാണ്. രാവിലെ ഒമ്പതു മുതൽ വൈകുന്നേരം ആറുവരെയാണ് പ്രവർത്തന സമയം. അവർഡിന്‍റെ ഭാഗമായി രണ്ടുലക്ഷം രൂപയാണ് സെന്‍ററിന്‍റെ പ്രവർത്തനങ്ങൾക്ക് ലഭിക്കുന്നത്.

മലയോര കർഷകരെ കുടിയിറക്കാൻ ആസൂത്രിത നീക്കം: പി.വി. അൻവർ

നിലമ്പൂർ: മലയോര ജനതയെ കുടിയിറക്കാൻ ആസൂത്രിത നീക്കമുണ്ടെന്നും ഇത് ജനകീയ പിന്തുണയോടെ നേരിടുമെന്നും പി.വി. അൻവർ പറഞ്ഞു. മൂത്തേടത്ത് തൃണമുൽ കോൺഗ്രസിന്‍റെ ഓഫീസ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. വന്യമൃഗങ്ങൾ ജനവാസ മേഖലകളിൽ തമ്പടിക്കുകയാണ്. മനുഷ്യരെ കൊലപ്പെടുത്തുകയും കൃഷി നശിപ്പിക്കുകയും ചെയ്യുമ്പോൾ പ്രശ്നപരിഹാരം എന്തെന്ന് സർക്കാർ പറയുന്നില്ല. തുറന്നിട്ട മൃഗശാലയായി കേരളം മാറികഴിഞ്ഞു. ജനസാന്ദ്രമായിരുന്ന മലയോര മേഖലയിൽ നിന്നും പ്രാണരക്ഷാർഥം ജനങ്ങൾ ഇറങ്ങുകയാണ്. വന്യമൃഗ ശല്യംമൂലം ജനങ്ങൾ പ്രാണഭീതിയിൽ കഴിയുമ്പോൾ വനത്തിന്‍റെ വിസ്തൃതി കൂട്ടാനാണ് സംസ്ഥാന സർക്കാരിന് ജാഗ്രത. നിലമ്പൂരിൽ മാത്രം 161 കർഷകരുടെ ഭൂമി വാങ്ങി വനത്തോട് ചേർത്തുകഴിഞ്ഞു. ഭരണപക്ഷവും പ്രതിപക്ഷവും ഉൾപ്പെടെ നടത്തുന്ന ആസൂത്രിതമായ അജണ്ടയാണ് ഇതിന് പിന്നിലുള്ളതെന്നും അദ്ദേഹം കൂട്ടിച്ചേർത്തു. വിവിധ പാർട്ടികളിൽ നിന്നും തൃണമൂൽ കോൺഗ്രസിൽ ചേർന്ന 50പേരെ ഷാൾ അണിയിച്ച് പാർട്ടിയിലേക്ക് സ്വീകരിച്ചു. ഉന്നത വിജയംനേടിയ വിദ്യാർത്ഥികളെയും മികച്ച ക്ഷീര കർഷകനെയും ചടങ്ങിൽ ആദരിച്ചു. മുണ്ടോടൻ ഉസ്മാൻ അധ്യക്ഷത വഹിച്ചു. തൃണമൂൽ കോൺഗ്രസ് നേതാക്കളായ ഇ.കെ. സുകു, സാജിത്ത് ബാബു, ഉമ്മർ ഇണ്ടേപ്പാടൻ, ഇസ്മായിൽ മൂത്തേടം, ജോഷി, ഷെരീഫ് എന്നിവർ സംസാരിച്ചു. മൂത്തേടം ടൗണിൽ ശക്തി തെളിയിച്ച് പ്രകടനവും നടത്തി.

ജനവാസ മേഖലയിലൂടെ പകൽ സമയത്ത് തീറ്റ തേടി കരടി

ടികെ കോളനിയിലാണ് വീണ്ടും ഭീതി പരത്തി കരടിയുടെ പകൽ സഞ്ചാരം പൂക്കോട്ടുംപാടം: ജനവാസ മേഖലയിലൂടെ പകൽ സമയത്തും തീറ്റ തേടിയിറങ്ങി കരടി. അമരമ്പലം പഞ്ചായത്തിലെ ടികെ കോളനി ആന്‍റണിക്കാട്ടിലാണ് വൈകുന്നേരം ജനവാസ മേഖലയിലൂടെ കരടി തീറ്റ തേടി ഇറങ്ങിയത്. രണ്ടുമസത്തിലധികമായി പ്രദേശത്ത് രാത്രിയിലെത്തി നാശനഷ്ടം വരുത്തിയിരുന്ന കരടി പകൽ സമയത്തുമെത്തി തുടങ്ങിയതോടെ പ്രദേശത്തെ ജനങ്ങൾ കൂടുതൽ ഭീതിയിലായി. ശനിയാഴ്ച വൈകുന്നേരമാണ് മേനോൻപറമ്പിൽ ജെറീഷിന്‍റെ വീടിനോട് ചേർന്നുള്ള കൃഷിയിടത്തിലേക്ക് പൂക്കോട്ടുംപാടം ടികെ കോളനിറോഡ് മുറിച്ചുകടന്ന് കരടിയെത്തിയത്. കൃഷിയിടത്തിലൂടെ ഭയമില്ലാതെ സഞ്ചരിച്ച കരടി ചിതൽ കൂട് നശിപ്പിച്ച് അതിൽ നിന്ന് ചിതലിനെ ഭക്ഷിച്ചുവെന്നും ജെറീഷ് പറഞ്ഞു. ഇതിനിടയിൽ കരടിയുടെ ചിത്രം ജെറീഷ് പകർത്തി. വിവരമറിയിച്ചതിനെ തുടർന്ന് വനം ആർആർടി ജീവനക്കാരും സ്ഥലത്തെതി പരിശോധിച്ചപ്പോഴും കൃഷിയിടത്തിൽ കരടിയെ കണ്ടു. തുടർന്ന് റബർ ബുള്ളറ്റ് ഉപയോഗിച്ച് വെടിയുതിർത്താണ് കരടിയെ ഓടിച്ചുവിട്ടത്. മാസങ്ങളായി പ്രദേശത്തുള്ള അമ്പലങ്ങളിലെത്തി പൂജദ്രവ്യങ്ങളായ എണ്ണ, നെയ്യ്, ശർക്കര എന്നിവ ഭക്ഷിച്ച് മടങ്ങുന്നത് പതിവായിരുന്നു. ഒപ്പം ചില വീടുകൾക്ക് ഉള്ളിലടക്കം കരടി കയറാൻ ശ്രമിച്ചിട്ടുമുണ്ടായിരുന്നു. ഇതേ തുടർന്ന് കരടിയെ പിടികൂടാൻ കെണി ഒരുക്കിയിട്ടുണ്ടെങ്കിലും ഇതിൽ കയറാതെ കരടി വീണ്ടും ഭീതി പരത്തി ജനവാസ മേഖലയിലൂടെ നടക്കുകയാണ്. കൂടുതൽ കെണികൾ സ്ഥാപിക്കണമെന്നും ജനങ്ങളുടെ ഭീതി അകറ്റാൻ അധികൃതരുടെ ഭാഗത്ത് നിന്നും ശക്തമായ നടപടി വേണമെന്നും ഇല്ലെങ്കിൽ പ്രതിഷേധം നടത്തുമെന്നും വാർഡ് മെന്പർ വി.കെ ബാലസുബ്രമണ്യൻ പറഞ്ഞു.

‘മഞ്ചേരി മെഡിക്കൽ കോളജിന്‍റെ ദുരവസ്ഥക്ക് പരിഹാരം കാണണം’

മഞ്ചേരി: ആയിരക്കണക്കിന് രോഗികളുടെ ആശ്രയമായ മഞ്ചേരി മെഡിക്കൽ കോളജിന്‍റെ ഇന്നത്തെ ദുരവസ്ഥക്ക് പരിഹാരം കാണണമെന്നും മെഡിക്കൽ കോളജ് വന്നതോടെ നഷ്ടപ്പെട്ട മഞ്ചേരിയിലെ ജനറൽ ആശുപത്രി പുനഃസ്ഥാപിക്കണമെന്നും ആശുപത്രി കോമ്പൗണ്ടിലെ ഇടിഞ്ഞു വീഴാറായ കെട്ടിടങ്ങൾ പുതുക്കിപ്പണിത് ആശുപത്രിയുടെ സൗകര്യം വർധിപ്പിക്കണമെന്നും എൻസിപിഎസ് മഞ്ചേരി നിയോജക മണ്ഡലം കൺവൻഷൻ ആവശ്യപ്പെട്ടു. എൻസിപിഎസ് ജില്ലാ പ്രസിഡന്‍റ് കെ.പി. രാമനാഥൻ ഉദ്ഘാടനം ചെയ്തു. നിയോജക മണ്ഡലം പ്രസിഡന്‍റ് മുഹമ്മദലി ശിഹാബ് അധ്യക്ഷത വഹിച്ചു. കെ.ടി. മുജീബ്, മുഹമ്മദ് ഹാരീസ് ബാബു, ടി.സി. നാടി, ഷാജി മഞ്ചേരി, സുമേഷ് വെട്ടേക്കോട് എന്നിവർ പ്രസംഗിച്ചു.

കൈതപ്രവുമായി സംവദിച്ച് പരിയാപുരം സെന്‍റ് മേരീസ് സ്‌കൂള്‍ വിദ്യാര്‍ഥികള്‍

പരിയാപുരം: സെന്‍റ് മേരീസ് ഹയര്‍ സെക്കന്‍ഡറി സ്‌കൂള്‍ വിദ്യാരംഗം കലാസാഹിത്യവേദി പ്രവര്‍ത്തകര്‍ വായനയുടെയും എഴുത്തിന്‍റെയും പൊരുള്‍ തേടി ഗാനരചയിതാവ് കൈതപ്രം ദാമോദരന്‍ നമ്പൂതിരിക്കൊപ്പം ഒരു ദിനം ചെലവഴിച്ചു. തന്‍റെ എല്ലാ രചനകളും വായനയുടെ ഉത്പന്നങ്ങളാണെന്ന് കൈതപ്രം പറഞ്ഞു. വായന ജീവിതത്തെ മുന്നോട്ടു നയിക്കുന്ന ഇന്ധനമാണ്. സത്യത്തില്‍ നമുക്കു പോകാന്‍ ഒരു വഴിയേ ഉള്ളു, നന്മയുടെ-സ്‌നേഹത്തിന്‍റെ വഴി. അതു നിങ്ങള്‍ തിരിച്ചറിയണം. ഇല വീഴുന്നതും പുഴ ഒഴുകുന്നതും പാഠമാണെന്ന് ഓര്‍ക്കണമെന്നും കൈതപ്രം കുട്ടികളോടു പറഞ്ഞു. കൈതപ്രത്തിന്‍റെ ഗാനങ്ങള്‍ കോര്‍ത്തിണക്കി വിദ്യാര്‍ഥികളായ കെ.പി.അബിന്‍ കൃഷ്ണ, പി.സ്വാതി മഹേഷ്, കെ.പി.ആര്യ, കെ.നന്ദിക പ്രഭാത്കുമാര്‍ എന്നിവര്‍ "ഗാനമാല' സമര്‍പ്പിച്ചു. ചിത്രകാരി ജുവാന ജയിന്‍ അദ്ദേഹത്തിന്‍റെ ചിത്രം വരച്ച് സമ്മാനമായി നല്‍കി. കോഴിക്കോട് പുതിയറയിലുള്ള എസ്.കെ.പൊറ്റെക്കാട്ട് സാംസ്‌കാരിക കേന്ദ്രത്തിലെത്തി എസ്.കെ.യുടെ മകള്‍ സുമിത്ര ജയപ്രകാശുമായും കുട്ടികള്‍ കൂടിക്കാഴ്ച നടത്തി. "അച്ഛന്‍ കണ്ടതും അനുഭവിച്ചതുമാണ് അദ്ദേഹത്തിന്‍റെ കഥാപാത്രങ്ങളായി മാറിയത്. പല കഥാപാത്രങ്ങളെയും ഞാനും കണ്ടിട്ടുണ്ട്. എവിടെ ചെന്നാലും സാധാരണക്കാരുമായി അച്ഛന്‍ ആത്മബന്ധം സ്ഥാപിക്കും. അവരെല്ലാം കഥാപാത്രങ്ങളായി കൃതികളില്‍ നിറയും. സത്യത്തെ ദൈവമായി കണ്ട ആളായിരുന്നു അച്ഛന്‍. എഴുത്തിലും അതു കാണാം' എസ്.കെയുടെ മകള്‍ സുമിത്ര ജയപ്രകാശ് ഓര്‍മകള്‍ പങ്കുവച്ചു. ദേവനന്ദ ആര്‍. ലക്ഷ്മി, ജിസ് മരിയ ജെയിംസ്, സി.ടി.അദ്‌നാന്‍, എസ്.ശ്രീകാര്‍ത്തിക, എ. ഐറിന്‍ സഫീര്‍, ആല്‍ബിന എലിസബത്ത് ചാക്കോ, അന്ന ഫ്രാന്‍സിസ്, അക്ഷയ് സനീഷ്, സന മെറിന്‍, ആല്‍ഫിയ ബിജു എന്നിവര്‍ സുമിത്രയുമായി സംവദിച്ചു. കെ.വൈഗ പ്രസാദ്, വി.ഫാത്തിമ ഷെന്‍സ എന്നിവര്‍ വരച്ച എസ്.കെയുടെ ചിത്രങ്ങള്‍ സുമിത്ര ജയപ്രകാശ് ഏറ്റുവാങ്ങി. വിദ്യാരംഗം കോ ഓര്‍ഡിനേറ്റര്‍ മനോജ് വീട്ടുവേലിക്കുന്നേല്‍, അധ്യാപകരായ പി.ജി.ജോസഫ്, കെ.എന്‍.വിജില, എം.അഹമദ് മിഖ്ദാദ്, വി.അജയ് എന്നിവര്‍ നേതൃത്വം നല്‍കി.

കാട്ടുപന്നികളെ കൂട്ടത്തോടെ വെടിവയ്ക്കാൻ നടപടിയുമായി ചാലിയാർ പഞ്ചായത്ത് : 17 ഷൂട്ടർമാർക്ക് ചുമതല

നിലമ്പൂർ: കാട്ടുപന്നികളെ വെടിവയ്ക്കാൻ ശക്തമായ നടപടിയുമായി ചാലിയാർ ഗ്രാമപഞ്ചായത്ത്. ഇതിനായി തോക്ക് ലൈസൻസുള്ള 17 ഷൂട്ടർമാരെ നിയമിച്ചു. ഇന്ന് മുതൽ കാട്ടുപന്നികളെ വെടിവയ്ക്കും. ഷൂട്ടർമാരുടെ യോഗം ഇന്ന് ചാലിയാർ ഗ്രാമപഞ്ചായത്ത് ഓഫീസിൽ നടക്കും. പെരുമ്പത്തൂർ. എളമ്പിലാക്കോട്, മുട്ടിയേൽ വാർഡുകളിലാണ് ഇന്ന് രാത്രി കാട്ടുപന്നികളെ വെടിവയ്ക്കുക. രാത്രികാലങ്ങളിൽ വളർത്ത് മൃഗങ്ങളെ കൂട്ടിനുള്ളിൽ തന്നെ സംരക്ഷിക്കണമെന്ന് ജനങ്ങൾക്ക് മുന്നറിയിപ്പ് നൽകിയിട്ടുണ്ട്. ജനകീയ കൂട്ടായ്മ വാർഡ് കമ്മിറ്റി ഭാരവാഹികളുടെ നിർദേശങ്ങൾ ഓരോ വാർഡുകളിലെയും ജനങ്ങൾ പാലിക്കണം. ഇന്ന് മുതൽ ശല്യകാരായ കാട്ടുപന്നികളെ വെടിവച്ചു തുടങ്ങും. ഒരുമാസം നീണ്ടുനിൽക്കുന്ന പദ്ധതിക്കാണ് ഇന്ന് തുടക്കമാവുക. ഇതിനായി ജനകീയ കൂട്ടായ്മ പഞ്ചായത്ത് വാർഡ് കമ്മിറ്റികൾ രൂപികരിച്ചിട്ടുണ്ട്. എസ്റ്റേറ്റുകളും സ്വകാര്യ സ്ഥലങ്ങളോട് ചേർന്ന് കൃഷിയിടങ്ങളും കിടക്കുന്നതിനാൽ പഞ്ചായത്തിലെ ജനങ്ങൾ വലിയ തോതിൽ കാട്ടുപന്നി ഉൾപ്പെടെയുള്ള വന്യമൃഗങ്ങളുടെ ഭീഷണിയിലാണ്. കാട്ടുപന്നി ശല്യം അതിരൂക്ഷമായ ചാലിയാർ പഞ്ചായത്തിൽ കാട്ടുപന്നികളെ കൂട്ടത്തോടെ വെടിവയ്ക്കാനുള്ള പഞ്ചായത്ത് നടപടി ജനങ്ങൾക്ക് ആശ്വാസമാകും. കൃഷിയിടങ്ങളിലേക്കും റോഡുകളിലേക്കും എത്തുന്ന പന്നികളെയായിരിക്കും വെടിവയ്ക്കുക. അതിനാൽ ജനങ്ങൾ കടുത്ത ജാഗ്രത പുലർത്തണമെന്ന് എളമ്പിലാക്കോട്ചേർന്ന ജനകീയ കൂട്ടായ്മ യോഗത്തിൽ നിർദേശം നൽകി. കാട്ടാന ശല്യത്തിന് പരിഹാരം വേണമെങ്കിൽസോളാർ വൈദ്യുത വേലിയോ മതിലുകളോ വനാതിർത്തികളിൽ സ്ഥാപിക്കേണ്ടിവരും. ശല്യകാരായ കാട്ടാനകളെ കാടുകയറ്റാൻ വനംവകുപ്പുമായി ചേർന്ന് കർമപദ്ധതി പഞ്ചായത്ത് തയാറാക്കുകയും വേണം. കാട്ടുപന്നികളെ വെടിവെയ്ക്കാൻ നേരത്തെ തന്നെ ഗ്രാമപഞ്ചായത്തിന് അധികാരം ലഭിച്ചിരുന്നെങ്കിലും ചാലിയാർ പഞ്ചായത്തിൽ അത് കാര്യക്ഷമമായി നടപ്പാക്കിയില്ല. കാട്ടുപന്നികൾ കൂട്ടത്തോടെ റോഡുകൾ മുറിച്ച് കടക്കുകയും വലിയ തോതിൽ കൃഷിനാശം വരുത്തുകയും ചെയ്തതോടെ കർഷകരുടെ ഭാഗത്ത് നിന്നും ഉണ്ടായ വലിയ പ്രതിഷേധങ്ങളുടെ ഫലമായാണ് പഞ്ചായത്ത് അധികൃതർ ശക്തമായ നടപടിക്ക് തയാറായത്. എളമ്പിലാക്കോട് ചേർന്ന ജനകീയ കൂട്ടായ്മ യോഗത്തിൽ ചാലിയാർ ഗ്രാമപഞ്ചായത്ത് വൈസ് പ്രസിഡന്‍റ് ഗീതാ ദേവദാസ് അധ്യക്ഷത വഹിച്ചു. വികസന സ്റ്റാൻഡിംഗ് കമ്മിറ്റി ചെയർമാൻ തണിയിൽ സുരേഷ്. ഗ്രാമപഞ്ചായത്തംഗം മഞ്ജു അനിൽ, എൻസിപി ജില്ലാ ജനറൽ സെക്രട്ടറി പൂഴിത്തറ ഷാഹുൽ, വീരാൻ കുട്ടി വലിയാട്, കുന്നുമ്മൽ ഷൗക്കത്ത്, രാജു വൈലാശേരി, ഇബ്രാഹിം കാനക്കുത്ത്, അബ്ദുറഹ്മാൻ, ജേക്കബ് വൈലാശേരി എന്നിവർ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]