സീമെൻസ് ഫുട്ബോൾ: സെമിഫൈനൽ ഇന്നും നാളെയും : Deepika.com Nattu Visesham

വാർധക്യം മറന്ന് പടയണിയിലും കഥകളിയിലും മുരളീധരൻ പിള്ളയുടെ നടനഭാവം

പത്തനംതിട്ട: സപ്തതി പടിവാതിൽക്കലെത്തിയപ്പോൾ മനസിൽ ഉദിച്ച മോഹമായിരുന്നു പടയണി അഭ്യസനം. അതു പരിശീലിച്ചെടുത്ത് കളത്തിലിറങ്ങിയതിനു പിന്നാലെ കഥകളി പഠിക്കാനും തീരുമാനിച്ചു. ഇന്നിപ്പോൾ ടി.ജി. മുരളീധരൻപിള്ള ഇരുകലകളിലും നിറഞ്ഞാടുകയാണ്. പുലവൃത്തവും കോലംതുള്ളലും കഴിഞ്ഞ ആലസ്യത്തിൽ ഒന്നു മയങ്ങി ഉണർന്നപ്പോഴാണ് കഥകളികൂടി പഠിച്ചാലോ എന്ന ചിന്ത എഴുപത്തിരണ്ടാം വയസിൽ മനസിൽ കയറിയത്. ശ്രീപത്മനാഭ സ്വാമി ക്ഷേത്രത്തിൽത്തന്നെ അഭ്യാസം തുടങ്ങി. 74-ാം വയസിൽ കഴിഞ്ഞ എട്ടിന് ക്ഷേത്ര സന്നിധിയിൽത്തന്നെ അരങ്ങേറ്റം നടത്തി. വള്ളിക്കോട് ഗ്രാമത്തിലെ അറിയപ്പെടുന്ന പടയണി, കഥകളി കലാകാരനാണ് സൗമ്യാ ഭവനിൽ ടി.ജി. മുരളീധരൻപിള്ള ഇന്നിപ്പോൾ. കഥകളി അരങ്ങേറ്റ ദിനത്തിൽ തൃക്കോവിൽ ക്ഷേത്രനടയിൽ മേളപ്പദം എരിഞ്ഞുയർന്നപ്പോൾ പുറപ്പാടിനായി മനസിനെ പാകപ്പെടുത്താനുള്ള ശ്രമം നടത്തി നോക്കി. ഈശ്വരാനുഗ്രഹത്താൽ എല്ലാം ശുഭമായി. തുടർന്ന് സീതാ സ്വയംവരം കഥകളി അരങ്ങേറി. ദശരഥനായി മുരളീധരൻ പിള്ള അരങ്ങിലെത്തി. സാക്ഷ്യം വഹിക്കാൻ വടക്കേ ഇന്ത്യക്കാരായ സുഹൃത്തുക്കളും എത്തിയിരുന്നു. 46 വർഷം നീണ്ട പ്രവാസ ജീവിതത്തിനിടയിലും കരളിലെ കളിത്തട്ടിൽ അറുപത് തിരിയുടെ ശോഭയോടെ കഥകളി മോഹം ജ്വലിച്ചു നിന്നിരുന്നതായി മുരളീധരൻ പിള്ള പറയുന്നു. പടയണി പഠിക്കണമെന്നായിരുന്നു ആദ്യ മോഹം. മാതൃഗൃഹം പടയണി ഗ്രാമമായ കടമ്മനിട്ടയിലാണ്. കുട്ടിക്കാലം മുതൽ പടയണിയുടെ ചുവടുകൾ കണ്ടുവളർന്നതാണ്. വലിയ പടയണിയിൽ ഭൈരവി നിറഞ്ഞാടുന്നതു കാണുമ്പോൾ മനസിൽ രൗദ്ര ഭാവം ഉണരും. എല്ലാ വർഷവും മുടങ്ങാതെ കടമ്മനിട്ട ദേവീക്ഷേത്രത്തിൽ പടയണി കാണാൻ എത്തുമായിരുന്നു. 19-ാം വയസിൽ കേരളം വിട്ട് വടക്കേ ഇന്ത്യയിലേക്ക് യാത്രയായതാണ്. ഒറീസയിൽ വിവിധ കമ്പനികളിലായി ജോലി. 28 വർഷം ധന്യാ സിമന്‍റ്സിൽ സീനിയർ മാനേജരായി ജോലിയെടുത്തു. 2016ൽ ജോലി മതിയാക്കി നാട്ടിൽ തിരിച്ചെത്തി. കടമ്മനിട്ട ഗോത്ര കളരിക്കൊപ്പമാണ് ക്ഷേത്രങ്ങളില്‌ പടയണി അവതരിപ്പിക്കുന്നത്. താഴൂർ ഭഗവതി ക്ഷേത്രത്തിൽ പുലവൃത്തം ചവിട്ടി. മറുത, ഭൈരവി കോലങ്ങൾ എടുത്ത് കളത്തിൽ നിറഞ്ഞാടി. പ്രഫ. കടമ്മനിട്ട വാസുദേവൻ പിള്ളയുടെ അനുഗ്രഹാശംസകളോടെ കടമ്മനിട്ട ഗിരീശൻ ആശാന്‍റെ ശിക്ഷണത്തിലാണ് പടയണി അഭ്യസിച്ചത്. കഥകളിയിൽ ഇഷ്ടവേഷം ദുശാസനന്‍റേതാണ്. വേഷപ്പൊലിമ തന്നെയാണ് കാരണം. താഴൂർ ഭഗവതി ക്ഷേത്രത്തിൽ ഭദ്രകാളിയുടെ വേഷം ആടാനുള്ള തയാറെടുപ്പിലാണ് മുരളീധരൻ പിള്ള. നൂറു വയസ് തികഞ്ഞ അമ്മ ലക്ഷ്മിക്കുട്ടിയും ഭാര്യ ഗീതയും മക്കളായ സൗമ്യയും രമ്യയും പിന്തുണയുമായി അണിയറയിലുണ്ട്.

പെട്രോൾ പമ്പിൽ ജീവനക്കാർക്കുനേരേ ഗുണ്ടാ ആക്രമണം: രണ്ടു പേർക്കു പരിക്കേറ്റു

കായംകുളം: പെട്രോൾ പമ്പിൽ ജീവനക്കാർക്കുനേരേ ഗുണ്ടാ ആക്രമണം. രണ്ടു ജീവനക്കാർക്കു പരിക്കേറ്റു. കായംകുളം പുത്തൻറോഡ് ജംഗ്‌ഷനിലെ ടി.എ പെട്രോൾ പമ്പിൽ കഴിഞ്ഞദിവസം രാത്രിയായിരുന്നു സംഭവം. പെട്രോൾ അടിക്കാനെത്തിയ ഒരുകൂട്ടം യുവാക്കൾ 50 രൂപക്ക് പെട്രോൾ ചോദിച്ചു. പെട്രോൾ അടിച്ചശേഷം പണമില്ലെന്നു പറഞ്ഞു. പിന്നാലെ ജീവനക്കാരുമായി തർക്കം ഉണ്ടാകുകയും മർദിക്കുകയുമായിരുന്നു എന്നാണ് മർദനമേറ്റ ഉണ്ണികൃഷ്ണൻ പറയുന്നത്. ലഹരിക്കടിമയായ ആളുകളാണ് അക്രമം നടത്തിയതെന്നു പമ്പ് ഉടമയും വ്യാപാരി വ്യവസായി ഏകോപന സമിതി സംസ്ഥാന വൈസ് പ്രസിഡന്‍റുമായ എ.ജെ. ഷാജഹാൻ പറഞ്ഞു. സംഭവത്തിൽ കായംകുളം പോലീസ് അന്വഷണം ആരംഭിച്ചു.

മേയ്ദിനാചരണം ഇന്ന്

പത്തനംതിട്ട: സാർവദേശീയ തൊഴിലാളി ദിനമായ ഇന്ന് സംയുക്ത ട്രേഡ് യൂണിയൻ സമിതിയുടെ നേതൃത്വത്തിൽ ജില്ലയിലെ 11 ഏരിയ കേന്ദ്രങ്ങളിലും റാലിയും പൊതുയോഗവും അനുബന്ധ പരിപാടികളും സംഘടിപ്പിക്കും. രാവിലെ ഒന്പതിന്ഏരിയാകേന്ദ്രങ്ങളിൽ റാലി നടക്കും. പത്തനംതിട്ടയിൽ സിഐടിയു സംസ്ഥാന സെക്രട്ടറി പി.പി. ചിത്തരഞ്ജൻ എംഎൽഎ യോഗം ഉദ്ഘാടനം ചെയ്യും. മറ്റു സ്ഥലങ്ങളിലും ട്രേഡ് യൂണിയൻ നേതാക്കൾ യോഗം ഉദ്ഘാടനം ചെയ്യും. പത്തനംതിട്ടയിൽ രാവിലെ 10 മുതൽ പത്തനംതിട്ട ജില്ലാ സ്‌പോർട് കൗൺസിലിന്‍റെയും വിവിധ തൊഴിലാളി സംഘടനകളുടേയും പത്തനംതിട്ട അഹല്യ കണ്ണാശുപത്രിയുടെയും പത്തനംതിട്ട മൈക്രോ ലാബിന്‍റെയും സംയുക്താഭിമുഖ്യത്തിൽ വിദഗ്ധ ഡോക്ടർമാരുടെ നേതൃത്വത്തിൽ സൗജന്യ നേത്രപരിശോധന ക്യാമ്പും സൗജന്യ ജീവിതശൈലീ രോഗനിർണയവും ജില്ലാ സ്റ്റേഡിയത്തിൽ പ്രവർത്തിക്കുന്ന ജില്ലാ സ്പോർട്സ് കൗൺസിൽ ഓഫീസിൽ ഉണ്ടാകുമെന്ന് സ്പോർട്സ് കൗൺസിൽ ജില്ലാ പ്രസിഡന്‍റ് കെ.അനിൽ കുമാർ അറിയിച്ചു.

അരമനപ്പടിയിലുണ്ടായ വാഹനാപകടത്തിൽ മൂന്നുപേർക്ക് പരിക്ക്

അടൂർ: എംസി റോഡിൽ അരമനപ്പടിയിൽ പിക്കപ്പ് വാനും മിനി ടെമ്പോയും കൂട്ടിയിടിച്ച് മൂന്നുപേർക്ക് ഗുരുതരമായി പരിക്കേറ്റു. ടെമ്പോ ഡ്രൈവർ കട്ടപ്പന പുല്ലാന്തിനാൽ തോമസ് (57), കണ്ണൂർ ഒറ്റപ്ലാക്കൽ അരവിന്ദ് (38), ഭാര്യ കൊട്ടാരക്കര മഹിത മന്ദിരത്തിൽ മഹിമ (26) എന്നിവർക്കാണ് പരിക്കേറ്റത്. പരിക്കേറ്റവരെ അടൂർ ജനറൽ ആശുപത്രിയിൽ പ്രഥമശുശ്രൂഷ നൽകിയതിനു ശേഷം കോട്ടയം മെഡിക്കൽ കോളജിൽ പ്രവേശിപ്പിച്ചു. അടൂരിൽനിന്നും പന്തളം ഭാഗത്തേക്ക് പോയ പിക്കപ്പ് വാനും പന്തളത്തുനിന്നും അടൂർ ഭാഗത്തേക്ക് പോയ മിനി ടെമ്പോയുമാണ് അപകടത്തിൽപ്പെട്ടത്. സ്റ്റേഷൻ ഓഫീസർ വിനോദ് കുമാറിന്‍റെ നേതൃത്വത്തിലുള്ള ഫയർഫോഴ്സ് സംഘം 45 മിനിറ്റോളം പണിപ്പെട്ടാണ് അപകടത്തിൽപ്പെട്ട വാഹനങ്ങളിൽനിന്ന് ആളുകളെ പുറത്തെടുത്തത്. എംസി റോഡിൽ അരമനപ്പടി ഭാഗത്ത് അപകടം പതിവാണെന്ന് നാട്ടുകാർ പറഞ്ഞു.

വോട്ടര്‍ പട്ടിക ശുദ്ധീകരണ നടപടികൾ ആരംഭിച്ചു

പത്തനംതിട്ട: നിയമസഭാ തെരഞ്ഞെടുപ്പിനു മുന്നോടിയായി വോട്ടര്‍ പട്ടികയുടെ ശുദ്ധീകരണവുമായി ബന്ധപ്പെട്ട പ്രവര്‍ത്തനത്തില്‍ രാഷ്‌ട്രീയ പാര്‍ട്ടികളുടെ പൂര്‍ണ സഹകരണം ഉണ്ടാകണമെന്ന് ജില്ലാ കളക്ടര്‍ എസ്. പ്രേം കൃഷ്ണന്‍ അറിയിച്ചു. പട്ടികയിലുള്ള മരണപ്പെട്ടവരെയും മണ്ഡലങ്ങളില്‍നിന്ന് മാറിയവരെയും കണ്ടെത്തി ഒഴിവാക്കുന്നതിന് രാഷ്‌ട്രീയ പാര്‍ട്ടികള്‍ സഹകരിക്കണം. പുതിയ വോട്ടര്‍മാരെ പട്ടികയില്‍ ചേര്‍ക്കുന്നതിന് ബൂത്ത് ലെവല്‍ ഏജന്‍റുമാരുടെ പൂര്‍ണ സഹകരണം ഉണ്ടാകണം. ജില്ലയിലെ അഞ്ച് മണ്ഡലങ്ങളിലും ബൂത്ത് ലെവല്‍ ഏജന്‍റുമാരുടെ നിയമനം പൂര്‍ത്തിയാക്കി രാഷ്‌ട്രീയ പാര്‍ട്ടികള്‍ പട്ടിക ബന്ധപ്പെട്ട മണ്ഡലങ്ങളിലെ ഇലക്ടറല്‍ രജിസ്‌ട്രേഷന്‍ ഓഫീസര്‍മാര്‍ക്ക് കൈമാറണം. ഇരട്ടിപ്പ് കേസുകള്‍ ബൂത്ത് ലെവല്‍ ഏജന്‍റുമാര്‍ ബിഎല്‍ഒമാരെ അറിയിച്ച് ഒഴിവാക്കിയെന്ന് ഉറപ്പാക്കണമെന്നും കളക്ടര്‍ അറിയിച്ചു.മരണപ്പെട്ടവര്‍, സ്ഥലംമാറിപ്പോയവര്‍ എന്നീ കേസുകള്‍ സമയബന്ധിതമായി നീക്കം ചെയ്യുന്നതിന് ബന്ധപ്പെട്ട ഇലക്ടറല്‍ രജിസ്‌ട്രേഷന്‍ ഓഫീസര്‍മാര്‍ നടപടി സ്വീകരിക്കണമെന്നും കളക്ടര്‍ ആവശ്യപ്പെട്ടു. രാഷ്‌ട്രീയ പാര്‍ട്ടി പ്രതിനിധികളായ ആര്‍. അജയകുമാര്‍, എ. അബ്ദുള്‍ ഹാരിസ്, ആര്‍. ജയകൃഷ്ണന്‍, വിപിന്‍ വാസുദേവ്, തോമസ് ജോസഫ്, ഏബ്രഹാം വാഴയില്‍, ബി. ഷാഹുല്‍ ഹമീദ്, ദീപു ഉമ്മന്‍, തെരഞ്ഞെടുപ്പ് ഡെപ്യൂട്ടി കളക്ടര്‍ ബീന എസ്. ഹനീഫ്, ഇലക്ടറല്‍ രജിസ്‌ട്രേഷന്‍ ഓഫീസര്‍മാരായ സുമിത്ത് കുമാര്‍ താക്കൂര്‍, മിനി തോമസ് എന്നിവര്‍ പങ്കെടുത്തു.

സമ്പൂർണ അലർജി, ആസ്മ അലർജി ക്യാന്പ്

കോഴഞ്ചേരി: ആസ്മ അലർജി ബുദ്ധിമുട്ടുള്ളവർക്ക് സമഗ്ര ചികിത്സയും പരിശോധനകളും ഉൾപ്പെടുത്തിയ സന്പൂർണ അലർജി ആസ്മ മെഗാ ക്യാമ്പ് നാലിനു കോഴഞ്ചേരി മുത്തൂറ്റ് ആശുപത്രിയിൽ സംഘടിപ്പിക്കും. രാവിലെ ഒന്പതു മുതൽ ഉച്ചകഴിഞ്ഞ് മൂന്നുവരെ നടക്കുന്ന ക്യാന്പിൽ 499 രൂപ നിരക്കിൽ പൾമോണോളജി ഡോക്ടർ കൺസൾട്ടേഷൻ, പൾമണറി ഫംഗ്ഷൻ ടെസ്റ്റ് (പിഎഫ്ടി), സിബിസി, എഇസി, ചെസ്റ്റ് എക്സ് - റേ, എഫ്ഒടി, ഐജിഇ തുടങ്ങിയ സേവനങ്ങൾ ലഭ്യമാകും. മുൻകൂട്ടി രജിസ്റ്റർ ചെയ്യുന്നവർക്ക് ക്യാമ്പിൽ പങ്കെടുക്കാം. ഫോൺ: 99461 60000

ചന്ദനപ്പള്ളി ഓർത്തഡോക്സ് പള്ളി പെരുന്നാൾ ഇന്നു മുതൽ

എബിസി പ്രവർത്തനം നിലച്ചിട്ടു രണ്ടു വർഷം; തെരുവുനായ്ക്കളെ പിടികൂടാനാകുന്നില്ല

ഹയർ സെക്കൻഡറി ഡയറക്ടറേറ്റ് പുനഃസ്ഥാപിക്കണം: ആന്‍റോ ആന്‍റണി

ചരൽക്കുന്ന്: കുട്ടികൾക്കും അധ്യാപകർക്കുംവേണ്ടി ഗുണപരമായി പ്രവർത്തിച്ചിരുന്ന ഹയർ സെക്കൻഡറി ഡയറക്ടറേറ്റ് പുനഃസ്ഥാപിക്കണമെന്ന് ആന്‍റോ ആന്‍റണി എംപി. കേരള ഹയർ സെക്കൻഡറി ടീച്ചേഴ്സ് യൂണിയൻ സംസ്ഥാന നേതൃ ക്യാന്പ് ചരൽക്കുന്നിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഹയർ സെക്കൻഡറി കുട്ടികളുടെ അക്കാദമിക വിഷയങ്ങളിലും സ്കൂളുകൾ കേന്ദ്രീകരിച്ച് നടക്കുന്ന അക്രമങ്ങളും ലഹരിവ്യാപാനവും തടയാനും അച്ചടക്കം നിലനിർത്തി വിദ്യാലയങ്ങളെ മികവിന്‍റെ കേന്ദ്രങ്ങളാക്കുന്നതിനും വിദ്യാഭ്യാസ വകുപ്പിന് കഴിയുന്നില്ല. അധ്യാപകർക്ക് ആത്മവിശ്വാസത്തോടെ വിദ്യാലയങ്ങളിൽ പ്രവർത്തിക്കുന്നതിനുള്ള അന്തരീക്ഷം രൂപപ്പെടണമെന്നും എംപി അഭിപ്രയാപ്പെട്ടു. കുട്ടികളുടെ എണ്ണക്കുറവിന്‍റെ പേരിൽ ഹയർ സെക്കൻഡറി ബാച്ചുകളും അധ്യാപക തസ്തികകളും ഇല്ലാതാക്കുന്നത് അനുവദിക്കാനാവില്ലെന്നും പൊതുവിദ്യാലയങ്ങളിൽ പഠിക്കുന്നതിനുള്ള അവകാശം കുട്ടികൾക്കുണ്ടെന്നും അദ്ദേഹം പറഞ്ഞു. സംസ്ഥാന പ്രസിഡന്‍റ് കെ.ടി. അബ്ദുൽ ലത്തീഫ് അധ്യക്ഷത വഹിച്ചു. മുസ് ലിം ലീഗ് ജില്ലാ പ്രസിഡന്‍റ് സമദ് പത്തനംതിട്ട, ഒ. ഷൗക്കത്തലി, നിസർ ചേലേരി, വി.കെ. അബ്ദുറഹിമാൻ തുടങ്ങിയവർ പ്രസംഗിച്ചു.

അവധിക്കാല ഫുട്‌ബോൾ പരിശീലനം

നിരണം: പത്തനംതിട്ട ഫുട്‌ബോൾ അസോസിയേഷന്‍റെ നേതൃത്വത്തിൽ നിരണം സെന്‍റ് മേരീസ് ഗ്രൗണ്ടിൽ വിദ്യാർഥികൾക്കായി ഫുട്ബോൾ പരിശീലന ക്യാമ്പ് ആരംഭിച്ചു. നിരണം സെന്‍റ് മേരീസ് ഹയർ സെക്കൻഡറി സ്കൂ‌ളും മാർത്തോമൻ വിദ്യാപീഠം പബ്ലിക് സ്കൂളും സംയുക്തമായാണ് അവധിക്കാല ഫുട്ബോൾ പരിശീലന ക്യാന്പ് സംഘടിപ്പിച്ചിരിക്കുന്നത്. നിരണം ഗ്രാമപഞ്ചായത്ത് പ്രസിഡന്‍റ് അലക്സ് പുത്തുപ്പള്ളിൽ ഉദ്ഘാടനം ചെയ്തു. സെന്‍റ് മേരീസ് സ്കൂ‌ൾ മാനേജർ വർഗീസ് എം. അലക്സ് അധ്യക്ഷത വഹിച്ചു. നിരണം വലിയ പള്ളി ട്രസ്റ്റി മോഹൻ എം. ജോർജ്, ദേശീയ ഫുട്ബോൾ കോച്ച് റെജിനോൾഡ് വർഗീസ്, ജില്ലാ ഫുട്ബോൾ അസോസിയേഷൻ പ്രസിഡന്‍റ് ജോളി, സ്കൂൾ പ്രിൻസിപ്പൽ വി.എ. ബെനു ഐപ്പ്, എബി നിലവറ, കെ.എം. ജോൺ, ജിജു വൈക്കത്തുശേരി, റെജി കണിയാംകണ്ടത്തിൽ, വിശ്വനാഥൻ സാബു പേരയിക്കോടത്ത്, ദീപു കുര്യാക്കോസ്, ഷാരോൺ എന്നിവർ പ്രസഗിച്ചു.

ഡോ. റാണി മരിയ തോമസ് അസംപ്ഷന്‍ കോളജ് പ്രിന്‍സിപ്പല്‍

ചങ്ങനാശേരി: അസംപ്ഷന്‍ കോളജിന്‍റെ 18-ാമത്തെ പ്രിന്‍സിപ്പലായി ഡോ. റാണി മരിയ തോമസ് നിയമിതയായി. റവ.ഡോ. തോമസ് പാറത്തറ പ്രിന്‍സിപ്പല്‍ സ്ഥാനത്തുനിന്നു വിരമിച്ചതിനെത്തുടര്‍ന്നാണ് പുതിയ നിയമനം. കോളജിലെ സാമ്പത്തികശാസ്ത്ര വിഭാഗം മേധാവിയായിരുന്ന ഡോ. റാണി മരിയ കഴിഞ്ഞ രണ്ടുവര്‍ഷക്കാലായി വൈസ് പ്രിന്‍സിപ്പലായി സേവനം അനുഷ്ഠിച്ചുവരികയായിരുന്നു. 1995ല്‍ അധ്യാപികയായി നിയമിതയായ ഇവര്‍ ഐക്യുഎസി കോ-ഓര്‍ഡിനേറ്റര്‍, മാനേജിംഗ്‌ ബോര്‍ഡംഗം, ഗവേണിംഗ്‌ ബോഡിയംഗം, ഓള്‍ കേരള വിമന്‍സെല്‍ കോഓര്‍ഡിനേറ്റര്‍ തുടങ്ങിയനിലകളില്‍ പ്രവര്‍ത്തിച്ചിട്ടുണ്ട്. അസംപ്ഷന്‍ വിദ്യാര്‍ഥിയായിരുന്ന റാണി 1992ല്‍ എംജി സര്‍വകലാശാലയില്‍നിന്നും ബിഎ ഇക്കണോമിക്‌സിന് ഒന്നാംറാങ്കും എസ്ബി കോളജില്‍ വിദ്യാര്‍ഥിയായിരിക്കെ 1994ല്‍ എംഎ ഇക്കണോമിക്‌സിന് രണ്ടാംറാങ്കും കരസ്ഥമാക്കി. ഹൈദരാബാദ് സെന്‍ട്രല്‍ സര്‍വകലാശാലയില്‍നിന്നും എംഫിലും മുംബൈ ഐഐടിയില്‍നിന്നു പിഎച്ച്ഡിയും നേടിയിട്ടുണ്ട്. എസ്ബി കോളജ് റിട്ടയേർഡ് പ്രഫസർ തോമസ് കണയംപ്ലാവന്‍-ഓമന ദമ്പതികളുടെ മകളും വീല്‌ഹെമ്‌സണ്‍ ഷിപ്പ് മാനേജ്‌മെന്‍റ് പ്രൊക്യുര്‍മെന്‍റ് ഡിവിഷന്‍ മുന്‍ റീജണല്‍ഹെഡ് ആഞ്ഞിലിപ്പറമ്പില്‍ ജിജോ കുര്യാക്കോസിന്‍റെ ഭാര്യയുമാണ്.

ശൗചാലയ മാലിന്യവുമായെത്തിയ ടാങ്കർ ലോറി പിടികൂടി

അടൂർ: ഏനാത്ത് മണ്ണടി ദളവ ജംഗ്ഷൻ ഭാഗത്ത് ശൗചാലയ മാലിന്യം നിക്ഷേപിക്കാൻ വന്ന ടാങ്കർ ലോറി പോലീസ് പിടികൂടി. ഇന്നലെ പുലർച്ചെ 2.15നാണ് ഏനാത്ത് പോലീസ് നൈറ്റ്‌ പട്രോളിംഗ് സംഘം ടാങ്കർ കണ്ടത്. ഇതിനു മുന്നിൽ ഒരു കാർ കടന്നുപോയിരുന്നു. പിന്നാലെ അതിവേഗത്തിൽ ടാങ്കർ കടന്നുപോയപ്പോൾ സംശയം തോന്നിയ പോലീസ് പിന്തുടരുകയായിരുന്നു. പോലീസിനെ കണ്ട് അവിടെനിന്ന് അമിതവേത്തിൽ പാഞ്ഞ ടാങ്കറിനെ സാഹസികമായി പിന്തുടർന്നാണ് പിടികൂടിയത്. മൂന്നര കിലോമീറ്ററോളം പിന്തുടർന്ന് സഞ്ചരിച്ച ശേഷം ഏനാത്ത് മിസ്പാ ജംഗ്ഷനിൽ വാഹനം പോലീസ് പിടികൂടി. ഇതിനിടെ, പട്രോളിംഗ് സംഘം പത്തനംതിട്ട പോലീസ് കൺട്രോൾ റൂമിമായി ബന്ധപ്പെട്ട് വിവരം ധരിപ്പിച്ചു. റോഡ് അപകടങ്ങൾ കുറയ്ക്കാനുള്ള പട്രോളിംഗ് സംഘ(ബീറ്റ)ത്തിന്‍റെ സഹായം തേടി. എഎസ്ഐ സാജൻ ഫിലിപ്പ് , സിപിഒ അനീഷ് എന്നിവരായിരുന്നു ഏനാത്ത് പോലീസ് സംഘത്തിൽ ഉണ്ടായിരുന്നത്. ബീറ്റ പട്രോളിംഗ് സംഘത്തിന്‍റെ വാഹനം മിസ്പ ജംഗ്ഷനിലെത്തി ടാങ്കറിനു കുറുകെ ഇട്ട് തടഞ്ഞു പിടികൂടി. തുടർന്ന് ടാങ്കർ പോലിസ് സ്റ്റേഷനിലെത്തിച്ചു. വാഹനത്തിലുണ്ടായിരുന്ന അടൂർ, പന്നിവിഴ ശ്രീജിത്തിനെ (27 ) കസ്റ്റഡിയിലെടുത്തു. ഡ്രൈവറും മറ്റൊരാളും ഓടിരക്ഷപ്പെട്ടു. മണ്ണടി മുടിപ്പുര റോഡരികിലെ നീർച്ചാലിലും കൃഷിയിടത്തിലും കക്കൂസ് മാലിന്യം തള്ളിയതിനു രണ്ട് വാഹനങ്ങൾ കഴിഞ്ഞയിടെ ഏനാത്ത് പോലീസ് പിടികൂടിയിരുന്നു. ശുചിമുറി മാലിന്യം കൊണ്ടുവന്ന ടാങ്കർ ലോറിയും അകമ്പടിവന്ന ജീപ്പുമായിരുന്നു അന്ന് പിടിച്ചെടുത്തത്. സിസിടിവി ദൃശ്യങ്ങൾ പരിശോധിച്ചും മറ്റുമാണ് പോലീസ് അന്ന് വാഹനങ്ങൾ പിടികൂടിയത്. തുടർന്ന് ഏനാത്ത് പോലീസ് പട്രോളിംഗ് കൂടുതൽ ശക്തമാക്കിയിരുന്നു. അന്നത്തെ പോലീസ് സംഘത്തിലും സാജൻ ഫിലിപ്പ് ഉണ്ടായിരുന്നു.

നഗരസഭാ കൗൺസിലർമാർ ജില്ലാ പഞ്ചായത്ത് ഓഫീസ് ഉപരോധിച്ചു

പത്തനംതിട്ട: പന്തളം നഗരസഭ സമർപ്പിക്കുന്ന പദ്ധതികളുടെ ഡിപിസി അംഗീകാരം നൽകാതെ നഗരസഭാ ഭരണം അട്ടിമറിക്കുന്നതിന് ശ്രമിക്കുന്ന ഇടതുപക്ഷ രാഷ്‌ട്രീയത്തിന് ഓശാന പാടുന്ന ജില്ലാ പഞ്ചായത്ത് നേതൃത്വത്തിന്‍റെ നടപിടിക്കെതിരേ പന്തളം നഗരസഭാ കൗൺസിലർമാർ ജില്ലാ പഞ്ചായത്ത് ഓഫീസ് ഉപരോധിച്ചു. ഉപരോധ സമരത്തിന് ഐക്യദാർഢ്യം പ്രഖ്യാപിച്ചുകൊണ്ട് ബിജെപി ജില്ലാ പ്രസിഡന്‍റ് വി.എ. സൂരജ് പ്രസംഗിച്ചു. ജനറൽ സെക്രട്ടറി കെ. ബിനു മോൻ, പ്രദീപ് അയിരുർ, അജിത്ത് പുല്ലാട്, ജില്ലാ ട്രഷറർ ഗോപാലകൃഷ്ണൻ കർത്ത, കൗൺസിലർമാർ എന്നിവർ നേതൃത്വം നൽകി.

കുറ്റൂരിൽ വികസന സ്തംഭനം; യുഡിഎഫ് ധർണ

തിരുവല്ല: കുറ്റൂർ ഗ്രാമപഞ്ചായത്തിൽ സിപിഎം നേതൃത്വത്തിലുള്ള ഭരണകക്ഷി അംഗങ്ങളും ഉദ്യോഗസ്ഥരും തമ്മിലുള്ള ശീതസമരം വികസനത്തെ പിന്നോട്ട് അടിച്ചതായി യുഡിഎഫ് ജില്ലാ ചെയർമാനും കേരള കോൺഗ്രസ് ജില്ലാ പ്രസിഡന്‍റുമായ വർഗീസ് മാമ്മൻ. കുറ്റൂർ ഗ്രാമപഞ്ചായത്തിലെ ഭരണസ്തംഭനത്തിനെതിരേ യുഡിഎഫ് മണ്ഡലം കമ്മിറ്റിയുടെ നേതൃത്വത്തിൽ നടന്ന ധർണ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.ഗ്രാമീണ റോഡുകൾ അടക്കം തകർന്നു കിടന്നിട്ടും ജനകീയ ആസൂത്രണ പദ്ധതി പ്രകാരം സാധാരണക്കാർക്ക് ലഭിക്കേണ്ട പല ആനുകൂല്യങ്ങളും ലഭിക്കാതെ പോയതിനുപിന്നിൽ ഇപ്പോൾ പരസ്യമായ ഉദ്യോഗസ്ഥ -ഭരണകക്ഷി തർക്ക ഭാഗമാണെന്ന് വർഗീസ് മാമ്മൻ പറഞ്ഞു. മണ്ഡലം ചെയർമാൻ ജിനു തോമ്പുംകുഴി അധ്യക്ഷത വഹിച്ചു. യുഡിഎഫ് നിയോജകമണ്ഡലം ചെയർമാൻ ലാലു തോമസ്, കോൺഗ്രസ് ബ്ലോക്ക് പ്രസിഡന്‍റ് ഈപ്പൻ കുര്യൻ, ഡിസിസി ജനറൽ സെക്രട്ടറി ഏബ്രഹാം കുന്നുകണ്ടത്തിൽ, നിർവാഹക സമിതിയംഗം ആർ. ജയകുമാർ, യൂത്ത് ഫ്രണ്ട് സംസ്ഥാന ജനറൽ സെക്രട്ടറി വി.ആർ. രാജേഷ്, ജില്ലാ പ്രസിഡന്‍റ് ബിനു കുരുവിള തുടങ്ങിയവർ പ്രസംഗിച്ചു.

വീട്ടമ്മയെ ഉപദ്രവിച്ച കേസിലെ പ്രതിക്ക് തടവ്

പത്തനംതിട്ട: വീട്ടമ്മയെ ദേഹോപദ്രവം ഏൽപ്പിക്കുകയും അപമാനിക്കുകയും ചെയ്ത കേസിൽ പ്രതിക്ക് ഒന്നര വർഷത്തെ തടവും പിഴയും. കൊല്ലം പത്തനാപുരം പുന്നല ചാചിപ്പുന്ന എഞ്ചൂർ തെക്കേക്കര ലക്ഷംവീട്ടിൽ നവാസി(ഷൈജു-40)നെയാണ് പത്തനംതിട്ട ജുഡീഷൽ ഒന്നാം ക്ലാസ് മജിസ്ട്രേട്ട് കോടതി രണ്ട് പി. അഞ്ജലി ദേവി ശിക്ഷിച്ചത്. കൊടുമൺ പോലീസ് 2018ൽ രജിസ്റ്റർ ചെയ്ത് അന്വേഷണം നടത്തി കുറ്റപത്രം സമർപ്പിച്ച കേസിലാണ് വിധി. മുടിയൂർക്കോണം സ്വദേശിനിയെ വീട്ടിലേക്ക് നടന്നു പോകവേ 2018 മേയ് 20ന് രാത്രി ഏഴിനു പിന്നിലൂടെ വന്ന പ്രതി കടന്നുപിടിച്ച് ഉപദ്രവിക്കുകയായിരുന്നു. രക്ഷപ്പെടാൻ ശ്രമിച്ചപ്പോൾ തള്ളിയിടുകയും വസ്ത്രം വലിച്ചുകീറുകയും വായ് പൊത്തിപ്പിടിച്ച് ഉപദ്രവിക്കുകയും ചെയ്തു. അന്നത്തെ കൊടുമൺ എസ്ഐ ആയിരുന്ന വൈ. തോമസ് കേസ് രജിസ്റ്റർ ചെയ്ത് അന്വേഷണം നടത്തി പ്രതിയെ പിടികൂടുകയും അന്വേഷണം പൂർത്തിയാക്കി കോടതിയിൽ കുറ്റപത്രം സമർപ്പിക്കുകയും ചെയ്തു. ബലാത്സംഗശ്രമത്തിനും ദേഹോപദ്രവം ഏൽപ്പിച്ചതിനുമായിരുന്നു കേസെടുത്തത്.

ജീവനക്കാരെ സർക്കാർ കൊള്ളയടിക്കുന്നു: സതീഷ് കൊച്ചുപറന്പിൽ

പത്തനംതിട്ട: ആനുകൂല്യങ്ങൾ തുടർച്ചയായി നിഷേധിച്ച് ഇടതുപക്ഷ സർക്കാർ ജീവനക്കാരെ കൊള്ളയടിക്കുകയാണെന്ന് ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പിൽ. ടൗൺ ഹാളിൽ നടന്ന എൻജിഒ അസോസിയേഷൻ ജില്ലാ കൺവൻഷൻ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഇടതുപക്ഷ ഭരണത്തിൽ ജീവനക്കാരും ജനങ്ങളും ഒരേപോലെ ദുരിതത്തിൽ ആണെന്നും അദ്ദേഹം പറഞ്ഞു. പി.എസ്. മനോജ്കുമാർ അനുസ്മരണ യോഗം ഉദ്ഘാടനം ചെയ്തു. എൻഡോവ്മെന്‍റ് വിതരണം കെപിസിസി ജനറൽ സെക്രട്ടറി പഴകുളം മധു ഉദ്ഘാടനം ചെയ്തു.

കാറ്റിലും മഴയിലും വ്യാപക നാശനഷ്ടം

പത്തനംതിട്ട: ഇന്നലെ ഉച്ചകഴിഞ്ഞുണ്ടായ കാറ്റിലും മഴയിലും പത്തനംതിട്ടയിലും പരിസരങ്ങളിലും വ്യാപക നാശനഷ്ടം. പത്തനംതിട്ട ടൗൺ പ്രദേശത്ത് നിരവധി സ്ഥലങ്ങളിൽ മരങ്ങൾ കടപുഴകി. പത്തനംതിട്ട മിനി സിവിൽ സ്റ്റേഷനു പിന്നിലെ മരം കടപുഴകി കോടതി കെട്ടിടത്തിനു പിന്നിലായി പതിച്ചു. വീടുകൾക്കും കെട്ടിടങ്ങൾക്കും മുകളിൽ മരം വീണു. വൈദ്യുതി, ടെലിഫോൺ നെറ്റ് വർക്ക് ബന്ധങ്ങളും വ്യാപകമായി തകരാറിലായി. പ്രമാടത്തെ നിരവധി വീടുകൾ‌ക്കു മുകളിലേക്ക് മരം കടപുഴകി. മരങ്ങൾ വീണ് വൈദ്യുത ബന്ധം തകരാറിലാണ്. വൈദ്യുത പോസ്റ്റുകളും കന്പികളും വ്യാപകമായി തകർന്നു വീണു. മഴയ്ക്കൊപ്പം വീശിയടിച്ച കാറ്റ് പലയിടങ്ങളിലും ഭീതിജനകമായ അന്തരീക്ഷമാണ് ഉണ്ടാക്കിയത്. മരങ്ങൾ കടപുഴകി ഗ്രാമീണ ‌റോഡുകളിലടക്കം ഗതാഗതവും മുടങ്ങി.

കുടുംബശ്രീ മൈക്രോ എന്‍റർപ്രൈസസ് പുരസ്കാര വിതരണം മൂന്നിന്

പത്തനംതിട്ട : കുടുംബശ്രീയും കേരളവിഷനും സംയുക്തമായി നല്കുന്ന കുടുംബശ്രീ മൈക്രോ എന്‍റർപ്രൈസസ് അവാർഡ്‌ ജില്ലാതല വിതരണം മൂന്നിന് അടൂർ ഗീതം കൺവൻഷൻ സെന്‍ററിൽ നടക്കുമെന്ന് ഭാരവാഹികൾ പത്രസമ്മേളനത്തിൽ പറഞ്ഞു. വൈകുന്നേരം അഞ്ചിന് മന്ത്രി വീണാ ജോർജ് ഉദ്ഘാടനം നിർവഹിക്കും. നിയമസഭാ ഡെപ്യൂട്ടി സ്പീക്കർ ചിറ്റയം ഗോപകുമാർ അധ്യക്ഷത വഹിക്കും. എംഎൽഎമാരായ പ്രമോദ് നാരായൺ, കെ.യു. ജനീഷ് കുമാർ, കുടുംബശ്രീമിഷൻ സ്റ്റേറ്റ് എക്സിക്യൂട്ടിവ് ഡയറക്ടർ എച്ച്. ദിനേശൻ , കുടുംബശ്രീ ജില്ലാ കോ-ഓർഡിനേറ്റർ എസ്. ആദില എന്നിവർ പങ്കെടുക്കും. ജില്ലയിലെ ഏറ്റവും മികച്ച10 മൈക്രോ യൂണിറ്റ് സംരംഭങ്ങൾക്കാണ് പുരസ്കാരം നൽകുന്നത്. സിഒഎ ജില്ലാ പ്രസിഡന്‍റ് ബിജു എം. നായർ, സെക്രട്ടറി സുബാഷ് ബാബു, അടൂർ മേഖലാ സെക്രട്ടറി സുരേഷ് ബാബു, ജ്യേതിഷ്കുമാർ എന്നിവർ പത്രസമ്മേളനത്തിൽ പങ്കെടുത്തു.

കേരള കോൺഗ്രസ് ജില്ലാ ക്യാന്പ് മൂന്നിന്

പത്തനംതിട്ട: കേരള കോൺഗ്രസ് ജില്ലാ ക്യാന്പ് മൂന്നിന് മൈലപ്ര വയല ഇടിക്കുള നഗറിൽ നടക്കും. തദ്ദേശസ്ഥാപന തെരഞ്ഞെടുപ്പിനു മുന്നോടിയായാണ് ക്യാമ്പ്. രാവിലെ 9.30ന് ജില്ലാ പ്രസിഡന്‍റ് വർഗീസ് മാമ്മന്‍റെ അധ്യക്ഷതയിൽ കൂടുന്ന സമ്മേളനം കേരള കോൺഗ്രസ് ചെയർമാൻ പി.ജെ. ജോസഫ് എംഎൽഎ ഉദ്ഘാടനം ചെയ്യും. വിവിധ വിഷയങ്ങളിൽ സംസ്ഥാന-ജില്ലാനേതാക്കൾ പ്രബന്ധങ്ങൾ അവതരിപ്പിക്കും. പി.സി. തോമസ്, മോൻസ് ജോസഫ് എംഎൽഎ, ജോയി ഏബ്രഹാം, ഫ്രാൻസിസ് ജോർജ് എംപി, തോമസ് ഉണ്ണിയാടൻ, അപു ജോൺ ജോസഫ് തുടങ്ങിവർ വിഷയങ്ങൾ അവതരിപ്പിക്കും. സംസ്ഥാന ഭാരവാഹികളായ ജോസഫ് എം. പുതുശേരി, പ്രഫ. ഡി.കെ. ജോൺ, ജോൺ കെ. മാത്യൂസ്, ഏബ്രഹാം കലമണ്ണിൽ, കുഞ്ഞുകോശി പോൾ, ജോർജ് കുന്നപ്പുഴ തുടങ്ങിയവർ പ്രസംഗിക്കും. ജില്ലാ പ്രസിഡന്‍റ് വർഗീസ് മാമ്മൻ, ജനറൽ സെക്രട്ടറി ഷാജൻ മാത്യു, നിയോജക മണ്ഡലം പ്രസിഡന്‍റ് ദീപു ഉമ്മൻ, ടി. ഏബ്രഹാം എന്നിവർ പത്രസമ്മേളനത്തിൽ പങ്കെടുത്തു.

റെഡ് ക്രോസ് ദിനാചരണം എട്ടിന്

പത്തനംതിട്ട: റെഡ് ക്രോസ് സ്ഥാപകൻ ജീൻ ഹെൻട്രി ഡുണാന്‍റിന്‍റെ ജന്മദിനം റെഡ് ക്രോസ്ദിനമായി വിവിധ പരിപാടികളോടെ എട്ടിന് ആചരിക്കും. ക്ഷയരോഗ നിർമാർജനത്തിന്‍റെ ഭാഗമായി ജില്ലയിൽ ചികിത്സയിൽ കഴിയുന്ന രോഗികൾക്ക് അന്നേദിവസം രാവിലെ പോഷകാഹാര കിറ്റുകൾ നോഡൽ ഓഫീസർ ഡോ. നിരൻ ബാബുവിന് കൈമാറും. തുടർന്നുവരുന്ന ആറു മാസങ്ങളിലേക്ക് പോഷകാഹാര കിറ്റുകൾ വിതരണം ചെയ്യും. സമ്മേളനം ജില്ലാ കളക്ടർ എസ്. പ്രേം കൃഷ്ണൻ ഉദ്ഘാടനം ചെയ്യും. ജില്ലയിലെ റെഡ് ക്രോസ് ഹോം നഴ്സുമാർക്ക് രോഗീ പരിചരണം സംബന്ധിച്ച ക്ലാസുകൾ ഡോ. റോജി പി. ഉമ്മൻ നയിക്കും. റെഡ് ക്രോസ് സൊസൈറ്റി ആരംഭിക്കുന്ന ഫസ്റ്റ് എയ്ഡ് പരിശീലന കോഴ്സിന്‍റെ ഫ്ലാഗ് ഓഫ് സംസ്ഥാന സമിതിയംഗം സുനിൽ മാത്യു വള്ളക്കാലിൽ നടത്തും. ചെയർപേഴ്സൺ വത്സമ്മ സുകുമാരൻ അധ്യക്ഷത വഹിക്കും. പരിപാടികളുടെ വിജയത്തിനായി വിപുലമായ കമ്മിറ്റികൾ രൂപീകരിച്ചതായി ജില്ലാ സെക്രട്ടറി പി.കെ. ജോസഫ് അറിയിച്ചു.

തിരുവല്ല അതിഭദ്രാസന ദിനാചരണവും മെത്രാപ്പോലീത്തയുടെ നാമഹേതുക തിരുനാളും

തിരുവല്ല: മലങ്കര കത്തോലിക്കാ സഭ തിരുവല്ല അതിഭദ്രാസന ദിനവും അതിഭദ്രാസനാധ്യക്ഷന്‍റെ നാമഹേതുക തിരുനാളും ദൈവദാസൻ മാർ ഇവാനിയോസ് മെത്രാപ്പോലീത്തയുടെ മെത്രാഭിഷേക ശതാബ്ദിയും നാളെ തിരുവല്ല സെന്‍റ് ജോൺസ് മെത്രാപ്പോലീത്തൻ കത്തീഡ്രലിൽ നടക്കും. രാവിലെ 6.30ന് ആർച്ച്ബിഷപ് ഡോ. തോമസ് മാർ കൂറിലോസ് മെത്രാപ്പോലീത്തയുടെ മുഖ്യ കാർമികത്വത്തിലും അതിരൂപതയിലെ വൈദികരുടെ സഹ കാർമികത്വത്തിലും സമൂഹ ബലി. തുടർന്ന് ആരംഭിക്കുന്ന പൊതുസമ്മേളനത്തിൽ വിവിധ മേഖലകളിൽ അംഗീകാരം നേടിയവർക്ക് ആദരവ് നൽകുന്നതാണ്. അൽവീന മരിയ, റോബിൻ റോയി, ലെനി പാക്കാനിക്കുഴി എന്നിവർ ആദരം ഏറ്റുവാങ്ങും. ഇവാനിയൻ ഭവന നിർമാണ പദ്ധതിയുടെ രണ്ടാം ഘട്ടത്തിന്‍റെ ഉദ്ഘാടനം ആർച്ച്ബിഷപ് നിർവഹിക്കും. ഇവാനിയൻ ഭവന നിർമാണ പദ്ധതിയിൽ ആദ്യഘട്ടത്തിൽ ഒരു വർഷം കൊണ്ട് 126 വീടുകൾ അതി ഭദ്രാസനത്തിന്‍റെ വിവിധ വൈദിക മേഖലകളിലായി നിർമിച്ചു. തിരുവല്ല അതിരൂപതയുടെ പ്രസ്ബറ്റിറൽ കൗൺസിലിന്‍റെ ഉദ്ഘാടനവും യോഗത്തിൽ നടക്കും. സമ്മേളനത്തിനു ശേഷം തിരുവല്ല അതിരൂപത പ്രീസ്റ്റ്സ് വെൽഫയർ അസോസിയേഷന്‍റെ സമ്മേളനം തിരുവല്ല സെന്‍റ് ജോൺസ് ഓഡിറ്റോറിയത്തിൽ ചേരും. അതിരൂപത മുഖ്യ വികാരി ജനറാൾ റവ. ഡോ. ഐസക് പറപ്പള്ളിൽ, ഫാ. വർഗീസ് മരുതൂർ, ഫാ. ജോസ് മണ്ണൂർ കിഴക്കേതിൽ, ഫാ. മാത്യു പുനക്കുളം, ഡോ. വർഗീസ് ചെറിയാൻ തുടങ്ങിയവർ നേതൃത്വം നൽകും.

നൂറുമേനി ഫൊറോനാതല മത്സരം 11ന്

വരു, കാണൂ... ചെത്തിപ്പുഴയിലെ ഫിയാത്ത് മിഷന്‍ അന്തര്‍ദേശീയ കോണ്‍ഗ്രസ്

ചങ്ങനാശേരി: ഫിയാത്ത് മിഷന്‍റെ ആഭിമുഖ്യത്തില്‍ ചെത്തിപ്പുഴ തിരുഹൃദയ ദേവാലയത്തിലും ക്രിസ്തുജ്യോതി കാമ്പസിലുമായി നടക്കുന്ന അന്തര്‍ദേശീയ മിഷന്‍ കോണ്‍ഗ്രസിന്‍റെ മൂന്നാം ദിവസം രാവിലെ ഒമ്പതിന് ഗുഡ്ഗാവ് ആര്‍ച്ച്ബിഷപ് ഡോ. തോമസ് മാര്‍ അന്തോണിയോസ് സീറോ മലങ്കര ക്രമത്തില്‍ ദിവ്യബലിയര്‍പ്പിച്ചു. ഇന്‍ഡോര്‍ രൂപതയുടെ മുന്‍ ബിഷപ് ഡോ. ചാക്കോ തോട്ടുമാരിക്കല്‍, മാവേലിക്കര ബിഷപ് ജോഷ്വാ മാര്‍ ഇഗ്‌നാത്തിയോസ്, ബിഷപ് എമരിറ്റസ് ഡോ. ജോണ്‍ തോമസ് കട്ടറുകുടിയില്‍ എന്നിവര്‍ സഹകാര്‍മികത്വം വഹിച്ചു. ക്രിസ്തുജ്യോതി ഓഡിറ്റോറിയത്തില്‍ മലങ്കര കത്തോലിക്കാ സഭയിലെ മിഷനറിമാര്‍ക്കുവേണ്ടി നടത്തിയ സുവിശേഷ സംഗമം ബിഷപ് തോമസ് മാര്‍ അന്തോണിയോസ് ഉദ്ഘാടനം ചെയ്തു. ബ്രദര്‍ അനി ജോസഫ്, ബ്രദര്‍ സീറ്റ്‌ലി ജോര്‍ജ്, ബഥനി കോണ്‍ഗ്രിഗേഷന്‍ ജനറാള്‍ ഫാ. ഗീവര്‍ഗീസ് കുറ്റിയില്‍ എന്നിവര്‍ പ്രസംഗിച്ചു.

തിരുവല്ലയിൽ വൻ കഞ്ചാവ് വേട്ട; വില്പനയ്ക്കെത്തിച്ച 14 കിലോഗ്രാമുമായി ഒഡീഷ സ്വദേശി പിടിയിൽ

ചട്ടമ്പിസ്വാമി സമാധിദിനം ആചരിച്ചു

പത്തനംതിട്ട: വിദ്യകൊണ്ടും ജ്ഞാനം കൊണ്ടും വിപ്ലവം സൃഷ്ടിച്ച ചട്ടമ്പി സ്വാമികളുടെ 101-ാമത് സമാധിദിനം പത്തനംതിട്ട താലൂക്ക് എൻഎസ്എസ് കരയോഗ യൂണിയന്‍റെ നേതൃത്വത്തിൽ ആചരിച്ചു. യൂണിയൻ മന്ദിരത്തിൽ നടന്ന ചടങ്ങിൽ യൂണിയൻ ചെയർമാനും എൻഎസ്എസ് ഡയറകടർ ബോർഡ് അംഗവുമായ ആർ. ഹരിദാസ് ഇടത്തിട്ട ദിനാചരണം ഉദ്ഘാടനം ചെയ്തു. യൂണിയൻ സെക്രട്ടറി വി. ഷാബു, ഇൻസ്പെക്ടർ രാജേഷ് കുമാർ, യൂണിയൻ കമ്മിറ്റി അംഗങ്ങളായ കെ. സരോജ് കുമാർ, ഗീത സുരേഷ്, അഖിലേഷ് എസ്. കാര്യാട്ട്, പ്രദീപ് കുമാർ തുടങ്ങിയവർ പ്രസംഗിച്ചു.

ലഹരിക്കെതിരേ ഹാൻഡ്ബോൾ താരങ്ങൾ

മല്ലപ്പള്ളി: സമൂഹത്തിൽനിന്നു ലഹരി തുടച്ചുമാറ്റണമെന്ന സന്ദേശവുമായി ഹാൻഡ്ബോൾ പ്രദർശന മത്സരവുമായി ജില്ലയിലെ പുരുഷ, വനിതാ ഹാൻഡ്ബോൾ താരങ്ങൾ. മല്ലപ്പള്ളി പബ്ലിക് സ്റ്റേഡിയത്തിൽ നടന്ന മത്സരം ജില്ലാ ഹാൻഡ് അസോസിയേഷൻ സെക്രട്ടറി കുര്യൻ ചെറിയാൻ ഉദ്ഘാടനം ചെയ്തു. ട്രഷറർ റോയ് വർഗീസ് ഇലവുങ്കൽ, കോച്ച് പി. അനീഷ് മോൻ, മാനേജർ എൽ.ആർ. രഞ്ജിനി, ഇവ സാറ ജേക്കബ് തുടങ്ങിയവർ പ്രസംഗിച്ചു. തുടർന്ന് അമൃത രാജന്‍റെ നേതൃത്വത്തിലുള്ള ടീമും അശ്വിൻ ബിനുവിന്‍റെ നേതൃത്വത്തിലുള്ള ടീമും മത്സരിച്ചു. ഈ ടീമുകളും ഓരോ ഗോൾ നേടി.

കേരള കോൺ.-ബി ജില്ലാ നേതൃയോഗം

പത്തനംതിട്ട: കോന്നി ആനത്താവളത്തിൽ നാലുവയസുകാരന്‍റെ ദാരുണാന്ത്യത്തിനു കാരണമായ സംഭവത്തിൽ കേരള കോൺഗ്രസ്-ബി ജില്ലാ നേതൃയോഗം ദുഃഖം രേഖപ്പെടുത്തി. മരിച്ച അഭിരാമിന്‍റെ കുടുംബത്തിനു നഷ്ടപരിഹാരം നൽകണമെന്നും വിനോദ സഞ്ചാര കേന്ദ്രങ്ങളിൽ സുരക്ഷാ നടപടികൾ ഉറപ്പാക്കണമെന്നും യോഗം ആശ്യപ്പെട്ടു. കെടിയുസി-ബി സംസ്ഥാന പ്രസിഡന്‍റ് വടകോട് മോനച്ചൻ യോഗം ഉദ്ഘാടനം ചെയ്തു. ജില്ലാ പ്രസിഡന്‍റ് മനോജ് മാധവശേരി അധ്യക്ഷത വഹിച്ചു. മുരളീധരന്‍ നായര്‍ കല്ലൂപ്പാറ, സത്യന്‍ കണ്ണങ്കര, ശ്രീകുമാര്‍ ആലക്കാട്ടിൽ, സുരേഷ് ബാബു, സജു അലക്‌സാണ്ടർ, മാഹിന്‍ പത്തനാപുരം, സുലോചനന്‍ കിടങ്ങിൽ, സാംകുട്ടി പാലക്കാമണ്ണില്‍, മാത്യു ഡാനിയേല്‍, പി.സി. സക്കറിയ തുടങ്ങിയവര്‍ പ്രസംഗിച്ചു.

സംയുക്ത ട്രേഡ് യൂണിയന്‍ ജില്ലാ കണ്‍വന്‍ഷന്‍

പത്തനംതിട്ട: കേന്ദ്ര സര്‍ക്കാരിന്‍റെ തൊഴിലാളി ദ്രോഹ, ജനദ്രോഹ നയങ്ങള്‍ക്കെതിരേ മേയ് 20ന് ദേശീയ പണിമുടക്ക് നടക്കുന്നതിനു മുന്നോടിയായി സംയുക്ത ട്രേഡ് യൂണിയന്‍ ജില്ലാ കണ്‍വന്‍ഷന്‍ പത്തനംതിട്ട വൈഎംസിഎ ഹാളില്‍ നടന്നു. സിഐടിയു സംസ്ഥാന വൈസ് പ്രസിഡന്‍റ് എസ്. ജയമോഹന്‍ കണ്‍വന്‍ഷന്‍ ഉദ്ഘാടനം ചെയ്തു. എഐടിയുസി ജില്ലാ പ്രസിഡന്‍റ് എം. മധു അധ്യക്ഷത വഹിച്ചു. സംയുക്ത സമരസമിതി ജനറല്‍ കണ്‍വീനര്‍ കെ.സി. രാജഗോപാലന്‍ തീരുമാനങ്ങള്‍ വിശദീകരിച്ചു. പണിമുടക്കിന്‍റെ പ്രചാരണാര്‍ഥം മേയ് 12ന് സിഐടിയു ദേശീയ വൈസ് പ്രസിഡന്‍റ് ജെ. മേഴ്‌സിക്കുട്ടിയമ്മ ക്യാപ്റ്റനായുള്ള തെക്കന്‍മേഖല ജാഥയ്ക്ക് ജില്ലയില്‍ തിരുവല്ല, റാന്നി പത്തനംതിട്ട, കോന്നി, അടൂര്‍ കേന്ദ്രങ്ങളില്‍ സ്വീകരണം നല്‍കാനും പഞ്ചായത്ത്-മുനിസിപ്പല്‍ കേന്ദ്രങ്ങളില്‍ കാല്‍നട പ്രചാരണ ജാഥ നടത്താനും തീരുമാനിച്ചു.

തിരുവല്ല മുനിസിപ്പൽ ബസ് സ്റ്റാൻഡ് പണികൾ ഇഴയുന്നു

തിരുവല്ല: മുനിസിപ്പൽ ബസ് സ്റ്റാൻഡിന്‍റെ പണികൾ ഇഴയുന്നു. പൊട്ടിപ്പൊളിഞ്ഞു കിടക്കുന്ന ബസ് സ്റ്റാൻഡ് ടാറിംഗ് ജോലികൾക്കായി തറ ഇളക്കിയിട്ടിരിക്കുകയാണ്. കഴിഞ്ഞ മൂന്നാഴ്ചയിലേറെയായി ഈ നിലയിൽ സ്റ്റാൻഡ് കിടക്കുകയാണ്. ബസ് സ്റ്റാൻഡിലേക്ക് ബസുകളുടെ പ്രവേശവും തടഞ്ഞിരിക്കുകയാണ്. ബസുകൾ റോഡിന്‍റെ ഇരു വശങ്ങളിലുമായാണ് നിലവിൽ പാർക്ക് ചെയ്യുന്നത്. ബസുകൾ എവിടെയാണ് കിടക്കുന്നതെന്നറിയാതെ യാത്രക്കാരും ബുദ്ധിമുട്ടിലായി. പ്രത്യേകമായ ഒരു പദ്ധതിയുമില്ലാതെയാണ് നഗരസഭ ബസ് സ്റ്റാൻഡിന്‍റെ പണികൾ ആരംഭിച്ചത്. താത്കാലിക സംവിധാനം ബസുകളുടെ പാർക്കിംഗിനായി നഗരസഭ ഒരുക്കിയിട്ടുമില്ല. ഇക്കാരണത്താൽ ഗതാഗതക്കുരുക്കും യാത്രക്കാർക്ക് ബുദ്ധിമുട്ടും ഏറി. ബസ് സ്റ്റാൻഡിന്‍റെ പണികൾ അടിയന്തരമായി പൂർത്തീകരിക്കണമെന്ന് എൻസിപി-എസ് തിരുവല്ല ബ്ലോക്ക് കമ്മിറ്റി ആവശ്യപ്പെട്ടു. ബ്ലോക്ക് പ്രസിഡന്‍റ് എം.ബി. നൈനാൻ അധ്യക്ഷത വഹിച്ചു.

ഓപ്പറേഷൻ പി ഹണ്ട്: മൊബൈൽ ഫോണുകൾ പിടികൂടി

പത്തനംതിട്ട: നിരന്തരം അശ്ലീല സൈറ്റുകൾ സന്ദർശിക്കുകയും അശ്ലീലദൃശ്യങ്ങൾ കാണുകയും ശേഖരിച്ചുവയ്ക്കുകയും കൈമാറുകയും ചെയ്യുന്നവരെ കേന്ദ്രീകരിച്ച് ജില്ലയിൽ ഓപ്പറേഷൻ പി ഹണ്ട് എന്ന പേരിൽ പോലീസ് പരിശോധന നടന്നു. ജില്ലാ പോലീസ് സൈബർ സെല്ലിന്‍റെയും വിവിധ പോലീസ് സ്റ്റേഷനുകളുടെയും സംയുക്ത നേതൃത്വത്തിലാണ് റെയ്ഡുകൾ നടന്നത്. ഇത്തരത്തിൽ ഉപയോഗിച്ചുവെന്ന് കണ്ടെത്തിയ അഞ്ച് മൊബൈൽ ഫോണുകൾ പിടിച്ചെടുത്തു. തിരുവല്ലയിൽ രണ്ടും ആറന്മുള റാന്നി, കീഴ്‌വായ്പൂര് എന്നിവിടങ്ങളിൽ ഓരോന്നു വീതവുമാണ് പിടിച്ചെടുത്തത്.

മല്ലപ്പള്ളി-ചേലക്കൊന്പ് റോഡ് നിർമാണം: സ്ഥലം ഏറ്റെടുക്കൽ സമയബന്ധിതമാക്കും

തിരുവല്ല: തിരുവല്ല-മല്ലപ്പള്ളി-ചേലക്കൊമ്പ് റോഡ് സ്ഥലമേറ്റെടുപ്പ് നടപടികൾ വേഗത്തിലാക്കുന്നതിന് സമയക്രമം നിശ്ചയിക്കാൻ റവന്യുമന്ത്രി വിളിച്ചുകൂട്ടിയ യോഗത്തിൽ ധാരണ. മന്ത്രി കെ. രാജന്‍റെ അധ്യക്ഷതയിൽ മാത്യു ടി. തോമസ് എംഎൽഎയുടെ സാന്നിധ്യത്തിലാണ് യോഗം ചേർന്നത്. 2016ൽ ഭരണാനുമതി ലഭിച്ചിട്ടും സ്ഥലമെടുപ്പ് നടപടികൾ പൂർത്തീകരിക്കുവാൻ സാധിക്കാത്തതിനാൽ നിർമാണം തുടങ്ങുന്നതിന് സാധിക്കാതിരിക്കുന്ന റോഡിന്‍റെ സ്ഥലമെടുപ്പ് സംബന്ധിച്ചുള്ള നടപടിക്രമങ്ങൾക്ക് യോഗത്തിൽ സമയക്രമം നിശ്ചയിച്ചു നൽകി. ഇതനുസരിച്ച് ഇന്നുതന്നെ സ്ഥലമേറ്റെടുക്കൽ വിജ്ഞാപനത്തിനുള്ള നിർദേശം ജില്ലാ കളക്ടർ സർക്കാരിലേക്ക് സമർപ്പിക്കും. ഇതോടൊപ്പം വിളകളുടെയും വൃക്ഷങ്ങളുടെയും നിർമിതികളുടെയും മൂല്യനിർണയത്തിനായി കൃഷിവകുപ്പ് സോഷ്യൽ ഫോറസ്ട്രി, പൊതുമരാമത്ത് വകുപ്പുകളുടെ യോഗം വിളിക്കും. സർവേയർമാരുടെ അഭാവം നികത്തുന്നതിന് അടിയന്തര നടപടികൾ സ്വീകരിക്കാനും ഡിപിആർ, ബിവിഎസ് എന്നിവ തയാറാക്കുക, അധികമായി ഏറ്റെടുക്കേണ്ട ഭൂമിയുടെ സാമൂഹികാഘാത പഠനം മേയിൽ ആരംഭിക്കുക, കൂട്ടിച്ചേർക്കൽ വിജ്ഞാപനം ജൂണിൽ പ്രസിദ്ധപ്പെടുത്തുക തുടങ്ങിയ നടപടികൾ സ്വീകരിക്കാനും തീരുമാനിച്ചു. യോഗത്തിൽ ജില്ലാ കളക്ടർ എസ്. പ്രേംകൃഷ്ണൻ, റവന്യുവകുപ്പ് അഡീഷണൽ സെക്രട്ടറി ഷീബ ജോർജ്, പൊതുമരാമത്ത് അഡീഷണൽ സെക്രട്ടറി എ. ഷിബു, റവന്യു, റിക്ക് ഉദ്യോഗസ്ഥർ എന്നിവർ പങ്കെടുത്തു.

കെഎൽഎം മേയ്ദിന റാലിയും മഹാസമ്മേളനവും ചങ്ങനാശേരിയില്‍

ചങ്ങനാശേരി: മേയ്ദിന റാലിക്കും തൊഴിലാളി മഹാസംഗമത്തിനും ഒരുങ്ങി ചങ്ങനാശേരി അതിരൂപതയുടെ തൊഴിലാളി പ്രസ്ഥാനം കേരള ലേബര്‍ മൂവ്‌മെന്‍റ്. ഒന്നിന് ഉച്ചകഴിഞ്ഞ് 3.30ന് ചങ്ങനാശേരി അരമനപ്പടിക്കല്‍ നിന്ന് അതിരൂപത വികാരി ജനറാള്‍ മോണ്‍. സ്‌കറിയ കന്യാകോണില്‍ ഫ്ലാഗ് ഓഫ് ചെയ്യുന്ന മേയ്ദിന റാലി എസ്ബി കോളജിലെ ആര്‍ച്ച്ബിഷപ് കാവുകാട്ട് ഹാളില്‍ എത്തിച്ചേരും. അതിരൂപതയുടെ വിവിധ മേഖലകളില്‍നിന്നെത്തിച്ചേരുന്ന ആയിരങ്ങള്‍ റാലിയില്‍ അണിചേരും. വാദ്യമേളങ്ങളും വേഷവിധാനങ്ങളും നിശ്ചലദൃശ്യങ്ങളും റാലിയെ വര്‍ണാഭമാക്കും. നാലിന് എസ്ബി കോളജ് കാവുകാട്ട് ഹാളില്‍ ചേരുന്ന തൊഴിലാളി മഹാസംഗമത്തില്‍ അതിരൂപത വികാരിജനറാള്‍ മോണ്‍. ആന്‍റണി എത്തയ്ക്കാട്ട് അധ്യക്ഷത വഹിക്കും.ആര്‍ച്ച്ബിഷപ് മാര്‍ തോമസ് തറയില്‍ സമ്മേളനം ഉദ്ഘാടനം ചെയ്യും. ആര്‍ച്ച്ബിഷപ് എമിരിറ്റസ് മാര്‍ ജോസഫ് പെരുന്തോട്ടം അനുഗ്രഹ പ്രഭാഷണം നടത്തും. ലുവെല്ലാ വെഞ്ചേഴ്‌സ് എംഡി ജോയിസ് മേരി ആന്‍റണി മുഖ്യപ്രഭാഷണം നടത്തും. അതിരൂപത ഡയറക്ടര്‍ ഫാ. ജോണ്‍ വടക്കേക്കളം, ജനറല്‍ സെക്രട്ടറി പി.ജെ. സെബാസ്റ്റ്യന്‍, ജോയിന്‍റ് സെക്രട്ടറിമാരായ ഷാജി കോര, ലാലി ബോബന്‍, ജോമോന്‍ ഇരുപ്പക്കാട്ട് എന്നിവര്‍ പ്രസംഗിക്കും. കെഎല്‍എം ലേബര്‍ അവാര്‍ഡ് ജേതാക്കള്‍, ഈ വര്‍ഷം മികച്ച പ്രവര്‍ത്തനം കാഴ്ചവച്ച യൂണിറ്റുകള്‍, സംഘങ്ങള്‍ എന്നിവരെ ആദരിക്കും. ടിസണ്‍ തോമസ്, കെ.ഡി. ചാക്കോ, കെ.വി. കുര്യാക്കോസ്, ജിമ്മി അഗസ്റ്റിന്‍, സന്തോഷ് തോമസ്, സ്മിനു ജോസഫ് എന്നിവര്‍ നേതൃത്വം നല്‍കും. പാര്‍ക്കിംഗ് ക്രമീകരണം കേരള ലേബര്‍ മൂവ്‌മെന്‍റ് മേയ്ദിന റാലിയിലും തൊഴിലാളി മഹാസംഗമത്തിലും പങ്കെടുക്കാന്‍ എത്തിച്ചേരുന്നവരുടെ വാഹനങ്ങള്‍ അരമനപ്പടിക്കല്‍ ആളുകളെ ഇറക്കിയശേഷം എസ്ബി ഹൈസ്‌കൂള്‍ ഗ്രൗണ്ട്, എകെഎം സ്‌കൂള്‍ ഗ്രൗണ്ട്, എസ്ബി കോളജ് ടവര്‍ ഗ്രൗണ്ട്, കത്തീഡ്രല്‍ പള്ളി ഗ്രൗണ്ട്, ബൈപാസ് റോഡ് എന്നിവിടങ്ങളിലായി പാര്‍ക്ക് ചെയ്യണം.

പ്രാര്‍ഥനയും പഠനവും സംവാദങ്ങളുമായി ഫിയാത്ത് മിഷന്‍ രാജ്യാന്തര മിഷന്‍ കോണ്‍ഗ്രസ്

ചങ്ങനാശേരി: ഫിയാത്ത് മിഷന്‍ തിരുഹൃദയ പള്ളി, ക്രിസ്തുജ്യോതി കാമ്പസ്, മീഡിയ വില്ലേജ്, കാര്‍മല്‍ മൗണ്ട് ധ്യാനകേന്ദ്രം എന്നിവിടങ്ങളില്‍ സംഘടിപ്പിക്കുന്ന ഗ്രേറ്റ് ഗാതറിംഗ് ഓഫ് മിഷന്‍ (ജിജിഎം) രാജ്യാന്തര മിഷന്‍ കോണ്‍ഗ്രസിന്‍റെ രണ്ടാം ദിവസം തിരുവനന്തപുരം ആര്‍ച്ച്ബിഷപ് റവ. ഡോ. തോമസ് നെറ്റോയുടെ മുഖ്യകാര്‍മികത്വത്തില്‍ ലത്തീന്‍ക്രമത്തില്‍ വിശുദ്ധകുര്‍ബാന അര്‍പ്പിച്ചു. പുനലൂര്‍ ബിഷപ് റവ. ഡോ. സെല്‍വിസ്റ്റര്‍ പൊന്നുമുത്തന്‍, ഇറ്റാനഗര്‍ ബിഷപ് റവ. ഡോ. ബെന്നി വര്‍ഗീസ്, ഇറ്റാനഗര്‍ ബിഷപ് എമരിറ്റസ് റവ.ഡോ. ജോണ്‍ തോമസ്, ഇംഫാല്‍ രൂപത വികാരി ജനറാള്‍ ഫാ. വര്‍ഗീസ് വേലിക്കകം എന്നിവര്‍ സഹകാര്‍മികരായിരുന്നു. തുടര്‍ന്ന് ഇംഗ്ലീഷിലും മലയാളത്തിലും ഹിന്ദിയിലുമായി മൂന്ന് മിഷന്‍ ധ്യാനങ്ങള്‍ വിവിധ സെന്‍ററുകളില്‍ ആരംഭിച്ചു. ക്രിസ്തുജ്യോതി ഓഡിറ്റോറിയത്തില്‍ നടന്ന സന്യസ്ത സംഗമത്തില്‍ ബിഷപ് ജോണ്‍ തോമസ്, അഡ്വ. ജസ്റ്റിന്‍ പള്ളിവാതുക്കല്‍ എന്നിവര്‍ പ്രസംഗിച്ചു. കാലഘട്ടത്തിന്‍റെ ശത്രുക്കളെ തിരിച്ചറിഞ്ഞ് പരിശുദ്ധാത്മ അഭിഷേകത്തോടെ ജീവിക്കാന്‍ ബിഷപ് ജോണ്‍ തോമസ് സന്യസ്തരെ ആഹ്വാനം ചെയ്തു. തിരുഹൃദയ പാരിഷ് ഹാളില്‍ നടന്ന പ്രോലൈഫ് സംഗമത്തില്‍ ബിഷപ് ഡോ. ബെന്നി വര്‍ഗീസ് അനുഗ്രഹ പ്രഭാഷണം നടത്തി. അതിരൂപതയിലെ മിഷന്‍ പ്രവര്‍ത്തകരുടെ സംഗമം ചങ്ങനാശേരി അതിരൂപതയില്‍നിന്ന് മിഷന്‍ പ്രവര്‍ത്തനത്തിനായി പോയ മിഷണറിമാര്‍ക്കു വേണ്ടി നടത്തപ്പെട്ട മിഷന്‍ സംഗമത്തിൽ ബിഷപ് ഡോ. ബെന്നി വര്‍ഗീസ് അധ്യക്ഷത വഹിച്ചു. വൈകുന്നേരം തൃക്കൊടിത്താനം സെന്‍റ് സേവ്യേഴ്‌സ് ഫൊറോന ദേവാലയത്തില്‍ സംഘടിപ്പിച്ച മിഷന്‍ ഔട്ട് റീച്ച് പരിപാടിയില്‍ ബിഷപ് ഡോ. ജോണ്‍ തോമസ്, ബിഷപ് ഡോ. ചാക്കോ തോട്ടുമാരിക്കല്‍, ബിഷപ് തോമസ് മാര്‍ അന്തോണിയോസ് എന്നിവര്‍ ദിവ്യബലിയര്‍പ്പിക്കുകയും മിഷന്‍ അനുഭവങ്ങള്‍ പങ്കുവയ്ക്കുകയും ചെയ്തു. ദ ഫെയ്‌സ് ഓഫ് ദ ഫേസ്‌ലെസ് പ്രദര്‍ശിപ്പിച്ചു ഇന്‍റര്‍നാഷണല്‍ ഫിലിം ഫെസ്റ്റിവല്‍ ഓഫ് മിഷനില്‍ ഇന്ന് സിസ്റ്റര്‍ റാണി മരിയയുടെ ജീവിതം പറയുന്ന ദ ഫെയ്‌സ് ഓഫ് ദ ഫേസ്‌ലെസ് ചലച്ചിത്രം പ്രദര്‍ശിപ്പിച്ചു. തുടര്‍ന്ന് നടന്ന ഓപ്പണ്‍ ഫോറത്തില്‍ പ്രശസ്ത നിര്‍മാതാവായ ഡേവിസ് കൊച്ചാപ്പു ചര്‍ച്ച നയിച്ചു. മനുഷ്യനന്മയെക്കുറിച്ചു സംസാരിക്കുന്ന സിനിമകളെല്ലാം ക്രിസ്തീയ മൂല്യങ്ങളുള്‍ക്കൊള്ളുന്നവയാകയാല്‍ ഇത്തരം ചലച്ചിത്രമേളകള്‍ക്ക് വലിയ പ്രാധാന്യമുണ്ടെന്ന് ഓര്‍ഗനൈസര്‍ റെജു പുലിക്കോടന്‍ പറഞ്ഞു.

ആദിശങ്കര ഇന്‍റർനാഷണൽ ഫൗണ്ടേഷൻ വാർഷികം

പത്തനംതിട്ട: ആദിശങ്കര ഇന്‍റർനാഷണൽ ഫൗണ്ടേഷന്‍റെ നാലാം വാർഷികവും ശ്രീശങ്കരാചാര്യ ജയന്തി ആഘോഷത്തിന്‍റെ ഭാഗമായുള്ള ശ്രീശങ്കരസ്മൃതി ആഘോഷവും പത്തനംതിട്ട ശ്രീശാന്താനന്ദ മഠം ഋഷിജ്ഞാന സാധനാലയത്തിൽ മേയ് രണ്ടിനു നടക്കുമെന്ന് ഭാരവാഹികൾ പത്രസമ്മേളനത്തിൽ പറഞ്ഞു. ആദിശങ്കര ഇന്‍റർനാഷണൽ ഫൗണ്ടേഷനും ശ്രീശാന്താനന്ദ മഠം ഋഷിജ്ഞാന സാധനാലയവും അമ്മു കെയർ ചാരിറ്റബിൾ ട്രസ്റ്റും സംയുക്തമായാണ് ശ്രീശങ്കരസ്മൃതി ആഘോഷം നടത്തുന്നത്. രാവിലെ ഒന്പതിന് കേന്ദ്രമന്ത്രി ജോർജ് കുര്യൻ ഉദ്ഘാടനം ചെയ്യും. മാനേജിംഗ് ട്രസ്റ്റി സുരേഷ് പാഴൂർ അധ്യക്ഷത വഹിക്കും. ചടങ്ങിൽ സ്വാമിനി ദേവി ജ്ഞാനാഭനിഷ്ഠ, വിദ്യാസാഗർ ഗുരുമൂർത്തി, എ.സി. ദേവദാസ് തുടങ്ങിയവർ പ്രസംഗിക്കും. കൺവീനർ കെ.ജി. ഹരിദാസ്, ആലപ്പുഴ ജില്ലാ കോ-ഓർഡിനേറ്റർ ഉഷ അന്തർജനം, എൻ. വാമനൻ നമ്പൂതിരി, ജയകുമാർ എന്നിവർ പത്രസമ്മേളനത്തിൽ പങ്കെടുത്തു.

പെരുന്നാൾ

ആമക്കുന്ന് പള്ളിയിൽ പത്തനംതിട്ട: കോന്നി ആമക്കുന്ന് സെന്‍റ് ജോർജ് ഓർത്തഡോക്‌സ് വലിയ പള്ളിയിലെ പ്രധാന പെരുന്നാൾ ആറ്, ഏഴ് തീയതികളിൽനടക്കുമെന്ന് ഭാരവാഹികൾ പത്രസമ്മേളനത്തിൽ പറഞ്ഞു. കോന്നി താഴം ക്രിസ്ത്യൻ കൺവൻഷനും പെരുന്നാളിനോടനുബന്ധിച്ച് നടക്കും. മൂന്നിനു വൈകുന്നേരം ആറിന് സന്ധ്യാനമസ്കാരത്തെത്തുടർന്ന് തുമ്പമൺ ഭദ്രാസന സെക്രട്ടറി ജോൺസൺ കല്ലിട്ടതിൽ കോർ എപ്പിസ്കോപ്പ പാരിഷ് മിഷൻ പ്രവർത്തനം ഉദ്ഘാടനം ചെയ്യും. തുടർന്ന് വചനശുശ്രൂഷയ്ക്ക് ഫാ. ജോബ് സാം മാത്യു നേതൃത്വം നൽകും. നാലിനു രാവിലെ 7.45ന് കുർബാന. 10ന് സൺഡേസ്കൂൾ കുട്ടികളുടെ സംഗമം. വൈകുന്നേരം ആറിന് സന്ധ്യാനമസ്കാരത്തെത്തുടർന്ന് വചനശുശ്രൂഷ. അഞ്ചിനു രാവിലെ കുർബാന, തുടർന്ന് 9.30ന് സഭാകവി സി.പി. ചാണ്ടി അനുസ്‌മരണം. വൈകുന്നേരം ആറിന് സന്ധ്യാനമസ്കാരം, വചനശ്രുശ്രുഷ. ആറിനു രാവിലെ കുർബാന, ഒന്പതിന് ചെമ്പിൽ അരിയിടീൽ കർമം, ചെമ്പെടുപ്പ് പ്രദക്ഷിണം. 5.30ന് യുകെ, യൂറോപ്പ് ഭദ്രാസനാധിപൻ ഡോ. ഏബ്രഹാം മാർ സ്തേഫാനോസിനു സ്വീകരണം. രാത്രി ഏഴിന് പെരുന്നാൾ പ്രദക്ഷിണം. ഏഴിനു രാവിലെ എട്ടിന് കുർബാന, 10ന് പള്ളിപ്പടി കുരിശടിയിലേക്കുള്ള പ്രദക്ഷിണം, ശ്ലീഹാ വാഴ്‌വ്, നേർച്ചവിളമ്പ്, കൊടിയിറക്ക് എന്നിവയോടു കൂടി പെരുന്നാൾ സമാപിക്കും. വികാരി ഫാ. സിനോയ് ടി. തോമസ്, ട്രസ്റ്റി ടി.വി. തോമസ് തുണ്ടിൽ, സെക്രട്ടറി ജയിംസ് ജോർജ് പനച്ചത്തറയിൽ, ജനറൽ കൺവീനർ കെ.ജി. മാത്യു പറപ്പള്ളിൽ, പബ്ലിസിറ്റി കൺവീനർ പി.ഒ. ഫിലിപ്പ് പൂവണ്ണുനിൽക്കുന്നതിൽ, അലൻ ഒമ്നി ഈപ്പൻ എന്നിവർ പത്രസമ്മേളനത്തിൽ പങ്കെടുത്തു. കല്ലുങ്കൽ പള്ളിയിൽ തിരുവല്ല: കല്ലുങ്കൽ സെന്‍റ് ജോർജ് മലങ്കര സുറിയാനി കത്തോലിക്കാ പള്ളിയിൽ വിശുദ്ധ ഗീവർഗീസ് സഹദായുടെ ഓർമപ്പെരുന്നാൾ ഇന്നും നാളെയുമായി കൊണ്ടാടും. ഇന്നു വൈകുന്നേരം 6.30ന് പെരുന്നാൾ റാസ കല്ലുങ്കൽ സെന്‍റ് ജോർജ് നഗറിൽനിന്നു പള്ളിയിലേക്ക്. ഫാ. മാത്യു പുത്തൻപുരയിൽ തിരുനാൾ സന്ദേശം നൽകും. നാളെ രാവിലെ എട്ടിന് ഫാ. വർഗീസ് ഈരേച്ചേരിയുടെ പ്രധാന കാർമികത്വത്തിൽ കുർബാന. ഞക്കുകാവ് പള്ളിയിൽ ളാക്കൂർ: ഞക്കുകാവ് സെന്‍റ് ജോർജ് കത്തോലിക്കാ ദേവാലയത്തിൽ വിശുദ്ധ ഗീവർഗീസ് സഹദായുടെ തിരുനാളിനു കൊടിയേറി. മേയ് നാലുവരെയാണ് തിരുനാൾ. ഇന്നു വൈകുന്നേരം 6.15ന് ഭക്തസംഘടനാ വാർഷികം, നാളെ വൈകുന്നേരം അഞ്ചിന് ഫാ. ഡോ. സിജോ ജയിംസ് ചരിവുപറന്പിൽ വചനസന്ദേശം നൽകും. രണ്ടിനു വൈകുന്നേരം ഫാ. ഡോ. വർഗീസ് നടുതല പ്രസംഗിക്കും. മൂന്നിനു രാവിലെ 6.30ന് കുർബാന, എട്ടിന് ചെന്പ് പ്രതിഷ്ഠ, 6.45ന് തിരുനാൾ റാസ. നാലിനു രാവിലെ ഒന്പതിന് തിരുനാൾ കുർബാനയ്ക്ക് ബിഷപ് യൂഹാനോൻ മാർ ക്രിസോസ്റ്റം കാർമികത്വം വഹിക്കും. തുടർന്ന് നേർച്ചവിളന്പ്, കൊടിയിറക്ക്.

നബാർഡ് പിന്തുണയിൽ ചിറ്റാർ ബസ് സ്റ്റാൻഡും മാർക്കറ്റും നവീകരിക്കും

ചിറ്റാർ: ചിറ്റാർ മാർക്കറ്റും ബസ് സ്റ്റാൻഡും നവീകരിക്കുന്നതിനുള്ള പദ്ധതി തയാറാക്കി നബാർഡിനു സമർപ്പിക്കാൻ ഗ്രാമപഞ്ചായത്ത് കമ്മിറ്റി തീരുമാനിച്ചു. സ്ഥല പരിമിതിമൂലം വീർപ്പുമുട്ടുന്ന ബസ് സ്റ്റാൻഡും പൊതു മാർക്കറ്റുകളും വിപുലീകരിക്കുന്നതിന്‍റെ ഭാഗമായി ആധുനിക സൗകര്യങ്ങളോടുകൂടി നിർമാണം നടത്തുന്നതിനാണ് തീരുമാനം. നബാർഡിന്‍റെയും ഗ്രാമപഞ്ചായത്തിന്‍റെയും സംയുക്ത പദ്ധതിയായി ഏറ്റെടുക്കുകയാണ് ലക്ഷ്യം. പദ്ധതി തയാറാക്കി വിശദമായ പ്രോജക്‌ട് റിപ്പോർട്ട് തയാറാക്കുന്നതിന് നിർവഹണ ഉദ്യോഗസ്ഥരോടു ഗ്രാമപഞ്ചായത്ത് കമ്മിറ്റി നിർദേശിച്ചു. നബാർഡ് പുതുതായി നടപ്പിലാക്കുന്ന ഗ്രാമീണ മേഖലയിലെ അടിസ്ഥാന സൗകര്യ വികസന പദ്ധതിയിൽ (റിയാസ്) ഉൾപ്പെടുത്തിയാണ് പദ്ധതി. പ്രൊപ്പോസലുകൾ തയാറാക്കി സമർപ്പിക്കുന്നതിന് ജോയിന്‍റ് ഡയറക്ടറർ തദ്ദേശസ്വയം ഭരണവകുപ്പ് മുഖേന‍യുള്ള ഉത്തരവിന്‍റെ അടിസ്ഥാനത്തിലാണ് പദ്ധതി സമർപ്പിക്കാൻ തീരുമാനിച്ചത്. 2025-26 വർഷത്തെ പഞ്ചായത്ത് ബജറ്റിൽ ഇതു സംബന്ധിച്ച നിർദേശം അംഗീകരിക്കുകയും പ്രാഥമികമായി ഫണ്ട് നീക്കിവയ്ക്കുകയും ചെയ്തു. ടൗണിന്‍റെ മുഖച്ഛായ മാറും വിവിധ സർക്കാർ സ്ഥാപനങ്ങൾ, ആശുപത്രികൾ, ധനകാര്യ സ്ഥാപനങ്ങൾ, വിദ്യാഭ്യാസ സ്ഥാപനങ്ങൾ തുടങ്ങിയവയെല്ലാം ചിറ്റാർ മാർക്കറ്റ് ജംഗ്ഷനു സമീപത്തുതന്നെയാണ് പ്രവർത്തിച്ചു വരുന്നത്. കെഎസ്ആര്‌ടിസി ഉൾപ്പെടെ 50ൽപരം ബസുകൾ ചിറ്റാർ ബസ് സ്റ്റാൻഡിൽ ദിവസേന വന്നുപോകുന്നുണ്ട്. ടൂറിസ്റ്റുകേന്ദ്രങ്ങളായ ഗവി, തണ്ണിത്തോട് അടവി, തീർഥാടന കേന്ദ്രമായ ശബരിമല എന്നിവിടങ്ങളിലേക്കുളള സ്വാഗത കവാടം കൂടിയാണ് ചിറ്റാർ. വലിയ ജനപങ്കാളിത്തമുള്ള സാംസ്കാരിക, സാമുദായിക, രാഷ്‌ട്രീയ പരിപാടികൾക്ക് ചിറ്റാർ മാർക്കറ്റിനോടു ചേർന്ന ബസ് സ്റ്റാൻഡിലാണ് സമ്മേളന വേദിയൊരുക്കുന്നത്. ഇവയ്ക്കെല്ലാം സൗകര്യം കൂടി നൽകിക്കൊണ്ടാകണം ബസ് സ്റ്റാൻഡ് വികസനമെന്ന നിർദേശമാണ് ഉയർന്നിരിക്കുന്നത്. ബസ് സ്റ്റാൻഡിനൊപ്പം സമീപത്തു തന്നെയുള്ള മാർക്കറ്റിന്‍റെ ആധുനികവത്കരണവും യാഥാർഥ്യമാക്കാനാണ് ആലോചന. മലയോര കർഷകർക്ക് വിള ഉത്പന്നങ്ങൾ മാർക്കറ്റിൽ എത്തിക്കുന്നതിനും സമീപ പഞ്ചായത്തുകളിൽനിന്നും പൊതുജനങ്ങൾ ചിറ്റാർ മാർക്കറ്റിൽ വന്നു പോകുന്നതിനും കൂടുതൽ സൗകര്യമുണ്ടാകും. ബസ് സ്റ്റാൻഡിലെ സ്ഥലപരിമിതിക്കും പരിഹാരമുണ്ടാക്കും. ‌ചിറ്റാറിനെ ഒരു മാതൃകാ ടൗണാക്കി മാറ്റുകയാണ് ലക്ഷ്യമെന്ന് ഗ്രാമപഞ്ചായത്ത് പ്രസിഡന്‍റ് എ. ബഷീർ പറഞ്ഞു.

പോലീസിന്‍റെ സിസിടിവി തകര്‍ത്ത യുവാവ് അറസ്റ്റില്‍

പമ്പ: ശബരിമല ക്ഷേത്രത്തിന്‍റെസുരക്ഷാ ക്രമീകരണങ്ങളുടെ ഭാഗമായി പമ്പ പോലീസ് കണ്‍ട്രോള്‍ റൂമിനു മുന്നില്‍ സ്ഥാപിച്ചിരുന്ന സിസിടിവി കാമറ കല്ലെറിഞ്ഞു തകര്‍ത്ത യുവാവ് അറസ്റ്റില്‍. ളാഹ പെരുനാട് വെട്ടിക്കോട്ടില്‍ വിഷ്ണുവാണ് (19) പമ്പ പോലീസിന്റെ പിടിയിലായത്. പമ്പ ത്രിവേണിയില്‍ 26 ന് വൈകുന്നേരം അഞ്ചോടെ മരാമത്തു കോംപ്ലക്‌സിന് സമിപത്തെ പോലീസ് കണ്‍ട്രോള്‍ റൂമിനു മുന്‍വശത്തെ കാമറ മാറ്റി സ്ഥാപിക്കുന്നതിനിടെയാണ് ഇയാളുടെ അതിക്രമമുണ്ടായത്. ഗോവണിയില്‍ നിന്ന് കാമറ മാറ്റിസ്ഥാപിക്കുന്ന ജോലിയിലേര്‍പ്പെട്ട പാലക്കാട് ഭഗവതി അസോസിയേറ്റ്‌സ് കമ്പനി ജീവനക്കാരന്‍ സുജിത്തിനെ ഭീഷണിപ്പെടുത്തി വിഷ്ണു കാമറയ്ക്കുനേരെ കല്ലെറിയുകയായിരുന്നു. 2.90 ലക്ഷം രൂപയുടെ നഷ്ടം കണക്കാക്കുന്നു.ഇയാൾ സ്ഥിരമായി ലഹരിവസ്തുക്കള്‍ ഉപയോഗിക്കുന്നയാളാണെന്നു പോലീസ് പറഞ്ഞു.

വീട്ടമ്മയെ കൊലപ്പെടുത്താന്‍ ശ്രമം; പ്രതിക്ക് കഠിനതടവും പിഴയും

പത്തനംതിട്ട: വീട്ടമ്മയെ വെട്ടിക്കൊലപ്പെടുത്താന്‍ ശ്രമിച്ച കേസിലെ പ്രതിക്ക് 20 വര്‍ഷവും ഒരു മാസവും കഠിനതടവും 55,500 രൂപ പിഴയും ശിക്ഷ. കോന്നി അരുവാപ്പുലം മുതുപേഴുങ്കല്‍ മുറ്റാക്കുഴി നടുവിലേതറ വീട്ടില്‍ അജയകുമാറിനെയാണ് (കുട്ടൻ, 50) പത്തനംതിട്ട അഡിഷണല്‍ സെഷന്‍സ് കോടതി-മൂന്ന് ജഡ്ജി ഡോ. പി കെ ജയകൃഷ്ണന്‍ ശിക്ഷിച്ചത്. പിഴ അടച്ചില്ലെങ്കില്‍ 15 മാസവും ഏഴു ദിവസവും വെറും തടവ് അനുഭവിക്കണം. 2018 മേയ് 20ന് സംഭവം. ഇയാളുടെ അയല്‍വാസിയായ വിനോദിനിയെയാണ് (58) വീട്ടുമുറ്റത്ത് അതിക്രമിച്ചു കയറി വെട്ടുകത്തികൊണ്ട് തലയിലും പിന്‍ കഴുത്തിലും ഇടതു കൈക്കും മുഖത്തും ഗുരുതരമായി വെട്ടി പരിക്കേല്‍പിച്ചത്. ഇയാള്‍ മദ്യപിച്ചുവന്ന് സ്ഥിരമായി അസഭ്യം പറയുന്നതിനെതിരേ കോന്നി പോലീസില്‍ പരാതി നല്‍കിയിരുന്നു. എസ്ഐ ഇ. ബാബു രജിസ്റ്റര്‍ ചെയ്ത കേസില്‍ കോന്നി പോലീസ് ഇന്‍സ്‌പെക്ടര്‍ ആയിരുന്ന എസ്. അഷാദ് അന്വേഷണം പൂര്‍ത്തിയാക്കി കോടതിയില്‍ കുറ്റപത്രം സമര്‍പ്പിച്ചു. പ്രോസിക്യൂഷന് വേണ്ടി പബ്ലിക് പ്രോസിക്യൂട്ടര്‍ ബി. ബിന്നി ഹാജരായി.

നിരവധി ക്രിമിനല്‍ കേസുകളില്‍ പ്രതിയെ ഒരുവര്‍ഷത്തേക്ക് നാടുകടത്തി

പന്തളം: നിരവധി ക്രിമിനല്‍ കേസുകളില്‍ പ്രതിയായ പന്തളം കുരമ്പാല തോന്നല്ലൂര്‍ ഉളമയില്‍ റാഷിഖിനെ (24) ഒരു വര്‍ഷത്തേക്ക് ജില്ലയില്‍ നിന്നും പുറത്താക്കി. കവര്‍ച്ച, ദേഹോപദ്രവം ഏല്പിക്കല്‍ തുടങ്ങിയ കുറ്റകൃത്യങ്ങള്‍ക്ക് പന്തളം പോലീസ് രജിസ്റ്റര്‍ ചെയ്ത് അന്വേഷണം പൂര്‍ത്തിയാക്കി കോടതിയില്‍ കുറ്റപത്രം സമര്‍പ്പിച്ച അഞ്ചു കേസുകള്‍ ഉള്‍പ്പെടുത്തി സമര്‍പ്പിച്ച റിപ്പോര്‍ട്ട് പരിഗണിച്ചാണ് ഉത്തരവുണ്ടായത്. കേരള സാമൂഹിക വിരുദ്ധ പ്രവര്‍ത്തനങ്ങള്‍ തടയല്‍ നിയമം ( കാപ്പ ) വകുപ്പ് 15 (1) പ്രകാരമാണ് നടപടി. ഉത്തരവ് ഇന്ന് പന്തളം പോലീസ് ഇന്‍സ്പെക്ടര്‍ ടി. ഡി. പ്രജീഷിന്റെ നേതൃത്വത്തില്‍ നടപ്പിലാക്കി. 2019 മുതല്‍ കുറ്റകൃത്യങ്ങളില്‍ ഏര്‍പ്പെട്ടുവരികയാണ് ഇയാൾ. പന്തളം പോലീസ് സ്റ്റേഷനിലെ അഞ്ചു കേസുകള്‍ക്ക് പുറമേ, നൂറനാട് പോലീസ് സ്റ്റേഷനിലെ രണ്ടു കേസുകളിലും ഉള്‍പ്പെട്ടിട്ടുണ്ട. പന്തളം പോലീസ് നവംബര്‍ 27ന് റാഷിഖിനെ അറസ്റ്റ് ചെയ്തു ജയിലിലാക്കി. തുടര്‍ന്ന്, കഴിഞ്ഞ ം ജനുവരി ഒമ്പതിനു് ജാമ്യത്തിലിറങ്ങി. ഡിഐജിയുടെ ഉത്തരവുപ്രകാരം ഇപ്പോള്‍ നാടുകടത്തപ്പെട്ട പ്രതി, ഉത്തരവ് നിലനില്‍ക്കെ കുറ്റകൃത്യങ്ങളില്‍ എര്‍പ്പെട്ടാല്‍ കാപ്പ 15(4) പ്രകാരം പ്രോസിക്യൂഷന്‍ നടപടികള്‍ സ്വീകരിക്കുമെന്ന് ജില്ലാ പോലീസ് മേധാവി അറിയിച്ചു.

കഞ്ചാവ് ചെടികള്‍ നട്ടുവളര്‍ത്തി പരിപാലിച്ചു; പ്രതിക്ക് അഞ്ചു വര്‍ഷം കഠിനതടവും 25,000 രൂപ പിഴയും

പത്തനംതിട്ട: കഞ്ചാവ് ചെടികള്‍ നട്ടുവളര്‍ത്തി പരിപാലിച്ചതിന് എടുത്ത കേസിലെ പ്രതിക്ക് അഞ്ചു വര്‍ഷം കഠിനതടവും 25000 രൂപ പിഴയും. പത്തനംതിട്ട ആറന്മുളയില്‍ വിമാനത്താവള മിച്ചഭൂമി കൈയേറി താമസിക്കുന്ന വെണ്ണപ്പറ പാറയില്‍ വീട്ടില്‍ പൊടിയനെയാണ് പത്തനംതിട്ട അഡീഷണല്‍ ജില്ലാ സെഷന്‍സ് കോടതി ജഡ്ജി എസ്. ശ്രീരാജ് ശിക്ഷിച്ചത്. പൊടിയന്‍ താമസ സ്ഥലത്ത് അഞ്ച് കഞ്ചാവ് ചെടികളാണ് നട്ടുവളര്‍ത്തി പരിപാലിച്ചത്. എക്‌സൈസിന് കിട്ടിയ രഹസ്യവിവരത്തിന്റെ അടിസ്ഥാനത്തില്‍ പത്തനംതിട്ട സര്‍ക്കിള്‍ ഇന്‍സ്‌പെക്ടര്‍ എസ്. ഷാജിയുടെ നേതൃത്വത്തില്‍ നടത്തിയ പരിശോധനയില്‍ കഞ്ചാവ് ചെടികള്‍ പിടിച്ചെടുക്കുകയും പത്തനംതിട്ട എക്‌സൈസ് ഇന്‍സ്‌പെക്ടര്‍ എസ്. ശ്യാംകുമാര്‍ എന്‍ഡിപിഎസ് ക്രൈം രജിസ്റ്റര്‍ ചെയ്യുകയുമായിരുന്നു. പത്തനംതിട്ട അസിസ്റ്റന്‍റ് എക്‌സൈസ് കമ്മീഷണര്‍ രാജീവ് ബി . നായര്‍ അന്വേഷണം പൂര്‍ത്തിയാക്കി കോടതിയില്‍ കുറ്റപത്രം സമര്‍പ്പിച്ചു. പ്രോസിക്യൂഷനുവേണ്ടി അഡീഷണല്‍ ജില്ലാ ഗവണ്‍മെന്‍റ് പ്ലീഡര്‍ പി. ആർ. അനില്‍കുമാര്‍ ഹാജരായി.

വാർധക്യം മറന്ന് പടയണിയും കഥകളിയിലും മുരളീധരൻ പിള്ളയുടെ നടനഭാവം

പത്തനംതിട്ട: സപ്തതി പടിവാതിൽക്കലെത്തിയപ്പോൾ മനസിൽ ഉദിച്ച മോഹമായിരുന്നു പടയണി അഭ്യസനം. അതു പരിശീലിച്ചെടുത്ത് കളത്തിലിറങ്ങിയതിനു പിന്നാലെ കഥകളി പഠിക്കാനും തീരുമാനിച്ചു. ഇന്നിപ്പോൾ ടി.ജി. മുരളീധരൻപിള്ള ഇരുകലകളിലും നിറഞ്ഞാടുകയാണ്. പുലവൃത്തവും കോലംതുള്ളലും കഴിഞ്ഞ ആലസ്യത്തിൽ ഒന്നു മയങ്ങി ഉണർന്നപ്പോഴാണ് കഥകളി കൂടി പഠിച്ചാലോ എന്ന ചിന്ത എഴുപത്തിരണ്ടാം വയസിൽ മനസിൽ കയറിയത്. ശ്രീപത്മനാഭ സ്വാമി ക്ഷേത്രത്തിൽ തന്നെ അഭ്യാസം തുടങ്ങി. 74-ാം വയസിൽ കഴിഞ്ഞ എട്ടിന് ക്ഷേത്ര സന്നിധിയിൽ തന്നെ അരങ്ങേറ്റം നടത്തി. വള്ളിക്കോട് ഗ്രാമത്തിലെ അറിയപ്പെടുന്ന പടയണി, കഥകളി കലാകാരനാണ് സൗമ്യാ ഭവനിൽ ടി.ജി. മുരളീധരൻപിള്ള ഇന്നിപ്പോൾ. കഥകളി അരങ്ങേറ്റ ദിനത്തിൽ തൃക്കോവിൽ ക്ഷേത്രനടയിൽ മേളപ്പദം എരിഞ്ഞുയർന്നപ്പോൾ പുറപ്പാടിനായി മനസിനെ പാകപ്പെടുത്താനുള്ള ശ്രമം നടത്തി നോക്കി. ഈശ്വരാനുഗ്രഹത്താൽ എല്ലാം ശുഭമായി. തുടർന്ന് സീതാ സ്വയംവരം കഥകളി അരങ്ങേറി. ദശരഥനായി മുരളീധരൻ പിള്ള അരങ്ങിലെത്തി. സാക്ഷ്യം വഹിക്കാൻ വടക്കേ ഇന്ത്യക്കാരായ സുഹൃത്തുക്കളും എത്തിയിരുന്നു. 46 വർഷം നീണ്ട പ്രവാസ ജീവിതത്തിനിടയിലും കരളിലെ കളിത്തട്ടിൽ അറുപത് തിരിയുടെ ശോഭയോടെ കഥകളി മോഹം ജ്വലിച്ചു നിന്നിരുന്നതായി മുരളീധരൻ പിള്ള പറയുന്നു. പടയണി പഠിക്കണമെന്നായിരുന്നു ആദ്യ മോഹം. മാതൃഗൃഹം പടയണി ഗ്രാമമായ കടമ്മനിട്ടയിലാണ്. കുട്ടിക്കാലം മുതൽ പടയണിയുടെ ചുവടുകൾ കണ്ടുവളർന്നതാണ്. വലിയ പടയണിയിൽ ഭൈരവി നിറഞ്ഞാടുന്നതു കാണുമ്പോൾ മനസിൽ രൗദ്ര ഭാവം ഉണരും. എല്ലാ വർഷവും മുടങ്ങാതെ കടമ്മനിട്ട ദേവീക്ഷേത്രത്തിൽ പടയണി കാണാൻ എത്തുമായിരുന്നു. 19-ാം വയസിൽ കേരളം വിട്ട് വടക്കേ ഇന്ത്യയിലേക്ക് യാത്രയായതാണ്. ഒറീസയിൽ വിവിധ കമ്പനികളിലായി ജോലി. 28 വർഷം ധന്യാ സിമന്‍റ്സിൽ സീനിയർ മാനേജരായി ജോലിയെടുത്തു. 2016ൽ ജോലി മതിയാക്കി നാട്ടിൽ തിരിച്ചെത്തി. കടമ്മനിട്ട ഗോത്ര കളരിക്കൊപ്പമാണ് ക്ഷേത്രങ്ങളില്‌ പടയണി അവതരിപ്പിക്കുന്നത്. താഴൂർ ഭഗവതി ക്ഷേത്രത്തിൽ പുലവൃത്തം ചവിട്ടി. മറുത, ഭൈരവി കോലങ്ങൾ എടുത്ത് കളത്തിൽ നിറഞ്ഞാടി. പ്രഫ. കടമ്മനിട്ട വാസുദേവൻ പിള്ളയുടെ അനുഗ്രഹാശംസകളോടെ കടമ്മനിട്ട ഗിരീശൻ ആശാന്‍റെ ശിക്ഷണത്തിലാണ് പടയണി അഭ്യസിച്ചത്. കഥകളിയിൽ ഇഷ്ടവേഷം ദുശാസനന്‍റേതാണ്. വേഷപ്പൊലിമ തന്നെയാണ് കാരണം. താഴൂർ ഭഗവതി ക്ഷേത്രത്തിൽ ഭദ്രകാളിയുടെ വേഷം ആടാനുള്ള തയാറെടുപ്പിലാണ് മുരളീധരൻ പിള്ള. നൂറു വയസ് തികഞ്ഞ അമ്മ ലക്ഷ്മിക്കുട്ടിയും ഭാര്യ ഗീതയും മക്കളായ സൗമ്യയും രമ്യയും പിന്തുണയുമായി അണിയറയിലുണ്ട്.

മാങ്കൂട്ടം ആർഷ വിദ്യാജ്യോതി സ്കൂൾ എംജിഎം ഗ്രൂപ്പ് ഏറ്റെടുത്തു

പത്തനംതിട്ട: ഏഴംകുളം മാങ്കൂട്ടത്തു പ്രവർത്തിച്ചുവരുന്ന ആർഷ വിദ്യാജ്യോതി പബ്ലിക് സ്കൂളിനെ വിദ്യാഭ്യാസ ഗ്രൂപ്പായ എംജിഎം 27-ാമത്തെ വിദ്യാഭ്യാസ സംരംഭമായി ഏറ്റെടുത്തു. കൊളാബറേറ്റ് ലേണിംഗ്, മൈക്രോ ടീച്ചിംഗ്, ഗ്രൂപ്പ് ലേണിംഗ്, എ-ഐ ലേണിംഗ് തുടങ്ങിയ ആധുനിക സംവിധാനങ്ങളോടെയാണ് കോഴ്സുകൾ ആരംഭിക്കുന്നത്. സ്മാർട്ട് ക്ലാസ് റൂമിനൊപ്പം മാത്തമാറ്റിക്സ് ലാബ്, ലാംഗ്വേജ് ലാബ് തുടങ്ങിയവയും കുട്ടികൾക്കായി സജ്ജമാക്കും.പത്മശ്രീ മമ്മൂട്ടി ചെയർമാനായ കെയർ ആൻഡ് ഷെയർ ഇന്‍റർനാഷണൽ ഫൗണ്ടേഷന്‍റെ സഹകരണത്തോടെ പാവപ്പെട്ട വിദ്യാർഥികൾക്കായി നൂറു ശതമാനം സ്കോളർഷിപ്പോടെ വിദ്യാമൃതം പദ്ധതി നടപ്പാക്കുമെന്നും ഭാരവാഹികൾ പത്രസമ്മേളനത്തിൽ പറഞ്ഞു. എംജിഎം ഗ്രൂപ്പിന് എൻജിനിയറിംഗ്, ഫാർമസി, ആർട്സ് ആൻഡ് സയൻസ് കോളജുകൾ ഉൾപ്പെടെ 26ഓളം വിദ്യാഭ്യാസ സ്ഥാപനങ്ങൾ നിലവിലുണ്ട്. 2026ൽ മെഡിക്കൽ വിദ്യാഭ്യാസ രംഗത്തേക്ക് ചുവടുവയ്ക്കും. എംജിഎം ട്രസ്റ്റ് ചീഫ് ഓപ്പറേറ്റിംഗ് ഓഫീസർ ആൽഫ മേരി, അഡ്മിനിസ്ട്രേറ്റീവ് മാനേജർ സുനിൽകുമാർ, ചീഫ് എക്സിക്യൂട്ടീവ് സെക്രട്ടറി ഗോപിനാഥ് മഠത്തിൽ എന്നിവർ പത്രസമ്മേളനത്തിൽ പങ്കെടുത്തു.

വീസ തട്ടിപ്പ്: ഉദ്യോഗാർഥികളുടെ കൂട്ടപ്പരാതി

പത്തനംതിട്ട: വിദേശ രാജ്യങ്ങളിൽ ജോലി വാഗ്ദാനം ചെയ്തു വീസ തട്ടിപ്പ് നടത്തിയെന്ന പരാതിയുമായി ഉദ്യോഗാർഥികൾ. റാന്നി ഹോളി ലാൻഡ് കൺസൾട്ടൻസി ഉടമ ജോമോൻ ടി. ജോണിനെതിരേയാണ് പരാതി. ഇയാൾ ഒളിവിലാണെന്ന് പോലീസ് പറഞ്ഞു. ഇസ്രായേൽ, ഇറ്റലി തുടങ്ങി വിദേശ രാജ്യങ്ങളിൽ ജോലി വാഗ്ദാനം ചെയ്ത് ലക്ഷങ്ങൾ തട്ടിയതായി ചൂണ്ടിക്കാട്ടിയാണ് ഉദ്യോഗാർഥികൾ പത്തനംതിട്ട ജില്ലാ പോലീസ് മേധാവി വി.ജി. വിനോദ് കുമാറിന് പരാതി നൽകിയത്. റാന്നി കേന്ദ്രമാക്കി പ്രവർത്തിക്കുന്ന ഹോളി ലാൻഡ് കൺസൾട്ടൻസി റിക്രൂട്ട്മെന്‍റ് ഏജൻസി ഉടമ ജോമോൻ ടി. ജോൺ 40 ലക്ഷം രൂപ തട്ടിയെടുത്തെന്നാണ് ആരോപണം. വ്യാജ നിയമന കത്തും വ്യാജ വീസയും നൽകിയാണ് ഇയാൾ കബളിപ്പിച്ചതെന്നു പരാതിയിൽ പറയുന്നു. മുമ്പ് പരാതി നൽകിയ പന്ത്രണ്ട് പേരിൽ പത്തുപേരടങ്ങിയ സംഘം എസ്പി ഓഫീസിൽ ഒരുമിച്ചെത്തിയാണ് പരാതി നൽകിയത്. എസ്പി ഓഫീസിൽ നൽകിയ പരാതി റാന്നി ഡിവൈഎസ്പിക്ക് കൈമാറി. 50,000 മുതൽ 15 ലക്ഷം രൂപവരെ നഷ്ടപ്പെട്ടവരുണ്ട്. പണം തിരികെ നൽകാമെന്ന് പറഞ്ഞ് പലർക്കും ചെക്ക് നൽകിയും കബളിപ്പിച്ചിട്ടുണ്ട്. തട്ടിപ്പ് കേസിൽ ഇയാൾ മുമ്പ് അറസ്റ്റിലായെങ്കിലും റിമാൻഡ് കഴിഞ്ഞ് പുറത്തിറങ്ങി. ജോമോൻ ഒളിവിലാണെന്നാണ് പോലീസ് പറയുന്നത്. കാസർഗോഡ്, കണ്ണൂർ, കോഴിക്കോട്, എറണാകുളം, പത്തനംതിട്ട ജില്ലകളിലുള്ളവരാണ് പരാതിക്കാർ. ഇതിൽ കോട്ടയം സ്വദേശിയായ റാണിയിൽനിന്ന് 15 ലക്ഷവും എറണാകുളം സ്വദേശി ഷൈനിയുടെയും ഭർത്താവ് പ്രിൻസിന്‍റെയും 12 ലക്ഷം രൂപയും ജോമോൻ വാങ്ങിയിട്ടുണ്ട്. മറ്റുള്ളവരിൽ നിന്ന് ഒന്നു-രണ്ടു ലക്ഷം രൂപയാണ് കൈപ്പറ്റിയിരിക്കുന്നത്.

ജണ്ടായിക്കലിൽ ലോഡുമായെത്തിയ ലോറി ചരിഞ്ഞു

റാന്നി: ജണ്ടായിക്കലിൽ എതിർദിശയിൽ വന്ന വാഹനത്തിനു സൈഡ് കൊടുക്കുന്നതിനിടെ സിമന്‍റുമായെത്തിയ ലോറി റോഡിന്‍റെ വശത്തേക്ക് ചരിഞ്ഞു. ആർക്കും പരിക്കില്ല. ഇട്ടിയപ്പാറ-ജണ്ടായിക്കൽ-ബംഗ്ലാംകടവ് റോഡിൽ കിടങ്ങുമൂഴി ജംഗ്ഷനു സമീപം ഇന്നലെ രാവിലെ 11ഓടെയാണു സംഭവം. കിടങ്ങുമൂഴി ജംഗ്ഷനിൽനിന്ന് വലിയ വാഹനങ്ങൾ ജണ്ടായിക്കൽ ഭാഗത്തേക്കു പോകുന്നതിന് വിലക്കേർപ്പെടുത്തിയിട്ടുണ്ട്. ഇതു ചൂണ്ടിക്കാട്ടി ബോർഡും റോഡിൽ വച്ചിരുന്നു. ഇതു മറികടന്നു വലിയകുളത്തെ ഗോഡൗണിലേക്കു സിമന്‍റുമായി പോയ ലോറിയാണ് അപകത്തിൽപ്പെട്ടത്. ഉന്നത നിലവാരത്തിൽ റോഡ് വികസിപ്പിക്കുന്നതിന് പണി നടക്കുകയാണ്.

ഉത്സവപ്പറമ്പില്‍ കുടുംബത്തെ ആക്രമിച്ച സംഘത്തിലെ ഒരാള്‍ അറസ്റ്റില്‍

തിരുവല്ല: വേങ്ങല്‍ മാടപ്പള്ളിക്കാവ് ക്ഷേത്രത്തിലെ ഉത്സവത്തോടനുബന്ധിച്ച് നടന്ന ഗാനമേള പരിപാടിയില്‍ സ്ത്രീയും കുട്ടിയുമടങ്ങിയ കുടുംബത്തെ ആക്രമിക്കുകയും അപമാനിക്കുകയും ചെയ്ത സംഘത്തിലെ ഒരാളെ അറസ്റ്റ് ചെയ്തു. അഞ്ചു പേരടങ്ങിയ സംഘത്തിലെ ഒന്നാം പ്രതി കാവുംഭാഗം അഴിയിടത്തുചിറ അമ്മണത്തുംചേരില്‍ വീട്ടില്‍ എ.ഡി. ഷിജു (37) ആണ് തിരുവല്ല പോലീസിന്‍റെ പിടിയിലായത്. തിരുവല്ല കാവുംഭാഗം അഴിയിടത്തുചിറ ചാലക്കുഴി പടിഞ്ഞാറേ കുറ്റിക്കാട്ടില്‍ പ്രമോദിനും കുടുംബത്തിനുമാണ് അക്രമികളില്‍നിന്ന് അപമാനവും ദേഹോപദ്രവവും ഉണ്ടായത്. മറ്റ് പ്രതികള്‍ക്കായുള്ള തെരച്ചില്‍ ഊര്‍ജിതമാക്കി. അറസ്റ്റിലായ ഷിജു സ്ഥിരമായി ക്ഷേത്രത്തിലെ ഉത്സവപരിപാടിയില്‍ പ്രശ്‌നങ്ങള്‍ സൃഷ്ടിക്കാറുണ്ടെന്ന് പോലീസ് പറഞ്ഞു. എസ്എച്ച്ഒ എസ്. സന്തോഷിന്‍റെ മേല്‍നോട്ടത്തിലാണ് അന്വേഷണം നടക്കുന്നത്.

ചായക്കടയിലെ അടുപ്പിൽനിന്നു പൊട്ടിത്തെറി: കടയുടമയ്ക്കെതിരേ കേസ്

റാന്നി: പെരുനാട് വയറൻമരുതിയിലെ ഒരു ഹോട്ടലിൽ ഇന്നലെ രാവിലെ അടുപ്പിൽനിന്നു പൊട്ടിത്തെറി ശബ്ദം കേട്ടത് സംബന്ധിച്ച് റാന്നി ഡിവൈഎസ്പി ആർ. ജയരാജിന്‍റെ നേതൃത്വത്തിൽ വിശദമായ പരിശോധന നടത്തി. ശ്രീമുരുക സ്വാമി ക്ഷേത്രത്തിനടുത്തുള്ള നിതിൻ ആൻഡ് നിഖിൽ വെജിറ്റേറിയൻ ഹോട്ടലിലെ അടുക്കളയിൽനിന്നാണ് വലിയ ശബ്ദം ഉയർന്നത്. വിവരമറിഞ്ഞു പോലീസ് സംഘം സ്ഥലത്തെത്തി അന്വേഷണം നടത്തി. വയറൻ മരുതി പുത്തൻപറമ്പിൽ ശിവൻകുട്ടി(65)യുടേതാണ് ഹോട്ടൽ. ഇയാൾ ഹോട്ടലിലെ ചപ്പുചവറുകൾ തൂത്തുകൂട്ടി അടുപ്പിൽ ഇട്ടപ്പോൾ അബദ്ധത്തിൽ ഇവയുടെ കൂട്ടത്തിൽ ലൈറ്റർ വീണതായി സംശയമുണ്ടെന്നും അതാകാം പൊട്ടിത്തെറിച്ച് ഉഗ്രശബ്ദത്തിനു കാരണമായതെന്നും വെളിപ്പെടുത്തി. ആർക്കും ആളപായമില്ല. വിശദമായ ചോദ്യം ചെയ്യലിൽ, ഇയാൾ അശ്രദ്ധമായി കൈകാര്യം ചെയ്തതുമൂലമുള്ള അപകടമാണെന്ന് പോലീസിന് വ്യക്തമായി. തുടർന്ന് ഇയാളെ കസ്റ്റഡിയിലെടുത്ത് വൈദ്യപരിശോധനയ്ക്ക് ശേഷം പോലീസ് സ്റ്റേഷനിൽ എത്തിച്ചു. ശാസ്ത്രീയ പരിശോധനയിൽ സ്ഫോടകവസ്തുവിന്‍റെ സാന്നിധ്യം കണ്ടെത്തിയില്ല. റാന്നി ഡിവൈഎസ്പി ആർ. ജയരാജിന്‍റെ മേൽനോട്ടത്തിലാണ് പരിശോധന നടന്നത്. പെരുനാട് എസ്എച്ച്ഒ വിഷ്ണുവിന്‍റെ നേതൃത്വത്തിൽ പെരുനാട് പോലീസ് തുടർനടപടികൾ സ്വീകരിച്ചു. ബോംബ് സ്‌ക്വാഡ്, ഫോറൻസിക് സംഘം എന്നിവർ പരിശോധനയിൽ പങ്കെടുത്തു.

കൈക്കൂലി വാങ്ങുന്നതിനിടെ കുരമ്പാല വില്ലേജ് ഓഫീസിലെ കാഷ്വല്‍ സ്വീപ്പർ കുടുങ്ങി

പന്തളം: വസ്തു ഉടമയില്‍നിന്ന് കൈക്കൂലി വാങ്ങുന്നതിനിടെ അടൂര്‍ താലൂക്കിലെ കുരമ്പാല വില്ലേജ് ഓഫീസിലെ കാഷ്വല്‍ സ്വീപ്പറെ വിജിലന്‍സ് അറസ്റ്റ് ചെയ്തു. പന്തളം സ്വദേശി കഴുത്തുംമൂട്ടില്‍ ജയപ്രകാശാണ് പിടിയിലായത്. ലൊക്കേഷന്‍ സ്‌കെച്ചിനായി 1000 രൂപ കൈക്കൂലി വാങ്ങുന്നതിനിടെ ഇന്നലെ വൈകുന്നേരമാണ് വിജിലൻസ് ഡിവൈഎസ്പി സിനി ഡെന്നീസിന്‍റെ നേതൃത്വത്തിലുള്ള സംഘം ഇയാളെ അറസ്റ്റ് ചെയ്തത്. പറന്തല്‍ പള്ളിക്ക് സമീപമുള്ള സ്ഥലത്തിന്‍റെ ഫീല്‍ഡ് മെഷര്‍ ബുക്കിനും ലൊക്കേഷന്‍ സ്‌കെച്ചിനുമായി അപേക്ഷ നല്‍കിയ ആനയടി സ്വദേശിയില്‍ നിന്നാണ് ജയപ്രകാശ് കൈക്കൂലി വാങ്ങിയത്. എഫ്എം ബുക്കിനായി 1500 രൂപ വാങ്ങിയിരുന്നു. ലൊക്കേഷന്‍ സ്‌കെച്ചിനു വേണ്ടി വീണ്ടും 1000 രൂപ കൂടി ആവശ്യപ്പെട്ടു. ഇതില്‍ 500 രൂപ വില്ലേജ് ഓഫീസര്‍ക്ക് നല്‍കാന്‍ വേണ്ടിയാണെന്ന് ഇയാള്‍ പരാതിക്കാരനോട് പറഞ്ഞിരുന്നു. പണം നല്‍കാതെ ലൊക്കേഷന്‍ സ്‌കെച്ച് കിട്ടില്ലെന്ന് വന്നപ്പോഴാണ് സ്ഥലം ഉടമ വിജിലന്‍സിനെ സമീപിച്ചത്. തുടര്‍ന്ന് വിജിലന്‍സ് സംഘം അടയാളമിട്ടു നൽകിയ പണവുമായി പരാതിക്കാരനെ അയയ്ക്കുകയായിരുന്നു. പണം കൈപ്പറ്റുന്നതിനിടെ വിജിലൻസ് ഉദ്യോഗസ്ഥര്‍ ജയപ്രകാശിനെ കസ്റ്റഡിയിലെടുത്തു. ഇതു സംബന്ധിച്ച് കൂടുതല്‍ അന്വേഷണം നടക്കുമെന്ന് വിജിലന്‍സ് ഡിവൈഎസ്പി അറിയിച്ചു.

കണ്‍സ്യൂമര്‍ ഫെഡ് സ്റ്റുഡന്‍റ്സ് മാര്‍ക്കറ്റ് ജൂണ്‍ 15 വരെ

പത്തനംതിട്ട: കണ്‍സ്യൂമര്‍ ഫെഡിന്‍റെ ആഭിമുഖ്യത്തില്‍ കളക്‌ടറേറ്റിൽ ആരംഭിച്ച സ്റ്റുഡന്‍റ്സ് മാര്‍ക്കറ്റിന്‍റെ ഉദ്ഘാടനം ജില്ലാ കളക്ടര്‍ എസ്. പ്രേംകൃഷ്ണന്‍ നിര്‍വഹിച്ചു. കണ്‍സ്യൂമര്‍ ഫെഡ് എക്സിക്യൂട്ടീവ് ഡയറക്ടര്‍ ജി. അജയകുമാര്‍ അധ്യക്ഷത വഹിച്ചു. എഡിഎം ബി. ജ്യോതി ആദ്യവില്പന നടത്തി. ജൂണ്‍ 15 വരെ രാവിലെ പത്തുമുതല്‍ വൈകുന്നേരം 5.30 വരെയാണ് പ്രവര്‍ത്തനം. കുട്ടികള്‍ക്കായി പഠനസാമഗ്രികള്‍, പ്രമുഖ കമ്പനികളുടെ ബാഗുകള്‍, കുടകള്‍, ടിഫിന്‍ ബോക്‌സ്, വാട്ടര്‍ ബോട്ടില്‍, റെയിന്‍ കോട്ട്, പെന്‍സില്‍ ബോക്സ്, പേന ഉള്‍പ്പെടെയുള്ള പഠനോപകരണങ്ങളും കണ്‍സ്യൂമര്‍ഫെഡ് നിര്‍മിച്ച് വിപണിയിലെത്തിക്കുന്ന ത്രിവേണി നോട്ട്ബുക്കുകളും ലഭ്യമാണ്. ജില്ലയിലെ 12 ത്രിവേണി സൂപ്പര്‍ മാര്‍ക്കറ്റുകള്‍, നീതി സ്റ്റോറുകള്‍, സ്‌കൂള്‍ സൊസൈറ്റികള്‍ എന്നിവയിലൂടെ കണ്‍സ്യൂമര്‍ ഫെഡിന്‍റെ സേവനങ്ങള്‍ പൊതുജനങ്ങള്‍ക്കു ലഭിക്കും. റീജണല്‍ മാനേജര്‍ ടി.ഡി. ജയശ്രീ, അസിസ്റ്റന്‍റ് റീജണല്‍ മാനേജര്‍ ടി.എസ്. അഭിലാഷ്, കളക്‌ടറേറ്റ് ജീവനക്കാര്‍ തുടങ്ങിയവര്‍ പങ്കെടുത്തു.

ബസ് സർവീസ് പുനരാരംഭിച്ചു

പെരുമ്പെട്ടി: ചുങ്കപ്പാറ-ആലപ്പുഴ റൂട്ടിൽ കെഎസ്ആർടിസ് സർവീസ് പുനരാരംഭിച്ചു. മല്ലപ്പള്ളി ഡിപ്പോയിൽനിന്ന് മുടങ്ങിക്കിടന്ന ബസ് സർവീസാണ് പുനരാരംഭിച്ചത്. രാവിലെ 6.15ന് മല്ലപ്പള്ളിയിൽനിന്ന് ആരംഭിച്ച് 6.55 ന് ചുങ്കപ്പാറ. തിരികെ ഏഴിന് പെരുമ്പെട്ടി, കുളത്തൂർമൂഴി, പത്തനാട് കറുകച്ചാൽവഴി 8.30ന് ചങ്ങനാശേരി, 10ന് ആലപ്പുഴ. തിരികെ 10.25ന് ചങ്ങനാശേരി, തിരുവല്ല, കുന്നന്താനം വഴി 12.40ന് മല്ലപ്പള്ളി. തിരികെ 12.50ന് കല്ലൂപ്പാറ, തിരുവല്ല, ചങ്ങനാശേരി വഴി 3.10ന് ആലപ്പുഴ. തിരികെ 3.40ന് ആലപ്പുഴ, 5.05ന് ചങ്ങനാശേരി, 5.50 കറുകച്ചാൽ, കുളത്തൂർമൂഴി വഴി 6.35ന് ചുങ്കപ്പാറ. 6.40ന് ചുങ്കപ്പാറയിൽ നിന്നു പുറപ്പെട്ട് 7.30ന് മല്ലപ്പള്ളിയിൽ എത്തുന്ന തരത്തിലാണ് സമയ ക്രമീകരണം.

പൊട്ടിപ്പൊളിഞ്ഞ ബസ്ബേയിൽ വെള്ളക്കെട്ടും

അടൂർ: കെഎസ്ആർടിസി ജംഗ്ഷനിൽ സ്വകാര്യ ബസ് ബേ പൊട്ടിപ്പൊളിഞ്ഞതും വെള്ളക്കെട്ടും യാത്രക്കാർക്ക് ബുദ്ധിമുട്ടാകുന്നു. സമീപമുള്ള ഓടയുടെ ഭാഗത്തെ കുഴി അപകടഭീഷണിയാകുകയാണ്. കായംകുളം ഭാഗത്തേക്കുള്ള സ്വകാര്യബസ് യാത്രക്കാരെ കയറ്റുകയും ഇറക്കുകയും ചെയ്യുന്ന ഭാഗത്താണ് വെള്ളക്കെട്ട്. റോഡിലെ വെള്ളം ഓടയിലേക്ക് ഒഴുകിപ്പോകാതെ കെട്ടിക്കിടക്കുകയാണ്. പൊട്ടിപ്പൊളിഞ്ഞ സ്ലാബ് മാറിക്കിടക്കുന്നതു കാരണം കാൽ വഴുതി യാത്രക്കാർ ഓടയിൽ വീഴുന്നത് പതിവായി. ബസ് നിർത്തി യാത്രക്കാർക്കു കയറാനും ഇറങ്ങാനും വലിയ ബുദ്ധിമുട്ടാണ് നേരിടുന്നത്.

Deepika.com

The Largest Read Malayalam Internet Daily

Quick Links

Rashtra Deepika LTD

Deepika.com

The Largest Read Malayalam Internet Daily

Local News

Quick Links

Rashtra Deepika LTD