ADVERTISEMENT

ADVERTISEMENT

എക്സലൻസ് അവാർഡ് സമ്മാനിച്ചു

റാന്നി: പഠനത്തിൽ ഉന്നത വിജയം നേടിയവർക്ക് അംഗീകാരമായി എംഎൽഎയുടെ എക്സലൻസ് അവാർഡ് സമ്മാനിച്ചു. 10, 12 ക്ലാസുകളിൽ എല്ലാ വിഷയങ്ങൾക്കും എ പ്ലസ് നേടിയ വിദ്യാർഥികളെയും യൂണിവേഴ്സിറ്റി പരീക്ഷകളിൽ റാങ്ക് കരസ്ഥമാക്കിയവരെയും ആണ് അനുമോദിച്ചത്. അനുമോദനയോഗം ജോസ് കെ. മാണി എംപി ഉദ്ഘാടനം ചെയ്തു.

പ്രമോദ് നാരായൺ എംഎൽഎ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് കെ. ആർ. പ്രകാശ്, റാന്നി എം എസ് ഹയർ സെക്കൻഡറി സ്കൂൾ മാനേജർ കെ. സി. ജേക്കബ് കാവുങ്കൽ, പ്രിൻസിപ്പൽ സ്മിജു ജേക്കബ്, ഹെഡ്മാസ്റ്റർ ബിനോയി കെ. ഏബ്രഹാം എന്നിവർ പ്രസംഗിച്ചു.

ADVERTISEMENT

നാടിറങ്ങിയ കാട്ടാനയെ കാടു കയറ്റാൻ വനപാലകർ

പത്തനംതിട്ട: ആനയോടിക്കല്‍ ദൗത്യവുമായി കോന്നിയിലെ വനപാലകർ. കോന്നി വനം ഡിവിഷന്‍ പരിധിയില്‍ നടുവത്തുമൂഴി റേഞ്ചില്‍ കല്ലേലി തോട്ടം, കൊക്കത്തോട് ജനവാസ മേഖലയില്‍ കാട്ടാനകള്‍ വ്യാപകമായ ഇറങ്ങുന്ന സാഹചര്യത്തിലാണ് വനപാലകരുടെ നടപടി. ഡിഎഫ്ഒ ആയുഷ്മാൻ കോറിയുടെ നേതൃത്വത്തിൽ കോന്നി വനംഡിവിഷനിലെ വിവിധ ഓഫീസ് പരിധികളിൽ നിന്നുള്ള ഉദ്യോഗസ്ഥ സംഘമാണ് കൂട്ടമായി കാട് കയറിയത്. കോന്നി ആർ‌ആർ‌ടി, സൗത്ത് കുമരംപേരൂർ ഫോറസ്റ്റ് സ്റ്റേഷൻ, പാടംസ്റ്റേഷൻ, കൊക്കാത്തോട്, കരിപ്പാൻതോട് ഫോസ്റ്റ് സ്റ്റേഷനുകളിൽ നിന്നുള്ള 64 ജീവനക്കാരാണ് ദൗത്യത്തിൽ പങ്കെടുത്തത്. ജനവാസ മേഖലകളിലെത്തുന്ന കാട്ടാനകളെ തിരിച്ചറിഞ്ഞ് തിരികെ കാട്ടിലേക്ക് കടത്തി വിടുകയാണ് വനപാലക ദൗത്യം. ഇതിന്‍റെ ഭാഗമായി കോന്നി റേഞ്ചിന്‍റെ കീഴില്‍ സൗത്ത് കുമരംപേരൂര്‍ വനാതിര്‍ത്തിക്കുളളിലും വയക്കരവനമേഖലയിലുമാണ് ഇന്നലെ വ്യാപകമായി തെരച്ചില്‍ നടത്തിയത്. നദിക്കു സമീപമായി കണ്ട കാട്ടാനയെ ഉള്‍ക്കാട്ടിലേക്ക് കടത്തി വിടുകയും ചെയ്തു. ഇതിനിടയില്‍ കാട്ടാന വനപാലകർക്കു നേരേ പാഞ്ഞടുത്തു. പിന്തിരിഞ്ഞ് ഓടുന്നതിനിടയില്‍ എട്ടോളം വനപാലകര്‍ക്ക് വീണു പരിക്കേറ്റു. നിരീക്ഷണ സംഘം ജനവാസ മേഖലയില്‍ വൈകുന്നേരം നാലു മുതല്‍ പിറ്റേന്നു രാവിലെ ഒന്പതുവരെ നിരീക്ഷണ പട്രോളിംഗും ഇതുവഴി കടന്നു പോകുന്നവര്‍ക്ക് സുരക്ഷയും ഒരുക്കി പ്രത്യേക സംഘത്തെ നിയോഗിച്ചിട്ടുണ്ട്. സ്ഥിരമായി എത്തുന്ന ആനകളെ ശാസ്ത്രീയമായി തിരിച്ചറിഞ്ഞ് ഉള്‍ക്കാട്ടിലേക്ക് കടത്തിവിടുന്നത് വളരെ ശ്രമകരമാണ്. വനത്തിനുള്ളില്‍ പകല്‍ സമയത്ത് നിലയുറപ്പിച്ച ആനകള്‍ രാത്രികാലങ്ങളില്‍ അച്ചന്‍കോവിലാറും റോഡും കടന്ന് കൈതച്ചക്കത്തോട്ടത്തിലേക്ക് കൂട്ടത്തോടെ വരുന്ന സാഹചര്യമാണ് നിലവിലുള്ളതെന്ന് വനപാലകർ പറയുന്നു. കോന്നി കുളത്തുമൺ പ്രദേശത്ത് ഒരുമാസത്തിലേറെയായി നിരന്തരം കാട്ടാന ശല്യമുണ്ട്. ഇവയെ പലതവണ കാടു കയറ്റിയെങ്കിലും ഫലമുണ്ടായില്ല. കുളത്തുമൺ പ്രദേശത്തെ കൈതച്ചക്ക ത്തോട്ടമാണ് കാട്ടാനകളുടെ ലക്ഷ്യം.

എക്യുമെനിക്കൽ സാധ്യതകൾ പ്രയോജനപ്പെടുത്തണം: മാർത്തോമ്മ മെത്രാപ്പോലീത്ത

തിരുവല്ല: സാധ്യതകളുടെ കൂമ്പാരമാണ് എക്യുമെനിസമെന്ന് തിയഡോഷ്യസ് മാർത്തോമ്മ മെത്രാപ്പോലീത്ത. കേരള കൗൺസിൽ ഓഫ് ചർച്ചസിന്‍റെ ആസ്ഥാനമന്ദിരമായ ഡോ. ജോസഫ് മാർത്തോമ്മ എക്യുമെനിക്കൽ സെന്‍ററിന്‍റെ സമർപ്പണ ശുശ്രൂഷ നിർവഹിച്ചു പ്രസംഗിക്കുകയായിരുന്നു അദ്ദേഹം. കെസിസി പ്രസിഡന്‍റ് അലക്സിയോസ് മാർ യൗസേബിയോസ് മെത്രാപ്പോലീത്ത അധ്യക്ഷത വഹിച്ചു. ഡോ.ഗീവർഗീസ് മാർ കൂറിലോസ് ഡോ.ജോസഫ് മാർത്തോമ്മ അനുസ്മരണ പ്രഭാഷണം നടത്തി. സിറിൽ മാർ ബസേലിയോസ് മെത്രാപ്പോലീത്ത, സാമുവേൽ മാർ തെയോഫിലോസ് , ഔഗിൻ കുര്യാക്കോസ് മെത്രാപ്പോലീത്ത, ബിഷപ് ഡോ. ഉമ്മൻ ജോർജ്, ബിഷപ് ഡോ. ജോർജ് ഈപ്പൻ, ബിഷപ് സുന്ദർ സിംഗ്, മേജർ ബാബു പി. പൗലോസ്, ജനറൽ സെക്രട്ടറി ഡോ. പ്രകാശ് പി. തോമസ്, ട്രഷറർ റവ. ഡോ. ടി. ഐ. ജയിംസ് എന്നിവർ പ്രസംഗിച്ചു.

നഗരസഭാ സ്മാർട്ട് അങ്കണവാടി ഉദ്ഘാടനം ചെയ്തു

പത്തനംതിട്ട: നഗരസഭയിലെ സ്മാർട്ട് അങ്കണവാടി ചെയർമാൻ റ്റി. സക്കീർ ഹുസൈൻ നാടിനു സമർപ്പിച്ചു. അങ്കണവാടികൾ നാടിന്‍റെ വിദ്യാഭ്യാസത്തിന്‍റെയും സാംസ്കാരികതയുടെയും കേന്ദ്രമാണെന്ന് അദ്ദേഹം പറഞ്ഞു. ആറാം വാർഡിലെ 91-ാം നമ്പർ അങ്കണവാടിയാണ് നിർമാണം പൂർത്തിയാക്കി ആധുനിക സൗകര്യങ്ങളോടെ ഉദ്ഘാടനം ചെയ്തത്. 850 ചതുരശ്രയടി സ്ഥലത്ത് 25 ലക്ഷം രൂപ ചെലവിലാണ് അങ്കണവാടി നിർമിച്ചത്. കെട്ടിടം പൂർണമായും ശീതീകരിച്ചിട്ടുണ്ട്. കുട്ടികളുടെ കളിക്കോപ്പുകളും എത്തി. നഗരസഭയുടെ തനത് ഫണ്ടുപയോഗിച്ച് വാങ്ങിയ സ്ഥലത്താണ് പുതിയ അങ്കണവാടി നിർമിച്ചത്. വാർഡ് കൗൺസിലർ ആൻസി തോമസ് അധ്യക്ഷത വഹിച്ചു. ഡെപ്യൂട്ടി ചെയർപേഴ്സൺ ആമിന ഹൈദരാലി മുഖ്യപ്രഭാഷണം നടത്തി. ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ മേഴ്സി വർഗീസ്, ആരോഗ്യ സ്റ്റാൻഡിംഗ് കമ്മിറ്റി ചെയർമാൻ ജെറി അലക്സ്, വിദ്യാഭ്യാസ കലാകായിക സ്റ്റാൻഡിംഗ് കമ്മിറ്റി ചെയർമാൻ എസ്. ഷമീർ, പ്രതിപക്ഷ നേതാവ് കെ. ജാസിംകുട്ടി, ജില്ലാ ആസൂത്രണ സമിതി അംഗം പി.കെ. അനീഷ്, കൗൺസിലർമാരായ എ. സുരേഷ് കുമാർ, റോസ്‌ലിൻ സന്തോഷ്, റോഷൻ നായർ, എം.സി. ഷെരീഫ്, ആനി സജി, അംബികാ വേണു, മുനിസിപ്പൽ എൻജിനീയർ സുധീർ രാജ് തുടങ്ങിയവർ പ്രസംഗിച്ചു. ഭൂമി വിട്ടു നൽകിയ സുമിത്ത് സി. തോമസിനെ ആദരിച്ചു. പ്രദേശവാസികൾ സന്തോഷസൂചകമായി പായസവിതരണവും കരിമരുന്ന് പ്രയോഗവും നടത്തി. നിലവിലെ ഭരണസമിതിയുടെ കാലയളവിൽ ആറ്‌ അങ്കണവാടികൾക്കാണ് സ്വന്തം കെട്ടിടം നിർമിച്ചത്. നഗരസഭ 22-ാം വാർഡിൽ നിർമിക്കുന്ന അങ്കണവാടിയും ഉടൻ ഉദ്‌ഘാടനം ചെയ്യും.

ലോക സാമൂഹിക മാധ്യമദിനത്തിൽ ജോർജിയൻ റേഡിയോ

ചുങ്കപ്പാറ: സെന്‍റ് ജോർജ് ഹൈസ്കൂളിൽ ഗ്രീൻ സ്റ്റുഡിയോയുടെയും മീഡിയ ക്ലബിന്‍റെയും ആഭിമുഖ്യത്തിൽ ജോർജിയൻ റേഡിയോയ്ക്ക് ആരംഭം കുറിച്ചു. സ്കൂൾ റേഡിയോ പ്രക്ഷേപണത്തിന്‍റെ ഉദ്ഘാടനം സ്കൂൾ ഹെഡ്മാസ്റ്റർ വർഗീസ് ജോസഫ് റേഡിയോയിലൂടെ ആദ്യ സന്ദേശം നൽകി നിർവഹിച്ചു. കുട്ടികൾ തന്നെയാണ് റേഡിയോ ജോക്കിയായി റേഡിയോ നിയന്ത്രിക്കുന്നത്. സ്റ്റുഡിയോ കോ ഓർഡിനേറ്റർ ലൈജു കോശി മാത്യു, അനി മാത്യു, ദീപ അഗസ്റ്റിൻ എന്നിവർ നേതൃത്വം നൽകുന്നു. സാമൂഹിക മാധ്യമങ്ങളുടെ നന്മയാർന്ന ഉപയോഗം കുട്ടികൾക്കു മനസിലാക്കാനുള്ള അവസരമാണ് സ്കൂളിൽ ക്രമീകരിക്കുന്നതെന്ന് ഹെഡ്മാസ്റ്റർ അറിയിച്ചു.

ജനറൽ ആശുപത്രി സംവിധാനങ്ങൾ മെഡിക്കൽ കോളജിലേക്ക്

പത്തനംതിട്ട: ജനറൽ ആശുപത്രിയുടെ ബി ആൻഡ് സി ബ്ലോക്ക് നവീകരിക്കുന്നതിന്‍റെ ഭാഗമായി നിലവിലെ സംവിധാനങ്ങൾ കോന്നി മെഡിക്കൽ കോളജിലേക്ക് മാറ്റുന്നതിനുള്ള ഉത്തരവ് ഉടനിറങ്ങും. നാലിനുശേഷം ജനറൽ ആശുപത്രിയിൽ ശസ്ത്രക്രിയകൾ എടുക്കേണ്ടതില്ലെന്ന നിർദേശം വന്നു. ശോച്യാവസ്ഥയിലായ ബി ആൻഡ് സി ബ്ലോക്കിന് അടിയന്തര അറ്റകുറ്റപ്പണി അനിവാര്യമായ സാഹചര്യത്തിൽ കെട്ടിടം അടച്ചിടേണ്ടിവരുമെന്നതിനാൽ ഇവിടെ പ്രവർത്തിച്ചിരുന്ന വിഭാഗങ്ങൾക്ക് മറ്റൊരിടം കണ്ടെത്താനാണ് ഇവ മെഡിക്കൽ കോളജിലേക്കു മാറ്റുന്നത്. പ്രധാന ശസ്ത്രക്രിയ വിഭാഗങ്ങളായ ഒബ്സ്റ്റട്രിക്സ് ആൻഡ് ഗൈനക്കോളജി, അസ്ഥിരോഗവിഭാഗം, ജനറൽ സർജറി, ഇഎൻടി എന്നിവയാണ് മെഡിക്കൽ കോളജിലേക്ക് മാറ്റുന്നത്. ഇതു സംബന്ധമായി മന്ത്രിതലത്തിലുൾപ്പെടെ ചർച്ച നടത്തി തീരുമാനമെടുത്തിരുന്നുവെങ്കിലും ഡോക്ടർമാരുടെ ഭാഗത്തു നിന്ന് എതിർപ്പുണ്ടായതോടെ ഉത്തരവ് വൈകുകയായിരുന്നു. എന്നാൽ കെട്ടിടത്തിന്‍റെ നിർമാണ ജോലികൾ ഉടൻ ആരംഭിക്കേണ്ട സാഹചര്യത്തിൽ മാറ്റങ്ങൾ ഉടൻ നടത്താൻ നിർദേശം വന്നു. സംവിധാനങ്ങൾ മാറ്റുന്നതിനൊപ്പം ഡോക്ടർമാരും ജീവനക്കാരും അടക്കം കുറെയധികം ആളുകളെ താത്കാലികാടിസ്ഥാനത്തിൽ മെഡിക്കൽ കോളജിലേക്കു മാറ്റേണ്ടിവരും. ജനറൽ ആശുപത്രിയിൽ ഒപി മാത്രമായിരിക്കും ഇനിയുണ്ടാകുക. നിലവിൽ രണ്ട് പ്രധാന കെട്ടിടങ്ങളുടെ പണികൾ നടന്നുവരികയാണ്. അതുകൊണ്ടുതന്നെ കിടത്തിച്ചികിത്സയ്ക്കു സൗകര്യങ്ങളില്ലെന്ന സ്ഥിതിയായി. നിലവിൽ ഐപി വാർഡും ശസ്ത്രക്രിയ വിഭാഗവും ബി ആൻഡ് സി ബ്ലോക്കിലായിരുന്നു. നിലവിലെ സംവിധാനങ്ങൾ കോന്നി മെഡിക്കൽ കോളജിലേക്കു മാറ്റുന്നതോടെ പത്തനംതിട്ട ജനറൽ ആശുപത്രിയും കോന്നി മെഡിക്കൽ കോളജിന്‍റെ ഭാഗമാകും. മെഡിക്കൽ വിദ്യാഭ്യാസ വകുപ്പിനു കീഴിലാണ് കോന്നി മെഡിക്കൽ കോളജിന്‍റെ പ്രവർത്തനം. നേരത്തേ ജനറൽ ആശുപത്രിയെ മെഡിക്കൽ കോളജിന്‍റെ ഭാഗമാക്കി ഉത്തരവിറക്കിയിരുന്നു. കോന്നി സർക്കാർ മെഡിക്കൽ കോളജിന് ദേശീയ മെഡിക്കൽ കമ്മീഷന്‍റെ അംഗീകാരം വാങ്ങാൻ വേണ്ടിയാണ് ഇത്തരമൊരു ഉത്തരവിറക്കിയിരുന്നത്. ജനറൽ ആശുപത്രിയിലെ കിടക്കകളും രോഗികളും ചൂണ്ടിക്കാട്ടിയാണ് അംഗീകാരം വാങ്ങിയത്. മെഡിക്കൽ കോളജിൽ ഐപി വിഭാഗം ശക്തിപ്പെടാത്തതിനാൽ നിലവിലും ബേസ് ആശുപത്രിയായി പത്തനതിട്ട ജനറൽ ആശുപത്രിയാണ് നിലനിന്നിരുന്നത്. പത്തനംതിട്ടയിലും പരിസരങ്ങളിലും സർക്കാർ നഴ്സിംഗ് കോളജുകൾക്കും സ്കൂളുകൾക്കും ബേസ് ആശുപത്രി ഇവിടെയായിരുന്നു. തകർച്ചയിലായത് 17 വർഷം മുന്പുള്ള കെട്ടിടം 17 വർഷം മുന്പ് നിർമാണം പൂർത്തീകരിച്ച കെട്ടിടമാണ് ബി ആൻഡ് സി ബ്ലോക്ക്. നിർമാണത്തിലെ പിഴവുകളാണ് തകർച്ചയ്ക്കു കാരണമായത്. കെട്ടിടത്തിനു ചോർച്ച ഉണ്ടാകാൻ തുടങ്ങിയിട്ട് വർഷങ്ങളായി. ലിഫ്റ്റ് പ്രവർത്തിപ്പിക്കുന്പോൾ കെട്ടിടം മൊത്തത്തിൽ കുലുങ്ങുന്ന സ്ഥിതിയുണ്ട്. ഡ്രെയിനേജ് സംവിധാനങ്ങളും ശൗചാലയങ്ങളും അടഞ്ഞു കിടക്കുകയാണ്. ഇവിടെനിന്നുള്ള മലിനജലം രോഗികളെ കിടത്തിയിരിക്കുന്ന വാർഡുകളിലേക്കാണ് വീണിരുന്നത്. നവീകരണത്തിന് നാലു കോടി രൂപയുടെ പദ്ധതിയാണ് നടപ്പാക്കുന്നത്. സർക്കാർ ഏജൻസിയായ ഇൻകെലാണ് പണികൾ നടത്തുന്നത്. കെട്ടിടത്തിന്‍റെ ഒരു നില നവീകരിച്ച് നേത്രചികിത്സാ വിഭാഗം ക്രമീകരിക്കും. കണ്ണ് ഓപ്പറേഷൻ തിയേറ്ററും വാർഡും ഇതിൽ ക്രമീകരിക്കും. നിലവിൽ ആശുപത്രിയിൽ ഒപി ബ്ലോക്കിന്‍റെയും അത്യാഹിത വിഭാഗത്തിന്‍റെയും പണികൾ നടന്നുവരികയാണ്. ഇതുകാരണം സ്ഥലസൗകര്യം തീരെയില്ല. ഒപി പ്രവർത്തിക്കുന്ന കെട്ടിടത്തിലും അത്യാഹിത വിഭാഗത്തിലം ഏറെ പരിമിതികളുണ്ട്. ഇത്തരം ഒരു സാഹചര്യത്തിൽ ബി ആൻ സി ബ്ലോക്കിലെ സൗകര്യങ്ങൾ കൂടി ആശുപത്രി വളപ്പിൽ തന്നെ നിലനിർത്താനാകില്ലെന്ന് കഴിഞ്ഞ എച്ച്എംസി യോഗത്തിൽ മന്ത്രി വീണാ ജോർജ് തന്നെ വ്യക്തമാക്കിയിരുന്നു. വെള്ളക്കരം കുടിശിക രണ്ടുകോടി, വൈദ്യുതി ചാർജ് എഴുതിത്തള്ളി ജനറൽ ആശുപത്രിയുടെ വെള്ളക്കരം കുടിശിക രണ്ടു കോടി രൂപയാണ്. ആശുപത്രിയുടെ നിയന്ത്രണാധികാരമുള്ള ജില്ലാ പഞ്ചായത്താണ് ഇത് അടയ്ക്കേണ്ടത്. വൈദ്യുതി ചാർജ് ഇനത്തിൽ കെഎസ്ഇബിക്ക് കോടികൾ നൽകാനുണ്ടായിരുന്നെങ്കിലും സർക്കാർ ഇടപെട്ട് ഒഴിവാക്കി നൽകി. ഇനി 24 ലക്ഷം രൂപ അടയ്ക്കണം. ആശുപത്രിയിലേക്ക് ആവശ്യമായ സാധനങ്ങൾ വാങ്ങിയതുമായി ബന്ധപ്പെട്ട് കുടിശിക ഏറെയുണ്ട്. ഇവ കൃത്യമായി നൽകാനാകുന്നില്ല. ആശുപത്രിയുടെ ബാധ്യതകൾ സംബന്ധിച്ച് ഇന്നലെ പോലീസ് സ്പെഷൽ ബ്രാഞ്ച് സംഘം പരിശോധനകൾ നടത്തി. എച്ച്എംസി അറിഞ്ഞിട്ടില്ല ജനറൽ ആശുപത്രി സംവിധാനങ്ങൾ മാറ്റുന്നതു സംബന്ധിച്ച് ആശുപത്രി മാനേജ്മെന്‍റ് കമ്മിറ്റിക്ക് അറിവില്ല. ഏറ്റവുമൊടുവിൽ ചേർന്ന എച്ച്എംസി യോഗത്തിൽ ബി ആൻഡ് സി ബ്ലോക്കിന്‍റെ നിർമാണം ഉടൻ ആരംഭിക്കുമെന്ന് അധ്യക്ഷത വഹിച്ച മന്ത്രി വീണാ ജോർജ് അറിയിച്ചിരുന്നു. എന്നാൽ ഇതോടെ ആശുപത്രി സംവിധാനങ്ങൾ എങ്ങനെ നിലനിർത്തണമെന്നതു സംബന്ധിച്ച് ആലോചിച്ചു തീരുമാനിക്കാമെന്നായിരുന്നു മറുപടി. മെഡിക്കൽ കോളജിലേക്ക് ആശുപത്രി സംവിധാനങ്ങൾ മാറ്റുന്നതു ജില്ലാ പഞ്ചായത്തിലും ചർച്ച ചെയ്തിട്ടില്ല. ഡോക്ടർമാരുടെ സംഘടനായ കെജിഎംഒഎ ഇക്കാര്യത്തിൽ തങ്ങൾക്കുള്ള എതിർപ്പ് അറിയിച്ചിരുന്നു. പച്ചപിടിക്കാതെ കോന്നി മെഡിക്കൽ കോളജ് പത്തനംതിട്ട: ഹരിതാഭ സുന്ദരമാണ് കോന്നി സർക്കാർ മെഡിക്കൽ കോളജ് പരിസരമെങ്കിലും അഞ്ചുവർഷമെത്തുന്പോഴും പ്രവർത്തനം പച്ചപിടിച്ചില്ല. കോടികൾ ചെലവഴിച്ചുള്ള നിർമാണങ്ങളും ഉദ്ഘാടനങ്ങളും തകൃതിയായി നടക്കുന്പോഴും അടിയന്തരഘട്ടത്തിൽ ചികിത്സ ലഭ്യമാക്കാനുള്ള സംവിധാനം കോന്നിയിൽ ഇപ്പോഴുമായിട്ടില്ല. പ്രതിദിനം 1000 രോഗികൾ ഒപി വിഭാഗത്തിലെത്തുന്നുണ്ടെന്നാണ് കണക്ക്. എന്നാൽ പരമാവധി പേരെ മാത്രമേ ഇപ്പോഴും കിടത്തി ചികിത്സിക്കാറുള്ളൂ. ഇതിനുള്ള സംവിധാനമേ മെഡിക്കൽ കോളജിൽ ആയിട്ടുള്ളൂവെന്നാണ് അധികൃതർ പറയുന്നത്. 300 കിടക്കകളുള്ള ആശുപത്രി കെട്ടിടം ഉദ്ഘാടനം ചെയ്തിട്ടു മൂന്നുവർഷമായി. അത്യാഹിതവിഭാഗം ഉദ്ഘാടനം ചെയ്തുവെങ്കിലും അതും പൂർണസജ്ജമായിട്ടില്ല. ഡോക്ടർമാരുടെ അഭാവമാണ് പ്രധാന പ്രശ്നം. തസ്തികകൾ അനുവദിച്ചെങ്കിലും നിയമനം പൂർണമാകാത്തതിനാൽ ഡോക്ടർമാരും അനുബന്ധ ജീവനക്കാരും ഇല്ല. ക്വാർട്ടേഴ്സിന്‍റെ പണികൾ പൂർത്തിയാകാത്തതിനാൽ താമസസൗകര്യം ഇല്ലെന്ന പേരിലാണ് ഡോക്ടർമാർ കോന്നിയിലേക്കുള്ള നിയമനം സ്വീകരിക്കാത്തത്. താത്കാലികാടിസ്ഥാനത്തിലുള്ള ഡോക്ടർ നിയമനമാണ് ഇപ്പോഴും. ഉന്നത നിലവാരത്തിലുള്ള സജ്ജീകരണങ്ങളാണ് മെഡിക്കൽ കോളജിൽ ഒരുക്കിയിരിക്കുന്നത്. സ്കാനിംഗ് സംവിധാനം, സർജറി യൂണിറ്റ്, ഐസിയു എന്നിവയെല്ലാം ആധുനിക സംവിധാനങ്ങളോടെയാണ് സജ്ജീകരിച്ചിരിക്കുന്നത്. ഇവയുടെ പ്രയോജനം രോഗികൾക്കു ലഭിച്ചു തുടങ്ങിയിട്ടില്ല. പീഡിയാട്രിക് ഐസിയുവില്‍ 15 കിടക്കകളാണ് സജ്ജീകരിച്ചിട്ടുള്ളത്. ഏറെ കാത്തിരിപ്പിനുശേഷം പോസ്റ്റുമോർട്ടം നടപടികൾ സമീപകാലത്ത് ആരംഭിച്ചു. എന്നാൽ പോലീസ് ഔട്ട്പോസ്റ്റ് ഉൾപ്പെടെ തുടങ്ങിയിട്ടില്ല. മോർച്ചറിയായിട്ടുണ്ട്. പ്രസവവാർഡും കുട്ടികളുടെ വാർഡും ഉടൻ തുറക്കുമെന്ന പ്രഖ്യാപനങ്ങളും പ്രാവർത്തികമായിട്ടില്ല. എംബിബിഎസിൽ 300 കുട്ടികൾ 2022ലാണ് കോന്നി മെഡിക്കൽ കോളജിൽ ആദ്യ എംബിബിഎസ് ബാച്ച് എത്തുന്നത്. 100 കുട്ടികൾക്ക് പ്രവേശനം ലഭിച്ചു. കഴിഞ്ഞ മൂന്നുവർഷത്തിനിടെ 300 കുട്ടികളെത്തി. ആദ്യബാച്ച് മൂന്നാം വർഷം പൂർത്തീകരിക്കുന്നു. നാലാമത്തെ ബാച്ചിന്‍റെ പ്രവേശന നടപടികൾ കീം ഫലം വന്നാലുടൻ ആരംഭിക്കും. മെഡിക്കൽ കോളജിലെ ചികിത്സാ സൗകര്യങ്ങൾ മെച്ചപ്പെടാത്തതും കൂടുതൽ രോഗികളെ കിടത്തി ചികിത്സിക്കാനാകാത്തതും കുട്ടികളുടെ പഠനത്തെ ബാധിക്കുന്നു. പത്തനംതിട്ട ജനറൽ ആശുപത്രി കേന്ദ്രീകരിച്ചാണ് കുട്ടികളുടെ ക്ലീനിക്കൽ പഠനം നടന്നുവന്നത്. നിർമാണ ജോലികൾ കാരണം ജനറൽ ആശുപത്രിയിൽ കൂടുതൽ രോഗികളെ പ്രവേശിപ്പിക്കാനാകാത്ത സാഹചര്യമുണ്ട്. അവിടെ എത്തുന്നവരെ കോന്നി മെഡിക്കൽ കോളജിലേക്ക് റഫർ ചെയ്യുന്നുമില്ല. അവസാനവർഷത്തിലേക്കു പ്രവേശിക്കുന്ന കുട്ടികൾക്കാവശ്യമായ പ്രാക്ടിക്കൽ സൗകര്യം ലഭ്യമാകേണ്ടതുണ്ട്. ക്ലിനിക്കൽ പഠനത്തിനും ക്രമീകരണം വേണം. ഇക്കാര്യങ്ങളിലെ മെല്ലപ്പോക്ക് കുട്ടികളുടെ പഠനത്തെ ബാധിക്കും. കുട്ടികളുടെ ഹോസ്റ്റൽ, ലൈബ്രറി, ലാബ് എന്നിവയെല്ലാം സജ്ജമാണ്. എന്നാൽ ഒരു മെഡിക്കൽ കോളജിന്‍റെ അന്തരീക്ഷത്തിലേക്ക് കോന്നി ഇപ്പോഴും എത്തിയിട്ടില്ല. കാന്പസ് മാത്രമായി ഇത് ഒതുങ്ങുകയാണെന്ന് കുട്ടികൾ പറയുന്നു. ഇതിനിടെ നഴ്സിംഗ് കോളജും ആരംഭിച്ചിട്ടുണ്ട്. ഇവരോടൊപ്പം പത്തനംതിട്ട സർക്കാർ നഴ്സിംഗ് കോളജിലെ കുട്ടികളെയും കോന്നി മെഡിക്കൽ കോളജിലേക്കാണ് അയയ്ക്കുന്നത്. ഒരുവർഷം കൂടി കഴിയുന്പോഴേക്കും ഹൗസ് സർജൻസി സൗകര്യം കുട്ടികൾക്കു നൽകേണ്ടതുണ്ട്. പിന്നാലെ പിജി കോഴ്സുകൾ ആരംഭിക്കുമെന്നും പറയുന്നു. എന്നാൽ അടിസ്ഥാന സൗകര്യ വിപുലീകരണത്തിൽ സമയബന്ധിത നടപടികൾ ഉണ്ടാകുന്നില്ലെന്നാണ് ആക്ഷേപം. ചെലവഴിച്ചത് കോടികൾ കിഫ്ബി ഫണ്ടിലൂടെ 352 കോടി രൂപയുടെ വികസനപ്രവര്‍ത്തനങ്ങളാണ് മെഡിക്കൽ കോളജുമായി ബന്ധപ്പെട്ടു നടന്നതായി പറയുന്നത്. വൻകിട കന്പനികൾക്കായിരുന്നു കരാറുകൾ. കിഫ്ബിയും കേന്ദ്രഫണ്ടുകളും ഉപയോഗപ്പെടുത്തിയാണ് നിർമാണം നടത്തിയത്. എന്‍എച്ച്എമ്മില്‍ നിന്ന് 15 ലക്ഷം രൂപ മുതല്‍ മുടക്കിലാണ് പീഡിയാട്രിക് ഐസിയു സജ്ജീകരിച്ചത്. ബോയ്സ് ഹോസ്റ്റൽ നിർമാണത്തിന് 12 കോടി രൂപ ചെലവായി. മെഡിക്കല്‍ കോളജിലെ നാലു കെട്ടിടങ്ങളുടെ നിര്‍മാണവും 11 നിലകളിലായി 40 അപ്പാര്‍ട്‌മെന്‍റുകള്‍ ഉള്‍പ്പെടുത്തിയ രണ്ട് ക്വാർ‌ട്ടേഴ്സ് സമുച്ചയങ്ങളുടെ നിർമാണങ്ങൾ പൂർത്തീകരിച്ചുവരുന്നു. പ്രിൻസിപ്പൽ ഡീൻ വില്ല പൂർത്തീകരിച്ചു. 800 പേർക്ക് ഇരിക്കാവുന്ന ഓഡിറ്റോറിയത്തിന്‍റെയും എക്സാമിനേഷൻ ഹാളിന്‍റെയും പാർക്കിംഗ് ലോഞ്ചിന്‍റെയും നിർമാണം നടക്കുന്നുണ്ട്. ഉദ്ഘാടനം നടന്നത് 2020ൽ 2011ലെ യുഡിഎഫ് മന്ത്രിസഭയുടെ കാലത്ത് അനുമതി ആകുകയും 2013ൽ അന്നത്തെ മുഖ്യമന്ത്രി ഉമ്മൻ ചാണ്ടി തറക്കല്ലിടുകയും ചെയ്ത മെഡിക്കൽ കോളജിന്‍റെ ഓഫീസ് സംവിധാനങ്ങളടക്കം 2015-ൽതന്നെ ആരംഭിക്കുകയും ചെയ്തു. കോന്നി മെഡിക്കൽ കോളജിന് ദേശീയ മെഡിക്കൽ കമ്മീഷൻ അംഗീകാരത്തിനു വേണ്ടി അന്നുതന്നെ ശ്രമം തുടങ്ങിയിരുന്നു. എന്നാൽ പിന്നീടുവന്ന എൽഡിഎഫ് സർക്കാർ തുടർപ്രവർത്തനങ്ങളിൽ താത്പര്യം കാട്ടിയിട്ടില്ല. തടസപ്പെട്ട നിർമാണ ജോലികൾ അടക്കം പുനരാരംഭിച്ചത് 2019ലാണ്. 2020 സെപ്റ്റംബർ 14ന് മെഡിക്കൽ കോളജ് ഉദ്ഘാടനം ചെയ്തു. ഐപി വിഭാഗം 2021 ഫെബ്രുവരി പത്തിനും തുറന്നു കൊടുത്തു. എന്നാൽ കിടത്തിച്ചികിത്സയും അത്യാഹിത വിഭാഗവും പൂർണ സജ്ജമല്ലെന്നാണ് ആരോഗ്യ വകുപ്പ് ഇപ്പോഴും പറയുന്നത്. അത്യാഹിത, ഐപി വിഭാഗങ്ങളിലേക്കെത്താനുള്ള യാത്രാ ബുദ്ധിമുട്ടും കാരണമായി പറയുന്നു. മെഡിക്കൽ കോളജ് റോഡിന്‍റെ വിപുലീകരണ പ്രവർത്തനങ്ങൾ ആരംഭിച്ചിട്ടേയുള്ളൂ. അടിയന്തരഘട്ടത്തിൽ ആംബുലൻസ് അടക്കമുള്ളവ എത്താനുള്ള ബുദ്ധിമുട്ടാണ് കാരണമയി പറയുന്നത്.

നഴ്സിംഗ് കോളജ്: അംഗീകാരമില്ലാതെ ഫലം തരില്ലെന്ന് കുഹാസ്

പത്തനംതിട്ട: പത്തനംതിട്ടയിലെ സർക്കാർ നഴ്സിംഗ് കോളജിലെ രണ്ടാം വർഷ വിദ്യാർഥികളുടെ കഴിഞ്ഞ സെമസറ്ററുകളുടെ ഫലം ആരോഗ്യ സർവകലാശാല പുറത്തുവിട്ടില്ല. രണ്ട് സെമസ്റ്ററുകളുടെ ഫലമാണ് ലഭിക്കാനുള്ളത്. സർവകലാശാലയിൽ ആരോഗ്യവകുപ്പ് സമ്മർദം ചെലുത്തിയതോടെ ഫലം പരിശോധിക്കാനുള്ള അവസരം കുട്ടികൾക്ക് ലഭിച്ചിരുന്നു. ഒരു തവണ മാത്രമേ ഇത്തരത്തിൽ പരിശോധിക്കാനാകൂ. അഖിലേന്ത്യ നഴ്സിംഗ് കൗൺസിലിന്‍റെ അംഗീകാരം കോളജിനു ലഭിക്കാത്തതാണ് പ്രശ്നം. ആരോഗ്യ സർവകാലാശാല താത്കാലിക അംഗീകാരം നൽകിയാണ് കുട്ടികളെ ബിഎസ് സി നഴ്സിംഗ് പഠനത്തിനു പ്രവേശിപ്പിച്ചത്. അടിസ്ഥാന സൗകര്യങ്ങളൊരുക്കി ഐഎൻസി അംഗീകാരം ഉടൻ വാങ്ങാമെന്ന ഉറപ്പിലായിരുന്നു പ്രവേശനം. എന്നാൽ രണ്ടുവർഷം കഴിഞ്ഞിട്ടും പത്തനംതിട്ട നഴ്സിംഗ് കോളജിന് അംഗീകാരമായിട്ടില്ല. 2023ൽ തുടങ്ങിയ സംവിധാനങ്ങൾ മാത്രമേ ഇപ്പോഴും ഉള്ളൂ. സ്വന്തമായി സ്ഥലം കണ്ടെത്തി ഐഎൻസി വ്യവസ്ഥകൾ പ്രകാരമുള്ള കെട്ടിടം നിർമിച്ചെങ്കിൽ മാത്രമേ അനുമതി ലഭ്യമാകൂ. സംസ്ഥാനത്ത് 2023ൽ പുതുതായി തുടങ്ങിയ അഞ്ച് നഴ്സിംഗ് കോളജിലെ ബാച്ചുകൾക്ക് അനുമതി ലഭിച്ചിരുന്നില്ല. എന്നാൽ മറ്റു നാലിടങ്ങളിൽ രണ്ടാംവർഷക്കാർക്ക് അനുമതി നൽകി. മെഡിക്കൽ കോളജുകളോടു ചേർന്നായതിനാൽ അനുമതിക്കു തടസമുണ്ടായില്ല. ഈ കോളജുകളിലെ ഒന്നാംവർഷ ബാച്ചിനും തുടർന്ന് അനുമതി ലഭിച്ചേക്കും. എന്നാൽ പത്തനംതിട്ടയിൽ ഒരു ബാച്ചിനും അംഗീകമുണ്ടായിട്ടില്ല. മൂന്നാമത്തെ ബാച്ചിന്‍റെ പ്രവേശന നടപടികളും ആരംഭിച്ചിട്ടുണ്ട്. കോളജിന്‍റെ അടിസ്ഥാന പ്രശ്നങ്ങൾ സംബന്ധിച്ചു ജില്ലാ കളക്ടറുമായി ഈയാഴ്ച ചർച്ച നടക്കുമെന്ന് പിടിഎ പറയുന്നു. മലയാലപ്പുഴയിലെ സ്വകാര്യ എൻജിനിയറിംഗ് കോളജ് കെട്ടിടത്തിലേക്ക് നഴ്സിംഗ് കോളജ് മാറ്റാനുള്ള ആലോചനയാണ് നടക്കുന്നത്. എൻജിനിയറിംഗ് കോളജ് പ്രവർത്തിച്ചിരുന്ന കെട്ടിടം ഇതിനായി സജ്ജമാക്കേണ്ടതുണ്ട്. നഴ്സിംഗ് കോളജ് കുട്ടികൾ ക്ലിനിക്കൽ പഠനത്തിനായി ഇനി കോന്നി മെഡിക്കൽ കോളജിലാണ് പോകേണ്ടത്. രണ്ടാംവർഷ കുട്ടികൾക്ക് കഴിഞ്ഞയിടെ ക്ലിനിക്കൽ പഠനം കോട്ടയം മെഡിക്കൽ കോളജിലായിരുന്നു. ഇവർക്ക് ബസ് വാങ്ങി നൽകുമെന്ന് മന്ത്രി വീണാ ജോർജ് നൽകിയ ഉറപ്പും പാലിക്കപ്പെട്ടിട്ടില്ല. ബസ് ഉടനെത്തുമെന്നാണ് അധികൃതർ പറയുന്നത്. ഹോസ്റ്റൽ ഫീസ്, ഭക്ഷണം, യാത്രാച്ചെലവ് തുടങ്ങിയ ചെലവുകൾ ഏറുന്നതോടെ രക്ഷിതാക്കളുടെ ആശങ്കയും വർധിച്ചു. ഇതിനിടെയാണ് അനുമതി ലഭ്യമാകാത്ത വിഷയങ്ങളും നേരിടുന്നത്.

മാർത്തോമ്മ ശ്ലീഹയുടെ ജീവിതദർശനങ്ങൾ പിന്തുടരാനാകണം: കർദിനാൾ മാർ ആലഞ്ചേരി

നിലയ്ക്കൽ: മാർത്തോമ്മ ജീവിതദർശനങ്ങൾ ഉൾക്കൊള്ളുകയും അതു സമൂഹത്തിനു പകർന്നു കൊടുക്കുകയും വേണമെന്ന് കർദിനാൾ മാർ ജോർജ് ആലഞ്ചേരി. നിലയ്ക്കൽ സെന്‍റ് തോമസ് എക്യുമെനിക്കൽ ദേവാലയത്തിൽ മാർത്തോമ്മ ശ്ലീഹയുടെ ദുക്റാനാ തിരുനാളിനോടനുബന്ധിച്ച് ഇന്നലെ രാവിലെ ദിവ്യബലി അർപ്പിച്ച് സന്ദേശം നൽകുകയായിരുന്നു അദ്ദേഹം. കാഞ്ഞിരപ്പള്ളി രൂപതയിലെ തുലാപ്പള്ളി, സീതത്തോട് ഇടവകാംഗങ്ങൾ കുർബാനയിൽ സന്നിഹിതരായിരുന്നു. ഫാ. ബെന്നി തട്ടാപറന്പിൽ, ഫാ. സോണി, ഫാ.ഷൈജു മാത്യു തുടങ്ങിയവർ നേതൃത്വം നൽകി. രാവിലെ യാക്കോബായ സഭ തുന്പമൺ ഭദ്രാസനത്തിലെ ഫാ. എബി സ്റ്റീഫൻ എന്നിവർ കുർബാന അർപ്പിച്ചു.

ജില്ലയില്‍ രണ്ട് ദുരിതാശ്വാസ ക്യാമ്പുകള്‍

‌പത്തനംതിട്ട: ജില്ലയില്‍ രണ്ട് ദുരിതാശ്വാസ ക്യാമ്പുകൾ. തിരുവല്ല താലൂക്കിലാണ് രണ്ട് ക്യാമ്പുകളും പ്രവര്‍ത്തിക്കുന്നത്. 15 കുടുംബങ്ങളിലായി 15 പുരുഷന്‍മാരും 20 സ്ത്രീകളും 12 കുട്ടികളും ഉള്‍പ്പെടെ 47 പേരാണ് ക്യാമ്പിലുള്ളത്. മേപ്രാല്‍ കുര്യാക്കോസ് മാര്‍ കൂറിലോസ് കമ്യൂണിറ്റി ഹാൾ, തിരുമൂലപുരം എസ്എന്‍വിഎസ് എച്ച്എസ് എന്നിവിടങ്ങളിലാണ് ക്യാമ്പ്.

കോന്നി മെഡിക്കൽ കോളജിലേക്ക് കോൺഗ്രസ് മാർച്ച് ഇന്ന്

പത്തനംതിട്ട: സര്‍ക്കാര്‍ മെഡിക്കല്‍ കോളജുകളിലെ ശസ്ത്രക്രിയ ഉപകരണങ്ങളുടെയും മരുന്നിന്‍റെയും ക്ഷാമവും ഡോക്ടര്‍മാരുടെയും ജീവനക്കാരുടെയും അഭാവവും പരിഹരിക്കുക, സര്‍ക്കാര്‍ ആശുപത്രികളോടുള്ള പിണറായി സര്‍ക്കാരിന്‍റെ അവഗണന അവസാനിപ്പിക്കുക, രോഗികളുടെ ജീവന്‍ വച്ച് പന്താടുന്ന നടപടി അവസാനിപ്പിക്കുക തുടങ്ങിയ ആവശ്യങ്ങള്‍ ഉന്നയിച്ച് ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ ഇന്നു രാവിലെ 10.30 ന് കോന്നി മെഡിക്കല്‍കോളജിലേക്ക് പ്രതിഷേധ മാര്‍ച്ചും ധര്‍ണയും സംഘടിപ്പിക്കും. മാര്‍ച്ചും ധര്‍ണയും യുഡിഎഫ് സംസ്ഥാന കണ്‍വീനര്‍ അടൂര്‍ പ്രകാശ് എംപി ഉദ്ഘാടനം ചെയ്യും. ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പില്‍ അധ്യക്ഷത വഹിക്കും. ‌ പ്രതിഷേധ മാര്‍ച്ചിലും ധര്‍ണയിലും പങ്കെടുക്കുവാനുള്ള ജില്ലയിലെ കോണ്‍ഗ്രസ് നേതാക്കളും, ഭാരവാഹികളും പ്രവര്‍ത്തകരും രാവിലെ 10.30 ന് മുമ്പായി കോന്നി കേന്ദ്രീയ വിദ്യാലയത്തിന് സമീപമുള്ള വെയിറ്റിംഗ് ഷെഡ് ഭാഗത്ത് എത്തിച്ചേരണമെന്ന് ഡിസിസി ജനറല്‍ സെക്രട്ടറി സാമുവല്‍ കിഴക്കുപുറം അറിയിച്ചു.

കൊന്നമൂട് വളവിൽ ബൈക്ക് വീട്ടുമുറ്റത്തേക്ക് മറിഞ്ഞു

പത്തനംതിട്ട: കൊന്നമൂട് വളവിൽ വീണ്ടും അപകടം. നിയന്ത്രണം വിട്ട ബൈക്ക് ഏഴ് അടിയോളം താഴ്ചയിൽ വീടിന്‍റെ മുറ്റത്തേക്ക് മറിഞ്ഞു പന്തളം സ്വദേശികളായ രണ്ടു പേർക്ക് പരിക്കേറ്റു. ഇന്നലെ രാവിലെയായിരുന്നു അപകടം. ഇവരെ ജനറൽ ആശുപത്രിയിൽ പ്രവേശിപ്പിച്ചു. ഒരു കാർ വരുന്നത് കണ്ട് ബൈക്ക് വെട്ടിച്ചപ്പോഴാണ് നിയന്ത്രണം വിട്ടത്. റോഡരികിലെ കൈവരിയുടെ വിടവിൽ കൂടിയാണ് താഴെ പതിച്ചത് . പത്തനംതിട്ട - അയിരൂർ കെഎസ്ടിപി റോഡിൽ കൊന്നമൂടിനും വെട്ടിപ്പുറത്തിനും ഇടയിലുള്ള ഭാഗത്ത് അടുത്ത സമയത്ത് വാഹനാപകടമുണ്ടായി ഒരാളുടെ ജീവൻ പൊലിഞ്ഞതിനു പിന്നാലെ റോഡ് നിർമാണത്തിലെ അപാകതകൾ വീണ്ടും ചർച്ചയാകുകയാണ്. അപകടകരമായ വളവ് നിവർത്താതെയാണ് റോഡ് നിർമാണം പൂർത്തിയാക്കിയത്. ഇക്കാര്യം നാട്ടുകാർ അന്നേ ചൂണ്ടിക്കാട്ടിയിരുന്നു.

മെഡിക്കൽ ഉപജാപക സംഘത്തിനെതിരേ നടപടി വേണം

പത്തനംതിട്ട: ലാബ് ടെസ്റ്റുകൾക്കും മരുന്നുകൾക്കും ഉപകരണങ്ങൾക്കും രോഗികളെ കൂട്ടത്തോടെ സ്വകാര്യ സ്ഥാപനങ്ങളിലേക്ക് അയയ്ക്കുന്ന ഉപജാപകസംഘം കേരളത്തിലെ സർക്കാർ മെഡിക്കൽ കോളജുകളിൽ പ്രവർത്തിക്കുന്നതായിട്ടുള്ള പരാതിയിൽ നടപടി സ്വീകരിക്കണമെന്ന് ആവശ്യം. ഹൈക്കോടതി അഭിഭാഷകനും പൊതു പ്രവർത്തകനുമായ കുളത്തൂർ ജയ്‌സിംഗ് നൽകിയ പരാതിയിൽ ഉചിത നടപടി സ്വീകരിക്കുവാൻ മുഖ്യമന്ത്രിയുടെ ഓഫീസ് മെഡിക്കൽ വിദ്യാഭ്യാസ വകുപ്പ് ഡയറക്ടർക്ക് നിർദ്ദേശം നൽകി. ഗവൺമെന്‍റ് മെഡിക്കൽ കോളജുകളിൽ ചികിത്സ തേടി എത്തുന്ന രോഗികളെ സ്വകാര്യ ലാബുകളിൽ ടെസ്റ്റുകൾ നടത്തുന്നതിന് പറഞ്ഞയക്കുന്ന ഉപജാപ കസംഘം പ്രവർത്തിക്കുന്നതായ ആക്ഷേപമാണ് പരാതിക്ക് അടിസ്ഥാനമായത്. സർക്കാർ മെഡിക്കൽ കോളജിൽ ലഭ്യമാകുന്ന മരുന്നുകൾ എഴുതാതെ സ്വകാര്യ മെഡിക്കൽ ഷോപ്പുകളിൽ ലഭ്യമാകുന്ന മരുന്നുകൾ എഴുതി രോഗികളെ അത്തരം മരുന്നുകൾ വാങ്ങുവാൻ പ്രോത്സാഹിപ്പിച്ചുവരുന്നതായും പരാതിയിൽ ചൂണ്ടിക്കാട്ടി. സർക്കാർ മെഡിക്കൽ കോളജിൽ എത്തുന്ന രോഗികളിൽ ഭൂരിപക്ഷവും മരുന്നുകൾക്കും ഓപ്പറേഷൻ ഉപകരണങ്ങൾക്കുംലാബ് ടെസ്റ്റുകൾക്കും മറ്റും സ്വകാര്യ സ്ഥാപനങ്ങളെ ആശ്രയിക്കേണ്ടി വരുന്നതിനു പിന്നിൽ വർഷങ്ങളായി തുടരുന്ന ചിലരുടെ സംഘടിത ശ്രമങ്ങളാണെന്ന് കുളത്തൂർ ജയ്‌സിംഗിന്‍റെ പരാതിയിൽ പറയുന്നു.

തൊഴിലാളികൾ അറിയാതെ വസ്ത്ര വ്യാപാരശാല പൂട്ടി

അടൂർ: അപ്രതീക്ഷിതമായി വസ്ത്ര വ്യാപാരശാല അടച്ചുപൂട്ടിയതിനാൽ നൂറോളം തൊഴിലാളികൾ പെരുവഴിയിലായി. കെപി റോഡിൽ പ്രവർത്തിക്കുന്ന കരിക്കിനേത്ത് സിൽക്ക് ഗലേറിയ ആണ് തൊഴിലാളികൾ പോലുമറിയാതെ ഇന്നലെ താഴിട്ടത്. രാവിലെ ജോലിക്കെത്തിയ തൊഴിലാളികൾ പൂട്ടിക്കിടക്കുന്ന വസ്ത്രശാല കണ്ട് അമ്പരന്നു പോയി. ഇതോടെ നൂറോളം തൊഴിലാളികളുടെ കുടുംബങ്ങൾ പ്രതിസന്ധിയിലായി. കടയിൽ അവശേഷിക്കുന്ന തുണിത്തരങ്ങൾ രാത്രിയിൽ കണ്ടെയ്നർ ലോറികളിലായി കടത്തിയെന്നാണ് സമീപവാസികൾ പറയുന്നത്. ഉടമയെ ഫോണിലൂടെ ബന്ധപ്പെടാൻ തൊഴിലാളികൾ ശ്രമിച്ചെങ്കിലും കഴിഞ്ഞില്ല.

തദ്ദേശസ്ഥാപനങ്ങളുടെ ഹെല്‍ത്ത് ഗ്രാന്‍റ് ഭേദഗതികൾക്ക് അംഗീകാരം

പത്തനംതിട്ട: ജില്ലയിലെ 21 തദ്ദേശസ്ഥാപനങ്ങളുടെ ഹെല്‍ത്ത് ഗ്രാന്‍റ് സ്പില്‍ഓവര്‍ ഭേദഗതി പദ്ധതിക്ക് ജില്ലാ ആസൂത്രണ സമിതി യോഗത്തിൽ അംഗീകാരം നൽകി. പത്തനംതിട്ട നഗരസഭ, ഇലന്തൂര്‍, പന്തളം, കോന്നി, പറക്കോട്, പുളിക്കീഴ് ബ്ലോക്ക് പഞ്ചായത്തുകള്‍, തണ്ണിത്തോട്, മെഴുവേലി, ഏനാദിമംഗലം, അരുവാപ്പുലം, അയിരൂര്‍, തുമ്പമണ്‍, ഇലന്തൂര്‍, മലയാലപ്പുഴ, പള്ളിക്കല്‍, ഏഴംകുളം, ആറന്മുള, നെടുമ്പ്രം, പന്തളം തെക്കേക്കര, ചെറുകോല്‍, മല്ലപ്പള്ളി ഗ്രാമപഞ്ചായത്തുകള്‍ എന്നിവയുടെ പദ്ധതിക്കാണ് അംഗീകാരം ലഭിച്ചത്. അടൂര്‍, പത്തനംതിട്ട നഗരസഭകളുടെ ഖരമാലിന്യ പരിപാലന പദ്ധതിക്കും അംഗീകാരമായി. ജില്ലാ പദ്ധതി തയ്യാറാക്കുന്നതിന്‍റെ പുരോഗതിയും വിലയിരുത്തി. ജില്ലാ പഞ്ചായത്ത് വൈസ് പ്രസിഡന്‍റ് ബീന പ്രഭ, ക്ഷേമകാര്യ സ്ഥിരം സമിതി അധയക്ഷന്‍ ജിജി മാത്യു, അംഗങ്ങളായ സാറാ തോമസ്, വി റ്റി അജോമോന്‍, ജില്ലാ ഡെപ്യൂട്ടി പ്ലാനിംഗ് ഓഫീസര്‍ ജി. ഉല്ലാസ്, തദ്ദേശസ്ഥാപന പ്രതിനിധികള്‍, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

എസ്എൻഐടിയിൽ ബിരുദദാനച്ചടങ്ങ് മൂന്നിന്

പത്തനംതിട്ട: അടൂർ ശ്രീനാരായണ ഇൻസ്റ്റിറ്റ്യൂട്ട് ഓഫ് ടെക്നോളജിയിലെ ബിരുദദാനച്ചടങ്ങ് മൂന്നിനു രാവിലെ 9.30ന് നടക്കും. കഴിഞ്ഞ മൂന്നുവർഷത്തിനുള്ളിൽ സ്ഥാപനത്തിൽ നിന്നും ബിരുദ, ബിരാദാനന്തര പഠനം വിജയകരമായി പൂർത്തിയാക്കി നാനൂറോളം വിദ്യാർഥികൾ ചടങ്ങിൽ സർട്ടിഫിക്കറ്റുകൾ ഏറ്റുവാങ്ങുമെന്ന് കോളജ് പ്രിൻസിപ്പൽ പ്രഫ. രാധാകൃഷ്ണൻ നായർ പത്രസമ്മേളനത്തിൽ പറഞ്ഞു. മന്ത്രി ഡോ. ആർ. ബിന്ദു സമ്മേളനം ഉദ്ഘാടനം ചെയ്യും. കോളജ് ചെയർമാൻ കെ. സദാനന്ദൻ അധ്യക്ഷത വഹിക്കുന്ന യോഗത്തിൽ ഡെപ്യൂട്ടി സ്പീക്കർ ചിറ്റയം ഗോപകുമാർ അവാർഡുദാനം നിർവഹിക്കും. കോളജ് മാനേജിംഗ് ഡയറക്ടർ എബിൻ അന്പാടിയിൽ അക്കാഡമിക് എക്സലൻസ് അവാർഡ് സമ്മാനിക്കും. എംബിഎ ഡിപ്പാർട്ട്മെന്‍റ് ഡയറക്ടർ ഡോ.ജി. ഹരിസുന്ദർ, വിവിധ ഡിപ്പാട്ട്മെന്‍റ് മേധാവികൾ തുടങ്ങിയവർ പ്രസംഗിക്കും. എംബിഎ ഡയറക്ടർ ഡോ.ജി. ഹരിസുന്ദർ, ഇലക്ട്രിക്കൽ ആൻഡ് ഇലക്ട്രോണിക്സ് വകുപ്പ് മേധാവി പ്രഫ.ലക്ഷ്മി ആർ. നായർ എന്നിവരും പത്രസമ്മേളനത്തിൽ പങ്കെടുത്തു.

ബന്ദിപ്പൂവ് കൃഷി ആരംഭിച്ചു

ഓമല്ലൂർ: ഗ്രാമപഞ്ചായത്ത് കുടുംബശ്രീ തൊഴിലുറപ്പ് എന്നിവയുടെ നേതൃത്വത്തിൽ ഓണത്തിന് വിപണിയിൽ എത്തുന്നതിനു വേണ്ടി ബന്ദിപ്പൂവ് കൃഷി ആരംഭിച്ചു. കൃഷിയുടെ പഞ്ചായത്തുതല ഉദ്ഘാടനം പ്രസിഡന്‍റ് ജോൺസൺ വിളവിനാൽ നിർവഹിച്ചു. കഴിഞ്ഞ വർഷം കുടുംബശ്രീ പൂകൃഷി ചെയ്തെങ്കിലും കാലാവസ്ഥയുടെ മാറ്റവും വിപണിയിൽ തമിഴ്നാട് പൂക്കളുടെ കടന്നുവരവും കുടുംബശ്രീ യൂണിറ്റുകൾക്ക് നഷ്ടം സംഭവിച്ചു. ഇത്തവണ ഓണത്തിന് വിപണിയിൽ ഇറക്കുവാൻ 55 ദിവസത്തിനകം പൂക്കുന്ന തൈകളാണ് നടുന്നതെന്ന് പ്രസിഡന്റ് ജോൺസൺ പറഞ്ഞു. വാർഡ് മെംബർ പി. സുജാത അധ്യക്ഷത വഹിച്ചു. സിഡിഎസ് ചെയർപേഴ്സൺ കെ അമ്പിളിപ്രസംഗിച്ചു.

മാന്നാർ മഹാത്മാ ജലമേള സെപ്റ്റംബർ എട്ടിന്

പത്തനംതിട്ട: 59 ാമത് മാന്നാർ മഹാത്മാ ജലമേള സെപ്റ്റംബർ എട്ടിന് ഉച്ചകഴിഞ്ഞ് രണ്ടു മുതൽ കുര്യത്ത് കടവിലുള്ള മഹാത്മാ വാട്ടർ സ്റ്റേഡിയത്തിൽ നടത്തുമെന്ന് ജനറൽ കൺവീനർ എൻ. ഷൈാജും ജനറൽ സെക്രട്ടറി ടി.കെ. ഷാജഹാനും പത്രസമ്മേളനത്തിൽ അറിയിച്ചു. നെഹ്റു ട്രോഫി ജലമേളകളിൽ പങ്കെടുത്തുവരുന്ന 12 ചുണ്ടൻവള്ളങ്ങളും ആറ് ഒന്നാംഗ്രേഡ് വെപ്പു വള്ളങ്ങളും മറ്റു ചെറുവള്ളങ്ങളും ഉൾപ്പെടെ നാല്പതിൽപരം കളിവള്ളങ്ങൾ മത്സരങ്ങളിൽ പങ്കെടുക്കും. മേളയുടെ നടത്തിപ്പിലേക്ക് വിവിധ കമ്മിറ്റികൾ രൂപീകരിച്ച് പ്രവർത്തനം തുടങ്ങി. മഹാത്മാഗാന്ധി ഇന്ത്യൻ നാഷണൽ കോൺഗ്രസ് പ്രസിഡന്‍റായതിന്‍റെ നൂറാംവാർഷികം ആഘോഷിക്കുന്ന കാലയളവെന്ന നിലയിൽ പ്രിയങ്ക ഗാന്ധിയെ ജലോത്സവത്തിലേക്കു ക്ഷണിച്ചതായി ഭാരവാഹികൾ അറിയിച്ചു.സെക്രട്ടറി സോമരാജ്, മോൻ തുണ്ടിയിൽ എന്നിവരും പത്രസമ്മേളനത്തിൽ പങ്കെടുത്തു.

തിരുവല്ലയിലെ സ്വകാര്യ ബസ് സ്റ്റാൻഡ് നിർമാണം ഇന്ന് പൂർത്തിയാകും

തിരുവല്ല: മുനിസിപ്പൽ ബസ് സ്റ്റാൻഡിന്‍റെ അറ്റകുറ്റപ്പണികൾ ഇന്ന് പൂർത്തിയാകും. യാർഡ് പൊട്ടിപ്പൊളിഞ്ഞ് ബസുകളുടെ പ്രവേശനം തന്നെ അസാധ്യമായ രീതിയിൽ കിടന്നിരുന്ന ബസ് സ്റ്റാൻഡിന്‍റെ പുനർനിർമാണം നഗരസഭ തന്നെയാണ് നടത്തിയത്. എന്നാൽ ബസുകളുടെ പ്രവേശനത്തിന് ഒരാഴ്ച കൂടി കഴിയുമെന്ന് കരുതുന്നു. കഴിഞ്ഞ ആറുമാസമായി നിലവിലെ ബസ് സ്റ്റാൻഡ് അറ്റകുറ്റപ്പണികൾക്കായി അടച്ചിട്ടിരിക്കുകയായിരുന്നു. ഇതു കാരണം ബസുകൾ ടികെ റോഡിൽ വൈഎംസിഎ ജംഗ്ഷനിലെ ബൈപാസ് പാലത്തിനടിയിലാണ് പാർക്ക് ചെയ്തിരുന്നത്. യാത്രക്കാർ ഇവിടെയെത്തിയാണ് ബസുകളിൽ കയറിയിരുന്നത്. മഴക്കാലമായതോടെ പാർക്കിംഗ് ഏരിയായിൽ ചെളിയും വെള്ളവും നിറഞ്ഞതോടെ യാത്രക്കാരും ബസ് ജീവനക്കാരും ദുരിതത്തിലായി. 30 ലക്ഷം രൂപ ചെലവിലാണ് നിർമാണം നടത്തിയത്. മഴ പണികളെ ബാധിച്ചിരുന്നതായി കരാറുകാർ പറഞ്ഞു. കോൺക്രീറ്റ് ജോലികൾഇന്നു പൂർത്തിയാകും. 150 ഓളം ബസുകൾ പ്രതിദിനം വന്നു പോകുന്ന സ്റ്റാൻഡിൽ യാത്രക്കാർക്കും ബസ് ജീവനക്കാർക്കും യാതൊരു അടിസ്ഥാനസൗകര്യങ്ങളും ഇല്ല. ശൗചാലയമോ വിശ്രമമുറിയോ ഉപയോഗ യോഗ്യമായിട്ടില്ല. ഷീറ്റ് പാകിയ ഒരു താത്കാലിക ഷെൽട്ടറാണ് ഇപ്പോഴുള്ളത്. ശുചിമുറിക്കും അടച്ചുകെട്ടൽ ഇല്ല. നിർമാണഘട്ടത്തിൽ അടിസ്ഥാന സൗകര്യ വികസനം നഗരസഭ ശ്രദ്ധിച്ചിരുന്നില്ല. ഏറെ വർഷങ്ങൾക്കുശേഷമാണ് ബസ് സ്റ്റാൻഡ് യാർഡ് കോൺക്രീറ്റ് ചെയ്യാനെങ്കിലും തയാറായതെന്ന് പറയുന്നു. ടികെ റോഡിൽ നിന്ന് ഒഴുകി എത്തുന്ന മഴ വെള്ളം യാത്രക്കാരുടെ നിലവിലെ കാത്തിരിപ്പ് കേന്ദ്രത്തിലേക്കാണ് എത്തുന്നത്.വെള്ളവും വെളിച്ചവും പ്രാഥമികാവശ്യ സൗകര്യങ്ങളും ഒരുക്കി ബസ് സ്റ്റാൻഡ് വികസിപ്പിക്കണമെന്നാണാവശ്യം.

സണ്‍ഡേസ്‌കൂള്‍ അധ്യാപക സംഗമം

അടൂർ: ഓര്‍ത്തഡോക്‌സ് സിറിയന്‍ സണ്‍ഡേസ്‌കൂള്‍ അസോസിയേഷന്‍ അടൂര്‍ കടമ്പനാട് ഭദ്രാസന വാര്‍ഷിക സമ്മേളനവും അധ്യാപക സംഗമവും ബിരുദ ദാനവും പത്തനാപുരം മൗണ്ട് തബോര്‍ ദയറായില്‍ ബസേലിയോസ് മാര്‍ത്തോമ്മ മാത്യൂസ് തൃതീയന്‍ കാതോലിക്കാ ബാവ ഉദ്ഘാടനം ചെയ്തു. ഫാ. ഡോ. തമ്പി വര്‍ഗീസിന്‍റെ അധ്യക്ഷതയില്‍ ഫാ. ഡോ. മാത്യു വര്‍ഗീസ്, ഭദ്രാസന സെക്രട്ടറി ഫാ. മാത്യൂസ് പ്ലാവിളയിൽ, ഫാ. ഫിലിപ്പ് മാത്യൂസ്, പീറ്റര്‍ റമ്പാൻ, ഫാ. ടി. കെ. തോമസ്, ലേഖ ജയിംസ്, ജി. തോമസ്, ജേക്കബ് കുര്യൻ, സാം അകമുറ്റത്ത്, എബിന്‍ ജോര്‍ജ് എന്നിവര്‍ പ്രസംഗിച്ചു. അവാര്‍ഡ് വിതരണവും ബിരുദ ദാനവും ബാവ നിര്‍വഹിച്ചു.

തിരുവല്ലയില്‍ മിഷന്‍ 2025

തിരുവല്ല: തദ്ദേശ സ്ഥാപനങ്ങളുടെ വികസന പ്രവര്‍ത്തനങ്ങള്‍ക്ക് തുരങ്കംവയ്ക്കുന്നത് കേരളം ഭരിക്കുന്ന ഇടതുപക്ഷ സര്‍ക്കാരാണെന്ന് കെപിസിസി രാഷ്ടീയകാര്യസമിതി അംഗം പ്രഫ. പി.ജെ. കുര്യന്‍. കോണ്‍ഗ്രസ് തിരുവല്ല നിയോജക മണ്ഡലം കമ്മിറ്റിയുടെ ആഭിമുഖ്യത്തില്‍ തദ്ദേശ സ്വയംഭരണ സ്ഥാപനങ്ങളുടെ തെരഞ്ഞെടുപ്പിന് മുന്നോടിയായി സംഘടിപ്പിച്ച മിഷന്‍ 2025 ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. തിരുവല്ല ബ്ലോക്ക് കോണ്‍ഗ്രസ് കമ്മിറ്റിയുടെ പ്രസിഡന്റ് ഈപ്പന്‍ കുര്യന്‍ അധ്യക്ഷത വഹിച്ചു. ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പില്‍ മുഖ്യ പ്രഭാഷണം നടത്തി. സേവാദള്‍ ജില്ലാ ചെയര്‍മാന്‍ ശ്യാം എസ്. കോന്നി ക്ലാസെടുത്തു. കെപിസിസി സെക്രട്ടറി എൻ.ഷൈലാജ്, റെജി തോമസ്,ജേക്കബ് പി.ചെറിയാന്‍, റോബിന്‍ പരുമല, കോശി പി.സഖറിയ, അനു ജോര്‍ജ്, ലാലു തോമസ്, എബി മേക്കരിങ്ങാട്, രാജേഷ് മലയില്‍ എന്നിവര്‍ പ്രസംഗിച്ചു.

പുഷ്പഗിരിയില്‍ തിമിര രോഗനിര്‍ണയ മെഗാ മെഡിക്കല്‍ ക്യാമ്പ്

തിരുവല്ല: പുഷ്പഗിരി മെഡിക്കല്‍ കോളജ് ആശുപത്രി മാര്‍ സ്‌തേഫാനോസ് പദ്ധതി പ്രകാരം 3000 രോഗികള്‍ക്ക് സൗജന്യ തിമിര ശസ്ത്രക്രിയ നടത്തുന്നതിന്‍റെ ഭാഗമായുള്ള മെഗാ മെഡിക്കല്‍ ക്യാമ്പ് . മാത്യു ടി. തോമസ് എംഎല്‍എ ഉദ്ഘാടനം ചെയ്തു. തിരുവല്ല അതിരൂപത മെത്രാപ്പോലീത്ത ഡോ. തോമസ് മാര്‍ കൂറിലോസ് അധ്യക്ഷത വഹിച്ചു. പുഷ്പഗിരി ഗ്രൂപ്പ് ഓഫ് ഇന്‍സ്റ്റിറ്റ്യൂഷന്‍സ് സിഇഒ റവ. ഡോ. ബിജു വര്‍ഗീസ് പയ്യമ്പള്ളിൽ, പത്തനംതിട്ട ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം, തിരുവല്ല മുനിസിപ്പല്‍ വൈസ് ചെയര്‍മാന്‍ ജിജി വട്ടശേരിൽ, സമന്വയ പ്രസിഡന്‍റ് ആര്‍. ജയകുമാര്‍, മര്‍ച്ചന്റ്‌സ് അസോസിയേഷന്‍ പ്രസിഡന്‍റ് എം. സലിം, റെഡക്രോസ് സൊസൈറ്റി സെക്രട്ടറി ബാബു കല്ലുങ്കൽ, ഫേസ് ഓഫ് തിരുവല്ല സെക്രട്ടറി സിബി തോമസ്, ജോയ് ആലുക്കാസ് മാള്‍ മാനേജര്‍ ഷെല്‍ട്ടന്‍ വി. റാഫെല്‍, പുഷ്പഗിരി ഒഫ്ത്താല്‍മോളജി വിഭാഗം അസോ. പ്രഫ. ഡോ. ഡിജിന്‍ മറിയം ജോസഫ്, അസി. പ്രഫ. ഡോ. ആശ ജോര്‍ജ് തുടങ്ങിയവര്‍ പ്രസംഗിച്ചു.

ടിഇസി നവീകരിച്ച ശാഖ ഉദ്ഘാടനം ചെയ്തു

പുല്ലാട്: തിരുവല്ല ഈസ്റ്റ് കോ ഓപ്പറേറ്റീവ് ബാങ്കിന്‍റെ പുല്ലാട് ശാഖയുടെ നവീകരിച്ച കെട്ടിടത്തിന്‍റെ ഉദ്ഘാടനം ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം നിര്‍വഹിച്ചു. ബാങ്ക് ചെയര്‍മാന്‍ ഡോ. ജേക്കബ് ജോര്‍ജ് അധ്യക്ഷത വഹിച്ചു. വൈസ് ചെയര്‍മാന്‍ ജോര്‍ജ്കുരുവിള, ജില്ലാ പഞ്ചായത്തംഗം ജിജി മാത്യു, കെഎസ്ഐഡിസി ചെയര്‍മാന്‍ ഫിലിപ്പോസ് തോമസ് ഗ്രാമപഞ്ചായത്തംഗം സോണി കുന്നപ്പുഴ, വിവിധ രാഷ്‌ട്രീയ സംഘടനാ പ്രതിനിധികളായ അജയകുമാര്‍ വല്ല്യുഴത്തിൽ, എം.കെ. സന്തോഷ് കുമാർ, അജിത് പുല്ലാട്, പ്രഫ. പി.എം. വര്‍ഗീസ്, ബാങ്ക് ഭരണ സമിതിയംഗങ്ങളായ ഡോ. ജി. അംബികാദേവി, വി. കെ. ശ്രീധരന്‍പിള്ള, ടി.എൻ. ചന്ദ്രശേഖരന്‍ നായര്‍, അനില്‍ ഏബ്രഹാം, പി. സി. മാത്യു, മനു ഭായി മോഹൻ, ബാങ്ക് സി.ഒ. കെ. മോഹനൻ, ശാഖ മാനേജര്‍ കെ.ജി. രാജേന്ദ്രന്‍ നായര്‍ എന്നിവര്‍ പ്രസംഗിച്ചു.

സിപിഐ അടൂര്‍ മണ്ഡലം സമ്മേളനത്തില്‍ തര്‍ക്കം

അടൂർ: സിപിഐ അടൂര്‍ മണ്ഡലം സമ്മേളനത്തില്‍ സെക്രട്ടറിയുടെ തെരഞ്ഞെടുപ്പ് തര്‍ക്കത്തില്‍ കലാശിച്ചു. നിലവിലെ മണ്ഡലം അസിസ്റ്റന്‍റ് സെക്രട്ടറി ശങ്കരനാരായണനെയാണ് സംസ്ഥാന നേതൃത്വം സെക്രട്ടറിയായി തീരുമാനിച്ചത്. സിപിഐ സംസ്ഥാന എക്‌സിക്യൂട്ടീവ് അംഗങ്ങളായ മുല്ലക്കര രത്‌നാകരൻ, ആര്‍.രാജേന്ദ്രന്‍, ജില്ലാ സെക്രട്ടറി സി.കെ.ശശിധരന്‍ എന്നിവരുടെ സാന്നിധ്യത്തിലാണ് തീരുമാനമുണ്ടായത്. എന്നാല്‍ ഇതിനെ നിലവിലെ മണ്ഡലം സെക്രട്ടറി ഏഴംകുളം നൗഷാദ് എതിര്‍ത്തു. ശങ്കരനാരായണന്‍ മത്സരിച്ചാല്‍ താന്‍ സ്ഥാനം ഒഴിയില്ലെന്ന് അറിയിച്ചു. തുടര്‍ന്ന് മറ്റുള്ളവരും എതിര്‍പ്പ് അറിയിച്ചു. എതിര്‍പ്പ് ശക്തമായതോടെ ജില്ലാ സമ്മേളനം വരെ സിപിഐയുടെ മുതിര്‍ന്ന നേതാവ് മുണ്ടപ്പള്ളി തോമസിന് സെക്രട്ടറിയുടെ താത്കാലിക ചുമതല നല്‍കാന്‍ സംസ്ഥാന നേതൃത്വം തീരുമാനിച്ചു. ഇതും വാക്കുതര്‍ക്കത്തിനു കാരണമായി.

എട്ടര വയസുകാരിക്കുനേരേ ലൈംഗികാതിക്രമം: യുവാവ് അറസ്റ്റില്‍

കോന്നി: എട്ടുവയസുള്ള പെണ്‍കുട്ടിയുടെ ശരീരത്തില്‍ കടന്നുപിടിച്ച് ലൈംഗികാതിക്രമം നടത്തിയ യുവാവിനെ തണ്ണിത്തോട് പോലീസ് അറസ്റ്റ് ചെയ്തു. ഓമല്ലൂര്‍ മാത്തൂര്‍ അമ്പലത്തിന് സമീപം അമ്പാടി ഭവനം വീട്ടില്‍ നിന്നും തണ്ണിത്തോട് തേക്കുതോട് താഴെ പൂച്ചക്കുളം കോട്ടക്കല്‍ വീട്ടില്‍ അനീഷാണ് (27) അറസ്റ്റിലായത്. 20ന് ഇയാളുടെ വീടിന്‍റെ ഹാളില്‍ വച്ചാണ് സംഭവം. കുട്ടി സ്‌കൂള്‍ ടീച്ചറോടു വിവരം പറഞ്ഞതിനേ തുടര്‍ന്നാണ് പീഡന വിവരം പുറത്തറിയുന്നത്. കോടതിയില്‍ ഹാജരാക്കിയ ഇയാളെ റിമാന്‍ഡ് ചെയ്തു. പോലീസ് ഇന്‍സ്പെക്ടര്‍ വി കെ വിജയരാഘവൻ, എസ്‌ഐ ജയരാജ് പണിക്കര്‍ എന്നിവരുടെ നേതൃത്വത്തിലായിരുന്നു അന്വേഷണം.

ഒളികല്ല് വനത്തില്‍ വിത്തുകളെറിഞ്ഞു

വടശേരിക്കര: വന്യജീവി സംഘര്‍ഷങ്ങള്‍ ലഘൂകരണത്തിനും പരിസ്ഥിതി പുനഃസ്ഥാപനത്തിനും ലക്ഷ്യമിട്ട് വനം വകുപ്പ് നടപ്പിലാക്കുന്ന വിത്തൂട്ട്-2025 പദ്ധതിയുടെ ഭാഗമായി വടശേരിക്കര റേഞ്ചിലെ ഒളികല്ല് ഭാഗത്ത് വിത്തുകളെറിഞ്ഞു. റാന്നി സോഷ്യല്‍ ഫോറേഞ്ച് ഓഫീസര്‍ വി. എസ്. ഷുഹൈബ്, ഗൂഡ്രിക്കല്‍ റേഞ്ച് ഓഫീസര്‍ എ. എസ്. അശോക്, വടശേരിക്കര റേഞ്ച് ഓഫീസര്‍ ജി. എസ്. രഞ്ജിത്, സോഷ്യല്‍ ഫോറസ്ട്രി ഡെപ്യൂട്ടി റേഞ്ച് ഫോറസ്റ്റ് ഓഫീസര്‍ ഐ. ദിലീപ്, ചിറ്റാര്‍ ഫോറസ്റ്റ് സ്റ്റേഷന്‍ സ്റ്റാഫ്, വടശേരിക്കര മോഡല്‍ റസിഡന്‍ഷല്‍ സ്‌കൂള്‍ ഫോറസ്ട്രി ക്ലബിലെ കുട്ടികൾ, അധ്യാപകര്‍ തുടങ്ങിയവർ പങ്കെടുത്തു. വന്യജീവി സംഘര്‍ഷത്തിന്‍റെ ഭാഗമായി നടപ്പിലാക്കുന്ന ഫുഡ്, ഫോഡർ, വാട്ടര്‍ പദ്ധതിയുടെ ഭാഗമായാണ് വിത്തുട്ട് നടപ്പിലാക്കുന്നത്. ഈ പദ്ധതിയിലൂടെ വനത്തിനുള്ളിലെ ഭക്ഷ്യലഭ്യത വര്‍ധിപ്പിക്കുവാനും വന്യജീവി സംഘര്‍ഷം ലഘൂകരിക്കാനും കഴിയും. മണ്ണിന്‍റെയും കമ്പോസ്റ്റിന്‍റെയും മിശ്രിതത്തില്‍ പൊതിഞ്ഞ നാടന്‍ സസ്യങ്ങളുടെ വിത്തുകളാണ് വിത്തുണ്ടകളില്‍ ഉള്ളത്. സൂര്യതാപത്തില്‍ ഉണങ്ങാതെ വിത്തിനെ സംരക്ഷിച്ചു മുളച്ചു പൊന്തുന്നതിനും സഹായകമാണ് വിത്തുണ്ടകൾ. മണ്ണ്, ചാണകം, മഞ്ഞള്‍ തുടങ്ങിയവ ചേര്‍ത്തുള്ള ആവരണം വിത്തുണ്ടകള്‍ക്ക് ജീവികളില്‍ നിന്നുള്ള പ്രതിരോധം നല്‍കുന്നു. ഓരോ പ്രദേശത്തിന്‍റെയും പ്രത്യേകതകള്‍ക്കു അനുസൃതമായാണ് വിത്തുണ്ടകളിലെ സസ്യ ഇനങ്ങള്‍ നിശ്ചയിക്കുന്നത്. സ്വാഭാവികമായി കാണുന്ന തദ്ദേശീയ ഇനങ്ങളുടെ വിത്തുകള്‍ മാത്രമാണ് വിത്തുണ്ടകളില്‍ ഉപയോഗിക്കുക. വന്യജീവികള്‍ക്കു ഭക്ഷണം ഉറപ്പാക്കുന്ന മുള പോലെയുള്ള സസ്യങ്ങൾ, ഫലവൃക്ഷങ്ങള്‍, ഭക്ഷണയോഗ്യമായ പുല്ലുകൾ, സസ്യങ്ങള്‍, പഴവര്‍ഗ വൃക്ഷങ്ങള്‍ തുടങ്ങിയവക്ക് മുന്‍ഗണന നല്‍കുന്നതായും വനം വകുപ്പ് പറയുന്നു.

ലഹരിവിരുദ്ധ ക്യാമ്പ് നടത്തി

തിരുവല്ല: അന്തര്‍ദേശീയ ലഹരിവിരുദ്ധ ദിനാചരണത്തിന്‍റെ ഭാഗമായി ബ്ലോക്ക് പഞ്ചായത്ത് സംഘടിപ്പിച്ച ലഹരിവിരുദ്ധ ബോധവത്കരണക്യാമ്പ് പഞ്ചായത്ത് പ്രസിഡന്‍റ് സി.കെ. അനു ഉദ്ഘാടനംചെയ്തു. വൈസ് പ്രസിഡന്‍റ് സോമന്‍ താമരച്ചാലില്‍ അധ്യക്ഷത വഹിച്ചു. കടപ്ര ഗ്രാമപഞ്ചായത്ത് പ്രസിഡന്‍റ് നിഷ അശോകന്‍, കുറ്റൂര്‍ ഗ്രാമപഞ്ചായത്ത് പ്രസിഡന്‍റ് അനുരാധ സുരേഷ്, ബ്ലോക്ക് വികസനകാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ മറിയാമ്മ ഏബ്രഹാം, ബ്ലോക്ക് ആരോഗ്യ വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ എം.ബി. അനീഷ്, ബ്ലോക്ക് അംഗങ്ങളായ വിജി നൈനാൻ, ജിനു തോമ്പുംകുഴി തുടങ്ങിയവര്‍ പ്രസംഗിച്ചു. സിവില്‍ എക്‌സൈസ് ഓഫീസര്‍ ഷിജു ലഹരിവിരുദ്ധ ബോധവത്കരണ ക്ലാസെടുത്തു. തുടര്‍ന്ന് ബ്ലോക്ക് പരിധിയിലുള്ള വിവിധ ക്ലബുകള്‍ തമ്മില്‍ കായികമത്സരങ്ങള്‍ നടത്തി.

ലഹരിവിരുദ്ധദിനാചരണം നടത്തി

ആനിക്കാട്: സെന്‍റ് മേരീസ് ഹൈസ്‌കൂളില്‍ ലോക ലഹരിവിരുദ്ധ ദിനത്തില്‍ മല്ലപ്പള്ളി എക്‌സൈസ് റേഞ്ച് ഓഫീസിന്‍റെയും സ്‌കൂള്‍ വിമുക്തി ക്ലബിന്‍റെയും ആഭിമുഖ്യത്തില്‍ ലഹരി വിരുദ്ധ പ്രതിജ്ഞയും ബോധവത്കരണ ക്ലാസും നടന്നു. റേഞ്ച് എക്‌സൈസ് ഇന്‍സ്‌പെക്ടര്‍ ചാക്കോ സക്കായി, സിവില്‍ ഓഫീസര്‍ വിഷ്ണു എന്നിവര്‍ ക്ലാസെടുത്തു. ഹെഡ്മാസ്റ്റര്‍ പി.ബിനുമോൻ, വിമുക്തി ക്ലബ് കണ്‍വീനര്‍ പി.എം. പ്രമോദ്, ഫാ. വര്‍ഗീസ് കണ്ടത്തില്‍ എന്നിവര്‍ പ്രസംഗിച്ചു.

ലഹരിക്കെതിരേ ചെന്നിത്തലയുടെ വാക്കത്തോണ്‍ 14ന്

പത്തനംതിട്ട: മുന്‍പ്രതിപക്ഷ നേതാവ് രമേശ് ചെന്നിത്തല ലഹരിക്കെതിരായി നടത്തുന്ന വാക്കത്തോണ്‍ ജൂലൈ 14ന് പത്തനംതിട്ടയില്‍ നടക്കും. വാക്ക് എഗെന്‍സ്റ്റ് ഡ്രഗ്സിന്റെ ഭാഗമായി പ്രൗഡ് കേരളയാണ് പരിപാടി സംഘടിപ്പിക്കുന്നത്.സ്റ്റേഡിയം ജംഗ്ഷന്‍ മുതല്‍ മുനിസിപ്പല്‍ ടൗണ്‍ സ്‌ക്വയര്‍ വരെ രാവിലെ ആറിനാണ് വാക്കത്തോണ്‍ നടക്കുന്നത്. സാമൂഹ്യ, സാംസ്‌കാരിക, മത, സമുദായ നേതാക്കളും വിവിധ രാഷ്രീയ പാര്‍ട്ടി നേതാക്കളും സ്‌കൂൾ, കോളജ് വിദ്യാര്‍ഥികളും വാക്കത്തോണില്‍ പങ്കാളികളാകും.

ലഹരിവിരുദ്ധ സെമിനാര്‍

അടൂർ: സ്‌നേഹത്തണലിന്‍റെ ആഭ്യമുഖ്യത്തില്‍ ലഹരി വിരുദ്ധദിനത്തോടനുബന്ധിച്ച് സെമിനാറും പകല്‍ വീടും സംഘടിപ്പിച്ചു.ഫാ. ജയിംസ് മഠത്തില്‍ച്ചിറ സിഎംഐ യുടെ അധ്യക്ഷതയില്‍ ഫാ. ലിജിന്‍ മൂഴയില്‍ ഉദ്ഘാടനം ചെയ്തു. ഫാ. ബൈജു പേരൂര്‍ മുഖ്യപ്രഭാഷണം നടത്തി. സിസ്റ്റര്‍ വിമല ജോര്‍ജ്, ജോസ് ഫ്രാന്‍സീസ്, ജോര്‍ജ് മുരിക്കന്‍ എന്നിവര്‍ പ്രസംഗിച്ചു.

ലഹരിക്കെതിരേ സന്ദേശവുമായി എസ്‌ഐയുടെ സൈക്കിള്‍ യാത്ര

പത്തനംതിട്ട: ലഹരിക്കെതിരായ സന്ദേശവുമായി കേരളത്തില്‍ സൈക്കിളില്‍ ഒരു യാത്ര നടത്തുകയാണ് പോലീസ് ഉദ്യോഗസ്ഥനായ ഷാജഹാൻ. കൊല്ലം ഈസ്റ്റ് പോലീസ് സ്റ്റേഷനിലെ എസ്‌ഐയാണ് ഷാജഹാൻ. ലഹരി വിപത്തിനെതിരേ സൈക്കിളില്‍ സംസ്ഥാന പര്യടനം നടത്തി പ്രചാരണം നടത്തുകയാണ് ലക്ഷ്യം. കഴിഞ്ഞ മേയ് 31ന് കൊല്ലം വെസ്റ്റ് പോലീസ് സ്റ്റേഷനില്‍ നിന്ന് ആരംഭിച്ച സൈക്കിള്‍ യാത്രയുടെ പര്യടനം പത്തനംതിട്ടയിലുമെത്തി. യാത്രയ്ക്ക് ജില്ലാ പോലീസ് ആസ്ഥാനത്ത് നര്‍കോട്ടിക് സെല്‍ ഡിവൈഎസ്പി ബി. അനിലിന്‍റെ നേതൃത്വത്തില്‍ സ്വീകരണം നല്‍കി. മുഴുനീള യാത്രയില്‍ 2025 കിലോമീറ്റര്‍ താണ്ടുമെന്ന് എസ്‌ഐ പറഞ്ഞു. കേരള പോലീസ് നടപ്പിലാക്കുന്ന വിവിധ ലഹരി വിരുദ്ധ ബോധവത്ക്കരണ പരിപാടികള്‍ക്ക് ഐക്യദാര്‍ഢ്യം പ്രഖ്യാപിച്ചു കൊണ്ടാണ് എസ്‌ഐയുടെ സൈക്കിള്‍ യാത്ര.

നിലയ്ക്കല്‍ എക്യുമെനിക്കല്‍ ദേവാലയത്തില്‍ ദുക്‌റാന തിരുനാളിനു തുടക്കമായി

നിലയ്ക്കൽ: സെന്‍റ് ‌തോമസ് എക്യുമെനിക്കല്‍ വിശുദ്ധ മാര്‍ത്തോമ്മ ശ്ലീഹയുടെ ദുക്‌റാന തിരുനാളിനു കൊടിയേറി. തൊഴിയൂര്‍ സ്വതന്ത്ര സുറിയാനി സഭാധ്യക്ഷന്‍ സിറില്‍ മാര്‍ ബസേലിയോസ് മെത്രാപ്പോലീത്ത വിശുദ്ധ കുര്‍ബാന അര്‍പ്പിച്ച് കൊടിയേറ്റ് കര്‍മം നിര്‍വഹിച്ചു. നിലയ്ക്കല്‍ ദേവാലയം അഡ്മിനിസ്‌ട്രേറ്റര്‍ ഫാ. ഷൈജു മാത്യു, ഫാ. സി.എം. ഫിലിപ്പോസ്, ഫാ.സ്റ്റെഫാനോ പുലിക്കോട്ടിൽ, തൊഴിയൂര്‍ സഭാ ട്രസ്റ്റി ഗീവർ മാണി, സഭാ സെക്രട്ടറി ബിനോയ് മാത്യു തുടങ്ങിയവര്‍ പങ്കെടുത്തു. ജൂലൈ മൂന്നുവരെ വിവിധ സഭാ വിഭാഗങ്ങളുടെ നേതൃത്വത്തില്‍ വിശുദ്ധ കുര്‍ബാന ഉണ്ടാകും. ഇന്നു രാവിലെ പത്തിന് നടക്കുന്ന കുര്‍ബാനയ്ക്ക് സീറോ മലബാര്‍ സഭയുടെ കര്‍ദിനാള്‍ മാര്‍ ജോര്‍ജ് ആലഞ്ചേരി മുഖ്യകാര്‍മികത്വം വഹിക്കും. നാളെ രാവിലെ ഒമ്പതിന് സീറോ മലബാര്‍ ക്രമത്തിലുള്ള കുര്‍ബാനയ്ക്ക് കാഞ്ഞിരപ്പള്ളി രൂപതാധ്യക്ഷന്‍ മാര്‍ ജോസ് പുളിക്കല്‍ കാര്‍മികനാകും. രണ്ടിനു രാവിലെ ഏഴിന് ഓര്‍ത്തഡോക്‌സ് സഭയുടെ മാത്യൂസ് മാര്‍ തേവോദോസിയോസ് മെത്രാപ്പോലീത്തയും ഒമ്പതിന് മാര്‍ത്തോമ്മ സഭയുടെ ഡോ.ജോസഫ് മാര്‍ ബര്‍ണബാസ് സഫ്രഗന്‍ മെത്രാപ്പോലീത്തയും വിശുദ്ധ കുര്‍ബാന അര്‍പ്പിക്കും. മൂന്നിനു രാവിലെ ഒമ്പതിന് നിലയ്ക്കല്‍ എക്യുമെനിക്കല്‍ ട്രസ്റ്റ് വൈസ് ചെയര്‍മാന്‍ ഡോ.ജോഷ്വാ മാര്‍ ഇഗ്നാത്തിയോസിന്‍റെ കാര്‍മികത്വത്തില്‍ കുര്‍ബാന. സഭയുടെ ഔദ്യോഗിക ചുമതലയില്‍ നിന്നു വിരമിച്ച ഡോ.ജോഷ്വാ മാര്‍ ഇഗ്‌നാത്തിയോസിന് സീതത്തോട്, ചിറ്റാർ, തുലാപ്പള്ളി പൗരാവലിയുടെ നേതൃത്വത്തില്‍ ആദരം അര്‍പ്പിക്കും. പൊതു സമ്മേളനം കെ,.യു. ജനീഷ് കുമാര്‍ എംഎല്‍എ ഉദ്ഘാടനം ചെയ്യും. ഡോ. ജോഷ്വാ മാര്‍ നിക്കോദിമോസ് മെത്രാപ്പോലീത്ത, ബിഷപ് ഉമ്മന്‍ കോശി, ഗീവര്‍ഗീസ് കുറ്റിയില്‍ ഫാ. ഷൈജു മാത്യു തുടങ്ങിയവര്‍ പ്രസംഗിക്കും. നേര്‍ച്ചവിളമ്പോടെ തിരുനാള്‍ സമാപിക്കും.

പേവിഷ വാഹകരായി തെരുവുനായ്ക്കൾ; വളര്‍ത്തുമൃഗങ്ങളിലേക്കും രോഗബാധ

കോഴഞ്ചേരി: തെരുവുനായ്ക്കളില്‍ നിന്നു വളര്‍ത്തു നായ്ക്കള്‍ അടക്കമുള്ള മൃഗങ്ങളിലേക്ക് പേ വിഷബാധ പടരുന്നു. തെരുവുനായ്ക്കളുമായി സഹവാസമുള്ള വളര്‍ത്തു മൃഗങ്ങള്‍ക്കു വേഗത്തില്‍ പേവിഷബാധ പടരുകയാണ്. പ്രതിരോധ കുത്തിവയ്പ് വളര്‍ത്തു മൃഗങ്ങള്‍ക്കു നിര്‍ബന്ധമാക്കിയിട്ടുണ്ടെങ്കില്‍ 50 ശതമാനം ആളുകളും ഇതെടുപ്പിച്ചിട്ടില്ല. തദ്ദേശസ്ഥാപനങ്ങളും മൃഗസംരക്ഷണ വകുപ്പും നല്‍കിയ നിര്‍ദേശങ്ങള്‍ പാലിക്കപ്പെടാതെ വന്നതോടെ തെരുവുനായ്ക്കളുടെയും വളര്‍ത്തു നായ്ക്കളുടെയും ഭീതി ഒരേപോലെ വേട്ടയാടുകയാണ്. വളര്‍ത്തു മൃഗങ്ങളില്‍ പ്രതിരോധ കുത്തിവയ്പ് എടുപ്പിക്കാനുള്ള ക്യാമ്പുകളും മറ്റും ഇപ്പോള്‍ നടക്കുന്നില്ല. വളര്‍ത്തു മൃഗങ്ങളുമായി ബന്ധപ്പെട്ട കണക്കുകളും വകുപ്പുദ്യോഗസ്ഥരുടെ പക്കല്‍ ഇല്ല. കഴിഞ്ഞ രണ്ടു മാസത്തിനിടെ കോയിപ്രം പഞ്ചായത്തില്‍ മാത്രം ഒരു സ്‌കൂള്‍ കുട്ടി ഉള്‍പ്പെടെ രണ്ട് പേരാണ് പേവിഷബാധയെ തുടര്‍ന്ന് മരിച്ചത്. നിരവധി ആളുകളെ തെരുവുനായ ആക്രമിക്കുകയും ചെയ്തിട്ടുണ്ട്. പലരും ആശുപത്രിയില്‍ എത്തി ചികിത്സ തേടിയിട്ടുണ്ട്. എന്നാല്‍ പ്രതിരോധ മരുന്നിന് സര്‍ക്കാര്‍ ആശുപത്രിയില്‍ ക്ഷാമം ഉണ്ടെന്നുള്ള വിമര്‍ശനം നിലനില്‍ക്കുകയാണ്. വിദ്യാലയ അങ്കണത്തിലും നായക്കൂട്ടം കോയിപ്രം പഞ്ചായത്തിലെ മുഴുവന്‍ പ്രദേശത്തും തെരുവ് നായ്ക്കളുടെ ശല്യം രൂക്ഷമാണ്. പഞ്ചായത്തിലെ പലവിദ്യാലയങ്ങളിലെ ക്ലാസ് മുറികളിലും വരാന്തകളിലും തെരുവു നായ്ക്കള്‍ തമ്പടിച്ചിരിക്കുകയാണ്. ബാങ്കുകൾ, പഞ്ചായത്ത്, വില്ലേജ്, ബ്ലോക്ക് ഓഫീസുകൾ, മറ്റ് സര്‍ക്കാര്‍ സ്ഥാപനങ്ങൾ, വ്യാപാര വ്യവസായ സ്ഥാപനങ്ങള്‍, തുടങ്ങി ഒട്ടുമിക്ക സ്ഥാപനങ്ങളുടെ പരിസരങ്ങളിലും ജനവാസ മേഖലകളിലും തെരുവനായ്ക്കളുടെ ശല്യം നിയന്ത്രണാതീതമായി വര്‍ധിച്ചിരിക്കുകയാണ്. കഴിഞ്ഞ ദിവസം കുമ്പനാട്ടെ ഒരു വിദ്യാലയത്തിലേക്കുള്ള വഴിയിലും സ്‌കൂള്‍ അങ്കണത്തിലും തെരുവുനായ്ക്കള്‍ കൂട്ടമായെത്തിയതിനേതുടര്‍ന്ന് അധ്യാപകര്‍ക്ക് നാട്ടുകാരുടെ സഹായം തേടേണ്ടി വന്നു. തുടര്‍ന്ന് കോയിപ്രം ഗ്രാപഞ്ചായത്ത് സെക്രട്ടറിക്ക് സ്‌കൂള്‍ അധികൃതര്‍ നിവേദനം നല്‍കി. എന്നാല്‍ തെരുവ് നായ്ക്കളെ പിടികൂടാനാകില്ലെന്ന നിലപാടാണ് പഞ്ചായത്ത് സ്വീകരിച്ചത്. സഹികെട്ട പ്രദേശവാസികള്‍ക്കു വേണ്ടി സാമൂഹ്യ പ്രവര്‍ത്തകനായ സുബിന്‍ നീറുംപ്ലാക്കല്‍ കോയിപ്രം പോലീസിന്‍റെ സഹായം തേടി. പോലീസ് ഉദ്യോഗസ്ഥര്‍ സ്‌കൂളില്‍ എത്തി വേണ്ട സഹായം നൽകുകയായിരുന്നു. ജംഗ്ഷനുകളില്‍നിന്ന് വീട്ടുപരിസരത്തേക്കും ജംഗ്ഷനുകളിലും കടത്തിണ്ണകളിലും വെയ്റ്റിംഗ്‌ഷെഡിലുമൊക്കെയായി കഴിഞ്ഞിരുന്ന തെരുവുനായ്ക്കള്‍ വീട്ടുമുറ്റങ്ങളിലേക്കും കടന്നുകയറിത്തുടങ്ങി. മഴക്കാലമായതോടെ ഇവ വീട്ടുപരിസരങ്ങളില്‍ കടന്നുകയറി സിറ്റൗട്ടിലും മറ്റുമായി താവളം ഉറപ്പിക്കുകയാണ്. ആക്രമണകാരികളായ നായ്ക്കളെ ഓടിക്കാനും വീട്ടുകാര്‍ക്കാകുന്നില്ല. ഇവയില്‍ നിന്നാണ് വളര്‍ത്തു നായ, പൂച്ച, പശു തുടങ്ങിയവയ്ക്കു കടിയേല്‍ക്കുന്നത്. വളര്‍ത്തു മൃഗങ്ങളെ തെരുവുനായ ആക്രമിച്ചാല്‍ പോലും ദിവസങ്ങള്‍ കഴിഞ്ഞാണ് ലക്ഷണങ്ങള്‍ കണ്ടുവരുന്നത്. ഇതിനിടെയില്‍ ഉടമകള്‍ക്കും ഇവയുടെ ആക്രമണം ഉണ്ടാകാനിടയുണ്ട്. കോയിപ്രം പഞ്ചായത്തിലെ പുല്ലാട് ജംഗ്ഷൻ‌, വിവേകാനന്ദ ഹൈസ്‌കൂള്‍ പരിസരം, പുല്ലാട് വടക്കേ കവല, മുട്ടുമൺ‌, കോയിപ്രം കൃഷി ഓഫീസ് പരിസരം, കുമ്പനാട് ജംഗ്ഷൻ, ഹെബ്രോന്‍പുരം, വട്ടക്കോട്ടാല്‍, നെല്ലിമല, കൊച്ചാലുംമൂട്, കണമൂട്, കടപ്ര, കരീലമുക്ക്, കോയിപ്രം ഗവ ഹയര്‍ സെക്കന്‍ഡറി സ്‌കൂള്‍ പരിസരം, കോയിപ്രം ഉള്‍പ്പെടെയുള്ള സ്ഥലങ്ങളിലെല്ലാം നായ്ക്കള്‍ റോഡിലും പരിസരങ്ങളിലും കൂട്ടമായുണ്ട്. തെരുവു നായ്ക്കളുടെ ആക്രമണത്തില്‍ നിന്നു ബസ് കാത്ത് നില്‍ക്കുന്നവരും സ്‌കൂള്‍ കൂട്ടികളും കാല്‍നടയാത്രക്കാരും ഇരുചക്ര വാഹന യാത്രക്കാരും ഭാഗ്യം കൊണ്ടാണ് രക്ഷപ്പെടുന്നത്. കാല്‍നട യാത്രക്കാര്‍ക്കും ഇരുചക്ര വാഹന യാത്രക്കാര്‍ക്കും വിദ്യാര്‍ഥികള്‍ക്കും പൊതുജനങ്ങള്‍ക്കും ജീവന് ഭീഷണി ആകുന്ന വിധത്തില്‍ പകലെന്നോ രാത്രിയെന്നോ വ്യത്യാസമില്ലാതെയാണ് തെരുവുനായ്ക്കള്‍ വിഹരിക്കുന്നത്. പൊതുജനങ്ങള്‍ക്കും സ്‌കൂള്‍ കുട്ടികള്‍ക്കും തെരുവുനായ്ക്കളുടെ ആക്രമണത്തില്‍ നിന്നും ജീവനും സ്വത്തിനും സംരക്ഷണം നല്കുന്നതിന് അടിയന്തര നടപടി സ്വീകരിക്കണമെന്ന് ആവശ്യപ്പെട്ട് പൊതു പ്രവര്‍ത്തകനായ സുബിന്‍ നീറുംപ്ലാക്കല്‍ മുഖ്യമന്ത്രിക്കും തദ്ദേശസ്വയംഭരണ, ആരോഗ്യമന്ത്രിമാര്‍ക്കും ജില്ലാ കളക്ടര്‍ക്കും നിവേദനം നല്‍കി.

കേരളം തെരുവ് നായ്ക്കളുടെ പിടിയിൽ: ഡി.കെ ജോണ്‍

അടൂര്‍: തെരുവ് നായ്ക്കളുടെ ആക്രമണങ്ങളില്‍ നിന്നു പോലും ജനങ്ങളെ രക്ഷിക്കാന്‍ സര്‍ക്കാരിനു കഴിയുന്നില്ലെന്ന് കേരള കോണ്‍ഗ്രസ് വൈസ് ചെയര്‍മാന്‍ പ്രഫ. ഡി.കെ. ജോണ്‍. കേരള കോണ്‍ഗ്രസ് അടൂര്‍ നിയോജക മണ്ഡലം സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. നാടുമുഴുവന്‍ തെരുവ് നായ്ക്കളും വന്യ മൃഗങ്ങളും കൈയടക്കി. മനുഷ്യജീവനെ ഭീഷണിയായ തെരുവുനായ്ക്കളെ സര്‍ക്കാര്‍ സംരക്ഷിക്കുകയോ അതിന് കഴിയാതെ വന്നാല്‍ മുന്‍ കാലങ്ങളിലേതു പോലെ തദ്ദേശ സ്ഥാപനങ്ങള്‍ക്കു നിര്‍ദേശം നല്‍കുകയോ വേണമെന്ന് ഡി.കെ. ജോണ്‍ ആവശ്യപ്പെട്ടു. വൈ. രാജന്റെ അധ്യക്ഷതയില്‍ ഉന്നത അധികാര സമിതി അംഗം ഡോ. ജോര്‍ജ് വര്‍ഗീസ് കൊപ്പാറ, കൗണ്‍സിലര്‍മാരായ കെ.ആർ. രവി, ലാലി സജി, സാം ഏബ്രഹാം, വി.എസ്. ഇടിക്കുള, ജോര്‍ജ് കുളഞ്ഞിക്കൊമ്പില്‍, പി.ജി. വര്‍ഗീസ്, ജന്‍സി കടുവിങ്കല്‍, പി.ജി പാപ്പച്ചന്‍, ബാബു തറയില്‍, രാജേന്ദ്രന്‍ നായര്‍ , ബിജു ജോഷ്വ വര്‍ഗീസ്, പഴകുളം രേണുകുമാര്‍, ജോണ്‍ തോമസ്, പാപ്പി ഡാനിയേല്‍, ജോര്‍ജ്് കോശി എന്നിവര്‍ പ്രസംഗിച്ചു.

ഇടതുഭരണം ആരോഗ്യമേഖലയെ തകര്‍ത്തു: സതീഷ് കൊച്ചുപറമ്പിൽ

കോന്നി: സാധാരണ ജനങ്ങളുടെ ആശാകേന്ദ്രമായ ആരോഗ്യ മേഖലയെ ഇടതുഭരണം തകര്‍ത്തതായി ഡിസിസി പ്രസിഡന്റ് പ്രഫ.സതീഷ് കൊച്ചുപറമ്പിൽ. യുഡിഎഫ് കോന്നി മണ്ഡലം കണ്‍വന്‍ഷന്‍ ഉദ്ഘാടനം ചെയതു പ്രസംഗിക്കുകയായിരുന്നു അദ്ദേഹം. യുഡിഎഫ് നിയോജക മണ്ഡലം ചെയര്‍മാന്‍ എസ്. സന്തോഷ് കുമാര്‍ അധ്യക്ഷത വഹിച്ചു. ഡിസിസി പ്രസിഡന്റ് പ്രഫ സതീഷ് കൊച്ചുപറമ്പില്‍ ഉദ്ഘാടനം ചെയ്തു. കെപിസിസി അംഗം മാത്യു കുളത്തുങ്കല്‍, യുഡിഎഫ് ജില്ലാ കണ്‍വീനര്‍ എ. ഷംസുദ്ദീന്‍, ഡിസിസി വൈസ് പ്രസിഡന്റുമാരായ റോബിന്‍ പീറ്റര്‍, എ. സുരേഷ് കുമാര്‍, തണ്ണിത്തോട് ബ്ലോക്ക് കമ്മിറ്റി പ്രസിഡന്റ് ആര്‍. ദേവകുമാര്‍, ഡിസിസി സെക്രട്ടറിമാരായ സാമുവല്‍ കിഴക്കുപുറം, എലിസബത്ത് അബു, എസ്.വി പ്രസന്നകുമാര്‍, അജോമോന്‍, അബ്ദുള്‍ മുത്തലീഫ്, പ്രവീണ്‍ പ്ലാവിളയില്‍, രാജന്‍ പുതുവേലില്‍, തുടങ്ങിയവര്‍ പ്രസംഗിച്ചു.

മല്ലപ്പള്ളി താലൂക്ക് ലൈബ്രറി സംഗമം നടത്തി

‌മല്ലപ്പള്ളി: താലൂക്ക് ലൈബ്രറി കൗണ്‍സില്‍ നേതൃത്വത്തില്‍ താലൂക്ക് ലൈബ്രറി സംഗമം നടത്തി. ലൈബ്രറി കൗണ്‍സില്‍ സംസ്ഥാന എക്‌സിക്യൂട്ടീവ് അംഗം റ്റി.കെ. ജി. നായര്‍ ഉദ്ഘാടനം ചെയ്തു.താലൂക്ക് പ്രസിഡന്‍റ് ജിനോയി ജോര്‍ജ് അധ്യക്ഷത വഹിച്ചു. പദ്ധതി വിശദീകരണം ജില്ലാ പ്രസിഡന്‍റ് ഡോ. പി.ജെ ഫിലിപ്പും വായനാ സന്ദേശം സംസ്ഥാന കൗണ്‍സിലംഗം കെ.പി രാധാകൃഷ്ണനും നടത്തി. താലൂക്ക് സെക്രട്ടറി കെ രമേശ് ചന്ദ്രൻ, ബി. വിനയസാഗർ, ബിന്ദു ചാത്തനാട്ട്, ബാബു പാലയ്ക്കൽ, ജോസ് കുറഞ്ഞൂർ, ജി അനില്‍ കുമാർ, തമ്പി കോലത്ത്, ശാലിനികുട്ടിയമ്മ, ഉണ്ണികൃഷ്ണന്‍ നായർ, നജീബ് റാവുത്തര്‍ എന്നിവര്‍ പ്രസംഗിച്ചു.

നിരണം തീര്‍ഥാടനം ആറിന്; സ്വാഗതസംഘം ഓഫീസ് തുറന്നു

ചങ്ങനാശേരി: അതിരൂപതാ യുവദീപ്തി-എസ്എംവൈഎമ്മിന്‍റെ ആഭിമുഖ്യത്തില്‍ ജൂലൈ ആറിന് സംഘടിപ്പിക്കുന്ന നിരണം തീര്‍ഥാടനത്തിനുള്ള സ്വാഗതസംഘം ഓഫീസ് പാസ്റ്ററല്‍ സെന്‍ററില്‍ തുറന്നു. അതിരൂപത ഡയറക്ടര്‍ ഫാ. സാവിയോ മാനാട്ട് ഉദ്ഘാടനം ചെയ്തു. അതിരൂപത പ്രസിഡന്‍റ് അരുണ്‍ ടോം അധ്യക്ഷത വഹിച്ചു. അസിസ്റ്റന്‍റ് ഡയറക്ടര്‍ ഫാ. ടോണി പുതുവീട്ടില്‍ക്കളം, ഡെപ്യൂട്ടി പ്രസിഡന്‍റ് എലിസബത്ത് വര്‍ഗീസ്, ജനറല്‍ സെക്രട്ടറി ക്രിസ്റ്റി കെ. കുഞ്ഞുമോന്‍, ട്രഷറര്‍ സെബാസ്റ്റ്യ ൻ മഞ്ഞുമ്മേല്‍, കണ്‍വീനര്‍മാരായ ക്രിസ്റ്റിന്‍ സേവ്യര്‍, ലൂസി ഫിലിപ്പോസ്, ഡെന്നി, റിയ റ്റോജി എന്നിവര്‍ പ്രസംഗിച്ചു.

പോലീസില്‍ വീണ്ടും തമ്മിലടി : റൗഡി ലിസ്റ്റില്‍പെട്ടയാളെ സ്‌പെഷല്‍ പബ്ലിക് പ്രോസിക്യൂട്ടറായി നിയമിച്ചെന്ന്; എസ്പിക്കെതിരേ ഡിവൈഎസ്പിയുടെ പരാതി

പത്തനംതിട്ട: റൗഡി ലിസ്റ്റില്‍ ഉള്‍പ്പെട്ട അഭിഭാഷകനെ കൊലക്കേസില്‍ സ്പെഷല്‍ പ്രോസിക്യൂട്ടറാക്കാന്‍ ജില്ലാ പോലീസ് മേധാവി ശിപാര്‍ശ ചെയതതിനെതിരേ മുഖ്യമന്ത്രിക്കു ഡിവൈഎസപിയുടെ പരാതി. പത്തനംതിട്ട കരിക്കിനേത്ത് സില്‍ക്സിലെ പ്രമാദമായ കൊലപാതക കേസില്‍ പത്തനംതിട്ട ബാറിലെ അഭിഭാഷകനായ പ്രശാന്ത് വി. കുറുപ്പിനെ സ്പെഷല്‍ പ്രോസിക്യൂട്ടറാക്കിയതിനെച്ചൊല്ലിയാണ് പോലീസിലെ പുതിയ വിവാദം. നിരവധി കേസുകളില്‍ പ്രതിയാണ് പ്രശാന്തെന്നും ഇയാളെ സ്‌പെഷല്‍ പബ്ലിക് പ്രോസിക്യൂട്ടാറാക്കാന്‍ ജില്ലാ പോലീസ് മേധാവി വി.ജി. വിനോദ്കുമാര്‍ ശിപാര്‍ശ ചെയ്തത് ദുരൂഹമാണെന്നും ആലപ്പുഴ ഡിവൈഎസ്പി എം.ആര്‍. മധുബാബു മുഖ്യമന്ത്രിക്കും സംസ്ഥാന പോലീസ് മേധാവിക്കും നല്‍കിയ പരാതിയില്‍ പറയുന്നു. കേസില്‍ അന്വേഷണ ഉദ്യോഗസ്ഥനായിരുന്നു മധുബാബു. എംഎസിടി കേസുകള്‍ നടത്തുന്ന അഭിഭാഷകനെ കൊലക്കേസ് വിചാരണയ്ക്ക് സ്പെഷല്‍ പ്രോസിക്യൂട്ടറാക്കിയത് തന്നോടുള്ള വിരോധത്താലാണെന്നും മധുബാബു പറയുന്നു. വി.ജി. വിനോദ് കുമാറിന് വര്‍ഷങ്ങളായി തന്നോട് പകയുണ്ട്. കരിക്കിനേത്ത് കേസില്‍ അന്വേഷണ ഉദ്യോഗസ്ഥനായിരുന്നു താന്‍. സ്പെഷല്‍ പ്രോസിക്യൂട്ടറാകാന്‍ കരിക്കിനേത്ത് ഉടമയ്ക്ക് വേണ്ടപ്പെട്ട അഭിഭാഷകരുടെ പട്ടികയാണ് നല്‍കിയത്. ഇവര്‍ കേസ് തോറ്റു കൊടുത്തിട്ട് കുറ്റം തന്‍റെ മേല്‍ ചാര്‍ത്താനുള്ള നീക്കമാണ്. ഇതിനു വേണ്ടിയാണ് എസ്പി ശ്രമിക്കുന്നതെന്നും മധുബാബു പരാതിയില്‍ ആരോപിക്കുന്നു. പരാതിയുടെ അടിസ്ഥാനത്തില്‍ മധുബാബുവിന്റെ മൊഴിയെടുത്തു. ഡിവൈഎസ്പിയുടെ ആരോപണം നടപടി ഭയന്നെന്ന് എസ്പി കരിക്കിനേത്ത് കൊലപാതകക്കേസില്‍ നടപടി നേരിടേണ്ടിവരുമെന്ന ഭയം കാരണമാണ് സ്‌പെഷല്‍ പബ്ലിക് പ്രോസിക്യൂട്ടര്‍ നിയമനവുമായി ബന്ധപ്പെട്ട് തനിക്കെതിരേ ഡിവൈഎസ്പി എം.ആര്‍. മധുബാബു രംഗത്തെത്തിയിരിക്കുന്നതെന്ന് ജില്ലാ പോലീസ് മേധാവി വി.ജി. വിനോദ് കുമാര്‍ പ്രതികരിച്ചു. പത്തനംതിട്ട കരിക്കിനേത്ത് വസ്ത്രശാലയിലെ കാഷ്യര്‍ ആയിരുന്ന ബിജു എം ജോസഫ് 2013 നവംബര്‍ അഞ്ചിന് കൊല്ലപ്പെട്ട കേസില്‍ സഹോദരന്മാരായ സാബു എം ജോസഫും ബേബി എം ജോസഫുമാണ് ഹൈക്കോടതിയെ സമീപിച്ചത്. 2013 ല്‍ റിപ്പോര്‍ട്ട് ആയി അന്വേഷണം നടത്തി 2015 ല്‍ കുറ്റപത്രം സമര്‍പ്പിച്ച കേസിന്‍റെ വിചാരണ ഇതേവരെ തുടങ്ങാത്തത് പ്രതികളുടെ സ്വാധീനം കാരണമാണെന്നും, അതിനാല്‍ കേസില്‍ സ്‌പെഷല്‍ പബ്ലിക് പ്രോസിക്യൂട്ടറെ നിയമിക്കുന്നതിന് ശിപാര്‍ശ ചെയ്യണമെന്നും ആവശ്യപ്പെട്ട് ജില്ലാ പോലീസ് മേധാവിക്ക് 2013 നവംബര്‍ അഞ്ചിന് ബിജുവിന്റെ സഹോദരന്മാര്‍ അപേക്ഷ നല്‍കിയിരുന്നു. ഇവര്‍ താത്പര്യമുള്ള പേരുകള്‍ അപേക്ഷയില്‍ പരാമര്‍ശിക്കുകയും ചെയ്തിരുന്നു. ഇത് അനന്തര നടപടികള്‍ക്കായി അന്നത്തെ ജില്ലാ പോലീസ് മേധാവി പോലീസ് ആസ്ഥാനത്തേക്ക് അയച്ചു. നടപടി വൈകിയപ്പോള്‍ ഇവര്‍ ഹൈക്കോടതിയെ സമീപിച്ചു . ഹര്‍ജി പരിഗണിച്ച ഹൈക്കോടതി പരാതിക്കാരെയും സീനിയര്‍ പബ്ലിക് പ്രോസിക്യൂട്ടറെയും കേട്ട ശേഷം, മൂന്നു പേരുകളില്‍ നിന്നും ഒരാളെ സ്‌പെഷല്‍ പബ്ലിക് പ്രോസിക്യൂട്ടറായി ശിപാര്‍ശ ചെയ്ത് കഴിഞ്ഞ മാര്‍ച്ച് 14 ന് പരാതി തീര്‍പ്പാക്കുകയും ചെയ്തു. ഹൈക്കോടതിയുടെ ഈ ഉത്തരവിനെതിരേ ആദ്യം അന്വേഷണഉദ്യോഗസ്ഥനായിരുന്ന അന്നത്തെ സിഐ മധുബാബു മാര്‍ച്ച് 16 ന് മുഖ്യമന്ത്രിക്ക് പരാതി നല്‍കുകയായിരുന്നു. സി ആര്‍ പി സി 319 പ്രകാരം ആവശ്യമെങ്കില്‍ തെളിവുകള്‍ നശിപ്പിച്ചവരെ പ്രതികളാക്കാവുന്നതാണെന്നും കൊല്ലപ്പെട്ടയാളുടെ സഹോദരന്‍മാരുടെ ഹര്‍ജി തീര്‍പ്പാക്കി ഹൈക്കോടതി വ്യക്തമാക്കിയിരുന്നു ഇത് പ്രകാരം നടപടി നേരിടേണ്ടിവരുമെന്ന് ഭയന്നാണ് ഡിവൈഎസ്പി ഇത്തരത്തില്‍ പരാതിയുമായി മുന്നോട്ടുവന്നതെന്നാണ് എസ്പി പറയുന്നത്.. റൗഡി ഹിസ്റ്ററി സീറ്റില്‍ ഉള്‍പ്പെട്ടയാളെ നിയമിക്കുന്നതിന് ജില്ലാ പോലീസ് മേധാവി ശുപാര്‍ശ നല്‍കി എന്നുളള ആരോപണം തീര്‍ത്തും അടിസ്ഥാനരഹിതമാണെന്നും എസ്പിയുടെ പത്രക്കുറിപ്പില്‍ പറയുന്നു. അഭിഭാഷകന്‍റെ ക്രിമിനല്‍ പശ്ചാത്തലം സംബന്ധിച്ച് കുറിപ്പില്‍ ഒന്നും പറയുന്നുമില്ല.

ആണ്‍കുട്ടിക്ക് പ്രകൃതിവിരുദ്ധ പീഡനം യുവാവിന് 30 വര്‍ഷം കഠിനതടവും പിഴയും

പത്തനംതിട്ട: ഒമ്പത് വയസു കഴിഞ്ഞ ആണ്‍കുട്ടിയെ പ്രകൃതിവിരുദ്ധ പീഡനത്തിന് വിധേയനാക്കിയ പ്രതിക്ക് 30 വര്‍ഷം കഠിനതടവും 1.2 ലക്ഷം രൂപ പിഴയും. ചെങ്ങന്നൂര്‍ മുളക്കുഴ കൊഴുവല്ലൂര്‍ മോടിയില്‍ വീട്ടില്‍ ലിതിന്‍ തമ്പിയെ (25)യാണ് പത്തനംതിട്ട അതിവേഗ സ്പെഷല്‍ കോടതി ജഡ്ജ് ടി മഞ്ജിത്ത് ശിക്ഷിച്ചത്. പിഴത്തുക കുട്ടിക്ക് നല്‍കാനും കോടതി ഉത്തരവില്‍ പറയുന്നു. ആറന്മുള പോലീസ് 2020 ഒക്ടോബര്‍ 29ന് രജിസ്റ്റര്‍ ചെയ്ത് അന്വേഷണം നടത്തിയ കേസിലാണ് വിധി. 2019 ജൂണ്‍ ഒന്നിനും സെപ്റ്റംബര്‍ 30 നുമിടയിലുള്ള കാലയളവിലാണ് കുട്ടിക്ക് ഇയാളില്‍ നിന്നും ക്രൂരമായ പീഡനങ്ങള്‍ നേരിട്ടത്. മൊബൈല്‍ ഫോണില്‍ അശ്ലീല ദൃശ്യങ്ങള്‍ കാട്ടിയ ശേഷമായിരുന്നു പീഡനം. കുട്ടിയെ പീഡിപ്പിക്കുന്ന ദൃശ്വങ്ങള്‍ മൊബൈല്‍ ഫോണില്‍ പകര്‍ത്തുകയും ചെയ്തു. വിവരങ്ങള്‍ പുറത്തു പറയരുതെന്ന് ഭീഷണിപ്പെടുത്തിയിരുന്നു. പോക്സോ നിയമത്തിലെ ബന്ധപ്പെട്ട വകുപ്പുകള്‍ പ്രകാരം 25 വര്‍ഷവും ഭീഷണിപ്പെടുത്തിയതിന് ഇന്ത്യന്‍ ശിക്ഷാ നിയമമനുസരിച്ച് അഞ്ചുവര്‍ഷവുമാണ് ശിക്ഷിച്ചത്. ശിക്ഷാകാലാവധി ഒരുമിച്ച് അനുഭവിച്ചാല്‍ മതിയാകും. ആറന്മുള എസഐ ആയിരുന്ന എസ് എസ് രാജീവാണ് എഫ്‌ഐആര്‍ രജിസ്റ്റര്‍ ചെയ്ത് ഇലവുംതിട്ട പോലീസ് ഇന്‍സ്പെക്ടര്‍ ആയിരുന്ന എം ആര്‍ സുരേഷ് അന്വേഷണം പൂര്‍ത്തിയാക്കി കോടതിയില്‍ കുറ്റപത്രം സമര്‍പ്പിച്ചു. പ്രോസിക്യൂഷന് വേണ്ടി പബ്ലിക് പ്രോസിക്യൂട്ടര്‍ റോഷന്‍ തോമസ് ഹാജരായി. കോടതി നടപടികളില്‍ എഎസഐ ഹസീന സഹായിയായി.

മഹിളാ കോണ്‍ഗ്രസ് യോഗം

പത്തനംതിട്ട: മഹിളാ കോണ്‍ഗ്രസ് സംസ്ഥാന പ്രസിഡന്റ് ജേബി മേത്തര്‍ എംപി നയിക്കുന്ന മഹിളാ സാഹസ് കേരള യാത്രയുടെ മുന്നൊരുക്കത്തിന്റെ ഭാഗമായി മഹിളാ കോണ്‍ഗ്രസ് സംസ്ഥാന, ജില്ലാ ഭാരവാഹികളുടെയും, ബ്ലോക്ക്, മണ്ഡലം പ്രസിഡന്‍റുമാരുടെയും നേതൃസമ്മേളനം ഡിസിസി പ്രസിഡന്റ് പ്രഫ.സതീഷ് കൊച്ചുപറമ്പില്‍ ഉദ്ഘാടനം ചെയ്തു. സാഹസ് യാത്ര ഓഗസ്റ്റ് 16 ന് പത്തനംതിട്ട ജില്ലയിലെ തിരുവല്ല ബ്ലോക്കില്‍ പ്രവേശിക്കും. പത്തനംതിട്ട ജില്ലയിലെ 75 മണ്ഡലങ്ങളിലും പര്യടനം നടത്തി ഓഗസ്റ്റ് 21 ന് യാത്ര തണ്ണിത്തോട് ബ്ലോക്കിലെ അരുവാപ്പുലം മണ്ഡലത്തില്‍ പര്യവസാനിക്കും. മഹിളാ കോണ്‍ഗ്രസ് ജില്ലാ പ്രസിഡന്‍റ് രജനി പ്രദീപ് അധ്യക്ഷത വഹിച്ചു. യുഡിഎഫ് ജില്ലാ കണ്‍വീനര്‍ . ഷംസുദ്ദീന്‍, മാലേത്ത് സരളാദേവി എക്‌സ് എംഎല്‍എ, സംസ്ഥാന ഭാരവാഹികളായ ദീപാ അനില്‍, മഞ്ജു വിശ്വനാഥ്, ആശാ തങ്കപ്പന്‍, അനില ദേവി, ഡിസിസി ജനറല്‍ സെക്രട്ടറി എലിസബത്ത് അബു, വൈസ് പ്രസിഡന്റുമാരായ മേഴ്‌സി പാണ്ടിയത്ത്, ലീല രാജന്‍, മേഴ്‌സി സാമുവല്‍, അന്നമ്മ ഫിലിപ്പ്, സുജാത മോഹന്‍, രഞ്ജിനി സുനില്‍, വസന്ത ശ്രീകുമാര്‍, സജിത തുടങ്ങിയവര്‍ പ്രസംഗിച്ചു. പ്രവാസി കോണ്‍ഗ്രസ് യോഗം ഇന്ന് പത്തനംതിട്ട: കേരളാ പ്രദേശ് പ്രവാസി കോണ്‍ഗ്രസ് ജില്ലാ നേതൃസംഗമം ഇന്ന് രാവിലെ 10.30 ന് പത്തനംതിട്ട രാജീവ്ഭവന്‍ ഓഡിറ്റോറിയത്തില്‍ നടക്കും. കെപിസിസി ജനറല്‍ സെക്രട്ടറി പഴകുളം മധു ഉദ്ഘാടനം ചെയ്യും. ജില്ലാ പ്രസിഡന്‍റ് മാത്യു പാറക്കല്‍ അധ്യക്ഷത വഹിക്കും. ഡിസിസി പ്രസിഡന്റ് പ്രഫ. സതീഷ് കൊച്ചുപറമ്പില്‍ മുഖ്യപ്രഭാഷണം നടത്തും. സംസ്ഥാന ഭാരവാഹികളായ സാമുവല്‍ കിഴക്കുപുറം, ടി ജെ മാത്യു, മോനി ജോസഫ്, കോശി ജോര്‍ജ്, ഷിബു റാന്നി എന്നിവര്‍ പ്രസംഗിക്കും.

പമ്പാനദിയുടെ ആഴം കുറഞ്ഞു; പ്രളയം ക്ഷണിച്ചുവരുത്തി ചെളിയും തുരുത്തുകളും

റാന്നി: ആഴംകുറഞ്ഞതും മണല്‍ത്തിട്ടകള്‍ ഇല്ലാത്തതും കാരണം പമ്പയുടെ തീരത്ത് അതിവേഗ പ്രളയസാധ്യത. ഇക്കൊല്ലം കാലവര്‍ഷം ആരംഭിച്ചതിനു പിന്നാലെ അടിക്കടി നിരവധി പ്രളയങ്ങളാണ് പമ്പാതീരത്തുണ്ടായത്. ശക്തമായ മഴയില്‍ വന്‍തോതില്‍ വെള്ളമെത്തുന്ന നദി ആഴമില്ലാത്തതിനാല്‍ തീരങ്ങളെ കവര്‍ന്നാണ് ഒഴുകുന്നത്. വീടുകളും കൃഷിയിടങ്ങളും തൊഴുത്തുകളും വളര്‍ത്തുമൃഗങ്ങളും ഉള്‍പ്പെടെ വെള്ളം കവരുന്ന സ്ഥിതിയുണ്ട്. 2018 ലെ മഹാപ്രളയത്തില്‍ അലറിയൊഴുകിയ പമ്പാനദി തീരങ്ങളിലെ നിരവധി വീടുകളും കൃഷിയിടങ്ങളും നാശോന്‍മുഖമാക്കി. നാറാണംമൂഴി പഞ്ചായത്തിലെ തോണിക്കടവ് ഉള്‍പ്പെടെ വിവിധ സ്ഥലങ്ങളിലും റാന്നി താലൂക്കിലെ പല മേഖലകളിലും ആളുകള്‍ പെരുവെള്ളത്തിന്‍റെ ഭീകരത തിരിച്ചറിഞ്ഞിരുന്നു. ഇപ്പോഴും അന്ന് ഉണ്ടായ നാശനഷ്ടങ്ങളുടെ ഞെട്ടലില്‍ നിന്ന് പലര്‍ക്കും മോചനമുണ്ടായിട്ടില്ല. മഴയൊന്നുറച്ചു പെയ്താല്‍ വെള്ളം കയറുമെന്ന ഭീതിയിലാണ് തീരങ്ങളിലെ കുടുംബങ്ങള്‍. മണല്‍ വാരല്‍ നിരോധനം നിലനില്‍ക്കുന്നതിനാല്‍ നദിയുടെ അടിത്തട്ട് ഉയര്‍ന്നിട്ടുണ്ട്. എന്നാല്‍ മുമ്പുണ്ടായിരുന്ന മണല്‍ശേഖരം നഷ്ടപ്പെട്ട് ഇപ്പോള്‍ ചെളിയാണ് അടിത്തട്ടിലുള്ളതെന്ന് പറയുന്നു. മഹാപ്രളയത്തിനുശേഷമാണ് ഇത്തരത്തില്‍ ചെളി ഉണ്ടായിരിക്കുന്നത്. മുന്പ് വള്ളം കടത്തുകടവുകള്‍ നിലനിന്ന തോണിക്കടവിലും അത്തിക്കയത്തും നാറാണംമൂഴിയിലും മുക്കത്തുമൊന്നും ഇപ്പോള്‍ കടത്തുകടവുകളൊ കയങ്ങളോ ഇല്ല. ഇവിടങ്ങളില്‍ നദിയുടെ അടിത്തട്ട് നിറഞ്ഞു കവിഞ്ഞു. ഇപ്പോള്‍ എത്തുന്ന വെള്ളം അതേപടി താഴേക്ക് കുതിച്ചെത്തുകയാണ്. മണല്‍ശേഖരം നദിക്കുണ്ടായിരുന്നപ്പോള്‍ അത് ആഗിരണം ചെയ്യുന്ന വെള്ളം തടഞ്ഞു നിര്‍ത്താനാകുമെയിരുന്നു. നദിയുടെ ഉപരിതലം മുമ്പത്തേക്കാള്‍ അപകടകാരിയാണിപ്പോൾ. നദിയില്‍ പുറ്റുകളും പച്ചത്തുരുത്തുകളും രൂപപ്പെടുന്നതും നദി ഗതി മാറി കരകളിലേക്ക് ഒഴുകുന്നതിനിടയാക്കുന്നുണ്ട്. പെരുന്തേനരുവിക്ക് താഴെയും കട്ടിക്കല്ലരുവിക്ക് സമീപവും പുറ്റുകള്‍ രൂപപ്പെട്ട് നദീ മധ്യത്തില്‍ ഏക്കറുകളോളം സ്ഥലം കരയായി മാറിയിട്ടുണ്ട്. ഇതിനു വശങ്ങളിലൂടെ ഒഴുകിയ നദി തീരങ്ങളിലേക്ക് കയറി കരഭൂമി കൈയടക്കുകയും ചെയ്തിട്ടുണ്ട്. എന്നാല്‍ ആ പ്രദേശങ്ങളില്‍ തീരത്ത് കാര്യമായ ജനപ്പാര്‍പ്പില്ലാത്തതിനാല്‍ വീടുകള്‍ക്കോ കൃഷിയിടങ്ങള്‍ക്കോ കാര്യമായ നാശനഷ്ടങ്ങളില്ല. എന്നാല്‍ അതിനും താഴേക്കുള്ള സ്ഥലങ്ങളിലെ സ്ഥിതി ഇതല്ല. തോണിക്കടവുള്‍പ്പെടെയുള്ള പ്രദേശങ്ങളും അതിനു താഴേക്കും നദീതീരമേഖലകളില്‍ വീടുകളും കൃഷിയിടങ്ങളുമുണ്ട്. ഇവിടങ്ങളില്‍ തുരുത്തുകള്‍ രൂപപ്പെടുന്നത് മഴക്കാലത്ത് നദി കരകളിലേക്ക് ആര്‍ത്തലച്ചു ചെന്ന് വീടുകളും കിടപ്പാടങ്ങളും കവര്‍ന്നു കൊണ്ടുപോകുന്നതിനിടയാക്കുമെന്നാണ് പ്രദേശവാസികളുടെ ആശങ്ക. നദിയിലെ മണല്‍ നിബന്ധനകള്‍ക്കു വിധേയമായി വാരാമെന്ന സര്‍ക്കാര്‍ നിര്‍ദേശം അടുത്ത സമയത്തുണ്ടായെങ്കിലും നടപടിയുണ്ടായിട്ടില്ല. നദിയുടെ ഒഴുക്ക് സുഗമമാക്കുന്നതിലേക്കുള്ള മണല്‍വാരലാണ് വേണ്ടത്. അടിത്തട്ടില്‍ അടിഞ്ഞുകൂടിയ ചെളി നീക്കം ചെയ്ത് മണല്‍ നിക്ഷേപിക്കുന്ന തരത്തിലുള്ള പ്രക്രിയയും നദിയില്‍ വേണ്ടിവരും. പ്രളയഭീഷണിയിലായ തീരങ്ങളുടെ സംരക്ഷണത്തിനു സര്‍ക്കാര്‍ അടിയന്തര നടപടികള്‍ സ്വീകരിക്കണമെന്ന ആവശ്യം ഉയര്‍ന്നിട്ടുണ്ട്. മണിമലയാറിന്‍റെ തീരത്തേക്കു മാലിന്യപ്രവാഹം വെണ്ണിക്കുളം: തുടര്‍ച്ചയായ പ്രളയക്കെടുതിയിലായ മണിമലയാറിന്‍റെ തീരങ്ങളിലേക്ക് വന്‍തോതില്‍ മാലിന്യ പ്രവാഹം. നദീ തീരങ്ങളിലും തോടുകളിലും ഓടകളിലുമൊക്കെ അടിഞ്ഞുകൂടിയ പ്ലാസ്റ്റിക് മാലിന്യങ്ങളും കുപ്പികളും മറ്റ് അജൈവ വസ്തുക്കളും വന്‍തോതിലാണ് നദീ തീരത്ത് അടിഞ്ഞിരിക്കുന്നത്. മഴക്കാലം ആയതിനു പിന്നാലെ മണിമലയാര്‍ തുടര്‍ച്ചയായ പ്രളയഭീഷണി നേരിട്ടുവരികയാണ്. മഴ ശക്തമായി പെയ്യുമ്പോഴേക്കും നദി അപകടനിലയിലേക്ക് വേഗത്തിലെത്തുന്ന സ്ഥിതിയുണ്ട്. കഴിഞ്ഞ കുറെ വര്‍ഷങ്ങളായി നദിയുടെ വീതി കുറഞ്ഞതാണ് പ്രധാന പ്രശ്‌നം. തീരങ്ങളിലെ കൈയേറ്റവും മുളങ്കാടുകള്‍ അടക്കം വളര്‍ന്നു നദിയിലേക്ക് ഇറങ്ങിയതും വീതി കുറയാന്‍ കാരണമായി. ഇതോടൊപ്പം പല ഘട്ടങ്ങളിലായി അടിഞ്ഞുകൂടിയ മാലിന്യങ്ങളും നദിയിലെ സുഗമമായ ഒഴുക്കിനെ സാരമായി ബാധിച്ചിട്ടുണ്ട്. അടിഞ്ഞുകൂടുന്ന മാലിന്യങ്ങള്‍ തീരവാസികള്‍ക്കും ജലവിതരണ പദ്ധതികള്‍ക്കും ഭീഷണിയാണ്. ശുദ്ധജല വിതരണ പദ്ധതികളുടെ സ്രോതസുകള്‍ പലതും നദിയോടു ചേര്‍ന്നു തന്നെയാണ്. ഇതിനു സമീപത്തായാണ് പലയിടത്തും മാലിന്യങ്ങള്‍ അടിഞ്ഞുകൂടുന്നത്. നദി കരകവിഞ്ഞെത്തുന്നതോടെ തീരങ്ങളും കിണറുകളും മലിനപ്പെടുന്നു. തീര സംരക്ഷണത്തിനും നദിയിലെ ഒഴുക്ക് സുഗമമാക്കുന്നതിനും നടപടി വേണമെന്നാവശ്യം ഉയരുന്നുവെങ്കിലും നടപടികളുണ്ടാകുന്നില്ല.

ലഹരിമുക്ത നഗരം ജില്ലാതല ഉദ്ഘാടനം

പത്തനംതിട്ട: ലഹരിവിരുദ്ധ ദിനാചരണത്തിന്‍റെ ഭാഗമായി വ്യാപാര - വ്യവസായ മേഖലയിൽ ലഹരി മുക്ത നഗരം പദ്ധതിയുടെ ജില്ലാതല ഉദ്ഘാടനം പത്തനംതിട്ട ഡിവൈഎസ്പി എസ്. അഷാദ് നിർവഹിച്ചു. കേരള വ്യാപാരി വ്യവസായി ഏകോപന സമിതി ജില്ലാ പ്രസിഡന്‍റ് പ്രസാദ് ജോൺ മാമ്പ്ര അധ്യക്ഷത വഹിച്ചു. ഗവൺമെന്‍റ് നിരോധിച്ചതും ആരോഗ്യത്തിന് ഹാനികരവുമായ ലഹരി ഉത്പന്നങ്ങൾ പൂർണമായി ഉപേക്ഷിച്ച് വിപണനവും വിതരണവും തടയുന്നതിന് ആവശ്യമായ നടപടി സ്വീകരിക്കുന്നതിനും കേരള വ്യാപാരി വ്യവസായി ഏകോപന സമിതി പത്തനംതിട്ട ജില്ലാതലയോഗം തീരുമാനിച്ചു. യോഗത്തിൽ ജില്ലാ ജനറൽ സെക്രട്ടറി ഏബ്രഹാംപരുവാനിക്കൽ, യൂണിറ്റ് ജനറൽ സെക്രട്ടറി അലിഫ്ഖാൻ, ട്രഷറാർ ബെന്നി ഡാനിയേൽ,നൗഷാദ് റോളക്സ്, കെ.സുരേഷ്ബാബു, വിജോ ജേക്കബ് വർഗീസ്, ഷാജൻ ഏബഹാം, ഉണ്ണികൃഷ്ണൻ മാണിക്യം, ലീനാ വിനോദ്, എം.ജോർജ് വർഗീസ്, സോണിയ, കെ.വി. ഓമനക്കുട്ടൻ, സജി കരിമ്പനക്കൽ തുടങ്ങിയവർ പ്രസംഗിച്ചു.

വെച്ചൂച്ചിറ നവോദയയിൽ മെറിറ്റ് ഡേ

വെച്ചൂച്ചിറ: ജവഹർ നവോദയ വിദ്യാലയത്തിലെ മെറിറ്റ് ഡേയുടെയും മ്യൂസിയം കോർണറിന്‍റെയും ഉദ്ഘാടനം ആന്‍റോ ആന്‍റണി എംപി നിർവഹിച്ചു. മെറിറ്റ് ഡേ ചടങ്ങിൽ സിബിഎസ്ഇ പന്ത്രണ്ടാം ക്ലാസ് പരീക്ഷയിൽ ദേശീയതലത്തിൽ ഒന്നാമതെത്തിയ നിഭ എൻ. പ്രഭയെയും സയൻസ് വിഷയങ്ങളിൽ ഒന്നാമത് എത്തിയ അഭിനവ് ലാലിനെയും 10 12 ക്ലാസുകളിൽ സ്കൂളിൽ ഒന്നും രണ്ടും മൂന്നും സ്ഥാനങ്ങളിൽ എത്തിയ കുട്ടികളെയും എല്ലാ വിഷയങ്ങളിലും എ പ്ലസ് നേടിയ മറ്റു കുട്ടികളെയും ആദരിച്ചു. വെച്ചൂച്ചിറ പഞ്ചായത്ത് പ്രസിഡന്‍റ് ഇ. വി വർക്കി വാർഡ് അംഗങ്ങളായ ടി. കെ. ജയിംസ്, രമാദേവി, പ്രസന്നകുമാരി, നവോദയ പ്രിൻസിപ്പൽ വി. സുധീർ, വൈസ് പ്രിൻസിപ്പൽ രശ്മി, അധ്യാപികമാരായ തങ്കമണി, റാണി മാത്യു തുടങ്ങിയവർ പ്രസംഗിച്ചു.

പണിമുടക്കില്‍ നിര്‍ബന്ധപൂര്‍വം പങ്കെടുപ്പിക്കാനുള്ള ശ്രമം അപലപനീയം: ഫെസ്റ്റോ

പത്തനംതിട്ട: ഇടതു ട്രേഡ് യൂണിയനുകള്‍ ജൂലൈ ഒമ്പതിന് ആഹ്വാനം ചെയ്തിട്ടുള്ള ദേശീയ പണിമുടക്കില്‍ സംസ്ഥാനത്തെ സര്‍ക്കാര്‍ ജീവനക്കാരെ നിര്‍ബന്ധപൂര്‍വം പങ്കെടുപ്പിക്കാന്‍ ശ്രമിക്കുന്ന ഭരണാനുകൂല സര്‍വീസ് സംഘടനകളുടെ ഭീഷണി അവസാനിപ്പിക്കണമെന്ന് കേരള എന്‍ജിഒ സംഘ് സംസ്ഥാന ജനറല്‍ സെക്രട്ടറി എസ്.രാജേഷ് ആവശ്യപ്പെട്ടു. ഫെഡറേഷന്‍ ഓഫ് എംപ്ലോയീസ് ആന്‍ഡ് ടീച്ചേഴ്‌സ് ഓര്‍ഗനൈസേഷന്‍സ് ജില്ലാ കണ്‍വെന്‍ഷന്‍ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. സംസ്ഥാന ജീവനക്കാര്‍ക്ക് സമയബന്ധിതമായി ലഭ്യമാകേണ്ട ശമ്പള പരിഷ്‌കരണം, ക്ഷാമബത്ത, ലീവ് സറണ്ടര്‍ ഉള്‍പ്പെടെ നിലവിലുണ്ടായിരുന്ന ആനുകൂല്യങ്ങളെല്ലാം വര്‍ഷങ്ങളായി തടഞ്ഞുവച്ചിരിക്കുന്ന ഇടതുമുന്നണി സര്‍ക്കാരിനെതിരേ പ്രക്ഷോഭത്തിന് തയ്യാറാകാതെ, സംസ്ഥാന ജീവനക്കാരുമായി പുലബന്ധം പോലുമില്ലാത്ത വിഷയങ്ങള്‍ ഉന്നയിച്ച് കേന്ദ്രസര്‍ക്കാരിനെതിരേ ട്രേഡ് യൂണിയന്‍ നടത്തുന്ന രാഷ്ട്രീയപ്രേരിത പണിമുടക്കിലേക്ക് സര്‍ക്കാര്‍ ജീവനക്കാരെ അനാവശ്യമായി വലിച്ചിഴക്കാൻ ഇടതു സംഘടനകള്‍ ശ്രമിക്കുകയാണെന്ന് അദ്ദേഹം കുറ്റപ്പെടുത്തി. ജില്ലാ പ്രസിഡന്‍റ് മനോജ് ബി. നായര്‍ അധ്യക്ഷത വഹിച്ചു. സംസ്ഥാന വനിതാ വിഭാഗം കണ്‍വീനര്‍ പി. സി. സിന്ധുമോൾ, സംസ്ഥാന സമിതി അംഗങ്ങളായ എസ്. ഗിരീഷ്, ജി. അനീഷ്, ജില്ലാ പ്രസിഡന്‍റ് എന്‍. ജി. ഹരീന്ദ്രൻ, ജില്ലാ സെക്രട്ടറി എം. രാജേഷ്, എന്‍ റ്റി യു ജില്ലാ സെക്രട്ടറി വിഭൂത് നാരായണൻ‌, പെന്‍ഷനേഴ്സ് സംഘ് സംസ്ഥാന വൈസ് പ്രസിഡന്‍റ് സി. സുരേഷ്‌കുമാര്‍, ജില്ലാ പ്രസിഡന്‍റ് എം. കെ. അരവിന്ദന്‍ എന്നിവര്‍ പ്രസംഗിച്ചു. സര്‍വീസില്‍ നിന്നും വിരമിച്ച വിവിധ ഘടക സംഘടനാ നേതാക്കള്‍ ഉള്‍പ്പെടെയുള്ളവര്‍ക്ക് യാത്രയയപ്പും എസ്എസ്എല്‍സി, പ്ലസ് ടു പരീക്ഷകളില്‍ ഉന്നത വിജയം കരസ്ഥമാക്കിയ വിദ്യാര്‍ഥത്ഥികള്‍ക്ക് അനുമോദനവും നല്‍കി. ഭാരവാഹികളായി അജി എസ് നായര്‍ - പ്രസിഡന്‍റ്, വി. പ്രിജിത്, പി. പ്രിയേഷ്, അനിത ജി. നായര്‍ - വൈസ് പ്രസിഡന്‍റുമാര്‍, എന്‍. രതീഷ് - സെക്രട്ടറി, കെ. സുധീഷ്, വി. എസ്. രാജേഷ്, അര്‍ജുന്‍ ദേവ് - ജോയിന്‍റ് സെക്രട്ടറിമാര്‍, കെ. ബി. ശശികുമാര്‍ - ട്രഷറാര്‍ എന്നിവരെ തെരഞ്ഞെടുത്തു.

കെപിഎംഎസ് ജില്ലാ സമ്മേളനം

പത്തനംതിട്ട: കേരള പുലയര്‍ മഹാസഭ പത്തനംതിട്ട ജില്ലാ സമ്മേളനം മഹാസഭ രക്ഷാധികാരി കെ വിദ്യാധരന്‍ ഉദ്ഘാടനം ചെയ്തു. ജില്ലാ പ്രസിഡന്‍റ് മന്ദിരം രവീന്ദ്രന്‍ അധ്യക്ഷത വഹിച്ചു. കരാര്‍ നിയമനങ്ങള്‍ അവസാനിപ്പിച്ച് സ്ഥിരം നിയമനങ്ങള്‍ നടത്തുക, സ്വജനപക്ഷക്കാരെ നിയമിച്ച് ദളിത് സംവരണം അട്ടിമറിക്കുന്നതില്‍ നിന്ന് കേന്ദ്ര - സംസ്ഥാന സര്‍ക്കാരുകള്‍ പിന്മാറുക, സ്ഥിരം നിയമനം ഉറപ്പാക്കുക തുടങ്ങിയ ആവശ്യങ്ങള്‍ സമ്മേളനം ഉന്നയിച്ചു. സര്‍ക്കാര്‍ എയ്ഡഡ് സ്ഥാപനങ്ങളില്‍ പഠിക്കുന്ന ദളിത് വിദ്യാര്‍ഥികളുടെ ലംപ്‌സം ഗ്രാന്‍റും ഹോസ്റ്റല്‍ഫീസും 3500 രൂപയില്‍ നിന്നും 6500 ആയി വര്‍ധിപ്പിച്ച് ഓരോ മാസവും കൃത്യമായി കൊടുക്കാന്‍ സര്‍ക്കാര്‍ ഇച്ഛാശക്തി കാട്ടണമെന്ന് സമ്മേളനം ആവശ്യപ്പെട്ടു. എസ്എസ്എല്‍സി, പ്ലസ് ടു പരീക്ഷയില്‍ ഉന്നത വിജയം നേടിയ കുട്ടികള്‍കള്‍ക്ക് കോഴഞ്ചേരി ഗ്രാമപഞ്ചായത്ത് പ്രസിഡന്‍റ് സാലി ഫിലിപ്പ് പുരസ്‌കാരങ്ങള്‍ നല്‍കി. ശിശുക്ഷേമസമിതിയംഗം സൂസമ്മ മാത്യു ക്ലാസ് നയിച്ചു. പഞ്ചായത്ത് മെംബര്‍ ഗീതാ മുരളി, സെക്രട്ടറി സുരേഷ് ബാബു, അനില്‍കുമ്പനാട്, ജില്ലാ സെക്രട്ടറി സുരേന്ദ്രന്‍ ആറന്മുള, രഘുനാഥ് കടമ്മനിട്ട, സുരേഷ് മെഴുവേലി, രാജു ഉള്ളന്നൂർ, കെ ടി രാഘവൻ, ഇലന്തൂര്‍ രാമചന്ദ്രന്‍ എന്നിവര്‍ പ്രസംഗിച്ചു.

ആയുര്‍വേദ തൊഴിലാളി യൂണിയന്‍ പോസ്റ്റ് ഓഫീസ് മാര്‍ച്ച് നടത്തി

പത്തനംതിട്ട: നാട്ടുവൈദ്യ സംരക്ഷണ ദിനാചരണത്തിന്‍റെ ഭാഗമായി കേരള ആയുര്‍വേദ തൊഴിലാളി യൂണിയന്‍ (സിഐടിയു) സംസ്ഥാന വ്യാപകമായി വിവിധ ആവശ്യങ്ങള്‍ ഉന്നയിച്ച് കേന്ദ്ര സര്‍ക്കാര്‍ സ്ഥാപനങ്ങളിലേക്ക് മാര്‍ച്ചും ധര്‍ണയും നടത്തി. പത്തനംതിട്ട ഹെഡ് പോസ്റ്റ് ഓഫീസ് മാര്‍ച്ചും ധര്‍ണയും സിഐടിയു സംസ്ഥാന വൈസ് പ്രസിഡന്‍റ് പി. ബി. ഹര്‍ഷകുമാര്‍ ഉദ്ഘാടനം ചെയ്തു. ആയുര്‍വേദ തൊഴിലാളി യൂണിയന്‍ ജില്ലാ പ്രസിഡന്‍റ് രമേശന്‍ വൈദ്യര്‍ അധ്യക്ഷത വഹിച്ചു. സിഐടിയു ജില്ലാ വൈസ് പ്രസിഡന്‍റ് ശ്യാമ ശിവന്‍ മുഖ്യ പ്രഭാഷണം നടത്തി. യൂണിയന്‍ ജില്ലാ സെക്രട്ടറി കെ.എം. ബിനോയ് വൈദ്യന്‍ വൈസ് പ്രസിഡന്‍റ് ഇക്ബാല്‍ വൈദ്യർ, ബാബു വൈദ്യൻ, പെരുംതുരുത്തി വൈദ്യർ, സ്റ്റാലില്‍ വൈദ്യർ, വിഷ്ണു ഗുരുക്കള്‍ എന്നിവര്‍ പ്രസംഗിച്ചു.

കള്ളക്കേസ് ചുമത്തി റിമാന്‍ഡ്: പോലീസ് ഉദ്യോഗസ്ഥര്‍ക്കെതിരേ നടപടി ഉണ്ടായില്ലെന്ന്

പത്തനംതിട്ട: യുവാക്കളെ കള്ളക്കേസില്‍ കുടുക്കി റിമാന്‍ഡ് ചെയ്തതായ ആരോപണത്തില്‍ പോലീസ് ഉദ്യോഗസ്ഥര്‍ കുറ്റക്കാരെന്ന് വകുപ്പുതല അന്വേഷണത്തില്‍ കണ്ടെത്തിയിട്ടും യാതൊരു നടപടിയും ഉണ്ടായില്ലെന്നു പരാതി. 2021 ഏപ്രില്‍ 26 ന് അയിരുര്‍ കോറ്റാത്തൂര്‍ ചരുവില്‍ സി.എസ്. പ്രദീപ്, അയിരൂര്‍ സൗത്ത് പള്ളിപ്പറമ്പില്‍ മോന്‍സി ജോസഫ്, മാരാമണ്‍ തകിടിപ്പുറത്ത് ദീപുകുമാര്‍ എന്നിവരെ കേസെടുത്ത് റിമാന്‍ഡ് ചെയ്ത അന്നത്തെ കോയിപ്രം എസ്എച്ച്ഒ ഗോപി, എസ്‌ഐ രാജന്‍ ബാബു എന്നിവര്‍ക്കെതിരേയാണ് പത്തനംതിട്ട അഡീഷണല്‍ എസ്പി, ജില്ലാ സ്പെഷല്‍ ബ്രാഞ്ച് ഡിവൈഎസ്പി എന്നിവര്‍ അന്വേഷണം നടത്തി നടപടിക്ക് ശിപാര്‍ശ ചെയ്തത്. നാലു വര്‍ഷം കഴിഞ്ഞിട്ടും ഉദ്യോഗസ്ഥര്‍ക്കെതിരേ നടപടിയുണ്ടായില്ലെന്ന് മാത്രമല്ല, ഇവര്‍ക്ക് സ്ഥാനക്കയറ്റം അടക്കം ലഭിക്കുകയും ചെയ്തുവെന്ന് ജയിലില്‍ അടയ്ക്കപ്പെട്ട മോന്‍സി ജോസഫ്, ദീപുകുമാര്‍ എന്നിവര്‍ പത്രസമ്മേളനത്തില്‍ പറഞ്ഞു. മോന്‍സിയും പ്രദീപും സഞ്ചരിച്ചിരുന്ന കാറിനു നേരേ ക്രഷര്‍ യൂണിറ്റില്‍ നിന്ന് പാറപ്പൊടിയുമായി ഇറങ്ങി വന്ന ടിപ്പര്‍ ലോറി ഇടിക്കാന്‍ ചെന്നു. ഇതേത്തുടര്‍ന്ന് ഇരുവരും ലോറി ഡ്രൈവറുമായി വാക്കേറ്റമുണ്ടായി. ദൃക്സാക്ഷികളായ നാട്ടുകാര്‍ കൂടി ചേര്‍ന്ന് ലോറി തടഞ്ഞിട്ടു. മോന്‍സി ഈ വിവരം കോയിപ്രം പോലീസ് സ്റ്റേഷനില്‍ വിളിച്ച് അറിയിച്ചു. എസ്‌ഐ രാജന്‍ ബാബുവിന്‍റെ നേതൃത്വത്തില്‍ സ്ഥലത്തു വന്ന പോലീസ് അപകടം ഉണ്ടാക്കാന്‍ ശ്രമിച്ച ടിപ്പര്‍ ലോറി കസ്റ്റഡിയില്‍ എടുത്തു. അതിന്‍റെ ഡ്രൈവറെയും മോന്‍സി, പ്രദീപ് എന്നിവരെയും സ്റ്റേഷനില്‍ എത്തിച്ചു. എന്നാല്‍ പരാതിക്കാരായ മോന്‍സിയെയും പ്രദീപിനെയും ലോറി തട്ടിയെടുക്കാന്‍ ശ്രമിച്ചുവെന്ന കുറ്റം ചുമത്തി റിമാന്‍ഡ് ചെയ്യുകയാണുണ്ടായത്. സംഭവ സ്ഥലത്ത് ഇല്ലാതിരുന്ന ദീപുവിനെയും പ്രതി ചേര്‍ത്തു. മുന്‍കൂര്‍ ജാമ്യത്തിന് ശ്രമിച്ചെങ്കിലും വിചാരണക്കോടതിയില്‍ ചെല്ലാനായിരുന്നു ദീപുവിന് കിട്ടിയ നിര്‍ദേശം. ഇതു പ്രകാരം, കോടതിയില്‍ ചെന്ന ദിപുവിനെയും റിമാന്‍ഡ് ചെയ്തു. മൂവരും ആറു ദിവസം ജയിലില്‍ കഴിഞ്ഞു. ജയിലില്‍ നിന്ന് കോവിഡ് ബാധിച്ചാണ് ദീപു തിരികെയെത്തിയത്. കുടുംബാംഗങ്ങളിലേക്കും രോഗം പടര്‍ന്ന് ഗുരുതരാവസ്ഥയിലായതോടെ ആറു ലക്ഷത്തോളം ചികിത്സയ്ക്കായി ചെലവഴിച്ചെന്ന് ദീപു പറഞ്ഞു. ഉദ്യോഗസ്ഥരുടെ ഭാഗത്തു നിന്നുണ്ടായ വീഴ്ച ചൂണ്ടിക്കാട്ടിയാണ് റിപ്പോര്‍ട്ട് നല്‍കിയത്. ഇവര്‍ക്കെതിരേ നടപടിക്കും ശിപാര്‍ശ ചെയ്തിരുന്നു. എന്നാല്‍ റിപ്പോര്‍ട്ട് പോലീസ് പൂഴ്ത്തി വച്ചു. ഒരു നടപടിയും ഉണ്ടാകാതെ വന്നപ്പോള്‍ പല തവണ യുവാക്കള്‍ മുഖ്യമന്ത്രിക്കടക്കം പരാതി നല്‍കി. ഓരോ തവണയും വിളിച്ച് മൊഴി എടുക്കുമെന്നല്ലാതെ പിന്നീടൊന്നും സംഭവിക്കാറില്ലെന്ന് പറയുന്നു. ഏറ്റവുമൊടുവിലായി കഴിഞ്ഞ 12 ന് തിരുവല്ല ഡിവൈഎസ്പി വിളിപ്പിച്ചു വീണ്ടും മൊഴി എടുത്തു. ഇതിനിടെ കേസിലെ വാദിയായ ലോറിയുടെ ഡ്രൈവര്‍ സ്വന്തം ചെലവില്‍ ഇത് കള്ളക്കേസാണെന്ന് പറഞ്ഞ് ഹൈക്കോടതിയെ സമീപിച്ചു. കേസ് കോടതി റദ്ദാക്കുകയും ചെയ്തു. ലോറി ഉടമയുടെ നിര്‍ബന്ധപ്രകാരമാണ് താന്‍ യുവാക്കള്‍ക്കെതിരേ മൊഴി നല്‍കാന്‍ നിര്‍ബന്ധിതനായതെന്ന് ഡ്രൈവര്‍ തങ്ങളോട് പറഞ്ഞിരുന്നുവെന്ന് ദീപുവും മോന്‍സിയും പത്രസമ്മേളനത്തില്‍ പറഞ്ഞു.

അക്ഷരനിധിക്ക് തുടക്കം

പത്തനംതിട്ട: പ്രവാസി മലയാളികളുടെ സാംസ്‌കാരിക സംഘടനയായ പ്രവാസി സംസ്‌കൃതി അസോസിയേഷന്‍റെ അഞ്ചാം വാര്‍ഷികത്തോടനുബന്ധിച്ച് ജില്ലയിലെ വിവധ സ്‌കൂളുകളില്‍ ആരംഭിച്ച കുട്ടികളുടെ അക്ഷരനിധി പുസ്തക പദ്ധതിയുടെ ഉദ്ഘാടനം തോട്ടുപുറം യുപി സ്‌കൂളില്‍ അസോസിയേഷന്‍ പ്രസിഡന്‍റ് സാമുവേല്‍ പ്രക്കാനം നിര്‍വഹിച്ചു. സ്‌കൂള്‍ പ്രഥമാധ്യാപിക റ്റി. ആശലത അധ്യക്ഷത വഹിച്ചു. അസോസിയേഷന്‍ ജനറല്‍ സെക്രട്ടറി ബിജു ജേക്കബ് കൈതാരം, ജില്ലാ പ്രസിഡന്‍റ് വര്‍ഗീസ് മാത്യു, ചിത്രകാരന്‍ പി.ഡി.ഹരിലാൽ, ഗവ. എല്‍പിജി സ്‌കൂള്‍ പ്രഥമാധ്യാപിക സൂസമ്മ വര്‍ഗീസ്, കെ.ജ്യോതികുമാരി, സൗമ്യ ഓമനക്കുട്ടന്‍ നായർ, റാണി ജോണ്‍ തുടങ്ങിയവര്‍ പ്രസംഗിച്ചു. അക്ഷരനിധി പുസ്തക ലൈബ്രറിക്ക് ആവശ്യമായ പുസ്തകങ്ങള്‍ അസോസിയേഷനു വേണ്ടി ജനറല്‍ സെക്രട്ടറി പ്രഥമാധ്യാപികയ്ക്കു കൈമാറി.

അങ്കണവാടി കെട്ടിടത്തിന്‍റെ മതിൽ ഇടിഞ്ഞുവീണു

തിരുവല്ല: വനിതാ ശിശു വികസന വകുപ്പിന്‍റെ കീഴിലുള്ള 45-നമ്പർ പാണ്ടിശ്ശേരി ഭാഗം അങ്കണവാടി കെട്ടിടത്തിന്‍റെ ചുറ്റുമതിലിന്‍റെ ഒരു ഭാഗം കനത്ത മഴയിൽ കഴിഞ്ഞ ദിവസം തകർന്നു വീണു. 40 അടിയോളം താഴ്ചയുള്ള പാറക്കുളത്തിന്‍റെ മുകളിലായാണ് ഈ അങ്കണവാടി പ്രവർത്തിക്കുന്നത്. ബാക്കിയുള്ള ചുറ്റുമതിലും ഏതു നിമിഷവും നിലംപൊത്താവുന്ന അവസ്ഥയിലാണ്. ഇനിയും മതിൽ ഇടിഞ്ഞാൽ അത് പ്രധാന കെട്ടിടത്തെയും ബാധിക്കാൻ സാധ്യതയുണ്ട്. നിരവധി കുട്ടികൾ പഠിക്കുന്ന അങ്കണവാടി കെട്ടിടത്തിന്‍റെ ചുറ്റുമതിൽ ബലപ്പെടുത്താനുള്ള നടപടികൾ അടിയന്തരമായി സ്വീകരിക്കണമെന്ന് പ്രദേശവാസികൾ ആവശ്യപ്പെട്ടു.

റാന്നി പാലത്തിന് പുതിയ ടെൻഡർ

റാന്നി: പമ്പാനദിക്കു കുറുകെ നിർമാണം നിലച്ച പുതിയ വലിയ പാലത്തിന്‍റെ ടെൻഡർ തുറന്നു. പത്തനംതിട്ട ആസ്ഥാനമായി പ്രവർത്തിക്കുന്ന കരാർ കമ്പനിയായ മുളമൂട്ടിൽ കൺസ്ട്രക്ഷൻസ് എസ്റ്റിമേറ്റ് തുകയേക്കാൾ 43 ശതമാനവും ഊരാളുങ്കൽ ലേബർ കോൺട്രാക്ട് സൊസൈറ്റി 40 ശതമാനവും ഉയർത്തിയാണ് രേഖപ്പെടുത്തിയിരിക്കുന്നത്. മൂന്നാം തവണയും ഉയർന്ന ടെൻഡർ നിരക്കായതിനാൽ കെആർഎഫ്ബി ഇത് പരിശോധിച്ച് സംസ്ഥാന മന്ത്രിസഭയുടെ അംഗീകാരത്തിനായി സമർപ്പിക്കും. സംസ്ഥാന മന്ത്രിസഭയുടെ അനുമതിയോടുകൂടി മാത്രമേ ടെൻഡർ ഉറപ്പിക്കാനാകൂ. 26 കോടി രൂപയുടെ നിർമാണ പ്രവൃത്തികളാണ് റാന്നി പാലത്തിനും അപ്രോച്ച് റോഡിനുമായി അനുവദിച്ചത്.

റോഡ് നിർമാണം വേഗത്തിൽ പൂർത്തിയാക്കണം

റാന്നി: നിയോജകമണ്ഡലത്തിലെ മന്ദമരുതി - കക്കുടുമൺ - അത്തിക്കയം, ഇട്ടിയപ്പാറ - ബംഗ്ലാം കടവ്-വടശേരിക്കര, വെണ്ണിക്കുളം - തെള്ളിയൂർ റോഡുകളുടെ നിർമാണ ജോലികൾ എത്രയും വേഗം പൂർത്തിയാക്കണമെന്ന് പ്രമോദ് നാരായൺ എംഎൽഎ മന്ത്രി മുഹമ്മദ് റിയാസിനോട് അഭ്യർഥിച്ചു. കഴിഞ്ഞദിവസം മന്ത്രിയുടെ ഓഫീസിൽ അദ്ദേഹത്തെ നേരിൽക്കണ്ടാണ് എംഎൽഎ ഇക്കാര്യം അഭ്യർഥിച്ചത്. നിർമാണപ്രവൃത്തികൾ അവസാന ഘട്ടത്തിലെത്തിനിൽക്കുന്ന പുതമൺ - കുട്ടത്തോട്, പാലച്ചുവട് -നരിക്കുഴി റോഡുകളുടെ നിർമാണം അടിയന്തരമായി പൂർത്തീകരിക്കണമെന്നും എംഎൽഎ അഭ്യർഥിച്ചു. മന്ദമരുതി - അത്തിക്കയം റോഡ് നിർമാണത്തിന് 12 കോടി രൂപയാണ് വകയിരുത്തിയിരിക്കുന്നത്. 8.3 കിലോമീറ്റർ ദൂരംവരുന്ന റോഡിന്‍റെ നിർമാണം മൂന്ന് റീച്ചുകളായാണ് നടത്തുന്നത്. റോഡിന്‍റെ പൈപ്പിടീൽ, വൈദ്യുത പോസ്റ്റുകൾ മാറ്റൽ എന്നീ പ്രവൃത്തികൾ വൈകിയതോടെ നിർമാണം പൂർത്തീകരിക്കാനും തടസമായി. റോഡിലെ കലുങ്ക്, വശം കെട്ടൽ പ്രവൃത്തികൾ പൂർത്തിയായി. 2.25 കിലോമീറ്റർ ദൂരത്തിൽ ബിഎം ടാറിംഗും പൂർത്തിയാക്കി. 1.5 കിലോമീറ്റർ ഡബ്ല്യുഎംഎം പൂർത്തിയായി. മന്ദമരുതി മുതൽ 1.75 കിലോമീറ്റർ റോഡിന്‍റെ റീസ്റ്റോറേഷൻ പണികളും ലെവലിംഗും പൂർത്തിയാവുന്നതോടെ പൂർണമായും ടാറിംഗ് നടത്താനാകും. 10 കോടി രൂപ ചെവഴിച്ച് നിർമിക്കുന്ന ഇട്ടിയപ്പാറ ബംഗ്ലാംകടവ് - വടശേരിക്കര റോഡിലെ പൈപ്പിടീൽ ജോലികൾ അവസാന ഘട്ടത്തിലാണ്. പുതമൺ- കുട്ടത്തോട് പുതമൺ കുട്ടത്തോട്, നരിക്കുഴി റോഡുകളുടെ നിർമാണം 75 ശതമാനവും പൂർത്തിയായിട്ടുണ്ട്. ബിസി ടാറിംഗാണ് ഇനി പൂർത്തിയാകാനുള്ളത്. ജലഅഥോറിറ്റി ജോലികൾ പൂർത്തീകരിച്ചാൽ ടാറിംഗും പൂർത്തീകരിക്കാനാകും.

പിഎം റോഡ് നിറയെ അപകടക്കെണികൾ

പത്തനംതിട്ട: പിഎം റോഡ് പുനര്‍നിര്‍മാണത്തിനിടെ തര്‍ക്കങ്ങളില്‍പെട്ട സ്ഥലങ്ങള്‍ അപകടക്കെണികളായി മാറുന്നു. ഭൂമി ഏറ്റെടുക്കല്‍ ഉള്‍പ്പെടെ രണ്ട് പതിറ്റാണ്ട് മുമ്പ് നടപടികളാരംഭിച്ച പിഎം റോഡിന്‍റെ നിര്‍മാണം ഇപ്പോഴും പൂര്‍ത്തീകരിക്കാനാകാത്തത് കെഎസ്ടിപിക്കും തലവേദനയായിരിക്കുകയാണ്. റോഡിന്‍റെ പ്ലാച്ചേരി കോന്നി റീച്ചിലാണ് നിര്‍മാണം പൂര്‍ത്തീകരിക്കാനുള്ളത്. മൈലപ്ര രണ്ടാം കലുങ്കിന് സമീപം റോഡിന്‍റെ സംരക്ഷണ ഭിത്തി നിര്‍മാണം, മൈലപ്ര തയ്യില്‍പ്പടിക്ക് സമീപമുള്ള ഒന്നാം കലുങ്ക്, മൈലപ്ര ഗ്രാമപഞ്ചായത്ത് ഓഫീസിനും മൈലപ്ര പോസ്റ്റ് ഓഫീസിനും മധ്യേയുള്ള സ്ഥലം, മൈലപ്ര തടിമില്ലിനു സമീപം കലുങ്കിനോടു ചേര്‍ന്നുള്ള കോണ്‍ക്രീറ്റ് കാന, റോഡിന്‍റെ വശത്തെ സംരക്ഷണ ഭിത്തി നിര്‍മാണം എന്നിവയും മൈലപ്ര പള്ളിപ്പടിക്കൽ, പത്തനംതിട്ടയ്ക്കു തിരിയുന്ന ഭാഗത്തു റോഡിന്‍റെ ഒരു വശത്തെ പണികളും ഇനിയും പൂര്‍ത്തീകരിക്കാനുണ്ട്. മൈലപ്ര പള്ളിപ്പടിക്കല്‍ നിന്നും പത്തനംതിട്ട ഭാഗത്തേ്ക്ക് തിരിയുന്ന റോഡിന്‍റെ മധ്യഭാഗത്തായി ഇതുവരെ ഡിവൈഡറുകളോ സിഗ്‌നല്‍ ലൈറ്റുകളോ അധികൃതര്‍ സ്ഥാപിച്ചിട്ടില്ല. മണ്ണാറക്കുളഞ്ഞി ആശുപത്രിപടിക്കല്‍നിന്നും വടശേരിക്കരയ്ക്കും റാന്നിക്കും റോഡ് തിരിയുന്ന ഭാഗത്തും റോഡിനു തീരെ വീതിക്കുറവാണ്. റോഡിന്‍റെ മധ്യഭാഗത്ത് സ്ഥാപിച്ച ഡിവൈഡെറുകള്‍ അശാസ്ത്രീയമായതും ഇരു ദിശയില്‍ നിന്നും വരുന്ന വാഹനങ്ങള്‍ തമ്മില്‍ ഇടിച്ച് അപകടമുണ്ടാകാനുള്ള സാധ്യത ഏറെയുള്ളതുമാണ്. ഇവിടെയും അധികൃതര്‍ സിഗ്‌നല്‍ ലൈറ്റുകള്‍ സ്ഥാപിച്ചിട്ടില്ല. ഭൂമി ഏറ്റെടുക്കലും ബാക്കി റോഡ് വികസനത്തിനായി ഭൂമി ഏറ്റെടുക്കുന്നതിനുള്ള നടപടികള്‍ തുടങ്ങിയത് 2001ലാണ്. ലോകബാങ്ക് ധനസഹായത്തോടെ റോഡ് വികസനം പ്രഖ്യാപിച്ചതിനു പിന്നാലെ തുടങ്ങിയതാണ് നടപടികൾ. എന്നാല്‍ ഇതു പിന്നീട് തടസപ്പെട്ടു. ഭൂമി ഏറ്റെടുക്കല്‍ നടപടികള്‍ അന്തിമഘട്ടത്തില്‍ എത്തിയത് വൈകിയതാണ് കാരണം. 95 ശതമാനം ഭൂമി ഇടപാടുകളും നടത്തിയാണ് നിര്‍മാണം തുടങ്ങിയത്. തര്‍ക്കങ്ങള്‍ അവശേഷിച്ചത് മൈലപ്ര വില്ലേജിലാണ്. ഭൂമിയുമായി ബന്ധപ്പെട്ട രേഖകള്‍ കൈവശം ഇല്ലായെന്ന പേരിലും സര്‍വേ നമ്പരിലെ പിശകുകളും തര്‍ക്കത്തിനിടയാക്കി. ഇത്തരത്തില്‍ തര്‍ക്കങ്ങളുന്നയിക്കപ്പെട്ടവര്‍ക്ക് ഭൂമി വില നല്‍കിയില്ല. ഇതേത്തുടര്‍ന്ന് സ്ഥലം ഏറ്റെടുക്കല്‍ തസപ്പെട്ടു. മൈലപ്ര പള്ളിപ്പടിക്കും മണ്ണാറക്കുളഞ്ഞിക്കും മധ്യേ തടസങ്ങള്‍ക്കു പ്രധാന കാരണവും ഇതാണ്. അപകടങ്ങള്‍ പതിയിരിക്കുന്നു നിര്‍മാണം പൂര്‍ത്തിയാകാത്ത സ്ഥലങ്ങള്‍ അപകടക്കെണികളായി മാറിയിരിക്കുകയാണ്. സംസ്ഥാന പാതയിലെ തിരക്കും റോഡിനോടു ചേര്‍ന്ന തിട്ടയുടെ അപകടാവസ്ഥയും കലുങ്കിനുവേണ്ടിയുള്ള കുഴികളുമെല്ലാം അപകടക്കെണിയാണ്. മണ്ണാറക്കുളഞ്ഞി മുതല്‍ മൈലപ്ര വഴി കുമ്പഴ റൂട്ടില്‍ പുതിയ റോഡ് നിര്‍മിച്ചതിനു ശേഷം കഴിഞ്ഞ ഒരു വര്‍ഷത്തിനിടയ്ക്ക് ആറുപേരാണ് വിവിധ സ്ഥലങ്ങളിലായി വാഹന അപകടങ്ങളില്‍ മരണപ്പെട്ടത്. കുമ്പഴവടക്ക് മാര്‍ത്തോമ്മപ്പള്ളിപ്പടിക്കു സമീപം, കുമ്പഴവടക്ക് റേഷന്‍ കടയ്ക്ക് സമീപം, മൈലപ്രാ തടി മില്ലിന് സമീപം, മൈലപ്ര വില്ലേജ് ഓഫീസിനു സമീപം, മൈലപ്ര തയ്യില്‍പ്പടിയ്ക്ക് സമീപം, മണ്ണാറക്കുളഞ്ഞി ആശുപത്രിപ്പടിക്ക് സമീപം എന്നിവിടങ്ങളിലാണ് വാഹനാപകടങ്ങളില്‍ ആറുപേര്‍ മരണപ്പെട്ടത്. കൂടാതെ ഈ റൂട്ടില്‍ നിരവധി വാഹന, കാല്‍നട യാത്ര അപകടങ്ങളും പലപ്പോഴായി ഉണ്ടായിക്കൊണ്ടിരിക്കുന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]