ADVERTISEMENT

ADVERTISEMENT

ഓഫീസ് കുത്തിത്തുറന്ന് മോഷണം: പ്രതി പിടിയിൽ

ഗാന്ധിനഗർ: ഓഫീസ് കുത്തിത്തുറന്ന് മോഷണം നടത്തിയ പ്രതി അറസ്റ്റിൽ. കൊല്ലം ഒയ്യൂർ നസീർ മൻസിൽ നവാസ് (45) ആണ് പിടിയിലായത്. കഴിഞ്ഞ മേയ് 24ന് എസ്എച്ച് മൗണ്ട് ഭാഗത്തുള്ള സെൻട്രൽ ഫിനാൻഷ്യൽ ക്രെഡിറ്റ് ആൻഡ് ഇൻവെസ്റ്റ്മെന്‍റ് കോ-ഓപ്പറേറ്റീവ് ഇന്ത്യ ലിമിറ്റഡ് എന്ന സ്ഥാപനത്തിൽനിന്ന് 65,895 രൂപ മോഷണം പോയിരുന്നു. മുൻവശത്തെ ഷട്ടറിന്‍റെ താഴ് ആക്സോ ബ്ലേഡ് ഉപയോഗിച്ച് അറുത്തുമാറ്റിയ നിലയിലായിരുന്നു.

സംഭവത്തിൽ കേസെടുത്ത് അന്വേഷണം നടത്തിയ ഗാന്ധിനഗർ പോലീസ് പ്രതി നവാസ് ആണെന്ന്‍ തിരിച്ചറിയുകയായിരുന്നു. നിലവില്‍ മറ്റൊരു കേസില്‍ ഉള്‍പ്പെട്ട് റിമാൻഡിലായിരുന്ന പ്രതിയെ ഹരിപ്പാട് ജുഡീഷൽ ഫസ്റ്റ് ക്ലാസ് മജിസ്ട്രേറ്റ് കോടതിയിൽനിന്നും ഗാന്ധിനഗർ പോലീസ് കസ്റ്റഡിയിലെടുക്കുകയായിരുന്നു.

ADVERTISEMENT

ലേബർ കോഡുകൾ തൊഴിലാളിവിരുദ്ധമെന്ന്

പൊൻകുന്നം: കേന്ദ്രനയത്തിന്‍റെ ഭാഗമായുള്ള ലേബർ കോഡുകൾ ജനദ്രോഹപരമെന്ന് സിപിഐ ജില്ലാ സെക്രട്ടറി വി.ബി. ബിനു. സിപിഐ ജില്ലാ സമ്മേളനത്തിന് മുന്നോടിയായുള്ള കർഷക സംഗമത്തിന്‍റെ സംഘാടക സമിതി രൂപീകരണ യോഗം പൊൻകുന്നത്ത് ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. കോർപറേറ്ററുകൾക്ക് അനുകൂലമായ നിലപാടാണ് കേന്ദ്രസർക്കാർ സ്വീകരിക്കുന്നതെന്നും കർഷക സംഘടനകൾ കൃഷിക്കാർക്കൊപ്പംനിന്ന് സമരം ചെയ്തതിന്‍റെ ഗുണം കർഷകർക്ക് ലഭിച്ചുവെന്നും വി.ബി. ബിനു കൂട്ടിച്ചേർത്തു. സിപിഐ ജില്ലാ കമ്മിറ്റിയംഗം രാജൻ ചെറുകാപ്പള്ളി അധ്യക്ഷത വഹിച്ചു. സംസ്ഥാന എക്സിക്യൂട്ടീവ് അംഗം ഒ.പി.എ. സലാം, കിസാൻ സഭ ദേശീയ സെക്രട്ടറി ഇ.എൻ. ദാസപ്പൻ, ജില്ലാ പ്രസിഡന്‍റ് വി.ടി. തോമസ്, എം.എ. ഷാജി, മണ്ഡലം സെക്രട്ടറി സി.ജി. ജ്യോതിരാജ്, വി.ജെ. കുര്യാക്കോസ്, മണ്ഡലം അസിസ്റ്റന്‍റ് സെക്രട്ടറി ശരത് മണിമല, ബാബു ലൂക്കോസ്, പി.എസ്. സിനീഷ്, തങ്കമ്മ അലക്സ്, ചന്ദ്രബാബു എന്നിവർ പ്രസംഗിച്ചു. സംഘാടകസമിതി പ്രസിഡന്‍റായി രാജൻ ചെറുകാപ്പള്ളി, സെക്രട്ടറിയായി സി.ജി. ജ്യോതിരാജ് എന്നിവരെ തെരഞ്ഞെടുത്തു.

കാവാലി വ്യൂ പോയിന്‍റിൽ മാലിന്യം തള്ളി

കൂട്ടിക്കൽ: കാവാലി വ്യൂ പോയിന്‍റിൽ മാലിന്യം തള്ളി. ഇന്നലെ രാവിലെ മുതലാണ് കാവാലിയിൽ റോഡ് സൈഡിൽ മാലിന്യങ്ങൾ കാണപ്പെട്ടത്. രൂക്ഷമായ ദുർഗന്ധം വമിച്ചതോടെ ജനങ്ങളുടെ പ്രതിഷേധം വ്യാപകമായി. ചാക്കിലാക്കി തള്ളിയ മാലിന്യത്തിൽനിന്നു കുട്ടികളുടെ ഡയപ്പറുകൾ ഉൾപ്പെടെയുള്ളവ പുറത്തുകിടക്കുകയായിരുന്നു. രാത്രിയിലോ പുലർച്ചയോ ആണ് ഇവിടെ മാലിന്യം തള്ളിയതെന്ന് കരുതപ്പെടുന്നു. വിവരമറിഞ്ഞ് പഞ്ചായത്ത് അധികൃതർ സ്ഥലത്തെത്തി മാലിന്യം നീക്കം ചെയ്തു. വീണ്ടും ഇവിടെ മാലിന്യം തള്ളാതിരിക്കാനുള്ള നടപടികൾ സ്വീകരിക്കണമെന്ന് നാട്ടുകാർ ആവശ്യപ്പെട്ടു. നിരവധി പേരാണ് ഇതുവഴി കടന്നുപോകുമ്പോൾ വ്യൂ പോയിന്‍റിൽ പ്രകൃതിഭംഗി ആസ്വദിക്കാനായി വാഹനം നിർത്തി ഇറങ്ങുന്നത്. പൊതുനിരത്തുകളിൽ ഉൾപ്പെടെ മാലിന്യം തള്ളുന്നവർക്കെതിരേ ശക്തമായ നടപടിയുണ്ടാകുമെന്ന് കൂട്ടിക്കൽ പഞ്ചായത്ത് പ്രസിഡന്‍റ് ബിജോയ്‌ ജോസ്‌ മുണ്ടുപാലം അറിയിച്ചു.

കേരള എൻസിസി ഇന്‍റർ ഗ്രൂപ്പ് സ്പോർട്സ് ഷൂട്ടിംഗ് മത്സരം സമാപിച്ചു

എരുമേലി: എംഇഎസ് കോളജിൽ പത്തു ദിവസമായി നടന്ന കേരള - ലക്ഷദ്വീപ് ഡയറക്‌ടറേറ്റിന്‍റെ കീഴിലുള്ള തിരുവനന്തപുരം, കൊല്ലം, കോട്ടയം, എറണാകുളം, കോഴിക്കോട് എന്നീ അഞ്ചു ഗ്രൂപ്പുകളിൽ നിന്നുള്ള തെരഞ്ഞെടുക്കപ്പെട്ട നൂറ് എൻസിസി കേഡറ്റുകളുടെ ഷൂട്ടിംഗ് കോമ്പറ്റീഷൻ സമാപിച്ചു. എൻസിസി ഗ്രൂപ്പ് ഹെഡ് ക്വാർട്ടർ കോട്ടയത്തിന്‍റെയും 16 കേരള ബറ്റാലിയൻ എൻസിസി കോട്ടയത്തിന്‍റെയും ആഭിമുഖ്യത്തിലാണ് ക്യാമ്പ് നടത്തിയത്. ഷൂട്ടിംഗ് കോമ്പറ്റീഷനിൽ കോട്ടയം ഗ്രൂപ്പ് ഓവറോൾ ചാന്പ്യൻഷിപ്പും തിരുവനന്തപുരം ഗ്രൂപ്പ് റണ്ണേഴ്അപ്പുമായി. സമ്മാനദാനം കേരള-ലക്ഷദ്വീപ് ഡയറക്‌ടറേറ്റിനുവേണ്ടി എൻസിസി കോട്ടയം ഗ്രൂപ്പ് കമാൻഡർ ബ്രിഗേഡിയർ ജി.വി.എസ്. റെഡി നടത്തി. എംഇഎസ് കോളജ് മാനേജ്മെന്‍റ് കമ്മിറ്റി സെക്രട്ടറി സി.യു. അബ്ദുൾ കരീം, പ്രിൻസിപ്പൽ പ്രഫ.ഡോ.എസ്. അനിൽകുമാർ എന്നിവർ പ്രസംഗിച്ചു. വിവിധ ഷൂട്ടിംഗ് മത്സരങ്ങളിൽ വിജയികളായ 30 കേഡറ്റുകൾക്ക് ഓഗസ്റ്റ് അഞ്ചിന് മഹാരാഷ്‌ട്രയിൽ നടക്കുന്ന ഓൾ ഇന്ത്യ ലെവൽ ഇന്‍റർ ഡയറക്‌ടറേറ്റ് സ്പോർട്സ് ഷൂട്ടിംഗ് കോമ്പറ്റീഷനിൽ കേരളത്തെ പ്രതിനിധീകരിച്ചുകൊണ്ട് പങ്കെടുക്കും. ഇവർക്ക് തിരുവനന്തപുരം പാങ്ങോട് നടത്തുന്ന രണ്ട് ക്യാമ്പുകളിലായി പരിശീലനം നൽകും.

ബസിൽനിന്നു വിദ്യാർഥിനി റോഡിലേക്കു വീണതു കണ്ടിട്ടും ബസ് നിർത്താതെ പോയതായി പരാതി

കാഞ്ഞിരപ്പള്ളി: സ്റ്റോപ്പിൽ ഇറങ്ങുന്നതിനിടെ മുൻപോട്ടെടുത്ത ബസിൽനിന്നു വിദ്യാർഥിനി റോഡിലേക്ക് വീണതു കണ്ടിട്ടും ബസ് നിർത്താതെ പോയതായി പരാതി. കാഞ്ഞിരപ്പള്ളി ആനിത്തോട്ടത്ത് വച്ചാണ് വിദ്യാർഥികൾ ഇറങ്ങുന്നതിനിടെ ബസ് മുന്നോട്ടെടുത്തതും ഒരു വിദ്യാർഥിനി തെറിച്ച് റോഡിൽ വീണതും. ഇന്നലെ വൈകുന്നേരം നാലോടെയായിരുന്നു സംഭവം. ഈരാറ്റുപേട്ട-കാഞ്ഞിരപ്പള്ളി റൂട്ടിലോടുന്ന "വാഴയിൽ' സ്വകാര്യ ബസിൽ നിന്നാണ് വിദ്യാർഥിനി റോഡിലേക്കു തെറിച്ചുവീണത്. അദ്ഭുതകരമായാണ് കുട്ടി രക്ഷപ്പെട്ടത്. സംഭവത്തിനുശേഷം ബസ് നിർത്താനോ കുട്ടിക്ക് പരിക്കുണ്ടോ എന്ന് അന്വേഷിക്കാനോപോലും ബസ് ജീവനക്കാർ തയാറായില്ലെന്ന് ദൃക്സാക്ഷികൾ പറഞ്ഞു. കാഞ്ഞിരപ്പള്ളിയിലെ സ്വകാര്യ സ്കൂളിലെ ഏഴാം ക്ലാസ് വിദ്യാർഥിനിയാണ് അപകടത്തിൽപ്പെട്ടത്.

അറ്റകുറ്റപ്പണിക്കാ‌യി ബസ് സ്റ്റാൻഡ് അടച്ചു; കാഞ്ഞിരപ്പള്ളി ടൗൺ ഗതാഗതക്കുരുക്കിൽ

കാഞ്ഞിരപ്പള്ളി: കാഞ്ഞിരപ്പള്ളി ബസ് സ്റ്റാൻഡ് കവാടത്തിലെ അറ്റകുറ്റപ്പണികൾക്കായി സ്റ്റാൻഡ് അടച്ചതോടെ ടൗണിൽ ഗതാഗതകുരുക്ക് രൂക്ഷമായി. ബസുകളെല്ലാം സ്റ്റാൻഡിന്‍റെ മുന്പിൽ നിർത്തി ആളുകളെ കയറ്റുകയും ഇറക്കുകയും ചെയ്യുന്നതോടെയാണ് ഗതാഗതക്കുരുക്ക് രൂക്ഷമായത്. മഴയും വെയിലുംകൊണ്ടു വിദ്യാർഥികളടക്കമുള്ള യാത്രക്കാർ നടുറോഡിലായ അവസ്ഥയിലാണ്. സീബ്രാലൈനിലൂടെപോലും റോഡ് മുറിച്ചുകടക്കാൻ യാത്രക്കാർ കഷ്ടപ്പെടുകയാണ്. ദേശീയപാതയിൽനിന്നു കാഞ്ഞിരപ്പള്ളി ബസ് സ്റ്റാൻഡിലേക്കു പ്രവേശിക്കുന്നതും ഇറങ്ങുന്നതുമായ റോ‍ഡിലെ ഓടകൾക്കു മുകളിലുള്ള സ്ലാബുകൾ തകർന്നതിനെത്തുടർന്ന് ഇവ പുനഃസ്ഥാപിക്കുന്നതിന്‍റെ ഭാഗമായാണ് ബസ് സ്റ്റാൻഡ് അടച്ചിട്ടത്. കോട്ടയം ഭാഗത്തേക്കുള്ള ബസുകൾ മിനി സിവിൽ സ്റ്റേഷന്‍റെ മുന്നിലും മുണ്ടക്കയം ഭാഗത്തേക്കുള്ള ബസുകൾ ഇടിമണ്ണിക്കൽ ജൂവലറിയുടെ മുന്നിലും നിർത്തി ആളുകളെ കയറ്റണമെന്നാണ് അധികൃതർ അറിയിച്ചിരുന്നത്. എന്നാൽ, ഈ ഗതാഗത ക്രമീകരണങ്ങൾ ഒന്നും നടക്കുന്നില്ല. കൂടാതെ ഈരാറ്റുപേട്ട ഭാഗങ്ങളിലേക്കു പോകുന്ന ബസുകൾ യാത്രക്കാരെ ഇറക്കിയ ശേഷം ദേശീയപാതയിൽ മിനിസിവിൽ സ്റ്റേഷന്‍റെ മുന്നിൽ തന്നെയാണ് പാർക്ക് ചെയ്യുന്നത്. ഇതും ടൗണിൽ ഗതാഗതക്കുരുക്കിനു കാരണമാകുന്നുണ്ട്. രാവിലെയും വൈകുന്നേരവുമാണ് ഏറ്റവും കൂടുതൽ തിരക്ക് അനുഭവപ്പെടുന്നത്. ഇതിനിടെ ഇത്രയും ദിവസം ബസ് സ്റ്റാൻഡ് അടച്ചിട്ടിട്ടും സ്റ്റാൻഡിലേക്കുള്ള റോഡ് നന്നാക്കാനുള്ള നടപടികൾ ഇതുവരെ ആരംഭിച്ചിട്ടില്ലെന്ന ആരോപണം ശക്തമായിരിക്കുകയാണ്. നിലവിൽ റോഡ് കുണ്ടും കുഴിയുമായി താറുമാറായി കിടക്കുകയാണ്. മുന്പു കോൺക്രീറ്റ് ചെയ്തിരുന്ന റോഡ് തകർന്നതിനെത്തുടർന്ന് ഇതിന്‍റെ മുകളിൽ ടാറിംഗ് നടത്തിയിരുന്നു. എന്നാൽ, ഇപ്പോൾ ഈ ടാറിംഗും അടിയിലെ കോൺക്രീറ്റിംഗും തകർന്ന നിലയിലാണ്. കഷ്ടിച്ച് ഒരു ബസിനു മാത്രം കടന്നുപോകാൻ കഴിയുന്ന ഭാഗത്തെ കോൺക്രീറ്റിംഗ് തകർന്നതോടെ ബസ് ആടിയുലഞ്ഞാണ് സ്റ്റാൻഡിലേക്കു കയറുന്നത്. നിലവിൽ ബസ് സ്റ്റാൻഡ് അടച്ചിരിക്കുന്ന സാഹചര്യത്തിൽ റോഡിന്‍റെ അറ്റകുറ്റപ്പണി കൂടി നടത്തിയില്ലെങ്കിൽ ഇതിനായി പിന്നീട് വീണ്ടും സ്റ്റാൻഡ് അടച്ചിടേണ്ടി വരും.

‘സ്മാർട്ട് കാഞ്ഞിരപ്പള്ളി' വികസന സെമിനാർ ഇന്ന്

കാഞ്ഞിരപ്പള്ളി: സെന്‍റ് ഡൊമിനിക്സ് കത്തീഡ്രലിന്‍റെ ദ്വിശതാബ്ദി സമാപന ആഘോഷങ്ങളുടെ ഭാഗമായി നടത്തപ്പെടുന്ന വികസന സെമിനാർ സ്മാർട്ട് കാഞ്ഞിരപ്പള്ളി ഇന്നു വൈകുന്നേരം അഞ്ചിന് കത്തീഡ്രൽ മഹാജൂബിലി ഹാളിൽ നടക്കും. കത്തീഡ്രൽ വികാരിയും ആർച്ച്പ്രീസ്റ്റുമായ റവ.ഡോ. കുര്യൻ താമരശേരി സെമിനാർ ഉദ്ഘാടനം ചെയ്യും. ചീഫ് വിപ്പ് ഡോ. എൻ. ജയരാജ്, ആന്‍റോ ആന്‍റണി എംപി, പഞ്ചായത്ത് പ്രസിഡന്‍റ് കെ.ആർ. തങ്കപ്പൻ, ജില്ലാ പഞ്ചായത്തംഗം ജെസി ഷാജൻ, ബ്ലോക്ക് പഞ്ചായത്ത് വൈസ് പ്രസിഡന്‍റ് ജോളി മടുക്കക്കുഴി, പഞ്ചായത്തംഗങ്ങളായ മഞ്ജു ബിനോയ്, ബിജു പത്യാല, വി.പി. രാജൻ തുടങ്ങിയവർ പങ്കെടുക്കും. സെമിനാറിൽ പ്രഫ. തോമസ് വർക്കി, ഡോ. ജയ്മോൾ ജയിംസ്, ഡോ. ജോസ് കല്ലറയ്ക്കൽ എന്നിവർ പ്രബന്ധങ്ങൾ അവതരിപ്പിക്കും. മാധ്യമപ്രവർത്തകനും യൂട്യൂബറുമായ ജോ എ. സ്കറിയ ചർച്ചകൾക്കു നേതൃത്വം നൽകും. സമഗ്ര ജീവിത ഗുണനിലവാര ഉന്നതിയും സാമൂഹ്യനന്മയും ലക്ഷ്യമാക്കിയുള്ള പ്രായോഗിക നിർദേശങ്ങളാണ് സെമിനാറിലൂടെ ലക്ഷ്യം വയ്ക്കുന്നത്. കത്തീഡ്രൽ അസിസ്റ്റന്‍റ് വികാരിമാരായ ഫാ. തോമസ്കുട്ടി ആലപ്പാട്ടുകുന്നേൽ, ഫാ. ടോണി മുളങ്ങാശേരി, ഡോ. ബെന്നി ജോർജ്, ടോമി നീറിയാങ്കല്‍, സെബാസ്റ്റ്യൻ എള്ളുകുന്നേൽ എന്നിവർ നേതൃത്വം നൽകുമെന്ന് പബ്ലിസിറ്റി കൺവീനർ ഫിലിപ്പ് നിക്കോളാസ് പള്ളിവാതുക്കൽ അറിയിച്ചു.

ഡോ. ജോസ് തെക്കുംചേരിക്കുന്നേലിന്‍റെ മെത്രാഭിഷേകം: ചെമ്മലമറ്റം ഇടവക പ്രാർഥനയിൽ

ചെമ്മലമറ്റം: ജലന്ധര്‍ രൂപതയുടെ മെത്രാനായി ഡോ. ജോസ് തെക്കുംചേരിക്കുന്നേല്‍ ഇന്ന് അഭിഷിക്തനാകുന്പോള്‍ അദ്ദേഹത്തിന്‍റെ ഇടവകയായ ചെമ്മലമറ്റം പന്ത്രണ്ട് ശ്ലീഹന്മാരുടെ ഇടവകസമൂഹം പ്രാര്‍ഥനയിലും സന്തോഷത്തിലുമാണ്. ദൈവവിളികളാല്‍ സമ്പന്നമാണ് ചെമ്മലമറ്റം ഇടവക. രാജ്കോട്ട് രൂപതയുടെ മുന്‍ അധ്യക്ഷന്‍ മാര്‍ ഗിഗ്രറി കരോട്ടെമ്പ്രയില്‍ ഉള്‍പ്പെടെ രണ്ടു മെത്രാന്മാരും 52 വൈദികരും 180 സന്യസ്തരും ഇടവകയില്‍നിന്നുണ്ട്. രണ്ടു മെത്രാന്മാരുടെയും കുടുംബങ്ങള്‍ അയല്‍വാസികളാണ് എന്നുള്ളതും പ്രത്യേകതയാണ്. ഇടവകയില്‍നിന്നു നിരവധി പേര്‍ ഇന്നു നടക്കുന്ന ചടങ്ങില്‍ പങ്കെടുക്കാന്‍ ജലന്ധറിനു പോയിട്ടുണ്ട്. അസി. വികാരി ഫാ. ജേക്കബ് കടുതോടിലാണ് ഇടവക ടീമിനെ നയിക്കുന്നത്. ഈ മാസം 27നു മാതൃ ഇടവകയായ ചെമ്മലമറ്റം പള്ളിയില്‍ വന്‍ സ്വീകരണമാണ് പുതിയ ബിഷപ്പിന് നല്‍കുന്നത്. വികാരി ഫാ. സെബാസ്റ്റ്യന്‍ കൊല്ലംപറമ്പിലിന്‍റെ നേതൃത്വത്തില്‍ വിപുലമായ ഒരുക്കങ്ങള്‍ തുടങ്ങിക്കഴിഞ്ഞു.

അമോണിയ പ്ലാന്‍റ്: അനുമതിക്കായി അപേക്ഷയെത്തിയത് ഓൺലൈനിൽ

എലിക്കുളം: എലിക്കുളം പഞ്ചായത്തിൽ പത്തനംതിട്ട സ്വദേശിയുടെ മലനാട് അമോണിയ പ്രൈവറ്റ് ലിമിറ്റഡ് എന്ന പ്ലാന്‍റിന് അനുമതിക്കായി അപേക്ഷയെത്തിയത് സർക്കാരിന്‍റെ ഓൺലൈൻ സംവിധാനമായ കെ-സ്വിഫ്റ്റിലൂടെ. ആളുറുമ്പ് പടിഞ്ഞാറ്റുമലയിൽ അമോണിയ പ്ലാന്‍റിനായി സ്വകാര്യകമ്പനി വാങ്ങിയത് ഒന്നേകാൽ ഏക്കർ (0.5070 ഹെക്ടർ) സ്ഥലമാണെന്ന് അപേക്ഷയിൽ സൂചിപ്പിച്ചിട്ടുണ്ട്. സ്ഥലം വാങ്ങിയതിനും കെട്ടിടം പണിയുന്നതിനും മെഷീനറിക്കുമായി കണക്കിൽ കാണിച്ചിരിക്കുന്നത് ഒന്നരക്കോടി രൂപ. അപേക്ഷയിൽ ഒക്യൂപ്പൻസി എന്ന കോളത്തിൽ പ്ലാന്‍റ് അപകടകരം എന്ന ഗണത്തിലാണ് ഉൾപ്പെടുത്തിയിട്ടുള്ളത്. ജനവികാരം ഉൾക്കൊണ്ടില്ലെങ്കിൽ പ്ലാന്‍റിനെതിരേ ശക്തമായ സമരമുണ്ടാവുമെന്ന് എലിക്കുളം മേഖല പൗരസമിതി പ്രസിഡന്‍റ് ജിമ്മിച്ചൻ മണ്ഡപത്തിൽ പറഞ്ഞു. പടിഞ്ഞാറ്റുമലയിൽ അമോണിയം പ്ലാന്‍റിന്‍റെ പ്രവർത്തനം തുടങ്ങിയാൽ കുടിവെള്ളസ്രോതസുകൾ നശിക്കുമെന്ന് ജനകീയ കമ്മിറ്റി ചെയർമാൻ ജോസഫ് മാത്യു തെക്കേക്കുറ്റ് പറഞ്ഞു.

ഓൾ കേരള ഇംഗ്ലീഷ് പ്രസംഗമത്സരം

കടനാട്: സെന്‍റ് സെബാസ്റ്റ്യന്‍സ് ഹൈസ്‌കൂള്‍ ഇംഗ്ലീഷ് അധ്യാപകനും പിജിടിഎ സംസ്ഥാന കൗണ്‍സിലറുമായിരുന്ന ജിമ്മി ജോസ് ചീങ്കല്ലിന്‍റെ സ്മരണാര്‍ഥം ഓള്‍ കേരള ഇംഗ്ലീഷ് പ്രസംഗമത്സരം നടത്തി. മത്സരത്തിനുശേഷം സ്‌കൂള്‍ അസി. മാനേജര്‍ ഫാ. ജോസഫ് അട്ടങ്ങാട്ടിലിന്‍റെ അധ്യക്ഷതയില്‍ ചേര്‍ന്ന പൊതുസമ്മേളനം ഫ്രാന്‍സിസ് ജോര്‍ജ് എംപി ഉദ്ഘാടനം ചെയ്തു. മാണി സി. കാപ്പന്‍ എംഎല്‍എ മുഖ്യപ്രഭാഷണവും സമ്മാനദാനവും നിര്‍വഹിച്ചു. ജില്ലാ പഞ്ചായത്ത് മെബർ രാജേഷ് വാളിപ്ലാക്കല്‍ വിവിധ സ്‌കൂള്‍ ക്ലബ്ബുകളുടെ പ്രവര്‍ത്തനോദ്ഘാടനം നിര്‍വഹിച്ചു. പഞ്ചായത്ത് പ്രസിഡന്‍റ് ജിജി തമ്പി, വാര്‍ഡ് മെംബര്‍ ഉഷാ രാജു, പ്രിന്‍സിപ്പല്‍ സെബാസ്റ്റ്യന്‍ തെരുവില്‍, പിടിഎ പ്രസിഡന്‍റ് സിബി അഴകന്‍പറമ്പില്‍, ഹെഡ്മാസ്റ്റര്‍ വി.ജെ. അജി എന്നിവര്‍ പ്രസംഗിച്ചു. മത്സരത്തില്‍ മാനന്തവാടി എംജിഎം എച്ച്എസ്എസിലെ നെഹല ഫാത്തിമ ഒന്നാം സ്ഥാനവും പ്ലാശനാല്‍ സെന്‍റ് ആന്‍റണീസ് ഹയര്‍ സെക്കന്‍ഡറി സ്‌കൂളിലെ ആത്മജ നിഷാന്ത് രണ്ടാം സ്ഥാനവും കടനാട് സെന്‍റ് സെബാസ്റ്റ്യന്‍സ് ഹയര്‍ സെക്കന്‍ഡറി സ്‌കൂളിലെ മരിയറ്റ് ജോമോനും അരുവിത്തുറ സെന്‍റ് ജോര്‍ജ് ഹയര്‍ സെക്കന്‍ഡറി സ്‌കൂളിലെ ഗ്രേഷ്യന്‍ ജോയും മൂന്നാം സ്ഥാനവും കരസ്ഥമാക്കി.

പാലാ ജനറല്‍ ആശുപത്രിക്ക് ആരോഗ്യവകുപ്പിന്‍റെ കായകൽപ് അവാര്‍ഡ്

പാലാ: 2025ലെ ആരോഗ്യ വകുപ്പിന്‍റെ സംസ്ഥാന കായകല്‍പ് അവാര്‍ഡില്‍ പാലാ കെ.എം. മാണി സ്മാരക ഗവ. ജനറല്‍ ആശുപത്രി കോട്ടയം ജില്ലയില്‍ ഒന്നാം സ്ഥാനവും കമന്‍റേഷന്‍ അവാര്‍ഡില്‍ കേരളത്തിലെ നാലാം സ്ഥാനവും കരസ്ഥമാക്കി. 2024ല്‍ കമന്‍റേഷന്‍ അവാര്‍ഡ് കരസ്ഥമാക്കിയ പാലാ ജനറല്‍ ആശുപത്രി ഇപ്രാവശ്യം വളരെ ഉയര്‍ന്ന ഗ്രേഡോടെ കോട്ടയം ജില്ലയിൽനിന്നു തെരഞ്ഞെടുക്കപ്പെട്ട ഏക ജനറല്‍ ആശുപത്രിയായി. അഭിമാനകരമായ നേട്ടമാണ് ആശുപത്രി നേടിയിരിക്കുന്നതെന്ന് ആശുപത്രി മാനേജിംഗ് കമ്മിറ്റി ചെയര്‍മാന്‍ കൂടിയായ നഗരസഭാധ്യക്ഷന്‍ തോമസ് പീറ്ററും ആശുപത്രി സൂപ്രണ്ട് അസിസ്റ്റന്‍റ് ഡയറക്ടര്‍ ഡോ. ടി.പി.അഭിലാഷും പറഞ്ഞു. നിരവധിയായ ഘടകങ്ങള്‍ പരിശോധിച്ചാണ് അവാര്‍ഡിന് പരിഗണിച്ചത്. ആശുപത്രിയിലെ വിവിധ ചികിത്സാ വിഭാഗങ്ങളിലെ ഡോക്ടര്‍മാരുടെയും മുഴുവന്‍ ആരോഗ്യ പ്രവര്‍ത്തകരുടെയും പ്രതിബദ്ധതയോടെയുള്ള കൂട്ടായ പ്രയത്‌നത്തിന്‍റെ ഫലമാണിതെന്ന് അവര്‍ പറഞ്ഞു. വലിയ രോഗീസൗഹൃദ വികസന പദ്ധതികളാണ് ഈ വര്‍ഷം നടപ്പാക്കുന്നതെന്നും അവര്‍ പറഞ്ഞു.

മിനിലോറിയും കാറും കൂട്ടിയിടിച്ച് അമ്മയ്ക്കും മകനും പരിക്ക്

തലയോലപ്പറമ്പ്: മിനിലോറിയും ഇന്നോവയും കൂട്ടിയിടിച്ചുണ്ടായ അപകടത്തിൽ സിപിഐ മുൻ സംസ്ഥാന സെക്രട്ടറി അന്തരിച്ച കാനം രാജേന്ദ്രന്‍റെ ഭാര്യക്കും മകനും പരിക്ക്. തലയോലപ്പറമ്പ് വടകര തോട്ടം ജംഗ്ഷനു സമീപം ഇന്നലെ വൈകുന്നേരം 4.30 ഓടെയായിരുന്നു അപകടം. ഇടിയുടെ ആഘാതത്തിൽ ഇന്നോവയുടെ മുൻവശം പൂർണമായി തകർന്നു. തലയ്ക്ക് സാരമായി പരിക്കേറ്റ വനജ രാജേന്ദ്രൻ, മകൻ സന്ദീപ് രാജേന്ദ്രൻ എന്നിവരെ എറണാകുളത്തുള്ള സ്വകാര്യ ആശുപത്രിയിൽ പ്രവേശിപ്പിച്ചു. എറണാകുളത്തുനിന്നും തലയോലപ്പറമ്പ് ഇല്ലിത്തൊണ്ടിലുള്ള ഗ്രാനൈറ്റ് കടയിലേക്ക് ലോഡുമായി വരികയായിരുന്നു മിനിലോറി. കോട്ടയം ഭാഗത്തുനിന്നു എറണാകുളം ഭാഗത്തേക്ക് പോകുകയായിരുന്നു ഇന്നോവ. കാർ ഡ്രൈവർ മയങ്ങിപ്പോയതാണ് അപകടത്തിന് ഇടയാക്കിയതെന്ന് പറയപ്പെടുന്നു.

പരിസ്ഥിതി സംരക്ഷണ മേഖലയിലെ പുതു മാതൃകകള്‍ക്കുള്ള അംഗീകാരം

കോട്ടയം: പരിസ്ഥിതി സംരക്ഷണ മേഖലയില്‍ സൃഷ്ടിച്ച പുതു മാതൃകകള്‍ക്കുള്ള അംഗീകാരമാണ് എംജി യൂണിവേഴ്‌സിറ്റിക്ക് ലഭിച്ച ജൈവവൈവിധ്യ സംരക്ഷണ അവാര്‍ഡ്. സര്‍ക്കാര്‍, സഹകരണ, പൊതുമേഖലകളിലെ മികച്ച ജൈവവൈവിധ്യ സംരക്ഷണ സ്ഥാപനമായാണ് സംസ്ഥാന ജൈവവൈവിധ്യ ബോര്‍ഡ് എംജി യൂണിവേഴ്‌സിറ്റിയെ തെരഞ്ഞെടുത്തത്. വൈവിധ്യമാര്‍ന്ന സസ്യജാലങ്ങള്‍ തണല്‍വിരിക്കുന്ന കാമ്പസ് പൂര്‍ണമായും പരിസ്ഥിതി സൗഹൃദമായാണ് പ്രവര്‍ത്തിക്കുന്നത്. ജൈവ മാലിന്യങ്ങളും വൃക്ഷങ്ങളുടെ കരിയിലകളും വരെ മൂല്യവര്‍ധിത ഉത്പന്നങ്ങളാക്കി മാറ്റുന്ന നിര്‍മലം എംജിയു ഗ്രീന്‍ പ്രോട്ടോക്കോള്‍ പദ്ധതിയും കാര്‍ബണ്‍ മലിനീകരണം കുറയ്ക്കുന്നതിന് ലക്ഷ്യമിടുന്ന ബയോഗ്യാസ് പ്ലാന്‍റുകളും സൗരോര്‍ജ യൂണിറ്റുകളും കാമ്പസിനെ വേറിട്ടുനിര്‍ത്തുന്നു. ജീവക ലൈവ് ലാബോറട്ടറി എന്ന പേരില്‍ 2008 മുതല്‍ 12 ഏക്കര്‍ സ്ഥലം സംരക്ഷിത മേഖലയായി നിലനിര്‍ത്തിയിട്ടുണ്ട്. ഓര്‍ഗാനിക് ഫാം, ഔഷധ സസ്യോദ്യാനം, മിയാവാക്കി വനം, പഴവര്‍ഗങ്ങളുടെ ഉദ്യാനം, ഭൂമിമിത്ര ക്ലബ്, പരിസ്ഥിതി ശാസ്ത്ര വിദ്യാര്‍ഥികളുടെ ക്ലബ്, വിദ്യാര്‍ഥികള്‍ക്കും സന്ദര്‍ശകര്‍ക്കും കാമ്പസിലെ മരങ്ങളെ അടുത്തറിയുന്നതിനുപകരിക്കുന്ന ക്യുആര്‍ കോഡ് സംവിധാനം തുടങ്ങിയവയും ഇവിടെയുണ്ട്. ജൈവ വൈവിധ്യ സംരക്ഷണ പ്രവര്‍ത്തനങ്ങളില്‍ അധ്യാപകരും വിദ്യാര്‍ഥികളും ജീവനക്കാരും പങ്കുചേരുന്നു. അധിനിവേശ സസ്യങ്ങളെ നിയന്ത്രിക്കുന്നതിനുള്ള നടപടികള്‍, സര്‍ക്കാര്‍, സര്‍ക്കാരിതര മേഖലകളിലെ ജൈവവൈവിധ്യ നയരൂപീകരണ പ്രവര്‍ത്തനങ്ങളിലെയും പ്രളയാനന്തര ദുരന്തനിവാരണ പഠനങ്ങളിലെയും പങ്കാളിത്തം, സ്‌കൂള്‍ ഓഫ് എന്‍വയോണ്‍മെന്‍റല്‍ സയന്‍സസിന്‍റെ നേതൃത്വത്തില്‍ പരിസ്ഥിതി സംരക്ഷണത്തിനായി നടത്തിവരുന്ന വിവിധ പ്രവര്‍ത്തനങ്ങള്‍ എന്നിവയും പുരസ്‌കാര നേട്ടത്തിന് സഹായകമായി.

വിദ്യാർഥിനിയെ മരിച്ചനിലയിൽ കണ്ടെത്തി

വൈക്കം: ബിബിഎ വിദ്യാർഥിനിയെ വീട്ടിൽ തൂങ്ങിമരിച്ച നിലയിൽ കണ്ടെത്തി. ഉദയനാപുരം നേരേകടവ് വഴിത്തറയിൽ രാജേഷ്-നിഷ ദമ്പതികളുടെ മകൾ അനഘ (22)യെയാണ് കിടപ്പുമുറിയിൽ തൂങ്ങി മരിച്ചനിലയിൽ കണ്ടെത്തിയത്. വ്യാഴാഴ്ച വൈകുന്നേരം അഞ്ചോടെയായിരുന്നു സംഭവം. സംസ്കാരം നടത്തി. ഉടുപ്പിയിൽ ബിബിഎയ്ക്ക് പഠിക്കുന്ന അനഘ കഴിഞ്ഞ മാസം 30 നാണ് അവധിക്ക് നാട്ടിൽ എത്തിയത്. 15ന് തിരികെ പോകാൻ ഇരിക്കുകയായിരുന്നു. അമ്മ നിഷ വിദേശത്താണ്. വൈക്കം പോലീസ് മേൽനടപടി സ്വീകരിച്ചു.

വേമ്പനാട്ടുകായലിനു ചുറ്റും ജൈവവേലി നിർമിക്കണം പി.ജെ. ജോസഫ്

വൈക്കം: വേമ്പനാട്ട് കായലിന്‍റെ ആവാസവ്യവസ്ഥയ്ക്ക് കോട്ടം തട്ടാതെ ജൈവവേലി നിർമിച്ച് കൃഷിയെ പ്രോത്സാഹിപ്പിക്കണമെന്ന് കേരള കോൺഗ്രസ് ചെയർമാൻ പി.ജെ. ജോസഫ്. വേമ്പനാട്ട് കായൽ സംരക്ഷണ സംഗമ സംസ്ഥാന സെമിനാർ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. കായലിലും നദികളിലും അടിഞ്ഞുകൂടുന്ന ചെളിയും മണലും മാലിന്യങ്ങളും മൂലം കായലിന്‍റെ ജല സംഭരണശേഷി പ ത്തിലൊന്നായി കുറഞ്ഞു. ഇത് വെള്ളപ്പൊക്കത്തിനും വ്യാപകമായ കൃഷിനാശത്തിനും കാരണമാകുകയാണ്. കായലിൽനിന്നു വാരുന്ന ചെളിയും മണലും ഉപയോഗിച്ച് ബണ്ട് നിർമിച്ച് വെള്ളപ്പൊക്കത്തിന് പരിഹാരം ഉണ്ടാക്കണം. 98 കിലോമീറ്റർ നീളമുള്ള വേമ്പനാട്ട് കായലിൽ ആറു നദികൾ സംഗമിക്കുന്നു. ഈ നദികളിലൂടെ ഒഴുകിയെത്തുന്ന എക്കൽ ഫലപ്രദമായി വിനിയോഗിച്ച് നെൽകൃഷിക്കും മത്സ്യകൃഷിക്കും ഉപകരിക്കുന്ന രീതിയിൽ മാറ്റിയെടുക്കണമെന്ന് അദ്ദേഹം അഭിപ്രായപ്പെട്ടു. കുട്ടനാട് അപ്പർ കുട്ടനാട് മേഖലകളിലെ കനാലുകൾ തടാകങ്ങൾ ആക്കി മാറ്റിയാൽ ടൂറിസം മേഖലയ്ക്ക് പുത്തൻ ഉണർവ് ഉണ്ടാകും. വേമ്പനാട്ടുകായലിൽ എത്തുന്ന കാർബൺ ശേഖരം കൃഷിക്ക് ഉപയോഗയോഗ്യമാക്കുന്ന പദ്ധതികൾ സംസ്ഥാന സർക്കാർ രൂപം നൽകി നടപ്പിലാക്കണമെന്നും അദ്ദേഹം ആവശ്യപ്പെട്ടു. കേരള കോൺഗ്രസ് കോട്ടയം ജില്ലാ പ്രസിഡന്‍റ് ജയ്സൺ ജോസഫ് അധ്യക്ഷത വഹിച്ചു. സെമിനാറിൽ കാർഷിക വികസന കേന്ദ്രം മുൻ ഡയറക്ടർ ഡോ. കെ.ജി. പത്മകുമാർ വിഷയാവതരണം നടത്തി. വർക്കിംഗ് ചെയർമാൻ പി.സി. തോമസ്, എക്സിക്യൂട്ടീവ് ചെയർമാൻ മോൻസ്ജോസഫ് എംഎൽഎ, സെക്രട്ടറി ജനറൽ ജോയ് ഏബ്രഹാം, ഡെപ്യൂട്ടി ചെയർമാൻ ഫ്രാൻസിസ് ജോർജ് എംപി, ഡെപ്യൂട്ടി ചെയർമാൻ തോമസ് ഉണ്ണിയാടൻ, സംസ്ഥാന കോ-ഓർഡിനേറ്റർ അപു ജോൺ ജോസഫ്, വൈസ് ചെയർമാൻമാരായ ഇ.ജെ. ആഗസ്തി, കെ.എഫ്. വർഗീസ്, സീനിയർ സെക്രട്ടറിമാരായ മാഞ്ഞൂർ മോഹൻകുമാർ, ജോണി അരീക്കാട്ടില്‍, സംസ്ഥാന അഡ്‌വൈസർ തോമസ് കണ്ണന്തറ, പാർട്ടി ഉന്നത അധികാര സമിതി അംഗങ്ങളായ പോൾസൺ ജോസഫ്, സ്റ്റീഫൻ പാറാവേലി, പ്രിൻസ് ലൂക്കോസ്, തോമസ് ഉഴുന്നാലി, ബിനുചെങ്ങളം, ജോർജ് പുളിങ്കാട്ട്, സാബു ഒഴുങ്ങാലി, ജെയിംസ് മാത്യുതെക്കൻ, ജോർജ് ചെന്നേലി, ജോസ് വഞ്ചിപ്പുര, ജോസ് ജെയിംസ് നിലപ്പനക്കൊല്ലി, ജോസഫ് തോമസ് തുടങ്ങിയവർ പ്രസംഗിച്ചു.

പുതിയ കേരളത്തിനായി പുതിയ കോൺഗ്രസ്: ദീപ ദാസ് മുൻഷി

കോട്ടയം: ഇടത് സര്‍ക്കാരിനെ അധികാരത്തില്‍നിന്ന് നീക്കാനുള്ള പോരാട്ടത്തിനൊപ്പം പുതിയ കേരളത്തിനായുള്ള കര്‍മ പദ്ധതികളും തയാറാക്കണമെന്ന് എഐസിസി ജനറല്‍ സെക്രട്ടറി ദീപ ദാസ് മുന്‍ഷി. കോട്ടയത്ത് ജില്ലാ കോണ്‍ഗ്രസ് കമ്മിറ്റി സംഘടിപ്പിച്ച സമരസംഗമം സ്‌പെഷല്‍ ജനറല്‍ ബോഡി യോഗം ഉദ്ഘാടനം ചെയ്യുകയായിരുന്നു അവര്‍. കേരളത്തില്‍ ഇടത് സര്‍ക്കാരിനെതിരേയും കേന്ദ്രത്തില്‍ ബിജെപി സര്‍ക്കാരിനെതിരേയും സമരങ്ങള്‍ നടത്തുന്നതിനൊപ്പം തന്നെ യുവതലമുറയെ അടുത്തറിയാനും ചേര്‍ത്ത് നിര്‍ത്തിക്കൊണ്ടുള്ള നാടിന്‍റെ വികസനത്തിനും ഊന്നല്‍ നല്‍കണമെന്നും അവര്‍ ചൂണ്ടിക്കാട്ടി. നാട്ടില്‍ യുവാക്കള്‍ക്ക് ജോലി കിട്ടുന്നില്ല. യുവാക്കള്‍ വലിയൊരു വിഭാഗം തൊഴില്‍തേടി വിദേശങ്ങളിലേക്ക് പോകുകയാണ്. തൊഴിലവസരങ്ങള്‍ സൃഷ്ടിച്ച് ഇവരെ കേരളത്തില്‍ നിലനിര്‍ത്താന്‍ കോണ്‍ഗ്രസിന് പദ്ധതി വേണം. വര്‍ധിച്ചുവരുന്ന ലഹരിവിപത്തിനെതിരേയും കോണ്‍ഗ്രസ് പ്രവര്‍ത്തകര്‍ മുന്നിട്ടിറങ്ങണം. പുതിയ കേരളത്തെക്കുറിച്ച് കോണ്‍ഗ്രസിന്‍റെയും യുഡിഎഫിന്‍റെയും കാഴ്ചപ്പാടും പദ്ധതികളും ജനങ്ങള്‍ക്ക് മുന്നില്‍ വയ്ക്കാന്‍ കഴിയണം. യുഡിഎഫ് സര്‍ക്കാരിന്‍റെ കാലത്ത് പ്രവര്‍ത്തനത്തിലുണ്ടായിരുന്ന ആവേശം വീണ്ടെടുക്കണമെന്നും യോഗം ഉദ്ഘാടനം ചെയ്ത് ദീപ ദാസ് മുന്‍ഷി പറഞ്ഞു. രാഹുല്‍ഗാന്ധി പങ്കെടുക്കുന്ന ഉമ്മന്‍ ചാണ്ടി അനുസ്മരണം ചരിത്രസംഭവമാക്കാനും യോഗം തീരുമാനിച്ചു. കെപിസിസി പ്രസിഡന്‍റ് സണ്ണി ജോസഫ്, യുഡിഎഫ് കണ്‍വീനര്‍ അടൂര്‍ പ്രകാശ് എംപി, ഡിസിസി പ്രസിഡന്‍റ് നാട്ടകം സുരേഷ്, എംഎല്‍എമാരായ തിരുവഞ്ചൂര്‍ രാധാകൃഷ്ണന്‍, എ.പി. അനില്‍കുമാര്‍, പി.സി. വിഷ്ണുനാഥ്, ആന്‍റോ ആന്‍റണി എംപി, നേതാക്കളായ വി.പി. സജീന്ദ്രന്‍, കെ.സി. ജോസഫ്, ജോസഫ് വാഴയ്ക്കന്‍, പി.എ. സലിം, ജോസി സെബാസ്റ്റ്യന്‍, കുര്യന്‍ ജോയി, ടോമി കല്ലാനി, പി.ആര്‍. സോന, ഫില്‍സണ്‍ മാത്യൂസ്, ജോഷി ഫിലിപ്പ്, സുധാകുര്യന്‍, പി.എസ്. രഘുറാം, കുഞ്ഞ് ഇല്ലംപള്ളി തുടങ്ങിയവര്‍ പ്രസംഗിച്ചു.

എലിപ്പനി പടരുന്നു ; ജാഗ്രത പാലിക്കുക, മുന്‍കരുതലുകള്‍ സ്വീകരിക്കുക

കോട്ടയം: ജില്ലയില്‍ എലിപ്പനി ബാധിതരുടെ എണ്ണത്തില്‍ വര്‍ധന. കനത്ത ജാഗ്രതയുമായി ആരോഗ്യവകുപ്പ്. എലിപ്പനി ബാധിച്ചു മരണപ്പെടുന്നവരുടെ എണ്ണവും രോഗം പിടിപെടുന്നവരുടെ എണ്ണവും വര്‍ധിക്കുന്നതോടെയാണ് ആരോഗ്യവകുപ്പ് മുന്‍കരുതലുമായി രംഗത്തെത്തിയത്. ജില്ലയില്‍ എലിപ്പനി കേസുകള്‍ വ്യാപകമായി റിപ്പോര്‍ട്ടു ചെയ്യുന്ന സാഹചര്യത്തില്‍ ജാഗ്രത പാലിക്കണമെന്നും മുന്‍കരുതലുകള്‍ സ്വീകരിക്കണമെന്നും ആരോഗ്യവകുപ്പ് വ്യക്തമാക്കി. വെള്ളംകയറിയ പ്രദേശങ്ങളില്‍ താമസിക്കുന്നവര്‍, ദുരിതാശ്വാസക്യാമ്പുകളില്‍ കഴിയുന്നവര്‍, ശുചീകരണത്തൊഴിലാളികള്‍, പാടത്തും ജലാശയങ്ങളിലും മീന്‍ പിടിക്കാനിറങ്ങുന്നവര്‍ തുടങ്ങി കെട്ടിക്കിടക്കുന്ന വെള്ളവുമായോ മണ്ണുമായോ സമ്പര്‍ക്കമുണ്ടായിട്ടുള്ള എല്ലാവരും എലിപ്പനിക്കെതിരേയുള്ള മുന്‍കരുതല്‍ മരുന്നായ ഡോക്സിസൈക്ലിന്‍ 200 മില്ലിഗ്രാം (100 മില്ലിഗ്രാമിന്‍റെ രണ്ട് ഗുളിക) ആരോഗ്യപ്രവര്‍ത്തകരുടെ നിര്‍ദ്ദേശാനുസരണം കഴിക്കണം. ഗുളിക കഴിക്കുമ്പോള്‍ മലിനജലവുമായി സമ്പര്‍ക്കത്തില്‍വരുന്ന തൊഴിലുകളില്‍ ഏര്‍പ്പെടുന്നവര്‍ 200 എംജി ഡോക്സിസൈക്ലിന്‍ ഗുളിക ആഴ്ചയിലൊരിക്കല്‍ ആറാഴ്ച വരെ കഴിക്കണം. ജോലി തുടര്‍ന്നും ചെയ്യുന്നെങ്കില്‍ രണ്ടാഴ്ചത്തെ ഇടവേളയ്ക്കു ശേഷം വീണ്ടും കഴിക്കണം. വെറും വയറ്റില്‍ ഡോക്സിസൈക്ലിന്‍ ഗുളിക കഴിക്കരുത്. ഭക്ഷണം കഴിച്ച ശേഷം മാത്രം ഗുളിക കഴിക്കാന്‍ ശ്രദ്ധിക്കണം. ഗുളിക കഴിക്കുന്നതോടൊപ്പം രണ്ടു ഗ്ലാസ് വെള്ളമെങ്കിലും കുടിക്കണം. ഗുളിക കഴിച്ചശേഷം ചിലര്‍ക്കുണ്ടാകുന്ന വയറെരിച്ചില്‍ ഒഴിവാക്കാന്‍ ഇതു സഹായിക്കും. ഗുളിക കഴിച്ചശേഷം ഉടനേ കിടക്കരുത്. തൊഴിലുറപ്പ് ജോലികളില്‍ ഏര്‍പ്പെടുന്നവര്‍ ജോലിക്കിറങ്ങുന്നതിനു തലേദിവസം ഭക്ഷണശേഷം ഗുളിക കഴിക്കണം. പ്രതിരോധമാണ് പ്രധാനം ശരീരത്തില്‍ ചെറിയ മുറിവുകളോ വ്രണങ്ങളോ ഉള്ളവര്‍, പാദം വിണ്ടുകീറിയവര്‍. ഏറെനേരം വെള്ളത്തില്‍ പണിയെടുത്ത് കൈകാലുകളിലെ തൊലി മൃദുലമായവര്‍ തുടങ്ങിയവരില്‍ എലിപ്പനിക്ക് കാരണമാകുന്ന രോഗാണുവിന് പ്രവേശിക്കാന്‍ എളുപ്പമാണ്. ശരീരത്തില്‍ മുറിവുകള്‍ ഉള്ളവര്‍ അത് ഉണങ്ങുന്നതുവരെ മലിനജലവുമായി സമ്പര്‍ക്കത്തില്‍വരുന്ന ജോലികള്‍ ചെയ്യരുത്. ജോലിചെയ്യേണ്ട സാഹചര്യം വന്നാല്‍ കൈയുറ, കാലുറ എന്നിവ ധരിക്കണം. ഡോക്സിസൈക്ലിനും കഴിക്കണം. വീടിനു പുറത്തിറങ്ങുമ്പോള്‍ നിര്‍ബന്ധമായും ചെരുപ്പ് ധരിക്കണം. വിനോദത്തിനായി മീന്‍ പിടിക്കാന്‍ പോകുന്ന സ്ഥലങ്ങളില്‍ മലിനജലവുമായി സമ്പര്‍ക്കമുണ്ടായാല്‍ ഡോക്സിസൈക്ലിന്‍ ഗുളിക കഴിച്ച് മുന്‍ കരുതല്‍ എടുക്കുക. കന്നുകാലികളെ കുളിപ്പിക്കുന്ന തോട്, കുളം എന്നിവിടങ്ങളില്‍ കുളിക്കുകയോ മുഖം കഴുകുകയോ ചെയ്യരുത്‌. തൊഴുത്ത്, പട്ടിക്കൂട് എന്നിവ വൃത്തിയാക്കുന്നവര്‍ മൃഗങ്ങളുടെ വിസര്‍ജ്ജ്യങ്ങളുമായി സമ്പര്‍ക്കം ഉണ്ടാകാതെ സൂക്ഷിക്കുക. കെട്ടിക്കിടക്കുന്ന വെള്ളത്തില്‍ ഇറങ്ങേണ്ടിവന്നാല്‍ കൈകാലുകള്‍ സോപ്പുപയോഗിച്ച് നന്നായി കഴുകുക ആഹാരവും കുടിവെള്ളവും എലി മൂത്രംകലര്‍ന്ന് മലിനമാകാതെ മൂടിവ‌യ്ക്കുക. കടുത്ത പനി, തലവേദന, ക്ഷീണം, ശരീര വേദന, കാല്‍വണ്ണയിലെ പേശികളില്‍ വേദന, കണ്ണിനു മഞ്ഞനിറം എന്നിവ ഉണ്ടായാല്‍ സ്വയംചികിത്സ ഒഴിവാക്കി അടുത്തുള്ള ആരോഗ്യ കേന്ദ്രത്തിലെത്തി ഡോക്ടറെ കണ്ടു ചികിത്സതേടണം. മലിനജലവുമായി സമ്പര്‍ക്കം വന്നിട്ടുണ്ടെങ്കില്‍ ഡോക്ടറോട് പറയണം. ഇതോടെ നിര്‍ണയം കൂടുതല്‍ എളുപ്പമാകും. കുട്ടികളെ മലിനജലത്തില്‍ കുളിക്കാനോ കളിക്കാനോ അനുവദിക്കരുതെന്നും ജാഗ്രത പാലിക്കണമെന്നും ജില്ലാ മെഡിക്കല്‍ ഓഫീസര്‍ അറിയിച്ചു.

രാമപുരം നാലമ്പലദര്‍ശനം: തീർഥയാത്രകളുമായി കെഎസ്ആർടിസി

കോട്ടയം: രാമപുരം നാലമ്പലദര്‍ശനത്തിനു കെഎസ്ആര്‍ടിസി ബജറ്റ് ടൂറിസം സെല്ലുമായി സഹകരിച്ച് 17 മുതല്‍ ഓഗസ്റ്റ് 16 വരെ എല്ലാ ജില്ലകളില്‍നിന്നും തീര്‍ഥയാത്രകള്‍ ക്രമീകരിച്ചെന്നും മുന്‍കൂട്ടി സീറ്റുകള്‍ ബുക്കുചെയ്യാന്‍ സൗകര്യമുണ്ടെന്നും നാലമ്പല ദര്‍ശന കമ്മിറ്റി. ഓരോ ഡിപ്പോകളില്‍നിന്നുള്ള യാത്രാതീയതിയും വിശദാംശങ്ങളും അതതു ജില്ലകളിലെ കോ-ഓര്‍ഡിനേറ്റര്‍മാര്‍ തയാറാക്കിവരുന്നു. രാമപുരം ശ്രീരാമസ്വാമി ക്ഷേത്രം, കൂടപ്പുലം ശ്രീലക്ഷ്മണസ്വാമി ക്ഷേത്രം, അമനകര ശ്രീഭരതസ്വാമി ക്ഷേത്രം, മേതിരി ശത്രുഘ്‌നസ്വാമി ക്ഷേത്രം എന്നിവിടങ്ങളിൽ ദര്‍ശനം നടത്തി വീണ്ടും ശ്രീരാമസ്വാമി ക്ഷേത്രത്തില്‍ ദര്‍ശനം നടത്തുന്നതോടെ നാലമ്പല ദര്‍ശനം പൂര്‍ത്തിയാകും. ഒരേദിവസം ഉച്ചപൂജയ്ക്ക് മുമ്പ് നാലമ്പലദര്‍ശനം പൂര്‍ത്തിയാക്കണം. ഇന്‍ഫര്‍മേഷന്‍ സെന്‍ററുകളും വോളണ്ടിയര്‍മാരുടെ സേവനവും നാലു ക്ഷേത്രങ്ങളിലും ഒരുക്കിയിട്ടുണ്ട്. വാഹനങ്ങള്‍ പാര്‍ക്കുചെയ്യാൻ കൂടുതല്‍ സൗകര്യമുണ്ട്. മഴ നനയാതെ ക്യൂ നില്‍കുന്നതിനു പന്തല്‍ ഒരുക്കിയിട്ടുണ്ട്. വഴിപാടുകള്‍ക്ക് ഉടന്‍ പ്രസാദം ലഭിക്കും. അമനകര ഭരതസ്വാമി ക്ഷേത്രത്തില്‍ ദിവസവും അന്നദാനമുണ്ട്. കര്‍ക്കിടമാസത്തില്‍ ദര്‍ശനസമയം രാവിലെ അഞ്ചുമുതല്‍ ഉച്ചയ്ക്ക് 12 വരെയും വൈകുന്നേരം അഞ്ചുമുതല്‍ 7.30 വരെയുമാണ്. ക്ഷേത്രങ്ങള്‍ തമ്മിലുള്ള ദൂരം മൂന്നു കിലോമീറ്റര്‍ മാത്രമാണ്.

സാന്‍തോം ഫുഡ് ഫാക്ടറി ഉദ്ഘാടനം 14ന്

പാലാ: പാലാ സോഷ്യല്‍ വെല്‍ഫെയര്‍ സൊസൈറ്റി പ്രമോട്ട് ചെയ്യുന്ന സാന്‍തോം ഫാര്‍മര്‍ പ്രൊഡ്യൂസര്‍ കമ്പനിയുടെ ഉടമസ്ഥതയില്‍ ആരംഭിക്കുന്ന പാലാ രൂപത പ്ലാറ്റിനം ജൂബിലി സ്മാരക പാലാ സാന്‍തോം ഫുഡ് ഫാക്ടറിയുടെ ഉദ്ഘാടനം 14ന് നടക്കുമെന്ന് ബിഷപ്സ് ഹൗസില്‍ നടന്ന പത്രസമ്മേളനത്തില്‍ മാര്‍ ജോസഫ് കല്ലറങ്ങാട്ട് അറിയിച്ചു. പാലാ രൂപതയുടെ ഉടമസ്ഥതയിലുള്ള മുണ്ടുപാലം സ്റ്റീല്‍ ഇന്ത്യ കാമ്പസിലാണ് സാന്‍തോം ഫുഡ് ഫാക്ടറി പ്രവര്‍ത്തനം ആരംഭിക്കുന്നത്. നിര്‍മാണം പൂര്‍ത്തിയായ ഫാക്ടറിക്കെട്ടിടത്തിന്‍റെ ആശീര്‍വാദകര്‍മം 14ന് ഉച്ചകഴിഞ്ഞ് 2.30ന് ബിഷപ് മാര്‍ ജോസഫ് കല്ലറങ്ങാട്ട് നിര്‍വഹിക്കും. മുഖ്യ വികാരി ജനറാള്‍ മോണ്‍. ജോസഫ് തടത്തില്‍, വികാരി ജനറാള്‍മാരായ മോണ്‍. ജോസഫ് മലേപ്പറമ്പില്‍, മോണ്‍. ജോസഫ് കണിയോടിക്കല്‍, മോണ്‍. സെബാസ്റ്റ്യന്‍ വേത്താനത്ത് എന്നിവര്‍ സഹകാര്‍മികരാകും. മന്ത്രിമാരായ വി.എന്‍. വാസവനും പി. പ്രസാദും പങ്കെടുക്കും ഉച്ചകഴിഞ്ഞ് മൂന്നിന് മാര്‍ ജോസഫ് കല്ലറങ്ങാട്ടിന്‍റെ അധ്യക്ഷതയില്‍ ചേരുന്ന സമ്മേളനത്തിന്‍റെ ഉദ്ഘാടനം മന്ത്രി വി.എന്‍. വാസവനും ഫാക്ടറിയുടെ ഉദ്ഘാടനം കൃഷിമന്ത്രി പി. പ്രസാദും നിര്‍വഹിക്കും. രൂപതയുടെ പ്ലാറ്റിനം ജൂബിലിയുടെ സ്മരണാര്‍ഥം 75 മാതൃകാ കര്‍ഷകരെ സമ്മേളനത്തില്‍ ആദരിക്കും. വികാരി ജനറാള്‍ മോണ്‍. സെബാസ്റ്റ്യന്‍ വേത്താനത്ത് പദ്ധതി വിശദീകരിക്കും. എംപിമാരായ ജോസ് കെ. മാണി, കെ. ഫ്രാന്‍സിസ് ജോര്‍ജ്, എംഎല്‍എമാരായ മാണി സി. കാപ്പന്‍, മോന്‍സ് ജോസഫ്, സെബാസ്റ്റ്യന്‍ കുളത്തുങ്കല്‍, ചാണ്ടി ഉമ്മന്‍ എന്നിവരും പി.സി. ജോര്‍ജ്, മുനിസിപ്പല്‍ ചെയര്‍മാന്‍ തോമസ് പീറ്റര്‍, പിഎസ്ഡബ്ല്യുഎസ് ഡയറക്ടര്‍ ഫാ. തോമസ് കിഴക്കേല്‍, സ്മോള്‍ ഫാര്‍മേഴ്‌സ് അഗ്രി ബിസിനസ് കണ്‍സോര്‍ഷ്യം മാനേജിംഗ് ഡയറക്ടര്‍ എസ്. രാജേഷ്‌കുമാര്‍, സ്റ്റേറ്റ് ഹോര്‍ട്ടികള്‍ച്ചര്‍ മിഷന്‍ മാനേജിംഗ് ഡയറക്ടര്‍ സജി ജോണ്‍, നബാര്‍ഡ് ജില്ലാ മാനേജര്‍ റെജി വര്‍ഗീസ്, പ്രിന്‍സിപ്പല്‍ കൃഷി ഓഫീസര്‍ സി. ജോ ജോസ്, വ്യവസായവകുപ്പ് ജില്ലാ ജനറല്‍ മാനേജര്‍ വി.ആര്‍. രാജേഷ്, ആത്മാ പ്രോജക്‌ട് ഡയറക്ടര്‍ മിനി ജോര്‍ജ്, സ്റ്റേറ്റ് ഹോര്‍ട്ടികള്‍ച്ചര്‍ മിഷന്‍ ഡെപ്യൂട്ടി ഡയക്ടര്‍ ലെന്‍സി തോമസ്, കൃഷി വിജ്ഞാനകേന്ദ്രം പ്രോഗ്രാം കോ-ഓര്‍ഡിനേറ്റര്‍ ഡോ. ജി. ജയലക്ഷ്മി, കാഞ്ഞിരമറ്റം അഗ്രോ പ്രൊഡ്യൂസർ കമ്പനി ചീഫ് എക്‌സിക്യൂട്ടീവ് ഓഫീസര്‍ ടോം ജേക്കബ്‍, സാന്‍തോം ഫാര്‍മര്‍ പ്രൊഡ്യൂസര്‍ കമ്പനി ചെയര്‍മാന്‍ സിബി മാത്യു തുടങ്ങിയവര്‍ പ്രസംഗിക്കും. വാര്‍ഷിക പൊതുയോഗം പാലാ സാന്‍തോം ഫാര്‍മേഴ്‌സ് പ്രൊഡ്യൂസര്‍ കമ്പനിയുടെ വാര്‍ഷിക പൊതുയോഗം രാവിലെ 11ന് ആരംഭിക്കും. ചെയര്‍മാന്‍ സിബി മാത്യു അധ്യക്ഷത വഹിക്കും. പിഎസ്ഡബ്ല്യുഎസ് ഡയറക്ടര്‍ ഫാ. തോമസ് കിഴക്കേല്‍ ഉദ്ഘാടനം ചെയ്യും. ഡയറക്ടര്‍ ബോര്‍ഡംഗം ജോയി മടിക്കാങ്കല്‍, ചീഫ് എക്‌സിക്യൂട്ടീവ് ഓഫീസര്‍ വിമല്‍ കദളിക്കാട്ടില്‍, ക്ലാരീസ് ചെറിയാന്‍, ഡയറക്ടര്‍ ബോര്‍ഡംഗങ്ങളായ പി.വി. ജോര്‍ജ് പുരയിടം, ഷീബാ ബെന്നി എന്നിവര്‍ പ്രസംഗിക്കും. 1.30ന് കാര്‍ഷിക മേഖലയിലെ പ്രശ്‌നങ്ങളും സാധ്യതകളും സംബന്ധിച്ച കര്‍ഷകസംവാദം നടക്കും. സ്റ്റീല്‍ ഇന്ത്യ ഡയറക്ടര്‍ ഫാ. ജോസഫ് താഴത്തുവരിക്കയിലിന്‍റെ അധ്യക്ഷതയില്‍ ഇന്‍ഫാം ദേശീയ ചെയര്‍മാന്‍ ഫാ. ജോസഫ് ചെറുകരക്കുന്നേല്‍ സംവാദം ഉദ്ഘാടനം ചെയ്യും. ഇന്‍ഫാം രൂപത ഡയറക്ടര്‍ ഫാ. ജോസഫ് തറപ്പേല്‍ മോഡറേറ്ററാകും. വിവിധ കര്‍ഷക കമ്പനി സാരഥികളും വിദഗ്ധരും പ്രസംഗിക്കും. പിഎസ്ഡബ്ല്യുസ് അസിസ്റ്റന്‍റ് ഡയറക്ടര്‍ ഫാ. ഫ്രാന്‍സിസ് ഇടത്തിനാല്‍ സ്വാഗതവും എഫ്പിഒ ഡിവിഷന്‍ മാനേജര്‍ ഡാന്‍റീസ് കൂനാനിക്കല്‍ നന്ദിയും പറയും. കര്‍ഷകകൂട്ടായ്മകള്‍ വിവിധ കലാപരിപാടികളും അവതരിപ്പിക്കും. പാലാ ബിഷപ്സ് ഹൗസില്‍ നടന്ന വാര്‍ത്താസമ്മേളനത്തില്‍ മാര്‍ ജോസഫ് കല്ലറങ്ങാട്ട്, മോണ്‍. സെബാസ്റ്റ്യന്‍ വേത്താനത്ത്, ഫാ. തോമസ് കിഴക്കേല്‍, ഫാ. ജോസഫ് താഴത്തുവരിക്കയില്‍, ഫാ. ഫ്രാന്‍സിസ് ഇടത്തിനാല്‍, സിബി മാത്യു കണിയാംപടി, പബ്ലിസിറ്റി കമ്മിറ്റി കണ്‍വീനര്‍ ഡാന്‍റീസ് കൂനാനിക്കല്‍, പി.വി. ജോര്‍ജ് പുരയിടം, സപ്ലിമെന്‍റ് കമ്മിറ്റി കണ്‍വീനര്‍ ടോണി സണ്ണി തുടങ്ങിയവര്‍ സന്നിഹിതരായിരുന്നു.

ഭാരതീയ പോസ്റ്റല്‍ ഫെഡറേഷന്‍ പ്രതിഷേധ പ്രകടനം നടത്തി

ചങ്ങനാശേരി: ദേശീയ പൊതു പണിമുടക്ക് ദിനത്തില്‍ ചങ്ങനാശേരി ഹെഡ് പോസ്റ്റ് ഓഫീസില്‍ അതിക്രമിച്ചുകയറി പോസ്റ്റല്‍ ജീവക്കാരന്‍ വിഷ്ണു ചന്ദ്രനെ മര്‍ദിച്ച സംഭവത്തില്‍ ഭാരതീയ പോസ്റ്റല്‍ ഫെഡറേഷന്‍റെ നേതൃത്വത്തില്‍ പ്രതിഷേധ പ്രകടനവും യോഗവും സംഘടിപ്പിച്ചു. പെരുന്നയില്‍ നിന്നാരംഭിച്ച പ്രകടനത്തില്‍ നിരവധി സംഘപരിവാര്‍ പ്രവര്‍ത്തകര്‍ പങ്കെടുത്തു. കെഎസ്ആര്‍ടിസി ജംഗ്ഷനില്‍ നടന്ന പ്രതിഷേധ യോഗം ബിഎംഎസ് ദേശീയ നിര്‍വാഹക സമിതി അംഗം കെ.കെ. വിജയകുമാര്‍ ഉദ്ഘാടനം ചെയ്തു. സര്‍ക്കിള്‍ കണ്‍വീനര്‍ രാജേന്ദ്രപ്രസാദ്, ബിജെപി ജില്ലാ സെക്രട്ടറി എ. മനോജ്, ഗോപന്‍ മണിമുറി, ഡി. ഹര്‍ഷന്‍ എന്നിവര്‍ പ്രസംഗിച്ചു.

അഭിഭാഷകരും ക്ലര്‍ക്കുമാരും നടത്തിവന്ന സമരം അവസാനിപ്പിച്ചു

ചങ്ങനാശേരി: മജിസ്‌ട്രേറ്റ് കോടതിയുടെ അധികാരപരിധി പുനര്‍നിര്‍ണയിച്ചതിലുള്ള അപാകത പരിഹരിക്കണമെന്ന് ആവശ്യപ്പെട്ട് കഴിഞ്ഞ 109 ദിവസമായി ചങ്ങനാശേരി താലൂക്കിലെ പൊതുസമൂഹത്തിന്‍റെ പൂര്‍ണ പിന്തുണയില്‍ നടത്തിവന്ന പ്രതിഷേധ സമരം അവസാനിപ്പിച്ചതായി സമരസമിതി അറിയിച്ചു. ചങ്ങനാശേരി ബാര്‍ അസോസിയേഷനാണ് സമരത്തിന് നേതൃത്വം നല്‍കിയത്. കേരള ബാര്‍ കൗണ്‍സിലിന്‍റെ മുന്‍ ചെയര്‍മാന്‍ അഡ്വ. കെ.എന്‍. അനില്‍കുമാര്‍, ബാര്‍ കൗണ്‍സില്‍ അംഗവും തിരുവനന്തപുരം ബാര്‍ അസോസിയേഷന്‍ പ്രസിഡന്‍റുമായ അഡ്വ. പള്ളിച്ചല്‍ എസ്.കെ പ്രമോദ് എന്നിവരുടെ സാന്നിധ്യത്തില്‍ കോട്ടയം ജുഡീഷല്‍ ജില്ലയുടെ ചാര്‍ജ് വഹിക്കുന്ന ഹൈക്കോടതി ജഡ്ജി ജസ്റ്റീസ് വി.ജി. അരുണുമായി ബാര്‍ അസോസിയേഷന്‍ പ്രതിനിധികള്‍ നടത്തിയ കൂടിക്കാഴ്ചയിലെ നിര്‍ദ്ദേശങ്ങള്‍ ഉള്‍ക്കൊണ്ട് സത്യഗ്രഹ സമരം താത്കാലികമായി അവസാനിപ്പിക്കാന്‍ തീരുമാനിച്ചതെന്ന് ബാര്‍ അസോസിയേഷന്‍ പ്രസിഡന്‍റ് അഡ്വ. കെ. മാധവന്‍ പിള്ള, സെക്രട്ടറി പി.എ. സുജാത, കെഎസിഎ ചങ്ങനാശേരി യൂണിറ്റ് പ്രസിഡന്‍റ് പ്രതാപന്‍ എന്നിവര്‍ അറിയിച്ചു.

പള്ളാത്തുരുത്തി പാലത്തിന്‍റെ ആര്‍ച്ച് കോണ്‍ക്രീറ്റിംഗ് : എസി റോഡില്‍ നാളെ മുതല്‍ ഗതാഗത നിയന്ത്രണം

ചങ്ങനാശേരി: ആലപ്പുഴ- ചങ്ങനാശേരി റോഡില്‍ പുതിയ പള്ളാത്തുരുത്തി പാലത്തിന്‍റെ ആര്‍ച്ച് കോണ്‍ക്രീറ്റിംഗ് പ്രവൃത്തികള്‍ നടക്കുന്നതിനാല്‍ നാളെ രാവിലെ 10 മുതല്‍ 13ന് രാവിലെ ആറുവരെ എസി റോഡിലൂടെയുള്ള ഗതാഗതത്തിന് നിയന്ത്രണമേര്‍പ്പെടുത്താന്‍ തീരുമാനം. ആലപ്പുഴ കളക്‌ടറേറ്റില്‍ ചേര്‍ന്ന എസി റോഡ് നിര്‍മാണവുമായി ബന്ധപ്പെട്ട ഉദ്യോഗസ്ഥരുടെ യോഗത്തിലാണ് തീരുമാനമെടുത്തത്. ചങ്ങനാശേരിയില്‍നിന്ന് ആലപ്പുഴയിലേക്കു വരുന്ന ഭാരവാഹനങ്ങള്‍ തിരുവല്ല വഴി തിരുവല്ല-അമ്പലപ്പുഴ റോഡിലൂടെ ദേശീയ പാതയില്‍ എത്തിച്ചേരണം. ചങ്ങനാശേരിയില്‍നിന്നു വരുന്ന ചെറു വാഹനങ്ങള്‍ എസി റോഡിലൂടെ സഞ്ചരിച്ച് മങ്കൊമ്പ് ജംഗ്ഷനില്‍നിന്ന് ചമ്പക്കുളം ഭാഗത്തേക്കു തിരിഞ്ഞ് നെടുമുടി പഞ്ചായത്ത് ഓഫീസ് ജംഗ്ഷന്‍വഴി ദേശീയ പാതയിലെ കാക്കാഴം റെയില്‍വേ മേല്‍പ്പാലത്തിന് വടക്ക് വശത്തുള്ള എസ്എന്‍ കവലയില്‍വന്ന് ആലപ്പുഴയിലേക്ക് യാത്ര തുടരണം. ആലപ്പുഴയില്‍നിന്നും ചങ്ങനാശേരിക്കു പോകുന്ന ഭാരവാഹനങ്ങള്‍ അമ്പലപ്പുഴ - തിരുവല്ല റോഡിലൂടെ ചങ്ങനാശേരിക്കു പോകണം. ആലപ്പുഴയില്‍നിന്നും ചങ്ങനാശേരിക്ക് പോകുന്ന ചെറുവാഹനങ്ങള്‍ ദേശീയ പാതയിലെ എസ്എന്‍ കവലയില്‍നിന്നും കഞ്ഞിപ്പാടം-ചമ്പക്കുളം വഴി എസി റോഡിലെ പൂപ്പള്ളിയിലെത്തി ചങ്ങനാശേരിക്ക് യാത്ര തുടരണം. പള്ളാത്തുരുത്തി പഴയ പാലത്തിന് സമാന്തരമായി പണിയുന്ന പുതിയ പാലത്തിന്‍റെ നടുവിലുള്ള 72 മീറ്റര്‍ നീളമുള്ള ആര്‍ച്ചിന്‍റെ ആദ്യഘട്ട കോണ്‍ക്രീറ്റിംഗ് പ്രവൃത്തികളാണ് നാളെ നടക്കുന്നത്. യോഗത്തില്‍ ജില്ലാ കളക്ടര്‍ അലക്‌സ് വര്‍ഗീസ് അധ്യക്ഷത വഹിച്ചു. കെഎസ്ടിപി എക്‌സിക്യുട്ടീവ് എന്‍ജിനിയര്‍ ജി.എസ്. ജ്യോതി, അമ്പലപ്പുഴ ഡിവൈഎസ്പി കെ.എന്‍. രാജേഷ്, വിവിധ വകുപ്പുകളിലെ ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

‘സൈബര്‍ ഇടങ്ങളിലെ ചതിക്കുഴികള്‍’ വനിതാ കമ്മീഷന്‍ സെമിനാര്‍

കോട്ടയം: സ്ത്രീകള്‍ നേരിടുന്ന ആരോഗ്യപ്രശ്‌നങ്ങളും സൈബര്‍ ഇടങ്ങളിലെ ചതിക്കുഴികളും ചര്‍ച്ചചെയ്തു വനിതാ കമ്മീഷന്‍ സെമിനാര്‍. ജില്ലാ പഞ്ചായത്തിന്‍റെ സഹകരണത്തോടെ നടത്തിയ സംസ്ഥാനതല സെമിനാര്‍ വനിതാ കമ്മീഷനംഗം അഡ്വ. ഇന്ദിരാ രവീന്ദ്രന്‍ ഉദ്ഘാടനം ചെയ്തു. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ അധ്യക്ഷത വഹിച്ചു. ജില്ലാ പഞ്ചായത്ത് വൈസ് പ്രസിഡന്‍റ് ജോസ് പുത്തന്‍കാലാ, ജില്ലാ പഞ്ചായത്തംഗങ്ങളായ പി.ആര്‍. അനുപമ, മഞ്ജു സുജിത്, ജെസി ഷാജന്‍, സെക്രട്ടറി പി.എസ്. ഷിനോ, വനിതാ കമ്മീഷന്‍ സെക്രട്ടറി വൈ.ബി. ബീന, വനിതാ കമ്മീഷന്‍ റിസര്‍ച്ച് ഓഫീസര്‍ എ.ആര്‍. അര്‍ച്ചന എന്നിവര്‍ പങ്കെടുത്തു.

തകര്‍ന്ന റോഡുകൾ... കണ്ണടച്ച് വഴിവിളക്കുകൾ... പെരുന്ന മന്നം നഗറിൽ യാത്രാദുരിതം

ചങ്ങനാശേരി: പെരുന്ന മന്നംനഗര്‍ മേഖലയിലെ വഴിവിളക്കുകള്‍ പ്രകാശിക്കുന്നില്ല. തകര്‍ന്ന റോഡുകളിലെ കാല്‍നടപ്പും വാഹനഗതാഗതവും ദുരിതമാകുന്നു. നാളുകളായി പ്രകാശിക്കാത്ത മുപ്പതോളം വഴിവിളക്കുകളുടെ പോസ്റ്റുകളുടെ നമ്പര്‍ സഹിതം നഗരസഭാധികൃതര്‍ക്ക് പരാതി നല്‍കിയിട്ടും പ്രതികരണമുണ്ടാകാത്തതിനെതിരേ മന്നം നഗര്‍ റെസിഡന്‍റ്സ് അസോസിയേഷന്‍ പ്രതിഷേധവുമായി രംഗത്തെത്തി. ഈ വാര്‍ഡിലെ പല വഴിവിളക്കുകളും പ്രകാശിക്കാതായിട്ട് ഒരു വര്‍ഷത്തിലേറെയായി. റെഡ്സ്ക്വയര്‍ ജംഗ്ഷനില്‍ എസി റോഡിനേയും എന്‍എച്ച്-183 (എംസി റോഡ്) നേയും ചങ്ങനാശേരി ബൈപാസുമായി ബന്ധിപ്പിക്കുന്ന പ്രധാന റോഡായ മന്നം റോഡ് പൂര്‍ണമായും തകര്‍ന്ന അവസ്ഥയിലാണ്. വഴിവിളക്കുകള്‍ പ്രകാശിക്കാത്തതുമൂലം രാത്രികാലങ്ങളിലെ ഈറോഡിലെ സഞ്ചാരം ദുരിതപൂര്‍ണമാണ്. ജനജീവിതം ദുരിതത്തിലാഴ്തുന്ന വിഷയങ്ങള്‍ക്ക് പരിഹാരമുണ്ടായില്ലെങ്കില്‍ നിയമ നടപടികളും ശക്തമായ ജനകീയ പ്രതിഷേധവുമായി മുന്നോട്ടു പോകുമെന്ന് മന്നം നഗര്‍ റെസിഡന്‍റ്സ് അസോസിയേഷന്‍ ഭാരവാഹികള്‍ അറിയിച്ചു.

കറുകച്ചാൽ സെൻട്രൽ ജംഗ്ഷനിൽ നവീകരണ പ്രവർത്തനങ്ങൾ ആരംഭിച്ചു

കറുകച്ചാൽ: കറുകച്ചാൽ സെൻട്രൽ ജംഗ്ഷനിൽ നവീകരണ പ്രവർത്തനങ്ങൾ ആരംഭിച്ചു. എപ്പോഴും തിരക്കേറിയ സെൻട്രൽ ജംഗ്ഷനിൽ റോഡിലെ കുഴികൾ മൂലം ഗതാഗത സ്തംഭനം പതിവായിരുന്നു. ഏറെനാളായി തകർന്നുകിടന്ന ഈ ഭാഗം വാഹനങ്ങൾക്കും കാൽനട യാത്രക്കാർക്കും ഒരു പോലെ ഭീഷണിയും ഉയർത്തിയിരുന്നു. നാലുറോഡുകൾ സന്ധിക്കുന്ന സെൻട്രൽ ജംഗ്ഷനിലെ റോഡിന്‍റെ തകർച്ച ഏറെ വിമർശനങ്ങൾക്ക് ഇടയാക്കിയിരുന്നു. ഏതാനും നാളുകൾക്ക് മുമ്പേ ടൗണിലെ റോഡുകൾ ഉന്നത നിലവാരത്തിൽ ടാറിംഗ് നടത്തി നവീകരിച്ചെങ്കിലും ആഴ്ചകൾക്കകം തന്നെ ഈ ഭാഗത്ത് കുഴികൾ രൂപപ്പെട്ട് ചെളിവെള്ളം കെട്ടിനിൽക്കുകയും വാഹനങ്ങൾക്കും കാൽനട യാത്രക്കാർക്കും വളരെയേറെ ബുദ്ധിമുട്ടുകൾ സൃഷ്ടിക്കുകയും ചെയ്തിരുന്നു. നിർമാണത്തിലെ അപാകതയാണ് വളരെ പെട്ടെന്നുതന്നെ ഈ ഭാഗത്തെ റോഡ് തകർന്നു കുഴികൾ രൂപപ്പെടാൻ കാരണമായതെന്ന് ആക്ഷേപം ഉയർന്നിരുന്നു. ഇപ്പോൾ 4500 ചതുരശ്രയടി വിസ്തീർ്ണത്തിൽ റോഡിലെ പഴയ ടാറിംഗ് ഇളക്കി മാറ്റി ടൈൽ പാകി നവീകരിക്കാനാണ് പിഡബ്ല്യൂഡി റോഡ് വിഭാഗം അധികൃതരുടെ തീരുമാനം.

പാര്‍ശ്വവത്കൃതരുടെ ഉന്നമനത്തിന് വിദ്യാഭ്യാസം ഉപകരിക്കണം: പ്രഫ. സി.ടി. അരവിന്ദകുമാര്‍

ചങ്ങനാശേരി: വിദ്യാഭ്യാസം പാര്‍ശ്വവത്കരിക്കപ്പെട്ടവരുടെ ഉന്നമനത്തിനുവേണ്ടിയാവണമെന്ന് എംജി സര്‍വകലാശാല വൈസ് ചാന്‍സലര്‍ പ്രഫ.സി.ടി. അരവിന്ദകുമാര്‍. എസ്ബി കോളജില്‍ നടന്ന ബിരുദദാന ചടങ്ങ് ഉദ്ഘാടനം ചെയ്യുകയായിരുന്നു അദ്ദേഹം. പഠനം പൂര്‍ത്തിയാക്കി പുറത്തിറങ്ങുന്ന കുട്ടികള്‍ക്ക് തെരഞ്ഞെടുപ്പുകള്‍ക്ക് അനന്തസാധ്യതകള്‍ ഉള്ളതായും വൈസ് ചാന്‍സലര്‍ കൂട്ടിച്ചേര്‍ത്തു. ആര്‍ച്ച്ബിഷപ് മാര്‍ തോമസ് തറയില്‍ അനുഗ്രഹപ്രഭാഷണം നടത്തി. മൂല്യബോധമുള്ള ഒരു തലമുറയെ വാര്‍ത്തെടുക്കുന്നതില്‍ എസ്ബി കോളജ് എന്നും ശ്രദ്ധപുലര്‍ത്തുന്നതായി മാര്‍ തോമസ് തറയില്‍ പറഞ്ഞു. കോളജ് മാനജര്‍ മോണ്‍. ആന്‍റണി എത്തയ്ക്കാട്ട്, പ്രിന്‍സിപ്പല്‍ റവ.ഡോ. ടെഡി കാഞ്ഞൂപ്പറമ്പില്‍, വൈസ് പ്രിന്‍സിപ്പല്‍ ഫാ. ജോസ് ജേക്കബ് മുല്ലക്കരി, 2025ലെ ബെസ്റ്റ് ഔട്ട്ഗോയിംഗ് സ്റ്റുഡന്‍റ് ലൂമിനറി അവാര്‍ഡ് നേടിയ പി. അപര്‍ണ എന്നിവര്‍ പ്രസംഗിച്ചു. 2025 അക്കാദമിക വര്‍ഷം വിജയകരമായി ബിരുദ -ബിരുദാനന്തര കോഴ്‌സുകള്‍ പൂര്‍ത്തിയാക്കിയ വിദ്യാര്‍ഥികള്‍ക്കാണ് ബിരുദം നല്‍കിയത്.

കുരിശുംമൂട്ടില്‍ പൈപ്പ് പൊട്ടി ശുദ്ധജലം പാഴാകുന്നു; യാത്രക്കാര്‍ക്ക് ചെളിവര്‍ഷം

ചങ്ങനാശേരി: ചങ്ങനാശേരി-വാഴൂര്‍ റോഡില്‍ കുരിശുംമൂട് ജംഗ്ഷനു സമീപം പൈപ്പ് പൊട്ടി ശുദ്ധജലം റോഡിലൂടെ ഒഴുകുന്നു. റോഡ് തകരുന്നു. സ്വകാര്യ മാര്‍ക്കറ്റിനു സമീപമാണ് പൈപ്പു പൊട്ടി ഒഴുകുന്നത്. വേഗത്തില്‍ വാഹനങ്ങള്‍ കടന്നു പോകുമ്പോള്‍ സമീപത്തെ വ്യാപാര സ്ഥാപനങ്ങളിലേക്കും കാല്‍നടയാത്രക്കാരുടെമേലും ചെളിവെള്ളവര്‍ഷം പതിവാകുന്നു. കഴിഞ്ഞ രണ്ടാഴ്ചക്കാലമായാണ് ഈ ഭാഗത്ത് പൈപ്പ് പൊട്ടിയൊഴുകുന്നത്. കുരിശുംമൂട് പമ്പ്ഹൗസ് റോഡില്‍ പുല്ലുകാട്ടുചിറ ഭാഗത്തും മോര്‍ക്കുളങ്ങര ഭാഗത്തും പൈപ്പുപൊട്ടി ദിവസങ്ങളായി ശുദ്ധജലം റോഡിലൂടെ ഒഴുകുകയാണെന്നു നാട്ടുകാര്‍ പറഞ്ഞു. പഴകിയ പൈപ്പുകള്‍ക്കു കേടുപാടുകള്‍ സംഭവിക്കുന്നതാണ് പൈപ്പ് പൊട്ടി വെള്ളം നഷ്ടപ്പെടാന്‍ കാരണമെന്നാണ് വാട്ടര്‍ അഥോറിറ്റിയുടെ വിശദീകരണം. ജല്‍ജീവന്‍ പദ്ധതിയുടെ ഭാഗമായി പൈപ്പുകള്‍ മാറ്റി സ്ഥാപിക്കുന്നതോടെ പ്രശ്‌നത്തിനു പരിഹാരമാകുമെന്ന് വാട്ടര്‍ അഥോറിറ്റി അധികൃതർ പറഞ്ഞു.

തലയാഴത്ത് കുടുംബാരോഗ്യകേന്ദ്രം നിര്‍മാണം പൂര്‍ത്തിയായി

തലയാഴം: പഞ്ചായത്ത് അഞ്ചാം വാര്‍ഡിലെ കുടുംബാരോഗ്യകേന്ദ്രത്തിന്‍റെ നിര്‍മാണം പൂര്‍ത്തിയായി. എന്‍ആര്‍എച്ച്എം ഫണ്ടില്‍നിന്ന് 1.26 കോടി രൂപ മുടക്കിയാണ് നിര്‍മാണം പൂര്‍ത്തീകരിച്ചത്. രണ്ട് ഒപി, ഒരു സ്‌പെഷ്യാലിറ്റി ഒപി, പരിശോധനാമുറി, നിരീക്ഷണമുറി, ഫാര്‍മസി, ശൗചാലയം എന്നീ സൗകര്യങ്ങളോടെയാണ് പുതിയ കെട്ടിടം നിര്‍മിച്ചിരിക്കുന്നത്. കുടുംബാരോഗ്യകേന്ദ്രം പ്രവര്‍ത്തനം ആരംഭിക്കുന്നതോടെ മൂന്നു ഡോക്ടര്‍മാരുടെ സേവനം ലഭിക്കും. രാവിലെ ഒമ്പതു മുതല്‍ വൈകുന്നേരം ആറുവരെ ചികിത്സ ഉണ്ടാകും. ഒപ്പം ഫാര്‍മസിസ്റ്റ്, നഴ്സ് എന്നിവരുടെ എണ്ണത്തിലും വര്‍ധന ഉണ്ടാകും. നിലവിൽ രാവിലെ ഒമ്പതുമുതല്‍ ഉച്ചയ്ക്ക് രണ്ടുവരെയാണ് പരിശോധനാസമയം. രണ്ട് ഡോക്ടര്‍മാരാണ് ഇവിടെയുള്ളത്. ദിനംപ്രതി 120 പേര്‍ ചികിത്സതേടി എത്താറുണ്ട്.

കുറുപ്പന്തറ സെന്‍റ് സേവ്യേഴ്സ് സ്കൂളിൽ ക്ലബ്ബുകളുടെ പ്രവര്‍ത്തനോദ്ഘാടനം നടത്തി

കുറുപ്പന്തറ: സെന്‍റ് സേവ്യേഴ്‌സ് വൊക്കേഷണല്‍ ഹയര്‍ സെക്കൻഡറി സ്‌കൂളില്‍ വിവിധ ക്ലബ്ബുകളുടെ പ്രവര്‍ത്തനോദ്ഘാടനം നടന്നു. നവാഗത സിനിമാ സംവിധായകന്‍ ബിന്‍റോ സ്റ്റീഫന്‍ ക്ലബ്ബുകളുടെ പ്രവര്‍ത്തനോദ്ഘാടനം നിര്‍വഹിച്ചു. സ്‌കൂള്‍ മാനേജര്‍ റവ.ഫാ. ജോസ് വള്ളോംപുരയിടത്തില്‍ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് കോമളവല്ലി രവീന്ദ്രന്‍, വാര്‍ഡ് മെംബര്‍ ആന്‍സി സിബി, പ്രിന്‍സിപ്പല്‍ അനൂപ് കെ. സെബാസ്റ്റ്യന്‍, ഹെഡ്മാസ്റ്റര്‍ ജോഷി ജോര്‍ജ്, പിടിഎ പ്രസിഡന്‍റ് ഷാജി കടുന്നക്കരി എന്നിവര്‍ പ്രസംഗിച്ചു.

കടുത്തുരുത്തി റോട്ടറി ക്ലബ് ഭാരവാഹികള്‍ ചുമതലയേറ്റു

കടുത്തുരുത്തി: കടുത്തുരുത്തി റോട്ടറി ക്ലബ് ഭാരവാഹികളായി ജോര്‍ജ് ജി. മുരിക്കന്‍ -പ്രസിഡന്‍റ്, അഡ്വ. ജോസ് ജോസഫ് - സെക്രട്ടറി, തോമസ് തോമസ് - ട്രഷറര്‍ എന്നിവര്‍ ചുമതലയേറ്റു. സമ്മേളനം എന്‍. ഷൈന്‍കുമാര്‍ ഉദ്ഘാടനം ചെയ്തു. മുന്‍ പ്രസിഡന്‍റ് റിട്ട. കേണല്‍ പി.ജെ. സൈമണ്‍ അധ്യക്ഷത വഹിച്ചു. ജില്ലാ പദ്ധതിയായ ഓപ്പോളിന്‍റെ ലോഗോ വിധു രാജീവിന് കൈമാറി ഷൈന്‍കുമാര്‍ ഉദ്ഘാടനം നിര്‍വഹിച്ചു. ഭൂമിക പദ്ധതിയുടെ ഉദ്ഘാടനം റോട്ടറി അസിസ്റ്റന്‍റ് ഗവര്‍ണര്‍ ഡോ ബിനു സി. നായര്‍, നിയുക്ത പ്രസിഡന്‍റ് ജോര്‍ജ് ജി. മുരിക്കന് ലോഗോ നല്‍കി നിര്‍വഹിച്ചു. മുന്‍ സെക്രട്ടറി എം.യു. ബേബി, ജോയ് മാത്യു, ഫ്രാന്‍സിസ് പുതുക്കുളങ്ങര, രാജന്‍ പൊതി എന്നിവര്‍ പ്രസംഗിച്ചു.

വെള്ളം കയറി ഏത്തവാഴകൃഷി നശിച്ചു

ഉദയനാപുരം: ഓണവിപണി ലക്ഷ്യമിട്ടു പാട്ടഭൂമിയിൽ നടത്തിയ ഏത്തവാഴകൃഷി വെള്ളം കയറി പൂർണമായി ഒടിഞ്ഞു നശിച്ചത് കർഷക രുടെ പ്രതീക്ഷകളെ തകർത്തു. ഉദയനാപുരം പടിഞ്ഞാറെക്കര ഭാഗത്ത് ഏത്തവാഴകൃഷി നടത്തിയ വേഴക്കേരി മണിയപ്പൻ, പെരുമ്പ്ലാത്ത് പങ്കജാക്ഷൻ എന്നിവരുടെ കൃഷിയാണ് പൂർണമായി നശിച്ചത്. മണിയൻ 400 ഏത്തവാഴകളും പങ്കജാക്ഷൻ 350 ഏത്തവാഴകളുമാണ് നട്ടിരുന്നത്. ഒടിഞ്ഞ് മണ്ണൊടു ചേർന്നു കിടക്കുന്ന വലിയ ഏത്തക്കുലകൾ കച്ചവടക്കാർ നിശ്ചയിക്കുന്ന വിലയ്ക്ക് കൊടുക്കാൻ തയാറായിട്ടും ആരും വാങ്ങാനില്ല. സാങ്കേതിക കാരണങ്ങൾ നിരത്തി ഏത്തവാഴയ്ക്ക് കൃഷിഭവനുകളുംഇൻഷ്വറൻസ് പരിരക്ഷ നിഷേധിച്ചു. മണിയനു മൂന്നര ലക്ഷം രൂപയുടേയും പങ്കജാക്ഷനു മൂന്നു ലക്ഷം രൂപയുടേയും നഷ്ടമുണ്ടായതായാണ് കണക്കാക്കുന്നത്. വാഴകൃഷി പൂർണമായി നശിച്ച് വൻ സാമ്പത്തികബാധ്യത യിലായ ഈ കർഷകർക്ക് മതിയായ നഷ്ടപരിഹാരം നൽകാൻ കൃഷിവകുപ്പ് നടപടി സ്വീകരിക്കണമെന്ന് കർഷകർ ആവശ്യപ്പെട്ടു.

നിയന്ത്രണംവിട്ട കാര്‍ ബൈക്കിലും വൈദ്യുതിത്തൂണിലും ഇടിച്ച് അപകടം; ബൈക്ക് യാത്രികനു ഗുരുതുര പരിക്ക്

കോതനല്ലൂര്‍: നിയന്ത്രണംവിട്ട കാര്‍ ബൈക്കിലും വൈദ്യുതിത്തൂ ണിലും ഇടിച്ചു അപകടം. ബൈക്ക് യാത്രികനായ അറുനൂറ്റിമംഗലം കണ്ണന്‍ നിവാസില്‍ സി.ആര്‍. കണ്ണന്(36) ‍ ഗുരുതരമായി പരിക്കേറ്റു. ഇയാളെ ഏറ്റുമാനൂരിലെ ആശുപത്രിയില്‍ പ്രവേശിപ്പിച്ചു. ഇന്നലെ രാവിലെ 11.15ന് ഏറ്റുമാനൂര്‍-എറണാകുളം റോഡില്‍ കോതനല്ലൂര്‍ വിജയ പാര്‍ക്ക് ഹോട്ടലിനു സമീപമാണ് അപകടം. കൊട്ടാരക്കര സ്വദേശി ചന്ദ്രന്‍പിള്ളയും കുടുംബവും സഞ്ചരിച്ച കാറാണ് അപകടത്തില്‍പ്പെട്ടത്. ചോറ്റാനിക്കരയില്‍ പോയശേഷം തിരികെ വീട്ടിലേക്കു മടങ്ങുകയായിരുന്നു ഇവര്‍. നിയന്ത്രണംവിട്ട കാര്‍ എതിര്‍ദിശയില്‍ വന്ന കണ്ണന്‍റെ ബൈക്കില്‍ ഇടിച്ചശേഷം വൈദ്യുതിത്തൂണിലിടിച്ചാണു നിന്നത്. ഏറ്റുമാനൂരിലെ സ്പോര്‍ട്സ് ഷോറൂമില്‍ പോയശേഷം തിരികെ വീട്ടിലേക്കു മടങ്ങുകയായിരുന്നു കണ്ണന്‍. വൈദ്യുതിത്തൂണ് ഒടിയുകയും വൈദ്യുതിലൈനുകള്‍ പൊട്ടിവീഴുകയും ചെയ്തതോടെ ഇതുവഴിയുള്ള വാഹനഗതാഗതം അരമണിക്കൂറിലധികം തടസപ്പെട്ടു. കടുത്തുരുത്തി പോലീസ് സ്ഥലത്തെത്തി മേല്‍നടപടികള്‍ സ്വീകരിച്ചു.

ഹരിതകർമസേനയ്ക്ക് മഴക്കോട്ട് വിതരണം ചെയ്തു

കോട്ടയം: ജില്ലാ റെസിഡന്‍റ്സ് അസോസിയേഷനും കോട്ടയം നഗരസഭയും സംയുക്തമായി നഗരസഭയിലെ മുഴുവന്‍ ഹരിത കര്‍മ സേനാംഗങ്ങള്‍ക്കും സൗജന്യമായി മഴക്കോട്ട് വിതരണം ചെയ്തു. ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍ വിതരണോദ്ഘാടനം നിര്‍വഹിച്ചു. അസോസിയേഷന്‍ പ്രസിഡന്‍റ് ജോണ്‍ സി. ആന്‍റണി, സെക്രട്ടറി വി. കൃഷ്ണമൂര്‍ത്തി, വൈസ് പ്രസിഡന്‍റ് ജോണ്‍ മത്തായി, വാര്‍ഡ് കൗണ്‍സിലര്‍മാരായ ജയമോള്‍ ജോസഫ്, സന്തോഷ് കുമാര്‍ തുടങ്ങിയവര്‍ പ്രസംഗിച്ചു.

വേമ്പനാട്ടുകായൽ സംരക്ഷണം: കേരള കോൺഗ്രസ് സെമിനാർ ഇന്ന്

വൈക്കം: വേമ്പനാട്ടുകായൽ സംരക്ഷിക്കണമെന്നാവശ്യപ്പെട്ട് കേരള കോൺഗ്രസ് സംഘടിപ്പിക്കുന്ന സംസ്ഥാനതല സെമിനാർ ഇന്നു രാവിലെ 11ന് വൈക്കം സത്യഗ്രഹ സ്മാരക ഹാളിൽ നടക്കും.പാർട്ടി ചെയർമാൻ പി.ജെ. ജോസഫ് സെമിനാർ ഉദ്ഘാടനംചെയ്യും.ജില്ലാ പ്രസിഡന്‍റ് ജെയ്സൺജോസഫ് അധ്യക്ഷത വഹിക്കും. കുമരകം കാർഷിക ഗവേഷണ കേന്ദ്രം മുൻഡയറക്ടർ ഡോ. കെ.ജി.പത്‌മകുമാർ വിഷയാവതരണം നടത്തും. പ്രമുഖ പരിസ്ഥിതി പ്രവർത്തകൻ രാജുമാത്യു മുഖപ്രഭാഷണം നടത്തും. വേമ്പനാട്ടുകായൽ മലിനീകരണം കുട്ടനാട്, അപ്പർ കുട്ടനാടുമേഖലയുടെ ആവാസ വ്യവസ്ഥയെ പ്രതികൂലമായി ബാധിക്കുന്ന സാഹചര്യം കണക്കിലെടുത്ത് സംസ്ഥാന-കേന്ദ്ര സർക്കാരുകൾ അടിയന്തരമായി വേമ്പനാട്ടുകായൽ സംരക്ഷിക്കുന്നതിന് പദ്ധതി തയാറാക്കണമെന്നാവശ്യപ്പെട്ടാണ് സെമിനാർ സംഘടിപ്പിക്കുന്നത്. പി. സി.തോമസ്,മോൻസ് ജോസഫ് എം എൽ എ, ഫ്രാൻസിസ് ജോർജ് എം പി, തോമസ് ഉണ്ണിയാടൻ തുടങ്ങിയവർ സംബന്ധിക്കും.

രാജമ്മ പഠിക്കുകയാണ് 66-ാം വയസിൽ; പ്ലസ് ടുവിന് 80 ശതമാനം മാർക്ക് വാങ്ങാൻ

കുമരകം: പ്ലസ് വണ്‍ പരീക്ഷയ്ക്ക് 68 ശതമാനം മാര്‍ക്ക് വാങ്ങിയ അറുപത്താറുകാരിയായ രാജമ്മ പ്ലസ്ടുവിന് 80ശതമാനം മാര്‍ക്ക് എന്ന ലക്ഷ്യത്തോടെ ഉറക്കമിളച്ചു പഠിക്കുകയാണ്. കുമരകം സൗത്ത് പുത്തന്‍ കരിച്ചിറ വാവയുടെ ഭാര്യ പി.ടി. രാജമ്മയാണ് ഉയര്‍ന്ന ശതമാനത്തിനായി പഠിക്കുന്നത്. സാക്ഷരതാ മിഷൻ കേന്ദ്രത്തില്‍ കഴിഞ്ഞദിവസമാണ് രാജമ്മയുടെ പഠനം പൂര്‍ത്തിയായത്. വയസ്‌കരക്കുന്ന് ഗവണ്‍മെന്‍റ് മോഡല്‍ ഹയര്‍ സെക്കന്‍ഡറി സ്‌കൂളില്‍ ശനിയും ഞായറും പൊതുഅവധി ദിവസങ്ങളിലുമായിരുന്നു ക്ലാസുകള്‍. 24 വയസ് മുതലുള്ളവര്‍ അവിടെ പഠിതാക്കളാണ്. ഇവരില്‍ ഏറ്റവും പ്രായം കൂടുതല്‍ രാജമ്മയ്ക്കാണ്. കോട്ടയം സെന്‍ററില്‍ മാത്രം 123 വിദ്യാര്‍ഥികളാണുള്ളത്. നാടന്‍പാട്ട് കലാകാരികൂടിയാണ് രാജമ്മ. സഹപാഠികളുടെ ഒത്തുചേരലുകള്‍ അടിപൊളിയാക്കുന്നതില്‍ രാജമ്മയുടെ നാടന്‍പാട്ടുകളും സിനിമാപ്പാട്ടുകളും മുഖ്യപങ്കു വഹിച്ചിരുന്നു. തൊഴിലുറപ്പു തൊഴിലാളിയുമാണ്. അഞ്ചാം ക്ലാസില്‍ പഠനം അവസാനിപ്പിച്ച രാജമ്മ 61 -ാം വയസിലാണ് പത്താംക്ലാസ് തുല്യതാ പരീക്ഷ വിജയിച്ചത്. ഭര്‍ത്താവ് വാവയും മക്കളും പഠനത്തിനു പൂര്‍ണ പിന്തുണയുമായി ഒപ്പമുണ്ട്.

സർക്കാർ തീരുമാനം : ബിന്ദുവിന്‍റെ കുടുംബത്തിന് പത്തുലക്ഷം രൂപ ധനസഹായവും മകന് ജോലിയും

വൈക്കം: കോട്ടയം മെഡിക്കൽ കോളജ് ആശുപത്രിയിൽ ശുചിമുറി സമുച്ചയം തകർന്നുവീണ് മരിച്ച വൈക്കം തലയോലപ്പറമ്പ് സ്വദേശിനി ബിന്ദുവിന്‍റെ കുടുംബത്തിന് മുഖ്യമന്ത്രിയുടെ ദുരിതാശ്വാസനിധിയിൽ നിന്ന് പത്തുലക്ഷം രൂപ ധനസഹായം അനുവദിക്കാൻ മന്ത്രിസഭായോഗം തീരുമാനിച്ചതായി സി.കെ. ആശ എംഎൽഎ അറിയിച്ചു. ബിന്ദുവിന്‍റെ മകൻ നവനീതിന് ഉചിതമായ ജോലി നൽകാൻ തിരുവിതാംകൂർ ദേവസ്വം ബോർഡിനോട് ശിപാർശ ചെയ്യാനും മന്ത്രിസഭാ യോഗം തീരുമാനിച്ചു. ബിന്ദുവിന്‍റെ മകൾ നവമിയുടെ ശസ്ത്രക്രിയ ഇന്നലെ വിജയകരമായി നടന്നെന്നും ബിന്ദുവിന്‍റെ വീട് 12.50 ലക്ഷം രൂപ വിനിയോഗിച്ചു നവീകരിക്കുന്ന നടപടികൾ പുരോഗമിക്കുകയാണെന്നും സി.കെ. ആശ പറഞ്ഞു.

പുസ്തകപരേഡ് മത്സരം: വിജയികളെ പ്രഖ്യാപിച്ചു

കോട്ടയം: വായനപക്ഷാചരണത്തിന്‍റെ ഭാഗമായി വിവര-പൊതുജനസമ്പര്‍ക്ക വകുപ്പും ജില്ലാ ഭരണകേന്ദ്രവും സ്‌കൂള്‍, കോളജ് വിദ്യാര്‍ഥികള്‍ക്കായി നടത്തിയ പുസ്തകപരേഡ്, പുസ്തകാസ്വാദന മത്സരത്തിലെ വിജയികളെ പ്രഖ്യാപിച്ചു. ഹൈസ്‌കൂള്‍ വിഭാഗത്തില്‍ പ്ലാശനാല്‍ സെന്‍റ് ആന്‍റണീസ് എച്ച്എസ്എസിലെ 10-ാം ക്ലാസ് വിദ്യാര്‍ഥിനി ലിയ സച്ചിന്‍ ഒന്നാം സ്ഥാനവും കടപ്ലാമറ്റം സെന്‍റ് ആന്‍റണീസ് ഹൈസ്‌കൂളിലെ ഒന്പതാം ക്ലാസ് വിദ്യാര്‍ഥിനി സാറാ മരിയ ജോബി രണ്ടാം സ്ഥാനവും കാഞ്ഞിരപ്പള്ളി ആനക്കല്ല് സെന്‍റ് ആന്‍റണീസ് പബ്ലിക് സ്‌കൂളിലെ എട്ടാം ക്ലാസ് വിദ്യാര്‍ഥിനി എമ്മ അന്ന ചെറിയാന്‍ മൂന്നാം സ്ഥാനവും നേടി. ഹയര്‍ സെക്കന്‍ഡറി വിഭാഗത്തില്‍ കോട്ടയം സിഎംഎസ് കോളജ് ഹയര്‍ സെക്കന്‍ഡറി സ്‌കൂളിലെ പ്ലസ് വണ്‍ വിദ്യാര്‍ഥിനി ശില്പ അന്ന സാം ഒന്നാംസ്ഥാനവും മാന്നാനം സെന്‍റ് എംഫ്രേസ് ഹയര്‍ സെക്കന്‍ഡറി സ്‌കൂളിലെ പ്ലസ് ടു വിദ്യാര്‍ഥി നെവിന്‍ പ്രമോദ് രണ്ടാം സ്ഥാനവും കോട്ടയം എംഡി സെമിനാരി ഹയര്‍ സെക്കന്‍ഡറി സ്‌കൂളിലെ പ്ലസ് വണ്‍ വിദ്യാര്‍ഥി നിബിന്‍ ഷെറഫ് മൂന്നാം സ്ഥാനവും നേടി. കോളജ് വിഭാഗത്തില്‍ എംജി സര്‍വകലാശാലാ സ്‌കൂള്‍ ഓഫ് ലെറ്റേഴ്‌സിലെ എംഎ മലയാളം വിദ്യാര്‍ഥിനി ദേവിക ആര്‍. ചന്ദ്രന്‍ ഒന്നാം സ്ഥാനവും കുറവിലങ്ങാട് ദേവമാതാ കോളജിലെ എംഎ മലയാളം വിദ്യാര്‍ഥിനി അനുപ്രിയ ജോജോ രണ്ടാം സ്ഥാനവും പാമ്പാടി കെജി കോളജിലെ ബിഎസ്‌സി ഫുഡ് സയന്‍സ് ആന്‍ഡ് ക്വാളിറ്റി കണ്‍ ട്രോള്‍ മൂന്നാം വര്‍ഷ വിദ്യാര്‍ ഥിനി ഹരിത എച്ച്. മൂന്നാം സ്ഥാനവും നേടി. വിജയികള്‍ ക്ക് സമ്മാനവും സര്‍ട്ടിഫിക്കറ്റും ഫലകവും വായനപക്ഷാചരണത്തിന്‍റെ ജില്ലാതല സമാപനച്ചടങ്ങില്‍ നല്‍കും. വായന പക്ഷാചരണത്തോടനുബന്ധിച്ചു പ്രിയപുസ്തകം എന്‍റെ വാക്കില്‍ എന്ന പേരിലാണ് ജില്ലാ ഇന്‍ഫര്‍മേഷന്‍ ഓഫീസിന്‍റെ ഔദ്യോഗിക ഫേസ്ബുക്ക് പേജുവഴി നൂതനമായ പുസ്തകപരിചയമത്സരം സംഘടിപ്പിച്ചത്.

ഏറ്റുമാനൂർ മിനി സിവിൽ സ്റ്റേഷൻ നിർമാണോദ്ഘാടനം നാളെ

ഏറ്റുമാനൂർ: ഏറ്റുമാനൂർ മിനി സിവിൽ സ്റ്റേഷന്‍റെ നിർമാണോദ്ഘാടനം നാളെ നടക്കും. ഏറ്റുമാനൂർ പോലീസ് സ്റ്റേഷനു സമീപമുള്ള നിർദ്ദിഷ്ട മിനി സിവിൽ സ്റ്റേഷൻ അങ്കണത്തിൽ വൈകുന്നേരം 4.30നു നടക്കുന്ന ചടങ്ങിൽ മന്ത്രി വി.എൻ. വാസവൻ നിർമാണ ഉദ്ഘാടനം നിർവഹിക്കും. നഗരസഭാ ചെയർപേഴ്സൺ ലൗലി ജോർജ് അധ്യക്ഷത വഹിക്കും. ഫ്രാൻസിസ് ജോർജ് എംപി, ജില്ലാ പഞ്ചായത്ത് പ്രസിഡൻ്റ് ഹേമലത പ്രേംസാഗർ, ജില്ലാ കളക്ടർ ജോൺ വി. സാമുവൽ തുടങ്ങിയവർ പ്രസംഗിക്കും. ഏറ്റുമാനൂർ പോലീസ് സ്റ്റേഷനു സമീപം സർക്കാരിന്‍റെ അധീനതയിലുള്ള 81.18 സെന്‍റ് സ്ഥലത്താണ് മിനി സിവിൽ സ്റ്റേഷൻ നിർമിക്കുന്നത്. 32 കോടി രൂപ ചെലവഴിച്ച് അഞ്ചുനിലകളിലായി 3810 ചതുരശ്ര മീറ്ററിലാണ് മിനി സിവിൽ സ്റ്റേഷൻ കെട്ടിടം ഉയരുന്നത്. രണ്ടു ഘട്ടങ്ങളായാണ് നിർമാണം നടക്കുന്നത്. ആദ്യഘട്ടത്തിൽ മൂന്നു നിലകളിലായി 2300 ചതുരശ്ര മീറ്റർ നിർമാണം പൂർത്തീകരിക്കും. ഇതിന് 15 കോടി രൂപ ചെലവഴിക്കും. 110 ചതുരശ്ര മീറ്ററിൽ പാർക്കിംഗ് സൗകര്യവും ഒരുക്കും. സബ് രജിസ്ട്രാർ ഓഫീസ്, സബ് ട്രഷറി, അസിസ്റ്റന്‍റ് പബ്ലിക് പ്രോസിക്യൂട്ടറുടെ ഓഫീസ്, പൊതുമരാമത്ത് കെട്ടിട വിഭാഗത്തിന്‍റെയും നിരത്ത് വിഭാഗത്തിന്‍റെയും അസിസ്റ്റന്‍റ് എൻജിനിയർമാരുടെ ഓഫീസുകൾ, കൃഷി അസിസ്റ്റന്‍റ് ഡയറക്ടറുടെ ഓഫീസ്, ഡയറി എക്സ്റ്റൻഷൻ ഓഫീസ്, ഫുഡ് ഇൻസ്പെക്ടർ ഓഫീസ്, കൃഷിഭവൻ, ഐസിഡിഎസ് ഓഫീസ് എന്നീ പത്ത് സർക്കാർ ഓഫീസുകൾ ആദ്യ ഘട്ടത്തിൽ മിന് സിവിൽ സ്റ്റേഷനിൽ പ്രവർത്തനമാരംഭിക്കും. മൂന്നു പതിറ്റാണ്ടിലേറെയായി ഉയരുന്ന ജനകീയാവശ്യമാണ് യാഥാർഥ്യമാകുന്നത്. മിനി സിവിൽ സ്റ്റേഷനു വേണ്ടി ഏറ്റുമാനൂരിൽ ഒട്ടേറെ സമരങ്ങൾ അരങ്ങേറിയിട്ടുണ്ട്. ഈ സർക്കാർ അധികാരത്തിലേറിയ ശേഷം നടന്ന ആദ്യ മണ്ഡല വികസന ശില്പശാലയിലെ ആവശ്യമാണ് ഇപ്പോൾ യാഥാർഥ്യമാകുന്നതെന്ന് മന്ത്രി വി.എൻ. വാസവൻ പറഞ്ഞു.

രോഗികൾക്ക് ഭീഷണിയായി ആശുപത്രികളിൽ നായക്കൂട്ടം

കോട്ടയം: നായ കടിച്ചാല്‍ അതിവേഗം ചികിത്സ ഉറപ്പാക്കാനാവണം സര്‍ക്കാര്‍ ആശുപത്രി വളപ്പിലെ നായക്കൂട്ടത്തെ പായിക്കാന്‍ നടപടിയെടുക്കാത്തത്. കോട്ടയം മെഡിക്കല്‍ കോളജ്, ജില്ലാ ആശുപത്രി, താലൂക്ക് ആശുപത്രികള്‍ തുടങ്ങി തെരുവുനായകള്‍ അലഞ്ഞുതിരിയാത്ത സര്‍ക്കാര്‍ ആതുരാലയങ്ങള്‍ ഒന്നുമില്ല. ഭക്ഷണ അവശിഷ്ടങ്ങള്‍ക്കായി ആശുപത്രി വളപ്പുകളില്‍ അലഞ്ഞുതിരിയുന്ന നായകളെ വന്ധ്യംകരിക്കാനോ പേവിഷ പ്രതിരോധ കുത്തിവയ്പ് കൊടുക്കാനോ നാടുകടത്താനോ നടപടികളില്ല. ആശുപത്രി വികസന സമിതികളും തദ്ദേശസ്ഥാപനങ്ങളും ഇക്കാര്യത്തില്‍ യാതൊരു നടപടിയും സ്വീകരിക്കുന്നില്ല. കോട്ടയം മെഡിക്കല്‍ കോളജ് പ്രവേശനകവാടം മുതല്‍ നായ്ക്കള്‍ അലഞ്ഞുതിരിയുന്നു. ജില്ലാ ആശുപത്രിയില്‍ മുന്പ് രോഗിയെയും കൂട്ടിരിപ്പുകാരിയെയും നായ കടിച്ചിട്ടുണ്ട്. ആശുപത്രിയോടു ചേര്‍ന്ന് സ്ഥലം വെറുതെകിടക്കുന്ന സാഹചര്യമാണ് നായ്ക്കള്‍ കൂടുതല്‍ പ്രശ്‌നകാരികളാക്കുന്നത്. കോട്ടയം മെഡിക്കല്‍ കോളജിനോടു ചേര്‍ന്നുള്ള കുട്ടികളുടെ ആശുപത്രിയിലും മെഡിക്കല്‍ കോളജ് വക ആളൊഴിഞ്ഞ സ്ഥലത്തും ഹോസ്റ്റലുകള്‍ക്കു സമീപവും നായശല്യം രൂക്ഷമാണ്.

വിസ്മയമായി കീര്‍ത്തനയുടെ "ഇന്‍സൈറ്റ് റേയ്‌സ്’

ചങ്ങനാശേരി: എട്ടാംക്ലാസ് വിദ്യാര്‍ഥിനി ടി. കീര്‍ത്തനയുടെ ശാസ്ത്രപുസ്തകം നാളെ പ്രകാശനം ചെയ്യും. കീര്‍ത്തനയുടെ രചനകള്‍ "ഇന്‍സൈറ്റ് റേയ്‌സ്’ എന്ന പേരിൽ പുസ്തകമാക്കുന്പോൾ അത് തൃക്കൊടിത്താനം ഗവൺമെന്‍റ് ഹൈസ്‌കൂളിനും അഭിമാനമാകുന്നു. യുപി ക്ലാസിലെ സയന്‍സ് പുസ്തകങ്ങളെ ആസ്പദമാക്കി വരച്ച കഥകളും കാര്‍ട്ടൂണുകളും ചിത്രങ്ങളുമാണ് കീര്‍ത്തനയെ വ്യത്യസ്തയാക്കുന്നത്. യുപി ക്ലാസുകളിലെ അധ്യാപകര്‍ക്കും കുട്ടികള്‍ക്കും റഫറന്‍സ് പുസ്തകമായി ഉപയോഗിക്കത്തക്ക നിലവാരത്തിലുള്ളതാണ് ഈ രചനകള്‍. തൃക്കൊടിത്താനം കിളിമല ചിറപ്പറമ്പില്‍ ധനീഷ്‌കുമാര്‍-ശ്രീക്കുട്ടി ദമ്പതികളുടെ മൂത്തമകളാണ് കീര്‍ത്തന. എഴുത്തും വരയും കീര്‍ത്തന മാതാപിതാക്കളെ കാണിച്ചിരുന്നില്ല. എന്നാല്‍, ഇവയെല്ലാം ക്ലാസ് അധ്യാപിക റാണി ജോസഫിന് അയച്ചുകൊടുത്തിരുന്നു. ഈ അധ്യാപികയാണ് കീര്‍ത്തനയിലെ ശാസ്ത്ര എഴുത്തുകാരിയെ തിരിച്ചറിഞ്ഞത്. തുടര്‍ന്ന് കീര്‍ത്തനയുടെ വൈഭവം ടീച്ചര്‍ മാതാപിതാക്കളെ അറിയിച്ചു. ഈ എഴുത്തും വരയും പുസ്തകമാക്കണമെന്ന തീരുമാനത്തിലെത്തിച്ചത് ഈ സ്‌കൂളിലെ ഹയര്‍സെക്കന്‍ഡറി മലയാളവിഭാഗം അധ്യാപിക ഡോ. ജലജ ചരിവുകാലായിലാണ്. ഇക്കാര്യമറിയിച്ചപ്പോള്‍ ഹെഡ്മിസ്ട്രസ് ആര്‍.എസ്. രാജി വേണ്ട ഒത്താശകളും പ്രോത്സാഹനങ്ങളും നല്‍കി. കീര്‍ത്തനയുടെ ഇംഗ്ലീഷിലുള്ള രചനകള്‍ കനകപ്പലം എംടി ഹൈസ്‌കൂളിലെ അധ്യാപകന്‍ രാജീവ് നായര്‍ തിരുത്തലുകള്‍ നടത്തി മലയാളത്തിലേക്കു വിവര്‍ത്തനം ചെയ്തു. ഈ രചനകളും വരകളും കൂട്ടിച്ചേര്‍ത്ത് തൃക്കൊടിത്താനം ഗവ. ഹയര്‍സെക്കന്‍ഡറി സ്‌കൂളാണ് "ഇന്‍സൈറ്റ് റേയ്‌സ്’ എന്ന പേരില്‍ പ്രസിദ്ധീപകരിക്കുന്നത്. ത്രിതല പഞ്ചായത്ത് അധികാരികള്‍, സ്‌കൂള്‍ പിടിഎ എന്നിവരുടെ സഹകരണത്തോടെ പുറത്തിറക്കുന്ന പുസ്തകം നാളെ രാവിലെ 11ന് സ്‌കൂള്‍ ഓഡിറ്റോറിയത്തില്‍ ചേരുന്ന സമ്മേളനത്തില്‍ പ്രശസ്ത കവിയും ചലച്ചിത്രഗാന രചയിതാവുമായ വയലാര്‍ ശരത്ചന്ദ്രവര്‍മ പ്രകാശനം ചെയ്യും. പിടിഎ പ്രസിഡന്‍റും പഞ്ചായത്ത് വൈസ് പ്രസിഡന്‍റുമായ ബിനോയി ജോസഫ് അധ്യക്ഷത വഹിക്കും. ജില്ലാപഞ്ചായത്ത് സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ മഞ്ജു സുജിത്, മാടപ്പള്ളി ബ്ലോക്ക് പഞ്ചായത്ത് പ്രസിഡന്‍റ് എന്‍.രാജു, തൃക്കൊടിത്താനം പഞ്ചായത്ത് പ്രസിഡന്‍റ് മോളി ജോസ്, പ്രിന്‍സിപ്പല്‍ എ. സജീന തുടങ്ങിയവര്‍ പ്രസംഗിക്കും.

പച്ചത്തുരുത്തുകള്‍ക്ക് ഹരിതകേരളം മിഷന്‍ പുരസ്‌കാരം

കോട്ടയം: ജില്ലയില്‍ തദ്ദേശ സ്വയംഭരണ സ്ഥാപനങ്ങള്‍ ഒരുക്കിയ ഏറ്റവും മികച്ച പച്ചത്തുരുത്തുകള്‍ക്ക് ഹരിതകേരളം മിഷന്‍ പുരസ്‌കാരം നല്‍കും. ഏറ്റവും മികച്ച മൂന്ന് പച്ചത്തുരുത്തുകള്‍ക്ക് ജില്ലാതല പുരസ്‌കാരം നല്‍കും. ജില്ലകളിലെ പച്ചത്തുരുത്തുകളില്‍നിന്ന് തെരഞ്ഞെടുത്ത മികച്ച അഞ്ച് പച്ചത്തുരുത്തുകള്‍ക്ക് സംസ്ഥാനതല പുരസ്‌കാരവും നല്‍കും. ജില്ലാതല പുരസ്‌കാരം സെപ്റ്റംബര്‍ ആദ്യവാരം കോട്ടയത്ത് സമ്മാനിക്കും. സംസ്ഥാനതല പുരസ്‌കാരം ഓസോണ്‍ ദിനമായ സെപ്റ്റംബര്‍ 16ന് തിരുവനന്തപുരത്ത് വച്ചാണ് സമ്മാനിക്കുക. പച്ചത്തുരുത്തുകളിലെ വൃക്ഷ-സസ്യ വൈവിധ്യങ്ങള്‍, പച്ചത്തുരുത്ത് സംരക്ഷണത്തിന് സംഘാടകസമിതി വഹിക്കുന്ന പങ്ക്, ജൈവ വേലി, വിവര വിജ്ഞാന ബോര്‍ഡുകള്‍ തുടങ്ങിയ ഘടകങ്ങള്‍ പരിശോധിച്ചായിരിക്കും പുരസ്‌കാരങ്ങള്‍ നല്‍കുന്നത്. ജില്ലാ സംസ്ഥാന തലങ്ങളില്‍ രൂപീകരിച്ച വിദഗ്ധസമിതികളുടെ സന്ദര്‍ശനത്തിലൂടെയാണ് മികച്ചവയെ കണ്ടെത്തുക. പച്ചത്തുരുത്തുകളുടെ വ്യാപനവും വൈവിധ്യവും വര്‍ധിപ്പിക്കാന്‍ വിപുലമായ പ്രവര്‍ത്തനങ്ങളാണ് ജില്ലയില്‍ നടക്കുന്നത്. ജില്ലയില്‍ 153 പച്ചത്തുരുത്തുകളാണ് നിലവിലുള്ളത്. ഓഗസ്റ്റ് 30 നകം 404 പച്ചത്തുരുത്തുകള്‍ ഒരുക്കലാണ് ലക്ഷ്യം. ജില്ലയിലെ പച്ചത്തുരുത്തുകളില്‍ തൈകള്‍ക്ക് വളര്‍ച്ചയുള്ള 10 പച്ചത്തുരുത്തുകളുടെ കാര്‍ബണ്‍ സംഭരണശേഷി കണക്കാക്കുന്ന പ്രവര്‍ത്തനങ്ങളും സംഘടിപ്പിക്കും. സ്ഥലനാമവൃക്ഷങ്ങള്‍ നട്ടുവളര്‍ത്തുന്ന പച്ചത്തുരുത്തുകളും വംശനാശം വന്നുകൊണ്ടിരിക്കുന്ന വൃക്ഷങ്ങള്‍ നട്ടുവളര്‍ത്തുന്ന പച്ചത്തുരുത്തുകളും ജില്ലയില്‍ വ്യാപിപ്പിക്കും.

മണര്‍കാട് കോഴിവളര്‍ത്തല്‍ കേന്ദ്രം വീണ്ടും തുറക്കുന്നു

കോട്ടയം: ജില്ലാ പഞ്ചായത്തിന്‍റെ കീഴിലുള്ള മണര്‍കാട് കോഴിവളര്‍ത്തല്‍ കേന്ദ്രം വീണ്ടും തുറക്കുന്നു. 15 മുതല്‍ പ്രവര്‍ത്തനം തുടങ്ങും. പക്ഷിപ്പനി ബാധയെത്തുടര്‍ന്ന് കഴിഞ്ഞ ഒരു വര്‍ഷമായി ഫാം അടച്ചിട്ടിരിക്കുകയായിരുന്നു. ആദ്യഘട്ടമായി തൊടുപുഴ കോലാനി ഫാമില്‍ നിന്നും ഒരുദിവസം പ്രായമായ ഗ്രാമശ്രീ ഇനത്തില്‍പെട്ട 1372 കോഴിക്കുഞ്ഞുങ്ങളെ എത്തിക്കും. അടുത്ത മാസം മാതൃപിതൃ ശേഖരത്തിനായി മണ്ണൂത്തി യൂണിവേഴ്‌സി പൗള്‍ട്രിഫാമില്‍നിന്ന് ഒരു ദിവസം പ്രായമായ 1800 കോഴിക്കുഞ്ഞുങ്ങളെയും കൊണ്ടുവരും. ഫാമിന്‍റെ പ്രവര്‍ത്തനം പൂര്‍ണതോതില്‍ ആരംഭിച്ചു കഴിഞ്ഞാല്‍ സെന്‍ട്രല്‍ പൗള്‍ട്രി ഡെവലപ്‌മെന്‍റ് ഓര്‍ഗനൈസേഷനില്‍നിന്ന് കാവേരിയിനത്തില്‍പെട്ട കോഴികളുടെ 4000 മുട്ടകള്‍ വിരിയിക്കാനായി എത്തിക്കും. പക്ഷിപ്പനി തടയാന്‍ കൂടുതല്‍ സുരക്ഷാക്രമീകരണങ്ങളോടെയാണ് ഫാം തുറക്കുന്നത്. 10 കൂടുകളാണ് ഇവിടെയുള്ളത്. കൂടുകളും പരിസരവും പല തവണ അണുവിമുക്തമാക്കിയശേഷമാണു പ്രവര്‍ത്തനം തുടങ്ങുന്നത്. കൂടുകളില്‍ പെയിന്‍റിംഗടക്കമുള്ള നവീകരണ ജോലികള്‍ പുരോഗമിക്കുകയാണ്. തുടക്കത്തില്‍ എല്ലാ കൂടുകളിലും കോഴികളെ ഇടുന്നില്ല. പക്ഷികള്‍ കടക്കാതെ സംരക്ഷിക്കാന്‍ കൂടുകള്‍ക്ക് ചുറ്റും നൈലോണ്‍വലയിട്ടു. തുറന്ന വരാന്തയുള്ള കൂടുകളിലാണ് വലയിട്ടിരിക്കുന്നത്. ഫാമിലേക്ക് വരുന്ന വാഹനങ്ങളുടെ ടയറുകള്‍ അണുവിമുക്തമാക്കാന്‍ പ്രധാന ഗേറ്റില്‍ 12 അടി നീളത്തിലും 12 അടി വീതിയിലും കോണ്‍ക്രീറ്റിട്ട് വീല്‍ഡിപ്പ് നിര്‍മിച്ചിട്ടുണ്ട്. ടയറുകള്‍ അണുവിമുക്തമാക്കാന്‍ ഹൈപ്പോക്ലോറേറ്റ് ലായനി ഇവിടെ നിറയ്ക്കും. ജീവനക്കാര്‍ക്ക് കടന്നുവരാന്‍ മറ്റൊരു ചെറിയ ഗേറ്റ് നിര്‍മിക്കും. കൂടുകളിലേക്ക് കടക്കുന്ന ജീവനക്കാരുടെ കാലുകള്‍ അണുവിമുക്തമാക്കാന്‍ എല്ലാ കൂടിന്‍റെയും പ്രവേശനഭാഗത്ത് സംവിധാനമൊരുക്കിയിട്ടുണ്ട്. ഫാമിനു ചുറ്റുമുള്ള മരങ്ങളുടെ ശിഖരങ്ങളും വെട്ടിമാറ്റും. ഫാമിനടുത്തേക്ക് പുറത്തുനിന്ന് വരുന്നവരുടെ തിരക്ക് കുറയ്ക്കാന്‍ സെയില്‍സ് കൗണ്ടര്‍ പ്രവേശന കവാടത്തിനടുത്തേക്ക് മാറ്റാനാണ് അധികൃതരുടെ തീരുമാനം. 2024-25, 2025-26 വര്‍ഷങ്ങളില്‍ ഫാമിന്‍റെ നവീകരണത്തിനായി ജില്ലാ പഞ്ചായത്ത് 20 ലക്ഷം രൂപ അനുവദിച്ചിരുന്നു. 2024 മേയിലാണ് ഫാമില്‍ എച്ച്5 എന്‍1 പിടിപെട്ട് കോഴികള്‍ കൂട്ടത്തോടെ ചത്തത്. ആകെ 9175 കോഴികളെ ദയാവധത്തിന് വിധേയമാക്കി. 25 ലക്ഷം രൂപയുടെ നഷ്ടമുണ്ടായെന്നാണ് കണക്ക്. ഒരു വര്‍ഷമായി പ്രവര്‍ത്തിക്കാത്തതിനാല്‍ വന്‍ നഷ്ടമാണ് പൗള്‍ട്രി ഫാമിന് നേരിട്ടത്. 2023-24 വര്‍ഷം 95 ലക്ഷം രൂപ പൗള്‍ട്രി ഫാമില്‍നിന്ന് വരുമാനം കിട്ടിയിരുന്നു. കോഴിവളര്‍ത്തല്‍കേന്ദ്രത്തില്‍ കാര്‍ഷികവികസന കര്‍ഷകക്ഷേമ വകുപ്പമായി ചേര്‍ന്ന് പച്ചക്കറി, പൂക്കൃഷിക്കും തുടക്കമായി. പച്ചക്കറിവ്യാപനം സര്‍ക്കാര്‍ സ്ഥാപനങ്ങളിലൂടെയും സാധ്യമാക്കണമെന്ന നിര്‍ദേശത്തിന്‍റെ അടിസ്ഥാനത്തിലാണിത്. ഏഴര ഏക്കര്‍ സ്ഥലമുള്ള ഫാമില്‍ 70 സെന്‍റ് സ്ഥലത്താണ് വിവിധതരം പച്ചക്കറിയും പൂകൃഷിയും നടത്തുന്നത്. ഇതിന് 50,000 രൂപ കൃഷിവകുപ്പ് നല്‍കിയിരുന്നു. ഫാമിലെ ജീവനക്കാര്‍ തന്നെയാണ് കൃഷിചെയ്യുന്നത്.

വേളാങ്കണ്ണി ട്രെയിനിന് ഇനി ആധുനിക കോച്ചുകള്‍

കോട്ടയം: എറണാകുളത്തുനിന്നു കോട്ടയം വഴി വേളാങ്കണ്ണിയിലേക്കു പോകുന്ന ട്രെയിനിന് ആധുനിക കോച്ചുകള്‍ അനുവദിച്ചു. ജര്‍മന്‍ സാങ്കേതികവിദ്യയിലൂടെ റെയില്‍വേ കോച്ച് ഫാക്ടറി വികസിപ്പിച്ച എല്‍എച്ച്ബി പോര്‍ച്ചുഗല്‍ കോച്ച് ഉപയോഗിച്ചാണ് ഇനിമുതല്‍ വേളാങ്കണ്ണി ട്രെയിന്‍ സര്‍വീസ് നടത്തുന്നത്. നിലവിലുള്ള കോച്ചുകളേക്കാള്‍ കൂടുതല്‍ സൗകര്യങ്ങളുള്ളതാണ് ഈ കോച്ചുകള്‍. ഏതെങ്കിലും വിധത്തിലുള്ള അപകടങ്ങള്‍ സംഭവിക്കുമ്പോള്‍ ഒരു കോച്ചിന്‍റെ മുകളിലേക്ക് മറ്റൊരു കോച്ച് കയറുന്ന അവസ്ഥ ഉണ്ടാകാറുണ്ട്. ഇത്തരം അപകടങ്ങള്‍ ഈ കോച്ചുകളില്‍ താരതമ്യേന കുറവാണ് ഉണ്ടാകുന്നത്. മാത്രവുമല്ല യാത്രക്കാര്‍ക്ക് അപകടം സംഭവിക്കുവാനുള്ള സാധ്യതകളും വിരളമാണെന്നാണ് വിദഗ്ധര്‍ അഭിപ്രായം. കാലപ്പഴക്കം വന്ന വേളാങ്കണ്ണി ട്രെയിനിന്‍റെ കോച്ചുകള്‍ മാറ്റണമെന്നു ഫ്രാന്‍സിസ് ജോര്‍ജ് എംപി ഉള്‍പ്പെടെയുള്ള ജനപ്രതിനിധികള്‍ റെയില്‍വേ മന്ത്രിയോട് നിരന്തരമായി ആവശ്യപ്പെട്ടതിന്‍റെ അടിസ്ഥാനത്തിലാണ് പുതിയ കോച്ചുകള്‍ അനുവദിച്ചിട്ടുള്ളത്. കന്നി യാത്രയില്‍ കോട്ടയത്ത് എത്തിയ ട്രെയിനിന് ഫ്രാന്‍സിസ് ജോര്‍ജ് എംപിയുടെ നേതൃത്വത്തില്‍ സ്റ്റേഷനില്‍ സ്വീകരണം നൽകി. സ്റ്റേഷന്‍ മാനേജര്‍ പി.ജി. വിജയകുമാര്‍, ഡെപ്യൂട്ടി സ്റ്റേഷന്‍ മാസ്റ്റര്‍ മാത്യു ജോസഫ്, ട്രാന്‍സ്പോര്‍ട്ടേഷന്‍ ഇന്‍സ്‌പെക്ടര്‍ ജോ പ്രവീണ്‍ എന്നിവര്‍ സംബന്ധിച്ചു. ആഴ്ചയില്‍ തിങ്കളാഴ്ചയും ശനിയാഴ്ചയുമായി രണ്ട് സര്‍വീസാണു വേളാങ്കണ്ണിക്കുള്ളത്. എറണാകുളത്തുനിന്നു പുറപ്പെടുന്ന ട്രെയിന്‍ ഉച്ചകഴിഞ്ഞ് രണ്ടിന് കോട്ടയത്തും പിറ്റേദിവസം രാവിലെ 5.40നു വേളാങ്കണ്ണിയിലും എത്തിച്ചേരും. അന്നുതന്നെ വൈകുന്നേരം 6.40നു തിരിച്ചുപോരുന്ന ട്രെയിന്‍ രാവിലെ 10.10ന് കോട്ടയത്ത് എത്തിച്ചേരുന്ന വിധത്തിലാണ് സര്‍വീസ് ക്രമീകരിച്ചിരിക്കുന്നത്.

ശബരി റെയില്‍ പദ്ധതി: സ്ഥലം ഏറ്റെടുക്കല്‍ വൈകുന്നു

കോട്ടയം: ശബരി റെയില്‍വേ നിര്‍മാണത്തിന് സ്ഥലം ഏറ്റെടുക്കാനുള്ള നടപടികള്‍ അനിശ്ചിതമായി ഇഴയുന്നു. സംസ്ഥാന സര്‍ക്കാര്‍ കിഫ്ബി പദ്ധതിയില്‍ 600 കോടി രൂപ നഷ്ടപരിഹാരം നല്‍കി റെയില്‍വേക്ക് സ്ഥലം ഏറ്റെടുത്തുകൊടുക്കാതെ പണി നടക്കില്ലെന്ന് റെയില്‍വേ വ്യക്തമാക്കിയിട്ടുണ്ട്. ആകെ നാലായിരം കോടി രൂപ ചെലവു വരുന്ന പദ്ധതിയില്‍ ഈ മാസംമുതല്‍ സ്ഥലം ഏറ്റെടുക്കല്‍ തുടങ്ങുമെന്നായിരുന്നു പ്രഖ്യാപനം. ഇതോടെ കാലടിമുതല്‍ പിഴകുവരെ അയ്യായിരം കുടുംബങ്ങളാണ് അനിശ്ചിതത്വത്തില്‍ കഴിയുന്നത്. ശബരി റെയില്‍ പദ്ധതിയുടെ പുതുക്കിയ എസ്റ്റിമേറ്റിന് അനുമതി നല്‍കാനുള്ള നടപടിക്രമങ്ങളും ആരംഭിച്ചില്ല. പദ്ധതിക്ക് റെയില്‍വേ എത്ര രൂപ മുടക്കും എന്നതിലും വ്യക്തതയില്ല. സംസ്ഥാന മുഖ്യമന്ത്രിയും റെയില്‍വേ മന്ത്രിയും കേന്ദ്ര റെയില്‍വേ മന്ത്രിയെ സന്ദര്‍ശിച്ച ശേഷമാണ് ശബരി പദ്ധതി പുനര്‍ജീവിപ്പിക്കാന്‍ തീരുമാനമായത്. സ്ഥലം ഏറ്റെടുക്കുന്നതിന് റവന്യൂ വകുപ്പ് സ്‌പെഷല്‍ തഹസില്‍ദാര്‍മാരുടെ ഓഫീസ് തുറക്കുമെന്ന പ്രഖ്യാപനവും നടപ്പിലായില്ല. അങ്കമാലിയില്‍ നിന്നും എരുമേലി വരെ 111 കിലോമീറ്ററാണ് പാതയുടെ നീളം. പദ്ധതിയുടെ മൂന്നാം റീച്ചായ പിഴക് മുതല്‍ എരുമേലി വരെ സ്ഥലം അളന്നുതിരിച്ചിട്ടില്ല. കാലടി, പെരുമ്പാവൂര്‍, ഒടക്കാലി, കോതമംഗലം, മൂവാറ്റുപുഴ, വാഴക്കുളം, തൊടുപുഴ, കരിങ്കുന്നം, രാമപുരം, ഭരണങ്ങാനം, ചെമ്മലമറ്റം, കാഞ്ഞിരപ്പള്ളി, എരുമേലി എന്നിവിടങ്ങളിലാണ് സ്റ്റേഷനുകള്‍ വരിക. 1997-98 കേന്ദ്ര റെയില്‍വേ ബജറ്റിലാണ് പദ്ധതിക്ക് അനുമതിയായത്. ഇതനുസരിച്ച് അങ്കമാലി മുതല്‍ കാലടി വരെ ഏഴു കിലോമീറ്റര്‍ റെയിലും പെരിയാറിനു കുറുകെ പാലവും കാലടിയില്‍ സ്റ്റേഷനും നിര്‍മിച്ചു. 303 ഹെക്ടര്‍ സ്ഥലം ഏറ്റെടുക്കേണ്ട പദ്ധതിയില്‍ ഇതേവരെ 24 ഹെക്ടര്‍മാത്രമാണ് റെയില്‍വേ നഷ്ടം നല്‍കി ഏറ്റെടുത്തിരിക്കുന്നത്. ഹര്‍ജിയില്‍ വാദം മുടങ്ങി കോട്ടയം: ബിലീവേഴ്‌സ് ചര്‍ച്ചിനു കീഴിലുള്ള അയന ചാരിറ്റബിള്‍ ട്രസ്റ്റിന്‍റെ കൈവശമുള്ള ചെറുവള്ളി എസ്റ്റേറ്റ് സര്‍ക്കാരിന് വിട്ടുകിട്ടുന്നതിന് കോട്ടയം ജില്ലാ കളക്ടര്‍ പാലാ സബ് കോടതിയില്‍ സമര്‍പ്പിച്ച ഹര്‍ജിയില്‍ വാദം മുടങ്ങി. തോട്ടത്തിന്‍റെ ഉടമസ്ഥാവകാശം സ്ഥാപിച്ചുകിട്ടാന്‍ സംസ്ഥാന സര്‍ക്കാര്‍ സമര്‍പ്പിച്ച ചില രേഖകള്‍ കോടതി സ്വീകരിച്ചില്ല. 1910ലെ സെറ്റില്‍മെന്‍റ് ആക്ട് പ്രകാരം ആര്‍ക്കൈവ്‌സില്‍നിന്ന് എടുത്ത രേഖയുടെ ആധികാരികതയില്‍ കോടതി വിശദീകരണം തേടി. ഇതോടെ കേസിന്‍റെ വാദം വീണ്ടും മുന്നോട്ടുവച്ചു.

എലിക്കുളത്ത് അമോണിയ പ്ലാന്‍റിനൊരുക്കം; ആശങ്കയിൽ നാട്

എലിക്കുളം: എലിക്കുളം പഞ്ചായത്തിൽ ആളുറുമ്പ് പടിഞ്ഞാറ്റുമല ഭാഗത്ത് അമോണിയ പ്ലാന്‍റിന്‍റെ അനുമതിക്കായി അപേക്ഷ നൽകി സ്വകാര്യകമ്പനി. പഞ്ചായത്തിന്‍റെ എൻഒസിക്കായി കമ്പനി അപേക്ഷ നൽകിയത് പ്രദേശത്ത് ഒന്നരയേക്കറോളം സ്ഥലം വാങ്ങിയതിന് ശേഷം. പത്തനംതിട്ട സ്വദേശിയുടെ മലനാട് അമോണിയാ പ്രൈവറ്റ് ലിമിറ്റഡ് കമ്പനിയാണ് പ്ലാന്‍റ് സ്ഥാപിക്കാൻ ഒരുങ്ങുന്നത്. പ്ലാന്‍റ് സ്ഥാപിക്കുന്നതിനെതിരേ നാട്ടുകാർ ജനകീയസമിതി രൂപീകരിച്ച് പ്രവർത്തനം തുടങ്ങി. തമിഴ്‌നാട്ടിൽ ജനരോഷത്തെ തുടർന്ന് സ്റ്റോപ്പ് മെമ്മോ ലഭിച്ച പ്ലാന്‍റാണ് കാർഷിക ഗ്രാമീണ മേഖലയിലേക്ക് മാറ്റി സ്ഥാപിക്കുവാൻ ശ്രമിക്കുന്നതെന്ന് ജനകീയസമിതി ആരോപിച്ചു. കിലോമീറ്ററുകളോളം അപകട വ്യാപന ശേഷിയുള്ളതിനാൽ റെഡ് സോണിൽ മാത്രം പ്രവർത്തിക്കേണ്ട അമോണിയം പ്ലാന്‍റ് ജനങ്ങൾ പാർക്കുന്ന ഗ്രാമീണ - കാർഷിക മേഖലയിൽ പ്രവർത്തനം ആരംഭിച്ചാൽ കുടിവെള്ള ദൗർഭല്യത്തിനും ജല - അന്തരീക്ഷ മലിനീകരണത്തിനും മനുഷ്യ - ജീവജാലങ്ങൾക്കും സസ്യ - വൃക്ഷാദികൾക്കും വളരെയേറെ ഹാനികരവുമാകും. പടിഞ്ഞാറ്റുമലയുടെ മുകൾ ഭാഗത്ത് പ്ലാന്‍റ് പ്രവർത്തനം ആരംഭിച്ചാൽ സമീപത്തുള്ള നാലോളം കുടിവെള്ള പദ്ധതികളും പ്രദേശത്തെ പ്രധാന ജലസ്രോതസായ പൊന്നൊഴുകുംതോടും കാഞ്ഞിരപ്പള്ളി താലൂക്കിലെ ഏക നെൽപ്പാടമായ കാപ്പുകയം പാടശേഖരവും നശിച്ച് പോകും. പരിസരപ്രദേശത്തെ ജനങ്ങളുടെ സാധാരണ ജീവിതത്തെ ബാധിക്കുന്ന അമോണിയം പ്ലാന്‍റിനെതിരേ പ്രതിഷേധം ശക്തമാക്കി വിവിധ സമരപരിപാടികൾക്ക് രൂപം നൽകി. ജനകീയ കമ്മിറ്റി ചെയർമാനായി ജോസഫ് മാത്യു തെക്കേക്കുറ്റ്, കൺവീനറായി ജോർജ്കുട്ടി ജേക്കബ് കുരുവിനാകുന്നേൽ, രക്ഷാധികാരികളായി എലിക്കുളം പഞ്ചായത്ത് മെംബർമാരായ സെൽവി വിൽസൻ, ആശാ റോയി, മാതൂസ് മാത്യൂ, തിടനാട് പഞ്ചായത്ത് മെംബർ മിനി ബിനോ എന്നിവരെയും വൈസ് ചെയർമാൻമാരായി വിൽസൻ പതിപ്പള്ളി, ജിമ്മിച്ചൻ മണ്ഡപത്തിൽ എന്നിവരെയും ജോയിന്‍റ് കൺവീനർമാരായി ബിനോ മുളങ്ങാശേരി, ജസ്റ്റിൻ ജോർജ് എന്നിവരെയും 25 അംഗ എക്‌സിക്യുട്ടിവ് കമ്മിറ്റിയേയും തെരഞ്ഞെടുത്തു. കഴിഞ്ഞ ദിവസം പഞ്ചായത്ത് കമ്മിറ്റിയിൽ എൻഒസിക്കായുള്ള അപേക്ഷ ചർച്ചയ്ക്കെത്തി. പഞ്ചായത്തംഗങ്ങൾ ഒന്നാകെ പ്ലാന്‍റ് വേണ്ടെന്ന നിലപാട് സ്വീകരിച്ചു. പ്രശ്‌നം സംബന്ധിച്ച് പഠിച്ച് റിപ്പോർട്ട് തയാറാക്കാൻ ഉപസമിതിയെ നിയോഗിച്ചു. പടിഞ്ഞാറ്റുമല സന്ദർശിച്ച് പഞ്ചായത്ത് ഉപസമിതി എലിക്കുളം: ആളുറുമ്പ് പടിഞ്ഞാറ്റുമലയിൽ പ്രവർത്തനമാരംഭിക്കുവാൻ ഒരുങ്ങുന്ന അമോണിയം പ്ലാന്‍റിനെതിരേ ജനരോഷം വ്യാപകമായ സാഹചര്യത്തിൽ സ്ഥലം പഞ്ചായത്ത് ഉപസമിതി സന്ദർശിച്ചു. പടിഞ്ഞാറ്റിൻ മലയിലെ ഒന്നര ഏക്കറോളം സ്ഥലം വാങ്ങിയ ശേഷം അണുബോംബുപോലെ പ്രഹരശേഷിയുള്ള അമോണിയം ഫാക്ടറി നിർമിക്കുവാനുളള തീരുമാനം അംഗീകരിക്കില്ലെന്ന് ജനങ്ങൾ ഇവരെ അറിയിച്ചു. പ്ലാന്‍റ് നിലവിൽ വന്നാൽ ഇവിടുത്തെ പ്രകൃതിയുടെ സന്തുലിതാവസ്ഥ ഉൾപ്പടെ താളം തെറ്റും. ദിനം പ്രതി 40000 ലിറ്ററോളം ജലം ആവശ്യമായി വരുന്ന അമോണിയ പ്ലാന്‍റ് നിലവിൽ വന്നാൽ 350ലേറെ കുടുംബങ്ങൾ താമസിക്കുന്ന ഇവിടുത്തെ ജലലഭ്യത ഇല്ലാതെയാവും. കൂടാതെ ഇവിടെ പ്ലൈവുഡ് ഫാക്ടറിക്കും ശ്രമം നടക്കുന്നതായി കർമസമിതി ആരോപിച്ചു.

നേതൃശില്പശാല നടത്തി

മുണ്ടക്കയം: തദ്ദേശീയ തെരഞ്ഞെടുപ്പിന് മുന്നോടിയായി (മിഷൻ 2025) കേരള പ്രദേശ് കോൺഗ്രസ് കമ്മിറ്റിയുടെ നിർദേശപ്രകാരം കോൺഗ്രസ് പൂഞ്ഞാർ നിയോജകമണ്ഡലം നേതൃശില്പശാല മുണ്ടക്കയം സർവീസ് സഹകരണ ബാങ്ക് ഓഡിറ്റോറിയത്തിൽ നടത്തി. കെപിസിസി ജനറൽ സെക്രട്ടറി പി.എ. സലീം ഉദ്ഘാടനം ചെയ്തു. മുണ്ടക്കയം ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് ബിനു മറ്റക്കര അധ്യക്ഷത വഹിച്ചു. പ്രകാശ് പുളിക്കൻ, റോയി കപ്പലുമാക്കൽ, മുഹമ്മദ് ഇല്യാസ്, ബെന്നി ചേറ്റുകുഴി തുടങ്ങിയവർ പ്രസംഗിച്ചു. ശില്പശാലയ്ക്ക് രാജീവ് ഗാന്ധി പഞ്ചായത്ത് രാജ് ജില്ലാ ചീഫും ഡിസിസി വൈസ് പ്രസിഡന്‍റുമായ കെ.സി. നായർ, കെ.കെ. സദാനന്ദൻ പുഞ്ചവയൽ എന്നിവർ നേതൃത്വം നൽകി. കോൺഗ്രസ് മണ്ഡലം പ്രസിഡന്‍റുമാർ, പോഷക സംഘടനകളുടെ മണ്ഡലം പ്രതിനിധികൾ, തദ്ദേശീയ സ്വയംഭരണ മെംബർമാർ തുടങ്ങിയവർ പങ്കെടുത്തു.

നവീകരിച്ച മൃഗാശുപത്രി കെട്ടിടം ഉദ്ഘാടനം ചെയ്തു

വെള്ളാവൂർ: പഞ്ചായത്ത് വാർഷിക പദ്ധതിയിൽ ഉൾപ്പെടുത്തി നവീകരിച്ച മൃഗാശുപത്രി കെട്ടിടം തുറന്ന് നൽകി. പഞ്ചായത്ത്‌ പ്രസിഡന്‍റ് പി.ടി. അനൂപ് ഉദ്ഘാടനം ചെയ്തു. വൈസ് പ്രസിഡന്‍റ് കെ.കെ. ആനന്ദവല്ലി അധ്യക്ഷത വഹിച്ചു. പഞ്ചായത്തംഗങ്ങളായ ടി.എസ്. ശ്രീജിത്ത്‌, റോസമ്മ കോയിപ്പുറം, സന്ധ്യ റെജി, ടി.കെ. ഷിനിമോൾ, സിന്ധുമോൾ ബിനോയ്‌, ബെൻസി ബൈജു, പി. രാധാകൃഷ്ണൻ, ആർ. ജയകുമാർ, ഡോ. ഐശ്വര്യ എന്നിവർ പ്രസംഗിച്ചു. എച്ച്എംസി അംഗങ്ങൾ, ക്ഷീര കർഷക പ്രതിനിധികൾ, കുടുംബശ്രീ അംഗങ്ങൾ തുടങ്ങിയവർ പങ്കെടുത്തു.

എരുമേലിയിൽ ഇടത്താവള നിർമാണം പുരോഗമിക്കുന്നു

എരുമേലി: ശബരിമല സീസൺ ആരംഭിക്കാൻ ഇനി അഞ്ച് മാസം മാത്രം ബാക്കി നിൽക്കെ എരുമേലിയിലെ വലിയമ്പലത്തിൽ ഇടത്താവളത്തിനുള്ള കെട്ടിട സമുച്ചയത്തിന്‍റെ നിർമാണങ്ങൾ പുരോഗമിക്കുന്നു. നാല് വർഷം മുമ്പാണ് നിർമാണം തുടങ്ങിയത്. പക്ഷേ, പണികൾ ഇടയ്ക്കുവച്ച് നിർത്തുകയും തുടർന്ന് നിർമാണം ഇഴയുകയുമായിരുന്നു. 15 കോടി രൂപ കിഫ്‌ബി ഫണ്ടിൽ ചെലവിട്ടാണ് നിർമാണം. കെട്ടിടത്തിന്‍റെ ആദ്യ നിലയുടെ നിർമാണം എത്രയും വേഗം പൂർത്തിയാക്കി ഈ സീസണിൽ തുറന്നുകൊടുക്കാനാണ് ഇപ്പോൾ പണികൾ വേഗത്തിലാക്കിയിരിക്കുന്നത്. ഇതിന്‍റെ ഭാഗമായി ഇന്നലെ വലിയ ക്രെയിൻ യൂണിറ്റ് നിർമാണ സ്ഥലത്ത് എത്തിച്ചു. ക്ഷേത്ര മതിൽക്കെട്ട് ഇതിനായി പൊളിക്കേണ്ടിവന്നു. ക്രെയിൻ യൂണിറ്റ് ക്ഷേത്ര വളപ്പിൽ കടക്കാൻ ഇടുങ്ങിയ മതിൽ തടസമായിരുന്നു. ക്ഷേത്രത്തിന്‍റെ മുന്നിലുള്ള ഒരു പാർക്കിംഗ് സ്ഥലം നിർമാണ ആവശ്യത്തിനായി അടച്ചു കെട്ടിയിരിക്കുകയാണ്. കഴിഞ്ഞ സീസണിൽ കെട്ടിട നിർമാണം പൂർത്തിയാകാത്തതിനാൽ താത്കാലിക ഷെഡുകൾ നിർമിച്ചാണ് തീർഥാടകർക്ക് വിശ്രമ സൗകര്യം ഒരുക്കിയത്. ഓഡിറ്റോറിയം, ഡോർമെറ്ററികൾ, ശൗചാലയങ്ങൾ, ഹാൾ, മെസ്, 16 മുറികൾ, പാർക്കിംഗ് സൗകര്യം എന്നിവയ്ക്കായാണ് 15 കോടിയുടെ പദ്ധതി ആവിഷ്‌കരിച്ചത്. കരാറുകാർ തമ്മിലുള്ള തർക്കം മൂലമാണ് ഒരു വർഷത്തോളം നിർമാണം നിലച്ചിരുന്നത്. ഇത് പരിഹരിച്ച് കഴിഞ്ഞയിടെയാണ് നിർമാണം പുനരാരംഭിച്ചത്. നിർമാണ പുരോഗതി കഴിഞ്ഞ ദിവസം സെബാസ്റ്റ്യൻ കുളത്തുങ്കൽ എംഎൽഎ എത്തി വിലയിരുത്തിയിരുന്നു.

തകർന്നടിഞ്ഞ് പെരുവന്താനം - അഴങ്ങാട് റോഡ്; തിരിഞ്ഞു നോക്കാതെ അധികൃതർ

പെരുവന്താനം: നൂറുകണക്കിന് മലയോര കുടുംബങ്ങൾ അധിവസിക്കുന്ന പെരുവന്താനം - ആനച്ചാരി - അഴങ്ങാട് റോഡ് തകർന്നിട്ട് വർഷങ്ങൾ പിന്നിടുകയാണ്. ദേശീയപാതയിൽ പെരുവന്താനത്തുനിന്നു തുടങ്ങി ആനചാരിവഴി അഴങ്ങാടിനുള്ള റോഡാണിത്. ഇടുക്കി ജില്ലയിലെതന്നെ ഏറ്റവും മോശമായ റോഡുകളിലെന്നാണിതെന്നാണ് നാട്ടുകാർ പറയുന്നത്. റോഡിന്‍റെ ഒട്ടുമിക്ക ഭാഗവും ടാറിംഗ് പൂർണമായും തകർന്ന് വലിയ കുഴികൾ രൂപപ്പെട്ട നിലയിലാണ്. നൂറുകണക്കിന് ആളുകളും സ്‌കൂള്‍ വാഹനങ്ങളും കെഎസ്ആര്‍ടിസി ബസും ഉള്‍പ്പെടെ കടന്നുപോകുന്ന റോഡാണ് തകർന്ന് കിടക്കുന്നത്. റോഡിന്‍റെ ശോചനീയാവസ്ഥ പരിഹരിക്കണമെന്നാവശ്യപ്പെട്ട് പ്രദേശവാസികൾ നിരവധി തവണ പഞ്ചായത്തിനെയും ജനപ്രതിനിധികളെയും സമീപിച്ചെങ്കിലും ഇവരാരും ഇങ്ങോട്ട് തിരിഞ്ഞുപോലും നോക്കാൻ തയാറാകുന്നില്ലെന്ന് നാട്ടുകാർ ആരോപിച്ചു. റോഡിന്‍റെ പല ഭാഗങ്ങളിലും സംരക്ഷണഭിത്തി തകർന്ന നിലയിലാണ്. റോഡിന്‍റെ വശങ്ങളിൽ കല്ലും മണ്ണും കൂടിക്കിടക്കുന്നതും കാട് വളർന്നു നിൽക്കുന്നതും ഓടകളുടെ അഭാവവും മൂലം മഴ പെയ്യുമ്പോൾ റോഡിലൂടെ വെള്ളം കുത്തി ഒഴുകുകയാണ്. ഇത് റോഡിന്‍റെ തകർച്ച കാരണമാകുന്നുണ്ട്. വിതി വളരെകുറവായ റോഡിലൂടെ ഒരു വാഹനത്തിന് മാത്രമാണ് കടന്നു പോകുവാൻ കഴിയുന്നത്. ഇത് ഒട്ടുമിക്ക സ്ഥലങ്ങളിലും തകർന്നു കിടക്കുന്നതോടെ പ്രദേശത്തുകൂടിയുള്ള യാത്ര അതീവ ദുഷ്കരമാണ്. പെരുവന്താനം - ആനച്ചാരി - അഴങ്ങാട് റോഡിന്‍റെ പലഭാഗങ്ങളിലും ആവശ്യത്തിനു കലുങ്കുകൾ ഇല്ലാത്തതുമൂലം മഴപെയ്യുമ്പോൾ റോഡിൽ വലിയ ജലപ്രവാഹമാണ് ഉണ്ടാകുന്നത്. ഇത് പലപ്പോഴും അപകടങ്ങൾക്കും വഴിവയ്ക്കുന്നുണ്ട്. സ്കൂൾ വിദ്യാർഥികൾ അടക്കമുള്ളവർ മഴക്കാലങ്ങളിൽ ജീവൻ പണയം വച്ചാണ് ഈ റോഡിലൂടെ സഞ്ചരിക്കുന്നത്. മലയോര ജനതയുടെ ആശ്രയമായ ഈ റോഡിനോടുള്ള അധികൃതരുടെ അവഗണനയ്ക്കെതിരേ മേഖലയിൽ ശക്തമായ പ്രതിഷേധമാണ് ഉയരുന്നത്.

പ്രതിഭാ പുരസ്കാരവും എംഎൽഎ എക്സലൻസ് അവാർഡ് വിതരണവും 13ന്

ഈരാറ്റുപേട്ട: സെബാസ്റ്റ്യന്‍ കുളത്തുങ്കല്‍ എംഎല്‍എ നേതൃത്വം നല്‍കുന്ന ഫ്യൂച്ചര്‍ സ്റ്റാര്‍സ് എഡ്യൂക്കേഷന്‍ പ്രോജക്റ്റിന്‍റെ ആഭിമുഖ്യത്തില്‍ എസ്എസ്എല്‍സി, പ്ലസ് ടു പരീക്ഷകളില്‍ മുഴുവന്‍ വിഷയങ്ങള്‍ക്കും എ പ്ലസ് നേടിയ നിയോജകമണ്ഡലത്തിലെ എല്ലാ കുട്ടികള്‍ക്കും, കൂടാതെ സിവില്‍ സര്‍വീസ് റാങ്ക് ജേതാക്കളായ സോണറ്റ് ജോസ്, നസ്രിന്‍ പി. ഫസീം, യൂണിവേഴ്‌സിറ്റി പരീക്ഷകളില്‍ വിവിധ വിഷയങ്ങള്‍ക്ക് റാങ്ക് നേടിയവര്‍, പിഎച്ച്ഡി ലഭിച്ചവര്‍ തുടങ്ങിയവര്‍ക്ക് പ്രതിഭാ പുരസ്‌കാരവും, എസ്എസ്എല്‍സി പ്ലസ്ടു പരീക്ഷകളില്‍ 100 ശതമാനം വിജയം കൈവരിച്ച സ്‌കൂളുകള്‍ക്ക് എംഎല്‍എ എക്‌സലന്‍സ് അവാര്‍ഡും 13ന് വിതരണം ചെയും. കാഞ്ഞിരപ്പള്ളി സെന്‍റ് ഡൊമിനിക്‌സ് കോളജ് ഓഡിറ്റോറിയത്തില്‍ ഉച്ചകഴിഞ്ഞ് രണ്ടിന് നടക്കുന്ന പരിപാടി മന്ത്രി എം.ബി. രാജേഷ് ഉദ്ഘാടനം ചെയ്യും. സെബാസ്റ്റ്യന്‍ കുളത്തുങ്കല്‍ എംഎല്‍എ അധ്യക്ഷത വഹിക്കും. പ്രമോദ് നാരായണന്‍ എംഎല്‍എ മുഖ്യപ്രഭാഷണം നടത്തും. കോട്ടയം ജില്ലാ പോലീസ് ചീഫ് ഷാഹുല്‍ ഹമീദ് അവാര്‍ഡുകള്‍ വിതരണം ചെയ്യും. ഫ്യൂച്ചര്‍ സ്റ്റാര്‍സ് അഡ്‌വൈസറി ബോര്‍ഡ് മെംബര്‍ ജോര്‍ജുകുട്ടി ആഗസ്തി, ഡയറക്ടര്‍ ഡോ. ആന്‍സി ജോസഫ്, ജില്ലാ ആസൂത്രണ സമിതി അംഗം കെ. രാജേഷ്, കോളജ് പ്രിന്‍സിപ്പല്‍ ഡോ.സീമോന്‍ തോമസ്, ഈരാറ്റുപേട്ട മുനിസിപ്പല്‍ ചെയര്‍പേഴ്‌സണ്‍ സുഹറ അബ്ദുല്‍ ഖാദര്‍, കാഞ്ഞിരപ്പള്ളി ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ്, മറിയാമ്മ ഫെര്‍ണാണ്ടസ്, ജില്ലാ പഞ്ചായത്ത് അംഗങ്ങൾ എന്നിവര്‍ പ്രസംഗിക്കും

രാമപുരം പോലീസ് അറസ്റ്റ് ചെയ്തു

രാമപുരം: വാടകയ്ക്ക് എടുത്ത വാഹനങ്ങള്‍ ഉടമയറിയാതെ മറിച്ചുവിറ്റ കേസിലെ പ്രതിയെ രാമപുരം പോലീസ് അറസ്റ്റു ചെയ്തു. മൂവാറ്റുപുഴ മുടവൂര്‍ കുറ്റിക്കാട്ടുച്ചാലില്‍ അബൂബക്കര്‍ സിദ്ദിഖിനെ(50)യാണ് അറസ്റ്റ് ചെയ്തത്. ഇയാള്‍ പരാതിക്കാരന്‍റെ കൈവശമുണ്ടായിരുന്ന ട്രാക്ടറിനു 15000 രൂപ പ്രതിമാസ വാടക നല്‍കാമെന്നും പിക്കപ്പ് വാഹനം നല്ല വിലയ്ക്ക് വിറ്റ് തരാമെന്നും കരാറായ ശേഷം ഉടമയറിയാതെ മറിച്ചു വില്‍ക്കുകയും പണം നല്‍കാതെ കബളിപ്പിക്കുകയുമായിരുന്നു. പരാതിയെത്തുടര്‍ന്നു രാമപുരം പോലീസ് അന്വേഷണം നടത്തി പ്രതിയെ എസ്‌ഐ ടി.സി. മനോജ്, എസ്‌സിപിഒ വിനീത് രാജ്, പ്രദീപ് എം. ഗോപാല്‍ എന്നിവരുടെ നേത്രത്വത്തില്‍ എറണാകുളം കളമശേരിയില്‍നിന്നും പിടികൂടുകയായിരുന്നു. പ്രതിക്കെതിരേ മൂവാറ്റുപുഴ കൂത്താട്ടുകുളം എന്നീ സ്റ്റേഷനുകളില്‍ കേസുകളുണ്ട്.

പുസ്തകപരേഡ് മത്സരത്തിലെ വിജയികളെ പ്രഖ്യാപിച്ചു

കോട്ടയം: വായനപക്ഷാചരണത്തിന്‍റെ ഭാഗമായി വിവര-പൊതുജനസമ്പര്‍ക്ക വകുപ്പും ജില്ലാ ഭരണകേന്ദ്രവും സ്‌കൂള്‍, കോളജ് വിദ്യാര്‍ഥികള്‍ക്കായി നടത്തിയ പുസ്തകപരേഡ്, പുസ്തകാസ്വാദന മത്സരത്തിലെ വിജയികളെ പ്രഖ്യാപിച്ചു. ഹൈസ്‌കൂള്‍ വിഭാഗത്തില്‍ പ്ലാശനാല്‍ സെന്‍റ് ആന്‍റണീസ് എച്ച്എസ്എസിലെ 10-ാം ക്ലാസ് വിദ്യാര്‍ഥിനി ലിയ സച്ചിന്‍ ഒന്നാം സ്ഥാനവും കടപ്ലാമറ്റം സെന്‍റ് ആന്‍റണീസ് ഹൈസ്‌കൂളിലെ ഒന്‍പതാം ക്ലാസ് വിദ്യാര്‍ഥിനി സാറാ മരിയ ജോബി രണ്ടാം സ്ഥാനവും കാഞ്ഞിരപ്പള്ളി ആനക്കല്‍ സെന്‍റ് ആന്‍റണീസ് പബ്ലിക് സ്‌കൂളിലെ എട്ടാം ക്ലാസ് വിദ്യാര്‍ഥിനി എമ്മ അന്ന ചെറിയാന്‍ മൂന്നാം സ്ഥാനവും നേടി. ഹയര്‍ സെക്കന്‍ഡറി വിഭാഗത്തില്‍ കോട്ടയം സിഎംഎസ് കോളജ് ഹയര്‍ സെക്കന്‍ഡറി സ്‌കൂളിലെ പ്ലസ് വണ്‍ വിദ്യാര്‍ഥിനി ശില്പ അന്ന സാം ഒന്നാം സ്ഥാനവും മാന്നാനം സെന്‍റ് എംഫ്രേസ് ഹയര്‍ സെക്കന്‍ഡറി സ്‌കൂളിലെ പ്ലസ് ടു വിദ്യാര്‍ഥി നെവിന്‍ പ്രമോദ് രണ്ടാം സ്ഥാനവും കോട്ടയം എം.ഡി. സെമിനാരി ഹയര്‍ സെക്കന്‍ഡറി സ്‌കൂളിലെ പ്ലസ് വണ്‍ വിദ്യാര്‍ഥി നിബിന്‍ ഷെറഫ് മൂന്നാം സ്ഥാനവും നേടി. കോളജ് വിഭാഗത്തില്‍ എംജി സര്‍വകലാശാലാ സ്‌കൂള്‍ ഓഫ് ലെറ്റേഴ്‌സിലെ എംഎ മലയാളം വിദ്യാര്‍ഥിനി ദേവിക ആര്‍. ചന്ദ്രന്‍ ഒന്നാം സ്ഥാനവും കുറവിലങ്ങാട് ദേവമാതാ കോളജിലെ എംഎ മലയാളം വിദ്യാര്‍ഥിനി അനുപ്രിയ ജോജോ രണ്ടാം സ്ഥാനവും പാമ്പാടി കെജി കോളജിലെ ബിഎസ്‌സി ഫുഡ് സയന്‍സ് ആന്‍ഡ് ക്വാളിറ്റി കണ്‍ട്രോള്‍ മൂന്നാം വര്‍ഷ വിദ്യാര്‍ഥിനി ഹരിത എച്ച്. മൂന്നാം സ്ഥാനവും നേടി. വിജയികള്‍ക്ക് സമ്മാനവും സര്‍ട്ടിഫിക്കറ്റും ഫലകവും വായനപക്ഷാചരണത്തിന്‍റെ ജില്ലാതല സമാപനച്ചടങ്ങില്‍ നല്‍കും. വായന പക്ഷാചരണത്തോടനുബന്ധിച്ചു പ്രിയ പുസ്തകം, എന്‍റെ വാക്കില്‍ എന്ന പേരിലാണ് ജില്ലാ ഇന്‍ഫര്‍മേഷന്‍ ഓഫീസിന്‍റെ ഔദ്യോഗിക ഫേസ്ബുക്ക് പേജു വഴി നൂതനമായ പുസ്തകപരിചയമത്സരം സംഘടിപ്പിച്ചത്.

വൈദ്യുതി നിലച്ചാൽ ബിഎസ്എൻഎൽ ഫോൺ നിശ്ചലം; ഉപഭോകൃത കോടതിയിൽ ഹർജി

കുന്നോന്നി: വൈദ്യുതി നിലച്ചാല്‍ പ്രദേശത്തെ ബിഎസ്എന്‍എല്‍ ഫോണുകളും വൈഫൈ നെറ്റ് വര്‍ക്ക് സംവിധാനങ്ങളുമെല്ലാം സ്‌പോട്ടില്‍ നിശ്ചലമാകും. കഴിഞ്ഞ മൂന്ന് വര്‍ഷക്കാലമായി ജില്ലയിലെ ബാറ്ററി ബാക്അപ്പ് ഇല്ലാത്ത ബിഎസ്എന്‍എല്‍ ടവറുകളുടെ അവസ്ഥ ഇതാണ്. ഫോണ്‍ പ്രവര്‍ത്തനക്ഷമമാകുന്ന സമയങ്ങളില്‍ കോള്‍ ഡ്രോപ്പാകുന്നതും പതിവാണ്. ഇതിനെതിരേ നിരവധി പരാതികള്‍ ബന്ധപ്പെട്ടവര്‍ക്ക് നൽകിയെങ്കിലും നടപടി ഉണ്ടാകാത്തതിനെതിരേ പൊതുപ്രവര്‍ത്തകനും കെസിബിസി ടെമ്പറന്‍സ് മൂവ്‌മെന്‍റ് സംസ്ഥാന സെക്രട്ടറിയുമായ പ്രസാദ് കുരുവിള ബിഎസ്എന്‍എലിന്‍റെ ഭാഗത്തുനിന്നുണ്ടായ വീഴ്ചയില്‍ ഒരു ലക്ഷം രൂപ നഷ്ടപരിഹാരം ആവശ്യപ്പെട്ടും മേലില്‍ മൂന്നുവര്‍ഷക്കാലത്തേക്ക് സൗജന്യ സേവനം തന്‍റെ നിലവിലുള്ള നമ്പരുകള്‍ക്ക് ആവശ്യപ്പെട്ടുമാണ് ബിഎസ്എന്‍എല്‍ ജനറല്‍ മാനേജര്‍ക്കെതിരേ ജില്ലാ ഉപഭോക്തൃ കോടതിയില്‍ ഹര്‍ജി ഫയല്‍ ചെയ്തിരിക്കുന്നത്. ഹര്‍ജിക്കാരന്‍ ഈരാറ്റുപേട്ട സബ് ഡിവിഷന് കീഴില്‍ കുന്നോന്നി ടവറിന് പരിധിയില്‍ വരുന്ന ഉപഭോക്താവാണ്. കുന്നോന്നി ടവറും വൈദ്യുതി ബന്ധം നിലച്ചാല്‍ നിശ്ചലമാകും. ജനറേറ്റര്‍ സൗകര്യമില്ലാത്തതും ബാറ്ററി ബാക്അപ്പ് ഇല്ലാത്തതുമാണ് ഈ ടവറുകള്‍ നേരിടുന്ന മുഖ്യ പ്രശ്‌നം. രൂക്ഷമായ ഈ പ്രശ്‌നം പരിഹരിച്ച് ഇടമുറിയാത്ത സേവനം ഉപഭോക്താക്കള്‍ക്ക് നല്കണമെന്നും ഹര്‍ജിയില്‍ പ്രസാദ് കുരുവിള ആവശ്യപ്പെട്ടു.

അഖില കേരള ഇംഗ്ലീഷ് പ്രസംഗം മത്സരം

കടനാട്: സെന്‍റ് സെബാസ്റ്റ്യന്‍സ് ഹൈസ്‌കൂള്‍ ഇംഗ്ലീഷ് അധ്യാപകനും പിജിടിഎ സ്റ്റേറ്റ് കൗണ്‍സിലറും ആയിരുന്ന അന്തരിച്ച ജിമ്മി ജോസ് ചീങ്കല്ലിലിന്‍റെ അനുസ്മരണാര്‍ഥം സംഘടിപ്പിക്കുന്ന അഖില കേരള ഇംഗ്ലീഷ് പ്രസംഗ മത്സരം നാളെ 10 മുതല്‍ കടനാട് സെന്‍റ് സെബാസ്റ്റ്യന്‍സ് ഹയര്‍ സെക്കണ്ടറി സ്‌കൂളില്‍ ആരംഭിക്കും. കേരളത്തിലെ സര്‍ക്കാര്‍, എയ്ഡഡ് സ്‌കൂളുകളിലെ വിദ്യാർഥികള്‍ക്കാണ് മത്സരത്തില്‍ പങ്കെടുക്കുവാന്‍ അര്‍ഹതയുള്ളത്. വിജയികള്‍ക്ക് കാഷ് അവാര്‍ഡും മെമന്‍റോയും സമ്മാനിക്കും. പങ്കെടുക്കുന്ന എല്ലാ വിദ്യാര്‍ഥികള്‍ക്കും സര്‍ട്ടിഫിക്കറ്റ് വിതരണം ചെയ്യും. ഉച്ചകഴിഞ്ഞ് രണ്ടിന് നടക്കുന്ന പൊതുസമ്മേളനം ഫ്രാന്‍സിസ് ജോര്‍ജ് എംപി ഉദ്ഘാടനം ചെയ്യും. സ്‌കൂള്‍ മാനേജര്‍ ഫാ. ജോസഫ് പാനാമ്പുഴ അധ്യക്ഷത വഹിക്കുന്ന യോഗം മാണി സി. കാപ്പന്‍ എംഎല്‍എ മുഖ്യാതിഥിയായിരിക്കും. ജില്ലാ പഞ്ചായത്തംഗം രാജേഷ് വാളിപ്ലാക്കല്‍, പഞ്ചായത്ത് പ്രസിഡന്‍റ് ജിജി തമ്പി വാര്‍ഡ് മെംബര്‍ ഉഷാ രാജു, ഫാ. ജോസഫ് അട്ടങ്ങാട്ടില്‍, അസി. വികാര്‍, സെബാസ്റ്റ്യന്‍ തെരുവില്‍, സിബി അഴകന്‍പറമ്പില്‍, ഹെഡ്മാസ്റ്റര്‍ വി.ജെ. അജി, സിബി ആന്‍റണി തെക്കേടത്ത് എന്നിവര്‍ പ്രസംഗിക്കും. അന്വേഷണങ്ങള്‍ക്ക് ഫോണ്‍: 9446608780

നാലമ്പല ദര്‍ശനം, രാമപുരത്ത് ക്ഷേത്രങ്ങള്‍ ഒരുങ്ങി

രാമപുരം: കര്‍ക്കിടകമാസത്തിന്‍റെ പുണ്യ നാളുകളില്‍ ശ്രീരാമലക്ഷമണ-ഭരത ശത്രുഘ്‌ന ക്ഷേത്രങ്ങളില്‍ ഒരേ ദിവസം ദര്‍ശനം നടത്തുന്ന നാലമ്പല ദര്‍ശനത്തിന് രാമപുരത്തെ ക്ഷേത്രങ്ങള്‍ ഒരുങ്ങി. 17 മുതല്‍ ആഗസ്റ്റ് 16 വരെ എല്ലാ ജില്ലകളില്‍നിന്നും നാലമ്പല തീര്‍ഥാടനയാത്രകള്‍ സംഘടിപ്പിച്ചിട്ടുണ്ട്. ക്ഷേത്രങ്ങള്‍ തമ്മിലുള്ള ദൂരം മൂന്ന് കിലോമീറ്റര്‍ മാത്രമായതിനാല്‍ ചുരുങ്ങിയ സമയംകൊണ്ട് ദര്‍ശനം നടത്തുവാന്‍ സാധിക്കും. രാമപുരത്തെ ശ്രീരാമസ്വാമിക്ഷേത്രത്തിലും തുടര്‍ന്ന് കുടപ്പുലം ലക്ഷമണസ്വാമി ക്ഷേത്രത്തിലും അമനകര ശ്രീഭരതസ്വാമി ക്ഷേത്രത്തിലും മേതിരി ശത്രുഘിന സ്വാമിക്ഷേത്രത്തിലും ദര്‍ശനം നടത്തിയ ശേഷം വീണ്ടും ശ്രീരാമസ്വാമിയെ ദര്‍ശനം നടത്തുന്നതോടെ നാലമ്പലദര്‍ശനം പൂര്‍ണമാകുന്നു തീര്‍ഥാടകര്‍ക്ക് മഴ നനയാതെ ക്യൂ നില്‍ക്കുന്നതിന് പന്തല്‍ സംവിധാനങ്ങളും വാഹന പാര്‍ക്കിംഗിന് വിപുലമായ സൗകര്യവും ഒരുക്കിയിട്ടുണ്ട്. ഇന്‍ഫര്‍മേഷന്‍ സെന്‍ററുകളും വോളന്‍റിയര്‍മാരുടെ സേവനവും നാല് ക്ഷേത്രങ്ങളിലും ലഭ്യമാണ്. അമനകര ഭരതസ്വാമി ക്ഷേത്രത്തില്‍ എല്ലാ ദിവസവും അന്നദാനം ഉണ്ടായിരിക്കും. ആരോഗ്യപ്രവര്‍ത്തകരുടെ സേവനവും നാല് ക്ഷേത്രങ്ങളിലും ഉണ്ടായിരിക്കും. കര്‍ക്കിടമാസത്തില്‍ ദര്‍ശനസമയം പുലര്‍ച്ചെ അഞ്ചു മുതല്‍ രാവിലെ 12 വരെയും വൈകുന്നേരം അഞ്ചു മുതല്‍ 7.30 വരെയും ആയിരിക്കും.

കരൂര്‍ പഞ്ചായത്തില്‍ ഡെങ്കിപ്പനിയ്‌ക്കെതിരേ ജാഗ്രതാ നിര്‍ദേശം

പാലാ: കരൂര്‍ പഞ്ചായത്തിലെ ചില വാര്‍ഡുകളില്‍ ഡെങ്കിപ്പനി റിപ്പോര്‍ട്ട് ചെയ്ത സാഹചര്യത്തില്‍ ആരോഗ്യവകുപ്പും പഞ്ചായത്തും ജാഗ്രതാ നിര്‍ദേശവും ബോധവത്കരണ പ്രവര്‍ത്തനവുമായി രംഗത്ത്. പഞ്ചായത്തിലെ ഏഴ്, നാല് വാര്‍ഡുകളിലായി ആറ് പേര്‍ക്കാണ് ഡെങ്കിപ്പനി സ്ഥിരീകരിച്ചത്. ജൂലൈ ആദ്യ ദിവസങ്ങളില്‍ രോഗം സ്ഥിരീകരിച്ച ഇവര്‍ സുഖം പ്രാപിച്ചുവെന്നും പിന്നീട് കേസുകളൊന്നും കണ്ടെത്തിയില്ലെന്നും ആശങ്കപ്പെടേണ്ട സാഹചര്യമില്ലെന്നും ഹെല്‍ത്ത് ഇന്‍സ്‌പെക്ടര്‍ പറഞ്ഞു. എന്നിരുന്നാലും ഈഡിസ് കൊതുകുകള്‍ വളരുന്ന സാഹചര്യം ഒഴിവാക്കണമെന്നും പരിസരശുചിത്വം പാലിക്കണമെന്നും ആരോഗ്യവകുപ്പ് അറിയിച്ചു. പഞ്ചായത്തിലുടനീളം മൈക്ക് അനൗസ്‌മെന്റ് നടത്തി ലഘുലേഖകള്‍ വിതരണം ചെയ്തു. മുന്‍കരുതല്‍ സ്വീകരിക്കണം റബര്‍ ചിരട്ടകള്‍, ടയര്‍, കുപ്പി, കൊക്കോത്തോട്, കരിക്ക് തൊണ്ട്, മുട്ടത്തോട്, പ്ലാസ്റ്റിക് കുപ്പികൾ തുടങ്ങിയവയില്‍ വെള്ളം കെട്ടി നില്‍ക്കുന്നില്ല എന്ന് ഉറപ്പ് വരുത്തണം. വലിയ ടാങ്കുകള്‍, പാറക്കുഴികള്‍ എന്നിവയില്‍ ഗപ്പി മത്സങ്ങളെ നിക്ഷേപിക്കുക, ടെറസ്, സണ്‍ഷേഡ്, ഫ്രിഡ്ജ് ഡ്രേ എന്നിവയിലെ വെള്ളം ആഴ്ചയിലൊരിക്കല്‍ വൃത്തിയാക്കുക എന്നിങ്ങനെയുള്ള മുന്‍ കരുതല്‍ നടപടി ആളുകള്‍ സ്വീകരിക്കണമെന്ന് ആരോഗ്യ വകുപ്പ് അറിയിച്ചു.

എലിക്കുളത്ത് അമോണിയ പ്ലാന്‍റിനൊരുക്കം; ആശങ്കയിൽ നാട്

എലിക്കുളം: എലിക്കുളം പഞ്ചായത്തിൽ ആളുറുമ്പ് പടിഞ്ഞാറ്റുമല ഭാഗത്ത് അമോണിയ പ്ലാന്‍റിന്‍റെ അനുമതിക്കായി അപേക്ഷ നൽകി സ്വകാര്യകമ്പനി. പഞ്ചായത്തിന്‍റെ എൻഒസിക്കായി കമ്പനി അപേക്ഷ നൽകിയത് പ്രദേശത്ത് ഒന്നരയേക്കറോളം സ്ഥലം വാങ്ങിയതിന് ശേഷം. പത്തനംതിട്ട സ്വദേശിയുടെ മലനാട് അമോണിയാ പ്രൈവറ്റ് ലിമിറ്റഡ് കമ്പനിയാണ് പ്ലാന്‍റ് സ്ഥാപിക്കാൻ ഒരുങ്ങുന്നത്. പ്ലാന്‍റ് സ്ഥാപിക്കുന്നതിനെതിരേ നാട്ടുകാർ ജനകീയസമിതി രൂപീകരിച്ച് പ്രവർത്തനം തുടങ്ങി. തമിഴ്‌നാട്ടിൽ ജനരോഷത്തെ തുടർന്ന് സ്റ്റോപ്പ് മെമ്മോ ലഭിച്ച പ്ലാന്‍റാണ് കാർഷിക ഗ്രാമീണ മേഖലയിലേക്ക് മാറ്റി സ്ഥാപിക്കുവാൻ ശ്രമിക്കുന്നതെന്ന് ജനകീയസമിതി ആരോപിച്ചു. കിലോമീറ്ററുകളോളം അപകട വ്യാപന ശേഷിയുള്ളതിനാൽ റെഡ് സോണിൽ മാത്രം പ്രവർത്തിക്കേണ്ട അമോണിയം പ്ലാന്‍റ് ജനങ്ങൾ പാർക്കുന്ന ഗ്രാമീണ - കാർഷിക മേഖലയിൽ പ്രവർത്തനം ആരംഭിച്ചാൽ കുടിവെള്ള ദൗർഭല്യത്തിനും ജല - അന്തരീക്ഷ മലിനീകരണത്തിനും മനുഷ്യ - ജീവജാലങ്ങൾക്കും സസ്യ - വൃക്ഷാദികൾക്കും വളരെയേറെ ഹാനികരവുമാകും. പടിഞ്ഞാറ്റുമലയുടെ മുകൾ ഭാഗത്ത് പ്ലാന്‍റ് പ്രവർത്തനം ആരംഭിച്ചാൽ സമീപത്തുള്ള നാലോളം കുടിവെള്ള പദ്ധതികളും പ്രദേശത്തെ പ്രധാന ജലസ്രോതസായ പൊന്നൊഴുകുംതോടും കാഞ്ഞിരപ്പള്ളി താലൂക്കിലെ ഏക നെൽപ്പാടമായ കാപ്പുകയം പാടശേഖരവും നശിച്ച് പോകും. പരിസരപ്രദേശത്തെ ജനങ്ങളുടെ സാധാരണ ജീവിതത്തെ ബാധിക്കുന്ന അമോണിയം പ്ലാന്‍റിനെതിരേ പ്രതിഷേധം ശക്തമാക്കി വിവിധ സമരപരിപാടികൾക്ക് രൂപം നൽകി. ജനകീയ കമ്മിറ്റി ചെയർമാനായി ജോസഫ് മാത്യു തെക്കേക്കുറ്റ്, കൺവീനറായി ജോർജ്കുട്ടി ജേക്കബ് കുരുവിനാകുന്നേൽ, രക്ഷാധികാരികളായി എലിക്കുളം പഞ്ചായത്ത് മെംബർമാരായ സെൽവി വിൽസൻ, ആശാ റോയി, മാതൂസ് മാത്യൂ, തിടനാട് പഞ്ചായത്ത് മെംബർ മിനി ബിനോ എന്നിവരെയും വൈസ് ചെയർമാൻമാരായി വിൽസൻ പതിപ്പള്ളി, ജിമ്മിച്ചൻ മണ്ഡപത്തിൽ എന്നിവരെയും ജോയിന്‍റ് കൺവീനർമാരായി ബിനോ മുളങ്ങാശേരി, ജസ്റ്റിൻ ജോർജ് എന്നിവരെയും 25 അംഗ എക്‌സിക്യുട്ടിവ് കമ്മിറ്റിയേയും തെരഞ്ഞെടുത്തു. കഴിഞ്ഞ ദിവസം പഞ്ചായത്ത് കമ്മിറ്റിയിൽ എൻഒസിക്കായുള്ള അപേക്ഷ ചർച്ചയ്ക്കെത്തി. പഞ്ചായത്തംഗങ്ങൾ ഒന്നാകെ പ്ലാന്‍റ് വേണ്ടെന്ന നിലപാട് സ്വീകരിച്ചു. പ്രശ്‌നം സംബന്ധിച്ച് പഠിച്ച് റിപ്പോർട്ട് തയാറാക്കാൻ ഉപസമിതിയെ നിയോഗിച്ചു. പടിഞ്ഞാറ്റുമല സന്ദർശിച്ച് പഞ്ചായത്ത് ഉപസമിതി എലിക്കുളം: ആളുറുമ്പ് പടിഞ്ഞാറ്റുമലയിൽ പ്രവർത്തനമാരംഭിക്കുവാൻ ഒരുങ്ങുന്ന അമോണിയം പ്ലാന്‍റിനെതിരേ ജനരോഷം വ്യാപകമായ സാഹചര്യത്തിൽ സ്ഥലം പഞ്ചായത്ത് ഉപസമിതി സന്ദർശിച്ചു. പടിഞ്ഞാറ്റിൻ മലയിലെ ഒന്നര ഏക്കറോളം സ്ഥലം വാങ്ങിയ ശേഷം അണുബോംബുപോലെ പ്രഹരശേഷിയുള്ള അമോണിയം ഫാക്ടറി നിർമിക്കുവാനുളള തീരുമാനം അംഗീകരിക്കില്ലെന്ന് ജനങ്ങൾ ഇവരെ അറിയിച്ചു. പ്ലാന്‍റ് നിലവിൽ വന്നാൽ ഇവിടുത്തെ പ്രകൃതിയുടെ സന്തുലിതാവസ്ഥ ഉൾപ്പടെ താളം തെറ്റും. ദിനം പ്രതി 40000 ലിറ്ററോളം ജലം ആവശ്യമായി വരുന്ന അമോണിയ പ്ലാന്‍റ് നിലവിൽ വന്നാൽ 350ലേറെ കുടുംബങ്ങൾ താമസിക്കുന്ന ഇവിടുത്തെ ജലലഭ്യത ഇല്ലാതെയാവും. കൂടാതെ ഇവിടെ പ്ലൈവുഡ് ഫാക്ടറിക്കും ശ്രമം നടക്കുന്നതായി കർമസമിതി ആരോപിച്ചു. ഇവിടേക്ക് വാഹനങ്ങൾ എത്തുക ദുഷ്‌കരമാണ്. അപകട സാധ്യത ഉണ്ടായാൽത്തന്നെ ഫയർ ഫോഴ്‌സിന്‍റേതുൾപ്പെടെയുള്ള വാഹനങ്ങൾ ഇവിടെ എത്തുക അപ്രാപ്യമാണ്. എലിക്കുളം പഞ്ചായത്ത് പ്രസിഡന്‍റ് ജിമ്മിച്ചൻ ഈറ്റത്തോട്ട്, ഉപസമിതിയംഗങ്ങളായ എസ്. ഷാജി, മാത്യൂസ് പെരുമനങ്ങാട്ട്, സിൽവി വിൽസൺ, ആശ മോൾ റോയ്, എം.ആർ. സരീഷ്‌കുമാർ, പൊതുപ്രവർത്തകൻ വിൽസൺ പതിപ്പള്ളിൽ എന്നിവരാണ് സ്ഥലം സന്ദർശിച്ചത്.

ഓണപ്പൂവസന്തവുമായി വാഴൂർ ബ്ലോക്ക് പഞ്ചായത്ത്

പൊൻകുന്നം: ഓണത്തിന് പൂക്കളമൊരുക്കാൻ ആവശ്യമായ പൂക്കൾ പ്രാദേശികമായി ലഭ്യമാക്കുക എന്ന ലക്ഷ്യത്തോടെ ഓണപ്പൂവസന്തം പുഷ്പകൃഷി പദ്ധതിയുമായി വാഴൂർ ബ്ലോക്ക് പഞ്ചായത്ത്. 2025-26 വാർഷിക പദ്ധതിയിൽ ഉൾപ്പെടുത്തി രണ്ടേകാൽ ലക്ഷം രൂപ ചെലവഴിച്ചാണ് പദ്ധതി നടപ്പാക്കുന്നത്. ബ്ലോക്ക് പഞ്ചായത്ത് പരിധിയിലെ 50 കർഷക ഗ്രൂപ്പുകൾ വഴിയാണ് ബന്ദിപ്പൂ (ചെണ്ടുമല്ലി) കൃഷി നടത്തുന്നത്. തൈകൾ നട്ട് 45-ാം ദിവസം മുതൽ പൂവിട്ടു തുടങ്ങും. ഒരു ചെടിയിൽനിന്നു മൂന്നുമുതൽ നാലു കിലോ വരെ പൂക്കൾ ലഭിക്കുമെന്നാണ് പ്രതീക്ഷ. ഓറഞ്ച്, മഞ്ഞ നിറത്തിലുള്ള ബന്ദിപ്പൂക്കളാണ് കൃഷി ചെയ്യുന്നത്. പൊൻകുന്നം ഗവ. വിഎച്ച്എസ്എസിൽ നടന്ന ബ്ലോക്ക്തല പുഷ്പകൃഷിയുടെ ഉദ്ഘാടനം ബ്ലോക്ക് പഞ്ചായത്ത് പ്രസിഡന്‍റ് മുകേഷ് കെ. മണി നിർവഹിച്ചു. ചിറക്കടവ് പഞ്ചായത്ത് പ്രസിഡന്‍റ് സി.ആർ. ശ്രീകുമാർ, ബ്ലോക്ക് പഞ്ചായത്ത് വൈസ് പ്രസിഡന്‍റ് ഗീത എസ്. പിള്ള, ബ്ലോക്ക് പഞ്ചായത്തംഗം ഷാജി പാമ്പൂരി, മിനി സേതുനാഥ്, ലതാ ഉണ്ണികൃഷ്ണൻ, പഞ്ചായത്തംഗങ്ങളായ സുമേഷ് ആൻഡ്രൂസ്, ആന്‍റണി മാർട്ടിൻ, ശ്രീലത സന്തോഷ്, കൃഷി അസിസ്റ്റന്‍റ് ഡയറക്ടർ സിമി ഇബ്രാഹിം, സ്കൂൾ പ്രിൻസിപ്പൽ എം.എച്ച്. നിയാസ്, ഹെഡ്മിസ്ട്രസ് എം.സി. രജനി, പിടിഎ പ്രസിഡന്‍റ് പി.ജി. ജനീവ് എന്നിവർ പ്രസംഗിച്ചു.

പെരുന്ന ഗവൺമെന്‍റ് എല്‍പി സ്‌കൂള്‍ ഞെരുക്കത്തില്‍ : എല്‍പി സ്‌കൂളും വനിതാ ഐടിഐയും പ്രവര്‍ത്തിക്കുന്നത് ഒരു കെട്ടിടത്തില്‍

ചങ്ങനാശേരി: പെരുന്ന ഗവൺമെന്‍റ് എല്‍പി സ്‌കൂള്‍ കെട്ടിടത്തില്‍ പ്രവര്‍ത്തിക്കുന്നത് എല്‍പി സ്‌കൂളും വനിതാ ഐടിഐയും. സ്ഥലദൗര്‍ലഭ്യത്തില്‍ ഇരു സ്ഥാപനങ്ങളും ഞെരുങ്ങുന്നു. ഒരു നൂറ്റാണ്ടിലധികം ചരിത്രമുള്ള സ്‌കൂളിനാണ് ഈ ദുര്‍ഗതി. മഴക്കാല ദുരിതം വര്‍ധിക്കുമ്പോള്‍ ഈ സ്‌കൂളിൽ ദുരിതാശ്വാസ ക്യാമ്പ് തുറക്കുന്നതും പതിവാണ്. പെരുന്ന ഗവൺമെന്‍റ് എല്‍പി സ്‌കൂളില്‍ അമ്പത് വിദ്യാര്‍ഥികളും നാല് അധ്യാപകരുമാണുള്ളത്. എങ്ങും ഇടംകിട്ടാതെ വന്നതോടെയാണ് 12 വര്‍ഷംമുമ്പ് സര്‍ക്കാര്‍ അനുവദിച്ച വനിത ഐടിഐ ഈ എല്‍പി സ്‌കൂള്‍ കെട്ടിടത്തില്‍ പ്രവര്‍ത്തനം തുടങ്ങിയത്. എംഎല്‍എയായിരുന്ന സി.എഫ്. തോമസിന്‍റെ ശ്രമഫലമായാണ് വ്യവസായ വകുപ്പിന്‍റെ കീഴിലുള്ള ഈ ഐടിഐ ചങ്ങനാശേരിയില്‍ അനുവദിച്ചത്. സ്ഥലമില്ല, കെട്ടിടവുമില്ല; വികസനമുരടിപ്പില്‍ വനിതാ ഐടിഐ സ്ഥലപരിമിതിയില്‍ ചങ്ങനാശേരി വനിതാ ഐടിഐ നട്ടംതിരിയുന്നു. 12 വര്‍ഷങ്ങള്‍ക്കുമുമ്പ് ചങ്ങനാശേരിയില്‍ അനുവദിച്ച കോട്ടയം ജില്ലയിലെ വനിതകള്‍ക്കായുള്ള ഏക ഐടിഐയാണ് സ്വന്തമായി സ്ഥലവും കെട്ടിടവുമില്ലാതെ മുടന്തി നീങ്ങുന്നത്. എന്‍സിവിടി അംഗീകാരമുള്ള ഡിസിവിൽ, എസ്‌സിവിടി അംഗീകാരമുള്ള കമ്പ്യൂട്ടര്‍ ഓപ്പറേറ്റര്‍ ആൻഡ് പ്രോഗ്രാമിംഗ് അസിസ്റ്റന്‍റ് എന്നീ രണ്ട് ട്രേഡുകളിലെ നാല് ബാച്ചുകളിലായി നൂറോളം ട്രെയിനികളാണ് ഈ സ്ഥാപനത്തിലുള്ളത്. എന്‍സിവിടി നോംസ് പ്രകാരം ഈ സ്ഥാപനത്തിന് ഒരേക്കര്‍ ഏഴുസെന്‍റ് സ്ഥലമാണ് ആവശ്യമായുള്ളത്. ഈ സ്ഥലം ചങ്ങനാശേരി നഗരസഭ നല്‍കാമെന്ന ധാരണയിലാണ് ഐടിഐ താത്കാലികമായി ഗവൺമെന്‍റ് എല്‍പി സ്‌കൂളില്‍ പ്രവര്‍ത്തനമാരംഭിച്ചത്. സ്ഥലം ലഭിച്ചാല്‍ വ്യാ വസായിക വകുപ്പ് കെട്ടിടം നിര്‍മിച്ചു നല്‍കാമെന്ന് ഉറപ്പുനൽകിയിട്ടുണ്ട്. എന്നാല്‍, കാലം ഇത്രയുമായിട്ടും നഗരസഭ ഐടിഐക്ക് സ്ഥലം അനുവദിച്ചു നല്‍കിയിട്ടില്ല. ഇതുമൂലം ഈ സ്ഥാപനത്തിന്‍റെ വികസന സാധ്യതകളും അടഞ്ഞിരിക്കുകയാണ്. നിവേദനം നല്‍കും ഐടിഐക്ക് ഉചിതമായ സ്ഥലം അനുവദിക്കണമെന്നാവശ്യപ്പെട്ട് അധികാരികള്‍ക്ക് നിവേദനം സമര്‍പ്പിക്കും. ജയമോള്‍ ബി. കവിയൂര്‍ വനിതാ ഐടിഐ പിടിഎ പ്രസിഡന്‍റ് സ്ഥലം കണ്ടെത്തും വനിതാ ഐടിഐക്ക് അനുയോജ്യമായ സ്ഥലം കണ്ടെത്തി നല്‍കും. കൃഷ്ണകുമാരി രാജശേഖരന്‍ മുനിസിപ്പല്‍ ചെയര്‍പേഴ്‌സണ്‍ വ്യവസായിക വകുപ്പ് കെട്ടിടം നിര്‍മിച്ചു നല്‍കും വനിതാ ഐടിഐക്ക് നഗരസഭ സ്ഥലം അനുവദിച്ചാല്‍ വ്യാവസായിക വകുപ്പ് കെട്ടിടം നിര്‍മിച്ചുനല്‍കും. ജോബ് മൈക്കിള്‍ എംഎല്‍എ

വാർധക്യം സന്തോഷകരമാക്കാൻ സീയോനിൽ ഗ്രേസ്ഫുൾ ധ്യാനം

ചങ്ങനാശേരി: അതിരൂപതയുടെ കുന്നന്താനം സീയോൻ ധ്യാനകേന്ദ്രത്തിൽ അറുപതു വയസിനു മുകളിലുള്ളവർക്കായി നടത്തിവരുന്ന ഗ്രേസ്ഫുൾ ധ്യാനം 27 മുതൽ 30 വരെ നടക്കും. ധ്യാനകേന്ദ്രം ഡയറക്‌ടർ ഫാ. തോമസ് പ്ലാപ്പറന്പിൽ, ഫാ. ഷാജി തുന്പേച്ചിറയിൽ എന്നിവരുടെ നേതൃത്വത്തിലാണ് നാലുദിവസം ധ്യാനകേന്ദ്രത്തിൽ താമസിച്ചുള്ള ധ്യാനം നടത്തുന്നത്. വാർധക്യത്തിലെ പ്രശ്നങ്ങളും പ്രതിവിധികളും സംബന്ധിച്ച് വിദഗ്ധരായ ഡോക്‌ടർമാരും വൈദികരും പ്രഭാഷണം നടത്തും. വാർധക്യകാലത്തെ അവഗണനയും അനാരോഗ്യവും മറന്ന് സന്തോഷം കണ്ടെത്താൻ നാലുദിവസങ്ങളിലായി നടക്കുന്ന സൗഖ്യദായക ശുശ്രൂഷകൾ, കൗൺസലിംഗ്, വ്യായാമപരിശീലനം എന്നിവ സഹായിക്കുന്നു. കൂടുതൽ വിവരങ്ങൾക്കും രജിസ്ട്രേഷനും 8086399023, 9495107045 എന്നീ നന്പരുകളിൽ ബന്ധപ്പെടുക.

ക്രിസ്തുജ്യോതി ഗ്രൂപ്പ് സ്ഥാപനങ്ങളില്‍ മാനേജേഴ്‌സ് ഡേ

ചെത്തിപ്പുഴ: ക്രിസ്തുജ്യോതി ഗ്രൂപ്പ് ഓഫ് ഇന്‍സ്റ്റിറ്റ്യൂഷന്‍സിനു കീഴിലുള്ള ക്രിസ്തുജ്യോതി കോളജ്, ക്രിസ്തു ജ്യോതി, പ്ലാസിഡ് വിദ്യാവിഹാര്‍, ക്രിസ്തുജ്യോതി വിദ്യാനികേതന്‍, ക്രിസ്തുജ്യോതി കിൻഡര്‍ ഗാര്‍ട്ടന്‍ എന്നിവയുടെ സംയുക്താഭിമുഖ്യത്തില്‍ ഇന്നു മാനേജഴ്‌സ് ദിനം ആഘോഷിക്കും. വികാരി ജനറാള്‍ ഫാ. ജോസി താമരശേരിയുടെ അധ്യക്ഷതയില്‍ ചേരുന്ന പൊതുസമ്മേളനത്തില്‍ ക്രിസ്തുജ്യോതി ഗ്രൂപ്പ് സ്ഥാപനങ്ങളുടെ മാനേജരായ റവ.ഡോ. തോമസ് കല്ലുകളത്തെ ആദരിക്കും. ഫാ. ടോമി ഇലവുങ്കല്‍, ഫാ. സ്‌കറിയ എതിരേറ്റ്, ഫാ. ജോഷി ചീരാംകുഴി, ഫാ. ഫിലിപ്പോസ് തുണ്ടുവാലിച്ചിറ, ഡോ. ജോബിന്‍ എസ്. കൊട്ടാരം, എന്‍.ഒ. ആന്‍റണി എന്നിവര്‍ പ്രസംഗിക്കും.

എസ്ബി കോളജില്‍ ബിരുദദാനച്ചടങ്ങ് ഇന്ന്

ചങ്ങനാശേരി: എസ്ബി കോളജില്‍ ബിരുദദാനച്ചടങ്ങ് ഇന്നു രാവിലെ 10ന് നടക്കും. മഹാത്മാഗാന്ധി യൂണിവേഴ്‌സിറ്റി വൈസ്ചാന്‍സലര്‍ പ്രഫ. സി.ടി. അരവിന്ദകുമാര്‍ മുഖ്യാതിഥിയായിരിക്കും. ആര്‍ച്ച്ബിഷപ് മാര്‍ തോമസ് തറയില്‍ അനുഗ്രഹപ്രഭാഷണം നടത്തും. കോളജ് മാനേജര്‍ മോണ്‍. ആന്‍റണി എത്തയ്ക്കാട്ട്, കോളജ് പ്രിന്‍സിപ്പല്‍ റവ.ഡോ. ടെഡി കാഞ്ഞൂപ്പറമ്പില്‍, വൈസ്പ്രിന്‍സിപ്പല്‍ ഫാ. ജോസ് മുല്ലക്കരി എന്നിവര്‍ പ്രസംഗിക്കും. 2025ലെ "ബെസ്റ്റ് ഔട്ട്ഗോയിംഗ് സ്റ്റുഡന്‍റ്- ലൂമിനറി അവാര്‍ഡ്’ നേടിയ പി. അപര്‍ണ മറുപടിപ്രസംഗം നടത്തും. ബിരുദം സ്വീകരിക്കുന്ന വിദ്യാര്‍ഥികളും അവരുടെ മാതാപിതാക്കളും ഉള്‍പ്പെടെ രണ്ടായിരത്തോളം ആളുകള്‍ ചടങ്ങില്‍ പങ്കെടുക്കും. കോളജ് ഗ്രൗണ്ടിലും ഇന്‍ഡോര്‍ സ്റ്റേഡിയത്തിലും ഉള്‍പ്പെടെ വിപുലമായ പാര്‍ക്കിംഗ് ക്രമീകരണങ്ങള്‍ ഒരുക്കിയിട്ടുണ്ട്.

ദേശീയ പണിമുടക്ക് ചങ്ങനാശേരിയില്‍ പൂർണം

ചങ്ങനാശേരി: കേന്ദ്രസര്‍ക്കാരിന്‍റെ തെറ്റായ തൊഴിലാളി ദ്രോഹനയങ്ങള്‍ക്കെതിരേ സംയുക്ത ട്രേഡ് യൂണിയനുകളും സര്‍ക്കാര്‍ ജീവനക്കാരുടെ ഫെഡറേഷനുകളും നടത്തിയ ദേശീയ പണിമുടക്ക് ചങ്ങനാശേരിയില്‍ പൂര്‍ണം. റവന്യു ടവര്‍ ഉള്‍പ്പെടെ സര്‍ക്കാര്‍ ഓഫീസുകളില്‍ ജീവനക്കാരുടെ ഹാജര്‍നില കുറവായിരുന്നു. സ്‌കൂളുകളും കോളജുകളും പ്രവര്‍ത്തിച്ചില്ല. നഗരത്തിലും ഗ്രാമീണമേഖലകളിലും കടകമ്പോളങ്ങള്‍ അടഞ്ഞുകിടന്നു. പണിമുടക്കനുകൂലികള്‍ പ്രകടനത്തിനിടെ ഹെഡ്‌ പോസ്റ്റ് ഓഫീസിലേക്കു തള്ളിക്കയറി ഓഫീസ് പ്രവര്‍ത്തനം നിര്‍ത്തിവയ്ക്കണമെന്ന് ആവശ്യപ്പെട്ടു. ഇത് പോസ്റ്റ് ഓഫീസ് ജീവനക്കാരുമായി തര്‍ക്കത്തിനിടയാക്കി. സംഭവം മൊബൈലില്‍ ചിത്രീകരിച്ച ബിജെപി അനുകൂല സംഘടനയായ ഭാരതീയ പോസ്റ്റല്‍ എംപ്ലോയീസ് ഫെഡറേഷന്‍ ചങ്ങനാശേരി ഡിവിഷന്‍ സെക്രട്ടറിയും പോസ്റ്റ്മാനുമായ കാവാലം നാരകത്തറ സ്വദേശി വിഷ്ണു ചന്ദ്ര (32)നെ സമരനാനുകൂലികള്‍ മര്‍ദിച്ചതായും പരാതിയുണ്ട്. പരിക്കേറ്റ ഇയാളെ ചങ്ങനാശേരി ജനറല്‍ ആശുപത്രിയില്‍ പ്രവേശിപ്പിച്ചു. ഇതേത്തുടര്‍ന്ന് പോസ്റ്റ് ഓഫീസ് അടച്ചു. പോസ്റ്റ്മാനെ കൈയേറ്റം ചെയ്തതു സംബന്ധിച്ച് പോസ്റ്റ്മാസ്റ്റര്‍ ചങ്ങനാശേരി പോലീസ് സ്റ്റേഷനില്‍ പരാതി നല്‍കി. കെഎസ്ആര്‍ടിസി ഡിപ്പോയിലെ ജീവനക്കാര്‍ പലരും ഹാജരായെങ്കിലും പുലര്‍ച്ചെ 4.40നുള്ള നെടുംകണ്ടം സര്‍വീസ് മാത്രമേ ഓടിയുള്ളൂ. നഗരത്തിലൂടെ കടന്നുപോയ കെഎസ്ആര്‍ടിസി, അന്തര്‍സംസ്ഥാന ടൂറിസ്റ്റ് ബസുകളും സമരാനുകൂലികള്‍ തടഞ്ഞു. സമരാനുകൂലികള്‍ കെഎസ്ആര്‍ടിസി ബസുകള്‍ യാത്രക്കാരെ ഇറക്കിവിട്ടശേഷം ഡിപ്പോയിലേക്കു കയറ്റിയിടീച്ചു. സ്വകാര്യ ബസുകളും ഓട്ടോ ടാക്‌സികളും ഓടിയില്ല. ഹോട്ടലുകള്‍ അടഞ്ഞുകിടന്നു. ചില ബാറുകള്‍ തുറന്നുപ്രവര്‍ത്തിച്ചു. സംയുക്ത ട്രേഡ് യൂണിയന്‍റെ നേതൃത്വത്തില്‍ നഗരത്തില്‍ പ്രകടനവും ഹെഡ് പോസ്റ്റ് ഓഫീസ് മാര്‍ച്ചും നടത്തി. ടിബി റോഡില്‍നിന്നും ആരംഭിച്ച മാര്‍ച്ച് നഗരം ചുറ്റി പോസ്റ്റ് ഓഫീസ് ജംഗ്ഷനില്‍ സമാപിച്ചു. തുടര്‍ന്നു നടന്ന സമ്മേളനം സിഐടിയു ജില്ലാ വൈസ് പ്രസിഡന്‍റ് കെ.സി. ജോസഫ് ഉദ്ഘാടനം ചെയ്തു. എഐടിയുസി മണ്ഡലം പ്രസിഡന്‍റ് കെ.ടി. തോമസ് അധ്യക്ഷത വഹിച്ചു. സമരസമിതി നേതാക്കളായ ടി.എസ്. നിസ്താര്‍, കെ.ഡി. സുഗതന്‍, പി.എ. നിസാര്‍, ടി.പി. അജികുമാര്‍, അഡ്വ.പി.എ. നിസാര്‍, പി.ആര്‍. അനില്‍കമാര്‍, അഡ്വ.കെ. മാധവന്‍പിള്ള, ജോജി ജോസഫ് എന്നിവര്‍ പ്രസംഗിച്ചു. കുറിച്ചി, പായിപ്പാട്, മാടപ്പള്ളി, തൃക്കൊടിത്താനം പോസ്റ്റ് ഓഫീസുകളിലേക്കും സമരസമിതി മാര്‍ച്ച് സംഘടിപ്പിച്ചു.

കാറിൽനിന്ന് കഞ്ചാവ് പിടികൂടി

തലയോലപ്പറമ്പ്: യുവാക്കൾ സഞ്ചരിച്ച കാർ സ്കൂട്ടറിൽ ഇടിച്ചുണ്ടായ അപകടത്തെത്തുടർന്ന് സ്ഥലത്തെത്തിയ പോലീസ് നടത്തിയ പരിശോധനയിൽ വാഹനത്തിൽനിന്നു കഞ്ചാവ് കണ്ടെടുത്തു. സംഭവവുമായി ബന്ധപ്പെട്ട് ഒരാൾക്കെതിരേ പോലീസ് കേസ് രജിസ്റ്റർ ചെയ്തു. ചൊവ്വാഴ്ച രാത്രി 10.45ന് മറവൻതുരുത്ത് - ടോൾ റോഡിൽ മണിശേരി ക്ഷേത്രത്തിനു സമീപമാണ് അപകടം നടന്നത്. കാർ ഓടിച്ചിരുന്ന ചെമ്പ് തുരുത്തുമ്മ സ്വദേശി ജിത്തുവി (25)നെതിരേയാണ് തലയോലപ്പറമ്പ് പോലീസ് കേസെട‌ുത്തത്. മൂന്നംഗ സംഘം കാറിൽ കോട്ടയം ഇല്ലിക്കൽക്കല്ലിൽ പോയി തിരികെ വരുന്നതിനിടെ നിയന്ത്രണം വിട്ട കാർ മുന്നിൽപ്പോയ സ്കൂട്ടറിനു പിന്നിൽ ഇടിച്ചാണ് അപകടം. തുടർന്ന് നാട്ടുകാർ ഓടിക്കുടുകയും ഇവരെ തടയുകയുമായിരുന്നു. സംഭവമറിഞ്ഞ് തലയോലപ്പറമ്പ് പോലീസ് സ്ഥലത്തെത്തുകയും ഇവർ ലഹരി ഉപയോഗിച്ചതായി സംശയമുണ്ടെന്ന് നാട്ടുകാർ പറഞ്ഞതോടെ കാർ പരിശോധിക്കുകയുമായിരുന്നു. കാറിന്‍റെ ഡാഷ് ബോർഡിൽ സൂക്ഷിച്ചിരുന്ന മൂന്നു ഗ്രാം കഞ്ചാവ് പോലീസ് കണ്ടെടുത്തു. തുടർന്ന് കാറിലുണ്ടായിരുന്ന മറ്റു രണ്ടു യുവാക്കളെ പോലിസ് സ്റ്റേഷനിലേക്കു കൊണ്ടുവരികയായിരുന്നു. വാഹനം ഓടിച്ചിരുന്ന യുവാവ്, അപകടത്തിൽ പരിക്കേറ്റയാളെ വൈക്കം താലൂക്ക് ആശുപത്രിയിൽ ചികിത്സക്കായി കൊണ്ടുപോയ ശേഷം തിരികെ എത്തിയതോടെ ഇയാളെ അറസ്റ്റ് ചെയ്യുകയായിരുന്നു. യുവാവിനെ പിന്നീട് ജാമ്യത്തിൽ വിട്ടു. കാർ പോലീസ് കസ്റ്റഡിയിലെടുത്തു. അപകടത്തിൽ സാരമായി പരിക്കേറ്റ സ്കൂട്ടർ യാത്രികൻ താലൂക്ക് ആശുപത്രിയിൽ ചികിത്സയിലാണ്.

കുറുപ്പന്തറ സെന്‍റ് സേവ്യേഴ്സ് വിഎച്ച്എസ്എസിൽ മെറിറ്റ് ഡേ

കുറുപ്പന്തറ: സെന്‍റ് സേവ്യേഴ്‌സ് വൊക്കേഷണല്‍ ഹയര്‍ സെക്കന്‍ഡറി സ്‌കൂളില്‍ പിടിഎയുടെയും പൂര്‍വ വിദ്യാര്‍ഥീ സംഘടനയായ ആസ്‌ക്കിന്‍റെയും (എഎഎസ്‌കെ) സംയുക്താഭിമുഖ്യത്തില്‍ മെറിറ്റ് ഡേ ആചരിച്ചു. എസ്എസ്എല്‍സി, പ്ലസ്ടു പരീക്ഷകളില്‍ ഫുള്‍ എ പ്ലസ് നേടിയവരെയും എല്‍എസ്എസ്, യുഎസ്എസ്, എന്‍എംഎംഎസ് പരീക്ഷകളില്‍ മികച്ച വിജയം നേടിയ വിദ്യാര്‍ഥികളെയും ആദരിച്ചു. മോന്‍സ് ജോസഫ് എംഎല്‍എ പരിപാടിയുടെ ഉദ്ഘാടനം നിര്‍വഹിച്ചു. ‌ യോഗത്തില്‍ സ്‌കൂള്‍ മാനേജര്‍ ഫാ. ജോസ് വള്ളോംപുരയിടം അധ്യക്ഷത വഹിച്ചു. സിനിമാ സംവിധായകനായ ബിന്‍റോ സ്റ്റീഫന്‍, പഞ്ചായത്ത് പ്രസിഡന്‍റ് കോമളവല്ലി രവീന്ദ്രന്‍, വാര്‍ഡ് മെമ്പര്‍ ആന്‍സി സിബി, പ്രിന്‍സിപ്പല്‍ അനൂപ് കെ. സെബാസ്റ്റ്യന്‍, ഹെഡ്മാസ്റ്റര്‍ ജോഷി ജോര്‍ജ്, പിടിഎ പ്രസിഡന്‍റ് ഷാജി കടുന്നക്കരി, ആസ്‌ക് പ്രസിഡന്‍റ് കെ.എം. ടോമി, അധ്യാപക പ്രതിനിധി പി.ജെ. സിജോ, മെര്‍ളിന്‍ ആന്‍ ബിജോ എന്നിവര്‍ പ്രസംഗിച്ചു.

മാലിന്യസംഭരണകേന്ദ്രം നിര്‍മിക്കാനുള്ള നീക്കത്തിനെതിരേ നാട്ടുകാര്‍ രംഗത്ത്

പെരുവ: റേഷന്‍കടയ്ക്കും അങ്കണവാടിക്കും വീടുകള്‍ക്കും സമീപം മാലിന്യസംഭരണകേന്ദ്രം നിര്‍മിക്കാനുള്ള നീക്കത്തിനെതിരേ നാട്ടുകാര്‍ രംഗത്ത്. മുളക്കുളം പഞ്ചായത്തിലെ വടുകുന്നപ്പുഴയിലെ മിനി വ്യവസായ കേന്ദ്രത്തിലാണ് മാലിന്യം സംഭരിക്കാന്‍ പ്ലാന്‍റ് നിര്‍മിക്കുന്നത്. ഇതിനെതിരേ സമീപവാസികളും നാട്ടുകാരും പ്രതിഷേധവുമായി രംഗത്ത് എത്തിയിരിക്കുകയാണ്. പഞ്ചായത്തിലെ മുഴുവന്‍ വാര്‍ഡുകളിലെയും മാലിന്യങ്ങള്‍ സംഭരിക്കാന്‍വേണ്ടിയാണ് ഇവിടെ ബഹുനില കെട്ടിടം നിര്‍മിക്കാനുദേശിക്കുന്നത്. പ്ലാന്‍റ് നിര്‍മിക്കുന്ന സ്ഥലത്തുനിന്നു മീറ്ററുകള്‍ മാറിയാണ് പൊതുവിതരണ കേന്ദ്രവും മൃഗസംരക്ഷണ വകുപ്പിന്‍റെ സബ്‌സെന്‍ററും പ്രവര്‍ത്തിക്കുന്നത്. ഇവിടെനിന്ന് 25 മീറ്റര്‍ മാറി അങ്കണവാടിയും നൂറു മീറ്റര്‍ ദൂരത്തില്‍ പ്രാഥമികാരോഗ്യകേന്ദ്രത്തിന്‍റെ സബ് സെന്‍ററും പ്രവര്‍ത്തിക്കുന്നു. കൂടാതെ യുവജനങ്ങള്‍ ഷട്ടില്‍ കളിക്കുന്ന കോര്‍ട്ടും ഇവിടെയാണ് സ്ഥിതിചെയ്യുന്നുത്. ഇതിനു ചുറ്റുമായി നിരവധി വീടുകളും കിണറുകളുമുണ്ട്. ദിവസവും നൂറുകണക്കിന് ആളുകളാണ് ഇവിടെ വിവിധ ആവശ്യങ്ങള്‍ക്കായി എത്തുന്നത്. കൂടാതെ ചെല്ലാനിരപ്പ് ഭാഗത്തേക്ക് സഞ്ചരിക്കുന്ന കാല്‍നടയാത്രക്കാരും ഇതുവഴിയാണ് കടന്നുപോകുന്നത്. ഇപ്പോള്‍ ഇവിടെ പഞ്ചായത്തിലെ ഒന്ന്, രണ്ട് വാര്‍ഡുകളിലെ വീടുകളില്‍നിന്നും ഹരിതകര്‍മസേന സംഭരിച്ച പ്ലാസ്റ്റിക് മാലിന്യങ്ങളാണ് ചാക്കുകളിലാക്കി സൂക്ഷിച്ചിരിക്കുന്നത്. ഇതു മഴയും വെയിലുമേറ്റ് ചീഞ്ഞ് ദുര്‍ഗന്ധം വമിക്കുകന്ന സ്ഥിതിയിലാണ്. പുതിയതായി നിര്‍മിക്കുന്ന മാലിന്യസംഭരണ പ്ലാന്‍റ് ഇവിടെനിന്നു മാറ്റിയില്ലെങ്കില്‍ ശക്തമായ സമരപരിപാടികള്‍ സംഘടിപ്പിക്കുമെന്ന് നാട്ടുകാര്‍ പറയുന്നു.

വൈക്കത്ത്‌ ദേശീയ പണിമുടക്ക് പൂർണം

വൈക്കം: കേന്ദ്ര സർക്കാരിന്‍റെ തൊഴിലാളിദ്രോഹ നയങ്ങൾക്കെതിരേ സംയുക്ത ട്രേഡ് യൂണിയനുകളും സർക്കാർ ജീവനക്കാരുടെ ഫെഡറേഷനുകളും നടത്തിയ ദേശീയ പണിമുടക്ക് വൈക്കത്ത്‌ പൂർണം. സിവിൽ സ്റ്റേഷനിലെ ഉൾപ്പെടെ സർക്കാർ ഓഫീസുകളിൽ ജീവനക്കാർ എത്താത്തതിനെത്തുടർന്ന് സർക്കാർ ഓഫീസുകൾ തുറന്നു പ്രവർത്തിച്ചില്ല. സ്കൂളുകളും കോളജുകളും വ്യാപാരശാലകളും ചന്തകളും പെട്രോൾ പമ്പുകളും അടഞ്ഞുകിടന്നു. എന്നാൽ, ആശുപത്രികളുടെയും മരുന്നുകടകളുടെയും പ്രവർത്തനങ്ങൾക്ക് തടസമുണ്ടായില്ല. കെഎസ്ആർടിസി- സ്വകാര്യ ബസുകളും ഓട്ടോ ടാക്സികളും പണിമുടക്കി. സംയുക്ത ട്രേഡ് യൂണിയന്‍റെ നേതൃത്വത്തിൽ വൈക്കം തൊഴിലാളി ദ്രോഹ നയങ്ങൾക്കെതിരേ നഗരത്തിൽ പ്രകടനവും ബിഎസ്എൻഎൽ ഓഫീസ് മാർച്ചും നടത്തി. ദേവസ്വം ഗ്രൗണ്ടിൽനിന്ന് ആരംഭിച്ച മാർച്ച്‌ ബിഎസ്എൻഎൽ ഓഫീസിനു മുന്നിൽ സമാപിച്ചു. തുടർന്ന് ബിഎസ്എൻഎൽ ഓഫീസിനു മുന്നിൽ ചേർന്ന പ്രതിഷേധ സമരം സിഐടിയു സംസ്ഥാന കമ്മിറ്റി അംഗം കെ.കെ. ഗണേശൻ ഉദ്ഘാടനം ചെയ്തു. എ ഐ ടിയുസി നേതാവ് പി. സുഗതൻ അധ്യക്ഷത വഹിച്ചു. ടി.എൻ. രമേശൻ, പി.വി. പുഷ്കരൻ, പി.എസ്. പുഷ്കരൻ, എം.എൻ. അനിൽകുമാർ, സി.പി. പ്രമോദ്, ഏബ്രഹാം പഴയകടവൻ, സി.പി. ജയരാജ്‌, കെ.അജിത്, ടി.ജി. ബാബു, സി.കെ. ആശ എംഎൽഎ എന്നിവർ പ്രസംഗിച്ചു.

തെരുവുനായശല്യം വർധിക്കുന്നു

മണർകാട്: പെരുമാനുർ കുളം മുതൽ കണിയാംകുന്നു വരെയുള്ള ഭാഗത്ത് തെരുവുനായ ശല്യം രൂക്ഷമാകുന്നതായി പരാതി. പ്രദേത്തെ വീടുകളുടെ ഗേറ്റ് തുറന്നാൽ വീട്ടുമുറ്റത്തേക്ക് നായ്ക്കൾ ചാടി കടക്കും. ഭയം കാരണം ഇവ തിരികെ പോകുന്നവരെ വീടടച്ച് അകത്തിരിക്കുകയേ മാർഗമുള്ളൂവെന്ന് നാട്ടുകാർ പറയുന്നു. നായ്ക്കൾ കാരണം ബാങ്കിൽ വരാൻ ഇടപാടുകാർക്കു പേടിയാണെന്ന് ഇവിടെ പ്രവർത്തിക്കുന്ന ബാങ്കിലെ ജീവനക്കാരും പറ‍യുന്നു. കണിയാംകുന്ന് ഭാഗത്തു മൂന്ന് സ്കൂളുകളുണ്ട്. ഇന്നലെ നായ പിന്നാലെ വരുന്നതു കണ്ട് ഓടിയ വിദ്യാർഥിയുടെ കാലിനു റോഡിൽ വീണു പരിക്കേറ്റിരുന്നു. വഴിയിൽ കൂടെ നടക്കാൻ പോലും ഇപ്പോൾ ഭയമാണെന്നും പ്രശ്നം പരിഹരിക്കാൻ ബന്ധപ്പെട്ട അധികൃതർ നടപടിയെടുക്കണമെന്നുമാണ് നാട്ടുകാരുടെ ആവശ്യം.

സംരംഭക സംരക്ഷണത്തിന് നിയമം വേണം: ഫ്രാന്‍സിസ് ജോര്‍ജ്

കോട്ടയം: സംരംഭക സംരക്ഷണ നിയമനിര്‍മാണം നടത്തണമെന്നും സംരംഭങ്ങളുടെ നിലനില്പിനും വളര്‍ച്ചയ്ക്കും അനുയോജ്യമായ സാമ്പത്തിക പങ്കാളികളായി ധനകാര്യ സ്ഥാപനങ്ങള്‍ മാറണമെന്നും ഫ്രാന്‍സിസ് ജോര്‍ജ് എംപി. ബില്‍ഡേഴ്സ് അസോസിയേഷന്‍ ഓഫ് ഇന്ത്യ കോട്ടയം പ്രസ്‌ക്ലബ്ബില്‍ സംഘടിപ്പിച്ച സെമിനാര്‍ ഉദ്ഘാടനം ചെയ്യുകയായിരുന്നു അദ്ദേഹം. ബില്‍ഡേഴ്സ് അസോസിയേഷന്‍ ഏറ്റുമാനൂര്‍ സെന്‍റര്‍ ചെയര്‍മാന്‍ ഷാജി ഇലവത്തില്‍ അധ്യക്ഷത വഹിച്ചു. ചീഫ് കോ-ഓര്‍ഡിനേറ്റര്‍ എബി. എം. പൊന്നാട്ട്, ബില്‍ഡേഴ്സ് അസോസിയേഷന്‍ ഓഫ് ഇന്ത്യ സ്റ്റേറ്റ് ചെയര്‍മാന്‍ കെ.എ. ജോണ്‍സണ്‍, സുരേഷ് പൊറ്റക്കാട്, കേരള സ്റ്റേറ്റ് സ്‌മോള്‍ സ്‌കെയില്‍ ഇന്‍സ്ട്രീസ് അസോസിയേഷന്‍ ജില്ലാ പ്രസിഡന്‍റ് കെ. ദിലീപ് കുമാര്‍, കിഫ്ബി കോണ്‍ട്രാക്‌ടേഴ്‌സ് അസോസിയേഷന്‍ സെക്രട്ടറി പോള്‍ ടി. മാത്യു, ഗവൺമെന്‍റ് കോണ്‍ട്രാക്ടേഴ്‌സ് അസോസിയേഷന്‍ പ്രസിഡന്‍റ് വര്‍ഗീസ് കണ്ണമ്പള്ളി, എംഎസ്എംഇ ബോറവേഴ്സ് അസോസിയേഷന്‍ പ്രസിഡന്‍റ് ജോഷ് ലോറന്‍സ് എന്നിവര്‍ പ്രസംഗിച്ചു.

മാന്നാനം പാലത്തിന്‍റെ ‌നിര്‍മാണം പുനരാരംഭിക്കുന്നു

കോട്ടയം: സാങ്കേതിക പ്രശ്നങ്ങളെത്തുടര്‍ന്ന് മുടങ്ങിക്കിടന്നിരുന്ന മാന്നാനം പാലത്തിന്‍റെ നിര്‍മാണം പുനരാരംഭിക്കുന്നു. കെഎസ്ടിപിയുടെ നേതൃത്വത്തില്‍ റീ ബില്‍ഡ് കേരള പദ്ധതിയില്‍ ഉള്‍പ്പെടുത്തി 24.83 കോടി രൂപ ചെലവഴിച്ചാണ് പാലം നിര്‍മിക്കുന്നത്. ദേശീയ ജലപാതാ മാനദണ്ഡങ്ങള്‍ പാലിച്ച് നിര്‍മിക്കുന്ന പുതിയ പാലം 228.7 മീറ്റര്‍ നീളത്തിലും 12 മീറ്റര്‍ വീതിയിലും വര്‍ഷകാല ജലനിരപ്പില്‍നിന്ന് ആറു മീറ്റര്‍ ഉയരത്തിലുമാണ് പണിയുന്നത്. നീണ്ടൂര്‍, അതിരമ്പുഴ പഞ്ചായത്തുകളെ ബന്ധിപ്പിച്ച് മാന്നാനം-നീണ്ടൂര്‍ റോഡില്‍ പെണ്ണാര്‍ തോടിനു കുറുകെയാണ് പാലം. മാന്നാനംപാലം പൊളിച്ച് പുതുക്കിപ്പണിയാന്‍ മുന്പേ നടപടികളാവുകയും പണികള്‍ തുടങ്ങുന്ന ഘട്ടത്തിലെത്തുകയും ചെയ്തിരുന്നതാണ്. എന്നാല്‍ പെണ്ണാര്‍ തോട് ദേശീയ ജലപാതയിലുള്‍പ്പെടുത്തി വിജ്ഞാപനം വന്നതോടെയാണ് ഒരു വര്‍ഷമായി നിര്‍മാണം മുടങ്ങിക്കിടന്നിരുന്നത്. ദേശീയ ജലപാതയുടെ മുകളിലുള്ള പാലങ്ങള്‍ക്ക് നിയമമനുസരിച്ച് 41 മീറ്റര്‍ നീളം, 12 മീറ്റര്‍ വീതി, വര്‍ഷകാലജലനിരപ്പില്‍ നിന്ന് ആറു മീറ്റര്‍ ഉയരം എന്നിവ വേണം. നിര്‍മാണം ആരംഭിച്ച പാലത്തിന് 10 മീറ്റര്‍ നീളവും നാലു മീറ്റര്‍ വീതിയുമായിരുന്നു. മന്ത്രി വി.എന്‍. വാസവന്‍റെ ഇടപെടലിനെത്തുടര്‍ന്നാണ് ദേശീയ ജലപാതാ മാനദണ്ഡങ്ങള്‍ പാലിച്ച് പുതിയ പാലം നിര്‍മിക്കാന്‍ പുതിയ രൂപരേഖ തയാറാക്കിയത്. ഒരേസമയം ഒരു വാഹനത്തിനു മാത്രം കടന്നുപോകാവുന്ന വീതിയേ പഴയ പാലത്തിന് ഉണ്ടായിരുന്നുള്ളൂ. പാലത്തിന്‍റെ കൈവരികളും ബീമുകളും ദ്രവിച്ച നിലയിലാണ്. പാലം പണി മുടങ്ങിയത് പ്രദേശത്തെ ജനങ്ങളെ തീരാദുരിതത്തിലാക്കിയിരുന്നു. മാന്നാനത്തുനിന്ന് നീണ്ടൂര്‍ ഭാഗത്തേക്കു പോകുന്ന വാഹനങ്ങള്‍ ഇപ്പോള്‍ വില്ലൂന്നിയിലെത്തിയാണ് യാത്ര തുടരുന്നത്. പുതിയ പാലം വരുന്നതോടെ കല്ലറ, നീണ്ടൂര്‍ ഭാഗങ്ങളില്‍നിന്നെത്തുന്നവര്‍ക്ക് എളുപ്പത്തില്‍ മാന്നാനത്തേക്കും മെഡിക്കല്‍ കോളജിലേക്കുമൊക്കെ എത്താനാവും. മാന്നാനത്തെ വിദ്യാഭ്യാസസ്ഥാപനങ്ങളില്‍ പഠിക്കുന്ന നൂറുകണക്കിനു വിദ്യാര്‍ഥികള്‍ക്കും സൗകര്യമാവും.

വളര്‍ത്തുനായ്ക്കളെ വഴിയില്‍ ഉപേക്ഷിക്കുന്നതു വ്യാപകമെന്ന്

പാമ്പാടി: വളര്‍ത്തുനായ്ക്കളെ വാഹനങ്ങളില്‍ കൊണ്ടുവന്ന് വഴിയില്‍ ഉപേക്ഷിക്കുന്നതു വ്യാപകം. പൂതകുഴി, നെടുങ്ങോട്ടുമല, കന്നുവെട്ടി, ഇല്ലിമറ്റം തുടങ്ങിയ പ്രദേശങ്ങളിലാണ് വളര്‍ത്തുനായ്ക്കളെ ഉപേക്ഷിക്കുന്നത്. രോഗം ബാധിച്ചവയും പ്രായാധിക്യമുള്ളവയും വിദേശത്തു താമസമാക്കാന്‍ ഒരുങ്ങുന്നവരുടെയും നായ്ക്കളാണ് ഉപേക്ഷിക്കപ്പെടുന്നവയില്‍ കൂടുതലും. ഇത്തരം നായ്ക്കളെ ഉപേക്ഷിക്കാന്‍ ഉയര്‍ന്ന വാടകയ്ക്ക് സ്ഥിരമായി ഓടുന്ന വാഹനങ്ങളുമുണ്ട്. കര്‍ശന പരിശോധന മൂലം വഴിയില്‍ ഭക്ഷ്യമാലിന്യങ്ങള്‍ ഉപേക്ഷിക്കുന്നതു കുറഞ്ഞത് പട്ടികളെ വളര്‍ത്തുകോഴികളെ പിടിച്ചു ഭക്ഷണമാക്കാന്‍ നിര്‍ബന്ധിതരാക്കുന്നു. വലിയ ഫാമുകളിലും വീടുകളില്‍ വളര്‍ത്തുന്ന കോഴികളെയും ഒരുപോലെ ഇവ ആക്രമിക്കുകയാണ്. കഴിഞ്ഞ മൂന്നുമാസത്തിനുള്ളില്‍ പതിനായിരത്തോളം കോഴികളാണ് നായ്ക്കളുടെ ആക്രമണത്തിനിരയായത്. അതീവ ഗൗരവമേറിയ ഈ വിഷയം പരിഹരിക്കാന്‍ കര്‍ശന നടപടി സ്വീകരിക്കണമെന്ന് കര്‍ഷക കോണ്‍ഗ്രസ് ജില്ലാ ജനറല്‍ സെക്രട്ടറി എബി ഐപ്പ് ആവശ്യപ്പെട്ടു.

വനിതാ കമ്മീഷന്‍ സെമിനാര്‍ ഇന്ന്

കോട്ടയം: സംസ്ഥാന വനിതാ കമ്മീഷനും ജില്ലാ പഞ്ചായത്തും സംയുക്തമായി സ്ത്രീകളും ആരോഗ്യവും, സൈബര്‍ ഇടങ്ങളിലെ ചതിക്കുഴികള്‍ എന്നീ വിഷയങ്ങളില്‍ സംസ്ഥാനതല സെമിനാര്‍ സംഘടിപ്പിക്കും. ജില്ലാ പഞ്ചായത്ത് ഹാളില്‍ ഇന്നു രാവിലെ 10ന് വനിതാ കമ്മീഷന്‍ അംഗം അഡ്വ. ഇന്ദിര രവീന്ദ്രന്‍ സെമിനാര്‍ ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ അധ്യക്ഷത വഹിക്കും. ചങ്ങനാശേരി ജനറല്‍ ആശുപത്രി ഗൈനക്കോളജിസ്റ്റ് കണ്‍സള്‍ട്ടന്‍റ് ഡോ.എല്‍. ലതാകുമാരി, കേരള പോലീസ് സൈബര്‍ എക്‌സ്‌പേര്‍ട്ട് ബി. ശ്യംകുമാര്‍, ജില്ലാ പഞ്ചായത്തംഗങ്ങളായ വൈസ് പ്രസിഡന്‍റ് ജോസ് പുത്തന്‍കാലാ, പി.ആര്‍. അനുപമ, പി.എം. മാത്യു, മഞ്ജു സുജിത്, ഹൈമി ബോബി, ജില്ലാ പഞ്ചായത്ത് സെക്രട്ടറി പി.എസ്. ഷിനോ, കേരള വനിതാ കമ്മീഷന്‍ മെംബര്‍ സെക്രട്ടറി വൈ.ബി. ബീന, കേരള വനിതാ കമ്മീഷന്‍ റിസര്‍ച്ച് ഓഫീസര്‍ എ.ആര്‍. അര്‍ച്ചന എന്നിവര്‍ പങ്കെടുക്കും.

എസ്എഫ്ഐക്കാരെ അറസ്റ്റ് ചെയ്യണമെന്ന്

കോട്ടയം: കാലിക്കറ്റ് സര്‍വകലാശാലയില്‍ ജീവനക്കാരെ ക്രൂരമായി ആക്രമിക്കുകയും ഗുരുതരമായി പരിക്കേല്‍പ്പിക്കുകയും ചെയ്ത എസ്എഫ്‌ഐക്കാരെ ജാമ്യമില്ലാ വകുപ്പു പ്രകാരം കേസ് ചുമത്തി അറസ്റ്റ് ചെയ്യണമെന്ന് ഫെഡറേഷന്‍ ഓഫ് ഓള്‍ കേരള യൂണിവേഴ്‌സിറ്റി എംപ്ലോയീസ് ഓര്‍ഗനൈസേഷന്‍സ് സംസ്ഥാന കമ്മിറ്റി ആവശ്യപ്പെട്ടു. അതിക്രൂരമായ ആക്രമണത്തില്‍ പോലീസ്, കേസ് രജിസ്റ്റര്‍ ചെയ്തു കുറ്റക്കാരെ അറസ്റ്റ് ചെയ്യണമെന്നവശ്യപ്പെട്ട് ഇന്നു കേരളത്തിലെ എല്ലാ സര്‍വകലാശാലകളിലും പ്രതിഷേധസമരം സംഘടിപ്പിക്കുമെന്ന് ഫെഡറേഷന്‍ സംസ്ഥാന പ്രസിഡന്‍റ് എന്‍. മഹേഷ്, ജനറല്‍ സെക്രട്ടറി ജയന്‍ ചാലില്‍, ട്രഷറര്‍ കെ. എസ്. ജയകുമാര്‍ എന്നിവര്‍ അറിയിച്ചു.

ദേശീയ പണിമുടക്ക് പാന്പാടിമേഖലയിൽ പൂർണം

പാമ്പാടി: ഇന്നലെ നടന്ന ദേശീയ പണിമുടക്ക് മണർകാട്, പുതുപ്പള്ളി, മീനടം, പാമ്പാടി, കൂരോപ്പട, വാഴൂർ തുടങ്ങിയ സ്ഥലങ്ങളിൽ പൂർണമായിരുന്നു. വ്യാപാര സ്ഥാപനങ്ങളൊന്നും തുറന്നു പ്രവർത്തിച്ചില്ല. രാവിലെ തുറന്ന ബാങ്കുകൾ ഉൾപ്പെടെയുള്ള ധനകാര്യ സ്ഥാപനങ്ങൾ പണിമുടക്കനുകൂലികളെത്തി അടപ്പിച്ചു. ഒരിടത്തും ഇടപാടുകാരെത്തിയില്ല. കൃഷിഭവൻ, എഇഒ ഓഫീസുകളൊന്നും തുറന്നില്ലെങ്കിലും പാമ്പാടി വില്ലേജ് ഓഫീസ് തുറന്നുപ്രവർത്തിച്ചു. സിപിഎം പ്രവർത്തകരെത്തി വില്ലേജ് ഓഫീസ് അടപ്പിക്കാൻ ശ്രമിച്ചെങ്കിലും പോലീസെത്തി അനിഷ്ടസംഭവങ്ങൾ ഒഴിവാക്കി. വൈകുന്നേരം അഞ്ചുവരെ ഓഫീസ് തുറന്നിരിക്കണമെന്ന് വില്ലേജ് ഓഫീസറുടെ ചുമതലയുള്ള അസിസ്റ്റന്‍റിന് താക്കീതു നൽകിയാണ് സമരാനുകൂലികൾ പിരിഞ്ഞുപോയത്. ഇരുചക്ര വാഹനങ്ങളും സ്വകാര്യ കാറുകളും നിരത്തിലിറങ്ങി. ഹോട്ടലുകളൊന്നും പ്രവർത്തിക്കാതിരുന്നതിനാൽ ടൗണുകളിലെത്തിയവർ ഭക്ഷണം കിട്ടാതെ വലഞ്ഞു.

ജോലിചെയ്യുന്ന ബാങ്കിൽനിന്നു പണം തട്ടിയ യുവാവ് പിടിയിൽ

ഗാന്ധിനഗര്‍: എച്ച്ഡിഎഫ്‌സി ബാങ്ക് കുമാരനല്ലൂര്‍ ബ്രാഞ്ചില്‍ സാമ്പത്തിക ക്രമക്കേടുകള്‍ നടത്തിയ ജീവനക്കാരന്‍ അറസ്റ്റില്‍. പനച്ചിക്കാട് ഐമാന്‍ കവല മലയില്‍ ടോണി വര്‍ഗീസ് (31) ആണ് അറസ്റ്റിലായത്. പ്രതി ടെല്ലറായി ജോലി ചെയ്തു വന്നിരുന്ന എച്ച്ഡിഎഫ്‌സി സംക്രാന്തി ബ്രാഞ്ചിന്‍റെ കൗണ്ടറില്‍നിന്നും 2024 നവംബര്‍ 21ന് ഉച്ചയ്ക്ക് ഒന്നിനും വൈകുന്നേരം അഞ്ചിനും ഇടയ്ക്കുള്ള സമയത്ത് പ്രതി ബാങ്കിന്‍റെതന്നെ രണ്ട് അക്കൗണ്ടുകളില്‍ മൂന്നു ലക്ഷം രൂപ നിക്ഷേപിച്ചതായി ഡെപ്പോസിറ്റ് സ്ലിപ്പില്‍ എഴുതി ഒപ്പിട്ട് ബാങ്കില്‍ വയ്ക്കുകയായിരുന്നു. തുടര്‍ന്ന് അന്നേദിവസം ഉച്ചയ്ക്ക് ഒന്നിന് മറ്റൊരു അക്കൗണ്ടിലേക്ക് രണ്ടു ലക്ഷം രൂപയും പകല്‍ 3.30ഓടെ വേറൊരു അക്കൗണ്ടിലേക്ക് ഒരു ലക്ഷം രൂപയും ട്രാന്‍സ്ഫര്‍ ചെയ്ത് പിന്‍വലിച്ചെടുത്തു. തുടര്‍ന്ന് കാഷ് കൗണ്ടറില്‍നിന്ന് 1,100 രൂപ പണമായും ഇയാള്‍ എടുത്തു. ആകെ 3,01,100 രൂപ ബാങ്കില്‍നിന്നും തട്ടിയെടുത്തതായാണ് അന്വേഷണത്തിലൂടെ കണ്ടെത്തിയത്. സംഭവത്തില്‍ പ്രതി സ്റ്റേഷനില്‍ കീഴടങ്ങിയതിനെത്തുടര്‍ന്ന് അറസ്റ്റ് രേഖപ്പെടുത്തി കോടതിയില്‍ ഹാജരാക്കി. പ്രതിയെ റിമാന്‍ഡ് ചെയ്തു.

1.713 കിലോ കഞ്ചാവുമായി മൂന്നു പേര്‍ പിടിയില്‍

കോട്ടയം: വീടിനുള്ളില്‍നിന്നും വില്പനയ്ക്കായി എത്തിച്ച കഞ്ചാവുമായി സ്ത്രീ ഉള്‍പ്പെടെ മൂന്നു പേര്‍ പിടിയില്‍. കാരാപ്പുഴ പയ്യമ്പിള്ളിച്ചിറയില്‍ ഈശ്വരി (47), പൂത്തറ ഹൗസില്‍ അഖില്‍ പി. രാജ്(27), മലരിക്കല്‍ ചുങ്കത്ത് ഹൗസില്‍ അക്ഷയ് സി. അജി (26) എന്നിവരെയാണ് വെസ്റ്റ് പോലീസ് അറസ്റ്റ് ചെയതത്. ജില്ലാ പോലീസ് ചീഫ് എ. ഷാഹുല്‍ ഹമീദിനു ലഭിച്ച രഹസ്യവിവരത്തെത്തുടര്‍ന്ന് ഇന്നലെ രാത്രി 12.30ന് നടത്തിയ പരിശോധനയില്‍ ഒന്നാം പ്രതിയായ ഈശ്വരിയും കുടുംബവും താമസിച്ചുവരുന്ന വീട്ടിൽനിന്നാണ് 1.713 കിലോഗ്രാം കഞ്ചാവുമായി മൂന്നു പ്രതികളെയും പിടികൂടിയത്. കേസിലെ പ്രതികളായ അഖില്‍, അക്ഷയ് എന്നിവര്‍ ലഹരിവസ്തുക്കള്‍ കച്ചവടത്തിനായി സൂക്ഷിച്ച നിരവധി കേസുകളിലെ പ്രതികളാണ്. ഒന്നാംപ്രതി ഈശ്വരിയുടെ മകന്‍ സുന്ദര്‍ ഗണേഷ് കാപ്പാ നിയമപ്രകാരം ജില്ലയില്‍നിന്നു നാടുകടത്തപ്പെട്ട പ്രതിയാണ്. ഇയാള്‍ക്കെതിരേ തിരുപ്പൂരില്‍ എട്ടു കിലോ കഞ്ചാവുമായി പിടിക്കപ്പെട്ട കേസും നിലവിലുണ്ട്. പ്രതികളെ കോടതിയില്‍ ഹാജരാക്കി.

മഴ മാറി മാനം തെളിഞ്ഞു : വെള്ളപ്പൊക്കദുരിതത്തില്‍നിന്നു കുമരകത്തിന് മോചനം അകലെ

കുമരകം: കുമരകം നിവാസികള്‍ക്കു വെള്ളപ്പൊക്കമെന്നത് പണ്ടു വര്‍ഷകാലത്ത് മാത്രമായെത്തുന്ന അതിഥിയായിരുന്നുവെങ്കില്‍ ഇന്നു കുമരകത്തെ നിത്യസന്ദര്‍ശകനായ വില്ലനായി മാറിയിരിക്കുന്നു. കുമരകത്തെ ഭൂരിഭാഗം പ്രദേശങ്ങളിലെയും ആറുകളും തോടുകളും ചെറുചാലുകളുമെല്ലാം പോളയും പുല്‍ക്കെട്ടുകളും തിങ്ങിനിറഞ്ഞും എക്കലും ചെളിയും അടിഞ്ഞും നീരൊഴുക്ക് നിലച്ചിരിക്കുന്ന അവസ്ഥയിലാണ്. വര്‍ഷങ്ങള്‍ക്കുമുന്പ് കുമരകത്ത് വേമ്പനാട്ട് കായലിലേക്ക് വെള്ളം ഒഴുകിപ്പോയിരുന്നതും ജല ഗതാഗതത്തിനും മറ്റും ഉപയോഗിച്ചിരുന്ന പല തോടുകളും ഇപ്പോള്‍ നാമമാത്രമായി മാറി. പല തോടുകളും ഓടകള്‍ക്കു സമാനമായി എന്നു പറയുന്നതില്‍ ഒട്ടും അതിശയോക്തിയില്ല. ഭരണാധികാരികള്‍ക്ക് ഇതൊന്നും അറിവില്ലാത്ത കാര്യമല്ല. എന്നാൽ, ഈ ദുരിതത്തിന് ശാശ്വതപരിഹാരം കണ്ടെത്താന്‍ ആരും ശ്രമിക്കുന്നില്ല. മുന്‍കാലങ്ങളില്‍ വെള്ളപ്പൊക്കം ഉണ്ടായാല്‍ നാല്, അഞ്ച് ദിവസങ്ങള്‍കൊണ്ട് വെള്ളം ഇറങ്ങിപ്പോകുമായിരുന്നു. കഴിഞ്ഞ രണ്ട് മൂന്നു വര്‍ഷങ്ങളായി ഈ അവസ്ഥ മാറിയിട്ടുണ്ട്. കിഴക്കന്‍ വെള്ളവും പെയ്ത്തൂ വെള്ളവും കൃത്യമായി കായലിലേക്കും തുടര്‍ന്ന് കടലിലേക്കും ഒഴുകിപ്പോകുന്നതിന് ഉണ്ടായിട്ടുള്ള തടസങ്ങള്‍ ഏറെയാണ്. കുമരകത്തിന്‍റെ ഹൃദയഭാഗമായ കുമരകം മത്സ്യമാര്‍ക്കറ്റിന്‍റെ സമീപത്തുകൂടി ഒഴുകിയിരുന്ന തോട് ഇപ്പോള്‍ ഓടയായി മാറിക്കഴിഞ്ഞു. മുന്‍കാലങ്ങളില്‍ മത്സ്യത്തൊഴിലാളികള്‍ ഈ തോട്ടിലൂടെ വള്ളത്തിലെത്തി മത്സ്യവ്യാപാരം നടത്തിയിരുന്നുവെന്നത് ഇപ്പോഴത്തെ അവസ്ഥ കണ്ടാല്‍ ആരും വിശ്വസിക്കില്ല. മാത്രമല്ല, ഇപ്പോള്‍ ഈ തോട് കുപ്പത്തൊട്ടിയായും മാറി. ഇതുപോലെ നിരവധി തോടുകളാണു കുമരകത്തിന്‍റെ വിവിധ പ്രദേശങ്ങളില്‍ വീതി കുറഞ്ഞും എക്കലും ചെളിയും അടിഞ്ഞും നാമാവശേഷമായിക്കൊണ്ടിരിക്കുന്നത്. കുമരകത്തിന്‍റെ പ്രവേശനകവാടമായ രണ്ടാം കലുങ്ക് തോട്, ഒന്നാം കലുങ്ക് തോട് തുടങ്ങി ഉദാഹരണങ്ങള്‍ ഏറെയാണ്. വര്‍ഷകാല ആരംഭത്തില്‍ത്തന്നെ വെള്ളപ്പൊക്കത്തെ നേരിടേണ്ടി വരുന്ന അവസ്ഥ, ലോകത്തിലെതന്നെ പ്രധാന വിനോദസഞ്ചാര കേന്ദ്രങ്ങളില്‍ ഒന്നായ കുമരകത്തിന്‍റെ പ്രശസ്തിക്കും മങ്ങലേൽപ്പിക്കുന്നു. മികച്ച ടൂറിസം ഗ്രാമം എന്ന പദവിക്കൊപ്പം, ദുരിതം പേറുന്ന ഗ്രാമമെന്ന പദവിയും കുമരകത്തിന് അനുയോജ്യമായി തീര്‍ന്നിരിക്കുകയാണ്. തോടുകള്‍ റോഡുകള്‍ക്കായി ശോഷിച്ചതും പാലങ്ങളുടെ കാലുകളില്‍ പോളയും വലിയ പുല്‍ക്കെട്ടുകളും തങ്ങിനില്‍ക്കുന്നതും നീരൊഴുക്കിനെ സാരമായി ബാധിക്കുന്നു. കുമരകത്തെ പ്രധാന തോടുകളിലൊന്നായ കോട്ടത്തോട്ടില്‍ ചന്തഭാഗത്തെ പാലങ്ങളില്‍ പുല്‍ക്കെട്ടുകള്‍ തങ്ങി നില്‍ക്കുന്നതു സ്ഥിരം കാഴ്ചയാണ്. യാത്രാ ദുരിതം മാറാന്‍ പുതുക്കിപ്പണിയാന്‍ പൊളിച്ച കോണത്താറ്റു പാലവും ഇപ്പോള്‍ വെള്ളപ്പൊക്കദുരിതത്തിനു കാരണമാകുന്നുണ്ട്. പാലം പണിയാന്‍ നിര്‍മിച്ച താത്കാലിക ബണ്ട് ആശുപത്രി തോട്ടിലൂടെയുള്ള നീരൊഴുക്കിനെ തടസപ്പെടുത്തുന്നു. പാലം നിര്‍മാണത്തിനായി പൈലിംഗ് നടത്തിയപ്പോള്‍ ഉണ്ടായ ചെളിയും എക്കലും കോട്ടത്തോട്ടില്‍ ഒഴുകിയെത്തിയതും നീരൊഴുക്ക് നിലയ്ക്കാന്‍ പ്രധാന കാരണമാണ്. ശ്രീനാരായണ മത്സര വള്ളംകളി നടക്കാന്‍ ഏതാനും മാസം ബാക്കിനില്‍ക്കേ എക്കലും ചെളിയും നിറഞ്ഞ് ആഴംകുറഞ്ഞ തോടിന്‍റെ അവസ്ഥ വള്ളംകളിയെ പ്രതികൂലമായി ബാധിക്കുമെന്ന ആശങ്ക കുമരകത്തെ ജലോത്സവപ്രേമികള്‍ പങ്കുവയ്ക്കുന്നുണ്ട്. വേമ്പനാട്ടു കായലിലും ചെറുതോടുകളിലും കൈയേറ്റം നടക്കുന്നുവെന്ന കാര്യം പലതവണ മാധ്യമങ്ങള്‍ റിപ്പോര്‍ട്ട് ചെയ്തിട്ടും കാര്യക്ഷമമായ നടപടികള്‍ ഉണ്ടായിട്ടില്ലെന്നത്കൈയേറ്റങ്ങള്‍ തുടരുവാന്‍ പ്രേരകമാകുന്നുവെന്നാണ് നാട്ടുകാരുടെ ആക്ഷേപം. പഞ്ചായത്തും ജലസേചന വകുപ്പും മുന്‍കൈയെടുത്ത് കുമരകത്തെ തോടുകൾ പുനരുദ്ധരിച്ച് നീരൊഴുക്ക് വർധിപ്പിക്കുന്നതിലൂടെ ഗ്രാമീണ ടൂറിസം മേഖലയ്ക്കു പുത്തനുണര്‍വ് ഉണ്ടാകുന്നതോടൊപ്പം കുമരകം നിവാസികള്‍ക്കു കൂടുതല്‍ തൊഴിലവസരങ്ങള്‍ ലഭ്യമാകുകയും ചെയ്യും. വര്‍ഷകാലം പിന്‍വാങ്ങാന്‍ ഇനിയും ആഴ്ചകള്‍ ബാക്കിനില്‍ക്കവേ, വീണ്ടുമൊരു വെള്ളപ്പൊക്ക ദുരിതമനുഭവിക്കുവാന്‍ അവസര മൊരുക്കരുതേ എന്നാണ് നാട്ടുകാരുടെ അഭ്യര്‍ഥന.

പണിമുടക്കില്‍ ജനം വലഞ്ഞു

കോട്ടയം: കേന്ദ്രസര്‍ക്കാരിന്‍റെ തൊഴിലാളി വിരുദ്ധ നയങ്ങള്‍ക്കെതിരേ സംയുക്ത കേന്ദ്ര ട്രേഡ് യൂണിയനുകളും ജീവനക്കാരുടെ ഫെഡറേഷനുകളും ആഹ്വാനം ചെയ്ത അഖിലേന്ത്യാ പണിമുടക്ക് ജില്ലയില്‍ ജനജീവിതത്തെ ബാധിച്ചു. വിവിധയിടങ്ങളില്‍ സമരാനുകൂലികള്‍ കെഎസ്ആര്‍ടിസി ബസുകളും ടാക്‌സി വാഹനങ്ങളും തടഞ്ഞു. ചങ്ങനാശേരിയില്‍ ഹെഡ്‌പോസ്‌റ്റോഫീസ് ജീവനക്കാരനു സമരാനുകൂലികളുടെ മര്‍ദനമേറ്റു. സ്വകാര്യ വാഹനങ്ങള്‍ യഥേഷ്ടം നിരത്തിലുണ്ടായിരുന്നു. സ്വകാര്യ ബസുകള്‍ നിരത്തിലിറങ്ങാതെ പൂര്‍ണമായും പണിമുടക്കില്‍ പങ്കുചേര്‍ന്നു. കെഎസ്ആര്‍ടിസിയിലും പണിമുടക്ക് പൂര്‍ണമായിരുന്നു. ചില ഡിപ്പോകളില്‍ ഏതാനും സര്‍വീസുകള്‍ അയച്ചു. ഈരാറ്റുപേട്ട, കാഞ്ഞിരപ്പള്ളി എന്നിവിടങ്ങളില്‍ സമരാനുകൂലികള്‍ കെഎസ്ആര്‍ടിസി ബസുകള്‍ തടഞ്ഞു. ജീവനക്കാരുടെ ഫെഡറേഷനുകളും പണിമുടക്കില്‍ പങ്കെടുത്തതോടെ സര്‍ക്കാര്‍ ഓഫീസുകളില്‍ ജീവനക്കാരുടെ എണ്ണം കുറവായിരുന്നു. കളക്ടറേറ്റില്‍ ഹാജര്‍നില തീര്‍ത്തും കുറവായിരുന്നു. സ്‌കൂളുകളും പ്രവര്‍ത്തിച്ചില്ല. വ്യാപാരികളും പണിമുടക്കില്‍ പങ്കുചേര്‍ന്ന് തുറന്നില്ല. ചെറിയ തട്ടുകടകളും ഏതാനും കടകളും തുറന്നുപ്രവര്‍ത്തിച്ചു. മെഡിക്കല്‍ ഷോപ്പുകള്‍ തുറന്നു പ്രവര്‍ത്തിച്ചു. പൊതുഗതാഗതം സ്തംഭിച്ചതോടെ മാര്‍ക്കറ്റുകള്‍ ഉള്‍പ്പെടെ വ്യാപാര മേഖല ജില്ലയില്‍ പൂര്‍ണമായും നിശ്ചലമായിരുന്നു. കര്‍ഷകരും തൊഴിലാളികളും കേന്ദ്ര, സംസ്ഥാന സര്‍ക്കാര്‍ ജീവനക്കാരും അധ്യാപകരും പൊതുമേഖലാ ജീവനക്കാരും ബാങ്കിംഗ്, ഇന്‍ഷ്വറന്‍സ് ജീവനക്കാരും പണിമുടക്കില്‍ പങ്കെടുത്തതോടെ ബാങ്കിംഗ്, ഇന്‍ഷ്വറന്‍സ്, പൊതുമേഖല സ്ഥാപനങ്ങളും ഫാക്ടറികളും പണിയിടങ്ങളും സ്തംഭിച്ചു. അവശ്യ സര്‍വീസുകളായ ആശുപത്രി, പാല്‍, പത്രം എന്നിവയെ പണിമുടക്കില്‍ നിന്നൊഴിവാക്കിയിരുന്നു. പണിമുടക്കിന്‍റെ ഭാഗമായി സംയുക്ത ട്രേഡ് യൂണിയന്‍ ജില്ലാ കോഓര്‍ഡിനേഷന്‍ കമ്മിറ്റിയുടെ ആഭിമുഖ്യത്തില്‍ ജില്ലാതല പ്രകടനം കോട്ടയത്ത് നടന്നു. തിരുനക്കരയില്‍ ആരംഭിച്ച പ്രകടനം നഗരത്തിലെ വിവിധ ഭാഗങ്ങള്‍ ചുറ്റി തിരുനക്കര സ്വകാര്യ ബസ് സ്റ്റാന്‍ഡ് മൈതാനത്ത് അവസാനിച്ചു. തുടര്‍ന്ന് ചേര്‍ന്ന പൊതുസമ്മേളനം സിഐടിയു സംസ്ഥാന വൈസ്പ്രസിഡന്‍റ് ടി. ആര്‍. രഘുനാഥന്‍ ഉദ്ഘാടനം ചെയ്തു. എഐടിയുസി ജില്ലാ സെക്രട്ടറി വി.കെ. സന്തോഷ്‌കുമാര്‍ അധ്യക്ഷനായി. കെ. അനില്‍കുമാര്‍, വി.ബി. ബിനു, സി. കെ. ശശിധരന്‍, കെ.ആര്‍. അജയ്, എം.കെ. പ്രഭാകരന്‍, പി.ജെ. വര്‍ഗീസ്, പി.കെ. ആനന്ദക്കുട്ടന്‍, രാജീവ് നെല്ലിക്കുന്നേല്‍, പോള്‍സണ്‍ പീറ്റര്‍, സി.കെ. സുഹൈബ, സജീഷ് സ്‌കറിയ, എം.കെ. ദിലീപ്, സീമ എസ്. നായര്‍ തുടങ്ങിയവര്‍ പ്രസംഗിച്ചു. പാലാ, ഈരാറ്റുപേട്ട, കാഞ്ഞിരപ്പള്ളി, ചങ്ങനാശേരി, ഏറ്റുമാനൂര്‍, കടുത്തുരുത്തി, വൈക്കം, പാമ്പാടി എന്നിവിടങ്ങളിലും പ്രദേശികതലങ്ങളിലും കേന്ദ്ര സര്‍ക്കാര്‍ ഓഫീസുകള്‍ക്കു മുമ്പില്‍ പ്രകടനവും പ്രതിഷേധ കൂട്ടായ്മകളും നടന്നു. പണിമുടക്ക് കാഞ്ഞിരപ്പള്ളി താലൂക്കില്‍ പൂര്‍ണമായിരുന്നു. രാവിലെ തുറന്ന ചില കടകളും ബാങ്കുകളും സമരക്കാര്‍ വന്ന് അടപ്പിച്ചു. നിരത്തിലിറങ്ങിയ കെഎസ്ആര്‍ടിസി, ടാക്‌സി വാഹനങ്ങളും സമരക്കാര്‍ തടഞ്ഞു. കാഞ്ഞിരപ്പള്ളി സിവില്‍ സ്റ്റേഷനില്‍ തഹസില്‍ദാര്‍ ഉള്‍പ്പെടെ വിവിധ ഓഫീസുകളിലായി 14 ജീവനക്കാര്‍ മാത്രമാണ് എത്തിയത്. വൈക്കത്ത് പണിമുടക്ക് പൂർണമായിരുന്നു. കെഎസ്ആർടിസി,സ്വകാര്യബസുകൾ നിരത്തിലിറങ്ങിയില്ല. വൈക്കം -തവണക്കടവ്, പൂത്തോട്ട - പെരുമ്പളം ബോട്ട് സർവീസുകളും വൈക്കം - തവണക്കടവ്, നേരേകടവ് - മാക്കേക്കടവ്, ചെമ്മനാകരി - മണപ്പുറം ചങ്ങാട സർവീസും നിലച്ചു. കോവിലകത്തുംകടവ്, ചെമ്പ്, തലയോലപ്പറമ്പ് മാർക്കറ്റുകളും അടഞ്ഞുകിടന്നു. പൊതുപണിമുടക്ക് ചങ്ങനാശേരി മേഖലയിലും പൂര്‍ണം. സ്വകാര്യവാഹനങ്ങള്‍ ഓടി. വ്യാപാര സ്ഥാപനങ്ങള്‍ അടഞ്ഞുകിടന്നു. തുറന്നുപ്രവര്‍ത്തിച്ച ചങ്ങനാശേരി ഹെഡ്‌പോസ്റ്റ് ഓഫീസിലേക്കു തള്ളിക്കയറിയ സമരാനുകൂലികളും ജീവനക്കാരുമായി തര്‍ക്കമുണ്ടാകുകയും ബിജെപി അനുകൂല സംഘടനയായ ഭാരതീയ പോസ്റ്റല്‍ എംപ്ലോയീസ് ഫെഡറേഷന്‍ ചങ്ങനാശേരി ഡിവിഷന്‍ സെക്രട്ടറിയും പോസ്റ്റുമാനുമായ കാവാലം നാരകത്തറ സ്വദേശി വിഷ്ണു ചന്ദ്രന് മര്‍ദനമേല്‍ക്കുകയും ചെയ്തു. ഈരാറ്റുപേട്ടയിൽ സമരാനുകൂലികൾ കെഎസ്ആർടിസി ബസും സ്വകാര്യ വാഹനങ്ങളും തടഞ്ഞു. ഈരാറ്റുപേട്ട ഡിപ്പോയിൽ നിന്നും ആലപ്പുഴയിലേക്ക് സർവീസ് ആരംഭിച്ച ബസാണ് സെൻട്രൽ ജംഗ്ഷനിൽ തടഞ്ഞത്. കട്ടപ്പനയിൽ നിന്നും എത്തിയ ബസും നഗരത്തിൽ തടഞ്ഞു. പാലായിൽ കടകമ്പോളങ്ങള്‍ അടഞ്ഞുകിടന്നു. സ്വകാര്യ ബസുകള്‍ നിരത്തിലിറങ്ങിയില്ല. സര്‍ക്കാര്‍ ഓഫീസുകളില്‍ ഹാജര്‍നില പകുതിയിലും കുറവായിരുന്നു. കോട്ടയം സിഎംഎസ് കോളേജിന് സമീപത്തെ ഐസിഐസിഐ ബാങ്ക് സമരാനുകൂലികളെത്തി പൂട്ടിച്ചു. കെഎസ്ആര്‍ടിസി ചുരുക്കം ചില സര്‍വീസുകള്‍ നടത്തി. തൃശൂരില്‍ നിന്നും പാലായ്ക്ക് വരികയായിരുന്ന പാലാ ഡിപ്പോയുടെ ബസിനു നേരേ മൂവാറ്റുപുഴയ്ക്ക് സമീപം പണിമുടക്ക് അനുകൂലികള്‍ കല്ലെറിഞ്ഞു. ബസിന്‍റെ ചില്ലുകള്‍ പൊട്ടിയിട്ടുണ്ട്. ദൃശ്യങ്ങള്‍ പകര്‍ത്തിയ മാധ്യമപ്രവര്‍ത്തകന് മര്‍ദനമേറ്റു.

വേളാങ്കണ്ണി ട്രെയിനിന് ഇനി ആധുനിക കോച്ചുകള്‍

കോട്ടയം: എറണാകുളത്തുനിന്നു കോട്ടയം വഴി വേളാങ്കണ്ണിയിലേക്കു പോകുന്ന ട്രെയിനിന് ആധുനിക കോച്ചുകള്‍ അനുവദിച്ചു. ജര്‍മന്‍ സാങ്കേതികവിദ്യയിലൂടെ റെയില്‍വേ കോച്ച് ഫാക്ടറി വികസിപ്പിച്ച എല്‍എച്ച്ബി പോര്‍ച്ചുഗല്‍ കോച്ച് ഉപയോഗിച്ചാണ് ഇനിമുതല്‍ വേളാങ്കണ്ണി ട്രെയിന്‍ സര്‍വീസ് നടത്തുന്നത്. നിലവിലുള്ള കോച്ചുകളേക്കാള്‍ കൂടുതല്‍ സൗകര്യങ്ങളുള്ളതാണ് ഈ കോച്ചുകള്‍. ഏതെങ്കിലും വിധത്തിലുള്ള അപകടങ്ങള്‍ സംഭവിക്കുമ്പോള്‍ ഒരു കോച്ചിന്‍റെ മുകളിലേക്ക് മറ്റൊരു കോച്ച് കയറുന്ന അവസ്ഥ ഉണ്ടാകാറുണ്ട്. ഇത്തരം അപകടങ്ങള്‍ ഈ കോച്ചുകളില്‍ താരതമ്യേന കുറവാണ് ഉണ്ടാകുന്നത്. മാത്രവുമല്ല യാത്രക്കാര്‍ക്ക് അപകടം സംഭവിക്കുവാനുള്ള സാധ്യതകളും വിരളമാണെന്നാണ് വിദഗ്ധര്‍ അഭിപ്രായം. കാലപ്പഴക്കം വന്ന വേളാങ്കണ്ണി ട്രെയിനിന്‍റെ കോച്ചുകള്‍ മാറ്റണമെന്നു ഫ്രാന്‍സിസ് ജോര്‍ജ് എംപി ഉള്‍പ്പെടെയുള്ള ജനപ്രതിനിധികള്‍ റെയില്‍വേ മന്ത്രിയോട് നിരന്തരമായി ആവശ്യപ്പെട്ടതിന്‍റെ അടിസ്ഥാനത്തിലാണ് പുതിയ കോച്ചുകള്‍ അനുവദിച്ചിട്ടുള്ളത്. കന്നി യാത്രയില്‍ കോട്ടയത്ത് എത്തിയ ട്രെയിനിന് ഫ്രാന്‍സിസ് ജോര്‍ജ് എംപിയുടെ നേതൃത്വത്തില്‍ സ്റ്റേഷനില്‍ സ്വീകരണം നൽകി. സ്റ്റേഷന്‍ മാനേജര്‍ പി.ജി. വിജയകുമാര്‍, ഡെപ്യൂട്ടി സ്റ്റേഷന്‍ മാസ്റ്റര്‍ മാത്യു ജോസഫ്, ട്രാന്‍സ്പോര്‍ട്ടേഷന്‍ ഇന്‍സ്‌പെക്ടര്‍ ജോ പ്രവീണ്‍ എന്നിവര്‍ സംബന്ധിച്ചു. ആഴ്ചയില്‍ തിങ്കളാഴ്ചയും ശനിയാഴ്ചയുമായി രണ്ട് സര്‍വീസാണു വേളാങ്കണ്ണിക്കുള്ളത്. എറണാകുളത്തുനിന്നും പുറപ്പെടുന്ന ട്രെയിന്‍ ഉച്ചകഴിഞ്ഞ് രണ്ടിന് കോട്ടയത്തും പിറ്റേദിവസം രാവിലെ 5.40നു വേളാങ്കണ്ണിയിലും എത്തിച്ചേരും. അന്നുതന്നെ വൈകുന്നേരം 6.40നു തിരിച്ചുപോരുന്ന ട്രെയിന്‍ രാവിലെ 10.10ന് കോട്ടയത്ത് എത്തിച്ചേരുന്ന വിധത്തിലാണ് സര്‍വീസ് ക്രമീകരിച്ചിരിക്കുന്നത്.

മെഡി.‍ കോളജ്: മന്ത്രിമാരുടെ നേതൃത്വത്തില്‍ ഓപ്പറേഷന്‍ തിയറ്ററുകളുടെ നിര്‍മാണ പുരോഗതി വിലയിരുത്തി

കോട്ടയം: മെഡിക്കല്‍ കോളജിലെ പുതിയ സര്‍ജിക്കല്‍ ബ്ലോക്കിലെ ഓപ്പറേഷന്‍ തിയറ്ററുകളുടെ നിര്‍മാണ പുരോഗതി മന്ത്രിമാരായ വീണാ ജോര്‍ജ്, വി.എന്‍. വാസവന്‍ എന്നിവരുടെ നേതൃത്വത്തില്‍ വിലയിരുത്തി. സര്‍ജിക്കല്‍ ബ്ലോക്കില്‍ ഒ.ടി. ഇന്‍റഗ്രേഷന്‍ പ്രവര്‍ത്തനങ്ങള്‍ പുരോഗമിക്കുന്നു. ഓപ്പറേഷന്‍ തിയറ്ററുകള്‍ സമയബന്ധിതമായി പൂര്‍ത്തിയാക്കാനും പാക്സ് മെഷീന്‍ എത്രയും വേഗം ലഭ്യമാക്കാനും നിര്‍ദേശം നല്‍കി. സര്‍ജിക്കല്‍ ബ്ലോക്കിലെ ടെലിഫോണ്‍ കണക്‌ഷനുകള്‍ ഉള്‍പ്പെടെയുള്ളവ വേഗത്തില്‍ത്തന്നെ ലഭ്യമാക്കണം. പൂര്‍ത്തിയാക്കാനുള്ള പ്രവൃത്തികള്‍ സമയബന്ധിതമായി തീര്‍ക്കാനും സൗകര്യങ്ങള്‍ക്കനുസരിച്ച് ജീവനക്കാരെ നിയമിക്കാനും നിര്‍ദേശം നല്‍കി. ആരോഗ്യ വകുപ്പ് അഡീഷണല്‍ ചീഫ് സെക്രട്ടറി, എന്‍എച്ച്എം സ്റ്റേറ്റ് മിഷന്‍ ഡയറക്ടര്‍, മെഡിക്കല്‍ വിദ്യാഭ്യാസ വകുപ്പ് ഡയറക്ടര്‍, കെഎംഎസ്‌സിഎല്‍ ജനറല്‍ മാനേജര്‍, കോട്ടയം മെഡിക്കല്‍ കോളജ് പ്രിന്‍സിപ്പല്‍, സൂപ്രണ്ട് തുടങ്ങിയവര്‍ യോഗത്തില്‍ പങ്കെടുത്തു.

കീം ഹൈക്കോടതി വിധി നിരാശാജനകം: കേരള സ്റ്റേറ്റ് സ്‌കൂള്‍ ടീച്ചേഴ്‌സ് ഫ്രണ്ട്

പാലാ: കീം പ്രവേശന പരീക്ഷയിലെ മാര്‍ക്ക് ഏകീകരണത്തിലെ അപാകതകള്‍ പരിഹരിച്ച് പൊതുവിദ്യാലയങ്ങളിലെ വിദ്യാര്‍ഥികള്‍ക്ക് നീതി ലഭ്യമാക്കി പ്രസിദ്ധീകരിച്ച കീം ഫലം റദ്ദാക്കിയ ഹൈക്കോടതി സിംഗിള്‍ ബഞ്ച് വിധി നിരാശാജനകമാണെന്നും സര്‍ക്കാര്‍ അപ്പീല്‍ പോകണമെന്നും കേരള സ്റ്റേറ്റ് സ്‌കൂള്‍ ടീച്ചേഴ്‌സ് ഫ്രണ്ട് സംസ്ഥാന പ്രസിഡന്‍റ് ടോബിന്‍ കെ. അലക്‌സ് സര്‍ക്കാരിനോട് ആവശ്യപ്പെട്ടു. പൊതുവിദ്യാലയങ്ങളില്‍ പഠിക്കുന്ന സാധാരണക്കാരായ കുട്ടികള്‍ക്ക് എന്‍ജിനിയറിംഗ് കോളജ് പ്രവേശനം എളുപ്പത്തില്‍ ലഭ്യമാക്കുക എന്ന ഉദ്ദേശ്യത്തോടെയാണ് എം.എ. ബേബി വിദ്യാഭ്യാസമന്ത്രിയായിരുന്നപ്പോള്‍ കീം റാങ്ക് ലിസ്റ്റ് തയാറാക്കാന്‍ ഹയര്‍ സെക്കൻഡറിയുടെ 50 ശതമാനം മാര്‍ക്ക് ഉള്‍പ്പെടുത്തിയത്. ഇത് പൊതുവിദ്യാലയങ്ങളില്‍ പഠിക്കുന്ന സാധാരണക്കാരായ വിദ്യാര്‍ഥികള്‍ക്ക് വളരെയധികം പ്രയോജനം നല്‍കുന്നതായിരുന്നു. എന്നാല്‍ ഇക്കഴിഞ്ഞ വര്‍ഷത്തെ കീം 2024 റാങ്ക് ലിസ്റ്റ് പ്രസിദ്ധീകരിച്ചപ്പോള്‍ കേരള സിലബസില്‍ പഠിച്ചവരോട് വലിയ അനീതിയാണ് കാണിച്ചത്. ബോര്‍ഡ് പരീക്ഷയുടെ മാര്‍ക്ക് സ്റ്റാന്‍ഡേര്‍ഡൈസേഷന്‍ നടത്തിയതിലെ അപാകതമൂലം മിടുക്കരായ പല കുട്ടികള്‍ക്കും നമ്മുടെ മികച്ച എന്‍ജിനിയറിംഗ് കോളജുകളില്‍ പ്രവേശനം നിഷേധിക്കപ്പെട്ടു. ഇത് സ്റ്റേറ്റ് കുട്ടികളുടെ അവസരം നിഷേധിക്കലാണെന്നും ഉന്നത വിദ്യാഭ്യാസരംഗത്ത് നമ്മുടെ പൊതുവിദ്യാലയങ്ങളിലെ കുട്ടികള്‍ തഴയപ്പെടുന്നതിന് കാരണമാകുമെന്നും സംഘടന മുഖ്യമന്ത്രിക്കും പൊതു വിദ്യാഭ്യാസവകുപ്പ് മന്ത്രി വി. ശിവന്‍കുട്ടിക്കും നല്‍കിയ നിവേദനത്തില്‍ ചൂണ്ടിക്കാണിച്ചിരുന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]