ചമ്പക്കുളം മൂലം ജലോത്സവത്തിൽ ആയാപറമ്പ് വലിയദിവാൻജി ഒന്നാമൻ
Sunday, June 23, 2024 1:16 AM IST
ചന്പക്കുളം: ചമ്പക്കുളം മൂലം ജലോത്സവത്തിൽ ആലപ്പുഴ ടൗൺ ബോട്ട് ക്ലബ് തുഴഞ്ഞ ആയാപറമ്പ് വലിയദിവാൻജി ചുണ്ടന് രാജപ്രമുഖൻ ട്രോഫി.
ആവേശോജ്വലമായ ഫൈനലിൽ നടുഭാഗം ബോട്ട്ക്ലബ്ബിന്റെ നടുഭാഗം ചുണ്ടനെ രണ്ടാം സ്ഥാനത്തേക്കു പിൻതള്ളിയാണ് ജോസ് ആറാംത്തുംപള്ളിയുടെ നേതൃത്വത്തിലെത്തിയ ടൗൺ ക്ലബ് കിരീടം ഉയർത്തിയത്.
ചമ്പക്കുളം ബോട്ട് ക്ലബ്ബിന്റെ ചമ്പക്കുളം ചുണ്ടൻ മൂന്നാമത് തുഴഞ്ഞെത്തി. ഒന്നാം സ്ഥാനം നേടിയ ആയാപറമ്പ് വലിയദിവാൻജി ചുണ്ടന്റെ ക്യാപ്റ്റന് കളക്ടർ അലക്സ് വർഗീസ് ട്രോഫി കൈമാറി.
ചുണ്ടൻ വള്ളങ്ങളുടെ ലൂസേഴ്സ് ഫൈനലിൽ ചങ്ങംകരി നടുഭാഗം ക്രിസ്ത്യൻ യൂണിയന്റെ സെന്റ് ജോർജ് ചുണ്ടൻ ഒന്നാം സ്ഥാനം നേടി. ഒളിമ്പ്യൻ സെബാസ്റ്റ്യൻ സേവ്യറിന്റെ ക്യാപ്റ്റൻസിയിലാണ് ചങ്ങംകരി ക്ലബ് ചമ്പക്കുളത്താറ്റിൽ മത്സരത്തിനിറങ്ങിയത്. തോമസ് കെ. തോമസ് എംഎൽഎ ജലമേള ഉദ്ഘാടനം ചെയ്തു.