ഐസിഎസ്‌സി ഗ്ലോബല്‍ മാക്‌സി അവാര്‍ഡ്: ലുലു മാളുകള്‍ക്ക് അംഗീകാരം
Tuesday, June 3, 2025 2:05 AM IST
കൊച്ചി: ഷോപ്പിംഗ് സെന്‍റര്‍ വ്യവസായത്തിലെ മാര്‍ക്കറ്റിംഗ് മികവിനുള്ള ലോകത്തിലെ ഏറ്റവും അഭിമാനകരമായ അംഗീകാരങ്ങളിലൊന്നായ ഐസിഎസ്‌സി ഗ്ലോബല്‍ മാക്‌സി അവാര്‍ഡ്‌സ് 2025ല്‍ മൂന്ന് പ്രധാന അംഗീകാരങ്ങള്‍ സ്വന്തമാക്കി ലുലു മാളുകള്‍.
15ലധികം രാജ്യങ്ങളില്‍നിന്നുള്ള മികച്ച ഷോപ്പിംഗ് സെന്‍ററുകള്‍ മാറ്റുരച്ച മത്സരത്തില്‍ രണ്ട് സ്വര്‍ണ മെഡലും ഒരു വെള്ളി മെഡലുമാണ് ലുലു മാളുകള്‍ സ്വന്തമാക്കിയത്. ലുലു ഫ്ലവര്‍ ഫെസ്റ്റ് സംഘടിപ്പിച്ച കൊച്ചി ലുലു മാളും ലുലു ലിറ്റില്‍ ഗെയിംസ് സംഘടിപ്പിച്ച ലക്നോ ലുലു മാളുമാണ് സ്വര്‍ണ മെഡൽ ജേതാക്കള്‍. സ്വാതന്ത്ര്യദിനത്തോടനുബന്ധിച്ച് സംഘടിപ്പിച്ച ഫ്രീഡം ഫിയസ്റ്റയ്ക്ക് തിരുവനന്തപുരം ലുലു മാള്‍ വെള്ളി മെഡൽ കരസ്ഥമാക്കി.
ലുലു ഗ്രൂപ്പിന് മാത്രമല്ല രാജ്യത്തിനുതന്നെയും ഏറെ അഭിമാനകരമായ നേട്ടമാണിതെന്ന് ലുലു ഷോപ്പിംഗ് മാള്‍സ് ഇന്ത്യ ഡയറക്ടര്‍ ഷിബു ഫിലിപ്‌സ് പറഞ്ഞു. അവാര്‍ഡിന് അര്‍ഹമായ കാമ്പയിനുകളില്‍ ഓരോന്നിനും അതിന്‍റെ കാതലായ ശക്തമായ ഉള്‍ക്കാഴ്ച ഉണ്ടായിരുന്നുവെന്ന് ലുലു മാള്‍സ് ഇന്ത്യ മാര്‍ക്കറ്റിംഗ് ജനറല്‍ മാനേജര്‍ ഐശ്വര്യ ബാബു പറഞ്ഞു.
ലാസ് വെഗാസില്‍ നടന്ന ഇന്‍റര്‍നാഷണല്‍ കൗണ്‍സില്‍ ഓഫ് ഷോപ്പിംഗ് സെന്‍റേഴ്‌സിന്‍റെ (ഐസിഎസ്‌സി) ആഗോള കോണ്‍ഫറന്‍സിലാണ് അവാര്‍ഡുകള്‍ സമ്മാനിച്ചത്.