പരിഷ്‌കരിച്ച പിഒസി ബൈബിള്‍ പ്രകാശനം ഇന്ന്
Tuesday, June 3, 2025 2:05 AM IST
കൊച്ചി: കേരളസഭയുടെ 16 വർഷത്തെ കാത്തിരിപ്പിന് വിരാമമാകുന്നു. പരിഷ്‌കരിച്ച പിഒസി ബൈബിള്‍ ഇന്നു പ്രകാശനം ചെയ്യും.
ഉച്ചയ്ക്ക് 12ന് കേരളസഭയുടെ ആസ്ഥാന കാര്യാലയമായ പാലാരിവട്ടം പിഒസിയില്‍ നടക്കുന്ന ചടങ്ങിൽ കെസിബിസി പ്രസിഡന്‍റ് കര്‍ദിനാള്‍ മാർ ബസേലിയോസ് ക്ലീമിസ് കാതോലിക്കാ ബാവ, പ്രഫ. എം.കെ. സാനുവിന് നൽകിയാണു ബൈബിളിന്‍റെ പ്രകാശനകര്‍മം നിര്‍വഹിക്കുക. ചടങ്ങിൽ കേരളത്തിലെ എല്ലാ മെത്രാന്മാരും സന്യാസ സമൂഹങ്ങളുടെ മേജര്‍ സുപ്പീരിയർമാരും പങ്കെടുക്കും.
വിശുദ്ധഗ്രന്ഥം കാലാകാലങ്ങളില്‍ പരിഷ്‌കരിച്ച് ദൈവജനത്തിനു സംലഭ്യമാക്കാന്‍ ശ്രദ്ധിക്കണമെന്ന മാര്‍പാപ്പമാരുടെ നിര്‍ദേശങ്ങള്‍ അനുസരിച്ചാണ് 2008ല്‍ കേരളസഭ പിഒസി ബൈബിളിന്‍റെ പരിഷ്‌കരണശ്രമങ്ങള്‍ ആരംഭിച്ചത്.
1992ല്‍ തന്നെ പിഒസി ബൈബിള്‍ പരിഷ്‌കരിക്കേണ്ടതിന്‍റെ ആവശ്യകതയെക്കുറിച്ച് ചര്‍ച്ചകള്‍ ആരംഭിച്ചെങ്കിലും 2005 ജൂണില്‍ അന്നത്തെ കെസിബിസി ബൈബിള്‍ കമ്മീഷന്‍ സെക്രട്ടറിയായിരുന്ന റവ. ഡോ. സൈറസ് വേലംപറമ്പിലാണു പുതിയനിയമം പരിഷ്‌കരിക്കുന്നതിനുള്ള പ്രോജക്ട് കെസിബിസിക്കു സമര്‍പ്പിച്ചത്. തുടര്‍ന്ന് റവ.ഡോ.അഗസ്റ്റിന്‍ മുള്ളൂര്‍ കണ്‍വീനറായി ബൈബിള്‍ പണ്ഡിതരുടെ സംഘം രൂപീകരിക്കുകയും മൂലഭാഷകളില്‍നിന്നു വിവര്‍ത്തനം ആരംഭിക്കുകയും ചെയ്തു.
ബൈബിള്‍ പണ്ഡിതരായ റവ. ഡോ. അഗസ്റ്റിന്‍ മുള്ളൂര്‍, റവ. ഡോ. ആന്‍റണി തേറാത്ത്, റവ.ഡോ. ജോസഫ് തൊണ്ടിപ്പറമ്പില്‍, റവ.ഡോ. ജോണ്‍സണ്‍ പുതുശേരി, റവ. ഡോ. കുര്യന്‍ വാലുപറമ്പില്‍, ഭാഷാപണ്ഡിതരായ റവ. ഡോ. ചെറിയാന്‍ കുനിയന്തോടത്ത്, പ്രഫ. ഷെവ. പ്രിമൂസ് പെരിഞ്ചേരി എന്നിവര്‍ വിവിധ ഘട്ടങ്ങളിൽ പുതിയനിയമ പരിഷ്‌കരണ സംഘത്തിൽ അംഗങ്ങളായിരുന്നു. പരിഷ്‌കരിച്ച പുതിയനിയമം 2012ല്‍ പ്രസിദ്ധീകരിച്ചു.
2015ല്‍ അന്നത്തെ ബൈബിള്‍ കമ്മീഷന്‍ സെക്രട്ടറിയായിരുന്ന റവ. ഡോ.ജോഷി മയ്യാറ്റില്‍ പഴയനിയമം പരിഷ്‌കരിക്കുന്നതിനുള്ള പ്രോജക്ട് കെസിബിസിക്ക് സമര്‍പ്പിച്ചു.
അദ്ദേഹത്തോടൊപ്പം റവ. ഡോ. ജോസഫ് തൊണ്ടിപ്പറമ്പില്‍, ബിഷപ് ഡോ. ജയിംസ് ആനാപറമ്പില്‍, റവ. ഡോ. ഏബ്രഹാം പേഴുംകാട്ടില്‍, റവ.ഡോ. സെബാസ്റ്റ്യന്‍ കുറ്റിയാനിക്കല്‍, റവ.ഡോ. ജോണ്‍സണ്‍ പുതുശേരി, റവ. ഡോ. ആന്‍റണി തറേക്കടവില്‍, റവ. ഡോ. ജേക്കബ് പ്രസാദ്, ഭാഷാപണ്ഡിതരായ പ്രഫ. ഷെവ. പ്രിമൂസ് പെരിഞ്ചേരി, പ്രഫ. ഡൊമിനിക് പഴമ്പാശേരി എന്നിവരടങ്ങിയ സംഘമാണു പഴയ നിയമ പരിഷ്‌കരണം പൂര്‍ത്തിയാക്കിയത്. വിവിധ ഘട്ടങ്ങളിലായി പുരോഗമിച്ച പ്രവർത്തനങ്ങൾ 2024ല്‍ പൂര്‍ത്തീകരിച്ചു.
പരിഭാഷയുടെ കൃത്യതയ്ക്കും ഭാഷാസംശോധനയ്ക്കും വേണ്ട തിരുത്തലുകള്‍ക്കു ശേഷം പരിഷ്‌കരിച്ച പിഒസി സമ്പൂര്‍ണ ബൈബിളാണ് ഇന്നു പ്രകാശിതമാകുന്നത്. കേരളസഭയ്ക്കും കേരള കത്തോലിക്കാ മെത്രാന്‍ സമിതിക്കും പിഒസിക്കും കെസിബിസി ബൈബിള്‍ കമ്മീഷനും ഇത് അഭിമാനത്തിന്‍റെ ചരിത്ര മുഹൂര്‍ത്തമാണെന്ന് പിഒസി ഡയറക്ടർ ഫാ. തോമസ് തറയിൽ, കെസിബിസി ബൈബിൾ കമ്മീഷൻ സെക്രട്ടറി റവ. ഡോ. ജോജു കോക്കാട്ട് എന്നിവർ പറഞ്ഞു.