കൊച്ചി കായലില്‍ കാണാതായ ടാന്‍സാനിയന്‍ നാവിക ഉദ്യോഗസ്ഥന്റെ മൃതദേഹം കണ്ടെത്തി
Wednesday, June 4, 2025 1:21 AM IST
കൊച്ചി: കൊച്ചി കായലില്‍ ഒഴുക്കില്‍പ്പെട്ടു കാണാതായ നാവിക ഉദ്യോഗസ്ഥന്റെ മൃതദേഹം കണ്ടെത്തി.
ടാന്‍സാനിയന്‍ സ്വദേശിയായ അബ്‌ദുള്‍ ഇബ്രാഹിം സാലിഹിന്‍റെ (22) മൃതദേഹമാണ് ഇന്നലെ പുലര്‍ച്ചെ നേവല്‍ ബേസിലെ സ്‌കൂബ ഡൈവിംഗ് സ്‌കൂളിനടുത്ത് കായലില്‍ കണ്ടെത്തിയത്. ടാന്‍സാനിയന്‍ നയതന്ത്ര പ്രതിനിധികളുമായുള്ള ചര്‍ച്ചയ്ക്കുശേഷം മൃതദേഹം കൈമാറും.
ഏഴിമല നാവിക അക്കാഡമിയില്‍നിന്നു പരിശീലനം പൂർത്തിയാക്കി കഴിഞ്ഞ ദിവസം നടന്ന പാസിംഗ് ഔട്ട് പരേഡില്‍ പങ്കെടുത്ത അബ്‌ദുള്‍ ഇബ്രാഹിം സാലിഹ് കൊച്ചി വിമാനത്താവളം വഴി ഇന്നലെ നാട്ടിലേക്കു മടങ്ങാനായി കൊച്ചിയിലെ നാവിക ആസ്ഥാനത്ത് എത്തിയതായിരുന്നു. ഞായറാഴ്ച വൈകുന്നേരം 5.30ന് വെണ്ടുരുത്തി പാലത്തില്‍നിന്നാണു കായലില്‍ ചാടിയത്.
നാവിക ആസ്ഥാനത്തിനു സമീപം വെണ്ടുരുത്തി പാലത്തില്‍ സുഹൃത്തുക്കളുമൊത്ത് സംസാരിച്ചുനിന്ന ഇദ്ദേഹം ഒരു തവണ വെള്ളത്തില്‍ ചാടി നീന്തിക്കയറിയിരുന്നു. വീണ്ടും പാലത്തിനു മുകളിലെത്തി താഴേക്കു ചാടിയപ്പോള്‍ മുങ്ങിത്താഴുകയായിരുന്നുവെന്നാണ് പോലീസ് പറയുന്നത്. ശക്തമായ അടിയൊഴുക്കില്‍പ്പെട്ടുവെന്നാണ് കരുതുന്നത്.