ഡൽഹിയിൽ മലയാളിവ്യവസായിയെ കൊലപ്പെടുത്തി
Sunday, October 1, 2023 1:33 AM IST
ന്യൂഡൽഹി: ന്യൂഡൽഹിയിൽ മലയാളിയായ വ്യവസായിയെ കൊലപ്പെടുത്തി പാർക്കിലെ മരത്തിൽ കെട്ടിത്തൂക്കിയ നിലയിൽ കണ്ടെത്തി.
തിരുവല്ല മേപ്രാൽ സ്വദേശി പി.പി. സുജാതനെ(58)യാണു മരിച്ചനിലയിൽ കണ്ടെത്തിയത്. ദ്വാരക റോഡിനു സമീപം ശിവാനി എൻക്ലേവിലാണ് എസ്എൻഡിപി ദ്വാരക ശാഖാ സെക്രട്ടറികൂടിയായിരുന്ന ഇദ്ദേഹം താമസിച്ചിരുന്നത്.
ബിസിനസ് ആവശ്യത്തിനായി വ്യാഴാഴ്ച രാത്രി സുജാതൻ വീട്ടിൽനിന്ന് ഇറങ്ങിയിരുന്നു. പാർക്കിൽ പ്രഭാതസവാരിക്കെത്തിയവരാണ് മൃതദേഹം കണ്ടത്. സുജാതൻ ധരിച്ചിരുന്ന ഷർട്ട് ഉപയോഗിച്ചാണ് കെട്ടിത്തൂക്കിയത്. രക്തത്തിൽ കുളിച്ച നിലയിലുള്ള മൃതദേഹത്തിൽ ഒട്ടേറെ മുറിവുകളുണ്ട്. സംഭവത്തിൽ പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.
കവർച്ച ലക്ഷ്യമിട്ടാണ് കൊലപാതകമെന്നാണു പോലീസിന്റെ പ്രാഥമിക നിഗമനം. ഡൽഹി പോലീസ് ക്രൈംബ്രാഞ്ചാണ് സംഭവം അന്വേഷിക്കുന്നത്. സ്ഥലത്തെ സിസിടിവി ദൃശ്യങ്ങൾ പരിശോധിക്കുന്നുണ്ട്. വർഷങ്ങളായി ഡൽഹിയിൽ താമസിക്കുന്ന സുജാതന് അടുക്കള ഉപകരണങ്ങളുടെ ബിസിനസായിരുന്നു. ഭാര്യ: പ്രീതി. മക്കൾ: ശാന്തിപ്രിയ, അമൽ.