ADVERTISEMENT

ADVERTISEMENT

സ്കൂൾ ടീം ചെസ് ചാന്പ്യൻഷിപ്പ് സെലക്‌ഷൻ മൂന്നിന്

പത്തനംതിട്ട: ചെസ് അസോസിയേഷൻ കേരള സംഘടിപ്പിക്കുന്ന സംസ്ഥാന സ്കൂൾ ടീം ചെസ് ചാന്പ്യൻഷിപ്പ് 10, 11 തീയതികളിൽ തൃശൂരിൽ നടക്കും. ഇതിലേക്കുള്ള ജില്ലാ ടീം സെലക്‌ഷൻ ടൂർണമെന്‍റ് മൂന്നിന് അടൂർ ഓൾ സെയിന്‍റ്സ് പബ്ലിക് സ്കൂളിൽ നടക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു.
ജില്ലയിൽ ചെസ് ഇൻ സ്കൂൾ പദ്ധതി നടപ്പിലാക്കുന്ന പ്രവർത്തനങ്ങളുടെ ഭാഗമായി സ്കൂളുകൾ ഓൾ ഇന്ത്യ ചെസ് ഫെഡറേഷനിൽ രജിസ്റ്റർ ചെയ്യണമെന്നും സ്കൂളുകളിൽ ചെസ് ക്ലബുകൾ രൂപീകരിക്കണമെന്നും ഭാരവാഹികൾ പറഞ്ഞു. കേരളത്തിലെ സ്കൂളുകളിൽ ചെസ് ഒരു പഠന വിഷയമാക്കണമെന്ന് വിദ്യാഭ്യാസ വകുപ്പിനോടും രക്ഷിതാക്കളോടും ജനപ്രതിനിധികളോടും അസോസിയേഷൻ ആവശ്യപ്പെട്ടു. ഈ ആവശ്യമുന്നയിച്ച് ബന്ധപ്പെട്ടവർക്ക് നിവേദനം നൽകാനും തീരുമാനിച്ചതായി ജില്ലാ പ്രസിഡന്‍റ് ഷംസ് എംബ്രായിൽ പത്രസമ്മേളനത്തിൽ പറഞ്ഞു.
പിആർഒ ഷാജി പൂച്ചേരിൽ, ജില്ലാ ജോയിന്‍റ് സെക്രട്ടറി ആർ. പ്രസന്നകുമാർ, ജില്ലാ കമ്മിറ്റിയംഗങ്ങളായ അജയ് മേനോൻ, ബിനോ മണ്ണിക്കരോട്ട്, സി. പ്രദീപ് കുമാർ എന്നിവരും പത്രസമ്മേളനത്തിൽ പങ്കെടുത്തു.

ADVERTISEMENT

പുലിഭീതിയിൽ വെച്ചൂച്ചിറ താന്നിക്കാപ്പുഴ തോട്ടം മേഖല: കണ്ടത് ടാപ്പിംഗ് തൊഴിലാളി; തെരച്ചിൽ നടത്തി വനംവകുപ്പ്

റാന്നി: വെച്ചൂച്ചിറ മേഖലയിൽ പുലിയെ കണ്ടതായി ടാപ്പിംഗ് തൊഴിലാളിയുടെ വെളിപ്പെടുത്തലിനേ തുടർന്ന് പ്രദേശത്ത് വനംവകുപ്പ് പരിശോധന തുടങ്ങി. വെച്ചൂച്ചിറ നവോദയയ്ക്കും പെരുന്തേനരുവിക്കും മധ്യേയുള്ള താന്നിക്കാപ്പുഴ ഭാഗത്താണ് ഇന്നലെ പുലർച്ചെ പുലിയെ കണ്ടതായി വെളിപ്പെടുത്തലുണ്ടായത്. സ്ഥലപരിശോധന നടത്തി വനപാലകർ പുലിയുടെ കാൽപാദങ്ങൾ കണ്ടെത്തിയതായാണ് സൂചന. ഇന്നലെ പുലർച്ചെ ടാപ്പിംഗിനു പോയ കക്കുടുക്ക സ്വദേശി മാവുങ്കൽ രാജൻ എന്നയാളാണ് സമീപ പുരയിടത്തിലൂടെ പുലി അടുത്തുള്ള പൊന്തക്കാട്ടിലേക്ക് സാവധാനം പോകുന്നതായി കണ്ടത്. പ്രാണരക്ഷാർഥം അടുത്തുള്ള ഒരു വീട്ടിലേക്ക് രാജൻ ഓടിയെത്തുകയായിരുന്നു. നാട്ടുകാർ വിവരവറിയിച്ചതനുസരിച്ച് റാന്നി ഫോറസ്റ്റ് റേഞ്ച് ഓഫീസർ ബി.ആർ. ജയന്‍റെ നേതൃത്വത്തിൽ കക്കുടിമൺ ഡെപ്യൂട്ടി റേഞ്ചർ ഉൾപ്പെടെ വൻ വനപാലക സംഘം രാവിലെ തന്നെ സ്ഥലത്തെത്തിയതോടെയാണ് നാട്ടുകാർക്ക് തെല്ലൊരാശ്വാസമായത്. പ്രദേശത്ത് വിശദമായ പരിശോധനനടത്തിയ വനപാലകർ കാവലേർപ്പെടുത്തിയിട്ടുണ്ട്. അതേസമയം വെച്ചൂച്ചിറയുടെ കിഴക്കൻ പ്രദേശങ്ങളിൽ അടുത്ത കാലത്തായി പുലിയുടെ സാന്നിധ്യം കണ്ടുവന്നിരുന്നു. വെച്ചൂച്ചിറ മേഖലയിലും പുലി സാന്നിധ്യം സംബന്ധിച്ച വെളിപ്പെടുത്തലുകളും അഭ്യൂഹങ്ങളും നാട്ടിൽ ആശങ്കയുയർത്തിയിരിക്കുകയാണ്. തോട്ടം മേഖല പലയിടത്തും കാടു കയറി കിടക്കുന്നതിനാൽ വന്യമൃഗങ്ങൾ ഇറങ്ങാനുള്ള സാധ്യത ഏറെയാണ്. പെരുന്തേനരുവി വനപ്രദേശത്ത് ആനയുടെയും പുലിയുടെയും കാട്ടുപോത്തിന്‍റെയും സാന്നിധ്യം ഏറെ നാളായിട്ടുണ്ട്. എന്നാൽ ജനവാസ മേഖലയിൽ പുലിയെ സമീപകാലത്തെങ്ങും കണ്ടിരുന്നില്ല. വെച്ചൂച്ചിറയുടെ സമീപ പ്രദേശങ്ങളിൽ പുലി അടക്കമുള്ള വന്യമൃഗങ്ങൾ കാടിറങ്ങുന്നതായ സംഭവങ്ങൾ നേരത്തെ റിപ്പോർട്ട് ചെയ്തിരുന്നു. കക്കുടുക്കയിൽ സ്വകാര്യ എസ്റ്റേറ്റുകളോടു ചേർന്ന് വൻതോതിൽ കാട്ടുവളർന്നു കിടക്കുന്നതിനാൽ മ്ലാവ്, പന്നി തുടങ്ങിയവയുടെ സാന്നിധ്യം കൂടുതലായുണ്ടെന്ന് വനപാലകർ പറഞ്ഞു. തീറ്റ തേടി ഇറങ്ങുന്ന വന്യമൃഗങ്ങൾ ഇരയെ തേടി ജനവാസ മേഖലകളിലേക്ക് ഇറങ്ങാനുള്ള സാധ്യതയും ഇതോടെ വർധിക്കുകയാണ്. പുലിയുടെ സാന്നിധ്യം തളിക്കളയാനാവില്ലെന്ന നിലപാടാണ് വനം ഉദ്യോഗസ്ഥർക്കുള്ളത്. സ്ഥലം നിരീക്ഷിക്കുന്നതിനായി കാമറ സ്ഥാപിക്കാനും വനംകുപ്പ് തീരുമാനിച്ചിട്ടുണ്ട്. കൂട് സ്ഥാപിക്കാൻ നിർദേശം നൽകിയതായി പ്രമോദ് നാരായൺ എംഎൽഎ റാന്നി: പുലിയുടെ സാന്നിധ്യം കണ്ട തോട്ടം മേഖലയിൽ എത്രയും വേഗം കൂട് സ്ഥാപിച്ച് പുലിയെ പിടികൂടാനുള്ള നടപടി സ്വീകരിക്കണമെന്ന് പ്രമോദ് നാരായൺ എംഎൽഎ വനം വകുപ്പിനോട് ആവശ്യപ്പെട്ടു. പുലിയുടെ സാന്നിധ്യം കണ്ട സ്ഥലം സന്ദർശിച്ച ശേഷമാണ് എംഎൽഎ ഇക്കാര്യം ഉന്നയിച്ചത്. വന്യമൃഗത്തിന്‍റെ കാൽപ്പാടുകൾ പരിശോധിച്ച വനംവകുപ്പ് പുലിയുടെ സാന്നിധ്യം സ്ഥിരീകരിച്ച സാഹചര്യത്തിൽ ഇന്നുതന്നെ പുലിയെ പിടിക്കാനുള്ള കൂട് വയ്ക്കാനാകുമെന്ന് ഫോറസ്റ്റ് റേഞ്ച് ഓഫീസർ ബി. ആർ. ജയൻ അറിയിച്ചു. ഇതിനായുള്ള നടപടിക്രമങ്ങൾ ആരംഭിച്ചു. \ ഇതിനായി റേഞ്ച് ഓഫീസർ, രണ്ട് വെറ്ററിനറി സർജന്മാർ, ചീഫ് വൈൽഡ് ലൈഫ് പ്രതിനിധി, നാഷണൽ ടൈഗർ കൺസർവേഷൻ പ്രതിനിധി, പഞ്ചായത്ത് പ്രസിഡന്‍റ് എന്നിവരുടെ ഒരു കമ്മിറ്റി രൂപീകരിച്ചു. കൂട് സ്ഥാപിക്കാനുള്ള തീരുമാനം കൊല്ലം സതേൺ സർക്കിൾ ചീഫ് കൺസർവേറ്റർ കമലഹാറിന് റിപ്പോർട്ട് സമർപ്പിച്ചിട്ടുണ്ട്. ഈ റിപ്പോർട്ട് ചീഫ് വൈൽഡ് ലൈഫ് വാർഡൻ പ്രമോദ് ജി. കൃഷ്ണനു കൈമാറും. അദ്ദേഹമാണ് കൂടു വയ്ക്കുന്നതിനുള്ള അന്തിമ തീരുമാനമെടുക്കേണ്ടത്. എംഎൽഎയെ കൂടാതെ വെച്ചൂച്ചിറ ഗ്രാമപഞ്ചായത്ത് പ്രസിഡൻറ് ഇ. വി. വർക്കി, മെംബർമാരായ ടി. കെ. ജയിംസ്, സിറിയക് തോമസ്,റേഞ്ച് ഓഫീസർ ബി. ആർ. ജയൻ, ആർ. വരദരാജൻ എന്നിവരും എംഎൽഎയോടൊപ്പം സ്ഥലം സന്ദർശിച്ചു.

സ്ത്രീകളുടെ തൊഴിൽപങ്കാളിത്തം 50 ശതമാനമായി ഉയർത്തും: മന്ത്രി എം.ബി. രാജേഷ്

തിരുവല്ല: സ്ത്രീകൾക്ക് വേതനാധിഷ്ഠിത തൊഴിൽ ലഭ്യമാക്കിക്കൊണ്ട് അവരുടെ തൊഴിൽ പങ്കാളിത്തം ഇരുപത് ശതമാനത്തിൽ നിന്ന് അമ്പത് ശതമാനമാക്കി ഉയർത്തുമെന്ന് മന്ത്രി എം.ബി. രാജേഷ്. തിരുവല്ലയിൽ കുടുംബശ്രീ സിഡിഎസ് അധ്യക്ഷരുടെ സംഗമം സംസ്ഥാനതല ഉദ്ഘാടനവും സിഡിഎസ്തല പ്രോഗ്രസ് റിപ്പോർട്ട് പ്രകാശനവും നിർവഹിച്ചു പ്രസംഗിക്കുകയായിരുന്നു മന്ത്രി. വിജ്ഞാന കേരളം പദ്ധതിയുമായി സഹകരിച്ചുകൊണ്ട് സ്ത്രീകൾക്ക് നൈപുണ്യ പരിശീലനം നൽകി വിവിധ മേഖലകളിൽ തൊഴിൽ ലഭ്യമാക്കുന്നതിനാണ് കുടുംബശ്രീ ലക്ഷ്യമിടുന്നത്. ഓണത്തിന് മുമ്പ് ഒരു ലക്ഷം വനിതകൾക്കും അടുത്ത മാർച്ചിനുള്ളിൽ മൂന്നു ലക്ഷം പേർക്കും വേതനാധിഷ്ഠിത തൊഴിൽ ലഭ്യമാക്കുകയാണ് ലക്ഷ്യം. ഇത് കുടുംബങ്ങളുടെയും കേരളീയ സമ്പദ്ഘടനയുടെയും വളർച്ചയ്ക്ക് വഴിയൊരുക്കും. മാത്യു ടി. തോമസ് എംഎൽഎ അധ്യക്ഷത വഹിച്ചു. കുടുംബശ്രീ എക്സിക്യൂട്ടീവ് ഡയറക്ടർ എച്ച്. ദിനേശൻ, ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം, തിരുവല്ല നഗരസഭാധ്യക്ഷ അനു ജോർജ്, ജില്ലാപഞ്ചായത്ത് ക്ഷേമകാര്യ സ്ഥിര സമിതി അധ്യക്ഷൻ ജിജി മാത്യു, നഗരസഭാ വാർഡ് കൗൺസിലർ ലെജു എം. സഖറിയ, എസ്ബിഐ എബിയു ഡെപ്യൂട്ടി ജനറൽ മാനേജർ സന്തോഷ് കുമാർ, കുടുംബശ്രീ പ്രോഗ്രാം ഓഫീസർ കെ.യു. ശ്യാംകുമാർ, ജില്ലാ മിഷൻ കോ ഓർഡിനേറ്റർ എസ്. ആദില, സി.ഡി.എസ് അധ്യക്ഷമാരായ ഉഷ രാജേന്ദ്രൻ തുടങ്ങിയവർ പ്രസംഗിച്ചു. കുടുംബശ്രീ സിഡിഎസുകളുടെ നേതൃത്വത്തിൽ നടത്തിയ കഴിഞ്ഞ നാലു വർഷത്തെ പ്രവർത്തനങ്ങളും കൈവരിച്ച നേട്ടങ്ങളും വിവരിക്കുന്ന പ്രോഗ്രസ് റിപ്പോർട്ടുകളാണ് തയാറാക്കിയത്

രഹസ്യവിവരങ്ങൾ ചോർത്തിനൽകുന്നവർ സർവീസിലുണ്ടാകില്ല: മന്ത്രി രാജേഷ്

പത്തനംതിട്ട: രാസലഹരി അടക്കമുള്ള മയക്കുമരുന്നിന്‍റെ വ്യാപനം തടയുന്നതിലേക്ക് എക്സൈസ് വകുപ്പിന്‍റെ രഹസ്യവിവരങ്ങൾ പുറത്തുവിടുന്നവർ പിന്നീടു സർവീസിലുണ്ടാകില്ലെന്ന് മന്ത്രി എം. ബി. രാജേഷ്. കേരള സ്റ്റേറ്റ് എക്സൈസ് സ്റ്റാഫ് അസോസിയേഷൻ 45 ാം സംസ്ഥാന സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ലഹരിക്കെതിരേയുള്ള പോരാട്ടത്തിൽ കേരള സമൂഹം ഒറ്റക്കെട്ടായി രംഗത്തുവന്നിട്ടുള്ള കാലഘട്ടമാണിത്. ഏതുവിധേനയും മാരകലഹരി നമ്മുടെ നാട്ടിൽ തടയപ്പെടണമെന്നുള്ളതിൽ തർക്കമില്ല. ഇക്കാര്യത്തിൽ വാട്സ്ആപ് അടക്കമുള്ള മാധ്യമങ്ങളിലൂടെ പൊതുജനങ്ങൾക്ക് വിവരങ്ങൾ കൈമാറാം. ഇത്തരം വിവരങ്ങൾ രഹസ്യമായിരിക്കണമെന്നതിൽ മുഖ്യമന്ത്രി അടക്കം കർശന നിർദേശമാണ് നൽകിയിരിക്കുന്നതെന്നും മന്ത്രി ചൂണ്ടിക്കാട്ടി. മാരകലഹരി തടയുന്നതിലേക്ക് ശക്തമായ സംവിധാനമാണ് എക്സൈസ് വകുപ്പ് ചെയ്തിരിക്കുന്നത്. നടപടികൾക്കൊപ്പം ബോധവത്കരണവും ചികിത്സയും ഇതിന്‍റെ ഭാഗമാണ്. മയക്കുമരുന്നിന്‍റെ ഉറവിടം കേരളത്തിൽ അല്ല. ഉറവിടം കണ്ടെത്തുന്നതിലേക്ക് വകുപ്പിനു പരിമിതികളുണ്ട്. എന്നിരുന്നാലും ഗോവ വരെ എത്തി കേസ് തെളിയിച്ച സംഭവങ്ങളുണ്ട്. എക്സൈസ് ക്രൈംബ്രാഞ്ചിനെ ശക്തിപ്പെടുത്തും. വകുപ്പിന്‍റെ പരിമിതികളും അംഗബലത്തിന്‍റെ കുറവും പരിഹരിക്കാനുള്ള നടപടികൾ ഉണ്ടാകുമെന്നും മന്ത്രി രാജേഷ് പറഞ്ഞു. അസോസിയേഷൻ സംസ്ഥാന പ്രസിഡന്‍റ് ടി. സജു കുമാർ അധ്യക്ഷത വഹിച്ചു. കെ.യു. ജനീഷ് കുമാർ എംഎൽഎ മുഖ്യപ്രഭാഷണം നടത്തി. ഓമല്ലൂർ ഗ്രാമപഞ്ചായത്ത് പ്രസിഡന്‍റ് ജോൺസൺ വിളവിനാൽ, ഓഫീസേഴ്സ് അസോസിയേഷൻ സംസ്ഥാന പ്രസിഡന്‍റ് ആർ. മോഹൻ കുമാർ, ജോയിന്‍റ് എക്സൈസ് കമ്മീഷണർ ബി. രാധാകൃഷ്ണൻ, ഡെപ്യൂട്ടി കമ്മീഷണർ എം. സൂരജ്, പെൻഷനേഴ്സ് അസോസിയേഷൻ സംസ്ഥാന പ്രസിഡന്‍റ് ടി. ജയിംസ്, അസോസിയേഷൻ ജനറൽ സെക്രട്ടറി കെ. സന്തോഷ് കുമാർ, സെക്രട്ടറി പി.ഡി. പ്രസാദ്, സംഘാടന സമിതി വർക്കിംഗ് ചെയർമാൻ ഷാബു തോമസ് എന്നിവർ പ്രസംഗിച്ചു. വൈകുന്നേരം സാംസ്കാരിക സമ്മേളനം ഡെപ്യൂട്ടി സ്പീക്കർ ചിറ്റയം ഗോപകുമാർ ഉദ്ഘാടനം ചെയ്തു. സമ്മേളനം ഇന്നു സമാപിക്കും. വിവിധ വിഷയങ്ങളിൽ രാവിലെ ചർച്ച നടക്കും. ഉച്ചകഴിഞ്ഞ് ജീവിതമാണ് ലഹരി ഡോ.എൽ.ആർ. മധുജനും ഡോ.എൻ. നൗഫലും പ്രഭാഷണം നടത്തും.

ലഹരിക്കെതിരേ രമേശ് ചെന്നിത്തലയുടെ നേതൃത്വത്തില്‍ പത്തനംതിട്ടയില്‍ സമൂഹനടത്തം

പത്തനംതിട്ട: ലഹരി മാഫിയയ്‌ക്കെതിരേ മുന്‍ പ്രതിപക്ഷ നേതാവ് രമേശ് ചെന്നിത്തലയുടെ നേതൃത്വത്തില്‍ പത്തനംതിട്ടയില്‍ ഇന്നലെ രാവിലെ നടന്ന സമൂഹ നടത്തത്തിൽ വൻ പങ്കാളിത്തം. ജീവിതത്തിന്‍റെ നാനാതുറകളിൽപ്പെട്ടവർ നടത്തത്തിൽ പേര്‍ പങ്കാളികളായി. പ്രൗഡ് കേരള എന്ന സംഘടനയുടെ നേതൃത്വത്തില്‍ രാവിലെ പത്തനംതിട്ട സ്റ്റേഡിയം ജംഗഷനില്‍ നിന്ന് ആരംഭിച്ച് മുനിസിപ്പല്‍ ടൗണ്‍ സ്‌ക്വയര്‍ വരെയാണ് ലഹരിവിരുദ്ധ സമൂഹ നടത്തം നടന്നത്. വിദ്യാര്‍ഥികൾ, യുവജനങ്ങള്‍, സന്നദ്ധ സംഘടനകൾ, മദ്യവിരുദ്ധ- ലഹരിവിരുദ്ധ സംഘടനകളുടെ പ്രതിനിധികൾ, സാംസ്‌കാരിക രാഷ്ട്രീയ മണ്ഡലങ്ങളിലെ പ്രമുഖർ, ആത്മീയ നേതാക്കള്‍ തുടങ്ങിയവര്‍ പങ്കെടുത്തു. ജനപ്രതിനിധികളും യുഡിഎഫ് നേതാക്കളും അണിനിരന്ന റാലിയുടെ മുന്‍നിരയില്‍ ആത്മീയ സാംസ്‌കാരിക സംഘടന നേതാക്കളുമുണ്ടായിരുന്നു. നേരം പുലർന്നപ്പോൾ നടന്ന വ്യത്യസ്തമായ ലഹരി വിരുദ്ധ പോരാട്ടം കാണുവാൻ റോഡിനിരുവശവും ആളുകളും ഒത്തുചേർന്നു. പിന്നീട് ഇവരിൽ പലരും ഒപ്പം നടന്നു നീങ്ങി. ട്രാക് സൂട്ടും ലഹരി വിരുദ്ധ മുദ്രാവാക്യം ആലേഖനം ചെയ്ത ടീ ഷർട്ടും ധരിച്ചെത്തിയ രമേശ് ചെന്നിത്തലയ്ക്കു പിന്നിലായി അതേ വേഷധാരികൾ കൂടി അണിനിരന്നപ്പോൾ നഗരത്തിനു പുത്തൻ അനുഭവമായി. പത്തനംതിട്ട ടൗണ്‍ സ്‌ക്വയറില്‍ നടന്ന സമ്മേളനത്തില്‍ ഡോ.ഏബ്രഹാം മാര്‍ സെറാഫിം മെത്രാപ്പോലീത്ത, ഡോ.ജോസഫ് മാർ ബർണബാസ് സഫ്രഗൻ മെത്രാപ്പോലീത്ത, ഇമാം അബ്ദുള്‍ ഷുക്കൂര്‍ മൗലവി, ജോണ്‍സണ്‍ കല്ലിട്ടതില്‍ കോര്‍ എപ്പിസ്‌കോപ്പ, ആന്‍റോ ആന്‍റണി എംപി, ഡിസിസി പ്രസിഡന്‍റ് പ്രഫ.സതീഷ് കൊച്ചുപറമ്പിൽ, യുഡിഎഫ് ജില്ലാ ചെയര്‍മാന്‍ വര്‍ഗീസ് മാമ്മന്‍, മുന്‍ മന്ത്രി പന്തളം സുധാകരൻ, മുൻ എംഎല്‍എ ജോസഫ് എം.പുതുശേരി, കെപിസിസി രാഷ്ട്രീയ കാര്യസമിതിയംഗം ഷാനിമോള്‍ ഉസ്മാന്‍, ജനറല്‍ സെക്രട്ടറി പഴകുളം മധു തുടങ്ങിയവര്‍ പ്രസംഗിച്ചു. പ്രൗ കേരളചെയർമാൻ മലയിൻകീഴ് വേണുഗോപാൽ, ജില്ലാ കൺവീനർ വെട്ടൂർ ജ്യോതിപ്രസാദ്, കോ ഓർഡിനേറ്റർ റോജി കാട്ടാശേരി, ഫെലീസിറ്റേറ്റർവ് തട്ടയിൽ ഹരികുമാർ എന്നിവരുടെ നേതൃത്വത്തിൽ നടത്തപ്പെട്ട വാക്കത്തോണിന്‍റെ മുന്നിൽ ചെണ്ടമേളം,പഞ്ചവാദ്യം, റോളർ സ്കേറ്റിംഗ് എന്നിവയും മികവേകി. ലഹരി വിരുദ്ധ പ്രതിജ്ഞ യോടെ സമാപിച്ചു. പത്തനംതിട്ട ടൗണ്‍ സ്‌ക്വയറില്‍ നടന്ന സമ്മേളനത്തില്‍ ഡോ.ഏബ്രഹാം മാര്‍ സെറാഫിം മെത്രാപ്പോലീത്ത, ഡോ.ജോസഫ് മാർ ബർണബാസ് സഫ്രഗൻ മെത്രാപ്പോലീത്ത, ഇമാം അബ്ദുള്‍ ഷുക്കൂര്‍ മൗലവി, ജോണ്‍സണ്‍ കല്ലിട്ടതില്‍ കോര്‍ എപ്പിസ്‌കോപ്പ, ആന്‍റോ ആന്‍റണി എംപി, ഡിസിസി പ്രസിഡന്‍റ് പ്രഫ.സതീഷ് കൊച്ചുപറമ്പില്‍, യുഡിഎഫ് ജില്ലാ ചെയര്‍മാന്‍ വര്‍ഗീസ് മാമ്മൻ, മുന്‍ മന്ത്രി പന്തളം സുധാകരൻ, മുൻ എംഎല്‍എ ജോസഫ് എം.പുതുശേരി, കെപിസിസി രാഷ്ട്രീയ കാര്യസമിതിയംഗം ഷാനിമോള്‍ ഉസ്മാൻ, ജനറല്‍ സെക്രട്ടറി പഴകുളം മധു തുടങ്ങിയവര്‍ പ്രസംഗിച്ചു.

സ്കൂളിൽ അധ്യാപക നിയമനം വൈകുന്നു; കുത്തിയിരിപ്പ് സമരത്തിന് രക്ഷിതാവ്

കുന്നന്താനം: മകൻ പഠിക്കുന്ന വിദ്യാലയത്തിൽ അധ്യാപക നിയമനം വൈകുന്നതിൽ പ്രതിഷേധിച്ച് അച്ഛൻ സമരം നടത്തുമെന്ന മുന്നറിയിപ്പുമായി രക്ഷിതാവ്. ഇംഗ്ലീഷ് അധ്യാപക നിയമനം നടത്തുക, നിരന്തര മൂല്യ നിർണയത്തിന്‍റെ ഭാഗമായി എല്ലാ ആഴ്ചയും പരീക്ഷ നടത്തുക എന്നീ ആവശ്യങ്ങൾ ഉന്നയിച്ച് കുന്നന്താനം പാലയ്ക്കാത്തകിടി സെന്‍റ് മേരീസ് സർക്കാർ ഹൈസ്കൂളിലെ രക്ഷിതാവ് എസ്. വി. സുബിനാണ് കുത്തിയിരിപ്പ് സമരത്തിനു തയാറെടുക്കുന്നത്. സ്കൂൾ തുറന്ന് ഒന്നര മാസം പിന്നിട്ടിട്ടും ഹൈസ്കൂൾ വിഭാഗത്തിൽ ഇംഗ്ലീഷ് പഠിപ്പിക്കുന്നതിന് അധ്യാപകരെ നിയമിച്ചിട്ടില്ല. പകരം സാമൂഹ്യ ശാസ്ത്ര അധ്യാപിക ഇംഗ്ലീഷ് പഠിപ്പിക്കണമെന്ന് നിർദേശിച്ചിരിക്കുകയാണ്. സാമൂഹ്യ ശാസ്ത്ര പാഠഭാഗങ്ങൾ പൂർത്തീകരിക്കുവാൻ കൂടുതൽ സമയം വേണമെന്നിരിക്കേ ഭാഷാ പഠനത്തിന് വിഷയ വിദഗ്ധർ അല്ലാത്തവരെ ചുമതലപ്പെടുത്തുന്നതിലൂടെ അധ്യാപനം തന്നെ താളം തെറ്റുമെന്ന് സുബിൻ പറഞ്ഞു. കഴിഞ്ഞ ഒന്നര മാസത്തിനിടെ ഹൈസ്കൂൾ ക്ലാസുകളിൽ ആദ്യ പാഠഭാഗത്തിന്‍റെ രണ്ട് പാരഗ്രാഫ് മാത്രമാണ് ഇംഗ്ലീഷ് വിഷയ പഠിപ്പിച്ചത്. ഇംഗ്ലീഷ് ടീച്ചറെ നിയമിക്കുന്നതിന് നിയമപരമായി എന്തെങ്കിലും തടസമുണ്ടെങ്കിൽ പിടിഎ മുൻകൈയെടുത്ത് രക്ഷിതാക്കളും പൂർവ വിദ്യാർഥികളും സഹകരിച്ച് വേതനം നൽകി ടീച്ചറെ നിയമിക്കുന്നതിന് സന്നദ്ധമാണെന്നറിയിച്ചിട്ടും ഹെഡ്മാസ്റ്റർ മുൻകൈ എടുക്കുകയോ പിടിഎ വിളിച്ചു ചേർക്കുകയോ ചെയ്തില്ലെന്നു സുബിൻ പറഞ്ഞു. നിയമനങ്ങൾ ഇന്നുവരെ നടത്തേണ്ടതില്ലെന്ന് ഡിഡിഇയും ഡിഇഒയും നിർദേശം നൽകിയിട്ടുണ്ടെന്ന് ഹെഡ്മാസ്റ്റർ പറഞ്ഞു. പത്താംക്ലാസിൽ പഠിക്കുന്ന തന്‍റെ കുട്ടിക്കും സഹപാഠികൾക്കും എട്ട്, ഒന്പത് ക്ലാസുകളിലെ കുട്ടികൾക്കും ഒരേപോലെ ബാധിക്കുന്ന വിഷയത്തിൽ 18നകം പരിഹാരം കണ്ടില്ലെങ്കിൽ 21നു സ്കൂളിനു മുന്പിൽ കുത്തിയിരിപ്പ് സമരം നടത്തുമെന്ന് സുബിൻ അറിയിച്ചു. ജൂലൈ : 15 വരെ നിയമനങ്ങൾ നടത്തേണ്ടതില്ലായെന്ന് തിരുവല്ല ഡി ഇ ഒ യും പത്തനംതിട്ട ഡി ഡി ഇ യും നിർദ്ദേശം നൽകിയിട്ടുണ്ടെന്നാണ് ഹെഡ്മാസ്റ്ററിൻ്റെ മറുപടി.തൻ്റെ മകൻ 10 - ആം ക്ലാസ്സ് വിദ്യാർത്ഥിയാണെന്നും തൻ്റെ കുട്ടിയേപ്പോലെ 10 ലെ മറ്റ് കുട്ടികൾക്കും 8, 9 ക്ലാസ്സിലെ കുട്ടികളെയും ഒരുപോലെ ബാധിക്കുന്ന പ്രശ്നം ജൂലൈ 18 നകം പരിഹരിക്കണമെന്നും പരിഹരിക്കാത്ത പക്ഷം ജൂലൈ 21 തിങ്കൾ സ്കൂളിന് മുമ്പിൽ കുത്തിയിരുപ്പ് സമരം നടത്തുമെന്ന് സുബിൻ അറിയിച്ചു. പത്താംക്ലാസിൽ ഗണിത അധ്യാപിക നടത്തുന്ന ാതൃകയിൽ നിരന്തര മൂല്യനിർണയം നടത്താൻ മറ്റ് അധ്യാപകരും തയാറാകണമെന്നാവശ്യവും സുബിൻ ഉന്നയിച്ചിട്ടുണ്ട്.

ജില്ലയിൽ യൂത്ത് കോൺഗ്രസിന്‍റെ സംഘടനാ സംവിധാനം പോരെന്ന് നേതാക്കളും

പത്തനംതിട്ട: എസ്എഫ്‌ഐയെ പുകഴ്ത്തിയും യൂത്ത് കോണ്‍ഗ്രസിനെ ഇകഴത്തിയും കോണ്‍ഗ്രസ് നേതാവ് പി.ജെ. കുര്യന്‍ കഴിഞ്ഞദിവസം നടത്തിയ പരാമര്‍ശങ്ങളെച്ചൊല്ലി കോണ്‍ഗ്രസില്‍ ചേരിതിരിവ്. കുര്യനെ തള്ളി മുതിര്‍ന്ന കോണ്‍ഗ്രസ് നേതാക്കളായ മുല്ലപ്പള്ളി രാമചന്ദ്രനും കെ.സി. ജോസഫും രംഗത്തെത്തിയതിനു പിന്നാലെ നവമാധ്യമ പോരിനു യൂത്ത് കോണ്‍ഗ്രസ്, കെഎസ് യു നേതാക്കള്‍ മഹിളാ കോണ്‍ഗ്രസ് നേതാക്കൾ തുടക്കമിട്ടുവെങ്കിലും യൂത്ത് കോൺഗ്രസിന്‍റെ സംഘടനാ സംവിധാനത്തിലെ പോരായ്മകൾ കൂടി ചർച്ചയായതോടെ വിഷ‍യത്തിൽ ചേരിതിരിവ് പ്രകടമായി. കോൺഗ്രസ് വർക്കിംഗ് കമ്മിറ്റിയംഗം രമേശ് ചെന്നിത്തല പി.ജെ. കുര്യനെ പിന്തുണച്ച് രംഗത്തെത്തുകയും പരാമർശത്തിൽ പി.ജെ. കുര്യൻ വിശദീകരണം നൽകുകയും കൂടി ചെയ്തതോടെ യൂത്ത് കോൺഗ്രസിന്‍റെ സംഘടനാ സംവിധാനത്തിലെ പോരായ്മകളിലേക്ക് ചർച്ചകൾ നീണ്ടു. എസ്എഫ്‌ഐയുടെ സംഘടനാ സംവിധാനത്തെയും സമരത്തെയും പുകഴ്ത്തി കോണ്‍ഗ്രസ് വേദിയില്‍ നടത്തിയ പ്രസംഗത്തിനു പിന്നില്‍ വരാന്‍ പോകുന്ന തെരഞ്ഞെടുപ്പുകളാണ് പി.ജെ. കുര്യൻ ഉന്നമിട്ടത്. ഡിസിസിയുടെ സമരസംഗമം പരിപാടിയില്‍ കെപിസിസി പ്രസിഡന്‍റ് സണ്ണി ജോസഫും യുഡിഎഫ് കണ്‍വീനര്‍ അടൂര്‍ പ്രകാശും യൂത്ത് കോണ്‍ഗ്രസ് സംസ്ഥാന പ്രസിഡന്‍റ് രാഹുല്‍ മാങ്കൂട്ടത്തിലും ഉള്‍പ്പെടെയുള്ളവര്‍ വേദിയിലിരിക്കുമ്പോഴാണ് പി.ജെ. കുര്യന്‍ യൂത്ത് കോണ്‍ഗ്രസിന്‍റെ പ്രവര്‍ത്തനശൈലിയെ അപലപിച്ചത്. യൂത്ത് കോണ്‍ഗ്രസ് നേതാക്കളെ കാണുന്നത് ടിവിയിലാണെന്ന അദ്ദേഹത്തിന്‍റെ പരാമര്‍ശമാണ് പലരെയും ചൊടിപ്പിച്ചത്. പൊതുവേദിയിൽ ഇത്തരമൊരു പരാമർശം നടത്തിയതിനെ മുതിർന്ന നേതാക്കളും വിമർശിച്ചു. കുര്യൻ നടത്തിയ വിമർശനം യൂത്ത് കോൺഗ്രസ് സംഘടനാ സംവിധാനത്തിലെ പോരായ്മകളെക്കുറിച്ചാണെന്ന അഭിപ്രായവും ഇതിനിടെ ഉണ്ടായി. പഞ്ചായത്ത് തലത്തിൽ യൂത്ത് കോൺഗ്രസ് പ്രവർത്തനം ഇല്ലെന്നും ഇത് ഭാവി തെരഞ്ഞെടുപ്പുകളെ ദോഷകരമായി ബാധിക്കുമെന്നുമുള്ള അഭിപ്രായവും ഒരു വിഭാഗം നേതാക്കൾ ഉയർത്തി. പി.ജെ. കുര്യനു പിന്തുണയുമായി ഡിസിസി പത്തനംതിട്ട: ഡിസിസി പത്തനംതിട്ടയില്‍ സംഘടിപ്പിച്ച സമര സംഗമത്തില്‍ കെപിസിസി രാഷ്‌ട്രീയകാര്യ സമിതി അംഗം പ്രഫ. പി.ജെ. കുര്യന്‍ യൂത്ത് കോണ്‍ഗ്രസ് പ്രവര്‍ത്തനം കൂടുതല്‍ ശക്തമാക്കണമെന്ന് സദുദ്ദേശ്യത്തോടെ നടത്തിയ പ്രസംഗത്തെ ദുര്‍വയാഖ്യാനം ചെയ്ത് യൂത്ത് കോണ്‍ഗ്രസിനെതിരാണെന്ന് വരുത്തി തീർക്കാൻ ശ്രമമെന്ന് ഡിസിസി പ്രസിഡന്‍റ് പ്രഫ.സതീഷ് കൊച്ചുപറന്പിൽ. സദുദ്ദേശ്യത്തോടെ കെപിസിസി പ്രസിഡന്‍റിന്‍റേയും മറ്റു നേതാക്കളുടെയും സാന്നിധ്യത്തില്‍ ഉപദേശ രൂപേണ അദ്ദേഹം നടത്തിയ പ്രസംഗം സംസ്ഥാനം ഭരിക്കുന്ന പിണറായി വിജയന്‍റെ നെറികേടുകള്‍ക്കുംഏകാധിപത്യ അഴിമതി ഭരണത്തിനും എതിരായി കോണ്‍ഗ്രസ് പ്രവര്‍ത്തകര്‍ നിരന്തരമായി നടത്തിക്കൊണ്ടിരിക്കുന്ന ശക്തമായ സമരങ്ങളെ വിസ്മരിച്ചുകൊണ്ടല്ലെന്ന് പി.ജെ. കുര്യന്‍ തന്നെ വ്യക്തമാക്കിയിട്ടുള്ളതാണെന്ന് ഡിസിസി പ്രസിഡന്‍റ് പറഞ്ഞു. ഒരു അധ്യാപകന്‍റെ കാര്‍ക്കശ്യത്തോടെയുള്ള അദ്ദേഹത്തിന്‍റെ പ്രസംഗത്തിലെ ചില ഭാഗങ്ങള്‍ മാത്രം അടര്‍ത്തിയെടുത്തുകൊണ്ട് ആഘോഷമാക്കുവാനും സൈബര്‍ ആക്രമണങ്ങളിലൂടെ പ്രൊഫ. പി.ജെ. കുര്യനെനെ മോശമായ രീതിയില്‍ ചിത്രീകരിച്ച് സൈബര്‍ ആക്രമണം നടത്തുന്ന സംഘടിത നീക്കത്തെ അംഗീകരിക്കാനാവില്ലെന്ന് ഡി.സി.സി പ്രസിഡന്‍റ് പറഞ്ഞു. കേരളത്തില്‍ ദുര്‍ഭരണം നടത്തുന്ന മുഖ്യമന്ത്രിക്കും, ജില്ലയെ പ്രതിനിധീകരിക്കുന്ന ആരോഗ്യമന്ത്രിക്കുമെതിരേ ജില്ലാ കോണ്‍ഗ്രസ് കമ്മിറ്റിയും യൂത്ത് കോണ്‍ഗ്രസ് അടക്കമുള്ള പോഷക സംഘടനകളും സമപരിപാടികള്‍ തുടരുമെന്നും ഡിസിസി പ്രസിഡന്‍റ് പറഞ്ഞു.

സീനിയർ ജേർണലിസ്റ്റ് യൂണിയൻ വിളംബര സമ്മേളനം

പത്തനംതിട്ട: സീനിയർ ജേർണലിസ്റ്റ് യൂണിയൻ ദേശീയ സമ്മേളനം ഓഗസ്റ്റ് 19 മുതൽ 21 വരെ തിരുവനന്തപുരത്ത് നടക്കും. ഇതിനു മുന്നോടിയായി സീനിയർ ജേർണലിസ്റ്റ് യൂണിയൻ കേരള ജില്ലാ കമ്മിറ്റി സംഘടിപ്പിക്കുന്ന വിളംബര സമ്മേളനം 17ന് ഉച്ചയ്ക്ക് 12ന് പത്തനംതിട്ട പ്രസ് ക്ലബിൽ ഡെപ്യൂട്ടി സ്പീക്കർ ചിറ്റയം ഗോപ കുമാർ ഉദ്ഘാടനം ചെയ്യും. പ്രസ് ക്ലബ് പ്രസിഡന്‍റ് ബിജു കുര്യൻ അധ്യക്ഷത വഹിക്കുന്ന യോഗത്തിൽ ജോസഫ് എം. പുതുശേരി എക്സ് എംഎൽഎ, സീനിയർ ജേർണലിസ്റ്റ് യൂണിയൻ സംസ്ഥാന സെക്രട്ടറി പി.അജയകുമാർ തുടങ്ങിയവർ പ്രസംഗിക്കും.

ട്രാക്ടറിൽ ശബരിമല സന്നിധാനത്തേക്ക് പോലീസ് ഉന്നതന്‍റെ യാത്ര വിവാദത്തിൽ

പത്തനംതിട്ട: ഹൈക്കോടതി വിലക്ക് ലംഘിച്ച് എഡിജിപി എം.ആര്‍. അജിത്ത് കുമാര്‍ പമ്പയില്‍ നിന്നും സന്നിധാനത്തേക്കും തിരിച്ചും ട്രാക്ടറില്‍ യാത്ര ചെയ്തത് വിവാദമാകുന്നു. നവഗ്രഹ പ്രതിഷ്ഠയ്ക്കായി നട തുറന്ന 12ന് വൈകുന്നേരമാണ് എഡിജിപി ട്രാക്ടറില്‍ സന്നിധാനത്തേക്ക് പോയത്. ദര്‍ശനത്തിനു ശേഷം 13ന് തിരിച്ചും ട്രാക്ടറിലാണ് മടങ്ങിയതെന്നു പറയുന്നു. സംഭവത്തിൽ ദേവസ്വം സ്‌പെഷല്‍ കമ്മീഷണര്‍ ദേവസ്വം വിജിലന്‍സിനോട് റിപ്പോര്‍ട്ട് തേടിയിട്ടുണ്ട്.പമ്പ - സന്നിധാനം ട്രാക്ടര്‍ സര്‍വീസ് സാധനങ്ങള്‍ കൊണ്ടു പോകാന്‍ മാത്രമേ ഉപയോഗിക്കാവൂ എന്ന് ഹൈക്കോടതി കര്‍ശന നിര്‍ദേശം നല്‍കിയിട്ടുണ്ട്. നിയമം ലംഘിക്കുന്നവര്‍ക്കെതിരേ നടപടി എടുക്കാനും നിര്‍ദേശമുണ്ട്. ഈ നിര്‍ദേശം നിലനില്‍ക്കുമ്പോഴാണ് അതീവ രഹസ്യമായി എഡിജിപി ട്രാക്ടര്‍ സന്നിധാനം യാത്രയ്ക്ക് ഉപയോഗിച്ചത്. പമ്പ - സന്നിധാനം റൂട്ടില്‍ അല്‍പം മാറി ആള്‍ക്കാരുടെ ശ്രദ്ധയില്‍പ്പെടാത്ത ഭാഗത്ത് ചെന്നാണ് എഡിജിപി ട്രാക്ടറില്‍ കയറി സന്നിധാനത്തേക്ക് പോയത്. അവിടെ ചെന്നിറങ്ങിയതും തിരികെ മടങ്ങിയതും ആള്‍ക്കാര്‍ ശ്രദ്ധിക്കാത്ത ഭാഗം നോക്കിയാണ്. ഇതാദ്യമായിട്ടല്ല എഡിജിപി ട്രാക്ടര്‍ യാത്ര നടത്തുന്നത്. ശബരിമല കോ-ഓര്‍ഡിനേറ്റര്‍ ആയിരിക്കുമ്പോഴും സ്ഥാനത്ത് നിന്ന് നീക്കിയതിന് ശേഷവും ഇദ്ദേഹം ട്രാക്ടര്‍ സഞ്ചാരത്തിന് ഉപയോഗിച്ചിരുന്നു. നേരത്തേ പത്തനംതിട്ട ജില്ലാ പോലീസ് മേധാവി വി.ജി. വിനോദ്കുമാറും ട്രാക്ടര്‍ യാത്ര നടത്തിയത് വിവാദമായിരുന്നു. ഈ വിവരം റിപ്പോര്‍ട്ട് ചെയ്ത സ്പെഷല്‍ ബ്രാഞ്ച് ഉദ്യോഗസ്ഥനെ എസ്പി ശാസിക്കുകയും ചെയ്തിരുന്നു.ചില ദേവസ്വം ഉദ്യോഗസ്ഥരും ട്രാക്ടര്‍ സഞ്ചാരത്തിന് ഉപയോഗിക്കാറുണ്ട്. ട്രാക്ടറില്‍ കയറി ഇരുന്ന ശേഷം ടാര്‍പ്പ ഇട്ട് മൂടിയാണ് ഇവരുടെ സഞ്ചാരം.

ധന്യൻ മാർ ഈവാനിയോസ് ഓർമപ്പെരുന്നാൾ ഇന്ന് തിരുമൂലപുരത്ത്

തിരുവല്ല: ധന്യൻ മാർ ഈവാനിയോസ് മെത്രാപ്പോലീത്തയുടെ 72 മത് ഓർമപ്പെരുന്നാൾ മലങ്കര സുറിയാനി കത്തോലിക്കാ സഭ തിരുവല്ല അതിഭദ്രാസനത്തിന്‍റെ ആഭിമുഖ്യത്തിൽ തിരുമൂലപുരം സെന്‍റ് മേരിസ് മലങ്കര കത്തോലിക്കാ ദേവാലയത്തിൽ ഇന്നു നടക്കും. വൈകുന്നേരം നാലിന് സെന്‍റ് ജോൺസ് മെത്രാപ്പോലീത്തൻ കത്തിഡ്രൽ വികാരി ഫാ. മാത്യു പുനക്കുളത്തിന്‍റെ മുഖ്യ കാർമികത്വത്തിൽ വിശുദ്ധ കുർബാന. തുടർന്ന് മാക്ഫാസ്റ്റ് കോളജ് പ്രിൻസിപ്പൽ ഡോ. വർഗീസ് ചെറിയാൻ അനുസ്മരണ പ്രഭാഷണം നടത്തും. 6 30ന് ദേവാലയത്തിൽ നിന്നും തിരുമൂലപുരം ജംഗ്ഷനിൽ എത്തി തിരിച്ച് ബേത് ആ ബോദ് മലങ്കരയിലേക്ക് ( മലങ്കരയുടെ പിതൃഭവനം) ആഘോഷമായ മെഴുകുതിരി പ്രദർശനം. തുടർന്ന് ആശിർവാദവും നേർച്ചവിളമ്പോടും കൂടി പെരുന്നാളിന് സമാപനമാകുമെന്ന് ഇടവക വികാരി ഫാ. വർഗീസ് ചാമക്കാലയിൽ അറിയിച്ചു.

പ്രതിഭകളെ ആദരിച്ച് മെറിറ്റ് ഫെസ്റ്റ്

ഓമല്ലൂർ : മലങ്കര ഓർത്തഡോക്സ് സഭ തുമ്പമൺ ഭദ്രാസന എംജിഒസിഎസ്എമ്മിന്‍റെ നേതൃത്വത്തിൽ ഭദ്രാസനത്തിലെ 10, പ്ലസ് ടു വിജയിച്ച വിദ്യാർഥികളെ ആദരിക്കുന്ന മെറിറ്റ് ഫെസ്റ്റ് ഓമല്ലൂർ സെന്‍റ് തോമസ് ഓർത്തഡോക്സ് വലിയപള്ളിയിൽ നടന്നു. ഭദ്രാസനത്തിലെ 500ൽ പരം വിദ്യാർഥികൾ പങ്കെടുത്ത സമ്മേളനം മന്ത്രി വീണാ ജോർജ് ഉദ്ഘാടനം ചെയ്തു. ഏബ്രഹാം മാർ സെറാഫിം മെത്രാപ്പോലീത്ത അധ്യക്ഷത വഹിച്ചു കാതോലിക്കേറ്റ് കോളജിലെ ഇംഗ്ലീഷ് വിഭാഗം അസിസ്റ്റന്‍റ് പ്രഫ. റിജോ ജോൺ ശങ്കരത്തിൽ മോട്ടിവേഷൻ ക്ലാസ് നയിച്ചു.ഭദ്രാസന കൗൺസിൽ അംഗം ഫാ. ബിജു തോമസ് പറന്തൽ, എംജിഒസിഎസ്എം വൈസ് പ്രസിഡന്‍റ് ഫാ. റിജോഷ് ജോർജ്, ജനറൽ സെക്രട്ടറി ഡോ. ജോമി ലിനു, ഇടവക വികാരിമാരായ ഫാ. ലെസ് ലിപി. ചെറിയാൻ, ഫാ. അഖിൽ വർഗീസ്, ഇടവക ട്രസ്റ്റി കെ. വി. ജേക്കബ് കേന്ദ്ര സ്റ്റുഡന്‍റ്സ് സെക്രട്ടറി ജിതിന മേരി ജോയ് എന്നിവർ പ്രസംഗിച്ചു. ഫാ. ബ്രിൻസ് അലക്സ് മാത്യൂസ്, ഫാ. സി. കെ. തോമസ്, ഫാ. ജിത്തു തോമസ്, ഫാ. എബിൻ മാത്യു സക്കറിയ, ഫാ. റിജോ സണ്ണി, ഡിസ്ട്രിക് ഓർഗനൈസർ മാരായ ബിജോ, ആന്‍റോ, ആൽഫിൻ, ഗ്രിഗോറി, അഞ്ജു, നോയൽ എന്നിവർ നേതൃത്വം നൽകി.

യൂത്ത് കോൺഗ്രസ് ജില്ലാ പ്രസിഡന്‍റിനെ കരുതൽ തടങ്കലിലാക്കിയത് കിരാതമെന്ന് പുതുശേരി

പത്തനംതിട്ട: യൂത്ത് കോൺഗ്രസ് ജില്ലാ പ്രസിഡന്‍റ് വിജയ് ഇന്ദുചൂഡനെ യാത്രാമധ്യേ വാഹനം തടഞ്ഞു നിർത്തി കസ്റ്റഡിയിലെടുത്ത് വൈകുന്നേരം വരെ പോലീസ് സ്റ്റേഷനിൽ കരുതൽ തടങ്കലിൽ വച്ച നടപടി അങ്ങേയറ്റം അപലപനീയവും കിരാത പോലീസ് വാഴ്ചയുടെ ഭീകര ദൃശ്യവുമാണെന്ന് കേരള കോൺഗ്രസ് വൈസ് ചെയർമാൻ ജോസഫ് എം. പുതുശേരി. ആരോഗ്യമന്ത്രി വീണാ ജോർജിന് ജില്ലയിൽ വിവിധ പരിപാടികൾ ഉണ്ടെന്ന കാരണം പറഞ്ഞാണ് കസ്റ്റഡിയിലെടുത്തത്. മന്ത്രിക്കു പരിപാടികൾ ഉള്ളപ്പോൾ പൊതുപ്രവർത്തകർക്ക് പുറത്തിറങ്ങാനും യാത്ര ചെയ്യാനും വയ്യാത്ത സാഹചര്യം ഒരുക്കുന്നത് അമിതാധികാരപ്രയോഗവും ഫാസിസ്റ്റ് സമീപനവുമാണെന്ന് പുതുശേരി പറഞ്ഞു. മന്ത്രിമാർക്കെതിരേ പ്രതിഷേധവും പ്രകടനങ്ങളും ഒക്കെ നടക്കുന്നത് സർവസാധാരണമാണ്. അത് ജനാധിപത്യ ക്രമത്തിൽ അംഗീകരിക്കപ്പെട്ടിട്ടുള്ള അവകാശവുമാണ്. മന്ത്രിമാരെ വഴിയിൽ തടയുക എന്ന സമരപരിപാടി ഔദ്യോഗികമായി പ്രഖ്യാപിച്ചു നാടുനീളെ കലാപം ഉണ്ടാക്കിയ ഡിവൈഎഫ്ഐയുടെയും അതിന് ആശിർവാദം നൽകിയ സിപിഎമ്മിന്റെയും നേതാക്കൾക്ക് ഇപ്പോൾ പ്രതിഷേധമെന്ന് കേൾക്കുമ്പോൾ ഹാലിളകുന്നതും വിളറി പിടിക്കുന്നതും ഭരണത്തുടർച്ചയുടെ അധികാര ലഹരി മത്തുപിടിപ്പിച്ചതിന്‍റെ ദൃഷടാന്തമാണെന്ന് പുതുശേരി പറഞ്ഞു.

മാലിന്യ സംസ്‌കരണം സമൂഹത്തിന്‍റെ ഉത്തരവാദിത്വം: മന്ത്രി എം.ബി. രാജേഷ്

ഇരവിപേരൂർ: ഗ്രാമപഞ്ചായത്ത് നേതൃത്വത്തിൽ വള്ളംകുളത്തു നിര്‍മിച്ച ആധുനിക അറവുശാല സംസ്ഥാനത്തിനാകെ മാതൃകയാണെന്ന് മന്ത്രി എം. ബി. രാജേഷ്. ഇരവിപേരൂർ ഗ്രാമപഞ്ചായത്ത് ആധുനിക അറവുശാലയുടെ ഉദ്ഘാടനം നിർവഹിച്ചു പ്രസംഗിക്കുകയായിരുന്നു അദ്ദേഹം. ആരോഗ്യകരവും ശുചിത്വമുള്ളതുമായ മാംസം ജനങ്ങളുടെ അവകാശമാണ്. ഇതേപോലെയുള്ള ആധുനിക അറവുശാലകൾ നാടിനുവേണം. മേന്മയേറിയ മാംസം നല്‍കുന്നതിനൊപ്പം ശാസ്ത്രീയമായ രീതിയില്‍ മാലിന്യ സംസ്‌കരണം ഉറപ്പാക്കുന്നുവെന്നതാണ് ഇതിന്‍റെ പ്രത്യേകതയെന്ന് മന്ത്രി കൂട്ടിച്ചേർത്തു. സ്വകാര്യ പങ്കാളിത്തത്തോടെ ബിഒടി വ്യവസ്ഥയില്‍ നടപ്പാക്കുന്ന പദ്ധതി അറവുമാടുകളെ നൂതന സംവിധാനത്തിലൂടെ മെഷീന്‍ വഴി അണുവിമുക്തമാക്കി കശാപ്പു ചെയ്ത് പൊതുജനങ്ങള്‍ക്ക് നല്‍കുന്നു. മാലിന്യ സംസ്‌കരണം സമൂഹത്തിന്‍റെ കൂടി ഉത്തരവാദിത്വമാണെന്ന് മന്ത്രി പറഞ്ഞു. പിഴ ചുമത്തിയതു കൊണ്ടു മാത്രം മാലിന്യം അലക്ഷ്യമായി വലിച്ചെറിയുന്നവരെ തടയാനാകില്ല. കോയിപ്രം ബ്ലോക്ക് പഞ്ചായത്ത് പ്രസിഡന്‍റ് ജെസി സൂസന്‍ ഫിലിപ്പ് അധ്യക്ഷത വഹിച്ചു. ഇരവിപേരൂര്‍ ഗ്രാമപഞ്ചായത്ത് പ്രസിഡന്‍റ് കെ. ബി. ശശിധരന്‍പിള്ള, വൈസ് പ്രസിഡന്‍റ് സാലി ജേക്കബ്, ജില്ലാ പഞ്ചായത്ത് ക്ഷേമകാര്യ സ്ഥിരം സമിതി അധ്യക്ഷന്‍ ജിജി മാത്യു, സംസ്ഥാന ആസൂത്രണ സമിതി അംഗം ഡോ. വര്‍ഗീസ് ജോര്‍ജ്, മുന്‍ ദേവസ്വം ബോര്‍ഡ് പ്രസിഡന്‍റ് കെ. അനന്തഗോപന്‍, ഗ്രാമപഞ്ചായത്ത് സെക്രട്ടറി മനേഷ് കുമാര്‍, ബ്ലോക്ക്, ഗ്രാമപഞ്ചായത്ത് അംഗങ്ങള്‍ തുടങ്ങിയവര്‍ പ്രസംഗിച്ചു.

മാർ ഗ്രിഗോറിയോസ് ദിവ്യകാരുണ്യാലയം ഉദ്ഘാടനം 20ന്

തിരുവല്ല: കവിയൂർ കോട്ടൂർ ആർച്ച് ബിഷപ് മാർ ഗ്രീഗോറിയോസ് ഫൗണ്ടേഷൻ മാർ ഗ്രീഗോറിയോസ് ദിവ്യകാരുണ്യാലയം ആശിർവാദവും ഉദ്ഘാടനവും 20ന് ഉച്ചകഴിഞ്ഞ് മൂന്നിന് ചങ്ങനാശേരി അതിരൂപതാധ്യക്ഷൻ മാർ തോമസ് തറയിൽ നിർവഹിക്കും. തിരുവല്ല അതിരൂപത വികാരി ജനറാൾ മോൺ. ഡോ.ഐസക് പറപ്പള്ളിൽ അനുസ്മരണ പ്രഭാഷണം നടത്തും. അലക്സ് കുര്യാക്കോസ് അധ്യക്ഷത വഹിക്കും. സുപ്പിരീയർ ജനറാൾ ഫാ. മാത്യു കുരികാട്ടിൽ എംഎസ്ജെ മുഖ്യപ്രഭാഷണവും ഫാ. ഗീവർഗീസ് കുറ്റിയിൽ ഒഐസി അനുഗ്രഹപ്രഭാഷണവും നടത്തും. കവിയൂർ ഗ്രാമപഞ്ചായത്ത് പ്രസിഡന്‍റ് എം.ഡി. ദിനേശ് കുമാർ, ഫാ. അലക്സാണ്ടർ കുരീകാട്ടിൽ, ഫാ. മാത്യു കാമുണ്ടകത്തിൽ, ഫാ.സജിൻ തളിയൻ, ബ്രദർ സന്തോഷ് ജോസഫ്, സ്ഥാപക പ്രസിഡന്‍റ് ഫാ. ഇഗ്നേഷ്യസ് തങ്ങളത്തിൽ ഒഐസി, സെക്രട്ടറി പ്രഫ. ജേക്കബ് എം. ഏബ്രഹാം, ഫാ. സുബിൻ കുറവക്കാട്ട് തുടങ്ങിയവർ പ്രസംഗിക്കും.

നഗരമധ്യത്തിൽ പൈപ്പ് പൊട്ടി ഗർത്തം രൂപപ്പെട്ടു

പത്തനംതിട്ട: നഗരമധ്യത്തിൽ പൈപ്പ്പൊട്ടി വൻ ഗർത്തം. പത്തനംതിട്ട മിനി സിവിൽ സ്റ്റേഷൻ പടിക്കൽ മൂന്നു ദിവസം മുമ്പാണ് പൈപ്പ് പൊട്ടി കുഴി രൂപപ്പെട്ടത് . ദിവസങ്ങൾ കഴിഞ്ഞിട്ടും അറ്റകുറ്റപ്പണി നടത്താൻ അധികൃതർക്ക് കഴിഞ്ഞിട്ടില്ല. ഒരാൾ പൊക്കത്തിൽ വൻ ഗർത്തമാണ് റോഡ് മധ്യത്തിൽ രൂപപ്പെട്ടിട്ടുള്ളത്. ഇതോടെ നഗരത്തിൽ കുടിവെള്ള വിതരണവും മുടങ്ങിയിരിക്കുകയാണ്. നഗരത്തിൽ വളരെ തിരക്കേറിയ ഭാഗം കൂടിയാണിത്. ഗർത്തം രൂപപ്പെട്ടതോടെ വാഹനങ്ങൾക്ക് ഇതുവഴി പോകാൻ പറ്റാത്ത അവസ്ഥയാണ്. ഗതാഗത കുരുക്കും രൂക്ഷമായിട്ടുണ്ട്.

മുണ്ടിയപ്പള്ളി ബിലീവേഴ്സ് മെഡിക്കൽ സെന്‌ററിൽ കിടത്തിച്ചികിത്സ ആരംഭിച്ചു

തിരുവല്ല: മ ുണ്ടിയപ്പള്ളി ബിലീവേഴ്സ് മെഡിക്കൽ സെന്‍ററിൽ രോഗികളെ കിടത്തി ചികിത്സിക്കുവാനുള്ള സൗകര്യങ്ങൾക്ക് തുടക്കമായി. സ്വകാര്യ മുറികൾ ഉൾപ്പെടെ കിടത്തിച്ചികിത്സയ്ക്ക് അത്യാവശ്യമായ സൗകര്യങ്ങളോടു കൂടിയുള്ള റീഹാബിലിറ്റേഷൻ സെന്‍ററും മുണ്ടിയപ്പള്ളി ബിലീവേഴ്സിൽ പ്രവർത്തനം ആരംഭിച്ചിട്ടുണ്ട്. ചികിത്സാ സംബന്ധമായ ആവശ്യങ്ങൾക്ക് എത്തിയ മുണ്ടിയപ്പള്ളി താഴികയിൽ കെ.വി. മറിയാമ്മയാണ് കിടത്തിച്ചികിത്സാ സൗകര്യങ്ങളും റീഹാബിലിറ്റേഷൻ സെന്‍ററും ഉദ്ഘാടനം ചെയ്തത്. ബിലീവേഴ്സ് ചർച്ച് മെഡിക്കൽ കോളജ് ആശുപത്രി ഡയറക്ടറും സിഇഒയുമായ ഡോ. ജോർജ് ചാണ്ടി മറ്റീത്ര അധ്യക്ഷത വഹിച്ചു. രോഗികേന്ദ്രീകൃതമായി ബിലീവേഴ്സ് ആശുപത്രി നടത്തുന്ന പ്രവർത്തനങ്ങളുടെ പ്രതീകമായാണ് ആശുപത്രിയിൽ ചികിത്സയ്ക്കായെത്തിയ വ്യക്തിയെ കൊണ്ട് ഉദ്ഘാടനം നിർവഹിപ്പിച്ചതെന്ന് ഡോ. ജോർജ് ചാണ്ടി മറ്റീത്ര പറഞ്ഞു. ബിലീവേഴ്സ് ആശുപത്രി അസോസിയേറ്റ് ഡയറക്ടർ ഡോ. ജോൺ വല്യത്ത് , മുണ്ടിയപ്പള്ളി ബിലീവേഴ്സ് മെഡിക്കൽ സെന്‍റർ മെഡിക്കൽ സൂപ്രണ്ടും പാലിയേറ്റിവ് മെഡിസിൻ സീനിയർ കൺസൾട്ടൻ്റുമായ ഡോ. ലിജിയ മാത്യു, പിഎംആർ വിഭാഗം മേധാവി ഡോ. തോമസ് മാത്യു, പാലിയേറ്റിവ് മെഡിസിൻ വിഭാഗം മേധാവി ഡോ. അജിത് സി. കോശി, ചീഫ് നഴ്സിംഗ് ഓഫീസർ മിനി സാറാ തോമസ്, നഴ്സിംഗ് ഇൻ ചാർജ് പൊന്നമ്മ തോമസ് എന്നിവർ സന്നിഹിതരായിരുന്നു.

എച്ച്1 എന്‍1 പനിക്കെതിരേ ജാഗ്രത പാലിക്കണം

പത്തനംതിട്ട: എച്ച്1 എന്‍1 പനിക്കെതിരേ ജാഗ്രത പാലിക്കണമെന്ന് ജില്ലാ മെഡിക്കല്‍ ഓഫീസര്‍ ഡോ. എല്‍. അനിത കുമാരി അറിയിച്ചു. ഇന്‍ഫ്‌ളുവന്‍സ വൈറസ് കാരണം ഉണ്ടാകുന്ന രോഗമാണ് എച്ച്1എന്‍1 പനി. തുമ്മല്‍, തൊണ്ടവേദന, മൂക്കൊലിപ്പ്, ചുമ ശ്വാസതടസം, ഛര്‍ദ്ദി എന്നിവ ലക്ഷണങ്ങളാണ്. രോഗബാധയുള്ളവര്‍ മൂക്കും വായും മറയ്ക്കാതെ തുമ്മുകയും ചുമക്കുകയും ചെയ്യുമ്പോഴും മറ്റുള്ളവരുമായി അടുത്തിടപഴകുമ്പോഴും രോഗിയുടെ സ്രവങ്ങള്‍ പുരളാനിടയുള്ള പ്രതലങ്ങളില്‍ സ്പര്‍ശിക്കുന്നതിലൂടെയും മറ്റുള്ളവരിലേക്ക് പകരുന്നു. രോഗലക്ഷണങ്ങള്‍ തുടക്കത്തിലെ തിരിച്ചറിഞ്ഞ് കൃത്യസമയത്ത് ചികിത്സ തേടണം. സര്‍ക്കാര്‍ ആശുപത്രികളില്‍ സൗജന്യ പരിശോധനയും ചികിത്സയും ലഭ്യമാണ്. രോഗപ്പകര്‍ച്ച ഒഴിവാക്കാന്‍ വ്യക്തി ശുചിത്വവും സാമൂഹിക ശുചിത്വവും പാലിക്കുന്നുവെന്ന് ഉറപ്പാക്കണമെന്നും ഡിഎംഒ അഭ്യർഥിച്ചു.

കേറ്ററേഴ്സ് അസോസിയേഷൻ ജില്ലാ സമ്മേളനം നടത്തി

പത്തനംതിട്ട: ഓൾ കേരള കേറ്ററേഴ്സ് അസോസിയേഷന്‍ (എകെസിഎ) ആറാമത് ജില്ലാ സമ്മേളനം ഓമല്ലൂരില്‍ നടന്നു. ജില്ലാ പ്രസിഡന്‍റ് ചെറിയാന്‍ ജോസഫ് മേന്മ യുടെ അധ്യക്ഷതയില്‍ സംസ്ഥാന പ്രസിഡന്‍റ് പ്രിന്‍സ് ജോര്‍ജ് ഉദ്ഘാടനം ചെയ്തു. മന്ത്രി വീണാ ജോര്‍ജ്, കെ.യു. ജനീഷ്‌കുമാര്‍ എംഎല്‍എ, പത്തനംതിട്ട മുനിസിപ്പല്‍ ചെയര്‍മാന്‍ ടി. സക്കീര്‍ ഹുസൈൻ, ഓമല്ലൂര്‍ ഗ്രാമപഞ്ചായത്ത് പ്രസിഡന്‍റ് ജോണ്‍സണ്‍ വിളവിനാല്‍, സംസ്ഥാന നേതാക്കളായ വി. സുനുകുമാർ, മനോജ് മാധവശേരില്‍ തുടങ്ങിയവർ പ്രസംഗിച്ചു. അനധികൃത കാറ്ററിംഗ് നടത്തുന്നവര്‍ക്കെതിരേ കര്‍ശന നടപടി ഉണ്ടാകണമെന്നും നിത്യോപയോഗ സാധനങ്ങളുടെ അമിത വിലവർധന പിടിച്ചു നിര്‍ത്താന്‍ വേണ്ട അടിയന്തര നടപടികള്‍ സര്‍ക്കാര്‍ കൈക്കൊള്ളണമെന്നും സമ്മേളനം ആവശ്യപ്പെട്ടു. സംഘടനയുടെ പുതിയ ഭാരവാഹികളായി ചെറിയാന്‍ ജോസഫ് - പ്രസിഡന്‍റ്, സിന്‍ജു മാത്യു - ജനറല്‍ സെക്രട്ടറി, ലാല്‍ജി മാത്യു - ട്രഷറാർ എന്നിവരെ തെരഞ്ഞെടുത്തു.

വാര്‍ഷികവും പ്രതിഭാ സംഗമവും

പത്തനംതിട്ട : ഹ്യൂമന്‍ റൈറ്റ്‌സ് പ്രമോഷന്‍ മിഷന്‍ പത്തനംതിട്ട ജില്ലാ കമ്മിറ്റിയുടെ ആറാം വാര്‍ഷികവും ഇക്കഴിഞ്ഞ എസ്എസ്എല്‍സി, പ്ലസ് ടു പരീക്ഷകളില്‍ മികച്ച വിജയം നേടിയ ജില്ലയിലെ ചെന്നീര്‍ക്കര പഞ്ചായത്തിലെ കുട്ടികളെ ആദരിക്കുന്ന പ്രതിഭാ സംഗമവും കാര്‍ട്ടൂണിസ്റ്റ് ഷാജി മാത്യു ഉദ്ഘാടനം ചെയ്തു. മിഷന്‍ ജില്ലാ പ്രസിഡന്‍റ് സാമുവേല്‍ പ്രക്കാനം അധ്യക്ഷത വഹിച്ചു. സംസ്ഥാന മാധ്യമ പുരസ്‌കാര ജേതാവ് വര്‍ഗീസ് സി. തോമസ് മുഖ്യ പ്രഭാഷണം നടത്തി . ഇലന്തൂര്‍ ബ്ലോക്ക് പഞ്ചായത്ത് അംഗങ്ങളായ കലാ അജിത്, അജി അലക്‌സ്, ഇലന്തൂര്‍ പഞ്ചായത്ത് വൈസ് പ്രസിഡന്‍റ് വിന്‍സന്‍ തോമസ്, മിഷന്‍ ജില്ലാ ഭാരവാഹികളായ സിനു ഏബ്രഹാം, ജോസ് ഏബ്രഹാം, ജിജി ജോര്‍ജ്, ബൈജു തങ്കച്ചൻ, പഞ്ചായത്ത് അംഗങ്ങളായ സജി ജോൺ, വി.രാമചന്ദ്രന്‍ നായര്‍, ലീലാ കേശവന്‍ തോമസ് ജോണ്‍, ഡോ. സ്‌നേഹ ജോര്‍ജ് പച്ചയില്‍ തുടങ്ങിയവര്‍ പ്രസംഗിച്ചു . മികച്ച വിജയം നേടിയ കുട്ടികളെ അവാര്‍ഡ് നല്‍കി അനുമോദിച്ചു.

മൂന്നു ഗ്രാം കഞ്ചാവുമായി ഡിവൈഎഫ്ഐ പ്രവർത്തകൻ അറസ്റ്റിൽ

അടൂര്‍: മൂന്ന് ഗ്രാം കഞ്ചാവുമായി ഡിവൈഎഫ്‌ഐ പ്രവര്‍ത്തകന്‍ അറസ്റ്റില്‍. അടൂര്‍ കോട്ടമുകള്‍ മിനി ജംഗ്ഷനില്‍ സഫീര്‍ മന്‍സില്‍ മുഹമ്മദ് സാബിറിനെയാണ് (20) അടൂര്‍ പോലീസ് പിടികൂടിയത്. ശനിയാഴ്ച വൈകുന്നേരം ആറിന് കോട്ടമുകള്‍ ഭാഗത്താണ് ഇയാളെ പോലീസ് പിടികൂടിയത്. ഒരാള്‍ക്ക് കൈവശം വയ്ക്കാന്‍ അനുമതിയുള്ള കഞ്ചാവ് മാത്രം മുഹമ്മദ് സാബിറിന്‍റെ കൈവശത്തുള്ളൂ എന്നതിനാല്‍ കേസെടുത്ത ശേഷം ഇയാള്‍ക്ക് സ്റ്റേഷന്‍ ജാമ്യം നല്‍കി പോലീസ് വിട്ടയച്ചു.

ബലാത്സംഗക്കേസില്‍ യുവാവ് അറസ്റ്റില്‍

പത്തനംതിട്ട: ഭര്‍തൃമതിയും ഒരുകുഞ്ഞിന്‍റെ മാതാവുമായ യുവതിയെ ബലാത്സംഗത്തിന് ഇരയാക്കിയ കേസില്‍ യുവാവ് അറസ്റ്റില്‍. ചെങ്ങറ പൊയ്കയില്‍ വീട്ടില്‍ വിഷ്ണു ശങ്കറാണ് (32) അറസ്റ്റിലായത്. ജനുവരി ഒന്നുമുതല്‍ ജൂലൈ ഏഴുവരെയുള്ള കാലയളവില്‍ ബലാത്സംഗം ചെയ്തുവെന്നാണ് പരാതി. ഇന്‍സ്റ്റാംഗ്രാമിലൂടെയുള്ള പരിചയം മുതലെടുത്ത് നിര്‍ബന്ധിച്ച് യുവതിയില്‍നിന്ന് മൊബൈല്‍ ഫോണും പണവും കൈവശമാക്കി. ഇരുവരും ചേര്‍ന്നുള്ള ചിത്രങ്ങള്‍ യുവതിയുടെ ഫോണില്‍ എടുത്തിരുന്നതായും പലദിവസങ്ങളിലും യുവതിയുടെ വീട്ടില്‍ അതിക്രമിച്ചു കയറി ബലാത്സംഗത്തിന് വിധേയയാക്കിയെന്നും പരാതിയില്‍ പറയുന്നു. നിര്‍ബന്ധിച്ച് അര്‍ധനഗ്ന ഫോട്ടോകള്‍ ഫോണില്‍ എടുത്ത് സൂക്ഷിക്കുകയും തുടര്‍ന്ന് യുവാവിന്‍റെ സുഹൃത്തിന് അയച്ചുകൊടുക്കുകയും ചെയ്തു. ഇതോടെയാണ് യുവതി പരാതിയുമായി മലയാലപ്പുഴ പോലീസിനെ സമീപിച്ചത്. യുവാവിനെ ഇയാളുടെ മാതൃസഹോദരി വാടകയ്ക്ക് താമസിക്കുന്ന ആലപ്പുഴ ഹരിപ്പാട് മുട്ടത്തെ വീട്ടില്‍നിന്നുമാണ് കസ്റ്റഡിയിലെടുത്തത്. മൊബൈല്‍ ഫോണ്‍ ശാസ്ത്രീയ പരിശോധനയ്ക്ക് അയയ്ക്കുതിനായി കസ്റ്റഡിയിലെടുത്തു. വിഷ്ണു ശങ്കറിനെ കോടതിയില്‍ ഹാജരാക്കി റിമാന്‍ഡ് ചെയ്തു. പത്തനംതിട്ട, മലയാലപ്പുഴ പോലീസ് സ്റ്റേഷനുകളില്‍ രജിസ്റ്റര്‍ ചെയ്തിട്ടുള്ള നിരവധി ക്രിമിനല്‍ കേസുകളിലെ പ്രതിയാണ് യുവാവെന്ന് പോലീസ് പറഞ്ഞു. മലയാലപ്പുഴ പോലീസ് ഇന്‍സ്‌പെക്ടര്‍ ബി.എസ്. ശ്രീജിത്തിന്‍റെ നേതൃത്വത്തില്‍ നടക്കുന്ന അന്വേഷണത്തില്‍ എസ്‌ഐ വി. എസ്. കിരണ്‍, എഎസ്ഐ ജയലക്ഷ്മി തുടങ്ങിയവരുള്‍പ്പെടുന്നു.

പി.ജെ. കുര്യന്‍ ഉന്നമിട്ടത് നിയമസഭാ സ്ഥാനാര്‍ഥി നിര്‍ണയം; കോണ്‍ഗ്രസില്‍ പുതിയ വിവാദങ്ങള്‍ക്കു തുടക്കമായി

പത്തനംതിട്ട: ജില്ലയിലെ കോണ്‍ഗ്രസിന്‍റെ തലമുതിര്‍ന്ന നേതാവായ പി.ജെ. കുര്യന്‍ യൂത്ത് കോണ്‍ഗ്രസിനെ ശക്തിപ്പെടുത്താന്‍ നടത്തിയ ആഹ്വാനം തിരിഞ്ഞുകൊത്തി. എസ്എഫ്‌ഐയുടെ സംഘടനാ സംവിധാനത്തെയും സമരത്തെയും പുകഴ്ത്തി കുര്യന്‍ കോണ്‍ഗ്രസ് വേദിയില്‍ നടത്തിയ പ്രസംഗത്തിനു പിന്നില്‍ വരാന്‍പോകുന്ന തെരഞ്ഞെടുപ്പുകളില്‍ ജില്ലയിലെ യുഡിഎഫ് സ്ഥാനാര്‍ഥി നിര്‍ണയത്തില്‍ തനിക്ക് പങ്കാളിത്തം ഉറപ്പിക്കാനുള്ള ശ്രമത്തിന്‍റെ ഭാഗംകൂടിയാണെന്ന് ആരോപണം. കുര്യനെതിരേ യൂത്ത് കോണ്‍ഗ്രസ് നേതാക്കള്‍ ശക്തമായ പ്രതികരണങ്ങളുമായാണ് രംഗത്തെത്തിയിരിക്കുന്നത്. കഴിഞ്ഞദിവസം ഡിസിസിയുടെ സമരസംഗമം പരിപാടിയില്‍ കെപിസിസി പ്രസിഡന്‍റ് സണ്ണി ജോസഫും യുഡിഎഫ് കണ്‍വീനര്‍ അടൂര്‍ പ്രകാശും യൂത്ത് കോണ്‍ഗ്രസ് സംസ്ഥാന പ്രസിഡന്‍റ് രാഹുല്‍ മാങ്കൂട്ടത്തിലും ഉള്‍പ്പെടെയുള്ളവര്‍ വേദിയിലിരിക്കുമ്പോഴാണ് പി.ജെ. കുര്യന്‍ യൂത്ത് കോണ്‍ഗ്രസിന്‍റെ പ്രവര്‍ത്തനശൈലിയെ അപലപിച്ചത്. യൂത്ത് കോണ്‍ഗ്രസ് നേതാക്കളെ കാണുന്നത് ടിവിയിലാണെന്ന അദ്ദേഹത്തിന്‍റെ പരാമര്‍ശമാണ് പലരെയും ചൊടിപ്പിച്ചത്. തുടര്‍ന്ന് കുര്യന്‍ നടത്തിയ പരാമര്‍ശങ്ങള്‍ വരാന്‍പോകുന്ന നിയമസഭാ തെരഞ്ഞെടുപ്പില്‍ തനിക്ക് മുഖ്യറോള്‍ കൈവരിക്കുകയെന്ന ലക്ഷ്യത്തോടെയാണെന്ന് യൂത്ത് കോണ്‍ഗ്രസ് നേതാക്കള്‍ ചൂണ്ടിക്കാട്ടുന്നു. തിരുവല്ലയില്‍ മത്സരിക്കാന്‍ വരെ അദ്ദേഹം സന്നദ്ധനായേക്കുമെന്ന പ്രചാരണത്തിനിടെയാണ് പുതിയ വിവാദത്തിനു തിരികൊളുത്തിയിരിക്കുന്നത്. - സംസ്ഥാന സര്‍ക്കാരിനെതിരേ ശക്തമായ പ്രചാരണം നടക്കുമ്പോഴും സിപിഎമ്മിന്‍റെ സംഘടനാസംവിധാനം അടിയുറച്ചതാണ്. ഓരോ മണ്ഡലത്തിലും 25 പ്രവര്‍ത്തകരെയെങ്കിലും സംഘടിപ്പിക്കാന്‍ കഴിഞ്ഞില്ലെങ്കില്‍ കാര്യമില്ല. കഴിഞ്ഞ നിയമസഭാ തെരഞ്ഞെടുപ്പില്‍ തന്‍റെ അഭിപ്രായം മാനിച്ചിരുന്നെങ്കില്‍ ജില്ലയില്‍ മൂന്ന് സീറ്റിലെങ്കിലും വിജയിക്കാമായിരുന്നെന്നും കുര്യന്‍ പറഞ്ഞു. അടൂര്‍പ്രകാശ് അടക്കമുള്ള നേതാക്കള്‍ തന്‍റെ അഭിപ്രായം അവഗണിച്ചു. ഇത്തവണയും സ്ഥാനാര്‍ഥികളെ അടിച്ചേല്‍പിക്കാനാണ് ശ്രമമെങ്കില്‍ വലിയ പരാജയം കാത്തിരിക്കുകയാണെന്നും കുര്യന്‍ മുന്നറിയിപ്പ് നല്‍കി. വര്‍ഷങ്ങളായി ജില്ലയിലെ കോണ്‍ഗ്രസ് സംഘടനാ സംവിധാനത്തെ നിയന്ത്രിക്കുന്ന കുര്യനെതിരേ മുമ്പും പാര്‍ട്ടിയില്‍ പടയൊരുക്കം ഉണ്ടായിട്ടുണ്ട്. ഡിസിസി മുന്‍ പ്രസിഡന്‍റുമാരായ പീലിപ്പോസ് തോമസ്, ബാബു ജോര്‍ജ്, ജില്ലാ പഞ്ചായത്ത് മുന്‍ പ്രസിഡന്‍റ് ഡോ. സജി ചാക്കോ എന്നിവര്‍ സിപിഎമ്മിലേക്കു പോയതുതന്നെ പി.ജെ. കുര്യന്‍ ജില്ലയില്‍ കോണ്‍ഗ്രസിനെ ഹൈജാക്ക് ചെയ്തുവെന്ന് ആരോപിച്ചാണ്.

മാന്നാര്‍ ബസ് സ്റ്റാന്‍ഡ് മോട്ടോർ വെഹിക്കിൾ ഉദ്യോഗസ്ഥർ എത്തി പരിശോധിച്ചു

മാന്നാര്‍: കാല്‍നൂറ്റാണ്ടു പിന്നിട്ടിട്ടും റോഡ് ട്രാന്‍സ്‌പോര്‍ട്ട് അഥോറിറ്റിയുടെ അംഗീകാരം ലഭിക്കാതിരുന്ന മാന്നാര്‍ ബസ് സ്റ്റാന്‍ഡ് മോട്ടോര്‍ വെഹിക്കിള്‍ ഉദ്യോഗസ്ഥര്‍ നേരിട്ടെത്തി പരിശോധിച്ചു. ആലപ്പുഴ ആര്‍ടിഒ ഡി. ജയരാജ്, ജോയിന്‍റ് ആര്‍ടിഒ പ്രസാദ് എന്നിവരാണ് മാന്നാര്‍ പഞ്ചായത്ത് പ്രസിഡന്‍റ് ടി.വി. രത്‌നകുമാരി, സെക്രട്ടറി ബോബി ഫ്രാന്‍സിസ്, മറ്റ് ഉദ്യോഗസ്ഥര്‍ എന്നിവരോടൊപ്പം സ്റ്റാന്‍ഡിലെത്തി പരിശോധന നടത്തിയത്. ഉദ്യോഗസ്ഥര്‍ ബസ് സ്റ്റാന്‍ഡില്‍ വരുത്തേണ്ട മാറ്റങ്ങള്‍ നിര്‍ദേശിച്ചു. പ്രവര്‍ത്തനം നിശ്ചലമായിരുന്ന ബസ് സ്റ്റാന്‍ഡിന്‍റെ പ്രവര്‍ത്തനം പുനരാരംഭിക്കുന്നതിനുള്ള യോഗം പഞ്ചായത്ത് ഓഫീസില്‍ നടന്നു. പഞ്ചായത്ത് പ്രസിഡന്‍റ് ടി.വി. രത്‌നകുമാരി അധ്യക്ഷയായി. അടിയന്തരമായി ചില പ്രവൃത്തികള്‍ നടപ്പിലാക്കുന്നതിനായി പഞ്ചായത്ത് ഫണ്ടില്‍ 10 ലക്ഷം രൂപ വകയിരുത്തിയതായി പ്രസിഡന്‍റ് യോഗത്തിൽ അറിയിച്ചു. ഈ പ്രവൃത്തികള്‍ കഴിഞ്ഞാലുടന്‍ ബസ് സ്റ്റാന്‍ഡിന്‍റെ പ്രവര്‍ത്തനം പുനരാരംഭിക്കുന്നതിന് താത്കാലിക അനുമതി ലഭിക്കുന്നതിന് ശിപാര്‍ശ ചെയ്യണമെന്ന് പ്രസിഡന്‍റ് ഉദ്യോഗസ്ഥരോട് ആവശ്യപ്പെട്ടു. ആര്‍ടിഒ ഡി. ജയരാജ്, ജോയിന്‍റ് ആര്‍ടിഒ പ്രസാദ്, മാന്നാര്‍ എസ്‌ഐ പ്രദീപ് ലാല്‍, സെക്രട്ടറി ബോബി ഫ്രാന്‍സിസ്, പിഡബ്ല്യുഡി ചെങ്ങന്നൂര്‍ എഇ എസ്. അഭിലാഷ്, പിഡബ്ല്യുഡി ഓവര്‍സിയര്‍ രാജ്‌മോഹന്‍, എംഎംബി ശ്യാംകുമാര്‍ എന്നിവര്‍ പങ്കെടുത്തു. 2023-ല്‍ ആണ് അംഗീകാരത്തിനായി പഞ്ചായത്തധികൃതര്‍ അപേക്ഷ സമര്‍പ്പിച്ചത്. അന്ന് മോട്ടോര്‍ വെഹിക്കിള്‍ ഉദ്യോഗസ്ഥര്‍ സ്റ്റാന്‍ഡ് പരിശോധിച്ചിരുന്നു. തുടര്‍നടപടികള്‍ ഉണ്ടായില്ല. സാമൂഹിക പ്രവര്‍ത്തകനായ കുട്ടമ്പേരൂര്‍ സുരഭിയില്‍ പീടിയേക്കല്‍ പി. സുരേഷ് കുമാര്‍ ഹൈക്കോടതിയില്‍ ഹര്‍ജി നല്‍കിയിരുന്നു. ഹൈക്കോടതി ഇതിന്‍റെ വിവരങ്ങള്‍ കളക്ടറോട് ആവശ്യപ്പെട്ടതിനെത്തുടര്‍ന്നാണ് തുടര്‍ നടപടികള്‍ക്ക് വീണ്ടും ജീവന്‍വച്ചത്.

ലഹരിക്കെതിരേ രമേശ് ചെന്നിത്തലയുടെ നേതൃത്വത്തില്‍ സമൂഹ നടത്തം ഇന്ന്

പത്തനംതിട്ട: ലഹരി മാഫിയയ്‌ക്കെതിരേ മുന്‍ പ്രതിപക്ഷ നേതാവ് രമേശ് ചെന്നിത്തലയുടെ നേതൃത്വത്തില്‍ സമൂഹ നടത്തം ഇന്ന് പത്തനംതിട്ടയില്‍. ലഹരിവിരുദ്ധ പ്രവര്‍ത്തനങ്ങളുടെ ഭാഗമായി പ്രൗഡ് കേരള എന്ന സംഘടനയുടെ നേതൃത്വത്തില്‍ രാവിലെ ആറിന് പത്തനംതിട്ട സ്റ്റേഡിയം ജംഗഷനില്‍നിന്ന് ആരംഭിച്ച് മുനിസിപ്പല്‍ ടൗണ്‍ സ്‌ക്വയര്‍ വരെയാണ് ലഹരിവിരുദ്ധ സമൂഹ നടത്തം. വാക്കത്തോണില്‍ വിദ്യാര്‍ഥികള്‍, യുവജനങ്ങള്‍, സന്നദ്ധ സംഘടനകള്‍, മദ്യവിരുദ്ധ- ലഹരിവിരുദ്ധ സംഘടനകളുടെ പ്രതിനിധികള്‍, സാംസ്‌കാരിക രാഷ്‌ട്രീയ മണ്ഡലങ്ങളിലെ പ്രമുഖര്‍, ആത്മീയ നേതാക്കള്‍ തുടങ്ങിയവര്‍ പങ്കെടുക്കുമെന്ന് പ്രൗഡ് കേരള ചെയര്‍മാന്‍ മലയിന്‍കീഴ് വേണുഗോപാല്‍ അറിയിച്ചു. പത്തനംതിട്ട ടൗണ്‍ സ്‌ക്വയറില്‍ തുടര്‍ന്ന് സമ്മേളവും പ്രതിജ്ഞയെടുപ്പും ഉണ്ടാകും.

പോക്സോ കേസില്‍ യുവാവ് അറസ്റ്റില്‍

പത്തനംതിട്ട: പ്രായപൂര്‍ത്തിയാവാത്ത പെണ്‍കുട്ടിയെ കടത്തിക്കൊണ്ടുപോയി ലൈംഗിക അതിക്രമം കാട്ടിയ കേസില്‍ യുവാവ് അറസ്റ്റില്‍. കോന്നി താഴം അട്ടച്ചാക്കല്‍ ചാലുംകരോട്ട് വീട്ടില്‍ എസ്.എസ്. അനന്തു സായിയാണ് (22) പിടിയിലായത്. കഴിഞ്ഞ 12ന് ഉച്ചയ്ക്ക് പന്ത്രണ്ടോടെ കുട്ടിയെയും കൂട്ടി പത്തനാപുരം മരുതിമൂട് പള്ളിയിലും മറ്റും പോയിട്ട് തിരികെ പത്തനംതിട്ടയില്‍നിന്ന് അട്ടച്ചാക്കല്‍ വഴി കോന്നിയിലേക്ക് വരുന്ന ബസില്‍ അട്ടച്ചാക്കലില്‍ ഇറങ്ങി. തുടര്‍ന്ന് കോന്നിയില്‍ നിന്നു വീട്ടിലേക്കുപോകാന്‍ കയറിയ ബസില്‍ കുട്ടിയുടെ അമ്മ ഇരുവരെയും കണ്ടു. പിന്നീട് കുട്ടിയുടെ അമ്മ കുട്ടിയെയും കൂട്ടി സ്റ്റേഷനില്‍ എത്തി വിവരം പറയുകയായിരുന്നു. എസ്ഐ ആര്‍. അനില്‍ കുമാര്‍, സിപിഒ സുഭദ്രാ ദേവി അന്വേഷണത്തിന് നേതൃത്വത്തില്‍ അന്വേഷണം നടത്തുന്നു. ഇയാളെ കോടതിയില്‍ ഹാജരാക്കി റിമാന്‍ഡ് ചെയ്തു.

ലഹരിമാഫിയയ്ക്ക് പോലീസ് സംരക്ഷണം; യൂത്ത് കോൺഗ്രസ് പോലീസ് സ്റ്റേഷൻ ഉപരോധിച്ചു

അടൂര്‍: പിടിയിലാകുന്ന ലഹരിമാഫിയ സംഘത്തെ പോലീസ് സംരക്ഷിക്കുന്നുവെന്ന് ആരോപിച്ചുകൊണ്ട് യൂത്ത് കോണ്‍ഗ്രസ് പ്രവര്‍ത്തകര്‍ അടൂര്‍ പോലീസ് സ്റ്റേഷന്‍ ഉപരോധിച്ചു. ഇന്നലെ കഞ്ചാവുമായി പിടികൂടിയ ഡിവൈഎഫ്‌ഐ പ്രവര്‍ത്തകരും നേതാക്കളും അടക്കമുള്ളവരെ സിപിഎം നേതാക്കളുടെ നിദ്ദേശപ്രകാരം മുമ്പും പോലീസ് സംരക്ഷിച്ചിട്ടുണ്ടെന്ന് യൂത്ത് കോണ്‍ഗ്രസ് ആരോപിച്ചു. പിടിച്ചെടുക്കുന്നത് വലിയ അളവിലുള്ള ലഹരി വസ്തുക്കള്‍ ആണെങ്കിലും പോലീസ് അതിന്‍റെ അളവ് കുറച്ചുകാണിച്ചു പ്രതികള്‍ക്കു ജാമ്യം ലഭിക്കുവാന്‍ ആവശ്യമായ സഹായങ്ങള്‍ ചെയ്യുകയാണെന്നും നേതാക്കള്‍ ആരോപിച്ചു. ഡിവൈഎഫ്ഐയുടെ സജീവ പ്രവര്‍ത്തകരും നേതാക്കളും പ്രവര്‍ത്തകരുമാണ് ലഹരി സംഘത്തിന് നേതൃത്വം നല്കുന്നതെന്നും യൂത്ത് കോണ്‍ഗ്രസ് ആരോപിച്ചു. യൂത്ത് കോണ്‍ഗ്രസ് നിയോജകമണ്ഡലം പ്രസിഡന്‍റ് ജയകൃഷ്ണന്‍ പള്ളിക്കല്‍, സംസ്ഥാന ജനറല്‍ സെക്രട്ടറി റിനോ പി. രാജന്‍, അനന്തു ബാലന്‍, ഫെന്നി നൈനാന്‍ തുടങ്ങി യവർ പങ്കെടുത്തു.

ജനറല്‍ ആശുപത്രി ബി ആന്‍ഡ് സി ബ്ലോക്ക്: കോണ്‍ക്രീറ്റ് തൂണുകള്‍ ബലപ്പെടുത്തും

പത്തനംതിട്ട: ജനറല്‍ ആശുപത്രിയിലെ ബി ആന്‍ഡ് സി ബ്ലോക്കിന്‍റെ തൂണുകള്‍ ബലപ്പെടുത്തുകയും ചോര്‍ച്ചയ്ക്കു പരിഹാരം കണ്ടെത്തുകയുമാണ് അറ്റകുറ്റപ്പണികളില്‍ പ്രധാനം. 17 വര്‍ഷം മാത്രം പഴക്കമുള്ള ബി ആന്‍ഡ് സി ബ്ലോക്ക് തകര്‍ച്ചയെ നേരിടുന്ന ഘട്ടത്തില്‍ അറ്റകുറ്റപ്പണികള്‍ക്കുള്ള കരാര്‍ നല്‍കിക്കഴിഞ്ഞു. ബ്ലോക്കില്‍ പ്രവര്‍ത്തിച്ചിരുന്ന ആശുപത്രി സംവിധാനങ്ങള്‍ എല്ലാം നിര്‍ത്തിവച്ചു. പിന്നാലെ ഉപകരണങ്ങളടക്കം പുറത്തിറക്കുന്ന ജോലികളും നടന്നുവരുന്നു. ഇതു പൂര്‍ത്തിയാകുന്നതോടെ അടുത്തയാഴ്ച പണികള്‍ ആരംഭിക്കാനുള്ള നീക്കമാണ് നടക്കുന്നത്. സര്‍ക്കാര്‍ ഏജന്‍സിയായ ഇന്‍കെലാണ് പണികള്‍ നടത്തുന്നത്. ഊരാളുങ്കല്‍ ലേബര്‍ സൊസൈറ്റിക്ക് ഇവര്‍ നിര്‍മാണ കരാര്‍ നല്‍കിക്കഴിഞ്ഞു. 5.5 കോടിയുടെ ജോലികള്‍ക്കാണ് കരാര്‍. 23ന് കെട്ടിടം അവര്‍ക്ക് കൈമാറാമെന്നാണ് അറിയിച്ചിരിക്കുന്നത്. ജില്ലാ സ്‌റ്റേഡിയത്തിന്‍റെ കരാര്‍ ജോലികള്‍ക്കായി സാമഗ്രികള്‍ പത്തനംതിട്ടയില്‍തന്നെയുള്ളതിനാല്‍ വേഗത്തില്‍ പണി പൂര്‍ത്തീകരിക്കാനാകുമെന്ന പ്രതീക്ഷയാണ് ഊരാളുങ്കല്‍ സൊസൈറ്റിക്കുള്ളത്. ആറുമാസമാണ് കരാര്‍ കാലാവധി. കെട്ടിടത്തിന്‍റെ 30 തൂണുകള്‍ പൊളിച്ചു പണിയും. തൂണുകള്‍ ഓരോന്നായിട്ടാകും പൊളിച്ചു പണിയുന്നത്. നിലവിലുള്ളതിനേക്കാള്‍ കൂടുതല്‍ വ്യാപ്തിയിലാകും പുതിയ തൂണുകള്‍ നിര്‍മിക്കുന്നത്. ഒരേ സമയം മൂന്ന് തലത്തിലുള്ള നവീകരണമാണ് നടത്തുന്നത്. തൂണുകള്‍ ബലപ്പെടുത്തുന്നതിനൊപ്പം ടോയ്‌ലെറ്റുകളുടെ അറ്റകുറ്റപ്പണികള്‍ നടത്തും. മുകളില്‍ മഴവെള്ളം വീഴാതിരിക്കാന്‍ റൂഫ് നിര്‍മിക്കുകയും ചെയ്യും. ബലക്ഷയത്തിനു കാരണം കോവിഡ് കാലത്തെ തുടര്‍ച്ചയായ ക്ലോറിനേഷനെന്ന് 17 വര്‍ഷം മാത്രം പഴക്കമുള്ള ബി ആന്‍ഡ് സി ബ്ലോക്കിന് ബലക്ഷയം സംഭവിക്കാനുള്ള കാരണങ്ങളെ സംബന്ധിച്ചു പ്രാഥമിക പഠനം നടത്തിയ മൂന്ന് പഠന ഏജന്‍സികളും ഒരേ നിഗമനത്തിലാണ് എത്തിയിട്ടുള്ളത്. കോവിഡ് കാലത്ത് ദിവസവും മൂന്ന് നേരം ക്ലോറിന്‍ കലര്‍ത്തിയ വെള്ളം ചേര്‍ത്ത് ശുചീകരണം നടത്തിയതിലൂടെയാണ് കെട്ടിടത്തിന് ബലക്ഷയമുണ്ടായതെന്നാണ് തിരുവനന്തപുരം ഗവണ്‍മെന്‍റ് എന്‍ജിനിയറിംഗ് കോളജ്, ഊരാളുങ്കല്‍ സൊസൈറ്റി, ഇന്‍കല്‍ എന്നിവര്‍ നടത്തിയ പഠനം വ്യക്തമാക്കുന്നത്. കോണ്‍ക്രീറ്റ് തൂണുകളില്‍ അമിത അളവില്‍ ക്ലോറിന്‍ ചേര്‍ന്ന വെള്ളം ഒഴിച്ചതുകൊണ്ട് കോണ്‍ക്രീറ്റ് കമ്പികള്‍ ദ്രവിച്ചതാണ് അപകടകരമായ ബലക്ഷയത്തിനു കാരണമായതെന്ന് പഠനം ചൂണ്ടിക്കാട്ടിയിരുന്നു. കോണ്‍ക്രീറ്റ് തൂണുകള്‍ നനഞ്ഞ് ദ്രവിച്ചിട്ടുണ്ട്. സിമന്‍റ് പാളികള്‍ അടര്‍ന്നു. ടോയ്‌ലെറ്റുകളിലെ ടൈല്‍സിന്‍റെ വിടവുകള്‍ വഴി ചോര്‍ച്ചയും സംഭവിച്ചു. എന്നാല്‍, മറ്റ് ആശുപത്രികളിലും ക്ലോറിനേഷന്‍ നടത്തിയിട്ടുള്ളതാണെന്നും ബലക്ഷയം റിപ്പോര്‍ട്ട് ചെയ്തിട്ടില്ലെന്നും നിര്‍മാണ രംഗത്തെ വിദഗ്ധര്‍ ചൂണ്ടിക്കാട്ടുന്നു. ഡ്രെയിനേജ് സംവിധാനം തകരാറില്‍ നിര്‍മാണത്തിലെ അപാകതയാണ് പെട്ടെന്നുള്ള ബലക്ഷയത്തിനു കാരണമെന്ന് എന്‍ജിനിയറിംഗ് രംഗത്തെ പലരും ചൂണ്ടിക്കാട്ടിയിരുന്നു. കോവിഡിനു മുമ്പുതന്നെ കെട്ടിടത്തിനു ചില പോരായ്മകള്‍ ശ്രദ്ധയില്‍പ്പെട്ടിരുന്നു. ഡ്രെയിനേജ് സംവിധാനം ആദ്യ വര്‍ഷങ്ങളില്‍ത്തന്നെ തകരാറിലായി. ഇതേത്തുടര്‍ന്ന് ചില വാര്‍ഡുകള്‍ അടച്ചിടേണ്ടിവന്നിട്ടുണ്ട്. പിന്നീട് ഇതു പരിഹരിച്ചാണ് മുന്നോട്ടു പോയത്. കെട്ടിടത്തിന്‍റെ ചോര്‍ച്ച ആരംഭിച്ചിട്ട് ഏറെക്കാലമായെന്ന അഭിപ്രായവും ഇവര്‍ക്കുണ്ട്. നേരത്തേ നഗരസഭയുടെ നിയന്ത്രണത്തിലായിരുന്നപ്പോള്‍ പ്രശ്‌നങ്ങള്‍ പരിഹരിക്കുന്നതിലേക്ക് എന്‍ജിനിയറിംഗ് വിഭാഗം എസ്റ്റിമേറ്റെടുത്തിരുന്നു. 2.5 കോടി രൂപയ്ക്ക് തകരാറുകള്‍ പരിഹരിക്കാനാകുമെന്ന റിപ്പോര്‍ട്ട് രണ്ടുവര്‍ഷം മുമ്പ് നല്‍കിയിരുന്നു. എന്നാല്‍ അന്ന് നടപടികളുണ്ടായില്ല. പിന്നീട് ലിഫ്റ്റ് പ്രവര്‍ത്തിക്കുമ്പോള്‍ കെട്ടിടത്തിനു കുലുക്കം അനുഭവപ്പെട്ടു തുടങ്ങി. ജനറല്‍ ആശുപത്രി ബ്ലോക്കില്‍ പുതിയ അത്യാഹിത, ഒപി വിഭാഗം കെട്ടിടങ്ങളുടെ നിര്‍മാണത്തിനായി പൈലിംഗ് ആരംഭിച്ചതോടെ തകര്‍ച്ച വേഗത്തിലായി. ഇതേത്തുടര്‍ന്നാണ് കെട്ടിടം പൂര്‍ണമായി അടച്ചിട്ട് ആളുകളെ ഒഴിപ്പിച്ച് അറ്റകുറ്റപ്പണികള്‍ നടത്താന്‍ തീരുമാനിച്ചത്. ബ്ലോക്കിലെ ശസ്ത്രക്രിയ വിഭാഗങ്ങള്‍ കോന്നി മെഡിക്കല്‍ കോളജിലേക്ക് മാറ്റാനാണ് നിര്‍ദേശം. ഇതിനുള്ള നടപടികള്‍ നടന്നുവരുന്നു.

നെല്‍കര്‍ഷകര്‍ക്ക് പാട്ടത്തുക വിതരണം ചെയ്തു

ഓമല്ലൂര്‍: ചീക്കനാല്‍ കുളക്കട ഏലായില്‍ നെല്ല് കൃഷി ചെയ്ത പാടം ഉടമകള്‍ക്ക് പാട്ടത്തുക പാടശേഖരസമിതി വിതരണം ചെയ്തു. തരിശായി കിടന്നിരുന്ന 35 ഏക്കര്‍ പാടമാണ് ഇത്തവണ കൃഷി ചെയ്തത്. ഓമല്ലൂര്‍ ഗ്രാമപഞ്ചായത്ത് കമ്മിറ്റി മുന്‍കൈയെടുത്ത് കഴിഞ്ഞ രണ്ടുവര്‍ഷമായി കുളക്കട ഏല ലാഭത്തിലാണ് കൃഷി നടത്തിവരുന്നത്. ഇത്തവണയും കൃഷി ലാഭത്തിലാണെന്ന് കര്‍ഷകര്‍ പറഞ്ഞു. നെല്ല് സപ്ലൈകോയാണ് സംഭരിച്ചത്. സപ്ലൈകോ പണം നല്‍കിയതിനേത്തുടര്‍ന്നാണ് പാട്ടത്തുക കര്‍ഷകര്‍ക്ക് നല്‍കിയത്. പാട്ടത്തുക വിതരണത്തിന്‍റെ ഉദ്ഘാടനം ഗ്രാമപഞ്ചായത്ത് പ്രസിഡന്‍റ് ജോണ്‍സണ്‍ വിളവിനാല്‍ നിര്‍വഹിച്ചു. വാര്‍ഡ് മെംബര്‍ മിനി വര്‍ഗീസ് അധ്യക്ഷത വഹിച്ചു. പാടശേഖര സമിതി ഭാരവാഹികളായ കെ.എസ്. പാപ്പച്ചന്‍്, തമ്പിക്കുട്ടി യോശുവ, ജോര്‍ജ് തോമസ് എന്നിവര്‍ പങ്കെടുത്തു.

പ്രതിഭാ സംഗമവും ആദരിക്കലും

മല്ലപ്പള്ളി: ആഞ്ഞിലിത്താനം വൈഎംഎ ഗ്രന്ഥശാലയുടെ നേതൃത്വത്തില്‍ പ്രതിഭാസംഗമവും ആദരിക്കലും നടത്തി. മല്ലപ്പള്ളി ബ്ലോക്ക് പഞ്ചായത്ത് പ്രസിഡന്‍റ് ബാബു കൂടത്തില്‍ പ്രതിഭാ സംഗമം ഉദ്ഘാടനം ചെയ്തു. വൈഎംഎ ഗ്രന്ഥശാല പ്രസിഡന്‍റ് ഡോ. പി. ജെ. ഫിലിപ്പ് അധ്യക്ഷത വഹിച്ചു. അധ്യാപകനും ചിത്രകാരനുമായ സി. സാമുവല്‍, നോവലിസ്റ്റ് പതാലില്‍ തമ്പി എന്നിവരെ ഗ്രാമപഞ്ചായത്ത് വൈസ് പ്രസിഡന്‍റ് പ്രഫ. എം.കെ. മധുസൂദനന്‍ നായര്‍ ആദരിച്ചു. എസ്എസ്എല്‍സി, പ്ലസ് ടു പരീക്ഷകളില്‍ എല്ലാ വിഷയങ്ങള്‍ക്കും എ പ്ലസ് നേടിയ വിദ്യാര്‍ഥികള്‍ക്ക് വൈഎംഎ എക്‌സിക്യൂട്ടീവ് കമ്മിറ്റിയംഗം എന്‍.പി. ഷാജി ഏര്‍പ്പെടുത്തിയ വടക്കുപാമല ഡോ. ജമുനാ ഷാജി മെമ്മോറിയല്‍ കാഷ് അവാര്‍ഡും തങ്കമ്മ പാച്ചു മെമ്മോറിയല്‍ കാഷ് അവാര്‍ഡ്, മെമന്‍റോ എന്നിവ സമ്മാനിച്ചു. ഉന്നത വിജയം നേടിയ മറ്റ് വിദ്യാര്‍ഥികളെയും മെമന്‍റോ നല്‍കി ആദരിച്ചു. വൈഎംഎ വൈസ് പ്രസിഡന്‍റും ഗ്രാമപഞ്ചായത്ത് പത്താം വാര്‍ഡ് അംഗവുമായ വി.ജെ. റെജി, ഗ്രാമപഞ്ചായത്തംഗങ്ങളായ ഗ്രേസി മാത്യു, സ്മിത വിജയരാജന്‍, റിട്ടയേർഡ് അഡീഷണല്‍ ഡിഐജി പി.പി. കുഞ്ഞുഞ്ഞ്, പ്രഫ. ജി. ശ്രീനിവാസ, കെ.കെ. ശ്രീധരന്‍, സുമ നിവാസ, താലൂക്ക് ലൈബ്രറി കൗണ്‍സില്‍ എക്‌സിക്യൂട്ടീവ് അംഗം തമ്പി കോലത്ത, വൈഎംഎ സെക്രട്ടറി സിബി ആഞ്ഞിലിത്താനം ലൈബ്രേറിയന്‍ ശില്പ ഷിജിന്‍, ജോയിന്‍റ് സെക്രട്ടറി സുനില്‍ ജോണ്‍ തുടങ്ങിയവര്‍ പ്രസംഗിച്ചു.

യൂത്ത് കോണ്‍ഗ്രസുകാരെ കരുതല്‍ തടങ്കലിലാക്കി; ആരോഗ്യമന്ത്രി മണ്ഡലത്തിലെത്തി

പത്തനംതിട്ട: ആരോഗ്യ മന്ത്രി വീണാ ജോര്‍ജിനെതിരേ പ്രതിഷേധത്തിന് സാധ്യതയുള്ളതിനാല്‍ യൂത്ത് കോണ്‍ഗ്രസ് ജില്ലാ പ്രസിഡന്‍റ് ഉള്‍പ്പെടെ മൂന്നു പേരെ പോലീസ് കരുതല്‍ തടങ്കലിലാക്കി. മന്ത്രി മണ്ഡലത്തില്‍ പങ്കെടുത്ത പരിപാടികള്‍ക്കു ശേഷം വൈകുന്നേരത്തോടെ ഇവരെ വിട്ടയച്ചു. ജില്ലാ പ്രസിഡന്‍റ് വിജയ് ഇന്ദൂ ചൂഡന്‍, ആറന്‍മുള നിയോജക മണ്ഡലം വൈസ് പ്രസിഡന്‍റ് ടി.എസ്. സുനില്‍, കെഎസ്‌യു ജില്ലാ ജനറല്‍ സെക്രട്ടറി റോഷന്‍ റോയ് തോമസ് എന്നിവരെയാണ് പിടികൂടിയത്. ഓമല്ലൂരില്‍നിന്നാണ് വിജയ് ഇന്ദുചൂഡനടക്കമുള്ളവരെ പത്തനംതിട്ട പോലീസ് ബലം പ്രയോഗിച്ച് പിടികൂടി കരുതല്‍ തടങ്കലിലാക്കിയത്. മന്ത്രി വീണാ ജോര്‍ജ് ഓമല്ലൂരില്‍ നടക്കുന്ന പരിപാടിയില്‍ പങ്കെടുക്കാന്‍ എത്തുമെന്നതിനാല്‍ യൂത്ത് കോണ്‍ഗ്രസ് നേതൃത്വത്തില്‍ കരിങ്കൊടി കാണിക്കാന്‍ സാധ്യതയുള്ളതിനാലാണ് ഇവരെ കരുതല്‍ തടങ്കലിലാക്കിയത്.

കീം സമീകരണ വിഷയത്തിലെ കോടതിവിധി ഹയര്‍ സെക്കന്‍ഡറി മേഖലയ്‌ക്കേറ്റ തിരിച്ചടി: കെഎച്ച്എസ്ടിഎ

പത്തനംതിട്ട: കേരളത്തിലെ പൊതുവിദ്യാഭ്യാസത്തിന് പ്രത്യേകിച്ചും ഹയര്‍ സെക്കന്‍ഡറി മേഖലയ്‌ക്കേറ്റ കനത്ത തിരിച്ചടിയാണ് കീം സമീകരണ വിഷയത്തില്‍ ഹൈക്കോടതിയില്‍നിന്ന് ഗവണ്‍മെന്‍റിനു നല്‍കിയിട്ടുള്ള ഉത്തരവെന്ന് കെഎച്ച്എസ്ടിഎ. വളരെയധികം വിദ്യാര്‍ഥികളുടെ ഉന്നത പഠന സ്വപ്നങ്ങളുടെ ചിറകരിയുകയാണ് വൈകി നടത്തിയ സമീകരണ സൂത്രവാക്യങ്ങള്‍. പ്രോസ്പെക്ടസില്‍ പറഞ്ഞതിനു വിരുദ്ധമായി നടപ്പിലാക്കിയ പരിഷ്‌കാരങ്ങള്‍ പ്രാവര്‍ത്തികമാക്കാന്‍ കഴിയില്ലെന്ന കൃത്യമായ ബോധ്യത്തോടെ തന്നെയാണ് വിദ്യാഭ്യാസ വകുപ്പ് ഈ ഒരു സമീപനം സ്വീകരിച്ചത്. വളരെ ഗൗരവത്തോടെ കൈകാര്യം ചെയ്യേണ്ടിയിരുന്ന ഒരു വിഷയത്തെ തികഞ്ഞ ലാഘവത്തോടെ സമീപിച്ചതിന്‍റെ ഫലം അനുഭവിക്കുകയാണ് വിദ്യാര്‍ഥി സമൂഹം. ഹൈസ്‌കൂള്‍, ഹയര്‍ സെക്കന്‍ഡറി ഏകീകരണ നടപടികളും ഹയര്‍ സെക്കന്‍ഡറി അധ്യാപക സംഘടനകളെ ക്യുഐപിയില്‍ ഉള്‍പ്പെടുത്താതെ ഏകപക്ഷീയമായി തീരുമാനിക്കുന്ന വിദ്യാഭ്യാസ പരിഷ്‌കാരങ്ങളും ഹയര്‍ സെക്കന്‍ഡറി വിദ്യാഭ്യാസത്തിന്‍റെ മാറ്റ് കുറയ്ക്കുന്നുണ്ടെന്ന സത്യം തിരിച്ചറിയേണ്ടതുണ്ടെന്ന് കെഎച്ച്എസ്ടിഎ സംസ്ഥാന കമ്മിറ്റി അഭിപ്രായപ്പെട്ടു.

സംസ്ഥാനത്തെ പ്രധാന വകുപ്പുകള്‍ കെടുകാര്യസ്ഥതയില്‍: ജോസഫ് മാര്‍ ബര്‍ണബാസ്

റാന്നി: സംസ്ഥാനത്തെ വിദ്യാഭ്യാസം, ആരോഗ്യം, വനം വന്യജീവി, ആഭ്യന്തരം, യുവജന ക്ഷേമം, തൊഴില്‍ വകുപ്പുകള്‍ കെടുകാര്യസ്ഥതയിലാണെന്ന് മാര്‍ത്തോമ്മ സഭ റാന്നി - നിലയ്ക്കല്‍ ഭദ്രാസനാധിപന്‍ ഡോ. ജോസഫ് മാര്‍ ബര്‍ണബാസ് സഫ്രഗന്‍ മെത്രാപ്പോലീത്ത. ഭദ്രാസന വാര്‍ഷിക അസംബ്ലിയില്‍ അധ്യക്ഷ പ്രസംഗം നടത്തുകയായിരുന്നു അദ്ദേഹം. സമഗ്രമായ മാറ്റങ്ങള്‍ക്ക് ബന്ധപ്പെട്ടവര്‍ തയാറായില്ലെങ്കില്‍ കേരളം വന്‍ വിപത്തുകള്‍ അഭിമുഖീകരിക്കേണ്ടിവരുമെന്നും സഫ്രഗന്‍ മെത്രാപ്പോലീത്ത അഭിപ്രായപ്പെട്ടു. അമിതമായ രാഷ്‌ട്രീയ ഇടപെടലുകള്‍ സര്‍വകലാശാലകളുടെ മഹത്വവും നിലവാരവും തകര്‍ത്തു. പിഎസ്‌സി റാങ്ക് ലിസ്റ്റ് മറികടന്ന് നടക്കുന്ന പുറംവാതില്‍ നിയമനങ്ങളും പരീക്ഷാ ക്രമക്കേടുകളും പെരുകുന്ന അക്രമങ്ങളും തൊഴില്‍ സാധ്യതകളുടെ അപര്യാപ്തതയും മറ്റുമാണ് യുവജനങ്ങള്‍ കേരളം വിടുന്നതിന് പ്രധാന കാരണങ്ങള്‍. മദ്യശാലകള്‍ തുടങ്ങുവാന്‍ കാട്ടുന്ന ഉത്സാഹം എന്തുകൊണ്ടാണ് വ്യവസായ സംരംഭങ്ങള്‍ ആരംഭിക്കുന്നതില്‍ ഉണ്ടാകാത്തതെന്നും ഡോ. ജോസഫ് മാര്‍ ബര്‍ണബാസ് ആരാഞ്ഞു. വര്‍ധിച്ചുവരുന്ന വന്യജീവി, തെരുവുനായ ആക്രമണങ്ങള്‍ തടയാനും പരിഹരിക്കാനും കേന്ദ്ര സംസ്ഥാന സര്‍ക്കാരുകള്‍ വിമുഖത കാണിക്കുന്നതില്‍ ഭദ്രാസന വാര്‍ഷിക അസംബ്ലി യോഗത്തില്‍ അവതരിപ്പിച്ച പ്രമേയത്തിലൂടെ പ്രതിഷേധം രേഖപ്പെടുത്തി. വനാതിര്‍ത്തിയില്‍ മാത്രമല്ല നാട്ടിന്‍ പുറങ്ങളില്‍പോലും വന്യമൃഗങ്ങളെ ഭയന്നാണ് ജനങ്ങള്‍ ജീവിക്കുന്നത്. ഭരണാധികാരികള്‍ നിയമത്തിന്‍റെ നൂലാമാലകള്‍ തിരിച്ചറിഞ്ഞു പരിഹാരത്തിനായി തയാറാകണമെന്നും യോഗം ആവശ്യപ്പെട്ടു. ഭദ്രാസന സെക്രട്ടറി റവ. തോമസ് കോശി പനച്ചമൂട്ടില്‍ വര്‍ഷിക റിപ്പോര്‍ട്ടും വരവു ചെലവു കണക്കും ഭദ്രാസന ട്രഷറര്‍ അനു ഫിലിപ്പ് 2025 -26 സാമ്പത്തിക വര്‍ഷത്തിലെ ബജറ്റും അവതരിപ്പിച്ചു. കേരള സര്‍ക്കാരുമായി സഹകരിച്ച് റാന്നി മന്ദിരം ജംഗ്ഷനില്‍ വിനോദ, വിശ്രമ, കായിക ആരോഗ്യ കേന്ദ്രം നിര്‍മിക്കുന്നതിനായി പതിനഞ്ചു സെന്‍റ് ഭൂമി സര്‍ക്കാരിന് വിട്ടു നല്‍കാന്‍ യോഗം തീരുമാനിച്ചു. മൈലപ്രയ്ക്കു സമീപം ചീങ്കല്‍തടത്തില്‍ വാങ്ങിയ സ്ഥലത്ത് ധ്യാനാശ്രമവും മുതിര്‍ന്ന പൗരന്മാര്‍ക്കുള്ള പരിചരണ കേന്ദ്രവും സ്ഥാപിക്കുന്നതിനും അഞ്ചുകുഴിയില്‍ മാനസിക ആരോഗ്യ കേന്ദ്രത്തിന്‍റെ പണികള്‍ ആരംഭിക്കുന്നതിനും യോഗം തീരുമാനിച്ചു. യുവജന ശക്തീകരണം, തരിശുഭൂമി കൃഷി, ഗ്രാമവികസനം, വിദ്യാഭ്യാസ സഹായം, ചികിത്സാ സഹായം, ആദിവാസികള്‍ക്കായി കനവ് പാര്‍പ്പിട പദ്ധതി, ഭവന പുനരുദ്ധാരണ പദ്ധതി, മിഷന്‍ പ്രവര്‍ത്തനങ്ങള്‍ തുടങ്ങി നിരവധി പദ്ധതികള്‍ക്കായി ബജറ്റില്‍ തുക വകകൊള്ളിച്ചിട്ടുണ്ട്. റവ. ജോസഫ് ഉമ്മന്‍ ധ്യാനപ്രസംഗം നടത്തി. ആരാധനയ്ക്ക് റവ. ജോയിഷ് പാപ്പച്ചന്‍, ലിജിന്‍ കെ ജോസഫ്, മാത്യുസണ്‍ പി. തോമസ്, ആനി പി. ഏബ്രഹാം എന്നിവര്‍ നേതൃത്വം നല്‍കി. കഴിഞ്ഞ സാമ്പത്തിക വര്‍ഷത്തില്‍ വിദ്യാഭ്യാസ, കായിക, സാമൂഹിക, സാംസ്‌കാരിക രംഗങ്ങളിലും സണ്‍ഡേസ്‌കൂള്‍ രംഗത്തും പുരസ്‌കാരങ്ങള്‍ നേടിയവരെ യോഗം ആദരിച്ചു.

ആറന്മുളയില്‍ രുചിമേളത്തിനു തിരിതെളിഞ്ഞു : വള്ളസദ്യകള്‍ ഒക്ടോബര്‍ രണ്ടുവരെ

കോഴഞ്ചേരി: ആറന്മുളയില്‍ വള്ളസദ്യകള്‍ക്കു തുടക്കമായി. പാര്‍ഥസാരഥി ക്ഷേത്രത്തില്‍ പള്ളിയോട സേവാസംഘത്തിന്‍റെ ആഭിമുഖ്യത്തിലാണ് വഴിപാട് പള്ളിയോട സദ്യകള്‍ക്കു തുടക്കമായത്. ഇന്നലെ രാവിലെ 11.30ന് പാര്‍ഥസാരഥി ക്ഷേത്ര മതിലകത്തെ ആനക്കൊട്ടിലിനു മുമ്പില്‍ മന്ത്രി കെ.ബി. ഗണേഷ് കുമാര്‍ ഭദ്രദീപം തെളിച്ചാണ് വള്ളസദ്യ ഉദ്ഘാടനം ചെയ്തത്. നിലവിളക്കിന് മുമ്പിലെ പ്രത്യേകം തയാര്‍ ചെയ്ത തൂശനിലയില്‍ മന്ത്രി വീണാ ജോര്‍ജ്, ആന്‍റോ ആന്‍റണി എംപി., പ്രമോദ് നാരായണ്‍ എംഎല്‍എ, അവിട്ടം തിരുനാള്‍ ആദിത്യ വര്‍മ എന്നിവര്‍ വിഭവങ്ങള്‍ വിളമ്പി. സദ്യയില്‍ പങ്കെടുക്കാന്‍ ആദ്യം പാര്‍ഥസാരഥി ക്ഷേത്രക്കടവിലെത്തിയ കോഴഞ്ചേരി, ളാക - ഇടയാറന്മുള പള്ളിയോടങ്ങളെ വെറ്റില, പാക്ക്, പുകയില തുടങ്ങിയവ നല്‍കി ആചാരാനുഷ്ഠാനങ്ങളോടെ പള്ളിയോട സേവാസംഘം പ്രസിഡന്‍റ് കെ.വി. സാംബദേവനും സെക്രട്ടറി പ്രസാദ് ആനന്ദഭവനും ചേര്‍ന്ന് സ്വീകരിച്ചു. മന്ത്രിമാരും ജനപ്രതിനിധികളും പള്ളിയോടത്തിലെത്തിയ കരനാഥന്‍മാരെയും സ്വീകരിച്ച് പ്രദക്ഷിണ വഴിയിലൂടെ കൊടിമരച്ചുവട്ടിലേക്ക് എത്തിച്ചു. വഞ്ചിപ്പാട്ട് പാടിയാണ് പള്ളിയോടങ്ങളെയും അതിഥികളെയും ക്ഷേത്ര മതിലകത്തേക്ക് സ്വീകരിച്ചത്. അതിഥികള്‍ക്കും പള്ളിയോട പ്രതിനിധികള്‍ക്കും കരനാഥന്‍മാര്‍ക്കും ക്ഷേത്രത്തിലെ പടിഞ്ഞാറെ ഊട്ടുപുരയിലാണ് സദ്യ ഒരുക്കിയിരുന്നത്. എട്ട് പള്ളിയോടങ്ങളാണ് ആദ്യ ദിനത്തില്‍ പങ്കെടുത്തത്. മുന്‍ എംഎല്‍എമാരായ രാജു ഏബ്രഹാം, എ. പത്മകുമാര്‍, മാലേത്ത് സരളാദേവി, രാഷ്‌ട്രീയകക്ഷി പ്രതിനിധികളായ പി. മോഹന്‍രാജ്, എം.വി. ഗോപകുമാര്‍, വിക്ടര്‍ ടി. തോമസ്, ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം, അംഗം ആര്‍. അജയകുമാര്‍, ത്രിതല പഞ്ചായത്ത് ജനപ്രതിനിധികള്‍, ഉദ്യോഗസ്ഥര്‍ എന്നിവര്‍ പങ്കെടുത്തു. ഫയര്‍ ആന്‍ഡ് സേഫ്റ്റി, പോലീസ് തുടങ്ങിയ സേനാംഗങ്ങള്‍ വിപുലമായ സംവിധാനമാണ് ഒരുക്കിയത്. അഗ്‌നിശമന സേനയുടെ പ്രത്യേക സംഘം ബോട്ടില്‍ പള്ളിയോടങ്ങള്‍ക്ക് സംരക്ഷണം നല്‍കുന്നുണ്ടായിരുന്നു. ഒക്ടോബര്‍ രണ്ടുവരെ നീളുന്നതാണ് വള്ളസദ്യ വഴിപാടുകാലം. ഇതുവരെയായി 412 സദ്യകള്‍ ബുക്കു ചെയ്തു കഴിഞ്ഞു. ഭക്തര്‍ ആചാരാനുഷ്ഠാനങ്ങളോടെ വഴിപാടില്‍ പങ്കെടുക്കും. പള്ളിയോടങ്ങളില്‍ ക്ഷേത്രക്കടവിലെത്തുന്ന കരക്കാരെ സ്വീകരിച്ചാനായിച്ചാണ് സദ്യയില്‍ പങ്കെടുപ്പിക്കുക. കെഎസ്ആര്‍ടിസി ബജറ്റ് ടൂറിസത്തിനും തുടക്കം കെഎസ്ആര്‍ടിസിയുടെ ബ്ജറ്റ് ടൂറിസം സെല്ലിന്‍റെ ആഭിമുഖ്യത്തിലുള്ള പഞ്ചപാണ്ഡവ ക്ഷേത്ര ദര്‍ശനവും വള്ളസദ്യയുടെ ഉദ്ഘാടനവും പാഞ്ചജന്യം ഓഡിറ്റോറിയത്തിനു മുമ്പില്‍ മന്ത്രി കെ.ബി. ഗണേഷ് കുമാര്‍ നിര്‍വഹിച്ചു. കെഎസ്ആര്‍ടിസി വൈക്കം ഡിപ്പോയില്‍നിന്നുള്ള ബസാണ് ആദ്യം എത്തിയത്. ബസിലെ ജീവനക്കാരേയും യാത്രക്കാരേയും പള്ളിയോട സേവാസംഘം പ്രസിഡന്‍റ് കെ.വി. സാംബദേവന്‍, സെക്രട്ടറി പ്രസാദ് ആനന്ദഭവന്‍ എന്നിവരുടെ നേതൃത്വത്തിലുള്ള സംഘം ഭാരവാഹികള്‍ സ്വീകരിച്ചു. മന്ത്രി കെ.ബി. ഗണേഷ് കുമാര്‍ മാലയിട്ടാണ് യാത്രക്കാരെ വരവേറ്റത്. വള്ളസദ്യകാലത്ത് 400 ട്രിപ്പുകള്‍ സംസ്ഥാനത്തെ വിവിധ ഡിപ്പോകളില്‍നിന്ന് ആറന്മുളയിലേക്ക് നടത്താനാണ് ലക്ഷ്യമിടുന്നതെന്ന് ബജറ്റ് ടൂറിസം ജില്ലാ കോ-ഓര്‍ഡിനേറ്റര്‍ സന്തോഷ് കുമാര്‍ പറഞ്ഞു. കെഎസ്ആര്‍ടിസി ടൂറിസവുമായി ബന്ധപ്പെട്ടെത്തുന്ന യാത്രക്കാര്‍ക്ക് പാഞ്ചജന്യം ഓഡിറ്റോറിയത്തിലാണ് സദ്യ ക്രമീകരിക്കുന്നത്. ഇന്‍ഷ്വറന്‍സ് കവറേജ് വള്ളംകളി, വള്ളസദ്യ തുടങ്ങിയ ചടങ്ങുകളിൽ‍ പങ്കെടുക്കുവാനെത്തുന്ന പള്ളിയോടങ്ങളിലെ തുഴച്ചില്‍ക്കാര്‍ക്ക് അപകട മരണം സംഭവിച്ചാല്‍ ആശ്രിതർക്ക് 10 ലക്ഷം രൂപ ലഭിക്കത്തക്ക തരത്തിലുള്ള രണ്ട് കോടി രൂപയുടെ ഇന്‍ഷ്വറന്‍സ് പോളിസി കൈമാറി. പള്ളിയോട സേവാസംഘം യുണൈറ്റഡ് ഇന്ത്യ ഇന്‍ഷ്വറന്‍സ് കമ്പനിയുമായിട്ടുള്ള ഇന്‍ഷ്വറന്‍സ് പരിരക്ഷയുടെ പോളിസി കൈമാറ്റം മന്ത്രി വീണാ ജോര്‍ജ് നിര്‍വഹിച്ചു. ഉത്രട്ടാതി ജലമേള, വള്ളസദ്യ, പാര്‍ഥസാരഥി ക്ഷേത്രത്തിലെ ആചാരവും ഐതിഹ്യവും വിവരിക്കുന്ന വിസ്മയ ദര്‍ശനം എന്ന ഡോക്യുമെന്‍ററിയുടെ പ്രദര്‍ശന ഉദ്ഘാടനവും മന്ത്രി കെ.ബി. ഗണേഷ് കുമാര്‍ നിര്‍വഹിച്ചു. പള്ളിയോട സേവാസംഘം പുറത്തിറക്കുന്ന പാഞ്ചജന്യം എന്ന സുവനീറിന്‍റെ പ്രകാശന കര്‍മവും മന്ത്രി വീണാ ജോര്‍ജ് നിര്‍വഹിച്ചു.

ഇടത്തിട്ട സര്‍ക്കാര്‍ എല്‍പി സ്‌കൂളിന് പുതിയ കെട്ടിടം

കൊടുമൺ: ഇടത്തിട്ട സര്‍ക്കാര്‍ എല്‍പി സ്‌കൂളിന് 40 ലക്ഷം രൂപയുടെ പുതിയ കെട്ടിടത്തിന്‍റെ നിര്‍മാണോദ്ഘാടനം നിയമസഭാ ഡെപ്യൂട്ടി സ്പക്കര്‍ ചിറ്റയം ഗോപകുമാര്‍ നിര്‍വഹിച്ചു. ഗ്രാമപഞ്ചായത്ത് പ്രസിഡന്‍റ് കെ.കെ. ശ്രീധരന്‍ അധ്യക്ഷത വഹിച്ചു. ജില്ലാ പഞ്ചായത്ത് വൈസ് പ്രസിഡന്‍റ് ബീനാ പ്രഭ , ഗ്രാമപഞ്ചായത്ത് വൈസ് പ്രസിഡൻ ധന്യാ ദേവി, സ്റ്റാൻഡിംഗ് കമ്മിറ്റി ചെയര്‍മാന്‍മാരായ എ. വിപിന്‍ കുമാർ, കെ. പുഷ്പലത, അംഗങ്ങളായ പി.എസ്. രാജു, അഞ്ജന ബിനുകുമാര്‍, എസ്.എസ്.കെ ജില്ലാ പ്രോഗ്രാം കോ-ഓര്‍ഡിനേറ്റര്‍ റെനി ആന്‍റണി, എഇഒ സീമാ ദാസ്, കെ.എ. ഷെഹിന, പ്രോജക്ട് എൻജിനിയര്‍ ജി. കുഞ്ഞുമോൾ, പി.ആര്‍. മായ എന്നിവര്‍ പങ്കെടുത്തു. എസ്.എസ്.കെ. ഫണ്ട് ഉപയോഗിച്ച് നാല് ക്ലാസ് മുറികള്‍ നിര്‍മിക്കും.

അപകടാവസ്ഥയിലായ സ്കൂൾ കെട്ടിടം പൊളിച്ചു മാറ്റണം; പ്രതിഷേധ സമരവുമായി കേരള കോൺഗ്രസ്

ആനിക്കാട്: വായ്പൂര് മഹാറാണി സേതുലക്ഷ്മിഭായ് വിലാസം വൊക്കേഷണൽ ഹയർ സെക്കൻഡറി സ്കൂളിലെ അപകടാവസ്ഥയിലായ പഴയ കെട്ടിടം അടിയന്തരമായി പൊളിച്ചു മാറ്റണമെന്ന് ആവശ്യപ്പെട്ട് കേരള കോൺഗ്രസ് മണ്ഡലം കമ്മറ്റിയുടെ ആഭിമുഖ്യത്തിൽ സ്കൂൾ കവാടത്തിൽ പ്രതിഷേധ സമരം നടത്തി. 1902 ൽ പണിത ആദ്യത്തെ ഓടിട്ട കെട്ടിടമാണ് അപകടാവസഥയിലുള്ളത്. പുതിയ കെട്ടിടങ്ങൾ പണിതതോടെ ഈ കെട്ടിടത്തിൽ ക്ലാസുകൾ നടക്കുന്നില്ലെങ്കിലും കുട്ടികൾ അതിനുള്ളിൽ കയറാനുള്ള സാധ്യത ഏറെയാണ്. പാർട്ടി സീനിയർ ജനറൽ സെക്രട്ടറി കുഞ്ഞുകോശി പോൾ ധർണ ഉദ്ഘാടനം ചെയ്തു. മണ്ഡലം പ്രസിഡന്‍റ തോമസ് മാത്യുവിന്‍റെ അധ്യക്ഷതയിൽ ഉന്നതാധികാരസമിതി അംഗം ജോൺസൺ കുര്യൻ, ജില്ലാ സെക്രട്ടറി ബേബി തടിയിൽ, ഗ്രാമപഞ്ചായത്തു പ്രസിഡന്‍റ് സൂസൻ ദാനിയേൽ, അംഗം മോളിക്കുട്ടി സിബി, സർവീസ് സഹകരണ ബാങ്ക് വൈസ് പ്രസിഡന്‍റ് റ്റി.ജി. മാത്യു, എം.പി.ശശിധര കൈമൾ, റ്റി.സി. വിജയൻ, റ്റി.റ്റി. കുഞ്ഞുമോൻ, മാത്യു തോമസ്, റീന റേച്ചൽ മാത്യു, കെ.ജി. ശ്രീധരൻ, സി.പി. അശോക് കുമാർ, വർഗീസ് നൂഴുമുറി, പി.എസ്. ഏബ്രഹാം, ലാലു വറുഗീസ്, എം. ജെ. മാത്തുകുട്ടി , സി.വി. ഫിലിപ്പ് എന്നിവർ പ്രസംഗിച്ചു.

ലഹരിവിരുദ്ധ വിമോചന നാടകം

കലഞ്ഞൂർ: ദേശീയ വായനദിന മാസാചരണത്തിന്‍റെ ഭാഗമായി പി. എന്‍. പണിക്കര്‍ ഫൗണ്ടേഷന്‍ സംഘടിപ്പിച്ച ലഹരിവിരുദ്ധ വിമോചന നാടകം കലഞ്ഞൂർ സര്‍ക്കാര്‍ മോഡല്‍ ഹയര്‍സെക്കന്‍ഡറി സ്‌കൂളില്‍ അരങ്ങേറി. സ്‌കൂള്‍ പ്രിന്‍സിപ്പല്‍ എം. സക്കീന ഉദ്ഘാടനം നിര്‍വഹിച്ചു. പിറ്റിഎ പ്രസിഡന്‍റ് എസ്. രാജേഷ് അധ്യക്ഷത വഹിച്ചു. കേരള ജനമൈത്രി പോലീസ് തിയേറ്റര്‍ ഗ്രൂപ്പാണ് പാഠം ഒന്ന് ഒരു മദ്യപന്‍റെ ആത്മകഥ എന്ന നാടകം അവതരിപ്പിച്ചത്. പി.എന്‍. പണിക്കര്‍ ഫൗണ്ടേഷന്‍ ജില്ലാ സെക്രട്ടറി സി. കെ. നസീര്‍, സ്‌റ്റേറ്റ് ജനമൈത്രി ഡ്രാമാ കോഓർഡിനേറ്റര്‍ മുഹമ്മദ് ഷാ, കൂടല്‍ സ്റ്റേഷന്‍ അഡീഷണല്‍ എസ്ഐ സുനില്‍കുമാര്‍, വിഎച്ച്എസ് സി പ്രിന്‍സിപ്പല്‍ മായ എസ്. നായര്‍, എസ്പിസി സിപിഒ ലിജോ ഡാനിയേൽ, സീനിയര്‍ അസിസ്റ്റന്‍റ് ലാല്‍ വര്‍ഗീസ്, ജോണ്‍ മാത്യു, പ്രധാനാധ്യാപിക ബി. ലേഖ എന്നിവര്‍ പങ്കെടുത്തു.

കീം പ്രവേശനം അനിശ്ചിതത്വത്തിലാക്കിയത് സർക്കാരെന്ന് സണ്ണി ജോസഫ്

പത്തനംതിട്ട: സംസ്ഥാന സര്‍ക്കാരിന്‍റെ ദുര്‍വാശിയും ഗുരുതരവീഴ്ചയുമാണ് കേരള എൻജിനിയറിംഗ് പ്രവേശനം അനിശ്ചിതത്വത്തില്‍ ആക്കിയതെന്ന് കെപിസിസി പ്രസിഡന്‍റ് സണ്ണി ജോസഫ് എംഎൽഎ. അതിന്‍റെ ഫലം അനുഭവിക്കുന്നത് കേരളത്തിലെ വിദ്യാർഥികളും അവരുടെ രക്ഷിതാക്കളുമാണ്. തകർച്ചയുടെ ഉത്തരവാദിത്വം ഏറ്റെടുത്ത് ആവശ്യമായ നടപടി സ്വീകരിക്കണമെന്നും സണ്ണി ജോസഫ് പറഞ്ഞു. കീം പ്രവേശന വിഷയത്തില്‍ രാഷ്ട്രീയം കലര്‍ത്താനില്ല. പക്ഷേ വിദ്യാർഥികളുടെ ആശങ്ക പരിഹരിക്കണം. ഉന്നതവിദ്യാഭ്യസ മന്ത്രി ന്യായീകരണവും ദുരഭിമാനവും ഉപേക്ഷിച്ച് യാഥാർഥ്യം അംഗീകരിക്കാന്‍ തയാറാകണം. നിലപാട് സ്വീകരിക്കുന്നതില്‍ സിപിഐ കുറച്ചുകൂടി ധൈര്യം കാണിക്കണം. വിദ്യാർഥികള്‍ക്കും രക്ഷാകര്‍ത്താക്കള്‍ക്കും ഒപ്പമാണ് പ്രതിപക്ഷം. സര്‍ക്കാര്‍ പിടിവാശി ഉപേക്ഷിക്കണം. അവകാശവാദങ്ങള്‍ ഓരോന്നായി പൊളിയുകയാണ്. ഉന്നത വിദ്യാഭ്യാസ മേഖലയുടെയും ആരോഗ്യ മേഖലയുടെയും തകര്‍ച്ചയില്‍ നിന്ന് അവകാശവാദങ്ങളെല്ലാം അടിസ്ഥാനരഹിതമാണെന്ന് ബോധ്യപ്പെട്ടെന്നും സണ്ണി ജോസഫ് പറഞ്ഞു. ശശി തരൂര്‍ കോണ്‍ഗ്രസിന്‍റെ ഭാഗമാണെന്ന് പറഞ്ഞ സണ്ണി ജോസഫ് ജനാധിപത്യ മതേതര പാര്‍ട്ടിയായ കോണ്‍ഗ്രസിനെ ശക്തിപ്പെടുത്താന്‌‍ എല്ലാവരും സന്നദ്ധരാണെന്നും പറഞ്ഞു. ദേശീയതലത്തിലും സംസ്ഥാനതലത്തിലും പ്രതിപക്ഷത്തുള്ളതിനാല്‍ സംഘടനപരമായ ഉത്തരവാദിത്വവും രാഷ്ട്രീയ ദൗത്യവും വലുതാണ്. അതേറ്റെടുത്ത് ഒറ്റക്കെട്ടായി മുന്നോട്ട് പോകുമെന്നും കെപിസിസി പ്രസിഡന്‍റ് പറഞ്ഞു.

വികസന പദ്ധതികൾ ഉദ്ഘാടനം നാളെ

‌അടൂർ: എംഎൽഎ ഫണ്ടിൽ നിന്നും തുക അനുവദിച്ചു നവീകരിച്ച ഏനാദിമംഗലം ഗ്രാമപഞ്ചായത്ത് ഓഫീസ് ഉദ്ഘാടനം നാളെ വൈകുന്നേരം അഞ്ചിന് മന്ത്രി എം. ബി. രാജേഷ് നിർവഹിക്കുമെന്ന് കെ. യു. ജനീഷ് കുമാർ എംഎൽഎ അറിയിച്ചു. സ്ഥലപരിമിതിമൂലം വീർപ്പുമുട്ടിയിരുന്ന ഏനാദിമംഗലം പഞ്ചായത്ത്‌ ഓഫീസ് പുതിയ നിർമാണം പൂർത്തികരിച്ചതോടെ സുഗമമായി പ്രവർത്തിക്കും.കോന്നി നിയോജക മണ്ഡലം ആസ്തി വികസന പദ്ധതി 2023-24 പ്രകാരം 65 ലക്ഷം രൂപ ചെലവിൽ 3700 ചതുരശ്ര അടിയിൽ നിർമിച്ച കെട്ടിടത്തിൽ കോൺഫറൻസ് ഹാൾ, സ്റ്റാൻഡിംഗ് കമ്മിറ്റി ഓഫീസ്, പഞ്ചായത്ത്‌ അംഗങ്ങൾക്ക് ഇരിക്കുന്നത്തിനുള്ള മുറികൾ, എൽഎസ്ജിഡി അസിസ്റ്റന്‍റ് എൻജിനിയർ ഓഫീസ്, വില്ലേജ് എക്സ്റ്റൻഷൻ ഓഫീസ്, തൊഴിലുറപ്പ് പദ്ധതി ഓഫീസ്,കുടുംബശ്രീ ഓഫീസ് എന്നിവയാണ് ക്രമീകരിച്ചിരിക്കുന്നത്. നവീകരിച്ച പഞ്ചായത്ത് ഓഫീസ് ഉദ്ഘാടനത്തിനൊപ്പം ആധുനിക നിലവാരത്തിൽ നിർമിക്കുന്ന മങ്ങാട് - കുന്നിട - ചെളിക്കുഴി റോഡ് , 3.3 5 കോടി രൂപ അനുവദിച്ച് ആധുനികരീതിയിൽ നിർമിക്കുന്ന പുത്തൻചന്ത - തേപ്പുപാറ റോഡ് എന്നിവയുടെ നിർമാണോദ്ഘാടനം മന്ത്രി പി. എ മുഹമ്മദ് റിയാസ് ഓൺലൈനായി നിർവഹിക്കും. നിലവിലുള്ള 3.5 വീതിയുള്ള റോഡ് 5.5 മീറ്റർ വീതിയിൽ ബിഎംബിസി സാങ്കേതികവിദ്യയിലാണ് നിർമിക്കുന്നത്. ആവശ്യമായ സ്ഥലങ്ങളിൽ സംരക്ഷണഭിത്തിയും ഓടയും ഐറിഷ് ഓടയും ട്രാഫിക് സേഫ്റ്റി പ്രവൃത്തികളും നിർമാണത്തിൽ ഉൾപ്പെടുത്തിയിട്ടുണ്ട്. ഇടുക്കി ആസ്ഥാനമായുള്ള കരാർ കമ്പനിയാണ് പ്രവൃത്തി ഏറ്റെടുത്തിരിക്കുന്നത്. പൊതുമരാമത്ത് നിരത്ത് വിഭാഗമാണ് നിർവഹണ ഏജൻസി. ഏനാദിമംഗലം സ്മാർട്ട് വില്ലേജ് ഓഫീസ് നിർമാണോദ്ഘാടനം മന്ത്രി കെ. രാജൻ നിർവഹിക്കും. ഇളമണ്ണൂരിനും മരുതിമൂടിനും മധ്യേ കെപി റോഡിനു സമീപമുള്ള 60 സെന്‍റ് റവന്യൂ ഭൂമിയിലാണ് വില്ലേജ് ഓഫീസ് നിർമിക്കുന്നത്. സംസ്ഥാന നിർമിതി കേന്ദ്രത്തിനാണ് നിർവഹണച്ചുമതല. സംസ്ഥാന സർക്കാർ ഒരു കോടി രൂപ അനുവദിച്ച് അംബേദ്കർ ഗ്രാമ വികസന പ്രവൃത്തി നടപ്പിലാക്കുന്ന കണ്ണങ്കര - ചെമ്മണ്ണേറ്റം കോളനിയിലെ വികസന പ്രവൃത്തികൾ മന്ത്രി ഒ ആർ. കേളു ഓൺലൈനായി നിർവഹിക്കും. പ്രവൃത്തിയിലൂടെ വീടുകളുടെ അറ്റകുറ്റപ്പണികൾ, ഗ്രാമീണ വഴികളുടെ നിർമ്മാണ പ്രവർത്തികൾ, സംരക്ഷണഭിത്തി നിർമ്മാണം എന്നിവ നടപ്പിലാക്കും. എംഎൽഎ ഫണ്ടിൽ നിന്നും 15 ലക്ഷം രപ അനുവദിച്ചു നിർമാണം പൂർത്തീകരിച്ച ഏനാദിമംഗലം സിഎച്ച്സി - മാരൂർ റോഡിന്‍റെ ഉദ്ഘാടനവും 20 ലക്ഷം രൂപ വീതം അനുവദിച്ച് നിർമിക്കുന്ന ഗ്രാമീണ റോഡ് പ്രവൃത്തികളായ വേടമല- കുന്നിട റോഡ്, തോട്ടപ്പാലം- കണ്ണങ്കര റോഡ് എന്നിവയുടെ നിർമാണോദ്ഘാടനവും മന്ത്രി എം.ബി. രാജേഷ് നിർവഹിക്കും. നാളെ വൈകുന്നേരം അഞ്ചിന് ഇളമണ്ണൂർ ചാങ്കൂർ അമ്പലം ജംഗ്ഷനിൽ നടക്കുന്ന ചടങ്ങിൽ അഡ്വ. കെ. യു. ജനീഷ് കുമാർ എംഎൽഎ അധ്യക്ഷത വഹിക്കും. മന്ത്രി എം. ബി. രാജേഷ് പൊതുയോഗം ഉദ്ഘാടനം ചെയ്യും. ആന്‍റോ ആന്‍റണി എംപി, ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം, ജില്ലാ കളക്ടർ എസ്. പ്രേംകൃഷ്ണൻ, ഗ്രാമപഞ്ചായത്ത് പ്രസിഡന്‍റ് സാം വാഴോട് തുടങ്ങിയവർ പ്രസംഗിക്കം. ആറു മുതൽ സുപ്രസിദ്ധ ഗായിക പ്രസീത ചാലക്കുടിയും സംഘവും അവതരിപ്പിക്കുന്ന ഗാനമേളയും ഉണ്ടാകും.

ബൈക്കിനു തീപിടിച്ചു പൊള്ളലേറ്റയാൾ മരിച്ചു

കൊടുമൺ: ബൈക്കിനു തീ പിടിച്ച് ഗുരുതര പൊള്ളലേറ്റ് ചികിൽസയിലായിരുന്നയാൾ മരിച്ചു. അങ്ങാടിക്കൽ തെക്ക് പ്രീതാ ഭവനത്തിൽ രാജനാണ് (58) മരിച്ചത്. തിങ്കളാഴ്ച ഉച്ചകഴിഞ്ഞ് മൂന്നോടെ പറക്കോട് ബ്ലോക്ക് ഓഫീസിനു സമീപത്താണ് അപകടം നടന്നത് . അറ്റകുറ്റപ്പണികൾക്കായി അടൂരിലുള്ള വർക്ക് ഷോപ്പിലേക്ക് ബൈക്ക് കൊണ്ടു പോകുന്നതിനിടെയാണ് തീപിടിച്ചത്. പെട്ടെന്ന് തീ പിടിച്ചതോടെ ബൈക്കിൽ നിന്നും ഇറങ്ങാൻ ആയില്ല. കോട്ടയം മെഡിക്കൽ കോളജ് ആശുപത്രിയിൽ ചികിൽസയിൽ ആയിരുന്നു. ചുനക്കരയിൽ സ്വന്തമായി ലബോറട്ടറി നടത്തിവരികയായിരുന്നു രാജൻ. ഭാര്യ: പ്രഭാ രാജൻ. മക്കൾ: അജിൻ രാജ്, അജു പ്രിയ. മരുമകൻ: വിനയ് . സംസ്കാരം ഇന്ന് 12.30 ന് വീട്ടുവളപ്പിൽ.

വർത്തമാനകാലഘട്ടത്തിലെ ചിന്താഗതികളെ വിദ്യാഭ്യാസ മേഖല ഏറ്റെടുക്കണം: ഗവർണർ ശ്രീധരൻപിള്ള

റാന്നി: നാടിന്‍റെ തനിമയും സാംസ്കാരിക സന്പത്തും ഉയർത്തിപ്പിടിക്കുന്നതിനൊപ്പം വർത്തമാനകാല ചിന്തകളും വെല്ലുവിളികളും വിദ്യാഭ്യാസ മേഖല ഏറ്റെടുക്കേണ്ടതുണ്ടെന്ന് ഗോവ ഗവർണർ പി.എസ്. ശ്രീധരൻപിള്ള. റാന്നി സെന്‍റ് തോമസ് കോളജിന്‍റെ വജ്ര ജൂബിലി ആഘോഷങ്ങളുടെ സമാപനവും പൂർവ വിദ്യാർഥി സംഗമവും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ‌ കഴിഞ്ഞ ദശകങ്ങളിൽ ഉണ്ടായ വിദ്യാഭ്യാസ പുരോഗതിയെ നമ്മുടെ സമൂഹം കൂടുതൽ വിലയിരുത്തുകയും അതിൽ നിന്നും ഉരുത്തിരിയുന്ന വിശാലമായ പുതുതലമുറയിലേക്ക് ആവാഹിക്കുകയും ചെയ്യണം. കലാലയങ്ങൾ വ്യക്തിവികാസത്തിന്‍റെ വേദികളാണെന്നതു വിസ്മരിക്കരുതെന്നും ശ്രീധരൻപിള്ള അഭിപ്രായപ്പെട്ടു. കോളജ് മാനേജർ പ്രഫ. റോയി മേലേൽ അധ്യക്ഷത വഹിച്ചു. ആന്‍റോ ആന്‍റണി എംപി, പ്രമോദ് നാരായൺ എംഎൽഎ, അലുമ്നി അസോസിയേഷൻ പ്രസിഡന്‍റ് രാജു ഏബ്രഹാം എക്സ് എംഎൽഎ, കോളജ് പ്രിൻസിപ്പൽ ഡോ. സ്നേഹ എൽസി ജേക്കബ്, റാന്നി വലിയപള്ളി വികാരി ഫാ. എം.സി. സക്കറിയ, കോളജ് സെക്രട്ടറി പ്രഫ.കെ. പ്രസാദ് ജോസഫ് , അലുമ്നി അസോസിയേഷൻ സെക്രട്ടറി ഡോ. എം.കെ. സുരേഷ് എന്നിവർ പ്രസംഗിച്ചു. കോളജ് വിദ്യാർഥികളും പൂർവ വിദ്യാർഥികളും താജ് പത്തനംതിട്ടയും ചേർന്നൊരുക്കിയ കലാ വിരുന്നും സമ്മേളനത്തിന്‍റെ ഭാഗമായി നടന്നു.

എമർജൻസി മെഡിസിൻ ദ്വിദിന ശില്പശാല ബിലീവേഴ്സ് ആശുപത്രിയിൽ നടന്നു

തിരുവല്ല: ബിലീവേഴ്സ് ചർച്ച് മെഡിക്കൽ കോളജ് ആശുപത്രി എമർജൻസി മെഡിസിൻ വിഭാഗത്തിന്‍റെ ആഭിമുഖ്യത്തിൽ ക്രിട്ടിക്കൽ കെയർ, ജനറൽ സർജറി, പൾമണോളജി, ഇഎൻടി വിഭാഗങ്ങളുടെ സഹകരണത്തോടെ ദ്വിദിന ശില്പശാല നടന്നു. അത്യാഹിതവിഭാഗത്തിൽ എത്തുന്ന രോഗികൾക്ക് അടിയന്തര വൈദ്യസഹായം നൽകുന്നതിന്‍റെ ഭാഗമായി നടത്തുന്ന നടപടികളുടെ പരിശീലനമാണ് ശില്പശാലയിൽ നടന്നത്. ബിലീവേഴ്സ് ആശുപത്രി അസോസിയേറ്റ് ഡയറക്ടറും പ്രശസ്ത പീഡിയാട്രിക് കാർഡിയോ തൊറാസിക്ക് സർജനുമായ ഡോ. ജോൺ വല്യത്ത് ശില്പശാല ഉദ്ഘാടനം ചെയ്തു. വെർവ്മെഡിസിമുഹബ് കമ്പനിയുടെ ഡയറക്ടർ ഡോ. അമർ ചൗഹാൻ മുഖ്യാതിഥിയായിരുന്നു. മെഡിക്കൽ സൂപ്രണ്ട് ഡോ. ജോംസി ജോർജ്, എമർജൻസി വിഭാഗം മേധാവി ഡോ. ലൈലു മാത്യൂസ്, സീനിയർ കൺസൾട്ടന്‍റ്ഡോ. ഷമ്മി ഡഗ്ലസ് ലാംബെർട്ട്, എന്നിവർ പ്രസംഗിച്ചു. ബിലീവേഴ്സ് ആശുപത്രി എമർജൻസി മെഡിസിൻ, ക്രിട്ടിക്കൽ കെയർ, ജനറൽ സർജറി, പൾമണോളജി, ഇഎൻടി വിഭാഗങ്ങളിലെ ഡോക്ടർമാർ ശില്പശാലയിലെ വിവിധ സെഷനുകൾ നയിച്ചു. കേരളത്തിലെ ഗവൺമെന്‍റ് മെഡിക്കൽ കോളജുകളിൽ നിന്നടക്കമുള്ള വിവിധ ആശുപത്രികളിലെ ഡോക്ടർമാരും സർജന്മാരും ശില്പശാലയിൽ പങ്കെടുത്തു. വൈദ്യശാസ്ത്രത്തിലെ ആധുനിക സങ്കേതങ്ങൾ, അടിയന്തര സാഹചര്യങ്ങളിൽ രോഗികളുടെ രക്ഷയ്ക്ക് ഫലപ്രദമായി ഉപയോഗിക്കേണ്ടതിന്‍റെ ആവശ്യകത ശില്പശാല ചർച്ച ചെയ്തു.

ത്രിതല പഞ്ചായത്ത് തെരഞ്ഞെടുപ്പ്: പ്രാദേശിക കക്ഷികൾ നിർണായക ശക്തിയായി മാറും-ജോസ് കെ. മാണി

വെച്ചൂച്ചിറ: ആസന്നമായ ത്രിതല പഞ്ചായത്ത് തെരഞ്ഞെടുപ്പിൽ ദേശീയ പാർട്ടികളേക്കാൾ ജനപിന്തുണ ആർജ്ജിച്ച് നിർണായക ശക്തികളായി മാറാൻ പ്രാദേശിക പാർട്ടികൾക്ക് കഴിയുമെന്ന് കേരള കോൺഗ്രസ്-എം ചെയർമാൻ ജോസ് കെ. മാണി എംപി. കേരള കോൺഗ്രസ്-എം റാന്നി നിയോജകമണ്ഡലം കമ്മിറ്റി വെച്ചൂച്ചിറയിൽ സംഘടിപ്പിച്ച ദ്വിദിന പഠന ക്യാമ്പ് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മലയോരമേഖലയിലെ ജനങ്ങൾ നേരിടുന്ന വിഷയങ്ങളിലും കാർഷിക പ്രശ്നങ്ങളിലും ഭരണ, പ്രതിപക്ഷ രാഷ്‌ട്രീയ വ്യത്യാസമില്ലാതെ ശക്തമായ നിലപാട് സ്വീകരിച്ച് കേരള കോൺഗ്രസ്-എം ജനങ്ങൾക്കൊപ്പം അടിയുറച്ചു നിൽക്കുമെന്നും ജോസ് ക. മാണി പറഞ്ഞു. പാർട്ടിയുടെ വിശ്വാസ്യത തകർക്കുവാൻ ലക്ഷ്യമിട്ട് വലതുപക്ഷ മാധ്യമങ്ങൾ നടത്തുന്ന മുന്നണി മാറ്റ ചർച്ചകൾ കേരള സമൂഹത്തിൽ വിലപ്പോവില്ലെന്നും, കേരള കോൺഗ്രസ്-എം എക്കാലവും ഇടതുപക്ഷ ജനാധിപത്യ മുന്നണിക്കൊപ്പം അടിയുറച്ചു നിൽക്കുമെന്നും ജോസ് കെ. മാണി പറഞ്ഞു. വനം-വന്യ ജീവി വിഷയത്തിൽ ശാശ്വത പരിഹാരം കാണുവാൻ പാർട്ടി നിയോഗിച്ച വിദഗ്ധ സമിതിയുടെ റിപ്പോർട്ട് ഉടൻതന്നെ കേന്ദ്ര, സംസ്ഥാന സർക്കാരുകൾക്ക് കൈമാറുമെന്നും അദ്ദേഹം അറിയിച്ചു. റാന്നി നിയോജകമണ്ഡലം പ്രസിഡന്‍റ് ജോർജ് ഏബ്രഹാം അധ്യക്ഷത വഹിച്ചു. പ്രമോദ് നാരായൺ എംഎൽഎ മുഖ്യപ്രഭാഷണം നടത്തി. ജില്ലാ പ്രസിഡന്‍റ് സജി അലക്സ്‌, സംസ്ഥാന സ്റ്റിയറിംഗ് കമ്മിറ്റി അംഗങ്ങളായ മനോജ്‌ മാത്യു, ഡോ. വർഗീസ് പേരയിൽ, ജില്ലാ ജനറൽ സെക്രട്ടറി ഏബ്രഹാം വാഴയിൽ, ബിബിൻ കള്ളംപറമ്പിൽ, ഷെറി തോമസ്, ബോബി കാക്കനാപള്ളിൽ, റിന്‍റോ തോപ്പിൽ, എം.സി. ജയകുമാർ, ടോമി വടക്കേമുറി, മാത്യു നൈനാൻ, ഹാൻലി ജോൺ, ടോം ആയല്ലൂർ, റോസമ്മ സക്കറിയ, ബഹനാൻ ജോസഫ്, ജോൺ വി. തോമസ്, ടിബു പുരക്കൽ, ദിലീപ് ഉതിമൂട്, ശോഭ ചാർളി, ബാബു അന്ത്യൻകുളം, ടോമി പാറകുളങ്ങര, പൊന്നി വെച്ചൂച്ചിറ എന്നിവർ പ്രസംഗിച്ചു.

ആറന്മുളയിൽ ഇനി വള്ളസദ്യക്കാലം

ആറന്മുള: ആറന്മുളയിൽ വഴിപാട് വള്ളസദ്യകൾക്ക് ഇന്നു തുടക്കമാകും. ആറന്മുള പാർഥസാരഥി ക്ഷേത്രവുമായി ബന്ധപ്പെട്ട് പള്ളിയോട സേവാസംഘം നടത്തുന്ന വള്ളസദ്യ ചടങ്ങുകൾ ഒക്ടോബർ രണ്ടുവരെ നീളും. പന്പയുടെ ഇരുകരകളിലുമായുള്ള 52 പള്ളിയോടങ്ങൾക്ക് വിവിധ ദിവസങ്ങളിലായി ഭക്തർ വഴിപാട് വള്ളസദ്യ ഒരുക്കും. തിരുവോണത്തോണിക്ക് അകന്പടി സേവിക്കുന്ന പള്ളിയോടങ്ങളിൽ എത്തുന്ന കരക്കാർക്ക് ഭക്തർ വഴിപാടെന്ന നിലയിലാണ് ഓരോദിവസവും സദ്യ നൽകുന്നത്. ആറന്മുളയുടെ തനത് വിഭവങ്ങൾ ചേർത്തുള്ള സദ്യയിൽ പങ്കാളികളാകാനായി ഇനിയുള്ള ദിവസങ്ങളിൽ വൻ തിരക്കാണ് ഉണ്ടാകുന്നത്. വള്ളസദ്യ വഴിപാടുകൾക്ക് തുടക്കം കുറിച്ചുകൊണ്ട് വിശിഷ്ടാതിഥികളെ ഇന്നു രാവിലെ 11ന് ക്ഷേത്ര തിരുമുറ്റത്തേക്ക് സ്വീകരിച്ച് ആനയിക്കും. 11.15ന് ക്ഷേത്ര ആനക്കൊട്ടിലിൽ മന്ത്രി കെ. ബി. ഗണേഷ് കുമാർ ഭദ്രദീപം കൊളുത്തി ഉദ്ഘാടനം ചെയ്യും. അവിട്ടം തിരുനാൾ ആദിത്യ വർമ, വീണാ ജോർജ്, ആന്‍റോ ആന്‍റണി എംപി, പ്രമോദ് നാരായണൻ എംഎൽഎ എന്നിവർ ഇലയിൽ വിഭവങ്ങൾ വിളമ്പും. തുടർന്ന് പള്ളിയോട സേവാസംഘം നിർമിച്ച വിസ്മയ ദർശനം ഡോക്കുമെന്‍ററി ക്ഷേത്രമുറ്റത്തെ വഞ്ചിപ്പാട്ട് സോപാനം പന്തലിൽ പ്രമോദ് നാരായണൻ എംഎൽഎ പ്രകാശനം ചെയ്യും. ക്ഷേത്രത്തിലെ ഉച്ചപൂജയ്ക്കു ശേഷം വഴിപാട് വള്ളസദ്യകൾ ഊട്ടുപുരകളിൽ ആരംഭിക്കും. ആദ്യം ക്ഷേത്രക്കടവിൽ എത്തുന്ന പള്ളിയോടത്തെ പള്ളിയോട സേവാസംഘം ഭാരവാഹികൾ വെറ്റില, പുകയില നൽകി സ്വീകരിക്കും. 11. 30ന് പാഞ്ചജന്യം ഓഡിറ്റോറിയത്തിൽ കെഎസ്ആർടിസി ബജറ്റ് ടൂറിസം സെല്ലിന്‍റെ പഞ്ചപാണ്ഡവ ക്ഷേത്രദർശന യാത്രയുടെ ഭാഗമായി നടത്തുന്ന വള്ളസദ്യ മന്ത്രി കെ. ബി. ഗണേഷ് കുമാർ ഉദ്ഘാടനം ചെയ്യും. രാവിലെ 10.30 ന് പഞ്ചപാണ്ഡവ ക്ഷേത്രദർശന സംഘം എത്തുന്ന കെഎസ്ആർടിസി ബസിനെയും സ്റ്റാഫിനെയും പ്രസിഡന്‍റ് കെ. വി. സാംബദേവൻ, സെക്രട്ടറി പ്രസാദ് ആനന്ദദവൻ എന്നിവർ ചേർന്നു സ്വീകരിക്കും. ഓതറ, ളാക -ഇടയാറൻ മുള, കോടിയാട്ടുകര, തെക്കേമുറി, പൂവത്തൂർ പടിഞ്ഞാറ്, കോഴഞ്ചേരി, വെൺപാല എന്നീ ഏഴു പള്ളിയോടങ്ങളാണ് ഇന്നു വള്ളസദ്യയിൽ പങ്കെടുക്കുന്നത്. 52 കരനാഥന്മാർ, പള്ളിയോടപ്രതിനിധികൾ, ദേവസ്വം ഭാരവാഹികൾ, രാഷ്ട്രീയ സാമൂഹിക സാംസ്കാരിക നേതാക്കൾ, ക്ഷണിക്കപ്പെട്ട അതിഥികൾ തുടങ്ങിയവർ പങ്കെടുക്കും. ആചാരപ്പെരുമയിൽ ആറന്മുളയിലെ വള്ളസദ്യ വഴിപാട് ആചാരപ്പെരുമയിൽ പ്രസിദ്ധമാണ്. വഴിപാട് നടത്തുന്ന ഭക്തൻ ആ ദിവസം രാവിലെ ക്ഷേത്രത്തിലെത്തി കൊടിമരച്ചുവട്ടിൽ നിറപറ സമർപ്പിക്കുന്നതോടെയാണ് ചടങ്ങുകൾതുടങ്ങുന്നത്. ക്ഷേത്ര ശ്രീകോവിലിൽ നിന്നും പൂജിച്ചു വാങ്ങിയ പൂമാല ‌ഏതു പള്ളിയോടത്തിനാണോ വഴിപാട് സമർപ്പിക്കുന്നത് ആ കരയിൽ എത്തി പള്ളിയോടത്തിൽ ചാർത്തി ആറന്മുളയിലേക്കു യാത്രയാക്കണം. വഞ്ചിപ്പാട്ടുകൾ പാടി ക്ഷേത്രത്തിലെത്തുന്ന പള്ളിയോടത്തെ അഷ്ടമംഗല്യം, താലപ്പൊലി, മുത്തുക്കുട, വാദ്യമേളം എന്നിവയോടെ വായ്ക്കുരവയിട്ട് കരനാഥൻമാർക്ക് വെറ്റില, പുകയില നൽകി സ്വീകരിക്കും. തുടർന്ന് പള്ളിയോടങ്ങളിലെത്തുന്നവർ വഞ്ചിപ്പാട്ടോടെ കൊടിമരച്ചുവട്ടിൽ പറയിട്ട സ്ഥലത്ത് എത്തും. തുടർന്ന് മുത്തുക്കുടയും തുഴയും ദേവനു നടയ്ക്കു മുന്നിൽവയ്ക്കും. ക്ഷേത്രത്തിനു വലംവയ്ക്കുന്ന സംഘം വഴിപാട് തയാറാക്കിയ പന്തലിലേക്ക് എത്തും. അവിടെ ഭദ്രദീപം തെളിച്ച് ഭക്തിയോടെ വിഭവങ്ങൾ വിളന്പും. സദ്യയ്ക്കായി പുറപ്പെടുന്പോഴും പ്രത്യേക പാട്ടുകൾ ക്രമീകരിച്ചിട്ടുണ്ട്. ക്ഷേത്ര കൊടിമരച്ചുവട്ടിലെ ആചാരങ്ങൾ പൂർത്തിയാക്കിയാണ് സദ്യയിൽ പങ്കെടുക്കാനായി കരക്കാർ നീങ്ങുന്നത്. തുടർന്ന് വള്ളസദ്യയിൽ മാത്രം വിളന്പുന്ന വിഭവങ്ങൾ കരനാഥൻമാർ ശ്ലോകങ്ങൾ ചൊല്ലിയും പാട്ടുപാടിയും ആവശ്യപ്പെടും. വഴിപാടുകാർ ഇത് കരനാഥൻമാർക്ക് നൽകും. ചോദിക്കുന്ന വിഭവങ്ങളെല്ലാം ഇല്ലെന്നു പറയാതെ വിളന്പണമെന്നാണ് ചടങ്ങ്. 63 ഇനം കറികൾ ആറന്മുള വള്ളസദ്യയ്ക്കായി തയാറാക്കേണ്ടത് 63 ഇനം വിഭവങ്ങളാണ് ഇവയിലേറെയും കറിക്കൂട്ടുകളാണ്. വിഭവസമൃദ്ധമായ സദ്യ വിളന്പുന്നതിനും ഉണ്ണുന്നതിനും ക്രമവും ചിട്ടകളുമുണ്ട്. സദ്യയുണ്ട്, കൊടിമരച്ചുവട്ടിൽ എത്തുന്ന കരനാഥൻമാർ കൊടിമരച്ചുവട്ടിലെ പറ തെളിച്ച് വഴിപാടുകാർക്ക് ആയുരാരോഗ്യ സൗഖ്യത്തിനും സന്പൽ സമൃദ്ധിക്കുമായി പ്രാർഥിച്ച് ദക്ഷിണ വാങ്ങി പള്ളിയോടത്തിലേക്കു മടങ്ങും. മടങ്ങുന്ന കരനാഥൻമാർക്കൊപ്പം വഴിപാടുകാർ ചെന്നു പള്ളിയോടത്തിൽ കയറ്റി യാത്രയാക്കുന്നതോടെയാണ് വള്ളസദ്യ വഴിപാട് സമാപിക്കുന്നത്.

പുതിയകാവ് സ്കൂളിൽ മോഷണ ശ്രമം

തിരുവല്ല: നെടുമ്പ്രം പുതിയകാവ് ഗവൺമെന്‍റ് സ്കൂളിൽ മോഷണ ശ്രമം.സ്കൂളിലെ ഓഫീസ്, സ്റ്റാഫ്, കംപ്യൂട്ടർ മുറികൾ അടക്കം കുത്തിത്തുറന്ന മോഷ്ടാക്കൾ ഏഴ് അലമാരകളുടെ ലോക്കറുകളുടെ പൂട്ടുകളും തകർത്തു. ഓഫീസ് റൂമിലെ പ്രധാന അലമാര കുത്തിത്തുറന്ന മോഷ്ടാക്കൾ ഉള്ളിൽ സൂക്ഷിച്ചിരുന്ന താക്കോൽക്കൂട്ടം ഉപയോഗിച്ചാണ് മറ്റ് അലമാരകൾ തുറന്നത്. പുതിയ സ്കൂൾ കെട്ടിടത്തിന്‍റെ പണികളുടെ ഭാഗമായി ഇന്നലെ രാവിലെ എട്ടോടെ തൊഴിലാളികൾ എത്തിയപ്പോഴാണ് മോഷണ വിവരം പുറത്തിറഞ്ഞത്. സംഭവം അറിഞ്ഞെത്തിയ വാർഡ് മെംബർ ജിജോ ചെറിയാൻ പുളിക്കീഴ് പോലീസിൽ വിവരം അറിയിച്ചു. തുടർന്ന് എത്തിയ എസ്ഐ അടങ്ങുന്ന സംഘം പ്രാഥമിക പരിശോധന നടത്തി. വിരലടയാള വിദഗ്ധരും സ്ഥലത്തെത്തി തെളിവുകൾ ശേഖരിച്ചിട്ടുണ്ട്. കംപ്യൂട്ടർ ലാബിലും ഓഫീസ് മുറിയിലുമായി സൂക്ഷിച്ചിരുന്ന ലാപ്ടോപ്പുകളും കാമറയും അടക്കമുള്ള വിലപിടിച്ച വസ്തുക്കൾ ഒന്നുംതന്നെ നഷ്ടപ്പെട്ടിട്ടില്ലെന്ന് പ്രധാന അധ്യാപിക സി. ബിന്ദു കൃഷ്ണ പറഞ്ഞു. കഴിഞ്ഞ രണ്ടു വർഷത്തിനിടെ ഇത് മൂന്നാം തവണയാണ് സ്കൂളിൽ മോഷണവും മോഷണശ്രമവും ഉണ്ടായത്. പ്രധാന അധ്യാപിക നൽകിയ പരാതിയിൽ പോലീസ് കേസെടുത്ത് അന്വേഷണം ആരംഭിച്ചു.

നവമാധ്യമങ്ങൾ തേജോവധം ചെയ്യുന്നു; പരാതിയുമായി അതിജീവിത

പത്തനംതിട്ട: നവമാധ്യമങ്ങളിലൂടെ തന്നെയും ഒരു മാസം പ്രായമുള്ള കുഞ്ഞിനെയും കുറിച്ച് അപവാദം പ്രചരിപ്പിക്കുന്നുവെന്ന് പോക്‌സോ കേസ് അതിജീവിതയുടെ പരാതി. 31 പേര്‍ക്കെതിരേ അടൂര്‍ പോലീസില്‍ പരാതി നല്‍കിയെങ്കിലും ഒരു നടപടിയും സ്വീകരിച്ചിട്ടില്ലെന്നും യുവതിയും അഭിഭാഷകരും പത്രസമ്മേളനത്തില്‍ ആരോപിച്ചു. അനാഥാലയത്തില്‍ വളര്‍ന്ന അതിജീവിത 18 വയസ് തികഞ്ഞതിന് പിന്നാലെ നടത്തിപ്പുകാരിയുടെ ബന്ധുവായ യുവാവിനെ വിവാഹം കഴിച്ചിരുന്നു. ഇതിനു പിന്നാലെയാണ് തനിക്കും കുഞ്ഞിനുമെതിരേ സൈബർ ആക്രമണം നടക്കുന്നതെന്ന് യുവതി പറഞ്ഞു.

അയല്‍വാസിയെ ആക്രമിച്ച കേസില്‍ യുവാവ് അറസ്റ്റില്‍

പത്തനംതിട്ട: കടം വാങ്ങിയ പണം തിരികെ ചോദിച്ചതിന്‍റെ വിരോധത്താല്‍ അയല്‍വാസിയായ ബന്ധുവിനെ ആക്രമിച്ച് പരിക്കേല്പിച്ച കേസില്‍ യുവാവ് അറസ്റ്റിൽ. തൂവയൂര്‍ തെക്ക് പാണ്ടിമലപ്പുറം നന്ദു ഭവനില്‍ വൈഷ്ണവാണ് (ചന്ദു, 23) അറസ്റ്റിലായത്. തൂവയൂര്‍ തെക്ക് പാണ്ടിമലപ്പുറം പുത്തന്‍പുരയില്‍ ഹരിഹരനാണ് (43) പരിക്കേറ്റത്. എസ്ഐ ആർ. ശ്രീകുമാര്‍, എസ്ഐ രവികുമാര്‍ എന്നിവരാണ് അന്വേഷണം നടത്തുന്നത്.

വിവിധ പദ്ധതികൾക്കായി 1.45 കോടി രൂപയുടെ ഭരണാനുമതി

തിരുവല്ല: നിയോജകമണ്ഡലത്തിലെ വിവിധ പദ്ധതികൾക്കായി എംഎൽഎ ഫണ്ടിൽ നിന്ന് 1.45 കോടി രൂപയുടെ ഭരണാനുമതി ലഭിച്ചതായി മാത്യു ടി. തോമസ് എംഎൽഎ അറിയിച്ചു. നിരണം പഞ്ചായത്തിലെ കുമ്പളത്ത്പടി നിരണത്ത്തടം റോഡ് (15 ലക്ഷം), പുതിയാ മഠം -തോട്ടുമട റോഡ് (രണ്ടാം റീച്ച്) 15 ലക്ഷം , കടപ്ര പഞ്ചായത്തിലെ ബ്ലോക്ക്‌ പടി - മണപറമ്പ് റോഡ് (15 ലക്ഷം), പെരിങ്ങര പഞ്ചായത്തിലെ ചിറയിൽ പടി -ഐരാമ്പള്ളി റോഡ് (20 ലക്ഷം), പനച്ചയിൽ പടി -രക്ഷാസൈന്യം റോഡ് (25 ലക്ഷം), കുറ്റൂർ പഞ്ചായത്തിലെ കൊച്ചുപാലത്തിങ്കൽ - മുണ്ടുചിറപ്പാട് റോഡ് (40 ലക്ഷം), നെടുമ്പ്രം പഞ്ചായത്തിലെ കാർണശേരി- ഓട്ടാഫീസ് കടവ് റോഡ് (15 ലക്ഷം) എന്നീ പ്രവൃത്തികൾക്കാണ് ഭരണാനുമതി ലഭിച്ചിട്ടുള്ളത്.

ഭാര്യയെയും മകളെയും ആക്രമിച്ച യുവാവ് അറസ്റ്റില്‍

പത്തനംതിട്ട: ഭാര്യയെയും മകളെയും ആക്രമിച്ച് പരിക്കേല്പിച്ച കേസില്‍ യുവാവ് അറസ്റ്റിൽ. കോന്നി അരുവാപ്പുലം അണപ്പടി ചെമ്പകത്തുകാലാപ്പടി ചെമ്പിലാക്കല്‍ ആർ. ബിജുമോനാണ് (43) അറസ്റ്റിലായത്. ഇയാളുടെ ഭാര്യ പ്രിയക്കും (38) മൂത്തമകള്‍ ദേവിക(17) യ്ക്കുമാണ് പരിക്കേറ്റത്. യുവാവ് വീട്ടിലെത്തി ഭാര്യയുടെയും മകളുടെയും മുഖത്ത് മുളകുപൊടി വിതറുകയായിരുന്നു. വെപ്രാളത്തോടെ മുഖം കഴുകാന്‍ തുനിഞ്ഞ പ്രിയയുടെ അരികിലെത്തിയ ഇയാള്‍ കയിലിരുന്ന ചുറ്റിക കൊണ്ട് ഇടതുകണ്ണിനു മുകളില്‍ അടിച്ചു. തടസം പിടിക്കാനെത്തിയ മകളുടെ തലയ്ക്കും പിന്നില്‍ ചുറ്റിക ഉപയോഗിച്ച് അടിച്ചുപരിക്കേല്പിച്ചു. നിലവിളിച്ചുകൊണ്ട് വീടിനു പുറത്തേക്കോടിയ ഇരുവരെയും മുറ്റത്തുകിടന്ന സൈക്കിള്‍ പമ്പ് കൊണ്ട് തലയ്ക്കും കൈയ്ക്കും അടിക്കുകയും ചെയ്തു. ഗുരുതരമായി പരിക്കേറ്റ പ്രിയയും മകളും പത്തനംതിട്ടയിലെ സ്വകാര്യ ആശുപത്രിയില്‍ ചികിത്സയിലാണ്. ഇരുവരും തമ്മില്‍ ഒരു വീട്ടില്‍ താമസിക്കുമ്പോഴും വിരോധത്തിലായിരുന്നു എന്ന് പറയുന്നു. കോടതിയില്‍ ഹാജരാക്കിയ ബിജുമോനെ റിമാൻഡ് ചെയ്തു. എസ്ഐ പി. കെ. പ്രഭയുടെ നേതൃത്വത്തിലാണ് അന്വേഷണം.

കിടങ്ങന്നൂരില്‍ ട്യൂഷന്‍ അധ്യാപകനെതിരേ വീണ്ടും പോക്സോ കേസ്

ആറന്മുള: പോക്സോ കേസില്‍ പ്രതിയായി ജുഡീഷല്‍ കസ്റ്റഡിയില്‍ കഴിയുന്ന ട്യൂഷന്‍ സെന്‍റര്‍ നടത്തിപ്പുകാരനായ അധ്യാപകനെതിരേ മറ്റൊരു കേസില്‍ വീണ്ടും പോക്സോ ചുമത്തി. മെഴുവേലി സ്വദേശിയായ പതിമൂന്നുകാരന്‍റെ മൊഴിപ്രകാരമാണ് ആറന്മുള പോലീസ് രണ്ടാമത്തെ കേസ് രജിസ്റ്റര്‍ ചെയ്തത്. കിടങ്ങന്നൂര്‍ സെന്‍റ് മേരീസ് കോളജ് ട്യൂഷന്‍ സെന്‍റര്‍ ഉടമ കാക്കനാട്ട് പുതുപറമ്പില്‍ വീട്ടില്‍ ഏബ്രഹാം അലക്സാണ്ടറിനെ (62) യാണ് ആറന്മുള പോലീസ് ഫോര്‍മല്‍ അറസ്റ്റ് ചെയ്തത്. 13 കാരനുനേരേ ലൈംഗിക അതിക്രമം നടത്തിയതിന് 30നാണ് ആദ്യ പോക്സോ കേസ് എടുത്തത്. പോലീസ് ഇന്‍സ്‌പെക്ടര്‍ വി എസ് പ്രവീണിന്‍റെ നേതൃത്വത്തിലായിരുന്നു നടപടി.

പെരിങ്ങമലയിൽ ആളുകളെ കടിച്ച നായയ്ക്ക് പേവിഷബാധ

പത്തനംതിട്ട: നഗരത്തിൽ പരിഭ്രാന്തി പരത്തിയ തെരുവ് നായയ്ക്ക് പേവിഷ ബാധ സ്ഥിരീകരിച്ചു. വെള്ളിയാഴ്ച രാവിലെ ആറ് മുതൽ ഉച്ചയ്ക്ക് 12.30 വരെ നഗരസഭാ പരിധിയിൽ പെരിങ്ങമല, തോണിക്കുഴി, കുമ്പാങ്ങൽ ഭാഗത്തൂടെ ഓടിയ നായയുടെ ആക്രമണത്തിൽ നിരവധി പേർക്ക് കടിയേറ്റിരുന്നു. ഇവർ പത്തനംതിട്ട ജനറൽ ആശുപത്രിയിൽ ചികിത്സ തേടി. മറ്റ് രണ്ട് പേരുടെ നേർക്ക് നായ കുരച്ച് ചാടിയെങ്കിലും അവർ ഓടി രക്ഷപ്പെട്ടു. വാർഡ് കൗൺസിലറുടെ നേതൃത്വത്തിൽ പ്രദേശവാസികൾക്ക് ജാഗ്രതാ നിർദേശം നൽകിയിട്ടുണ്ട്. പരിക്കേറ്റവർ പ്രതിരോധ മരുന്ന് എടുത്തിട്ടുണ്ട്. നിരവധി വളർത്തുനായ്ക്കളേയും തെരുവ് നായ്ക്കളെയും ഇതേ നായ കടിച്ചിട്ടുണ്ട്. പിന്നാലെ നായയെ ചത്തനിലയിൽ കണ്ടെത്തുകയായിരുന്നു. തുടർന്ന് നടന്ന പരിശോധനയിലാണ് പേ വിഷബാധ സ്ഥിരീകരിച്ചത്. പ്രദേശവാസികൾ ഇതു സംബന്ധിച്ച് ആശങ്കയിലാണ്.

സിടിസി ഉദ്ഘാടനവും സര്‍ട്ടിഫിക്കറ്റ് വിതരണവും

കാഞ്ഞിരപ്പള്ളി: രൂപത വിശ്വാസജീവിത പരിശീലനകേന്ദ്രം വിശ്വാസജീവിത പരിശീലകര്‍ക്കായി നടത്തുന്ന അടിസ്ഥാന ദൈവശാസ്ത്ര അധ്യാപന വിഷയങ്ങളില്‍ അറിവ് നല്‍കുന്ന പരിശീലന പരിപാടിയായ കാറ്റക്കിസ്റ്റ്‌സ് ട്രെയിനിംഗ് കോഴ്‌സിന്‍റെ (സിടിസി) പുതിയ അധ്യയനവര്‍ഷത്തിന്‍റെ ഉദ്ഘാടനവും 2024-25ല്‍ കോഴ്‌സ് പൂര്‍ത്തിയാക്കിയവരുടെ സര്‍ട്ടിഫിക്കറ്റ് വിതരണവും പാസ്റ്ററല്‍ സെന്‍ററില്‍ നടന്നു. രൂപതാധ്യക്ഷന്‍ മാര്‍ ജോസ് പുളിക്കല്‍ സമ്മേളനം ഉദ്ഘാടനം ചെയ്ത് സര്‍ട്ടിഫിക്കറ്റുകൾ വിതരണം ചെയ്തു. രൂപത പ്രോട്ടോസിഞ്ചെല്ലൂസ് ഫാ. ജോസഫ് വെള്ളമറ്റം അധ്യക്ഷത വഹിച്ചു. വിശ്വാസ ജീവിത പരിശീലന ഡയറക്ടര്‍ ഫാ. തോമസ് വാളന്മനാല്‍, ഫാ. സേവ്യര്‍ കൊച്ചുപറമ്പില്‍ എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]