ADVERTISEMENT

ADVERTISEMENT

അങ്കണവാടി കലോത്സവം ആരവം 2025

തിരുവല്ല: പെരിങ്ങര ഗ്രാമപഞ്ചായത്തിന്‍റെയും ഐസിഡിഎസിന്‍റെയും സംയുക്താഭിമുഖ്യത്തിൽ സംഘടിപ്പിച്ച അങ്കണവാടി കലോത്സവം ആരവം 2025 പുളിക്കീഴ് ബ്ലോക്ക് പഞ്ചായത്ത് പ്രസിഡന്‍റ് സി.കെ. അനു ഉദ്ഘാടനം ചെയ്തു.

ഗ്രാമപഞ്ചായത്ത് പ്രസിഡന്‍റ് ഏബ്രഹാം തോമസ് അധ്യക്ഷത വഹിച്ചു. സ്ഥിരംസമിതി അധ്യക്ഷരായ റിക്കു മോനി വർഗീസ്, ജയ ഏബ്രഹാം, വിഷ്ണു നമ്പൂതിരി, അംഗങ്ങളായ എം.സി.ഷൈജു, ശാന്തമ്മ ആർ.നായർ, ശാർമിള സുനിൽ, മാത്തൻ ജോസഫ്, എസ്. സനിൽ കുമാരി, അശ്വതി രാമചന്ദ്രൻ, സുഭദ്രാ രാജൻ, ചന്ദ്രു എസ്. കുമാർ, ഐസിഡിഎസ് സൂപ്പർവൈസർ എസ്. റീന എന്നിവർ പ്രസംഗിച്ചു.

ADVERTISEMENT

ഹണിട്രാപ്പ് ക്രൂരത: ദുരൂഹതകൾ ബാക്കി

കോഴഞ്ചേരി: ഹണിട്രാപ്പില്‍ കുരുക്കി രണ്ട് യുവാക്കളെ മനുഷ്യത്വരഹിതമായി ഉപദ്രവിച്ച ജയേഷ് - രശ്മി ദന്പതികളുടെ ജീവിതം ദുരൂഹതകൾ നിറഞ്ഞത്. ഇവരുടെ സ്വഭാവ രീതികളും സമീപവാസികൾക്ക് മനസിലാക്കാനായിരുന്നില്ല. റാന്നി, ആലപ്പുഴ സ്വദേശികളെ ക്രൂരമായി ഉപദ്രവിച്ച ദന്പതികൾ റിമാൻഡിലാണെങ്കിലും ഇവരെ സംബന്ധിച്ച വിവരങ്ങൾ തേടി പോലീസ് ഇന്നലെയും വിശദമായ അന്വേഷണം നടത്തി. ക്രൂരമർദനത്തിനിരയായ ആലപ്പുഴ സ്വദേശിയ സംഭവം നടന്ന ആന്താലിമണ്ണിലെത്തിച്ച് തെളിവുമെടുത്തു. കോയിപ്രം, തോട്ടപ്പുഴശേരി ഗ്രാമപഞ്ചായത്തുകളുടെ അതിര്‍ത്തിപ്രദേശമായ കള്ളിപ്പാറ-ആന്താലിമണ്‍ പ്രദേശത്താണ് ഇവര്‍ താമസിച്ചിരുന്നത്. ഇരുപഞ്ചായത്തുകളിലെയും വോട്ടര്‍പട്ടികയില്‍ ഇവരുടെ പേര് ഇല്ലെന്ന് കോയിപ്രം ഗ്രാമപഞ്ചായത്ത് വൈസ് പ്രസിഡന്‍റും നാലാംവാര്‍ഡ് മെംബറുമായ റെനി രാജു കുഴിക്കാലയും തോട്ടപ്പുഴശേരി ഗ്രാമപഞ്ചായത്ത് മുന്‍വൈസ് പ്രസിഡന്‍റ് ഷെറിന്‍ റോയിയും പറയുന്നു. എന്നാല്‍, ജയേഷിന്‍റെ മാതാപിതാക്കള്‍ക്ക് തോട്ടപ്പുഴശേരി ഗ്രാമപഞ്ചായത്തില്‍ വോട്ട് ഉണ്ടായിരുന്നു. ഇരുവരും മരിച്ചുപോയി. മാതാവ് മരിക്കുമ്പോള്‍ കോയിപ്രം ഗ്രാമപഞ്ചായത്തിലെ നാലാം വാര്‍ഡിലെ കുടുംബശ്രീ പ്രവര്‍ത്തകര്‍ മരണാനന്തരപ്രവര്‍ത്തനങ്ങള്‍ക്കു സാമ്പത്തിക സഹായം നല്കിയിരുന്നതായി റെനി രാജു കുഴിക്കാല പറയുന്നു. സാമ്പത്തികമായി പിന്നോക്കം അവസ്ഥയിലായിരുന്നുവെങ്കിലും തദ്ദേശസ്വയംഭരണ സ്ഥാപനങ്ങളിലെയോ മറ്റ് സ്ഥാപനങ്ങളിലെയോ ഒരു സഹായത്തിനായി ഇവര്‍ സമീപിച്ചിരുന്നില്ല. എല്ലാവരുമായും ഒരു നിശ്ചിതഅകലം പാലിച്ചായിരുന്നു ജീവിതം. സമീപവാസികളേറെയും ദിവസക്കൂലിക്കു പണിയെടുക്കുന്നവരായതിനാൽ വൈകുന്നേരം വീടുകളിൽ മടങ്ങിയെത്തി തങ്ങളുടെ സ്വകാര്യ ജീവിതത്തിലേക്കു കടക്കുമെന്നതിനാൽ ഇവരെക്കുറിച്ച് കൂടുതല്‍ കാര്യങ്ങള്‍ അറിവില്ലായിരുന്നു. ന്യൂജെന്‍ ജീവിതം ജയേഷ് ന്യൂജെന്‍ രീതിയിലാണ് ജീവിച്ചിരുന്നതെന്ന് നാട്ടുകാര്‍ പറയുന്നു. ഹിറ്റാച്ചി കമ്പനിയിലെ ജീവനക്കാരനായ ഇയാൾ സിനിമാസ്റ്റൈലില്‍ ഹെഡ്‌ഫോണില്‍ പാട്ടും മറ്റും കേട്ടുകൊണ്ടാണ് നടന്നിരുന്നത്. അയല്‍വാസികളുമായി യാതൊരു സഹകരണവും ഇല്ലായിരുന്നുവെന്നും പരിസരവാസിയായ സുരേഷ് പറഞ്ഞു. ചെറിയ വീടാണെങ്കിലും സിസിടിവി കാമറ ഘടിപ്പിച്ചിരുന്നു. എന്നാൽ, ഇതിപ്പോൾ പ്രവർത്തിക്കുന്നില്ലെന്നാണ് സൂചന. രശ്മി കോഴഞ്ചേരിയിലടക്കം ചില വാണിജ്യ സ്ഥാപനങ്ങളിലും പൊതിച്ചോര്‍ വിതരണസ്ഥാപനങ്ങളിലും താല്ക്കാലിക ജീവനക്കാരിയിരുന്നു. പ്രൈമറി സ്‌കൂളിലെ വിദ്യാര്‍ഥികളായ ഇവരുടെ കുട്ടികളെ രശ്മിയുടെ വീട്ടുകാര്‍ അയിരൂരിലുള്ള കുടുംബവീട്ടിലേക്കു മാറ്റിയിരിക്കുകയാണ്. ആഭിചാരക്രിയകളും അന്ധവിശ്വാസവും ജയേഷിന്‍റെ മാതാവ് കാഷായവസ്ത്രം ധരിച്ച് ക്ഷേത്രങ്ങളിലും മറ്റും തീര്‍ഥാടനം നടത്തി ജീവിക്കുകയായിരുന്നുവെന്നും ഇവരുടെ രീതികള്‍ കണ്ട് ജയേഷ് ആഭിചാരക്രിയകളും മറ്റും നടത്തിയിരുന്നതായി സംശയവും നാട്ടുകാര്‍ക്കുണ്ട്. ഇവര്‍ താമസിക്കുന്ന വീടിന്‍റെ പുറകുവശത്തുള്ള റബര്‍തോട്ടം വഴി ആളുകള്‍ വീട്ടിലെത്തിയിരുന്നതായും പറയുന്നു. ഇരുവർക്കും മനോവൈകല്യമുണ്ടെന്ന സംശയത്തിലാണ് പോലീസ്. രശ്മിയുമായി ലൈംഗിക ബന്ധത്തിലേര്‍പ്പെടുന്നതായി അഭിനയിപ്പിക്കുകയും അതിന്‍റെ ദൃശ്യങ്ങള്‍ ഫോണില്‍ പകര്‍ത്തുകയും ചെയ്ത ശേഷമാണ് ദമ്പതികള്‍ യുവാക്കളെ മര്‍ദിച്ചതെന്നാണ് വിവരം. യുവാവിന്‍റെ പക്കല്‍നിന്നു പണവും ഐഫോണും അടക്കമുള്ള സാധനങ്ങള്‍ പ്രതികള്‍ തട്ടിയെടുക്കുകയും ചെയ്തു. സമാനമായ രീതിയില്‍ ദമ്പതികളുടെ മര്‍ദനമേറ്റ ആലപ്പുഴ സ്വദേശിയെ കണ്ടെത്തിയാണ് പോലീസ് മൊഴിയെടുത്തത്. ഇയാള്‍ കേസ് നല്കാന്‍പോലും തയാറല്ലായിരുന്നു. 19 കാരനായ യുവാവിനാണ് മര്‍ദനമേറ്റത്. കഴിഞ്ഞ ഒന്നിനാണ് ഇയാള്‍ക്ക് മര്‍ദനമേറ്റത്. മാരാമണ്ണിലേക്ക് വിളിച്ചുവരുത്തി ജയേഷ് ഇയാളുമായി മദ്യപിച്ച ശേഷമാണ് വീട്ടിലെത്തിയത്. റാന്നി സ്വദേശിയുടെ മൊഴിയില്‍ പറയുന്ന തരത്തിലായിരുന്നു ഇയാൾക്കും മര്‍ദനം. രണ്ട് ഫോണുകളും കൈവശമുണ്ടായിരുന്ന 19,000 രൂപയും നഷ്ടപ്പെട്ടതായി യുവാവ് പറയുന്നു. പരാതിയില്ലാതെ ഒളിവില്‍ കഴിയുന്നതിനിടെയാണ് യുവാവിനെ പോലീസ് കണ്ടെത്തി മൊഴി രേഖപ്പെടുത്തിയത്. മുറിവുകള്‍ക്കു ഇയാൾ ചികിത്സ തേടിയിരുന്നു.

പുനരൈക്യ വാർഷികം: സമ്മേളന നഗർ ഒരുങ്ങി ഇന്ന് പതാക ഉയരും

പത്തനംതിട്ട: മലങ്കര സുറിയാനി കത്തോലിക്കാ സഭാ പുനരൈക്യ വാർഷികാഘോഷങ്ങൾക്കായി സമ്മേളന നഗർ ഒരുങ്ങി. പ്രധാന വേദിയായ അടൂർ ഓൾ സെയ്ന്‍റ്സ് പബ്ലിക് സ്കൂളിലെ മാർ ഇവാനിയോസ് നഗറിൽ 45000 ചതുരശ്ര അടി വിസ്തീർണമുള്ള കൂറ്റൻ പന്തലിന്‍റെ നിർമാണം പൂർത്തിയായി. 10,000 പേർക്ക് ഇരിക്കാനുള്ള സൗകര്യമാണ് ഒരുക്കിയിരിക്കുന്നത്. പ്രധാന വേദി കൂടാതെ തട്ട, ആനന്ദപ്പള്ളി എന്നിവിടങ്ങളിലെ പള്ളി ഓഡിറ്റോറിയങ്ങളും വേദികളായി ക്രമീകരിച്ചിട്ടുണ്ട്. മൂന്നുദിവസത്തെ ബൈബിൾ കൺവൻഷനും 19നു വൈകുന്നേരം നിഖ്യാ സുന്നഹദോസ് വാർഷിക സമ്മേളനവും പ്രധാന വേദിയിലാണ്. 19ന് ഉച്ചകഴിഞ്ഞ് അല്മായ സംഗമവും 20നു നടക്കുന്ന സഭാതല സംഗമവും പുനരൈക്യ വാർഷികവും മാർ ഈവാനിയോസ് നഗറിലെ പ്രധാന വേദിയിലാണ്. യുവജനസംഗമം തട്ട സെന്‍റ് ആന്‍റണീസ് ദേവാലയത്തിലും കുട്ടികളുടെ സംഗമം ആനന്ദപ്പള്ളി സെന്‍റ് മേരീസ് ദേവാലയത്തിലുമായി നടക്കും. പത്തനംതിട്ട രൂപതയിലെ പ്രയാണങ്ങൾ പത്തനംതിട്ട: മലങ്കര കത്തോലിക്കാ സഭാ പുനരൈക്യ വാർഷികാഘോഷ നഗറിൽ പ്രതിഷ്ഠിക്കാനുള്ള ബൈബിൾ, വള്ളിക്കുരിശ്, കാതോലിക്കാ പതാക, ഛായാചിത്ര പ്രയാണങ്ങൾ പത്തനംതിട്ട രൂപതയിലെ അഞ്ച് വൈദികജില്ലകളുടെ ചുമതലയിൽ ഇന്നു നടക്കും.

ബൈബിൾ കോന്നി വൈദിക ജില്ലയിൽ നിന്നു പ്രയാണമായി എത്തിക്കും. ഇന്ന് ഉച്ചകഴിഞ്ഞ് രണ്ടിന് കൂടൽ സെന്‍റ് പീയൂസ് മലങ്കര കത്തോലിക്കാ പള്ളിയിൽ നിന്ന് ആരംഭിക്കുന്ന പ്രയാണം പത്തനംതിട്ട സെന്‍റ് പീറ്റേഴ്സ് കത്തീഡ്രലിൽ എത്തി രൂപതയിലെ വിവിധ വൈദിക ജില്ലകളിൽ നിന്നുള്ള പ്രയാണങ്ങളുമായി ചേരും. വള്ളിക്കുരിശ് പ്രയാണം സീതത്തോട് വൈദിക ജില്ലയിൽ നിന്നാണ്. കാതോലിക്കാ പതാക റാന്നി പെരുനാട് വൈദികജില്ലയുടെ ആഭിമുഖ്യത്തിൽ മാന്പാറ ദേവാലയത്തിൽ നിന്നാരംഭിക്കും. ആർച്ച് ബിഷപ് ബനഡിക്ട് മാർ ഗ്രീഗോറിയോസിന്‍റെ ഛായാചിത്രം പത്തനംതിട്ട വൈദികജില്ലയിൽ നിന്നും പ്രയാണം തുടങ്ങും. സീതത്തോട്, കോന്നി, പെരുനാട്, പത്തനംതിട്ട പ്രയാണങ്ങൾ പത്തനംതിട്ട സെന്‍റ് പീറ്റേഴ്സ് കത്തീഡ്രലിൽ സംഗമിച്ചശേഷമാണ് അടൂരിലേക്ക് നീങ്ങുന്നത്. പന്തളം വൈദികജില്ലയിൽ നിന്നും മേജർ ആർച്ച് ബിഷപ് സിറിൽ ബസേലിയോസ് കാതോലിക്കാ ബാവയുടെ ഛായാചിത്രവുമായുള്ള പ്രയാണം എംസി റോഡുവഴി അടൂരിലെത്തും. അടൂർ സെൻട്രലിൽ തിരുവനന്തപുരം, മാവേലിക്കര, തിരുവല്ല രൂപതകളിൽ നിന്നുള്ള പ്രയാണങ്ങളുമായി തിരുഹൃദയ ദേവാലയത്തിൽ സംഗമിച്ച് അടൂർ മാർ ഈവാനിയോസ് നഗറിൽ എത്തിച്ചേരും. തുടർന്ന് സഭാധ്യക്ഷൻ മേജർ ആർച്ച് ബിഷപ് കർദിനാൾ മാർ ബസേലിയോസ് ക്ലീമീസ് കാതോലിക്കാ ബാവ സമ്മേളനനഗറിൽ പതാക ഉയർത്തും. തിരുവല്ലയിൽ നിന്ന് ഛായാചിത്ര പ്രയാണം തിരുവല്ല: മലങ്കര സുറിയാനി കത്തോലിക്കാ സഭയുടെ 95 ാം പുനരൈക്യ വാർഷിക ആഘോഷത്തിന് മുന്നോടിയായി പുനരൈക്യ പ്രസ്ഥാനത്തിന്‍റെ സഹശില്പിയും തിരുവല്ല അതിഭദ്രാസനത്തിന്‍റെ പ്രഥമ മെത്രാപ്പോലീത്തയുമായിരുന്ന യാക്കോബ് മാർ തെയോഫിലോസ് മെത്രാപ്പോലീത്ത കബറടങ്ങിയിരിക്കുന്ന തിരുവല്ല സെന്‍റ് ജോൺസ് മെത്രാപ്പോലീത്തൻ കത്തീഡ്രൽ ദേവാലയത്തിൽ നിന്നും ഛായാചിത്രം ഇന്ന് കൊണ്ടുപോകും. പുനരൈക്യ സംഗമം നടക്കുന്ന അടൂർ ഓൾ സെയിന്‍റസ് പബ്ളിക് സ്കൂളിലേയ്ക്ക് തിരുവല്ല അതിഭദ്രാസനത്തിന്‍റെ നേതൃത്വത്തിൽ നടക്കുന്ന ഛായചിത്ര പ്രയാണം ഇന്ന് ഉച്ചകഴിഞ്ഞ് മൂന്നിന് ആരംഭിക്കും. തിരുവല്ല അതിഭദ്രാസന മുഖ്യ വികാരി ജനറാൾ മോൺ.ഡോ. ഐസക് പറപ്പള്ളി ഉദ്ഘാടനം നിർവഹിക്കും. എംസിവൈഎം തിരുവല്ല അതിഭദ്രാസന ഡയറക്ടർ ഫാ. ചെറിയ കുരിശുമൂട്ടിൽ, അസിസ്റ്റന്‍റ് ഡയറക്ടർ ഫാ. മാത്യു മുളവേലിൽ, പ്രസിഡന്‍റ് സിറിയക് വി. ജോൺ, ജനറൽ സെക്രട്ടറി സച്ചിൻ രാജു സക്കറിയ, എംസിഎ തിരുവല്ല അതിഭദ്രാസന വൈദിക ഉപദേഷ്ടാവ് ഫാ. മത്തായി മണ്ണൂർ വടക്കേതിൽ, പ്രസിഡന്‍റ് ബിജു പാലത്തിങ്കൽ, ജനറൽ സെക്രട്ടറി ജസ്റ്റിൻ ജോൺ എന്നിവർ നേതൃത്വം നൽകും. വൺവേ സംവിധാനം അടൂർ - പത്തനംതിട്ട റൂട്ടിൽ പന്നിവിഴയിൽ നിന്ന് സ്‌കൂൾ ഗ്രൗണ്ടിലേക്ക് (ചെറിയ വാഹനങ്ങൾ) കണ്ണങ്കോട്, അടൂർ ഭാഗത്തേക്കും ബൈപാസിലേക്കും ഗീതം ഓഡിറ്റോറിയത്തിന് മുമ്പിലൂടെയുള്ള വഴി മടക്കയാത്രയ്ക്ക് ഉപയോഗിക്കണം. നൂറ് മണിക്കൂർ ദിവ്യകാരുണ്യ ആരാധന പത്തനംതിട്ട: അടൂരിൽ നടക്കുന്ന 95 ാമത് പുനരൈക്യ വാർഷികത്തോടനുബന്ധിച്ച് മലങ്കര കത്തോലിക്കാ സഭ പത്തനംതിട്ട രൂപതയിലെ സുവിശേഷസംഘം നടത്തുന്ന നൂറ് മണിക്കൂർ ദിവ്യകാരുണ്യ ആരാധന ഇന്നു രാവിലെ എട്ടു മുതൽ 20ന് ഉച്ചയ്ക്ക് 12വരെ തട്ട സെന്‍റ് ആന്‍റണീസ് മലങ്കര കത്തോലിക്കാ ദേവാലയത്തിലും ഓൾ സെയ്ന്‍റ്സ് പബ്ലിക് സ്കൂളിലുമായി നടക്കും.

ജൈവവൈവിധ്യ രജിസ്റ്ററിലേക്ക് വിവരങ്ങൾ കൈമാറി

പത്തനംതിട്ട: സംസ്ഥാന ജൈവ വൈവിധ്യ ബോർഡിന്‍റെ ധനസഹായത്തോടെ പത്തനംതിട്ട കാതോലിക്കേറ്റ് കോളജിൽ നടത്തിവരുന്ന ഗവേഷണത്തിന്‍റെ ഭാഗമായി സ്വരൂപിച്ച നാട്ടറിവുകളും സസ്യവിവരണങ്ങളും ജില്ലയിലെ വിവിധ ജൈവ വൈവിധ്യ പരിപാലന സമിതികൾക്ക് കൈമാറ്റം ചെയ്തു തുടങ്ങി. ‌മല്ലപ്പുഴശേരി പഞ്ചായത്ത് കാര്യാലയത്തിൽ പത്തനംതിട്ട കാതോലിക്കേറ്റ് കോളജ് പ്രിൻസിപ്പൽ ഡോ. സിന്ധു ജോൺസ് ഉദ്ഘാടനം നിർവഹിച്ചു. ഗ്രാമപഞ്ചായത്ത് പ്രസിഡന്‍റ് മിനി ജിജു ജോസഫിന് മല്ലപ്പുഴശേരി പഞ്ചായത്തിലെ ജൈവവൈവിധ്യവും നാട്ടറിവുകളും കൈമാറിക്കൊണ്ടായിരുന്നുഉദ്ഘാടനം. കേരളത്തിലെ ആദിവാസി വിഭാഗങ്ങൾ ഉപയോഗിക്കുന്ന സസ്യ വർഗങ്ങളുടെ സംരക്ഷണത്തിനായിയും അറിവുകൾ സമാഹരിക്കുന്നതിനുമായാണ് സംസ്ഥാന ജൈവ വൈവിധ്യ ബോർഡ്‌ ഗവേഷണ പദ്ധതി അനുവദിച്ചിരിക്കുന്നത്. സസ്യ ജാലകങ്ങളെ സംരക്ഷിക്കുന്നതിനുള്ള ഏതനോബോട്ടാനിക്കൽ ഗാർഡൻ കാതോലിക്കേറ്റ് കോളജിൽ തയാറാകുന്നുണ്ട്. റാന്നി പെരുനാട്, ചിറ്റാർ പഞ്ചായത്തുകൾക്കും പത്തനംതിട്ട മുനിസിപ്പാലിറ്റിക്കും ഡാറ്റ കൈമാറും. ചടങ്ങിൽ പ്രോജെക്ടിന്‍റെ പ്രിൻസിപ്പൽ ഇൻവെസ്റ്റിഗേറ്റർ ഡോ.വി.പി. തോമസ്, ബോട്ടണി വിഭാഗം തലവൻ ഡോ.ബിനോയ്‌ ടി.തോമസ്, പഞ്ചായത്ത്‌ സെക്രട്ടറി ആർ.സുമാ ഭായി അമ്മ, ജൈവവൈവിധ്യബോർഡ് ജില്ലാ കോഓർഡിനേറ്റർ അരുൺ സി.രാജൻ, വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ അശ്വതി പി.നായർ, ബിഎംസി കൺവീനർ പി.കെ. ഉണ്ണികൃഷ്ണൻ, പിബിആർ കോഓർഡിനേറ്റർ നിരുപമാ രാജ്എന്നിവർ പ്രസംഗിച്ചു.

സൈക്കിള്‍കടയില്‍ മോഷണം: ഒരാൾ അറസ്റ്റിൽ

കോഴഞ്ചേരി: സൈക്കിള്‍ കടയില്‍ നിന്ന് പണം മോഷ്ടിച്ച കേസിൽ ഒരാൾ അറസ്റ്റിൽ. കൊല്ലം കിഴക്കേ കല്ലട കൈലാത്തുമുക്കില്‍ ക്ലാച്ചിരത്തില്‍ ജോണ്‍സണ്‍ വര്‍ഗീസ് (49) ആണ് ആലപ്പുഴയില്‍ നിന്നും കോയിപ്രം പോലീസിന്റെ കസ്റ്റഡിയിലായത്. കോയിപ്രം പുല്ലാട് ജംഗ്ഷന് സമീപത്തുള്ള ഗോപാലകൃഷ്ണന്‍റെ സൈക്കിള്‍ കടയിലെ മേശയില്‍ സൂക്ഷിച്ചിരുന്ന 50000 രൂപ ആഗസ്റ്റ് 28ന് പുലര്‍ച്ചെ അപഹരിക്കുകയായിരുന്നു. തിരുവല്ല, കൊല്ലം അഞ്ചാലുംമൂട്, ആലപ്പുഴ മാന്നാര്‍ പോലീസ് സ്റ്റേഷനുകളിലെ മോഷണക്കേസുകളിലും ഇയാള്‍ പ്രതിയാണെന്ന് പോലീസ് പറഞ്ഞു. പോലീസ് ഇന്‍സ്പെക്ടര്‍ പി. എം. ലിബിയുടെ നേതൃത്വത്തില്‍ എസ് ഐ ആര്‍. രാജീവ്, സിപിഒ മാരായ അനന്തു, അരവിന്ദ്, രെജു എന്നിവരടങ്ങിയ പോലീസ് സംഘമാണ് ജോൺസൺ വർഗീസിനെ കസ്റ്റഡിയിലെടുത്തത്.

മധ്യവയസ്കനെ മർദിച്ച കേസിൽ മൂന്നു പേർ അറസ്റ്റിൽ

പന്തളം: മധ്യവയസ്കനെ ഹെൽമെറ്റ് കൊണ്ട് തലയ്ക്കടിച്ചും മറ്റും പരിക്കേല്പിച്ച സംഭവത്തിൽ മൂന്നുപേരെ പന്തളം പോലീസ് പിടികൂടി. നിരവധി ക്രിമിനൽ കേസുകളിൽ പ്രതികളായ പന്തളം മങ്ങാരം മുത്തുണിയിൽ ദിൽഷാ മൻസിലിൽ ദിൽക്കു ദിലീപ് (25), ഏനാത്ത് മണ്ടച്ചൻപാറ പറവിള പുത്തൻവീട്ടിൽ ജെബിൻ തോമസ് (28), പന്തളം മങ്ങാരം കുരീക്കാവിൽ അജിൽ കൃഷ്ണൻ (28) എന്നിവരാണ് അറസ്റ്റിലായത്. പന്തളം കടയ്ക്കാട് വലിയവിള കിഴക്കേതിൽ അബ്ദുൽ റഹ്മാനാണ് മർദ്ദനമേറ്റത്. 13ന് രാത്രി 9.30ഓടെ പന്തളം കെഎസ്ആർടിസി സ്റ്റാൻഡിനു സമീപം വച്ചുണ്ടായ വാക്കുതർക്കത്തേത്തുടർന്ന് സ്കൂട്ടറിൽ വന്ന സംഘം അബ്ദുൽ റഹ്മാൻ സഞ്ചരിച്ചിരുന്ന ബൈക്ക് തടഞ്ഞുനിർത്തി ഹെൽമെറ്റ് കൊണ്ട് അടിക്കുകയും ചവിട്ടുകയും മറ്റും ചെയ്യുകയായിരുന്നു. അബ്ദുൽ റഹ്മാന്‍റെ പരാതിയിൽ, എസ്ഐ അനീഷ് ഏബ്രഹാം കേസ് രജിസ്റ്റർ ചെയ്ത് അന്വേഷണം ആരംഭിച്ചു. പോലീസ് ഇൻസ്‌പെക്ടർ ടി. ഡി. പ്രജീഷിന്‍റെ നേതൃത്വത്തിലുള്ള അന്വേഷണസംഘം‌ പന്തളം പ്രദേശത്തെ സ്ഥിരം പ്രശ്നകാരികളായ പ്രതികളെ മണിക്കൂറുകൾക്കകം കണ്ടെത്തി പിടികൂടിയത്.കോടതിയിൽ ഹാജരാക്കി.

കോന്നി മെഡിക്കല്‍ കോളജില്‍ ആദ്യ കൺമണി പിറന്നു

കോന്നി: കോന്നി ഗവ. മെഡിക്കല്‍ കോളജ് ആശുപത്രിയിലെ ലേബര്‍ റൂമില്‍ ഇന്നലെ ചരിത്രം പിറവിയെടുത്തു. ആശുപത്രി പ്രവര്‍ത്തനം ആരംഭിച്ചതിനു ശേഷമുള്ള ആദ്യ കുഞ്ഞാണ് ഇന്നലെ ജനിച്ചത്. പത്തനംതിട്ട സ്വദേശികളായ സിന്ദൂരി - വിഷ്ണു ദമ്പതികള്‍ക്കാണ് പെണ്‍കുഞ്ഞ് ജനിച്ചത്. സിസേറിയനിലൂടെയാണ് പ്രസവം നടന്നത്. അമ്മയും കുഞ്ഞും സുഖമായി ഇരിക്കുന്നുവെന്ന് ഡോക്ടര്‍മാര്‍ അറിയിച്ചു. 2020ൽ മെഡിക്കൽ കോളജ് ഉദ്ഘാടനം ചെയ്തുവെങ്കിലും ലേബർ റൂമും ശസ്ത്രക്രിയ സംവിധാനങ്ങളും പ്രവർത്തനക്ഷമമായത് കഴിഞ്ഞ മാസമാണ്. പത്തനംതിട്ട ജനറൽ ആശുപത്രി കെട്ടിടം നവീകരണത്തിനായി അടച്ചപ്പോൾ അവിടെ പ്രവർത്തിച്ചിരുന്ന ഗൈനക്കോളജി വിഭാഗം മെഡിക്കൽ കോളജിലേക്ക് മാറ്റേണ്ടിവന്നതോടെയാണ് നടപടികൾ വേഗത്തിലായത്. മെഡിക്കൽ കോളജിൽ ആധുനിക സംവിധാനങ്ങളോടെ ലേബർ ബ്ലോക്ക് നിർമിച്ചിരുന്നുവെങ്കിലും സാങ്കേതിക പ്രശ്നങ്ങളും ഡോക്ടർമാരുടെ അഭാവവും കാരണം ഗർഭിണികൾക്ക് പ്രയോജനപ്പെടുത്താനായിരുന്നില്ല. 3.5 കോടി രൂപ ചെലവില്‍ നിർമിച്ച ലേബർ ബ്ലോക്കില്‍ അള്‍ട്രാസൗണ്ട്, മോഡുലാര്‍ ഓപ്പറേഷന്‍ തിയറ്ററുകൾ, എല്‍ഡിആര്‍ സ്യൂട്ടുകള്‍, ഐസിയു, ഐസൊലേഷന്‍ യൂണിറ്റുകള്‍ തുടങ്ങി എല്ലാ സൗകര്യങ്ങളും ലഭ്യമാണ്. ആരോഗ്യമന്ത്രി വീണാ ജോർജ് മാതാപിതാക്കളെയും കുഞ്ഞിനെയും ജീവനക്കാരെയും ആശംസകൾ അറിയിച്ചു. ആദ്യ കുഞ്ഞിന്‍റെ വരവ് ജീവനക്കാരും ഡോക്ടർമാരും ചേർന്ന് ആഘോഷമാക്കി മാറ്റുകയും ചെയ്തു.

ഓടിക്കൊണ്ടിരുന്ന ബസിനു മുകളിലേക്ക് വൈദ്യുതിത്തൂൺ കടപുഴകി

പത്തനംതിട്ട: അഴൂർ പാറക്കടവ് പാലത്തിനു സമീപം റോഡരികിൽ നിന്നിരുന്ന വൈദ്യുതതൂൺ ഓടിക്കൊണ്ടിരുന്ന സ്വകാര്യബസിനു മുകളിലേക്ക് കടപുഴകി. അപകടം ഒഴിവായത് തലനാരിഴയ്ക്ക് ഇന്നലെ രാവിലെ 11.30 ഓടെയാണ് സംഭവം. കോന്നിയിൽ നിന്നും പ്രമാടം വഴി പത്തനംതിട്ടയിലെക്ക് വരികയായിരുന്ന മുരഹര ബസിനു മുകളിലേക്കാണ് വൈദ്യുത തൂ‌ണ് ണത്. വാഹനത്തിൽ ഉണ്ടായിരുന്ന യാത്രക്കാർ ഭയന്നു പുറത്തേക്ക് ഇറങ്ങാതിരുന്നതും വലിയ അപകടം ഒഴിവാക്കി. ആരെങ്കിലും പുറത്തേക്ക് ഇറങ്ങിയിരുന്നുവെങ്കിൽ എർത്തിംഗ് സംഭവിക്കുകയും വാഹനത്തിൽ ഉണ്ടായിരുന്ന ആളുകൾക്ക് വൈദ്യുതാഘാതം ഏൽക്കുന്നതിന് കാരണമാവുകയും ചെയ്യുമായിരുന്നു. തൂണ് കടപുഴകിയെങ്കിലും വൈദ്യുതി ബന്ധം വിച്ഛേദിക്കപ്പെട്ടിരുന്നില്ല. ഫയർഫോഴ്സ് സംഘം ഉടൻ സ്ഥലത്തെത്തിയെങ്കിലും ലൈനിൽ വൈദ്യുതി നിലയ്ക്കാത്തതിനാൽ രക്ഷാപ്രവർത്തനവും വൈകി. കെഎസ്ഇബി ജീവനക്കാർ എത്തി വൈദ്യുതി വിച്ഛേദിച്ചശേഷമാണ് ബസ് മുന്നോട്ടെടുത്തത്. റോഡരികിൽ അപകടാവസ്ഥയിൽ നിന്ന തൂണാണ് മറിഞ്ഞുവീണതെന്ന് പറയുന്നു.

ഭക്ഷ്യസ്ഥാപനങ്ങളില്‍നിന്ന് പിഴ ഈടാക്കിയത് 4.27 ലക്ഷം

പത്തനംതിട്ട: ലൈസന്‍സില്ലാതെ പ്രവര്‍ത്തിച്ച ജില്ലയിലെ ഭക്ഷ്യസ്ഥാപനങ്ങളില്‍നിന്നു കഴിഞ്ഞ ഒമ്പതു മാസത്തിനിടെ പിഴയായി ഈടാക്കിയത് 4,27,700 രൂപ. ഭക്ഷ്യസുരക്ഷാവകുപ്പ് ജില്ലയുടെ വിവിധ ഭാഗങ്ങളില്‍ നടത്തിയ പരിശോധനകളില്‍ വീഴ്ച കണ്ടെത്തിയവര്‍ക്കെതിരേയാണ് നടപടി. അനധികൃതമായി ഭക്ഷണ പദാര്‍ഥങ്ങള്‍ നിര്‍മിക്കുന്നവരില്‍നിന്നു വിതരണം ചെയ്യുന്നവരില്‍നിന്നുമാണ് കഴിഞ്ഞ ജനുവരി ഒന്നുമുതല്‍ കഴിഞ്ഞ ഒമ്പതുവരെ ഈടാക്കിയ തുകയാണിത്. ഭക്ഷ്യസുരക്ഷാ ഗുണനിലവാര നിയമം 2006 പ്രകാരം ലൈസന്‍സോ രജിസ്‌ട്രേഷനോ ഇല്ലാതെ ഭക്ഷ്യസ്ഥാപനങ്ങള്‍ പ്രവര്‍ത്തിക്കാന്‍ പാടില്ല. ഇത്തരം സ്ഥാപനങ്ങള്‍ കണ്ടെത്താന്‍ വ്യാപക പരിശോധനകളാണ് ഭക്ഷ്യസുരക്ഷാ വകുപ്പ് നടത്തിവരുന്നത്. പിടിക്കപ്പെട്ടാല്‍ പിഴ ഈടാക്കുകയും സ്ഥാപനം പൂട്ടിക്കുകയും ചെയ്യും. ഇക്കാലയളവില്‍ സംസ്ഥാനത്ത് ഏറ്റവും കൂടുതല്‍ പിഴ ഈടാക്കിയത് എറണാകുളം ജില്ലയിലാണ്. തിരുവനന്തപുരം, മലപ്പുറം, കോഴിക്കോട്, കോട്ടയം, തൃശൂര്‍ ജില്ലകളാണ് തൊട്ടുപിന്നിലുള്ളത്. വീട്ടില്‍ ഊണുകാരും കുടുങ്ങും ജില്ലയില്‍ തട്ടുകടകള്‍ അടക്കമുള്ളവയാണ് കൂടുതലായി ലൈസന്‍സില്ലാതെ പ്രവര്‍ത്തിക്കുന്നത്. സമീപകാലത്തായി ആരംഭിച്ചിട്ടുള്ള വീട്ടില്‍ ഊണ് ഭക്ഷണ ശാലകളും പരിശോധനയുടെ പരിധിയിലുണ്ട്. ഏതുതരം ഭക്ഷണം തയാറാക്കി വില്പന നടത്തിയാലും ലൈസന്‍സ് നിര്‍ബന്ധമാണ്. ചെറുകിട ഹോട്ടലുകൾ, ബേക്കറികള്‍ അടക്കം ലൈസന്‍സ് പുതുക്കാത്തവരും ഏറെയാണ്. ദേശീയപാതയുള്‍പ്പെടെ എല്ലാ പ്രധാന റോഡുകളിലും അനധികൃത ഭക്ഷണ വില്‍പനകേന്ദ്രങ്ങള്‍ പ്രവര്‍ത്തിക്കുന്നുണ്ട്. ഭക്ഷണം പാകംചെയ്ത് വാഹനങ്ങളില്‍കൊണ്ടുവന്നു നിശ്ചിതകേന്ദ്രങ്ങളില്‍ പാര്‍ക്ക് ചെയ്തു വില്‍പന നടത്തുന്നവരുടെ എണ്ണവും ഏറിയിട്ടുണ്ട്. വൈകുന്നേരങ്ങളില്‍ ചായയും ലഘുഭക്ഷണവുമായി വഴിയോരങ്ങളില്‍ വില്പന നടത്തുന്നവരുമുണ്ട്. ജീവനോപാധി എന്ന നിലയിലാകും ഇവരുടെ പ്രവര്‍ത്തനമെങ്കിലും നിയമപരമായി അംഗീകരിക്കാനാകില്ലെന്ന് ഭക്ഷ്യസുരക്ഷ വകുപ്പ് വ്യക്തമാക്കി. ഭക്ഷണം വില്‍ക്കാനുള്ള നിയമപരമായ അംഗീകാരമില്ലാത്തവരെ പിടികൂടി പിഴ ഈടാക്കുകയാണ് ചെയ്തുവരുന്നത്. വഴിയോരങ്ങളിലും വീടുകളിലും തയാറാക്കി നല്‍കുന്ന ഭക്ഷണത്തിന് ബില്ലോ മറ്റ് നിയമപരമായ രേഖകളോ ഉണ്ടാകില്ല. ഇത്തരത്തില്‍ വാങ്ങുന്ന ഭക്ഷണം നിമിത്തം ആരോഗ്യപ്രശ്നങ്ങളുണ്ടായാല്‍ പരാതിപ്പെടാനും പ്രയാസമാകുമെന്നു ചൂണ്ടിക്കാണിക്കപ്പെടുന്നു. ഹോട്ടലുകളിലും മറ്റും വില്‍ക്കുന്ന വിലയില്‍ താഴ്ത്തിയാണ് വഴിയോരങ്ങളിലെ വില്പന. വീടുകളിലും മറ്റും തയാറാക്കി നല്കുന്ന ഇത്തരം ഭക്ഷണത്തിനു ഗുണനിലവാരവും മെച്ചമായിരിക്കുമെങ്കിലും ലൈസന്‍സ് ലഭിക്കാന്‍ ബുദ്ധിമുട്ടുണ്ട്. ശുചിത്വത്തിനും മാര്‍ക്ക് ഇതിനുപുറമേ, കഴിഞ്ഞ നാലു മാസത്തിനിടെ ജില്ലയില്‍ നടത്തിയ പരിശോധനകളില്‍ മറ്റു 14 കേസുകളും ഭക്ഷ്യ സുരക്ഷാവകുപ്പ് രജിസ്റ്റര്‍ ചെയ്തിട്ടുണ്ട്. ശുചിത്വത്തില്‍ വീഴ്ച വരുത്തിയ ഹോട്ടലുകള്‍ അടക്കമുള്ളവയ്‌ക്കെതിരേയാണ് കേസ്. ഭക്ഷണശാലകളിലെ ശുചിത്വത്തെ സംബന്ധിച്ചു കര്‍ശന നിര്‍ദേശങ്ങളാണ് നല്‍കിയിട്ടുള്ളത്. കൂടാതെ ജീവനക്കാര്‍ക്കു ഹെല്‍ത്ത് കാര്‍ഡും നിര്‍ബന്ധം. പാചകത്തിനുപയോഗിക്കുന്ന സാധനങ്ങളുടെ ഗുണമേന്മയിലും വിട്ടുവീഴ്ച പാടില്ലെന്ന നിര്‍ദേശമാണ് പരിശോധനയ്‌ക്കെത്തുന്നവര്‍ക്കുള്ളത്. സംശയം തോന്നുന്ന ഭക്ഷോത്പന്നങ്ങള്‍ ലാബുകളിലെത്തിച്ചു പരിശോധന നടത്തും. വെളിച്ചെണ്ണ വില ക്രമാതീതമായി വര്‍ധിച്ചതോടെ മായം ചേര്‍ക്കലും വ്യാജന്‍മാരും വ്യാപകമാണെന്ന പരാതികളെത്തുടര്‍ന്ന് ഇതുമായി ബന്ധപ്പെട്ട പരിശോധനകളും കര്‍ശനമാക്കിയിട്ടുണ്ട്. ജില്ലയിലെ അമ്പതിടങ്ങളില്‍ ഇക്കാലയളവില്‍ വെളിച്ചെണ്ണ പരിശോധിച്ചെങ്കിലും കാര്യമായ തോതില്‍ വ്യാജ വെളിച്ചെണ്ണ കണ്ടെടുക്കാനായിട്ടില്ല.

അഗ്നിരക്ഷാ വകുപ്പ് ജീവനക്കാർക്ക് റോപ് റെസ്ക്യൂ പരിശീലനം

പത്തനംതിട്ട: ജില്ലയിലെ അഗ്നിരക്ഷാ സേന പത്തനംതിട്ട, അടൂർ, കോന്നി നിലയങ്ങളിൽ നിന്നു തെരഞ്ഞെ‌ടുക്കപ്പെട്ട 14 ജീവനക്കാരെ ഉൾപ്പെടുത്തി റോപ് റെസ്ക്യൂ പരിശീലനം അഗ്നിരക്ഷാവകുപ്പ് ജില്ലാ പരിശീലന കേന്ദ്രത്തിൽ ആരംഭിച്ചു. കോന്നി ചെങ്കളത്ത് ക്വാറിയിൽ ദുരന്തം ഉണ്ടായപ്പോൾ ഫയർഫോഴ്സിന്‍റെ സ്പെഷൽ ടാസ്ക് ഫോഴ്സ് എത്തിയാണ് രക്ഷാപ്രവർത്തനം വേഗത്തിലാക്കിയത്. ഈ പശ്ചാത്തലത്തിൽ ഇത്തരത്തിൽ ഒരു ദുരന്തം ഉണ്ടായാൽ കൈകാര്യം ചെയ്യുന്നതിന് ജില്ലയിൽ തന്നെ പൂർണസജ്ജമായ ഒരു ടീം ഉണ്ടാകണം എന്ന ലക്ഷ്യത്തോടെയാണ് ജില്ലയിലെ വിവിധ നിലയങ്ങളിൽ നിന്നും ജീവനക്കാരെ ഉൾപ്പെടുത്തി പരിശീലനം നൽകുന്നതെന്ന് ജില്ലാ ഓഫീസർ വിശി വിശ്വനാഥ് അറിയിച്ചു. കുറഞ്ഞത് 50 പേരടങ്ങുന്ന ടീമിനെ പരിശീലനം നൽകി സജ്ജരാക്കുകയാണ് ലക്ഷ്യമെന്നും ജില്ലാ ഫയർ ഓഫീസർ അറിയിച്ചു. പത്തനംതിട്ട സ്റ്റേഷൻ ഓഫീസർ വി. വിനോദ് കുമാറിനാണ് പരിശീലനച്ചുമതല. കോന്നി സ്റ്റേഷൻ ഓഫീസർ എസ്.കെ. സന്ദീപിന്‍റെ നേതൃത്വത്തിൽ ഫയർ ആൻഡ് റെസ്ക്യൂ ഓഫീസർമാരായ അഖിൽ, രമാകാന്ത് എന്നിവരാണ് ക്ലാസുകൾക്ക് നേതൃത്വം നൽകുന്നത്. രണ്ട് വനിതകളടക്കം പരിശീലന പരിപാടിയിൽ പങ്കെടുക്കുന്നുണ്ട്.

ഡിസിസി നേതൃസമ്മേളനം നാളെ

പത്തനംതിട്ട: ജില്ലാ കോൺഗ്രസ് കമ്മിറ്റി നേതൃസമ്മേളനം നാളെ ഉച്ചകഴിഞ്ഞ് 3.30ന് പത്തനംതിട്ട രാജീവ് ഭവൻ ഓഡിറ്റോറിയത്തിൽ ചേരും. കെപിസിസി പ്രസിഡന്‍റ് സണ്ണി ജോസഫ് എംഎൽഎ ഉദ്ഘാടനം ചെയ്യും. ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പിൽ അധ്യക്ഷത വഹിക്കും. കെപിസിസി രാഷ്‌ട്രീയകാര്യ സമിതി അംഗങ്ങൾ, ഭാരവാഹികൾ എന്നിവർ പ്രസംഗിക്കും. തദ്ദേശ സ്ഥാപന തെരഞ്ഞെടുപ്പ് മുന്നൊരുക്കങ്ങൾ, വാർഡ് കോൺഗ്രസ് കമ്മിറ്റികളുടെ നേതൃത്വത്തിൽ നടന്നുകൊണ്ടിരിക്കുന്ന ഗൃഹസമ്പർക്ക പരിപാടിയുടെ പുരോഗതി ഭാവി സംഘടനാ കാര്യങ്ങൾ എന്നിവയെക്കുറിച്ച് ചർച്ച ചെയ്യുന്നതിനായി ചേരുന്ന നേതൃസമ്മേളനത്തിൽ കോൺഗ്രസിന്‍റെ ജില്ലയിലെ മുതിർന്ന നേതാക്കൾ, കെപിസിസി അംഗങ്ങൾ, ഡിസിസി ഭാരവാഹികൾ, നിർവാഹക സമിതി അംഗങ്ങൾ, ബ്ലോക്ക്, മണ്ഡലം പ്രസിഡന്‍റുമാർ, പോഷക സംഘടനകളുടേയും സെല്ലുകളുടേയും സംസ്ഥാന ഭാരവാഹികൾ, ജില്ലാ പ്രസിഡന്‍റുമാർ, ത്രിതല പഞ്ചായത്ത്, മുനിസിപ്പൽ അധ്യക്ഷർ, പാർലമെന്‍ററിപാർട്ടി നേതാക്കൾ, സഹകരണസംഘം പ്രസിഡന്‍റുമാർ എന്നിവർ പങ്കെടുക്കുമെന്ന് ജനറൽ സെക്രട്ടറി സാമുവേൽ കിഴക്കുപുറം അറിയിച്ചു.

കരിങ്ങണംപള്ളി റോഡ് ഉദ്ഘാടനം ചെയ്തു

മല്ലപ്പള്ളി: തേലമൺ -പുല്ലു കുത്തി റോഡിനോടു ചേർന്ന മൂന്നാംവാർഡിലെ കരിങ്ങണംപള്ളി റോഡിന് ശാപമോക്ഷം. താറുമാറായി കിടന്നിരുന്ന റോഡ് എംപിയുടെ പ്രാദേശിക വികസനഫണ്ടിൽ നിന്നും കോൺക്രീറ്റ് ചെയ്ത് ഗതാഗതയോഗ്യമാക്കി. റോഡിന്‍റെ ഉദ്ഘാടനം ആന്‍റോ ആന്‍റണി എംപി നിർവഹിച്ചു. ഗ്രാമപഞ്ചായത്ത് പ്രസിഡന്‍റ് എസ്. വിദ്യാമോൾ അധ്യക്ഷത വഹിച്ചു. കുഞ്ഞുകോശി പോൾ, ആനിക്കാട് ഗ്രാമ പഞ്ചായത്ത് പ്രസിഡന്‍റ് സൂസൻ ദാനിയേൽ, കല്ലൂപ്പാറ ഗ്രാമപഞ്ചായത്ത് വൈസ് പ്രസിഡന്‍റ് എബി മേക്കരിങ്ങാട്ട്, ബ്ലോക്ക് പഞ്ചായത്തംഗങ്ങളായ സിന്ധു സുഭാഷ്, ലൈല അലക്സാണ്ടർ, ഗ്രാമപഞ്ചായത്തംഗങ്ങളായ തോമസ് മാത്യു, റജി പണിക്കുറി, പ്രകാശ് വടക്കേമുറി, മോളിക്കുട്ടി സിബി, കേരള കോൺഗ്രസ് ഉന്നതാധികാര സമിതി അംഗം ജോൺസൺ കുര്യൻ, കോശി. പി. സഖറിയ, അഖിൽ ഓമനക്കുട്ടൻ, കോൺഗ്രസ് മണ്ഡലം പ്രസിഡന്‍റ് എം.കെ. സുഭാഷ്കുമാർ, ടി. എസ്. ചന്ദ്രശേഖരൻ നായർ, കെ.ജി. സാബു, വി.തോമസ് മാത്യു , അനിൽ കയ്യാലത്ത്, രാജൻ എണാട്ട്, ബാബു കുര്യൻ, ബിജു പണിക്കമുറി, കെ.പി. സെൽവകുമാർ, തോമസ് കൊല്ലറക്കുഴി എന്നിവർ പ്രസംഗിച്ചു.

കവിയൂരിൽ മുൻ പ്രസിഡന്‍റിന്‍റെ പേര് വോട്ടർപട്ടികയിൽ ഇല്ല

പത്തനംതിട്ട: കവിയൂർ ഗ്രാമപഞ്ചായത്ത് മുൻ പ്രസിഡന്‍റ് ടി. കെ. സജീവിന്‍റെ പേര് വോട്ടർ പട്ടികയിൽ നിന്നും വെട്ടിമാറ്റിയതായി പരാതി. കവിയൂർ പഞ്ചായത്തിൽ എട്ടാം വാർഡിലാണ് നിലവിൽ വോട്ടർപട്ടികയിൽ പേരുണ്ടായിരുന്നത്. സജീവ് പത്താം വാർഡിൽ നിന്നുള്ള ഗ്രാമപഞ്ചായത്ത് അംഗമാണ്. പത്താം വാർഡിൽ താമസിക്കുന്നുവെന്നും അതിനാൽ എട്ടാം വാർഡിൽ വോട്ടവകാശം നിഷേധിക്കാൻ അധികാരമുണ്ടെന്നുള്ള പഞ്ചായത്ത് സെക്രട്ടറിയുടെ നിലപാട് വസ്തുതാവിരുദ്ധവും നിഷേധാത്മകവുമാണെന്ന് സജീവ് പത്രസമ്മേളനത്തിൽപറഞ്ഞു. ഇതു സംബന്ധിച്ച അപ്പീൽ ഹർജിയും നൽകിയിട്ടുണ്ട്. 2025 ലെ തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിനുള്ള വോട്ടർ പട്ടികയിൽ പേരു ചേർക്കലിനും തിരുത്തലിനും ഒഴിവാക്കലിനുമായുള്ള അവസരത്തിൽ നിലവിലുള്ള വോട്ടർ പട്ടികയിൽനിന്നും രജിസ്ട്രേഷൻ ഓഫീസർ ആയ ഗ്രാമ പഞ്ചായത്ത് സെക്രട്ടറി ടി.കെ. സജീവിനെ ഒഴിവാക്കി ഉത്തരവിട്ടു. നടപടികൾ റദ്ദാക്കണമെന്നാവശ്യപ്പെട്ടു സജീവ് നൽകിയ അപ്പീൽ പരിഗണിച്ച തദ്ദേശ സ്വയംഭരണ വകുപ്പ് പത്തനംതിട്ട ജോയിന്‍റ് ഡയറക്ടർ പഞ്ചായത്ത് സെക്രട്ടറിയോടും വിശദീകരണം ആവശ്യപ്പെട്ടിരുന്നു. സജീവിന്‍റെ പരാതിയിൽ തെളിവെടുപ്പ് നടത്തിയ ജോയിന്‍റ് ഡയറക്ടറുടെ ഉത്തരവ് വന്നിട്ടില്ല. 2000 മുതൽ 2020 വരെ നടന്ന വിവിധ തലങ്ങളിൽ പഞ്ചായത്തുകളിലേക്കുള്ള എല്ലാ തെരഞ്ഞെടുപ്പിലും മത്സരിക്കുകയും നിലവിൽ കവിയൂർ പഞ്ചായത്ത് സ്വതന്ത്രഅംഗമായി തന്നെ തുടരുമ്പോഴാണ് വോട്ടർ പട്ടികയിൽ നിന്നും തന്‍റെ പേരു വെട്ടി മാറ്റിയതെന്ന് സജീവ് പത്രസമ്മേളനത്തിൽ പറഞ്ഞു. പഞ്ചായത്തിന്‍റെ വിവിധ പദ്ധതികളുടെ നടത്തിപ്പിൽ സർക്കാർ മാനദണ്ഡം പാലിക്കാതെയും പഞ്ചായത്ത് വക സ്വത്തുക്കൾ നഷ്ടം വരുത്തിയും കൃത്യമായി ഗ്രാമസഭകൾ വിളിച്ചു ചേർക്കാതെയും മറ്റും കൃത്യനിർവഹണത്തിൽ വീഴ്ചകൾ വരുത്തിയതിനെതിരേ നിയമപരമായ പോരാട്ടം നടത്തുന്നതിൽ അസ്വസ്ഥതയുള്ള ബിജെപി ഭരണസമിതിയെ തൃപ്തിപ്പെടുത്തുന്നതിനു വേണ്ടി സെക്രട്ടറി പ്രവർത്തിച്ചുവെന്നും അദ്ദേഹം കുറ്റപ്പെടുത്തി. ഒരു ബിജെപി പ്രവർത്തകനാണ് പരാതി നൽകിയത്. കരട് വോട്ടർ പട്ടികയിൽ തന്‍റെ പേരുണ്ടായിരുന്നു. പരാതിയുടെ അടിസ്ഥാനത്തിൽ തന്നെ കഴിഞ്ഞ ഓഗസ്റ്റ് 23ന് ഹിയറിംഗിനു വിളിപ്പിച്ചിരുന്നു. വർഷങ്ങളായി തന്‍റെ കുടുംബവീട് സ്ഥിതി ചെയ്യുന്ന എട്ടാം വാർഡിലെ വോട്ടറാണ് താൻ. കുടുംബാംഗങ്ങൾ പത്താംവാർഡിലാണ് ഉൾപ്പെടുന്നതെങ്കിലും തന്‍റെ വോട്ടവകാശം സ്വന്തം വാർഡിലെ പട്ടികയിൽ തുടരുകയായിരുന്നെന്ന് സജീവ് പറഞ്ഞു. രാഷ്‌ട്രീയലക്ഷ്യങ്ങളോടെ തന്‍റെ വോട്ടവകാശം ഇല്ലാതാക്കാൻ മുന്പും ശ്രമങ്ങളുണ്ടായിട്ടുണ്ട്. ഇത്തവണ നോട്ടീസ് നൽകാതെയാണ് അന്തിമപട്ടികയിൽ പേര് ഒഴിവാക്കിയത്. ഇതിനെതിരേ പഞ്ചായത്ത് ജോയിന്‍റ് ഡ‍യറക്ടർക്ക് അപ്പീൽ നൽകി. വിശദമായ അന്വേഷണം നടത്തി വിധി വരുന്നതു കാത്തിരിക്കുകയാണ്. പേര് ഒഴിവാക്കുകയാണെങ്കിൽ കോടതിയെ സമീപിക്കുമെന്നും സജീവ് പറഞ്ഞു. വാർഡ് അംഗം എന്ന നിലയിൽ തുടരുമ്പോഴാണ് വോട്ടർ പട്ടികയിൽ നിന്നും തെരഞ്ഞെടുപ്പ് കമ്മീഷൻ നൽകിയിട്ടുള്ള മാർഗനിർദ്ദേശങ്ങൾ ഇആർഒ കൂടിയായ സെക്രട്ടറി ലംഘിച്ചത്. അഴിമതിയെ എതിർക്കുമ്പോൾ നേരിട്ട് മറുപടി പറയാതെ കുതന്ത്രങ്ങൾ പയറ്റുന്ന പഞ്ചായത്ത് പ്രസിഡന്‍റിന്‍റെയും സെക്രട്ടറിയുടെയും നടപടികൾക്കെതിരേ നിയമ പോരാട്ടം തുടരുമെന്ന് ടി. കെ. സജീവ് പറഞ്ഞു. കോൺഗ്രസ് തിരുവല്ല ബ്ലോക്ക് പ്രസിഡന്‍റും ഡിസിസി ജനറൽ സെക്രട്ടറിയുമായിരുന്ന ടി. കെ. സജീവ് 2000 -2005 ലും 2010 -2015 കാലഘട്ടത്തിലുമായി പത്തു വർഷം കവിയൂർ പഞ്ചായത്ത് പ്രസിഡന്‍റായും 2010-15 കാലഘട്ടത്തിൽ മല്ലപ്പള്ളി ബ്ലോക്ക് പഞ്ചായത്തഗമായും പ്രവർത്തിച്ചിരുന്നു. കവിയൂർ ഗ്രാമപഞ്ചായത്തു പ്രസിഡന്‍റ് ആയിരുന്ന കലത്ത് 2013 -14 ൽ സംസ്ഥാന സർക്കാരിന്‍റെ മികച്ച പഞ്ചായത്തിനുള്ള സ്വരാജ് ട്രോഫിയും 2014-15-ൽ കേന്ദ്ര സർക്കാരിന്‍റെ ഭാരതത്തിലെ മികച്ച പഞ്ചായത്തിൽ പഞ്ചായത്ത് ശക്തീകരൺ പുരസ്കാരവും കവിയൂർ പഞ്ചായത്ത് നേടിയിരുന്നു. 2015 ലെ ജില്ലാ പഞ്ചായത്ത് തെരഞ്ഞെടുപ്പിൽ കോൺഗ്രസ് സ്ഥാനാർഥി ആയി മത്സരിച്ചപ്പോൾ മല്ലപ്പള്ളി ബ്ലോക്കിൽ പാർട്ടി വിരുദ്ധ പ്രവർത്തനം നടത്തിയവരെ നേതൃത്വം സംരക്ഷിക്കുന്നു എന്നാരോപിച്ചിരുന്നു. കഴിഞ്ഞ തദ്ദേശ തെരഞ്ഞെടുപ്പിൽ സ്വതന്ത്രനായി മത്സരിച്ചാണ് ടി. കെ. സജീവ് പഞ്ചായത്ത് അംഗമായത്. എന്നാൽ‌ സ്ഥലപരിശോധന നടത്തി കൃത്യമായ തെളിവുകളുടെയും ബോധ്യങ്ങളുടെയും അടിസ്ഥാനത്തിലാണ് സജീവിന്‍റെ പേര് പട്ടികയിൽ നിന്നൊഴിവാക്കിയതെന്ന് ഗ്രാമപഞ്ചായത്ത് സെക്രട്ടറി പറഞ്ഞു.

എസ്എൻഡിപി യോഗം യൂണിയൻ തലത്തിൽ നേതൃസംഗമങ്ങൾ‌

പത്തനംതിട്ട: എസ്എൻഡിപി യോഗത്തിന്‍റെ പ്രവർത്തനങ്ങൾ കാലോചിതമായി മാറ്റങ്ങൾ ഉൾക്കൊണ്ട് കൂടുതൽ ശക്തമാക്കുന്നതിനും കുടുംബയൂണിറ്റ് മുതൽ സംഘടനയ്ക്കു കൂടുതൽ കരുത്തേകുവാനും എസ്എൻഡിപി യൂണിയൻ തലങ്ങളിൽ ശാഖാ നേതൃസംഗമങ്ങൾ നടത്തും. സംഘടനാ പ്രവർത്തനങ്ങളും പ്രാദേശികമായ വിഷയങ്ങളും യോഗത്തിൽ ചർച്ച ചെയ്യുമെന്ന് യൂണിയൻ ഭാരവാഹികൾ പത്രസമ്മേളനത്തിൽ പറഞ്ഞു. യോഗം ജനറൽ സെക്രട്ടറി വെള്ളാപ്പള്ളി നടേശൻ, വൈസ് പ്രസിഡന്‍റ് തുഷാർ വെള്ളാപ്പള്ളി, ദേവസ്വം സെക്രട്ടറി അരയക്കണ്ടി സന്തോഷ് തുടങ്ങിയവർ യോഗങ്ങളിൽ പങ്കെടുക്കും. അടൂർ യൂണിയനു കീഴിലുള്ള 66 ശാഖായോഗങ്ങളുടേയും ശാഖാ കുടുംബയോഗങ്ങളുടേയും മൈക്രോ യൂണി റ്റുകളുടേയും വിവിധ പോഷകസംഘടനകളുടേയും ഭാരവാഹികൾ, കമ്മിറ്റിയംഗങ്ങൾ എന്നിവരുൾപ്പെടെയുള്ളവർ പങ്കെടുക്കുന്ന അടൂർ യൂണിയൻ ശാഖാനേതൃത്വസംഗമം നാളെ ഉച്ചകഴിഞ്ഞ് രണ്ടിന് അടൂർ ഗീതം കൺവൻഷൻ സെന്‍ററിൽ നടക്കുമെന്ന് ഭാരവാഹികൾ പത്രസമ്മേളനത്തിൽ പറഞ്ഞു. അടൂർ യൂണിയൻ കൺവീനർ മണ്ണടി മോഹൻ, ചെയർമാൻ എം. മനോജ് കുമാർ എന്നിവർ പത്രസമ്മേളനത്തിൽ പരിപാടികൾ വിശദീകരിച്ചു. റാന്നിയിൽ പത്തനംതിട്ട: റാന്നി എസ്എൻഡിപി യൂണിയൻ ശാഖാനേതൃത്വ സംഗമം 19 നു രാവിലെ ഒന്പതിന് റാന്നി വളയനാട് ഓഡിറ്റോറിയത്തിൽ നടക്കുമെന്ന് ഭാരവാഹികൾ പറഞ്ഞു . 1250 പേർ നേതൃസംഗമത്തിൽ പങ്കെടുക്കും. അഡ്മിനിസ്ട്രേറ്റർ മണ്ണടി മോഹൻ , ശാഖാ പ്രസിഡന്‍റുമാരായ വാസുദേവൻ വയറൻമരുതി, സുകുലാൽ എന്നിവർ പത്രസമ്മേളനത്തിൽ പരിപാടികൾ വിശദീകരിച്ചു. കുന്പനാട്ട് പത്തനംതിട്ട: തിരുവല്ല , കോഴഞ്ചേരി യൂണിയനുകളുടെ നേതൃത്വത്തിൽ നാളെ രാവിലെ ഒന്പതിന് കുമ്പനാട് ലോയൽ കൺവൻഷൻ സെന്‍ററിൽ ശാഖാ നേതൃത്വ സംഗമം നടക്കുമെന്ന് ഭാരവാഹികൾ പത്രസമ്മേളനത്തിൽ പറഞ്ഞു. 2500 പ്രതിനിധികൾ പങ്കെടുക്കും. കോഴഞ്ചേരി യൂണിയൻ പ്രസിഡന്‍റ് മോഹൻ ബാബു, സന്തോഷ് ശാന്തി, എന്നിവർ പങ്കെടുത്തു. പത്തനംതിട്ടയിൽ പത്തനംതിട്ട: എസ്എൻഡിപി യോഗം പത്തനംതിട്ട, പന്തളം യൂണിയനുകളുടെ ശാഖാ നേതൃത്വ സംഗമം 19 ന് ഉച്ചകഴിഞ്ഞ് രണ്ടിന് പത്തനംതിട്ട സെന്‍റ് സ്റ്റീഫൻസ് ഓഡിറ്റോറിയത്തിൽ നടക്കുമെന്ന് യൂണിയൻ ഭാരവാഹികൾ പത്രസമ്മളനത്തിൽ അറിയിച്ചു. യോഗം ജനറൽ സെക്രട്ടറി വെള്ളാപ്പള്ളി നടേശൻ അധ്യക്ഷത വഹിക്കും. വൈസ് പ്രസിഡന്‍റ് തുഷാർ വെള്ളാപ്പള്ളി സംഘടനാ വിശദീകരണവും ദേവസ്വം സെക്രട്ടറി അരയാക്കണ്ടി സന്തോഷ് സംഘടനാ സന്ദേശവും നൽകും. പത്തനംതിട്ട യൂണിയൻ പ്രസിഡൻറ് കെ. പത്മകുമാർ സ്വാഗതം പറയും. 2580 പ്രതിനിധികൾ നേതൃസംഗമത്തിൽ പങ്കെടുക്കും. പത്തനംതിട്ട യൂണിയൻ പ്രസിഡന്‍റ് കെ. പത്മകുമാർ, സെക്രട്ടറി ഡോ. എ.വി. ആന്ദരാജ്, പത്തനംതിട്ട യൂണിയൻ സെക്ര്ടറി ഡി. അനിൽകുമാർ, യോഗം അസിസ്റ്റൻറ് സെക്രട്ടറി ടി.പി. സുന്ദരേശൻ, പത്തനംതിട്ട യൂണിയൻ വൈസ് പ്രസിഡന്‍റ് സുനിൽ മംഗലത്ത് എന്നിവർ പങ്കെടുത്തു.

പഴകുളത്ത് കുട്ടികളുടെ ദ്വിദിന സഹവാസ ജില്ലാ ക്യാമ്പ്

പത്തനംതിട്ട: കുട്ടികളുടെ ദ്വിദിന സഹവാസ ജില്ല ക്യാമ്പ് ഒക്ടോബര്‍ ഒന്ന്, രണ്ട് തീയതികളില്‍ പഴകുളം പാസില്‍ നടക്കും. നാളെ വൈകുന്നേരം അഞ്ചിന് സംഘാടക സമിതി രൂപീകരണ യോഗം പഴകുളം പാസില്‍ ചേരും. വര്‍ണോല്‍സവം, ശിശുദിനാഘോഷം , ലഹരിക്കെതിരേ കളിയും കളിക്കളവും തുടങ്ങിയ കാന്പയിനുകള്‍ നടത്താനും ശിശുക്ഷേമസമിതി ജില്ലാ എക്സിക്യൂട്ടീവ് തിരുമാനിച്ചു. ശിശുക്ഷേമസമിതി ജില്ലാ വൈസ് പ്രസിഡന്‍റ് ആര്‍. അജിത് കുമാര്‍ അധ്യക്ഷത വഹിച്ചു. സെക്രട്ടറി ജി. പൊന്നമ്മ, ജോയിന്‍റ് സെക്രട്ടറി സലിം പി. ചാക്കോ, ട്രഷറര്‍ ഏ ജി ദീപു, എക്സിക്യൂട്ടീവ് അംഗങ്ങളായ ടി. രാജേഷ് കുമാര്‍ , എസ് മീരാസാഹിബ്, ജില്ലാ വനിത ശിശു വികസന ഓഫീസര്‍ കെ. വി. ആശാമോള്‍, അടൂര്‍ എഇഒ സീമാദാസ്, എഎസ്ഐ സി.കെ. മനോജ് എന്നിവര്‍ പ്രസംഗിച്ചു.

കാലാവധി തീരാൻ മാസങ്ങൾ; പഠനയാത്രയിൽ പറക്കോട് ബ്ലോക്ക്, ഏറത്ത് പഞ്ചായത്തംഗങ്ങൾ

അടൂർ: ഭരണസമിതിയുടെ കാലാവധി തീരാൻ മാസങ്ങൾ മാത്രമുള്ളപ്പോൾ പറക്കോട് ബ്ലോക്ക് പഞ്ചായത്തിലേയും ഏറത്ത് ഗ്രാമപഞ്ചായത്തിലേയും അംഗങ്ങൾ പഠനയാത്രയ്ക്ക് പോയത് വിവാദത്തിൽ. ഏറത്ത് ഗ്രാമപഞ്ചായത്തിലെ പ്രസിഡന്‍റ്, വൈസ് പ്രസിഡന്‍റ് രണ്ട് ജീവനക്കാർ ഉൾപ്പെടെ 16 പേരാണ് പോയിരിക്കുന്നത്. പഞ്ചായത്തിൽ മൊത്തം 17 അംഗങ്ങളാണുള്ളത്. ഇതിൽ 14 പേരും യാത്രയ്ക്കു പോയിരിക്കുകയാണ്. മൂന്ന് പേർ ഒഴിവായി. ഏറത്ത് ഗ്രാമപഞ്ചായത്തിലെ സിപിഎം,കോൺഗ്രസ്,ബിജെപി അംഗങ്ങൾ യാത്രയിലുണ്ട്. യുഡിഎഫ് അംഗങ്ങളായ മറിയാമ്മ തരകൻ, റോസമ്മ സെബാസ്റ്റ്യൻ, എൽഡിഎഫ് അംഗം സന്തോഷ് ചാത്തന്നൂപ്പുഴ എന്നിവരാണ് യാത്രയിൽ പോകാതിരുന്നത്. ബംഗളൂരു, മൈസൂരു തുടങ്ങി കർണാടകയിലെ വിവിധ സ്ഥലങ്ങൾ സന്ദർശിക്കുക എന്നതാണ് ലക്ഷ്യം. ഒരാൾക്ക് 25000 രൂപയാണ് ചെലവ്. കിലയിൽ നിന്നാണ് യാത്രയ്ക്കുള്ള ഫണ്ട് അനുവദിച്ചിരിക്കുന്നത്. യാത്ര, ഉച്ചഭക്ഷണം, താമസം എന്നിവ ഉൾപ്പെടെ ഒരാൾക്ക് പ്രതിദിനം പരമാവധി 5000 രൂപ നിരക്കിൽ അഞ്ച് ദിവസത്തേക്ക് 25000 രൂപയാണ് ആർജിഎസ്എ പദ്ധതി പ്രകാരം കിലയിൽ നിന്നും നല്കുന്നത്. യാത്രാ സംഘത്തിലെ ആളുകളുടെ എണ്ണം 25 ൽ നിജപ്പെടുത്തിയിട്ടുണ്ട്. പ0ന യാത്രയ് ക്ക് കിലയിൽ നി ന്നും അനുവദിക്കുന്ന തുകയ്ക്ക് പുറമേ തനത് ഫണ്ടിൽ നിന്നും 50 ശതമാനം വരെ അധിക തുക ചെലവഴിക്കാനാകുമെന്നും ഉത്തരവിൽ പറയുന്നു. എന്നാൽ ഏറത്ത് പഞ്ചായത്ത് തനതുഫണ്ടിൽ നിന്നും പണം വേണ്ടിവരില്ലെന്നും സർക്കാർ ചട്ടങ്ങൾ പാലിച്ചാണ് യാത്രയെന്നും പ്രസിഡന്‍റ് രാജേഷ് അന്പാടിയിൽ പറഞ്ഞു. പറക്കോട് ബ്ലോക്ക് പഞ്ചായത്തിലെ 15 അംഗങ്ങളിൽ പത്തു പേരാണ് യാത്രയിലുള്ളത്. ഹൈദ്രാബാദിലേക്കാണ് ഇവരുടെ യാത്ര. ഭരണസമിതിയുടെ അവസാനനാളുകളിലെ പഠനയാത്ര വിവാദമായിട്ടുണ്ട്. തിരികെ എത്തുന്പോഴേക്കും തെരഞ്ഞെടുപ്പ് പ്രചാരണത്തിനു സമയമാകുമെന്നതിനാൽ പഠനയാത്രയിൽ ലഭിച്ച വിവരങ്ങൾ ആർക്കു കൈമാറുമെന്നതിലാണ് അവ്യക്തത.

വ്യാപാരി വ്യവസായി ഏകോപനസമിതി ഓണാഘോഷം

പത്തനംതിട്ട: കേരള വ്യാപാരി വ്യവസായി ഏകോപന സമിതി പത്തനംതിട്ട ജില്ലാ കമ്മിറ്റിയുടെ നേതൃത്വത്തിൽ ഓണാഘോഷം ജില്ലാ കളക്ടർ എസ്. പ്രേം കൃഷ്ണൻ ഉദ്ഘാടനം ചെയ്തു . കലാ, കായിക മത്സരങ്ങൾ, മെഗാ ഗാനമേള, വ്യാപാര സംഗമവും - ചർച്ചയും ഓണ സൽക്കാരങ്ങളും ആഘോഷത്തിന്‍റെ ഭാഗമായിനടത്തി. ഏകോപന സമിതി പത്തനംതിട്ട ജില്ലാ പ്രസിഡന്‍റ് പ്രസാദ് ജോൺ മാമ്പ്ര അദ്ധ്യക്ഷത വഹിച്ച യോഗത്തിൽ വർക്കിംഗ് പ്രസിഡന്‍റ് ഷാജി മാത്യു, യൂണിറ്റ് ജനറൽ സെക്രട്ടറി ആലിഫ് ഖാൻ മേധാവി, ട്രഷറാർ ബെന്നി ഡാനിയേൽ, ഏബ്രഹാം പരുവാനിക്കൽ. കെ. എസ്. അനിൽകുമാർ, സൂര്യ ഗിരീഷ്, അശ്വിൻ മോഹൻ, ലാലു മറ്റപ്പള്ളിൽ, സുരേഷ് ബാബു, കെ.പി. തന്പി തുടങ്ങിയവർ പ്രസംഗിച്ചു.

അങ്കണവാടികളുടെ പരിഷ്കരിച്ച ഭക്ഷണ മെനു നഗരസഭാ തലത്തിൽ ഉദ്ഘാടനം ചെയ്തു

പത്തനംതിട്ട: അങ്കണവാടികളിലെ പരിഷ്കരിച്ച മെനു നടപ്പിലാക്കുന്നതിന്‍റെ നഗരസഭാതല ഉദ്ഘാടനം ചിറ്റൂർ ഒന്പതാം വാർഡിലെ സ്മാർട്ട്‌ അങ്കണവാടിയിൽ മുനിസിപ്പൽ ചെയർമാൻ ടി.സക്കീർ ഹുസൈൻ നിർവഹിച്ചു. വാർഡ് കൗൺസിലർ ആർ. സാബു അധ്യക്ഷത വഹിച്ചു. ഐസിഡിഎസ് സൂപ്പർവൈസർ നിഷ ആ നി ജോസഫ് മെനു പരിഷ്കരണത്തിന്‍റെ ലക്ഷ്യങ്ങൾ വിശദീകരിച്ചു. 96-ാം നമ്പർ അങ്കണവാടി വർക്കർ വി.കെ. ജയ, ഹെൽപ്പർ പി.ആർ. ലത എന്നിവർ പങ്കെടുത്തു. ശങ്കു എന്ന അങ്കണവാടി കുട്ടിയുടെ ആവശ്യം സാമൂഹ്യ മാധ്യമത്തിലൂടെ വലിയ ജനശ്രദ്ധ നേടിയിരുന്നു. സംസ്ഥാന സർക്കാർ നടത്തിയ ഇടപെടലിലൂടെ തന്‍റെ ആവശ്യം സാധിച്ചതിന്‍റെ സന്തോഷവും ഈ കുട്ടി പങ്കുവച്ചിരുന്നു. എണ്ണയുടെയും പഞ്ചസാരയുടെയും ഉപ്പിന്‍റെയും ഉപയോഗം പരമാവധി കുറച്ചുള്ള ശാസ്ത്രീയ ഭക്ഷണ രീതിയാണ് മെനുവിൽ ഉൾപ്പെടുത്തിയിരിക്കുന്നത്.

നേത്രദാന പക്ഷാചരണം ജില്ലാതല സമാപനം

പത്തനംതിട്ട: ദേശീയ നേത്രദാന പക്ഷാചരണത്തിന്‍റെ ജില്ലാതല സമാപനവും മെഗാ നേത്രപരിശോധനാ ക്യാമ്പും കോന്നി പ്രിയദര്‍ശിനി ടൗണ്‍ഹാളില്‍ സംഘടിപ്പിച്ചു. ജില്ലാ പഞ്ചായത്ത് ആരോഗ്യ സ്റ്റാൻഡിംഗ് കമ്മിറ്റി ചെയര്‍പേഴ്‌സണ്‍ ആർ. അജയകുമാര്‍ ഉദ്ഘാടനം ചെയ്തു. കോന്നി ഗ്രാമപഞ്ചായത്ത് പ്രസിഡന്‍റ് അനി സാബു തോമസ് അധ്യക്ഷത വഹിച്ചു. കോന്നി ബ്ലോക്ക് പഞ്ചായത്ത് പ്രസിഡന്‍റ് എം.വി. അമ്പിളി മുഖ്യപ്രഭാഷണവും ജില്ലാ മെഡിക്കല്‍ ഓഫീസര്‍ ഡോ. എൽ. അനിതകുമാരി വിഷയാവതരണവും നടത്തി. ജില്ലാ നോഡല്‍ ഓഫീസര്‍ ഡോ. ഐപ്പ് ജോസഫ് നേത്രദാന സമ്മതപത്രം സ്വീകരിച്ചു. ജെസിഐ കോന്നി ചാപ്റ്റര്‍ പ്രസിഡന്‍റ് ഡെന്നീസ് മാത്യു അക്രിലിക് ബോര്‍ഡില്‍ തയാറാക്കിയ ബോധവത്കരണ ബോര്‍ഡുകള്‍ ആരോഗ്യ വകുപ്പിന് കൈമാറി. കോന്നി ബ്ലോക്ക്പഞ്ചായത്ത് ആരോഗ്യ സ്റ്റാൻഡിംഗ് ‌ കമ്മിറ്റി ചെയര്‍പേഴ്‌സണ്‍ തുളസീ മണിയമ്മ, കോന്നി ഗ്രാമപഞ്ചായത്ത് ആരോഗ്യ സ്റ്റാൻഡിംഗ് കമ്മിറ്റി ചെയര്‍പേഴ്‌സണ്‍ തോമസ് കാലായിൽ, കോന്നി ബ്ലോക്ക് പഞ്ചായത്ത് അംഗം ജോളി ഡാനിയൽ, കോന്നി ഗ്രാമപഞ്ചായത്ത് അംഗം സിന്ധു സന്തോഷ്, ജില്ലാ എഡ്യുക്കേഷന്‍ മീഡിയ ഓഫീസര്‍ എസ്. ശ്രീകുമാർ, ജില്ലാ ഓഫ്താല്‍മിക് സര്‍ജന്‍ ഡോ. എൻ. വി. സിനി , കോന്നി താലൂക്കാശുപത്രി സൂപ്രണ്ട് ഡോ. സ്മിത ആന്‍ സാം, ഡെപ്യൂട്ടി ജില്ലാ എഡ്യുക്കേഷന്‍ മീഡിയ ഓഫീസര്‍ ബിജു ഫ്രാന്‍സിസ്, ജില്ലാ ആശുപത്രി കോഴഞ്ചേരി ജൂണിയര്‍ കണ്‍സള്‍ട്ടന്‍റ് ഡോ.മനോജ് കുമാര്‍, ജില്ലാ ഒഫ്താല്‍മിക് കോഓര്‍ഡിനേറ്റര്‍ കെ. അജിത, ഹെല്‍ത്ത് സൂപ്പര്‍വൈസര്‍ ബി. അനില്‍കുമാര്‍ എന്നിവര്‍ പങ്കെടുത്തു. നേത്രദാനം നടത്തിയ പത്തനംതിട്ട എസ്എസ് കോട്ടജില്‍ എം.എൻ.സുകുമാരന്‍റെ ഭാര്യ ശശികല ആദരം ഏറ്റുവാങ്ങി.

മൂര്‍ത്തിമുരുപ്പ് കുടിവെള്ള പദ്ധതിയും അംബേദ്കര്‍ ഗ്രാമവും ഉദ്ഘാടനം ചെയ്തു

കോന്നി: വള്ളിക്കോട് പഞ്ചായത്തിലെ മൂര്‍ത്തിമുരുപ്പ് ഉന്നതിയിലെ കുടിവെള്ള പദ്ധതിയും അംബേദ്കര്‍ ഗ്രാമം പദ്ധതിയും മന്ത്രി ഒ.ആർ. കേളു ദ്ഘാടനം ചെയ്തു. പട്ടികജാതി കോര്‍പസ് ഫണ്ട് 1.62 കോടി രൂപ ചെലവഴിച്ചാണ് മൂര്‍ത്തിമുരുപ്പ് കുടിവെള്ള പദ്ധതി പൂര്‍ത്തിയാക്കിയത്. അംബേദ്കര്‍ ഗ്രാമം പദ്ധതിക്ക് ഒരു കോടി രൂപയാണ് അനുവദിച്ചത്. കെ.യു. ജനീഷ് കുമാര്‍ എംഎല്‍എ അധ്യക്ഷത വഹിച്ചു. മൂര്‍ത്തിമുരുപ്പ് ഉന്നതിയിലെ കുടിവെള്ളക്ഷാമം പരിഹരിക്കുന്നതിന് വകുപ്പ് മന്ത്രിക്ക് എംഎല്‍എ നല്‍കിയ നിവേദനത്തിന്‍റെ അടിസ്ഥാനത്തിലാണ് ഫണ്ട് അനുവദിച്ചത്. അച്ചന്‍കോവിലാറ്റിലെ താഴൂർക്കടവ് ഇന്‍ ടെക്ക് പമ്പ് ഹൗസില്‍ നിന്നും 30 എച്ച്പി മോട്ടോറിലൂടെ ഉയര്‍ന്ന പ്രദേശമായ മൂര്‍ത്തിമുരിപ്പ് ഉന്നതിയില്‍ കുടിവെള്ളം എത്തിക്കുന്നതാണ് പദ്ധതി. ഉന്നതിയിലേക്കുള്ള ഗ്രാമീണ റോഡുകള്‍, ഇടവഴികള്‍ എന്നിവയുടെ നിര്‍മാണം, വീടുകളുടെ അറ്റകുറ്റപണി, സംരക്ഷണ ഭിത്തി തുടങ്ങിയവയാണ് അംബേദ്കര്‍ ഗ്രാമം പദ്ധതിയില്‍ ഉള്‍പ്പെട്ടത്. ജില്ലാ നിര്‍മിതികേന്ദ്രം ആയിരുന്നു നിര്‍വഹണ ഏജന്‍സി. വള്ളിക്കോട് ഗ്രാമപഞ്ചായത്ത് പ്രസിഡന്‍റ് ആര്‍. മോഹനന്‍ നായർ, ജില്ലാ പഞ്ചായത്തംഗം റോബിന്‍ പീറ്റർ, ബ്ലോക്ക് പഞ്ചായത്ത് അംഗം പ്രസന്ന രാജൻ, ഗ്രാമപഞ്ചായത്ത് വൈസ് പ്രസിഡന്‍റ് സോജി പി. ജോൺ, സ്റ്റാന്‍ഡിംഗ് കമ്മിറ്റി ചെയര്‍പേഴ്സൺ എം വി.ജോസ്, ഗ്രാമപഞ്ചായത്ത് അംഗങ്ങളായ ലിസി ജോണ്‍സണ്‍, ഗീത കുമാരി, ലക്ഷ്മി, തോമസ് ജോസ്, രാഷ്‌ട്രീയ പാര്‍ട്ടി പ്രതിനിധികളായ രാജു നെടുവംപുറം, ബൈജു വടക്കേടത്ത്, സി.സുമേഷ്, പട്ടികജാതി വകുപ്പ് ജില്ലാ ഓഫീസര്‍ ദിലീപ് തുടങ്ങിയവർ പ്രസംഗിച്ചു.

വിദ്യാഭ്യാസം സമൂഹ നന്മയ്ക്കാകണം: ജസ്റ്റീസ് ബെഞ്ചമിന്‍ കോശി

തിരുവല്ല: സമൂഹത്തെ നന്മയിലേക്ക് നയിക്കുന്ന വിദ്യാഭ്യാസത്തിലൂടെ മാത്രമേ ലക്ഷ്യബോധമുള്ള തലമുറയെ വാര്‍ത്തെടുക്കുവാന്‍ സാധിക്കുവെന്ന് വൈ.എം.സി.എ മുന്‍ ദേശീയ പ്രസിഡന്‍റ് ജസ്റ്റീസ് ജെ. ബെഞ്ചമിന്‍ കോശി. വൈഎംസിഎ സബ് - റീജിയന്‍ സംഘടിപ്പിച്ച മെറിറ്റ് ഈവനിംഗ് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഈ കാലഘട്ടത്തിലെ വെല്ലുവിളികളെയും അപായങ്ങളെയും നേരിടുവാനും അതിജീവിക്കുവാനുള്ള തിരിച്ചറിവും കരുത്തും യുവതലമറ വിദ്യാഭ്യാസത്തിലൂടെ നേടണമെന്നും അദ്ദേഹം പറഞ്ഞു. ചെയര്‍മാന്‍ ജോജി പി. തോമസ് അധ്യക്ഷത വഹിച്ചു. മലങ്കര ഓര്‍ത്തഡോക്‌സ് സഭാ അങ്കമാലി ഭദ്രാസനാധിപന്‍ യൂഹാനോന്‍ മാര്‍ പോളിക്കാര്‍പ്പോസ് മെത്രാപ്പോലീത്ത അനുഗ്രഹ പ്രഭാഷണം നടത്തി. മാര്‍ത്തോമ്മാ സഭാ വികാരി ജനറാള്‍ റവ. ജോര്‍ജ് മാത്യു മുഖ്യ പ്രഭാഷണം നടത്തി. മുന്‍ റീജണല്‍ ചെയര്‍മാന്‍ വി.സി സാബു, റീജണല്‍ യൂത്ത് വര്‍ക്ക് കമ്മിറ്റി ചെയര്‍മാന്‍ ലിനോജ് ചാക്കോ, മധ്യമേഖല കോ ഓര്‍ഡിനേറ്റര്‍ എബി ജേക്കബ്, സംസ്ഥാന സമിതി അംഗങ്ങളായ ജോസഫ് നെല്ലാനിക്കൻ, ജോ ഇലഞ്ഞിമൂട്ടിൽ, ജനറല്‍ കണ്‍വീനര്‍ സുനില്‍ മറ്റത്ത്, വൈസ് ചെയര്‍മാന്‍മാരായ തോമസ് വി. ജോൺ, നിതിന്‍ കടവിൽ, പ്രോഗ്രാം കണ്‍വീനര്‍ സജി മാമ്പ്രക്കുഴിയിൽ, വര്‍ഗീസ് ടി. മങ്ങാട്, ജുബിന്‍ ജോൺ, കെ. സി മാത്യു, എം ബി നൈനാൻ, തിരുവല്ല വൈഎംസിഎ വൈസ് പ്രസിഡന്‍റ് ജേക്കബ് വര്‍ഗീസ്, കുര്യന്‍ ചെറിയാന്‍ എന്നിവര്‍ പ്രസംഗിച്ചു.

ആനന്ദപ്പള്ളിക്ക് ആനന്ദോത്സവം

മരമടി മഹോത്സവ കരടുബില്ല് മന്ത്രിസഭ അംഗീകരിച്ചു പത്തനംതിട്ട: സംസ്ഥാനത്തെ ഏറ്റവും പ്രധാനപ്പെട്ട കാര്‍ഷിക ഉല്‍സവമായിരുന്ന ആനന്ദപ്പള്ളി മരമടി 17 വര്‍ഷത്തിനുശേഷം വീണ്ടുമെത്തുന്ന പ്രതീക്ഷയിലാണ് നാട്. മരമടി മഹോത്സവ കരടുബില്ലിന് കഴിഞ്ഞദിവസം മന്ത്രിസഭ അംഗീകാരം നല്‍കി. നിയമസഭ ബില്ല് പാസാക്കിക്കഴിഞ്ഞാല്‍ മരമടി ഏറ്റെടുത്തു നടത്താനുള്ള ഒരുക്കത്തിലാണ് ആനന്ദപ്പള്ളി കര്‍ഷകസമിതി. 2008 മുതല്‍ ആനന്ദപ്പള്ളി മരമടി നടക്കുന്നില്ല. ജെല്ലിക്കെട്ട് ഉള്‍പ്പെടെ മൃഗങ്ങളെ ഉപയോഗിച്ചു നടത്തുന്ന കാര്‍ഷികമേളകള്‍ നിരോധിച്ചതിനു പിന്നാലെയാണ് ആനന്ദപ്പള്ളിയിലെ ആനന്ദോത്സവത്തിനും വിലക്കുണ്ടായത്. എന്നാല്‍ ശക്തമായ സമ്മര്‍ദത്തേ തുടര്‍ന്ന് 2017 ജനുവരിയില്‍ കേന്ദ്ര സര്‍ക്കാര്‍ അതത് സംസ്ഥാനങ്ങള്‍ അവരുടെ നിയമസഭകളില്‍ ബില്ല് പാസാക്കി ജെല്ലിക്കെട്ട്, കംബാല, മരമടി, കാളപൂട്ട്, ഉഴവ് മത്സരങ്ങള്‍ നടത്തുന്നതിനു അനുമതി നല്‍കി. അപ്പോള്‍ തന്നെ തമിഴ്‌നാടും കര്‍ണാടകയും പ്രത്യേക നിയമസഭാ സമ്മേളനം വിളിച്ചുകൂട്ടി ബില്ല് പാസാക്കി പ്രസിഡന്‍റിന്‍റെ അനുമതി വാങ്ങി മുടങ്ങിയ ഉത്സവങ്ങള്‍ പുനരാരംഭിച്ചു. അക്കാലയളവില്‍ തന്നെ ആനന്ദപ്പള്ളി കര്‍ഷക സമിതിയും മരമടിക്കുള്ള ബില്ല് പാസാക്കണമെന്ന് ആവശ്യപ്പെട്ട് കേരള മുഖ്യമന്ത്രിക്ക് നിവേദനം കൊടുത്തതാണ്. പക്ഷേ എട്ടു വര്‍ഷത്തിനു ശേഷമാണ് മന്ത്രിസഭ ഇത് പരിഗണിച്ചത്. കര്‍ഷകനും കാളയും ഒന്നിക്കും ആരും അറിയാത്ത പ്രയത്‌നങ്ങളും കഷ്ടപ്പാടുകളുമാണ് ഈ ഉത്സവത്തിന്‍റെ പിന്നിലുള്ളത്. കര്‍ഷകനും ഉരുക്കളും ഒന്നിച്ചു നിന്നെങ്കിലേ മരമടി പൂര്‍ണതയിലെത്തൂ. അനേകം മനുഷ്യരുടെ കഠിനാധ്വാനവും അതിലേറെ സാമ്പത്തികാവശ്യങ്ങളും മരമടിക്കുണ്ട്. മരമടിക്ക് മുന്നോടിയായി പാടം ഉഴുത് മറിച്ച് വൃത്തിയാക്കണം. കാഷ് അവാര്‍ഡ്, ട്രോഫി, താമസം, സ്റ്റേജ്, ഗതാഗതം, പവിലിയന്‍ എന്നിങ്ങനെ ലക്ഷങ്ങളാണ് ചെലവാകുക. ലക്ഷണമൊത്ത ഒരു ജോടി ഉരുക്കള്‍ക്കു ലക്ഷങ്ങളാണ് ഇപ്പോള്‍ വില. ഇവയിലധികവും കേരളത്തിനു പുറത്തുനിന്നെത്തിക്കുന്നവയാണ്. ഉരുക്കള്‍ക്ക് ചിട്ടയായ ആഹാര രീതിയും തരപ്പെടുത്തേണ്ടതുണ്ട്. ഒരു മാസം മുന്‍പ് പ്രത്യേക പരിശീലനവും ആഹാരവും നല്‍കിത്തുടങ്ങണം. ഉരുക്കള്‍ക്ക് ഒപ്പം ഓടുന്നവരെ പണം കൊടുത്ത് ബുക്ക് ചെയ്യണം. ഇങ്ങനെ വന്‍ സാമ്പത്തിക ബാധ്യതയാണ് ഉണ്ടാകുന്നത്. മൃഗപീഡനമാണ് ഇവിടെ നടക്കുന്നതെന്നുള്ള വാദം കര്‍ഷകര്‍ നിഷേധിക്കുന്നു. ഉരുക്കളുടെ. ആരോഗ്യ സംരക്ഷണത്തിനും ഊര്‍ജത്തിനും അങ്ങാടി മരുന്ന്, പാല്‍, മുതിര, മുട്ട, അരിക്കഞ്ഞി, കരിക്ക്, ബാര്‍ലി, കടല, പരുത്തിപ്പിണ്ണാക്ക് തുടങ്ങിയവയാണ് കൊടുക്കുന്നത്. ശാരീരിക ബലത്തിന് ഉലുവ വേവിച്ച് കരിപ്പെട്ടിയില്‍ കലര്‍ത്തിയും നല്‍കും. സുഖ ചികിത്സയുടെ ഭാഗമായി ശരീരശുദ്ധി വരുത്താന്‍ രാവിലെയും വൈകുന്നേരവും ആദ്യം വൈക്കോലും പിന്നീട് സോപ്പും തേച്ച് കുളിപ്പിക്കണം. മത്സര ദിവസത്തിന്‍റെ തലേന്ന് ക്ഷീണം ഉണ്ടാകാതിരിക്കാന്‍ ദശമൂലാരിഷ്ടവും നല്‍കും. നാടിന്‍റെ കാര്‍ഷികോത്സവം ചേറ്റുകണ്ടത്തില്‍ കാളക്കൂറ്റന്‍മാര്‍ നുകം കെട്ടി പായുന്നത് കര്‍ഷകരും വിദേശ ടൂറിസ്റ്റുകളും ഉള്‍പ്പെടെ നൂറുകണക്കിന ആളുകളാണ് ആസ്വദിച്ചിരുന്നത്. സംസ്ഥാന ടൂറിസം വകുപ്പിന്‍റെ ഭാഗമായും മരമടി ഉത്സവം അംഗീകരിച്ചിരുന്നു. തമിഴ്‌നാട്ടില്‍ ജെല്ലിക്കെട്ട് നിരോധിച്ചതിനു പിന്നാലെയാണ് 60 വര്‍ഷമായി നടന്നു വന്ന പരമ്പരാഗത കാര്‍ഷിക ഉത്സവമായ ആനന്ദപ്പള്ളി മരമടി ഉത്സവത്തിനും നിരോധനം വന്നത്. മൃഗങ്ങളെ പീഡിപ്പിക്കുന്നുവെന്ന വാദമാണ് ഈ കാര്‍ഷിക ഉത്സവം നിന്നു പോകാന്‍ കാരണമായത്. ചിങ്ങക്കൊയ്ത്ത് കഴിഞ്ഞ് ഓഗസ്റ്റ് 15 നാണ് മരമടി നടത്തിയിരുന്നത്. അടൂര്‍ പുതുവീട്ടില്‍ പടി ഏലാ കേന്ദ്രീകരിച്ച് 1950 ലാണ് മരമടി ഉത്സവം ആരംഭിച്ചത്. പിന്നീട് അമ്പിയില്‍ ഏലായിലേക്ക് എത്തി. അവിടത്തെ സ്ഥലപരിമിതി കാരണം ആനന്ദപ്പള്ളിയില്‍ കര്‍ഷക സമിതി രൂപീകരിച്ച് മരമടി ഏറ്റെടുത്തു. 1986 ലാണ് ആനന്ദപ്പള്ളി പാലശേരി ഏലായില മരമടി ഉത്സവം ആരംഭിച്ചത്. കൃഷിയിലുള്ള ആവേശം കെട്ടടങ്ങരുതെന്ന സന്ദേശമാണ് മരമടിയിലൂടെ കര്‍ഷകര്‍ മുന്നോട്ടുവയ്ക്കുന്നത്. 2008 ലാണ് ആനന്ദപ്പള്ളി മരമടി നിലച്ചത്. മരമടിയെ സ്‌നേഹിക്കുന്ന ആയിരങ്ങളെ ഇതു നിരാശയിലാക്കി. കൃഷിയിലുള്ള ആവേശം കെട്ടടങ്ങരുതെന്ന സന്ദേശമാണ് മരമടിയിലൂടെ കര്‍ഷകര്‍ മുന്നോട്ടുവയ്ക്കുന്നത്. മരമടിയില്‍ പങ്കെടുക്കുന്ന ഉരുക്കളുടെ വിജയം തങ്ങളുടെ വിജയമായി കര്‍ഷകര്‍ കണക്കാക്കുന്നു. പോരാട്ട വിജയം; ബില്ല് പാസായാല്‍ സീസണായി കാത്തിരിക്കില്ല എട്ടുവര്‍ഷം നീണ്ട പോരാട്ടത്തിനൊടുവിലാണ് മരമടിക്ക് അനുമതി നല്കാനുള്ള ബില്ല് മന്ത്രിസഭയെങ്കിലും പാസാക്കിയതെന്ന് ആനന്ദപ്പള്ളി കര്‍ഷകസമിതി പ്രസിഡന്‍റ് വർഗീസ് ദാനിയേലും സെക്രട്ടറിവി.കെ. സ്റ്റാന്‍ലിയും പറഞ്ഞു. 2017 ജനുവരിയില്‍ തന്നെ ആനന്ദപ്പള്ളി കര്‍ഷക സമിതിയും മരമടി ബില്ല് പാസാക്കണമെന്ന് ആവശ്യപ്പെട്ട് കേരള മുഖ്യമന്ത്രിക്ക് നിവേദനം കൊടുത്തിരുന്നു. ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍ മൂന്നു തവണ വിഷയം നിയമസഭയില്‍ അവതരിപ്പിച്ചു. ബില്ല് പാസാക്കാന്‍ സംസ്ഥാനങ്ങള്‍ക്ക് കേന്ദ്രസര്‍ക്കാര്‍ നല്‍കിയ അവകാശത്തെ ചോദ്യം ചെയ്തു മൃഗസ്‌നേഹികളുടെ സംഘടനകള്‍ സുപ്രീം കോടതിയെ സമീപിച്ചു. എന്നാല്‍ സുപ്രീംകോടതി അതു തള്ളുകയും സംസ്ഥാനങ്ങള്‍ ബില്ല് പാസാക്കുന്നതിനുള്ള അവകാശത്തെ ഉറപ്പിക്കുകയും ചെയ്തതാണ്. പല ജില്ലകളിലെ കര്‍ഷകരും ബില്ലിനു വേണ്ടി കാത്തിരിക്കാതെ മരമടികള്‍ മറ്റു പല പേരില്‍ നടത്തിയപ്പോഴും ആനന്ദപ്പള്ളി കര്‍ഷക സമിതി ബില്ലിനായി പോരാട്ടം തുടര്‍ന്നു. കര്‍ഷക സമിതി മുഖ്യമന്ത്രിക്കും മന്ത്രിമാര്‍ക്കും കക്ഷി രാഷ്ട്രീയ നേതാക്കള്‍ക്കും, പ്രതിപക്ഷ നേതാവിനും നിരവധി നിവേദനങ്ങള്‍ കൊടുത്തു. നിരവധി ധര്‍ണകള്‍ നടത്തി. എട്ടു വര്‍ഷത്തിനുശേഷം മന്ത്രിസഭ ഇത് പരിഗണിച്ചത് കര്‍ഷക സമിതിയുടെ മാത്രം പോരാട്ട വിജയമാണെന്ന് പ്രസിഡന്‍റുംസെക്രട്ടറിയും അഭിപ്രായപ്പെട്ടു. ബില്ല് പാസായാല്‍ അടുത്ത സീസാണായി കാത്തിരിക്കാതെ തന്നെ മരമടി നടത്താന്‍ തീരുമാനിച്ചിരിക്കുകയാണ് കര്‍ഷക സമിതി. മരമടി ബില്ല് ഈ നിയമസഭാ സമ്മേളനത്തില്‍തന്നെ കൊണ്ടുവരാന്‍ ശ്രമിക്കും അടൂർ: തെക്കന്‍ കേരളത്തിലെ തന്നെ ശ്രദ്ധേയ കാര്‍ഷികോത്സവങ്ങളില്‍ ഒന്നായിരുന്ന ആനന്ദപ്പള്ളി മരമടി പുനരാരംഭിക്കുന്നതിനുള്ള നിയമ നിര്‍മാണ സാധ്യത തെളിഞ്ഞതായി ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍. മരമടിക്കൊപ്പം കന്നുപൂട്ട്, കാളപൂട്ട് തുടങ്ങിയ കാര്‍ഷിക കായിക വിനോദങ്ങളും ഈ കാലയളവില്‍ രാജ്യത്താകെ നിരോധിച്ചിരുന്നു. ശക്തമായ പ്രാദേശിക പ്രക്ഷോഭങ്ങളേ തുടര്‍ന്ന് തമിഴ്‌നാട് സര്‍ക്കാര്‍ നിയമനിര്‍മാണം സാധ്യമാക്കി ജെല്ലിക്കെട്ട് പുനരാരംഭിച്ചുവെങ്കിലും കേരളമടക്കമുള്ള ഇതര സംസ്ഥാനങ്ങളില്‍ ഈ വിഷയത്തിന്മേലുള്ള നിയമ നിര്‍മാണ, ഭേദഗതി നടപടികളില്‍ വേണ്ടത്ര പുരോഗതി അന്നുണ്ടായില്ലെന്ന് ചിറ്റയം പറഞ്ഞു. ഇന്ന് ആരംഭിക്കുന്ന നിയമസഭാ സമ്മേളന കാലയളവില്‍ തന്നെ മരമടി ബില്ല് അവതരിപ്പിച്ച് പാസാക്കുന്നതിന് കൂടുതല്‍ ശ്രമങ്ങള്‍ നടത്തിവരികയാണെന്നും ഡെപ്യൂട്ടി സ്പീക്കര്‍ പറഞ്ഞു. നിയമസഭാ സാമാജികന്‍ എന്ന നിലയില്‍ സഭയില്‍ നിരവധി തവണ ചോദ്യങ്ങളിലൂടെയും, സബ്മിഷനിലൂടെയും പ്രസംഗങ്ങളിലൂടെയും ഈ വിഷയം സജീവമാക്കിയിരുന്നു. നിയമസഭയുടെ ഡെപ്യൂട്ടി സ്പീക്കര്‍ എന്ന പദവിയില്‍ നേരിട്ട് ഈ വിഷയത്തില്‍ ഇടപെടുന്നതിനുള്ള നിയമപരമായ പരിമിതി ബോധ്യപ്പെട്ട് നിയമസഭാനുബന്ധ സിപിഐ പാര്‍ലമെന്‍ററി പാര്‍ട്ടി സംവിധാനവുമായി ബന്ധപ്പെട്ട് കഴിഞ്ഞ സമ്മേളനത്തില്‍ ഈ വിഷയത്തിന്മേല്‍ അവതരിപ്പിക്കപ്പെട്ട സ്വകാര്യ ബില്ലിന്‍റെതുടര്‍ച്ചയായിട്ടാണ് നിയമ ഭേദഗതി വിഷയത്തില്‍ നിലവിലുള്ള പുരോഗതി ഉണ്ടായിട്ടുള്ളതെന്നും ചിറ്റയം ഗോപകുമാര്‍ പറഞ്ഞു. കാര്‍ഷികോത്സവമായ മരമടി നടപ്പിലാക്കുന്നതിന് ആവശ്യമായ കരട് ബില്‍ ഈ നിയമസഭാ കാലയളവില്‍ അംഗീകരിക്കപ്പെടുമെന്ന പ്രത്യാശയിലാണ്. 1960 ലെ കേന്ദ്രസര്‍ക്കാര്‍ നിയമത്തിന് ഭേദഗതി വരുത്തിയാകും ഈ വിഷയം പരിഹരിക്കപ്പെടുകയെന്നും അദ്ദേഹം അറിയിച്ചു.

ദേഹോപദ്രവക്കേസില്‍ ഒരാള്‍ പിടിയില്‍

പത്തനംതിട്ട: അയല്‍വാസിയെ കമ്പിവടികൊണ്ട് അടിച്ചുപരിക്കേല്പിച്ച സംഭവത്തില്‍ ഒരാളെ പിടികൂടി. കൂടല്‍ നിരത്തുപാറ എലിക്കോട് കിഴക്കതില്‍ വിഷ്ണു (33)ആണ് അറസ്റ്റിലായത്. വാക്കുതര്‍ക്കത്തേ തുടര്‍ന്ന് കഴിഞ്ഞ മേയ് 16ന് വൈകുന്നേരം 6.30 ഓടെ അയല്‍വാസിയായ എലിക്കോട് പുത്തന്‍വീട്ടില്‍ രാമചന്ദ്രന്‍റെ വീട്ടില്‍ അതിക്രമിച്ചു കയറി പ്രതികള്‍ അസഭ്യം വിളിക്കുകയും കമ്പി വടികൊണ്ടും മറ്റും അടിച്ചു പരിക്കേല്പിക്കുകയും ചെയ്തു. രാമചന്ദ്രന്‍ കൂടല്‍ പോലീസ് സ്റ്റേഷനില്‍ പരാതി നല്‍കിയതിനെതുടര്‍ന്ന് സീനിയര്‍ സിവില്‍ പോലീസ് ഓഫീസര്‍ രാജേഷ് മൊഴി രേഖപ്പെടുത്തി, എസ്‌ഐ അനില്‍കുമാര്‍ കേസ് രജിസ്റ്റര്‍ ചെയ്ത് അന്വേഷണം ആരംഭിച്ചു. പോലീസ് ഇന്‍സ്പെക്ടര്‍ സി. എല്‍. സുധീറിന്‍റെ നേതൃത്വത്തിലുള്ള അന്വേഷണസംഘം പ്രതികള്‍ക്കായി തെരച്ചില്‍ നടത്തി വരവേ, വിഷ്ണുവിനെ എലിക്കോട് നിന്നും കസ്റ്റഡിയില്‍ എടുത്തു. പോലീസ് ഇന്‍സ്പെക്ടറുടെ നേതൃത്വത്തില്‍ എസഐ അനില്‍കുമാറാണ് വിഷ്ണുവിനെ കസ്റ്റഡിയിലെടുത്തത്.

ജന്മാഷ്ടമിനാളില്‍ സദ്യയുണ്ട്, തൃപ്തരായി ഭക്തജനങ്ങൾ

ആറന്മുള: കണ്ണന്‍റെ ജന്മനാളില്‍ വിഭവസമൃദ്ധമായ സദ്യയുണ്ട് തൃപ്തരായി ഭക്തജനങ്ങള്‍ തൂശനിലയില്‍ വിളമ്പിയ വിഭവങ്ങളെല്ലാം മതിയാവോളം ആസ്വദിച്ചാണ് വിദൂരങ്ങളില്‍ നിന്നെത്തിയവര്‍ പോലും മടങ്ങിയത്. കുത്തരിച്ചോറാനൊപ്പം വറുത്ത എരിശേരി, തോരന്‍, കാളൻ, അവിയല്‍, സാന്പാര്‍, പച്ചടി, കിച്ചടി, അച്ചാറ് തുടങ്ങി ഇവയുടെ വ്യത്യസ്ത രുചികളോടെയും വിഭവങ്ങളോടെയുമാണ് തയാറാക്കി നല്‍കിയത്. കൂടാതെ ഉപ്പേരി വിഭവങ്ങളും പപ്പടം, വടയും ഉണ്ണിയപ്പവും കരിന്പുമെല്ലാം വിഭവങ്ങളുടെ കൂട്ടത്തിലെത്തി. അമ്പലപ്പുഴ പാല്‍പ്പായസം അടക്കം പായസങ്ങളിലും വ്യത്യസ്തത നിറഞ്ഞുനിന്നു. കൂടാതെ ആറന്മുളയില്‍ മാത്രമായുള്ള വിഭവങ്ങള്‍ വള്ളസദ്യയുടെ ഭാഗമായി വിളമ്പ ക്ഷേത്രത്തിനുള്ളില്‍ സി. കെ. ഹരിചന്ദ്രന്‍ നായരുടെയും പുറത്തുള്ള സദ്യാലയങ്ങളില്‍ അനീഷ് ചന്ദ്രന്‍ നായരുടെയും നേതൃത്വത്തിലാണ് സദ്യവട്ടങ്ങള്‍ ഒരുക്കി വിളമ്പിയത്. അമ്പലപ്പുഴ അരവിന്ദാക്ഷന്‍ നായരുടെ നേതൃത്വത്തിലാണ് അമ്പലപ്പുഴ പാല്‍പ്പായസം തയാറാക്കി. രാവിലെ ആരംഭിച്ച സമൂഹസദ്യ ഉച്ചകഴിഞ്ഞാണ് പൂര്‍ത്തിയായത്. ആനക്കൊട്ടിലില്‍ എത്തി ഭദ്രദീപം തെളിയിച്ച് തൂശനിലയില്‍ വിഭവങ്ങള്‍ വിശിഷ്ടാതിഥികള്‍ വിളമ്പിയതോടെയാണ് സദ്യ ആരംഭിച്ചത്. മന്ത്രിമാരായ വി.എൻ. വാസവന്‍, പി. പ്രസാദ്, മുന്‍ എംഎല്‍എമാരായ രാജു ഏബ്രഹാം, മാലേത്ത് സരളാദേവി, എ. പത്മകുമാർ, ജില്ലാ പഞ്ചായത്ത് മെംബര്‍മാരായ ആര്‍ അജയകുമാർ, ഓമല്ലൂര്‍ ശങ്കരന്‍, തോട്ടപ്പുഴശേരി ഗ്രാമപഞ്ചായത്ത് പ്രസിഡന്‍റ് കൃഷ്ണകുമാര്‍, ശ്രീ വിജയാനന്ദാശ്രമം മഠാധിപതി മാതാ കൃഷ്ണാനന്ദ പൂര്‍ണിമാമയി ജില്ലാ പോലീസ് മേധാവി ആർ. ആനന്ദ് തുടങ്ങിയവര്‍ പങ്കെടുത്തു. പള്ളിയോടങ്ങളില്‍ എത്തിയവരെ ദക്ഷിണ നല്‍കി സ്വീകരിച്ചു. മന്ത്രി പി. പ്രസാദും കരക്കാരെ സ്വീകരിക്കാന്‍ ക്ഷേത്രക്കടവിലെത്തി. വഞ്ചിപ്പാട്ടു പാടി ക്ഷേത്ര വളപ്പില്‍ പ്രവേശിച്ചകരക്കാര്‍ വലംവച്ച് തൊഴുതശേഷമാണ് സദ്യയില്‍ പങ്കാളികളായത്.

വിദ്യാഭ്യാസ മന്ത്രിയുടെ പ്രസ്താവന പ്രതിഷേധകരം: എഎച്ച്എസ്ടിഎ

തിരുവല്ല: അധ്യാപകർ വിദ്യാഥികളുടെ അടികൊണ്ട് വീണാലും പ്രതികരിക്കരുതെന്ന വിദ്യാഭ്യാസ മന്ത്രിയുടെ പ്രസ്താവന നിരുത്തരവാദപരമാണെന്ന് എയ്ഡഡ് ഹയർ സെക്കൻഡറി ടീച്ചേഴ്സ് അസോസിയേഷൻ. അധ്യാപകരെ ആക്രമിക്കാൻ വിദ്യാർഥികളെ പ്രോത്സാഹിപ്പിക്കുന്ന പ്രസ്താവന പിൻവലിച്ച് മന്ത്രി അധ്യാപക സമൂഹത്തോട് മാപ്പ് പറയണം. അധ്യാപകർക്ക് ഭയരഹിതമായി ജോലി ചെയ്യാനുള്ള സാഹചര്യം ഒരുക്കേണ്ട വിദ്യാഭ്യാസമന്ത്രി, അധ്യാപകരിൽ ഭയപ്പാട് സൃഷ്ടിക്കുന്നതിന്‍റെ ഉദ്ദേശ്യം സംശയകരമാണ്. നിരവധി വിഷയങ്ങളിൽ അധ്യാപകരെ ശത്രുപക്ഷത്ത് നിർത്തുന്ന നിലപാടുകളാണ് വകുപ്പുമന്ത്രി തുടർച്ചയായി സ്വീകരിക്കുന്നതെന്ന് അസോസിയേഷൻ കുറ്റപ്പെടുത്തി. കുട്ടിയുടെ മർദ്ദനമേറ്റ അധ്യാപകനെ സസ്പെൻഡ് ചെയ്ത നടപടി വിദ്യാഭ്യാസ വകുപ്പ് പിൻവലിക്കണം. മാറിവരുന്ന സാമൂഹ്യ സാഹചര്യത്തിൽ വിദ്യാർഥി മർദ്ദനങ്ങളി ൽ നിന്നു കള്ളപരാതികളിൽ നിന്നു അധ്യാപകരെ സംരക്ഷിക്കാൻ അടിയന്തരമായി നിയമ നിർമാണം നടത്തണമെന്നും എഎച്ച്എസ്ടിഎ ജില്ലാ പ്രസിഡന്‍റ് പി. ചാന്ദിനി, പ്രിൻസിപ്പൽ ഫോറം കൺവീനർ ജയ മാത്യൂസ്, ജില്ലാ ട്രഷറർ വിനു ഗോപാൽ എന്നിവർ ആവശ്യപ്പെട്ടു.

വീഥികള്‍ അമ്പാടികളായി, നാടെങ്ങും ശോഭായാത്ര

പത്തനംതിട്ട: ശ്രീകൃഷ്ണജയന്തി ദിനത്തില്‍ വീഥികളെ അമ്പാടികളാക്കി നാടെങ്ങും ശോഭായാത്രകൾ. ഉണ്ണിക്കണ്ണന്മാരും ഗോപികമാരും അണിനിരന്ന ശോഭായാത്രകള്‍ രാത്രിവരെ നീണ്ടുനിന്നു. മഹാശോഭായാത്രകളും ഉപശോഭായാത്രകളും നടന്നു. ഉപയാത്രകള്‍ സംഗമിച്ച് പ്രധാന ടൗണുകളില്‍ മഹാശോഭായാത്രയായി മാറി. അമ്പതോളം മഹാശോഭായാത്രകള്‍ പത്തനംതിട്ട ജില്ലയില്‍ നടന്നു. വിവിധ കലാപരിപാടികളും ഉറിയടി ഉള്‍പ്പെടെയുള്ളവയും ഇതോടനുബന്ധിച്ച് ക്രമീകരിച്ചിരുന്നു. അമ്മമാരും കുട്ടികളും അടക്കം പങ്കാളികളായി. പത്തനംതിട്ട, ഓമല്ലൂർ, വടശേരിക്കര, കോന്നി, റാന്നി, കോഴഞ്ചേരി, അടൂർ, പന്തളം, തിരുവല്ല, മല്ലപ്പള്ളി, ചാലാപ്പള്ളി തുടങ്ങിയ സ്ഥലങ്ങളില്‍ മഹാശോഭായാത്രകള്‍ നടന്നു. തിരുവല്ല: ഉണ്ണിക്കണ്ണനും കൂട്ടുകാരും നാടുംനഗരവും കീഴടക്കി. ഉണ്ണിക്കണ്ണന്മാരും ഗോപികമാരും അവതാരകഥകള്‍ പുനരാവിഷ്‌കരിച്ച നിശ്ചലദൃശ്യങ്ങളും ആഘോഷത്തിന് മാറ്റുകൂട്ടി. വിവിധ ബാലഗോകുലങ്ങളുടെ നേതൃത്വത്തില്‍ ആയിരങ്ങളെ പങ്കെടുപ്പിച്ച ശോഭായാത്രകള്‍ നഗര, ഗ്രാമവീഥികളില്‍ വര്‍ണക്കാഴ്ചയായി. നാമജപ സങ്കീര്‍ത്തനങ്ങളും ഭജനകീര്‍ത്തനങ്ങളും അകമ്പടിയായി. ഉണ്ണിക്കണ്ണന്മാര്‍, രാധാകൃഷ്ണ നൃത്തം നശ്ചല ദൃശ്യങ്ങൾ, പുരാണ കലാരൂപങ്ങള്‍, വാദ്യ മേളങ്ങള്‍ എന്നിവ ശോഭയാത്രയുടെ പകിട്ട് വര്‍ധിപ്പിച്ചു. കാവുംഭാഗം ഏറങ്കാവ് ക്ഷേത്രത്തിന് മുന്നില്‍ നിന്ന് തുടങ്ങിയ ശോഭായാത്ര ശ്രീരാമകൃഷ്ണാശ്രമം മഠാധിപതി സ്വാമി നിര്‍വിണാനന്ദ ഉദ്ഘാടനം ചെയ്തു. വിവിധ ഗോകുലങ്ങളില്‍ നിന്ന് ആരംഭിച്ച ശോഭായാത്രകള്‍ തിരു എറങ്കാവ് ജംഗ്ഷനില്‍ സംഗമിച്ചു. തുടര്‍ന്ന് എഴിഞ്ഞിലും വിവേകാനന്ദ, ആലംതുരുത്തി ശ്രീഭദ്ര, മന്നംകരച്ചിറ ശ്രീശങ്കര, മുത്തൂര്‍ ശ്രീഭദ്ര കുറ്റപ്പുഴ, പെരുന്തുരുത്തി, ചാലക്കുഴി, മീന്തലക്കര ശ്രീധര്‍മ്മശാസ്താ, ആമല്ലൂര്‍ എന്നീ ശോഭായാത്രകള്‍ ദീപാ ജംഗ്ഷനില്‍ സംഗമിച്ച് മഹാശോഭായാത്രയായി തിരുവല്ല ശ്രീവല്ലഭക്ഷേത്രാങ്കണത്തില്‍ സമാപിച്ചു.

നോര്‍ക്ക ശില്‍പശാല 18 ന്

പത്തനംതിട്ട: ജില്ലയിലെ പ്രവാസികള്‍ക്കും പ്രവാസി സംരംഭകര്‍ക്കുമായി നോര്‍ക്ക റൂട്ട്‌സ്, സെന്‍റര്‍ ഫോര്‍ മാനേജ്‌മെന്‍റ് ഡവലപ്മെന്‍റ് (സിഎംഡി) എന്നിവയുടെ ആഭിമുഖ്യത്തില്‍ എന്‍ഡിപിആര്‍ഇഎം പരിശീലന പരിപാടി 18 ന് പത്തനംതിട്ട വൈഎംസിഎ ഹാളില്‍ സംഘടിപ്പിക്കും. സംരംഭം തുടങ്ങുന്നതിനു നടപ്പാക്കുന്നതിനും ആവശ്യമായ സാമ്പത്തിക, നിയമ, മാനേജ്‌മെന്‍റ് മേഖലകളെ സംബന്ധിച്ച മാര്‍ഗനിര്‍ദ്ദേശം നല്‍കും. രജിസ്‌ട്രേഷന്‍ 9.30 മുതൽ. ഫോണ്‍ 0471 2329738, +91-8078249505. www.norkaroots.kerala.gov.in സന്ദര്‍ശിച്ച് രജിസ്റ്റര്‍ ചെയ്യാം. കൃത്യമായ വായ്പാ തിരിച്ചടവിന് 15 ശതമാനം മൂലധന സബ്സിഡിയും (പരമാവധി മൂന്നു ലക്ഷം രൂപ വരെ) മൂന്നു ശതമാനം പലിശ സബ്സിഡിയും (ആദ്യത്തെ നാലു വര്‍ഷം) പദ്ധതിയിലൂടെ സംരംഭകര്‍ക്ക് ലഭിക്കും.

മാര്‍ത്തോമ്മാ സ്‌കൂള്‍സ് റിട്ട. ടീച്ചേഴ്‌സ് പഠനസമ്മേളനം

പത്തനംതിട്ട: അധ്യാപകര്‍ തങ്ങളുടെ ജീവിതം വാക്കിലൂടെയും പ്രവൃത്തിയിലൂടെയും മറ്റുള്ളവര്‍ക്ക് പ്രചോദനം സൃഷ്ടിക്കുന്നതാക്കി തീര്‍ക്കണമെന്ന് ഡോ.ജോസഫ് മാര്‍ ബര്‍ണബാസ് സഫ്രഗന്‍ മെത്രാപ്പോലീത്ത. മാര്‍ത്തോമ്മാ സ്‌കൂള്‍സ് റിട്ട. ടീച്ചേഴ്‌സ് ഫെലോഷിപ്പിന്‍റെ സംസ്ഥാനതല പഠന സമ്മേളനം പത്തനംതിട്ട മാര്‍ത്തോമ്മാ ഹയര്‍ സെക്കന്‍ഡറി സ്‌കൂളില്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സംസ്ഥാന പ്രസിഡന്‍റ് വി.എം. മത്തായിയുടെ അധ്യക്ഷതയില്‍ മലയാള മനോരമ അസി.എഡിറ്റര്‍ ബോബി ഏബ്രഹാം ക്ലാസിന് നേതൃത്വം നല്‍കി. സംസ്ഥാന സെക്രട്ടറി സജി ജോൺ, ട്രഷറാര്‍ കെ.ജി.തോമസ്, വി.വി. മേരിക്കുട്ടി, എ.വി.ജോര്‍ജ്, എ.ടി.ജോൺ, എന്‍.ടി.മാത്യു, ടെന്‍സ് ടി. ബേബി, സെനു തോമസ്, വാളകം ജോൺ, എം.ജെ. ജോസഫ്, എം. ചെറിയാൻ, പ്രഥമാധ്യാപകരായ മിനി തോമസ്, ജിജി മാത്യു സ്‌ക്കറിയ എന്നിവര്‍ പ്രസംഗിച്ചു.

പുനരൈക്യ വാര്‍ഷിക ആശംസാഗാനം പ്രകാശനം ചെയ്തു

പത്തനംതിട്ട: പുനരൈക്യ വാര്‍ഷിക ആഘോഷങ്ങളുടെ ആശംസാഗാനം സിഡിയുടെ പ്രകാശനം ചീക്കനാല്‍ സെന്‍റ് പീറ്റേഴ്‌സ് പള്ളിയില്‍ നടന്നു. യൂഹാനോന്‍ മാര്‍ ക്രിസോസ്റ്റം മെത്രാപ്പോലീത്ത, ബഥനി സന്യാസസമൂഹം സുപ്പിരീയര്‍ ജനറാള്‍ ഫാ.വര്‍ഗീസ് കുറ്റിയില്‍ ഒഐസിക്കും ബഥനി സന്യാസിനി സമൂഹം പത്തനംതിട്ട പ്രൊവന്‍സ് മദര്‍ പ്രൊവിന്‍ഷ്യല്‍ ആഗ്‌നസറ്റ് എസ്‌ഐസിക്കും സിഡി നല്‍കിയാണ് പ്രകാശനം നിര്‍വഹിച്ചത്. ആശാ റാണി രചിച്ച ഗാനങ്ങളാണ് ആശംസ സിഡിയില്‍ ഉള്‍പ്പെടുത്തിയിട്ടുള്ളത്. ഫാ. വര്‍ഗീസ് തയ്യില്‍ സംഗീതം നല്‍കി. അഞ്ചു ജോസഫ്, അരുണ്‍കുമാര്‍ എന്നിവരാണ് പാടിയിത്.

പുനരൈക്യ വാര്‍ഷികം: ഇടവകതല ആഘോഷങ്ങള്‍ക്കു തുടക്കം

പത്തനംതിട്ട: അടൂരില്‍ 16ന് ആരംഭിക്കുന്ന 95 ാമത് പുനരൈക്യ വാര്‍ഷികത്തിന്‍റെ ആതിഥേയ രൂപതയായ പത്തനംതിട്ടയിലെ മലങ്കര കത്തോലിക്കാ ഇടവകകളില്‍ ആഘോഷ പരിപാടികള്‍ക്ക് ഇന്നലെ തുടക്കമായി. ധന്യന്‍ മാര്‍ ഈവാനിയോസ് മെത്രാപ്പോലീത്തയ്‌ക്കൊപ്പം ആദ്യം പുനരൈക്യപ്പെട്ട അഞ്ചു പേരില്‍ ഒരാളായ ഫാ. ജോണ്‍ കുഴിനാപ്പുറത്ത് ഒഐസിയുടെ മാതൃ ഇടവകയായ ഓമല്ലൂര്‍ ചീക്കനാല്‍ സെന്‍റ് പീറ്റേഴ്‌സ് മലങ്കര സുറിയാനി കത്തോലിക്കാ പള്ളിയില്‍ ഇടവകതല പുനരൈക്യ ആഘോഷങ്ങളുടെ രൂപതാതല ഉദ്ഘാടനം നടന്നു. പത്തനംതിട്ട രൂപതയുടെ പ്രഥമ അധ്യക്ഷന്‍ യൂഹാനോന്‍ മാര്‍ ക്രിസോസ്റ്റം മെത്രാപ്പോലീത്ത വിശുദ്ധ കുര്‍ബാനയ്ക്കു മുഖ്യകാര്‍മികത്വം വഹിച്ചു. പത്തനംതിട്ട രൂപതാധ്യക്ഷന്‍ സാമുവേല്‍ മാര്‍ ഐറേനിയോസ് മെത്രാപ്പോലീത്ത വചന സന്ദേശം നല്‍കി. ബഥനി ആശ്രമം സുപ്പീരിയര്‍ ജനറല്‍ ഫാ. വര്‍ഗീസ് കുറ്റിയില്‍ ഒഐസി, ഫാ.ജോണ്‍ കുഴിനാപ്പുറം അനുസ്മരണം നടത്തി. പത്തനംതിട്ട രൂപത വികാരി ജനറാള്‍ ഫാ. വര്‍ഗീസ് മാത്യു കാലായില്‍ വടക്കേതിൽ, ബഥനി ആശ്രമം പ്രൊക്കുറേറ്റര്‍ ജനറാള്‍ ഫാ. ജോണ്‍ തുണ്ടിയത്ത് ഒഐസി, ഫാ. ജോണ്‍ വട്ടപ്പറമ്പില്‍ ഒഐസി, ഫാ. വര്‍ഗീസ് ചാമക്കാലായിൽ, ഫാ. മാത്യു പടയാനിക്കല്‍, ഫാ. തോമസ് വടക്കേക്കര, ഫാ. ഐവാന്‍ പുതുപ്പറമ്പില്‍ എന്നിവര്‍ വിശുദ്ധ കുര്‍ബാനയില്‍ സഹകാര്‍മികരായിരുന്നു. ചീക്കനാല്‍ ഇടവക വികാരി ഫാ. ജോയ്‌സി പുതുപ്പറമ്പിലിന്‍റെ നേതൃത്വത്തില്‍ ഇടവകയിലെ വിശ്വാസ സമൂഹം ഒന്നാകെ ശുശ്രൂഷകളില്‍ പങ്കുചേര്‍ന്നു. 16 മുതല്‍ 20 വരെ അടൂര്‍ ഓള്‍ സെയിന്‍റ്സ് സ്‌കൂളില്‍ നടക്കുന്ന 95-ാം പുനരൈക്യ വാര്‍ഷിക ആഘോഷങ്ങള്‍ക്ക് മുന്നൊരുക്കമായി പത്തനംതിട്ട രൂപതയിലെ 100 പള്ളികളിലും ഇന്നലെ വിശുദ്ധ കുര്‍ബാനയോടനുബന്ധിച്ച് പരേതരായ ഇടയ ശ്രേഷ്ഠരുടെ അനുസ്മരണവും കാതോലിക്കാ പതാക ഉയര്‍ത്തലും നടന്നു.

കോയിപ്രത്ത് യുവാക്കള്‍ക്ക് ക്രൂരമര്‍ദനം : കൂടുതൽ വിവരങ്ങൾ പുറത്ത്

ദമ്പതികളെക്കുറിച്ച് വിശദമായ അന്വേഷണം കോഴഞ്ചേരി: കോയിപ്രം ആന്താലിമണ്ണില്‍ ഹണിട്രാപ്പില്‍ കുടുക്കി യുവാക്കളെ അതിക്രൂരമായ മര്‍ദനത്തിനിരയാക്കിയ സംഭവത്തില്‍ കൂടുതല്‍ വിവരങ്ങള്‍ പുറത്ത്. അതിക്രൂര മര്‍ദനം സംബന്ധിച്ച് ഇരയായ റാന്നി സ്വദേശിയായ യുവാവ് പോലീസിനു നല്കിയ മൊഴി വിശ്വാസത്തിലെടുത്തുകൊണ്ടാണ് പോലീസ് അന്വേഷണം പുരോഗമിക്കുന്നത്. സൈക്കോ മനോനിലയിലുള്ള യുവദമ്പതികളാണ് യുവാക്കളെ അതിക്രൂര പീഡനത്തിനിരയാക്കിയതെന്നാണ് പോലീസ് പറയുന്നത്. കോയിപ്രം ആന്താലിമണ്ണ് സ്വദേശികളായ ജയേഷ്, ഭാര്യ രശ്മി എന്നിവരാണ് അറസ്റ്റിലായത്. കൂടുതല്‍ പീഡിപ്പിച്ചത് രശ്മിയാണെന്നും ജനനേന്ദ്രിയത്തില്‍ സ്റ്റാപ്ലര്‍ പിന്‍ അടിച്ചത് രശ്മിയാണെന്നും നഖത്തില്‍ മുട്ടുസൂചി തറച്ചും പീഡിപ്പിച്ചെന്നും റാന്നി സ്വദേശി പറഞ്ഞു. കമ്പികൊണ്ട് തുടരെ അടിച്ചു. ഇതിനിടെ മുറിവില്‍ മുളക് സ്‌പ്രേ ചെയ്തു. ദേഹമാസകലം ഗുരുതര പരിക്കുകളാണുള്ളത്. മര്‍ദനത്തില്‍ ആലപ്പുഴ സ്വദേശിയുടെ ഒരു കണ്ണിന്‍റെ കാഴ്ച ഭാഗികമായി നഷ്ടപ്പെട്ടു. നട്ടെല്ലിന് പൊട്ടലുണ്ട്. വാരിയെല്ലിന് പൊട്ടലുണ്ട്. കെട്ടിത്തൂക്കിയിട്ടാണ് മര്‍ദിച്ചത്. മുന്‍ വൈരാഗ്യമൊന്നും ഉണ്ടായിരുന്നില്ല. തിരുവോണ ദിവസം വീട്ടിലേക്ക് പോയത് പരിചയത്തിന്‍റെ പുറത്താണെന്ന് പറയുന്നു. ജയേഷിന്‍റെ കൂടെ ഇയാള്‍ ജോലി ചെയ്തിട്ടുണ്ട്. രശ്മിയുമായി അടുത്ത പരിചയത്തിലുമായിരുന്നു യുവാവ്. ജനനേന്ദ്രിയത്തിന് പുറമേ ദേഹമാസകലം സ്റ്റേപ്ലര്‍ പിന്നുകൾ അടിച്ചു കയറ്റി. കൊല്ലുമെന്ന ഭയത്തില്‍ പുറത്താരോടും പറഞ്ഞില്ല. വീഡിയോ ദൃശ്യങ്ങള്‍ പുറത്ത് വീടുമെന്ന് ഭീഷണിപ്പെടുത്തിയിരുന്നു. യുവാവ് പറഞ്ഞു. ബ്ലേഡ് വെച്ച് വരയുകയും കണ്ണിന് അടക്കം പരിക്കേറ്റെന്നും പറയുന്നു. ക്രൂരമര്‍ദ്ദനത്തിനു മുന്‍പ് ആഭിചാരക്രിയകള്‍ പോലും നടത്തിയെന്നും ഇലന്തൂരിലെ നരബലി പോലെയുള്ള സാഹചര്യമായിരുന്നു അവിടെയുണ്ടായിരുന്നതെന്നും മരിച്ചുപോയ ആരൊക്കെയൊ ദേഹത്തുകയറിയതു പോലെയാണ് അവര്‍ സംസാരിച്ചതെന്നും യുവാവ് പറഞ്ഞു. ഓണദിവസം രാവിലെ ജയേഷുമൊത്ത് മദ്യപിച്ചശേഷമാണ് വീട്ടിലെത്തിയത്. സംസാരിക്കുന്നതിനിടിയില്‍ പെട്ടെന്ന് പെപ്പര്‍ സ്‌പ്രേ അടിച്ചു. അപ്രതീക്ഷിതമായി കൈകെട്ടി പിന്നീട് കയറില്‍ കെട്ടിത്തൂക്കുകയും മര്‍ദിക്കുകയുമായിരുന്നുവെന്നാണ് മൊഴി.. പ്രതികള്‍ക്ക് മനോവൈകല്യമുണ്ടെന്ന സംശത്തിലാണ് പോലീസ്. റാന്നി സ്വദേശിയുടെ ജനനേന്ദ്രിയത്തിലാണ് 23 സ്റ്റാപ്ലര്‍ പിന്നുകള്‍ അടിച്ചത്. രശ്മിയുമായി ലൈംഗിക ബന്ധത്തിലേ‍പ്പെടുന്നതായി അഭിനയിപ്പിക്കുകയും അതിന്‍റെ ദൃശ്യങ്ങള്‍ ഫോണില്‍ പകര്‍ത്തുകയും ചെയ്ത ശേഷമാണ് ദമ്പതികള്‍ യുവാവിനെ മര്‍ദിച്ചതെന്നാണ് വിവരം. യുവാവിന്‍റെ പക്കല്‍ നിന്നും പണവും ഐഫോണും അടക്കമുള്ള സാധനങ്ങള്‍ പ്രതികള്‍ തട്ടിയെടുക്കുകയും ചെയ്തു. സമാനമായ രീതിയില്‍ ദമ്പതികളുടെ മര്‍ദനമേറ്റ ആലപ്പുഴ സ്വദേശിയെ കണ്ടെത്തിയാണ് പോലീസ് മൊഴിയെടുത്തത്. ഇയാള്‍ കേസ് നല്കാന്‍പോലും തയാറല്ലായിരുന്നു. 19 കാരനായ യുവാവിനാണ് മര്‍ദമമേറ്റത്. കഴിഞ്ഞ ഒന്നിനാണ് ഇയാള്‍ക്ക് മര്‍ദനമേറ്റത്. പരിചയം മുതലെടുത്ത് ഹണി ട്രാപ്പ് മോഡല്‍ കെണിയൊരുക്കി ജയേഷ് ഇടയ്ക്ക് ബെംഗളൂരുവിലും മൈസൂരുവിലുമൊക്കെ ജോലി ചെയ്തിട്ടുണ്ട്. മര്‍ദനത്തിനിരയായ റാന്നി സ്വദേശിയായ യുവാവും ജയേഷും ഒപ്പം ജോലി ചെയ്തിട്ടുണ്ട്. റാന്നി സ്വദേശിയുടെ ബന്ധുവാണ് മര്‍ദത്തിനിരയായ ആലപ്പുഴ സ്വദേശി. രണ്ടുപേര്‍ക്കും രശ്മിയുമായി ഫോണ്‍ വഴി പരിചയമുണ്ട്. ഹണി ട്രാപ്പ് മോഡലില്‍ യുവാക്കളെ കുരുക്കാന്‍ വേണ്ടി രശ്മിയുമായി ഫോണ്‍ വഴി ബന്ധമുണ്ടാക്കി കെണിയൊരുക്കിയതായിരിക്കാമെന്നാണ് പോലീസ് പറയുന്നത്. നേരിട്ടത് കൊടിയ മര്‍ദ്ദനമാണെന്നാണ് റാന്നി സ്വദേശിയായ യുവാവ് വെളിപ്പെടുത്തിയത്. റാന്നി സ്വദേശിയെ തിരുവോണദിവസംവീട്ടിലേക്ക് ക്ഷണിക്കുകയായിരുന്നു. വീട്ടുമുറ്റത്ത് എത്തിയപ്പോള്‍ തന്നെ സംശയങ്ങള്‍ തോന്നിയിരുന്നുവെന്ന് യുവാവ് പറഞ്ഞു. കഴുത്തില്‍ കത്തി വച്ച ശേഷം വിവസ്ത്രനാക്കി ഭാര്യക്കൊപ്പം കട്ടിലില്‍ കിടക്കാന്‍ ജയേഷ് ഭീഷണിപ്പെടുത്തി. ലൈംഗികബന്ധത്തില്‍ ഏര്‍പ്പെടുന്നതായി അഭിനയിക്കാന്‍ പറഞ്ഞു. അതിനുശേഷം ഉത്തരത്തില്‍ കെട്ടിത്തൂക്കി മര്‍ദിച്ചുവെന്നും മനോനില തെറ്റിയവരെപോലെയാണ് പെരുമാറിയിരുന്നതെന്നും റാന്നി സ്വദേശി പറഞ്ഞു. ആഭിചാരക്രിയകളൊക്കെ നടത്തിയായിരുന്നു മര്‍ദനമെന്നും റാന്നി സ്വദേശി പറഞ്ഞു. മര്‍ദനത്തിനിരയാക്കിയശേഷം വഴിയില്‍ ഉപേക്ഷിച്ചു ജനനേന്ദ്രിയത്തില്‍ മുളകു സ്‌പ്രേ അടിച്ച ശേഷം 23 സ്റ്റേപ്ലര്‍ പിന്‍ അടിച്ചു കയറ്റി. രശ്മിയാണ് ഈ ക്രൂരത ചെയ്തതെന്നാണ് യുവാവിന്‍റെ വെളിപ്പെടുത്തല്‍. സെപ്റ്റംബര്‍ ഒന്നിന് മര്‍ദ്ദനമേറ്റ ആലപ്പുഴ സ്വദേശിക്ക് ഒരു കണ്ണിന്‍റെ കാഴ്ച പകുതി നഷ്ടമായി. നട്ടെല്ലടക്കം പൊട്ടലുണ്ട്. മര്‍ദ്ദിച്ചശേഷം യുവാക്കളെ വഴിയരികിൽ തള്ളി. നഗ്‌ന ദൃശ്യങ്ങള്‍ പുറത്തുവരുമെന്ന് ഭീഷണിപ്പെടുത്തിയതിനാല്‍ യുവാക്കള്‍ ആരോടും പരാതിപ്പെട്ടില്ല. റാന്നി സ്വദേശിയെ വഴിയരികില്‍ നിന്ന് പുതമണ്‍ ഭാഗത്തള്ള ഓട്ടോറിക്ഷ തൊഴിലാളികളാണ് ആശുപത്രിയില്‍ എത്തിച്ചത്. ജയേഷിനെയും ഭാര്യയെയും ഭയന്ന് ആദ്യം കളവായ മൊഴിയാണ് റാന്നി സ്വദേശി നല്‍കിയത്. വിശദമായ അന്വേഷണത്തിലാണ് കോയിപ്രം ആന്താലിമണ്‍ സ്വദേശികളായ ജയേഷിനെയും ഭാര്യ രശ്മിയെയും പോലീസ് കസ്റ്റഡിയിലെടുക്കുന്നത്. ദുരൂഹതകള്‍ ബാക്കി അയല്‍ക്കാരുമായി ബന്ധമില്ലാതെയാണ് ജയേഷും ഭാര്യ രശ്മിയും താമസിച്ചിരുന്നത്. പലദിവസങ്ങളിലും ആഭിചാരക്രിയകള്‍ നടന്നിരുന്നതായി അയല്‍വാസികള്‍ പറയുന്നു. സൈക്കോ മനോനിലയുള്ള ദമ്പതികളാണ് ഇവരെന്നും ഇവരുടെ ജീവിതശൈലിയിലടക്കം അടിമുടി ദുരൂഹതയുണ്ടെന്നുമാണ് പോലീസ് പറയുന്നത്. അതിക്രൂരമായ മര്‍ദ്ദനങ്ങള്‍ ഒന്നും തൊട്ട് അയല്‍പക്കത്തെ വീട്ടുകാര്‍ പോലും അറിഞ്ഞില്ല. ആരുമായി സഹകരിക്കാതെ ഒറ്റപ്പെട്ടാണ് ജയേഷും ഭാര്യയും താമസിക്കുന്നത്. ഇവരുടെ വീട്ടില്‍ നിന്ന് യുവാക്കളെ മര്‍ദിക്കാന്‍ ഉപയോഗിച്ച പ്ലെയര്‍ അടക്കമുള്ള വസ്തുക്കളും കണ്ടെത്തിയിട്ടുണ്ട്.

കൾച്ചറൽ ഫോറം ഓണാഘോഷം

കോന്നി: കൾച്ചറൽ ഫോറം സംഘടിപ്പിച്ച കോന്നി ഓണം 2025 സാഹിത്യകാരനും അധ്യാപകനുമായ പ്രീത് ചന്ദനപ്പള്ളി ഉദ്ഘാടനം ചെയ്തു. കൾച്ചറൽ ഫോറം ചെയർമാൻ റോബിൻ പീറ്റർ അധ്യക്ഷത വഹിച്ച സമ്മേളനത്തിൽ കൺവീനർ ബിനുമോൻ ഗോവിന്ദൻ, വൈസ് ചെയർമാൻ എസ്. സന്തോഷ് കുമാർ, എക്സിക്യൂട്ടീവ് കമ്മിറ്റി അംഗങ്ങളായ പി .ജയൻ, സിജിമോൾ മാത്യു, ജി. ശ്രീകുമാർ, ടി. ലിജ, ചിത്ര രാമചന്ദ്രൻ, ജോയൽ മാത്യു, പ്രവീൺ പ്ലാവിളയിൽ, ഐവാൻ വകയാർ, ബിജു വട്ടക്കുളഞ്ഞി, ഗീവർഗീസ്, സുജാത മോഹൻ, വി.എസ്. മനോജ് തുടങ്ങിയവർ പ്രസംഗിച്ചു. പരിപാടികളുടെ ഭാഗമായി കായികമത്സരങ്ങളും കലാപരിപാടികളും നടന്നു.

കെപിഎസ്ടിഎ സ്വദേശ് മെഗാ ക്വിസ് മത്സരം

കോന്നി: കെപിഎസ്ടിഎ അക്കാദമിക് കൗൺസിൽ സംഘടിപ്പിച്ച ഉപജില്ലാതല സ്വദേശ് മെഗാ ക്വിസ് ആവേശമായി. സമാപന സമ്മേളനം ബ്ലോക്ക് പഞ്ചായത്തംഗം പ്രവീൺ പ്ലാവിളയിൽ ഉദ്ഘാടനം ചെയ്തു. ഉപജില്ലാ പ്രസിഡന്‍റ് ഡി. രഞ്‌ജിനി അധ്യക്ഷത വഹിച്ചു. ബ്ലോക്ക് പഞ്ചായത്തംഗം ജോളി ഡാനിയൽ സമ്മാനദാനം നിർവഹിച്ചു. സെക്രട്ടറി ടോമിൻ പടിയറ, ജില്ലാ പ്രസിഡന്‍റ് ഫിലിപ്പ് ജോർജ്, ജെമി ചെറിയാൻ, സ്മിത ബേബി, മിലൻ ജോൺസൻ എന്നിവർ പ്രസംഗിച്ചു. വിവിധതലങ്ങളിൽ ഒന്നും രണ്ടും സ്ഥാനങ്ങൾ നേടിയവർ: എൽപി - നവമി എ. ശിവാനി (ജിഎൽപിഎസ്, കലഞ്ഞൂർ) പി.എസ്. സൂര്യനാഥ് (ജിഎൽപിഎസ്, കോന്നി). യുപി - എസ്.ദേവേന്ദു (ഗവ. മോഡൽ എച്ച്എസ്എസ്, കലഞ്ഞൂർ) ജൂവൽ മേരി ജോർജ് (ജിഎച്ച്എസ്എസ്, കോന്നി). എച്ച്എസ് - ദേവനന്ദന (ഗവ. മോഡൽ എച്ച്എസ്എസ്, കലഞ്ഞൂർ) എം.എസ്. അനുപ്രിയ ( ജിഎച്ച്എസ്എസ്, മാങ്കോട്). എച്ച്എസ്എസ് - വി. നിരഞ്ജൻ, അർജുൻ എസ് കുമാർ (ഇരുവരും ഗവ. മോഡൽ എച്ച് എസ്എസ്, കലഞ്ഞൂർ).

കെ.ജി. ജോർജ് ഫിലിം ഫെസ്റ്റിവലും പഠനവും 20, 21 തീയതികളിൽ

തിരുവല്ല: മധ്യതിരുവിതാംകൂറിന്‍റെ അഭിമാനമായ വിശ്വവിഖ്യാത ചലച്ചിത്ര സംവിധായകൻ കെ.ജി. ജോർജിന്‍റെ രണ്ടാം ചരമ വാർഷികത്തോടനുബന്ധിച്ച് എം.ജി. സോമൻ ഫൗണ്ടേഷന്‍റെ നേതൃത്വത്തിൽ സ്വപ്നാടനം എന്ന പേരിൽ കെ.ജി. ജോർജ് ഫിലിം ഫെസ്റ്റിവലും പഠനവും 20, 21 തീയതികളിൽ തിരുവല്ല ബിലിവേഴ്‌സ് മെഡിക്കൽ കോളജ് ആംഫി തിയറ്ററിൽ നടക്കും. 40 വർഷത്തിനു ശേഷമാണ് തിരുവല്ലയിൽ ഫെസ്റ്റിവൽ നടക്കുന്നത്. ആറു സിനിമകളാണ് പ്രദർശിപ്പിക്കുന്നത്. ഈ ചിത്രങ്ങളുമായി സഹകരിച്ച അഭിനേതാക്കളും സാങ്കേതിക പ്രവർത്തകരും നിരൂപകരും മേളയിൽ പങ്കെടുക്കും. 20നു രാവിലെ ഒന്പതിന് കോലങ്ങൾ പ്രദർശിപ്പിക്കും. 11ന് എം.ജി. സോമൻ ഫൗണ്ടേഷൻ ചെയർമാൻ ബ്ലെസിയുടെ അധ്യക്ഷതയിൽ കൂടുന്ന യോഗത്തിൽ ചലച്ചിത്ര അക്കാഡമി ചെയർമാൻ പ്രേംകുമാർ ഫിലിം ഫെസ്റ്റിവൽ ഉദ്ഘാടനം ചെയ്യും. തുടർന്നു നടക്കുന്ന ഓപ്പൺ ഫോറത്തിൽ മേനക സുരേഷും പഠനം ചലച്ചിത്ര നിരൂപകൻ വിജയകൃഷ്‌ണനും കെ.ജി. ജോർജിന്‍റെ ചലച്ചിത്ര പ്രബന്ധം ഡോ. സൈബാസ്റ്റ്യൻ കാട്ടടിയും അവതരിപ്പിക്കും. 1.45ന് "ഇരകൾ' സിനിമ പ്രദർശിപ്പിക്കും. 4.15ന് സിനിമാ ഫോട്ടോഗ്രാഫർ വേണുവിന്‍റെ നേതൃത്വത്തിൽ ചർച്ച. 5.30ന് ചലച്ചിത്രം - ആദാമിന്‍റെ വാരിയെല്ല്. 21ന് രാവിലെ ഒന്പതിന് ചലച്ചിത്രം - സ്വപ്നാടനം എന്നിവ പ്രദർശിപ്പിക്കും. 11ന് ഫെസ്റ്റിവലിന്‍റെ സമാപന സമ്മേളനത്തിൽ മന്ത്രി സജി ചെറിയാൻ മുഖ്യാതിഥിയാകും. മന്ത്രി കെ.ബി. ഗണേഷ് കുമാർ കെ.ജി. ജോർജ് ഫിലിം സ്റ്റഡി സെന്‍ററിന്‍റെ ഉദ്ഘാടനം നിർവഹിക്കും. ബിലിവേഴ്‌സ് ചർച്ച് മെഡിക്കൽ കോളജ് ഹോസ്‌പിറ്റൽ മാനേജർ ഫാ. സിജോ പന്തപ്പള്ളിൽ പ്രസംഗിക്കും. ഓപ്പൺ ഫോറത്തിൽ മല്ലിക സുകുമാരനും സിനിമയിലെ നായകൻ മോഹൻദാസും പങ്കെടുക്കും. 1.45ന് ചലച്ചിത്രം യവനിക, 4.15ന് തുടർന്ന് നടക്കുന്ന ഓപ്പൺ ഫോറത്തിൽ പഠനം കവിയൂർ ചലച്ചിത്രതാരവും നായികയുമായ ശിവപ്രസാദും നിർവഹിക്കും. 5.30ന് "മറ്റൊരാൾ' - ചലച്ചിത്രം പ്രദർശിപ്പിക്കും. കെ. ജി. ജോർജിന്‍റെ ജീവിതവും സിനിമയും സമഗ്രമായി പഠിച്ച് എം.ജി. സോമൻ ഫൗണ്ടേഷൻ ഇതിനോടൊപ്പം ഒരു റഫറൻസ് ഗ്രന്ഥവും തയാറാക്കും. സിനിമ ആസ്വാദനത്തിന് ചലച്ചിത്രോത്സവത്തിന്‍റെ താത്പര്യമുള്ളവരെ ഉൾപ്പെടുത്തി കെ.ജി. ജോർജ്സ് ഫിലിം സ്റ്റഡീസും തുടർച്ചയായിനടത്തും. എം.ജി. സോമൻ ഫൗണ്ടേഷൻ ചെയർമാൻ ബ്ലെസി, സെക്രട്ടറി എസ്. കൈലാസ്, മോഹൻ അയിരൂർ, കൺവീനർമാരായ സാജൻ വർഗീസ്, സുരേഷ് കാവുംഭാഗം, സാജൻ കെ.വർഗീസ്, ജോർജ് മാത്യു, പി. എം.അനീർ എന്നവർ പറഞ്ഞു.

വിദ്യാഭ്യാസമന്ത്രിയുടെ പ്രസ്താവന അക്രമങ്ങൾക്കുള്ള പ്രോത്സാഹനം: കെപിഎസ്ടിഎ

പത്തനംതിട്ട: അധ്യാപകന് അടി കിട്ടിയാലും വിദ്യാർഥികളെ ശാസിക്കാൻ പാടില്ലെന്ന വിദ്യാഭ്യാസമന്ത്രിയുടെ പ്രസ്താവന വിദ്യാലയങ്ങളിൽ അക്രമത്തെ പ്രോത്സാഹിപ്പിക്കുന്നതും ഭയം കൂടാതെ ജോലി ചെയ്യാനുള്ള അധ്യാപകരുടെ അവകാശ നിഷേധവുമെന്ന് കെപിഎസ്ടിഎ ജില്ലാ കമ്മിറ്റി. ഇത്തരം പ്രസ്താവനകൾ സാക്ഷര കേരളത്തിന് അപമാനമാണെന്നും മന്ത്രി പ്രസ്താവന പിൻവലിച്ച് പൊതുസമൂഹത്തോടു ക്ഷമാപണം നടത്തണമെന്നും കേരള പ്രദേശ് സ്കൂൾ ടീച്ചേഴ്സ് അസോസിയേഷൻ ജില്ലാ കമ്മിറ്റി ആവശ്യപ്പെട്ടു. കേരളത്തിൽ നടമാടുന്ന അക്രമങ്ങൾക്കും മയക്കുമരുന്ന് മാഫിയ വിളയാട്ടത്തിനും മന്ത്രിയുടെ പ്രസ്താവന കൂടുതൽ ഊർജം പകരുമെന്നും കെപിഎസ്ടിഎ അഭിപ്രായപ്പെട്ടു. കലാലയങ്ങളിലെ കോപ്പിയടി പിടികൂടിയാൽ അധ്യാപകനെതിരേ സ്ത്രീപീഡന പരാതി എഴുതിക്കൊടുക്കുകയും അച്ചടക്കം പാലിക്കാൻ പറഞ്ഞാൽ ആക്രമണം നടത്തുകയും ചെയ്യുന്ന വിദ്യാർഥികൾക്ക് ഒത്താശ ചെയ്യുന്ന, യാതൊരു നടപടിക്രമങ്ങളും പാലിക്കാതെ അധ്യാപകർക്കെതിരേ സസ്പെൻഷനും പ്രതികാര നടപടികളും സ്വീകരിക്കുന്ന ഭരണകൂടം കേരളത്തെ ഇരുണ്ട യുഗത്തിലേക്ക് കൊണ്ടുപോകാനാണ് ശ്രമിക്കുന്നതെന്നും കെപിഎസ്ടിഎ ചൂണ്ടിക്കാട്ടി. ജില്ലാ പ്രസിഡന്‍റ് ഫിലിപ്പ് ജോർജ് അധ്യഷത വഹിച്ചു. സെക്രട്ടറി വി.ജി. കിഷോർ, ട്രഷറർ പി. അജിത്ത് ഏബ്രഹാം, സംസ്ഥാന സമിതി അംഗങ്ങളായ എസ്. പ്രേം, വർഗീസ് ജോസഫ്, സി.കെ. ചന്ദ്രൻ, ബിറ്റി അന്നമ്മ തോമസ്, എസ്. ദിലീപ് കുമാർ, വി. ലിബികുമാർ എന്നിവർ പ്രസംഗിച്ചു.

ഏറത്ത് നെടുംകുന്നുമല ടൂറിസം പദ്ധതിക്ക് തുടക്കം

അടൂർ: ഏറത്ത് ഗ്രാമപഞ്ചായത്ത് പരിധിയിലെ നെടുംകുന്നുമല കേന്ദ്രീകരിച്ചുള്ള ടൂറിസം വികസന പദ്ധതിക്ക് തുടക്കമാകുന്നതായി ഡെപ്യൂട്ടി സ്പീക്കർ ചിറ്റയം ഗോപകുമാർ അറിയിച്ചു. പദ്ധതി പ്രവർത്തനങ്ങൾ ക്രമീകരിക്കുന്നതിന്‍റെ പ്രാഥമിക ഒരുക്കങ്ങൾ ക്രമീകരിക്കുന്നതിന് നിർവഹണച്ചുമതല ഏറ്റെടുത്തിട്ടുള്ള ഹിന്ദുസ്ഥാൻ ലാറ്റക്സ് ലിമിറ്റഡിന്‍റെ സിവിൽ എൻജിനിയറിംഗ് ടീമിനൊപ്പം ഡെപ്യൂട്ടി സ്പീക്കർ പദ്ധതി പ്രദേശം സന്ദർശിച്ചു. ‌3.5 കോടി രൂപ അടങ്കൽ തുകയുള്ള സമഗ്ര ടൂറിസം പദ്ധതിയുടെ പ്രാഥമിക ഘട്ടമായി 50 ലക്ഷംരൂപയുടെ പദ്ധതിക്കാണ് നിലവിൽ അനുമതി ലഭ്യമായത്. നിയമസഭാ സാമാജികൻ എന്ന നിലയിൽ ഡെപ്യൂട്ടിസ്പീക്കർ നൽകിയ 2023 -24 ബജറ്റ് നിർദേശത്തിന്‍റെ അടിസ്ഥാനത്തിൽ അനുവദിച്ച സമഗ്രപദ്ധതിയുടെ ഒന്നാം ഘട്ടം എന്ന നിലയിലാണ് പദ്ധതിക്ക് തുടക്കമാകുന്നത്. പ്രാഥമിക ഘട്ടത്തിൽ നെടുംകുന്നുമല വ്യൂ പോയിന്‍റിലേക്ക് എത്തിച്ചേരുന്നതിന് മൂന്നു മീറ്റർ വീതിയിലുള്ള 300 മീറ്റർ വഴി, വഴിയുടെ വശം ചേർന്ന് ഹാൻഡ് റെയിൽ സംവിധാനം, സീറ്റിംഗ് സംവിധാനങ്ങൾ, ടോയ്‌ലറ്റ്, മാലിന്യസംസ്കരണ ക്രമീകരണങ്ങൾ, വിശാലമായ ചിൽഡ്രൻസ് പാർക്ക് നിർമാണത്തിനായുള്ള പ്രാഥമിക അടിസ്ഥാന സൗകര്യങ്ങൾ അടക്കമുള്ള ഘടകങ്ങളാണ് ഉൾപ്പെടുത്തിയിരിക്കുന്നത്. പത്തനംതിട്ട ജില്ലാ ടൂറിസം ഡെവലപ്മെന്‍റ് കോർപറേഷൻ മുഖാന്തിരമാണ് അനുബന്ധ സമഗ്രപദ്ധതി വിഭാവനം ചെയ്തിരിക്കുന്നത്. തിരുവനന്തപുരം കേന്ദ്രീകരിച്ചുള്ള ഡിമെ ബാഗ് സൊലുഷൻ ലിമിറ്റഡ് കമ്പനിക്കാണ് ടെൻഡറിലൂടെ പദ്ധതിയുടെ നിർവഹണ കരാർ ലഭിച്ചത്. അടൂർ ടൗണിൽനിന്ന് ആറു കിലോമീറ്റർ മാത്രം ദൂരത്തായുള്ള ഈ പ്രദേശം ഭൂമിശാസ്ത്രപരമായ പ്രത്യേകതകൾകൊണ്ട് സാഹസിക ടൂറിസത്തിനടക്കം അനുയോജ്യ സാധ്യതകളുള്ള സ്ഥലമാണ്. ഒന്നാംഘട്ട പ്രാഥമിക പദ്ധതികൾ പൂർത്തീകരിച്ച് സമയബന്ധിതമായി സമഗ്ര ടൂറിസം പദ്ധതി നടപ്പിലാക്കുമെന്നും ഡെപ്യൂട്ടി സ്പീക്കർ പറഞ്ഞു. സമഗ്രപദ്ധതിയിൽ 12 മീറ്റർ വീതം ഉയരമുള്ള രണ്ടു വാച്ച് ടവറുകൾ, കുട്ടികൾക്കുള്ള അഡ്വഞ്ചറസ് അമ്യൂസ്മെന്റ് പാർക്ക്, ടൂറിസ്റ്റ് ഇൻഫർമേഷൻ സെന്‍റർ, സ്നാക് ബാർ, ലാൻഡ് സ്കേപ്പിംഗ്, ലൈറ്റ് ആൻഡ് സൗണ്ട് ഷോ, പാണ്ഡവരുടെ വനവാസവുമായി ബന്ധപ്പെട്ടുള്ള ശില്പ ചിത്രീകരണങ്ങളടക്കം പൂർത്തീകരിക്കുന്നതോടെ സംസ്ഥാനത്തെതന്നെ ശ്രദ്ധേയമായ ഒരു ടൂറിസം കേന്ദ്രമായി മാറുനനതിനുള്ള സാധ്യതയാണ് തെളിയുന്നതെന്നും ചിറ്റയം ഗോപകുമാർ അഭിപ്രായപ്പെട്ടു.

കോന്നി മെഡിക്കൽ കോളജിലെ ഓണാഘോഷം പരിധിക്കു പുറത്ത് പ്രതിഷേധിച്ച് രോഗികളും കൂട്ടിരിപ്പുകാരും

പത്തനംതിട്ട: കോന്നി സർക്കാർ മെഡിക്കൽ കോളജിലെ വിദ്യാർഥികളുടെ ഓണാഘോഷം അത്യാഹിത വിഭാഗത്തിനു സമീപം വരെ എത്തിയപ്പോൾ പ്രതിഷേധവുമായി രോഗികളും കൂട്ടിരിപ്പുകാരും. എംബിബിഎസ് വിദ്യാർഥികളാണ് ചെണ്ടമേളം അടക്കം ഉൾപ്പെടുത്തി ഓണാഘോഷം സംഘടിപ്പിച്ചത്. വലിയ ആഘോഷമാണ് ന‌ടത്തിയതെന്നും ഇതു രോഗികൾക്കും കൂ‌ട്ടിരിപ്പുകാർക്കും ബുദ്ധിമുട്ട് ഉണ്ടാക്കിയെന്നുമാണ് ആരോപണം. വലിയ ശബ്ദത്തോടെയുള്ള ആഘോഷത്തിൽ ബുദ്ധിമുട്ട് നേരിട്ടെന്ന് രോഗികളും കൂട്ടിരിപ്പുകാരും പറഞ്ഞു. ആശുപത്രിക്കു മുന്നിൽ ഓണാഘോഷം നടത്തുന്ന ദൃശ്യങ്ങൾ പുറത്തുവന്നിട്ടുണ്ട്. നേരത്തേ, വയനാട്ടിൽ ആരോഗ്യമന്ത്രിയുൾപ്പെടെ പങ്കെടുത്ത പരിപാടിയിലെ ആഘോഷം വിവാദമായിരുന്നു. ഇതിനുശേഷം ആശുപത്രികളിൽ ഇത്തരത്തിലുള്ള ആഘോഷങ്ങൾ ന‌ടത്തരുതെന്ന മുന്നറിയിപ്പ് നിലനിൽക്കുകയാണ്. ആശുപത്രിയിൽ തിരക്ക് കുറവായിരുന്നതിനാൽ ആഘോഷം കാന്പസിനുള്ളിൽനിന്ന് അത്യാഹിത വിഭാഗത്തിലേക്കും ഒപിയിലേക്കും നീളുകയായിരുന്നു. ഇന്നലെ രാവിലെ പത്തുമുതലാണ് ആഘോഷം നടന്നത്. അത്യാഹിത വിഭാഗത്തിന്‍റെ മുന്നിൽനിന്ന് ചെണ്ടമേളത്തോടുകൂടി തുറന്ന ജീപ്പിൽ മാവേലിയുമുൾപ്പെ‌ടെ ആയിരുന്നു ഘോഷയാത്ര. അത്യാഹിത വിഭാഗത്തിനു മുന്നിൽ ആഘോഷം ഏറെനേരം നീണ്ടതോടെയാണ് പ്രതിഷേധം ഉയർന്നത്. പിന്നീട് കാന്പസിലേക്കു പോകുകയും ചെയ്തു. ഓണാഘോഷം പരിധി വിടരുതെന്ന സെക്യൂരിറ്റി ജീവനക്കാരുടെ മുന്നറിയിപ്പ് വിദ്യാർഥികൾ അവഗണിച്ചതായും പറയുന്നു. എന്നാൽ, കോളജ് യൂണിയനും വിദ്യാർഥികളും ഇതംഗീകരിച്ചിട്ടില്ല. ആർക്കും ബുദ്ധിമുട്ടുണ്ടാക്കിയിട്ടില്ലെന്നും അത്യാഹിത വിഭാഗത്തിനു സമീപത്തുനിന്ന് ഘോഷയാത്ര ആരംഭിക്കുക മാത്രമേ ചെയ്തിട്ടുള്ളൂവെന്നും യൂണിയൻ ഭാരവാഹികൾ പറയുന്നു.

ക്യാപ്റ്റൻ രാജു പുരസ്കാരദാനം 17ന്

പത്തനംതിട്ട: സിനിമാ പ്രേക്ഷക കൂട്ടായ്മ ആറാമത് ക്യാപ്റ്റൻ രാജു പുരസ്കാരം മണിയൻപിള്ള രാജുവിന് 17ന് സമ്മാനിക്കും . വൈകുന്നേരം നാലിനു നടക്കുന്ന ചടങ്ങിൽ കേരള ചലച്ചിത്ര അക്കാഡമി ചെയർമാൻ പ്രേംകുമാർ പുരസ്കാരവും കേരള സാംസ്കാരിക പ്രവർത്തക ക്ഷേമനിധി ബോർഡ് ചെയർമാൻ മധുപാൽ പ്രശസ്തിപത്രവും മണിയൻപിള്ള രാജുവിന് സമ്മാനിക്കുമെന്ന് പ്രേക്ഷക കൂട്ടായ്മ ചെയർമാൻ സലിം പി. ചാക്കോയും കൺവീനർ പി. സക്കീർ ശാന്തിയും അറിയിച്ചു.

ശ്രീകൃഷ്ണ ജയന്തി ആഘോഷം ഇന്ന് 50 മഹാശോഭായാത്ര, 500 ഉപശോഭായാത്ര

പത്തനംതിട്ട: ബാലഗോകുലത്തിന്‍റെ നേതൃത്വത്തിൽ ശ്രീകൃഷ്ണജയന്തി ദിനമായ ഇന്നു വൈകുന്നേരം ജില്ലയിൽ വിവിധ കേന്ദ്രങ്ങളിൽ ശോഭാ യാത്രകൾ സംഘടിപ്പിക്കും. 50 മഹാശോഭായാത്രകളും 500 ഓളം ഉപ ശോഭായാത്രകളും വിവിധയിടങ്ങളിലായി നടക്കും. ജില്ലയിലെ 150 ബാലഗോകുലങ്ങളുടെയും വിവിധ ഹൈന്ദവ സംഘടനകളുടേയും നേതൃത്വത്തിലാണ് ശ്രീകൃഷ്ണജയന്തി ആഘോഷങ്ങൾ സംഘടിപ്പിച്ചിരിക്കുന്നത്. ഇന്നു പുലർച്ചെ മുതൽ ക്ഷേത്രങ്ങളിൽ വിശേഷാൽ പൂജകളും പ്രത്യേക വഴിപാടുകളും നടക്കും. പാൽപ്പായസം വിതരണം, പൊങ്കാല, നാരായണീയ പാരായണം കൃഷ്ണലീല, ഉറിയടി, തിരുവാതിര തുടങ്ങിയ പരിപാടികളുണ്ടാകും. പത്തനംതിട്ടയിൽ ടൗൺ, മലയാലപ്പുഴ, മൈലപ്ര, വള്ളിക്കോട്, ഓമല്ലൂർ, ചെന്നീർക്കര, ഇലന്തൂർ കൈപ്പട്ടൂർ, മഞ്ഞനിക്കര എന്നീ സ്ഥാനീയ സമിതികളിലാണ് വിപുലമായ രീതിയിൽ ശോഭായാത്രകൾ. വൈകുന്നേരം അഞ്ചിന് വെട്ടിപ്പുറം, പത്തനംതിട്ട ടൗൺ, മണ്ണാറമല , കല്ലറക്കടവ്, കണ്ണങ്കര എന്നിവിടങ്ങളിൽനിന്നുള്ള ശോഭായാത്രകൾ പത്തനംതിട്ട ജിയോ ഗ്രൗണ്ടിൽ സംഗമിച്ച് മഹാശോഭയാത്രയായി ശ്രീധർമശാസ്ത്ര ക്ഷേത്ര‌ത്തിൽ സമാപിക്കും. തുടർന്ന് ഉറിയടി, പ്രസാദ വിതരണം എന്നിവ നടക്കും. റാന്നി, വടശേരിക്കര, കോന്നി, അടൂർ, തിരുവല്ല, മല്ലപ്പള്ളി ടൗണുകൾ കേന്ദ്രീകരിച്ചും മഹാശോഭായാത്രകൾ ക്രമീകരിച്ചിട്ടുണ്ട്.

ആറന്മുളയിൽ അഷ്ടമിരോഹിണി വള്ളസദ്യ ഇന്ന്

ആറന്മുള: ആറന്മുള ക്ഷേത്രത്തിലെ അഷ്ടമിരോഹിണി വള്ളസദ്യക്കുള്ള ഒരുക്കങ്ങൾ പൂർത്തിയായി. ഇന്നലെ വൈകുന്നേരം അഞ്ചിന് ആദ്യ ചെമ്പ് അരി വേവിക്കാൻ തുടങ്ങി. അതു നേരം വെളുക്കുവോളം തുടർന്നുകൊണ്ടിരുന്നു. ക്ഷേത്രത്തിനുള്ളിൽ സി.കെ. ഹരിചന്ദ്രൻ നായരുടെയും പുറത്തുള്ള സദ്യാലയങ്ങളിൽ അനീഷ് ചന്ദ്രൻ നായരുടെയും നേതൃത്വത്തിലാണ് സദ്യവട്ടങ്ങൾ ഒരുക്കിയിരിക്കുന്നത്. ക്ഷേത്രത്തിന്‍റെ മൂന്നു ഭാഗത്തായി പള്ളിയോടങ്ങൾക്കും പ്രത്യേകം പ്രത്യേകം ഈ ചോറും വിഭവങ്ങളും പകർന്നുവയ്ക്കും. ആദ്യ ചെമ്പ് അരി ആനക്കൊട്ടിൽ വഞ്ചിപ്പാട്ട് പാടി സമർപ്പിച്ച ശേഷമാണ് ബാക്കി വിഭവങ്ങളുടെ പാചകം പൂർത്തിയാക്കിയത്. ഒരു ലക്ഷത്തിൽപ്പരം ആളുകൾ ഇക്കുറി സദ്യയിൽ പങ്കെടുക്കുമെന്ന് പ്രതീക്ഷിക്കുന്നു. നാല്പതിൽപ്പരം വിഭവങ്ങൾ അന്പലപ്പുഴ പാൽപ്പായസം ഉൾപ്പെടെ നാല്പതിൽപ്പരം വിഭവങ്ങളോടെയാണ് ആറന്മുള സദ്യ തയാറാക്കി നൽകുന്നത്. തൂശനിലയിൽ ഇവയെല്ലാം വിളന്പിനൽകും. പാടി ചോദിക്കുന്ന വിഭവങ്ങൾ കരക്കാർക്കു നൽകുന്ന രീതിയുമുണ്ട്. തോരൻ, കാളൻ, അവിയൽ, സാന്പാർ, പച്ചടി, കിച്ചടി, അച്ചാർ തുടങ്ങി ഇവയുടെ വ്യത്യസ്ത രുചികളോടെയും വിഭവങ്ങളോടെയുമാണ് തയാറാക്കി നൽകുന്നത്. കൂടാതെ ഉപ്പേരി വിഭവങ്ങളും പപ്പടം, വടയും ഉണ്ണിയപ്പവും കരിന്പുമെല്ലാം വിഭവങ്ങളുടെ കൂട്ടത്തിലെത്തും. പായസംതന്നെ വ്യത്യസ്തമായി തയാറാക്കി നൽകും. സദ്യക്കെത്തുന്നവർക്കെല്ലാം വിഭവങ്ങൾ ഉറപ്പാക്കി നൽകും. ക്ഷേത്രത്തിനുള്ളിൽ സി.കെ. ഹരിചന്ദ്രൻ നായരുടെയും പുറത്തുള്ള സദ്യാലയങ്ങളിൽ അനീഷ് ചന്ദ്രൻ നായരുടെയും നേതൃത്വത്തിലാണ് സദ്യവട്ടങ്ങൾ ഒരുക്കിയിരിക്കുന്നത്. അമ്പലപ്പുഴ അരവിന്ദാക്ഷൻ നായരുടെ നേതൃത്വത്തിലാണ് അമ്പലപ്പുഴ പാൽപ്പായസം തയാറാക്കുന്നത്. പള്ളിയോടങ്ങളിൽ എത്തുന്ന കരക്കാർക്കു ക്ഷേത്രത്തിന്‍റെ വടക്കും പടിഞ്ഞാറുമുള്ള മുറ്റത്ത് പ്രത്യേകം പ്രത്യേകം വിഭവങ്ങൾ കാലത്തെ ഒമ്പതിനു മുമ്പായി എത്തിച്ചുവയ്ക്കും. ക്ഷേത്രത്തിന്‍റെ തെക്കുഭാഗത്തുള്ള സദ്യാലയത്തിൽ ഭക്തജനങ്ങൾക്ക് തുടർച്ചയായി സദ്യ നൽകിക്കൊണ്ടിരിക്കും. നൂറിലധികം ആളുകളെ ഇതിനായി പ്രത്യേകം നിയോഗിച്ചിട്ടുണ്ട്. ചേനപ്പാടിയിൽനിന്നു തൈര് എത്തി പരന്പരാഗത ആചാരങ്ങളോടെ ചേനപ്പാടിയിൽനിന്ന് എത്തിച്ച തൈര് പള്ളിയോട സേവാസംഘം പ്രസിഡന്‍റ് കെ.വി. സാംബദേവന്‍റെ നേതൃത്വത്തിൽ ഇന്നലെ സ്വീകരിച്ചു. ആറന്മുളയിലെ അഷ്ടമിരോഹിണി വള്ളസദ്യക്കുള്ള തൈര് ചേനപ്പാടിയിൽനിന്നെത്തിക്കുന്ന രീതിയാണുള്ളത്. ഇതു പ്രത്യേകം തയാറാക്കി പാളയിലാക്കിയാണ് സമർപ്പിച്ചത്. ഘോഷയാത്രയായി കൊണ്ടുവന്ന തൈര് ഏറ്റുവാങ്ങാൻ ഭക്തജനങ്ങളും ദേവസ്വം ഉദ്യോഗസ്ഥരും പള്ളിയോട സേവാ സംഘം പ്രവർത്തകരും എത്തിയിരുന്നു. കരക്കാർ പള്ളിയോടങ്ങളിലെത്തും വള്ളസദ്യക്കായി ആറന്മുളയിലെ 52 പള്ളിയോട കരക്കാരും എത്തും. തങ്ങളുടെ പള്ളിയോടങ്ങളിലാണ് കരക്കാർ എത്തുന്നത്. ആടയാഭരണങ്ങൾ അണിഞ്ഞ് അലങ്കാരങ്ങൾ ചാർത്തിയായിരിക്കും പള്ളിയോടങ്ങൾ ക്ഷേത്രക്കടവിലെത്തുക. ഉത്തൃട്ടാതി ജലോത്സവത്തിനുശേഷം പള്ളിയോടങ്ങൾ അണിനിരക്കുന്ന ഘോഷയാത്രയും ക്ഷേത്രക്കടവിൽ ദൃശ്യമാകും. രാവിലെ 9.30ഓടെ പള്ളിയോട കരക്കാർ എത്തിത്തുടങ്ങും. 10.30ഓടെ ഇവരെ സ്വീകരിച്ചാനയിക്കും. 11.30നാണ് ഉദ്ഘാടനച്ചടങ്ങ്.

പ്രസാദ് മല്ലപ്പള്ളിക്ക് സർഗപ്രതിഭാ പുരസ്കാരം

മല്ലപ്പള്ളി:സാഹിത്യ സാംസ്കാരിക രംഗത്തെ സമഗ്രസംഭാവനയ്ക്ക് കോട്ടയം സാഹിത്യകാര സ്വാശ്രയ സംഘം ഏർപ്പെടുത്തിയ സമഗ്രസംഭാവന പുരസ്കാരത്തിന് പ്രസാദ് മല്ലപ്പള്ളി അർഹനായി. 20നു കോട്ടയം കെ.പി.എസ്.മേനോൻ ഹാളിൽ നടക്കുന്ന ചടങ്ങിൽ ഫ്രാൻസിസ് ജോർജ് എംപി പുരസ്കാര വിതരണം നിർവഹിക്കും. ചീഫ് വിപ്പ് ഡോ. എൻ. ജയരാജ്, തിരുവഞ്ചൂർ രാധാകൃഷ്ണൻ എംഎൽഎ, വി.ബി. ബിനു, പ്രഫ.എൻ. രഘുദേവ് എന്നിവർ പങ്കെടുക്കും.

സർക്കാർതല ക്രമീകരണങ്ങൾ അവലോകനം ചെയ്തു

പത്തനംതിട്ട: 16 മുതൽ 20 വരെ പത്തനംതിട്ട രൂപതയുടെ ആതിഥേയത്വത്തിൽ അടൂർ ഓൾ സെയിന്‍റ്സ് പബ്ലിക് സ്കൂളിലെ മാർ ഈവാനിയോസ് നഗറിൽ നടക്കുന്ന 95-ാം പുനരൈക്യ വാർഷികാഘോഷവും സഭാ സംഗമവുമായി ബന്ധപ്പെട്ട് സർക്കാർ തല ക്രമീകരണങ്ങൾ ജില്ലാ കളക്ടർ എസ്. പ്രേംകൃഷ്ണന്‍റെ അധ്യക്ഷതയിൽ കൂടിയ ഉന്നതതല യോഗം അവലോകനം ചെയ്തു. പോലീസ്, ഫയർഫോഴ്സ്, റവന്യൂ, ആരോഗ്യം തുടങ്ങിയ വകുപ്പുകളെ പ്രതിനിധീകരിച്ച് ജില്ലാതല ഉദ്യോഗസ്ഥർ പങ്കെടുത്തു. ഡെപ്യൂട്ടി കളക്ടർ ആർ. രാജലക്ഷ്മി, അഡീഷണൽ എസ്പി പി.വി. ബേബി, അടൂർ ആർഡിഒ എം. ബിബിൻ കുമാർ, അഡീഷണൽ ഡിഎംഒ ഡോ.ജീവൻ, അടൂർ ഡിവൈഎസ്പി ജി. സന്തോഷ് കുമാർ, തഹസിൽദാർ ജോൺ സാം, അടൂർ ഫ‍യർ സ്റ്റേഷൻ ഓഫീസർ കെ.സി. റെജികുമാർ തുടങ്ങിയവർ പങ്കെടുത്തു. പത്തനംതിട്ട രൂപത വികാരി ജനറാളും പുനരൈക്യ വാർഷികാഘോഷ കമ്മിറ്റിയുടെ ജനറൽ കോർഡിനേറ്ററുമായ മോൺ‌.വർഗീസ് മാത്യു കാലായിൽ വടക്കേതിലിൻ്റെ നേതൃത്വത്തിൽ ഫാ. ചാക്കോ തടത്തിൽ, ഫാ. ആന്‍റോ കണ്ണംകുളം, ഫാ. ക്രിസ്റ്റി തേവള്ളിൽ, ഫാ. പോൾ നിലയ്ക്കൽ തെക്കേതിൽ, ഫാ. ഏബ്രഹാം മേപ്പുറത്ത്, ഫാ. സെബാസ്റ്റ്യൻ ജോൺ കിഴക്കെതിൽ, വി.ടി. രാജൻ, ശ്രീറോയ് മാത്യു ചാങ്ങേത്ത്, ജോസഫ് വി. തോമസ്, ജിതിൻ സണ്ണി എന്നിവരും യോഗത്തിൽ പങ്കെടുത്തു.

എസ്ഐ മർദിച്ചെന്ന പരാതിയിൽ നടപടിയുണ്ടായില്ലെന്ന്

പത്തനംതിട്ട: മണ്ഡല, മകരവിളക്കു കാലത്ത് നിലയ്ക്കലിൽ കരാറെടുത്ത വ്യാപാര സ്ഥാപനം പ്രവർത്തിപ്പിക്കുന്നതിനു പണം നൽകാത്തതിന്‍റെ പേരിൽ അതിക്രമം കാട്ടിയ എസ്ഐക്കെതിരേ നൽകിയ പരാതിയിൽ നടപടി ഉണ്ടായില്ലെന്ന് ആക്ഷേപം. പന്പയിൽ എസ്ഐ ആയിരുന്ന യു. ബിജു 2013-14ലെ മണ്ഡല മകരവിളക്കു കാലത്ത് പണം നൽകാത്തതിന്‍റെ പേരിൽ നിലയ്ക്കലിലെ കട പൂട്ടിക്കുകയും മർദിക്കുകയും ചെയ്തതായാണ് പരാതി. ശബരിമല സീസണിലെ കച്ചവടത്തിനായി തിരുവിതാംകൂർ ദേവസ്വം ബോർഡിൽനിന്നു തുലാപ്പള്ളി അമ്പലത്തിങ്കൽ വീട്ടിൽ വേണു പമ്പാവാലിയുടെ മകൻ രതീഷ് 3,75,000 രൂപയ്ക്ക് നിലയ്ക്കൽ പാർക്കിംഗ് ഗ്രൗണ്ടിനു സമീപമുള്ള സ്ഥലം ഷെഡ് കെട്ടി ഹോട്ടൽ നടത്താൻ ലേലത്തിൽ പിടിച്ചിരുന്നു. കടകെട്ടുന്ന സമയത്ത് എസ്ഐ യു. ബിജു കടയുടെ മുന്നിൽ വന്ന് അനധികൃത കച്ചവടം ഇവിടെ നടത്തിക്കില്ലായെന്നും പണം വേണമെന്നും ആവശ്യപ്പെട്ടതായി പിതാവ് വേണു പമ്പാവാലി പത്രസമ്മേളനത്തിൽ പറഞ്ഞു. ‌പണം ആവശ്യപ്പെട്ട് അദ്ദേഹം വ്യാപാരികളെ തുടരെ ഭീഷണിപ്പെടുത്തുകയും ചെയ്തു. പണം നൽകാതിരുന്നതിന്‍റെ പേരിൽ 2013 ഡിസംബർ മൂന്നിന് രാവിലെ ഒന്പതോടെ എസ്ഐ യു. ബിജുവും അഞ്ചു പോലീസുകാരും ഹോട്ടലിന്‍റെ മുമ്പിൽ ജീപ്പിൽ വന്നിറങ്ങി. എസ്ഐ കടയുടെ അകത്തേക്കു ചാടിക്കയറി ഉടമസ്ഥൻ ആരാണന്നും ലൈസൻസ് എടുക്കാനും ആവശ്യപ്പെട്ടു. ലൈസൻസ് എടുക്കാൻ മകൻ രതീഷ് പെരുനാട് പഞ്ചായത്തിൽ പോയിരിക്കുകയാണന്ന് വേണു പറഞ്ഞു. ഹെൽത്ത് കാർഡ് തൊഴിലാളികൾക്കു കിട്ടിയതേയുള്ളുവെന്നും പറഞ്ഞു. ഇതു കേട്ടയുടനെ എസ്ഐ ബിജു അസഭ്യവർഷം നടത്തുകയും ഹോട്ടലിൽ ഉണ്ടായിരുന്ന നാലു ഡെസ്കുകളും തടി ബെഞ്ചുകളും കാലുകൊണ്ട് തൊഴിച്ചു മറിച്ചിടുകയും ചെയ്ത് ഹോട്ടലിൽ ഭീകരാന്തരീക്ഷം ഉണ്ടാക്കി. തുടർന്ന് അസഭ്യം വിളിച്ചുകൊണ്ട് വേണുവിന്‍റെ നാഭിക്കു തൊഴിക്കുകയും ചെയ്തു. തൊഴികൊണ്ട് വേണു താഴേക്കു വീണു. എഴുന്നേറ്റപ്പോൾ കഴുത്തിനു പിടിച്ച് തള്ളി കടയ്ക്കു പുറത്തിറക്കി. തുടർന്ന് ജീപ്പിൽക്കയറ്റി. കടയിൽനിന്നുകൊണ്ടുതന്നെ എസ്ഐ ബിജു ഡ്യൂട്ടി മജിസ്ട്രേറ്റിനെ ഫോണിൽ വിളിച്ച് അനധികൃത കടയാണെന്നു പറഞ്ഞ് കട പൂട്ടിക്കാൻ നിർദേശിച്ചു. കടയുടെ പ്രവർത്തനം നിർത്തിവച്ചതായി കാണിച്ച് നോട്ടീസ് കടയിൽ ഒട്ടിക്കുകയും ചെയ്തു. തന്നെയും മകനെയും ഒന്നും രണ്ടും പ്രതികളാക്കി കേസെടുത്തു. വൈകുന്നേരം രണ്ടു പേരുടെ ആൾജാമ്യത്തിൽ വിടുകയായിരുന്നു. മർദനമേറ്റ വേണു പത്തനംതിട്ട ജനറൽ ആശുപത്രിയിൽ ചികിത്സ തേടി. ‌ ഉദ്യോഗസ്ഥന്‍റെ പീഡനത്തിനെതിരേ പോലീസ് ഉദ്യോഗസ്ഥർക്കു പരാതി നൽകിയെങ്കിലും ഫലമുണ്ടായില്ല. നിലയ്ക്കൽ സ്റ്റേഷനിൽനിന്നും പോലീസുകാർ എത്തി മൊഴി എടുത്തതിൽ ഒരു നടപടിയും ഉണ്ടായില്ല. ‌ പോലീസ് കംപ്ലയിന്‍റ് അഥോറിറ്റിക്കു നൽകിയ പരാതിയിലും അന്വേഷണമുണ്ടായില്ല. സംഭവത്തെത്തുടർന്ന് മൂന്നു ദിവസം കട അടച്ചിടേണ്ടി വന്നു. മൂന്നു ലക്ഷം രൂപ നഷ്ടവുമുണ്ടായി. യു. ബിജുവിനെതിരേ കോടതിയിൽ നൽകിയ സ്വകാര്യ അന്യായത്തിന്മേൽ നടപടികൾ നടക്കുകയാണെന്ന് വേണു പറഞ്ഞു.

എംസിവൈഎം അന്തർദേശീയ യുവജന കൺവൻഷൻ സ്വാഗതസംഘം ഓഫീസ് ഉദ്ഘാടനം

പത്തനംതിട്ട: മലങ്കര സുറിയാനി കത്തോലിക്കാ സഭയുടെ 95-ാം പുനരൈക്യ വാർഷിക ആഘോഷങ്ങളുടെ ഭാഗമായി 19ന് തട്ടയിൽ സെന്‍റ് ആന്‍റണീസ് മലങ്കര കത്തോലിക്കാ പള്ളിയിലെ മാർ തെയോഫിലോസ് നഗറിൽ നടക്കുന്ന 34 -ാമത് അന്തർദേശീയ യുവജന കൺവൻഷന്‍റെ സ്വാഗതസംഘം ഓഫീസ് ഉദ്ഘാടനം ചെയ്തു. പന്തളം വൈദിക ജില്ലാ വികാരി ഡാനിയേൽ കുഴിത്തടത്തിൽ കോർ എപ്പിസ്കോപ്പ സ്വാഗതസംഘം ഓഫീസ് ഉദ്ഘാടനം ചെയ്തു. സ്വാഗതസംഘം ഓഫീസ് ഉദ്ഘാടനയോഗത്തിൽ ഭദ്രാസന പ്രസിഡന്‍റ് ബിബിൻ ഏബ്രഹാം അധ്യക്ഷത വഹിച്ചു. സഭാതല വൈസ് പ്രസിഡന്‍റ് അക്സ രാജൻ, ഭദ്രാസന ഡയറക്ടർ ഫാ. ജോബ് പതാലിൽ, തട്ട യൂണിറ്റ് ഡയറക്ടർ ഫാ. കുര്യാക്കോസ് കുത്തിനേത്ത്, ഭദ്രാസന അനിമേറ്റർ സിസ്റ്റർ ജോവാൻ എസ്ഐസി, പന്തളം വൈദിക ജില്ലാ ഡയറക്ടർ ഫാ. സാം വെങ്ങാട്ടൂർ, പന്തളം വൈദിക ജില്ലാ പ്രസിഡന്‍റ് സാം കോശി, പന്തളം വൈദിക ജില്ല അനിമേറ്റർ സിസ്റ്റർ രമ്യ എസ്ഐസി, തട്ട യൂണിറ്റ് പ്രസിഡന്‍റ് ജേക്കബ്, ഭദ്രാസന ഭാരവാഹികൾ, വൈദിക ജില്ലാ ഭാരവാഹികൾ, യുവജനങ്ങൾ എന്നിവർ പങ്കെടുത്തു. അന്തർദേശീയ യുവജന കൺവൻഷനിൽ വിവിധ ഭദ്രാസനങ്ങളിൽനിന്നായി ആയിരത്തിലധികം യുവജനങ്ങൾ പങ്കെടുക്കും. കൺവൻഷന് എല്ലാ ക്രമീകരണങ്ങളും പൂർത്തിയായതായി ഭാരവാഹികൾ അറിയിച്ചു.

പുനരൈക്യ വാർഷികം: രൂപതയിലെ ഇടവകകളിൽ ഇന്ന് പതാക ഉയരും

പത്തനംതിട്ട: മലങ്കര സുറിയാനി കത്തോലിക്കാ സഭാ പുനരൈക്യ വാർഷികത്തിന്‍റെയും സഭാ സംഗമത്തിന്‍റെയും ഭാഗമായി ഇന്ന് രൂപതയിലെ 100 പള്ളികളിലും ഇടവകതല ആഘോഷം നടക്കും. വിശുദ്ധ കുർബാനയ്ക്കു ശേഷം ഇടവക വികാരിയുടെ നേതൃത്വത്തിൽ കാതോലിക്കാ പതാക ഉയർത്തും. മാർ ഇവാനിയോസിനോടൊപ്പം ആദ്യം പുനരൈക്യപ്പെട്ട അഞ്ചു പേരിൽ ഒരാളായ ഫാ. ജോൺ കുഴിനപ്പുറത്തിന്‍റെ മാതൃ ഇടവകയായ ചീക്കനാൽ സെന്‍റ് പീറ്റേഴ്സ് പള്ളിയിലെ ആഘോഷങ്ങൾക്ക് രൂപതാധ്യക്ഷൻ ഡോ. സാമുവൽ മാർ ഐറേനിയോസ് മെത്രാപ്പോലീത്തയും രൂപതയുടെ പ്രഥമ അധ്യക്ഷൻ യൂഹാനോൻ മാർ ക്രിസോസ്റ്റം മെത്രാപ്പോലീത്തയും ബഥനി സന്യാസ സമൂഹത്തിന്‍റെ സുപ്പീരിയർ ജനറൽ ഫാ. ഗീവർഗീസ് കുറ്റിയിലും നേതൃത്വം നൽകും.

ഇലന്തൂർ മാർത്തോമ്മ വലിയപള്ളി ഇടവകദിനാചരണം

ഇലന്തൂർ: മാർത്തോമ്മാ വലിയ പള്ളിയുടെ 208 ാമത് ഇടവകദിനം 17 മുതൽ 21 വരെ വിവിധ പരിപാടികളോടെ നടത്തും. 17, 19, 20 തീയതികളിൽ വൈകുന്നേരം ആറിന് ആരംഭിക്കുന്ന ഇടവക കൺവൻഷനിൽ ബെന്നി പുലിയൂർ, റവ. ഡോ. മോത്തി വർക്കി, സുബി പള്ളിക്കൽ എന്നിവർ പ്രസംഗിക്കും. 18ന് വൈകുന്നേരം ആറിന് ഇടവക സ്ഥാപക ദിന സ്തോത്ര ശുശ്രൂഷക്കും വിശുദ്ധ കുർബാനയ്ക്കും ഇടവക മുൻ വികാരി റവ. എം.എം. മത്തായി നേതൃത്വം നൽകും. 20നു രാവിലെ 7.30ന് വിശുദ്ധ കുർബാനയും തുടർന്നു യുവജനങ്ങൾക്കും സൺ‌ഡേസ്കൂൾ വിദ്യാർഥികൾക്കുമായി വിവിധ മത്സരങ്ങളും സംഘിപ്പിക്കും. സമാപനദിനമായ 21നു രാവിലെ എട്ടിന് വിശുദ്ധ കുർബാനക്ക് ഡോ. യുയാക്കിം മാർ കൂറിലോസ് സഫ്രഗൻ മെത്രാപ്പോലീത്ത മുഖ്യകാർമികത്വം വഹിക്കും. തുടർന്ന് ചേരുന്ന ഇടവകദിന സമ്മേളനത്തിൽ വികാരി റവ. ബാബു പി. കുലത്താക്കൽ അധ്യക്ഷത വഹിക്കും. ഡോ. യുയാക്കിം മാർ കൂറിലോസ് സഫ്രഗൻ മെത്രാപ്പോലീത്ത മുഖ്യസന്ദേശം നൽകും. ഉന്നത വിജയികൾ, കർഷക അവാർഡ് ജേതാക്കൾ എന്നിവർക്ക് അനുമോദനം, 80 വയസ് കഴിഞ്ഞവർക്ക് ആദരം, 50 വർഷം പൂർത്തിയാക്കിയ ദമ്പതികൾക്ക് ആദരം, ആൽവിൽ സാം ഫിലിപ്പ് അവാർഡ് ദാനം, സ്നേഹവിരുന്ന് എന്നിവയും ഉണ്ടാകും. അസിസ്റ്റന്‍റ് വികാരി റവ. ലിക്കുഷ് കോശി, പി.എം. തോമസ്, സാം ചെമ്പകത്തിൽ, തോമസ് സ്കറിയ, സി.എസ്. ഫിലിപ്പ്, കെ.പി. മാത്യു, എസ്. യോഹന്നാൻ എന്നിവർ നേതൃത്വ നൽകും.

ആഗോള അയ്യപ്പസംഗമം 20ന്, പമ്പയില്‍ ഒരുക്കങ്ങളായി

പത്തനംതിട്ട: 20നു പമ്പയില്‍ നടക്കുന്ന ആഗോള അയ്യപ്പസംഗമത്തിന് ഒരുക്കങ്ങള്‍ തുടങ്ങി. പ്രളയത്തില്‍ തകര്‍ന്ന രാമമൂര്‍ത്തി മണ്ഡപപ്രദേശത്ത് ജര്‍മന്‍ സാങ്കേതികവിദ്യയില്‍ 30,000 ചതുരശ്ര അടി വിസ്തീര്‍ണമുള്ള പ്രധാന പന്തലിന്‍റെ നിര്‍മാണം ആരംഭിച്ചു. ഉദ്ഘാടനസമ്മേളനം നടക്കുന്ന പ്രധാന പന്തല്‍ 3000 ആളുകളെ ഉള്‍ക്കൊള്ളുന്നതാണ്. വിഐപികളെ സ്വീകരിച്ചിരുത്താന്‍ പ്രത്യേക ലോഞ്ച്, കോണ്‍ഫറന്‍സ് ഹാള്‍, ഡൈനിംഗ് ഹാള്‍, വിശ്രമമുറികള്‍, എക്‌സിബിഷന്‍ ഹാള്‍ തുടങ്ങിയവ പ്രത്യേകം നിര്‍മിക്കും. പ്ലൈവുഡ് നിരത്തിയാണ് തറ ഒരുക്കുന്നത്. മുകളില്‍ ചൂട് ഇറങ്ങാത്ത ഷീറ്റുകള്‍ വിരിക്കും. ഇന്നും നാളെയുമായി ക്രെയിന്‍ ഉപയോഗിച്ച് മേല്‍ക്കൂര ഉയര്‍ത്തും. എല്ലാ പന്തലുകളിലും ശീതീകരണ സംവിധാനമുണ്ട്. എറണാകുളം കേന്ദ്രമായ ഏജന്‍സിക്കാണ് പന്തലിന്‍റെ കരാര്‍ നല്‍കിയിരിക്കുന്നത്. 14 തൊഴിലാളികളാണ് പന്തല്‍ നിര്‍മിക്കുന്നത്. ശബരിമല വികസനം പ്രധാന അജൻഡയാക്കി തിരുവിതാംകൂര്‍ ദേവസ്വം ബോര്‍ഡാണ് ആഗോള അയ്യപ്പസംഗമം സംഘടിപ്പിക്കുന്നത്. വിദേശങ്ങളില്‍നിന്നുള്ള പ്രതിനിധികളടക്കം എത്തുന്നുണ്ട്. അന്താരാഷ്‌ട്ര നിലവാരത്തില്‍ സമ്മേളനം നടത്തുന്നതിനുള്ള ക്രമീകരണങ്ങളാണ് പമ്പയില്‍ ഒരുങ്ങുന്നത്. മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. സ്ഥിരം പന്തലുകളും പൂർത്തിയാകും തീര്‍ഥാടകരുടെ കൂടി സൗകര്യാര്‍ഥം പമ്പയില്‍ നിര്‍മാണത്തിലിരിക്കുന്ന സ്ഥിരം നടപ്പന്തലുകള്‍ അയ്യപ്പസംഗമത്തിന് മുന്നോടിയായി നാളെയോടെ പൂര്‍ത്തിയാകും. നാലു പന്തലുകളാണ് നിര്‍മാണത്തിലുള്ളത്. മേല്‍ക്കൂരയും തറയുമാണ് ഇനി പൂര്‍ത്തിയാകാനുള്ളത്. കഴിഞ്ഞ തീര്‍ഥാടനകാലത്തിനു മുന്‍പായി ആറു പന്തലുകള്‍ നിര്‍മിച്ചിരുന്നു. പമ്പയിലെ മരാമത്ത് ഓഫീസിന്‍റെയും ഗസ്റ്റ് ഹൗസിന്‍റെയും പെയിന്‍റിംഗ് ജോലികളും ടോയ്‌ലറ്റിന്‍റെ അറ്റകുറ്റപ്പണികളും ആരംഭിച്ചു. വൃക്ഷത്തറകളുടെയും കല്‍പ്പടവുകളുടെയും അറ്റകുറ്റപ്പണികള്‍ പൂരോഗമിക്കുന്നു. പമ്പ ഗണപതി ക്ഷേത്രത്തിലും പരിസരത്തും അറ്റകുറ്റപ്പണികള്‍ ഇന്ന് ആരംഭിക്കും.

സമുദായ ശക്തീകരണം രാഷ്‌ട്രപുരോഗതിക്ക്: മാര്‍ പുളിക്കല്‍

കാഞ്ഞിരപ്പള്ളി: രാജ്യത്തിന്‍റെ മതേതരത്വം സംരക്ഷിക്കാനും സാധാരണക്കാര്‍ക്ക് നീതി ലഭിക്കാനും കര്‍ഷകര്‍ക്കു ജീവിക്കാനുള്ള സാഹചര്യം ഒരുക്കാനും മൂല്യബോധമുള്ള തലമുറയെ ഭരണ, രാഷ്‌ട്രീയ രംഗത്തിറക്കാനുമുള്ള ഇടപെടലുകള്‍ ഉണ്ടാകണമെന്ന് കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ. കാഞ്ഞിരപ്പള്ളി രൂപതയുടെ പന്ത്രണ്ടാമത് പാസ്റ്ററല്‍ കൗണ്‍സിലിന്‍റെ എട്ടാമത് സമ്മേളനം ഉദ്ഘാടനം ചെയ്ത് പ്രസംഗിക്കുകയായിരുന്നു ബിഷപ്. സഭ എന്ന കാഴ്ചപ്പാട് നമ്മുടെ നെഞ്ചിടിപ്പായി മാറുന്നുവെന്ന് ഉറപ്പുവരുത്താന്‍ നമ്മള്‍ ശ്രദ്ധിക്കണം. കരുത്തും കര്‍മശേഷിയുമുള്ള സമൂഹമായി സഭാമക്കള്‍ മാറണമെന്ന് മാര്‍ ജോസ് പുളിക്കല്‍ ഉദ്‌ബോധിപ്പിച്ചു. ശ്ലീഹന്മാരാകുന്ന അടിത്തറയില്‍ പണിയപ്പെട്ടിരിക്കുന്ന സഭയോടു ചേര്‍ന്നുനിന്നുകൊണ്ട് നമ്മുടെ ജീവിതം മുന്പോട്ടു കൊണ്ടുപോകണം. സീറോ മലബാര്‍ സഭയുടെ സമുദായ സംഘടനയായ കത്തോലിക്ക കോണ്‍ഗ്രസ് കൂടുതല്‍ ശക്തിപ്പെടേണ്ടത് കാലഘട്ടത്തിന്‍റെ ആവശ്യമാണെന്ന് മാര്‍ ജോസ് പുളിക്കല്‍ കൂട്ടിച്ചേർത്തു. സമുദായ ശക്തീകരണം ആധുനിക കാലഘട്ടത്തില്‍ എന്ന വിഷയത്തെ ആസ്പദമാക്കി ഫാ. ജസ്റ്റിന്‍ മതിയത്ത് ക്ലാസ് നയിച്ചു. പ്രോട്ടോ സിഞ്ചെല്ലൂസ് റവ.ഡോ. ജോസഫ് വെള്ളമറ്റം, വികാരി ജനറാള്‍മാരായ ഫാ. ബോബി അലക്‌സ് മണ്ണംപ്ലാക്കല്‍, റവ.ഡോ. സെബാസ്റ്റ്യന്‍ കൊല്ലംകുന്നേല്‍, ഷെവ. അഡ്വ.വി.സി. സെബാസ്റ്റ്യന്‍ തുടങ്ങിയവര്‍ പ്രസംഗിച്ചു. ചാന്‍സലര്‍ റവ.ഡോ. മാത്യു ശൗര്യാംകുഴി, പ്രൊക്കുറേറ്റര്‍ ഫാ. ഫിലിപ്പ് തടത്തില്‍, പാസ്റ്ററല്‍ കൗണ്‍സില്‍ സെക്രട്ടറി ഡോ. ജൂബി മാത്യു എന്നിവര്‍ പരിപാടികള്‍ക്ക് നേതൃത്വം നല്‍കി.

ചന്ദനമരം മുറിക്കാൻ അനുമതി : പട്ടയഭൂമിയിലെ മരംമുറിക്കലിൽ അവ്യക്തത

പത്തനംതിട്ട: സ്വകാര്യ ഭൂമിയിലെ ചന്ദനമരം വനം വകുപ്പു മുഖേന മുറിച്ച് വില്‍പന നടത്തുന്നതിനുള്ള കരട് ബില്ലിന് മന്ത്രിസഭ അംഗീകാരം നൽകിയെങ്കിലും പട്ടയഭൂമിയിലെ ഇതര മരങ്ങൾ മുറിക്കുന്നതുമായി ബന്ധപ്പെട്ട അവ്യക്തത തുടരുന്നു. പട്ടയഭൂമിയിൽ കർഷകൻ പരിപാലിച്ചുപോരുന്ന മരങ്ങൾ മുറിച്ചുമാറ്റുന്പോൾ വനംവകുപ്പ് ഇപ്പോഴും തടസവാദങ്ങൾ ഉന്നയിക്കുന്നുണ്ട്. പ്ലാവ്, ആഞ്ഞിലി, തേക്ക്, ഈട്ടി, മഹാഗണി തുടങ്ങിയ മരങ്ങൾക്ക് ഈ പ്രശ്നം നിലനിൽക്കുകയാണ്. കർഷക ഭൂമിയിലെ മരങ്ങൾ മുറിക്കാൻ അനുമതി നൽകി ഇതിനോടകം സർക്കാർതലത്തിൽ ഉത്തരവുകൾ ഇറങ്ങിയിട്ടുണ്ടെങ്കിലും ഇത് അംഗീകരിച്ച് അനുമതി നൽകാൻ വനംവകുപ്പ് ഉദ്യോഗസ്ഥർ തയാറാകുന്നില്ല. പത്തനംതിട്ട ജില്ലയുടെ കിഴക്കൻ മലയോര മേഖലയിലാണ് ഇതുമായി ബന്ധപ്പെട്ട തർക്കങ്ങൾ അടിക്കടി ഉണ്ടാകുന്നത്. പട്ടയം ലഭിച്ചതും ലഭിക്കാനുള്ളതുമായ ഭൂപ്രദേശങ്ങൾ ഉണ്ടെന്ന പേരിലാണ് വനംവകുപ്പിന്‍റെ ഇടപെടൽ. കൈവശാവകാശമുള്ളതും തലമുറുകളായി തങ്ങൾ കൈവശംവച്ചുവരുന്നതുമായ കൃഷിയിടങ്ങളിൽ നട്ടുവളർത്തിയ മരങ്ങൾ മുറിച്ചുനീക്കാനുള്ള അവകാശത്തിനാണ് കർഷകർ വാദിക്കുന്നത്. എന്നാൽ, പട്ടയം, കൈവശാവകാശരേഖ ഇവ സംബന്ധിച്ച് വനംവകുപ്പിന്‍റെ തടസവാദങ്ങൾ നിലനിൽക്കുന്ന പ്രദേശത്ത് ഏതുതരം മരം മുറിക്കാനും അനുമതി നൽകാറില്ല. കർഷകർ തങ്ങളുടെ ജീവനോപാധിയായി നട്ടുവളർത്തുകയും മക്കളുടെ വിദ്യാഭ്യാസം, വിവാഹം തുടങ്ങിയ ആവശ്യങ്ങൾക്കായി മരങ്ങൾ മുറിച്ചുമാറ്റുകയും ചെയ്യുന്പോഴാണ് വനംവകുപ്പിന്‍റെ ഇടപെടലുകൾ പലപ്പോഴും ഉണ്ടാകുന്നത്. ഇതു സംഘർഷങ്ങൾക്കു വഴിവയ്ക്കാറുമുണ്ട്. ഇത്തരം പ്രശ്നങ്ങൾ പരിശോധിച്ച് ഉമ്മൻ ചാണ്ടി സർക്കാരിന്‍റെ കാലത്ത് വ്യക്തമായ ഉത്തരവ് നൽകിയിരുന്നെങ്കിലും വനംവകുപ്പിലെ ചില ഉദ്യോഗസ്ഥർ ഇതിലും വെള്ളം ചേർത്തു. മുറിച്ചുമാറ്റാൻ കഴിയുന്ന മരങ്ങളുടെ പട്ടിക തയാറാക്കിയപ്പോഴും പട്ടയഭൂമി എന്ന വ്യാഖ്യാനത്തിലും പിഴവുകൾ ചൂണ്ടിക്കാട്ടി വനംവകുപ്പ് തർക്കവാദങ്ങളുന്നയിച്ചു. നൂറുവർഷങ്ങൾക്കു മുകളിൽ നൽകിയിട്ടുള്ള പതിവ് ഭൂമികളിൽ‌ മാത്രമാണ് അനുമതി നൽകിയത്. വനംവകുപ്പ് ഭക്ഷ്യോത്പാദന ആവശ്യങ്ങൾക്കായി നൽകിയിട്ടുള്ള ഭൂമിയിൽ മരങ്ങൾ മുറിക്കാൻ അനുമതി നൽകാറില്ല. ഇത്തരം സ്ഥലങ്ങളിൽ പാഴ്മരങ്ങൾ മുറിക്കാൻ പോലും വനംവകുപ്പ് തടസവാദം ഉന്നയിച്ചിട്ടുണ്ട്. ചന്ദനമരം കൃഷി പ്രോത്സാഹിപ്പിക്കാൻ പദ്ധതി ചന്ദനമരം നട്ടുവളർത്തി വെട്ടിവിൽക്കാനുള്ള അനുമതി കർഷകനു നൽകുന്നതിലൂടെ കൃഷി പ്രോത്സാഹിപ്പിക്കകയാണ് സർക്കാർ ലക്ഷ്യം. ഒരു കിലോ ചന്ദനത്തിന് ഏറ്റവും കുറഞ്ഞത് നാലായിരം മുതല്‍ ഏഴായിരം രൂപ വരെയാണ് ഇപ്പോള്‍ മാര്‍ക്കറ്റ് വില. ചന്ദനത്തിന്‍റെ ഗുണനിലവാരമനുസരിച്ച് വിലയില്‍ വീണ്ടും വർധന ഉണ്ടാകും. നിലവിൽ സ്വന്തം ഭൂമിയില്‍നിന്നു ചന്ദനമരം മോഷണം പോയാലും സ്ഥലം ഉടമയ്ക്കെതിരേ കേസ് എടുക്കാറുണ്ട്. അതിനാല്‍ത്തന്നെ ചന്ദനമരം വച്ചുപിടിപ്പിക്കാന്‍ ആളുകള്‍ തയാറല്ലായിരുന്നു. ചന്ദനമരം മുറിച്ചുമാറ്റാൻ പാകമാകണമെങ്കിൽത്തന്നെ നൂറുവർഷം വേണ്ടിവരും. കർഷകരെ സംബന്ധിച്ചിടത്തോളം കൃഷിയും ലാഭകരമല്ല. നിലവിലുള്ള നിയമപ്രകാരം ഉണങ്ങിയ ചന്ദനമരങ്ങളും അപകടകരമായവയും മുറിക്കുന്നതിനു മാത്രമാണ് അനുമതിയുള്ളത്. സ്വന്തം ആവശ്യത്തിന് വീടുവയ്ക്കുന്നതിനുള്ള സ്ഥലത്തെ മരവും മുറിക്കാന്‍ അനുമതി നല്‍കുന്നതാണ്. പതിവുഭൂമിയിൽ വിലക്ക് റവന്യൂ വകുപ്പ് പതിച്ചുനല്‍കിയ ഭൂമിയിലുള്ളതും സര്‍ക്കാരിലേക്കു റിസര്‍വ് ചെയ്തതുമായ ചന്ദനമരങ്ങള്‍ മുറിക്കാന്‍ ബില്ലില്‍ അനുവാദം നല്‍കുന്നില്ല. ഇതിനു ഭൂമിക്കു പട്ടയം നല്‍കുന്നത് സംബന്ധിച്ച് ഭൂപതിവ് റവന്യൂ നിയമങ്ങളില്‍ ഭേദഗതി വേണമെന്നതിനാലാണിത്. ഇത്തരം സ്ഥലങ്ങളിൽ നിൽക്കുന്ന മറ്റു മരങ്ങൾ മുറിക്കാനം അനുമതിയില്ല. വനമേഖലയോടു ചേർന്ന പ്രദേശങ്ങളിലാണ് തർക്കം ഏറെയുള്ളത്. ഇത്തരം സ്ഥലങ്ങളിൽ നൽകിയിട്ടുള്ള ഭൂ രേഖകൾ വനംവകുപ്പ് അംഗീകരിച്ചിട്ടില്ല. സ്ഥലത്തിനു പട്ടയം തേടിയുള്ള അപേക്ഷകളും തീരുമാനമാകാതെ കിടക്കുകയാണ്. സ്വന്തം പുരയിടത്തിലെ മരം മുറിച്ച് വീടുവയ്ക്കാൻ പോലും ഭൂ ഉടമയ്ക്ക് അനുമതിയില്ലാത്ത സാഹചര്യം നിലവിലുണ്ട്.

ആര്‍ദ്ര കേരളം പുരസ്‌കാരം: പത്തനംതിട്ട ജില്ലാ പഞ്ചായത്തിന് രണ്ടാംസ്ഥാനം

പത്തനംതിട്ട: ആരോഗ്യ മേഖലയില്‍ മികച്ച പ്രവര്‍ത്തനം നടത്തിയ തദ്ദേശസ്ഥാപനങ്ങള്‍ക്കുള്ള ആര്‍ദ്ര കേരളം പുരസ്‌കാര നിറവില്‍ പത്തനംതിട്ട ജില്ലാ പഞ്ചായത്ത്. സംസ്ഥാന വിഭാഗത്തില്‍ പത്തനംതിട്ട ജില്ലാ പഞ്ചായത്ത് രണ്ടാം സ്ഥാനം നേടി. അഞ്ച് ലക്ഷം രൂപയാണ് പുരസ്‌കാര തുക. ഗ്രാമപഞ്ചായത്ത് വിഭാഗം ജില്ലാതലത്തില്‍ ഏഴംകുളം ഗ്രാമപഞ്ചായത്ത് ഒന്നാം സ്ഥാനവും (അഞ്ച് ലക്ഷം രൂപ) കൊടുമണ്‍ ഗ്രാമപഞ്ചായത്ത് രണ്ടാം സ്ഥാനവും ( മൂന്ന് ലക്ഷം രൂപ) കോയിപ്രം ഗ്രാമപഞ്ചായത്ത് മൂന്നാം സ്ഥാനവും ( രണ്ട് ലക്ഷം രൂപ) സ്വന്തമാക്കി. മന്ത്രി വീണാ ജോര്‍ജാണ് പുരസ്‌കാരങ്ങള്‍ പ്രഖ്യാപിച്ചത്. ആരോഗ്യ വകുപ്പിന്‍റെ പങ്കാളിത്തത്തോടെ തദ്ദേശ സ്ഥാപനങ്ങളുടെ നേതൃത്വത്തില്‍ ആവിഷ്‌കരിച്ച് നടപ്പാക്കുന്ന സമഗ്ര ആരോഗ്യ പദ്ധതി ശ്രദ്ധേയമാണ്. 2023-24 സാമ്പത്തിക വര്‍ഷം തദ്ദേശ സ്വയംഭരണ സ്ഥാപനങ്ങള്‍ ആരോഗ്യ മേഖലയില്‍ 1692.95 കോടി രൂപയുടെ പദ്ധതി പൂര്‍ത്തിയാക്കി. ഇന്‍ഫര്‍മേഷന്‍ കേരള മിഷന്‍റെ സഹായത്തോടെയാണ് പുരസ്‌കാരത്തിന് പരിഗണിക്കാവുന്ന തദ്ദേശ സ്വയംഭരണ സ്ഥാപനങ്ങളുടെ മുന്‍ഗണനാ പട്ടിക തയാറാക്കിയത്. തദ്ദേശ സ്വയംഭരണ സ്ഥാപനങ്ങള്‍ ആരോഗ്യ മേഖലയില്‍ ചെലവഴിച്ച തുക, സാന്ത്വന പരിചരണ പരിപാടികൾ, കായകല്‍പ്പ് സ്‌കോര്‍, ഹെല്‍ത്ത് ഗ്രാന്‍റ് വിനിയോഗം, ആരോഗ്യ മേഖലയുമായി ബന്ധപ്പെട്ട മറ്റ് പ്രവര്‍ത്തനങ്ങള്‍ എന്നിവ പരിഗണിച്ചു. പ്രതിരോധ കുത്തിവയ്പ്, വാര്‍ഡുതല പ്രവര്‍ത്തനങ്ങള്‍, പ്രാദേശിക ആരോഗ്യ ആവശ്യങ്ങള്‍ക്ക് അനുസൃതമായ നൂതന ഇടപെടലുകള്‍ സാമൂഹിക ഘടകങ്ങളായ ശുചിത്വം, മാലിന്യ പരിപാലനം, പ്രാണി നിയന്ത്രണം, ജീവിത ശൈലി ക്രമീകരണത്തിനുള്ള ഭൗതിക സാഹചര്യങ്ങള്‍ ഒരുക്കൽ, മോഡേണ്‍ മെഡിസിന്‍, ആയുര്‍വേദ, ഹോമിയോ മേഖലകളിലുള്ള ദേശീയ സംസ്ഥാന ആരോഗ്യ പദ്ധതിയുടെ ഫലപ്രദമായ നടത്തിപ്പ് എന്നിവയും വിലയിരുത്തി.

റെയിൽവേ സ്റ്റേഷൻ റോഡിൽ മാലിന്യം തള്ളുന്നു

തിരുവല്ല: തിരുവല്ല റെയിൽവേ സ്റ്റേഷൻ - ആമല്ലൂർ റോഡിൽ രാത്രികാലങ്ങളിൽ മാലിന്യം തള്ളുന്നു. അസഹ്യമായ ദുർഗന്ധം കാരണം ഇതുവഴി യാത്ര ചെയ്യാൻ കഴിയാത്ത അവസ്ഥയാണ്. വീടുകളിലെയും കടകളിലെയും മാലിന്യങ്ങൾ കൂടാതെയാണ് കോഴിഫാമുകളിൽ നിന്നുള്ള മാലിന്യങ്ങളും അറവുശാലയിലെ അവശിഷ്ടങ്ങളും വലിച്ചെറിയുന്നത്. രാത്രിയിൽ ചാക്ക് കെട്ടുകളിലാക്കിയ മാലിന്യങ്ങൾ വാഹനങ്ങളിലെത്തിച്ചാണ് തള്ളുന്നത്. തെരുവ് നായ്ക്കൾ കടിച്ചുകീറിയും വാഹനങ്ങൾ കയറിയിറങ്ങിയും മാലിന്യങ്ങൾ നാല് വശവും ചിതറിക്കിടക്കുകയാണ്. റെയിൽവേസ്റ്റേഷനിലേക്കുള്ള യാത്രക്കാരോടൊപ്പം ആമല്ലൂർ നിവാസികൾക്ക് തിരുവല്ല ടൗണിൽ പോകാനുള്ള മാർഗമാണ് ഈ റോഡ്. സിസിടിവി കാമറകൾ സ്ഥാപിക്കണമെന്ന ആവശ്യം അധികൃതർ ഇനിയും ചെവിക്കൊണ്ടിട്ടില്ല.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]