ADVERTISEMENT

ADVERTISEMENT

വായനസംസ്കാരം വളർത്താൻ ദീപിക നമ്മുടെ ഭാഷ പദ്ധതിക്ക് കഴിയും: ഡോ. ജോഷ്വാ മാർ ഇഗ്നാത്തിയോസ്

കറ്റാനം: വിദ്യാർഥികളിൽ വായന സംസ്കാരം വളർത്താനും പത്രവായനയിലൂടെ സാമൂഹ്യബോധത്തെക്കുറിച്ച് അറിവ് നൽകാനും ദീപിക നമ്മുടെ ഭാഷ പദ്ധതി വലിയ പങ്കാണ് വഹിക്കുന്നതെന്ന് ബിഷപ് ഡോ. ജോഷ്വാ മാർ ഇഗ്നാത്തിയോസ് മെത്രാപ്പോലിത്ത പറഞ്ഞു.

പുതുതലമുറയെ വായനാശീലരാക്കുക എന്ന ലക്ഷ്യത്തോടെ വിദ്യാലയങ്ങളിൽ ദീപിക ആവിഷ്കരിച്ച് നടപ്പിലാക്കിവരുന്ന നമ്മുടെ ഭാഷ പദ്ധതിയുടെ മാവേലിക്കര താലൂക്ക് തല ഉദ്ഘാടനം കറ്റാനം പോപ്പ് പയസ് ഹയർ സെക്കൻഡറി സ്കൂളിൽ നിർവഹിക്കുകയായിരുന്നു അദ്ദേഹം. പിടിഎ പ്രസിഡന്‍റ് വർഗീസ് മത്തായി അധ്യക്ഷത വഹിച്ചു. ദീപിക കായംകുളം ലേഖകൻ നൗഷാദ് മാങ്കാംകുഴി പദ്ധതി വിശദീകരണം നടത്തി.

ഭരണിക്കാവ് പഞ്ചായത്ത് പ്രസിഡന്‍റ് കെ. ദീപ, കുറത്തികാട് സബ് ഇൻസ്പെക്ടർ എം.എസ്. എബി, പ്രിൻസിപ്പൽ ടി. മോഹൻ, ഹെഡ്മാസ്റ്റർ ടി.കെ. സാബു, ജനറൽ കൺവീനർ സി.ടി. വർഗീസ്, സ്റ്റാഫ് സെക്രട്ടറി ഫാ.സിൽവസ്റ്റർ തെക്കേടത്ത്, സെലിൻ സ്കറിയ, ഷേർലി തോമസ് എന്നിവർ പ്രസംഗിച്ചു.

ADVERTISEMENT

കരുവാറ്റ മാലിയില്‍-തോപ്പില്‍ കുടിവെള്ളപദ്ധതി ഉദ്ഘാടനം

ആലപ്പുഴ: കരുവാറ്റ ഗ്രാമപഞ്ചായത്തിലെ മാലിയില്‍-തോപ്പില്‍ കുടിവെള്ള പദ്ധതിയുടെ ഉദ്ഘാടനം ഹരിപ്പാട് ബ്ലോക്ക് പഞ്ചായത്ത് പ്രസിഡന്‍റ് രുഗ്മിണി രാജു നിര്‍വഹിച്ചു. ഹരിപ്പാട് ബ്ലോക്ക് പഞ്ചായത്ത് ജനകീയാസൂത്രണ പദ്ധതിയില്‍ ഉള്‍പ്പെടുത്തി വിവിധ സാമ്പത്തിക വര്‍ഷങ്ങളിലായി 23 ലക്ഷം രൂപ വിനിയോഗിച്ചാണ് നിര്‍മാണം പൂര്‍ത്തീകരിച്ചത്. കരുവാറ്റ ഗ്രാമപഞ്ചായത്ത് മൂന്നാം വാര്‍ഡില്‍ നടന്ന ചടങ്ങില്‍ പഞ്ചായത്ത് പ്രസിഡന്‍റ് സനില്‍കുമാര്‍ അധ്യക്ഷനായി. ബ ്ലോക്ക് പഞ്ചായത്ത് വൈസ് പ്രസിഡന്‍റ് പി. ഓമന, ഹരിപ്പാട് ബ്ലോക്ക് പഞ്ചായത്ത് സ്ഥിരംസമിതി അധ്യക്ഷരായ എം.എം. അനസ് അലി, ടി.ആര്‍. വത്സല, പി. ശാന്തികൃഷ്ണ, ബ്ലോക്ക് പഞ്ചായത്ത് സെക്രട്ടറി ജി. സുനില്‍കുമാര്‍, കരുവാറ്റ ഗ്രാമപഞ്ചായത്ത് സെക്രട്ടറി പി. ഹരിദാസ് തുടങ്ങിയവര്‍ പങ്കെടുത്തു.

കുട്ടനാട്ടുകാർക്ക് യാത്രാക്ലേശം

കുട്ടനാട്: ജലഗതാഗത വകുപ്പിന്‍റെ ബോട്ടുകളെ മാത്രം ആശ്രയിച്ച് യാത്രചെയ്യുന്ന കുട്ടനാട്ടുകാർ യാത്രാക്ലേശത്താൽ വലയുന്നു. പ്രധാന സർവീസുകൾ താറുമാറായി. അറ്റകുറ്റപ്പണിക്കായി കയറ്റുന്ന ബോട്ടുകൾ സമയബദ്ധമായി പണി പൂർത്തിയാക്കി ഇറക്കാത്തതും പകരം ബോട്ടിടാത്തതുമാണ് പ്രതിസന്ധിക്കു കാരണമെന്ന് യാത്രക്കാർ പറയുന്നു. കൈനകരി, കുട്ടമംഗലം, കുപ്പപ്പുറം, കായൽ മേഖലകളിലുള്ളവരാണ് ഏറെ പ്രതിസന്ധിയിലായിരിക്കുന്നത്. രാവിലത്തെ സമയങ്ങളിൽ ഈ പ്രദേശങ്ങളെ ബന്ധപ്പെടുത്തി സർവീസ് നടത്തിയിരുന്ന എ-47, എ-84 എന്നീ ബോട്ടുകൾ അറ്റകുറ്റപ്പണിക്കായി കയറ്റിയതോടെയാണ് പ്രതിസന്ധി രൂക്ഷമായത്. എ-47 ബോട്ട് പുലർച്ചെ നെടുമുടിയിൽനിന്ന് പുറപ്പെട്ട് ഏഴുമണിയോടെ ആലപ്പുഴയിൽ എത്തുന്ന നിലയിലാണ് സർവീസ് നടത്തിയിരുന്നത്. എ-87 ബോട്ട് നെടുമുടിയിൽനിന്ന് പുറപ്പെട്ട് കായൽപ്പുറത്തുവന്ന് അവിടെനിന്ന് ആലപ്പുഴയിൽ എത്തുന്ന നിലയിലുമാണ് സർവീസ് നടത്തിയിരുന്നത്. കൈനകരിയിലെ ഉൾപ്രദേശങ്ങളിലും കായൽ മേഖലയിലുമുള്ളവർക്കും ആലപ്പുഴയിൽ എത്തുന്നതിനും സമയബദ്ധമായി ട്രെയിനിൽ എറണാകുളത്തുൾപ്പെടെ പോയി ജോലിചെയ്യുന്നവർക്കും ഏറെ ഗുണകരമായിരുന്നു ഈ സർവീസുകൾ. എ-47 ബോട്ട് സർവീസ് നിർത്തിയിട്ട് മൂന്നാഴ്ചയോളമായി. പകരം ബോട്ടുണ്ടെങ്കിലും പ്രയോജനകരമല്ല. ഇരുമ്പുബോട്ടാണത്. സമയത്ത് ഓടിയെത്താത്തതിനാൽ യാത്രക്കാർ ഏറെ ബുദ്ധിമുട്ടിലാണ്. എ-87 ബോട്ട് ഒരാഴ്ചയോളമായി പിൻവലിച്ചിട്ട്. പകരം ബോട്ട് ഇട്ടിട്ടുമില്ല. ഇപ്പോൾ കുട്ടനാട്ടിൽ ഉണ്ടായിട്ടുള്ള വെള്ളപ്പൊക്ക കെടുതിക്കൊപ്പം ബോട്ട് സർവീസുകൾകൂടി മുടങ്ങിയതോടെ കുട്ടനാട്ടിലെ യാത്രക്കാർക്ക് ഇരുട്ടടിയായിരിക്കുകയാണ്.

മഴ: ജില്ലയില്‍ പനി പടരുന്നു

ആലപ്പുഴ: മഴക്കാലമായതോടെ ജില്ലയില്‍ പനി പടരുന്നു. ദിവസേന 300-350 പേര്‍ പനിക്ക് ചികിത്സ തേടിയിരുന്ന സ്ഥാനത്ത് ഇപ്പോഴത് 500-നു മുകളിലെത്തി. എലിപ്പനി സംശയത്തോടെ ചികിത്സയിലായിരുന്ന ചേര്‍ത്തല പള്ളിത്തോട് സ്വദേശി ബുധനാഴ്ച മരിച്ചു. 45 വയസ്സുള്ളയാളാണ് മരിച്ചത്. കഴിഞ്ഞദിവസം കോവിഡ് ബാധിച്ച് രണ്ടുപേര്‍ മരിച്ചിരുന്നു. എച്ച്1 എന്‍1, ഡെങ്കിപ്പനി, എലിപ്പനി, കോവിഡ്, ചിക്കന്‍പോക്‌സ്, മഞ്ഞപ്പിത്തം, മലമ്പനി എന്നിവയ്ക്കു പിന്നാലെ ചെള്ളുപനിയും സ്ഥിരീകരിച്ചത് ആശങ്കയ്ക്കിടയാക്കി. ചൊവ്വാഴ്ചയാണ് ഒരാള്‍ക്ക് ചെള്ളുപനി ബാധിച്ചത്. ഏറെനാളുകള്‍ക്കുശേഷമാണ് രോഗബാധ. ഓറിയന്‍ഷ്യ സൂസുഗാമുഷി എന്ന ബാക്ടീരിയ മൂലമുണ്ടാകുന്നതാണ് ചെള്ളുപനി. മണ്ണിനടിയിലെ ചെള്ളില്‍നിന്നാണ് ഇവ പടരുന്നത്. എലി, അണ്ണാന്‍, മുയല്‍ തുടങ്ങിയവയില്‍നിന്ന് രോഗം പകരാം. അവയുടെ ശരീരത്തിലെ ചെള്ളുകള്‍ മനുഷ്യരെ കടിക്കുമ്പോഴാണ് പകരുന്നത്. ചെള്ളുകടിയേറ്റാല്‍ 10-12 ദിവസമാകുമ്പോള്‍ ലക്ഷണം കണ്ടുതുടങ്ങും. കടിയേറ്റ ഭാഗത്ത് ചുവന്ന പാടുകള്‍ രൂപപ്പെടും. പിന്നീട് കറുത്ത വ്രണമായി മാറും. നേരത്തേ കണ്ടെത്തിയാല്‍ ആന്റി ബയോട്ടിക് ഉപയോഗിച്ച് ചികിത്സിക്കാം. ഗുരുതരാവസ്ഥയിലെത്തിയാല്‍ മരിക്കാം. വ്യക്തിശുചിത്വവും പരിസര ശുചിത്വവുമാണ് രോഗം വരാതിരിക്കാനുള്ള പോംവഴി. വേനല്‍ക്കാലത്ത് വ്യാപകമാകുന്ന ചിക്കന്‍പോക്‌സും മഴക്കാലത്ത് റിപ്പോര്‍ട്ടു ചെയ്യുന്നുണ്ട്. കഴിഞ്ഞദിവസം അഞ്ചുപേര്‍ക്കാണ് രോഗം ബാധിച്ചത്. ജില്ലയില്‍ വ്യാഴാഴ്ച 10 പേര്‍ക്ക് കോവിഡ് സ്ഥിരീകരിച്ചു. ഇതോടെ രോഗബാധിതരുടെ എണ്ണം 398 ആയി. കോവിഡിനൊപ്പം മറ്റു പനികളും വരുന്നത് ആളുകളെ ആശങ്കയിലാക്കിയിട്ടുണ്ട്. സാധാരണ വൈറല്‍ പനി പിടിപെട്ടാല്‍ പോലും കോവിഡാണെന്ന പേടിയിലാണ് ആളുകള്‍.

പുന്നപ്രയിലെ കുടിവെള്ളപ്രശ്നത്തിന് പരിഹാരമായി കുഴൽക്കിണർ

അമ്പലപ്പുഴ: പുന്നപ്ര വടക്ക് പഞ്ചായത്തിലെ വിവിധ വാർഡുകളിൽ കുടിവെള്ള പ്രശ്നം പരിഹാരിക്കാൻ കുഴൽക്കിണറിന്‍റെ പ്രവർത്തനത്തിന് തുടക്കം. പഞ്ചായത്തിലെ ഏഴു മുതൽ 11 വരെയുള്ള വാർഡുകളിലും പുന്നപ്ര തെക്ക് പഞ്ചായത്തിലെ കരിമ്പാവളവ് ഉൾപ്പെടുന്ന കിഴക്കൻ ഭാഗങ്ങളിലും ഇതോടെ ഒരു പരിധിവരെ ശുദ്ധജലം ലഭ്യമാകും. എച്ച്. സലാം എംഎൽഎയുടെ ഫണ്ടിൽനിന്ന് 5,14,617 രൂപയും പഞ്ചായത്തിന്‍റെ വാർഷികപദ്ധതിയിൽ ഉൾപ്പെടുത്തി 5.25 ലക്ഷം രൂപയുമടക്കം ആകെ 10,39,617 രൂപ ചെലവിലാണ് വാട്ടർ വർക്സ് പമ്പ് ഹൗസിൽ കുഴൽക്കിണർ പ്രവർത്തന സജ്ജമാക്കിയത്. എച്ച്. സലാം എംഎൽഎ ഇതിന്‍റെ പ്രവർത്തനോദ്ഘാടനം നിർവഹിച്ചു. പ്രസിഡന്‍റ് സജിത സതീശൻ അധ്യക്ഷയായി. വൈസ് പ്രസിഡന്‍റ് എ.പി. സരിത, സ്ഥിരംസമിതി അധ്യക്ഷ അജിത ശശി, വാട്ടർ അഥോറിറ്റി എക്സിക്യൂട്ടീവ് എൻജിനിയർ കെ.എൽ. ഗിരീഷ്, അസിസ്റ്റന്‍റ് എക്സിക്യൂട്ടീവ് എൻജിനിയർ ഷിനോ മെറിൻ ജോൺ, കെ. മോഹൻ കുമാർ, കെ.പി. സത്യകീർത്തി, രതീഷ് കുമാർ, പി. പ്രീത് എന്നിവർ സംസാരിച്ചു.

അന്പലപ്പുഴ റെയിൽവേ സ്റ്റേഷൻ പരിസരത്ത് നായശല്യം രൂക്ഷം

അമ്പലപ്പുഴ: റെയിൽവേ സ്റ്റേഷൻ പരിസരത്ത് നായശല്യം അതിരൂക്ഷമാണ്. സ്ത്രീകളും കുട്ടികളുമടക്കം റെയിൽവേ സ്റ്റേഷനിലേക്ക് വരുന്നവർക്കും തിരികെ പോകുന്നവർക്കും ഇതു മൂലം വളരെ ബുദ്ധിമുട്ട് അനുഭവിക്കുകയാണ്. റെയിൽവേ സ്റ്റേഷന്‍റെ പടിഞ്ഞാറു ഭാഗത്ത് പട്ടികൾ റോഡിൽ വിലസുന്നതുമൂലം ഇതുവഴി വരുന്ന യാത്രക്കാർക്കും റെയിവേ സ്റ്റേഷനിലേക്ക് വരുന്നവർക്കും നായയുടെ കടിയേൽക്കാൻ സാധ്യത കൂടുതലാണ്. രാവിലെ ജോലിക്കായും മറ്റും പോയി രാത്രിയോടെ എത്തുന്ന യാത്രക്കാർക്കും കുടുംബത്തോടൊപ്പം യാത്രകഴിഞ്ഞ് എത്തുന്ന മറ്റു യാത്രക്കാർക്കും വയോജനങ്ങൾ, സ്ത്രീകൾ, കുട്ടികൾ തുടങ്ങി നിലവിൽ വടക്കു പടിഞ്ഞാറു ഭാഗത്തുകൂടി പോകേണ്ടിവരുന്നവർ കൂടുതലായും ഭീതിയോടെയാണ് അമ്പലപ്പുഴ റെയിൽവേ സ്റ്റേഷനിൽ വന്നു വീടുകളിലെക്കു മടങ്ങുന്നത്.

ഒരു ഗ്രാമത്തിന്‍റെ സാമൂഹ്യമാറ്റത്തിന് നാന്ദികുറിച്ച പരുമല ടാഗോര്‍ വായനശാല@76

മാന്നാര്‍: ഒ‌രു ഗ്രാമത്തിന്‍റെ കലാ-കായിക, സാമൂഹ്യ, സാംസ്‌കാരിക മുന്നേറ്റത്തിന് നാന്ദികുറിച്ച ഒരു പ്രസ്ഥാനമാണ് പരുമല ടാഗോര്‍ വായനശാല. ഇതിലൂടെ വളര്‍ന്നത് ഒരു പുത്തന്‍ വായന സംസ്‌കാരം കൂടിയാണ്. പരുമലയുടെ ഹൃദയഭാഗത്തു തലയുയര്‍ത്തി നില്‍ക്കുന്ന ഈ വായനശാല പരുമലയുടെ എല്ലാ തലങ്ങളിലുമുള്ള പുരോഗതിയുടെ പ്രഭവകേന്ദ്രം കൂടിയാണ്. വായനശാലയെന്നു കേള്‍ക്കുമ്പോള്‍ പത്രം വായിക്കാനും പുസ്തകങ്ങളെടുത്ത് വായിക്കാനുമുള്ള കേന്ദ്രം എന്നാണ് സാധാരണയായി മനസിലാക്കുക. എന്നാല്‍, ഈ പ്രകിയകള്‍ക്കൊപ്പം നാടിന്‍റെ വികസനക്കുതിപ്പിന്‍റെ ചര്‍ച്ചകളും വിവിധ പൊതുയോഗങ്ങള്‍ക്കും വേദിയാകുന്നതും ഇവിടമാണ്. മറ്റിടങ്ങളില്‍നിന്നും വ്യത്യസ്തമായി പുലര്‍ച്ചെതന്നെ വായനശാല സജീവമാകുന്നു. രാവിലെ എട്ടിന് മാത്രമേ വായനാഹാളും ഓഫീസും മറ്റും തുറക്കുകയുള്ളൂവെങ്കിലും പുലര്‍ച്ചേതന്നെ വായനശാലയുടെ വരാന്തയില്‍ പത്രവായനക്കാര്‍ സജീവമാകും. വായനശാലയുടെ അടുത്തുള്ള കടയില്‍നിന്നു ചായയും കുടിച്ച് ഒന്നിലധികം പത്രവും വായിച്ച് പോകുന്ന നിരവധിപേര്‍ ഇപ്പോഴുണ്ടെന്നതാണ് ഈ വായനശാലയുടെ പ്രത്യേകത. വിവിധ വിഭാഗങ്ങളിലായി 10000 പുസ്തകങ്ങളുടെ ശേഖരം ഇവിടെയുണ്ട്. വായന മരിക്കുന്നുവെന്ന പ്രചാരണം ഈ വായനശാലയെ സംബന്ധിച്ചിടത്തോളം ശരിയല്ല. യുവാക്കളും വിദ്യാര്‍ഥികളും അടക്കം നിരവധി പേരാണ് ഇവിടെ പുസ്തകമെടുക്കാന്‍ എത്തുന്നത്. നിരവധി റെഫറന്‍സ് ഗ്രന്ഥങ്ങള്‍ ഇവിടെ ഉള്ളതിനാല്‍ ധാരാളം പേര്‍ ഇതിനായും ഇവിടെയെത്തുന്നു. വായനശാലയില്‍ പുസ്തകമെടുക്കാനും പത്രം വായിക്കാനും റെഫറന്‍സ് ഗ്രന്ഥങ്ങള്‍ നോക്കാനും മറ്റുമായി എത്തുന്നവര്‍ക്ക് എല്ലാ സഹായ സഹകരണവുമായി ലൈബ്രേറിയന്‍ ടി.കെ.രാജന്‍ രാവിലെ എട്ടു മുതല്‍ വൈകുന്നേരം ഏഴു വരെ ഇവിടെയുണ്ട്. 1949 ല്‍ സ്ഥാപിതമായ ഈ വായനശാല പല തവണ പുനര്‍നിര്‍മിച്ചു. ഇന്നത്തെ രീതിയില്‍ ആധുനിക സൗകര്യങ്ങളോടെ ഇരുനിലകളിലായി പുനര്‍നിര്‍മിച്ചത് 2006ലാണ്. വായനഹാള്‍, പുസ്തകങ്ങള്‍ സൂക്ഷിക്കുന്ന വലിയ ഹാള്‍, ഓഫീസ് റൂം, കോണ്‍ഫറന്‍സ് ഹാള്‍ എന്നിവ ഉള്‍കൊള്ളുന്നതാണ് ഈ വായനശാല. ഇപ്പോഴും എല്ലാ മാസത്തിലും പുസ്തചര്‍ച്ചകളും കുട്ടികളിലും യുവാക്കളിലും വയനാശീലം വര്‍ധിപ്പിക്കാനുള്ള വിവിധ പരിപാടികളുമായി ഇന്നും സജീവമാണ് പരുമല ഗ്രാമത്തിലെ ടാഗോര്‍ വായനശാല. പ്രഫ. എ.ലോപ്പസ് പ്രസിഡന്‍റും ഇ.ജി. ഹരികുമാര്‍ സെക്രട്ടറിയുമായുള്ള കമ്മിറ്റി പ്രവര്‍ത്തിച്ചുവരുന്നു.

പ്രവര്‍ത്തനവര്‍ഷ ഉദ്ഘാടനവും എയ്ഞ്ചല്‍സ് മീറ്റും ഇന്ന്

ആലപ്പുഴ: ഏഷ്യയിലെ ഏറ്റവും വലിയ അല്‍മായ സംഘടനയായ ചെറുപുഷ്പ മിഷന്‍ ലീഗിന്‍റെ ആലപ്പുഴ മേഖല പ്രവര്‍ത്തനവര്‍ഷ ഉദ്ഘാടനവും ഭാരവാഹികളുടെ സത്യപ്രതിജ്ഞയും ഈ വര്‍ഷം ആഘോഷപൂര്‍വമായ വിശുദ്ധ കുര്‍ബാന സ്വീകരിച്ച കുട്ടികളുടെ സംഗമമായ എയ്ഞ്ചല്‍സ് മീറ്റും ഈ വര്‍ഷം പത്താം ക്ലാസ് പരീക്ഷകളില്‍ ഉന്നത വിജയം കരസ്ഥമാക്കിയ മിഷന്‍ ലീഗ് പ്രവര്‍ത്തകര്‍ക്ക് അനുമോദനവും ഇന്ന് രാവിലെ ഒന്പതു മുതല്‍ പഴവങ്ങാടി മാര്‍ സ്ലീവ ഫൊറോന ദേവാലയത്തില്‍ നടത്തും. ചങ്ങനാശേരി അതിരൂപതയുടെ മുന്‍ അധ്യക്ഷന്‍ മാര്‍ ജോസഫ് പെരുന്തോട്ടം മെത്രാപ്പോലീത്ത അര്‍പ്പിക്കുന്ന വിശുദ്ധ കുര്‍ബാനയെത്തുടര്‍ന്ന് സമ്മേളനം ഉദ്ഘാടനം ചെയ്യും. മിഷന്‍ ലീഗ് ആലപ്പുഴ മേഖല പ്രസിഡന്‍റ് മാസ്റ്റര്‍ ആഞ്ചലോ മൈക്കിള്‍ അധ്യക്ഷത വഹിക്കും. ഫൊറോന വികാരി ഫാ. മാത്യു നടമുഖത്ത് അനുഗ്രഹ പ്രഭാഷണം നടത്തും. ഫാ. യോഹന്നാന്‍ കട്ടത്തറ, ഫാ. സെബാസ്റ്റ്യന്‍ മാമ്പ്ര, സിസ്റ്റർ മെറിന്‍ മൂന്നാറ്റുംമുഖം, ആലപ്പുഴ മേഖല ഓര്‍ഗനൈസിംഗ് പ്രസിഡന്‍റ് സിറിയക് തലച്ചെല്ലൂര്‍, സ്റ്റെഫിന്‍ ചാക്കോ, ജെഫിന്‍ ജോസഫ്, ഷിന്‍സണ്‍ വര്‍ഗീസ് , ത്രേസ്യാമ്മ ജയിംസ് തുടങ്ങിയവര്‍ പ്രസംഗിക്കും. മരിയ ജോസ്, ലിനിമോള്‍ അലക്‌സ്, ജോമോള്‍ ജയിംസ് തുടങ്ങിയവര്‍ നേതൃത്വം നല്‍കും.

കിടങ്ങറ-കുന്നങ്കരി പിഡബ്ല്യുഡി റോഡ് ഉയർത്തണമെന്ന് പൗരാവലി

കുട്ടനാട്: വെളിയനാട് പഞ്ചായത്തിലെ മൂന്നു മുതൽ ആറുവരെ വാർഡുകളിലെ ജനങ്ങളുടെ ഏകയാത്രാമാർഗമായ കിടങ്ങറ- കുന്നങ്കരി റോഡ് ചെറിയ വെള്ളപ്പൊക്കത്തിൽപ്പോലും നാലടി വെള്ളം കെട്ടിക്കിടക്കുന്ന സാഹചര്യമാണ് നിലനിൽക്കുന്നത്. നൂറുകണക്കിന് സ്വകാര്യ വാഹനങ്ങൾ കൂടാതെ ഇരുപതിനു മുകളിൽ സ്കൂൾ ബസുകളും കുന്നങ്കരി ബേത്‌ലഹേം പള്ളി ജംഗ്ഷനിൽ എത്തിയാണ് കുട്ടികളെ ചങ്ങനാശേരിക്കും കുട്ടനാട്ടിലെ വിവിധ സ്കൂളുകളിലേക്കും എത്തിക്കുന്നത്. തുടരെ വെള്ളപ്പൊക്കം ഉണ്ടാകുന്നതിനാൽ കുട്ടികളുടെ പഠനം ആഴ്ചകളോളും മുടങ്ങുന്ന സാഹചര്യവും ഉണ്ട്. കൂടാതെ പള്ളികൾ, ക്ഷേത്രങ്ങൾ, വില്ലേജ്, പഞ്ചായത്ത്, സപ്ലൈകോ എന്നീ സ്ഥലങ്ങളിലേക്കും പോകാൻ ഏക മാർഗം കിടങ്ങറ-കുന്നങ്കരി റോഡാണ്. ഈ റോഡ് അടിയന്തരമായി ഉയർത്തി നിർമിക്കണമെന്നും ഇതിനായി ആവശ്യമായ ഫണ്ട് അനുവദിക്കാൻ പിഡബ്ലു ഡി വകുപ്പ് തയാറാകണമെന്നും കുട്ടനാട് എംഎൽഎ അടിയന്തര ഇടപെടൽ നടത്തണമെന്നും കിടങ്ങറ- കുന്നങ്കരി പൗരാവലി ആവശ്യപ്പെട്ടു. റോഡിന്‍റെ നിർമാണത്തിന് ഫണ്ട് അനുവദിക്കാത്തപക്ഷം ശക്തമായ സമരപരിപാടികൾക്ക് രൂപം നൽകാനും കുന്നങ്കരിൽ ചേർന്ന പൗരാവലിയുടെ യോഗത്തിൽ തീരുമാനിച്ചു. പ്രസിഡന്‍റ് എ.കെ. സലിം അരീശേരിൽ അധ്യക്ഷത വഹിച്ചു. ജനറൽ സെക്രട്ടറി ഔസേപ്പച്ചൻ ചെറുകാട്, ട്രഷറർ റജി കൊച്ചുപറമ്പിൽ, ജോണി പത്രോസ് പുലിമുഖം, ബേബിച്ചൻ കണിയാംപറമ്പിൽ, ബിജു വേലങ്കേരിച്ചിറ,രാമു മെതികളം, അജികുമാർ അജിഭവനം, ജോയിച്ചൻ കളത്തിൽ, പ്രദീപ് കിഴക്കേക്കുറ്റ് എന്നിവർ പ്രസംഗിച്ചു.

ഗവര്‍ണര്‍ പദവിക്കു നിരക്കാത്ത പ്രവര്‍ത്തനങ്ങള്‍ നടത്തുന്നു: കൊടിക്കുന്നില്‍ സുരേഷ്

മാവേലിക്കര: ഗവര്‍ണര്‍ പദവിക്കു നിരക്കാത്ത പ്രവര്‍ത്തനങ്ങള്‍ തുടര്‍ച്ചയായി നടത്തുന്നതു മൂലം രാജ്ഭവന്‍ ആര്‍എസ്എസിന്‍റെ ആസ്ഥാനമായി മാറുകയാണെന്ന് കോണ്‍ഗ്രസ് പ്രവര്‍ത്തകസമിതി അംഗവും മാവേലിക്കര എംപിയുമായ കൊടിക്കുന്നില്‍ സുരേഷ്. ഭരണഘടനാപരമായ ഉത്തരവാദിത്വം നിറവേറ്റേണ്ട സ്ഥാനം രാഷ്ട്രീയരംഗത്തുള്ള ആര്‍എസ്എസ് തിട്ടൂരങ്ങള്‍ നടപ്പാക്കുന്നതിനു വേണ്ടി ദുരുപയോഗം ചെയ്യുകയാണ് ഗവര്‍ണര്‍ രാജേന്ദ്ര അര്‍ലേക്കര്‍. ഗവര്‍ണര്‍ പദവിയില്‍ പ്രവേശിക്കുന്നതിനു മുമ്പ് രാഷ്ട്രീയപ്രവര്‍ത്തനം ഉണ്ടായിരിക്കാം. പക്ഷേ, ഭരണഘടനാതലത്തില്‍ ഉയര്‍ന്ന ഉത്തരവാദിത്വം വഹിക്കേണ്ട സാഹചര്യത്തില്‍ ആര്‍എസ്എസിന്‍റെ ഏജന്‍റാകുന്നതിന് യാതൊരു നീതീകരണവും ഇല്ല. സംസ്ഥാനത്തെ സുപ്രധാന ഭരണഘടനാ സ്ഥാനമായ ഗവര്‍ണര്‍പദവി മുതലെടുത്ത് ഒരു വ്യക്തി ജനാധിപത്യ തത്വങ്ങളെ ചോദ്യംചെയ്യുന്ന രീതിയില്‍ സംസാരിക്കുകയാണ്. രാജേന്ദ്ര അര്‍ലേക്കര്‍ മനഃപൂര്‍വം രാജ്ഭവനെ വിവാദത്തിലേക്കു വലിച്ചിഴയ്ക്കുകയാണ്. ഇത് അപകടകരമായ പ്രവണതകള്‍ക്ക് വഴിവയ്ക്കും. ഇത്തരത്തില്‍ ഗവര്‍ണര്‍ ഭരണഘടനാ വിരുദ്ധ പ്രവര്‍ത്തനങ്ങള്‍ക്ക് നേതൃത്വം നല്‍കുമ്പോള്‍ മുഖ്യമന്ത്രി എന്തുകൊണ്ട് രാഷ്ട്രപതിയുടെ ശ്രദ്ധയിലേക്ക് ഇതു കൊണ്ടുചേരുന്നില്ല എന്നതും വലിയ ചോദ്യമാണ്. മന്ത്രിമാര്‍ രാജ്ഭവനില്‍ പോകുന്നത് നാടകങ്ങളായി മാറുകയാണ്. ഗവര്‍ണറുടെ നടപടി പൊതുജന താത്പര്യത്തിനെതിരാണെന്നും എന്നാല്‍ മുഖ്യമന്ത്രിക്കും സര്‍ക്കാരിനും ഗവര്‍ണറെ തുറന്ന് എതിര്‍ക്കാനുള്ള ധൈര്യം ഇല്ലെന്നും കൊടിക്കുന്നില്‍ സുരേഷ് കുറ്റപ്പെടുത്തി. കേന്ദ്രസര്‍ക്കാരിന്‍റെ ഇത്തരം നിലപാടുകള്‍ക്കെതിരേ പ്രതികരിക്കാന്‍ പോലും ഭയക്കുന്ന മുഖ്യമന്ത്രി പിണറായി വിജയനും സര്‍ക്കാരും ശക്തമായ നീതിനിഷേധത്തിന്‍റെ ഭാഗമാണ്. ആര്‍എസ്എസിന്‍റെ അജണ്ടകളില്‍ വഴങ്ങാനും ഭരണഘടനാ സ്ഥാപനങ്ങളുടെ നിഷേധത്തില്‍ പങ്കാളിയാകാനും തയാറാണ് ഇപ്പോഴത്തെ ഇടതുപക്ഷ സര്‍ക്കാര്‍. ഇതു ജനാധിപത്യത്തെ ചവിട്ടിമെതിക്കുന്ന അപമാനകരമായ സാഹചര്യമാണെന്നും എംപി പറഞ്ഞു.

ദേശീയപാതയിലെ യാത്രാക്ലേശത്തിന് ബദലായ റോഡിലും കുണ്ടും കുഴിയും

തുറവൂര്‍: ദേശീയപാതയിലെ അരൂര്‍ -തുറവൂര്‍ ഉയരപ്പാത നിര്‍മാണവുമായി ബന്ധപ്പെട്ടുള്ള ഗതാഗതക്കുരുക്ക് ഒഴിവാക്കാന്‍ വാഹനങ്ങള്‍ വഴിതിരിച്ചു വിടുന്ന റോഡുകളിലും യാത്രക്കാരെ കാത്തിരിക്കുന്നത് അപകടക്കുഴികള്‍. നിലവില്‍ വാഹനങ്ങള്‍ വഴിതിരിച്ചു വിടുന്ന തുറവൂര്‍ തൈക്കാട്ടുശേരി, കുമ്പളങ്ങി -തുറവൂര്‍ റോഡുകള്‍ പലയിടത്തും തകര്‍ന്ന നിലയിലാണ്. അരൂര്‍ -തുറവൂര്‍ ദേശീയപാതയിലെ കുഴികളില്‍നിന്നു രക്ഷതേടി സമാന്തര റോഡുകള്‍ തെരഞ്ഞെടുത്താലും കുഴികളില്‍നിന്നു കുഴികളിലേക്കു സഞ്ചരിക്കാനാണു യാത്രക്കാരുടെ വിധി. രണ്ടു റോഡുകളും പൊതുമരാമത്ത് വകുപ്പിന്‍റെ കീഴിലാണെങ്കിലും കഴിഞ്ഞ വര്‍ഷത്തെ മഴക്കാലത്തു ദേശീയപാതയുടെ നിര്‍മാണച്ചുമതലയുള്ള കരാര്‍ കമ്പനി ഈ റോഡുകളിലെ കുഴികളടച്ച് അറ്റകുറ്റപ്പണി നടത്തിയിരുന്നു. മഴക്കാലത്ത് ദേശീയപാത തകര്‍ന്നു യാത്രക്കാരുടെ പ്രതിഷേധം രൂക്ഷമായതോടെ കലക്ടറുടെ നിര്‍ദേശപ്രകാരമായിരുന്നു ഈ നടപടി. എന്നാല്‍ ഇതോടെ റോഡ് അറ്റകുറ്റപ്പണിയില്‍നിന്നു പൊതുമരാമത്ത് വകുപ്പ് പിന്മാറി. പൊതുമരാമത്ത് വകുപ്പിന്‍റെ റോഡ് അറ്റകുറ്റപ്പണി നടത്തേണ്ടത് തങ്ങളല്ലെന്നാണു ദേശീയപാതയുടെ കരാര്‍ കമ്പനിയുടെ ഇപ്പോഴത്തെ നിലപാട്. ഇതോടെ വഴിയില്ലാതെ പെരുവഴിയിലായതു യാത്രക്കാര്‍. എഴുപുന്ന പാറായിക്കവല മുതല്‍ കുമ്പളങ്ങി പാലം വരെയുള്ള ഭാഗത്താണു ഏറ്റവും കൂടുതല്‍ കുഴികള്‍. മഴ തുടങ്ങിയതോടെ വെള്ളം നിറഞ്ഞ കുഴികള്‍ അപകടഭീഷണിയുയര്‍ത്തുന്നു. തോപ്പുംപടി, എറണാകുളം ഭാഗത്തേക്കു പോകുന്ന യാത്രക്കാരില്‍ ഭൂരിഭാഗവും തുറവൂര്‍ - കുമ്പളങ്ങി റോഡ് വഴിയാണ് പോകുന്നത്. തുറവൂര്‍ ജംഗ്ഷനു പടിഞ്ഞാറു ഭാഗത്തെ വളവിലും തുറവൂര്‍-ടിഡി റെയില്‍വേ ഗേറ്റിലും വന്‍ കുഴികളാണ്. തുറവൂര്‍ -കുമ്പളങ്ങി റോഡില്‍ എഴുപുന്ന ഭാഗത്തെ കുഴികള്‍ക്ക് ഒരടി വരെ ആഴമുണ്ട്. ടിഡി റെയില്‍വേ ഗേറ്റിന് അരികിലുള്ള കുഴിയില്‍ നാട്ടുകാര്‍ മെറ്റലും മണ്ണും ഉപയോഗിച്ചു അടച്ചിരുന്നെങ്കിലും വാഹനങ്ങള്‍ കയറിയിറങ്ങി എല്ലാം പഴയ സ്ഥിതിയായി. വെള്ളം കെട്ടിനില്‍ക്കുന്നതിനാല്‍ രാത്രി ആഴമറിയാതെ വാഹനങ്ങള്‍ കുഴിയില്‍ വീഴുന്നതും പതിവായി. നാലുകുളങ്ങര, വല്ലേത്തോട്, കരുമാഞ്ചേരി, എഴുപുന്ന, കുമ്പളങ്ങി പാലത്തിനു തെക്കുഭാഗത്തും വലിയ കുഴികള്‍ നിറഞ്ഞു. തുറവൂര്‍ ആലപ്പുഴ-എറണാകുളം ജില്ലകളെ തീരദേശവുമായി ബന്ധിപ്പിക്കുന്ന എഴുപുന്ന-കുമ്പളങ്ങി പാലത്തിന്‍റെ തെക്കുഭാഗത്തെ അപ്രോച്ച് റോഡ് പൂര്‍ണമായും തകര്‍ന്നു.

വായനാദിനാചരണം: പുസ്തകവണ്ടി പര്യടനം നടത്തി

മങ്കൊമ്പ്: വായനാദിനാചരണത്തിന്‍റെ ഭാഗമായി ചമ്പക്കുളം സെന്‍റ് മേരീസ് ഹയർ സെക്കൻഡറി സ്‌കൂൾ, ലിയോ തേർട്ടീന്ത് വായനശാല എന്നിവയുടെ സംയുക്താഭിമഖ്യത്തിൽ പുസ്തകവണ്ടി പര്യടനം നടത്തി. കൊണ്ടാക്കൽ, പടഹാരം, ചമ്പക്കുളം ബസ് സ്റ്റാൻഡ്, തെക്കേക്കര, പള്ളിക്കൂട്ടുമ്മ, നസ്രത്ത്, പൊങ്ങ, നർബോനപുരം എന്നിവിടങ്ങളിൽ പര്യടനം നടത്തിയ വണ്ടി വിദ്യാർഥികൾക്ക് പുസ്തകങ്ങൾ വിതരണം ചെയ്യുകയും വായനശാലയുടെ സൗജന്യ അംഗത്വ കാർഡുകൾ നൽകുകയും ചെയ്തു. ബാലസാഹിത്യകൃതികൾ അടങ്ങുന്ന എണ്ണൂറോളം പുസ്തകങ്ങളായിരുന്നു പുസ്തകവണ്ടിയിലുണ്ടായിരുന്നത്. സ്‌കൂൾ അങ്കണത്തിൽ നടന്ന വായന മാസാചരണ സമ്മേളനം നെടുമുടി ഗ്രാമപഞ്ചായത്ത് വൈസ് പ്രസിഡന്‍റ് സാജു ആന്‍റണി ഉദ്ഘാടനം ചെയ്തു. ഗ്രാമപഞ്ചായത്തംഗം സോഫിയമ്മ മാത്യു അധ്യക്ഷത വഹിച്ച ചടങ്ങിൽ കുട്ടനാട് താലൂക്ക് ലൈബ്രറി കൗൺസിൽ പ്രസിഡന്‍റ് കെ. ഗോപകുമാർ പി.എൻ. പണിക്കർ അനുസ്മരണം നടത്തി. വായനശാല പ്രസിഡന്‍റ് ടോമി ജോസഫ്, കവി ഫിലിപ്പോസ് തത്തംപള്ളി, വായനശാല ലൈബ്രേറിയൻ ജേക്കബ് ആന്‍റണി, ഹെഡ്മാസ്റ്റർ പ്രകാശ്. ജെ. തോമസ്, സീനിയർ അധ്യാപിക പി.വി. ഷൈനി, കോ-ഓർഡിനേറ്റർ ജോമോൻ വർഗീസ് തുടങ്ങിയവർ പ്രസംഗിച്ചു.

റോഡുകളിലെ വെള്ളക്കെട്ടിനെതിരേ വള്ളംകളി സമരം നടത്തി

മങ്കൊമ്പ് : വെള്ളക്കെട്ടിനെത്തുടർന്ന് ഗ്രാമീണ റോഡുകളിൽ ആഴ്ചകളായി ഗതാഗതം തടസപ്പെടുന്നതിൽ പ്രതിഷേധിച്ച് യുഡിഎഫ് വെളിയനാട് മണ്ഡലം കമ്മിറ്റിയുടെ നേതൃത്വത്തിൽ റോഡിൽ വള്ളംകളി മത്സരം നടത്തി. വെളിയനാട് പുളിഞ്ചുവട് ജംഗ്ഷനിലെ റോഡിൽ നടത്തിയ ചെറുവള്ളംകളി മത്സരം കെപിസിസി സെക്രട്ടറി കറ്റാനം ഷാജി ഉദ്ഘാടനം നടത്തി. സ്വാമിനാഥൻ കമ്മീഷൻ റിപ്പോർട്ട് പ്രകാരം കായലുകളും ആറുകളും തോടുകളും ആഴംകൂട്ടൽ പദ്ധതി നടപ്പിലാക്കാത്ത ഇടതു സർക്കാരിന്‍റെ ക്രൂരമായ നിസംഗതയാണ് കുട്ടനാട്ടുകാർ ഇന്നനുഭവിക്കുന്ന ദുരിതത്തിനു കാരണമെന്ന് അദ്ദേഹം പറഞ്ഞു. കേരള കോൺഗ്രസ് ജില്ലാ പ്രസിഡന്‍റ് ജേക്കബ് ഏബ്രഹാം വിജയികൾക്ക് സമ്മാനങ്ങൾ വിതരണം ചെയ്തു. യുഡിഎഫ് മണ്ഡലം ചെയർമാൻ ടി.ഡി. അലക്‌സാണ്ടർ അധ്യക്ഷത വഹിച്ച ചടങ്ങിൽ സി.വി. രാജീവ്, സാബു തോട്ടുങ്കൽ, ജി. സൂരജ്, എ.കെ. കുഞ്ചറിയ, സന്തോഷ് തോമസ്, റോഫിൻ ജേക്കബ്, ജോർജ് ചന്ദ്രത്തുവാക്കൽ, സനിൽകുമാർ മൂലയിൽ തുടങ്ങിയവർ പ്രസംഗിച്ചു.

ലതികയ്ക്ക് നാല്‍പ്പതാണ്ടിന്‍റെ യോഗയുടെ കരുത്തില്‍ എഴുപതിന്‍റെ ചെറുപ്പം

ആര്‍. മനു മാവേലിക്കര: ഈ എഴുപത്തൊന്നുകാരി ഇന്നും പതിനെട്ടിന്‍റെ ചെറുപ്പത്തിലാണ്. രഹസ്യം തിരക്കിയപ്പോള്‍ അതു യോഗയാണത്രെ. മാവേലിക്കര കൊറ്റാര്‍കാവ് പാറയില്‍ നാട്ടകത്ത് ലതികാ രാജനാണ് നാലു പതിറ്റാണ്ടു കാലത്തെ യോഗചര്യകൊണ്ട് മറ്റു പലര്‍ക്കും അദ്ഭുതം തോന്നത്തക്ക വിധത്തില്‍ ചുറുചുറുക്കോടെ നടക്കുന്നത്. 31-ാം വയസില്‍ അഞ്ചാം ക്ലാസുകാരനായ മൂത്തമകന്‍ രാജേഷില്‍നിന്നാണ് ലതിക യോഗാഭ്യാസം പഠിച്ചുതുടങ്ങുന്നത്. രാജേഷ് അന്ന് പാലക്കാട് കല്ലേക്കാട് വ്യാസ വിദ്യാപീഠത്തില്‍ അഞ്ചാം ക്ലാസ് വിദ്യാര്‍ഥിയായിരിക്കേ അവിടുത്തെ പാഠ്യപദ്ധതിയില്‍ യോഗ പരിശീലനവുമുണ്ടായിരുന്നു. അന്നുമുതല്‍ ഇന്നുവരെ ലതികയുടെ ദിനചര്യയുടെ ഭാഗമാണ് യോഗ. പിന്നീട് പല മാധ്യമങ്ങള്‍ വഴിയും ലതിക യോഗയെ ക്കുറിച്ച് കൂടുതല്‍ അറിയുകയും തന്‍റെ യോഗചര്യയെ മെച്ചപ്പെടുത്തുകയും ചെയ്തു. യോഗ കൂടാതെ ഒരു ജിംനാസ്റ്റിക് ട്രൈയിനികൂടിയാണ് ലതിക. പുന്നമൂട് പ്രവര്‍ത്തിക്കുന്ന വനിതകള്‍ക്കു മാത്രമായി സജ്ജീകരിച്ചിരിക്കുന്ന ജിമ്മില്‍ ചെറുപ്പക്കാരികളെക്കാള്‍ വലിയ പ്രകടനമാണ് എഴുപതിന്‍റെ കരുത്തില്‍ ലതിക കാഴ്ചവയ്ക്കുന്നത്. ഇരുപത് പുഷ് അപ്, പത്ത് ചിന്നിംഗുകള്‍, മൂന്ന് സെറ്റായി അറുപതോളം ചെസ്റ്റ് പ്രസ്, കൂടാതെ സാമാന്യം തരക്കേടില്ലാത്ത ഭാരത്തില്‍ ലെഗ്പ്രസും ചെയ്യുമെന്ന് സഹ ജിംനാസ്റ്റിക് പരിശീലകരും സാക്ഷ്യപ്പെടുത്തുന്നു. കേവലം ആറുമാസമായിട്ടേയുള്ളു തന്‍റെ ജിംനാസ്റ്റിക് പരിശീലനത്തിനെന്ന് ലതിക പറയുന്നു. കൂടാതെ സൂംബ ഡാന്‍സ്, തിരുവാതിര എന്നിവയുമുണ്ട് ലതികയുടെ ലിസ്റ്റില്‍. ആഴ്ചയില്‍ ഒരിക്കലാണ് സൂംബ പരിശീലനമെങ്കില്‍ ദിവസവും രാവിലത്തെ യോഗയും ജിമ്മും കഴിഞ്ഞ് വൈകിട്ട് നാലു മുതല്‍ മുള്ളികുളങ്ങര എന്‍എസ്എസ് കരയോഗം ഹാളില്‍ തിരുവാതിര പരിശീലനവുമുണ്ട്. ഇതിനിടയ്ക്കുള്ള സമയം മുള്ളിക്കുളങ്ങരയും മാവേലിക്കരയുമുള്ള വീട്ടിലെ കാര്യങ്ങളും നോക്കിനടത്തുന്നതുകൊണ്ട് വലിയ തിരക്കിലാണെപ്പോഴും ലതിക. എഴുപത്തിയൊന്നാം വയസിലും തന്‍റെ ഇന്നോവാ ക്രിസ്റ്റ കാറുമായി എന്താവശ്യത്തിനും പുറത്തുപോകുന്നതും ലതിക തന്നെയാണ്. ഈ പ്രായത്തില്‍ ജിമ്മൊക്കെ എങ്ങനെ ചെയ്യുന്നു എന്ന ചോദ്യത്തിന് യോഗ പകര്‍ന്നുതന്ന മനോധൈര്യവും കരുത്തുമുണ്ടെങ്കില്‍ എനിക്ക് എന്തുമാകുമെന്നതായിരുന്നു ഉത്തരം. പുലര്‍ച്ചെ മൂന്നിനാരംഭിക്കുന്ന ദിനചര്യയാണ് ലതികയുടേത്. ഒരു മണിക്കൂര്‍ യോഗയും രണ്ടു മണിക്കൂര്‍ ജിം പരിശീലനവും ഒന്നര മണിക്കൂര്‍ നീളുന്ന തിരവാതിര പരിശീലനവും ചേരുന്നതാണ് ഒരു ദിവസത്തെ വ്യായാമ ദിനചര്യയെന്നും ഇതിനൊപ്പം ഭക്ഷണ ക്രമീകരണവും ചേരുന്നതാണ് തന്‍റെ ആരോഗ്യ രഹസ്യമെന്നും ലതികവെളിപ്പെടുത്തുന്നു. എല്ലാവരും ഇത്തരത്തില്‍ യോഗയുമൊത്തുള്ള ഒരു ജീവിതക്രമം മുന്‍പോട്ടു കൊണ്ടുപോകുകയാണെങ്കില്‍ ജീവിതം സന്തോഷപ്രദവും ആരോഗ്യപൂര്‍ണവുമാക്കാമെന്നതാണ് ലതികയുടെ നിലപാട്. മാവേലിക്കര ബുദ്ധ ജംഗ്ഷനു സമീപമുള്ള വീട്ടില്‍ മൂന്നാം നിലയിലേക്കും മറ്റും പോകാന്‍ ലിഫ്റ്റുണ്ടെങ്കിലും കോണിപ്പടികള്‍ കയറി മാത്രമേ ലതിക പോകാറുള്ളു. മൂന്നാം നിലയിലാണ് യോഗാചര്യക്കും മറ്റുമായുള്ള മുറി സ്ഥിതിചെയ്യുന്നത്. വ്യാപാരിയായ ഭര്‍ത്താവ് രാജശേഖരനും പ്രവാസികളായ മകന്‍ രാജേഷും മകള്‍ ലക്ഷ്മിയും അഭിഭാഷകനായ ഇളയമകന്‍ കൃഷ്ണനുണ്ണിയും ലതികയുടെ ജീവിതക്രമത്തിന് പൂര്‍ണ പിന്തുണയുമായി കൂടെയുണ്ട്.

കലുങ്ക് നിര്‍മാണത്തിന് എടുത്ത കുഴി അപകടക്കെണി

ഹരിപ്പാട്: ദേശീയപാതയില്‍ കലുങ്ക് നിര്‍മാണത്തിനായി എടുത്ത കുഴി അപകടക്കെണിയാകുന്നു. താലൂക്ക് ആശുപത്രി ജംഗ്ഷനില്‍നിന്ന് റവന്യു ടവറിലേക്കുള്ള റോഡിലാണ് അപകടം പതിയിരിക്കുന്ന കുഴിയുള്ളത്. ദേശീയപാതയില്‍കൂടി വരുന്ന വാഹനങ്ങള്‍ റവന്യു ടവര്‍, കോടതി, പോലീസ് സ്റ്റേഷന്‍, ബിഎസ്എന്‍എല്‍ ഓഫിസ് എന്നിവിടങ്ങളിലേക്കു പോകാന്‍ ആശ്രയിക്കുന്ന റോഡാണിത്. പഴയ ദേശീയപാതയായ ഈ റോഡില്‍ മുരളി ഹോട്ടലിനു സമീപമുള്ള കുഴിയുടെ വശങ്ങള്‍ ഇടിഞ്ഞു വീണുകൊണ്ടിരിക്കുകയാണ്. ഇപ്പോള്‍ റോഡിന്‍റെ പകുതിയിലധികം ഇടിഞ്ഞുപോയി. ടാര്‍ ചെയ്ത ഭാഗമാണ് ഇടിഞ്ഞുവീഴുന്നത്. ഇതുമൂലം എതിരേ വാഹനങ്ങള്‍ വന്നാല്‍ സൈഡ് കൊടുക്കാന്‍ കഴിയില്ല. ഇവിടെ ആവശ്യത്തിനുള്ള മുന്നറിയിപ്പ് സംവിധാനങ്ങള്‍ ഏര്‍പ്പെടുത്തിയിട്ടില്ല. റോഡ് ഇടിഞ്ഞുവീഴുന്നത് ഒഴിവാക്കുന്നതിനുള്ള നടപടി സ്വീകരിക്കണമെന്നാണ് യാത്രക്കാരുടെ ആവശ്യം.

ചേര്‍ത്തല നഗരത്തിലെ അനധികൃത നിര്‍മാണം: ടാക്‌സി സ്റ്റാന്‍ഡില്‍ വേലികെട്ടുന്നത് തടഞ്ഞ് ഡ്രൈവര്‍മാര്‍

ചേര്‍ത്തല: അനധികൃത കച്ചവടങ്ങള്‍ക്കെതിരായ നഗരസഭ ഇടപെടലുകള്‍ക്കു പിന്നാലെ നടപടിയുമായി ക്ഷേത്ര അധികൃതരും. നടപടിയുടെ ഭാഗമായി ടാക്‌സി വാഹനങ്ങള്‍ ഇടുന്ന സ്ഥലത്തു വേലികെട്ടി തിരിക്കാനുള്ള നീക്കം തര്‍ക്കങ്ങളെത്തുടര്‍ന്നു നിര്‍ത്തിവച്ചു. വേലിക്കെട്ടാന്‍ ഇട്ട കല്‍ക്കുറ്റികളടക്കം തര്‍ക്കത്തെത്തുടര്‍ന്ന് ഊരിമാറ്റി. ക്ഷേത്ര അധികൃതര്‍ ഉപദേശകസമിതിയുടെ സഹകരണത്തില്‍ സ്ഥലം തിരിച്ചു വേലികെട്ടാന്‍ വെള്ളിയാഴ്ച രാവിലെ ആറോടെയാണ് നടപടി തുടങ്ങിയത്. ഈ സമയത്ത് വാഹനങ്ങളൊന്നും ഇല്ലായിരുന്നു. വിവരമറിഞ്ഞ് ഏഴോടെയാണ് ഡ്രൈവര്‍മാര്‍ എത്തിയത്. ഇതോടെ തര്‍ക്കവും വാദപ്രതിവാദങ്ങളുമുണ്ടായി. തുടര്‍ന്നാണ് നടപടികള്‍ നിര്‍ത്തിവച്ചത്. വര്‍ഷങ്ങളായി ടാക്‌സിവാഹനങ്ങള്‍ ഇടുന്ന സ്ഥലമാണിതെന്നും ഇതിനുമേല്‍ അനാവശ്യ വിവാദമാണുണ്ടാക്കുന്നതെന്നുമാണ് സംയുക്ത ഡ്രൈവേഴ്‌സ് യൂണിയന്‍റെ വാദം. 45 ഓളം ഡ്രൈവര്‍മാര്‍ ഇവിടം കേന്ദ്രീകരിച്ചു പ്രവര്‍ത്തിച്ച് ഉപജീവനത്തിനു വഴി കണ്ടെത്തുന്നു. ഇവരെ പെരുവഴിയിലേക്കു തള്ളിവിടുന്ന ഏകപക്ഷീയ നടപടിയാണ് സ്വീകരിച്ചത്. ഇതിനെതിരേ സര്‍ക്കാരിനും മന്ത്രിക്കുമടക്കം പരാതികള്‍ നല്‍കിയിട്ടുണ്ടെന്നും ഭാരവാഹികള്‍ അറിയിച്ചു. ക്ഷേത്രത്തിന്‍റെ ഉടമസ്ഥതയിലുള്ള സ്ഥലം ടാക്‌സി സ്റ്റാന്‍ഡിന് വിട്ടുനല്‍കിയിട്ടില്ലെന്ന് ക്ഷേത്രം അധികൃതരും പറയുന്നു. നിലവില്‍ ക്ഷേത്രത്തിലെ തെക്കേ ഓഡിറ്റോറിയത്തിന്‍റെ വികസനത്തിനും നവീകരണത്തിനും അംഗീകാരമായ സാഹചര്യത്തില്‍ തിരുവിതാംകൂര്‍ ദേവസ്വം ബോര്‍ഡ് അധികൃതരുടെ നിര്‍ദ്ദേശപ്രകാരമാണ് സ്ഥലം സംരക്ഷിക്കാന്‍ നടപടി സ്വീകരിച്ചതെന്ന് ക്ഷേത്രം സബ് ഗ്രൂപ്പ് ഓഫീസര്‍ ലേഖാ ആര്‍ പണിക്കര്‍ പറഞ്ഞു. സ്ഥാപിച്ച കുറ്റികള്‍ പിഴുതുമാറ്റിയതിനെതിരേ ബന്ധപ്പെട്ട കേന്ദ്രങ്ങളില്‍ പരാതി നല്‍കുന്നുണ്ട്. ഒപ്പം കോടതിയില്‍ നിയമനടപടികളും സ്വീകരിക്കുമെന്നും സബ് ഗ്രൂപ്പ് ഓഫീസര്‍ അറിയിച്ചു.

ഗൃഹപ്രവേശന ചടങ്ങ് നടക്കാനിരിക്കെ ഗൃഹനാഥൻ അപകടത്തിൽ മരിച്ചു

മങ്കൊമ്പ്: ഇന്നു ഗൃഹപ്രവേശന ചടങ്ങ് നടക്കാനിരിക്കെ ഗൃഹനാഥൻ റോഡ് അപകടത്തിൽ മരിച്ചു. മങ്കൊമ്പ് വട്ടക്കളത്തിൽ പരേതനായ രവീന്ദ്രൻ പിള്ളയുടെയും വിജയമ്മയുടെയും മകൻ ശൈലേഷ് കുമാറാണ് (ബിജു -51 ) മരിച്ചത്. വ്യാഴാഴ്ച വെെകുന്നേരം ഏഴിനു എംസി റോഡിൽ തുരുത്തി മിഷൻ പള്ളിക്കുസമീപം റോഡ് മുറിച്ച് കടക്കുന്നതിനിടെ ബൈക്ക് ഇടിച്ചാണ് അപകടം. ഉടൻ ചങ്ങനാശേരിയിലെ താലൂക്ക് ആശുപത്രിയിൽ പ്രവേശിപ്പിച്ചു. അവിടെനിന്നു കോട്ടയം മെഡിക്കൽ കോളജ് ആശുപത്രിയിലേക്ക് കൊണ്ടുപോകും വഴി രാത്രി 9.30 നു മരണം സംഭവിച്ചു. തുരുത്തിയിൽ വീടും പുരയിടവും വാങ്ങി അറ്റകുറ്റപ്പണികൾ നടത്തി ഇന്ന് ഗ്യഹപ്രവേശന ചടങ്ങ് നടത്താനിരിക്കുകയായിരുന്നു. സംസ്കാരം ഇന്ന് മൂന്നിന് മങ്കൊമ്പിലെ കുടുബവീട്ടിൽ. ഭാര്യ: അമ്പിളി.

ബസും ബൈക്കും കുട്ടിയിടിച്ച് ബൈക്ക് യാത്രികൻ മരിച്ചു

കായംകുളം: ബസും ബൈക്കും കുട്ടിയിടിച്ച് ബൈക്ക് യാത്രികൻ മരിച്ചു. മുതുകുളം ഗ്രീഷ്‌മത്തിൽ പരേതനായ തങ്കപ്പൻപിള്ള - രമാദേവി ദമ്പതികളുടെ മകൻ ടി. രമേശ് കുമാറാണ് (51) മരിച്ചത്. ഇന്നലെ രാവിലെ കാർത്തികപ്പള്ളി റോഡിൽ കരിവിൽ പീടിക ജംഗ്ഷനു കിഴക്കുവശം ബസും ബൈക്കും കൂട്ടിയിടിച്ചായിരുന്നു അപകടം. ഭാര്യ: രാജലക്ഷ്‌മി (നഴ്‌സ്‌, ദീപം ഹോസ്‌പിറ്റൽ, പറവൂർ ജംഗ്ഷൻ). മക്കൾ: രേഷ്‌മ, ഗ്രീഷ്‌മ.

മാന്നാർ മൂർത്തിട്ട-മുക്കാത്താരി റോഡ് നിർമാണം നീളുന്നു

മാന്നാർ: മാന്നാറിന്‍റെ പടിഞ്ഞാറൻ പ്രദേശങ്ങൾക്ക് യാത്രാസൗകര്യം ഒരുക്കുന്ന റോഡിന്‍റെ നിർമാണം ഇനിയും നീളും. മാന്നാർ പാവുക്കര മൂർത്തിട്ട-മുക്കാത്താരി റോഡിന്‍റെ നിർമാണമാണ് റീ ടെൻഡർ നടപടികളിൽ തട്ടി അനിശ്ചിതമായി നീളുന്നത്. മാന്നാറിന്‍റെ പടിഞ്ഞാറൻ പ്രദേശങ്ങളിൽ കാർഷിക മേഖലയിലുൾപ്പെടെ വികസനക്കുതിപ്പിന് നിദാനമാകാവുന്ന റോഡാണിത്. കാൽ നൂറ്റാണ്ടായി തകർന്നുകിടക്കുന്ന മാന്നാർ പാവുക്കര മൂർത്തിട്ട-മുക്കാത്താരി ബണ്ട് റോഡിന്‍റെ പുനർനിർമാണമാണ് ഇനിയും നീളുവാൻ സാധ്യത ഏറിയത്. എല്ലാ രാഷ്‌ട്രീയ പാർട്ടികളുടെയും തെരഞ്ഞെടുപ്പ് സമയത്തെ പ്രധാന വിഷയമാണ് റോഡിന്‍റെ നിർമാണം. പുതിയ നിരക്കിൽ എസ്റ്റിമേറ്റ് തയാറാക്കി ടെൻഡർ പുനഃക്രമീകരിച്ചു ചെയ്യാനാണ് കഴിഞ്ഞ ദിവസം ലഭിച്ച നിർദേശമെന്ന് മന്ത്രി സജി ചെറിയാന്‍റെ ഓഫീസ് അറിയിച്ചു. നാട്ടുകാരുടെ വർഷങ്ങളായുള്ള ആവശ്യത്തിന് പരിഹാരമായി മൂർത്തിട്ട-മുക്കാത്താരി ബണ്ട് റോഡിന്‍റെ നിർമാണത്തിനായി സ്ഥലം എംഎൽഎ കൂടിയായ മന്ത്രി സജി ചെറിയാൻ റീബിൽഡ് കേരള പദ്ധതിയിൽ ഉൾപ്പെടുത്തി 15 കോടി രൂപയാണ് അനുവദിച്ചത്. നിർമാണപ്രവർത്തനങ്ങളുടെ ആദ്യഘട്ടമെന്ന നിലയിൽ ആറുമീറ്റർ വീതിയിൽ അളവെടുപ്പും ഭൂമി ഏറ്റെടുക്കലും നടത്തി. കൂടാതെ മാന്നാർ പഞ്ചായത്ത് പ്രസിഡന്‍റ് ടി.വി. രത്നകുമാരി ചെയർപേഴ്സണായി 50 പേരടങ്ങുന്ന ജനറൽ കമ്മിറ്റിയും 25 അംഗ എക്സിക്യൂട്ടീവ് കമ്മിറ്റിയും തെരഞ്ഞെടുത്ത് സംഘാടകസമിതിയും രൂപവത്‌കരിച്ചിരുന്നു. 2024 മാർച്ച് 12ന് മന്ത്രി നിർമാണോദ്‌ഘാടനവും നടത്തിയിരുന്നു. കരാറെടുക്കാൻ മുന്നോട്ടുവന്ന മുളമൂട്ടിൽ കൺസ്ട്രക്‌ഷൻസ് കൈയൊഴിഞ്ഞതിനെത്തുടർന്ന് മന്ത്രി സജി ചെറിയാന്‍റെ നേതൃത്വത്തിൽ നടത്തിയ ശ്രമങ്ങളുടെ ഫലമായി കരാറേറ്റെടുക്കാൻ ഊരാളുങ്കൽ സൊസൈറ്റി സന്നദ്ധത അറിയിക്കുകയും സർക്കാർ നൽകിയ രൂപരേഖയും എസ്റ്റിമേറ്റും പരിശോധിച്ച്‌ വിലയിരുത്താനായി സൊസൈറ്റി പ്രതിനിധികൾ പദ്ധതിസ്ഥലം സന്ദർശിക്കുകയും ചെയ്തിരുന്നു. എന്നാൽ, വർക്ക്‌ രണ്ടാമത് ടെൻഡർ ചെയ്ത ഊരാളുങ്കൽ സൊസൈറ്റി 18 ശതമാനത്തിന് മുകളിലുളള നിരക്കാണ് ഉൾപ്പെടുത്തിയത്. ഇത്രയും ഉയർന്ന നിരക്കിൽ നിർമാണത്തിന് അംഗീകാരം ലഭിക്കാതെ വന്നതോടെയാണ് പുതിയ നിരക്കിൽ എസ്റ്റിമേറ്റ് തയാറാക്കി ടെൻഡർ ചെയ്യാനുള്ള നിർദേശം ലഭിച്ചതെന്ന് മന്ത്രി സജി ചെറിയാന്‍റെ ഓഫീസ് അറിയിച്ചു. ഇതോടെ റോഡ് നിർമാണം വീണ്ടും നീളുകയായിരുന്നു. താത്കാലിക പരിഹാരം ഉണ്ടാവണമെന്ന് ആവശ്യം മൂർത്തിട്ട-മുക്കാത്താരി റോഡിലെ യാത്രാദുരിതത്തിന് താത്കാലികമായെങ്കിലും ആശ്വാസം ഉണ്ടാകുന്നതിന് നടപടികൾ ഉണ്ടാവണമെന്ന് ആവശ്യപ്പെട്ട് സിപിഐ മാന്നാര്‍ മണ്ഡലം കമ്മിറ്റിയംഗവും പാവുക്കര മുസ്‌ലിം ജമാഅത്ത് കമ്മിറ്റി പ്രസിഡന്‍റും സാമൂഹ്യപ്രവർത്തകനുമായ സുധീർ എലവൺസ് മുഖ്യമന്ത്രി, തദ്ദേശസ്വയംഭരണമന്ത്രി, മന്ത്രി സജി ചെറിയാൻ എന്നിവർക്ക് നിവേദനം നൽകി. യാത്രാക്ലേശം ശാശ്വതമായി പരിഹരിക്കാന്‍ കാലതാമസം ഉണ്ടാകുമെന്നതിനാൽ അപകടമില്ലാതെ നടന്നുപോകാന്‍ കഴിയുന്ന സാഹചര്യം പ്രദേശവാസികൾക്ക് ഉണ്ടാക്കി നൽകണമെന്നും സര്‍ക്കാര്‍ സംവിധാനങ്ങളില്‍ കൂടി അത് സാധ്യമാവില്ലെങ്കില്‍ പൊതുജന പങ്കാളിത്തത്തോടുകൂടി താത്കാലികമായെങ്കിലും റോഡിലെ കുഴികളും ഗര്‍ത്തങ്ങളും അടയ്ക്കുന്നതിന് അനുവാദം ലഭ്യമാവുന്നതിനുവേണ്ട നടപടികള്‍ സ്വീകരിക്കണമെന്നും നാട്ടുകാർ ആവശ്യപ്പെട്ടു.

ക്രൈസ്റ്റ് കിംഗ് സ്കൂളിൽ പ്രവേശനോത്സവം

ചേപ്പാട്: ക്രൈസ്റ്റ് കിംഗ് ഹയർ സെക്കൻഡറി സ്കൂളിൽ പ്ലസ് വൺ പ്രവേശനോത്സവം വരവേൽപ്പ് 2025 ചേപ്പാട് പഞ്ചായത്ത് പ്രസിഡന്‍റ് എം.കെ. വേണുകുമാർ ഉദ്ഘാടനം ചെയ്തു. കുട്ടികളുടെ മാനസികവും ബൗദ്ധികവുമായ വളർച്ചയിൽ രക്ഷിതാക്കൾക്കുള്ള പങ്ക് വലുതാണെന്ന് അദ്ദേഹം പറഞ്ഞു. സ്കൂൾ പിടിഎ പ്രസിഡന്‍റ് അഡ്വ. സുനിൽകുമാർ അധ്യക്ഷത വഹിച്ചു. 2024-25 വർഷം പ്ലസ്ടു പരീക്ഷയിൽ ഉന്നതവിജയം നേടിയ കുട്ടികളെ അനുമോദിച്ചു. മാവേലിക്കര രൂപത എംഎസ്‌സി സ്കൂൾ കറസ്പോണ്ടന്‍റ് ഫാ. ഡാനിയേൽ തെക്കേടത്ത് മുഖ്യപ്രഭാഷണം നടത്തി. സ്കൂൾ പ്രിൻസിപ്പൽ ബിനു കെ. സാമുവൽ, ചേപ്പാട് പഞ്ചായത്ത് വൈസ് പ്രസിഡന്‍റ് ബിന്ദു രാജേന്ദ്രൻ മുതുകുളം ബ്ലോക്ക് പഞ്ചായത്ത് മെമ്പർ എം. ശിവപ്രസാദ് ഫാ. ജോബി, സൂസൻ ജേക്കബ്, എൻഎസ്എസ് കോ-ഓർഡിനേറ്റർ ജൂലി ജോയി, സീനിയർ അസി. സി.ടി. ജോമോൻ എന്നിവർ പ്രസംഗിച്ചു. കായംകുളം എക്സൈസ് പ്രിവന്‍റീവ് ഓഫീസർ ലഹരിയുമായി ബന്ധപ്പെട്ട ക്ലാസ് നയിച്ചു.

വൈദികരുടെ നിരാഹാരത്തിന് ഐക്യദാർഢ്യം

ആലപ്പുഴ: കണ്ണമാലിമുതൽ സൗദിവരെ തുടർച്ചയായി ഉണ്ടാകുന്ന കടലാക്രമണത്തെ ലാഘവത്തോടെ കാണുന്ന കളക്ടറും ഇറിഗേഷൻ ഡിപ്പാർട്ട്മെന്‍റ് ഉദ്യോഗസ്ഥരും കുറ്റകരമായ അനാസ്ഥ അവസാനിപ്പിക്കണമെന്ന് ഓൾ ഇന്ത്യാ കാത്തലിക് യൂണിയൻ കേരള സംസ്ഥാന സമിതി ആവശ്യപ്പെട്ടു. പ്രകൃതിദുരിതത്തിൽ പെടുത്തി അടിയന്തര ഡംപിംഗ് നടത്തി തീരദേശവാസികളെ രക്ഷിക്കാൻ ഉദ്യോഗസ്ഥർ താത്പര്യം എടുക്കണമെന്ന് അൽഫോൻസ് പെരേര (കൊല്ലം), ബാബു അത്തിപ്പൊഴിയിൽ (ആലപ്പുഴ), ജയിംസ് സി.ജെ. (തൃശൂർ), ഫ്രാൻസി ആന്‍റണി (തൃശൂർ), ആന്‍റണി തൊമ്മാന (ഇരിങ്ങാലക്കുട,) ദേവസഹായം (സുൽത്താൻപേട്ട്), തോമസ് തേവരത് (മാവേലിക്കര), ജോസ് ആന്‍റണി (കാലടി), ജോസ് കുരിശിങ്കൽ (കോട്ടപ്പുറം) എന്നിവർ ആവശ്യപ്പെട്ടു. നാളെ നടക്കുന്ന വൈദികരുടെ നിരാഹാരത്തിന് സംഘടന ഐക്യദാർഢ്യം പ്രഖ്യാപിച്ചു.

കഞ്ചാവുവേട്ട: ഇതരസംസ്ഥാന തൊഴിലാളികൾ പിടിയിൽ

അമ്പലപ്പുഴ: രണ്ടര കിലോ കഞ്ചാവുമായി രണ്ട് ഇതരസംസ്ഥാന തൊഴിലാളികൾ പിടിയിൽ. ബീഹാർ വെസ്റ്റ് ചമ്പാരൻ ജില്ലയിലെ ദൊഘ്രാഹയിൽനിന്നും അമ്പലപ്പുഴ കാക്കാഴം പക്കിപ്പറമ്പ് വീട്ടിൽ വാടകയ്ക്ക് താമസിക്കുന്ന അലി രാജ അൻസാരി ( 37), എം.ഡി. അക്ബർ (49) എന്നിവരെയാണ് ജില്ലാ ലഹരിവിരുദ്ധ സ്ക്വാഡും അമ്പലപ്പുഴ പോലീസും ചേർന്ന് പിടികൂടിയത്. രഹസ്യവിവരത്തിന്‍റെ അടിസ്ഥാനത്തിൽ നടത്തിയ പരിശോധനയിലാണ് കഞ്ചാവ് പിടികൂടിയത്. നർക്കോട്ടിക് സെൽ ഡിവൈഎസ്പി ബി. പങ്കജാക്ഷന്‍റെ നേതൃത്വത്തിലുള്ള ജില്ലാ ലഹരിവിരുദ്ധ സ്ക്വാഡും അമ്പലപ്പുഴ ഡിവൈ എസ്പി കെ.എൻ. രാജേഷിന്‍റെ മേൽനോട്ടത്തിൽ അമ്പലപ്പുഴ പോലീസ് സ്റ്റേഷൻ ഇൻസ്പെക്ടർ പ്രതീഷ് കുമാറിന്‍റെ നേതൃത്വത്തിൽ സബ് ഇൻസ്പെക്ടർ അനീഷ് കെ. ദാസ്, ജി.എസ്ഐ പ്രിൻസ് സൽപുത്രൻ, സീനിയർ സിവിൽ പോലീസ് ഓഫീസർ ജയശങ്കർ, ഡ്രൈവർ സിവിൽ പോലീസ് ഓഫീസർ വിഷ്ണു, ഹോം ഗാർഡ് നന്ദകുമാർ എന്നിവരടങ്ങുന്ന സംഘമാണ് പ്രതികളെ പിടികൂടിയത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു. അമ്പലപ്പുഴയിൽനിന്ന് നാലു കിലോ കഞ്ചാവുമായി മൂന്നു പേരെ അറസ്റ്റ് ചെയ്തതുമായി ബന്ധപ്പെട്ട കേസിന്‍റെ അന്വേഷണം തുടരുകയാണ്. ഒഡീഷയിൽനിന്നാണ് കഞ്ചാവ് കടത്തിക്കൊണ്ട് വന്നതെന്ന് പ്രാഥമിക അന്വേഷണത്തിൽ അറിയാൻ കഴിയുന്നത്.

റോഡ് ഉയർത്താൻ സമരമാർഗം വള്ളംകളി

മങ്കൊമ്പ്: ചെറിയ അളവിൽ ജലനിരപ്പുയർന്നാൽ പോലും വെള്ളത്തിനടിയിലാകുന്ന കുട്ടനാട്ടിലെ ഗ്രാമീണറോഡുകൾ ഉയർത്തി പുനർനിർമിക്കണമെന്നാവശ്യപ്പെട്ട് യുഡിഎഫ് കുട്ടനാട് വെളിയനാട് നിയോജകമണ്ഡലം കമ്മിറ്റിയുടെ നേതൃത്വത്തിൽ ഇന്നു വള്ളംകളി നടത്തി പ്രതിഷേധിക്കും. 2.30ന് വെളിയനാട് പുളിഞ്ചുവട് ജംഗ്ഷനിലാണ് പ്രതിഷേധ സൂചകമായി ചെറുവള്ളംകളി സമരം നടത്തുന്നത്. നാലുദിവസം മഴപെയ്താൽ കുട്ടനാട്ടിലെ ഇടറോഡുകൾ വെള്ളത്തിനടിയിലാകുന്നത് പതിവായിരിക്കുകയാണെന്ന് നേതാക്കൾ ആരോപിച്ചു. ഇരുചക്രവാഹനങ്ങൾ പോലും ഓടാത്ത സാഹചര്യത്തിൽ പ്രദേശവാസികൾ വളരെയേറെ ബുദ്ധിമുട്ട് അനുഭവിക്കുകയാണ്. വെളിയനാട് പഞ്ചായത്തിലെ കിടങ്ങറ-കുന്നംകരി റോഡിൽ വെള്ളം കയറിയിട്ട് ഒരാഴ്ചയിലേറെയായി. കിടങ്ങറ-കണ്ണാടി റോഡിൽ പുളിഞ്ചുവട് മുതലുള്ള ഭാഗത്ത് അര കിലോമീറ്റർ പ്രദേശം വെള്ളത്തിലാണ്. ഇതുവഴിയുള്ള മങ്കൊമ്പ്, ചതുർഥ്യാകരി, പുളിങ്കുന്ന്, വടക്കൻ വെളിയനാട് കെഎസ്ആർടിസി സർവീസുകൾ ജനങ്ങൾക്ക് ഏക ആശ്രയമാണ്. റോഡ് ഉയർത്തി നിർമിക്കാൻ അധികൃതർ അടിയന്തര നടപടി സ്വീകരിക്കണമെന്ന് യുഡിഎഫ് നേതാക്കളായ സി.വി. രാജീവ്, സാബു തോട്ടുങ്കൽ, ജി. സൂരജ്, ടി.ഡി. അലക്‌സാണ്ടർ, എ.കെ. കുഞ്ചെറിയ എന്നിവർ ആവശ്യപ്പെട്ടു.

റോഡ് തോടായി; യാത്രക്കാർ ദുരിതത്തിൽ

തുറവൂര്‍: ലക്ഷങ്ങള്‍ മുടക്കി പുതുക്കിപ്പണിത റോഡ് തകര്‍ന്നു തോടായി. ഇതോടെ യാത്രക്കാര്‍ കടുത്ത ദുരിതത്തിലും. തുറവൂര്‍-കുമ്പളങ്ങി റോഡാണ് ഏറെക്കുറെ പൂര്‍ണമായും തകര്‍ന്നു തരിപ്പണമായത്. മാസങ്ങള്‍ക്കുമുമ്പ് ജനകീയ പ്രക്ഷോഭത്തെത്തുടര്‍ന്ന് കുഴികളും മറ്റും അടച്ച് ടാര്‍ ചെയ്ത റോഡാണ് വീണ്ടും തകര്‍ന്നത്. നിലവില്‍ റോഡ് കുഴികള്‍ നിറഞ്ഞതിനാല്‍ കാല്‍നടയാത്രക്കാര്‍ക്കു പോലും സഞ്ചരിക്കാന്‍ സാധിക്കില്ല. തുറവൂര്‍-തൈക്കാട്ടുശേരി റോഡിന്‍റെ അവസ്ഥയും ഇതുതന്നെ. റോഡ് തകര്‍ന്നു തരിപ്പണമായി വെള്ളം കെട്ടിക്കിടക്കുന്നത് വന്‍ദുരിതമാണ് യാത്രക്കാര്‍ക്ക് ഉണ്ടാക്കുന്നത്. ദേശീയപാതയില്‍ തുറവൂര്‍-അരൂര്‍ ഉയരപ്പാത നിര്‍മാണത്തോടനുബന്ധിച്ച് വലിയ വാഹനങ്ങളും ചെറുവാഹനങ്ങളും തുറവൂര്‍- കുമ്പളങ്ങി റോഡിലൂടെയും തുറവൂര്‍-തൈക്കാട്ടുശേരി റോഡിലൂടെയുമാണ് തിരിച്ചുവിട്ടുകൊണ്ടിരിക്കുന്നത്. ഈ റോഡുകള്‍ തകര്‍ന്നതോടുകൂടി വന്‍ ഗതാഗതക്കുരുക്കാണ് അനുഭവപ്പെടുന്നത്. സ്‌കൂള്‍ കുട്ടികളാണ് കൂടുതലും ദുരിതത്തിലായത്. ഗതാഗതക്കുരുക്കുമൂലം സമയത്ത് സ്‌കൂളിലും ജോലിസ്ഥലങ്ങളിലും എത്താനാവുന്നില്ല. അടിയന്തരമായി കുമ്പളങ്ങി-തുറവൂര്‍ റോഡും തുറവൂര്‍-തൈക്കാട്ടുശേരി റോഡും അറ്റകുറ്റപ്പണി നടത്തി ഗതാഗതയോഗ്യമാക്കണമെന്ന് നാട്ടുകാര്‍ ആവശ്യപ്പെട്ടു.

നെല്ലുവില വിതരണം ചെയ്യണം: കർഷക യൂണിയൻ

മങ്കൊമ്പ്: നെല്ലുവില അന്യായമായി വൈകിപ്പിച്ചു കർഷകരെ കടക്കാരാക്കി മാറ്റിയ ഇടതു സർക്കാർ കർഷകവഞ്ചന അവസാനിപ്പിക്കണമെന്ന് കേരള കോൺഗ്രസ് ഉന്നതാധികാര സമിതിയംഗം ജോസ് കോയിപ്പള്ളി ആവശ്യപ്പെട്ടു. കേരള കർഷക യൂണിയൻ നടത്തിയ നെൽകർഷക സമരം ഉദ്ഘാടനം ചെയ്യുകയായിരുന്നു അദ്ദേഹം. നെൽകർഷകരെ മില്ലുകാർക്ക് വിറ്റ സർക്കാർ ബാങ്കുകാർക്ക് മുന്നിൽ പണയം വയ്ക്കാൻ മത്സരിക്കുകയണ്. കർഷകരോട് കൃഷിമന്ത്രി നീതിപാലിക്കണമെന്നും അദ്ദേഹം പറഞ്ഞു. സംസ്ഥാന വൈസ് പ്രസിഡന്‍റ് സി.ടി. തോമസ് അധ്യക്ഷത വഹിച്ച യോഗത്തിൽ സണ്ണി തോമസ്, ബിജു ചെറുകാട്, ജോസഫ്കുഞ്ഞ് എട്ടിൽ, കെ.വി. ജോസഫ്, മാത്യു ചാക്കോ തുടങ്ങിയവർ പ്രസംഗിച്ചു.

വെള്ളത്തിൽ മുങ്ങി കുട്ടംപേരൂര്‍ തൈച്ചിറ ഭാഗം

മാന്നാര്‍: മഴ മാറിയിട്ടും ജലനിരപ്പ് താഴാതെ കുട്ടംപേരൂര്‍ തൈച്ചിറ ഭാഗം. വാലേല്‍, മേല്‍പ്പാടം കൊടുന്താര്‍ റോഡിൽ രണ്ടാഴ്ച മുന്‍പുണ്ടായ വെള്ളപ്പൊക്കത്തില്‍ കയറിയ വെള്ളമാണ് ഇപ്പോഴും കെട്ടിക്കിടക്കുന്നത്. മാന്നാര്‍ പഞ്ചായത്ത് 11-ാം വാര്‍ഡിലെ കുട്ടംപേരൂര്‍ തൈച്ചിറ ഭാഗത്തെ 15 വീട്ടുകാരാണ് ഇതുമൂലം ദുരിതമനുഭവിക്കുന്നത്. കുട്ടംപേരൂര്‍ ആറില്‍നിന്നു കൈവഴി തോട്ടിലൂടെ എത്തുന്ന വെള്ളം ഒഴുകിപ്പോകാന്‍ വേറെ വഴിയില്ലാത്തതിനാല്‍ ഇവിടെ കെട്ടിക്കിടക്കുകയാണ്. ഏതു മഴക്കാലത്തും മാന്നാറില്‍ ആദ്യം വെള്ളം കയറുന്നതും ഏറെ ദുരിതം വിതച്ച ശേഷം മാത്രം ഒടുവിലായി വെള്ളമിറങ്ങുന്നതുമായ പ്രദേശമാണിത്. വെള്ളം കയറിയാല്‍ ഇവിടത്തുകാര്‍ക്കു പുറത്തുപോകാനാകില്ല. ജലനിരപ്പ് ഒരടി ഉയര്‍ന്നാല്‍ മുഴുവന്‍ വീടുകളിലും വെള്ളം കയറും. മാന്നാര്‍ പഞ്ചായത്തില്‍നിന്നും 20 വര്‍ഷം മുന്‍പ് വീടു ലഭിച്ച കുടുംബങ്ങളാണ് ഇവിടെ പ്രധാനമായും താമസിക്കുന്നത്. ഇവിടെയുള്ള കമ്യൂണിറ്റി ഹാളും കൈത്തറി നിര്‍മാണ യൂണിറ്റ് സ്ഥിതി ചെയ്യുന്ന കെട്ടിടവും വെള്ളക്കെട്ടിലും അതുമൂലം നാശത്തിന്‍റെ വക്കിലുമാണ്. മേല്‍പ്പാടം എസ്ബിഐ കൊടുന്താര്‍ കരിക്കാട്ട് തെക്കേതില്‍ ഭാഗവും വെള്ളത്തില്‍ത്തന്നെ. വെട്ടുപുതുക്കേരി പാടശേഖരത്തിലെ പ്രധാന റോഡ് മുഴുവന്‍ മുങ്ങിയിരിക്കുകയാണ്. പാതയില്‍ രണ്ടടി വെള്ളം ഇപ്പോഴുമുണ്ട്. വള്ളത്തിലാണ് മിക്ക വീട്ടുകാരും പോകുന്നത്. വാലേല്‍ കുന്നുപറമ്പില്‍ ഭാഗമുള്‍പ്പെടെ മിക്ക റോഡുകളും വെള്ളത്തില്‍ തന്നെ. കഴിഞ്ഞ ദിവസം മരിച്ച പട്ടനോടി ഭാഗത്തെ സിദ്ധാര്‍ഥന്‍റെ മൃതദേഹം ഭവനത്തില്‍ പൊതുദര്‍ശനത്തിന് വയ്ക്കാന്‍ സാധിക്കാത്തതിനാല്‍ മറ്റൊരു ഭവനത്തില്‍ വയ്ക്കുകയായിരുന്നു. പിന്നീട് കുടുംബ വീട്ടില്‍ വെള്ളത്തിനു മുകളില്‍ തട്ടിട്ട് ഉയര്‍ത്തി ദഹനം നടത്തേണ്ട സ്ഥിതിയും ഉണ്ടായി.

മഴയിൽ ഓടകൾ അടഞ്ഞു; തുറവൂർ-അരൂർ യാത്രാമാർഗം ദുർഘടം

തുറവൂര്‍: അരൂര്‍-തുറവൂര്‍ ഉയരപ്പാത നിര്‍മാണം നടക്കുന്ന 12.75 കിലോമീറ്ററിലാണ് യാത്ര ദുഃസ്സഹമാകുന്നത്. കോടംതുരുത്തു മുതല്‍ അരൂര്‍ വരെയുള്ള ഭാഗങ്ങളിലാണ് യാത്രക്കാരെ ദുരിതത്തിലാക്കി കുഴികളും വെള്ളക്കെട്ടും നിറഞ്ഞത്. പലയിടത്തും വാഹനങ്ങള്‍ അപകടത്തില്‍പ്പെടുന്ന കുഴികളായി. പെയ്ത്തുവെള്ളം ഒഴുക്കിവിടാന്‍ പലയിടങ്ങളിലും ഓട നിര്‍മാണം ആരംഭിച്ചെങ്കിലും പൂര്‍ണമായിട്ടില്ല. മഴയ്ക്കു മുന്‍പ് ഓടനിര്‍മാണം പൂര്‍ത്തിയാകാത്തത് കാരണം ഓടയില്‍ നിറയുന്ന വെള്ളം പൊതു തോടുകളിലേക്ക് ഒഴുക്കിവിടുന്നതുമായി ബന്ധപ്പെട്ട് പഞ്ചായത്തുകളുമായുള്ള തര്‍ക്കം പരിഹരിക്കാന്‍ വൈകിയതാണ്. ഇത് മൂലമാണ് ഓടനിര്‍മാണം പൂര്‍ത്തിയാക്കാന്‍ വൈകിയതെന്നാണ് കരാറുകാര്‍ പറയുന്നത്. കോടംതുരുത്ത് മുതല്‍ അരൂര്‍ ബൈപാസ് കവല വരെ ഇരുവശങ്ങളിലും മഴവെള്ളം റോഡരികില്‍ കെട്ടിനില്‍ക്കുകയാണ്. വെള്ളക്കെട്ട് ഒഴിവാക്കാന്‍ കരാര്‍ കമ്പനി അധികൃതര്‍ മോട്ടര്‍ ഉപയോഗിച്ച് ടാങ്കര്‍ ലോറികളില്‍ വെള്ളം പമ്പ് ചെയ്തു നീക്കുന്നുണ്ട്. എന്നാല്‍ ശക്തമായ മഴ മൂലം വെള്ളക്കെട്ട് റോഡില്‍ പഴയപടിയായിരിക്കുകയാണ്. ഗതാഗതക്കുരുക്കില്‍ നിന്നു രക്ഷനേടാമെന്നു കരുതി തുറവൂരില്‍ നിന്നു തൈക്കാട്ടുശേരി അരൂക്കുറ്റി റോഡ് വഴി അരൂക്കുറ്റി പാലം ഇറങ്ങുമ്പോള്‍ യാത്രക്കാരെ സ്വീകരിക്കുന്നത് വന്‍ ഗതാഗതക്കുരുക്കാണ്. ഇവിടെനിന്നു കൊച്ചിയിലേക്ക് പോകുന്ന വാഹനങ്ങള്‍ ഇഴഞ്ഞിഴഞ്ഞ് 500 മീറ്റര്‍ സഞ്ചരിച്ച് യുടേണ്‍ തിരിഞ്ഞ് തിരിച്ച് അരൂര്‍ ക്ഷേത്രം കവലയിലെത്താന്‍ അരമണിക്കൂര്‍ വേണം. ക്ഷേത്രം കവലയിലെത്തിയാലാകട്ടെ വെള്ളക്കെട്ടും കുഴികളും. പരിചയമില്ലാത്ത ഡ്രൈവര്‍മാര്‍ ആണെങ്കില്‍ വെള്ളക്കെട്ടിലെ കുഴികളില്‍ വീണ് വാഹനങ്ങള്‍ തകരാറാകുമെന്ന് ഉറപ്പ്.

പി.ജെ. ഫ്രാൻസിസ്: ആദർശ രാഷ്‌ട്രീയത്തിന്‍റെ സ്വപ്നസൂക്ഷിപ്പുകാരൻ

ആദർശ രാഷ്‌ട്രീയത്തിന്‍റെ സ്വപ്നസൂക്ഷിപ്പുകാരനായിരുന്നു ബുധനാഴ്ച വിടവാങ്ങിയ അഡ്വ. പി.ജെ. ഫ്രാൻസിസ്. സംസ്കാരം ഇന്ന് ഉച്ചകഴിഞ്ഞ് മൂന്നിന് മൗണ്ട് കാർമൽ കത്തീഡ്രലിൽ നടക്കും. 1996ലെ നിയമസഭാ തെരഞ്ഞെടുപ്പിൽ മാരാരിക്കുളം നിയോജകമണ്ഡലത്തിൽ രാഷ്‌ട്രീയ കേരളത്തെ ഞെട്ടിച്ച ‘ജയന്‍റ് കില്ലർ’ ആണ് അഡ്വ. പി.ജെ. ഫ്രാൻസിസ്. വി.എസ്. അച്യുതാനന്ദനെയാണ് അന്ന് 1965 വോട്ടുകൾക്ക് ഫ്രാൻസിസ് പരാജയപ്പെടുത്തിയത്. ആലപ്പുഴ ജില്ലയിലെ പൊള്ളേത്തൈ ഗ്രാമത്തിൽ 1937 ഫെബ്രുവരി 19നാണ് പള്ളിക്കത്തയ്യിൽ ജുസീഞ്ഞ്-റബേക്കാ ദന്പതികളുടെ മകനായി ഫ്രാൻസിസ് ജനിച്ചത്. പ്രൈമറി സ്കൂൾ വിദ‍്യാഭ‍്യാസത്തിനു ശേഷം തൃശൂർ ജില്ലയിലെ എൽത്തുരുത്ത് സെന്‍റ് അലോഷ്യസ് വിദ്യാലയത്തിന്‍റെ ബോർഡിംഗിൽ താമസിച്ചുകൊണ്ട് പത്താംതരം പൂർത്തിയാക്കി. മധ്യപ്രദേശിൽനിന്നു ഇന്‍റർമീഡിയറ്റ് പാസായതിനെത്തുടർന്ന് നേപ്പാളിലെ കാഡ്മണ്ഡു സർവകലാശാലയിൽനിന്ന് 1964ൽ ബിരുദം കരസ്ഥമാക്കി. തുടർന്ന് എറണാകുളം ലോ കോളജിൽ ചേർന്ന് 1967ൽ നിയമബിരുദം നേടി. 34 വർഷത്തോളം അഭിഭാഷകനായി തുടർന്നു. കേസും കേസുകെട്ടുകളും വാദപ്രതിവാദങ്ങളും ജാമ്യമെടുക്കലുമായി തിരക്കേറിയ കോടതി പ്രവർത്തനങ്ങളിൽനിന്നും സ്വയം വിരമിച്ചതും 2002ലെ മാർച്ച് 19നുതന്നെ. പൊതുപ്രവർത്തനത്തിൽ സ്വന്തം പിതാവിന്‍റെ വഴിയെയാണ് അദ്ദേഹം സഞ്ചരിച്ചത്. വിദ്യാർഥി കോൺഗ്രസിൽ പ്രവർത്തിച്ചതിനെത്തുടർന്ന് പൊള്ളേത്തൈ വാർഡ്, മണ്ഡലം കമ്മിറ്റികളിൽ പ്രവർത്തിച്ചതിനുശേഷമാണ് കോൺഗ്രസ് ജില്ലാ കമ്മിറ്റിയിൽ സജീവമായത്. കെപിസിസി അംഗമായി പ്രവർത്തിക്കവേയാണ് അരൂരിൽ ഗൗരിയമ്മയ്ക്കെതിരായി മത്സരിച്ചത്. തുടർന്നുവന്ന നിയമസഭാ തെരഞ്ഞെടുപ്പിൽ അട്ടിമറി വിജയം നേടി വി.എസിനെ പരാജയപ്പെടുത്തി 1996ൽ നിയമസഭാംഗമായി. ജില്ലാ പഞ്ചഗുസ്തി അസോസിയേഷൻ പ്രസിഡന്‍റ്, ബാസ്കറ്റ് ബോൾ അസോസിയേഷൻ വൈസ് പ്രസിഡന്‍റ്, കേരള സ്റ്റേറ്റ് സ്പോർട്സ് കൗൺസിൽ അംഗം എന്നീ നിലകളിൽ പ്രവർത്തിച്ചിട്ടുണ്ട്. തീരദേശവികസന അഥോറിറ്റിയുടെ വൈസ് ചെയർമാനായും സേവനം അനുഷ്ഠിച്ചു. വാവക്കാട് പീറ്ററിന്‍റെയും റൊസാരിയുടെയും മകൾ മറിയാമ്മയാണ് ഭാര‍്യ. ആലപ്പുഴ സെന്‍റ് ജോസഫ്സ് വനിതാ കോളജിൽ അധ്യാപനത്തിനായി പ്രവേശിച്ച പ്രഫ. വി.പി. മറിയാമ്മ ചരിത്ര വിഭാഗം മേധാവിയായി 1999 ലാണ് വിരമിച്ചത്. ജോസ്, റോസ്, ടോണി, റീന എന്നിവർ മക്കളാണ്. അഭിഭാഷക, രാഷ്‌ട്രീയ പ്രവർത്തനങ്ങൾക്കിടയിലും എഴുത്തും വായനയും ഒപ്പമുണ്ടായിരുന്നു. കല, സാഹിത്യം, ചരിത്രം തുടങ്ങിയ മേഖലകളിലെ ഈടുറ്റ ഗ്രന്ഥങ്ങൾ ഉൾക്കൊള്ളുന്ന ലൈബ്രറി വീട്ടിലുണ്ടായിരുന്നു. പാതിരി മലയാളം-ഒരു പുനർവിചിന്തനം, ആലപ്പുഴ-കിഴക്കിന്‍റെ വെനീസ്, ആലപ്പുഴ ജില്ലയുടെ ചരിത്രസ്മരണകൾ എന്നീ ഗ്രന്ഥങ്ങൾ രചിച്ചു.

പുസ്തകങ്ങളുടെ കേരളത്തിലെ ഏറ്റവും വലിയ സ്വകാര്യശേഖരം മാവേലിക്കരയിൽ

യു.ആര്‍. മനു മാവേലിക്കര: ലോകത്തെവിടെയും ഒരു അമൂല്യ പുസ്തകം ലഭിക്കുമെന്നറിഞ്ഞാല്‍ അവിടെപ്പോയി അത് സ്വന്തമാക്കുന്ന ഒരാള്‍ മാവേലിക്കരയിലുണ്ട്. ചലച്ചിത്ര സംവിധായകനും ഗ്രന്ഥകാരനുമായ മാവേലിക്കര ഇറവങ്കര മേഘനയില്‍ ഡോ. മധു ഇറവങ്കരയാണ് അത്തരമൊരു വ്യത്യസ്തനായ വ്യക്തി. പുസ്തകങ്ങള്‍ സൂക്ഷിക്കാൻ 1600 സ്‌ക്വയര്‍ ഫീറ്റില്‍ സ്വന്തമായി ഒരു ഇരുനില ലൈബ്രറി തന്നെ അദ്ദേഹത്തിനുണ്ട്. 1997ല്‍ പത്തനംതിട്ട കാതോലിക്കേറ്റ് കോളജില്‍ രസതന്ത്രം അധ്യാപകനായി ജോലി ലഭിച്ചശേഷം വായനയുടെയും പുസ്തകശേഖരത്തിന്‍റെയും ലോകം വിസ് തൃതമായി. എംഎസ്‌സിക്കു ശേഷം മൂന്നുമാസം മാത്രമാണ് അദ്ദേഹത്തിന് മെറിറ്റില്‍ ജോലി ലഭിക്കാനായി കാത്തിരിക്കേണ്ടിവന്നത്. അതോടെ ലഭിക്കുന്ന ശമ്പളത്തിന്‍റെ 60 ശതമാനത്തോളം തുക പുസ്തക ശേഖരണത്തിനായി മാറ്റിവയ് ക്കാനും ആരംഭിച്ചു. അക്കാലത്ത് നൈജീരിയയില്‍ ഒരു അസൈന്‍മെന്‍റിനായി പോയി മൂന്നരവര്‍ഷത്തിനുശേഷം തിരികെ വന്നത് ഒരു കണ്ടയ്നര്‍ ബുക്ക് ചെയ്ത് അതില്‍ നിറയെ പുസ്തകങ്ങളുമായായിരുന്നു. അന്ന് ആഫ്രിക്കന്‍ എഴുത്തുകാരുടെയും മറ്റ് ഫോറിന്‍ എഴുത്തുകാരുടെയും പുസ്തകങ്ങളും ബ്രിട്ടീഷ് കൗണ്‍സില്‍ ലൈബ്രറിയില്‍ നിന്ന് അമൂല്യ പുസ്തകങ്ങളുടെ സിറോസ് കോപ്പി എടുത്ത് ബൈന്‍ഡ് ചെയ്തുമാണ് നൈജീരിയയില്‍നിന്ന് എത്തിച്ചത്. ഒരു ദിവസം രണ്ടു പുസ്തകങ്ങള്‍ എങ്കിലും വാങ്ങുമെന്നാണ് അദ്ദേഹം പറയുന്നത്. പിന്നെ എഴുത്തുകാരും മറ്റും സമ്മാനമായി കൊടുക്കുന്നത് വേറെയും. മധു ഇറവങ്കര നടത്താറുള്ള ലോക യാത്രകളുടെ ഒരു ലക്ഷ്യം തന്നെ പുസ്തക ശേഖരണമാണ്. ദ മ്യൂസിയം ഓഫ് ഇന്നസന്‍സ്, റിപ്പോര്‍ട്ട് റ്റു ഗ്രേകോ, ദ ബുക്ക് ഓഫ് ലാറ്റര്‍ ആൻഡ് ഫൊര്‍ഗെറ്റിംഗ്, ദ സാഗാ ഓഫ് സൗത്ത് കാമരൂപ്, ഹൗ റ്റു റീഡ് ഫിലിം, ഫിഫ്റ്റി ഇയേഴ്‌സ് ഇന്‍ ഫിലിം, മേജര്‍ ഫിലിം തിയറീസ്, സിനിമ ഓഫ് ലോണ്‍ലിനസ്, എ ക്രിട്ടിക്കല്‍ സിനിമ ഉള്‍പ്പെടെ ആയിരക്കണക്കിന് അമൂല്യമായ പുസ്തകങ്ങളാണ് ശേഖരത്തില്‍ ഉള്‍പ്പെട്ടിട്ടുള്ളത്. സിനിമ ഗവേഷണ വിദ്യാര്‍ഥികള്‍ക്കുള്ള ഒരു റഫറന്‍സ് ലൈബ്രറികൂടിയാണ് ഇവിടം. ഒട്ടേറെ വിദേശീയരും സ്വദേശീയരുമായ സിനിമ ഗവേഷകര്‍ ഇത് പ്രയോജനപ്പെടുത്തിക്കൊണ്ടിരിക്കുന്നു. ഈ ലൈബ്രറിയില്‍ താമസിച്ചുകൊണ്ടുതന്നെ അവര്‍ക്ക് ഗവേഷണ സംബന്ധമായ കാര്യങ്ങള്‍ ചെയ്യാനുള്ള സാഹചര്യവും സൗജന്യമായി മധു ഇറവങ്കര ഇവിടെ ഒരുക്കിയിട്ടുണ്ട്. ഒട്ടേറെ രാജയാന്തര ചലച്ചിത്ര അവാര്‍ഡ് നിര്‍ണയ സമിതികളില്‍ അംഗമായിരുന്ന മധു ഇറവങ്കര നങ്കൂരം എന്ന സിനിമയും 30 ഡോക്യുമെന്‍ററികളും സംവിധാനം ചെയ്തിട്ടുണ്ട്. 25 പുസ്തകങ്ങള്‍ രചിച്ചിട്ടുമുണ്ട്. റിട്ട. അധ്യാപികയായ എസ്. ഉഷയാണ് ഭാര്യ. കവയിത്രിയായ മകള്‍ ആര്‍ദ്ര മാനസി യുണൈറ്റഡ് നേഷന്‍സിന്‍റെ ഭാഗമായി പ്രവര്‍ത്തിച്ചുവരുന്നു. മകന്‍ അനന്തു മാധവ് കുക്കുഎഫ്എം സംസ്ഥാന തലവനാണ്. നോവലിസ്റ്റായ കീര്‍ത്തിക് ശശിധരന്‍ മരുമകനാണ്.

ജാമ്യത്തിലിറങ്ങി മുങ്ങിയ ഒഡീഷ സ്വദേശി പിടിയില്‍

ചേർത്തല: കഞ്ചാവ് കേസിൽ പിടിയിലായി റിമാന്‍ഡില്‍ കഴിയുന്നതിനിടെ ജാമ്യത്തിലിറങ്ങി ഒളിവിൽ പോയ ഇതര സംസ്ഥാന സ്വദേശി പിടിയില്‍. ഒഡീഷ എല്ലക്കല്ല് നെടുംകല്ലേൽ ബാബു(52)വിനെയാണ് പിടികൂട്ടിയത്. 2022ൽ ചേർത്തല പോലീസ് സ്റ്റേഷനിൽ കഞ്ചാവ് കടത്തുമായി ബന്ധപ്പെട്ട് അറസ്റ്റിലാകുകയും തുടർന്ന് റിമാന്‍ഡിലാകുകയും ചെയ്തു. അഞ്ചുമാസത്തോളം ജയിലിൽ കഴിഞ്ഞ ശേഷമാണ് ജാമ്യത്തിൽ ഇറങ്ങി ഒളിവിൽ പോയത്. ഒഡിഷയിലെ റായഗാടാ ജില്ലയിലെ ഡാഗുടിയിൽ നിന്നുമാണ് ഇയാളെ പിടികൂടിയത്. ചേർത്തല പോലീസ് സ്റ്റേഷൻ എഎസ് ഐമാരായ ബിജു കെ. തോമസ്, എസ്‌സി പിഒ ശൈലകുമാർ എന്നിവരടങ്ങുന്ന സംഘം 17ന് പുലർച്ചെ ഒന്നിന് ബാബുവിന്‍റെ വീട് വളഞ്ഞ് പിടികൂടുകയായിരുന്നു. ഒഡിഷാ റായ് ഗുഡി ജില്ലാ പോലീസ് മേധാവിയും മലയാളിയുമായ സ്വാതി എസ്. കുമാർ എല്ലാവിധ സഹായങ്ങളും അന്വേഷണ ഉദ്യോഗസ്ഥർക്ക് നൽകിയിരുന്നു. ഒഡീഷയുടെ അതിർത്തി പ്രദേശമായ ഡാഗുടിയിൽ കഞ്ചാവ് കൃഷിക്കായി എത്തിയ ബാബു നൂതന കൃഷിരീതികൾ ഗ്രാമവാസികളെ പഠിപ്പിക്കുകയും ഗ്രാമത്തിലുള്ള മിത എന്ന സ്ത്രീയെ വിവാഹം ചെയ്തു ബാബുമാഞ്ചി എന്ന പേരിൽ കഴിഞ്ഞു വരികയായിരുന്നുവെന്ന് പോലീസ് പറഞ്ഞു. ബാബുവിന് ചേർത്തല പോലീസ് സ്റ്റേഷനിലെ കേസ് കൂടാതെ പാലക്കാട് എക്സൈസിന്‍റെയും കേസുണ്ട്. ഒഡീഷ്യയിൽനിന്നു വലിയതോതിൽ കഞ്ചാവ് എത്തിക്കുന്ന സംഘത്തിലെ മുഖ്യകണ്ണിയാണ് അറസ്റ്റിലായ ബാബുവെന്നും കൂടെയുള്ള പ്രതികള്‍ക്കായി അന്വേഷണം ഊർജിതമാക്കുമെന്നും ചേർത്തല പോലീസ് പറഞ്ഞു.

അതിരൂപത കത്തോലിക്ക കോണ്‍ഗ്രസ് മെറിറ്റ് അവാര്‍ഡ്ദാനം 22ന്

ചങ്ങനാശേരി: അതിരൂപത കത്തോലിക്ക കോണ്‍ഗ്രസിന്‍റെ നേതൃത്വത്തില്‍ നടത്തുന്ന മെറിറ്റ് അവാര്‍ഡ്-2025 വിതരണവും എക്‌സലന്‍ഷ്യ സീസണ്‍-3 മാര്‍ ജോസഫ് പവ്വത്തില്‍ സ്മാരക ഹെറിറ്റേജ് ക്വിസ് മത്സരത്തില്‍ വിജയികള്‍ക്കുള്ള സമ്മാനദാനവും 22ന് ഉച്ചയ്ക്ക് ഒന്നിന് എസ്ബി കോളജിലെ കാവുകാട്ട് ഹാളില്‍ നടത്തും. അതിരൂപതയുടെ അമ്പൂരി മുതല്‍ അതിരമ്പുഴവരെയുള്ള ഫൊറോനകളില്‍നിന്നും എസ്എസ്എല്‍സി, പ്ലസ് ടു പരീക്ഷകളില്‍ മുഴുവന്‍ വിഷയങ്ങള്‍ക്ക് എ പ്ലസ് നേടിയവര്‍, സിബിഎസ്ഇ, ഐസിഎസ്ഇ പരീക്ഷകള്‍ക്ക് എല്ലാ വിഷയങ്ങള്‍ക്കും 90 ശതമാനം മാര്‍ക്കിന് മുകളില്‍ നേടിയവര്‍ തുടങ്ങി 800 വിദ്യാര്‍ഥികള്‍ക്കാണ് അവാര്‍ഡുകള്‍ നല്‍കുന്നത്. ആര്‍ച്ച്ബിഷപ് മാര്‍ തോമസ് തറയില്‍ അവാര്‍ഡ് വിതരണം നിര്‍വഹിക്കും. പ്രസിഡന്‍റ് ബിജു സെബാസ്റ്റ്യന്‍ അധ്യക്ഷത വഹിക്കും. അതിരൂപതാ വികാരിജനറാള്‍ മോണ്‍. ആന്‍റണി എത്തയ്ക്കാട്ട് മാര്‍ഗനിര്‍ദ്ദേശ പ്രസംഗവും ഗ്ലോബല്‍ പ്രസിഡന്‍റ് പ്രഫ.രാജീവ് കൊച്ചുപറമ്പില്‍ മുഖ്യപ്രഭാഷണവും നടത്തും. അതിരൂപതാ ഡയറക്ടര്‍ ഫാ. സെബാസ്റ്റ്യന്‍ ചാമക്കാല സന്ദേശം നല്‍കും. ജനറല്‍ സെക്രട്ടറി ബിനു ഡൊമിനിക്, ട്രഷറര്‍ ജോസ് വെങ്ങാന്തറ, ജനറല്‍ കണ്‍വീനമാരായ കുഞ്ഞ് കളപ്പുര, ഷിജി ജോണ്‍സണ്‍, സണ്ണിച്ചന്‍ ഇടിമണ്ണിക്കല്‍, ടോമിച്ചന്‍ അയ്യരുകുളങ്ങര എന്നിവര്‍ പ്രസംഗിക്കും.

ഫാ. മാർട്ടിൻ വാഴച്ചിറ അനുസ്മരണം

മങ്കൊമ്പ്: സ്‌കോട്‌ലൻഡിൽ മരിച്ച ഫാ. മാർട്ടിൻ വാഴച്ചിറയുടെ എട്ടാം ചരമ വാർഷികാചരണം 22, 23 തീയതികളിലായി നടക്കുമെന്ന് സംഘാടകർ പത്രസമ്മേളനത്തിൽ അറിയിച്ചു. വൈദികന്‍റെ ഭൗതിക ശരീരം അടക്കം ചെയ്തിട്ടുള്ള ചെത്തിപ്പുഴ തിരുഹൃദയ ദേവാലയത്തിൽ 23ന് രാവിലെ ഏഴിന് കുർബാനയും മറ്റ് തിരുക്കർമങ്ങളും നടക്കും. 22ന് വൈദികന്‍റെ ഇടവക ദേവാലയമായ പുളിങ്കുന്ന് സെന്‍റ് മേരീസ് പള്ളിയിൽ വൈകുന്നേരം നാലിന് വിശുദ്ധ കുർബാന. തുടർന്ന് അഞ്ചിന് പാരിഷ് ഹാളിൽ നടക്കുന്ന അനുസ്മരണ സമ്മേളനം ചങ്ങനാശേരി എസ്ബി കോളജ് പ്രിൻസിപ്പൽ റവ. ഡോ. ടെഡി കാഞ്ഞൂപ്പറമ്പിൽ ഉദ്ഘാടനം ചെയ്യും. പുളിങ്കുന്ന് ഫെറോനാ വികാരി റവ. ഡോ. ടോം പുത്തൻകളം അധ്യക്ഷത വഹിക്കുന്ന സമ്മേളനത്തിൽ പുളിങ്കുന്ന് സെന്‍റ് സെബാസ്റ്റ്യൻസ് സിഎംഐ ആശ്രമ പ്രിയോർ ഫാ. ജോസ് കോനാട്ട് അനുസ്മരണ പ്രഭാഷണം നടത്തും. പുളിങ്കുന്ന് സെന്‍റ് ജോസഫ് ഹയർ സെക്കൻഡറി ഹെഡ്മാസ്റ്റർ ഫാ. ജോസഫ് കുറുപ്പശേരി, പുളിങ്കുന്ന് ഫെറോനാപള്ളി സഹവികാരി ഫാ. ടിബിൻ ഒറ്റാറയ്ക്കൽ, പഞ്ചായത്ത് സെക്രട്ടറി ആഷ്‌ലി നായർ എന്നിവർ എസ്എസ്എൽസി, പ്ലസ്ടു പരീക്ഷകളിൽ ഉന്നതവിജയം നേടിയ വിദ്യാർഥികളെ ആദരിക്കും. പഞ്ചായത്ത് സെക്രട്ടറി ആഷ്‌ലി നായർ സിവിൽ സർവീസ് പരീക്ഷയിൽ മികച്ച വിജയം നേടിയ അഞ്ജലി പ്രദീപിനെ ആദരിക്കും. തുടർന്ന് പുളിങ്കുന്ന് ഫെറോനാ സഹവികാരി ഫാ. വർഗീസ് താനിക്കാപ്പാറ കുട്ടികൾക്ക് പഠനോപകരണങ്ങൾ വിതരണം ചെയ്യും. ജോഷി കൊല്ലാറ, മനോജ് കാനാച്ചേരി., ജോൺ. സി. ടിറ്റോ, എം.എം. ജോസഫ്, ടോം നടുവിലേടം, ഷാരോൺ ടിറ്റോ, മാത്തുക്കുട്ടി തറയിൽ എന്നിവർ പത്രസമ്മേളനത്തിൽ പങ്കെടുത്തു.

മെഡി. കോളജ് ആശുപത്രിയിൽ ഐസിയു കിടക്കകളുടെ എണ്ണം വർധിപ്പിച്ചു

അമ്പലപ്പുഴ: ആലപ്പുഴ വണ്ടാനം മെഡിക്കൽ കോളജ് ആശുപത്രിയിൽ ഐസിയു കിടക്കകളുടെ എണ്ണം വർധിപ്പിച്ചു. നവീകരിച്ച മെഡിസിൻ തീവ്രപരിചരണ വിഭാഗത്തിന്‍റെ (മെഡിസിൻ ഐസിയു) ഉദ്ഘാടനം എച്ച്. സലാം എം എൽഎ നിർവഹിച്ചു. ആശുപത്രിയിലെ മൾട്ടി ഡിസിപ്ലിനറി (എംഡിഐസിയു) യിൽ മെഡിസിൻ വിഭാഗത്തിൽ 12 ലക്ഷം രൂപ ചെലവഴിച്ച് 10 കിടക്ക സൗകര്യങ്ങളാണ് ഇതിന്‍റെ ഭാഗമായി വർധിപ്പിച്ചത്. സർജറി ഐസിയുവിന്‍റെ അറ്റകുറ്റപ്പണിയും ഇതോടൊപ്പം പൂർത്തീകരിച്ചു. എംഡി ഐസിയു വിലെ സർജറി, സ്റ്റെപ്പ് ഡൗൺ എന്നീ വിഭാഗങ്ങളിലായി സർജറിയിൽ 16 ഉം സ്റ്റെപ് ഡൗണിൽ 9 ഉം കിടക്ക സൗകര്യങ്ങളാണ് ഉണ്ടായിരുന്നത്. ഇവിടെ 10 മെഡിസിൻ ഐസിയു കൂടി പ്രവർത്തിക്കുന്നതോടെ ഈ വിഭാഗങ്ങളിൽ ആകെ 35 ഉം ഐസുലേഷനിൽ രണ്ടും ഉൾപ്പെടെ ആകെ 37 ഐസിയു കിടക്ക സൗകര്യങ്ങളാണ് എംഡി ഐസിയുവിൽ മാത്രം നിലവിൽ പ്രവർത്തിക്കുക. ഇതിനു പുറമേ നേരത്തെ വാർഡ് എട്ട് ആയി പ്രവർത്തിച്ചിരുന്നത്, സൂപ്പർ സ്പെഷാലിറ്റിയിലേക്ക് മാറ്റിയപ്പോൾ ഇവിടെ 9 കിടക്ക സൗകര്യങ്ങളോടെ എമർജൻസി ഐസിയു സജ്ജീകരിച്ചു. ഒപ്പം ട്രോമ ഐസിയുവിൽ 9 കിടക്ക സൗകര്യങ്ങളുമാണ് പ്രവത്തിക്കുന്നത്. ഇതോടെ സൂപ്പർ സ്പെഷാലിറ്റിയിലെ ഐസിയുവിന് പുറമേ 55 ഐസിയു കിടക്കകളായി. ഐസിയു കിടക്കസൗകര്യം വർധിച്ചതോടെ അത്യാസന്നനിലയിലുള്ള രോഗികൾക്ക് അടിയന്തര ചികിത്സ കൂടുതൽ നൽകുന്നതിനും അത്യാസന്നനിലയിലുള്ള രോഗികളെ മറ്റ് ആശുപത്രികളിലേക്ക് കൊണ്ടുപോകേണ്ടി വരുന്നത് ഒരു പരിധി വരെയെങ്കിലും ഒഴിവാക്കുവാനും കഴിയും. ഐസിയു കിടക്കകളുടെ എണ്ണം വർധിപ്പിക്കണമെന്ന് കാട്ടി എച്ച്. സലാം എംഎൽഎ ആരോഗ്യമന്ത്രിക്ക് നേരത്തെ കത്തുനൽകിയിരുന്നു. പ്രിൻസിപ്പൽ ഡോ. ബി. പദ്മകുമാർ, ആശുപത്രി സൂപ്രണ്ട് ഡോ. എ. ഹരികുമാർ, മെഡിസിൻ വിഭാഗം മേധാവി ഡോ. സുരേഷ് രാഘവൻ, എം ഡിഐസിയു നോഡൽ ഓഫീസർ ഡോ. എൻ.ആർ. സജികുമാർ, ചീഫ് ന ഴ്സിംഗ് ഓഫീസർ പി.കെ. ഉഷ, നഴ്സിംഗ് സൂപ്രണ്ടുമാരായ എസ്. മിനി, എം. നളിനി, ജി. ജലജമ്മ, ഇ. ജി. ഷീബ, വിവിധ വിഭാഗങ്ങളിലെ ജീവനക്കാർ എന്നിവർ പങ്കെടുത്തു.

കാക്കാഴം പഴയപാലത്തില്‍ ഗര്‍ത്തം: ആശങ്കയില്‍ നാട്ടുകാര്‍

അമ്പലപ്പുഴ: കാക്കാഴം പഴയ പാലത്തിന്‍റെ കൈവരികള്‍ തകര്‍ന്നതിന് പിന്നാലെ ഗര്‍ത്തം രൂപപ്പെട്ടത് അപകടഭീതിയില്‍. കാലപ്പഴക്കം മൂലം മാസങ്ങള്‍ക്ക് മുമ്പായി കൈവരികള്‍ തകര്‍ന്ന് വീണിരുന്നു. മാമ്പലത്തറ, പുതുക്കുളങ്ങര പ്രദേശത്തെ ആയിരക്കണക്കിന് കുടുംബങ്ങള്‍ക്ക് ദേശീയപാതയിലെത്തണമെങ്കില്‍ കാപ്പിത്തോടിന് കുറുകെയുള്ള കാക്കാഴം പഴയപാലം മാത്രമാണ് ആശ്രയം. കൂടാതെ കാക്കാഴം കാപ്പിത്തോടിന് സമീപത്തെ ഗവ. ഹയർ സെക്കൻ്ററി, ഹൈസ്കൂള്‍, എസ് എൻ വി ടി ടി ഐ എന്നീ സ്കൂളുകളിലെ ആയിരത്തിലധികം വിദ്യാര്‍ഥികള്‍ക്ക് ഈ പാലത്തിലൂടെ മാത്രമാണ് എത്താന്‍ കഴിയുന്നത്. സ്കൂള്‍ ബസുകള്‍ ഉള്‍പ്പെടെയുള്ള നിരവധി വാഹനങ്ങളാണ് പാലത്തിലൂടെ കടന്നുപോകുന്നത്. പാലത്തിന്‍റെ ഒരു ഭാഗത്ത് ഇന്നലെ രാവിലെയാണ് ഗര്‍ത്തം ശ്രദ്ധയില്‍പെടുന്നത്. തുടര്‍ന്ന് സ്കൂള്‍ ബസുകളും മറ്റ് വലിയ വാഹനങ്ങളും കയറാതിരിക്കാന്‍ തടസം വച്ചിരിക്കുകയാണ്. ജീര്‍ണാവസ്ഥയിലായ പാലം നിലംപൊത്താന്‍ സാധ്യതയുണ്ട്. ദേശീയപാത വിഭാഗത്തിന്‍റെ കീഴിലുള്ള പാലം പുനഃസ്ഥാപിക്കണമെന്ന് സ്കൂൾ പി ടി എ പല തവണ അധികൃതരോട് ആവശ്യപ്പെട്ടതാണ്. എന്നാൽ മാസങ്ങൾ കഴിഞ്ഞിട്ടും ഇതിന് പരിഹാരമായില്ല. പ്രദേശവാസികളും സ്കൂളിലേക്ക് പോകുന്ന വിദ്യാർഥികളും അധ്യാപകരും ഉൾപ്പെടെയുള്ളവർ പാലത്തിലൂടെ ഭീതിയോടെയാണ് യാത്ര ചെയ്യുന്നത്.

കെസി പാലം : പുനര്‍നിര്‍മാണത്തിന് ഭരണാനുമതി

കിടങ്ങറ: കെസി പാലത്തിന്‍റെ പുനര്‍നിര്‍മാണത്തിന് 42.32 കോടി രൂപയുടെ ഭരണാനുമതി. കിടങ്ങറ-കണ്ണാടി റോഡില്‍ സ്ഥിതി ചെയ്യുന്ന പാലം ഇപിസി (എൻജിനിയറിംഗ് പ്രൊക്യുര്‍മെന്‍റ് ആന്‍ഡ് കണ്‍സ്ട്രക‌്ഷന്‍) മാതൃകയിലാണു നിര്‍മിക്കുന്നത്. ദേശീയ ജലപാതയില്‍ ഉള്‍പ്പെടുന്ന കനാലിനു കുറുകെയുള്ള പാലത്തിനടിയിലൂടെ ജലനിരപ്പ് ഉയരുമ്പോള്‍ ബോട്ടുകള്‍ക്കു കടന്നുപോകാന്‍ പറ്റാത്ത സാഹചര്യമായതിനാലാണു പാലം ഉയരം കൂട്ടി പുനര്‍നിര്‍മിക്കാന്‍ തീരുമാനിച്ചത്. ദേശീയ ജലപാത മാനദണ്ഡങ്ങള്‍ പ്രകാരമാണു പുതിയ പാലം രൂപകല്‍പന ചെയ്തിരിക്കുന്നത്. കനാലിലെ ഏറ്റവും കൂടിയ ജലനിരപ്പില്‍നിന്ന് (എച്ച്ടിഎല്‍) 6 മീറ്റര്‍ ഉയരത്തിലാണു പാലം രൂപകല്‍പന ചെയ്തിരുന്നത്. പാലത്തിന്‍റെ ഉയരം നിലവിലുള്ളതില്‍ നിന്ന് 2 മീറ്ററോളം കൂടുമ്പോള്‍ ഉണ്ടാകാവുന്ന കുത്തനെയുള്ള ചെരിവ് അപകടങ്ങള്‍ ഉണ്ടാക്കുമെന്നതിനാല്‍ ഇത്തരം കാര്യങ്ങള്‍ ഉള്‍പ്പെടെ പരിഹരിച്ചുകൊണ്ടാണു പാലം നിര്‍മിക്കുക. ഇതിനായി 2.65 കോടി രൂപ ചെലവില്‍ സ്ഥലം ഏറ്റെടുത്തിട്ടുണ്ട്. രണ്ടു വശങ്ങളിലുമായി 250 മീറ്റര്‍ നീളത്തില്‍ അപ്രോച്ച് റോഡും 10 മീറ്റര്‍ വീതിയിലുമാണു പാലം നിര്‍മിക്കുന്നത്. അപ്രോച്ച് റോഡിന് ഇരുവശങ്ങളിലുമായി 5 മീറ്റര്‍ സര്‍വീസ് റോഡും നിര്‍മിക്കും. ഉള്‍നാടന്‍ ജലഗതാഗത അഥോറിറ്റിയുടെ നിരാക്ഷേപ പത്രം ലഭിച്ചാലുടന്‍ ടെന്‍ഡര്‍ നടപടികള്‍ പൂര്‍ത്തിയാക്കി പാലം നിര്‍മാണം ആരംഭിക്കുമെന്നു മന്ത്രി പി.എ.മുഹമ്മദ് റിയാസ് അറിയിച്ചു. ഏറെ നാളത്തെ കുട്ടനാടിന്‍റെ പൊതു ആവശ്യങ്ങളില്‍ ഒന്നായിരുന്നു കെസി പാലത്തിന്‍റെ പുനര്‍നിര്‍മാണമെന്നു തോമസ് കെ.തോമസ് എംഎല്‍എ പറഞ്ഞു. പാലത്തിന്‍റെ ഉയരക്കുറവു വെള്ളപ്പൊക്കക്കാലത്തു വലിയ പ്രതിസന്ധിയാണു സൃഷ്ടിച്ചിരുന്നത്. പാലം പുനര്‍നിര്‍മിക്കുന്നതോടെ ഈ പ്രശ്‌നത്തിനു പരിഹാരമാകും. പാലം നിര്‍മാണത്തിന്‍റെ തുടര്‍നടപടികള്‍ സമയബന്ധിതമായി പൂര്‍ത്തിയാക്കുന്നതിന് ആവശ്യമായ നടപടി സ്വീകരിക്കുമെന്നും എംഎല്‍എ പറഞ്ഞു.

റോഡിലെ വെള്ളക്കെട്ട് ഒഴിവാക്കാൻ അഞ്ചുലക്ഷം

മാന്നാർ: മാന്നാർ പരുമലക്കടവ് - കടപ്രമഠം റോഡിലെ വെള്ളക്കെട്ടിന് പരിഹാരമായി നിർമാണ പ്രവർത്തനങ്ങൾക്ക് രാജ്യസഭാ എംപി അഡ്വ.ഹാരിസ് ബീരാൻ ഫണ്ട് അനുവദിച്ചു. അഞ്ചു ലക്ഷം രൂപ അനുവദിച്ചതായും നിർമാണപ്രവർത്തനങ്ങൾ ആരംഭിക്കുന്നതിന്‍റെ നടപടികൾ നടന്നുവരുന്നതായും വാർഡ് മെംബർ ഷൈന നവാസ് അറിയിച്ചു. പരുമലക്കടവ് - കടപ്രമഠം റോഡിൽ ഓടാട്ട് ക്ഷേത്ര ജംഗ്ഷൻ ഉൾപ്പെടുന്ന തകർന്നുകിടന്ന ഭാഗം ഏതാനും മാസങ്ങൾക്ക് മുമ്പാണ് കോൺക്രീറ്റ് ചെയ്ത് ഉയർത്തിയത്. കിഴക്കോട്ട് പരുമലക്കടവ് വരെയുള്ള ബാക്കി ഭാഗം പുനർ നിർമാണം നടക്കാതെ താഴ്ന്നു കിടന്നതിനാൽ ചെറിയൊരു മഴ പെയ്താൽ പോലും വെള്ളക്കെട്ടിലാവുന്നത് പതിവായിരുന്നു. പരുമലക്കടവ് - കടപ്രമഠം റോഡിലെ വെളളക്കെട്ടിനെതിരേ രാഷ്‌ട്രീയപാർട്ടികളും ഓട്ടോറിക്ഷാ തൊഴിലാളികളും സമരംനടത്തുകയും പഞ്ചായത്ത് സെക്രട്ടറി ഉൾപ്പെടെയുള്ളവർക്ക് പരാതികൾ നൽകുകയും ചെയ്തിരുന്നു. വെള്ളം ഒഴുകിപ്പോകുന്നതിന് തടസമായി നിൽക്കുന്ന സ്വകാര്യ വ്യക്തികളുടെ നിർമിതികൾ പൊളിച്ചുമാറ്റുന്നതിന് പഞ്ചായത്ത് സെക്രട്ടറി കത്ത് നൽകിയിരുന്നെങ്കിലും പൂർണമായി പൊളിച്ച് മാറ്റാത്തതിനാൽ വാർഡ് മെംബറുടെയും നാട്ടുകാരുടെയും നേതൃത്വത്തിൽ വെള്ളം ഒഴുകിപ്പോകുന്നതിനുള്ള തടസങ്ങൾ നീക്കം ചെയ്തു.

പള്ളിത്തോട്-ചാവടി റോഡിൽ മാലിന്യം തള്ളുന്നത് തുടരുന്നു

തുറവുർ: റോഡുവശങ്ങളിൽ മാലിന്യം തള്ളുന്നത് തുടരുന്നു. പള്ളിത്തോട്-ചാവടി റോഡിന്‍റെ വശങ്ങളിലാണ് വൻതോതിൽ മാലിന്യം തള്ളുന്നത്. ഇറച്ചിക്കടകളിലെയും കോഴിക്കടകളിലെയും മാലിന്യങ്ങൾ തള്ളുന്നതുകൂടാതെ ഇപ്പോൾ പ്ലാസ്റ്റിക് ,പേപ്പർ മാലിന്യങ്ങളും വൻതോതിലാണ് ഈ റോഡിന്‍റെ വശങ്ങളിലെ തോടുകളിൽ തള്ളുന്നത്. രാത്രിയുടെ മറവിലാണ് സാമൂഹിക വിരുദ്ധരുടെ അഴിഞ്ഞാട്ടം. നിരവധി പരാതികൾ നൽകിയിട്ടും പോലീസും കുത്തിയതോട് ,തുറവൂർ പഞ്ചായത്ത് അധികൃതരും യാതൊരു നടപടിയും സ്വീകരിക്കാത്തത് ഇത്തരം സാമൂഹിക വിരുദ്ധ പ്രവർത്തനങ്ങൾക്ക് സഹായകരമാകുന്നതായും ആക്ഷേപമുണ്ട്. ശനി, ഞായർ ദിവസങ്ങളിലും മറ്റ് അവധി ദിവസങ്ങളിലുമാണ് മാലിന്യങ്ങൾ ചാക്കിൽ കെട്ടി തോട്ടിൽ തള്ളുന്നത്. ഇത് വൻ ആരോഗ്യപ്രശ്നങ്ങൾക്ക് കാരണമായിട്ടുണ്ട്. കഴിഞ്ഞദിവസങ്ങളിലും ഇത്തരത്തിൽ പത്തു ചാക്ക് ഇറച്ചിമാലിന്യങ്ങളാണ് പള്ളിത്തോട്-ചാവടി റോഡിന് ഇരുവശങ്ങളിലുമുള്ള തോടുകളിൽ തള്ളിയിരിക്കുന്നത്. അസഹനീയമായ ദുർഗന്ധമാണ് ഈ മേഖലയിൽ അനുഭവപ്പെടുന്നത്. പ്രദേശവാസികൾ മാരക രോഗഭീതിയിലാണ്. മാലിന്യം തള്ളുന്നവരെ പിടികൂടാൻ കാമറകൾ സ്ഥാപിക്കുമെന്നും റോഡിന്‍റെ ഇരുവശവും മാലിന്യം നീക്കി ടൈൽ പാകുമെന്നും തുറവൂർ കുത്തിയതോട് പഞ്ചായത്ത്അധികൃതർ ചേർത്തല കോടതിയിൽ ഉറപ്പ് നൽകിയെങ്കിലും യാതൊരുവിധ നടപടിയും ഉണ്ടായിട്ടില്ല. തോടുകളിലെ ഇറച്ചിമാലിന്യങ്ങളും മറ്റു മാലിന്യങ്ങളും നീക്കി ശുദ്ധീകരിക്കാനുള്ള അടിയന്തിര നടപടി പഞ്ചായത്തധികൃതരുടെ ഭാഗത്തുനിന്ന് ഉണ്ടാകണമെന്ന ആവശ്യം ശക്തമായി.

കായിപ്പുറത്തിന് അക്ഷരവെളിച്ചമായി സൗഹൃദവേദി

മുഹമ്മ: കായിപ്പുറം ഗ്രാമത്തിന്‍റെ അക്ഷരവെളിച്ചമാണ് സൗഹൃദവേദി വയനശാല. കായിപ്പുറം ജംഗ്ഷന് കിഴക്ക് സ്വന്തമായി വാങ്ങിയ സ്ഥലത്ത് നിർമിച്ച മന്ദിരത്തിൽ പ്രവർത്തിക്കുന്ന വായനശാലയിൽ രാവിലെ മുതൽ വൈകുന്നേരം വരെ അക്ഷരസ്നേഹികളുടെ തിരക്കാണ്. പ്രധാന പത്രങ്ങളും ആനുകാലിക പ്രസിദ്ധീകരണങ്ങളുമെല്ലാം സൗഹൃദവേദിയിലുണ്ട്. വിദ്യാർഥികളും മുതിർന്നവരുമടക്കം നിരവധിപേർ ദിവസേന അക്ഷരമധുരം നുകരാൻ എത്തുന്ന വായനശാല ഉദ്ഘാടനം ചെയ്തത് ഗാനഗന്ധർവൻ കെ.ജെ യേശുദാസ് ആണ്. എല്ലാ വർഷവും നടത്തുന്ന വായനശാലയുടെ വാർഷികാഘോഷം കായിപ്പുറത്തിന് ഉത്സവഛായ പകരുന്ന നാളുകളാണ്. മൂന്നുനാൾ നീളുന്ന ആഘോഷവേളകളിൽ വിദ്യാർഥികൾക്കായി ക്വിസ് മത്സരം, ചിത്രരചനാ മൽസരം കലാപരിപാടികൾ എന്നിവയും ഉണ്ടാകും. എല്ലാ വർഷവും വാർഷികത്തിന് 1000 വിദ്യാർഥികൾക്ക് പഠനോപകരണങ്ങൾ നൽകാറുണ്ട്. ബാഗ്, കുട, ബുക്ക്, ബോക്സ് എന്നിങ്ങനെ കുട്ടികൾക്കാവശ്യമായ പഠനോപകരണങ്ങൾ എല്ലാം അടങ്ങുന്ന കിറ്റാണ് നൽകുന്നത്. എല്ലാ വർഷവും കുട്ടികൾക്ക് സൈക്കിൾ വിതരണവും രോഗികളായവർക്ക് ചികിൽസാ സഹായവും ചെയ്യാറുണ്ട്. വായനശാലാ പ്രസിഡന്‍റ് ടി. കുഞ്ഞുമോന്‍റെ സഹധർമിണിയായിരുന്ന രജനിയുടെ സ്മരാണാർഥം നിർമിച്ച രജനി നീതി ലാബ് കായിപ്പുറം ഗ്രാമത്തിന് ഏറെ ആശ്വാസമാണ്. മൾട്ടി സ്പെഷാലിറ്റി ആശുപത്രിയിൽ ഉള്ളത്ര സൗകര്യങ്ങളോടെയാണ് നീതി ലാബ് പ്രവർത്തിക്കുന്നത്. 30 ലക്ഷം രൂപ ചിലവിൽ നിർമിച്ച നീതി ലാബ് സൗഹൃദ വേദി വായനശാലയ്ക്ക് തിലകക്കുറിയാണ്. 25 ശതമാനം മുതൽ 50 ശതമാനം വരെ ഡിസ്കൗണ്ട് ഓരോ പരിശോധനയ്ക്കും നൽകുന്നുണ്ട്. കിടപ്പു രോഗികൾക്ക് പരിശോധന സൗജന്യമാണ്.

നിർമാണപ്രവർത്തനങ്ങൾ പുനരാരംഭിക്കുന്നു

ചെങ്ങന്നൂർ: മൂന്നര വർഷത്തോളം വൈകിയ നന്നാട് പുത്തൻതോട് പാലത്തിന്‍റെ അപ്രോച്ച് റോഡിന്‍റെയും ഓടയുടെയും നിർമാണ പ്രവൃത്തികൾ പുനരാരംഭിക്കുന്നു. തിരുവൻവണ്ടൂർ ഹൈസ്കൂൾ ജംഗ്ഷൻ- നന്നാട് ഈരടിച്ചിറ റോഡിന്‍റെ ഭാഗമായ ഈ പാലത്തിന്‍റെ അപ്രോച്ച് റോഡിന്‍റെ നിർമാ ണത്തിലെ തടസങ്ങൾ പരിഹരിച്ച് ഉടൻതന്നെ പണികൾ പുനരാരംഭിക്കുമെന്ന് പ്രദേശം സന്ദർശിച്ച ശേഷം മന്ത്രി സജി ചെറിയാൻ അറിയിച്ചു. കരാറുകാരൻ, റീബിൽഡ് കേരള ഉദ്യോഗസ്ഥർ, ജനപ്രതിനിധികൾ എന്നിവരുമായി നടത്തിയ ചർച്ചയിലാണ് മന്ത്രി തീരുമാനം പ്രഖ്യാപിച്ചത്. ഓട, അപ്രോച്ച് റോഡ് ഉൾപ്പെടെയുള്ള നിർമാണം ഒരു മാസത്തിനകം പൂർത്തീകരിക്കാൻ മന്ത്രി നിർദേശം നൽകി. തിരുവൻവണ്ടൂർ പഞ്ചായത്തിലെ ഹൈസ്കൂൾ ജംഗ്ഷനിൽ നിന്ന് നന്നാട് ഈരടിച്ചിറ വരെ നീളുന്ന രണ്ടര കിലോമീറ്റർ റോഡിൽ രണ്ട് പാലങ്ങളും ഒരു കലുങ്കുമാണ് നിർമിക്കുന്നത്. ഇതിൽ ഒരു പാലത്തിന്‍റെയും കലുങ്കിന്‍റെയും നിർമാണവും റോഡ് ടാറിംഗും ഇതിനോടകം പൂർത്തിയായിട്ടുണ്ട്. എന്നാൽ, വരട്ടാറിന് കുറുകെയുള്ള ഏറ്റവും പ്രധാനപ്പെട്ട പുത്തൻതോട് പാലത്തിന്റെ അപ്രോച്ച് റോഡിൻ്റെയും ഓടയുടെയും നിർമാണം പൂർത്തിയാകാത്തത് പ്രദേശവാസികളെ ഏറെ ബുദ്ധിമുട്ടിലാക്കിയിരുന്നു. ഇത് സംബന്ധിച്ച് വിവിധ സംഘടനകളും രാഷ്‌ട്രീയ കക്ഷികളും നിരന്തര സമരങ്ങളും പ്രക്ഷോഭങ്ങളും നടത്തിവരികയായിരുന്നു.

ഭാവിയുടെ നല്ല വാഗ്ദാനമായി വിദ്യാർഥികൾ മാറണം: ബിഷപ് ഡോ. ജോഷ്വാ മാർ ഇഗ‌്നാത്തിയോസ്

കറ്റാനം: ഭാവിയുടെ നല്ല വാഗ്ദാനമായി വിദ്യാർഥികൾ വളർന്നുവരാനുള്ള സാഹചര്യം വീടുകളിൽ മാതാപിതാക്കൾ ഒരുക്കണമെന്ന് കെസിബിസി വിദ്യാഭ്യാസ കമ്മീഷൻ ചെയർമാൻ ബിഷപ് ഡോ. ജോഷ്വാ മാർ ഇഗ‌്നാത്തിയോസ്. കറ്റാനം പോപ്പ് പയസ് ഹയർ സെക്കൻഡറി സ്കൂളിൽ പ്ലസ് വൺ പ്രവേശനോത്സവവും പ്രതിഭാ സംഗമവും ഉദ്ഘാടനം ചെയ്യുകയായിരുന്നു അദ്ദേഹം . അധ്യാപകരുടെയും രക്ഷകർത്താക്കളുടെയും കൂട്ടായ പരിശ്രമത്തിലൂടെ സാമൂഹിക ഉന്നമനം ലക്ഷ്യമാക്കി പ്രവർത്തിക്കുന്ന നല്ല വിദ്യാർഥി സമൂഹത്തെ വാർത്തെടുക്കാൻ സാധിക്കണം. നല്ല സമൂഹത്തിന്‍റെ നിർമിതിക്കായി സ്വപ്നം കാണുവാൻ വിദ്യാർഥികളെ പ്രേരിപ്പിക്കണം. കുട്ടികളുടെ സമഗ്ര വളർച്ച ലക്ഷ്യമാക്കി അധ്യാപകർ പ്രവർത്തിക്കണമെന്നും ബിഷപ് പറഞ്ഞു. പിടിഎ പ്രസിഡന്‍റ് വർഗീസ് മത്തായി അധ്യക്ഷത വഹിച്ചു. ഭരണിക്കാവ് ഗ്രാമപഞ്ചായത്ത് പ്രസിഡന്‍റ് കെ. ദീപ മുഖ്യപ്രഭാഷണം നടത്തി. കുറത്തികാട് സബ് ഇൻസ്പെക്ടർ എം എസ് എബി ലഹരിവിരുദ്ധ സന്ദേശം നൽകി. പ്രിൻസിപ്പൽ ടി.മോഹൻ ഹെഡ്മാസ്റ്റർ ടി.കെ. സാബു ജനറൽ കൺവീനർ സി.ടി. വർഗീസ്, സ്റ്റാഫ് സെക്രട്ടറി ഫാ. സിൽവസ്റ്റർ തെക്കേടത്ത്, സെലിൻ സ്കറിയ, ഷേർലി തോമസ് എന്നിവർ പ്രസംഗിച്ചു. പ്ലസ്ടു പരീക്ഷയിൽ ഉന്നത വിജയം നേടിയ വിദ്യാർഥികളെ ചടങ്ങിൽ ആദരിച്ചു.

വെള്ളപ്പൊക്കം മൂലം ദുരിതമനുഭവിക്കുന്നവർക്ക് സഹായമെത്തിക്കണം: ജനാധിപത്യ കേരളാകോണ്‍ഗ്രസ്

രാമങ്കരി: രണ്ടാഴ്ചയ്ക്കിടെ തുടര്‍ച്ചയായുണ്ടായ വെള്ളപ്പൊക്കം മൂലം ദുരിതമനുഭവിക്കുന്ന കുടുംബങ്ങളെ രക്ഷിക്കാന്‍ അടിയന്തരമായി കഞ്ഞിവീഴ്ത്തല്‍ കേന്ദ്രങ്ങള്‍ ആരംഭിക്കാന്‍ ജില്ലാ ഭരണകൂടത്തിന് സര്‍ക്കാര്‍ നിര്‍ദേശം നല്‍കണമെന്ന് ജനാധിപത്യ കേരളാ കോണ്‍ഗ്രസ് ചെയര്‍മാന്‍ ഡോ കെ.സി. ജോസഫ് ആവശ്യപ്പെട്ടു. പകര്‍ച്ചവ്യാധി ഭീഷണി നേരിടുന്ന ഈ പ്രദേശങ്ങളിലെ ജലനിരപ്പ് നിയന്ത്രിക്കാന്‍ പാടശേഖരങ്ങളില്‍ ഉടന്‍ പമ്പിംഗ് ആരംഭിക്കണമെന്നും കുട്ടനാട്ടിലെ കര്‍ഷകരുടെ നെല്ലുവില കുടിശിക നല്‍കാന്‍ ബാങ്കുകള്‍ തടസം നില്‍ക്കുന്ന സാഹചര്യത്തില്‍ ഒരാഴ്ചയ്ക്കകം മുഴുവന്‍ കുടിശികയും കൊടുത്തു തീര്‍ക്കാന്‍ സര്‍ക്കാര്‍ മുന്‍കൈയെടുക്കണമെന്നും അദ്ദേഹം ആവശ്യപ്പെട്ടു. ജനാധിപത്യ കേരളാകോണ്‍ഗ്രസ് കുട്ടനാട് നിയോജക മണ്ഡലം കണ്‍വന്‍ഷന്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. നിയോജകമണ്ഡലം പ്രസിഡന്‍റ് ജേക്കബ് അലക്സാണ്ടര്‍ അധ്യക്ഷത വഹിച്ചു.

സിഗ്‌നല്‍ ബോയകളുടെ കുറവ് ബോട്ടുകളെ വട്ടംകറക്കുന്നു

ആലപ്പുഴ: ജലഗതാഗതവകുപ്പ് ബോട്ടുകളെ വലച്ച് ജലപാതയിലെ സിഗ്‌നല്‍ ബോയകളുടെ കുറവ്. ഇതേത്തുടര്‍ന്ന് മുഹമ്മ-കുമരകം ജലപാതയില്‍ ബോട്ടുകളുടെ ദിശ മാറുന്നതു പതിവായി. ശക്തമായ കാറ്റും മഴയുമെല്ലാം ബോട്ട് സര്‍വീസിനെ ബാധിക്കുന്നതിനിടെയാണ് ബോയകളില്ലാത്തു രാത്രികാലത്തുള്‍പ്പെടെ ബോട്ടുകളെ വട്ടംകറക്കുന്നത്. മുഹമ്മ-കുമരകം ജലപാതയില്‍ നിലവില്‍ ഏഴു സിഗ്‌നല്‍ ബോയകളാണ് സ്ഥാപിച്ചിരിക്കുന്നത്. ഇതിൽ രണ്ടെണ്ണം മാത്രമാണ് ശരിയായിട്ടുള്ളത്. ബാക്കിയുള്ള പലതും തകരാറായി ബോട്ടുചാലില്‍നിന്നു മാറിക്കിടക്കുകയാണ്. ഇന്‍ലാന്‍ഡ് വാട്ടര്‍ അഥോറിറ്റി, മാരിടൈം ബോര്‍ഡ് എന്നിവയുടെ നേതൃത്വത്തിലാണ് ബോയകള്‍ സ്ഥാപിക്കേണ്ടത്. 12 കിലോമീറ്ററോളം ദൂരമുള്ളതാണ് ജലപാത. ഇടയ്ക്ക് ജലഗതാഗത വകുപ്പിന്‍റെ നേതൃത്വത്തില്‍ ബോയകള്‍ സ്ഥാപിക്കാന്‍ നീക്കമുണ്ടായെങ്കിലും അനുമതി ലഭിച്ചില്ല. ബോയകളില്ലാത്തതിനാല്‍ ദിശ അറിയാനാകാതെ സര്‍വീസ് ബോട്ടുകളും മറ്റു ബോട്ടുകളും വേമ്പനാട്ടുകായലില്‍ കറങ്ങുകയാണ്. ഇതിനുപുറമേ കുമരകം കുരിശടിയിലെ സിഗ്‌നല്‍ ലൈറ്റ് തകരാറിലായതും രാത്രികാലത്തെ ബോട്ട് സര്‍വീസിനെ ബാധിക്കുന്നുണ്ട്. അതിനാല്‍ വളരെയധികം ബുദ്ധിമുട്ടിയാണ് രാത്രികാലത്ത് ബോട്ട് കുമരകത്തേക്കു പോകുന്നത്. രാത്രികാലത്ത് വെളിച്ചസംവിധാനം ഉള്‍പ്പെടെയുള്ളവയാണ് ബോയകള്‍. സൗരോര്‍ജത്തില്‍ പ്രവര്‍ത്തിച്ച് ബ്ലിങ്കറുകളായി പ്രവര്‍ത്തിക്കുന്നവയായിരുന്നിവ. ഇവ പുനഃസ്ഥാപിക്കുന്നതിനായി അധികൃതരുടെ ഭാഗത്തുനിന്ന് ഇടപെടലുകളുണ്ടാകണമെന്നാണ് ജലഗതാഗതവകുപ്പ് ജീവനക്കാരും ബോട്ട് യാത്രക്കാരും ആവശ്യപ്പെടുന്നത്.

അമ്പലപ്പുഴയിൽ വൻ ലഹരിവേട്ട‌; നാലുകിലോ കഞ്ചാവുമായി മൂന്ന് യുവാക്കൾ പിടിയിൽ

അമ്പലപ്പുഴ: അമ്പലപ്പുഴയിൽ വീണ്ടും വൻ ലഹരി വേട്ട. നാലു കിലോ കഞ്ചാവുമായി മൂന്ന് യുവാക്കൾ പിടിയിൽ. അമ്പലപ്പുഴ തെക്ക് പഞ്ചായത്ത് 14-ാം വാർഡിൽ പുതുവൽ കോമനയിൽ കാശിനാഥൻ (22), 15-ാം വാർഡിൽ പുതുവൽ കോമന (മഠത്തിൽപറമ്പ്)യിൽ ഹരികൃഷ്ണൻ (22), 15-ാം വാർഡിൽ പുതുവൽ വീട്ടിൽ ഷംനാദ് (20) എന്നിവരെയാണ് അമ്പലപ്പുഴ പോലീസ് സ്റ്റേഷൻ ഇൻസ്പെക്ടർ പ്രതീഷ് കുമാറിന്‍റെ നേതൃത്വത്തിൽ അറസ്റ്റ് ചെയ്തത്. കഴിഞ്ഞരാത്രി 11ന് പട്രോളിംഗിന്‍റെ ഭാഗമായി പോലീസ് അമ്പലപ്പുഴ കുഞ്ചുപിള്ള സ്കൂൾ പരിസരത്തെത്തിയപ്പോൾ മൂന്ന് യുവാക്കൾ കഞ്ചാവ് ചെറിയ പൗച്ചുകളിലാക്കുന്നത് ശ്രദ്ധയിൽപ്പെട്ടു. പോലീസിനെ കണ്ട് കഞ്ചാവും ബൈക്കും മൊബൈൽ ഫോണും ഉപേക്ഷിച്ച് പ്രതികൾ ഓടി രക്ഷപ്പെട്ടു. തുടർന്ന് കഞ്ചാവും ബൈക്കും മൊബൈൽ ഫോണും മറ്റ് രേഖകളും കസ്റ്റഡിയിലെടുത്ത പോലീസ് പ്രതികൾക്കായി തെരച്ചിൽ നടത്തുകയും പുറക്കാട് ഭാഗത്തുനിന്ന് പിടികൂടുകയുമായിരുന്നു. അമ്പലപ്പുഴ ഡിവൈഎസ്പി കെ.എൻ. രാജേഷിന്‍റെ മേൽനോട്ടത്തിൽ അമ്പലപ്പുഴ പോലീസ് സ്റ്റേഷൻ ഇൻസ്പെക്ടർ പ്രതീഷ് കുമാറിന്‍റെ നേതൃത്വത്തിൽ സബ് ഇൻസ്പെക്ടർ അനീഷ് കെ. ദാസ്, പ്രൊബേഷൻ സബ് ഇൻസ്പെക്ടർ നിധിൻ രാജ്, ഗ്രേഡ് എഎസ്ഐ പ്രിൻസ് സൽപുത്രൻ, സീനിയർ സിവിൽ പോലീസ് ഓഫീസർമാരായ സുജിമോൻ, രതീഷ് വാസു, ജോസഫ് ജോയി, ഡാൻസാഫ് അംഗങ്ങളായ എബിൻ സിൽവസ്റ്റർ, സിവിൽ പോലീസ് ഓഫീസർമാരായ വിജിത്ത്, മിഥുൻ, ശ്രീജി, അമ്പാടി, എച്ച്.ജി. ഇർഷാദ് എന്നിവരടങ്ങുന്ന സംഘമാണ് പ്രതികളെ പിടികൂടിയത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.

മെഡിക്കല്‍ കോളജ് ആശുപത്രിയിൽ നിര്‍മാണപ്രവർത്തനങ്ങൾക്ക് നിലവാരമില്ലെന്ന്

അമ്പലപ്പുഴ: ആലപ്പുഴ മെഡിക്കല്‍ കോളജ് ആശുപത്രി വളപ്പില്‍ നിര്‍മാണം നടക്കുന്ന കെട്ടിടങ്ങള്‍ക്ക് മതിയായ സാമഗ്രികള്‍ ഉപയോഗിക്കുന്നില്ലെന്ന ആരോപണം ശക്തം. അടുത്തിടെ‍ ഉദ്ഘാടനം കഴിഞ്ഞ സൂപ്പര്‍ സ്പെഷാലിറ്റി കെട്ടിടത്തിലുണ്ടായ ചോര്‍ച്ചയും ശുചിമുറി ഉപയോഗശൂന്യമായതും സംബന്ധിച്ചു നടന്ന വിജിലന്‍സ് അന്വേഷണത്തിലും നിര്‍മാണത്തില്‍ അപാകതയുള്ളതായി തെളിഞ്ഞിരുന്നു. കൂടാതെ പി ജി ക്വാര്‍ട്ടേഴ്സിലും അടുത്തിടെ‍ ചോര്‍ച്ചയുണ്ടായി. കരാര്‍ പ്രകാരമുള്ള മെറ്റീരിയലുകള്‍ ഉള്‍പ്പെടുത്താറില്ല. നിര്‍മാണത്തിന് ആവശ്യമായ മണ്ണ് ആശുപത്രി വളപ്പില്‍നിന്നു കുഴിച്ചെടുക്കുകയാണ്. എംസാന്‍റ് ഉള്‍പ്പെടെയുള്ള സാമഗ്രികളിലും തട്ടിപ്പ് നടത്താറുണ്ട് എന്നിങ്ങനെയുള്ള ആരോപണങ്ങള്‍ ശക്തമാണ്. കഴിഞ്ഞദിവസം ആശുപത്രി വളപ്പില്‍ പി ജി ക്വാര്‍ട്ടേഴ്സിലേക്കുള്ള റോഡരികില്‍ മരുന്ന് സംഭരണത്തിനുള്ള കെട്ടിടത്തിന്‍റെ മേല്‍ക്കൂര കോണ്‍ക്രീറ്റിംഗിലും കരാറുകാരന്‍ അഴിമതി കാട്ടിയതായ ആക്ഷേപം ശക്തമാണ്. മീപത്തുള്ള മണ്ണ് കൂട്ടിയിട്ട് അതിന് മുകളില്‍ എം സാന്‍റിട്ട് പിഡബ്ല്യുഡി ഉദ്യോഗസ്ഥരെ തെറ്റിദ്ധരിപ്പിച്ചാണ് നിര്‍മാണം നടത്തിയിരിക്കുന്നത്. കരാര്‍ പ്രകാരമുള്ള എം സാന്‍റ് ഇറക്കിയതായി ഉദ്യോഗസ്ഥരെ തെറ്റിദ്ധരിപ്പിക്കുകയായിരുന്നു, മണ്ണ് കൂട്ടിയിട്ടതിന്‍റെ ലക്ഷ്യം. ഇത് പി ഡബ്ല്യുഡി ഉദ്യോഗസ്ഥര്‍ കരാറുകാരന്‍റെ ശ്രദ്ധയില്‍പ്പെടുത്തിയപ്പോള്‍ ഇയാള്‍ ഭീഷണിപ്പെടുത്തിയതായ ആരോപണവും നാട്ടുകാര്‍ പറയുന്നു. ഇതിന്‍റെ ഫോട്ടോ എടുക്കാനെത്തിയ പ്രദേശവാസിയായ പതിനാറുകാരനെ കൊലപ്പെടുത്താന്‍ ശ്രമിച്ചതായി പരാതി അമ്പലപ്പുഴ പോലീസിന് നല്‍കിയിരുന്നു. സമീപവാസിയായ വെളിയില്‍ വീട്ടില്‍ അര്‍ജുന(16) നെ കരാറുകാരന്‍ മര്‍ദ്ദിക്കുകയും കമ്പിപ്പാരകൊണ്ട് ആക്രമിക്കാന്‍ ശ്രമിച്ചതായും പരാതിയില്‍ പറയുന്നു. എം സാന്‍റിന് പകരം മണ്ണ് ഉപയോഗിക്കുന്നത് ശ്രദ്ധയില്‍പ്പെട്ടത് മൊബൈലില്‍ പകര്‍ത്തുന്നതിനിടെ കരാറുകാരന്‍ തള്ളിയിട്ടശേഷം മൊബൈല്‍ പിടിച്ചുവാങ്ങി കമ്പിപ്പാരകൊണ്ട് ആക്രമിക്കാന്‍ ശ്രമിച്ചതായി അമ്പലപ്പുഴ പോലീസിന്‍റെ എഫ്ഐആറിലും പറയുന്നുണ്ട്. കൊലപ്പെടുത്താന്‍ ഉപയോഗിച്ചതായി പറയുന്ന പാരയും പോലീസ് കണ്ടെടുത്തിരുന്നു. എന്നാല്‍ നിസാര വകുപ്പ് ചുമത്തിയാണ് അമ്പലപ്പുഴ പോലീസ് കേസെടുത്തത്. സംഭവവുമായി ബന്ധപ്പെട്ട് ശിശുവികസന സമിതിയും കുട്ടിയില്‍നിന്നു മൊഴിയെടുത്ത് റിപ്പോര്‍ട്ട് സമര്‍പ്പിച്ചിട്ടുണ്ട്. പ്രായപൂര്‍ത്തിയാകാത്ത കുട്ടിയെ കൊലപ്പെടുത്താന്‍ ശ്രമിച്ച സംഭവത്തില്‍ മതിയായ കേസെടുക്കണമെന്ന് ആവശ്യപ്പെട്ട് കോടതിയെ സമീപിക്കാനുള്ള തയാറെടുപ്പിലാണ് ബന്ധുക്കള്‍. കെട്ടിടനിര്‍മാണത്തില്‍ വിജിലന്‍സ് അന്വേഷണം വേണമെന്ന ആവശ്യവും ശക്തമാണ്.

ശബരിമല തീർത്ഥാടകൻ മിത്രപ്പുഴയിൽ മുങ്ങിമരിച്ചു

ചെങ്ങന്നൂർ: ശബരിമല തീർഥാടനത്തിനെത്തിയ തമിഴ്നാട് സ്വദേശി മിത്രപ്പുഴ ആറാട്ടുകടവിൽ മുങ്ങിമരിച്ചു. തമിഴ്നാട് സ്വദേശി വി. ഗണേശൻ (48) ആണ് മരിച്ചത്. ഇന്നലെ രാവിലെ 7.30 ന് കുളിക്കാനിറങ്ങിയ ഇദ്ദേഹം ഒഴുക്കിൽപ്പെട്ട് താഴ്ന്നുപോവുകയായിരുന്നു. എട്ടു പേരടങ്ങുന്ന സംഘത്തോടൊപ്പമാണ് ഗണേശൻ ശബരിമലയിലേക്ക് തിരിച്ചത്. കുളിക്കാനായി പുഴയിലിറങ്ങിയപ്പോൾ കമ്പിവേലിയുള്ള ഭാഗത്ത് ഒഴുക്കിൽപ്പെടുകയായിരുന്നു. കൂടെയുണ്ടായിരുന്നവർ നോക്കിനിൽക്കെയാണ് സംഭവം. ഏകദേശം മുക്കാൽ മണിക്കൂറിന് ശേഷം അതേ സ്ഥലത്തുനിന്നുതന്നെ മൃതദേഹം കണ്ടെത്തി. ചെങ്ങന്നൂർ പോലീസും ഫയർഫോഴ്സും സ്ഥലത്തെത്തി മൃതദേഹം ചെങ്ങന്നൂർ താലൂക്ക് ആശുപത്രിയിലേക്ക് മാറ്റി. സംഭവത്തിൽ പോലീസ് മേൽനടപടികൾ സ്വീകരിച്ചു. പരേതൻ ചെന്നൈ ടാബ്‌ലറ്റ് ഇന്ത്യ ലിമിറ്റഡ് സ്ഥാപനത്തിലെ ഓപ്പറേറ്ററായിരുന്നു. ഭാര്യ: ശ്രീദേവി. ഏക മകൾ: നേത്ര.

വായന ലഹരിയാക്കി എഴുത്താളൻ

അമ്പലപ്പുഴ: മരിക്കാത്ത വായനയുടെ ലോകത്ത് നിറദീപമായി എഴുത്താളൻ ഡോ. അരുൺകുമാർ. അധ്യാപകനും കവിയും പുസ്തകരചയിതാവും നല്ലൊരു വാഗ്‌മിയുമായ ഹരിപ്പാട് സ്വദേശി അരുൺ കുമാറിന്‍റെ തൂലികാനാമമാണ് ‘എഴുത്താളൻ’. അധ്യാപക ജോലിയുടെ തിരക്കൊഴിഞ്ഞാൽപിന്നെ വായനയാണ് അദ്ദേഹത്തിന്‍റെ ലഹരി. ഹരിപ്പാട് നഗരസഭാ വായനശാല, പറവൂർ പബ്ളിക് ലൈബ്രററി, ആലപ്പുഴ മുനിസിപ്പൽ വായനശാല, അമ്പലപ്പുഴ പി.കെ. മെമ്മോറിയൽ അടക്കം ഗ്രന്ഥശാലകളിലെ നിറസാന്നിധ്യമാണ് ഡോ. അരുൺകുമാർ. വീട്ടിലും വൻ പുസ്തക ശേഖരമുണ്ട്. മലയാളത്തിലും ഇംഗ്ലീഷിലും ഇറങ്ങുന്ന ഭൂരിഭാഗം ദിനപത്രങ്ങളും ആനുകാലിക പ്രസിദ്ധീകരണങ്ങളും വായിക്കും. ഇലക്‌ട്രോണിക് മാധ്യമങ്ങളുടെ അതിപ്രസരത്തിൽ വായന നശിച്ച കാലത്ത് ഇത് ലഹരിയാക്കിയ അപൂർവമാളുകളിൽ ഒരാളാണ് എഴുത്താളൻ. മലയാളത്തിലും ഇംഗ്ലീഷിലുമായി അദ്ദേഹം എഴുതിയിട്ടുള്ള കൃതികൾ ഇന്ത്യക്കു വെളിയിലും പരിഭാഷപ്പെടുത്തിയിട്ടുണ്ട്. വിദ്യാഭ്യാസ മേഖലയിലടക്കം അദ്ദേഹത്തിന്‍റെ സേവനങ്ങൾക്ക് നിരവധി പുരസ്കാരങ്ങളും ലഭിച്ചിരുന്നു . വിക്കിപീഡിയയിൽ ഇടം നേടിയിട്ടുള്ള അരുൺ കുമാർ ഇംഗ്ലീഷ് സാഹിത്യത്തിലാണ് ഡോക്ടറേറ്റ് നേടിയത്.

തിമിംഗലത്തിന്‍റെ ജഡം മറവുചെയ്തു

അമ്പലപ്പുഴ: പുറക്കാട് പഴയങ്ങാടിയിൽ കഴിഞ്ഞ ദിവസം തീരത്തടിഞ്ഞ കൂറ്റൻ നീലത്തിമിംഗലത്തിന്‍റെ ജഡം മറവുചെയ്തു. തീരത്തിന് തൊട്ടടുത്തായി ക്രെയിനുപയോഗിച്ച് വലിയ കുഴിയെടുത്താണ് ജഡം മറവുചെയ്തത്. സർക്കാർവക ഭൂമിയാണിത്. റാന്നി ഫോറസ്റ്റ് റേഞ്ച് ഓഫീസർ ബി.ആർ.ജയന്‍റെ നേതൃത്വത്തിലാണ് നടപടിക്രമങ്ങൾ പൂർത്തിയാക്കിയത്. ജഡം പല കഷണങ്ങളാക്കിയാണ് മറവുചെയ്തത്. അഴുകിയ ജഡം മുറിച്ചതോടെ പ്രദേശമെങ്ങും അതിരൂക്ഷമായ ദുർഗന്ധമാണ് അനുഭവപ്പെട്ടത്. ഏകദേശം അര കിലോമീറ്ററോളം ദൂരം ദുർഗന്ധമായിരുന്നു. പ്രദേശവാസികൾക്ക് വീടുകളിൽ ഭക്ഷണമുണ്ടാക്കാനോ കഴിക്കാനോ കഴിയാത്ത അവസ്ഥയായിരുന്നു. ബുധനാഴ്ച രാവിലെയാണ് ജഡം മറവ് ചെയ്യാനുള്ള നടപടികൾ ആരംഭിച്ചത്. മരണകാരണം അറിയാൻ ജഡത്തിൽ നിന്ന് സാമ്പിൾ ശേഖരിച്ചു. ഇതിന്‍റെ ഫോറൻസിക് പരിശോധനാ ഫലമറിയാൻ ഒരാഴ്ച വേണ്ടിവരും. ഇതിനു ശേഷം മാത്രമേ മരണ കാരണമറിയാൻ കഴിയൂ. പുറക്കാട് പഴയങ്ങാടി തീരത്താണ് ചൊവ്വാഴ്ച വൈകിട്ട് മൂന്നരയോടെ കൂറ്റൻ തിമിംഗലത്തിന്‍റെ ജഡമടിഞ്ഞത്. നാലു ദിവസത്തിനുള്ളിൽ രണ്ടാമത്തെ തിമിംഗലത്തിന്‍റെ ജഡമാണ് പുറക്കാട് അടിഞ്ഞു കയറിയത്.

"ആലപ്പുഴക്കാർ ഇൻ കൊച്ചി...’ ഹൃദ്യമായ ഒത്തുചേരൽ

കൊച്ചി: ആലപ്പുഴയിൽ വേരുകളുള്ളവരും നിലവിൽ കൊച്ചിയിൽ താമസിക്കുന്നവരുമായ ആളുകൾക്കായി സംഘടിപ്പിച്ച "ആലപ്പുഴക്കാർ ഇൻ കൊച്ചി’ സംഗമം ഹൃദയസ്പർശിയായി. ആലപ്പുഴയിലെ പഴയകാല ഓർമകൾ അയവിറക്കിയും സൗഹൃദങ്ങൾ പുതുക്കിയും കൊച്ചിയിലെ ആലപ്പുഴക്കാർ സന്തോഷം പങ്കുവച്ചു. കേരള പിഡബ്ല്യുഡി മുൻ ചീഫ് എൻജിനിയർ എം.എ. ചാക്കോ എട്ടുകെട്ടിൽ, ആലപ്പുഴ സൗത്ത് ഇന്ത്യൻ റബർ വർക്സ് മുൻ സിഇഒ ജി. കൃഷ്ണൻ എന്നിവരെ ചടങ്ങിൽ ആദരിച്ചു. എറണാകുളം രാമവർമ ക്ലബ്ബിൽ നടന്ന ചടങ്ങിൽ പ്രമുഖ സംവിധായകൻ സിബി മലയിൽ, വ്യവസായി ജോസ് പട്ടാറ, ഓം കുമാർ, ശ്രീകുമാർ, ബിന്ദു മാധവ്, രാജ്കുമാർ, ജോണി വാര്യംപറമ്പിൽ, ഔസേപ്പച്ചൻ വാളക്കുഴി തുടങ്ങി നിരവധി പേർ പങ്കെടുത്തു. പ്രഫ. അയ്യങ്കാർ ഉൾപ്പെടെ അന്തരിച്ച ആലപ്പുഴയിലെ പ്രമുഖരെ യോഗം അനുസ്മരിച്ചു. ആലപ്പുഴ മുല്ലക്കൽ ചിറപ്പ്, പള്ളിപ്പെരുന്നാളുകൾ, ബീച്ചിലെ കറക്കം, ദിൽഖുഷ്, ഐസിഎച്ച്, ബ്രദേഴ്സ് തുടങ്ങിയ ഇഷ്ടഭക്ഷണശാലകൾ, സിആർ ലെതർ വർക്സ്, സെന്‍റ് ജോർജ് അംബ്രല്ല മാർട്ടിനടുത്തുള്ള കടകൾ, ലിയോ തേർട്ടീൻത് സ്കൂൾ, സെന്‍റ് ജോസഫ്സ് ഗേൾസ് സ്കൂൾ, കോളജ്, ഗോപിച്ചേട്ടന്‍റെ മുറുക്കാൻ കട, ആലപ്പുഴ ബീച്ച് തുടങ്ങിയ ആലപ്പുഴയുടെ ഓർമകൾ എല്ലാവരും പങ്കുവച്ചു. കൊച്ചിയിൽ സ്ഥിരതാമസമാക്കിയ ആലപ്പുഴക്കാരുടെ സംഗമം വരുംവർഷങ്ങളിലും നടത്തുമെന്നു സംഘാടകർ അറിയിച്ചു.

പുറക്കാട് പഞ്ചായത്തിന്‍റെ തീരപ്രദേശത്ത് വീണ്ടും നീലത്തിമിംഗലം അടിഞ്ഞു

അമ്പലപ്പുഴ: പുറക്കാട് പഞ്ചായത്തിന്‍റെ തീരപ്രദേശത്ത് ദിവസങ്ങൾക്കുള്ളിൽ രണ്ടാമതും നീലത്തിമിംഗലം അടിഞ്ഞു. പുറക്കാട് പഴയങ്ങാടി തീരത്താണ് ചൊവ്വാഴ്ച ഉച്ചകഴിഞ്ഞ് മൂന്നരയോടെ ചത്ത നിലയിലുള്ള കൂറ്റൻ തിമിംഗലമടിഞ്ഞത്. ഏകദേശം 30 മീറ്റർ നീളമുള്ള ഇത് ദിവസങ്ങൾക്കു മുൻപ് ചത്തതാണെന്ന് സംശയമുണ്ട്. അധികം അഴുകിയിട്ടില്ല. എങ്കിലും അതിരൂക്ഷമായ ദുർഗന്ധമാണ് പ്രദേശത്തുള്ളത്. ഇവിടെ കടൽഭിത്തിയില്ലാത്തതിനാൽ തീരത്തോട് ചേർന്നാണ് തിമിംഗലമടിഞ്ഞത്. നൂറു കണക്കിന് പേരാണ് ഇതിനെ കാണാനായി എത്തിച്ചേരുന്നത്. പഞ്ചായത്ത് പ്രസിഡന്‍റ് എ.എസ്. സുദർശനന്‍റെ നേതൃത്വത്തിൽ പഞ്ചായത്ത് അധികൃതരും തോട്ടപ്പള്ളി തീരദേശ പോലീസും സ്ഥലത്തെത്തി. തിമിംഗലമടിഞ്ഞു കയറിയത് ജില്ലാ കളക്ടർ, വനംവകുപ്പ് എന്നിവരെ അറിയിച്ചിട്ടുണ്ടെന്ന് പഞ്ചായത്ത് പ്രസിഡന്‍റ് പറഞ്ഞു. മൂന്നു ദിവസം മുമ്പ് ഇവിടെനിന്നു രണ്ടു കിലോമീറ്റർ തെക്ക് പുന്തലയിലും കൂറ്റൻ നീലത്തിമിംഗലമടിഞ്ഞു കയറിയിരുന്നു. വളരെയധികം അഴുകിയ നിലയിലായിരുന്നു അന്നത്തെ തിമിംഗലം.

തീരവും തീരജനതയും സംരക്ഷിക്കപ്പെടണം: ഫാ. സേവ്യര്‍ കുടിയാംശേരി

ആലപ്പുഴ: കടല്‍ത്തീരവും തീരജനതയും സംരക്ഷിക്കപ്പെടാന്‍ അടിയന്തര നടപടികള്‍ സ്വീകരിക്കണമെന്ന് ആലപ്പുഴ രൂപത പിആര്‍ഒയും കോസ്റ്റൽ എഡ്യൂക്കേഷണല്‍ സൊസൈറ്റി പ്രസിഡന്‍റുമായ ഫാ. സേവ്യര്‍ കുടിയാംശേരി സര്‍ക്കാരിനോട് ആവശ്യപ്പെട്ടു. അമ്പലപ്പുഴ മുതല്‍ ചെല്ലാനം വരെയുള്ള തീരപ്രദേശം അതിതീവ്രമായ കടല്‍ക്ഷോഭത്തെ നേരിടുകയാണ്. ചെല്ലാനത്തെ തീരദേശ റോഡ് മുഴുവന്‍ കടല്‍ജലം കയറി മുങ്ങിയതിനാല്‍ യാത്രപോലും മുടങ്ങിയിരിക്കുന്നു. കടല്‍ഭിത്തിയില്ലാത്ത ഒറ്റമശേരി, പുന്നപ്ര, പറവൂര്‍, നര്‍ബോന തുടങ്ങിയ പ്രദേശങ്ങള്‍ എത്രയും വേഗം കടല്‍ഭിത്തി കെട്ടി സംരക്ഷിക്കണം. തീരത്തുള്ള അനേകം വീടുകള്‍ തകര്‍ന്നുവീഴാറായിരിക്കുന്നു. അപകടങ്ങളില്‍പ്പെട്ട കപ്പലുകളില്‍നിന്നുള്ള കണ്ടെയ്‌നറുകള്‍ തീരത്തടിയുന്നത് തീരത്ത് വലിയ പരിഭ്രാന്തി പരത്തിയിരിക്കുകയാണ്. ഇതിനെല്ലാം പരിഹാരം കണ്ടെത്താൻ സർക്കാർ തയാറാകണമെന്ന് അദ്ദേഹം പറഞ്ഞു. കാറ്റും കോളും വരുമ്പോള്‍ മീന്‍പിടിക്കാന്‍ പോകരുതെന്നു പറയുന്ന ദിവസങ്ങള്‍ ഏറെയാകുന്ന സാഹചര്യത്തില്‍ എങ്ങനെ ജീവിക്കും എന്നതു ഗൗരവമുള്ള വിഷയമാണ്. അത്തരം ദിവസങ്ങളില്‍ നഷ്ടപരിഹാരം നല്‍കാന്‍ മനുഷ്യാവകാശ കമ്മീഷന്‍റെ വിധിയുള്ളതാണെങ്കിലും കൃത്യമായി നല്‍കുന്നില്ല. ഈ സാഹചര്യത്തില്‍ അടിയന്തര നടപടികള്‍ സ്വീകരിക്കപ്പെടണമെന്നും അദ്ദേഹം ആവശ്യപ്പെട്ടു. റോയി പി. തിയോച്ചന്‍, ഗര്‍ഷോം രാഹുല്‍, റാഫേല്‍ കൊമ്മാടി എന്നിവര്‍ പ്രസംഗിച്ചു.

ആറാട്ടുപുഴ, തൃക്കുന്നപ്പുഴ പഞ്ചായത്തുകളിൽ കടലാക്രമണം

കായംകുളം: ഇടവേളയ്ക്കുശേഷം വീണ്ടും കടലാക്രമണം ശക്തമായത് തൃക്കുന്നപ്പുഴ, ആറാട്ടുപുഴ തീരദേശവാസികളെ ദുരിതത്തിലാഴ്ത്തി. പാഞ്ഞുകയറിയ തിരമാലയ്ക്കു മുന്നിൽ നിസഹായരായി നോക്കിനിൽക്കാനേ അവർക്ക് കഴിഞ്ഞുള്ളൂ. കനത്ത മഴയ്ക്കൊപ്പം കടലാക്രമണവും ശക്തമായതോടെ തീരവാസികളുടെ ദുരിതം കടുത്തതായി. കഴിഞ്ഞ ദിവസം ഉച്ചയോടെ ആരംഭിച്ച കടലാക്രമണം കനത്ത നാശമാണ് തീരത്ത് വിതച്ചത്. നിരവധി വീടുകൾ ഏതുനിമിഷവും കടലെടുക്കാവുന്ന അവസ്ഥയിലാണ്. തീരദേശ റോഡിന് പടിഞ്ഞാറുഭാഗം കടൽവെള്ളം കെട്ടിനിൽക്കുന്നു. വരും ദിവസങ്ങളിലും കടൽ ദുരിതം തീർക്കുമെന്ന ഭീതി ജനങ്ങൾക്കുണ്ട്. ആറാട്ടുപുഴ വലിയഴിക്കൽ, പെരുമ്പള്ളി, കള്ളിക്കാട് മീശമുക്ക്, എസി പള്ളി ജംഗ്ഷൻ വടക്കു മുതൽ എംഇഎസ് ജംഗ്ഷൻ വരെ, പടിഞ്ഞാറെ ജുമാമസ്ജിദിന് വടക്കുഭാഗം മുതൽ കാർത്തിക ജംഗ്ഷൻ, മംഗലം എന്നിവിടങ്ങൾ വരെയും കടലാക്രമണം ജനജീവിതം ദുരിതത്തിലാഴ്ത്തി. കരയിലേക്ക് അടിച്ചുകയറിയ തിരമാല തീരദേശ റോഡ് കവിഞ്ഞ് ശക്തമായി കിഴക്കോട്ട് ഒഴുകി. തീരദേശ റോഡിന് പടിഞ്ഞാറും കിഴക്കുമുള്ള നൂറിലധികം വീടുകളിൽ വെള്ളം കയറി. പെരുമ്പള്ളി ഭാഗത്ത് നിർമിച്ച ജിയോ കടൽഭിത്തി ഭാഗികമായി തകർന്നു. ഇവിടെ ഏത് നിമിഷവും റോഡ് കടലെടുക്കാവുന്ന അവസ്ഥയിലാണ്. പെരുമ്പള്ളി ഭാഗത്ത് വൻതോതിലാണ് തീരം കടലെടുക്കുന്നത്. ഇവിടെ പേരിനു പോലും കടൽഭിത്തി നിലവിലില്ല. എസി പള്ളി ജംഗ്ഷന് വടക്കുഭാഗത്ത് തീരദേശ റോഡിൽ മണ്ണടിഞ്ഞു തുടങ്ങി. നിരവധി കുടുംബങ്ങൾ ബന്ധുവീടുകളിലേക്ക് താമസം മാറി. നിരവധി കച്ചവട സ്ഥാപനങ്ങളിലും വെള്ളം കയറി. കായംകുളം പൊഴിയുടെ വടക്കേക്കരയിലെ കായലോരത്തും കടലേറ്റം നാശം വിതയ്ക്കുകയാണ്. ഇവിടെ കൽക്കെട്ട് ഇടിഞ്ഞ് കര നഷ്ടപ്പെടുന്നു. കായംകുളം പൊഴിയിലേക്ക് കയറുന്ന തിരമാലകൾ കരയിലേക്ക് ആഞ്ഞടിക്കുന്നത് വലിയഴീക്കൽ സ്കൂളിന്‍റെ ഭാഗത്തും പരിസരത്തും തീരം നഷ്ടപ്പെടാൻ കാരണമാകുന്നു. ഈ ഭാഗത്തെയും ജനങ്ങൾ കടുത്ത ഭീതിയിലാണ്. തൃക്കുന്നപ്പുഴ പഞ്ചായത്തിലെ മതുക്കൽ ചേലക്കാട്, പാനൂർ ഭാഗങ്ങളിലും കടലാക്രമണം ദുരിതം തീർത്തു. കടലാക്രമണത്തിൽ നാശം സംഭവിച്ച മതുക്കൽ ചേലക്കാട് തീരദേശ റോഡിന് കൂടുതൽ നാശമുണ്ടായി. വീടുകളുടെ സംരക്ഷണത്തിനായി അടുക്കിവച്ച മണൽചാക്കുകൾ കൂടി കടലെടുത്തത് വീട്ടുകാരെ സങ്കടത്തിലാഴ്ത്തിയിരിക്കുകയാണ്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]