ADVERTISEMENT

ADVERTISEMENT

കുടുംബാരോഗ്യ കേന്ദ്രവും പരിസരവും ശുചീകരിച്ചു

തിരുവമ്പാടി: അൽഫോൻസ കോളജ് എൻഎസ്എസ് യൂണിറ്റിന്‍റെ ആഭിമുഖ്യത്തിൽ തിരുവമ്പാടി കുടുംബാരോഗ്യ കേന്ദ്രവും പരിസരവും ശുചീകരിച്ചു.

ശുചീകരണ പരിപാടി കുടുംബാരോഗ്യ കേന്ദ്രം മെഡിക്കൽ ഓഫീസർ ഡോ. കെ.വി. പ്രിയ ഉദ്ഘാടനം ചെയ്തു. എൻഎസ്എസ് പ്രോഗ്രാം ഓഫീസർ ഫാ. ഷിജു മാത്യു അധ്യക്ഷത വഹിച്ചു. ഹെൽത്ത് ഇൻസ്പെക്ടർ എം. സുനീർ,

നഴ്സിംഗ് ഓഫീസർ ഷീജ, ജെഎച്ച്ഐമാരായ റോഷൻലാൽ, മുഹമ്മദ് മുസ്തഫ ഖാൻ, എൻഎസ്എസ് സ്റ്റാഫ് കോഡിനേറ്റർമാരായ പി. സായന്ത്, കെ. അഞ്ജന, എൻഎസ്എസ് വളണ്ടിയർ സെക്രട്ടറിമാരായ എബിൻ സണ്ണി, ജിയാ ജഗീഷ് എന്നിവർ പ്രസംഗിച്ചു.

ADVERTISEMENT

വിദ്യാർഥിയെ മർദിച്ചതായി പരാതി

കൊയിലാണ്ടി: കോളജ് വിദ്യാർഥിയെ മാനേജർ മർദിച്ചതായി പരാതി. കൊയിലാണ്ടി ആർട്സ് കോളജ് മാനേജർ സ്ഥാപനത്തിലെ പ്ലസ് വൺ വിദ്യാർഥിയായ എസ്.ബി. വൈഷ്ണവിനെ മർദിച്ചതായാണ് പരാതി. വൈഷ്ണവിന്‍റെ മൊബൈൽ ഫോൺ ക്ലാസിലെ ഒരു സഹപാഠിക്ക് വീട്ടുകാരെ ബന്ധപ്പെടാനായി നൽകുകയായിരുന്നു. എന്നാൽ ഇതേ സമയത്ത് ക്ലാസിൽ എത്തിയ പ്രിൻസിപ്പൽ വിദ്യാർഥിയിൽ നിന്ന് ഫോൺ പിടിച്ചെടുത്ത് രക്ഷിതാക്കളോട് കോളജുമായി ബന്ധപ്പെടാൻ ആവശ്യപ്പെടുകയുമായിരുന്നു. തുടർന്ന് ഫോണിന്‍റെ ഉടമയായ വൈഷ്ണവ് കോളജ് ഓഫീസിൽ എത്തി മാനേജരോട് കാര്യം ധരിപ്പിപ്പിക്കുന്നതിനിടെ ഇദ്ദേഹം വിദ്യാർഥിയുടെ കഴുത്തിൽ പിടിച്ചു മർദിച്ചുവെന്നാണ് പരാതി.പരിക്കേറ്റ വിദ്യാർഥി ആശുപത്രിയിൽ ചികിത്സ തേടി.

വികസന മുരടിപ്പ് : ജനകീയ കുറ്റവിചാരണയുമായി എൽഡിഎഫ്

കൂരാച്ചുണ്ട്: യുഡിഎഫ് ഭരണത്തിലുള്ള കൂരാച്ചുണ്ട് പഞ്ചായത്ത് ഭരണസമിതിയുടെ ദുർഭരണത്തിനെതിരേയും വികസന മുരടിപ്പിലും പ്രതിഷേധിച്ച് എൽഡിഎഫ് കൂരാച്ചുണ്ട് പഞ്ചായത്ത് കമ്മിറ്റി ജനകീയ കുറ്റവിചാരണ നടത്തുന്നു. യുഡിഎഫ് ഭരണം അധികാരത്തിലേറി നാലരവർഷം പിന്നിടുമ്പോഴും പ്രധാന കക്ഷിയായ കോൺഗ്രസും മുസ്‌ലിം ലീഗും തമ്മിൽ പ്രസിഡന്‍റ് പദവിയെ ചൊല്ലിയുള്ള തർക്കവും മുന്നണിക്കുള്ളിലെ അധികാര വടംവലിയും പഞ്ചായത്തിന്‍റെ വികസന പ്രവർത്തനങ്ങളെ അട്ടിമറിച്ചു. സർക്കാർ നൽകുന്ന ഫണ്ടുകൾ വീതം വയ്ക്കുന്നതല്ലാതെ ഒരു വികസനങ്ങളും നടപ്പാക്കിയില്ലെന്ന് എൽഡിഎഫ് കൂരാച്ചുണ്ട് പഞ്ചായത്ത് കമ്മിറ്റി ഭാരവാഹികളായ വിൽസൺ പാത്തിച്ചാലിൽ, എ.സി ഗോപി, കെ.ജി അരുൺ, ജോസഫ് വെട്ടുകല്ലേൽ, എ.കെ. പ്രേമൻ, അശോകൻ കുറുങ്ങോട്ട് എന്നിവർ വാർത്താസമ്മേളനത്തിൽ പറഞ്ഞു. സമരത്തിന്‍റെ പ്രചരണാർഥം ഇന്നും നാളെയും പഞ്ചായത്തിലുടനീളം കാൽനട പ്രചരണ ജാഥ സംഘടിപ്പിക്കും. ഇന്ന് കക്കയത്തു നിന്നും ആരംഭിക്കുന്ന ജാഥ സിപിഎം ഏരിയ സെക്രട്ടറി ടി.കെ. സുമേഷ് ഉദ്ഘാടനം ചെയ്യും. വൈകിട്ട് പൂവത്തുംചോലയിൽ നടക്കുന്ന സമാപന സമ്മേളനം കേരള കോൺഗ്രസ് -എം ജില്ലാ പ്രസിഡന്‍റ് ടി.എം. ജോസഫ് ഉദ്ഘാടനം ചെയ്യും. നാളെ ഓട്ടപ്പാലത്തു നിന്നും ആരംഭിക്കുന്ന ജാഥ എൻസിപി നേതാവ് പി. സുധാകരൻ ഉദ്ഘാടനം ചെയ്യും. വൈകിട്ട് 5.30ന് കൂരാച്ചുണ്ടിൽ നടക്കുന്ന സമാപന സമ്മേളനം സിപിഐ ജില്ലാ സെക്രട്ടറി പി. ഗവാസ് ഉദ്ഘാടനം ചെയ്യും. 23ന് രാവിലെ പത്തിന് നടക്കുന്ന ജനകീയ കുറ്റ വിചാരണ സിപിഎം ജില്ലാ സെക്രട്ടറി എം. ഹബൂബ് ഉദ്ഘാടനം ചെയ്യും.

പകൽ വീട് ഉദ്ഘാടനം ചെയ്തു

കോടഞ്ചേരി: കോടഞ്ചേരി പഞ്ചായത്തിനെ വയോജന സൗഹൃദ പഞ്ചായത്താക്കി മാറ്റുന്നതിന്‍റെ ഭാഗമായി മഹിളാ സമാജത്തിൽ നിന്നും വിട്ടു കിട്ടിയ അഞ്ചു സെന്‍റ് സ്ഥലവും കെട്ടിടവും നവീകരിച്ച് പകൽവീടാക്കി മാറ്റി. പകൽ വീടിന്‍റെ ഉദ്ഘാടനം പഞ്ചായത്ത് പ്രസിഡന്‍റ് അലക്സ് തോമസ് ചെമ്പകശേരി നിർവഹിച്ചു. വാർഡ് മെമ്പർ ജോർജുകുട്ടി വിളക്കുന്നേൽ അധ്യക്ഷത വഹിച്ചു. ചടങ്ങിൽ വൈസ് പ്രസിഡന്‍റ് ജമീല അസീസ് മുഖ്യപ്രഭാഷണം നടത്തി. ഫാ. പോൾ മരിയ പീറ്റർ, ഫാ. റെജി കോലാനിക്കൽ, പഞ്ചായത്ത് മെമ്പർമാരായ ചിന്നമ്മ മാത്യു, ബിന്ദു ജോർജ്,ക്ഷീരോൽപാദന സഹകരണസംഘം പ്രസിഡന്‍റ് ബെന്നി ജേക്കബ്, വ്യാപാര വ്യവസായി ഏകോപന സമിതി യൂണിറ്റ് പ്രസിഡന്‍റ് തമ്പി വായിക്കാട്ട്,ഡോണ ഫ്രാൻസിസ്, സീന ദിലീഷ് എന്നിവർ പ്രസംഗിച്ചു.

പെരുന്തേനീച്ചയുടെ അക്രമണത്തിൽ നിന്ന് രക്ഷതേടി യുവാവ് കിണറ്റിൽ ചാടി

മുക്കം: പെരുന്തേനീച്ചയുടെ അക്രമണത്തിൽ നിന്ന് രക്ഷതേടി ബൈക്ക് യാത്രികനായ യുവാവ് കിണറ്റിൽ ചാടി. മാമ്പറ്റ ചേരികലോട് ബൈക്കിൽ യാത്ര ചെയ്യുകയായിരുന്ന ചാത്തമംഗലം വേങ്ങേരി മഠം പടിഞ്ഞാറേ തൊടികയിൽ ഷാജുവാണ് ഇന്നലെ വൈകുന്നേരം പെരുന്തേനീച്ചയുടെ അക്രമണത്തിൽ നിന്നും രക്ഷനേടാനായി കിണറിലേക്ക് എടുത്തുചാടിയത്. ഇയാൾ ബൈക്കിൽ സഞ്ചരിച്ചു കൊണ്ടിരിക്കുന്നതിനിടയിൽ പെരുന്തേനീച്ച കൂട്ടത്തോടെ വന്ന് കുത്തുകയായിരുന്നു. ഇതോടെയാണ് കിണറ്റിലേക്ക് ചാടിയത്. സംഭവം ശ്രദ്ധയിൽപെട്ട നാട്ടുകാർ വിവരം മുക്കം അഗ്നി രക്ഷാ സേനയെ അറിയിക്കുകയും മുക്കത്തു നിന്നും ഫയർ സ്റ്റേഷൻ ഓഫീസർ എം.എ. അബ്ദുൽ ഗഫൂറിന്‍റെ നേതൃത്വത്തിലുള്ള അഗ്നി രക്ഷാസേന സ്ഥലത്തെത്തി കിണറ്റിൽ ചാടിയ ആളെ റെസ്ക്യു നെറ്റ് ഉപയോഗിച്ച് രക്ഷപെടുത്തി മുക്കം കെഎംസിടി മെഡിക്കൽ കോളജിൽ എത്തിച്ചു. ഇയാളുടെ മുഖമാകെ ഈച്ചയുടെ കുത്തേറ്റ പരുക്കാണ്.

ഹെൽപ് ഡെസ്ക്കുകൾ ആരംഭിച്ചത് കർഷകരെ വിഡ്ഢിയാക്കാൻ: എഎപി

കൂടരഞ്ഞി: തെരഞ്ഞെടുപ്പ് മുന്നിൽ കണ്ട് മനുഷ്യ -വന്യജീവി സംഘർഷ ലഘൂകരണം എന്ന പേരിൽ ഹെൽപ് ഡെസ്ക്കുകൾ ആരംഭിച്ചത് മലയോര കർഷകരെ വിഡ്ഢികളാക്കാനുള്ള നീക്കമാണെന്ന് ആം ആദ്മി പാർട്ടി കൂടരഞ്ഞി പഞ്ചായത്ത് കമ്മിറ്റി ആരോപിച്ചു. കാട്ടുപന്നികളെ വെടിവച്ചു കൊല്ലാൻ പഞ്ചായത്തു പ്രസിഡന്‍റിന് അധികാരം ലഭിച്ചതിനു ശേഷം ഇതുവരെ കൂടരഞ്ഞി പഞ്ചായത്തിൽ പതിമൂന്ന് കാട്ടുപന്നികളെ മാത്രമാണ് വെടിവച്ചു കൊന്നത്. പുലി, കടുവ, കുരങ്ങ്, മയിൽ തുടങ്ങിയ വന്യജീവികളുടെ ശല്യം കൃഷിയിടങ്ങളിൽ മാത്രമല്ല ജന ജീവിതത്തെയും സരമായി ബാധിച്ചിട്ടുണ്ട്. പകൽസമയത്ത് പോലും ജനങ്ങൾക്ക് നേരേ ആക്രമണം ഉണ്ടാകുന്നു. എംപാനൽ ഷൂട്ടർമാർക്ക് മതിയായ പ്രതിഫലം നൽകാത്തതും കാട്ടുപന്നി ശല്യം രൂക്ഷമാകാൻ കാരണമായെന്ന് യോഗം വിലയിരുത്തി. തെരഞ്ഞെടുപ്പുകൾ വരുന്പോൾ ഇത്തരം നീക്കങ്ങളുമായി മുന്നോട്ടുവരാതെ ശാശ്വതമായ പരിഹാരം കാണണമെന്നും യോഗം ആവശ്യപ്പെട്ടു. ജോബി പുളിമൂട്ടിൽ അധ്യക്ഷത വഹിച്ചു. മനു പൈബിളിൽ, ജോസ് മുള്ളനാനിയിൽ, ബാബു ഐക്കര, ജോയി കളത്തിപറമ്പിൽ, ഫ്രാൻസിസ് പുന്നകുന്നേൽ, ബൈജു വരിക്കാനി, ജോഷി തുളുവനാനിക്കൽ തുടങ്ങിയവർ പ്രസംഗിച്ചു.

ലോട്ടറി തൊഴിലാളികള്‍ ആദായനികുതി ഓഫീസ് മാര്‍ച്ച് നടത്തി

കോഴിക്കോട്: കേരള ലോട്ടറിയെ തകര്‍ക്കാനുള്ള കേന്ദ്രസര്‍ക്കാര്‍ നീക്കത്തിനെതിരേ കോഴിക്കോട് ആദായനികുതി ഓഫീസിലേക്ക് ലോട്ടറി തൊഴിലാളികളും ഏജന്‍റുമാരും മാര്‍ച്ച് നടത്തി. സംയുക്ത ട്രേഡ് യൂണിയനുകളുടെ നേതൃത്വത്തിലുള്ള ഭാഗ്യക്കുറി സംരക്ഷണ സമിതി ആഭിമുഖ്യത്തിലായിരുന്നു മാര്‍ച്ചും ധര്‍ണയും സംഘടിപ്പിച്ചത്. ഓള്‍ കേരള ലോട്ടറി ട്രേഡേഴ്‌സ് യൂണിയന്‍ (എഐടിയുസി) സംസ്ഥാന വര്‍ക്കിംഗ് പ്രസിഡന്‍റ് പി.എം. ജമാല്‍ ഉദ്ഘാടനം ചെയ്തു. എ.സി. തോമസ് (ഐഎന്‍ടിയുസി) അധ്യക്ഷത വഹിച്ചു. സി.സി. രതിഷ് (സിഐടിയു),വി.കെ. മോഹന്‍ദാസ് (സിഐടിയു), ഷാജു പൊന്‍പാറ (ഐഎന്‍ടിയുസി), നസുറുദ്ധീന്‍ (വിവിഎസ് - കെഎല്‍എ), ബി.കെ. ബാലകൃഷ്ണന്‍ (സിഐടിയു), വിനയകൃഷ്ണന്‍ (വ്യാപാര സമിതി), കബീര്‍ സലാല (എച്ച്എംഎസ്), പി.കെ. മുഹമ്മദ് (എഐടിയുസി) എന്നിവര്‍ സംസാരിച്ചു. 2017ല്‍ ജിഎസ്ടി ആരംഭിച്ചതുമുതല്‍ 12 ശതമാനമായിരുന്നു നികുതി. എന്നാല്‍ 2020 ആകുമ്പോള്‍ ഇത് 28 ശതമാനമായി. ഇപ്പോള്‍ 40 ശതമാനക്കി വര്‍ധിപ്പിച്ചിരിക്കുകയാണ്. ഈ തീരുമാനം തൊഴിലാളികളുടെ വരുമാനത്തെ സാരമായി ബാധിക്കുകയും ഭിന്നശേഷിക്കാരും പ്രായമായവരും രോഗികളുമായ രണ്ടു ലക്ഷത്തോളം പേരുടെ ഉപജീവനമാര്‍ഗം ഇല്ലാതാക്കുകയുമാണ്. ക്ഷേമനിധി ബോര്‍ഡ് നടപ്പാക്കുന്ന പെന്‍ഷന്‍, ബോണസ് ചികിത്സ ധനസഹായം, മരണാനന്തര കുടുംബസഹായം, വിദ്യാഭ്യാസ ധനസഹായം, പ്രസവ ധനസഹായം, ഭിന്നശേഷിക്കാര്‍ക്കുള്ള മുച്ചക്ര വാഹനങ്ങള്‍ എന്നീ ആനുകൂല്യങ്ങളുടെ വിതരണത്തെയും നികുതി വര്‍ധന പ്രതികൂലമായി ബാധിക്കുകയാണ്. ലോട്ടറിയിലെ വരുമാനം ഉപയോഗിച്ചുള്ള കാരുണ്യ ചികിത്സ പദ്ധതിയേയും ഇത് തകരാറിലാക്കുമെന്ന് സംയുക്ത ട്രേഡ് യൂണിയന്‍ വ്യക്തമാക്കി.

പമ്പ് സെറ്റ് ഉപകരണങ്ങൾ മോഷ്ടിച്ച പ്രതി പിടിയിൽ

പെരുവണ്ണാമൂഴി: ജലജീവൻ കരാറുകാരായ മിഡ്‌ലാൻഡ് കമ്പനിയുടെ ഉടമസ്ഥതയിലുള്ള പെരുവണ്ണാമൂഴി സൈറ്റിൽ നിന്ന് 12 പമ്പ് സെറ്റ് കാരി ചെയിനുകൾ മോഷ്ടിച്ച് വിൽപ്പന നടത്തിയ പ്രതിയെ പെരുവണ്ണാമൂഴി പോലീസ് അറസ്റ്റ്‌ ചെയ്തു. പെരുവണ്ണാമൂഴി പൊന്മലപ്പാറ സ്വദേശി നടേമ്മൽ മൊബിൻ എന്ന കുട്ടാപ്പി (31)യാണ് പിടിയിലായത്. പേരാമ്പ്ര കോടതിയിൽ ഹാജരാക്കിയ പ്രതിയെ റിമാൻഡ് ചെയ്‌തു. ഒരു കാരിചെയിനിന് അൻപതിനായിരം രൂപയോളം വിലവരും. മൊത്തം ആറ് ലക്ഷം രൂപയുടെ ചെയിനാണ് പ്രതി മോഷ്ടിച്ചത്. യഥാർഥ വില അറിയാത്ത പ്രതി ഇത് പേരാമ്പ്ര പുറ്റം പൊയിൽ ഭാഗത്തെ ആക്രികടയിൽ അയ്യായിരം രൂപക്ക് വിൽക്കുകയായിരുന്നു. മിഡ്‌ലാൻഡ് കന്പനിയുടെ മാനേജർ നൽകിയ പരാതിയുടെ അടിസ്ഥാനത്തിലാണ് പ്രതിയെ കസ്റ്റഡിയിലെടുത്തത്.

ടൈഗർ സഫാരി പാർക്കിലേക്ക് ചക്കിട്ടപാറ ഭരണ സമിതി യാത്ര തിരിച്ചു

പേരാമ്പ്ര: ചക്കിട്ടപാറ പഞ്ചായത്തിലെ ടൂറിസം വളർച്ചക്ക് പുത്തനുണർവ് നൽകുന്ന ടൈഗർ സഫാരി പാർക്ക് ആരംഭിക്കുന്നതിനു മുന്നോടിയായി ഇതിന്‍റെ പ്രവർത്തനങ്ങൾ നേരിൽ കാണാൻ പഞ്ചായത്ത് ഭരണ സമിതി അംഗങ്ങൾ കർണാടകയിലെ ബന്നാർഘട്ട ടൈഗർ പാർക്ക്‌ സന്ദർശിക്കാനായി പുറപ്പെട്ടു. പ്രസിഡന്‍റ് കെ. സുനിലിന്‍റെയും വൈസ് പ്രസിഡന്‍റ് ചിപ്പി മനോജിന്‍റെയും നേതൃത്വത്തിൽ 13 അംഗ ജനപ്രതിനിധി സംഘമാണ് സന്ദർശനത്തിനു പോയിരിക്കുന്നത്. ടൈഗർ പാർക്ക് സ്ഥാപിച്ചാലുള്ള ഗുണങ്ങൾ, പ്രശ്നങ്ങൾ എന്നിവയൊക്കെ ഇവർ പഠിക്കും. ചക്കിട്ടപാറ പഞ്ചായത്തിലെ മുതുകാട് പേരാമ്പ്ര എസ്റ്റേറ്റിനു സമീപമാണ് കോഴിക്കോട് ജില്ലയിലെ ടൈഗർ പാർക്കിനായി വനംവകുപ്പ് നിശ്ചയിച്ചിരിക്കുന്നത്. ഭരണ സമിതി കക്ഷി ഭേദമില്ലാതെയാണ് ബംഗളൂരിലെ ബന്നാർ ഘട്ട സഫാരി പാർക്ക് സന്ദർശിക്കുന്നത്.

നിരാഹാര സമരം ഫലം കണ്ടു : കക്കയത്ത് കെഎസ്ഇബിയ്ക്ക് ഭൂമി വിട്ടു നൽകിയ കുടുംബങ്ങൾക്ക് പ്രശ്ന പരിഹാരം

കൂരാച്ചുണ്ട്: കക്കയത്തെ പവർ ഹൗസ് നിർമാണത്തിന്‍റെ ഭാഗമായി ഇരുപത് വർഷം മുമ്പ് കെഎസ്ഇബിയ്ക്ക് പെൻസ്റ്റോക് നിർമാണത്തിനായി ഭൂമി വിട്ടു നൽകിയവർക്ക് സർക്കാർ നഷ്ടപരിഹാരം നൽകാത്ത വിഷയത്തിൽ പ്രശ്നപരിഹാരം. കക്കയത്തെ അഞ്ച് കുടുംബങ്ങൾ ഇന്നലെ കൂരാച്ചുണ്ട് വില്ലേജ് ഓഫീസിനു മുമ്പിൽ നടത്തിയ നിരാഹാര സമരത്തെ തുടർന്നാണ് പ്രശ്നത്തിന് പരിഹാരമായത്. കെഎസ്ഇബി 2005ലാണ് ഭൂമി ഏറ്റെടുത്തത്. എന്നാൽ നഷ്ടപരിഹാരത്തിനായി വർഷങ്ങളോളം കുടുംബങ്ങൾ കെഎസ്ഇബി, റവന്യു ഓഫീസുകൾ കയറിയിറങ്ങിയിട്ടും പരിഹാരമായില്ല. തുടർന്നാണ് സമരവുമായി കുടുംബങ്ങൾ രംഗത്തിറങ്ങിയത്. ജില്ലാ കളക്ടറുടെ ഉത്തരവു പ്രകാരം കൊയിലാണ്ടി തഹസിൽദാർ ജയശ്രീ വാര്യർ, ഡെപ്യൂട്ടി തഹസിൽദാർ കെ.എസ്. സുരേഷ് എം. മാവിലായിൽ എന്നിവർ ഇന്നലെ സ്ഥലത്തെത്തി കുടുംബങ്ങളുമായി നടത്തിയ ചർച്ചയെ തുടർന്ന് ഉച്ചകഴിഞ്ഞതോടെ സമരം അവസാനിപ്പിച്ചു. ഇവരുടെ കൈവശമുള്ള ഭൂമിയുടെ മുഴുവൻ രേഖകളും പരിശോധിച്ച് 30നുള്ളിൽ ആവശ്യമായ നടപടി സ്വീകരിക്കാനാണ് തീരുമാനമായത്. കൂരാച്ചുണ്ട് പഞ്ചായത്തിലെ നാലാം വാർഡ് കക്കയം കോണിപ്പാറ മേഖലയിലെ ലീല കൂവ്വപൊയ്കയിൽ, പ്രജീഷ് പൂവത്തിങ്കൽ, ത്രേസ്യാമ്മ പൂവത്തിങ്കൽ, ജോസ് കുറുമുട്ടത്ത്, മാത്യു കുറുമുട്ടത്ത് എന്നീ കുടുംബങ്ങളുടെ മൂന്ന് ഏക്കറോളം വരുന്ന ഭൂമിയാണ് 2005ൽ കുറ്റ്യാടി അഡീഷണൽ എക്സ്റ്റൻഷൻ ജലവൈദ്യുത പദ്ധതിയുടെ ഭാഗമായുള്ള പെൻസ്റ്റോക് പൈപ്പ് സ്ഥാപിക്കാനായി സർക്കാർ ഏറ്റെടുത്തത്. ഭൂമി കെഎസ്ഇബിക്ക് കൈമാറുന്നതുമായി ബന്ധപ്പെട്ട കാര്യങ്ങൾ നടന്ന് കൊണ്ടിരിക്കുന്നതിനിടയിൽ വനംവകുപ്പ് ഈ ഭൂമിയിൽ അവകാശ വാദം ഉന്നയിച്ചതിനെ തുടർന്ന് തർക്കമാവുകയായിരുന്നു. ചർച്ചയിൽ പഞ്ചായത്ത് പ്രസിഡന്‍റ് ഒ.കെ. അമ്മദ്, പഞ്ചായത്ത് അംഗങ്ങളായ ഡാർളി ഏബ്രഹാം, സണ്ണി പുതിയകുന്നേൽ, വില്ലേജ് ഓഫീസർ പി.വി സുധി, രാഷ്ട്രീയ പാർട്ടി പ്രതിനിധികളായ വി.ജെ. സണ്ണി, ജോസ് വെളിയത്ത്, എ.സി. ഗോപി, എൻ.കെ. കുഞ്ഞമ്മദ് എന്നിവർ പങ്കെടുത്തു.

സ്ത്രീ ക്ലിനിക്ക് ഉദ്ഘാടനം ചെയ്തു

ചെമ്പനോട: ചക്കിട്ടപാറ പഞ്ചായത്ത് തല സ്ത്രീ ക്ലിനിക്കിന്‍റെ ഉദ്‌ഘാടനം ചെമ്പനോടയിൽ ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ ഇ.എം. ശ്രീജിത്ത്‌ നിർവഹിച്ചു. വാർഡ് മെമ്പർ ലൈസ ജോർജ് അധ്യക്ഷത വഹിച്ചു. മെഡിക്കൽ ഓഫീസർ ഡോ. കെ. വിനോദ് ക്ലാസ് എടുത്തു. ഫ്രാൻസിസ് കിഴക്കരക്കാട്ട്, അവള ഹമീദ്, ജയേഷ് ചെമ്പനോട, ആരോഗ്യ ഉദ്യോഗസ്ഥരായ പ്രീജിത്ത്, എം.വി. വിജി, ജെ. ശ്യാം എന്നിവർ പ്രസംഗിച്ചു.

സംരക്ഷണ ഭിത്തി നിർമിക്കണമെന്ന്

തലയാട്: പനങ്ങാട് പഞ്ചായത്തിലെ തലയാട് - വയലട റോഡിൽ കാവുമ്പുറം ഭാഗത്തു സംരക്ഷണ ഭിത്തി നിർമിക്കാത്തത് അപകട ഭീഷണി ഉയർത്തുന്നു. മാസങ്ങൾക്ക് മുൻപ് റോഡ് പണിക്ക് കൊണ്ടുവന്ന കോൺക്രീറ്റ് മിക്സ്‌ ചെയ്യുന്ന യന്ത്രം റോഡിന്‍റെ സംരക്ഷണ ഭിത്തിയോട് കൂടി മറിയുകയായിരുന്നു. ഇതിന് ശേഷം റോഡിന്‍റെ സംരക്ഷണ ഭിത്തി നിർമിച്ചിട്ടില്ല. ദിവസവും നൂറു കണക്കിനാളുകൾ വയലട വ്യൂ പോയിന്‍റിലേക്ക് ഉൾപ്പെടെ യാത്ര ചെയ്യുന്ന റോഡാണിത്. ഇറക്കമുള്ള റോഡിൽ സംരക്ഷണ ഭിത്തി ഇല്ലാത്തത് വലിയ അപകടങ്ങൾക്ക് വഴിവെക്കുമെന്നും എത്രയും വേഗം അധികാരികൾ സംരക്ഷണ ഭിത്തി നിർമിക്കണമെന്നും നാട്ടുകാർ ആവശ്യപ്പെട്ടു. photo: തലയാട് - വയലട റോഡിൽ സംരക്ഷണ ഭിത്തി നിർമിച്ചിട്ടില്ലാത്ത ഭാഗം

കാരശേരിയിൽ മാലിന്യ സംസ്കരണം ഇനി വേഗത്തിലാവും; എംസിഎഫ് നിർമാണത്തിന് സ്വന്തമായി ഭൂമി വാങ്ങി

മുക്കം: കാരശേരി പഞ്ചായത്തിൽ മാലിന്യ സംസ്കരണ നടപടികൾ വേഗത്തിലാക്കാൻ നടപടി സ്വീകരിച്ച് ഭരണസമിതി. ഇതിന്‍റെ ഭാഗമായി എംസിഎഫ് കെട്ടിടം നിർമിക്കുന്നതിന് വേണ്ടി കറുത്തപറമ്പ് എള്ളങ്ങളിൽ സ്വന്തമായി 20 സെന്‍റ് ഭൂമി വാങ്ങി. പഞ്ചായത്തിന്‍റെ 18 വാർഡുകളിലെ വീടുകളിൽ നിന്നും അജൈവ മാലിന്യങ്ങൾ ശേഖരിച്ചത് കൊണ്ടുവെക്കുവാനോ തരംതിരിക്കുവാനോ പഞ്ചായത്തിന് ഇതുവരെ സ്വന്തമായി ഭൂമിയോ കെട്ടിടമോ ഇല്ലായിരുന്നു. ഇതോടെ ഭരണസമിതി നേരിട്ട് നിരവധി പ്രദേശങ്ങൾ സന്ദർശിക്കുകയും അതിന്‍റെ അടിസ്ഥാനത്തിൽ കറുത്തപറമ്പ് എള്ളങ്ങലിൽ പുതിയ സ്ഥലം കണ്ടെത്തുകയും 20 സെന്‍റ് ഭൂമി വാങ്ങുകയുമായിരുന്നു. കറുത്തപറമ്പ് സാംസ്കാരിക നിലയത്തിൽ വച്ച് പഞ്ചായത്ത് പ്രസിഡന്‍റ് സുനിതാ രാജൻ പഞ്ചായത്ത് സെക്രട്ടറി മരിയക്ക് ആധാരം കൈമാറി. വൈസ് പ്രസിഡന്‍റ് ജംഷീദ് ഒളകര അധ്യക്ഷത വഹിച്ചു. ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ ജിജിത സുരേഷ്, വികസന സ്റ്റാൻഡിംഗ് കമ്മിറ്റി ചെയർപേഴ്സൺ ശാന്താദേവി മൂത്തേടത്ത്, പഞ്ചായത്ത് അംഗങ്ങളായ ഷാഹിന, കെ. കൃഷ്ണദാസ്, മുൻ പഞ്ചായത്ത് വൈസ് പ്രസിഡന്‍റ് എം.ടി. അഷ്റഫ്, രാഷ്ട്രീയപ്പാർട്ടി പ്രതിനിധികളായ സമാൻ ചാലൂളി, കെ. കോയ, എ.പി. മോയി, ഇസ്മായിൽ മേച്ചേരി, നടുക്കണ്ടി അബൂബക്കർ, റഹൂഫ് കറുത്തപറമ്പ്, ബാബു തോണ്ടയിൽ, കലന്ദൻക്കുട്ടി കറുത്തപറമ്പ്, മുഹമ്മദ്, റഹൂഫ് കറുത്തപറമ്പ്, ഷൈമ, അസിസ്റ്റന്‍റ് സെക്രട്ടറി ജോസ് തോമസ് എന്നിവർ പ്രസംഗിച്ചു.

വടകര ബീച്ച് പോസ്റ്റോഫീസ് അടച്ചുപൂട്ടുന്നു : പ്രദേശത്തെ ജനങ്ങളെ ദോഷകരമായി ബാധിക്കുമെന്ന്

വടകര: വടകരയുടെ തീരപ്രദേശത്തെ ആയിരക്കണക്കിന് ജനങ്ങള്‍ക്ക് തപാല്‍ സേവനം നല്‍കിക്കൊണ്ടിരിക്കുന്ന ബീച്ച് പോസ്റ്റ് ഓഫീസ് അടച്ചു പൂട്ടുന്നു. ഇതു സംബന്ധിച്ച ഉത്തരവ് ഇറങ്ങി. ഈ മാസം മുപ്പതോടെ ബീച്ച് പോസ്റ്റ് ഓഫീസ് വടകര ഹെഡ്പോസ്റ്റ് ഓഫീസില്‍ ലയിപ്പിക്കുമെന്നാണ് ഉത്തരവില്‍ പറയുന്നത്. ഈ നടപടി ഈ പ്രദേശത്തെ പൊതുജനങ്ങളുടെ ജീവിതത്തെയും ജീവനക്കാരേയും ദോഷകരമായി ബാധിക്കുമെന്ന് ചൂണ്ടിക്കാണിക്കപ്പെടുന്നു. മത്സ്യത്തൊഴിലാളികള്‍, ചെറുകിട വ്യാപാരികള്‍, ദിവസവേതന തൊഴിലാളികള്‍, സഹകരണസംഘങ്ങളുമായി ബന്ധപ്പെട്ടവര്‍, ചെറുകിട വ്യവസായികള്‍ തുടങ്ങിയ നിരവധി വിഭാഗങ്ങള്‍ക്കുള്ള ജീവിതോപാധിയുടെ കേന്ദ്രമാണ് തപാല്‍ ഓഫീസ്. ബാങ്കിംഗ്, ഇന്‍ഷ്വറന്‍സ്, മണി ഓര്‍ഡര്‍ തുടങ്ങിയ പദ്ധതികള്‍ തപാല്‍ ഓഫീസ് വഴി നടപ്പിലാക്കി വരുന്നുണ്ട്. ഓഫീസ് അടച്ചുപൂട്ടുന്നത് ഇത്തരം പ്രവര്‍ത്തനങ്ങളെ ദോഷകരമായി ബാധിക്കും. ഈ പ്രദേശത്ത് നിരവധി വിദ്യാഭ്യാസ സ്ഥാപനങ്ങളും കുടുംബാരോഗ്യ കേന്ദ്രങ്ങളും നഗരാരോഗ്യ ഉപകേന്ദ്രങ്ങളും പ്രവര്‍ത്തിക്കുന്നുണ്ട്. വിദ്യാര്‍ഥികള്‍ക്ക് സ്‌കോളര്‍ഷിപ്പ് തുടങ്ങിയ സേവനങ്ങള്‍ തപാല്‍ ഓഫീസ് ബാങ്കിംഗ് വഴിയാണ് സാധാരണയായി നടക്കുന്നത്. ഓഫീസ് ഇല്ലാതാകുന്നത് ഇത്തരം സേവനങ്ങള്‍ താറുമാറാക്കും. ബീച്ച് തപാല്‍ ഓഫീസ് ഇല്ലാതായാല്‍ ഇവിടത്തെ സാധാരണക്കാര്‍ക്ക് വടകര ഹെഡ് പോസ്റ്റ് ഓഫീസിനെയോ ചോറോട് പോസ്റ്റ് ഓഫീസിനെയോ ആശ്രയിക്കേണ്ടിവരും. ഇവ ദൂരെയായതിനാല്‍ പൊതുജനങ്ങള്‍ക്ക് വലിയ പ്രയാസം വരും. മത്സ്യതൊഴിലാളികള്‍ക്കും മുതിര്‍ന്ന പൗരന്മാര്‍ക്കും സ്ത്രീകള്‍ക്കും വിദ്യാര്‍ഥികള്‍ക്കും രോഗികള്‍ക്കും യാത്ര പ്രയാസം സൃഷ്ടിക്കും. പോസ്റ്റ്മാന്‍ ഡ്യൂട്ടിയിലുള്ളവര്‍ പുതിയ ഓഫീസുകളില്‍ നിന്ന് കൂടുതല്‍ ദൂരം നടന്ന് മെയില്‍ വിതരണം നടത്തേണ്ടിവരും. ഇതോടെ മെയില്‍ ഡെലിവറിയും ജനങ്ങള്‍ക്കുള്ള സേവനവും വൈകും. ആര്‍ഡി ഏജന്‍റുമാര്‍ മറ്റോഫീസുകളില്‍ ചേര്‍ക്കപ്പെടുന്നതോടെ അവിടങ്ങളിലെ കൗണ്ടര്‍ ജീവനക്കാരുടെ ജോലി ഭാരം ഉയരും. തപാല്‍ മേഖലയെ ദോഷകരമായി ബാധിക്കുന്ന നടപടിയാണ് അധികൃതര്‍ കൈക്കൊള്ളുന്നത്.

തൂങ്കുഴി പിതാവ് ലാളിത്യത്തിന്‍റെ ആള്‍രൂപം

എം. ജയതിലകന്‍ കോഴിക്കോട്: കാലം ചെയ്ത ആര്‍ച്ച് ബിഷപ് മാര്‍ ജേക്കബ് തൂങ്കുഴി മാനന്തവാടിയില്‍ ബിഷപായിരുന്ന കാലം. കൃഷിയില്‍ താല്‍പര്യമുള്ള ആളായിരുന്നു പിതാവ്. ഒഴിവു കിട്ടുമ്പോള്‍ കാര്‍ഷിക വൃത്തിയില്‍ ഏര്‍പ്പെടും. ഒരു ദിവസം പിതാവിനെ കാണാന്‍ രണ്ടു പത്രപ്രവര്‍ത്തകര്‍ വന്നു. അദ്ദേഹം അരമനയില്‍ ഉണ്ടായിരുന്നില്ല. കെട്ടിടത്തിന്‍റെ പിറകിലുണ്ടെന്ന് ജീവനക്കാര്‍ പറഞ്ഞു. പത്ര പ്രവര്‍ത്തകര്‍ രണ്ടുപേരും പിന്‍ഭാഗത്ത് ചെന്നു നോക്കി. അവിടെ ആരെയും കണ്ടില്ല. അവര്‍ തിരിച്ചുവന്ന് വിവരം പറഞ്ഞു. പിന്‍ഭാഗത്ത് ഉണ്ടല്ലോ എന്നായി ജീവനക്കാര്‍. പത്രപ്രവര്‍ത്തകര്‍ വീണ്ടും അരമനയുടെ പിന്‍ഭാഗത്തേക്ക് പോയി. അവിടെ ഒരു കര്‍ഷകന്‍ വാഴയ്ക്ക് തടമെടുക്കുന്നുണ്ടായിരുന്നു.കൈലി മുണ്ടും ബനിയനുമാണ് വേഷം. പത്രപ്രവര്‍ത്തകര്‍ തൂങ്കുഴി പിതാവിനെ അവിടെ എവിടെയെങ്കിലും കണ്ടോ എന്ന് അദ്ദേഹത്തോടു തിരക്കി. "അത് ഞാന്‍ തന്നെ' എന്നായിരുന്നു മറുപടി. ഇതു കേട്ട പത്രപ്രവര്‍ത്തകര്‍ അദ്ഭുതസ്തംബ്ധരായി. പിതാവിന്‍റെ ലാളിത്യത്തെക്കുറിച്ച് പറയുമ്പോള്‍ അദ്ദേഹത്തിന്‍റെ സഹോദരപുത്രന്‍ സ്‌കറിയ തൂങ്കുഴിയുടെ കണ്ണുകള്‍ നിറഞ്ഞു. ലാളിത്യത്തിന്‍റെ ആള്‍ രൂപമായിരുന്നു പിതാവെന്ന് അദ്ദേഹം പറഞ്ഞു. ജീവിതത്തില്‍ ഒരിക്കല്‍ പോലും തൂങ്കുഴി പിതാവ് ദേഷ്യപ്പെട്ടിട്ടില്ല. സൗമ്യ സ്വഭാവക്കാരനായിരുന്നു അദ്ദേഹം. സ്‌നേഹം നിറഞ്ഞ പെരുമാറ്റം. പിതാവ് പൗരോഹിത്യം സ്വീകരിച്ച് തലശേരിയില്‍ വൈദികനായിരുന്ന കാലത്താണ് 1968-ല്‍ പാല വിളക്കുമാടത്തുനിന്ന് തിരുവമ്പാടിയിലേക്ക് കുടിയേറിയതെന്ന് സ്‌കറിയ പറഞ്ഞു. അന്ന് അഞ്ചാം ക്‌ളാസിലാണ് താന്‍ പഠിക്കുന്നത്. പിതാവ് തലശേരിയില്‍നിന്ന് വീട്ടില്‍ വരുമ്പോള്‍ വലിയ ആഘോഷമാണ്. വയറു നിറയെ ഭക്ഷണം കിട്ടും.പാട്ടുപാടും. കുര്‍ബാനയുടെ പാട്ടുകളും ക്രിസ്തീയ ഭക്തിഗാനങ്ങളുമാണ് പാടുക. ബിഷപ്പുമാരിലെ ഗായകനും ഗായകരിലെ ബിഷപ്പുമെന്നാണ് തൂങ്കുഴി പിതാവ് അറിയപ്പെട്ടിരുന്നത്. തലശേരിയില്‍നിന്ന് ബൈക്കിലാണ് തിരുവമ്പാടിയിലേക്ക് വരിക. ബൈക്കിന്‍റെ പിറകില്‍ കയറ്റി ഞങ്ങളെയെല്ലാം കൊണ്ടുപോകും. മറക്കാനാവാത്ത അനുഭവമായിരുന്നു അത്. ഡ്രൈവിംഗ് അദ്ദേഹത്തിനു ഹരമായിരുന്നു. പിതാവായപ്പോഴും "അച്ചാ' എന്നാണ് ഞങ്ങളെല്ലാം വിളിച്ചിരുന്നതെന്ന് സ്‌കറിയ പറഞ്ഞു. കൂടുതല്‍ അടുപ്പം സൂക്ഷിക്കാന്‍ "അച്ചാ' എന്ന വിളിക്കാണ് സാധിക്കുക. അതുകൊണ്ട് അദ്ദേഹത്തിന്‍റെ മരണം വരെ അച്ചാ എന്നാണ് വിളിച്ചിരുന്നത്. പുല്ലൂരാംപാറ സെന്‍റ് ജോസഫ്‌സ് ഹൈസ്‌കൂള്‍ ഹെഡ്മാസ്റ്ററായി 2013ലാണ് സ്‌കറിയ തൂങ്കുഴി വിരമിച്ചത്. മാത്യു തൂങ്കുഴിയുടെയും എല്‍സിയുെടയും മകനാണ് സ്‌കറിയ തൂങ്കുഴി.

ക്രിസ്തുദാസികള്‍ക്കു പ്രഭ ചൊരിഞ്ഞ ആത്മീയ ചൈതന്യം : അന്ത്യവിശ്രമം സ്നേഹഭവനിൽ

ബിനു ജോര്‍ജ് കോഴിക്കോട്: ഓരോരുത്തരെയും പേരെടുത്തു വിളിക്കാന്‍ തക്കവണ്ണമുളള ആത്മബന്ധം. ഓരോ തവണ സന്ദര്‍ശനത്തിനെത്തുമ്പോഴും തൂമഞ്ഞുപോലെ ഹൃദയത്തില്‍ സ്‌നേഹം നിറയ്ക്കുന്ന സൗമ്യമായ വാക്കുകള്‍. ജന്മദിനങ്ങളില്‍ കൃത്യമായി വിളിയെത്തും. സുഖവിവരങ്ങള്‍ അന്വേഷിച്ച്‌ പ്രാര്‍ഥനാ ആശംസകള്‍ നേരും. വിശേഷാവസരങ്ങളില്‍ മധുരവും കേക്കും വസ്ത്രങ്ങളുമൊക്കെ പിതാവിന്‍റെ വകയായി എത്തും. ഇനി ആ കരുതല്‍ ഉണ്ടാവില്ലല്ലോ എന്ന ഹൃദയവേദനയിലാണ് ലോകമെമ്പാടുമുള്ള ക്രിസ്തുദാസി സന്യാസിനി സമൂഹ (സൊസൈറ്റി ഓഫ് ക്രിസ്തുദാസി-എസ്‌കെഡി)ത്തിലെ അംഗങ്ങള്‍. ക്രിസ്തുദാസി സന്യാസിനി സമൂഹത്തിന്‍റെ സ്ഥാപകനായ ആര്‍ച്ച് ബിഷപ് എമിരറ്റസ് മാര്‍ ജേക്കബ് തൂങ്കുഴിയുടെ വിയോഗവാര്‍ത്ത അറിഞ്ഞതു മുതല്‍ കോഴിക്കോട് ചേവരമ്പലത്തെ എസ്‌കെഡി ജനറലേറ്റില്‍ രാപകലെന്യേ പ്രാര്‍ഥനയിലാണ് സന്യാസിനികള്‍. എസ്‌കെഡി സന്യാസിനികളും ജനറലേറ്റിനോടനുബന്ധിച്ചു സ്ഥിതി ചെയ്യുന്ന സ്‌നേഹഭവന (ഹോം ഓഫ് ലവ്)ത്തിലെ അന്തേവാസികളും പിതാവിന്‍റെ സ്‌നേഹവും കരുതലും ഇന്നലെയെന്ന പോലെ ഓര്‍ത്തെടുക്കുകയാണ്. നിറയുന്ന കണ്ണുകള്‍, വിതുമ്പുന്ന അധരങ്ങള്‍... കാരുണ്യവാനും സ്‌നേഹസമ്പന്നനുമായ തൂങ്കുഴി പിതാവ് ഇനി ഇല്ലെന്നുള്ള യാഥാര്‍ഥ്യം സൃഷ്ടിക്കുന്ന ഹൃദയവേദനയും ശൂന്യതയും മറികടക്കാന്‍ എസ്‌കെഡി ജനറലേറ്റിലെ ചാപ്പലില്‍ പിതാവിന്‍റെ ഛായാചിത്രത്തിനു മുമ്പില്‍ കണ്ണീര്‍ പ്രണാമം അര്‍പ്പിക്കുകയാണ് സന്യാസിനികള്‍. 1973ലാണ് മാനന്തവാടി രൂപത സ്ഥാപിച്ചത്. പ്രഥമ മെത്രാന്‍ തൂങ്കുഴി പിതാവും. പ്രാരംഭ കാലഘട്ടത്തില്‍ അജപാലന ദൗത്യം നിര്‍വഹിക്കാന്‍ രൂപതയ്ക്ക് ആവശ്യത്തിന് സന്യാസിനികളുണ്ടായിരുന്നില്ല. 70 കാലഘട്ടത്തില്‍ വയനാട്ടിലേക്ക് കാര്യമായ യാത്രാസൗകര്യങ്ങളുമില്ലായിരുന്നു. പ്രതികൂല സാഹചര്യങ്ങള്‍ കാരണം പുറമെ നിന്ന് വയനാട്ടിലേക്ക് സന്യാസിനികളുടെ സേവനം ലഭിക്കാന്‍ ബുദ്ധിമുട്ടായിരുന്നു. പ്രതിസന്ധികളെ അതിജീവിച്ച് മാനന്തവാടി രൂപതയെ വളര്‍ച്ചയിലേക്കു നയിച്ച പ്രഥമ മെത്രാന്‍ കുടിയേറ്റ ജനതയുടെ ആത്മീയ വളര്‍ച്ചയില്‍ ക്രിസ്തുവിന്‍റെ മണവാട്ടിമാരുടെ അനിവാര്യത തിരിച്ചറിഞ്ഞിരുന്നു. അങ്ങനെയാണ് തൂങ്കുഴി പിതാവ് ക്രിസ്തുദാസികളുടെ സമൂഹത്തിനു തുടക്കമിട്ടത്. എസ്‌കെഡിയുടെ പടിപടിയായുള്ള വളര്‍ച്ച തിരിച്ചറിഞ്ഞ വത്തിക്കാന്‍ 1986 സെപ്റ്റംബറില്‍ സന്യാസിനി സമൂഹത്തിന്‍റെ നിയമാവലി അംഗീകരിച്ചു. നിലവില്‍ ഇന്ത്യയിലും വിദേശങ്ങളിലുമായി 317 സന്യാസിനികളാണ് എസ്‌കെഡിക്കുള്ളത്. കേരളത്തിനു പുറമെ നോര്‍ത്ത് ഈസ്റ്റിലും, ഇറ്റലി, ജര്‍മനി, ആഫ്രിക്ക, അമേരിക്ക എന്നീ രാജ്യങ്ങളിലും എസ്‌കെഡി പ്രവര്‍ത്തിക്കുന്നുണ്ട്. 'ഇതാ കര്‍ത്താവിന്‍റെ ദാസി' എന്ന തിരുവചനമാണ് എസ്‌കെഡിയുടെ മുഖമുദ്ര. എവിടെയായാലും ആ നാടിന്‍റെ ആവശ്യമനുസരിച്ച്, സാഹചര്യമനുസരിച്ച് ദൈവഹിതം നിറവേറ്റുകയാണ് എസ്‌കെഡി സന്യാസിനികള്‍. ഇല്ലായ്മകളുടെയും അസൗകര്യങ്ങളുടെയും പ്രാരാബ്ധങ്ങളുടെയും കാലത്ത് മാനന്തവാടി രൂപതയെ വളര്‍ച്ചയിലേക്കു നയിച്ച തൂങ്കുഴി പിതാവിന്‍റെ അജപാലന ദൗത്യത്തിനു കരുത്തുപകരാന്‍ ക്രിസ്തുദാസി സന്യാസിനി സമൂഹത്തിനു കഴിഞ്ഞിട്ടുണ്ട്. തുടക്കത്തില്‍ വയനാട് ദ്വാരകയിലായിരുന്നു എസ്‌കെഡിയുടെ ആസ്ഥാനമായ ജനറലേറ്റ്. പിന്നീടാണ് കോഴിക്കോട് ചേവരമ്പലത്തേക്കു മാറിയത്. ദ്വാരകയിലെ മഠം നിലവില്‍ മദര്‍ ഹൗസായാണ് പ്രവര്‍ത്തിക്കുന്നത്. സ്‌നേഹം തുളുമ്പുന്ന ഭവനം കോഴിക്കോട് ചേവരമ്പലത്തെ എസ്‌കെഡി ജനറലേറ്റിനോടനുബന്ധിച്ച് ‘സ്‌നേഹഭവനം' (ഹോം ഓഫ് ലവ്) തുടങ്ങുമ്പോള്‍ തൂങ്കുഴി പിതാവിന്‍റെ മനസിലുണ്ടായിരുന്നത് അതിമനോഹരമായ ആശയമായിരുന്നു. ആരോരുമില്ലാത്തവര്‍ പാര്‍ക്കുന്ന സ്‌നേഹഭവനം ഒരു വീടിന്‍റെ അന്തരീക്ഷത്തില്‍ പ്രവര്‍ത്തിക്കണം. ആരുമില്ലെന്ന തോന്നല്‍ അഗതികള്‍ക്കും അശരണര്‍ക്കും ഉണ്ടാകരുത്. അതു യാഥാര്‍ഥ്യമായി. നിലവില്‍ 95 അന്തേവാസികളാണ് സ്‌നേഹത്തണലില്‍ പാര്‍ക്കുന്നത്. ജാതി, മതഭേദമെന്യേ ആരോരുമില്ലാത്തവര്‍ക്ക് ആശ്രയമേകുന്ന ആശ്വാസകേന്ദ്രമാണ് സ്‌നേഹഭവനം. ആരുമില്ലാത്തവരെ കണ്ടെത്തിയാല്‍ പോലീസുകാരും സാമൂഹിക ക്ഷേമ വകുപ്പ് ഉദ്യോഗസ്ഥരും ആദ്യം നിര്‍ദേശിക്കുന്ന പേരാണ് സ്‌നേഹഭവനം. ഗവര്‍ണറും മുഖ്യമന്ത്രിയുമടക്കം നിരവധി പ്രമുഖര്‍ സ്‌നേഹഭവനത്തിലെത്തി ആശംസകളറിയിച്ചിട്ടുണ്ട്. സിസ്റ്റര്‍ ടീന കുന്നേല്‍ ആണ് എസ്‌കെഡിയുടെ മദര്‍ ജനറാള്‍. സിസ്റ്റര്‍ ലിന്‍സ മഴൂവഞ്ചേരി അസിസ്റ്റന്‍റ് ജനറാളായി പ്രവര്‍ത്തിക്കുന്നു. ഫിനാന്‍സ് കൗണ്‍സിലര്‍ സിസ്റ്റര്‍ ഗ്‌ളാഡിസ്, കൗണ്‍സിലര്‍മാരായ സിസ്റ്റര്‍ നാന്‍സി ഓരത്ത്, സിസ്റ്റര്‍ മെര്‍ലി മഞ്ഞപ്പള്ളില്‍ എന്നിവരും എസ്‌കെഡി സന്യാസിനി സമൂഹത്തിനു നേതൃത്വം നല്‍കുന്നു. സ്‌നേഹഭവനത്തില്‍ കഴിയണമെന്ന് ആഗ്രഹിച്ച പിതാവ് ചേവരമ്പലത്തെ സ്‌നേഹഭവനത്തില്‍ വിശ്രമജീവിതം നയിക്കണമെന്നായിരുന്നു തൂങ്കുഴി പിതാവിന്‍റെ ആഗ്രഹം. പക്ഷെ പല കാരണങ്ങള്‍ കൊണ്ടും അതു യാഥാര്‍ഥ്യമായില്ലെന്നു ചേവരമ്പലം എസ്‌കെഡി മദര്‍ ജനറലിന്‍റെ കൗണ്‍സിലര്‍മാരായ സിസ്റ്റര്‍ നാന്‍സി ഓരത്തും സിസ്റ്റര്‍ മെര്‍ലി മഞ്ഞപ്പള്ളിയിലും പറഞ്ഞു. പിതാവിനെ തൃശൂര്‍ രൂപതാധികൃതര്‍ സ്‌നേഹം കൊണ്ടു മൂടുകയായിരുന്നു. പിതാവിന്‍റെ എല്ലാ കാര്യങ്ങളും വളരെ ഭംഗിയായാണ് അവര്‍ നിറവേറ്റിയത്. പിതാവ് സ്ഥാപിച്ച തൃശൂര്‍ ജൂബിലി മിഷന്‍ മെഡിക്കല്‍ കോളജില്‍ ചികിത്സക്കുള്ള സൗകര്യവും കൂടി പരിഗണിച്ച് അവിടെ തന്നെ തങ്ങുകയായിരുന്നുവെന്നും കൗണ്‍സിലര്‍മാര്‍ പറഞ്ഞു. 2024 ഏപ്രിലിലാണ് അവസാനമായി പിതാവ് ചേവരമ്പലത്തെ ജനറലേറ്റ് സന്ദര്‍ശിച്ചത്. ദൈവ മഹത്വം ജീവിതത്തിലുടനീളം പ്രകാശിപ്പിച്ച തൂങ്കുഴി പിതാവ് തങ്ങളില്‍ പ്രസരിപ്പിച്ച ഊര്‍ജവും ചൈതന്യവും അവര്‍ണനീയമാണെന്ന് സന്യാസിനികള്‍ സാക്ഷ്യപ്പെടുത്തുന്നു. 317 സന്യാസിനികളെയും പേരെടുത്തുവിളിക്കാന്‍ തക്കവണ്ണമുള്ള ആത്മബന്ധം പിതാവിനുണ്ടായിരുന്നു. സന്യാസിനിമാരുടെ മാതാപിതാക്കളെയും പിതാവിന് അറിയാമായിരുന്നു. ജന്മദിനവേളകളില്‍ പിതാവ് ഫോണില്‍ വിളിച്ച് ആശംസകള്‍ നേരുമായിരുന്നു. ‘അപ്പനെ പോലെ സ്‌നേഹം ചൊരിഞ്ഞ പിതാവ്' ‘എനിക്ക് അപ്പനെ പോലെയായിരുന്നു തൂങ്കുഴി പിതാവ്. പിതാവ് കാലം ചെയ്തുവെന്ന വിവരം സഹിക്കാനാവുന്നില്ല. സ്‌നേഹഭവനത്തിലെ അടുക്കള ജീവനക്കാരിയാണ് ഞാന്‍. പക്ഷെ പിതാവിന് വലുപ്പച്ചെറുപ്പമൊന്നുമില്ല. ഇടയ്ക്ക് ഇവിടെ വരുമ്പോള്‍, ഒരു അപ്പനെ പോലെ എന്‍റെ സുഖവിവരങ്ങള്‍ അന്വേഷിക്കുകയും സമ്മാനങ്ങള്‍ നല്‍കുകയും ചെയ്തിരുന്നു'... 11 വര്‍ഷമായി സ്‌നേഹഭവനത്തില്‍ ജോലിചെയ്യുന്ന കോഴിക്കോട് തിരുവമ്പാടി സ്വദേശിനി ലീല (65) നിറകണ്ണുകളോടെ പറയുന്നു. വിശേഷാവസരങ്ങളില്‍ പിതാവ് കാണാന്‍ വരുമായിരുന്നു. കുടുംബത്തെക്കുറിച്ചൊക്കെ ചോദിക്കും. വസ്ത്രങ്ങള്‍ നല്‍കും. സാമ്പത്തികമായും സഹായിച്ചിട്ടുണ്ട്. ആ കരുതലും വാത്സല്യവും സ്‌നേഹവും ഇനിയില്ലല്ലോ എന്നോര്‍ത്ത് ലീല കണ്ണീര്‍ തുടച്ചു. പിതാവ് രോഗബാധിതനായി കിടപ്പിലാണെന്നറിഞ്ഞപ്പോള്‍ കാണാനായി തൃശൂരില്‍ പോയതിന്‍റെ ഓര്‍മകളും ലീല പങ്കുവച്ചു. എസ്‌കെഡി ജനറലേറ്റ് ചാപ്പലില്‍ കല്ലറ ഒരുങ്ങി ആര്‍ച്ച്ബിഷപ് എമിരറ്റസ് മാര്‍ ജേക്കബ് തൂങ്കുഴിയുടെ ഭൗതീകശരീരം സംസ്‌കരിക്കുന്നത് ചേവരമ്പലത്തെ എസ്‌കെഡി ജനറലേറ്റിലെ ചാപ്പലില്‍. ചാപ്പലില്‍ മാതാവിന്‍റെ തിരുസ്വരൂപത്തിനു മുമ്പിലായി, പിതാവിന്‍റെ ആഗ്രഹമനുസരിച്ച് നേരത്തെ തന്നെ അന്ത്യവിശ്രമത്തിനുള്ള സ്ഥലം നിശ്ചയിച്ചിരുന്നു. തന്‍റെ സംസ്‌കാരം ലളിതമായ രീതിയില്‍, ആര്‍ഭാടം ഒഴിവാക്കി നടത്തണമെന്നു പിതാവ് വില്‍പത്രത്തില്‍ കുറിച്ചതു സാക്ഷാത്കരിക്കാനുള്ള ഒരുക്കങ്ങളിലാണ് എസ്‌കെഡി സന്യാസിനികള്‍. 22ന് എസ്‌കെഡി ജനറലേറ്റില്‍ ഭൗതീകശരീരം പൊതുദര്‍ശനത്തിനു വയ്ക്കുമെന്നാണ് ആദ്യം അറിയിച്ചിരുന്നത്. എന്നാല്‍ പിതാവിനെ അവസാനമായി ഒരു നോക്ക് കാണാന്‍ ആയിരങ്ങള്‍ ഒഴുകിയെത്തുമെന്നതിനാല്‍ ഇതിനുള്ള സൗകര്യം പരിഗണിച്ച്, തൃശൂരില്‍ നിന്ന് എത്തിക്കുന്ന ഭൗതീകശരീരം കോഴിക്കോട് ദേവഗിരി കാമ്പസിലാണ് പൊതുദര്‍ശനത്തിനു വയ്ക്കുക. ദേവഗിരിയില്‍നിന്ന് വൈകുന്നേരം ആറുമണിയോടെ ചേവരമ്പലം ജനറലേറ്റില്‍ എത്തിച്ച് സംസ്‌ക്കരിക്കുമെന്നാണ് നിലവിലുള്ള അറിയിപ്പ്.

സ്ത്രീ കാമ്പയിന്‍ നടത്തി

കൂരാച്ചുണ്ട്: കൂരാച്ചുണ്ട് സാമൂഹിക ആരോഗ്യ കേന്ദ്രത്തിന്‍റെ ആഭിമുഖ്യത്തില്‍ സ്ത്രീകളുടെയും കുട്ടികളുടെയും ആരോഗ്യത്തിനായുള്ള സ്ത്രീ കാമ്പയിന്‍ സിഎച്ച്‌സി തല ക്ലിനിക്കുകളുടെ ഉദ്ഘാടനം ബാലുശേരി ബ്ലോക്ക് പഞ്ചായത്ത് പ്രസിഡന്‍റ് വി.കെ. അനിത നിര്‍വഹിച്ചു. കൂരാച്ചുണ്ട് പഞ്ചായത്ത് പ്രസിഡന്‍റ് ഒ.കെ. അമ്മദ് അധ്യക്ഷത വഹിച്ചു. കൂരാച്ചുണ്ട് സിഎച്ച്‌സി മെഡിക്കല്‍ ഓഫീസര്‍ അസ്‌ലം, ഫറൂഖ്, ആരോഗ്യ സ്റ്റാന്‍ഡിംഗ് കമ്മറ്റി ചെയര്‍പേഴ്‌സണ്‍ സിമിലി ബിജു. ബ്ലോക്ക് പഞ്ചായത്തംഗം വി.കെ. ഹസീന, വാര്‍ഡ് മെമ്പര്‍ വിജയന്‍ കിഴക്കയില്‍മീത്തല്‍, ഹെല്‍ത്ത് ഇന്‍സ്പെക്ടര്‍ എ.സി.അരവിന്ദന്‍, ജെപിഎച്ച്എന്‍ ബുഷ്‌റ എന്നിവര്‍ പ്രസംഗിച്ചു. തിരുവമ്പാടി: ജനകീയ ആരോഗ്യ കേന്ദ്രങ്ങള്‍ കേന്ദ്രീകരിച്ച് സ്ത്രീകള്‍ക്കും കുട്ടികള്‍ക്കുമായി പ്രത്യേക ആരോഗ്യ സേവനങ്ങള്‍ നല്‍കുന്ന സ്ത്രീ ക്യാമ്പയിന്‍റെ തിരുവമ്പാടി പഞ്ചായത്ത്തല ഉദ്ഘാടനം പഞ്ചായത്ത് പ്രസിഡന്‍റ് ബിന്ദു ജോണ്‍സണ്‍ നിര്‍വഹിച്ചു. പഞ്ചായത്ത് വൈസ് പ്രസിഡന്‍റ് കെ.എ.അബ്ദുറഹിമാന്‍ അധ്യക്ഷനായി. കുടുംബാരോഗ്യ കേന്ദ്രം മെഡിക്കല്‍ ഓഫീസര്‍ ഡോ. കെ.വി. പ്രിയ, ഹെല്‍ത്ത് ഇന്‍സ്‌പെക്ടര്‍ എം. സുനീര്‍, പബ്ലിക് ഹെല്‍ത്ത് നഴ്‌സ് ത്രേസ്യ, ഐസിഡിഎസ് സൂപ്പര്‍വൈസര്‍ ചഷമ ചന്ദ്രന്‍, ജെഎച്ച്‌ഐ മുഹമ്മദ് മുസ്തഫാ ഖാന്‍, എംഎല്‍എസ്പി അഞ്ജന, ലിയ സെബാസ്റ്റ്യന്‍ എന്നിവര്‍ സംസാരിച്ചു.

എസ് പിസി കേഡറ്റുകള്‍ രോഗികള്‍ക്ക് വസ്ത്രങ്ങള്‍ നല്‍കി

താമരശേരി: കൂടത്തായി സെന്‍റ് മേരീസ് ഹൈസ്‌കൂള്‍ എസ്പിസി കേഡറ്റുകള്‍ മെഡിക്കല്‍ കോളജിലെ രോഗികള്‍ക്ക് പുതിയ വസ്ത്രങ്ങള്‍ വാങ്ങി നല്‍കി. മാനേജര്‍ ഫാ. ബിബിന്‍ ജോസ്, ഹെഡ്മാസ്റ്റര്‍ തോമസ് അഗസ്റ്റിന്‍, പിടിഎ പ്രസിഡന്‍റ് സത്താര്‍ പുറായില്‍, എസ് പിസി പിടിഎ പ്രസിഡന്‍റ് ഷനോജ് എന്നിവര്‍ ചേര്‍ന്ന് ശ്രീജ, ശ്രീഷ്മ, വസന്തകുമാരി എന്നിവര്‍ക്ക് കൈമാറി. തുടര്‍ന്ന് നടന്ന മീറ്റിങ്ങില്‍ സിപിഒ റെജി കരോട്ട്, ഹെഡ്മാസ്റ്റര്‍ തോമസ് അഗസ്റ്റിന്‍, പിടിഎ പ്രസിഡന്‍റ് സത്താര്‍ പുറായില്‍, എസ് പിസി പിടിഎ പ്രസിഡന്‍റ് ഷനോജ്, ഡ്രില്‍ ഇന്‍സ്ട്രക്ടര്‍ റെജിലേഷ്, സുമി ഇമ്മാനുവല്‍ എന്നിവര്‍ പ്രസംഗിച്ചു. ശ്രീജ, ശ്രീഷ്മ, വസന്തകുമാരി എന്നിവര്‍ ക്ലാസെടുത്തു.

റോഡരികില്‍ ഭീഷണിയായി മരങ്ങള്‍; മനുഷ്യാവകാശ കമ്മീഷന്‍ കേസെടുത്തു

കോഴിക്കോട്: ബാലുശേരി-കോഴിക്കോട് റോഡരികില്‍ ഭീഷണിയായി നില്‍ക്കുന്ന മരങ്ങള്‍ മുറിച്ചുമാറ്റുന്നില്ലെന്ന പരാതിയില്‍ മനുഷ്യാവകാശ കമ്മീഷന്‍ ജുഡീഷ്യല്‍ അംഗം കെ. ബൈജുനാഥ് സ്വമേധയാ കേസെടുത്ത് ജില്ലാ കളക്ടറില്‍ നിന്നും റിപ്പോര്‍ട്ട് ആവശ്യപ്പെട്ടു. കരിക്കാംകുളം മുതല്‍ ബാലുശേരിമുക്ക് വരെയുള്ള റോഡിന്‍റെ ഇരുവശങ്ങളിലുമായി നില്‍ക്കുന്ന മരങ്ങളാണ് ഭീഷണിയായി മാറുന്നത്. മഴക്കാലത്ത് മരങ്ങള്‍ വീഴുമ്പോള്‍ മാത്രമാണ് നടപടിയെടുക്കുന്നത് എന്നാണ് ആക്ഷേപം. എരക്കുളത്തിന് സമീപം കഴിഞ്ഞ മാസം തെങ്ങ് കടപുഴകി റോഡിലേക്ക് വീണു. കക്കോടി പഞ്ചായത്ത് ഷോപ്പിംഗ് കോംപ്ലക്‌സിന് മുന്നിലുള്ള തണല്‍മരവും അപകടഭീഷണിയിലാണെന്ന് മനസിലാക്കുന്നു. 15 ദിവസത്തിനകം ജില്ലാ കളക്ടര്‍ റിപ്പോര്‍ട്ട് സമര്‍പ്പിക്കണം. ഒക്ടോബര്‍ 28 ന് കോഴിക്കോട് പൊതുമരാമത്ത് വകുപ്പ് റസ്റ്റ് ഹൗസില്‍ നടക്കുന്ന സിറ്റിംഗില്‍ കേസ് പരിഗണിക്കും.

യുഡിഎഫ് ഹെല്‍ത്ത് കമ്മീഷന്‍ സിറ്റിംഗ് 20ന്

കോഴിക്കോട്: യുഡിഎഫ് നിയമിച്ച ഹെല്‍ത്ത് കമ്മിഷന്‍റെ സിറ്റിംഗ് കോഴിക്കോട് ഹോട്ടല്‍ വുഡീസില്‍ 20ന് രാവിലെ 10 മുതല്‍ ഉച്ചയ്ക്ക് ഒന്നുവരെ നടക്കും. കേരളത്തിലെ ആരോഗ്യരംഗത്തെ വീഴ്ചകള്‍ പഠിക്കുന്നതിനും പരിഹാരനിര്‍ദേശം സമര്‍പ്പിക്കുന്നതിനുമാണ് യുഡിഎഫ് ഹെല്‍ത്ത് കമ്മീഷനെ നിയമിച്ചിരിക്കുന്നത്. ഹെല്‍ത്ത് കമ്മിഷന്‍ അധ്യക്ഷന്‍ ഡോ. എസ്.എസ്. ലാല്‍, അംഗങ്ങളായ ഡോ: പി.എന്‍. അജിത, ഡോ: ശ്രീജിത്, എന്‍. കുമാര്‍, ഡോ: രാജന്‍ ജോസഫ് മാഞ്ഞൂരാന്‍, ഡോ. ഒ.റ്റി. മുഹമ്മദ് ബഷീര്‍ എന്നിവരാണ് സിറ്റിംഗില്‍ പങ്കെടുക്കുന്നതെന്ന് യുഡിഎഫ് ജില്ലാ ചെയര്‍മാന്‍ കെ. ബാലനാരായണന്‍, കണ്‍വീനര്‍ അഹമ്മദ് പുന്നക്കല്‍ എന്നിവര്‍ അറിയിച്ചു.

മലയോര ഹൈവേ: റോഡിന്‍റെ സ്‌കെച്ച് പ്രദര്‍ശിപ്പിച്ച് ബിജെപി

ചക്കിട്ടപാറ: 1971ലെ സര്‍വെ പ്രകാരമുള്ള പെരുവണ്ണാമൂഴി - ചക്കിട്ടപാറ - ചെമ്പ്ര പി.ഡബ്ല്യു.ഡി. റോഡിന്‍റെ എഫ്.എം.ബി. സ്‌കെച്ച് പുറത്ത് വിട്ട് ബി.ജെ.പി ചക്കിട്ടപാറ പഞ്ചായത്ത് കമ്മറ്റി. ഇങ്ങനെ ഒരു സ്‌കെച്ചില്ലെന്ന പ്രചരണം നടത്തി ചക്കിട്ടപാറ ടൗണില്‍ റോഡിന്‍റെ നടുവില്‍ നിന്ന് ഇരു ഭാഗത്തേക്കും ആറ് മീറ്റര്‍ വീതം അളന്നു 12 മീറ്റര്‍ വീതി നിര്‍ണയിച്ച് മലയോര ഹൈവേ നിര്‍മ്മിക്കുന്നതിനെതിരെ ചില വ്യാപാരികളും കെട്ടിട ഉടമകളും ഹൈക്കോടതിയില്‍ കേസ് നല്‍കിയിരുന്നു. ഇവരുടെ കെട്ടിട സ്ഥല ഭാഗത്ത് ഹൈവേ നിര്‍മ്മാണം വിലക്കികൊണ്ടുള്ള ഉത്തരവ് നില നില്‍ക്കെയാണ് പാതയുടെ യഥാര്‍ത്ഥമെന്നു പറയുന്ന എഫ്.എം.ബി സ്‌കെച്ച് ബി.ജെ.പി പുറത്തു വിട്ടത്. ഇതിന്‍റെ പകര്‍പ്പ് ബോര്‍ഡ് രൂപത്തിലാക്കി അവര്‍ ചക്കിട്ടപാറ ടൗണില്‍ സ്ഥാപിച്ചു. യഥാര്‍ത്ഥ അളവ് മറച്ച് വച്ച് ഹെവേ നിര്‍മ്മിക്കുന്നത് റോഡ് കൈയേറ്റക്കാരെ സംരംക്ഷിക്കാനാണെന്നും ഇതിനു കൂട്ടു നില്‍ക്കുന്ന ഇടത് വലത് വികസന വിരോധികളെ ജനം തിരിച്ചറിയണമെന്നും ബി.ജെ.പി ആവശ്യപ്പെട്ടു.

എട്ടു വയസുകാരിക്ക് പീഡനം: 64 വയസുകാരന് തടവും പിഴയും

നാദാപുരം: എട്ടു വയസുകാരിക്കു നേരെ ലൈംഗിക അതിക്രമം നടത്തിയ 64 വയസുകാരന് 15 വര്‍ഷം കഠിനതടവും 30000 രൂപ പിഴയും ശിക്ഷ വിധിച്ച് നാദാപുരം ഫാസ്റ്റ് ട്രാക്ക് സ്‌പെഷല്‍ കോടതി ജഡ്ജ് കെ. നൗഷാദ് അലി. പൂതംപാറ സ്വദേശി കുന്നുമ്മല്‍ കുഞ്ഞിരാമനെ(64) യാണ് ശിക്ഷിച്ചത്. 2001 ലാണ് കേസിനാധാരമായ സംഭവം നടന്നത്. വീട്ടുസാധനങ്ങള്‍ വാങ്ങാന്‍ പോയ കുട്ടിയെ കടയില്‍ വച്ചാണ് ലൈംഗികാതിക്രമത്തിന് വിധേയമാക്കിയത്. പീഡിപ്പിച്ച വിവരം വിദ്യാര്‍ഥിനി സ്‌കൂള്‍ കൗണ്‍സിലര്‍ മുഖേന തൊട്ടില്‍പാലം പോലീസ് സ്റ്റേഷനില്‍ അറിയിക്കുകയായിരുന്നു. തൊട്ടില്‍പാലം പോലീസ് സ്റ്റേഷന്‍ സബ് ഇന്‍സ്‌പെക്ടര്‍ എം.പി. വിഷ്ണുവാണ് കോടതിയില്‍ കുറ്റപത്രം സമര്‍പ്പിച്ചത്. പ്രോസിക്യൂഷന്‍ ഭാഗത്തുനിന്ന് 12 സാക്ഷികളെ വിസ്തരിക്കുകയും 14 രേഖകള്‍ ഹാജരാക്കുകയും ചെയ്തു. പ്രതി കട നടത്തിയിട്ടില്ലെന്നും വേറൊരാള്‍ക്ക് വാടകക്ക് കൊടുത്തിരുന്നു എന്നും കാണിച്ച് പ്രതിഭാഗത്ത് നിന്ന് സാക്ഷികളെ വിസ്തരിച്ചിരുന്നു. ഈ വാദം കോടതി തള്ളിക്കളഞ്ഞു. പ്രോസിക്യൂഷന് വേണ്ടി സ്‌പെഷല്‍ പബ്ലിക് പ്രോസിക്യൂട്ടര്‍ മനോജ് അരൂര്‍ ഹാജരായി. അസി. സബ് ഇന്‍സ്‌പെക്ടര്‍ പി.എം. ഷാനി പ്രോസിക്യൂഷന്‍ നടപടികള്‍ ഏകോപിപ്പിച്ചു.

ജ്വല്ലറിയില്‍ നിന്നു മുക്കുത്തി മോഷ്ടിച്ച യുവതി അറസ്റ്റില്‍

കോഴിക്കോട്: ജ്വല്ലറിയില്‍ നിന്നും സ്വര്‍ണ്ണ മൂക്കുത്തി മോഷ്ടിച്ച യുവതിയെ പോലീസ് അറസ്റ്റു ചെയ്തു. കോഴിക്കോട് തലക്കളത്തൂര്‍ പാലോറമല സ്വദേശിനി ശിവപാര്‍വ്വം വീട്ടില്‍ മാളവിക (24 )യെയാണ് നടക്കാവ് പോലീസ് പിടികൂടിയത്. ഈ മാസം 13ന് അരയിടത്ത് പാലത്തുള്ള തനിഷ്‌ക് ജ്വല്ലറിയില്‍ സ്വര്‍ണ്ണം വാങ്ങാനെന്ന വ്യാജേന എത്തിയ യുവതി ജ്വല്ലറി സെയില്‍മാന്‍മാരുടെ കണ്ണ് വെട്ടിച്ച് സ്വര്‍ണ്ണ മൂക്കുത്തി മോഷ്ടിക്കുകയായിരുന്നു. ജ്വല്ലറിയിലെ സിസി ടിവി ദൃശ്യങ്ങള്‍ പരിശോധിച്ചാണ് പ്രതിയെ തിരിച്ചറിഞ്ഞത്.

ടാലന്‍ഷിയ ക്വിസ് മത്സരത്തിന് ആവേശകരമായ സമാപനം

താമരശേരി: താമരശേരി കോര്‍പറേറ്റ് എഡ്യൂക്കേഷണല്‍ ഏജന്‍സി എല്‍പി, യുപി, ഹൈസ്‌കൂള്‍, ഹയര്‍ സെക്കന്‍ഡറി സ്‌കൂള്‍ വിദ്യാര്‍ഥികള്‍ക്കായി തിരുവമ്പാടി അല്‍ഫോന്‍സാ കോളജില്‍ നടത്തിയ ടാലന്‍ഷിയ മെഗാ ക്വസ് മത്സരത്തിന്‍റെ ഗ്രാന്‍റ് ഫിനാലെ സമാപിച്ചു. സമാപന സമ്മേളനം ബിഷപ് മാര്‍ റെമീജിയോസ് ഇഞ്ചനാനിയില്‍ ഉദ്ഘാടനം ചെയ്തു. കോര്‍പറേറ്റ് മാനേജര്‍ ഫാ.ജോസഫ് വര്‍ഗീസ് അധ്യക്ഷത വഹിച്ചു. സംസ്ഥാന ചലചിത്ര അക്കാദമി ചെയര്‍മാന്‍ പ്രേംകുമാര്‍ മുഖ്യ പ്രഭാഷണം നടത്തി. ചലചിത്ര അക്കാദമി റീജിയണല്‍ കോര്‍ഡിനേറ്റര്‍ നവീന വിജയന്‍, അല്‍ഫോന്‍സ കോളജ് പ്രിന്‍സിപ്പല്‍ ഡോ. ഷൈജു ഏലിയാസ് എന്നിവര്‍ പ്രസംഗിച്ചു. വിജയികള്‍ക്ക് ക്യാഷ് അവാര്‍ഡുകളും ട്രോഫികളും ബിഷപ് മാര്‍ റെമീജിയോസ് ഇഞ്ചനാനിയില്‍, നടന്‍ പ്രേംകുമാര്‍ എന്നിവര്‍ ചേര്‍ന്ന് സമ്മാനിച്ചു. അല്‍ഫോന്‍സാ കോളേജ് അഡ്മിനിസ്‌ട്രേറ്റര്‍ ഫാ.മനോജ് കൊല്ലംപറമ്പില്‍ ക്വിസ് മത്സരങ്ങള്‍ നിയന്ത്രിച്ചു. ബെന്നി ലൂക്കോസ്,വിപിന്‍ എം. സെബാസ്റ്റ്യന്‍, റോഷിന്‍ മാത്യു, ഷിബു മാത്യു എന്നിവര്‍ നേതൃത്വം നല്‍കി. ഏബല്‍ റിന്‍റോ, പി.ആര്‍.റുഷ്ദ ഫാത്തിമ (സേക്രട്ട് ഹാര്‍ട്ട് എല്‍പി സ്‌കൂള്‍ തിരുവമ്പാടി), എസ്തര്‍ മരിയ, നിയ ഫാത്തിമ (സെന്‍റ് മേരീസ് എച്ച്എസ് കല്ലാനോട്), ക്രിസ്ത്യാനോ ഡെലിന്‍ ഡെന്നീസ്, ഇസബെല്ല വര്‍ഗീസ് (സെന്‍റ് ജോര്‍ജ് എച്ച്എസ് കുളത്തുവയല്‍), അനന്തു സന്തോഷ്, ബ്രിജിത്ത് തോമസ് (ഹോളി ഫാമിലി എച്ച്എസ്എസ് പടത്തുകടവ്) എന്നിവര്‍ ഓരോ വിഭാഗത്തിലും ഒന്നാം സ്ഥാനം കരസ്ഥമാക്കി. വിജയികള്‍ക്ക് യഥാക്രമം 10000, 7000, 5000 രൂപ ക്യാഷ് പ്രൈസും സ്‌കൂളുകള്‍ക്ക് എവറോളിംഗ് ട്രോഫിയും നല്‍കി.

മലയോര ഹൈവേ പ്രവൃത്തി ആരംഭിക്കാത്തതില്‍ പ്രതിഷേധം

കൂരാച്ചുണ്ട്: മലയോര ഹൈവേയുടെ ഭാഗമായുള്ള കൂരാച്ചുണ്ട് പഞ്ചായത്ത് പരിധിയിലുള്ള റീച്ചിന്‍റെ പ്രവര്‍ത്തി ഉദ്ഘാടനം ഉടന്‍ നടത്തണമെന്ന് സിപിഐ കൂരാച്ചുണ്ട് ബ്രാഞ്ച് കമ്മിറ്റി ആവശ്യപ്പെട്ടു. പഞ്ചായത്തിന്‍റെ പരിധിയില്‍ മലയോര ഹൈവേയുടെ ഒരു പ്രവര്‍ത്തിയും ആരംഭിച്ചിട്ടില്ല. റോഡിനായി സ്ഥലം വിട്ടുനല്‍കുന്ന കെട്ടിട ഉടമകളില്‍ നിന്നും സ്ഥല ഉടമകളില്‍ നിന്നും സമ്മതപത്രം വാങ്ങിയിട്ടുണ്ട്. എസ്റ്റിമേറ്റ് നടപടികള്‍ പൂര്‍ത്തീകരിച്ച് ടെന്‍ഡറായി. എന്നാല്‍ മാസങ്ങള്‍ ആയിട്ടും പ്രവര്‍ത്തി ആരംഭിക്കാന്‍ വൈകുകയാണ്. സമീപ പഞ്ചായത്തുകളായ ചക്കിട്ടപാറ, പനങ്ങാട് എന്നിവിടങ്ങളില്‍ മലയോര ഹൈവേയുടെ പ്രവര്‍ത്തികള്‍ ദ്രുതഗതിയില്‍ നടക്കുന്നുണ്ട്.കൂരാച്ചുണ്ട് പഞ്ചായത്തില്‍ പ്രവര്‍ത്തി നടക്കാതിരിക്കാന്‍ കാരണം പഞ്ചായത്ത് ഭരണസമിതിയുടെ അനാസ്ഥയാണെന്ന് യോഗം ആരോപിച്ചു. ടി.കെ.ശിവദാസന്‍ അധ്യക്ഷത വഹിച്ചു. എ.കെ.പ്രേമന്‍, പി.ടി തോമസ്, വിനു മ്ലാക്കുഴിയില്‍, കുട്ടിആലി കുനിയില്‍, ഗോപിനാഥന്‍,പ്രവീണ്‍, ഗോപാലന്‍ മണ്ടോപ്പാറ എന്നിവര്‍ പ്രസംഗിച്ചു.

റോഡ് തകര്‍ച്ച: നൊച്ചാട് പഞ്ചായത്തിനു മുന്നില്‍ കോണ്‍ഗ്രസ് സമരം നടത്തി

പേരാമ്പ്ര: ജലജീവന്‍ പദ്ധതിയിലൂടെ തകര്‍ത്ത ഗ്രാമീണ റോഡുകള്‍ പുനര്‍നിര്‍മിക്കാത്ത നൊച്ചാട് ഗ്രാമ പഞ്ചായത്ത് ഭരണസമിതിക്കെതിരെ കോണ്‍ഗ്രസ് നൊച്ചാട് മണ്ഡലം കമ്മിറ്റിയുടെ നേതൃത്വത്തില്‍ നൊച്ചാട് ഗ്രാമ പഞ്ചായത്ത് ഓഫീസ് മുന്നില്‍ പ്രതിഷേധ ധര്‍ണ്ണ നടത്തി. ബ്ലോക്ക് കോണ്‍ഗ്രസ് പ്രസിഡന്‍റ് കെ. മധു കൃഷ്ണന്‍ ഉദ്ഘാടനം ചെയ്തു. മണ്ഡലം പ്രസിഡന്‍റ് വി.വി. ദിനേശന്‍ അധ്യക്ഷത വഹിച്ചു. കെ.സി. ഗോപാലന്‍, പി.എം. പ്രകാശന്‍, സി.കെ. അജീഷ്, ഗീത കല്യായി, രഞ്ജിത്ത് തുമ്പക്കണ്ടി, റഷീദ് ചെക്യാലത്ത്, പി.കെ. മോഹനന്‍, രാമചന്ദ്രന്‍ വാളേരി തുടങ്ങിയവര്‍ പ്രസംഗിച്ചു. എം.കെ. ദിനേശന്‍, കെ.വി. ശശികുമാര്‍, എ.ഗോവിന്ദന്‍, വി.ബേബി, കെ. വത്സന്‍, എം.കെ. ഫൈസല്‍ തുടങ്ങിയവര്‍ നേതൃത്വം നല്‍കി.

ദീര്‍ഘകാലസ്വപ്നം സാക്ഷാത്കരിച്ചു : കാറ്റുള്ളമല നിര്‍മ്മല സ്‌കൂളിന് പുതിയ ഗ്രൗണ്ട്

കാറ്റുള്ളമല: നിര്‍മ്മല യുപി സ്‌കൂളിന്‍റെ ദീര്‍ഘകാലത്തെ സ്വപ്‌നത്തിന് സാക്ഷാത്കാരം. പുതിയ ഫുട്‌ബോള്‍ ഗ്രൗണ്ട് ഉദ്ഘാടന ചടങ്ങ് പേരാമ്പ്ര എഇഒ കെ.വി.പ്രമോദ് ഉദ്ഘാടനം ചെയ്തു. സ്വന്തമായ ഗ്രൗണ്ട് ഇല്ലാത്തതിനാല്‍ വര്‍ഷങ്ങളായി നിര്‍മ്മല സ്‌കൂള്‍ മറ്റ് സ്‌കൂള്‍ ഗ്രൗണ്ടുകളെയാണ് കായിക മത്സരങ്ങള്‍ക്ക് ആശ്രയിച്ചിരുന്നത്. ആ പ്രശ്‌നത്തിന് ശാശ്വത പരിഹാരമാണ് പുതിയ ഫുട്‌ബോള്‍ ഗ്രൗണ്ട് ഉദ്ഘാടനം ചെയ്യപ്പെട്ടതിലൂടെ പൂര്‍ത്തിയായിരിക്കുന്നത്. പരിമിതമായ സ്ഥലത്ത് ഫുട്‌ബോള്‍ ഗ്രൗണ്ട് നിര്‍മ്മിക്കുക എന്നത് ശ്രമകരമായ ഒരു ഉദ്യമം ആയിരുന്നു. കാറ്റുള്ളമല സെന്‍റ് മേരീസ് പള്ളി കൈകാരന്മാരുടെയും സ്‌കൂള്‍ പിടിഎ അംഗങ്ങളുടെയും അധ്യാപകരുടെയും അകൈതവമായ സഹകരണം ഉണ്ടായിരുന്നു ഗ്രൗണ്ട് നിര്‍മാണത്തിന്. സ്‌കൂള്‍ മാനേജര്‍ ഫാ. ജോസ് പെണ്ണാപറമ്പിലാണ് സ്വപ്ന സാക്ഷാത്കാരത്തിന് ചുക്കാന്‍ പിടിച്ചത്. ഉദ്ഘാടന ചടങ്ങില്‍ ഫാ. ജോസ് പെണ്ണാപറമ്പില്‍ അധ്യക്ഷനായിരുന്നു. പ്രധാനാധ്യാപിക പി.ശ്രുതി, വാര്‍ഡ് മെമ്പര്‍ പി.കെ.ഷിജു, പിടിഎ പ്രസിഡന്‍റ് സിബി വടക്കേകുന്നേല്‍, സ്റ്റാഫ് പ്രതിനിധി ജസ്‌നി ജോസ് എന്നിവര്‍ പ്രസംഗിച്ചു. പെനാലിറ്റി ഷൂട്ടിലൂടെ ഫാ.ജോസ് പെണ്ണാപറമ്പില്‍ ഗ്രൗണ്ട് ഉദ്ഘാടനം ചെയ്തു.

പയ്യോളി നഗരസഭാ സ്റ്റേഡിയം നിർമാണ സാമഗ്രികളുടെ സൂക്ഷിപ്പ് കേന്ദ്രമായി

പയ്യോളി: പയ്യോളി നഗരസഭയുടെ കീഴിലുള്ള ഇ കെ നായനാർ മിനി സ്റ്റേഡിയം നിർമാണ സാമഗ്രികളുടെ സൂക്ഷിപ്പ് കേന്ദ്രമായി മാറുന്നത് പതിവാകുന്നു. മഴ മാറി കളിസ്ഥലം ഉപയോഗപ്രദമായ സമയത്താണ് കുടിവെള്ള പദ്ധതിക്ക് വേണ്ടിയുള്ള പൈപ്പുകൾ ഇറക്കി കളിസ്ഥലം കരാറുകാർ കയ്യേറിയത്. പൈപ്പിറക്കുന്ന സമയത്ത് തന്നെ നാട്ടുകാർ ഇതിനെ ചോദ്യം ചെയ്തിരുന്നുവെങ്കിലും നഗരസഭയുടെ അനുമതി ഉണ്ടെന്നാണ് കരാറുകാരുടെ വിശദീകരണം. പയ്യോളി നഗരസഭയുടെ കീഴിലുള്ള ഏക കളിസ്ഥലമാണ് ഇത്തരത്തിൽ സ്വകാര്യ വ്യക്തികൾക്ക് വേണ്ടി നശിപ്പിക്കപ്പെടുന്നത്.യുവതലമുറയെ ലഹരിയിൽ നിന്ന് പിന്തിരിപ്പിക്കാനായി കളിസ്ഥലങ്ങളിലേക്ക് ഇവരെ എത്തിക്കാനുള്ള ശ്രമങ്ങൾ നടക്കുന്നതിനിടെയാണ് പയ്യോളി നഗരസഭയുടെ കളിസ്ഥലം പോലും നഷ്ടപ്പെടുന്ന സാഹചര്യമുണ്ടാകുന്നത്. സാധനങ്ങൾ ഇറക്കാൻ വന്നതിനെ തുടർന്ന് ചെളിയിൽ കുളിച്ച നിലയിലാണ് ഇപ്പോൾ മുനിസിപ്പൽ സ്റ്റേഡിയം. നടക്കാൻ പോലും ബുദ്ധിമുട്ടുള്ള ഇവിടെ എങ്ങനെ കളിക്കും എന്നാണ് കുട്ടികളുടെ ചോദ്യം. അതിരാവിലെയും രാത്രിയും വ്യായാമത്തിനായി ഗ്രൗണ്ടിൽ എത്തുന്നവരും ഇതുമൂലം പ്രയാസപ്പെടുകയാണ്.

മെഡിക്കല്‍ കോളജ് മോര്‍ച്ചറിയില്‍ സ്ഥലമില്ല : നഗരസഭാ സെക്രട്ടറിയോട് റിപ്പോര്‍ട്ട് തേടി മനുഷ്യാവകാശ കമീഷന്‍

കോഴിക്കോട്: കോഴിക്കോട് മെഡിക്കല്‍ കോളജ് മോര്‍ച്ചറിയില്‍ നടപടിക്രമങ്ങളില്‍ കുരുങ്ങി 16 അനാഥ മൃതദേഹങ്ങള്‍ സൂക്ഷിക്കുന്നതു കാരണം മോര്‍ച്ചറിയില്‍ സ്ഥലമില്ലെന്ന പരാതിയില്‍ മനുഷ്യാവകാശ കമീഷന്‍ ജുഡീഷ്യല്‍ അംഗം കെ. ബൈജുനാഥ് സ്വമേധയാ കേസെടുത്ത് നഗരസഭാ സെക്രട്ടറിയില്‍ നിന്നും റിപ്പോര്‍ട്ട് ആവശ്യപ്പെട്ടു. ഒരാഴ്ചക്കകം റിപ്പോര്‍ട്ട് സമര്‍പ്പിക്കണം. ഒക്ടോബര്‍ 28ന് കോഴിക്കോട് പൊതുമരാമത്ത് റസ്റ്റ് ഹൗസില്‍ നടക്കുന്ന സിറ്റിംഗില്‍ കേസ് പരിഗണിക്കും. ഓഗസ്റ്റ്, സെപ്റ്റംബര്‍ മാസങ്ങളിലാണ് ഇത്രയധികം മൃതദേഹങ്ങള്‍ മോര്‍ച്ചറിയിലെത്തിയത്. കോഴിക്കോട് ജില്ലയിലെ ആറ് പോലീസ് സ്റ്റേഷനുകളില്‍ നിന്നും മലപ്പുറം, മഞ്ചേരി പോലീസ് സ്റ്റേഷന്‍ പരിധിയില്‍ നിന്നുമാണ് മൃതദേഹങ്ങള്‍ എത്തിയത്. ഇവയില്‍ പലതും ഫ്രീസറുകളില്‍ സൂക്ഷിക്കാനുള്ള സമയപരിധി കഴിഞ്ഞതാണ്. കോഴിക്കോട് മെഡിക്കല്‍ കോളേജ് മോര്‍ച്ചറിയില്‍ നിലവിലുള്ളഏക ഫ്രീസര്‍ യൂണിറ്റില്‍ 18 മൃതദേഹങ്ങള്‍ മാത്രമേ സൂക്ഷിക്കാന്‍ കഴിയുകയുള്ളൂ. മൃതദേഹങ്ങളില്‍ ചിലതെങ്കിലും ഒഴിവാക്കിയില്ലെങ്കില്‍ മോര്‍ച്ചറി നിറയുമെന്നാണ് പരാതി. ഒരു ഫ്രീസര്‍ യൂണിറ്റ് പ്രവര്‍ത്തനക്ഷമമല്ല. അജ്ഞാത മൃതദേഹങ്ങള്‍ സംസ്‌കരിക്കാനുള്ള ചുമതല തദ്ദേശസ്വയംഭരണ സ്ഥാപനങ്ങള്‍ക്കാണ്. മൃതദേഹങ്ങള്‍ ഏറ്റെടുത്ത് സംസ്‌ക്കരിക്കാന്‍ കോര്‍പറേഷനിലേക്ക് മൂന്നു തവണ കത്തു നല്‍കിയതായി പോലീസ് പറയുന്നു.

സംസ്ഥാനത്തെ ചെറുകിട റൈസ് ഫ്‌ളോര്‍ മില്ലുകള്‍ അടച്ചുപൂട്ടല്‍ ഭീഷണിയില്‍

കോഴിക്കോട്: സംസ്ഥാനത്തെ ചെറുകിട റൈസ് ഫ്‌ളോര്‍ ആന്‍ഡ് ഓയില്‍ മില്ലുകള്‍ അടച്ചുപൂട്ടല്‍ ഭീഷണിയിലായി. നിലനില്‍പിനുള്ള പോരാട്ടത്തിലാണ് മിക്ക മില്ലുകളുമെന്ന് സംസ്ഥാന ചെറുകിട റൈസ് ഫ്‌ളോര്‍ ആന്‍ഡ് ഓയില്‍ മില്ലേഴ്‌സ് അസോസിയേഷന്‍ ഭാരവാഹികള്‍ വാര്‍ത്താസേമ്മളനത്തില്‍ പറഞ്ഞു. സംസ്ഥാനത്തെ ഏറ്റവും പഴക്കം ചെന്ന തൊഴില്‍ േമഖലയാണിത്. സംസ്ഥാനത്ത് 45000 ചെറുകിട മില്ലുകളുണ്ട്. ഓരോ ഗ്രാമപഞ്ചായത്തിലും അമ്പതുവരെ മില്ലുകള്‍ പ്രവര്‍ത്തിക്കുന്നുണ്ട്. ഇതില്‍ 70 ശതമാനം മില്ലുകളും വനിതകളാണ് നടത്തുന്നത്. കെട്ടുതാലിയും കിടപ്പാടവുമെല്ലാം പണയം വച്ചാണ് മിക്കവരും മില്ലുകള്‍ തുടങ്ങിയിട്ടുള്ളത്. സര്‍ക്കാറില്‍ നിന്ന് ചെറുകിട വ്യവസായ യൂണിറ്റുകള്‍ക്കു ലഭിക്കേണ്ട ഒരു ആനുകൂല്യവും ലഭിക്കുന്നില്ല. അതുകൊണ്ടുതന്നെ പീഡിത യൂണിറ്റായി മില്ലുകള്‍ ദിനേന മാറിക്കൊണ്ടിരിക്കുകയാണ്. റേഷന്‍ വിതരണ പ്രശ്‌നം, വൈദ്യുത ചാര്‍ജ്, പിഎഫ്എ ലൈസന്‍സ് തുടങ്ങിയ മേഖലകളില്‍ നിന്ന് നേരിടുന്ന ദുരനുഭവങ്ങള്‍ മൂലം മില്ലുകള്‍ നടത്താനാവാതെ പൂട്ടുകയാണ്. ലൈസന്‍സ് പുതുക്കുന്നതിനു വലിയ ബുദ്ധിമുട്ടാണുള്ളത്. ഇപ്പോള്‍ മില്ലുകളില്‍ ഡസ്റ്റ്ബിന്‍ വയ്ക്കണമെന്നാണ് നിര്‍ദേശം. ഹരിതകര്‍മ സേനയ്ക്ക് തുക നല്‍കുകയും അതിന്‍റെ റസീറ്റ് സൂക്ഷിക്കുകയും േവണം. മില്ലുകളില്‍ പ്‌ളാസ്റ്റിക് േവസ്റ്റ് ഇല്ലെങ്കിലും മാലിന്യ സംസ്‌കരണത്തിനു വിഹിതം നല്‍കാനാണ് ഉത്തരവ്. മില്ലുടമകള്‍ നേരിടുന്ന പ്രശ്‌നങ്ങള്‍ ചര്‍ച്ച ചെയ്യുന്നതിനു അസോസിയേഷന്‍ കണ്‍വന്‍ഷന്‍ 21ന് ബീച്ച് േറാഡിലെ ഗുജറാത്തി ഹാളില്‍ നടക്കും. 1200 പേര്‍ സംബന്ധിക്കും. രാവിലെ ഒമ്പതിനു മന്ത്രി പി.എ മുഹമ്മദ് റിയാസ് ഉദ്ഘാടനം ചെയ്യും.സംസ്ഥാന പ്രസിഡന്‍റ് എന്‍.കെ ഹരീന്ദ്രനാഥ് അധ്യക്ഷത വഹിക്കും. എം.കെ രാഘവന്‍ എംപി, അഹമ്മദ് ദേവര്‍േകാവില്‍ എംഎല്‍എ എന്നിവര്‍ മുഖ്യാതിഥികളായിരിക്കും. സംസ്ഥാന പ്രസിഡന്‍റ് എന്‍.കെ ഹരീന്ദ്രനാഥ്, വൈസ് പ്രസിഡന്‍റ് സെയ്തുട്ടിഹാജി ഒളവണ്ണ, മൊയ്തീന്‍ഹാജി എന്നിവര്‍ വാര്‍ത്താസമ്മേളനത്തില്‍ സംബന്ധിച്ചു.

പോലീസുകാരെ കൈകാര്യം ചെയ്യുമെന്ന് വീണ്ടും കെഎസ്‌യു നേതാവ്

കോഴിക്കോട്: കെഎസ്‌യു പ്രവര്‍ത്തകരെ കണ്ടാല്‍ പേപ്പട്ടികളെ പോലെ കടിച്ചു കീറുന്ന പോലീസുകാരെ കൈകാര്യം ചെയ്യുമെന്ന് കെഎസ്‌യു ജില്ല പ്രസിഡന്‍റ് വി.ടി. സൂരജ്. പ്രതിപക്ഷ പോഷക സംഘടനയായതിന്‍റെ പേരില്‍ കഴിഞ്ഞ ഒന്‍പത് വര്‍ഷകാലമായി തങ്ങളെ പോലീസ് വേട്ടയാടുകയാണെന്ന് അദ്ദേഹം വാര്‍ത്താസമ്മേളനത്തില്‍ പറഞ്ഞു. പല സമരങ്ങളിലും ക്രൂരമായി മര്‍ദിച്ചിട്ടും പോലീസുകാര്‍ക്കെതിരെ നടപടിയുണ്ടായില്ല. അതേ സമയം കെഎസ്‌യു പ്രവര്‍ത്തകരെ മര്‍ദിച്ചവര്‍ക്കെതിരേ രോഷം കൊണ്ടതിന്‍റെ പേരില്‍ പരാതിയില്ലാതെ സ്വമേധയ കേസെടുത്തിരിക്കുകയാണ്. കേസിനെ ശക്തമായി നേരിടുമെന്നു വി.ടി സൂരജ് പറഞ്ഞു. കെഎസ്‌യു നേതാക്കളായ ജോയല്‍ ആന്‍റണിയെയും രാഗിനെയും ഉള്‍പ്പെടെ കഴുത്തിന് പിടിച്ച പൊലീസ് ഉദ്യോഗസ്ഥര്‍ക്കെതിരെ പരാതി ഉണ്ടായിട്ടും എന്ത് നടപടിയാണ് എടുത്തത് . ഇത്തരം പോലീസുകാര്‍ക്കെതിരെ നടപടിയെടുക്കാതെ പ്രോല്‍സാഹിക്കുന്ന സര്‍ക്കാര്‍ നയത്തെ വകവച്ചു നല്‍കാന്‍ തയ്യാറല്ല. അകാരണമായി വേട്ടയാടല്‍ തുടര്‍ന്നാല്‍ അത്തരം പൊലീസുകാരെ കൈകാര്യം ചെയ്യുമെന്നും സൂരജ് ആവര്‍ത്തിച്ചു. 2023 ഡിസംബറില്‍ ചോദ്യപേപ്പര്‍ ചോര്‍ച്ചയുമായി ബന്ധപ്പെട്ട് ഡിഡിഇ ഓഫീസില്‍ എത്തിയതിന്‍റെ പേരിലാണ് കസബ സിഐ കൈലാസ്നാഥിന്റെ നേതൃത്വത്തില്‍ മര്‍ദ്ദിച്ചത്. മര്‍ദനത്തില്‍ മജിസ്ട്രേറ്റിന് മൊഴി നല്‍കിയിരുന്നു. അന്ന് നല്‍കിയ മൊഴി പകര്‍പ്പിനുള്ള അപേക്ഷ നല്‍കിയിട്ടുണ്ട്. കസബ സ്റ്റേഷനിലെ മര്‍ദന ദൃശ്യം ലഭിക്കാന്‍ നിയമനടപടികളിലേക്ക് നീങ്ങുമെന്നും സൂരജ് വ്യക്തമാക്കി.

ക്യുആർ കോഡ് സ്കാൻ; നിര്‍ദേശങ്ങളുമായി പോലീസ്

കോഴിക്കോട്: ക്യുആർ കോഡുകൾ സ്കാൻ ചെയ്യുന്നതുവഴിയുള്ള തട്ടിപ്പുകള്‍ വര്‍ധിച്ചുവരുന്നതായി പോലീസ്. ക്യുആർ കോഡ് ഉപയോഗിച്ച് ഒരു ലിങ്ക് തുറക്കുമ്പോൾ യുആര്‍എല്‍ സുരക്ഷിതമാണെന്നും വിശ്വസനീയമായ ഉറവിടത്തിൽ നിന്നാണ് വരുന്നതെന്നും ഉറപ്പാക്കേണ്ടത് പ്രധാനമാണെന്ന് പോലീസ് ഔദ്യോഗിക ഫേസ്ബുക്ക് പോസ്റ്റില്‍ മുന്നറിയിപ്പ് നല്‍കുന്നു. ഇമെയിലിലെയും എസ്എംഎസിലെയും സംശയകരമായ ലിങ്കുകൾ ക്ലിക്കുചെയ്യുന്നത് അപകടകരമെന്നതുപോലെ ക്യുആർ കോഡുകൾ നയിക്കുന്ന യുആര്‍എല്‍കൾ എല്ലാം ശരിയാകണമെന്നില്ല. ഫിഷിംഗ് വെബ്‌സൈറ്റിലേക്ക് നിങ്ങളെ കൊണ്ടുപോകാൻ അതിനു കഴിഞ്ഞേക്കും. ക്യുആർ കോഡ് സ്കാനർ ആപ് - സെറ്റിംഗ്സിൽ ‘ഓപ്പണ്‍ യുആര്‍എല്‍എസ് ഓട്ടോമാറ്റിക്കലി'എന്ന ഓപ്ഷൻ നമ്മുടെ യുക്താനുസരണം സെറ്റ് ചെയ്യാം. നമ്മുടെ അറിവോടെ വെബ്‌സൈറ്റുകളിൽ പ്രവേശിക്കാനുള്ള അനുമതി നൽകുന്നതാണ് ഉചിതം. അറിയപ്പെടുന്ന സേവന ദാതാക്കളിൽ നിന്ന് മാത്രം ക്യു ആർ കോഡ് ജനറേറ്റ് ചെയ്യുകയാണ് വേണ്ടത്. ക്യു ആർ കോഡ് ഉപയോഗിച്ചുള്ള ഇടപാടുകൾ നടത്തിയ ഉടനെ അക്കൗണ്ടിലെ ട്രാൻസാക്ഷൻ വിശദാംശങ്ങൾ പരിശോധിച്ച് ഉറപ്പുവരുത്തുക, കസ്റ്റം ക്യുആർ കോഡ് ആപ്പുകൾ ഡൗൺലോഡ് ചെയ്യുന്നത് ഒഴിവാക്കുക, ക്യുആർ കോഡ് സ്കാൻ ചെയ്യാൻ കഴിയുന്നതും ഉപകരണ നിർമാതാവ് നൽകുന്ന വിശ്വസനീയമായ ആപ്പുകൾ ഉപയോഗിക്കുക എന്നീ നിര്‍ദേശങ്ങളും പോലീസ് നല്‍കുന്നു.

ദീപിക നമ്മുടെ ഭാഷ പദ്ധതി : പൂതംപാറ സെന്‍റ് ജോസഫ്‌സ് എല്‍പി സ്‌കൂൾ

പൂതംപാറ: പൂതംപാറ സെന്‍റ് ജോസഫ്‌സ് എല്‍പി സ്‌കൂളില്‍ ദീപിക നമ്മുടെ ഭാഷ പദ്ധതി ഉദ്ഘാടനം ചെയ്തു. സ്‌കൂള്‍ മാനേജര്‍ ഫാ. ജോസ് കരോട്ടുഴുന്നാലില്‍ സ്‌കൂള്‍ ലീഡര്‍ അര്‍ഷിതയ്ക്ക് ദീപിക പത്രം നല്‍കി ഉദ്ഘാടനം ചെയ്തു. അധ്യാപകരായ അനുപ് ജോണ്‍, ഷാര്‍ലറ്റ് സഖറിയാസ് എന്നിവരാണ് പത്രം സ്‌പോണ്‍സര്‍ ചെയ്തത്.

മൈജി ഫ്യൂച്ചര്‍ എപിക് ഷോറൂം തൊണ്ടയാട് 20ന് പ്രവര്‍ത്തനം തുടങ്ങും

കോഴിക്കോട്: കോഴിക്കോടിന് ഏറ്റവും വലിയ ശേഖരവും ലൈവ് എക്‌സ്പീരിയന്‍സും ഒരുക്കി കേരളത്തിലെ ഏറ്റവും വലിയ എപിക് ഫ്യൂച്ചര്‍ ഷോറൂമുമായി മൈജി. 20ന് കുഞ്ചാക്കോ ബോബനും മഞ്ജുവാര്യരും ചേര്‍ന്ന് കോഴിക്കോട് തൊണ്ടയാട്ടെ എപിക് ഷോറൂം ഉദ്ഘാടനം ചെയ്യും. സാധാരണ രീതിയില്‍ നിന്നു വ്യത്യസ്തമായി ഷോറൂമില്‍ ഓരോ ഉത്പന്നവും എക്‌സ്പീരിയന്‍സ് ചെയ്ത് ഷോപിംഗ് നടത്താന്‍ കഴിയുന്ന സൗകര്യമാണ് ഇവിടെ ഒരുക്കിയിരിക്കുന്നത്. ലോകത്തിലെ ഏറ്റവും പുതിയ ടെക്‌നോളജിയിലുള്ള പുതിയ ഉത്പന്നങ്ങള്‍ കുറഞ്ഞവിലയില്‍ ലഭ്യമാക്കുക എന്നതിനൊപ്പം പ്രീമിയം സര്‍വീസും വേള്‍ഡ് ക്ലാസ് ആമ്പിയന്‍സുമാണ് മൈജി ഫ്യൂച്ചര്‍ എപിക് ഷോറൂം നല്‍കുന്നതെന്നും ഭാവിയില്‍ മറ്റു ജില്ലകളിലേക്കും എപിക് ഷോറൂമുകള്‍ ആരംഭിക്കുമെന്നും മൈജി ചെയര്‍മാന്‍ എ.കെ. ഷാജി പറഞ്ഞു. മോഡുലാര്‍ കിച്ചന്‍ ലൈവ് എക്‌സ്പീരിയന്‍സും ഇവിടെ ഒരുക്കിയിട്ടുണ്ട്. 45000 ചതുരശ്ര അടി വിസ്തീര്‍ണമുള്ള കെട്ടിടത്തില്‍ 12000 ചതുരശ്ര അടി പാര്‍ക്കിംഗ് സൗകര്യം ഉണ്ട്. വൈകാതെ തന്നെ കൊച്ചിയിലും തിരുവനന്തപുരത്തും എപിക് ഷോറൂമിന് തുടക്കം കുറിക്കുമെന്നും എ.കെ. ഷാജി പറഞ്ഞു.

ജനകീയ ജാഥയ്ക്ക് സ്വീകരണം നല്‍കി

കോഴിക്കോട്: വയനാട് ചുരം ബദല്‍ റോഡ് യഥാര്‍ഥ്യമാക്കണമെന്ന് ആവശ്യപ്പെട്ട് വയനാട് ചുരം ബദല്‍ റോഡ് ആക്്ഷന്‍ കമ്മിറ്റിയും കേരള വ്യാപാരി വ്യവസായി ഏകോപന സമിതിയും നടത്തിയ ജാഥ എല്‍ഐസി കോര്‍ണറില്‍ സമാപിച്ചു. സമാപന യോഗം താമരശേരി ബിഷപ് മാര്‍ റെമീജിയോസ് ഇഞ്ചനാനിയില്‍ ഉദ്ഘാടനം ചെയ്തു. ജാഥ ക്യാപ്റ്റന്‍മാരായ ടി.ആര്‍. ഓമനക്കുട്ടന്‍, എം. ബാബുമോന്‍, അമീര്‍ മുഹമ്മദ് ഷാജി, വി.കെ. ഹുസൈന്‍ കുട്ടി, ഫൈസല്‍ വയനാട്, ഡിസിസി പ്രസിഡന്‍റ് പ്രവീണ്‍ കുമാര്‍, മുസ്ലിം ലീഗ് നേതാവ് ടി.ടി. ഇസ്മയില്‍, പുതുപ്പാടി മുന്‍ പഞ്ചായത്ത് പ്രഡിഡന്‍റ് ഗിരീഷ് ജോണ്‍, ബിജെപി ജില്ലാ സെക്രട്ടറി എം. സുരേഷ്, കെ.സി. അബു, മുസ്തഫ പാലാഴി, വയനാട് ജില്ലാ പ്രസിഡന്‍റ് ജോജിന്‍ ടി. ജോയ്, കോഴിക്കോട് ജില്ലാ ജനറല്‍ സെക്രട്ടറി വി. സുനില്‍ കുമാര്‍ , സലീം രാമനാട്ടുകര, ഷംസു എല്ലേറ്റിൽ, പി.ടി.എ. ലത്തീഫ് എന്നിവര്‍ പ്രസംഗിച്ചു. ജില്ലാ വൈസ് പ്രസിഡന്‍റ് മനാഫ് കാപ്പാട് അധ്യക്ഷത വഹിച്ചു.

പൂഴിത്തോട് - പടിഞ്ഞാറത്തറ ബദല്‍പാത : ഡിസംബറിനുള്ളില്‍ പദ്ധതിരേഖയ്ക്ക് അന്തിമരൂപം നല്‍കും: മന്ത്രി റിയാസ്

കോഴിക്കോട്: താമരശേരി ചുരം വഴി വയനാട്ടിലേക്കുള്ള ഗതാഗതപ്രതിസന്ധി പരിഹരിക്കുന്നതിനു പൂഴിത്തോട് -പടിഞ്ഞാറത്തറ ചുരം ബദല്‍പാതയ്ക്ക് വീണ്ടും ചിറകുമുളയ്ക്കുന്നു. ഡിസംബറിനുള്ളില്‍ പദ്ധതിരേഖയ്ക്ക് അന്തിമരൂപം നല്‍കാന്‍ നിര്‍ദേശിച്ചതായി മന്ത്രി പി.എ. മുഹമ്മദ് റിയാസ് നിയമസഭയില്‍ അറിയിച്ചു. കഴിഞ്ഞ വര്‍ഷം ജനവരി 30നാണ് പൂഴിത്തോട്-പടിഞ്ഞാറത്തറ റോഡുമായി ബന്ധപ്പെട്ട സബ്മിഷന്‍ ഒ.ആര്‍. കേളു നിയമസഭയില്‍ അവതരിപ്പിച്ചത്. ടി.പി. രാമകൃഷ്ണന്‍ എംഎല്‍എയും ഈ റോഡ് പ്രാവര്‍ത്തികമാകേണ്ടതിന്‍റെ അനിവാര്യത ചൂണ്ടിക്കാട്ടിയിരുന്നു. അന്ന് സഭയ്ക്ക് നല്‍കിയ ഉറപ്പാണ് ഈ റോഡിന്‍റെ സാധ്യതാപഠനം നടത്തും എന്നുള്ളതെന്ന് മ്രന്തി പറഞ്ഞു. സാധ്യതാ പഠനത്തിനായി 2024 മാര്‍ച്ച് പത്തിന് 1.5 കോടി രൂപ അനുവദിക്കുകയും ചെയ്തിരുന്നു. ആ ഘട്ടത്തില്‍ വനത്തിനകത്ത് ഇന്‍വെസ്റ്റിഗേഷന്‍ നടത്താനുള്ള അനുമതി വേണ്ടിയിരുന്നു. വനം വകുപ്പ് മന്ത്രിയുമായി നേരിട്ട് സംസാരിച്ച് വകുപ്പ് തലത്തില്‍ ഇടപെട്ടാണ് അത് സാധ്യമാക്കിയത്. നിലവില്‍ ഇന്‍വെസ്റ്റിഗേഷന്‍ പ്രവൃത്തി ഏറെക്കുറെ പൂര്‍ത്തീകരിച്ചു. കോഴിക്കോട് ജില്ലയിലും വയനാട് ജില്ലയിലും വനേതര ഭാഗത്ത് ജിപിഎസ് സര്‍വേയും വനത്തിനുള്ളില്‍ ലിഡാറും ഡ്രോണും ഉപയോഗിച്ചുള്ള സര്‍വേയുമാണ് നടത്തിയത്.പടിഞ്ഞാറത്തറ ഭാഗത്ത് വനത്തിനുള്ളില്‍ 6.5 കി.മീറ്ററും വനേതര ഭാഗത്ത് 10 കി.മീറ്ററും സര്‍വേ നടത്തി. കോഴിക്കോട് പൂഴിത്തറയില്‍ വനേതര ഭാഗത്ത് 5 കി.മീറ്ററും വനഭാഗത്ത് 3 കി.മീറ്ററോളവും സര്‍വേ നടപടികള്‍ നടത്തിയതായി മന്ത്രി പറഞ്ഞു. സര്‍വേപൂര്‍ത്തിയാകുന്നതിന്‍റെ പശ്ചാത്തലത്തില്‍ അടുത്ത ഘട്ടത്തിലേക്ക് നീങ്ങാന്‍ പൊതുമരാമത്ത് വകുപ്പ് തീരുമാനിച്ചിരിക്കുകയാണ്. ഇന്‍വെസ്റ്റിഗേഷന്‍ റിപ്പോര്‍ട്ടുകള്‍ പരിശോധിച്ച് പൂഴിത്തോട് -പടിഞ്ഞാറത്തറ റോഡിന്‍റെ താത്കാലിക അലൈന്‍മെന്‍റ് തയാറാക്കാന്‍ ഉദ്യോഗസ്ഥര്‍ക്ക് നിര്‍ദേശം നല്‍കിയിട്ടുണ്ട്. അലൈന്‍മെന്‍റിന്‍റെ അംഗീകാരത്തിനുശേഷം പദ്ധതിരേഖ കൂടി തയാറാക്കും. ഡിസംബറോടെ പദ്ധതി രേഖയ്ക്ക് അന്തിമരൂപം നല്‍കാനാണ് നിര്‍ദേശിച്ചിരിക്കുന്നത്. ഡിപിആര്‍ തയാറാക്കിയശേഷം തുടര്‍നടപടികള്‍ സ്വീകരിക്കും. വയനാട് ജില്ലയിലെ ഗതാഗതവുമായി ബന്ധപ്പെട്ട് വലിയ പരിഗണനയാണ് സര്‍ക്കാര്‍ പൊതുവെ നല്‍കിവരുന്നതെന്ന് മ്രന്തി റിയാസ് പറഞ്ഞു. ടി.പി. രാമകൃഷ്ണന്‍ എംഎല്‍എയാണ് റോഡിനെക്കുറിച്ച് നിയമസഭയില്‍ ഉന്നയിച്ചത്. സാധ്യതാ പഠനം അടിയന്തരമായി പൂര്‍ത്തീകരിക്കുന്നതിന് പൊതുമരാമത്ത് വകുപ്പ് വനംവകുപ്പിന്‍റെ സഹായത്തോടെ കേന്ദ്രഅനുമതി ലഭ്യമാക്കണമെന്നായിരുന്നു ആവശ്യം. ഇതിനുള്ള മറുപടിയിലാണ് മന്ത്രി റിയാസ് ഡിപിആര്‍ തയാറാക്കിയ ശേഷം തുടര്‍നടപടികള്‍ സ്വീകരിക്കുമെന്ന് വ്യക്തമാക്കിയത്.

മലയോര ഹൈവേ : ഭൂമി വിട്ടുനല്‍കിയവര്‍ക്ക് ഉടന്‍ സാക്ഷ്യപത്രം നല്‍കുമെന്ന്

കൂരാച്ചുണ്ട്: മലയോര ഹൈവേയുടെ നിര്‍മ്മാണത്തിന്‍റെ ഭാഗമായി കൂരാച്ചുണ്ട് ടൗണില്‍ റോഡിനായി ഭൂമി വിട്ടുനല്‍കിയ ഉടമകളില്‍ പുതിയ കെട്ടിടങ്ങള്‍ നിര്‍മ്മിക്കുന്നതിനായി അപേക്ഷ നല്‍കിയവര്‍ക്ക് ഇളവ് ലഭിക്കുന്നതിനായി റോഡ് ഫണ്ട് ബോര്‍ഡില്‍ നിന്നും നല്‍കുന്ന സാക്ഷ്യപത്രം ഉടന്‍ നല്‍കുമെന്ന് പഞ്ചായത്ത് പ്രസിഡന്‍റ് ഒ.കെ അമ്മദ് അറിയിച്ചു. റോഡ് നിര്‍മ്മാണത്തിനായി സ്ഥലം വിട്ടു നല്‍കിയ കെട്ടിട ഉടമകള്‍ക്ക് പുതിയ കെട്ടിടങ്ങള്‍ നിര്‍മ്മിക്കുന്നതിനായി പഞ്ചായത്ത് കെട്ടിട നിര്‍മ്മാണ ചട്ടങ്ങളില്‍ ഇളവ് നല്‍കുമെന്ന് ഉടമകള്‍ സമ്മതപത്രം നല്‍കിയ സമയത്ത് പഞ്ചായത്ത് അറിയിച്ചിരുന്നു. റോഡില്‍ നിന്നും മൂന്നു മീറ്റര്‍ ദൂരം പാലിച്ചുകൊണ്ട് കെട്ടിടം നിര്‍മ്മിക്കണമെന്ന ചട്ടത്തില്‍ ഇളവ് നല്‍കുമെന്നാണ് പഞ്ചായത്ത് ഉറപ്പു നല്‍കിയിരുന്നത്. എന്നാല്‍ കെട്ടിട നിര്‍മാണ ആവശ്യാര്‍ത്ഥം ഉടമകള്‍ പഞ്ചായത്തിനെ സമീപിച്ചപ്പോള്‍ ഭൂമി വിട്ടു നല്‍കിയെന്നുള്ള കെ ആര്‍ എഫ് ബി യുടെ സാക്ഷ്യപത്രം ഹാജരാക്കാന്‍ ആവശ്യപ്പെട്ടു. ഇത് ഭൂ ഉടമകളെ പ്രതിസന്ധിയിലാക്കിയിരുന്നു. ഭൂമി വിട്ടു നല്‍കിയിട്ടും ഉടമകള്‍ക്ക് കെആര്‍എഫ്ബി സാക്ഷ്യപത്രം നല്‍കാതിരുന്നതാണ് പ്രതിസന്ധി സൃഷ്ടിച്ചത്. ഇതേ തുടര്‍ന്ന് റോഡ് ഫണ്ട് ബോര്‍ഡ് ഉദ്യോഗസ്ഥരും പഞ്ചായത്ത് അധികൃതരും ചേര്‍ന്ന് അപേക്ഷ നല്‍കിയ ഏഴു പേരുടെ സ്ഥലംഇന്നലെ അളന്ന് തിട്ടപ്പെടുത്തി. രണ്ടുദിവസത്തിനുള്ളില്‍ ഇവര്‍ക്ക് സാക്ഷ്യപത്രം നല്‍കുമെന്നു പഞ്ചായത്ത് പ്രസിഡന്‍റ് പറഞ്ഞു. വൈസ് പ്രസിഡന്‍റ് വിന്‍സി തോമസ്, സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ സിമിലി ബിജു, കെആര്‍എഫ്ബി ഉദ്യോഗസ്ഥരായ പ്രോജക്ട് എന്‍ജിനീയര്‍ കെ.അദ്യുത് രാജ്, സൈറ്റ് സൂപ്പര്‍വൈസര്‍ എം.ജെ. അതുല്‍, എന്‍.കെ കുഞ്ഞമ്മദ് തുടങ്ങിയവര്‍ നേതൃത്വം നല്‍കി.

വരുന്നൂ.. കോര്‍പറേഷന്‍റെ ഷോപ്പിങ് ഫെസ്റ്റിവൽ

കോഴിക്കോട് : വ്യാപാരമേഖലയ്ക്ക് ഉണര്‍വേകാനും ടൂറിസം സാധ്യതകള്‍ പ്രോത്സാഹിപ്പിക്കുന്നതിനുമായി കോര്‍പറേഷന്‍ ഷോപ്പിങ് ഫെസ്റ്റിവല്‍ സംഘടിപ്പിക്കുന്നു. കോര്‍പറേഷന്‍റെ എല്ലാ പ്രദേശങ്ങളിലേയും വ്യാപാരികളെ ഉള്‍ക്കൊള്ളുന്ന തരത്തിലാണ് ഫെസ്റ്റിവല്‍ സംഘിടിപ്പിക്കുന്നത്. പദ്ധതി നടപ്പാക്കുന്നതിനായി ഡിപിആര്‍ തയാറാക്കുന്നതിന് ഇവന്റ് മാനേജ്മെന്‍റ് കമ്പനിയെ ചുമതലപ്പെടുത്താന്‍ മേയര്‍ ഡോ.ബീനാഫിലിപ്പിന്‍റെ അധ്യക്ഷതയില്‍ ചേര്‍ന്നകൗണ്‍സില്‍ യോഗം അംഗീകാരം നല്‍കി. ഫെസ്റ്റിവല്‍ എങ്ങനെ എപ്രകാരം നടപ്പാക്കുമെന്നത് സംബന്ധിച്ചാണ് ഡിപിആര്‍ തയാറാക്കുന്നത്. ഇതിനായി താല്‍പര്യപത്രം ഉടന്‍ ക്ഷണിക്കും. എന്നാല്‍ മേളകള്‍ നടത്തി പരചയസമ്പത്തുള്ള കോര്‍പറേഷന്‍ ഷോപ്പിങ് ഫെസ്റ്റിവല്‍ സംഘിടിപ്പിക്കാന്‍ സ്വകാര്യ കമ്പനിയില്‍ നിന്ന് ഡിപിആര്‍ തേടുന്നതിനോട് യുഡിഎഫ് അംഗങ്ങള്‍ വിയോജിച്ചു. കോര്‍പറേഷനിലെ മികച്ച ഉദ്യോഗസ്ഥരെയും സ്റ്റാന്‍റിങ് കമ്മിറ്റികളേയും ഉള്‍പ്പെടുത്തി ഡിപിആര്‍ തയാറാക്കാവുന്നതാണെന്ന് പ്രതിപക്ഷ ഉപനേതാവ് കെ. മൊയ്തീന്‍ കോയ പറഞ്ഞു. ഇവന്റ് മാനേജ്മെന്‍റ് കമ്പനി ഫെസ്റ്റിവല്‍ നടത്തുമ്പോള്‍ കോര്‍പറേഷനിലെ ജനപ്രതിനിധികള്‍ക്ക് കാര്യമായി ഇടപെടാന്‍ സാധിക്കില്ലെന്നും പ്രതിപക്ഷം ചൂണ്ടിക്കാട്ടി. എന്നാല്‍ ചരിത്രപരമായി ഏറെ പ്രാധാന്യങ്ങളുള്ള നഗരത്തിന്റെ പൈതൃകത്തിന് ഇണങ്ങുന്ന രീതിയിയില്‍ പ്രഫഷനലായി ഒരു രൂപ രേഖ തയാറാക്കുന്നതിനാണ് കമ്പനിയെ ചുമതലപ്പെടുത്തുന്നതെന്ന് മേയറും ഡെപ്യൂട്ടി മേയര്‍ സി.പി മുസാഫര്‍ അഹമ്മദും പറഞ്ഞു.

തുരങ്കപാതയ്ക്കൊപ്പം നാലുവരിപ്പാത നിർമിക്കുക ലക്ഷ്യം: എംഎൽഎ

തിരുവമ്പാടി: ആനക്കാംപൊയിൽ - കള്ളാടി- മേപ്പാടി തുരങ്കപ്പാതയുടെ പ്രവേശന കവാടമായ മറിപ്പുഴയിൽനിന്നു നാഷണൽ ഹൈവേ 66 ലേക്ക് 30 മീറ്റർ വീതിയിൽ നാലുവരിപ്പാത നിർമിക്കുകയാണ് സർക്കാരിന്‍റെ അടുത്ത ലക്ഷ്യമെന്ന് ലിന്‍റോ ജോസഫ് എംഎൽഎ അറിയിച്ചു. തുരങ്ക പാതയുടെ നിർമാണോദ്ഘാടനത്തോടനുബന്ധിച്ച് സംഘടിപ്പിച്ച സ്വാഗതസംഘം പിരിച്ചുവിടുന്ന യോഗം ഉദ്ഘാടനം ചെയ്ത് സംസാരിക്കുകയായിരുന്നു എംഎൽഎ. തുരങ്കപാതയുടെ പണി പൂർത്തീകരിക്കുന്നതോടൊപ്പം നാലുവരി പാതയുടെ പണിയും പൂർത്തീകരിക്കാനാണ് സർക്കാർ ലക്ഷ്യമിടുന്നതെന്നും എംഎൽഎ പറഞ്ഞു. ആനക്കാംപൊയിൽ പാരീഷ് ഹാളിൽ ചേർന്ന യോഗത്തിൽ തിരുവമ്പാടി പഞ്ചായത്ത് പ്രസിഡന്‍റ് ബിന്ദു ജോൺസൺ അധ്യക്ഷത വഹിച്ചു. തിരുവമ്പാടി പഞ്ചായത്ത് അംഗങ്ങളായ ബേബി കരിമ്പിൻപുരയിടത്തിൽ, രാജു അമ്പലത്തിങ്കൽ, ബ്ലോക്ക് പഞ്ചായത്ത് അംഗം ബാബു കളത്തൂർ, സെന്‍റ് മേരീസ് യുപി സ്കൂൾ പ്രധാനാധ്യാപകൻ റോയ്, ബെന്നി ആനക്കല്ലേൽ തുടങ്ങിയവർ പ്രസംഗിച്ചു.

പിക്കപ്പ് ലോറി ഓട്ടോയിൽ ഇടിച്ചു

നാദാപുരം: ഇരുമ്പ് പൈപ്പ് കയറ്റിയ പിക്കപ്പ് ലോറി അശ്രദ്ധമായി റോഡിലിറക്കി ഓട്ടോയിൽ ഇടിച്ച് രണ്ട് പേർക്ക് പരിക്ക്. പുറമേരി സ്വദേശി ഓട്ടോ ഡ്രൈവർ ബാബു, കക്കംവെള്ളി സ്വദേശിനിക്കുമാണ് പരിക്കേറ്റത്. നാദാപുരം - വടകര സംസ്ഥാന പാതയിൽ പുറമേരിയിലാണ് അപകടം. സംസ്ഥാന പാതയിൽ നിന്നും വീട്ടിലേക്ക് പൈപ്പുമായി കയറുന്നതിനിടെ വീട്ടിൽ നിന്നും മറ്റൊരു വാഹനം റോഡിലേക്ക് ഇറക്കാൻ പിക്കപ്പ് ലോറി പിറകോട്ട് ഇറക്കുകയായിരുന്നു. ഇതിനിടെ ഓട്ടോറിക്ഷ ലോറിയിൽ നിന്ന് പുറത്തേക്ക് തള്ളി നിൽക്കുന്ന ഇരുമ്പ് പൈപ്പുകളിലും ലോറിയിലും വന്നിടിക്കുകയായിരുന്നു. ഓട്ടോയുടെ മുൻഭാഗം പൂർണമായി തകർന്നു. പരിക്കേറ്റവർ നാദാപുരം ഗവ. താലൂക്ക് ആശുപത്രിയിലും, വടകര ആശുപത്രിയിലും ചികിത്സ തേടി.

കെ-സ്മാര്‍ട്ട് ഫെസിലിറ്റേഷന്‍ സെന്‍റര്‍ പ്രവര്‍ത്തനം തുടങ്ങി

കോഴിക്കോട്: കോര്‍പറേഷന്‍ ഓഫീസിലെ കെ-സ്മാര്‍ട്ട് ഫെസിലിറ്റേഷന്‍ സെന്‍ററിന്‍റെയും സാമൂഹ്യ സുരക്ഷാ പെന്‍ഷന്‍ സേവന കേന്ദ്രത്തിന്‍റെയും പ്രവര്‍ത്തനം ആരംഭിച്ചു. കോര്‍പറേഷന്‍ ഓഫീസില്‍ നിന്ന് ലഭ്യമാകുന്ന വിവിധ സേവനങ്ങള്‍ സംബന്ധിച്ച് പ്രദര്‍ശിപ്പിക്കുന്ന ഡിജിറ്റല്‍ ഇന്‍ഫര്‍മേഷന്‍ ഡിസ്‌പ്ലേ ബോര്‍ഡ് ജനസേവനകേന്ദ്രത്തിന് മുന്നില്‍ സ്ഥാപിച്ചു. ഫ്രന്‍റ് ഓഫീസില്‍ നടന്ന ചടങ്ങില്‍ മേയര്‍ ഡോ.ബീനാ ഫിലിപ്പ് ഉദ്ഘാടനം നിര്‍വഹിച്ചു. കോര്‍പറേഷന്‍ ഓഫീസില്‍ നിന്നു പൊതുജനങ്ങള്‍ക്ക് മികച്ച സേവനം ലഭ്യമാക്കുന്നതിന് കൗണ്‍സിലും ജീവനക്കാരും ഒരുമിച്ച് പ്രവര്‍ത്തിക്കുന്നതിനുള്ള ശ്രമങ്ങളുടെ ഭാഗമായാണ് ഈ സേവനം ഓഫീസില്‍ ആരംഭിച്ചതെന്ന് മേയര്‍ പറഞ്ഞു. അക്ഷയ കേന്ദ്രങ്ങള്‍ വഴി ഫീസ് നല്‍കി സമര്‍പ്പിച്ചിരുന്ന വിവിധ അപേക്ഷകള്‍ ഇനി കോര്‍പറേഷന്‍ ഓഫീസില്‍ നിന്നു സൗജന്യമായി പൊതുജനങ്ങള്‍ക്കാകെ ലഭ്യമാകും. പെന്‍ഷന്‍ സേവന കേന്ദ്രം സാധാരണക്കാരായ പെന്‍ഷന്‍ ഗുണഭോക്താക്കള്‍ക്ക് വലിയ ആശ്രയമാകും. ഡെപ്യൂട്ടി മേയര്‍ സി.പി മുസാഫര്‍ അഹമ്മദ് അധ്യക്ഷത വഹിച്ചു. സ്ഥിരം സമിതി ചെയര്‍മാന്‍മാരായ പി.ദിവാകരന്‍, പി.സി രാജന്‍, കോര്‍പറേഷന്‍ സെക്രട്ടറി കെ.യു ബിനി , അഡീഷണല്‍ സെക്രട്ടറി എന്‍.കെ ഹരീഷ് എന്നിവര്‍ സംസാരിച്ചു.

24 മണിക്കൂർ ഉപവാസം തുടങ്ങി

കൊയിലാണ്ടി: നന്തി ടൗണിൽ നാഷണൽ ഹൈവേ നിർമിക്കുന്ന 300 മീറ്റർ നീളവും 10 മീറ്റർ ഉയരവും 30 മീറ്റർ വീതിയുമുള്ള എംബാങ്ക്മെന്‍റിന് പകരം എലിവേറ്റഡ് ഹൈവേ നിർമിക്കണമെന്ന ആവശ്യവുമായി എൻഎച്ച് 66 നന്തി ജനകീയ കമ്മിറ്റി നടത്തുന്ന 24 മണിക്കൂർ ഉപവാസ സമരം പ്രശസ്ത എഴുത്തുകാരനും സാമൂഹിക പ്രവർത്തകനുമായ കൽപ്പറ്റ നാരായണൻ ഉദ്ഘാടനം ചെയ്തു. കനത്ത മഴ ലഭിക്കുന്ന പ്രദേശമായതിനാൽ മണ്ണ് കൊണ്ട് നിർമിക്കുന്ന എംബാങ്ക്മെന്‍റ് തകരാനും നന്തി ടൗണിൽ വെള്ളം കയറാനുമുള്ള സാധ്യത കൂടുതലാണ്. പരിസ്ഥിതി നശിപ്പിച്ചുകൊണ്ടുള്ള നിർമാണരീതി കടുത്ത കുടിവെള്ളക്ഷാമവും കടുത്ത ചൂടും ഉണ്ടാക്കുമെന്നും കൽപ്പറ്റ നാരായണൻ അഭിപ്രായപ്പെട്ടു. ഈ മാസം 23, 24 തീയതികളിൽ കേന്ദ്ര മന്ത്രിയുമായി നടക്കുന്ന കൂടിക്കാഴ്ചയിൽ നന്തിക്കാരുടെ ആവശ്യത്തിനായി പരമാവധി ശ്രമിക്കുമെന്ന് സമരപ്പന്തൽ സന്ദർശിച്ച വടകര എംപി ഷാഫി പറമ്പിൽ പറഞ്ഞു.

പാലിയേറ്റീവ് പ്രവർത്തനം സുവിശേഷ ദൗത്യം: റവ. ഡോ. ബിനു കുളത്തിങ്കൽ

കുളത്തുവയൽ: സ്നേഹത്തിൽ അധിഷ്ഠിതമായ സുവിശേഷ ദൗത്യമാണ് പാലിയേറ്റീവ് പ്രവർത്തനത്തിന്‍റെ കാതലെന്ന് സെന്‍റ് അൽഫോൻസാ പാലിയേറ്റീവ് ആൻഡ് ജെറിയാട്രിക് കെയർ താമരശേരി രൂപത ഡയറക്ടർ റവ. ഫാ. ഡോ. ബിനു കുളത്തിങ്കൽ പറഞ്ഞു. സംഘടനയുടെ കുളത്തുവയൽ മേഖലാ വോളണ്ടിയർ സംഗമം കുളത്തുവയൽ ഇടവക പാരീഷ് ഹാളിൽ ഉദ്ഘാടനം ചെയ്യുകയായിരുന്നു അദ്ദേഹം. ഒപ്പമുണ്ട് എന്ന വിശ്വാസവും, സങ്കടം കേൾക്കാനും സാന്ത്വനിപ്പിക്കാനും സഹായിക്കാനും തന്‍റെ അരികെ ആളുണ്ട് എന്ന ആത്മ വിശ്വാസവും കിടപ്പു രോഗികളിൽ ജനിപ്പിക്കാൻ കഴിയുന്നിടത്താണ് ഓരോ പാലിയേറ്റീവ് വോളണ്ടിയറുടേയും പ്രവർത്തന വിജയപഥമെന്നും അദ്ദേഹം കൂട്ടിച്ചേർത്തു. സെന്‍റ് അൽഫോൻസാ പാലിയേറ്റീവ് കെയറിന്‍റെ രൂപതാ പ്രസിഡന്‍റ് ബേബി സെബാസ്റ്റ്യൻ കൂനന്താനം അധ്യക്ഷത വഹിച്ചു. മേഖലാ സെക്രട്ടറി പ്രസാദ് സിംഗ് ചന്ദ്രൻകുന്നേൽ റിപ്പോർട്ട് അവതരിപ്പിച്ചു. പാലിയേറ്റീവ് പ്രവർത്തന രംഗത്ത് 20 വർഷം പൂർത്തിയാക്കിയ മേഖലാ പ്രസിഡന്‍റ് ജോസ് തോണക്കരയെ രൂപതാ ഡയറക്ടർ പൊന്നാടയണിയിച്ചും ഉപഹാരം നൽകിയും ആദരിച്ചു. പാലിയേറ്റീവ് നഴ്‌സിംഗ് രംഗത്ത് 15 വർഷത്തിലധിക കാലമായി നിസ്വാർത്ഥ സേവനം അനുഷ്ഠിക്കുന്ന നഴ്സ് സുബൈദ ബഷീറിനെ കുളത്തുവയൽ സെന്‍റ് ജോർജ് തീർത്ഥാടന കേന്ദ്രം റെക്‌ടർ റവ. ഡോ. തോമസ് കളരിക്കൽ ഉപഹാരം നൽകി ആദരിച്ചു. താമരശേരി രൂപതാ സെന്‍റ് അൽഫോൻസാ പാലിയേറ്റീവ് കെയറിന്‍റെ പ്രസിഡന്‍റായി തെരഞ്ഞെടുക്കപ്പെട്ട ബേബി സെബാസ്റ്റ്യനെ പെരുവണ്ണാമൂഴി ഫാത്തിമ മാതാ ഇടവക വികാരി ഫാ. ഏബ്രഹാം വള്ളോപ്പള്ളി പൊന്നാടയണിച്ച് ആദരിച്ചു. ജോസ്‌ തോണക്കര, ലിസി ജഗൻ മുക്കള്ളിൽ, റോസിലിൻ കല്ലൂര്, ഗ്രേസി കൊടൂർ എന്നിവർ പ്രസംഗിച്ചു. ജോസ് കുറൂർ, സ്വർഗകുമാർ, ജോഷി ചീങ്കല്ലേൽ, ബേബി പുതിയേടത്ത്, സോമൻ കപ്പലുമാക്കൽ തുടങ്ങിയവർ പരിപാടികൾക്ക്‌ നേതൃത്വം നൽകി.

തെരുവ് നായ ശല്യം ; കളക്ടറേറ്റിനു മുന്നിൽ ശ്രദ്ധ ക്ഷണിക്കൽ സമരം നടത്തി

കോഴിക്കോട്: രൂക്ഷമായ തെരുവ് നായ ശല്യം പരിഹരിക്കാൻ അടിയന്തര നടപടികൾ സ്വീകരിക്കണം എന്നാവശ്യപ്പെട്ടു കൊണ്ട് റെസിഡന്‍റ്സ് അപ്പെക്സ് കൗൺസിൽ ഓഫ് കോഴിക്കോടിന്‍റെ നേതൃത്വത്തിൽ കളക്ടറേറ്റിന് മുന്നിൽ ശ്രദ്ധക്ഷണിക്കൽ സമരം നടത്തി. കോൺഫെഡറേഷൻ ഓഫ് റെസിഡന്‍റ്സ് വെൽഫെയർ അസോസിയേഷൻ അഖിലേന്ത്യാ ജനറൽ സെക്രട്ടറി പി.സി. അജിത്‌ കുമാർ ഉദ്ഘാടനം ചെയ്തു. കോൺഫെഡറേഷൻ അഖിലേന്ത്യാ ജോയിന്‍റ് സെക്രട്ടറിയും റെസിഡന്‍റ്സ് അപ്പെക്സ് കൗൺസിൽ ജില്ലാ പ്രസിഡന്‍റുമായ എം.കെ. ബീരാൻ അധ്യക്ഷത വഹിച്ചു. ജില്ലാ ജനറൽ സെക്രട്ടറി സി. രാധാകൃഷ്ണൻ, സംസ്ഥാന വർക്കിംഗ്‌ പ്രസിഡന്‍റ് ആർ. അനിൽ കുമാർ, വനിതാ കമ്മിറ്റി സംസ്ഥാന പ്രസിഡന്‍റ് കെ. സതീദേവി, സംസ്ഥാന വൈസ് പ്രസിഡന്‍റ് കെ.പി. ജനാർദ്ദനൻ, വനിതാ കമ്മിറ്റി ജില്ലാ പ്രസിഡന്‍റ് എൻ.കെ. ലീല, എൻ. ഭാഗ്യനാഥൻ, കെ.സി. രവീന്ദ്രനാഥ്‌, എം.പി. രാമകൃഷ്ണൻ, പി. രാധാകൃഷ്ണൻ, കെ.വി. ഷാബു, സക്കീർ പാറക്കാട് പ്രസംഗിച്ചു.

ദര്‍ശനം സാംസ്‌കാരിക വേദി മുപ്പതാം വാര്‍ഷികാഘോഷം

കോഴിക്കോട്: കാളാണ്ടിത്താഴം ദര്‍ശനം സാംസ്‌കാരിക വേദിയുടെ മുപ്പതാം വാര്‍ഷികാഘോഷത്തിന്‍റെ ഭാഗമായി മെഗാ ഇവന്‍റ് 19,20 തീയതികളില്‍ നടക്കുമെന്ന് സംഘാടകര്‍ വാര്‍ത്താസമ്മേളനത്തില്‍ അറിയിച്ചു. . ദര്‍ശനത്തിന്‍റെ പ്രവര്‍ത്തനത്തില്‍ വിവിധ സേവനങ്ങളും സഹായ സഹകരണങ്ങളും നല്‍കിയ വ്യക്തികളെയും സ്ഥാപനങ്ങശളയും ആദരിച്ചുകൊണ്ടാണ് 19ന് വാര്‍ഷികാഘോഷത്തിനു തുടക്കം കുറിക്കുക. തുടര്‍ന്ന് വി.െക സുരേഷ്ബാബുവിന്‍റെ പ്രഭാഷണം നടക്കും. പ്രാദേശിക കലാകാരന്‍മാരുടെ നൃത്തസന്ധ്യയും കരോക്കെ ഗാനമേളയും ഒരുക്കിയിട്ടുണ്ട്. 20ന് നാടന്‍ പാട്ടുകാരി പ്രസീത ചാലക്കുടി സംഘടിപ്പിക്കുന്ന നാടന്‍പാട്ട് നൃത്ത ദൃശ്യവിസ്മയം അരങ്ങേറും. 21ന് സാംകാരിക സംഗമം ഒരുക്കിയതായും അവര്‍ അറിയിച്ചു.ജനറല്‍ കണവീനര്‍ കെ.സതീശന്‍, പ്രസിഡന്‍റ് പി.സിദ്ധാര്‍ഥന്‍, കെ. കുഞ്ഞാലി സഹീര്‍, സല്‍മി സത്യാര്‍ഥി എന്നിവര്‍ വാര്‍ത്താസമ്മേളനത്തില്‍ സംബന്ധിച്ചു.

യാത്രാദുരിതത്തിന് ശമനമില്ല : പയ്യോളിയിൽ "പൊടിപൂരം'

പയ്യോളി: ദേശീയപാത നിർമാണം മൂന്നുവർഷം പിന്നിടുമ്പോഴും പയ്യോളിയിലെ യാത്രാദുരിതത്തിന് ശമനമില്ല. മഴക്കാലത്ത് കുഴികൾ രൂപപ്പെടുന്നതും വാഹനങ്ങൾ മറിയുന്നതും യാത്രക്കാർ അപകടത്തിൽപ്പെടുന്നതുമാണ് ദുരിതമെങ്കിൽ മഴ മാറിയാൽ കനത്ത പൊടി ശല്യമാണ് ടൗണിൽ ആകെ ഉള്ളത്. മാസ്ക് ധരിക്കാതെ പയ്യോളിയിലൂടെയുള്ള യാത്ര അങ്ങേയറ്റം ബുദ്ധിമുട്ടാണ്. വ്യാപാരികളും ഓട്ടോ തൊഴിലാളികളും ഉൾപ്പെടെയുള്ള ടൗണിൽ നിരന്തരം ഉണ്ടാവുന്നവർക്ക് പലതരത്തിലുള്ള ആരോഗ്യ പ്രശ്നങ്ങളും വന്നു തുടങ്ങി. മഴയത്ത് കുഴിയടക്കാൻ വേണ്ടി പാറപ്പൊടി ഉപയോഗിച്ചതാണ് പ്രധാന പ്രശ്നമായി മാറുന്നത്. മഴ മാറിക്കഴിഞ്ഞാൽ ഇതിലുള്ള ചീളുകൾ ഉൾപ്പെടെയുള്ളവ പൊടിക്കൊപ്പം ശ്വാസകോശത്തിൽ വരെ എത്തുന്നുണ്ടെന്ന് ആരോഗ്യ വിദഗ്ധർ പറയുന്നു. ഇതിന് പരിഹാരം കാണാനായി കരാർ കമ്പനി ലോറിയിൽ വെള്ളം എത്തിച്ച് നനയ്ക്കുന്ന ജോലി ഏതാണ്ട് ഉപേക്ഷിച്ച മട്ടാണ്. ശ്രീകൃഷ്ണ ജയന്തി ദിനത്തിൽ വൈകുന്നേരം ആണ് പയ്യോളി ടൗണിലെ ബാരിക്കേടഡുകൾ നീക്കി ജംഗ്ഷൻ ഗതാഗതത്തിനായി തുറന്നു കൊടുത്തത്. നാലു മാസത്തിലേറെയായി അടച്ചിട്ടിരുന്ന വഴി തുറന്നുപ്പോൾ ടാറിംഗ് ചെയ്യാത്തതിനാൽ രൂക്ഷമായ പൊടി ശല്യമാണ്. നിലവിൽ നിർമിച്ചിരിക്കുന്ന മേൽപ്പാലത്തിലേക്കുള്ള അപ്പ്രോച്ച് റോഡ് നിർമിക്കുന്നതിന് വേണ്ടി റെയിൽവേ സ്റ്റേഷന് സമീപമുള്ള കിഴക്കും പടിഞ്ഞാറും ഭാഗത്തെ സർവീസ് റോഡ് ബന്ധിപ്പിക്കുന്ന ഭാഗം അടച്ചിട്ടുണ്ട്. ഇതോടെ മുഴുവൻ വാഹനങ്ങളും ജംഗ്ഷനിലൂടെ കടന്നു പോകുമ്പോൾ കൂടുതൽ പൊടി ശല്യമാണ്. ജംഗ്ഷൻ തുറന്നു കൊടുത്തതിനുശേഷം പൊടി ശല്യം കുറയ്ക്കാനായി ഒരു തവണ പോലും കരാർ കമ്പനി ഈ ഭാഗം നനച്ചിട്ടില്ലെന്ന് സമീപത്തെ വ്യാപാരിയായ "ഐശ്വര്യ ഹോം നീഡ്‌സ്' ഉടമ സതീശൻ പറയുന്നു. ഇക്കാര്യത്തിൽ നഗരസഭ ഇടപെടാതെ മാറി നിൽക്കുന്നതും രൂക്ഷമായ വിമർശനം ഉയർത്തുന്നുണ്ട്.

മനുഷ്യ-വന്യജീവി സംഘർഷ ലഘൂകരണ യജ്ഞം : വനംവകുപ്പ് ഹെൽപ് ഡെസ്ക് തുറന്നു

കൂരാച്ചുണ്ട്: കേരള വനം വകുപ്പ് മനുഷ്യ - വന്യജീവി സംഘർഷ ലഘൂകരണ യജ്ഞ പരിപാടിയുടെ ഭാഗമായി കൂരാച്ചുണ്ട് പഞ്ചായത്തിൽ ഹെൽപ് ഡെസ്ക് പഞ്ചായത്ത് ഓഫീസ് കെട്ടിടത്തിൽ തുറന്നു. പഞ്ചായത്ത് പ്രസിഡന്‍റ് ഒ.കെ. അമ്മദ് ഉദ്ഘാടനം ചെയ്തു. വൈസ് പ്രസിഡന്‍റ് വിൻസി തോമസ് അധ്യക്ഷത വഹിച്ചു. പഞ്ചായത്ത് സ്ഥിരം സമിതി അംഗങ്ങളായ സണ്ണി പുതിയകുന്നേൽ, ഡാർളി ഏബ്രഹാം, സിമിലി ബിജു, കക്കയം ഫോറസ്റ്റ് ഓഫീസ് സെക്ഷൻ ഓഫീസർ പി. ബഷീർ, ബീറ്റ് ഫോറസ്റ്റ് ഓഫീസർ എസ്. അഭിനന്ദ്, പഞ്ചായത്ത് സെക്രട്ടറി ഫാത്തിമ നിഷാന, അസിസ്റ്റന്‍റ് സെക്രട്ടറി മനിൽകുമാർ എന്നിവർ പ്രസംഗിച്ചു. വനം വകുപ്പ് ഉദ്യോഗസ്ഥരും പഞ്ചായത്ത് പ്രതിനിധികളും അടങ്ങുന്ന ടീമുകൾ ഈ ഹെൽപ് ഡെസ്ക്കുകൾ മുഖേന പൊതുജനങ്ങളിൽ നിന്നും പരാതികൾ ശേഖരിക്കുകയും ഓരോ പഞ്ചായത്തിലും ഇതിനായി ഒരു ഫെസിലിറ്റേറ്ററെ ചുമതലപ്പെടുത്തുകയും പ്രാദേശിക തലത്തിൽ പരിഹരിക്കാൻ കഴിയുന്ന പ്രശ്നങ്ങൾക്ക് ഒന്നാം ഘട്ടമായ പഞ്ചായത്ത് തലത്തിൽ പരിഹാരം കാണുകയും ചെയ്യും. ജില്ലയിൽ ഏറ്റവും കൂടുതൽ വന്യമൃഗ ശല്യം അനുഭവപ്പെടുന്ന 14 പഞ്ചായത്തുകളിലാണ് ഹെൽപ് ഡെസ്ക്കുകൾ ആരംഭിച്ചിരിക്കുന്നത്. വന്യജീവികളുമായി ബന്ധപ്പെട്ട് ബുദ്ധിമുട്ടുകൾ അനുഭവിക്കുന്ന ഏവർക്കും ഹെൽപ് ഡെസ്ക്കിൽ ബന്ധപ്പെടാവുന്നതും പരാതികൾ നൽകാവുന്നതുമാണ് കൂടരഞ്ഞി: തദ്ദേശസ്ഥാപനങ്ങളിൽ വനംവകുപ്പ് ഹെൽപ്പ് ഡെസ്ക് തുറന്നു. 30 വരെ കൂടരഞ്ഞി പഞ്ചായത്ത് ഓഫീസിൽ ഹെൽപ് ഡെസ്ക് പ്രവർത്തിക്കും. മനുഷ്യ വന്യജീവി സംഘർഷം, ആവാസവ്യവസ്ഥ പുനസ്ഥാപനം, നഷ്ടപരിഹാരം, ആശയങ്ങൾ, നയങ്ങൾ, ഗവേഷണം, നിയമങ്ങളും ചട്ടങ്ങളും, സന്നദ്ധ സംഘടനകളുടെ പ്രവർത്തനം, വനംവകുപ്പിന്‍റെ വിവിധ സേവനങ്ങൾ, ഇക്കോ ടൂറിസം, സ്വയം സന്നദ്ധ പുനരധിവാസം, വനാവകാശ നിയമം, പരിവേഷ പോർട്ടൽ, പൊതുസ്ഥലങ്ങളിലെ മരം മുറി മുതലായ വിഷയങ്ങളിലുള്ള ആവലാതികളും സംശയങ്ങളും പൊതു ജനങ്ങൾക്ക് ഹെൽപ് ഡെസ്കിൽ നൽകാവുന്നതാണ്. കഴിഞ്ഞ 31 ന് മുഖ്യമന്ത്രി ഉദ്ഘാടനം ചെയ്ത മൂന്നുഘട്ടങ്ങളിലായി നടപ്പാക്കുന്ന തീവ്രയജ്ഞ പരിപാടിയുടെ ഭാഗമായാണ് ഹെൽപ് ഡെസ്ക് തുറന്നത്. താമരശേരി: മനുഷ്യ - വന്യജീവി സംഘർഷ ലഘൂകരണ തീവ്രയജ്ഞ പരിപാടിയുടെ ഭാഗമായി കട്ടിപ്പാറ പഞ്ചായത്തിൽ പരാതി സ്വീകരിക്കുന്നതിനുള്ള ഹെൽപ് ഡെസ്ക് പ്രവർത്തനമാരംഭിച്ചു. പഞ്ചായത്ത് പ്രസിഡന്‍റ് പ്രേംജി ജെയിംസ് ഉദ്ഘാടനം ചെയ്തു. വൈസ് പ്രസിഡന്‍റ് ബിന്ദു സന്തോഷ്‌, പഞ്ചായത്ത് സെക്രട്ടറി നൗഷാദ് അലി, ജനപ്രതിനിധികളായ അഷ്റഫ് പൂലോട്, മുഹമ്മദ് ഷാഹിം, ജീൻസി തോമസ് സംഘടനാ പ്രതിനിധികളായ കരീം പുതുപ്പാടി, കെ.വി. സെബാസ്റ്റ്യൻ, മജീദ് ഇരുമ്പോട്ടു പൊയിൽ, ഷിജോ ജോൺ, പഞ്ചായത്ത് അസിസ്റ്റന്‍റ് സെക്രട്ടറി ശ്രീകുമാർ തുടങ്ങിയവർ പങ്കെടുത്തു. ഒക്ടോബർ 30 വരെയാണ് തീവ്രയജ്‌ഞ പരിപാടി സംഘടിപ്പിച്ചിരിക്കുന്നത്. ചക്കിട്ടപാറ: ചക്കിട്ടപാറ പഞ്ചായത്ത് ഓഫീസിൽ ഹെൽപ് ഡെസ്ക് ആരംഭിച്ചു. ഇതിന്‍റെപ്രചരണ പോസ്റ്റർ പ്രകാശനം ചെയ്തു. പഞ്ചായത്ത് പ്രസിഡന്‍റ് കെ. സുനിൽ ഹെൽപ് ഡെസ്ക് ഉദ്ഘാടനം ചെയ്തു.പഞ്ചായത്ത് ഭരണസമിതി അംഗം ജിതേഷ് മുതുകാട്, പെരുവണ്ണാമൂഴി ഫോറസ്റ്റ് റെയിഞ്ച് ഓഫീസർ എ.സി. സുധീന്ദ്രൻ, ഡെപ്യുട്ടി റെയിഞ്ച് ഫോറസ്റ്റ് ഓഫീസർ എസ്.എൻ. രാജേഷ്, സെക്ഷൻ ഫോറസ്റ്റ് ഓഫീസർ ടി.വി. ബിനേഷ് കുമാർ, ബീറ്റ് ഫോറസ്റ്റ് ഓഫീസർമാരായ ആർ. കൃഷ്ണപ്രിയ, ബി.വി. ബിസ്‌ന, ടി. ധീരജ്, ഫോറസ്റ്റ് വാച്ചർ പി.പി. ശോഭന, എൻഎംആർ വാച്ചർ പി.ഡി. പോൾ, ഉണ്ണി, സുനിൽ കുമാർ, രാജീവൻ, ഹനീഫ എന്നിവർ പങ്കെടുത്തു. കോടഞ്ചേരി: കോടഞ്ചേരി പഞ്ചായത്തില്‍ ആരംഭിച്ച ഹെല്‍പ് ഡെസ്‌കില്‍ പരാതി നിക്ഷേപിച്ച് പ്രസിഡന്‍റ് അലക്‌സ് തോമസ് ചെമ്പകശേരി ഉദ്ഘാടനം നിര്‍വഹിച്ചു. ബ്ലോക്ക് പഞ്ചായത്ത് അംഗം റോയി കുന്നപ്പള്ളി, ഗ്രാമപഞ്ചായത്ത് വൈസ് പ്രസിഡന്‍റ് ജമീല അസീസ്, ബീറ്റ് ഫോറസ്റ്റ് ഓഫീസര്‍ അജീഷ്, ഗ്രാമപഞ്ചായത്ത് സെക്രട്ടറി കെ. സീനത്ത്, മെമ്പര്‍മാരായ ചിന്ന അശോകന്‍, ഏലിയാമ്മ കണ്ടത്തില്‍, പിആര്‍ടി അംഗം ലൂയിസ് ജോസഫ് തുടങ്ങിയവര്‍ പങ്കെടുത്തു.

വിശ്വകര്‍മ ജയന്തി ആചരണം 17ന്

കോഴിക്കോട്: ഓള്‍ കേരള ഗോള്‍ഡ് ആന്‍ഡ് സില്‍വര്‍ മര്‍ച്ചന്‍റ്സ് അസോസിയേഷന്‍ വിശ്വകര്‍മ ജയന്തി സാമൂഹ്യ സേവന പദ്ധതികളിലൂടെ ആചരിക്കുന്നു. ഇതിന്‍റെ ഭാഗമായി രക്തദാനം, ആയിരം കുഞ്ഞുങ്ങള്‍ക്ക് സൗജന്യമായി കാതുകുത്തി സ്വര്‍ണകമ്മല്‍ നല്‍കല്‍, പഴയകാല സ്വര്‍ണതൊഴിലാളികളെ ആദരിക്കല്‍ എന്നിവ യൂണിറ്റുകളില്‍ സംഘടിപ്പിക്കും. പരിപാടിയുടെ സംസ്ഥാനതല ഉദ്ഘാടനം 17ന് ചാലപ്പുറം ബുള്ളിയന്‍ ആര്‍ക്കേഡില്‍ അസോസിയേഷന്‍ സംസ്ഥാന പ്രസിഡന്‍റ് കെ.സുരേന്ദ്രന്‍ നിര്‍വഹിക്കുമെന്ന് ഫൈസല്‍ അമീന്‍, പി. സുനില്‍കുമാര്‍, നാസര്‍ സലീന, സുധീര്‍ കളരിക്കല്‍, വി.അബ്ദുല്ല എന്നിവർ വാര്‍ത്താസമ്മേളനത്തില്‍ പറഞ്ഞു.

ടാലൻഷിയ 2.0 മെഗാ ക്വിസ് മത്സരത്തിന് ഉജ്ജ്വല തുടക്കം

താമരശേരി: താമരശേരി കോർപറേറ്റ് എഡ്യൂക്കേഷണൽ ഏജൻസി വിദ്യാർഥികൾക്കായി നടത്തി വരുന്ന ടാലൻഷിയ 2.0 മെഗാ ക്വിസ് മത്സരത്തിന് തിരുവമ്പാടി അൽഫോൻസാ കോളജിൽ തുടക്കമായി. കോഴിക്കോട്, മലപ്പുറം ജില്ലയിലെ വിവിധ സ്കൂളിൽ നിന്ന് വിദ്യാർഥികൾ മത്സരത്തിനെത്തി. ഹയർ സെക്കൻഡറി സ്കൂൾ വിദ്യാർഥികൾക്ക് രാവിലെയും എൽപി വിഭാഗത്തിന് ഉച്ചകഴിഞ്ഞുമാണ് മത്സരങ്ങൾ നടന്നത്. അൽഫോൻസാ കോളജ് മാനേജർ ഫാ. സ്കറിയ മങ്കരയുടെ അധ്യക്ഷതയിൽ നടന്ന പരിപാടി കോളജ് പ്രിൻസിപ്പൽ ഡോ. ഷൈജു ഏലിയാസ് ഉദ്ഘാടനം ചെയ്തു. അൽഫോൻസാ കോളജ് അഡ്മിനിസ്ട്രേറ്റർ ഫാ. മനോജ് കൊല്ലംപറമ്പിൽ ക്വിസ് മത്സരങ്ങൾ നിയന്ത്രിച്ചു. കോർപറേറ്റ് മാനേജർ ഫാ. ജോസഫ് വർഗീസ് പ്രസംഗിച്ചു. അധ്യാപകരായ വിപിൻ എം. സെബാസ്റ്റ്യൻ, റോഷിൻ മാത്യു, ഷിബു മാത്യു എന്നിവർ നേതൃത്വം നൽകി. രാവിലെ നടന്ന ഹയർ സെക്കൻഡറി സ്കൂൾ ഗ്രാന്‍റ് ഫിനാലെ മത്സരത്തിൽ പടത്തുകടവ് ഹോളി ഫാമിലി ഹയർ സെക്കൻഡറി സ്കൂൾ, പുല്ലൂരാംപാറ സെന്‍റ് ജോസഫ്സ് ഹയർ സെക്കൻഡറി സ്കൂൾ, കുളത്തുവയൽ സെന്‍റ് ജോർജസ് ഹയർ സെക്കൻഡറി സ്കൂൾ യഥാക്രമം ആദ്യ മൂന്നു സ്ഥാനങ്ങൾ കരസ്ഥമാക്കി. ഉച്ചയ്ക്ക് ശേഷം നടന്ന എൽപി വിഭാഗം ഗ്രാന്‍റ് ഫിനാലെ മത്സരത്തിൽ തിരുവമ്പാടി സേക്രഡ് ഹാർട്ട് യുപി സ്കൂൾ ഒന്നാം സ്ഥാനവും കട്ടിപ്പാറ നസ്രത്ത് എൽപി സ്കൂൾ മൂത്തോറ്റിക്കൽ രണ്ടാം സ്ഥാനവും നേടി. ഇന്ന് ഹൈസ്കൂൾ, യുപി വിഭാഗം മത്സരങ്ങൾ നടക്കും. സമാപന സമ്മേളനം താമരശേരി ബിഷപ് മാർ റെമീജിയോസ് ഇഞ്ചനാനിയിൽ ഉദ്ഘാടനം ചെയ്യും. കോർപറേറ്റ് മാനേജർ ഫാ.ജോസഫ് വർഗീസ് അധ്യക്ഷത വഹിക്കും. സംസ്ഥാന ചലച്ചിത്ര അക്കാദമി ചെയർമാൻ പ്രേംകുമാർ മുഖ്യാതിഥിയായി പങ്കെടുക്കും. ചലചിത്ര അക്കാദമി റീജണൽ കോഓർഡിനേറ്റർ നവീന വിജയൻ പ്രസംഗിക്കും.

മദ്യപിച്ച് പോലീസ് സ്റ്റേഷൻ ആക്രമിച്ച യുവാവ് പിടിയിൽ

മുക്കം: മുക്കത്തെ സ്വകാര്യ ബാറിൽ നിന്ന് മദ്യപിച്ച് പോലീസ് സ്റ്റേഷനിൽ അതിക്രമിച്ചു കയറി അക്രമം നടത്തിയ യുവാവ് പിടിയിൽ. ചൊവ്വാഴ്ച പുലർച്ചെ രണ്ടരയോടെയാണ് സംഭവം. മലപ്പുറം ജില്ലയിലെ കിഴിശേരി തൃപ്പനച്ചി സ്വദേശി അബൂബക്കർ സിദ്ധീഖാണ് ആക്രമണം നടത്തിയത്. ഇയാൾ മദ്യപിച്ച് പുറത്തിറങ്ങിയ ശേഷം താൻ വന്ന വാഹനംവച്ച സ്ഥലം മറന്നുപോവുകയും അത് അന്വേഷിച്ച് നടക്കുകയുമായിരുന്നു. അതിനിടെയാണ് 400 മീറ്ററോളം അപ്പുറത്തുള്ള പോലീസ് സ്റ്റേഷൻ പരിസരത്തെത്തിയത്. ആദ്യം ചരൽ വാരി എറിയുകയും പോലീസുകാർ പിടിച്ചു മാറ്റുന്നതിനിടയിൽ ജീപ്പിന് കല്ലെറിഞ്ഞ് നാശനഷ്ടങ്ങൾ വരുത്തുകയുമായിരുന്നു. ഔദ്യോഗിക കൃത്യനിർവഹണം തടസപ്പെടുത്തുകയും സ്റ്റേഷൻ പോർച്ചിൽ നിർത്തിയിട്ട വാഹനത്തിന്‍റെ ചില്ല് അടിച്ചുപൊളിച്ച് നാശനഷ്ടം വരുത്തുകയും ചെയ്തിൽ വിവിധ വകുപ്പുകൾ അനുസരിച്ച് കേസ് രജിസ്റ്റർ ചെയ്തിട്ടുണ്ട്.

തലയടിച്ചു പൊട്ടിക്കും; പോലീസിനെതിരേ ഭീഷണിയുമായി കെഎസ്‌യു നേതാവ്

കോഴിക്കോട്: പോലീസ് ഉദ്യോഗസ്ഥര്‍ക്കതിരേ ഭീഷണി പ്രസംഗവുമായി കെഎസ്‌യു കോഴിക്കോട് ജില്ലാ പ്രസിഡന്‍റ് വി.ടി. സൂരജ്. സമരങ്ങളെ തടഞ്ഞാല്‍ പോലീസിന്‍റെ തലയടിച്ചുപൊട്ടിക്കുമെന്നായിരുന്നു സൂരജിന്‍റെ പ്രസംഗം. പോലീസ് അതിക്രമങ്ങള്‍ക്കെതിരേ ഡിസിസി പ്രസിഡന്‍റ് പ്രവീണ്‍ കുമാറിന്‍റെ നേതൃത്വത്തില്‍ സംഘടിപ്പിച്ച സമരത്തിന്‍റെ വേദിയിലായിരുന്നു സൂരജിന്‍റെ വിവാദ പ്രസംഗം. കോണ്‍ഗ്രസിന്‍റെ കണ്ണിലെ കരടായ കോഴിക്കോട് ടൗണ്‍ മുന്‍ എസിപി ബിജുരാജിന്‍റെയും കസബ മുന്‍ സിഐ കൈലാസ് നാഥിന്‍റെയും തലയടിച്ച് പൊട്ടിക്കുമെന്നാണ് പ്രസംഗത്തിലെ സൂചന. കെഎസ്‌യു വിന്‍റെ സമരങ്ങളെ ഇനി തടയാന്‍ വന്നാല്‍ ഉദ്യോഗസ്ഥരെ ആക്രമിക്കാന്‍ യൂത്ത്‌കോണ്‍ഗ്രസ്, കെഎസ്‌യു നേതാക്കള്‍ തയാറാകുമെന്നതില്‍ സംശയം വേണ്ടെന്നും സൂരജ് പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]