ADVERTISEMENT

ADVERTISEMENT

ഏകദിന റാന്പ് എംഎസ്എംഇ ക്ലിനിക് സംഘടിപ്പിച്ചു

കൽപ്പറ്റ: സൂക്ഷ്മ, ചെറുകിട, ഇടത്തരം സംരംഭങ്ങളുടെ പ്രകടനം വളർത്തുകയും ത്വരിതപ്പെടുത്തുകയും ചെയ്യുന്നതിനായി ലോക ബാങ്ക്, കേന്ദ്ര എംഎസ്എംഇ വകുപ്പ്, കേരള വ്യവസായ വകുപ്പ് എന്നിവ സംയുക്തമായി ജില്ലാ വ്യവസായ കേന്ദ്രത്തിന്‍റെ നേതൃത്വത്തിൽ ഏകദിന റാന്പ് എംഎസ്എംഇ ക്ലിനിക് സംഘടിപ്പിച്ചു.

കൽപ്പറ്റ ഗ്രീൻഗേറ്റ് ഹോട്ടലിൽ അസിസ്റ്റന്‍റ് കളക്ടർ പി.പി. അർച്ചന ഉദ്ഘാടനം ചെയ്തു. സംരംഭകരോട് ഏറെ ബഹുമാനമുണ്ടെന്നും വരും കാലങ്ങളിൽ എംഎസ്എംഇ യൂണിറ്റുകളുടെ പേരിൽ ജില്ല അറിയപ്പെടണമെന്നും അസിസ്റ്റന്‍റ് കളക്ടർ പറഞ്ഞു. ഇന്ത്യൻ സന്പദ് വ്യവസ്ഥയിൽ പ്രധാന പങ്ക് വഹിക്കുന്ന എംഎസ്എംഇ മേഖലയുടെ വളർച്ചയ്ക്കും പ്രതിരോധശേഷി വർധിപ്പിക്കുന്നതിനും മത്സര ശേഷി വളർത്തുന്നതിനും എംഎസ്എംഇകൾക്കുള്ള പിന്തുണ കൂടുതൽ വർധിപ്പിക്കുന്നതിനായി കേന്ദ്ര, സംസ്ഥാന സർക്കാരുകളുടെ ആഭിമുഖ്യത്തിൽ നടപ്പാക്കുന്ന പദ്ധതിയാണ് റൈസിംഗ് ആൻഡ് ആക്സലറേറ്റിംഗ് എംഎസ്എംഇ പെർഫോമൻസ് (റാന്പ്).

എംഎസ്എംഇകൾ ആരംഭിക്കുന്നതിന് ആവശ്യമായ മാർഗനിർദേശം നൽകുന്നതിനും ലൈസൻസിംഗ് ജിഎസ്ടി, വിപണനം, ധനസഹായം, കയറ്റുമതി, ബാങ്കിംഗ്, ടെക്നോളജി എന്നീ മേഖലകളിലെ വിദഗ്ധരുടെ സേവനം ലഭ്യമാക്കുകയും ചെയ്യുക എന്നതാണ് റാന്പ് പരിപാടിയുടെ ഭാഗമായുള്ള എംഎസ്എംഇ ക്ലിനിക് ലക്ഷ്യമാക്കുന്നത്.

ഇതിന്‍റെ ഭാഗമായി ഭക്ഷ്യസുരക്ഷ, ജിഎസ്ടി, ലീഗൽ മെട്രോളജി, മലിനീകരണ നിയന്ത്രണ ബോർഡ് എന്നിവയുമായി ബന്ധപ്പെട്ട വിഷയങ്ങളിൽ വിദഗ്ധർ ക്ലാസുകൾ നൽകി. ജില്ലാ വ്യവസായ കേന്ദ്രം ജനറൽ മാനേജർ കെ.എ. ജിഷ അധ്യക്ഷത വഹിച്ചു.

ജില്ലാ വ്യവസായ കേന്ദ്രം അസിസ്റ്റന്‍റ് ഡയറക്ടർ അശ്വിൻ പി. കുമാർ, ജില്ലാ പ്രസിഡന്‍റ് പി.ഡി. സുരേഷ് കുമാർ, ജില്ലാ വ്യവസായ കേന്ദ്രം മാനേജർ(ക്രഡിറ്റ്) പി.എസ്. കലാവതി, ജില്ലാ വ്യവസായ കേന്ദ്രം ഡെപ്യൂട്ടി രജിസ്ട്രാർ വി.എൻ. സജിത്ത് കുമാർ, വകുപ്പ് ഉദ്യോഗസ്ഥർ, വിവിധ മേഖലകളിലെ സംരംഭകർ എന്നിവർ പങ്കെടുത്തു.

ADVERTISEMENT

മിനി ബസ് സർവീസ് പുനരാരംഭിക്കണമെന്ന്

ഗൂഡല്ലൂർ: ദേവർശോല മേഖലയിൽ മിനി ബസ് സർവീസ് പുനരാരംഭിക്കണമെന്ന് കൗണ്‍സിലർ റസീന, ഫൈസൽ ബാബു, സായി പ്രിയ, ചന്ദ്രശേഖർ എന്നിവരുടെ നേതൃത്വത്തിലുള്ള സംഘം ജില്ലാ കളക്ടർക്ക് നൽകിയ നിവേദനത്തിൽ ആവശ്യപ്പെട്ടു. ഗൂഡല്ലൂരിൽ നിന്ന് ചെളുക്കാടി, ആലവയൽ, കെണിയംവയൽ, ത്രീഡിവിഷൻ, വാച്ചികൊല്ലി, ദേവർശോല വഴി സർവീസ് നടത്തിയിരുന്ന മിനി ബസ് കഴിഞ്ഞ ഒന്പതാം തീയതി മുതൽ നിർത്തിവച്ചിരുന്നു. ഇത്കാരണം യാത്രക്കാർ ദുരിതത്തിലായിരിക്കുകയാണ്. സർവീസ് പുനരാരംഭിക്കുന്നതിന് ആവശ്യമായ നടപടികൾ സ്വീകരിക്കണമെന്ന് നിവേദനത്തിൽ ചൂണ്ടികാട്ടി.

സംസ്ഥാനത്ത് ഒന്നാമതായി വടുവൻചാൽ ജിഎച്ച്എസ്എസിന്‍റെ പച്ചത്തുരുത്ത്

കൽപ്പറ്റ: കാലാവസ്ഥ സന്തുലിതമാക്കി ജൈവവൈവിധ്യങ്ങളുടെ അതിജീവനത്തിനായി നിർമിച്ച വടുവൻചാൽ ജിഎച്ച്എസ്എസിന്‍റെ "ഹരിതാരണ്യം’ പച്ചത്തുരുത്തിന് സംസ്ഥാനത്തെ വിദ്യാലയങ്ങളിലെ മികച്ച പച്ചത്തുരുത്തിനുള്ള ഒന്നാംസ്ഥാനം. സംസ്ഥാനത്തെ മികച്ച മുളന്തുരുത്തുകളിൽ ഒന്നാമതെത്തിയത് വെങ്ങപ്പള്ളി ഗ്രാമപ്പഞ്ചായത്തിന്‍റെ ചോലപ്പുറം മുളന്തുരുത്താണ്. ഇവയുൾപ്പടെ സംസ്ഥാനത്തെ മികച്ച പച്ചത്തുരുത്തുകൾക്ക് ഹരിതകേരളം മിഷൻ നൽകുന്ന അംഗീകാരങ്ങളിൽ സംസ്ഥാന തലത്തിൽ അഞ്ച് അംഗീകാരങ്ങൾ വയനാട് നേടി. തദ്ദേശസ്ഥാപന തലത്തിൽ തൊണ്ടർനാട് ഗ്രാമപഞ്ചായത്തിന്‍റെ "ശാന്തിവനം’ പച്ചത്തുരുത്ത് അഞ്ചാം സ്ഥാനം നേടി. പച്ചത്തുരുത്ത് ഒരുക്കിയ സ്ഥാപനങ്ങളിൽ എടവക ഗ്രാമപ്പഞ്ചായത്തിലെ നല്ലൂർനാട് കാൻസർ കെയർ സെന്‍ററിലെ "തൈതാൽ’ പച്ചത്തുരുത്ത് മൂന്നാം സ്ഥാനം നേടി. പച്ചത്തുരുത്ത് ഉണ്ടാക്കുന്നതിലും പരിപാലിക്കുന്നതിലും അന്പുകുത്തി ഗവ.എൽപി സ്കൂളിലെ പാർട്ട് ടൈം സ്വീപ്പർ കെ.സി. പീറ്ററിനെ ആദരിച്ചു.

യുവാവിന്‍റെ ആക്രമണത്തിൽ പോലീസുകാർക്ക് പരിക്ക്

കൽപ്പറ്റ: ഭാര്യയെയും ഭാര്യാമാതാവിനെയും മർദിച്ചെന്ന പരാതിയിൽ അന്വേഷണത്തിനെത്തിയ പോലീസുകാരെ യുവാവ് ആക്രമിച്ചു. മേപ്പാടി എസ്ഐ പി. രജിത്ത്, സിവിൽ പോലീസ് ഓഫീസർ എഫ്. പ്രമോദ് എന്നിവരെയാണ് തൃക്കൈപ്പറ്റ മാമലക്കുന്ന് സദക്കത്തുള്ള(39)ആക്രമിച്ചത്. പരിക്കേറ്റ എസ്ഐയും സിപിഒയും ആശുപത്രിയിൽ ചികിത്സ തേടി. പോലീസുമായുള്ള ബലപ്രയോഗത്തിനിടെ പരിക്കേറ്റ സദക്കത്തുള്ളയും ചികിത്സയിലാണ്. 15ന് രാത്രിയാണ് സംഭവം. ഭർത്താവ് സദക്കത്തുള്ള തന്നെയും മാതാവിനെയും ആക്രമിക്കുകയാണെന്ന് അറിയിച്ചും രക്ഷിക്കണമെന്ന് ആവശ്യപ്പെട്ടും എമർജൻസി നന്പറായ 112ൽ ബിന്ദു എന്ന യുവതി വിളിച്ചു പറഞ്ഞതുപ്രകാരമാണ് പോലീസ് മാമലക്കുന്നിലെത്തിയത്. വഴിയിൽ കരഞ്ഞുനിൽക്കുകയായിരുന്ന ബിന്ദുവിനെയും കൂട്ടി പോലീസ് വീട്ടിൽ എത്തിയപ്പോൾ ബഹളം വച്ച് അക്രമാസക്തനായി സിറ്റൗട്ടിൽ നിൽക്കുകയായിരുന്നു സദക്കത്തുള്ള. അനുനയിപ്പിക്കുന്നതിനായി സംസാരിക്കുന്നതിനിടെ സദക്കത്തുള്ള വീണ്ടും അക്രമാസക്തനായി എസ്ഐയുടെ കൈപിടിച്ചു തിരിച്ചു. ഇത് തടയാൻ ശ്രമിച്ച സിപിഒയെ മുഖത്ത് മുഷ്ടിചുരുട്ടി ഇടിച്ചതിനുശേഷം വയറിന് തൊഴിച്ചുവീഴ്ത്തി. നിലത്തുകിടന്ന കല്ലെടുത്തും സിപിഒയെ ആക്രമിക്കാൻ ശ്രമിച്ചു. തുടർന്ന ബലം പ്രയോഗിച്ച് കീഴ്പ്പെടുത്തി നാട്ടുകാരന്‍റെ സഹായത്തോടെയാണ് ഇയാളെ പോലീസ് കൈനാട്ടി ജനറൽ ആശുപത്രിയിൽ എത്തിച്ച് വൈദ്യപരിശോധനയ്ക്കു വിധേയനാക്കിയത്. വീട്ടിലെത്തിയ പോലീസ് കാര്യം എന്താണെന്നുപോലും തിരക്കാതെ തന്നെ മർദിക്കുകയായിരുന്നുവെന്ന് സദക്കത്തുള്ള ആശുപത്രിയിൽ മാധ്യമപ്രവർത്തകരുമായി സംസാരിക്കവേ ആരോപിച്ചു. photo: തൃക്കൈപ്പറ്റ മാമലക്കുന്നിൽ യുവാവിന്‍റെ ആക്രമണത്തിൽ പരിക്കേറ്റ സിപിഒ പ്രമോദ്.

പ്രിയങ്ക ഗാന്ധി ചെട്ട്യാലത്തൂർ ഉന്നതി സന്ദർശിച്ചു

ചെട്ട്യാലത്തൂർ: സുൽത്താൻ ബത്തേരി നിയോജകമണ്ഡലത്തിലെ ചെട്ട്യാലത്തൂർ ഉന്നതിയിൽ പ്രിയങ്ക ഗാന്ധി എംപി സന്ദർശനം നടത്തി. അടിസ്ഥാന സൗകര്യങ്ങളില്ലാത്തതും വൈദ്യുതി, ഗതാഗത പ്രശ്നങ്ങൾ തുടങ്ങിയ വിഷയങ്ങൾ പ്രദേശവാസികൾ പ്രിയങ്കയെ അറിയിച്ചു. പുനരധിവാസ പാക്കേജ് അപര്യാപ്തമാണെന്നും നഷ്ടപരിഹാരത്തുക ഉയർത്തണമെന്നും അവർ പ്രിയങ്ക ഗാന്ധിയോട് ആവശ്യപ്പെട്ടു.

കൂട് പൊളിച്ച് പുലി കോഴികളെ കൊന്നു

വനംവകുപ്പ് നിരീക്ഷണ കാമറ സ്ഥാപിച്ചു സുൽത്താൻ ബത്തേരി: മാടക്കരയിൽ പുലി കോഴികളെ കൊന്നുതിന്നു. മംഗലം ചന്പാടത്ത് ഗിരീഷ്കുമാറിന്‍റെ എട്ട് കോഴികളെയാണ് ഇന്നലെ പുലർച്ചെ പുലികൊന്നുതിന്നത്. സംഭവത്തെ തുടർന്ന് വനപാലകർ സ്ഥലത്ത് കാമറ സ്ഥാപിച്ചു. ഇന്നലെ പുലർച്ചെ രണ്ടോടെയാണ് സംഭവം. വീടിനോട് ചേർന്നുള്ള കോഴിക്കൂട്ടിൽ നിന്ന് കരച്ചിൽകേട്ട് നോക്കിയപ്പോൾ കൂടിന്‍റെ ഒരുഭാഗം പൊളിഞ്ഞുകിടക്കുന്ന നിലയിലായിരിന്നു. എട്ട് കോഴികളെയും കാണാനില്ലായിരുന്നു. കഴിഞ്ഞദിവസം പ്രദേശത്ത് പുലിയുടെ കാൽപ്പാടുകൾ കണ്ടതിനാൽ ഭീതികാരണം പുറത്തിറങ്ങിയില്ല. നേരം പുലർന്നശേഷം സമീപ കൃഷിയിടങ്ങൾ പരിശോധിച്ചപ്പോൾ ഒരു കോഴിയെ തലയില്ലാത്ത നിലയിൽ കണ്ടെത്തി. വനപാലകർ സ്ഥലത്തെത്തി പരിശോധ നടത്തി പുലിയാണ് കോഴിക്കൂട് തകർത്ത് കോഴികളെ പിടികൂടിയതെന്ന് സ്ഥിരീകരിക്കുകയും നിരീക്ഷണ കാമറ സ്ഥാപിക്കുകയും ചെയ്തു. രണ്ട് ദിവസം മുന്പ് പ്രദേശവാസിയായ മംഗലം കുറ്റിപറിച്ചേൽ ജോണിയുടെ നായയെ പിടികൂടാനും ശ്രമിച്ചിരുന്നു. സമീപത്തെ മണ്‍പാതയിൽ പുലിയുടെ കാൽപ്പാടുകളും കണ്ടിരുന്നു. കോഴികളെ പുലി പിടികൂടിയതോടെ പ്രദേശവാസികൾ ഭീതയിലാണ്. പുലിഭീതിയിൽ പ്രദേശത്തെ ക്ഷീരകർഷകരും പ്രതിസന്ധിയിലാണ്. കൃഷിയിടങ്ങളിൽ തൊഴിലെടുക്കാനും പേടിയാണ്. സമീപത്തെ എസ്റ്റേറ്റ് കാടുമൂടികിടക്കുന്നതാണ് പുലി പ്രദേശത്ത് തന്പടിക്കാൻ കാരണമായി ചൂണ്ടിക്കാണിക്കുന്നത്. അതിനാൽ എസ്റ്റേറ്റിലെയും സമീപത്തെും കാട് വെട്ടാനുള്ള നടപടിവേണമെന്നും പ്രദേശത്ത് കൂട് വച്ച് പുലിയെ പിടികൂടി ഭീതി ഒഴിവാക്കണമെന്നും നാട്ടുകാർ ആവശ്യപ്പെട്ടു.

രണ്ടാം ലോകമഹായുദ്ധത്തിൽ പങ്കെടുത്ത സൈനികരുടെ ഭാര്യമാരിൽ 48 പേർ വയനാട്ടിൽ ജീവിക്കുന്നു

കൽപ്പറ്റ: 1939 സെപ്റ്റംബറിൽ ആരംഭിച്ച് 1945 സെപ്റ്റംബർ വരെ നീണ്ട രണ്ടാം ലോകമഹായുദ്ധത്തിൽ പങ്കെടുത്ത സൈനികരുടെ ഭാര്യമാരിൽ 48 പേർ വയനാട്ടിൽ ജീവിക്കുന്നു. എക്സ് സർവീസ്മെൻ കോണ്‍ട്രിബ്യൂട്ടറി ഹെൽത്ത് സ്കീം കൽപ്പറ്റ ഓഫീസ് ഇൻ ചാർജ് ലെഫ്.കേണൽ വി.ഡി. ചാക്കോയുടെ നേതൃത്വത്തിലാണ് ഇത്രയും പേരെ കണ്ടെത്തിയത്. 87 മുതൽ 107 വരെ വയസുള്ളവർ ഇക്കൂട്ടത്തിലുണ്ട്. വയനാട് കോളനൈസേഷൻ സ്കീം(ഡബ്ല്യുസിഎസ്)ഉൾപ്പെടുന്ന ബത്തേരി താലൂക്കിലാണ് ഇവരിൽ അധികവും. രണ്ടാം ലോകമഹായുദ്ധത്തിൽ പങ്കെടുത്ത സൈനികരുടെ പുനരധിവാസത്തിനു നടപ്പാക്കിയതാണ് ഡബ്ല്യുസിഎസ്). ലോക യുദ്ധത്തിൽ പങ്കെടുത്ത സൈനികരിൽ ആരും ജില്ലയിൽ ജീവിച്ചിരിപ്പില്ല. മൂന്നുമാസത്തിലധികം പരിശ്രമിച്ചാണ് രണ്ടാം ലോകമഹായുദ്ധ പോരാളികളുടെ ഭാര്യമാരിൽ ഇത്രയും പേർ ജീവിച്ചിരിക്കുന്നതായി കണ്ടെത്തിയതെന്നു ലെഫ്.കേണൽ വി.ഡി. ചാക്കോ പറഞ്ഞു. ഇവരെ വയനാട് ചേംബർ ഓഫ് കൊമേഴ്സ്, വിമുക്തഭടൻമാരുടെ സംഘടന, ജില്ലാ സൈനിക ബോർഡ്, എക്സ് സർവീസ്മെൻ കോണ്‍ട്രിബ്യൂട്ടറി ഹെൽത്ത് സ്കീം തുടങ്ങിയവയുടെ നേതൃത്വത്തിൽ 21ന് രാവിലെ 10ന് ബത്തേരി മുനിസിപ്പിൽ ഓഡിറ്റോറയിത്തിൽ ആദരിക്കും. ചടങ്ങ് പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു ഉദ്ഘാടനം ചെയ്യും. ഐ.സി. ബാലകൃഷ്ണൻ എംഎൽഎ അധ്യക്ഷത വഹിക്കും. ജില്ലാ കളക്ടർ ഡി.ആർ. മേഘശ്രീ, ബത്തേരി മുനിസിപ്പൽ ചെയർമാൻ ടി.കെ. രമേഷ്, കെഎസ്ഇഎസ്എൽ ജില്ലാ പ്രസിഡന്‍റ് പി.പി. മത്തായിക്കുഞ്ഞ് തുടങ്ങിയവർ പ്രസംഗിക്കും. ആദരണച്ചടങ്ങിനു മുന്പ് രണ്ടാംലോക മഹായുദ്ധവുമായി ബന്ധപ്പെട്ട ഡോക്യുമെന്‍ററി പ്രദർശനം, വീര വനിതകളുടെ ജീവിതാനുഭവങ്ങൾ പങ്കുവയ്ക്കൽ എന്നിവ ഉണ്ടാകുമെന്ന് ലെഫ്.കേണൽ വി.ഡി. ചാക്കോ, കേരള സ്റ്റേറ്റ് എക്സ് സർവീസസ് ലീഗ്(കെഎസ്ഇഎസ്എൽ)ജില്ലാ സെക്രട്ടറി, വയനാട് ചേംബർ ഓഫ് കൊമേഴ്സ് പ്രസിഡന്‍റ് ജോണി പാറ്റാനി, സെക്രട്ടറി കെ.ഐ. വർഗീസ് എന്നിവർ പറഞ്ഞു.

വിജ്ഞാന കേരളം: പ്രാദേശിക തൊഴിൽമേള സംഘടിപ്പിച്ചു

കൽപ്പറ്റ: തൊഴിൽ അന്വേഷകരായ അഭ്യസ്ഥവിദ്യർക്ക് തൊഴിൽ അവസരങ്ങൾ ഒരുക്കുക എന്ന ലക്ഷ്യത്തോടെ വൈത്തിരി ഗ്രാമപ്പഞ്ചായത്തിൽ വിജ്ഞാന കേരളം പ്രാദേശിക തൊഴിൽമേള സംഘടിപ്പിച്ചു. വിവിധ കന്പനികളെ പ്രതിനിധീകരിച്ച് 15ലധികം തൊഴിൽ ദാതാക്കളും 250 ഓളം തൊഴിൽ അന്വേഷകരും പങ്കെടുത്തു. സെന്‍റ് ജോസഫ്സ് പാരിഷ് ഹാളിൽ സംഘടിപ്പിച്ച പരിപാടി ഗ്രാമപ്പഞ്ചായത്ത് പ്രസിഡന്‍റ് എം.വി. വിജേഷ് ഉദ്ഘാടനം ചെയ്തു. ഗ്രാമപഞ്ചായത്ത് വൈസ് പ്രസിഡന്‍റ് ഉഷ ജ്യോതിദാസ് അധ്യക്ഷത വഹിച്ചു. വിജ്ഞാന കേരളം ജില്ലാ ഓഫീസർ സി.എസ്. ശ്രീജിത്ത്, കുടുംബശ്രീ ജില്ലാ മിഷൻ ഡിപിഎം ജൻസണ്‍, സിഡിഎസ് ചെയർപേഴ്സണ്‍ ഷാജിമോൾ, ആസൂത്രണ സമിതി ഉപാധ്യക്ഷൻ ആർ. രവിചന്ദ്രൻ, ആരോഗ്യ സ്റ്റാൻഡിംഗ് കമ്മിറ്റി ചെയർമാൻ എൻ.ഒ. ദേവസ്‌സി, വികസനകാര്യ സ്റ്റാൻഡിംഗ് കമ്മിറ്റി ചെയർമാൻ കെ.കെ. തോമസ്, അംഗങ്ങളായ വി.എസ്. സുജിന, മേരിക്കുട്ടി മൈക്കിൾ, ബി. ഗോപി, പി.കെ. ജയപ്രകാശ്, ഗ്രാമപ്പഞ്ചായത്ത് സെക്രട്ടറി കെ.എസ്. സജീഷ്, കുടുംബശ്രീ ചെയർപേഴ്സണ്‍മാരായ അഷിത, ഷബ്ന, വിദ്യ, രജിത എന്നിവർ പങ്കെടുത്തു.

കൊലയാളി ആനയെ പിടികൂടാൻ ഉത്തരവിട്ടു

ഗൂഡല്ലൂർ: ഓവാലി പഞ്ചായത്തിൽ ഭീതി പരത്തുന്ന കൊലയാളി ആനയായ രാധാകൃഷ്ണനെ പിടികൂടാൻ ഉത്തരവിട്ടു. ചെന്നൈ പിസിസിഎഫ് രാകേഷ്കുമാർ കോഗ്രയാണ് ആനയെ മയക്കുവെടിവച്ച് പിടികൂടാൻ ഉത്തരവ് പുറപ്പെടുവിച്ചത്. ശ്രീനിവാസൻ, ബൊമ്മൻ എന്നി രണ്ട് കുംകിയാനകളെ ഇവിടെ എത്തിച്ചിട്ടുണ്ട്. മഞ്ചേശ്വരി പ്ലാന്‍റേഷൻ തേയില എസ്റ്റേറ്റിലെ ഗ്ലൻമൻസിലാണ് ഇപ്പോൾ കാട്ടുകൊന്പൻ തന്പടിച്ചിരിക്കുന്നത്. ഈ ആന പത്ത് വർഷത്തിനിടെ 13 മനുഷ്യരുടെ ജീവനുകളാണ് അപഹരിച്ചത്. 15 വീടുകൾ ആക്രമിക്കുകയും നിരവധി പേർക്ക് പരിക്കേൽക്കുകയും ചെയ്തിട്ടുണ്ട്. ഏറ്റവും ഒടുവിൽ ബാർവുഡ് സ്വദേശിയായ പി.പി. മെഹ്ബൂബ് എന്ന ഷംസുദ്ധീൻ (38) ആണ് കൊല്ലപ്പെട്ടത്. കൂടെയുണ്ടായിരുന്ന എസ്റ്റേറ്റ് ഫീൽഡ് ഓഫീസർ ചെല്ലദുരൈക്ക് പരിക്കേൽക്കുകയും ചെയ്തിരുന്നു. കൊലയാളി കൊന്പനെ പിടികൂടാൻ കാലതാമസം നേരിട്ടതിൽ ജനങ്ങളുടെ പ്രതിഷേധം ശക്തമായിരുന്നു.

ചിപ്പിലിത്തോട്-തളിപ്പുഴ ബൈപാസ്: ജനകീയ സമരജാഥ തുടങ്ങി

സുൽത്താൻ ബത്തേരി: വരണം ചുരം ബൈപാസ് മാറണം ദുരിതയാത്ര എന്ന മുദ്രാവാക്യവുമായി ചുരം ബൈപ്പാസ് ആക്ഷൻ കമ്മിറ്റിയും കേരളാ വ്യാപാരി വ്യവസായി ഏകോപനസമിതിയും സംയുക്തമായി ബത്തേരി മുതൽ കോഴിക്കോട് വരെ നടത്തുന്ന ജനകീയ സമരജാഥയ്ക്ക് ബത്തേരിയിൽ തുടക്കം കുറിച്ചു. കുരുക്കില്ലാത്ത ചുരം റോഡിന്‍റെ വീണ്ടെടുപ്പിനായി സമാന്തരമായി ചിപ്പിലിതോട് മരുതിലാവ് തളിപ്പുഴ ബൈപാസ് യാഥാർഥ്യമാക്കുക, അധികാരികൾ നിസംഗത വെടിയുക എന്നീ ആവശ്യങ്ങൾ ഉന്നയിച്ചുകൊണ്ടുള്ള ജനകീയ സമരജാഥ ഇന്ന് വൈകുന്നേരം കോഴിക്കോട് സമാപിക്കും. മുനിസിപ്പാലിറ്റി ചെയർമാൻ ടി.കെ. രമേശ് ഉദ്ഘാടനം നിർവഹിച്ചു. കെവിവിഇഎസ് പുൽപ്പള്ളി യൂണിറ്റ് പ്രസിഡന്‍റ് ആതിര മത്തായി, ബത്തേരി യൂണിറ്റ് പ്രസിഡന്‍റ് പി.വൈ. മത്തായി, കെവിവിഇഎസ് ജില്ലാ പ്രസിഡന്‍റ് ജോജിൻ ടി. ജോയ്, ചുരം ബൈപാസ് ആക്ഷൻ കമ്മിറ്റി ചെയർമാൻ വി.കെ. ഹുസൈൻക്കുട്ടി, ജനറൽ കണ്‍വീനർ ടി.ആർ.ഒ. കുട്ടൻ, ഗണപതി ക്ഷേത്ര സമിതി പ്രസിഡന്‍റ് കെ.ജി. ഗോപാലപിള്ള, ബിജെപി ജില്ലാ പ്രസിഡന്‍റ് പ്രശാന്ത് മലവയൽ, മുസ്‌ലിം ലീഗ് ജില്ലാ സെക്രട്ടറി പി.പി. അയൂബ്, കോണ്‍ഗ്രസ് മണ്ഡലം പ്രസിഡന്‍റ് ബാബു പഴുപ്പത്തൂർ, സിപിഎം ഏരിയാകമ്മിറ്റി അംഗം യോഹന്നാൻ, വനിതാവിംഗ് സംസ്ഥാന പ്രസിഡന്‍റ് ശ്രീജ ശിവദാസ്, യൂനുസ് ചേനക്കൽ ബത്തേരി യൂണിറ്റ് ജനറൽ സെക്രട്ടറി, കെവിവിഇഎസ് മേഖല കമ്മിറ്റി ചെയർമാൻ എം.ആർ. സുരേഷ് ബാബു, ട്രഷറർ കെ.ആർ. അനിൽകുമാർ, മുള്ളൻകൊല്ലി യൂണിറ്റ് പ്രസിഡന്‍റ് സണ്ണി മണ്ഡപത്തിൽ, ഇരുളം യൂണിറ്റ് പ്രസിഡന്‍റ് വി.ടി. ജോസ്, ജില്ലാ സെക്രട്ടറി ഓമനക്കുട്ടൻ, സംയുക്ത ട്രേഡ് യൂണിയൻ ചെയർമാൻ അബ്ദുള്ള മാടക്കര, ബേക്കറി അസോസിയേഷൻ മാത്യു സെബാസ്റ്റ്യൻ, ഹോട്ടൽ ആൻഡ് റസ്റ്ററന്‍റ് അസോസിയേഷൻ അനീഷ് ബി. നായർ, ജില്ലാ വൈസ് പ്രസിഡന്‍റ് സാബു ഏബ്രാഹാം, കോഴിക്കോട് യൂണിറ്റ് വൈസ് പ്രസിഡന്‍റ് ഷാജി, ബത്തേരി യൂണിറ്റ് ട്രഷറർ യു.പി. ശ്രീജിത്ത്, യൂത്ത് വിംഗ് ബത്തേരി യൂണിറ്റ് പ്രസിഡന്‍റ് പി. സംഷാദ്, ജില്ലാ സെക്രട്ടറി വി.കെ. റഫീക്ക്, വനിതാവിംഗ് ബത്തേരി യൂണിറ്റ് പ്രസിഡന്‍റ് ആർ. കല തുടങ്ങിയവർ പ്രസംഗിച്ചു.

കേരള വന്യജീവി സംരക്ഷണ ഭേദഗതി ബിൽ: വിമർശനവുമായി പ്രകൃതി സംരക്ഷണ സമിതി

കൽപ്പറ്റ: മന്ത്രിസഭ അംഗീകാരം നൽകിയതും നിയമസഭയിൽ അവതരിപ്പിക്കാനിരിക്കുന്നതുമായ കേരള വന്യജീവി സംരക്ഷണ(ഭേദഗതി)ബില്ലിലെ വ്യവസ്ഥകളെ നിശിതമായി വിമർശിച്ച് വയനാട് പ്രകൃതി സംരക്ഷണ സമിതി. ബിൽ അധാർമികവും ശാസ്ത്രീയ പഠനത്തിന്‍റെ പിൻബലമില്ലാത്തതും നിയമവിരുദ്ധവും പരിസ്ഥിതി പ്രവർത്തകരെയും ശാസ്ത്രസമൂഹത്തെയും ആശങ്കപ്പെടുത്തുന്നതുമാണെന്ന് സമിതി വിലയിരുത്തി. ശാസ്ത്രീയ പഠനം, പാരിസ്ഥിതിക സർവേ, വിശ്വസനീയമായ ഡാറ്റ എന്നിവ അടിസ്ഥാനമാക്കി തയാറാക്കിയതല്ല ബിൽ. അംഗീകൃത ജീവശാസ്ത്രജ്ഞരെയോ ഗവേഷണ സ്ഥാപനങ്ങളെയോ വനം-വന്യജീവി സംരക്ഷണ മേഖലയിലെ അംഗീകൃത എൻജിഒകളെയോ ബിൽ തയാറാക്കുന്നതുമായി ബന്ധപ്പെട്ട് സർക്കാർ സമീപിച്ചിട്ടില്ല. വന്യജീവി മാനേജ്മെന്‍റിന് ദീർഘകാല, ശസ്ത്ര പിന്തുണയുള്ള തന്ത്രങ്ങൾ ആവശ്യമാണ്. ശാസ്ത്രീയ വൈദഗ്ധ്യം അവഗണിക്കുന്നതിലൂടെ മനുഷ്യ-വന്യജീവി സംഘർഷം കൂടുതൽ വഷളാക്കുന്ന നടപടികളെ സർക്കാർ പ്രോത്സാഹിപ്പിക്കുകയാണ് ചെയ്യുന്നത്. ബിൽ അവതരിപ്പിക്കുന്നതിനുമുന്പ് ചീഫ് വൈൽഡ് ലൈഫ് വാർഡന്‍റെ അഭിപ്രായം സർക്കാർ ആരായുകയുണ്ടായില്ല. 1972ലെ വന്യജീവി(സംരക്ഷണ)നിയമപ്രകാരം നിർബന്ധിത അധികാരമാണ് ചീഫ് വൈൽഡ് ലൈഫ് വാർഡനുളളത്. അദ്ദേഹത്തിന്‍റെ ഉപദേശവും അംഗീകാരവും ഇല്ലാതെ നിയമത്തിൽ ഗൗരവമുള്ള ഭേദഗതികൾ വരുത്തുന്നത് നിയമവ്യവസ്ഥയ്ക്കും ഭരണഘടനയുടെ പ്രയോഗത്തിനും നേരേയുള്ള വെല്ലുവിളിയാണ്. മനുഷ്യനെ ആക്രമിച്ചതിന്‍റെയും കൃഷികൾ നശിപ്പിച്ചതിന്‍റെയും പേരിൽ ഏത് വന്യമൃഗത്തെയും ഉടൻ കൊല്ലാൻ അധികാരം നൽകുന്ന ബിൽ വ്യവസ്ഥ തെറ്റായ തിരിച്ചറിയലിന്‍റെ സാധ്യത അവഗണിക്കുന്നതും വംശനാശഭീഷണി നേരിടുന്ന ജീവികളെ വിവേചനരഹിതമായി കൊല്ലുന്നത് പ്രോത്സാഹിപ്പിക്കുന്നതുമാണ്. വന്യജീവി നിയമത്തിലെയും നാഷണൽ ടൈഗർ കണ്‍സർവേഷൻ അഥോറിറ്റി മാർഗനിർദേശങ്ങളിലെയും നിലവിലുള്ള സുരക്ഷാ മുൻകരുതലുകൾ മറികടക്കുന്നതാണ് ബില്ലിലെ നിർദേശങ്ങൾ. മനുഷ്യസുരക്ഷയും സംരക്ഷണ കടമകളും സന്തുലിതമാണെന്ന് ഉറപ്പാക്കുന്നതിനു നിലവിലുള്ള മുൻകരുതലുകളെ തടസങ്ങളായി ചിത്രീകരിച്ച് സർക്കാർ പൊതുജനങ്ങളെ ആശയക്കുഴപ്പത്തിലാക്കുകയും ഭയം സൃഷ്ടിക്കുകയും ചെയ്യുകയാണ്. ജീവിവർഗങ്ങളെ ക്ഷുദ്രജീവികളായി പ്രഖ്യാപിക്കുന്നതിനുള്ള അധികാരങ്ങൾ കേന്ദ്രത്തിൽനിന്ന് സംസ്ഥാനത്തിന് കൈമാറാൻ ശ്രമിക്കുന്നതാണ് ബിൽ. മനുഷ്യ-വന്യജീവി സംഘർഷം പ്രധാനമായും ആവാസവ്യവസ്ഥയുടെ നാശം, ഖനനം, വന നശീകരണം, അനിയന്ത്രിതമായ ഭൂവിനിയോഗം എന്നിവയിൽനിന്നു ഉണ്ടാകുന്നതാണെന്നാണ് ഗവേഷണങ്ങൾ വ്യക്തമാക്കുന്നത്. എന്നാൽ ഇക്കാര്യങ്ങളെ അഭിസംബോധന ചെയ്യുന്നതിനു പകരം ബിൽ വന്യജീവികളുടെ മേൽ കുറ്റം ചുമത്തുകയും ഭൂമി, വന ഭരണത്തിലെ പരാജയങ്ങൾ മറയ്ക്കാൻ ജൈവ വൈവിധ്യത്തെ ബലിയർപ്പിക്കുകയുമാണ് ചെയ്യുന്നത്. വന്യജീവിയെ കൊല്ലുന്നതോ മയക്കുവെടി വയ്ക്കുന്നതോ സംബന്ധിച്ച തീരുമാനം ചീഫ് വൈൽഡ് ലൈഫ് വാർഡനു മാത്രം അധികാരപ്പെട്ടതാണ് കോടതി വിധി വ്യക്തമാക്കിയിട്ടുണ്ട്. വന്യജീവികളെ വെടിവയ്ക്കുന്നതിന് ഉത്തരവ് പുറപ്പെടുവിക്കാൻ ജില്ലാ കളക്ടർമാർക്ക് അധികാരമില്ല. ഇതിന് വിരുദ്ധമായ ഭേദഗതി സർക്കാർ കൊണ്ടുവരുന്നത് കോടതിവിധിയെ മറികടക്കുന്നതാണെന്നും യോഗം ചൂണ്ടിക്കാട്ടി. ജനം ഒറ്റക്കെട്ടായി തെറ്റായ നിയമ നിർമാണത്തെ എതിർക്കണമെന്നു ആവശ്യപ്പെട്ടു. പ്രസിഡന്‍റ് എൻ. ബാദുഷ അധ്യക്ഷത വഹിച്ചു. എം. ഗംഗാധരൻ, തോമസ് അന്പലവയൽ, എ.വി. മനോജ് , ബാബു മൈലന്പാടി, സണ്ണി മരക്കടവ്, പി.എം. സുരേഷ്, ഒ.ജെ. മാത്യു, സി.എസ്. ഗോപാലകൃഷ്ണൻ എന്നിവർ പ്രസംഗിച്ചു.

കരടി ഭീതിയിൽ ചീരാൽ

സുൽത്താൻ ബത്തേരി: പുലിഭീതി നിലനിൽക്കുന്ന ചീരാലിൽ കരടിയും സ്വൈര്യജീവിതം തകർക്കുന്നു. കഴിഞ്ഞദിവസം വീടിനുസമീപമെത്തിയ കരടി പ്ലാവിൽ നിന്ന് ചക്കപറിച്ചുതിന്നു. കളന്നൂർ പട്ടംചിറ വിശ്വനാഥന്‍റെ വീട്ടുമുറ്റത്താണ് കഴിഞ്ഞദിവസം രാത്രി കരടിയെത്തിയത്. വീടിനോട് ചേർന്ന തൊഴുത്തിന് സമീപത്ത് ശബ്ദം കേട്ട് വീട്ടുകാർ ഉണരുകയായിരുന്നു. ജനൽ തുറന്നുനോക്കിയപ്പോൾ പ്ലാവിൽ തിന്ന് ചക്ക പറിച്ചുതിന്നുന്നതാണ് കണ്ടത്. വീട്ടുകാർ ബഹളം വച്ചതോടെ കരടി ഇരുളിലേക്ക് മറയുകയായിരുന്നു. മാസങ്ങളായി വരിക്കേരി, ഈസ്റ്റ് ചീരാൽ, പാട്ടത്ത് തുടങ്ങിയ പ്രദേശങ്ങളിൽ കരടിശല്യം രൂക്ഷമാണ്. പലരും ഇതിനുമുന്പ് കൃഷിയിടത്തിലടക്കം കരടിയെ പലതവണ കണ്ടിരുന്നു. ഇതേത്തുടർന്ന് വനപാലകരെത്തി കരടിയെ നിരീക്ഷിക്കാൻ കാമറകളും സ്ഥാപിച്ചിരുന്നു. സ്ഥിരമായി കരടിയെത്താൻ തുടങ്ങിയതോടെ ഭീതിയിലാണ് പ്രദേശവാസികൾ. കഴിഞ്ഞ ഏപ്രിൽ മുതൽ പ്രദേശത്ത് പുലി സാന്നിധ്യവും സ്ഥിരീകരിച്ചിട്ടുണ്ട്. ഇതിനോടകം ഇരുപതോളം വളർത്തുമൃഗങ്ങളെയാണ് പുലി ആക്രമിച്ചത്. ഇതിൽ പതിനെട്ട് മൃഗങ്ങൾ കൊല്ലപ്പെട്ടു. കരടി, പുലി ഭീതി ഒഴിവാക്കാൻ നടപടികൾ സ്വീകരിക്കണമെന്ന ആവശ്യമാണ് നാട്ടുകാർ ഉന്നയിക്കുന്നത്.

യാക്കോബായ സുറിയാനിസഭ മെത്രാപ്പോലീത്തയെ പ്രിയങ്ക ഗാന്ധി എംപി സന്ദർശിച്ചു

മീനങ്ങാടി: യാക്കോബായ സുറിയാനിസഭ മലബാർ ഭദ്രാസനാധിപൻ ഗീവർഗീസ് മോർ സ്തേഫാനോസ് മെത്രാപ്പോലീത്തയെ പ്രിയങ്ക ഗാന്ധി എംപി സന്ദർശിച്ചു. സഭയുടെ ആസ്ഥാനത്ത് എത്തിയ പ്രിയങ്ക ഗാന്ധി എംപിയെ ഭദ്രാസനം സെക്രട്ടറി ഫാ. ബേസിൽ കരനിലത്ത്, ജോയിന്‍റ് സെക്രട്ടറി ബേബി വാളങ്ങോട്ട്, അരമന മാനേജർ എൽദോ മനയത്ത്, ഫാ. മത്തായി അതിരന്പുഴയിൽ, ഫാ. ലിജോ ആനിക്കാട്ട്, ബൈജു തെക്കുംപുറത്ത് എന്നിവർ ചേർന്ന് സ്വീകരിച്ചു. മെത്രപ്പോലീത്ത എഴുതിയ പുസ്തകങ്ങളും സമ്മാനിച്ചാണ് പ്രിയങ്ക ഗാന്ധിയെ യാത്രയാക്കിയത്.

മാനന്തവാടി ബിഷപ്പിനെ സന്ദർശിച്ച് പ്രിയങ്ക ഗാന്ധി

മാനന്തവാടി: മാനന്തവാടി ബിഷപ് മാർ ജോസ് പൊരുന്നേടത്തിനെ ബിഷപ് ഹൗസിൽ സന്ദർശിച്ച് പ്രിയങ്ക ഗാന്ധി എംപി. വികാരി ജനറാൾ മോണ്‍. പോൾ മുണ്ടോളിക്കൽ, പിആർഒ ഫാ. ജോസ് കൊച്ചറക്കൽ, സാലു ഏബ്രഹാം, എകെസിസി പ്രസിഡന്‍റ് ജോണ്‍സണ്‍ തൊഴുത്തുങ്കൽ, സെബാസ്റ്റ്യൻ പാലംപറന്പിൽ, യൂത്ത് ഡയറക്ടർ ഫാ. സാന്‍റോ തുടങ്ങിയവർ സന്നിഹിതരായിരുന്നു.

മനുഷ്യജീവന്‍റെ മൂല്യത്തെ ഭരണകൂടങ്ങൾ അവഗണിക്കുന്നു: സാഗർ ധാര

കൽപ്പറ്റ: മനുഷ്യജീവന്‍റെ മൂല്യത്തെ ഭരണകൂടങ്ങൾ അവഗണിക്കുകയാണെന്ന് പരിസ്ഥിതി പ്രവർത്തകനും റിസ്ക് അനലിസ്റ്റുമായ സാഗർ ധാര. ട്രാൻസിഷൻ സ്റ്റഡീസും പശ്ചിമഘട്ട സംരക്ഷണ സമിതിയും സംയുക്തമായി രൂപീകരിച്ച ജനകീയ ശാസ്ത്ര പഠന സമിതി പുഞ്ചിരിമട്ടം ഉരുൾ ദുരന്തവുമായി ബന്ധപ്പെട്ട് പുസ്തകരൂപത്തിൽ തയാറാക്കിയ റിപ്പോർട്ടിന്‍റെ പ്രകാശനം ട്രിഡന്‍റ് ആർക്കേഡ് ഹാളിൽ നിർവഹിച്ച് പ്രസംഗിക്കുകയായിരുന്നു അദ്ദേഹം. മനുഷ്യജീവന്‍റെ മൂല്യം തിരിച്ചറിയുന്നതിൽ ഭരണകൂടങ്ങൾ വരുത്തുന്ന വീഴ്ചയാണ് പ്രകൃതി ദുരന്തങ്ങളിൽ കൂടിയ തോതിൽ ആൾനഷ്ടം ഉണ്ടാകുന്നതിന് ഇടയാക്കുന്നത്. പ്രകൃതി ദുരന്തങ്ങളിലും ഇതര അപകടങ്ങളിലും മനുഷ്യജീവൻ നഷ്ടമാകുന്പോൾ ഉയർന്ന നഷ്ടപരിഹാരം ആശ്രിതർക്ക് നൽകാൻ ഭരണകൂടത്തെ നിർബന്ധിതമാക്കുന്ന നിയമനിർമാണം ഉണ്ടാകണം. എങ്കിലേ പ്രകൃതിദുരന്തങ്ങളെക്കുറിച്ചുള്ള മുന്നറിയിപ്പുകൾ, സുരക്ഷാസംവിധാനങ്ങൾ എന്നിവയിൽ വർധിച്ച ഉത്തരവാദിത്വത്തോടെ അധികാരകേന്ദ്രങ്ങൾ ഇടപെടൂവെന്ന് സാഗർ ധാര പറഞ്ഞു. "തെന്നുന്ന ഭൂമി; ചിതറുന്ന ജീവിതങ്ങൾ’ എന്ന പേരിൽ തയാറാക്കിയ റിപ്പോർട്ടിന്‍റെ ആദ്യ കോപ്പി സാമൂഹിക വിമർശകനും രാഷ്ട്രീയ നിരീക്ഷകനുമായ ജോസഫ് സി. മാത്യു സ്വീകരിച്ചു. പുഞ്ചിരിമട്ടം ഉരുൾ ദുരന്തത്തിൽനിന്നു പാഠം ഉൾക്കൊള്ളാൻ ഭരണാധികാരികൾ തയാറായില്ലെന്ന് അദ്ദേഹം പറഞ്ഞു. ഉരുൾപൊട്ടലിന്‍റെ പശ്ചാത്തലത്തിൽ പശ്ചിമഘട്ടത്തിൽ തുരങ്കപാത പദ്ധതി പ്രാവർത്തികമാക്കാൻ ഭരണാധികാരികൾ മടിക്കുമെന്നായിരുന്നു പൊതുവെ വിലയിരുത്തൽ. എന്നാൽ പദ്ധതിയുമായി സർക്കാർ മുന്നോട്ടുപോകുകയാണ്. പ്രകൃതിദുരന്തങ്ങളും വികസന മാതൃകകളും തമ്മിലുള്ള ബന്ധം മനസിലാക്കാൻ സാമാന്യബോധം മതിയാകും. ഭരണാധികാരികൾക്ക് സാമാന്യബോധം നഷ്ടമായെന്നും ജോസഫ് സി. മാത്യു പറഞ്ഞു. പശ്ചിമഘട്ട സംരക്ഷണ സമിതി ചെയർമാൻ വർഗീസ് വട്ടേക്കാട്ടിൽ അധ്യക്ഷത വഹിച്ചു. കാലാവസ്ഥാശാസ്ത്രജ്ഞനും കുസാറ്റ് ഫാക്കൽട്ടിയുമായ ഡോ.എസ്. അഭിലാഷ്, ഹ്യൂം സെന്‍റർ ഡയറക്ടർ ഡോ.സി.കെ. വിഷ്ണുദാസ്, പദ്മശ്രീ ചെറുവയൽ രാമൻ, ബോട്ടണിസ്റ്റും ട്രാൻസിഷൻ സ്റ്റഡീസ് അംഗവുമായ ഡോ.സ്മിത പി. കുമാർ എന്നിവർ പ്രസംഗിച്ചു. ഡോ.കെ.ആർ. അജിതൻ റിപ്പോർട്ട് പരിചയപ്പെടുത്തി. എം.കെ. രാംദാസ്, മോഹൻദാസ് എന്നിവർ പ്രസംഗിച്ചു.

വള്ളിയൂർക്കാവ് പാലം: നിർമാണ പുരോഗതി മന്ത്രി വിലയിരുത്തി

മാനന്തവാടി: വള്ളിയൂർക്കാവ് പാലത്തിന്‍റെ നിർമാണ പുരോഗതി പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു വിലയിരുത്തി. മാനന്തവാടി നഗരസഭയെയും എടവക പഞ്ചായത്തിനെയും ബന്ധിപ്പിക്കുന്ന പാലം 17 കോടി രൂപ ചെലവിൽ സംസ്ഥാന പൊതുമരാമത്ത് വകുപ്പാണ് നിർമിക്കുന്നത്. ഡിസംബറോടെ പ്രവൃത്തി പൂർത്തിയാകും. 207 മീറ്റർ നീളവും 11 മീറ്റർ വീതിയും ഉള്ളതാണ് പാലം. ഊരാളുങ്കൽ ലേബർ കോണ്‍ട്രാക്ട് സൊസൈറ്റിക്കാണ് പ്രവൃത്തി ചുമതല. നിർമാണം പൂർത്തിയാകുന്പോൾ ജില്ലയിലെ ഏറ്റവും വലിയ പാലമായി ഇത് മാറും. കമ്മന നിവാസികൾക്ക് മാനന്തവാടി ടൗണിലേക്കുള്ള യാത്ര സുഗമമാക്കാൻ പാലം ഉതകും. മുനിസിപ്പൽ കൗണ്‍സിലർമാരായ കെ.സി. സുനിൽകുമാർ, വി.ആർ. പ്രവീജ്, അബ്ദുൾ ആസിഫ് എന്നിവർക്കൊപ്പമാണ് മന്ത്രി പാലം സന്ദർശിച്ചത്.

എംഎൽഎ ഓഫീസ് അക്രമണം: യുഡിഎഫ് പ്രതിഷേധസംഗമം നടത്തി

കൽപ്പറ്റ: വയനാട്ടിലെ സിപിഎം ജില്ലാ നേതൃത്വം ക്രിമിനൽ പ്രവർത്തങ്ങൾക്ക് ഒത്താശ പകരുകയും നേതൃത്വം കൊടുക്കുകയും ചെയ്യുന്നത് അപമാനകരമാണെന്ന് മലപ്പുറം ഡിസിസി പ്രസിഡന്‍റ് വി.എസ്. ജോയി. കൽപ്പറ്റ എംഎൽഎ ഓഫീസ് ആക്രമിച്ച ഡിവൈഎഫ്ഐ അക്രമികളുടെ നടപടിയിൽ പ്രതിഷേധിച്ച്, സിപിഎം നടത്തുന്ന നുണപ്രചാരണങ്ങൾക്കെതിരേ യുഡിഎഫ് കൽപ്പറ്റ നിയോജകമണ്ഡലം കമ്മിറ്റിയുടെ നേതൃത്വത്തിൽ കൽപ്പറ്റ ടൗണിൽ നടത്തിയ പ്രതിഷേധ പ്രകടനവും സംഗമവും ഉദ്ഘാടനം ചെയ്യുകയായിരുന്നു അദ്ദേഹം. രാഹുൽ ഗാന്ധിയുടെ ഓഫീസ് അക്രമിക്കുകയും അന്ന് അണിയറയിൽ മുഴുവൻ നേതൃത്വം കൊടുത്ത് സമര സ്ഥലത്തു വന്ന് ആക്രമികൾക്ക് ആത്മവിശ്വാസം കൊടുത്തത് സിപിഎമ്മിന്‍റെ ജില്ലാ സെക്രട്ടറിയാണ്. ഐ.സി. ബാലകൃഷ്ണൻ എംഎൽഎയുടെ ഓഫീസ് അക്രമണത്തിന് പിന്നിലും സിപിഎമ്മിന്‍റെ ഇതേ നേതൃത്വം തന്നെയാണ്. ഇപ്പോൾ കൽപ്പറ്റ എംഎൽഎയുടെ ഓഫീസിലേക്ക് ഡിവൈഎഫ്ഐക്കാരെ പറഞ്ഞയച്ചത് ഇതേ സിപിഎം ജില്ലാ നേതൃത്വമാണ്. ഇത്തരം അക്രമപ്രവർത്തങ്ങളിൽ നിന്ന് നേതൃത്വം സ്വന്തം അണികളെ നിയന്ത്രിക്കേണ്ടവർ തന്നെ അക്രമത്തിന് നേതൃത്വം നൽകുന്ന സാഹചര്യമാണുള്ളത്. അപവാദ പ്രചാരണം നടത്തി കൽപ്പറ്റ എംഎൽഎയും യുഡിഎഫിനെയും കോണ്‍ഗ്രസിനെയും ഇല്ലാതാക്കാം എന്നുള്ളത് വ്യാമോഹം മാത്രമാണ്. സ്വന്തം ജീവിതം മുഴുവൻ ഉഴിഞ്ഞുവച്ചുണ്ടാക്കിയ പണം നിക്ഷേപിച്ച നൂറ് കണക്കിന് നിക്ഷേപകരെ പെരുവഴിയിലാക്കി മരണത്തിലേക്ക് തള്ളിവിടുന്ന സിപിഎം ആദ്യം ചെയ്യേണ്ടത് ബ്രഹ്മഗിരിയിലെ നിക്ഷേപകരുടെ പണം തിരിച്ചുകൊടുത്ത് അവരെ മരണത്തിൽ നിന്ന് രക്ഷപ്പെടുത്തുകയാണ് വേണ്ടത്. ബ്രഹ്മഗിരിയിൽ സിപിഎം നടത്തിയത് വലിയ അഴിമതിയാണ്. ഇതിലൂടെ വയനാട്ടിലെ സിപിഎം എത്രത്തോളം അഴിമതിയിലൂടെ കടന്നുപോകുന്നുവെന്ന് വ്യക്തമാണെന്നും അദ്ദേഹം കൂട്ടിച്ചേർത്തു. മുസ്‌ലിം ലീഗ് നിയോജകമണ്ഡലം ജനറൽ സെക്രട്ടറി സലീം മേമന അധ്യക്ഷത വഹിച്ചു. ടി. സിദ്ദിഖ് എംഎൽഎ മുഖ്യപ്രഭാഷണം നടത്തി. യുഡിഎഫ് നിയോജകമണ്ഡലം കണ്‍വീനർ പി.പി. ആലി, റസാക്ക് കൽപ്പറ്റ, യഹ്യാഖാൻ തലക്കൽ, ടി.ജെ. ഐസക്, എം.എ. ജോസഫ്, ബി. സുരേഷ് ബാബു, ഹാരിസ് ബാബു ചാലിയാർ, ഹാരിസ് കണ്ടിയൻ, പി.കെ. അബ്ദുറഹിമാൻ, നജീബ് കരണി, പോൾസണ്‍ കൂവക്കൽ, ശോഭന കുമാരി, പോൾസണ്‍ കൂവക്കൽ, ഗോകുൽദാസ് കോട്ടയിൽ, ഗിരീഷ് കൽപ്പറ്റ, എൻ. മുസ്തഫ, എം.പി. നവാസ്, സി.എ. അരുണ്‍ദേവ്, ഹർഷൽ കോന്നാടൻ തുടങ്ങിയവർ പ്രസംഗിച്ചു.

നെൽക്കൃഷിയുമായി ഹിൽ ബ്ലൂംസ് വിദ്യാർഥികൾ

മാനന്തവാടി: ഒന്നര ഏക്കർ വയലിൽ നെൽക്കൃഷിയുമായി വിദ്യാർഥികൾ. ഹിൽ ബ്ലൂംസ് സ്ക്കൂളിന്‍റെ ഉടമസ്ഥയിലുള്ള സ്ഥലത്താണ് എല്ലാ വർഷവും കൃഷി ഇറക്കാനുള്ള പദ്ധതിക്ക് വിദ്യാർഥികൾ തുടക്കം കുറിച്ചിരിക്കുന്നത്. ആദ്യമായാണ് സ്ക്കൂൾ നെൽകൃഷിയിലേക്കിറങ്ങുന്നത്. 200 ഓളം വിദ്യാർഥികളും അധ്യാപകരും ചേർന്നാണ് ഞാറ് നട്ട് കൃഷി ആരംഭിച്ചത്. പാൽതൊണ്ടി വിത്താണ് ഉപയോഗിച്ചിരിക്കുന്നത്. തിരുനെല്ലി അഗ്രോ പ്രൊഡ്യുസേഴ്സ് കന്പനിയിലെ രാജേഷ് കൃഷ്ണന്‍റെ നേതൃത്വത്തിലാണ് ആവശ്യമായ നെൽവിത്തുകൾ നൽകിയത്. എടവക കൃഷി ഓഫീസർ കെ.ജി. സുനിൽ സാങ്കേതിക സഹായം നൽകി. സ്കൂളിലെ ഭക്ഷണ ശാലയിലേക്ക് ആവശ്യമായ അരിയും പച്ചക്കറികളും ലഭ്യമാക്കുന്നതിനൊപ്പം നെൽകൃഷി രീതികളെക്കുറിച്ച് അറിവ് പകർന്ന് നൽകുക എന്നതാണ് ലക്ഷ്യമിടുന്നതെന്ന് വിദ്യാർഥികളായ ഹെയ്സൽ ഷമീറും നൻമ റോഷിൻ മാത്യുവും പറഞ്ഞു. നെൽകൃഷി കഴിഞ്ഞുള്ള സീസണിൽ പച്ചക്കറി കൃഷി ചെയ്തും എല്ലാ വർഷവും കൃഷിയുമായി മുന്നോട്ട് പോകാനാണ് അധികൃതരുടെ തീരുമാനം. അധ്യാപകരും വിദ്യാർഥികളും ചേർന്ന് പാട്ട് പാടി ഞാറ് നട്ടത് വേറിട്ട അനുഭവവുമായി. പ്രിൻസിപ്പൽ സീറ്റ ജോസ്, മാനേജർ ജോർജ് ജോസ്, ലൈഫ് സ്കിൽ കോഓർഡിനേറ്റർ വി.സി. മോഹനൻ എന്നിവർ നേതൃത്വം നൽകി.

സ്നേഹ ഭവനത്തിനായി എൻഎസ്എസ് വോളണ്ടിയർമാരുടെ കുട്ടിക്കട

കൽപ്പറ്റ: നാഷണൽ സർവീസ് സ്കീം ജില്ലാതലത്തിൽ നിർമിക്കുന്ന സ്നേഹഭവനത്തിന് കൈത്താങ്ങാകുകയെന്ന ലക്ഷ്യത്തോടെ കൽപ്പറ്റ എസ്കെഎംജെ ഹയർസെക്കൻഡറി സ്കൂളിലെ എൻഎസ്എസ് യൂണിറ്റ് കുട്ടിക്കട ആരംഭിച്ചു. മരവയൽ ജിനചന്ദ്ര സ്മാരക ജില്ലാ സ്റ്റേഡിയത്തിൽ നടക്കുന്ന സ്കൂൾ കായിക മേളയിലാണ് എൻഎസ്എസ് യൂണിറ്റിന്‍റെ നേതൃത്വത്തിൽ കുട്ടിക്കട ആരംഭിച്ചത്. വിദ്യാർഥികൾ വീടുകളിൽ നിന്നും ഉണ്ടാക്കി കൊണ്ടുവന്ന വിഭവങ്ങളാണ് കുട്ടിക്കടയിൽ ഒരുക്കിയത്. കുട്ടിക്കടയുടെ ഉദ്ഘാടനം പിടിഎ പ്രസിഡന്‍റ് ബിനി സതീഷ് നിർവഹിച്ചു. സ്കൂൾ പ്രിൻസിപ്പൽ എം. വിവേകാനന്ദൻ, എൻഎസ്എസ് ജില്ലാ കണ്‍വീനർ കെ.എസ്. ശ്യാൽ, പിടിഎ വൈസ് പ്രസിഡന്‍റ് വിനീത് കുമാർ, എൻഎസ്എസ് പ്രോഗ്രാം ഓഫീസർ എ. സ്മിത, ഫെബിൻ സനിൽ, പി.പി. അജിത്ത്, എൻഎസ്എസ് ലീഡർ എയ്ഞ്ചൽ മരിയ ബിനു എന്നിവർ പങ്കെടുത്തു.

മിനിലോറിയിൽ കടത്തുകയായിരുന്ന പ്ലാസ്റ്റിക് കുപ്പികൾ പിടികൂടി

ഗൂഡല്ലൂർ: കർണാടകയിൽ നിന്ന് മേട്ടുപാളയത്തിലേക്ക് മിനിലോറിയിൽ കടത്തുകയായിരുന്ന പ്ലാസ്റ്റിക് ബോട്ടിലുകൾ പിടികൂടി. 100 പ്ലസ്റ്റിക് കുടിവെള്ളകുപ്പികളാണ് പിടികൂടിയത്. തുറപ്പള്ളി ചെക്പോസ്റ്റിൽ പോലീസും നഗരസഭാ അധികൃതരും നടത്തിയ വാഹന പരിശോധനയ്ക്കിടെയാണ് ഇത് പിടികൂടിയത്. ഇതുമായി ബന്ധപ്പെട്ട് ലോറി ഡ്രൈവറിൽ നിന്ന് 2,000 രൂപ പിഴ ചുമത്തുകയും ചെയ്തു. നീലഗിരി ജില്ലയിൽ പ്ലാസ്റ്റിക് കുപ്പികൾ നിരോധിച്ചിട്ടുണ്ട്.

കാപ്പി കർഷകർക്കുള്ള സൗജന്യ രജിസ്ട്രേഷൻ കാന്പയിൻ ഇന്ന് വെള്ളമുണ്ടയിൽ

കൽപ്പറ്റ: യൂറോപ്യൻ യൂണിയന്‍റെ പുതിയ പുതിയ നിബന്ധനകൾ വയനാട്ടിലെ കർഷകരെ സാരമായി ബാധിക്കാതിരിക്കാൻ കോഫി ബോർഡ് നടപടികൾ ആരംഭിച്ചു. ഇതിന്‍റെ ഭാഗമായി ഇന്ത്യാ കോഫി ആപ്പിൽ കർഷകർക്ക് സൗജന്യമായി രജിസ്റ്റർ ചെയ്യാൻ സൗകര്യമൊരുക്കി. കർഷകർക്ക് ആപ്പിൽ രജിസ്റ്റർ ചെയ്യാൻ സഹായിക്കുന്നതിനായി പ്രത്യേക കാന്പയിൻ തുടങ്ങി. എടവക, തൊണ്ടർനാട്, പടിഞ്ഞാറത്തറ, വെള്ളമുണ്ട പഞ്ചായത്തുകളിലെ കർഷകർക്കായി പ്രത്യേക സൗജന്യ രജിസ്ട്രേഷൻ കാന്പയിൻ ഇന്ന് രാവിലെ 10 മുതൽ വെള്ളമുണ്ട എട്ടേനാലിലെ സിറ്റി ഓഡിറ്റോറിയത്തിൽ നടക്കും. ജില്ലയിലെ നാല് കേന്ദ്രങ്ങളിൽ മാത്രമാണ് കോഫി ബോർഡിന്‍റെ നേതൃത്വത്തിൽ പ്രത്യേക കർഷക രജിസ്ട്രേഷൻ കാന്പയിൻ നടത്തുക. വാഴവറ്റയിലും പനമരത്തും കർഷക സെമിനാറും നടത്തി. ബോർഡിന്‍റെ കാന്പയിൻ അവസാനിച്ചു കഴിഞ്ഞാൽ കർഷകർ സ്വമേധയാ ഇന്ത്യാ കോഫി ആപ്പിൽ രജിസ്റ്റർ ചെയ്യേണ്ടിവരും. ആധാറുമായി ബന്ധിപ്പിച്ച നന്പർ ഉള്ള മൊബൈൽ ഫോണ്‍, ആധാർ കാർഡ്, കൈവശ അവകാശ സർട്ടിഫിക്കറ്റ് അല്ലെങ്കിൽ നികുതി ചീട്ട്, ബാങ്ക് പാസ് ബുക്ക് എന്നിവയുമായി കർഷകർ എത്തണം. വനനശീകരണം നടത്തിയല്ല തോട്ടങ്ങളിൽ കൃഷി ചെയ്തിട്ടുള്ളത് എന്ന സത്യവാങ്മൂലം നൽകിയില്ലെങ്കിൽ 2026 ജനുവരി ഒന്നു മുതൽ യൂറോപ്യൻ യൂണിയൻ ഇന്ത്യയിൽ നിന്ന് കാപ്പി കയറ്റുമതി ചെയ്യുന്നത് നിയന്ത്രിച്ചേക്കും. കർണാടകയിലെ കൂർഗ്, കേരളത്തിലെ ഇടുക്കി, വയനാട് ജില്ലകളെയാണ് യൂറോപ്യൻ യൂണിയന്‍റെ നിബന്ധനകൾ സാരമായി ബാധിക്കുന്നത്. ഇന്ത്യ കോഫി ആപ്പിൽ രജിസ്റ്റർ ചെയ്തു കഴിഞ്ഞാൽ ഇനിമുതൽ കോഫി ബോർഡിന്‍റെ സബ്സിഡികളും പദ്ധതികളും ആനുകൂല്യങ്ങൾക്കും ഈ രജിസ്ട്രേഷൻ ഉപയോഗിക്കാം. കർഷകർക്കുള്ള അറിയിപ്പുകളും ഇനി മുതൽ ഇന്ത്യ കോഫി ആപ്പ് മുഖേനയായിരിക്കും. അതിനാൽ ഈ സൗകര്യം കർഷകർ പരമാവധി പ്രയോജനപ്പെടുത്തണമെന്ന് കോഫി ബോർഡ് ജോയിന്‍റെ ഡയക്ടർ ഡോ.എം. കറുത്തമണി അഭ്യർഥിച്ചു. കേരള എഫ്പിഒ കണ്‍സോർഷ്യം, കാർഷികോത്പാദക കന്പനികളായ വേ ഫാം, ടീ ഫാം, കാർഷിക മേഖലയിലെ ഉത്പന്ന നിർമാണ കന്പനിയായ യാരാ, വിവിധ വായന ശാലകൾ, ക്ലബുകൾ, വിവിധ കർഷക സംഘടനകൾ എന്നിവയുടെ സഹകരണത്തോടെയാണ് പരിപാടി സംഘടിപ്പിച്ചിട്ടുള്ളത്.

കുടുംബ സംഗമവും ഓണാഘോഷവും സംഘടിപ്പിച്ചു

മീനങ്ങാടി: മറുനാടൻ കർഷക കൂട്ടായ്മയായ നാഷണൽ ഫാർമേഴ്സ് പ്രൊഡ്യൂസർ ഓർഗനൈസേഷൻ (എൻഎഫ്പിഒ) വിപുലമായ ഓണാഘോഷവും കുടുംബ സംഗമവും മീനങ്ങാടിയിൽ സംഘടിപ്പിച്ചു. നവമാധ്യമങ്ങളിലൂടെ മലയാളികൾക്ക് സുപരിചിതരായ "ജാനുഏടത്തിയും കേളപ്പേട്ടനും’ ആഘോഷ പരിപാടികൾ ഉദ്ഘാടനം ചെയ്തു. വ്യത്യസ്തവും വിനോദപ്രദവുമായ മത്സരങ്ങളിൽ കർഷക കുടുംബങ്ങളിൽ നിന്നും പ്രായഭേദമന്യേ ആളുകൾ പങ്കെടുത്തു. തൃശൂരിൽ നിന്നെത്തിയ പുലികളുടെ പുലികളി, കൈകൊട്ടിക്കളി, ശിങ്കാരിമേളം തുടങ്ങിയ വൈവിധ്യമാർന്ന കലാപരിപാടികളോടെ മാവേലിമന്നന്‍റെ നേതൃത്വത്തിൽ മീനങ്ങാടിയിൽ വിളംബര ഘോഷയാത്ര നടത്തി. വിവിധതരം പച്ചക്കറികൾ ഉപയോഗിച്ച് രൂപകല്പന ചെയ്ത പൂക്കളം കാണികൾക്ക് ദൃശ്യ വിസ്മയമായി. കലാകായിക മത്സരങ്ങൾ, ഓണസദ്യ എന്നിവയും നടത്തി. വിവിധ മേഖലകളിൽ മികവ് തെളിയിച്ച കർഷകകുടംബങ്ങളിലെ പ്രതിഭകളെ ആദരിച്ചു. ഐ.സി. ബാലകൃഷ്ണൻ എംഎൽഎ മത്സരവിജയികൾക്ക് മീനങ്ങാടി പഞ്ചായത്ത് പ്രസിഡന്‍റ് കെ.ഇ. വിനയൻ, എൻഎഫ്പിഒ ചെയർമാൻ ഫിലിപ്പ് ജോർജ്, കണ്‍വീനർ എസ്.എം. റസാഖ്, ചീഫ് കോഓർഡിനേറ്റർ തോമസ് മിറർ എന്നിവർ പ്രസംഗിച്ചു. ചാരിറ്റി ചെയർമാൻ ഇ.വി. സെബാസ്റ്റ്യൻ, കണ്‍വീനർ കെ.പി. ജോസ്, ട്രഷറർ സണ്ണി നീലഗിരി, ബിനീഷ് ഡൊമിനിക്, എൻഎഫ്പിഒ സ്നേഹ സംഗമം 2025 സഘാടക സമിതി ഭാരവാഹികളായ ഷിബു കാര്യന്പാടി, ബിജു പൗലോസ്, സിന്‍റോ ജോർജ്, സിജോ ബേസിൽ, കെ.ജെ. ഷാജി, പി.കെ. ഷൈജു, വി.എസ്. സന്തോഷ്, സജി ചാക്കോച്ചൻ, ഉദയൻ കാവ്യശ്രീ, എൻഎഫ്പിഒ അഡ്മിനിസ്ട്രേറ്റീവ് കമ്മറ്റി അംഗങ്ങൾ എന്നിവർ പരിപാടികൾക്ക് നേതൃത്വം നൽകി.

പ്ലാറ്റിനം ജൂബിലി ആഘോഷം തുടങ്ങി

ഏച്ചോം: കുട്ടികളെ തല്ലിപ്പഠിപ്പിക്കുന്ന കാലഘട്ടം കഴിഞ്ഞുവെന്നും അതിലുപരി അവരെ കൂടി മനസിലാക്കിക്കൊണ്ട് വിദ്യാഭ്യാസം നൽകുകയെന്നതാണ് ഇന്നത്തെ പൊതുസമൂഹത്തിന്‍റെ കാഴ്ചപ്പാടെന്ന് പട്ടികജാതി-വർഗ പിന്നാക്കക്ഷേമ മന്ത്രി ഒ.ആർ. കേളു. സർവോദയ ഹയർ സെക്കൻഡറി സ്കൂളിന്‍റെ പ്ലാറ്റിനം ജൂബിലി ആഘോഷം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. വിദ്യാഭ്യാസരംഗത്ത് ഇതിനകം വലിയ മാറ്റങ്ങൾ കൊണ്ടുവന്നിട്ടുള്ള കേരളം മാറുന്ന കാലത്തിനനുസരിച്ച് പുതിയ കാഴ്ചപ്പാടിലേക്കാണ് സഞ്ചരിക്കുന്നതെന്നും അദ്ദേഹം പറഞ്ഞു. നിയമസഭാ സമ്മേളനംമൂലം ഓണ്‍ലൈനിലൂടെയാണ് അദ്ദേഹം ഉദ്ഘാടനം നിർവഹിച്ചത്. സ്കൂൾ മാനേജർ ഫാ. ജേക്കബ് കുമ്മിണിയിൽ അധ്യക്ഷത വഹിച്ചു. ജെസ്യൂട്ട് പ്രൊവിൻഷ്യൽ ഫാ. ഹെൻറി പട്ടരുമഠത്തിൽ മുഖ്യപ്രഭാഷണം നടത്തി. പാഠപുസ്തകങ്ങൾക്കപ്പുറം വയനാട് നേരിടുന്ന പാരിസ്ഥിതിക സാമൂഹിക പ്രശ്നങ്ങൾ കൂടി ക്ലാസ്മുറിയിൽ ചർച്ച ചെയ്യപ്പെടണമെന്ന് അദ്ദേഹം പറഞ്ഞു. പനമരം ഗ്രാമപ്പഞ്ചായത്ത് പ്രസിഡന്‍റ് എ. ലക്ഷ്മി ലോഗോ പ്രകാശനം നിർവഹിച്ചു. ചടങ്ങിൽ സ്കൂൾ പാലിയേറ്റീവ് പ്രവർത്തനോദ്ഘാടനവും എൽപി സ്കൂൾ കുട്ടികൾക്ക് പഠന പിന്തുണ നൽകുന്ന "ചിറക് ’ എന്ന കൈപ്പുസ്തകത്തിന്‍റെ പ്രകാശനവും നടത്തി. ജില്ലാപ്പഞ്ചായത്ത് ഡിവിഷൻ അംഗം കെ.ബി. നസീമ, സ്കൂൾ ഡയറക്ടർ ഫാ. ബിജു ജോർജ്, പ്രിൻസിപ്പൽ സിസ്റ്റർ ഒ. ബീന, ഹെഡ്മിസ്ട്രസ് സിസ്റ്റർ ജെസി പോൾ, ഷിജു മരുതനാനിയിൽ, സി.കെ. ഉണ്ണികൃഷ്ണൻ, റെജി ജോസ്, സോഫിയ കുര്യൻ, വി.ഡി. തോമസ് എന്നിവർ പ്രസംഗിച്ചു.

തൊഴിൽ മേള

ഊട്ടി: ജില്ലാ തൊഴിൽ വകുപ്പ്, സ്വകാര്യ കന്പനികൾ എന്നിവയുടെ ആഭിമുഖ്യത്തിൽ 19ന് ഊട്ടിയിൽ തൊഴിൽമേള നടക്കും. കോയന്പത്തൂർ, ചെന്നൈ, തിരിപ്പൂർ, നീലഗിരി ജില്ലകളിൽ നിന്നുള്ള സ്വകാര്യ കന്പനികൾ പങ്കെടുക്കും. നീലഗിരി ജില്ലയിലെ യുവാക്കൾ ഇത് ഉപയോഗപ്പെടുത്തണമെന്ന് ജില്ലാ കളക്ടർ അറിയിച്ചു. എട്ടാം ക്ലാസ് മുതൽ പ്ലസ് ടു, ഡിഗ്രി, ഐടിഐ യോഗ്യതയുള്ളവർ മേളയിൽ പങ്കെടുക്കണം.

പ്ലാറ്റിനം ജൂബിലി ആഘോഷം സമാപിച്ചു

മക്കിയാട്: കോറോം സെന്‍റ് മേരീസ് യാക്കോബായ സുറിയാനി സൂനോറോ പള്ളിയുടെ പ്ലാറ്റിനം ജൂബിലി ആഘോഷം സമാപനം ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ജുനൈദ് കൈപ്പാണി ഉദ്ഘാടനം ചെയ്തു. മലബാർ ഭദ്രാസനാധിപൻ ഡോ. ഗീവർഗീസ് മാർ സ്തേഫാനോസ് അധ്യക്ഷത വഹിച്ചു. ജില്ലാ പഞ്ചായത്ത് അംഗം കെ. വിജയൻ, മലബാർ ഭദ്രാസന വൈദിക സെക്രട്ടറി ഫാ. മത്തായിക്കുഞ്ഞ് ചാത്തനാട്ടുകുടി, തൊണ്ടർനാട് പഞ്ചായത്ത് അംഗം കെ.ജെ. ഏലിയാമ്മ, വികാരി ഫാ. എൽദോ കൂരൻതാഴത്തുപറന്പിൽ, ട്രസ്റ്റി ബൈജു തൊണ്ടുങ്ങൽ, സഭാ മാനേജിംഗ് കമ്മിറ്റി അംഗം കെ.എം. ഷിനോജ്, പള്ളി സെക്രട്ടറി അഖിൽ ഏലിയാസ്, പെരുന്നാൾ കമ്മിറ്റി ജനറൽ കണ്‍വീനർ ജിജോ വള്ളിക്കാട്ടിൽ, ഫാ. സിനു ചാക്കോ എന്നിവർ പ്രസംഗിച്ചു. മാതാവിന്‍റെ ജനനത്തിരുന്നാൾ ആഘോഷത്തിന്‍റെ ഭാഗമായി കാൽനട തീർഥയാത്ര, വിശുദ്ധ മൂന്നിൻമേൽ കുർബാന, മധ്യസ്ഥ പ്രാർഥന, സുനോറോ വണക്കം, നേർച്ച ഭക്ഷണ വിതരണം എന്നിവ നടത്തി. വിവിധ മത്സരങ്ങളിലെ വിജയികൾക്ക് സമ്മാനം നൽകി.

ഗ്രന്ഥശാലാദിനം ആഘോഷിച്ചു

വെള്ളമുണ്ട: മൊതക്കര പ്രതിഭ ഗ്രന്ഥാലയത്തിൽ ഗ്രന്ഥശാലാദിനം ആഘോഷിച്ചു. ഗ്രന്ഥശാല സംരക്ഷണ സദസ് ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ജുനൈദ് കൈപ്പാണി ഉദ്ഘാടനം ചെയ്തു. ഗ്രന്ഥശാല പ്രസിഡന്‍റ് സി.എം. അനിൽകുമാർ അധ്യക്ഷത വഹിച്ചു. ദീർഘകാലം ഗ്രന്ഥാലയം പ്രസിഡന്‍റായിരുന്ന എം.എൻ. ജനാർദനൻ, മുതിർന്ന വായനക്കാരായ ഗംഗാധരൻ നായർ, വസുമതി ഭാസ്കരൻ, പുതുതലമുറ വായനക്കാരൻ സനീഷ്, കവികളായ കെ.വി. രതീഷ്, റഫീഖ് പുളിഞ്ഞാൽ എന്നിവരെ ആദരിച്ചു. എം.പി. സുരേഷ്കുമാർ, കെ.എം. ബാബു, സെക്രട്ടറി ജയേഷ്കുമാർ എന്നിവർ പ്രസംഗിച്ചു.

മടത്തുവയലിൽ നാട്ടി ഉത്സവം

തരിയോട്: മടത്തുവയലിൽ ചെന്നലോട്, മടത്തുവയൽ വാർഡുകളിൽ ഉൾപ്പെട്ട അവന്തിക, ശ്രീദേവി, നന്ദന കുടുംബശ്രീ സംയുക്ത ബാധ്യതാസംഘങ്ങളുടെ നേതൃത്വത്തിൽ നാട്ടി ഉത്സവം നടത്തി. മടത്തുവയലിൽ രണ്ട് ഏക്കറിലാണ് കുടുംബശ്രീ ജെഎൽജികളുടെ നെൽക്കൃഷി. ഗ്രൂപ്പ് അംഗങ്ങൾക്കൊപ്പം മടത്തുവയൽ തറവാട്ടിൽനിന്നുള്ളവരും ജനപ്രതിനിധികളും നാട്ടി ഉത്സവത്തിൽ പങ്കാളികളായി. പഞ്ചായത്ത് പ്രസിഡന്‍റ് ഷമീം പാറക്കണ്ടി ഉദ്ഘാടനം ചെയ്തു. വാർഡ് അംഗം ചന്ദ്രൻ മടത്തുവയൽ അധ്യക്ഷത വഹിച്ചു. രാമൻ ലക്ഷ്മി, ജസി തോമസ്, ഗിരിജ കുനിയുമ്മൽ, പുഷ്പ മടത്തുവയൽ, ചെറിയ ചന്തു, രാമൻ തേയി, എം.ആർ. ഉണ്ണി, കേളു ചന്ദ്രിക, അണ്ണൻ അമ്മു, ഉഷ വെള്ളൻ, നിഷ ബാലകൃഷ്ണൻ, സിഡിഎസ് ചെയർപേഴ്സണ്‍ രാധ മണിയൻ, അഗ്രികൾച്ചർ കമ്മ്യൂണിറ്റി റിസോഴ്സ് പേഴ്സണ്‍ എ.കെ. ഗീത എന്നിവർ പ്രസംഗിച്ചു.

വന്യജീവി സങ്കേതത്തിൽ പ്രിയങ്ക ഗാന്ധി സന്ദർശനം നടത്തി

സുൽത്താൻ ബത്തേരി: വയനാട് വന്യജീവി സങ്കേതത്തിലെ മുത്തങ്ങ റേഞ്ച് ആസ്ഥാനത്ത് പ്രിയങ്ക ഗാന്ധി എംപി സന്ദർശനം നടത്തി. വനാർത്തി പ്രദേശങ്ങളിൽ വർധിക്കുന്ന വന്യമൃഗശല്യം, അധിനിവേശ സസ്യങ്ങളുടെ വ്യാപനംമൂലം വനത്തിൽ പരിസ്ഥിതി സന്തുലനത്തിൽ സംഭവിച്ച തകർച്ച ഉൾപ്പടെ വിഷയങ്ങൾ അവർ വനം-വന്യജീവി സംരക്ഷണ വിഭാഗം ഉദ്യോഗസ്ഥരുമായി ചർച്ച ചെയ്തു. വൈൽഡ് ലൈഫ് വാർഡൻ വരുണ്‍ ഡാലിയ, ഫോറസ്റ്റ് വെറ്ററിനറി ഓഫീസർ ഡോ.അരുണ്‍ സക്കറിയ തുടങ്ങിയവർ സന്നിഹിതരായിരുന്നു. മുത്തങ്ങയിലെ വിക്രം, പല്ലവ്ദേവ്, ഭരത് എന്നീ കുംകിയാനകൾക്ക് എംപി ഭക്ഷണം നൽകി. ഐ.സി. ബാലകൃഷ്ണൻ എംഎൽഎയ്ക്കൊപ്പമാണ് പ്രിയങ്ക മുത്തങ്ങ സന്ദർശിച്ചത്.

കൽപ്പറ്റയിൽ ടോയ്‌ലെറ്റ് ബ്ലോക്ക് ഉദ്ഘാടനം ഇന്ന്

കൽപ്പറ്റ: നഗരത്തിൽ ഹെഡ്പോസ്റ്റ് ഓഫീസിനു സമീപം ബസ് കാത്തിരിപ്പുകേന്ദ്രത്തോടുചേർന്ന് നിർമാണം പൂർത്തിയായ ടോയ് ലെറ്റ് ബ്ലോക്ക് ഇന്ന് പൊതുജനങ്ങൾക്ക് തുറന്നുകൊടുക്കും. വൈകുന്നേരം നാലിന് മുനിസിപ്പൽ ചെയർമാൻ ടി.ജെ. ഐസക് ഉദ്ഘാടനം നിർവഹിക്കും. നഗരത്തിലെ പ്രധാന ബസ് കാത്തിരിപ്പുകേന്ദ്രമാണ് ഹെഡ്പോസ്റ്റ് ഓഫീസിനടുത്തുള്ളത്. കോഴിക്കോട് ഭാഗത്തുനിന്നു പുൽപ്പള്ളി, മാനന്തവാടി, ബത്തേരി, മൈസൂരു, ബംഗളൂരു ഭാഗങ്ങളിലേക്കുള്ള ബസുകൾ പഴയ സ്റ്റാൻഡിൽ കയറാറില്ല. വഴിയോരത്ത് ബസുകൾ നിർത്തിയാണ് യാത്രക്കാരെ ഇറക്കുകയും കയറ്റുകയും ചെയ്യുന്നത്. ജില്ലയുടെ വിവിധ ഭാഗങ്ങളിൽനിന്നു കൽപ്പറ്റയിലെത്തുന്നവർക്കും കർണാടകയിലേക്കും മറ്റും യാത്രയ്ക്ക് ബസ് കാത്തു നിൽക്കുന്നവർക്കും ടോയ് ലെറ്റ് സൗകര്യത്തിന്‍റെ അഭാവം വലിയ പ്രയാസം സൃഷ്ടിച്ചിരുന്നു. രാത്രി ഹെഡ് പോസ്റ്റ് ഓഫീസിനു സമീപം ബസ് ഇറങ്ങുന്ന യാത്രക്കാർ പരിസരത്തെ ഇടവഴികളെയാണ് മൂത്രമൊഴിക്കുന്നതിന് ആശ്രയിച്ചിരുന്നത്. ഇത് പകൽ ഇടവഴികളിൽ ദുർഗന്ധം വമിക്കുന്നിതിനു കാരണമായിരുന്നു. ഈ അവസ്ഥയ്ക്കാണ് ടോയ് ലെറ്റ് ബ്ലോക്ക് പ്രവർത്തനം തുടങ്ങുന്നതോടെ പരിഹാരമാകുന്നത്. വർഷങ്ങൾ മുന്പ് നഗരസഭ ബസ് കാത്തിരിപ്പുകേന്ദ്രത്തിനടുത്ത് ഇ- ടോയ് ലെറ്റ് സ്ഥാപിച്ചെങ്കിലും വൈകാതെ വിവിധ കാരണങ്ങളാൽ അടച്ചുപൂട്ടുകയായിരുന്നു. ബസ് കാത്തിരിപ്പുകേന്ദ്രത്തിന്‍റെ ഒരു ഭാഗമാണ് പുതിയ ടോയ് ലെറ്റ് ബ്ലോക്കിന് ഉപയോഗപ്പെടുത്തിയത്. ഹെഡ് പോസ്റ്റ്ഓഫീസിനും അനന്തവീര തിയേറ്ററിനും ഇടിയിലൂടെയുള്ള വീതികുറഞ്ഞ പൊതുവഴി ആഴത്തിൽ കുഴിച്ചാണ് സേഫ്റ്റി ടാങ്ക് സ്ഥാപിച്ചത്. ടോയ് ലെറ്റ് ബ്ലോക്ക് നിർമാണത്തിനും ഇടവഴിയുടെ നവീകരണത്തിനും നഗരസഭ തനത് ഫണ്ടിൽനിന്നും 50 ലക്ഷത്തോളം രൂപ ചെലവഴിച്ചു. ആധുനിക രീതിയിലാണ് ടോയ് ലെറ്റ് ബ്ലോക്ക് നിർമാണം പൂർത്തിയാക്കിയത്. എയർകണ്ടീഷൻ ചെയ്ത ബ്ലോക്ക് 24 മണിക്കൂറും പ്രവർത്തിക്കും. ഇതിനു മൂന്ന് ഷിഫ്റ്റ്കളിലായി ജോലിക്കാരെ നിയോഗിക്കും. പ്രതിദിനം 5,000 കിലോലിറ്റർ ശുദ്ധീകരണശേഷിയുള്ള ടാങ്കാണ് ബ്ലോക്കിൽ ഉപയോഗിച്ചിരിക്കുന്നത്. മലിനജലം പൊല്യൂഷൻ കണ്‍ട്രോൾ ബോർഡ് നിഷ്കർഷിക്കുന്ന നിലവാരത്തിൽ ശുദ്ധീകരിക്കും. എസ്ബിആർ(സീക്വൻസിംഗ് ബാച്ച് റിയാക്ടർ)സാങ്കേതിക വിദ്യ ടോയ് ലെറ്റ് നിർമാണത്തിൽ ഉപയോഗപ്പെടുത്തിയിട്ടുണ്ട്.

കുറുവ വിനോദസഞ്ചാരകേന്ദ്രം ഉണർന്നു; റാഫ്റ്റിംഗ് വൈകാതെ പുനരാരംഭിക്കും

കൽപ്പറ്റ: സൗത്ത് വയനാട് വനം ഡിവിഷനിലെ ചെതലത്ത് റേഞ്ചിലുള്ള കുറുവ ദ്വീപിൽ വിനോദസഞ്ചാരം പുനരാരംഭിച്ചു. മഴക്കാലത്ത് നിർത്തിവച്ച ടൂറിസം പ്രവർത്തനങ്ങൾക്കാണ് ദ്വീപിൽ വീണ്ടും തുടക്കമായത്. ആവശ്യമായ ഒരുക്കം നടത്തിയാണ് സഞ്ചാരികൾക്ക് ദ്വീപിൽ കഴിഞ്ഞ ദിവസം മുതൽ പ്രവേശനം അനുവദിച്ചത്. ദക്ഷിണേന്ത്യയിലെ പ്രസിദ്ധ പരിസ്ഥിതി സൗഹൃദ വിനോദസഞ്ചാരകേന്ദമാണ് കുറുവ. പ്രകൃതിദൃശ്യങ്ങളും ശുദ്ധവായുവും ജൈവവൈവിധ്യ സമൃദ്ധിയുമാണ് കുറുവയുടെ സവിശേഷത. 388ൽപരം ഇനം സസ്യജാലങ്ങളുടെ സാന്നിധ്യം കുറുവ ദ്വീപുകളിൽ സ്ഥിരീകരിച്ചിട്ടുണ്ട്. വംശനാശം നേരിടുന്നതടക്കം 57 ഇനം ഓർക്കിഡുകൾ കുറുവയിലുണ്ട്. 92 ഇനം വൻമരങ്ങളാണ് ദ്വീപുകളിൽ തണൽവിരിക്കുന്നത്. 35 മീറ്റർ വരെ ഉയരത്തിൽ വളരുന്ന നനവാർന്ന ഇലപൊഴിക്കും കാട് കുറുവയുടെ പ്രത്യേകയാണ്. അപൂർവ ഇനങ്ങളിൽപ്പെട്ടതടക്കം പക്ഷിമൃഗാദികളുടെ ആവാസ വ്യവസ്ഥയുമാണ് ദ്വീപുകൾ. ചെറുതും വലുതുമായ 70ൽ പരം തുരുത്തുകളാണ് കുറുവയിലുള്ളത്. ഇതിൽ കബനി നദിയിലെ പാൽവെളിച്ചത്തിനും ചെറിയമലയ്ക്കും ഇടയിലുള്ള രണ്ട് വലിയ തുരുത്തുകളിലാണ് ടൂറിസം. നേരത്തേ ഏഴ് തുരുത്തുകളിൽ സഞ്ചാരികൾക്ക് പ്രവേശനം നൽകിയിരുന്നു. ജൈവ വൈവിധ്യ സംരക്ഷണവും സന്ദർശകരുടെ സുരക്ഷയും കണക്കിലെടുത്താണ് വിനോദസഞ്ചാരം രണ്ട് ദ്വീപുകളിൽ മാത്രമാക്കിയത്.പയ്യന്പള്ളി പാൽവെളിച്ചം, പുൽപ്പള്ളി പാക്കം ചെറിയമല ഭാഗങ്ങളിലൂടെയാണ് സഞ്ചാരികൾക്ക് കുറുവ ദ്വീപിൽ പ്രവേശനം. വിനോദസഞ്ചാരകേന്ദ്രത്തിൽ ദിവസം അനുവദിക്കാവുന്ന സന്ദർശകരുടെ എണ്ണം പരിമിതപ്പെടുത്തിയിട്ടുണ്ട്. പാൽവെളിച്ചം വഴി 245ഉം ചെറിയമല ഭാഗത്തുകൂടി 244ഉം പേർക്കാണ് ദിവസം പ്രവേശനം. ഹൈക്കോടതി ഉത്തരവ് അനുസരിച്ചാണ് ഇത്തരത്തിൽ ക്രമീകരണം ഏർപ്പെടുത്തിയത്. വിനോദയാത്രയ്ക്ക് എത്തുന്ന മുഴുവൻ പേർക്കും ദ്വീപിൽ പ്രവേശനം നൽകാൻ കഴിയാത്ത സ്ഥിതിയാണ്. ഈ പരിമിതി മറികടക്കുന്നതിന് ദ്വീപുകളോടു ചേർന്ന നദിയിൽ റാഫ്റ്റിംഗ് സൗകര്യം ഏർപ്പെടുത്തിയിരുന്നു. നദിയിലൂടെയുള്ള ചെറു ചങ്ങാട സവാരികൾ ഒഴുക്കിന്‍റെ ശക്തി കുറയുന്നതനുസരിച്ച് പുനരാരംഭിക്കും. രാവിലെ 9.30 മുതൽ ഉച്ചകഴിഞ്ഞ് 3.30 വരെയാണ് സഞ്ചാരികൾക്കു ദ്വീപിൽ പ്രവേശനം.

ബത്തേരിയിൽ ബാങ്കേഴ്സ് മീറ്റ് നടത്തി

സുൽത്താൻ ബത്തേരി: സംരംഭകർക്ക് ബാങ്കിംഗ് സേവനങ്ങളിൽ അവബോധം പകരാനും ബാങ്കും സംരംഭകരും തമ്മിലുള്ള ആശയവിനിമയം സുഗമമാക്കുന്നതിനും വൈത്തിരി താലൂക്ക് വ്യവസായ കേന്ദ്രത്തിന്‍റെ ആഭിമുഖ്യത്തിൽ ബാങ്കേഴ്സ് മീറ്റ് നടത്തി. കേന്ദ്ര സൂക്ഷ്മ-ചെറുകിട-ഇടത്തരം വ്യവസായ മന്ത്രാലയത്തിന്‍റെയും സംസ്ഥാന വ്യവസായ വാണിജ്യ വകുപ്പിന്‍റെയും ആഭിമുഖ്യത്തിൽ നടത്തുന്ന ലോക ബാങ്ക് പദ്ധതിയായ റൈസിംഗ് ആൻഡ് ആക്സിലറേറ്റിംഗ് എംഎസ്എംഇ പെർഫോർമൻസ് റാന്പ് പദ്ധതിയുടെ ഭാഗമായാണ് മീറ്റ് സംഘടിപ്പിച്ചത്. ഹോട്ടൽ സാഫ്രോണിൽ നഗരസഭാ കൗണ്‍സിലർ പ്രജിത രവി ഉദ്ഘാടനം ചെയ്തു. ജില്ലാ വ്യവസായ കേന്ദ്രം ഡെപ്യൂട്ടി ഡയറക്ടർ പി.എസ്. കലാവതി അധ്യക്ഷത വഹിച്ചു. വൈത്തിരി ഉപജില്ലാ വ്യവസായ ഓഫീസർ എൻ. അയ്യപ്പൻ, ലീഡ് ബാങ്ക് മാനേജർ ടി.എം. മുരളീധരൻ, ബത്തേരി വ്യവസായ വികസന ഓഫീസർ ജി.എസ്. സ്മിത എന്നിവർ പ്രസംഗിച്ചു. വ്യവസായ വകുപ്പ് പ്രതിനിധികളും 12 ബാങ്ക് മാനേജർമാരും 70 സംരംഭകരും പങ്കെടുത്തു. ബാങ്ക് വായ്പകൾക്കുള്ള 20 അപേക്ഷകൾ മീറ്റിൽ ലഭിച്ചു. പുതിയ സംരംഭകർക്ക് ഉദ്യം, കെ സ്വിഫ്റ്റ് രജിസ്ട്രേഷനു സൗകര്യം ഒരുക്കിയിരുന്നു.

ശ്രീകൃഷ്ണജയന്തി ആഘോഷിച്ചു

കൽപ്പറ്റ: ജില്ലയിൽ ശ്രീകൃഷ്ണ ജയന്തി ആഘോഷിച്ചു. നിരവധി സ്ഥലങ്ങളിൽ ബാലഗോകുലത്തിന്‍റെ നേതൃത്വത്തിൽ വർണാഭമായ ശോഭായാത്ര നടന്നു. പനമരം കൃഷ്ണൻമൂല ശ്രീകൃഷ്ണ ക്ഷേത്രത്തിൽ വിശേഷ പൂജകൾ, വൃന്ദാവനം നൃത്താവിഷ്കാരം, കായിക മത്സരങ്ങൾ, പിറന്നാൾ സദ്യ, ദീപാരാധന, വിഷ്ണു സഹസ്രനാമ അർച്ചന, കുചേലഗമനം ദൃശ്യാവിഷ്കാരം തുടങ്ങിയവ നടന്നു. ക്ഷേത്ര ഭരണസമിതി, പാഞ്ചജന്യം സന്നദ്ധ സേവാസംഘം, മാതൃസമിതി എന്നിവ സംയുക്തമായാണ് പരിപാടികൾ സംഘടിപ്പിച്ചത്വടുവഞ്ചാൽ: ശ്രീകൃഷ്ണജയന്തി ആഘോഷത്തിന്‍റെ ഭാഗമായി "ഗ്രാമം തണലേകട്ടെ, ബാല്യം സഫലമാകട്ടെ’ എന്ന സന്ദേശവുമായി ശ്രീ ദുർഗാ ബാലഗോകുലം വിവിധ ക്ഷേത്ര സമിതികളുടെ സഹകരണത്തോടെ ടൗണിൽ വർണാഭമായ ശോഭായാത്ര നടത്തി. കൃഷ്ണ-ഗോപിക വേഷധാരികളായ നിരവധി കുട്ടികളും വാദ്യമേളങ്ങളും ഗോപികനൃത്തവും ശ്രീകൃഷ്ണ സ്തുതികളും കൂടിച്ചേർന്നതായിരുന്നു ശോഭായാത്ര. കുഞ്ഞോത്ത് കോട്ട ശ്രീ പോർക്കലി ഭഗവതി ക്ഷേത്രത്തിൽ ചിത്രഗിരി സെന്‍റ് ജോർജ് പള്ളി വികാരി ഫാ. ജോസ് തുരുത്തേൽ ശോഭായാത്ര ഉദ്ഘാടനം ചെയ്തു. ഉപ ശോഭായാത്രകൾ സംഗമിച്ച് നഗര പ്രദക്ഷിണത്തോടെ കുഞ്ഞോത്തുകോട്ട ക്ഷേത്രവളപ്പിലായിരുന്നു സമാപനം. ഇതിനുശേഷം കുട്ടികളുടെ കലാപരിപാടികൾ, പായസ പ്രസാദ വിതരണം എന്നിവ നടന്നു.

വിജയന്‍റെ കുടുംബത്തിന്‍റെ ബാധ്യത പാർട്ടി എന്തിന് ഏറ്റെടുക്കണം? ചോദ്യവുമായി കോണ്‍ഗ്രസ് പ്രവർത്തകർ

കൽപ്പറ്റ: വയനാട് ഡിസിസി ട്രഷറർ ആയിരിക്കേ സാന്പത്തിക പ്രതിസന്ധിയിൽ അകപ്പെട്ടതിനെത്തുടർന്ന് വിഷം കഴിച്ച് ജീവനൊടുക്കിയ ബത്തേരി മണിച്ചിറ എൻ.എം. വിജയന്‍റെ കുടുംബത്തിന്‍റെ ബാധ്യത കോണ്‍ഗ്രസ് എന്തിന് ഏറ്റെടുക്കണം? വിജയന്‍റെ ബാധ്യത പൂർണമായും ഏറ്റെടുക്കാതെ പാർട്ടി നേതൃത്വം വഞ്ചിച്ചുവെന്ന ആരോപണം മരുമകൾ പദ്മജ ഉന്നയിക്കുകയും കൈഞരന്പ് മുറിച്ച് കഴിഞ്ഞ ദിവസം ആത്മഹത്യക്ക് ശ്രമിക്കുകയും ചെയ്ത പശ്ചാത്തലത്തിൽ ജില്ലയിലെ കോണ്‍ഗ്രസ് പ്രവർത്തകകരിൽ ഒരു വിഭാഗം ഉയർത്തുന്നതാണ് ഈ ചോദ്യം. വിഷം കഴിച്ച എൻ.എം. വിജയൻ കോഴിക്കോട് മെഡിക്കൽ കോളജ് ആശുപത്രിയിൽ ചികിത്സയിലരിക്കേ 2024 ഡിസംബർ 27നാണ് മരിച്ചത്. വിജയനൊപ്പം വിഷം കഴിച്ച ഇളയമകൻ ജിജേഷും ചികിത്സയിലിരിക്കേ ഇതേ ദിവസം മരിച്ചു. മരണത്തിനു മുന്പ് വിജയൻ എഴുതി കുറിപ്പുകൾ പുറത്തുവരികയും അവയിലെ ഉള്ളടക്കം വിവാദമാകുകയും ചെയ്തപ്പോഴാണ് അദ്ദേഹം കടത്തിൽ മുങ്ങിയകഥ കോണ്‍ഗ്രസിലെ സാധാരണ പ്രവർത്തകരുടെ ശ്രദ്ധയിൽപ്പെടുന്നത്. കോണ്‍ഗ്രസ് നിയന്ത്രണത്തിലുള്ള സഹകരണ ബാങ്കുകളിൽ ജോലി വാഗ്ദാനം ചെയ്ത് വിജയൻ ഇടനിലക്കാരൻ എന്ന നിലയിൽ അനേകം ആളുകളിൽനിന്നു പണം വാങ്ങിയിരുന്നു. ഇവരിൽ പലർക്കും ജോലി കൊടുക്കാനോ പണം തിരികെ നൽകാനോ വിജയനു കഴിഞ്ഞില്ല. നിയമന വാഗ്ദാനം നൽകി ആളുകളിൽനിന്നു വാങ്ങിയ പണം ജില്ലയിലെ കോണ്‍ഗ്രസ് നേതാക്കളിൽ ചിലർക്കാണ് വിജയൻ കൈമാറിയത്. ഈ വിവരം വ്യക്തമാക്കുന്നതായിരുന്നു വിജയന്‍റെ മരണശേഷം പുറത്തുവന്ന കുറിപ്പുകൾ. വ്യക്തിഗത ആവശ്യങ്ങൾക്കും പാർട്ടിയിൽപ്പെട്ട ചിലരുടെ താത്പര്യം മുൻനിർത്തിയും വിജയൻ സ്വന്തം സ്വത്ത് പണയപ്പെടുത്തി ലക്ഷക്കണക്കിനു രൂപ ധനകാര്യ സ്ഥാപനങ്ങളിൽനിന്നു വായ്പയെടുത്തിരുന്നു. ബാധ്യതകൾ വലിയ അലോസരമായപ്പോഴായിരുന്നു വിജയന്‍റെയും മകന്‍റെയും ആത്മഹത്യ. ബാങ്കുകളിൽ നിയമനത്തിന് നൽകിയവർ ബാധ്യതകൾ വീട്ടുന്നതിന് പലവട്ടം കത്തുനൽകിയിട്ടും പാർട്ടിയിലെ ഉത്തരവാദപ്പെട്ടർ കൂട്ടാക്കിയില്ലെന്ന പരിഭവം വിജയന്‍റെ കുറിപ്പുകളിൽ ഉണ്ടായിരുന്നു. വിജയന്‍റെ മരണം വിവാദമാകുകയും മുതിർന്ന നേതാക്കളിൽ ചിലർ ആത്മഹത്യ പ്രേരണയ്ക്ക് കേസിൽപ്പെടുകയും ചെയ്തപ്പോൾ പാർട്ടി ഇടപെടൽ ഉണ്ടായി. വിജയന്‍റെ വീട് സന്ദർശിച്ച പാർട്ടി നേതാക്കൾ ബാധ്യതകൾ ഏറ്റെടുക്കുമെന്ന് കുടുംബാംഗങ്ങൾക്ക് രേഖാമൂലം ഉറപ്പുനൽകി. ബാങ്കുകളിൽ അടക്കം ഏകദേശം രണ്ടേകാൽ കോടി രൂപയുടെ കടമാണ് വിജയന് ഉണ്ടായിരുന്നത്. എന്നാൽ രണ്ട് തവണകളായി 20 ലക്ഷം രൂപയാണ് പാർട്ടി ഇതിനകം ലഭ്യമാക്കിയത്. പാർട്ടി നേതാക്കളിൽ ചിലരുമായി ഉണ്ടാക്കിയ ഉടന്പടിയിൽ പറയുന്നതു പ്രകാരം അഞ്ച് ലക്ഷം രൂപ കൂടി ലഭിക്കാനുണ്ടെന്നാണ് വിജയന്‍റെ കുടുംബാംഗങ്ങൾ പറയുന്നത്. വീടിന്‍റെയും സ്ഥലത്തിന്‍റെയും ബാധ്യത തീർക്കാൻ പാർട്ടി തയാറാകുന്നില്ലെന്നും കുടുംബം കുറ്റപ്പെടുത്തുന്നുണ്ട്. ബാധ്യതകൾ വിജയൻ പാർട്ടിക്കുവേണ്ടി വരുത്തിയല്ല. അതിനാൽത്തന്നെ വിജയന്‍റെ കടങ്ങൾ വീട്ടേണ്ട ഉത്തരവാദിത്വം കെപിസിസിക്ക് ഇല്ലെന്നാണ് ജില്ലയിലെ കോണ്‍ഗ്രസ് പ്രവർത്തകർക്കിടയിലെ പൊതു അഭിപ്രായം. ഇത് തുറന്നടിക്കാൻ വിമുഖത കാട്ടുന്ന അവർ, വിജയനെ കടക്കെണിയിലാക്കിയവരിൽനിന്നു പണം തിരിച്ചുപിടിച്ച് കുടുംബത്തിന് ലഭ്യമാക്കുന്നതിനുള്ള ഇടപെടലാണ് കെപിസിസി നടത്തേണ്ടതെന്നും അടക്കം പറയുന്നു. വിജയന്‍റെ ബാധ്യതകൾ വീട്ടുന്നതുമായി ബന്ധപ്പെട്ട് പാർട്ടി നേതാക്കളിൽ ചിലർ ഉടന്പടയിൽ ഏർപ്പെട്ടിരുന്നു. ഈ ഉടന്പടിയിൽ പറയുന്ന കാര്യങ്ങൾ പാർട്ടി ഒന്നൊന്നായി നടത്തിവരികയാണെന്നാണ് കഴിഞ്ഞ ദിവസം ടി. സിദ്ദിഖ് എംഎൽഎ പറഞ്ഞത്. എന്നാൽ ഇത്തരത്തിൽ ഉടന്പടി ഉള്ളതായി അറിയില്ലെന്നാണ് കെസപിസി അധ്യക്ഷൻ മാധ്യമങ്ങളെ അറിയിച്ചത്. പ്രവർത്തകരെ മരണത്തിലേക്ക് തള്ളിവിടുന്ന സ്വഭാവം കോണ്‍ഗ്രസിനില്ല: എൻ.ഡി. അപ്പച്ചൻ കൽപ്പറ്റ: പ്രവർത്തകരെ മരണത്തിലേക്ക് തള്ളിവിടുന്ന സ്വഭാവം കോണ്‍ഗ്രസിനില്ലെന്ന് ഡിസിസി പ്രസിഡന്‍റ് എൻ.ഡി. അപ്പച്ചൻ പ്രസ്താവനയിൽ പറഞ്ഞു. അപ്രതീക്ഷിതമായി ഉണ്ടാകുന്ന പ്രതിസന്ധികൾ തരണം ചെയ്യാൻ കഴിയാത്തവരാണ് ആത്മഹത്യയിൽ അഭയം തേടുന്നത്. ഇക്കൂട്ടത്തിൽ കോണ്‍ഗ്രസുകാരും ഉണ്ടാകാം. പുൽപ്പള്ളിയിൽ പഞ്ചായത്തംഗം ജീവനൊടുക്കിയതും ബത്തേരിയിൽ പാർട്ടി കുടുംബാംഗം ആത്മഹത്യക്ക് ശ്രമിച്ചതും മുന്പുണ്ടായ ചില മരണങ്ങളും ചൂണ്ടിക്കാട്ടി കോണ്‍ഗ്രസ് ജില്ലാ നേതൃത്വത്തിനെതിരേ സിപിഎമ്മും ബിജെപിയും കുതിരകയറുകയാണ്. പൊതുസമൂഹത്തിന് മുന്പിൽ ജാള്യത്തോടെ നിൽക്കുന്ന സിപിഎമ്മിന്‍റെയും ബിജെപിയുടെയും ജൽപനങ്ങൾക്ക് കോണ്‍ഗ്രസിനെ തകർക്കാനാകില്ല. സംസ്ഥാനത്ത് കൊലപാതക പരന്പരകൾ നടത്തിയ പാർട്ടികളാണ് സിപിഎമ്മും ബിജെപിയും. മുള്ളൻകൊല്ലി പ്രശ്നത്തിന്‍റെ പേരിൽ രാഷ്ട്രീയ മുതലെടുപ്പിനാണ് ഇടതു പാർട്ടികളും ബിജെപിയും ശ്രമിക്കുന്നത്. ഇത് വിലപ്പോകില്ല. ജനങ്ങൾക്കിടയിൽ ആശയക്കുഴപ്പം സൃഷ്ടിക്കാൻ സിപിഎം, ബിജെപി നേതാക്കൾ പലതും പടച്ചുവിടുകയാണെന്നും അപ്പച്ചൻ പറഞ്ഞു. കോണ്‍ഗ്രസുകാരുടെ ആത്മഹത്യകളിൽ അന്വേഷണം വേണം: ആർജെഡി കൽപ്പറ്റ: ജില്ലയിലെ കോണ്‍ഗ്രസ് നേതാക്കളുടെ ആത്മഹത്യകളിൽ പോലീസ് സമഗ്രാന്വേഷണം നടത്തണമെന്ന് രാഷ്ട്രീയ ജനതാദൾ-ആർജെഡി ജില്ലാ കമ്മിറ്റി ആവശ്യപ്പെട്ടു. കഴിഞ്ഞ വെള്ളിയാഴ്ച മുള്ളൻകൊല്ലി പഞ്ചായത്ത് അംഗവും കോണ്‍ഗ്രസ് നേതാവുമായ ജോസ് നെല്ലേടം ജീവനൊടുക്കി. അടുത്ത ദിവസം ബത്തേരിയിൽ കോണ്‍ഗ്രസ് കുടുംബാംഗം പദ്മജ ആത്മഹത്യക്കു ശ്രമിച്ചു. ഡിസിസി ട്രഷറർ ആയിരിക്കേ കഴിഞ്ഞ വർഷം ജീവനൊടുക്കിയ എൻ.എം. വിജയന്‍റെ മരുമകളാണ് പദ്മജ. വർഷങ്ങൾ മുന്പ് മാനന്തവാടി കോണ്‍ഗ്രസ് ഓഫീസിൽ ബ്ലോക്ക് കോണ്‍ഗ്രസ് പ്രസിഡന്‍റ് പി.വി. ജോണ്‍ ആത്മഹത്യ ചെയ്തു. ഇതിനെല്ലാം പിന്നിൽ കോണ്‍ഗ്രസിലെ ചില നേതാക്കളുടെ വഴിവിട്ട ഇടപെടലുകളാണ്. ഇക്കാര്യങ്ങൾ പുറത്തുവരാൻ പോലീസിന്‍റെ വിശദാന്വേഷണം ആവശ്യമാണെന്ന് യോഗം അഭിപ്രായപ്പെട്ടു. പ്രസിഡന്‍റ് ഡി. രാജൻ അധ്യക്ഷത വഹിച്ചു.

വടുവൻചാലിൽ ലയണ്‍സ് ഹോസ്പിറ്റൽ പ്രവർത്തനം തുടങ്ങി

സുൽത്താൻ ബത്തേരി: ലയണ്‍സ് ക്ലബ് കേരള ഘടകം വടുവൻചാലിൽ സ്ഥാപിച്ച ആശുപത്രി ഇൻർനാഷണൽ പ്രസിഡന്‍റ് എ.പി. സിംഗ് ഉദ്ഘാടനം ചെയ്തു. കേരള മൾട്ടിപ്പിൾ കൗണ്‍സിൽ ചെയർമാൻ രാജൻ നന്പൂതിരി അധ്യക്ഷത വഹിച്ചു. ടി. സിദ്ദിഖ് എംഎൽഎ ഹെൽത്ത് കാർഡ് വിതരണം നിർവഹിച്ചു. മുൻ ഇന്‍റർനാഷണൽ ഡയറക്ടർ കൃഷ്ണ റെഡി, സംഗീത ജാട്ടിയ എന്നിവർ സ്പീച്ച്-ഹിയറിംഗ് യൂണിറ്റ് ഉദ്ഘാടനം ചെയ്തു. ഡയാലിസിസ് സെന്‍റർ വി.പി. നന്ദകുമാറും മാനസികാരോഗ്യ ബോധവത്കരണം മുൻ ഡയറക്ടർ വിജയകുമാർ രാജുവും ഉദ്ഘാടനം ചെയ്തു. മുൻ ഡയറക്ടർ ആർ. മുരുകൻ, ലയണ്‍സ് ഗവർണർ രവി ഗുപ്ത, മുൻ ഗവർണർ പ്രഫ.പി. വർഗീസ് വൈദ്യൻ, ടി.കെ.രജീഷ്, വിനീഷ് വിദ്യാധരൻ, ഡോ.രാജീവ്, അമർനാഥ്, എ.വി. വാമനകുമാർ, ടൈറ്റസ് തോമസ്, പി.എസ്. സൂരജ് എന്നിവർ പ്രസംഗിച്ചു. ആശുപത്രിയിൽ ആദ്യഘട്ടത്തിൽ ഡയാലിസിസ് യൂണിറ്റുകളും സ്പീച്ച് ആൻഡ് ഹിയറിംഗ് സെന്‍ററും പ്രവർത്തിക്കും. പുഞ്ചിരിമട്ടം ഉരുൾ ദുരന്തബാധിതർക്ക് സൗജന്യമായും മറ്റുള്ളവർക്ക് ഇളവുകളോടെയും ചികിത്സ ലഭ്യമാക്കും.

പദ്മജയെയും ജോസിന്‍റെ കുടുംബത്തെയും എം.വി. ജയരാജൻ സന്ദർശിച്ചു

കൽപ്പറ്റ: ആത്മഹത്യക്ക് ശ്രമിച്ച് ബത്തേരിയിൽ സ്വകാര്യ ആശുപത്രിയിൽ ചികിത്സയിലുള്ള കോണ്‍ഗ്രസ് കുടുംബാംഗം പദ്മജയെയും ജീവനൊടുക്കിയ മുള്ളൻകൊല്ലി പഞ്ചായത്ത് ഭരണസമിതിയംഗവും കോണ്‍ഗ്രസ് നേതാവുമായ ജോസ് നെല്ലേടത്തിന്‍റെ കുടുംബത്തെയും സിപിഎം സംസ്ഥാന സെക്രട്ടേറിയറ്റ് അംഗം എം.വി. ജയരാജൻ സന്ദർശിച്ചു. ജില്ലാ സെക്രട്ടറി കെ. റഫീഖ്, നേതാക്കളായ വി.വി. ബേബി, സി.കെ. രാമചന്ദ്രൻ, പി.ആർ. ജയപ്രകാശ് രുക്മിണി സുബ്രഹ്മണ്യൻ എന്നിവർക്കൊപ്പമാണ് ജയരാജൻ പദ്മജയെ കാണാനെത്തിയത്. കഴിഞ്ഞ വർഷം ആത്മഹത്യ ചെയ്ത വയനാട് ഡിസിസി ട്രഷറർ എൻ.എം. വിജയന്‍റെ മരുമകളാണ് പദ്മജ. വിജയന്‍റെ കുടുംബത്തിന്‍റെ സാന്പത്തിക ബാധ്യത കോണ്‍ഗ്രസ് ഏറ്റെടുക്കുന്നില്ലെങ്കിൽ സിപിഎം സഹായത്തിനു തയാറാകുമെന്ന് ജയരാജൻ ആശുപത്രി പരിസരത്ത് മാധ്യമപ്രവർത്തകരോട് പറഞ്ഞു. പാർട്ടി നേതാക്കളായ കെ. റഫീഖ്, രുക്മിണി സുബ്രഹ്മണ്യൻ, എം.എസ്. സുരേഷ്ബാബു, ബൈജു നന്പിക്കൊല്ലി, സി.പി. വിൻസന്‍റ് എന്നിവർക്കൊപ്പമായിരുന്നു ജോസിന്‍റെ വസതിയിൽ സന്ദർശനം. ജോസിന്‍റെ കുടുംബാംഗങ്ങളെ അദ്ദേഹം ആശ്വസിപ്പിച്ചു.

സ്വന്തം ബാൻഡ് സെറ്റ് ടീമുമായി തവിഞ്ഞാൽ സെന്‍റ് മേരീസ് ഇടവക

തവിഞ്ഞാൽ: വയനാട്ടിലെ തവിഞ്ഞാൽ സെന്‍റ് മേരീസ് ഇടവകയ്ക്ക് സ്വന്തം ബാൻഡ് സെറ്റ് ടീമായി. 12 വനിതകളും രണ്ട് പുരുഷൻമാരും അടങ്ങുന്ന ടീമിന്‍റെ അരങ്ങേറ്റം പരിശുദ്ധമാതാവിന്‍റെ ജനനത്തിരുനാൾ ആഘോഷനാളിൽ പള്ളി അങ്കണത്തിൽ നടന്നു. 15നും 40നും ഇടയിലാണ് ടീം അംഗങ്ങളുടെ പ്രായം. വിദ്യാർഥികളും വീട്ടമ്മമാരും ഇവർക്കിടയിലുണ്ട്. ഇടവകാംഗമായ കുഴിക്കാലിൽ കരോട്ട് ജോണിയാണ് പരിശീലകൻ. നാലുമാസത്തെ ശിക്ഷണം കഴിഞ്ഞപ്പോഴാണ് ടീം അരങ്ങേറ്റത്തിനു പ്രാപ്തി നേടിയതെന്ന് ജോണി പറഞ്ഞു. ഡിസംബറോടെ ടീം ഇടവകയ്ക്കു പുറത്ത് പ്രോഗ്രാമിനുപോകാൻ പാകത്തിൽ ബാൻഡ് മേളത്തിൽ വൈദഗ്ധ്യം നേടുമെന്നാണ് അദ്ദേഹത്തിന്‍റെ അഭിപ്രായം. ടീമിന് രണ്ട് ബുക്കിംഗ് ഇതിനകം ലഭിച്ചു. ബാൻഡ് മേളത്തിൽ ഉപയോഗിക്കുന്നതിൽ 12 ഉപകരണങ്ങൾ കൈകാര്യം ചെയ്യുന്ന കലാകാരനാണ് ജോണി. ഇടവകയ്ക്ക് സ്വന്തമായി ബാൻഡ്സെറ്റ് ടീം എന്ന ആശയം മുൻ വികാരി ഫാ.ആന്‍റോ മന്പള്ളിലിന്‍റേതാണ്. നിലവിലെ വികാരി ഫാ.ജയിംസ് പുത്തൻപറന്പിലിന്‍റെ പ്രോത്സാഹനമാണ് ബാൻഡ് മേളം പരിശീലനത്തിൽ പ്രചോദനമായത്.

മകന്‍റെ വിവാഹദിനത്തിൽ രണ്ട് കുടുംബങ്ങൾക്ക് അഞ്ച് സെന്‍റ് വീതം സ്ഥലം നൽകി ദന്പതികൾ

സുൽത്താൻ ബത്തേരി: മൂത്ത മകന്‍റെ വിവാഹദിനത്തിൽ രണ്ട് നിർധന കുടുംബങ്ങൾക്ക് ഭവനനിർമാണത്തിന് അഞ്ച് സെന്‍റ് വീതം സ്ഥലം നൽകി ദന്പതികൾ. റോട്ടറി ക്ലബ് അംഗം മൂലങ്കാവ് വിളക്കുന്നേൽ സണ്ണി- ഷീജ ദന്പതികളാണ് മകൻ വി.ടി. ആർജിതിന്‍റെയും ഇരുളം കൊടിത്തോപ്പിൽ തോമസ്-മിനി ദന്പതികളുടെ മകൾ നിനുവിന്‍റെയും വിവാഹദിനത്തിൽ ഭൂദാനം നടത്തിയത്. മൂലങ്കാവ് സെന്‍റ് ജൂഡ്സ് പള്ളിയിൽ നടന്ന വിവാഹകർമത്തിനുശേഷം നവദന്പതികൾ ഭൂമിയുടെ രേഖ കുടുംബങ്ങൾക്ക് കൈമാറി. ചീരാൽ ടൗണിന് ഒരു കിലോമീറ്റർ അകലെയുള്ള ഭൂമിയുടെ രജിസ്ട്രേഷൻ നേരത്തേ നടത്തിയിരുന്നു. ചീരാൽ ഉള്ളോലിക്കൽ ഷിനു പത്രോസ്, മലവയൽ കണിയാംവയൽ കെ.എസ്. നീനു എന്നിവർക്കാണ് ഭൂമി ലഭിച്ചത്. വളരെ പ്രയാസകരമായ സാഹചര്യങ്ങളിൽ കഴിഞ്ഞിരുന്നവരാണ് ഇവരും കുടുംബാംഗങ്ങളും. രണ്ട് കുടുംബങ്ങളുടെയും ദയനീയാവസ്ഥ ശ്രദ്ധയിൽപ്പെതിനെത്തുടർന്നാണ് അഞ്ച് സെന്‍റ് വീതം ഭൂമി നൽകാൻ വിളക്കുന്നേൽ കുടുംബം തീരുമാനിച്ചത്. ചിറ്റിലപ്പള്ളി റോട്ടറി സ്വപ്ന ഭവന പദ്ധതിയിൽ ഷിനുവിനും നീനുവിനും വീട് ലഭ്യമാക്കുന്നതിനു ഇടപെട്ടതായി സണ്ണി പറഞ്ഞു.

പഴശിരാജ കോളജിൽ- ദേശീയ കോണ്‍ഫറൻസ്

പുൽപ്പള്ളി: പഴശിരാജ കോളജിലെ മാധ്യമ വിഭാഗത്തിന്‍റെ നേതൃത്വത്തിൽ ദേശീയ കോണ്‍ഫറൻസ് സംഘടിപ്പിക്കുന്നു. 16, 17 തീയതികളിൽ നടത്തുന്ന മാധ്യമ കോണ്‍ഫറൻസിൽ മാധ്യമ സംവിധാനങ്ങളും ഏഷ്യൻ ഭൗമ രാഷ്ട്രീയവും, സാധ്യതകളും വെല്ലുവിളികളും എന്ന വിഷയത്തിലാണ് കോണ്‍ഫറൻസ് നടത്തുന്നത്. കേന്ദ്ര സർക്കാർ സ്ഥാപനമായ ഇന്ത്യൻ കൗണ്‍സിൽ ഫോർ വേൾഡ് അഫയേഴ്സ് (ഐസിഡബ്ല്യുഎ) ആണ് കോണ്‍ഫറൻസിന് ആവശ്യമായ ധനസഹായം ചെയ്യുന്നത്. മാധ്യമങ്ങളുടെ വളർച്ച, ഏഷ്യൻ ഭൗമ രാഷ്ട്രീയത്തിൽ മാധ്യമ സാങ്കേതിക വിദ്യകളുടെ ഭാവി, വ്യാപാരസാന്പത്തിക സഖ്യങ്ങളിൽ മാധ്യമങ്ങളുടെ പങ്ക്, മാധ്യമ മേഖല നേരിടുന്ന വെല്ലുവിളികൾ, തുടങ്ങിയവയാണ് കോണ്‍ഫറൻസിലെ ചർച്ചാവിഷയങ്ങൾ. വിവിധ സർവകലാശാലകളിൽ നിന്നും ഗവേഷണ സ്ഥാപനങ്ങളിൽ നിന്നും മാധ്യമ സ്ഥാപനങ്ങളിൽ നിന്നുമുള്ള 13 പ്രമുഖരാണ് കോണ്‍ഫറൻസിൽ നേരിട്ട് പ്രബന്ധങ്ങൾ അവതരിപ്പിക്കുന്നത്. വിദ്യാർഥികൾ, അധ്യാപകർ തുടങ്ങി മറ്റു നിരവധിപേർ കോണ്‍ഫറൻസിൽ പങ്കെടുക്കും. ഇന്ത്യൻ ഇൻസ്റ്റിറ്റ്യൂട്ട് ഓഫ് മാസ് കമ്മ്യൂണിക്കേഷൻ ബിസിനസ് കമ്മ്യൂണിക്കേഷൻ വിഭാഗം മേധാവി ഡോ. സുരഭി ദാഹിയ ഉദ്ഘാടനം നിർവഹിക്കും. ഡൽഹി ജവഹർലാൽ നെഹ്റു യൂണിവേഴ്സിറ്റിയിലെ പ്രഫ.ഡോ. മനുഗോണ്ട രവീന്ദ്രനാഥ്, മൈസൂരു യൂണിവേഴ്സിറ്റിയിലെ മാധ്യമ വിഭാഗം അധ്യാപിക ഡോ.എം.എസ്. സപ്ന, തമിഴ്നാട് കേന്ദ്ര സർവകലാശാലയിലെ മാധ്യമ വിഭാഗം മേധാവി ഡോ. രാധ, കേരള യൂണിവേഴ്സിറ്റിയിലെ മാധ്യമ വിഭാഗം അധ്യാപകൻ ഡോ. ലാൽമോഹൻ, തിരുവനന്തപുരം മാർ ഇവാനിയോസ് കോളജിലെ മാധ്യമ വിഭാഗം അധ്യാപകൻ ഡോ.എസ്.ആർ. സഞ്ജീവ്, കൽപ്പറ്റ ഗവ.കോളജിലെ മാധ്യമ അധ്യാപകരായ ഡോ. സ്മിത, അനീഷ് എം. ദാസ്, മദ്രാസ് ക്രിസ്ത്യൻ കോളജിലെ കമ്മ്യൂണിക്കേഷൻ വിഭാഗം മേധാവി ഡോ. ദേബോറ രാജ്, കണ്ണൂർ ഡോണ്‍ ബോസ്കോ കോളജിലെ മാധ്യമ വിഭാഗം അധ്യാപിക ഡോ. സീന ജോണ്‍സണ്‍, ജെയിൻ യൂണിവേഴ്സിറ്റിയിലെ മാധ്യമ വിഭാഗം മേധാവി ഡോ. നിമ്മി മരിയ ജോസഫ്, മാധ്യമപ്രവർത്തകരായ ജോസ് കുര്യൻ, എം.പി. പ്രശാന്ത് എന്നിവരാണ് കോണ്‍ഫറൻസിൽ പ്രത്യേക ക്ഷണിതാക്കളായി പ്രബന്ധങ്ങൾ അവതരിപ്പിക്കുന്നത്. കൂടാതെ കേരളത്തിനകത്തും പുറത്തുനിന്നുമുള്ള വിവിധ സർവകലാശാലകളിലെ അധ്യാപകരും ഗവേഷകരും വിവിധ വിഷയങ്ങളിൽ പ്രബന്ധങ്ങൾ അവതരിപ്പിക്കും. പഴശിരാജ കോളജിലെ മാധ്യമ വിഭാഗം അധ്യാപകരായ ഡോ. ജോബിൻ ജോയ്, ഷോബിൻ മാത്യു, ലിൻസി ജോസഫ്, ക്രിസ്റ്റീന ജോസഫ്, റിയ കൃഷ്ണ, എം.ഡി. അലക്സ്, വിദ്യാർഥികളായ നിലീന, സഞ്ജന, ഋതിൻ രാജ്, അസോസിയേഷൻ സെക്രട്ടറി അഭിനവ് എന്നിവരാണ് കോണ്‍ഫറൻസിന് നേതൃത്വം നൽകുന്നത്. കോണ്‍ഫറൻസ് 17ന് സമാപിക്കും.

ജോസ് നെല്ലേടത്തിന്‍റെ മരണത്തിൽ സമഗ്രാന്വേഷണം വേണം: ആം ആദ്മി പാർട്ടി

പുൽപ്പള്ളി: ജനകീയനും പൊതുപ്രവർത്തനത്തിൽ മാതൃകയുമായിരുന്ന ജോസ് നെല്ലേടത്തിനെ ആത്മഹത്യയിലേക്ക് നയിച്ച കാര്യങ്ങളിൽ സമഗ്രാന്വേഷണം നടത്തണമെന്ന് ആം ആദ്മി പാർട്ടി മുള്ളൻകൊല്ലി പഞ്ചായത്ത് കമ്മിറ്റി ആവശ്യപ്പെട്ടു. ആരോ നൽകിയ വിവരത്തിന്‍റെ പേരിൽ നിരപരാധിയെ 17 ദിവസം ജയിലിൽ അടച്ചതും അന്വേഷിക്കണം. കുറച്ചുകാലമായി മുള്ളൻകൊല്ലിയിൽ നടക്കുന്നത് പൊതുപ്രവർത്തകർക്ക് നാണക്കേടുണ്ടാക്കുന്ന സംഭവങ്ങളാണെന്ന് യോഗം അഭിപ്രായപ്പെട്ടു. പൊതുപ്രവർത്തകർ വ്യക്തി താത്പര്യം ഒഴിവാക്കി ജനനൻമയ്ക്കുവേണ്ടി പ്രവർത്തിക്കണമെന്ന് ആവശ്യപ്പെട്ടു. ജോസ് നെല്ലേടത്തിന്‍റെ മരണത്തിൽ അനുശോചിച്ചു. ബത്തേരി മണ്ഡലം പ്രസിഡന്‍റ് ലിയോ കൊല്ലവേലിൽ അധ്യക്ഷത വഹിച്ചു. പഞ്ചായത്ത് കമ്മിറ്റി പ്രസിഡന്‍റ് കെ.സി. വർഗീസ്, ആന്‍റണി പൂത്തോട്ടയിൽ, സജി പനച്ചകത്തേൽ, നോബി പള്ളിത്തറ, ഷാജി വണ്ടന്നൂർ, ഉലഹനാൻ മേമാട്ട്, കെ.ജി. ബെന്നി, സാബു ഏബ്രഹാം, സിനോജ് കാനാട്ട് എന്നിവർ പ്രസംഗിച്ചു.

ആശ വർക്കർമാർക്ക് ഓണസമ്മാനവുമായി പ്രിയങ്ക ഗാന്ധി

കൽപ്പറ്റ: നിയോജകമണ്ഡലത്തിലെ ആശ വർക്കർമാർക്ക് പ്രിയങ്ക ഗാന്ധി എംപി ഓണസമ്മാനമായി സാരി നൽകി. ടി. സിദ്ദിഖ് എംഎൽഎ വിതരണോദ്ഘാടനം നിർവഹിച്ചു. യുഡിഎഫ് നിയോജകമണ്ഡലം ചെയർമാൻ ടി. ഹംസ അധ്യക്ഷത വഹിച്ചു. കെപിസിസി അംഗം പി.പി. ആലി, യുഡിഎഫ് ജില്ലാ കണ്‍വീനർ പി.ടി. ഗോപാലക്കുറുപ്പ്, നഗരസഭാ ചെയർമാൻ ടി.ജെയ ഐസക്, നേതാക്കളായ റസാഖ് കൽപ്പറ്റ, ബി. സുരേഷ്ബാബു, പോൾസണ്‍ കുവക്കൽ, എം.എ. ജോസഫ്, ശോഭനകുമാരി, എൻ. മുസ്തഫ, ഗിരീഷ് കൽപ്പറ്റ, കെ. അജിത എന്നിവർ പ്രസംഗിച്ചു.

തുരങ്ക പാത: യന്ത്രങ്ങളുമായി എത്തുന്ന വാഹനങ്ങൾക്ക് സ്വീകരണം നൽകും

മേപ്പാടി: ആനക്കാംപൊയിൽ-കള്ളാടി തുരങ്കപാത നിർമാണത്തിന് യന്ത്രങ്ങളുമായി പദ്ധതി പ്രദേശമായ മീനാക്ഷിയിലെത്തുന്ന വാഹനങ്ങൾക്ക് ടൗണിൽ സ്വീകരണം നൽകാൻ കർമ സമിതി ഭാരവാഹികളുടെ യോഗം തീരുമാനിച്ചു. സ്വീകരണത്തോടനുബന്ധിച്ച് കരോക്കെ ഗാനമേള സംഘടിപ്പിക്കും. കണ്‍വീനർ കെ.പി. ഹൈദർ അലി അധ്യക്ഷത വഹിച്ചു. ചെയർമാൻ പി. മുനീർ, ടി.ആർ. പ്രമോദ്, സി.കെ. കമാൽ വൈദ്യർ, റഫീക്ക് കഡൂർ, ജലീൽ പുത്തുമല, ജിജിത്ത് ചൂരൽമല, സി.കെ. ജംഷീർ, ഹരീഷ് മാൻകുന്ന് എന്നിവർ പ്രസംഗിച്ചു.

സുൽത്താൻ ബത്തേരി ബ്ലോക്ക് ക്ഷീര സംഗമം നടത്തി

അന്പലവയൽ: ബത്തേരി ബ്ലോക്ക് ക്ഷീര സംഗമം തോമാട്ടുചാൽ മാർത്തോമ ഹാളിൽ നടത്തി. ക്ഷീരവികസന വകുപ്പിന്‍റെയും ബ്ലോക്കിലെ ക്ഷീരസംഘങ്ങളുടെയുംആഭിമുഖ്യത്തിലും അന്പലവയൽ ക്ഷീരസംഘത്തിന്‍റെ ആതിഥേയത്വത്തിലുമായിരുന്നു പരിപാടി. ജില്ല പഞ്ചായത്ത് പ്രസിഡന്‍റ് സംഷാദ് മരക്കാർ ഉദ്ഘാടനം ചെയ്തു. ബ്ലോക്ക് പഞ്ചായത്ത് പ്രസിഡന്‍റ് സി. അസൈനാർ അധ്യക്ഷത വഹിച്ചു. ക്ഷീര വികസന ഡെപ്യൂട്ടി ഡയറക്ടർ ഫെമി വി. മാത്യു, എംആർസിഎംപിയു ഭരണസമിതിയംഗം റോസിലി തോമസ്, യഥാക്രമം അന്പലവയൽ, മീനങ്ങാടി, നെൻമേനി, നൂൽപ്പുഴ പഞ്ചായത്ത് പ്രസിഡന്‍റുമാരായ സി.കെ. ഹഫ്സത്ത്, കെ.ഇ. വിനയൻ, ബിന്ദു അനന്തൻ, ഷീജ സതീഷ്, ജില്ലാ പഞ്ചായത്ത് അംഗം സീത വിജയൻ, ലത ശശി, കെ. ഷമീർ, കെ.കെ. പൗലോസ്, പി.പി. പ്രദീപൻ, ബി.പി. ബെന്നി, പി.പി. വിജയൻ, കെ.ബി. മാത്യു, ബത്തേരി ക്ഷീര വികസന ഓഫീസർ പി.പി. പ്രജിഷ എന്നിവർ പ്രസംഗിച്ചു. ബ്ലോക്കിലെ മികച്ച ക്ഷീര കർഷകരെയും ചിത്രരചന, ക്വിസ് മത്സര വിജയികളെയും ആദരിച്ചു. അന്പലവയൽ ക്ഷീരസംഘം പ്രസിഡന്‍റ് എ.പി. കുര്യാക്കോസ് സ്വാഗതം പറഞ്ഞു.

ജോസിന്‍റെ ആത്മഹത്യ വിഭാഗീയതയുടെ പരിണിതഫലം: കേരള കോണ്‍ഗ്രസ്-എം

പുൽപ്പള്ളി: മുള്ളൻകൊല്ലി പഞ്ചായത്തംഗം ജോസ് നെല്ലേടത്തിന്‍റെ ആത്മഹത്യ കോണ്‍ഗ്രസിലെ വിഭാഗീയതയുടെ പരിണിതഫലമാണെന്ന് കേരള കോണ്‍ഗ്രസ്-എം മുള്ളൻകൊല്ലി മണ്ഡലം കമ്മിറ്റി അഭിപ്രായപ്പെട്ടു. കോണ്‍ഗ്രസിലെ ഗ്രൂപ്പ് പോരിന്‍റെ ഫലമായി ജില്ലയിൽ അഞ്ച് കോണ്‍ഗ്രസ് പ്രവർത്തകരാണ് 2015നുശേഷം ജീവനൊടുക്കിയത്. കോണ്‍ഗ്രസിലെ ഗ്രൂപ്പ് വഴക്ക് ജില്ലയുടെ വിവിധ ഭാഗങ്ങളിൽ ശക്തമാണ്. സാന്പത്തിക നേട്ടത്തിനും അധികാരത്തിനും സ്വാർഥതാത്പര്യ സംരക്ഷണത്തിനും നിലകൊള്ളുന്നവരുടെ പാർട്ടിയായി കോണ്‍ഗ്രസ് അധഃ പതിച്ചുവെന്നും യോഗം അഭിപ്രായപ്പെട്ടു. കേരള കർഷക യൂണിയൻ-എം ജില്ലാ പ്രസിഡന്‍റ് റെജി ഓലിക്കരോട്ട് ഉദ്ഘാടനം ചെയ്തു. പാർട്ടി ജില്ലാ സെക്രട്ടറി കെ.കെ. ബേബി, സംസ്ഥാന കമ്മിറ്റി അംഗം ഗോൾഡ, കേരള വിദ്യാർഥി കോണ്‍ഗ്രസ്-എം ജില്ലാ പ്രസിഡന്‍റ് ആൽവിൻ അമരിക്കാട്ട്, ടോമി ഇലവുങ്കൽ, സിബി കാട്ടാംകോട്ടിൽ, ബെന്നി വേങ്ങത്താനം, ജോസഫ് കാരക്കാട്ട്, ഡോ.ബീന ജോസ്, ജോണി മണ്ണുംപുറം, തങ്കച്ചൻ പരീക്കൻ, ബിനേഷ് താഴത്തുവീട്ടിൽ എന്നിവർ പ്രസംഗിച്ചു.

കോൺഗ്രസിനെതിരെ പ്രതിഷേധമുയരുന്നു : കുടുംബം ഇല്ലാതാക്കുന്നവരുടെ പാര്‍ട്ടിയായി കോണ്‍ഗ്രസ് മാറി: പ്രശാന്ത് മലവയല്‍

കല്‍പ്പറ്റ: എതിര്‍ശബ്ദങ്ങളുയര്‍ത്തുന്നവരെ കുടുംബത്തോടൊപ്പം ഇല്ലായ്മ ചെയ്യുന്നവരുടെ പാര്‍ട്ടിയായി വയനാട്ടിലെ കോണ്‍ഗ്രസ് മാറിയെന്ന് ബിജെപി ജില്ലാ പ്രസിഡന്റ് പ്രശാന്ത് മലവയല്‍ ആരോപിച്ചു. ഡിസിസി ട്രഷററായിരിക്കേ ജീവനൊടുക്കിയ എന്‍.എം. വിജയന്റെ മരുമകള്‍ പദ്മജ ആത്മഹത്യക്ക് ശ്രമിച്ചതിനു പിന്നില്‍ ജില്ലയിലെ കോണ്‍ഗ്രസ് നേതാക്കളുടെ മാനസിക പീഡനമാണ്. വിജയന്‍റെ കുടുംബത്തിന്‍റെ ബാധ്യത പൂര്‍ണമായും ഏറ്റെടുക്കാമെന്ന വാഗ്ദാനം കോണ്‍ഗ്രസ് നേതൃത്വം പാലിച്ചില്ല. ലക്ഷക്കണക്കിനു രൂപയുടെ കടം ചുമലിലായതുമുതല്‍ വിജയന്‍റെ മകനും മരുമകളും മാനസിക സംഘര്‍ഷത്തിലാണ്. മുള്ളന്‍കൊല്ലിയില്‍ പഞ്ചായത്ത് മെംബര്‍ ജോസ് നെല്ലേടം ആത്മഹത്യ ചെയ്തത് കോണ്‍ഗ്രസുമായി ബന്ധപ്പെട്ട പ്രശ്നങ്ങളെത്തുടര്‍ന്നാണ്. കോണ്‍ഗ്രസ് നേതാക്കള്‍ ഗുഢാലോചന നടത്തിയാണ് മരക്കടവ് കാനാട്ടുമലയില്‍ തങ്കച്ചനെ പോര്‍ച്ചില്‍ കാറിന് അടിയില്‍ കര്‍ണാടക മദ്യവും സ്ഫോടവസ്തുക്കളും വച്ച് കേസില്‍ കുടുക്കിയത്. ജില്ലയിലുള്ള പ്രിയങ്ക ഗാന്ധി എംപി ജോസിന്റെ വീട് സന്ദര്‍ശിക്കാനും കുടുംബാംഗങ്ങളെ ആശ്വസിപ്പിക്കാനും തയാറായില്ല. ആത്മഹത്യക്ക് ശ്രമിച്ച പദ്മജയെ സന്ദര്‍ശിച്ചില്ല. ഇത് അപലപനീയമാണെന്നും പ്രശാന്ത് പറഞ്ഞു. പദ്മജയെ ആശുപത്രിയില്‍ പ്രശാന്ത് സന്ദര്‍ശിച്ചു.

ചീരാലിൽ വീണ്ടും പുലി ആക്രമണം: വളർത്തുനായയെ കൊണ്ടുപോയി

സുൽത്താൻ ബത്തേരി: ചീരാലിൽ വീണ്ടും പുലിയുടെ ആക്രമണം. ചീരാൽ കായൽകുന്ന് സജിതയുടെ വളർത്തുനായയെ പുലി ആക്രമിച്ചത്. വ്യാഴാഴ്ച രാത്രി 11.30 ഓടെയാണ് സംഭവം. ശബ്ദംകേട്ട് വീട്ടുകാർ പുറത്തിറങ്ങിയെങ്കിലും നായയെ പുലി കൊണ്ടുപോകുകയായിരുന്നു. കഴിഞ്ഞ ദിവസം ചീരാൽ ചൗണ്ടൻമൂല അച്ചാമ്മയുടെ വളർത്തുനായയെ പുലി കൊന്നു തിന്നിരുന്നു.

വിനോദ സഞ്ചാര മേഖലയ്ക്ക് ഉണർവായി പഴശി പാർക്ക്

മാനന്തവാടി: വടക്കെ വയനാടിന്‍റെ വിനോദ സഞ്ചാര മേഖലയ്ക്ക് ഉണർവായി പഴശി പാർക്ക്. ഓണാവധി ആരംഭിച്ച ഓഗസ്റ്റ് 28 മുതൽ ഈമാസം ഏഴ് വരെ പാർക്ക് സന്ദർശിച്ചത് 1876 പേർ. വരുമാന ഇനത്തിൽ ലഭിച്ചത് 67,480 രൂപ. ഓണത്തിന് പിറ്റേന്ന് ടിക്കറ്റ് വിൽപ്പനയിലൂടെ ലഭിച്ചത് 22520 രൂപയും. മധ്യവേനലവധിക്കാലത്ത് ഏപ്രിൽ, മേയ് മാസങ്ങളിൽ 10 ലക്ഷം രൂപയും വരുമാനമായി ലഭിച്ചിരുന്നു. സാമൂഹ്യ വനവത്കരണ വിഭാഗത്തിന്‍റെ നിയന്ത്രണത്തിലുണ്ടായിരുന്ന പാർക്ക് 1994 ലാണ് ജില്ലാ ടൂറിസം പ്രമോഷൻ കൗണ്‍സിൽ ഏറ്റെടുത്തത്. 4.55 ഹെക്ടറിൽ വ്യാപിച്ച് കിടക്കുന്ന പാർക്കിന്‍റെ ലാൻഡ് സ്കേപ്പിംഗും മുളങ്കൂട്ടങ്ങളും വെള്ളച്ചാട്ടവും വാട്ടർ ഫൗണ്ടനും നടപ്പാതയും കഫ്റ്റീരിയയും ഇരിപ്പിടങ്ങളുമെല്ലാം വിനോദ സഞ്ചാരികളെ ആകർഷിക്കുന്നുണ്ട്. വയനാട് പാക്കേജിൽ ഉൾപ്പെടുത്തിയാണ് കുട്ടികൾക്കായി പാർക്ക് ഒരുക്കിയിരിക്കുന്നത്. സോർബിംഗ് ബോൾ, മൾട്ടി സീറ്റ് സീ സോ, മൾട്ടി പ്ലേ ഫണ്‍ സിസ്റ്റം, മേരി ഗോ റൗണ്ട്, വാട്ടർ കിയോസ്ക്ക്, വാട്ടർ ആക്ടിവിറ്റീസ്, കുടിവെള്ള സൗകര്യം എന്നിവയെല്ലാമാണ് ഇവിടെ ആധുനിക രീതീയിൽ സജ്ജീകരിച്ചിരിക്കുന്നത്. മുതിർന്നവർക്ക് 40 രൂപയും കുട്ടികൾക്ക് 20 രൂപയുമാണ് നിരക്ക്,പാർക്കിൽ നിന്ന് വള്ളിയൂർക്കാവ് വരെ കബനിയിലൂടെയുള്ള റിഫർ റാഫ്റ്റിങ്ങ്, മ്യുസിക് ഫൗണ്ടൻ എന്നിവയും ആരംഭിക്കുന്നതിനുള്ള നടപടികൾ പുരോഗമിക്കുകയാണെന്ന് ഡിടിപിസി മാനേജർ രതീഷ് കുമാർ പറഞ്ഞു.

വനം ഓഫീസിൽ പീഡനശ്രമം: സെക്ഷൻ ഓഫീസർക്കെതിരേ പരാതി നൽകി

പടിഞ്ഞാറത്തറ: പീഡനശ്രമത്തിന് ഫോറസ്റ്റ് വനിതാ ബീറ്റ് ഓഫീസർ നൽകിയ പരാതിയിൽ പടിഞ്ഞാറത്തറ പോലീസ് കേസെടുത്തു. സുഗന്ധഗിരി സെക്ഷൻ ഫോറസ്റ്റ് ഓഫീസർ രതീഷ്കുമാറിനെതിരേയാണ് കേസ്. സെപ്റ്റംബർ ഒന്നിനാണ് കേസിന് ആസ്പദമായ സംഭവം. രാത്രി ഡ്യൂട്ടിക്കിടെയാണ് പീഡനശ്രമം നടന്നതെന്നാണ് വനിതാ ഉദ്യോഗസ്ഥയുടെ പരാതിയിൽ. ഡ്യൂട്ടി കഴിഞ്ഞ് ഓഫീസിൽനിന്നു പോയ ഉദ്യോഗസ്ഥൻ തിരിച്ചെത്തിയാണ് അതിക്രമത്തിന് മുതിർന്നത്. ഈ സമയം ഓഫീസിൽ മറ്റാരും ഉണ്ടായിരുന്നില്ല. ഓഫീസിനു പുറത്തുകടന്നാണ് പട്ടികവർഗത്തിൽപ്പെട്ട വനിതാ ഓഫീസർ രക്ഷപ്പെട്ടത്. കൽപ്പറ്റയിലേക്ക് സ്ഥലം മാറ്റിയ രതീഷ്കുമാറിനെതിരേ വകുപ്പതല അന്വേഷണം നടന്നുവരികയാണെന്ന് സൗത്ത് വയനാട് ഡിഎഫ്ഒ അറിയിച്ചു.

എൻ.എം. വിജയന്‍റെ ആത്മഹത്യ: കെപിസിസി നൽകിയ ഉറപ്പുകൾ പാലിച്ചില്ലെന്ന് കുടുംബം

സുൽത്താൻ ബത്തേരി: മുൻ ഡിസിസി ട്രഷറർ എൻ.എം. വിജയൻ ആത്മഹത്യ ചെയ്ത വിഷയവുമായി ബന്ധപ്പെട്ട് കെപിസിസി നേതൃത്വം നൽകിയ ഉറപ്പുകൾ പാലിച്ചില്ലെന്ന ആരോപണവുമായി എൻ.എം. വിജയന്‍റ മരുമകൾ പത്മജ. സുൽത്താൻ ബത്തേരിയിൽ മാധ്യമങ്ങളോട് സംസാരിക്കുകയായിരുന്നു പത്മജ. പാർട്ടി പ്രവർത്തനങ്ങളുമായി ബന്ധപ്പെട്ട് എൻ.എം. വിജയനുണ്ടായ ബാധ്യതകളെല്ലാം ജൂണ്‍ മുപ്പതിനകം തീർക്കാമെന്നതരത്തിൽ പാർട്ടിയുമായി ധാരണാപത്രം ഉണ്ടാക്കിയെങ്കിലും ഇതുവരെ ഒന്നും നടന്നിട്ടില്ല. ഭർത്താവ് വിജേഷിന് അസുഖംവന്ന് ആശുപത്രിയിൽ പ്രവേശിക്കപ്പെട്ട് ബുദ്ധിമുട്ടിലായിട്ടും ആരും സാഹായിച്ചില്ല. പാർട്ടിയുമായി ഉണ്ടാക്കിയ ധാരണപത്രം വാങ്ങാൻ അഭിഭാഷകന്‍റെ ഓഫീസിലെത്തിയെങ്കിലും ലഭിച്ചില്ല. അന്വേഷിച്ചപ്പോൾ പാർട്ടി പ്രസിഡന്‍റ് പഠിക്കാൻ വാങ്ങിയെന്നാണ് കൽപ്പറ്റ എംഎൽഎ പറഞ്ഞത്. ഇതുവരെ തങ്ങളോട് ചെയ്ത് തരാമെന്ന് പറഞ്ഞ ഒരുകാര്യവും ചെയ്തുതന്നില്ലെന്നും ഫോണ്‍വിളിച്ചിട്ട് എടുക്കുന്നില്ലെന്നും കോണ്‍ഗ്രസ് പാർട്ടിയോടുള്ള വിശ്വാസം നഷ്ടപെട്ടതായും പത്മജ പറഞ്ഞു. തങ്ങൾ താമസിക്കുന്ന സ്ഥലംപോലും ബാങ്കിൽ പണയത്തിലാണെന്നും പത്മജ പറഞ്ഞു.

സംസ്ഥാന ടിടിഐ കലോത്സവം: തിരുവനന്തപുരം ഓവറോൾ ചാന്പ്യൻമാർ

സുൽത്താൻ ബത്തേരി: 29-ാമത് സംസ്ഥാന ടിടിഐ-പിപിടിടിഐ, അധ്യാപക കലോത്സവത്തിൽ തിരുവനന്തപുരം ജില്ല വിജയികളായി. മൂന്ന് വിഭാഗങ്ങളിലുമായി 280 പോയന്‍റ് നേടിയാണ് തിരുവനന്തപുരം ജില്ല ഓവറോൾ ചാന്പ്യൻമാരായത്. 82 പോയിന്‍റുമായി ടിടിഐ വിഭാഗത്തിൽ ഇടുക്കി ഡയറ്റ് ഒന്നാംസ്ഥാനവും 81 പോയിന്‍റുമായി കൊല്ലം ഡയറ്റ് രണ്ടാംസ്ഥാനവും നേടി. പിപിടിടിഐ വിഭാഗത്തിൽ 141 പോയിന്‍റുമായി തൃശൂർ ഒല്ലൂർ വിദ്യ പിപിടിടിഐ ഒന്നാംസ്ഥാനവും 136 പോയിന്‍റുനേടിയ കോഴിക്കോട് നടക്കാവ് ഗവ. ടീച്ചർ എഡ്യുക്കേഷൻ രണ്ടാസ്ഥാനവും കരസ്ഥമാക്കി. അധ്യാപക കലോത്സവത്തിൽ 27 പോയന്‍റുമായി വയനാട്, കൊല്ലം, കോട്ടയം, കോഴിക്കോട്, കണ്ണൂർ, എറണാകുളം എന്നീ ജില്ലകൾ ഒന്നാം സ്ഥാനം പങ്കിട്ടു. ബത്തേരി ഡയറ്റിൽ നടന്ന സമാപന സമ്മേളനം ജില്ലാപഞ്ചായത്ത് പ്രസിഡന്‍റ് സംഷാദ് മരക്കാർ ഉദ്ഘാടനം ചെയ്ത് വിജയികൾക്കുള്ള സമ്മാനങ്ങൾ വിതരണം ചെയ്തു. ജില്ലപഞ്ചായത്ത് സ്റ്റാൻഡിംഗ് കമ്മിറ്റി ചെയർപേഴ്സണ്‍ ജുനൈദ് കൈപ്പാണി അധ്യക്ഷത വഹിച്ചു. പൊതുവിദ്യാഭ്യാസ ഡയറക്ടർ എൻ.എസ്.കെ. ഉമേഷ് മുഖ്യപ്രഭാഷണം നടത്തി. എസ്എസ്കെ ജില്ലാ പ്രോജക്ട് കോ ഓർഡിനേറ്റർ വി. അനിൽകുമാർ, ഡയറ്റ് പ്രിൻസിപ്പൽ കെ.എം. സെബാസ്റ്റ്യൻ, എഡിപിഐ ആർ.എസ്. ഷിബു, ഡിഡിഇ വി.എ. ശശീന്ദ്രവ്യാസ് എന്നിവർ പ്രസംഗിച്ചു.

ഹ്യൂം സെന്‍ററിൽ പ്രിയങ്ക ഗാന്ധി സന്ദർശനം നടത്തി

കൽപ്പറ്റ: പുളിയാർമലയിലെ ഹ്യൂം സെന്‍റർ ഫോർ ഇക്കോളജി ആൻഡ് വൈൽഡ് ലൈഫ് ബയോളജിയിൽ പ്രിയങ്ക ഗാന്ധി എംപി സന്ദർശനം നടത്തി. സെന്‍ററിലെ കാലാവസ്ഥ നിരീക്ഷണ സംവിധാനങ്ങളുടെയും ലബോറട്ടറികളുടെയും പ്രവർത്തനം അവർ നിരീക്ഷിച്ചു. ജില്ലയിലെ കാലാവസ്ഥാവ്യതിയാനം, വന്യജീവി പ്രതിരോധം, ആദിവാസി സമൂഹത്തിന്‍റെ ഭക്ഷണരീതികൾ, പോഷകാഹാരപ്രശ്നങ്ങൾ എന്നിവ എംപിക്കു മുന്നിൽ സെന്‍റർ എക്സിക്യുട്ടീവ് ഡയറക്ടർ സി.കെ. വിഷ്ണുദാസ്, ജി. ബാലഗോപാൽ, സാമൂഹിക ശാസ്ത്രജ്ഞ ഡോ.ടി.ആർ. സുമ എന്നിവർ അവതരിപ്പിച്ചു. ഹ്യൂം സെന്‍ററിന്‍റെ പഠനങ്ങൾ ഭാവി തലമുറകൾക്കും നയരൂപീകരണത്തിന് ഭരണസംവിധാനങ്ങൾക്കും മുതൽക്കൂട്ടാണെന്ന് പ്രിയങ്ക ഗാന്ധി പറഞ്ഞു. ടി. സിദ്ദിഖ് എംഎൽഎ പ്രിയങ്ക ഗാന്ധിക്കൊപ്പം ഉണ്ടായിരുന്നു. കൽപ്പറ്റ: പിബ്ല്യുഡി ഗസ്റ്റ് ഹൗസിൽ എംപി പുഞ്ചിരിമട്ടം ഉരുൾ ദുരന്തബാധിതരുടെ പ്രതിനിധികളുമായി സംസാരിച്ചു. ടി. സിദ്ദിഖ് എംഎൽഎ, മേപ്പാടി പഞ്ചായത്ത് പ്രസിഡന്‍റ് കെ. ബാബു എന്നിവരുടെ നേതൃത്വത്തിലാണ് ദുരന്തബാധിതകരായ കർഷകർ, ചെറുകിട വ്യാപാരികൾ, വ്യവസായികൾ, രോഗികൾ എന്നിവർ എംപിയെ കണ്ടത്. ജീവിതപ്രയാസങ്ങൾ ഇവർ എംപിയോട് വിശദീകരിച്ചു. കൽപ്പറ്റ: ചന്ദ്രപ്രഭ ചാരിറ്റബിൾ ട്രസ്റ്റ് ചെയർമാൻ എം.ജെ. വിജയപദ്മൻ, ഭാര്യ നമിത എന്നിവരെ പുളിയാർമലയ്ക്കു സമീപം വീട്ടിൽ പ്രിയങ്ക ഗാന്ധി എംപി സന്ദർശിച്ചു. വയനാട്ടിൽനിന്നുള്ള എംപിയും കോണ്‍ഗ്രസ് നേതാവുമായിരുന്ന എം.കെ. ജിനചന്ദ്രന്‍റെ മകനാണ് വിജയപദ്മൻ. 1957ൽ വയനാട് ഉൾപ്പെടുന്ന തലശേരി ലോകസഭാ മണ്ഡലത്തിലേക്ക് നടന്ന തെരഞ്ഞെടുപ്പിലാണ് ജിനചന്ദ്രൻ വിജയിച്ചത്. കോണ്‍ഗ്രസ് പാർലമെന്‍ററി പാർട്ടി വിപ്പായിരുന്നു അദ്ദേഹം.

കുപ്രസിദ്ധ മോഷ്ടാവ് പിടിയിൽ

പനമരം: കുപ്രസിദ്ധ മോഷ്ടാവ് പനമരം മുരിങ്ങമറ്റം കോളനിയിലെ ബിജു പോലീസ് പിടിയിൽ. വ്യാഴാഴ്ച വൈകുന്നേരത്തോടെ മാനന്തവാടി എരുമത്തെരുവിൽ പനമരം പോലീസ് പിടികൂടി. 2024 ഓഗസ്റ്റിൽ കൂളിവയൽ മതിശേരി സ്വദേശിയുടെ വീടിന്‍റെ പൂട്ട് തകർത്ത് ഏകദേശം ഒരു പവൻ സ്വർണാഭരണങ്ങളും പണവും മൊബൈൽ ഫോണും മോഷ്ടിച്ച കുറ്റത്തിന് പനമരം പോലീസ് കേസിൽ ഒളിവിൽ പോയ ബിജുവിനായി പോലീസ് അന്വേഷണം നടത്തുകയായിരുന്നു. ഇയാൾമുന്പ് മാനന്തവാടി, പനമരം പോലീസ് സ്റ്റേഷനുകളിൽ രജിസ്റ്റർ ചെയ്ത അഞ്ച് മോഷണക്കേസുകളിൽ പ്രതിയാണ്. പനമരം പോലീസ് സ്റ്റേഷൻ ഇൻസ്പെക്ടർ പി.ജി. രാംജിതിന്‍റെ നേതൃത്വത്തിൽ എഎസ്ഐമാരായ ബിജു വർഗീസ്, ബിനീഷ്, സിപിഒ അജേഷ് എന്നിവരടങ്ങിയ പോലീസ് സംഘമാണ് പ്രതിയെ പിടികൂടിയത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]