ADVERTISEMENT

ADVERTISEMENT

ടീം വിഴിഞ്ഞം വിദ്യാർഥികളെ അനുമോദിച്ചു

വിഴിഞ്ഞം: ടീം വിഴിഞ്ഞം സൊസൈറ്റിയുടെ നേതൃത്വത്തിൽ എസ്എസ്എൽസി, പ്ലസ്ടു പരിക്ഷകളിൽ ഉന്നത വിജയം നേടിയവരെ അനുമോദിച്ചു. ടീം വിഴിഞ്ഞം പ്രസിഡന്‍റ് സാദിക്കിന്‍റെ അധ്യക്ഷതയിൽ കൂടിയ യോഗം മുൻ പ്രസിഡന്‍റ് സഫറുള്ള ഖാൻ ഉദ്ഘാടനം ചെയ്തു.

ജലീൽ തൈവിളാകം, ടീം വിഴിഞ്ഞം ട്രഷറർ ഒ എസ് ഷാജഹാൻ, തുടങ്ങിയവർ ആശംസകൾ അർപ്പിച്ചു സംസാരിച്ചു. ടീം വിഴിഞ്ഞം സെക്രട്ടറി എൻ നൗഷാദ് സ്വാഗതവും, നഹാസ് ഇസ്മായിൽ നന്ദിയും പറഞ്ഞു.

ADVERTISEMENT

കരമനയിലെ ദമ്പതികളുടെ ആത്മഹത്യ: മൃതദേഹങ്ങളുമായി നാട്ടുകാർ ബാങ്കിനു മുന്നിൽ പ്രതിഷേധിച്ചു

തിരുവനന്തപുരം: ബാങ്കിന്‍റെ ജപ്തി ഭീഷണിയെ തുടർന്നു കരമനയിൽ ദമ്പതികൾ ജീവനൊടുക്കിയ സംഭവത്തിൽ വൻ പ്രതിഷേധം. വിഎസ്ഡിപിയുടെ നേതൃത്വത്തിൽ ദമ്പതികളുടെ മൃതദേഹവുമായി ബാങ്കിനു മുന്നിൽ നാട്ടുകാർ പ്രതിഷേധിച്ചതോടെ നാട്ടുകാരുടെ രോഷംഅണപൊട്ടി. മരണപ്പെട്ട ദമ്പതിമാരുടെ വായ്പകൾ എഴുതിത്തള്ളാമെന്ന് ബാങ്ക് രേഖാമൂലം ഉറപ്പുനൽകിയതോടെയാണ് പ്രതിഷേധക്കാ ർ സമരം അവസാനിപ്പിച്ചത്. ജനറൽ ആശുപത്രിക്കു സമീപമുള്ള എസ്ബിഐ എസ്എംഇ ശാഖയ്ക്കുമുന്നിലാണ് നാട്ടുകാർ പ്രതിഷേധിച്ചത്. വായ്പ എഴുതിത്തള്ളണമെന്ന് ആവശ്യപ്പെട്ട് രാവിലെ മുതല്‍ വിഎസ് ഡിപി പ്രവര്‍ത്തകര്‍ ബാങ്കിന് മുന്നില്‍ സമരം നടത്തിയിരുന്നു. ആശുപത്രിയില്‍ പോസ്റ്റ്‌മോര്‍ട്ടത്തിനുശേഷം ഉച്ചയ്ക്കു രണ്ടരയോടെ ദമ്പതികളുടെ മൃതദേഹങ്ങളും വഹിച്ചുകൊണ്ടുള്ള ആമ്പുലന്‍സ് ജനറല്‍ ആശുപത്രിക്ക് സമീപമുള്ള എസ്ബിഐ ബ്രാഞ്ചിനു മുന്നിലെത്തി. തുടര്‍ന്ന് വിഎസ്ഡിപി പ്രവര്‍ത്തകര്‍ മൃതദേഹങ്ങള്‍ ബാങ്കിനു മുന്നില്‍ ഇറക്കിവച്ച് പ്രതിഷേധം തുടര്‍ന്നു. ഒരു മണിക്കൂറോളം പ്രതിഷേധം തുടര്‍ന്നപ്പോള്‍ ബാങ്ക് അധികൃതര്‍ 20 ദിവസത്തിനുള്ളില്‍ മരണപ്പെട്ടവരുടെ വായ്പാ ബാധ്യത എഴുതിത്തള്ളാമെന്നു രേഖാമൂലം എഴുതി നല്‍കി. ഇതോടെ സമരം അവസാനിപ്പിച്ച് മൃതദേഹങ്ങള്‍ സംസ്‌കാര ചടങ്ങുകള്‍ക്കായി കൊണ്ടുപോയി. വിഎസ്ഡിപി നേതാക്കളായ വിഷ്ണുപുരം ചന്ദ്രശേഖര്‍, ശ്യാംലൈജു, ചൊവ്വര സുനില്‍, അഡ്വ. പൂഴിക്കുന്ന് സുദേവന്‍, കൗണ്‍സിലര്‍മാരായ കരമന അജിത്, ജി.എസ്. മഞ്ജു തുടങ്ങിയവര്‍ പ്രതിഷേധ പരിപാടിയിൽ പങ്കെടുത്തു. കഴിഞ്ഞദിവസം വീടിനുമുന്നിലും പ്രതിഷേധം നടന്നു. ബാങ്കിന്‍റെ ഭാഗത്തുനിന്നുള്ള പീഡനമാണ് മരണകാരണമെന്നാരോപിച്ച് നാട്ടുകാരും കോണ്‍ട്രാക്ടേഴ്‌സ് ഫെഡറേഷനും വന്‍ പ്രതിഷേധമുയര്‍ത്തി. മൃതദേഹങ്ങള്‍ മാറ്റണമെങ്കില്‍ കളക്ടറോ ആര്‍ഡിഒയോ എത്തണമെന്നു പ്രതിഷേധക്കാര്‍ ആവശ്യപ്പെട്ടതിനെത്തുടര്‍ന്നു തഹസില്‍ദാരെത്തി ചര്‍ച്ച നടത്തി. എട്ടു മണിക്കൂറിനുശേഷമാണു മൃതദേഹങ്ങള്‍ പോസ്റ്റ്‌മോര്‍ട്ടത്തിനായി മാറ്റിയത്. ഇവര്‍ താമസിച്ചുവരുന്ന കാട്ടാന്‍വിളയിലെ വീട് ജപ്തി ചെയ്യാനായി മൂന്നു തവണ ഉദ്യോഗ സ്ഥരെത്തിയെങ്കിലും പൊതുപ്രവര്‍ത്തകരും നാട്ടുകാരും ഇടപെട്ട് മടക്കി അയക്കുകയായിരുന്നു.

തീപിടിത്തം: സമഗ്ര അന്വേഷണം നടത്തണമെന്ന ആവശ്യം ശക്തം

പൂവാർ: കാഞ്ഞിരംകുളം പഞ്ചായത്ത് ഓഫീസിലെ അപ്രതീക്ഷിത തീപിടിത്തം സംബന്ധിച്ച് സമഗ്ര അന്വേഷണസ്റ്റ നടത്തണമെന്ന് ആവശ്യം. ഇന്നലെ ഫോറൻസിക് വിഭാഗം എത്തിപരിശോധന നടത്തി. 35 ലക്ഷത്തോളം രൂപയുടെ നാശനഷ്ടം ഉണ്ടായതായതാണു പ്രാഥമിക കണക്ക്. കൂടുതൽ നാശനഷ്ടങ്ങൾക്ക് വിധേയമായ ഒന്നാംനില പൂർണമായി കത്തിയമർന്നു. കാഞ്ഞിരംകുളം പോലീസിന്‍റെ നിരീക്ഷണത്തിലാണ് കെട്ടിടത്തിലെ പരിശോധനകൾ നടന്നത്. സെക്രട്ടറിയുടെ മുറിയടക്കം ഓഫീസിന്‍റെ വിവിധ ഭാഗങ്ങളിൽ വച്ചിരുന്ന കമ്പ്യൂട്ടർ സെർവർ, ക്ലയിന്‍റ് കമ്പ്യൂട്ടർ, നാലു ലാപ് ടോപ്പുകൾ, 12 ഡെസ്‌ക് ടോപ്പുകൾ, 11 പ്രിന്‍റുകൾ, 11 സ്കാനറുകൾ, ഒരു ഫോട്ടോസ്റ്റാറ്റ് മെഷീൻ, നെറ്റ് സെർവർ, ടെലഫോൺ, സിസിടിവി, ജീവനക്കാരുടെ സർവീസ് ബുക്ക് സൂക്ഷിച്ചിരുന്ന അലമാര, മറ്റു ഫയലുകൾ സൂക്ഷിച്ചിരുന്ന രണ്ട് അലമാരകൾ, ഓഫീസ് സ്റ്റാഫിനുള്ള കാബിനുകൾ, ഫർണീച്ചറുകൾ, എ‌ട്ട് സീലിംഗ് ഫാനുകൾ എന്നിവയാണു പൂർണമായി നശിച്ചത്. ഉദ്യോഗസ്ഥരുടെ കാബിനുകളിൽ സൂക്ഷിച്ചിരുന്ന ഫയലുകൾ, മറ്റും സാധനങ്ങളും പൂർണമായും കത്തിയമർന്നു. പഞ്ചായത്ത് ഓഫീസിന്‍റെ ഒന്നാം നിലയിലാണ് കഴിഞ്ഞ ദിവസം രാത്രി തീയും പുകയും ആദ്യം കണ്ടത്. ഇതു ശ്രദ്ധയിൽപെട്ട തൊട്ടടുത്ത ആയൂർവേദ ആശുപത്രിയിലെ സെക്യൂരിറ്റി ജീവനക്കാർ ഫയർഫോഴ്‌സിനെ വിവരം അറിയിക്കുകയായിരുന്നു. തുടർന്ന് പൂവാർ, നെയ്യാറ്റിൻകര ഫയർഫോഴ്സ് യൂണിറ്റുകൾ സ്ഥലത്തെത്തിയാണ് തീ നിയന്ത്രണ വിധേയമാക്കിയത്. ഷോർട്ട് സർക്യൂട്ടാണ് തീ കത്താൻ കാരണമെന്നാണ് പ്രാഥമിക നിഗമനം. എന്നാൽ ഇലക്ട്രിക് വിഭാഗത്തിന്‍റെ പരിശോധന ഇന്നു നടക്കുമെന്നറിയുന്നു. അത് കഴിഞ്ഞാൽ മാത്രമേ വ്യക്തമായ കാരണം കണ്ടെത്താനാകൂവെന്നു പോലീസ് പറയുന്നു. സിപിഎം ഭരിക്കുന്ന പഞ്ചായത്ത് ഓഫീസ് തീ കത്തി നശിച്ച സംഭവം സ്വതന്ത്ര ഏജൻസിയെ കൊണ്ട് അന്വേഷിപ്പിച്ചു സത്യം പുറത്തുകൊണ്ടുവരണമെന്ന് ബിജെപി ബാലരാമപുരം മണ്ഡലം പ്രസിഡന്‍റ് ഡി. സുനീഷ് ആവശ്യപ്പെട്ടു.

കരമന -കളിയിക്കാവിള പാതയിൽ മാവ് കടപുഴകി ഗതാഗതം സ്തംഭിച്ചു

നെയ്യാറ്റിന്‍കര : കരമന -കളിയിക്കാവിള പാതയില്‍ പത്താംകല്ലിനു സമീപം മാവ് കടപുഴകി ഗതാഗതം സ്തംഭിച്ചു. വീടുകള്‍ക്കു മുകളിലും പൊതുനിരത്തിലും മരങ്ങള്‍ മറിഞ്ഞു വീണു. വട്ടവിളയ്ക്കു സമീപം ബിജു, അനിരുദ്ധന്‍ എന്നിവരുടെ വീടുകളുടെ മുകളിലേയ്ക്കു വന്‍മരങ്ങള്‍ കടപുഴകി വീണു. ഫയര്‍ ആന്‍ഡ് റസ്ക്യൂ യൂണിറ്റ് സ്ഥലത്തെത്തിയെങ്കിലും അത്രയും കൂറ്റന്‍ വൃക്ഷം മുറിച്ചു നീക്കാനുള്ള സംവിധാനത്തിന്‍റെ അപര്യാപ്തത അവരെ നിസഹായരാക്കി. മരം മുറിക്കുന്ന തൊഴിലാളികള്‍ക്കു മാത്രമേ അവ കൃത്യമായ രീതിയില്‍ മുറിച്ചു മാറ്റാനാവൂ എന്ന് അധികൃതര്‍ അറിയിച്ചു. നെയ്യാറ്റിന്‍കര ആലംപൊറ്റയ്ക്കുംസമീപം രാധാകൃഷ് ണന്‍റെ വീടിനു മുകളില്‍ വീണ മരം ഫയര്‍ ആന്‍ഡ് റസ് ക്യൂ യൂണിറ്റ് മുറിച്ചുമാറ്റി. കരമന- കളിയിക്കാവിള പാതയില്‍ പത്താംകല്ലില്‍ സ്വകാര്യ വൃക്തിയുടെ പുരയിടത്തിലെ കൂറ്റന്‍ മാവ് കടപുഴകി വീണു. മതിലിനുമുകളിലൂടെ റോഡിലേയ് ക്ക് വൃക്ഷം പതിച്ചതോടെ ഗതാഗതവും താത്കാലികമായി സ് തംഭിച്ചു. മരച്ചില്ലകള്‍ ഏറെ പണിപ്പെട്ട് ഫയര്‍ ആന്‍ഡ് റസ്ക്യൂ യൂണിറ്റു മുറിച്ച് നീക്കം ചെയ്തു. ഗതാഗതം നിയന്ത്രിക്കാന്‍ പോലീസും സ്ഥലത്തുണ്ടായിരുന്നു. മരം പതിച്ചപ്പോള്‍ വാഹനങ്ങളൊന്നും റോഡിലില്ലാതിരുന്നതു വലിയ ദുരന്തം ഒഴിവാക്കി. പയറ്റുവിള, പെരുങ്കടവിള, പിരായുംമൂട്, ജെബിഎസ് സ്കൂളിനു സമീപം, ചെങ്കല്‍ ആശുപത്രിക്കു സമീപം, മൂന്നുകല്ലിന്‍മൂട് എന്നിവിടങ്ങളിലൊക്കെ റോഡിലേയ്ക്കു വീണ വൃക്ഷങ്ങള്‍ ഫയര്‍ ആന്‍ഡ് റസ്ക്യൂ യൂണിറ്റ് ടീം ആണ് മുറിച്ചുമാറ്റിയത്.

യുവാവിനെ ആളുമാറി മര്‍ദിച്ച സംഭവം; ഒരാള്‍കൂടി പിടിയില്‍

പേരൂര്‍ക്കട: യുവാവിനെ ആളുമാറി മര്‍ദിച്ചു കൊലപ്പെടുത്താന്‍ ശ്രമിച്ച സംഭവത്തില്‍ ഒരാള്‍കൂടി പിടിയില്‍. വട്ടിയൂര്‍ക്കാവ് അറപ്പുര സരസ്വതി വിദ്യാലയത്തിനു സമീപം പേഴുവിള വീട്ടില്‍ മനു (31) ആണ് പിടിയിലായത്. മേയ് 14-നായിരുന്നു കേസിനാസ്പദമായ സംഭവം. തിരുമല പുന്നയ്ക്കാമുകള്‍ സ്വദേശി പ്രവീണ്‍ ആണ് പത്തംഗസംഘത്തിന്‍റെ ആക്രമണത്തിന് ഇരയായത്. പ്രതികളുടെ സുഹൃത്തായ പൂജപ്പുര സ്വദേശി വിഷ്ണു സംഭവദിവസം ആത്മഹത്യ ചെയ്തിരുന്നു. വിഷ്ണുവിന്‍റെ മരണത്തിന് ഉത്തരവാദി പ്രവീണ്‍ ആണെന്ന് ആരോപിച്ചായിരുന്നു മര്‍ദനം. വിഷ്ണുവിന്‍റെ സംസ്‌കാരച്ചടങ്ങ് ശാന്തികവാടത്തില്‍ നടത്തിയശേഷം സംഘം പ്രവീണിനെ മര്‍ദിച്ചവശനാക്കുകയും കൈവശമുണ്ടായിരുന്ന പണം അപഹരിച്ച് രക്ഷപ്പെടുകയും ചെയ്യുകയായിരുന്നു. പ്രാവച്ചമ്പലം സ്വദേശി മുഹമ്മദ് കൈഫ് (23), നേമം പഴയ കാരയ്ക്കാമണ്ഡപം സ്വദേശി അനു (29), പാപ്പനംകോട് സ്വദേശികളായ നിഷാദ് (25), അദിത് വിജയന്‍ (20), അശ്വിന്‍ വിജയന്‍ (20), മുട്ടത്തറ സ്വദേശി വിഷ്ണു (32), കാട്ടാക്കട സ്വദേശി മുജീഷ് ഖാന്‍ (23) എന്നിവര്‍ നേരത്തെ അറസ്റ്റിലായിരുന്നു. മനുവിനെ അറപ്പുരയിലെ വീട്ടില്‍നിന്നും തമ്പാനൂര്‍ സിഐ വി.എം. ശ്രീകുമാര്‍, എസ്ഐ ബിനു മോഹന്‍, എസ്സിപിഒ ശ്രീരാഗ്, സിപിഒമാരായ ഷിഹാബ്, സുരേഷ് എന്നിവര്‍ ചേര്‍ന്നാണ് പിടികൂടിയത്. പ്രതിയെ കോടതി റിമാന്‍ഡ് ചെയ്തു.

നിറചിരിയോടെ അനഘേന്ദു തിരികെ സ്‌കൂളിലേക്ക്

തിരുവനന്തപുരം: അമ്മ പകുത്ത് നല്‍കിയ ജീവന്‍റെ നിറചിരിയുമായി അനഘേന്ദു വീണ്ടും സ്‌കൂളിലേക്ക്. മഞ്ഞപ്പിത്തം ബാധിച്ച് കരള്‍ പ്രവര്‍ത്തന രഹിതമായ നിലയിലായിരുന്നു 14 വയസുകാരി അനഘേന്ദുവിനെ തിരുവനന്തപുരം കിംസ് ഹെല്‍ത്തിലെത്തിച്ചത്. രോഗാവസ്ഥ ഏറെ ഗുരുതരമായതിനാല്‍ എത്രയും വേഗം കരള്‍ മാറ്റിവെക്കുക എന്നത് മാത്രമായിരുന്നു അനഘേന്ദുവിന്‍റെ ജീവന്‍ രക്ഷിക്കാനുള്ള ഏക മാര്‍ഗം. തുടര്‍ന്ന് അടിയന്തിരമായി കുട്ടിയുടെ അമ്മയില്‍ നിന്നുതന്നെ കരള്‍ സ്വീകരിച്ച് ശസ്ത്രക്രിയ വിജയകരമായി പൂര്‍ത്തീകരിക്കുകയായിരുന്നു. അടിയന്തരമായി ശസ്ത്രക്രിയ നടത്തേണ്ടുന്ന സാഹചര്യത്തില്‍ അനഘേന്ദുവിന്‍റെ അമ്മ തന്നെ കരള്‍ പകുത്ത് നല്‍കുവാന്‍ സന്നദ്ധമായി മുന്നോട്ടുവന്നു. ചികിത്സയ്ക്കാവശ്യമായ തുക സ്വരൂപിക്കുന്നതു വലിയ വെല്ലുവിളിയായിരുന്നു. എന്നാല്‍ ഇതിനായി കാത്തുനില്‍ക്കാതെതന്നെ കരള്‍മാറ്റ ശസ്ത്രക്രിയ വിജയകരമായി പൂര്‍ത്തിയാക്കി. ശസ്ത്രക്രിയ പൂര്‍ത്തിയായി ദിവസങ്ങള്‍ക്കകം അനഘേന്ദുവിന്‍റെ കുടുംബത്തിനു കൈത്താങ്ങായി കിംസ് ഹെല്‍ത്ത് നല്‍കിയ സാമ്പത്തിക സഹായത്തിനൊപ്പം, മന്ത്രി ഡോ. ആര്‍. ബിന്ദുവിന്‍റെയും വകുപ്പ് ഉദ്യാഗോസ്ഥരുടെയും സമയോചിത ഇടപെടലുകളിലൂടെ അനഘേന്ദുവിനുള്ള ചികിത്സാ ധനസഹായം വേഗത്തില്‍ ലഭ്യമാകുകയും ചെയ്തു. കൂടാതെ സുമനസുകളില്‍ നിന്നും ലഭിച്ച തുകയും അനഘേന്ദുവിനും അമ്മയ്ക്കും ചികിത്സ പൂര്‍ത്തിയാക്കാന്‍ താങ്ങായി. ഹെപ്പറ്റോബൈലറി, പാന്‍ക്രിയാറ്റിക് ആൻഡ് ലിവര്‍ ട്രാന്‍സ്പ്ലാന്‍റ് സര്‍ജറി വിഭാഗം സീനിയര്‍ കണ്‍സള്‍ട്ടന്‍റും ചീഫ് കോ-ഓര്‍ഡിനേറ്ററുമായ ഡോ. ടി.യു. ഷബീറലി, ട്രാന്‍സ്പ്ലാന്‍റ് സര്‍വീസസ് സീനിയര്‍ കണ്‍സള്‍ട്ടന്‍റും ക്ലിനിക്കല്‍ ചെയറുമായ ഡോ. ഷിറാസ് അഹമ്മദ് റാത്തര്‍ എന്നിവരുടെ നേതൃത്വത്തില്‍ 10 മണിക്കൂറോളം നീണ്ട ശസ്ത്രക്രിയയ്‌ക്കൊടുവിലാണ് കരള്‍ മാറ്റിവയ്ക്കല്‍ പൂര്‍ത്തിയാക്കിയത്. ഹെപ്പറ്റോബൈലറി, പാന്‍ക്രിയാറ്റിക് ആൻഡ് ലിവര്‍ ട്രാന്‍സ്പ്ലാന്‍റ് സര്‍ജറി വിഭാഗം കണ്‍സള്‍ട്ടന്‍റ് ഡോ. വര്‍ഗീസ് എല്‍ദോ, അനസ്‌തേഷ്യ വിഭാഗം കണ്‍സള്‍ട്ടന്‍റുമാരായ ഡോ. ഹാഷിര്‍ എ, ഡോ. ആര്‍.എസ്. പ്രിജിത്, ഡോ. അഭിജിത് ഉത്തമന്‍, ഗ്യാസ്‌ട്രോ എന്‍ട്രോളജി വിഭാഗം സീനിയര്‍ കണ്‍സള്‍ട്ടന്‍റ് ഡോ. മധു ശശിധരന്‍, പീഡിയാട്രിക് ഗ്യാസ്‌ട്രോ എന്‍ട്രോളജി, ഹെപ്പറ്റോളജി ആന്‍ഡ് ലിവര്‍ ട്രാന്‍സ്പ്ലാന്‍റ് വിഭാഗം അസോസിയേറ്റ് കൺസൾട്ടന്‍റ് ഡോ. അനു കെ. വാസു, ഇന്‍റർവൻ‍ഷണല്‍ റേഡിയോളജി വിഭാഗം സീനിയര്‍ കണ്‍സള്‍ട്ടന്‍റ് ഡോ. മനീഷ് കുമാര്‍ യാദവ്, ഇമേജിംഗ് ആന്‍ഡ് ഇന്‍റർവന്‍ഷണല്‍ റേഡിയോളജി വിഭാഗം സീനിയര്‍ കണ്‍സള്‍ട്ടന്‍റ് ഡോ. കെ.എസ്. മനോജ്, പീഡിയാട്രിക് ക്രിട്ടിക്കല്‍ കെയര്‍ വിഭാഗത്തിലെ ഡോ. ഷിജു കുമാര്‍ എന്നിവരും ചികിത്സയുടെ ഭാഗമായി.

കോട്ടൂർ കുമ്പിൾമൂട് തോട് കരകവിഞ്ഞ് വെള്ളപ്പൊക്കം സ്ഥിരമായി മാറുന്നു

കോട്ടൂർ: പരിസ്ഥിതി വകുപ്പിന്‍റെ മുന്നറിയിപ്പും സെന്‍റർ ഫോർ എർത്ത് സയൻസ് സ്റ്റഡീസ് നൽകിയ നിർദേശങ്ങളും അവഗണിച്ചു; കോട്ടൂർ കുമ്പിൾമൂട് തോടു കരവിയുന്നതും വെള്ളപൊക്കം വീടുകളെയും കൃഷിയിടങ്ങളേയും ബാധിക്കുന്നതു പതിവായി മാറുന്നു. കോട്ടൂർ പ്രദേശം മുങ്ങു കയും തോടു പോകുന്ന കുറ്റിച്ചൽ ജംഗ്ഷൻ വെള്ളത്തിനടിയിലാകുകയും ചെയ്തു. കോട്ടൂരിലെ പാലമൂട്, കാഞ്ചിമൂട്ട്താര, മൂന്നാറ്റുമുക്ക്, ചോനാംപാറയുടെ കിഴക്കേചരിവ്, പുലിയടിച്ചാൻകുന്ന് കിഴക്കേമല പാറയുടെ തെക്ക് കിഴക്കേ ചരിവ്, ചാരുംകുഴി, വെള്ളക്കുഴി ഏല, ഈച്ചുകുട്ടി കോണു വട്ടക്കരിക്കകം എന്നിവ ഉൾപ്പെട്ട വിസ്തൃതമായ കുമ്പിൾമൂട് തോടിന്‍റെ വൃഷ്ടിപ്രദേശത്തു രണ്ടോ മൂന്നോ മണിക്കൂർ തുടർച്ചയായി മഴ പെയ്യുന്നതും കോട്ടൂർ കണ്ടകംചിറ, മാൻകുടി പ്രദേശം മേപ്പിലാംകോണം, വില്ലുചാരി കുന്നിന്‍റെ വടക്കു കിഴക്കേചരിവ്, നെല്ലിക്കുന്ന്, കറണ്ടകംചിറ എന്നിവിടങ്ങളിലുള്ള വെള്ളവുംകൂടി ഒന്നിച്ചൊഴുകിയെത്തി കോട്ടൂർ പ്രദേശത്ത് ഇത്തരത്തിൽ വെള്ളപ്പൊക്കമുണ്ടാകാറാണ് പതിവ്. കോട്ടൂരിൽനിന്നു താഴേക്കൊഴുകി കരമനയാറ്റിന്‍റെ ഭാഗമെത്തുന്നതിനുമുൻപ് നടുവച്ചൽ, എലിമല, വാഴപ്പള്ളി, കുരുന്തറക്കോണം, ശംഭുതാങ്ങി, അരുകിൽ, പച്ചക്കാട് തുടങ്ങിയ പ്രദേശങ്ങളിലെത്തി കാര്യോട് കുമ്പിൾ മൂട് തോടായി മാറുന്നു. ഇവിടങ്ങളിലെ പ്രാദേശിക നീർച്ചാലുകളും കൂടിചേർന്നു കൂടുതൽ അപകടസാധ്യതയും ഉണ്ടാക്കാറുണ്ട്. കഴിഞ്ഞ കുറേ വർഷങ്ങളായി കുമ്പിൾമൂട് തോടിൻഖെ ഇരുകരകളിലും സ്വാഭാവിക നീരൊഴുക്കിനെ തടഞ്ഞതും വികസന പ്രവർത്തനങ്ങൾക്കുവേണ്ടി അശാസ്ത്രീയ നിർമാണങ്ങൾ നടത്തിയതും താത്ക്കാലിക ബണ്ടു നിർമാണവും കുമ്പിൾമൂട് തോടിന്‍റെ ഇരുകരകളിലെ കൈയേറ്റവും തോടിലൂടെയുള്ള സ്വാഭാവിക നീരൊഴുക്കിനെ തടസപ്പെടു ത്തുന്നുണ്ട്. മലവെള്ളം സമീപ പ്രദേശങ്ങളിലൂടെ കയറിയൊഴുകുന്ന നിലയിലേക്കു മാറിയിരുന്നു. വർഷങ്ങൾക്ക് മുൻപ് ഇവിടെ പഠനത്തിനെത്തിയ സെസ്സും പരിസ്ഥിതിവകുപ്പും തോടിനെ സംരക്ഷിക്കാൻ മുന്നറിയിപ്പു നൽകിയിരുന്നുവെങ്കിലും എല്ലാവരും മുന്നറിയിപ്പിനെ അവഗണിക്കുകയായിരുന്നു. കാലങ്ങൾക്കുശേഷം അവർ ചൂണ്ടികാട്ടിയതുപോലെ പ്രദേശങ്ങളിൽ വെള്ളമെത്തുകയും ചെയ്തിരുന്നു. പരിഹാരമായി ചില നിർദേശങ്ങളും അവർ മുന്നോട്ട് വച്ചിരുന്നു. കുറ്റിച്ചൽ പഞ്ചായത്തിനും ഇതു സംബന്ധിച്ചു നിർദേങ്ങൾ നൽകിയെങ്കിലും ഒരു നടപടിയും ഉണ്ടായില്ല. മഴവെള്ള നിർഗമനം തടസപ്പെടുത്തി, നീർചാലിനോടു ചേർന്നു നിർമാണവും കുമ്പിൾമൂട് തോടിൽ മലവെള്ളം ഒലിച്ചുപോകുന്നതിന് തടസമാകുന്ന തരത്തിൽ മാലിന്യങ്ങൾ നിറഞ്ഞതും കുറ്റിച്ചെടികളും ഈറയും, മുളയുമെല്ലാം വളർന്നു ഇരുകരകളുംമൂടി കിടക്കുന്നതും സ്വാഭാവിക നീരൊഴുക്കിന് തടസമുണ്ടാകുന്നതിന് കാരണമായിരിക്കുകയാണെന്നും നഗരത്തിലേയ്ക്ക് കുടിവെള്ളമെത്തിക്കാൻ രണ്ടു വർഷം മുൻപ് വന്ന ജലവിഭവവകുപ്പ് വിദഗ്ദരും മുന്നറിയിപ്പ് നൽകിയതാണ്. ശാസ്ത്രീയമായ രീതിയിലൂടെ ചെളി നീക്കി സ്വാഭാവിക നീരൊഴുക്ക് പുനഃസ്ഥാപിക്കുവാൻ ബന്ധപ്പെട്ടവർ ശ്രദ്ധിച്ചില്ലെങ്കിൽ വീണ്ടും പ്രളയമുണ്ടാകുമെന്നും ചൂണ്ടികാണിക്കപ്പെടുന്നുണ്ട്.

വഴുതോട്ടുകോണം കുളത്തിന് ശാപമോക്ഷമായില്ല

പാറശാല: കൊല്ലയില്‍ പഞ്ചായത്തിലെ കൊറ്റാമം വാര്‍ഡില്‍ സ്ഥിതി ചെയ്യുന്ന വഴുതോട്ടുകോണം കുളത്തിന് ഇനിയും ശാപമോക്ഷമാവുന്നില്ല. മൂന്നു വര്‍ഷം മുന്‍പ് റോഡു പണിക്ക് ടാര്‍ കയറ്റിവന്ന ടിപ്പര്‍ ലോറി കുളത്തിലേക്ക് മറിഞ്ഞ് അപകടം സംഭവിച്ചിരുന്നു. പാര്‍ശ്വഭിത്തി തകര്‍ന്ന് റോഡ് കുളത്തിലേക്ക് പതിച്ചതാണ് അപകടകാരണം. കൊച്ചുകുട്ടികളുമായി പോകുന്ന സ്‌കൂള്‍ വാഹനങ്ങള്‍ ഉള്‍പ്പെടെ നിരവധി വാഹനങ്ങള്‍ ഈ റോഡിലൂടെയാണ് കടന്നുപൊയ്‌ക്കൊണ്ടിരുന്നത്. പഞ്ചായത്തിനും മറ്റ് അധികാരികള്‍ക്കും നാട്ടുകാര്‍ നിരവധി പരാതികള്‍ നല്‍കിയെങ്കിലും ഇതുവരെയും പ്രശ്‌നത്തിന് ശാശ്വത പരിഹാരം ആയില്ല. തൊഴുലുറപ്പ് ഫണ്ട് എന്ന പേരില്‍ പഞ്ചായത്ത് ഇപ്പോള്‍ പതിനഞ്ച് ലക്ഷം രൂപ അനുവദിച്ചതായി പറയുന്നു. എന്നാല്‍ പണി എവിടെയും എത്തിയില്ല. വെള്ളം വറ്റിക്കാനെന്ന പേരില്‍ നൂറുകണക്കിന് ആളുകളും വാഹനങ്ങളും ദിവസവും കടന്നുപോകുന്ന കുളത്തിന്‍റെ പാര്‍ശ്വഭിത്തിയോട് ചേര്‍ന്ന കോണ്‍ക്രീറ്റ് റോഡ് ജെസിബി ഉപയോഗിച്ച് വെട്ടിപ്പൊളിച്ചിട്ടും നാളേറെയായി. കുളത്തിന്‍റെ കണ്ണറ തുറന്നും മോട്ടോറുപയോഗിച്ചും വെള്ളം വറ്റിക്കാന്‍ മറ്റു മാര്‍ഗങ്ങള്‍ നിലനില്‍ക്കെയാണ് പതിനായിരങ്ങള്‍ ചെലവഴിച്ച് ജനങ്ങള്‍ക്ക് ഏറെ ബുദ്ധിമുട്ടുണ്ടാക്കി റോഡ് വെട്ടിപൊളിച്ചത്. റോഡു പണിക്കുള്ള കരിങ്കല്ലും മെറ്റലും മറ്റു നിർമാണ സാമഗ്രികളും റോഡിലാണ് ഇട്ടിരിക്കുന്നത്. ഇതുകാരണം ധനുവച്ചപുരം റെയില്‍വേ സ്‌റ്റേഷനിലേക്കു പോകുന്ന ചെറുവാഹനങ്ങൾക്കും കാല്‍നടയാത്രക്കാര്‍ക്കും ഇതുവഴി യാത്ര ചെയ്യാന്‍ സാധിക്കാതായിട്ട് നാളേറെയായി. എത്രയും വേഗം പ്രശ്‌നത്തിന് ശാശ്വത പരിഹാരം കാണാന്‍ അധികൃതര്‍ തയാറാകണമെന്നാണ് നാട്ടുകാരുടെ ആവശ്യം .

പ്രിയംവദ കൊലക്കേസ് പ്രതികളെ റിമാൻഡ് ചെയ്തു

വെള്ളറട: അയല്‍വാസിയായ വീട്ടമ്മയെ കൊലപ്പെടുത്തി വീടിനു സമീപത്തു കുഴിച്ചിട്ട സംഭവത്തില്‍ പ്രതികളെ റിമാൻഡു ചെയ്തു. കേസിലെ രണ്ടാം പ്രതി സന്തോഷിന്‍റെ തെളിവെടുപ്പ് പൂര്‍ത്തിയാക്കിയ ശേഷമാണ് ഇരുവരെയും നെയ്യാറ്റിന്‍കര കോടതിയില്‍ ഹാജരാക്കിയത്. പനച്ചമൂട് പഞ്ചാക്കുഴി മാവുവിള വീട്ടില്‍ പ്രിയംവദ (48) കൊല്ലപ്പെട്ട സംഭവത്തില്‍ മാവുവിള വി.എസ്. ഭവനില്‍ വിനോദാണ് (46) ഒന്നാം പ്രതി. ‌ സാമ്പത്തിക ഇടപാടാണ് കൊലപാതകത്തിനു കാരണമെന്നാണ് പോലീസ് കണ്ടെത്തല്‍. മൃതദേഹം കുഴിച്ചിടാന്‍ സഹായിച്ചതിനു വിനോദിന്‍റെ സഹോദരന്‍ ചെങ്കല്‍ വട്ടവിള സ്വദേശി സന്തോഷി(42)നെയും പോലീസ് പിടികൂടിയിരുന്നു. കഴിഞ്ഞ വ്യാഴാഴ്ചയാണ് വിനോദ് പ്രിയംവദയെ കൊലപ്പെടുത്തിയത്. ഞായറാഴ്ച രാവിലെയാണ് കൊലപാതകവിവരം പുറത്തറിയുന്നത്.

നെടുമങ്ങാട് പഴവടി ഗ്രാമത്തിൽ മൂന്നു ദിവസമായി വൈദ്യുതി ഇല്ല; 150 കുടുംബങ്ങൾ ദുരിതത്തിൽ

നെടുമങ്ങാട്: ടൗണിലെ പഴവടി ഗ്രാമത്തിൽ മൂന്നു ദിവസമായി വൈദ്യുതി ഇല്ല.150ഓളം കുടുംബങ്ങൾ ദുരിതത്തിലാണ്. കല്ലമ്പാറ ട്രാൻസ്ഫോമറിൽനിന്നും കേബിൾ വഴി വൈ ദ്യുതി കണക്‌ഷനുള്ള പഴവടി, കല്ലമ്പാറ, കുന്നുംപുറം പ്രദേശങ്ങളിലെ 150 ലധികം വീടുകളിലുള്ളവർ കഴിഞ്ഞ മൂന്നുദിവസമായി പകലും രാത്രിയും വൈദ്യുതിയില്ലാതെ ദുരിതത്തി ലാണ്. കെഎസ്ഇബി ഓഫീസിൽ നിന്നും അരകിലോമീറ്റർ പോലും ഇല്ലാത്ത സ്ഥലത്താണ് വൈദ്യുതി ബന്ധം താറുമാറായിരി ക്കുന്നത്. ആസ്ഥാനത്തുൾപ്പെടെ നിരവധി പേർ പരാതി ഫോണിലൂടെയും നേരിട്ടും അറിയിച്ചിട്ടും ഇതുവരെ പരിഹാരവുമായിട്ടില്ല. അണ്ടർഗ്രൗണ്ട് കേബിളിലെ തകരാറാണു പ്രശ്നമെന്നും പരിഹരിക്കാൻ സമയമെടുക്കുമെന്നുമാണു സ്ഥിരം മറുപടി. ഇടയ്ക്കിടയ്ക്ക് വൈദ്യുതി വന്നാൽ വീണ്ടും തടസപ്പെടും. ഓരോ തവണ വൈദ്യുതി വന്നുകുമ്പോഴും വീടുകളിലെ ഒന്നോ രണ്ടോ വൈദ്യത ഉപപകരണങ്ങൾ കേടാവുകയും ചെയ്യും.

പാചകവാതക സിലിന്‍ഡര്‍ മോഷണം; പ്രതി പിടിയില്‍

പേരൂര്‍ക്കട: പാചകവാതക സിലിന്‍ഡറുകള്‍ മോഷ്ടിച്ചു മറിച്ചുവിറ്റ സംഭവത്തിലെ രണ്ടാംപ്രതിയെ മ്യൂസിയം പോലീസ് പിടികൂടി. കരമന തളിയല്‍ സത്യന്‍ നഗര്‍ തളിയല്‍ ക്ഷേത്രത്തിനു സമീപം ടി.സി 50/1335-ല്‍ ശരവണന്‍ (35) ആണ് പിടിയിലായത്. ജഗതി ഡിപിഐ ജംഗ്ഷനിലെ രജനി ഗ്യാസ് ഏജന്‍സിയില്‍ ജൂണ്‍മാസം ആദ്യത്തെ ആഴ്ചയായിരുന്നു സംഭവം. രണ്ടു സിലിന്‍ഡറുകളാണ് ഇവിടെനിന്നു മോഷ്ടിക്കപ്പെട്ടത്. ഇതില്‍ ഒന്നു തമ്പാനൂരിലും മറ്റൊന്നു കരമനയിലുമുള്ള കടകളില്‍ വില്‍പ്പന നടത്തിയത് പോലീസ് കണ്ടെടുത്തിരുന്നു. കരമന തെലുങ്കുചെട്ടി തെരുവില്‍ ടി.സി 20/2205ല്‍ കാര്‍ത്തികും (30) ശരവണനും ചേര്‍ന്നാണ് ഗ്യാസ് ഏജന്‍സിയില്‍ നിന്ന് സിലിന്‍ഡറുകള്‍ കടത്തിയത്. കാര്‍ത്തിക് നേരത്തെ റിമാന്‍ഡിലായിരുന്നു. സിസിടിവി ദൃശ്യങ്ങള്‍ പ്രതിയെ പിടികൂടുന്നതിന് സഹായകമായി. മ്യൂസിയം സിഐ വിമല്‍, എസ്ഐമാരായ വിപിന്‍, ഷിജു, സിപിഒമാരായ രഞ്ജിത്ത്, അനീഷ് ചന്ദ്രന്‍, അനു കൃഷ്ണന്‍, അനൂപ് എന്നിവരാണ് അന്വേഷണ സംഘത്തില്‍ ഉണ്ടായിരുന്നത്. അറസ്റ്റിലായ പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

ഭീഷണിയായി കൂറ്റന്‍ തണല്‍മരം

പേരൂര്‍ക്കട: ആല്‍മര ഭീഷണിക്കു പിന്നാലെ മുട്ടട നിവാസികള്‍ക്കു തലവേദന സൃഷ്ടിച്ചുകൊണ്ടു കൂറ്റന്‍ തണൽമരവും. ജംഗ്ഷനു തൊട്ടടുത്ത് എടിഎം കൗണ്ടറിനു മുന്നില്‍ നില്‍ക്കുന്ന കൂറ്റന്‍ തണല്‍മരമാണ് ഭീഷണി സൃഷ്ടിക്കുന്നത്. ശക്തമായ മഴയും കാറ്റും തുടരുന്നതിനാല്‍ തണല്‍മരത്തിന്‍റെ ശിഖരങ്ങള്‍ ഏതുനിമിഷവും ഒടിഞ്ഞുവീഴാവുന്ന അവസ്ഥയിലാണ്. ജംഗ്ഷനില്‍ കൂറ്റന്‍ ആല്‍മരം ഭീഷണി സൃഷ്ടിക്കുന്നതു സംബന്ധിച്ച് ദീപിക വാര്‍ത്ത പ്രസിദ്ധീകരിച്ചിരുന്നു. തണല്‍മരശിഖരങ്ങള്‍ നിലംപൊത്തുകയാണെങ്കില്‍ എടിഎം കൗണ്ടര്‍, വ്യാപാര സ്ഥാപനങ്ങളില്‍ മൂന്നെണ്ണം, സമീപത്തെ സ്റ്റാൻഡില്‍ പാര്‍ക്ക് ചെയ്തിരിക്കുന്ന ഓട്ടോറിക്ഷകള്‍, സബ്രജിസ്ട്രാര്‍ ഓഫീസിന്‍റെ മതില്‍ക്കെട്ട് എന്നിവ അപകടത്തില്‍പ്പെടും. മഴ കൂടുതല്‍ ശക്തമാകുന്നതിനുമുമ്പ് ദുരന്ത നിവാരണ അഥോറിറ്റി ഇടപെട്ട് മരക്കൊമ്പുകള്‍ മുറിക്കണമെന്നതാണ് നിവാസികളുടെ ആവശ്യം.

പഠനോപകരണ വിതരണം

നെടുമങ്ങാട് : താലൂക്ക് സോഷ്യൽ വെൽഫെയർ അസോസിയേഷന്‍റെ ആഭിമുഖ്യത്തിൽ എസ്എസ്എൽസി, പ്ലസ് ടൂ പരീക്ഷകളിൽ ഉന്നത വിജയം കരസ്ഥമാക്കിയവർക്ക് അ നുമോദനവും പഠനോപകരണ വിതരണവും നടത്തി. റിട്ട. അധ്യാപകൻ രത്നരാജ് ഉ ത്ഘാടനം ചെയ്തു. പ്രസിഡന്‍റ് കെ.എസ്. പ്രമോദ് അധ്യക്ഷത വഹിച്ചു. സെക്രട്ടറി മന്നൂർക്കോണം സത്യൻ, ശോഭന, മാർട്ടിൻ ജോസ്, അക്ഷയ് രാജ്,ഇനി ജി മാർട്ടിൻ, സുജികുമാർ എന്നിവർ സംസാരിച്ചു.

മികവുത്സവം 2025 ഉദ്ഘാടനം ചെയ്തു

നെടുമങ്ങാട്: കഴിഞ്ഞ ഒമ്പത് വർഷത്തിനിടെ 5000 കോടി രൂപയുടെ അടിസ്ഥാന വികസന പ്രവർത്തനങ്ങൾ പൊതുവിദ്യാഭ്യാസ മേഖലയിൽ നടപ്പാക്കിയിട്ടുണ്ടെന്നു മന്ത്രി വി. ശിവൻകുട്ടി അഭിപ്രായപ്പെട്ടു. പത്താം ക്ലാസ്, പ്ലസ് ടു പരീക്ഷകളിൽ ഉന്നത വിജയം നേടിയ നെടുമങ്ങാട് മണ്ഡലത്തിലെ വിദ്യാർഥികൾക്കുള്ള നെടുമങ്ങാട് എംഎൽഎയുടെ വിദ്യാഭ്യാസ അവാർഡുദാന ചടങ്ങ് 'മികവുത്സവം 2025 ' ഉദ്ഘാടനം ചെയ്യുകയായിരുന്നു മന്ത്രി. എസ്എസ്എൽസിക്ക് മുഴുവൻ വിഷയങ്ങളിലും എ പ്ലസ് കരസ്ഥമാക്കിയ മണ്ഡലത്തിലെ 554 വിദ്യാർഥികളും ഐസിഎസ്ഇ, സിബിഎസ്ഇ സ്കൂളുകളിൽ പഠിച്ച 75 ശതമാനത്തിൽ അധികം മാർക്ക്‌ നേടിയ 318 വിദ്യാർഥികളും ഉൾപ്പെടെ 872 വിദ്യാർഥികളെയാണ് ചടങ്ങിൽ അനുമോദിച്ചത്. നെടുമങ്ങാട് മുൻസിപ്പൽ ടൗൺ ഹാളിൽ നടന്ന ചടങ്ങിൽ നെടുമങ്ങാട് നഗരസഭ ചെയർപേഴ്സൺ സി.എസ്. ശ്രീജ, നെടുമങ്ങാട് മണ്ഡലത്തിൽ ഉൾപ്പെട്ട വിവിധ പഞ്ചായത്തുകളുടെ പ്രസിഡന്‍റുമാർ, തൃശൂർ ഡിഐജി ഹരിശങ്കർ, നഗരസഭ കൗൺസിലർമാർ, മണ്ഡലത്തിലെ വിവിധ സ്കൂളിലെ അധ്യാപകർ തുടങ്ങിയവർ പങ്കെടുത്തു.

ചീഫ് സെക്രട്ടറിയെ ആദരിച്ചു

മെഡിക്കല്‍കോളജ്: പുതുതായി നിയമിതനായ കേരള ചീഫ് സെക്രട്ടറി ഡോ. എ. ജയതിലകിനു സ്‌നേഹാദരങ്ങള്‍ അര്‍പ്പിച്ച് സ്വന്തം നാടും നാട്ടുകാരും. കേശവദാസപുരം വാര്‍ഡിലെ രാജലക്ഷ്മി നഗറിലെ സ്ഥിരതാമസക്കാരനായ അദ്ദേഹത്തിന്‍റെ പുതിയ സ്ഥാനലബ്ദിയിലെ സന്തോഷത്തിലാണ് അയല്‍ക്കാരും നാട്ടുകാരും. കേശവദാസപുരം വാര്‍ഡിന്‍റെകൂടി അഭിമാനമായ അദ്ദേഹത്തിന് വാര്‍ഡിന്‍റെ സ്‌നേഹോപഹാരം കൗണ്‍സിലര്‍ അംശു വാമദേവന്‍ കൈമാറി.

കെ. മാധവൻ അനുസ്മരണം

നെടുമങ്ങാട്: മൈലം നേതാജി ഗ്രന്ഥശാലയുടെ ആഭിമുഖ്യത്തിൽ സംഘടിപ്പിച്ച കെ. മാധവൻ വാർഷിക അനുസ്മരണ സമ്മേളനം ജില്ലാ കോൺഗ്രസ് കമ്മിറ്റി മുൻ പ്രസിഡന്‍റ് കരകുളം കൃഷ്ണപിള്ള ഉദ്ഘാടനം ചെയ്തു. തോപ്പിൽ ശശിധരൻ അധ്യക്ഷത വഹിച്ചു. വിതുര ശശി മുഖ്യപ്രഭാഷണവും, അഡ്വ. വീണ എസ്. നായർ വിദ്യാഭ്യാസ അവാർഡ് വിതരണവും നടത്തി. കായിക പ്രതിഭകളെ കെ. ജ്യോതിഷ് കുമാർ ആദരിച്ചു, ലാൽ റോഷൻ, ഉഷാകുമാരി യു.എസ്. സുഷ, അജയഘോഷ്, നടരാജൻ ചെട്ടിയർ, ബി. അശോകൻ, കൃഷ്ണൻകുട്ടി, സന്തോഷ്, രതീഷ് തുടങ്ങിയവർ പ്രസംഗിച്ചു.

പ്രതിഭാ സംഗമവും അനുമോദനവും

വെമ്പായം: പിരപ്പൻകോട് പ്ലാക്കീഴ് സോമശേഖരൻ നായർ മെമ്മോറിയൽ ലൈബ്രറിയുടെ ആഭിമുഖ്യത്തിൽ സംഘടിപ്പിച്ച പ്രതിഭാ സംഗമവും അനുമോദനവും കെഎസ്ആർടിസി മാനേജിംഗ് ഡയറക്ടർ പ്രമോജ് ശങ്കർ ഉദ്ഘാടനം ചെയ്തു. ഗ്രന്ഥശാലാ പ്രസിഡന്‍റ് എം.എസ്. രാജു അധ്യക്ഷനായ ചടങ്ങിനു സെക്രട്ടറി ബാബുരാജൻ സ്വാഗതം ആശംസിച്ചു. കേരള സംഗീത നാടക അക്കാദമി പ്രഫഷണൽ നാടക മത്സരത്തിൽ വിജയികളായ മുഹാദ് വെമ്പായം, എൻ.കെ. ശ്രീജ എന്നിവരെ അനുമോദിച്ചു. താലൂക്ക് ലൈബ്രറി കൗൺസിൽ സെക്രട്ടറി ജി. രാജേന്ദ്രൻ, താലൂക്ക് കൗൺസിൽ പ്രസിഡന്‍റ് കെ. രാജേന്ദ്രൻ, മാണിക്കൽ പഞ്ചായത്ത് വൈസ് പ്രസിഡന്‍റ് ലേഖ കുമാരി, ബ്ലോക്ക് മെമ്പർമാരായ ടി. നന്ദു, കെ. സജീവ്, വാർഡ് ജനപ്രതിനിധി ജ്യോതിലക്ഷ്മി തുടങ്ങിയവർ സംസാരിച്ചു. ഗ്രന്ഥശാലാ അംഗം ശാന്തകുമാരി നന്ദി പറഞ്ഞു.

വിതുര ദൈവപരിപാലന പള്ളിയിലെ തിരുനാൾ ദിനങ്ങൾക്ക് തുടക്കമായി

വിതുര : ദൈവ പരിപാലന ലത്തീൻ കത്തോലിക്ക പള്ളിയിലെ തിരുനാൾ, നൊവേന ദിങ്ങൾക്കു തുടക്കംകുറിച്ചുള്ള നൊവേനക്കും ദിവ്യബലിക്കും സീറോ മലങ്കര സെന്‍റ് തോമസ് പള്ളി ഇടവക വികാരി ഫാ. മാത്യു റെജി ഒഐസി നേതൃത്വം നൽകി. ഇന്നു നടക്കുന്ന തിരുകർമങ്ങൾക്ക് സീറോ മലബാർ കൊപ്പം ആൾ സെയിന്‍റ്സ് ഇടവക വികാരി ഫാ. ബെന്നി വെട്ടിത്താനം നേതൃത്വം നൽകും. നാളെ വൈകുന്നേരം അഞ്ചിന് ഇടവക വികാരി ഫാ. റിനോയ് കാടിപ്പറമ്പിൽ ഒഎസ്ജെ തിരുനാൾ പതാക ഉയർത്തും. തുടർന്നു നടക്കുന്ന സമൂഹ ദിവ്യബലിക്കു നെടുമങ്ങാട് റീജണൽ കോ- ഓർഡിനേറ്റർ ഫാ. റൂഫസ് പയസ് ലീൻ മുഖ്യകർമികനാകും, ഫാ. സേവ്യർ ചിറയത്ത് സിഎംഐ വചനസന്ദേശം നൽകും. തിരുനാൾ ദിനങ്ങളിൽ ചുള്ളിമാനൂർ ഫെറോന വികാരി ഡോ. ടി. ബിനു, ഫാ. സെബാസ്റ്റ്യൻ കാണിച്ചുക്കുന്നത്ത്, ഫാ. അനൂജോ, ഫാ. പ്രവീൺ പോൾ, തുടങ്ങിയവർ തിരുകർമങ്ങൾക്കു മുഖ്യകർമികാരാകും, ഫാ. വിജിൻ എസ്. അഞ്ചോലസ്, ഫാ. സെബാസ്റ്റ്യൻ പള്ളിക്കൽ തുടങ്ങിയവർ വചന സന്ദേശം നൽകും. തിരുനാൾ 22 നു സമാപിക്കും.

പഞ്ചായത്തിനെതിരേ അപവാദ പ്രചാരണം: പ്രതിഷേധം ശക്തം

പാറശാല: കൊല്ലയില്‍ പഞ്ചായത്ത് എല്‍ഡിഎഫ് ഭരണസമിതിക്കെതിരെ കോൺഗ്രസും ബിജെപിയും ചേർന്നു അവിശുദ്ധ കൂട്ടുകെട്ട് നടത്തുന്നതിനെതിരെ പ്രതിഷേധം ശക്തം. എല്‍ഡിഎഫ് കൊല്ലയില്‍ പഞ്ചായത്ത് കമ്മിറ്റി സംഘടിപ്പിച്ച പ്രതിഷേധ കൂട്ടായ്മ സിപിഎം പാറശാല ഏരിയ സെക്രട്ടറി അഡ്വ. എസ് അജയകുമാര്‍ ഉദ്ഘാടനം ചെയ്തു. ശശീന്ദ്ര ബാബു അധ്യക്ഷത വഹിച്ചു. സിപിഐ കൊല്ലയില്‍ ലോക്കല്‍ കമ്മിറ്റി സെക്രട്ടറി എ. വിജയൻ സ്വാഗതം പറഞ്ഞു. സിപിഎം ധനുവച്ചപുരം ലോക്കല്‍ കമ്മിറ്റി സെക്രട്ടറി വി. താണുപിള്ള, കെ. രാജേന്ദ്രകുമാര്‍, വി.എസ്. ബിനു, കെ. അംബിക, ഡോ. എന്‍.എസ്. നവനീത് കുമാര്‍, രാധാകൃഷ്ണന്‍, കെ.വി. പത്മകുമാര്‍, എസ്. സന്ധ്യ, ജി. ബൈജു, വി.എസ്. അനില, ജ്യോതിഷ റാണി, സന്തോഷ് കുമാര്‍, സി.കെ. സിനി കുമാരി, കെ.പി. സുശീല, നന്ദി എം. മഹേഷ് എന്നിവര്‍ പ്രസംഗിച്ചു.

സാന്പത്തിക തിരിമറി: ജീവനക്കാരുടെ ജാമ്യാപേക്ഷ 19ന് പരിഗണിക്കും

തിരുവനന്തപുരം: നടൻ കൃഷ് ണകുമാറിന്‍റെ മകൾ ദിയ കൃഷ്ണയുടെ സ്ഥാപനത്തിൽ ജീവനക്കാർ സാന്പത്തിക തട്ടിപ്പ് നടത്തിയെന്ന കേസിൽ മൂന്നു ജീവനക്കാരുടെ ജാമ്യാപേക്ഷ പരിഗണിക്കുന്നത് 19 ലേക്കു മാറ്റി. തിരുവനന്തപുരം സെഷൻസ് കോടതിയാണ് ജീവനക്കാരായ വിനീത, ദിവ്യ ഫ്രാൻക്ലിൻ, രാധ എന്നിവരുടെ ജാമ്യ ഹർജി പരിഗണിക്കുന്നത്. സ്ഥാപനത്തിൽ എത്തുന്ന ഉപഭോക്താക്കൾക്ക് സ്ഥാപനത്തിലെ ക്യുആർ കോഡിനുപകരം ജീവനക്കാർ സ്വന്തം അക്കൗണ്ടിലെ ക്യുആർ കോഡ് നൽകി 69 ലക്ഷം രൂപയുടെ തട്ടിപ്പ് നടത്തിയെന്നതാണ് ദിയ കൃഷ്ണ നല്കിയ പരാതി. ഇതിനു പിന്നാലെയാണ് ദിയയുടെ സ്ഥാപനത്തിലെ മൂന്നു ജീവനക്കാരും മുൻകൂർ ജാമ്യാപേക്ഷയ്ക്ക് കോടതിയെ സമീപിച്ചത്. ജീവനക്കാർ ദിയയ്ക്കെതിരേയും കേസ് നല്കിയിരുന്നു. തങ്ങളെ തട്ടിക്കൊണ്ടുപോകാൻ ശ്രമിച്ചു എന്നത് ഉൾപ്പെടെയുള്ള പരാതിയാണ് ജീവനക്കാർ നല്കിയിട്ടുള്ളത്. ദിയ നല്കിയ പരാതിയിലും ജീവനക്കാർ നല്കിയ പരാതിയിലും പോലീസ് റിപ്പോർട്ട് ഹാജരാക്കത്തതിനാലാണ് ജാമ്യ ഹർജിയിൽ വാദം കേൾക്കുന്നത് 19 ലേക്ക് മാറ്റിയത്.

വിജയോത്സവം സംഘടിപ്പിച്ചു

നെയ്യാറ്റിന്‍കര: നെല്ലിമൂട് സെന്‍റ് ക്രിസോസ്റ്റംസ് ജിഎച്ച്എസിലെ വിജയോത്സവം പാറശാല രൂപത ബിഷപ് ഡോ. തോമസ് മാര്‍ യൗസേബിയോസ് ഉദ്ഘാടനം ചെയ്തു. എസ്എസ്എല്‍സി പരീക്ഷയില്‍ മുഴുവന്‍ വിഷയങ്ങള്‍ക്കും എ പ്ലസ് നേടിയ 138 പേരെയും ഒന്പതു വിഷയങ്ങള്‍ക്ക് എ പ്ലസ് ലഭിച്ച 27 പേരെയും യുഎസ്എസ് സ്കോളര്‍ഷിപ്പ് ജേതാക്കളെയും എന്‍ എംഎംഎസ് സ്കോളര്‍ഷിപ്പ് ജേതാവിനെയും ചടങ്ങില്‍ അനുമോദിച്ചു. പിടിഎ പ്രസിഡന്‍റ് സി.എസ്. ശ്രീകുമാര്‍ അധ്യക്ഷനായ ചടങ്ങില്‍ മെന്‍റലിസ്റ്റ് വിനോദ് ശാന്തിപുരം മുഖ്യാതിഥിയായിരുന്നു. അധ്യാപക പ്രതിനിധി സിസ്റ്റര്‍ മെര്‍ലിന്‍ മരിയ, ഹെഡ് മിസ്ട്രസ് സിസ്റ്റര്‍ ശോഭിത ജോസ്, പിടിഎ വൈസ് പ്രസിഡന്‍റ് എസ്.എസ്. വീണ എന്നിവര്‍ പ്രസംഗിച്ചു. രംഗപൂജ, അനുമോദനഗാനം എന്നിവയും നടന്നു.

പട്ടം എസ്‌യുടി ആശുപത്രിയില്‍ ലോക രക്തദാനദിനം ആചരിച്ചു

തിരുവനന്തപുരം: ലോക രക്തദാന ദിനത്തോടനുബന്ധിച്ച് എസ്‌യുടി ആശുപത്രിയില്‍ രക്തദാന ക്യാമ്പ് സംഘടിപ്പിച്ചു. ആശുപത്രിയുടെ മാനേജിംഗ് ഡയറക്ടറും ചീഫ് എക്സിക്യൂട്ടീവ് ഓഫീസറുമായ കേണല്‍ രാജീവ് മണ്ണാളി പരിപാടി ഉദ്ഘാടനം ചെയ്തു. വിവിധ കോളജ് വിദ്യാര്‍ഥികളും ആംബുലന്‍സ് ഡ്രൈവര്‍മാരും ഉള്‍പ്പെടെ നിരവധി പേര്‍ രക്തദാനം ചെയ്തു. ആശുപത്രിയുടെ മെഡിക്കല്‍ സൂപ്രണ്ട് ഡോ. വി. രാജശേഖരന്‍ നായര്‍, ബ്ലഡ് ബാങ്ക് ഇന്‍ചാര്‍ജ് ബി. രാധാകൃഷ്ണന്‍, വിവിധ വകുപ്പുകളുടെ മാനേജര്‍മാര്‍ എന്നിവരും ക്യാമ്പില്‍ പങ്കെടുത്തു.

കേരള ഹിന്ദീ പ്രചാരസഭയുടെ ബിരുദ സമർപ്പണം നാളെ

തിരുവനന്തപുരം: ഹിന്ദീപ്രചാര സഭയുടെ ആചാര്യ/ബിഎഡിന്‍റെ ബിരുദസമർപ്പണ സമ്മേളനം നാളെ രാവിലെ 11ന് ഗവർണർ രാജേന്ദ്ര വിശ്വനാഥ് ആർലേക്കർ വഴുതക്കാട് എം.കെ. വേലായുധൻ നായർ ഹാളിൽ ഉദ്ഘാടനം ചെയ്യും. കേരള യൂണിവേഴ്സിറ്റി വൈസ് ചാൻസലർ ഡോ. മോഹൻ കുന്നുമ്മൽ അധ്യക്ഷത വഹിക്കും. കേരള യൂണിവേഴ്സിറ്റി ഹിന്ദീ വിഭാഗം മുൻ വകുപ്പ് മേധാവി ഡോ. എസ്. തങ്കമണി അമ്മ അനുഗ്രഹ പ്രഭാഷണം നടത്തും. സഭ അധ്യക്ഷൻ എസ്. ഗോപകുമാർ സത്യവാചകം ചൊല്ലിക്കൊടുക്കും. സെക്രട്ടറി അഡ്വ. ബി. മധു, ട്രഷറർ ജി. സദാനന്ദൻ, ആചാര്യ കോളജ് ഓഫ് ടീച്ചർ എഡ്യൂക്കേഷൻ പ്രിൻസിപ്പൽ ഡോ. മധുബാലചന്ദ്രൻ എന്നിവർ പങ്കെടുക്കും.

പ്രിയദർശിനി ഗ്രന്ഥശാലാ വാർഷികാഘോഷം

മാറനല്ലൂർ: പ്രിയദർശിനി ഗ്രന്ഥശാലയുടെ 18-ാമത് വാർഷികാഘോഷവും സെമിനാറും ജില്ലാ പഞ്ചായത്ത് പ്രസിഡന്‍റ് സുരേഷ് കുമാർ ഉദ്ഘാടനം ചെയ്തു. ഗ്രന്ഥശാല വൈസ് പ്രസിഡന്‍റ് വിനുലാൽ അധ്യക്ഷത വഹിച്ചു. ബാലവേദി വിദ്യാർഥികളുടെ വിവിധ കലാപരിപാടികൾ നടന്നു. ഗ്രന്ഥശാല സെക്രട്ടറി സജി ജോസ് റിപ്പോർട്ട് അവതരിപ്പിച്ചു. പ്ലസ് ടു, എസ്എസ്എൽസി വിജയികൾക്ക് ക്യാഷ് നൽകി. വിദ്യാർഥികൾക്കുള്ള പഠനോപകരണ വിതരണം വാർഡ് മെമ്പർ ശരണ്യ നിർവഹിച്ചു. തുടർന്ന് കവിയരങ്ങിൽ സംഘടിപ്പിച്ച കുറ്റിയാണിക്കാട് ദിലീപ്, രാജി വെട്ടമംഗലം, ഹരൻ പുന്നവൂർ തുടങ്ങിയവർ പങ്കെടുത്തു

ഭാര്യയും ഭർത്താവും മണിക്കുറുകളുടെ വ്യത്യാസത്തിൽ മരിച്ചു

കാരക്കോണം: ഭാര്യയും ഭർത്താവും മണിക്കുറുകളുടെ വ്യത്യാസത്തിൽ മരിച്ചു. കാരക്കോണം തുറ്റിയോട്ടുകോണം ശിവദത്തിൽ ജി.വിദ്യാധരൻപിള്ള(71)യും ഭാര്യ വി.വത്സകുമാരി(68)യുമാണ് മരിച്ചത്. വിദ്യാധരൻപിള്ള ഞായറാഴ്ച രാത്രി 8.30നും വത്സകുമാരി തിങ്കളാഴ് ചാവിലെ എട്ടിനുമാണ് മരിച്ചത്. തിരുവനന്തപുരം ജനറൽ ആശുപത്രിയിൽ ചികിത്സയിലായിരുന്ന വിദ്യാധരൻപിള്ളക്ക് കൂട്ടിരിനെത്തിയതായിരുന്നു ബാര്യ വത്സലകുമാരി. ആറുകാണി ഹോളി ഫാമിലി ഹൈസ്കൂളിലെ റിട്ട. പ്യൂണായിരുന്നു വിദ്യാധരൻപിള്ള. മക്കൾ: സജികുമാർ, സന്തോഷ്കുമാർ, ബൈജു, സൗമ്യ. മരുമക്കൾ: ശാന്തി, ശകുന്തള, കൃഷ്ണ, ജ്യോതിഷ്കുമാർ.

വീട്ടിനുള്ളിൽ പരിക്കേറ്റ നിലയിൽ കണ്ടയാൾ മരിച്ചു

പാലോട് : വീടിനുള്ളിൽ പരിക്കേറ്റ നിലയിൽ കണ്ടയാൾ മരണമടഞ്ഞു. പെരിങ്ങമ്മല പാപ്പനംകോട് വേലൻ വെട്ടി വീട്ടിൽ ഹണി(44) യാണ് മരിച്ചത്. വീട്ടിൽ ഒറ്റക്കായിരുന്നു താമസം. തലയിൽ പരിക്ക് പറ്റിയ നിലയിൽ കാണുകയായിരുന്നു. ആശുപത്രിയിൽ എത്തിച്ചെങ്കിലും മരണം സംഭവിക്കുകയായിരുന്നു. പാലോട് ഹിമ വെസ്സൽസ് സ്ഥാപനത്തിന്‍റെ ഉടമയാണ്.പോലീസ് അന്വേഷണം ആരംഭിച്ചു. ഫോറൻസിക് വിഭാഗം സ്ഥലത്തെത്തി പരിശോധന നടത്തി. ഭാര്യ: രേവതി. മകൻ: ഇവാൻ.

ബൈക്കിടിച്ച് പരിക്കേറ്റ വീട്ടമ്മ മരിച്ചു

വിഴിഞ്ഞം: ബൈക്കിടിച്ച് പരിക്കേറ്റ് ആശുപത്രിയിൽ പ്രവേശിപ്പിച്ച വീട്ടമ്മ മരിച്ചു. അതിയന്നൂർ താന്നിമൂട് തോപ്പുവിള വീട്ടിൽ ചന്ദ്രന്‍റെ ഭാര്യ സൗദാമിനി (65)ആണ് മരിച്ചത്. ഞായറാഴ്ച രാത്രി ഏഴരയോടെ വിഴിഞ്ഞം ഉച്ചക്കടയിലായിരുന്നു സംഭവം. ഉച്ചക്കടയിൽ താമസിക്കുന്ന മകൻ ജയകുമാറിന്‍റെ വീട്ടിലേക്ക് പോകാൻ ബസിറങ്ങി നടന്നു വരുന്നതിനിടയിലാണ് അമിതവേഗത്തിൽ എത്തിയ ബൈക്ക് ഇടിച്ച് തെറിപ്പിച്ചത്. ഗുരുതരമായി പരിക്കേറ്റ സൗദാമിനിയെ നാട്ടുകാർ തെയ്യാറ്റിൻകരയിലെ സ്വകാര്യ ആശുപത്രിയിലും അവിടെ നിന്ന് മെഡിക്കൽ കോളജിൽ എത്തിച്ചെങ്കിലും രാത്രി 11.30 ഓടെ മരിച്ചു. വിഴിഞ്ഞം പോലീസ്മേൽ നടപടി സ്വീകരിച്ചു.

അജ്ഞാത മൃതദേഹം കണ്ടെത്തി

പൂവാർ:കോവളം - കാരോട് ബൈപാസിൽ കല്ലുമുട് പാലത്തിന് സമീപം വൃദ്ധനെ മരിച്ച നിലയിൽ കണ്ടെത്തി. ആളെ തിരിച്ചറിഞ്ഞിട്ടില്ല. ഏകദേശം 63 വയസ് പ്രായം തോനിക്കുന്ന ഇയ്യാൾ ഇളം പച്ചനിറത്തിൽ ലുങ്കി ധരിച്ചിട്ടുണ്ട്. വെള്ളിയാഴ്ച്ച രാത്രി എട്ടോടെ വാഹനം ഇടിച്ച് മരിച്ച നിലയിൽ മൃതദേഹം കണ്ടെത്തുകയായിരുന്നു. മൃതദേഹം കാഞ്ഞിരംകുളം മെഡിക്കൽ കോളജ് മോർച്ചറിയിലേക്ക് മാറ്റി.

വഴിച്ചല്‍ ഇമ്മാനുവേല്‍ ബിഎഡ് ട്രെയിനിംഗ് കോളജ് ബിരുദദാനം

വെള്ളറട: വാഴിച്ചല്‍ ഇമ്മാനുവേല്‍ ബിഎഡ് ട്രെയിനിംഗ് കോളജില്‍ 2023-2025 ബാച്ചിലെ ബിരുദ ധാരികള്‍ക്ക് വേണ്ടിയുള്ള ബിരുദദാന ചടങ്ങുകള്‍ നടന്നു. നെയ്യാറ്റിന്‍കര രൂപത നിയുക്ത മെത്രാന്‍ റവ. ഡോ. സെല്‍വരാജന്‍ ദാസന്‍ ചടങ്ങുകള്‍ക്ക് ഭദ്രദീപം തെളിച്ചു. കേരള യൂണിവേഴ്‌സിറ്റി സിൻഡിക്കേറ്റു മുൻ മെമ്പറും തൈക്കാട് ഗവ.ട്രെയിനിംഗ് കോളജ് മുൻ പ്രിൻസിപ്പലുമായ പ്രഫ. ജേക്കബ് മാത്യു വിശിഷ്ടാതിഥിയായി. കോളേജ് മാനേജര്‍ റവ. ജി. ക്രിസ്തുദാസ്, പ്രിന്‍സിപ്പൽ ഡോ. ബിനിത ദാസ്, കോളജ് ബര്‍സാര്‍ ഷാജ്കുമാര്‍, മുന്‍ പ്രിന്‍സിപ്പല്‍ ഡോ. ഇ. നാരായണപിള്ള, ഡെന്നിസ് കുമാര്‍ തുടങ്ങിയവർ പങ്കെടുത്തു.

മഴശക്തം: ബൈപാസിന്‍റെ സർവീസ് റോഡിലും വെള്ളക്കെട്ട്

വിഴിഞ്ഞം: മഴ ശക്തമായതോടെ ബൈപ്പാസിന്‍റെ സർവീസ് റോഡിലും വെള്ളക്കെട്ട്. യാത്രക്കാരും നാട്ടുകാരും ദുരിതത്തിലായി. കോവളം - കാരോട് ബൈപ്പാസിൽ കാഞ്ഞിരംകുളം, കോട്ടു കാൽ ഭാഗങ്ങളിലാണ് വെള്ളക്കെട്ടു രൂപംകൊണ്ടത്. കയറ്റിറക്ക് സ്ഥലങ്ങളിൽ വെള്ളം ഒഴുകിപ്പോകാനുള്ള ഓടകൾ നിർമിിച്ചതിലുള്ള അപാകതയാണ് പ്രശ്നമെന്നു നാട്ടുകാർ പറയുന്നു. ഇരുചക്ര വാഹന യാത്രക്കാരും കാൽനടയാത്രക്കാരുമാണ് ഏറെ ദുരിതമനുഭവിക്കുന്നത്. കെട്ടിക്കിടക്കുന്ന മലിന ജലം പകർച്ചവ്യാധികൾക്ക് കാരണമാകാമെന്ന ഭയത്തിലാണ് നാട്ടുകാർ. അശാസ്ത്രീയമായ ഓട നിർമാണത്തിനെതിരെ പരാതി അറിയിച്ചെങ്കിലും ദേശീയപാതാ അധികൃതർ തിരിഞ്ഞു നോക്കിയില്ലെന്നും പരാതിയുണ്ട്. ഇതിനുപരി ബൈപ്പാസിൽ നിന്നുള്ള വെള്ളം വൻ ശക്തിയായി കുത്തന്നെ സർവീസ് റോഡിലേക്ക് പതിക്കുന്നതും യാത്രക്കാർക്ക് ദുരിതമായി. മഴവെള്ളം താഴേക്ക് ഒഴുക്കാൻ പൈപ്പുകൾ സ്ഥാപിച്ചെങ്കിലും ഒന്നും ഫലം കണ്ടില്ലെന്നും നാട്ടുകാർ പറയുന്നു.

ബാലരാമപുരം ചന്തയുടെ നവീകരണ പ്രവൃത്തികള്‍ പുരോഗമിക്കുന്നു

നെയ്യാറ്റിന്‍കര: ബാലരാമപുരം ചന്തയ്ക്ക് പുതിയ മുഖം സമ്മാനിക്കുക എന്ന ലക്ഷ്യത്തോടെയുള്ള നടപടികള്‍ക്കു തുടക്കമായി. കാട്ടാക്കട - വിഴിഞ്ഞം റോഡില്‍ ബാലരാമപുരം ജംഗ്ഷനു സമീപത്തായാണു ചന്ത സ്ഥിതി ചെയ്തിരുന്നത്. വര്‍ഷങ്ങളുടെ പാരന്പര്യമുള്ള ബാലരാമപുരം ചന്തയില്‍ ഒരു കാലത്ത് അഞ്ഞൂറോളം ചെറുതും വലുതുമായ കച്ചവടക്കാരുണ്ടായിരുന്നതായി മുതിര്‍ന്ന തലമുറയില്‍പ്പെട്ടവര്‍ പറയുന്നു. മത്സ്യവും മലക്കറികളും മുതല്‍ ഗാര്‍ഹികാവശ്യങ്ങള്‍ക്കുള്ള കുട്ടയും മുറവും ചൂലും അടക്കം നിരവധി ഇനങ്ങളുടെ കച്ചവടകേന്ദ്രമായിരുന്നു ഇവിടം. പിന്നീട് കച്ചവടം കുറഞ്ഞെങ്കിലും ബാലരാമപുരം ചന്തയുടെ പ്രതാപവും പ്രൗഢിയും മായാതെ അവശേഷിച്ചു. കാലപ്പഴക്കംചെന്ന കെട്ടിടം കച്ചവടക്കാര്‍ക്കും ഉപഭോക്താക്കള്‍ക്കും ഒരുപോലെ ഭീഷണിയായതും ചന്തയും പരിസരവും മതിയായ പരിപാലനമില്ലാതായതും പതിയെ ഈ വ്യാപാരയിടത്തിന്‍റെ പ്രസക്തി കുറച്ചു. കോവിഡ് സമയത്ത് ബാലരാമപുരം ചന്ത പൂര്‍ണമായും നിലച്ചു. രോഗസാഹചര്യങ്ങള്‍ അതിജീവിച്ചെങ്കിലും ചന്തയില്‍ പഴയതുപോലെ കച്ചവടക്കാരുടെയും ഉപഭോക്താക്കളുടെയും സാന്നിധ്യം അനുഭവപ്പെട്ടില്ല. ചന്ത ഹൈ ടെക് ആക്കണമെന്ന കച്ചവടക്കാരുടെയും ഉപഭോക്താക്കളുടെയും ആവശ്യം പരിഗണിച്ച് ബാലരാമപുരം പഞ്ചായത്ത് നവീകരണ പദ്ധതിക്കു രൂപംനല്‍കി. ചന്തയിലെ വ്യാപാരികളോട് ഒഴിഞ്ഞു പോകാന്‍ പഞ്ചായത്ത് അധികൃതര്‍ ആവശ്യപ്പെട്ടു. എട്ടുകോടി രൂപ വിനിയോഗിച്ചാണു പുതിയ സംവിധാനങ്ങളോടെ ചന്ത നവീകരിക്കുന്നത്. ചന്തയിലെ കെട്ടിടങ്ങളെല്ലാം പൊളിച്ചുനീക്കുന്ന നടപടികളും ആരംഭിച്ചു. ഇതിനിടയില്‍ പെയ്ത മഴ നവീകരണ പ്രവൃത്തികള്‍ക്ക് വെല്ലുവിളിയാകുന്നുണ്ട്. കച്ചവടക്കാര്‍ക്കും ഉപഭോക്താക്കള്‍ക്കും സൗകര്യപ്രദമായ രീതിയില്‍ ബഹുനില സമുച്ചയമാണ് ചന്തയില്‍ യാഥാര്‍ഥ്യമാക്കാന്‍ തീരുമാനിച്ചിട്ടുള്ളത്.

കിഴക്കൻമല പദ്ധതി യാഥാർഥ്യമായി

ആര്യൻകോട്: കുടിവെള്ള ക്ഷാമം പരിഹരിക്കുന്നതിനായി സംസ്ഥാന സർക്കാർ കിഫ്ബി പദ്ധതിയിൽ ഉൾപ്പെടുത്തി 45 കോടി രൂപ അടങ്കലിൽ അനുവദിച്ച കിഴക്കൻമല കുടിവെള്ള പദ്ധതിയുടെ നിർമാണ പ്രവർത്തനങ്ങൾ അവസാന ഘട്ടത്തിൽ. നെയ്യാറിലെ മൂന്നാറ്റുമുക്കിൽനിന്നു വെള്ളം പമ്പുചെയ്ത് ആര്യൻകോട് പഞ്ചായത്തിലെ കിഴക്കൻമലയിൽ ജലശുദ്ധീകരണശാല നിർമിച്ച് സംഭരണികൾ വഴി ആര്യൻകോട് -പെരുങ്കടവിള പഞ്ചായത്തുകളിലെ വിവിധസ്ഥലങ്ങളിലേക്ക് എത്തിക്കുന്ന തരത്തിലാണ് പദ്ധതി തയാറാക്കിയിട്ടുള്ളത്. ശുദ്ധീകരണശാലയും അനുബന്ധഘടകങ്ങളും ഓവർഹെഡ് ടാങ്കുകൾ, ട്രാൻസ്മിഷൻ മെയിൻ, ഡിസ്ട്രിബ്യൂഷൻ ലൈനുകൾ, സ്ഥാപിക്കാനുള്ള പ്രവർത്തനങ്ങൾ അതിവേഗം പുരോഗമിക്കുകയാണ്. ഇതിനു പുറമെ മണ്ഡലത്തിലെ എല്ലാ പഞ്ചായത്തിലും കേന്ദ്ര-സംസ്ഥാന സർക്കാരുകളുടെ സംയുക്ത സമ്പൂർണ കുടിവെള്ള വിതരണ പദ്ധതിയായ 'ജലജീവൻ മിഷൻ' പദ്ധതിയുടെ ഭാഗമായി ഗാർഹിക കണക്ഷനുകൾ ലഭ്യമാകുന്ന നടപടികൾ പുരോഗമിച്ചുവരുന്നു ഇതിനായി എംഎൽഎ ഫണ്ടും സംസ്ഥാന സർക്കാർ ഫണ്ടും കേന്ദ്ര ഫണ്ടും സംയോജിപ്പിച്ച് വിനിയോഗിച്ചു വരുന്നു. മലയോര ഹൈവേ കടന്നുവരുന്ന പ്രദേശങ്ങളിൽ റോഡിനിരുവശവും പുതുതായി പൈപ്പ് ലൈനുകൾ സ്ഥാപിക്കുന്നതിനുള്ള നടപടി ക്രമങ്ങൾ പൂർത്തിയാക്കിയിട്ടുണ്ട്.

വീടിനു മുകളിലേക്കു മതിൽ പതിച്ച് അപകടം; വീട്ടമ്മ രക്ഷപ്പെട്ടു

പേയാട് : കൂറ്റൻ മതിൽ വീടിനു മുകളിലേക്ക് പതിച്ച് അപകടത്തിൽ വീട്ടമ്മ അത്ഭുതകരമായി രക്ഷപ്പെട്ടു. സംഭവത്തിൽ മണ്ണിനടിയില്‍പ്പെട്ട വളര്‍ത്തുനായ ചത്തു. പേയാട് അരുവിപ്പുറം റോഡില്‍ ആറ്റൂര്‍ക്കോണം ഗ്രേസ് കോട്ടേജില്‍ നാഗമ്മ (68) യുടെ വീടാണ് ഇന്നലെ രാവിലെ എ ട്ടോടെ തകര്‍ന്നത്. സമീപത്തെ സ്വകാര്യവ്യക്തിയുടെ പതിനഞ്ചടിയോളം ഉയരമുള്ള മതില്‍ പാടെ, നാഗമ്മയു ടെ ഷീറ്റുമേഞ്ഞ വീടിനു മുകളിലേക്ക് പതിക്കുകയായിരുന്നു. വലിയ ശബ്ദത്തോടെ കോണ്‍ക്രീറ്റ് മതില്‍ വീടിന്‍റെ പിന്‍ഭാഗത്തെ സിമന്‍റുകട്ടകെട്ടിയ ചുമരിലേയ് ക്ക് ഇടിഞ്ഞുവീഴുകയായിരുന്നു. ശബ്ദംകേട്ട് ഓടിയെത്തിയ സമീപവാസികൾ മതിലിന്‍റെയും ചുമരിന്‍റെയും അവശിഷ്ടങ്ങള്‍ക്കിടയിലായ നാഗമ്മയെ പുറത്തെടുത്ത് ഉടന്‍ ജനറല്‍ ആശുപത്രിയില്‍ പ്രവേശിപ്പിച്ചു. മണ്ണിനടിയില്‍പ്പെട്ട നായയെ ചത്തനിലയില്‍ പിന്നീട് പുറത്തെടുത്തു. വിളപ്പില്‍ പഞ്ചായത്തിലെ പേയാട് വാര്‍ഡില്‍ താമസിക്കുന്ന നാഗമ്മയ്ക്ക് ലൈഫ് പദ്ധതിയില്‍ വീട് വയ്ക്കാന്‍ സഹായം നല്‍കിയിരുന്നു. ഇതിന്‍റെ അടിത്തറ നിര്‍മാണം സമീപത്തുനടക്കുകയാണ്. ഇതിനിടെയാണ് ഇപ്പോൾ വീട് ഇടിഞ്ഞത്. മതിലിനോടു ചേർന്നു വെള്ളം ഊറ്റുന്നതും ഇതു വീട്ടിലേക്ക് ഒഴുകിവരുന്നതിനെ സംബന്ധിച്ച് നാഗമ്മ പലതവണ പഞ്ചായത്തിൽ പരാതി നൽകിയിരുന്നുവെങ്കിലും ഇതിനു നടപടി ഉണ്ടായിരുന്നില്ല. കനത്ത മഴയ്ക്കൊപ്പം നേരത്തെ തന്നെ ഉണ്ടായിരുന്ന ഊറ്റും ഇപ്പോൾ മതിലിടാൻ കാരണമായി എന്നതാണ് നിഗമനം. രണ്ടു പെണ്‍മക്കളാണ് നാഗമ്മയ്ക്ക്. ഇവര്‍ സമീപ പ്രദേശത്താണ് വാടകക്ക് താമസിക്കുന്നത്. ശനിയാഴ്ച രാത്രിവരെ മൂത്തമകള്‍ ധന്യയും അവരുടെ മക്കളും നാഗമ്മയുടെ വീട്ടിലുണ്ടായിരുന്നു. ഇവര്‍ രാത്രി അവരുടെ വീട്ടിലേക്ക് പോയിരുന്നു.

നെയ്യാർഡാമിൽ ജലനിരപ്പ് ഉയർന്നു; ഷട്ടറുകൾ വീണ്ടും ഉയർത്തി

നെയ്യാർ ഡാം: ജലനിരപ്പ് ഉയർന്നതിനെ തുടർന്ന് നെയ്യാർ അണക്കെട്ടിന്‍റെ ഷട്ടറുകൾ കൂടുതൽ ഉയർത്തി. ഇന്നലെ രാവിലെ 11 നാണ് അണക്കെട്ടിന്‍റെ നാല് ഷട്ടറുകളും 20 സെമീ തുറന്നത്. ഡാമിൽ 801.100 മീറ്റർ ജലമാണ് ഇപ്പോഴുള്ളത്. പരമാവധി നിരപ്പ് 84.75 മീറ്റർ ആണ്. കാലർഷം കനക്കുമെന്നു മുന്നറിയിപ്പ് കിട്ടിയതോടെയാണ് ഡാം ഷട്ടറുകൾ തുറന്നത്. കഴിഞ്ഞദിവസം 79.240 മീറ്റർ ജലമാണ് ഉണ്ടായിരുന്നത്. എന്നാൽ ഇന്നലെ രാവിലെയോടെ ജലനിരപ്പ് ഉയരുകയായിരുന്നു. തുടർന്നാണ് ഡാമിന്‍റെ നാല് ഷട്ടറുകളും കൂടുതൽ ഉയർത്തിയത്. ഷട്ടറുകൾ ഇനിയും ഉയർത്തേണ്ടി വരുമെന്നാണ് ബന്ധപ്പെട്ടവർ നൽകുന്ന സൂചന. ഡാമിലേയ്ക്കു നീരൊഴുക്കുന്ന നെയ്യാർ, കല്ലാർ, മുല്ലയാർ തുടങ്ങിയ വലിയ നദികളും മണിയങ്കത്തോട്, കാരക്കുടി, അഞ്ചുനാഴിത്തോട്, കാരയാർ തുടങ്ങിയ 20 ളം ചെറുനദികളിലും കനത്ത വെള്ളമാണ് ഉള്ളത്. വനത്തിൽ നല്ല മഴ ചെയ്തതിനെ തുടർന്നാണ് നീരൊഴുക്കു വർധിച്ചത്. ആറിന്‍റെ ഇരു കരകളിലും താമസിക്കുന്നവർ ജാഗ്രത പാലിക്കണമെന്ന് അധിക്യതർ അറിയിച്ചു. അണക്കെട്ട് നിറഞ്ഞതോടെ കാച്ച്മെന്‍റ് ഏരിയായിൽ വെള്ളം കയറി. ഇവിടെ താമസിക്കുന്നവരുടെ വീടുകളിൽ അടുക്കള വരെ വെള്ളമെത്തി. പലരും താമസവും മാറ്റിയിട്ടുണ്ട്. ഇവിടുത്തെ കൃഷിയിടങ്ങളിലും വെള്ളം കയറിയിട്ടുണ്ട്. വനത്തിൽ കനത്ത മഴ പെയ്യുന്നതിനാൽ ആദിവാസികളും ദുരിതത്തിലാണ്. ഇവർക്ക് പുറത്തിറങ്ങാൻ പോലും കഴിയുന്നില്ല. കാട്ടുമൃഗങ്ങളുടെ ഭീഷണിയുമുണ്ട്. പലരുടേയും വീട്ടുമൃഗങ്ങൾ ഒലിച്ചുപോയതായി താമസിക്കുന്നവർ പരാതിപ്പെട്ടു.

ജീവിതമൂല്യങ്ങള്‍ സദാ സംരക്ഷിക്കണം: ഡോ. തോമസ് മാര്‍ യൗസേബിയോസ്

നെയ്യാറ്റിന്‍കര: നെല്ലിമൂട് സെന്‍റ് ക്രിസോസ്റ്റംസ് സ്കൂളില്‍ പുതിയ അധ്യയന വര്‍ഷത്തില്‍ "ദീപിക നമ്മുടെ ഭാഷ' പദ്ധതിക്ക് തുടക്കം കുറിച്ചു. പാറശാല രൂപത അധ്യക്ഷന്‍ ഡോ. തോമസ് മാര്‍ യൗസേബിയോസ് സ്കൂളിലെ വിദ്യാര്‍ഥി പ്രതിനിധികള്‍ക്ക് ദീപിക പത്രം നല്‍കിയാണ് പദ്ധതി ഉദ്ഘാടനം ചെയ്തത്. ജീവിതത്തെ ഗൗരവമായി വീക്ഷിക്കണമെന്നും നിശ്ചയദാര്‍ഢ്യത്തോടെ ലക്ഷ്യത്തിലെത്തിച്ചേരണമെന്നും ജീവിതമൂല്യങ്ങള്‍ സദാ സംരക്ഷിക്കണമെന്നും അദ്ദേഹം വിദ്യാര്‍ഥികളെ ഓർമിപ്പിച്ചു. ദീപിക തിരുവനന്തപുരം റസിഡന്‍റ് മാനേജര്‍ ഡോ. വര്‍ക്കി ആറ്റുപുറത്ത് കോര്‍ എപ്പിസ്കോപ്പ ആമുഖപ്രസംഗം നടത്തി. ദീപിക നെയ്യാറ്റിന്‍കര രൂപത കോ-ഓര്‍ഡിനേറ്റര്‍ ഫാ. ജിബിന്‍രാജ്, സെന്‍റ് ക്രിസോസ്റ്റംസ് ഗേള്‍സ് ഹയര്‍സെക്കന്‍ഡറി സ്കൂള്‍ ഹെഡ്മിസ്ട്രസ് സിസ്റ്റര്‍ ശോഭിത ജോസ് ഡിഎം, അതിയന്നൂര്‍ പഞ്ചായത്ത് ആരോഗ്യ- വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ കൊടങ്ങാവിള വിജയകുമാര്‍ എന്നിവര്‍ പ്രസംഗിച്ചു. ദീപിക തിരുവനന്തപുരം സര്‍കുലേഷന്‍ മാനേജര്‍ ഇ.വി. വര്‍ക്കി സ്വാഗതവും നെയ്യാറ്റിന്‍കര ഏരിയ മാനേജര്‍ രാജീവ് നന്ദിയും പറഞ്ഞു.

ശംഖുംമുഖം തീരം കടലെടുത്തു; നിരവധി വീടുകള്‍ ഭീഷണിയിൽ

വലിയതുറ: കഴിഞ്ഞ മൂന്നു ദിവസമായി മഴ ശക്തമായതോടെ തീരദേശ മേഖലകളില്‍ കടാലാക്രമണം ശക്തം. വെട്ടുകാട് ശക്തമായ കടലാക്രമണത്തില്‍ നിരവധി വീടുകള്‍ ഭീഷണി നേരിടുന്നു. വെട്ടുകാട് തീരത്ത് ഇന്നലെ പകല്‍ കടലാക്രമണത്തിനു നേരിയ ശമനമുണ്ടായതായി പ്രദേശവാസികള്‍ പറയുന്നു. തീരമേഖലയിൽ യുവാക്കളുടെയും വീട്ടുകാരുടെയും നേതൃത്വത്തില്‍ മണല്‍ചാക്കുകള്‍ അടുക്കുന്ന ജോലി തുടരുകയാണ്. ഇന്നലെ ഉച്ചയ്ക്ക് 1.32 ഓടെ ശംഖുംമുഖം തീരത്തു ശക്തമായ കടലാക്രമണമാണുണ്ടായത്. ശംഖുംമുഖം എല്‍പി സ്‌കൂളിനു പടിഞ്ഞാറുഭാഗത്തു (കണ്ണാന്തുറ) ശക്തമായ കടലാക്രമണം ഉണ്ടായതോടെ ഏതു നിമിഷവും തകര്‍ന്നുവീഴാവുന്ന വീടുകളെ സ്വതന്ത്ര മത്സ്യത്തൊഴിലാളി ഫെഡറേഷന്‍റെ സഹായത്തോടെ ക്ലേയും മണലും ജംബോ ബാഗുകളില്‍ നിറച്ച് താത്കാലികമായി സംരക്ഷണ ഭിത്തികള്‍ നിര്‍മിക്കുകയായിരുന്നു. കടലാക്രമണം ശക്തമായിട്ടും ബന്ധപ്പെട്ട അധികൃതര്‍ ഈ ഭാഗത്തേയ്ക്കു തിരിഞ്ഞുനോക്കുന്നില്ലന്നു മത്സ്യത്തൊഴിലാളികളും പ്രദേശവാസികളും ആരോപിക്കുന്നു. അതിശക്തമായ കടല്‍ക്ഷേഭം കാരണം ശംഖുംമുഖം, വെട്ടുകാട് തീരത്ത് ശക്തമായ കരയിടിച്ചില്‍ തുടരുകയാണ്. ഈ ഭാഗങ്ങളില്‍ 210 ഓളം വീടുകളാണ് അപകട ഭീഷണി നേരിടുന്നത്. വീടുകളെ സംരക്ഷിക്കുന്നതിനായി തീരത്ത് മത്സ്യത്തൊഴിലാളികളുടെയും പ്രദേശവാസികളുടെയും നേതൃത്വത്തില്‍ രാത്രിയിലും മണല്‍ചാക്കുകള്‍ അടുക്കുന്ന ജോലികള്‍ തുടർന്നു. വെട്ടുകാട് വയര്‍ലെസ് സ്റ്റേഷന്‍ പരിധിമുതല്‍ ടൈറ്റാനിയം വരെയുള്ള തീരത്തോടു ചേര്‍ന്നു നൂറിലധികം വീടുകളും ശംഖുംമുഖം കുരിശടി മുതല്‍ കണ്ണാന്തുറ സെന്‍റ് ആന്‍റണീസ് പള്ളിവരെയുള്ള 125 ഓളം വീടുകളാണ് കടലാക്രമണ ഭീഷണി നേരിടുന്നത്. മുന്നറിയിപ്പുണ്ടായിട്ടും തീരസംരക്ഷണത്തിനു ജില്ലാ ഭരണകൂടവും കൗണ്‍സിലര്‍മാരും നടപടിയെടുക്കുന്നില്ലെന്നു പ്രദേശവാസികള്‍ ആരോപിക്കുന്നു. വലിയതുറ, കൊച്ചുതോപ്പ്, വലിയതോപ്പ് ഭാഗങ്ങളിലും കടലാക്രമണം ശക്തമായി തുടരുന്നു.

ആഭരണത്തട്ടിപ്പ്; ജ്വല്ലറിക്കെതിരേ കന്‍റോണ്‍മെന്‍റില്‍ 25 പരാതികള്‍

പേരൂര്‍ക്കട: ആഭരണത്തട്ടിപ്പുമായി ബന്ധപ്പെട്ട് തിരുവനന്തപുരം പുളിമൂടിനു സമീപം പ്രവര്‍ത്തിച്ചുവന്ന ജ്വല്ലറിക്കെതിരേ കന്‍റോൺമെന്‍റ് സ്റ്റേഷനില്‍ കഴിഞ്ഞ 15 ദിവസത്തിനിടെ 25 പരാതികള്‍ ലഭിച്ചു. ഇതില്‍ രണ്ണെണ്ണത്തില്‍ കേസെടുത്തു. തിരുവനന്തപുരം നഗരത്തിലും റൂറല്‍ ഭാഗത്തും താമസിച്ചുവരുന്നവരാണ് പരാതികള്‍ നല്‍കിയിരിക്കുന്നത്. ഇതില്‍ പരാതി നല്‍കിയിരിക്കുന്ന ഒരാള്‍ക്ക് ലഭിക്കാനുള്ള തുക 40 ലക്ഷം രൂപയെന്നാണ് പറയുന്നത്. വരും ദിവസങ്ങളില്‍ കൂടുതല്‍ പരാതികള്‍ ലഭിച്ചേക്കുമെന്നു കന്‍റോൺമെന്‍റ് സി.ഐ. പ്രജീഷ് ശശി പറഞ്ഞു. ജ്വല്ലറിയുടെ ശാഖയില്‍ സ്വർണാഭരണങ്ങളും പണവും സ്ഥിരനിക്ഷേപമായി നല്‍കി കബളിപ്പിക്കപ്പെട്ട ചിലര്‍ തങ്ങള്‍ക്കു പണം തിരികെ ലഭിക്കുമെന്ന വിശ്വാസത്തിലാണ്.

സൈനികൻ തോമസ് ചെറിയാന്‍റെ പ്രതിമ സ്ഥാപിക്കാൻ മന്ത്രിക്കു നിവേദനം നൽകി എക്സ് സർവീസ് ലീഗ്

നേമം: 56 വർഷത്തിനുമുന്പ് ഹിമാചൽ പ്രദേശിലെ റോത്താങ് ചുരത്തിൽ വിമാന അപകടത്തിൽ മരിച്ച സൈനികൻ തോമസ് ചെറിയന്‍റെ ജന്മദിനത്തോടനുബന്ധിച്ചു നടത്തിയ അനുസ്മര ണ ചടങ്ങ് മന്ത്രി വി. ശിവൻകുട്ടി ഉദ് ഘാടനം ചെയ്തു. സൈനികൻ തോമസ് ചെറിയാന്‍റെ പ്രതിമ സ്ഥാപിക്കണമെന്ന് അവശ്യപ്പെട്ടാണ് എക്സ് സർവീസസ് ലീഗ് പാപ്പനംകോട് ബ്രാഞ്ച് കമ്മിറ്റി മന്ത്രിക്കു നിവേദനം നൽകി. അഹമ്മദാബാദ് വിമാന അപകടത്തിൽ മരിച്ചവർക്ക് ചടങ്ങിൽ ആദരാഞ്ജലികൾ അർപ്പിച്ചു. കല്ലിയൂർ പഞ്ചായത്ത്‌ പ്രസിഡന്‍റ് സോമശേഖരൻ നായർ, എക്സ് സർവീസസ് ലീഗ് ബ്രാഞ്ച് പ്രസിഡന്‍റ് കരുമം രവീന്ദ്രൻ, സെക്രട്ടറി ശാന്തിവിള പദ്മകുമാർ, ട്രഷറർ സോമൻ നായർ, അശോകകുമാർ, സർവോദയം അനിൽകുമാർ തമ്പി, ശ്രീകണ്ഠൻ നായർ, പാപ്പനംകോട് കമാൽ, എം.എ. ലത്തീഫ് എന്നിവർ പങ്കെടുത്തു.

ഒരു വയസുകാരിയുടെ തലയില്‍ സ്റ്റീല്‍പാത്രം കുടുങ്ങി

പേരൂര്‍ക്കട: ഒരു വയസുകാരിയുടെ തലയില്‍ കുടുങ്ങിയ കുഴിവുള്ള സ്റ്റീല്‍പാത്രം ഏറെനേരത്തെ പരിശ്രമത്തിനുശേഷം ഫയര്‍ഫോഴ്‌സ് ഉദ്യോഗസ്ഥര്‍ ചേര്‍ന്നു നീക്കി. പൂജപ്പുര കേശവന്‍ നഗര്‍ റോഡ് അശോക് ഭവനില്‍ അശോക് കുമാറിന്‍റെ മകളുടെ തലയിലാണ് പാത്രം കുടുങ്ങിയത്. ഞായറാഴ്ച രാത്രി 8.30നാണ് സംഭവം. വീട്ടില്‍ കളിച്ചുകൊണ്ടിരിക്കുന്നതിനിടെ കുട്ടി പാത്രമെടുത്തു തലയില്‍ കമിഴ്ത്തുകയായിരുന്നു. വേദനകൊണ്ടു കുട്ടി കരഞ്ഞതോടെ വീട്ടുകാര്‍ തിരുവനന്തപുരം ഫയര്‍‌സ്റ്റേഷനില്‍ കുട്ടിയുമായി എത്തുകയായിരുന്നു. സേന കട്ടര്‍ ഉപയോഗിച്ച് പാത്രം മുറിച്ചാണു കുട്ടിയെ രക്ഷപ്പെടുത്തിയത്. ഗ്രേഡ് എസ്ടിഒ സതീഷ്‌കുമാര്‍, എസ്എഫ്ആര്‍ഒ ഷാഫി എന്നിവര്‍ നേതൃത്വം നല്‍കി.

സമ്മർ സ്കൂൾ ഫുട്ബോൾ ടൂർണമെന്‍റ് സമാപിച്ചു

തിരുവനന്തപുരം: തിരുവനന്തപുരം കൊന്പൻസ് ഫുട്ബോൾ ടീം പൊതുവിദ്യാഭ്യാസ വകുപ്പുമായി സഹകരിച്ച് സംഘടിപ്പിച്ച സമ്മർ സ്കൂൾ ഫുട്ബോൾ ടൂർണമെന്‍റ് സമാപിച്ചു. കഴിഞ്ഞ ദിവസം ചന്ദ്രശേഖരൻ നായർ സ്റ്റേഡിയത്തിൽ നടന്ന അണ്ടർ 16 വിഭാഗം ഫൈനലിൽ പുല്ലുവിള ലിയോ 13 സ്കൂൾ ചാന്പ്യന്മായി. എംവിഎച്ച്എസ്എസ് അരുമാനൂരിനെ 3-0 ത്തിന് തോൽപ്പിച്ചാണ് ലിയോ 13 പുല്ലുവിള കപ്പടിച്ചത്. മികച്ച പ്ലെയേർസായി ക്രിസ്റ്റ്യാനോ റൊണാൾഡോയും, അരവിന്ദും തെരഞ്ഞെടുക്കപ്പെട്ടപ്പോൾ സഞ്ജു മികച്ച ഗോൾ കീപ്പറായി. അണ്ടർ 14 വിഭാഗത്തിൽ സെന്‍റ് മാത്യൂസ് പൊഴിയൂർ സ്കൂൾ ലിയോ 13 പുല്ലുവിളയെ ഷൂട്ടൗട്ടിൽ തോൽപ്പിച്ചു. ഈ വിഭാഗത്തിൽ ബെസ്റ്റ് ഗോൾ കീപ്പറായി അനന്തുവും മികച്ച കളിക്കാരനായി എബിനെയും തെരഞ്ഞെടുത്തു. പെണ്‍കുട്ടികളുടെ വിഭാഗം ഫൈനലിൽ ലിയോ 13 പുല്ലുവിളയും പൊഴിയൂർ ഗവണ്‍മെന്‍റ് യുപിഎസും പൊഴിയൂർ തമ്മിൽ നടന്ന മത്സരത്തിൽ 40 ഗോളുകൾക്ക് ലിയോ 13 പുല്ലുവിള വിജയിച്ചു. മികച്ച പ്ലേയർക്കുള്ള ട്രോഫി ദർശന രാജും, പ്ലേയർ ഓഫ് ദി ടൂർണമെന്‍റായി സ്റ്റഫീനയും, മികച്ച ഗോൾ കീപ്പറായി സോജയെയും തെരഞ്ഞെടുത്തു. കൊന്പൻസ് സ്പോർട്സ് ഫൗണ്ടേഷൻ ഉടമകളായ ജി. വിജയരാഘവൻ, കെ.സി. ചന്ദ്രഹാസൻ, ടി.ജെ. മാത്യു, ടെറൻസ് അലക്സ് എന്നിവർ ചേർന്നു സമ്മാനവിതരണം നടത്തി.

മഴയും കാറ്റും ശക്തമായി; നഗരത്തില്‍ വ്യാപക മരംവീഴ്ച

പേരൂര്‍ക്കട: ശക്തമായ കാറ്റിലും മഴയിലും തിരുവനന്തപുരം നഗരതതില്‍ വ്യാപകമായി തണല്‍മരങ്ങള്‍ വീണു. മഴയുടെ രണ്ടാം വരവിലും തണല്‍മരശിഖരങ്ങളുടെ ഭീഷണി ഒഴിവായിട്ടില്ല. ദുരന്ത നിവാരണ അഥോറ്റിയുടെ ഇടപെടല്‍ ശക്തമാകാത്തതാണു വീണ്ടും മരവീഴ്ചയും നാശനഷ്ടവും ഉണ്ടാകാന്‍ കാരണമായത്. നഗരപരിധിയില്‍ വരുന്ന വട്ടിയൂര്‍ക്കാവ്, നീറമണ്‍കര, കാലടി, കരമന, മണക്കാട്, വഞ്ചിയൂര്‍, കൈമനം, അമ്പലമുക്ക്, കവടിയാര്‍, പേരൂര്‍ക്കട, പൂജപ്പുര, മ്യൂസിയം, തൃക്കണ്ണാപുരം, ചൂഴാറ്റുകോട്ട എന്നിവിടങ്ങളിലാണ് കൂറ്റന്‍ തണല്‍മരങ്ങള്‍ നിലംപൊത്തിയത്. ഇതില്‍ ഭൂരിഭാഗം പ്രദേശങ്ങളിലും മരങ്ങള്‍ ഇലക്ട്രിക് ലൈനിനു മുകളിലൂടെയാണ് പതിച്ചത്. കവടിയാര്‍-അമ്പലമുക്ക് റോഡില്‍ കൂറ്റന്‍ തണല്‍മരങ്ങള്‍ വീണു കാറുകള്‍ തകര്‍ന്നിട്ടുണ്ട്. തിരുവനന്തപുരം ഫയര്‍‌സ്റ്റേഷനില്‍ നിന്ന് സ്റ്റേഷന്‍ ഓഫീസര്‍ ഷാജി, അസി. സ്റ്റേഷന്‍ ഓഫീസര്‍ സതീഷ്‌കുമാര്‍ എന്നിവരുടെ നേതൃത്വത്തിലാണ് പ്രവര്‍ത്തനങ്ങള്‍ നടത്തിയത്.

കാൻസർ അവബോധക്ലാസും രോഗനിർണയ ക്യാമ്പും

തിരുവനന്തപുരം: കാൻസർ അവബോധ ക്ലാസും രോഗ നിർണയ ക്യാമ്പുകളും സമൂഹത്തിൽ വ്യാപകമാക്കാൻ സംസ്‍കാരിക സന്നദ്ധ സംഘടനകൾ മുന്നോട്ടു വരണമെന്നു മന്ത്രി റോഷി ആഗസ്റ്റിൻ പറഞ്ഞു. പിഎംജിയിലെ ലൂർദ് ഫെറോന പള്ളി മാതൃവേദി-പിതൃവേദി, നിംസ് മെഡിസിറ്റി, സ്വസ്തി ഫൌണ്ടേഷൻ എന്നിവ സംയുക്തമായി നടത്തിയ കാൻസർ അവബോധ ക്ലാസും രോഗ നിർണയ ക്യാമ്പും പള്ളിയുടെ ഹാളിൽ ഉദ്ഘാടനം ചെയ്യുക ആയിരുന്നു മന്ത്രി. പള്ളി വികാരിയും സീറോ മലബാർ ചങ്ങനാശേരി രൂപത വികാരി ജനറാളുമായ ഡോ. വർഗീസ് ജോൺ തെക്കേക്കര അധ്യക്ഷനായിരുന്നു. സീറോ മലബാർ ചങ്ങനാശേരി രൂപതഅധ്യക്ഷൻ ബിഷപ്പ് ഡോ. തോമസ് തറയിലിന്‍റെ സെക്രട്ടറി ഫാ. റോബിൻ ആശംസ അർപ്പിച്ചു. ഡോ. മിന്‍റു മാത്യു, ഡോ. ഗായത്രി രാജീവ്‌ എന്നിവർ അവബോധ ക്ലാസുകൾ നടത്തി. ഡോ. അഞ്ചു, ഡോ. മൈമൂന എന്നിവരുടെ നേത്രത്വത്തിൽ നിംസിലെ ഒരു സംഘം ഡോക്ടർമാർ രോഗ നിർണയ ക്യാമ്പ് നയിച്ചു. സ്വസ്തി ഫൗണ്ടേഷൻ ലീഗൽ അഡ്വൈസർ ലാലു ജോസഫ്, മാതൃ-പിതൃവേദി ഭാരവാഹികളായ മീര ഷാജി, അഡ്വ. സെലിൻ തോമസ്, ടോമിന, മേരി ജോസ്, നിത്യ ഷാജി, ആശ ഫ്രാൻസിസ്, ഏബ്രഹാം ജോസ്, ബിനു ദേവസ്യ, വി.വി. ജോർജ്, ഷിബി സിറിയക്, ഫ്രാൻസിസ്, കെ. ജെ. ജോർജ് എന്നിവർ പരിപാടിക്ക് നേതൃത്വം നൽകി. മാതൃ-പിതൃ വേദി ഡയറക്ടർ ഫാ. മാത്യു മരങ്ങാട്ട് സ്വാഗതവും പിതൃവേദി പ്രസിഡന്‍റ് അഡ്വ. കെ.എസ്‌. ജോസ് സെബാസ്റ്റ്യൻ നന്ദിയും പറഞ്ഞു.

കാഞ്ഞിരംകുളം പഞ്ചായത്ത് ഓഫീസിൽ തീപിടിത്തം: ഫയലുകൾ കത്തിനശിച്ചു

പൂവാർ: കാഞ്ഞിരംകുളം പഞ്ചായത്ത് ഓഫീസിൽ രാത്രിയിൽ വൻതീപിടിത്തം. ഓഫീസ് പൂർണമായി കത്തിയമർന്നു. ലക്ഷങ്ങളുടെ നഷ്ടം. ഒന്നാം നിലയിലാണ് ആദ്യം തീയും പുകയും കണ്ടത്. തുടർന്നു രണ്ടാം നിലയിലേക്കു തീ പടർന്നു. ശക്തമായ തീയും പുകയും ഉയരുന്നതു കണ്ടു നാട്ടുകാരാണ്. ഫയർഫോഴ്‌സിനെ വിവരം അറിയിച്ചത്. ഫയര്‍ഫോഴ്‌സും പോലീസും സ്ഥലത്തെത്തി തുടർനടപടികൾ സ്വീകരിച്ചു. അവധി ആയതിനാല്‍ ആളപായമില്ല. കെട്ടിടത്തിനുള്ളില്‍നിന്നും തീയും പുകയും ഉയരുന്നത് നാട്ടുകാരുടെ ശ്രദ്ധയില്‍പ്പെട്ടതോടെ പൂവാർ ഫയര്‍ഫോഴ്‌സിനെ വിവരം അറിയിക്കുകയായിരുന്നു. തുടർന്ന് പൂവാർ, വിഴിഞ്ഞം, നെയ്യാറ്റിൻകര ഫയർഫോഴ്സ് യൂണിറ്റുകൾ സ്ഥലത്തെത്തിയാണ് തീ അണച്ചത്. ഒന്നാം നിലയിലെ 14 കമ്പ്യൂട്ടറുകൾ പൂർണമായും കത്തിയമർന്നു. ഫയലുകളും അവ വച്ചിരുന്ന ഫർണിച്ചറുകളും അഗ്നിക്കിരയായി. തീ പടർന്ന ഒന്നാം നിലയിലാണ് സെക്രട്ടറി, പ്രസിഡന്‍റ്, വൈസ് പ്രസിഡന്‍റ്, ഫ്രണ്ട് ഓഫീസ്, സൂപ്രണ്ട് ഓഫീസ് തുടങ്ങിയ പ്രധാനപ്പെട്ട ഓഫീസുകളും പ്രവർത്തിക്കുന്നത്. ഇവിടെ ഉണ്ടായിരുന്ന എല്ലാ ഫയലുകളും അഗ്രിക്കരയായി. ഇൻവർട്ടർ മുഖേനയുള്ള ഷോർട്ട് സർക്യൂട്ടാണു തീ കത്താൻ കാരണമെന്നാണ് പ്രാഥമിക നിഗമനം. കാഞ്ഞിരംകുളം പോലീസ് പഞ്ചായത്ത് ഓഫീസ് സീൽ ചെയ്തു. വിശദമായ പരിശോധന ഇന്നു പകൽ നടത്തുമെന്നു കാഞ്ഞിരംകുളം പോലീസ് അറിയിച്ചു.

ദമ്പതികളുടെ മൃതദേഹം വീട്ടിൽനിന്നു മാറ്റിയത് അഞ്ച് മണിക്കൂറിനുശേഷം; ദുഃഖമടക്കാനാകാതെ ബന്ധുക്കൾ

നേമം : കരമന കാട്ടാന്‍വിളയില്‍ ദമ്പതികളെ മരിച്ച നിലയില്‍ കണ്ടെത്തിയ സംഭവത്തില്‍ സമുദായ സംഘടനയുടെ പ്രതിഷേധം ഉണ്ടായതിനെ തുടര്‍ന്ന് അഞ്ച് മണിക്കൂറിനു ശേഷമാണ് മൃതദേഹം പോസ്റ്റുമോര്‍ട്ടത്തിനായി മെഡിക്കല്‍കോളേജ് ആശുപത്രിയിലേക്ക് മാറ്റിയത്. തുടര്‍ന്ന് തഹസില്‍ദാര്‍ മഞ് ജുള എത്തി പ്രതിഷേധക്കാരുമായി സംസാരിച്ച ശേഷമാണ് മൃതദേഹം ആംബുലന്‍സില്‍ കയറ്റാനായത്. ബാങ്കിന്‍റെ ഭീഷണിയെ തുടര്‍ന്നാണ് കോണ്‍ട്രാക്ടറായ സതീഷും ഭാര്യ ബിന്ദുവും മരിക്കാനിടയായതെന്നാണ് ആരോപണം ഉയരുന്നത്. വിഎസ്ഡിപി നേതാവ് വിഷ്ണുപുരം ചന്ദ്രശേഖരന്‍റെ നേതൃത്വത്തിലായിരുന്നു പ്രതിഷേധം. ദീര്‍ഘക്കാലം നഗരസഭയുടെ കോണ്‍ട്രാക്ടറായിരുന്ന സതീഷിന്‍റെയും ഭാര്യയുടെയും മരണം ബന്ധുക്കളെയും നാട്ടുകാരെയും ദുഃഖത്തിലാഴ്ത്തി. ശനിയാഴ്ച രാത്രിയിലും സതീഷിനെ അയല്‍പക്കത്ത് താമസിച്ചിരുന്ന ബന്ധുക്കള്‍ കണ്ടിരുന്നു. ഞായറാഴ്ച രാവിലെ ബിന്ദുവിന്‍റെ സഹോദരന്‍ ബിനു വീട്ടിലെത്തിയപ്പോഴാണ് വാതില്‍ അടഞ്ഞുകിടക്കുന്നത് കണ്ടത്. ഫോണ്‍ വിളിച്ചിട്ട് എടുക്കാത്തതിനെ തുടര്‍ന്നു സംശയം തോന്നി അടുത്തു താമസിക്കുന്ന സതീഷിന്‍റെ മൂത്തസഹോദരന്‍ ശിവന്‍കുട്ടിയേയും കൂട്ടി പിന്‍വശത്തെ വാതില്‍ ചവിട്ടി പൊളിച്ചപ്പോള്‍ രക്തത്തില്‍ കുളിച്ചുകിടക്കുന്ന സതീഷിനെയും കിടപ്പു മുറിയില്‍ തൂങ്ങിയ നിലയില്‍ ബിന്ദുവിനെയും കണ്ടെത്തുകയായിരുന്നു. കരാറുപണികള്‍ക്കായി ബാങ്കില്‍ നിന്നും ലോണ്‍ എടുത്തിട്ടുള്ള സതീഷിന് ജോലി ചെയ്ത വകയില്‍ ലക്ഷങ്ങള്‍ കിട്ടാനുണ്ടെന്നു നാട്ടുകാര്‍ പറയുന്നു. ബാങ്ക് ലോണ്‍ അടവ് മുടങ്ങിയതോടെ ജപ്തി ഭീഷണിയും ഉണ്ടായിരുന്നതായി ബന്ധുക്കള്‍ പറഞ്ഞു. വിദേശത്തുള്ള മകന്‍ സബിത്തിനന്‍റെ പേരിലും ലൈസന്‍സ് എടുത്ത് ഒരുവര്‍ഷം മുമ്പു വരെ സതീഷ് കോൺട്രാസ് ജോലികള്‍ ചെയ്തിരുന്നു. അടുത്തിടെയാണ് മകന്‍ സൗദിയിലേയ്ക്കു പോയത്. കോണ്‍ട്രാക്ട് പണികള്‍ മുടങ്ങുകയും അസുഖ ബാധിതനാവുകയും ചെയ്തതോടെ സാമ്പത്തിക ബാധ്യതകൂടി സതീഷ് ഓട്ടോ ഓടിക്കുകയും ചെയ്തിരുന്നു. തിങ്കളാഴ്ച വീട്ടില്‍ നിന്നും ഒഴിയാന്‍ ബാങ്കുകാര്‍ ആവശ്യപ്പെട്ടിരുന്നതായും ബന്ധുക്കള്‍ പറഞ്ഞു.

മഴ, കാറ്റ്, കടലാക്രമണം; ദുരിത ദിനങ്ങളെണ്ണി തലസ്ഥാനം

തിരുവനന്തപുരം: ദിവസങ്ങളായി തുടരുന്ന ശക്തമായ മഴയിൽ ജില്ലയിൽ വ്യാപക നാശനഷ്ടം. നിരവധി വീടുകക്ക് കേടുപാടുകൾ സംഭവിച്ചു. താഴ്ന്ന പ്രദേശങ്ങളിലെ വീടുകളിൽ വെള്ളം കയറി. ശക്തമായ മഴയെ തുടർന്ന് ഇന്നലെ ഉച്ചയോടെ വലിയതുറയിൽ തേക്കുമരം കടപുഴകി വീണ് മേൽക്കൂര തകർന്നു. വലിയതുറ വാർഡ് കൗണ്‍സിലർ ടി.ആർ. ഐറിന്‍റെ വീടിനു മുകളിലേക്കാണു മരം വീണത്. കൗണ്‍സിലറും മക്കളും ഈ സമയം വീട്ടിലുണ്ടായിരുന്നെങ്കിലും ശബ്ദംകേട്ട് ഓടി പുറത്തിറങ്ങിയതിനാൽ അപകടം ഒഴിവായി. മരം വീണതിനെ തുടർന്നു വീടിന്‍റെ മതിലിനും കേടുപാടുകളുണ്ടായി. ഇന്നലെ ഉച്ചയോടെ വീശിയടിച്ച ശക്തമായ കാറ്റിൽ ജില്ലയിൽ ചിലയിടങ്ങളിൽ മരങ്ങൾ കടപുഴകി വീണതിനെ തുടർന്ന് ഗതാഗതം തടസപ്പെട്ടു. ഗൗരീശപട്ടത്തു കൂറ്റൻ മരം റോഡിലേയ്ക്ക് വീണത് മണിക്കൂറുകളോളം ഗതാഗതം മുടക്കി. വൈദ്യുതിയും തടസപ്പെട്ടു. കരമന എൻജിഒ ക്വാർട്ടേഴ്സ്, വട്ടിയൂർക്കാവ്, നിറമണ്‍കര, മണക്കാട്, കാലടി സൗത്ത്, കൊഞ്ചിറവിള എന്നിവിടങ്ങളിലും മരംവീണു. ശക്തമായ മഴ തുടരുന്ന സാഹചര്യത്തിൽ പേപ്പാറ, അരുവിക്കര ഡാമുകളുടെ ഷട്ടറുകൾ ഉയർത്തി. ജലനിരപ്പുയരുന്നതിനെ തുടർന്നു നദികളുടെ കരയിലുള്ളവർ ജാഗ്രത പാലിക്കണമെന്ന് കേന്ദ്ര ജലകമ്മീഷനും സംസ്ഥാന ജലസേചന വകുപ്പും മുന്നറിയിപ്പ് നൽകി. ഇന്നും ശക്തമായ മഴയ്ക്ക് സാധ്യതയുള്ളതിനാൽ ജില്ലയിൽ യെല്ലോ അലർട്ട് പ്രഖ്യാപിച്ചതായി കാലാവസ്ഥാ നിരീക്ഷണ കേന്ദ്രം അറിയിച്ചു. നിലവിൽ മൂന്നു ദുരിതാശ്വാസ ക്യാന്പുകളാണ് ജില്ലയിൽ പ്രവർത്തിക്കുന്നത്. 20 കുടുംബങ്ങളിലുള്ള 50 പേരാണ് ക്യാന്പിലുള്ളത്. മഴയും കാറ്റും ശക്തമായതോടൊപ്പം കടലാക്രമണവും രൂക്ഷമായതോടെ ജില്ലയുടെ തീരപ്രദേശങ്ങൾ ആശങ്കയിലായി. ശംഖുമുഖം, വെട്ടുകാട്, വേളി കടൽത്തീരങ്ങൾ പ്രക്ഷുബ്ധമാണ്. കടൽഭിത്തി നിർമാണം പൂർത്തിയാകാത്ത പ്രദേശങ്ങളിൽ നെഞ്ചിടിപ്പോടെയാണു കിടന്നുറങ്ങുതെന്നു പ്രദേശവാസികൾ പറയുന്നു. ശംഖുംമുഖം കൊച്ചുതോപ്പിൽ കടലാക്രമണത്തിൽ രണ്ടു വീടുകൾ തകർന്നു. ശംഖുംമുഖത്തെ അങ്കണവാടി കെട്ടിടം നേരത്തെ കടലെടുത്തിരുന്നു. പല വീടുകളും ഏത് നിമിഷവും തകരുമെന്ന സ്ഥിതിയിലാണ്.

കരമനയില്‍ ദമ്പതിമാരെ മരിച്ചനിലയില്‍ കണ്ടെത്തി

ആത്മഹത്യയെന്നു പ്രാഥമിക നിഗമനം പേരൂര്‍ക്കട: കരമനയില്‍ ദമ്പതികളെ വീടിനുള്ളില്‍ മരിച്ചനിലയില്‍ കണ്ടെത്തി. ആത്മഹത്യയെന്നാണു പ്രാഥമിക നിഗമനമെന്നു പോലീസ്. കരമന നെടുങ്കാട് കാട്ടാന്‍വിള കൊച്ചുമാവേലി വീട്ടില്‍ പരേതനായ കേശവന്‍ - ഭവാനി ദമ്പതികളുടെ മകന്‍ സതീഷ് (55), പരേതനായ തങ്കന്‍-വസന്ത ദമ്പതികളുടെ മകള്‍ ബിന്ദു (50) എന്നിവരെയാണു മരിച്ചനിലയില്‍ കണ്ടെത്തിയത്. കാട്ടാന്‍വിളയിലെ ഒറ്റനില വീടിന്‍റെ ഹാളിനുള്ളില്‍ സതീഷിനെ കഴുത്തറുത്ത നിലയിലും കിടപ്പുമുറിയിൽ ബിന്ദുവിനെ തൂങ്ങിമരിച്ച നിലയിലുമാണ് കണ്ടെത്തിയത്. ഞായറാഴ്ച രാവിലെ 10 മണിയോടെ ബിന്ദുവിന്‍റെ സഹോദരന്‍ ബിനു ഇരുവരേയും അന്വേഷിച്ചെത്തിയതോടെയാണ് മരണവിവരം പുറംലോകം അറിയുന്നത്. വീടിന്‍റെ കതക് ചവിട്ടിത്തുറന്നു നടത്തിയ പരിശോധനയിലാണ് മൃതദേഹങ്ങള്‍ കണ്ടെത്തിയത്. കരാര്‍ പണിക്കാരനായിരുന്നു സതീഷ്. വിവിധ കാലങ്ങളിലായി ഉണ്ടായ കടബാധ്യതയും ബാങ്കില്‍ നിന്നുള്ള മാനസിക സമ്മര്‍ദവുമാണ് ആത്മഹത്യയിലേക്കു നയിച്ചതെന്നാണു ബന്ധുക്കള്‍ പറയുന്നത്. അതേസമയം സതീഷിന്‍റെ മൃതദേഹത്തില്‍ ആഴത്തിലുള്ള മുറിവുകള്‍ ഉണ്ടായിരുന്നുവെന്നും ബിന്ദു ഭര്‍ത്താവിനെ കൊലപ്പെടുത്തിയശേഷം ആത്മഹത്യ ചെയ്യുകയായിരുന്നുവെന്നു കരുതുന്നുവെന്നും പോസ്റ്റുമോര്‍ട്ടം റിപ്പോര്‍ട്ട് ലഭിച്ചാല്‍ മാത്രമേ യഥാര്‍ഥ വസ്തുതകള്‍ അറിയാന്‍ സാധിക്കൂവെന്നും പോലീസ് അറിയിച്ചു. വിവരം അറിഞ്ഞ് കരമന പോലീസ് സ്ഥലത്തെത്തിയിരുന്നു. എന്നാൽ ആര്‍ഡിഒ എത്തിയാല്‍ മാത്രമേ വീട്ടില്‍നിന്നു മൃതദേഹങ്ങള്‍ മോര്‍ച്ചറിയിലേക്കു കൊണ്ടുപോകാന്‍ അനുവദിക്കുവെന്ന നിലപാടിലായിരുന്നു നാട്ടുകാർ. ബാങ്കിനെതിരേ നടപടിയെടുക്കണമെന്നും നാട്ടുകാർ ആവശ്യപ്പെട്ടു. അഞ്ചുവര്‍ഷത്തിനുമുമ്പു തളര്‍വാതം പിടിപെട്ടതിനെത്തുടര്‍ന്നു കരാര്‍പണിയിലേര്‍പ്പെടാന്‍ സാധിക്കാതിരുന്ന സതീഷ് കുറച്ചുനാളായി ഓട്ടോറിക്ഷ ഓടിച്ചുവരികയായിരുന്നു. മകന്‍: സജിത്ത് (സൗദി അറേബ്യ). അസ്വാഭാവിക മരണത്തിനു കരമന പോലീസ് കേസെടുത്തു.

അയല്‍വാസിയായ യുവതിയെ കൊന്നു കുഴിച്ചുമൂടി; പ്രതി പിടിയില്‍

വെള്ളറട: പനച്ചമൂട്ടില്‍ കാണാതായ യുവതിയെ കൊന്നു കുഴിച്ചുമൂടിയ നിലയില്‍ കണ്ടെത്തി. പനച്ചമൂട് പഞ്ചാകുഴി മാവുവിള വീട്ടില്‍ പ്രിയംവദ (47) യെയാണ് തൊട്ടടുത്ത വീട്ടില്‍ കൊന്നു കുഴിച്ചു മൂടിയ നിലയില്‍ കണ്ടെത്തിയത്. സംഭവവുമായി ബന്ധപ്പെട്ട് അയല്‍വാസികളായ രണ്ടുപേരെയാണ് വെള്ളറട പോലീസ് കസ്റ്റഡിയിലെടുത്തത്. വര്‍ഷങ്ങള്‍ക്കു മുന്‍പ് ഭര്‍ത്താവ് ബാലകൃഷ്ണനുമായി പിരിഞ്ഞു മക്കളുമായി താമസിച്ച് വരികയായിരുന്നു പ്രിയംവദ. ഇവരുടെ രണ്ടുപെണ്‍മക്കള്‍ വിവാഹം കഴിഞ്ഞ് ഭര്‍തൃവീടുകളിലാണ്. ജൂണ്‍ 12 മുതല്‍ പ്രിയംവദയെ കാണാനില്ലായിരുന്നു. ഫോണില്‍ വിളിച്ചിട്ടും കിട്ടാത്തതിനെത്തുടര്‍ന്നു മക്കള്‍ വെള്ളറട പോലീസില്‍ പരാതി നല്‍കിയിരുന്നു. പോലീസ് അന്വേഷണം തുടരുന്നതിനിടയിലാണ് ഞായറാഴ്ച ഉച്ചയോടെയാണ് പ്രിയംവദയുടെ മൃതദേഹം കണ്ടെത്തിയത്. അയല്‍വാസിയായ വിനോദിന്‍റെ വീടിനകത്തുള്ള കട്ടിലിനടിയില്‍ ചാക്കില്‍ കെട്ടിയ നിലയില്‍ എന്തോ കിടക്കുന്നതായി മക്കള്‍ കാണുകയും തൊട്ടടുത്ത് താമസിക്കുന്ന ബന്ധുവായ സരസ്വതിയെ വിവരമറിയിക്കുകയുമായിരുന്നു. സരസ്വതി ഈ വിവരം ആരാധനക്കായി പള്ളിയിലെത്തിയപ്പോള്‍ വികാരിയെ അറിയിച്ചു. വികാരി അറിയിച്ചതു പ്രകാരം പോലീസ് സ്ഥലത്തെത്തിയ സമയത്ത് യുവാക്കൾ വീടിന്‍റെ അകം കഴുകി വൃത്തിയാക്കുകയായിരുന്നു. തുടര്‍ന്നു നടത്തിയ പരിശോധനയിലാണ് മൃതദേഹം ശുചിമുറിയില്‍ കുഴിച്ചിട്ട നിലയില്‍ കണ്ടെത്തിയത്. തുടര്‍ന്നാണ് സഹോദരങ്ങളായ സന്തോഷ് (42), വിനോദ് (46) എന്നിവരെ പോലീസ് കസ്റ്റഡിയിലെടുത്തത്. ചോദ്യം ചെയ്യലില്‍ വിനോദ് കുറ്റംസമ്മതിച്ചതായി പോലീസ് പറഞ്ഞു. ഇക്കഴിഞ്ഞ 12നു രാവിലെ ഏഴിനും എട്ടിനും ഇടയിലാണു കൊല നടത്തിയതെന്നും ഞായറാഴ്ച മൃതദേഹം കുഴിച്ചിടുകയായിരുന്നുവെന്നും ഇയാള്‍ പോലീസിനോട് സമ്മതിച്ചതായാണ് വിവരം. ഇയാള്‍ക്കൊപ്പം പോലീസ് കസ്റ്റഡിയില്‍ എടുത്ത സന്തോഷിനു കൊലപാതകത്തില്‍ പങ്കില്ലെന്നാണ് വിനോദ് പറയുന്നത് . കശുവണ്ടി ഫാക്ടറി തൊഴിലാളിയായ പ്രിയംവദയുമായി സാമ്പത്തിക ഇടപാടുണ്ടായിരുന്നതായും ഇതിന്‍റെ പേരില്‍ തര്‍ക്കമുണ്ടായതായും വിനോദ് മൊഴി നൽകി. തർക്കത്തിനിടെ മർദിച്ചപ്പോൾ ബോധംകെട്ടു വീണ പ്രിയംവദയെ പിന്നീടു കഴുത്തുഞെരിച്ച് കൊലപ്പെടുത്തുകയായിരുന്നു. പ്രിയംവദയെ കാണാനില്ലെന്ന പരാതിയെത്തുടര്‍ന്ന് അന്വേഷണത്തിനായി വിനോദും നാട്ടുകാര്‍ക്കൊപ്പം ചേര്‍ന്നിരുന്നു. കസ്റ്റഡിയിലെടുത്ത പ്രതികളുമായി പോലീസ് തെളിവെടുപ്പ് നടത്തി. നെയ്യാറ്റിന്‍കര ഡിവൈഎസ്പിയുടെ നേതൃത്വത്തില്‍ പോലീസും വെള്ളറട സര്‍ക്കിള്‍ ഇന്‍സ്പക്ടര്‍ പ്രസാദ്, ഫോറന്‍സിക് സംഘവും ചേര്‍ന്ന് മൃതദേഹം പുറത്തെടുത്തു.

ഓട്ടോറിക്ഷയിൽ നിന്നും തെറിച്ചു വീണ പിഞ്ചു കുഞ്ഞിന് ദാരുണാന്ത്യം

നെടുമങ്ങാട് : ഓട്ടോറിക്ഷയും ബുള്ളറ്റും ഇടിച്ച് ഓട്ടോ മറിഞ്ഞു മാതാവിന്‍റെ കയ്യിൽ നിന്നും തെറിച്ചു വീണ പിഞ്ചു കുഞ്ഞ് മരിച്ചു. വിതുര ജുമാ മസ്ജിദിനു സമീപം ഷിജാദ് മൻസിലിൽ ഷിജാദ് -നൗഷിമ ദമ്പതികളുടെ ഒരു വയസുകാരനായ മകൻ ആബിസ് മിൻഹാൻ ആണ് മരിച്ചത്. ഇന്നലെ വൈകുന്നേരം നാലിന് നെടുമങ്ങാട് പൊന്മുടി റോഡിൽ മല്ലമ്പ്ര കോണത്തായിരുന്നു അപകടം. വിതുര ഭാഗത്തു നിന്നും നെടുമങ്ങാട് ഭാഗത്തേക്ക് ഓട്ടോ റിക്ഷയിൽ മുന്നു മക്കളുമായി മാതാവ് യാത്ര ചെയ്യവേ മറ്റൊരു വാഹനത്തെ മറികടന്ന് അമിത വേഗതയിൽ എത്തിയ ബുള്ളറ്റ് ഓട്ടോയിൽ ഇടിക്കുകയായിരുന്നു. ഇടിയുടെ ആഘാതത്തിൽ ഓട്ടോ മറിഞ്ഞു. മാതാവിന്‍റെ കയ്യിലിരുന്ന കുഞ്ഞ് തെറിച്ചു വീണ് പരിക്കേൽക്കുകയായിരുന്നു. ഉടൻതന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. തിരുവനന്തപുരം മെഡിക്കൽ കോളജിലെ ഹൗസ് സർജനും, പിജി വിദ്യാർഥിയുമാണ് ബുള്ളറ്റിൽ സഞ്ചരിച്ചിരുന്നത്. ഇവർ പൊന്മുടിയിലേക്ക് പോകുകയായിരുന്നു. കുട്ടിയുടെ മാതാവിനും പരിക്കുണ്ട്.

മുൻ കെഎസ്ആർടിസി ജീവനക്കാരൻ തൂങ്ങി മരിച്ച നിലയിൽ

കല്ലറ : കുളമാൻകുഴി അവിട്ടം ഭവനിൽ റിട്ട. കെഎസ്ആർടിസി കൺട്രോളിംഗ് ഇൻസ്പെക്ടറെ തൂങ്ങിമരിച്ച നിലയിൽ കണ്ടെത്തി. മുൻ പാരലൽ കോളജ് അധ്യാപകനുമായ അനിൽകുമാർ (61) നെയാണ് അടുക്കളയോട് ചേർന്ന് വീടിന് പിറകുവശത്ത് തൂങ്ങിമരിച്ച നിലയിൽ ഇന്നലെ രാവിലെ ആറിനു ശേഷം കണ്ടെത്തിയത്. പുലിപ്പാറ വാർഡിലെ മുൻ മെമ്പർ ബീനയുടെ ഭർത്താവാണ് മരിച്ച അനിൽകുമാർ. മക്കൾ: ആകാശ്, ആകർഷ്, അർപ്പിത മൃതദേഹം പോസ്റ്റ്മോർട്ടത്തിന് ശേഷം വീട്ടുവളപ്പിൽ സംസ്കരിച്ചു.

കാണാതായ വയോധികയുടെ മൃതദേഹം തോട്ടിൽ നിന്നും കണ്ടെത്തി

വെടിവെച്ചാൻകോവിൽ : കാണാതായ വയോധികയുടെ മൃതദേഹം തോട്ടിൽ നിന്നും കണ്ടെത്തി. പെരിങ്ങമ്മല ആത്മബോധിനി സ്വദേശിനിയായ സുകുമാരിയമ്മ (94) യെ കാണാതായത്. ബന്ധുക്കളും നാട്ടുകാരും നടത്തിയ തെരച്ചിലിനൊടുവിലാണ് ഉച്ചയോടെ വീടിന് മുന്നിലെ തോടിനുവശത്തുളള മകളുടെ വീട്ടിലായിരുന്നു താമസം. പതിവായി വൈകുന്നേരം സമീപത്തെ ക്ഷേത്രത്തിലേക്ക് നോക്കി തൊഴുന്ന പതിവുണ്ടായിരുന്നെന്നും തോടിന് സമീപം നിന്ന് പ്രാർഥിക്കുന്നതിനിടെ കാൽതെറ്റി വീണതാകാം മരണ കാരണമെന്നുമാണ് പ്രാഥമിക വിവരം. ഉച്ചയ്ക്ക് ശേഷം വീട്ടിൽ സുകുമാരിയമ്മയും പേരക്കുട്ടിയും മാത്രമായിരുന്നു ഉണ്ടായിരുന്നത്. നല്ല മഴയായതിനാൽ പേരക്കുട്ടി കിടന്നുറങ്ങി. വൈകുന്നേരം അഞ്ചിന് ഉറക്കം എഴുന്നേറ്റ് നോക്കിയപ്പോഴാണ് സുകുമാരിയമ്മയെ കാണാനില്ലെന്ന് മനസിലായത്. പിന്നാലെ ബന്ധുക്കളും നാട്ടുകാരും പരിശോധനയാരംഭിച്ചു. വീടിന് മുന്നിലെ തോട്ടിലും നാട്ടുകാർ പരിശോധന നടത്തി. ഇതിനിടെയാണ് ഒഴുകിയെത്തിയ മാലിന്യങ്ങൾക്കിടെ ഇവരെ മരിച്ച നിലയിൽ കണ്ടെത്തിയത്. പ്രദേശത്ത് കനത്തമഴയായിരുന്നതിനാൽ തോട്ടിലും വെള്ളം കൂടിയിട്ടുണ്ട്. ഇൻക്വസ്റ്റ് നടപടികൾ പൂർത്തിയാക്കിയ പൊലീസ് മൃതദേഹം പോസ്റ്റുമോർട്ടത്തിനായി മെഡിക്കൽ കോളേജിലേക്ക് മാറ്റി.

മാന്നാനം സുരേഷ് ഗുരുദേവ സർവീസ് സൊസൈറ്റി ദേശീയ വർക്കിംഗ് പ്രസിഡന്‍റ്

വെഞ്ഞാറമൂട്: ഗുരുദേവ സർവീസ് സൊസൈറ്റി ദേശീയ വർക്കിംഗ് പ്രസിഡന്‍റായി മാന്നാനം സുരേഷിനെ തെരഞ്ഞെടുത്തതായി ദേശീയ പ്രസിഡന്‍റ് ആർ.സി. രാജീവ് ദാസ് അറിയിച്ചു. രാഷ്ട്രീയ ജനതാദൾ നേതാവും, പത്രപ്രവർത്തകനും, ലോഹ്യ കർമസമിതി, സോഷ്യലിസ്റ്റ് അലയൻസ് ഫോറം, ഗാന്ധി ദർശന വേദി എന്നീപ്രസ്ഥാനങ്ങളുടെ അഖിലേന്ത്യ പ്രസിഡന്‍റുമാണ് മാന്നാനം സുരേഷ്. ഫിലിം കോ ഡയറക്ടറർ, ശ്രീ ഗോകുലം മെഡിക്കൽ കോളജ് പേഷ്യന്‍റ് റിലേഷൻ ഓഫീസറായും പ്രവർത്തിക്കുന്നു. കോട്ടയം, മാന്നാനം കൊക്കപ്പള്ളിൽ വീട്ടിൽ കെ.എം. പവിത്രന്‍റെയും സാവിത്രി പവിത്രന്‍റെയും മകനാണ്. ഭാര്യ: ഷീജ സുരേഷ് (പ്രഫസർ, ശ്രീ ഗോകുലം നഴ്സിംഗ് കോളജ് വെഞ്ഞാറമൂട്, തിരുവനന്തപുരം). വിദ്യാർത്ഥികളായ സവിധൻ സുരേഷ്, സരിധൻ സുരേഷ് മക്കളാണ്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]