ADVERTISEMENT

ADVERTISEMENT

നഗരവീഥികളുണര്‍ത്തി വാക്കത്തോണ്‍

കോഴിക്കോട്: രണ്ടാം പിണറായി വിജയന്‍ സര്‍ക്കാരിന്‍റെ നാലാം വാര്‍ഷികാഘോഷത്തിന്‍റെ ഭാഗമായി 12 വരെ കോഴിക്കോട് ബീച്ചില്‍ നടക്കുന്ന "എന്‍റെ കേരളം' പ്രദര്‍ശന വിപണന മേളയുടെ പ്രചാരണാര്‍ഥം സംഘടിപ്പിച്ച വാക്കത്തോണ്‍ നഗരവീഥികളില്‍ മേളയുടെ വിളംബരമായി.

മനോരമ ജംഗ്ഷനില്‍ നിന്നാരംഭിച്ച് മാനാഞ്ചിറയില്‍ അവസാനിച്ച വാക്കത്തോണ്‍ മന്ത്രി എ.കെ. ശശീന്ദ്രന്‍ ഉദ്ഘാടനം ചെയ്തു.

കെ.എം. സച്ചിന്‍ദേവ് എംഎല്‍എ, തോട്ടത്തില്‍ രവീന്ദ്രന്‍ എംഎല്‍എ, സ്‌പോര്‍ട്‌സ് കൗണ്‍സില്‍ സെക്രട്ടറി പ്രപു പ്രേംനാഥ്, ജില്ലാ ഇന്‍ഫര്‍മേഷന്‍ ഓഫീസ് അസിസ്റ്റന്‍റ് എഡിറ്റര്‍ സൗമ്യ ചന്ദ്രന്‍, സംസ്ഥാന എന്‍എസ്എസ് ഓഫീസര്‍ ആര്‍.എന്‍ അന്‍സര്‍, ജില്ലാ എന്‍എസ്എസ് കോഓഡിനേറ്റര്‍ ഫസീല്‍ അഹമ്മദ് തുടങ്ങിയവര്‍ സംബന്ധിച്ചു.

ADVERTISEMENT

മലയോര ഹൈവേ നിർമ്മാണം: ചക്കിട്ടപാറയിൽ റോഡ് താലൂക്ക് സർവെയർ അളക്കും

ചക്കിട്ടപാറ: പെരുവണ്ണാമൂഴി ചക്കിട്ടപാറ ചെമ്പ്ര റൂട്ടിലെ മലയോര ഹൈവേ നിർമ്മാണത്തിൽ ഉയർന്നിരിക്കുന്ന അതിര് നിർണയ പ്രശ്നം പരിഹരിക്കുവാൻ തീരുമാനമായി. താലൂക്ക് സർവേയറെ കൊണ്ട് റോഡ് വീതി അളവു നടത്തുവാൻ ഇന്നലെ ചക്കിട്ടപാറ പഞ്ചായത്ത് ഹാളിൽ ചേർന്ന സർവകക്ഷി യോഗം തീരുമാനിച്ചു. ഇതിനുവേണ്ടി രാഷ്ട്രീയ പാർട്ടി നേതാക്കളായ എ. ജി. ഭാസ്കരൻ (സി.പി.എം) ചെയർമാനും, റെജി കോച്ചേരി (കോൺഗ്രസ്) കൺവീനറുമായി സപ്പോർട്ടിംഗ് കമ്മിറ്റിക്കു രൂപം നൽകി. ഹൈവേ പ്രവർത്തി ചക്കിട്ടപാറ ടൗണിൽ എത്തിയപ്പോഴാണ് റോഡിന്‍റെ വീതി നിർണയത്തിലെ അപാകത നാട്ടുകാരുടെ ശ്രദ്ധയിൽ പെട്ടത്. കാര്യങ്ങൾ കെആർഎഫ്ബി. ഉദ്യോഗസ്ഥരോടും കരാറുകാരോടും പറഞ്ഞെങ്കിലും ചെവിക്കൊള്ളാൻ അവർ തയാറായില്ല. ഇതോടെ പണി വ്യാപാരികൾ തടഞ്ഞു. നാട്ടുകാർ ഒപ്പുശേഖരണം നടത്തി താലൂക്ക് വികസനസമിതിക്ക് കൂട്ട പരാതിയും നൽകി. ഇതോടെ ടി.പി. രാമകൃഷ്ണൻ എംഎൽഎ ബന്ധപ്പെട്ട ഉദ്യോഗസ്ഥരുടെ യോഗം ഇന്നലെ പെരുവണ്ണാമൂഴിയിൽ വിളിച്ചു ചേർത്തു. ജനഹിതത്തിനനുസരിച്ച് മലയോര ഹൈവേ നിർമ്മാണം നടത്താൻ നിർദ്ദേശം നൽകി. ഇതോടെയാണ് താലൂക്ക് സർവെയർ റോഡിന്‍റെ വീതിയും അതിരും നിർണയിക്കട്ടെയെന്ന തീരുമാനമുണ്ടായത്. പെരുവണ്ണാമൂഴി മുതൽ ചെമ്പ്ര വരെയുള്ള അഞ്ച് കിലോമീറ്റർ റോഡ് വികസനത്തിനു വേണ്ടി വർഷങ്ങൾക്കു മുമ്പ് അക്വയർ ചെയ്ത മുഴുവൻ സ്ഥലവും കണ്ടെത്തി സർക്കാർ അധീനതയിൽ നിലനിർത്താനുള്ള നടപടി ഉണ്ടാകണമെന്ന ആവശ്യം പഞ്ചായത്തിൽ ചേർന്ന സർവകക്ഷി യോഗത്തിൽ പങ്കെടുത്തവർ ഒന്നടങ്കം ആവശ്യപ്പെട്ടു. പ്രസിഡന്‍റ് കെ.സുനിൽ അധ്യക്ഷത വഹിച്ചു. വൈസ് പ്രസിഡന്‍റ് ചിപ്പി മനോജ്, ജനപ്രതിനിധികളായ ഇ.എം. ശ്രീജിത്ത്, ജിതേഷ് മുതുകാട്, ഗിരിജ ശശി, രാഷ്ട്രീയ പാർട്ടി നേതാക്കളായ റെജി കോച്ചേരി, എ. ജി. ഭാസ്കരൻ, രാജൻ വർക്കി, ബാബു കൂനംതടം, ജെയിംസ് മാത്യു, പ്രദീപൻ ചക്കിട്ടപാറ എന്നിവരും കെആർഎഫ്ബി. ഉദ്യോഗസ്ഥരും സംബന്ധിച്ചു.

ഫറോക്ക് താലൂക്ക് ആശുപത്രിയില്‍ 103 കിടക്കകളുള്ള ആശുപത്രി സമുച്ചയം ഒരുങ്ങുന്നു

കോഴിക്കോട്: പാവപ്പെട്ട രോഗികൾക്ക് മെച്ചപ്പെട്ട ആരോഗ്യ ചികിത്സ ഉറപ്പാക്കാൻ ഫറോക്ക് ഗവ.താലൂക്ക് ആശുപത്രിയിൽ പുതിയ കെട്ടിട സമുച്ചയം ഒരുങ്ങി. കിഫ്ബി ഫണ്ടിൽ 14.36 കോടി ചെലവിട്ട് നിർമിച്ച നാല് നില കെട്ടിടം ജൂണ്‍ ആദ്യവാരം ഉദ്ഘാടനം ചെയ്യും.കെട്ടിടത്തിന്‍റെ അവസാനഘട്ട പണികൾ പുരോഗമിക്കുകയാണ്. ആവശ്യമായ മെഡിക്കൽ ഉപകരണങ്ങൾ ലഭ്യമാകുന്നതോടെ പ്രവര്‍ത്തനം തുടങ്ങും.103 കിടക്കകളുള്ള ആശുപത്രി സമുച്ചയമാണ് നിർമിച്ചിരിക്കുന്നത്.4,337 ചതുരശ്ര മീറ്റർ വിസ്തൃതിയുള്ള കെട്ടിട സമുച്ചയവും അനുബന്ധ സൗകര്യങ്ങളുമാണ് ഒരുക്കിയത്.38 കാറുകൾ, 150 ബൈക്കുകൾ എന്നിവയ്ക്കു പാര്‍ക്കിംഗ് സൗകര്യവുമുണ്ട്. പൊതുമേഖലാ സ്ഥാപനമായ വാപ്കോസിന്‍റഎ നേതൃത്വത്തിലാണ് കെട്ടിട നിർമാണം പൂർത്തിയാകുന്നത്. ഫറോക്ക്, രാമനാട്ടുകര നഗരസഭകൾ, കോർപറേഷൻ ചെറുവണ്ണൂർ, ബേപ്പൂർ മേഖല, കടലുണ്ടി, ചേലേമ്പ്ര, ചെറുകാവ്, വാഴയൂർ, വള്ളിക്കുന്ന് പഞ്ചായത്തുകളിൽ നിന്നുൾപ്പെടെ ആയിരക്കണക്കിന് രോഗികൾ ഫറോക്ക് താലൂക്ക് ആശുപത്രിയിൽ ചികിത്സ തേടിയെത്തുന്നുണ്ട്.ഇവിടെ അടിസ്ഥാന സൗകര്യങ്ങൾ വർധിക്കുന്നതോടെ ജനങ്ങൾക്ക് ആരോഗ്യ സേവനം കൂടുതൽ ഫലപ്രദമാകും.എല്ലാ വിഭാഗം വിദഗ്ധ ഡോക്ടർമാരുടെയും സേവനവും ലഭ്യമാകും. എന്നതു പാവപ്പെട്ട രോഗികൾക്ക് ഗുണകരമാണ്. കൂടാതെ ആർദ്രം പദ്ധതി വിഭാവനം ചെയ്യുന്ന സമഗ്ര ആരോഗ്യ പരിരക്ഷ എല്ലാവർക്കും ഉറപ്പാക്കാനുമാകും. സ്വന്തം ലേഖകന്‍

ബൈപാസ് റോഡ് യാഥാർത്ഥ്യമാകാനുള്ള പ്രവർത്തനങ്ങൾ ത്വരിതഗതിയിലാക്കണം

കൂരാച്ചുണ്ട് :അനുദിനം ഗതാഗതക്കുരുക്ക് മൂലം ദുരിതം അനുഭവിക്കുന്ന കൂരാച്ചുണ്ട് നിവാസികളുടെ സ്വപ്നമായ ബൈപാസ് റോഡ് യാഥാർത്ഥ്യമാകാനുള്ള പ്രവർത്തനങ്ങൾ ത്വരിതഗതിയിലാക്കാൻ സംസ്ഥാന സർക്കാരും എംഎൽഎയും പഞ്ചായത്ത് അധികൃതരും ആത്മാർത്ഥമായി ശ്രമം നടത്തണമെന്ന് സിപിഐ കൂരാച്ചുണ്ട് ബ്രാഞ്ച് സമ്മേളനം ആവശ്യപ്പെട്ടു. ബൈപാസ് റോഡിനുവേണ്ടി കൂരാച്ചുണ്ടിലെ ജനങ്ങൾ കാത്തിരിപ്പ് തുടങ്ങിയിട്ട് കാലങ്ങളായി. റോഡിന്‍റെ ആദ്യ ഘട്ടത്തിന്‍റെ ഭാഗമായുള്ള അലൈൻമെന്‍റ്, പൈലിംഗ് തുടങ്ങിയവ നടത്തിയെങ്കിലും സർക്കാർ ഭാഗത്തു നിന്നും തുടർനടപടികളൊന്നും ഉണ്ടായിട്ടില്ല. ഒട്ടുമിക്കദിവസങ്ങളിലും കൂരാച്ചുണ്ട് അങ്ങാടി ഗതാഗതക്കുരുക്കിൽ വീർപ്പുമുട്ടുന്നുണ്ട്. മാത്രമല്ല ഇവിടെ വാഹന പാർക്കിംഗ് സംവിധാനക്കുറവും റോഡിന്റെ വീതി കുറവുമെല്ലാമാണ് കാരണമാകുന്നത്. കൂരാച്ചുണ്ടിലൂടെ കടന്നു പോകുന്ന മലയോര ഹൈവേയുടെ നിർമാണത്തിന്‍റെ ഭാഗമായുള്ള ടൗണിലെ പ്രവർത്തികൾ വൈകുന്നത് ഗതാഗതക്കുരുക്കിന് ആക്കം വർധിപ്പിക്കുന്നുണ്ട്.ഈ അവസ്ഥയിൽ ബൈപാസ് റോഡ് യാഥാർത്യമാക്കാൻ എത്രയും വേഗം നടപടി വേണമെന്നും സമ്മേളനം ആവശ്യപ്പെട്ടു. കെ.വി. കുഞ്ഞപ്പൻ നഗറിൽ നടന്ന സമ്മേളനംടി.കെ. ശിവദാസൻ അദ്ധ്യക്ഷത വഹിച്ചു.മുരളി ,സി.കെ ബാലകൃഷ്ണൻ,എ.കെ. പ്രേമൻ, പി.ടി. തോമസ്, വിനു മ്ലാക്കുഴിയിൽ, ഗോപാലൻ മണ്ടോപ്പാറ, പീറ്റർ കിങ്ങിണിപ്പാറ,എന്നിവർ പ്രസംഗിച്ചു.പുതിയ ഭാരവാഹികളായിഎ.കെ. പ്രേമൻ (സെക്രട്ടറി)ടി.കെ.ശിവദാസൻ (അസി. സെക്രട്ടറി) എന്നിവരെ തെരഞ്ഞെടുത്തു.

എന്‍റെ കേരളം പ്രദര്‍ശന മേളയില്‍ താരമായി കൃഷിവകുപ്പ് സ്റ്റാളുകള്‍

കോഴിക്കോട്: രണ്ടാം പിണറായി സര്‍ക്കാറിന്‍റെ നാലാം വാര്‍ഷിക ആഘോഷങ്ങളോട് അനുബന്ധിച്ച് കോഴിക്കോട് ബീച്ചില്‍ ആരംഭിച്ച എന്‍റെ കേരളം പ്രദര്‍ശന വിപണന മേളകളയില്‍ ഒരുക്കിയ കൃഷിവകുപ്പിന്‍റെ സ്റ്റാളുകള്‍ ശ്രദ്ധേയമായി. മുഖ്യമന്ത്രി പിണറായി വിജയന്‍ ഉദ്ഘാടനം ചെയ്ത മേളയില്‍ തീം പവലിയനില്‍ ഒരുക്കിയിരിക്കുന്ന കൃഷി വകുപ്പ് സ്റ്റാളില്‍ ഡിജിറ്റല്‍ അഗ്രികള്‍ച്ചര്‍ മേഖലയിലെ പ്രവര്‍ത്തനങ്ങള്‍ പൊതുജനങ്ങള്‍ക്ക് അനുഭവഭേദ്യമാകുന്ന തരത്തിലാണ് സ്റ്റാള്‍ സജ്ജികരിച്ചിരിക്കുന്നത്. ഡ്രോണ്‍ സംവിധാനത്തിന്‍റെ കൃഷിയിടത്തിലെ സാധ്യതകളെക്കുറിച്ച് കര്‍ഷകര്‍ക്കും പൊതുജനത്തിനും അവബോധം സൃഷ്ടിക്കുന്നതിനും ഡ്രോണ്‍ പ്രവര്‍ത്തനം അടുത്തറിയുന്നതിനും ലൈവ് ഡെമോണ്‍സ്ട്രഷനും സ്റ്റാളില്‍ സജ്ജീകരിച്ചിട്ടുണ്ട്. കൃഷി വകുപ്പിന്റെ സ്വന്തം ബ്രാന്‍ഡായ കേരളഗ്രോ ഉല്‍പ്പന്നങ്ങളുടെയും മില്ലറ്റ് ഉല്‍പ്പന്നങ്ങളുടെയും പ്രദര്‍ശനവും ഒരുക്കിയിട്ടുണ്ട്. കാര്‍ഷിക സേവനങ്ങള്‍ ഒരു കുടക്കീഴിലാക്കി നിലവില്‍ വന്ന കതിര്‍ ആപ്പ് രജിസ്‌ട്രേഷന്‍ ഹെല്‍പ് ഡെസ്‌ക്കും കൃഷി വകുപ്പ് നടപ്പിലാക്കുന്ന വിവിധ ഫ്‌ളാഗ്ഷിപ്പ് പദ്ധതികളെ സംബന്ധിച്ച വിവരങ്ങള്‍ ലഭ്യമാക്കുന്ന ഹെല്‍പ്പ് ഡസ്‌കുകളും തീം പവലിയനില്‍ ഒരുക്കിയിരിക്കുന്നത് സന്ദര്‍ശകര്‍ക്ക് ഏറെ ഗുണപ്രദമായി. വിളകളിലെ രോഗ കീട നിയന്ത്രണം സംബന്ധിച്ച് സമഗ്രമായ വിവരങ്ങള്‍ ലഭ്യമാക്കുന്ന ക്രോപ്പ് ഹെല്‍ത്ത് ക്ലിനിക്കും പ്ലാന്റ് ഡോക്ടര്‍ സേവനവും സ്റ്റാളില്‍ സജ്ജീകരിച്ചിട്ടുണ്ട്. ഇതിന് പുറമെ 1500 സ്‌ക്വയര്‍ ഫീറ്റില്‍ കൃഷി വകുപ്പ് കോഴിക്കോട് ജില്ല ഒരുക്കിയിരിക്കുന്ന നടീല്‍ വസ്തുക്കളുടെയും, കാര്‍ഷിക മൂല്യ വര്‍ദ്ധിത ഉത്പന്നങ്ങളുടെയും പ്രദര്‍ശന വിപണന മേളയും പൊതുജന പങ്കാളിത്തം കൊണ്ട് സജീവമായി. ബയോ ഫാര്‍മസി, കേരളഗ്രോ ബ്രാന്‍ഡ് ഉല്‍പ്പന്നങ്ങളുടെയും മില്ലറ്റുകളുടെയും വിപണന സ്റ്റാളുകള്‍, വിവിധയിനം നെല്‍വിത്തുകളുടെ അപൂര്‍വ ശേഖരത്തിന്റെ പ്രദര്‍ശനം, വിവിധ ബ്ലോക്ക് ലെവല്‍ ഫെഡറേറ്റഡ് ഓര്‍ഗനൈസേഷനുകളുടെയും ഫാമുകളുടെയും പ്രദര്‍ശന സ്റ്റാളുകള്‍, വിവിധയിനത്തില്‍പെട്ട നാളികേരങ്ങളുടെ പ്രദര്‍ശനം എന്നിവ കൊണ്ട് സ്റ്റാളുകള്‍ എല്ലാം തന്നെ സജീവമായി. കാര്‍ഷിക യന്ത്രങ്ങളുടെയും ഉപകരണങ്ങളുടെയും പ്രദര്‍ശനവുമായി കാര്‍ഷിക എന്‍ജിനീയറിങ് വിഭാഗം ഒരുക്കിയ സ്റ്റാള്‍ ഏറെ ജനശ്രദ്ധ ആകര്‍ഷിച്ചു. വിവിധ കാര്‍ഷിക ഉത്പന്നങ്ങള്‍ വാങ്ങുന്നതിനുള്ള സൗകര്യവും ഇവിടെ സജ്ജീകരിച്ചിട്ടുണ്ട്.

കർഷകർക്കാശ്വാസം; നടക്കൽ തോട് ശുചീകരിച്ചു

മുക്കം: നിരവധി കർഷകർക്കാശ്വാസമായി കാരക്കുറ്റി - നടക്കൽ - കുറ്റിപ്പൊയിൽ തോട് ശുചീകരിച്ചു. മഴക്കാല മുന്നൊരുക്കങ്ങളുടെ ഭാഗമായാണ് തോടിന്‍റെ ഒരു ഭാഗം കലുങ്കിനോട് ചേർന്ന് ശുചീകരിച്ചത്.നിലവിൽ മുകൾ ഭാഗത്ത് നിന്നും കല്ലും മണ്ണും ചപ്പുചവറുകളുമൊലിച്ചെത്തി സ്വാഭാവിക ഒഴുക്ക് തടസ്സപ്പെടുന്ന അവസ്ഥയായിരുന്നു. വെള്ളം കെട്ടി നിൽക്കുന്നത് സമീപത്തെ കിണറുകൾ കലങ്ങുന്നതിനും വയലുകളിലേക്ക് കൂടുതൽ വെള്ളം ഒലിച്ചിറങ്ങി കൃഷി ചെയ്യുന്നതിനും തടസ്സമായിരുന്നു. ഈ സാഹചര്യത്തിലാണ് വാർഡ് മെമ്പർ വി. ഷംലൂലത്തിന്‍റെ നേതൃത്വത്തിൽ തോട് ശുചീകരിച്ചത്. അഹമ്മദ് കുട്ടി പുളക്ക തൊടി പ്രവർത്തനങ്ങൾക്ക് നേതൃത്വം നൽകി.

ആസ്റ്റർ മിംസിൽ പിഎംആർ വിഭാഗം പ്രവർത്തനം ആരംഭിച്ചു

കോഴിക്കോട്: അസുഖങ്ങൾ കൊണ്ടും അപകടങ്ങൾ കൊണ്ടും ശരീരത്തിന്‍റെ ചലനം നഷ്ടപ്പെട്ടവർക്ക് സാധാരണ ജീവിതത്തിലേക്കുള്ള തിരിച്ച് പോക്കിന് സാധ്യമാകുന്ന കേരളത്തിലെ ഏറ്റവും മികച്ച എഐ-വിആർ സൗകര്യങ്ങളോടെയുള്ള പിഎംആർ വിഭാഗം പ്രവർത്തനം ആരംഭിച്ചു. നവീകരിച്ച പിഎംആർ വിഭാഗത്തിന്‍റെ ഉദ്ഘാടനം ഷാഫി പറമ്പിൽ എംപി നിർവഹിച്ചു. അത്യാധുനിക സജ്ജീകരങ്ങളുള്ള ആശുപത്രികളിൽ ഇത്തരം വിഭാഗങ്ങളുടെ പ്രവർത്തനവുംകൂടി വരുന്നതോടെ രോഗികൾക്ക് അത് കൂടുതൽ ആശ്വാസം നൽകുന്നതിനും വേഗത്തിൽ രോഗമുക്തി നേടുന്നതിനും കാരണമാകുമെന്ന് അദ്ദേഹം പറഞ്ഞു. ഫിസിയാട്രിസ്റ്റ് (റിഹാബിലിറ്റേഷൻ വിദഗ്ദ്ധൻ), ഒക്യുപേഷണൽ തെറാപ്പിസ്റ്റ്, ഫിസിയോതെറാപ്പിസ്റ്റ്, സ്‌പീച്ച് ആൻഡ് ലാംഗ്വേജ് തെറാപ്പിസ്റ്റ്, പ്രോസ്തറ്റിസ്റ്റ്, ഓർത്തോട്ടിസ്റ്റ്, റിഹാബിലിറ്റേഷൻ നഴ്‌സുമാർ, സൈക്കോളജിസ്റ്റ്, സാമൂഹികപ്രവർത്തകർ എന്നിവരടങ്ങിയ ടീമിലുടെ പിഎംആറിന്‍റെ പ്രവർത്തനം നടക്കുന്നത്. ചടങ്ങിൽ മുൻ ഇന്ത്യൻ ഫുട്ബോൾ താരം അനസ് എടത്തൊടിക, ആസ്റ്റർമിംസ് സിഎംഎസ് ഡോ. ഏബ്രഹാം മാമൻ, ഡോ. നൗഫൽ ബഷീർ, പിഎംആർ വിഭാഗം മേധാവി ഡോ. കെ.പി. ആയിഷ റുബീന തുടങ്ങിയവർ പങ്കെടുത്തു.

ത്രിദിന നീന്തൽ പരിശീലനം സമാപിച്ചു

തിരുവമ്പാടി : മുക്കം അഗ്നിരക്ഷാ സേനയും ജെസിഐ കാരശ്ശേരിയും സംയുക്തമായി മുങ്ങിമരണങ്ങൾ ഒഴിവാക്കുക എന്ന ലക്ഷ്യത്തോടെ സംഘടിപ്പിച്ച ത്രിദിന നീന്തൽ പരിശീലനം സമാപിച്ചു. തിരുവമ്പാടി പഞ്ചായത്ത് പ്രസിഡന്‍റ് ബിന്ദു ജോൺസൺ ഉദ്ഘാടനവും സർട്ടിഫിക്കറ്റ് വിതരണവും നിര്‍വഹിച്ചു. തിരുവമ്പാടി ഹിൽസ് സ്വിമ്മിങ് പൂളിൽ മൂന്നു ദിവസമായി നടന്ന നീന്തൽ പരിശീലന ക്യാമ്പിനാണ് സമാപനമായത് നീന്തിവാ മക്കളെ പദ്ധതിയുടെ ബ്രാൻഡ് അംബാസിഡർ റന ഫാത്തിമയുടെ നേതൃത്വത്തിലാണ് പരിശീലനം നൽകിയത്. ജെസിഐ കാരശ്ശേരി പ്രസിഡന്‍റ് മുഹമ്മദ് ആസാദ് ചടങ്ങിൽ അധ്യക്ഷനായി.

ഫ്രഷ് കട്ട് താൽക്കാലികമായി പ്രവർത്തനം നിർത്തി

താമരശേരി: കട്ടിപ്പാറ പഞ്ചായത്തിലെ ഇറച്ചിപ്പാറയിൽ പ്രവർത്തിക്കുന്ന കേരളത്തിലെ ഏറ്റവും വലിയതും കോഴിക്കോട് ജില്ലയിലെ ഏക കോഴി അറവുമാലിന്യ സംസ്കരണ ഫാക്ടറിയായ ഫ്രഷ് ക്കട്ട് താൽക്കാലികമായി അറ്റകുററ പണികൾക്കായി പ്രവർത്തനം നിർത്തിവെച്ചു. മലിനീകരണ നിയന്ത്രണ ബോർഡും, ശുചിത്വമിഷനും, ഗ്രാമ പഞ്ചായത്തും , ഡിഎല്‍എഫ്എംസിയും നിഷ്കർഷിക്കുന്ന വ്യവസ്ഥകളും,നാട്ടുകാരുടെ ആശങ്കകളും പരിഹരിച്ചതിനു ശേഷം മാത്രമേ ഫാക്ടറി തുടർന്ന് തുറന്നു പ്രവർത്തിക്കുകയുള്ളൂ. ഉദ്യോഗസ്ഥരുടെയും, ഫാക്ടറി ഉടമകളുടെയും, സമരസമിതി പ്രവർത്തകരുടെയും മേൽനോട്ടത്തിലായിരിക്കും ഫാക്ടറിയുടെ നവീകരണ പ്രവർത്തി നടത്തുകയെന്ന് മാനേജ്മെന്‍റ് വ്യക്തമാക്കി.എന്നാൽ ജില്ലയിലെ മാലിന്യ നീക്കത്തെ ഇത് ബാധിക്കില്ലെന്നും പകരം സംവിധാനം ഏർപ്പെടുത്തിയിട്ടുണ്ടെന്നും ഫാക്ടറി മാനേജ്മെന്‍റ് വ്യക്തമാക്കി.പ്രശ്നങ്ങൾ പരിഹരിച്ച് എത്രയും വേഗത്തിൽ പ്ലാന്‍റ് തുടർന്ന് പ്രവർത്തിക്കുന്നതാണെന്നും മാനേജ്മെന്‍റ് അറിയിച്ച. 2019 മുതലാണ് ഫ്രഷക്കട്ട് ഫാക്ടറിയുടെ പ്രവർത്തനം ആരംഭിച്ചത്.

സെമിനാർ നടത്തി

കോഴിക്കോട്: ലോകത്ത് ഏറ്റവും മികച്ച ഭരണഘടനയുണ്ടായിട്ടും നമ്മുടെ രാജ്യത്ത് ജനാധിപത്യവും നിയമവ്യവസ്ഥയും പരീക്ഷണം നേരിടുകയാണെന്ന് മുസ്ലിംലീഗ് ദേശീയ ഓർഗനൈസിംഗ് സെക്രട്ടറി ഇ.ടി. മുഹമ്മദ് ബഷീർ അഭിപ്രായപ്പെട്ടു. ജനാധിപത്യം ഉപയോഗിച്ചു കൊണ്ട് ഫാഷിസം എങ്ങനെ നടപ്പാക്കാം എന്നതാണ് ഇന്ത്യയിലെ ഭരണകൂടം തെളിയിച്ചു കൊണ്ടിരിക്കുന്നത്. ജനാഭിലാഷമല്ല കോർപ്പറേറ്റ് ഭീമൻമാരുടെ ഇഛയാണ് ഭരണകൂടത്തിന് പ്രധാനം എന്നു വന്നിരിക്കുന്നു. ഇതിനെതിരെ ജനങ്ങൾ തന്നെ രംഗത്തിറങ്ങണം -അദ്ദേഹം പറഞ്ഞു. കൾച്ചറൽ ഇനിഷ്യേറ്റീവ് കേരള കോഴിക്കോട്ട് സംഘടിപ്പിച്ച വംശഹത്യയും എമ്പുരാനും സെമിനാർ ഉദ്ഘാടനം ചെയുകയായിരുന്നു അദ്ദേഹം. സർക്കാരിനെതിരെ സംസാരിക്കുന്നവർക്കെതിരെ അന്വേഷണ ഏജൻസികളെ വിട്ട് പീഡിപ്പിക്കുന്ന സിനിമയിലെ രംഗം യഥാർത്ഥ ജീവിതത്തിൽ ആവർത്തിക്കുന്നതാണ് നാം കാണുന്നത്. ഇതിൽ അവർക്ക് ഒട്ടും ലജ്ജ തോന്നാത്തത്അൽഭുതമില്ലെന്നും അദ്ദേഹം പറഞ്ഞു. കൾച്ചറൽ ഇനിഷ്യേറ്റീവ് സംസ്ഥാന പ്രസിഡന്‍റ് വി.കെ. മൂസ അധ്യക്ഷത വഹിച്ചു.

ലഹരിക്കെതിരേ എക്‌സൈസ് സെമിനാര്‍

കോഴിക്കോട്: പുതുതലമുറയുടെ മാനസികാരോഗ്യം സംരക്ഷിക്കേണ്ടതിന്‍റെ ആവശ്യകതയും ലഹരി ഉപയോഗത്തിന്‍റെ പ്രത്യാഘാതങ്ങളും ചര്‍ച്ച ചെയ്ത് എന്‍റെ കേരളം പ്രദര്‍ശന-വിപണന മേളയിലെ സെമിനാര്‍. "പുതുതലമുറയും മാനസികാരോഗ്യവും' എന്ന വിഷയത്തില്‍ എക്‌സൈസ് വകുപ്പാണ് സെമിനാര്‍ സംഘടിപ്പിച്ചത്. പുതുതലമുറയാകെ വഴിതെറ്റിയവരല്ലെന്നും അവരുടെ നന്മകളെ വിലകുറച്ച് കാണരുതെന്നും സെമിനാര്‍ അഭിപ്രായപ്പെട്ടു. മാനസികാരോഗ്യം തകരുമ്പോഴാണ് കുട്ടികളും മുതിര്‍ന്നവരും ഉള്‍പ്പടെ ലഹരി പോലുള്ളവയില്‍ അഭയം തേടുന്നതെന്നും പുതുതലമുറയുടെ മാനസികാരോഗ്യം സംരക്ഷിക്കാന്‍ സാമൂഹികപരമായ ഇടപെടല്‍ കൂടി ആവശ്യമുണ്ടെന്നും സെമിനാര്‍ വിലയിരുത്തി.പുതിയ തലമുറയുടെ ചിന്തയും അഭിപ്രായവും പരിഗണിക്കണമെന്ന് സെമിനാര്‍ ഉദ്ഘാടനം ചെയ്ത കെ.എം. സച്ചിന്‍ദേവ് എംഎല്‍എ അഭിപ്രായപ്പെട്ടു. സമൂഹത്തില്‍ പിടിമുറുക്കിയ ലഹരിക്കെതിരെ ഒറ്റക്കെട്ടായി നിലകൊള്ളണമെന്നും അദ്ദേഹം പറഞ്ഞു.സെമിനാറില്‍ സാമൂഹികനീതി വകുപ്പ് മുന്‍ അസി. ഡയറക്ടര്‍ അഷ്‌റഫ് കാവില്‍, വിമുക്തി ഡി അഡിക്ഷന്‍ സെന്‍റര്‍ സൈക്യാട്രിസ്റ്റ് ഡോ. വനതി സുബ്രഹ്‌മണ്യം, ഫാറൂഖ് കോളജ് ജേണലിസം വിദ്യാര്‍ഥി അര്‍ഷിന്‍ സനീന്‍ എന്നിവര്‍ വിഷയമവതരിപ്പിച്ചു.

ഡോ. സി. രഘുനാഥന്‍ നായര്‍ക്കും സുനില്‍കുമാര്‍ ഗുരിക്കള്‍ക്കും പുരസ്‌കാരം

കോഴിക്കോട്: ചെലവൂര്‍ ഉസ്താദ് സിഎം ഗുരുക്കളുടെ സ്മരണാര്‍ഥം ആയുര്‍വേദ ചികിത്സയിലെ മികവുറ്റ േസവനത്തിന് ഏര്‍പ്പെടുത്തിയ ഭിഷക് പ്രതിഭ അവാര്‍ഡ് ഡോ. സി. രഘുനാഥന്‍ നായര്‍ക്ക്. ആയോധന പ്രതിഭ അവാര്‍ഡ് കെ. സുനില്‍കുമാര്‍ ഗുരിക്കള്‍ക്കും ലഭിച്ചു. 25000 രൂപ വീതവും പ്രശസ്തിപത്രവുമാണ് പുരസ്‌കാരം. വിദ്യ പ്രതിഭ അവാര്‍ഡുകളും കളരി വിദ്യാര്‍ഥി പ്രതിഭാ അവാര്‍ഡുകളും ഇതോടൊപ്പം പ്രഖ്യാപിച്ചിട്ടുണ്ട്. ഇന്നു നടക്കുന്ന അനുസമരണ സമ്മേളനത്തില്‍ അവാര്‍ഡുകള്‍ വിതരണം െചയ്യുമെന്ന് ഷാഫി ദവാ ഖാന ജനറല്‍ മാനേജര്‍ എ.മൂസ ഹാജി, ചെയര്‍നോന്‍ ഡോ. അഹീര്‍ അലി, ജഡ്ജിംഗ് കമ്മിറ്റി ചെയര്‍മാന്‍ ഡോ. മനോജ് കാളൂര്‍ എന്നിവര്‍ വാര്‍ത്താസമ്മേളനത്തില്‍ സംബന്ധിച്ചു.

ജപ്പാൻ കുടിവെള്ള പദ്ധതി കുഴി കാരണം കച്ചവടം മുടങ്ങി; കേസെടുത്തു

കോഴിക്കോട് : പേരാമ്പ്രയിൽ ജപ്പാൻ കുടിവെള്ള പദ്ധതിക്ക് വേണ്ടിയെടുത്ത വലിയ കുഴി കാരണം വ്യാപാരിക്ക് ഒരു മാസമായി കച്ചവടം നടത്താൻ നിവൃത്തിയില്ലെന്ന പരാതിയിൽ മനുഷ്യാവകാശ കമ്മീഷൻ കേസെടുത്തു. ജല അതോറിറ്റി കോഴിക്കോട് എക്സിക്യൂട്ടീവ് എന്‍ജിനീയര്‍ പരാതി പരിശോധിച്ച് 10 ദിവസത്തിനകം വിശദീകരണം നൽകണമെന്ന് കമ്മീഷൻ ജുഡീഷ്യൽ അംഗം കെ. ബൈജുനാഥ് ആവശ്യപ്പെട്ടു. 21 ന് കോഴിക്കോട് നടക്കുന്ന സിറ്റിംഗിൽ കേസ് പരിഗണിക്കും. ദൃശ്യമാധ്യമ വാർത്തയുടെ അടിസ്ഥാനത്തിൽ സ്വമേധയാ രജിസ്റ്റർ ചെയ്ത കേസിലാണ് നടപടി. തച്ചറാത്ത് കുഞ്ഞിക്കണ്ണൻ എന്നയാളുടെ ചെറിയ കടമുറിയ്ക്ക് മുന്നിലാണ് വലിയ കുഴിയെടുത്തത്. നാലു ദിവസത്തിനകം കുഴിമൂടാമെന്ന ഉറപ്പാണ് നൽകിയത്. എന്നാൽ ഒരു മാസമായിട്ടും കുഴി മൂടിയിട്ടില്ല. ഇതിന് സമീപമുള്ള ട്രാൻസ്ഫോർമർ കുഴിയിലേക്ക് മറിഞ്ഞു നിൽക്കുന്നു. പഞ്ചായത്തിൽ അടക്കം പരാതി നൽകിയിട്ടും നടപടിയുണ്ടായില്ല. ഒരു മാസമായി കടയിലേക്ക് ആളുകൾക്ക് കയറാനാവുന്നില്ലെന്നാണ് പരാതിയില്‍ പറയുന്നത്.

നഴ്‌സസ് വാരാഘോഷത്തിന് തുടക്കമായി

കോഴിക്കോട്: ജില്ലാ നഴ്‌സസ് വാരാഘോഷത്തിനു തുടക്കമായി.രാവിലെ മുതലക്കുളം മൈതാനിയില്‍നിന്ന് ആരംഭിച്ച വിളംബര യാത്രയോടെയാണ് വാരാഘോഷം തുടങ്ങിയത്. വിളംബര ജാഥയില്‍ നൂറ് കണക്കിന് നഴ്‌സുമാര്‍ അണിനിരന്നു. റാലിക്ക് ശേഷം ലഹരി വിരുദ്ധ സന്ദേശമുയര്‍ത്തി ബലൂണുകള്‍ പറത്തി.ജില്ലാ നഴ്‌സിംഗ് ഓഫീസര്‍ പദ്മിനി.സി പതാക ഉയര്‍ത്തി. ടൗണ്‍ ഹാളില്‍ നടന്ന ചടങ്ങില്‍ സബ് കളക്ടര്‍ ഹര്‍ഷില്‍ ആര്‍.മീണ ഉദ്ഘാടനം ചെയ്തു. ഡിഎംഒ ഡോ. എന്‍. രാജേന്ദ്രന്‍ അധ്യക്ഷത വഹിച്ചു.സിന്ധു ഡി. നായര്‍, പി.ജി സന്തോഷ,പി.സി സുനിത, ശോഭന കുമാരി ,ഗീതാ കുമാരി എ, ഇന്ദിര ടി, ഷീബ എല്‍.വി, വനജ കെ, ഷീബ പി, സോളി ജോസഫ്, ബെസ്സി ജോസഫ്, അരുണ്‍കുമാര്‍ പി വി എന്നിവര്‍ സംസാരിച്ചു.

ആര്‍ കെ പൊറ്റശ്ശേരി അവാര്‍ഡ് ശ്രീകുമാര്‍ മാവൂരിന്

കോഴിക്കോട്: പ്രശസ്ത ചിത്രകാരനും ശില്‍പിയുമായ ആര്‍.കെ പൊറ്റശ്ശേരിയുടെ സ്മരണാര്‍ത്ഥം ഏര്‍പ്പെടുത്തിയ ആര്‍.കെ പൊറ്റശ്ശേരി പുരസ്‌കാരത്തിന് യുവശില്‍പിയും ചിത്രകാരനുമായ ശ്രീകുമാര്‍ മാവൂര്‍ അര്‍ഹനായി. 10,001 രൂപയും പ്രശസ്തിപത്രവും ശില്‍പവും അടങ്ങുന്നതാണ് പുരസ്‌കാരം. ഈ മാസം 11ന് ഗുരുകുലം ആര്‍ട് ഗാലറിയില്‍ നടക്കുന്ന ചടങ്ങില്‍ മന്ത്രി എ,കെ ശശീന്ദ്രന്‍ അവാര്‍ഡ് സമ്മാനിക്കുമെന്ന് അവാര്‍ഡ് കമ്മിറ്റി ചെയര്‍മാന്‍ ഗുരുകുലം ബാബു, ആര്‍,കെ മധു, രമേഷ് മാണിക്യന്‍ എന്നിവര്‍ വാര്‍ത്താസമ്മേളനത്തില്‍ അറിയിച്ചു.

ഫെസ്റ്റ് കഴിഞ്ഞിട്ടും കമാനങ്ങൾ നോക്കു കുത്തിയായി റോഡിൽ തന്നെ

ചക്കിട്ടപാറ: ഏപ്രിൽ 15 മുതൽ 22 വരെയായിരുന്നു പെരുവണ്ണാമൂഴി ടൂറിസം ഫെസ്റ്റ്. ഇത് കഴിഞ്ഞിട്ട് 12 ദിവസം പിന്നിട്ടെങ്കിലും പാതകൾ കവർ ചെയ്ത് സ്ഥാപിച്ച സ്വാഗത കമാനങ്ങൾ മാറ്റാതെ നോക്കു കുത്തിയായി നിൽക്കുകയാണ്. ചക്കിട്ടപാറ പഞ്ചായത്തിന്‍റെ ഉത്തരവാദിത്വത്തിലാണ് ഇത് സ്ഥാപിച്ചത്. ചക്കിട്ടപാറ ടൗണിന്‍റെ സെന്‍റർ ഭാഗത്താണ് ഒരു കമാനം. ഓട്ടോസ്റ്റാന്‍റിനും യാത്രക്കാരെ കയറ്റാനായി ബസുകൾ നിർത്തുന്ന സ്ഥലത്തിനടുത്തുമാണിത്. കമാനം കാരണം പലപ്പോഴും ഇവിടെ ഗതാഗത കുരുക്കിന് ഇടയാകുന്നുണ്ട്. പെരുവണ്ണാമൂഴിയിലും പൊതു ശല്യമുണ്ടാക്കി ഒരു കമാനമുണ്ട്.

ഹൃദയം തുടി കൊട്ടും സ്മാരകം; ടി.പി. സ്‌ക്വയര്‍ നാടിന് സമര്‍പിച്ചു

വടകര: ടി.പി. ചന്ദ്രശേഖരന്‍ വെട്ടേറ്റു വീണ മണ്ണില്‍ ഹൃദയം തുടി കൊട്ടുന്ന കാഴ്ചകളുമായി സ്മാരകം ഉയര്‍ന്നു. ടിപി രക്തസാക്ഷി സ്‌ക്വയര്‍ എന്നു പേരിട്ട മന്ദിരം ടിപിയുടെ പതിമൂന്നാം രക്തസാക്ഷി ദിനത്തില്‍ നാടിനു സമര്‍പിച്ചു. ടി.പി. ചന്ദ്രശേഖരന്‍ കൊല്ലപ്പെടുന്ന സമയത്ത് ഓടിച്ച ബൈക്കും ധരിച്ച വാച്ചും കണ്ണടയുമെല്ലാം ടി.പി. രക്തസാക്ഷി സ്‌ക്വയറിലുണ്ട്. ഇവയോടൊപ്പം ഓര്‍മകളുടെ നെരിപ്പോട് ഉയര്‍ത്തുന്ന ചിത്രങ്ങളും വേദനിക്കുന്ന കാഴ്ചകളായി ഇവിടെ കാണാം. ഒപ്പം ഡിജിറ്റല്‍ ലൈബ്രറിയും. ഇന്നലെ രാവിലെ ആര്‍എംപിഐ അഖിലേന്ത്യാ ജനറല്‍ സെക്രട്ടറി മംഗത്‌റാം പസ്ല ടി.പി. സ്‌ക്വയര്‍ ഉദ്ഘാടനം ചെയ്തു. മന്ദിരത്തിനു മുന്നില്‍ സ്ഥാപിച്ച ടിപിയുടെ പൂര്‍ണകായ പ്രതിമ അനാഛാദന കര്‍മവും അദ്ദേഹം നിര്‍വഹിച്ചു. ഡിജിറ്റല്‍ ലൈബ്രറി ഉദ്ഘാടനം ആര്‍എംപിഐ തമിഴ്‌നാട് സംസ്ഥാന സെക്രട്ടറി കെ. ഗംഗാധര്‍ നിര്‍വഹിച്ചു. വള്ളിക്കാട്ട് ചന്ദ്രശേഖരനെ കൊലപ്പെടുത്തിയ സ്ഥലത്തിന് അടുത്തായാണ് റോഡിനോട് ചേര്‍ന്ന് സ്‌ക്വയര്‍ നിര്‍മിച്ചത്. ഈ സ്ഥലം ആര്‍എംപിഐ വില കൊടുത്ത് വാങ്ങുകയായിരുന്നു. ഇവിടെ ഉയര്‍ത്തിയ ടിപി സ്തൂപം പലതവണ തകര്‍ക്കപ്പെട്ടു. പതിമൂന്നാം വര്‍ഷത്തിലാണ് ടിപിയുടെ സ്മരണകള്‍ നിറഞ്ഞ മൂന്ന് നില മന്ദിരം നിര്‍മാണം പൂര്‍ത്തിയായി നാടിന് സമര്‍പിച്ചിരിക്കുന്നത്. 2012 മേയ് നാലിനു രാത്രിയാണ് ടി.പി. ചന്ദ്രശേഖരനെ സിപിഎം പ്രവര്‍ത്തകര്‍ വെട്ടിക്കൊന്നത്.

വളയത്ത് വീടിന് നേരെ അക്രമം

നാദാപുരം: വളയം ചുഴലിയിൽ വീടിന് നേരെ അജ്ഞാതരുടെ അക്രമണം. ചുഴലിയിലെ പീടികയുള്ള നിരവുമ്മൽ കണാരന്‍റെ വീടിന് നേർക്കാണ് അക്രമണമുണ്ടായത്. ശനിയാഴ്ച്ച രാത്രി പതിനൊന്നരയോടെയാണ് സംഭവം. വീട്ടു വളപ്പിലെ കരിങ്കല്ലുകൾ ഉപയോഗിച്ചാണ് അക്രമം നടത്തിയത്. വീടിന്‍റെ മുൻവശത്തെ ജനൽ ഗ്ലാസുകൾ പൂർണമായും തകർക്കപ്പെട്ടിട്ടുണ്ട്. മുൻവശത്തെ വാതിലിനും ഭിത്തിക്കും കേടുപാട് സംഭവിച്ചിട്ടുണ്ട്. നിലത്തെ ടൈലുകളും പൊട്ടിയിട്ടുണ്ട്. സംഭവ സമയത്ത് കണാരന്‍റെ മകനും ഭാര്യയും മക്കളും അടക്കമുള്ളവർ വീട്ടിലുണ്ടായിരുന്നു. ഇവർ ബഹളം വച്ചതിനെത്തുടർന്ന് സമീപവാസികൾ ഓടിയെത്തിയപ്പോഴേക്കും അക്രമികൾ ഓടി മറഞ്ഞിരുന്നു. കുടുംബം വളയം പോലീസ് സ്റ്റേഷനിൽ പരാതി നൽകി. വളയം പേലീസ് സംഘം വീട്ടിലെത്തി പരിശോധനകൾ നടത്തി.

സാമ്രാജ്യത്വ ശക്തികൾ യുദ്ധത്തിന് മുറവിളി കൂട്ടുന്നു: സത്യൻ മൊകേരി

പേരാമ്പ്ര: ലോക സാമ്പത്തിക ശക്തികൾ കുത്തക താൽപര്യങ്ങൾക്കു വേണ്ടി രാഷ്ട്രങ്ങളെ കീഴ്പ്പെടുത്തി സാമ്രാജ്യത്വം വളർത്താനുള്ള ശ്രമങ്ങളാണ് കണ്ടു വരുന്നതെന്ന് സിപിഐ കേന്ദ്ര കൺട്രോൾ കമ്മീഷൻ സെക്രട്ടറി സത്യൻ മൊകേരി അഭിപ്രായപ്പെട്ടു. സിപിഐ പേരാമ്പ്ര മണ്ഡലം പ്രതിനിധി സമ്മേളനം കായണ്ണയിൽ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. യുദ്ധം എന്നും ജനജീവിതത്തെ ദുസഹമാക്കുകയാണ് ചെയ്തത്. സാമ്രാജ്യത്വ കഴുകൻമാർ ഇതിനായി വട്ടമിട്ട് പറക്കുന്നുവെന്ന് സത്യൻ മൊകേരി ചൂണ്ടിക്കാട്ടി. സിപിഐ സംസ്ഥാന കൗൺസിൽ അംഗം ഇ.കെ. വിജയൻ എംഎൽഎ, സിപിഐ ജില്ലാ അസി: സെക്രട്ടറി പി.കെ. നാസർ, ആർ. ശശി, അജയ് ആവള എന്നിവർ പ്രസംഗിച്ചു.

ഗ്രാമീണ വഴികളിലൂടെയുള്ള സഞ്ചാരമായി ടൂറിസം വകുപ്പ് സ്റ്റാള്‍

കോഴിക്കോട്: കേരളത്തിന്‍റെ ഗ്രാമീണതയും പച്ചപുതച്ച മലയോരങ്ങളും കടല്‍ത്തീരത്തെ ഡെസ്റ്റിനേഷന്‍ കല്യാണങ്ങളും ഉള്‍പ്പെടെ വിനോദ സഞ്ചാര മേഖലയുടെ നേര്‍ചിത്രങ്ങള്‍ ഒരുക്കിയിരിക്കുകയാണ് "എന്‍റെ കേരളം' പ്രദര്‍ശന- വിപണന മേളയിലെ ടൂറിസം വകുപ്പ് സ്റ്റാളില്‍. ഉത്തരവാദിത്ത ടൂറിസം മേഖലയിലെ കേരളത്തിന്‍റെ സാധ്യതകള്‍ എടുത്തുകാണിക്കുന്ന വിവിധ കാഴ്ചകള്‍ കൊണ്ട് മനോഹരമാക്കിയ സ്റ്റാളില്‍ ഗ്രാമീണ വഴികളിലൂടെയുള്ള സഞ്ചാരത്തിന്‍റെ നേരനുഭവം പകരാന്‍ വയലും കുളവും തേവ് യന്ത്രവും ഓലക്കുടിലും തത്സമയ മണ്‍പാത്ര നിര്‍മാണവുമെല്ലാമുണ്ട്. ഒപ്പം പുതുതലമുറയുടെ വിവാഹ സ്വപ്നങ്ങള്‍ വര്‍ണാഭമാക്കുന്ന ഡെസ്റ്റിനേഷന്‍ വെഡിങ്ങിന്‍റെ ആവിഷ്‌കരണം പ്രധാന സെല്‍ഫി പോയിന്‍റാണ്.സാഹസിക ടൂറിസം അടയാളപ്പെടുത്തുന്ന കാഴ്ചകളും കൗതുകം പകരുന്നതാണ്. ഫോട്ടായും സെല്‍ഫിയുമെടുത്ത് ഈ സ്റ്റാളില്‍ സമയം ചെലവഴിക്കുന്നവര്‍ ഒട്ടേറെയാണ്. സന്ദര്‍ശകര്‍ക്ക് കേരളത്തിലെ വിനോദസഞ്ചാര മേഖലകളെ കുറിച്ചുള്ള വിവരങ്ങളും ഇവിടെ ലഭിക്കും. വിനോദസഞ്ചാര വകുപ്പിന്‍റെ സ്റ്റാളിനോട് ചേര്‍ന്നുള്ള പൊതുമരാമത്ത് വകുപ്പിന്‍റെ സ്റ്റാളിലേക്ക് പ്രവേശിക്കുന്നത് പ്രത്യേകമായി തയാറാക്കിയ വികസന പാലത്തിലൂടെയാണ്. കേരളത്തിന്‍റെ പശ്ചാത്തല വികസനത്തിന്‍റെ പ്രതീകമായി പാലങ്ങള്‍, മലയോര ഹൈവേ, തീരദേശ ഹൈവേ, റോഡുകള്‍, റസ്റ്റ് ഹൗസുകള്‍ തുടങ്ങിയവയുടെ മാതൃകകള്‍ കാണാം.

തണ്ണിമത്തൻ വേണോ , പുൽപ്പറമ്പിലെത്താം

മുക്കം: നെൽകൃഷി കൊയ്ത്ത് കഴിഞ്ഞ് വെറുതെ കിടക്കുന്ന വയൽ കണ്ടപ്പോൾ മലപ്പുറം സ്വദേശി സൈഫുല്ലക്ക് ഒരു ആഗ്രഹം. അവിടെ തണ്ണിമത്തൻ കൃഷിയിറക്കിയാലോ. മനസിലെ ആഗ്രഹം കൂട്ടുകാരോട് പങ്കുവച്ചു. പിന്നെ ഒട്ടും വൈകിയില്ല സൈഫുല്ലയും കൂട്ടുകാരും പ്രദേശത്തുള്ള വയലുകളെല്ലാം പാട്ടത്തിനെടുത്ത് തണ്ണിമത്തൻ കൃഷി ആരംഭിച്ചു. പുൽപ്പറമ്പിലെ 12 ഏക്കറോളം സ്ഥലത്താണ് സൈഫുല്ലയും വാഴക്കാട് മപ്രം സ്വദേശി സലീമും വാലില്ലാപുഴ സ്വദേശി അബ്ദുൽ ഖാദറും തണ്ണിമത്തൻ നട്ടത്. ഉണങ്ങിയ വയൽ ഉഴുതുമറിച്ച് ഡ്രിപ്പ് ഇറിഗേഷൻ നടത്തി ശാസ്ത്രീയമായി കൃഷി ചെയ്തപ്പോൾ പ്രതീക്ഷിക്കാത്ത വിളവ് ലഭിച്ചു. നമ്മുടെ നാട്ടിൽ തണ്ണിമത്തൻ കൃഷി അത്ര സുലഭമല്ലാത്ത സമയത്താണ് വ്യാവസായികാടിസ്ഥാനത്തിൽ ഇവർ നാലിനങ്ങൾ നട്ട് വിളവെടുത്തത്. കിരൺ, ഓറഞ്ച് മഞ്ച്, ജൂബിലി കിംഗ്, മഞ്ഞ എന്നീ നാലിനങ്ങളാണ് കൃഷി ചെയ്തത്.മധുരമൂറുന്ന സ്വാധോടു കൂടിയുള്ള തണ്ണിമത്തൻ വാങ്ങാൻ പ്രദേശത്തേക്ക് ആളുകൾ ഒഴുകുകയാണ്.വിളവെടുക്കുന്ന വയലിൽ നിന്നു തന്നെ വിപണനം നടത്തിക്കൊണ്ടിരിക്കുന്നു.ഇന്നലെ നടന്ന വിളവെടുപ്പ് ഉത്സവം മുക്കം കൃഷി ഓഫീസർ ടിൻസി ടോം, ഡിവിഷൻ കൗൺസിലർ ഗഫൂർ, നഗരസഭ സ്റ്റാൻഡിംഗ് കമ്മിറ്റി ചെയർമാൻമാരായ സത്യനാരായണൻ, മജീദ് ബാബു, റുബീന, കർഷകർ, നാട്ടുകാർ എന്നിവരുടെ സാന്നിധ്യത്തിൽ മുക്കം നഗരസഭ ചെയർമാൻ പി.ടി. ബാബു നിർവഹിച്ചു. ഇനി ഒരാഴ്ചകാലം പുൽപറമ്പിൽ തണ്ണീർമത്തൻ ദിനങ്ങളാണ്.

കോഴിക്കോട് സൗത്തില്‍ റേഷന്‍ ലഭിക്കാതെ ആയിരങ്ങള്‍

കോഴിക്കോട്: കോഴിക്കോട് സൗത്ത് മേഖലയില്‍ 50 ഓളം റേഷന്‍ കടകളില്‍ ഏപ്രില്‍ മാസത്തെ റേഷന്‍ സാധനങ്ങളെത്തിക്കാന്‍ ഭക്ഷ്യ സിവില്‍ സപ്ലൈസ് വകുപ്പ് അധികാരികള്‍ക്കായില്ല. ബേപ്പൂരിലെ റേഷന്‍ ഭക്ഷ്യധാന്യ സംഭരണകേന്ദ്രമായ എന്‍. എസ്. എഫ്. എ. ഗോഡൗണിലെ ഹെഡ്‌ലോഡ് വര്‍ക്കര്‍മാരുടെ തൊഴില്‍ തര്‍ക്കമാണ് ബേപ്പൂര്‍, മാറാട് ചക്കുംകടവ്, മുഖദാര്‍ ബീച്ച്, ഉള്‍പ്പെടേയുള്ള തീരദേശ മേഖലയിലടക്കം ഇരുപതിനായിരത്തോളം കുടുംബങ്ങള്‍ക്ക് ഏപ്രില്‍ മാസത്തെ റേഷന്‍ നിഷേധിക്കപ്പെടാന്‍ കാരണം. ജില്ലാ കളക്ടർ, എ.ഡി.എം, ജില്ലാ ലേബര്‍ ഓഫീസര്‍, ജില്ലാ സപ്ലൈ ഓഫീസര്‍ എന്നിവരുടെ അനുരഞ്ജന ശ്രമങ്ങളും വിജയം കണ്ടില്ല. ബേപ്പൂര്‍ മണ്ഡലം എംഎല്‍എയും പൊതുമരാമത്ത് വകുപ്പ് മന്ത്രി കൂടിയായ പി.എ.മുഹമ്മദ് റിയാസിനെ വിവരം ധരിപ്പിച്ചുവെങ്കിലും നടപടികള്‍ ഒന്നും ഉണ്ടായില്ല. ബദല്‍ സംവിധാനമായി റേഷന്‍ ലഭിക്കാത്ത പ്രദേശങ്ങളിലേക്ക് കോഴിക്കോട് വെള്ളയിലെ എന്‍.എസ്.എഫ്.ഗോഡൗണില്‍ നിന്ന് റേഷന്‍ നല്‍കാനുള്ള നടപടിയുണ്ടാവണമെന്നു റേഷന്‍ വ്യാപാരികള്‍ ആവശ്യപ്പെട്ടു. ഏപ്രില്‍ മാസത്തെ റേഷന്‍ വിതരണം ഈ മാസം മൂന്നുവരെ ദീര്‍ഘിപ്പിച്ചു നല്‍കിയിരുന്നെങ്കിലും അതിനുമുമ്പായി പോലീസ് സഹകരണത്തോടെ രണ്ട് ലോഡ് ഭക്ഷ്യധാന്യങ്ങള്‍ മാത്രമാണ് വിതരണം ചെയ്യാനായത്. ആദ്യ ലോഡ് അരി സ്റ്റോക്കില്ലാത്ത ഏതാനും കടകളിലെത്തിച്ചുവെങ്കിലും രണ്ടാമത്തെ ലോഡ് ഭക്ഷ്യധാന്യം വിഹിതം ഭാഗിച്ചു നല്‍കാതെ ഒരു കടയിലേക്ക് മാത്രം നല്‍കിയത് പരാതികള്‍ക്കും പ്രതിഷേധങ്ങള്‍ക്കും ഇടയാക്കി. പ്രശ്‌നപരിഹാരത്തിന് അിടയന്തര നടപടി ഉണ്ടാവണമെന്ന് ഓള്‍ കേരള റീട്ടെയില്‍ റേഷന്‍ ഡീലേഴ്‌സ് അസോസിയേഷന്‍ സംസ്ഥാന ജനറല്‍ സെക്രട്ടറി ടി. മുഹമ്മദാലി, കോഴിക്കോട് ജില്ലാ പ്രസിഡന്‍റ് ഇ. ശ്രീജന്‍, ജനറല്‍ സെക്രട്ടറി കെ.പി. അഷ്‌റഫ് എന്നിവര്‍ ആവശ്യപ്പെട്ടു.

ഇഫയുടെ അഗ്രിക്കള്‍ച്ചര്‍ നഴ്‌സറി ഉദ്ഘാടനം ചെയ്തു

താമരശേരി: താമരശേരി രൂപതയുടെ സ്ഥാപനമായ ഇന്‍സ്റ്റിറ്റ്യൂട്ട് ഓഫ് ഫുഡ് ആന്‍ഡ് അഗ്രികള്‍ച്ചര്‍ എത്തിക്‌സിന്‍റെ (ഇഫ) ആഭിമുഖ്യത്തില്‍ ആരംഭിച്ച അഗ്രിക്കള്‍ച്ചറല്‍ നഴ്‌സറിയുടെ ഉദ്ഘാടനവും വെഞ്ചിരിപ്പും താമരശേരി ബിഷപ് മാര്‍ റെമീജിയോസ് ഇഞ്ചനാനിയില്‍ നിര്‍വ്വഹിച്ചു. താമരശേരി ബിഷപ്‌സ് ഹൗസിന്‍റെ അടുത്തായി ആരംഭിച്ച നഴ്‌സറിയില്‍ പൂച്ചെടികള്‍, ഫലവൃക്ഷത്തൈകള്‍, വിത്തുകള്‍, ചെടിച്ചട്ടികള്‍, വളം, ജൈവ കീടനാശിനികള്‍, കാര്‍ഷിക ഉപകരണങ്ങള്‍, ഗ്രോബാഗുകള്‍ തുടങ്ങിയവ കുറഞ്ഞ നിരക്കില്‍ ലഭിക്കും. കര്‍ഷകര്‍ ഉല്പാദിപ്പിക്കുന്ന സാധനങ്ങള്‍ വില്‍ക്കാനുള്ള സംവിധാനങ്ങളും ഇവിടെ ഒരുക്കിയിട്ടുണ്ട്.

ചെക്യാട് യുവാവിനെ കാണാതായതായി പരാതി

നാദാപുരം: ചെക്യാട് താനക്കോട്ടൂരിൽ യുവാവിനെ കാണാതായതായി പരാതി. പാട്ടോൻ കുന്നുമ്മൽ അബ്ദുൽ സലീമിനെ (34) യാണ് കാണാതായതായി ബന്ധുക്കൾ വളയം പോലീസിൽ പരാതി നൽകിയത്. കഴിഞ്ഞ മേയ് ഒന്നിന് രാവിലെ ആറരയോടെ വീട്ടിൽ നിന്നും പുറത്തേക്ക് ഇറങ്ങിയ ശേഷം കാണാതായതാണ്. പാറക്കടവ് ടൗണിൽ പച്ചക്കറി കടയിലെ തൊഴിലാളി ആയിരുന്നു. കടയിലേക്ക് പോവുന്നു എന്നാണ് വീട്ടിൽ നിന്ന് ഇറങ്ങിയത്. കടയിൽ എത്തിയിരുന്നില്ല. വളയം പോലീസ് കേസ് എടുത്ത് അന്വേഷണം ആരംഭിച്ചു.

നാല് ബ്ലോക്കുകളില്‍ മൊബൈല്‍ വെറ്ററിനറി യൂണിറ്റ് യാഥാര്‍ഥ്യമായി

കോഴിക്കോട്: ക്ഷീര കര്‍ഷകരുടെ വീട്ടുപടിക്കല്‍ സേവനം ലഭ്യമാക്കുന്നതിനായി റീബിള്‍ഡ് കേരള ഇനീഷ്യേറ്റീവിന്‍റെ ഭാഗമായി ജില്ലയിലെ നാല് ബ്ലോക്കുകളില്‍ മൊബൈല്‍ വെറ്ററിനറി യൂണിറ്റുകള്‍ പ്രവര്‍ത്തനം ആരംഭിച്ചു. ഒരു മൊബൈല്‍ സര്‍ജറി യൂണിറ്റും സജ്ജമായിട്ടുണ്ട്. പേരാമ്പ്ര, പന്തലായനി, കോഴിക്കോട്, വടകര ബ്ലോക്കുകളില്‍ വൈകീട്ട് ആറ് മുതല്‍ രാവിലെ ആറ് വരെയാണ് മൊബൈല്‍ വെറ്ററിനറി യൂണിറ്റുകള്‍ പ്രവര്‍ത്തിക്കുക.

കണ്‍സ്യൂമര്‍ഫെഡിന്‍റെ സ്റ്റുഡന്‍റ്സ് മാര്‍ക്കറ്റുകള്‍ക്ക് തുടക്കം

കോഴിക്കോട്: വിലക്കുറവില്‍ വിദ്യാര്‍ഥികള്‍ക്ക് പഠനോപകരണങ്ങള്‍ ലഭ്യമാക്കാന്‍ സ്റ്റുഡന്‍റ്സ് മാര്‍ക്കറ്റുകളുമായി കണ്‍സ്യൂമര്‍ഫെഡ്. വിദ്യാര്‍ഥികള്‍ക്ക് വേണ്ടതെല്ലാം ഒരു കുടക്കീഴില്‍ അണിനിരത്തി ജില്ലയിലെ 40 കേന്ദ്രങ്ങളിലാണ് സ്റ്റുഡന്‍റ്സ് മാര്‍ക്കറ്റുകള്‍ ആരംഭിക്കുന്നത്. മെച്ചപ്പെട്ട പഠനത്തിന് മികച്ച പഠനോപകരണങ്ങള്‍ എന്ന ലക്ഷ്യം മുന്‍നിര്‍ത്തിയാണ് സ്റ്റുഡന്‍റ്സ് മാര്‍ക്കറ്റുകള്‍ പ്രവര്‍ത്തിക്കുക. ജില്ലയിലെ ത്രിവേണി മെഗാ സ്റ്റുഡന്‍റ്സ് മാര്‍ക്കറ്റ് മുതലക്കുളത്ത് മന്ത്രി പി.എ. മുഹമ്മദ് റിയാസ് ഉദ്ഘാടനം ചെയ്തു. ത്രിവേണി സ്റ്റുഡന്‍റ്സ് മാര്‍ക്കറ്റുകളുടെ ജില്ലാതല ഉദ്ഘാടനവും മന്ത്രി നിര്‍വഹിച്ചു. കണ്‍സ്യൂമര്‍ഫെഡ് ഡയറക്ടര്‍ എം. മെഹബൂബ് അധ്യക്ഷത വഹിച്ചു. ശീതീകരിച്ച ത്രിവേണി മെഗാ സ്റ്റുഡന്‍റ്സ് മാര്‍ക്കറ്റാണ് ഇത്തവണ മുതലക്കുളത്ത് കണ്‍സ്യൂമര്‍ഫെഡ് ഒരുക്കിയിരിക്കുന്നത്. ത്രിവേണി നോട്ട്ബുക്ക് ഗ്യാലറി, ബാഗ്ഹൗസ്, ഷൂമാര്‍ട്ട്, അബ്രല്ല ഹൗസ്, വിവിധതരം കളിപ്പാട്ടങ്ങള്‍, ഐക്യൂ വര്‍ധിപ്പിക്കുന്ന പ്രത്യേകതരം പഠനോപകരണങ്ങളും ഗൃഹോപകരണങ്ങളും ലഭ്യമാകുന്ന കിഡ്‌സ് ആന്‍ഡ് മദേഴ്‌സ് കോര്‍ണര്‍, പെന്‍സില്‍ ബോക്‌സ്, ലഞ്ച്‌ബോക്‌സ്, വാട്ടര്‍ബോട്ടില്‍, പേന, പെന്‍സില്‍, ഇന്‍സ്ട്രുമെന്‍റ് ബോക്‌സ്, കളര്‍പെന്‍സിലുകള്‍ തുടങ്ങിയവ ലഭിക്കുന്ന മറ്റ് പഠനോപകരണ വിഭാഗം എന്നിവ മുതലക്കുളത്തെ ത്രിവേണി മെഗാ സ്റ്റുഡന്‍റ്സ് മാര്‍ക്കറ്റിന്‍റെ പ്രത്യേകതയാണ്. ത്രിവേണി നോട്ട്ബുക്കുകള്‍ വീട്ടിലിരുന്ന് ബുക്ക് ചെയ്യാനും അവസരമുണ്ട്.

തൊഴിലാളിക്ക് സൂര്യതാപം ഏറ്റു

കോടഞ്ചേരി: കോടഞ്ചേരിയിൽ കരിങ്കൽ പണിക്കിടെ തൊഴിലാളിക്ക് സൂര്യതാപം ഏറ്റു. കഴിഞ്ഞദിവസം തോട്ടുംമുഴിയിൽ പണിയെടുക്കുന്നതിനിടെ കളപ്പാട്ട് മത്തായി (69)ക്കാണ് സൂര്യതാപം ഏറ്റത്. കൈയ്യുടെ തൊലിപ്പുറത്ത് കുമിള പോലെ രൂപപ്പെടുകയും തൊലി പോയ നിലയിലുമാണ്. കോടഞ്ചേരി കുടുംബാരോഗ്യ കേന്ദ്രത്തിൽ ചികിത്സ തേടി.

മയക്കുമരുന്ന് കടത്ത് : ബംഗളൂരുവിൽ പിടിയിലായത് അഞ്ച് നാദാപുരം സ്വദേശികൾ ഉൾപ്പെടെ എട്ട് പേർ

നാദാപുരം: കേരളത്തിൽ വിൽപനക്കായി ശേഖരിച്ച വൻ മയക്കുമരുന്ന് ശേഖരവുമായി അഞ്ച് നാദാപുരം സ്വദേശികൾ ഉൾപ്പെടെ എട്ട് പേർ ബംഗളൂരുവിൽ പോലീസ് പിടിയിൽ. നാദാപുരം പോലീസ് സ്റ്റേഷൻ പരിസരത്തെ പൊന്നൻ കുനിയിൽ സാബിർ (35), ഈയ്യങ്കോട് മേപ്പള്ളി വീട്ടിൽ ജാഫർ (36), നാദാപുരം സ്വദേശി വെള്ളച്ചാലിൽ ഷമീൽ (32), കച്ചേരി സ്വദേശി ചെങ്ങാടി താഴെ കുനിയിൽ മുഹമ്മദ് അബ്ദുൾ സമദ് (31), തൂണേരി സ്വദേശി കുറുങ്ങോട്ട് മുഹമ്മദ് ഷാക്കിർ (28), മാഹി പാറക്കൽ പത്തലത്ത് വീട്ടിൽ മുഹമ്മദ് ഷക്കീർ (48) കോട്ടയം കാത്തിരപ്പള്ളി സ്വദേശി മുഹമ്മദ് നയിസ് (27), കണ്ണൂർ നിസാമുദ്ദീൻ (30) എന്നിവരാണ് അറസ്റ്റിലായത്. ബംഗളൂരു യലഹങ്ക പോലീസ് സ്റ്റേഷൻ പരിധിയിലെ സിൽവർ കി ഹോട്ടൽ മുറിയിൽ നിന്നുമാണ് പ്രതികൾ പിടിയിലായത്.116 ഗ്രാം എംഡിഎംഎ ക്രിസ്റ്റൽ, ഇലക്ട്രോണിക് ത്രാസ്, 10 മൊബൈൽ ഫോണുകൾ, മൊബൈൽ ടാബുകൾ, കെഎൽ 18 എൽ 9783 നന്പർ ഐ 20 കാർ, കെ എൽ 18 എക്സ് 5999 നമ്പർ സ്വിഫ്റ്റ് കാറുമാണ് പോലീസ് പിടികൂടിയത്. പിടികൂടിയ എംഡിഎംഎക്ക് 27 ലക്ഷത്തിലേറെ രൂപ വില വരുമെന്ന് പോലീസ് അറിയിച്ചു. കേരളത്തിൽ നിന്നുള്ള പ്രതികൾ ബംഗളൂരിലെത്തി വാടകയ്ക്ക് താമസിക്കുകയും നൈജീരിയയിലെ അറിയപ്പെടുന്ന മയക്കുമരുന്ന് കച്ചവടക്കാരിൽനിന്ന് കുറഞ്ഞ വിലയ്ക്ക് എംഡിഎംഎ ക്രിസ്റ്റൽ വാങ്ങി വിൽപന നടത്തുകയായിരുന്നെന്ന് പോലീസ് പറഞ്ഞു. പ്രതികളെ കോടതി റിമാൻഡ് ചെയ്തു. ബംഗളൂരു കേന്ദ്രീകരിച്ച് റിയൽ എസ്‌റ്റേറ്റ്, ബേക്കറി ബിസിനസ് എന്നിങ്ങനെയാണ് പ്രതികൾ നാട്ടിലുള്ളവരെ ധരിപ്പിച്ചിരുന്നത്. നാദാപുരം ടൗൺ, തലശേരി റോഡ്, തൂണേരി, കല്ലാച്ചി, പാറക്കടവ് മേഖലകളിൽ വിൽപന നടത്താനായി കൊണ്ട് വരാനായിരുന്നു മയക്ക് മരുന്ന് ശേഖരം സൂക്ഷിച്ചത്.

അപകടത്തില്‍പ്പെട്ടവരെ കണ്ട് വാഹനത്തില്‍ നിന്നിറങ്ങി ഇടപെട്ട് പ്രിയങ്കഗാന്ധി

താമരശേരി: വഴിമധ്യേ അപകടത്തില്‍പ്പെട്ടവരെ കണ്ട് വാഹനം നിറുത്തി ഇറങ്ങി ചികിത്സ ഉറപ്പാക്കാന്‍ ഇടപെടലുകള്‍ നടത്തി വയനാട് എംപി പ്രിയങ്കാഗാന്ധി. കരിപ്പൂര്‍ വിമാനത്താവളത്തില്‍നിന്ന് കല്‍പ്പറ്റയിലേക്കുള്ള യാത്രമധ്യേ ശനിയാഴ്ച രാത്രി ഈങ്ങാപ്പുഴയില്‍ ഉണ്ടായ കാര്‍ അപകടം ശ്രദ്ധയില്‍ പെട്ട പ്രിയങ്ക വാഹനം നിര്‍ത്തി ഇറങ്ങുകയും തന്‍റെ വാഹനവ്യൂഹത്തിലെ ഡോക്ടറെ വരുത്തി പരിക്കേറ്റവരെ പരിശോധിച്ച് പ്രാഥമിക ചികിത്സ നല്‍കുകയും ചെയ്തു. തുടര്‍ന്ന് വാഹനവ്യൂഹത്തിലെ ആംബുലന്‍സില്‍ ആശുപത്രിയിലെത്തിക്കാന്‍ നിര്‍ദ്ദേശം നല്‍കിയാണ് പ്രിയങ്ക ഗാന്ധി യാത്ര തുടര്‍ന്നത്. കൊയിലാണ്ടി സ്വദേശിയായ നൗഷാദും കുടുംബവും സഞ്ചാരിച്ചിരുന്ന കാര്‍ മറ്റൊരു കാറുമായി കൂട്ടിയിടിച്ചാണ് അപകടമുണ്ടായത്.

വഖഫ് ഭേദഗതി സ്വത്ത് കൊള്ളയടിക്കുന്നത് തടയാന്‍: സി.കെ. പത്മനാഭന്‍

കോഴിക്കോട്: സാധാരണ മുസ്‌ലീംകള്‍ക്ക് ഉപയുക്തമാകേണ്ട വഖഫ് സ്വത്ത് ചില പുരോഹിതര്‍ കൊള്ളയടിക്കാതിരിക്കാനാണ് കേന്ദ്ര സര്‍ക്കാര്‍ വഖഫ് ഭേദഗതി നിയമം കൊണ്ടുവന്നതെന്ന് ബിജെപി ദേശീയ സമിതി അംഗം സി.കെ. പത്മനാഭന്‍. ബിജെപി കോഴിക്കോട് സിറ്റി ജില്ലാകമ്മറ്റി നടത്തിയ വഖഫ് ഭേദഗതി നിയമ ശില്‍പശാല ഉദ്ഘാടനം ചെയ്യുകയായിരുന്നു അദ്ദേഹം. മുസ്‌ലീം സമുദായത്തിന്‍റെ ക്ഷേമപ്രവര്‍ത്തനത്തിനായി കൊണ്ടുവന്ന വഖഫ് നിയമം പ്രീണനരാഷ്ട്രീയത്തിന്‍റെ ഭാഗമായി അധികാരത്തിലെത്തിയവര്‍ മതപുരോഹിതര്‍ക്ക് കൊള്ളയടിക്കാന്‍ അവസരമൊരുക്കി. ദുരൂഹമായ കാര്യങ്ങളാണ് വഖഫിന്‍റെ കാര്യത്തില്‍ നടക്കുന്നത്. മുനമ്പം മാത്രമല്ല കുംഭമേള നടന്ന പ്രയാഗ് രാജും പാര്‍ലമെന്‍റ്നില്‍ക്കുന്ന സ്ഥലവും ഉള്‍പ്പെടെ രാജ്യത്തെ ഭൂരിഭാഗ സ്വത്തും വഖഫ് ചെയ്തതാണെന്ന് ചില മതപുരോഹിതര്‍ പറഞ്ഞപ്പോഴാണ് ജനം അതിന്‍റെ ഭീകരത മനസ്സിലാക്കിയത്. രാജ്യത്ത് എന്ത് പുരോഗമനപരമായ നിയമം കൊണ്ടുവന്നാലും അത് മുസ്‌ലീം വിരുദ്ധമാക്കി യുദ്ധസമാനമായ വികാരം ഇളക്കിവിടുകയാണ് കമ്യൂണിസ്റ്റ് പാര്‍ട്ടിയും കോണ്‍ഗ്രസും. ഒരുമിച്ച് കഴിയേണ്ട ജനതയെ വിഭജിച്ച് ചോരപ്പുഴ ഒഴുക്കാനാണ് ഇവര്‍ ശ്രമിക്കുന്നത്. പഹല്‍ഗാം കൂട്ടക്കൊലയ്ക്കുശേഷം എന്തുകൊണ്ട് യുദ്ധത്തിലൂടെ തിരിച്ചടിക്കുന്നില്ല എന്നാണ് ഇക്കൂട്ടര്‍ ചോദിക്കുന്നത്. ഇപ്പോള്‍ കാണുന്ന നിശബ്ദത കൊടുങ്കാറ്റിനു മുന്നിലെ ശാന്തതമാണ്. രാഷ്ട്രമെന്ന നിലയില്‍ യുക്തിഭദ്രമായി നിലനില്‍ക്കാനുള്ള യോഗ്യത പാക്കിസ്ഥാന് ഇല്ല. ഇന്ത്യാവിരുദ്ധതയില്‍ വൈകാരികമായാണ് ആ രാജ്യം ഇത്രകാലം നിലനിന്നത്. പാക്കിസ്ഥാന്‍ പ്രേമം പ്രച്ഛന്നമായി തുടരുന്നവരും ഇടതു-വലതു പൂതനമാരും ശത്രുരാജ്യത്തിന് ഊര്‍ജം പകരുന്ന നിലപാടെടുത്താലും വൈകാതെ പാക്കിസ്ഥാന്‍ ഭൂമുഖത്തു നിന്ന് ഇല്ലാതാകുമെന്നും അദ്ദേഹം പറഞ്ഞു. സിറ്റി ജില്ലാ പ്രസിഡന്‍റ് അഡ്വ.കെ.പി പ്രകാശ് ബാബു അധ്യക്ഷനായിരുന്നു. ജീവന ഡയറക്ടര്‍ ഫാ.ആല്‍ഫ്രഡ് വടക്കെതുണ്ടിയി‌ല്‍, ടി.വി.ഉണ്ണികൃഷ്ണന്‍, അഡ്വ. രമ്യ മുരളി, എം.സുരേഷ്, വി.കെ. സജീവന്‍, അഡ്വ. എന്‍. അരവിന്ദന്‍, അഡ്വ. വി.ശ്യാംഅശോക്, അബ്ദുള്‍ റസാഖ്, ജോയ് വളവില്‍ എന്നിവര്‍ പങ്കെടുത്തു.

സിഡബ്ല്യുആര്‍ഡിഎമ്മിന് ഇഐഎ അക്രഡിറ്റേഷന്‍

കോഴിക്കോട്: ജല മേഖലയില്‍ പ്രവര്‍ത്തിക്കുന്ന കുന്നമംഗലത്തെ കേരള ശാസ്ത്ര സാങ്കേതിക കൗണ്‍സില്‍ ഗവേഷണ സ്ഥാപനമായ ജലവിഭവ വികസന വിനിയോഗ കേന്ദ്രത്തിന് (സിഡബ്ല്യുആര്‍ഡിഎം) നദീതട പദ്ധതികളുടെ പരിസ്ഥിതി ആഘാത നിര്‍ണ്ണയത്തിനുള്ള എന്‍എബിഇടി അക്രഡിറ്റേഷന്‍ ലഭിച്ചു. പരിസ്ഥിതി ആഘാത വിലയിരുത്തല്‍ പഠനങ്ങള്‍ നടത്താന്‍ അംഗീകാരം ലഭിച്ച കേരളത്തിലെ അഞ്ച് സ്ഥാപനങ്ങളില്‍ ഒന്നാണ് സിഡബ്ല്യുആര്‍ഡിഎം. അക്രഡിറ്റേഷന്‍ ഉപയോഗിച്ച്, ജലവൈദ്യുത പദ്ധതികള്‍, ജലസേചന പദ്ധതികള്‍ തുടങ്ങിയ നദീതട പദ്ധതികളില്‍ പരിസ്ഥിതി ആഘാത പഠനങ്ങള്‍ നടത്താന്‍ കഴിയും. നദീതട പദ്ധതികളില്‍ ഇഐഎ അംഗീകാരം ലഭിച്ച കേരളത്തിലെ ഏക സ്ഥാപനമാണിത്.

നിറഞ്ഞ സദസില്‍ സെമിനാറുകള്‍ക്ക് തുടക്കം

കോഴിക്കോട്: ലോക സഞ്ചാരികളെ കേരളത്തിലേക്ക് ആകര്‍ഷിക്കുന്നത് വഴി തൊഴിലും വരുമാനവും വര്‍ധിപ്പിക്കാന്‍ കഴിഞ്ഞെന്നും ടൂറിസം കേന്ദ്രങ്ങളില്‍ ആവശ്യമായ സൗകര്യങ്ങള്‍ ഒരുക്കാന്‍ സര്‍ക്കാരിന് സാധിച്ചെന്നും പി.ടി.എ. റഹീം എംഎല്‍എ. "എന്‍റെ കേരളം' പ്രദര്‍ശന-വിപണന മേളയുടെ ഭാഗമായി നടത്തുന്ന സെമിനാറുകളുടെ ഉദ്ഘാടനം നിര്‍വഹിക്കുകയായിരുന്നു അദ്ദേഹം."പശ്ചാത്തല വികസനവും ടൂറിസം വളര്‍ച്ചയും' എന്ന വിഷയത്തിലാണ് ആദ്യ ദിവസത്തെ സെമിനാര്‍ നടന്നത്. പശ്ചാത്തല വികസന മേഖലയിലുണ്ടായ വികസനങ്ങളിലൂടെയും ഡെസ്റ്റിനേഷന്‍ ടൂറിസം, ഉത്തരവാദിത്ത ടൂറിസം, ടൂറിസം ക്ലബുകള്‍ തുടങ്ങിയവയിലൂടെയും പൊതുവായി വിനോദസഞ്ചാര മേഖലയില്‍ വലിയ നേട്ടമുണ്ടാക്കാന്‍ കഴിഞ്ഞതായി സെമിനാര്‍ വിലയിരുത്തി. കോവിഡാനന്തരം ലോകം കാണാന്‍ ആഗ്രഹിക്കുന്ന പ്രധാന ഇടങ്ങളില്‍ ഒന്നായി കേരളം മാറിയതിനു പിന്നില്‍ സര്‍ക്കാരിന്‍റെ ദീര്‍ഘവീക്ഷണമുള്ള പദ്ധതികള്‍ ഉണ്ടെന്നും ഡിസൈന്‍ പോളിസിയിലൂടെ കേരളത്തിന്‍റെ മുഖച്ഛായ മാറ്റാന്‍ കഴിയുമെന്നും അഭിപ്രായമുയര്‍ന്നു. സെമിനാര്‍ കമ്മിറ്റി ചെയര്‍മാന്‍ ടി.വി. നിര്‍മലന്‍ അധ്യക്ഷത വഹിച്ചു. സെമിനാര്‍ നോഡല്‍ ഓഫീസര്‍ അബ്ദുല്‍ ഹക്കീം, ജില്ലാ ഇന്‍ഫര്‍മേഷന്‍ ഓഫീസര്‍ അബ്ദുല്‍ കരീം എന്നിവര്‍ പ്രസംഗിച്ചു.

പേവിഷ ബാധയേറ്റ് കുട്ടി മരിച്ച സംഭവം: മെഡിക്കല്‍ കോളജിനെതിരേ പരാതിയുമായി പിതാവ്

കോഴിക്കോട്: പെരുവള്ളൂരില്‍ പേവിഷബാധയേറ്റ് അഞ്ചര വയസുകാരി മരിച്ച സംഭവത്തില്‍ കോഴിക്കോട് മെഡിക്കല്‍ കോളജിന് വീഴ്ച സംഭവിച്ചുവെന്ന പരാതിയുമായി കുട്ടിയുടെ പിതാവ് സല്‍മാനുല്‍ ഫാരിസ്. മെഡിക്കല്‍ കോളജില്‍ ചികിത്സ വൈകിയെന്നും ചികിത്സാ പിഴവിനെതിരെ പരാതി നല്‍കുമെന്നും സിയയുടെ പിതാവ് പറഞ്ഞു. സര്‍ക്കാരിന്‍റെ ഭാഗത്തു നിന്നും ആരോഗ്യ വകുപ്പിന്‍റെ ഭാഗത്തു നിന്നും ആരും ബന്ധപ്പെട്ടില്ല. വാക്‌സിന്‍ എടുത്തിട്ടും മരണം സംഭവിച്ചതില്‍ വിശദമായ പഠനം വേണമെന്നും കുടുംബം ആവശ്യപ്പെട്ടു. കഴിഞ്ഞ ദിവസമാണ് സിയ മരിച്ചത്. മാര്‍ച്ച് 29നാണ് കുട്ടിയ്ക്ക് നായയുടെ കടിയേറ്റത്. ചോരയില്‍ കുളിച്ച നിലയിലായിരുന്നു കുട്ടി. ആദ്യം തിരൂരങ്ങാടി താലൂക് ആശുപത്രിയിലേക്കാണ് കൊണ്ടു പോയത്. ഇതിനുള്ള ഡോക്ടര്‍ ഇവിടെ ഇല്ലെന്നാണ് പറഞ്ഞത്. ഉടന്‍ തന്നെ കോഴിക്കോട് മെഡിക്കല്‍ കോളജിലേക്ക് കൊണ്ടുപോയെന്നും പിതാവ് പറഞ്ഞു.ആദ്യം ചികിത്സ നല്‍കിയ ശേഷം 48 മണിക്കൂര്‍ കഴിഞ്ഞു വരാന്‍ പറഞ്ഞു. പിന്നീട് പനി ബാധിച്ചപ്പോള്‍ കുട്ടിക്ക് ഉറങ്ങാന്‍ കഴിയാത്ത അവസ്ഥയായിരുന്നു. കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സ വൈകി. മുറിവ് തുന്നാതെ തന്നെ മടക്കി വിടുകയായിരുന്നു. ആദ്യ ഇഞ്ചക്ഷന്‍ കൊടുത്തു കഴിഞ്ഞ് 48 മണിക്കൂര്‍ കഴിഞ്ഞേ അടുത്ത ചികിത്സ ചെയ്യാനാവൂ എന്ന് പറഞ്ഞു. പിന്നീട് രണ്ട് ദിവസം കഴിഞ്ഞ് തലയില്‍ പത്ത് തുന്നിക്കെട്ടിട്ടു. നായയുടെ കടിയേറ്റ് ഉടന്‍ 20 മിനിട്ടു കൊണ്ട് തിരൂരങ്ങാടി താലൂക്ക് ആശുപതിയില്‍ എത്തിച്ചുവെന്നും പിതാവ് പറഞ്ഞു. എന്നാല്‍, വിശദീകരണവുമായി ആശുപത്രി അധികൃതരും രംഗത്തെത്തി. കാറ്റഗറി മൂന്നില്‍ വരുന്ന കേസാണിതെന്നും ഇത്തരം കേസുകളില്‍ മുറിവ് തുന്നാൻ പാടില്ലെന്നാണ് അംഗീകൃത മാര്‍ഗനിര്‍ദേശമെന്നും അധികൃതര്‍ അവകാശപ്പെട്ടു.

കാണാതായ ആളുടെ മൃതദേഹം കിണറ്റിൽ കണ്ടെത്തി

താമരശേരി: ഒരാഴ്ചയായി കാണാതായ ആളുടെ മൃതദേഹം കിണറ്റിൽ കണ്ടെത്തി. താമരശേരി വെഴുപ്പൂർ വൃന്ദാവൻ എസ്റ്റേറ്റിൽ താമസിക്കുന്ന സന്ദീപ് എന്ന ബൈജു (55) ആണ് മരിച്ചത്. സംസ്ഥാന പാതയിൽ വെഴുപ്പൂർ അമൃതാനന്ദമയി സദ്സംഗ സമിതി കെട്ടിടത്തിനു സമീപത്തെ കിണറ്റിൽ ഇന്നലെ ഉച്ചയ്ക്ക് 12 ഓടെ സമീപവാസിയാണ് മൃതദേഹം കണ്ടെത്തിയത്. കൈയിലെ വളയും വസ്ത്രങ്ങളും കണ്ട് സഹോദരനാണ് മൃതദേഹം സന്ദീപിന്‍റേതെന്ന് തിരിച്ചറിഞ്ഞത്. ഒരാഴ്ചയായി സന്ദീപിനെ കാണാനില്ലായിരുന്നു. ഇത് സംബന്ധിച്ച് താമരശേരി പോലീസിൽ പരാതി നൽകിയിരുന്നു. അവിവാഹിതനായ ഇയാൾ വയനാട്ടിൽ ഉൾപ്പെടെ കൃഷി നടത്തിവരികയായിരുന്നു. മുക്കത്ത് നിന്നും അഗ്നിരക്ഷാസേന സംഘമെത്തിയാണ് മൃതദേഹം കിണറ്റിൽ നിന്നും പുറത്തെടുത്തത്. താമരശേരി പോലീസ് ഇൻക്വസ്റ്റ് നടത്തിയ മൃതദേഹം കോഴിക്കോട് മെഡിക്കൽ കോളജ് ആശുപത്രിയിലേക്ക് പോസ്റ്റ് മോർട്ടത്തിന് അയച്ചു. ഇന്ന് സംസ്കാരം നടക്കും. വി.എം.ശ്രീനിവാസൻ നായരുടെയും ബാലാമണി (തങ്കം)യുടെയും മകനാണ് ബൈജു. സുധീപ് സഹോദരനാണ്.

ഉരുവില്‍ നിന്നു വീണ തമിഴ്‌നാട് സ്വദേശി മുങ്ങിമരിച്ചു

കോഴിക്കോട്: തുറമുഖ വാര്‍ഫില്‍ നങ്കൂരമിട്ട ഉരുവില്‍ നിന്നു ചാലിയാറില്‍ വീണ തമിഴ്‌നാട് സ്വദേശി മുങ്ങിമരിച്ചു. തൂത്തുകുടി സ്വദേശി സെല്‍വനാണ് (48) മരിച്ചത്. ലക്ഷദ്വീപിലേക്ക് ചരക്ക് കയറ്റാന്‍ ബേപ്പൂര്‍ പോര്‍ട്ടിന്‍റെ വാര്‍ഫില്‍ നങ്കൂരമിട്ട എംഎസ്‌വി മൗലാ എന്ന ഉരുവിലെ തൊഴിലാളിയായിരുന്നു. ഉരുവിന്‍റെ മുകള്‍ത്തട്ടില്‍ നിന്നും പുലര്‍ച്ചെ താഴെത്തട്ടിലേക്ക് വശത്തെ കോണിയിലൂടെ ഇറങ്ങുന്നതിനിടെ കാല്‍ തെന്നി പുഴയിലേക്ക് വീഴുകയായിരുന്നു. ശബ്ദം കേട്ട് സഹപ്രവര്‍ത്തകര്‍ കയറിട്ടുനല്‍കി രക്ഷപ്പെടുത്താന്‍ ശ്രമിച്ചെങ്കിലും കയറില്‍ പിടിക്കാന്‍ കഴിയാതെ സെല്‍വന്‍ മുങ്ങിപ്പോവുകയായിരുന്നു. തുടര്‍ന്ന് ഉരു ജീവനക്കാര്‍ കോസ്റ്റല്‍ പോലീസിനെയും അഗ്നിരക്ഷാ സേനയേയും വിവരം അറിയിച്ചു. അഗ്നിരക്ഷാ സേനാംഗങ്ങള്‍ കോസ്റ്റല്‍ പോലീസിന്‍റെ ബോട്ടിന്‍റെ സഹായത്തോടെ പാതാളക്കരണ്ടി ഉപയോഗിച്ച് തെരച്ചില്‍ നടത്തിയെങ്കിലും ആളെ കണ്ടെത്താനായില്ല. പിന്നീട് സ്‌കൂബ ടീം നടത്തിയ തെരച്ചിലില്‍ ഏകദേശം 35 അടി താഴ്ചയില്‍ നിന്നും ചളിയില്‍ പൂണ്ട നിലയില്‍ സെല്‍വനെ കണ്ടെത്തുകയുമായിരുന്നു. ഉടനെ തന്നെ ആംബുലന്‍സില്‍ തൊട്ടടുത്ത ആശുപത്രിയില്‍ എത്തിച്ചെങ്കിലും രക്ഷപ്പെടുത്താനായില്ല.

മത്സ്യ തൊഴിലാളികളെ സംരക്ഷിക്കാന്‍ ഒറ്റക്കെട്ടായി രംഗത്തിറങ്ങണം : അഡ്വ. അലക്‌സ് കോഴിമല

കോഴിക്കോട് : മത്സ്യതൊഴിലാളികളെ സംരക്ഷിക്കാന്‍ ഒറ്റക്കെട്ടായി രംഗത്തിറങ്ങണമെന്ന് കേരള കോണ്‍ഗ്രസ് (എം) സംസ്ഥാന ജനറല്‍ സെക്രട്ടറി അലക്‌സ് കോഴിമല. കേരള യൂത്ത് ഫ്രണ്ട് (എം) സംസ്ഥാന പ്രസിഡ ന്‍റ് സിറിയക് ചാഴികാടന്‍ നയിക്കുന്ന തീരദേശ സംരക്ഷണ യാത്രയ്ക്ക് കോഴിക്കോട് ജില്ലയില്‍ നല്‍കിയ സ്വീകരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. കേരളത്തിന്‍റെ തീരദേശങ്ങള്‍ വില്‍ക്കാനാണ് കേന്ദ്ര സര്‍ക്കാര്‍ ശ്രമിക്കുന്നത്. ഇത് സാധാരണക്കാരായ മത്സ്യ തൊഴിലാളികളെ ദ്രോഹിക്കുകയാണ്. തീരങ്ങള്‍ വില്‍ക്കുന്നത് വമ്പന്‍ മുതലാളിമാര്‍ക്കാണ്. ഇത് വഴി മത്സ്യ തൊഴിലാളികള്‍ക്ക് ജീവിതം ദുരിത പൂര്‍ണമാകുമെന്നും അദ്ദേഹം പറഞ്ഞു. മെയ് ഒന്നിന് കാസര്‍കോട് നിന്ന് ആരംഭിച്ച യാത്ര മെയ് ഒന്‍പതിന് തിരുവനന്തപുരത്ത് സമാപിക്കും. സ്വീകരണത്തിന്റെ കോഴിക്കോ ട് ജില്ലാതല ഉദ്ഘാടനം വെള്ളയില്‍ കടപ്പുറത്ത് നടന്നു. കേരള യൂത്ത്ഫ്രണ്ട്(എം) കോഴിക്കോട് ജില്ലാ പ്രസിഡന്റ് അരുണ്‍ തോമസ് യോഗത്തില്‍ അധ്യക്ഷത വഹിച്ചു. കേരള കോണ്‍ഗ്രസ് (എം) കോഴിക്കോട് ജില്ലാ പ്രസിഡന്റ് ടി എം ജോസഫ് മുഖ്യപ്രഭാഷണം നടത്തി.കേരള കോണ്‍ഗ്രസ് (എം) സംസ്ഥാന സ്റ്റിയറിംഗ് കമ്മിറ്റി അംഗം സാജന്‍ തൊടുക,കേരള കോണ്‍ഗ്രസ് (എം) സംസ്ഥാന സെക്രട്ടറിയേറ്റ് അംഗം കെ.കെ നാരായണന്‍, കേരള യൂത്ത്ഫ്രണ്ട് (എം) സംസ്ഥാന ഓഫീസ് ചാര്‍ജ് ജനറല്‍ സെക്രട്ടറി ഷേയ്ക്ക് അബ്ദുള്ള, ഭാരവാഹികളായ കെ.എം പോള്‍സണ്‍, വിനോദ് കിഴക്കതില്‍, ബോബി ഓസ്റ്റിന്‍, ഷിബു തോമസ്, സനീഷ് ഇ.ടി, സുരേഷ് മുതുവണ്ണാച്ച, അനേക് തോണിപാറ,ചന്ദ്രന്‍ അഴിയൂര്‍,എം റഷീദ്, ഷാജു ജോര്‍ജ്, ഷിനോജ് പുളിയോലി, ഭാസിത്,അഡ്വ: ശരത് ജോസ്, അരുണ്‍ തോമസ്,ബ്രൈറ്റ് വട്ടനിരപ്പില്‍,സനീഷ് ഇ.ടി,ജോമോന്‍ പൊടിപാറ,ജോഷ്വ രാജു,ബിജോ പി.ബാബു,ജെസ്സല്‍ വര്‍ഗീസ്, ആഷിക് വിശ്വനാഥ്,ജോസഫ് ജോണ്‍, റീത്ത ജസ്റ്റിന്‍ എന്നിവര്‍ പ്രസംഗിച്ചു.

അർജുന വോളി ;കെടിസി ചാത്തമംഗലം ജേതാക്കൾ

കൂടരഞ്ഞി: അർജുന സ്പോർട്സ് ക്ലബ് സംഘടിപ്പിച്ച മൂന്നാമത് സോമൻ അഞ്ചേരിൽ, കിരൺ ടോംസൺ വളയത്തിൽ സ്മാരക ജില്ലാതല വോളി മേളയിൽ ഫൈനലിൽ ഇൻ സാറ്റ് താമരശേരിയെ പരാജയപ്പെടുത്തി കെടിസി ചാത്തമംഗലം ജേതാക്കളായി. ട്രോഫിയും 10000 രൂപ ക്യാഷ് അവാർഡുമാണ് വിജയികൾ കരസ്ഥമാക്കിയത്. ഇൻസാറ്റിന് 7000 രൂപയും കിരൺ ടോംസൺ ട്രോഫിയും ലഭിച്ചു. മുൻ മധ്യപ്രദേശ് ആർമി കമാൻഡ് കളിക്കാരനായിരുന്ന ബെന്നി ഏബ്രഹാം കളിക്കാരെ പരിചയപ്പെട്ടു. കൂടരഞ്ഞി പഞ്ചായത്ത് വൈസ് പ്രസിഡന്‍റ് മേരി തങ്കച്ചൻ വിജയികൾക്ക് ട്രോഫികൾ വിതരണം ചെയ്തു. സർവീസ് ബാങ്ക് പ്രസിഡന്‍റ് പി.എം. തോമസ്, വി.എം. മാത്യു, എം.ടി. തോമസ്, വി.എ. ജോസ്, വിപിൻ തോമസ്, പ്രദീപ് കുമാർ എന്നിവർ പ്രസംഗിച്ചു.

കേന്ദ്രം കാണിക്കുന്ന നീതികേടിനെതിരേ പ്രതികരിക്കണം: മന്ത്രി എ.കെ. ശശീന്ദ്രൻ

ബാലുശേരി: കേന്ദ്രം കേരളത്തോടു കാണിക്കുന്ന നീതികേടിനെതിരേ പ്രതികരിക്കാൻ യുഡിഎഫ് തയാറാകുന്നില്ലെന്നും രാഷ്ട്രീയ വിവാദങ്ങളുണ്ടാക്കി എൽഡിഎഫ് സർക്കാറിനെതിരേ ആക്ഷേപമുയർത്തി തളർത്താൻ ശ്രമിക്കുകയാണെന്നും മന്ത്രി എ.കെ. ശശീന്ദ്രൻ പറഞ്ഞു. എൻസിപി- എസ് ബാലുശേരി ബ്ലോക്ക് കൺഷൻഷനും കിസാൻ സഭ കർമ്മ ശ്രേഷ്ഠ പുരസ്ക്കാര ജേതാവ് ഒ.ഡി തോമസിനെ അനുമോദിക്കൽ ചടങ്ങും ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. പി.വി ഭാസ്ക്കരൻ കിടാവ് അധ്യക്ഷത വഹിച്ചു. കിസാൻ സഭ കർമ്മ ശ്രേഷ്ഠ പുരസ്ക്കാര ജേതാവ് ഒ.ഡി. തോമസിനെയും മുതിർന്ന എൻസിപി പ്രവർത്തകൻ കെ.സി ആലിക്കോയ ഹാജി എന്നിവരെ ചടങ്ങിൽ മന്ത്രി ഉപഹാരം നൽകി ആദരിച്ചു. സംസ്ഥാന സെക്രട്ടറിമാരായ പി. സുധാകരൻ, സി. സത്യചന്ദ്രൻ, ജില്ല പ്രസിഡന്‍റ് മുക്കം മുഹമ്മദ്, വൈസ് പ്രസിഡന്‍റ് ടി.പി വിജയൻ, റീന കല്ലങ്ങാട്, വിജയൻ, കെ.ആർ. രാമകൃഷ്ണൻ, വർഗീസ്, കെ. രാധാകൃഷ്ണൻ എന്നിവർ പ്രസംഗിച്ചു.

കൊയിലാണ്ടിയിൽ വീണ്ടും എംഡിഎംഎ വേട്ട

കൊയിലാണ്ടി: കൊയിലാണ്ടിയിൽ പോലീസിന്‍റെ സ്പെഷ്യൽ ഡ്രൈവിൽ എംഡിഎംഎ പിടികൂടി. കൊയിലാണ്ടി നടേരി മഞ്ഞളാട് പറമ്പിൽ ഹബീബിന്‍റെ കൈയിൽ നിന്ന് മൂന്നു ഗ്രാം എംഡിഎംഎയാണ് കൊയിലാണ്ടി പോലീസ് പിടികൂടിയത്. വടകര ഡിവൈഎസ്പി ഹരിപ്രസാദിന്‍റെ നേതൃത്വത്തിൽ സിഐ ശ്രീലാൽ ചന്ദ്രശേഖരൻ എസ്ഐ പ്രദീപൻ, എഎസ്ഐ ബിജു വാണിയംകുളം, അനഘ, ഡാൻസാഫ് അംഗങ്ങളായ ഷാജി, ബിനീഷ്, ഷോബിത്ത് എന്നിവർ ചേർന്നാണ് പ്രതിയെ പിടികൂടിയത്. നേരത്തെ19 ഗ്രാം എംഡിഎംഎ കൈവശം വച്ച കാവുംവട്ടം സ്വദേശി മുഹമ്മദ് ഹാഷിമിന്‍റെ സംഘത്തിലെ പ്രധാന കണ്ണിയാണ് ഹബീബ്.

വാഹന പ്രചാരണ ജാഥയ്ക്ക് സ്വീകരണം നൽകി

കോടഞ്ചേരി: ദേശീയ കർഷക തൊഴിലാളി ഫെഡറേഷൻ (ഡികെടിഎഫ്) കോഴിക്കോട് ജില്ല പ്രസിഡന്‍റ് മനോജ് കുമാർ പാലങ്ങാട് കർഷക തൊഴിലാളികളുടെ വിവിധ അവകാശങ്ങളും ആവശ്യങ്ങളും ഉന്നയിച്ചു കൊണ്ട് നയിക്കുന്ന ജില്ല സമര വാഹന പ്രചാരണ ജാഥയ്ക്ക് കോടഞ്ചേരിയിൽ സ്വീകരണം നൽകി. യൂത്ത് കോൺഗ്രസ് ജില്ല പ്രസിഡന്‍റ് ആർ. ഷഹീൻ പരിപാടി ഉദ്ഘാടനം ചെയ്തു. ഡികെടിഎഫ് സംസ്ഥാന സെക്രട്ടറി വി.ടി. സുരേന്ദ്രൻ, കർഷക കോൺഗ്രസ് സംസ്ഥാന സെക്രട്ടറി സണ്ണി കാപ്പാട്ടുമല എന്നിവർ മുഖ്യപ്രഭാഷണം നടത്തി. ഡികെടിഎഫ് ജില്ല വൈസ് പ്രസിഡന്‍റ് എ.കെ. മുഹമ്മദ്, പഞ്ചായത്ത് പ്രസിഡന്‍റ് അലക്സ് തോമസ്, വികസനകാര്യ സ്റ്റാൻഡിംഗ് കമ്മിറ്റി ചെയർമാൻ ജോസ് പെരുമ്പള്ളിൽ, കൊടുവള്ളി നിയോജക മണ്ഡലം യൂത്ത് കോൺഗ്രസ് പ്രസിഡന്‍റ് ഫസൽ പാലങ്ങാട്, ന്യൂനപക്ഷ നിയോജക മണ്ഡലം പ്രസിഡന്‍റ് സേവ്യർ കുന്നത്തേട്ട്, കർഷക കോൺഗ്രസ് ജില്ല സെക്രട്ടറി ബാബു പട്ടരാട്ട്, കോൺഗ്രസ് ബ്ലോക്ക് സെക്രട്ടറി സജി നിരവത്ത് തുടങ്ങിയവർ പ്രസംഗിച്ചു.

വീട്ടിൽ നിന്ന് എംഡിഎംഎയുമായി യുവാവ് അറസ്റ്റിൽ

നാദാപുരം: വീട്ടിനകത്ത് കിടപ്പ് മുറിയിൽ സൂക്ഷിച്ച എംഡിഎംഎയുമായി യുവാവ് അറസ്റ്റിൽ. വാണിമേൽ കോടിയൂറ സ്വദേശി ഫൈസൽ (36) നെയാണ് വളയം സബ് ഇൻസ്പെക്ടർ ആർ.സി. ബിജുവിന്‍റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്. 0.63 ഗ്രാം എംഡിഎംഎ പ്രതിയിൽ നിന്ന് പിടികൂടി. രഹസ്യവിവരത്തിന്‍റെ അടിസ്ഥാനത്തിൽ ഇയാളുടെ വീട്ടിൽ വെള്ളിയാഴ്ച്ച പോലീസ് പരിശോധന നടത്തുകയായിരുന്നു. കിടപ്പ് മുറിയിൽ തലയണക്കുള്ളിലാക്കി സൂക്ഷിച്ച നിലയിലായിരുന്നു എംഡിഎംഎ.

നിർത്തിയിട്ട കാറിൽ നിന്ന് എംഡിഎംഎ പിടികൂടി

കൊയിലാണ്ടി: കാവും വട്ടത്ത് വീട്ടിൽ നിർത്തിയിട്ട കാറിൽ നിന്നും എംഡിഎംഎ പിടികൂടി. തുടർന്ന് യുവാവിനെ അറസ്റ്റ് ചെയ്തു. നടേരി കാവും വട്ടം കൊല്ലോറത്ത് ഹൗസ് മുഹമ്മദ് ഷാഫി (35) ആണ് അറസ്റ്റിലായത്. റെയ്ഡ് നടത്തവെ വീട്ടിൽ നിർത്തിയിട്ട കാർ പരിശോധിച്ചപ്പോഴാണ്18.19 ഗ്രാം എംഡിഎംഎ പിടികൂടിയത്. കോഴിക്കോട് റൂറൽ ജില്ലാ പോലീസ് മേധാവി കെ.ഇ. ബൈജുവിന്‍റെ നിർദ്ദേശപ്രകാരം വടകര ഡിവൈഎസ്പി ഹരി പ്രസാദ്, കൊയിലാണ്ടി പോലീസ് ഇൻസ്പെക്ടർ ശ്രീലാൽ ചന്ദ്രശേഖരൻ, എസ്ഐമാരായ പ്രദീപൻ, മനോജ്, എഎസ്ഐ വിജു വാണിയംകുളം, സിപിഒ ബിജീഷ്, ഷമീന, തുടങ്ങിയവരുടെ നേതൃത്വത്തിലായിരുന്നു റെയ്ഡ്. പ്രതിയെ ഇന്ന് കോടതിയിൽ ഹാജരാക്കും.

അയൽവാസികൾ നടവഴി മതിൽ കെട്ടി അടച്ചു; കേസെടുത്തു

കോഴിക്കോട്: അയൽവാസികൾ മതിൽകെട്ടി നടവഴി അടച്ചതിനെ തുടർന്ന് വീട്ടമ്മ പുറത്തിറങ്ങാനാവാത്ത അവസ്ഥയിലെത്തിയെന്ന പരാതിയിൽ മനുഷ്യാവകാശ കമ്മീഷൻ കേസെടുത്ത് കൊടുവള്ളി മുൻസിപ്പാലിറ്റി സെക്രട്ടറിയിൽ നിന്നും റിപ്പോർട്ട് തേടി. 15 ദിവസത്തിനകം റിപ്പോർട്ട് സമർപ്പിക്കണമെന്ന് കമ്മീഷൻ ജുഡീഷ്യൽ അംഗം കെ. ബൈജുനാഥ് ആവശ്യപ്പെട്ടു. മേയ് 20 ന് കോഴിക്കോട് ഗവ. ഗസ്റ്റ് ഹൗസിൽ നടക്കുന്ന സിറ്റിംഗിൽ കേസ് പരിഗണിക്കും. കഴിഞ്ഞ ഒന്പത് വർഷമായി അനീസുമ്മയ്ക്ക് വീട്ടിൽ നിന്നും പുറത്തിറങ്ങാൻ കഴിയുന്നില്ല. 25 വർഷം മുമ്പാണ് സ്ഥലം വാങ്ങിയത്. അന്ന് വീടിന് മുന്നിലുണ്ടായിരുന്ന നടവഴിയാണ് അയൽവാസികൾ കെട്ടിയടച്ചത്. തുടർന്ന് മറ്റൊരു അയൽവാസിയുടെ വഴിയിലൂടെ നടന്നെങ്കിലും അതും കെട്ടിയടച്ചു. വീടിന് പുറകുവശത്തെ മതിൽകെട്ടിറങ്ങി ഇല്ലാത്ത വഴിയിലൂടെയാണ് അനീസുമ്മ ഇപ്പോൾ സഞ്ചരിക്കുന്നത്. വാർത്തയുടെ അടിസ്ഥാനത്തിൽ സ്വമേധയാ രജിസ്റ്റർ ചെയ്ത കേസിലാണ് നടപടി.

വേളം പഞ്ചായത്ത് ഭരണം; സിപിഎമ്മിലെ പി.എം. കുമാരൻ വൈസ് പ്രസിഡന്‍റ്

കുറ്റ്യാടി: വേളം പഞ്ചായത്തിൽ ഇന്നലെ നടന്ന അവിശ്വാസ പ്രമേയ വോട്ടടുപ്പിൽ ലീഗ് വിമത പക്ഷവും വെൽഫയർ പാർട്ടിയും സിപിഎം അനുകൂല നിലപാട് എടുത്തു. തുടർന്ന് സിപിഎമ്മിലെ പി.എം. കുമാരൻ വൈസ് പ്രസിഡന്‍റായി. ലീഗ് - കോൺഗ്രസ് ഭൂരിപക്ഷമുള്ള വേളം പഞ്ചായത്തിൽ അവസാനം വർഷം കോൺഗ്രസിന് പ്രസിഡന്‍റ് സ്ഥാനം നൽകണമെന്ന യുഡിഎഫ് തീരുമാനം പഞ്ചായത്ത് പ്രസിഡന്‍റും ലീഗ് വിമത അംഗങ്ങളും എതിർത്തതിനെത്തുടർന്ന് കോൺഗ്രസ് അംഗം വൈസ് പ്രസിഡന്‍റ് സ്ഥാനം രാജിവച്ചു. തുടർന്ന് സിപിഎം അവിശ്വാസ പ്രമേയം നോട്ടീസ് നൽകി. ‌‌ അവിശ്വാസപ്രമേയ തെരഞ്ഞെടുപ്പിൽ നോട്ടീസ് നൽകിയ സിപിഎം വോട്ട് ചെയ്യാതെ തന്ത്രപരമായി ഒഴിഞ്ഞു നിന്നു. ഇതേ തുടർന്ന് വിമത ലീഗ് അംഗങ്ങളും വെൽവെയർ പാർട്ടി അംഗവും ഒന്നിച്ച് നിന്ന് അവിശ്വാസ പ്രമേയ ചർച്ചയിൽ പ്രസിഡന്‍റ് സ്ഥാനം നിലനിർത്തി. ഇതിന് പ്രത്യുപകാരമായി ഇന്നലെ നടന്ന വൈസ് പ്രസിഡന്‍റ് അവിശ്വാസ പ്രമേയത്തിൽയുഡിഎഫ് നാല് മെമ്പർമാരും വെൽഫയർ പാർട്ടി പ്രതിനിധിയും ചേർന്ന് തെരഞ്ഞെടുപ്പിൽ നിന്ന് വിട്ടു നിന്നു. ബാക്കിയുള്ള 12 പേര് വോട്ടെടുപ്പിൽ പങ്കെടുത്തപ്പോൾ ഏഴ് വോട്ട് സിപിഎമ്മിന് ലഭിച്ചു. ഔദ്യോഗിക ലീഗ് സ്ഥാനാർഥി ഇ.പി. സലീമിന് നാല് വോട്ടും കിട്ടി. ഇതേ തുടർന്ന് സിപിഎം അംഗം പി.എം. കുമാരൻ വൈസ് പ്രസിഡന്‍റായി.

പോലീസ് സേനാംഗങ്ങളിലെ ആത്മഹത്യ തടയണം; മനുഷ്യാവകാശ കമ്മീഷൻ

കോഴിക്കോട്: പോലീസ് സേനാംഗങ്ങളിൽ വർധിച്ചുവരുന്ന ആത്മഹത്യ തടയാൻ സേനയുടെ അംഗബലം കാലോചിതമായി പരിഷ്ക്കരിക്കണമെന്ന് മനുഷ്യാവകാശ കമ്മീഷൻ ജുഡീഷ്യൽ അംഗം കെ. ബൈജുനാഥ്. ക്വാണ്ടം കമ്പ്യൂട്ടിംഗ്, എഡ്ജ് കമ്പ്യൂട്ടിംഗ്, ജനറേറ്റീവ് എഐ തുടങ്ങിയ സാങ്കേതികവിദ്യകൾ ലഭ്യമായിട്ടും പോലീസിലെ പല കാര്യങ്ങളും പരമ്പരാഗതമായ രീതിയിലാണ് നടക്കുന്നതെന്ന് കമ്മീഷൻ സർക്കാരിന് നൽകിയ വിശദമായ ഉത്തരവിൽ പറഞ്ഞു. പരിഷ്കൃത സമൂഹത്തിന് യോജിക്കാത്തതും മാനവിക വിരുദ്ധവുമായ കൊളോണിയൽ കാലത്തെ ശേഷിപ്പുകൾ പോലീസ് സേനയിൽ അവസാനിപ്പിക്കണമെന്നും കമ്മീഷൻ ആവശ്യപ്പെട്ടു. സേനാംഗങ്ങളിലെ ആത്മഹത്യ തടയാൻ കേരള പോലീസ് അസോസിയേഷനും കേരള പോലീസ് ഓഫീസേഴ്സ് അസോസിയേഷനും കമ്മീഷനിൽ സമർപ്പിച്ച നിർദ്ദേശങ്ങളിൽ സാമ്പത്തിക ബാധ്യത വരാത്ത എക്സിക്യൂട്ടീവ് ഓർഡർ മുഖേന നടപ്പിലാക്കാൻ കഴിയുന്ന പ്രപ്പോസലുകൾ പരിശോധിച്ച് അവ കാലതാമസമില്ലാതെ നടപ്പിലാക്കണമെന്ന് കമ്മീഷൻ സംസ്ഥാന പോലീസ് മേധാവിക്ക് നിർദ്ദേശം നൽകി. നയപരമായ തീരുമാനങ്ങൾ വേണ്ട കാര്യങ്ങൾ വിശദമായി പഠിച്ച് പ്രാവർത്തികമാക്കാൻ ആഭ്യന്തര വകുപ്പ് സെക്രട്ടറി നടപടിയെടുക്കണം. ഉത്തരവിന്‍റെ അടിസ്ഥാനത്തിൽ സ്വീകരിച്ച നടപടികൾ ആഭ്യന്തര വകുപ്പു സെക്രട്ടറിയും സംസ്ഥാന പോലീസ് മേധാവിയും 3 മാസത്തിനകം കമ്മീഷനെ അറിയിക്കണം. സേനാംഗങ്ങൾക്കിടയിലെ ആത്മഹത്യയെക്കുറിച്ച് പ്രസിദ്ധീകരിച്ച പത്രവാർത്തയുടെ അടിസ്ഥാനത്തിൽ സ്വമേധയാ രജിസ്റ്റർ ചെയ്ത കേസിലാണ് നടപടി. മനുഷ്യാവകാശങ്ങൾ സംരക്ഷിക്കാൻ ബാധ്യതയുള്ളവരുടെ മനുഷ്യാവകാശങ്ങൾ ലംഘിക്കരുതെന്ന് കെ. ബൈജുനാഥ് ആവശ്യപ്പെട്ടു. മദ്യപാനവും കുടുംബഛിദ്രവും സാമ്പത്തിക അച്ചടക്കമില്ലായ്മയും മറ്റുമാണ് ആത്മഹത്യക്ക് കാരണമെന്ന സംസ്ഥാന പോലീസ് മേധാവിയുടെ റിപ്പോർട്ടിനോട് കമ്മീഷൻ വിയോജിച്ചു. കടുത്ത ജോലി സമ്മർദ്ദവും ജോലി സ്ഥലത്തെ അന്തരീക്ഷവും സേനാംഗങ്ങളുടെ മാനസികാരോഗ്യത്തെ സാരമായി ബാധിക്കുന്നുണ്ടെന്ന് ഉത്തരവിൽ പറഞ്ഞു.

പ്രകൃതിക്ഷോഭത്തിൽ തകരാറിലായത് 5000 ത്തോളം കണക്ഷൻ

ചക്കിട്ടപാറ: മൂന്ന് ഫീഡറുകളിലായി 14069 കണക്ഷനുകളാണ് ചക്കിട്ടപാറ വൈദ്യുതി സെക്ഷൻ ഓഫീസിന് കീഴിലുള്ളത്. കഴിഞ്ഞ ദിവസത്തെ മഴയിലും കാറ്റിലും ഇടിമിന്നലിലും ഇതിൽ 5000 ത്തോളം കണക്ഷനുകൾ തകരാറിലായി. വെള്ളിയാഴ്ച വൈകിട്ടു മുതൽ ഓഫീസിലെ ഫോണുകൾക്ക് വിശ്രമമുണ്ടായിരുന്നില്ല. രാത്രി തന്നെ ചക്കിട്ടപാറ ടൗൺ ഉൾപ്പടെ വൈദ്യുതി പുനഃസ്ഥാപിച്ചു. ഇന്നലെ നേരം പുലർന്നതോടെ ഫോൺ വിളികൾ എത്തി. ഉൾപ്രദേശങ്ങളിലെല്ലാം ലൈനുകളിൽ മരങ്ങൾ പതിച്ചു തകരാറിലായ നിലയിലായിരുന്നു. തൂണുകളും തകർന്ന വിവരമെത്തി. അസി. എൻജിനീയർ ദീപു സി. കുഞ്ഞപ്പന്‍റെ നേതൃത്വത്തിൽ സെക്ഷനു കീഴിലെ ജീവനക്കാർ ടീമായി. ഓരോ മേഖലകൾ തിരിച്ച് തകരാർ പരിഹരിക്കൽ ആരംഭിച്ചു. ഭക്ഷണവും വിശ്രമവുമില്ലാത്ത അവർ ജോലി ചെയ്തത്. ഇതിനു ഫലമുണ്ടായി. തകരാറുകളിൽ ഭൂരിഭാഗവും ഇന്നലെ വൈകീട്ടോടെ പരിഹരിച്ചു. ശേഷിക്കുന്നത് നേരെയാക്കാൻ ഇന്നും ശ്രമം തുടരും.

മഴ, മിന്നൽ, കാറ്റ് ; മലയോര മേഖലയിൽ കനത്ത നാശനഷ്ടം

മരം വീണ് വൈദ്യുതി ലൈനുകൾക്ക് വ്യാപക തകരാർ പേരാമ്പ്ര: വെള്ളിയാഴ്‌ച വൈകീട്ട് കനത്ത മഴക്കിടെയുണ്ടായ കാറ്റും ഇടിമിന്നലിലും മലയോര മേഖലയിൽ കനത്ത നാശനഷ്ടം. ചക്കിട്ടപാറ, ചങ്ങരോത്ത്, കൂത്താളി പഞ്ചായത്ത് മേഖലകളിലാണ്‌ വ്യാപക നാശനഷ്ടമുണ്ടായത്. കാറ്റിൽ നൂറ് കണക്കിന് മരങ്ങളാണ് വീണത്. വീടുകൾക്കും വൈദ്യുതി ലൈനുകൾക്കും സാരമായ തകരാർ സംഭവിച്ചു. വീടുകൾക്ക് മിന്നലുമേറ്റു. ആളുകൾക്ക് പരിക്കുമേറ്റിട്ടുണ്ട്. വളർത്തു മൃഗങ്ങൾക്കും നാശമുണ്ടായി. ചക്കിട്ടപാറ പഞ്ചായത്ത് വാർഡ് ഏഴിൽ പെട്ട എസ്റ്റേറ്റ് മുക്ക് ഭാഗത്തെ വടക്കേടത്ത് വിൻസെന്‍റിന്‍റെ വളർത്തു പോത്ത്‌ മിന്നലേറ്റ് ചത്തു. വടക്കേടത്ത് ഷിനുവിന്‍റെ വീടിനു നാശ നഷ്ടവുമുണ്ടായി. വീടിന്‍റെ ഭിത്തി, ജനൽ തുടങ്ങിയവ മിന്നലിൽ തകർന്നു. മുതുകാട് മേഖലയിൽ മരങ്ങൾകടപുഴകി വീണു വൈദ്യുതി ലൈനുകൾ വ്യാപകമായി തകർന്നു. തേവർകണ്ടി രാഘവന്‍റെ വീടിനു മേൽ മരങ്ങൾ കടപുഴകി വീണ് നാശമുണ്ടായി. വൈദ്യുതി തൂണും തകർന്നു. ചക്കിട്ടപാറ പഞ്ചായത്ത് വാർഡ് പത്തിൽ പെട്ട കൊടൂർ വിജയകുമാറിന്‍റെ വീടിനു മിന്നലേറ്റു. വൈദ്യുതി വയറിംഗ് സംവിധാനങ്ങളും ഉപകരണങ്ങളും നശിച്ചു. വീടിനും സാരമായ തകരാർ സംഭവിച്ചിട്ടുണ്ട്. ഇതേ വാർഡിൽ പെട്ട കിടപ്പു രോഗിയായ കൊരവൻ തലക്കൽ സാറയൂടെ വീടിന്‍റെ മേൽക്കൂര ഷീറ്റുകൾ കനത്ത കാറ്റിൽ പാറിപ്പോയി. അടുക്കള ഭാഗത്തിനു സാരമായ തകരാർ സംഭവിച്ചു. വാർഡ് 12 ൽ പെട്ട ഓടക്കൽ പറമ്പിൽ കെ.ടി. പ്രകാശിന്‍റെ വീടിനു മീതെ കാറ്റിൽ മരം വീണു. ചെമ്പ്രയിൽ മാളിയേക്കൽ ചാക്കോയുടെ ഇരുപത്തി അഞ്ചോളം റബർ മരങ്ങൾ കാറ്റിൽ നശിച്ചു. താന്നിക്കൽ വത്സരാജിന്‍റെ വീട്ടിലേക്ക് മരം വീണ് അടുക്കള ഭാഗം തകർന്നു. തുറശേരി മൊയ്തീന്‍റെ കൃഷി നശിച്ചു. മുക്കള്ളിൽ, കോടേരിച്ചാൽ ഭാഗങ്ങളിൽ വ്യാപകമായി മരങ്ങൾ കാറ്റിൽ കടപുഴകി വീണു. വൈദ്യുതി ലൈനുകൾക്ക് സാരമായ തകരാർ സംഭവിച്ചു. പെരുവണ്ണാമൂഴി താഴത്തു വയലിലെ എഴുത്തുപുരക്കൽ അമ്മിണി (73) ക്ക് മിന്നലിൽ സാരമായ പരിക്കേറ്റു. ഇവർ മൊടക്കല്ലൂർ മെഡിക്കൽ കോളജ് ആശുപത്രിയിൽ ചികിത്സയിലാണ്. നരിനടയിൽ കോങ്കോട്ടുമ്മൽ ദിവ്യ സുരേഷ് മിന്നലേറ്റ് പേരാമ്പ്ര താലൂക്ക് ആശുപത്രിയിൽ ചികിത്സ തേടി. പൂഴിത്തോട് മേഖലയിലും മരങ്ങൾ വീണ് നാശവും വൈദ്യുതി തകരാറും സംഭവിച്ചിട്ടുണ്ട്. ചങ്ങരോത്ത് പഞ്ചായത്തിലെ വിവിധ പ്രദേശങ്ങളിലും കാറ്റിൽ നാശമുണ്ടായി.

കോഴിക്കോട് നഗരത്തിൽ വീണ്ടും മയക്കുമരുന്ന് വേട്ട

കോഴിക്കോട്: ഹൈലൈറ്റ് മാളിന്‍റെ മുന്നിലുള്ള മേൽപാലത്തിന്‍റെ താഴെ വച്ച് 251.78 ഗ്രാം എംഡിഎംഎയുമായി യുവാവ് പിടിയിൽ. മലപ്പുറം തിരൂർ രാരംപറമ്പിൽ വീട്ടിൽ രവീന്ദ്രന്‍റെ മകൻ ആർ.പി. അജയ് (25) ആണ് സർക്കിൾ ഇൻസ്‌പെക്ടർ എ. പ്രജിത്തിന്‍റെ നേതൃത്വത്തിൽ അറസ്റ്റ് ചെയ്തത്. മയക്കുമരുന്ന് കടത്തുവാൻ ഉപയോഗിച്ച ബുള്ളറ്റും കസ്റ്റഡിയിലെടുത്തു. ബാംഗ്ലൂരിൽ നിന്നും വൻതോതിൽ മയക്കുമരുന്നെത്തിച്ച് കോഴിക്കോട് മലപ്പുറം ജില്ലയിൽ വിതരണം ചെയ്യുന്ന ശൃംഗലയിലെ വലിയ ഒരു കണ്ണിയാണ് പിടിക്കപ്പെട്ടത്. ഗൂഗിൾ മാപ്പ് വഴി ലൊക്കേഷൻ അയച്ചുകൊടുത്ത് ആവശ്യക്കാർ ലൊക്കേഷനിൽ ചെന്ന് മയക്കുമരുന്ന് കളക്റ്റ് ചെയ്യുന്ന രീതിയാണ് പ്രതി നടപ്പിലാക്കികൊണ്ടിരിക്കുന്നത്.

കാർഡിയോളജിക്കൽ സൊസൈറ്റി ഓഫ് ഇന്ത്യ കേരള ചാപ്റ്ററിന്‍റെ സമ്മേളനം ആരംഭിച്ചു

കോഴിക്കോട്: ഹൃദയാരോഗ്യം, അതിനൂതന ഹൃദ്രോഗ ചികിത്സാ സാങ്കേതിക വിദ്യകൾ, നവീകരണം, എന്നിവ ലക്ഷ്യമിട്ടുള്ള കാർഡിയോളജിക്കൽ സൊസൈറ്റി ഓഫ് ഇന്ത്യ കേരള ചാപ്റ്ററിന്‍റെ (സിഎസ്ഐ-കെ) മൂന്ന് ദിവസത്തെ സമ്മേളനം റാവിസ് കടവ് റിസോർട്ടിൽ ആരംഭിച്ചു. സിഎസ്ഐ-കെ പ്രസിഡന്‍റ് ഡോ. ശിവപ്രസാദ് സമ്മേളനം ഉദ്ഘാടനം ചെയ്തു. നേരത്തെയുള്ള രോഗനിർണയം, മികച്ച ചികിത്സാ രീതികൾ, രോഗ പരിചരണം എന്നിവയിൽ സംസ്ഥാനം മുന്നിലാണ്. എന്നാൽ, യുവജനങ്ങൾക്കിടയിൽ വർധിച്ചുവരുന്ന ഹൃദ്രോഗനിരക്കുകളെ ചെറുക്കുന്നതിൽ ജീവിതശൈലി മാറ്റങ്ങളുടെയും പ്രതിരോധ പ്രചാരണ പരിപാടികളും ശക്തിപ്പെടുത്തേണ്ടതുണ്ടെന്ന് ഡോ. ശിവപ്രസാദ് പറഞ്ഞു. വൈസ് പ്രസിഡന്‍റും സയന്‍റിഫിക് കമ്മിറ്റി ചെയർമാനുമായ ഡോ. പി.കെ. അശോകൻ, സെക്രട്ടറി ഡോ. എസ്.എം. അഷ്‌റഫ്, ഡോ. പി. രവീന്ദ്രൻ, ഓർഗനൈസിംഗ് ചെയർമാൻ ഡോ. ജോൺ എഫ്. ജോൺ, ഓർഗനൈസിംഗ് സെക്രട്ടറി ഡോ. രാജേഷ് മുരളീധരൻ എന്നിവർ പ്രസംഗിച്ചു.

എന്‍റെ കേരളം പ്രദർശന വിപണന മേളക്ക് തുടക്കമായി

കോഴിക്കോട്: സംരംഭകവർഷം പദ്ധതിയുടെ ഭാഗമായി മൂന്നര ലക്ഷം പദ്ധതികളാണ് കേരളത്തിൽ ആരംഭിച്ചതെന്ന് മുഖ്യമന്ത്രി പിണറായി വിജയൻ. കേരളം സംരംഭക സൗഹൃദമാണെന്നതിന്‍റെ തെളിവാണിത്. സംസ്ഥാന സർക്കാരിന്‍റെ നാലാം വാർഷികാഘോഷങ്ങളുടെ ഭാഗമായ ‘എന്‍റെ കേരളം’ പ്രദർശന-വിപണനമേളയുടെയും കുടുംബശ്രീ ദേശീയ സരസ് മേളയുടെയും ഉദ്ഘാടനം നിർവഹിക്കുകയായിരുന്നു മുഖ്യമന്ത്രി. വമ്പൻ മൂലധന നിക്ഷേപമില്ലാതെ മികച്ച വരുമാനം ഉറപ്പിക്കാൻ കഴിയുന്ന സാധ്യതകളെ പ്രയോജനപ്പെടുത്തി മുന്നോട്ട് പോവണം. അരക്കോടിയോളം സ്ത്രീകൾ അംഗങ്ങളായിട്ടുള്ള ജനകീയ പ്രസ്ഥാനമാണ് കുടുംബശ്രീ. ഇത്തവണത്തെ ബജറ്റിൽ 270 കോടി രൂപയാണ് കുടുംബശ്രീക്കായി നീക്കി വച്ചത്. പ്രാദേശിക സംരഭകത്വ വികസനത്തിന്‍റെയും സമ്പദ് വ്യവസ്ഥയുടെയും നട്ടെല്ലായി കുടുംബശ്രീ മാറിയെന്നും അദ്ദേഹം പറഞ്ഞു. മന്ത്രി പി.എ. മുഹമ്മദ് റിയാസ് അധ്യക്ഷത വഹിച്ചു. ഒരിക്കലും നടക്കില്ലെന്നു കരുതിയ പദ്ധതികൾ സർക്കാർ നടപ്പിലാക്കി കൊണ്ടിരിക്കുകയാണ്. 2025 ഡിസംബറോട് കൂടി ദേശീയപാത 66 ന്‍റെ നിർമാണം പൂർത്തീകരിക്കും. കോഴിക്കോടിന്‍റെ വിവിധ മേഖലകളിൽ വികസന മാറ്റം ദൃശ്യമാണ്. സാധാരണ മനുഷ്യർ ആഗ്രഹിച്ച പദ്ധതികളാണ് സർക്കാർ നടപ്പാക്കിക്കൊണ്ടിരിക്കുന്നത്. എല്ലാ വിഭാഗം ജനങ്ങളിലേക്കും വികസന പ്രവർത്തനങ്ങൾ എത്തിക്കാൻ സർക്കാരിന് സാധിച്ചെന്നും മന്ത്രി പറഞ്ഞു. മന്ത്രി എ.കെ. ശശീന്ദ്രൻ മുഖ്യാഥിതിയായി. കുടുംബശ്രീയിലൂടെ സംസ്ഥാനം കൈവരിച്ച നേട്ടങ്ങളുടെ നേർചിത്രമാണ് സരസ് മേളയിൽ കാണാൻ കഴിയുകയെന്ന് അദ്ദേഹം പറഞ്ഞു. കഴിഞ്ഞ ഒൻപത് വർഷം കൊണ്ട് സംസ്ഥാനം കൈവരിച്ച നേട്ടങ്ങൾ സമാനതകളില്ലാത്തതാണെന്നും മന്ത്രി പറഞ്ഞു. മേയർ ഡോ. ബീന ഫിലിപ്പ്, എംഎൽഎമാരായ തോട്ടത്തിൽ രവീന്ദ്രൻ, അഹമ്മദ് ദേവർകോവിൽ, ഇ.കെ. വിജയൻ, പി.ടി.എ. റഹീം, കുഞ്ഞമ്മദ് കുട്ടി, കെ.എം. സച്ചിൻദേവ്, ലിന്‍റോ ജോസഫ്, ജില്ലാ പഞ്ചായത്ത് പ്രസിഡന്‍റ് ഷീജ ശശി, വൈസ് പ്രസിഡന്‍റ് അഡ്വ. പി. ഗവാസ്, ഡെപ്യൂട്ടി മേയർ സി.പി. മുസാഫർ അഹമ്മദ് തുടങ്ങിയവർ പങ്കെടുത്തു.

സ്വകാര്യബിരുദദാന സമ്മേളനത്തിനിടെ ഭക്ഷ്യ വിഷബാധ

കോഴിക്കോട് : കാലിക്കറ്റ് ട്രേഡ് സെന്‍ററില്‍ നടന്ന സ്വകാര്യബിരുദദാന സമ്മേളനത്തിനിടെ ഭക്ഷ്യ വിഷബാധ. ഭക്ഷണം കഴിച്ച വിദ്യാര്‍ഥികളില്‍ ചിലര്‍ക്ക് അസ്വസ്ഥകളുണ്ടായി. ഉച്ചഭക്ഷണമായി വിതരണം ചെയ്ത നെയ്‌ച്ചോറും ചിക്കന്‍ കറിയും ഭക്ഷ്യയോഗ്യമല്ലെന്ന് ഭക്ഷ്യസുരക്ഷാ വകുപ്പ് പരിശോധനയില്‍ കണ്ടെത്തി. പരിപാടിയുടെ സംഘടകരായ സെന്‍റര്‍ ഫോര്‍ വിമെന്‍ എംപവര്‍മെന്‍റ് ആന്‍ഡ് ഏര്‍ലി ചൈല്‍ഡ്ഹുഡ് എഡ്യുക്കേഷ‌‌ന് ഭക്ഷ്യസുരക്ഷാ വകുപ്പ് നോട്ടീസ് നല്‍കി. പിടിച്ചെടുത്ത ഭക്ഷണം കുഴിച്ചുമൂടാനും നിര്‍ദേശം നല്‍കി. ഇന്നലെ രാവിലെ ഒമ്പതിന് ആരംഭിച്ച പരിപാടിയില്‍ വിദ്യാര്‍ഥികളും രക്ഷിതാക്കളുമായി അയ്യായിരത്തോളം പേരാണ് പങ്കെടുത്തത്. ഉച്ചയ്ക്ക് ഒന്നരയ്ക്കാണ് ഭക്ഷണ വിതരണം ആരംഭിച്ചത്. പഴകിയ ഭക്ഷണമാണിതെന്നും വിതരണം നിര്‍ത്തണമെന്നും ആവശ്യപ്പെട്ടു. ഇതോടെ രക്ഷിതാക്കളും ഭക്ഷണം വിതരണക്കാരുടെ തമ്മില്‍ വാക്ക് തര്‍ക്കമായി. തുടര്‍ന്ന് പോലീസും കോര്‍പ്പറേഷന്‍ ആരോഗ്യ വിഭാഗവും ഭക്ഷ്യ സുരക്ഷാ വകുപ്പ് ഉദ്യോഗസ്ഥരും സ്ഥലത്തെത്തുകയായിരുന്നു. മലപ്പുറം തിരുനാവായയുള്ള നാലുപേര്‍ അടങ്ങുന്ന പാചക സംഘമാണ് ഭക്ഷണം തയാറാക്കിയത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]