ADVERTISEMENT

ADVERTISEMENT

തദ്ദേശസ്ഥാപനങ്ങളുമായി ആശയവിനിമയമില്ലാത്തത് ദേശീയപാതയോരത്തെ ചെറുപട്ടണങ്ങളെ വിഭജിച്ചു: ഗ്രെയ്‌സ്

ചെറുവത്തൂർ: ദേശീയപാത 66 ന്‍റെ ആസൂത്രണവേളയിൽ എൻഎച്ച്എഐ പ്രാദേശിക ഭരണകൂടങ്ങളുമായി ശരിയായ രീതിയിൽ ആശയവിനിമയം നടത്താത്തതാണ് പല ചെറു പട്ടണങ്ങളും രണ്ടായി വിഭജിച്ച ഇന്നത്തെ അവസ്‌ഥയിലെത്താൻ കാരണമായതെന്ന് ഗ്രാജുവേറ്റ്സ് അസോസിയേഷൻ ഓഫ് കൺസൽട്ടന്‍റ് എൻജിനിയേഴ്‌സ്(ഗ്രെയ്‌സ്) കാസർഗോഡ് സെന്‍റർ വാർഷിക പൊതുയോഗം ആരോപിച്ചു.

ദേശീയപാതയുടെ നിർമാണം നടക്കുമ്പോൾ ജനസാന്ദ്രതയുള്ള പ്രദേശങ്ങൾ കണക്കിലെടുക്കാതെ പരിമിതമായ അടിപ്പാതകൾ മാത്രമേ നൽകിയിട്ടുള്ളു. ഇതു പരിഹരിക്കാൻ കൂടുതൽ ഫ്ലൈഓവർ ബ്രിഡ്‌ജുകളും ഫൂട് ബ്രിഡ്‌ജുകളും നിർമിക്കണമെന്നും യോഗം ആവശ്യമുന്നയിച്ചു.

ചെറുവത്തൂർ ജെകെ റസിഡൻസിയിൽ നടന്ന വാർഷിക യോഗം ഗ്രെയ്‌സ് മുൻ സംസ്‌ഥാന പ്രസിഡന്‍റ് എ. മഹേഷ് ഉദ്ഘാടനം ചെയ്‌തു. രാജീവൻ പരങ്ങേൻ അധ്യക്ഷതവഹിച്ചു.
സി. ഷൗക്കത്തലി, എം.എസ്. പ്രദീപ് നായർ, ഫലാഹ് അബ്‌ദുൾ സലാം, ജലീൽ കണ്ണോത്ത് എന്നിവർ പ്രസംഗിച്ചു. ഭാരവാഹികൾ: രാജീവൻ പരങ്ങേൻ(പ്രസിഡന്‍റ്), ഫലാഹ് അബ്‌ദുൾ സലാം(ജനറൽ സെക്രട്ടറി), ജലീൽ കണ്ണോത്ത്(ട്രഷറർ).

ADVERTISEMENT

കൃഷിവകുപ്പ് കൈവിട്ടു; പുത്തിഗെയിൽ കർഷകർക്ക് കെഎസ്ഇബിയുടെ ഇരുട്ടടി

കാസർഗോഡ്: പുത്തിഗെ കൃഷിഭവനു കീഴിൽ കാർഷിക ആവശ്യത്തിനുള്ള സൗജന്യ വൈദ്യുതി കണക്‌‌ഷൻ എടുത്തിരുന്ന ഇരുനൂറിലധികം ഉപഭോക്താക്കൾക്ക് കെഎസ്ഇബി പതിനായിരങ്ങളുടെ കുടിശിക ബിൽ നല്കി. കഴിഞ്ഞ നാലുവർഷത്തെ കുടിശികയായി 30,000 രൂപ മുതൽ 70,000 രൂപ വരെ അടയ്ക്കാനാണ് ഓരോരുത്തർക്കും ലഭിച്ച ബില്ലിൽ കാണിച്ചിരിക്കുന്നത്. നിശ്ചിത തീയതിക്കകം ബില്ലടച്ചില്ലെങ്കിൽ വൈദ്യുതി കണക്‌‌ഷൻ വിച്ഛേദിക്കുമെന്നും സീതാംഗോളി വൈദ്യുതി സെക്‌ഷൻ ഓഫീസിൽ നിന്ന് അറിയിച്ചിട്ടുണ്ട്. കഴിഞ്ഞ നാലുവർഷത്തോളമായി ഇത്രയും പേരുടെ വൈദ്യുതി ബില്ലുകൾ കൃഷിഭവനിൽനിന്ന് അടയ്ക്കാതിരുന്നതാണ് ഭീമമായ ബിൽ കുടിശിക വരാൻ ഇടയാക്കിയത്. കാർഷികാവശ്യത്തിനുള്ള സൗജന്യവൈദ്യുതിയുമായി ബന്ധപ്പെട്ട് മതിയായ രേഖകൾ സമർപ്പിക്കാത്തവരെയാണ് പദ്ധതിയിൽ നിന്ന് ഒഴിവാക്കിയതെന്നാണ് കൃഷിഭവൻ അധികൃതരുടെ വിശദീകരണം. സ്ഥലമുടമ മരിച്ചിട്ടും പിന്തുടർച്ചക്കാരുടെ പേരിലേക്ക് മാറ്റാത്ത കണക്‌‌ഷനുകൾ, വസ്തു കൈമാറ്റം ചെയ്തതുമായി ബന്ധപ്പെട്ട കണക്‌‌ഷനുകൾ തുടങ്ങിയവയും ഒഴിവാക്കപ്പെട്ടിട്ടുണ്ട്. സ്വന്തമായി ജലാശയമില്ലാതെ പുഴയിൽനിന്ന് വെള്ളമെടുക്കുന്നവർക്കും സൗജന്യവൈദ്യുതിയുടെ ആനുകൂല്യം നല്കാനാകില്ലെന്നാണ് ഇവർ പറയുന്നത്. പുഴയിൽനിന്ന് മോട്ടോർ ഉപയോഗിച്ച് വെള്ളമെടുക്കുന്നത് നിയമവിരുദ്ധമായതാണ് കാരണം. പുത്തിഗെ കൃഷിഭവനു കീഴിൽ രജിസ്റ്റർ ചെയ്തിട്ടുള്ള ആയിരത്തോളം കർഷകരിൽ ഇരുനൂറോളം പേരെയാണ് പട്ടികയിൽനിന്ന് ഒഴിവാക്കിയിട്ടുള്ളത്. വൈദ്യുതി ബില്ലുമായി കൃഷിഭവനിൽ അന്വേഷിച്ചെത്തിയവരെ ഇക്കാര്യം അറിയിച്ചിട്ടുണ്ടെന്നും മതിയായ രേഖകൾ സമർപ്പിച്ചാൽ ആനുകൂല്യം പുനഃസ്ഥാപിക്കാൻ തടസമില്ലെന്നും കൃഷിവകുപ്പ് ഉദ്യോഗസ്ഥർ പറയുന്നു. സമീപ പഞ്ചായത്തുകളിലും രേഖകൾ സമർപ്പിക്കാത്തവരെ പട്ടികയിൽനിന്ന് ഒഴിവാക്കിയിട്ടുണ്ടെന്നും അവർ പറയുന്നു. എന്നാൽ രേഖകൾ സമർപ്പിക്കാത്ത കാര്യം അതതു സമയത്തുതന്നെ അറിയിച്ചിരുന്നെങ്കിൽ നാലുവർഷം വരെയുള്ള ബിൽ കുടിശിക ഒന്നിച്ചടയ്ക്കേണ്ട സാഹചര്യമുണ്ടാകില്ലായിരുന്നുവെന്ന് കർഷകർ പറയുന്നു. വൈദ്യുതി ബിൽ വന്നതിനുശേഷം അന്വേഷിക്കാൻ ചെന്നപ്പോൾ മാത്രമാണ് കൃഷിഭവൻ അധികൃതർ ഇക്കാര്യം പറയുന്നത്. രേഖകൾ കൈയിലുണ്ടായിരുന്നിട്ടും ഇത് കൃത്യമായി അറിയാതിരുന്നതിനാലാണ് പലർക്കും സമർപ്പിക്കാൻ കഴിയാതെ പോയത്. ഇനി രേഖകൾ സമർപ്പിച്ചലും നാലുവർഷത്തെ കുടിശിക അവരവർ തന്നെ അടയ്ക്കേണ്ട അവസ്ഥ‍യാണ്. നോട്ടീസ് ലഭിച്ചവരിൽ അധികവും കമുക് കർഷകരാണ്. കമുകുകളിലെ ഉത്പാദനക്കുറവും രോഗങ്ങളും മൂലം വലയുന്നതിനിടയിലാണ് ഇവർക്ക് കെഎസ്ഇബിയുടെ ഇരുട്ടടി കൂടി കിട്ടിയത്. മിക്കവരും കമുകിൻതോട്ടങ്ങൾ നനയ്ക്കാൻ പരമ്പരാഗതമായി പുഴയിലെ വെള്ളം എടുക്കാറുണ്ടെന്നും ഇതിനു നിയമപരമായ വിലക്കുണ്ടെന്നറിയുന്നത് ഇപ്പോഴാണെന്നും കർഷക സംഘടനകൾ പറയുന്നു. മഞ്ചേശ്വരം, കാസർഗോഡ് താലൂക്കുകളിൽ കുഴൽക്കിണർ നിർമാണത്തിനും നിയന്ത്രണങ്ങളുള്ളതിനാലും സാധാരണ കിണറുകളിൽ വെള്ളം കിട്ടുന്നത് കുറവായതിനാലും വേനലിൽ കമുകിൻതോട്ടങ്ങൾ നനയ്ക്കുന്നതിന് മറ്റു വഴികളില്ലാത്ത നിലയാണ്. പലവിധ പ്രശ്നങ്ങളാൽ വലയുന്ന കർഷകരെ കൂടുതൽ പ്രതിസന്ധിയിലാക്കാതെ ബിൽ കുടിശിക അടയ്ക്കാൻ കൃഷിവകുപ്പ് തയാറാകണമെന്നും കമുകിൻതോട്ടങ്ങളിലെ രോഗബാധ തടയാൻ തദ്ദേശസ്ഥാപനങ്ങളുടെ ഫണ്ട് ഉപയോഗിച്ച് മരുന്ന് തെളിക്കണമെന്നും കിസാൻ സേന പുത്തിഗെ പഞ്ചായത്ത് കൺവൻഷൻ ആവശ്യപ്പെട്ടു. ജില്ലാ ജനറൽ സെക്രട്ടറി ഷുക്കൂർ കാണാജെ ഉദ്ഘാടനം ചെയ്തു. സുരേഷ് അടുക്കതൊട്ടി അധ്യക്ഷത വഹിച്ചു. മുഹമ്മദ് ഹജി കണ്ടത്തിൽ, പ്രസാദ്‌ കക്കപാടി, എം. ഇസ്മായിൽ ഹാജി, ബാലസുബ്രഹ്മണയ ഭട്ട് ചക്നിഗെ, സീതാറാം മാണബയൽ എന്നിവർ പ്രസംഗിച്ചു.

കുഴി: ചിത്താരി പാലം അടച്ചു

കാഞ്ഞങ്ങാട്: കാഞ്ഞങ്ങാട്-കാസര്‍ഗോഡ് സംസ്ഥാനപാതയിലെ ചിത്താരി പുഴയ്ക്ക് കുറുകെയുള്ള പാലത്തില്‍ വലിയ കുഴി രൂപപ്പെട്ടു. കിഴക്ക് ഭാഗത്തുള്ള പഴയ പാലത്തിന്‍റെ മധ്യത്തിലായാണ് കുഴി രൂപപ്പെട്ടത്. പുഴ കാണുന്ന വിധത്തിലാണ് കുഴി രൂപപ്പെട്ടത്. ഇരുചക്രവാഹനങ്ങള്‍ ഉള്‍പ്പെടെ പുഴയില്‍ വീഴാന്‍ പാകത്തിലാണ് കുഴിയുണ്ടായത്. കാഞ്ഞങ്ങാട് ഭാഗത്തേക്ക് വാഹനങ്ങളാണ് ഈ പാലത്തിലൂടെ കടന്നുപോകുന്നത്. നാട്ടുകാര്‍ ഉടന്‍ മുന്നറിയിപ്പ് നടപടി സ്വീകരിച്ചതിനാല്‍ വലിയ അപകടങ്ങള്‍ ഒഴിവായി. വൈകുന്നേരത്തോടെ പോലീസെത്തി പാലം അടച്ചു.

സർക്കാർ വീട് പണിതു നല്കിയത് കുന്നിൻചെരിവിൽ; ഇപ്പോൾ ഒഴിയാൻ നോട്ടീസ്

ബോവിക്കാനം: 15 വർഷം മുമ്പ് ഇഎംഎസ് ഭവനപദ്ധതിയിൽ നിർമിച്ചുനല്കിയ വീടുകൾ കുന്നിൻചെരിവിലായതിനാൽ അപകടാവസ്ഥയിലാണെന്നു ചൂണ്ടിക്കാട്ടി താമസക്കാർക്ക് ഒഴിയാൻ നോട്ടീസ്. മുളിയാർ ജംബ ഇഎംഎസ് ഹൗസിംഗ് കോളനിയിലെ ഒൻപത് കുടുംബങ്ങൾക്കാണ് വില്ലേജ് ഓഫീസർ നോട്ടീസ് നല്കിയത്. തണൽ ബഡ്സ് സ്കൂളിൽ ഒരുക്കിയിട്ടുള്ള താത്കാലിക ക്യാമ്പിലേക്ക് മാറണമെന്നാണ് നിർദേശം. നഫീസ, റസാഖ്, സുബൈദ, ആദം, ഹഫ്‌സ, ബീഫാത്തിമ, ഷെറിഫ്, യൂസഫ് എന്നിവരുടെ കുടുംബങ്ങളാണ് ഇപ്പോൾ ഇവിടെ കഴിയുന്നത്. സ്വന്തമായി വീടില്ലാതിരുന്ന കുടുംബങ്ങൾക്ക് സർക്കാർ സൗജന്യമായാണ് ഇഎംഎസ് ഭവനപദ്ധതിയിൽ വീട് നിർമിച്ചുനല്കിയത്. മറ്റു വഴികളില്ലാതിരുന്നതിനാലാണ് ചെങ്കുത്തായ കുന്നിൻചെരിവിലായിട്ടും ഇവർ ഇവിടെ താമസിക്കാനെത്തിയത്. ആദ്യകാലങ്ങളിൽ കുട്ടികൾ വീടിനു പുറത്തിറങ്ങി കളിച്ചാൽപോലും കാലുതെറ്റി താഴേക്ക് വീഴാവുന്ന അവസ്ഥയായിരുന്നുവെന്ന് ഇവർ പറയുന്നു. മിക്കവരും വീടുകൾ സ്വന്തം ചെലവിൽ നവീകരിക്കുകയും ചെങ്കല്ലുകൊണ്ട് സംരക്ഷണഭിത്തി കെട്ടി വീടിനു ചുറ്റും മണ്ണിട്ടുയർത്തി നിരപ്പാക്കുകയും ചെയ്തിരുന്നു. ചുറ്റുപാടും കാർഷികവിളകൾ നട്ടുവളർത്തുകയും ചെയ്തു. എന്നാൽ പലപ്പോഴും കനത്ത മഴയിൽ സംരക്ഷണഭിത്തികൾ തകർന്ന് മണ്ണ് താഴേക്ക് കുത്തിയൊഴുകി. ഏതാനും വീടുകളുടെ അടിത്തറ പോലും പുറത്ത് കാണാവുന്ന നിലയിലായി. ഇതോടെയാണ് റവന്യൂ അധികൃതർ സ്ഥലത്തെത്തി ഈ വീടുകൾ താമസിക്കാൻ സുരക്ഷിതമല്ലെന്ന് റിപ്പോർട്ട് നല്കിയത്. പക്ഷേ സാധനങ്ങളെല്ലാമെടുത്ത് വീടുകൾ ഒഴിഞ്ഞാൽ ദീർഘകാലം ദുരിതാശ്വാസ ക്യാമ്പിൽ താമസിക്കാനാകാത്തതിനാൽ പിന്നീട് ഇവർ എങ്ങോട്ട് പോകുമെന്ന കാര്യത്തിൽ ഒരു ധാരണയുമില്ല.

കാസർഗോഡ് റെയിൽവേ സ്റ്റേഷൻ മണ്ണിടിച്ചിൽ ഭീഷണിയിൽ

കാസർഗോഡ്: റെയിൽവേ സ്റ്റേഷനിൽ നടക്കുന്ന നിർമാണ പ്രവർത്തനങ്ങളെ തുടർന്ന് ഒന്നാം പ്ലാറ്റ്ഫോമും പാതയും മണ്ണിടിച്ചിൽ ഭീഷണിയിലായി. 10 ദിവസം മുമ്പ് കനത്ത മഴയ്ക്കിടെ നിർമാണം നടക്കുന്ന ഒന്നാം പ്ലാറ്റ്ഫോമിന് സമീപം കുന്നിടിഞ്ഞുവീണിരുന്നു. ഇതോടെ ഇവിടുത്തെ നിർമാണപ്രവർത്തനങ്ങൾ നിലച്ചു. ഇടിഞ്ഞുവീണ മണ്ണുപോലും ഇതുവരെ നീക്കംചെയ്യാതെ വലകൊണ്ട് മൂടിവച്ചിരിക്കുകയാണ്. വീണ്ടും കനത്ത മഴയുണ്ടായാൽ കുന്നിന്‍റെ ബാക്കിഭാഗം കൂടി ഇടിഞ്ഞുവീഴുമെന്ന നിലയിലാണ് ഉള്ളത്. അങ്ങനെയായാൽ ഒന്നാം പ്ലാറ്റ്ഫോമിലേക്കും പാതയിലേക്കും മണ്ണ് വീണ് ട്രെയിൻ ഗതാഗതം തടസപ്പെടുന്ന നിലയാകും. ദേശീയപാതയുടെ കാര്യത്തിൽ സംഭവിച്ചതുപോലെ പ്ലാറ്റ് ഫോമിനോട് ചേർന്ന് പാർശ്വഭിത്തിയുടെ നിർമാണത്തിനായി കരാറെടുത്തവർ അശാസ്ത്രീയമായ രീതിയിൽ കുന്നിടിച്ചതാണ് മണ്ണിടിച്ചിലിന് കാരണമായത്. ഇടിഞ്ഞുവീണ മണ്ണ് നീക്കംചെയ്യുകയും കൂടുതൽ മണ്ണിടിച്ചിലുണ്ടാകാതിരിക്കാൻ അടിയന്തിര നടപടികൾ സ്വീകരിക്കുകയും ചെയ്തില്ലെങ്കിൽ ഇവിടെ ഏതു നിമിഷവും ട്രെയിൻ ഗതാഗതം തടസപ്പെടുമെന്ന കാര്യം ഉറപ്പാണെന്ന് യാത്രക്കാർ പറയുന്നു.

അരിവാള്‍ രോഗം ജില്ലാതല കാമ്പയിന് തുടക്കമായി

പരപ്പ: സിക്കിള്‍ സെല്‍ അഥവാ അരിവാള്‍ കോശരോഗപ്രതിരോധത്തിന്‍റെ ബോധവത്കരണം ലക്ഷ്യമാക്കി ആരോഗ്യവകുപ്പ് നടപ്പിലാക്കുന്ന കാമ്പയിന് ജില്ലയില്‍ തുടക്കമായി. ജില്ലാ മെഡിക്കല്‍ ഓഫീസ് , ദേശീയ ആരോഗ്യ ദൗത്യം എന്നിവയുടെ സംയുക്ത ആഭിമുഖ്യത്തില്‍ പരപ്പ ബ്ലോക്ക് പഞ്ചായത്ത് ഹാളില്‍ നടന്ന ചടങ്ങ് ബ്ലോക്ക് വൈസ്പ്രസിഡന്‍റ് കെ. ഭൂപേഷ് ഉദ്ഘാടനം ചെയ്തു. ആരോഗ്യകാര്യ സ്ഥിരംസമിതി അധ്യക്ഷ എം. പത്മകുമാരി അധ്യക്ഷതവഹിച്ചു. ജില്ലാ ആര്‍സിഎച്ച് ഓഫീസര്‍ ഡോ.കെ.കെ. ഷാന്‍റി, രജനി കൃഷ്ണന്‍, കെ. മധുസൂദനന്‍, അജിത് സി. ഫിലിപ്പ് എന്നിവര്‍ സംസാരിച്ചു. ജില്ലാ ടി.ബി ഓഫീസര്‍ ആരതി രഞ്ജിത്, ജൂണിയര്‍ അഡ്മിനിസ്ട്രേറ്റീവ് മെഡിക്കല്‍ ഓഫീസര്‍ ഡോ.പി. രഞ്ജിത് എന്നിവര്‍ ക്ലാസ് നയിച്ചു. നീലേശ്വരം താലൂക്ക് ആശുപത്രി സൂപ്രണ്ട് ഡോ.ടി.ര ഞ്ജിത്കുമാര്‍ സ്വാഗതവും ഹെല്‍ത്ത് ഇന്‍സ്പെക്ടര്‍ സുരേഷ് ബാബു നന്ദിയും പറഞ്ഞു.

ലഹരിവിരുദ്ധ ബോധവത്കരണക്ലാസ്

നീലേശ്വരം: സെന്‍റ് പീറ്റേഴ്‌സ് ഐസിഎസ്ഇ സ്‌കൂളില്‍ ലഹരിവിരുദ്ധ ബോധവത്കരണക്ലാസ് നടത്തി. നീലേശ്വരം എസ്‌ഐ രാജേഷ് കുമാര്‍ ക്ലാസ് നയിച്ചു. സ്‌കൂള്‍ മാനേജര്‍ ഫാ. ലോറന്‍സ്, പ്രിന്‍സിപ്പല്‍ സിസ്റ്റര്‍ ഐറിന്‍ എന്നിവര്‍ പ്രസംഗിച്ചു. സ്റ്റാഫ് സെക്രട്ടറി സൗദാബി സ്വാഗതവും ഹെഡ് ഗേള്‍ അഫ്രിന്‍ അബ്ദുള്‍ സത്താര്‍ നന്ദിയും പറഞ്ഞു. പരപ്പ: അന്താരാഷ്ട്ര ലഹരിവിരുദ്ധ ദിനത്തോടനുബന്ധിച്ച് വിദ്യാര്‍ഥികള്‍ക്ക് ലഹരിവിരുദ്ധ അവബോധക്ലാസ്, ഷോര്‍ട്ട് ഫിലിം പ്രദര്‍ശനം, ചര്‍ച്ച, ചിത്രരചനമത്സരം എന്നിവ സംഘടിപ്പിച്ചു. തദ്ദേശസ്വയംഭരണ വകുപ്പ് ജോയിന്‍റ് ഡയറക്ടറുടെ കാര്യാലയം, പരപ്പ ബ്ലോക്ക് പഞ്ചായത്ത്, പട്ടിക വര്‍ഗ്ഗ വികസന വകുപ്പ്, എക്‌സൈസ് വകുപ്പ് എന്നിവയുടെ സംയുക്താഭിമുഖ്യത്തില്‍ പരപ്പ ബ്ലോക്ക് പഞ്ചായത്തില്‍ നടന്ന പരിപാടി ബ്ലോക്ക് പഞ്ചായത്ത് പ്രസിഡന്‍റ് എം. ലക്ഷ്മി ഉദ്ഘാടനം ചെയ്തു. വൈസ്പ്രസിഡന്‍റ് കെ. ഭൂപേഷ് അധ്യക്ഷതവഹിച്ചു. പട്ടികവര്‍ഗ വികസന വകുപ്പ് പരപ്പ ട്രൈബല്‍ എക്സ്റ്റന്‍ഷന്‍ ഓഫീസര്‍ എ. ബാബു, ആര്‍ജിഎസ്എ ജില്ലാ പ്രോഗ്രാം മാനേജര്‍ എസ്. ഷൈബ എന്നിവര്‍ പ്രസംഗിച്ചു. സിവില്‍ എക്‌സൈസ് ഓഫീസര്‍ ചാള്‍സ് ജോസ് ക്ലാസ് നയിച്ചു. ജോയിന്‍റ് ബ്ലോക്ക് ഡെവലപ്‌മെന്‍റ് ഓഫീസര്‍ കെ.ജി. ബിജുകുമാര്‍ സ്വാഗതവും കമ്യൂണിറ്റി ഡെവലപ്‌മെന്‍റ് എക്‌സ്‌പെര്‍ട്ട് ബി. ജയകൃഷ്ണന്‍ നന്ദിയും പറഞ്ഞു.

കൊലപാതകശ്രമം: പ്രതിക്ക് കഠിനതടവും പിഴയും

കാസര്‍ഗോഡ്: പണം കടം ചോദിച്ചപ്പോള്‍ കടം കൊടുക്കാത്തതിന്‍റെ വിരോധത്തില്‍ ഹോട്ടല്‍ തൊഴിലാളിയെ കത്തിവീശി കഴുത്തില്‍ മുറിവേല്‍പിച്ച സംഭവത്തില്‍ പ്രതിക്ക് ഏഴുവര്‍ഷം കഠിനതടവും 45,000രൂപ പിഴയും ശിക്ഷ വിധിച്ചു. പയ്യന്നൂര്‍ പെരുന്തട്ട തവിടിശേരിയിലെ ശ്രീജിത് എന്ന ഷാജിയെയാണ് കാസര്‍ഗോഡ് അഡീഷണല്‍ ഡിസ്ട്രിക്റ്റ് ആന്‍ഡ് സെഷന്‍സ് കോടതി (മൂന്ന്) ജഡ്ജ് ശിക്ഷിച്ചത്. പിഴയടച്ചില്ലെങ്കില്‍ 10 മാസം അധികതടവും അനുഭവിക്കണം. 2021 ജനുവരി 23നു ചട്ടഞ്ചാല്‍ ടൗണിലെ വിഘ്‌നേശ്വര ഹോട്ടല്‍ ഉടമ കെ.എം. ഗോപാലന്‍ പാത്രം കഴുകിക്കൊണ്ടിരിക്കവെയാണ് അക്രമത്തിനിരയായത്. മേല്‍പറമ്പ എസ്‌ഐ എം.പി. പത്മനാഭനാണ് ആദ്യം അന്വേഷണം നടത്തി പ്രതിയെ അറസ്റ്റ് ചെയ്തത്. അന്വേഷണംപൂര്‍ത്തിയാക്കി കുറ്റപത്രം സമര്‍പ്പിച്ചത് എസ്‌ഐ വി. കുഞ്ഞിക്കണ്ണനാണ്. പ്രോസിക്യൂഷനു വേണ്ടി അഡീഷണല്‍ ഗവ. പ്ലീഡര്‍ പി. സതീശന്‍, അഡ്വ. അമ്പിളി എന്നിവര്‍ ഹാജരായി.

സമരപ്രഖ്യാപന കൺവൻഷൻ നടത്തി

മാലോം: വിലക്കയറ്റം, അനധികൃത കാറ്ററിംഗ്, പാചകവാതക വിലവർധനവ് എന്നിവയ്ക്കെതിരെ പ്രതിഷേധവുമായി ഓൾ കേരള കാറ്ററേഴ്സ് അസാസിയേഷൻ സമരപ്രഖ്യാപന കൺവൻഷൻ മാലോം പിഎം ഓഡിറ്റോറിയത്തിൽ നടന്നു. സംസ്ഥാന സെക്രട്ടറി കെ.കെ. കബീർ ഉദ്ഘാടനം ചെയ്തു. ജില്ലാ പ്രസിഡന്‍റ് രമേശൻ പാവൂർ അധ്യക്ഷതവഹിച്ചു. ജില്ലാ രക്ഷാധികാരി പി. മൂസ മുഖ്യ പ്രഭാഷണം നടത്തി. ബി.എം. സാദിഖ്, ചിറ്റാരിക്കാൽ മേഖല ജനറൽ സെക്രട്ടറി ജിബിൻ ഏബ്രഹാം എന്നിവർ സംസാരിച്ചു. ജില്ലാ ജനറൽ സെക്രട്ടറി മനോജ്‌ മടിക്കൈ സ്വാഗതവും ട്രഷറര്‍ സജി റോയൽ നന്ദിയും പറഞ്ഞു.

ക്ഷീരകർഷക സമ്പർക്ക പരിപാടി നടത്തി

നീലേശ്വരം: ക്ഷീരവികസന വകുപ്പിന്‍റെയും നീലേശ്വരം ക്ഷീരസംഘത്തിന്‍റെയും സംയുക്താഭിമുഖ്യത്തിൽ ക്ഷീരകർഷക സമ്പർക്ക പരിപാടിയും ഗുണമേന്മ ബോധവത്കരണ ക്ലാസും നടത്തി. നഗരസഭ വൈസ് ചെയർമാൻ പി.പി. മുഹമ്മദ് റാഫി ഉദ്ഘാടനം ചെയ്തു. നീലേശ്വരം ക്ഷീരസംഘം പ്രസിഡന്‍റ് മാമുനി വിജയൻ അധ്യക്ഷതവഹിച്ചു. കാനറ ബാങ്ക് സീനിയർ മാനേജർ ജി. ജിബിനെ ആദരിച്ചു. ക്ഷീരവികസന വകുപ്പ് ക്വാളിറ്റി കൺട്രോൾ ഓഫീസർ കല്യാണി നായർ, ബ്ലോക്ക് ക്ഷീര വികസന ഓഫീസർ കെ. രമ്യ, ഡയറി ഇൻസ്പെക്ടർ പി.വി. രജിമ എന്നിവർ ക്ലാസ് നയിച്ചു. നഗരസഭ കൗൺസിലർ ഇ. ഷജീർ, നീലേശ്വരം സർവീസ് സഹകരണ ബാങ്ക് പ്രസിഡന്‍റ് കെ.വി. രാജേന്ദ്രൻ, സഹകരണ ഹൗസിംഗ് സൊസൈറ്റി പ്രസിഡന്‍റ് മഡിയൻ ഉണ്ണികൃഷ്ണൻ, നീലേശ്വരം അർബൻ സഹകരണ സംഘം വൈസ് പ്രസിഡന്‍റ് എം. രാജഗോപാലൻ, ക്ഷീരസംഘം സെക്രട്ടറി പി.വി. സുമ, ഡയറക്ടർ കെ. കുഞ്ഞികൃഷ്ണൻ എന്നിവർ പ്രസംഗിച്ചു.

വിദ്യാലയങ്ങളിലെ റാഗിംഗ്: കര്‍ശനനടപടിയെന്ന് പോലീസ്

കാസര്‍ഗോഡ്: പല വിദ്യാഭ്യാസ സ്ഥാപനങ്ങളിലും റാഗിംഗ് നടക്കുന്നുണ്ടെന്നും ഇതിനെതിരെ കര്‍ശന നടപടി സ്വീകരിക്കുമെന്നും പോലീസ്. കഴിഞ്ഞ ദിവസം ആദൂര്‍ പോലീസ് സ്റ്റേഷന്‍ പരിധിയിലെ സ്‌കൂള്‍ വിദ്യാര്‍ത്ഥികള്‍ക്കെതിരെ പോലീസ് കേസ് എടുത്തിരുന്നു. റാഗിംഗില്‍ പങ്കെടുത്തവരും പ്രോത്സാഹിപ്പിക്കുന്നവരും കുറ്റക്കാരാണ്. കേന്ദ്രസര്‍ക്കാര്‍ റാഗിംഗ് പരാതികള്‍ പരിഹരിക്കാനായി ആന്‍റി റാഗിംഗ് ഹെല്‍പ് ലൈന്‍ സജ്ജമാക്കിയിട്ടുണ്ട്. നിയമങ്ങള്‍ കൊണ്ടു മാത്രം ഈ സാമൂഹിക വിപത്തിനെ പൂര്‍ണമായും ഇല്ലാതാക്കാന്‍ സാധിക്കില്ല. അതിനു സ്ഥാപനങ്ങളുടെയും, രക്ഷിതാക്കളുടെയും, വിദ്യാര്‍ഥികളുടെയും കൂട്ടായ ശ്രമവും ആവശ്യമാണ്. വിദ്യാഭ്യാസ സ്ഥാപനങ്ങള്‍ റാഗിംഗ് വിരുദ്ധ ബോധവത്കരണ പരിപാടികള്‍ സംഘടിപ്പിക്കുകയും, പരാതിപ്പെടാനുള്ള സംവിധാനങ്ങള്‍ ശക്തിപ്പെടുത്തുകയും വേണം. ഇത്തരം കുറ്റകൃത്യങ്ങള്‍ യഥാ സമയം റിപ്പോര്‍ട്ട് ചെയ്യാതെ മറച്ചുവെയ്ക്കുന്ന സ്ഥാപനങ്ങള്‍ക്കെതിരെയും നടപടിയുണ്ടാകും. ജില്ലാ പോലീസ് മേധാവി ബി.വി.വിജയഭരത് റെഡ്ഡിയുടെ നിര്‍ദ്ദേശ പ്രകാരം ജില്ലയിലെ എല്ലാ വിദ്യാഭ്യാസ സ്ഥാപനങ്ങളും പോലീസ് സ്‌പെഷല്‍ സ്‌ക്വാഡിന്‍റെ നിരീക്ഷണത്തില്‍ ആയിരിക്കും. റാഗിംഗ് നടന്നതായി തെളിയിക്കപ്പെട്ടാല്‍ രണ്ടുവര്‍ഷം വരെ തടവും 10,000 രൂപ വരെ പിഴയും ലഭിക്കും. ഏതെങ്കിലും സ്ഥാപനം റാഗിംഗ് നടന്നത് മറച്ചുവെക്കാന്‍ ശ്രമിച്ചാല്‍, സ്ഥാപനം റാഗിംഗിന് കൂട്ടുനിന്നതായി നിയമം കാണുന്നതാണ്. റാഗിംഗുമായി ബന്ധപ്പെട്ട ഏത് പരാതിയും നിങ്ങള്‍ക്ക് അതാത് പോലീസ് സ്റ്റേഷനുകളിലോ ആന്‍റി റാഗിംഗ് ഹെല്‍പ് ലൈന്‍ നമ്പറായ 1800-180-5522 (24x7 ടോള്‍ഫ്രീ) ലേക്ക് വിളിക്കാവുന്നതാണ്. ഇ-മെയില്‍: [email protected], വെബ്‌സൈറ്റ്: www. antiragging.in

കുഞ്ഞുകരങ്ങളിലേക്ക് പുസ്തക കൈനീട്ടവുമായി സെന്‍റ് പയസ് കോളജ്

മാലക്കല്ല്: സെന്‍റ് മേരീസ് എയുപി സ്കൂളിലെ കുട്ടികൾക്ക് പുസ്തക കൈനീട്ടമൊരുക്കി രാജപുരം സെന്‍റ് പയസ് ടെൻത് കോളജ്. കോളജിലെ മലയാള വിഭാഗവും ഭാഷാ ക്ലബും എൻഎസ്എസ് യൂണിറ്റും ചേർന്നാണ് സ്കൂളിലേക്ക് പുസ്തകങ്ങൾ നല്കിയത്. സ്കൂൾ മാനേജർ ഫാ. ഡിനോ കുമ്മാനിക്കാട്ടിലും മുഖ്യാധ്യാപകൻ എം.എ. സജിയും കോളജിലെ എൻ‌എസ്എസ് വോളണ്ടിയർമാരിൽനിന്ന് പുസ്തകങ്ങൾ ഏറ്റുവാങ്ങി. കോളജിലെ മലയാളവിഭാഗം അധ്യാപിക അതുല്യ കുര്യാക്കോസ്, ലൈബ്രറി ഇൻ ചാർജ് സുരേഷ് കുമാർ എന്നിവർ സംബന്ധിച്ചു. വായന മാസാചരണവുമായി ബന്ധപ്പെട്ട് കുട്ടികൾക്കായി ചിത്രം കാണാം കഥയുണ്ടാക്കാം, വായന പ്രശ്നോത്തരി മത്സരങ്ങളും സംഘടിപ്പിച്ചു.

ബസ് സ്റ്റാൻഡ് പ്രശ്നത്തിൽ കാഞ്ഞങ്ങാട്ട് ബസുകളുടെ മിന്നൽ പണിമുടക്ക്

കാഞ്ഞങ്ങാട്: മാസങ്ങളായി തുടരുന്ന ബസ് സ്റ്റാൻഡ് പ്രശ്നവുമായി ബന്ധപ്പെട്ട് കാഞ്ഞങ്ങാട്ട് സ്വകാര്യ ബസുകളുടെ മിന്നൽ പണിമുടക്ക്. നീലേശ്വരം, ചെറുവത്തൂർ ഭാഗങ്ങളിലേക്ക് സർവീസ് നടത്തുന്ന സ്വകാര്യ ബസുകളാണ് അടഞ്ഞുകിടക്കുന്ന കോട്ടച്ചേരി ബസ് സ്റ്റാൻഡിനു മുന്നിലെ റോഡരികിൽ കൂട്ടത്തോടെ നിർത്തിയിട്ട് പ്രതിഷേധിച്ചത്. ബസ് സ്റ്റാൻഡ് അടച്ചിട്ടതോടെ നീലേശ്വരം, ചെറുവത്തൂർ ഭാഗങ്ങളിലേക്കും മലയോരങ്ങളിലേക്കുമുള്ള ബസുകളും ജില്ലാ ആശുപത്രി, മടിക്കൈ ഭാഗങ്ങളിലേക്കുള്ള ബസുകളും കണ്ണൂരിലേക്കും മറ്റുമുള്ള ദീർഘദൂര ബസുകളുമെല്ലാം ഇവിടെ നിർത്തിയാണ് ആളുകളെ ഇറക്കുകയും കയറ്റുകയും ചെയ്യുന്നത്. എന്നാൽ ഈ സ്ഥലത്ത് അഞ്ചു മിനിറ്റിൽ കൂടുതൽ സമയം നിർത്തിയിട്ടെന്നാരോപിച്ച് നീലേശ്വരം, ചെറുവത്തൂർ ഭാഗങ്ങളിലേക്കുള്ള ഏതാനും ബസുകൾക്ക് ഇന്നലെ അധികൃതർ പിഴ ചുമത്തിയതോടെയാണ് ബസ് ജീവനക്കാർ പ്രതിഷേധം തുടങ്ങിയത്. തുടർന്ന് ഈ ഭാഗങ്ങളിലേക്കുള്ള ബസുകളെല്ലാം ഓട്ടംനിർത്തി ഇവിടെ നിരയായി നിർത്തിയിടുകയായിരുന്നു. ഇതോടെ ഇതുവഴി ഗതാഗതം സ്തംഭിക്കുമെന്ന നിലയായി. ഇതിനിടയിൽ കാസർഗോട്ട് പൊതുപരിപാടിക്കെത്തിയ ഗോവ ഗവർണർ പി.എസ്. ശ്രീധരൻ പിള്ളയ്ക്ക് വഴിയൊരുക്കാനുള്ളതിനാൽ പോലീസും ബുദ്ധിമുട്ടിലായി. ഒടുവിൽ ബസ് ജീവനക്കാരുമായി സംസാരിച്ച് നിർത്തിയിട്ട ബസുകളെല്ലാം ആലാമിപ്പള്ളി പുതിയ ബസ് സ്റ്റാൻഡിലേക്ക് മാറ്റി. പ്രശ്നത്തിൽ ചർച്ച നടത്താമെന്ന ഉറപ്പിന്മേൽ പിന്നീട് സമരം അവസാനിപ്പിക്കുകയായിരുന്നു.

ജില്ലാ ഒളിമ്പിക് അസോ. മെഗാറാലി നടത്തി

നീലേശ്വരം: രാജ്യാന്തര ഒളിമ്പിക് ദിനാഘോഷത്തിന്‍റെ ഭാഗമായി ലഹരിവിപത്തിനെതിരെ കായികലോകം എന്ന സന്ദേശമുയർത്തി ജില്ലാ ഒളിമ്പിക് അസോസിയേഷന്‍റെ നേതൃത്വത്തിൽ നീലേശ്വരത്ത് മെഗാറാലി നടത്തി. നഗരസഭാധ്യക്ഷ ടി.വി. ശാന്ത ഫ്ലാഗ് ഓഫ് ചെയ്തു. അന്തർദേശീയ വോളിബോൾ താരം അഞ്ജു ബാലകൃഷ്ണൻ ഒളിമ്പിക് ദീപം തെളിച്ചു. നഗരസഭ കൗൺസിലർമാരായ കെ. മോഹനൻ, പി.പി. ലത, പി. ശ്രീജ, അന്തർദേശീയ പവർ ലിഫ്റ്റിംഗ് താരം എം.വി. പ്രദീഷ്, ദേശീയ ഫുട്‌ബോൾ താരം വിജയചന്ദ്രൻ, വോളിബോൾ താരം പി. ഗോപാലകൃഷ്ണൻ, ജില്ലാ ഒളിമ്പിക് അസോസിയേഷൻ സെക്രട്ടറി എം. അച്യുതൻ, വൈസ് പ്രസിഡന്‍റ് ഡോ. എം.കെ. രാജശേഖരൻ എന്നിവർ സംബന്ധിച്ചു. മെയിൻ ബസാറിലെ പഴയ നഗരസഭാ ഓഫിസിന് സമീപത്തുനിന്ന് തുടങ്ങിയ റാലി രാജാസ് ഹയർ സെക്കൻഡറി സ്‌കൂൾ മൈതാനത്ത് സമാപിച്ചു.

അയൽവാസിയുടെ മരസ്നേഹം അതിരുകടന്നു; വയോധിക ദമ്പതികൾ ദുരിതക്കയത്തിൽ

പരപ്പ: മരങ്ങളോടുള്ള അയൽവാസിയുടെ സ്നേഹം അതിരുകടന്നതോടെ ദുരിതക്കയത്തിലായിരിക്കുകയാണ് പരപ്പ പുലിയംകുളത്തെ ജോർജ് കല്ലക്കുളവും ഭാര്യ ഫിൽസമ്മയും. 32 ഏക്കറോളം തരിശ് ഭൂമിയിൽ മരങ്ങൾ നട്ടുവളർത്തി വനഭൂമിയാക്കി മാറ്റി പാഠപുസ്തകങ്ങളിൽ പോലും ഇടം നേടിയ അബ്ദുൾ കരീമിന്‍റെ സ്ഥലത്തോടു ചേർന്നാണ് ഇവരുടെ വീടും കടമുറിയുമുള്ളത്. വീടുകളുടെയും സ്ഥാപനങ്ങളുടെയും മുകളിൽ അപകടാവസ്ഥയിൽ നിൽക്കുന്ന മരങ്ങളും മരച്ചില്ലകളും അവയുടെ ഉടമകൾ തന്നെ മുറിച്ചു മാറ്റണമെന്ന സർക്കാർ നിർദേശം പാലിക്കാൻ അറിയപ്പെടുന്ന പരിസ്ഥിതി പ്രവർത്തകനായ അയൽവാസി തയാറാകാത്തതാണ് പ്രശ്നം. ജോർജും ഭാര്യയും ഇക്കാര്യത്തിൽ പഞ്ചായത്തിന്‍റെ സഹായം തേടിയെങ്കിലും അബ്ദുൾ കരീമിന്‍റെ ഭാഗത്തുനിന്ന് തടസവാദങ്ങൾ ഉയർന്നതോടെ അതും നടന്നില്ല. 70 വയസു കഴിഞ്ഞ ജോർജും ഭാര്യ ഫിൽസമ്മയും മാത്രമാണ് ഈ വീട്ടിൽ താമസിക്കുന്നത്. ഹൃദ്രോഗിയായ ജോർജ് ഒരു മാസത്തോളം പരിയാരം ഗവ. മെഡിക്കൽ കോളജ് ആശുപത്രിയിൽ ചികിത്സയിലായിരുന്നു. ആശുപത്രി വിട്ട് വീട്ടിലെത്തിയപ്പോഴാണ് അബ്ദുൾ കരീമിന്‍റെ പറമ്പിലെ വലിയ ശീമക്കൊന്ന മരം തന്‍റെ വീടിനു മുകളിലേക്ക് ചാഞ്ഞു വീണു കിടക്കുന്നതായി കണ്ടത്. ഉടമസ്ഥനായ അബ്ദുൾ കരീമിനോട് പറഞ്ഞെങ്കിലും അദ്ദേഹം മരം മുറിച്ചുമാറ്റിയില്ല. പഞ്ചായത്ത് മെംബറെ വിവരമറിയിച്ചിട്ടും ഫലമുണ്ടായില്ല. തുടർന്ന് ഈമാസം മൂന്നിന് പരാതി എഴുതിനല്കുന്നതിനായി കിലോമീറ്ററുകൾ സഞ്ചരിച്ച് കിനാനൂർ-കരിന്തളം പഞ്ചായത്ത് ഓഫീസിലെത്തി. പക്ഷേ ഓൺലൈനായി അപേക്ഷിക്കണമെന്നായിരുന്നു അവിടെനിന്ന് കിട്ടിയ നിർദേശം. വീണ്ടും വീട്ടിലേക്ക് മടങ്ങി അടുത്ത ദിവസം ഓൺലൈൻ സേവനകേന്ദ്രത്തിലെത്തി അപേക്ഷ നല്കി. അതിനുപിന്നാലെ പഞ്ചായത്ത് അധികൃതർ വീട്ടിലെത്തി പരിശോധന നടത്തി മടങ്ങിയെങ്കിലും പിന്നീട് നടപടികളൊന്നുമുണ്ടായില്ല. രണ്ടാഴ്ച കഴിഞ്ഞപ്പോൾ വീണ്ടും പഞ്ചായത്തിൽ വിളിച്ച് പരാതി പറഞ്ഞിട്ടും ഫലമുണ്ടായില്ല. നേരത്തേ ഒരുതവണ കരീമിന്‍റെ പറമ്പിൽ നിന്നുള്ള മരംവീണ് ജോർജിന്‍റെ വീടിനു മുകളിലെ വാട്ടർ ടാങ്കും പൈപ്പ് കണക്‌ഷനുകളും തകർന്നിരുന്നതാണ്. മറ്റൊരിക്കൽ വീടിനോടു ചേർന്നുള്ള കടമുറിയുടെ മുകളിൽ മരം വീണ് ഷീറ്റുകൾ തകർന്നു. അതെല്ലാം ശരിയാക്കാൻ കാൽലക്ഷത്തിലേറെ രൂപയാണ് ജോർജിന് ചെലവായത്. ഇനിയും കാത്തുനിന്നാൽ ഇതുതന്നെയാകും ഫലമെന്ന് മനസ്സിലായതോടെ ജോർജ് സ്വന്തം നിലയിൽ പണിക്കാരെ കൊണ്ടുവന്ന് മരം മുറിച്ചു നീക്കാൻ ശ്രമം നടത്തി. എന്നാൽ, അബ്ദുൾ കരീം തടസവാദങ്ങളുമായി എത്തിയതോടെ അതും നടന്നില്ല. ജോർജിന്‍റെ വീടിന് മുകളിലേക്ക് മരം ചാഞ്ഞുവീണിട്ട് ഇപ്പോൾ ഒരുമാസത്തോളമായി. കരീമിന്‍റെ പറമ്പിലെ വേറെയും മരങ്ങൾ ജോർജിന്‍റെ വീടിനും കടമുറിക്കും മുകളിലേക്ക് അപകടകരമായ വിധത്തിൽ ചാഞ്ഞുനിൽക്കുന്നുണ്ട്. ഇവയൊന്നും മുറിച്ചുമാറ്റാൻ പ്രകൃതി സ്നേഹിയായ അബ്ദുൾ കരീം തയാറാകുന്നില്ല. അപകടഭീഷണിക്കൊപ്പം ഈ മരങ്ങളിൽ നിന്നുള്ള ഇലകളും മറ്റും ജോർജിന്‍റെ വാട്ടർ ടാങ്കിലും സൺഷേഡിലും മുറ്റത്തും വീണടിഞ്ഞ് മഴക്കാലത്ത് മാലിന്യപ്രശ്നവും സൃഷ്ടിക്കുന്നുണ്ട്. മരങ്ങൾ നട്ടുവളർത്തുന്നതിനോ സംരക്ഷിക്കുന്നതിനോ ഒട്ടും എതിരല്ലെങ്കിലും തങ്ങളുടെ വീടിന് അപകടഭീഷണിയായ ശീമക്കൊന്നയുടെ കൊമ്പുകൾ പോലും മുറിച്ചുമാറ്റാൻ അനുവദിക്കാത്ത പരിസ്ഥിതി സ്നേഹത്തെ ഇനി എങ്ങനെ നേരിടുമെന്നറിയാതെ വലയുകയാണ് ഈ വയോധിക ദമ്പതികൾ.

സ്പ്രിംഗ് ഷെഡ് പദ്ധതി കേന്ദ്രസംഘം സന്ദർശിച്ചു

പാലാവയൽ: കേരളത്തിൽ ആദ്യമായി നടപ്പിലാക്കിയ നീരുറവയധിഷ്ഠിത നീർത്തട വികസന പദ്ധതി സന്ദർശിച്ച് ജില്ലാ കളക്ടർ കെ. ഇന്പശേഖറിന്‍റെ നേതൃത്വത്തിലുള്ള കേന്ദ്രസംഘം. നബാർഡിന്‍റെ സാമ്പത്തിക സഹായത്തോടെ സെന്‍റർ ഫോർ റിസർച്ച് ആൻഡ് ഡവലപ്മെന്‍റ് (സിആർഡി) ഈസ്റ്റ് എളേരി പഞ്ചായത്തിൽ നടപ്പിലാക്കിയ കണ്ടാരം സ്പ്രിംഗ് ഷെഡ് പദ്ധതിയാണ് കേന്ദ്ര ജൽശക്തി അഭിയാൻ സംഘം സന്ദർശിച്ചത്. ജില്ലയിൽ നടപ്പിലാക്കിവരുന്ന ജലസംരക്ഷണ പ്രവർത്തനങ്ങൾ വിലയിരുത്തുന്നതിന്‍റെ ഭാഗമായിരുന്നു സന്ദർശനം. ഉറവ സംരക്ഷണം, മേൽക്കൂര മഴവെള്ള റീചാർജിംഗ്, തടയണകൾ എന്നീ പ്രവൃത്തികൾ വിലയിരുത്തിയ സംഘം കുണ്ടാര ഗ്രാമവികസന സമിതിയുമായും ഗുണഭോക്തൃകുടുംബങ്ങളുമായി ആശയവിനിമയവും നടത്തി. കേന്ദ്ര ജലവിഭവ ബോർഡ് സയന്‍റിസ്റ്റ് സി.വി. അനു, കേന്ദ്ര ജല കമ്മീഷൻ സബ് ഡിവിഷണൽ എൻജിനിയർ കെ. പ്രമോദ്, ജില്ലാ ഭൂജല വകുപ്പ് മേധാവി അരുൺ ദാസ് എന്നിവരാണ് സംഘത്തിലുണ്ടായിരുന്നത്. പഞ്ചായത്ത് പ്രസിഡന്‍റ് ജോസഫ് മുത്തോലി, നബാർഡ് ഡിഡിഎം ഷാരോൺ വാസ്, സ്ഥിരംസമിതി അധ്യക്ഷരായ പ്രശാന്ത് സെബാസ്റ്റ്യൻ, മേഴ്സി മാണി, മെംബർമാരായ ഷേർളി ചീങ്കല്ലേൽ, സോണിയ വേലായുധൻ, വി.വി. ബാലചന്ദ്രൻ, സെക്രട്ടറി ജഗദീഷ്, സിആർഡി ഡയറക്ടർ ഡോ. ശശികുമാർ, പ്രോഗ്രാം ഓഫീസർ ഇ.സി. ഷാജി, ഗ്രാമവികസന സമിതി പ്രസിഡന്‍റ് സെബാസ്റ്റ്യൻ തെക്കേൽ, കെ.എ. തോമസ് എന്നിവർ നേതൃത്വം നൽകി.

കെഎസ്ആർടിസി ബസുകൾ ദേശീയപാതയിൽ; സർവീസ് റോഡിൽ കാത്തിരുന്ന് വലഞ്ഞ് യാത്രക്കാർ

കുമ്പള: പുതിയ ദേശീയപാതയുടെ തലപ്പാടി-ചെങ്കള റീച്ച് ഏതാണ്ട് പൂർത്തിയായതോടെ കാസർഗോഡ് നിന്ന് മംഗളൂരുവിലേക്കുള്ള കെഎസ്ആർടിസി ബസുകൾ ഇടയ്ക്കുള്ള ചെറിയ സ്റ്റോപ്പുകൾ ഒഴിവാക്കി ദേശീയപാതയിലൂടെ എളുപ്പവഴിക്ക് കടന്നുപോകാൻ തുടങ്ങിയതായി പരാതി. സർവീസ് റോഡിലേക്കിറങ്ങി സ്റ്റോപ്പുകളിൽ നിർത്തുന്നതിന്‍റെ സമയം ലാഭിക്കാനെന്ന നിലയിലാണ് ആരും ഇറങ്ങാനില്ലാത്ത സ്റ്റോപ്പുകളെ അവഗണിച്ച് ബസുകൾ ദേശീയപാതയിലൂടെ നേരിട്ട് കടന്നുപോകുന്നത്. സർവീസ് റോഡുകളോടു ചേർന്ന സ്റ്റോപ്പുകളിൽ ബസ് കയറാനായി കാത്തുനിൽക്കുന്ന യാത്രക്കാരാണ് ഇതുമൂലം വലയുന്നത്. ഈമാസം മൂന്നിന് രാവിലെ 6.30ഓടെ കാസർഗോഡ് നിന്ന് മംഗളൂരുവിലേക്ക് പോകുകയായിരുന്ന രണ്ട് കെഎസ്ആർടിസി ബസുകൾ മൊഗ്രാൽ ടൗൺ, പെർവാഡ് ബസ് സ്റ്റോപ്പുകളിൽ സർവീസ് റോഡിലേക്കിറങ്ങി നിർത്താതെ ദേശീയപാതയിലൂടെ നേരിട്ട് കടന്നുപോയതുമായി ബന്ധപ്പെട്ട് പൊതുപ്രവർത്തകനായ താജുദ്ദീൻ മൊഗ്രാൽ ഗതാഗതമന്ത്രിക്ക് പരാതി നല്കിയിരുന്നു. അതിരാവിലെ മംഗളൂരുവിലെ ആശുപത്രികളിലേക്ക് പോകുന്ന രോഗികളും കൂട്ടിരിപ്പുകാരും വിദ്യാർഥികളുമടക്കമുള്ളവർ ബസ് കാത്തുനിൽക്കുമ്പോഴാണ് ഒന്നിനു പിറകെ ഒന്നായി വന്ന രണ്ടു ബസുകളും നിർത്താതെ കടന്നുപോയതെന്ന് പരാതിയിൽ ചൂണ്ടിക്കാണിച്ചിരുന്നു. സമയക്രമം പാലിക്കാതെ മത്സര ഓട്ടം നടത്തുകയും സ്റ്റോപ്പുകളിൽ നിർത്താതെ പോകുകയും ചെയ്ത ബസുകളുടെ ഡ്രൈവർമാർക്കെതിരെ നടപടിയെടുക്കാൻ കാസർഗോഡ് ഡിപ്പോ അധികൃതർക്ക് നിർദേശം നല്കിയതായി മറുപടി ലഭിച്ചിട്ടുണ്ട്.

ദേശീയപാതയിലെ ഗതാഗതനിരോധനം: വട്ടംകറങ്ങി യാത്രക്കാര്‍

കാസര്‍ഗോഡ്: കനത്ത മഴയില്‍ തെക്കില്‍ ബേവിഞ്ചയില്‍ മണ്ണിടിഞ്ഞ് സംരക്ഷണഭിത്തി തകര്‍ന്നതിനെതുടര്‍ന്ന് ദേശീയപാതയില്‍ ഗതാഗതം നിര്‍ത്തിവെച്ചതോടെ യാത്രക്കാര്‍ ദുരിതത്തില്‍. ബസുകളൊക്കെ ചട്ടഞ്ചാലില്‍ നിന്ന് ദേളി വഴി ചുറ്റിയാണ് കാസര്‍ഗോഡ് എത്തുന്നത്. കാസര്‍ഗോഡ് നിന്നു മറ്റൊരു ബസ് കയറി വീണ്ടും യാത്ര ചെയ്ത് വേണം വിദ്യാനഗര്‍ ഭാഗത്തേക്കെത്താന്‍. ഒറ്റ ബസില്‍ നേരിട്ട് എത്തിയിരുന്നവര്‍ക്ക് ഇപ്പോള്‍ രണ്ടു ബസിനെ ആശ്രയിക്കണം. ചട്ടഞ്ചാലില്‍ നിന്ന് ചെര്‍ക്കള വഴി വിദ്യാനഗര്‍ ഭാഗത്തേക്കും ബന്തടുക്ക ഭാഗത്തേക്കും പോകേണ്ടവരാണ് ഇപ്പോള്‍ യാത്രാദുരിതം നേരിടുന്നത്. വിദ്യാനഗര്‍ സിവില്‍ സ്റ്റേഷന്‍, കോടതി, കാസര്‍ഗോഡ് ഗവ.കോളജ്, സ്‌കൂളുകള്‍, പഞ്ചായത്ത് ഉള്‍പ്പെടെയുള്ള സ്ഥാപനങ്ങളിലേക്ക് നിത്യവും ഇതുവഴി വന്നിരുന്ന യാത്രക്കാര്‍ക്ക് സമയനഷ്ടവും പണച്ചെലവും ഏറി. ബസുകളെ സംബന്ധിച്ചിടത്തോളം ദേശീയപാത വഴിയുള്ള യാത്രക്കാരുടെ എണ്ണം കുറഞ്ഞതോടെ കളക്ഷന്‍ കുത്തനെ കുറയുകയും ഇന്ധനച്ചെലവേറുകയും ചെയ്തു. ജൂണ്‍ 16നാണ് ദേശീയപാത 66ല്‍ തെക്കില്‍ ഭാഗത്ത് മണ്ണിടിഞ്ഞത്. ഇതോടെ ഇതുവഴിയുള്ള ഗതാഗതം നിര്‍ത്തിവെക്കുകയായിരുന്നു. തെക്കില്‍ ഭാഗത്ത് ഇടക്കിടെയുണ്ടാവുന്ന മണ്ണിടിച്ചില്‍ കനത്ത ആശങ്കയാണ് സൃഷ്ടിക്കുന്നത്. ജനപ്രതിനിധികളും നാട്ടുകാരും നേരത്തെ തന്നെ നിര്‍മാണ കമ്പനി മേഘക്കെതിരെ പ്രതിഷേധവുമായി രംഗത്തെത്തിയിരുന്നു. അതേസമയം ദേശീയപാതയില്‍ ഓടുന്ന കെഎസ്ആര്‍ടിസി ബസുകളില്‍ ചിലത് കാസര്‍ഗോഡ് പുതിയ ബസ് സ്റ്റാന്‍ഡില്‍ കയറുന്നില്ലെന്ന് യാത്രക്കാര്‍ പരാതിപ്പെടുന്നു. പ്രസ് ക്ലബ് ജംഗ്ഷനില്‍ യാത്രക്കാരെ ഇറക്കി പഴയ ബസ് സ്റ്റാന്‍ഡ് വഴി ഡിപ്പോയിലേ്ക പോകുന്നുവെന്നാണ് യാത്രക്കാര്‍ പറയുന്നത്. ഇതു കാരണം പുതിയ ബസ് സ്റ്റാന്‍ഡ് വഴി ചെര്‍ക്കളയിലേക്ക് പോകുന്നവര്‍ക്ക് ദുരിതമാണ് കെഎസ്ആര്‍ടിസി സമ്മാനിക്കുന്നത്. 10 രൂപ അധികം കൊടുത്ത് പുതിയ ബസ് സ്റ്റാന്‍ഡില്‍ പോകേണ്ട സ്ഥിതിയാണുള്ളത്. റിപ്പോര്‍ട്ട് ലഭിച്ചാല്‍ അഞ്ചുദിവസത്തിനകം ഗതാഗതം പുനഃസ്ഥാപിക്കും: കളക്ടര്‍ ദേശീയപാത 66 നിര്‍മാണത്തിനിടെ മണ്ണിടിഞ്ഞതിനെതുടര്‍ന്ന് ഗതാഗതം നിരോധിച്ച തെക്കിലില്‍ പാര്‍ശ്വസംരക്ഷണ നിര്‍മാണ പ്രവൃത്തികള്‍ അടിയന്തരമായി പൂര്‍ത്തിയാക്കാന്‍ ജില്ലാ കളക്ടര്‍ കെ. ഇമ്പശേഖര്‍ കരാര്‍ കമ്പനികള്‍ക്ക് ഉത്തരവ് നല്‍കി. പാര്‍ശ്വഭിത്തി നിര്‍മാണം പൂര്‍ത്തിയാക്കാന്‍ നാലുദിവസം കൂടി വേണമെന്ന് സ്ഥലം സന്ദര്‍ശിച്ച ജില്ലാ കളക്ടറെ ദേശീയപാതാ നിര്‍മാണപ്രതിനിധികള്‍ അറിയിച്ചു. ദേശീയപാത അതോറിറ്റി റിപ്പോര്‍ട്ട് ലഭിച്ചാല്‍ അഞ്ചുദിവസത്തിനകം ഇതുവഴിയുള്ള ഗതാഗതം പുനരാരംഭിക്കാനാകുമെന്ന് കളക്ടര്‍ അറിയിച്ചു. അതേസമയം ദേശീയപാത വഴി വരുന്ന പ്രൈവറ്റ് ബസുകളെല്ലാം പുതിയ ബസ് സ്റ്റാന്‍ഡിലെത്തിയാണ് പഴയ ബസ് സ്റ്റാന്‍ഡിലേക്ക് പോകുന്നത്. യാത്രക്കാര്‍ പരാതിപ്പെട്ടതോടെ ചില കെഎസ്ആര്‍ടിസി ബസുകള്‍ പുതിയ ബസ് സ്റ്റാന്‍ഡില്‍ വന്നുപോകാന്‍ തുടങ്ങിയിട്ടുണ്ട്.

ആടുകളെ തെരുവുനായകള്‍ കടിച്ചുകൊന്നു

പടുപ്പ്: പറമ്പില്‍ കെട്ടിയിട്ടിരുന്ന രണ്ട് ആടുകളെ തെരുവുനായക്കൂട്ടം കടിച്ചുകൊന്നു. പടുപ്പ് സെന്‍റ് ജോര്‍ജ് പള്ളിക്ക് സമീപം താമസിക്കുന്ന വാട്ടപ്പള്ളി രാജേഷിന്‍റെ ഒരു മാസം ഗര്‍ഭിണിയായ ആടിനെയും മറ്റൊരു ആടിനെയുമാണ് കടിച്ചുകൊന്നത്. ഒരു ആടിനെ മുറിവേല്‍പ്പിക്കുകയും ചെയ്തു. പള്ളിക്ക് സമീപവും പടുപ്പ് ടൗണിലും തെരുവ് നായ്ക്കളുടെ ശല്യം കൂടുതലാണ്. സ്‌കൂളില്‍ പോകുന്ന കുട്ടികള്‍ പേടിയോടെയാണ് ഈ വഴി കടന്നുപോകുന്നത്. അധികൃതരുടെ ഭാഗത്ത് നിന്നും ശാശ്വതമായ പരിഹാരം കാണണമെന്ന് നാട്ടുകാര്‍ ആവശ്യപ്പെടുന്നു.

മയക്കുമരുന്ന് കേസ് പ്രതിയെ പൂജപ്പുര ജയിലിലടയ്ക്കും

കാഞ്ഞങ്ങാട്: നിരവധി മയക്കുമരുന്ന് കേസുകളില്‍ പ്രതിയായ യുവാവിനെ പിഐടി എന്‍ഡിപിഎസ് ആക്ട് പ്രകാരം ഹൊസ്ദുര്‍ഗ് പോലീസ് അറസ്റ്റ് ചെയ്തു. കൊളവയല്‍ ഇട്ടമ്മല്‍ സ്വദേശി പി.പി. നിസാമുദ്ദീനെയാണ് (35) അറസ്റ്റ് ചെയ്തത്. സംസ്ഥാന സര്‍ക്കാര്‍ ഒരു വര്‍ഷത്തേക്ക് തടവില്‍ പാര്‍പ്പിക്കാന്‍ ഉത്തരവിട്ട ഇയാളെ പൂജപ്പുര സെന്‍ട്രല്‍ ജയിലിലേക്ക് മാറ്റും. 72.73ഗ്രാ എംഡിഎംഎ വില്പനക്കായി കൈവശം വച്ചതിന് കഴിഞ്ഞ ഡിസംബറില്‍ തലപ്പാടിയില്‍ പിടിയിലായ ഇയാള്‍ക്കെതിരെ മഞ്ചേശ്വരം പോലീസ് സ്റ്റേഷനില്‍ കേസ്സ് രജിസ്റ്റര്‍ ചെയ്തിരുന്നു. ബേക്കല്‍ പോലീസ് സ്റ്റേഷനില്‍ രണ്ട് ലഹരിക്കേസുകളും‍ ഇയാള്‍ക്കെതിരെയുണ്ട്. തുടര്‍ച്ചയായി ലഹരിക്കേസുകളില്‍ ഉള്‍പ്പെട്ടവര്‍ക്കെതിരെ ചുമത്തുന്ന പ്രിവന്‍ഷന്‍ ഓഫ് ഇല്ലിസിറ്റ് ട്രാഫിക്ക് എന്‍ഡിപിഎസ് നിയമപ്രകാരം കാഞ്ഞങ്ങാട് സബ് ഡിവിഷനിലെ ആദ്യ അറസ്റ്റാണിത്. ജില്ലയില്‍ ഈ നിയമപ്രകാരം അറസ്റ്റിലാകുന്ന നാലാമത്തെയാളാണ് നിസാമുദ്ദീന്‍.

നവജീവന സ്‌പെഷല്‍ സ്‌കൂളിൽ സൗജന്യ തെറാപ്പി സെന്‍റര്‍ തുറന്നു

പെര്‍ള: നവജീവന സ്‌പെഷല്‍ സ്‌കൂളിലെ സൗജന്യ തെറാപ്പി സെന്‍റര്‍ ഔദ്യോഗികമായി ഉദ്ഘാടനം ചെയ്തു. ഭിന്നശേഷിക്കാരായ കുട്ടികളെ വളരെ ചെറുപ്രായത്തില്‍ തന്നെ കണ്ടെത്തുകയും അവര്‍ക്ക് ഫിസിയോതെറാപ്പി, സ്പീച്ച് തെറാപ്പി, ബിഹേവിയറല്‍ തെറാപ്പി, ഒക്കുപേഷണല്‍ തെറാപ്പി, കൗണ്‍സലിംഗ് എന്നിവ സൗജന്യമായി നല്‍കുന്നതിനാണ് സെന്‍റര്‍ മുഖ്യമായും ലക്ഷ്യമിടുന്നത്. ആധുനിക സൗകര്യങ്ങളോടു കൂടി കുട്ടികളുടെ മാനസിക ഉല്ലാസത്തിന് ഉപകാരപ്രദമാകുന്ന രീതിയിലാണ് കെട്ടിടം പണികഴിപ്പിച്ചിരിക്കുന്നത്. 2017 മുതൽ എന്‍മകജെ ഇടിയടുക്കയില്‍ സ്ഥിതിചെയ്യുന്ന സ്ഥാപനം മാനന്തവാടി നോര്‍ബട്ടൈന്‍ സന്യാസ സമൂഹത്തിന്‍റെയും എഫ്‌സിസി സന്യാസിനി സമൂഹത്തിന്‍റെയും നേതൃത്വത്തിലാണ് പ്രവര്‍ത്തിക്കുന്നത്. 120ലധികം കുട്ടികള്‍ തെറാപ്പികള്‍ക്കും പ്രത്യേക പഠനത്തിനും പരിശീലനത്തിനും ഇവിടെ ചെലവഴിക്കുന്നു. തെറാപ്പി സെന്‍ററിന്‍റെ ഉദ്ഘാടനം എ.കെ.എം. അഷറഫ് എംഎല്‍എ നിര്‍വഹിച്ചു ഒക്കുപേഷണല്‍, സെന്‍സറി ലാബുകളുടെ ഉദ്ഘാടനം എന്‍മകജെ പഞ്ചായത്ത് പ്രസിഡന്‍റ് ജെ.എസ്. സോമശേഖര നിര്‍വഹിച്ചു. കുട്ടികള്‍ക്ക് വേണ്ടി ആരംഭിച്ചിരിക്കുന്ന റിക്കാര്‍ഡിംഗ് സ്റ്റുഡിയോയുടെ ഉദ്ഘാടനം തലശേരി സെന്‍റ് ജോസഫ് പ്രൊവിന്‍സിന്‍റെ പ്രൊവിന്‍ഷ്യല്‍ സുപ്പീരിയര്‍ സിസ്റ്റര്‍ അഞ്ജലി എഫ്‌സി നിര്‍വഹിച്ചു. തുടര്‍ന്ന് നടന്ന പൊതുസമ്മേളനത്തില്‍ മാനന്തവാടി നോര്‍ബട്ടൈന്‍ സന്യാസ സമൂഹത്തിന്‍റെ പ്രോലേറ്റ് റവ. ഡോ. ജോസ് മുരിക്കന്‍ അധ്യക്ഷത വഹിച്ചു. പെര്‍ള സെന്‍റ് ജൂഡ് പള്ളി വികാരി ഫാ. ആല്‍ബര്‍ട്ട് തെക്കേവയലില്‍, റാണി മരിയ എഫ്‌സി കോണ്‍വന്‍റ് സുപ്പീരിയര്‍ സിസ്റ്റര്‍ സെസിന്‍ എഫ്‌സിസി, പിടിഎ പ്രസിഡന്‍റ് ശശിധരന്‍ എന്നിവര്‍ പ്രസംഗിച്ചു. സ്‌കൂള്‍ മാനേജര്‍ ഫാ. ജോസ് ചെമ്പോട്ടിക്കല്‍ സ്വാഗതവും പ്രിന്‍സിപ്പല്‍ സിസ്റ്റര്‍ ഷെന്‍സി ജോസ് എഫ്‌സിസി നന്ദിയും പറഞ്ഞു. തുടര്‍ന്ന് കുട്ടികളുടെ വിവിധ കലാപരിപാടികളും അരങ്ങേറി.

റബറിന്‍റെ തറവില 250 രൂപയാക്കണം

കാഞ്ഞിരടുക്കം: സംസ്ഥാന സര്‍ക്കാരിന്‍റെ പ്രകടനപത്രികയിലെ റബറിന്‍റെ അടിസ്ഥാന വില 250 രൂപ എത്രയും പെട്ടെന്ന് നടപ്പാക്കണമെന്ന് കാഞ്ഞിരടുക്കം റബര്‍ ഉത്പാദകസംഘത്തിന്‍റെ വാര്‍ഷിക പൊതുയോഗം ആവശ്യപ്പെട്ടു. റബര്‍ ബോര്‍ഡ് കാഞ്ഞങ്ങാട് റീജിയണല്‍ ഓഫീസ് റബര്‍ പ്രൊഡക്ഷന്‍ കമ്മീഷണര്‍ കെ.ടി. രാജു ഉദ്ഘാടനം ചെയ്തു. പ്രസിഡന്‍റ് ജോണ്‍സണ്‍ പാറപ്പുറത്ത് അധ്യക്ഷതവഹിച്ചു. കാഞ്ഞിരടുക്കം സെന്‍റ് ജോര്‍ജ് പള്ളി വികാരി ഫാ. തോമസ് പള്ളിക്കല്‍, കാഞ്ഞങ്ങട് റബേഴ്‌സ് കമ്പനി ലിമിറ്റഡ് മാനേജിംഗ് ഡയറക്ടര്‍ അനില്‍കുമാര്‍, എഡിഒ ഷൈനി റെജി, വൈസ്പ്രസിഡന്‍റ് കെ.യു. മാത്യു, ഡയറക്ടര്‍മാരായ ജോര്‍ജ് പൈനാപ്പള്ളി, റ്റി.വി. രാജേഷ്, റ്റി.എം. ജോസ്, സണ്ണി കണിപ്പള്ളി എന്നിവര്‍ പ്രസംഗിച്ചു.

യുഡിഎഫ് ആഹ്ളാദപ്രകടനം

വെള്ളരിക്കുണ്ട്: നിലമ്പൂർ ഉപതെരഞ്ഞടുപ്പിലെ വിജയത്തിൽ ആഹ്ളാദം പ്രകടിപ്പിച്ചുകൊണ്ട് വെള്ളരിക്കുണ്ടിൽ യുഡിഎഫ് ആഹ്ളാദപ്രകടനം നടത്തി. ബസ് സ്റ്റാൻഡ് പരിസരത്തു നിന്ന് പ്രകടനം ആരംഭിച്ച് തെക്കേ ബസാറിൽ സമാപിച്ചു. ഡിസിസി സെക്രട്ടറി ഹരീഷ് പി. നായർ, മുസ്‌ലിംലീഗ് ജില്ലാ കമ്മിറ്റി അംഗം എ.സി.എ. ലത്തീഫ്, യുഡിഎഫ് നിയോജകമണ്ഡലം ചെയർമാൻ പ്രിൻസ് ജോസഫ്, ഷോബി ജോസഫ്, കെ.ആർ. വിനു, ജോസ് ചിത്രക്കുഴി, എൽ.കെ. മൊയ്‌തു, കെ.എ. സാലു, ജോസ് വടക്കേപറമ്പിൽ, സണ്ണി കള്ളിവയൽ, ബേബി വെള്ളംകുന്നേൽ, മാത്യു കൈതമറ്റം, ഫവാസ് അജ്മൽ, ദേവസ്യ മുതുകുളം, ജയിംസ് പടിഞ്ഞാറെമുറി എന്നിവർ നേതൃത്വം നൽകി. ചിറ്റാരിക്കാൽ: നിലമ്പൂർ ഉപതെരഞ്ഞെടുപ്പിലെ യുഡിഎഫ് വിജയത്തിൽ ഈസ്റ്റ്‌ എളേരി മണ്ഡലം കോൺഗ്രസ്‌ കമ്മിറ്റിയുടെ നേതൃത്വത്തിൽ ആഹ്ളാദ പ്രകടനം നടത്തി. മണ്ഡലം പ്രസിഡന്‍റ് ജോർജ് കരിമഠം, പഞ്ചായത്ത്‌ പ്രസിഡന്‍റ് ജോസഫ് മുത്തോലി, ഡിസിസി സെക്രട്ടറി ടോമി പ്ലാച്ചേരി, ജോസ് കുത്തിയതോട്ടിൽ, പ്രശാന്ത് പാറേക്കുടിയിൽ, തോമസ് മാത്യു, മാത്യു സെബാസ്റ്റ്യൻ, എം.കെ. ഗോപാലകൃഷ്ണൻ, ബെന്നി കോഴിക്കോട്, അഗസ്റ്റിൻ ജോസഫ്, ഡൊമിനിക് കോയിത്തുരുത്തേൽ, മനോജ് കിഴക്കേൽ എന്നിവർ നേതൃത്വം നല്കി.

കുട്ടി ഡ്രൈവർമാരെ പിടിക്കാൻ ജില്ലയിലെങ്ങും പോലീസ് പരിശോധന

കാഞ്ഞങ്ങാട്: പ്ലസ് വൺ ക്ലാസുകളടക്കം തുടങ്ങിയതോടെ പ്രായപൂർത്തിയാകാത്തവർ വാഹനമെടുത്ത് ഇറങ്ങുന്നത് തടയാൻ ജില്ലയിലെങ്ങും പോലീസ് പരിശോധന. കഴിഞ്ഞ ദിവസങ്ങളിൽ ഹൊസ്ദുർഗ്, അമ്പലത്തറ, രാജപുരം, ബേക്കൽ, ചന്തേര പോലീസ് സ്റ്റേഷനുകളുടെ പരിധികളിലായി ഇതുമായി ബന്ധപ്പെട്ട് പത്തോളം കേസുകളാണ് രജിസ്റ്റർ ചെയ്തത്. മിക്കതിലും അമ്മമാരുടെ പേരിലുള്ള ഇരുചക്രവാഹനങ്ങളുമായാണ് കുട്ടികൾ ഇറങ്ങിയത്. ഇതിലെല്ലാം അമ്മമാരുടെ പേരിലാണ് കേസെടുത്തിട്ടുള്ളത്. പിഴശിക്ഷയ്ക്കൊപ്പം ഇവരുടെ ലൈസൻസ് നിശ്ചിതകാലത്തേക്ക് സസ്പെൻഡ് ചെയ്യുന്നതടക്കമുള്ള നടപടികളുണ്ടാകും. ബന്ധപ്പെട്ട വാഹനങ്ങളും കസ്റ്റഡിയിലെടുത്തിട്ടുണ്ട്. ഇലക്ട്രിക് സ്കൂട്ടറുകളുടെ കാര്യത്തിൽ നിയമങ്ങൾ അത്ര കർശനമല്ലാത്തതിന്‍റെ മറവിലാണ് കുട്ടികൾ മറ്റു വാഹനങ്ങളും എടുത്തുപയോഗിക്കുന്നതെന്ന് പോലീസും മോട്ടോർവാഹന വകുപ്പ് അധികൃതരും പറയുന്നു.

ഉന്നതവിജയികള്‍ക്ക് ആദരം

കാലിച്ചാനടുക്കം: വൈഎംസിഎയുടെ ആഭിമുഖ്യത്തില്‍ എസ്എസ്എല്‍സി, പ്ലസ്ടു പരീക്ഷകളിലെ ഉന്നത വിജയികള്‍ക്ക് ആദരവും കുടുംബസംഗമവും പുതിയ ഭാരവാഹികളുടെ സത്യപ്രതിജ്ഞ ചടങ്ങും സംഘടിപ്പിച്ചു. കാസര്‍ഗോഡ് സബ് റീജിയണ്‍ ചെയര്‍മാന്‍ സണ്ണി മാണിശേരി ഉദ്ഘാടനം ചെയ്തു. എം.ജെ. ബേബി അധ്യക്ഷതവഹിച്ചു. കാലിച്ചാനടുക്കം സെന്‍റ് ജോസഫ് ഇടവക വികാരി ഫാ. സുനീഷ് പുതുക്കുളങ്ങര അനുഗ്രഹപ്രഭാഷണം നടത്തി. കാലിച്ചാനടുക്കം വിൻസെന്‍ഷ്യന്‍ ആശ്രമം സുപ്പീരിയര്‍ ഫാ. ആന്‍റോ ഇടശേരി ഉപഹാരസമര്‍പ്പണം നടത്തി. യൂണി-വൈ സംസ്ഥാന ചെയര്‍മാന്‍ അഖില്‍ ജോണ്‍ വിശിഷ്ടാതിഥിയായി. ഫാ. അമല്‍ തോമസ് ചിലാലയില്‍, സി.എം. ബൈജു, ജിസ്മി ജോസ്, ജോയി പന്തമാക്കല്‍, ലിസി രാജന്‍ പുളിക്കല്‍, അനഘ പോള്‍, അമല്‍ നെടുമല എന്നിവര്‍ പ്രസംഗിച്ചു. സിബി മലയാറ്റില്‍ സ്വാഗതവും ജിജി ജോണ്‍ നന്ദിയും പറഞ്ഞു.

പി.എന്‍. പണിക്കര്‍ അനുസ്മരണവും അനുമോദന സദസും

എണ്ണപ്പാറ: മുക്കുഴി പുനര്‍ജനി വായനശാല പി.എന്‍. പണിക്കര്‍ അനുസ്മരണവും അനുമോദനസദസും സംഘടിപ്പിച്ചു. എസ് എസ് എല്‍ സി, പ്ലസ്ടു, എല്‍ എസ് എസ്, യു എസ് എസ് പരീക്ഷകളില്‍ വിജയിച്ച കുട്ടികള്‍, സ്വര്‍ണ ലാലൂര്‍, സൈന്യത്തില്‍ നിന്നും ദീര്‍ഘകാലത്തെ സേവനത്തിനു ശേഷം സുബൈദാര്‍ പദവിയില്‍ നിന്നും വിരമിച്ച എം.ജെ. ജോഷി, ചിത്രകാരന്‍ കെ.ആര്‍. ഷാജി എന്നിവരെ ആദരിച്ചു. ജില്ലാ പഞ്ചായത്തംഗം ഷിനോജ് ചാക്കോ ഉദ്ഘാടനം ചെയ്തു. ലൈബ്രറി പ്രസിഡന്‍റ് മണിപ്രസാദ് അധ്യക്ഷതവഹിച്ചു. സുരേഷ് പാറക്കല്ല്, രാജേഷ് നര്‍ക്കല, ഗോപി, ബാബുരാജ്, കെ.സി. ജിജോമോന്‍, കെ.സി. ഏബ്രഹാം, ജെയിന്‍ മുക്കുഴി, ഷിജു ചാക്കോ എന്നിവര്‍ സംസാരിച്ചു.

നീലേശ്വരം പോലീസിനും നന്മമരത്തിനുമെതിരെ കാഞ്ഞങ്ങാട് നഗരസഭ പരാതി നല്‍കി

കാഞ്ഞങ്ങാട്: അവകാശികളില്ലാത്ത മൃതദേഹം സംസ്‌കരിച്ചപ്പോള്‍ നീലേശ്വരം പോലീസ് നടപടിക്രമം പാലിക്കാത്തതിനെതിരെ കാഞ്ഞങ്ങാട് നഗരസഭ പരാതി നല്‍കി. ബുധനാഴ്ച വൈകുന്നേരമാണ് കിനാനൂര്‍-കരിന്തളം നെല്ലിയടുക്കം കിളിയളം ചാലില്‍ ബാനം സ്വദേശി കെ.വി.രാജന്‍റെ മൃതദേഹം കാണപ്പെട്ടത്. മൂന്നുദിവസത്തിലധികം പഴക്കമുള്ള മൃതദേഹം ചീഞ്ഞളിഞ്ഞ നിലയിലായിരുന്നു. മൃതദേഹം പരിയാരം ഗവ. മെഡിക്കല്‍ കോളജില്‍ പോസ്റ്റുമോര്‍ട്ടം നടത്തി. എന്നാല്‍ മൃതദേഹം ഏറ്റെടുക്കാന്‍ ബന്ധുക്കള്‍ തയാറായില്ല. ഇത്തരത്തില്‍ ലഭിക്കുന്ന മൃതദേഹങ്ങള്‍ സംസ്‌കരിക്കാന്‍ നീലേശ്വരത്ത് സ്ഥലവുമില്ല. ഇതോടെയാണ് നീലേശ്വരം പോലീസ് കാഞ്ഞങ്ങാട്ടെ നന്മമരം ചാരിറ്റബിള്‍ ട്രസ്റ്റിന്‍റെ സഹായം തേടുന്നത്. നന്മമരം പ്രവര്‍ത്തകര്‍ കാഞ്ഞങ്ങാട് നഗരസഭയുടെ പൊതുശ്മശാനത്തില്‍ സംസ്‌കാരം നടത്തി. സംസ്‌കാരത്തിനുശേഷം നീലേശ്വരം എസ്‌ഐ കെ.വി. രതീശന്‍ 3000 രൂപ നല്‍കി. ഈ തുക അവര്‍ ഒരു വൃക്കരോഗിക്ക് നല്‍കുകയും ചെയ്തു. ഇവര്‍ സംസ്‌കാരം നടത്തിയ ദിവസം തന്നെ കൃഷ്ണമന്ദിരം റോഡിലെ രവീന്ദ്രന്‍ എന്നയാളുടെ സംസ്‌കാരവും ഇവിടെ നടത്തിയിരുന്നു. ഇതിനായി ശ്മശാനം തുറന്നിരുന്നു. മാരിയമ്മ സേവാസമിതി പ്രവര്‍ത്തകര്‍ക്കാണ് ശ്മശാനത്തിന്‍റെ നടത്തിപ്പുചുമതല. പിറ്റേന്ന് മാധ്യമവാര്‍ത്തയിലൂടെയാണ് അനുമതിയില്ലാതെ മൃതദേഹം സംസ്‌കരിച്ച സംഭവത്തെക്കുറിച്ചറിയുന്നതെന്ന് കാഞ്ഞങ്ങാട് നഗരസഭ കാഞ്ഞങ്ങാട് ഡിവൈഎസ്പിക്കും ജില്ലാ പോലീസ് മേധാവിക്കും നല്‍കിയ പരാതിയില്‍ പറയുന്നു. നഗരസഭ വൈസ്‌ചെയര്‍മാന്‍ ബില്‍ടെക് അബ്ദുള്ളയുടെ അനുമതിയോടെയാണ് മൃതദേഹം സംസ്‌കരിച്ചതെന്നാണ് നീലേശ്വരം പോലീസിന്‍റെ വാദം. എന്നാല്‍ രേഖാമൂലമുള്ള യാതൊരു അനുമതിയും നഗരസഭ നല്‍കിയില്ലെന്നും മാത്രമല്ല വൈസ് ചെയര്‍മാനല്ല, സെക്രട്ടറിയാണ് ഇതിന് അനുമതി നല്‍കേണ്ടതെന്നും നഗരസഭ അധികൃതര്‍ പറയുന്നു. ഇടപെട്ടത് പോലീസ് സഹായം അഭ്യര്‍ഥിച്ചതിനാല്‍: നന്മമരം പോലീസ് സഹായം അഭ്യര്‍ഥിച്ചതിന്‍റെ അടിസ്ഥാനത്തില്‍ മാത്രം ഈ വിഷയത്തില്‍ ഇടപെട്ട തങ്ങളെ സമൂഹമധ്യത്തില്‍ അവഹേളിക്കുകയും കരിവാരിത്തേയ്ക്കുകയുമാണ് കേസ് കൊടുത്തതിലൂടെ നഗരസഭ ചെയ്തതെന്ന് നന്മമരം പ്രവര്‍ത്തകര്‍ ആരോപിച്ചു. കോവിഡ് കാലം മുതല്‍ ഇന്നുവരെ ഒരു ദിവസം പോലും മുടങ്ങാതെ കാഞ്ഞങ്ങാട്ടെ തെരുവില്‍ കഴിയുന്നവര്‍ക്ക് ഉച്ചഭക്ഷണു വിശേഷദിവസങ്ങളില്‍ സദ്യയും പുത്തനുടുപ്പും നല്‍കുന്നുണ്ട്. റെയില്‍വേ ട്രാക്കിലും മറ്റും ചിന്നിച്ചിതറിയ മൃതദേഹങ്ങള്‍ സംസ്‌കരിക്കുന്നതില്‍ പോലീസിനെ സഹായിക്കുന്നു. തങ്ങളുടെ പ്രവര്‍ത്തനങ്ങളെക്കുറിച്ച് നല്ല ബോധ്യമുള്ള നഗരഭരണാധികാരികള്‍ തന്നെ ഇങ്ങനെയൊരു നടപടി സ്വീകരിച്ചതില്‍ പ്രതിഷേധവും വിയോജിപ്പും അറിയിക്കുന്നതായി ഭാരവാഹികളായ സലാം കേരള, ഷിബു നോര്‍ത്ത്, ബഷീര്‍ കെട്ടിക്കാല്‍, വിനു വേലാശ്വരം, റഹ്‌മാന്‍ പാണത്തൂര്‍, പ്രസാദ് ആലാമിപ്പള്ളി എന്നിവര്‍ പത്രസമ്മേളനത്തില്‍ അറിയിച്ചു.

മേൽപ്പാലം വന്നപ്പോഴേക്കും ബസ് സ്റ്റോപ്പ് പോയി

കുമ്പള: പുതിയ ദേശീയപാതയുടെ തലപ്പാടി–ചെങ്കള റീച്ചിൽ കുമ്പള പെർവാഡ് ടൗണിൽ ഏറെ മുറവിളികൾക്കുശേഷം മേൽനടപ്പാലം നിർമിച്ചെങ്കിലും കിഴക്കുവശത്തെ ബസ് സ്റ്റോപ്പും കാത്തിരിപ്പ് കേന്ദ്രവും ഒഴിവാക്കിയതായി പരാതി. നിർമാണ കരാറുകാരായ ഊരാളുങ്കൽ സൊസൈറ്റി തയ്യാറാക്കിയ പട്ടിക പ്രകാരം പെർവാഡ് ദേശീയപാതയുടെ പടിഞ്ഞാറുഭാഗത്ത് മാത്രമാണ് ബസ് സ്റ്റോപ്പ് അനുവദിച്ചിരിക്കുന്നത്. കുമ്പള ഐഎച്ച്ആർഡി കോളജ് അടക്കമുള്ള വിദ്യാഭ്യാസ സ്ഥാപനങ്ങളിലേക്കും നിരവധി മതസ്ഥാപനങ്ങളിലേക്കും എസ്സാ കൺവെൻഷൻ സെന്‍ററിലേക്കും മഞ്ചേശ്വരം ഭാഗത്തുനിന്ന് എത്തുന്നവർ ഇവിടെയാണ് ബസിറങ്ങേണ്ടത്. തിരക്കേറിയ ടൗണിൽ റോഡ് മുറിച്ച് കടക്കാൻ മേൽനടപ്പാലം വേണമെന്ന ആവശ്യമുയർന്നതും ഇങ്ങനെയാണ്. നാട്ടുകാർ മേൽപ്പാലത്തിന്‍റെ നിർമാണം പൂർത്തിയായതിന്‍റെ ആശ്വാസത്തിൽ നിൽക്കുമ്പോഴാണ് ഇവിടെ ബസ് സ്റ്റോപ്പും കാത്തിരിപ്പുകേന്ദ്രവും നിർമിക്കുന്നില്ലെന്ന വിവരം പുറത്തുവന്നത്. കിഴക്കുവശത്ത് ബസ് കാത്തിരിപ്പുകേന്ദ്രം നിർമിക്കാൻ സ്ഥലം പരിമിതമാണെന്നാണ് അധികൃതരുടെ നിലപാട്. ഇതോടെ മേൽപ്പാലം കൊണ്ടുള്ള പ്രയോജനവും ഇല്ലാതാകുന്ന നിലയാണ്. പെർവാഡ് ടൗണിൽ റോഡിന്‍റെ പടിഞ്ഞാറ് വശത്തേതുപോലെ കിഴക്കുവശത്തും മേൽപ്പാലത്തോടുചേർന്ന് ബസ് സ്റ്റോപ്പ് അനുവദിക്കണമെന്നും ലഭ്യമായ സ്ഥലത്ത് യാത്രക്കാർക്കായി കാത്തിരിപ്പുകേന്ദ്രം നിർമിക്കുകയും ചെയ്യണമെന്നാവശ്യപ്പെട്ട് പൊതുപ്രവർത്തകനായ പി. മുഹമ്മദ് നിസാർ അധികൃതർക്ക് നിവേദനം നല്കിയിട്ടുണ്ട്.

വീട്ടിലും വണ്ടിയിലും പാമ്പ് വരുന്ന കാലം; സൂക്ഷിച്ചാൽ ദുഃഖിക്കേണ്ട

കാസർഗോഡ്: വേനൽച്ചൂടിൽ മാളങ്ങൾക്കുള്ളിലും കരിയിലകൾക്കടിയിലും പതുങ്ങിക്കിടന്ന പാമ്പുകൾ ഊർജസ്വലതയോടെ പുറത്തിറങ്ങുന്ന കാലമാണ് മഴക്കാലം. മൂർഖന്‍റെയും അണലിയുടെയും പെരുമ്പാമ്പിന്‍റെയുമൊക്കെ മുട്ടകൾ വിരിഞ്ഞ് കുഞ്ഞുങ്ങൾ പുറത്തുവരുന്നതും ഇക്കാലത്താണ്. ദിക്കുകിട്ടാതെ അലയുന്ന പാമ്പിൻകുഞ്ഞുങ്ങൾക്കുപോലും വിഷമുണ്ടാകും. കാറഡുക്ക കർമംതൊടിയിൽ രാവിലെ ജോലിക്കു പോവുകയായിരുന്ന പഞ്ചായത്ത് ജീവനക്കാരി സ്കൂട്ടർ സ്റ്റാർട്ട് ചെയ്യാനൊരുങ്ങുമ്പോൾ ഹാൻഡിൽ ബാറിൽ ചുറ്റിയിരുന്ന പാമ്പിനെ കണ്ട് പകച്ചതും ഉദുമയ്ക്ക് സമീപം അരമങ്ങാനത്ത് മകന് ഹെൽമെറ്റ് എടുത്തുകൊടുക്കുകയായിരുന്ന യുവതിക്ക് അതിനുള്ളിൽ പതുങ്ങിയിരുന്ന പാമ്പിന്‍റെ കടിയേറ്റതും കഴിഞ്ഞ ഒരാഴ്ചയ്ക്കിടയിലാണ്. കണ്ണൂർ പഴയങ്ങാടിയിലും ഇരിട്ടിയിലും അടുത്തിടെ ബൈക്കിലും ഹെൽമെറ്റിലും പാമ്പിനെ കണ്ടെത്തിയ സംഭവങ്ങളുണ്ടായി. മുമ്പ് വനമേഖലയിൽ മാത്രം കണ്ടിരുന്ന പെരുമ്പാമ്പുകൾ പോലും ഇപ്പോൾ നാട്ടിൻപുറങ്ങളിലും നഗരമേഖലയിലും സാധാരണമാവുകയാണ്. കർമംതൊടിയിലെ പഞ്ചായത്ത് ജീവനക്കാരി പൂർണിമയുടെ സ്കൂട്ടറിൽ ചുറ്റിപ്പിടിച്ചിരുന്നതും അരമങ്ങാനത്തെ മുംതാസിന്‍റെ ഹെൽമെറ്റിൽ പതുങ്ങിയിരുന്നതും പെരുമ്പാമ്പിൻ കുഞ്ഞുങ്ങളായിരുന്നു. ഇവയ്ക്ക് വിഷമില്ലാത്തതിനാൽ വലിയ തലവേദന ഒഴിവായി. എന്നാൽ മൂർഖൻ, അണലി, വെള്ളിക്കെട്ടൻ തുടങ്ങി കൊടിയ വിഷമുള്ള പാമ്പുകളും എല്ലായിടങ്ങളിലുമെത്തുന്നുണ്ട്. രണ്ടുപേർ ഇവയുടെ കടിയേറ്റ് മരിക്കുകയും ചെയ്തു. തക്കസമയത്ത് ചികിത്സ തേടിയതുകൊണ്ടുമാത്രം ജീവൻ രക്ഷപ്പെട്ടവരുമുണ്ട്. കഴിഞ്ഞ വർഷം രാജവെമ്പാലകളെ പോലും കണ്ടതാണ്. വനംവകുപ്പിനെ വിവരമറിയിച്ചാൽ സർപ്പ വോളണ്ടിയർമാരെത്തി പാമ്പുകളെ പിടികൂടി മറ്റൊരിടത്ത് കൊണ്ടുപോയി വിടുകയാണ് ചെയ്യുന്നത്. മഴക്കാലമായതോടെ പറമ്പുകളിൽ കാടും പടർപ്പുകളും തഴച്ചുവളരുന്ന കാലമാണ്. സ്വന്തം വീട്ടുപരിസരം വൃത്തിയാക്കിയാലും അടുത്തുള്ള ഒഴിഞ്ഞ പറമ്പിൽ നിന്നോ സർക്കാർ ഭൂമിയിൽ നിന്നോ പാമ്പുകൾ വീട്ടുപരിസരത്തെത്താം. നടവഴികളിൽ പോലും പതുങ്ങിക്കിടക്കുന്ന പാമ്പിൻകുഞ്ഞുങ്ങളെ അറിയാതെ ചവിട്ടിപ്പോകാനിടയുണ്ട്. വാഹനങ്ങളിലും ഹെൽമെറ്റിലും കയറിക്കൂടുന്നതുപോലെ അഴിച്ചുവച്ച ഷൂസിനുള്ളിലും കാർപെറ്റിനടിയിലുമൊക്കെ പാമ്പുകളുണ്ടായേക്കാം. പഴയ സാധനങ്ങൾ കൂട്ടിവച്ച സ്ഥലങ്ങളുണ്ടെങ്കിൽ പ്രത്യേകം ശ്രദ്ധിക്കണം. നീലേശ്വരത്ത് റെയിൽവേ സ്റ്റേഷൻ പരിസരത്തെ കാടുപിടിച്ച സ്ഥലത്തുനിന്ന് സ്കൂൾ കെട്ടിടത്തിലെത്തിയ പാമ്പ് ക്ലാസ് മുറിക്കു പുറത്തുവച്ച് അധ്യാപികയെ കടിച്ചത് കഴിഞ്ഞ വർഷമാണ്. വെളിച്ചമില്ലാത്ത സ്ഥലങ്ങളിലൂടെ നടക്കുമ്പോഴും സാധനങ്ങളെടുക്കുമ്പോഴും മൊബൈൽ വെട്ടമെങ്കിലും തെളിയിക്കണം. പാമ്പുകടിയേറ്റാൽ സംശയത്തിനിട നല്കാതെ എത്രയും പെട്ടെന്ന് ആശുപത്രിയിലെത്തിക്കേണ്ടതും അത്യാവശ്യമാണ്.

കാറിന്‍റെ പിന്നിൽ ബൈക്കിടിച്ച് യുവാവ് മരിച്ചു

തൃക്കരിപ്പൂർ: കാലിക്കടവ്- തൃക്കരിപ്പൂർ പ്രധാന പാതയിലെ ചന്തേരയിലുണ്ടായ വാഹനാപകടത്തിൽ ബൈക്ക് യാത്രികനായ യുവാവ് മരിച്ചു. സഹയാത്രികന് ഗുരുതരപരിക്ക്. വലിയപറമ്പ കന്നുവീട് കടപ്പുറത്തെ ഇ. രാജീവന്‍റെയും പ്രജിനയുടെയും മകൻ വസുദേവ് (19) ആണ് മരിച്ചത്. ബൈക്കിൽ കൂടെ സഞ്ചരിച്ച കന്നുവീട് കടപ്പുറത്തെ അനിലന്‍റെ മകൻ ആദിത്യനെ (21) ഗുരുതര പരിക്കുകളോടെ മംഗളൂരുവിലെ ആശുപത്രിയിൽ പ്രവേശിപ്പിച്ചു. ഇന്നലെ ഉച്ചകഴിഞ്ഞ് മൂന്നോടെ ചന്തേര ഗവ. യുപി സ്കൂളിന് മുന്നിലാണ് അപകടം. ഇരുവരും സഞ്ചരിച്ച ബൈക്ക് നിയന്ത്രണംവിട്ട് കാറിന്‍റെ അരികിലിടിച്ചാണ് അപകടമുണ്ടായത്. കാലിക്കടവ് ഭാഗത്തുനിന്നു വന്ന ബൈക്ക് മുന്നിലുള്ള വാഹനങ്ങൾ ബ്രേക്ക് ചെയ്തപ്പോൾ നിർത്താനുള്ള ശ്രമത്തിൽ നിയന്ത്രണംവിട്ട് മുന്നിൽ പോയ കാറിന്‍റെ അരികിലിടിച്ച് യുവാക്കൾ റോഡിലേക്ക് തെറിച്ചുവീഴുകയായിരുന്നു. നാട്ടുകാരും ചന്തേര സ്റ്റേഷനിൽ നിന്നെത്തിയ പോലീസും ചേർന്ന് ചെറുവത്തൂരിലെ ആശുപത്രിയിലേക്കെത്തും മുമ്പ് വസുദേവ് മരിച്ചു. മൃതദേഹം പരിയാരം ഗവ. മെഡിക്കൽ കോളജിലേക്ക് മാറ്റി. സഹോദരി: വരലക്ഷ്മി.

കരുണ്‍ താപ്പയുടെ സംഭാവനകള്‍ നിസ്തുലം: സണ്ണി ജോസഫ്

കാസര്‍ഗോഡ്: അന്തരിച്ച ജില്ലാ കോണ്‍ഗ്രസ് കമ്മിറ്റിയുടെ ജനറല്‍ സെക്രട്ടറി ആയിരുന്ന കരുണ്‍ താപ്പ പാര്‍ട്ടിയെ ശക്തിപ്പെടുത്തുന്നതില്‍ നിസ്തുലമായ സംഭാവനകള്‍ ചെയ്ത വ്യക്തിത്വവും രാഷ്ട്രീയ സാമൂഹ്യ സാംസ്‌കാരിക രംഗങ്ങളില്‍ അദ്ദേഹത്തിന്‍റേതായ മികവുറ്റ പ്രവര്‍ത്തനങ്ങള്‍ നടത്തിയ നേതാവായിരുന്നുവെന്നും കെപിസിസി പ്രസിഡന്‍റ് സണ്ണി ജോസഫ് എംഎല്‍എ. വിദ്യാനഗര്‍ ചാല റോഡിലുള്ള വസതിയിലെത്തി കുടുംബാംഗങ്ങളോട് അനുശോചനമറിയിച്ച് ഭൗതിക ശരീരത്തില്‍ റീത്ത് സമര്‍പ്പിക്കുകയും ചെയ്തു. രാജ്മോഹന്‍ ഉണ്ണിത്താന്‍ എംപി, ഡിസിസി പ്രസിഡന്‍റ് പി.കെ.ഫൈസല്‍ എന്നിവര്‍ ഒപ്പമുണ്ടായിരുന്നു.

കോടതി നടപടികൾ കണ്ടറിഞ്ഞ് സെന്‍റ് ജോൺസ് വിദ്യാർഥികൾ

പാലാവയൽ: വിദ്യാർഥികളെ കോടതി നടപടികൾ പരിചയപ്പെടുത്തുന്നതിനും നിയമ വ്യവസ്ഥതികൾ കൂടുതുതൽ മനസ്സിലാക്കുന്നതിനുമായി ജില്ലാ ലീഗൽ സെൽ സംഘടിപ്പിച്ച സംവാദ് എന്ന പ്രോഗ്രാമിൽ പാലാവയൽ സെന്‍റ് ജോൺസ് എച്ച്എസ്എസ് 30 കുട്ടികൾ പങ്കെടുത്തു. കാസർഗോഡ് ജില്ലാ കോടതിയിലെത്തിയ വിദ്യാർത്ഥികളുമായി ജില്ലാ ജഡ്ജ് രാജീവൻ സംവദിച്ചു. കുട്ടികളുടെ ചോദ്യങ്ങൾക്ക് അദ്ദേഹം മറുപടി നൽകി. കോടതിയിലെ വിചാരണ നടപടികൾ ഉൾപ്പെടെ എല്ലാ കാര്യങ്ങളും നേരിട്ടു കാണുന്നതിന് അവസരമൊരുക്കി. കോടതിയിലെ മറ്റു ജഡ്ജിമാർ, ലീഗൽ സെൽ ചുമതല വഹിക്കുന്ന അഭിഭാഷകർ, കൗൺസിലൽ എന്നിവർ കുട്ടികൾക്ക് ക്ലാസ്സ് എടുത്തു. തുടർന്ന് വിദ്യാനഗർ പോലീസ് സ്റ്റേഷനും കുട്ടികൾ സന്ദർശിച്ചു. എസ്എച്ച്ഒ വിപിൻ സ്റ്റേഷനിലെ കാര്യങ്ങൾ വിശദീകരിച്ചു നൽകി. കുട്ടികൾക്കു പുറമെ സ്കൂളിലെ സാമൂഹ്യ ശാസ്ത്ര അധ്യാപകരായ റോഷി ജോസ്, ദീപ ജോസ് എന്നിവരും പരിപാടിയിൽ പങ്കാളികളായി.

പട്ടികവിഭാഗം വിദ്യാർഥികളുടെ വിദേശപഠന സ്വപ്നം യാഥാർഥ്യമാക്കും: മന്ത്രി ഒ.ആർ. കേളു

ചീമേനി: പട്ടികജാതി പട്ടികവർഗ വിഭാഗങ്ങളിലെ വിദ്യാർഥികൾക്ക് വിദേശ പഠനം സാധ്യമാക്കാൻ സംസ്ഥാന സർക്കാർ ഒപ്പം നിൽക്കുമെന്ന് പട്ടികജാതി പട്ടികവർഗ പിന്നോക്കക്ഷേമ മന്ത്രി ഒ.ആർ. കേളു പറഞ്ഞു. നീലേശ്വരം ബ്ലോക്ക് പഞ്ചായത്ത് വാർഷിക പദ്ധതിയിൽ ഉൾപ്പെടുത്തി 30 ലക്ഷം രൂപ ചെലവിൽ കയ്യൂർ-ചീമേനി പഞ്ചായത്തിലെ പയ്യറാട്ട് നിർമിച്ച കമ്യൂണിറ്റി ഹാൾ ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. പട്ടികജാതി പട്ടികവർഗ വിഭാഗങ്ങളിലെ 800 യുവാക്കളെയാണ് സർക്കാർ സ്കോളർഷിപ്പ് നൽകി വിദേശ രാജ്യങ്ങളിലേക്ക് പഠനത്തിനായി അയച്ചിട്ടുള്ളത്. ഓരോരുത്തർക്കും 25 ലക്ഷം രൂപയാണ് നല്കുന്നത്. ഓസ്ട്രേലിയ, അമേരിക്ക, ജർമനി തുടങ്ങിയ രാജ്യങ്ങളിലാണ് ഇവർ പഠിച്ച് പ്ലേസ്മെന്‍റ് നേടുന്നതെന്ന് മന്ത്രി പറഞ്ഞു. ചടങ്ങിൽ എം. രാജഗോപാലൻ എംഎൽഎ അധ്യക്ഷത വഹിച്ചു. അസിസ്റ്റന്‍റ് എൻജിനീയർ എം.കെ. ശ്രുതി റിപ്പോർട്ട് അവതരിപ്പിച്ചു. ജില്ലാ പഞ്ചായത്ത് പൊതുമരാമത്ത് സ്ഥിരം സമിതി അധ്യക്ഷ കെ. ശകുന്തള, ബ്ലോക്ക് പഞ്ചായത്ത് പ്രസിഡന്‍റ് മാധവൻ മണിയറ, വൈസ് പ്രസിഡന്‍റ് പി.കെ. ലക്ഷ്മി, കയ്യൂർ ചീമേനി പഞ്ചായത്ത് പ്രസിഡന്‍റ് എ.ജി. അജിത് കുമാർ, വൈസ് പ്രസിഡന്‍റ് എം. ശാന്ത, ബ്ലോക്ക് പഞ്ചായത്ത് സ്ഥിരം സമിതി അധ്യക്ഷരായ വി.വി. സുനിത, എം. സുമേഷ്, കെ. അനിൽകുമാർ, അംഗങ്ങളായ എം. കുഞ്ഞിരാമൻ, ടി.എസ്. നജീബ്, പി.ബി. ഷീബ, പഞ്ചായത്ത് അംഗം എം. ശ്രീജ, ബ്ലോക്ക് പഞ്ചായത്ത് സെക്രട്ടറി ടി. രാകേഷ്, പട്ടികജാതി വികസന ഓഫീസർ പി.വി. സതീഷ്കുമാർ, പ്രമോട്ടർ എം. സൗമിനി, വിവിധ രാഷ്ട്രീയകക്ഷി പ്രതിനിധികളായ എം.കെ. നളിനാക്ഷൻ, കരിമ്പിൽ കൃഷ്ണൻ, കെ. രാജൻ, മുഹമ്മദ് കുഞ്ഞി കൂളിയാട് എന്നിവർ പങ്കെടുത്തു.

സിഡ്കോ വ്യവസായ ഭൂമിയിൽ നഗരസഭ മാലിന്യനിക്ഷേപം നടത്തുന്നതായി പരാതി

കാസര്‍ഗോഡ്: വ്യവസായ വികസനത്തിനുവേണ്ടി സിഡ്‌കോയില്‍ നിന്ന് ഏറ്റെടുത്ത രണ്ടേക്കര്‍ ഭൂമി കാസര്‍ഗോഡ് നഗരസഭ മാലിന്യ നിക്ഷേപ കേന്ദ്രമാക്കി മാറ്റിയതായി പരാതി. വിദ്യാനഗറിലെ സിഡ്‌കോ വ്യവസായ എസ്റ്റേറ്റിലാണ് നഗരസഭയിലെ ഹരിത കര്‍മസേനയുടെ നേതൃത്വത്തില്‍ ശേഖരിക്കുന്ന മാലിന്യം ചാക്കുകെട്ടുകളില്‍ നിറച്ച് സംഭരിച്ചുവയ്ക്കുന്നത്. മഴക്കാലമായതോടെ മാലിന്യം തെരുവ് നായ്ക്കള്‍ വലിച്ചിട്ട് സമീപത്തെ കിണറുകളിലേക്കടക്കം എത്തുകയാണെന്ന് വ്യവസായ എസ്റ്റേറ്റിലെ സംരംഭകര്‍ പറയുന്നു. ഷെഡുകള്‍ നിർമിച്ച് സംരംഭകര്‍ക്ക് നല്കാമെന്ന വ്യവസ്ഥയിലാണ് വര്‍ഷങ്ങള്‍ക്ക് മുമ്പ് നഗരസഭ സിഡ്‌കോയില്‍ നിന്ന് ഭൂമി ഏറ്റെടുത്തതെന്ന് സിഡ്‌കോ അധികൃതര്‍ പറയുന്നു. എന്നാൽ പേരിന് ഒന്നുരണ്ട് ഷെഡുകള്‍ മാത്രമാണ് പണിതത്. ഇവയിലൊന്നിനെയാണ് ഇപ്പോൾ നഗരസഭയുടെ പ്ലാസ്റ്റിക് ഷ്രഡിംഗ് യൂണിറ്റാക്കി മാറ്റിയിരിക്കുന്നത്. ഇതിനു ചുറ്റുമാണ് മാലിന്യം ചാക്കുകെട്ടുകളിലാക്കി കൂട്ടിയിട്ടിരിക്കുന്നത്. തൊട്ടടുത്തുള്ള നഗരസഭ വ്യവസായ വികസനകേന്ദ്രത്തിന്‍റെ പരിസരത്തും മാലിന്യങ്ങൾ കൂട്ടിയിട്ടിരിക്കുകയാണ്. സമീപത്തെ മറ്റ് വ്യവസായ സംരംഭങ്ങളിലേക്ക് പോകുന്നവര്‍ക്ക് ഈ മാലിന്യങ്ങളില്‍ ചവിട്ടിയും മൂക്കുപൊത്തിയും നടന്നുപോകേണ്ട അവസ്ഥയാണെന്ന് അവർ ചൂണ്ടിക്കാട്ടുന്നു.

കോളിയാർ വളവിൽ അപകടങ്ങൾ നിത്യസംഭവമാകുന്നു

പരപ്പ: ഒടയംചാൽ-ചെറുപുഴ റോഡിലെ കോളിയാർ വളവിൽ അപകടങ്ങൾ നിത്യസംഭവമാകുന്നു. ഏറ്റവുമൊടുവിൽ കഴിഞ്ഞ ദിവസം ഒരു പിക്കപ്പ് വാൻ നിയന്ത്രണംവിട്ട് മറിഞ്ഞിരുന്നു. നവീകരിച്ച റോഡിന്‍റെ നിർമാണത്തിലെ അപാകതയാണ് അപകടങ്ങൾക്ക് കാരണമാകുന്നതെന്നാണ് നാട്ടുകാർ പറയുന്നത്. കഴിഞ്ഞവർഷം ഇവിടെ നടന്ന അപകടങ്ങളിൽ രണ്ടുപേരുടെ ജീവൻ പൊലിഞ്ഞിരുന്നു. റോഡ് നിർമാണത്തിലെ അശാസ്ത്രീയത പരിശോധിച്ച് പ്രശ്നം ശാസ്ത്രീയമായി പരിഹരിച്ച് അപകടങ്ങൾ തടയുന്നതിനുള്ള നടപടി സ്വീകരിക്കണമെന്ന് കോടോം-ബേളൂർ പഞ്ചായത്ത് അംഗം എം.വി. ജഗന്നാഥ് പൊതുമരാമത്ത് വകുപ്പ് മന്ത്രിക്കും ജില്ലാ കലക്ടർക്കും നല്കിയ നിവേദനത്തിൽ ആവശ്യപ്പെട്ടു.

ജില്ലയുടെ വികസനത്തിന് കൂട്ടായ പരിശ്രമം അനിവാര്യം: രാജ്മോഹൻ ഉണ്ണിത്താൻ എംപി

കാസർഗോഡ്: ജില്ലയുടെ വികസന പിന്നോക്കാവസ്ഥ പരിഹരിക്കുന്നതിന് ജനപ്രതിനിധികളുടെയും വിവിധ വകുപ്പുകളിലെ ഉദ്യോഗസ്ഥരുടെയും കേന്ദ്ര-സംസ്ഥാന സർക്കാരുകളുടെയും കൂട്ടായ പരിശ്രമം അനിവാര്യമാണെന്ന് രാജ്മോഹൻ ഉണ്ണിത്താൻ എംപി പറഞ്ഞു. ജില്ലാ ആസൂത്രണ സമിതി ഹാളിൽ ചേർന്ന ഡിസ്ട്രിക്ട് ഡെവലപ്മെന്‍റ് ഓർഡിനേഷൻ ആൻഡ് മോണിറ്ററിംഗ് കമ്മിറ്റി (ദിശ) അവലോകനയോഗത്തിൽ അധ്യക്ഷത വഹിച്ചു പ്രസംഗിക്കുകയായിരുന്നു അദ്ദേഹം. ജില്ലയിൽ വിവിധ കേന്ദ്രാവിഷ്കൃത പദ്ധതികളുടെ കൃത്യമായ നടത്തിപ്പ് ഉറപ്പുവരുത്തണമെന്നും പദ്ധതികളെ സംബന്ധിച്ച് പ്രാദേശിക തലത്തിൽ ജനപ്രതിനിധികൾക്ക് അവബോധം നൽകണമെന്നും അദ്ദേഹം പറഞ്ഞു. ജില്ലയിൽ വിവിധ വകുപ്പുകൾ മുഖേന നടപ്പിലാക്കുന്ന കേന്ദ്രാവിഷ്കൃത പദ്ധതി പ്രവർത്തനങ്ങൾ യോഗത്തിൽ വിലയുത്തി. കേന്ദ്രാവിഷ്കൃത പദ്ധതികളുടെ നടത്തിപ്പിൽ തടസങ്ങൾ ഉണ്ടെങ്കിൽ അവ പരിഹരിക്കുന്നതിന് നടപടി സ്വീകരിക്കുമെന്ന് ദിശ ചെയർമാൻ കൂടിയായ രാജ്മോഹൻ ഉണ്ണിത്താൻ എംപി പറഞ്ഞു. കേന്ദ്ര-സംസ്ഥാന സർക്കാരുകളിൽ നിന്നുള്ള ഫണ്ടിന്‍റെ ലഭ്യത സമയബന്ധിതമായി വിലയിരുത്തുകയും വിനിയോഗം ഉറപ്പാക്കുകയും ചെയ്യണമെന്നും അദ്ദേഹം നിർദേശിച്ചു. ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണൻ, കയ്യൂർ ചീമേനി പഞ്ചായത്ത് പ്രസിഡന്‍റ് എ.ജി. അജിത് കുമാർ, വെസ്റ്റ് എളേരി പഞ്ചായത്ത് പ്രസിഡന്‍റ് ഗിരിജ മോഹനൻ, പിഎയു പ്രൊജക്ട് ഡയറക്ടർ പി.എ. ജസ്റ്റിൻ, വിവിധ വകുപ്പുകളുടെ ജില്ലാതല ഉദ്യോഗസ്ഥർ എന്നിവർ യോഗത്തിൽ സംബന്ധിച്ചു.

ദേശീയപാത: എഐവൈഎഫ് മനുഷ്യമതിൽ തീർത്തു

ചെറുവത്തൂർ: ദേശീയപാത നിർമാണം അശാസ്ത്രീയമായി നടത്തുന്നത് ജനങ്ങളുടെ ജീവനും സ്വത്തിനും ഭീഷണിയായി നിൽക്കുന്നുവെന്നും വീരമലക്കുന്നിനെ സംരക്ഷിക്കാൻ പാരിസ്ഥിതിക ഓഡിറ്റിംഗ് നടത്തണമെന്നും ആവശ്യപ്പെട്ട് എഐവൈഎഫ് വീരമലക്കുന്നിന് മുന്നിൽ മനുഷ്യ മതിൽ തീർത്തു. സിപിഐ ജില്ലാ സെക്രട്ടറി സി.പി. ബാബു ഉദ്ഘാടനം ചെയ്തു. എഐവൈഎഫ് ജില്ലാ പ്രസിഡന്‍റ് എം.സി. അജിത് അധ്യക്ഷതവഹിച്ചു. ബങ്കളം പി. കുഞ്ഞികൃഷ്ണൻ, ധനീഷ് ബിരിക്കുളം, സി.വി. വിജയരാജ്, മുകേഷ് ബാലകൃഷ്ണൻ, പ്രകാശൻ പള്ളിക്കാപ്പിൽ, കെ.വി. ദിലീഷ്, കെ. കരുണാകരൻ, എം. ശ്രീജിത് എന്നിവർ പ്രസംഗിച്ചു.

ഉച്ചഭക്ഷണ മെനു മാത്രം പോര, മതിയായ തുകയും അനുവദിക്കണം: കെപിഎസ്ടിഎ

കാഞ്ഞങ്ങാട്: വിദ്യാഭ്യാസമന്ത്രി പ്രഖ്യാപിച്ച സ്‌കൂള്‍ കുട്ടികള്‍ക്കുള്ള ഉച്ചഭക്ഷണ മെനു സ്വാഗതം ചെയ്യുന്നുവെന്നും എന്നാല്‍ പുതുക്കിയ മെനു അനുസരിച്ച് ഭക്ഷണം നല്‍കുന്നതിന് പുതുക്കിയ തുകയും ആവശ്യമാണെന്ന് കെപിഎസ്ടിഎ റവന്യുജില്ലാകമ്മിറ്റി ആവശ്യപ്പെട്ടു. ഫ്രൈഡ് റൈസും ബിരിയാണിയും വവിധതരം കറികളും ഉള്‍പ്പെടെ ഭക്ഷണം നല്‍കുന്നതിന് നിലവില്‍ ലോവര്‍ പ്രൈമറിക്ക് അനുവദിച്ചിട്ടുള്ളത് 6.78 രൂപയാണ്. ഈ തുക വച്ച് എങ്ങനെയാണ് ഇത്രയും വിശാലമായ ഉച്ചഭക്ഷണം നല്‍കുന്നത്. നിലവില്‍ അനുവദിച്ചിട്ടുള്ള തുക പോലും മാസങ്ങളോളം കുടിശിക ആവുകയും ഹൈക്കോടതിയില്‍ കേസ് പരിഗണിക്കുന്ന മുറയ്ക്ക് മാത്രം മൂന്നും നാലും മാസത്തെ കുടിശിക അനുവദിക്കുകയും ചെയ്യുന്ന സര്‍ക്കാര്‍ കുട്ടികളോട് ആത്മാര്‍ത്ഥത ഉണ്ടെങ്കില്‍ ഉച്ചഭക്ഷണ തുക വര്‍ധിപ്പിക്കാന്‍ തയ്യാറാകണം. ഉച്ചഭക്ഷണ വിതരണത്തിനു വേണ്ടി മുഖ്യാധ്യാപകര്‍ പണം പിരിക്കാന്‍ ഇറങ്ങണമെന്ന മന്ത്രിയുടെ പ്രസ്താവന അംഗീകരിക്കാന്‍ കഴിയുന്നതല്ല. അധ്യാപകരുടെ ജോലി കുട്ടികളെ പഠിപ്പിക്കുക എന്നുള്ളതാണ്, പണപ്പിരിവല്ല. മതിയായ തുക അനുവദിക്കാത്ത പക്ഷം ഇപ്പോള്‍ പ്രഖ്യാപിച്ച മെനു നടപ്പിലാക്കാന്‍ കഴിയില്ലെന്ന് സര്‍ക്കാരിന് ഒഴികെ മറ്റെല്ലാവര്‍ക്കും അറിയാവുന്ന വസ്തുതയാണ്. വളരെക്കാലം മുമ്പ് കഞ്ഞിയും പയറും നല്‍കിയിരുന്ന കാലഘട്ടത്തില്‍ 500 കുട്ടികള്‍ക്ക് ഒരു പാചകക്കാരിയാണ് ഉണ്ടായിരുന്നത്. ചോറ്, ഒഴിച്ചു കറി, കൂട്ടുകറി, പാല്‍ ഇത്രയും ഒരു ദിവസം 500 കുട്ടികള്‍ക്ക് പാചകം ചെയ്യാന്‍ ഇപ്പോഴും ഒരു പാചകതൊഴിലാളിയാണുള്ളത്. ഒരാളെ കൊണ്ട് ഇത്രയും സാധനങ്ങള്‍ 500 കുട്ടികള്‍ക്ക് പാചകം ചെയ്തുകൊടുക്കാന്‍ കഴിയില്ല എന്നത് വസ്തുതയാണ്. അതിനാല്‍ അടിയന്തരമായി നൂറു കുട്ടികള്‍ക്ക് മുകളില്‍ രണ്ടു പാചക തൊഴിലാളികളെ അനുവദിക്കാന്‍ സര്‍ക്കാര്‍ തയ്യാറാകണം. ഏറ്റവും പുതിയ ഉത്തരമനുസരിച്ച് ലോവര്‍ പ്രൈമറിക്ക് 6.78 രൂപയും യുപി വിഭാഗത്തിന് 10.17 രൂപയുമാണ്. പാചകവാതകം, അരി കൊണ്ടുവരുന്നതിന്‍റെ കടത്തുകൂലി, പച്ചക്കറി, പലവ്യഞ്ജനം അടക്കമുള്ള ചെലവുകള്‍ക്ക് നിലവില്‍ അനുവദിച്ചിട്ടുള്ള തുക തികച്ചും അപര്യാപ്തമാണ്. അതിനാല്‍ പുതിയ മെനു നടപ്പിലാക്കണമെങ്കില്‍ അടിയന്തരമായി മതിയായ തുക അനുവദിക്കണമെന്നും ചെലവിനുള്ള പണം ഉമ്മന്‍ചാണ്ടി സര്‍ക്കാരിന്‍റെ കാലത്തേതു പോലെ മുന്‍കൂറായി അനുവദിക്കണമെന്നും കെപിഎസ്ടിഎ സര്‍ക്കാരിനോട് ആവശ്യപ്പെട്ടു. റവന്യു ജില്ലാ പ്രസിഡന്‍റ് പി.ടി. ബെന്നി അധ്യക്ഷതവഹിച്ചു. കെ. ഗോപാലകൃഷ്ണന്‍, പി. ശ്രീജ, ജി.കെ. ഗിരീഷ്, പി. ശശിധരന്‍, അലോഷ്യസ് ജോര്‍ജ്, പ്രശാന്ത് കാനത്തൂര്‍, ജോമി ടി. ജോസ്, സ്വപ്ന ജോര്‍ജ്, എം.കെ. പ്രിയ, വി.കെ. പ്രഭാവതി, പി. ജലജാക്ഷി, ടി.രാജേഷ് കുമാര്‍, സി.എം. വര്‍ഗീസ്, ബിജു അഗസ്റ്റിന്‍ എന്നിവര്‍ സംസാരിച്ചു.

യോഗ ദിനാചരണം നടത്തി

കാഞ്ഞങ്ങാട്: കേരള സര്‍ക്കാര്‍ -ആയുഷ് വകുപ്പ് നാഷണല്‍ ആയുഷ് മിഷന്‍ കേരളം വണ്‍ എര്‍ത്ത്, വണ്‍ ഹെല്‍ത്ത് അന്താരാഷ്ട്ര യോഗാ ദിന ജില്ലാതല പരിപാടി കാഞ്ഞങ്ങാട് വ്യാപാര ഭവനില്‍ ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍ ഉദ്ഘാടനം ചെയ്തു. ഹോമിയോപ്പതി വകുപ്പ് ജില്ലാ മെഡിക്കല്‍ ഓഫീസര്‍ ഡോ.എ.കെ. രേഷ്മ അധ്യക്ഷതവഹിച്ചു. ഭാരതീയ ചികിത്സാ വകുപ്പ് മെഡിക്കല്‍ ഓഫീസര്‍ ഡോ.ഡി.സി. ദീപ്തി മുഖ്യപ്രഭാഷണം നടത്തി. ജില്ലാ മെഡിക്കല്‍ ഓഫീസര്‍ ഡോ.എ.വി. രാംദാസ്, ഡോ.പി.വി. അരുണ്‍, ഡോ. നിര്‍മല പ്രതാപ്, ഡോ.പി.എസ്. മഹേഷ്, എം.വി. നാരായണന്‍, ഡോ.കെ. ശ്രുതി പണ്ഡിറ്റ്, ഡോ. പ്രദീപ് ദാമോദരന്‍, ഡോ.എം.എസ്. വിനോദ്, വി. ബിന്ദു എന്നിവര്‍ പ്രസംഗിച്ചു. ഡോ.പി. തുഷാര സ്വാഗതവും ഡോ. ഹര്‍ഷന്‍ സൂസന്‍ ഏലിയാസ് നന്ദിയും പറഞ്ഞു.

ഡോക്ടര്‍ തസ്തികയില്ലാതെ സ്ത്രീകളുടെയും കുട്ടികളുടെയും ആശുപത്രി

കാഞ്ഞങ്ങാട്: സ്ത്രീകളുടെയും കുട്ടികളുടെയും ആശുപ്രതി പ്രവര്‍ത്തനം തുടങ്ങി വര്‍ഷങ്ങള്‍ കഴിഞ്ഞിട്ടും ഡോക്ടര്‍മാരുടെ ഒരു തസ്തികപോലും അനുവദിക്കാതെ ആരോഗ്യവകുപ്പിന്‍റെ അനാസ്ഥ. ഡോക്ടര്‍മാരുടെ കുറവു കാരണം അത്യാഹിത വിഭാഗത്തിന്‍റെ പ്രവര്‍ത്തനം രാത്രി നിര്‍ത്തിവയ്‌ക്കേണ്ടി വന്നു. എന്നിട്ടും പകരം സംവിധാനം ഒരുക്കാതെ മുഖംതിരിക്കുകയാണ് ആരോഗ്യവകുപ്പ്. നിലവില്‍ അത്യാഹിത വിഭാഗത്തില്‍ രണ്ടു ഡോക്ടര്‍മാരാണ് ഉള്ളത്. ഒപിയില്‍ നാലു പേരും. അത്യാഹിത വിഭാഗത്തില്‍ നാലു പേരെങ്കിലും ഉണ്ടെങ്കില്‍ മാത്രമേ രാത്രി സേവനം ലഭ്യമാകൂ. ഉണ്ടായിരുന്ന ഡോക്ടര്‍മാര്‍ സ്ഥലംമാറി പോയതോടെയാണു രാത്രി അത്യാഹിത വിഭാഗത്തിന്‍റെ പ്രവര്‍ത്തനം നിലച്ചത്. അത്യാഹിത വിഭാഗത്തില്‍ ആറു ഡോക്ടര്‍മാര്‍ കുറഞ്ഞത് വേണം. ഗൈനക്കോളജി വിഭാഗത്തില്‍ മൂന്നുപേരും പീഡിയാട്രിക് വിഭാഗത്തില്‍ മൂന്നുപേരും കുറഞ്ഞത് വേണം. മാനദണ്ഡപ്രകാരം ഇരുവിഭാഗത്തിലും ആറു ഡോക്ടര്‍മാര്‍ വീതം വേണം. രണ്ട് അനസ്‌തറ്റിക് ഡോക്ടറുടെ സേവനവും ആവശ്യമാണ്. ഇത്രയും ഡോക്ടര്‍മാരും ഇവര്‍ക്കാവശ്യമായ നഴ്‌സിംഗ് സ്റ്റാഫും ഉണ്ടെങ്കില്‍ ആശുപ്രതിയുടെ പ്രവര്‍ത്തനം മുടങ്ങാതെ മുന്നോട്ട് കൊണ്ടുപോകാന്‍ കഴിയും. എന്നാല്‍ ഒരു ഡോക്ടറുടെ തസ്തിക പോലും ഇതുവരെ അനുവദിച്ചിട്ടില്ല. ടാറ്റാ ആശുപത്രിയില്‍ നിന്നുള്ള സ്റ്റാഫിനെയും ജോലി ക്രമീകരണത്തിന്‍റെ ഭാഗമായി മറ്റു ആശുപ്രതികളില്‍ നിന്നുള്ള ഡോക്ടര്‍മാരെയും ഉപയോഗിച്ചാണ് ആശുപ്രതി നിലവില്‍ പ്രവര്‍ത്തിക്കുന്നത്. 192 തസ്തിക ആണ് ആശുപത്രിക്ക് വേണ്ടി ജില്ലാ മെഡിക്കല്‍ ഓഫീസ് സര്‍ക്കാരിനോട് ആവശ്യപ്പെട്ടത്.അനുവദിച്ച് വെറും 12 തസ്തിക മാത്രവും. ആവശ്യമായ തസ്തിക ഇനിയും അനുവദിച്ചില്ലെങ്കില്‍ ആശുപത്രിയുടെ പ്രവര്‍ത്തനം തന്നെ താളം തെറ്റും. മതിയായ ഡോക്ടര്‍മാരോ ജീവനക്കാരോ മറ്റു സൗകര്യങ്ങളോ ഇല്ലാതെ വെറും നോക്കുകുത്തിയായ സ്ത്രീകളുടെയും കുട്ടികളുടെയും ആശുപത്രിക്ക് മുന്നില്‍ ഫോറം ഫോര്‍ കാസര്‍ഗോഡ് പ്രതിഷേധധര്‍ണ നടത്തി. മുന്‍ നഗരസഭ ചെയര്‍മാന്‍ വി. ഗോപി ഉദ്ഘാടനം ചെയ്തു. പത്മരാജന്‍ ഐങ്ങോത്ത് അധ്യക്ഷതവഹിച്ചു. പ്രേമചന്ദ്രന്‍ ചോമ്പാല, കെ.കെ. ബാബു, എം. കുഞ്ഞികൃഷ്ണന്‍, എം.എം. നാരായണന്‍, പി. ഹരിശ്ചന്ദ്രന്‍, രവീന്ദ്രന്‍ ചേടിറോഡ്, വി.വി. മോഹനന്‍, പി. സരോജ, പി.വി. ചന്ദ്രന്‍, പി. ഭാസ്‌കരന്‍, ദിവ്യ ഷാജി, ഷിഹാബ് കാര്‍ഗില്‍, അബ്ദുള്‍ ഖയ്യൂം, ഫത്തിമത്ത് സുഹറ, സി. ബാലകുഷ്ണന്‍, കേളു കൈപ്രം എന്നിവര്‍ സംസാരിച്ചു. സിസ്റ്റര്‍ ജയ ആന്‍റോ മംഗലത്ത് സ്വാഗതവും മനോജ് ഉപ്പിലിക്കൈ നന്ദിയും പറഞ്ഞു.

കുണ്ടുപ്പള്ളിയിൽ വീണ്ടും കാട്ടാനയിറങ്ങി; വ്യാപക കൃഷി നാശം

റാണിപുരം: കുണ്ടുപ്പള്ളിയിൽ വീണ്ടും ജനവാസ മേഖലയിൽ കാട്ടാനയിറങ്ങി കൃഷി നശിപ്പിച്ചു. കുറത്തിപ്പതിയിലെ പി. യോഗേഷിന്‍റെ കൃഷിയിടത്തിലാണ് ഇന്നലെ പുലർച്ചെ നാലു മണിയോടെ കാട്ടാനയിറങ്ങിയത്. നിരവധി വാഴകളും കമുകുകളും ആന നശിപ്പിച്ചു. വിവരമറിഞ്ഞ് സ്ഥലത്തെത്തിയ വനംവകുപ്പിന്‍റെ ആർആർടി സംഘമാണ് ആനയെ തുരത്തിയത്. ഒരാഴ്ചയ്ക്കിടെ നാലാം തവണയാണ് കുണ്ടുപ്പള്ളിയിൽ ജനവാസ കേന്ദ്രങ്ങളിൽ കാട്ടാനയിറങ്ങുന്നത്. കഴിഞ്ഞ ദിവസം കുറ്റിക്കോൻ സതീഷിന്‍റെ കൃഷിയിടത്തിലിറങ്ങി അമ്പതോളം വാഴകൾ നശിപ്പിച്ചിരുന്നു. പ്രദേശത്ത് നിരീക്ഷണം നടത്തുകയായിരുന്ന ആർആർടി സംഘം രാത്രിയിൽ ആനയെ തുരത്തി ഓടിച്ചിരുന്നെങ്കിലും അതിരാവിലെ വീണ്ടുമെത്തി കൃഷി നശിപ്പിക്കുകയായിരുന്നു. സെക്ഷൻ ഫോറസ്റ്റ് ഓഫീസർ ബി. ശേഷപ്പ, ആർആർടി സെക്ഷൻ ഫോറസ്റ്റ് ഓഫീസർ കെ. ജയകുമാരൻ, ബീറ്റ് ഫോറസ്റ്റ് ഓഫീസർമാരായ കെ.പി. അഭിലാഷ്, കെ. സുധീഷ്, രതീഷ്, റാണിപുരം വനസംരക്ഷണ സമിതി സെക്രട്ടറി ഡി. വിമൽരാജ്, ട്രഷറർ എം.കെ. സുരേഷ്, ടിറ്റോ എന്നിവർ സ്ഥലത്തെത്തി. റാണിപുരത്ത് വനാതിർത്തിയോടു ചേർന്ന് സ്ഥാപിച്ച സൗരോർജ വേലിയും കടന്നാണ് ആനകൾ ജനവാസ കേന്ദ്രങ്ങളിലെത്തി കൃഷി നശിപ്പിക്കുന്നത്. പ്രദേശത്ത് ഏക്കർ കണക്കിന് സ്വകാര്യഭൂമി കൃഷി ചെയ്യാതെ കാടുപിടിച്ച് കിടക്കുന്നതാണ് ആനകൾക്ക് തമ്പടിക്കാൻ സഹായകമാകുന്നത്. കാട് വെട്ടിത്തെളിക്കാൻ സ്ഥലമുടമകൾക്ക് നിർദേശം നല്കണമെന്ന് എംഎൽഎ ഉൾപ്പെടെ പങ്കെടുത്ത യോഗങ്ങളിൽ നിരവധി തവണ ആവശ്യമുയർന്നിരുന്നെങ്കിലും റവന്യൂവകുപ്പോ പഞ്ചായത്തോ ഇക്കാര്യത്തിൽ മേൽനടപടികൾ സ്വീകരിക്കുന്നില്ലെന്നാണ് ആക്ഷേപം. ഉടമകൾ മുൻകൈയെടുക്കാത്തപക്ഷം പഞ്ചായത്ത് തൊഴിലുറപ്പ് തൊഴിലാളികളെ ഉപയോഗപ്പെടുത്തി കാട് വെട്ടിത്തെളിക്കാനുള്ള നടപടികൾ ഉണ്ടാകണമെന്നും അവർ ആവശ്യപ്പെടുന്നു.

സംസ്ഥാനത്തെ എല്ലാ വിഭാഗം ജനങ്ങൾക്കും ഭൂമി ഉറപ്പാക്കും: മന്ത്രി ഒ.ആർ. കേളു

പനത്തടി: സമൂഹത്തിലെ എല്ലാ വിഭാഗം ജനങ്ങൾക്കും ഭൂമിയുറപ്പാക്കുകയാണ് സർക്കാർ നയമെന്നും ലൈഫ്, സേഫ് പദ്ധതികളിലൂടെ പട്ടികവർഗ വിഭാഗത്തിൽ പെട്ട ജനങ്ങൾക്ക്‌ സുരക്ഷിതമായ വീട് ഉറപ്പാക്കുമെന്നും പട്ടികജാതി - പട്ടികവർഗ പിന്നോക്ക ക്ഷേമ മന്ത്രി ഒ.ആർ. കേളു പറഞ്ഞു. പനത്തടി പഞ്ചായത്ത് ആറാം വാർഡിൽ കമ്മാടിയിലെ പ്രകൃതിദുരന്ത ബാധിത പ്രദേശത്തു നിന്ന് പുനരധിവസിപ്പിക്കുന്ന 10 പട്ടികവർഗ കുടുംബങ്ങൾക്കുവേണ്ടി കല്ലപ്പള്ളി ബട്ടോളിയിൽ നിർമിച്ച പുതിയ വീടുകളുടെ താക്കോൽവിതരണം നിർവഹിച്ച് പ്രസംഗിക്കുകയായിരുന്നു മന്ത്രി. സംസ്ഥാനത്തെ മുഴുവൻ താലൂക്കുകളിലും നടക്കുന്ന പട്ടയവിതരണം, അദാലത്ത് നടപടികളിലൂടെ എല്ലാ വിഭാഗം ജനങ്ങളുടെയും ഭൂമി സംബന്ധമായ പ്രശ്നങ്ങൾ പരിഹരിച്ച് മുഴുവനാളുകൾക്കും ഭൂമി ലഭ്യമാക്കാൻ ആവശ്യമായ നടപടികളാണ് സർക്കാർ സ്വീകരിക്കുന്നതെന്നും പട്ടികവർഗ വിഭാഗത്തിലെ യോഗ്യത നേടിയ വിദ്യാർഥികൾക്ക് ഉന്നത വിദ്യാഭ്യാസത്തിനും മത്സര പരീക്ഷാ പരിശീലനത്തിനും ആവശ്യമായ എല്ലാ സൗകര്യങ്ങളും ഉറപ്പാക്കുമെന്നും മന്ത്രി പറഞ്ഞു. സംസ്ഥാന അതിർത്തിക്കു സമീപത്തെ കമ്മാടി ഉന്നതിയിൽ വർഷകാലങ്ങളിൽ പുറംലോകത്തുനിന്ന് ഒറ്റപ്പെട്ടു കഴിഞ്ഞിരുന്ന 10 കുടുംബങ്ങളെയാണ് ബട്ടോളിയിൽ പുനരധിവസിപ്പിക്കുന്നത്. മുൻകാലങ്ങളിൽ കാലവർഷം കനക്കുന്നതോടെ ഇവരെ എല്ലാ വർഷവും ദുരിതാശ്വാസ ക്യാമ്പുകളിലേക്ക് മാറ്റി പാർപ്പിക്കുകയായിരുന്നു പതിവ്. ഈ പ്രശ്നത്തിന് ശാശ്വത പരിഹാരം കണ്ടെത്തുന്നതിനായാണ് ഇവരെ സ്ഥിരമായി മറ്റൊരിടത്തേക്ക് മാറ്റാൻ തീരുമാനിച്ചത്. ഇതിന്‍റെ അടിസ്ഥാനത്തിലാണ് ജില്ലാ ഭരണകൂടത്തിന്‍റെ നേതൃത്വത്തിൽ കമ്മാടിയിൽ നിന്ന് മൂന്ന് കിലോമീറ്റർ അകലെയുള്ള ബട്ടോളിയിൽ റോഡ്, വൈദ്യുതി സൗകര്യമുള്ള 84 സെന്‍റ് റവന്യൂ ഭൂമി കണ്ടെത്തുകയും ഓരോ കുടുംബത്തിനും ആറ് സെന്‍റ് വീതം അനുവദിച്ച് പട്ടയം നല്കുകയും ചെയ്തത്. പിന്നീട് ഇവർക്ക് താമസയോഗ്യമായ വീട് നിർമിക്കുന്നതിനായി പട്ടികവർഗ വികസന വകുപ്പ് ഓരോ കുടുംബത്തിനും ആറ് ലക്ഷം രൂപ വീതം അനുവദിച്ചു. വാർഡ് മെംബർ കൺവീനറായ കമ്മിറ്റിയുടെ നേതൃത്വത്തിലാണ് വീടുകൾ നിർമിച്ചത്. ഇവിടെ പരപ്പ ബ്ലോക്ക് പഞ്ചായത്ത് 10 ലക്ഷം രപ ചെലവിൽ കുടിവെള്ള പദ്ധതിയും നടപ്പിലാക്കിയിട്ടുണ്ട്. ഇ. ചന്ദ്രശേഖരൻ എംഎൽഎ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് എം. ലക്ഷ്മി കുടിവെള്ള വിതരണത്തിന്‍റെ ഉദ്ഘാടനം നിർവഹിച്ചു. പട്ടികവർഗ വികസന ഓഫീസർ കെ. മധുസൂദനൻ റിപ്പോർട്ട് അവതരിപ്പിച്ചു. പഞ്ചായത്ത് പ്രസിഡന്‍റ് പ്രസന്ന പ്രസാദ്, വൈസ് പ്രസിഡന്‍റ് പി.എം. കുര്യാക്കോസ്, ബ്ലോക്ക് പഞ്ചായത്ത് ആരോഗ്യ വിദ്യാഭ്യാസ സ്ഥിരം സമിതി അധ്യക്ഷ എം. പത്മകുമാരി, പഞ്ചായത്ത് സ്ഥിരം സമിതി അധ്യക്ഷരായ ലത അരവിന്ദ്, സുപ്രിയ ശിവദാസ്, ബ്ലോക്ക് പഞ്ചായത്ത് അംഗം അരുൺ രംഗത്ത് മല, പഞ്ചായത്ത് അംഗങ്ങളായ മഞ്ജുഷ, കെ.എസ്. പ്രീതി, പി.കെ. സൗമ്യമോൾ, വി.വി. ഹരിദാസ്, കെ.ജെ. ജെയിംസ്, രാധാ സുകുമാരൻ, എൻ. വിൻസെന്‍റ്, കെ.കെ. വേണുഗോപാൽ, എഡിഎം പി. അഖിൽ, വെള്ളരിക്കുണ്ട് തഹസിൽദാർ പി.വി. മുരളി, പനത്തടി ട്രൈബൽ എക്സ്റ്റൻഷൻ ഓഫീസർ സലിം താഴെകോറോത്ത്, ഒക്ലാവ് കൃഷ്ണൻ, എം.സി. മാധവൻ, ബിനു വർഗീസ്, എം. പ്രതാപചന്ദ്രൻ, എം.ബി. ഇബ്രാഹിം, പി. രാമചന്ദ്ര സരളായ, വാർഡ് മെബറും സംഘാടകസമിതി കൺവീനറുമായ രാധാകൃഷ്ണ ഗൗഡ എന്നിവർ പ്രസംഗിച്ചു.

നാടെങ്ങും യോഗ ദിനാചരണം

ചോയ്യംകോട്: ആരോഗ്യവകുപ്പിന്‍റെ നേതൃത്വത്തിൽ ചോയ്യംകോട് ജനകീയ ആരോഗ്യ കേന്ദ്രത്തിൽ അന്താരാഷ്ട്ര യോഗ ദിനത്തിന്‍റെ ജില്ലാതല ഉദ്ഘാടനവും യോഗ പ്രദർശനവും സംഘടിപ്പിച്ചു. കിനാനൂർ-കരിന്തളം പഞ്ചായത്ത് പ്രസിഡന്‍റ് ടി.കെ. രവി ഉദ്ഘാടനം ചെയ്തു. ആരോഗ്യ വിദ്യാഭ്യാസ സ്ഥിരം സമിതി ചെയർമാൻ കെ.വി. അജിത് കുമാർ അധ്യക്ഷത വഹിച്ചു. ജില്ലാ സർവയലൻസ് ഓഫീസർ ഡോ.ബി. സന്തോഷ് സന്ദേശം നല്കി. ക്ഷേമകാര്യ സ്ഥിരം സമിതി ചെയർപേഴ്സൺ ഷൈജമ്മ ബെന്നി, പഞ്ചായത്ത് അംഗങ്ങളായ എ. കൈരളി, എം. ധന്യ, നോഡൽ ഓഫീസർ ഡോ. ധന്യ ദയാനന്ദ്, ഹോമിയോ മെഡിക്കൽ ഓഫിസർ ഡോ. സുമേഷ്, ഡെപ്യൂട്ടി ജില്ലാ എഡ്യുക്കേഷൻ മീഡീയാ ഓഫീസർ പി.പി. ഹസീബ്, കരിന്തളം കുടുംബാരോഗ്യ കേന്ദ്രം ഹെൽത്ത് ഇൻസ്‌പെക്ടർ എം.വി. സുരേഷ് ബാബു എന്നിവർ പ്രസംഗിച്ചു. ബേക്കൽ: ആര്‍ക്കിയോളജിക്കല്‍ സര്‍വേ ഓഫ് ഇന്ത്യ തൃശൂർ സർക്കിളിന്‍റെ ആഭിമുഖ്യത്തില്‍ ബേക്കല്‍ കോട്ടയിൽ അന്താരാഷ്ട്ര യോഗ ദിനാചരണം നടത്തി. സി.എച്ച്. കുഞ്ഞമ്പു എംഎല്‍എ ഉദ്ഘാടനം ചെയ്തു. ആര്‍ക്കിയോജിക്കല്‍ സര്‍വേ ഓഫ് ഇന്ത്യ സൂപ്രണ്ട് വിജയകുമാര്‍ എസ്. നായര്‍ അധ്യക്ഷത വഹിച്ചു. പത്മശ്രീ സത്യനാരായണ ബലേരി മുഖ്യാതിഥിയായി. പള്ളിക്കര പഞ്ചായത്ത് പ്രസിഡന്‍റ് എം. കുമാരന്‍, ബിആര്‍ഡിസി മാനേജിംഗ് ഡയറക്ടർ ഷിജിൻ പറമ്പത്ത്, ഡെപ്യൂട്ടി സൂപ്രണ്ടിംഗ് ആർക്കിയോളജിസ്റ്റ് സി. കുമാരൻ, അസി. സൂപ്രണ്ടിംഗ് ആർക്കിയോളജിസ്റ്റ് (ടെക്നിക്കൽ) ഭരതരാജ് സുരേഷ്, കൺസർവേറ്റീവ് അസിസ്റ്റന്‍റുമാരായ പി.വി. ഷാജു (ബേക്കൽ), ലോകേഷ് (തൃശൂർ), വിഗ്നേഷ് (കണ്ണൂർ), തൃശൂർ സർക്കിൾ സർവേയർ റെക്സ് എന്നിവർ സംബന്ധിച്ചു. ചിറ്റാരിക്കാൽ: തോമാപുരം സെന്‍റ് തോമസ് എച്ച്എസ്എസിൽ നടന്ന യോഗ ദിനാചരണം മുഖ്യാധ്യാപകൻ ജസ്റ്റിൻ മാത്യു ഉദ്ഘാടനം ചെയ്തു. ദാമോദരൻ പരിശീലനം നല്കി. അധ്യാപകരായ ജോസുകുട്ടി തോമസ്, മിനിമോൾ സേവ്യർ എന്നിവർ പ്രസംഗിച്ചു. പെരിയ: കേരള കേന്ദ്ര സര്‍വകലാശാലയിലെ യോഗ സ്റ്റഡീസ് വിഭാഗത്തിന്‍റെ ആഭിമുഖ്യത്തിൽ യോഗ ദിനം ആചരിച്ചു. വൈസ് ചാന്‍സലര്‍ പ്രഫ.സിദ്ദു പി. ആല്‍ഗുര്‍ അധ്യക്ഷത വഹിച്ചു. മംഗളൂരു സർവകലാശാല ഹ്യൂമണ്‍ കോണ്‍ഷ്യസ്നസ് ആൻഡ് യോഗിക് സയന്‍സസ് വിഭാഗം മുന്‍ ചെയര്‍മാന്‍ പ്രഫ.കെ. കൃഷ്ണ ശര്‍മ സന്ദേശം നല്കി. രജിസ്ട്രാര്‍ ഡോ.എം. മുരളീധരന്‍ നമ്പ്യാര്‍, സ്റ്റുഡന്‍റ്സ് വൈല്‍ഫെയര്‍ ഡീന്‍ പ്രഫ. രാജേന്ദ്ര പിലാങ്കട്ട, സ്‌കൂള്‍ ഓഫ് മെഡിസിന്‍ ആന്‍റ് പബ്ലിക് ഹെല്‍ത്ത് ഡീന്‍ പ്രഫ. മാത്യു ജോര്‍ജ്, ഡോ. സുബ്രഹമണ്യ പൈലൂര്‍, ഡോ.അ ഞ്ജലാദേവി എന്നിവര്‍ പ്രസംഗിച്ചു. നീലേശ്വരം: പടന്നക്കാട് നെഹ്റു ആർട്സ് ആൻഡ് സയൻസ് കോളജ് എൻസിസി യൂണിറ്റിന്‍റെ ആഭിമുഖ്യത്തിൽ വെള്ളിക്കോത്ത് തത്വമസി യോഗ കേന്ദ്രവുമായി സഹകരിച്ച് യോഗ പ്രദർശനം സംഘടിപ്പിച്ചു. തൃക്കരിപ്പൂർ: പഞ്ചായത്തിന്‍റെയും കൊയോങ്കര ഗവ. ആയുർവേദ ആശുപത്രിയുടെയും നേതൃത്വത്തിൽ നടത്തിയ അന്താരാഷ്ട്ര യോഗദിനാചരണം പഞ്ചായത്ത് പ്രസിഡന്‍റ് വി.കെ. ബാവ ഉദ്ഘാടനം ചെയ്തു. പഞ്ചായത്തംഗം എ.കെ. സുജ അധ്യക്ഷത വഹിച്ചു.

ചെറുവത്തൂർ ഗവ. ഐടിഐ കെട്ടിടം തുറന്നു

ചെറുവത്തൂർ: ചെറുവത്തൂർ ഗവ. ഐടിഐക്കായി പുതുതായി നിർമിച്ച ഇരുനില കെട്ടിടം മന്ത്രി ഒ.ആർ. കേളു ഉദ്ഘാടനം ചെയ്തു. പട്ടികജാതി വകുപ്പിന് കീഴിലുള്ള ഐടിഐയിൽ പുതിയ കോഴ്സുകൾ ആരംഭിക്കുന്നത് സജീവ പരിഗണനയിലാണെന്ന് മന്ത്രി പറഞ്ഞു. കമ്പ്യൂട്ടർ ലാബ്, ലൈബ്രറി, സ്മാർട്ട് ക്ലാസ് റൂം, ഓഫീസ് മുറി, പ്രിൻസിപ്പൽ ഓഫീസ് തുടങ്ങിയ സൗകര്യങ്ങളോടെ 83.44 ലക്ഷം രൂപ ചെലവിലാണ് പുതിയ കെട്ടിടം നിർമിച്ചത്. ചടങ്ങിൽ എം. രാജഗോപാലൻ എംഎൽഎ അധ്യക്ഷത വഹിച്ചു. രാജ്മോഹൻ ഉണ്ണിത്താൻ എംപി വിശിഷ്ടാതിഥിയായി. പിഡബ്യുഡി എക്സിക്യൂട്ടീവ് എഞ്ചിനീയർ എം. ജഗദീഷ് റിപ്പോർട്ട് അവതരിപ്പിച്ചു. പഞ്ചായത്ത് പ്രസിഡന്‍റ് സി.വി. പ്രമീള, ബ്ലോക്ക് പഞ്ചായത്ത് അംഗം കെ. വല്ലി, പഞ്ചായത്തംഗം മഹേഷ് വെങ്ങാട്ട്, പട്ടികജാതി വികസന വകുപ്പ് ഡെപ്യൂട്ടി ഡയറക്ടർ കെ.കെ. ഷാജു, ഉത്തര മേഖല ട്രെയിനിംഗ് ഇൻസ്പെക്ടർ എ. ബാബുരാജൻ, ജില്ലാ പട്ടികജാതി വികസന ഓഫീസർ പി. മിനി, കെ. ബാലകൃഷ്ണൻ, എ.വി. ദാമോദരൻ, ടി.സി.എ. റഹ്മാൻ, മുകേഷ് ബാലകൃഷ്ണൻ, കെ.വി. രഘൂത്തമൻ, ഒ.കെ. ബാലകൃഷ്ണൻ, എ.ജി. ബഷീർ, സുരേഷ് പുതിയിടത്ത്, മാധവൻ ഒരിയര, .എം. ബാലകൃഷ്ണൻ എന്നിവർ പ്രസംഗിച്ചു.

ഏയ്ഞ്ചൽ മരിയ സെബാന് ചെറുകഥാ പുരസ്കാരം

കാഞ്ഞങ്ങാട്: എഴുത്തുകാരനും സാംസ്കാരിക പ്രവർത്തകനുമായിരുന്ന രാജീവൻ കാഞ്ഞങ്ങാടിന്‍റെ സ്മരണയ് ക്കായി യുവകലാസാഹിതി ജില്ലാ കമ്മിറ്റി ഏർപ്പെടുത്തിയ കലാലയ ചെറുകഥ പുരസ്കാരത്തിന് കോഴിക്കോട് ദേവഗിരി സെന്‍റ് ജോസഫ്സ് കോളജിലെ ബിരുദ വിദ്യാർഥിനി ഏയ്ഞ്ചൽ മരിയ സെബാൻ അർഹയായി. ദീപിക ഫ്രണ്ട്സ് ക്ലബ് ജില്ലാ കോ-ഓർഡിനേറ്റർ പനത്തടിയിലെ സെബാൻ കാരക്കുന്നേലിന്‍റെയും ബളാന്തോട് ഗവ. ഹയർ സെക്കൻഡറി സ്കൂൾ അധ്യാപിക രാജി തോമസിന്‍റെയും മകളാണ്. മാധവൻ പുറച്ചേരി, പത്മനാഭൻ ബ്ലാത്തൂർ, ഷെരീഫ് കുരിക്കൾ എന്നിവരടങ്ങിയ ജൂറിയാണ് വിധിനിർണയം നടത്തിയത്. രാജീവൻ കാഞ്ഞങ്ങാടിന്‍റെ പത്താം ചരമവാർഷിക ദിനമായ ജൂൺ 29 ന് കാഞ്ഞങ്ങാട് എംഎൻ സ്മാരക മന്ദിരത്തിൽ നടക്കുന്ന അനുസ്മരണ സമ്മേളനത്തിൽ പുരസ്കാരം നല്കും.

ഒളിവിൽ പോയ പ്രതികൾ പിടിയിൽ

കാഞ്ഞങ്ങാട്: രണ്ടുമാസം മുമ്പ് വീട്ടിൽനിന്ന് എംഡിഎംഎയും ഹൈബ്രിഡ് കഞ്ചാവും പിടികൂടിയതിനെ തുടർന്ന് ഒളിവിൽ പോയ പ്രതികൾ ഹൊസ്ദുർഗ് പോലീസും ജില്ലാ ലഹരി വിരുദ്ധ സ്‌ക്വാഡും നടത്തിയ അന്വേഷണത്തിൽ പിടിയിലായി. മുറിയനാവി സ്വദേശികളായ ഷാജഹാൻ അബൂബക്കർ (41), പി.എം. നൗഷാദ് (37) എന്നിവരാണ് പിടിയിലായത്. കഴിഞ്ഞ ഏപ്രിൽ 25 ന് നടത്തിയ പരിശോധനയിൽ ഷാജഹാന്‍റെ വീട്ടിൽ നിന്ന് ഇയാളുടെ പാന്‍റിലും സോക്സിലും ഒളിപ്പിച്ചുവച്ചിരുന്ന 3.610 ഗ്രാം എംഡിഎംഎയും നൗഷാദിന്‍റെ വീട്ടിൽ നിന്ന് 1.790 ഗ്രാം എംഡിഎംഎയും 5.950 ഗ്രാം ഹൈബ്രിഡ് കഞ്ചാവും പിടികൂടിയിരുന്നു. ഷാജഹാനെ മംഗളൂരു ജ്യോതി സർക്കിളിന് സമീപത്തെ ഒളിത്താവളത്തിൽ നിന്നും നൗഷാദിനെ ഗോവയിൽ നിന്നുമാണ് പിടികൂടിയത്. ഇരുവരും നേരത്തേയും സമാനമായ കേസുകളിൽ പ്രതികളാണ്. എസ്ഐമാരായ അഖിൽ, വരുൺ, എസ് സിപിഒ കെ.ടി. അനിൽ, ജ്യോതിഷ് എന്നിവർ ചേർന്നാണ് പ്രതികളെ പിടികൂടിയത്.

തോമാപുരം ഫൊറോനയിൽ ദിശാദർശൻ ഹെൽപ്പ് ഡസ്ക് പ്രവർത്തനമാരംഭിച്ചു

ചിറ്റാരിക്കാൽ: തലശേരി അതിരൂപത സമുദായ ശാക്തീകരണത്തിന്‍റെ ഭാഗമായി ചിറ്റാരിക്കാലിൽ തോമാപുരം സെന്‍റ് തോമസ് ഫൊറോനയുടെ കീഴിൽ ദിശാദർശൻ ഹെൽപ്പ് ഡസ്ക് പ്രവർത്തനമാരംഭിച്ചു. ഫൊറോന വികാരി റവ.ഡോ. മാണി മേൽവട്ടം ആശീർവാദ കർമവും ഉദ്ഘാടനവും നിർവഹിച്ചു. ഫൊറോന ഹെൽപ് ഡസ്ക് ഡയറക്ടർ ഫാ. ജോജി ചക്കനാനിക്കൽ അധ്യക്ഷത വഹിച്ചു. അതിരൂപത ചാൻസലർ ഫാ. ജോസഫ് റാത്തപ്പള്ളിൽ, ഹെൽപ് ഡസ്ക് കോ-ഓർഡിനേറ്റർ സിവിക്കുട്ടി വർഗീസ്, ഇടവക കോ-ഓർഡിനേറ്റർ രാജു മാത്യു പാഴൂർ, ഷൈനി ജോബി കൊണ്ടാണ്ടുശാലയ്ക്കൽ എന്നിവർ പ്രസംഗിച്ചു. ചിറ്റാരിക്കാൽ ടൗൺ കുരിശുപള്ളിക്കു സമീപത്തുള്ള സാന്തോം കെട്ടിടത്തിലാണ് ദിശാദർശൻ ഹെൽപ്പ് ഡസ്ക് പ്രവർത്തിക്കുക. സമുദായത്തെ ശാക്തീകരിക്കുന്നതിനും സമുദായാംഗങ്ങളുടെ പിന്നോക്കാവസ്ഥ പരിഹരിക്കുന്നതിനുമുള്ള വിവിധ കർമപദ്ധതികളാണ് ഹെൽപ് ഡസ്ക് വഴി വിഭാവനം ചെയ്യുന്നത്.

ദേലമ്പാടി പഞ്ചായത്ത് വാർഡ് വിഭജനത്തിനെതിരേ ഹൈക്കോടതിയുടെ ഇടക്കാല ഉത്തരവ്

അഡൂർ: ദേലമ്പാടി പഞ്ചായത്തിൽ വാർഡ് വിഭജനത്തിലെ ക്രമക്കേട് ചൂണ്ടിക്കാട്ടി സമർപ്പിച്ച ഹർജിയിലെ അന്തിമ വിധിക്ക് ശേഷം മാത്രമേ വാർഡ് വിഭജനത്തിന് അന്തിമ രൂപം നൽകാൻ പാടുള്ളൂവെന്ന് ഹൈക്കോടതിയുടെ ഇടക്കാല ഉത്തരവ്. യുഡിഎഫ് നേതാക്കളായ ടി.കെ. ദാമോദരൻ, കെ.പി. സിറാജുദ്ദീൻ എന്നിവർ നൽകിയ ഹർജിയിലാണ് ഹൈക്കോടതയുടെ ഉത്തരവുണ്ടായത്. മാനദണ്ഡങ്ങൾ പാലിക്കാതെയും പ്രകൃതിദത്തമായ അതിരുകൾ കാണിക്കാതെയുമാണ് പഞ്ചായത്തിൽ വാർഡ് വിഭജനം നടത്തിയതെന്നാണ് ഹർജിയിലെ ആരോപണം. ഇതുമായി ബന്ധപ്പെട്ട് നിരവധി പരാതികൾ ഡിലിമിറ്റേഷൻ സമിതിക്ക് നൽകിയെങ്കിലും അതൊന്നും അംഗീകരിക്കാതെ കരട് വിജ്ഞാപന പ്രകാരമുള്ള വാർഡുകൾ അതേപടി അന്തിമമാക്കി പ്രസിദ്ധീകരിക്കുകയായിരുന്നുവെന്ന് ഹർജിയി ചൂണ്ടിക്കാട്ടി. ഇതേത്തുടർന്നാണ് യുഡിഎഫ് നേതാക്കൾ ഹൈക്കോടതിയെ സമീപിച്ചത്. ഹർജിയിൽ പ്രാഥമിക വാദം കേട്ട ഹൈക്കോടതി ഹർജി ഫയലിൽ സ്വീകരിക്കുകയും ബന്ധപ്പെട്ടവർക്ക് നോട്ടീസ് നല്കാൻ ഉത്തരവിടുകയും ചെയ്തു. ഹർജിക്കാർക്ക് വേണ്ടി അഡ്വ. മുഹമ്മദ് ഷാഫി ഹാജരായി.

ഇന്‍റേണല്‍ കമ്മിറ്റികള്‍ ശക്തമാകണം: വനിതാ കമ്മീഷന്‍ അംഗം

കാഞ്ഞങ്ങാട്: സംസ്ഥാന വനിതാ കമ്മീഷന്‍ പോഷ് ആക്ട് 2013 മായി ബന്ധപ്പെട്ട് ജില്ലയിലെ സര്‍ക്കാര്‍ സ്ഥാപനങ്ങളിലെ ഇന്‍റേണല്‍ കമ്മിറ്റി അംഗങ്ങള്‍ക്ക് കാഞ്ഞങ്ങാട് വ്യാപാരഭവനില്‍ ശില്‍പശാല സംഘടിപ്പിച്ചു. തൊഴിലിടങ്ങളിലെ സ്ത്രീ പ്രശ്‌നങ്ങള്‍ സംബന്ധിച്ച് വനിതാ കമ്മീഷന് ലഭിച്ച് വരുന്ന പരാതികളുടെ എണ്ണം കൂടി വരുന്ന സാഹചര്യത്തിലാണ് 14 ജില്ലകളിലും ശില്പശാലകള്‍ സംഘടിപ്പിക്കുന്നതെന്നും സ്ഥാപനങ്ങളില്‍ പോഷ് ആക്ട് 2013നു കീഴില്‍ പ്രവര്‍ത്തിക്കുന്ന മുഴുവന്‍ ഇന്‍റേണല്‍ കമ്മറ്റികളും കൂടുതല്‍ ക്തമാകേണടതുണ്ടെന്നും സംസ്ഥാന വനിതാകമ്മീഷന്‍ അംഗം പി. കുഞ്ഞായിഷ പറഞ്ഞു. ബ്ലോക്ക് പഞ്ചായത്ത് പ്രസിഡന്‍റ് കെ. മണികണ്ഠന്‍ അധ്യക്ഷതവഹിച്ചു. എം. ആശാലത, എല്‍. ഷീബ, എസ്. സന്തോഷ് കുമാര്‍ പ്രസംഗിച്ചു.

ബേക്കല്‍ കോട്ടയുടെ തകര്‍ച്ച: ചര്‍ച്ച നടത്തി

ബേക്കല്‍: കേരളത്തിലെ കേന്ദ്ര പുരാവസ്തു വകുപ്പിന്‍റെ ചുമതലയുള്ള സൂപ്രണ്ടിംഗ് ആര്‍ക്കിയോളജിസ്റ്റ് വിജയകുമാര്‍ എസ്. നായരും സി.എച്ച്. കുഞ്ഞമ്പു എംഎല്‍എയും കേന്ദ്ര പുരാവസ്തു വകുപ്പിന്‍റെ കീഴിലുള്ള സംരക്ഷിത സ്മാരകമായ ബേക്കല്‍ കോട്ടയുമായി ബന്ധപ്പെട്ട വിവിധ വിഷയങ്ങള്‍ ചര്‍ച്ച ചെയ്തു. കനത്ത മഴയില്‍ തകര്‍ന്ന കോട്ട മതില്‍ പുരാവസ്തു മാര്‍ഗനിര്‍ദേശമനുസരിച്ച് മഴക്കാലം കഴിയുന്നതോടെ പുനഃസൃഷ്ടിക്കാനുള്ള പ്രവര്‍ത്തി തുടങ്ങാന്‍ കഴിയുമെന്ന് സൂപ്രണ്ടിംഗ് ആര്‍ക്കിയോളജിസ്റ്റ് പ്രത്യാശ പ്രകടിപ്പിച്ചു. കോട്ടക്കകത്തെ ടൂറിസ്റ്റ് വകുപ്പിന്‍റെ കീഴിലുള്ള ടൂറിസ്റ്റ് ബംഗ്ലാവിന്‍റെ കേടുപാടുകള്‍ നീക്കി സന്ദര്‍ശകര്‍ക്ക് വേണ്ടി ഉപയോഗപ്പെടുത്താനായി സങ്കേതിക കുരുക്കഴിക്കാന്‍ ശ്രമിക്കുമെന്ന് ഇരുവരും പറഞ്ഞു. ഡെപ്യൂട്ടി സൂപ്രണ്ടിംഗ് ആര്‍ക്കിയോളജിസ്റ്റ് ഇ. കുമാരന്‍, അസി. സൂപ്രണ്ടിംഗ് ആര്‍ക്കിയോളജിസ്റ്റ് (ടെക്‌നിക്കല്‍) ഭരദ്വാജ് സുരേഷ്, കണ്‍സര്‍വേറ്റീവ് അസിസ്റ്റന്‍റ് പി.വി. ഷാജു എന്നിവര്‍ സംബന്ധിച്ചു.

യോഗ ദിനാചരണം

വെള്ളരിക്കുണ്ട്: അന്താരാഷ്ട്ര യോഗ ദിനാചരണത്തിനു മുന്നോടിയായി സെന്‍റ് ജൂഡ്‌സ് ഹയർ സെക്കൻഡറി സ്കൂൾ എൻസിസി യൂണിറ്റിന്‍റെ ആഭിമുഖ്യത്തിൽ വിദ്യാർഥികൾക്കായി യോഗ ക്ലാസ് നടത്തി. യോഗ മാസ്റ്റർ ബാബുരാജ് ക്ലാസ് നയിച്ചു. മുഖ്യാധ്യാപകൻ എം.യു. ജോസ്കുട്ടി, എൻസിസി ഓഫീസർ പി.എൻ. ജെന്നി എന്നിവർ പ്രസംഗിച്ചു. മാലോം: മാലോത്ത് കസബ ജിഎച്ച്എസ്എസിൽ നടന്ന യോഗ ദിനാചരണത്തിന് ഇൻസ്ട്രക്ടർ ജലീന ആൻ സെബാസ്റ്റ്യൻ നേതൃത്വം നൽകി. സീനിയർ അസിസ്റ്റന്‍റ് ബീന ചാക്കോ ഉദ്ഘാടനം ചെയ്തു. എസ്എംസി ചെയർമാൻ കെ. ദിനേശൻ അധ്യക്ഷതവഹിച്ചു. സ്റ്റാഫ് സെക്രട്ടറി മാർട്ടിൻ ജോർജ്, അധ്യാപകരായ പി.ജി. ജോജിത, രമ്യ കൃഷ്ണൻ, പി.പി. ശ്രീവിദ്യ എന്നിവർ സംബന്ധിച്ചു. തൃക്കരിപ്പൂർ: സംഗീത- യോഗാ ദിനാചരണത്തിന് മുന്നോടിയായി സെന്‍റ് പോൾസ് എയുപി സ്കൂളിൽ മെലോടിക്ക ഉപയോഗിച്ചുള്ള സംഗീതവും യോഗ അഭ്യാസവും നടത്തി. സംഗീതാധ്യാപകൻ ജോയ് പിലാത്തറ മെലോടിക്ക എന്ന സംഗീത ഉപകരണത്തിൽ കുട്ടികൾക്കായി പാട്ടുകൾ വായിച്ചു. യോഗ പരിശീലക സി. ഷൈനി വിദ്യാർത്ഥികളെ യോഗ അഭ്യാസം പരിശീലിപ്പിച്ചു. സ്കൂൾ ഓഡിറ്റോറിയത്തിൽ നടന്ന സംഗീത- യോഗ ദിനാചരണം ഗായകൻ നിരുപം സായ് ഉദ്ഘാടനം ചെയ്തു. ചടങ്ങിൽ സ്കൂൾ പിടിഎ പ്രസിഡന്‍റ് എം.വി. ഫൈസൽ അധ്യക്ഷത വഹിച്ചു. റിട്ട. എഇഒ കെ.വി. രാഘവൻ, മുഖ്യാധ്യാപിക സിസ്റ്റർ ഷീനാ ജോർജ്, മദർ പിടിഎ പ്രസിഡന്‍റ് എം. സുൽഫാനത്ത്, പി. ദേവസി എന്നിവർ പ്രസംഗിച്ചു. പിടിഎ പ്രസിഡന്‍റ് എം.വി. ഫൈസൽ നിരൂപം സായിയെ പൊന്നാടയണയിച്ച് ആദരിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]