ADVERTISEMENT

ADVERTISEMENT

ആശാ സമരത്തിന് സ്വീകരണം നൽകി

അമ്പലപ്പുഴ: ആശാ സമരത്തിന്‍റെ ഭാഗമായി നടക്കുന്ന സമരയാത്രയ്ക്ക് അമ്പലപ്പുഴയിൽ സ്വീകരണം നൽകി. സമ്മേളനം കച്ചേരി മുക്കിൽ ജോസഫ് സി. മാത്യു ഉദ്ഘാടനം ചെയ്തു. സാമ്പത്തിക പരാധീനത ഉണ്ടെന്ന് പറയുമ്പോൾ സർക്കാർ ആർക്കാണ് മുൻഗണന കൊടുക്കുന്നതെന്നു നോക്കണം. സ്ഥിരനിയമനം വേണ്ടെന്നു വയ്ക്കുന്ന സർക്കാരാണ് ആശമാരോട് സ്ഥിര നിയമനം നൽകാൻ കേന്ദ്രത്തിനോട് ആവശ്യപ്പെടാൻ പറയുന്നത്. സോ കോൾഡ് ഇടതുപക്ഷ സർക്കാരാണ് സ്ത്രീകളോട് ഇങ്ങനെ പെരുമാറുന്നത്.

കേരള ആശാ ഹെൽത്ത് വർക്കേഴ്സ് അസോസിയേഷൻ സംസ്ഥാന ജനറൽ സെക്രട്ടറി എം.എ. ബിന്ദുവിനെ കച്ചേരിമുക്ക് ജംഗ്ഷനിൽനിന്ന് ഊഷ്മളമായി വരവേറ്റു. തുടർന്ന് നടന്ന സ്വീകരണ സമ്മേളനത്തിൽ സ്വാഗതസംഘം മേഖലാ ചെയർമാൻ ആർ. സനൽകുമാർ അധ്യക്ഷത വഹിച്ചു.
കെഎഎച്ച്ഡബ്ല്യുഎ ജില്ലാ സെക്രട്ടറി കെ.ജെ. ഷീല, കെ.ആർ. രാജിമോൾ, ജില്ലാ സ്വാഗതസംഘം ചെയർമാൻ ഡോ കെ.എസ്. മനോജ്, കരിമണൽ ഖനന വിരുദ്ധ ഏകോപന സമിതി ചെയർമാൻ സുരേഷ് കുമാർ, കോൺഗ്രസ് ബ്ലോക്ക് പ്രസിഡന്‍റ് ടി.എ. ഹമീദ്, യുഡിഎഫ് നിയോജക മണ്ഡലം ചെയർമാൻ കമാൽ എം. മാക്കിയിൽ തുടങ്ങിയവർ പ്രസംഗിച്ചു.

ADVERTISEMENT

ചാരുംമൂട് തെരുവുനായ്ക്കളുടെ പിടിയിൽ; എബിസി പദ്ധതിയിൽ അലംഭാവം

ചാരുംമൂട്: തെരുവുനായ്ക്കളുടെ താവളമായി ചാരുംമൂട് മേഖല. ചാരുംമൂട് കെഎസ്ഇബി ഓഫീസിനു സമീപം കഴിഞ്ഞയാഴ്ച നാലു പേര്‍ക്ക് തെരുവുനായയുടെ കടിയേറ്റിരുന്നു. കൃഷി അസി. ഡയറക്ടര്‍ ഓഫീസിലെ ഉദ്യോഗസ്ഥനെയും തെരുവുനായ കടിച്ചു. ഒട്ടേറെ വളര്‍ത്തുമൃഗങ്ങളെയും കടിച്ചിട്ടുണ്ട്. അഞ്ചുപേരെ നായ കടിച്ച സംഭവത്തെത്തുടര്‍ന്ന് താമരക്കുളം പഞ്ചായത്തും മൃഗാശുപത്രിയും ചേര്‍ന്ന് തെരുവുനായ്ക്കളെ പിടികൂടി പേവിഷബാധയ്‌ക്കെതിരേ വാക്‌സിന്‍ നല്‍കി. മൂന്നുമാസം മുമ്പ് പേരൂര്‍ കാരാണ്‍മയിലെ സ്‌കൂള്‍ വിദ്യാര്‍ഥി പേപ്പട്ടിയുടെ കടിയേറ്റ് ആശുപത്രിയില്‍ ചികിത്സയിലിരിക്കെ മരിച്ചിരുന്നു. വിടിനു സമീപത്തുകൂടിയുള്ള കെഐപി കനാല്‍ റോഡിലൂടെ സൈക്കിളില്‍ പോകുമ്പോള്‍ തെരുവുനായ കുട്ടിയെ ആക്രമിച്ചിരുന്നു. ശരീരത്തില്‍ മുറിവുകളൊന്നും ഇല്ലാത്തതിനാല്‍ കുട്ടി വീട്ടില്‍ പറഞ്ഞിരുന്നില്ല. ഒരുമാസം കഴിഞ്ഞപ്പോള്‍ പേവിഷബാധയുടെ ലക്ഷണം കാണിക്കുകയായിരുന്നു. മനഃസമാധാനത്തോടെ കുട്ടികളെ സ്‌കൂളുകളിലേക്ക് വിടാന്‍ കഴിയാതെ ഭയപ്പാടിലാണ് രക്ഷാകര്‍ത്താക്കള്‍. ചാരുംമൂട്ടിലെ ബ്ലോക്ക് പഞ്ചായത്ത് ഓഫീസ് വളപ്പും കെഎസ്ഇബി ഓഫീസിന്‍റെ പരിസരവും കെഐപി ഓഫിസ് വളപ്പും നെഹ്‌റു പാര്‍ക്കും നായ്ക്കള്‍ കൈയടക്കിയിരിക്കുകയാണ്. സര്‍ക്കാര്‍ സ്ഥാപനങ്ങളിലെ ജീവനക്കാരും ഇവിടെ വിവിധ ആവശ്യങ്ങള്‍ക്കായി എത്തുന്ന ജനങ്ങളും ഭീതിയിലാണ്. ചാരുംമൂട് ചന്തയിലും കനാല്‍ റോഡുകളിലും നായ്ക്കള്‍ സൈ്വരവിഹാരം നടത്തുന്നു. കെപി റോഡിലെ കാല്‍നടയാത്രികര്‍ക്കും തെരുവുനായ്ക്കള്‍ പേടിസ്വപ്നമാണ് ചാരുമൂട് കൂടാതെ നൂറനാട്, താമരക്കുളം, പാലമേല്‍, ചുനക്കര, പടനിലം, ഇടപ്പോണ്‍, കരിമുളയ്ക്കല്‍, ആദിക്കാട്ടുകുളങ്ങര, കുടശനാട്, പയ്യനല്ലൂര്‍, പാറ്റൂര്‍, ഉളവുക്കാട്, കോമല്ലൂര്‍ പ്രദേശങ്ങളിലും തെരുവുനായ്ക്കളെ കൊണ്ട് ജനങ്ങള്‍ ഭീതിയിലാണ്. സന്ധ്യകഴിഞ്ഞാല്‍ നായകളുടെ ശല്യം കൂടുതലാണ്. നായ്ക്കളുടെ കടിയേറ്റ് നിരവധിപേര്‍ ചികിത്സയിലാണ്. രാത്രിയില്‍ ഇരുചക്രവാഹന യാത്രക്കാരുടെ പിന്നാലെ നായ്ക്കള്‍ ഓടിയെത്തി കടിക്കുന്നതും പതിവാണ്. വളര്‍ത്തുമൃഗങ്ങളെയും കടിച്ചുപരിക്കേല്‍പ്പിക്കുന്നു. ചന്തകള്‍ കേന്ദ്രീകരിച്ചും മാലിന്യം തള്ളുന്ന കെഐപി കനാല്‍ ഭാഗങ്ങള്‍ കേന്ദ്രീകരിച്ചുമാണ് നായ്കളുടെ വിളയാട്ടം കൂടുതലുള്ളത്. താമരക്കുളം മാധവപുരം, ആദിക്കാട്ടുകുളങ്ങര, എരുമക്കുഴി, പടനിലം, ചുനക്കര ചന്തകളിലും തെരുവുനായശല്യം കൂടുതലാണ്. നായ്ക്കെ നിയന്ത്രിക്കേണ്ട തദ്ദേശസ്ഥാപന അധികാരികള്‍ ഇതൊന്നു കണ്ടില്ലെന്ന ഭാവത്തിലാണ്. 2001ല്‍ പ്രാബല്യത്തില്‍ വന്ന അനിമല്‍ ബര്‍ത്ത് കണ്‍ട്രോള്‍ എബിസി നിയമം പഞ്ചായത്തുകള്‍ നടപ്പാക്കുന്നില്ല. തദ്ദേശവകുപ്പും മൃഗസംരക്ഷണവകുപ്പും സംയുക്തമായി തെരുവുനായ്ക്കളെ പിടികൂടി വന്ധ്യംകരണം നടത്തുന്നതാണ് എബിസി പദ്ധതി. ഇതിനായി തദ്ദേ ശസ്ഥാപനങ്ങള്‍ നിരീക്ഷണ സമിതികള്‍ രൂപവത്കരിക്കണമെന്ന നിര്‍ദേശവും നടപ്പിലാക്കിയിട്ടില്ല.

ഭാര്യയുടെയും മകന്‍റെയും ചികിത്സയ്ക്കായി കനിവ് തേടി മധു

മാന്നാർ: കൂലിപ്പണിയെടുത്ത് നിത്യവൃത്തി കഴിയുന്ന കുരട്ടിക്കാട് വിക്കോലപറമ്പിൽ വി.എം. മധു (59)വിന്‍റെ ജീവിതം ഏറെ കയ്പേറിയതാണ്. ഭാര്യയുടെയും മകന്‍റെയും ചികിത്സയ്ക്കായി നെട്ടോട്ടമോടുന്ന ഈ വയോധികൻ സുമനുസകളുടെ കനിവിനായി കേഴുകയാണ്. ഒരു കാലിന് സ്വാധീനക്കുറവുള്ള മകൻ ഗോകുൽ(24)ന്‍റെ ചെറുപ്രായത്തിൽ തന്നെ തലയ്ക്കുള്ളിൽ വെള്ളം കെട്ടിനിന്ന് ഞരമ്പ് പൊട്ടുകയും തലച്ചോറിന് വളർച്ചയില്ലാതെ തലമാത്രം വലുതാകുന്ന രോഗത്തിനായി എട്ടാമത്തെ വയസിൽ നാലു ശസ്ത്രക്രിയകൾക്ക് വിധേയനാവുകയും ചെയ്തു. രോഗവും സാമ്പത്തിക ബുദ്ധിമുട്ടും കാരണം ഡിഗ്രി വിദ്യാഭ്യാസം പൂർത്തീകരിക്കാൻ ഈ യുവാവിനായില്ല. അഞ്ചുമാസം മുമ്പാണ് മധുവിന്‍റെ ഭാര്യ ശോഭന (58) കാൻസറിന്‍റെ പിടിയിൽപ്പെടുന്നത്. നാവിൽ പല്ല് കൊണ്ടുണ്ടായ മുറിവ് ഉണങ്ങാതെ വരുകയും പല്ല് നീക്കം ചെയ്ത് പരിശോധനയ്ക്ക് അയയ്ക്കുകയും ചെയ്തതോടെയാണ് കാൻസർ സ്ഥിരീകരിച്ചത്. തുടർന്ന് വായിൽ രണ്ടും കഴുത്തിൽ ഒന്നും ശസ്ത്രക്രിയ വേണ്ടി വന്നു. നിലവിൽ കഴുത്തിലുള്ള മുഴ നീക്കം ചെയ്യുന്നതിനായി അടിയന്തരമായി വീണ്ടുമൊരു ശസ്ത്രക്രിയ വേണമെന്നാണ് ഡോക്ടർമാർ പറയുന്നത്. ഭാര്യയുടെയും മകന്‍റെയും മരുന്നുകൾക്കായി ആഴ്ചതോറും നല്ലൊരു തുകതന്നെ വേണ്ടിവരുന്നു. ഇരുവരുടെയും ചികിത്സയ്ക്കായി ആശുപത്രികൾ കയറി ഇറങ്ങുന്നതിനാൽ സ്ഥിരമായി കൂലിപ്പണിക്കു പോകാനും മധുവിന് കഴിയുന്നില്ല. സ്വന്തമായി ഒരു തുണ്ടുഭൂമി പോലും ഇല്ലാത്ത ഈ കുടുംബം 20 വർഷത്തോളമായി വാടകയ് ക്ക് കഴിയുകയാണ്. ഭാര്യയുടെയും മകന്‍റെയും ചികിത്സയ്ക്കായി സുമനസുകൾ സഹായിക്കുമെന്ന പ്രതീക്ഷയിലാണ് ഈ കുടുംബം. ഗോഭനയുടെയും ഗോകുൽ മധുവിന്‍റെയും പേരിൽ എസ്ബിഐ മാന്നാർ ശാഖയിൽ ജോയിന്‍റ് അക്കൗണ്ട് തുറന്നിട്ടുണ്ട്. ഇവരുടെ ഫോൺ: 7025476710, A/c No: 67187202778, IFSC: SBIN 0070088.

മുണ്ടാര്‍ ടൂറിസം പദ്ധതിക്ക് വീണ്ടും ജീവന്‍വച്ചു

ഹരിപ്പാട്: അപ്പര്‍ക്കുട്ടനാട്ടിലെ അച്ചന്‍ കോവിലാറിനെയും പമ്പാ നദിയേയും തമ്മില്‍ ബന്ധിപ്പിച്ചിരുന്ന മുണ്ടാറിനെ ശുചീകരിക്കാന്‍ തുടങ്ങി. പോളയും പായലും മാലിന്യങ്ങളും നിറഞ്ഞുകിടക്കുന്ന മുണ്ടാറിനെ യന്ത്രസഹായത്തോടെ ശുദ്ധീകരിക്കുന്ന പ്രവര്‍ത്തനങ്ങള്‍ക്കാണ് തുടക്കം കുറിച്ചത്. പദ്ധതി പ്രവര്‍ത്തനങ്ങള്‍ക്കായി ജില്ലാ പഞ്ചായത്ത് 15 ലക്ഷം രൂപ അനുവദിച്ചിരുന്നു. ജില്ലാ പഞ്ചായത്തംഗം എ. ശോഭയുടെ ഇടപെടലിനെത്തുടര്‍ന്നാണ് തുക അനുവദിച്ചത്. പതിറ്റാണ്ടുകള്‍ക്കപ്പുറം ഇരുനദികളെയും തമ്മില്‍ ബന്ധിപ്പിക്കുന്ന സ്രോതസായിരുന്നു മുണ്ടാറെങ്കില്‍ ആ സാഹചര്യം മാറി. റോഡ് ഉയര്‍ന്നതോട് പമ്പയാറില്‍നിന്നുള്ള സാധ്യത അടയുകയായിരുന്നു. നീരൊഴുക്ക് നിലച്ചതോടെ മലിന ജലംകെട്ടിക്കിടന്നും പുല്ലും പായലും നിറഞ്ഞും ഇഴജന്തുക്കളുടെ ആവാസകേന്ദ്രമായും പ്രദേശം മാറി. ജില്ലാ പഞ്ചായത്തിനു കീഴിലുള്ള വീയപുരം സര്‍ക്കാര്‍ വിത്തുത്പാദന കേന്ദ്രത്തിനു സമീപത്ത് ഹരിപ്പാട് കടപ്രാ ലിങ്ക് ഹൈവേയോട് ചേര്‍ന്നാണ് മുണ്ടാര്‍ സ്ഥിതി ചെയ്യുന്നത്. മുണ്ടാര്‍ ടൂറിസം എന്ന പേരില്‍ ഒരു ആശയം കണ്ടെത്തി അതിന്‍റെ സാധ്യതകള്‍ പഠിച്ച് റിപ്പോര്‍ട്ട് തയാറാക്കി ടൂറിസം വകുപ്പിനു വീയപുരം പഞ്ചായത്ത് സമര്‍പ്പിച്ചിരുന്നു. എന്നാല്‍, ടൂറിസം വകുപ്പ് പദ്ധതിയില്‍ കണ്ണടച്ചു. 50 ഏക്കറില്‍ പരന്നുകിടക്കുന്ന വിത്തുത്പാദന കേന്ദ്രം, ചലച്ചിത്ര ചിത്രീകരണങ്ങള്‍ വരെ നടക്കുന്ന പതിനാലര ഏക്കര്‍ വ്യാപ്തിയുള്ള വീയപുരം സര്‍ക്കാര്‍ സംരക്ഷിത വനം, സംസ്ഥാനത്ത് മൂന്നു ദിവസങ്ങളിലായി നടക്കുന്ന ചരിത്ര പ്രസിദ്ധമായ പായിപ്പാട് ജലോത്സവ പവലിയന്‍, ഇവിടെ പരസ്യചിത്രീകരണങ്ങളും നടക്കാറുണ്ട് ചെറുതന, വീയപുരം പഞ്ചായത്തുകളിലായി പന്ത്രണ്ടോളം ജലരാജാക്ക ന്മാര്‍, വി.എസ്. അച്യുതാനന്ദന്‍ മുഖ്യമന്ത്രിയായപ്പോള്‍ പ്രഖ്യാപിച്ച കൊറ്റി സംരക്ഷണ കേന്ദ്രം തുടങ്ങി ടൂറിസത്തിന്‍റെ അനന്തസാധ്യതകളാണ് മുണ്ടാറുമായി കെട്ടുപിണഞ്ഞുകിടക്കുന്നത്. ഇതിനു പിന്നാലെ ഏതാനം വര്‍ഷമായി വീയപുരം പഞ്ചായത്തിനോട് ചേര്‍ന്ന് നിരണം ജലോത്സവം എന്ന പേരില്‍ ഒരു പുതിയ ജലോത്സവം കൂടി അപ്പര്‍ കുട്ടനാട്ടില്‍ രൂപപ്പെട്ടു. മുണ്ടാര്‍ ശുചീകരിച്ച് ആഴം കൂട്ടി ഇരുവശങ്ങളിലും സംരക്ഷണ ഭിത്തികള്‍ സ്ഥാപിക്കാനും ഒരു കരയില്‍ ചില്‍ഡ്രന്‍സ് പാര്‍ക്ക് സ്ഥാപിക്കാനുമൊക്കെയാണ് പഞ്ചായത്ത് ടൂറിസത്തിന്‍റെ ഭാഗമായി റിപ്പോര്‍ട്ട് തയാറാക്കിയത്. പ്രദേശത്തെ ആഭ്യന്തര വിദേശസഞ്ചാരികളുടെ സാന്നിദ്ധ്യം കൂടി കണക്കിലെടുത്താണ് പദ്ധതിക്ക് തയാറെടുപ്പുകള്‍ നടത്തിയതെങ്കിലും സര്‍ക്കാരോ വിനോദ സഞ്ചാര വകുപ്പോ പച്ചക്കൊടി കാണിക്കുന്നില്ല എന്ന നിരാശയാണ് തദ്ദേശ ഭരണ സ്ഥാപനത്തിനും പൊതുജനങ്ങള്‍ക്കുമുള്ളത്. ഇതുവഴി നിരവധി തൊഴില്‍ സാധ്യത കൂടിയാണ് ഇല്ലാതാക്കുന്നത്. ജില്ലാ പഞ്ചായത്തിന്‍റെ കനിവില്‍ മുണ്ടാര്‍ മാലിന്യമുക്തമാകുമെന്ന പ്രതീക്ഷ മാത്രമാണ് ഇപ്പോഴുള്ളത്.

കർഷകസംഘം ഓഫീസിൽ മോഷണം

തുറവൂര്‍: കുമ്പഞ്ഞി കര്‍ഷക സംഘം ഓഫീസില്‍ മോഷണം. നിരവധി ഫയലുകള്‍ മോഷണം പോയി. അരൂര്‍ പോലീസില്‍ കുമ്പഞ്ഞി കര്‍ഷക സംഘം പ്രസിഡന്‍റ് പരാതി നല്‍കി. വെള്ളിയാഴ്ച്ച രാവിലെ ഓഫീസ് തുറക്കാന്‍ എത്തിയ കമ്മിറ്റി അംഗങ്ങളാണ് മോഷണം നടന്നതായി സ്ഥിതീകരിച്ചത്. പഞ്ചായത്ത് റോഡിനോട് ചേര്‍ന്ന ഭാഗത്തുള്ള പ്രധാന ഷട്ടറിന്‍റെ താഴുകള്‍ പൊളിച്ചാണ് മോഷ്ടാക്കള്‍ അകത്തുകടന്നത്. സമീപത്തെ വാതിലുകള്‍ തുറന്നിട്ടശേഷമാണ് അലമാരിയില്‍ വച്ചിരുന്ന ഫയലുകള്‍ മോഷ്ടിച്ചത്. അലമാരിയുടെ സമീപത്തുകിടന്ന മേശയുടെ വിരിപ്പ് എടുത്ത് അതില്‍ കെട്ടിയാവണം ഫയലുകള്‍ കൊണ്ടുപോയതെന്ന് പ്രസിഡന്‍റ് ടി.കെ. ശശിധരന്‍പിള്ള പറഞ്ഞു. ഓഫീസ് മേശയുടെ വിരിപ്പ് കാണാനില്ല. ഓഫീസില്‍ കമ്മിറ്റി ഉള്ളപ്പഴോ വിറ്റു വിഹിതം കൊടുക്കാനോ പൊതുയോഗത്തിനോ മാത്രമേ ഓഫീസ് തുറക്കാറുള്ളൂ. കമ്മിറ്റിക്കാരായ പ്രദീപും അശോകനും കൂടി വെള്ളിയാഴ്ച രാവിലെ മര ഉരുപ്പടികള്‍ എടുക്കാന്‍ വേണ്ടി എത്തിയപ്പോഴാണ് ഷട്ടറിന്‍റെ പൂട്ട് പൊളിച്ച നിലയില്‍ കണ്ടത്. ഉടന്‍ തന്നേ പ്രസിഡന്‍റിനെ വിവരം അറിയിച്ചു. അദ്ദേഹം സ്ഥലത്തെത്തി അരൂര്‍ പോലീസില്‍ പരാതി നല്‍കി. കുമ്പഞ്ഞി കര്‍ഷക സംഘവുമായി ബന്ധപ്പെട്ട് ചേര്‍ത്തല കോടതിയില്‍ ചില വ്യവഹാരങ്ങള്‍ നടക്കുന്നുണ്ട്. അതുമായി ഈ മോഷണത്തിന് ബന്ധമുണ്ടോ എന്ന് പോലീസ് പരിശോധിച്ചുവരുന്നു. കുറച്ചുനാളുകള്‍ക്ക് മുന്‍പ് കമ്മിറ്റി ഓഫീസില്‍ കമ്മിറ്റി കൂടി കൊണ്ടിരിക്കുമ്പോള്‍ ചില ആളുകള്‍ ഓഫീസില്‍ കയറി സെക്രട്ടറിയുടെ കൈയില്‍ നിന്ന് ഫയലുകള്‍ പിടിച്ചുപറിച്ചുകൊണ്ടു പോയതായി പറയുന്നു. ഫോട്ടോ സഹിതം പരാതി നല്‍കിയിട്ടും ഇതുവരെ അരൂര്‍ പോലീസ് നടപടി എടുത്തിട്ടില്ല. അതിനെതിരേ ജില്ലാ പോലീസ് മോധാവിക്ക് പരാതി നല്‍കുമെന്ന് പ്രസിഡന്‍റ് പറഞ്ഞു.

കടയടപ്പു സമരത്തിനൊരുങ്ങി റേഷൻ ചില്ലറ വ്യാപാരികൾ

മങ്കൊമ്പ്: ഡോർ ഡലിവറി സംവിധാനത്തിലെ പാളിച്ചകളെത്തുടർന്ന് റേഷൻ വിതരണം തടസപ്പെടുന്ന സാഹചര്യത്തിൽ കടയടപ്പു സമരത്തിനൊരുങ്ങി ചില്ലറ റേഷൻ വ്യാപാരികൾ. ഓൾ കേരള റീട്ടെയിൽ റേഷൻ ഡീലേഴ്‌സ് അസോസിയേഷൻ കുട്ടനാട് താലൂക്കുതല യോഗത്തിലാണ് തീരുമാനം. ഭക്ഷ്യധാന്യങ്ങൾ കൃത്യമായി തൂക്കി നൽകുക, എല്ലാ മാസവും 15നു മുൻപായി സാധനങ്ങൾ കടകളിൽ എത്തിക്കുക എന്നീ ആവശ്യങ്ങളുന്നയിച്ചാണ് സമരം. കുട്ടനാട്ടിലെ 15 കടകൾക്ക് മേയ് മാസത്തിൽ വിതരണം ചെയ്യേണ്ട റേഷൻ സാധനങ്ങൾ ഇനിയും വിതരണം ചെയ്തിട്ടില്ലെന്ന് വ്യാപാരികൾ യോഗത്തിൽ അറിയിച്ചു. സംസ്ഥാന വൈസ് പ്രസിഡന്‍റ് ജോസ് കാവനാട് യോഗം ഉദ്ഘാടനം ചെയ്തു. താലൂക്ക് പ്രസിഡന്‍റ് എം. വിശ്വനാഥപിള്ള അധ്യക്ഷത വഹിച്ച യോഗത്തിൽ എൻ.കെ. വേണുഗോപാൽ, തോമസ് മാത്യു, കെ.ജെ. ടോമിച്ചൻ, ഷാജി ജോസഫ്. പി. സൈമൺ തുടങ്ങിയവർ പ്രസംഗിച്ചു.

ഭിന്നശേഷിക്കാരൻ ആറ്റിൽ മുങ്ങിമരിച്ചു

മങ്കൊമ്പ്: കുളിക്കുന്നതിനിടെ ഭിന്നശേഷിക്കാരനായ മധ്യവയസ്‌കൻ ആറ്റിൽ മുങ്ങിമരിച്ചു. കാവാലം പഞ്ചായത്ത് മൂന്നാം വാർഡ് പാലോടം ആലപ്പറമ്പിൽ അപ്പുക്കുട്ടനാ (53) ണു മരിച്ചത്. ഇന്നലെ രാവിലെ എട്ടേകാലോടെ പാലോടം ജെട്ടിക്കു സമീപത്തെ കുളിക്കടവിലാണ് സംഭവം. നീന്തൽ വശമില്ലാത്ത ഇയാൾ പതിവായി കുളിക്കുന്ന കടവിൽ കാൽവഴുതി ആറ്റിലേക്കു വീഴുകയായിരുന്നു. സംഭവസമയത്ത് പരിസരത്തെങ്ങും ആരുമില്ലായിരുന്നു. പിന്നീട് അതുവഴി വന്ന വയോധികൻ അപ്പുക്കുട്ടൻ ആറ്റിൽ മുങ്ങിത്താഴുന്നതു കണ്ടു നിലവിളിച്ചു. പാലുകൊടുക്കാൻ പോയി വന്ന ഒരു കുട്ടി ഇതുകേട്ട് ആറ്റിലിറങ്ങി രക്ഷിക്കാൻ ശ്രമിച്ചെങ്കിലും അപ്പുക്കുട്ടൻ ആഴത്തിലേക്കു മുങ്ങിത്താഴുകയായിരുന്നു. തുടർന്ന് പോലീസിലും ഫയർഫോഴ്‌സിലും വിവരമറിയിച്ചു. കൂടുതൽ നാട്ടുകാരെത്തി അരമണിക്കൂറോളം നടത്തിയ തെരച്ചിലിനൊടുവിൽ മൃതദേഹം കണ്ടെത്തുകയായിരുന്നു. ആലപ്പുഴ വണ്ടാനം മെഡിക്കൽ കോളജ് ആശുപത്രിയിൽ പോസ്റ്റുമാർട്ടം നടത്തിയ ശേഷം ബന്ധുക്കൾക്കു വിട്ടുകൊടുത്ത മൃതദേഹം വൈകുന്നേരത്തോടെ സംസ്‌കരിച്ചു.

വെള്ളക്കെട്ടിൽ വീണ് അഞ്ചാം ക്ലാസ് വിദ്യാർഥി മരിച്ചു

കായംകുളം: വീടിനു സമീപത്തെ വെള്ളക്കെട്ടിൽ വീണ് ഭിന്നശേഷിക്കാരനായ അഞ്ചാം ക്ലാസ് വിദ്യാർഥി മരിച്ചു. കായംകുളം കണ്ടല്ലൂർ പുതിയവിള പാട്ടോളി മാര്‍ക്കറ്റ് പ്രദീപ് ഭവനത്തിൽ പ്രദീപിന്‍റെ മകൻ അഭിനീത് (10) ആണ് മരിച്ചത്. കുട്ടിയെ കാണാനില്ലെന്ന് വീട്ടുകാർ കനകക്കുന്ന് പോലീസിൽ അറിയിച്ചതിനെത്തുടർന്ന് പോലീസ് എത്തി തെരച്ചിൽ നടത്തുന്നതിനിടെ വെള്ളക്കെട്ടിനു സമീപം കുട്ടിയുടെ ചെരുപ്പ് കണ്ടെത്തി. തുടർന്ന് നടത്തിയ പരിശോധനയിൽ കുട്ടിയെ കണ്ടെത്തുകയായിരുന്നു. കായംകുളം താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. കുമാരനാശാൻ സ്കൂളിലെ അഞ്ചാം ക്ലാസ് വിദ്യാർഥിയാണ്. മൃതദേഹം പോസ്റ്റ്മോർട്ടം നടപടികൾക്കുശേഷം ബന്ധുക്കൾക്ക് വിട്ടുകൊടുക്കും. മാതാവ് സുജാത.

തുറവൂർ താലൂക്ക് ആശുപത്രിയിൽ ഡോക്ടർമാരെ നിയമിക്കണം: കെ.സി. വേണുഗോപാൽ എംപി

തുറവൂർ: താലൂക്ക് ആശുപത്രിയിൽ ആവശ്യത്തിന് ഡോക്ടർമാരെ നിയമിക്കണമെന്ന് കെ.സി. വേണുഗോപാൽ എംപി. ഇക്കാര്യം ആവശ്യപ്പെട്ട് ആരോഗ്യമന്ത്രിക്ക് കെ.സി. വേണുഗോപാൽ കത്ത് നൽകി. നിത്യേന 1500ലധികം രോഗികളെത്തുന്ന ആശുപത്രിയിൽ ഒരു ഡോക്ടറുടെ സേവനം മാത്രമാണ് ലഭ്യമായിട്ടുള്ളത്. ഇത് ചികിത്സതേടിയെത്തുന്നവരെ വലയ്ക്കുന്നു. ഒപികളിൽ രോഗികളെ നോക്കുന്ന സമയങ്ങളിൽ അത്യാഹിത വിഭാഗത്തിലേക്ക് ഡോക്ടറുടെ സേവനം ആവശ്യമായി വരുമ്പോൾ ചികിത്സതടസപ്പെടുന്ന സ്ഥിതിയുണ്ട്. ഡോക്ടർമാർ ഇല്ലാത്ത അവസ്ഥ വളരെ ദയനീയമാണ്. നിലവിൽ നാലു ഡോക്ടർമാർ ഉള്ളതായിട്ടാണ് റിപ്പോർട്ട്‌ ചെയ്തിട്ടുള്ളത്. രാത്രികാലങ്ങളിൽ പലപ്പോഴും മതിയായ ഡോക്ടറുടെ സേവനവും ഉറപ്പാക്കാൻ കഴിയുന്നില്ല. ഡോക്ടർമാരെ നിയമിക്കുന്നതോടൊപ്പം അവരുടെ സേവനം കൃത്യമായി ലഭിക്കുന്നുണ്ടോയെന്ന് ഉറപ്പാക്കാൻ ഡിഎംഒയുടെ പരോശോധനയും നിർബന്ധമാക്കണമെന്നും കെ.സി. വേണുഗോപാൽ ആവശ്യപ്പെട്ടു.

വരട്ടാറ്റിലെ മണൽ മോഷണം: രണ്ടു പേർ അറസ്റ്റിൽ

ചെങ്ങന്നൂര്‍: ഇടനാട് വരട്ടാറില്‍നിന്നു ഡ്രഡ്ജ് ചെയ്‌തെടുത്ത മണല്‍ മോഷ്ടിച്ചു കടത്തിയ സംഭവത്തില്‍ രണ്ടു പേര്‍ അറസ്റ്റില്‍. ചെങ്ങന്നൂര്‍ ഇടനാട് സ്വദേശി ജയേഷ് കുട്ടമത്ത് (37), കുമ്പനാട് കടപ്ര സ്വദേശി ജിബിന്‍ തോമസ് (35) എന്നിവരെയാണ് ചെങ്ങന്നൂര്‍ പോലീസ് അറസ്റ്റ് ചെയ്തത്. കഴിഞ്ഞ ഞായറാഴ്ചയാണ് സംഭവം. പമ്പയുടെ കൈവഴിയായ വരട്ടാറിന്‍റെ പുനരുദ്ധാരണ പ്രവര്‍ത്തനത്തിന്‍റെ ഭാഗമായി ജലവിഭവവകുപ്പിന്‍റെ നേതൃത്വത്തില്‍ ഡ്രഡ്ജ് ചെയ്ത് ഇടനാട്ടിലെ വഞ്ചിപ്പോട്ടില്‍ കടവില്‍ സൂക്ഷിച്ചിരുന്ന 150 ക്യുബിക് മീറ്ററോളം വരുന്ന മണലാണ് പ്രതികള്‍ മോഷ്ടിച്ച് കടപ്രയിലേക്ക് കടത്തിക്കൊണ്ടുപോയതെന്ന് പോലീസ് പറഞ്ഞു. ജലവിഭവവകുപ്പ് എന്‍ജിനിയര്‍ നല്‍കിയ പരാതിയെത്തുടര്‍ന്നാണ് ഇരുവരുടെയും അറസ്റ്റ് നടന്നത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

പരിസ്ഥിതിദിനം ആഘോഷിച്ചു

ചേർത്തല: നൈപുണ്യ കോളജ് നേച്ചർ ക്ലബ്ബിന്‍റെ നേതൃത്വത്തിൽ പരിസ്ഥിതി ദിനം ആഘോഷിച്ചു. നൈപുണ്യ കോളജ് അസി. എക്സിക്യൂട്ടീവ് ഡയറക്ടര്‍മാരായ ഫാ. ചാക്കോ കിലുക്കൻ, ഫാ. ലിജോ കുറിയേടൻ എന്നിവർ ചേർന്ന് ആഘോഷ പരിപാടികൾ ഉദ്ഘാടനം ചെയ്തു. കോളജ് പ്രിൻസിപ്പൽ ഡോ. ബിജി പി. തോമസ് അധ്യക്ഷത വഹിച്ചു. വൈസ് പ്രിൻസിപ്പൽ പുഷ്പ ജോൺ, നേച്ചർ ക്ലബ്ബ് കോ-ഓർഡിനേറ്റഴ്സ് മേരി ജോസഫ് എന്നിവർ പങ്കെടുത്തു. പ്ലാസ്റ്റിക് മലിനീകരണത്തെ തോൽപ്പിക്കുക എന്ന ഈ വർഷത്തെ പരിസ്ഥിതി ദിനത്തിന്‍റെ ആശയം ഉൾക്കൊണ്ട്‌ പ്ലാസ്റ്റിക് മാലിന്യം കൈപ്പറ്റി വൃക്ഷതൈ പാരിതോഷികമായി നൽകുന്ന കൗണ്ടർ കോളജില്‍ സജ്ജമാക്കി. പരിപാടിയുടെ ഭാഗമായി കാമ്പസിൽ വൃക്ഷതൈ നടുകയും ക്വിസ് മത്സരം സംഘടിപ്പിക്കുകയും ചെയ്തു.

ആശാ വർക്കർമാരുടെ സമരം കണ്ടില്ലെന്ന് നടിക്കുന്നത് വിചിത്രം: ജോഷ്വാ മാർ ഇഗ്നാത്തിയോസ്

മാവേലിക്കര: ഇടതുപക്ഷമെന്ന് മേനിനടിക്കുന്ന ഒരു സര്‍ക്കാര്‍ അധ്വാനവര്‍ഗമായ ആശാ വര്‍ക്കര്‍മാരുടെ സമരത്തെ കണ്ടില്ലെന്ന് നടിക്കുന്നത് വിചിത്രമാണെന്ന് കേരള മദ്യവിരുദ്ധ മുന്നണി ചെയര്‍മാന്‍ ഡോ. ജോഷ്വാ മാര്‍ ഇഗ്‌നാത്തിയോസ്. സെക്രട്ടേറിയറ്റിനു മുന്‍പില്‍ നൂറ്റി ഇരുപത്തിയഞ്ച് ദിവസത്തിലേറെയായി നടക്കുന്ന ആശമാരുടെ രാപകല്‍ സമരം ഇന്ന് ഒരു അന്താരാഷ്ട്ര മാനം കൈവരിച്ചിരിക്കുന്നവെന്നും അദ്ദേഹം കൂട്ടിച്ചേര്‍ത്തു. കാസര്‍ഗോഡ്‌നിന്ന് ആരംഭിച്ച ആശ മാരുടെ രാപകല്‍ സമര യാത്രയ്ക്ക് മാവേലിക്കരയില്‍ നല്‍കിയ സ്വീകരണസമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ഡിസിസി വൈസ് പ്രസിഡന്‍റ് കെ.ആര്‍. മുരളീധരന്‍ അധ്യക്ഷത വഹിച്ചു. വിവധ രാഷ്ട്രീയ സാമൂഹ്യ സംഘടനാ നേതാക്കള്‍ ജാഥാ ക്യാപ്റ്റന്‍ എം.എ ബിന്ദുവിന് സ്വീകരണം നല്‍കി. മാവേലിക്കര മുനിസിപ്പല്‍ ചെയര്‍മാന്‍ നൈനാന്‍ സി. കുറ്റിശേരില്‍ മുഖ്യപ്രഭാഷണം നടത്തി. തോമസ് സി. കുറ്റിശേരില്‍, അഡ്വ. കെ. സണ്ണിക്കുട്ടി, ചുനക്കര ഹനീഫ, എം.എസ്. ഉണ്ണിത്താന്‍, കെ. കൃഷ്ണകുമാരി, ആര്‍. പാര്‍ഥസാരഥി വര്‍മ, കെ. ബാലകൃഷ്ണന്‍, കെ.ആര്‍. ഓമനക്കുട്ടന്‍, വിജയ ചന്ദ്രന്‍, എന്‍.ഗോവിന്ദന്‍ നമ്പൂതിരി, ഉമ്മന്‍ ചെറിയാന്‍, വര്‍ഗീസ് ജോര്‍ജ് എന്നിവര്‍ പ്രസംഗിച്ചു. ജാഥാ ക്യാപ്റ്റന്‍ എം.എ. ബിന്ദു സ്വീകരണത്തിനു മറുപടി നല്‍കിക്കൊണ്ട് സംസാരിച്ചു. സോമവല്ലി സാഗര്‍ സ്വാഗതവും മാജിദാ ഫസല്‍ കൃതജ്ഞതയും പറഞ്ഞു.

കാടൻമാവ് ജംഗ്ഷൻ നവീകരിക്കണം

ചെങ്ങന്നൂര്‍: ചെങ്ങന്നൂര്‍ ഇലഞ്ഞിമേല്‍-ഹരിപ്പാട് പാതയിലെ തിരക്കേറിയ കാടന്‍മാവ് ജംഗ്ഷന്‍ വീതികൂട്ടി നവീകരിക്കണമെന്ന് രാഷ്ട്രീയ ജനതാദള്‍ (ആര്‍ജെഡി) പുലിയൂര്‍ പഞ്ചായത്ത് പ്രവര്‍ത്തകയോഗം. റോഡിന്‍റെ വീതിക്കുറവും ഓടയുടെ ശോച്യാവസ്ഥയും അപകടസാധ്യത വര്‍ധിപ്പിക്കുന്നുവെന്നും ആര്‍ജെഡി ആവശ്യപ്പെട്ടു. ദിവസേന സ്‌കൂള്‍ ബസുകള്‍, സ്വകാര്യ ബസുകള്‍, കെഎസ്ആര്‍ടിസി ബസുകള്‍ ഉള്‍പ്പെടെ ആയിരക്കണക്കിന് വാഹനങ്ങള്‍ കടന്നുപോകുന്ന പ്രധാന ജംഗ്ഷനാണ് കാടന്‍മാവ്. ഹരിപ്പാട് ഭാഗത്തുനിന്ന് വരുന്ന വാഹനങ്ങള്‍ ചെങ്ങന്നൂര്‍ ഭാഗത്തേക്ക് തിരിയുന്നിടത്ത് റോഡിന് വീതിയില്ലായ്മ ഗതാഗതക്കുരുക്കിനു കാരണമാകാറുണ്ട്. റോഡിന്‍റെ മധ്യഭാഗം വരെ പുറംമൂടിയില്ലാതെ തുറന്നുകിടക്കുന്ന ഓടയിലേക്ക് ഇരുചക്രവാഹനങ്ങളടക്കം വീണ് അപകടങ്ങള്‍ സംഭവിക്കുന്നത് നിത്യസംഭവമാണെന്ന് ആര്‍ജെഡി നേതാക്കള്‍ പറഞ്ഞു. സ്‌കൂള്‍ തുറന്നതോടെ ഈ ഭാഗത്ത് തിരക്ക് വര്‍ധിച്ചിരിക്കുകയാണ്. റോഡിന് വീതിയില്ലാത്തതിനാല്‍ സ്‌കൂള്‍ കുട്ടികളടക്കം ഇതുവഴിയുള്ള യാത്ര അപകടകരമാണെന്നും അടിയന്തരമായി റോഡിന് വീതി കൂട്ടണമെന്നും യോഗം ആവശ്യപ്പെട്ടു. കൂടാതെ, ജംഗ്ഷനിലെ വെളിച്ചക്കുറവ് ഒരു പ്രധാന പ്രശ്‌നമാണ്. രാത്രികാലങ്ങളില്‍ അടുത്തുള്ള കടകളില്‍ നിന്നുള്ള വെളിച്ചം മാത്രമാണ് ആശ്രയം. ഇതിന് പരിഹാരമായി ജംഗ്ഷനില്‍ ഒരു ഹൈമാസ്റ്റ് ലൈറ്റ് സ്ഥാപിക്കണമെന്നും ആര്‍ജെഡി ആവശ്യപ്പെട്ടു. ആര്‍ജെഡി സംസ്ഥാന കമ്മിറ്റിയംഗം ഗിരീഷ് ഇലഞ്ഞിമേല്‍ ഉദ്ഘാടനം ചെയ്തു. മണ്ഡലം എക്‌സിക്യൂട്ടീവ് അംഗം അരുണ്‍ പേരിശേരി അധ്യക്ഷനായി. ജില്ലാ വൈസ് പ്രസിഡന്‍റ് ആര്‍. പ്രസന്നന്‍, മണ്ഡലം വൈസ് പ്രസിഡന്‍റ് മനു പാണ്ടനാട്, ജി. വിശ്വനാഥന്‍, എം. ജയിംസ് മാത്യു, അജേഷ് വിജയന്‍, എം.വി. പ്രസാദ്, കെ. ഹരിക്കുട്ടന്‍ എന്നിവര്‍ പ്രസംഗിച്ചു. പുലിയൂര്‍ പഞ്ചായത്ത് കമ്മിറ്റി ഭാരവാഹികളായി എം. ജയിംസ് മാത്യു (പ്രസിഡന്‍റ്), എം.വി. പ്രസാദ് (സെക്രട്ടറി) എന്നിവരടങ്ങിയ പതിനഞ്ചംഗ എക്‌സിക്യൂട്ടീവ് കമ്മിറ്റിയെയും യോഗം തെരഞ്ഞെടുത്തു.

പ്രസവത്തെത്തുടര്‍ന്ന് യുവതി മരിച്ചു; ആശുപത്രിക്കെതിരേ കേസ്

എടത്വ: ഇരട്ടക്കുട്ടികള്‍ക്ക് ജന്മം നല്‍കിയ യുവതി മരിച്ചു. അസ്വാ ഭാവിക മരണത്തില്‍ ആശുപത്രിക്കെതിരേ പോലീസ് കേസെടുത്തു. എടത്വ കൊടുപ്പുന്ന കോലത്ത് (തൃക്കാര്‍ത്തികയില്‍) കെ.ജെ. മോഹനന്‍റെ മകള്‍ നിത്യ മോഹനന്‍ (28) ആണ് മരിച്ചത്. വെള്ളിയാഴ്ച രാവിലെ ആറിന് തിരുവല്ല സ്വകാര്യ മെഡിക്കല്‍ കോളജില്‍ പ്രസവത്തിനായി നിത്യയെ പ്രവേശിപ്പിച്ചിരുന്നു. 11ന് സിസേറിയനിലൂടെ ഇരട്ടക്കുട്ടികളെ പുറത്തെടുത്തു. പ്രസവത്തെത്തുടര്‍ന്ന് രക്തസ്രാവം നില്‍ക്കുന്നില്ലെന്നും യൂട്രസ് നീക്കം ചെയ്യണമെന്നും ആശുപത്രി അധികൃതര്‍ ബന്ധുക്കളെ അറിയിച്ചു. ബന്ധുക്കള്‍ ഇതിന് സമ്മതിച്ചിരുന്നു. എന്നാല്‍, വൈകിട്ട് മൂന്നോടെ ഹൃദയതകരാര്‍ ഉണ്ടെന്ന് ആശുപത്രി അധികൃതര്‍ അറിയിക്കുകയും വെന്‍റിലേറ്ററിലേക്ക് മാറ്റുകയും ചെയ്തു. എന്നാല്‍, നിത്യയുടെ നിലഗുരുതരമാണെന്ന് ആശുപത്രിക്കാര്‍ അറിയിച്ചിട്ടും കാണാനോ മറ്റ് ആശുപത്രികളിലേക്ക് മാറ്റാനോ സമ്മതിച്ചില്ലെന്ന് ബന്ധുക്കള്‍ പറയുന്നു. വൈകിട്ട് ആറോടെ നിത്യ മരിച്ചതായി ബന്ധുക്കളെ അറിയിക്കുകയായിരുന്നു. തുടര്‍ന്ന് ബന്ധുക്കള്‍ ആശുപത്രിയക്കെതിരേ പ്രതഷേധിച്ചു. തിരുവല്ല ടൗണ്‍ പോലീസ് സ്റ്റേഷനില്‍ പരാതി നല്‍കി. അസ്വാഭാവിക മരണത്തിന് കേസെടുത്തിട്ടുണ്ട്. യുവതിയുടെ മൃതദേഹം കോട്ടയം മെഡിക്കല്‍ കോളജില്‍ പോസ്റ്റ്മോര്‍ട്ടത്തിനുശേഷം ബന്ധുക്കള്‍ക്ക് വിട്ടുനല്‍കി. മൃതദേഹം ജന്മവീട്ടില്‍ പൊതുദര്‍ശനത്തിനുവച്ചശേഷം ഇന്നലെ വെകിട്ട് ഭര്‍ത്താവ് വൈശാഖിന്‍റെ വീടായ കോട്ടയം കറുകച്ചാല്‍ ദൈവംപടി വൈഷ്ണവത്തില്‍ സംസ്‌കരിച്ചു.

പഠനോപകരണ വിതരണം നടത്തി

പുളിങ്കുന്ന്: പഞ്ചായത്ത്‌ അഞ്ചാം വാർഡ്‌ മെംബർ ജോഷി കൊല്ലാറയുടെ നേതൃത്വത്തിൽ ഒന്നുമുതൽ 10-ാം ക്ലാസ് വരെയുള്ള കുട്ടികൾക്ക് ബാഗും നോട്ട് ബുക്കുകളും അടങ്ങിയ പഠനോപകരണ വിതരണം നടത്തി. ജോഷി കൊല്ലാറ അധ്യക്ഷത വഹിച്ചു. എൻഎസ്എസ് കുട്ടനാട് താലൂക്ക് യൂണിയൻ പ്രസിഡന്‍റും ഡയറക്ടർ ബോർഡ്‌ അംഗവുമായ ഡോ. കെ.പി. നാരായണപിള്ള ഉദ്ഘാടനം ചെയ്തു. കണ്ണാടി സെന്‍റ് ജോസഫ് ഇടവക വികാരി ഫാ. ആന്‍റണി തലച്ചെല്ലൂർ മുഖ്യപ്രഭാഷണം നടത്തി. കുട്ടനാട്ടിൽ വെള്ളപ്പൊക്കഭീഷണി നേരിടുന്ന സമയത്ത് സ്കൂൾ തുറക്കലുമായി ബന്ധപ്പെട്ട് വിദ്യാർഥികളും മാതാപിതാക്കളും ബുദ്ധിമുട്ട് അനുഭവിക്കുന്ന സാഹചര്യത്തിൽ അവർക്ക് കൈത്താങ്ങാകുക എന്ന ഉദ്ദേശത്തോടുകൂടിയാണ് പരിപാടി സംഘടിപിച്ചത്. എൻഎസ്എസ് കുട്ടനാട് താലൂക്ക് യൂണിയൻ വൈസ് പ്രസിഡന്‍റ് രാധാകൃഷ്ണൻ മങ്ങാട്, എം.ആർ. സജീവ്, എ.എസ്. വിശ്വനാഥൻ, തങ്കച്ചൻ വാഴച്ചിറ, ജോസഫ് ജോസഫ് മാമ്പൂത്തറ, മനോജ്‌ കാനാച്ചേരി, വേലായുധൻ നായർ മണിയല, ബിജോ പുത്തൻചിറ, ഷാരോൺ ടിറ്റോ, ടോം മാത്യു നടുവിലേടം, സാബു ആറുപറ, മണി പൊയ്പ്പള്ളി, സാലിമ്മ തച്ചാറ, മാത്തുക്കുട്ടി തറയിൽ, ജോബി കല്ലുങ്കൽ തുടങ്ങിയവർ പ്രസംഗിച്ചു. 125 വിദ്യാർഥികൾക്കാണ് പഠനോപകരണ സാമഗ്രികൾ വിതരണം ചെയ്തത്. യോഗത്തിൽ എൻഎസ്എസ് ഡയറക്ടർ ബോർഡ്‌ അംഗമായി തെരഞ്ഞെടുക്കപ്പെട്ട ഡോ. കെ.പി. നാരായണപിള്ളയെ ഫാ. ആന്‍റണി തലച്ചെല്ലൂർ പൊന്നാട അണിയിച്ച് ആദരിച്ചു.

മന്ത്രി പി. പ്രസാദിന്‍റെ കുടുംബവീടിനു മുന്നില്‍ ബിജെപി-സിപിഐ സംഘര്‍ഷം

ചാരുംമൂട്: മന്ത്രി പി. പ്രസാദിന്‍റെ നൂറനാട്ടെ കുടുംബ വീടിനു മുന്നില്‍ ബിജെപി-സിപിഐ സംഘര്‍ഷം. ഭാരതാംബയുടേതെന്ന പേരില്‍ ആര്‍എസ്എസ് പ്രചരിപ്പിക്കാന്‍ ശ്രമിക്കുന്ന കാവി കൊടിയേന്തിയ സ്ത്രീയുടെ ചിത്രം വച്ച് വിളക്കു തെളിച്ച് പുഷ്പാര്‍ച്ചന നടത്തി പ്രതിഷേധിക്കാനുള്ള ബിജെപി ശ്രമം സിപിഐ പ്രവര്‍ത്തകര്‍ തടഞ്ഞു. ഇതു സംഘര്‍ഷത്തിനും കൈയാങ്കളിക്കും ഇടയാക്കി. രാജ്ഭവനില്‍ നിശ്ചയിച്ച പരിസ്ഥിതി ദിനാഘോഷ പരിപാടിയില്‍ ആര്‍എസ്എസ് ഉപയോഗിക്കുന്ന ചിത്രത്തില്‍ പുഷ്പാര്‍ച്ചന നടത്തണമെന്ന ഗവര്‍ണറുടെ നിലപാടില്‍ പ്രതിഷേധിച്ച് മന്ത്രി പരിസ്ഥിതി ദിനാഘോഷം രാജ്ഭവനില്‍നിന്നു മാറ്റിയിരുന്നു. ഭാരതാംബയുടേതെന്ന പേരില്‍ ആര്‍എസ്എസ് ഉപയോഗിക്കുന്ന ചിത്രത്തിലുള്ളത് ഇന്ത്യയുടെ ഭൂപടമല്ല. കൂടാതെ ചിത്രത്തിലെ സ്ത്രീ കൈയിലേന്തിയിരിക്കുന്നത് ഇന്ത്യയുടെ ദേശീയ പതാകയുമല്ല. മറിച്ച് കാവിക്കൊടിയാണ്. മാത്രവുമല്ല ചിത്രത്തിലുള്ളത് ഇന്ത്യയുടെ ദേശീയ മൃഗവുമല്ല. ഇക്കാര്യങ്ങള്‍ ചൂണ്ടിക്കാട്ടിയാണ് മന്ത്രി രാജ്ഭവനില്‍നിന്നു പരിപാടി മാറ്റിയത്. ഇതില്‍ പ്രതിഷേധിച്ചായിരുന്നു ബിജെപിയുടെ പ്രതിഷേധം. ചിത്രം വയ്ക്കുന്നത് സിപിഐ പ്രവര്‍ത്തകര്‍ തടഞ്ഞതോടെയാണ് സംഘര്‍ഷവും കയ്യാങ്കളിയും നടന്നത്. പ്രവര്‍ത്തകര്‍ ചേരിതിരിഞ്ഞ് മുദ്രാവാക്യം വിളിയും നടത്തി. ഈ സമയം നൂറനാട് എസ്എച്ച്ഒ എസ്. ശ്രീകുമാറിന്‍റെ നേതൃത്വത്തില്‍ കുറച്ചു പോലീസുകാര്‍ മാത്രമാണുണ്ടായത്. പോലീസ് പ്രവര്‍ത്തകരെ ശാന്തരാക്കാന്‍ ശ്രമിച്ചെങ്കിലും നടന്നില്ല. ചെങ്ങന്നൂര്‍ ഡിവൈഎസ്പി എം.കെ. ബിനുകുമാറിന്‍റെ നേതൃത്വത്തില്‍ കൂടുതല്‍ പോലീസ് എത്തിയാണ് ഇരു കൂട്ടരേയും തിരിച്ചയച്ചത്. ദേശീയപതാക ഉയര്‍ത്തി സിപിഐ പ്രവര്‍ത്തകര്‍ വൃക്ഷത്തൈ നടുകയും ചെയ്തു. സിപിഐയുടെ പ്രതിഷേധത്തിന് മണ്ഡലം സെക്രട്ടറി എം. മുഹമ്മദാലി, നൗഷാദ് എ. അസീസ്, അനു ശിവന്‍, കൃഷ്ണന്‍കുട്ടി തുടങ്ങിയവര്‍ നേതൃത്വം നല്‍കി. 75 പേർക്കെതിരേ കേസെടുത്തു ചാരുംമൂട്: നൂറനാട്ട് കഴിഞ്ഞദിവസം മന്ത്രിയുടെ വീട്ടിലേക്കു നടത്തിയ മാര്‍ച്ചിലുണ്ടായ സംഘര്‍ഷവുമായി ബന്ധപ്പെട്ട് 75 പേര്‍ക്കെതിരേ പോലീസ് കേസെടുത്തു. പോലീസ് നിര്‍ദേശം ധിക്കരിച്ച് മന്ത്രി പി. പ്രസാദിന്‍റെ വസതിക്കുമുന്നിലെത്തി പ്രതിഷേധവും സംഘര്‍ഷവുമുണ്ടാക്കിയതിന്‍റെ പേരില്‍ ബിജെപി നേതാക്കളടക്കം 30 പേര്‍ക്കെതിരെയാണ് കേസെടുത്തത്. ശനിയാഴ്ച വൈകിട്ട് കെ.പി. റോഡില്‍ ഗതാഗതതടസം സൃഷ്ടിച്ച് പ്രതിഷേധ പ്രകടനം നടത്തിയതിന് 45 സിപിഐ- എഐവൈഎഫ് പ്രവര്‍ത്തകര്‍ക്കെതിരെയും കേസെടുത്തു. പോലീസിനെതിരേ രൂക്ഷവിമർശനം ചാരുംമൂട്: നൂറനാട്ട് മന്ത്രി പി. പ്രസാദിന്‍റെ വസതിക്കു മുന്നിലേക്ക് പ്രതിഷേധത്തിനായി ബിജെപി പ്രവര്‍ത്തകര്‍ എത്തിയപ്പോള്‍ പോലീസ് നിഷ്‌ക്രിയമായിരുന്നുവെന്ന് സ്ഥലത്തെത്തിയ ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍. മന്ത്രിമാരുടെ വീടുകളിലേക്ക് മാര്‍ച്ചോ പ്രതിഷേധമോ നടക്കുമ്പോള്‍ കുറച്ചകലെ മാറി പോലീസ് തടയുന്നതാണ് രീതി. എന്നാല്‍, ഇവിടെ അതുണ്ടായില്ല. അതുകൊണ്ടാണ് മന്ത്രിയുടെ വീടിനു മുന്നില്‍ ബിജെപി പ്രവര്‍ത്തകര്‍ക്ക് എത്താനായതെന്നും ചിറ്റയം കുറ്റപ്പെടുത്തി. സംസ്ഥാനത്ത് ഗുരുതരമായ പ്രതിസന്ധി ഉണ്ടാക്കാന്‍ വേണ്ടി ബോധപൂര്‍വമായ പരിശ്രമമാണ് ബിജെപി നടത്തുന്നതെന്നും അദ്ദേഹം കുറ്റപ്പെടുത്തി.

തായങ്കരി പള്ളിയിൽ തിരുനാൾ

മങ്കൊമ്പ്: തായങ്കരി സെന്‍റ് ആന്‍റണീസ് പള്ളിയിൽ വിശുദ്ധ അന്തോനീസിന്‍റെ തിരുനാളിനു തുടക്കമായി. വികാരി ഫാ. ലിജോ കുഴിപ്പള്ളിൽ കൊടിയേറ്റി. തിരുനാൾ ദിവസങ്ങളിൽ ദിവസവും വൈകുന്നേരം 4.30ന് ജപമാല, മധ്യസ്ഥ പ്രാർഥന, വിശുദ്ധ കുർബാന, സന്ദേശം. ഫാ. ബിന്നി കുറിഞ്ഞിപ്പറമ്പിൽ, ഫാ.മോൻസി കൈപ്പടാശേരി, ഫാ. ആന്‍റോ പെരുമ്പള്ളിത്തറ, ഫാ. ബിജു മണവത്ത്, ഫാ. സനൂപ് മുത്തുമാക്കുഴിയിൽ, ഫാ. ജെറിൻ അട്ടിച്ചിറ അഞ്ചിൽ, ഫാ. തോമസ് കുറ്റിക്കാട്ട്, ഫാ. രഞ്ജിത് ആലുങ്കൽ, ഫാ.ഫിലിപ്പ് വൈക്കത്തുകാരൻ, ഫാ. മോൻസി മേളിപ്പടവിൽ തുടങ്ങിയവർ തിരുക്കർമങ്ങൾക്കു കാർമികത്വം വഹിക്കും. നാളെ രാവിലെ 6.30ന് സപ്ര, മധ്യസ്ഥപ്രാർഥന, വിശുദ്ധ കുർബാന, സന്ദേശം, 9.30ന് സപ്ര, വിശുദ്ധ കുർബാന, സന്ദേശം, തുടർന്ന മതാധ്യായന വർഷ ഉദ്ഘാടനം. 14ന് വൈകുന്നേരം 4.30ന് ജപമാല, മധ്യസ്ഥപ്രാർഥന, വിശുദ്ധ കുർബാന, സന്ദേശം, തുടർന്ന പ്രദക്ഷിണം. പ്രധാന തിരുനാൾ ദിനമായ 15ന് രാവിലെ 9.30ന് ജപമാല, 10.20ന് മധ്യസ്ഥ പ്രാർഥന, ആഘോഷമായ വിശുദ്ധ കുർബാന, ഫാ. ജോസഫ് വേളങ്ങാട്ടുശേരി, ലദീഞ്ഞ്, പ്രദക്ഷിണം, കൊടിയിറക്ക്, ഉത്പന്നലേലം.

കർഷകർക്ക് ഫലവൃക്ഷത്തൈകൾ വിതരണം ചെയ്തു

ചാരുംമൂട്: ചേതന ഇൻഫാം മാവേലിക്കര കാർഷിക ജില്ലയുടെ ആഭിമുഖ്യത്തിൽ പരിസ്ഥിതി ദിനത്തിന്‍റെ ഭാഗമായി കർഷകർക്ക് ഫലവൃക്ഷത്തൈകൾ വിതരണം ചെയ്തു. ചാരുംമൂട് മലങ്കര കാത്തോലിക്ക ദേവാലയത്തിൽ വൈസ് പ്രസിഡന്‍റ് രാജു എം.ജെ.യുടെ അധ്യക്ഷതയിൽ കറ്റാനം വൈദിക ജില്ലാ എംസിഎ ഡയറക്ടർ ഫാ. സിൽവസ്റ്റർ തെക്കേടത്ത് ഉദ്ഘാടനം ചെയ്തു. കാർഷിക ജില്ലാ പ്രസിഡന്‍റ് സ്റ്റീഫൻ തോമസ്, അനിമേറ്റർ റെജി രാജു, ഇൻഫാം ജില്ലാ ട്രഷറർ ഷൈനി ആൻഡ്രൂസ്, ചേതന സ്റ്റാഫ് അംഗങ്ങൾ, ഇൻഫാം കാർഷിക അംഗങ്ങളും പങ്കെടുത്തു. മാവേലിക്കര, കറ്റാനം, ചെങ്ങന്നൂർ, പുത്തൂർ, കടമ്പനാട് കൊല്ലം എന്നീ കാർഷിക ജില്ലകളിൽ കറിവേപ്പ്, കോവൽ, സീതാപ്പിൾ, നാരകം, ബഡ് നെല്ലി, ബഡ് മാവ് ഒപ്പം 10 കിലോ ഡോളോമൈറ്റ് എന്നിവ ഇൻഫാമിൽ രജിസ്റ്റർ ചെയ്തിട്ടുള്ള 550 കർഷകർക്ക് വിതരണം ചെയ്തു.

മൈലാഞ്ചി ഡിസൈനുകളിൽ വ്യത്യസ്ത രചിച്ച് വിദ്യാർഥിനികൾ

മാന്നാർ: പെരുന്നാളിനെ വരവേൽക്കാൻ വിശ്വാസികൾ അണിഞ്ഞൊരുങ്ങുമ്പോൾ മൊഞ്ചുള്ള മൈലാഞ്ചി ചോപ്പിൽ പെരുന്നാളിനെ കളറാക്കുകയാണ് ഈ കളിക്കൂട്ടുകാർ. മാന്നാറിലെ സാമൂഹ്യപ്രവർത്തകനും മാധ്യമ പ്രവർത്തകനുമായ മാന്നാർ കുരട്ടിക്കാട് അൻഷാദ് മൻസിലിൽ അൻഷാദിന്‍റെയും റെജിമോളുടെയും ഏകമകളായ അസ്ന അൻഷാദും കുരട്ടിക്കാട് വടക്കേവിളയിൽ നിസാം-ഷെറിന ദമ്പതികളുടെ മകൾ നൗറിൻ ഫാത്തിമയുമാണ് പെരുന്നാളിനെ വരവേൽക്കാൻ അദ്ഭുതപ്പെടുത്തുന്ന മൈലാഞ്ചി ഡിസൈനുകളൊരുക്കുന്നത്. അയൽവാസികളും കൂട്ടുകാരുമെല്ലാം പെരുന്നാൾ എത്തിയതോടെ ഇവരെത്തേടിയാണെത്തുന്നത്. സോഷ്യൽ മീഡിയകളിലും മറ്റും കണ്ടറിഞ്ഞ മൈലാഞ്ചിയുടെ കരവിരുതുകൾ സ്വായത്തമാക്കുവാൻ ഈ കളിക്കൂട്ടുകാർക്ക് ഏറെനാൾ വേണ്ടിവന്നില്ല. നാടൻ മൈലാഞ്ചി അരച്ച് പാരമ്പര്യ രീതിയിലും ബ്രാൻഡഡ് കമ്പനികളുടെ മൈലാഞ്ചി കോണുകളും ഉപയോഗിച്ച് ഇവരുടേതായ ഡിസൈനുകളിൽ വിരിയുന്ന മൈലാഞ്ചി മൊഞ്ച് ഈ കളിക്കൂട്ടുകാർക്ക് ഇന്നൊരു വരുമാന മാർഗംകൂടിയാണ്. വിവാഹത്തോടനുബന്ധിച്ച് നടക്കുന്ന മൈലാഞ്ചി രാവുകളിലും മണവാട്ടികളെ മൊഞ്ചത്തിയാക്കാനും ഈ കളിക്കൂട്ടുകാർ റെഡിയാണ്. ചെറുപ്പം മുതൽ ഒരുമിച്ച് കളിച്ചുവളർന്നവരിൽ അസ്ന അൻഷാദ് മാന്നാർ കുരട്ടിക്കാട് ശ്രീഭുവനേശ്വരി ഹയർ സെക്കൻഡറി സ്കൂളിലും നൗറിൻ ഫാത്തിമ മാന്നാർ നായർസമാജം ഗേൾസ് ഹൈസ്കൂളിലും എട്ടാം ക്ലാസ് വിദ്യാർഥിനികളാണ്. പഠനത്തിലും മികവ് പുലർത്തുന്ന ഇവരുടെ കലാവിരുന്നുകൾക്ക് പ്രോത്സാഹനമായി അധ്യാപകരും സഹപാഠികളും ഒപ്പമുണ്ട്.

3x3 ബാസ്കറ്റ്ബോൾ: ജില്ലാ ടീമുകൾക്ക് ജേഴ്സികൾ വിതരണം ചെയ്തു

ആലപ്പുഴ: ആദ്യത്തെ അണ്ടർ ട്വന്‍റിത്രീ (യു-23) 3 x3 സ്റ്റേറ്റ് ബാസ്‌കറ്റ്‌ബോൾ ചാമ്പ്യൻഷിപ്പിൽ മത്സരിക്കുന്ന ആലപ്പുഴ ജില്ലാ ടീമുകൾക്ക് ആലപ്പി ഡിസ്ട്രിക്ട് ബാസ്‌കറ്റ്‌ബോൾ അസോസിയേഷൻ (എഡിബിഎ) ജേഴ്സികൾ വിതരണം ചെയ്തു. ടീം അംഗങ്ങൾക്കുള്ള ജേഴ്‌സി വിതരണം മെഡിവിഷൻ മാനേജിംഗ് ഡയറക്ടർ ബിബു ബി. പുന്നൂരാൻ നിർവഹിച്ചു. പട്ടണ ചത്വരത്തിലെ ബാബു ജെ. പുന്നൂരാൻ ബാസ്‌കറ്റ് ബോൾ സ്റ്റേഡിയത്തിൽ ചേർന്ന യോഗത്തിൽ പ്രസിഡന്‍റ് റോണി മാത്യു അധ്യക്ഷത വഹിച്ചു. സെക്രട്ടറി ജോൺ ജോർജ്, പിആർഒ തോമസ് മത്തായി കരിക്കംപള്ളിൽ, എക്സിക്യൂട്ടീവ് കമ്മിറ്റി അംഗങ്ങളായ ജോസ് സേവ്യർ, ബ്രിജിറ്റ് ജോസഫ്, ബിനു എം., ഷഹബാസ് എസ്. തുടങ്ങിയവർ പങ്കെടുത്തു. രോഗനിർണയ സേവനങ്ങൾ നൽകുന്ന മെഡിവിഷനാണ് ടീമുകളെ സ്പോൺസർ ചെയ്യുന്നത്. 2025 ജൂൺ എട്ടിന് ഞായറാഴ്ച കൊച്ചി കടവന്ത്ര റീജണൽ സ്‌പോർട്‌സ് സെന്‍ററിലാണ് സംസ്ഥാന മത്സരം. ആലപ്പുഴ പുരുഷ ടീം: അശ്വിൻ-ക്യാപ്റ്റൻ, ആൽഫി, ജോസഫ്, ദേവസി. സ്റ്റാൻഡ് ബൈ: ആൽബിൻ, നിരഞ്ജൻ. വനിതാ ടീം: ടെസ ഹർഷൻ-ക്യാപ്റ്റൻ, സുഭദ്ര ജയകുമാർ, ഗംഗാ രാജഗോപാൽ, തേജസ് തോബിയാസ്. സ്റ്റാൻഡ് ബൈ: സ്വപ്ന, ശിവാനി.

കായികതാരങ്ങൾക്ക് സ്വീകരണം നൽകി

കായംകുളം: മധ്യപ്രദേശിലെ ഇൻഡോറിൽ നടന്ന ദേശീയ സബ് ജൂണിയർ നെറ്റ് ബോൾ ചാമ്പ്യൻഷിപ്പിൽ മെഡൽ നേടിയ കേരള ടീമംഗങ്ങൾക്ക് ആലപ്പുഴ ജില്ലാ നെറ്റ് ബോൾ അസോസിയേഷന്‍റെ ആഭിമുഖ്യത്തിൽ സ്വീകരണം നൽകി. സംസ്ഥാന ടീമിൽ അംഗങ്ങളായിരുന്ന ജില്ലക്കാരായ മീനു എസ്., കിരൺകുമാർ, ആദിൽ നൈഫ്, സംസ്ഥാന ടീമിന്‍റെ പരിശീലകനായ ജിതിൻ ജയൻ എന്നിവർക്കാണ് കായംകുളം റെയിൽവേ സ്റ്റേഷനിൽ സ്വീകരണം നൽകിയത്. ജില്ലാ നെറ്റ് ബോൾ അസോസിയേഷൻ സെക്രട്ടറി എസ്.കെ. ജയകുമാർ, ട്രഷറർ രഞ്ജു സക്കറിയ, പരിശീലകനായ അരുൺ ബിജു എന്നിവർ നേതൃത്വം നൽകി.

ലേബര്‍ ഓഫീസറുടെ തീരുമാനം ഏകപക്ഷീയം: ഹൗസ്‌ബോട്ട് ഓണേഴ്‌സ് സമിതി

ആലപ്പുഴ: ഹൗസ്‌ബോട്ട് മേഖലയില്‍ തൊഴിലാളികള്‍ വേതന വര്‍ധനവ് ആവശ്യപ്പെട്ടതില്‍ ആലപ്പുഴ ജില്ലാ ലേബര്‍ ഓഫീസര്‍ വിളിച്ചുചേര്‍ത്തതായി പറയുന്ന യോഗത്തില്‍ ഈ രംഗത്തുള്ള നാല് പ്രമുഖ ഉടമസംഘത്തില്‍ മൂന്ന് സംഘടനകളും പങ്കെടുത്തിരുന്നില്ല. ഒരു സംഘടനയിലെ ഖജാന്‍ജി മാത്രമാണ് പങ്കെടുത്തത്. ഈ യോഗത്തില്‍ വേതന വര്‍ധനവ് പ്രഖ്യാപിച്ച ലേബര്‍ ഓഫീസറുടെ നടപടി അംഗീകരിക്കാനാവില്ലെന്ന് കേരള സംസ്ഥാന ഹൗസ് ബോട്ട് ഓണേഴ്‌സ് സമിതി ആലപ്പുഴ ജില്ലാ ഭാരവാഹികള്‍ പറഞ്ഞു. ഹൗസ്‌ബോട്ട് മേഖലയില്‍ വേതനവര്‍ധനവ് ആവശ്യപ്പെടാന്‍ പറ്റിയ ഒരു സാഹചര്യവും ഇന്നില്ല. കാലവര്‍ഷം നേരത്തെ വന്നതുമൂലം പല ട്രിപ്പുകളും മുടക്കേണ്ടി വന്നതിനാൽ വലിയ സാമ്പത്തിക നഷ്ടമാണ് ഉണ്ടായിരിക്കുന്നതെന്നും യോഗം ചൂണ്ടിക്കാട്ടി. താത്കാലിക ജീവനക്കാരുടെ കാര്യത്തില്‍ യൂണിയന്‍ നിലപാടുകളും അംഗീകരിക്കാനാവില്ല. ഹൗസ്‌ബോട്ട് രംഗം ആലപ്പുഴയില്‍ നിലനില്‍ക്കുന്നതിനും തൊഴിലാളി - ഉടമ ബന്ധങ്ങള്‍ നല്ല രീതിയില്‍ തുടരുന്നതിനും പുതിയ യോഗം വിളിച്ച് ചര്‍ച്ചകള്‍ക്കു തയാറാകണമെന്ന് യോഗം ആവശ്യപ്പെട്ടു. യോഗത്തില്‍ പ്രസിഡന്‍റ് എ. അനസ് അധ്യക്ഷത വഹിച്ചു. ലൈജു മാതിരംപള്ളി, കെവിന്‍ റൊസാരിയോ, ബിജു എക്കോ, നിസാര്‍ ഗ്രാന്‍റ് ടൂര്‍, ഇ.എ. ബഷീര്‍ എന്നിവര്‍ പങ്കെടുത്തു.

പൊതുവിടങ്ങള്‍ വര്‍ണാഭമാക്കുന്ന പദ്ധതിക്കു തുടക്കം കുറിച്ച് ഫോട്ടോഗ്രാഫേഴ്‌സ് അസോസിയേഷന്‍

മാവേലിക്കര: ഓള്‍ കേരള ഫോട്ടോഗ്രാഫേഴ്‌സ് അസോസിയേഷന്‍ മാവേലിക്കര മേഖലാ കമ്മിറ്റിയുടെ വര്‍ണാഭമായ പൊതുവിടങ്ങള്‍ പദ്ധതിക്ക് ലോക പരിസ്ഥിതി ദിനത്തില്‍ തുടക്കമായി. പദ്ധതിയുടെ ആദ്യഘട്ടമായി തഴക്കര പഞ്ചായത്തിലെ ആക്കനാട്ടുകരയിലുള്ള മാക്രിമട ബണ്ട് റോഡ് പ്രാദേശിക വിനോദസഞ്ചാരകേന്ദ്രം സൗന്ദര്യവത്കരിച്ചു. റോഡിന്‍റെ ഇരുവശങ്ങളിലുമായി 100ല്‍പരം അലങ്കാര സസ്യങ്ങളാണ് നട്ടുപിടിപ്പിച്ചത്. ബോഗണ്‍വില്ല, ഗോള്‍ഡന്‍ ലഗും പ്ലാന്‍റ്, അലമാന്‍റ എന്നീ ഇനത്തിലുള്ള ചെടികളാണ് ഇവിടെ നട്ടിരിക്കുന്നത്. ഒരു വര്‍ഷം നീണ്ടു നില്‍ക്കുന്ന പദ്ധതിയില്‍ കൃത്യമായ ഇടവേളകളില്‍ ഇതിന്‍റെ പരിപാലനച്ചുമതലയും സംഘടന ഏറ്റെടുത്തിരിക്കുകയാണ്. ചെടികള്‍ പ്രതീക്ഷിത വളര്‍ച്ച കൈവരിച്ചാല്‍ ഒരു വര്‍ഷംകൊണ്ട് പൂക്കളാല്‍ അലംകൃതമായ പ്രദേശമായി ഇവിടം മാറുകയും തന്മൂലം ഇവിടുത്തെ ടൂറിസം സാധ്യതകള്‍ ഏറുകയും ചെയ്യുമെന്ന് ഭാരവാഹികള്‍ അവകാശപ്പെടുന്നു. തഴക്കര പഞ്ചായത്തില്‍ ആരംഭിച്ച പദ്ധതി മാവേലിക്കര മുനിസിപ്പാലിറ്റി, ചെട്ടികുളങ്ങര, തെക്കേക്കര, ചെന്നിത്തല പഞ്ചായത്തുകളിലും വ്യാപിപ്പിക്കുവാനാണ് സംഘടന ലക്ഷ്യം വയ്ക്കുന്നത്. തെക്കേക്കര ഗ്രാമപഞ്ചായത്ത് പ്രസിഡന്‍റ് ഷീബ സതീഷ് പദ്ധതി ഉദ്ഘാടനം ചെയ്തു. എകെപിഎ മാവേലിക്കര മേഖലാ പ്രസിഡന്‍റ് യു.ആര്‍. മനു അധ്യക്ഷത വഹിച്ചു. സുരേഷ് ചിത്രമാലിക, ഗിരീഷ് ഓറഞ്ച്, ശശിധരന്‍ ഗീത്, ഷൈജ തമ്പി, രാജന്‍ സുരഭി, അനീഷ് നിറക്കൂട്ട്, ബാബൂസ് പനച്ചമൂട് എം.എസ്. ജോണ്‍, ബിനുലാല്‍, മേഖലാ സെക്രട്ടറി ബിനു വൈഗ, മേഖലാ ഫോട്ടോഗ്രാഫി നേച്ചര്‍ ക്ലബ് കോ-ഓര്‍ഡിനേറ്റര്‍ സിബു നൊസ്റ്റാള്‍ജിയ എന്നിവര്‍ പ്രസംഗിച്ചു.

കായംകുളത്തും കുത്തിയതോടും കഞ്ചാവ് വേട്ട

തുറവൂർ: എൻഫീൽഡ് ബുള്ളറ്റിൽ കടത്തിക്കൊണ്ടുവന്ന 1.177 കിലോഗ്രാം കഞ്ചാവുമായി യുവാവിനെ കുത്തിയതോട് എക്സൈസ് ഇൻസ്പെക്ടർ പി.സി. ഗിരീഷിന്‍റെ നേതൃത്വത്തിലുള്ള സംഘം പിടികൂടി. അരൂക്കുറ്റി പഞ്ചായത്ത് വാർഡ് 12 നദുവത്ത് നഗർ വഞ്ചിപ്പുരയ്ക്കൽ വീട്ടിൽ നിധിൻ അമ്പാടി (28) ആണ് അറസ്റ്റിലായത്. ബുള്ളറ്റിൽ കഞ്ചാവുമായി വരവേ ഇയാളെ അരൂക്കുറ്റി കുറ്റിപ്പുറം ജംഗ്ഷന് പടിഞ്ഞാറു ഭാഗത്ത് എക്സൈസ് സംഘം കസ്റ്റഡിയിലെടുക്കുകയായിരുന്നു. ഇയാൾ മുൻപും മയക്കുമരുന്ന് കേസുകളിൽ പിടിക്കപ്പെട്ടിട്ടുള്ളതായി എക്സൈസ് അധികൃതർ പറഞ്ഞു. ചേർത്തല മജിസ്ട്രേറ്റ് കോടതി മുമ്പാകെ ഹാജരാക്കിയ പ്രതിയെ 14 ദിവസത്തേക്ക് റിമാൻഡ് ചെയ്തു. ഗ്രേഡ് അസി. എക്സൈസ് ഇൻസ്പെക്ടർ സബിനേഷ് ജിത്ത്, സിവിൽ ഓഫീസർമാരായ സാജൻ ജോസഫ്, യു. ഉമേഷ്, വി.കെ. വിപിൻ. വിഷ്ണുദാസ്, റോസമ്മ തോമസ് എന്നിവർ എക്സൈസ് സംഘത്തിൽ ഉണ്ടായിരുന്നു. കായംകുളം: നാലു കിലോ കഞ്ചാവുമായി ഇതര സംസ്ഥാന തൊഴിലാളി പിടിയിൽ. ആസാം സോണിപ്പുർ സ്വദേശി റിയായുൾ ഇസ്‌ലാമിനെ (27) ആണ് ജില്ലാ ലഹരിവിരുദ്ധ സ്ക്വാഡും കായംകുളം പോലീസും ചേർന്ന് പിടികുടിയത്. അന്യ -സംസ്ഥാനത്തുനിന്ന് കഞ്ചാവ് വിൽപ്പനയ്ക്കായി കൊണ്ടുവരുന്നുവെന്ന് രഹസ്യ വിവരം ലഭിച്ചതിനെത്തുടർന്ന് കെഎസ്ആർടിസി ബസ് സ്റ്റാൻഡ് പരിസരത്ത് നടത്തിയ പരിശോധനയിലാണ് ഇയാൾ പിടിയിലായത്. നിരവധി തവണ ഒഡീഷയിൽനിന്ന് കായംകുളം കേന്ദ്രമാക്കി കഞ്ചാവ് എത്തിച്ച് ഇയാൾ വിൽപ്പന നടത്തിവരികയായിരുന്നെന്ന് പോലീസ് പറഞ്ഞു. മുമ്പും നിരവധി തവണ ഇയാളെ കഞ്ചാവുമായി പോലീസ് പിടികുടിയിട്ടുണ്ട്. കേരളത്തിന്‍റെ അതിർത്തി വരെ സ്തീകളെക്കൊണ്ട് കഞ്ചാവ് എത്തിച്ച് അവിടെനിന്ന് ഇയാൾ നേരിട്ടുപോയി വാങ്ങി കായംകുളത്തേക്ക് കൊണ്ടുവന്ന് ചെറുപൊതികളാക്കി ഇതര സംസ്ഥാന തൊഴിലാളികൾക്കും നാട്ടുകാർക്കും വിൽപ്പന നടത്തുകയായിരുന്നെന്നും പോലീസ് പറഞ്ഞു. ഓപ്പറേഷൻ ഡി ഹണ്ടിന്‍റെ ഭാഗമായി നർക്കോട്ടിക് സെൽ ഡിവൈഎസ്പി ബി. പങ്കജാക്ഷന്‍റെ നേതൃത്വത്തിലുള്ള ജില്ലാ ലഹരിവിരുദ്ധ സ്ക്വാഡും കായംകുളം ഡിവൈഎസ്പി ബാബുക്കുട്ടന്‍റെ നേതൃത്വത്തിൽ കായംകുളം സിഐ അരുൺഷാ, എസ്ഐ രതീഷ് ബാബു, എഎസ്ഐ സജീവ്, സിവിൽ പോലീസ് ഓഫീസർമാരായ ശ്യാം, ഷിബു, റിയാസ് എന്നിവരാണ് പ്രതിയെ പിടികുടിയത്.

ഒരു പടികൂടി കടന്നു കാവാലം തട്ടാശേരി പാലം: 3.56 കോടിയുടെ അധിക അനുമതി

മങ്കൊമ്പ്: എസി റോഡിനെയും എംസി റോഡിനെയും ബന്ധിപ്പിക്കുന്ന ഹ്രസ്വപാത യാഥർഥ്യമാക്കുന്ന കാവാലം തട്ടാശേരി പാലം നിർമാണത്തിന് കിഫ്ബി 63.59 കോടി രൂപയുടെ സാമ്പത്തികാനുമതി നൽകി. നേരത്തെ 60.03 കോടി അനുവദിച്ചിരുന്നെങ്കിലും പിഡബ്ള്യുഡിയുടെ പുതുക്കിയ റേറ്റ് പ്രകാരം അധികത്തുകയുടെ അനുമതി ആവശ്യമാണെന്നത് ടെണ്ടർ നടപടികൾക്കു തടസമായിരുന്നു. ഇതേത്തുടർന്ന് 3.56 കോടി രൂപ അധികമായി ചേർത്തു പുതുക്കിയ എസ്റ്റിമേറ്റ് കേരളാ റോഡ് ഫണ്ട് ബോർഡ് കിഫ്ബിക്ക് സമർപ്പിച്ചിരുന്നു. ഇതിനാണ് കഴിഞ്ഞ ദിവസം അനുമതിയായത്. എന്നാൽ പാലത്തിനായി ഏറ്റെടുത്ത സ്ഥലത്തുള്ള മരങ്ങൾ മുറിച്ചുനീക്കുന്ന കാര്യത്തിൽ നടപടിയായിരുന്നില്ല. ഇതിനായി കെആർഎഫ്ബി മൂന്നു തവണ ക്വട്ടേഷൻ ക്ഷണിച്ചിരുന്നെങ്കിലും ആരും തയാറായിരുന്നില്ല. മുറിക്കേണ്ട മരങ്ങളധികവും പാഴ്മരങ്ങളായതിനാലാണ് ആരു താത്പര്യം പ്രകടിപ്പിക്കാതിരുന്നത്. വെട്ടുകൂലി ഇനത്തിൽ വലിയ സാമ്പത്തികച്ചെലവ് വരുമെന്നതും തടസമായി. തുടർന്ന് കാവാലം പാലം സമ്പാദക സമിതിയുടെ നേതൃത്വത്തിൽ പൊതുജനങ്ങളുടെ സഹകരണത്തോടെ മരങ്ങൾ വെട്ടിമാറ്റാൻ തീരുമാനിക്കുകയും ഇതിനായി ക്വട്ടേഷൻ സമർപ്പിച്ച് അനുമതിക്കായി കാത്തിരിക്കുകയുമാണ്. മരങ്ങൾ വെട്ടിമാറ്റാൻ ഒരു മാസം സമയമാകും അനുവദിക്കുക. ഇതിനൊപ്പം ടെൻഡർ നടപടികളും നടത്താനാണ് കെആർഎഫ് ബി അധികാരികളുടെ നീക്കം. അടിയന്തരമായി ടെണ്ടർ ക്ഷണിച്ച് പാലം നിർമാണത്തിലേക്ക് കടക്കുമെന്ന് തോമസ് കെ. തോമസ് എംഎൽഎ അറിയിച്ചു. നാട്ടുകാരുടെ നിരന്തരമായ സമരങ്ങളെത്തുടർന്ന് ഒന്നാം പിണറായി സർക്കാരിന്‍റെ 2016 ലെ ആദ്യ ഇടക്കാല ബജറ്റിൽ പാലത്തിനായി 30 കോടി രൂപ അനുവദിച്ചിരുന്നു. തുടർന്ന് ദേശീയ ജലപാത നിയമം മറികടക്കാൻ രൂപരേഖയിൽ മാറ്റം വരുത്തിയതോടെ ഇത് 52 കോടി രൂപയായി വർധിപ്പിച്ചു. പടഹാരം പാലത്തിന്‍റെ മാതൃകയിലാണ് തട്ടാശേരി പാലവും നിർമിക്കാൻ ലക്ഷ്യമിടുന്നത്. 400 മീറ്റർ നീളത്തിലും 8.5 മീറ്റർ വീതിയിലുമാണ് പാലം നിർമിക്കുക. ടവർ മാതൃകയിൽ 45 മീറ്ററിന്‍റെ നാല് സ്പാനുകളും ഇരുവശത്തും 35 മീറ്റർ നീളത്തിൽ രണ്ടു വീതം സ്പാനുകളുമാണ് വെള്ളത്തിൽ നിർമിക്കുന്നത്.

വേഴപ്ര-കൊടുപ്പുന്ന-തായങ്കരി റോഡ് നിര്‍മാണം അശാസ്ത്രീയമെന്ന്

എടത്വ: പൊതുമരാമത്ത് നിര്‍മിക്കുന്ന വേഴപ്ര-കൊടുപ്പുന്ന-തായങ്കരി റോഡിന്‍റെ അപാകതകള്‍ പരിഹരിക്കണമെന്നാവശ്യപ്പെട്ട് ജനകീയ കൂട്ടായ്മയുടെ നേതൃത്വത്തില്‍ പ്രതിഷേധ ധര്‍ണ നടത്തി. വേഴപ്ര സെന്‍റ് പോള്‍സ് പള്ളി വികാരി ഫാ. ജിജോ അവണ്ണൂര്‍ ഉദ്ഘാടനം ചെയ്തു. ആറു കോടി രൂപ അടങ്കല്‍ തുകയില്‍ നിര്‍മാണം ആരംഭിച്ച റോഡില്‍ പഴുതി പടനിലം മുതല്‍ വേഴപ്ര കുരിശടിവരെയുള്ള ഭാഗം ഉയര്‍ത്തിയെങ്കിലും റോഡിന് സംരക്ഷണഭിത്തിയില്ലാത്തതിനാൽ പാടശേഖത്തില്‍നിന്ന് ഓളമടിച്ച് ഒരു മീറ്ററോളം ഒലിച്ചു പോയി. സംരക്ഷണഭിത്തി നിര്‍മിക്കാതെ റോഡ് ഉയര്‍ത്തി നിര്‍മിക്കുന്നതുകൊണ്ട് പ്രയോജനമില്ലെന്ന് പൊതുമരാമത്ത് ഉദ്യോഗസ്ഥരെ ജനപ്രതിനിധികള്‍ അറിയിച്ചിട്ടും നിർദേശം പരിഗണിക്കാന്‍ പോലും ഉദ്യോഗസ്ഥര്‍ തയാറായില്ലെന്ന് ആക്ഷേപമുണ്ട്. ടൈറ്റാനിക് പാലം മുതല്‍ ചെയ്യേണ്ട റോഡ് കരാറുകാരുടെ ഇഷ്ടത്തിന് നിര്‍മിക്കാന്‍ ഉദ്യോഗസ്ഥര്‍ കൂട്ടുനില്‍ക്കുകയാണെന്നും നിര്‍മാണത്തിലെ അശാസ്ത്രീയത വിജിലന്‍സ് അന്വേഷിക്കണമെന്നും യോഗം ആവശ്യപ്പെട്ടു. വെളിയനാട് ബ്ലോക്ക് പഞ്ചായത്ത് മെംബര്‍ പ്രമോദ് ചന്ദ്രന്‍ അധ്യക്ഷത വഹിച്ചു. എടത്വ പഞ്ചായത്ത് മെംബര്‍ ദീപ ഗോപകുമാര്‍, മുന്‍ ബ്ലോക്ക് പഞ്ചായത്ത് പ്രസിഡന്‍റുമാരായ അഡ്വ. സുദര്‍ശനകുമാര്‍, പോളി തോമസ്, എം.വി തങ്കച്ചന്‍, ചാക്കോച്ചന്‍ നെല്ലുവേലി, പി.എന്‍. കൃഷ്ണന്‍പോറ്റി, സിബി മൂലംകുന്നം, ഭാസി ബി. പുല്ലാങ്കളം, കെ.ജെ. മാത്യു, നിഷാദ് മുണ്ടുവേലി, ജോസി ഡൊമനിക്, ജിയോമോന്‍, കനകമ്മ, റോസിലിന്‍ ജോസഫ് എന്നിവര്‍ നേതൃത്വം നല്‍കി.

അമ്മത്തൊട്ടിലിൽ പുതിയ അതിഥിയായി ‘തണൽ’

ആലപ്പുഴ: ആലപ്പുഴ വുമൺ ആൻഡ് ചൈൽഡ് ഹോസ്പിറ്റലിൽ സ്ഥാപിച്ചിട്ടുള്ള അമ്മത്തൊട്ടിലിന്‍റെ കരുതലിനായി ഒരു നവാഗതൻ കൂടിയെത്തി. വെള്ളി പകൽ 1.30 ന് 8 ദിവസം പ്രായം തോന്നിക്കുന്ന ആൺകുരുന്ന് സമിതിയുടെ പരിചരണാർഥം എത്തിയത്. ആലപ്പുഴ അമ്മത്തൊട്ടിലിൽ ഈ വർഷം ലഭിക്കുന്ന മൂന്നാമത്തെ കുഞ്ഞാണ്. 2025 ജനുവരിയിലും മേയിലുമായി രണ്ടു പെൺകുഞ്ഞുങ്ങളെ ലഭിച്ചിരുന്നു. കുഞ്ഞിന് തണൽ എന്ന പേര് നൽകിയതായി സംസ്ഥാന ശിശുക്ഷേമ സമിതി ജനറൽ സെക്രട്ടറി ജി.എൽ. അരുൺഗോപി പത്രക്കുറിപ്പിൽ അറിയിച്ചു. തിരുവനന്തപുരം അമ്മത്തൊട്ടിലിൽ ഈ വർഷം ആറു കുട്ടികളും ആലപ്പുഴയിൽ രണ്ടു കുട്ടികളും ഉൾപ്പെടെ എട്ട് കുഞ്ഞുങ്ങളാണ് സംസ്ഥാന ശിശുക്ഷേമസമിതിയുടെ പരിചരണയിൽ അമ്മത്തൊട്ടിലുകൾ മുഖേന എത്തിയത്. നിർഭാഗ്യവും അപമാനവുമെന്ന നിലയിൽനിന്ന് കുരുന്നു ജീവനുകൾ നശിപ്പിക്കപ്പെടുന്ന പ്രവണത മാറി സുരക്ഷിതമായി അമ്മത്തൊട്ടിലിന്‍റെ സംരക്ഷണാർഥം എത്തിക്കുന്നതെന്ന് പറയുന്നു. ഇവിടെ എത്തപ്പെടുന്ന ബാല്യങ്ങൾക്ക് മതിയായ പരിചരണം നൽകി സുതാര്യമായ ദത്തെടുക്കൽ നടപടിക്രമങ്ങളിലൂടെ ദത്ത് നൽകാൻ സമിതിക്ക് കഴിഞ്ഞുവെന്നും അദ്ദേഹം പറഞ്ഞു. കഴിഞ്ഞ 26 മാസത്തിനിടയിൽ സമിതി ഇപ്രകാരം 163 കുട്ടികളെയാണ് നിയമപരമായ മാർഗങ്ങളിലൂടെ ദത്ത് നൽകിയത്.

എസി റോഡിൽ വാഹനാപകടം: സൈക്കിൾ യാത്രികൻ മരിച്ചു

മങ്കൊമ്പ്: എസി റോഡിൽ കഴിഞ്ഞ ദിവസം നടന്ന വാഹനാപകടത്തിൽ പരിക്കേറ്റ സൈക്കിൾ യാത്രികൻ മരിച്ചു. ചമ്പക്കുളം പഞ്ചായത്ത് നെടുമുടി നരുമീൻകുന്ന് വീട്ടിൽ ജോസഫാണ് ( 57) മരിച്ചത്. വ്യാഴാഴ്ച രാത്രി ഒൻപതോടെ മങ്കൊമ്പ് തെക്കേക്കര ജംഗ്ഷനിലാണ് അപകടം നടന്നത്. ജംഗ്ഷനിൽ പ്രവർത്തിക്കുന്ന പച്ചക്കറിക്കടയിലെ ജീവനക്കാരനായിരുന്നു. ജോലി കഴിഞ്ഞു നെടുമുടിയിലെ വീട്ടിലേക്ക് മടങ്ങാൻ തുടങ്ങുന്നതിനിടെ കടയുടെ സമീപത്തു ചങ്ങനാശേരി ഭാഗത്തുനിന്നെത്തിയ കാർ ജോസഫ് സഞ്ചരിച്ചിരുന്ന സൈക്കിളിൽ ഇടിക്കുകയായിരുന്നു. ഗുരുതര പരിക്കേറ്റ ഇയാളെ ആലപ്പുഴ വണ്ടാനം മെഡിക്കൽ കോളജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംസ്‌കാരം ഇന്നു രാവിലെ 10.30ന് നെടുമുടി നസ്രത്ത് സെന്‍റ് ജെറോംസ് പള്ളിയിൽ. ഭാര്യ: റോസമ്മ. മക്കൾ: സോബിൻ, റോബിൻ.

കാറിടിച്ച് പരിക്കേറ്റ് ചികിത്സയിലായിരുന്ന ഓട്ടോ ഡ്രൈവര്‍ മരിച്ചു

അമ്പലപ്പുഴ: നിന്ത്രണംവിട്ട കാറിടിച്ച് പരിക്കേറ്റ് ചികിത്സയിലായിരുന്ന ഓട്ടോ ഡ്രൈവര്‍ മരിച്ചു. ആലപ്പുഴ പഴവീട് സുരേന്ദ്രപുരം വീട്ടിൽ അമൃതകുമാറാണ് (54) മരിച്ചത്. കഴിഞ്ഞ ഞായറാഴ്ച രാത്രി ഒൻപതോടെ ആലപ്പുഴ ജനറൽ ആശുപത്രിക്ക് സമീപമായിരുന്നു അപകടം. ഇടിയുടെ ആഘാതത്തിൽ ഓട്ടോറിക്ഷ നടപ്പാതയ്ക്കു മുകളിലെ കൈവരിയുടെ മുകളിലേക്ക് ഇടിച്ചുനിന്നു. തലയ്ക്ക് പരിക്കേറ്റ അമൃതകുമാറിനെ ആലപ്പുഴ മെഡിക്കൽ കോളജ് ആശുപത്രിയിലെ തീവ്രപരിചരണ വിഭാഗത്തിൽ പ്രവേശിപ്പിച്ചെങ്കിലും വെള്ളിയാഴ്ച രാവിലെ മരിച്ചു. സ്ത്രീകൾ ഓടിച്ചിരുന്ന കാറാണ് നിയന്ത്രണം വിട്ട് ഓട്ടോയിലിടിച്ചത്. ഭാര്യ: രജനി. മകള്‍: അശ്വനി.

ദേശീയപാതയിൽ നിർമാണത്തിലുള്ള ഓടയിൽ വീണ് സ്കൂട്ടർ യാത്രികന് ദാരുണാന്ത്യം

കായംകുളം: ദേശീയപാതയിൽ സർവീസ് റോഡിന് കുറുകെ നിര്‍മിച്ചുകൊണ്ടിരുന്ന ഓടയിൽ വീണ് സ്കൂട്ടർ യാത്രികനായ യുവാവിന് ദാരുണാന്ത്യം. കായംകുളം നിറയിൽ മുക്കിൽ വാടകയ്ക്ക് താമസിക്കുന്ന നൂറനാട് പാലമേൽ എരുമക്കുഴി ബാലൻപറമ്പിൽ മഹേഷിന്‍റെ മകൻ ആരോമൽ (23) ആണ് മരിച്ചത്. ദേശീയപാതയിൽ കെപിഎസി ജംഗ്ഷനും കല്ലുംമൂടിനും ഇടയിൽ കഴിഞ്ഞ ദിവസം രാത്രിയായിരുന്നു അപകടം. കായംകുളം പോലീസ് നടപടികൾ സ്വീകരിച്ചു. അമ്മ: ബിന്ദു.

സുരക്ഷാക്രമീകരണം വേണം: എംഎൽഎ കളക്ടർക്ക് കത്ത് നൽകി

കായംകുളം: ദേശീയപാത 66-ൽ സുരക്ഷാക്രമീകരണങ്ങൾ ഒരുക്കി അപകടങ്ങൾ ഒഴിവാക്കുന്നതിനും ദേശീയ പാതയുടെ ഇരുവശങ്ങളിലുമുള്ള പ്രദേശങ്ങളിലെ വെള്ളക്കെട്ടിന് പരിഹാരം കാണാനും അടിയന്തര നടപടി സ്വീകരിക്കണമെന്ന ആവശ്യവുമായി യു. പ്രതിഭ എംഎൽഎ ജില്ലാ കളക്ടർക്ക് കത്ത് നൽകി. ദേശീയപാത 66-ൽ അപകടങ്ങൾ ദിനംപ്രതി വർധിക്കുകയാണ്. കഴിഞ്ഞ ദിവസം കായംകുളം ദേശീയപാതയിൽ സർവീസ് റോഡിന് കുറുകെ നിർമിച്ചുകൊണ്ടിരിക്കുന്ന ഓടയിൽ സ്കൂട്ടർ മറിഞ്ഞ് 23 വയസുള്ള യുവാവ് ദാരുണമായി മരണപ്പെട്ടു. ദേശീയപാത വികസനം ഏറെ അനിവാര്യമാണെങ്കിലും ജനങ്ങളുടെ ജീവനും സ്വത്തും സംരക്ഷിക്കേണ്ടതായിട്ടുണ്ട്. ദേശീയപാതയുടെ വികസന പ്രവർത്തനങ്ങൾ ആരംഭിച്ചശേഷം ഒട്ടേറെ അപകടങ്ങളാണ് ഉണ്ടായിട്ടുള്ളത്. നിരവധി യാത്രികരുടെ ജീവനുകളാണ് പൊലിഞ്ഞിട്ടുള്ളത്. നിർമാണ പ്രവർത്തനങ്ങൾ നടക്കുന്ന ദേശീയപാതയിൽ യാതൊരുവിധ അപകട സൂചക ബോർഡുകളും സ്ഥാപിച്ചിട്ടില്ല. ദേശീയപാതയുടെ വശങ്ങളിലുള്ള വൈദ്യുത പോസ്റ്റുകൾ നിർമാണവുമായി ബന്ധപ്പെട്ട് നീക്കം ചെയ്തതിനാൽ രാത്രികാലങ്ങളിൽ വലിയ ഇരുട്ടാണ്. റോഡിൽ രൂപപ്പെട്ടിട്ടുള്ള വലിയ കുഴികളും വെള്ളക്കെട്ടും അപകടങ്ങൾ വർധിപ്പിക്കുന്നതിന് കാരണമാകുന്നു. ഓടകളുടെ നിർമാണം പൂർത്തീകരിക്കാത്തതിനാൽ ദേശീയപാതയുടെ ഇരുവശങ്ങളിലും ഉള്ള പ്രദേശങ്ങൾ മഴക്കാലത്ത് വലിയ വെള്ളക്കെട്ടിലാണ്. ഓടകളുടെ നിർമാണം അതിവേഗം പൂർത്തീകരിക്കണം. ഇനിയും ഒരു ജീവൻ ദേശീയപാത 66-ൽ പൊലിയാതിരിക്കുവാൻ റോഡ് സേഫ്റ്റി അഥോറിറ്റിയും ദേശീയപാത അഥോറിറ്റിയും ജില്ലാ ഭരണകൂടവും റോഡ് സുരക്ഷ ഉറപ്പാക്കുന്നതിനുള്ള നടപടികൾ സ്വീകരിക്കണമെന്നും എംഎൽഎ കത്തിൽ ആവശ്യപ്പെട്ടു.

ദേശീയപാതയിൽ മരണക്കെണികളിൽ വീണ് ജീവനുകൾ പൊലിയുന്നു

കായംകുളം: ദേശീയപാത വികസനത്തിന്‍റെ ഭാഗമായി കായംകുളം കൃഷ്ണപുരം മുതൽ കരുവാറ്റ വരെ പലയിടത്തും നിർമാണ പ്രവർത്തനങ്ങൾ നടക്കുന്ന മേഖലകൾ മരണക്കെണികളാവുകയാണ്. ദേശീയപാത 66ൽ നിർമാണം നടക്കുന്ന മിക്കയിടത്തും മുന്നറിയിപ്പു ബോർഡുകളോ വഴിവിളക്കുകളോ ഇല്ല. കായംകുളം കെപിഎസി ജംഗ്ഷന് സമീപം സർവീസ് റോഡിന് കുറുകെ നിര്‍മിച്ചുകൊണ്ടിരുന്ന ഓടയിൽ വീണാണ് സ്കൂട്ടർ യാത്രികനായ യുവാവിന് കഴിഞ്ഞ ദിവസം ദാരുണാന്ത്യം സംഭവിച്ചത്. കായംകുളം നിറയിൽ മുക്കിൽ വാടകയ്ക്ക് താമസിക്കുന്ന നൂറനാട് പാലമേൽ എരുമക്കുഴി ബാലൻപറമ്പിൽ മഹേഷിന്‍റെ മകൻ ആരോമൽ (23) ആണ് മരിച്ചത്. ഇവിടെ മുന്നറിയിപ്പു ബോർഡുകളോ വഴിവിളക്കുകളോ ഇല്ല. ഇതു സംബന്ധിച്ച് ദേശീയപാത അഥോറിറ്റിക്കും കരാറുകാർക്കും നാട്ടുകാർ പരാതിപ്പെട്ടെങ്കിലും മാറ്റമുണ്ടായില്ല. നിർമാണം നടക്കുന്ന ഇടങ്ങളിൽ മുന്നറിയിപ്പ് ഫലപ്രദമായി ലഭിക്കുന്ന സൂചനാ ബോർഡുകൾ വയ്ക്കണമെന്നു നിർദേശമുണ്ട്. അപകടമേഖലകളിൽ ചുവന്ന ലൈറ്റ് ഘടിപ്പിക്കേണ്ടതുമുണ്ട്. എന്നാൽ മിക്കയിടങ്ങളിലും ഇതൊന്നും പാലിക്കുന്നില്ലെന്നതു വലിയ ദുരന്തങ്ങൾക്കു കാരണമാവുകയാണ്. കഴിഞ്ഞ രണ്ടു മാസത്തിനിടെ കരുവാറ്റയിൽ നിർമാണത്തിലിരിക്കുന്ന ദേശീയ പാതയിലുണ്ടായ വാഹനാപകടങ്ങളിൽ നിരവധി ജീവനുകൾ പൊലിഞ്ഞു. കായംകുളം എംഎസ്എം കോളജിന് സമീപം മുമ്പ് കാർ മറിഞ്ഞ് അപകടം ഉണ്ടായിട്ടുണ്ട്. പുത്തൻ റോഡ് ജംഗ്ഷനിൽ പിക്കപ്പ് വാൻ നിർമാണത്തിലിരിക്കുന്ന അടിപ്പാതയിൽ ഇടിച്ചുകയറിയ സംഭവവും ഉണ്ടായിട്ടുണ്ട്. ശക്തമായ മഴയിൽ ദേശീയപാതയുടെ പലയിടങ്ങളിലും നിർമാണ സ്ഥലങ്ങളിൽ വെള്ളക്കെട്ടുമുണ്ട്. കായംകുളം ദേശീയ പാതയിൽ ഓച്ചിറ മുതൽ രാമപുരംവരെ എട്ട് അടിപ്പാതകളാണ് നിർമിക്കുന്നത്. കായംകുളത്ത് ഉയരപ്പാത നിർമിക്കണമെന്ന ആവശ്യമായി ജനങ്ങൾ ശക്തമായ പ്രക്ഷോഭ പരിപാടികളുമായി രംഗത്ത് വന്നെങ്കിലും ദേശീയപാത അഥോറിറ്റി ആവശ്യം പരിഗണിച്ചില്ല.

എംഎല്‍എയുടെ മകനുള്‍പ്പെടെയുള്ളവരെ ഒഴിവാക്കി കഞ്ചാവ് കേസില്‍ കുറ്റപത്രം

ആലപ്പുഴ: കഞ്ചാവ് കേസില്‍ യു. പ്രതിഭ എംഎല്‍എയുടെ മകനുള്‍പ്പെടെ ഏഴു പേരെ ഒഴിവാക്കി എക്‌സൈസ് നര്‍കോട്ടിക് സ്പെഷല്‍ സ്‌ക്വാഡ് കുറ്റപത്രം സമര്‍പ്പിച്ചു. അമ്പലപ്പുഴ കോടതിയിലാണ് റിപ്പോര്‍ട്ട് സമര്‍പ്പിച്ചത്. ഇതോടെ കേസില്‍ രണ്ടു പ്രതികള്‍ മാത്രമായി. എംഎല്‍എയുടെ മകന്‍ കനിവിനെ അടക്കം പ്രതിയാക്കി എഫ്‌ഐആര്‍ ഇട്ട കേസിലാണ് മാറ്റം. തെളിവുകളുടെ അഭാവത്തില്‍ ഏഴുപേരെ പ്രതിപ്പട്ടികയില്‍നിന്ന് ഒഴിവാക്കിയതായി നേരത്തെ എക്‌സൈസ് ഇടക്കാല റിപ്പോര്‍ട്ട് സമര്‍പ്പിച്ചിരുന്നു. ഡിസംബര്‍ 28നാണ് കേസിനാസ്പദമായ സംഭവം. മൂന്നു ഗ്രാം കഞ്ചാവുമായി കനിവുള്‍പ്പെടെ ഒൻപതു പേരെ എക്‌സൈസ് സംഘം പിടികൂടുകയായിരുന്നു. ഒമ്പതാം പ്രതിയായിരുന്നു കനിവ്. ഒന്നാം പ്രതിയില്‍നിന്ന് കഞ്ചാവും രണ്ടാം പ്രതിയില്‍നിന്ന് കഞ്ചാവ് ഉപയോഗിക്കുന്ന ഉപകരണവും കണ്ടെത്തി. മറ്റുള്ളവര്‍ കഞ്ചാവ് ഉപയോഗിച്ചെന്നായിരുന്നു മഹസറിലുണ്ടായിരുന്നു. പിന്നീട് പ്രതികളെ ജാമ്യത്തില്‍ വിട്ടു. കുട്ടനാട് എക്‌സൈസാണ് കേസ് റജിസ്റ്റര്‍ ചെയ്തത്. ഇതിനു പിന്നാലെയാണ് മകനെതിരേ കേസെടുത്തില്ലെന്ന് പറഞ്ഞ് യു.പ്രതിഭ എംഎല്‍എ രംഗത്തെത്തിയത്. സംഭവം വിവാദമായതോടെ എക്‌സൈസ് നര്‍കോട്ടിക് സ്‌പെഷല്‍ സ്‌ക്വാഡ് അന്വേഷണം ഏറ്റെടുക്കുകയായിരുന്നു. എന്നാല്‍, വൈദ്യ പരിശോധന നടത്താത്തതിനാല്‍ പ്രതികള്‍ കഞ്ചാവ് ഉപയോഗിച്ചെന്ന് തെളിയിക്കാനായില്ല. കഞ്ചാവ് ഉപയോഗിക്കുന്നത് കണ്ടെന്ന് എക്‌സൈസ് ഉദ്യോഗസ്ഥര്‍ മൊഴി നല്‍കിയിട്ടുമില്ല. മറ്റു സാക്ഷികളും ഇല്ലാത്ത സാഹചര്യത്തിലാണ് ഏഴു പേരെ ഒഴിവാക്കി കുറ്റപത്രം സമര്‍പ്പിച്ചത്.

തായങ്കരി സെന്‍റ് ആന്‍റണീസ് പള്ളിയിൽ തിരുനാളിന് ഇന്നു കൊടിയേറും

എടത്വ: തായങ്കരി സെന്‍റ് ആന്‍റണീസ് പള്ളിയിൽ അദ്ഭുത പ്രവര്‍ത്തകനായ വിശുദ്ധ അന്തോനീസിന്‍റെ തിരുനാള്‍ ഇന്നു മുതല്‍ 15 വരെ നടക്കും. ഇന്ന് വൈകുന്നേരം 4.45ന് നടക്കുന്ന കൊടിയേറ്റിന് വികാരി ഫാ. ലിജോ കുഴിപ്പള്ളില്‍ മുഖ്യകാര്‍മികത്വം വഹിക്കും. തുടര്‍ന്ന് നടക്കുന്ന മധ്യസ്ഥപ്രാര്‍ഥന, കുര്‍ബാന, സന്ദേശം ഫാ. ജോര്‍ജ് തൈച്ചേരില്‍ കാര്‍മികത്വം വഹിക്കും. 14 വരെ എല്ലാ ദിവസവും വൈകുന്നേരം 4.30ന് ജപമാല, 4.45ന് മദ്ധ്യസ്ഥപ്രാര്‍ഥന, കുര്‍ബാന, സന്ദേശം തുടര്‍ന്ന് വാര്‍ഡുകളുടെ നേതൃത്വത്തില്‍ നേര്‍ച്ച വിതരണവും നടക്കും. ഞായറാഴ്ച രാവിലെ 9.45 ന് നടക്കുന്ന കുര്‍ബാനയ്ക്ക് ശേഷം മതാധ്യായന വര്‍ഷ ഉദ്ഘാടനവും പെന്തക്കുസ്താ ദിനവും ആചരിക്കും. കുട്ടികളെ എഴുത്തിന് ഇരുത്തും. 13ന് വൈകുന്നേരം 4.30ന് പ്രസുദേന്തി വാഴ്ച. 14ന് വൈകുന്നേരം 4.45ന് നടക്കുന്ന കുര്‍ബാനയ്ക്കുശേഷം വിശുദ്ധ അന്തോനീസിന്‍റെ കുരിശടിയിലേക്ക് പ്രദക്ഷിണവും നടക്കും. 15ന് തിരുനാള്‍ ദിനത്തില്‍ രാവിലെ 9.30ന് ജപമാല, 10.20ന് മധ്യസ്ഥ പ്രാര്‍ഥന, വിശുദ്ധ കുര്‍ബാന, സന്ദേശം. ഫാ. ജോസഫ് വേളങ്ങാട്ടുശേരി കാര്‍മികത്വം വഹിക്കും. തുടര്‍ന്ന് പള്ളിക്ക് ചുറ്റും പ്രദക്ഷിണം, കൊടിയിറക്ക്.

ചെങ്ങന്നൂർ നഗരസഭയ്ക്ക് നികുതി പിരിവിൽ റെക്കോർഡ് നേട്ടം

ചെങ്ങന്നൂർ: കെട്ടിടനികുതി പിരിവിൽ സർവകാല റെക്കോർഡ് നേടി ചെങ്ങന്നൂർ നഗരസഭ. മുൻ വർഷത്തേക്കാൾ മൂന്നു കോടിയിലധികം രൂപയുടെ അധികനികുതി ശേഖരണം നടത്തിയാണ് നഗരസഭ ഈ ചരിത്രനേട്ടം കൈവരിച്ചത്. 5,34,86,644 രൂപയാണ് ഇത്തവണ കെട്ടിടനികുതിയായി നഗരസഭയ്ക്ക് ലഭിച്ചത്. കഴിഞ്ഞ സാമ്പത്തിക വർഷം ഇത് 2,56,32,341 രൂപയായിരുന്നു. ഏഴു വാർഡുകളിൽ കെട്ടിടനികുതി ശേഖരണം നൂറുശതമാനം പൂർത്തിയാക്കി. ഇതിന്‍റെ ഭാഗമായി, നഗരസഭാ കൗൺസിലിന്‍റെയും സ്റ്റാഫ് കൗൺസിലിന്‍റെയും നേതൃത്വത്തിൽ സെക്രട്ടറി, റവന്യു വിഭാഗം ഉദ്യോഗസ്ഥർ, വാർഡ് കൗൺസിലർമാർ എന്നിവരെ ആദരിച്ചു. സെക്രട്ടറി ടി.വി. പ്രദീപ് കുമാർ, റവന്യു സൂപ്രണ്ട്: എസ്. ഗിരീഷ് കുമാർ, റവന്യു ഇൻസ്‌പെക്ടർ ആർ.എസ്. ശാന്തി, ക്ലർക്കുമാരായ രശ്മി ഭാസ്‌കരൻ, ടി. ഷിബു, അശ്വതി ധരൻ, ടി. വിപിൻ ദാസ്, ജോൺസിമോൾ തുടങ്ങിയവരെയാണ് ആദരിച്ചത്. ഒന്ന്, ഇരുപത് വാർഡുകളിൽ നൂറുശതമാനം പൂർത്തീകരണത്തിലേക്ക് എത്തുകയാണ്. നഗരസഭാ ചെയർപേഴ്സൺ അഡ്വ. ശോഭാ വർഗീസ് സമ്മേളനം ഉദ്ഘാടനം ചെയ്യുകയും ആദരിക്കൽ ചടങ്ങ് നിർവഹിക്കുകയും ചെയ്തു. വൈസ് ചെയർമാൻ കെ. ഷിബുരാജൻ അധ്യക്ഷനായി.

ലഹരിക്കെതിരേ പോരാടുന്ന ഭരണാധികാരികൾ മദ്യത്തെക്കുറിച്ച് മിണ്ടുന്നില്ല: വി.എം. സുധീരൻ

കറ്റാനം: നാടിനെ ലഹരിമുക്തമാക്കാൻ പോരാടുന്ന സർക്കാരും ഭരണാധികാരികളും മദ്യത്തെക്കുറിച്ച് ഒന്നും മിണ്ടാത്തത് ദുഃഖകരമാണെന്ന് മുതിർന്ന രാഷ്ട്രീയ നേതാവ് വി.എം. സുധീരൻ. കറ്റാനത്ത് ഡോ. ജോഷ്വാ മാർ ഇഗ്നാത്തിയോസ് ഫൗണ്ടേഷന്‍റെ പ്രഥമ പുരസ് കാരം ഏറ്റുവാങ്ങി സംസാരിക്കുകയായിരുന്നു അദ്ദേഹം. മദ്യം-മയക്കുമരുന്ന് ഉൾപ്പെടുന്ന ലഹരിക്കെതിരേ ജോഷ്വാ തിരുമേനി നടത്തിവരുന്ന പ്രവർത്തനങ്ങൾ ഇന്നു കൂടുതൽ പ്രസക്തമാവുകയാണ്. സമൂഹനന്മയ്ക്കുവേണ്ടി തലമുറകളെയും നാടിനെയും രക്ഷിക്കാൻ കേരളം ഒരു സാമൂഹ്യദുരന്തത്തിലേക്കു പോകുന്ന ദുരവസ്ഥയിൽനിന്നു രക്ഷിക്കാൻ തിരുമേനിയെപ്പോലുള്ളവർ നടത്തുന്ന പ്രവർത്തനങ്ങൾ കൂടുതൽ കരുത്തോടെ മുന്നോട്ടുപോകണം.വിദ്യാർഥികൾ ഏതുതലത്തിൽ എത്തിയാലും സത്യം കൈവിടാതെ ജനക്ഷേമത്തിനും നാടിന്‍റെ നന്മയ്ക്കുവേണ്ടിയും വേണം പ്രവർത്തിക്കാൻ. വർഗീയവിധ്വംസക താത്പര്യങ്ങൾ ഉയർത്തിപ്പിടിക്കുന്ന ശക്തികളുടെ കെണിയിൽ വീഴാതിരിക്കാൻ വിദ്യാർഥികൾ ഉൾപ്പെടുന്ന പുതുതലമുറ ജാഗ്രത പുലർത്തണമെന്നും സുധീരൻ പറഞ്ഞു.

ജോഷ്വാ തിരുമേനി സാമൂഹ്യനന്മയുടെ പ്രതീകം: കർണാടക മന്ത്രി കെ.ജെ. ജോർജ്

കറ്റാനം: സമൂഹത്തിൽ നല്ല കാര്യങ്ങൾ ചെയ്യുന്നവർ എന്നും അംഗീകരിക്കപ്പെടുകയും ആദരിക്കപ്പെടുകയും ചെയ്യുമെന്നും ജോഷ്വാ മാർ ഇഗ്നാത്തിയോസ് തിരുമേനി സാമൂഹ്യനന്മയുടെ പ്രതീകമാണന്നും കർണാടക ഊർജമന്ത്രി കെ.ജെ. ജോർജ് പറഞ്ഞു. ഡോ. ജോഷ്വാ മാർ ഇഗ്നാത്തിയോസിന് നൽ കിയ സ്നേഹാദരവ് സമ്മേളനം കറ്റാനം പോപ്പ് പയസ് സ്കൂളിൽ ഉദ്ഘാടനം ചെയ്യുകയായിരുന്നു അദ്ദേഹം. സാമൂഹ്യനന്മ മുൻനിർത്തിയുള്ള ജോഷ്വാ തിരുമേനിയുടെ പ്രവർത്തനം സമൂഹത്തിനാകെ മാതൃക പകരുന്നതാണ്. മാനവ സാഹോദര്യം കൊണ്ട് സമ്പന്നമായ നമ്മുടെ രാജ്യത്ത് പുതുതലമുറ മാനവീക മൂല്യങ്ങൾ ഉയർത്തിപ്പിടിക്കണമെന്നും മന്ത്രി കെ.ജെ. ജോർജ് പറഞ്ഞു. ജോഷ്വാ മാർ ഇഗ്നാത്തിയോസ് ഫൗണ്ടേഷൻ ഏർപ്പെടുത്തിയ പ്രഥമ പുരസ്കാരം മുതിർന്ന രാഷ്ട്രീയ നേതാവ് വി. എം. സുധീരന് അദ്ദേഹം സമ്മാനിച്ചു. സി.ടി. വർഗീസ് തയാറാക്കിയ സൂര്യതേജസോടെ ജോഷ്വാ മാർ ഇഗ്നാത്തിയോസ് എന്ന പുസ്തകത്തിന്‍റെ പ്രകാശനവും നടന്നു. എംഎസ്‌സി സ്കൂൾ കറസ്പോണ്ടന്‍റ് ഫാ. ഡാനിയേൽ തെക്കേടത്ത് അധ്യക്ഷത വഹിച്ചു. ജോൺസൺ ഏബ്രഹാം, എൻ.എം. നസീർ വാർഡ് മെമ്പർ മാത്യു ഫിലിപ്പ്, പ്രിൻസിപ്പൽ ടി. മോഹൻ, ഹെഡ്മാസ്റ്റർ ടി.കെ. സാബു, പിടിഎ പ്രസിഡന്‍റ് വർഗീസ് മത്തായി, ജനറൽ കൺവീനർ സി.റ്റി. വർഗീസ്, ഫാ. സിൽവസ്റ്റർ തെക്കേടത്ത്, സെലിൻ സ്കറിയ എന്നിവർ പ്രസംഗിച്ചു.

കണ്ണടച്ചു തുറക്കും മുൻപേ ടാറിംഗ് ഇളകി

ചാരുംമൂട്: ടാറിംഗ് നടത്തി ഒരുമാസം തികയും മുമ്പേ പാലമേൽ പഞ്ചായത്തിലെ മാവിളപ്പടി-ആശാൻകലുങ്ക് റോഡിലെ ടാറിംഗ് ഇളകി. നാട്ടുകാർ പ്രതിഷേധവുമായി രംഗത്ത് എത്തി. മഴയിൽ റോഡിന്‍റെ പല ഭാഗങ്ങളും തകർന്നു. മഴപെയ്തതോടെ റോഡിൽക്കൂടി ഇപ്പോൾ യാത്ര ചെയ്യാൻ പറ്റാതായി. ഇളകിക്കിടക്കുന്ന മെറ്റലുകളിൽ കയറി ഇരുചക്രവാഹന യാത്രക്കാർ അപകട ത്തിൽപ്പെടാനും തുടങ്ങി. നൂറനാട്-പന്തളം റോഡും മാവിളപ്പടി റോഡുമായി ബന്ധിപ്പിക്കുന്ന ഭാഗത്ത് പണി നടത്താനുണ്ട്. ഏഴു ചപ്പാത്തുകളുടെ കോൺക്രീറ്റും നടത്തിയിട്ടില്ല. മഴയിൽ ടാറിംഗ് നടത്തിയതിനെതിരേ നാട്ടുകാർ മുമ്പ് പ്രതിഷേധവുമായി എത്തിയിരുന്നു.ഇതേത്തുടർന്ന് പിഎംജിഎസ്‌വൈ ഉദ്യോഗസ്ഥരെത്തിയശേഷമാണ് പണി പുനരാരംഭിച്ചത്. മഴയെത്തുടർന്ന് മരങ്ങളിൽനിന്നു ശക്തമായി വെള്ളം വീണ ഭാഗങ്ങളിലാണ് ടാറിംഗ് ഇളകിപ്പോ യിട്ടുള്ളതെന്നും കേന്ദ്രസർക്കാർ പദ്ധതിയായതിനാൽ ടാറിംഗിന്‍റെ വിവിധ ഘട്ടങ്ങളിൽ പരിശോധന നടത്തിയിട്ടുണ്ടെന്നും ഏഴുചപ്പാത്തുകളും മാവിളപ്പടി ഭാഗത്തെ റോഡും കോൺക്രീറ്റ് ചെയ്യുമെന്നും പിഎംജിഎസ്‌വൈ അസി. എൻജിനിയർ ദീപ പറഞ്ഞു. പ്രധാനമന്ത്രി ഗ്രാമ സഡക് യോജന (പിഎംജിഎസ്‌വൈ) പദ്ധതിയിലാണ് റോഡ് നിർമിച്ചത്. പണി തുടങ്ങിയിട്ട് ഒന്നരവർഷത്തിലേറെയായി. മാവിളപ്പടി മുതൽ പയ്യനല്ലൂർ മായയക്ഷിക്കാവ് വരെയുമുള്ള ആറു കിലോമീറ്റർ വരെ റോഡിന്‍റെ നവീകരത്തിനായി 4.80 കോടി രൂപയാണ് അനുവദിച്ചിട്ടുള്ളത്. നൂറനാട്-പന്തളം റോഡിലെ മാവിളപ്പടി മുതൽ കായംകുളം-പുനലൂർ റോഡിലെ ആശാൻകലുങ്ക് വരെയുള്ള മൂന്നു കിലോമീറ്റർ ദൂരത്തിലു ള്ള ആദ്യ റിച്ചിലാണ് പണി ഏതാണ്ട് പൂർത്തിയായിട്ടുള്ളത്. കായംകുളം-പുനലൂർ റോഡിലെ മാമ്മൂട് മുതൽ പഴ കുളം-ആനയടി റോഡിലെ പയ്യനല്ലൂർ മായയക്ഷിക്കാവ് വരെയുമുള്ള മൂന്നു കിലോമീറ്റർ ഭാഗത്തെ രണ്ടാമത്തെ റീച്ചിലും പണി നടക്കുന്നുണ്ട്. മഴ കഴിഞ്ഞാൽ ഇവിടത്തെ ടാറിംഗ് നടത്തുമെന്നാണ് ഉദ്യോഗസ്ഥർ പറയുന്നത്. കായംകുളം-പുനലൂർ റോഡിനെ എംസി റോഡുമായി ബന്ധിപ്പിക്കുന്ന റോഡാണിത്. കെപി റോഡിൽനിന്നും ശബരിമല പാതയായും ഈ റോഡ് ഉപയോഗിക്കുന്നു. കൃഷിമന്ത്രി പി. പ്രസാദിന്‍റെ വീടിനോടു ചേർന്നും റാന്നി എംഎൽഎ പി.എൻ. പ്രമോദ് നാരായണന്‍റെ വീടിനു സമീപത്തു കൂടിയുമാണ് റോഡ് കടന്നുപോകുന്നത്. റോഡ് റീടാർ ചെയ്തിട്ട് പത്തുവർഷത്തിലേറെയായിരുന്നു. റോഡിന്‍റെ ശോച്യാവസ്ഥ കാരണം അഞ്ചു ബസുകൾ സർവീസ് നിർത്തി. നാട്ടുകാരു ടെ നിരന്തരമായ പരാതിയെത്തുടർ ന്നാണ് സുരേഷ്‌ എംപി ഇടപെട്ട് പിഎംജിഎസ്‌വൈ പദ്ധതിയിൽ റോഡു പണിയാൻ തുക അനുവദിച്ചത്.

രണ്ടരപ്പതിറ്റാണ്ടിന്‍റെ സ്വപ്നം പ ൂവണിഞ്ഞു; ഗുമസ്തനിൽനിന്ന് വക്കീലിലേക്ക് സുരേഷ്

അമ്പലപ്പുഴ: രണ്ടരപ്പതിറ്റാണ്ടായി മനസിൽ കൊണ്ടുനടന്ന സ്വപ്നം പൂവണിഞ്ഞു. ഗുമസ്തക്കുപ്പായത്തിൽനിന്ന് സുരേഷ് വക്കീൽക്കുപ്പായമണിഞ്ഞ് കോടതിയിലെത്തി. നീണ്ട 25 വർഷം അമ്പലപ്പുഴ ജുഡീഷ്യൽ ഒന്നാംക്ലാസ് മജിസ്ട്രേറ്റ് കോടതിയിൽ അഡ്വക്കറ്റ് ക്ലാർക്കായി ജോലി ചെയ്തിരുന്ന അമ്പലപ്പുഴ കട്ടക്കുഴി വണ്ടകം വീട്ടിൽ ജി. സുരേഷാണ് വ്യാഴാഴ്ച മുതൽ വക്കീൽക്കുപ്പായമണിഞ്ഞ് കോടതിയിലെത്തിയത്. ജൂൺ ഒന്നിന് കേരള ബാർ കൗൺസിൽ നടത്തിയ എൻറോൾമെന്‍റ് ചടങ്ങിലാണ് ജി. സുരേഷ് അഭിഭാഷകനായി സന്നത് എടുത്തത്. ആലപ്പുഴ-അമ്പലപ്പുഴ കോടതികളുടെ ചരിത്രത്തിൽ ആദ്യമായാണ് ഒരു അഡ്വക്കറ്റ് ക്ലാർക്ക് നിയമപഠനം പൂർത്തിയാക്കി അഭിഭാഷകനായി കോടതിയിലെ ത്തുന്നത്. ആലപ്പുഴ എസ്ഡി കോളജിൽനിന്നു 1986-1989ൽ ബിരുദപഠനം പൂർത്തിയാക്കിയ സുരേഷ് 10 വർഷം സ്വകാര്യ ട്യൂഷൻ സെന്‍ററിലെ അധ്യാപകനായി ജോലി നോക്കിയിരുന്നു. ആലപ്പുഴയിലെ പ്രമുഖ അഭിഭാഷകനായ അഡ്വ. ജി. രാമകൃഷ്ണന്‍റെ കൂടെ ക്ലാർക്കായി പ്രവർത്തനം തുടങ്ങി. പിന്നീട് അമ്പലപ്പുഴയിൽ 25 വർഷം ക്ലാർക്കായി സേവനം അനുഷ്‌ഠിച്ചു. അഡ്വക്കറ്റ് ക്ലാർക്ക് അസോസിയേഷന്‍റെ അമ്പലപ്പുഴ യൂണിറ്റിന്‍റ് പ്രസിഡന്‍റായും പ്രവർത്തിച്ചിട്ടുണ്ട്. അഡ്വക്കേറ്റ് ക്ലർക്കായി ജോലി ചെയ്ത കാലം മുതലുള്ള ആഗ്രഹമായിരുന്നു അഭിഭാഷകനാകണമെന്നത്. പല കാരണം കൊണ്ട് നടക്കാതിരുന്ന ഈ ആഗ്രഹമാണ് ഇപ്പോൾ പൂവണിഞ്ഞതെന്ന് സുരേഷ് പറയുന്നു. പുതിയ വേഷത്തിലെത്തിയ ജി. സുരേഷിനെ അമ്പലപ്പുഴ ബാർ അസോസിയേഷന്‍റെ നേതൃത്വത്തിൽ ആദരിച്ചു. കോടതി വളപ്പിൽ നടന്ന ചടങ്ങിൽ എച്ച്. സലാം എംഎൽഎ അനുമോദനം നിർവഹിച്ചു. അഡ്വ. ശ്രീലത ഹരി അധ്യക്ഷത വഹിച്ചു. മജിസ്ട്രേറ്റ് ഐശ്വര്യ ആൻ ജേക്കബ് ഉപഹാരങ്ങൾ നൽകി. അസി. പബ്ലിക് പ്രോസിക്യൂട്ടർ പ്രസൂൺ ബെന്നി, ബ്ലോക്ക് പഞ്ചായത്ത് പ്രസിഡന്‍റ് അഡ്വ. ഷീബാ രാകേഷ്, അഭിഭാഷകരായ അഹമ്മദ് അമ്പലപ്പുഴ, എ.ടി. പ്രദീപ്, സന്ധ്യ, ജെ. ഷെർലി, ആർ. രജിത എന്നിവർ പ്രസംഗിച്ചു.

ജില്ലാക്കോടതി പാലം: കച്ചവടക്കാരെ ഒഴിപ്പിക്കാൻ നോട്ടീസ്

ആലപ്പുഴ: ജില്ലാക്കോടതി പാലം പുനർനിർമാണത്തിന് ഭാഗമായി സ്ഥലം ഏറ്റെടുക്കുന്നതുമായി ബന്ധപ്പെട്ട് ഹൈക്കോടതിയിലുണ്ടായിരുന്ന കേസ് തീർപ്പായതോടെ വിധി നടപ്പാക്കി കച്ചവടക്കാരെ ഉടൻ ഒഴിപ്പിക്കണമെന്നാവശ്യപ്പെട്ട് പൊതുമരാമത്ത് വിഭാഗം നഗരസഭയ്ക്ക് കത്ത് നൽകി. നഷ്ടപരിഹാരത്തുക വർധിപ്പിക്കണമെന്നും പുനരധിവസിപ്പിക്കണമെന്നും ആവശ്യപ്പെട്ട് 25 കച്ചവടക്കാർ ആറുമാസം മുൻപ് നൽകിയ പരാതിയിൽ കഴിഞ്ഞമാസം 29ന് ആണ് ഹൈക്കോടതി വിധി പുറപ്പെടുവിച്ചത്. കച്ചവടക്കാർക്ക് നഷ്ടപരിഹാരമായി 50,000 രൂപ കിഫ്ബി നേരത്തെ കോടതിയിൽ കെട്ടിവച്ചിരുന്നു. കൂടാതെ രണ്ടു ലക്ഷം രൂപ വരെ കച്ചവടക്കാർക്ക് അവകാശപ്പെടാം എന്നു കോടതി പരാമർശിച്ചിട്ടുണ്ട്. അതിനായി റവന്യു സെക്രട്ടറിക്ക് അപേക്ഷ നൽകണം. മൂന്നാഴ്ചയ്ക്കുള്ളിൽ അപേക്ഷ നൽകണമെന്നും മൂന്നു മാസത്തിനുള്ളിൽ സർക്കാർ തീരുമാനം എടുക്കണമെന്നുമാണു വിധി. നിർമാണത്തിന്‍റെ പ്രാധാന്യവും ഗൗരവവും കണക്കിലെടുത്ത് ഒഴിപ്പിക്കലും പുനരധിവാസവും അടിയന്തരമായി പൂർത്തിയാക്കണമെന്നും കോടതി നിർദേശിച്ചിട്ടുണ്ട്.

നാടെങ്ങും പരിസ്ഥിതിദിനാഘോഷം

ആലപ്പുഴ: കൃഷി എന്‍റെ അഭിമാനമാണെന്നും കൃഷിയാണ് എന്‍റെ ലഹരിയെന്നും പുതുതലമുറ പറഞ്ഞും പ്രവർത്തിച്ചും പഠിച്ചു തുടങ്ങണമെന്ന് ജില്ലാ കളക്ടർ അലക്സ് വർഗീസ് പറഞ്ഞു. ജില്ലാ അഗ്രി ഹോൾട്ടി സൊസൈറ്റിയുടെ നേതൃത്വത്തിൽ ലോകപരിസ്ഥിതി ദിനത്തില്‍ കളക്ടറേറ്റിലെ ഗാന്ധി സ്മൃതി മണ്ഡപത്തിൽ വൃക്ഷത്തൈ നട്ടു സംസാരിക്കുകയായിരുന്നു അദ്ദേഹം. കിളിഞാവൽ വൃക്ഷത്തൈയാണ് കളക്ടര്‍ നട്ടത്. ജില്ലാ അഗ്രി ഹോൾട്ടി സൊസൈറ്റി ജനറൽ സെക്രട്ടറി രവി പാലത്തുങ്കൽ, വൈസ് പ്രസിഡന്‍റ് എ.എൻ. പുരം ശിവകുമാർ, പി. ശ്യാംകുമാർ, പയ്യസ് നെറ്റോ, ഹരികുമാർ വാലേത്ത്‌, പി.എസ്. ഹരിദാസ്, രാജു പള്ളിപ്പറമ്പിൽ, സുനിൽ വർഗീസ്, എം.ഇ. ഉത്തമക്കുറുപ്പ് തുടങ്ങിയവർ പങ്കെടുത്തു. ജില്ലാ പഞ്ചായത്തിൽ പോസ്റ്റർ പ്രദർശനം ആലപ്പുഴ: പരിസ്ഥിതി ദിനത്തിൽ ജില്ലാ സാക്ഷരതാമിഷന്‍റെ നേതൃത്വത്തിൽ ജില്ലാ പഞ്ചായത്തിൽ "ബീറ്റ് പ്ലാസ്റ്റിക് പൊലൂഷൻ" പോസ്റ്റർ പ്രദർശനം നടത്തി. ഐക്യരാഷ്ട്ര പരിസ്ഥിതി പരിപാടിയുടെ ഭാഗമായി തയാറാക്കിയ പോസ്റ്ററുകളാണ് പ്രദർശിപ്പിച്ചത്. പ്ലാസ്റ്റിക് മാലിന്യം ഇല്ലാതാക്കുക എന്ന സന്ദേശമാണ് പോസ്റ്ററുകളിലുള്ളത്. പോസ്റ്റർ പ്രദർശനം ജില്ലാ പഞ്ചായത്ത് പ്രസിഡന്‍റ് കെ.ജി. രാജേശ്വരി ഉദ്ഘാടനം ചെയ്തു. ആരോഗ്യ വിദ്യാഭ്യാസ സ്ഥിരം സമിതി അധ്യക്ഷ എം.വി. പ്രിയ, ജില്ലാ പഞ്ചായത്തംഗം ആർ. റിയാസ്, കെ. ആർ. ദേവദാസ്, കെ.വി. രതീഷ്, എസ്. മഞ്ജു, പി.കെ. ജോസഫ്, എസ്. സനിത തുടങ്ങിയവർ പങ്കെടുത്തു. പ്ലാസ്റ്റിക് മാലിന്യം ഗുരുതരഭീഷണി: നീതാ കെ. ഗോപാൽ ചെങ്ങന്നൂർ: പ്ലാസ്റ്റിക്കിന്‍റെ പുനരുത്പാദനം ഒരു ശാശ്വത പരിഹാരമല്ലെന്നും പ്ലാസ്റ്റിക് കണങ്ങൾ ഭൂമിയിൽ ദീർഘകാലം അടിഞ്ഞുകൂടുന്നത് ഹരിതഗൃഹ വാതകങ്ങൾ കെട്ടിക്കിടക്കാനും അതുവഴി അന്തരീക്ഷ ഊഷ്മാവ് വർധിപ്പിക്കാനും കാലാവസ്ഥയിൽ ഗുരുതരമായ മാറ്റങ്ങൾ വരുത്താനും ഇടയാക്കുമെന്ന് കേന്ദ്ര കാലാവസ്ഥ നിരീക്ഷണവകുപ്പ് തിരുവനന്തപുരം മേധാവി നീതാ കെ. ഗോപാൽ. ചെങ്ങന്നൂർ പ്രൊവിഡൻസ് എൻജിനിയറിംഗ് കോളജിന്‍റെ ആഭിമുഖ്യത്തിൽ നടന്ന ലോക പരിസ്ഥിതി ദിനാചരണം ഉദ്ഘാടനം ചെയ്യുകയായിരുന്നു നീതാ കെ. ഗോപാല്‍. പ്രകൃതിയിൽ അലിഞ്ഞുചേരുന്ന വസ്തുക്കളുടെ ഉപയോഗം വർധിപ്പിക്കുക മാത്രമാണ് ഇതിനുള്ള ഏക പോംവഴിയെന്നും അതിനായി വരും തലമുറകളെ പ്രോത്സാഹിപ്പിക്കേണ്ടത് വിദ്യാഭ്യാസ സ്ഥാപനങ്ങളുടെ കടമയാണെന്നും അവർ പറഞ്ഞു. ചെയർപേഴ്സൺ മറിയാമ്മ ജോർജ് അധ്യക്ഷയായി. പ്രിൻസിപ്പൽ ഡോ. സന്തോഷ് സൈമൺ, പ്രഫ. ഡോ. പി. എസ്. അനൂപ്, പ്രഫ. ജെറിൻ ജോയ് വർഗീസ്, പ്രഫ. ദിനുലാൽ, പ്രഫ. മഞ്ജുഷ എന്നിവർ പ്രസംഗിച്ചു. പരിസ്ഥിതിക്ക് അനുയോജ്യമായ വിവിധ വസ്തുക്കളുടെയും വൈദ്യുതി വാഹനങ്ങളുടെയും പ്രദർശനവും ദിനാചരണത്തിന്‍റെ ഭാഗമായി നടന്നു. മങ്കൊമ്പ്: പ്ലാസ്റ്റിക് മലിനീകരണം അവസാനിപ്പിക്കുകയെന്ന ഈ വർഷത്തെ പരിസ്ഥിതിദിന സന്ദേശം പൊതുസമൂഹത്തിൽ ആഹ്വാനം ചെയ്തു ചെറുകര ആർ.എൻ. മെമ്മോറിയൽ ഗ്രന്ഥശാലയും ജ്ഞാനോദയം ബാലവേദിയും സംഘടിപ്പിച്ച 'ഒരു തൈ നടാം' പരിപാടി കുട്ടനാട് താലൂക്ക് ലൈബ്രറി കൗൺസിൽ പ്രസിഡന്‍റ് കെ. ഗോപകുമാർ ഉദ്ഘാടനം ചെയ്തു. ബാലവേദി പ്രസിഡന്‍റ് ദേവ ജിത്ത് അധ്യക്ഷത വഹിച്ച യോഗത്തിൽ ഗ്രന്ഥശാല സെക്രട്ടറി കെ.എം. മഹേഷ്, ബാലവേദി കോ-ഓർഡിനേറ്റർ ശ്രീജാ മധു, പി.എൻ. സൺയാറ്റ്, ജി. യശോധരൻ, ബിന്ധ്യാ അഭിലാഷ്, കെ.ടി. വിജയനാഥ് തുടങ്ങിയവർ പ്രംസംഗിച്ചു.

ജലസമൃദ്ധിയുടെ കാലം കഴിഞ്ഞു ; ജലശാപമേറ്റ് കുട്ടനാട്

മങ്കൊമ്പ്: നെല്ലറയെന്നു പേരുകേട്ട കുട്ടനാട് ഇന്ന് നിരവധി പാരിസ്ഥിതിക പ്രശ്നങ്ങള്‍ നേരിടുന്ന പ്രദേശമായി മാറിക്കഴിഞ്ഞു. ജലസമൃദ്ധിക്കു പേരുകേട്ട കുട്ടനാടിന് ശാപവും ഇതേ ജലം തന്നെയാണ്. ശുദ്ധജലത്തടാകങ്ങളും ആറുകളും അനുഗ്രഹമായിരുന്ന കുട്ടനാടിന് ഇവയാണ് ഇന്നു ഏറ്റവും വലിയ വെല്ലുവിളിയുയര്‍ത്തുന്നതും. ജലാശയങ്ങളിലെ ജലം മുഴുവന്‍ മലിനമായിരിക്കുന്നു. മാരകമായ പല രോഗങ്ങളും കുട്ടനാട്ടുകാര്‍ക്കു സമ്മാനിക്കുന്നത് മലിനജലവാഹിനികളായ ജലാശയങ്ങള്‍ തന്നെയാണ്. കൃഷിയാവശ്യത്തിനുള്ള മാരകമായ കീടനാശിനികള്‍, ഹൗസ്ബോട്ടുകള്‍ പോലെയുള്ള ടൂറിസയാനങ്ങള്‍ വെള്ളത്തില്‍ കലര്‍ത്തുന്ന മാലിന്യങ്ങള്‍ ഇവയെല്ലാം കുട്ടനാടിന്‍റെ പരിസ്ഥിതിയെ ദോഷകരമായി ബാധിച്ചിട്ടുണ്ട്. ഒരു കാലത്ത് കുട്ടനാടിന്‍റെ ജീവനാഡികളെന്നു വിശേഷിപ്പിക്കപ്പെട്ടിരുന്ന ചെറുതോടുകളുടെ നാശം കുട്ടനാടിന്‍റെ പരിസ്ഥിയെ തകിടം മറിച്ചു. റോഡ് സൗകര്യങ്ങള്‍ വന്നതോടെ യാത്രകള്‍ക്കും ചരക്കുനീക്കങ്ങള്‍ക്കും കുട്ടനാട്ടുകാര്‍ ആശ്രയിച്ചിരുന്ന തോടുകള്‍ വിസ്മൃതിയിലായി. തോടുകള്‍ പലതും നികത്തി റോഡുകളാക്കിയപ്പോള്‍ നാട്ടുകാര്‍ക്കും നഷ്ടങ്ങളൊന്നുമുണ്ടായില്ല. ഗതാഗത പ്രാധാന്യം കുറഞ്ഞതോടെ വീടിനു സമീപത്തുകൂടി ഒഴുകിയിരുന്ന ചെറുതോടുകള്‍ പലതും നികത്തി, സമീപത്തെ പുരയിടങ്ങളുടെ മതില്‍ക്കെട്ടിനുള്ളിലായി. ആദ്യകാലങ്ങളില്‍ എത്രശക്തമായ മഴയുണ്ടായാലും കുട്ടനാട്ടിലെ പുരയിടങ്ങളില്‍ വെള്ളം കെട്ടിക്കിടന്നിരുന്നില്ല. അതിനാല്‍ ജനങ്ങളും ഹാപ്പി. എന്നാല്‍, കാലം മാറിയതോടെ കാര്യങ്ങള്‍ കീഴ്്‌മേല്‍ മറിഞ്ഞു. തോടുകള്‍ കരഭൂമിയായതോടെ പുരയിടങ്ങളും മലകള്‍ക്കിടയിലെ നാട്ടുവഴികളും മാസങ്ങളോളം സ്ഥിരം വെള്ളക്കെട്ടിലായി. റോഡ് ഗതാഗതത്തിന്‍റെ ഭാഗമായി നിര്‍മിക്കുന്ന ഉയരവും വീതിയും കുറഞ്ഞ കലുങ്കുകളും കുട്ടനാടിന്‍റെ പരിസ്ഥിതിക്കു ദോഷകരമായി. വാഹനഗതാഗതത്തിനു മാത്രമല്ല, നീരൊഴുക്കിനും ഇവ തടസമായി. തോടുകളില്‍ നിറഞ്ഞുവളരുന്ന പോളയും കടകലും തോടുകളുടെ നാശത്തിനു വഴിയൊരുക്കുന്നു. പണ്ട് ജലഗതാഗതത്തിനു ഉപയോഗിച്ചിരുന്ന പല തോടുകളും വര്‍ഷങ്ങളായി പോളയും കടകലും നിറഞ്ഞുകിടക്കുകയാണ്. നീരൊഴുക്കു തടസപ്പെട്ടതോടെ ചെറിയ പ്രളയത്തില്‍ പോലും കോടികള്‍ മുടക്കി ഉയര്‍ത്തിനിര്‍മിച്ച റോഡുകള്‍ പോലും വെള്ളത്തിനടിയിലായി. വെള്ളംകൊണ്ടു പൊറുതിമുട്ടുമ്പോഴും കുടിക്കാനൊരു തുള്ളി ശുദ്ധജലം കിട്ടാനില്ലാത്തത് കുട്ടനാട്ടുകാരെ വിഷമിപ്പിക്കുന്നു. പണ്ടുകാലത്തു പൊതുജലാശയങ്ങളിലെ വെള്ളം കുടിച്ച് ആരോഗ്യവാന്‍മാരായിരുന്ന ഭൂരിഭാഗം കുട്ടനാട്ടുകാരും ഇന്നു കുടിവെള്ളം വിലയ്്കു വാങ്ങി ഉപയോഗിക്കേണ്ട ഗതികേടിലെത്തി. റോഡ് സൗകര്യമില്ലാത്ത പ്രദേശങ്ങളില്‍ കഴിയുന്ന കുടുംബങ്ങളാകട്ടെ പഴയതുപോലെ ഇന്നും മലിനജലം കുടിച്ചു രോഗികളായി മാറുന്നു. കുടിവെള്ളം, ആശുപത്രി സൗകര്യങ്ങള്‍ എന്നിവയുടെ അഭാവം, അടിക്കടിയുണ്ടാകുന്ന വലിയ വെള്ളപ്പൊക്കങ്ങള്‍ ഇവയെല്ലാം കുട്ടനാട്ടുകാരെ പലായനം ചെയ്യാന്‍ പ്രേരിപ്പിക്കുന്നു. കഴിഞ്ഞ ഏതാനും വര്‍ഷങ്ങള്‍ക്കിടയില്‍ ആയിരക്കണക്കിനു കുടുംബങ്ങളാണ് സമീപ ജില്ലകളിലേക്കടക്കം കുടിയേറിയത്. ആളൊഴിഞ്ഞ പുരയിടങ്ങള്‍ വര്‍ധിച്ചതോടെ വിഷപ്പാമ്പുകള്‍ക്കു താവളങ്ങളേറി. കുട്ടനാട്ടിലിന്നു ഏറ്റവുമധികമായി കാണപ്പെടുന്ന ജീവികളിലൊന്നാണ് കീരി. ഇവയും കുട്ടനാടിന്‍റെ പരിസ്ഥിതിക്കു ദോഷകരമാകുന്നുണ്ട്. കുട്ടനാട്ടില്‍ ഏറെ കണ്ടുവന്നിരുന്ന ഒരു ജീവിയാണ് ആമകള്‍. ഇവ വംശനാശ ഭീഷണി നേരിടുകയാണ്. കരയിലാണ് ആമകള്‍ മുട്ടയിടുന്നത്. കീരികള്‍ ഇവ തേടിപ്പിടിച്ചു ഭക്ഷണമാക്കുന്നത് ആമകളുടെ വംശവര്‍ധനവിനു ഭീഷിയാകുന്നുണ്ട്. കര്‍ഷകന്‍റെ മിത്രമായ തവളയടക്കമുള്ള പല ജീവികളെയും ഇവ ഭക്ഷണമാക്കുന്നു. പണ്ടുകാലത്തു സുലഭമായിരുന്ന പല മത്സ്യങ്ങളും ഇന്നു കുട്ടനാട്ടില്‍നിന്ന് അപ്രത്യക്ഷമായിക്കഴിഞ്ഞു. ജലമലിനീകരണവും ഓരുവെള്ളത്തിന്‍റെ അഭാവവും മൂലം പ്രജനനത്തിനുണ്ടാകുന്ന പ്രതികൂല സാഹചര്യങ്ങളുമാണ് ഇതിനു കാരണമാകുന്നതെന്നാണ് വിദഗ്ധ പഠനങ്ങള്‍ വ്യക്തമാക്കുന്നത്.

രാസലഹരിയുമായി യുവാവ് പിടിയിൽ

അമ്പലപ്പുഴ: രാസലഹരിയുമായി യുവാവ് പിടിയിൽ. അമ്പലപ്പുഴ തെക്ക് പഞ്ചായത്ത് 15-ാം വാർഡിൽ ഗണപതിവട്ടം കോമനയിൽ സുനിതാ മൻസിലിൽ റിയാസി(21)നെയാണ് ആലപ്പുഴ ജില്ലാ ലഹരിവിരുദ്ധ സ്ക്വാഡും അമ്പലപ്പുഴ പോലീസും ചേർന്ന് ആറു ഗ്രാം രാസലഹരിയിനത്തിൽപ്പെട്ട ആംഫിറ്റാമിനുമായി പിടികൂടിയത്. ഓപ്പറേഷൻ ഡി ഹണ്ടിന്‍റെ ഭാഗമായി അമ്പലപ്പുഴ റെയിൽവേ സ്റ്റേഷൻ, തോട്ടപ്പള്ളി, വ്യാസ ജംഗ്ഷൻ, വളഞ്ഞവഴി തീരദേശ പ്രദേശങ്ങൾ എന്നിവ കേന്ദ്രീകരിച്ച് നടത്തിയ പട്രോളിംഗിനിടെ അമ്പലപ്പുഴ തീരദേശ റോഡിൽ ഗണപതിവട്ടത്തിനടുത്ത് നടത്തിയ പരിശോധനയിലാണ് റിയാസിനെ പിടികൂടിയത്. നർക്കോട്ടിക് സെൽ ഡെപ്യൂട്ടി പോലീസ് സൂപ്രണ്ടന്‍റ് ബി. പങ്കജാക്ഷന്‍റെ നേതൃത്വത്തിലുള്ള ജില്ലാ ലഹരി വിരുദ്ധ സ്ക്വാഡും അമ്പലപ്പുഴ ഡെപ്യൂട്ടി പോലീസ് സൂപ്രണ്ടന്‍റ് കെ.എൻ. രാജേഷിന്‍റെ നേതൃത്വത്തിൽ അമ്പലപ്പുഴ പോലീസ് സ്റ്റേഷൻ സബ് ഇൻസ്പെക്ടർ അനീഷ് കെ. ദാസ്, പ്രൊബേഷൻ സബ് ഇൻസ്പെക്ടർ നിധിൻ, ഗ്രേഡ് എസ്ഐ പ്രിൻസ് സൽപുത്രൻ, സീനിയർ സിവിൽ പോലീസ് ഓഫീസർ സുജിമോൻ, സിവിൽ പോലീസ് ഓഫീസർമാരായ വിജിത്ത്, മിഥുൻ, ഹാരിസൺ, വിഷ്ണു എന്നിവരടങ്ങുന്ന സംഘമാണ് പ്രതിയെ പിടികൂടിയത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

മെഡിക്കല്‍ കോളജില്‍ അമ്പതു തസ്തികകള്‍ അനുവദിച്ചു

അമ്പലപ്പുഴ: ആലപ്പുഴ വണ്ടാനം മെഡിക്കല്‍ കോളജ് ആശുപത്രിയില്‍ നഴ്‌സുമാരുടെയും ടെക്‌നീഷന്‍മാരുടേതുമുള്‍പ്പെടെ 50 തസ്തികകള്‍ സര്‍ക്കാര്‍ അനുവദിച്ചതായി എച്ച്. സലാം എംഎല്‍എ അറിയിച്ചു. ബയോമെഡിക്കല്‍ എന്‍ജിനിയര്‍-(1), അനസ്‌തേഷ്യ ടെക്‌നീഷന്‍-(2), ഗ്രേഡ് 2 ഫാര്‍മസിസ്റ്റ് -(1), ഡയാലിസിസ് ടെക്‌നീഷന്‍-(2), കാത്ത് ലാബ് ടെക്‌നീഷന്‍-(1), ഇഇജി ടെക്‌നീഷന്‍-(1), സ്റ്റാഫ് നഴ്‌സ്-(42) ഉള്‍പ്പെടെ 50 പോസ്റ്റുകളാണ് അനുവദിച്ച് ഉത്തരവായത്. 1964 ലെ സ്റ്റാഫ് പാറ്റേണ്‍ അനുസരിച്ചാണ് നിലവില്‍ ആശുപത്രികളുടെ പ്രവര്‍ത്തനം. എന്നാല്‍, നിത്യേന ആശുപത്രിയില്‍ എത്തുന്നവരുടെ വര്‍ധന പലപ്പോഴും പ്രതിസന്ധി സൃഷ്ടിച്ചിരുന്നു. ടെക്‌നീഷന്‍മാര്‍ ഉള്‍പ്പെടെ ഉള്ളവരുടെ കുറവും പ്രയാസം സൃഷിച്ചു. ആര്‍എസ്ബിവൈ വഴിയും എന്‍എച്ച്എം വഴിയും നഴ്‌സുമാരെയും ജീവനക്കാരെയും നിയമിച്ചുകൊണ്ടാണ് ആശുപത്രിയുടെ പ്രവര്‍ത്തനങ്ങള്‍ മുന്നോട്ട് കൊണ്ടുപോയത്. ആലപ്പുഴയില്‍നിന്ന് വണ്ടാനത്തേക്കു മാറ്റി പ്രവര്‍ത്തിച്ച മെഡിക്കല്‍ കോളജിന്‍റെ ആരംഭഘട്ടത്തില്‍ 1500 രോഗികള്‍ വരെയാണ് നിത്യേന എത്തിയിരുന്നതെങ്കില്‍, ഇപ്പോള്‍ 2500 മുതല്‍ 3200 പേര്‍ വരെയാണ് ചികിത്സതേടി എത്തുന്നത്. സൂപ്പര്‍ സ്‌പെഷാലിറ്റിയുടെ പ്രവര്‍ത്തനം കൂടി ആരംഭിച്ചതോടെയാണ് ക്രമാതീതമായ വര്‍ധനവുണ്ടായത്. സൂപ്പര്‍ സ്‌പെഷാലിറ്റി ബ്ലോക്കിന്‍റെ ഉദ്ഘാടന വേളയില്‍ കൂടുതല്‍ ഡോക്ടര്‍മാരെയും ജീവനക്കാരെയും നിയമിക്കുമെന്ന് മുഖ്യമന്ത്രി തന്നെ ജനങ്ങള്‍ക്ക് ഉറപ്പുനല്‍കിയിരുന്നു. ഇതിന്‍റെ അടിസ്ഥാനത്തില്‍ എട്ടു ഡോക്ടര്‍മാരുടെ പോസ്റ്റ് അനുവദിക്കുകയും പ്ലാസ്റ്റിക് സര്‍ജറി വിഭാഗം പുതിയതായി ആരംഭിക്കുകയും ചെയ്തു. ഇതിനു പിന്നാലെയാണ് ഇപ്പോള്‍ 50 പോസ്റ്റുകള്‍ കൂടി സര്‍ക്കാര്‍ അനുവദിച്ച് ഉത്തരവായത്.

കൊല്ലം-തേനി ദേശീയപാതയോരം കാടുകയറി

ചാരുംമൂട്: തിരക്കേറിയ കൊല്ലം-തേനി ദേശീയപാതയുടെ ഇരുവശവും കാടുകയറി. ഇതുമൂലം കാല്‍ നടയാത്രക്കാര്‍ പാതയോരത്തുനിന്നു റോഡില്‍ കയറി സഞ്ചരിക്കേണ്ടിവരുന്നതിനാല്‍ അപകടസാധ്യതയും ഏറി. ദേശീയപാതയ്ക്കു മതിയായ വീതിയില്ലാത്തതും വലിയ പ്രശ്‌നമാണ്. കൊല്ലം -തേനി ദേശീയപാത 24 മീറ്റര്‍ വീതിയില്‍ നാലുവരി പാതയാക്കാനുള്ള പദ്ധതിക്ക് അന്തിമ അംഗീകാരം ലഭിച്ചിട്ട് മാസങ്ങളായി. ദേശീയപാതയുടെ വശങ്ങള്‍ കാടുപിടിച്ചതുമൂലം ഇഴജന്തുക്കളുടെ താവളമായി ഇവിടം മാറി. ചാരുംമൂട് മുതല്‍ വെട്ടിയാര്‍ പള്ളിമുക്ക് വരെയുള്ള ആറു കിലോമീറ്റര്‍ ദൂരത്തില്‍ വലിയ പുല്ലുകളും വള്ളിപ്പടര്‍പ്പുകളും വളര്‍ന്ന് പാതയോരം കാടുപിടിച്ചിരിക്കുകയാണ്. നുറുകണക്കിന് വാഹനങ്ങളാണ് ദിനം പ്രതി സഞ്ചരിക്കുന്നത്. റോഡ് കാടുകയറിയതിനാല്‍ രണ്ടു വാഹനങ്ങള്‍ എതിര്‍ദിശയില്‍നിന്ന് വന്നാല്‍ പോലും കുട്ടികള്‍ ഉള്‍പ്പെടെയുള്ളവര്‍ക്ക് വശത്തേക്ക് മാറി നില്‍ക്കാന്‍ പോലും കഴിയാത്ത സ്ഥിതിയാണ്. ചുനക്കര സാമൂഹിക ആരോഗ്യകേന്ദ്രത്തിന് വടക്കുവശത്തു ള്ള റോഡില്‍ കുറ്റിച്ചെടികള്‍ കാടുപിടിച്ച് കിടക്കുകയാണ്. റോഡിന് വശങ്ങള്‍ കുറവായതിനാല്‍ സൈക്കിള്‍ യാത്രക്കാരും കാല്‍നടയാത്രക്കാരും അപകടത്തില്‍പ്പെടുന്നതും പതിവാണ്. അപകടവളവുകളുടെ സമീപവും ഇത്തരത്തില്‍ കാടുവളര്‍ന്ന് നില്‍ക്കുകയാണ്. അടിയന്തരമായി നീക്കം ചെയ്യണമെന്നാണ് ആവശ്യം.

3x3 ബാസ്‌കറ്റ്‌ബോള്‍: അശ്വിനും ടെസയും നയിക്കും

ആലപ്പുഴ: ആദ്യത്തെ അണ്ടര്‍ ട്വന്‍റി ത്രീ (യു-23) 3x3 സ്റ്റേറ്റ് ബാസ്‌കറ്റ്ബോള്‍ ചാമ്പ്യന്‍ഷിപ്പില്‍ മത്സരിക്കുന്ന ആലപ്പുഴ ജില്ലാ ടീമുകളെ അശ്വിനും ടെസ ഹര്‍ഷനും നയിക്കും. 8ന് കൊച്ചി കടവന്ത്ര റീജണല്‍ സ്പോര്‍ട്സ് സെന്‍ററിലാണ് മത്സരം. ആലപ്പി ഡിസ്ട്രിക്ട് ബാസ്‌കറ്റ്ബോള്‍ അസോസിയേഷനാണ് (എഡിബിഎ) ടീമുകളെ തെരഞ്ഞെടുത്തത്. മറ്റ് ടീം അംഗങ്ങള്‍: പുരുഷന്മാര്‍: ആല്‍ഫി, ജോസഫ്, ദേവസി. സ്റ്റാന്‍ഡ് ബൈ: ആല്‍ബിന്‍, നിരഞ്ജന്‍. വനിതകള്‍: സുഭദ്ര ജയകുമാര്‍, ഗംഗാ രാജഗോപാല്‍, തേജസ് തോബിയാസ്. സ്റ്റാന്‍ഡ് ബൈ: സ്വപ്ന, ശിവാനി. ടീമുകള്‍ക്കുള്ള ജേഴ്സി വിതരണം ആറിന് രാവിലെ 8.30ന് മെഡിവിഷന്‍ മാനേജിംഗ് ഡയറക്ടര്‍ ബിബു ബി. പുന്നൂരാന്‍ നിര്‍വഹിക്കും. പ്രസിഡന്‍റ് റോണി മാത്യു അധ്യക്ഷത വഹിക്കും. രോഗനിര്‍ണയ സേവനങ്ങള്‍ നല്‍കുന്ന മെഡിവിഷന്‍, ടീമുകളെ സ്‌പോണ്‍സര്‍ ചെയ്യും.

ചേര്‍ത്തല സെന്‍റ് മൈക്കിള്‍സ് കോളജിന് വീണ്ടും റാങ്കിന്‍റെ തിളക്കം

ചേര്‍ത്തല: കേരള യൂണിവേഴ്സിറ്റിയുടെ ഡിഗ്രി ഫലപ്രഖ്യാപനത്തില്‍ ചേര്‍ത്തല സെന്‍റ് മൈക്കിള്‍സ് കോളജിന് തുടര്‍ച്ചയായി നേട്ടം. ബിവോക് ടൂറിസം ആൻഡ് ഹോസ്പിറ്റാലിറ്റി മാനേജ്‌മെന്‍റില്‍ ആദ്യ മൂന്നുറാങ്കുകള്‍ ചേര്‍ത്തല സെന്‍റ് മൈക്കിള്‍സ് കോളജിലെ വിദ്യാര്‍ഥികള്‍ക്കാണ്. കോളജിലെ ബി. ആദിത്യന്‍ ഒന്നാം റാങ്കും പി.എ. അര്‍ജുന്‍ രണ്ടാം റാങ്കും എയ്ഞ്ചല്‍ ജോസഫ് മൂന്നാം റാങ്കും കരസ്ഥമാക്കി. കഴിഞ്ഞദിവസം പ്രസിദ്ധീകരിച്ച ഫലപ്രഖ്യാപനത്തില്‍ ബിവോക് സോഫ്റ്റ് വെയര്‍, ബിബിഎ ലോജിസ്റ്റിക്സ്, ബിഎസ്‌സി ഫിസിക്സ് എന്നീ വിഷയങ്ങളില്‍ കോളജിലെ വിദ്യാര്‍ഥികളായ പി.എസ്. അലന്‍, എന്‍.പി. നന്ദന, ജെ.എല്‍. കരിഷ്മ, കെ.ആര്‍. ഭാഗ്യലക്ഷ്മി എന്നിവരും കേരള യൂണിവേഴ്സിറ്റിയുടെ റാങ്കുപട്ടികയില്‍ സ്ഥാനം പിടിച്ചിരുന്നു. വിദ്യാര്‍ഥികള്‍ക്ക് നല്‍കുന്ന ചിട്ടയായ പരിശീലനവും അധ്യാപകരുടെ അര്‍പ്പണമനോഭാവവുമാണ് കോളജിന് തുടര്‍ച്ചയായി നേട്ടം കൈവരിക്കാനായതെന്ന് അധികൃതര്‍ പറഞ്ഞു. മികച്ച നേട്ടം കൈവരിച്ച വിദ്യാര്‍ഥികളെ കോളജ് അധികൃതര്‍ അനുമോദിച്ചു.

ദേശീയപാതയിൽ ലോറിയിടിച്ച് ബൈക്ക് യാത്രികന് ദാരുണാന്ത്യം

തുറവൂർ: ഉയരപ്പാത നിർമാണം നടക്കുന്ന ദേശീയപാതയിൽ വീണ്ടും അപകടം. ടോറസിടിച്ച് പട്ടണക്കാട് കൈതപ്പറമ്പ് അയ്യപ്പന്‍റെ മകൻ രാധാകൃഷ്ണൻ (40) ആണ് മരിച്ചത്. ഇന്നലെ വൈകുന്നേരം മൂന്നിന് കുത്തിയതോട് തെക്ക് പാട്ടുകുളങ്ങരയിലായിരുന്നു അപകടം. ഇലക്ട്രിക് ജോലികൾ കരാറെടുത്തു ചെയ്തു കൊടുക്കുന്ന രാധാകൃഷ്ണൻ വർക്ക് സൈറ്റിലേക്കു പോകുംവഴിയാണ് അപകടമുണ്ടാകുന്നത്. ഇയാളുടെ ബൈക്കിൽ തമിഴ്നാട് രജിസ്ട്രേഷനിലുള്ള ടോറസ് ഇടിച്ചു വീഴ്ത്തുകയായിരുന്നു. മൃതദേഹം അരൂക്കുറ്റി ഗവ. ആശുപത്രി മോർച്ചറിയിൽ. കുത്തിയതോട് പോലീസ് സ്ഥലത്തെത്തി തുടർനടപടികൾ സ്വീകരിച്ചു. ഭാര്യ: ആതിര. മകൾ: കൃഷ്ണ തീർഥ.

ശുദ്ധമായ കുടിവെള്ളം ഉറപ്പാക്കുക സര്‍ക്കാര്‍ ലക്ഷ്യം: മന്ത്രി റോഷി അഗസ്റ്റിന്‍

ആലപ്പുഴ: എല്ലാവര്‍ക്കും ശുദ്ധമായ കുടിവെള്ളം ലഭ്യമാക്കുക എന്നതാണ് സര്‍ക്കാരിന്‍റെ ലക്ഷ്യമെന്ന് മന്ത്രി റോഷി അഗസ്റ്റിന്‍. വളവനാട് കുടുംബാരോഗ്യ കേന്ദ്രത്തിനു സമീപം നടന്ന ചടങ്ങില്‍ മണ്ണഞ്ചേരി പഞ്ചായത്തിലെ ഉന്നതതല ജലസംഭരണിയുടെ നിര്‍മാണോദ്ഘാടനം നിര്‍വഹിച്ച് സംസാരിക്കുകയായിരുന്നു അദ്ദേഹം. ശുദ്ധജലസ്രോതസുകള്‍ ഏറ്റവും കുറവുള്ള പ്രദേശങ്ങളാണ് ആലപ്പുഴയിലേത്. മണ്ണഞ്ചേരി പഞ്ചായത്തില്‍ ജലവിഭവ വകുപ്പിന്‍റെ പുതിയ പദ്ധതി പൂര്‍ത്തിയാകുന്നതോടെ പ്രദേശത്തെ കുടിവെള്ളക്ഷാമത്തിനു പരിഹാരം കാണാന്‍ കഴിയുമെന്നും പദ്ധതി എത്രയും വേഗം പൂര്‍ത്തിയാക്കുമെന്നും അദ്ദേഹം പറഞ്ഞു. എല്ലായിടത്തും കുടിവെള്ള കണക്ഷനുകള്‍ സ്ഥാപിക്കുന്നതിനൊപ്പം അതിന്‍റെ നിര്‍മാണ ഘട്ടങ്ങളില്‍ റോഡുകള്‍ക്ക് ഉള്‍പ്പെടെ സംഭവിക്കുന്ന തകരാറുകള്‍ പരിഹരിക്കാനുള്ള തുക കൂടി വകയിരുത്തിയാണ് ഓരോ പദ്ധതിയും സര്‍ക്കാര്‍ നടപ്പാക്കുന്നതെന്നും മന്ത്രി പറഞ്ഞു. പരിപാടിയില്‍ പി.പി. ചിത്തരഞ്ജന്‍ എംഎല്‍എ അധ്യക്ഷനായി. കുടിവെള്ളം ഓരോ ജനതയുടെയും മൗലികാവകാശമാണെന്ന് കണ്ട് ഇത്തരം പദ്ധതികള്‍ക്ക് വലിയ പ്രാധാന്യമാണ് സര്‍ക്കാര്‍ നല്‍കുന്നതെന്ന് എംഎല്‍എ പറഞ്ഞു. ഉന്നതതല ജലസംഭരണിയുടെ നിര്‍മാണം പൂര്‍ത്തിയാകുന്നതോടെ മണ്ണഞ്ചേരി നിവാസികള്‍ക്ക് ഏറ്റവും മികച്ച കുടിവെള്ളം തന്നെ ലഭ്യമാകുമെന്നും എംഎല്‍എ പറഞ്ഞു. മണ്ണഞ്ചേരി പഞ്ചായത്തിലെ ജലവിതരണത്തിന്‍റെ നവീകരണ പ്രവര്‍ത്തനങ്ങള്‍ നടപ്പാക്കുന്നതിനായി വളവനാട് കുടുംബാരോഗ്യകേന്ദ്രത്തിന് സമീപം 12 ലക്ഷം ലിറ്റര്‍ ശേഷിയുള്ള ഉന്നതതല ജലസംഭരണി, മൂന്നു ലക്ഷം ലിറ്റര്‍ ശേഷിയുള്ള ഭൂതല സംഭരണി, പഞ്ചായത്തില്‍ 105 കിലോ മീറ്റര്‍ വിതരണ ശൃംഖല എന്നിവ സ്ഥാപിക്കുന്നതിനും റോഡ് പുനര്‍നിര്‍മാണ പ്രവൃത്തികള്‍ക്കുമായി കിഫ്ബി പദ്ധതി വഴി 49.32 കോടി രൂപയാണ് അനുവദിച്ചിരിക്കുന്നത്. ഊരാളുങ്കല്‍ ലേബര്‍ കോണ്‍ട്രാക്ട് സൊസൈറ്റിക്കാണ് നിര്‍മാണച്ചുമതല. 2026 മാര്‍ച്ച് മാസത്തോടുകൂടി പ്രവൃത്തി പൂര്‍ത്തിയാക്കാനാണ് ലക്ഷ്യം. ചടങ്ങില്‍ ആര്യാട് ബ്ലോക്ക് പഞ്ചായത്ത് പ്രസിഡന്‍റ് കെ.ഡി. മഹീന്ദ്രന്‍, മണ്ണഞ്ചേരി പഞ്ചായത്ത് പ്രസിഡന്‍റ് റ്റി.വി. അജിത് കുമാര്‍ തുടങ്ങിയവര്‍ പങ്കെടുത്തു.

സ്വര്‍ണാഭരണങ്ങള്‍ക്ക് എച്ച്‌യുഐഡി സമയം നീട്ടണം: എകെജിഎസ്എംഎ

ആലപ്പുഴ: സ്വര്‍ണാഭരണത്തില്‍ രണ്ടുമാസത്തിനുള്ളില്‍ ഹാള്‍മാര്‍ക്ക് യൂണിക്ക് ഐഡന്‍റിഫിക്കേഷന്‍ നിര്‍ബന്ധമാക്കിയ ബിഐഎസ് നടപടി വ്യാപാര മേഖലയില്‍ പ്രതിസന്ധി സൃഷ്ടിക്കുമെന്ന് ഓള്‍ കേരള ഗോള്‍ഡ് ആൻഡ് സില്‍വര്‍ മര്‍ച്ചന്‍റ്സ് അസോസിയേഷന്‍. ഇക്കാര്യത്തില്‍ ഒരുവര്‍ഷത്തെ കാലാവധി അനുവദിക്കണമെന്ന് അസോസിയേഷന്‍ സംസ്ഥാന ചെയര്‍മാന്‍ ഡോ. ബി. ഗോവിന്ദന്‍, പ്രസിഡന്‍് ജസ്റ്റിന്‍ പാലത്ര, ജനറല്‍ സെക്രട്ടറി കെ.എ. ജലീല്‍, ട്രഷറര്‍ ബിന്ദു മാധവ് എന്നിവര്‍ ആവശ്യപ്പെട്ടു. നിയമം നടപ്പിലാക്കുന്നതിന് മുമ്പ് വ്യാപാരികള്‍ക്ക് അവബോധം നല്‍കുന്നതിനായി എല്ലാ ജില്ലകളിലും ബിഐഎസുമായി സഹകരിച്ച് എകെജിഎസ്എംഎയുടെ നേതൃത്വത്തില്‍ ക്യാമ്പുകള്‍ സംഘടിപ്പിക്കുമെന്നും ഭാരവാഹികള്‍ അറിയിച്ചു.

ബോധവത്കരണ ക്ലാസ് സംഘടിപ്പിച്ചു

ചേര്‍ത്തല: അർത്തുങ്കൽ സെന്‍റ് ഫ്രാൻസിസ് അസീസി ഹൈസ്കൂളിലെ എന്‍എസ്എസ് യൂണിറ്റിന്‍റെ ഈ വര്‍ഷത്തെ പ്രവർത്തനങ്ങളുടെ ഉദ്ഘാടനം സ്കൂൾ മാനേജർ റവ. ഡോ. യേശുദാസ് കാട്ടുങ്കല്‍തയ്യിൽ നിര്‍വഹിച്ചു. പ്രിൻസിപ്പൽ കെ.ജെ. നിക്സൻ അധ്യക്ഷത വഹിച്ചു. തുടര്‍ന്നു നടന്ന നിയമ ബോധവത്കരണ ക്ലാസിന് ലീഗൽ സർവീസ് സെൽ റിസോഴ്സ് പേഴ്സൺ അഡ്വ.കെ.ആർ. അജിത് കുമാർ നേതൃത്വം നല്കി. വാർഡ് കൗൺസിലർ മേരി ഗ്രേസ് സെബാസ്റ്റ്യൻ, പിഎൽവി ടിൻസിമോൾ ജോസി, എൻഎസ്എസ് പ്രോഗ്രാം ഓഫീസർ അജു പി. ബഞ്ചമിൻ, അനിമോൾ ലെവി, അദിൻ റാഫെൽ, റോഡിയ എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]