ADVERTISEMENT

ADVERTISEMENT

സർക്കിൾ സഹകരണ യൂണിയൻ: യുഡിഎഫിന് ഉജ്വല വിജയം

തൊടുപുഴ: താലൂക്ക് സർക്കിൾ സഹകരണ യൂണിയൻ തെരഞ്ഞെടുപ്പിൽ യുഡിഎഫിന് ഉജ്വല വിജയം. തെരഞ്ഞെടുപ്പ് നടന്ന 11 സീറ്റിൽ പത്തുസീറ്റും യുഡിഎഫ് കരസ്ഥമാക്കി. ടോണി കുര്യാക്കോസ്, ടോമി തോമസ് കാവാലം, ടോമിച്ചൻ പി. മുണ്ടുപാലം, സി.കെ. നസീർ, ഇന്ദു സുധാകരൻ, സി.പി. കൃഷ്ണൻ, കൃഷ്ണൻ കണിയാപുരം, ടോം തോമസ് എന്നിവർ യുഡിഎഫ് പാനലിൽ വിജയിച്ചു.

എം.ടി. ജോണി മുണ്ടയ്ക്കാമറ്റത്തിൽ, എം. സ്കറിയ എന്നിവർ നേരത്തേ എതിരില്ലാതെ തെരഞ്ഞെടുക്കപ്പെട്ടിരുന്നു. എസ്. സിജോയാണ് എൽഡിഎഫ് പാനലിൽ നിന്നു വിജയിച്ചത്. വിജയിച്ച സ്ഥാനാർഥികൾക്കൊപ്പം യുഡിഎഫ് നേതാക്കൾ ടൗണിൽ ആഹ്ളാദ പ്രകടനവും നടത്തി. ഗാന്ധി സ്ക്വയറിൽ നടന്ന യോഗത്തിൽ ഡിസിസി പ്രസിഡന്‍റ് സി.പി. മാത്യു, എൻ.ഐ. ബെന്നി, സുരേഷ് ബാബു, പി.എൻ. സീതി എന്നിവർ പ്രസംഗിച്ചു.

ADVERTISEMENT

മഴക്കെടുതി: ജില്ലയിൽ 148 വീടുകൾക്ക് നാശനഷ്ടം

ഇടുക്കി: കനത്ത മഴയെ തുടർന്ന് ജില്ലയിൽ 148 വീടുകൾക്ക് നാശനഷ്ടം. 138 വീടുകൾ ഭാഗികമായും 10 വീടുകൾ പൂർണമായും തകർന്നു. ഇടുക്കി താലൂക്കിൽ 55 വീടുകളാണ് തകർന്നത്. 52 വീടുകൾ ഭാഗികമായും മൂന്ന് വീടുകൾ പൂർണമായും തകർന്നു. തൊടുപുഴ താലൂക്കിൽ 29 വീടുകൾക്ക് നാശനഷ്ടമുണ്ടായി. 25 വീടുകൾ ഭാഗികമായും നാലു വീടുകൾ പൂർണമായും തകർന്നു. ദേവികുളം താലൂക്കിൽ 26 വീടുകൾ ഭാഗികമായും രണ്ടു വീടുകൾ പൂർണമായും തകർന്നു. ഉടുന്പൻചോലയിൽ 25 വീടുകൾക്ക് നാശനഷ്ടമുണ്ടായി. ഒരു വീട് പൂർണമായും തകർന്നു. പീരുമേട് താലൂക്കിൽ 11 വീടുകൾക്ക് ഭാഗിക നാശനഷ്ടമുണ്ടായി. ജില്ലയിൽ കഴിഞ്ഞ 24 മണിക്കൂറിനിടയിൽ 14 വീടുകളാണ് കനത്ത മഴയിൽ തകർന്നത്. കനത്ത മഴയിൽ ജില്ലയിൽ 5.48 കോടി രൂപയുടെ കൃഷിനാശമാണ് ഉണ്ടായതായാണ് പ്രാഥമിക കണക്കുകൾ. 350.8 ഹെക്ടറിലായി 3218 കർഷകരുടെ കാർഷിക വിളകൾ ഇതിനോടകം നശിച്ചു. ജില്ലയിൽ 14 ദുരിതാശ്വാസ ക്യാന്പുകളാണ് തുറന്നിരിക്കുന്നത്. ഇടുക്കി താലൂക്കിൽ ഏഴ് ക്യാന്പുകളും ദേവികുളം താലൂക്കിൽ അഞ്ച് ക്യാന്പുകളും ഉടുന്പൻചോല താലൂക്കിൽ രണ്ട് ക്യാന്പുകളുമാണ് തുറന്നിരിക്കുന്നത്. 78 കുടുംബങ്ങളിലെ 240 അംഗങ്ങൾ ഈ ക്യാന്പുകളിലുണ്ട്. രണ്ടു ദിവസമായി ജില്ലയിൽ മഴയുടെ ശക്തി കുറഞ്ഞിരിക്കുകയാണ്. ഒറ്റപ്പെട്ട മഴയാണ് പലയിടങ്ങളിലും ലഭിച്ചത്. കഴിഞ്ഞ 24 മണിക്കൂറിനുള്ളിൽ 35.34 മില്ലി മീറ്റർ മഴയാണ് ജില്ലയിൽ പെയ്തത്. ഉടുന്പൻചോല - 6.2, ദേവികുളം - 24.4, പീരുമേട്- 88.1, ഇടുക്കി- 24.2 തൊടുപുഴ-33.6 എന്നിങ്ങനെയാണ് ഓരോ താലൂക്കിലും പെയ്ത മഴയുടെ കണക്ക്. ഇടുക്കി ഡാമിൽ 2344.22 അടിയും മുല്ലപ്പെരിയാറിൽ 130.05 അടിയുമാണ് ജലനിരപ്പ്.

കാട്ടാനശല്യത്തില്‍ പൊറുതിമുട്ടി നാട്ടുകാർ

അടിമാലി: വാളറ കുളമാന്‍കുഴി മേഖലയില്‍ കാട്ടാനശല്യത്തില്‍ പൊറുതിമുട്ടി നാട്ടുകാർ.മൂന്ന് കാട്ടാനകളാണ് ഏതാനും ദിവസങ്ങളായി വാളറ കുളമാൻകുഴി ‍ ജനവാസ മേഖലയില്‍ ഇറങ്ങി നാശം വരുത്തുന്നത്. പ്രദേശത്തെ അമ്പതോളം കര്‍ഷകരുടെ കൃഷിയിടങ്ങളിലാണ് കാട്ടാ നകൾ നാശംവരുത്തിയത്. പല കര്‍ഷകര്‍ക്കും സംഭവിച്ച നഷ്ടം വലുതാണ്. ഏലവും മലയിഞ്ചിയും കൊക്കോയുമൊക്കെ കാട്ടാനകള്‍ വൻതോതില്‍ നശിപ്പിച്ചു.തുരത്തിയോടിക്കാന്‍ ശ്രമിച്ചാലും കാട്ടാനകള്‍ ജനവാസ മേഖലയില്‍നിന്നു പിന്‍വാങ്ങാന്‍ തയാറാകാത്ത സ്ഥിതിയാണ്. കാട്ടാന ശല്യം രൂക്ഷമായിട്ടും വനംവകുപ്പിന്‍റെ ഭാഗത്തുനിന്നു ഫലപ്രദമായ ഇടപെടല്‍ ഉണ്ടായിട്ടില്ലെന്ന ആക്ഷേപവുമുണ്ട്. പൊറുതിമുട്ടിയതോടെ പ്രദേശത്തെ ആളുകള്‍ നേര്യമംഗലം ഫോറസ്റ്റ് റേഞ്ചോഫീസിലേക്ക് പ്രതിഷേധവുമായി എത്തി.തുടര്‍ന്ന് നടത്തിയ ചര്‍ചയില്‍ ആനയെ തുരത്താന്‍ പ്രദേശത്ത് ആര്‍ ആര്‍ടി സംഘത്തെ നിയോഗിക്കാമെന്ന് വനംവകുപ്പ് അറിയിച്ചു. തുടര്‍നടപടികളില്‍ തീരുമാനം കൈകൊള്ളാന്‍ മൂന്നാര്‍ ഡി എഫ്ഒയുടെ സാന്നിധ്യത്തില്‍ നാളെ ചര്‍ച്ച നടത്താമെന്ന് വനംവകുപ്പ് ഉദ്യോഗസ്ഥര്‍ അറിയിച്ചതോടെ പ്രതിഷേധം താത്കാലിമായി അവസാനിപ്പിച്ചു. കാട്ടാനകള്‍ ജനവാസമേഖലയിലേക്ക് ഇറങ്ങുന്ന പ്രദേശത്ത് കുറ്റമറ്റ രീതിയില്‍ ഫെന്‍സിംഗ് തീര്‍ത്താല്‍ ആനശല്യം ഒരു പരിധിവരെ പരിഹാരിക്കാമെന്നാണ് പ്രദേശവാസികൾ പറയുന്ന ത്. കാട്ടാനശല്യം രൂക്ഷമായതോടെ പകല്‍ സമയത്ത് കൃഷിയിടങ്ങളില്‍ ഇറങ്ങാന്‍ കര്‍ഷകര്‍ ഭയക്കുകയാണ്. മഴ പെയ്യുന്നതോടെ അടിക്കടി പ്രദേശത്ത് വൈദ്യുതിയും മൊബൈല് ‍നെറ്റ്‌വര്‍ക്കും മുടങ്ങുകയാണ്.

മലയോരത്തുനിന്ന് കര്‍ഷകരെ ആട്ടിയിറക്കാന്‍ ശ്രമം: യൂത്ത്ഫ്രണ്ട്-ജേക്കബ്

കട്ടപ്പന: എല്‍ഡിഎഫ് സര്‍ക്കാരിന്‍റെയും വനംവകുപ്പിന്‍റെയും കര്‍ഷകദ്രോഹ നടപടികള്‍ക്കെതിരേ പ്രക്ഷോഭം സംഘടിപ്പിക്കുമെന്ന് യൂത്ത് ഫ്രണ്ട്(ജേക്കബ്) സംസ്ഥാന പ്രസിഡന്‍റ് സാജന്‍ ജോസഫ്. 60 വര്‍ഷത്തിലേറെയായി വണ്ണപ്പുറം മേഖലയിലെ കര്‍ഷകരുടെ കൈവശത്തിലുള്ള ഭൂമിയിലാണ് വനംവകുപ്പ് അവകാശവാദം ഉന്നയിക്കുന്നത്. ഇപ്പോള്‍ ഇവിടെ മരം മുറിക്കണമെങ്കില്‍ വനംവകുപ്പിന് അപേക്ഷ നല്‍കി ഉദ്യോഗസ്ഥര്‍ക്ക് കൈക്കൂലി കൊടുക്കേണ്ട സ്ഥിതിയാണ്. കര്‍ഷകര്‍ മലയോരത്തുനിന്ന് ആട്ടിയിറക്കപ്പെടുന്ന അവസ്ഥഅനുവദിക്കില്ല. വന്യമൃഗങ്ങള്‍ നാട്ടിലിറങ്ങിയാല്‍ വനമേഖലയുടെ സൂക്ഷിപ്പുകാരായ വനപാലകര്‍ക്കാണ് ഉത്തരവാദിത്വം. എന്നാല്‍, ഇരകളായ കര്‍ഷകരെ പ്രതിക്കൂട്ടിലാക്കുന്ന നടപടിയാണിപ്പോള്‍ വനംവകുപ്പ് സ്വീകരിക്കുന്നത്. പ്രശ്നത്തിനു ശാശ്വത പരിഹാരമുണ്ടാകുംവരെ കര്‍ഷകരുടെ ആവശ്യങ്ങള്‍ക്കുവേണ്ടി നിലപാടെടുക്കുമെന്നു സാജന്‍ ജോസഫ് പറഞ്ഞു.

പട്ടയം നഷ്ടപ്പെട്ടവർക്ക് നിജസ്ഥിതി സർട്ടിഫിക്കറ്റ് നൽകാൻ ഉത്തരവ്

കട്ടപ്പന: സംസ്ഥാനത്ത് വിവിധ ഭൂനിയമങ്ങൾ പ്രകാരം നൽകിയ പട്ടയത്തിന്‍റെ അസൽ പകർപ്പ് നഷ്ടപ്പെട്ടവർക്ക് ഇനി ആശ്വസിക്കാം. അത്തരം കേസുകളിൽ ജില്ലാ കളക്ടർ നിജസ്ഥിതി സർട്ടിഫിക്കറ്റ് അനുവദിക്കണമെന്ന് സർക്കാർ ഉത്തരവിട്ടു. പട്ടയം നഷ്ടപ്പെട്ടു എന്ന കാരണത്താൽ നിരവധി അപേക്ഷകളാണ് സർക്കാരിനു ലഭിച്ചിട്ടുള്ളത്. അതിന്‍റെ അടിസ്ഥാനത്തിലാണ് റവന്യു വകുപ്പ് നിജസ്ഥിതി സർട്ടിഫിക്കറ്റ് നൽകാനുള്ള ഉത്തരവ് പുറപ്പെടുവിച്ചത്. പട്ടയം നഷ്ടപ്പെട്ടതു മൂലം ബാങ്കിൽനിന്ന് വായ്പയെടുക്കാനോ ഭൂമി ക്രയവിക്രയം ചെയ്യാനോ സാധിക്കാത്ത സ്ഥിതിയുണ്ടായിരുന്നു. അത്തരം പ്രശ്നങ്ങൾക്കുകൂടി പരിഹാരമാകും. താലൂക്ക് ഓഫീസ്, വില്ലേജ് ഓഫീസ് എന്നിവിടങ്ങളിലെ രജിസ്റ്ററുകളിലെ രേഖപ്പെടുത്തലുകളുടെ അടിസ്ഥാനത്തിൽ തഹസിൽദാർ ജില്ലാ കളക്ടർക്ക് കൊടുക്കുന്ന റിപ്പോർട്ടിന്‍റെ അടിസ്ഥാനത്തിലായിരിക്കും ജില്ലാ കളക്ടർ നിജസ്ഥിതി സർട്ടിഫിക്കറ്റ് അനുവദിക്കുക. 2020 ൽ സമാനമായി ഒരുത്തരവ് സർക്കാർ പുറപ്പെടുവിച്ചിരുന്നു, എങ്കിലും 1964 ലെ ചട്ടങ്ങൾ, 1995 ലെ ചട്ടങ്ങൾ, 1993 ലെ ചട്ടങ്ങൾ എന്നിങ്ങനെ മൂന്നു ഭൂപതിവു ചട്ടങ്ങൾ പ്രകാരം അനുവദിക്കപ്പെട്ട പട്ടയങ്ങൾക്കു മാത്രമായിരുന്നു ആ ഉത്തരവ് ബാധകമായിരുന്നത്. ഇപ്പോൾ പുറത്തിറക്കിയ ഉത്തരവ് പ്രകാരം 15 വ്യത്യസ്ത ചട്ടങ്ങൾ പ്രകാരം പട്ടയം അനുവദിക്കപ്പെട്ട കേസുകളിൽ നിജസ്ഥിതി സർട്ടിഫിക്കറ്റ് ലഭിക്കും. വില്ലേജ് ഓഫീസിലെ തണ്ടപ്പേർ അക്കൗണ്ടിൽ പട്ടയ കക്ഷിയുടെയും തുടർന്നുള്ള നിയമാനുസൃത കൈമാറ്റങ്ങൾ മുഖേന നിലവിലെ കൈവശക്കാരന്‍റെയോ പേരിൽ ഭൂനികുതി ഒടുക്കി വരുന്നതുമായ സാഹചര്യങ്ങളിൽ പട്ടയ ഫയൽ പ്രകാരമുള്ള ഭൂമിതന്നെയാണ് കൈവശ ഭൂമിയെന്ന് ഉറപ്പുവരുത്തി ആധികാരികത ബോധ്യപ്പെടുന്ന സംഗതികളിൽ പട്ടയം ലഭിച്ച ആളിൽ നിന്നും നിയമപ്രകാരം ഭൂമി കൈമാറ്റം ചെയ്തു ലഭിച്ച നിലവിലെ കൈവശക്കാരന്‍റെ പേരിൽ നിജസ്ഥിതി സർട്ടിഫിക്കറ്റ് അനുവദിക്കുന്നതിനാണ് ജില്ലാ കളക്ടർമാരെ ചുമതലപ്പെടുത്തിയിട്ടുള്ളത്.

കുടയത്തൂർ ആയുർവേദ ആശുപത്രിക്ക് അംഗീകാരം

കുടയത്തൂർ: പഞ്ചായത്ത് ഗവ.ആയുർവേദ ഡിസ്പെൻസറി ആയുഷ് ഹെൽത്ത് ആൻഡ് വെൽനെസ് സെന്‍ററിന് എൻഎബിഎച്ച് പുരസ്കാരം. മന്ത്രി വീണാ ജോർജ് പുരസ്കാരം നൽകി. കുടയത്തൂർ പഞ്ചായത്ത് പ്രസിഡന്‍റ് കെ.എൻ.ഷിയാസ്, സീനിയർ മെഡിക്കൽ ഓഫീസർ ഡോ.എൽ.ജ്യോതിലക്ഷ്മി, യോഗാ ഇൻസ്ട്രക്ടർ ഡോ. ചിന്നു സൂര്യൻ, ജില്ലാ പ്രോഗ്രാം മാനേജർ ഡോ. ശ്രീദർശൻ, ജില്ലാ കോ-ഓർഡിനേറ്റർ ഡോ. വിജിത എന്നിവർ ചേർന്ന് പുരസ്കാരം ഏറ്റുവാങ്ങി.

ഉദ്യോഗസ്ഥരെ നിയന്ത്രിക്കാൻ കഴിയുന്നില്ലെങ്കിൽ സർക്കാർ രാജിവയ്ക്കണം: സണ്ണി പൈമ്പിള്ളിൽ

ചെറുതോണി: വനം വകുപ്പ് ഉദ്യോഗസ്ഥരെ നിയന്ത്രിക്കാൻ സർക്കാരിന് കഴിയുന്നില്ലെങ്കിൽ രാജിവയ്ക്കുകയാണ് വേണ്ടതെന്ന് കേരളവ്യാപാരി വ്യവസായി ഏകോപന സമിതി ജില്ലാ പ്രസിഡന്‍റ് സണ്ണി പൈമ്പിള്ളിൽ. ജില്ലയിലെ വനം വകുപ്പ് ഉദ്യോഗസ്ഥർ സമാന്തര ഗവൺമെന്‍റായി പ്രവർത്തിക്കുകയാണെന്ന് അദ്ദേഹം കുറ്റപ്പെടുത്തി. വനംവകുപ്പ് ഉദ്യോഗസ്ഥർ തോന്നിയപോലെ ജനങ്ങൾക്കെതിരേ കേസെടുക്കുകയും സർക്കാർ അതിന് പിറകെ നടന്ന് കേസ് പിൻവലിക്കുകയും ചെയ്യുന്നത് സർക്കാരിനും മന്ത്രിമാർക്കും നാണക്കേടാണ്. വേടനെതിരേ എടുത്ത കേസും മാർ ജോർജ് പുന്നക്കോട്ടിലിനെതിരേ എടുത്ത കേസും മറ്റ് നിരവധി കേസുകളും പിൻവലിച്ചത് ഇതിനുദാഹരണമാണ്. ഇപ്പോൾ തൊമ്മൻകുത്ത് നാരങ്ങാനത്തു വൈദികർക്കും ഇടവകക്കാർക്കുമെതിരേ എടുത്ത കേസുകളും സർക്കാരിന് മാനക്കേടായിരിക്കയാണ്. താമസിയാതെ ഇതും പിൻവലിക്കേണ്ടിവരുമെന്നും സണ്ണി പൈമ്പിള്ളിൽ പറഞ്ഞു. നാരങ്ങാനത്തു കുരിശ് സ്ഥാപിച്ചത് കൈവശ ഭൂമിയിലാണെന്ന് തഹസിൽദാർ ജില്ലാ കളക്ടർക്കു റിപ്പോർട്ട് നൽകിക്കഴിഞ്ഞു. ഈ സാഹചര്യത്തിൽ വനം വകുപ്പ് ഉദ്യോഗസ്ഥർക്കെതിരേ നടപടി സ്വീകരിക്കുകയാണ് വേണ്ടത്. ജില്ലയിൽ പല സ്ഥലങ്ങളിലും റവന്യു ഭൂമിക്കുമേൽ വനം വകുപ്പ് അവകാശവാദം ഉന്നയിച്ചിരിക്കുന്നത് സർക്കാരും ജില്ലയിലെ ഭരണകക്ഷി നേതാക്കളും ഗൗരവത്തോടെ കാണണം. സുര്യനെല്ലി, സിങ്കുകണ്ടം ഉൾപ്പെടെയുള്ള പ്രദേശങ്ങൾ ഇതിനുദാഹരണമാണ്. ഇക്കാര്യത്തിൽ സർക്കാരും ജില്ലാ ഭരണകൂടവും വ്യക്തമായ നിലപാട് സ്വീകരിക്കണമെന്നും ഏകോപന സമിതി ജില്ലാ കമ്മിറ്റി ആവശ്യപ്പെട്ടു.

ഇടുക്കിയിലെ റോഡുകൾക്ക് 107 കോടി: മന്ത്രി

ചെറുതോണി: ഇടുക്കി നിയോജക മണ്ഡലത്തിലെ രണ്ടു പ്രധാന റോഡുകൾ ബിഎം ആന്‍ഡ് ബിസി നിലവാരത്തിലേക്ക് ഉയർത്തുന്നതിനായി 107.07 കോടി രൂപ കിഫ്ബി മുഖേന അനുവദിച്ചതായി മന്ത്രി റോഷി അഗസ്റ്റിൻ അറിയിച്ചു. ചേലച്ചുവട്-വണ്ണപ്പുറം റോഡിന് 52.01 കോടിയും, നത്തുകല്ല്-അടിമാലി റോഡിന് 55.06 കോടിരൂപയുമാണ് അനുവദിച്ചത്. കിഫ്ബിയുടെ കീഴിലുള്ള കേരള റോഡ് ഫണ്ട് ബോർഡ് (കെആർഎഫ്ബി) മുഖേനയാണ് നിർമാണം നടത്തുന്നത്.മുഖ്യമന്ത്രിയുടെ അധ്യക്ഷതയിൽ ചേർന്ന കിഫ്ബി ബോർഡ് യോഗത്തിലാണ് ഇതു സംബന്ധിച്ച തീരുമാനമായത്. പൊതുമരാമത്ത് വകുപ്പിനാകും നിർമാണച്ചുമതലയെന്ന് മന്ത്രി അറിയിച്ചു. അടിമാലി-നത്തുകല്ല് റോഡ്, ചേലച്ചുവട്-വണ്ണപ്പുറം റോഡുകളുടെ വികസനത്തിനായി ഭൂമി ഏറ്റെുടക്കുന്നതിന് നേരത്തേ 6.43 കോടി രൂപ അനുവദിച്ചിരുന്നു.റോഡുകൾ വീതികൂട്ടേണ്ടിവരുന്പോൾ ഭൂമി നഷ്ടപ്പെടുന്നവരുടേയും നീക്കം ചെയ്യേണ്ടിവരുന്ന കെട്ടിട ഉടമസ്ഥർക്കും നഷ്ടം നൽകുന്നതിനായാണ് തുക അനുവദിച്ചിട്ടുള്ളത്. ഇടുക്കിയെ ലോറേഞ്ചുമായി ബന്ധിപ്പിക്കുന്ന പ്രധാന റോഡായ ചേലച്ചുവട്-വണ്ണപ്പുറം റോഡ് പൂർത്തിയാക്കുന്നതിലൂടെ ഹൈറേഞ്ച് മേഖലയിൽ നിന്നും തൊടുപുഴ, മൂവാറ്റുപുഴ, നെടുന്പാശേരി വിമാനത്താവളം ഉൾപ്പെടെയുള്ള മേഖലകളിലേക്ക് യാത്ര സുഗമമാകും. അടിമാലി-നത്തുകല്ല് റോഡ് കട്ടപ്പന-ഇരട്ടയാർ വഴി അടിമാലിയിലേക്ക് സുഗമമായ പാതയ്ക്കു വഴിയൊരുക്കും. കിഫ്ബി റോഡുകളുടെ നിബന്ധനയനുസരിച്ച് റോഡിന് ആവശ്യമായ വീതിയിൽ നിർമിക്കുന്നതിനായി സ്ഥലം ഏറ്റെടുക്കുന്നതിന് തുക അനുവദിച്ചിരുന്നു. എന്നാൽ, റീസർവേ നടപടികൾ പൂർത്തിയാക്കാത്തതും സ്ഥലം ഉടമകൾ സ്ഥലം വിട്ടുനൽക്കുന്നതിന് കാലതാമസം നേരിടുന്നത് ഒഴിവാക്കുന്നതിനായി നിലവിലുള്ള റോഡ് കൂടുതൽ സൗകര്യപ്രദമായും ആവശ്യ ഇടങ്ങളിൽ മാത്രം വീതി കൂട്ടിയും നിർമിക്കുന്നതിന് മന്ത്രി റോഷി അഗസ്റ്റിൻ നിർദേശം നൽകുകയായിരുന്നു. ഇതേത്തുടർന്ന് കിഫ്ബി നടപടിക്രമങ്ങൾ വേഗത്തിലാക്കുകയും ധനാനുമതി നൽകുകയുമായിരുന്നു.

വിശ്വാസം ജീവിതസാക്ഷ്യമാണ്: മാര്‍ ജോസ് പുളിക്കല്‍

കാഞ്ഞിരപ്പള്ളി: വിശ്വാസം ജീവിതസാക്ഷ്യമാണെന്നും അനുദിന ജീവിത സാഹചര്യങ്ങളിലാണ് വിശ്വാസം തെളിയിക്കപ്പെടുന്നതെന്നും കാഞ്ഞിരപ്പള്ളി രൂപതാധ്യക്ഷന്‍ മാര്‍ ജോസ് പുളിക്കല്‍. രൂപത വിശ്വാസജീവിത പരിശീലനകേന്ദ്രത്തിന്‍റെയും ചെറുപുഷ്പ മിഷന്‍ ലീഗിന്‍റെയും വാര്‍ഷികാഘോഷം കാഞ്ഞിരപ്പള്ളി പാസ്റ്ററല്‍ സെന്‍ററില്‍ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ജീവിതത്തിലെ പ്രശ്‌നങ്ങളിലും പ്രതിസന്ധികളിലും തളരാതെ മുന്നേറാന്‍ വിശ്വാസം അനിവാര്യമാണെന്നും മാര്‍ ജോസ് പുളിക്കല്‍ പറഞ്ഞു. രൂപത പ്രോട്ടോസിഞ്ചെല്ലൂസ് റവ.ഡോ. ജോസഫ് വെള്ളമറ്റം അധ്യക്ഷത വഹിച്ചു. സിഞ്ചെല്ലൂസ് ഫാ. സെബാസ്റ്റ്യന്‍ കൊല്ലംകുന്നേല്‍, ഫാ. വര്‍ഗീസ് കൊച്ചുപറമ്പില്‍ എന്നിവര്‍ പ്രസംഗിച്ചു. മതാധ്യാപനരംഗത്ത് 50 വര്‍ഷങ്ങള്‍ പൂര്‍ത്തിയാക്കിയ നാല് അധ്യാപകര്‍ക്കും 25 വര്‍ഷങ്ങള്‍ പൂര്‍ത്തിയാക്കിയ 29 അധ്യാപകര്‍ക്കും പുരസ്‌കാരങ്ങള്‍ നല്‍കി. വിവിധ മേഖലകളില്‍ മികവ് തെളിയിച്ച സണ്‍ഡേ സ്‌കൂളുകളെയും കുട്ടികളെയും ആദരിച്ചു. കഴിഞ്ഞ 12 വര്‍ഷവും മുടങ്ങാതെ എല്ലാ ഞായറാഴ്ചകളിലും വിശ്വാസജീവിത പരിശീലനത്തില്‍ പങ്കെടുത്ത 25 കുട്ടികള്‍ക്ക് പ്രത്യേക പുരസ്‌ക്കാരങ്ങള്‍ നൽകി ആദരിച്ചു. തുടര്‍ന്ന് വിശ്വാസജീവിതപരിശീലനകേന്ദ്രം രൂപത ഡയറക്ടര്‍ ഫാ. തോമസ് വാളന്മനാലിന്‍റെ നേതൃത്വത്തില്‍ പ്രധാനാധ്യാപകര്‍, സ്റ്റാഫ് സെക്രട്ടറിമാര്‍, ഫൊറോന സെക്രട്ടറിമാര്‍ എന്നിവരുടെ സമ്മേളനവും നടത്തി. അടുത്ത അധ്യയനവര്‍ഷത്തെ കര്‍മപദ്ധതികളുടെ വിശദീകരണവും ചര്‍ച്ചകളും നടത്തി.

റവ. ഡോ. തോമസ് വെങ്ങാലുവക്കേൽ പടിയിറങ്ങുന്നു

മൂലമറ്റം: സെന്‍റ് ജോസഫ്സ് ഓട്ടോണോമസ് കോളജ് പ്രിൻസിപ്പൽ റവ. ഡോ. തോമസ് വെങ്ങാലുവക്കേൽ സിഎംഐ പടിയിറങ്ങുന്നു. എംജി യൂണിവഴ്സിറ്റി പ്രഫസറും ഗവേഷണ മാർഗദർശിയുമായ അദ്ദേഹത്തിനു കീഴിൽ ഒട്ടേറെ വിദ്യാർഥികൾ ഗവേഷണം നടത്തിവരുന്നുണ്ട്. സയൻസ്, സൈക്കോളജി, കായിക വിഭാഗം അധ്യാപകൻ, ബർസാർ, ലോക്കൽ മാനേജർ, സിഎംഐ കോട്ടയം പ്രൊവിൻസ് കോർപറേറ്റ് മാനേജർ എന്നീ നിലകളിൽ നേരത്തേ സേവനം അനുഷ്ഠിച്ചിട്ടുണ്ട്. എംപിഎഡ്, എംഎസ്‌സി, ഫിസിയോളജി, പിഎച്ച്ഡി ബിരുദധാരിയാണ് റവ. ഡോ.തോമസ് വെങ്ങാലുവക്കേൽ. സെന്‍റ് ജോസഫ്സ് അക്കാദമി ഫോർ ഹയർ എഡ്യൂക്കേഷൻ സ്ഥാപക ഡയറക്ടറായിരുന്നു. 55 അന്തർദേശീയ ജേർണൽ പബ്ലിക്കേഷനുകൾ, 45 ബുക്ക് ചാപ്റ്ററുകൾ, 10 അന്തർദേശീയ പ്രബന്ധങ്ങൾ എന്നിവയുടെ രചയിതാവാണ്. 2018 മുതൽ ചെന്നൈ സ്പോർട്സ് യൂണിവഴ്സിറ്റി ഡോക്ടറൽ കമ്മിറ്റി മെംബർ, വിവിധ യൂണിവഴ്സിറ്റികളുടെ അസിസ്റ്റന്‍റ് പ്രഫസർ, അസോസിയേറ്റ് പ്രഫസർ, പ്രഫസർ, പ്രിൻസിപ്പൽ സെലക‌്ഷൻ കമ്മിറ്റി മെംബർ, എംജി യൂണിവേഴ്സിറ്റി ഫിസിക്കൽ എഡ്യൂക്കേഷൻ വിഭാഗം ബിപിഎസ്, എംപിഇഎസ്, ബിപിഎഡ്, എംഫിൽ പ്രോഗ്രാമുകളുടെ സിലബസ് കമ്മിറ്റിയംഗം, സ്പോർട്സ് സയൻസ് ബോർഡ് ഓഫ് സ്റ്റഡീസ് എന്നിവയിലും പ്രവർത്തിച്ചിട്ടുണ്ട്. ഇദ്ദേഹത്തിന്‍റെ പരിശ്രമഫലമായാണ് മൂലമറ്റം കോളജിന് ഓട്ടോണോമസ് പദവി ലഭിച്ചത്. ചീനിക്കുഴി സെന്‍റ് മേരീസ് പള്ളി വികാരിയായാണ് പുതിയ നിയമനം.

വാർഷിക പൊതുയോഗം

തങ്കമണി: വ്യാപാരി വ്യവസായി ഏകോപനസമിതി തങ്കമണി യൂണിറ്റിന്‍റെ വാർഷിക പൊതുയോഗം ഏകോപന സമിതി ജില്ലാ പ്രസിഡന്‍റ് സണ്ണി പൈന്പള്ളി ഉദ്ഘാടനം ചെയ്തു. യൂണിറ്റ് പ്രസിഡന്‍റ് കെ.വി. ആന്‍റണി അധ്യക്ഷത വഹിച്ചു. സെക്രട്ടറി കെ.കെ. ജയ്മോൻ, ജില്ലാ സെക്രട്ടറി ജോസ് കുഴിക്കണ്ടം, മണ്ഡലം സെക്രട്ടറി സാജു പട്ടരുമഠം തുടങ്ങിയവർ പ്രസംഗിച്ചു. കട്ടപ്പന: കട്ടപ്പന മർച്ചന്‍റ്സ് അസോസിയേഷൻ വാർഷിക പൊതുയോഗവും കുടുംബ സുരക്ഷാനിധി വിതരണവും ഇന്നു വൈകുന്നേരം അഞ്ചിന് കട്ടപ്പന കല്ലറക്കൽ റസിഡൻസിയിൽ നടക്കുമെന്ന് ഭാരവാഹികൾ അറിയിച്ചു. കെവിവിഇ എസ് ജില്ലാ പ്രസിഡന്‍റ് സണ്ണി പൈന്പിള്ളിൽ ഉദ്ഘാടനം ചെയ്യും. കട്ടപ്പന മർച്ചന്‍റ്സ് അസോസിയേഷൻ പ്രസിഡന്‍റ് സാജൻ ജോർജ് അധ്യക്ഷത വഹിക്കും. മരണപ്പെട്ട വ്യാപാരിയുടെ കുടുംബത്തിന് ആറ് ലക്ഷം രൂപ നൽകും. പദ്ധതി ജില്ലാ ചെയർമാൻ ഡയസ് പുല്ലൻ വിശദീകരിക്കും. എംജി യൂണിവേഴ്സിറ്റി പരീക്ഷയിൽ റാങ്ക് ജേതാവായ നൂപ അനൂപിനെയും എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയവരെയും അനുമോദിക്കും. 90 വയസ് കഴിഞ്ഞ അംഗങ്ങളെയും ചടങ്ങിൽ ആദരിക്കും. ജില്ലാ വർക്കിംഗ് പ്രസിഡന്‍റ് കെ.ആർ. വിനോദ്,അഡ്വ. എം. കെ. തോമസ്, ഷിജോ തടത്തിൽ, ജോഷി കുട്ടട, കെ. പി. ബഷീർ, സാജു പട്ടരുമഠം , മുംതാസ് ഇബ്രാഹിം, എ.കെ. ഷിയാസ്, സിജോ മോൻ ജോസ് എന്നിവർ പ്രസംഗിക്കും.

ജില്ലാ പ്രവേശനോത്സവം തൊടുപുഴയിൽ

തൊടുപുഴ: പുതിയ അധ്യയനവർഷത്തിന് നാളെ വർണാഭമായ തുടക്കം. മഴയുടെ ആശങ്ക നില നിൽക്കുന്നുണ്ടെങ്കിലും കുട്ടികളെ വരവേൽക്കാനുള്ള തയാറെടുപ്പിലാണ് വിദ്യാഭ്യാസ വകുപ്പും സ്കൂൾ അധികൃതരും പിടിഎ കമ്മിറ്റികളും. കോരിച്ചൊരിയുന്ന മഴയും കാറ്റും ജില്ലയിൽ വ്യാപകമായിരുന്നെങ്കിലും രണ്ടു ദിവസമായി മഴയുടെ ശക്തി കുറഞ്ഞു നിൽക്കുന്നത് ആശ്വാസമായിട്ടുണ്ട്. ആദ്യദിനം ആഘോഷമായി വിദ്യാർഥികളെ സ്കൂളുകളിലേക്ക് ആനയിക്കും. ഇതിനു മുന്നോടിയായി ഭൂരിഭാഗം സ്കൂളുകളുടെയും പരിസരം വൃത്തിയാക്കുകയും ചുമരുകൾ പെയിന്‍റടിച്ച് മനോഹരമാക്കുകയും ചെയ്തിട്ടുണ്ട്. ഇതു സംബന്ധിച്ച് എല്ലാ സ്കൂൾ അധികൃതർക്കും വിദ്യാഭ്യാസ വകുപ്പ് പ്രത്യേക മാർഗ നിർദേശം നൽകിയിരുന്നു. താളമേളങ്ങളുടെ അകന്പടിയോടെയായിരിക്കും പല സ്കൂളുകളിലും പ്രവേശനോത്സവം സംഘടിപ്പിക്കുക. പുതുതായി എത്തുന്ന കുരുന്നുകൾക്ക് സമ്മാനങ്ങളും നൽകും. പുത്തനുടുപ്പും പുസ്തകവും കുടയുമൊക്കെയായി വിദ്യാലയങ്ങളിലെത്താനുള്ള തയാറെടുപ്പിലാണ് കുട്ടികൾ. പ്രതികൂല കാലാവസ്ഥയായിട്ടും സ്കൂൾ വിപണിയിൽ ഈ ദിവസങ്ങളിൽ വലിയ തിരക്കാണ് അനുഭവപ്പെട്ടത്. സ്കൂൾ തുറക്കുന്നതിനു മുന്നോടിയായി പരിസര ശുചീകരണം, അറ്റകുറ്റപ്പണികൾ, അപകടാവസ്ഥയിലുള്ള മരങ്ങൾ, ശിഖരങ്ങൾ എന്നിവ മുറിച്ചുമാറ്റുന്ന ജോലികൾ, ശുചിമുറി സൗകര്യം ഉറപ്പാക്കൽ, ചുറ്റുമതിൽ നിർമാണം, സ്കൂൾ വാഹനങ്ങളുടെ ഫിറ്റ്നസ് പരിശോധന തുടങ്ങിയവ പൂർത്തിയാക്കി. ജില്ലാതല പ്രവേശനോത്സവം നാളെ രാവിലെ 9.30ന് തൊടുപുഴ സെന്‍റ് സെബാസ്റ്റ്യൻസ് യുപി സ്കൂളിൽ മന്ത്രി റോഷി അഗസ്റ്റിൻ ഉദ്ഘാടനം ചെയ്യും. പി.ജെ.ജോസഫ് എംഎൽഎ അധ്യക്ഷത വഹിക്കും. ഡീൻ കുര്യാക്കോസ് എംപി മുഖ്യപ്രഭാഷണം നടത്തും. പഠനോപകരണ വിതരണം ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാക്കുന്നേലും കളി ഒരു ലഹരി പദ്ധതി ഉദ്ഘാടനം മുനിസിപ്പൽ ചെയർമാൻ കെ. ദീപക്കും നിർവഹിക്കും. സ്കൂൾ മാനേജർ ഫാ.ജോസ് പൊതൂർ അനുഗ്രഹ പ്രഭാഷണം നടത്തും. ജില്ലാ കളക്ടർ വി.വിഗ്‌നേശ്വരി സന്ദേശം നൽകും. എംഎൽമാരായ വാഴൂർ സോമൻ, എം.എം. മണി, ഡി. രാജ, ജില്ലാ പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ കെ.ജി.സത്യൻ, മുനിസിപ്പൽ കൗണ്‍സിലർമാരായ പി.ജി. രാജശേഖരൻ, ജോസ് മഠത്തിൽ എന്നിവർ പ്രസംഗിക്കും. ബഡ്സ് സ്കൂൾ പ്രവേശനോത്സവവും നാളെ ഇടുക്കി: ബുദ്ധിപരമായ വെല്ലുവിളികൾ നേരിടുന്ന കുട്ടികൾക്കായുള്ള ബഡ്സ് സ്കൂളുകളിൽ നാളെ പ്രവേശനോത്സവം നടക്കും. ജില്ലയിൽ നാല് ബഡ്സ് സ്ഥാപനങ്ങളിലായി 119 കുട്ടികൾ പഠനം നടത്തുന്നുണ്ട്. മറ്റു വിദ്യാലയങ്ങളിലെപോലെ ഈ സ്ഥാപനങ്ങളിലും നാളെ വർണാഭമായ പ്രവേശനോത്സവം സംഘടിപ്പിക്കും.വിദ്യാഭ്യാസ സ്ഥാപനങ്ങൾ അലങ്കരിക്കുകയും കുട്ടികളെ മധുരം നൽകി സ്വീകരിക്കുകയും ചെയ്യും. കുട്ടികളുടെ കലാപരിപാടികളും അരങ്ങേറും.

ജില്ലയിലെ ആദ്യ സ്മാർട്ട് കൃഷിഭവൻ വണ്ണപ്പുറത്ത്

തൊടുപുഴ: ജില്ലയിലെ ആദ്യ സ്മാർട്ട് കൃഷിഭവൻ വണ്ണപ്പുറത്ത് പ്രവർത്തനസജ്ജമായി. സംസ്ഥാന സർക്കാർ നബാർഡിന്‍റെ ധനസഹായത്തോടെ പൂർത്തിയാക്കിയ പദ്ധതി വിത്തിൽനിന്ന് വിപണിയിലേക്ക് ഒരു കുടക്കീഴിൽ എല്ലാ സേവനങ്ങളും എന്ന ആശയമാണ് ലക്ഷ്യമിടുന്നത്. ആധുനിക സൗകര്യങ്ങളുള്ള സ്മാർട്ട് കൃഷിഭവൻ കാർഷിക സേവനങ്ങൾക്കായി രൂപകൽപ്പന ചെയ്തതാണ്. അന്പതോളം കർഷകരെ ഉൾക്കൊള്ളാൻ കഴിയുന്ന ട്രെയിനിംഗ് ഹാൾ, കാർഷിക ഉത്പന്നങ്ങൾ നേരിട്ട് വിപണനം ചെയ്യുന്ന ഇക്കോ ഷോപ്പ്, കാർഷിക വിളകളെ ബാധിക്കുന്ന രോഗങ്ങൾ തിരിച്ചറിയാനും പ്രതിരോധ നടപടികൾ ലഭ്യമാക്കാനും സജ്ജമാക്കിയ പ്ലാന്‍റ് ഹെൽത്ത് ക്ലിനിക്ക്, ജൈവ നിയന്ത്രണ ഉപാധികൾ വിതരണം ചെയ്യുന്ന ബയോ ഫാർമസി, കർഷകർക്ക് അപേക്ഷകൾ നൽകാനും വിവിധ രജിസ്ട്രേഷൻ നടപടികൾ സുഗമമായി നടത്താനുമായി ഒരുക്കിയ ഫ്രണ്ട് ഓഫീസ് എന്നിവയാണ് കൃഷിഭവനിലെ പ്രധാന സൗകര്യങ്ങൾ. അടുത്ത ദിവസംതന്നെ സ്മാർട്ട് കൃഷിഭവന്‍റെ ഉദ്ഘാടനം നടത്തി കർഷകർക്കായി തുറന്നുനൽകുമെന്ന് അധികൃതർ അറിയിച്ചു.

കാറ്റിലും മഴയിലും നടപ്പാലം തകർന്നു; ഏത്തവാഴത്തോട്ടം നശിച്ചു

ചെറുതോണി: ശക്തമായ മഴയിൽ നടപ്പാലങ്ങൾ തകർന്ന് 20 കുടുംബങ്ങൾ ഒറ്റപ്പെട്ടു. കാമാക്ഷി പഞ്ചായത്തിലെ പുത്തൻപുരയിൽപ്പടി -കരിമുണ്ടപ്പടി റോഡിലെ നടപ്പാലമാണ് കഴിഞ്ഞ ദിവസമുണ്ടായ കനത്ത മഴയിൽ തകർന്നത്. ഇതോടെ പത്തോളം കുടുംബങ്ങൾ ഒറ്റപ്പെട്ടു. പാറക്കടവ് തോടിന് കുറുകെ വർഷങ്ങൾക്ക് മുമ്പ് പഞ്ചായത്ത് നിർമിച്ച നടപ്പാലവും തകർന്നു. പാലത്തിൽ രൂപപ്പെട്ട ഗർത്തത്തിൽ വീണ് പ്രദേശവാസികളായ രണ്ട് വയോധികർക്ക് കഴിഞ്ഞ വ്യാഴാഴ്ച രാവിലെ പരിക്കേറ്റിരുന്നു. ശക്തമായ കാറ്റിലും മഴയിലും തോപ്രാംകുടി ദൈവംമേട് അയ്യനോലിൽ ദീപുവിന്‍റെ ഒരേക്കറിലധികം സ്ഥലത്ത് കൃഷി ചെയ്തിരുന്ന വിളവെടുക്കാറായ രണ്ടാ യിരം ഏത്തവാഴ നശിച്ചു. ഒന്നര മാസം കൂടി കഴിഞ്ഞാൽ വാഴക്കുല വെട്ടിയെടുക്കാറാകുമായിരുന്നു. ബാങ്കിൽ നിന്നും വ്യക്തികളിൽ നിന്നും നാല് ലക്ഷത്തോളം രൂപ വായ്പ എടുത്താണ് കൃഷി ചെയ്തത്. 2023 ലെ വാത്തിക്കുടി കൃഷിഭവനിലെ മികച്ച യുവകർഷകനുള്ള പുരസ്കാരം നേടിയ ആളായിരുന്നു ദീപു. വാഴത്തോട്ടം കാറ്റിൽ തകർന്നു പോയതോടെ എന്തു ചെയ്യണമെന്നറിയാതെ പകച്ചു നിൽക്കുകയാണ് ഈ യുവകർഷകൻ.

കാറും ആംബുലൻസും കൂട്ടിയിടിച്ചു നാലുപേർക്ക് പരിക്ക്

പീരുമേട്: പീരുമേട് ഐഎച്ച് ആർഡി കോളജിന് സമീപം കാർ ആംബുലൻസിൽ ഇടിച്ച് അപകടം. കാറിലുണ്ടായിരുന്ന നാലുപേർക്ക് പരിക്കേറ്റു. ഇന്നലെ രാവിലെ ആയിരുന്നു സംഭവം. ഏറണാകുളം തൃപ്പുണിത്തുറയിൽനിന്ന് തമിഴ്നാട്ടിലെ പൂശാലംപെട്ടിയിലേക്ക് രോഗിയുമായി പോയ ആംബുലൻസ് ഓട്ടോറിക്ഷയെ മറികടക്കുന്നതിനിടെയാണ് അപകടം. ഇടിയുടെ ആഘാതത്തിൽ ആംബുലൻസ് ഓട്ടോറിക്ഷയിലും തട്ടി. ഓട്ടോറിക്ഷയിലെ യാത്രക്കാരായ കാഞ്ഞിരപ്പള്ളി തമ്പലക്കാട് സ്വദേശികളായ അമ്പിളി (15), വീണ (25) എന്നിവർക്കും പരിക്കേറ്റു. ഇവർക്ക് പ്രഥമ ശുശ്രൂഷനൽകിയ ശേഷം കാഞ്ഞിരപ്പള്ളി താലൂക്ക് ആശുപത്രിയിൽ പ്രവേശിപ്പിച്ചു. കാർ യാത്രികരെ മുണ്ടക്കയം മെഡിക്കൽ ട്രസ്റ്റ് ആശുപത്രിയിൽ പ്രവേശിപ്പിച്ചു.

അരിയില്ലെങ്കിലും ഉച്ചഭക്ഷണം നൽകണമെന്ന നിർദേശം അംഗീകരിക്കില്ല: കെപിഎസ്ടിഎ

തൊടുപുഴ: എഫ്സിഐ ഗോഡൗണിലെ തൊഴിൽത്തർക്കം മൂലം അരി വിതരണം തടസപ്പെട്ട സാഹചര്യത്തിൽ സ്കൂൾ തുറക്കുന്ന ദിവസം മുതൽ ഉച്ച ഭക്ഷണം നൽകണമെന്ന സർക്കാർ നിർദേശം അംഗീകരിക്കില്ലെന്ന് കെപിഎസ്ടിഎ ജില്ലാ കമ്മിറ്റി. കഴിഞ്ഞവർഷത്തെ ഉച്ചഭക്ഷണത്തിന്‍റെ തുക പോലും പൂർണമായി നൽകിയിട്ടില്ല. സർക്കാർ അനാസ്ഥ മൂലം അരിവിതരണം തടസപ്പെട്ട സാഹചര്യത്തിൽ പ്രഥമാധ്യാപകരുടെ ഉത്തരവാദിത്വത്തിൽ ഉച്ചഭക്ഷണം നടത്തണമെന്ന നിർദേശം അംഗീകരിക്കില്ല. എത്രയും വേഗം സ്കൂളുകളിൽ അരി എത്തിച്ചു നൽകുന്നതിന് വേണ്ട ക്രമീകരണം ഉണ്ടാകണമെന്ന് ജില്ലാ കമ്മിറ്റി ആവശ്യപ്പെട്ടു. ജില്ലാ പ്രസിഡന്‍റ് ജോബിൻ കളത്തിക്കാട്ടിൽ അധ്യക്ഷത വഹിച്ചു. സംസ്ഥാന സെക്രട്ടറി പി.എം. നാസർ, സുനിൽ ടി. തോമസ്, ഷിന്‍റോ ജോർജ് , ബിജോയ് മാത്യു, ജോർജ് ജേക്കബ്, വി.കെ. ആറ്റ്‌ലി, സജി മാത്യു, എം.വി. ജോർജുകുട്ടി, ടി. ശിവകുമാർ എന്നിവർ പ്രസംഗിച്ചു.

സുരക്ഷാ മുന്നറിയിപ്പുമായി വൈദ്യുതി ബോർഡ്

തൊടുപുഴ: കാലവർഷത്തോടനുബന്ധിച്ച് വൈദ്യുതി അപകടങ്ങളിൽപ്പെടാതിരിക്കാൻ പ്രത്യേക ശ്രദ്ധ വേണമെന്ന് കെഎസ്ഇബി മുന്നറിയിപ്പ് നൽകി. ലൈനുകളോട് തൊട്ടുകിടക്കുന്ന മരച്ചില്ലകൾ മുറിച്ചുമാറ്റാനും സർവീസ് വയർ, സ്റ്റേ വയർ, വൈദ്യുതി പോസ്റ്റുകൾ എന്നിവയെ സ്പർശിക്കാതിരിക്കാനും ശ്രദ്ധിക്കണം. ലോഹഷീറ്റിന് മുകളിൽ സർവീസ് വയർ കിടക്കുകയോ, ലോഹത്തൂണിൽ തട്ടിക്കിടക്കുകയോ ചെയ്താൽ വൈദ്യുതാഘാതം ഏൽക്കാൻ സാധ്യതയുള്ളതിനാൽ ഇത്തരം കാര്യങ്ങൾ ശ്രദ്ധയിൽപ്പെട്ടാൽ കെഎസ്ഇബി സെക്ഷൻ ഓഫീസിൽ അറിയിക്കണം. വൈദ്യുതി ലൈനുകളോട് തൊട്ടുകിടക്കുന്ന മരച്ചില്ലകൾ മുറിച്ചുമാറ്റാനും ലൈനിൽ തട്ടാൻ സാധ്യതയുള്ള വൃക്ഷത്തലപ്പുകൾ വെട്ടിമാറ്റാനും കഐസ്ഇബിയുമായി ജനങ്ങൾ സഹകരിക്കണം. ലൈനിനോടനുബന്ധിച്ച് നിൽക്കുന്ന മരങ്ങൾ വെട്ടിമാറ്റുന്നതിനായി ലൈൻ ഓഫ് ചെയ്യുന്നതിന് സെക‌്ഷൻ ഓഫീസിനെ സമീപിക്കാം. മഴയുള്ള സമയത്ത് ലൈനിനു സമീപത്തോ ലൈനിൽ തൊട്ടുകിടക്കുന്നതോ ആയ മരങ്ങളിൽ സ്പർശിക്കരുത്. ഉപഭോക്താക്കൾക്കും പൊതുജനങ്ങൾക്കും വൈദ്യുതി സുരക്ഷയുമായി ബന്ധപ്പെട്ട് നിർദേശങ്ങളോ ആവശ്യങ്ങളോ ഉണ്ടെങ്കിൽ തൊട്ടടുത്തുള്ള സെക‌്ഷൻ ഓഫീസിൽ അറിയിക്കുകയോ 1912ൽ വിളിക്കുകയോ ചെയ്യുക. 9496001912 എന്ന നന്പരിൽ വാട്സ്ആപ്പിലും അറിയിക്കാം. കെഎസ്ഇബിയുടെ എമർജൻസി നന്പരായ 9496010101 ലേക്കും വാട്സ് ആപ്പ് സന്ദേശമയയ്ക്കാം. അപകടസാധ്യതയുള്ള പോസ്റ്റ് ലൈനിന്‍റെ ചിത്രത്തിനൊപ്പം കൃത്യമായ സ്ഥലം, പോസ്റ്റ് നന്പർ, സെക‌്ഷൻ ഓഫീസിന്‍റെ പേര്, ജില്ല, വിവരം അറിയിക്കുന്നയാളുടെ പേര്, ഫോണ്‍ നന്പർ തുടങ്ങിയ വിവരങ്ങൾ സന്ദേശത്തിൽ ഉൾപ്പെടുത്തണം.

കനത്തമഴയിൽ സംരക്ഷണ ഭിത്തിയിടിഞ്ഞ് വീട് അപകടാവസ്ഥയിൽ

ചെറുതോണി: കുടിവെള്ള പദ്ധതിക്കായി നിർമിച്ച കുഴി വീടിന് അപകടക്കുഴിയായി. കനത്ത മഴയിൽ കരിമ്പൻ മങ്ങാട്ടിൽ പാച്ചന്‍റെ വീടാണ് മണ്ണിടിഞ്ഞ് അപകടത്തിലായിരിക്കുന്നത്. ഏതാനും മാസം മുൻപ് ജപ്പാൻ കുടിവെള്ള പദ്ധതിയുടെ ഭാഗമായി വീടിനു മുന്നിലൂടെ പൈപ്പിടാൻ കുഴിയെടുത്തിരുന്നു. ഇവിടെ മണ്ണിട്ടുമൂടി സംരക്ഷണ ഭിത്തി കെട്ടിക്കൊടുക്കണമെന്നാവശ്യപ്പെട്ടെങ്കിലും അധികൃതർ തയാറായില്ല. കഴിഞ്ഞദിവസമുണ്ടായ കനത്ത മഴയിൽ പൈപ്പിടാൻ നിർമിച്ച കുഴിയിൽ വെള്ളം കെട്ടിനിന്ന് വീടിന്‍റെ മുറ്റമുൾപ്പെടെ ഇടിഞ്ഞു വീഴുകയായിരുന്നു. ഇതോടെ വീട് അപകടത്തിലായിരിക്കയാണ്.

വനംവകുപ്പ് സമ്മതിക്കില്ല: പണിതിട്ടും പണിതിട്ടും വെളിച്ചമെത്തിക്കാന്‍ കഴിയാതെ കെഎസ്ഇബി

രാജാക്കാട്: ശക്തമായ മഴയിലും കാറ്റിലും നിരവധി മരങ്ങൾ കടപുഴകി വീണ് രാജാക്കാട് പൊന്മുടി റൂട്ടില്‍ വൈദ്യുത പോസ്റ്റുകളും ലൈനുകളും തകര്‍ത്ത് നിലംപൊത്തി. അപകട ഭീഷണി ഉയര്‍ത്തി നില്‍ക്കുന്ന മരങ്ങള്‍ മുറിച്ച് നീക്കണമെന്ന ആവശ്യവുമായി പൊതു പ്രവര്‍ത്തകര്‍ രംഗത്തെത്തിയിട്ടും വനം വകുപ്പ് മരങ്ങള്‍ മുറിക്കാന്‍ തയാറായിട്ടില്ല. രാജാക്കാട് പൊന്മുടി റൂട്ടില്‍ ചേലച്ചുവട് മുതൽ പൊന്മുടി ഡാം വരെയാണ് മണ്‍ തിട്ടകള്‍ക്ക് മുകളില്‍ അപകടഭീഷണി ഉയര്‍ത്തി വന്‍മരങ്ങള്‍ നില്‍ക്കുന്നത്. കാലവര്‍ഷം ആരംഭിക്കുന്നതിന് മുമ്പ് ഇത്തരം മരങ്ങള്‍ ബന്ധപ്പെട്ട വകുപ്പുകള്‍ മുറിച്ച് മാറ്റണമെന്ന ജില്ലാ കളക്ടറുടെ ഉത്തരവും വന്നിരുന്നു. ഇതേത്തുടര്‍‍ന്നാണ് കഴിഞ്ഞ ദിവസങ്ങളില്‍ ശക്തമായി പെയ്ത മഴയില്‍ മണ്‍ തിട്ടകള്‍ക്ക് മുകളില്‍ മണ്ണൊലിച്ച് പോയി വേരുകള്‍ തള്ളിനിന്ന മരങ്ങൾ റോഡിലേക്ക് പതിച്ചത്. ഇതോടെ നിരവധി വൈദ്യുത പോസ്റ്റുകളും ലൈനുകളും തകര്‍ന്നു. രണ്ട് ദിവസമായി കെഎസ്ഇബി ഉദ്യോഗസ്ഥര്‍ കിണഞ്ഞ് പരിശ്രമിച്ചിട്ടും ഇപ്പോഴും വൈദ്യുതി ബന്ധം പൂര്‍ണമായി പുനഃസ്ഥാപിക്കാന്‍ കഴിഞ്ഞിട്ടില്ല. പൊന്മുടിയില്‍ മാത്രമല്ല രാജാക്കാട് സെക്‌ഷന്‍റെ കീഴില്‍വരുന്ന വിവിധ പ്രദേശങ്ങളിൽ നിരവധി വൈദ്യുത പോസ്റ്റുകളും തകര്‍ന്നിട്ടുണ്ട്. കഴിഞ്ഞ കുറച്ച് ദിവസങ്ങളായി വിശ്രമമില്ലാതെ സമയവും കാലവും നോക്കാതെ വൈദ്യുതി ബന്ധം പുനഃസ്ഥാപിക്കാനുള്ള പരിശ്രമത്തിലാണ് കെഎസ്ഇബി ജീവനക്കാര്‍. പലയിടങ്ങളിലും ഇപ്പോഴും പൂര്‍ണമായി വൈദ്യുതി എത്തിക്കാന്‍ കഴിഞ്ഞിട്ടില്ല.

ലോക്കാട് ഗ്യാപ്പിലൂടെ യാത്രയ്ക്ക് നിരോധനം ഏർപ്പെടുത്തി

മൂന്നാർ: കൊച്ചി - ധനുഷ്കോടി ദേശീയ പാതയിൽ ലോക്കാട് ഗ്യാപ്പിലൂടെയുള്ള യാത്രയ്ക്ക് ജില്ലാ ഭരണകൂടം നിരോധനം ഏർപ്പെടുത്തി. കഴിഞ്ഞ ദിവസം പെയ്ത ശക്തമായ മഴയിൽ ചെറിയതോതിൽ മണ്ണിടിച്ചിൽ ഉണ്ടായതോടെയാണ് യാത്രാവിലക്ക് ഏർപ്പെടുത്തിയിട്ടുള്ളത്. കഴിഞ്ഞ മൂന്നു ദിവസങ്ങളായി രാത്രികാല യാത്രയ്ക്ക് ഇവിടെ അനുമതി ഇല്ലായിരുന്നു. ഇനിയൊരു അറിയിപ്പ് ഉണ്ടാകുന്നതുവരെയാണ് ഗതാഗതത്തിന് നിരോധനമുള്ളത്. തമിഴ്നാട്ടിൽനിന്ന് നിരവധി സഞ്ചാരികൾ മൂന്നാറിൽ എത്തുന്നത് കണക്കിലെടുത്തും മേഖലയിൽ ശക്തമായ മഴ തുടരുന്ന സാഹചര്യത്തിലുമാണ് നടപടി. കഴിഞ്ഞ ദിവസം പകൽ സമയത്ത് അല്പനേരം മഴ ശമിച്ചത് മൂന്നാറിനും തോട്ടം മേഖലയ്ക്കും ആശ്വാസമായി. വ്യാഴാഴ്ച മുതൽ വെള്ളിയാഴ്ച ഉച്ചവരെയുള്ള 24 മണിക്കൂറിനിടയ്ക്ക് 115.80 മില്ലീ മീറ്റർ മഴയാണ് പെയ്തത്. അതേ സമയം അടിയന്തര സാഹചര്യങ്ങളിൽ രക്ഷാപ്രവർത്തനങ്ങൾ ഏകോപിപ്പിക്കേണ്ട താലൂക്ക് ആസ്ഥാനമായ ദേവികുളത്ത് ഫോണ്‍ നെറ്റ് കണക്‌ഷനും വൈദ്യുതിയുമില്ലാതെ ഒരാഴ്ച പിന്നിടുകയാണ്. വൈദ്യുതി തകരാർ പരിഹരിക്കാനുള്ള ശ്രമങ്ങൾ നടന്നുവരികയാണെങ്കിലും പൂർണ തോതിൽ പുനഃസ്ഥാപിക്കാൻ കഴിഞ്ഞിട്ടില്ല. ഈ ഒരു സാഹചര്യത്തിൽ സർക്കാർ ഓഫീസുകളുടെ പ്രവർത്തനംപോലും മുന്നോട്ടു കൊണ്ടുപോകുവാൻ കഴിയാത്ത നിലയാണുള്ളത്. കനത്ത മഴയിലും കാറ്റിലും വൈദ്യുതി ബന്ധം താറുമായതോടെയാണ് ഒരാഴ്ചയായി പ്രദേശവാസികൾ വൈദ്യുതി ഇല്ലാതെ ബുദ്ധിമുട്ട് അനുഭവിക്കുന്നു. നെറ്റ് വർക്കും ഒരാഴ്ചയായി തകരാറിലാണ്. ഇതോടെ ആശയ വിനിമയവും നടത്താൻപറ്റാത്ത നിലയാണ്. വില്ലേജ് ഓഫീസറുടെ നേതൃത്വത്തിലാണ് താലൂക്കിലെ രക്ഷാപ്രവർത്തനങ്ങൾ കാലങ്ങളായി ഏകോപ്പിപ്പിക്കുന്നത്. ചെറിയ ഒരു മഴ പെയ്താലോ ശക്തമായ കാറ്റ് വീശിയാലോ വൈദ്യുതി ദിവസങ്ങളോളം മുടങ്ങുന്ന അവസ്ഥയിൽ പ്രശ്നത്തിൽ ഉചിതമായ നടപടികൾ സ്വീകരിക്കണമെന്നാണ് നാട്ടുകാർ ആവശ്യപ്പെട്ടുന്നത്.

ലിഫ്റ്റിൽ കുടുങ്ങി വ്യാപാരി മരിച്ച സംഭവം: ഇലക്‌ട്രിക്കൽ ഇൻസ്പെക്ടറേറ്റിന്‍റെ നേതൃത്വത്തിൽ പരിശോധന

കട്ടപ്പന: സ്വർണക്കടയുടമ ലിഫ്റ്റ് അപകടത്തിൽ മരിച്ച സംഭവത്തിൽ ഇലക്‌ട്രിക്കൽ ഇൻസ്പെക്ടറേറ്റ് അധികൃതർ സ്ഥലത്ത് പരിശോധന നടത്തി. ലിഫ്റ്റ് കമ്പനി ജീവനക്കാരുടെയും സ്ഥാപനത്തിൽ ഇതേ സമയത്ത് ലിഫ്റ്റ് പ്രവർത്തിപ്പിച്ചിരുന്നവരുടേയും മൊഴി ഇലക്‌ട്രിക്കൽ ഇൻസ്പെക്ടർ രേഖപ്പെടുത്തി. അപകടത്തിൽപ്പെട്ട ലിഫ്റ്റിലും കൺട്രോൾ യൂണിറ്റിലും സംഘം വിശദമായ പരിശോധന നടത്തി. വൈദ്യുതി മുടങ്ങിയ സമയത്ത് ഒന്നാം നിലയ്ക്കും തറ നിരപ്പിനും ഇടയിലാണ് ലിഫ്റ്റ് നിന്നത്. തുടർന്ന് സ്ഥാപനത്തിലെ ജീവനക്കാർ ലിഫ്റ്റ് ടെക്നീഷ്യനെ വീഡിയോ കോളിൽ ബന്ധപ്പെട്ട ശേഷം പ്രവർത്തിപ്പിക്കാൻ ശ്രമിച്ചപ്പോഴാണ് മുകൾ നിലയിൽ പോയി ഇടിച്ചുനിന്നത്. പരിചയമില്ലാത്തവർ പ്രവർത്തിപ്പിച്ചതാണ് അപകട കാരണമെന്നാണ് സംഘത്തിന്‍റെ വിലയിരുത്തൽ. ഒപ്പം, നിലച്ച ലിഫ്റ്റ് പ്രവർത്തിപ്പിക്കാൻ ശ്രമിച്ചതിലെ പിഴവാണെന്ന് ഇലക്‌ട്രിക്കൽ ഇൻസ്പെക്ടറേറ്റിന്‍റെ പ്രാഥമിക പരിശോധനയിൽ കണ്ടെത്തി. പവിത്ര ഗോൾഡ് മാനേജിംഗ് പാർട്ണർ സണ്ണി ഫ്രാൻസിസാണ് ബുധനാഴ്ച ഉച്ചയ്ക്ക് ലിഫ്റ്റ് അപകടത്തിൽ മരിച്ചത്. പുളിയൻമല റോഡിൽ പ്രവർത്തിക്കുന്ന പവിത്ര ഗോൾഡിലാണ് അപകടം നടന്നത്. സണ്ണി കയറിയ ലിഫ്റ്റ് വൈദ്യുതി നിലച്ചതിനെത്തുടർന്ന് ഓഫായി. പിന്നീട് സണ്ണി ഫോണിൽ ആവശ്യപ്പെട്ടതനുസരിച്ച് ജീവനക്കാർ ടെക്നീഷന്‍റെ നിർദേശ പ്രകാരം പ്രവർത്തിപ്പിക്കാൻ ശ്രമിക്കുന്നതിനിടെ നിയന്ത്രണമില്ലാതെ മുകളിലേക്ക് പോയി ഇടിക്കുകയുമായിരുന്നു. പിന്നീട് ലിഫ്റ്റ് തുറക്കാൻ കടയിലെ ജീവനക്കാർ ശ്രമിച്ചെങ്കിലും കഴിഞ്ഞില്ല. തുടർന്ന് കട്ടപ്പന അഗ്നിരക്ഷാ സേനയെത്തിയാണ് ലിഫ്റ്റ് തുറന്നത്. തലയിൽ ഗുരുതരമായും ശരീരത്തിന്‍റെ വിവിധ ഭാഗങ്ങളിലും പരിക്കേറ്റ നിലയിലായിരുന്നു അപ്പോൾ സണ്ണി. സ്പൈനൽ കോഡിനേറ്റ പരിക്കാണ് മരണകാരണമായതെന്നാണ് പോസ്റ്റ്മോർട്ടത്തിന് ശേഷം ലഭിച്ച പ്രാഥമിക വിവരം. തലയ്ക്കും സുഷുമ്നാ നാഡിക്കും ഏറ്റ ഗുരുതര പരിക്കാണ് മരണത്തിന് കാരണമായതെന്നാണ് വിവരം. ഇലക്‌ട്രിക്കൽ ഇൻസ്പെക്ടറേറ്റിനു പുറമെ ലിഫ്റ്റ് കമ്പനിയും അന്വേഷണം ആരംഭിച്ചിട്ടുണ്ട്. ഇലക്‌ട്രിക്കൽ ഇൻസ്പെക്ടറുടെ റിപ്പോർട്ട് അടുത്ത ദിവസം സർക്കാരിന് കൈമാറും. ലിഫ്റ്റ് നിർമിച്ച കമ്പനി പ്രതിനിധികളെയും ടെക്നീഷൻമാരെയും വിളിച്ചു വരുത്തിയാണ് പരിശോധന നടത്തിയത്. കട്ടപ്പന പോലീസും അസ്വാഭാവിക മരണത്തിന് കേസെടുത്ത് അന്വേഷണം നടത്തുന്നുണ്ട്.

കേസെടുത്ത് ജനങ്ങളെ ഭയപ്പെടുത്താമെന്ന് കരുതേണ്ട: കത്തോലിക്ക കോണ്‍ഗ്രസ്

കോതമംഗലം: കുടിയേറ്റ കർഷകരോട് സർക്കാരും രാഷ്‌ട്രീയ പാർട്ടികളും പുലർത്തുന്ന നിഷേധാത്മക നിലപാടുകൾക്കെതിരേ കത്തോലിക്ക കോണ്‍ഗ്രസ് കോതമംഗലം രൂപത സമിതി. 1977നു മുൻപ് കൈവശമുള്ള ഭൂമിക്ക് പട്ടയം നൽകണമെന്ന വ്യവസ്ഥ നടപ്പാക്കാൻ തയാറാകാത്ത അധികൃതരുടെ നടപടി ന്യായീകരിക്കാനാവാത്തതാണ്. വനം-റവന്യു വകുപ്പുകളുടെ നേതൃത്വത്തിൽ ജോയിന്‍റ് വെരിഫിക്കേഷൻ നടത്തി പട്ടയ നടപടികൾ ത്വരിതപ്പെടുത്താൻ നടപടി സ്വീകരിക്കുന്നതിനു പകരം കർഷകരെ കുടിയിറക്കാൻ നടത്തുന്ന നീക്കം അനുവദിക്കാനാവില്ല. കൈവശ ഭൂമിക്ക് യഥാസമയം പട്ടയം നൽകിയിരുന്നെങ്കിൽ നാരങ്ങാനം ഉൾപ്പെടെയുള്ള സ്ഥലങ്ങളിലെ വിവാദങ്ങൾ ഉണ്ടാകുമായിരുന്നില്ല. പൊതുജനത്തെ വിഡ്ഢികളാക്കുന്ന നിലപാടുകളും നടപടികളുമാണ് പലരുടെയും ഭാഗത്തുനിന്ന് ഉണ്ടാകുന്നത്. നാരങ്ങാനത്തെ കുരിശു പൊളിച്ച വനം വകുപ്പുകാർ ദുഃഖവെള്ളിയാഴ്ച അവിടെ പൊതുനിരത്തിലൂടെ കുരിശിന്‍റെ വഴി നടത്തിയ വൈദികർക്കും ജനപ്രതിനിധികൾക്കും നാട്ടുകാർക്കും എതിരെകേസെടുത്ത് നോട്ടീസ് അയയ്ക്കുന്നത് അടിയന്തരമായി നിർത്തിവയ്ക്കണം. സമാധാനകാംക്ഷികളായ ജനത്തിനുമേൽ കുതിരകയറിയാൽ തക്ക തിരിച്ചടി നൽകുമെന്ന് കത്തോലിക്ക കോണ്‍ഗ്രസ് മുന്നറിയിപ്പ് നൽകി. സാധാരണക്കാരെ കബളിപ്പിക്കാനുള്ള തന്ത്രമാണ് പലരുടെയും സമരങ്ങളും പ്രതികരണങ്ങളും എന്നു വ്യക്തമാണ്. മുഖ്യമന്ത്രിയും ബന്ധപ്പെട്ട ജനപ്രതിനിധികളും ശക്തമായ ഭാഷയിൽ പ്രതികരിച്ചിട്ടും തുടർച്ചയായി കർഷക ദ്രോഹ നടപടികൾ നിർബാധം നടത്തുന്നതും കേസെടുക്കുന്നതും എന്തിനുവേണ്ടിയാണെന്ന് തിരിച്ചറിയാനുള്ള ശേഷി ജനങ്ങൾക്കുണ്ട്. ഈ നെറികേട് തുടരുന്നത് എന്തുകൊണ്ടാണെന്ന് സർക്കാർ വ്യക്തമാക്കണം. ഒരു വശത്ത് കർഷക പ്രേമം നടിക്കുകയും മറുവശത്ത് കർഷകരെ വേട്ടയാടുകയും ചെയ്യുന്ന മനോഭാവം അംഗീകരിക്കാനാവില്ല.വിശ്വാസികളുടെ സംയമനം ബലഹീനതയായി കാണരുതെന്നും കത്തോലിക്കാ കോണ്‍ഗ്രസ് മുന്നറിയിപ്പ് നൽകി. രൂപത പ്രസിഡന്‍റ് സണ്ണി കടൂത്താഴെ അധ്യക്ഷത വഹിച്ചു. രൂപത ഡയറക്ടർ റവ. ഡോ. മാനുവൽ പിച്ചളക്കാട്ട്, രൂപത ജനറൽ സെക്രട്ടറി മത്തച്ചൻ കളപ്പുരയ്ക്കൽ, ട്രഷറർ തന്പി പിട്ടാപ്പിള്ളിൽ, സി.എ. തോമസ്, അഡ്വ. യു.വി. ചാക്കോ, ബിന്ദു ജോസ്, മേരി ആന്‍റണി, ഷൈജു ഇഞ്ചയ്ക്കൽ, ജിജി പുളിക്കൽ, ആന്‍റണി പുല്ലൻ, ജോർജ് മങ്ങാട്ട്, അബി കാഞ്ഞിരപ്പാറ, ജോണ്‍ മുണ്ടൻകാവിൽ, ജോയ്സ് മേരി ആന്‍റണി, ബേബിച്ചൻ നിധീരിക്കൽ, ബെന്നി തോമസ്, ജോർജ് കുര്യാക്കോസ്, ജിനു ആന്‍റണി, ജോണി ജേക്കബ്, കെ.എം. ജോസഫ്, ഇ.ആർ. പൈലി, വി.ജെ. റോജോ, സനിൽ പി. ജോസ്, അമിത ജോണി, ജോസ് കുര്യൻ, റോയ് മാത്യു, അഞ്ജു ജോസ് എന്നിവർ പ്രസംഗിച്ചു.

കുരിശ് തകർക്കലും കർഷക പീഡനവും: മുഖ്യമന്ത്രിക്ക് ഭീമഹർജിയുമായി ജനങ്ങൾ

തൊടുപുഴ: തൊമ്മൻകുത്ത് നാരങ്ങാനത്തെ കൈവശഭൂമിയിൽ സ്ഥാപിച്ച കുരിശ് തകർക്കുകയും കള്ളക്കേസ് എടുക്കുകയും ചെയ്ത വനംവകുപ്പ് നടപടിക്കെതിരേ 1750-ഓളം പേർ ഒപ്പിട്ട ഭീമഹർജി മുഖ്യമന്ത്രി പിണറായി വിജയന് അയച്ചുനൽകി. തൊമ്മൻകുത്ത് നിവാസികളാണ് ഭീമഹർജിയിൽ ഒപ്പിട്ടിരിക്കുന്നത്. കർഷകരെ പീഡിപ്പിക്കുന്ന വനംവകുപ്പ് ഉദ്യോഗസ്ഥർക്കെതിരേ അടിയന്തരമായി നടപടിയെടുക്കണമെന്നും ഹർജിയിൽ ചൂണ്ടിക്കാട്ടിയിട്ടുണ്ട്. അതേ സമയം കൈവശഭൂമിയിൽ കുരിശ് സ്ഥാപിച്ച സംഭവത്തിലും കുരിശ് തകർത്ത സ്ഥലത്തേക്ക് ദുഃഖവെള്ളിയാഴ്ച കുരിശിന്‍റെ വഴി നടത്തിയ സംഭവത്തിലും വൈദികർ ഉൾപ്പെടെയുള്ളവർക്കെതിരേ വനംവകുപ്പ് കേസെടുത്ത സംഭവത്തിൽ പ്രതിഷേധം ശക്തമാകുകയാണ്. കോതമംഗലം രൂപത വികാരി ജനറാൾ മോണ്‍. വിൻസെന്‍റ് നെടുങ്ങാട്ട്, ചാൻസലർ ഫാ. ജോസ് കുളത്തൂർ, തൊമ്മൻകുത്ത് പള്ളിവികാരി ഫാ. ജയിംസ് ഐക്കരമറ്റം എന്നിവരടക്കമുള്ളവർക്കെതിരേയാണ് വനംവകുപ്പ് കേസെടുത്തത്. വൈദികരടക്കമുള്ളവർക്കെതിരേ കേസെടുത്ത സംഭവത്തിൽ പ്രതിഷേധം ശക്തമാക്കാൻ ഒരുങ്ങുകയാണ് കോതമംഗലം രൂപത. പലവട്ടം ഡിഎഫ്ഒ അടക്കമുള്ളവരുമായി സമവായ ചർച്ച നടത്തുകയും പ്രശ്നങ്ങൾ ഉണ്ടാകില്ലെന്ന് ഉറപ്പുനൽകിയിട്ടും വീണ്ടും കേസെടുക്കുകയാണുണ്ടായത്. വനംവകുപ്പധികൃതരുടെ ഗൂഢാലോചനയും രഹസ്യ അജണ്ട നടപ്പാക്കാനുള്ള നീക്കവുമാണ് ഇതിനു പിന്നിലെന്നാണ് ആക്ഷേപം ഉയരുന്നത്. നേരത്തെ കേരള കോണ്‍ഗ്രസ്-എം ചെയർമാൻ ജോസ് കെ. മാണി എംപി സ്ഥലം സന്ദർശിച്ച് മടങ്ങിയതിന്‍റെ പിറ്റേന്ന് ഇവിടുത്തെ പ്രാർഥനാപീഠം എറിഞ്ഞുടച്ചതും രഹസ്യ നീക്കത്തിന്‍റെ ഭാഗമായാണെന്ന് അന്ന് ആക്ഷേപം ഉയർന്നിരുന്നു. മുഖ്യമന്ത്രിക്കു ലഭിച്ച പരാതി സംബന്ധിച്ചുള്ള അന്വേഷണത്തിന്‍റെ ഭാഗമായി തൊടുപുഴ തഹസിൽദാർ നാരങ്ങാനത്തെ കുരിശ് പിഴുതസ്ഥലം നേരിട്ട് സന്ദർശിക്കുകയും ഇവിടം കൈവശഭൂമിയാണെന്ന് ഡെപ്യൂട്ടികളക്ടർ കെ.എം. ജോസുകുട്ടി മുന്പാകെ ഹിയറിംഗിനിടെ റിപ്പോർട്ട് നൽകുകയും ചെയ്തിരുന്നു. എന്നാൽ ഈ സ്ഥലം വനഭൂമിയാണെന്ന നിലപാടിലായിരുന്നു വനംവകുപ്പ്. ഇതേത്തുടർന്നു തർക്ക സ്ഥലത്ത് സംയുക്തപരിശോധന നടത്താൻ തീരുമാനിച്ചിരിക്കുകയാണ്. ഇതിനു പിന്നാലെയാണ് കേസുമായി വനംവകുപ്പ് രംഗത്തെത്തിയിരിക്കുന്നത്. ഈ നില തുടർന്നാൽ കൈയും കെട്ടി നോക്കിനിൽക്കാനാകില്ലെന്നും സമാനകർഷക സംഘടനകളുമായി ചേർന്ന് പ്രതിഷേധ സമരം സംസ്ഥാനതലത്തിലേക്ക് വ്യാപിപ്പിക്കാനാണ് തൊമ്മൻകുത്ത് ജാഗ്രതാസമിതി തീരുമാനിച്ചിരിക്കുന്നത്.

മലനാട് ക്ഷീരശ്രീ സ്വര്‍ണ്‍ പതക് പുരസ്‌കാരം റീജ ബിന്‍സിന്

പാറത്തോട്: മലനാട് മില്‍ക്ക് പ്രൊഡ്യൂസേഴ്‌സ് സൊസൈറ്റിയുടെ ഒരു ലക്ഷം രൂപ സമ്മാനത്തുക ലഭിക്കുന്ന ഫാ. മാത്യു വടക്കേമുറി മെമ്മോറിയല്‍ മലനാട് ക്ഷീരശ്രീ സ്വര്‍ണ്‍ പതക് പുരസ്‌കാര്‍ കൊച്ചറ കണയങ്കല്‍ റീജ ബിന്‍സിന്. 21 പശുക്കളും 10 കന്നുകുട്ടികളും ഉള്‍പ്പെടെ 31 കന്നുകാലികളെ വളര്‍ത്തുന്ന റീജ കഴിഞ്ഞ വര്‍ഷം 88,197 കിലോ പാല്‍ മലനാട് മില്‍ക്കിനു നല്‍കി. ഭര്‍ത്താവ് ബിന്‍സ് ഇമ്മാനുവേല്‍ കണയങ്കലും മക്കളായ ജെറിന്‍, മെറിന്‍, എറിന്‍ എന്നിവരും റീജയോട് ഒപ്പംനിന്നു കരുത്തു പകരുന്നു. 75,000 രൂപ സമ്മാനത്തുകയുള്ള മലനാട് ക്ഷീരശ്രീ രജത് പതക് പുരസ്‌കാറിന് അര്‍ഹനായത് കടുക്കാസിറ്റി ചരട്ടവയലില്‍ ബാബു ജോസഫാണ്. 16 പശുക്കളും മൂന്ന് കന്നുകുട്ടികളും ഉള്‍പ്പെടെ 19 കന്നുകാലികളെ വളര്‍ത്തുന്ന ബാബു ജോസഫ് കഴിഞ്ഞവര്‍ഷം 51,298 കിലോ പാല്‍ മലനാട് മില്‍ക്കിനു നല്‍കി. ഭാര്യ: മോളമ്മ. മക്കള്‍- മിന്‍റു, മിലന്‍. 50,000 രൂപ സമ്മാനത്തുകയുള്ള മലനാട് ക്ഷീരശ്രീ കാന്‍സി പതക് പുരസ്‌കാര്‍ നെറ്റിത്തൊഴു വയലാറ്റുപുത്തന്‍പുരയ്ക്കല്‍ റെജി കുര്യനാണ് ലഭിച്ചത്. 16 പശുക്കളും മൂന്നു കന്നുകുട്ടികളും ഉള്‍പ്പെടെ 19 കന്നുകാലികളെ വളര്‍ത്തുന്ന ഇദ്ദേഹം 70,423 കിലോ പാല്‍ മലനാട് മില്‍ക്കില്‍ അളന്നു. ഡെസിയാണ് ഭാര്യ. മക്കള്‍ - എബിന്‍ മരിയ, ലിബിന മരിയ. മലനാട് ക്ഷീരശ്രീ നക്ഷത്ര പതക് ജേതാക്കളായ 10 പേര്‍ക്ക് 25,000 രൂപ വീതം സമ്മാനമായി ലഭിച്ചു. ബേബി സെബാസ്റ്റ്യന്‍ ഗണപതിപ്ലാക്കല്‍ (മുരിക്കടി), സി.സി. കുര്യന്‍ ചാത്തന്‍പാറ (ചെല്ലാര്‍കോവില്‍), വര്‍ഗീസ് കെ.ജെ. കൂവക്കുന്നേല്‍ (വെസ്റ്റ് പാറ), ലാലിച്ചന്‍ കുര്യാക്കോസ് പെരിയോട്ട് (റോസ് നഗര്‍), റിറ്റു സിബി തകടിയേല്‍ (പത്തുവളവ്), ജൂലിയറ്റ് ജോസഫ് പാണ്ടിയപ്പള്ളില്‍ (ചെങ്ങളം), സഹദേവന്‍ ഗുരുകൃപ (കൊച്ചറ), സുനില്‍കുമാര്‍ പൂവത്തുംമൂട്ടില്‍ (വെള്ളയാംകുടി), അനിതാ മഹേഷ് പാലക്കാട്ടുതെക്കേതില്‍ (സ്‌നേഹഗിരി), വര്‍ഗീസ് ചാക്കോ പൊന്‍പുഴ (അണക്കര) എന്നിവരാണ് അവാര്‍ഡിന് അര്‍ഹരായത്. അവാര്‍ഡുകള്‍ മലനാട് മില്‍ക്ക് പ്രൊഡ്യൂസേഴ്‌സ് സൊസൈറ്റിയുടെ വാര്‍ഷിക പൊതുയോഗത്തില്‍ വിതരണം ചെയ്തു. ഫാ. മാത്യു വടക്കേമുറി മെമ്മോറിയല്‍ മലനാട് മില്‍ക്ക് വിദ്യാശ്രീ പുരസ്‌കാറിന് അര്‍ഹയായ പ്ലസ്ടു പരീക്ഷയില്‍ ഏറ്റവും കൂടുതല്‍ മാര്‍ക്കു നേടിയ കുട്ടിക്ക് 25,000 രൂപയും പത്താം ക്ലാസ് പരീക്ഷയില്‍ എല്ലാ വിഷയങ്ങള്‍ക്കും എ പ്ലസ് നേടിയ ഒമ്പതു പേര്‍ക്ക് 10,000 രൂപ വീതവും കാഷ് അവാര്‍ഡ് നല്‍കി. മികച്ച സംഘങ്ങള്‍ക്കുള്ള എവറോളിംഗ് ട്രോഫിയും ക്ഷീര കര്‍ഷകര്‍ക്കുള്ള വേനല്‍ക്കാല ഇന്‍സെന്‍റീവും യോഗത്തില്‍ വിതരണം ചെയ്തു.

ജില്ലയിൽ 35 കോടിയുടെ വികസന പദ്ധതി നടപ്പാക്കും

തൊടുപുഴ: നവകേരള സദസിൽ ലഭിച്ച നിർദേശങ്ങളുടെ അടിസ്ഥാനത്തിൽ ജില്ലയിൽ നടപ്പാക്കുന്ന വികസന പദ്ധതികൾക്കായി 35 കോടി അനുവദിച്ചു. അഞ്ചു നിയമസഭാ മണ്ഡലങ്ങൾക്കും ഏഴ് കോടി വീതമാണ് അനുവദിച്ചിരിക്കുന്നത്. 28 വികസന പദ്ധതികളാണ് നടപ്പാക്കുന്നത്. റോഡ് വികസനത്തിനാണ് മുൻഗണന നൽകിയിട്ടുള്ളത്. 35 കോടിയിൽ 28.5 കോടിയാണ് റോഡ് നിർമാണത്തിന് അനുവദിച്ചിരിക്കുന്നത്. നെടുങ്കണ്ടം, തൊടുപുഴ ഫയർ ആൻഡ് റസ്ക്യു സ്റ്റേഷൻ മന്ദിര നിർമാണത്തിന് 6.5 കോടി വിനിയോഗിക്കും. ദേവികുളം നിയോജക മണ്ഡലത്തിൽ പതിനെട്ടാം മൈൽ - ചിറ്റുവര സൗത്ത്, കുണ്ടള എസ്പി പുരം - പോസ്റ്റ് ഓഫീസ് റോഡ്, കുറ്റിയാർ വാലി , തെൻമല ന്യൂഡിവിഷൻ, സോത്തുപാറ - ഗുണ്ടുമല , മൂന്നാർ- നടയാർ- കുറുമല, 200 ഏക്കർ - മെഴുകുംചാൽ, അന്പഴച്ചാൽ - കാണ്ടിയാംപാറ, കന്നിമല-ലോവർ ടോപ്പ് ഡിവിഷൻ, ലക്ഷ്മി ഈസ്റ്റ്- മാനില ഒഡികെ, ലാക്കാട് - ദേവികുളം ലോവർ, കോവിൽക്കടവ്- ചെറുവാട് മിഷൻ വയൽ - ആനക്കാംപെട്ടി എന്നീ റോഡുകളുടെ വികസന പ്രവർത്തനമാണ് നടപ്പാക്കുന്നത്. ഉടുന്പൻചോലയിൽ നെടുങ്കണ്ടം ഫയർ ആൻഡ് റസ്ക്യു സ്റ്റേഷനു പുറമേ ചെല്ലാർകോവിൽ - നെറ്റിത്തൊഴു, നടുമറ്റം മുണ്ടപ്ലാക്കൽ പടി - എൻആർ സിറ്റി, കാരിത്തോട് -ആട്ടുപാറകരിമല റോഡുകളുടെ നിർമാണ പ്രവർത്തനം നടത്തും. തൊടുപുഴ മണ്ഡലത്തിൽ തൊടുപുഴ ഫയർ സ്റ്റേഷൻ നിർമാണവും മുതലക്കോടം - പഴുക്കാക്കുളം റോഡ്, കാരിക്കോട് - കുന്നം റോഡ് നിർമാണം എന്നിവ നടപ്പാക്കും. ഇടുക്കി മണ്ഡലത്തിൽ നത്തുകല്ല് -വെളളയാംകുടി - സുവർണഗിരി - കക്കാട്ടുകട റോഡിൽ വെള്ളയാംകുടി മുതൽ കക്കാട്ടുകട വരെ ആറു കോടി ഉപയോഗിച്ച് ടാറിംഗും ഒരുകോടി വിനിയോഗിച്ച് കട്ടപ്പന നേതാജി ബൈപാസ് റോഡ് നിർമാണവും നടക്കും. പീരുമേട്ടിൽ ആനചാരി അഴങ്ങാട്, ഡൈമുക്ക് ആനക്കുഴി, ചപ്പാത്ത് - ചെങ്കര റോഡിലെ ശാന്തിപ്പാലം മുതൽ കൊളുന്തുപുര വരെ, പഴയ പാന്പനാർ - ലാഡ്രം - കൊടുവാക്കരണം, വെള്ളാരംകുന്ന് ആനക്കുഴി, ഒട്ടകത്തലമേട് - മേനോൻമേട് -മാങ്കവല, വാളാർഡി - മേപ്പുരട്ട് എന്നീ റോഡുകളുടെ നിർമാണവും നടത്തും.

മഴക്കെടുതി: ജില്ലയിൽ 130 വീടുകൾക്ക് നാശനഷ്ടം

ഇടുക്കി: ജില്ലയിൽ മഴക്കെടുതികളിൽ ഇതുവരെ നഷ്ടപ്പെട്ടത് മൂന്നു പേരുടെ ജീവൻ. മരം ഒടിഞ്ഞു വീണ് രണ്ട് തോട്ടം തൊഴിലാളി സ്ത്രീകളും മരം ലോറിക്കുമേൽ വീണ് യുവാവുമാണ് മരിച്ചത്. മൂന്ന് പേർക്ക് പരിക്കേറ്റു. ജില്ലയിൽ കഴിഞ്ഞ ഒരാഴ്ചയായി പെയ്ത കനത്ത മഴയിൽ 130 വീടുകൾക്ക് നാശനഷ്ടമുണ്ടായി. 121 വീടുകൾ ഭാഗികമായും ഒൻപത് വീടുകൾ പൂർണമായും തകർന്നു. ഇതിനിടെ കഴിഞ്ഞ ദിവസങ്ങളിൽ പെയ്ത കനത്ത മഴയ്ക്ക് നേരിയ ശമനമുണ്ടായിട്ടുണ്ട്. ഇന്നലെ ഉച്ചയോടെയാണ് മഴയുടെ ശക്തി കുറഞ്ഞത്. കഴിഞ്ഞ ദിവസങ്ങളിൽ പെയ്ത കനത്ത മഴയെത്തുടർന്ന് ജില്ലയിൽ 14 ദുരിതാശ്വാസ ക്യാന്പുകൾ തുറന്നു. ഇടുക്കി -ഏഴ്, ദേവികുളം -അഞ്ച്, ഉടുന്പൻചോല- രണ്ട് എന്നിങ്ങനെയാണ് ഓരോ താലൂക്കുകളിലും ക്യാന്പ് തുറന്നത്. ഇടുക്കി താലൂക്കിലെ ഏഴു ക്യാന്പുകളിൽ 45 കുടുംബങ്ങളിലായി 138 പേരാണ് കഴിയുന്നത്. ദേവികുളം താലൂക്കിലെ അഞ്ച് ദുരിതാശ്വാസ ക്യാന്പുകളിൽ 27 കുടുംബങ്ങളിലെ 83 പേരും മറയൂർ ഗവ. എൽപി സ്കൂളിൽ ആരംഭിച്ച ക്യാന്പിൽ 11 കുടുംബങ്ങളിലെ 26 അംഗങ്ങളുമാണുള്ളത്. ഉടുന്പൻചോല താലൂക്കിൽ രണ്ട് ദുരിതാശ്വാസ ക്യാന്പുകളിൽ മൂന്ന് കുടുംബങ്ങളിലെ 10 അംഗങ്ങളുണ്ട്. ഇടുക്കി താലൂക്കിൽ 45 വീടുകളാണ് തകർന്നത്. ഇതിൽ 43 വീടുകൾ ഭാഗികമായും രണ്ട് വീടുകൾ പൂർണമായും തകർന്നു. തൊടുപുഴ താലൂക്കിൽ 24 വീടുകൾ ഭാഗികമായും നാലു വീടുകൾ പൂർണമായും തകർന്നു. ദേവികുളം താലൂക്കിൽ 24 വീടുകൾ ഭാഗികമായും രണ്ട് വീടുകൾ പൂർണമായും നശിച്ചു. ഉടുന്പൻചോല താലൂക്കിൽ 23 വീടുകൾക്ക് നാശനഷ്ടമുണ്ടായതിൽ ഒരു വീട് പൂർണമായും തകർന്നു. പീരുമേട് താലൂക്കിൽ എട്ട് വീടുകൾക്ക് ഭാഗികമായി നാശനഷ്ടമുണ്ടായി. കനത്ത മഴയിൽ ജില്ലയിൽ ഇതു വരെ 5.48 കോടി രൂപയുടെ കൃഷിനാശമാണ് ഉണ്ടായതായാണ് പ്രാഥമിക കണക്കുകൾ. 350.8 ഹെക്ടറിലായി 3218 കർഷകരുടെ കാർഷിക വിളകൾ നശിച്ചു. 89.74 മില്ലി മീറ്റർ മഴയാണ് ജില്ലയിൽ കഴിഞ്ഞ 24 മണിക്കൂറിനുള്ളിൽ പെയ്തത്. ഇന്നലെ ഉച്ചയ്ക്ക് 12 വരെയുള്ള കണക്കു പ്രകാരം ഉടുന്പൻചോല -36, ദേവികുളം - 114.2, പീരുമേട്- 135.9, ഇടുക്കി - 78.2 തൊടുപുഴ - 84.4 മില്ലിമീറ്റർ മഴയാണ് ഓരോ താലൂക്കുകളിലും പെയ്തത്. ഇടുക്കി ഡാമിൽ 2342 അടിയും മുല്ലപ്പെരിയാറിൽ 128.4 അടിയുമാണ് ജലനിരപ്പ്. ഒറ്റപ്പെട്ട ശക്തമായ മഴയ്ക്ക് സാധ്യതയുള്ളതിനാൽ ജില്ലയിൽ ഇന്ന് കേന്ദ്ര കാലാവസ്ഥാ വകുപ്പ് യെല്ലോ അലർട്ട് പ്രഖ്യാപിച്ചിട്ടുണ്ട്. മഴ തുടരുന്ന സാഹചര്യത്തിൽ മണ്ണിടിച്ചിലും ഉരുൾപൊട്ടലും ഉണ്ടാകാൻ സാധ്യതയുള്ളതിനാൽ ജനങ്ങൾ അതീവ ജാഗ്രത പാലിക്കണമെന്ന് ജില്ലാ ഭരണകൂടം അറിയിച്ചു. വിനോദസഞ്ചാര നിയന്ത്രണം: നിരോധനം ലംഘിച്ചാൽ കർശന നടപടി ഇടുക്കി: ജില്ലയിൽ മഴ ശക്തിപ്പെടുന്ന സാഹചര്യത്തിൽ വിനോദസഞ്ചാരത്തിന് പൂർണ നിരോധനം ഏർപ്പെടുത്തിയ ഉത്തരവ് ലംഘിക്കുന്നവർക്കെതിരേ കർശന നടപടി സ്വീകരിക്കുമെന്ന് ജില്ലാ കളക്ടർ അറിയിച്ചു. ഉത്തരവിന് വിരുദ്ധമായി നടത്തുന്ന ജീപ്പ് സവാരിയും ട്രക്കിംഗും ഉൾപ്പടെയുള്ള എല്ലാവിധ വിനോദസഞ്ചാര പ്രവർത്തനങ്ങളും കർശനമായി തടയും. വീഴ്ചവരുത്തുന്ന വാഹനം, സ്ഥാപനം എന്നിവ പിടിച്ചെടുക്കും. വാഹനയുടമ, ഡ്രൈവർ, സ്ഥാപനയുടമ എന്നിവർക്കെതിരേ ദുരന്തനിവാരണ നിയമ പ്രകാരം കർശന നടപടി സ്വീകരിക്കും. വിനോദസഞ്ചാര പ്രവർത്തനങ്ങൾ നിരോധിച്ചിട്ടും ജില്ലയിലെ ചില പ്രദേശങ്ങളിൽ ഉത്തരവ് ലംഘിച്ച് വിനോദ സഞ്ചാരികളെയും വഹിച്ചുള്ള ജീപ്പ് സവാരിയും ട്രക്കിംഗും നടത്തുന്നത് ശ്രദ്ധയിൽപ്പെട്ടതിനെത്തുടർന്നാണ് ഉത്തരവ്. മഴക്കാലത്ത് ജീവന് സുരക്ഷയില്ലാതെ തോട്ടം തൊഴിലാളികൾ തൊടുപുഴ: കാലവർഷസമയത്ത് ജീവന് സുരക്ഷയില്ലാതെ തോട്ടം മേഖലയിൽ ജോലിയെടുക്കുന്ന തൊഴിലാളികൾ. മരങ്ങൾ കടപുഴകിയും ഒടിഞ്ഞും വീണ് സ്ത്രീ തൊഴിലാളികൾ ഉൾപ്പെടെ ഓരോ വർഷവും ഒട്ടേറെ പേർക്ക് ജീവൻ നഷ്ടമാകുന്പോഴും ഇവരുടെ സുരക്ഷ ഉറപ്പാക്കുന്ന കാര്യത്തിൽ അധികൃതർ കാര്യമായ നടപടി സ്വീകരിക്കുന്നില്ല. അതി ശക്തമായ മഴക്കാലത്തും ജോലിയെടുക്കാൻ നിർബന്ധിതമാകുന്നതോടെയാണ് പലപ്പോഴും ഇവർ അപകടത്തിൽപ്പെടുന്നത്. ജില്ലയിൽ കഴിഞ്ഞ ദിവസങ്ങളിൽ മരം വീണുണ്ടായ അപകടങ്ങളിൽ രണ്ട് സ്ത്രീ തൊഴിലാളികൾ മരിച്ചിരുന്നു. പാന്പാടുംപാറയിൽ സ്വകാര്യ എസ്റ്റേറ്റിൽ ജോലിക്കാരിയായ മാലതി, വണ്ടൻമേട് വാഴവീട്ടിൽ ഏലത്തോട്ടത്തിൽ ജോലി ചെയ്യുന്നതിനിടെ അണക്കര കടശിക്കടവ് സ്വദേശിയായ എലിസബത്ത് എന്നിവരാണ് മരക്കൊന്പ് വീണ് മരിച്ചത്. മഴക്കാലത്ത് അപകട സാധ്യതയുണ്ടെങ്കിൽപ്പോലും തോട്ടമുടമകൾ ഇവരെ ജോലിക്കിറക്കുന്ന സ്ഥിതിയുമുണ്ട്. മഴക്കാലത്ത് അപകടങ്ങൾ പതിവായതോടെ തോട്ടം മേഖലയിൽ ജോലി ചെയ്യുന്നവർക്ക് സുരക്ഷ ഉറപ്പാക്കാനായി നൂതന പദ്ധതികൾ ആരംഭിക്കണമെന്ന ആവശ്യവും ഇതുവരെ പരിഗണിക്കപ്പെട്ടിട്ടില്ല. ജില്ലയിലെ ഏലം, തേയില തുടങ്ങിയ തോട്ടം മേഖലകളിൽ ലക്ഷക്കണക്കിനു തൊഴിലാളികളാണ് ജോലി ചെയ്യുന്നത്. കേരളം, തമിഴ്നാട് എന്നിവിടങ്ങളിൽനിന്നുള്ളവർക്കു പുറമേ ഉത്തരേന്ത്യൻ സംസ്ഥാനങ്ങളിൽനിന്നുള്ള ഒട്ടേറെ തൊഴിലാളികൾ ഇവിടെ ജോലി ചെയ്യന്നുണ്ട്. പലപ്പോഴും ജീവൻ പണയംവച്ചാണ് ഇവർ ഏലക്കാടുകളിലും മറ്റും പണിയെടുക്കുന്നത്. ശക്തമായ മഴയുള്ള സമയത്ത് തൊഴിലാളികളെ തോട്ടംമേഖലകളിൽ ജോലിക്കിറക്കരുതെന്ന ജില്ലാ ഭരണകൂടത്തിന്‍റെ നിർദേശംപോലും മറികടന്നാണ് ഇവരെ ജോലി ചെയ്യാൻ നിർബന്ധിതരാക്കുന്നത്. കാറ്റത്തും മഴയത്തും മരം കടപുഴകി വീണ് ഉണ്ടാവുന്ന അപകടങ്ങളിൽ ജീവൻ നഷ്ടപ്പെടുകയും ജോലി ചെയ്യാൻ സാധിക്കാത്തവിധം പരിക്കേൽക്കുകയും ചെയ്യുന്നവർ അനവധിയാണ്. ദിവസക്കൂലിക്കാണ് കൂടുതൽ സ്ത്രീ തൊഴിലാളികളും തോട്ടം മേഖലകളിൽ പണിയെടുക്കുന്നത്. ഒരു ദിവസം ജോലി നഷ്ടപ്പെട്ടാൽപോലും കുടുംബ ബജറ്റ് താളം തെറ്റും. ഇതോടെയാണ് പലരും പ്രതികൂല കാലാവസ്ഥയിലും ജോലി ചെയ്യുന്നത്. ഇത്തരത്തിൽ ജോലി ചെയ്യുന്ന കുടുംബത്തിന്‍റെ ഏക അത്താണിയാണ് അപകടങ്ങളിൽ നഷ്ടമാകുന്നത്. എന്നാൽ ഇൻഷ്വറൻസ് അടക്കമുള്ള യാതൊരു പരിരക്ഷയും ഇവർക്ക് ഇല്ലാത്തതിനാൽ കുടുംബം മുഴുപ്പട്ടിണിയിലേക്ക് പോകുന്ന സാഹചര്യമാണുള്ളത്. കുട്ടികളുടെ വിദ്യാഭ്യാസംവരെ പാതിവഴിയിൽ മുടങ്ങും. അപകടം നടക്കുന്പോൾ സർക്കാർ പ്രഖ്യാപിക്കുന്ന തുച്ഛമായ തുകമാത്രമാണ് ഇവർക്ക് ലഭിക്കാറുള്ളത്. പരിക്കേൽക്കുന്നവർക്ക് ഇതും ലഭ്യമാകാറില്ല. മതിയായ രേഖകളില്ലാതെ തോട്ടം മേഖലയിൽ ജോലി ചെയ്യുന്ന ഒട്ടേറെ ഇതരസംസ്ഥാന തൊഴിലാളികളുമുണ്ട്. അപകടങ്ങളിൽ ഇവർക്ക് എന്തെങ്കിലും സംഭവിച്ചാൽ ഒരു സഹായവും ലഭിക്കാറില്ല. തൊഴിൽ സുരക്ഷ ഉറപ്പാക്കാൻ വിവിധ തൊഴിലാളി സംഘടനകൾ സമരങ്ങൾ നടത്താറുണ്ടെങ്കിലും തൊഴിലാളികളുടെ ജീവന് സംരക്ഷണം ഉറപ്പുവരുത്താൻ ഇവരും ശ്രമിക്കാറില്ലെന്നതാണ് വസ്തുത. ഏലത്തോട്ടങ്ങളിൽ അപകടകരമായി നിൽക്കുന്ന മരങ്ങൾ വെട്ടിമാറ്റുകയും കനത്ത മഴയുള്ള ദിവസങ്ങളിൽ ജോലി ഒഴിവാക്കുകയും ചെയ്യണം. ഈ ദിവസങ്ങളിൽ തൊഴിലാളി കുടുംബങ്ങൾക്ക് സാന്പത്തിക സഹായം ലഭ്യമാക്കുകയും സൗജന്യമായി ഭക്ഷ്യവസ്തുക്കൾ എത്തിച്ചുകൊടുക്കുകയും വേണമെന്നും ആവശ്യമുയരുന്നുണ്ട്.

മഴക്കെടുതി; ജില്ലയിൽ 4.35 കോടിയുടെ കൃഷിനാശം

ഇടുക്കി: കനത്ത കാറ്റിലും മഴയിലും ജില്ലയിൽ 4.35 കോടി രൂപയുടെ കൃഷിനാശം. 285.13 ഹെക്ടർ സ്ഥലത്തെ വിവിധ കാർഷിക വിളകൾ നശിച്ചു. 2520 കർഷകരുടെ കൃഷിയാണ് നശിച്ചത്. മേയ് 15 മുതൽ 28 വരെയുള്ള കാലയളവിലെ പ്രാഥമിക കണക്കാണിതെന്ന് പ്രിൻസിപ്പൽ കൃഷി ഓഫീസർ അറിയിച്ചു. വാഴ, ഏലം, കുരുമുളക്, റബർ, കൊക്കോ എന്നിവയാണ് കൂടുതലായും നശിച്ചത്. 72.87 ഹെക്ടറിലെ 33613 കുലച്ച വാഴകളാണ് നശിച്ചത്. 658 കർഷകർക്കായി രണ്ടു കോടി രൂപയുടെ നഷ്ടമുണ്ടായി. 238 കർഷകരുടെ 6.04 ഹെക്ടറിലെ കുലയ്ക്കാത്ത 9,620 വാഴകകൾ നശിച്ചു. ഈയിനത്തിൽ 38.48 ലക്ഷം രൂപയുടെ നാശനഷ്ടം കണക്കാക്കുന്നു. 147.97 ഹെക്ടർ സ്ഥലത്തെ ഏലം ചെടികളും നശിച്ചു. ഇതുവഴി ഒരു കോടിയുടെ നഷ്ടമുണ്ടാകുകയും 947 കർഷകരെ ബാധിക്കുകയും ചെയ്തു. 11.88 ഹെക്ടർ സ്ഥലത്തെ 4,839 കായ്ച്ച കുരുമുളക് ചെടികളാണ് നശിച്ചത്. 36.29 ലക്ഷം രൂപ നഷ്ടവും 220 കർഷകരെ ഇതു ബാധിക്കുകയും ചെയ്തിട്ടുണ്ട്. 15 കർഷകരുടെ 1.7 ഏക്കറിലെ 130 കായ്ക്കാത്ത കുരുമുളക് ചെടികൾ നശിക്കുകയും 65,000 രൂപയുടെ നഷ്ടമുണ്ടാകുകയും ചെയ്തു. 32.13 ഹെക്ടറിലെ 1085 വെട്ടുന്ന റബറുകൾ നശിച്ചതുമൂലം 113 കർഷകർക്കായി 21.7 ലക്ഷം രൂപയുടെ നഷ്ടമുണ്ടായി. 44 കർഷകരുടെ 2.81 ഹെക്ടറിലെ 505 വെട്ടിത്തുടങ്ങാത്ത റബർ മരങ്ങൾ നശിക്കുകയും 7.58 ലക്ഷം രൂപയുടെ നഷ്ടമുണ്ടാകുകയും ചെയ്തു. 1.95 ഹെക്ടറിലെ 999 കൊക്കോ മരങ്ങളും നശിച്ചു. ഇതിലൂടെ 65 കർഷകർക്കായി 3.5 ലക്ഷം രൂപയുടെ നഷ്ടമുണ്ടായി. 17 കർഷകരുടെ 1.58 ഹെക്ടർ സ്ഥലത്തെ കപ്പകൃഷിക്ക് 21000 രൂപയുടെ നഷ്ടവും 69.2 സെന്‍റിലെ മൂന്നു കർഷകരുടെ പച്ചക്കറി കൃഷിക്ക് 13000 രൂപയും നഷ്ടമുണ്ടായി. 112 വീടുകൾക്ക് നാശനഷ്ടം ഇടുക്കി: ജില്ലയിൽ കഴിഞ്ഞ ആറുദിവസത്തിനിടെ 112 വീടുകൾ തകർന്നു. ഇന്നലെ മാത്രം 62 വീടുകൾക്ക് നാശം നേരിട്ടു. ഇതിൽ ആറു വീടുകൾ പൂർണമായും 56 വീടുകൾ ഭാഗികമായുമാണ് തകർന്നത്. ഇടുക്കി താലൂക്കിൽ 30 വീടുകൾ ഭാഗികമായും രണ്ടുവീടുകൾ പൂർണമായും തകർന്നു. തൊടുപുഴ താലൂക്കിൽ 18 വീടുകൾ ഭാഗികമായും നാല് വീടുകൾ പൂർണമായും തകർന്നു. പിരുമേട് ഉടുന്പൻചോല താലൂക്കുകളിൽ മൂന്ന് വീടുകൾ ഭാഗികമായുംദേവികുളം താലൂക്കിൽ രണ്ട് വീടുകൾ ഭാഗികമായും തകർന്നു. അഞ്ച് ക്യാന്പുകൾ തുറന്നു ഇടുക്കി: കനത്ത മഴയെത്തുടർന്ന് ജില്ലയിൽ അഞ്ചു ക്യാന്പുകൾ തുറന്നു. ഇടുക്കി താലൂക്കിൽ മൂന്നു ക്യാന്പും ദേവികുളം താലൂക്കിൽ രണ്ടു ക്യാന്പുമാണ് തുറന്നിട്ടുള്ളത്. ഇടുക്കി താലൂക്കിൽ മണിയാറൻകുടി സലീന ചാൾസ് ഇംഗ്ലീഷ് മീഡിയം സ്കൂളിലെ ക്യാന്പിൽ 18 കുടുംബങ്ങളിലായി 65 അംഗങ്ങളാണുള്ളത്. കഞ്ഞിക്കുഴി കീരിത്തോട് നിത്യസഹായമാതാ പാരിഷ് ഹാളിൽ ആരംഭിച്ച ദുരിതാശ്വാസ ക്യാന്പിൽ നാലു കുടുംബങ്ങളിലെ 10 അംഗങ്ങളുണ്ട്. മുരിക്കാശേരി സെന്‍റ് തോമസ് ഹയർ സെക്കൻഡറി സ്കൂളിൽ ആരംഭിച്ച ക്യാന്പിൽ നാലു കുടുംബങ്ങളിലെ ഏഴംഗങ്ങളാണുള്ളത്. മൂന്നാർ മൗണ്ട് കാർമൽ പാരിഷ് ഹാളിൽ എട്ടുകുടുംബങ്ങളിലായി 26 അംഗങ്ങളുണ്ട്. വെള്ളത്തൂവൽ ഗവ. ഹയർ സെക്കൻഡറി സ്കൂളിലെ ക്യാന്പിൽ അഞ്ച് കുടുബങ്ങളിൽനിന്ന് 15 അംഗങ്ങളുണ്ട്.

പൊന്മുടി ഡാമിന്‍റെ ഷട്ടറുകൾ തുറന്നു

രാജാക്കാട്: അപ്രതീക്ഷിതമായി എത്തിയ കാലവർഷത്തിൽ വൃഷ്ടിപ്രദേശങ്ങളിലുണ്ടായ കനത്ത മഴയിൽ പന്നിയാർ പുഴയിൽ നീരൊഴുക്ക് വർധിച്ചതോടെ പൊന്മുടി ഡാമിന്‍റെ ഷട്ടറുകൾ തുറന്നു. ഇന്നലെ വൈകുന്നേരം 4.15നാണ് ഡാമിന്‍റെ ആദ്യത്തെ ഷട്ടർ 20 സെന്‍റിമീറ്റർ ഉയർത്തി സെക്കൻഡിൽ 22 ക്യുമെക്സ് വെള്ളം പുറത്തേക്ക് ഒഴുക്കിയത്. നീരൊഴുക്ക് വർധിച്ചതിനെത്തുടർന്ന് 4.30ന് രണ്ടാമത്തെ ഷട്ടറും 4.45ന് മൂന്നാമത്തെ ഷട്ടറും 20 സെന്‍റീമീറ്റർ വീതം ഉയർത്തി സെക്കൻഡിൽ 46,000 ലിറ്റർ വെള്ളമാണ് പുറത്തേക്ക് ഒഴുക്കുന്നത്. പന്നിയാർ ഹൈഡ്രോ ഇലക്‌ട്രിക് പ്രോജക്ടിന്‍റെ ഭാഗമായുള്ള അണക്കെട്ടിൽ നാലു ദിവസം മുമ്പു വരെ സംഭരണശേഷിയുടെ 75 ശതമാനം വെള്ളമേ ഉണ്ടായിരുന്നുള്ളൂ. ആദ്യമായാണ് മേയിൽ പൊന്മുടി ഡാം തുറക്കുന്നത്. 707.75 അടിയാണ് പൊന്മുടി ഡാമിന്‍റെ പരമാവധി സംഭരണശേഷി. ഇപ്പോൾ 706.5 അടി വെള്ളമാണ് ഡാമിലുള്ളത്. മൂന്നു ഷട്ടറുള്ള ഡാമിന്‍റെ നടുവിലെ ഷട്ടറാണ് ആദ്യം ഉയർത്തിയത്. തുടർന്ന് ജലനിരപ്പ് പരിശോധിച്ച ശേഷമാണ് മറ്റു ഷട്ടറുകൾ ഉയർത്തിയത്. നീരൊഴുക്ക് വർധിച്ചാൽ ഇനിയും ഷട്ടറുകൾ ഉയർത്തുമെന്നും 60 സെന്‍റീമീറ്റർ വരെ തുറക്കാനാണ് കളക്ടർ അനുമതി നൽകിയിരിക്കുന്നതെന്നും പ്രൊജക്ട് എൻജിനിയർ അറിയിച്ചു.

അയ്യപ്പൻകോവിലിൽ വീടുകൾ തകർന്നു

ഉപ്പുതറ: ശക്തമായ കാറ്റിലും മഴയിലും അയ്യപ്പൻകോവിൽ പഞ്ചായത്തിൽ രണ്ടു വീടുകൾ തകർന്നു. ഹെവൻവാലി പാറയ്ക്കൽ പുഷ്പം ഹൃദയരാജ്, പുല്ലുമേട് പുതുവൻ സെൽവി എന്നിവരുടെ വീടുകളാണ് തകർന്നത്. മുകൾ ഭാഗത്തുനിന്നു പാറക്കെട്ട് അടർന്നുവീണാണ് പുഷ്പത്തിന്‍റെ വീട് തകർന്നത്. ശക്തമായ കാറ്റിൽ സെൽവിയുടെ വീടിന്‍റെ മേൽക്കൂര പറന്നുപോയി. ഭിത്തികൾക്കും കേടുപാടുകൾ സംഭവിച്ചു. ബുധനാഴ്ച രാത്രിയിലാണ് രണ്ടു സംഭവങ്ങളും ഉണ്ടായത്. ഈ സമയം രണ്ടു വീടുകളിലും കൊച്ചുമക്കൾ ഉൾപ്പെടെയുള്ളവർ ഉണ്ടായിരുന്നു. ആർക്കും പരിക്കില്ല. വിവരമറിഞ്ഞയുടൻ പഞ്ചായത്തംഗം ബി. ബിനു, അയ്യപ്പൻകോവിൽ വില്ലേജ് ഓഫീസർ എ. അഞ്ജു,ആനവിലാസം വില്ലേജ് ഓഫീസർ രാജേഷ് മുല്ലപ്പള്ളി എന്നിവർ സ്ഥലത്തെത്തി. സെൽവിയെയും കുടുംബത്തെയും ബന്ധുവീട്ടിലേക്കും പുഷ്പത്തെയും വീട്ടുകാരെയും ദുരിതാശ്വാസ ക്യാമ്പിലേക്കും മാറ്റി. മണ്ണിടിച്ചിൽ ഭീഷണിയുള്ള കുഴൽപാലം, അയ്യപ്പൻകോവിൽ പാറേപ്പള്ളി പ്രദേശത്തുള്ള രണ്ടു വീട്ടുകാരെയും ക്യാമ്പിലേക്കു മറ്റിയിട്ടുണ്ട്. പൂക്കുളം ഗവ. എൽപി സ്കൂൾ, മേരികുളം സെന്‍റ് മേരീസ് യുപി സ്കൂൾ എന്നിവിടങ്ങളിലാണ് ദുരിതാശ്വാസ ക്യാമ്പുകൾ തുടങ്ങിയത്.

ലയത്തിനു മുകളിലേക്ക് വൻ മരം കടപുഴകി; ഓട്ടോറിക്ഷകൾ മരത്തിനടിയിൽപ്പെട്ടു

വണ്ടിപെരിയാർ: തൊഴിലാളികളുടെ ലയത്തിനു മുകളിലേക്ക് വൻ മരം കടപുഴകി വീണു. രണ്ട് ഓട്ടോറിക്ഷകളും മരത്തിനടിയിലായി. വ്യാഴാഴ്ച പുലർച്ചെ രണ്ടരയോടെയാണ് വണ്ടിപ്പെരിയാർ വാളാർഡി എച്ച്എംഎൽ എസ്റ്റേറ്റിൽ താമസിക്കുന്ന മുത്തുലക്ഷ്മി പുഷ്പം, മനോന്മണി ബാലമുരുകൻ എന്നിവരുടെ വീടുകളുടെ മുകളിലേക്ക് വൻ മരം കടപുഴകി വീണത്. മൂന്നു കുട്ടികളും മുത്തുലക്ഷ്മിയും മുത്തുലക്ഷ്മിയുടെ മാതാവ് പുഷ്പവുമാണ് വീടിനുള്ളിൽ ഉണ്ടായിരുന്നത്. ഇവർ അദ്ഭുതകരമായി രക്ഷപ്പെട്ടു. ഇതിനിടെ തൊട്ടടുത്ത ലയത്തിൽ താമസിക്കുന്ന രാജയുടെ ഓട്ടോറിക്ഷ മരത്തിനടിയിൽപ്പെട്ട് പൂർണമായി നശിച്ചു. ഇതോടൊപ്പം സമീപത്തു നിർത്തിയിട്ടിരുന്ന പെട്ടിഓട്ടോറിക്ഷയും തകർന്നിട്ടുണ്ട്. സംഭവം അറിഞ്ഞ എംപി, എംഎൽഎ, ത്രിതല പഞ്ചായത്ത് പ്രതിനിധികൾ ഉൾപ്പെടെയുള്ളവർ സംഭവസ്ഥലം സന്ദർശിച്ചു.

തൊടുപുഴ മേഖലയിൽ വ്യാപക നാശം

തൊടുപുഴ: കനത്ത മഴയിൽ തൊടുപുഴ, കുമ്മംകല്ല്, ഇടവെട്ടി മേഖലകളിലുണ്ടായത് വ്യാപക നാശം. ബുധനാഴ്ച വൈകുന്നേരം വീശിയടിച്ച കാറ്റിൽ നഗരത്തിൽ പലയിടത്തും മരങ്ങളും വൈദ്യുതി പോസ്റ്റുകളും മറിഞ്ഞു വീണു. ഇതേത്തുടർന്ന് പ്രദേശത്തേക്കുള്ള ഗതാഗതം സ്തംഭിച്ചു. കൂറ്റൻ മരം റോഡിലേക്ക് മറിഞ്ഞുവീണാണ് പ്രദേശത്തെ ഗതാഗവും വൈദ്യുതിയുമടക്കം സ്തംഭിച്ചത്. 24 മണിക്കൂർ പിന്നിട്ടിട്ടും ഇതു വഴിയുള്ള ഗതാഗതം പുനഃസ്ഥാപിക്കാത്തത് യാത്രക്കാരെ ദുരിതത്തിലാക്കി. ഒടിഞ്ഞത് കൂറ്റൻമരമായതിനാൽ വൈദ്യുതി പോസ്റ്റുകളടക്കം തകർന്നു. ഗതാഗതവും വൈദ്യുതിയും പൂർണമായും രാത്രിയോടെ എല്ലാം പുനഃസ്ഥാപിക്കാനാണ് ശ്രമം നടത്തുന്നതെന്ന് അധികൃതർ പറഞ്ഞു. പ്രദേശത്തെ നിരവധി വീടുകളിലേക്കും മരം വീണ് നാശം സംഭവിച്ചിട്ടുണ്ട്. കോടിക്കുളം ചെറുതോട്ടിൻകരയിൽ ഇന്നലെ വൈകുന്നേരം 5.45 ഓടെയുണ്ടായ ശക്തമായ കാറ്റിലും മഴയിലും മരങ്ങൾ വീണ് ഗതാഗതം തടസപ്പെടുകയും വൈദ്യുതി ബന്ധം തകരാറിലാകുകയും ചെയ്തു. കോടിക്കുളം, തട്ടക്കുഴ എന്നിവിടങ്ങളിലും മരം വീണ് ഗതാഗതം തടസപ്പെട്ടു. ഫയർഫോഴ്സിന്‍റെയും പോലീസിന്‍റെയും നാട്ടുകാരുടെയും നേതൃത്വത്തിൽ മരങ്ങൾ മുറിച്ചുനീക്കി. തട്ടക്കുഴ ശ്രീ മഹാദേവ ക്ഷേത്രത്തിലെ കൂറ്റൻ ആൽമരം ഇന്നലെയുണ്ടായ കാറ്റിൽ കടപുഴകി വീണു.

ന്യൂമാൻ കോളജിൽ കൊമേഴ്സ് ഗവേഷണകേന്ദ്രത്തിന് അനുമതി

തൊടുപുഴ: ന്യൂമാൻ കോളജിലെ കൊമേഴ്സ് വിഭാഗത്തിന് എംജി യൂണിവേഴ്സിറ്റിയുടെ ഗവേഷണ കേന്ദ്രമായി പ്രവർത്തിക്കാനുള്ള അനുമതി ലഭിച്ചു. വിവിധ മാനദണ്ഡങ്ങളെ അടിസ്ഥാനമാക്കിയുള്ള സൂഷ്മ പരിശോധനകൾക്ക് ശേഷമാണ് ഗവേഷണ കേന്ദ്ര പദവി ലഭിക്കുന്നത്. 1964-ൽ പ്രവർത്തനമാരംഭിച്ച കൊമേഴ്സ് വിഭാഗം കേരളത്തിലെ മികച്ച ഡിപ്പാർട്ട്മെന്‍റുകളിൽ ഒന്നാണ്. കോളജിലെ ഗവേഷണ മേഖലയ്ക്ക് ഈ നേട്ടം കൂടുതൽ ഉൗർജം പകരുമെന്നും കേന്ദ്രത്തിന്‍റെ പ്രവർത്തനങ്ങൾ ഉടൻ ആരംഭിക്കുമെന്നും പ്രിൻസിപ്പൽ ഡോ.ജെന്നി കെ. അലക്സ് അറിയിച്ചു. ഇപ്പോൾ ഡിപ്പാർട്ടുമെന്‍റ് നടപ്പാക്കിവരുന്ന കർമപദ്ധതികൾക്ക് പുറമേ അനുദിനം മാറുന്ന ഉന്നത വിദ്യാഭ്യാസരംഗത്ത് ഗുണമേ· ഉറപ്പാക്കുന്ന നവീനപ്രവർത്തനങ്ങൾ ക്രമീകരിക്കുന്നതിന് ഗവേഷണ കേന്ദ്രമായുള്ള ഉയർച്ച ഉപകാരപ്പെടുത്തുമെന്ന് വകുപ്പ് മേധാവി ക്യാപ്റ്റൻ പ്രജീഷ് സി.മാത്യു പറഞ്ഞു. ഗവേഷണകേന്ദ്രത്തിന്‍റെ ഭാവി പ്രവർത്തനങ്ങൾക്കായി സംഘടിപ്പിച്ച പ്ലാനിംഗ് ഫോറത്തിൽ അധ്യാപകരായ ബീന ദീപ്തി ലൂയിസ്, എബി തോമസ്, ജോയൽ ജോർജ്, ഫിയോണ ബെന്നി എന്നിവർ പങ്കെടുത്തു. കോളജിന്‍റെ നേട്ടത്തെ രക്ഷാധികാരി ബിഷപ് മാർ ജോർജ് മഠത്തിക്കണ്ടത്തിൽ, മാനേജർ മോണ്‍. പയസ് മലേക്കണ്ടത്തിൽ, ഹയർ എഡ്യൂക്കേഷൻ സെക്രട്ടറി റവ.ഡോ. പോൾ പാറത്താഴം, പ്രിൻസിപ്പൽ ഡോ. ജെന്നി കെ. അലക്സ്, വൈസ് പ്രിൻസിപ്പൽമാരായ ഡോ. സാജു ഏബ്രഹാം, പ്രഫ. ബിജു പീറ്റർ, ബർസാർ ഫാ. ബെൻസണ്‍ എൻ. ആന്‍റണി എന്നിവർ അഭിനന്ദിച്ചു.

യുവാവ് കനാലിൽ മരിച്ച നിലയിൽ

മറയൂർ : വട്ടവടയിൽ കനാലിൽ യുവാവിന്‍റെ മൃതദേഹം കണ്ടെത്തി. കോവിലൂർ സ്വദേശി ശരവണന്‍റെ മകൻ (25) വിഷ്ണുവിന്‍റെ മൃതദേഹമാണ് കണ്ടെത്തിയത്. കനാലിലേക്ക് തലകീഴായി കിടക്കുന്ന നിലയിലായിരുന്നു മൃതദേഹമെന്ന് പോലീസ് പറഞ്ഞു. ദേവികുളം പോലീസ് അന്വേഷണം ആരംഭിച്ചു. വട്ടവട പഞ്ചായത്ത് ഓഫീസിനു സമീപം മണ്ണിടിച്ചിൽ ഉണ്ടായിട്ടുണ്ട്. ഇതിനു സമീപത്താണ് മൃതദേഹവും കണ്ടെത്തിയത്. ചെറിയ കനാലിൽ വീണ് മരണം സംഭവിച്ചതായാണ് പ്രാഥമിക നിഗമനം. പ്രദേശത്ത് അഞ്ചു ദിവസമായി വൈദ്യുതി ബന്ധവും നിലച്ചിരിക്കുകയാണ്. മൃതദേഹം ഇടുക്കി മെഡിക്കൽ കോളജിൽ പോസ്റ്റുമോർട്ടം നടത്തി ബന്ധുക്കൾക്ക് വിട്ടുനൽകി. അമ്മ തങ്കമ്മാൾ. സഹോദൻ: വിവേക്.

വിശ്വാസജീവിത പരിശീലന ദിനാഘോഷം വാർഷികാഘോഷവും

കാഞ്ഞിരപ്പള്ളി: രൂപത വിശ്വാസജീവിതപരിശീലന കേന്ദ്രത്തിന്‍റെയും ചെറുപുഷ്പ മിഷൻ ലീഗിന്‍റെയും വാർഷികാഘോഷവും അവാർഡ് ദാനവും നാളെ രാവിലെ 9.30 മുതൽ ഉച്ചകഴിഞ്ഞ് രണ്ടു വരെ കാഞ്ഞിരപ്പള്ളി പാസ്റ്ററൽ സെന്‍ററിൽ നടക്കും. രാവിലെ പത്തിന് ഫാ. വർഗീസ് കൊച്ചുപറമ്പിൽ "വിശ്വാസജീവിതപരിശീലനം: നിത്യജീവനിലുള്ള പ്രത്യാശ' എന്ന വിഷയത്തെ ആസ്പദമാക്കി ക്ലാസ് നയിക്കും. തുടർന്നു നടക്കുന്ന വാർഷികസമ്മേളനം കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ ഉദ്ഘാടനം ചെയ്യും. രൂപത പ്രോട്ടോ സിഞ്ചെല്ലൂസ് റവ.ഡോ. ജോസഫ് വെള്ളമറ്റം അധ്യക്ഷത വഹിക്കും. രൂപത സിഞ്ചെല്ലൂസ് ഫാ. സെബാസ്റ്റ്യൻ കൊല്ലംകുന്നേൽ പ്രസംഗിക്കും. വിവിധ മേഖലകളിൽ മികവു തെളിയിച്ച സൺഡേ സ്കൂളുകളെയും കുട്ടികളെയും ആദരിക്കും. മതാധ്യാപനരംഗത്ത് 50 വർഷങ്ങൾ പൂർത്തിയാക്കിയ നാല് അധ്യാപകർക്കും 25 വർഷങ്ങൾ പൂർത്തിയാക്കിയ 29 അധ്യാപകർക്കും പുരസ്കാരങ്ങൾ നൽകും. കഴിഞ്ഞ 12 വർഷവും മുടക്കം വരുത്താതെ എല്ലാ ഞായറാഴ്ചകളിലും വിശ്വാസജീവിത പരിശീലനത്തിൽ പങ്കെടുത്ത 25 കുട്ടികൾക്ക് പ്രത്യേക പുരസ്കാരങ്ങൾ നൽകി ആദരിക്കും. തുടർന്ന് പ്രധാനാധ്യാപകർ, സ്റ്റാഫ് സെക്രട്ടറിമാർ, ഫൊറോന സെക്രട്ടറിമാർ എന്നിവരുടെ സമ്മേളനം കാഞ്ഞിരപ്പള്ളി രൂപത വിശ്വാസജീവിത പരിശീലനകേന്ദ്രം ഡയറക്ടർ ഫാ. തോമസ് വാളന്മനാൽ നയിക്കും. സമ്മേളനത്തിൽ അടുത്ത അധ്യയനവർഷത്തെ കർമപദ്ധതികളുടെ വിശദീകരണവും ചർച്ചകളും നടക്കും.

കുളമാവ് ഗ്രാമത്തെ നെഞ്ചിലേറ്റിയ സിസ്റ്റർ ഡോ. ജോസഫൈൻ വിശ്രമജീവിതത്തിലേക്ക്

മൂലമറ്റം: എസ്എച്ച് സഭാംഗമായ സിസ്റ്റർ ഡോ. ജോസഫൈൻ കളപ്പുര മലയോരഗ്രാമമായ കുളമാവിലെ സാധാരണക്കാരായ മനുഷ്യരെ ഹൃദയംകൊണ്ടു സ്നേഹിച്ചു. അമ്മയും കുഞ്ഞും തമ്മിലുള്ള പൊക്കിൾക്കൊടി ബന്ധം പോലെയായിരുന്നു ആ സ്നേഹം. 1979ലാണ് സിസ്റ്റർ കുളമാവ് എസ്എച്ച് കോണ്‍വന്‍റിൽ എത്തുന്നത്. ആതുര ശുശ്രൂഷാരംഗത്ത് നാലര പതിറ്റാണ്ടോളം നീണ്ട സേവനത്തിനിടെ ഇവിടത്തുകാർക്ക് പത്തും ഇരുപതും അന്പതും രൂപയ്ക്ക് മരുന്ന് മാത്രമല്ല ലഭിച്ചത്. സോഷ്യൽ സെന്‍റർ എന്ന സ്ഥാപനത്തിലൂടെ നിരവധിപ്പേർക്ക് വീട്, ശുചിമുറി, തയ്യൽപരിശീലനം എന്നിവയെല്ലാം സിസ്റ്ററിലൂടെ ലഭിച്ചു. കാരുണ്യത്തിന്‍റെ തൂവൽ സ്പർശം സിസ്റ്ററിന്‍റെ കർമനിരതമായ ജീവിതത്തിലൂടെയും സ്നേഹമസൃണമായ സംസാരത്തിലൂടെയും പുഞ്ചിരിതൂകുന്ന മുഖഭാവത്തോടെയും അനുഭവച്ചറിയാൻ ഈ ഗ്രാമത്തിനായി. ജർമനിയിൽനിന്നു മെഡിസിൻ പഠനം പൂർത്തിയാക്കിയ സിസ്റ്റർ മുതലക്കോടം ഹോളിഫാമിലി, കട്ടപ്പന സെന്‍റ് ജോണ്‍സ്, മൂലമറ്റം ബിഷപ് വയലിൽ എന്നീ ആശുപത്രികളിൽ സേവനം അനുഷ്ടിച്ചിട്ടുണ്ട്. 1980ൽ കുളമാവ് എസ്എച്ച് മഠത്തോടു ചേർന്ന് സിസ്റ്റർ സ്ഥാപിച്ച സെന്‍റ് ജോസഫ് ഡിസ്പെൻസറിയിലൂടെയാണ് അനേകർ സിസ്റ്ററിന്‍റെ ശുശ്രൂഷ അനുഭവിച്ചറിഞ്ഞത്. സോഷ്യൽ സെന്‍റർ എന്ന സ്ഥാപനത്തിലൂടെ നൂറുകണക്കിനു പെണ്‍കുട്ടികൾ തയ്യൽപരിശീലനം നേടി. ഇവർക്ക് തയ്യൽമെഷീനുകൾ നൽകി അവരെ തൊഴിൽ സംരംഭകരാക്കി മാറ്റി. വർഷങ്ങൾക്കുമുന്പ് നിരവധിപ്പേർ ശാരീരിക അസ്വസ്ഥതയുമായി ഡിസ്പെൻസറിയിലെത്തി. കാരണമന്വേഷിച്ചപ്പോൾ ശുചിമുറി ഇല്ലാത്തതാണ് രോഗബാധയ്ക്കു കാരണമെന്ന് അറിയാനായി. അതോടെ അവർക്ക് ശുചിമുറി നിർമിച്ചുനൽകാൻ സിസ്റ്റർ മുന്നിട്ടിറങ്ങി. വീടില്ലാത്തവർക്ക് വീടും നിർമിച്ചുനൽകി. നാടുകാണിയിലെ ഡിസ്പെൻസറിയുടെ ശാഖയിലൂടെ ഗോത്രജനത ഏറെയുള്ള കോഴിപ്പള്ളി, നാടുകാണി എന്നിവിടങ്ങളിലും നിസ്വാർഥ സേവനം എത്തിക്കാൻ സിസ്റ്ററിനു കഴിഞ്ഞു. പതിറ്റാണ്ടുകൾ നീണ്ട തന്‍റെ ശുശ്രൂഷാമണ്ഡലത്തെ വിട്ട് മൂലമറ്റം എസ്എച്ച് കോണ്‍വന്‍റിലേക്ക് വിശ്രമത്തിനായി ഇന്നു സിസ്റ്റർ മടങ്ങുന്പോൾ തങ്ങൾക്കു ലഭിച്ച സ്നേഹത്തിന്‍റെ കടം എങ്ങനെ വീട്ടുമെന്ന ചിന്തയിലാണ് നാട്ടുകാർ.

മൺതിട്ട ഇടിഞ്ഞു വീട് അപകടാവസ്ഥയിൽ‌

കട്ടപ്പന: ഇരട്ടയാർ നാലു സെന്‍റ് കോളനിയിൽ വീടുകളുടെ മുൻ വശത്തെ മൺതിട്ട ഇടിഞ്ഞ് വീടുകൾ അപകടാവസ്ഥയിലായി. കറുകയിൽ സോമൻ, സമീപവാസിയായ അനിത എന്നിവരുടെ വീടുകളാണ് അപകടാവസ്ഥയിലായത്. കഴിഞ്ഞ ദിവസം ഇതു വഴിയുള്ള റോഡ് കോൺക്രീറ്റ് ചെയ്യുന്നതിന്‍റെ ഭാഗമായി വീടുകളുടെ മുൻവശത്തെ മണ്ണ് എടുത്തുമാറ്റിയിരുന്നു. തുടർന്ന് വലിയ തിട്ടയായി നിലകൊള്ളുകയായിരുന്നു. നിലവിൽ വീടിന്‍റെ മുൻവശത്ത് ഇടിഞ്ഞ ഭാഗം പടുതാ ഇട്ട് സംരക്ഷിച്ചു നിർത്തിയിരിക്കുകയാണ്.

സ്വരാജില്‍ മരം വീണ് വീട് തകർന്നു

കട്ടപ്പന: മരം കടപുഴകി വീണ് കാഞ്ചിയാര്‍ സ്വാരാജില്‍ വീടിന് കേടുപാട് സംഭവിച്ചു. സ്വരാജ് ഗോപുരം സിറിളിന്‍റെ വീടിനു മുകളിലേക്കാണ് സമീപത്തുനിന്ന ഈട്ടിമരം വീണത്. വീട്ടിലുണ്ടായിരുന്നവര്‍ പുറത്തേക്ക് ഓടി രക്ഷപ്പെട്ടു. വീടിന്‍റെ ഭിത്തികള്‍ക്ക് വിള്ളല്‍ വീണിട്ടുണ്ട്. മേല്‍ക്കൂരയ്ക്കും കേടുപാട് സംഭവിച്ചു. വിവരമറിയിച്ചതിനെത്തുടര്‍ന്ന് ഫയര്‍ഫോഴ്‌സ് എത്തിയെങ്കിലും മരം മുറിച്ചുമാറ്റാന്‍ പ്രയാസമാണെന്നു പറഞ്ഞ് ഇവര്‍ മടങ്ങി. മരം മുറിച്ചുമാറ്റാന്‍ അനുമതിക്കായി മൂന്നു വര്‍ഷം മുമ്പ് ജില്ലാ കളക്ടര്‍, എഡിഎം, കാഞ്ചിയാര്‍ പഞ്ചായത്ത് എന്നിവര്‍ക്ക് പരാതി നല്‍കിയിരുന്നു. റവന്യു അധികൃതര്‍ സ്ഥലത്തെത്തി പരിശോധന നടത്തി മടങ്ങിയതല്ലാതെ തുടര്‍നടപടി ഉണ്ടായില്ല. തുടര്‍ന്ന് വീണ്ടും പരാതി നല്‍കിയെങ്കിലും വിഫലമായി. നിലവില്‍ ഈ വീട് അപകടാവസ്ഥയിലാണ്. അറ്റകുറ്റപ്പണി നടത്തണമെങ്കില്‍ വന്‍തുക വേണ്ടിവരും. അധികൃതരുടെ അനാസ്ഥയാണ് ഇപ്പോഴത്തെ ദുരവസ്ഥയ്ക്കു കാരണമെന്ന് സിറില്‍ പറയുന്നു.

ഓണ്‍ലൈൻ പരീക്ഷാ സംവിധാനം ഏർപ്പെടുത്തും: മന്ത്രി ആർ. ബിന്ദു

വണ്ടിപ്പെരിയാർ: സർക്കാർ പോളിടെക്നിക് കോളേജിൽ പുതുതായി നിർമിച്ച അക്കാദമിക് ബ്ലോക്കിലെ പുതിയ കംപ്യൂട്ടർ ലാബിൽ ഓണ്‍ലൈൻ പരീക്ഷാ സംവിധാനം ഏർപ്പെടുത്തുമെന്ന് മന്ത്രി ഡോ. ആർ. ബിന്ദു. കോളജിന്‍റെ രജതജൂബിലിയോടനുബന്ധിച്ച് നിർമിച്ച പുതിയ അക്കാദമിക് ബ്ലോക്കിന്‍റെ ഉദ്ഘാടനം നിർവഹിക്കുകയായിരുന്നു മന്ത്രി. ഓണ്‍ലൈൻ പരീക്ഷാ കേന്ദ്രം സജ്ജമാകുന്നതോടെ മലയോര മേഖലയിലെ വിദ്യാർഥികൾക്കും ഉദ്യോഗാർഥികൾക്കും ഏറെ ദൂരം യാത്ര ചെയ്യാതെ ഇവിടെ തന്നെ പരീക്ഷ എഴുതുന്നതിനുള്ള സാഹചര്യം ഇതിവഴിയുണ്ടാകുമെന്നും മന്ത്രി പറഞ്ഞു. പ്രവേശന പരീക്ഷകൾ, പിഎസ്എസി ഉൾപ്പടെയുള്ള ഓണ്‍ലൈൻ പരീക്ഷകൾ തുടങ്ങിയവ നടത്താനാവശ്യമായ ക്രമീകരണങ്ങളാകും ഇവിടെ ഏർപ്പെടുത്തുക. 280 കംപ്യൂട്ടറുകൾ ഉൾപ്പെടുന്ന ലാബാണ് സജ്ജീകരിച്ചിട്ടുള്ളത്. കിഫ്ബിയുടെ സഹായത്തോടെ കിറ്റ്കോയുടെ മേൽനോട്ടത്തിൽ 9.63 കോടി രൂപ ചെലവഴിച്ചാണ് അത്യാധുനിക സൗകര്യങ്ങളോടെ ക്ലാസ് മുറികൾ, ലാബുകൾ, സെമിനാർ ഹാൾ എന്നിവയുൾപ്പെടുന്ന അക്കാദമിക് ബ്ലോക്ക് നിർമിച്ചത്. നാലു നിലകളിലായി നാലുനിലകളിലായി നിർമിച്ചിരിക്കുന്ന പുതിയ അക്കാദമിക് ബ്ലോക്കിന് 32,000 സ്ക്വയർ ഫീറ്റ് വിസ്തീർണമുണ്ട്. ക്ലാസ്റൂമുകൾ, ലാബുകൾ, കോമണ്‍ കംപ്യൂട്ടിംഗ് ഫെസിലിറ്റി ലാബ്, സെമിനാർ ഹാൾ, സ്റ്റാഫ് റൂമുകൾ, എച്ച്ഒഡി റൂമുകൾ, സ്റ്റുഡന്‍റസ് അമിനിറ്റി റൂമുകൾ, സിക്ക് റൂം തുടങ്ങിയ സൗകര്യങ്ങളും ഇവിടെയുണ്ട്. വാഴൂർ സോമൻ എംഎൽഎ അധ്യക്ഷത വഹിച്ചു. ഡീൻ കുര്യാക്കോസ് എംപി മുഖ്യപ്രഭാഷണം നടത്തി. ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറനാകുന്നേൽ, പീരുമേട് ബ്ലോക്ക് പഞ്ചായത്ത് വൈസ് പ്രസിഡന്‍റ് ആർ. ശെൽവത്തായി, ഇടുക്കി ജില്ലാ പഞ്ചായത്തംഗം എസ്.പി. രാജേന്ദ്രൻ, വണ്ടിപ്പെരിയാർ പഞ്ചായത്ത് വൈസ് പ്രസിഡന്‍റ് എം. ശ്രീരാമൻ തുടങ്ങിയവർ പ്രസംഗിച്ചു.

കോടികൾ പാഴായത് മിച്ചം; ബസ് ടെർമിനൽ ചോർന്നൊലിക്കുന്നു

തൊടുപുഴ: മഴക്കാലമെത്തിയതോടെ തൊടുപുഴയിലെ കെഎസ്ആർടിസി ബസ് സ്റ്റാൻഡിൽ എത്തുന്ന യാത്രക്കാരുടെ സ്ഥിതി ദുരിതപൂർണം. കോടികൾ മുടക്കി നിർമിച്ച ബസ് ടെർമിനലിൽ എത്തുന്ന യാത്രക്കാർക്ക് കുടയുണ്ടെങ്കിൽ മഴയിൽനിന്നു രക്ഷപ്പെടാമെന്ന സ്ഥിതിയാണ്. ഇവിടെ ബസ് കാത്തിരിക്കുന്ന ഇടങ്ങൾ ഉൾപ്പെടെ ചോർന്നൊലിക്കുന്ന നിലയിലാണ്. മിക്കയിടങ്ങളിലും മേൽക്കൂരയിലൂടെ വെള്ളം താഴേക്ക് പതിക്കും. ഇതോടെ പ്രദേശമാകെ വെള്ളക്കെട്ടും രൂപപ്പെടും. പലയിടത്തും ബക്കറ്റിൽ വെള്ളം പിടിച്ചെടുത്ത് മാറ്റേണ്ട സ്ഥിതിയാണുള്ളത്. കെട്ടിടത്തിന്‍റെ മേൽക്കൂരയിൽ സ്ഥാപിച്ചിരിക്കുന്ന കട്ടികുറഞ്ഞ ഷീറ്റുകൾക്കിടയിലൂടെയാണ് വെള്ളം താഴേക്കു പതിക്കുന്നത്. ഇത് തറയിൽ വലിയ അളവിൽ കെട്ടിക്കിടക്കുന്നതാണ് യാത്രക്കാരെ വലയ്ക്കുന്നത്. രണ്ടു ദിവസം തുടർച്ചയായി മഴ പെയ്താൽ സ്ഥിതി അതീവ ദയനീയമാകും. ശുചിമുറിയിലേക്കു പോകുന്ന ഭാഗത്തും വെള്ളം കെട്ടിക്കിടക്കുന്നുണ്ട്. മുൻവശത്തുള്ള നിരീക്ഷണ കാമറയിലേക്കും വെള്ളം പതിക്കുന്നുണ്ട്. വെള്ളം ഒലിച്ചിറങ്ങുന്നതിനാൽ ഇതിനു സമീപത്തുള്ള സ്വിച്ച് ബോർഡും നനഞ്ഞ് കുതിർന്നിരിക്കുകയാണ്. ലിഫ്റ്റ് സ്ഥാപിക്കുന്നതിനായി ഭിത്തി തുരന്ന ഭാഗത്തും വെള്ളം ചോർന്നൊലിക്കുന്നുണ്ട്. രണ്ടു ശുചീകരണ തൊഴിലാളികൾ മുഴുവൻ സമയവും തറയിലെ വെള്ളക്കെട്ട് നീക്കാനുള്ള ശ്രമത്തിലാണ്. കനത്ത മഴയെത്തുടർന്ന് ഓഫീസ് മുറിയിലടക്കം വെള്ളം വീഴുന്നുണ്ട്. പാഴ്സൽ സൂക്ഷിക്കുന്ന മുറിയുടെ ഭിത്തിയിലൂടെ വെള്ളം ഒലിച്ചിറങ്ങുന്നതിനാൽ തറയിൽ ഇതു സൂക്ഷിക്കാൻ കഴിയാത്ത അവസ്ഥയുണ്ട്. ഇതിനു പുറമേ പാർക്കിംഗ് ഏരിയായിലും വെള്ളക്കെട്ട് രൂപപ്പെടുന്നുണ്ട്. കോടികൾ മുടക്കിയെങ്കിലും അശാസ്ത്രീയമായ നിർമാണമാണ് കെട്ടിടത്തിന്‍റെ ഈ ദുരവസ്ഥയ്ക്കു കാരണമെന്നാണ് ആക്ഷേപം. ഇതിനിടെ തറയിലെ വെള്ളത്തിലും ചെളിയിലും ചവിട്ടി യാത്രക്കാർ തെന്നിവീഴുന്നുമുണ്ട്. കഴിഞ്ഞ ദിവസം ആറോളം യാത്രക്കാർ അപകടത്തിൽപ്പെട്ടു. ബസിൽ കയറാനുള്ള ഓട്ടത്തിനിടയിലാണ് പലരും വഴുതി വീഴുന്നത്. ചോർച്ച തടയുന്നതിന് അടിയന്തര സംവിധാനമൊരുക്കുന്നതിനായി 50,000 രൂപ അനുവദിക്കണമെന്നാവശ്യപ്പെട്ട് ഗതാഗതവകുപ്പ് കാര്യാലയത്തിലേക്ക് കത്തയച്ചിട്ടുണ്ടെന്ന് അഡ്മിനിസ്ട്രേറ്റീവ് ഓഫീസർ വി. താര പറഞ്ഞു. കെട്ടിടത്തിനു മുകളിൽ വാട്ടർപ്രൂഫ് ചെയ്യുന്ന നടപടികൾ പുരോഗമിക്കുകയാണ് ഇതിനിടയിലാണ് കാലവർഷമെത്തിയത്. മഴ കുറഞ്ഞാൽ തുടർനടപടികൾ സ്വീകരിക്കുമെന്നും അവർ പറഞ്ഞു.

നനഞ്ഞൊലിച്ച് നഗരസഭാ സ്റ്റാൻഡും

തൊടുപുഴ: ദിവസവും ആയിരക്കണക്കിനു യാത്രക്കാർ എത്തുന്ന തൊടുപുഴ മുനിസിപ്പൽ ബസ് സ്റ്റാൻഡും ചോർന്നൊലിക്കുകയാണ്. സ്റ്റാൻഡിലെ ഷോപ്പിംഗ് കോംപ്ലക്സിന്‍റെ മേൽക്കൂരയിലെ തകരഷീറ്റുകൾ ചോർന്നൊലിക്കുന്ന നിലയിലായതോടെയാണ് യാത്രക്കാരും വ്യാപാരികളും ബസ് ജീവനക്കാരും ദുരിതമനുഭവിക്കാൻ തുടങ്ങിയത്. ബസ് കാത്തുനിൽക്കുന്ന യാത്രക്കാർ മഴ പെയ്താൽ നനയുന്ന സ്ഥിതിയാണുള്ളത്. ഇവിടെ കച്ചവടസ്ഥാപനങ്ങൾ നടത്തുന്ന വ്യാപാരികളും ഇതുമൂലം ദുരിതമനുഭവിക്കുകയാണ്. ഷോപ്പിംഗ് കോംപ്ലക്സിന്‍റെ തകരഷീറ്റുകൾ തുരുന്പെടുത്തും മറ്റും നശിച്ചു തുടങ്ങിയിട്ട് കാലങ്ങളായി. മഴ പെയ്യുന്നതോടെ വരാന്തയിൽ വെള്ളം കെട്ടിക്കിടക്കുന്നതിനാൽ യാത്രക്കാർ തെന്നിവീഴാനും സാധ്യതയുണ്ട്. വ്യാപാരികളാണ് വെള്ളം തുടച്ചുനീക്കി ഇവിടം വൃത്തിയാക്കുന്നത്. വരാന്തയിൽ വീഴുന്ന വെള്ളം ബസ്ബേയിലും പരിസര പ്രദേശങ്ങളിലുമാണ് കെട്ടിക്കിടക്കുന്നത്. ഇവിടെ കോണ്‍ക്രീറ്റിൽ പായൽ പിടിച്ച് യാത്രക്കാർ തെന്നിവീണ് അപകടമുണ്ടാകാനും സാധ്യതയുണ്ട്. മുനിസിപ്പൽ അധികൃതർക്കു മുന്നിൽ ഏറെനാളുകളായി ഇതു സംബന്ധിച്ച് പരാതി പറയുന്നുണ്ടെങ്കിലും ഇവർ തിരിഞ്ഞു നോക്കുന്നില്ലെന്ന് വ്യാപാരികൾ പറയുന്നു. ഷോപ്പിംഗ് കോംപ്ലക്സിലെ വ്യാപാര സ്ഥാപനങ്ങളിൽനിന്നും വാടകയിനത്തിലും ബസുകളുടെ പാർക്കിംഗ് ഫീസിനത്തിലും വൻ തുക നഗരസഭയ്ക്ക് ലഭിക്കുന്നുണ്ട്. എങ്കിലും സ്റ്റാൻഡിലെ അടിസ്ഥാന സൗകര്യങ്ങൾ മെച്ചപ്പെടുത്തുന്നില്ലെന്നാണ് പരാതി.

ഓപ്പറേഷൻ സുരക്ഷിത വിദ്യാരംഭം; സ്കൂൾ ബസുകളുടെ ഫിറ്റ്നസ് പരിശോധന പുരോഗമിക്കുന്നു

ഇടുക്കി: സ്കൂൾ വിദ്യാർഥികളുടെ സുരക്ഷ ഉറപ്പാക്കാൻ ഓപ്പറേഷൻ സുരക്ഷിത വിദ്യാരംഭം 2025 പദ്ധതിയുടെ ഭാഗമായി ജില്ലയിലെ സ്കൂൾ ബസുകളുടെ ഫിറ്റ്നസ് പരിശോധന പുരോഗമിക്കുന്നു. ജില്ലയിലെ അഞ്ച് ആർടി ഓഫീസുകളുടെ കീഴിലാണ് ബസുകളുടെ പരിശോധന നടക്കുന്നത്. അതത് സ്കൂളുകളിൽ നേരിട്ടെത്തിയാണ് മോട്ടോർ വാഹനവകുപ്പ് പരിശോധന നടത്തുന്നത്. ഇടുക്കി ആർടി ഓഫീസിന്‍റെ കീഴിൽ സ്കൂൾ ബസുകളുടെ പരിശോധന പൂർത്തിയായി. വിവിധ സ്കൂളുകളിലായി 160 വാഹനങ്ങൾ പരിശോധിച്ചു. ഇതിൽ 28 വാഹനങ്ങൾക്ക് ന്യൂനതകൾ കണ്ടെത്തിയതിനാൽ ആ വാഹനങ്ങൾ കേടുപാടുകൾ പരിഹരിച്ചതിനു ശേഷം വീണ്ടും ഹാജരാക്കാൻ ആർടിഒ പി.എം. ഷെബീർ നിർദേശം നൽകി. സ്പീഡ് ഗവേണറുകൾ, എമർജൻസി ഡോറുകൾ എന്നിവ പ്രവർത്തിക്കാത്തതും തേയ്മാനം സംഭവിച്ച ടയറുകൾ ഉള്ളതുമായ സ്കൂൾ വാഹനങ്ങൾ ന്യൂനതകൾ പരിഹരിച്ച ശേഷം വീണ്ടും ഹാജരാക്കാൻ നിർദേശം നൽകി. ദേവികുളം ആർടി ഓഫീസിന്‍റെ നേതൃത്വത്തിൽ 33 സ്കൂളുകളിലെ 90 ബസുകൾ പരിശോധിച്ചു. ഡ്രൈവർമാരും ആയമാരും ഉൾപ്പെടെ 184 പേർക്ക് ബോധവത്ക്കരണ ക്ലാസ് നൽകി. വണ്ടിപ്പെരിയാർ ആർടി ഓഫീസിന്‍റെ നേതൃത്വത്തിൽ 125 സ്കൂൾ ബസുകളുടെ പരിശോധന പൂർത്തിയാക്കി. തൊടുപുഴ ആർടി ഓഫീസിന്‍റെ നേതൃത്വത്തിൽ 60 സ്കൂളുകളിലെ 190 വാഹനങ്ങൾ പരിശോധിച്ചു. ഡ്രൈവർമാരും ആയമാരും ഉൾപ്പെടെ 350 പേർക്ക് ബോധവത്കരണ ക്ലാസ് നല്കി. ഉടുന്പൻചോല ആർടി ഓഫീസിന്‍റെ നേതൃത്വത്തിൽ 65 സ്കൂൾ ബസുകളുടെ പരിശോധന പൂർത്തിയാക്കി.

ജില്ലയിൽ കനത്ത മഴ, കാറ്റ്; വ്യാപക നാശം

തൊടുപുഴ: ജില്ലയിൽ കനത്ത മഴ തുടരുന്നു. ശക്തമായ കാറ്റും മഴയും മൂലം വ്യാപക നാശനഷ്ടമാണ് ജില്ലയിൽ ഉണ്ടായിരിക്കുന്നത്. കഴിഞ്ഞ 24 മണിക്കൂറിനിടെ 23 വീടുകൾ കനത്ത മഴയിൽ തകർന്നു. ദേവികുളം താലൂക്കിൽ രണ്ടു വീടുകൾ പൂർണമായും 13 വീടുകൾ ഭാഗികമായും തകർന്നു. പീരുമേട്ടിൽ അഞ്ചു വീടുകളും ഉടുന്പൻചോലയിൽ മൂന്നു വീടുകളും ഭാഗികമായി നശിച്ചു. കഴിഞ്ഞ അഞ്ചുദിവസമായി പെയ്യുന്ന കനത്ത മഴയിലും ശക്തമായ കാറ്റിലും ജില്ലയിൽ 48 വീടുകൾക്കാണ് നാശനഷ്ടമുണ്ടായത്. മൂന്നു വീടുകൾ പൂർണമായും തകർന്നു. ദേവികുളം താലൂക്കിൽ രണ്ട് വീടുകളും ഉടുന്പൻചോല താലൂക്കിൽ ഒരു വീടുമാണ് പൂർണമായും തകർന്നത്. കനത്ത കാറ്റിനെത്തുടർന്ന് തൊടുപുഴ നഗരത്തിൽ പാർക്ക് ചെയ്തിരുന്ന കാറുകൾക്കു മുകളിലേക്കു മരം വീണു. ഗവ. ഗസ്റ്റ് ഹൗസിനു എതിർവശത്ത് പാർക്ക് ചെയ്തിരുന്ന കാറുകൾക്ക് മുകളിലേക്കാണ് ഇന്നലെ വൈകുന്നേരം മരം വീണത്. 49.56 മില്ലി മീറ്റർ മഴയാണ് ജില്ലയിൽ കഴിഞ്ഞ 24 മണിക്കൂറിനുള്ളിൽ പെയ്തത്. ഇടുക്കി അണക്കെട്ടിൽ 2335.4 അടിയും മുല്ലപ്പെരിയാറിൽ 121.6 അടിയുമാണ് ജലനിരപ്പ്. അതിതീവ്ര മഴയ്ക്ക് സാധ്യതയുള്ളതിനാൽ ജില്ലയിൽ ഇന്നും നാളെയും കേന്ദ്ര കാലാവസ്ഥാ വകുപ്പ് റെഡ് അലർട്ടും ശനിയാഴ്ച യെല്ലോ അലർട്ടും പ്രഖ്യാപിച്ചിട്ടുണ്ട്. അതിതീവ്രമഴയുടെ പശ്ചാത്തലത്തിൽ ജില്ലയിൽ അതീവ ജാഗ്രതാ നിർദേശം പുറപ്പെടുവിച്ചിട്ടുണ്ട്.

മറയൂരിന്‍റെ വേനൽക്കാല സൗന്ദര്യമായ നീല വാക കാറ്റിൽ നിലം പതിച്ചു

മറയൂർ: മാർച്ച്, ഏപ്രിൽ മാസങ്ങളിൽ മറയൂരിന്‍റെ സൗന്ദര്യമായിരുന്ന നീലവാക (ജക്രാന്ത) ബുധനാഴ്ച പുലർച്ചെയുണ്ടായ കനത്ത മഴയിലും കാറ്റിലും കടപുഴകി. അയൽ സംസ്ഥാനങ്ങളിൽ നിന്നും ചിന്നാർ വഴി കേരളത്തിലേക്ക് പ്രവേശിക്കുന്ന ജനവാസ കേന്ദ്രമായ നൂറുവീട് ഭാഗത്തെ നാൽക്കവലയിൽ മരം പൂവിട്ട് നിൽക്കുന്നത് ആരെയും ആകർഷിക്കുന്ന കാഴ്ചയായിരുന്നു. ഉദുമൽപേട്ട, കാന്തല്ലൂർ, മൂന്നാർ, മറയൂർ എന്നിവിടങ്ങളിലേക്ക് വഴികൾ പിരിയുന്ന ഭാഗത്താണ് നീല വാക തണലേകി നിന്നിരുന്നത്. കേരളത്തിലേയും തമിഴ്നാട്ടിലേയും സോഷ്യൽ മീഡിയയിൽ നിറഞ്ഞുനിന്നിരുന്ന മരം കടപുഴകി വീണ ദുഃഖം പങ്കുവച്ച് സോഷ്യൽ മീഡിയ റീലുകളിൽ നിറയുകയാണ്. മറയൂർ ഡയറീസ് എന്ന ഇൻസ്റ്റാഗ്രാം പേജിലൂടെ പങ്കുവച്ച പൂവിട്ടതും വീണ് കിടക്കുന്നതുമായ മരം നൂറുകണക്കിന് പ്രഫൈലുകളിലേക്കാണ് ഷെയർ ചെയ്യപ്പെട്ടിരിക്കുന്നത്. അഞ്ചുനാടിന്‍റെ വേനൽക്കാല സൗന്ദര്യമാണ് നഷ്ടമായതെന്നും വേനൽക്കാലത്ത് ടൂറിസം മേഖലയിൽ നിരവധി സഞ്ചാരികളെ ആകർഷിച്ചിരുന്ന മരം കടപുഴകി വീണത് ടൂറിസം മേഖലയ്ക്കു തന്നെ വലിയ നഷ്ടമാണെന്നും കാന്തല്ലൂർ പഞ്ചായത്ത് പ്രസിഡന്‍റ് പി.ടി. തങ്കച്ചൻ പറഞ്ഞു.

അശാസ്ത്രീയ മണ്ണുനീക്കൽ ഭീഷണി

അടിമാലി: മഴ കനത്തതോടെ ദേശീയപാത 85ല്‍ മരം വീഴ്ചയും മണ്ണിടിച്ചില്‍ ഭീഷണിയും. നവീകരണ ജോലികളുടെ ഭാഗമായി മണ്ണു നീക്കിയതോടെയാണ് നേര്യമംഗലം മുതല്‍ മൂന്നാര്‍ വരെയുള്ള ഭാഗങ്ങളില്‍ ഇടിച്ചില്‍ ഭീഷണി ഉണ്ടായിരിക്കുന്നത്. മണ്ണു നീക്കിയ ഭാഗത്ത് മണ്‍തിട്ടയ്ക്കു മുകളില്‍ ആശങ്കയോടെ കഴിയുന്ന നിരവധി വീട്ടുകാരുണ്ട്. നേര്യമംഗലം വനമേഖലയിലടക്കം നിലം പതിക്കാവുന്ന നിലയില്‍ നില്‍ക്കുന്ന മരങ്ങളും ധാരാളമാണ്. ഇത്തവണ മഴ കനത്ത ശേഷം ഏറ്റവും അധികം മരങ്ങള്‍ നിലംപതിച്ചതും മണ്ണിടിച്ചില്‍ ഉണ്ടായതുമായ ഇടങ്ങളില്‍ ഒന്നാണ് ദേശീയപാത 85ന്‍റെ ഭാഗമായ നേര്യമംഗലം മുതല്‍ മൂന്നാര്‍ വരെയുള്ള ഭാഗം. നവീകരണജോലികളുടെ ഭാഗമായി മണ്ണു നീക്കിയതാണ് മണ്ണിടിച്ചിലിനും അടിക്കടിയുള്ള മരം വീഴ്ചയ്ക്കും കാരണം. കഴിഞ്ഞ മഴക്കാലത്തും സ്ഥിതി സമാനമായിരുന്നു. നേര്യമംഗലം വനമേഖലയില്‍ മണ്ണ് നീക്കിയ നിരവധിയിടങ്ങളില്‍ റോഡിലേക്ക് പതിക്കാവുന്ന വിധം വലിയ മരങ്ങള്‍ നില്‍ക്കുന്നുണ്ട്. മണ്ണ് നീക്കിയ പലയിടങ്ങളിലും ഭീമാകാരമായ തിട്ട രൂപം കൊണ്ടു. അവയുടെ മുകളിലുള്ള വീടുകള്‍ പലതും അപകടാവസ്ഥയിലാണ്.ഇടിച്ചില്‍ ഭീഷണി മൂലം ചിലര്‍ മറ്റിടങ്ങളിലേക്കു താമസം മാറി. മണ്ണിട്ട് നികത്തി ഓടകളും കലുങ്കുകളും അടഞ്ഞതോടെ മഴ വെള്ളം കൃഷിയിടങ്ങളിലൂടെ നിരന്നൊഴുകുന്നതായും പരാതിയുണ്ട്. മണ്ണു നീക്കിയ ഇടങ്ങളില്‍ സംരക്ഷണഭിത്തി നിര്‍മാണം പൂര്‍ത്തിയാകാന്‍ വൈകുന്നതു മൂലം ദേശീയപാതതന്നെ ചിലയിടങ്ങളില്‍ ഇടിച്ചില്‍ ഭീഷണിയിലാണ്. ഇതുമൂലം കല്ലാറിനും രണ്ടാം മൈലിനും ഇടയില്‍ ഗതാഗതനിയന്ത്രണം ഏര്‍പ്പെടുത്തിയിട്ടുണ്ട്. ശക്തമായ മഴ തുടര്‍ന്നാല്‍ കൂടുതല്‍ ഇടങ്ങളില്‍ മണ്ണിടിച്ചില്‍ ഉണ്ടാകുമോയെന്ന ആശങ്കയിലാണ് വാഹനയാത്രികര്‍.

തൊടുപുഴയിൽ വൈദ്യുതി ബന്ധം പൂർണമായി നിലച്ചു

തൊടുപുഴ: ഇന്നലെ വൈകുന്നേരമുണ്ടായ കനത്ത കാറ്റിലും മഴയിലും തൊടുപുഴ മേഖലയിൽ വ്യാപക നാശം. വൈകുന്നേരം വീശിയടിച്ച കാറ്റിൽ നഗരത്തിൽ പലയിടത്തും മരങ്ങളും വൈദ്യുതി പോസ്റ്റുകളും മറിഞ്ഞു വീണു. തൊടുപുഴ ഗസ്റ്റ് ഹൗസിനു സമീപം കാറുകൾക്കു മുകളിലേക്ക് മരം വീണ് വാഹനങ്ങൾക്കു കേടുപാടു സംഭവിച്ചു. തൊടുപുഴ - കുമ്മംകല്ല് - ഇടവെട്ടി റോഡിൽ പല ഭാഗത്തും വൈദ്യുതി പോസ്റ്റുകളും മരങ്ങളും വീണ് വാഹന ഗതാഗതം തടസപ്പെട്ടു. തൊടുപുഴ ആയുർവേദ ആശുപത്രി വളപ്പിൽ മരങ്ങൾ മറിഞ്ഞുവീണു. മരം ഒടിഞ്ഞുവീണ് ഇന്ന് നടക്കുന്ന സ്പോർട്സ് ആയുർവേദ ബ്ലോക്കിന്‍റെ ഉദ്ഘാടനച്ചടങ്ങിനായി ഒരുക്കിയിരിക്കുന്ന പന്തലും തകർന്നു. നഗരത്തിൽ ഒട്ടേറെ വ്യാപാര സ്ഥാപനങ്ങളുടെ ബോർഡുകളും കാറ്റിൽ നിലംപൊത്തി. ഒട്ടേറെ ഇടങ്ങളിൽ മരങ്ങളും പോസ്റ്റുകളും വീണതിനെത്തുടർന്ന് പല റൂട്ടുകളിലും ഏറെ നേരം ഗതാഗത തടസമുണ്ടായി. ഫയർഫോഴ്സിന്‍റെ വിവിധ യൂണിറ്റുകൾ മരങ്ങൾ മുറിച്ചു മാറ്റുന്നത് രാത്രി വൈകിയും തുടർന്നു. തൊടുപുഴ നഗരത്തിലും പരിസര പ്രദേശങ്ങളിലും വൈദ്യുതി ബന്ധവും ഏറെ നേരം പൂർണമായി നിലച്ചു.

കാറ്റിൽ ഏത്തവാഴത്തോട്ടം നശിച്ചു

രാജാക്കാട്‌: ശക്തമായ കാറ്റിലും മഴയിലും ഏത്തവാഴത്തോട്ടം നശിച്ചു. രാജാക്കാട് - കള്ളിമാലി കാക്കുഴിയിൽ ബേബിയുടെ വാഴത്തോട്ടമാണ് പൂർണമായും ഒടിഞ്ഞുവീണ് നശിച്ചത്. ഒൻപതു മാസം പ്രായമായ കുലവന്ന 200 ഏത്തവാഴകളാണ് നശിച്ചത്. ബാങ്ക് വായ്പ എടുത്താണ് കൃഷി ഇറക്കിയത്. ഓണക്കാലത്ത് വിളവെടുക്കാവുന്ന ഏത്ത വാഴകളായിരുന്നു. ഒരു ലക്ഷത്തോളം രൂപയുടെ നഷ്ടമുണ്ടായതായി കണക്കാക്കുന്നു. നഷ്ടം സംബന്ധിച്ച് രാജാക്കാട് കൃഷിഭവനിൽ അപേക്ഷ നൽകിയതായി ബേബി പറഞ്ഞു.

കത്തിപ്പാറയിൽ ഓടിക്കൊണ്ടിരുന്ന കാറിനു മുകളിൽ മരം വീണു

അടിമാലി: കല്ലാർകുട്ടി കത്തിപ്പാറയ്ക്കു സമീപം ഓടിക്കൊണ്ടിരുന്ന കാറിനു മുകളിൽ മരം വീണു. ഫാ. റെജി പാലക്കാടൻ സഞ്ചരിച്ചിരുന്ന കാറിനു മുകളിലാണ് മരം വീണത്. അപകടത്തിൽനിന്ന് അദ്ഭുതകരമായി വൈദികൻ രക്ഷപ്പെട്ടു. അടിമാലിയിൽനിന്നു മുരിക്കാശേരിയിലേക്കു പോകുന്ന വഴിയാണ് വൈദികൻ സഞ്ചരിച്ചിരുന്ന വാഹനത്തിനു മുകളിലേക്ക് മരം വീണത്. തുടർന്ന് പ്രദേശവാസികളും അടിമാലി അഗ്നിരക്ഷാസേനയും എത്തി രക്ഷപ്പെടുത്തുകയായിരുന്നു. ഇന്നലെ വൈകുന്നേരം ആയിരുന്നു സംഭവം. റോഡിലേക്കു വീണ മരം അഗ്നിരക്ഷാസേന എത്തി മുറിച്ചുമാറ്റി ഗതാഗതം പുനഃസ്ഥാപിച്ചു . ദേശീയപാത 85ൽ ചീയപ്പാറയ്ക്ക് സമീപം മരം വീണ് ഗതാഗതം തടസപ്പെട്ടിരുന്നു.

ദുരിതാശ്വാസ ക്യാന്പുകൾ തുറന്നു

ജില്ലയിൽ ഇന്നലെ രണ്ടു ദുരിതാശ്വാസ ക്യാന്പുകൾ കൂടി തുറന്നു. മണിയാറൻകുടി സലീന ചാൾസ് ഇംഗ്ലീഷ്് മീഡിയം സ്കൂളിലെ ക്യാന്പിൽ 11 കുടുംബങ്ങളിലെ 33 അംഗങ്ങളാണുള്ളത്. ഇതിൽ പത്ത് പുരുഷൻമാർ, 18 സ്ത്രീകൾ, അഞ്ച് കുട്ടികൾ എന്നിവരാണ് കഴിയുന്നത്. കഞ്ഞിക്കുഴി കീരിത്തോട് നിത്യസഹായമാതാ പാരീഷ് ഹാളിൽ ആരംഭിച്ച ദുരിതാശ്വാസ ക്യാന്പിൽ രണ്ട് കുടുംബങ്ങളിലെ ഏഴ് അംഗങ്ങളാണുള്ളത്. കഴിഞ്ഞ ദിവസം മൂന്നാർ മൗണ്ട് കാർമൽ പാരീഷ് ഹാളിൽ തുറന്ന ദുരിതാശ്വാസ ക്യാന്പിലേക്ക് മൂന്നു പേർ കൂടി എത്തിയിട്ടുണ്ട്. ഇവിടെ ആകെ 25 പേരാണ് താമസിക്കുന്നത്. വാഴത്തോപ്പ് പഞ്ചായത്തിൽ ദുരിതാശ്വാസ ക്യാമ്പ് ആരംഭിച്ചു. മണിയാറൻകുടി - പെരുങ്കാല സെലീന ചാൾസ് സ്കൂളിലാണ് ക്യാമ്പ് തുറന്നത്. 20 കുടുംബങ്ങളാണ് ഇന്നലെ ക്യാമ്പിൽ എത്തിയത്. ജില്ലാ കളക്ടറുടെ നിർദേശപ്രകാരമാണ് ദുരിതാശ്വാസ ക്യാമ്പ് പ്രവർത്തനമാരംഭിച്ചത്.

കരിമണ്ണൂരിലെ ഫ്ളാറ്റ് സമുച്ചയം: നടപടി വേണം-അപു ജോണ്‍ ജോസഫ്

കരിമണ്ണൂർ: അപകടാവസ്ഥയിലായ വേനപ്പാറയിലെ ഫ്ളാറ്റ് സമുച്ചയം കേരള കോണ്‍ഗ്രസ് സംസ്ഥാന കോ-ഓർഡിനേറ്റർ അപു ജോണ്‍ ജോസഫ് സന്ദർശിച്ചു. സംസ്ഥാന സർക്കാർ ഏറെ കൊട്ടിഘോഷിച്ച് ഉദ്ഘാടനം നടത്തുകയും 40-ഓളം ഭവനരഹിതർക്കായി ലൈഫ് മിഷൻ പദ്ധതിയിൽ ഉൾപ്പെടുത്തി നിർമിച്ചുനൽകുകയും ചെയ്ത ഫ്ളാറ്റിന്‍റെ നിർമാണത്തിലെ അപാകതയാണ് തകർച്ചയ്ക്ക് കാരണമെന്ന് അദ്ദേഹം പറഞ്ഞു. പ്രീ ഫാബ്രിക്കേഷൻ മെത്തഡോളജി സംവിധാനത്തിലൂടെയാണ് സമുച്ചയം നിർമിച്ചിരിക്കുന്നത്. ഒരു കുടുംബത്തിന് താമസിക്കാൻ നൽകിയിരിക്കുന്ന ഫ്ളാറ്റിന് 18 ലക്ഷം രൂപയോളം ചെലവായിട്ടുണ്ട്. ഏഴുകോടിയോളം ചെലവഴിച്ച് നിർമിച്ച സമുച്ചയം നിലവിൽ ആളുകൾക്ക് താമസിക്കാൻ കഴിയാത്ത സാഹചര്യത്തിലാണ്. കെട്ടിടത്തിന്‍റെ ഭിത്തികളടക്കം ജിപ്സം ബോർഡ് ഉപയോഗിച്ചാണ് നിർമിച്ചിരിക്കുന്നത് .മുകളിൽ വെള്ളം കെട്ടിനിൽക്കുന്നത് സമുച്ചയത്തിന്‍റെ തകർച്ചയ്ക്ക് കാരണമായിട്ടുണ്ട്. മുറികൾ തിരിക്കാൻ ഉപയോഗിക്കുന്ന ജിപ്സം ബോർഡുകൾ കെട്ടിടത്തിന്‍റെ പ്രധാനഘടനയിലാണ് ഉപയോഗിച്ചിരിക്കുന്നത്. വെള്ളം വീണാൽ നശിക്കുന്ന നിർമാണസാമഗ്രികൾ ഉപയോഗിച്ച് കെട്ടിടം നിർമിച്ചതും മഴവെള്ളം സുഗമമായി ഒഴുകിപ്പോകാനുമുള്ള സാഹചര്യം ഒരുക്കാത്തതുമാണ് കെട്ടിടത്തിന്‍റെ തകർച്ചയ്ക്കും ശോചനീയാവസ്ഥയ്ക്കും കാരണമെന്നും അദ്ദേഹം പറഞ്ഞു . എത്രയും വേഗം പ്രശ്നത്തിന് പരിഹാരം ഉണ്ടാക്കണമെന്നും നിർമാണത്തിൽ വന്നിട്ടുള്ള വീഴ്ചകളും അഴിമതി നടന്നിട്ടുണ്ടെങ്കിൽ അതും അന്വേഷിക്കണമെന്നും അദ്ദേഹം ആവശ്യപ്പെട്ടു. കരിമണ്ണൂർ മണ്ഡലം പ്രസിഡന്‍റ് പോൾ കുഴിപ്പിള്ളിൽ, പഞ്ചായത്തംഗങ്ങളായ ബൈജു വറവുങ്കൽ, ജീസ് ആയത്തുപാടം, ടെസി വിൽസൻ, ഷേർലി സെബാസ്റ്റ്യൻ, എ.എൻ.ദിലീപ് കുമാർ, വിപിൻ അഗസ്റ്റിൻ, വി.എ. സക്കീർ എന്നിവരും അദ്ദേഹത്തോടൊപ്പമുണ്ടായിരുന്നു.

ഡൈമുക്കിലെ ഗൃഹനാഥന്‍റെ കൊലപാതകം: തെളിവു നശിപ്പിച്ച സംഭവത്തിൽ ഭാര്യയും അറസ്റ്റിൽ

വണ്ടിപ്പെരിയാർ: അഞ്ചുമുക്ക് പുതുപ്പറമ്പിൽ മോഹനനെ മകൻ വിഷ്ണു കോൺക്രീറ്റ് സ്ലാബിൽ തലയിടിപ്പിച്ചു കൊലപ്പെടുത്തിയ കേസിൽ മോഹനന്‍റെ ഭാര്യ കുമാരിയെ (59 )യാണ് പോലീസ് പ്രതിചേർത്ത് അറസ്റ്റ് ചെയ്തത്. കൊലപാതകം മറച്ചുവയ്ക്കാൻ ശ്രമിച്ചു, തെളിവുകൾ നശിപ്പിക്കാൻ കൂട്ടുനിന്നു എന്നിവയാണ് കുമാരിക്കെതിരേ ചുമത്തിയിരിക്കുന്നത്. വിഷ്ണുവിനെ കഴിഞ്ഞദിവസം അറസ്റ്റ് ചെയ്തിരുന്നു. കടം വാങ്ങിയ പണം തിരിച്ചു ചോദിച്ചതുമായി ബന്ധപ്പെട്ടു ഉണ്ടായ തർക്കത്തിനിടെയാണ് മകൻ പിതാവിന്‍റെ തല പിടിച്ചു കോൺക്രിറ്റ് സ്ലാബിൽ തുടർച്ചയായി ഇടിപ്പിച്ചു കൊലപ്പെടുത്തിയത്. കൊലപാതകം മറച്ചുവയ്ക്കുന്നതിന്‍റെ ഭാഗമായി കുമാരിയും മകൻ വിഷ്ണുവും അയൽവാസികളെ ഫോണിൽ വിളിച്ച് പിതാവ് അനക്കമില്ലാതെ കിടക്കുന്നു എന്ന് അറിയിച്ചിരുന്നു. അയൽവാസികൾ എത്തിയപ്പോൾ മോഹനൻ കട്ടിലിൽ മരിച്ചു കിടക്കുന്നതാണ് കണ്ടത്. കട്ടിലിന്‍റെ അടിഭാഗത്ത് തുണിയിട്ട് മൂടിയ നിലയിൽ രകതം കിടക്കുന്നതും, വെള്ളമുണ്ട് ഉടുക്കാത്ത മോഹനൻ മുണ്ടു ധരിച്ചിരുന്നതും അയൽവാസികളിൽ സംശയത്തിനിടയാക്കി. ഇവർ പോലീസിൽ വിവരം അറിയച്ചതാണ് കേസിൽ വഴിത്തിരിവുണ്ടാക്കിയത്.

മുഹൂർത്തസമയത്ത് യുവതി വിവാഹത്തിൽനിന്നു പിന്മാറി

മറയൂർ: മുഹൂർത്ത സമയത്ത് വിവാഹത്തിൽനിന്നു പിൻമാറി യുവതി. മറയൂർ മേലാടി സ്വദേശിയായ യുവാവും തമിഴ്നാട് തിരുപ്പൂർ സ്വദേശിനിയായ യുവതിയും തമ്മിൽ ഇന്നലെ വിവാഹം നടത്താനാണ് നിശ്ചയിച്ചിരുന്നത്. ഇതിനായി തിരുപ്പൂരിൽനിന്നു ബന്ധുക്കളും യുവതിയും എത്തിയിരുന്നു. വിവാഹം നടക്കുന്ന ക്ഷേത്രത്തിനു സമീപമാണ് ഇവർ താമസിച്ചിരുന്നത്. മേലാടിയിലെ ക്ഷേത്രത്തിൽ വിവാഹവും തൊട്ടടുത്തുള്ള പഞ്ചായത്ത് ഹാളിൽ വിരുന്ന് സൽക്കാരവും ഒരുക്കിയിരുന്നു. ഇതിനിടെയാണ് വിവാഹസമയത്തിനു മിനിറ്റുകൾക്കു മുന്പ് യുവതി വിവാഹത്തിൽനിന്നുപിൻമാറിയത്. വിവരം അറിയിക്കാനായി 100-ൽ വിളിക്കുകയായിരുന്നു. ഇതിൽ കിട്ടാതായപ്പോൾ പോലീസ് കണ്‍ട്രോൾ റൂമിലേക്ക് വിളിച്ചു. വിവാഹത്തിൽ താത്പര്യമില്ലെന്നും അടിയന്തരമായി പ്രശ്നത്തിൽ പോലീസ് ഇടപെടണമെന്നും അറിയിച്ചു. സംഭവം കണ്‍ട്രോൾ റൂമിൽ നിന്നും മറയൂർ പോലീസ് സ്റ്റേഷനിലേക്ക് അറിയിച്ചു. ഉടൻ തന്നെ പോലീസ് എത്തി വിവാഹം നിർത്തിവയ്ക്കുകയും യുവതിയേയും ബന്ധുക്കളെയും സ്റ്റേഷനിലേക്ക് മാറ്റുകയും ചെയ്തു. തുടർന്ന് വരനെയും ബന്ധുക്കളെയും എത്തിച്ച് യുവതിയുമായി സംസാരിച്ചപ്പോഴും വിവാഹത്തിന് താത്പര്യമില്ലെന്ന് ആവർത്തിച്ചു. ഇതേ തുടർന്ന് വിവാഹം വേണ്ടെന്നുള്ള ധാരണയിൽ രണ്ടു കുടുംബക്കാരും സമ്മതം അറിയിച്ച്പിരിഞ്ഞു പോയി. കഴിഞ്ഞദിവസം രാത്രിയാണ് വധു ബന്ധുക്കൾക്കൊപ്പം മേലാടിയിൽ എത്തിയത്. വിവാഹ സദ്യ ഉൾപ്പെടെയുള്ള എല്ലാകാര്യങ്ങളും ഒരുക്കുകയും ചെയ്തിരുന്നു. പോലീസിന്‍റെ സമയോചിത ഇടപെടൽ മൂലം അനിഷ്ടസംഭവങ്ങൾഒഴിവായി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]