ADVERTISEMENT

ADVERTISEMENT

കുടയത്തൂർ ആയുർവേദ ആശുപത്രിക്ക് അംഗീകാരം

കുടയത്തൂർ: പഞ്ചായത്ത് ഗവ.ആയുർവേദ ഡിസ്പെൻസറി ആയുഷ് ഹെൽത്ത് ആൻഡ് വെൽനെസ് സെന്‍ററിന് എൻഎബിഎച്ച് പുരസ്കാരം. മന്ത്രി വീണാ ജോർജ് പുരസ്കാരം നൽകി.

കുടയത്തൂർ പഞ്ചായത്ത് പ്രസിഡന്‍റ് കെ.എൻ.ഷിയാസ്, സീനിയർ മെഡിക്കൽ ഓഫീസർ ഡോ.എൽ.ജ്യോതിലക്ഷ്മി, യോഗാ ഇൻസ്ട്രക്ടർ ഡോ. ചിന്നു സൂര്യൻ, ജില്ലാ പ്രോഗ്രാം മാനേജർ ഡോ. ശ്രീദർശൻ, ജില്ലാ കോ-ഓർഡിനേറ്റർ ഡോ. വിജിത എന്നിവർ ചേർന്ന് പുരസ്കാരം ഏറ്റുവാങ്ങി.

ADVERTISEMENT

പതിനാലുകാരിയുടെ ആത്മഹത്യ: യുവാവ് അറസ്റ്റിൽ

ഉപ്പുതറ: പതിനാലുകാരി ആത്മഹത്യ ചെയ്ത സംഭവത്തിൽ യുവാവിനെ ഉപ്പുതറ പോലീസ് അറസ്റ്റു ചെയ്തു. ലോൺട്രി മാട്ടുപ്പെട്ടി ലയത്തിൽ താമസിക്കുന്ന കൈലാസത്തിൽ നിഖിൽ നിക്സനെ (18)യാണ് സിഐ ജോയി മാത്യൂ അറസ്റ്റ് ചെയ്തത്. കഴിഞ്ഞ 24 നാണ് പെൺകുട്ടി ആത്മഹത്യ ചെയ്തത്. അസ്വാഭാവിക മരണത്തിന് പോലീസ് കേസെടുത്തു. എന്നാൽ പെൺകുട്ടി ശാരീരിക പീഡനത്തിന് ഇരയായെന്ന് പോസ്റ്റ്മോർട്ടത്തിൽ വ്യക്തമായി. തുടർന്ന് അസ്വാഭാവിക മരണത്തിനെടുത്ത കേസിൽ പോക്സോ വകുപ്പു കൂടി ചേർത്ത് അന്വേഷണം ഊർജിതമാക്കി. തുടർന്ന് നിഖിൽ ഉൾപ്പെടെ സംശയം തോന്നിയ നിരവധി പേരെ ചോദ്യം ചെയ്തു. 14 മണിക്കൂർ നീണ്ട ചോദ്യം ചെയ്തലിനൊടുവിൽ പ്രണയം നടിച്ച് പെൺകുട്ടിയെ പീഡിപ്പിച്ചതായി നിഖിൽ സമ്മതിക്കുകയായിരുന്നു. എസ്ഐ പി. എൻ. പ്രദീപ് , വനിത എഎസ്ഐ ജോളി ജോസഫ്, സീനിയർ സിവിൽ പോലിസ് ഓഫീസർമാരായ ജിജോ. പി. വിജയൻ, പി.എ.നിഷാദ് എന്നിവരും അന്വഷണ സംഘത്തിൽ ഉണ്ടായിരുന്നു. കോടതിയിൽ ഹാജരാക്കിയ പ്രതിയെ റിമാൻഡു ചെയ്തു.

കുട്ടികൾക്കായി റീയൂസ് ചലഞ്ചുമായി ജില്ലാ കളക്ടർ

ഇടുക്കി: ജില്ലാ ഭരണകൂടവും ശുചിത്വ മിഷനും തദ്ദേശ വകുപ്പും വിദ്യാഭ്യാസ വകുപ്പുമായി സഹകരിച്ച് സംഘടിപ്പിക്കുന്ന കാന്പയിന്‍റെ ഭാഗമായി കുട്ടികൾക്കും രക്ഷിതാക്കൾക്കുമായി റീയൂസ് ചലഞ്ചുമായി ജില്ലാ കളക്ടർ വി. വിഗ്‌നേശ്വരി. സ്കൂൾ വിദ്യാർഥികൾക്കിടയിൽ പുനരുപയോഗ ശീലം വളർത്തിയെടുക്കുകയും അതുവഴി വിഭവങ്ങളുടെ പരമാവധി ഉപയോഗം ഉറപ്പുവരുത്തുകയും ചെയ്യുക എന്ന ലക്ഷ്യത്തോടെ ശുചിത്വ മിഷന്‍റെ നേതൃത്വത്തിലുള്ള കാന്പയിനാണ് പുതിയ അധ്യയന വർഷത്തിൽ നടപ്പാക്കുന്നത്. എല്ലാ അധ്യയന വർഷത്തിലും പുതിയ ബാഗും കുടയും യൂണിഫോമും ചെരിപ്പും വാങ്ങുന്നത് കാലങ്ങളായി തുടരുന്ന ശീലമാണ്. പഴയവ ഉപയോഗ യോഗ്യമാണെങ്കിലും അവ ഉപേക്ഷിച്ച് പുതിയത് വാങ്ങുന്നതാണ് കൂടുതൽ പേരും ചെയ്യുന്നത്. കുട്ടികളുടെയും രക്ഷിതാക്കളുടെയും ഈ മനോഭാവം മാറ്റി പഴയ ബാഗ്, കുട, ചെരുപ്പ്, പുസ്തകങ്ങൾ തുടങ്ങിയവ പുനരുപയോഗിക്കുന്നതാണ് കാന്പയിനിലൂടെ ലക്ഷ്യമിടുന്നത്. ഇതിന്‍റെ ഭാഗമായി മുൻവർഷങ്ങളിലെ ബാഗ്, യൂണിഫോം, കുട, ചെരുപ്പ്, വാട്ടർ ബോട്ടിൽ, ടിഫിൻ ബോക്സ് തുടങ്ങിയവ 2025-26 അധ്യയന വർഷം പുനരുപയോഗം ചെയ്യുന്ന വിദ്യാർഥികളെ സ്കൂൾ അധ്യാപകരുടെ സഹായത്തോടെ കണ്ടെത്തി അവർക്കു ജില്ലാ കളക്ടറുടെ കൈയൊപ്പോടുകൂടിയ ഗ്രീൻ ചാംപ് സർട്ടിഫിക്കറ്റ് നൽകും. കൂടാതെ മൂന്നിലധികം വസ്തുക്കൾ പുനരുപയോഗിക്കുന്ന വിദ്യാർഥികൾക്ക് പ്രത്യേക സമ്മാനവും നൽകും. പുതിയവ വാങ്ങിയ കുട്ടികൾക്കും കാന്പയിന്‍റെ ഭാഗമാവാം. കുട്ടികൾ അവരുടെ വീടുകളിലെ കേടുപാടുകൾ ഇല്ലാത്തതും ഉപയോഗിക്കാൻ സാധിക്കുന്നതുമായ കഴിഞ്ഞ സ്കൂൾ വർഷത്തെ ബാഗ്, കുട ഉൾപ്പെടെയുള്ളവ വൃത്തിയാക്കി സ്കൂളിൽ എത്തിച്ചു നൽകണം. അവ അധ്യാപകർ ശേഖരിച്ച് അതേ സ്കൂളിൽ തന്നെ ആവശ്യക്കാരായ മറ്റു കുട്ടികൾക്ക് നൽകുകയോ തദ്ദേശ സ്ഥാപനങ്ങളുടെ സഹകരണത്തോടെ ശുചിത്വ മിഷൻ ശേഖരിച്ച് മറ്റു സ്കൂളുകളിൽ ആവശ്യമുള്ള കുട്ടികൾക്ക് നൽകുകയോ ചെയ്യും. പുനരുപയോഗ സാധ്യമായ ബാഗ്, കുട മുതലായവ സംഭാവന ചെയ്യുന്ന കുട്ടികൾക്കും സർട്ടിഫിക്കറ്റ് നൽകും. ഇന്നു മുതൽ 10 വരെ കാന്പയിനിൽ പങ്കു ചേരാം. ജില്ലയിലെ ഗ്രീൻ ചാന്പ്യൻമാരുടെ ആദ്യ ലിസ്റ്റ് പരിസ്ഥിതി ദിനമായ അഞ്ചിന് പ്രസിദ്ധീകരിക്കും.

മഴയുടെ ശക്തി കുറഞ്ഞു; ജില്ലയ്ക്ക് ആശ്വാസം

തൊടുപുഴ: ജില്ലയിൽ മഴയുടെ ശക്തി കുറഞ്ഞതോടെ ദുരിതാശ്വാസ ക്യാന്പുകളിലുണ്ടായിരുന്ന കുടുംബങ്ങൾ വീടുകളിലേക്ക് മടങ്ങിത്തുടങ്ങി. ഇന്നലെ ഒറ്റപ്പെട്ട മഴയാണ് പല മേഖലകളും ലഭിച്ചത്. ജില്ലയിൽ മൂന്ന് ക്യാന്പുകളാണ് ഇപ്പോൾ പ്രവർത്തിക്കുന്നത്. മഴ ശക്തമായിരുന്ന ദിവസങ്ങളിൽ 14 ദുരിതാശ്വാസ ക്യാന്പുകൾ തുറന്നിരുന്നു. ഇടുക്കി താലൂക്കിലെ എല്ലാ ക്യാന്പുകളും അടച്ചു. ഉടുന്പൻചോല താലൂക്കിൽ രണ്ടു ദുരിതാശ്വാസ ക്യാന്പുകളും ദേവികുളത്ത് ഒരു ക്യാന്പുമാണ് നിലവിൽ പ്രവർത്തിക്കുന്നത്. മൂന്നു ക്യാന്പുകളിലായി 11 കുടുംബങ്ങളിലെ 36 പേരാണുള്ളത്. ദുരിതാശ്വാസ ക്യാന്പ് പ്രവർത്തിക്കുന്ന അയ്യപ്പൻകോവിൽ പഞ്ചായത്തിലെ കരിങ്കുളം എൽപി സ്കൂളിന് ജില്ലാ കളക്ടർ അവധി പ്രഖ്യാപിച്ചിട്ടുണ്ട്. ഇന്നലെ ഉച്ചയ്ക്ക് 12 വരെയുള്ള 24 മണിക്കൂറിനുള്ളിൽ 5.56 മില്ലി മീറ്റർ മഴയാണ് ജില്ലയിൽ പെയ്തത്. ഇടുക്കി ഡാമിൽ 2344.75 അടിയും മുല്ലപ്പെരിയാറിൽ 130.45 അടിയുമാണ് ജലനിരപ്പ്. കഴിഞ്ഞ ഏഴ് ദിവസങ്ങളിലായി 150 വീടുകൾക്ക് നാശനഷ്ടമുണ്ടായി. ഇതിൽ 140 വീടുകൾ ഭാഗികമായും 10 വീടുകൾ പൂർണ്ണമായും തകർന്നു. ഇടുക്കി താലൂക്കിൽ 55 വീടുകൾ തകർന്നു. 52 വീടുകൾ ഭാഗികമായും മൂന്ന് വീടുകൾ പൂർണമായും തകർന്നു. തൊടുപുഴ താലൂക്കിൽ 27 വീടുകൾ ഭാഗികമായും നാല് വീടുകൾ പൂർണമായും തകർന്നു. ദേവികുളം താലൂക്കിൽ 26 വീടുകൾ ഭാഗികമായും രണ്ട് വീടുകൾ പൂർണമായും ഉടുന്പൻചോലയിൽ 25 വീടുകൾക്ക് നാശനഷ്ടമുണ്ടായി. ഇതിൽ ഒരു വീട് പൂർണമായും തകർന്നു. പീരുമേട് താലൂക്കിൽ 11 വീടുകൾക്ക് ഭാഗികമായി നാശനഷ്ടമുണ്ടായി. കനത്ത മഴയിൽ ജില്ലയിൽ ഏകദേശം 5.48 കോടി രൂപയുടെ കൃഷിനാശം ഉണ്ടായതായാണ് പ്രാഥമിക കണക്കുകൾ.

അക്ഷരമുറ്റത്തേക്ക് 5,278 കുട്ടികൾ

തൊടുപുഴ: ജില്ലയിലെ അക്ഷരമുറ്റങ്ങളിലേക്ക് ഇന്ന് 5,278 കുട്ടികൾ ചുവടു വയ്ക്കും. ഒന്നു മുതൽ പത്ത് വരെയുള്ള ക്ലാസുകളിലായി 84,128 കുട്ടികളാണ് പുതുതായി പ്രവേശനം നേടുന്നത്. ജില്ലാതല സ്കൂൾ പ്രവേശനോത്സവം ഇന്നു രാവിലെ 9.30ന് തൊടുപുഴ സെന്‍റ് സെബാസ്റ്റ്യൻസ് യുപി സ്കൂളിൽ നടക്കും. കുട്ടികളെ വിദ്യാലയങ്ങളിലേക്ക് വരവേൽക്കാനുള്ള ഒരുക്കങ്ങളെല്ലാം പൂർത്തിയായി. ആകെ വിദ്യാർഥികളിൽ 40,472 പെണ്‍കുട്ടികളും 43,656 ആണ്‍കുട്ടികളുമാണ്. സർക്കാർ സ്കൂളുകളിൽ 25,046 കുട്ടികളും എയ്ഡഡ് സ്കൂളുകളിൽ 53155 കുട്ടികളും അണ്‍ എയ്ഡഡ് സ്കൂളിൽ 5927 കുട്ടികളും പ്രവേശനം നേടി. ഒന്നാം ക്ലാസിൽ സർക്കാർ സ്കൂൾ - 1,533, എയ്ഡഡ് - 3199, അണ്‍ എയ്ഡഡ് 546 എന്നിങ്ങനെയാണ് കുട്ടികളുടെ എണ്ണം. രണ്ട്: 2333- 4083 - 737, മൂന്ന്: 2527 - 4320 -681, നാല്: 2524 -4372-705, അഞ്ച്: 2292- 4956 -459 , ആറ്: 2358-5580 - 469, ഏഴ്: 2622-6149-561, എട്ട്: 2670- 6478 -642, ഒന്പത്: 3111-6954, 579, പത്ത്: 3076 - 7064-548 എന്നിങ്ങനെയാണ് ഓരോ ക്ലാസിലും പ്രവേശനം നേടിയ കുട്ടികളുടെ എണ്ണം. ഇന്നലെ വരെ പ്രവേശനം നേടിയ വിദ്യാർഥികളുടെ കണക്കാണിത്. ജില്ലാതല സ്കൂൾ പ്രവേശനോത്സവം മന്ത്രി റോഷി അഗസ്റ്റിൻ ഉദ്ഘാടനം ചെയ്യും. പി.ജെ. ജോസഫ് എംഎൽഎ അധ്യക്ഷത വഹിക്കും. ഡീൻ കുര്യാക്കോസ് എംപി മുഖ്യപ്രഭാഷണം നടത്തും. കളി ഒരു ലഹരി പദ്ധതിയുടെ ഉദ്ഘാടനം തൊടുപുഴ നഗരസഭാ ചെയർമാൻ കെ. ദീപക്ക് നിർവഹിക്കും. ജില്ലാ കളക്ടർ വി. വിഗ്നേശ്വരി പ്രവേശനോത്സവ സന്ദേശം നൽകും.

സ്കൂൾ തുറക്കൽ: കുട്ടികൾക്ക് സുരക്ഷയൊരുക്കി പോലീസ്

തൊടുപുഴ: ജില്ലയിലെ സ്കൂളുകൾ തുറക്കുന്നതുമായി ബന്ധപ്പെട്ട് സുരക്ഷാ ക്രമീകരണങ്ങൾ പൂർത്തിയായതായി ജില്ലാ പോലീസ് മേധാവി ടി.കെ. വിഷ്ണു പ്രദീപ് അറിയിച്ചു. എല്ലാ വിദ്യാഭ്യാസ സ്ഥാപനങ്ങളുടെ പരിസരത്തും പ്രധാന ജംഗ്ഷനുകളിലും പോലീസ് ഉദ്യോഗസ്ഥരെ വിന്യസിക്കും. സ്കൂൾ പ്രവർത്തനം ആരംഭിക്കുന്ന സമയത്തും വൈകുന്നേരവും ട്രാഫിക് ക്രമീകരണത്തിന് അധിക പോലീസ് ഉദ്യോഗസ്ഥരെ വിന്യസിക്കും. സ്കൂൾ പരിസരങ്ങളിൽ ലഹരിപദാർഥങ്ങളുടെ വിൽപ്പന തടയുന്നതിന് സ്പെഷൽ ഡ്രൈവ് നടത്തും. നിരീക്ഷണത്തിനായി കൂടുതൽ പോലീസ് ഉദ്യോഗസ്ഥരേ നിയോഗിച്ചിട്ടുണ്ട്. സ്കൂൾ ബസുകൾക്കും സ്വകാര്യ വാഹനങ്ങൾക്കും ആവശ്യമായ രജിസ്ട്രേഷൻ രേഖകൾ ഉണ്ടെന്ന് ഉറപ്പാക്കാൻ മോട്ടോർവാഹനവകുപ്പുമായി ചേർന്ന് നടപടി സ്വീകരിച്ചിട്ടുണ്ട്. ഡ്രൈവർമാർ മദ്യപിച്ചാണോ വാഹനം ഓടിക്കുന്നതെന്ന് കണ്ടെത്താൻ പ്രത്യേകം സംവിധാനം ഏർപ്പെടുത്തിയിട്ടുണ്ട്. വിദ്യാർഥികളോട് മോശമായി പെരുമാറുന്ന വാഹന ജീവനക്കാർക്കെതിരെ കർശന നടപടികൾ സ്വീകരിക്കും. സ്കൂൾ ബസുകൾ, സ്വകാര്യ വാഹനങ്ങൾ, ഓട്ടോകൾ എന്നിവയിൽ പരിധിയിൽ കൂടുതൽ കുട്ടികളെ കുത്തിനിറച്ച് സ്കൂളിലേക്ക് കൊണ്ടുപോകുന്നത് തടയുന്നതിന് നിർദേശം നൽകിയിട്ടുണ്ട്. കുട്ടികൾ സ്കൂളിലേക്കു വരുന്ന സമയങ്ങളിലും തിരികെ വീട്ടിലേക്ക് പോകുന്ന സമയങ്ങളിലും ടിപ്പർ ലോറികളുടെ സഞ്ചാരം നിയന്ത്രിക്കുന്നതിനായി ക്രമീകരണങ്ങളും ഏർപ്പെടുത്തിയിട്ടുണ്ടെന്നും ജില്ലാ പോലീസ് മേധാവി പറഞ്ഞു.

കാഡ്സ് കർഷക അവാർഡുകൾ സമ്മാനിച്ചു

തൊടുപുഴ: കാഡ്സ് ഗ്രീൻ ഫെസ്റ്റിനോട് അനുബന്ധിച്ച് കാർഷിക മേഖലയിലെ വിവിധ രംഗങ്ങളിൽ മികവു തെളിയിച്ചവർക്കുള്ള അവാർഡുകൾ സമ്മാനിച്ചു. ജൈവകൃഷി മേഖലയിൽ മികവ് തെളിയിച്ചവർക്കുള്ള ജൈവശ്രീ അവാർഡിന് ഷാഹുൽ ഹമീദ് തിമ്മലിൽ അർഹനായി. കരിമണ്ണൂർ സ്വദേശിയായ ഷാഹുൽ ഹമീദ് ഒരേക്കർ സ്ഥലത്ത് നടപ്പാക്കിയ സംയോജിത ജൈവ കാർഷിക മികവിനാണ് 10,000 രൂപയുടെ കാഷ് അവാർഡും പ്രശസ്തിപത്രവും നേടിയത്. പച്ചക്കറി ഫലവൃക്ഷതൈകൾ കൂടാതെ കോഴി, ആട്, മീൻ വളർത്തൽ എന്നിവയും നടത്തുന്നുണ്ട്. ഒരേക്കർ സ്ഥലത്തുനിന്ന് 1,75,000 രൂപയുടെ അറ്റാദായം അദ്ദേഹം നേടുന്നുണ്ട്. മികച്ച ജൈവകർഷകനായ ആലക്കോട് പള്ളത്ത് പി.സി. ആന്‍റണി സ്പെഷൽ ജൂറി അവാർഡ് നേടി. ചക്കച്ചുളയാക്കി വിപണനം ചെയ്തു ഒന്നരലക്ഷം രൂപയുടെ വരുമാനം നേടിയ കുണിഞ്ഞി തോണിക്കത്തടത്തിൽ ഡെന്നി ജോസഫ് ചക്കശ്രീ അവാർഡിന് അർഹനായി. ഏറ്റവും കൂടിയ തുകയുടെ കാർഷിക ഉത്പന്നങ്ങൾ വിപണനം ചെയ്ത ആലക്കോട് വളവനാട് ബിജു മകരശ്രീ അവാർഡ് നേടി. മികച്ച നാടൻ വിത്തുത്പാദകർക്കുള്ള അവാർഡായ ഹരിതശ്രീ അവാർഡിന് വണ്ണപ്പുറം സലോമി സാജു അർഹയായി. മികച്ച ബാലകർഷകർക്കുള്ള പച്ചക്കുടുക്ക അവാർഡ് നേടിയത് കുറുമണ്ണ് സെന്‍റ് ജോണ്‍സ് ഹൈസ്കൂളിലെ ഒന്പതാം ക്ലാസുകാരനായ മാധവ് പി . ബിജുവാണ്. മികച്ച കർഷക തൊഴിലാളിക്കുള്ള അവാർഡായ അധ്വാനശ്രീ കരിമണ്ണൂർ സ്വദേശി റോയി ജോസഫും ഗൃഹോദ്യാനത്തിനുള്ള ഉദ്യാനശ്രീ അവാർഡ് ഏഴല്ലൂർ വെളുത്തേടത്ത് പറന്പിൽ മേരി സാജുവും നേടി. മികച്ച നെൽകർഷകനുള്ള കർത്യാര്യൻ അവാർഡിന് അർഹനായത് വാഴക്കുളം സ്വദേശിയായ റ്റെഡി ജോസ് തെക്കേക്കരയാണ്. 22 ഏക്കർ നെൽപ്പാടത്താണ് അദ്ദേഹം കൃഷി ഇറക്കി വിജയം കൈവരിച്ചത്. അവാർഡ് ജേതാക്കൾക്ക് 3,000 രൂപയുടെ കാഷ് അവാർഡും പ്രശസ്തിപത്രവും സമ്മാനിച്ചു.

ചരിത്രത്തിൽ ഇടംപിടിച്ച് മാട്ടുപ്പെട്ടി ഫാം

പ്രതിസന്ധികളിലും ക്ഷീരവിപ്ലവത്തിന്‍റെ ഓർമകളുമായി മൂന്നാർ മൂന്നാർ: വീണ്ടുമൊരു ക്ഷീരദിനംകൂടി എത്തിയെങ്കിലും പ്രതിസന്ധികളിൽപെട്ട് ക്ഷീരമേഖലയിൽനിന്നു പിൻവാങ്ങി മൂന്നാറിലെ കർഷകർ. കടുവയും പുലിയുമെല്ലാം കന്നുകാലികളെ കൊന്നൊടുക്കുന്നത് പതിവായതോടെ നിരവധി പേരാണ് മൂന്നാറിൽ ഒരു പതിറ്റാണ്ടിനിടയിൽ ക്ഷീരമേഖലയിൽ നിന്നും പിൻവാങ്ങിയത്. കഴിഞ്ഞ രണ്ടു മൂന്നു വർഷത്തിനിടയിൽ മുന്നൂറോളം കന്നുകാലികളാണ് വന്യജീവികളുടെ ആക്രമണത്തിൽ കൊല്ലപ്പെട്ടത്. വീടിനു സമീപത്തെ തൊഴുത്തിൽ കെട്ടിയിട്ടിരുന്ന പശുക്കളെ പോലും വന്യജീവികൾ കൊന്നതോടെ വേദനയോടെയാണ് അധികവരുമാനമെന്ന രീതിയിൽ കണ്ടിരുന്ന ഈ രംഗത്തു നിന്നു തൊഴിലാളികൾ പിൻവാങ്ങിയത്. എങ്കിലും ലോക ക്ഷീര ദിനത്തിൽ മൂന്നാറിനും ഓർക്കാനുണ്ട് അരനൂറ്റാണ്ടിലധികം പ്രായമുള്ള പാൽനിറമുള്ള ധവള വിപ്ലവത്തിന്‍റെ കഥ. പാൽ ഉത്പാദന രംഗത്ത് കേരളത്തെ മുന്നിലെത്തിക്കുവാൻ കാരണമായതിന്‍റെ ഉറവിടമായതും തെക്കിന്‍റെ കാഷ്മീരായ മൂന്നാറിൽ നിന്നായിരുന്നു. അതും സഞ്ചാരികൾക്ക് ഏറെ പ്രിയപ്പെട്ട മാട്ടുപ്പെട്ടിയിൽ. കന്നുകാലി വർഗോദ്ധാരണത്തിന്‍റെ ഉറവിടവും മാട്ടുപ്പെട്ടിയായിരുന്നു. ഇൻഡോ സ്വിസ്പ്രോജക്ട് ആയിരുന്നു ഇതിനു കാരണമായത്. സ്വിസ് സർക്കാരിന്‍റെ സഹായത്തോടെ കേരള സർക്കാർ ആണ് ഇത്തരമൊരു പദ്ധതിക്ക് തുടക്കം കുറിച്ചത്. 1963ൽ ആയിരുന്നു ഇത്. പിന്നീട് പിറന്നത് ചരിത്രമായിരുന്നു. കേരളത്തിന്‍റെ പാൽ ഉത്പാദനത്തിൽ നിർണായകമായ മുന്നേറ്റം നടത്താൻ കാരണമായ സുനന്ദിനി എന്ന സങ്കരയിനം പശുക്കളെ വികസിപ്പിച്ചത് മാട്ടുപ്പെട്ടിയിൽ നിന്നായിരുന്നു. നാടൻ പശുക്കളിൽനിന്നു ശരാശരി 300 കിലോ പാൽ ലഭിച്ചയിടത്ത് മാട്ടുപ്പെട്ടിയിൽ വികസിപ്പിച്ച സുനന്ദിനി പശുക്കളിലൂടെ ആദ്യ കറവയിൽ തന്നെ 1400 കിലോ ആയി ഉയർന്നു. നിലവിൽ അത് 3,600 കിലോയിൽ എത്തി നിൽക്കുന്നു. മാട്ടുപ്പെട്ടിയിൽ ഇതിനായി 500 ഏക്കൽ നൽകാമെന്ന് അറിയിച്ചതോടെയാണ് സ്വിസ് സർക്കാർ പദ്ധതി ഏറ്റെടുത്തത്. 1964ൽ ബ്രൗണ്‍ സ്വിസ് ഇനത്തിൽപ്പെട്ട കാളകളുടെ ശീതീകരിച്ച ബീജം ഇറക്കുമതി ചെയ്തതോടെ ഗവേഷണ പ്രവർത്തനങ്ങൾക്ക് തുടക്കമായി. സങ്കരയിനം ബീജം ഗാഢ ശീതീകരണിയിലാക്കി ദീർഘനാൾ സൂക്ഷിക്കാനുള്ള സംവിധാനവും ഏർപ്പെടുത്തി. രണ്ടായിരത്തോളം കർഷകരാണ് ഇതിൽ നിന്നും പ്രചോദനമുൾക്കൊണ്ട് ഈ രംഗത്തേക്കു കടന്നുവന്നത്. 1972ൽ സംസ്ഥാന സർക്കാറിന്‍റെ പ്രത്യേക തൊഴിൽദാന പദ്ധതി പ്രകാരം 1,000 പഞ്ചായത്തുകളിൽ ഇൻസേമിനേറ്റർമാരെ നിയമിച്ചു. ഇതേ തുടർന്നാണ് ഇൻഡോ സ്വിസ് പദ്ധതിയിൽ പിറവിയെടുത്ത് സുനന്ദിനി സംസ്ഥാനമാകെ എത്തിയത്. കേരള കന്നുകാലി വികസന ബോർഡിന്‍റെ മാനേജിംഗ് ഡയറക്ടർ ആയി വിരമിച്ച ഡോ.സി.ടി. ചാക്കോയുടെ വാക്കുകളിലുണ്ട് ഈ പദ്ധതിയുടെ പ്രാധാന്യം. ലോകത്തെ തന്നെ ഏറ്റവും മികച്ച പദ്ധതികളിൽ ഒന്നാണിത്. പദ്ധതിയുടെ കാലാവധി അവസാനിച്ചതോടെ ഇപ്പോൾ നടത്തിപ്പു നിർവഹണവും കേരള കന്നുകാലി വികസന ബോർഡിന്‍റെ കീഴിലാണ്. ലോകപ്രശസ്ത വാസ്തുശില്പിയായ ലാറി ബേക്കർ രൂപകൽപ്പന ചെയ്ത കെട്ടിടങ്ങളാണ് ഇവിടെയുള്ളത്.

പ്രതിരോധ മരുന്ന് വിതരണം നടത്തി

കാഞ്ഞാർ: അറക്കുളം വിൻസെന്‍റ് ഡി പോൾ സൊസൈറ്റിയുടെ നേതൃത്വത്തിൽ കുടയത്തൂർ ഗവ. ഹോമിയോ ആശുപത്രിയുടെ സഹകരണത്തോടെ പകർച്ചപ്പനിയ്ക്കും ഡെങ്കിപ്പനിക്കും എതിരെയുള്ള പ്രതിരോധ മരുന്ന് വിതരണം നടത്തി. പ്രസിഡന്‍റ് തോമസ് കിഴക്കേൽ അധ്യക്ഷത വഹിച്ചു. അറക്കുളം സെന്‍റ് തോമസ് പള്ളി വികാരി ഫാ. ജോർജ് പാറേകുന്നേൽ വിതരണോദ്ഘാടനം നിർവഹിച്ചു. മെഡിക്കൽ ഓഫീസർ ഡോ. രഞ്ജിൻ രാജ് മുഖ്യപ്രഭാഷണം നടത്തി. റോബർട്ട് തെക്കേൽ, പ്രവീണ്‍ വെച്ചൂർ, ജിജോമോൻ കാരയക്കാട്ട്, ജെറിഷ് മൈലാടൂർ, തോമസ്കുട്ടി മുണ്ടയ്ക്കാട്ട്, കുര്യാച്ചൻ കുന്നുംപുറത്ത്, ക്രിസ് കിണറ്റുകര, ജോബി ഇടമനശേരി, ആൽബിൻ കുരിയലാപ്പുഴ എന്നിവർ പ്രസംഗിച്ചു.

വേഡ് ആർട്ട് ഒരുക്കി താരമായി ലിയോണ പ്രമിൽ

ചെറുതോണി: ഇടവകയിലെ കുടുംബങ്ങളുടെ വീട്ടുപേരുകൾ കോർത്തിണക്കി പള്ളിയുടെ രൂപചിത്രം തയാറാക്കി ശ്രദ്ധേയയായി ലിയോണ പ്രിമിൽ. ഇരട്ടയാർ സെന്‍റ് തോമസ് ഫൊറോന പള്ളിയുടെ രൂപരേഖയാണ് ലിയോണ വേഡ് ആർട്ടിലൂടെ തയാറാക്കിയിരിക്കുന്നത്. പള്ളിയുടെ മുൻഭാഗത്തെ ഏറ്റവും മുകളിലെ കുരിശുമുതൽ അടിത്തറവരെ ഓരോ കുടുംബത്തിന്‍റെയും വീട്ടു പേരുകൾ അതിവിദഗ്ധമായി എഴുതി ചേർത്താണ് ലിയോണ വേഡ് ആർട്ട് ഒരുക്കിയിരിക്കുന്നത്. ചിത്രകല അഭ്യസിക്കാത്ത ഈ കൊച്ചു കലാകാരി രണ്ടു ദിവസത്തെ കഠിനപരിശ്രമത്തിലൂടെയാണ് പള്ളിയുടെ രൂപഘടന തയാറാക്കിയത്. അഞ്ചാം ക്ലാസിൽ പഠിക്കുന്പോൾ ചെറുപുഷ്പ മിഷൻലീഗിൽ അംഗമായ ലിയോണ ഇടവക മാഗസിനായി വിശുദ്ധരുടെ ചിത്രങ്ങൾ വരച്ചു നൽകിയത് വേഡ് ആർട്ടിന് സഹായകമായി. ഇടുക്കി രൂപത മിഷൻ ലീഗിന്‍റെ ഈ വർഷത്തെ ആപ്തവാക്യമായ ദൈവ കേന്ദ്രീകൃത കുടുംബം ദൈവവിളിയുടെ ഉറവിടവും ശക്തിയും എന്ന വിഷയത്തെ ആസ്പദമാക്കിയാണ് വേഡ് ആർട്ട് നിർമിച്ചിരിക്കുന്നത്. ഇരട്ടയാർ പള്ളി വികാരി മോണ്‍.ജോസ് കരിവേലിക്കലിന്‍റെയും സഹവികാരിമാരുടെയും മിഷൻ ലീഗ് അനിമേറ്ററിന്‍റെയും നിർദേശവും പ്രോത്സാഹനവും വേഡ് ആർട്ട് ഒരുക്കാൻ സഹായകകമായതായി ലിയോണ പ്രമിൽ പറഞ്ഞു. ലിന്‍റ തയാറാക്കിയ വേഡ് ആർട്ട് മോണ്‍. ജോസ് കരിവേലിക്കലിന് കൈമാറി. ഇരട്ടയാർ സെന്‍റ് തോമസ് ഹയർ സെക്കൻഡറി സ്കൂളിൽ നിന്നും ഈ വർഷം പ്ലസ് ടു ലിന്‍റ. ഇരട്ടയാർ ഉപ്പുകണ്ടം പന്തപ്പാട്ട് പ്രിമിൽ ഫിലിപ്പിന്‍റെയും റീനയുടെയും മകളാണ്. ലിയോണ്‍സ്, ലോയൽ, ലിയ എന്നിവർ സഹോദരങ്ങളാണ്.

സ്വപ്നഭവനത്തിന്‍റെ താക്കോൽ കൈമാറി

തൊടുപുഴ: മൈലക്കൊന്പ് ദിവ്യം ഫൗണ്ടേഷൻ ദരിദ്രരും നിരാലംബരുമായ കുടുംബങ്ങൾക്കായി നടത്തിവരുന്ന ഭവനപദ്ധതിയുടെ ഭാഗമായ രണ്ടാമത്തെ സ്വപ്ന വീടിന്‍റെ നിർമാണം പൂർത്തിയാക്കി താക്കോൽ കൈമാറി. സന്നദ്ധപ്രവർത്തകരുടെയും പ്രാദേശിക തൊഴിലാളികളുടെയും വ്യക്തികളുടെയും സംഘടനകളുടെയും സഹായത്തോടെ ചിറ്റിലപ്പള്ളി ഫൗണ്ടേഷന്‍റെ സഹകരണത്തോടെയാണ് വീടു നിർമാണം പൂർത്തിയാക്കിയത്. തൊടുപുഴ മണക്കാട് സ്വദേശിനി രഞ്ജു ദേവസ്യക്കാണ് വീടു നിർമിച്ചു നൽകിയത്. ദിവ്യം ഫൗണ്ടേഷൻ ഫൗണ്ടർ ഡയറക്ടർ ഫാ. ബെന്നി മാത്യു ഓടയ്ക്കൽ താക്കോൽദാനം നിർവഹിച്ചു. പ്രത്യാശഭവൻ സെക്രട്ടറി പ്രിൻസ് അഗസ്റ്റിൻ, ദിവ്യം ഫൗണ്ടേഷൻ മാനേജർ ജോബി തോമസ്, സൂപ്പർവൈസർ ഏലിയാസ് വർഗീസ്, മീഡിയമാനേജർ ജോണ്‍സണ്‍ എന്നിവർ പങ്കെടുത്തു.

തിരിച്ചടിയായി കാലവർഷം; പ്രതീക്ഷ വിടാതെ ടൂറിസം മേഖല

തൊടുപുഴ: കാലവർഷം ശക്തിപ്പെട്ടതിനെ തുടർന്ന് അടച്ച വിനോദ സഞ്ചാര കേന്ദ്രങ്ങൾ ഇന്നലെ വീണ്ടും തുറന്നു. പ്രതീക്ഷിച്ചതിലും നേരത്തെയെത്തിയ കാലവർഷം ജില്ലയിലെ വിനോദ സഞ്ചാര മേഖലയെ വലിയ തോതിൽ പ്രതികൂലമായി ബാധിച്ചിരുന്നു. മേയിൽ ജില്ലയിലേക്ക് വിനോദസഞ്ചാരികളുടെ വൻ ഒഴുക്കാണ് ഉണ്ടായത്. ഇത്തരത്തിൽ ടൂറിസം മേഖലയിൽ വലിയ ഉണർവു പ്രകടമായിരുന്ന സമയത്താണ് അപ്രതീക്ഷിതമായി കാലവർഷം എത്തിയത്. കഴിഞ്ഞ വർഷം നേടിയതിനെക്കാൾ മെച്ചപ്പെട്ട വരുമാനവും ഈ വർഷം നേടാനായതിന്‍റെ ആഹ്ലാദത്തിലായിരുന്നു ടൂറിസം മേഖലയുമായ ബന്ധപ്പെട്ടു പ്രവർത്തിക്കുന്നവർ. ഏതാനും ദിവസം മുന്പ് കാലവർഷം ശക്തമായതോടെ കഴിഞ്ഞ 24ന് ജില്ലയിൽ വിനോദ സഞ്ചാരത്തിനും വിവിധ പ്രവർത്തനങ്ങൾക്കും ജില്ലാ ഭരണകൂടം നിയന്ത്രണമേർപ്പെടുത്തി. മഴ ശക്തിപ്പെട്ടതോടെ 29നു മുഴുവൻ ടൂറിസം പ്രവർത്തനങ്ങൾക്കും നിരോധനം ഏർപ്പെടുത്തി. ഇതോടെ ഹോട്ടലുകളിലും റിസോർട്ടുകളിലും മുറികളും മറ്റും ബുക്ക് ചെയ്തിരുന്നവർ ഇത് റദ്ദാക്കുന്ന സ്ഥിതിയായി. ഇന്നലെ മുതൽ മഴയുടെ ശക്തി കുറഞ്ഞതോടെയാണ് വീണ്ടും ടൂറിസം കേന്ദ്രങ്ങൾ തുറക്കാൻ അനുമതി നൽകിയത്. കഴിഞ്ഞ മാസം ആദ്യ അഞ്ചു ദിവസങ്ങളിലായി ജില്ലാ ടൂറിസം പ്രമോഷൻ കൗണ്‍സിലിന്‍റെ കണക്കു പ്രകാരം ജില്ലയിൽ 1,18,234 പേരാണു വിവിധ ടൂറിസം കേന്ദ്രങ്ങളിലായി സന്ദർശനത്തിനായി എത്തിയത്. എന്നാൽ ശക്തമായ മഴ ആരംഭിച്ച് ടൂറിസം നിരോധിക്കുന്നതിനു മുന്പുള്ള അഞ്ചു ദിവസങ്ങളിൽ എത്തിയത് 42,821 പേർ മാത്രമാണ്. ഡിടിപിസിയുടെ കണക്കു പ്രകാരം കഴിഞ്ഞ മാസം 28 വരെ 5,45,784 പേരാണു ജില്ലയിലെത്തിയത്. 2024 മേയ് മാസത്തിൽ എത്തിയതിനേക്കാൾ 65,033 പേർ ഈ മേയിൽ ജില്ലയിലെ ടൂറിസം മേഖലകളിലെത്തി. മഴ പ്രതികൂലമായി ബാധിക്കാതിരുന്നെങ്കിൽ കഴിഞ്ഞ മാസം മാത്രം ആറു ലക്ഷത്തിലധികം സഞ്ചാരികൾ ഇടുക്കി സന്ദർശിക്കുമായിരുന്നെന്ന് ഡിടിപിസി സെക്രട്ടറി ജിതീഷ് ജോസ് പറഞ്ഞു. മഴയുടെ ശക്തി കുറഞ്ഞതോടെ ജില്ലയിലെ ടൂറിസം കേന്ദ്രങ്ങൾ വീണ്ടും സജീവമാകുമെന്നാണ് പ്രതീക്ഷ.

മൂന്നാർ ടൗണിനു സമീപം പുലിയുടെ സാന്നിധ്യം

മൂന്നാർ: ടൗണിനു സമീപം പുലിയെ കണ്ടതോടെ പ്രദേശവാസികൾ ഭീതിയിൽ. പഴയ മൂന്നാർ കെഡിഎച്ച് ക്ലബിനു സമീപമാണ് പ്രദേശവാസികൾ പുലിയെ കണ്ടത്. വിവരം അറിയിച്ചതോടെ സ്ഥലത്തെത്തിയ ആർആർടി സംഘം സ്ഥലത്ത് പുലിയുടെ സാന്നിധ്യം സ്ഥിരീകരിക്കുകയും ചെയ്തു. പ്രദേശത്ത് പുലിയുടെ കാൽപ്പാടുകളും കണ്ടെത്തി. കഴിഞ്ഞ ദിവസം വൈകുന്നേരമാണ് ജനവാസ മേഖലയ്ക്കു സമീപം പുലി എത്തിയത്. ആർആർടി സംഘം പ്രദേശത്ത് തെരച്ചിൽ നടത്തിയെങ്കിലും പുലിയെ കണ്ടെത്താനായില്ല. മൂന്നാർ ടൗണിനു സമീപം ജനവാസ മേഖലയിൽ രണ്ടു മാസത്തിനിടയിൽ രണ്ടാം തവണയാണ് പുലി എത്തുന്നത്. രണ്ടു മാസങ്ങൾക്കു മുന്പ് മൂന്നാർ ഫോറസ്റ്റ് റേഞ്ച് ഓഫീസിനു സമീപവും പുലി എത്തിയിരുന്നു. വന്യജീവികളുടെ സാന്നിധ്യം ജനവാസ മേഖലകളിൽ രൂക്ഷമായിട്ടും വനം വകുപ്പിന് പ്രശ്നത്തിൽ ഉചിതമായ പരിഹാരം കണ്ടെത്താൻ കഴിഞ്ഞിട്ടില്ല. കഴിഞ്ഞ ദിവസം തൊഴിലാളികൾ ജോലി ചെയ്യുകയായിരുന്ന തേയില തോട്ടത്തിൽ കാട്ടുപോത്ത് എത്തിയിരുന്നു. മൂന്നാർ നല്ലതണ്ണി വെസ്റ്റ് ഡിവിഷനിലെ ഫീൽഡിലാണ് കാട്ടുപോത്ത് എത്തിയത്. തൊഴിലാളികൾ ബഹളം വച്ചതോടെയാണ് കാട്ടുപോത്ത് കാടു കയറിയത്. കഴിഞ്ഞ ദിവസം മാട്ടുപ്പെട്ടിയിലെ ജനവാസമേഖലയിൽ പടയപ്പയും എത്തിയതോടെ വന്യജീവികൾ മൂലം പ്രദേവാസികളും തൊഴിലാളികളും ഭീതിയോടെയാണ് കഴിയുന്നത്.

ഗ്രീൻവാലി ഡെവലപ്മെന്‍റ് സൊസൈറ്റി സ്വാശ്രയ മുട്ട ഗ്രാമം പദ്ധതി തുടങ്ങി

ചെറുതോണി: കോട്ടയം അതിരൂപതയുടെ സാമൂഹ്യ സേവന വിഭാഗമായ ഗ്രീൻവാലി ഡെവലപ്മെന്‍റ് സൊസൈറ്റിയുടെ നേതൃത്വത്തിൽ സ്വാശ്രയ മുട്ട ഗ്രാമം പദ്ധതിക്ക് തുടക്കം കുറിച്ചു. പ്രവർത്തന ഗ്രാമങ്ങളിൽ മുട്ടയുടെ ക്ഷാമം പരിഹരിക്കുകയും പരാശ്രയ ശീലം ഒഴിവാക്കുകയും ചെയ്യുക എന്നതാണ് പദ്ധതിയുടെ ലക്ഷ്യം. പദ്ധതിയുടെ ഉദ്ഘാടനം ഗ്രീൻവാലി ഡെവലപ്മെന്‍റ് സൊസൈറ്റി സെക്രട്ടറി ഫാ. സുജിത്ത് കാഞ്ഞിരത്തുംമൂട്ടിൽ നിർവഹിച്ചു. ചടങ്ങിൽ ഗ്രീൻവാലി ഡെവലപ്മെന്‍റ് സൊസൈറ്റി പ്രോഗ്രാം ഓഫീസർ സിറിയക് പറമുണ്ടയിൽ, പ്രോഗ്രാം കോ-ഓർഡിനേറ്റർ സിസ്റ്റർ ജിജി വെളിഞ്ചായിൽ, മെറിൻ എബ്രാഹം, അനിമേറ്റർ സിനി സജി എന്നിവർ പങ്കെടുത്തു. പ്രവർത്തന ഗ്രാമങ്ങളിൽ 1500- ഓളം കോഴിക്കുഞ്ഞുങ്ങളെ വിതരണം ചെയ്തു.

നെടുങ്കണ്ടം മിനി സിവില്‍ സ്റ്റേഷന്‍ ചോര്‍ന്നൊലിക്കുന്നു; അപകടഭീഷണിയായി പില്ലറുകളില്‍ രൂപപ്പെട്ട വിള്ളലുകള്‍

നെടുങ്കണ്ടം: ഉദ്ഘാടനം ചെയ്തു വര്‍ഷങ്ങള്‍ക്കുള്ളില്‍ തന്നെ ചോര്‍ന്നൊലിക്കുകയാണ് നെടുങ്കണ്ടത്തെ മിനി സിവില്‍ സ്റ്റേഷന്‍ കെട്ടിടം. പ്രധാന തൂണുകളോടു ചേര്‍ന്ന് വിള്ളലുകള്‍ രൂപപ്പെട്ടതും റൂഫിംഗ് ഷീറ്റുകള്‍ തകര്‍ന്നതുംമൂലം ചെറിയ മഴ പെയ്താല്‍ പോലും സിവില്‍ സ്റ്റേഷന്‍റെ ഉള്ളിലെ വരാന്തകളില്‍ വെള്ളക്കെട്ടുകള്‍ രൂപപ്പെടുന്നത് പതിവാണ്. ടൈലുകളില്‍ വെള്ളം കെട്ടി നില്‍ക്കുന്നത് അപകടങ്ങള്‍ക്ക് കാരണമാകുന്നതോടൊപ്പം കെട്ടിടത്തിനുള്ളില്‍ ഈര്‍പ്പം നിറയുന്നത് ജീവനക്കാര്‍ക്കാരെയും ഇവിടെയെത്തുന്ന പൊതുജനങ്ങളെയും ബുദ്ധിമുട്ടിലാക്കുന്നു. 2013ല്‍ പ്രവര്‍ത്തനം ആരംഭിച്ച നെടുങ്കണ്ടത്തെ മിനി സിവില്‍ സ്റ്റേഷന്‍ കെട്ടിടം മൂന്നു വര്‍ഷം മുമ്പു ചോരാന്‍ തുടങ്ങിയിരുന്നു. മൂന്നു നിലകളുള്ള കെട്ടിടത്തിന്‍റെ മേല്‍ക്കൂരയോടു ചേര്‍ന്നുള്ള തൂണുകളില്‍ വിള്ളലുകള്‍ ഉണ്ടായതാണ് ചോര്‍ച്ച ഉണ്ടാകാന്‍ പ്രധാന കാരണം. താലൂക്ക് ഓഫീസ്, സപ്ലൈ ഓഫീസ്, ആര്‍.ടി. ഓഫീസ് അടക്കം പത്തിലധികം സര്‍ക്കാര്‍ സ്ഥാപനങ്ങളിലായി 250ല്‍ അധികം ജീവനക്കാര്‍ ജോലി ചെയ്യുന്ന ഇവിടെ വിവിധ ആവശ്യങ്ങള്‍ക്കായി നൂറുകണക്കിന് ആളുകളാണ് ദിവസേന എത്തുന്നത്. കൂടാതെ താലൂക്ക് വികസനസമിതി യോഗങ്ങള്‍, വിവിധ മീറ്റിംഗുകള്‍ എന്നിവ നടക്കുന്ന ഇവിടം പല സര്‍ക്കാര്‍ പരിപാടികളുടെയും വേദിയായും ഉപയോഗിക്കാറുണ്ട്. കഴിഞ്ഞ ദിവസമുണ്ടായ മഴയില്‍ തൂണുകളിലെ വിള്ളലുകള്‍ വലുതാകുകയും മഴവെള്ളം കുത്തിയൊലിച്ച് ഇറങ്ങുന്ന സ്ഥിതിയിലാകുകയും ചെയ്തിട്ടുണ്ട്. വിള്ളലുകള്‍ക്കുള്ളില്‍ പായല്‍ വളരുന്നത് കോണ്‍ക്രീറ്റിന്‍റെ ബലത്തെയും കെട്ടിടത്തിന്‍റെ സുരക്ഷയെത്തന്നെയും ബാധിക്കും. ഇതുകൂടാതെ കെട്ടിടത്തിന്‍റെ നടുമുറ്റത്തിനു മുകളില്‍ ഇട്ടിരിക്കുന്ന റൂഫിംഗ് ഷീറ്റും പുറത്തേക്കുള്ള ജനലുകളും തകര്‍ന്നതോടെ മഴവെള്ളം നടുമുറ്റത്തേക്കും മൂന്ന് നിലകളിലെയും വരാന്തകളിലേക്കും ഒഴുകിയിറങ്ങുകയും ചെയ്യുന്നുണ്ട്. മിനുസമുളള ടൈലുകള്‍ വിരിച്ച വരാന്തകളില്‍ വെള്ളം കെട്ടിനില്‍ക്കുന്നത് അപകടങ്ങള്‍ക്കും കാരണമാകും. ഇതു സംബന്ധിച്ച് ജീവനക്കാര്‍ മുമ്പ് പലതവണ അധികാരികളുടെ ശ്രദ്ധയില്‍പ്പെടുത്തിയിരുന്നെങ്കിലും നടപടി ഉണ്ടായില്ല.

സ്പോർട്സ് ആയുർവേദ ബ്ലോക്ക് ഉദ്ഘാടനം ചെയ്തു

തൊടുപുഴ: ജില്ലാ ആയുർവേദ ആശുപത്രിയിൽ ആരംഭിച്ച സ്പോർട്സ് ആയുർവേദ ബ്ലോക്കിനെ മികവിന്‍റെ കേന്ദ്രമാക്കാൻ സംസ്ഥാന സർക്കാർ സാധ്യമായ എല്ലാ സൗകര്യങ്ങളുമൊരുക്കുമെന്ന് മന്ത്രി റോഷി അഗസ്റ്റിൻ. ജില്ലാ ആയുർവേദ ആശുപത്രിയിൽ നിർമാണം പൂർത്തീകരിച്ച സ്പോർട്സ് ആയുർവേദ ബ്ലോക്കിന്‍റെ പ്രവർത്തനോദ്ഘാടനം നിർവഹിക്കുകയായിരുന്നു അദ്ദേഹം. ഇതിനായി ആരോഗ്യ വകുപ്പുമായി കൂടിയാലോചന നടത്തുമെന്നും അദ്ദേഹം പറഞ്ഞു. ദേശീയ ആയുഷ് മിഷൻ അനുവദിച്ച ഒരു കോടി വിനിയോഗിച്ചാണ് പുതിയ ബ്ലോക്കിന്‍റെ നിർമാണം പൂർത്തീകരിച്ചത്. അഞ്ച് നിലകളുള്ള കെട്ടിടം നിർമിക്കാനാണ് ലക്ഷ്യമിടുന്നത്. നിലവിൽ ഒരു നിലയാണ് നിർമാണം പൂർത്തീകരിച്ചിരിക്കുന്നത്. ഡീൻ കുര്യാക്കോസ് എംപി അധ്യക്ഷത വഹിച്ചു. രജിസ്ട്രേഷൻ കൗണ്ടറിന്‍റെ ഉദ്ഘാടനം ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ നിർവഹിച്ചു. സർവീസിൽ നിന്നും വിരമിക്കുന്ന ജില്ലാ മെഡിക്കൽ ഓഫീസർ ഡോ.പി.സി ഷീലയ്ക്ക് മന്ത്രി ഉപഹാരം നൽകി. ദേശീയ ആയുഷ് മിഷൻ ഡിപിഎം കെ.എസ് ശ്രീദർശൻ വിഷയാവതരണം നടത്തി. നഗരസഭ ചെയർമാൻ കെ.ദീപക്, ജില്ലാ പഞ്ചായത്ത് ആരോഗ്യ സ്റ്റാൻഡിംഗ് കമ്മിറ്റി ചെയർമാൻമാരായ കെ.ജി സത്യൻ, ഇന്ദു സുധാകരൻ, ജില്ലാ പഞ്ചായത്തംഗം പ്രഫ.എം.ജെ ജേക്കബ്, ന്യൂമാൻ കോളജ് ബർസാർ ഫാ.ബെൻസണ്‍ എൻ.ആന്‍റണി, സ്പെഷലിസ്റ്റ് മെഡിക്കൽ ഓഫീസർ ഡോ.ആർ വിനീത്, സൂപ്രണ്ട് ഇൻചാർജ് ഡോ. എസ്. ശ്രീജ എന്നിവർ പ്രസംഗിച്ചു.

പീരുമേട് ആശുപത്രിയിലെ അപര്യാപ്തത പരിശോധിക്കണം

ഇടുക്കി: പീരുമേട് താലൂക്ക് ആശുപത്രിയിലെ അപര്യാപ്തതകൾ പരിശോധിക്കാൻ ഡെപ്യൂട്ടി ഡിഎംഒ റാങ്കിലുള്ള ഉദ്യോഗസ്ഥനെ നിയോഗിക്കണമെന്ന് മനുഷ്യാവകാശ കമ്മീഷൻ ചെയർപേഴ്സൻ ജസ്റ്റിസ് അലക്സാണ്ടർ തോമസ് ഇടുക്കി ഡിഎംഒയ്ക്ക് നിർദേശം നൽകി. ഡോക്ടർമാർ, നഴ്സുമാർ, പാരാ മെഡിക്കൽ, മിനിസ്റ്റീരിയൽ ജീവനക്കാർ തുടങ്ങി സർക്കാർ അനുവദിച്ചിരിക്കുന്ന തസ്തികകൾ, എത്ര പേർ ജോലി ചെയ്യുന്നുണ്ട്, ഒഴിവുള്ള തസ്തികകൾ, അടിസ്ഥാന സൗകര്യങ്ങളുടെ അപര്യാപ്തത തുടങ്ങിയ കാര്യങ്ങൾ മനസിലാക്കി ഡപ്യൂട്ടി ഡിഎംഒ ജില്ലാ മെഡിക്കൽ ഓഫീസർക്ക് റിപ്പോർട്ട് നൽകണം. ഇതിന്‍റെ അടിസ്ഥാനത്തിൽ ഒഴിവുകൾ നികത്താനും ഭൗതിക സാഹചര്യങ്ങൾ മെച്ചപ്പെടുത്താനും ഡിഎംഒ നടപടിയെടുക്കണമെന്ന് ജസ്റ്റിസ് അലക്സാണ്ടർ തോമസ് ആവശ്യപ്പെട്ടു. അധിക തസ്തിക ആവശ്യമുണ്ടെങ്കിൽ വിശദമായ അപേക്ഷ സർക്കാരിന് സമർപ്പിക്കണമെന്നും കമ്മീഷൻ നിർദേശം നൽകി. നിർമാണ ജോലികൾ പൂർത്തിയാകുന്നതോടെ ഓപ്പറേഷൻ തിയേറ്ററും കൂടുതൽ കിടക്കകളോടു കൂടിയ വാർഡുകളും പ്രവർത്തനം തുടങ്ങുമെന്ന് ആരോഗ്യവകുപ്പ് ഡയറക്ടർ കമ്മീഷനെ അറിയിച്ചു. എന്നാൽ പീരുമേട് ആശുപത്രി ആരംഭിച്ച കാലത്തുള്ള 54 കിടക്കകളാണ് ഇപ്പോഴുമുള്ളതെന്ന് പരാതിക്കാരൻ കമ്മീഷനെ അറിയിച്ചു. സർജറി, ഇഎൻടി വിഭാഗങ്ങളിൽ ഡോക്ടർമാരില്ല. കിടത്തി ചികിത്സിക്കുന്ന രോഗികളുടെ എണ്ണം കുറച്ചു. ഹെൽത്ത് സെന്‍ററിൽനിന്ന് ലഭിക്കുന്ന സേവനങ്ങൾപോലും താലൂക്ക് ആശുപത്രിയിൽ ലഭിക്കുന്നില്ലെന്നും പരാതിക്കാരൻ കമ്മീഷനെ അറിയിച്ചു.

മഴക്കെടുതി: ജില്ലയിൽ 148 വീടുകൾക്ക് നാശനഷ്ടം

ഇടുക്കി: കനത്ത മഴയെ തുടർന്ന് ജില്ലയിൽ 148 വീടുകൾക്ക് നാശനഷ്ടം. 138 വീടുകൾ ഭാഗികമായും 10 വീടുകൾ പൂർണമായും തകർന്നു. ഇടുക്കി താലൂക്കിൽ 55 വീടുകളാണ് തകർന്നത്. 52 വീടുകൾ ഭാഗികമായും മൂന്ന് വീടുകൾ പൂർണമായും തകർന്നു. തൊടുപുഴ താലൂക്കിൽ 29 വീടുകൾക്ക് നാശനഷ്ടമുണ്ടായി. 25 വീടുകൾ ഭാഗികമായും നാലു വീടുകൾ പൂർണമായും തകർന്നു. ദേവികുളം താലൂക്കിൽ 26 വീടുകൾ ഭാഗികമായും രണ്ടു വീടുകൾ പൂർണമായും തകർന്നു. ഉടുന്പൻചോലയിൽ 25 വീടുകൾക്ക് നാശനഷ്ടമുണ്ടായി. ഒരു വീട് പൂർണമായും തകർന്നു. പീരുമേട് താലൂക്കിൽ 11 വീടുകൾക്ക് ഭാഗിക നാശനഷ്ടമുണ്ടായി. ജില്ലയിൽ കഴിഞ്ഞ 24 മണിക്കൂറിനിടയിൽ 14 വീടുകളാണ് കനത്ത മഴയിൽ തകർന്നത്. കനത്ത മഴയിൽ ജില്ലയിൽ 5.48 കോടി രൂപയുടെ കൃഷിനാശമാണ് ഉണ്ടായതായാണ് പ്രാഥമിക കണക്കുകൾ. 350.8 ഹെക്ടറിലായി 3218 കർഷകരുടെ കാർഷിക വിളകൾ ഇതിനോടകം നശിച്ചു. ജില്ലയിൽ 14 ദുരിതാശ്വാസ ക്യാന്പുകളാണ് തുറന്നിരിക്കുന്നത്. ഇടുക്കി താലൂക്കിൽ ഏഴ് ക്യാന്പുകളും ദേവികുളം താലൂക്കിൽ അഞ്ച് ക്യാന്പുകളും ഉടുന്പൻചോല താലൂക്കിൽ രണ്ട് ക്യാന്പുകളുമാണ് തുറന്നിരിക്കുന്നത്. 78 കുടുംബങ്ങളിലെ 240 അംഗങ്ങൾ ഈ ക്യാന്പുകളിലുണ്ട്. രണ്ടു ദിവസമായി ജില്ലയിൽ മഴയുടെ ശക്തി കുറഞ്ഞിരിക്കുകയാണ്. ഒറ്റപ്പെട്ട മഴയാണ് പലയിടങ്ങളിലും ലഭിച്ചത്. കഴിഞ്ഞ 24 മണിക്കൂറിനുള്ളിൽ 35.34 മില്ലി മീറ്റർ മഴയാണ് ജില്ലയിൽ പെയ്തത്. ഉടുന്പൻചോല - 6.2, ദേവികുളം - 24.4, പീരുമേട്- 88.1, ഇടുക്കി- 24.2 തൊടുപുഴ-33.6 എന്നിങ്ങനെയാണ് ഓരോ താലൂക്കിലും പെയ്ത മഴയുടെ കണക്ക്. ഇടുക്കി ഡാമിൽ 2344.22 അടിയും മുല്ലപ്പെരിയാറിൽ 130.05 അടിയുമാണ് ജലനിരപ്പ്.

കാട്ടാനശല്യത്തില്‍ പൊറുതിമുട്ടി നാട്ടുകാർ

അടിമാലി: വാളറ കുളമാന്‍കുഴി മേഖലയില്‍ കാട്ടാനശല്യത്തില്‍ പൊറുതിമുട്ടി നാട്ടുകാർ.മൂന്ന് കാട്ടാനകളാണ് ഏതാനും ദിവസങ്ങളായി വാളറ കുളമാൻകുഴി ‍ ജനവാസ മേഖലയില്‍ ഇറങ്ങി നാശം വരുത്തുന്നത്. പ്രദേശത്തെ അമ്പതോളം കര്‍ഷകരുടെ കൃഷിയിടങ്ങളിലാണ് കാട്ടാ നകൾ നാശംവരുത്തിയത്. പല കര്‍ഷകര്‍ക്കും സംഭവിച്ച നഷ്ടം വലുതാണ്. ഏലവും മലയിഞ്ചിയും കൊക്കോയുമൊക്കെ കാട്ടാനകള്‍ വൻതോതില്‍ നശിപ്പിച്ചു.തുരത്തിയോടിക്കാന്‍ ശ്രമിച്ചാലും കാട്ടാനകള്‍ ജനവാസ മേഖലയില്‍നിന്നു പിന്‍വാങ്ങാന്‍ തയാറാകാത്ത സ്ഥിതിയാണ്. കാട്ടാന ശല്യം രൂക്ഷമായിട്ടും വനംവകുപ്പിന്‍റെ ഭാഗത്തുനിന്നു ഫലപ്രദമായ ഇടപെടല്‍ ഉണ്ടായിട്ടില്ലെന്ന ആക്ഷേപവുമുണ്ട്. പൊറുതിമുട്ടിയതോടെ പ്രദേശത്തെ ആളുകള്‍ നേര്യമംഗലം ഫോറസ്റ്റ് റേഞ്ചോഫീസിലേക്ക് പ്രതിഷേധവുമായി എത്തി.തുടര്‍ന്ന് നടത്തിയ ചര്‍ചയില്‍ ആനയെ തുരത്താന്‍ പ്രദേശത്ത് ആര്‍ ആര്‍ടി സംഘത്തെ നിയോഗിക്കാമെന്ന് വനംവകുപ്പ് അറിയിച്ചു. തുടര്‍നടപടികളില്‍ തീരുമാനം കൈകൊള്ളാന്‍ മൂന്നാര്‍ ഡി എഫ്ഒയുടെ സാന്നിധ്യത്തില്‍ നാളെ ചര്‍ച്ച നടത്താമെന്ന് വനംവകുപ്പ് ഉദ്യോഗസ്ഥര്‍ അറിയിച്ചതോടെ പ്രതിഷേധം താത്കാലിമായി അവസാനിപ്പിച്ചു. കാട്ടാനകള്‍ ജനവാസമേഖലയിലേക്ക് ഇറങ്ങുന്ന പ്രദേശത്ത് കുറ്റമറ്റ രീതിയില്‍ ഫെന്‍സിംഗ് തീര്‍ത്താല്‍ ആനശല്യം ഒരു പരിധിവരെ പരിഹാരിക്കാമെന്നാണ് പ്രദേശവാസികൾ പറയുന്ന ത്. കാട്ടാനശല്യം രൂക്ഷമായതോടെ പകല്‍ സമയത്ത് കൃഷിയിടങ്ങളില്‍ ഇറങ്ങാന്‍ കര്‍ഷകര്‍ ഭയക്കുകയാണ്. മഴ പെയ്യുന്നതോടെ അടിക്കടി പ്രദേശത്ത് വൈദ്യുതിയും മൊബൈല് ‍നെറ്റ്‌വര്‍ക്കും മുടങ്ങുകയാണ്.

മലയോരത്തുനിന്ന് കര്‍ഷകരെ ആട്ടിയിറക്കാന്‍ ശ്രമം: യൂത്ത്ഫ്രണ്ട്-ജേക്കബ്

കട്ടപ്പന: എല്‍ഡിഎഫ് സര്‍ക്കാരിന്‍റെയും വനംവകുപ്പിന്‍റെയും കര്‍ഷകദ്രോഹ നടപടികള്‍ക്കെതിരേ പ്രക്ഷോഭം സംഘടിപ്പിക്കുമെന്ന് യൂത്ത് ഫ്രണ്ട്(ജേക്കബ്) സംസ്ഥാന പ്രസിഡന്‍റ് സാജന്‍ ജോസഫ്. 60 വര്‍ഷത്തിലേറെയായി വണ്ണപ്പുറം മേഖലയിലെ കര്‍ഷകരുടെ കൈവശത്തിലുള്ള ഭൂമിയിലാണ് വനംവകുപ്പ് അവകാശവാദം ഉന്നയിക്കുന്നത്. ഇപ്പോള്‍ ഇവിടെ മരം മുറിക്കണമെങ്കില്‍ വനംവകുപ്പിന് അപേക്ഷ നല്‍കി ഉദ്യോഗസ്ഥര്‍ക്ക് കൈക്കൂലി കൊടുക്കേണ്ട സ്ഥിതിയാണ്. കര്‍ഷകര്‍ മലയോരത്തുനിന്ന് ആട്ടിയിറക്കപ്പെടുന്ന അവസ്ഥഅനുവദിക്കില്ല. വന്യമൃഗങ്ങള്‍ നാട്ടിലിറങ്ങിയാല്‍ വനമേഖലയുടെ സൂക്ഷിപ്പുകാരായ വനപാലകര്‍ക്കാണ് ഉത്തരവാദിത്വം. എന്നാല്‍, ഇരകളായ കര്‍ഷകരെ പ്രതിക്കൂട്ടിലാക്കുന്ന നടപടിയാണിപ്പോള്‍ വനംവകുപ്പ് സ്വീകരിക്കുന്നത്. പ്രശ്നത്തിനു ശാശ്വത പരിഹാരമുണ്ടാകുംവരെ കര്‍ഷകരുടെ ആവശ്യങ്ങള്‍ക്കുവേണ്ടി നിലപാടെടുക്കുമെന്നു സാജന്‍ ജോസഫ് പറഞ്ഞു.

പട്ടയം നഷ്ടപ്പെട്ടവർക്ക് നിജസ്ഥിതി സർട്ടിഫിക്കറ്റ് നൽകാൻ ഉത്തരവ്

കട്ടപ്പന: സംസ്ഥാനത്ത് വിവിധ ഭൂനിയമങ്ങൾ പ്രകാരം നൽകിയ പട്ടയത്തിന്‍റെ അസൽ പകർപ്പ് നഷ്ടപ്പെട്ടവർക്ക് ഇനി ആശ്വസിക്കാം. അത്തരം കേസുകളിൽ ജില്ലാ കളക്ടർ നിജസ്ഥിതി സർട്ടിഫിക്കറ്റ് അനുവദിക്കണമെന്ന് സർക്കാർ ഉത്തരവിട്ടു. പട്ടയം നഷ്ടപ്പെട്ടു എന്ന കാരണത്താൽ നിരവധി അപേക്ഷകളാണ് സർക്കാരിനു ലഭിച്ചിട്ടുള്ളത്. അതിന്‍റെ അടിസ്ഥാനത്തിലാണ് റവന്യു വകുപ്പ് നിജസ്ഥിതി സർട്ടിഫിക്കറ്റ് നൽകാനുള്ള ഉത്തരവ് പുറപ്പെടുവിച്ചത്. പട്ടയം നഷ്ടപ്പെട്ടതു മൂലം ബാങ്കിൽനിന്ന് വായ്പയെടുക്കാനോ ഭൂമി ക്രയവിക്രയം ചെയ്യാനോ സാധിക്കാത്ത സ്ഥിതിയുണ്ടായിരുന്നു. അത്തരം പ്രശ്നങ്ങൾക്കുകൂടി പരിഹാരമാകും. താലൂക്ക് ഓഫീസ്, വില്ലേജ് ഓഫീസ് എന്നിവിടങ്ങളിലെ രജിസ്റ്ററുകളിലെ രേഖപ്പെടുത്തലുകളുടെ അടിസ്ഥാനത്തിൽ തഹസിൽദാർ ജില്ലാ കളക്ടർക്ക് കൊടുക്കുന്ന റിപ്പോർട്ടിന്‍റെ അടിസ്ഥാനത്തിലായിരിക്കും ജില്ലാ കളക്ടർ നിജസ്ഥിതി സർട്ടിഫിക്കറ്റ് അനുവദിക്കുക. 2020 ൽ സമാനമായി ഒരുത്തരവ് സർക്കാർ പുറപ്പെടുവിച്ചിരുന്നു, എങ്കിലും 1964 ലെ ചട്ടങ്ങൾ, 1995 ലെ ചട്ടങ്ങൾ, 1993 ലെ ചട്ടങ്ങൾ എന്നിങ്ങനെ മൂന്നു ഭൂപതിവു ചട്ടങ്ങൾ പ്രകാരം അനുവദിക്കപ്പെട്ട പട്ടയങ്ങൾക്കു മാത്രമായിരുന്നു ആ ഉത്തരവ് ബാധകമായിരുന്നത്. ഇപ്പോൾ പുറത്തിറക്കിയ ഉത്തരവ് പ്രകാരം 15 വ്യത്യസ്ത ചട്ടങ്ങൾ പ്രകാരം പട്ടയം അനുവദിക്കപ്പെട്ട കേസുകളിൽ നിജസ്ഥിതി സർട്ടിഫിക്കറ്റ് ലഭിക്കും. വില്ലേജ് ഓഫീസിലെ തണ്ടപ്പേർ അക്കൗണ്ടിൽ പട്ടയ കക്ഷിയുടെയും തുടർന്നുള്ള നിയമാനുസൃത കൈമാറ്റങ്ങൾ മുഖേന നിലവിലെ കൈവശക്കാരന്‍റെയോ പേരിൽ ഭൂനികുതി ഒടുക്കി വരുന്നതുമായ സാഹചര്യങ്ങളിൽ പട്ടയ ഫയൽ പ്രകാരമുള്ള ഭൂമിതന്നെയാണ് കൈവശ ഭൂമിയെന്ന് ഉറപ്പുവരുത്തി ആധികാരികത ബോധ്യപ്പെടുന്ന സംഗതികളിൽ പട്ടയം ലഭിച്ച ആളിൽ നിന്നും നിയമപ്രകാരം ഭൂമി കൈമാറ്റം ചെയ്തു ലഭിച്ച നിലവിലെ കൈവശക്കാരന്‍റെ പേരിൽ നിജസ്ഥിതി സർട്ടിഫിക്കറ്റ് അനുവദിക്കുന്നതിനാണ് ജില്ലാ കളക്ടർമാരെ ചുമതലപ്പെടുത്തിയിട്ടുള്ളത്.

ഉദ്യോഗസ്ഥരെ നിയന്ത്രിക്കാൻ കഴിയുന്നില്ലെങ്കിൽ സർക്കാർ രാജിവയ്ക്കണം: സണ്ണി പൈമ്പിള്ളിൽ

ചെറുതോണി: വനം വകുപ്പ് ഉദ്യോഗസ്ഥരെ നിയന്ത്രിക്കാൻ സർക്കാരിന് കഴിയുന്നില്ലെങ്കിൽ രാജിവയ്ക്കുകയാണ് വേണ്ടതെന്ന് കേരളവ്യാപാരി വ്യവസായി ഏകോപന സമിതി ജില്ലാ പ്രസിഡന്‍റ് സണ്ണി പൈമ്പിള്ളിൽ. ജില്ലയിലെ വനം വകുപ്പ് ഉദ്യോഗസ്ഥർ സമാന്തര ഗവൺമെന്‍റായി പ്രവർത്തിക്കുകയാണെന്ന് അദ്ദേഹം കുറ്റപ്പെടുത്തി. വനംവകുപ്പ് ഉദ്യോഗസ്ഥർ തോന്നിയപോലെ ജനങ്ങൾക്കെതിരേ കേസെടുക്കുകയും സർക്കാർ അതിന് പിറകെ നടന്ന് കേസ് പിൻവലിക്കുകയും ചെയ്യുന്നത് സർക്കാരിനും മന്ത്രിമാർക്കും നാണക്കേടാണ്. വേടനെതിരേ എടുത്ത കേസും മാർ ജോർജ് പുന്നക്കോട്ടിലിനെതിരേ എടുത്ത കേസും മറ്റ് നിരവധി കേസുകളും പിൻവലിച്ചത് ഇതിനുദാഹരണമാണ്. ഇപ്പോൾ തൊമ്മൻകുത്ത് നാരങ്ങാനത്തു വൈദികർക്കും ഇടവകക്കാർക്കുമെതിരേ എടുത്ത കേസുകളും സർക്കാരിന് മാനക്കേടായിരിക്കയാണ്. താമസിയാതെ ഇതും പിൻവലിക്കേണ്ടിവരുമെന്നും സണ്ണി പൈമ്പിള്ളിൽ പറഞ്ഞു. നാരങ്ങാനത്തു കുരിശ് സ്ഥാപിച്ചത് കൈവശ ഭൂമിയിലാണെന്ന് തഹസിൽദാർ ജില്ലാ കളക്ടർക്കു റിപ്പോർട്ട് നൽകിക്കഴിഞ്ഞു. ഈ സാഹചര്യത്തിൽ വനം വകുപ്പ് ഉദ്യോഗസ്ഥർക്കെതിരേ നടപടി സ്വീകരിക്കുകയാണ് വേണ്ടത്. ജില്ലയിൽ പല സ്ഥലങ്ങളിലും റവന്യു ഭൂമിക്കുമേൽ വനം വകുപ്പ് അവകാശവാദം ഉന്നയിച്ചിരിക്കുന്നത് സർക്കാരും ജില്ലയിലെ ഭരണകക്ഷി നേതാക്കളും ഗൗരവത്തോടെ കാണണം. സുര്യനെല്ലി, സിങ്കുകണ്ടം ഉൾപ്പെടെയുള്ള പ്രദേശങ്ങൾ ഇതിനുദാഹരണമാണ്. ഇക്കാര്യത്തിൽ സർക്കാരും ജില്ലാ ഭരണകൂടവും വ്യക്തമായ നിലപാട് സ്വീകരിക്കണമെന്നും ഏകോപന സമിതി ജില്ലാ കമ്മിറ്റി ആവശ്യപ്പെട്ടു.

ഇടുക്കിയിലെ റോഡുകൾക്ക് 107 കോടി: മന്ത്രി

ചെറുതോണി: ഇടുക്കി നിയോജക മണ്ഡലത്തിലെ രണ്ടു പ്രധാന റോഡുകൾ ബിഎം ആന്‍ഡ് ബിസി നിലവാരത്തിലേക്ക് ഉയർത്തുന്നതിനായി 107.07 കോടി രൂപ കിഫ്ബി മുഖേന അനുവദിച്ചതായി മന്ത്രി റോഷി അഗസ്റ്റിൻ അറിയിച്ചു. ചേലച്ചുവട്-വണ്ണപ്പുറം റോഡിന് 52.01 കോടിയും, നത്തുകല്ല്-അടിമാലി റോഡിന് 55.06 കോടിരൂപയുമാണ് അനുവദിച്ചത്. കിഫ്ബിയുടെ കീഴിലുള്ള കേരള റോഡ് ഫണ്ട് ബോർഡ് (കെആർഎഫ്ബി) മുഖേനയാണ് നിർമാണം നടത്തുന്നത്.മുഖ്യമന്ത്രിയുടെ അധ്യക്ഷതയിൽ ചേർന്ന കിഫ്ബി ബോർഡ് യോഗത്തിലാണ് ഇതു സംബന്ധിച്ച തീരുമാനമായത്. പൊതുമരാമത്ത് വകുപ്പിനാകും നിർമാണച്ചുമതലയെന്ന് മന്ത്രി അറിയിച്ചു. അടിമാലി-നത്തുകല്ല് റോഡ്, ചേലച്ചുവട്-വണ്ണപ്പുറം റോഡുകളുടെ വികസനത്തിനായി ഭൂമി ഏറ്റെുടക്കുന്നതിന് നേരത്തേ 6.43 കോടി രൂപ അനുവദിച്ചിരുന്നു.റോഡുകൾ വീതികൂട്ടേണ്ടിവരുന്പോൾ ഭൂമി നഷ്ടപ്പെടുന്നവരുടേയും നീക്കം ചെയ്യേണ്ടിവരുന്ന കെട്ടിട ഉടമസ്ഥർക്കും നഷ്ടം നൽകുന്നതിനായാണ് തുക അനുവദിച്ചിട്ടുള്ളത്. ഇടുക്കിയെ ലോറേഞ്ചുമായി ബന്ധിപ്പിക്കുന്ന പ്രധാന റോഡായ ചേലച്ചുവട്-വണ്ണപ്പുറം റോഡ് പൂർത്തിയാക്കുന്നതിലൂടെ ഹൈറേഞ്ച് മേഖലയിൽ നിന്നും തൊടുപുഴ, മൂവാറ്റുപുഴ, നെടുന്പാശേരി വിമാനത്താവളം ഉൾപ്പെടെയുള്ള മേഖലകളിലേക്ക് യാത്ര സുഗമമാകും. അടിമാലി-നത്തുകല്ല് റോഡ് കട്ടപ്പന-ഇരട്ടയാർ വഴി അടിമാലിയിലേക്ക് സുഗമമായ പാതയ്ക്കു വഴിയൊരുക്കും. കിഫ്ബി റോഡുകളുടെ നിബന്ധനയനുസരിച്ച് റോഡിന് ആവശ്യമായ വീതിയിൽ നിർമിക്കുന്നതിനായി സ്ഥലം ഏറ്റെടുക്കുന്നതിന് തുക അനുവദിച്ചിരുന്നു. എന്നാൽ, റീസർവേ നടപടികൾ പൂർത്തിയാക്കാത്തതും സ്ഥലം ഉടമകൾ സ്ഥലം വിട്ടുനൽക്കുന്നതിന് കാലതാമസം നേരിടുന്നത് ഒഴിവാക്കുന്നതിനായി നിലവിലുള്ള റോഡ് കൂടുതൽ സൗകര്യപ്രദമായും ആവശ്യ ഇടങ്ങളിൽ മാത്രം വീതി കൂട്ടിയും നിർമിക്കുന്നതിന് മന്ത്രി റോഷി അഗസ്റ്റിൻ നിർദേശം നൽകുകയായിരുന്നു. ഇതേത്തുടർന്ന് കിഫ്ബി നടപടിക്രമങ്ങൾ വേഗത്തിലാക്കുകയും ധനാനുമതി നൽകുകയുമായിരുന്നു.

വിശ്വാസം ജീവിതസാക്ഷ്യമാണ്: മാര്‍ ജോസ് പുളിക്കല്‍

കാഞ്ഞിരപ്പള്ളി: വിശ്വാസം ജീവിതസാക്ഷ്യമാണെന്നും അനുദിന ജീവിത സാഹചര്യങ്ങളിലാണ് വിശ്വാസം തെളിയിക്കപ്പെടുന്നതെന്നും കാഞ്ഞിരപ്പള്ളി രൂപതാധ്യക്ഷന്‍ മാര്‍ ജോസ് പുളിക്കല്‍. രൂപത വിശ്വാസജീവിത പരിശീലനകേന്ദ്രത്തിന്‍റെയും ചെറുപുഷ്പ മിഷന്‍ ലീഗിന്‍റെയും വാര്‍ഷികാഘോഷം കാഞ്ഞിരപ്പള്ളി പാസ്റ്ററല്‍ സെന്‍ററില്‍ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ജീവിതത്തിലെ പ്രശ്‌നങ്ങളിലും പ്രതിസന്ധികളിലും തളരാതെ മുന്നേറാന്‍ വിശ്വാസം അനിവാര്യമാണെന്നും മാര്‍ ജോസ് പുളിക്കല്‍ പറഞ്ഞു. രൂപത പ്രോട്ടോസിഞ്ചെല്ലൂസ് റവ.ഡോ. ജോസഫ് വെള്ളമറ്റം അധ്യക്ഷത വഹിച്ചു. സിഞ്ചെല്ലൂസ് ഫാ. സെബാസ്റ്റ്യന്‍ കൊല്ലംകുന്നേല്‍, ഫാ. വര്‍ഗീസ് കൊച്ചുപറമ്പില്‍ എന്നിവര്‍ പ്രസംഗിച്ചു. മതാധ്യാപനരംഗത്ത് 50 വര്‍ഷങ്ങള്‍ പൂര്‍ത്തിയാക്കിയ നാല് അധ്യാപകര്‍ക്കും 25 വര്‍ഷങ്ങള്‍ പൂര്‍ത്തിയാക്കിയ 29 അധ്യാപകര്‍ക്കും പുരസ്‌കാരങ്ങള്‍ നല്‍കി. വിവിധ മേഖലകളില്‍ മികവ് തെളിയിച്ച സണ്‍ഡേ സ്‌കൂളുകളെയും കുട്ടികളെയും ആദരിച്ചു. കഴിഞ്ഞ 12 വര്‍ഷവും മുടങ്ങാതെ എല്ലാ ഞായറാഴ്ചകളിലും വിശ്വാസജീവിത പരിശീലനത്തില്‍ പങ്കെടുത്ത 25 കുട്ടികള്‍ക്ക് പ്രത്യേക പുരസ്‌ക്കാരങ്ങള്‍ നൽകി ആദരിച്ചു. തുടര്‍ന്ന് വിശ്വാസജീവിതപരിശീലനകേന്ദ്രം രൂപത ഡയറക്ടര്‍ ഫാ. തോമസ് വാളന്മനാലിന്‍റെ നേതൃത്വത്തില്‍ പ്രധാനാധ്യാപകര്‍, സ്റ്റാഫ് സെക്രട്ടറിമാര്‍, ഫൊറോന സെക്രട്ടറിമാര്‍ എന്നിവരുടെ സമ്മേളനവും നടത്തി. അടുത്ത അധ്യയനവര്‍ഷത്തെ കര്‍മപദ്ധതികളുടെ വിശദീകരണവും ചര്‍ച്ചകളും നടത്തി.

റവ. ഡോ. തോമസ് വെങ്ങാലുവക്കേൽ പടിയിറങ്ങുന്നു

മൂലമറ്റം: സെന്‍റ് ജോസഫ്സ് ഓട്ടോണോമസ് കോളജ് പ്രിൻസിപ്പൽ റവ. ഡോ. തോമസ് വെങ്ങാലുവക്കേൽ സിഎംഐ പടിയിറങ്ങുന്നു. എംജി യൂണിവഴ്സിറ്റി പ്രഫസറും ഗവേഷണ മാർഗദർശിയുമായ അദ്ദേഹത്തിനു കീഴിൽ ഒട്ടേറെ വിദ്യാർഥികൾ ഗവേഷണം നടത്തിവരുന്നുണ്ട്. സയൻസ്, സൈക്കോളജി, കായിക വിഭാഗം അധ്യാപകൻ, ബർസാർ, ലോക്കൽ മാനേജർ, സിഎംഐ കോട്ടയം പ്രൊവിൻസ് കോർപറേറ്റ് മാനേജർ എന്നീ നിലകളിൽ നേരത്തേ സേവനം അനുഷ്ഠിച്ചിട്ടുണ്ട്. എംപിഎഡ്, എംഎസ്‌സി, ഫിസിയോളജി, പിഎച്ച്ഡി ബിരുദധാരിയാണ് റവ. ഡോ.തോമസ് വെങ്ങാലുവക്കേൽ. സെന്‍റ് ജോസഫ്സ് അക്കാദമി ഫോർ ഹയർ എഡ്യൂക്കേഷൻ സ്ഥാപക ഡയറക്ടറായിരുന്നു. 55 അന്തർദേശീയ ജേർണൽ പബ്ലിക്കേഷനുകൾ, 45 ബുക്ക് ചാപ്റ്ററുകൾ, 10 അന്തർദേശീയ പ്രബന്ധങ്ങൾ എന്നിവയുടെ രചയിതാവാണ്. 2018 മുതൽ ചെന്നൈ സ്പോർട്സ് യൂണിവഴ്സിറ്റി ഡോക്ടറൽ കമ്മിറ്റി മെംബർ, വിവിധ യൂണിവഴ്സിറ്റികളുടെ അസിസ്റ്റന്‍റ് പ്രഫസർ, അസോസിയേറ്റ് പ്രഫസർ, പ്രഫസർ, പ്രിൻസിപ്പൽ സെലക‌്ഷൻ കമ്മിറ്റി മെംബർ, എംജി യൂണിവേഴ്സിറ്റി ഫിസിക്കൽ എഡ്യൂക്കേഷൻ വിഭാഗം ബിപിഎസ്, എംപിഇഎസ്, ബിപിഎഡ്, എംഫിൽ പ്രോഗ്രാമുകളുടെ സിലബസ് കമ്മിറ്റിയംഗം, സ്പോർട്സ് സയൻസ് ബോർഡ് ഓഫ് സ്റ്റഡീസ് എന്നിവയിലും പ്രവർത്തിച്ചിട്ടുണ്ട്. ഇദ്ദേഹത്തിന്‍റെ പരിശ്രമഫലമായാണ് മൂലമറ്റം കോളജിന് ഓട്ടോണോമസ് പദവി ലഭിച്ചത്. ചീനിക്കുഴി സെന്‍റ് മേരീസ് പള്ളി വികാരിയായാണ് പുതിയ നിയമനം.

വാർഷിക പൊതുയോഗം

തങ്കമണി: വ്യാപാരി വ്യവസായി ഏകോപനസമിതി തങ്കമണി യൂണിറ്റിന്‍റെ വാർഷിക പൊതുയോഗം ഏകോപന സമിതി ജില്ലാ പ്രസിഡന്‍റ് സണ്ണി പൈന്പള്ളി ഉദ്ഘാടനം ചെയ്തു. യൂണിറ്റ് പ്രസിഡന്‍റ് കെ.വി. ആന്‍റണി അധ്യക്ഷത വഹിച്ചു. സെക്രട്ടറി കെ.കെ. ജയ്മോൻ, ജില്ലാ സെക്രട്ടറി ജോസ് കുഴിക്കണ്ടം, മണ്ഡലം സെക്രട്ടറി സാജു പട്ടരുമഠം തുടങ്ങിയവർ പ്രസംഗിച്ചു. കട്ടപ്പന: കട്ടപ്പന മർച്ചന്‍റ്സ് അസോസിയേഷൻ വാർഷിക പൊതുയോഗവും കുടുംബ സുരക്ഷാനിധി വിതരണവും ഇന്നു വൈകുന്നേരം അഞ്ചിന് കട്ടപ്പന കല്ലറക്കൽ റസിഡൻസിയിൽ നടക്കുമെന്ന് ഭാരവാഹികൾ അറിയിച്ചു. കെവിവിഇ എസ് ജില്ലാ പ്രസിഡന്‍റ് സണ്ണി പൈന്പിള്ളിൽ ഉദ്ഘാടനം ചെയ്യും. കട്ടപ്പന മർച്ചന്‍റ്സ് അസോസിയേഷൻ പ്രസിഡന്‍റ് സാജൻ ജോർജ് അധ്യക്ഷത വഹിക്കും. മരണപ്പെട്ട വ്യാപാരിയുടെ കുടുംബത്തിന് ആറ് ലക്ഷം രൂപ നൽകും. പദ്ധതി ജില്ലാ ചെയർമാൻ ഡയസ് പുല്ലൻ വിശദീകരിക്കും. എംജി യൂണിവേഴ്സിറ്റി പരീക്ഷയിൽ റാങ്ക് ജേതാവായ നൂപ അനൂപിനെയും എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയവരെയും അനുമോദിക്കും. 90 വയസ് കഴിഞ്ഞ അംഗങ്ങളെയും ചടങ്ങിൽ ആദരിക്കും. ജില്ലാ വർക്കിംഗ് പ്രസിഡന്‍റ് കെ.ആർ. വിനോദ്,അഡ്വ. എം. കെ. തോമസ്, ഷിജോ തടത്തിൽ, ജോഷി കുട്ടട, കെ. പി. ബഷീർ, സാജു പട്ടരുമഠം , മുംതാസ് ഇബ്രാഹിം, എ.കെ. ഷിയാസ്, സിജോ മോൻ ജോസ് എന്നിവർ പ്രസംഗിക്കും.

ജില്ലാ പ്രവേശനോത്സവം തൊടുപുഴയിൽ

തൊടുപുഴ: പുതിയ അധ്യയനവർഷത്തിന് നാളെ വർണാഭമായ തുടക്കം. മഴയുടെ ആശങ്ക നില നിൽക്കുന്നുണ്ടെങ്കിലും കുട്ടികളെ വരവേൽക്കാനുള്ള തയാറെടുപ്പിലാണ് വിദ്യാഭ്യാസ വകുപ്പും സ്കൂൾ അധികൃതരും പിടിഎ കമ്മിറ്റികളും. കോരിച്ചൊരിയുന്ന മഴയും കാറ്റും ജില്ലയിൽ വ്യാപകമായിരുന്നെങ്കിലും രണ്ടു ദിവസമായി മഴയുടെ ശക്തി കുറഞ്ഞു നിൽക്കുന്നത് ആശ്വാസമായിട്ടുണ്ട്. ആദ്യദിനം ആഘോഷമായി വിദ്യാർഥികളെ സ്കൂളുകളിലേക്ക് ആനയിക്കും. ഇതിനു മുന്നോടിയായി ഭൂരിഭാഗം സ്കൂളുകളുടെയും പരിസരം വൃത്തിയാക്കുകയും ചുമരുകൾ പെയിന്‍റടിച്ച് മനോഹരമാക്കുകയും ചെയ്തിട്ടുണ്ട്. ഇതു സംബന്ധിച്ച് എല്ലാ സ്കൂൾ അധികൃതർക്കും വിദ്യാഭ്യാസ വകുപ്പ് പ്രത്യേക മാർഗ നിർദേശം നൽകിയിരുന്നു. താളമേളങ്ങളുടെ അകന്പടിയോടെയായിരിക്കും പല സ്കൂളുകളിലും പ്രവേശനോത്സവം സംഘടിപ്പിക്കുക. പുതുതായി എത്തുന്ന കുരുന്നുകൾക്ക് സമ്മാനങ്ങളും നൽകും. പുത്തനുടുപ്പും പുസ്തകവും കുടയുമൊക്കെയായി വിദ്യാലയങ്ങളിലെത്താനുള്ള തയാറെടുപ്പിലാണ് കുട്ടികൾ. പ്രതികൂല കാലാവസ്ഥയായിട്ടും സ്കൂൾ വിപണിയിൽ ഈ ദിവസങ്ങളിൽ വലിയ തിരക്കാണ് അനുഭവപ്പെട്ടത്. സ്കൂൾ തുറക്കുന്നതിനു മുന്നോടിയായി പരിസര ശുചീകരണം, അറ്റകുറ്റപ്പണികൾ, അപകടാവസ്ഥയിലുള്ള മരങ്ങൾ, ശിഖരങ്ങൾ എന്നിവ മുറിച്ചുമാറ്റുന്ന ജോലികൾ, ശുചിമുറി സൗകര്യം ഉറപ്പാക്കൽ, ചുറ്റുമതിൽ നിർമാണം, സ്കൂൾ വാഹനങ്ങളുടെ ഫിറ്റ്നസ് പരിശോധന തുടങ്ങിയവ പൂർത്തിയാക്കി. ജില്ലാതല പ്രവേശനോത്സവം നാളെ രാവിലെ 9.30ന് തൊടുപുഴ സെന്‍റ് സെബാസ്റ്റ്യൻസ് യുപി സ്കൂളിൽ മന്ത്രി റോഷി അഗസ്റ്റിൻ ഉദ്ഘാടനം ചെയ്യും. പി.ജെ.ജോസഫ് എംഎൽഎ അധ്യക്ഷത വഹിക്കും. ഡീൻ കുര്യാക്കോസ് എംപി മുഖ്യപ്രഭാഷണം നടത്തും. പഠനോപകരണ വിതരണം ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാക്കുന്നേലും കളി ഒരു ലഹരി പദ്ധതി ഉദ്ഘാടനം മുനിസിപ്പൽ ചെയർമാൻ കെ. ദീപക്കും നിർവഹിക്കും. സ്കൂൾ മാനേജർ ഫാ.ജോസ് പൊതൂർ അനുഗ്രഹ പ്രഭാഷണം നടത്തും. ജില്ലാ കളക്ടർ വി.വിഗ്‌നേശ്വരി സന്ദേശം നൽകും. എംഎൽമാരായ വാഴൂർ സോമൻ, എം.എം. മണി, ഡി. രാജ, ജില്ലാ പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ കെ.ജി.സത്യൻ, മുനിസിപ്പൽ കൗണ്‍സിലർമാരായ പി.ജി. രാജശേഖരൻ, ജോസ് മഠത്തിൽ എന്നിവർ പ്രസംഗിക്കും. ബഡ്സ് സ്കൂൾ പ്രവേശനോത്സവവും നാളെ ഇടുക്കി: ബുദ്ധിപരമായ വെല്ലുവിളികൾ നേരിടുന്ന കുട്ടികൾക്കായുള്ള ബഡ്സ് സ്കൂളുകളിൽ നാളെ പ്രവേശനോത്സവം നടക്കും. ജില്ലയിൽ നാല് ബഡ്സ് സ്ഥാപനങ്ങളിലായി 119 കുട്ടികൾ പഠനം നടത്തുന്നുണ്ട്. മറ്റു വിദ്യാലയങ്ങളിലെപോലെ ഈ സ്ഥാപനങ്ങളിലും നാളെ വർണാഭമായ പ്രവേശനോത്സവം സംഘടിപ്പിക്കും.വിദ്യാഭ്യാസ സ്ഥാപനങ്ങൾ അലങ്കരിക്കുകയും കുട്ടികളെ മധുരം നൽകി സ്വീകരിക്കുകയും ചെയ്യും. കുട്ടികളുടെ കലാപരിപാടികളും അരങ്ങേറും.

ജില്ലയിലെ ആദ്യ സ്മാർട്ട് കൃഷിഭവൻ വണ്ണപ്പുറത്ത്

തൊടുപുഴ: ജില്ലയിലെ ആദ്യ സ്മാർട്ട് കൃഷിഭവൻ വണ്ണപ്പുറത്ത് പ്രവർത്തനസജ്ജമായി. സംസ്ഥാന സർക്കാർ നബാർഡിന്‍റെ ധനസഹായത്തോടെ പൂർത്തിയാക്കിയ പദ്ധതി വിത്തിൽനിന്ന് വിപണിയിലേക്ക് ഒരു കുടക്കീഴിൽ എല്ലാ സേവനങ്ങളും എന്ന ആശയമാണ് ലക്ഷ്യമിടുന്നത്. ആധുനിക സൗകര്യങ്ങളുള്ള സ്മാർട്ട് കൃഷിഭവൻ കാർഷിക സേവനങ്ങൾക്കായി രൂപകൽപ്പന ചെയ്തതാണ്. അന്പതോളം കർഷകരെ ഉൾക്കൊള്ളാൻ കഴിയുന്ന ട്രെയിനിംഗ് ഹാൾ, കാർഷിക ഉത്പന്നങ്ങൾ നേരിട്ട് വിപണനം ചെയ്യുന്ന ഇക്കോ ഷോപ്പ്, കാർഷിക വിളകളെ ബാധിക്കുന്ന രോഗങ്ങൾ തിരിച്ചറിയാനും പ്രതിരോധ നടപടികൾ ലഭ്യമാക്കാനും സജ്ജമാക്കിയ പ്ലാന്‍റ് ഹെൽത്ത് ക്ലിനിക്ക്, ജൈവ നിയന്ത്രണ ഉപാധികൾ വിതരണം ചെയ്യുന്ന ബയോ ഫാർമസി, കർഷകർക്ക് അപേക്ഷകൾ നൽകാനും വിവിധ രജിസ്ട്രേഷൻ നടപടികൾ സുഗമമായി നടത്താനുമായി ഒരുക്കിയ ഫ്രണ്ട് ഓഫീസ് എന്നിവയാണ് കൃഷിഭവനിലെ പ്രധാന സൗകര്യങ്ങൾ. അടുത്ത ദിവസംതന്നെ സ്മാർട്ട് കൃഷിഭവന്‍റെ ഉദ്ഘാടനം നടത്തി കർഷകർക്കായി തുറന്നുനൽകുമെന്ന് അധികൃതർ അറിയിച്ചു.

കാറ്റിലും മഴയിലും നടപ്പാലം തകർന്നു; ഏത്തവാഴത്തോട്ടം നശിച്ചു

ചെറുതോണി: ശക്തമായ മഴയിൽ നടപ്പാലങ്ങൾ തകർന്ന് 20 കുടുംബങ്ങൾ ഒറ്റപ്പെട്ടു. കാമാക്ഷി പഞ്ചായത്തിലെ പുത്തൻപുരയിൽപ്പടി -കരിമുണ്ടപ്പടി റോഡിലെ നടപ്പാലമാണ് കഴിഞ്ഞ ദിവസമുണ്ടായ കനത്ത മഴയിൽ തകർന്നത്. ഇതോടെ പത്തോളം കുടുംബങ്ങൾ ഒറ്റപ്പെട്ടു. പാറക്കടവ് തോടിന് കുറുകെ വർഷങ്ങൾക്ക് മുമ്പ് പഞ്ചായത്ത് നിർമിച്ച നടപ്പാലവും തകർന്നു. പാലത്തിൽ രൂപപ്പെട്ട ഗർത്തത്തിൽ വീണ് പ്രദേശവാസികളായ രണ്ട് വയോധികർക്ക് കഴിഞ്ഞ വ്യാഴാഴ്ച രാവിലെ പരിക്കേറ്റിരുന്നു. ശക്തമായ കാറ്റിലും മഴയിലും തോപ്രാംകുടി ദൈവംമേട് അയ്യനോലിൽ ദീപുവിന്‍റെ ഒരേക്കറിലധികം സ്ഥലത്ത് കൃഷി ചെയ്തിരുന്ന വിളവെടുക്കാറായ രണ്ടാ യിരം ഏത്തവാഴ നശിച്ചു. ഒന്നര മാസം കൂടി കഴിഞ്ഞാൽ വാഴക്കുല വെട്ടിയെടുക്കാറാകുമായിരുന്നു. ബാങ്കിൽ നിന്നും വ്യക്തികളിൽ നിന്നും നാല് ലക്ഷത്തോളം രൂപ വായ്പ എടുത്താണ് കൃഷി ചെയ്തത്. 2023 ലെ വാത്തിക്കുടി കൃഷിഭവനിലെ മികച്ച യുവകർഷകനുള്ള പുരസ്കാരം നേടിയ ആളായിരുന്നു ദീപു. വാഴത്തോട്ടം കാറ്റിൽ തകർന്നു പോയതോടെ എന്തു ചെയ്യണമെന്നറിയാതെ പകച്ചു നിൽക്കുകയാണ് ഈ യുവകർഷകൻ.

കാറും ആംബുലൻസും കൂട്ടിയിടിച്ചു നാലുപേർക്ക് പരിക്ക്

പീരുമേട്: പീരുമേട് ഐഎച്ച് ആർഡി കോളജിന് സമീപം കാർ ആംബുലൻസിൽ ഇടിച്ച് അപകടം. കാറിലുണ്ടായിരുന്ന നാലുപേർക്ക് പരിക്കേറ്റു. ഇന്നലെ രാവിലെ ആയിരുന്നു സംഭവം. ഏറണാകുളം തൃപ്പുണിത്തുറയിൽനിന്ന് തമിഴ്നാട്ടിലെ പൂശാലംപെട്ടിയിലേക്ക് രോഗിയുമായി പോയ ആംബുലൻസ് ഓട്ടോറിക്ഷയെ മറികടക്കുന്നതിനിടെയാണ് അപകടം. ഇടിയുടെ ആഘാതത്തിൽ ആംബുലൻസ് ഓട്ടോറിക്ഷയിലും തട്ടി. ഓട്ടോറിക്ഷയിലെ യാത്രക്കാരായ കാഞ്ഞിരപ്പള്ളി തമ്പലക്കാട് സ്വദേശികളായ അമ്പിളി (15), വീണ (25) എന്നിവർക്കും പരിക്കേറ്റു. ഇവർക്ക് പ്രഥമ ശുശ്രൂഷനൽകിയ ശേഷം കാഞ്ഞിരപ്പള്ളി താലൂക്ക് ആശുപത്രിയിൽ പ്രവേശിപ്പിച്ചു. കാർ യാത്രികരെ മുണ്ടക്കയം മെഡിക്കൽ ട്രസ്റ്റ് ആശുപത്രിയിൽ പ്രവേശിപ്പിച്ചു.

അരിയില്ലെങ്കിലും ഉച്ചഭക്ഷണം നൽകണമെന്ന നിർദേശം അംഗീകരിക്കില്ല: കെപിഎസ്ടിഎ

തൊടുപുഴ: എഫ്സിഐ ഗോഡൗണിലെ തൊഴിൽത്തർക്കം മൂലം അരി വിതരണം തടസപ്പെട്ട സാഹചര്യത്തിൽ സ്കൂൾ തുറക്കുന്ന ദിവസം മുതൽ ഉച്ച ഭക്ഷണം നൽകണമെന്ന സർക്കാർ നിർദേശം അംഗീകരിക്കില്ലെന്ന് കെപിഎസ്ടിഎ ജില്ലാ കമ്മിറ്റി. കഴിഞ്ഞവർഷത്തെ ഉച്ചഭക്ഷണത്തിന്‍റെ തുക പോലും പൂർണമായി നൽകിയിട്ടില്ല. സർക്കാർ അനാസ്ഥ മൂലം അരിവിതരണം തടസപ്പെട്ട സാഹചര്യത്തിൽ പ്രഥമാധ്യാപകരുടെ ഉത്തരവാദിത്വത്തിൽ ഉച്ചഭക്ഷണം നടത്തണമെന്ന നിർദേശം അംഗീകരിക്കില്ല. എത്രയും വേഗം സ്കൂളുകളിൽ അരി എത്തിച്ചു നൽകുന്നതിന് വേണ്ട ക്രമീകരണം ഉണ്ടാകണമെന്ന് ജില്ലാ കമ്മിറ്റി ആവശ്യപ്പെട്ടു. ജില്ലാ പ്രസിഡന്‍റ് ജോബിൻ കളത്തിക്കാട്ടിൽ അധ്യക്ഷത വഹിച്ചു. സംസ്ഥാന സെക്രട്ടറി പി.എം. നാസർ, സുനിൽ ടി. തോമസ്, ഷിന്‍റോ ജോർജ് , ബിജോയ് മാത്യു, ജോർജ് ജേക്കബ്, വി.കെ. ആറ്റ്‌ലി, സജി മാത്യു, എം.വി. ജോർജുകുട്ടി, ടി. ശിവകുമാർ എന്നിവർ പ്രസംഗിച്ചു.

സുരക്ഷാ മുന്നറിയിപ്പുമായി വൈദ്യുതി ബോർഡ്

തൊടുപുഴ: കാലവർഷത്തോടനുബന്ധിച്ച് വൈദ്യുതി അപകടങ്ങളിൽപ്പെടാതിരിക്കാൻ പ്രത്യേക ശ്രദ്ധ വേണമെന്ന് കെഎസ്ഇബി മുന്നറിയിപ്പ് നൽകി. ലൈനുകളോട് തൊട്ടുകിടക്കുന്ന മരച്ചില്ലകൾ മുറിച്ചുമാറ്റാനും സർവീസ് വയർ, സ്റ്റേ വയർ, വൈദ്യുതി പോസ്റ്റുകൾ എന്നിവയെ സ്പർശിക്കാതിരിക്കാനും ശ്രദ്ധിക്കണം. ലോഹഷീറ്റിന് മുകളിൽ സർവീസ് വയർ കിടക്കുകയോ, ലോഹത്തൂണിൽ തട്ടിക്കിടക്കുകയോ ചെയ്താൽ വൈദ്യുതാഘാതം ഏൽക്കാൻ സാധ്യതയുള്ളതിനാൽ ഇത്തരം കാര്യങ്ങൾ ശ്രദ്ധയിൽപ്പെട്ടാൽ കെഎസ്ഇബി സെക്ഷൻ ഓഫീസിൽ അറിയിക്കണം. വൈദ്യുതി ലൈനുകളോട് തൊട്ടുകിടക്കുന്ന മരച്ചില്ലകൾ മുറിച്ചുമാറ്റാനും ലൈനിൽ തട്ടാൻ സാധ്യതയുള്ള വൃക്ഷത്തലപ്പുകൾ വെട്ടിമാറ്റാനും കഐസ്ഇബിയുമായി ജനങ്ങൾ സഹകരിക്കണം. ലൈനിനോടനുബന്ധിച്ച് നിൽക്കുന്ന മരങ്ങൾ വെട്ടിമാറ്റുന്നതിനായി ലൈൻ ഓഫ് ചെയ്യുന്നതിന് സെക‌്ഷൻ ഓഫീസിനെ സമീപിക്കാം. മഴയുള്ള സമയത്ത് ലൈനിനു സമീപത്തോ ലൈനിൽ തൊട്ടുകിടക്കുന്നതോ ആയ മരങ്ങളിൽ സ്പർശിക്കരുത്. ഉപഭോക്താക്കൾക്കും പൊതുജനങ്ങൾക്കും വൈദ്യുതി സുരക്ഷയുമായി ബന്ധപ്പെട്ട് നിർദേശങ്ങളോ ആവശ്യങ്ങളോ ഉണ്ടെങ്കിൽ തൊട്ടടുത്തുള്ള സെക‌്ഷൻ ഓഫീസിൽ അറിയിക്കുകയോ 1912ൽ വിളിക്കുകയോ ചെയ്യുക. 9496001912 എന്ന നന്പരിൽ വാട്സ്ആപ്പിലും അറിയിക്കാം. കെഎസ്ഇബിയുടെ എമർജൻസി നന്പരായ 9496010101 ലേക്കും വാട്സ് ആപ്പ് സന്ദേശമയയ്ക്കാം. അപകടസാധ്യതയുള്ള പോസ്റ്റ് ലൈനിന്‍റെ ചിത്രത്തിനൊപ്പം കൃത്യമായ സ്ഥലം, പോസ്റ്റ് നന്പർ, സെക‌്ഷൻ ഓഫീസിന്‍റെ പേര്, ജില്ല, വിവരം അറിയിക്കുന്നയാളുടെ പേര്, ഫോണ്‍ നന്പർ തുടങ്ങിയ വിവരങ്ങൾ സന്ദേശത്തിൽ ഉൾപ്പെടുത്തണം.

കനത്തമഴയിൽ സംരക്ഷണ ഭിത്തിയിടിഞ്ഞ് വീട് അപകടാവസ്ഥയിൽ

ചെറുതോണി: കുടിവെള്ള പദ്ധതിക്കായി നിർമിച്ച കുഴി വീടിന് അപകടക്കുഴിയായി. കനത്ത മഴയിൽ കരിമ്പൻ മങ്ങാട്ടിൽ പാച്ചന്‍റെ വീടാണ് മണ്ണിടിഞ്ഞ് അപകടത്തിലായിരിക്കുന്നത്. ഏതാനും മാസം മുൻപ് ജപ്പാൻ കുടിവെള്ള പദ്ധതിയുടെ ഭാഗമായി വീടിനു മുന്നിലൂടെ പൈപ്പിടാൻ കുഴിയെടുത്തിരുന്നു. ഇവിടെ മണ്ണിട്ടുമൂടി സംരക്ഷണ ഭിത്തി കെട്ടിക്കൊടുക്കണമെന്നാവശ്യപ്പെട്ടെങ്കിലും അധികൃതർ തയാറായില്ല. കഴിഞ്ഞദിവസമുണ്ടായ കനത്ത മഴയിൽ പൈപ്പിടാൻ നിർമിച്ച കുഴിയിൽ വെള്ളം കെട്ടിനിന്ന് വീടിന്‍റെ മുറ്റമുൾപ്പെടെ ഇടിഞ്ഞു വീഴുകയായിരുന്നു. ഇതോടെ വീട് അപകടത്തിലായിരിക്കയാണ്.

വനംവകുപ്പ് സമ്മതിക്കില്ല: പണിതിട്ടും പണിതിട്ടും വെളിച്ചമെത്തിക്കാന്‍ കഴിയാതെ കെഎസ്ഇബി

രാജാക്കാട്: ശക്തമായ മഴയിലും കാറ്റിലും നിരവധി മരങ്ങൾ കടപുഴകി വീണ് രാജാക്കാട് പൊന്മുടി റൂട്ടില്‍ വൈദ്യുത പോസ്റ്റുകളും ലൈനുകളും തകര്‍ത്ത് നിലംപൊത്തി. അപകട ഭീഷണി ഉയര്‍ത്തി നില്‍ക്കുന്ന മരങ്ങള്‍ മുറിച്ച് നീക്കണമെന്ന ആവശ്യവുമായി പൊതു പ്രവര്‍ത്തകര്‍ രംഗത്തെത്തിയിട്ടും വനം വകുപ്പ് മരങ്ങള്‍ മുറിക്കാന്‍ തയാറായിട്ടില്ല. രാജാക്കാട് പൊന്മുടി റൂട്ടില്‍ ചേലച്ചുവട് മുതൽ പൊന്മുടി ഡാം വരെയാണ് മണ്‍ തിട്ടകള്‍ക്ക് മുകളില്‍ അപകടഭീഷണി ഉയര്‍ത്തി വന്‍മരങ്ങള്‍ നില്‍ക്കുന്നത്. കാലവര്‍ഷം ആരംഭിക്കുന്നതിന് മുമ്പ് ഇത്തരം മരങ്ങള്‍ ബന്ധപ്പെട്ട വകുപ്പുകള്‍ മുറിച്ച് മാറ്റണമെന്ന ജില്ലാ കളക്ടറുടെ ഉത്തരവും വന്നിരുന്നു. ഇതേത്തുടര്‍‍ന്നാണ് കഴിഞ്ഞ ദിവസങ്ങളില്‍ ശക്തമായി പെയ്ത മഴയില്‍ മണ്‍ തിട്ടകള്‍ക്ക് മുകളില്‍ മണ്ണൊലിച്ച് പോയി വേരുകള്‍ തള്ളിനിന്ന മരങ്ങൾ റോഡിലേക്ക് പതിച്ചത്. ഇതോടെ നിരവധി വൈദ്യുത പോസ്റ്റുകളും ലൈനുകളും തകര്‍ന്നു. രണ്ട് ദിവസമായി കെഎസ്ഇബി ഉദ്യോഗസ്ഥര്‍ കിണഞ്ഞ് പരിശ്രമിച്ചിട്ടും ഇപ്പോഴും വൈദ്യുതി ബന്ധം പൂര്‍ണമായി പുനഃസ്ഥാപിക്കാന്‍ കഴിഞ്ഞിട്ടില്ല. പൊന്മുടിയില്‍ മാത്രമല്ല രാജാക്കാട് സെക്‌ഷന്‍റെ കീഴില്‍വരുന്ന വിവിധ പ്രദേശങ്ങളിൽ നിരവധി വൈദ്യുത പോസ്റ്റുകളും തകര്‍ന്നിട്ടുണ്ട്. കഴിഞ്ഞ കുറച്ച് ദിവസങ്ങളായി വിശ്രമമില്ലാതെ സമയവും കാലവും നോക്കാതെ വൈദ്യുതി ബന്ധം പുനഃസ്ഥാപിക്കാനുള്ള പരിശ്രമത്തിലാണ് കെഎസ്ഇബി ജീവനക്കാര്‍. പലയിടങ്ങളിലും ഇപ്പോഴും പൂര്‍ണമായി വൈദ്യുതി എത്തിക്കാന്‍ കഴിഞ്ഞിട്ടില്ല.

ലോക്കാട് ഗ്യാപ്പിലൂടെ യാത്രയ്ക്ക് നിരോധനം ഏർപ്പെടുത്തി

മൂന്നാർ: കൊച്ചി - ധനുഷ്കോടി ദേശീയ പാതയിൽ ലോക്കാട് ഗ്യാപ്പിലൂടെയുള്ള യാത്രയ്ക്ക് ജില്ലാ ഭരണകൂടം നിരോധനം ഏർപ്പെടുത്തി. കഴിഞ്ഞ ദിവസം പെയ്ത ശക്തമായ മഴയിൽ ചെറിയതോതിൽ മണ്ണിടിച്ചിൽ ഉണ്ടായതോടെയാണ് യാത്രാവിലക്ക് ഏർപ്പെടുത്തിയിട്ടുള്ളത്. കഴിഞ്ഞ മൂന്നു ദിവസങ്ങളായി രാത്രികാല യാത്രയ്ക്ക് ഇവിടെ അനുമതി ഇല്ലായിരുന്നു. ഇനിയൊരു അറിയിപ്പ് ഉണ്ടാകുന്നതുവരെയാണ് ഗതാഗതത്തിന് നിരോധനമുള്ളത്. തമിഴ്നാട്ടിൽനിന്ന് നിരവധി സഞ്ചാരികൾ മൂന്നാറിൽ എത്തുന്നത് കണക്കിലെടുത്തും മേഖലയിൽ ശക്തമായ മഴ തുടരുന്ന സാഹചര്യത്തിലുമാണ് നടപടി. കഴിഞ്ഞ ദിവസം പകൽ സമയത്ത് അല്പനേരം മഴ ശമിച്ചത് മൂന്നാറിനും തോട്ടം മേഖലയ്ക്കും ആശ്വാസമായി. വ്യാഴാഴ്ച മുതൽ വെള്ളിയാഴ്ച ഉച്ചവരെയുള്ള 24 മണിക്കൂറിനിടയ്ക്ക് 115.80 മില്ലീ മീറ്റർ മഴയാണ് പെയ്തത്. അതേ സമയം അടിയന്തര സാഹചര്യങ്ങളിൽ രക്ഷാപ്രവർത്തനങ്ങൾ ഏകോപിപ്പിക്കേണ്ട താലൂക്ക് ആസ്ഥാനമായ ദേവികുളത്ത് ഫോണ്‍ നെറ്റ് കണക്‌ഷനും വൈദ്യുതിയുമില്ലാതെ ഒരാഴ്ച പിന്നിടുകയാണ്. വൈദ്യുതി തകരാർ പരിഹരിക്കാനുള്ള ശ്രമങ്ങൾ നടന്നുവരികയാണെങ്കിലും പൂർണ തോതിൽ പുനഃസ്ഥാപിക്കാൻ കഴിഞ്ഞിട്ടില്ല. ഈ ഒരു സാഹചര്യത്തിൽ സർക്കാർ ഓഫീസുകളുടെ പ്രവർത്തനംപോലും മുന്നോട്ടു കൊണ്ടുപോകുവാൻ കഴിയാത്ത നിലയാണുള്ളത്. കനത്ത മഴയിലും കാറ്റിലും വൈദ്യുതി ബന്ധം താറുമായതോടെയാണ് ഒരാഴ്ചയായി പ്രദേശവാസികൾ വൈദ്യുതി ഇല്ലാതെ ബുദ്ധിമുട്ട് അനുഭവിക്കുന്നു. നെറ്റ് വർക്കും ഒരാഴ്ചയായി തകരാറിലാണ്. ഇതോടെ ആശയ വിനിമയവും നടത്താൻപറ്റാത്ത നിലയാണ്. വില്ലേജ് ഓഫീസറുടെ നേതൃത്വത്തിലാണ് താലൂക്കിലെ രക്ഷാപ്രവർത്തനങ്ങൾ കാലങ്ങളായി ഏകോപ്പിപ്പിക്കുന്നത്. ചെറിയ ഒരു മഴ പെയ്താലോ ശക്തമായ കാറ്റ് വീശിയാലോ വൈദ്യുതി ദിവസങ്ങളോളം മുടങ്ങുന്ന അവസ്ഥയിൽ പ്രശ്നത്തിൽ ഉചിതമായ നടപടികൾ സ്വീകരിക്കണമെന്നാണ് നാട്ടുകാർ ആവശ്യപ്പെട്ടുന്നത്.

ലിഫ്റ്റിൽ കുടുങ്ങി വ്യാപാരി മരിച്ച സംഭവം: ഇലക്‌ട്രിക്കൽ ഇൻസ്പെക്ടറേറ്റിന്‍റെ നേതൃത്വത്തിൽ പരിശോധന

കട്ടപ്പന: സ്വർണക്കടയുടമ ലിഫ്റ്റ് അപകടത്തിൽ മരിച്ച സംഭവത്തിൽ ഇലക്‌ട്രിക്കൽ ഇൻസ്പെക്ടറേറ്റ് അധികൃതർ സ്ഥലത്ത് പരിശോധന നടത്തി. ലിഫ്റ്റ് കമ്പനി ജീവനക്കാരുടെയും സ്ഥാപനത്തിൽ ഇതേ സമയത്ത് ലിഫ്റ്റ് പ്രവർത്തിപ്പിച്ചിരുന്നവരുടേയും മൊഴി ഇലക്‌ട്രിക്കൽ ഇൻസ്പെക്ടർ രേഖപ്പെടുത്തി. അപകടത്തിൽപ്പെട്ട ലിഫ്റ്റിലും കൺട്രോൾ യൂണിറ്റിലും സംഘം വിശദമായ പരിശോധന നടത്തി. വൈദ്യുതി മുടങ്ങിയ സമയത്ത് ഒന്നാം നിലയ്ക്കും തറ നിരപ്പിനും ഇടയിലാണ് ലിഫ്റ്റ് നിന്നത്. തുടർന്ന് സ്ഥാപനത്തിലെ ജീവനക്കാർ ലിഫ്റ്റ് ടെക്നീഷ്യനെ വീഡിയോ കോളിൽ ബന്ധപ്പെട്ട ശേഷം പ്രവർത്തിപ്പിക്കാൻ ശ്രമിച്ചപ്പോഴാണ് മുകൾ നിലയിൽ പോയി ഇടിച്ചുനിന്നത്. പരിചയമില്ലാത്തവർ പ്രവർത്തിപ്പിച്ചതാണ് അപകട കാരണമെന്നാണ് സംഘത്തിന്‍റെ വിലയിരുത്തൽ. ഒപ്പം, നിലച്ച ലിഫ്റ്റ് പ്രവർത്തിപ്പിക്കാൻ ശ്രമിച്ചതിലെ പിഴവാണെന്ന് ഇലക്‌ട്രിക്കൽ ഇൻസ്പെക്ടറേറ്റിന്‍റെ പ്രാഥമിക പരിശോധനയിൽ കണ്ടെത്തി. പവിത്ര ഗോൾഡ് മാനേജിംഗ് പാർട്ണർ സണ്ണി ഫ്രാൻസിസാണ് ബുധനാഴ്ച ഉച്ചയ്ക്ക് ലിഫ്റ്റ് അപകടത്തിൽ മരിച്ചത്. പുളിയൻമല റോഡിൽ പ്രവർത്തിക്കുന്ന പവിത്ര ഗോൾഡിലാണ് അപകടം നടന്നത്. സണ്ണി കയറിയ ലിഫ്റ്റ് വൈദ്യുതി നിലച്ചതിനെത്തുടർന്ന് ഓഫായി. പിന്നീട് സണ്ണി ഫോണിൽ ആവശ്യപ്പെട്ടതനുസരിച്ച് ജീവനക്കാർ ടെക്നീഷന്‍റെ നിർദേശ പ്രകാരം പ്രവർത്തിപ്പിക്കാൻ ശ്രമിക്കുന്നതിനിടെ നിയന്ത്രണമില്ലാതെ മുകളിലേക്ക് പോയി ഇടിക്കുകയുമായിരുന്നു. പിന്നീട് ലിഫ്റ്റ് തുറക്കാൻ കടയിലെ ജീവനക്കാർ ശ്രമിച്ചെങ്കിലും കഴിഞ്ഞില്ല. തുടർന്ന് കട്ടപ്പന അഗ്നിരക്ഷാ സേനയെത്തിയാണ് ലിഫ്റ്റ് തുറന്നത്. തലയിൽ ഗുരുതരമായും ശരീരത്തിന്‍റെ വിവിധ ഭാഗങ്ങളിലും പരിക്കേറ്റ നിലയിലായിരുന്നു അപ്പോൾ സണ്ണി. സ്പൈനൽ കോഡിനേറ്റ പരിക്കാണ് മരണകാരണമായതെന്നാണ് പോസ്റ്റ്മോർട്ടത്തിന് ശേഷം ലഭിച്ച പ്രാഥമിക വിവരം. തലയ്ക്കും സുഷുമ്നാ നാഡിക്കും ഏറ്റ ഗുരുതര പരിക്കാണ് മരണത്തിന് കാരണമായതെന്നാണ് വിവരം. ഇലക്‌ട്രിക്കൽ ഇൻസ്പെക്ടറേറ്റിനു പുറമെ ലിഫ്റ്റ് കമ്പനിയും അന്വേഷണം ആരംഭിച്ചിട്ടുണ്ട്. ഇലക്‌ട്രിക്കൽ ഇൻസ്പെക്ടറുടെ റിപ്പോർട്ട് അടുത്ത ദിവസം സർക്കാരിന് കൈമാറും. ലിഫ്റ്റ് നിർമിച്ച കമ്പനി പ്രതിനിധികളെയും ടെക്നീഷൻമാരെയും വിളിച്ചു വരുത്തിയാണ് പരിശോധന നടത്തിയത്. കട്ടപ്പന പോലീസും അസ്വാഭാവിക മരണത്തിന് കേസെടുത്ത് അന്വേഷണം നടത്തുന്നുണ്ട്.

കേസെടുത്ത് ജനങ്ങളെ ഭയപ്പെടുത്താമെന്ന് കരുതേണ്ട: കത്തോലിക്ക കോണ്‍ഗ്രസ്

കോതമംഗലം: കുടിയേറ്റ കർഷകരോട് സർക്കാരും രാഷ്‌ട്രീയ പാർട്ടികളും പുലർത്തുന്ന നിഷേധാത്മക നിലപാടുകൾക്കെതിരേ കത്തോലിക്ക കോണ്‍ഗ്രസ് കോതമംഗലം രൂപത സമിതി. 1977നു മുൻപ് കൈവശമുള്ള ഭൂമിക്ക് പട്ടയം നൽകണമെന്ന വ്യവസ്ഥ നടപ്പാക്കാൻ തയാറാകാത്ത അധികൃതരുടെ നടപടി ന്യായീകരിക്കാനാവാത്തതാണ്. വനം-റവന്യു വകുപ്പുകളുടെ നേതൃത്വത്തിൽ ജോയിന്‍റ് വെരിഫിക്കേഷൻ നടത്തി പട്ടയ നടപടികൾ ത്വരിതപ്പെടുത്താൻ നടപടി സ്വീകരിക്കുന്നതിനു പകരം കർഷകരെ കുടിയിറക്കാൻ നടത്തുന്ന നീക്കം അനുവദിക്കാനാവില്ല. കൈവശ ഭൂമിക്ക് യഥാസമയം പട്ടയം നൽകിയിരുന്നെങ്കിൽ നാരങ്ങാനം ഉൾപ്പെടെയുള്ള സ്ഥലങ്ങളിലെ വിവാദങ്ങൾ ഉണ്ടാകുമായിരുന്നില്ല. പൊതുജനത്തെ വിഡ്ഢികളാക്കുന്ന നിലപാടുകളും നടപടികളുമാണ് പലരുടെയും ഭാഗത്തുനിന്ന് ഉണ്ടാകുന്നത്. നാരങ്ങാനത്തെ കുരിശു പൊളിച്ച വനം വകുപ്പുകാർ ദുഃഖവെള്ളിയാഴ്ച അവിടെ പൊതുനിരത്തിലൂടെ കുരിശിന്‍റെ വഴി നടത്തിയ വൈദികർക്കും ജനപ്രതിനിധികൾക്കും നാട്ടുകാർക്കും എതിരെകേസെടുത്ത് നോട്ടീസ് അയയ്ക്കുന്നത് അടിയന്തരമായി നിർത്തിവയ്ക്കണം. സമാധാനകാംക്ഷികളായ ജനത്തിനുമേൽ കുതിരകയറിയാൽ തക്ക തിരിച്ചടി നൽകുമെന്ന് കത്തോലിക്ക കോണ്‍ഗ്രസ് മുന്നറിയിപ്പ് നൽകി. സാധാരണക്കാരെ കബളിപ്പിക്കാനുള്ള തന്ത്രമാണ് പലരുടെയും സമരങ്ങളും പ്രതികരണങ്ങളും എന്നു വ്യക്തമാണ്. മുഖ്യമന്ത്രിയും ബന്ധപ്പെട്ട ജനപ്രതിനിധികളും ശക്തമായ ഭാഷയിൽ പ്രതികരിച്ചിട്ടും തുടർച്ചയായി കർഷക ദ്രോഹ നടപടികൾ നിർബാധം നടത്തുന്നതും കേസെടുക്കുന്നതും എന്തിനുവേണ്ടിയാണെന്ന് തിരിച്ചറിയാനുള്ള ശേഷി ജനങ്ങൾക്കുണ്ട്. ഈ നെറികേട് തുടരുന്നത് എന്തുകൊണ്ടാണെന്ന് സർക്കാർ വ്യക്തമാക്കണം. ഒരു വശത്ത് കർഷക പ്രേമം നടിക്കുകയും മറുവശത്ത് കർഷകരെ വേട്ടയാടുകയും ചെയ്യുന്ന മനോഭാവം അംഗീകരിക്കാനാവില്ല.വിശ്വാസികളുടെ സംയമനം ബലഹീനതയായി കാണരുതെന്നും കത്തോലിക്കാ കോണ്‍ഗ്രസ് മുന്നറിയിപ്പ് നൽകി. രൂപത പ്രസിഡന്‍റ് സണ്ണി കടൂത്താഴെ അധ്യക്ഷത വഹിച്ചു. രൂപത ഡയറക്ടർ റവ. ഡോ. മാനുവൽ പിച്ചളക്കാട്ട്, രൂപത ജനറൽ സെക്രട്ടറി മത്തച്ചൻ കളപ്പുരയ്ക്കൽ, ട്രഷറർ തന്പി പിട്ടാപ്പിള്ളിൽ, സി.എ. തോമസ്, അഡ്വ. യു.വി. ചാക്കോ, ബിന്ദു ജോസ്, മേരി ആന്‍റണി, ഷൈജു ഇഞ്ചയ്ക്കൽ, ജിജി പുളിക്കൽ, ആന്‍റണി പുല്ലൻ, ജോർജ് മങ്ങാട്ട്, അബി കാഞ്ഞിരപ്പാറ, ജോണ്‍ മുണ്ടൻകാവിൽ, ജോയ്സ് മേരി ആന്‍റണി, ബേബിച്ചൻ നിധീരിക്കൽ, ബെന്നി തോമസ്, ജോർജ് കുര്യാക്കോസ്, ജിനു ആന്‍റണി, ജോണി ജേക്കബ്, കെ.എം. ജോസഫ്, ഇ.ആർ. പൈലി, വി.ജെ. റോജോ, സനിൽ പി. ജോസ്, അമിത ജോണി, ജോസ് കുര്യൻ, റോയ് മാത്യു, അഞ്ജു ജോസ് എന്നിവർ പ്രസംഗിച്ചു.

കുരിശ് തകർക്കലും കർഷക പീഡനവും: മുഖ്യമന്ത്രിക്ക് ഭീമഹർജിയുമായി ജനങ്ങൾ

തൊടുപുഴ: തൊമ്മൻകുത്ത് നാരങ്ങാനത്തെ കൈവശഭൂമിയിൽ സ്ഥാപിച്ച കുരിശ് തകർക്കുകയും കള്ളക്കേസ് എടുക്കുകയും ചെയ്ത വനംവകുപ്പ് നടപടിക്കെതിരേ 1750-ഓളം പേർ ഒപ്പിട്ട ഭീമഹർജി മുഖ്യമന്ത്രി പിണറായി വിജയന് അയച്ചുനൽകി. തൊമ്മൻകുത്ത് നിവാസികളാണ് ഭീമഹർജിയിൽ ഒപ്പിട്ടിരിക്കുന്നത്. കർഷകരെ പീഡിപ്പിക്കുന്ന വനംവകുപ്പ് ഉദ്യോഗസ്ഥർക്കെതിരേ അടിയന്തരമായി നടപടിയെടുക്കണമെന്നും ഹർജിയിൽ ചൂണ്ടിക്കാട്ടിയിട്ടുണ്ട്. അതേ സമയം കൈവശഭൂമിയിൽ കുരിശ് സ്ഥാപിച്ച സംഭവത്തിലും കുരിശ് തകർത്ത സ്ഥലത്തേക്ക് ദുഃഖവെള്ളിയാഴ്ച കുരിശിന്‍റെ വഴി നടത്തിയ സംഭവത്തിലും വൈദികർ ഉൾപ്പെടെയുള്ളവർക്കെതിരേ വനംവകുപ്പ് കേസെടുത്ത സംഭവത്തിൽ പ്രതിഷേധം ശക്തമാകുകയാണ്. കോതമംഗലം രൂപത വികാരി ജനറാൾ മോണ്‍. വിൻസെന്‍റ് നെടുങ്ങാട്ട്, ചാൻസലർ ഫാ. ജോസ് കുളത്തൂർ, തൊമ്മൻകുത്ത് പള്ളിവികാരി ഫാ. ജയിംസ് ഐക്കരമറ്റം എന്നിവരടക്കമുള്ളവർക്കെതിരേയാണ് വനംവകുപ്പ് കേസെടുത്തത്. വൈദികരടക്കമുള്ളവർക്കെതിരേ കേസെടുത്ത സംഭവത്തിൽ പ്രതിഷേധം ശക്തമാക്കാൻ ഒരുങ്ങുകയാണ് കോതമംഗലം രൂപത. പലവട്ടം ഡിഎഫ്ഒ അടക്കമുള്ളവരുമായി സമവായ ചർച്ച നടത്തുകയും പ്രശ്നങ്ങൾ ഉണ്ടാകില്ലെന്ന് ഉറപ്പുനൽകിയിട്ടും വീണ്ടും കേസെടുക്കുകയാണുണ്ടായത്. വനംവകുപ്പധികൃതരുടെ ഗൂഢാലോചനയും രഹസ്യ അജണ്ട നടപ്പാക്കാനുള്ള നീക്കവുമാണ് ഇതിനു പിന്നിലെന്നാണ് ആക്ഷേപം ഉയരുന്നത്. നേരത്തെ കേരള കോണ്‍ഗ്രസ്-എം ചെയർമാൻ ജോസ് കെ. മാണി എംപി സ്ഥലം സന്ദർശിച്ച് മടങ്ങിയതിന്‍റെ പിറ്റേന്ന് ഇവിടുത്തെ പ്രാർഥനാപീഠം എറിഞ്ഞുടച്ചതും രഹസ്യ നീക്കത്തിന്‍റെ ഭാഗമായാണെന്ന് അന്ന് ആക്ഷേപം ഉയർന്നിരുന്നു. മുഖ്യമന്ത്രിക്കു ലഭിച്ച പരാതി സംബന്ധിച്ചുള്ള അന്വേഷണത്തിന്‍റെ ഭാഗമായി തൊടുപുഴ തഹസിൽദാർ നാരങ്ങാനത്തെ കുരിശ് പിഴുതസ്ഥലം നേരിട്ട് സന്ദർശിക്കുകയും ഇവിടം കൈവശഭൂമിയാണെന്ന് ഡെപ്യൂട്ടികളക്ടർ കെ.എം. ജോസുകുട്ടി മുന്പാകെ ഹിയറിംഗിനിടെ റിപ്പോർട്ട് നൽകുകയും ചെയ്തിരുന്നു. എന്നാൽ ഈ സ്ഥലം വനഭൂമിയാണെന്ന നിലപാടിലായിരുന്നു വനംവകുപ്പ്. ഇതേത്തുടർന്നു തർക്ക സ്ഥലത്ത് സംയുക്തപരിശോധന നടത്താൻ തീരുമാനിച്ചിരിക്കുകയാണ്. ഇതിനു പിന്നാലെയാണ് കേസുമായി വനംവകുപ്പ് രംഗത്തെത്തിയിരിക്കുന്നത്. ഈ നില തുടർന്നാൽ കൈയും കെട്ടി നോക്കിനിൽക്കാനാകില്ലെന്നും സമാനകർഷക സംഘടനകളുമായി ചേർന്ന് പ്രതിഷേധ സമരം സംസ്ഥാനതലത്തിലേക്ക് വ്യാപിപ്പിക്കാനാണ് തൊമ്മൻകുത്ത് ജാഗ്രതാസമിതി തീരുമാനിച്ചിരിക്കുന്നത്.

മലനാട് ക്ഷീരശ്രീ സ്വര്‍ണ്‍ പതക് പുരസ്‌കാരം റീജ ബിന്‍സിന്

പാറത്തോട്: മലനാട് മില്‍ക്ക് പ്രൊഡ്യൂസേഴ്‌സ് സൊസൈറ്റിയുടെ ഒരു ലക്ഷം രൂപ സമ്മാനത്തുക ലഭിക്കുന്ന ഫാ. മാത്യു വടക്കേമുറി മെമ്മോറിയല്‍ മലനാട് ക്ഷീരശ്രീ സ്വര്‍ണ്‍ പതക് പുരസ്‌കാര്‍ കൊച്ചറ കണയങ്കല്‍ റീജ ബിന്‍സിന്. 21 പശുക്കളും 10 കന്നുകുട്ടികളും ഉള്‍പ്പെടെ 31 കന്നുകാലികളെ വളര്‍ത്തുന്ന റീജ കഴിഞ്ഞ വര്‍ഷം 88,197 കിലോ പാല്‍ മലനാട് മില്‍ക്കിനു നല്‍കി. ഭര്‍ത്താവ് ബിന്‍സ് ഇമ്മാനുവേല്‍ കണയങ്കലും മക്കളായ ജെറിന്‍, മെറിന്‍, എറിന്‍ എന്നിവരും റീജയോട് ഒപ്പംനിന്നു കരുത്തു പകരുന്നു. 75,000 രൂപ സമ്മാനത്തുകയുള്ള മലനാട് ക്ഷീരശ്രീ രജത് പതക് പുരസ്‌കാറിന് അര്‍ഹനായത് കടുക്കാസിറ്റി ചരട്ടവയലില്‍ ബാബു ജോസഫാണ്. 16 പശുക്കളും മൂന്ന് കന്നുകുട്ടികളും ഉള്‍പ്പെടെ 19 കന്നുകാലികളെ വളര്‍ത്തുന്ന ബാബു ജോസഫ് കഴിഞ്ഞവര്‍ഷം 51,298 കിലോ പാല്‍ മലനാട് മില്‍ക്കിനു നല്‍കി. ഭാര്യ: മോളമ്മ. മക്കള്‍- മിന്‍റു, മിലന്‍. 50,000 രൂപ സമ്മാനത്തുകയുള്ള മലനാട് ക്ഷീരശ്രീ കാന്‍സി പതക് പുരസ്‌കാര്‍ നെറ്റിത്തൊഴു വയലാറ്റുപുത്തന്‍പുരയ്ക്കല്‍ റെജി കുര്യനാണ് ലഭിച്ചത്. 16 പശുക്കളും മൂന്നു കന്നുകുട്ടികളും ഉള്‍പ്പെടെ 19 കന്നുകാലികളെ വളര്‍ത്തുന്ന ഇദ്ദേഹം 70,423 കിലോ പാല്‍ മലനാട് മില്‍ക്കില്‍ അളന്നു. ഡെസിയാണ് ഭാര്യ. മക്കള്‍ - എബിന്‍ മരിയ, ലിബിന മരിയ. മലനാട് ക്ഷീരശ്രീ നക്ഷത്ര പതക് ജേതാക്കളായ 10 പേര്‍ക്ക് 25,000 രൂപ വീതം സമ്മാനമായി ലഭിച്ചു. ബേബി സെബാസ്റ്റ്യന്‍ ഗണപതിപ്ലാക്കല്‍ (മുരിക്കടി), സി.സി. കുര്യന്‍ ചാത്തന്‍പാറ (ചെല്ലാര്‍കോവില്‍), വര്‍ഗീസ് കെ.ജെ. കൂവക്കുന്നേല്‍ (വെസ്റ്റ് പാറ), ലാലിച്ചന്‍ കുര്യാക്കോസ് പെരിയോട്ട് (റോസ് നഗര്‍), റിറ്റു സിബി തകടിയേല്‍ (പത്തുവളവ്), ജൂലിയറ്റ് ജോസഫ് പാണ്ടിയപ്പള്ളില്‍ (ചെങ്ങളം), സഹദേവന്‍ ഗുരുകൃപ (കൊച്ചറ), സുനില്‍കുമാര്‍ പൂവത്തുംമൂട്ടില്‍ (വെള്ളയാംകുടി), അനിതാ മഹേഷ് പാലക്കാട്ടുതെക്കേതില്‍ (സ്‌നേഹഗിരി), വര്‍ഗീസ് ചാക്കോ പൊന്‍പുഴ (അണക്കര) എന്നിവരാണ് അവാര്‍ഡിന് അര്‍ഹരായത്. അവാര്‍ഡുകള്‍ മലനാട് മില്‍ക്ക് പ്രൊഡ്യൂസേഴ്‌സ് സൊസൈറ്റിയുടെ വാര്‍ഷിക പൊതുയോഗത്തില്‍ വിതരണം ചെയ്തു. ഫാ. മാത്യു വടക്കേമുറി മെമ്മോറിയല്‍ മലനാട് മില്‍ക്ക് വിദ്യാശ്രീ പുരസ്‌കാറിന് അര്‍ഹയായ പ്ലസ്ടു പരീക്ഷയില്‍ ഏറ്റവും കൂടുതല്‍ മാര്‍ക്കു നേടിയ കുട്ടിക്ക് 25,000 രൂപയും പത്താം ക്ലാസ് പരീക്ഷയില്‍ എല്ലാ വിഷയങ്ങള്‍ക്കും എ പ്ലസ് നേടിയ ഒമ്പതു പേര്‍ക്ക് 10,000 രൂപ വീതവും കാഷ് അവാര്‍ഡ് നല്‍കി. മികച്ച സംഘങ്ങള്‍ക്കുള്ള എവറോളിംഗ് ട്രോഫിയും ക്ഷീര കര്‍ഷകര്‍ക്കുള്ള വേനല്‍ക്കാല ഇന്‍സെന്‍റീവും യോഗത്തില്‍ വിതരണം ചെയ്തു.

ജില്ലയിൽ 35 കോടിയുടെ വികസന പദ്ധതി നടപ്പാക്കും

തൊടുപുഴ: നവകേരള സദസിൽ ലഭിച്ച നിർദേശങ്ങളുടെ അടിസ്ഥാനത്തിൽ ജില്ലയിൽ നടപ്പാക്കുന്ന വികസന പദ്ധതികൾക്കായി 35 കോടി അനുവദിച്ചു. അഞ്ചു നിയമസഭാ മണ്ഡലങ്ങൾക്കും ഏഴ് കോടി വീതമാണ് അനുവദിച്ചിരിക്കുന്നത്. 28 വികസന പദ്ധതികളാണ് നടപ്പാക്കുന്നത്. റോഡ് വികസനത്തിനാണ് മുൻഗണന നൽകിയിട്ടുള്ളത്. 35 കോടിയിൽ 28.5 കോടിയാണ് റോഡ് നിർമാണത്തിന് അനുവദിച്ചിരിക്കുന്നത്. നെടുങ്കണ്ടം, തൊടുപുഴ ഫയർ ആൻഡ് റസ്ക്യു സ്റ്റേഷൻ മന്ദിര നിർമാണത്തിന് 6.5 കോടി വിനിയോഗിക്കും. ദേവികുളം നിയോജക മണ്ഡലത്തിൽ പതിനെട്ടാം മൈൽ - ചിറ്റുവര സൗത്ത്, കുണ്ടള എസ്പി പുരം - പോസ്റ്റ് ഓഫീസ് റോഡ്, കുറ്റിയാർ വാലി , തെൻമല ന്യൂഡിവിഷൻ, സോത്തുപാറ - ഗുണ്ടുമല , മൂന്നാർ- നടയാർ- കുറുമല, 200 ഏക്കർ - മെഴുകുംചാൽ, അന്പഴച്ചാൽ - കാണ്ടിയാംപാറ, കന്നിമല-ലോവർ ടോപ്പ് ഡിവിഷൻ, ലക്ഷ്മി ഈസ്റ്റ്- മാനില ഒഡികെ, ലാക്കാട് - ദേവികുളം ലോവർ, കോവിൽക്കടവ്- ചെറുവാട് മിഷൻ വയൽ - ആനക്കാംപെട്ടി എന്നീ റോഡുകളുടെ വികസന പ്രവർത്തനമാണ് നടപ്പാക്കുന്നത്. ഉടുന്പൻചോലയിൽ നെടുങ്കണ്ടം ഫയർ ആൻഡ് റസ്ക്യു സ്റ്റേഷനു പുറമേ ചെല്ലാർകോവിൽ - നെറ്റിത്തൊഴു, നടുമറ്റം മുണ്ടപ്ലാക്കൽ പടി - എൻആർ സിറ്റി, കാരിത്തോട് -ആട്ടുപാറകരിമല റോഡുകളുടെ നിർമാണ പ്രവർത്തനം നടത്തും. തൊടുപുഴ മണ്ഡലത്തിൽ തൊടുപുഴ ഫയർ സ്റ്റേഷൻ നിർമാണവും മുതലക്കോടം - പഴുക്കാക്കുളം റോഡ്, കാരിക്കോട് - കുന്നം റോഡ് നിർമാണം എന്നിവ നടപ്പാക്കും. ഇടുക്കി മണ്ഡലത്തിൽ നത്തുകല്ല് -വെളളയാംകുടി - സുവർണഗിരി - കക്കാട്ടുകട റോഡിൽ വെള്ളയാംകുടി മുതൽ കക്കാട്ടുകട വരെ ആറു കോടി ഉപയോഗിച്ച് ടാറിംഗും ഒരുകോടി വിനിയോഗിച്ച് കട്ടപ്പന നേതാജി ബൈപാസ് റോഡ് നിർമാണവും നടക്കും. പീരുമേട്ടിൽ ആനചാരി അഴങ്ങാട്, ഡൈമുക്ക് ആനക്കുഴി, ചപ്പാത്ത് - ചെങ്കര റോഡിലെ ശാന്തിപ്പാലം മുതൽ കൊളുന്തുപുര വരെ, പഴയ പാന്പനാർ - ലാഡ്രം - കൊടുവാക്കരണം, വെള്ളാരംകുന്ന് ആനക്കുഴി, ഒട്ടകത്തലമേട് - മേനോൻമേട് -മാങ്കവല, വാളാർഡി - മേപ്പുരട്ട് എന്നീ റോഡുകളുടെ നിർമാണവും നടത്തും.

മഴക്കെടുതി: ജില്ലയിൽ 130 വീടുകൾക്ക് നാശനഷ്ടം

ഇടുക്കി: ജില്ലയിൽ മഴക്കെടുതികളിൽ ഇതുവരെ നഷ്ടപ്പെട്ടത് മൂന്നു പേരുടെ ജീവൻ. മരം ഒടിഞ്ഞു വീണ് രണ്ട് തോട്ടം തൊഴിലാളി സ്ത്രീകളും മരം ലോറിക്കുമേൽ വീണ് യുവാവുമാണ് മരിച്ചത്. മൂന്ന് പേർക്ക് പരിക്കേറ്റു. ജില്ലയിൽ കഴിഞ്ഞ ഒരാഴ്ചയായി പെയ്ത കനത്ത മഴയിൽ 130 വീടുകൾക്ക് നാശനഷ്ടമുണ്ടായി. 121 വീടുകൾ ഭാഗികമായും ഒൻപത് വീടുകൾ പൂർണമായും തകർന്നു. ഇതിനിടെ കഴിഞ്ഞ ദിവസങ്ങളിൽ പെയ്ത കനത്ത മഴയ്ക്ക് നേരിയ ശമനമുണ്ടായിട്ടുണ്ട്. ഇന്നലെ ഉച്ചയോടെയാണ് മഴയുടെ ശക്തി കുറഞ്ഞത്. കഴിഞ്ഞ ദിവസങ്ങളിൽ പെയ്ത കനത്ത മഴയെത്തുടർന്ന് ജില്ലയിൽ 14 ദുരിതാശ്വാസ ക്യാന്പുകൾ തുറന്നു. ഇടുക്കി -ഏഴ്, ദേവികുളം -അഞ്ച്, ഉടുന്പൻചോല- രണ്ട് എന്നിങ്ങനെയാണ് ഓരോ താലൂക്കുകളിലും ക്യാന്പ് തുറന്നത്. ഇടുക്കി താലൂക്കിലെ ഏഴു ക്യാന്പുകളിൽ 45 കുടുംബങ്ങളിലായി 138 പേരാണ് കഴിയുന്നത്. ദേവികുളം താലൂക്കിലെ അഞ്ച് ദുരിതാശ്വാസ ക്യാന്പുകളിൽ 27 കുടുംബങ്ങളിലെ 83 പേരും മറയൂർ ഗവ. എൽപി സ്കൂളിൽ ആരംഭിച്ച ക്യാന്പിൽ 11 കുടുംബങ്ങളിലെ 26 അംഗങ്ങളുമാണുള്ളത്. ഉടുന്പൻചോല താലൂക്കിൽ രണ്ട് ദുരിതാശ്വാസ ക്യാന്പുകളിൽ മൂന്ന് കുടുംബങ്ങളിലെ 10 അംഗങ്ങളുണ്ട്. ഇടുക്കി താലൂക്കിൽ 45 വീടുകളാണ് തകർന്നത്. ഇതിൽ 43 വീടുകൾ ഭാഗികമായും രണ്ട് വീടുകൾ പൂർണമായും തകർന്നു. തൊടുപുഴ താലൂക്കിൽ 24 വീടുകൾ ഭാഗികമായും നാലു വീടുകൾ പൂർണമായും തകർന്നു. ദേവികുളം താലൂക്കിൽ 24 വീടുകൾ ഭാഗികമായും രണ്ട് വീടുകൾ പൂർണമായും നശിച്ചു. ഉടുന്പൻചോല താലൂക്കിൽ 23 വീടുകൾക്ക് നാശനഷ്ടമുണ്ടായതിൽ ഒരു വീട് പൂർണമായും തകർന്നു. പീരുമേട് താലൂക്കിൽ എട്ട് വീടുകൾക്ക് ഭാഗികമായി നാശനഷ്ടമുണ്ടായി. കനത്ത മഴയിൽ ജില്ലയിൽ ഇതു വരെ 5.48 കോടി രൂപയുടെ കൃഷിനാശമാണ് ഉണ്ടായതായാണ് പ്രാഥമിക കണക്കുകൾ. 350.8 ഹെക്ടറിലായി 3218 കർഷകരുടെ കാർഷിക വിളകൾ നശിച്ചു. 89.74 മില്ലി മീറ്റർ മഴയാണ് ജില്ലയിൽ കഴിഞ്ഞ 24 മണിക്കൂറിനുള്ളിൽ പെയ്തത്. ഇന്നലെ ഉച്ചയ്ക്ക് 12 വരെയുള്ള കണക്കു പ്രകാരം ഉടുന്പൻചോല -36, ദേവികുളം - 114.2, പീരുമേട്- 135.9, ഇടുക്കി - 78.2 തൊടുപുഴ - 84.4 മില്ലിമീറ്റർ മഴയാണ് ഓരോ താലൂക്കുകളിലും പെയ്തത്. ഇടുക്കി ഡാമിൽ 2342 അടിയും മുല്ലപ്പെരിയാറിൽ 128.4 അടിയുമാണ് ജലനിരപ്പ്. ഒറ്റപ്പെട്ട ശക്തമായ മഴയ്ക്ക് സാധ്യതയുള്ളതിനാൽ ജില്ലയിൽ ഇന്ന് കേന്ദ്ര കാലാവസ്ഥാ വകുപ്പ് യെല്ലോ അലർട്ട് പ്രഖ്യാപിച്ചിട്ടുണ്ട്. മഴ തുടരുന്ന സാഹചര്യത്തിൽ മണ്ണിടിച്ചിലും ഉരുൾപൊട്ടലും ഉണ്ടാകാൻ സാധ്യതയുള്ളതിനാൽ ജനങ്ങൾ അതീവ ജാഗ്രത പാലിക്കണമെന്ന് ജില്ലാ ഭരണകൂടം അറിയിച്ചു. വിനോദസഞ്ചാര നിയന്ത്രണം: നിരോധനം ലംഘിച്ചാൽ കർശന നടപടി ഇടുക്കി: ജില്ലയിൽ മഴ ശക്തിപ്പെടുന്ന സാഹചര്യത്തിൽ വിനോദസഞ്ചാരത്തിന് പൂർണ നിരോധനം ഏർപ്പെടുത്തിയ ഉത്തരവ് ലംഘിക്കുന്നവർക്കെതിരേ കർശന നടപടി സ്വീകരിക്കുമെന്ന് ജില്ലാ കളക്ടർ അറിയിച്ചു. ഉത്തരവിന് വിരുദ്ധമായി നടത്തുന്ന ജീപ്പ് സവാരിയും ട്രക്കിംഗും ഉൾപ്പടെയുള്ള എല്ലാവിധ വിനോദസഞ്ചാര പ്രവർത്തനങ്ങളും കർശനമായി തടയും. വീഴ്ചവരുത്തുന്ന വാഹനം, സ്ഥാപനം എന്നിവ പിടിച്ചെടുക്കും. വാഹനയുടമ, ഡ്രൈവർ, സ്ഥാപനയുടമ എന്നിവർക്കെതിരേ ദുരന്തനിവാരണ നിയമ പ്രകാരം കർശന നടപടി സ്വീകരിക്കും. വിനോദസഞ്ചാര പ്രവർത്തനങ്ങൾ നിരോധിച്ചിട്ടും ജില്ലയിലെ ചില പ്രദേശങ്ങളിൽ ഉത്തരവ് ലംഘിച്ച് വിനോദ സഞ്ചാരികളെയും വഹിച്ചുള്ള ജീപ്പ് സവാരിയും ട്രക്കിംഗും നടത്തുന്നത് ശ്രദ്ധയിൽപ്പെട്ടതിനെത്തുടർന്നാണ് ഉത്തരവ്. മഴക്കാലത്ത് ജീവന് സുരക്ഷയില്ലാതെ തോട്ടം തൊഴിലാളികൾ തൊടുപുഴ: കാലവർഷസമയത്ത് ജീവന് സുരക്ഷയില്ലാതെ തോട്ടം മേഖലയിൽ ജോലിയെടുക്കുന്ന തൊഴിലാളികൾ. മരങ്ങൾ കടപുഴകിയും ഒടിഞ്ഞും വീണ് സ്ത്രീ തൊഴിലാളികൾ ഉൾപ്പെടെ ഓരോ വർഷവും ഒട്ടേറെ പേർക്ക് ജീവൻ നഷ്ടമാകുന്പോഴും ഇവരുടെ സുരക്ഷ ഉറപ്പാക്കുന്ന കാര്യത്തിൽ അധികൃതർ കാര്യമായ നടപടി സ്വീകരിക്കുന്നില്ല. അതി ശക്തമായ മഴക്കാലത്തും ജോലിയെടുക്കാൻ നിർബന്ധിതമാകുന്നതോടെയാണ് പലപ്പോഴും ഇവർ അപകടത്തിൽപ്പെടുന്നത്. ജില്ലയിൽ കഴിഞ്ഞ ദിവസങ്ങളിൽ മരം വീണുണ്ടായ അപകടങ്ങളിൽ രണ്ട് സ്ത്രീ തൊഴിലാളികൾ മരിച്ചിരുന്നു. പാന്പാടുംപാറയിൽ സ്വകാര്യ എസ്റ്റേറ്റിൽ ജോലിക്കാരിയായ മാലതി, വണ്ടൻമേട് വാഴവീട്ടിൽ ഏലത്തോട്ടത്തിൽ ജോലി ചെയ്യുന്നതിനിടെ അണക്കര കടശിക്കടവ് സ്വദേശിയായ എലിസബത്ത് എന്നിവരാണ് മരക്കൊന്പ് വീണ് മരിച്ചത്. മഴക്കാലത്ത് അപകട സാധ്യതയുണ്ടെങ്കിൽപ്പോലും തോട്ടമുടമകൾ ഇവരെ ജോലിക്കിറക്കുന്ന സ്ഥിതിയുമുണ്ട്. മഴക്കാലത്ത് അപകടങ്ങൾ പതിവായതോടെ തോട്ടം മേഖലയിൽ ജോലി ചെയ്യുന്നവർക്ക് സുരക്ഷ ഉറപ്പാക്കാനായി നൂതന പദ്ധതികൾ ആരംഭിക്കണമെന്ന ആവശ്യവും ഇതുവരെ പരിഗണിക്കപ്പെട്ടിട്ടില്ല. ജില്ലയിലെ ഏലം, തേയില തുടങ്ങിയ തോട്ടം മേഖലകളിൽ ലക്ഷക്കണക്കിനു തൊഴിലാളികളാണ് ജോലി ചെയ്യുന്നത്. കേരളം, തമിഴ്നാട് എന്നിവിടങ്ങളിൽനിന്നുള്ളവർക്കു പുറമേ ഉത്തരേന്ത്യൻ സംസ്ഥാനങ്ങളിൽനിന്നുള്ള ഒട്ടേറെ തൊഴിലാളികൾ ഇവിടെ ജോലി ചെയ്യന്നുണ്ട്. പലപ്പോഴും ജീവൻ പണയംവച്ചാണ് ഇവർ ഏലക്കാടുകളിലും മറ്റും പണിയെടുക്കുന്നത്. ശക്തമായ മഴയുള്ള സമയത്ത് തൊഴിലാളികളെ തോട്ടംമേഖലകളിൽ ജോലിക്കിറക്കരുതെന്ന ജില്ലാ ഭരണകൂടത്തിന്‍റെ നിർദേശംപോലും മറികടന്നാണ് ഇവരെ ജോലി ചെയ്യാൻ നിർബന്ധിതരാക്കുന്നത്. കാറ്റത്തും മഴയത്തും മരം കടപുഴകി വീണ് ഉണ്ടാവുന്ന അപകടങ്ങളിൽ ജീവൻ നഷ്ടപ്പെടുകയും ജോലി ചെയ്യാൻ സാധിക്കാത്തവിധം പരിക്കേൽക്കുകയും ചെയ്യുന്നവർ അനവധിയാണ്. ദിവസക്കൂലിക്കാണ് കൂടുതൽ സ്ത്രീ തൊഴിലാളികളും തോട്ടം മേഖലകളിൽ പണിയെടുക്കുന്നത്. ഒരു ദിവസം ജോലി നഷ്ടപ്പെട്ടാൽപോലും കുടുംബ ബജറ്റ് താളം തെറ്റും. ഇതോടെയാണ് പലരും പ്രതികൂല കാലാവസ്ഥയിലും ജോലി ചെയ്യുന്നത്. ഇത്തരത്തിൽ ജോലി ചെയ്യുന്ന കുടുംബത്തിന്‍റെ ഏക അത്താണിയാണ് അപകടങ്ങളിൽ നഷ്ടമാകുന്നത്. എന്നാൽ ഇൻഷ്വറൻസ് അടക്കമുള്ള യാതൊരു പരിരക്ഷയും ഇവർക്ക് ഇല്ലാത്തതിനാൽ കുടുംബം മുഴുപ്പട്ടിണിയിലേക്ക് പോകുന്ന സാഹചര്യമാണുള്ളത്. കുട്ടികളുടെ വിദ്യാഭ്യാസംവരെ പാതിവഴിയിൽ മുടങ്ങും. അപകടം നടക്കുന്പോൾ സർക്കാർ പ്രഖ്യാപിക്കുന്ന തുച്ഛമായ തുകമാത്രമാണ് ഇവർക്ക് ലഭിക്കാറുള്ളത്. പരിക്കേൽക്കുന്നവർക്ക് ഇതും ലഭ്യമാകാറില്ല. മതിയായ രേഖകളില്ലാതെ തോട്ടം മേഖലയിൽ ജോലി ചെയ്യുന്ന ഒട്ടേറെ ഇതരസംസ്ഥാന തൊഴിലാളികളുമുണ്ട്. അപകടങ്ങളിൽ ഇവർക്ക് എന്തെങ്കിലും സംഭവിച്ചാൽ ഒരു സഹായവും ലഭിക്കാറില്ല. തൊഴിൽ സുരക്ഷ ഉറപ്പാക്കാൻ വിവിധ തൊഴിലാളി സംഘടനകൾ സമരങ്ങൾ നടത്താറുണ്ടെങ്കിലും തൊഴിലാളികളുടെ ജീവന് സംരക്ഷണം ഉറപ്പുവരുത്താൻ ഇവരും ശ്രമിക്കാറില്ലെന്നതാണ് വസ്തുത. ഏലത്തോട്ടങ്ങളിൽ അപകടകരമായി നിൽക്കുന്ന മരങ്ങൾ വെട്ടിമാറ്റുകയും കനത്ത മഴയുള്ള ദിവസങ്ങളിൽ ജോലി ഒഴിവാക്കുകയും ചെയ്യണം. ഈ ദിവസങ്ങളിൽ തൊഴിലാളി കുടുംബങ്ങൾക്ക് സാന്പത്തിക സഹായം ലഭ്യമാക്കുകയും സൗജന്യമായി ഭക്ഷ്യവസ്തുക്കൾ എത്തിച്ചുകൊടുക്കുകയും വേണമെന്നും ആവശ്യമുയരുന്നുണ്ട്.

മഴക്കെടുതി; ജില്ലയിൽ 4.35 കോടിയുടെ കൃഷിനാശം

ഇടുക്കി: കനത്ത കാറ്റിലും മഴയിലും ജില്ലയിൽ 4.35 കോടി രൂപയുടെ കൃഷിനാശം. 285.13 ഹെക്ടർ സ്ഥലത്തെ വിവിധ കാർഷിക വിളകൾ നശിച്ചു. 2520 കർഷകരുടെ കൃഷിയാണ് നശിച്ചത്. മേയ് 15 മുതൽ 28 വരെയുള്ള കാലയളവിലെ പ്രാഥമിക കണക്കാണിതെന്ന് പ്രിൻസിപ്പൽ കൃഷി ഓഫീസർ അറിയിച്ചു. വാഴ, ഏലം, കുരുമുളക്, റബർ, കൊക്കോ എന്നിവയാണ് കൂടുതലായും നശിച്ചത്. 72.87 ഹെക്ടറിലെ 33613 കുലച്ച വാഴകളാണ് നശിച്ചത്. 658 കർഷകർക്കായി രണ്ടു കോടി രൂപയുടെ നഷ്ടമുണ്ടായി. 238 കർഷകരുടെ 6.04 ഹെക്ടറിലെ കുലയ്ക്കാത്ത 9,620 വാഴകകൾ നശിച്ചു. ഈയിനത്തിൽ 38.48 ലക്ഷം രൂപയുടെ നാശനഷ്ടം കണക്കാക്കുന്നു. 147.97 ഹെക്ടർ സ്ഥലത്തെ ഏലം ചെടികളും നശിച്ചു. ഇതുവഴി ഒരു കോടിയുടെ നഷ്ടമുണ്ടാകുകയും 947 കർഷകരെ ബാധിക്കുകയും ചെയ്തു. 11.88 ഹെക്ടർ സ്ഥലത്തെ 4,839 കായ്ച്ച കുരുമുളക് ചെടികളാണ് നശിച്ചത്. 36.29 ലക്ഷം രൂപ നഷ്ടവും 220 കർഷകരെ ഇതു ബാധിക്കുകയും ചെയ്തിട്ടുണ്ട്. 15 കർഷകരുടെ 1.7 ഏക്കറിലെ 130 കായ്ക്കാത്ത കുരുമുളക് ചെടികൾ നശിക്കുകയും 65,000 രൂപയുടെ നഷ്ടമുണ്ടാകുകയും ചെയ്തു. 32.13 ഹെക്ടറിലെ 1085 വെട്ടുന്ന റബറുകൾ നശിച്ചതുമൂലം 113 കർഷകർക്കായി 21.7 ലക്ഷം രൂപയുടെ നഷ്ടമുണ്ടായി. 44 കർഷകരുടെ 2.81 ഹെക്ടറിലെ 505 വെട്ടിത്തുടങ്ങാത്ത റബർ മരങ്ങൾ നശിക്കുകയും 7.58 ലക്ഷം രൂപയുടെ നഷ്ടമുണ്ടാകുകയും ചെയ്തു. 1.95 ഹെക്ടറിലെ 999 കൊക്കോ മരങ്ങളും നശിച്ചു. ഇതിലൂടെ 65 കർഷകർക്കായി 3.5 ലക്ഷം രൂപയുടെ നഷ്ടമുണ്ടായി. 17 കർഷകരുടെ 1.58 ഹെക്ടർ സ്ഥലത്തെ കപ്പകൃഷിക്ക് 21000 രൂപയുടെ നഷ്ടവും 69.2 സെന്‍റിലെ മൂന്നു കർഷകരുടെ പച്ചക്കറി കൃഷിക്ക് 13000 രൂപയും നഷ്ടമുണ്ടായി. 112 വീടുകൾക്ക് നാശനഷ്ടം ഇടുക്കി: ജില്ലയിൽ കഴിഞ്ഞ ആറുദിവസത്തിനിടെ 112 വീടുകൾ തകർന്നു. ഇന്നലെ മാത്രം 62 വീടുകൾക്ക് നാശം നേരിട്ടു. ഇതിൽ ആറു വീടുകൾ പൂർണമായും 56 വീടുകൾ ഭാഗികമായുമാണ് തകർന്നത്. ഇടുക്കി താലൂക്കിൽ 30 വീടുകൾ ഭാഗികമായും രണ്ടുവീടുകൾ പൂർണമായും തകർന്നു. തൊടുപുഴ താലൂക്കിൽ 18 വീടുകൾ ഭാഗികമായും നാല് വീടുകൾ പൂർണമായും തകർന്നു. പിരുമേട് ഉടുന്പൻചോല താലൂക്കുകളിൽ മൂന്ന് വീടുകൾ ഭാഗികമായുംദേവികുളം താലൂക്കിൽ രണ്ട് വീടുകൾ ഭാഗികമായും തകർന്നു. അഞ്ച് ക്യാന്പുകൾ തുറന്നു ഇടുക്കി: കനത്ത മഴയെത്തുടർന്ന് ജില്ലയിൽ അഞ്ചു ക്യാന്പുകൾ തുറന്നു. ഇടുക്കി താലൂക്കിൽ മൂന്നു ക്യാന്പും ദേവികുളം താലൂക്കിൽ രണ്ടു ക്യാന്പുമാണ് തുറന്നിട്ടുള്ളത്. ഇടുക്കി താലൂക്കിൽ മണിയാറൻകുടി സലീന ചാൾസ് ഇംഗ്ലീഷ് മീഡിയം സ്കൂളിലെ ക്യാന്പിൽ 18 കുടുംബങ്ങളിലായി 65 അംഗങ്ങളാണുള്ളത്. കഞ്ഞിക്കുഴി കീരിത്തോട് നിത്യസഹായമാതാ പാരിഷ് ഹാളിൽ ആരംഭിച്ച ദുരിതാശ്വാസ ക്യാന്പിൽ നാലു കുടുംബങ്ങളിലെ 10 അംഗങ്ങളുണ്ട്. മുരിക്കാശേരി സെന്‍റ് തോമസ് ഹയർ സെക്കൻഡറി സ്കൂളിൽ ആരംഭിച്ച ക്യാന്പിൽ നാലു കുടുംബങ്ങളിലെ ഏഴംഗങ്ങളാണുള്ളത്. മൂന്നാർ മൗണ്ട് കാർമൽ പാരിഷ് ഹാളിൽ എട്ടുകുടുംബങ്ങളിലായി 26 അംഗങ്ങളുണ്ട്. വെള്ളത്തൂവൽ ഗവ. ഹയർ സെക്കൻഡറി സ്കൂളിലെ ക്യാന്പിൽ അഞ്ച് കുടുബങ്ങളിൽനിന്ന് 15 അംഗങ്ങളുണ്ട്.

പൊന്മുടി ഡാമിന്‍റെ ഷട്ടറുകൾ തുറന്നു

രാജാക്കാട്: അപ്രതീക്ഷിതമായി എത്തിയ കാലവർഷത്തിൽ വൃഷ്ടിപ്രദേശങ്ങളിലുണ്ടായ കനത്ത മഴയിൽ പന്നിയാർ പുഴയിൽ നീരൊഴുക്ക് വർധിച്ചതോടെ പൊന്മുടി ഡാമിന്‍റെ ഷട്ടറുകൾ തുറന്നു. ഇന്നലെ വൈകുന്നേരം 4.15നാണ് ഡാമിന്‍റെ ആദ്യത്തെ ഷട്ടർ 20 സെന്‍റിമീറ്റർ ഉയർത്തി സെക്കൻഡിൽ 22 ക്യുമെക്സ് വെള്ളം പുറത്തേക്ക് ഒഴുക്കിയത്. നീരൊഴുക്ക് വർധിച്ചതിനെത്തുടർന്ന് 4.30ന് രണ്ടാമത്തെ ഷട്ടറും 4.45ന് മൂന്നാമത്തെ ഷട്ടറും 20 സെന്‍റീമീറ്റർ വീതം ഉയർത്തി സെക്കൻഡിൽ 46,000 ലിറ്റർ വെള്ളമാണ് പുറത്തേക്ക് ഒഴുക്കുന്നത്. പന്നിയാർ ഹൈഡ്രോ ഇലക്‌ട്രിക് പ്രോജക്ടിന്‍റെ ഭാഗമായുള്ള അണക്കെട്ടിൽ നാലു ദിവസം മുമ്പു വരെ സംഭരണശേഷിയുടെ 75 ശതമാനം വെള്ളമേ ഉണ്ടായിരുന്നുള്ളൂ. ആദ്യമായാണ് മേയിൽ പൊന്മുടി ഡാം തുറക്കുന്നത്. 707.75 അടിയാണ് പൊന്മുടി ഡാമിന്‍റെ പരമാവധി സംഭരണശേഷി. ഇപ്പോൾ 706.5 അടി വെള്ളമാണ് ഡാമിലുള്ളത്. മൂന്നു ഷട്ടറുള്ള ഡാമിന്‍റെ നടുവിലെ ഷട്ടറാണ് ആദ്യം ഉയർത്തിയത്. തുടർന്ന് ജലനിരപ്പ് പരിശോധിച്ച ശേഷമാണ് മറ്റു ഷട്ടറുകൾ ഉയർത്തിയത്. നീരൊഴുക്ക് വർധിച്ചാൽ ഇനിയും ഷട്ടറുകൾ ഉയർത്തുമെന്നും 60 സെന്‍റീമീറ്റർ വരെ തുറക്കാനാണ് കളക്ടർ അനുമതി നൽകിയിരിക്കുന്നതെന്നും പ്രൊജക്ട് എൻജിനിയർ അറിയിച്ചു.

അയ്യപ്പൻകോവിലിൽ വീടുകൾ തകർന്നു

ഉപ്പുതറ: ശക്തമായ കാറ്റിലും മഴയിലും അയ്യപ്പൻകോവിൽ പഞ്ചായത്തിൽ രണ്ടു വീടുകൾ തകർന്നു. ഹെവൻവാലി പാറയ്ക്കൽ പുഷ്പം ഹൃദയരാജ്, പുല്ലുമേട് പുതുവൻ സെൽവി എന്നിവരുടെ വീടുകളാണ് തകർന്നത്. മുകൾ ഭാഗത്തുനിന്നു പാറക്കെട്ട് അടർന്നുവീണാണ് പുഷ്പത്തിന്‍റെ വീട് തകർന്നത്. ശക്തമായ കാറ്റിൽ സെൽവിയുടെ വീടിന്‍റെ മേൽക്കൂര പറന്നുപോയി. ഭിത്തികൾക്കും കേടുപാടുകൾ സംഭവിച്ചു. ബുധനാഴ്ച രാത്രിയിലാണ് രണ്ടു സംഭവങ്ങളും ഉണ്ടായത്. ഈ സമയം രണ്ടു വീടുകളിലും കൊച്ചുമക്കൾ ഉൾപ്പെടെയുള്ളവർ ഉണ്ടായിരുന്നു. ആർക്കും പരിക്കില്ല. വിവരമറിഞ്ഞയുടൻ പഞ്ചായത്തംഗം ബി. ബിനു, അയ്യപ്പൻകോവിൽ വില്ലേജ് ഓഫീസർ എ. അഞ്ജു,ആനവിലാസം വില്ലേജ് ഓഫീസർ രാജേഷ് മുല്ലപ്പള്ളി എന്നിവർ സ്ഥലത്തെത്തി. സെൽവിയെയും കുടുംബത്തെയും ബന്ധുവീട്ടിലേക്കും പുഷ്പത്തെയും വീട്ടുകാരെയും ദുരിതാശ്വാസ ക്യാമ്പിലേക്കും മാറ്റി. മണ്ണിടിച്ചിൽ ഭീഷണിയുള്ള കുഴൽപാലം, അയ്യപ്പൻകോവിൽ പാറേപ്പള്ളി പ്രദേശത്തുള്ള രണ്ടു വീട്ടുകാരെയും ക്യാമ്പിലേക്കു മറ്റിയിട്ടുണ്ട്. പൂക്കുളം ഗവ. എൽപി സ്കൂൾ, മേരികുളം സെന്‍റ് മേരീസ് യുപി സ്കൂൾ എന്നിവിടങ്ങളിലാണ് ദുരിതാശ്വാസ ക്യാമ്പുകൾ തുടങ്ങിയത്.

ലയത്തിനു മുകളിലേക്ക് വൻ മരം കടപുഴകി; ഓട്ടോറിക്ഷകൾ മരത്തിനടിയിൽപ്പെട്ടു

വണ്ടിപെരിയാർ: തൊഴിലാളികളുടെ ലയത്തിനു മുകളിലേക്ക് വൻ മരം കടപുഴകി വീണു. രണ്ട് ഓട്ടോറിക്ഷകളും മരത്തിനടിയിലായി. വ്യാഴാഴ്ച പുലർച്ചെ രണ്ടരയോടെയാണ് വണ്ടിപ്പെരിയാർ വാളാർഡി എച്ച്എംഎൽ എസ്റ്റേറ്റിൽ താമസിക്കുന്ന മുത്തുലക്ഷ്മി പുഷ്പം, മനോന്മണി ബാലമുരുകൻ എന്നിവരുടെ വീടുകളുടെ മുകളിലേക്ക് വൻ മരം കടപുഴകി വീണത്. മൂന്നു കുട്ടികളും മുത്തുലക്ഷ്മിയും മുത്തുലക്ഷ്മിയുടെ മാതാവ് പുഷ്പവുമാണ് വീടിനുള്ളിൽ ഉണ്ടായിരുന്നത്. ഇവർ അദ്ഭുതകരമായി രക്ഷപ്പെട്ടു. ഇതിനിടെ തൊട്ടടുത്ത ലയത്തിൽ താമസിക്കുന്ന രാജയുടെ ഓട്ടോറിക്ഷ മരത്തിനടിയിൽപ്പെട്ട് പൂർണമായി നശിച്ചു. ഇതോടൊപ്പം സമീപത്തു നിർത്തിയിട്ടിരുന്ന പെട്ടിഓട്ടോറിക്ഷയും തകർന്നിട്ടുണ്ട്. സംഭവം അറിഞ്ഞ എംപി, എംഎൽഎ, ത്രിതല പഞ്ചായത്ത് പ്രതിനിധികൾ ഉൾപ്പെടെയുള്ളവർ സംഭവസ്ഥലം സന്ദർശിച്ചു.

തൊടുപുഴ മേഖലയിൽ വ്യാപക നാശം

തൊടുപുഴ: കനത്ത മഴയിൽ തൊടുപുഴ, കുമ്മംകല്ല്, ഇടവെട്ടി മേഖലകളിലുണ്ടായത് വ്യാപക നാശം. ബുധനാഴ്ച വൈകുന്നേരം വീശിയടിച്ച കാറ്റിൽ നഗരത്തിൽ പലയിടത്തും മരങ്ങളും വൈദ്യുതി പോസ്റ്റുകളും മറിഞ്ഞു വീണു. ഇതേത്തുടർന്ന് പ്രദേശത്തേക്കുള്ള ഗതാഗതം സ്തംഭിച്ചു. കൂറ്റൻ മരം റോഡിലേക്ക് മറിഞ്ഞുവീണാണ് പ്രദേശത്തെ ഗതാഗവും വൈദ്യുതിയുമടക്കം സ്തംഭിച്ചത്. 24 മണിക്കൂർ പിന്നിട്ടിട്ടും ഇതു വഴിയുള്ള ഗതാഗതം പുനഃസ്ഥാപിക്കാത്തത് യാത്രക്കാരെ ദുരിതത്തിലാക്കി. ഒടിഞ്ഞത് കൂറ്റൻമരമായതിനാൽ വൈദ്യുതി പോസ്റ്റുകളടക്കം തകർന്നു. ഗതാഗതവും വൈദ്യുതിയും പൂർണമായും രാത്രിയോടെ എല്ലാം പുനഃസ്ഥാപിക്കാനാണ് ശ്രമം നടത്തുന്നതെന്ന് അധികൃതർ പറഞ്ഞു. പ്രദേശത്തെ നിരവധി വീടുകളിലേക്കും മരം വീണ് നാശം സംഭവിച്ചിട്ടുണ്ട്. കോടിക്കുളം ചെറുതോട്ടിൻകരയിൽ ഇന്നലെ വൈകുന്നേരം 5.45 ഓടെയുണ്ടായ ശക്തമായ കാറ്റിലും മഴയിലും മരങ്ങൾ വീണ് ഗതാഗതം തടസപ്പെടുകയും വൈദ്യുതി ബന്ധം തകരാറിലാകുകയും ചെയ്തു. കോടിക്കുളം, തട്ടക്കുഴ എന്നിവിടങ്ങളിലും മരം വീണ് ഗതാഗതം തടസപ്പെട്ടു. ഫയർഫോഴ്സിന്‍റെയും പോലീസിന്‍റെയും നാട്ടുകാരുടെയും നേതൃത്വത്തിൽ മരങ്ങൾ മുറിച്ചുനീക്കി. തട്ടക്കുഴ ശ്രീ മഹാദേവ ക്ഷേത്രത്തിലെ കൂറ്റൻ ആൽമരം ഇന്നലെയുണ്ടായ കാറ്റിൽ കടപുഴകി വീണു.

ന്യൂമാൻ കോളജിൽ കൊമേഴ്സ് ഗവേഷണകേന്ദ്രത്തിന് അനുമതി

തൊടുപുഴ: ന്യൂമാൻ കോളജിലെ കൊമേഴ്സ് വിഭാഗത്തിന് എംജി യൂണിവേഴ്സിറ്റിയുടെ ഗവേഷണ കേന്ദ്രമായി പ്രവർത്തിക്കാനുള്ള അനുമതി ലഭിച്ചു. വിവിധ മാനദണ്ഡങ്ങളെ അടിസ്ഥാനമാക്കിയുള്ള സൂഷ്മ പരിശോധനകൾക്ക് ശേഷമാണ് ഗവേഷണ കേന്ദ്ര പദവി ലഭിക്കുന്നത്. 1964-ൽ പ്രവർത്തനമാരംഭിച്ച കൊമേഴ്സ് വിഭാഗം കേരളത്തിലെ മികച്ച ഡിപ്പാർട്ട്മെന്‍റുകളിൽ ഒന്നാണ്. കോളജിലെ ഗവേഷണ മേഖലയ്ക്ക് ഈ നേട്ടം കൂടുതൽ ഉൗർജം പകരുമെന്നും കേന്ദ്രത്തിന്‍റെ പ്രവർത്തനങ്ങൾ ഉടൻ ആരംഭിക്കുമെന്നും പ്രിൻസിപ്പൽ ഡോ.ജെന്നി കെ. അലക്സ് അറിയിച്ചു. ഇപ്പോൾ ഡിപ്പാർട്ടുമെന്‍റ് നടപ്പാക്കിവരുന്ന കർമപദ്ധതികൾക്ക് പുറമേ അനുദിനം മാറുന്ന ഉന്നത വിദ്യാഭ്യാസരംഗത്ത് ഗുണമേ· ഉറപ്പാക്കുന്ന നവീനപ്രവർത്തനങ്ങൾ ക്രമീകരിക്കുന്നതിന് ഗവേഷണ കേന്ദ്രമായുള്ള ഉയർച്ച ഉപകാരപ്പെടുത്തുമെന്ന് വകുപ്പ് മേധാവി ക്യാപ്റ്റൻ പ്രജീഷ് സി.മാത്യു പറഞ്ഞു. ഗവേഷണകേന്ദ്രത്തിന്‍റെ ഭാവി പ്രവർത്തനങ്ങൾക്കായി സംഘടിപ്പിച്ച പ്ലാനിംഗ് ഫോറത്തിൽ അധ്യാപകരായ ബീന ദീപ്തി ലൂയിസ്, എബി തോമസ്, ജോയൽ ജോർജ്, ഫിയോണ ബെന്നി എന്നിവർ പങ്കെടുത്തു. കോളജിന്‍റെ നേട്ടത്തെ രക്ഷാധികാരി ബിഷപ് മാർ ജോർജ് മഠത്തിക്കണ്ടത്തിൽ, മാനേജർ മോണ്‍. പയസ് മലേക്കണ്ടത്തിൽ, ഹയർ എഡ്യൂക്കേഷൻ സെക്രട്ടറി റവ.ഡോ. പോൾ പാറത്താഴം, പ്രിൻസിപ്പൽ ഡോ. ജെന്നി കെ. അലക്സ്, വൈസ് പ്രിൻസിപ്പൽമാരായ ഡോ. സാജു ഏബ്രഹാം, പ്രഫ. ബിജു പീറ്റർ, ബർസാർ ഫാ. ബെൻസണ്‍ എൻ. ആന്‍റണി എന്നിവർ അഭിനന്ദിച്ചു.

യുവാവ് കനാലിൽ മരിച്ച നിലയിൽ

മറയൂർ : വട്ടവടയിൽ കനാലിൽ യുവാവിന്‍റെ മൃതദേഹം കണ്ടെത്തി. കോവിലൂർ സ്വദേശി ശരവണന്‍റെ മകൻ (25) വിഷ്ണുവിന്‍റെ മൃതദേഹമാണ് കണ്ടെത്തിയത്. കനാലിലേക്ക് തലകീഴായി കിടക്കുന്ന നിലയിലായിരുന്നു മൃതദേഹമെന്ന് പോലീസ് പറഞ്ഞു. ദേവികുളം പോലീസ് അന്വേഷണം ആരംഭിച്ചു. വട്ടവട പഞ്ചായത്ത് ഓഫീസിനു സമീപം മണ്ണിടിച്ചിൽ ഉണ്ടായിട്ടുണ്ട്. ഇതിനു സമീപത്താണ് മൃതദേഹവും കണ്ടെത്തിയത്. ചെറിയ കനാലിൽ വീണ് മരണം സംഭവിച്ചതായാണ് പ്രാഥമിക നിഗമനം. പ്രദേശത്ത് അഞ്ചു ദിവസമായി വൈദ്യുതി ബന്ധവും നിലച്ചിരിക്കുകയാണ്. മൃതദേഹം ഇടുക്കി മെഡിക്കൽ കോളജിൽ പോസ്റ്റുമോർട്ടം നടത്തി ബന്ധുക്കൾക്ക് വിട്ടുനൽകി. അമ്മ തങ്കമ്മാൾ. സഹോദൻ: വിവേക്.

വിശ്വാസജീവിത പരിശീലന ദിനാഘോഷം വാർഷികാഘോഷവും

കാഞ്ഞിരപ്പള്ളി: രൂപത വിശ്വാസജീവിതപരിശീലന കേന്ദ്രത്തിന്‍റെയും ചെറുപുഷ്പ മിഷൻ ലീഗിന്‍റെയും വാർഷികാഘോഷവും അവാർഡ് ദാനവും നാളെ രാവിലെ 9.30 മുതൽ ഉച്ചകഴിഞ്ഞ് രണ്ടു വരെ കാഞ്ഞിരപ്പള്ളി പാസ്റ്ററൽ സെന്‍ററിൽ നടക്കും. രാവിലെ പത്തിന് ഫാ. വർഗീസ് കൊച്ചുപറമ്പിൽ "വിശ്വാസജീവിതപരിശീലനം: നിത്യജീവനിലുള്ള പ്രത്യാശ' എന്ന വിഷയത്തെ ആസ്പദമാക്കി ക്ലാസ് നയിക്കും. തുടർന്നു നടക്കുന്ന വാർഷികസമ്മേളനം കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ ഉദ്ഘാടനം ചെയ്യും. രൂപത പ്രോട്ടോ സിഞ്ചെല്ലൂസ് റവ.ഡോ. ജോസഫ് വെള്ളമറ്റം അധ്യക്ഷത വഹിക്കും. രൂപത സിഞ്ചെല്ലൂസ് ഫാ. സെബാസ്റ്റ്യൻ കൊല്ലംകുന്നേൽ പ്രസംഗിക്കും. വിവിധ മേഖലകളിൽ മികവു തെളിയിച്ച സൺഡേ സ്കൂളുകളെയും കുട്ടികളെയും ആദരിക്കും. മതാധ്യാപനരംഗത്ത് 50 വർഷങ്ങൾ പൂർത്തിയാക്കിയ നാല് അധ്യാപകർക്കും 25 വർഷങ്ങൾ പൂർത്തിയാക്കിയ 29 അധ്യാപകർക്കും പുരസ്കാരങ്ങൾ നൽകും. കഴിഞ്ഞ 12 വർഷവും മുടക്കം വരുത്താതെ എല്ലാ ഞായറാഴ്ചകളിലും വിശ്വാസജീവിത പരിശീലനത്തിൽ പങ്കെടുത്ത 25 കുട്ടികൾക്ക് പ്രത്യേക പുരസ്കാരങ്ങൾ നൽകി ആദരിക്കും. തുടർന്ന് പ്രധാനാധ്യാപകർ, സ്റ്റാഫ് സെക്രട്ടറിമാർ, ഫൊറോന സെക്രട്ടറിമാർ എന്നിവരുടെ സമ്മേളനം കാഞ്ഞിരപ്പള്ളി രൂപത വിശ്വാസജീവിത പരിശീലനകേന്ദ്രം ഡയറക്ടർ ഫാ. തോമസ് വാളന്മനാൽ നയിക്കും. സമ്മേളനത്തിൽ അടുത്ത അധ്യയനവർഷത്തെ കർമപദ്ധതികളുടെ വിശദീകരണവും ചർച്ചകളും നടക്കും.

കുളമാവ് ഗ്രാമത്തെ നെഞ്ചിലേറ്റിയ സിസ്റ്റർ ഡോ. ജോസഫൈൻ വിശ്രമജീവിതത്തിലേക്ക്

മൂലമറ്റം: എസ്എച്ച് സഭാംഗമായ സിസ്റ്റർ ഡോ. ജോസഫൈൻ കളപ്പുര മലയോരഗ്രാമമായ കുളമാവിലെ സാധാരണക്കാരായ മനുഷ്യരെ ഹൃദയംകൊണ്ടു സ്നേഹിച്ചു. അമ്മയും കുഞ്ഞും തമ്മിലുള്ള പൊക്കിൾക്കൊടി ബന്ധം പോലെയായിരുന്നു ആ സ്നേഹം. 1979ലാണ് സിസ്റ്റർ കുളമാവ് എസ്എച്ച് കോണ്‍വന്‍റിൽ എത്തുന്നത്. ആതുര ശുശ്രൂഷാരംഗത്ത് നാലര പതിറ്റാണ്ടോളം നീണ്ട സേവനത്തിനിടെ ഇവിടത്തുകാർക്ക് പത്തും ഇരുപതും അന്പതും രൂപയ്ക്ക് മരുന്ന് മാത്രമല്ല ലഭിച്ചത്. സോഷ്യൽ സെന്‍റർ എന്ന സ്ഥാപനത്തിലൂടെ നിരവധിപ്പേർക്ക് വീട്, ശുചിമുറി, തയ്യൽപരിശീലനം എന്നിവയെല്ലാം സിസ്റ്ററിലൂടെ ലഭിച്ചു. കാരുണ്യത്തിന്‍റെ തൂവൽ സ്പർശം സിസ്റ്ററിന്‍റെ കർമനിരതമായ ജീവിതത്തിലൂടെയും സ്നേഹമസൃണമായ സംസാരത്തിലൂടെയും പുഞ്ചിരിതൂകുന്ന മുഖഭാവത്തോടെയും അനുഭവച്ചറിയാൻ ഈ ഗ്രാമത്തിനായി. ജർമനിയിൽനിന്നു മെഡിസിൻ പഠനം പൂർത്തിയാക്കിയ സിസ്റ്റർ മുതലക്കോടം ഹോളിഫാമിലി, കട്ടപ്പന സെന്‍റ് ജോണ്‍സ്, മൂലമറ്റം ബിഷപ് വയലിൽ എന്നീ ആശുപത്രികളിൽ സേവനം അനുഷ്ടിച്ചിട്ടുണ്ട്. 1980ൽ കുളമാവ് എസ്എച്ച് മഠത്തോടു ചേർന്ന് സിസ്റ്റർ സ്ഥാപിച്ച സെന്‍റ് ജോസഫ് ഡിസ്പെൻസറിയിലൂടെയാണ് അനേകർ സിസ്റ്ററിന്‍റെ ശുശ്രൂഷ അനുഭവിച്ചറിഞ്ഞത്. സോഷ്യൽ സെന്‍റർ എന്ന സ്ഥാപനത്തിലൂടെ നൂറുകണക്കിനു പെണ്‍കുട്ടികൾ തയ്യൽപരിശീലനം നേടി. ഇവർക്ക് തയ്യൽമെഷീനുകൾ നൽകി അവരെ തൊഴിൽ സംരംഭകരാക്കി മാറ്റി. വർഷങ്ങൾക്കുമുന്പ് നിരവധിപ്പേർ ശാരീരിക അസ്വസ്ഥതയുമായി ഡിസ്പെൻസറിയിലെത്തി. കാരണമന്വേഷിച്ചപ്പോൾ ശുചിമുറി ഇല്ലാത്തതാണ് രോഗബാധയ്ക്കു കാരണമെന്ന് അറിയാനായി. അതോടെ അവർക്ക് ശുചിമുറി നിർമിച്ചുനൽകാൻ സിസ്റ്റർ മുന്നിട്ടിറങ്ങി. വീടില്ലാത്തവർക്ക് വീടും നിർമിച്ചുനൽകി. നാടുകാണിയിലെ ഡിസ്പെൻസറിയുടെ ശാഖയിലൂടെ ഗോത്രജനത ഏറെയുള്ള കോഴിപ്പള്ളി, നാടുകാണി എന്നിവിടങ്ങളിലും നിസ്വാർഥ സേവനം എത്തിക്കാൻ സിസ്റ്ററിനു കഴിഞ്ഞു. പതിറ്റാണ്ടുകൾ നീണ്ട തന്‍റെ ശുശ്രൂഷാമണ്ഡലത്തെ വിട്ട് മൂലമറ്റം എസ്എച്ച് കോണ്‍വന്‍റിലേക്ക് വിശ്രമത്തിനായി ഇന്നു സിസ്റ്റർ മടങ്ങുന്പോൾ തങ്ങൾക്കു ലഭിച്ച സ്നേഹത്തിന്‍റെ കടം എങ്ങനെ വീട്ടുമെന്ന ചിന്തയിലാണ് നാട്ടുകാർ.

മൺതിട്ട ഇടിഞ്ഞു വീട് അപകടാവസ്ഥയിൽ‌

കട്ടപ്പന: ഇരട്ടയാർ നാലു സെന്‍റ് കോളനിയിൽ വീടുകളുടെ മുൻ വശത്തെ മൺതിട്ട ഇടിഞ്ഞ് വീടുകൾ അപകടാവസ്ഥയിലായി. കറുകയിൽ സോമൻ, സമീപവാസിയായ അനിത എന്നിവരുടെ വീടുകളാണ് അപകടാവസ്ഥയിലായത്. കഴിഞ്ഞ ദിവസം ഇതു വഴിയുള്ള റോഡ് കോൺക്രീറ്റ് ചെയ്യുന്നതിന്‍റെ ഭാഗമായി വീടുകളുടെ മുൻവശത്തെ മണ്ണ് എടുത്തുമാറ്റിയിരുന്നു. തുടർന്ന് വലിയ തിട്ടയായി നിലകൊള്ളുകയായിരുന്നു. നിലവിൽ വീടിന്‍റെ മുൻവശത്ത് ഇടിഞ്ഞ ഭാഗം പടുതാ ഇട്ട് സംരക്ഷിച്ചു നിർത്തിയിരിക്കുകയാണ്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]