ADVERTISEMENT

ADVERTISEMENT

സ്നേഹഭവനത്തിന്‌റെ താക്കോൽ കൈമാറി

ചെറുതോണി: സിപിഎം കഞ്ഞിക്കുഴി ലോക്കൽ കമ്മിറ്റി നിർമിച്ച് നൽകിയ സ്നേഹഭവനത്തിന്‌റെ താക്കോൽ ദാനം നടന്നു. കഞ്ഞിക്കുഴി - തള്ളക്കാനം സലിൻ കുന്നേലിന് നിർമിച്ചു നൽകിയ സ്നേഹ ഭവനത്തിന്‌റെ താക്കോൽദാനം സിപിഎം ജില്ലാ സെക്രട്ടറി സി.വി. വർഗീസ് നിർവഹിച്ചു. 650 ചതുരശ്ര അടി വിസ്തീർണമുള്ള വീട് ഏഴര ലക്ഷം രൂപ മുടക്കിയാണ് നിർമിച്ചത്.

കഞ്ഞിക്കുഴി ലോക്കൽ കമ്മിറ്റി അംഗം റോഷൻ ജോൺ അധ്യക്ഷത വഹിച്ചു.
ജില്ലാ പഞ്ചായത്തംഗം കെ.ജി. സത്യൻ, ഏരിയാ സെക്രട്ടറി പി.ബി. സബീഷ്, ലിസി ജോസ്, എബിൻ ജോസഫ്, സിബി പേന്താനം, ഇ.ടി. ദിലീപ്, ശശി കന്യാലിൽ, ജി. നാരായണൻ നായർ, ജോർജ് പേടിക്കാട്ട് എന്നിവർ പ്രസംഗിച്ചു.

ADVERTISEMENT

സ്കൂട്ടർ അപകടത്തിൽ നേവി ഉദ്യോഗസ്ഥൻ മരിച്ചു

തൊടുപുഴ: സ്കൂട്ടർ അപകടത്തിൽ പരിക്കേറ്റ് ചികിത്സയിലായിരുന്ന മർച്ചന്‍റ് നേവി ഉദ്യോഗസ്ഥൻ മരിച്ചു. മഞ്ഞള്ളൂർ വടകോട് മറ്റത്തിനാനിക്കൽ മാത്യുവിന്‍റെ മകൻ കിരണ്‍ മാത്യു (32) ആണ് മരിച്ചത്. കഴിഞ്ഞ 12ന് തൊടുപുഴ ധന്വന്തരി ജംഗ്ഷനിൽ വച്ച് സ്കൂട്ടർ നിയന്ത്രണം വിട്ട് മറിഞ്ഞാണ് അപകടമുണ്ടായത്. തൊടുപുഴയിലെ സ്വകാര്യ ആശുപത്രിയിൽ ചികിത്സയിലിരിക്കെയാണ് മരണം. സംസ്കാരം ഇന്ന് 11ന് വടകോട് സെന്‍റ് സെബാസ്റ്റ്യൻസ് പള്ളിയിൽ. മാതാവ്: ഷൈനി. ഭാര്യ ജെംസി ജോണി ( നഴ്സ് സൗദി) കുറിച്ചിത്താനം പഴയമാക്കൽ കുടുംബാംഗം. സഹോദരി: കാജൽ.

ചപ്പാത്ത് പെട്രോൾപമ്പ് സൂപ്രണ്ട് സന്ദർശിച്ചു

ഉപ്പുതറ: കുട്ടിക്കാനം - കട്ടപ്പന മലയോര ഹൈവേ നിർമാണത്തിന് തടസമുണ്ടായ ചപ്പാത്ത് പെട്രോൾ പമ്പിന് മുന്നിലെ തർക്കസ്ഥലം ഇടുക്കി സർവേ സൂപ്രണ്ട് സന്ദർശിച്ചു. അയ്യപ്പൻകോവിൽ പഞ്ചായത്ത് ഭരണസമിതി ജില്ലാ ഭരണകൂടത്തിനു നൽകിയ പരാതിയിൽ ഇടുക്കി ആർഡിഒയുടെ നിർദേശകാരമാണ് സൂപ്രണ്ടിന്‍റെ നേതൃത്വത്തിലുള്ള ജില്ലാ സർവേ സംഘം വെള്ളിയാഴ്ച സ്ഥലം സന്ദർശിച്ചത്. ശനിയാഴ്ച സ്ഥലം പരിശോധിക്കാൻ എത്തുമെന്നായിരുന്നു പഞ്ചായത്ത് പ്രസിഡന്‍റിനെ അറിയിച്ചിരുന്നത്. എന്നാൽ, സ്ഥലം പരിശോധിക്കാൻ ഉദ്യോഗസ്ഥർ വെള്ളിയാഴ്ച എത്തിയ വിവരം പഞ്ചായത്ത് അധികൃതരെ അറിയിച്ചില്ല. വിവരമറിഞ്ഞ് സ്ഥലത്തു വന്ന പഞ്ചായത്ത് പ്രസിഡന്‍റിനോട് പ്രതികരിക്കാനും സൂപ്രണ്ട് തയാറായില്ല. പമ്പ് ഉടമയ്ക്ക് അനുകൂലമായ നിലപാടാണ് ഉദ്യോഗസ്ഥർ സ്വീകരിക്കുന്നതെന്ന് പ്രസിഡന്‍റ് ജയ്മോൾ ജോൺസൻ പറഞ്ഞു.ആർഡിഒയുടെ സാന്നിധ്യത്തിൽ സ്ഥലം അളന്ന് തിരിക്കണമെന്ന് കളക്ടറെ നേരിൽ കണ്ട് ആവശ്യപ്പെടുമെന്നും പ്രസിഡന്‍റ് അറിയിച്ചു. ഉടമ ഭൂമി വിട്ടു നൽകാത്തതിനാൽ പെട്രോൾ പമ്പിന് മുന്നിൽ റോഡിനു വീതി കുറച്ചാണ് ടാറിംഗ് നടത്തിയത്. ഐറിഷ് ഓടയും നിർമിച്ചില്ല. പമ്പിന്‍റെ ഒരു വശത്ത് 2.6 മീറ്ററും മറുവശത്ത് 1.6 മീറ്ററും ഉൾപ്പെടുന്ന രണ്ട് സെന്‍റ് ഭൂമി പുറമ്പോക്കാണെന്ന് താലൂക്ക് സർവേയർ കണ്ടെത്തിയിരുന്നു. ഈ സ്ഥലം വീണ്ടെടുത്തു നൽകാൻ തഹസിൽദാർക്കും പഞ്ചായത്ത് സെക്രട്ടറിക്കും ഹൈക്കോടതി നിർദേശം നൽകുകയും ചെയ്തിരുന്നു. എന്നാൽ, നടപടി സ്വീകരിക്കുന്നതിൽ തഹസിൽദാരും സെക്രട്ടറിയും വീഴ്ച വരുത്തി. പമ്പുടമ ഭൂപരിഷ്കരണ നിയമ പ്രകാരം കളക്ടർക്ക് പരാതി നൽകിയിരിക്കുകയാണ്.

വയോധികനെ ബൈക്കിടിച്ചു വീഴ്ത്തി പണം കവർന്നു; ഒരാൾ പിടിയിൽ

തൊടുപുഴ: ഇരുചക്ര വാഹനം ഉപയോഗിച്ച് വയോധികനെ ഇടിച്ച് വീഴ്ത്തി മൊബൈൽ ഫോണും പണവും കവർന്ന് രക്ഷപ്പെടുന്നതിനിടെ മൂന്നംഗ സംഘത്തിൽപ്പെട്ട ഒരാളെ നാട്ടുകാർ പിടികൂടി പോലീസിനു കൈമാറി. തൊടുപുഴ ഉണ്ടപ്ലാവ് കാരകുന്നേൽ ഷിനിൽ റസാഖ് (തക്കുടു -29) ആണ് പിടിയിലായത്. കുമാരമംഗലം മാളിയേക്കൽ ഷംസുദ്ദീനാണ് അതിക്രമത്തിനിരയായത്. തൊടുപുഴ കുമാരമംഗലത്ത് വ്യാഴാഴ്ച വൈകുന്നേരം നാലരയോടെയായിരുന്നു സംഭവം. കുമാരമംഗലം കറുക ഭാഗത്ത് റോഡരികിൽക്കൂടി നടന്നു പോകുകയായിരുന്നു ഷംസുദീൻ. ഈ സമയം ബൈക്കിലെത്തിയ പ്രതികൾ ഷംസുദ്ദീനെ ഇരുചക്ര വാഹനം കൊണ്ട് ഇടിച്ചുവീഴ്ത്തി. തുടർന്ന് പഴ്സിലുണ്ടായിരുന്ന 3000ത്തോളം രൂപയും മൊബൈൽ ഫോണും തട്ടിയെടുത്തു. എതിർക്കാൻ ശ്രമിച്ചപ്പോൾ ക്രൂരമായി മർദിച്ചു. ഷംസുദ്ദീന്‍റെ നിലവിളി കേട്ട് നാട്ടുകാർ ഓടിയെത്തി. അപ്പോഴേക്കും മൂവർ സംഘം ഇരുചക്ര വാഹനത്തിൽ രക്ഷപ്പെടാൻ ശ്രമിച്ചു. തുടർന്നാണ് ഷിനിൽ റസാഖിനെ നാട്ടുകാർ പിടികൂടിയത്. രണ്ടു പേർ സ്ഥലത്തുനിന്നു രക്ഷപ്പെടുകയും ചെയ്തു. തുടർന്ന് നാട്ടുകാർ അറിയിച്ചതനുസരിച്ച് തൊടുപുഴയിൽനിന്നെത്തിയ പോലീസിന് ഷിനിലിനെ കൈമാറി. കൂട്ടു പ്രതികളെ ഇരുവരെയും പിടികൂടാൻ അന്വേഷണം ഉൗർജിതമാക്കിയതായും പോലീസ് പറഞ്ഞു. ഒട്ടേറെ കേസുകളിൽ ഉൾപ്പെട്ടതിനെത്തുടർന്ന് പ്രതികളെ മൂവരെയും നേരത്തേ കാപ്പ കേസിൽ ഉൾപ്പെടുത്തി നാടു കടത്തിയിരുന്നു. ജയിലിൽനിന്നു തിരികേ വന്ന ശേഷമാണ് വീണ്ടും അതിക്രമം നടത്തിയിരിക്കുന്നത്. തലയ്ക്ക് സാരമായി പരിക്കേറ്റ ഷംസുദീൻ തൊടുപുഴ ജില്ലാ ആശുപത്രിയിൽ ചികിത്സ തേടി.

അങ്കണവാടി മന്ദിരം ഉദ്ഘാടനം

വെള്ളിയാമറ്റം: പഞ്ചായത്ത് പന്ത്രണ്ടാം വാർഡിലെ അങ്കണവാടിക്കായി നിർമിച്ച പുതിയ കെട്ടിടം ഉദ്ഘാടനം ചെയ്തു. വെള്ളിയാമറ്റം സെന്‍റ് ജോസഫ് പള്ളി സൗജന്യമായി നൽകിയ സ്ഥലത്താണ് കെട്ടിടം നിർമിച്ചിരിക്കുന്നത്. ഇളംദേശം ബ്ലോക്ക് പഞ്ചായത്ത് ഫണ്ടിൽനിന്ന് 5,80,000 രൂപയും ഐസിഡിഎസ് ഫണ്ടിൽനിന്ന് 8,70,000 രൂപയും പഞ്ചായത്തിന്‍റെ അഞ്ച് ലക്ഷം രൂപയും ചെലവഴിച്ചാണ് കെട്ടിടം നിർമിച്ചത്. പഞ്ചായത്ത് പ്രസിഡന്‍റ് മോഹൻദാസ് പുതുശേരി ഉദ്ഘാടനം ചെയ്തു. വൈസ് പ്രസിഡന്‍റ് ഷേർലി ജോസുകുട്ടി അധ്യക്ഷത വഹിച്ചു. ഫാ. മാത്യു മഠത്തിൽ മുതിർന്ന അധ്യാപികമാരെ ആദരിച്ചു. പഞ്ചായത്ത് അസി. സെക്രട്ടറി എ.എസ്. സ്മിത മോൾ താക്കോൽദാനം നിർവഹിച്ചു. ബ്ലോക്ക് പഞ്ചായത്തംഗം ടെസിമോൾ മാത്യു, പഞ്ചായത്ത് അംഗങ്ങളായ രാജു കുട്ടപ്പൻ, പോൾ സെബാസ്റ്റ്യൻ, വി.കെ. കൃഷ്ണൻ, രാജി ചന്ദ്രശേഖരൻ, അഭിലാഷ് രാജൻ, കബീർ കാസിം, സഹകരണ ബാങ്ക് പ്രസിഡന്‍റ് ജോസ് കോയിക്കാട്ടിൽ, എം. മോനിച്ചൻ, അലീന ജോർജ് എന്നിവർ പ്രസംഗിച്ചു.

വിദ്യാഭ്യാസ ഓഫീസിനു മുന്നിൽ കെപിഎസ്എംഎ ധർണ

തൊടുപുഴ: പ്രൈവറ്റ് എയ്ഡഡ് സ്കൂൾ മാനേജേഴ്സ് അസോസിയേഷൻ ജില്ലാ കമ്മിറ്റിയുടെ നേതൃത്വത്തിൽ തൊടുപുഴ ഉപജില്ലാ വിദ്യാഭ്യാസ ഓഫീസിനു മുന്നിൽ ധർണ നടത്തി. പൊതുവിദ്യാഭ്യാസ മേഖലയെ തകർക്കാതിരിക്കുക, ജോലിചെയ്യുന്ന അധ്യാപകർക്ക് അംഗീകാരവും ശന്പളവും നൽകുക, എയ്ഡഡ് സ്കൂളുകളുടെ സുഗമമായ പ്രവർത്തനങ്ങളെ തടസപ്പെടുത്താതിരിക്കുക തുടങ്ങിയ ആവശ്യങ്ങൾ ഉന്നയിച്ചായിരുന്നു സമരം. നഗരസഭാ ചെയർമാൻ കെ. ദീപക് ഉദ്ഘാടനം ചെയ്തു. സംസ്ഥാന ജനറൽ സെക്രട്ടറി മണി കൊല്ലം മുഖ്യപ്രഭാഷണം നടത്തി. പ്രകാശ് നാരായണൻ പ്രസംഗിച്ചു. ജില്ലാ പ്രസിഡന്‍റ് ഉണ്ണികൃഷ്ണൻ നായർ സ്വാഗതവും ജില്ലാ സെക്രട്ടറി എബി കുര്യാക്കോസ് നന്ദിയും പറഞ്ഞു. സംസ്ഥാന സർക്കാരിന്‍റെ മികച്ച അധ്യാപകനുള്ള അവാർഡ് നേടിയ കോന്പയാർ സെന്‍റ് തോമസ് എൽപിഎസ് ഹെഡ്മാസ്റ്റർ ബിജു ജോർജിനെ ചടങ്ങിൽ ആദരിച്ചു.

നഗരത്തിൽ പൈപ്പ് പൊട്ടി ജലവിതരണം മുടങ്ങി

തൊടുപുഴ: നഗരമധ്യത്തിൽ പൈപ്പ് പൊട്ടിയതിനെത്തുടർന്ന് കുടിവെള്ള വിതരണം മുടങ്ങി. ഇന്നലെ വൈകുന്നേരം നാലോടെ ഏറെ തിരക്കുള്ള റോട്ടറി ജംഗ്ഷനിലെ 110 എംഎം ലൈൻ പൈപ്പാണ് പൊട്ടിയത്. ഏഴടിയോളം ഉയരത്തിൽ വെള്ളം ചീറ്റിത്തെറിച്ചതോടെ ഇതുവഴി പോയ യാത്രക്കാരടക്കം നനഞ്ഞു കുളിച്ചു. ഈ സമയം ഇതുവഴി കടന്നുപോയ സ്കൂൾ വാഹനങ്ങളിലേക്കും വെള്ളം തെറിച്ചു. സമീപവാസികളും ഓട്ടോ തൊഴിലാളികളും ഉടൻതന്നെ വിളിച്ചറിയിച്ചെങ്കിലും വൈകിയാണ് ജല പ്രവാഹം നിർത്തിയതെന്നും ആക്ഷേഷപമുണ്ട്. കഴിഞ്ഞ നാലു മാസമായി ഈ പൈപ്പ് പൊട്ടി വെള്ളം ചോരുന്നതായാണ് പ്രദേശത്തെ വ്യാപാരികൾ പറയുന്നത്. ഓടയ്ക്ക് മുകളിൽ കോണ്‍ക്രീറ്റ് ഉള്ളതിനാൽ വെള്ളം പുറത്തേക്ക് വന്നിരുന്നില്ല. എന്നാൽ ഇന്നലെ ഭാരവാഹനം കയറിയതോടെ ഈ കോണ്‍ക്രീറ്റ് പൊട്ടിയതിനെത്തുടർന്നാണ് വെള്ളം പുറത്തേക്ക് തെറിച്ചത്. നാല് മാസം മുൻപ് പൈപ്പ് പൊട്ടിയതായി കാണിച്ച് പ്രദേശവാസികൾ പരാതി നൽകിയിരുന്നു. പൈപ്പ് പൊട്ടിയതിനാൽ ടൗണ്‍ മുതൽ വെങ്ങല്ലൂർ ഭാഗം വരെയുള്ള കുടിവെള്ള വിതരണം ഇന്നു തടസപ്പെടുമെന്നും പ്രശ്നം പരിഹരിച്ച ശേഷം വിതരണം പുനഃസ്ഥാപിക്കുമെന്നും വാട്ടർ അഥോറിട്ടി സെക്‌ഷൻ അസി. എൻജിനിയർ അറിയിച്ചു. കഴിഞ്ഞ ദിവസം വാട്ടർ ട്രീറ്റ്മെന്‍റ് പ്ലാന്‍റുകളിൽ ജല ശുദ്ധീകരണ പ്രവർത്തനങ്ങൾ നടക്കുന്നതിനാൽ തൊടുപുഴയിലും സമീപ പഞ്ചായത്തുകളിലും ജലവിതരണം മുടങ്ങിയിരുന്നു.

ഇനി സ്ത്രീകളെ തൊട്ടാൽ വിവരമറിയും

തൊടുപുഴ: കേരള പോലീസിന്‍റെ സോഷ്യൽ പോലീസ് വിംഗിന്‍റെ സ്വയം പ്രതിരോധ പരിശീലന പരിപാടിയുടെ ഭാഗമായി ജില്ലയിൽ പരിശീലനം നേടിയത് 95,000 പേർ. കുട്ടികൾക്കും സ്ത്രീകൾക്കും എതിരേയുള്ള അതിക്രമങ്ങൾ തടയാൻ അവരെ സ്വയം പ്രാപ്തരാക്കാനായാണ് പരിശീലനം സംഘടിപ്പിക്കുന്നത്. സോഷ്യൽ പോലീസിംഗ് ഡയറക്ടറേറ്റിനു കീഴിലെ വനിതാ സ്വയം പ്രതിരോധ പരിശീലനത്തിലൂടെയാണ് ഈ മുന്നേറ്റം. 2015-ലാണ് ഇത്തരമൊരു പരിശീലനത്തിനു തുടക്കമിടുന്നത്. 10 വർഷത്തിനിടയിലാണ് ഇത്രയും പേർ പരിശീലനം നേടിയത്. കളരി, കരാട്ടേ, ജൂഡോ വീടുകളിലും തൊഴിലിടങ്ങളിലും യാത്രകളിലും തുടങ്ങി സ്ത്രീകൾക്കും പെണ്‍കുട്ടികൾക്കുമെതിരേ അപ്രതീക്ഷിതമായുണ്ടാകുന്ന അതിക്രമങ്ങളിൽനിന്നു രക്ഷപ്പെടാൻ സജ്ജരാക്കുകയാണ് പരിശീലനത്തിന്‍റെ ലക്ഷ്യം. അപരിചിതരുടെ നീക്കങ്ങൾ തിരിച്ചറിയൽ, മോഷണശ്രമങ്ങൾ, ആസിഡ്, പെട്രോൾ ആക്രമണം തുടങ്ങിയവ നേരിട്ടാൽ എതിരാളിയെ പ്രതിരോധിക്കാനും പ്രത്യാക്രമണം നടത്താനും മറ്റ് മാർഗങ്ങൾ തേടാനുമുള്ള അവസരം ഇതിലൂടെ പ്രാപ്തമാകും. എന്തൊക്കെ തരത്തിൽ ആക്രമണങ്ങളുണ്ടാകാം, അവയെ എങ്ങനെയെല്ലാം പ്രതിരോധിക്കാം തുടങ്ങിയവയൊക്കെ ക്ലാസിൽ വിശദീകരിക്കും. പിന്നീട് പ്രായോഗിക പരിശീലനവും നൽകും. ഇതിന് കളരി, കരാട്ടേ, ജൂഡോ തുടങ്ങിയ ആയോധന കലകളിലെ മുറകളാണ് സ്വീകരിക്കുന്നത്. ഗുഡ് ടച്ച് , ബാഡ് ടച്ച്, പോക്സോ നിയമം എന്നിവയിൽ ബോധവത്കരണവുമുണ്ട്. പ്രായഭേദമെന്യേ സ്ത്രീകൾക്കു പരിശീലനത്തിൽ പങ്കെടുക്കാം. സൗജന്യ പരിശീലനം കുടുംബശ്രീ അംഗങ്ങൾ, ആശുപത്രി ജീവനക്കാർ, തൊഴിലുറപ്പ് തൊഴിലാളികൾ, റെസിഡന്‍റ്സ് അസോസിയേഷനുകൾ, ലോട്ടറി തൊഴിലാളികൾ, ലയണ്‍സ് ക്ലബ്ബുകൾ, സ്കൂൾ, കോളജുകൾ എന്നിവ അടക്കം താത്പര്യമുള്ള ഏതൊരു സംഘടനയ്ക്കും വ്യക്തികൾക്കും പദ്ധതിയുടെ ഭാഗമാകാം. താത്പര്യള്ളവർ അറിയിച്ചാൽ സൗജന്യ പരിശീലനം നൽകും. തുടർ പരിശീലനം ആവശ്യമെങ്കിൽ അതും നൽകും. പരിശീലന പരിപാടിയുടെ ഭാഗമായി ബെവ്കോ ജീവനക്കാരായ 54 വനിതകൾക്കും പരിശീലനം നൽകി. തൊടുപുഴ സ്റ്റേഷനിലെ ജനമൈത്രി യാർഡിലായിരുന്നു പരിശീലനം. ഒൗട്ട്‌ലെറ്റിലും ഗോഡൗണിലും ജോലി ചെയ്യുന്ന ജീവനക്കാരാണ് ഇവർ. ഇതിനു പുറമേ ഐഎംഎയുമായി സഹകരിച്ച് നിരവധി ആശുപത്രി ജീവനക്കാർക്കും വിവിധ സർക്കാർ വകുപ്പിലെ ജീവനക്കാർക്കും ഹോട്ടൽ ജീവനക്കാർക്കും അടക്കം പരിശീലനം നൽകിയിട്ടുണ്ട്. ആണ്‍കുട്ടികൾക്കു പരിശീലനം നൽകുന്ന പദ്ധതിയും പരിഗണനയിലാണ്. വനിതാ പോലീസ് ഓഫീസർമാരായ ടി.ജി. ബിന്ദു, കെ.എസ്. സോഫിയ, അഞ്ജു ഷാജി, ടി.ജി. ബിന്ദുമോൾ എന്നിവരാണ് പരിശീലനം നൽകുന്നത്. തിരുവനന്തപുരം റേഞ്ച് ഡിഐജി അജിതാ ബീഗം സംസ്ഥാന നോഡൽ ഓഫീസറും അഡീഷൽ എസ്പി ഇമ്മാനുവൽ പോൾ ജില്ലാ നോഡൽ ഓഫീസറുമാണ്. പരീശീലനത്തിനായി http://addlspidk.polkerala.gov.in എന്ന മെയിലിലേക്ക് അപേക്ഷ അയയ്ക്കണം. ഫോണ്‍: 9497912649.

വണ്ണപ്പുറത്ത് എൽഡിഎഫ് ആരോപണം പ്രഹസനം

തൊടുപുഴ: വണ്ണപ്പുറം പഞ്ചായത്തിൽ വോട്ടർ പട്ടികയിൽ വ്യാപകമായി ക്രമക്കേട് നടന്നതായി ആരോപിച്ച് സിപിഎം പഞ്ചായത്ത് ഓഫീസ് ഉപരോധം ഉൾപ്പെടെയുള്ള സമരപരിപാടികൾ സംഘടിപ്പിച്ച് ജനങ്ങളുടെ മുന്നിൽ യുഡിഎഫിനെ അപകീർത്തിപ്പെടുത്താനുള്ള നീക്കം നടത്തുകയാണെന്ന് ഭാരവാഹികൾ പത്രസമ്മേളനത്തിൽ ആരോപിച്ചു. വോട്ടർ പട്ടികയിൽ പേരു ചേർക്കുന്നത് തെരഞ്ഞെടുപ്പ് കമ്മീഷന്‍റെ നിർദേശവും മാനദണ്ഡവും അനുസരിച്ചാണ്. മലയോര മേഖല ഉൾപ്പെടുന്ന വണ്ണപ്പുറം പഞ്ചായത്തിൽ പ്രളയം, കോവിഡ്, പ്രകൃതിദുരന്തങ്ങൾ എന്നിവ തുടർച്ചയായി ഉണ്ടായപ്പോൾ ജീവരക്ഷാർഥം ചികിത്സയ്ക്കും കുട്ടികളുടെ വിദ്യാഭ്യാസത്തിനുമായി ഒട്ടേറെ പേർ താമസസ്ഥലത്തുനിന്നു ടൗണിലേക്കും സമീപപ്രദേശങ്ങളിലേക്കും താത്കാലികമായി താമസം മാറ്റിയിട്ടുണ്ട്. അവരുടെ സ്ഥലമോ ദേഹണ്ഡങ്ങളോ വീടുകളോ വിൽക്കുകയോ കൈമാറ്റം ചെയ്യുകയോ ചെയ്തിട്ടില്ല. ഇത്തരത്തിലുള്ളവരുടെ വോട്ടുകൾ വെട്ടിമാറ്റാനുള്ള സിപിഎമ്മിന്‍റെ നിർബന്ധബുദ്ധിയും കുടിലതന്ത്രവുമാണ് പഞ്ചായത്തിൽ നടത്തിയ പ്രഹസന സമരത്തിനാധാരം. താത്കാലികമായി മാറിത്താമസിക്കുന്നവർ നിലവിലെ വാടക വീടുകളിൽ വോട്ട് ചേർത്തിട്ടില്ലാത്ത അവസ്ഥയിൽ പേരുകൾ വോട്ടർ പട്ടികയിൽനിന്ന് നീക്കം ചെയ്താൽ അവരുടെ സ്ഥലത്തിന് പട്ടയം, ക്ഷേമപെൻഷനുകൾ, മറ്റ് ജീവിത പ്രശ്നങ്ങൾ പരിഹരിക്കുന്നതിന് വോട്ടവകാശം ഉപയോഗിക്കാൻ സാധിക്കാതെ വരുമെന്നായിരുന്നു യുഡിഎഫിന്‍റെ ആവശ്യം. എന്നാൽ എൽഡിഎഫ് ഇത് രാഷ‌്ട്രീയവത്കരിച്ച് യുഡിഎഫിനെ തകർക്കാൻ ശ്രമിക്കുകയാണെന്ന് നേതാക്കൾ പറഞ്ഞു. കേരളത്തിലെ എല്ലാ പഞ്ചായത്തിലും വോട്ട് ചേർക്കാനും തിരുത്താനും വെട്ടി മാറ്റാനുമുള്ള അവകാശം പഞ്ചായത്ത് പ്രസിഡന്‍റിലും ഭരണസമിതിയിലും നിക്ഷിപ്തമല്ലെന്നിരിക്കെ വോട്ടർ പട്ടികയുമായി ബന്ധപ്പെട്ട് വണ്ണപ്പുറം പഞ്ചായത്ത് കമ്മിറ്റിക്കും പ്രസിഡന്‍റിനുമെതിരേ ഉപരോധവും സമരപരിപാടികളും സംഘടിപ്പിച്ച് യുഡിഎഫിനെ പൊതുജനമധ്യത്തിൽ ആക്ഷേപിക്കാനുള്ള ശ്രമം ജനം അവജ്ഞയോടെ തള്ളിക്കളയുമെന്ന് യുഡിഎഫ് ചെയർമാൻ പി.എം. ഇല്യാസ്, കണ്‍വീനർ ബേബി വട്ടക്കുന്നേൽ, സണ്ണി കളപ്പുരയ്ക്കൽ, പി.വി. ഷാഹുൽ ഹമീദ്, എം.ടി. ജോണി എന്നിവർ പറഞ്ഞു.

110 കെവി ലൈൻ നഷ്ടപരിഹാരം: പട്ടയം കിട്ടാത്തവരെ തഴയാൻ നീക്കം

നെടുങ്കണ്ടം: കുത്തുങ്കല്‍ - നെടുങ്കണ്ടം 110 കെവി വൈദ്യുത പദ്ധതിക്കു ടവറുകളും ലൈനുകളും സ്ഥാപിക്കുന്നതിനു നഷ്ടപരിഹാരം നൽകുന്നതിൽ പട്ടയം കിട്ടാത്തവരെ ഒഴിവാക്കാൻ കെഎസ്ഇബി നീക്കം. പട്ടയത്തിനായി കാത്തിരിക്കുന്ന കർഷകർക്കു നഷ്ടപരിഹാരം നൽകേണ്ടതില്ലെന്ന കടുംപിടിത്തത്തിലാണ് കെഎസ്ഇബി. എന്നാൽ, ഇതിനെതിരേ വ്യാപക പ്രതിഷേധം ഉയരുകയാണ്. പതിറ്റാണ്ടുകളായി ജീവിക്കുന്ന ഭൂമിക്കു പട്ടയം കിട്ടാത്തതു കർഷകരുടെ കുറ്റമല്ലെന്നു പ്രതിഷേധക്കാർ ചൂണ്ടിക്കാട്ടുന്നു. തങ്ങളുടെ വർഷങ്ങളുടെ അധ്വാനം നഷ്ടമാകുന്പോൾ കേവലം സാങ്കേതികത്വത്തിന്‍റെ പേരിൽ നഷ്ടപരിഹാരം നിഷേധിക്കുന്നതു കടുത്ത അനീതിയാണെന്നും ഇവർ പറയുന്നു. അഞ്ചു പഞ്ചായത്തുകളിലൂടെ കടന്നുപോകുന്നതാണ് പദ്ധതി. 44 കോടി ഇതിനായി വിനയോഗിക്കും. ടവറുകളും ലൈനുകളും കെഎസ്ഇബി സ്ഥാപിക്കാൻ സര്‍വേ പൂര്‍ത്തിയാക്കി. ടവറുകളും ലൈനുകളും വരുന്ന പ്രദേശങ്ങളില്‍ പതിറ്റാണ്ടുകളായി കര്‍ഷകര്‍ക്കു വീടുകളും കൃഷികളും ഉള്ളതാണ്. ലൈന്‍ കടന്നുപോകുന്ന ഭാഗങ്ങളില്‍ കുരുമുളക്, ഏലം, തെങ്ങ്. കവുങ്ങ്, ജാതി, കാപ്പി, വാഴ എന്നീ കൃഷികളും നൂറുകണക്കിനു വീടുകളും ഉള്‍പ്പെടെ ഏക്കര്‍ കണക്കിനു ഭൂമിയുണ്ട്. എന്നാല്‍, പട്ടയമുള്ള കര്‍ഷകര്‍ക്കുമാത്രമേ നഷ്ടപരിഹാരത്തുക നൽകാൻ കഴിയൂ എന്ന നിലപാട് സ്വീകരിച്ചിരിക്കുകയാണ് കെഎസ്ഇബി. കർഷകർക്ക് അർഹമായ നഷ്ടപരിഹാരം നൽകണം നെടുങ്കണ്ടം: അരനൂറ്റാണ്ടിലധികമായി കര്‍ഷകര്‍ താമസിച്ചു വരികയും കൃഷിചെയ്യുകയും ചെയ്യുന്ന ഭൂമിയിലെ കര്‍ഷകര്‍ക്കും അവരുടെ വീടിനും ജീവനോപാധികള്‍ക്കും അര്‍ഹമായ നഷ്ടപരിഹാരത്തുക നൽകാന്‍ കെഎസ്ഇബി തയാറാകണമെന്നു കേരള കോണ്‍ഗ്രസ് ഉടുമ്പന്‍ചോല നിയോജക മണ്ഡലം കമ്മിറ്റി ആവശ്യപ്പെട്ടു.യോഗത്തില്‍ കേരള കോണ്‍ഗ്രസ് ഉടുമ്പന്‍ചോല നിയേജക മണ്ഡലം പ്രസിഡന്‍റ് ജോജി ഇടപ്പള്ളിക്കുന്നേല്‍ അധ്യക്ഷത വഹിച്ചു. ഉന്നതാധികാരസമിതിയംഗം അഡ്വ. തോമസ് പെരുമന ഉദ്ഘാടനം ചെയ്തു. ജോസ് പൊട്ടംപ്ലാക്കല്‍, ടി.വി. ജോസുകുട്ടി, എം.ജെ. കുര്യന്‍, ജോയി കണിയാംപറമ്പില്‍, പി.ജി. പ്രകാശ്. ജോര്‍ജ് അരീപ്ലാക്കല്‍ തുടങ്ങിയവർ പ്രസംഗിച്ചു.

സിബിഎസ്ഇ ഇടുക്കി ജില്ലാ കലോത്സവത്തിന് തിരിതെളിഞ്ഞു

അടിമാലി: സിബിഎസ്ഇ ജില്ലാ കലോത്സവത്തിന് അടിമാലി വിശദീപ്തി പബ്ലിക് സ്കൂളിൽ തിരിതെളിഞ്ഞു. കലോത്സവ സമ്മേളനം ജില്ലാ കളക്ടർ ഡോ. ദിനേശൻ ചെറുവത്ത് ഉദ്ഘാടനം ചെയ്തു. സഹോദയ പ്രസിഡന്‍റ് റവ. ഡോ. സിജൻ പോൾ ഊന്നുകല്ലേൽ അധ്യക്ഷത വഹിച്ചു. യോഗത്തിൽ സിനിമാതാരം സുമേഷ് ചന്ദ്രൻ, സഹോദയ സെക്രട്ടറി സിസ്റ്റർ ഷെറിൻ തെക്കേൽ, ട്രഷറർ ഫാ. സുജിത്ത് തൊട്ടിയിൽ, വൈസ് പ്രസിഡന്‍റ് റവ. ഡോ. രാജേഷ് ജോർജ്, ജോയിന്‍റ് സെക്രട്ടറി സിസ്റ്റർ അൻസിൽ, സ്കൂൾ മാനേജർ ഫാ. ഷിന്‍റോ കോലോത്തുപടവിൽ, സഹോദയ ജോയിന്‍റ്് കൺവീനർ ഫാ. ജിയോ ജോസ്, പിടിഎ പ്രസിഡന്‍റ് വർഗീസ് പീറ്റർ തുടങ്ങിയവർ പ്രസംഗിച്ചു. ജില്ലയിലെ 31 സിബിഎസ്ഇ സ്കൂളുകളിൽനിന്നായി 2500 ഓളം വിദ്യാർഥികളാണ് രണ്ടുദിവസം നീണ്ടുനിൽക്കുന്ന കലോത്സവത്തിൽ പങ്കെടുക്കുന്നത്. ആദ്യദിനം മേളയുടെ കുച്ചിപ്പുടി, ഭരതനാട്യം, തിരുവാതിര, നാടോടി നൃത്തം, മൂകാഭിനയം തുടങ്ങിയവ അരങ്ങേറി. അറബി പദ്യങ്ങളുടെ ശീലകളുമായി മാപ്പിളപ്പാട്ടും ശുദ്ധ സംഗീതവുമായി ലളിതഗാനവും മലയാളം, ഇംഗ്ലീഷ്, സംസ്കൃതം, ഹിന്ദി പദ്യപാരായണ മത്സരവും പ്രസംഗം മത്സരവും വേദിയിൽ അരങ്ങേറി. തബലയും മൃദംഗവും ഓടക്കുഴലും കാഴ്ചക്കാരിൽ സന്തോഷം നിറച്ചപ്പോൾ പാശ്ചാത്യ സംഗീതത്തിൽ ഗിറ്റാറും വയലിനും ഒപ്പത്തിനൊപ്പം മുന്നേറി. വിവിധ വേദികളിൽ നടന്ന അറുപതോളം മത്സരങ്ങളിൽ 568 പോയിന്‍റുമായി വിശ്വദീപ്തി സിഎംഐ പബ്ലിക് സ്കൂൾ ഒന്നാം സ്ഥാനത്തും 564 പോയിന്‍റുമായി വിജയമാത പബ്ലിക് സ്കൂൾ തൂക്കുപാലം രണ്ടാം സ്ഥാനത്തും 500 പോയിന്‍റുമായി ക്രിസ്തുജ്യോതി രാജാക്കാട് മൂന്നാം സ്ഥാനത്തുമാണ്. ഇന്ന് കലോത്സവ വേദിയിൽ വിവിധ സ്റ്റേജുകളിലായി ഏകാങ്ക നാടകം, സംഘനൃത്തം, കോൽക്കളി, ഒപ്പന, മാർഗംകളി, പാശ്ചാത്യസംഗീതം, മോഹിനിയാട്ടം, ദേശഭക്തിഗാനം, സംഘഗാനം, ശാസ്ത്രീയ സംഗീതം, ലളിതഗാനം, മോണോ ആക്ട്, മിമിക്രി, വിവിധ ഭാഷകളിലെ പദ്യപാരായണവും പ്രസംഗമത്സരങ്ങളും അരങ്ങേറും. വൈകുന്നേരം സമ്മാനദാന ചടങ്ങിൽ ഇടുക്കി എസ്പി കെ.എം. സാബു മാത്യു, അഡ്വ. എ. രാജ എംഎൽഎ തുടങ്ങിയവർ പങ്കെടുക്കും.

പകരക്കാരനായി ജിതിൻ പോയത് മരണത്തിലേക്ക്

ചെറുതോണി: നഴ്സായ ജിതിൻ ജോർജിന്‍റെ വേർപാട് ഉൾക്കൊള്ളാനാകാതെ നാരകക്കാനം. ഏറ്റുമാനൂർ - പാലാ റോഡിൽ പുന്നത്തുറ കവലയ്ക്ക് സമീപം നിയന്ത്രണം നഷ്ടപ്പെട്ട 108 ആംബുലൻസ് കാറിൽ ഇടിച്ച് മറിഞ്ഞുണ്ടായ അപകടത്തിലാണ് ആംബുലൻസിലെ മെയിൽ നഴ്സായ ജിതിൻ മരിച്ചത്. നാരകക്കാനം നടുവിലേടത്ത് (കാണക്കാലിൽ) ജിതിൻ ജോർജി (39) ന്‍റെ അപകടമരണമറിഞ്ഞ് നടുവിലേടത്ത് വീടും നാരകക്കാനം ഗ്രാമവും ഒന്നാകെ ശോകമൂകമായി. ഇന്നലെ ഉച്ച കഴിഞ്ഞ് രണ്ടരയോടെയാണ് അപകടമുണ്ടായത്. ‌നഴ്സിംഗ് പഠനത്തിനുശേഷം കരാർ അടിസ്ഥാനത്തിൽ അടിമാലി താലൂക്ക് ആശുപത്രിയിൽ നഴ്സായി ജോലി ചെയ്യുകയായിരുന്നു ജിതിൻ. ഇവിടെനിന്നാണ് രോഗിക്കൊപ്പം 108 ആംബുലൻസിൽ നെടുങ്കണ്ടത്തേക്കും തുടർന്ന് കോട്ടയത്തേക്കും പോയത്. ജോലിക്ക് കയറേണ്ടിയിരുന്ന നഴ്സിന് അസൗകര്യം ഉണ്ടായതിനെത്തുടർന്ന് പകരം ജോലിക്കു കയറിയതാണ് ജിതിൻ. അടിമാലിയിൽനിന്നു രോഗിയെയും കൊണ്ട് ആംബുലൻസിൽ നെടുങ്കണ്ടം താലൂക്ക് ആശുപത്രിയിൽ എത്തിയപ്പോൾ കോട്ടയം മെഡിക്കൽ കോളജാശുപത്രിയിലേക്ക് പോകാൻ നിർദേശിച്ചു. തുടർന്ന് രോഗിയെയും കൊണ്ട് കോട്ടയത്തേക്ക് പോകുമ്പോഴായിരുന്നു അപകടം. ജിതിന്‍റെ പിതാവ് കാണക്കാലിൽ ജോർജ് 38 വർഷങ്ങൾക്ക് മുമ്പ് നേര്യമംഗലത്ത് ചരക്കുവാഹനം മറിഞ്ഞുണ്ടായ അപകടത്തിലാണ് മരിച്ചത്. മാതാവ് മരിയാപുരം മുൻ പഞ്ചായത്ത് അംഗമായ ഗ്രേസി (ഇപ്പോൾ സിഡിഎസ് ചെയർപേഴ്സൺ) മകന്‍റെ മരണവാർത്തയറിഞ്ഞ് ബോധരഹിതയായി വീണു. തുടർന്ന് നാട്ടുകാർ ഗ്രേസിയെ ആശുപത്രിയിലാക്കി. നടുക്കം വിട്ടുമാറാതെ തങ്കമ്മയും ചെറുമകളും ഗാന്ധിനഗർ: അപകടത്തിൽനിന്നു രക്ഷപ്പെട്ടെങ്കിലും തങ്കമ്മയ്ക്കും ചെറുമകൾ സോഫിയയ്ക്കും നടുക്കം വിട്ടുമാറിയിട്ടില്ല . രണ്ട് ദിവസമായായി ഇടുക്കി ഉടുമ്പൻചോല പാപ്പൻപാറ ഏർത്ത് കുന്നേൽ തങ്കമ്മ നെടുങ്കണ്ടം താലൂക്ക് ആശുപത്രിയിൽ ഹൃദ്‌രോഗത്തിന് ചികിത്സയിലായിരുന്നു. വിദഗ്ധ ചികിത്സയ്ക്കായി കോട്ടയം മെഡിക്കൽ കോളജ് ആശുപത്രിയിലേക്ക് പോകവേയാണ് അപകടമുണ്ടായത്. തങ്ങൾ ആംബുലൻസിന്‍റെ പുറകിലായിരുന്നതിനാൽ എന്താണ് സംഭവിച്ചതെന്ന് അറിയില്ലെന്ന് സോഫിയ പറഞ്ഞു. ഇടിയുടെ ആഘാതത്തിൽ ആംബുലൻസിന്‍റെ വാതിൽ തുറന്നുപോയി. അതിലൂടെ ഞങ്ങൾ പുറത്തേക്കിറങ്ങി. പിന്നീട് നാട്ടുകാരാണ് മറ്റൊരു വാഹനത്തിൽ കയറ്റി മെഡിക്കൽ കോളജ് ആശുപത്രിയിൽ എത്തിച്ചത്. എന്നാൽ ഗുരുതര പരിക്കേറ്റില്ലെന്നും അമ്മ ഷൈനിക്ക് നടക്കുന്നതിന് ബുദ്ധിമുട്ടുണ്ടെന്നും സോഫിയ പറഞ്ഞു. ആശുപത്രിയിൽ വച്ചാണ് കൂടെ ഉണ്ടായിരുന്ന മെയിൽ നഴ്സ് മരിച്ച വിവരം ഇവർ അറിയുന്നത്.

കവിതയിൽ താരങ്ങളായി ഇരട്ട സഹോദരിമാർ

അടിമാലി: സിബിഎസ്ഇ ജില്ലാ കലോത്സവത്തിൽ താരങ്ങളായി ഇരട്ട സഹോദരിമാർ. പുളിയന്മല കാർമൽ സിഎംഐ പബ്ലിക് സ്കൂളിലെ ഒമ്പതാം ക്ലാസ് വിദ്യാർഥിനികളും പുറ്റടി സ്വദേശികളുമായ റബേക്ക യൂജിൻ, റേച്ചൽ യൂജിൻ എന്നിവരാണ് നേട്ടം സ്വന്തമാക്കിയത്. റേച്ചലിന് മലയാളം പദ്യപാരായണത്തിലും ഇംഗ്ലീഷ് കവിതാ രചനയിലും ഒന്നാംസ്ഥാനം ലഭിച്ചപ്പോൾ റബേക്കയ്ക്ക് ഇംഗ്ലീഷ് പദ്യപാരായണത്തിലും ഹിന്ദി പദ്യപാരായണത്തിൽ രണ്ടാം സ്ഥാനം ലഭിച്ചു. ഇത് നാലാം വർഷമാണ് ഇരുവരും സഹോദയാ കലോത്സവ വേദിയിൽ എത്തുന്നത്.

അന്താരാഷ്‌ട്ര മാരത്തൺ: റയാൻ ആഷ്‌ലിക്ക് ഒന്നാംസ്ഥാനം

നെടുങ്കണ്ടം: യംഗ് ഇന്ത്യൻസ് കോവളം ചാപ്റ്റർ മുഖ്യ സംഘാടകരായി നടത്തിയ മൂന്നാമത് അന്താരാഷ‌്ട്ര കോവളം മാരത്തണിൽ 18-29 പ്രായപരിധി വിഭാഗത്തിൽ പാമ്പാടുംപാറ സ്വദേശി റയാൻ ആഷ്‌ലി ഒന്നാംസ്ഥാനത്തെത്തി. അഞ്ചു വിഭാഗങ്ങളിലായി നടന്ന 42.2 കിലോ മീറ്റർ ഫുൾ മാരത്തണില്‍ അയ്യായിരത്തിലധികം പേർ പങ്കെടുത്തു. 21.1 കിലോമീറ്റർ ഹാഫ് മാർത്തണിൽ തിരുവനന്തപുരം ജില്ലാ കളക്ടർ അനു കുമാരിയും മകനും പങ്കെടുത്തു . കോവളം ലീല കൺവൻഷൻ സെന്‌ററിൽനിന്ന് ആരംഭിച്ച മാരത്തൺ ശംഖുമുഖം കടപ്പുറത്താണ് സമാപിച്ചത്. റയാൻ ആഷ‌‌‌‌‌‌‌്‌ലി പാമ്പാടുംപാറ തേനംമാക്കൽ ആഷ്‌ലിയുടെയും മഞ്ജുവിന്‌റെയും മകനും തിരുവനന്തപുരം മാർ ഗ്രിഗോറിയോസ് ലോ കോളജിലെ അഞ്ചാം വർഷ വിദ്യാർഥിയുമാണ്.

കെ.സി. ജോർജ് നാടക പ്രതിഭാ പുരസ്കാരം എം.ജെ. ആന്‍റണിക്ക്

കട്ടപ്പന: പ്രഥമ കെ. സി. ജോർജ് നാടക പ്രതിഭാ പുരസ്കാരം നാടകകൃത്ത് എം.ജെ. ആന്‍റണിക്ക്. രണ്ട് തവണ മികച്ച നാടകകൃത്തിനുള്ള സംസ്ഥാന അവാർഡ് നേടിയ കെ.സി. ജോർജിന്‍റെ സ്മരണക്കായി കെസി സൗഹൃദ കൂട്ടായ്മയാണ് പുരസ്കാരം ഏർപ്പെടുത്തിയത്. കെസിയുടെ ഒന്നാം ചരമവാർഷികത്തോടനുബന്ധിച്ച് 23ന് വൈകുന്നേരം നാലിന് കട്ടപ്പന സിഎസ്ഐ ഗാർഡനിൽ നടത്തുന്ന അനുസ്മരണ സമ്മേളനത്തിൽ പ്രശസ്ത നാടക - സിനിമ നടൻ പ്രമോദ് വെളിയനാട് പുരസ്കാരം സമർപ്പിക്കും. 1977ൽ തിരുവനന്തപുരം കെസ്കയ്ക്ക് വേണ്ടി എഴുതിയ അന്പലം എന്ന നാടകം സംവിധാനം ചെയ്തത് തിലകനായിരുന്നു. തുടർന്ന് ചങ്ങനാശേരി ദർശന ആർട്ട്സ് സെന്‍ററിന്‍റെ ബന്ധനം, ഇരട്ടയാർ സിവൈഎം എൽ ന്‍റെ രാജ്യം ശക്തി മഹത്വം, പലായനം, കട്ടപ്പന ഹൈസയുടെ ബലിമുഹൂർത്തം, സർഗചേതനയുടെ തിരിച്ചറിവിന്‍റെ വൃക്ഷം തുടങ്ങിയ നാടകങ്ങൾ രചിച്ചു. സ്വർഗത്തിൽ ഒരു വിവാഹം, ഇസ്രായേലിന്‍റെ മുത്ത് എന്നീ നാടകങ്ങൾക്ക് 2010, 2012 വർഷങ്ങളിൽ മികച്ച നാടക രചനയ്ക്കുള്ള കെസിബിസി അവാർഡ് ലഭിച്ചു. കല്ലേറുദൂരം, തേനൊഴുകും ദേശം എന്നീ ഭക്തിഗാന ആൽബങ്ങളുടെ രചനയും നിർവഹിച്ചിട്ടുണ്ട്. 2022ൽ ഗുരുത്വം എന്ന നാടകം പുസ്തക രൂപത്തിൽ പ്രസിദ്ധീകരിച്ചു. കെഎസ്ആർടിസിയിൽ ജീവനക്കാരനായിരുന്ന ആന്‍റണി 2005ൽ സർവീസിൽനിന്ന് വിരമിച്ചു. ഭാര്യ മേരിക്കുട്ടി. ജയൻ, ദേവൻ, ഉണ്ണി എന്നിവരാണ് മക്കൾ. ഇ. ജെ. ജോസഫ്, ജി. കെ. പന്നാംകുഴി,എം. സി. ബോബൻ എന്നിവരടങ്ങുന്ന ജൂറിയാണ് പുരസ്കാര ജേതാവിനെ തെരഞ്ഞെടുത്തത്.

ചട്ടഭേദഗതി: കട്ടപ്പനയിൽ ഇന്ന് പ്രതിഷേധ റാലി

കട്ടപ്പന: സർക്കാർ നയങ്ങൾക്കെതിരേ പ്രതികരിക്കുന്ന യുഡിഎഫ് നേതാക്കളെ തെരുവിൽ കൈകാര്യം ചെയ്യുമെന്ന സിപിഎം നിലപാട് രാഷ‌്ട്രീയ പാപ്പരത്തമാണെന്ന് യുഡിഎഫ് ജില്ലാ ചെയർമാൻ ജോയി വെട്ടിക്കുഴി പത്ര സമ്മേളത്തിൽ ആരോപിച്ചു. ഭൂമി പതിവ് ചട്ട ഭേദഗതി തട്ടിപ്പിനെതിരേ ഇന്ന്് ഉച്ചകഴിഞ്ഞ് രണ്ടിന് കട്ടപ്പന സിഎസ്ഐ ഗാർഡനിൽ യുഡിഎഫ്പ്രതിഷേധ സംഗമവും കട്ടപ്പന ടൗണിൽ പ്രതിഷേധ റാലിയും നടത്തും. എല്ലാ മണ്ഡലം ആസ്ഥാനങ്ങളിലും 30ന് മുന്പ് യുഡിഎഫ് പ്രതിഷേധ സദ‌സുകൾ സംഘടിപ്പിക്കുമെന്നും അദ്ദേഹം പറഞ്ഞു. കട്ടപ്പനയിൽ നടക്കുന്ന പ്രതിഷേധ സംഗമം യുഡിഎഫ് കണ്‍വീനർ അഡ്വ. അടൂർ പ്രകാശ് എംപി ഉദ്ഘാടനം ചെയ്യും. പി.ജെ. ജോസഫ് എംഎൽഎ മുഖ്യ പ്രഭാഷണം നടത്തും. ഡീൻ കുര്യാക്കോസ് എംപി, സി.പി. മാത്യു, അഡ്വ. എസ്. അശോകൻ, അഡ്വ. ഇ.എം. ആഗസ്തി, ടി.എം. സലിം, സുരേഷ് ബാബു, ജി. വർഗീസ് തുടങ്ങിയവർ പ്രസംഗിക്കും. ആറ് വർഷങ്ങൾക്ക് മുന്പ് ഇടതു സർക്കാർ അടിച്ചേൽപ്പിച്ച കെട്ടിടനിർമാണ നിരോധനം പിൻവലിക്കുന്നതിന് സർക്കാർ കൊണ്ടുവന്ന നിയമഭേദഗതി പ്രശ്നങ്ങൾ പരിഹരിക്കുന്നതിന് പകരം പ്രതിസന്ധികൾ കൂടുതൽ സങ്കീർണമാക്കുകയാണ്. സർക്കാരിന്‍റെ കെട്ടിടനിർമാണ ചട്ടങ്ങളും നിയമങ്ങളുമനുസരിച്ച് നിർമിച്ചതും എല്ലാ നികുതികളും അടച്ചിട്ടുള്ളതും ഇപ്പോഴും തദ്ദേശ സ്വയംഭരണ സ്ഥാപനങ്ങളിൽ നികുതിയടയ്ക്കുന്നതുമായ കെട്ടിട ഉടമകൾ ഇടുക്കിയിൽ മാത്രം ഫീസ് അടച്ച് അപേക്ഷകൾ സമർപ്പിച്ച് ക്രമവത്്കരിക്കണമെന്നും പിഴ അടയ്ക്കണമെന്നുമുള്ള വ്യവസ്ഥ നീതിനിഷേധമാണ്. ഒരേ നിയമമനുസരിച്ച് രാഷ‌്ട്രീയപാർട്ടികളും സംഘടനകളും സമുദായങ്ങളും നിർമിച്ച കെട്ടിടങ്ങൾ നിയമപരവും വ്യക്തികളുടെ നിർമിതികൾ നിയമവിരുദ്ധവുമാകുന്നത് കാട്ടുനിയമമാണെന്നും ജോയി വെട്ടിക്കുഴി പറഞ്ഞു. പത്രസമ്മേളനത്തിൽ അഡ്വ. തോമസ് പെരുമന, തോമസ് മൈക്കിൾ, അഡ്വ. കെ.ജെ. ബെന്നി, ജോജോ കുടക്കച്ചിറ, സിജു ചക്കുംമുട്ടിൽ തുടങ്ങിയവരും പങ്കെടുത്തു.

ചതുപ്പില്‍ അകപ്പെട്ട പശുവിനെ ഫയര്‍ഫോഴ്‌സ് രക്ഷപ്പെടുത്തി

നെടുങ്കണ്ടം: കല്ലാര്‍ പുഴയിലെ ചതുപ്പില്‍ അകപ്പെട്ട പശുവിനെ ഫയര്‍ ഫോഴ്‌സ് രക്ഷപ്പെടുത്തി. ഇന്നലെ ഉച്ചയ്ക്ക് 12 ഓടെയാണ് കല്ലാര്‍ കാരിപ്പുഴയില്‍ ശോഭനയുടെ പശു കല്ലാര്‍ പുഴയിലെ ചതുപ്പില്‍ അകപ്പെട്ടത്. മേയുന്നതിനായി പുഴയോരത്ത് വിട്ട പശു കാല്‍വഴുതി ചതുപ്പില്‍ താഴ്ന്നുപോകുകയായിരുന്നു. നെടുങ്കണ്ടം ഫയര്‍ ഫോഴ്‌സ് മണിക്കൂറിലധികം പരിശ്രമിച്ചാണ് പശുവിനെ കരയ്‌ക്കെത്തിച്ചത്. ഫയര്‍ ഫോഴ്‌സ് അസി. സ്റ്റേഷന്‍ ഓഫിസര്‍ പി.ഇ. സന്തോഷ്, ഉദ്യോഗസ്ഥരായ സജേഷ്, സന്തോഷ്, ബിബിന്‍, മാത്യു, ബിനീഷ്, റെജിമോന്‍ എന്നിവരുടെ നേതൃത്വത്തിലാണ് രക്ഷാപ്രവര്‍ത്തനം നടത്തിയത്.

വന്യജീവി ആക്രമണം: കാന്തല്ലൂരിൽ ഹെൽപ്പ് ഡെസ്ക്

മറയൂർ: സംസ്ഥാന വനംവകുപ്പിന്‍റെ മനുഷ്യ-വന്യജീവി സംഘർഷ ലഘുകരണ തീവ്രയജ്ഞ പരിപാടിയുടെ ഭാഗമായി കാന്തല്ലൂർ പഞ്ചായത്ത് ഓഫീസിൽ വനംവകുപ്പ് ഹെൽപ്പ് ഡെസ്ക് ആരംഭിച്ചു. പഞ്ചായത്ത് ഹാളിൽ നടന്ന യോഗം പഞ്ചായത്ത് പ്രസിഡന്‍റ് പി.ടി. തങ്കച്ചൻ ഉദ്ഘാടനം ചെയ്തു. പഞ്ചായത്ത് അംഗം മോഹൻദാസ്, കാന്തല്ലൂർ ഫോറസ്റ്റ് റേഞ്ച് ഓഫീസർ ഷിനു എസ്. മുഹമ്മദ്, ഡെപ്യൂട്ടി റേഞ്ച് ഓഫീസർ കെ.എസ്. മുത്തുകുമാർ, വണ്ണാന്തുറ ഡെപ്യൂട്ടി ഫോറസ്റ്റ് റേഞ്ച് ഓഫീസർ എ. ഗിരിചന്ദ്രൻ, മൂന്നാർ ഫ്ലയിംഗ് സ്ക്വാഡ് ഡെപ്യൂട്ടി റേഞ്ച് ഓഫീസർ അബൂബക്കർ സിദ്ദിഖ് എന്നിവർ പ്രസംഗിച്ചു. രാവിലെ 10 മുതൽ വൈകുന്നേരം അഞ്ചു വരെ വനംവകുപ്പ് ഉദ്യോഗസ്ഥന്‍റെ സേവനം ലഭ്യമാണ്. യോഗത്തിന് പിന്നാലെ, ആനശല്യം മൂലമുള്ള പ്രശ്നങ്ങൾക്ക് പരിഹാരം ആവശ്യപ്പെട്ട് പഞ്ചായത്ത് അംഗം മണികണ്ഠൻ പരാതി നൽകി.

പട്ടയ നിയമഭേദഗതി കേരളത്തെ പ്രതികൂലമായി ബാധിക്കും: രാജു അപ്‌സര

തിരുവനന്തപുരം: 2023ലെ പട്ടയ നിയമഭേദഗതി കേരളത്തെ ആകെ പ്രതികൂലമായി ബാധിക്കുമെന്നു കേരള വ്യാപാരി വ്യവസായി ഏകോപന സമിതി സംസ്ഥാന പ്രസിഡന്‍റ് രാജു അപ്‌സര. നിയമ ഭേദഗതിയിലും ചട്ടങ്ങളിലും ഉണ്ടായിട്ടുള്ള ജനങ്ങളെ ബാധിക്കുന്ന ഗുരുതരമായ വ്യവസ്ഥകള്‍ പിന്‍വലിക്കണമെന്നാവശ്യപ്പെട്ട് ഇടുക്കി ജില്ലയിലെ യൂണിറ്റ് ഭാരവാഹികളായ 590 പേര്‍ സെക്രട്ടേറിയറ്റിനു മുന്നില്‍ സംഘടിപ്പിച്ച സത്യഗ്രഹ സമരം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഇത് ഇടുക്കി ജില്ലയുടെ മാത്രം പ്രശ്‌നമല്ല, സംസ്ഥാനത്തെ ആകെ ബാധിക്കുന്ന പ്രശ്‌നമാണ്. ഇതിനെതിരേ സമിതി സംസ്ഥാന വ്യാപകമായി സമരത്തിലേക്ക് നീങ്ങുകയാണെന്നും ഇടുക്കി ജില്ലയിലെ ജനങ്ങളോടൊപ്പം കേരള വ്യാപാരി വ്യവസായി ഏകോപന സമിതി ഒന്നടങ്കം നിലകൊള്ളണമെന്നും അദ്ദേഹം പറഞ്ഞു. ഇടുക്കി ജില്ലാ പ്രസിഡന്‍റ് സണ്ണി പൈമ്പിള്ളില്‍ അധ്യക്ഷത വഹിച്ചു. തിരുവനന്തപുരം ജില്ലാ പ്രസിഡന്‍റ് ധനീഷ് ചന്ദ്രന്‍, പത്തനംതിട്ട ജില്ലാ പ്രസിഡന്‍റ് എ.ജെ. ഷാജഹാന്‍, സംസ്ഥാന സെക്രട്ടറി വൈ. വിജയന്‍, ഇടുക്കി ജില്ലാ വര്‍ക്കിംഗ് പ്രസിഡന്‍റ് കെ.ആര്‍. വിനോദ്, വൈസ് പ്രസിഡന്‍റ് പി.എം. ബേബി, ഇടുക്കി ജില്ലാ സെക്രട്ടറി ഹാജി നജീബ് ഇല്ലത്തുപറമ്പില്‍, സിബി കൊച്ചുവള്ളാട്ട് എന്നിവര്‍ പ്രസംഗിച്ചു.

നാരകക്കാനം മൃഗാശുപത്രിയിൽ ഡോക്ടറെ നിയമിക്കണമെന്ന്

ചെറുതോണി: നാരകക്കാനത്ത് പ്രവർത്തിക്കുന്ന മരിയാപുരം പഞ്ചായത്ത് മൃഗാശുപത്രിയിൽ ഡോക്ടറെ നിയമിക്കണമെന്ന് കേരള കർഷക യൂണിയൻ സംസ്ഥാന പ്രസിഡന്‍റ്് വർഗീസ് വെട്ടിയാങ്കൽ ആവശ്യപ്പെട്ടു. പഞ്ചായത്തിലെ ഡബിൾ കട്ടിംഗ്, അമലഗിരി, നാരകക്കാനം, കല്ല്യാണത്തണ്ട്, ഡാംടോപ്പ്, ഇടുക്കി, മരിയാപുരം, ചട്ടിക്കുഴി, തകരപ്പിള്ളിമേട് പ്രദേശങ്ങളിലെ ക്ഷീരകർഷകരുടെ ആശ്രയകേന്ദ്രമാണ് നാരകക്കാനത്തെ ആശുപത്രി. മൃഗാശുപത്രിയിലുണ്ടായിരുന്ന ഡോക്ടർ സ്ഥലം മാറിപോയപ്പോൾ പുതിയ ഡോക്ടറെ നിയമിക്കാത്തത് ക്ഷീരകർഷകരെ പ്രതിസന്ധിയിലാക്കിയിരിക്കയാണ്. മൃഗാശുപത്രിയിൽ ഡോക്ടറെ നിയമിക്കണമെന്ന് ആവശ്യപ്പെട്ട് വർഗീസ് വെട്ടിയാങ്കൽ മൃഗസംരക്ഷണ മന്ത്രി ജെ. ചിഞ്ചുറാണിക്കും സംസ്ഥാന മൃഗസംരക്ഷണ വകുപ്പ് ഡയറക്ടർക്കും ജില്ലാ മൃഗസംരക്ഷണ ഡെപ്യൂട്ടി ഡയറക്ടർക്കും ഇ-മെയിൽ വഴി നിവേദനം നൽകി.

"രാജകുമാരി പഞ്ചായത്തിൽ വിഭജനം തോന്നിയപടി'

രാജകുമാരി: രാജകുമാരി പഞ്ചായത്തിലെ വാർഡ് വിഭജനം അശാസ്ത്രീയമാണെന്ന് കോൺഗ്രസ്. കരട് വിജ്ഞാപനം വന്നപ്പോൾത്തന്നെ രേഖാമൂലം ആക്ഷേപം ഉന്നയിച്ചെങ്കിലും നടപടി ഉണ്ടായില്ലെന്ന് കോൺഗ്രസ് മണ്ഡലം പ്രസിഡന്‍റ് റോയി ചാത്തനാട്ട്, ബോസ് പുത്തയത്ത്, സുനിൽ വാരിക്കാട്ട് എന്നിവർ പറഞ്ഞു. ഉദ്യോഗസ്ഥർ ഹിയറിംഗിന് എത്തിയപ്പോൾ ഓരോ വാർഡിലെയും പരാതികൾ പരിശോധിക്കുമെന്നും പ്രശ്നങ്ങൾ പരിഹരിക്കുമെന്നും ഉറപ്പു നൽകിയിരുന്നു. എന്നാൽ, അന്തിമ വിജ്ഞാപനം വന്നപ്പോൾ ഒന്നാം വാർഡിന്‍റെയും പതിന്നാലാം വാർഡിന്‍റെയും അതിരുകൾ തമ്മിലുള്ള വ്യത്യാസം പരിഹരിച്ചില്ല. അതിനാൽ കുറച്ചു വീടുകൾ രണ്ടു വാർഡിലും ഉൾപ്പെടുന്ന സ്ഥിതിയാണ്. ഏകപക്ഷീയമോ ? മറ്റു വാർഡുകളിലും അതിർത്തിനിർണയത്തിൽ അപാകത ഉണ്ടെന്നും തെരഞ്ഞെടുപ്പ് കമ്മീഷനു പരാതി നൽകിയിട്ടുണ്ടെന്നും നേതാക്കൾ പറഞ്ഞു. വാർഡ് മാറിയ വോട്ടുകൾ ക്രമീകരിക്കണമെന്ന് ആവശ്യപ്പെട്ട് പഞ്ചായത്ത് സെക്രട്ടറിക്കു പരാതി നൽകിയെങ്കിലും നടപടി ഉണ്ടായില്ലെന്നും പഞ്ചായത്തു സെക്രട്ടറി സിപിഎം നിർദേശപ്രകാരം ഏകപക്ഷീയമായി വോട്ടേഴ്സ് ലിസ്റ്റ് ഉണ്ടാക്കിയെന്നും കോൺഗ്രസ് ആരോപിച്ചു. പഞ്ചായത്തിലെ സ്ഥിരതാമസക്കാരല്ലാത്തവരെ വോട്ടർപട്ടികയിൽ ഉൾപ്പെടുത്തിയപ്പോൾ സ്ഥിരതാമസക്കാരായ യുഡിഎഫ് അനുഭാവികളുടെ വോട്ട് വെട്ടിമാറ്റിയെന്നും കോൺഗ്രസ് നേതാക്കൾ പറഞ്ഞു. സിപിഎം ഏരിയ സെക്രട്ടറിയും മുൻ പഞ്ചായത്ത് പ്രസിഡന്‍റുമായ സുമ സുരേന്ദ്രന് രാജാക്കാട് പഞ്ചായത്തിലും രാജകുമാരി പഞ്ചായത്തിലും വോട്ട് ഉണ്ടെന്നും നേതാക്കൾ ആരോപിച്ചു. വോട്ടർ പട്ടികയിൽ ക്രമക്കേടെന്നു പരാതി നെടുംകണ്ടം: വോട്ടര്‍ പട്ടികയില്‍ കൃത്രിമം കാണിച്ചു ഭരണത്തുടര്‍ച്ച നേടാനുള്ള സിപിഎം കുതന്ത്രങ്ങളെ ശക്തമായി നേരിടുമെന്നു കോണ്‍ഗ്രസ് നെടുങ്കണ്ടം ബ്ലോക്ക് പ്രസിഡന്‍റ് സി.എസ്. യശോധരന്‍. മാര്‍ഗനിര്‍ദേശങ്ങള്‍ കാറ്റില്‍പറത്തി സിപിഎം ഭരിക്കുന്ന ഗ്രാമപഞ്ചായത്തുകളില്‍ പാര്‍ട്ടി നേതാക്കളുടെ സമ്മര്‍ദത്തിനു വഴങ്ങി പഞ്ചായത്ത് സെക്രട്ടറിമാര്‍ യുഡിഎഫ് വോട്ടര്‍മാരെ വോട്ടര്‍പട്ടികയില്‍നിന്നു വ്യാപകമായി ഒഴിവാക്കി. പുതുക്കിയ ലിസ്റ്റില്‍ പല പഞ്ചായത്തുകളിലും വര്‍ഷങ്ങളായി സ്ഥിരതാമസക്കാരായ യുഡിഎഫ് വോട്ടര്‍മാരുടെ പേരുകള്‍ നീക്കം ചെയ്യപ്പെട്ടിരിക്കുന്നു. വോട്ടര്‍ പട്ടിക പുതുക്കുമ്പോള്‍ അര്‍ഹരായവരെ ഒഴിവാക്കിയിട്ടില്ലെന്ന് ഉറപ്പാക്കാൻ ചുമതലപ്പെട്ട സെക്രട്ടറിമാര്‍ ഇക്കാര്യത്തില്‍ വീഴ്ച വരുത്തിയത് 1994ലെ കേരള പഞ്ചായത്ത് രാജ് ആക്ട് 28-ാം വകുപ്പ് പ്രകാരം കുറ്റകരമാണെന്നിരിക്കേ ഇവര്‍ക്കെതിരേ ശക്തമായ നടപടി സ്വീകരിക്കണമെന്നു സംസ്ഥാന തെരഞ്ഞെടുപ്പ് കമ്മീഷനോട് അദ്ദേഹം‍ ആവശ്യപ്പെട്ടു.

അഭിമാനത്തിന്‍റെ "പച്ചത്തുരുത്തിൽ’ ന്യൂമാൻ കോളജ്

തൊടുപുഴ: കേരള സർക്കാരിന്‍റെ പച്ചത്തുരുത്ത് പുരസ്കാരം ന്യൂമാൻ കോളജിന്. ഇടുക്കി ജില്ലയിലെ ഏറ്റവും മികച്ച പച്ചത്തുരുത്തായി സർക്കാർ തെരഞ്ഞെടുത്ത കോളജിനുള്ള പുരസ്കാരം ന്യൂമാൻ കോളജ്, പത്തനംതിട്ട ജില്ലാ കളക്ടർ എസ്. ഹരികിഷോറിൽനിന്ന് ഏറ്റുവാങ്ങി. 1964ൽ സഹ്യന്‍റെ മടിത്തട്ടിൽ, തൊടുപുഴയാറിന്‍റെ സമീപത്ത് സ്ഥാപിതമായ കോളജാണ് കലാലയ വിഭാഗത്തിൽ മികച്ച പച്ചത്തുരുത്തായി അംഗീകരിക്കപ്പെട്ടത്. 2021ൽ ഹരിത കേരളം മിഷന്‍റെ ഇടപെടലിലൂടെ ഏകദേശം 10 സെന്‍റ് വരണ്ട ഭൂമിയിൽ തുടക്കമിട്ട പച്ചത്തുരുത്ത് ഇന്ന് ഒരേക്കറിൽ, അതിജീവനത്തിന്‍റെ മാതൃകയും ജൈവവൈവിധ്യ സംരക്ഷണത്തിന്‍റെ അടയാളമായും മാറി. ന്യൂമാനിലെ ബൊട്ടാണിക്കൽ ഗാർഡനിൽ വ്യത്യസ്ത വിഭാഗത്തിലുൾപ്പെട്ട വിവിധയിനം സസ്യങ്ങളെ നട്ട് പരിപാലിക്കുമ്പോൾ തുളസി, അശ്വഗന്ധ, ശംഖുപുഷ്പം തുടങ്ങിയ ആയുർവേദ സസ്യങ്ങളും ഇവിടെയുണ്ട്. സുഗന്ധവ്യഞ്ജനങ്ങളെ "സ്പൈസ് ഗാർഡൻ’എന്ന വിഭാഗത്തിൽ പരിപാലിക്കുന്നു. ഏലം, കുരുമുളക്, കറുവപ്പട്ട, ഇഞ്ചി, ഗ്രാമ്പൂ തുടങ്ങിയ സസ്യങ്ങൾ ഇവിടെയുണ്ട്. ആന്തൂറിയം, ജെർബറ, റോസ്, ഗ്ലാഡിയോളസ് തുടങ്ങിയ പുഷ്പങ്ങൾ കാന്പസിനെ കൂടുതൽ സുന്ദരിയാക്കുന്നു. ജ്യോതിശാസ്ത്രത്തിന്‍റെ അടയാളങ്ങളായ 27 ഇനം സസ്യങ്ങളെ ’സ്റ്റാർ ഫോറസ്റ്റ്’ എന്ന വിഭാഗത്തിൽ ഉൾപ്പെടുത്തി സംരക്ഷിച്ചിട്ടുണ്ട്. ’ഫ്ലോറ ഓഫ് ന്യൂമാൻ’ എന്ന ശാസ്ത്രഗ്രന്ഥവും പുറത്തിറക്കിയിട്ടുണ്ട്. ഹരിതകേരളം മിഷന്‍റെ നേതൃത്വത്തിൽ ആരംഭിച്ച ’നെറ്റ് സീറോ കാർബൺ കേരളം ജനങ്ങളിലൂടെ’ എന്ന പദ്ധതിയിൽ ന്യൂമാൻ കോളജിനെയും ഉൾപ്പെടുത്തിയിട്ടുണ്ട്. അഞ്ഞൂറിലധികം വൃക്ഷങ്ങൾ കലാലയത്തിന്‍റെ വിവിധ മേഖലകളിൽ പരിപാലിക്കുന്നതിലൂടെ കാർബൺ സെക്കസ്ട്രേഷനിൽ കോളജ് പുതിയ മാതൃക സൃഷ്ടിക്കുകയാണ്. കോളജ് രക്ഷധികാരി മാർ ജോർജ് മഠത്തിൽകണ്ടത്തിൽ, മാനേജർ മോൺ.ഡോ. പയസ് മലേകണ്ടത്തിൽ, കോർപറേറ്റ് എഡ്യൂക്കേഷൻ സെക്രട്ടറി റവ. ഡോ.പോൾ പാറത്താഴം എന്നിവരുടെ മേൽനോട്ടത്തിൽ ബയോഡൈവേഴ്സിറ്റി ക്ലബ് കോർഡിനേറ്റർ ഡോ. ജയ്ബി സിറിയക്, കോളജ് ബർസാർ ഫാ.ബെൻസൺ ആന്‍റണി, വൈസ് പ്രിൻസിപ്പൽ ഡോ. സാജു എബ്രഹാം, അധ്യാപകർ, അനധ്യാപകർ,വിദ്യാർഥികൾ തുടങ്ങിയവരുടെ ഒത്തൊരുമയും കഠിനാധ്വാനവുമാണ് നേട്ടത്തിനു പിന്നിലെന്ന് പ്രിൻസിപ്പൽ ഡോ.ജെന്നി കെ. അലക്സ് അറിയിച്ചു.

താഴ്ന്നുകിടക്കുന്ന വൈദ്യുതിലൈൻ അപകടഭീഷണി

കരിമണ്ണൂർ: നെയ്യശേരി - തോക്കുന്പൻസാഡിൽ റോഡ് നിർമാണത്തിന്‍റെ ഭാഗമായി റോഡിന്‍റെ ഉയരം വർധിപ്പിച്ചതു മൂലം വൈദ്യുതി ലൈനുകൾ വാഹനങ്ങളിൽ തട്ടുന്ന വിധം താഴ്ന്നതായി പരാതി. ഇതോടെ റോഡിന് നടുവിൽ കൂടി മാത്രം വാഹനങ്ങൾ ഓടിക്കേണ്ട സ്ഥിതിയാണുള്ളതെന്ന് ഡ്രൈവർമാരും നാട്ടുകാരും പറഞ്ഞു. എതിർ ദിശയിൽ നിന്നെത്തുന്ന വാഹനങ്ങൾ സൈഡ് കൊടുക്കാനായി റോഡരികിലേക്ക് മാറ്റിയാൽ ബസ് ഉൾപ്പെടെയുള്ള വാഹനങ്ങൾ വൈദ്യുതി ലൈനിൽ തട്ടുന്ന സാഹചര്യമാണുള്ളത്. ഇത് വലിയ അപകടത്തിനിടയാക്കുമെന്നാണ് ഇവരുടെ ഭയം. ഇതിനു പുറമേ കരാർ കന്പനിയുടെ ഉൾപ്പെടെ വലിയ വാഹനങ്ങൾ തുടർച്ചയായി കടന്നുപോകുന്പോൾ ലൈനുകളിൽ തട്ടുകയും ഇതുമൂലം അമിത വൈദ്യുതി പ്രവാഹമുണ്ടായി സമീപ വീടുകളിലെ ഇലക‌്ട്രിക് ഉപകരണങ്ങൾ കത്തിനശിക്കുകയും ചെയ്യുന്നതായും പരാതിയുണ്ട്. റോഡിന്‍റെ നിർമാണച്ചുമതലയുള്ള കഐസ്ടിപിയും കരാർ കന്പനിയുമാണ് ഇതു ചെയ്യേണ്ടതെന്ന നിലപാടിലാണ് കെഎസ്ഇബി അധികൃതർ. എത്രയും വേഗം വൈദ്യുതി ലൈൻ ഉയർത്തി അപകടഭീഷണി ഒഴിവാക്കാൻ അധികൃതർ തയാറാകണമെന്നാണ് നാട്ടുകാരുടെ ആവശ്യം.

ടീച്ചർ എലിജിബിലിറ്റി ടെസ്റ്റ് : സർക്കാർ ഇടപെടണം: കെപിഎസ്ടിഎ

തൊടുപുഴ: ടീച്ചർ എലിജിബിലിറ്റി ടെസ്റ്റുമായി ബന്ധപ്പെട്ട സുപ്രീംകോടതി ഉത്തരവ് അര ലക്ഷത്തിലധികം അധ്യാപകരുടെ ജോലി സ്ഥിരതയെ ബാധിക്കുന്നതിനാൽ പ്രശ്നപരിഹാരത്തിനായി കേന്ദ്ര, സംസ്ഥാന സർക്കാരുകൾ അടിയന്തരമായി ഇടപെടണമെന്ന് കെപിഎസ്ടിഎ ആവശ്യപ്പെട്ടു. ഈ ആവശ്യം ഉന്നയിച്ച് കെപിഎസ് ടിഎ തൊടുപുഴ സബ്ജില്ല കമ്മിറ്റിയുടെ നേതൃത്വത്തിൽ തൊടുപുഴയിൽ പ്രതിഷേധ സായാഹ്നം സംഘടിപ്പിച്ചു. സംസ്ഥാന സെക്രട്ടറി പി.എം. നാസർ ഉദ്ഘാടനം ചെയ്തു. 2009ൽ നിലവിൽവന്ന കേന്ദ്ര വിദ്യാഭ്യാസ അവകാശ നിയമപ്രകാരം അധ്യാപകർക്ക് ടീച്ചർ എലിജിബിലിറ്റി ടെസ്റ്റ് നിർബന്ധമാക്കിയിരുന്നു. യോഗ്യത നേടാത്ത അധ്യാപകർ അഞ്ചുവർഷത്തിലധികം സർവീസ് ഉള്ളവരാണെങ്കിൽ സുപ്രീംകോടതി അനുവദിച്ച രണ്ടു വർഷത്തിനുശേഷവും പരീക്ഷ പാസായില്ലെങ്കിൽ സർവീസിൽനിന്ന് പുറത്തുപോകേണ്ട സാഹചര്യമാണ് ഉണ്ടായിരിക്കുന്നത്. അധ്യാപകരുടെ ജോലി സുരക്ഷ ഉറപ്പുവരുത്തുന്നതിന് പുനഃപരിശോധന ഹർജിയുമായി സുപ്രീംകോടതിയെ സമീപിക്കുന്നതിന് സംസ്ഥാന സമിതി തീരുമാനിച്ചതായി അദ്ദേഹം പറഞ്ഞു. പ്രസിഡന്‍റ് ദീപു ജോസ് അധ്യക്ഷത വഹിച്ചു. സംസ്ഥാന നിർവാഹക സമിതി അംഗം ബിജോയി മാത്യു, ജില്ലാ സെക്രട്ടറി സുനിൽ ടി. തോമസ്, ട്രഷറർ ഷിന്‍റോ ജോർജ്, സജി മാത്യു, വി.ആർ. രതീഷ്, ലിജോമോൻ ജോർജ്, രാജിമോൻ ഗോവിന്ദ്, സിനി ട്രീസ, ജീസ് എം. അലക്സ്, ജിബിൻ ജോസഫ്, ജോസഫ് മാത്യു, മിനിമോൾ, ജിന്‍റോ ജോർജ് എന്നിവർ പ്രസംഗിച്ചു.

ബോധവത്കരണ സെമിനാർ

തൊടുപുഴ: അൽ അസ്ഹർ കോളജിൽ ആന്‍റി റാഗിംഗ് ബോധവത്കരണ സെമിനാർ സംഘടിപ്പിച്ചു. ജില്ലാ അഡീഷണൽ പോലീസ് സൂപ്രണ്ട് ഇമ്മാനുവൽ പോൾ ഉദ്ഘാടനംചെയ്തു. അൽ അസ്ഹർ ഗ്രൂപ്പ് മാനേജിംഗ് ഡയറക്ടർ കെ.എം. മിജാസ് അധ്യക്ഷത വഹിച്ചു. ജില്ലാ ലീഗൽ സർവീസസ് അഥോറിറ്റി പാനൽ അഭിഭാഷകൻ പ്രേംജി സുകുമാരൻ ക്ലാസ് നയിച്ചു. ഡിവൈഎസ്പി പി.കെ. സാബു മുഖ്യപ്രഭാഷണം നടത്തി. അൽ അസ്ഹർ പോളിടെക്നിക് പ്രിൻസിപ്പൽ ഡോ. ഷാൻ എം. അസീസ്, അക്കാദമിക് ഡയറക്ടർ പ്രഫ. കെ.എ. ഖാലിദ്, വി.എ. ബിജു, എസ്.എസ്. താജുദ്ദീൻ എന്നിവർ പ്രസംഗിച്ചു.

ജില്ലയിൽ വികസനസദസ് 22 മുതൽ

ഇടുക്കി: സംസ്ഥാന സർക്കാരിന്‍റെ വികസന നേട്ടങ്ങൾ ജനങ്ങളിലെത്തിച്ച് ജനാഭിപ്രായം ലഭ്യമാക്കുകയും ഭാവി വികസനത്തിനായുള്ള ആശയങ്ങളും നിർദേശങ്ങളും സ്വരൂപിക്കുകയും ചെയ്യുക എന്ന ലക്ഷ്യത്തോടെ സംഘടിപ്പിക്കുന്ന വികസന സദസ് ജില്ലയിൽ 22 മുതൽ ഒക്ടോബർ 20 വരെ നടക്കും. അതത് തദ്ദേശ സ്ഥാപനങ്ങളുടെ മേൽനോട്ടത്തിലാണ് വികസനസദസുകൾ സംഘടിപ്പിക്കുക. പഞ്ചായത്തുകളിൽ 250 മുതൽ 300 പേരും നഗരസഭകളിൽ 1000 പേരും വികസന സദസിൽ പങ്കെടുക്കും. അതിദാരിദ്ര്യ നിർമാർജനം, ലൈഫ് മിഷൻ പദ്ധതികളുടെ ഭാഗമായി ഭൂമി വിട്ടുനൽകിയവർ, ഹരിതകർമ സേനാംഗങ്ങൾ തുടങ്ങി സർക്കാരിന്‍റെ വികസന പ്രവർത്തനങ്ങളിൽ പങ്കാളികളായവരെ ആദരിക്കും. വികസനനേട്ടങ്ങളുടെ അവതരണം തദ്ദേശ സ്ഥാപന സെക്രട്ടറിമാർ നടത്തും. തുടർന്ന് പൊതുജനങ്ങളിൽനിന്നുള്ള അഭിപ്രായവും നിർദേശങ്ങളും ആശയങ്ങളും അവതരിപ്പിക്കുന്ന ഓപ്പണ്‍ ഫോറവും ചർച്ചയും നടക്കും. 22ന് ബൈസണ്‍വാലി, കുമാരമംഗലം, 23ന് ചിന്നക്കനാൽ, ഉടുന്പൻചോല, 24ന് ഏലപ്പാറ, ഇരട്ടയാർ, 25ന് വണ്ടൻമേട്, 26ന് കൊന്നത്തടി, 30ന് കാമാക്ഷി, കാഞ്ചിയാർ, കാന്തല്ലൂർ, ഒക്ടോബർ രണ്ടിന് അടിമാലി, മൂന്നിന് വെള്ളത്തൂവൽ, അഞ്ചിന് കൊക്കയാർ, ആറിന് മരിയാപുരം, മുട്ടം, ഏഴിന് ഉടുന്പന്നൂർ, അയ്യപ്പൻകോവിൽ, ആലക്കോട്, എട്ടിന് മൂന്നാർ, ഒൻപതിന് ഉപ്പുതറ, വാത്തിക്കുടി, വട്ടവട, മാങ്കുളം, കരിമണ്ണൂർ, പാന്പാടുംപാറ, 10ന് വെള്ളിയാമറ്റം, കരുണാപുരം, ദേവികുളം, കോടിക്കുളം, 13ന് വണ്ണപ്പുറം, കുമളി, 14ന് ചക്കുപള്ളം, രാജാക്കാട്, 15ന് സേനാപതി, ശാന്തൻപാറ, ഇടമലക്കുടി, അറക്കുളം, 16ന് കരിങ്കുന്നം, കുടയത്തൂർ, നെടുങ്കണ്ടം, 17ന് വണ്ടിപ്പെരിയാർ, പുറപ്പുഴ, പെരുവന്താനം, 18ന് ഇടവെട്ടി, മണക്കാട്, പള്ളിവാസൽ, രാജകുമാരി, തൊടുപുഴ, കട്ടപ്പന നഗരസഭകൾ, 19ന് പീരുമേട്, 27ന് വാഴത്തോപ്പ് പഞ്ചായത്ത് എന്നിങ്ങനെയാണ് വികസന സദസ് സംഘടിപ്പിക്കുന്നത്. വികസനസദസിന്‍റെ സംഘാടനവുമായി ബന്ധപ്പെട്ട് ചേർന്ന യോഗം ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ ഉദ്ഘാടനം ചെയ്തു. സ്റ്റാൻഡിംഗ് കമ്മിറ്റി ചെയർമാൻ കെ.ജി. സത്യൻ അധ്യക്ഷത വഹിച്ചു. ജില്ലാ ആസൂത്രണ സമിതി ഉപാധ്യക്ഷൻ സി.വി. വർഗീസ്, ജില്ലാ പ്ലാനിംഗ് ഓഫീസർ ദീപ ചന്ദ്രൻ, തദ്ദേശ സ്വയംഭരണ വകുപ്പ് ജോയിന്‍റ് ഡയറക്ടർ ട്രീസ ജോസഫ് എന്നിവർ പ്രസംഗിച്ചു.

പോക്സോ കേസിൽ പ്രതി പിടിയിൽ

തൊടുപുഴ: പോക്സോ കേസിൽ പ്രതിയായ യുവാവിനെ തൊടുപുഴ പോലീസ് അറസ്റ്റ് ചെയ്തു. കണ്ണൂർ പൊട്ടൻപിലാവ് സ്വദേശി പി.കെ. വിജേഷാണ് (34) അറസ്റ്റിലായത്. ബുധനാഴ്ച കണ്ണൂരിൽനിന്നാണ് ഇയാളെ എസ്ഐ അജീഷ് കെ. ജോണിന്‍റെ നേതൃത്വത്തിലുള്ള അന്വേഷണ സംഘം പിടികൂടിയത്. 2024ലായിരുന്നു കേസിനാസ്പദമായ സംഭവം. 11കാരിയായ മകളെ പീഡിപ്പിച്ചതായി കാണിച്ച് പിതാവ് നൽകിയ പരാതിയിലാണ് അറസ്റ്റ്. കണ്ണൂർ സ്വദേശിയായ കുട്ടിയുടെ മാതാവ് തൊടുപുഴയിലെ സ്വകാര്യ സ്ഥാപനത്തിൽ ജോലി ചെയ്യുകയായിരുന്നു. മാതാവിന്‍റെ സുഹൃത്താണ് അറസ്റ്റിലായ വിജീഷ്. പിന്നീട് യുവതി വിദേശത്തേക്ക് പോയതിനു ശേഷമാണ് പിതാവ് വിവരമറിയുന്നത്.

ഹണി ട്രാപ്പ്: സൂക്ഷിക്കുക അവർ അരികിലുണ്ട്

തൊടുപുഴ: ഓണ്‍ലൈൻ തട്ടിപ്പുകൾ, ഹണിട്രാപ്പ് എന്നിവയിൽ ജാഗ്രത വേണമെന്ന മുന്നറിയിപ്പുമായി പോലീസ്. അടുത്ത നാളുകളിൽ ഇത്തരം സംഭവങ്ങൾ വ്യാപകമായി റിപ്പോർട്ട് ചെയ്യപ്പെടുന്ന സാഹചര്യത്തിലാണ് പോലീസ് ജാഗ്രതാ മുന്നറിയിപ്പ് നൽകിയത്. ഒരു വ്യക്തിയെ വഞ്ചിക്കുക, ചൂഷണം ചെയ്യുക, അല്ലെങ്കിൽ സ്വകാര്യ വിവരങ്ങൾ ചോർത്തുക തുടങ്ങിയ ലക്ഷ്യങ്ങളോടെ പ്രണയം നടിച്ചു കെണിയിലാക്കുന്നതിനെയാണ് ഹണി ട്രാപ്പ് എന്നു പറയുന്നത്. ആദ്യം ഓണ്‍ലൈൻ പ്ലാറ്റ്ഫോം വഴിയും മറ്റും സൗഹൃദം സ്ഥാപിക്കും. കെണിയിയാകുന്നവരെ തന്ത്രപൂർവം താവളങ്ങളിലേക്കു വരുത്തി സ്വകാര്യ വീഡിയോയും ഫോട്ടോകളുമൊക്കെ ബലമായി പകർത്തിയെടുക്കും. തുടർന്ന് ഇതുവച്ച് ബ്ലാക്ക് മെയിൽ ചെയ്യും. തട്ടിപ്പിനിരയാകുന്ന മിക്കവരും മാനക്കേട് ഭയന്നു വിവരം പുറത്തുപറയില്ല എന്നതാണ് ഇത്തരം സംഘങ്ങൾക്കു ബലമാകുന്നത്. ഇക്കാര്യങ്ങൾ ശ്രദ്ധിക്കുക അപരിചിതരുമായി ഓണ്‍ലൈനിൽ ബന്ധം സ്ഥാപിക്കുന്പോൾ കൂടുതൽ ശ്രദ്ധ വേണം. പെട്ടെന്ന് അടുപ്പം കാണിക്കുന്നവരെ സംശയിക്കണം. ഒന്നിച്ചു സമയം ചെലവഴിക്കാൻ പ്രലോഭിപ്പിക്കുന്നവരെ സൂക്ഷിക്കുക, വ്യക്തിപരമായ വിവരങ്ങളോ ചിത്രങ്ങളോ സാന്പത്തിക ഇടപാടുകളോ അപരിചിതരുമായി പങ്കുവയ്ക്കരുത്. അക്കൗണ്ടുകൾ വ്യാജമാണോ എന്നു തിരിച്ചറിയാൻ ശ്രമിക്കുക, അക്കൗണ്ടിന്‍റെ പ്രൊഫൈൽ ചിത്രങ്ങളും പോസ്റ്റുകളും യഥാർഥമാണോയെന്നു പരിശോധിക്കുക, സാന്പത്തിക സഹായം ആവശ്യപ്പെട്ട് ആരെങ്കിലും സമീപിക്കുകയാണെങ്കിൽ പ്രത്യേകിച്ച് ശ്രദ്ധിക്കുക. സംശയകരമായി എന്തെങ്കിലും തോന്നിയാൽ ഉടൻ അവരുമായുള്ള ബന്ധം വിച്ഛേദിക്കുക. തുടർന്ന് അവരെ ബ്ലോക്ക് ചെയ്യുകയും പോലീസിൽ റിപ്പോർട്ട് ചെയ്യുകയും ചെയ്യുക.

ലോട്ടറി തൊഴിലാളികളുടെ മാർച്ചും ധർണയും

തൊടുപുഴ: ലോട്ടറിക്ക് 40 ശതമാനം ജിഎസ്ടി വർധിപ്പിച്ച കേന്ദ്രസർക്കാർ തീരുമാനം പിൻവലിക്കണമെന്നാവശ്യപ്പെട്ട് ജില്ലാ ഭാഗ്യക്കുറി സംരക്ഷണ സമിതിയുടെ നേതൃത്വത്തിൽ തൊടുപുഴ ഇൻകം ടാക്സ് ഓഫീസിലേക്ക് ലോട്ടറി തൊഴിലാളികൾ മാർച്ചും ധർണയും നടത്തി. സിഐടിയു സംസ്ഥാന കമ്മിറ്റിയംഗം കെ.വി.ശശി ധർണ ഉദ്ഘാടനം ചെയ്തു. 2017-ൽ ജിഎസ്ടി ആരംഭിച്ചപ്പോൾ 12 ശതമാനം ആയിരുന്ന നികുതി 2020-ൽ 28 -ഉം ഇപ്പോൾ 40 ശതമാനവും ആയി വർധിപ്പിച്ചു. ലോട്ടറി വിറ്റ് ജീവിക്കുന്ന രണ്ട് ലക്ഷത്തോളം വരുന്ന ഭിന്നശേഷിക്കാർ, വിധവകൾ, രോഗികൾ, വയോധികർ തുടങ്ങിയവരെ ഇത് സാരമായി ബാധിച്ചെന്ന് അദ്ദേഹം പറഞ്ഞു. ഇതിനെതിരേ പാർലമെന്‍റ് മാർച്ച് ഉൾപ്പെടെ നടത്തുമെന്ന് അദ്ദേഹം മുന്നറിയിപ്പ് നൽകി. അനിൽ ആനിക്കാട്ട് അധ്യക്ഷത വഹിച്ചു. ജി.ഗിരീഷ്കുമാർ, കെ.വി.ജോയ്, ജോർജ് അന്പഴം, ബെന്നിച്ചൻ, ഗോപാലകൃഷ്ണൻ, രമണൻ പടന്നയിൽ, ജോർജ് കോട്ടൂർ എന്നിവർ പ്രസംഗിച്ചു.

കൊളുക്കുമലയിലേക്ക് കിടുക്കൻ ജീപ്പ് സഫാരി

ഇടുക്കി: മൂന്നാറിലെത്തുന്ന സഞ്ചാരികളുടെ ഇഷ്ട കേന്ദ്രമായ കൊളുക്കുമലയിലെ പ്രധാന വിനോദമായ ജീപ്പ് സഫാരി സുരക്ഷിതമാക്കാനുള്ള നടപടി മോട്ടോർ വാഹന വകുപ്പ് ഊർജിതമാക്കിയതോടെ സഞ്ചാരികൾ ഒഴുകുന്നു. സഞ്ചാരികൾക്കു സുരക്ഷിതയാത്ര ഉറപ്പാക്കാൻ മോട്ടോർ വാഹന വകുപ്പ് സ്വീകരിച്ച നടപടികളാണ് കൂടുതൽ പേരെ കൊളുക്കുമലയിലെ സാഹസിക യാത്രയിലേക്ക് ആകർഷിക്കുന്നത്. ദിനംപ്രതി അഞ്ഞൂറിലധികം പേരാണ് ഇവിടെ ജീപ്പ് സഫാരിക്ക് എത്തുന്നത്. സജീവ പരിശോധന കൊളുക്കുമല ടൂറിസം സേഫ്റ്റി കമ്മിറ്റി കണ്‍വീനറായ ഉടുന്പൻചോല ജോയിന്‍റ് ആർടിഒയുടെ നേതൃത്വത്തിലാണ് സുരക്ഷിതയാത്ര ഉറപ്പാക്കുന്നത്. കൃത്യമായ ഇടവേളകളിൽ വാഹനങ്ങളുടെ സാങ്കേതിക പരിശോധനയും യോഗ്യരായ ഡ്രൈവർമാരുടെ സേവനവും ഉറപ്പുവരുത്തും. ജീപ്പ് സഫാരി എസ്ഒപി മാനദണ്ഡങ്ങൾ നടപ്പാക്കിയതോടെയാണ് സുരക്ഷിതയാത്രയ്ക്ക് അവസരമൊരുങ്ങിയത്. ഇതു കൂടാതെ ലഹരി ഉപയോഗിച്ചിട്ടുണ്ടോയെന്നറിയാൻ എല്ലാ ദിവസവും ഡ്രൈവർമാരെ ബ്രത്ത് അനലൈസർ പരിശോധന നടത്തും. ഒരു ജീപ്പിൽ ആറുപേർക്കാണ് കൊളുക്കുമല സഫാരി നടത്താൻ സാധിക്കുന്നത്. രാവിലെ നാലു മുതൽ വൈകുന്നേരം അഞ്ചു വരെയാണ് സഞ്ചാരികളെ പ്രവേശിപ്പിക്കുന്നത്. മോട്ടോർ വാഹന വകുപ്പിന്‍റെ പരിശോധന മൂലം നിരവധിപേർ ലഹരിവസ്തുക്കൾ ഉപയോഗിക്കുന്നത് ഒഴിവാക്കുകയും നൂറോളം ഡ്രൈവർമാർ സ്വന്തമായി വാഹനം വാങ്ങുകയും ചെയ്തു. മോട്ടോർ വാഹന വകുപ്പിന്‍റെ ക്രിയാത്മകമായ ഇടപെടലുകളാണ് കൊളുക്കുമലയിൽ കുറ്റമറ്റ രീതിയിൽ ജീപ്പ് സഫാരിക്കു തുണയാകുന്നത്.

മലങ്കര ജലാശയതീരത്ത് ദൃശ്യചാരുത പകർന്ന് മുളങ്കൂട്ടം

തൊടുപുഴ: മലങ്കര ജലാശയത്തിനു സമീപം ഇടതൂർന്നു വളർന്നുനിൽക്കുന്ന മുളങ്കാടുകൾ സഞ്ചാരികൾക്ക് ദൃശ്യവിരുന്നാകും. ആലക്കോട് പഞ്ചായത്തിലെ ഏഴ്, എട്ട് വാർഡുകളുടെ സംഗമ സ്ഥാനമായ ആനക്കയം, തലയനാട് പ്രദേശത്തുള്ള ഇവിടം മനോഹരമായ ടൂറിസം കേന്ദ്രമാക്കാനാണ് ഇളംദേശം ബ്ലോക്ക് പഞ്ചായത്ത് പദ്ധതി തയാറാക്കുന്നത്. ആനക്കയം-കോളപ്ര റോഡിന് ഇരു വശത്തുമായി പടർന്നു പന്തലിച്ചു നിൽക്കുന്ന മുളങ്കാടുകൾ ഇവിടെയെത്തുന്ന വിനോദ സഞ്ചാരികളുടെ മനം കവരുന്ന ദൃശ്യചാരുതയാണ് പകർന്നുനൽകുന്നത്. സിനിമാ രംഗത്തുള്ളവരുടെയും ഇഷ്ട കേന്ദ്രമാണ് ഇവിടം. കഴിഞ്ഞ ദിവസം ടൊവിനോ തോമസ് നായകനാകുന്ന പള്ളിച്ചട്ടന്പിയുടെ ചിത്രീകരണം ഇവിടെയായിരുന്നു നടന്നത്. മലങ്കര ജലാശയത്തോട് ചേർന്നുനിൽക്കുന്ന മുളങ്കൂട്ടങ്ങളുടെ അഴക് ഒന്നു വേറെ തന്നെ. പാതയ്ക്ക് ഇരു വശത്തുമായി നിൽക്കുന്ന മുളങ്കൂട്ടം ഇപ്പോൾ പന്തലിച്ചു നിൽക്കുകയാണ്. ഇതിനിടയിലൂടെ മുളങ്കാടുകളുടെ മർമരം കേട്ട് ജലാശയത്തിൽ നിന്നുള്ള ഇളം തെന്നലേറ്റ് നടക്കാം. ഇപ്പോൾ തന്നെ ഫോട്ടോ ഷൂട്ടിനായും ചിത്രങ്ങൾ പകർത്താനും ഒട്ടേറെ പേർ ഇവിടെയെത്തുന്നുണ്ട്. പഞ്ചായത്തിന്‍റെ മുൻ ഭരണ സമിതിയുടെ ശിപാർശ പ്രകാരം 2023-24 വർഷത്തിൽ സംസ്ഥാന ബജറ്റിൽ ഒരു കോടി രൂപ ഇളംദേശം ബ്ലോക്ക് പഞ്ചായത്തിനായി അനുവദിച്ചിരുന്നു. ഈ തുക ഉപയോഗിച്ച് മുളങ്കാടുകൾ സംരക്ഷിച്ച് അടിസ്ഥാന സൗകര്യങ്ങൾ ഒരുക്കി ഇവിടം മികച്ച വിനോദ സഞ്ചാരകേന്ദ്രമാക്കാനാണ് ലക്ഷ്യമിടുന്നത്. മുളങ്കാടുകളുടെ സംരക്ഷണത്തോടൊപ്പം ചിൽഡ്രൻസ് പാർക്ക്, നടപ്പാതകൾ, ഓപ്പണ്‍ ജിംനേഷ്യം എന്നിവയും ആദ്യഘട്ടത്തിൽ ഒരുക്കാനാണ് തീരുമാനം. പദ്ധതിയുടെ ഡിപിആർ തയാറാക്കുന്നതിനു മുന്നോടിയായി മുൻ ജില്ലാ കളക്ടർ വി. വിഗ്നേശ്വരി മുളങ്കാടുകൾ സന്ദർശിച്ചിരുന്നു. തുടർന്ന് വിശദമായ പദ്ധതി രേഖ തയാറാക്കാൻ നിർദേശവും നൽകി. പിന്നീട് ഡിപിആർ തയാറാക്കാൻ ബ്ലോക്ക് പഞ്ചായത്ത് ഒരു ലക്ഷം രൂപ നീക്കി വച്ചതായി പ്രസിഡന്‍റ് ടോമി കാവാലം പറഞ്ഞു. വിശദമായ പദ്ധതി റിപ്പോർട്ട് തയാറാക്കിയാലുടൻ ഒരു കോടി രൂപയുടെ പ്രവർത്തനങ്ങൾ നടപ്പാക്കും. സർക്കാർ ഫണ്ടിനു പുറമേ വിവിധ കന്പനികളുടെ സിഎസ്ആർ ഫണ്ട് ലഭ്യമാക്കി ആകർഷകമായ പദ്ധതികൾ നടപ്പാക്കാനും ശ്രമം നടത്തുമെന്ന് അദ്ദേഹം പറഞ്ഞു. പദ്ധതികൾ പ്രാവർത്തികമായാൽ മലങ്കര തീരത്തെ ഈ മുളങ്കാടുകൾ സഞ്ചാരികളുടെ കണ്ണിനും മനസിനും കുളിർമ പകരും.

സ്വയം സഹായ സംഘങ്ങളുടെ വാർഷികാഘോഷം

മറയൂർ: സഹായഗിരി ഹെൽത്ത് കെയർ സൊസൈറ്റിയുടെ കീഴിൽ പ്രവർത്തിക്കുന്ന സ്വയം സഹായ സംഘങ്ങളുടെ വാർഷികാഘോഷം വിപുലമായ പരിപാടികളോടെ മറയൂരിൽ നടന്നു. സംഘശക്തി വിളിച്ചോതുന്ന വർണശബളമായ ഘോഷയാത്രയോടെയാണ് ആഘോഷങ്ങൾ ആരംഭിച്ചത്. കാന്തല്ലൂർ ഫോറസ്റ്റ് റേഞ്ച് ഓഫീസിന് മുന്നിൽനിന്ന് ആരംഭിച്ച ഘോഷയാത്ര കോവിൽക്കടവ് ടൗണ്‍ ചുറ്റി തെങ്കാശിനാഥൻ ഓഡിറ്റോറിയത്തിൽ സമാപിച്ചു. ഓഡിറ്റോറിയത്തിൽ നടന്ന സമ്മേളനം ഫാ. സെബാസ്റ്റ്യൻ കൊച്ചുപുരയ്ക്കൽ ഉദ്ഘാടനം ചെയ്തു. സഹായഗിരി ആശുപത്രി അഡ്മിനിസ്ട്രേറ്റർ സിസ്റ്റർ ബ്ലസിൻ എസ്ഡി അധ്യക്ഷത വഹിച്ചു. വിൻസിൻഷ്യൻ സഭാംഗം ഫാ. ടോണി മുഖ്യപ്രഭാഷണം നടത്തി. സഹായഗിരി പള്ളി വികാരി ഫാ. ജോയിസ് അഴിമുഖത്ത്, മറയൂർ പഞ്ചായത്ത് വൈസ് പ്രസിഡന്‍റ് ഉഷ ഹെൻട്രി തുടങ്ങിയവർ പ്രസംഗിച്ചു. സമ്മേളനത്തോടനുബന്ധിച്ച് സംഘാംഗങ്ങൾ അവതരിപ്പിച്ച കലാപരിപാടികളും അരങ്ങേറി. തയ്യൽ പരിശീലനം പൂർത്തിയാക്കിയവർക്ക് ഫാ. ടോണി സർട്ടിഫിക്കറ്റുകൾ വിതരണം ചെയ്തു. സിസ്റ്റർ ഫെമിലി ജോസ് എസ്ഡി സ്വാഗതവും ഐബി ജോസ് കുരിശിങ്കൽ നന്ദിയും പറഞ്ഞു.

പുസ്തകങ്ങൾ കൈമാറ്റം ചെയ്തു

വണ്ടിപ്പെരിയാർ: കുട്ടിക്കാനം മരിയൻ കോളജ് (ഓട്ടോണമസ്) സ്കൂൾ ഓഫ് സോഷ്യൽ വർക്ക് ഒന്നാം വർഷ ബിഎസ്ഡബ്ല്യു വിദ്യാർഥികളുടെ നേതൃത്വത്തിൽ വണ്ടിപ്പെരിയാർ ഗവണ്‍മെന്‍റ് യുപി സ്കൂളിൽ പുസ്തകങ്ങൾ കൈമാറ്റം ചെയ്യുന്ന പരിപാടി സംഘടിപ്പിച്ചു. അക്ഷരപ്രകാശം എന്ന പേരിൽ നടന്ന പുസ്തക കൈമാറ്റ ചടങ്ങിൽ വണ്ടിപ്പെരിയാർ ഗവ. യുപി സ്കൂൾ ഹെഡ്മാസ്റ്റർ എസ്.ടി. രാജ് അധ്യക്ഷത വഹിച്ചു. നൂറോഓളം പുസ്തകങ്ങളാണ് വിദ്യാർഥികൾ സ്കൂളിന് കൈമാറിയത്. മരിയൻ കോളജിലെ അധ്യാപകരായ ഡോ. ജോബി ബാബു, കെ.ജി. പൗർണമി, വിദ്യാർഥികളായ ബുഷ്റ അനസ്, സിസ്റ്റർ ജെസ്‌ലിൻ ജയിംസ്, മന്യ സുനിൽകുമാർ, ജോസഫ് കുര്യാക്കോസ് എന്നിവർ നേതൃത്വം നൽകി. വിദ്യാർഥികളുടെ വിവിധ കലാപരിപാടികളും അരങ്ങേറി.

മലയോര ഹൈവേയിൽ പാറ അടർന്നുവീണു

ഉപ്പുതറ: മലയോര ഹൈവേ നിർമാണത്തിനായി പാറയിൽ തമരടിച്ച് കെമിക്കൽ ഒഴിച്ചുവച്ചിരുന്ന ഭാഗത്തെ കല്ലുകൾ റോഡിലേക്ക് പതിച്ചു. വാഹനങ്ങൾ കടന്നുപോകുന്നതിനിടെയാണ് പാറ അടർന്നുവീണത്. വൻ അപകടം ഒഴിവായി. പീരുമേട് സ്വദേശി സഞ്ചരിച്ച കാർ ഈ ഭാഗത്തേക്ക് എത്തുന്നതിനു തൊട്ടുമുൻപാണ് പാറക്കല്ലുകൾ റോഡിലേക്ക് പതിച്ചത്. ബുധനാഴ്ച വൈകുന്നേരം അഞ്ചരയോടെയായിരുന്നു അപകടം. ആലടിക്കും പരപ്പിനും ഇടയിൽ പാറമടയ്ക്കു സമീപമായിരുന്നു അപകടം. റോഡിന്‍റെ മുകൾവശത്തെ തിട്ടയുടെ ഭാഗത്ത് കോൺക്രീറ്റ് സംരക്ഷണഭിത്തി നിർമാണം പുരോഗമിക്കുകയായിരുന്നു. സംരക്ഷണഭിത്തി നിർമാണം നടക്കുന്നതിനു മുകളിലുള്ള ഭാഗത്തെ കല്ല് പൊട്ടിക്കാൻ കെമിക്കൽ ഒഴിച്ചുവച്ചിരുന്ന ഭാഗത്തെ കല്ലാണ് റോഡിലേക്ക് വീണത്. ഇതുസംബന്ധിച്ച് യാതൊരുമുന്നറിയിപ്പും ഉണ്ടായിരുന്നില്ലെന്ന് യാത്രക്കാർ ആരോപിച്ചു.

ഡബിൾ ഡെക്കർ ബസ് അപകടം: ഡ്രൈവർക്ക് സസ്പെൻഷൻ

മൂന്നാർ: മൂന്നാറിൽ കെഎസ്ആർടിസിയുടെ ഡബിൾ ഡെക്കർ ബസ് അപകടത്തിൽപ്പെട്ട സംഭവത്തിൽ ഡ്രൈവർക്ക് സസ്പെൻഷൻ. കെ.പി. മുഹമ്മദിനെയാണ് സസ്പെൻഡു ചെയ്തത്. മേലുദ്യോഗസ്ഥരുടെ അന്വേഷണ റിപ്പോർട്ടിന്‍റെ അടിസ്ഥാനത്തിലാണ് നടപടി. മറ്റൊരു വാഹനത്തെ മറികടക്കുന്നതിനിടെ എതിരേ വന്നവാഹനത്തിൽനിന്ന് രക്ഷപ്പെടാൻ വാഹനം വെട്ടിക്കാനുള്ള ശ്രമത്തിൽ നിയന്ത്രണം നഷ്ടപ്പെട്ട് റോഡിന്‍റെ തിട്ടയിൽ ബസ് ഇടിക്കുകയായിരുന്നുവെന്നാണ് ഡ്രൈവർ പറഞ്ഞിരുന്നത്. എന്നാൽ സിസി കാമറയിൽ അത്തരമൊരു വാഹനം വന്നിരുന്നില്ലെന്ന് തെളിഞ്ഞിരുന്നു. അത്തരത്തിലൊരു വാഹനം വന്നിരുന്നില്ലെന്നാണ് ദൃക്സാക്ഷികളും പറഞ്ഞിരുന്നത്. ഡ്രൈവർ ഗുരുതരമായ അനാസ്ഥ കാട്ടിയെന്നതിന്‍റെ അടിസ്ഥാനത്തിലാണ് ഇപ്പോഴത്തെ നടപടി. 45 പേരാണ് വാഹനത്തിൽ ഉണ്ടായിരുന്നത്. റോഡരികിലെ കാത്തിരുപ്പുകേന്ദ്രവും തകർത്താണ് ബസ് ഇടിച്ചുനിന്നത്.

ഭൂനിയമഭേദഗതിയിൽനിന്നു സർക്കാർ പിൻമാറണം: കർഷക മഹാപഞ്ചായത്ത്

തൊടുപുഴ: ഭൂപതിവ് നിയമ ഭേദഗതിയിൽനിന്നു സർക്കാർ പിൻമാറണമെന്നും പ്രശ്നം പരിഹരിച്ചില്ലെങ്കിൽ സംസ്ഥാന തലത്തിൽ സമരപരിപാടികൾക്ക് തുടക്കം കുറിക്കുമെന്നും സംസ്ഥാനത്തെ 111 സ്വതന്ത്ര കർഷക സംഘടനകളുടെ അപ്പെക്സ് ബോഡിയായ കർഷക മഹാപഞ്ചായത്ത് നേതാക്കൾ പത്രസമ്മേളനത്തിൽ അറിയിച്ചു. അതിജീവന പോരാട്ടവേദി ചെയർമാൻ റസാഖ് ചൂരവേലിയെ തെരുവിൽ കൈകാര്യം ചെയ്യുമെന്ന എൽഡിഎഫ് പ്രസ്താവന അപലപനീയമാണ്. അദ്ദേഹത്തിന്‍റെ രക്തം പൊടിഞ്ഞാൽ തങ്ങളും ഒപ്പമുണ്ടാകും. അതിജീവന പോരാട്ടവേദിയുടെ നിലപാടിന് തങ്ങളുടെ പൂർണപിന്തുണയുണ്ട്. വിമർശനങ്ങൾ ഉന്നയിക്കുന്ന നേതാക്കളെ കൈകാര്യം ചെയ്യുമെന്ന എൽഡിഎഫ് നേതാക്കളുടെ വെല്ലുവിളി സംഘടന നേരിടും. ആരോപണങ്ങൾക്കും ഭീഷണിക്കുമെതിരേ എൻഐഎ, ഇഡി അടക്കമുള്ള ഏജൻസികൾക്കും സംസ്ഥാന പോലീസ് മേധാവിക്കും പരാതി നൽകിയിട്ടുണ്ട്. വിമർശിക്കുന്നവരുടെ വായ അടപ്പിക്കാനുള്ള ശ്രമമാണ് നടക്കുന്നത്. തീവ്രവാദ ബന്ധവും കള്ളപ്പണ ഇടപാടും ഉൾപ്പെടെ ആരോപിക്കുന്നവർ ഇതു സംബന്ധിച്ച് ആഭ്യന്തരവകുപ്പിനെ ഉപയോഗിച്ച് അന്വേഷണം നടത്തി നടപടി സ്വീകരിക്കുകയാണ് വേണ്ടത്. കേന്ദ്രസർക്കാരിനെതിരേ എൽഡിഎഫിന്‍റെയും രാജ്യത്തെ വിവിധ കർഷകസംഘടനകളുടെ നേതൃത്വത്തിൽ നേരത്തേ നടത്തിയ പ്രക്ഷോഭത്തെ തീവ്രവാദ ഗ്രൂപ്പുകളാണെന്ന് പറഞ്ഞ് ആക്ഷേപിച്ച ഇതേ രീതിയാണ് എൽഡിഎഫും പിന്തുടരുന്നത്. ഭൂനിയമഭേദഗതിയുമായി ബന്ധപ്പെട്ട ഗുരുതരമായ വീഴ്ച സർക്കാരിനുണ്ടായി എന്നാണ് ചട്ടരൂപീകരണത്തിലൂടെ വ്യക്തമായിരിക്കുന്നത്. അതിനാൽ 2013ൽ കൊണ്ടുവന്ന ഭൂഭേദഗതി നിയമം റദ്ദാക്കി 1960ലെ നിയമത്തിലെ സെക്ഷൻ 7(1) നൽകുന്ന അധികാരമുപയോഗിച്ച് കൃഷിക്കും വീടിനും എന്ന വിവിധ ചട്ടങ്ങളിൽ രേഖപ്പെടുത്തപ്പെട്ടത് ഇതര ഉപയോഗങ്ങൾക്കുമെന്ന വ്യവസ്ഥ കൂട്ടിച്ചേർത്ത് പരിഹരിക്കപ്പെടുകയാണ് വേണ്ടത്. പതിറ്റാണ്ടുകളായി ഇടുക്കിയിലെ ജനങ്ങൾ സ്വന്തമായി അനുഭവിക്കുന്ന ഭൂമിയിൽനിന്ന് അവരെ കുടിയിറക്കാനുള്ള നീക്കമാണ് ഒടുവിലത്തെ ഭൂപതിവ് ചട്ടഭേദഗതി. പുതിയ വ്യവസ്ഥയിൽ വീട് നിർമാണസാധ്യമല്ലാത്തതുമായ ഭൂമി ഈട് വച്ചാൽ ബാങ്ക് ലോണ്‍ കിട്ടാത്തതുമായ സാഹചര്യമാണ് സംജാതമാകുന്നത്. ഗുരുതരമായ വീഴ്ചയാണ് ഭൂപതിവ് നിയമ ഭേദഗതിയുമായി ബന്ധപ്പെട്ട് സർക്കാരിന് സംഭവിച്ചിട്ടുള്ളത്. വരുംദിവസങ്ങളിൽ ഇതു സംബന്ധിച്ചുള്ള വിവരങ്ങൾ കൂടുതൽ വ്യക്തമാകുമെന്നും നേതാക്കൾ പറഞ്ഞു. പത്രസമ്മേളനത്തിൽ ദേശീയ കർഷക സമര കോ-ഓർഡിനേറ്റർ കെ.വി. ബിജു, രാഷ‌്ട്രീയ കിസാൻ മഹാസംഘ് സംസ്ഥാന ചെയർമാൻ അഡ്വ. ബിനോയി തോമസ്, അതിജീവന പോരാട്ടവേദി ചെയർമാൻ റസാഖ് ചൂരവേലിൽ, ഇടുക്കി ലാന്‍ഡ് ഫ്രീഡം മൂവ്മെന്‍റ് നേതാക്കളായ പി.എം. ബേബി, സേവ് വെസ്റ്റേണ്‍ ഗാട്ട്സ് പീപ്പിൾ ഫൗണ്ടേഷൻ ട്രസ്റ്റി ജയിംസ് വടക്കൻ, ഫാർമേഴ്സ് വെൽഫയർ ഫൗണ്ടേഷൻ ചെയർമാൻ സുജി മാസ്റ്റർ, തൃശൂർ പരിയാരം കർഷക രക്ഷാസമിതി ചെയർമാൻ ജിന്നറ്റ് മാത്യു, പ്രഫ. ജോസുകുട്ടി ഒഴുകയിൽ തുടങ്ങിയവർ പങ്കെടുത്തു. വ്യവസ്ഥകള്‍ പിന്‍വലിക്കണം: യുഡിഎഫ് നെടുങ്കണ്ടം: ഭൂപതിവ് ചട്ട ഭേദഗതിയിലെ വ്യവസ്ഥകള്‍ അടിയന്തരമായി പിന്‍വലിക്കണമെന്ന് യുഡിഎഫ് ഉടുമ്പന്‍ചോല നിയോജക മണ്ഡലം കമ്മിറ്റി ഭാരവാഹികള്‍ ആവശ്യപ്പെട്ടു. പട്ടയ ഭൂമിയില്‍ എല്ലാ അനുമതികളും വാങ്ങി നിര്‍മിച്ച വീടുകളും വ്യാപാരസ്ഥാപനങ്ങളും ക്രമവത്കരിക്കണമെന്ന് പറയുന്നത് നീതിനിഷേധവും അഴിമതിക്ക് വഴിവയ്ക്കുന്നതുമാണ്. കെട്ടിടങ്ങള്‍ ക്രമവത്കരിക്കാന്‍ പട്ടയത്തിന്‍റെ പകര്‍പ്പ്, കരമടച്ച രസീത്, നിര്‍മാണത്തിന് അനുമതി ലഭിച്ചതിന്‍റെ രേഖകള്‍ തുടങ്ങിയവ അപേക്ഷയോടൊപ്പം സമര്‍പ്പിക്കണം. ഇതില്‍ ഏതെങ്കിലും രേഖകളുടെ അഭാവത്തില്‍ അപേക്ഷകള്‍ നിരസിക്കുമെന്ന് ചട്ടത്തില്‍ വ്യക്തമാക്കിയിട്ടുണ്ട്. ഇതിനായി ഭൂ ഉടമകളും കെട്ടിട ഉടമസ്ഥരും നെട്ടോട്ടമോടേണ്ടിവരും. നിര്‍മാണ നിരോധനം, പട്ടയപ്രശ്‌നം സങ്കീര്‍ണമാക്കല്‍, വനവിസ്തൃതി വര്‍ധിപ്പിക്കല്‍, സിഎച്ച്ആര്‍ തർക്കം, ലൈഫ് ഭവനപദ്ധതിക്കുള്ള സര്‍ട്ടിഫിക്കറ്റ് തുടങ്ങിയവ പിണറായി സര്‍ക്കാര്‍ വന്നതിന് ശേഷമാണ് ഉണ്ടായത്. ചട്ടഭേദഗതിയിലൂടെ ജനങ്ങളെ കൊള്ളയടിക്കാനുള്ള സര്‍ക്കാര്‍ നീക്കത്തിനെതിരേ യുഡിഎഫ് പ്രതിഷേധങ്ങള്‍ സംഘടിപ്പിച്ചുവരികയാണെന്നും നിയോജക മണ്ഡലം ചെയര്‍മാന്‍ എം.ജെ. കുര്യന്‍, കണ്‍വീനര്‍ ബെന്നി തുണ്ടത്തില്‍, സെക്രട്ടറി പി.എസ്. യൂനുസ് എന്നിവര്‍ അറിയിച്ചു. 18ന് എല്‍ഡിഎഫ് അഭിവാദ്യ സദസുകള്‍ നെടുങ്കണ്ടം: ഭൂനിയമ ഭേദഗതി ചട്ടരൂപീകരണം ജില്ലയിലെ വ്യാപാരികളെ പ്രതിസന്ധിയിലേക്ക് നയിക്കുമെന്ന പ്രചാരണം അടിസ്ഥാന രഹിതമാണെന്ന് സിപിഎം ജില്ലാ സെക്രട്ടറി സി.വി. വര്‍ഗീസ് പത്രസമ്മേളനത്തില്‍ പറഞ്ഞു. ഭൂപ്രശ്‌നങ്ങള്‍ക്ക് ശാശ്വത പരിഹാരമായി മന്ത്രിസഭ അംഗീകരിച്ച ചട്ടങ്ങള്‍ സബ്ജക്ട് കമ്മിറ്റിയുടെ പരിഗണനയിലാണ്. ആക്ഷേപങ്ങളും നിര്‍ദേശങ്ങളും നല്‍കാമെന്നിരിക്കേയാണ് ചില അരാഷ‌്ട്രീയ സംഘടനകള്‍ സമരത്തിനിറങ്ങിയിരിക്കുന്നത്. പുതിയ ഭേദഗതിയിലൂടെ വിവിധ മതവിശ്വാസികളുടെ ആരാധനാലയങ്ങളും സാമുദായിക സംഘടനകളുടെ കെട്ടിടങ്ങളും കോമ്പൗണ്ടിംഗ് ഫീസ് ഇല്ലാതെ ക്രമവത്്കരിക്കപ്പെടും. ഇതൂകൂടാതെ വിവിധ വിദ്യാഭ്യാസ സ്ഥാപനങ്ങളുടെ നിര്‍മാണത്തിനും നിയമപരമായ സാധുത കൈവരും. ഇടത്തരം വ്യാപാര സ്ഥാപനങ്ങളും ചട്ടഭേദഗതിയിലൂടെ നിയമവിധേയമാകും. മറ്റു കെട്ടിടങ്ങൾക്ക് നിര്‍മാണത്തിന് ഉപയോഗിച്ചിട്ടുള്ള സ്ഥലത്തിന്‍റെ ന്യായവിലമാത്രം പരിഗണിച്ച് കോമ്പൗണ്ടിംഗ് ഫീസ് അടച്ചാല്‍ മതിയെന്ന തരത്തിലാണ് ചട്ടം രൂപീകരിച്ചിട്ടുള്ളത്. ജില്ലയിലെ അഞ്ച് നിയോജക മണ്ഡലങ്ങളിലും എല്‍ഡിഎഫിന്‍റെ നേതൃത്വത്തില്‍ 18ന് അഭിവാദ്യ സദസുകള്‍ സംഘടിപ്പിക്കും. നെടുങ്കണ്ടത്ത് കെ.കെ. ജയചന്ദ്രനും കുമളിയില്‍ കെ. സലിംകുമാറും അടിമാലിയില്‍ സി.വി. വര്‍ഗീസും കട്ടപ്പനയില്‍ ജോസ് പാലത്തിനാലും തൊടുപുഴയില്‍ കെ.കെ. ശിവരാമനും സദസുകള്‍ ഉദ്ഘാടനം ചെയ്യും. സിപിഎം നേതാക്കളായ പി.എന്‍. വിജയന്‍, ടി.എം. ജോണ്‍, വി.സി. അനില്‍, രമേശ് കൃഷ്ണന്‍ എന്നിവരും പത്രസമ്മേളനത്തിൽ പങ്കെടുത്തു.

കമ്മീഷൻ അദാലത്ത്: 11 പരാതികൾ തീർപ്പാക്കി

തൊടുപുഴ: സംസ്ഥാന യുവജന കമ്മീഷൻ ജില്ലാതല അദാലത്തിൽ 11 പരാതികൾ പരിഹരിച്ചു. യുവജനങ്ങൾ നേരിടുന്ന പ്രശ്നങ്ങൾക്ക് കൃത്യമായ പരിഹാരം ലഭ്യമാക്കുന്നതിന് ഇടപെടുമെന്ന് അധ്യക്ഷത വഹിച്ച യുവജന കമ്മീഷൻ ചെയർമാൻ എം. ഷാജർ പറഞ്ഞു. യുവജനങ്ങളുടെ മാനസികാരോഗ്യം ഉറപ്പാക്കാൻ വിവിധ പദ്ധതികളും ലഹരിക്കെതിരായി നിരവധി കാന്പയിനുകളും നടപ്പാക്കി വരികയാണെന്നും അദ്ദേഹം പറഞ്ഞു. ആകെ 21 പരാതികളാണ് അദാലത്തിൽ പരിഗണിച്ചത്. 10 പരാതികൾ അടുത്ത സിറ്റിംഗിലേക്ക് മാറ്റിവച്ചു. പുതുതായി നാല് പരാതികൾ ലഭിച്ചു. ജോലിയിൽനിന്ന് അന്യായമായി പിരിച്ചുവിട്ടത്, വിദേശ തൊഴിൽ തട്ടിപ്പ്, സാമൂഹ്യ മാധ്യമങ്ങളിലൂടെ അപകീർത്തിപ്പെടുത്തൽ, ഭൂമി തരംമാറ്റൽ, വിദ്യാഭ്യാസലോണ്‍, സ്വകാര്യസ്ഥാപനത്തിലെ ശന്പളം തടഞ്ഞുവയ്ക്കൽ, എംജി. സർവകലാശാല ഡിഗ്രി സർട്ടിഫിക്കറ്റ് ലഭ്യമാക്കൽ, ഗാർഹിക പീഡനം തുടങ്ങിയ വിഷയങ്ങളിലാണ് പരാതികൾ ലഭിച്ചത്. ഇതിൽ കേസെടുക്കേണ്ട പരാതികൾ പോലീസിന് കൈമാറി. കമ്മീഷൻ അംഗം പി.സി. വിജിത, അഡ്മിനിട്രേറ്റീവ് ഓഫീസർ കെ. ജയകുമാർ, അസിസ്റ്റന്‍റ് ഓഫീസർ പി.അഭിഷേക് എന്നിവരും പങ്കെടുത്തു.

ജോലി തട്ടിപ്പ്: പണം തിരികെ ലഭിക്കാൻ നടപടി വേണമെന്ന്

തൊടുപുഴ: വിദേശത്ത് ജോലി വാഗ്ദാനം ചെയ്ത് സംസ്ഥാനത്തിന്‍റെ വിവിധ ഭാഗങ്ങളിൽനിന്നു കോടിക്കണക്കിനു രൂപ തട്ടിയെടുത്ത സംഭവത്തിൽ പ്രതികൾ പിടിയിലായെങ്കിലും ഇതു സംബന്ധിച്ച് സമഗ്ര അന്വേഷണം നടത്തണമെന്ന് ആക്‌ഷൻ കൗണ്‍സിൽ പത്രസമ്മേളനത്തിൽ ആവശ്യപ്പെട്ടു. നിലവിൽ പരാതി നൽകിയിരിക്കുന്ന 50 പേരിൽനിന്നുമായി പണം കൈക്കലാക്കിയ ശേഷം വിവിധ രാജ്യങ്ങളിലുള്ള കന്പനികളുടെ പേര് ഉപയോഗിച്ച് വ്യാജ വർക്ക് പെർമിറ്റ്, വ്യാജ വീസ എന്നിവ നിർമിച്ചാണ് തട്ടിപ്പ് നടത്തിവന്നിരുന്നത്. വ്യാജ രേഖകൾ നിർമിക്കാൻ സഹായിച്ചവരെ കണ്ടെത്തണം. കഴിഞ്ഞ കുറെ നാളുകളായി ഇവർ ഒളിവിലായിരുന്നെങ്കിലും ഇവർക്കെതിരേ കേസ് രജിസ്റ്റർ ചെയ്തതല്ലാതെ ലുക്കൗട്ട് നോട്ടീസ് പുറപ്പെടുവിക്കാൻ പോലും പോലീസ് തയാറായിരുന്നില്ല. തൊടുപുഴ പോലീസാണ് പ്രതികളായ രാജേഷിനെയും മനുവിനെയും അറസ്റ്റ് ചെയ്തത്. തട്ടിപ്പ് സംബന്ധിച്ച് ഉന്നതതല അന്വേഷണം നടത്തണമെന്നും ആക‌്ഷൻ കൗണ്‍സിൽ ആവശ്യപ്പെട്ടു. പത്രസമ്മേളനത്തിൽ കണ്‍വീനർ പി.പി. അനിൽകുമാർ, ചെയർമാൻ ഡേവിസ് ജോർജ്, വൈസ് ചെയർമാൻ ലാലി ജോണ്‍, അന്പിളി സന്തോഷ് തുടങ്ങിയവർ പങ്കെടുത്തു.

ഇൻകം ടാക്സ് ഓഫീസിലേക്ക് മാർച്ചും ധർണയും ഇന്ന്

തൊടുപുഴ: ലോട്ടറിക്ക് ജിഎസ്ടി 40 ശതമാനമായി വർധിപ്പിച്ച കേന്ദ്രസർക്കാർ തീരുമാനം പിൻവലിക്കണമെന്നാവശ്യപ്പെട്ട് ലോട്ടറി തൊഴിലാളികളും ഏജന്‍റുമാരും വില്പനക്കാരും ഇന്നു രാവിലെ 10.30ന് ഇൻകംടാക്സ് ഓഫീസിലേക്ക് മാർച്ച് നടത്തുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. ജില്ലാ ലോട്ടറി സംരക്ഷണസമിതിയുടെ നേതൃത്വത്തിൽ നടത്തുന്ന മാർച്ച് സിഐടിയു സംസ്ഥാന കമ്മിറ്റിയംഗം കെ.വി. ശശി ഉദ്ഘാടനം ചെയ്യും. ജിഎസ്ടി വർധന സംസ്ഥാനത്തെ രണ്ടുലക്ഷത്തോളം ലോട്ടറിത്തൊഴിലാളികളെ ഗുരുതരമായി ബാധിക്കും. നിലവിൽ ഒരു ടിക്കറ്റ് വിറ്റാൽ ഏജന്‍റിന് 8.50 രൂപയും വില്പനക്കാരന് 7.35 രൂപയുമാണ് ലഭിക്കുന്നത്. പുതിയ നികുതി പ്രാബല്യത്തിലാകുന്നതോടെ ഒരു ടിക്കറ്റിന് 3.35 രൂപ അധികനികുതി നൽകേണ്ടി വരും. സിഐടിയു, ഐൻടിയുസി, എഐടിയുസി, കെടിയുസി-എം, കെഎൽഎഎ തുടങ്ങിയ സംഘടനകളുടെ നേതൃത്വത്തിലാണ് സമരം. പത്രസമ്മേളനത്തിൽ ടി.ബി. സുബൈർ, ജി. ഗിരീഷ്കുമാർ, അനിൽ ആനിക്കാട്ട്, ഗോപാലകൃഷ്ണൻ, സനൽ തുടങ്ങിയവർ പങ്കെടുത്തു.

സാൻജോ സ്കൂളിൽ പച്ചക്കറിദിനം ആചരിച്ചു

കൊടുവേലി: സാൻജോ കിൻഡർ ഗാർട്ടൻ കുട്ടികൾ ഒരുക്കിയ പച്ചക്കറി ദിനാചരണം ശ്രദ്ധേയമായി. ദിനാചരണത്തോടനുബന്ധിച്ച് അറുപതോളം വിവിധതരം പച്ചക്കറികളുടെ എക്സിബിഷനും പച്ചക്കറി പ്രച്ഛന്നവേഷ മത്സരവും സ്റ്റാളുകളും ഒരുക്കിയിരുന്നു. സംഗീതജ്ഞൻ ടി.പി. വിവേക് ഉദ്ഘാടനം ചെയ്തു. എക്സിബിഷനിൽ ഉൾപ്പെടുത്തിയ പച്ചക്കറി വിഭവങ്ങൾ അനാഥാലയങ്ങൾക്ക് നൽകി.

മുട്ടത്ത് വഴിവിളക്കുകൾ തെളിയുന്നില്ലെന്ന് പരാതി

മുട്ടം: പഞ്ചായത്തിലെ വിവിധ വാർഡുകളിൽ വഴിവിളക്കുകൾ തെളിയുന്നില്ലെന്ന് ആക്ഷേപം. ഇതു സംബന്ധിച്ച് പ്രദേശവാസികൾ അതത് വാർഡ് മെംബർമാരെയും ഗ്രാമസഭകളിലും നിരന്തരം പരാതികൾ അറിയിച്ചെങ്കിലും നടപടിയില്ല. വിവിധ വാർഡുകളിൽ വഴിവിളക്കുകൾ പ്രവർത്തന സജ്ജമാക്കിയാലും ഏതാനും ദിവസങ്ങൾക്കകം ചില പ്രദേശങ്ങളിൽ ഇത് പ്രവർത്തന രഹിതമാകും. ടെണ്ടർ ഏറ്റെടുക്കുന്ന ഏജൻസികൾ ഗുണനിലവാരം കുറഞ്ഞ സാധന സാമഗ്രികൾ ഉപയോഗിക്കുന്നതിനാലാണ് ഇത്തരത്തിൽ സംഭവിക്കുന്നതെന്ന് ആക്ഷേപമുണ്ട്. മീനച്ചിൽ കുടിവെളള പദ്ധതിക്കായി പൈപ്പുകൾ സ്ഥാപിക്കുന്നതിന് കുത്തിപ്പൊളിച്ച മുട്ടം എംവിഐപി ഓഫീസിന് സമീപത്തും, ചളളാവയൽ - വളളിപ്പാറ പാതയിലേയും വഴിവിളക്കുകൾ ഏതാനും മാസങ്ങളായി പ്രവർത്തന രഹിതമാണ്. പഞ്ചായത്ത് വഴിവിളക്കുകൾ പ്രവർത്തസജ്ജമാക്കുന്നതിന് ടെൻഡർ ക്ഷണിച്ചെങ്കിലും അവസാന ദിവസമായ കഴിഞ്ഞ 10ന് ഒരു ടെൻഡർ മാത്രമാണ് ലഭിച്ചത്. വഴി വിളക്കുകൾ തെളിയ്ക്കുന്നതിന് കോട്ടയം കേന്ദ്രമായ ഏജൻസിയെ ചുമതലപ്പെടുത്തിയെന്നും അടുത്ത ദിവസം മുതൽ ജോലികൾ ആരംഭിക്കുമെന്നും പഞ്ചായത്ത് പ്രസിഡന്‍റ് മേഴ്സി ദേവസ്യ അറിയിച്ചു.

ഇടുക്കിയിലെ നിരത്തുകളിൽ നിലയ്ക്കാത്ത നിലവിളി ; എട്ടു മാസത്തിനിടെ പൊലിഞ്ഞത് 74 ജീവൻ

തൊടുപുഴ: ജില്ലയിലെ നിരത്തുകൾ ചോരക്കളങ്ങളാകുന്നതു തുടരുന്നു. അമിത വേഗവും അശ്രദ്ധയോടെയുള്ള ഡ്രൈവിംഗും മത്സരയോട്ടവും മൂലം എട്ടു മാസത്തിനിടെ ജില്ലയിൽ പൊലിഞ്ഞത് 74 ജീവനുകൾ. ഈ വർഷം ജനുവരി ഒന്നു മുതൽ ഓഗസ്റ്റ് 31 വരെ ജില്ലയിൽ 757 റോഡപകടങ്ങളാണ് റിപ്പോർട്ട് ചെയ്തത്. ഇതിൽ 66 അപകടങ്ങളിലായാണ് 74 പേർ മരിച്ചത്. ആകെ 1,132 പേർക്കു പരിക്കേറ്റു. 792 പേർ നിസാര പരിക്കുകളോടെ രക്ഷപ്പെട്ടു. ഇതിനുപുറമെ കേസ് റജിസ്റ്റർ ചെയ്യാത്ത അപകടങ്ങളും ഏറെ. ഈ മാസവും ജില്ലയിൽ ഒട്ടേറെ അപകടമരണങ്ങൾ റിപ്പോർട്ട് ചെയ്തു. മത്സരയോട്ടം തടയുന്നില്ല മോട്ടോർ വാഹനവകുപ്പും പോലീസും പരിശോധനയും ബോധവത്കരണവും നടത്തുന്നുണ്ടെന്നു പറയുന്നുണ്ടെങ്കിലും അപകടങ്ങൾ കുറയുന്നില്ല. എഐ കാമറകളുടെ വരവോടെ ഹെൽമറ്റ്, സീറ്റ് ബെൽറ്റ് എന്നിവ ധരിക്കുന്നവരുടെ എണ്ണത്തിൽ ഗണ്യമായ വർധന ഉണ്ട്. അതേസമയം, മറ്റു നിയമലംഘനങ്ങൾക്കു കുറവില്ല. അമിത വേഗവും സ്വകാര്യ ബസുകളുടെയും ടിപ്പർ, ടോറസ് ലോറികളുടെ മത്സരയോട്ടവും നിയന്ത്രിക്കാൻ ഒരു നടപടികളും ഉണ്ടാകുന്നില്ല. ജില്ലയിൽ അപകടത്തിൽപെടുന്നതിൽ ഏറെയും ഇരുചക്രവാഹനങ്ങളാണ്. അശ്രദ്ധയുടെ വില വലിയ വാഹന ഡ്രൈവർമാരുടെ അശ്രദ്ധയോടെയുള്ള ഡ്രൈവിംഗും അമിത വേഗവും ഇരുചക്ര വാഹന യാത്രക്കാരുടെ ജീവനെടുക്കുന്നു. കഴിഞ്ഞ ദിവസം തൊടുപുഴ സിഗ്നൽ ജംഗ്ഷനിൽ അശ്രദ്ധമായി തിരിച്ച ലോറിക്കടിയിൽപ്പെട്ടു സ്കൂട്ടർ യാത്രക്കാരനായ ഗൃഹനാഥൻ മരിച്ചിരുന്നു. ഡ്രൈവർമാർ വേണ്ടത്ര വിശ്രമമില്ലാതെ വാഹനമോടിക്കുന്നതും രാത്രി ഹെഡ് ലൈറ്റ് ഡിം ചെയ്യാത്തതുമെല്ലാം അപകടങ്ങൾക്കിടയാക്കുന്നു. വളവുകളും തിരിവുകളും കയറ്റിറക്കങ്ങളും നിറഞ്ഞതാണു ജില്ലയിലെ റോഡുകളിൽ ഭൂരിഭാഗവും. ഇത്തരം റോഡുകളിലൂടെ അമിത വേഗത്തിൽ വാഹനമോടിക്കുന്നത് അപകടങ്ങൾക്ക് വഴിവയ്ക്കുമെന്ന് മോട്ടോർ വാഹന വകുപ്പ് അധികൃതർ ചൂണ്ടിക്കാട്ടുന്നു. വാഹനപ്പെരുപ്പവും റോഡുകളുടെ അടിസ്ഥാന സൗകര്യങ്ങളുടെ അപര്യാപ്തത, മുന്നറിയിപ്പ് , സുരക്ഷാ സംവിധാനങ്ങളുടെ കുറവ് എന്നിവയും അപകടങ്ങൾക്കു കാരണമാകുന്നുണ്ട്. ഇതിനിടെ, അപകട സാധ്യത കൂടിയ റോഡുകളിൽ അമിത വേഗവും മറ്റും നിയന്ത്രിക്കാൻ മോട്ടോർ വാഹനവകുപ്പ് വിവിധ പദ്ധതികൾ നേരത്തെ ആവിഷ്കരിച്ചിരുന്നെങ്കിലും ഇപ്പോൾ അതെല്ലാം മന്ദീഭവിച്ചു. അപകട മരണങ്ങൾ ഇങ്ങനെ ജനുവരി, ഫെബ്രുവരി മാസങ്ങളിലാണ് ഏറ്റവുമധികം അപകട മരണങ്ങൾ നടന്നത്. ജനുവരി - 17 ഫെബ്രുവരി - 19 മാർച്ച് - 5 ഏപ്രിൽ - 7 മേയ് - 5 ജൂണ്‍ - 10 ജൂലൈ - 6 ഓഗസ്റ്റ് - 5 പ്രധാന കാരണങ്ങൾ അമിതവേഗം അശ്രദ്ധമായ ഡ്രൈവിംഗ് മദ്യപിച്ച് വാഹനമോടിക്കൽ അശ്രദ്ധമായ ഓവർടേക്കിംഗ് റോഡിന്‍റെ ശോച്യാവസ്ഥ മൊബൈൽ ഫോണിൽ സംസാരിച്ച് വാഹനമോടിക്കൽ.

കുരുമുളകിനു രോഗബാധ; ആശങ്കയിൽ കർഷകർ

ചെറുതോണി: കർഷകരുടെ പ്രതീക്ഷകൾക്കു തിരിച്ചടിയായി കുരുമുളക് ചെടികളിൽ രോഗബാധ. കഞ്ഞിക്കുഴി പഞ്ചായത്തിൽ മഞ്ഞളിപ്പ് രോഗം ബാധിച്ചു നിരവധി കർഷകരുടെ കുരുമുളക് ചെടികളാണ് നശിക്കുന്നത്. രോഗം ബാധിച്ച ചെടികൾ ദിവസങ്ങൾക്കുള്ളിൽ ഉണങ്ങിക്കരിയുകയാണ്. കുരുമുളക് ചെടികളിൽ രോഗബാധ വ്യാപകമായിട്ടും കൃഷി വകുപ്പിന്‍റെ ഭാഗത്തുനിന്നു യാതൊരു നടപടിയുമില്ലെന്നാണ് കർഷകരുടെ പരാതി. മഞ്ഞളിപ്പ് രോഗം ബാധിക്കുന്നതോടെ ദിവസങ്ങൾക്കുള്ളിൽത്തന്നെ ഇല കൊഴിഞ്ഞും തണ്ടുകൾ ഉണങ്ങിയും ചെടികൾ രണ്ടാഴ്ചയ്ക്കുള്ളിൽ പൂർണമായും നശിക്കുന്ന അവസ്ഥയാണ്. രോഗബാധ കണ്ടുതുടങ്ങിയപ്പോൾത്തന്നെ കർഷകർ കൃഷിഭവനിൽ അറിയിച്ചെങ്കിലും നടപടിയൊന്നുമുണ്ടായില്ലെന്നാണ് പരാതി. കുരുമുളക് കൃഷി വ്യാപകമായി നശിക്കുന്നതു തടയാൻ അധികൃതർ അടിയന്തര നടപടി സ്വീകരിക്കണമെന്നാണ് കർഷകരുടെ ആവശ്യം.

ബലക്ഷയമുള്ള കെട്ടിടത്തിലെ പ്രസവമുറി മാറ്റാൻ നടപടിയില്ല

അടിമാലി: അടിമാലി താലൂക്കാശുപത്രിയിലെ ബലക്ഷയമുള്ളമുള്ള കെട്ടിടത്തില്‍നിന്നു പ്രസവ വാര്‍ഡും പ്രസവ മുറിയും ബലക്ഷമതയുള്ള കെട്ടിടത്തിലേക്ക് മാറ്റുമെന്ന പ്രഖ്യാപനം നടപടിയായില്ല. ഒന്നര മാസം മുമ്പാണ് ഇതു സംബന്ധിച്ച പ്രഖ്യാപനം ഉണ്ടായത്. നിലവില്‍ കാഷ്വാലിറ്റി കെട്ടിടത്തിന് സമീപമുള്ള പഴയ കെട്ടിടത്തിലാണ് പ്രസവ വാര്‍ഡും മുറിയും പ്രവര്‍ത്തിക്കുന്നത്. ഈ കെട്ടിടത്തിന്‍റെ പല ഭാഗത്തും വിള്ളല്‍ സംഭവിച്ചിട്ടുണ്ട്. കെട്ടിടഭാഗങ്ങള്‍ അടര്‍ന്നുവീഴുന്ന സാഹചര്യവുമുണ്ട്. ഇത്തരം സാഹചര്യങ്ങള്‍ പരിഗണിച്ചായിരുന്നു പഴയ കെട്ടിടത്തില്‍നിന്നു ബലക്ഷമതയുള്ള കെട്ടിടത്തിലേക്ക് മാറ്റാന്‍ തീരുമാനിച്ചത്.

ആലുവ-മൂന്നാർ രാജപാത തുറക്കണം ; കണ്ണു തുറപ്പിക്കാൻ മാങ്കുളത്ത് പ്രത്യേക ഗ്രാമസഭ ഇന്ന്

മാങ്കുളം: ആലുവ-മൂന്നാർ രാജപാത തുറക്കാൻ അനുകൂല നടപടി സ്വീകരിക്കണമെന്നാവശ്യപ്പെട്ടു മാങ്കുളം പഞ്ചായത്തിൽ ഇന്നു പ്രത്യേക ഗ്രാമസഭ ചേരും. യോഗത്തിൽ ഇതിനായി പ്രമേയം അവതരിപ്പിച്ച് ഏകകണ്ഠമായി പാസാക്കും. വികസനമെന്നത് ഒരു പ്രദേശത്തെ ജനതയ്ക്ക് ആധുനിക സൗകര്യത്തോടെ ജീവിക്കാനുളള അവകാശമാണ്. എന്നാൽ, അടുത്ത കാലത്തെ ചില പരിസ്ഥിതി നിയമങ്ങളും അവയെ വ്യാഖ്യാനിക്കുന്ന രീതിയും മലയോര മേഖലയിലെ സാധാരണക്കാർ, ആദിവാസികൾ, തോട്ടംതൊഴിലാളികൾ എന്നിവരുടെ ജീവിതം വഴിമുട്ടിക്കുന്നതാണ്. ഈ സാഹചര്യത്തിലാണ് പ്രത്യേക ഗ്രാമസഭ ചേരാൻ തീരുമാനിച്ചത്. ജനങ്ങളുടെ ദുരിതം അധികൃതരുടെ ശ്രദ്ധയിൽകൊണ്ടുവരാനാണ് പ്രത്യേക ഗ്രാമസഭ. എങ്ങനെ വനമാകും? ആലുവ-മൂന്നാർ രാജപാത നൂറ്റാണ്ടുകൾ പഴക്കമുള്ളതും മധുരയിൽനിന്നു പഴയ തുറമുഖമായ മുസിരസിൽ എത്താൻ ഉപയോഗിച്ചുവന്നിരുന്നതുമാണ്. ഇതു പിന്നീട് കുതിര, കാളവണ്ടികൾ ഓടുന്ന പാതയായി മാറി. എന്നാൽ, 1924ലെ പ്രളയത്തിൽ ഒരു ഭാഗം തകർന്നടിഞ്ഞ പാത പിന്നീടു പുനരുദ്ധരിച്ചില്ല. റവന്യു രേഖകളിലും പൊതുമരാമത്ത് വകുപ്പ് രേഖകളിലും ഈ റോഡ് വനമായി വിജ്ഞാപനം ചെയ്തിട്ടില്ല. 1980ലെ വനനിയമത്തിലെ വനം എന്ന പദത്തിനു കോടതി നൽകിയ നിർവചനം മൂലം ഉണ്ടായിട്ടുള്ള നിയമോപദേശം മറികടക്കാൻ കേന്ദ്രസർക്കാർ 2023ൽ ഈ നിയമം ഭേദഗതി ചെയ്തിരുന്നു. 110 കിലോമീറ്ററോളം ദൈർഘ്യമുള്ള ഈ റോഡിന്‍റെ 25 കിലോമീറ്റർ മാത്രമാണ് ഗതാഗതയോഗ്യമല്ലാത്തത്. ഇത് ഈ റോഡ് നിലവിലില്ലെന്ന വനംവകുപ്പിന്‍റെ വാദത്തിന്‍റെ മുനയൊടിക്കുന്നു. ഇടമലക്കുടിക്കും നേട്ടമാകും ആലുവ-മൂന്നാർ രാജപാത തുറന്നുനൽകിയാൽ അതു രാജ്യത്തെ ആദ്യത്തെ ഗോത്ര പഞ്ചായത്തായ ഇടമലക്കുടിയുടെ വികസനത്തിലും വലിയ കുതിച്ചുചാട്ടമുണ്ടാകും. കഴിഞ്ഞ ഒരുമാസത്തിനിടെ മൂന്നു രോഗികളെ ഇടമലക്കുടിയിൽനിന്നു കിലോമീറ്ററുകളോളം ചുമന്ന് ആശുപത്രിയിൽ എത്തിക്കേണ്ടിവന്നു. ചികിത്സ വൈകി ഒരാളുടെ ജീവൻ നഷ്ടമായി. ദുർഘട പാതയിലൂടെ മാങ്കുളത്ത് എത്തിച്ച ശേഷം അടിമാലി താലൂക്ക് ആശുപത്രിയിലേക്കു കൊണ്ടുപോവുകയായിരുന്നു. എന്നാൽ, രാജപാത തുറന്നു നൽകിയാൽ ഇടമലക്കുടിക്കു പുറമെ അടിമാലി പഞ്ചായത്തിൽ ഉൾപ്പെടുന്ന കുറത്തിക്കുടിയുടെയും കുട്ടന്പുഴ പഞ്ചായത്തുകളിലെ അവികസിത പ്രദേശങ്ങളുടെയും വികസനത്തിന് ഇതു വഴിയൊരുക്കും. നാട് ഒരുമിക്കുന്നു ഇടമലക്കുടിയിൽനിന്നു കാൽനടയായി മാങ്കുളത്ത് റോഡ് സൗകര്യമുള്ള സ്ഥലത്ത് എത്താൻ കുഞ്ഞദൂരം മതി. എന്നാൽ, മൂന്നാർ വഴി അടിമാലിയിൽ എത്തണമെങ്കിൽ കിലോമീറ്ററുകൾ ചുറ്റി സഞ്ചരിക്കണം. റോഡില്ലാത്തതു മൂലം പതിറ്റാണ്ടുകളായി യാതന അനുഭവിക്കുന്ന ജനതയ്ക്ക് ആലുവ- മൂന്നാർ രാജപാതയുടെ വികസനം വൻ നേട്ടമാകും. ഇതിനായിട്ടാണ് നാട് ഒരുമിക്കുന്നത്. പാതയുടെ വികസനവുമായി ബന്ധപ്പെട്ടുള്ള ഹർജി അടുത്ത ദിവസം ഹൈക്കോടതി പരിഗണിക്കും. ഈ സാഹചര്യത്തിലാണ് ഇന്ത്യൻ ഭരണഘടനയിലെ 243 എ വകുപ്പ് പ്രകാരമുള്ള അധികാരം ഉപയോഗിച്ചും കേരള പഞ്ചായത്ത് രാജ് നിയമം 1994ലെ 3(3) വകുപ്പിലെ അവകാശം ഉപയോഗിച്ചുമാണ് പ്രത്യേക ഗ്രാമസഭായോഗം വിളിച്ചിരിക്കുന്നത്.

ഇൻഫാം കട്ടപ്പന കാർഷിക താലൂക്ക് ശില്പശാല

കട്ടപ്പന: ഇൻഫാം കട്ടപ്പന കാർഷിക താലൂക്ക് ശില്പശാല അണക്കരയിൽ നടന്നു. ഇൻഫാം ദേശീയ ചെയർമാൻ ഫാ. തോമസ് മറ്റമുണ്ടയിൽ ഉദ്ഘാടനം ചെയ്തു. അണക്കര ചില്ലിംഗ് പ്ലാന്‍റ് കോൺഫറൻസ് ഹാളിൽ നടന്ന ശില്പശാലയിൽ കട്ടപ്പന കാർഷിക താലൂക്ക് ഡയറക്ടർ ഫാ. വർഗീസ് കുളമ്പള്ളിൽ അധ്യക്ഷത വഹിച്ചു. കട്ടപ്പന കാർഷിക താലൂക്ക് ജോയിന്‍റ്് ഡയറക്ടർ ഫാ. വർഗീസ് കാക്കല്ലിൽ, ഫാ. കുര്യക്കോസ് മുഞ്ഞോലിൽ, താലൂക്ക് പ്രസിഡന്‍റ്് ബേബി ജോസഫ് പുത്തൻപറമ്പിൽ, ബാബു തോമസ്, സണ്ണി ഐലുമാലിൽ, സാജൻ ജോസഫ് തുടങ്ങിയവർ പ്രസംഗിച്ചു.

മകളുടെ വിവാഹദിനം നിര്‍ധന കുടുംബത്തിന് വീടൊരുക്കി ദമ്പതികള്‍

നെടുങ്കണ്ടം: മകളുടെ വിവാഹം ആര്‍ഭാടരഹിതമാക്കി ആ തുക ഉപയോഗിച്ച് നിര്‍ധന കുടുംബത്തിന് വീട് നിര്‍മിച്ച് നല്‍കി ദമ്പതികള്‍. നെടുങ്കണ്ടം വൈപ്പേല്‍ അശോകന്‍ - ബിജി ദമ്പതികളാണ് മകള്‍ അമൃതയുടെ വിവാഹത്തിനായി കരുതിയ പണം നിര്‍ധന കുടുംബത്തിന് വീടെന്ന സ്വപ്നം യാഥാര്‍ഥ്യമാക്കാന്‍ സംഭാവന ചെയ്തത്. മകളുടെ വിവാഹം ആഡംബര രഹിതമായി നടത്താന്‍ അശോകനും ബിജിയും നേരത്തേ തന്നെ തീരുമാനിച്ചിരുന്നു. വിവാഹത്തിനു മാറ്റിവച്ച അഞ്ച് ലക്ഷം രൂപയാണ് നിർധന കുടുംബത്തിനു വീടു നിർമിച്ചുനൽകാനായി എസ്എന്‍ഡിപി നെടുങ്കണ്ടം ശാഖയില്‍ ഏല്‍പ്പിച്ചത്. ശാഖാ നേതൃത്വം കട്ടക്കാലാ സ്വദേശിയായ വീട്ടമ്മയും മൂന്ന് പെണ്‍മക്കളുമടങ്ങുന്ന ഭവനരഹിതരായ കുടുംബത്തിന് വീടു പണിതു നൽകാൻ തീരുമാനിച്ചു. ശാഖാ അംഗങ്ങള്‍ തങ്ങളുടെ വിഹിതം അധ്വാനമായും സംഭാവന ചെയ്തു. എല്ലാവരുടെയും കൂട്ടായ പരിശ്രമത്തെത്തുടര്‍ന്ന് 61 ദിവസം കൊണ്ട് വീടുപണി പൂര്‍ത്തിയായി. അശോകന്‍ - ബിജി ദമ്പതികളുടെ മകൾ അമൃതയുടെ കഴുത്തില്‍ കുഞ്ചിത്തണ്ണി സ്വദേശി അനന്ദു രാജന്‍ താലി ചാര്‍ത്തിയ ദിവസംതന്നെ പുതിയ വീടിന്‍റെ ഗൃഹപ്രവേശനവും നടന്നു. ഗൃഹപ്രവേശനച്ചടങ്ങില്‍ എസ്എന്‍ഡിപി യൂണിയന്‍ ഭാരവാഹികള്‍, ശാഖാ ഭരണസമിതി അംഗങ്ങള്‍, മേഖലാ ഭാരവാഹികള്‍, കുടുംബയോഗം ഭാരവാഹികള്‍ തുടങ്ങിയവര്‍ പങ്കെടുത്തു. യൂണിയന്‍ പ്രസിഡന്‍റ് സജി പറമ്പത്ത് ഭദ്രദീപം തെളിച്ച് വീട് കൈമാറി. അശോകന്‍ - ബിജി ദമ്പതികളുടെ തീരുമാനം അറിഞ്ഞ് സമാനമായ രീതിയില്‍ വീട് നിര്‍മിച്ച് നല്‍കാന്‍ തയാറായി മൂന്നുപേര്‍ തങ്ങളെ സമീപിച്ചിട്ടുണ്ടെന്ന് എസ്എന്‍ഡിപി ഭാരവാഹികള്‍ പറഞ്ഞു.

കാഴ്ചയുടെ വസന്തം തീർത്ത് മൈക്രോവേവ് വ്യൂ പോയിന്‍റ്

ഇടുക്കി: അധികം സഞ്ചാരികൾ എത്തിച്ചേരാത്ത പ്രകൃതി ഒരുക്കിയ ദൃശ്യവിസ്മയവുമായി ഇടുക്കി പൈനാവിലെ മൈക്രോവേവ് വ്യൂ പോയിന്‍റ് സഞ്ചാരികളെ മാടി വിളിക്കുന്നു. ഇവിടെനിന്നാൽ കോടമഞ്ഞ് അരിച്ചിറങ്ങുന്ന പച്ചപുതച്ച മലനിരകളിലെ കുളിരേകുന്ന കാഴ്ചകൾ കാണാം. വനംവകുപ്പിന്‍റെ നേതൃത്വത്തിലുള്ള ജില്ലയിലെ മറ്റൊരു വിനോദസഞ്ചാരകേന്ദ്രമാണിത്. വിനോദസഞ്ചാരികൾ മാത്രമല്ല, സേവ് ദ ഡേറ്റ് പോലുള്ള ഫോട്ടോ ഷൂട്ടിനായും മറ്റും ഒട്ടേറെ പേർ ഇവിടം തേടിയെത്തുന്നുണ്ട്. മൈക്രോവേവ് വ്യൂ പോയിന്‍റിൽനിന്നാൽ കണ്ണെത്താദൂരത്തോളം പരന്നുകിടക്കുന്ന മനോഹര കാഴ്ചകളാണ് സഞ്ചാരികളെ കാത്തിരിക്കുന്നത്. മലയിടുക്കിലേക്ക് മറയുന്ന സൂര്യന്‍റെ അസ്തമയക്കാഴ്ചയാണ് ഏറെ ചേതോഹരം. മേഘങ്ങൾക്കിടയിലൂടെ പതിയെ താഴ്‌വരകളിലേക്ക് ഇറങ്ങിച്ചെല്ലുന്ന സൂര്യനും പഞ്ഞിക്കെട്ടുകൾ പോലെ ഒഴുകിനീങ്ങുന്ന മേഘങ്ങളും കാഴ്ചയുടെ പുത്തൻ അനുഭവം തീർക്കും. ആർച്ച് ഡാമായ ഇടുക്കി ജലാശയം ഇവിടെനിന്നാൽ കാണാം. കേരളത്തിലെ ഏറ്റവും ഉയരം കൂടിയ കൊടുമുടിയായ ആനമുടി, ചൊക്രമുടി, പാൽക്കുളം മേട്, തോപ്രാംകുടി ഉദയഗിരി, കാൽവരിമൗണ്ട് മലനിരകളുടെ കാഴ്ചകൾ സഞ്ചാരികൾക്ക് ഹൃദ്യമായ അനുഭവമാണ്. കൂടാതെ ഗ്യാപ് റോഡ്, പള്ളിവാസൽ, വെള്ളത്തൂവൽ സർജ്, പൂപ്പാറ, കള്ളിപ്പാറ തുടങ്ങിയ സ്ഥലങ്ങളുടെ ദൃശ്യഭംഗിയും ആസ്വദിക്കാനാകും. ഇതിനു പുറമേ ചുറ്റുമുള്ള പച്ചപ്പിന്‍റെ വന്യസൗന്ദര്യം സന്ദർശകരെ വിസ്മയിപ്പിക്കും. ചിലപ്പോൾ കാട്ടിൽ മേഞ്ഞു നടക്കുന്ന ആന, കുരങ്ങ്, കേഴ, കാട്ടുപോത്ത് തുടങ്ങിയ വന്യമൃഗങ്ങളെയും കാണാനാകും. സന്ദർശന സമയം രാവിലെ ഒൻപതു മുതൽ വൈകുന്നേരം ആറു വരെയാണ് ഇവിടെ പ്രവേശനം അനുവദിച്ചിരിക്കുന്നത്. മുതിർന്നവർക്ക് 40 രൂപയും കുട്ടികൾക്ക് 20 രൂപയുമാണ് പ്രവേശനനിരക്ക്. സഞ്ചാരികൾക്ക് ആവശ്യമായ സൗകര്യങ്ങളും ഇവിടെ ഒരുക്കിയിട്ടുണ്ട്. സുരക്ഷാ മുന്നൊരുക്കങ്ങളുടെ ഭാഗമായി വേലിയും നിർമിച്ചിട്ടുണ്ട്. 15 പേരടങ്ങിയ ജീവനക്കാരുടെ സംഘമാണ് ഈ സ്ഥലം പരിപാലിക്കുന്നത്. അവരിൽ മൂന്നു പേർ വീതം ഓരോ ദിവസവും സഞ്ചാരികളെ സഹായിക്കാൻ ഇവിടെയുണ്ടാകും. എത്തിച്ചേരാൻ തൊടുപുഴ - ചെറുതോണി സംസ്ഥാനപാതയിൽ കുയിലിമല സിവിൽ സ്റ്റേഷനും പൈനാവിനും ഇടയിലുള്ള ജില്ലാ പഞ്ചായത്ത് ജംഗ്ഷനിൽനിന്ന് ഇടത്തോട്ട് തിരിഞ്ഞ് എംആർഎസ് സ്കൂളിന്‍റെയും കേന്ദ്രീയ വിദ്യാലയത്തിന്‍റെയും ഇടയിലുള്ള ഓഫ് റോഡിനു സമാനമായ പാതയിലൂടെ സഞ്ചരിച്ചാൽ ഇവിടെയെത്താം. സാഹസികയാത്രികർക്ക് നവ്യാനുഭവം പകരുന്നതാണ് ഈ യാത്ര.

വന്യജീവി സംഘർഷം: ഹെൽപ് ഡെസ്ക് തുടങ്ങി

തൊടുപുഴ: വന്യജീവിശല്യം രൂക്ഷമായ തദ്ദേശ സ്ഥാപനങ്ങളിൽ ഇത്തരം പ്രശ്നങ്ങൾ പരിഹരിക്കുന്ന തിന്‍റെ ഭാഗമായി വനംവകുപ്പ് നടപ്പാക്കുന്ന തീവ്രയജ്ഞ പരിപാടിക്കു ജില്ലയിൽ തുടക്കമായി. ആദ്യഘട്ടമായി തദ്ദേശ സ്ഥാപനങ്ങളിലും റേഞ്ച് ഓഫീസുകളിലും വനംവകുപ്പിന്‍റെ ഹെൽപ് ഡെസ്കുകൾ ആരംഭിച്ചു. ഇതോടൊപ്പം വനംവകുപ്പുമായി ബന്ധപ്പെട്ട പരാതികൾ, നിർദേശങ്ങൾ, കർഷകർ അഭീമുഖീകരിക്കുന്ന പ്രശ്നങ്ങൾ എന്നിവ സമർപ്പിക്കാനായി പരാതിപ്പെട്ടികളും സ്ഥാപിച്ചു. 31 വരെ ഇതുവഴി പരാതികളും നിർദേശങ്ങളും നൽകാം. 30 ഹോട്ട് സ്പോട്ടുകൾ ഹെൽപ് ഡെസ്ക് വഴി പരാതികളും പ്രശ്നങ്ങളും സ്വീകരിച്ചു പരിഹാരം കണ്ടെത്തുകയാണ് ലക്ഷ്യം. വനം ഉദ്യോഗസ്ഥരും ജനപ്രതിനിധികളുംഅടങ്ങുന്ന ടീമുകൾ ഹെൽപ് ഡെസ്കുകൾ മുഖേന പരാതി സ്വീകരിക്കും. ഓരോ പഞ്ചായത്തിലും ഇതിനായി ഫെസിലിറ്റേറ്ററെ ചുമതലപ്പെടുത്തി. പ്രാദേശികമായി പരിഹരിക്കാൻ കഴിയുന്ന പ്രശ്നങ്ങളിൽ ആദ്യഘട്ടത്തിൽത്തന്നെ പരിഹാരം കാണും. സംസ്ഥാനത്ത് 273 പഞ്ചായത്തുകളിലാണ് ഒക്ടോബർ 30 വരെ തീവ്രയജ്ഞ പരിപാടി. ഇതിൽ മുപ്പതോളം പഞ്ചായത്തുകളിൽ വന്യജീവി ആക്രമണം മൂലം ജനങ്ങൾ ഏറെ ബുദ്ധിമുട്ടുന്നതിനാൽ ഇവ ഹോട്ട്സ്പോട്ടുകളായി പരിഗണിച്ചായിരിക്കും പ്രവർത്തനം. രണ്ട്, മൂന്നു ഘട്ടങ്ങൾ ജില്ലാ ഭരണകൂടത്തിന്‍റെ നേതൃത്വത്തിൽ എല്ലാ വകുപ്പുകളുടെയും സഹകരണത്തോടെ ജില്ലയുടെ ചുമതലയുള്ള മന്ത്രിയുടെ നേതൃത്വത്തിലാണ് രണ്ടാം ഘട്ട പ്രവർത്തനം. എംഎൽഎമാർ ഉൾപ്പെടെ ഇതിൽ പങ്കാളികളാകും. മനുഷ്യ -വന്യജീവി സംഘർഷ ലഘൂകരണ സമിതി കണ്‍വീനറായ ഡിഎഫ്ഒമാർക്കായിരിക്കും നിർവഹണ ചുമതല. ജില്ലാ തലത്തിൽ പരിഹരിക്കാൻ കഴിയാത്ത സങ്കീർണമായ പ്രശ്നങ്ങൾ മൂന്നാം ഘട്ടത്തിൽ പരിഗണിക്കും. ഇതിനായി മന്ത്രിമാർ, എംഎൽഎമാർ, വകുപ്പ് മേധാവികൾ എന്നിവർ ഉൾപ്പെടെ ചർച്ചകൾ നടത്തി പരിഹാര മാർഗം കണ്ടെത്തുകയാണ് ലക്ഷ്യം. വന്യജീവി ആക്രമണമുള്ള മേഖലകൾ പ്രത്യേക ക്ലസ്റ്ററുകൾ ആയി തിരിച്ചായിരിക്കും പരിഹാര മാർഗം കണ്ടെത്തുക. ഇവിടെയും പരിഹാരം കണ്ടെത്താൻ കഴിഞ്ഞില്ലെങ്കിൽ കേന്ദ്രസഹായത്തോടെ പരിഹരിക്കാൻ ശ്രമം നടത്തും. പരാതിപ്പെട്ടികളുള്ള പഞ്ചായത്തുകൾ കാഞ്ചിയാർ, ഉപ്പുതറ, കാമാക്ഷി, പീരുമേട്, പെരുവന്താനം, വാഴത്തോപ്പ്, കുമളി,വണ്ടിപ്പെരിയാർ, ചക്കുപള്ളം, നെടുങ്കണ്ടം, കരിങ്കുന്നം, മുട്ടം, കുമാരമംഗലം, ഉടുന്പന്നൂർ, വണ്ണപ്പുറം, മൂന്നാർ, ഇടമലക്കുടി, ദേവികുളം, ചിന്നക്കനാൽ, ശാന്തൻപാറ, അടിമാലി, വെള്ളത്തൂവൽ, കൊന്നത്തടി, കഞ്ഞിക്കുഴി, മാങ്കുളം, മറയൂർ, കാന്തല്ലൂർ, വട്ടവട പഞ്ചായത്തുകളിലും കട്ടപ്പന നഗരസഭയിലും പരാതിപ്പെട്ടിയും ഹെൽപ്പ് ഡെസ്കും ആരംഭിച്ചു. ഇതിനു പുറമെ ഇടുക്കി അതിർത്തിയിൽ എറണാകുളം ജില്ലയിൽപെട്ട പൈങ്ങോട്ടൂർ, കവളങ്ങാട്, കീരംപാറ പഞ്ചായത്തുകളിലുമാണ് പരാതിപ്പെട്ടികൾ സ്ഥാപിച്ചത്.

ബംഗളൂരുവിലേക്ക് കെഎസ്ആർടിസി സർവീസ് ആരംഭിക്കണം

തിരുവനന്തപുരം: കട്ടപ്പനയിൽനിന്ന് കുമളി വഴി ബംഗളൂരുവിലേക്ക് കെഎസ്ആർടിസി ബസ് സർവീസ് അനുവദിക്കണമെന്നാവശ്യപ്പെട്ട് ജില്ലാ പഞ്ചായത്ത് പ്രസിഡന്‍റ് രാരിച്ചൻ നീർണാക്കുന്നേൽ വകുപ്പ് മന്ത്രി കെ.ബി. ഗണേഷ്കുമാറിനു നിവേദനം നൽകി. ഇടുക്കി ജില്ലയിലെ വ്യാപാരികൾക്കും വിദ്യാർഥികൾക്കും വളരെ പ്രയോജനം ലഭിക്കുമെന്ന് നിവേദനത്തിൽ ചൂണ്ടിക്കാട്ടി. വിഷയം അനുഭാവപൂർവം പരിഗണിക്കുമെന്നും അവധി ദിവസങ്ങളിൽ പ്രത്യേക സർവീസ് നടത്തുന്ന കാര്യം പരിശോധിച്ച് നടപടി സ്വീകരിക്കുമെന്നും മന്ത്രി ഉറപ്പുനൽകിയതായി രാരിച്ചൻ അറിയിച്ചു.

സെക്യൂരിറ്റി ജീവനക്കാരന്‍റെ കൊലപാതകം: അന്വേഷണം എങ്ങുമെത്തിയില്ല

മൂന്നാർ: മൂന്നാറിലെ സെക്യൂരിറ്റി ജീവനക്കാരൻ കൊല്ലപ്പെട്ട സംഭവത്തിൽ ഒരു മാസം പിന്നിട്ടിട്ടും തുന്പ് കണ്ടെത്താനാവാതെ പോലീസ്. മൂന്നാർ ഡിവൈഎസ്പിയുടെ നേതൃത്വത്തിൽ വിപുലമായ സംഘം രൂപീകരിച്ച് അന്വേഷണം നടത്തുന്നുണ്ടെങ്കിലും കൊലപാതകം സംബന്ധിച്ച് സൂചനകളൊന്നും ലഭിച്ചിട്ടില്ലെന്നാണ് അറിയുന്നത്. ചൊക്കനാട് എസ്റ്റേറ്റ് സ്വദേശിയും ചൊക്കനാട് ഫാക്ടറിയിലെ സെക്യൂരിറ്റി ജീവനക്കാരനുമായ രാജപാണ്ടി കുത്തേറ്റു മരിച്ച സംഭവവുമായി ബന്ധപ്പെട്ട് നൂറിലധികം പേരെ ചോദ്യം ചെയ്തെങ്കിലും ഫലമുണ്ടായിട്ടില്ല. എസ്റ്റേറ്റ് കേന്ദ്രീകരിച്ച് നടത്തിയ അന്വേഷണവും വിഫലമായി. സംഭവദിവസം രാവിലെ ഏഴിനു ഫാക്ടറിയിൽനിന്ന് ഇറങ്ങിപ്പോകുന്നത് സിസി കാമറകളിൽ തെളിഞ്ഞെങ്കിലും മരിച്ച നിലയിൽ കണ്ടെത്തിയ ക്വാർട്ടേഴ്സിനു സമീപത്തെങ്ങും കാമറകൾ ഇല്ലാതിരുന്നത് തിരിച്ചടിയായി. സംഭവം നടന്ന് ദിവസങ്ങൾ കഴിഞ്ഞിട്ടും പ്രതികളെക്കുറിച്ചുള്ള സൂചനകൾ ലഭിക്കാതെ വന്നതോടെ പ്രതികളെക്കുറിച്ച് വിവരം നൽകുന്നവർക്ക് 25,000 രൂപ പാരിതോഷികം നൽകുമെന്ന് അന്വേഷണം സംഘം അറിയിച്ചിരുന്നു. എസ്റ്റേറ്റിലുള്ള ആരെങ്കിലും വിവരം നൽകുമെന്നായിരുന്നു പോലീസ് കണക്കുകൂട്ടിയിരുന്നത്. കഴിഞ്ഞ ഓഗസ്റ്റ് 16നാണ് എസ്റ്റേറ്റിലെ ക്വാർട്ടേഴ്സിൽ രാജപാണ്ടി മരിച്ച നിലയിൽ കണ്ടെത്തിയത്. തലയിലും കഴുത്തിലും കുത്തേറ്റ നിലയിലായിരുന്നു. ക്വാർട്ടേഴ്സിലേക്ക് മടങ്ങിയിട്ട് ഏറെ നേരമായിട്ടും മടങ്ങി വരാതിരുന്നതോടെ സഹപ്രവർത്തകർ അന്വേഷിച്ചു ചെന്നപ്പോഴാണ് രക്തംവാർന്ന നിലയിൽ ജീവനക്കാരനെ കണ്ടെത്തിയത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]