ADVERTISEMENT

ADVERTISEMENT

സ്പീക്ക് ആൻഡ് സ്പാർക്കിൾ ഇംഗ്ലീഷ് പ്രോഗ്രാം

മൂലമറ്റം: സെന്‍റ് ജോസഫ്‌സ് ഓട്ടോണമസ് കോളജിലെ എന്‍എസ്എസിന്‍റെ നേതൃത്വത്തില്‍ കാഞ്ഞാര്‍ സെന്‍റ് ജോസഫ്‌സ് സ്‌കൂളില്‍ ഇംഗ്ലീഷ് എൻ‌റിച്ച്മെന്‍റ് പ്രോഗ്രാമായ സ്പീക്ക് ആന്‍ഡ് സ്പാര്‍ക്കിളിന്‍റെ ഉദ്ഘാടനം ജില്ലാ പഞ്ചായത്തംഗം പ്രഫ. എം.ജെ. ജേക്കബ് നിര്‍വഹിച്ചു.

ജില്ലയിലെ 250-ഓളം സ്‌കൂളുകളില്‍നിന്നു തെരഞ്ഞടുക്കപ്പെട്ട ഏഴു സ്‌കൂളുകളില്‍ സര്‍ക്കാര്‍ ധനസഹായത്തോടെ റിസോഴ്‌സ് അധ്യാപകരിലൂടെ നടപ്പാക്കുന്ന പദ്ധതിയാണിത്. ക്ലാസ് റൂം പഠനത്തിനുപുറമേ വിവിധ ഭാഷാപഠന പ്രവര്‍ത്തനങ്ങള്‍ അവതരിപ്പിച്ച് സജീവമായ സംവേദനാത്മക കഴിവുകളുടെ വികാസവും ആഹ്ലാദകരമായ പഠനാന്തരീക്ഷം സൃഷ്ടിച്ചും ആശയവിനിമയശേഷിയും ഭാഷാപരിജ്ഞാനവും വര്‍ധിപ്പിക്കുകയാണ് ലക്ഷ്യം.

കോളജ് മാനേജര്‍ റവ. ഡോ. തോമസ് പുതുശേരി, പ്രിന്‍സിപ്പല്‍ ഡോ. ജോസഫ് ജോര്‍ജ്, സിഎഫ്ഒ റവ.ഡോ. അലക്‌സ് ലൂയിസ്, സ്‌കൂള്‍ മാനേജര്‍ ഫാ. ജോര്‍ജ് പാറേക്കുന്നേല്‍, ഹെഡ്മാസ്റ്റര്‍ ബിജുമോന്‍ മാത്യു, എഇഒ ആഷിമോള്‍ കുര്യാച്ചന്‍, പിടിഎ പ്രസിഡന്‍റ് ഷോബിന്‍ എന്നിവര്‍ പ്രസംഗിച്ചു.

എന്‍എസ്എസ്‌ പ്രോഗ്രാം ഓഫീസര്‍മാരായ ഡോ. കെ.വി. ജോബി, അഖില മരിയ റീഗല്‍, അനു സാജു, എസ്. ഷൈജു, എന്‍എസ്എസ് വോളന്‍റിയര്‍മാരായ ജെറി മാത്യു, വൈശാഖി പിള്ള എന്നിവര്‍ നേതൃത്വം നല്‍കി.

ADVERTISEMENT

യാത്രക്കാരുടെ പേടിസ്വപ്‌നമായി ശങ്കരപ്പള്ളി വളവ്

മുട്ടം: തൊടുപുഴ-പുളിയന്‍മല സംസ്ഥാനപാതയില്‍ മുട്ടം ശങ്കരപ്പള്ളി മേഖലയില്‍ അപകടങ്ങള്‍ പതിവാകുന്നു. ദിനംപ്രതിയുണ്ടാകുന്ന അപകടങ്ങളില്‍ നിരവധി ജീവന്‍ പൊലിയുകയും ഒട്ടേറെ പേര്‍ക്ക് പരിക്കേല്‍ക്കുകയും ചെയ്തിട്ടുണ്ട്. കഴിഞ്ഞ ദിവസം നിയന്ത്രണംവിട്ട കാര്‍ താഴ്ചയിലേക്കു മറിഞ്ഞ് പിഞ്ചുകുഞ്ഞടക്കം രണ്ടു പേരാണ് മരിച്ചത്. വെങ്ങല്ലൂര്‍ കരടിപ്പറമ്പില്‍ ആമിന ബീവി (58), കൊച്ചുമകള്‍ മിഷേല്‍ മറിയം (4 മാസം) എന്നിവരാണ് മരിച്ചത്. മിഷേലിന്‍റെ പിതാവും വെള്ളത്തൂവല്‍ പോലീസ് സ്റ്റേഷനിലെ സിവില്‍ പോലീസ് ഓഫീസറുമായ കെ.എസ്. ഷാമോന്‍, ഭാര്യ ഹസീന (29), ഇവരുടെ മകള്‍ നാലു വയസുകാരി ഐഷ എന്നിവര്‍ക്ക് പരിക്കേല്‍ക്കുകയും ചെയ്തിരുന്നു. തൊടുപുഴ ഭാഗത്തേക്കുവന്ന കാര്‍ ശങ്കരപ്പിള്ളി പാലത്തിന് സമീപം നിയന്ത്രണംവിട്ട് റോഡരികിലെ മരത്തില്‍ ഇടിച്ചശേഷം താഴ്ചയിലേക്ക് മറിഞ്ഞായിരുന്നു അപകടം. ശങ്കരപ്പള്ളി പാലവും പാലത്തോടു ചേര്‍ന്നുമുള്ള പ്രദേശവും നിരന്തര അപകട മേഖലയാണ്. ഇടത്തോട്ടും വലത്തോട്ടുമുള്ള വളവുകളും വീതി കുറവും പാലവും കൂടിച്ചേരുന്നിടത്താണ് അപകടം കൂടുതലായുണ്ടാകുന്നത്. ഏതാനും നാളുകള്‍ക്കുള്ളില്‍ പത്ത് അപകടങ്ങളാണ് ഈ പ്രദേശത്ത് മാത്രം സംഭവിച്ചിട്ടുള്ളത്. നാലു വാഹനങ്ങള്‍ കൂട്ടിയിടിച്ച് യാത്രക്കാർക്കു ഗുരുതര പരിക്കേറ്റത് മാസങ്ങള്‍ക്ക് മുമ്പാണ്. പിന്നീട് പിക്കപ്പ് ജീപ്പിടിച്ചും അപകടമുണ്ടായി. ഇതിന് മുന്‍പ് ട്രാവലറും അപകടത്തില്‍പ്പെട്ടു. റോഡിന്‍റെ അശാസ്ത്രീയ നിര്‍മാണമാണ് അപകടം തുടര്‍ക്കഥയാകാന്‍ കാരണമെന്ന് ചൂണ്ടിക്കാണിക്കപ്പെടുന്നു. മഴ പെയ്യുന്നതോടെ മിനുസമുള്ള റോഡില്‍ വാഹനങ്ങള്‍ തെന്നി നിയന്ത്രണം വിടാനുള്ള സാധ്യതയേറെയാണ്. പെട്ടെന്ന് ബ്രേക്ക് ചെയ്യാന്‍ ശ്രമിക്കുന്നതോടെയാണ് വാഹനങ്ങള്‍ അപകടത്തില്‍പ്പെടുന്നത്. ഇതിനിടെ അപകടങ്ങള്‍ വര്‍ധിച്ചതോടെ പൊതുമരാമത്ത് വകുപ്പ് സ്പീഡ് ബ്രേക്കറുകള്‍ സ്ഥാപിച്ചിരുന്നു. ഇത് അജ്ഞാത വാഹനങ്ങള്‍ ഇടിച്ചു തകര്‍ത്തതോടെ മുന്നറിയിപ്പ് സിഗ്‌നല്‍ സംവിധാനവും സ്ഥാപിച്ചു. എന്നാല്‍ ഇത്തരം സംവിധാനങ്ങള്‍ സ്ഥാപിച്ചെങ്കിലും അപകടത്തിന് കുറവു വന്നിട്ടില്ലെന്നതാണ് യാഥാര്‍ഥ്യം. ഇവിടെ റോഡിന്‍റെ അപകടാവസ്ഥ പരിഹരിക്കാന്‍ മോട്ടോര്‍ വാഹനവകുപ്പ് ഉള്‍പ്പെടെയുള്ള അധികൃതരടെ അടിയന്തര ഇടപെടല്‍ ഉണ്ടാവണമെന്ന് നാട്ടുകാര്‍ ആവശ്യപ്പെട്ടു.

എയര്‍ഹോണ്‍: ജില്ലയില്‍ 85 വാഹനങ്ങള്‍ക്കെതിരേ നടപടി

തൊടുപുഴ: വാഹനങ്ങളിലെ എയര്‍ഹോണുകള്‍ കണ്ടെത്താന്‍ മോട്ടോര്‍ വാഹനവകുപ്പ് ജില്ലയില്‍ നടത്തിയ പരിശോധനയില്‍ 85 വാഹനങ്ങള്‍ക്കെതിരേ നടപടി. വിവിധ മേഖലകളിലായാണ് അമിത ശബ്ദം മുഴക്കുന്ന എയര്‍ഹോണുകള്‍ കണ്ടെത്താന്‍ മോട്ടോര്‍ വാഹനവകുപ്പ് ഉദ്യോഗസ്ഥര്‍ പരിശോധന നടത്തിയത്. പിടികൂടിയ വാഹനങ്ങളുടെ ഉടമകളില്‍നിന്ന് 1,78,000 രൂപ പിഴ ഈടാക്കി. വാഹനങ്ങളില്‍നിന്ന് എയര്‍ഹോണുകള്‍ അഴിച്ചെടുത്തു. മോട്ടോര്‍ വാഹനവകുപ്പ് എന്‍ഫോഴ്‌സ്‌മെന്‍റ് ഓഫീസില്‍ സൂക്ഷിച്ചിരിക്കുന്ന എയര്‍ഹോണുകള്‍ ഇന്ന് റോഡ് റോളര്‍ കയറ്റി നശിപ്പിക്കും. സംസ്ഥാനത്താകെ നടക്കുന്ന പ്രത്യേക പരിശോധനയുടെ ഭാഗമായാണ് കഴിഞ്ഞ തിങ്കളാഴ്ച മുതല്‍ ജില്ലയിലും പരിശോധന ആരംഭിച്ചത്. 19 വരെയായിരുന്നു പരിശോധന. എയര്‍ഹോണുകള്‍ കൂടുതലായി ഘടിപ്പിക്കുന്ന ബസുകള്‍, ഗുഡ്‌സ് വാഹനങ്ങള്‍, ലോറികള്‍, അന്തര്‍ സംസ്ഥാന വാഹനങ്ങള്‍ എന്നിവയാണ് കൂടുതലായി പരിശോധിച്ചത്. ആര്‍ടിഒ ഓഫീസുകളുടെയും എന്‍ഫോഴ്‌സ്‌മെന്‍റ് വിഭാഗത്തിന്‍റെയും നേതൃത്വത്തിലാണ് പരിശോധന നടക്കുന്നത്. ഗതാഗതമന്ത്രി കെ.ബി. ഗണേഷ്‌കുമാറിന്‍റെ നിര്‍ദേശപ്രകാരമാണ് സംസ്ഥാനത്തുടനീളം പരിശോധന നടത്തിയത്. പിടികൂടുന്ന വാഹനങ്ങള്‍ക്ക് ആദ്യപടിയായി 2000 രൂപ വീതമാണ് പിഴയീടാക്കിയത്. വീണ്ടും നിയമലംഘനം ആവര്‍ത്തിച്ചാല്‍ 10,000 രൂപ വീതം പിഴയീടാക്കാനാണ് നിര്‍ദേശം.

സംസ്ഥാന സ്‌കൂള്‍ കായികമേള: പരിശീലന പദ്ധതിയുമായി "റൈസ്'

നെടുങ്കണ്ടം: സംസ്ഥാന സ്‌കൂള്‍ കായികമേളയില്‍ ഇടുക്കിയുടെ കായികമുന്നേറ്റം ലക്ഷ്യമിട്ട് ഡീന്‍ കുര്യാക്കോസ് എംപി റൈസ് പദ്ധതിയുടെ ഭാഗമായി നടപ്പിലാക്കുന്ന കായികപരിശീലനം നെടുങ്കണ്ടം പഞ്ചായത്ത് സിന്തറ്റിക് ട്രാക്ക് സ്റ്റേഡിയത്തില്‍ ആരംഭിച്ചു. ഇടുക്കി പാര്‍ലമെന്‍റ് മണ്ഡലത്തിലെ വിദ്യാര്‍ഥികളുടെ സമഗ്ര വളര്‍ച്ച ലക്ഷ്യമിട്ടാണ് റൈസ് പദ്ധതി നടപ്പിലാക്കുന്നത്. റവന്യു ജില്ലാ കായികമേളയില്‍ ഒന്നും രണ്ടും മൂന്നും സ്ഥാനങ്ങള്‍ നേടി സംസ്ഥാന സ്‌കൂള്‍ കായികമേളയ്ക്കു യോഗ്യത നേടിയ കായികതാരങ്ങള്‍ക്ക് രണ്ടു ദിവസത്തെ വിദഗ്ധ പരിശീലനമാണ് നല്‍കുന്നത്. 110 ഓളം കായികതാരങ്ങള്‍ പരിശീലനത്തില്‍ പങ്കെടുക്കുന്നുണ്ട്. ദേശീയ പരിശീലകരായ ഡോ. ജോര്‍ജ് ഇമ്മാനുവല്‍, എം.എ. ജോര്‍ജ് എന്നിവരാണ് പരിശീലനത്തിന് നേതൃത്വം നല്‍കുന്നത്. ജില്ലാ അത്‌ലറ്റിക് അസോസിയേഷനും ആര്‍ഡിഎസ്ജിഎയും മേല്‍നോട്ടം വഹിക്കും. കായികതാരങ്ങള്‍ക്ക് ലഭിക്കുന്ന വിദഗ്ധ പരിശീലനം സംസ്ഥാന കായികമേളയില്‍ മികച്ച പ്രകടനം കാഴ്ചവയ്ക്കുന്നതിന് വഴിയൊരുക്കുമെന്ന് ഡീന്‍ കുര്യാക്കോസ് എംപി പറഞ്ഞു. ടീം ഒരുമിച്ചുള്ള പരിശീലനത്തലൂടെ റിലേ പോലുള്ള ഇനങ്ങളില്‍ കോ-ഓര്‍ഡിനേഷന്‍ മെച്ചപ്പെടുത്താനും കൂടുതല്‍ നേട്ടങ്ങള്‍ സ്വന്തമാക്കാനും കഴിയും. പരിശീലനത്തില്‍ പങ്കെടുക്കുന്ന കായികതാരങ്ങള്‍ക്ക് ഭക്ഷണവും താമസസൗകര്യവും സൗജന്യമായി നല്‍കുന്നുണ്ട്. ഇതോടൊപ്പം ജില്ലാ ടീമിലെ മുഴുവന്‍ താരങ്ങള്‍ക്കും ജഴ്‌സിയും സൗജന്യമായി നല്‍കും. ജില്ലയിലെ കായികപരിശീലനരംഗത്തെ ആധുനിക സൗകര്യങ്ങളുടെയും വിദഗ്ധ കായികപരിശീലന ലഭ്യതയുടെയും അപര്യാപ്തത പരിഹരിക്കാന്‍ വരുംവര്‍ഷങ്ങളില്‍ കൂടുതല്‍ സൗകര്യങ്ങള്‍ ഒരുക്കാന്‍ റൈസ് പദ്ധതിയിലൂടെ ലക്ഷ്യമിടുന്നുണ്ടെന്ന് എംപി അറിയിച്ചു. പരിശീലന പരിപാടി ഡീന്‍ കുര്യാക്കോസ് എംപി ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്‍റ് പ്രിമി ലാലിച്ചന്‍ അധ്യക്ഷത വഹിച്ചു. അത്‌ലറ്റിക് അസോസിയേഷന്‍ പ്രസിഡന്‍റും റൈസ് കോ-ഓര്‍ഡിനേറ്ററുമായ വി.ഡി. ഏബ്രഹാം, ആര്‍ഡിഎസ്ജിഎ സെക്രട്ടറി പി.എ. സുനീഷ്, പരിശീലകന്‍ ഡോ. ജോര്‍ജ് ഇമ്മാനുവല്‍, റിട്ട. സായി കോച്ച് എം.എ. ജോര്‍ജ്, ജോയി തോമസ്, അത്‌ലറ്റിക് അസോസിയേഷന്‍ സെക്രട്ടറി കെ.കെ. ഷിജോ, ഗ്രാമപഞ്ചായത്ത് അംഗങ്ങള്‍ തുടങ്ങിയവര്‍ പ്രസംഗിച്ചു.

മൂലമറ്റം കോളജിലെ ടെക്‌ഫെസ്റ്റ് വേറിട്ട അനുഭവമായി

അറക്കുളം: സെന്‍റ് ജോസഫ്‌സ് കോളജ് ഡേറ്റാ സയന്‍സ് വിഭാഗം സംഘടിപ്പിച്ച ടെക്‌ഫെസ്റ്റ് വേറിട്ട അനുഭവമായി. കോളജ് മാനേജര്‍ റവ. ഡോ. തോമസ് പുതുശേരി ഉദ്ഘാടനം ചെയ്തു.പ്രിന്‍സിപ്പല്‍ ഡോ. ജോസഫ് ജോര്‍ജ്, ഡേറ്റാ സയന്‍സ് വിഭാഗം മേധാവി സിസ്റ്റര്‍ ഡോ. ജിന്‍സി ജോസ് എന്നിവര്‍ പ്രസംഗിച്ചു. ഡേറ്റാ സയന്‍സ്, ആര്‍ട്ടിഫിഷല്‍ ഇന്‍റലിജന്‍സ്, റോബോട്ടിക്‌സ്, സൈബര്‍ സുരക്ഷ, ഗെയിം ഡെവലപ്‌മെന്‍റ് തുടങ്ങിയ മേഖലകളിലെ വിവിധ പ്രദര്‍ശനങ്ങളും മത്സരങ്ങളും നടത്തി. വിദ്യാര്‍ഥികള്‍ സ്വന്തമായി രൂപകല്പന ചെയ്ത വിവിധ തരത്തിലുള്ള റോബോട്ടുകളും പ്രദര്‍ശിപ്പിച്ചു. ഹഗ്ഗിംഗ് റോബോട്ടിനെ സ്പര്‍ശിച്ചാല്‍ പാട്ട് പ്ലേ ചെയ്യുന്ന സംവിധാനം, മുന്നിലുള്ള തടസങ്ങളെ സെന്‍സര്‍ വഴി തിരിച്ചറിഞ്ഞ് സ്വയം ദിശ മാറ്റി മുന്നോട്ട് നീങ്ങുന്ന റോബോട്ട്, ഉപയോക്താവിന്‍റെ ചോദ്യങ്ങള്‍ക്ക് കൃത്യമായ ഉത്തരങ്ങള്‍ നല്‍കുന്ന ആര്‍ട്ടിഫിഷല്‍ ഇന്‍റലിജന്‍സ് അടിസ്ഥാനത്തിലുള്ള റോബോട്ട്, സുരക്ഷാമേഖലയില്‍ നിര്‍ണായകമായി റഡാര്‍ സാങ്കേതികവിദ്യ ഉപയോഗിച്ച് ലോഹങ്ങള്‍ കണ്ടെത്തുന്ന റോബോട്ട് എന്നിവയെല്ലാം വിദ്യാര്‍ഥികളുടെ സാങ്കേതികജ്ഞാനം വെളിപ്പെടുത്തുന്നതായി. ‌സമാപനയോഗം കോളജ് സിഎഫ്ഒ റവ.ഡോ. അലക്‌സ് ലൂയിസ് ഉദ്ഘാടനം ചെയ്തു. ചടങ്ങില്‍ വിജയികള്‍ക്കുള്ള സമ്മാനങ്ങളും വിതരണം ചെയ്തു.

കുടുംബശ്രീ ദീപാവലി ട്രേഡ് ഫെയറിന് തുടക്കം

ഇടുക്കി: ദീപാവലി ആഘോഷങ്ങള്‍ക്ക് മധുരം പകര്‍ന്ന് കുടുംബശ്രീ ജില്ലാ മിഷന്‍ ഒരുക്കുന്ന മധുരവണ്ടി ദീപാവലി സ്‌പെഷല്‍ ട്രേഡ് ഫെയറിന് മൂന്നാറില്‍ തുടക്കമായി. എ. രാജ എംഎല്‍എ വാഹനം ഫ്‌ളാഗ് ഓഫ് ചെയ്തു. മൂന്നാറിലെ പ്രധാന ടൂറിസം കേന്ദ്രങ്ങളില്‍ സഞ്ചാരികള്‍ക്കും നാട്ടുകാര്‍ക്കും കുടുംബശ്രീ സംരംഭകരുടെ കൈപ്പുണ്യമുള്ള മധുരവിഭവങ്ങള്‍ വാഹനത്തില്‍ ലഭ്യമാക്കും. റീബില്‍ഡ് കേരള പദ്ധതിയുടെ ഭാഗമായാണ് പദ്ധതിയൊരുക്കുന്നത്. കുടുംബശ്രീ ജില്ലാ മിഷന്‍ കോ-ഓര്‍ഡിനേറ്റര്‍ എ. മണികണ്ഠന്‍, അസിസ്റ്റന്‍റ് കോ-ഓര്‍ഡിനേറ്റര്‍ ജി. ഷിബു എന്നിവര്‍ പ്രസംഗിച്ചു.

ജില്ലാ റോഡ് സൈക്ലിംഗ് ചാമ്പ്യന്‍ഷിപ്

തൊടുപുഴ: ജില്ലാ സൈക്ലിംഗ് അസോസിയേഷന്‍റെ നേതൃത്വത്തില്‍ സ്‌പോര്‍ട്‌സ് കൗണ്‍സിലിന്‍റെ സഹകരണത്തോടെ നടത്തിയ ജില്ലാ റോഡ് സൈക്ലിംഗ് ചാമ്പ്യന്‍ഷിപ് സമാപിച്ചു. അസോസിയേഷന്‍ ജില്ലാ പ്രസിഡന്‍റ് അഡ്വ. ജോര്‍ലി കുര്യന്‍ ഫ്‌ളാഗ് ചെയ്തു. സംസ്ഥാന കൗണ്‍സില്‍ അംഗം എന്‍. രവീന്ദ്രന്‍, ഡോ. ബോബു ആന്‍റണി, എ.പി. മുഹമ്മദ് ബഷീര്‍, കെ.എം. അസീസ് തുടങ്ങിയവര്‍ പ്രസംഗിച്ചു. വിവിധ വിഭാഗങ്ങളില്‍ ആസിഫ് അസീസ് (സെന്‍റ് സെബാസ്റ്റ്യന്‍സ് യുപിഎസ്, തൊടുപുഴ, ഗോകുല്‍ സോമന്‍, നീരജ് സുനില്‍, ആദിത്യന്‍ ബി. നായര്‍, ഡി.കെ. അര്‍ജുന്‍, നിഖില്‍ പ്രദീപ് (എംകെഎന്‍എം എച്ച്എസ്എസ്, കുമാരമംഗലം, മിഷേല്‍ ആന്‍ കുരുവിള (ചാവറ ഇന്‍റര്‍നാഷണല്‍ സ്‌കൂള്‍, വാഴക്കുളം), ആന്‍മരിയ ബിജു (സെന്‍റ് സെബാസ്റ്റ്യന്‍സ് എച്ച്എസ്, തൊടുപുഴ, നസ്‌റിന്‍ കെ. മജീദ് (സെന്‍റ് ജോര്‍ജ് എച്ച്എസ്എസ്, മുതലക്കോടം), അര്‍ജുന്‍ ഗിരീഷ് (സെന്‍റ് ആന്‍റണീസ് എച്ച്എസ്, വണ്ടന്‍മേട്), അജോ ജോയി (സെന്‍റ് മേരീസ് എച്ച്എസ്എസ്, അറക്കുളം, അബിരാം വിനോദ് (സെന്‍റ് ജെറോംസ് എച്ച്എസ്എസ്, വെള്ളയാംകുടി), അഖില്‍ ഗിരീഷ് (നിര്‍മല കോളജ്, മൂവാറ്റുപുഴ) എന്നിവര്‍ സംസ്ഥാന ചാമ്പ്യന്‍ഷിപ്പിലേക്ക് തെരഞ്ഞെടുക്കപ്പെട്ടു.

കെജിഎംഒഎ മിഡ്‌സോണ്‍ കോണ്‍ഫറന്‍സ് നടത്തി

തൊടുപുഴ: കെജിഎംഒഎ മിഡ്‌സോണ്‍ കോണ്‍ഫറന്‍സ് സംഘടിപ്പിച്ചു. മിഡ്സോണ്‍ വൈസ് പ്രസിഡന്‍റ് ഡോ. എ.ബി. വിന്‍സെന്‍റ് അധ്യക്ഷത വഹിച്ചു. സംസ്ഥാന പ്രസിഡന്‍റ് ഡോ. പി.കെ. സുനില്‍ ഉദ്ഘാടനം ചെയ്തു. സെക്രട്ടറി ഡോ. ജോബിന്‍ ജി. ജോസഫ് സിഎംഇ സെഷനുകളുടെ ഉദ്ഘാടനം നടത്തി. ജില്ലാ പ്രസിഡന്‍റ് ഡോ. അന്‍സല്‍ നബി, സംസ്ഥാന ട്രഷറര്‍ ഡോ. ഡി. ശ്രീകാന്ത്, മാനേജിംഗ് എഡിറ്റര്‍ ഡോ. സി.പി. ബിജോയ്, ഡോ. ജെ. ആല്‍ബര്‍ട്ട്, ഡോ. ടോണി തോമസ്, ഡോ. കെ.ആര്‍. രജിത് എന്നിവര്‍ പ്രസംഗിച്ചു. ഡോക്ടര്‍മാര്‍ക്കുനേരേ വര്‍ധിച്ചുവരുന്ന ആക്രമണങ്ങള്‍ക്കെതിരേ യോഗം പ്രതിഷേധിച്ചു. കാഷ്വാലിറ്റികളില്‍ ഒരു ഷിഫ്റ്റില്‍ രണ്ട് സിഎംഒ ഡോക്ടര്‍മാര്‍ എന്ന രീതിയില്‍ ഒരാശുപത്രിയില്‍ ചുരുങ്ങിയത് എട്ട് ഡോക്ടര്‍മാര്‍ വേണമെന്നും ആരോഗ്യപ്രവര്‍ത്തകര്‍ക്ക് സുരക്ഷിതമായി ജോലി ചെയ്യാന്‍ അവസരമൊരുക്കണമെന്നും യോഗം ആവശ്യപ്പെട്ടു.

അച്ചായന്‍സ് ഗോള്‍ഡ് പുതിയ ഷോറൂം കട്ടപ്പനയിൽ

കട്ടപ്പന: അച്ചായന്‍സ് ഗോള്‍ഡ് 32-ാമത് ഷോറൂം കട്ടപ്പന വെള്ളയാംകുടി ടിജെകെ ബില്‍ഡിംഗില്‍ പ്രവര്‍ത്തനം ആരംഭിച്ചു. സിനിമാ താരങ്ങളായ ശ്വേത മേനോന്‍, അന്ന രാജന്‍, അച്ചായന്‍സ് ഗോള്‍ഡ് എംഡി ടോണി വര്‍ക്കിച്ചന്‍ എന്നിവര്‍ ചേര്‍ന്ന് ഉദ്ഘാടനം നിര്‍വഹിച്ചു. അച്ചായന്‍സ് ഗോള്‍ഡ് ജനറല്‍ മാനേജര്‍ ഷിനില്‍ കുര്യന്‍ അധ്യക്ഷത വഹിച്ചു.

ഇന്നോവയും ഓട്ടോറിക്ഷയും കൂട്ടിയിടിച്ച് ഓട്ടോ ഡ്രൈവർക്കു പരിക്ക്

വണ്ടിപ്പെരിയാർ: ഇന്നോവയും ഓട്ടോറിക്ഷയും കൂട്ടിയിടിച്ച് ഓട്ടോറിക്ഷാ ഡ്രൈവർക്ക് ഗുരുതരമായി പരിക്കേറ്റു. ഓട്ടോറിക്ഷാ ഡ്രൈവർ 59-ാം മൈലിൽ താമസിക്കുന്ന പരമശിവന്‍റെ (62) കാലിനും തലയ്ക്കും ഗുരുതരമായ പരിക്കേറ്റു. നാട്ടുകാർ ഇയാളെ പ്രാഥമികാരോഗ്യകേന്ദ്രത്തിലെത്തിച്ച് പ്രാഥമിക ചികിത്സ നൽകിയശേഷം കോട്ടയം മെഡിക്കൽ കോളജിലേക്ക് മാറ്റി. ‌ഞായറാഴ്ച രാത്രി എട്ടോടെ പോലീസ് സ്റ്റേഷന് സമീപമാണ് അപകടമുണ്ടായത്. കുമളിയിൽനിന്നു ചങ്ങനാശേരിയിലേക്ക് പോയ ഇന്നോവയും 59-ാംമൈലിൽനിന്നു വണ്ടിപ്പെരിയാറിലേക്ക് വരികയായിരുന്ന ഓട്ടോറിക്ഷയും തമ്മിലാണ് കൂട്ടിയിടിച്ചത്. അപകടത്തിൽ ഓട്ടോറിക്ഷ പൂർണമായും തകർന്നു. ഈ സമയത്ത് ബൈക്കിൽ യാത്ര ചെയ്ത രണ്ടുപേർക്കും അപകടത്തിൽ പരിക്കേറ്റു.

വനിതാ സംരംഭകരുടെ ബസ് മോട്ടോർ വാഹനവകുപ്പ് കന്നി ഓട്ടത്തിനു മുമ്പേ പിടികൂടി

നെടുങ്കണ്ടം: വനിതാ സംരംഭകരുടെ ബസ് കന്നിയാത്രയ്ക്കു മുമ്പേ മോട്ടോർ വാഹനവകുപ്പ് പിടികൂടി. ഇന്നലെയാണ് എഴുകുംവയൽ സ്വദേശികളായ വനിതകളുടെ നെടുങ്കണ്ടം-തിരുവനന്തപുരം റൂട്ടിൽ "മിടുക്കി' എന്ന പേരിൽ ബസ് സർവീസ് തുടങ്ങാനിരുന്നത്. എന്നാൽ, ബസ് സർവീസ് നിയമാനുസൃതമല്ലെന്ന പേരിൽ ഞായറാഴ്ച വൈകുന്നേരത്തോടെ മോട്ടോർ വാഹനവകുപ്പ് വാഹനം കസ്റ്റഡിയിലെടുക്കുകയായിരുന്നു. ഉടുമ്പൻചോല മോട്ടോർ വെഹിക്കിൾ ഇൻസ്‌പെക്‌ടറുടെ നേതൃത്വത്തിൽ പിടികൂടിയ വാഹനം നെടുങ്കണ്ടം പോലീസ് സ്റ്റേഷനിൽ സൂക്ഷിച്ചിരിക്കുകയാണ്. ഓൾ ഇന്ത്യ ടൂറിസ്റ്റ് പെർമിറ്റ് (എഐടിപി) പ്രകാരം പൂർണമായും നിയമാനുസൃതമായി പ്രവർത്തിക്കുന്നതിനാണ് തങ്ങൾ ശ്രമിക്കുന്നതെന്നും നിലവിലെ നിയമനടപടിക്കെതിരേ ഹൈക്കോടതിയെ സമീപിക്കുമെന്നും ഉടമകൾ പറഞ്ഞു. എഴുകുംവയൽ പ്ലാത്തറ ചാക്കോ തോമസിന്‍റെ ഉടമസ്ഥതയിലുള്ള മിടുക്കി ബസ് നോക്കിനടത്തുന്നത് മകൾ ജിലുവും മകൻ ജോമിന്‍റെ ഭാര്യ നീതുവും ചേർന്നാണ്. വനിതാ സംരംഭം എന്ന നിലയിൽ ഡ്രൈവർമാർ ഉൾപ്പെടെ വനിതകളെയാണ് ബസിന്‍റെ ജീവനക്കാരായി കണ്ടെത്തിയിരുന്നത്. തലസ്ഥാന നഗരത്തെയും ടൂറിസം സാധ്യതകൾ ഏറെയുള്ള ജില്ലയെയും തമ്മിൽ ബന്ധിപ്പിക്കുന്ന തരത്തിൽ ടുറിസം വികസനം കൂടി ലക്ഷ്യമിട്ടാണ് സർവീസ് ആരംഭിച്ചത്. സുരക്ഷിതത്വവും വിശ്വാസ്യതയുള്ളതുമായ യാത്രകൾ ഡൊമസ്റ്റിക് ആൻഡ് ഇന്‍റർനാഷണൽ ടൂർ പാക്കേജുകൾ, ടിക്കറ്റ് ബുക്കിംഗ്, വിസ പ്രൊസസിംഗ്, ട്രാവൽ ഇൻഷ്വറൻസ് തുടങ്ങിയവ ഉൾക്കൊള്ളിച്ച് സ്വയംതൊഴിൽ നേടുകയും കുറച്ചധികം ആളുകൾക്ക് ജോലി നൽകുകയും ചെയ്യുക എന്ന ഉദ്ദേശ്യത്തോടെയാണ് സംരംഭം ആരംഭിച്ചത്. ഇതിനായി ടൂറിസ്റ്റ് കണക്‌ടിവിറ്റിയായി ബസുകളും കാറുകളും വാഹനങ്ങളും വാങ്ങുന്നതിന്‍റെ ആദ്യ പടിയായാണ് ബസ് വാങ്ങിയതെന്നും ഉടമകൾ പറയുന്നു. ബസിന്‍റേത് ടൂറിസ്റ്റ് പെർമിറ്റ്: മോട്ടോർ വാഹനവകുപ്പ് ടൂറിസ്റ്റ് പെർമിറ്റ് സമ്പാദിച്ച ബസിന് സ്റ്റേജ് കാരിയേജ് പെർമിറ്റ് ബസുകൾക്ക് സമാനമായി ഓരോ പോയിന്‍റിൽനിന്നും തുക ഈടാക്കി ആളുകളെ കയറ്റിയിറക്കുന്നതിന് അനുമതി ഇല്ലാത്തതിനാലാണ് നടപടി സ്വീകരിച്ചിരിക്കുന്നതെന്നാണ് മോട്ടോർ വാഹനവകുപ്പ് അധികൃതർ പറയുന്നത്.

ജയ്ഹിന്ദ് സംസ്ഥാന നാടകോത്സവം ആരംഭിച്ചു

മുതലക്കോടം: ജയ്ഹിന്ദ് ലൈബ്രറിയുടെ നേതൃത്വത്തില്‍ സംഘടിപ്പിക്കുന്ന ആറാമത് സംസ്ഥാന നാടകോത്സവം തൊടുപുഴ ടൗണ്‍ഹാളില്‍ ആരംഭിച്ചു. സംസ്ഥാന ലൈബ്രറി കൗണ്‍സില്‍ സെക്രട്ടറി വി.കെ. മധു ഉദ്ഘാടനം ചെയ്തു. ലൈബ്രറി പ്രസിഡന്‍റ് കെ.സി. സുരേന്ദ്രന്‍ അധ്യക്ഷത വഹിച്ചു. ഈ വര്‍ഷം മുതല്‍ ഏര്‍പ്പെടുത്തിയ പ്രഥമ സാഹിത്യ പുരസ്‌കാരം ദിവാകരന്‍ വിഷ്ണുമംഗലത്തിന് കവി വീരാന്‍കുട്ടി സമ്മാനിച്ചു. ജില്ലാ ലൈബ്രറി കൗണ്‍സില്‍ പ്രസിഡന്‍റ് കെ.എം. ബാബു, മുനിസിപ്പല്‍ സ്റ്റാന്‍ഡിംഗ് കമ്മിറ്റി ചെയര്‍മാന്‍ സനു കൃഷ്ണന്‍, കൗണ്‍സിലര്‍ അഡ്വ. ജോസഫ് ജോണ്‍, പി.ആര്‍. വിശ്വന്‍ എന്നിവര്‍ പ്രസംഗിച്ചു. നാടകോത്സവം നാളെ സമാപിക്കും.

വിനോദസഞ്ചാരികൾക്ക് തേനീച്ചയുടെ കുത്തേറ്റു

ചെറുതോണി: പാണ്ടിപ്പാറ ടൂറിസ്റ്റ് പാറയിൽ വിനോദസഞ്ചാരികൾ ഉൾപ്പെടെ 13 പേർക്ക് തേനീച്ചയുടെ കുത്തേറ്റു. ഇന്നലെ ഉച്ചയോടെയാണ് സംഭവം. പാണ്ടിപ്പാറ ടൂറിസ്റ്റ് പാറയിലെത്തിയ എറണാകുളം സ്വദേശികൾക്കാണ് ആദ്യം കുത്തേറ്റത്. പാറയിൽ ഭക്ഷണം കഴിച്ചുകൊണ്ടിരുന്ന സഞ്ചാരികൾ തേനീച്ചയുടെ കുത്തേറ്റ് ഓടുന്നതുകണ്ട് രക്ഷിക്കാനെത്തിയ നാട്ടുകാരെയും ഈച്ചകൾ ഓടിച്ചിട്ട് കുത്തി. സമീപ പ്രദേശത്ത വീടുകളിലുണ്ടായിരുന്നവർക്കും തേനീച്ചയുടെ ആക്രമണമുണ്ടായി. കുത്തേറ്റവരെ ആംബുലൻസിൽ ഇടുക്കി മെഡിക്കൽ കോളജ് ആശുപത്രിയിൽഎത്തിച്ച് ചികിത്സ നൽകി. എറണാകുളം സ്വദേശികളായ ഹംബൽ (20), സ്റ്റെഫി ജോസ് (28), ബിൽദാർ (20 ), നബീൽ (20), അഖിൽ (20), മുബാരീസ് (21) എന്നിവർക്കും സമീപവാസികളായ ഓടമ്പള്ളിൽ സൗമ്യ (43), സാബു ഇഞ്ചയിൽ (48), സാബുവിന്‍റെ ഭാര്യ ലിറ്റിൽ (45), ഇവരുടെ മക്കളായ അമല (11 ), ആഗ്‌നസ് (7) എന്നിവർക്കും രക്ഷിക്കാനെത്തിയ ചാക്കോ (56), പ്രതീഷ് ചാമക്കാല എന്നിവർക്കുമാണ് കുത്തേറ്റത്. ഇവരിൽ ആഗ്‌നസ്, അമല എന്നിവരൊഴികെ മറ്റുള്ളവരെ പ്രാഥമിക ചികിത്സ നൽകി വിട്ടയച്ചു. വനംവകുപ്പ് ഉദ്യോഗസ്ഥർ സ്ഥലത്തെത്തി പരിശോധന നടത്തി. പരുന്ത് കൂടിളക്കിയതിനെത്തുടർന്നാവണം ഈച്ചകൾ ഇളകിയതെന്നു വനംവകുപ്പ് ഉദ്യോഗസ്ഥർ പറഞ്ഞു.

മഴയിൽ പാറക്കഷണങ്ങൾ പതിച്ച് നിർമാണത്തിലിരുന്ന വീട് തകർന്നു

നെടുങ്കണ്ടം: രാമക്കൽമേട് ആമപ്പാറയിൽ പെയ്ത മഴയിൽ പാറക്കഷണങ്ങൾ പതിച്ച് നിർമാണത്തിലിരുന്ന വീട് തകർന്നു. പിഎംഎവൈ പദ്ധതിയിൽ ആമപ്പാറ ചെറുകുന്നേൽ രമേശിനു ലഭിച്ച വീടാണ് നശിച്ചത്. കഴിഞ്ഞ ദിവസം പെയ്ത കനത്ത മഴയെത്തുടർന്ന് കൂറ്റൻ പാറക്കഷണങ്ങൾ ഇളകി വീടിന് മുകളിലേക്ക് പതിക്കുകയായിരുന്നു. വീടിന്‍റെ കട്ടിളയും ജനലും ഉൾപ്പെടെ ഇളകിപ്പോയി. തൊട്ടടുത്ത ഷെഡിലാണ് രമേശനും ഭാര്യയും രണ്ടു മക്കളും അടങ്ങുന്ന കുടുംബം നിലവിൽ താമസിക്കുന്നത്. ഷെഡിൽനിന്ന് അടച്ചുറപ്പുള്ള കൂരയിലേക്ക് മാറാമെന്ന സ്വപ്നമാണ് മഴ തകർത്തത്. ആകെ നാലു ലക്ഷം രൂപയാണ് വീടിനായി അനുവദിക്കുന്നത്. ഇതിൽ രണ്ട് ഗഡുക്കളായി 1,50,000 രൂപ ലഭിച്ചു. നിരവധി പേരിൽനിന്നു കടം വാങ്ങിയും മറ്റുമാണ് വീട് കട്ടിളപ്പൊക്കംവരെ എത്തിച്ചത്. ഇനിയെന്തു ചെയ്യുമെന്നറിയാതെ കുടുംബം മാനസികമായി തകർന്നിരിക്കുകയാണ്.

ഇടുക്കി അണക്കെട്ട് ഇനി കാൽനട യാത്രയായും സന്ദർശിക്കാം

ചെറുതോണി: ഇടുക്കി അണക്കെട്ടിലേക്കുള്ള സന്ദര്‍ശക നിയന്ത്രണം ഒഴിവാക്കുന്നതിന് തീരുമാനമായതായി മന്ത്രി റോഷി അഗസ്റ്റിന്‍. ഇടുക്കി മണ്ഡലത്തില്‍ കെഎസ്ഇബിയുമായി ബന്ധപ്പെട്ടുള്ള സ്ഥലങ്ങളില്‍ വിവിധ പദ്ധതികള്‍ നടപ്പാക്കുന്നതിന്‍റെ ഭാഗമായി തിരുവനന്തപുരത്ത് വൈദ്യുതി മന്ത്രി കെ. കൃഷ്ണന്‍കുട്ടിയുടെ അധ്യക്ഷതയില്‍ ചേര്‍ന്ന യോഗത്തിലാണ് ഇതു സംബന്ധിച്ച തീരുമാനമുണ്ടായത്. കഴിഞ്ഞ മൂന്നിന് വിദഗ്ധ സംഘത്തോടൊപ്പമുള്ള അണക്കെട്ട് സന്ദര്‍ശനത്തിന്‍റെ തുടര്‍ച്ചയായാണ് വൈദ്യുതി മന്ത്രിയും കെഎസ്ഇബി ഉയര്‍ന്ന ഉദ്യോഗസ്ഥരുമായി മന്ത്രി റോഷി യോഗം ചേര്‍ന്നത്. അടുത്ത മാസം ആദ്യം തന്നെ ഇടുക്കി അണക്കെട്ട് കാൽനടയാത്രികരായ സന്ദര്‍ശകര്‍ക്കായും തുറന്നുകൊടുക്കും. നിലവില്‍ ബഗ്ഗി കാറില്‍ ദിവസം 800 പേര്‍ക്ക് മാത്രമാണ് സന്ദര്‍ശനം അനുവദിക്കുന്നത്. ഇത് അണക്കെട്ടിൽ ഒരാൾ അതിക്രമിച്ച് കടന്ന് ഷട്ടറിന്‍റെ റോപ്പിൽ ദ്രാവകം ഒഴിക്കുകയും ചങ്ങലയിട്ട് പൂട്ടുകയും ചെയ്ത സംഭവത്തെത്തുടർന്നാണ് കാൽനടയാത്രയ്ക്ക് വിലക്ക് ഏർപ്പെടുത്തിയത്. ഈ നിയന്ത്രണം ഒഴിവാക്കി കാല്‍നടയായും സന്ദര്‍ശകരെ അനുവദിക്കണമെന്ന മന്ത്രി റോഷിയുടെ നിര്‍ദേശമാണ് യോഗത്തില്‍ അംഗീകരിച്ചത്.

കലോത്സവം: ഷന്താൾ ജ്യോതിക്ക് മികച്ച നേട്ടം

മുട്ടം: തൊടുപുഴ വിമല പബ്ലിക് സ്കൂളിൽ സെൻട്രൽ കേരള സഹോദയ മത്സരത്തിൽ മുട്ടം ഷന്താൾ ജ്യോതിക്ക് മികച്ച നേട്ടം. മുട്ടം ഷന്താൾ ജ്യോതി 437 പോയിന്‍റുകൾ നേടി 12-ാംസ്ഥാനത്തെത്തി. മിമിക്രി, റസിറ്റേഷൻ, ഹിന്ദി, വയലിൻ, ഗിത്താർ, ഡാൻസ്, പെയിന്‍റിംഗ് ഓയിൽകളർ, കാർട്ടൂണ്‍ എന്നീ മത്സരയിനങ്ങളിൽ സമ്മാനവും എ ഗ്രേഡും കരസ്ഥമാക്കി. ഇതോടൊപ്പം മറ്റിനങ്ങളിൽ എ ഗ്രേഡ് നേടുകയും ചെയ്തു. സ്കൂൾ മാനേജ്മെന്‍റ്, പ്രിൻസിപ്പൽ സിസ്റ്റർ റോസ് മരിയ, വൈസ് പ്രിൻസിപ്പൽ സിസ്റ്റർ റോ‌സ‌‌‌്‌ലിൻ, അധ്യാപകർ, പിടിഎ എന്നിവർ അനുമോദിച്ചു.

ബ്ലോക്ക് പഞ്ചായത്തുകളിലെ സംവരണ വാർഡുകൾ

അടിമാലി പട്ടികജാതി സംവരണം 7, പട്ടികവർഗ സംവരണം 12, സ്ത്രീ സംവരണം 1,4,6,8,9,10,13, ഇളംദേശം പട്ടികജാതി സംവരണം 14, പട്ടികവർഗ സംവരണം 4, സ്ത്രീ സംവരണം 2,5,6,7, 9,10, 11 ഇടുക്കി പട്ടികജാതി സംവരണം 14, പട്ടികവർഗ സംവരണം 7, സ്ത്രീ സംവരണം 2,3,4,5,8,10,11 ദേവികുളം പട്ടികജാതി സംവരണം 4,8, 9, പട്ടികജാതി സ്ത്രീ സംവരണം 5,10,13, പട്ടികവർഗ സംവരണം 6, പട്ടികവർഗ സ്ത്രീ സംവരണം 7, സ്ത്രീ സംവരണം 2,12,14 നെടുങ്കണ്ടം പട്ടികജാതി സംവരണം 14 സ്ത്രീ സംവരണം 3,4,5,8,11,12,13 അഴുത പട്ടികജാതി സംവരണം 9,10 പട്ടികജാതി സ്ത്രീ സംവരണം 7,12, സ്ത്രീ സംവരണം 1,2,5,6,8 കട്ടപ്പന പട്ടികജാതി സംവരണം 9, പട്ടികവർഗ സംവരണം 7, സ്ത്രീ സംവരണം 2,3,4,5,8,13,14 തൊടുപുഴ പട്ടികജാതി സംവരണം 10, സ്ത്രീ സംവരണം 2,3,4,6,11,12,14.

സാൻജോയും കാർമലും നാടകത്തിൽ മുത്തമിട്ടു

തൊടുപുഴ: അഭിനയരംഗത്തു വ്യക്തിമുദ്ര പതിപ്പിച്ച ഫാ. സിജു പോൾ പാലത്താനത്ത് സംവിധാനം നിർവഹിച്ച ഇംഗ്ലീഷ് നാടകങ്ങൾ വിജയമധുരം പങ്കിട്ടു. കൊടുവേലി സാൻജോ സിഎംഐ പബ്ലിക് സ്കൂളിന്‍റെയും വാഴക്കുളം കാർമൽ പബ്ലിക് സ്കൂളിന്‍റെയും നാടകം സംവിധാനം ചെയ്തത് ഇദ്ദേഹമാണ്. യൂജിൻ ദാനീലിന്‍റെ വേർ ദ ക്രോസ് ഈസ് മെയ്ഡ് എന്ന നാടകത്തിന്‍റെ പശ്ചാത്തലത്തിൽ കാർമൽ സ്കൂൾ അവതരിപ്പിച്ച നാടകം ഭാവത്തിലും അഭിനയത്തിലും നാടകീയതയിലും മികച്ചുനിന്നു. കപ്പൽ തകർന്നു വർഷങ്ങൾ കഴിഞ്ഞിട്ടും നിധിയുമായി തിരിച്ചുവരുമെന്ന സ്വപ്നവുമായി കഴിയുന്ന ക്യാപ്റ്റൻ ബാർട്ടിലെറ്റിനെയാണ് ഇതിൽ അവതരിപ്പിക്കുന്നത്. ക്യാപ്റ്റൻ മരിക്കുന്പോൾ മകൻ നാറ്റ് ആ ദൗത്യം ഏറ്റെടുക്കുകയും കുടുംബംമുഴുവൻ വിനാശകരമായ അത്യാഗ്രഹത്തിനു അടിമപ്പെടുകയും ചെയ്യുന്ന രംഗങ്ങളാണ് നാടകത്തിൽ അനാവരണം ചെയ്യുന്നത്. കെവിൻ ആന്‍റണി, ജോഷി, ടെസ ഷിമ്മി, ജെറോം മാത്യു, ജൂഡ് ജെയിംസ് എന്നിവരായിരുന്നു അഭിനേതാക്കൾ. സാൻജോ സ്കൂൾ കിംഗ് ലിയർ എന്ന നാടകത്തിന്‍റെ പശ്ചാത്തലത്തിൽ സ്വത്തുക്കൾ എഴുതിവാങ്ങി മാതാപിതാക്കളെ കറിവേപ്പില പോലെ പുറന്തള്ളുന്ന സാമൂഹിക വ്യവസ്ഥയെ തുറന്നുകാട്ടുന്നു. ഡാൻസി ജോയി, ഇവ റോസ് സിബി, ആൻമരിയ ബിനു, നേഹ കാപ്പൻ, പീറ്റർ ജോസഫ്, ഏഡൻ, ജോവാൻ, ജൂവൽ യേശുദാസ്, മിലൻ തെക്കേക്കര എന്നിവരാണ് ഇതിൽ മികവാർന്ന അഭിനയം കാഴ്ചവച്ചത്. ആദിത്യനാഥ്, ജെസ്വിൻ ജിനേഷ് എന്നിവരാണ് രംഗപടമൊരുക്കിയത്. കഴിഞ്ഞ പത്തു വർഷമായി ഫാ. സിജു പോളിന്‍റെ സംവിധാനത്തിൽ അരങ്ങേറിയ നാടകങ്ങൾക്കായിരുന്നു ഒന്നാം സ്ഥാനം. ഇത്തവണ തന്‍റെ സംവിധാനത്തിൽ അവതരിപ്പിച്ച രണ്ടു നാടകങ്ങളും ഒന്നാം സ്ഥാനം നേടിയതിന്‍റെ സന്തോഷത്തിലാണ് അച്ചനും വിദ്യാർഥികളും. ആതിഥേയ സ്കൂളായ വിമല പബ്ലിക് സ്കൂളിനാണ് രണ്ടാം സ്ഥാനം. വാലി ഓഫ് സ്ക്രീനിംഗ് ബീസ് എന്ന നാടകമാണ് ഇവർ അവതരിപ്പിച്ചത്.

ചക്കിക്കാവ്- മേച്ചാൽ റോഡ്: ഒരിക്കൽ പോയാൽ ഒരിക്കലും മറക്കില്ല!

കാഞ്ഞാർ: ഇലവീഴാപൂഞ്ചിറയ്ക്കു സമീപം ചക്കിക്കാവ്-മേച്ചാൽ റോഡ് തകർന്നു ഗതാഗത യോഗ്യമല്ലാതായിട്ട് നാളുകളേറെ. അധികാരികൾ തിരിഞ്ഞുനോക്കാത്തതിൽ വ്യാപക പ്രതിഷേധം. മലയോര മേഖലയായ ചക്കിക്കാവ്, മേച്ചാൽ നിവാസികൾ ഉപയോഗിക്കുന്ന റോഡാണ് ഗതാഗതയോഗ്യമല്ലാതായിരിക്കുന്നത്. റോഡിന്‍റെ വശങ്ങളിലുള്ള ഓടകൾ നിറഞ്ഞു വെള്ളം റോഡിലൂടെ ഒഴുകുകയാണ്. ശക്തമായ മഴയിൽ മലഞ്ചെരുവിൽനിന്നു കുത്തൊഴുക്കാണ് ഉണ്ടാകുന്നത്. വിനോദസഞ്ചാര കേന്ദ്രമായ ഇല്ലിക്കൽ കല്ലിൽനിന്ന് ഇലവീഴാ പൂഞ്ചിറയ്ക്ക് എത്തിച്ചേരാനുള്ള എളുപ്പവഴി കൂടിയാണിത്. റോഡ് തകരുന്നതിനു മുന്പു വിനോദസഞ്ചാരികളുടെ നിരവധി വാഹനങ്ങളാണ് ഇതുവഴി പോയിരുന്നത്. വിനോദസഞ്ചാരികളുടെ വരവ് ഈ മേഖലയിലുള്ള വ്യാപാര സ്ഥാപനങ്ങൾക്കു വലിയ ആശ്വാസമായിരുന്നു. ഇല്ലിക്കൽ കല്ലിൽ എത്തുന്നവരിൽ ഭൂരിഭാഗവും ഇലവീഴാപൂഞ്ചിറ ടൂറിസ്റ്റ് കേന്ദ്രം കൂടി സന്ദർശിച്ചാണ് മടങ്ങാറ്. എന്നാൽ, ഇപ്പോൾ സഞ്ചാരികൾ ഈ റോഡിനെ കൈയൊഴിഞ്ഞു. ഇതോടെ സ്ഥാപനങ്ങളിലെ കച്ചവടവും ഗണ്യമായി കുറഞ്ഞു. റോഡിനെ കൈവിട്ട് സഞ്ചാരികൾ ഇലവീഴാപൂഞ്ചിറയ്ക്കു കാഞ്ഞാറിൽനിന്നുള്ള റോഡും മേച്ചാലിൽനിന്നുള്ള റോഡും ഗതാഗത യോഗ്യമല്ലാതായതോടെ ചക്കിക്കാവ് വഴി ഇലവീഴാപൂഞ്ചിറയ്ക്ക് എത്തിയിരുന്ന വിനോദ സഞ്ചാരികൾ മറ്റു മാർഗങ്ങൾ തേടി. ഇതു മേഖലയെ ബാധിച്ചിട്ടുണ്ട്. കാഞ്ഞിരം കവലയിൽനിന്ന് ഇലവീഴാ പൂഞ്ചിറയ്ക്കുള്ള റോഡ് ആധുനിക രീതിയിൽ ടാറിംഗ് നടത്തിയിരുന്നു. കാഞ്ഞാറിൽനിന്നും മേച്ചാൽ ഭാഗത്തുംനിന്നുമുള്ള റോഡാണ് തകർന്നു കിടക്കുന്നത്. ഈ റോഡ് കുടയത്തൂർ പഞ്ചായത്തിൽപ്പെട്ടതാണ്. ഇല്ലിക്കൽകല്ലിൽനിന്നും ഇടുക്കി ഭാഗത്തുനിന്നുമുള്ള വിനോദ സഞ്ചാരികൾക്ക് ഇലവീഴാപൂഞ്ചിറയിൽ എത്തണമെങ്കിൽ മറ്റു വഴികളെ ആശ്രയിക്കമം. കാഞ്ഞാർ- ഇലവീഴാ പൂഞ്ചിറ റോഡിൽ കലുങ്കുകൾ നിർമിക്കാനുണ്ട്. ഈ വഴിയിൽ വാഹനങ്ങളുടെ അടിഭാഗം റോഡിൽ ഇടിക്കുന്നതായും പരാതിയുണ്ട്. ടൂറിസം മേഖലയ്ക്ക് ഉണർവു പകരേണ്ട റോഡിന്‍റെ അറ്റകുറ്റപ്പണി അടിയന്തരമായി നടത്തണമെന്നാണ് നാട്ടുകാരുടെ ആവശ്യം.

റോഡിലെ മണ്‍കൂനയിൽ കയറി സ്കൂട്ടർ മറിഞ്ഞ് വ്യാപാരി മരിച്ചു

കുമളി: വെള്ളാരംകുന്നിൽ ശനിയാഴ്ച രാത്രിയിലുണ്ടായ കനത്ത മഴയിൽ റോഡിലേക്ക് ഇടിഞ്ഞുവീണ മണ്‍കൂനയിൽ ഇടിച്ച് സ്കൂട്ടി മറിഞ്ഞ് വ്യാപാരി മരിച്ചു. വെള്ളാരംകുന്ന് പറപ്പള്ളിൽ പി.എം. തോമസ് (തങ്കച്ചൻ - 66) ആണ് മരിച്ചത്. ആനവിലാസം സെൻട്രൽ ഹോട്ടൽ ഉടമയാണ് തോമസ്. ഹോട്ടൽ അടച്ച് രാത്രി എട്ടോടെ വീട്ടിലേക്ക് പോകുന്പോഴാണ് അപകടമുണ്ടായത്. പരിചയക്കാരായ വഴി യാത്രക്കാരാണ് വഴിയിൽ ബോധരഹിതനായിക്കിടന്ന തോമസിന്‍റെ സഹോദരൻ സജുവിനെ വിവരം അറിയിക്കുകയായിരുന്നു. കട്ടപ്പനയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംസ്കാരം വ്യാഴാഴ്ച രണ്ടിന് വെള്ളാരംകുന്ന് സെന്‍റ് മേരീസ് പള്ളിയിൽ. ഭാര്യ ലീലാമ്മ തോമസ്. മകൾ: ജോസ്ന തോമസ്. മരുമകൻ: ജോസഫ് ആന്‍റണി. കാഞ്ഞിരപ്പള്ളി പഴയിടം സെന്‍റ് മൈക്കിൾസ് പള്ളി വികാരി ഫാ. ജോസ് മാത്യു പറപ്പള്ളിൽ പരേതന്‍റെ സഹോദരനാണ്.

കെട്ടിടങ്ങൾ ഉപാധിരഹിതമായി ക്രമവത്കരിക്കണം: ജോയി വെട്ടിക്കുഴി

കട്ടപ്പന: നിലവിലെ നിയമങ്ങൾ പാലിച്ചും നികുതികൾ അടച്ചും നിർമിച്ചിട്ടുള്ള കെട്ടിടങ്ങൾ 2019 ഓഗസ്റ്റ് 22ന് നിയമവിരുദ്ധമാക്കി ഇറക്കിയ റവന്യു സെക്രട്ടറിയുടെ ഉത്തരവ് പിൻവലിച്ച് സംസ്ഥാനത്ത് നിലവിലുള്ള നിയമവും തദ്ദേശ സ്ഥാപനങ്ങളുടെ നടപടികൾക്കു വിധേയമായും നടത്തിയിട്ടുള്ള മുഴുവൻ നിർമാണങ്ങളും ഉപാധിരഹിതമായി ക്രമവത്കരിക്കണമെന്ന് യുഡിഎഫ് ജില്ലാ ചെയർമാൻ ജോയി വെട്ടിക്കുഴി ആവശ്യപ്പെട്ടു. സർക്കാരിന്‍റെ വിവരക്കേടിന് ജനങ്ങൾ പിഴയടയ്ക്കണമെന്നു പറയുന്നത് അംഗീകരിക്കാനാകില്ല. ഉദ്യോഗസ്ഥ പീഡനവും സർക്കാർ കൊള്ളയും ലക്ഷ്യമാക്കിയുള്ള ചട്ട ഭേദഗതിയാണ് സർക്കാർ കൊണ്ടുവന്നിരിക്കുന്നത്. മാർക്സിസ്റ്റ് പാർട്ടിയുടെ പഞ്ചനക്ഷത്ര ഹോട്ടലുകൾക്ക് തുല്യമായ ജില്ലയിലെ കെട്ടിടസമുച്ചയങ്ങൾ കെട്ടിടത്തിന്‍റെ വിസ്തൃതിയോ ബിസിനസിന്‍റെ സ്വഭാവമോ പരിഗണിക്കാതെ ഒരു ശതമാനം പിഴ ഈടാക്കി ക്രമവത്്കരിക്കാമെന്ന് പറയുന്പോൾ വ്യക്തികൾ 50 ശതമാനംവരെ പിഴ നൽകണമെന്ന വ്യവസ്ഥ ഗുരുതരമായ വിവേചനമാണ്. ആരാധനാലയങ്ങൾ, ശ്മശാനങ്ങൾ, അംഗീകൃത വിദ്യാഭ്യാസ സ്ഥാപനങ്ങൾ എന്നിവയ്ക്ക് പിഴ ഈടാക്കേണ്ടതില്ലെന്ന് തീരുമാനിക്കാൻ അധികാരമുള്ള സർക്കാരിന് മുഴുവൻ നിർമാണങ്ങളെയും ഇതേ രീതിയിൽ ക്രമവത്കരിക്കാനും അധികാരമുണ്ട്. കെട്ടിടങ്ങളില്ലാത്ത ഭൂമിക്ക് വിനിയോഗത്തിന്‍റെ അടിസ്ഥാനത്തിൽ പിഴയടയ്ക്കണമെന്ന സർക്കാർ നിർദേശം കരിനിയമമാണ്. ക്രമവത്്കരണം കഴിഞ്ഞാൽ ബാക്കി വരുന്ന സ്ഥലത്ത് കെട്ടിടം പണിയുന്നതു സംബന്ധിച്ച യാതൊരു വ്യവസ്ഥയും ചട്ടഭേദഗതിയിൽ ഉൾപ്പെടുത്തിയിട്ടില്ല. ഒരാവശ്യത്തിന് ക്രമവത്കരിക്കുന്ന കെട്ടിടം മറ്റൊരാവശ്യത്തിന് ഉപയോഗിക്കാൻ പാടില്ലെന്ന വ്യവസ്ഥ യുക്തിരഹിതമാണ്. നിയമാനുസൃതം നടത്തിയിട്ടുള്ള നിർമാണങ്ങളുടെ ക്രമവത്കരണത്തിന് അപേക്ഷ സ്വീകരിക്കാൻ പോലും സർക്കാരിന് ധാർമികമായി അവകാശമില്ല. സർക്കാരിന്‍റെ തട്ടിപ്പിനും പിടിച്ചുപറിക്കുമെതിരേ ശക്തമായ സമരപരിപാടികൾക്ക് യുഡിഎഫ് നേതൃത്വം നൽകുമെന്നും സമരപരിപാടികളെപ്പറ്റി ആലോചിക്കുന്നതിന് യുഡിഎഫ് ജില്ലാ കമ്മിറ്റി യോഗം നാളെ രാവിലെ 11ന് കട്ടപ്പന സർവീസ് സഹകരണ ബാങ്കിന്‍റെ ഓഡിറ്റോറിയത്തിൽ ചേരുമെന്നും ജോയി വെട്ടിക്കുഴി അറിയിച്ചു.

മന്ത്രിസഭാ തീരുമാനം പട്ടയക്കെട്ടഴിക്കുമോയെന്ന് ഇടതുനേതാക്കൾ വ്യക്തമാക്കണം: ബിജോ മാണി

കട്ടപ്പന: കോടതി തടഞ്ഞ ജില്ലയിലെ പട്ടയ നടപടികൾ മന്ത്രിസഭാ തീരുമാനം കൊണ്ട് നടപ്പാക്കാനാകുമൊ എന്ന് മന്ത്രി റോഷി അഗസ്റ്റിനും ജില്ലയിലെ ഇടതു നേതാക്കളും വ്യക്തമാക്കണമെന്ന് ഡിസിസി ജനറൽ സെക്രട്ടറി ബിജോ മാണി ആവശ്യപ്പട്ടു. കട്ടപ്പനയിലേതടക്കമുള്ള ഷോപ്പ് സൈറ്റുകൾക്ക് പട്ടയം നൽകാൻ മന്ത്രി സഭ അംഗീകാരം നൽകിയതായാണ് പറയുന്നത്. എല്ലാ തടസങ്ങളും നീക്കിയെന്നും ഷോപ്പ് സൈറ്റുകളുടെ പട്ടയവിതരണം ഉടൻ ആരംഭിക്കുമെന്നുമാണ് ഇടതുപക്ഷം പ്രചരിപ്പിക്കുന്നത്. തെരഞ്ഞെടുപ്പ് മുന്നിൽക്കണ്ടുള്ള നുണ പ്രചാരണമാണിതെന്ന് വസ്തുതകൾ പരിശോധിച്ചാൽ വ്യക്തമാകും. സിഎച്ച്ആർ മേഖലയിൽ ഉൾപ്പെടുന്ന വില്ലേജുകളിലാണ് ഷോപ്പ് സൈറ്റുകൾക്ക് പട്ടയം നൽകാനുള്ളത്. ജില്ലയിൽ 26 വില്ലേജുകൾ സിഎച്ച്ആറിന്‍റെ പരിധിയിലാണ്. ഈ വില്ലേജുകളിലെ പട്ടയവിതരണം 2024 ഒക്ടോബർ 24ന് സുപ്രീംകോടതി തടഞ്ഞിരിക്കുകയാണ്. നാളിതുവരെ ഈ വിധി പുനഃപരിശോധിക്കാൻ സർക്കാർ ഒരു നടപടിയും സ്വീകരിച്ചിട്ടില്ല. സുപ്രീംകോടതി വിധി നിലനിൽക്കേ ഷോപ്പ് സൈറ്റുകൾക്ക് പട്ടയം നൽകാൻ കഴിയില്ലന്നറിഞ്ഞുകൊണ്ട് ജനങ്ങളെ വിഡ്ഢികളാക്കാൻ കരുതിക്കൂട്ടി നടത്തിയ രാഷ‌്ട്രീയ നാടകമാണ് മന്ത്രിസഭാ തീരുമാനം. ഷോപ്പ് സൈറ്റുകളുടെ പട്ടയവിതരണം ഇടതുസർക്കാർ മനഃപൂർവം വൈകിപ്പിക്കുകയായിരുന്നു. ഷോപ്പ് സൈറ്റുകൾക്ക് പട്ടയം നൽകാൻ 2016ൽ ഉമ്മൻചാണ്ടി സർക്കാർ തീരുമാനമെടുക്കുകയും ഇതിനായി സർവേ നടത്തുന്നതിന് 1415/2016 റവ. നന്പറായി 2016 ഫെബ്രുവരി 22ന് ഉത്തരവ് ഇറക്കുകയും ചെയ്തതാണ്. എന്നാൽ, തുടർന്നുവന്ന ഇടതുസർക്കാർ ആറു വർഷം വൈകിപ്പിച്ച് 2022 -23 കാലഘട്ടത്തിലാണ് സർവേ ആരംഭിച്ചത്. ഷോപ്പ് സൈറ്റുകളിൽ പട്ടയം അനുവദിക്കാവുന്ന കടമുറികളുടെ വിസ്തീർണം എത്രവരെയാകാമെന്ന് വ്യക്തത വരുത്തി സർക്കാർ ഉത്തരവിറക്കണമെന്ന് 2022 ജൂണ്‍ 24 ന് ഇടുക്കി ജില്ലാ കളക്ടർ റവന്യു അഡീഷണൽ ചീഫ് സെക്രട്ടറിക്ക് റിപ്പോർട്ട് നൽകിയിരുന്നു. ഈ റിപ്പോർട്ടിന്‍റെ അടിസ്ഥാനത്തിലുള്ള തുടർനടപടികൾ സ്വീകരിക്കുന്നത് മൂന്നു വർഷം വൈകി കഴിഞ്ഞ ദിവസത്തെ മന്ത്രിസഭാ യോഗത്തിലാണ്. സർവേ നടപടികൾ നേരത്തേ നടത്തി തുടർനടപടികൾ സ്വീകരിച്ചിരുന്നെങ്കിൽ വർഷങ്ങൾക്ക് മുൻപ് തന്നെ ഷോപ്പ് സൈറ്റുകൾക്ക് പട്ടയം നൽകാമായിരുന്നു. കോടതി വിധി ഉണ്ടാകുമായിരുന്നില്ല. ഓണത്തിന് മുൻപ് ഷോപ്പ് സൈറ്റുകൾക്ക് പട്ടയം നൽകുമെന്ന റവന്യൂ മന്ത്രിയുടെ പ്രഖ്യാപനം പാഴ്‌വാക്കായതുപോലെ മന്ത്രിസഭാ തീരുമാനവും നടപ്പിലാക്കാൻ കഴിയാത്ത പ്രഖ്യാപനം മാത്രമാണ്. സർക്കാരിന് ആത്മാർഥതയുണ്ടെങ്കിൽ സിഎച്ച്ആറിലെ പട്ടയ വിതരണം തടഞ്ഞ 24-10-2024 ലെ സുപ്രീം കോടതി ഉത്തരവ് പുനഃപരിശോധിക്കാൻ റിവ്യൂ ഹർജി നൽകണമെന്നും ബിജോ മാണി പത്ര സമ്മേളനത്തിൽ ആവശ്യപ്പെട്ടു. ബ്ലോക്ക് കോണ്‍ഗ്രസ് പ്രസിഡന്‍റ് തോമസ് മൈക്കിൾ, മണ്ഡലം പ്രസിഡന്‍റ് സിജു ചക്കുംമൂട്ടിൽ എന്നിവരും പത്രസമ്മേളനത്തിൽ പങ്കെടുത്തു.

ചെറുപുഷ്പ മിഷൻ ലീഗ്: സംസ്ഥാനതല സമാപനം വാഴത്തോപ്പിൽ

വാഴത്തോപ്പ്: ഇടുക്കി രൂപതയുടെ ആതിഥേയത്തിൽ ചെറുപുഷ്പ മിഷൻലീഗ് സംസ്ഥാനതല മിഷൻ വാരാചരണ സമാപന സമ്മേളനവും പ്രേഷിത റാലിയും വാഴത്തോപ്പിൽ നടന്നു. പ്രൗഢോജ്ജ്വലമായ പ്രേഷിത റാലിയോടെ ആരംഭിച്ച സമ്മേളനം ചെറുപുഷ്പ മിഷൻ ലീഗ് അന്തർദേശീയ ജനറൽ സെക്രട്ടറി ബിനോയി പള്ളിപ്പറമ്പിൽ ഉദ്ഘാടനം ചെയ്തു. സംസ്ഥാന പ്രസിഡന്‍റ് രഞ്ജിത്ത് മുതുപ്ലാക്കൽ അധ്യക്ഷത വഹിച്ചു. സംസ്ഥാന ജനറൽ സെക്രട്ടറി ജയ്സൺ പുളിച്ചുമാക്കൽ, മിഷൻലീഗ് ഇടുക്കി രൂപത ഡയറക്ടർ ഫാ. ഫിലിപ്പ് ഐക്കര, കത്തീഡ്രൽ വികാരി ഫാ. ടോമി ആനിക്കുഴിക്കാട്ടിൽ, രൂപത പ്രസിഡന്‍റ് സെസിൽ ജോസ്, രൂപത വൈസ് ഡയറക്ടർ സിസ്റ്റർ സ്റ്റാർലെറ്റ് സിഎംസി, ഹൈറേഞ്ച് റീജണൽ ഓർഗനൈസർ അജയ് ഫ്രാൻസിസ്, വാഴത്തോപ്പ് ശാഖ പ്രസിഡന്‍റ്് ജോൺസ് ബിനു എന്നിവർ പ്രസംഗിച്ചു. കത്തിഡ്രൽ അസി. വികാരി. ഫാ. ജോർജ് വള്ളിക്കാട്ടിൽ, സൺഡേസ്കൂൾ ഹെഡ്മാസ്റ്റർ ജോബി വരിക്കാട്ട്, രൂപത സമിതി അംഗങ്ങൾ, സൺ‌ഡേസ്കൂൾ അധ്യാപകർ എന്നിവർ നേതൃത്വം നൽകി.

വിരിപ്പാറയ്ക്കടുത്ത് മിനിബസ് മറിഞ്ഞു

അടിമാലി: കല്ലാര്‍ - മാങ്കുളം റോഡില്‍ മാങ്കുളം വിരിപ്പാറയ്ക്ക് സമീപം ടൂറിസ്റ്റുകളുമായി വന്ന മിനിബസ് പാതയോരത്തേക്ക് മറിഞ്ഞ് അപകടം. ഞായറാഴ്ച്ച ഉച്ചയ്ക്ക് ശേഷമായിരുന്നു അപകടം ഉണ്ടായത്. തമിഴ്‌നാട് തിരുപ്പൂരില്‍നിന്നുള്ള വിനോദസഞ്ചാര സംഘം സഞ്ചരിച്ചിരുന്ന ബസാണ് അപകടത്തില്‍പ്പെട്ടത്. ഇറക്കത്തിൽ മിനി ബസ് നിയന്ത്രണം നഷ്ടപ്പെട്ട് പാതയോരത്തേക്ക് മറിയുകയായിരുന്നു. അപകടം ഉണ്ടായ ഉടന്‍ പ്രദേശവാസികളുടെ നേതൃത്വത്തില്‍ രക്ഷാ പ്രവര്‍ത്തനം നടത്തി. വാഹനത്തില്‍ ഉണ്ടായിരുന്ന 23 പേർക്ക് പരിക്കേറ്റിട്ടുണ്ട്. ഇവരെ അടിമാലിയിലെ താലൂക്കാശുപത്രിയിലും സ്വകാര്യ ആശുപത്രിയിലുമായി പ്രവേശിപ്പിച്ചു. വാഹനത്തിനിടയില്‍ കുടുങ്ങിയവരെ ക്രെയിന്‍ ഉപയോഗിച്ച് ഉയര്‍ത്തിയാണ് പുറത്തെടുത്തത്. നാട്ടുകാരുടെയും അഗ്നിരക്ഷാ സേനാംഗങ്ങളുടെയും പോലീസിന്‍റെയും നേതൃത്വത്തിലാണ് രക്ഷാപ്രവര്‍ത്തനം നടത്തിയത്.

വ്യാപാരികൾക്ക് നഷ്ടപരിഹാരം നൽകണം: ഏകോപന സമിതി

ചെറുതോണി: കഴിഞ്ഞ ദിവസമുണ്ടായ വെള്ളപ്പൊക്കത്തിലും ഉരുൾപൊട്ടലിലും വ്യാപാരസ്ഥാപനങ്ങൾക്കുണ്ടായ നാശനഷ്ടങ്ങൾക്കു നഷ്ടപരിഹാരം നൽകണമെന്നു വ്യാപാരി വ്യവസായി ഏകോപന സമിതി ജില്ലാ കമ്മിറ്റി സർക്കാരിനോട് ആവശ്യപ്പെട്ടു. മുണ്ടിയിരുമ, തുക്കുപാലം, കൂട്ടാർ, ബാലഗ്രാം, ആനവിലാസം, കുമളി, ഒന്നാം മൈൽ മേഖലകളിലാണ് വെള്ളപ്പൊക്കവും ഉരുൾപൊട്ടലും വൻ നാശനഷ്ടമുണ്ടാക്കിയത്. ആനവിലാസത്ത് ഉരുൾപൊട്ടി എട്ടു കടകൾക്കും വീടുകൾക്കും നാശം സംഭവിച്ചു. കുട്ടാർ, ബാലഗ്രാം, തുക്കുപാലം, മുണ്ടിയെരുമ എന്നിവിടങ്ങളിൽ 25ഓളം കടകളിൽ വെള്ളവും ചെളിയും കയറി സാധനങ്ങൾ പൂർണമായും നശിച്ചു. ചില കടകൾ പൂർണമായും വെള്ളത്തിൽ മുങ്ങി. വെള്ളപ്പൊക്കമുണ്ടായ സ്ഥലങ്ങളിൽ സമിതി ജില്ലാ ഭാരവാഹികൾ സന്ദർശനം നടത്തി. ജില്ലാ പ്രസിഡന്‍റഅ ‌ സണ്ണി പൈമ്പിള്ളിൽ, സണ്ണി മാത്യു, ജയിംസ് അണക്കര, രാജു കുമളി, മാത്യു ആനവിലാസം, വി.എം. ഹാജി, സാലി, ബിജു മുണ്ടിയെരുമ, സജീവ്, പി.എസ്. സലിം, ആർ. സുരേഷ് എന്നിവർ നാശനഷ്ടമുണ്ടായ സ്ഥലങ്ങൾ സന്ദർശിച്ചു. കൃഷിഭൂമി ഒലിച്ചുപോയി; നാലേക്കർ ഭൂമി നശിച്ചു നെടുങ്കണ്ടം: കഴിഞ്ഞ ദിവസം ഉണ്ടായ കനത്ത മഴയിൽ ശൂലപ്പാറയിൽ ഉരുൾപൊട്ടി കൃഷി ഭൂമി ഒലിച്ചുപോയി. ശൂലപ്പാറ കരിന്തരിക്കൽ ദിവാകരന്‍റെ നാല് ഏക്കർ കൃഷിഭൂമിയാണ് നശിച്ചത്. ആയിരത്തോളം ഏലച്ചെടികൾ നശിച്ചു. വിളവെടുപ്പിന് പാകമായിരുന്ന കൃഷിയാണ് നശിച്ചത്. മണ്ണൊലിച്ചു പോയതിനാൽ സ്ഥലം പൂർണമായും കൃഷി യോഗ്യമല്ലാതായി.

പൊന്മുടി ഡാമിന്‍റെ ഷട്ടർ ഉയർത്തി

രാജാക്കാട്: തുലവര്‍ഷം ശക്തമായി തുടരുന്ന സാഹചര്യത്തിൽ റെഡ് അലർട്ടിൽ എത്തിയ പൊന്മുടി അണക്കെട്ട് തുറന്നു. നടുവിലെ ഷട്ടർ 20 സെന്‍റിമീറ്ററാണ് ഉയർത്തിയിരിക്കുന്നത്. സെക്കൻഡിൽ 15,000 ലിറ്റർ വെള്ളമാണ് പുറത്തേക്ക് ഒഴുക്കുന്നത്. പന്നിയാർ പുഴയുടെ ഇരു കരകളിലുമുള്ളവർ ജാഗ്രത പാലിക്കണമെന്ന് ജില്ലാ ഭരണകൂടം അറിയിച്ചു. കഴിഞ്ഞ അഞ്ചു മാസത്തിനുള്ളിൽ ഇത് ആറാം തവണയാണ് പൊന്മുടി അണക്കെട്ട് തുറക്കുന്നത്. സുരക്ഷാ മുൻകരുതലിന്‍റെ ഭാഗമായാണ് പൊന്മുടി അണക്കെട്ടിന്‍റെ ഷട്ടർ ഉയർത്തിയത്. നീരൊഴുക്ക് വീണ്ടും ശക്‌തമായാൽ ബാക്കി രണ്ട് ഷട്ടറുകൾ കൂടി ഉയർത്തുന്ന കാര്യം പരിഗണിക്കുമെന്ന് അസി. എൻജിനിയർ കെ.എൻ. രാജേഷ് അറിയിച്ചു. പന്നിയാർ ഇലട്രിക് പ്രോജക‌്ടിന്‍റെ ഭാഗമായുള്ള അണക്കെട്ടിൽ 707.75 അടി ആണ് പരമാവധി സംഭരണശേഷി. ഇപ്പോൾ 706 അടി വെള്ളമാണ് ഡാമിലുള്ളത്. ഈ വർഷം മേയ് 29നാണ് ആദ്യമായി ഡാം തുറന്നത്.

വെള്ളമിറങ്ങിയപ്പോൾ നഷ്ടങ്ങളുടെ ഭീകരത

നെടുങ്കണ്ടം: കഴിഞ്ഞ ദിവസത്തെ മിന്നൽ പ്രളയം കൂടുതൽ നാശം വിതച്ചത് കൂട്ടാർ മേഖലയിൽ. പുഴയിലെ വെള്ളം ഇറങ്ങിയതോടെയാണ് നാശനഷ്ടങ്ങൾ കൂടുതൽ വ്യക്തമായത്. പ്രളയത്തിൽ കൂട്ടർ - അല്ലിയാർ പാലം പൂർണമായും തകർന്നു. കരുണാപുരം, പാമ്പാടുംപാറ പഞ്ചായത്തുകളെ ബന്ധിപ്പിക്കുന്ന പാലമാണിത്. പാലം തകർന്നതോടെ ഗ്രാമങ്ങൾ ഒറ്റപ്പെട്ട നിലയിലാണ്. ഈ പാലത്തിനു സമീപം പാർക്ക് ചെയ്തിരുന്ന ട്രാവലർ മലവെള്ള പാച്ചിലിൽ ഒഴുകിപ്പോയിരുന്നു. കൂട്ടാർ സ്വദേശി റെജിയുടെ വിനായക ട്രാവൽസാണ് ഒഴുക്കിൽപ്പെട്ടത്. ഈ വാഹനം ഇന്നലെ നാട്ടുകാർ ചേർന്നു പുഴയിൽനിന്നു കരയ്ക്കെത്തിച്ചു. ട്രാക്ടറിൽ വടംകെട്ടി വലിച്ചു കരയ്ക്കു കയറ്റുകയായിരുന്നു. വാഹനം പൂർണമായും തകർന്നു. ഇതുൾപ്പെടെ അഞ്ച് വാഹനങ്ങളാണ് ഒഴുക്കിൽപ്പെട്ടത്. മേഖലയിൽ മൂന്നു വീടുകൾ പൂർണമായും തകർന്നു. അന്പതോളം വീടുകളിൽ വെള്ളം കയറി വീട്ടുപകരണങ്ങളും ഇലക‌്ട്രോണിക്സ് ഉപകരണങ്ങളും നശിച്ചു. വെള്ളം കയറിയതിനെത്തുടർന്ന് അയൽവീടുകളിൽ അഭയം തേടിയവർ തിരികെ വീട്ടിലെത്തി ചെളിയും വെള്ളവും നീക്കം ചെയ്തു. ഇന്നലെ മഴ മാറിനിന്നതും ആശ്വാസമായി.

വിറങ്ങലിച്ച് നെടുങ്കണ്ടം; ടൗണുകൾ മുങ്ങി, വാഹനങ്ങൾ ഒലിച്ചുപോയി

നെടുങ്കണ്ടം: മിന്നൽ പ്രളയത്തിൽ വിറങ്ങലിച്ച് നെടുങ്കണ്ടം മേഖല. വെള്ളിയാഴ്ച രാത്രിയിൽ അപ്രതീക്ഷിതമായി പെയ്ത കനത്ത മഴയിൽ കല്ലാർ പുഴയിൽ ക്രമാതീതമായി വെള്ളം ഉയർന്നതിനെ തുടർന്ന് 300ഓളം വീടുകളിലും നൂറോളം വ്യാപാരസ്ഥാപനങ്ങളിലും വെള്ളം കയറി. കൂട്ടാറിൽ പാർക്ക് ചെയ്തിരുന്ന അഞ്ച് വാഹനങ്ങൾ ഒഴുകിപ്പോയി. ഒരു ട്രാവലറും ഒരു ബൊലേറയും ഒരു കാറും രണ്ടു ബൈക്കുകളുമാണ് ഒഴുകിപ്പോയത്. വീടുകൾക്ക് മുന്പിൽ പാർക്ക് ചെയ്തിരുന്ന പത്തോളം വാഹനങ്ങളിലും വെള്ളം കയറി. ലക്ഷങ്ങളുടെ നഷ്ടം വെള്ളിയാഴ്ച രാത്രി ഒൻപതോടെ പെയ്തു തുടങ്ങിയ മഴ അർധരാത്രിയോടെ അതിശക്തമാവുകയായിരുന്നു. ഇതിനിടെ, നിരവധി സ്ഥലങ്ങളിൽ ചെറുതും വലുതുമായ മണ്ണിടിച്ചിലും ഉണ്ടായി. പുലർച്ചെ കല്ലാർ പുഴയും ചെറുതും വലുതുമായ തോടുകളും കരകവിഞ്ഞൊഴികി. ഇതോടെ കൂട്ടാർ, തൂക്കുപാലം, മുണ്ടിയെരുമ, ബാലഗ്രാം, താന്നിമൂട് തുടങ്ങിയ പ്രദേശങ്ങളിലെ നൂറു കണക്കിനു വീടുകളിലും വ്യാപാര സ്ഥാപനങ്ങളിലും വെള്ളം കയറുകയായിരുന്നു. ലക്ഷക്കണക്കിന് രൂപയുടെ നാശനഷ്ടമാണ ഉണ്ടായത്. പുഴയും സമീപ റോഡുകളും പൂർണമായും നികന്നായിരുന്നു വെള്ളം ഒഴുകിയത്. ശനിയാഴ്ച പുലർച്ചെ 4.30ഓടെ കല്ലാർ ഡാമിന്‍റെ നാലു ഷട്ടറുകളും 10 സെന്‍റിമീറ്റർ വീതം ഉയർത്തിയെങ്കിലും പുഴയിലെ ജലനിരപ്പ് ഉയരുകയായിരുന്നു. ഭിത്തി പൊളിച്ച് രക്ഷിച്ചു രാവിലെ 10 ന് ശേഷമാണ് ജലനിരപ്പ് കുറഞ്ഞു തുടങ്ങിയത്.ഡാമിൽനിന്നുള്ള വെള്ളം പുറത്തേക്ക് ഒഴുക്കിയതോടെ പച്ചടിയിൽ ഓട്ടോറിക്ഷാ ഒഴുകിപ്പോയി. കല്ലാർ ഡാമിൽനിന്നുള്ള വെള്ളം ഒഴുകിയെത്തി ചിന്നാർ, ബഥേൽ ഭാഗങ്ങളിൽ വിവിധ പ്രദേശങ്ങളിൽ വീടുകളിലും വ്യാപാര സ്ഥാപനങ്ങളിലും വെള്ളം കയറി നാശനഷ്ടമുണ്ടായി. തൂവൽ വെള്ളചാട്ടത്തിന്‍റെ വ്യൂ പോയിന്‍റിലെ നടപ്പാലത്തിലും വെള്ളം കയറി. വെള്ളം ഉയർന്ന മേഖലകളിൽ കഴിഞ്ഞിരുന്നവരെ രാത്രിതന്നെ നാട്ടുകാർ സുരക്ഷിത കേന്ദ്രങ്ങളിലേക്കു മാറ്റുകയായിരുന്നു. മുണ്ടിയെരുമയിൽ വീടിനുള്ളിൽ വെള്ളം കയറി വീട് പൂർണമായി മുങ്ങി. തുടർന്ന് ഭിത്തി പൊളിച്ചു വീട്ടുകാരെ വീടിനു മുകളിൽ എത്തിച്ച് നാട്ടുകാർ സാഹസികമായി രക്ഷപ്പെടുത്തുകയുമായിരുന്നു . പാലങ്ങൾ ഒഴുകിപ്പോയി കൂട്ടാറിൽനിന്ന് ഗ്രാമീണ മേഖലയായ അല്ലിയാറിലേക്കുള്ള ചപ്പാത്ത് പൂർണമായും തകർന്നു. വെള്ളപ്പൊക്കത്തിൽ നിരവധി ചെറു പാലങ്ങളും റോഡുകളും ഒലിച്ചു പോയി. അന്യാർതൊളുവിൽ വളർത്തു മൃഗങ്ങൾ ഒഴുകിയപ്പോയി. പാറക്കടവിൽ ജോബിയുടെ 10 ലിറ്റർ പാലുള്ള പശുവും ഒഴുക്കിൽപ്പെട്ടു. നിരപ്പേൽ കടയിൽ അരയേക്കറോളം കൃഷി ഭൂമി നശിച്ചു. കൂട്ടാറിൽ ഒരു വീട് പൂർണമായും തകർന്നു. കൂട്ടാർ, തൂക്കുപാലം, മുണ്ടിയെരുമ, താന്നിമൂട്, കോന്പയാർ എന്നിവിടങ്ങളിൽ വെള്ളം കയറി മണിക്കൂറുകളോളമാണ് ഗതാഗതം തടസപ്പെട്ടത്. ചുറ്റും വെള്ളം നിറഞ്ഞതോടെ പുറത്തിറങ്ങാൻ പറ്റാത്ത സ്ഥിതിയിലായിരുന്നു നിരവധി കുടുംബങ്ങൾ. പാന്പാടുംപാറയിലും സന്യാസിയോടയിലും മരങ്ങൾ വീണു ഗതാഗതം സ്തംഭിച്ചിരുന്നു. വരും ദിവസങ്ങളിലും മഴ ശക്തമാകുമെന്ന മുന്നറിയിപ്പു കൂടി ലഭിച്ചതോടെ വലിയ ആശങ്കയിലാണ് നെടുംകണ്ടം, പട്ടം കോളനി മേഖലയിലുള്ളവർ. കുമളി, വണ്ടിപ്പെരിയാർ മേഖലകളിൽ വെള്ളപ്പൊക്കവും മണ്ണിടിച്ചിലും കുമളി: കനത്ത മഴയിൽ കുമളി, വണ്ടിപ്പെരിയാർ മേഖലകളിൽ വെള്ളപ്പൊക്കവും മണ്ണിടിച്ചിലും ഉണ്ടായി. ദേശീയപാതയിൽ വണ്ടിപ്പെരിയാറിൽ വെള്ളം കയറി. മുല്ലപ്പെരിയാർ അണക്കെട്ട് സ്പിൽവേ തുറന്ന് പെരിയാറ്റിലേക്ക് ജലം ഒഴുക്കിയതോടെ പെരിയാറിന്‍റെ തീരുത്തുള്ള വീടുകളിൽ വെള്ളം കയറി.

കുമളിയിൽ നിരവധി വീടുകളിലും കടകളിലും വെള്ളം കയറി. തോടുകൾ നിറഞ്ഞൊഴുകി കുമളി ടൗണ്‍, ഹോളിഡേ ഹോം പരിസരം, വലിയകണ്ടം, ഒന്നാംമൈൽ, പെരിയാർ നഗർ എന്നിവിടങ്ങളിൽ പ്രളയവും നാശനഷ്ടങ്ങളുണ്ടായി. ഒന്നാം മൈലിലും കുമളി ടൗണിലും വ്യാപാര സ്ഥാപനങ്ങളിൽ വെള്ളം കയറി. ഹോളിഡേ ഹോമിന് സമീപം വീട്ടിൽ കുടുങ്ങിയ നാലംഗ കുടുംബത്തെ നാട്ടുകാരും പോലീസും ചേർന്ന് രക്ഷപ്പെടുത്തി. വെള്ളിയാഴ്ച രാത്രി 11ഓടെ ഇവിടെ വെള്ളം ഉയരുകയായിരുന്നു. തോടുകൾ കവിഞ്ഞൊഴുകിയതും നീർച്ചാലുകൾ ഇല്ലാതായതുമാണ് പ്രശ്നം സൃഷ്ടിച്ചത്. ഹോളിഡേ ഹോമിൽ 40ഓളം കുടുംബങ്ങളെ മാറ്റിപ്പാർപ്പിച്ചു. മേലേചിന്നാർ മേഖല വെള്ളത്തിൽ മേലേചിന്നാർ: മേഖലയിൽ വെള്ളിയാഴ്ച രാത്രിയിലുണ്ടായ ശക്തമായ മഴയ്ക്കൊപ്പം നെടുങ്കണ്ടം കല്ലാർ ഡാം തുറന്നതതോടെ മേലേചിന്നാർ മേഖല വെള്ളത്തിലായി. കല്ലാർമുക്ക്, ബഥേൽ, മേലേചിന്നാർ മേഖലകളിൽ വ്യാകമായ നാശനഷ്ടങ്ങൾ ഉണ്ടായി. കല്ലാർമുക്ക് പാലം, ബഥേൽ കുരിശടിപാലം എന്നിവയുടെ അപ്രോച്ചു റോഡുകൾ തകർന്നു. നിരവധി വീടുകളിൽ വെള്ളം കയറി ലക്ഷക്കണക്കിനു രൂപയുടെ നാശനഷ്ടങ്ങൾ ഉണ്ടായിട്ടുണ്ട്. വ്യാപകമായി കൃഷി നാശവും സംഭവിച്ചു.

കട്ടായം കട്ടപ്പന! കാൽവരിക്കു ഹാട്രിക്

സ്കൂൾ തലത്തിൽ ഹാട്രിക് നേട്ടവുമായി കാൽവരിമൗണ്ട് കാൽവരി ഹൈസ്കൂൾ ചാന്പ്യൻമാരായി. 19 സ്വർണം, 19 വെള്ളി, അഞ്ച് വെങ്കലം എന്നിവയോടെ 157 പോയിന്‍റാണ് സ്കൂൾ സ്വന്തമാക്കിയത്. 138 പോയിന്‍റ് നേടിയ എൻആർ സിറ്റി എസ്എൻവിഎച്ച്എസ് രണ്ടാം സ്ഥാനം നേടി. 14 സ്വർണം, 17 വെള്ളി, 17 വെങ്കലം എന്നിവയാണ് ഇവർക്ക് ലഭിച്ചത്. 62 പോയിന്‍റ് നേടിയ ഇരട്ടയാർ സെന്‍റ് തോമസ് സ്കൂളാണ് മൂന്നാം സ്ഥാനത്ത്. വിജയികൾക്കു നെടുങ്കണ്ടം ബ്ലോക്ക് പഞ്ചായത്ത് പ്രസിഡന്‍റ് കെ.ടി. കുഞ്ഞ് ട്രോഫികൾ സമ്മാനിച്ചു. വീണ്ടും മൗണ്ട് കയറി കാൽവരി നെടുങ്കണ്ടം: ആവേശം "ഹൈ'റേഞ്ചിലെത്തിയ റവന്യു ജില്ലാ കായിക മേളയ്ക്കു തിരശീല വീണപ്പോൾ കട്ടപ്പന സബ്ജില്ലയ്ക്ക് ഓവറോൾ കീരീടം. 46 സ്വർണം, 37 വെള്ളി, 21 വെങ്കലം എന്നിവയോടെ 401 പോയിന്‍റ് നേടിയാണ് കട്ടപ്പനയുടെ തേരോട്ടം. 23 സ്വർണം, 27 വെള്ളി, 25 വെങ്കലം ഉൾപ്പെടെ 242 പോയിന്‍റുമായി അടിമാലി സബ് ജില്ല റണ്ണേഴ്സ് അപ്പ്. 14 സ്വർണം, അഞ്ച് വെള്ളി, 10 വെങ്കലം എന്നിവയോടെ 106 പോയിന്‍റുമായി പീരുമേടാണ് മൂന്നാം സ്ഥാനത്ത്. തൊടുപുഴ സബ്ജില്ല -88, നെടുങ്കണ്ടം -83, അറക്കുളം -13 എന്നിങ്ങനെയാണ് മറ്റു സ്ഥാനങ്ങൾ നേടിയവർ. ഇവർ മേളയിലെ താരങ്ങൾ സബ്ജൂണിയർ ഗേൾസ്-ദേവപ്രിയ ഷൈബു (കാൽവരി ഹൈസ്കൂൾ കാൽവരിമൗണ്ട്), സീനിയർ ആണ്‍കുട്ടികൾ-സെബിൻ കെ. സെബാസ്റ്റ്യൻ, ഷാരോണ്‍ രാജു (ഇരുവരും സെന്‍റ് ജെറോംസ് എച്ച്എസ്എസ്വെള്ളയാംകുടി), നിയ തെരേസ മാത്യു-(സെന്‍റ് തോമസ് എച്ച്എസ്എസ് ഇരട്ടയാർ).

ഏഷ്യൻ പവർലിഫ്റ്റിംഗ് ചാന്പ്യൻഷിപ്പിൽ മറയൂരിന്‍റെ അഞ്ജലിയും

മറയൂർ: തുർക്കിയിലെ ഇസ്താംബുളിൽ നവംബർ രണ്ടു മുതൽ നടക്കുന്ന ഏഷ്യൻ ഓപ്പണ്‍ എക്യുപ്ഡ് ആൻഡ് ക്ലാസിക് പവർലിഫ്റ്റിംഗ് ചാന്പ്യൻഷിപ്പിൽ മറയൂർ കാന്തല്ലൂർ സ്വദേശിനി പി.ആർ. അഞ്ജലി (21) ഇന്ത്യയെ പ്രതിനിധീകരിക്കും. രാജ്യത്തിന്‍റെ നാലംഗ ടീമിലാണ് അഞ്ജലി ഇടം നേടിയിരിക്കുന്നത്. സേലം എവിഎസ് കേളജിലെ എംബിഎ വിദ്യാർഥിനിയായ അഞ്ജലി പവർലിഫ്റ്റിംഗിലെ ദേശീയ താരമാണ്. അഞ്ച് തവണ ദേശീയ മെഡൽ നേടിയ അവർ ഓൾ ഇന്ത്യ ഇന്‍റർ യൂണിവേഴ്സിറ്റി ചാന്പ്യൻഷിപ്പിൽ തുടർച്ചയായി രണ്ട് തവണ സ്വർണമെഡൽ കരസ്ഥമാക്കിയിട്ടുണ്ട്. നാഷണൽ പവർലിഫ്റ്റർ എം. എച്ച്. ആൽഫിറോസിന്‍റെ ശിക്ഷണത്തിലാണ് അഞ്ജലി ഈ നേട്ടങ്ങൾ സ്വന്തമാക്കിയത്. കാന്തല്ലൂർ ദിണ്ഡുകൊന്പ് പനിച്ചിപറന്പിൽവീട്ടിൽ മുൻ സൈനികൻ പ്രതീഷിന്‍റെയും രേഷ്മയുടെയും മകളാണ് അഞ്ജലി. മറയൂർ ജയ്മാതാ പബ്ലിക് സ്കൂളിലും കോതമംഗലം എംഎ കോളജിലും വിദ്യാർഥിയായിരുന്ന അഞ്ജലി കായികരംഗത്ത് സഹോദരിയുടെ പാത തുടരുകയാണ്. അഞ്ജലിയുടെ സഹോദരി ഐശ്വര്യ ട്രിപ്പിൾ ജന്പിൽ ദേശീയ ചാന്പ്യനും റെക്കോർഡ് ഉടമയുമാണ്.

കത്തോലിക്ക കോൺഗ്രസ് അവകാശ സംരക്ഷണ യാത്ര നാളെ ഇടുക്കിയിൽ

ചെറുതോണി: കത്തോലിക്ക കോൺഗ്രസ് ഗ്ലോബൽ പ്രസിഡന്റ് പ്രഫ. രാജീവ് കൊച്ചുപറമ്പിൽ നയിക്കുന്ന അവകാശ സംരക്ഷണ യാത്ര നാളെ ഇടുക്കി രൂപതയിൽ പര്യടനം നടത്തും. നീതി ഔദാര്യമല്ല. അവകാശമാണ് എന്ന മുദ്രാവാക്യവുമായി കാസർഗോഡ് പാണത്തൂരിൽ നിന്ന് 13ന് ആരംഭിച്ച അവകാശ സംരക്ഷണ യാത്ര 24 ന് തിരുവനന്തപുരത്ത് സെക്രട്ടറിയേറ്റ് മാർച്ചോടുകൂടി സമാപിക്കും. ജെബി കോശി കമ്മീഷൻ റിപ്പോർട്ട് പ്രസിദ്ധീകരിക്കുക, വന്യജീവി ആക്രമണം തടയുന്നതിന് ശാശ്വതമായ പരിഹാരം കാണുക, ജനവിരുദ്ധ ഭൂ നിയമങ്ങൾ പിൻവലിക്കുക, കാർഷികോൽപ്പന്നങ്ങൾക്ക് ന്യായമായ വില ഉറപ്പാക്കുക, വിദ്യാഭ്യാസ ന്യൂനപക്ഷ അവകാശങ്ങൾ സംരക്ഷിക്കുക എന്നീ ആവശ്യങ്ങൾ ഉന്നയിച്ച് നടത്തുന്ന യാത്രയുടെ ഇടുക്കി രൂപതയിലെ പര്യടനം നാളെ അടിമാലിയിൽ നിന്ന് ആരംഭിക്കും. ആദ്യ സ്വീകരണ സ്ഥലമായ ചേലച്ചുവട്ടിൽ ഇടുക്കി രൂപത മുഖ്യ വികാരി ജനറാൾ മോൺ. ജോസ് കരിവേലിക്കൽ സ്വീകരണ സമ്മേളനം ഉദ്ഘാടനം ചെയ്യും.11.30ന് -മുരിക്കാശ്ശേരിയിൽ വികാരി ജനറാൾമാരായ മോൺ. ജോസ് നരിതൂക്കിലും 2.30 ന് തങ്കമണിയിൽ മോൺ. ഏബ്രഹാം പുറയാറ്റും സ്വീകരണയോഗങ്ങൾ ഉദ്ഘാടനം ചെയ്യും. വൈകുന്നേരം നാലിന് കട്ടപ്പനയിൽ എത്തിച്ചേരുന്ന അവകാശ സംരക്ഷണ യാത്രക്ക് ഇടുക്കി കവലയിൽ സ്വീകരണം നൽകും. തുടർന്ന് നൂറുകണക്കിന് ആളുകളുടെ നേതൃത്വത്തിൽ കട്ടപ്പന മിനി സ്റ്റേഡിയത്തിലേക്ക് പ്രകടനം നടക്കും. അവകാശ സംരക്ഷണ യാത്രയുടെ ഇടുക്കി രൂപതയിലെ സമാപന സമ്മേളനം ഇടുക്കി രൂപത മെത്രാൻ മാർ ജോൺ നെല്ലിക്കുന്നേൽ ഉദ്ഘാടനം ചെയ്യും. കത്തോലിക്ക കോൺഗ്രസ് ഇടുക്കി രൂപത പ്രസിഡന്റ് ജോർജ് കോയിക്കൽ അധ്യക്ഷത വഹിക്കും. ഗ്ലോബൽ പ്രസിഡന്‍റ് പ്രഫ. രാജീവ് കൊച്ചുപറമ്പിൽ, ഇടുക്കി രൂപത മുഖ്യ വികാരി ജനറാൾ മോൺ. ജോസ് കരിവേലിക്കൽ, ഗ്ലോബൽ ഡയറക്ടർ ഫാ. ഫിലിപ്പ് കവിയിൽ, ഗ്ലോബൽ ജനറൽ സെക്രട്ടറി ഡോ. ജോസുകുട്ടി ഒഴുകയിൽ, രൂപത ജനറൽ സെക്രട്ടറി സിജോ ഇലന്തൂർ, ജോസഫ് ചാണ്ടി തേവർപറമ്പിൽ, ജോർജുകുട്ടി പുന്നക്കുഴിയിൽ, ബെന്നി ആന്റണി, രാജേഷ് ജോൺ, ട്രീസ ലിസ് സെബാസ്റ്റ്യൻ, മനു ജെ. വാരാപള്ളി,ഫാ.ജോസ് മാറാട്ടിൽ, ഫാ.സെബാസ്റ്റ്യൻ വടക്കേൽ, ഫാ. തോമസ് പുത്തൻപുര, കെസിവൈഎം ഇടുക്കി രൂപത പ്രസിഡന്റ് സാം സണ്ണി, മിഷൻ ലീഗ് ഇടുക്കി രൂപത പ്രസിഡന്റ് സെസ്സിൽ ജോസ്, ടീച്ചേഴ് ഗിൽഡ് രൂപത പ്രസിഡന്റ് നോബിൾ മാത്യു എന്നിവർ പ്രസംഗിക്കും.

മഴക്കെടുതി: മന്ത്രി റോഷി അഗസ്റ്റിൻ സന്ദർശിച്ചു

കട്ടപ്പന: മഴക്കെടുതികൾ ഉണ്ടായ കുന്തളംപാറ, വിടി നഗർ, കുരിശു പള്ളി തുടങ്ങിയ പ്രദേശങ്ങളിൽ മന്ത്രി റോഷി അഗസ്റ്റിൻ സന്ദർശിച്ചു. അഡീഷണൽ ജില്ലാ മജിസ്ട്രേറ്റ് ഷൈജു പി. ജേക്കബ്, മറ്റ് റവന്യു അധികൃതർ, ജനപ്രതിനിധികൾ എന്നിവരും മന്ത്രിക്കൊപ്പമുണ്ടായിരുന്നു.കഴിഞ്ഞദിവസം അപ്രതീക്ഷിതമായി ഉണ്ടായ മഴ വ്യാപക നാശനഷ്ടമാണ് കട്ടപ്പന നഗരസഭയുടെ വിവിധ മേഖലകളിൽ ഉണ്ടാക്കിയത്. സ്ഥിതിഗതികൾ സംബന്ധിച്ച് പരിശോധന നടത്തി റിപ്പോർട്ട് സമർപ്പിക്കാൻ മന്ത്രി നിർദേശിച്ചു. റവന്യു വകുപ്പിന്‍റെ റിപ്പോർട്ടിന്‍റെ അടിസ്ഥാനത്തിൽ തുടർ നടപടി സ്വീകരിക്കും. മണ്ണിടിഞ്ഞ സ്ഥലങ്ങളുടെ വശങ്ങൾ കെട്ടി സംരക്ഷിക്കുന്നതിന് എസ്റ്റിമേറ്റ് സമർപ്പിക്കാനും നാശനഷ്ടങ്ങളുമായി ബന്ധപ്പെട്ട തുടർ നടപടികൾ വേഗത്തിലാക്കാനും മന്ത്രി നിർദേശം നൽകി. കുരിശു പള്ളി പ്രദേശത്തെ അപകടഭീഷണിയിലുള്ള എട്ട് കുടുംബങ്ങളോട് സുരക്ഷിത സ്ഥാനത്തേക്ക് മാറിത്താമസിക്കാൻ മന്ത്രി നിർദേശിച്ചു.

മുട്ടുകാട്ടിലെ മുനിയറകള്‍ സംരക്ഷിക്കാൻ ടൂറിസം പദ്ധതി

രാജാക്കാട്: മഹാശിലായുഗ കാലത്തെ അവശേഷിപ്പുകളായ ചിന്നക്കനാല്‍ മുട്ടുകാട്ടിലെ മുനിയറകള്‍ സംരക്ഷിക്കുന്നതിനും മലമുകളിലെ ടൂറിസം സാധ്യതകള്‍ പ്രയോജനപ്പെടുത്തുന്നതിനും ചിന്നക്കനാല്‍ ഗ്രാമ പഞ്ചായത്ത് ടൂറിസം പദ്ധതി തയാറാക്കി. പ്രപ്പോസല്‍ തയാറാക്കി ഗ്രാമ പഞ്ചായത്ത്, ഡിടിപിസിക്ക് കൈമാറി. മുട്ടുകാട് പാടശേഖരത്തിന്‍റെ മനോഹര കാഴ്ചയും ഒപ്പം കോടമഞ്ഞും വീശിയടിക്കുന്ന കാറ്റും ഇവിടുത്തെ പ്രത്യേകതയാണ്. അധികൃതരുടെ ശ്രദ്ധ ഇവിടേയ്ക്കെത്താത്തതിനാല്‍ മേഖല സാമൂഹ്യവിരുടെ താവളവുമായി മാറിയിരുന്നു. ഈ സാഹചര്യത്തില്‍ക്കൂടിയാണ് പഞ്ചായത്തിന്‍റെ ഇടപെടല്‍ ഉണ്ടായിരിക്കുന്നത്. പദ്ധതി നടപ്പിലായാല്‍ ഉള്‍ഗ്രാമ പ്രദേശമായ മുട്ടുകാടിന്‍റെ സമഗ്രമായ വികസനത്തിനും ഇത് വഴിതെളിക്കും.

വികസന സദസ്

രാജകുമാരി: രാജകുമാരി ഗ്രാമ പഞ്ചായത്ത് വികസനസദസ് രാജകുമാരി ഗ്രാമ പഞ്ചായത്ത് കമ്യൂണിറ്റി ഹാളിൽ എം.എം. മണി എംഎൽഎ ഉദ്ഘാടനം ചെയ്തു. ഗ്രാമ പഞ്ചായത്ത് പ്രസിഡന്‍റ്് സുമ ബിജു അദ്ധ്യക്ഷത വഹിച്ചു. വൈസ് പ്രസിഡന്‍റ്് അജേഷ് മുകളേൽ, സെക്രട്ടറി ടി.കെ. കാഞ്ചന, ജില്ലാ പഞ്ചായത്ത് വൈസ് പ്രസിഡൻ്റ് ഉഷാകുമാരി മോഹൻകുമാർ, നെടുങ്കണ്ടം ബ്ലോക്ക് പഞ്ചായത്ത് പ്രസിഡൻ്റ് കെ.ടി. കുഞ്ഞ് തുടങ്ങിയവർ പ്രസംഗിച്ചു.

ശാന്തിഗിരി ഇൻസ്റ്റിറ്റ്യൂട്ട് ദേശീയതല ‌മാനേജ്മെന്‍റ് ഫെസ്റ്റ് സംഘടിപ്പിച്ചു

വഴിത്തല: ശാന്തിഗിരി ഇൻസ്റ്റിറ്റ്യൂട്ട് ഓഫ് മാനേജ്മെന്‍റിൽ ദേശീയതല മാനേജ്മെന്‍റ് ഫെസ്റ്റ് ഇംപൾസോ സംഘടിപ്പിച്ചു. ഫാ. പോൾ പാറക്കാട്ടേൽ സിഎംഐ അധ്യക്ഷത വഹിച്ചു. എക്സിക്യൂട്ടീവ് ഡയറക്ടർ ഫാ. എബിൻ കല്ലറയ്ക്കൽ സിഎംഐ, ഡയറക്ടർ ഇൻ-ചാർജ് ഡോ. ജിൻസ് ജോർജ്, ഫാക്കൽറ്റി ഫെസ്റ്റ് കോ-ഓർഡിനേറ്റർ ഫാ. ജിബു പി. ജോസഫ്, ലിസ ജോസ് എന്നിവർ പ്രസംഗിച്ചു. സ്റ്റുഡന്‍റ് കോ-ഓർഡിനേറ്റർമാരായ സുധി ദീപു, ബെക്സി ജോർജ് എന്നിവർ നേതൃത്വം നൽകി. ഫെസ്റ്റിൽ കുട്ടിക്കാനം മരിയൻ കോളജ് ഓവറോൾ ചാന്പ്യൻമാരായി. ഗായിക അഞ്ജു ജോസഫിന്‍റെ സംഗീതപരിപാടിയും നടന്നു. രാജ്യത്തിന്‍റെ വിവിധ ഭാഗങ്ങളിൽനിന്നുമായി 600-ഓളം വിദ്യാർഥികൾ പങ്കെടുത്തു. മാനേജ്മെന്‍റ് വൈദഗ്ധ്യം, സർഗാത്മകത, സാംസ്കാരിക മികവ് എന്നിവ പ്രകടിപ്പിക്കാൻ വിദ്യാർഥികൾക്ക് ഫെസ്റ്റിലൂടെ കഴിഞ്ഞു.

ശാന്തൻപാറ ഗ്രാമ പഞ്ചായത്ത് വികസനസദസ്

ശാന്തൻപാറ: ശാന്തൻപാറ ഗ്രാമ പഞ്ചായത്ത് വികസനസദസ് ഗ്രാമ പഞ്ചായത്ത് കമ്യൂണിറ്റി ഹാളിൽ എം. എം. മണി എംഎൽഎ ഉദ്ഘാടനം ചെയ്തു. ഗ്രാമ പഞ്ചായത്ത് പ്രസിഡന്‍റ് ലിജു വർഗീസ് അധ്യക്ഷത വഹിച്ചു. പഞ്ചായത്ത് സെക്രട്ടറി ഡി. തുളസിധരൻനായർ റിപ്പോർട്ട് അവതരിപ്പിച്ചു. വൈസ് പ്രസിഡന്‍റ്് നിത്യ സെലിൻ, അസി. സെക്രട്ടറി കെ.സി. ഗിരീഷ്കുമാർ, ജില്ലാ പഞ്ചായത്ത് വൈസ് പ്രസിഡന്‍റ്് ഉഷാകുമാരി മോഹൻകുമാർ, ദേവികുളം ബ്ലോക്ക് പഞ്ചായത്ത് പ്രസിഡന്‍റ്് ജിഷ ദിലീപ്, ആസൂത്രണസമിതി ഉപാധ്യക്ഷൻ സേനാപതി ശശി, ജനപ്രതിനിധികളായ എൻ.ആർ. ജയൻ, പി.ടി. മുരുകൻ, കെ.സി. രാജു, മർച്ചന്‍റ്് അസോസിയേഷൻ പ്രസിഡന്‍റ്് ജോയി ജോസഫ് തുടങ്ങിയവർ പ്രസംഗിച്ചു.

തോട്ടഭൂമി പതിച്ചു നൽകണം: പ്ലാന്‍റേഷൻ മിഷൻ

ഇടുക്കി: നൂറ്റാണ്ടുകളായി തോട്ടം ഉടമകളുടെ കൈവശം ഇരിക്കുന്ന റവന്യു ഭൂമി സർക്കാർ ഏറ്റെടുത്ത് ഭൂ രഹിതരായ തോട്ടം തൊഴിലാളികൾക്ക് വീടുവയ്ക്കാനായി പതിച്ചുനൽകണമെന്ന് കേരള പ്ലാന്‍റേഷൻ വെൽഫെയർ മിഷൻ യോഗം ആവശ്യപ്പെട്ടു സ്വന്തമായി ഭൂമി ഇല്ലാത്ത കാരണത്താൽ തൊഴിലാളികൾ കാലപ്പഴക്കം ചെന്ന ലയത്തിലാണ് ഇപ്പോഴും താമസിക്കുന്നത്. സർക്കാർ ഇടപെട്ട് തോട്ടം മേഖലയുടെ വികസനത്തിന് പ്രത്യേക പാക്കേജ് നടപ്പാക്കണമെന്നും യോഗം ആവശ്യപ്പെട്ടു. ചെയർമാൻ ഷിബു കെ. തന്പി അധ്യക്ഷത വഹിച്ചു. ജനറൽ സെക്രട്ടറി പി.ടി. ശ്രീകുമാർ, സന്തോഷ് കൃഷ്ണൻ, ബിജു പി. ഡേവിഡ്, ഡോ തോമസ് വൈദ്യൻ, ഷിനോജ് ജോസഫ്, ശാന്തി രമേശ്, ഗിരിജ ചന്ദ്രശേഖർ. സിസ്റ്റർ ശോഭന, വിനോദ് വർഗീസ്, സി.എൻ. മണി എന്നിവർ പ്രസംഗിച്ചു

വാഹന പ്രചാരണ ജാഥ ഇന്ന്

രാജാക്കാട്: കേന്ദ്ര,സംസ്ഥാന സർക്കാരുകളുടെ ജനദ്രോഹ നയങ്ങളിൽ പ്രതിഷേധിച്ചും രാജാക്കാട് ഗ്രാമ പഞ്ചായത്ത് ഭരണ സമിതിയുടെ കെടുകാര്യസ്ഥതയ്ക്കും വികസനമുരടിപ്പിനുമെതിരേ കോൺഗ്രസ് രാജാക്കാട് മണ്ഡലം കമ്മിറ്റി പ്രസിഡന്‍റ് ജോഷി കന്യാക്കുഴിയുടെ നേതൃത്വത്തിൽ ഇന്ന് രാജാക്കാട് പഞ്ചായത്തിൽ വാഹന പ്രചാരണ ജാഥ സംഘടിപ്പിക്കുമെന്ന് ഭാരവാഹികളായ ബാബു കൊച്ചുപുരക്കൽ, ജോയി തമ്പുഴ, ആഗസ്തി കുന്നുംപുറത്ത് എന്നിവർ പത്രസമ്മേളനത്തിൽ അറിയിച്ചു. ഇന്ന് രാവിലെ 7.30ന് പഴയവിടുതിയിൽ കെപിസിസി മെംബർ ആർ. ബാലൻപിള്ള ജാഥയുടെ ഉദ്ഘാടനം നിർവഹിക്കും. തുടർന്ന് അടിവാരം, വാക്കാസിറ്റി, അസിക്കവല, പന്നിയാർ നിരപ്പ്, കള്ളിമാലി, അമ്പലക്കവല, കലുങ്കുസിറ്റി, പന്നിയാർകൂട്ടി, ശ്രീനാരായണപുരം, കൊച്ചുമുല്ലക്കാനം, കുരങ്ങുപാറ, വലിയകണ്ടം, പുന്നസിറ്റി, എൻആർ സിറ്റി, മുല്ലക്കാനം എന്നീ കേന്ദ്രങ്ങളിൽ പര്യടനം നടത്തി രാജാക്കാട് ടൗണിൽ സമാപിക്കും. വൈകുന്നേരം അഞ്ചിന് ടൗണിൽ നടക്കുന്ന സമാപന സമ്മേളനം കെപിസിസി വൈസ് പ്രസിഡന്‍റ് റോയി കെ. പൗലോസ് ഉദ്ഘാടനം ചെയ്യും. ജില്ലാ വൈസ് പ്രസിഡന്‍റ്് കെ.എസ്. അരുൺ, ഉടുമ്പൻചോല ബ്ലോക്ക് പ്രസിഡന്‍റ്് എം.പി. ജോസ്, യുഡിഎഫ് നിയോജക മണ്ഡലം കൺവീനർ ബെന്നി തുണ്ടത്തിൽ തുടങ്ങിയവർ പ്രസംഗിക്കും.

കുടുംബങ്ങൾ സമൂഹത്തിന്‍റെ കരുത്ത്: മാർ നെല്ലിക്കുന്നേൽ

രാജകുമാരി: കെട്ടുറപ്പുള്ള കുടുംബബന്ധങ്ങളാണ് സമൂഹത്തെ വളർത്തുന്നതെന്ന് ഇടുക്കി രൂപത മെത്രാൻ മാർ ജോൺ നെല്ലിക്കുന്നേൽ. രാജകുമാരി ദൈവമാതാ ജൂബിലി തീർത്ഥാടന കേന്ദ്രത്തിൽ രൂപതയിലെ വിവാഹ, പൗരോഹിത്യ, സന്യാസ ജൂബിലി സംഗമം ഉദ്ഘാടനം ചെയ്യുകയായിരുന്നു അദ്ദേഹം. വിവാഹവും കുടുംബജീവിതവും അനിവാര്യതയല്ല എന്ന് ചിന്തിക്കുന്ന വർത്തമാനകാലത്ത് ഒരുമയോടെ ജീവിച്ചതിന്‍റെ സംതൃപ്തിയിൽ ജൂബിലി ആഘോഷിക്കുന്ന ദമ്പതികൾ പുതുതലമുറയ്ക്ക് മാതൃകയാണ്. പ്രാർഥനയിലും ആത്മീയതയിലും പരസ്പരമുള്ള വിശ്വസ്തതയിലും ബലവത്തായ കുടുംബ ബന്ധങ്ങൾക്ക് മാത്രമേ ആയുസ് ഉണ്ടാവുകയുള്ളൂവെന്നും അദ്ദേഹം പറഞ്ഞു. ലോക രക്ഷകനും ദൈവപുത്രനുമായ ഈശോമിശിഹായുടെ തിരുജനനത്തിന്‍റെ മഹാജൂബിലി ആഘോഷത്തിന്‍റെ ഭാഗമായി ഇടുക്കി രൂപതയിൽ 2025 ൽ പൗരോഹിത്യ, സന്ന്യാസ, വൈവാഹിക ജീവിതാന്തസുകളുടെ ജൂബിലി ആഘോഷിക്കുന്നവരുടെ രൂപതാതല സംഗമമാണ് രാജകുമാരിയിൽ നടന്നത്. രൂപതയുടെ വിവിധ ഇടവകകളിൽ നിന്ന് എത്തിയ 200ൽപ്പരം ദമ്പതികളുടെയും അമ്പതോളം സമർപ്പിതരുടെയും കാഴ്ച സമർപ്പണത്തെ തുടർന്ന് രൂപത മെത്രാൻ മാർ ജോൺ നെല്ലിക്കുന്നേലിന്‍റെ മുഖ്യ കർമികത്വത്തിൽ വിശുദ്ധ കുർബാന നടന്നു. ഇടുക്കി രൂപത വികാരി ജനറാൾ മോൺ. ജോസ് കരിവേലിക്കൽ ജൂബിലി സന്ദേശം നൽകി. തുടർന്ന് നടന്ന പൊതുസമ്മേളനം മാർ ജോൺ നെല്ലിക്കുന്നേൽ ഉദ്ഘാടനം ചെയ്തു. മോൺ. ജോസ് കരിവേലിയ്ക്കൽ അധ്യക്ഷത വഹിച്ചു. മോൺ. ജോസ് നരിതൂക്കിൽ, മോൺ. ഏബ്രഹാം പുറയാറ്റ്, രാജാക്കാട് ഫൊറോനാ വികാരി ഫാ. മാത്യു കരോട്ട്കൊച്ചറക്കൽ എന്നിവർ പ്രസംഗിച്ചു. ജൂബിലേറിയൻമാരെ സർട്ടിഫിക്കറ്റുകളും ഉപഹാരങ്ങളും നൽകി ആദരിച്ചു. രൂപത ഫാമിലി അപ്പോസ്‌റ്റലേ റ്റിന്റെ ആഭിമുഖ്യത്തിൽ നടത്തിയ ജൂബിലേറിയൻസ് മീറ്റിന് ഫാമിലി അപ്പോസ്റ്റൊലേറ്റ് രൂപത ഡയറക്ടർ ഫാ. മാത്യു അഴകനാകുന്നേൽ, രൂപത പിതൃവേദി ഡയറക്ടർ ഫാ. ആന്‍റണി പാലാപുളിക്കൽ, രൂപത മാതൃവേദി ഡയറക്ടർ ഫാ. ജോസഫ് കാരിക്കൂട്ടത്തിൽ, ഫാ. അലക്സ്‌ ചേന്നംകുളം, സിസ്റ്റർ സോഫിയ റോസ് സിഎംസി, സിസ്റ്റർ നിത്യ സിഎംസി, സിസ്റ്റർ ലീമാ റോസ് എസ്എബിഎസ്, സിസ്റ്റർ മെറിൻ എസ്എച്ച്, രൂപത പാസ്റ്ററൽ കൗൺസിൽ അംഗം അനൂപ് കുന്നേൽ എന്നിവർ നേതൃത്വം നൽകി.

വെൽഡിംഗിനിടെ ടാങ്കർ ലോറിക്ക് തീ പിടിച്ചു

കാഞ്ഞാർ: വെൽഡിംഗ് ജോലിക്കിടെ ടാങ്കർ ലോറിയ്ക്ക് തീ പിടിച്ചു. കാഞ്ഞാറിൽ വാഹനങ്ങൾ പൊളിക്കുന്ന ആക്രി വർക്ക്ഷോപ്പിൽ വെൽഡിംഗ് നടത്തുന്നതിനിടെയാണ് വാഹനത്തിന് തീ പിടിച്ചത്. ഇന്നലെ വൈകുന്നേരം മൂന്നോടെയായിരുന്നു സംഭവം. ഉണ്ണേച്ചുപറന്പിൽ ജബ്ബാറിന്‍റെ ആക്രിക്കടയിൽ ടാങ്കറിന്‍റെ തകിടിൽ വെൽഡിംഗ് നടത്തുന്നതിനിടെയാണ് വാഹനത്തിന് തീ പിടിച്ചത്. വാഹനത്തിനുള്ളിൽ ലാറ്റക്സ് ഉണ്ടായിരുന്നതിനാൽ തീ പടർന്നു പിടിക്കുകയായിരുന്നു. വിവരം ശ്രദ്ധയിൽപ്പെട്ട സമീപവാസി അഗ്നി രക്ഷാ സേനയെ വിവരം അറിയിക്കുകയും ഉടൻതന്നെ മൂലമറ്റത്ത് നിന്നും സേന സ്ഥലത്തെത്തി തീ അണയ്ക്കുകയായിരുന്നു. സമീപത്ത് പള്ളിയും, നിരവധി വീടുകളും വ്യാപാര സ്ഥാപനങ്ങളുമുണ്ട്. ഫയർഫോഴ്സ് എത്തി തീ അണച്ചതിനാൽ വൻ ദുരന്തം ഒഴിവായി. ഇവിടെ ഇതിനു മുൻപും തീ പിടുത്തം ഉണ്ടായിട്ടുണ്ട്. സ്റ്റേഷൻ ഓഫീസർ ടി.കെ.അബ്ദുൾ അസീസ്, സീനിയർ ഫയർ ആന്‍റ് റെസ്ക്യു ഓഫീസർമാരായ ജിൻസ് മാത്യു, ബിബിൻ എ. തങ്കപ്പൻ, ഫയർ ആന്‍റ് റെസ്ക്യു ഓഫീസർമാരായ എം.പി.സിജു, ടി.ആർ.ജിനേഷ് , സി.ആർ. ശ്രീകാന്ത്, കെ.സന്ദീപ്, എം.വി.അരുണ്‍ എന്നിവരുടെ നേത്വത്വത്തിലാണ് തീ അണച്ചത്.

അവകാശ സംരക്ഷണ യാത്രയ്ക്ക് മുരിക്കാശേരിയിൽ സ്വീകരണം നൽകും

ചെറുതോണി: ജനകീയ പ്രശ്നങ്ങൾ ഉന്നയിച്ച് കത്തോലിക്കാ കോൺഗ്രസ് ഗ്ലോബൽ പ്രസിഡന്‍റ്് പ്രഫ. രാജീവ് കൊച്ചുപറമ്പിൽ നയിക്കുന്ന അവകാശ സംരക്ഷണയാത്രയ്ക്ക് 20ന് രാവിലെ 11 ന് മുരിക്കാശേരിയിൽ പ്രൗഡോജ്ജ്വലമായ സ്വീകരണം നൽകുമെന്ന് ഭാരവാഹിക അറിയിച്ചു. കഴിഞ്ഞ 13ന് കാസർഗോഡ് പാണത്തൂരിൽനിന്ന് ആരംഭിച്ച് 24ന് തിരുവനന്തപുരത്ത് സെക്രട്ടറിയേറ്റിൽ സമാപിക്കുന്ന അവകാശ സംരക്ഷണയാത്രയാണ് 20ന് മുരിക്കാശേരിയിൽ എത്തിച്ചേരുന്നത്. നീതി ഔദാര്യമല്ല- അവകാശമാണ് എന്ന മുദ്രാവാക്യവുമായാണ് യാത്ര. മുരിക്കാശേരിയിൽ നടക്കുന്ന സ്വീകരണ യോഗം ഇടുക്കി രൂപത വികാരി ജനറാൾ മോൺ. ജോസ് നരിതൂക്കിൽ ഉദ്ഘാടനം ചെയ്യും. കത്തോലിക്ക കോൺഗ്രസ് മുരിക്കാശേരി യൂണിറ്റ് പ്രസിഡന്‍റ്് സണ്ണി കാരിശേരി അധ്യക്ഷത വഹിക്കും. ഗ്ലോബൽ സെക്രട്ടറി ഡോ. ജോസുകുട്ടി ജെ. ഒഴുകയിൽ, രൂപത പ്രസിഡന്‍റ്് ജോർജ്‌ കോയിക്കൽ, രൂപത സെക്രട്ടറി സിജോ ഇലന്തൂർ, മുരിക്കാശേരി ഫൊറോന പള്ളി വികാരി ഫാ. സെബാസ്റ്റ്യൻ വടക്കേൽ, രൂപത ഭാരവാഹികളായ ജോർജുകുട്ടി പുന്നക്കുഴി, ടോമി കണ്ടത്തിൽ, ബെന്നി മൂക്കിലിക്കാട്ട്, ജോസഫ് ചാണ്ടി തേവർപറമ്പിൽ, സണ്ണി കരിവേലിക്കൽ എന്നിവർ പ്രസംഗിക്കും.

സെൻട്രൽ കേരള സഹോദയ കലോത്സവം : നിർമല പബ്ലിക് സ്കൂൾ ബഹുദൂരം മൂന്നിൽ

തൊടുപുഴ: സെൻട്രൽ കേരള സഹോദയ കലോത്സവം സർഗധ്വനി-2025 രണ്ടുനാൾ പിന്നിട്ടപ്പോൾ കിരീട പോരാട്ടത്തിൽ മൂവാറ്റുപുഴ നിർമല പബ്ലിക് സ്കൂൾ ബഹുദൂരം മൂന്നിലെത്തി. കണ്ണിനും കാതിനും കുളിർമയേകി വിവിധ വേദികളിൽ അരങ്ങേറിയ മൽസരങ്ങൾക്ക് ഇന്നു തിരശീല വീഴും. നൃത്തയിനങ്ങളിൽ അഴകിന്‍റെ വിരുന്നായി മാറി കലാപ്രതിഭകളുടെ പോരാട്ടം. 683 പോയിന്‍റ് നേടി മൂവാറ്റുപുഴ നിർമല പബ്ലിക് സ്കൂൾ ഒന്നാംസ്ഥാനത്താണ്. 621 പോയിന്‍റോടെ വാഴക്കുളം കാർമൽ പബ്ലിക് സ്കൂൾ രണ്ടാമതും 513 പോയിന്‍റുമായി ആതിഥേയരായ വിമല പബ്ലിക് സ്കൂൾ മൂന്നാം സ്ഥാനത്തുമാണ്. തൊടുപുഴ ഡിപോൾ പബ്ലിക് സ്കൂൾ- 451, കൂത്താട്ടുകുളം മേരിഗിരി പബ്ലിക് സ്കൂൾ-426, വാളകം ബ്രൈറ്റ് പബ്ലിക് സ്കൂൾ-440 എന്നിങ്ങനെയാണ് മറ്റു സ്കൂളുകളുടെ പോയിന്‍റ് നില. ഇന്ന് ഒപ്പന, ദഫ്മുട്ട്, കുച്ചുപ്പുടി, കോൽക്കളി തുടങ്ങിയ മത്സരങ്ങൾ അരങ്ങേറും. വൈകുന്നേരം നാലിന് നടക്കുന്ന സമാപന സമ്മേളനത്തിൽ കേരള ചലച്ചിത്ര നാടക അക്കാദമി ചെയർമാനും നടനുമായ പ്രേംകുമാർ, തൊടുപുഴ ഡിവൈഎസ്പി പി.കെ. സാബു എന്നിവർ സമ്മാനങ്ങൾ വിതരണം ചെയ്യും. മോഹിനിയാട്ടത്തിൽ ആദിത്യയും കീർത്തനയും തൊടുപുഴ: സഹോദയ കലോത്സവം കാറ്റഗറി-4 വിഭാഗത്തിലെ വീറും വാശിയും നിറഞ്ഞ മോഹിനിയാട്ട മൽസരത്തിൽ രണ്ടുപേർക്ക് ഒന്നാം സ്ഥാനം. തൊടുപുഴ ഡിപോൾ പബ്ലിക് സ്കൂളിലെ ആദിത്യ ബിജുവും മൂവാറ്റുപുഴ സെന്‍റ് തോമസ് പബ്ലിക് സ്കൂളിലെ കീർത്തന സുദീപുമാണ് വിജയം പങ്കിട്ടത്. കുടയത്തൂർ അറയ്ക്കകുന്നേൽ ബിജു-അനു ദന്പതികളുടെ മകളാണ് ആദിത്യ. അഞ്ചാം ക്ലാസിനു ശേഷം കലോത്സവ വേദിയിൽ എത്തിയ ആദിത്യ ഒരിനത്തിൽ മത്സരിച്ച് ഒന്നാം സ്ഥാനം നേടിയപ്പോൾ കീർത്തന കഴിഞ്ഞ നാലു വർഷമായി വിജയത്തേര് തെളിക്കുകയാണ്. ഗുരുവായ ഷൈബി കൃഷ്ണയുടെ കീഴിലാണ് നൃത്ത പരിശീലനം. കുച്ചുപ്പുഡി, ഭരതനാട്യം, നാടോടിനൃത്തം എന്നിവയും പരിശീലിക്കുന്നുണ്ട്. മൂവാറ്റുപുഴ മേക്കടന്പ് ശ്രീശൈലത്തിൽ പരേതനായ സുധീപ് പുരുഷോത്തമൻ-ജെയ്സി ദന്പതികളുടെ മകളാണ് കീർത്തന.

അധരത്തിൻ ക്രിസ്തുവും ഹൃദയത്തിൽ ലോകവും ആകേണ്ടവരല്ല ക്രൈസ്തവർ: ബിഷപ് മഠത്തിപ്പറമ്പിൽ

നെടുങ്കണ്ടം: അധരത്തിൻ ക്രിസ്തുവും ഹൃദയത്തിൽ ലോകവും ആകേണ്ടവരല്ല ക്രൈസ്തവരെന്ന് വിജയപുരം ബിഷപ് മാർ ജസ്റ്റിൻ മഠത്തിപ്പറമ്പിൽ. കേരള കത്തോലിക്ക കരിസ്മാറ്റിക് നവീകരണത്തിന്‍റെ സുവര്‍ണജൂബിലി വര്‍ഷാചരണത്തിന്റെ ഭാഗമായി കല്ലാര്‍ സബ് സോണിന്‍റെ നേതൃത്വത്തില്‍ കല്ലാര്‍ മേരിഗിരി ദേവാലയ അങ്കണത്തില്‍ ആരംഭിച്ച ക്രിസ്തുജയന്തി ജൂബിലി ബൈബിള്‍ കണ്‍വെന്‍ഷന്‍ - റൂഹാ 2025 ഉദ്ഘാടനം ചെയ്യുകയായിരുന്നു അദ്ദേഹം. വാക്കുകളും പ്രവൃത്തികളും ക്രിസ്തുവിന് പ്രീതികരമായ ജീവിക്കേണ്ടവരാണ് ക്രൈസ്തവർ- മാർ ജസ്റ്റിൻ മഠത്തിപ്പറമ്പിൽ പറഞ്ഞു തോമസ് കുമളി വചന സന്ദേശം നല്‍കി. തുടർന്നുള്ള ദിവസങ്ങളിൽ ബാബു കോഴിക്കോട്, സെബാസ്റ്റ്യൻ താന്നിക്കല്‍ ,ഷാജി വൈക്കത്തുപറമ്പില്‍, ഫാ. ജയിംസ് മാക്കിയില്‍, ഫാ. സിജോ തയ്യാലയ്ക്കല്‍, ഉണ്ണി മാവടി എന്നിവർ വചനശുശ്രൂഷകള്‍ക്ക് നേതൃത്വം നല്‍കും. സബ് സോണ്‍ അനിമേറ്റര്‍ ഫാ. വിജോഷ് ജോസഫ് മുള്ളൂര്‍, ജന. കണ്‍വീനര്‍ ബേബിച്ചന്‍ കൊച്ചുപറമ്പില്‍, സബ്‌സോണ്‍ കോ-ഓഡിനേറ്റര്‍ എം.സി. സോഫി മുല്ലൂര്‍ തുടങ്ങിയവർ നേതൃത്വം നൽകി വരുന്നു.

കുടുംബബന്ധങ്ങളുടെ കെട്ടുറപ്പ് സമൂഹത്തിന്‍റെ കരുത്ത്: മാർ നെല്ലിക്കുന്നേൽ

രാജകുമാരി: കെട്ടുറപ്പുള്ള കുടുംബബന്ധങ്ങളാണ് സമൂഹത്തെ വളർത്തുന്നതെന്ന് ഇടുക്കി രൂപത മെത്രാൻ മാർ ജോൺ നെല്ലിക്കുന്നേൽ. രാജകുമാരി ദൈവമാതാ ജൂബിലി തീർത്ഥാടന കേന്ദ്രത്തിൽ രൂപതയിലെ വിവാഹ, പൗരോഹിത്യ, സന്യാസ ജൂബിലി സംഗമം ഉദ്ഘാടനം ചെയ്യുകയായിരുന്നു അദ്ദേഹം. വിവാഹവും കുടുംബജീവിതവും അനിവാര്യതയല്ല എന്ന് ചിന്തിക്കുന്ന വർത്തമാനകാലത്ത് ഒരുമയോടെ ജീവിച്ചതിന്‍റെ സംതൃപ്തിയിൽ ജൂബിലി ആഘോഷിക്കുന്ന ദമ്പതികൾ പുതുതലമുറയ്ക്ക് മാതൃകയാണ്. പ്രാർഥനയിലും ആത്മീയതയിലും പരസ്പരമുള്ള വിശ്വസ്തതയിലും ബലവത്തായ കുടുംബ ബന്ധങ്ങൾക്ക് മാത്രമേ ആയുസ് ഉണ്ടാവുകയുള്ളൂവെന്നും അദ്ദേഹം പറഞ്ഞു. ലോക രക്ഷകനും ദൈവപുത്രനുമായ ഈശോമിശിഹായുടെ തിരുജനനത്തിന്‍റെ മഹാജൂബിലി ആഘോഷത്തിന്‍റെ ഭാഗമായി ഇടുക്കി രൂപതയിൽ 2025 ൽ പൗരോഹിത്യ, സന്ന്യാസ, വൈവാഹിക ജീവിതാന്തസുകളുടെ ജൂബിലി ആഘോഷിക്കുന്നവരുടെ രൂപതാതല സംഗമമാണ് രാജകുമാരിയിൽ നടന്നത്. രൂപതയുടെ വിവിധ ഇടവകകളിൽ നിന്ന് എത്തിയ 200ൽപ്പരം ദമ്പതികളുടെയും അമ്പതോളം സമർപ്പിതരുടെയും കാഴ്ച സമർപ്പണത്തെ തുടർന്ന് രൂപത മെത്രാൻ മാർ ജോൺ നെല്ലിക്കുന്നേലിന്‍റെ മുഖ്യ കർമികത്വത്തിൽ വിശുദ്ധ കുർബാന നടന്നു. ഇടുക്കി രൂപത വികാരി ജനറാൾ മോൺ. ജോസ് കരിവേലിക്കൽ ജൂബിലി സന്ദേശം നൽകി. തുടർന്ന് നടന്ന പൊതുസമ്മേളനം മാർ ജോൺ നെല്ലിക്കുന്നേൽ ഉദ്ഘാടനം ചെയ്തു. മോൺ. ജോസ് കരിവേലിയ്ക്കൽ അധ്യക്ഷത വഹിച്ചു. മോൺ. ജോസ് നരിതൂക്കിൽ, മോൺ. ഏബ്രഹാം പുറയാറ്റ്, രാജാക്കാട് ഫൊറോനാ വികാരി ഫാ. മാത്യു കരോട്ട്കൊച്ചറക്കൽ എന്നിവർ പ്രസംഗിച്ചു. ജൂബിലേറിയൻമാരെ സർട്ടിഫിക്കറ്റുകളും ഉപഹാരങ്ങളും നൽകി ആദരിച്ചു. രൂപത ഫാമിലി അപ്പോസ്‌റ്റലേ റ്റിന്റെ ആഭിമുഖ്യത്തിൽ നടത്തിയ ജൂബിലേറിയൻസ് മീറ്റിന് ഫാമിലി അപ്പോസ്റ്റൊലേറ്റ് രൂപത ഡയറക്ടർ ഫാ. മാത്യു അഴകനാകുന്നേൽ, രൂപത പിതൃവേദി ഡയറക്ടർ ഫാ. ആന്‍റണി പാലാപുളിക്കൽ, രൂപത മാതൃവേദി ഡയറക്ടർ ഫാ. ജോസഫ് കാരിക്കൂട്ടത്തിൽ, ഫാ. അലക്സ്‌ ചേന്നംകുളം, സിസ്റ്റർ സോഫിയ റോസ് സിഎംസി, സിസ്റ്റർ നിത്യ സിഎംസി, സിസ്റ്റർ ലീമാ റോസ് എസ്എബിഎസ്, സിസ്റ്റർ മെറിൻ എസ്എച്ച്, രൂപത പാസ്റ്ററൽ കൗൺസിൽ അംഗം അനൂപ് കുന്നേൽ എന്നിവർ നേതൃത്വം നൽകി.

സർക്കാർ ലക്ഷ്യം മുഴുവൻ കുടുംബങ്ങളിലും ശുദ്ധജലമെത്തിക്കുകയെന്നത് മന്ത്രി റോഷി

കട്ടപ്പന: മുഴുവൻ കുടുംബങ്ങളിലുംശുദ്ധജലമെത്തിക്കുക എന്ന ലക്ഷ്യത്തോടെയാണ് സർക്കാർ പ്രവർത്തിച്ചതെന്ന് മന്ത്രി റോഷി അഗസ്റ്റിൻ.17 ലക്ഷത്തിൽനിന്ന് 48 ലക്ഷം കുടുംബങ്ങളിൽ കുടിവെള്ളമെത്തിക്കാൻ സർക്കാരിന് കഴിഞ്ഞ 10 വർഷത്തിനിടെ കഴിഞ്ഞു. ജലത്തെ ആശ്രയിച്ചാണ് നമ്മുടെ നാടിന്‍റെ നിലനിൽപ്പ്. കുട്ടനാട്ടിലെ നെൽവയലുകൾ മുതൽ ഇടുക്കിയിലെ മലനിരകൾ വരെ മണ്ണിനെ പോഷിപ്പിക്കുന്ന നദികൾ മുതൽ കായലുകൾ വരെ നമുക്ക് അനുഗ്രഹവവും വെല്ലുവിളിയുമാണ്. ജലവിഭവത്തിന്‍റെ മാനേജ്മെന്‍റ് കാര്യക്ഷമമായി സർക്കാർ നടത്തിവരുകയാണ്. ജലാശയങ്ങളുടെ ആഴം വർധിപ്പിക്കൽ, ഡാം ഡീസിൽറ്റേഷൻ തുടങ്ങിയ പ്രവർത്തനങ്ങൾക്കൊപ്പം കാർഷിക മേഖലയെ ശാക്തീകരിക്കുന്നതിന് മൈക്രോ ഇറിഗേഷൻ പദ്ധതികളും നടപ്പാക്കുന്നുണ്ട്. ശാസ്ത്രീയ കൃഷിരീതികളിലൂടെ വിളവ് വർധിപ്പിക്കുകയാണ് ലക്ഷ്യം. നമ്മുടെ നാട്ടിൽനിന്നുള്ള ഹില്ലി അക്വ കുപ്പിവെള്ളം വിദേശ രാജ്യങ്ങളിലേക്ക് കയറ്റി അയക്കുന്നു. ഹരിത രീതിയിലുള്ള കുപ്പികൾ പുറത്തിറക്കുന്ന പദ്ധതിക്ക് ഉടൻ തുടക്കം കുറിക്കുമെന്നും വിഷൻ 2031 സെമിനാറിലൂടെ 2031 ൽ കേരളം എങ്ങനെയായിരിക്കണം എന്ന ചർചയ്ക്ക് തുടക്കം കുറിക്കുകയാണ് എന്നും അദ്ദേഹം പറഞ്ഞു. കട്ടപ്പനയിൽ ജലവിഭവ വകുപ്പ് സംഘടിപ്പിച്ച വിഷന്‍ 2031 സെമിനാര്‍ ഉദ്ഘാടനം ചെയ്യുകയായിരുന്നു മന്ത്രി.1500 ലധികം പേരാണ് സെമിനാറിൽ പങ്കെടുത്തത്. രാവിലെ 10 ന് ആരംഭിച്ച ഉദ്ഘാടന സമ്മേളനത്തിൽ ജല വിഭവ വകുപ്പ് അഡീഷണൽ ചീഫ് സെക്രട്ടറി ബിശ്വനാഥ സിൻഹ, ജലനിധി എക്സിക്യൂട്ടീവ് ഡയറക്ടർ ഡോ. ബിനു ഫ്രാൻസിസ് എന്നിവർ ആമുഖ പ്രഭാഷ ണവും ജലവിഭവ വകുപ്പിന്‍റെ വിവിധ പദ്ധതികളുടെ റിപ്പോർട്ട് അവതരണവും നടത്തി. കഴിഞ്ഞ പത്ത് വർഷത്തിനിടെ 27 ലക്ഷം പുതിയ കുടിവെള്ള കണക്ഷനുകൾ നൽകിയതായി റിപ്പോർട്ടിൽ വിശദീകരിച്ചു. റീബിൽഡ് കേരളയിൽ 303 കോടിയുടെ 17 പദ്ധതികളാണ് നടപ്പാക്കുന്നതെന്നും റിപ്പോർട്ട് വ്യക്തമാക്കി.എല്ലാവർക്കും സുസ്ഥിരമായ ജലവിതരണ സംവിധാനങ്ങൾ ഉറപ്പാക്കൽ, മലിനീകരണ നിയന്ത്രണം-ശുദ്ധീകരണ സാങ്കേതികവിദ്യകൾ, ജല പുനരുപയോഗം, ഭൂഗർഭജല സംരക്ഷണം, റീചാർജ്, സുസ്ഥിരമായ ഉപയോഗംതുടങ്ങി വിവിധ വിഷയങ്ങളിലാണ് ചർച്ചകൾ നടക്കുന്നത്. എംഎൽഎമാരായ എം.എം. മണി, എ. രാജ, കേരള വാട്ടർ അതോറിറ്റി എം ഡി പി.ബി. നൂഹ് ജില്ലാ കളക്ടർ ഡോ. ദിനേശൻ ചെറുവാട്ട്, കട്ടപ്പന നഗരസഭ വൈസ് ചെയർമാൻ അഡ്വ.കെ.ജെ. ബെന്നി, വാർഡ് കൗൺസിലർ ജാൻസി ബേബി, ആസൂത്രണ സമിതി ഉപാധ്യക്ഷൻ സി.വി. വർഗീസ്, മർച്ചന്‍റ്് അസോസിയേഷൻ പ്രസിഡന്‍റ്് സാജൻ ജോർജ്, കാർഷിക കടാശ്വാസ കമ്മീഷൻ അംഗം ജോസ് പാലത്തിനാൽ, ജലവിഭവ വകുപ്പ് ചീഫ് എൻജിനിയർമാരായ ബിനോയി ടോമി ജോർജ്, വി.കെ. പ്രദീപ്, ഗ്രൗണ്ട് വാട്ടർ വകുപ്പ് ഡയറക്ടർ ഇൻ-ചാർജ് റിനി റാണി, സംഘാടക സമിതി അംഗങ്ങളായ ഇടുക്കി ഗ്രാമവികസന ബാങ്ക് പ്രസിഡൻ്റ് അഡ്വ. മനോജ് എം. തോമസ്, വി. ആർ. ശശി, ജിൻസൺ വർക്കി, ഷാജി നെല്ലിപ്പറമ്പിൽ, ഷാജി പാമ്പൂരി തുടങ്ങിയവർ പങ്കെടുത്തു.

അമ്മയുടെ ദൂരം മറികടന്ന് മകൾ

നെടുങ്കണ്ടം: കായിക താരമായ അമ്മയുടെ ശിക്ഷണത്തിലെത്തിയ നിയ അമ്മയെക്കാൾ ഒരു പടി മുന്നിലെത്തി സ്വർണം നേടി. റവന്യു ജില്ലാ സ്കൂൾ കായികമേളയുടെ സബ് ജൂണിയർ ഷോട്ട്പുട്ടിൽ ആദ്യ ശ്രമത്തിൽത്തന്നെയാണ് നിയയുടെ സുവർണ നേട്ടം. 2000ൽ സബ് ജൂണിയർ മത്സരത്തിൽ അമ്മ ഹണി എറിഞ്ഞു നേടിയ 7.33 മീറ്റർ 7.79 മീറ്ററായി ഉയർത്തിയാണ് നിയയുടെ മുന്നേറ്റം. റവന്യൂ ജില്ലാ കായികമേളയിൽ തുടർച്ചയായി അഞ്ചു തവണയാണ് നിയയുടെ മാതാവ് ഹണി ഷോട്ട്പുട്ടിൽ സ്വർണം നേടിയത്. ഒരു തവണ സംസ്ഥാന ചാന്പ്യനുമായി. പിന്നീട് ഹണി കളം വിട്ടെങ്കിലും ഷോട്ട്പുട്ടും കായിക മത്സരങ്ങളും എന്നും മനസിൽ സൂക്ഷിച്ചിരുന്നു. മക്കളിലൂടെ തന്‍റെ സ്വപ്നം യാഥാർഥ്യമാക്കുക എന്നതായിരുന്നു ഈ അമ്മയുടെ ലക്ഷ്യം. അങ്ങനെയാണ് മൂത്ത മകളായ നിയയുടെ പരിശീലക റോളിൽ അമ്മയെത്തിയത്. രാവിലെ അമ്മയുടെയും വൈകുന്നേരം കായികാധ്യാപികയായ സൂസൻ ജോസഫിന്‍റെയും ശിക്ഷണത്തിലുമാണ് നിയ ആദ്യ മത്സരത്തിന് ഇറങ്ങിയത്. പട്ടം കോളനി സഹകരണ ബാങ്ക് സെക്രട്ടറി റോബിനാണ് പിതാവ്. കട്ടപ്പന ഒസാനാം ഇംഗ്ലീഷ് മീഡിയം സ്കൂൾ വിദ്യാർഥിനിയാണ് നിയ.

റവന്യു ജില്ലാ കായിക മേളയുടെ രണ്ടാം ദിനത്തിൽ കട്ടപ്പന സബ്ജില്ലയുടെ കുതിപ്പ്

നെടുങ്കണ്ടം: ഹൈ ആൾറ്റിറ്റ്യൂഡ് സിന്തറ്റിക് സ്റ്റേഡിയത്തിൽ നടന്ന റവന്യു ജില്ലാ കായിക മേളയുടെ രണ്ടാം ദിനത്തിൽ കട്ടപ്പന സബ്ജില്ലയുടെ കുതിപ്പ്. 283 പോയിന്‍റുമായാണ് കട്ടപ്പനയുടെ മുന്നേറ്റം. 173 പോയിന്‍റുമായി അടിമാലി സബ്ജില്ലയാണ് തൊട്ടരികിൽ. പീരുമേട് സബ്ജില്ല - 80, തൊടുപുഴ - 71, നെടുങ്കണ്ടം - 65, അറക്കുളം - 11 , മൂന്നാർ -1 എന്നിങ്ങനെയാണ് പോയിന്‍റു നില. സ്കൂൾ തലത്തിൽ കാൽവരി ഹൈസ്കൂൾ രണ്ടാം ദിനത്തിലും 104 പോയിന്‍റുമായി ആധിപത്യം തുടർന്നു. എൻആർ സിറ്റി എസ്എൻവി 91 പോയിന്‍റോടെ രണ്ടാമതും ഇരട്ടയാർ സെന്‍റ് തോമസ് 52 പോയിന്‍റുമായി മൂന്നാം സ്ഥാനത്തുമാണ്. ഇന്നലെ മഴ മാറിനിന്നത് താരങ്ങൾക്കും സംഘാടകർക്കും ആശ്വാസമാ യി. ഇതു മൂലം മത്സരങ്ങൾ കൃത്യസമയത്തു പൂർത്തീകരിക്കാനും സാധിച്ചു. ഇന്ന് 1500 മീറ്റർ ഫൈനൽ, 400 മീറ്റർ ഫൈനൽ, റിലേ മത്സരങ്ങളുടെ ഫൈനൽ, ഹാമർ ത്രോ, ട്രിപ്പിൾ ജംപ്, പോൾ വാൾട്ട് എന്നിവ നടക്കും. സമാപന സമ്മേളനത്തിൽ ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാക്കുന്നേൽ വിജയികൾക്കു ട്രോഫികൾ വിതരണം ചെയ്യും. നെടുങ്കണ്ടം പഞ്ചായത്ത് പ്രസിഡന്‍റ് പ്രീമി ലാലിച്ചൻ അധ്യക്ഷത വഹിക്കും. വന്യൂ ജില്ലാ കായികമേള: തൊട്ടതെല്ലാം പൊന്നാക്കി സഹോദരങ്ങൾ നെടുങ്കണ്ടം: കായികമേളയിൽ രണ്ട് സ്കൂളുകളെ പ്രതിനിധീകരിച്ചാണ് വന്നതെങ്കിലും തൊട്ടതെല്ലാം പൊന്നാക്കി മൂവർ സംഘം ഒരു വീട്ടിലേക്കു മടങ്ങി. കാൽവരിമൗണ്ട് കോനാട്ട് സെബാസ്റ്റ്യൻ - മഞ്ജു ദന്പതികളുടെ മക്കളായ സെബിനും സെറിനും സോബിനും മിന്നും വിജയമാണ് കരസ്ഥമാക്കിയത്. സെബിൻ വെള്ളയാംകുടി സെന്‍റ് ജെറോംസ് എച്ച്എസ്എസിലെ പ്ലസ് ടു വിദ്യാർഥിയാണ്. മേളയിൽ 800 മീറ്ററിൽ ഒന്നാം സ്ഥാനവും 400 മീറ്റർ ഹർഡിൽസിൽ രണ്ടാം സ്ഥാനവും സെബിൻ നേടി. കാൽവരിമൗണ്ട് സിഎച്ച്എസിലെ വിദ്യാർഥികളാണ് സെറിനും സോബിനും. സെറിൻ 100, 200 മീറ്റർ എന്നിവയിൽ ഒന്നാം സ്ഥാനവും 400 മീറ്റർ റിലേയിൽ ഒന്നാം സ്ഥാനവും നേടിയപ്പോൾ സോബിൻ 600 മീറ്റർ ഓട്ടത്തിൽ രണ്ടാം സ്ഥാനവും 400 മീറ്റർ റിലേയിൽ ഒന്നാം സ്ഥാനവും കരസ്ഥമാക്കി. കഴിഞ്ഞ വർഷവും സെബിനും സെറിനും ജില്ലാ കായികമേളയിൽ എത്തിയിരുന്നു. പിതാവായ സെബാസ്റ്റ്യനും മുന്പ് ജില്ലാതല കായികമേളകളിൽ പങ്കെടുത്തിട്ടുണ്ട്. പരിശീലനം റോഡിൽ, നടന്നു സ്വർണം നേടി നെടുങ്കണ്ടം: പരിശീലനം റോഡിലായിരുന്നെങ്കിലും 800, 200 മീറ്റർ മത്സരങ്ങളിൽ അനയിന പി.അജ്മുദീനെ തോൽപ്പിക്കാൻ ആരുമുണ്ടായില്ല. മുണ്ടക്കയം സെന്‍റ് ആന്‍റണീസ് എച്ച്എസ്എസ് വിദ്യാർഥിനായാണ് അനയിന. നിലവിൽ ഹൈറേഞ്ച് സ്പോർട്സ് അക്കാദമിയുടെ പരിശീലന ഗ്രൗണ്ടിൽ അറ്റകുറ്റപ്പണികൾ നടക്കുന്നതിനാൽ ചുട്ടുപൊള്ളുന്ന റോഡിലൂടെ പരിശീലനം നടത്തേണ്ടി വന്നു ഈ മിടുക്കിക്ക്. കഴിഞ്ഞ വർഷം 600 മീറ്ററിൽ രണ്ടാം സ്ഥാനം നേടിയിരുന്നു. കായികാധ്യാപകൻ സന്തോഷ് ജോർജാണ് പരിശീലകൻ. സ്പോർട്സ് അക്കാദമിയുടെ നാഷണൽ സ്പോർട്സ് മീറ്റിലും സ്റ്റേറ്റ് മീറ്റിലും മികച്ച വിജയം കൈവരിക്കാൻ അനയിനക്ക് സാധിച്ചു. അജ്മുദീൻ - ശെമീന ദന്പതികളുടെ മകളാണ്.

ആവേശപ്പെരുമയിൽ..

നെടുങ്കണ്ടം: പുതിയ ദൂരവും ഉയരവും തേടി നെടുങ്കണ്ടം ഹൈആൾട്ടിറ്റ്യൂഡ് സിന്തറ്റിക് സ്റ്റേഡിയത്തിൽ 18-ാമതും റവന്യൂ ജില്ലാ സ്കൂൾ കായികമേളയ്ക്ക് ഉജ്വല തുടക്കം. തോരാമഴയ്ക്കും ന്യൂജൻ പോരാട്ടത്തിന്‍റെ ആവേശം ഒട്ടും കുറയ്ക്കാനായില്ല. ആദ്യദിന മത്സരങ്ങൾ പൂർത്തിയായപ്പോൾ കട്ടപ്പന ഉപജില്ല ട്രാക്കിലും ഫീൽഡിലും മുന്നിലാണ്. കട്ടപ്പന വിദ്യാഭ്യാസ ഉപജില്ല 142 പോയിന്‍റോടെ മുന്നിലാണ്. 80 പോയിന്‍റോടെ അടിമാലി തൊട്ടുപിന്നിൽ. കാൽവരി മൗണ്ട് സ്കൂളുകളിൽ കാൽവരിമൗണ്ട് ഹൈസ്കൂൾ 47 പോയന്‍റോടെ മുന്നിൽ നിൽക്കുന്നു. എസ്എൻവിഎൻ ആർസിറ്റി 29 പോയിന്‍റോടെ രണ്ടാമത്. ജില്ലയിലെ ഏഴു സബ് ജില്ലകളിൽനിന്നായി 2500 കായികതാരങ്ങളാ ണ് മേളയിൽ പങ്കെടുക്കുന്നത്. സബ് ജൂണിയർ, ജൂണിയർ, സീനിയർ എന്നീ വിഭാഗങ്ങളിലാണ് മത്സരങ്ങൾ. ജില്ലാ വിദ്യാഭ്യാസ ഓഫിസർ പി.സി. ഗീത പതാകയുയർത്തി. തുടർന്നു നടന്ന സമ്മേളനത്തിൽ എം.എം. മണി എംഎൽഎ മേള ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് പ്രിമി ലാലിച്ചൻ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് കെ.ടി. കുഞ്ഞ് മുഖ്യപ്രഭാഷണം നടത്തി. നെടുങ്കണ്ടം എഇഒ സി. ജെൻസിമോൾ, ബിജു ജോർജ്, വിവിധ സംഘടനാ ഭാരവാഹികൾ തുടങ്ങിയവർ പ്രസംഗിച്ചു. മീറ്റിലെ വേഗമേറിയ താരത്തെ കണ്ടെത്താനുള്ള നൂറു മീറ്റർ മത്സരത്തോടെയായിരുന്നു കായികമേളയ്ക്ക് തുടക്കം. കനത്ത മഴ മൂലം ഒരു മണിക്കൂറോളം വൈകിയാണ് മത്സരങ്ങൾ ആരംഭിച്ചത്. ആഫിയയെ വെല്ലാൻ ആരുമില്ല നെടുങ്കണ്ടം: ജൂണിയർ വിഭാഗം ലോംഗ് ജംപിൽ ആഫിയ ആൻ ജിജി ഒന്നാം സ്ഥാനം നേടുന്നത് തുടർച്ചയായി നാലാം തവണ. മുണ്ടക്കയം സെന്‍റ് ആന്‍റണീസ് സ്കൂളിലെ പത്താം ക്ലാസ് വിദ്യാഥിനിയാണ്.

കഴിഞ്ഞ തവണ ഹൈജംപ്, ട്രിപ്പിൾ ജംപ്, ഹർഡിൽസ് എന്നിവയിൽ എതിരാളികളെ നിഷ്പ്രഭരാക്കി ഒന്നാം സ്ഥാനം നേടിയിരുന്നു. ഇത്തവണയും ഈ ഇനങ്ങളിൽ മൽസരിക്കുന്നുണ്ട്. മുണ്ടക്കയം പുലികുഴി വെട്ടികിഴക്കേതിൽ ജിജിമോൻ-സുലു ദന്പതികളുടെ മകളാണ്. മുണ്ടക്കയം ഹൈറേഞ്ച് സ്പോർട്സ് അക്കാദമിയിലെ സന്തോഷ് ജോർജാണ് അഫിയയുടെ പരിശീലകൻ. വേഗത്തേരിൽ ഷാഹിനും സെറിനും നെടുങ്കണ്ടം: ഹൈആൾട്ടിറ്റ്യൂഡ് സിന്തറ്റിക് സ്റ്റേഡിയത്തിൽ നടന്ന 100 മീറ്റർ മത്സരം "ഹൈ'റേഞ്ചിൽ. മീറ്റിൽ ഷാഹിനും സെറിനും വേഗ താരങ്ങളായി. സീനിയർ 100 മീറ്ററിൽ 11.30 സെക്കന്‍റിലാണ് ഷാഹിൻ ഷൗക്കത്ത് കുതിച്ചെത്തിയത്. കഴിഞ്ഞ വർഷം 400, 100 മീറ്ററിലും രണ്ടാം സ്ഥാനവും 200 മീറ്ററിൽ ഒന്നാം സ്ഥാനവും നേടിയിരുന്നു. അടിമാലി എസ്എൻ ഡിപിവിഎച്ച്സിയിലെ വിദ്യാർഥിയും ഷൗക്കത്ത്-സിൽനിന ദന്പതികളുടെ മകനുമാണ്.

പെണ്‍കുട്ടികളുടെ 100 മീറ്ററിൽ വേഗമേയ താരമായ സെറിൻ കെ.സെബാസ്റ്റ്യൻ. 13.71 മിനിറ്റിലാണ് സുവർണ നേട്ടം സ്വന്തമാക്കിയത്. 2023ലും ഈ മിടുക്കി വേഗമേറിയ താരമായിരുന്നു. കാൽവരിമൗണ്ട് സ്കൂളിലെ ഒന്പതാം ക്ലാസ് വിദ്യാർഥിനിയാണ്. സെറിന്‍റെ രണ്ടു സഹോദരങ്ങളും കായിക താരങ്ങളാണ്. പ്ലസ്ടു വിദ്യാർഥിയായ മൂത്ത സഹോദരൻ സോബിൻ 600 മീറ്റർ റിലേയിൽ രണ്ടാം സ്ഥാനവും ഇളയ സഹോദരൻ ഏഴാം ക്ലാസ് വിദ്യാർഥിയായ സെബിൻ സെബിൻ ജൂണിയർ വിഭാഗം 100 മീറ്ററിൽ ഒന്നാമതുമെത്തിയിരുന്നു. കാൽവരിമൗണ്ട് കോനാട്ട് സെബാസ്റ്റ്യൻ-മഞ്ജു ദന്പതികളുടെ മക്കളാണ് ഇവർ. ട്രാക്കിൽ കായികാധ്യാപകരുടെ പ്രതിഷേധപ്രകടനം നെടുങ്കണ്ടം: ട്രാക്കിൽ കായികാധ്യാപകരുടെ പ്രതിഷേധ പ്രകടനം. കാലങ്ങളായി കായികാധ്യാപകർ ഉന്നയിക്കുന്ന പ്രശ്നങ്ങൾക്ക് പരിഹാരം ഉണ്ടാകാത്ത സാഹചര്യത്തിലാണ് റവന്യൂ ജില്ലാ സ്കൂൾ കായിക മേള നടക്കുന്ന നെടുങ്കണ്ടം സിന്തറ്റിക് സ്റ്റേഡിയത്തിൽ ഇവർ പ്രതിഷേധ പ്രകടനം നടത്തിയത്. ഉദ്ഘാടന സമ്മേളനം അവസാനിച്ച ഉടനെ ബാനറുമായി കായികാധ്യാപകർ ട്രാക്കിൽ ഇറങ്ങി.

സർക്കാർ, എയ്ഡഡ് വിദ്യാലയങ്ങൾക്ക് ഒരുപോലെ ബാധകമാകുന്ന വിധം കായികാധ്യാപകർക്ക് സംരക്ഷണ ഉത്തരവ് പുനഃസ്ഥാപിക്കുക, യുപി, ഹൈസ്കൂൾ തസ്തിക നിർണയ മാനദണ്ഡങ്ങൾ കാലോചിതമായി പരിഷ്കരിക്കുക, ഹയർ സെക്കൻഡറിയിൽ തസ്തികകൾ അനുവദിച്ച് പ്രമോഷനും നിയമനവും നൽകുക തുടങ്ങിയ ആവശ്യങ്ങൾ ഉന്നയിച്ചാണ് സംയുക്ത കായികാധ്യാപക സംഘടന സമരം നടത്തിയത്. ഇവരുടെ പ്രതിഷേധ പ്രകടനം അവസാനിച്ച ശേഷമാണ് മത്സരങ്ങൾ ആരംഭിച്ചത്. ഉന്നതിയുടെ അഭിമാനമായി ലയ നെടുങ്കണ്ടം: ആദിവാസി ഉന്നതിയിൽനിന്നുമെത്തിയ ലയ സുനിൽ ജൂണിയർ പെണ്‍കുട്ടികളുടെ 600 മീറ്റർ ഓട്ടത്തിൽ വെന്നിക്കൊടി പാറിച്ചു. പരാധീനതയുടെ നടുവിൽനിന്നെത്തിയ ലയ ലോംഗ് ജംപിലും 4.17 മീറ്റർ ദൂരം ചാടി ഒന്നാംസ്ഥാനം കരസ്ഥമാക്കിയിരുന്നു. സേനാപതി മാർ ബേസിൽ വൊക്കേഷണൽ ഹയർ സെക്കൻഡറി സ്കൂളിലെ ഒന്പതാം ക്ലാസ് വിദ്യാർഥിനിയാണ്.

ഒട്ടാത്തി സെറ്റിൽമെന്‍റ് കോളനിയിൽ എട്ട് കുടുംബങ്ങളാണുള്ളത്. നന്നേ ചെറുപ്പത്തിൽ ഫുട്ബോളിൽ ഏറെ തത്പരയായിരുന്ന ലയ കൂട്ടുകാർക്കൊപ്പം പ്ലാസ്റ്റിക് പന്തിൽ കളിച്ചാണ് വളർന്നത്. മകളെ വലിയ കായികതാരമാക്കണമെന്നായിരുന്നു മാതാപിതാക്കളുടെ മോഹം. എന്നാൽ, ഫുട്ബോളറാകാനായിരുന്നു ലയയുടെ ആഗ്രഹം. സ്കൂളിലെ കായികാധ്യാപകനായ എബിൻ ഈ താരത്തിന്‍റെ പ്രതിഭ തിരിച്ചറിഞ്ഞ് വഴിതിരിച്ചുവിടുകയായിരുന്നു. മുൻ വർഷങ്ങളിലും സബ്ജില്ലാ മത്സരങ്ങളിൽ പങ്കെടുത്തു സമ്മാനങ്ങൾ നേടിയിട്ടുണ്ടെങ്കിലും റവന്യു ജില്ലാ കായികമേളയിൽ പങ്കെടുക്കുന്നതും ഒന്നാം സ്ഥാനം നേടുന്നതും ആദ്യമാണ്. ഫുട്ബോൾ സംസ്ഥാന മത്സരത്തിൽ കഴിഞ്ഞ മൂന്നു വർഷങ്ങളായി പങ്കെടുക്കുന്ന ലയ ഇത്തവണ തിരുവനന്തപുരത്തു നടക്കുന്ന സംസ്ഥാന ഹാൻഡ് ബോൾ മത്സരത്തിൽ മാറ്റുരയ്ക്കാനുള്ള തയാറെടുപ്പിലാണ്. രാജാക്കാട് മാങ്ങാതൊട്ടി ഒട്ടാത്തി ഉന്നതിയിലെ സുനിലിന്‍റെയും ബീനയുടെയും മകളാണ്. മോശം കാലാവസ്ഥ: വിമർശിച്ച് എം.എം. മണി നെടുങ്കണ്ടം: കാലാവസ്ഥ മനസിലാക്കാതെ കായികമേള സംഘടിപിച്ച ഉദ്യോഗസ്ഥർക്കെതിരേ രൂക്ഷവിമർശനവുമായി എം.എം മണി എംഎൽഎ.മുൻകാലങ്ങളിൽ കാലാവസ്ഥ നോക്കിയാണ് ഇത്തരം മേളകൾ സംഘടിപ്പിച്ചിരുന്നത്. ഇത് തട്ടിപ്പുപരിപാടിയാണ്. ഉദ്യോഗസ്ഥരുടെ ഒരു പണിയായിപ്പോയി. മഴ നനഞ്ഞ് കുട്ടികൾ ഓടിയും ചാടിയും പനി പിടിക്കാനും ടൈഫോയിഡ് പോലുള്ള രോഗങ്ങൾ പിടിപെടാൻ സാധ്യതയുണ്ടെന്നും എം.എം.മണി പറഞ്ഞു.

വർണം വിതറി ന്യൂജെൻ പൂരം

തൊടുപുഴ: കലയുടെ മുന്തിരിത്തോപ്പിൽ വർണ ശലഭങ്ങൾ പറന്നിറങ്ങി. ന്യൂജെൻ പൂരത്തിൽ ശ്രുതി, താള, ലയ മാധുരിയിൽ ആസ്വാദകരുടെ ഹൃദയം നിറഞ്ഞു തുളുന്പി. നൃത്ത-നൃത്തേതര ഇനങ്ങളിൽ വീറും വാശിയും മുറ്റിയ പോരാട്ടമാണ് അരങ്ങേറിയത്. തൊടുപുഴ വിമല പബ്ലിക് സ്കൂളിൽ ആരംഭിച്ച സെൻട്രൽ കേരള സഹോദയ കലോത്സവം സർഗധ്വനി -2025 ന്‍റെ ആദ്യ ദിനം മത്സരങ്ങൾ പൂർത്തിയായപ്പോൾ 500 പോയിന്‍റ് നേടി മൂവാറ്റുപുഴ നിർമല പബ്ലിക് സ്കൂൾ ഒന്നാമതും 421 പോയിന്‍റോടെ വാഴക്കുളം കാർമൽ പബ്ലിക് സ്കൂൾ രണ്ടാമതും 380 പോയിന്‍റോടെ തൊടുപുഴ വിമല പബ്ലിക് സ്കൂൾ മൂന്നാം സ്ഥാനത്തുമാണ്. കൂത്താട്ടുകുളം മേരിഗിരി പബ്ലിക് സ്കൂളും വാളകം ബ്രൈറ്റ് പബ്ലിക് സ്കൂളും 314 എന്നി പോയിന്‍റുകളുമായി തൊട്ടുപിന്നിലുണ്ട്. ഇന്നലെ 41 മത്സരങ്ങളാണ് നടന്നത്. മത്സരഫലങ്ങൾ ഇനിയും പുറത്തുവരാ നുള്ളതിനാൽ പോയിന്‍റുനിലയിൽ മാറ്റും വരും. മാർഗംകളിയിൽ വാഴക്കുളം വൈബ് തൊടുപുഴ: മാർഗംകളിയിൽ വെന്നിക്കൊടി പാറിച്ച് വാഴക്കുളം കാർമൽ സിഎംഐ പബ്ലിക് സ്കൂൾ. കഴിഞ്ഞ വർഷം സഹോദയ കലോത്സവത്തിൽ മൂന്നാം സ്ഥാനത്തായ സ്കൂൾ ഇത്തവണ ചിട്ടയായ പരിശീലനത്തിലൂടെയാണ് ഒന്നാം സ്ഥാനം കൈപ്പിടിയിലൊതുക്കിയത്.

വർഷങ്ങളായി മാർഗംകളി പരിശീലിപ്പിക്കുന്ന ബിജു മൂലമറ്റമാണ് നാലു മാസത്തെ പരിശീലനം നൽകിയത്. ഗൗരി കൃഷ്ണ, റിച്ച എലിസ് ജിജോ, മീനാക്ഷി ഷിബി, ഇസബൽ സൻജോയ്, ആർദ്ര പി. അനിൽ, മഹിത സി. ബിനു, ഗായത്രി എസ്. നായർ എന്നിവരാണ് സംഘത്തിലുണ്ടായിരുന്നത്. 32 വർഷമായി മാർഗംകളി പരിശീലിപ്പിക്കുന്ന ബിജു മൂലമറ്റം ഇഎംഎച്ച്എസ്എസിലെ നൃത്താധ്യാപകൻ കൂടിയാണ്. അരങ്ങുണർത്തി അമൃത വിദ്യാലയം തൊടുപുഴ: സംഘനൃത്തം കാറ്റഗറി -2 വിഭാഗത്തിൽ ആദ്യ മത്സരത്തിൽതന്നെ ഒന്നാം സ്ഥാനം നേടിയെടുത്തതിന്‍റെ ആഹ്ലാദത്തിലാണ് പെരുന്പാവൂർ അമൃത വിദ്യാലയം. പരിശീലകനായ വിനോദ് പാലക്കാട് ഏഴു ദിവസത്തെ പരിശീലനം മാത്രമാണ് ഇവർക്കു നൽകിയത്.

ശാസ്ത്രീയ നൃത്തം അഭ്യസിക്കുന്ന കുട്ടികൾ ബാക്കി സമയങ്ങളിൽ അധ്യാപകരുടെ സഹായത്തോടെ പരിശീലനം പൂർത്തിയാക്കിയാണ് വേദിയിൽ എത്തിയത്. സഹോദയയിലെ ആദ്യ മത്സരത്തിൽതന്നെ മറ്റ് സ്കൂളുകളെ പിന്തള്ളി ഒന്നാം സ്ഥാനം നേടി. സി.എസ്. ദേവനന്ദ, അനന്തലക്ഷ്മി എസ്.പ്രദീപ്, ഋഷിക എം.നായർ, സാന്ദ്ര സന്ദീപ്, ദേവന കാർത്തിക, നിവേദ സജീഷ്, നിഹാരിക സായൂജ് എന്നിവരാണ് ടീമിലുണ്ടായിരുന്നത്. താരശോഭയിൽ അന്ന മരിയ തൊടുപുഴ: സിനിമയിലെ തിളക്കം കലോത്സവ വേദിയിലും ആവർത്തിച്ച അന്ന മരിയ ജോബി. കാറ്റഗറി -4 പെണ്‍കുട്ടികളുടെ മോണോആക്ടിൽ മൂന്നാം തവണയും അന്ന ജൈത്ര യാത്ര തുടർന്നു. തൊടുപുഴ ഡി പോൾ പബ്ലിക് സ്കൂളിലെ പ്ലസ് വണ്‍ വിദ്യാർഥിനി കൂടിയായ അന്ന ഏഴ് ചിത്രങ്ങളിൽ അഭിനയിച്ചിട്ടുണ്ട്.

സ്വർഗം, മധുരരാജ, മാർക്കോണി മത്തായി, ഇര, ബ്രദേഴ്സ് ഡേ, ഞാൻ മേരിക്കുട്ടി, തമിഴ് ചിത്രമായ പേട്ടറാപ്പ് എന്നി സിനിമകളിൽ അഭിനയിച്ചിട്ടുണ്ട്. അവതാരകയായും മിന്നും പ്രകടനമാണ് മഞ്ചാടി ജോബി എന്നറിയപ്പെടുന്ന ഈ മിടുക്കി കാഴ്ച വച്ചിട്ടുള്ളത്. ട്രാൻസ്ജെൻഡേഴ്സിന്‍റെ നൊന്പരങ്ങൾ ഭാവതീവ്രതയോടെ അവതരിപ്പിച്ചാണ് ഒന്നാം സ്ഥാനം നേടിയത്. നൗഷാദ് കലാഭവൻ ആണ് ഗുരു. കൊച്ചുപറന്പിൽ അഡ്വ. ജോബി ജോർജ് - ജോസ്ന ദന്പതികളുടെ മകളാണ്. തബലയിൽ മാധവനാദം തൊടുപുഴ: 25 വർഷമായി ആയിരക്കണക്കിനു പ്രതിഭകളെ രൂപപ്പെടുത്തിയ സുനിൽ കുമാർ തൊടുപുഴയുടെ ശിക്ഷണത്തിലെത്തിയ എം. മാധവിന് കാറ്റഗറി -3 തബലയിൽ ഒന്നാം സ്ഥാനത്തോടെ മിന്നും നേട്ടം. തൊടുപുഴ വിമല പബ്ലിക സ്കൂളിലെ ഒന്പതാം ക്ലാസ് വിദ്യാർഥിയാണ് മാധവ്. മണക്കാട് പുത്തൻപുരയിൽ റിട്ട. വില്ലേജ് ഓഫീസർ പി.എസ്. മുരളി - വിനീത ദന്പതികളുടെ മകനാണ്.

മണക്കാട് വേട്ടർകുന്നേൽ സുനിൽ കുമാർ വീടിനോടു ചേർന്നു കുട്ടികളെ വാദ്യഉപകരണങ്ങൾ പരിശീലിപ്പിച്ചു വരികയാണ്. ഇദ്ദേഹത്തിന്‍റെ ശിക്ഷണത്തിൽ റവന്യു ജില്ല, സിബിഎസ്ഇ കലോത്സവങ്ങളിൽ മാറ്റുരച്ചവർ നിരവധി. ചക്കപ്പഴ മധുരവുമായി കുഞ്ഞുണ്ണിയെത്തി തൊടുപുഴ: മലയാളികളെ ഏറെ ചിരിപ്പിച്ച ഹാസ്യ പരന്പരയായ ചക്കപ്പഴം എന്ന സീരിയലിൽ കുഞ്ഞുണ്ണി എന്ന പേരിൽ മികച്ച പ്രകടനം കാഴ്ച വച്ച സിനിമ സീരിയിൽ താരം അമൽരാജ് ദേവും കലോത്സവത്തിനെത്തി. തൃപ്പൂണിത്തുറ എംജിഎം പബ്ലിക് സ്കൂൾ വിദ്യാർഥിയായ അഗ്രേഷ് ദേവിനൊപ്പമാണ് ഇദ്ദേഹമെത്തിയത്. നാടോടി നൃത്തത്തിൽ രണ്ടാം സ്ഥാനം നേടിയത് ഈ ബാലതാരമാണ്.

ഹാഫ് എന്ന സിനിമയിലും മോഹൽലാലിനൊപ്പം പരസ്യ ചിത്രത്തിലും അഗ്രേഷ് അഭിനയിച്ചിട്ടുണ്ട്. നിലവിൽ സംപ്രേഷണം ചെയ്തുവരുന്ന സീരിയലുകളിലും സിനിമകളിലും അമൽരാജ് അഭിനയിച്ചു വരുന്നു. ഒടുവിൽ പുറത്തിറങ്ങിയത് ഹൃദയപൂർവം എന്ന സിനിമയാണ്. അപ്പീലിൽ കസറി വിമല തൊടുപുഴ: കഴിഞ്ഞ ദിവസം നടന്ന ബാന്‍റ് ഡിസ്പ്ലേ മത്സരത്തിൽ അപ്പീലിലൂടെ വിമല പബ്ലിക് സ്കൂളിന് ഒന്നാം സ്ഥാനം. മത്സര ഫലം പുറത്തു വന്നപ്പോൾ വിമല പബ്ലിക് സ്കൂളിന് രണ്ടാം സ്ഥാനമായിരുന്നു. എന്നാൽ അപ്പീലിലൂടെ മൂവാറ്റുപുഴ നിർമല പബ്ലിക് സ്കൂളിനൊപ്പം വിമല സ്കൂളും ഒന്നാം സ്ഥാനം പങ്കിടുകയായിരുന്നു.

അടിസ്ഥാന സൗകര്യങ്ങളില്ല: ഇടുക്കി മെഡി. കോളജിൽ നഴ്സിംഗ് വിദ്യാർഥികളുടെ സമരം

ചെറുതോണി: ഇടുക്കി മെഡിക്കൽ കോളജിനോടനുബന്ധിച്ച് ആരംഭിച്ച ഗവ. നഴ്സിംഗ് വിദ്യാർഥികൾക്ക് അടിസ്ഥാന സൗകര്യങ്ങളൊരുക്കണമെന്നാവശ്യപ്പെട്ട് വിദ്യാഥികളും രക്ഷിതാക്കളും മെഡിക്കൽ കോളജ് പ്രിൻസിപ്പൽ ഓഫീസിന് മുന്നിൽ അനിശ്ചിതകാല സമരം ആരംഭിച്ചു. രണ്ട് ബാച്ചിലായി 120 വിദ്യാർഥികൾ പഠിക്കുന്ന നഴ്സിംഗ് സ്കൂളിൽ താമസസൗകര്യമൊരുക്കാൻ സർക്കാർ തയാറാകാത്തതിൽ പ്രതിഷേധിച്ചാണ് സമരമാരംഭിച്ചത്. മെഡിക്കൽ കോളജിന് സമീപമുണ്ടായിരുന്ന പഴയ സ്കൂൾ കെട്ടിടത്തിലാണ് നിലവിൽ പെൺകുട്ടികൾ താമസിക്കുന്നത്. ഒരു ചെറിയ മുറിയിൽ 15ലധികം വിദ്യാർഥികളാണ് താമസിക്കുന്നത്. യാതൊരു സൗകര്യവുമില്ലാതെ വിദ്യാർഥികൾ നരകയാതന അനുഭവിക്കുകയാണെന്നാണ് ഇവർ ആരോപിക്കുന്നത്. ആൺകുട്ടികൾ സമീപ പ്രദേശത്തുള്ള വീടുകളിൽ പേയിംഗ് ഗസ്റ്റായും താമസിക്കുന്നു. നവംബറിൽ മൂന്നാമത്തെ ബാച്ചിലെ 60 വിദ്യാർഥികൾകൂടി ഇവിടെ പഠനത്തിനായി എത്തും. അടിസ്ഥാനസൗകര്യങ്ങൾ ഒരുക്കണമെന്നാവശ്യപ്പെട്ട് 2024 ഡിസംബർ 20ന് സൂചനാ സമരം നടത്തിയിരുന്നു. അന്നു മുതൽ പലതവണ മെഡിക്കൽ കോളജിലെത്തിയ ആരോഗ്യമന്ത്രി വീണാ ജോർജും ജില്ലയുടെ ചുമതല വഹിക്കുന്ന മന്ത്രി റോഷി അഗസ്റ്റിനും ഹോസ്റ്റലുൾപ്പെടെയുള്ള എല്ലാ സൗകര്യങ്ങളും എത്രയും വേഗം ഒരുക്കുമെന്ന് വാഗ്ദാനം ചെയ്തതല്ലാതെ മറ്റൊന്നും സംഭവിച്ചില്ലെന്നാണ് വിദ്യാർഥികളും രക്ഷിതാക്കളും ആരോപിക്കുന്നത്. ആവശ്യത്തിന് അധ്യാപകരോ ലാബ് സൗകര്യങ്ങളോ വാഹന സൗകര്യമോ ഒന്നും ഇവിയെയില്ല. 21ന് പ്രാക്ടിക്കൽ പരീക്ഷ നടക്കാനിരിക്കെയാണ് വിദ്യാർഥികൾ അനിശ്ചിതകാല സമരം ആരംഭിച്ചിരിക്കുന്നത്. രാവിലെ നഴ്സിംഗ് സ്കൂളിന് മുന്നിൽനിന്നു വിദ്യാർഥികളും രക്ഷിതാക്കളും പ്രകടനമായി മെഡിക്കൽ കോളജ് ആശുപത്രിയിലെത്തി. മണിക്കൂറുകൾ അത്യാഹിത വിഭാഗത്തിന് മുന്നിൽ കുത്തിയിരുന്ന് സമരം നടത്തിയശേഷം പ്രകടനമായി പ്രിൻസിപ്പൽ ഓഫീസിന് മുന്നിൽ തയാറാക്കിയ പന്തലിലെത്തി സമരം തുടരുകയായിരുന്നു. ആവശ്യങ്ങൾ പരിഹരിക്കാതെ സമരത്തിൽനിന്ന് പിൻമറില്ലെന്നാണ് വിദ്യാർഥികളും രക്ഷിതാക്കളും മുന്നറിയിപ്പ് നൽകിയിരിക്കുന്നത്. എൻഎസ്എ ചെയർമാൻ ഷെറിൻ രാജു, കെബിൻഎസ്എ പ്രസിഡന്‍റ്് അലീന ജോൺ, യൂണിയൻ ചെയർപേഴ്സൺ ദേവിക ബിനോയി, പിടിഎ പ്രതിനിധികൾ തുടങ്ങിയവർ സമരത്തിന് നേതൃത്വം നൽകി.

ഫാ. ജോസ് പ്ലാച്ചിക്കൽ പൗരോഹിത്യ സുവർണ ജൂബിലി നിറവിൽ

ചെറുതോണി: പ്രതിബദ്ധതകൊണ്ടു കർമമേഖലകളിൽ ശ്രദ്ധേയനായ ഇടുക്കി മുൻ മുഖ്യ വികാരി ജനറാൾ ഫാ. ജോസ് പ്ലാച്ചിക്കലിന്‍റെ പൗരോഹിത്യ സുവർണ ജൂബിലി ആഘോഷം നാളെ നടക്കും. ഉച്ചകഴിഞ്ഞ് രണ്ടിന് തങ്കമണി സെന്‍റ് തോമസ് ഫൊറോന പള്ളിയിൽ ഫാ. പ്ലച്ചിക്കലിന്‍റെ മുഖ്യ കാർമികത്വത്തിൽ കൃതജ്ഞതാ ബലി അർപ്പിക്കും. തുടർന്ന് ഇടുക്കി മെത്രാൻ മാർ ജോണ്‍ നെല്ലിക്കുന്നേൽ അധ്യക്ഷത വഹിക്കുന്ന പൊതുസമ്മേളനം കർദിനാൾ മാർ ജോർജ് ആലഞ്ചേരി ഉദ്ഘാടനം ചെയ്യും. മാർ ജോർജ് പുന്നക്കോട്ടിൽ അനുഗ്രഹ സന്ദേശം നൽകും. മന്ത്രി റോഷി അഗസ്റ്റിൻ, അഡ്വ. ഡീൻ കുര്യാക്കോസ് എംപി, മുൻ എംപി അഡ്വ. ജോയ്സ് ജോർജ്, സി.വി. വർഗീസ്, സിസ്റ്റർ പ്രദീപ സിഎംസി എന്നിവർ പ്രസംഗിക്കും. 1948ൽ ജനിച്ച അദ്ദേഹം 1965ൽ വൈദിക പരിശീലനം ആരംഭിച്ചു. പൂന പേപ്പൽ സെമിനാരിയിൽ വൈദിക പരിശീലനം പൂർത്തിയാക്കി 1975ൽ പട്ടം സ്വീകരിച്ചു. ഇംഗ്ലണ്ടിലെ എഡിൻബറോ യൂണിവേഴ്സിറ്റി, പൂന ഫിലിം ഇൻസ്റ്റിറ്റ്യൂട്ട്, റോമിലെ ഗ്രിഗോറിയൻ യൂണിവേഴ്സിറ്റി എന്നിവിടങ്ങളിൽ നിന്നായി കമ്യൂണിക്കേഷനിൽ ബിരുദ പഠനം പൂർത്തിയാക്കി. തൊടുപുഴ, മുതലക്കോടം പള്ളികളിൽ സഹവികാരിയായി ശുശ്രൂഷ ആരംഭിച്ച അദ്ദേഹം കോതമംഗലം രൂപത ചെറുപുഷ്പ മിഷൻ ലീഗ് ഡയറക്ടറായി. പാലാരിവട്ടം പിഒസിയിൽ ’താലന്ത് ’ മാസികയുടെ എഡിറ്ററായും കെസിബിസി മാധ്യമ കമ്മീഷൻ സെക്രട്ടറിയായും ശുശ്രൂഷ ചെയ്തു. കെസിബിസി അഖിലകേരള നാടക മത്സരം ജോസച്ചൻ കലാകേരളത്തിന് നൽകിയ സംഭാവനയാണ്. തുടർന്ന് ഡൽഹിയിൽ സിബിസിഐയുടെ മാധ്യമ കമ്മീഷൻ അംഗമായി സേവനം ചെയ്യുന്പോൾ അദ്ദേഹം ആരംഭിച്ച മാധ്യമ പരിശീലന കേന്ദ്രമാണ് നിസ്കോർട്ട്. ചെമ്മണ്ണാർ, വെള്ളയാംകുടി പള്ളികളുടെ വികാരിയായും സേവനം ചെയ്തു. ഇടുക്കി രൂപതയുടെ വികാരി ജനറാളായി നിയോഗിക്കപ്പെട്ടത് 2017 ലാണ്. രണ്ടു ബിഷപ്പുമാർക്കൊപ്പം എട്ടു വർഷം ചടുലവും അനുകരണനീയവുമായ പ്രവർത്തനങ്ങൾക്ക് അദ്ദേഹം നേതൃത്വം നൽകി. ഇടുക്കിയിലെ സാമൂഹിക വിഷയങ്ങളിലും കർഷകർക്ക് വേണ്ടിയുള്ള അവകാശ പോരാട്ടങ്ങളിലും മുൻപന്തിയിൽ നിന്നു. ഇപ്പോൾ പഴയരികണ്ടം പള്ളിയുടെ വികാരിയാണ്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]