ADVERTISEMENT

ADVERTISEMENT

പ്ലസ് വൺ വിദ്യാർഥികൾക്കു സ്കൂളുകളിൽ വരവേൽപ്പ്

ചിറ്റൂർ: ഈവർഷത്തെ പ്ലസ് വൺ ക്ലാസ് ആരംഭിക്കുന്നതിന്‍റെ ഭാഗമായി സംസ്ഥാനതലത്തിൽ ആസൂത്രണം ചെയ്ത പ്രവേശനോത്സവം -വരവേല്പ് 2025ന്‍റെ ജില്ലാതല ഉദ്ഘാടനം ഗവ. വിക്ടോറിയ ഗേൾസ് ഹയർ സെക്കൻഡറി സ്കൂളിൽ ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ നിർവഹിച്ചു.

ചിറ്റൂർ- തത്തമംഗലം നഗരസഭാ ചെയർപേഴ്സൺ കെ.എൽ. കവിത വിശിഷ്ടാതിഥിയായി പങ്കെടുത്തു. സ്കൂൾ പിടിഎ പ്രസിഡന്‍റ് എം.ജെ.മാത്യു അധ്യക്ഷനായ പരിപാടിയിൽ പ്രിൻസിപ്പൽ ടി.ടി. ഗിരി, സ്റ്റാഫ് സെക്രട്ടറി കെ. കുമാർ, നഗരസഭാ വിദ്യാഭ്യാസ സ്റ്റാന്‍റിംഗ് കമ്മിറ്റി ചെയർമാൻ കെ. സുമതി, കൗൺസിലർ ശ്രീദേവി രഘുനാഥ്, ഹയർസെക്കൻഡറി ജില്ലാ അസിസ്റ്റന്‍റ് കോ-ഓർഡിനേറ്റർ എം. അനീഷ് പ്രസംഗിച്ചു.

ADVERTISEMENT

വാടാനംകുർശിയിൽ അപകടങ്ങൾ തുടർക്കഥ; ഇന്നലെ അപകടത്തിൽപ്പെട്ടതു ചരക്കുലോറി

ഷൊർണൂർ: വാടാനംകുര്‌ശി റെയിൽവേ ഗേറ്റിനു സമീപം ചരക്കുലോറി മറിഞ്ഞു. കുളപ്പുള്ളി -പട്ടാമ്പി പ്രധാനപാതയിൽ നിർമാണം നടന്നുകൊണ്ടിരിക്കുന്ന റെയിൽവേ മേൽപ്പാലത്തിന് സമീപമാണ് ഇന്നലെ പുലർച്ചെ നാലോടുകൂടി ചരക്കുലോറി മറിഞ്ഞത്. റോഡിൽ വാരിക്കുഴികൾപോലെ രൂപപ്പെട്ടു കിടക്കുന്ന ഗർത്തങ്ങളിൽപെട്ടാണ് ചരക്കുലോറിയുടെ നിയന്ത്രണം തെറ്റിമറിഞ്ഞത്. റെയിൽവേ മേൽപ്പാലത്തിനായി സജ്ജീകരിച്ച സർവീസ്റോഡിലാണ് സംഭവം. ലോറി ഡ്രൈവർ നിസാരപരിക്കുകളോടെ രക്ഷപ്പെട്ടു. ഈ പ്രദേശത്ത് വാഹനങ്ങൾ അപകടത്തിൽപ്പെടുന്നത് ആവർത്തിച്ചുകൊണ്ടിരിക്കുകയാണ്. റോഡിൽ മുഴുവൻ കുണ്ടും കുഴികളും നിറഞ്ഞ്കിടക്കുന്ന സ്ഥിതിയാണ് ഇവിടെയുള്ളത്. മഴക്കാലമായതോടെ ഗർത്തങ്ങൾക്ക് തുല്യമായ കുഴികളിൽ വെള്ളം നിറഞ്ഞ് അപകടസാധ്യത വർധിച്ചിരിക്കുകയാണ്. കുഴികളുടെ ആഴം മനസിലാക്കാതെ ഇതിലേക്ക് വാഹനങ്ങൾ ഇറങ്ങുകയും അപകടത്തിൽപെടുകയും ആണ് ചെയ്യുന്നത്. ഈ പ്രദേശത്ത് റോഡിന്‍റെ ടാർ ഭാഗങ്ങൾ ഇല്ലെന്ന് തന്നെ പറയാം. ഒരു കൊല്ലത്തിലധികമായി ഈ പ്രദേശം സ്ഥിരം അപകടമേഖലയായി മാറിയിരിക്കുകയാണ്. റോഡിന് സമീപത്ത് താമസിക്കുന്ന വീട്ടുകാരും ഭയചകിതരാണ്. ഏത് നിമിഷവും നിയന്ത്രണം തെറ്റിയ ഒരു വാഹനം തങ്ങളുടെ വീടുകളിലേക്ക് അപകടമായി എത്തും എന്നതാണ് ഇവർ ഭയക്കുന്നത്. പ്രദേശത്തുള്ള റെയിൽവേ ഗേറ്റിൽ മണിക്കൂറുകളോളം കുടുങ്ങിക്കിടന്നാണ് വാഹനങ്ങൾ ഇതുവഴി യാത്ര ചെയ്യുന്നത്. ഇതിനു പുറമേയാണ് റോഡിന്‍റെ അതീവഗുരുതരമായ അപകടാവസ്ഥ. റോഡ് മുഴുവൻ തകർന്ന് വെള്ളക്കെട്ടുകൾ രൂപപ്പെട്ട് വാഹനയാത്ര പൂർണമായും പ്രദേശത്ത് സാധ്യമല്ലാത്ത സ്ഥിതിയാണ്. ഇരുചക്രവാഹനക്കാർ ഇവിടെ മറിഞ്ഞുവീഴുന്നത് നിത്യസംഭവമായിട്ടുണ്ട്. കാൽനടയാത്രക്കാർക്കും ഇതുവഴി സഞ്ചരിക്കാൻ കഴിയാത്ത അവസ്ഥയാണ്. നിരവധി വാഹനങ്ങൾ ഇവിടെ തകരാറു സംഭവിച്ചു നടുറോഡിൽ കിടക്കുന്നതും പതിവായിട്ടുണ്ട്. ജനങ്ങളുടെ ശക്തമായ പ്രതിഷേധം ഉയർന്നിട്ടും അധികൃതരുടെ ഭാഗത്തുനിന്നും ഒരു നടപടിയും ഉണ്ടാകുന്നില്ല. റെയിൽവേ മേൽപ്പാല നിർമാണത്തിന് വേണ്ടി പ്രദേശത്ത് ഏർപ്പെടുത്തിയ സജ്ജീകരണങ്ങളും വലിയ അപകടഭീഷണിയാണ് ഉയർത്തുന്നത്. ഇതിനുമുമ്പും നിരവധി വാഹനങ്ങൾ മേഖലയിൽ അപകടത്തിൽപെട്ടിട്ടുണ്ട്.

ഗ്രന്ഥശാലാപ്രസ്ഥാനത്തിനു ജീവിതം ഉഴിഞ്ഞുവച്ച് പി. ശിവദാസ്

മംഗലം ശങ്കരൻകുട്ടി ഒറ്റപ്പാലം: ഗ്രന്ഥശാലാ പ്രസ്ഥാനത്തിനുവേണ്ടി ജീവിതം സമർപ്പിച്ച് ഇവിടെയൊരാൾ. ഗ്രന്ഥകർത്താവ്, അധ്യാപകൻ, മാധ്യമപ്രവർത്തകൻ, കലാ-സാംസ്കാരിക-സാമൂഹിക-രാഷ്ട്രീയപ്രവർത്തകൻ എന്നീ നിലകളിലെല്ലാം കാലത്തിനുമേൽ കയ്യൊപ്പ് ചാർത്തിയ ലക്കിടി പി. ശിവദാസ് എന്ന ശിവദാസൻമാസ്റ്ററാണ് ഈ പ്രതിഭ. കേരളത്തിലെ ഏറ്റവും വലിയ ഗ്രന്ഥശാലയായ കുഞ്ചൻ സ്മാരക വായനശാലയുടെ സ്ഥാപകരിൽ പ്രമുഖനാണ് ഇദ്ദേഹം. ഇന്നു കാണുന്ന അവസ്ഥയിലേക്ക് ഈ പ്രസ്ഥാനത്തെ കൈപിടിച്ചുനടത്തിയതിലും ശിവദാസ് വഹിച്ച പങ്ക് അതുല്യമാണ്. അതിനുമപ്പുറം ഇദ്ദേഹത്തിന്‍റെ നേതൃത്വത്തിലുള്ള പ്രവർത്തനങ്ങളാണ് ലക്കിടി കിള്ളിക്കുറുശി മംഗലത്തും പരിസരപ്രദേശങ്ങളിലും പുരോഗതിക്കും കലാ സാഹിത്യ വളർച്ചയ്ക്കും സാഹചര്യമൊരുക്കിയത്. 1965ൽ അധ്യാപക പരിശീലനം പൂർത്തിയാക്കി ജന്മനാടിന്‍റെ അഭിവൃദ്ധിക്കായി ദേശസേവാസംഘം സ്ഥാപിച്ചാണ് ഇദ്ദേഹം പൊതു പ്രവർത്തനം തുടങ്ങിയത്. ആദ്യകാലത്ത് വിവേകോദയം എന്ന വായനശാലയെ കുഞ്ചൻ സ്മാരക വായനശാലയാക്കി മാറ്റി മികച്ച ഗ്രന്ഥശാലയാക്കി മാറ്റിയത് ഇദ്ദേഹമാണ്. മഹാകവി കുഞ്ചൻനമ്പ്യാരുടെ ജന്മഗൃഹം ദേശീയ സ്മാരകമായി ഉയർത്തണമെന്ന ആവശ്യവുമായി കുഞ്ചൻ സ്മാരക സമിതി രൂപീകരിച്ചതും, കലക്കത്ത് ഭവനം സാംസ്കാരിക വകുപ്പ് ഏറ്റെടുത്തത്തിനു പിന്നിലും പി. ശിവദാസ് തന്നെ ആയിരുന്നു. ദീർഘകാലം കുഞ്ചൻ സ്മാരക വായനശാല പ്രസിഡന്‍റ്, സെക്രട്ടറി എന്നീ സ്ഥാനങ്ങൾ വഹിച്ചു. 1987ൽ മികച്ച അധ്യാപകനുള്ള സംസ്ഥാന സർക്കാരിന്‍റെ പുരസ്കാരം ലഭിച്ചിട്ടുണ്ട്. ലക്കിടി-പേരൂർ പഞ്ചായത്ത് അംഗം, എസ്ആർകെ സഹകരണബാങ്ക് ഡയറക്ടർ, ബിഎസ്എസ് താലൂക്ക് സെക്രട്ടറി, ഭാരത് സ്കൗട്ട് ആൻഡ് ഗൈഡ്സ് ജില്ലാ അംഗം, എൻഎസ്എസ് കരയോഗം പ്രസിഡന്‍റ്, താലൂക്ക് യൂണിയൻ പ്രതിനിധി, ചിനക്കത്തൂർ പൂരം തെക്കുംമംഗലം ദേശക്കമ്മിറ്റി പ്രസിഡന്‍റ്, സെക്രട്ടറി തുടങ്ങി ഒട്ടേറെ രംഗങ്ങളിൽ മികച്ച പ്രവർത്തനം നടത്തി. സാംസ്കാരിക വകുപ്പിന്‍റെ കീഴിൽ പ്രവർത്തിക്കുന്ന മഹാകവി കുഞ്ചൻ നമ്പ്യാർ സ്മാരകത്തിന്‍റെ ചെയർമാനുമായിരുന്നു. മികച്ച ഗ്രന്ഥശാല പ്രവർത്തകനുള്ള കേരള സാഹിത്യ അക്കാദമി ദേശീയ പുരസ്കാര ജേതാവുമാണിദ്ദേഹം. ചിനക്കത്തൂർ പൂരം ഏഴു ദേശം കമ്മിറ്റിയുടെ പുരസ്കാരം, കലാമണ്ഡലം അപ്പുക്കുട്ടി പൊതുവാൾ മെമ്മോറിയൽ ട്രസ്റ്റ് പുരസ്കാരം, വള്ളുവനാട് രക്തദാന സമിതിയുടെ ഗാന്ധിയൻ പുരസ്കാരം തുടങ്ങിയ ബഹുമതികളും ലഭിച്ചിട്ടുണ്ട്. ചുഴികൾ, നരനായിങ്ങനെ, നാട്യകുലപതികൾ, നമ്പ്യാർപ്രതിഭ- ഒരു പുനരലോകനം, നടനകൈരളി, നിളയോരത്തെ മുത്തുമണികൾ, കിള്ളിക്കുറുശിക്ഷേത്ര മാഹാത്മ്യം തുടങ്ങിയ പുസ്തകങ്ങളും രചിച്ചിട്ടുണ്ട്. ഭാര്യ: പേരൂർ കിഴക്കേക്കര പരേതയായ രുഗ്മിണി നേത്യാർ. ‍ശ്രീദേവി, ഉത്തമൻ, പവിത്രൻ, സുധ, ശ്രീവത്സൻ എന്നിവരാണ് മക്കൾ.

വടക്കഞ്ചേരി ടൗണിൽ തെരുവുനായകൾ പെരുകി

വടക്കഞ്ചേരി: ടൗണിൽ തെരുവുനായകൾ പെരുകി വഴിനടക്കാൻ കഴിയാത്ത സ്ഥിതിയായി. ടൗണിലെ എല്ലാഭാഗത്തും നായസംഘങ്ങളാണ്. കുഞ്ഞുകുട്ടികളടക്കം പഠിക്കുന്ന ചെറുപുഷ്പം സ്കൂളിലും പരിസരത്തും നായകളുടെ പടയുണ്ട്. ഇതുമൂലം കുട്ടികൾക്ക് സ്വതന്ത്രമായി സ്കൂൾമുറ്റത്ത് നടക്കാൻപറ്റാത്ത സ്ഥിതിയായി. ഗേറ്റ് തുറന്നിടുമ്പോൾ പുറത്തുനിന്നുള്ള നായകൾ സ്കൂളിനുള്ളിൽ കടന്ന് അവിടെതന്നെ തങ്ങുകയാണ്. സന്ധ്യയാകുന്നതോടെയാണ് നായകളുടെ ശൗര്യം കൂടുക. വാഹനങ്ങൾക്കു പിന്നാലെയും നായകൾ പാഞ്ഞുവരും. കാർ നിർത്തി പുറത്തിറങ്ങുന്നവരെ കൂട്ടത്തോടെ ആക്രമിക്കാനെത്തും. ടിബി ജംഗ്ഷനിലും മന്ദം കവലയിലും സുനിതാമുക്കിലും ഗ്രാമം റോഡിലും മത്സ്യമാംസ കടകൾ കൂടുതലുള്ള ബസ് സ്റ്റാൻഡിനു മുന്നിലും ബസ് സ്റ്റാൻഡിലും കാരയങ്കാടും ഇത്തരം അക്രമകാരികളായ നായപ്പടയുണ്ട്. നായശല്യത്തിന് ശാശ്വതപരിഹാരം ഉണ്ടാക്കണമെന്നാണ് യാത്രക്കാരുടെ ആവശ്യം.

ഇരുമ്പകച്ചോലയിൽ കാട്ടാനയിറങ്ങി വ്യാപകകൃഷിനാശം: ജനങ്ങൾ ഭീതിയിൽ

കാഞ്ഞിരപ്പുഴ: ഇരുമ്പകച്ചോല ജനവാസമേഖലയിൽ ഇറങ്ങിയ കാട്ടാനകൾ കൃഷി നശിപ്പിച്ചു. കഴിഞ്ഞദിവസം രാത്രി ഇറങ്ങിയ കാട്ടാനയാണ് ജനവാസ മേഖലയിൽ ഭീഷണി ഉയർത്തിയത്. റോഡിനോട് ചേർന്നുള്ള വീടിന്‍റെ പറമ്പുകളിലും തോട്ടങ്ങളിലും കാട്ടാനയെത്തി. കൈപ്പക്കുഴി വീട്ടിൽ രാധാകൃഷ്ണൻ, കിഴക്കേക്കര കെ.എം. മാത്യു എന്നിവരുടെ തോട്ടത്തിലെ വിളകളും കാട്ടാനകൾ നശിപ്പിച്ചു. രാധാകൃഷ്ണന്‍റെ നാല് തെങ്ങുകൾ, പത്തോളം കമുക്, അന്പതോളം വാഴ എന്നിവയാണ് നശിപ്പിച്ചത്. മാത്യുവിന്‍റെ തോട്ടത്തിലെ തെങ്ങുകളും കമുകും വാഴയും കാട്ടാനകൾ നശിപ്പിച്ചു. കാട്ടാനകൾ നാട്ടിലിറങ്ങാതിരിക്കാനുള്ള ശാശ്വതപരിഹാരം വേണമെന്ന് കർഷകർ ആവശ്യപ്പെട്ടു.

സംസ്ഥാനപാതയിൽ മംഗലത്തെ കൾവർട്ട് മൂന്നാംതവണയും തകർന്നു

വടക്കഞ്ചേരി: പത്തു മാസത്തിനിടെ മൂന്നുതവണ പുതുക്കിപ്പണിത മംഗലം - ഗോവിന്ദാപുരം സംസ്ഥാനപാതയിലെ കൾവർട്ട് വീണ്ടും തകർന്നു. മംഗലംപാലത്തിനു സമീപം പഴയ വില്ലേജ് ഓഫീസിനടുത്തെ കൾവർട്ടാണ് തകരുന്നത്. സ്ലാബുകളുടെ ഇരുഭാഗത്തും വലിയ കുഴികളായി. കഴിഞ്ഞ കാലവർഷത്തിൽ പലതവണ പൊളിച്ചു പണിത കൾവർട്ടാണിത്. ഒടുവിൽ പണി പൂർത്തിയായി ഓഗസ്റ്റിൽ തുറന്നുകൊടുത്ത രണ്ടരയടി മാത്രം വീതിയുള്ള കൾവർട്ടാണിപ്പോൾ വീണ്ടും പൂർണമായ തകർച്ചയിലേക്ക് നീങ്ങുന്നത്. അടിയന്തരമായി അറ്റകുറ്റപ്പണി നടത്തിയില്ലെങ്കിൽ കൾവർട്ട് മൂന്നാം തവണയും തകർന്ന് അത് പൊതുമരാമത്ത് വകുപ്പിന് വീണ്ടും വലിയ നാണക്കേട് ഉണ്ടാക്കും. നാട്ടിൽ ചെറിയ നിർമാണ പ്രവൃത്തികൾ നടത്തുന്നയാതൊരു പഠനവും ഇല്ലാത്തവർ ഇതിലും ഉറപ്പോടെ ഇത്തരം പണികൾ ചെയ്യുമെന്നാണ് വാഹനയാത്രക്കാർ ചൂണ്ടിക്കാട്ടുന്നത്. ഇതിനടുത്തും റോഡ് തകർന്ന് കിടങ്ങുപോലെയായിട്ടുണ്ട്.

50 സെക്കൻഡിനുള്ളിൽ 500 വിദ്യാർഥികൾ 500 തൈകൾ നട്ടുപിടിപ്പിച്ചു

കോയന്പത്തൂർ: കോവൈപുതൂരിലെ പുനരുദ്ധരിച്ച മാരിയമ്മൻക്ഷേത്ര ചെക്ക്ഡാമിനുചുറ്റും 50 സെക്കന്‍റിനുള്ളിൽ 500 വിദ്യാർഥികൾ 500 മരങ്ങൾ നട്ടുപിടിപ്പിച്ചു. കോയന്പത്തൂർ സിറ്റി റൗണ്ട് ടേബിൾ- 31, കോയന്പത്തൂർ സിറ്റി ലേഡീസ് സർക്കിൾ- 16 ക്ലബുകളുടെ ആഭിമുഖ്യത്തിലായിരുന്നു പരിപാടി സംഘടിപ്പിച്ചത്. സ്റ്റാൾവാർട്ട് ഗ്രൂപ്പ് ഓഫ് കമ്പനീസും വിഎൽബി കോളജ് ഓഫ് ആർട്സ് ആൻഡ് സയൻസും സംയുക്ത പങ്കാളികളായ പരിപാടിയിൽ പൗരനേതാക്കൾ, വിദ്യാർഥികൾ, പരിസ്ഥിതി പ്രവർത്തകർ പങ്കെടുത്തു. കോയമ്പത്തൂർ സിറ്റി മുനിസിപ്പൽ കോർപ്പറേഷൻ ഡെപ്യൂട്ടി മേയർ ആർ. വെട്രിസെൽവൻ, സിരുതുളിയിലെ സ്റ്റിയറിംഗ് കമ്മിറ്റി അംഗം സുജാനി ബാലു, റൗണ്ട് ടേബിൾ ഇന്ത്യയുടെ ഏരിയ ചെയർമാൻ രഗുലൻ ശേഖർ, വിഎൽബി കോളജ് പ്രിൻസിപ്പൽ ഡി. കലൈവാണി എന്നിവർ പ്രസംഗിച്ചു.

നെല്ലിപ്പതി മല്ലീശ്വര സ്കൂളിൽ കമ്പ്യൂട്ടർ ലാബ് ഉദ്ഘാടനം

അഗളി: നെല്ലിപ്പതി മല്ലീശ്വര വിദ്യാനികേതൻ സ്കൂളിൽ പുതിയ കമ്പ്യൂട്ടർ ലാബ് തുറന്നു.അട്ടപ്പാടിയിലെ പിന്നോക്ക വിഭാഗത്തിൽപ്പെട്ട വിദ്യാർഥികളുടെ സാങ്കേതിക വൈദഗ്ധ്യം വർധിപ്പിക്കുന്നതിനായി സൗത്ത് ഇന്ത്യൻ ബാങ്കിന്‍റെ സിഎസ്ആർ സ്കീമിൽ ഉൾപ്പെടുത്തി അനുവദിച്ച 24 കമ്പ്യൂട്ടറുകളും ഒരു ഫോട്ടോകോപ്പി മെഷീനുമാണ് സ്കൂളിൽ ഉദ്ഘാടനം ചെയ്തത്. സൗത്ത് ഇന്ത്യൻ ബാങ്ക് പാലക്കാട് റീജണൽ ഹെഡ് പി. അഭിലാഷ് ഉദ്ഘാടനം നിർവഹിച്ചു. പഞ്ചായത്തംഗം കെ.ടി. ബെന്നി അധ്യക്ഷനായി. സൗത്ത് ഇന്ത്യൻ ബാങ്ക് ഒറ്റപ്പാലം ക്ലസ്റ്റർ ഹെഡ് ഒ.എം. പ്രസാദ്, ഗൂളിക്കടവ് ബ്രാഞ്ച് ഹെഡ് കെ. വിനുകൃഷ്ണൻ, വിവേകാനന്ദ മെഡിക്കൽ മിഷൻ സെക്രട്ടറി എസ്. സജിമോൻ, ട്രസ്റ്റി ഡോ.വി. നാരായണൻ പ്രസംഗിച്ചു.

നെഹ്‌റു എയറോനോട്ടിക്കൽ കോളജിൽ ഫ്രഷേഴ്സ് ഡേ ആഘോഷിച്ചു

കോയമ്പത്തൂർ: കോയമ്പത്തൂരിലെ നെഹ്‌റു എയറോനോട്ടിക്കൽ കോളജിലെ പുതിയ ബിരുദ വിദ്യാർഥികൾക്കുള്ള ഫ്രഷേഴ്സ് ഡേ ആഘോഷിച്ചു. എയർ ഇന്ത്യ ലിമിറ്റഡ് മാനേജർ (റിട്ടയേർഡ്) വിജയലക്ഷ്മി മുഖ്യാതിഥിയായിരുന്നു. നെഹ്‌റു എജ്യുക്കേഷണൽ ഗ്രൂപ്പ് ചെയർമാനും മാനേജിംഗ് ട്രസ്റ്റിയും അഭിഭാഷകനുമായ ഡോ.പി. കൃഷ്ണദാസ് അധ്യക്ഷത വഹിച്ചു. ചടങ്ങിൽ നെഹ്‌റു എജ്യുക്കേഷണൽ ഗ്രൂപ്പ് ചീഫ് സെക്രട്ടറിയും മാനേജിംഗ് ഓഫീസറുമായ ഡോ.പി. കൃഷ്ണകുമാർ അനുമോദന പ്രസംഗം നടത്തി. വിദ്യാഭ്യാസ ഗ്രൂപ്പ് പ്രഫ.ഡോ.എച്ച്.എൻ. നാഗരാജ മുഖ്യാതിഥിയായിരുന്നു. നേരത്തെ, കോളജ് ഡീൻ ഡോ.പി.ആർ. ബാലാജി പുതിയ വിദ്യാർഥികളെ സ്വാഗതം ചെയ്തു. ഫൈൻ ആർട്‌സ് വിഭാഗം മേധാവി പ്രഫ.ആർ. സിംഗാരവടിവേലു നന്ദി പറഞ്ഞു. ചടങ്ങിൽ വകുപ്പുമേധാവികളും അഞ്ഞൂറോളം വിദ്യാർഥികളും രക്ഷിതാക്കളും പങ്കെടുത്തു.

കാരംപൊറ്റ കനാലിലെ മാലിന്യവെള്ളക്കെട്ട് നീക്കുമെന്നു പഞ്ചായത്തിന്‍റെ ഉറപ്പ്

കൊഴിഞ്ഞാമ്പാറ: പഞ്ചായത്തിലെ കാരംപൊറ്റയിൽ ജനവാസമേഖലയിലൂടെ കടന്നുപോകുന്ന ജലസേചന കനാലിൽ മലിനജലം കെട്ടിനിൽക്കുന്ന പ്രശ്നത്തിനു പരിഹാരമുണ്ടാക്കാമെന്നു അധികൃതർ. കഴിഞ്ഞ ദിവസം ബിജെപി പ്രവർത്തകരുടെ നേതൃത്വത്തിൽ നാട്ടുകാർ പഞ്ചായത്ത് സെക്രട്ടറിയെ ഉപരോധിച്ചു നടത്തിയ സമരത്തെ തുടർന്നാണ് തീരുമാനം. വെള്ളിയാഴ്ചക്കകം പരിഹരിക്കാമെന്നാണ് ഉറപ്പുനൽകിയത്. നൂറുകണക്കിനു കുടുംബങ്ങൾ തിങ്ങിപ്പാർക്കുന്ന പ്രദേശത്തുകൂടെ കടന്നുപോകുന്ന കനാലിൽ കണ്ടാലറയ്ക്കുന്ന തരത്തിലാണ് മലിനജലം കെട്ടിക്കിടക്കുന്നത്. നഗരത്തിലെ വീടുകളിൽ നിന്നും കച്ചവട സ്‌ഥാപനങ്ങളിൽ നിന്നുള്ള മലിനജലമാണിതെന്നും സമരക്കാർ പഞ്ചായത്ത് സെക്രട്ടറി ബോധിപ്പിച്ചിരുന്നു. ബിജെപി ജില്ലാ ജനറൽ സെക്രട്ടറി എ.കെ.ഓമനക്കുട്ടൻ, എ.കെ മോഹൻദാസ്, കെ.ശ്രീകുമാർ, എം. ബാലകൃഷ്ണൻ എന്നിവരുടെ നേതൃത്വത്തിലായിരുന്നു സമരം.

അയ്യപ്പൻകാവിലെ ചാർജിംഗ് മെഷീൻ ബസ് സ്റ്റാൻഡിലേക്കു മാറ്റിക്കൂടേ...

വണ്ടിത്താവളം: കൃഷിഭവൻ കാര്യാലയത്തിനുമുന്നിൽ ജലസേചനവകുപ്പ് കനാൽബണ്ടിന്‍റെ അരികിൽ സ്ഥാപിച്ച വൈദ്യുതിവാഹന ചാർജിംഗ് മെഷീൻ ബസ് സ്റ്റാൻഡ് കോമ്പൗണ്ടിലേക്കു മാറ്റണമെന്നാവശ്യം. നിലവിലെ ചാർജിംഗ് സ്ഥലത്ത് ആവശ്യക്കാർക്ക് എത്തിപ്പെടാൻ ഏറെ അസൗകര്യമുണ്ട്. വണ്ടിത്താവളത്തും സമീപപ്രദേശങ്ങളിലും ഇലക്ട്രിക് വാഹനങ്ങൾ ഗണ്യമായി വർധിച്ചിട്ടുണ്ട്. മറ്റുസ്ഥലങ്ങളിൽനിന്നും വരുന്ന വാഹനങ്ങൾക്ക് റീചാർജ് ചെയ്യാൻ മെഷീനുണ്ടായിട്ടും ഉപയോഗിക്കാൻ കഴിയാത്ത സാഹചര്യമാണുള്ളത്. ബസ് സ്റ്റാൻഡിലേക്ക് മെഷീൻ മാറ്റിസ്ഥാപിച്ചാൽ ഏറെ സൗകര്യമാവുമെന്നതാണ് വാഹനഉടമകളുടെ നിർദേശം. താലൂക്കിൽ ചുരുക്കംചില സ്ഥലങ്ങളിൽ മാത്രമാണ് ചാർജിംഗ് സ്റ്റേഷനുള്ളത്.

ഭിന്നശേഷിക്കാർക്കും വയോജനങ്ങൾക്കും സഹായഉപകരണ നിർണയ ക്യാന്പ് ഇന്ന്

പറളി: ഭിന്നശേഷിക്കാർക്കും വയോജനങ്ങൾക്കുമായി സാമൂഹ്യനീതി വകുപ്പിന്‍റെ നേതൃത്വത്തിൽ സംഘടിപ്പിക്കുന്ന സ്പർശം സഹായ ഉപകരണ നിർണയ ക്യാന്പ് ഇന്നുരാവിലെ 9.30 മുതൽ പറളി ഗ്രാമപഞ്ചായത്ത് കല്യാണമണ്ഡപത്തിൽ നടക്കും. പാലക്കാട് ബ്ലോക്ക് പഞ്ചായത്തിന്‍റെ ആഭിമുഖ്യത്തിലാണ് ക്യാന്പ് സംഘടിപ്പിക്കുന്നത്. ക്യാന്പിൽ പങ്കെടുക്കാൻ ആഗ്രഹിക്കുന്ന ഭിന്നശേഷിക്കാർ ഭിന്നശേഷി സർട്ടിഫിക്കറ്റിന്‍റെയും, യുഡിഐഡി കാർഡ്, ആധാർ കാർഡിന്‍റെയും പകർപ്പുകൾ, പാസ്പോർട്ട് സൈസ് ഫോട്ടോ, ബിപിഎൽ റേഷൻകാർഡ് അല്ലെങ്കിൽ വരുമാന സർട്ടിഫിക്കറ്റ് എന്നിവയുടെ പകർപ്പുകൾ സഹിതം എത്തണം. സഹായ ഉപകരണങ്ങൾ ആവശ്യമുള്ള ഭിന്നശേഷിക്കാർ മാത്രമാണ് മെഡിക്കൽ ക്യാന്പിൽ പങ്കെടുക്കേണ്ടത്. 60 വയസ്‌ പൂർത്തിയായ വയോജനങ്ങൾ ബിപിഎൽ റേഷൻ കാർഡ്/വരുമാന സർട്ടിഫിക്കറ്റിന്‍റെ കോപ്പി, ആധാർകാർഡിന്‍റെ കോപ്പി, പാസ്പോർട്ട് സൈസ് ഫോട്ടോ എന്നിവ നിർബന്ധമായും കൊണ്ടുവരണം. ക്യാന്പിനോടനുബന്ധിച്ച് യുഡിഐഡി, യുഎച്ച്ഐഡി, ആധാർ, ഡ്രൈവിംഗ് ലൈസൻസ് എന്നിവയുമായി ബന്ധപ്പെട്ട ഹെൽപ്പ് ഡെസ്കും പ്രവർത്തിക്കും. കൂടുതൽ വിവരങ്ങൾ 0491 - 2543310 നന്പറിൽ ലഭിക്കും.

ഹൈമാസ്റ്റ് ലൈറ്റ് അണഞ്ഞിട്ടു രണ്ടുമാസം: നടപടിയില്ല

വണ്ടിത്താവളം: ടൗണിൽ ഹൈമാസ്റ്റ് ലൈറ്റ് പ്രവർത്തനരഹിതമായി രണ്ടുമാസം കഴിഞ്ഞിട്ടും പുനഃസ്ഥാപിക്കാത്തതിൽ യാത്രക്കാരുടേയും വ്യാപാരികളുടേയും പ്രതിഷേധം ശക്തം. തങ്ങളുടെ പരിധിയിൽ വരുന്നതല്ലെന്നു പറഞ്ഞ് ഗ്രാമപഞ്ചായത്തും കെഎസ്ഇബിയും കൈയൊഴിയുകയാണ്. എന്നാൽ ഹൈമാസ്റ്റ് സ്ഥാപിച്ച ഏജൻസി അഞ്ചുവർഷം കഴിഞ്ഞാതിനാൽ സർവീസ് ഗ്യാരന്‍റി കഴിഞ്ഞെന്നു പറഞ്ഞു നിസ്സഹകരിക്കുകയാണ്. ടൗൺ നാലുമൊക്ക് റോഡിൽ വ്യാപാര സ്ഥാപനങ്ങൾ അടച്ചാൽ പിന്നീട് ഇരുട്ടാണ്. ദൂരെ സ്ഥലങ്ങളിൽനിന്നും വണ്ടിത്താവളത്തെത്തി ഗ്രാമീണ ഉൾപ്രദേശത്തേക്കു പോവാൻ ഓട്ടോറിക്ഷ പോലും ലഭിക്കാത്ത അവസ്ഥയിലാണ്. പുലർച്ചെ പാലക്കാട്, തൃശൂർ ഭാഗത്തേക്ക് ബസ് കയറാനെത്തുന്ന സ്ത്രീകളടക്കമുളളവർ നിൽക്കുന്നത് ഭീതിയോടെയാണ്. ഈസ്ഥലത്ത് മുൻപ് പലതവണ വാഹനാപകടങ്ങളുമുണ്ടായിട്ടുണ്ട്. സമീപത്തെ വീട്ടിൽനിന്നും കയറഴിഞ്ഞുവന്ന രണ്ടു പോത്തുകുട്ടികൾ ജീപ്പിടിച്ച് ചത്ത സംഭവമുണ്ടായിട്ടുണ്ട്. പ്രദേശത്തെ ഹോട്ടലുടമ കാറിടിച്ച് സംഭവസ്ഥലത്തു തന്നെ മരണപ്പെട്ട അപകടവും ഇവിടെ നടന്നിട്ടുണ്ട്. ഇത്രയും അപകട ഭീഷണിയിലുള്ള സ്ഥലത്താണ് ഹൈമാസ്റ്റ് അണഞ്ഞ് ഇരുട്ടിലായിരിക്കുന്നത്.

ഒളിന്പ്യൻമാരായ ടിന്‍റു ലൂക്കയും പ്രീജ ശ്രീധരനും ദീപശിഖാപ്രയാണത്തിനു നേതൃത്വം നൽകും

പാലക്കാട്: അന്താരാഷ്ട്ര ഒളിന്പിക് ദിനാഘോഷത്തിന്‍റെ ഭാഗമായി 23ന് പാലക്കാട്ട് ദീപശിഖാ റാലിയും പൊതുസമ്മേളനവും നടത്താൻ സംഘാടകസമിതിയോഗം തീരുമാനിച്ചു. അഡീഷണൽ ഡിസ്ട്രിക്ട് മജിസ്ട്രേറ്റ് സുനിൽകുമാറിന്‍റെ അധ്യക്ഷതയിൽ കളക്ടറേറ്റ് കോണ്‍ഫറൻസ് ഹാളിൽ ചേർന്ന യോഗത്തിലാണ് പരിപാടികൾക്കു അന്തിമരൂപം നൽകിയത്. അന്നുരാവിലെ ഏഴിനു വിക്ടോറിയ കോളജ് പരിസരത്തുനിന്നാണ് ദീപശിഖാറാലി ആരംഭിക്കുക. കോട്ടമൈതാനത്തു നടക്കുന്ന പൊതുസമ്മേളനത്തോടെ റാലി സമാപിക്കും. ഒളിന്പ്യൻമാരായ ടിന്‍റു ലൂക്കയും പ്രീജാ ശ്രീധരനും ദീപശിഖാ പ്രയാണത്തിനു നേതൃത്വം നൽകും. എൻസിസി, എൻഎസ്എസ്, സ്കൗട്ട് ആൻഡ് ഗൈഡ്സ്, സ്റ്റുഡന്‍റ്സ് പോലീസ്, കായികതാരങ്ങൾ, വിവിധ സന്നദ്ധ സംഘടനകൾ എന്നിവരെല്ലാം റാലിയുടെ ഭാഗമാകും. ജില്ലാ കളക്ടർ ജി. പ്രിയങ്ക ചെയർപേഴ്സണും ജില്ലാ പോലീസ് മേധാവി അജിത്കുമാർ, അഡീഷണൽ ഡിസ്ട്രിക്ട് മജിസ്ട്രേറ്റ് സുനിൽകുമാർ, എന്നിവർ വൈസ് ചെയർമാൻമാരും ഒളിന്പിക് അസോസിയേഷൻ പ്രസിഡന്‍റ് കണ്‍വീനറുമായുള്ള സംഘാടകസമിതിയാണ് രൂപീകരിച്ചിട്ടുള്ളത്. യോഗത്തിൽ സ്പോർട്സ് കൗണ്‍സിൽ വൈസ് പ്രസിഡന്‍റ് സി. ഹരിദാസ്, ഒളിന്പിക് വേവ് കണ്‍വീനർ മുഹമ്മദ് കാസിം, ഒളിന്പിക് അസോസിയേഷൻ വൈസ് പ്രസിഡന്‍റ് കെ.സി. പ്രീത് പങ്കെടുത്തു.

അഡ്വ.പി. പ്രേംനാഥ് ലക്ഷദ്വീപ് ലീഗൽ ലിറ്ററസി സെൽ കോ-ഓർഡിനേറ്റർ

പാലക്കാട്: മുൻ ഡെപ്യൂട്ടി ഡയറക്ടർ ഓഫ് പ്രോസിക്യൂഷനും അട്ടപ്പാടി ലീഗൽക്ലബ്‌ കോ- ഓർഡിനേറ്ററുമായിരുന്ന പാലക്കാട്‌ സ്വദേശി അഡ്വ.പി. പ്രേംനാഥിനെ ലക്ഷദ്വീപ് ലീഗൽ ലിറ്ററസിസെൽ പ്രോജക്ട് കോ- ഓർഡിനേറ്ററായി ലക്ഷദ്വീപ് സ്റ്റേറ്റ് ലീഗൽ സർവീസ് അഥോറിറ്റി നിയമിച്ചു. ലക്ഷദ്വീപിലെ സ്കൂൾവിദ്യാർഥികളിൽ നിയമാവബോധം സൃഷ്ടിക്കാനുമുള്ള പദ്ധതികൾ ആവിഷ്കരിച്ച്‌ നടപ്പിലാക്കുവാനാണ് നിയമസാക്ഷരത ക്ലബുകൾ ആരംഭിക്കുന്നത്. കുറ്റകൃത്യങ്ങളിലെ ഇരകളുടെ ക്ഷേമത്തിനുവേണ്ടി പ്രവർത്തിക്കുന്ന വിശ്വാസ് ഇന്ത്യയുടെ സെക്രട്ടറിജനറൽ കൂടിയാണ് അഡ്വ.പി. പ്രേംനാഥ്.

ആലാംകടവ് നറണിപ്പാലം നിർമാണം പുരോഗമിക്കുന്നു

ചിറ്റൂർ: വണ്ണാമട- ചിറ്റൂർ റോഡിനേയും തത്തമംഗലം- മീനാക്ഷിപുരം റോഡിനേയും ബന്ധിപ്പിച്ചുകൊണ്ട് കല്ല്യാണപേട്ട- ആലാംകടവ് റോഡിൽ ചിറ്റൂർപുഴയ്ക്കുകുറുകെ നിര്‍മിക്കുന്ന നറണി പാലത്തിന്‍റെ പ്രവൃത്തികൾ പുരോഗമിക്കുന്നു. പത്തര കോടിരൂപ ചെലവഴിച്ചാണ് 148.50 മീറ്റർ നീളത്തിൽ പാലം നിർമിക്കുന്നത്. ഈ പാലത്തിന്‍റെ ഇരുവശത്തുമായി കല്യാണപേട്ട റോഡിൽ 83 മീറ്റർ നീളത്തിലും, ആലാംകടവ് റോഡിൽ 66 മീറ്റർ നീളത്തിലും അപ്രോച്ച് റോഡ് നിർമാണവും, അപകടങ്ങൾ ഒഴിവാക്കുന്നതിനായി ക്രാഷ് ബാരിയർ, സുരക്ഷാ മുന്നറിപ്പ്, ഡിഎൽപി ബോർഡുകൾ, റോഡ് മാർക്കിംഗ്, സ്റ്റഡ് പതിക്കൽ, പെയിന്‍റിംഗുകൾ എന്നിവയും പദ്ധതിയിൽ ഉൾപ്പെടുത്തിയിട്ടുണ്ട്.

ചരക്കുകടത്തുവാഹനങ്ങളിൽ തൊഴിലാളികളുടെ അപകടയാത്ര

കൊഴിഞ്ഞാമ്പാറ: ചിറ്റൂർ താലൂക്കിന്‍റെ കിഴക്കൻ അതിർത്തി പ്രദേശങ്ങളിൽ ചരക്കുകടത്ത് വാഹനങ്ങളിൽ യാത്രക്കാരെ കുത്തിനിറച്ച് കൊണ്ടുപോവുന്നതിനെതിരെ കർശനനടപടി വേണമെന്ന ആവശ്യം ശക്തം. പെട്ടിഓട്ടോ, ടെമ്പോ ഉൾപ്പെടെ വാഹനങ്ങളിലാണ് തൊഴിലാളികളെ ജോലി സ്ഥലത്തേക്കു കൊണ്ടുപോവുന്നത്. ഇത്തരം വാഹനങ്ങൾ യാത്രക്കിടെ മറിഞ്ഞാലോ മറ്റുവിധത്തിൽ അപകടമുണ്ടായാലോ ചികിത്സാചെലവിനുള്ള ഇൻഷ്വറൻസ് തുക ലഭിക്കില്ല. പട്രോളിംഗിനിടെ പോലീസ് സംഘം ഇത്തരക്കാരെ കണ്ടാൽ മൗനംപാലിക്കുന്നതു ഇത്തരം നിയമലംഘനത്തിനു വഴിമരുന്നിടുന്നുമുണ്ട്. മുന്പ് നെടുമ്പള്ളത്തുനിന്നും കുത്തനെയുള്ള കയറ്റംവഴി വണ്ടിത്താവളം ടൗണിലേക്കുള്ള വഴിയിൽ പെട്ടോഓട്ടോ തലകീഴായി മറിഞ്ഞ് പത്തോളം സ്ത്രീതൊഴിലാളികൾക്കു അപകടം സംഭവിച്ചിരുന്നു. മിക്ക സ്ത്രീകൾക്കും അന്ന് പരിക്കേറ്റു. അപകടങ്ങളുണ്ടായിട്ടും തൊഴിലാളികൾ ചെലവുകുറയ്ക്കാനാണ് ഇത്തരം യാത്രകളെ ആശ്രയിക്കുന്നത്. ചെലവു കുറയുന്പോഴും നടപടിയില്ലാതാകുന്പോഴും അപകടം കൂടുന്നുവെന്നാണ് യാഥാർഥ്യം.

എന്‍റെ ഓണസദ്യക്ക് എന്‍റെ പച്ചക്കറി: തൈകൾ വിതരണം ചെയ്തു

ആലത്തൂർ: എന്‍റെ ഓണസദ്യക്ക് എന്‍റെ പച്ചക്കറി എന്ന പദ്ധതിയുടെ ഭാഗമായി തരൂർ ഗ്രാമപഞ്ചായത്തിൽ പച്ചക്കറി തൈകളുടെ വിതരണോദ്ഘാടനം ഗ്രാമപഞ്ചായത്ത് പ്രസിഡന്‍റ് ഇ. രമണി നിർവഹിച്ചു. ഓണത്തിന് സ്വന്തമായി ഉത്പാദിപ്പിച്ച ജൈവപച്ചക്കറി ഉപയോഗിച്ചു ഓണസദ്യ ഒരുക്കണമെന്ന ലക്ഷ്യത്തോടെയാണ് പദ്ധതി നടപ്പിലാക്കുന്നത്. കൃഷിഭവന്‍റെ നേതൃത്വത്തിൽ സൗജന്യമായാണ് തരൂർ ഗ്രാമപഞ്ചായത്തിലെ കർഷകർക്കായി പയർ, വെണ്ട, അമര, മുളക്, തക്കാളി, വഴുതിന എന്നീ തൈകളാണ് നൽകിയത്. ഗ്രാമപഞ്ചായത്ത് വൈസ് പ്രസിഡന്‍റ് ഐ. ഷക്കീർ അധ്യക്ഷനായി. കൃഷി ഓഫീസർ, കമ്മിറ്റി ചെയർപേഴ്സണ്‍മാർ, പാടശേഖരസമിതി അംഗങ്ങൾ, കർഷകർ എന്നിവർ പങ്കെടുത്തു.

പാതയോരങ്ങളിൽ ബോർഡുകളുടെ അതിപ്രസരം

ഷൊർണൂർ: പാതയോരങ്ങളിൽ അനധികൃതമായി സ്ഥാപിച്ചിട്ടുള്ള പരസ്യബോർഡുകൾ നീക്കംചെയ്യണമെന്ന ഉത്തരവിന് പുല്ലുവില. ജില്ലയിലാകമാനം തന്നെ പൊതുനിരത്തുകളിലുള്ള ബോർഡുകൾ, ബാനറുകൾ, കൊടിതോരണങ്ങൾ തുടങ്ങിയവയ നീക്കം ചെയ്യണമെന്ന ഉത്തരവാണ് ലംഘിക്കപ്പെട്ടത്. ഇത്തരത്തിൽ നിയമലംഘനം നടത്തി സ്ഥാപിക്കപ്പെട്ട ബോർഡുകളും, കൊടിസ്തൂപങ്ങളും ഇപ്പോഴും പാതയോരങ്ങളിൽ വ്യാപകമാണ്. ചില തദ്ദേശസ്വയംഭരണ സ്ഥാപനങ്ങൾമാത്രം പേരിനുവേണ്ടി ചില നടപടികൾ എടുത്തതൊഴിച്ചാൽ ഉത്തരവ് വ്യാപകമായി ലംഘിക്കപ്പെട്ടു എന്നുള്ളതാണ് യാഥാർഥ്യം. നിയമലംഘനം നടത്തുന്ന വ്യക്തികൾക്കും സ്ഥാപനങ്ങൾക്കുമെതിരേ പിഴചുമത്താനായിരുന്നു തീരുമാനം. സ്ഥാപനങ്ങളുടെ ലൈസൻസ് റദ്ദാക്കുന്നതുൾപ്പെടെയുള്ള നടപടി സ്വീകരിക്കാനും ജില്ലാതല മേൽനോട്ടസമിതി തീരുമാനിച്ചിരുന്നു. ഇക്കാര്യത്തിൽ നടപടി സ്വീകരിക്കാൻ തദ്ദേശസ്വയംഭരണ സ്ഥാപനങ്ങൾക്കാണ് അധികാരം നൽകിയിരുന്നത്. പാതയോരങ്ങളിൽ കൊടി തോരണങ്ങൾ സ്ഥാപിക്കുന്നതിൽ ഇപ്പോഴും നിയന്ത്രണുവുമില്ലാത്ത സ്ഥിതിയാണ്. ഇതിനെ തുടർന്ന് സർക്കാർ പുതിയ മാർഗരേഖ പറത്തിറക്കിയിരുന്നു. കൊടി തോരണങ്ങൾ സ്ഥാപിക്കുന്നത് കാൽനടയാത്രക്കാർക്ക് ബുദ്ധിമുട്ടുണ്ടാക്കരുതെന്നും സ്ഥാപിക്കുംമുമ്പ് തദ്ദേശ സെക്രട്ടറിയുടെ മുൻകൂർ അനുമതി വാങ്ങണമെന്നുമായിരുന്നു ഇതിൽ പ്രധാനം. കൊടിതോരണങ്ങൾ സ്ഥാപിക്കുമ്പോൾ സംഘർഷത്തിലേക്കു പോകാതെ നോക്കണമെന്നും നിശ്ചിത ദിവസങ്ങളിലേക്കു മാത്രമേ കൊടിതോരണങ്ങൾ വയ്‌ക്കാവൂ എന്നതടക്കമുള്ള നിർദേശങ്ങൾ പരസ്യമായി ലംഘിക്കപ്പെടുന്ന സാഹചര്യമാണ് നിലവിലുള്ളത്. നേരത്തെ കൊടിതോരണങ്ങൾ നീക്കംചെയ്യാത്തതിനെതിരെ കടുത്ത വിമർശനങ്ങൾ ഹൈക്കോടതി പോലും ഉന്നയിച്ചിരുന്നു. എന്നാൽ ഇപ്പോഴും ഇക്കാര്യങ്ങളിൽ നടപടിയൊന്നുമുണ്ടാകുന്നില്ല എന്നതാണ് യാഥാർഥ്യം.

ഒറ്റപ്പാലം നഗരസഭയുടെ ഷീ ലോഡ്ജ് ഇനിയും പ്രവർത്തനം തുടങ്ങിയില്ല

ഒറ്റപ്പാലം: വർഷങ്ങൾ പിന്നിട്ടിട്ടും ഒറ്റപ്പാലത്ത് ഷീ ലോഡ്ജ് പദ്ധതി തുടങ്ങിയില്ല. പദ്ധതി നടപ്പാക്കാനായി കെട്ടിടംപണി പൂർത്തിയായി വർഷം മൂന്നുകഴിഞ്ഞിട്ടും ഇതാണുസ്ഥിതി. രാത്രിയിൽ ഒറ്റപ്പാലത്തെത്തുന്ന വനിതകൾക്ക് താമസിക്കുന്നതിനു സൗകര്യമൊരുക്കുന്ന പദ്ധതിയാണ് നഗരസഭാ ബസ്‌സ്റ്റാൻഡ് കെട്ടിടത്തിൽ പ്രവർത്തനസജ്ജമായത്. സുരക്ഷാസംവിധാനങ്ങൾകൂടി ഒരുക്കാനുള്ളതുകൊണ്ടാണ് പ്രവർത്തനം വൈകുന്നതെന്നാണ് നഗരസഭയുടെ വിശദീകരണം. നഗരസഭാ ബസ്‌സ്റ്റാൻഡിലെ പുതിയ കെട്ടിടത്തിൽ ഒന്നാംനിലയിലാണ് ഷീ ലോഡ്ജ് നിർമിച്ചിട്ടുള്ളത്. ആദ്യഘട്ടമെന്ന നിലയ്ക്ക് അഞ്ചുകിടക്കകളാണ് തയാറാക്കിയിട്ടുള്ളത്, രണ്ട് ശൗചാലയങ്ങളുള്ള കേന്ദ്രത്തിൽ കട്ടിൽ, മേശ, ഫാൻ തുടങ്ങിയവയുണ്ട്. താമസക്കാർക്ക് ഭക്ഷണമുൾപ്പെടെയുള്ള സൗകര്യങ്ങളുമൊരുക്കും. മുൻ ഭരണസമിതി 2019ൽ വിഭാവനംചെയ്ത പദ്ധതിയാണിത്. കുടുംബശ്രീയുടെ നേതൃത്വത്തിലായിരിക്കും നടത്തിപ്പെന്നും തീരുമാനിച്ചിരുന്നു. ഇതിനുവേണ്ടി നഗരസഭ കുടുംബശ്രീ യൂണിറ്റുകളിൽനിന്ന് താത്‌പര്യപത്രം ക്ഷണിക്കുകയും ചെയ്തു. യൂണിറ്റിനെ തെരഞ്ഞെടുക്കുന്നമുറയ്ക്ക് കൗൺസിലിന്‍റെ അംഗീകാരംനേടി ഷീ ലോഡ്ജ് പ്രവർത്തനമാരംഭിക്കാനായിരുന്നു പദ്ധതി. രണ്ടുലക്ഷംരൂപയുടെ പണികൾകൂടി നടത്തിക്കഴിഞ്ഞാൽ പ്രവർത്തനം തുടങ്ങുമെന്നാണ് നഗരസഭാധികൃതർ പറയുന്നത്.

കയറമ്പാറ കേന്ദ്രീയ വിദ്യാലയം റോഡിലൂടെ യാത്ര നരകതുല്യം

ഒറ്റപ്പാലം: വാഹനത്തിലായാലും കാൽനടയായിട്ടായാലും ജാഗ്രത പാലിച്ചില്ലെങ്കിൽ നടുവൊടിയും. കയറംമ്പാറ കേന്ദ്രീയവിദ്യാലയം റോഡിന്‍റെ സ്ഥിതിയാണിത്. ഇതുവഴിയുള്ള യാത്ര പരമദയനീയം. റോഡ് നവീകരിക്കാൻ അനുമതിയായെങ്കിലും ഈ മഴക്കാലംകൂടി കഴിയണമെന്നാണു അധികൃതർ പറയുന്നത്. മഴക്കാലമായതോടെ കുണ്ടുംകുഴികളും പാതാളഗർത്തങ്ങളും നിറഞ്ഞിരിക്കുകയാണ് റോഡിൽ. ഒപ്പം അപകടങ്ങളും പതിയിരിക്കുന്നു. കുഴികളിൽ വെള്ളംനിറഞ്ഞ് കിടക്കുന്നതിനാൽ ജാഗ്രതകൂടാതെ മുന്നോട്ടുനീങ്ങാനാകില്ല. നേരത്തെ റോഡ്നവീകരണത്തിന് സംസ്ഥാനസർക്കാർ രണ്ടുകോടി രൂപയാണ് അനുവദിച്ചത്. ഇതിന്‍റെ നിർമാണോദ്ഘാടനം നടത്തിയിട്ടു മാസങ്ങൾ പലതായി. എന്നാൽ നിർമാണം മാത്രം നടന്നില്ല. വർഷങ്ങളായി അറ്റകുറ്റപ്പണി നടത്താത്തതിനാലാണ് പാതയിൽ കുഴികൾ നിറഞ്ഞത്. പാലക്കാട്- കുളപ്പുള്ളി പാതയിലെ കയറംപാറ കവലയിൽനിന്ന് കേന്ദ്രീയ വിദ്യാലയം വഴി റെയിൽവേ ലൈൻ പരിസരത്ത് അവസാനിക്കുന്ന റോഡാണ് ഈ അവസ്ഥയിലായത്. ചില ഭാഗങ്ങൾ പൂർണമായി തകർന്നതിനാൽ കാൽനട യാത്രപോലും ദുഷ്കരമാണ്. ജല അഥോറിറ്റി ഓഫീസ്, കേന്ദ്രീയ വിദ്യാലയം തുടങ്ങിയ സ്ഥാപനങ്ങളടക്കം ഈ പാതയോരത്താണുള്ളത്. മീറ്റ്ന പമ്പ് ഹൗസ്, ജല ശുദ്ധീകരണശാല എന്നിവയും ഇവിടെയുണ്ട്. ബസുകൾ ഉൾപ്പെടെയുള്ള വാഹനങ്ങൾ കടന്നുപോകുന്ന പാതയാണ് കുഴിനിറഞ്ഞിരിക്കുന്നത്.

കൊക്കർണി പോലെ കുഴികൾ

വടക്കഞ്ചേരി: കൊക്കർണി പോലെ തകർന്ന്തരിപ്പണമായി മംഗലം- ഗോവിന്ദാപുരം സംസ്ഥാനപാത. മംഗലംപാലത്തിനടുത്ത് യത്തീംഖാനക്കു മുന്നിലെ കിടങ്ങുകൾമുതൽ പൊതുമരാമത്ത് വകുപ്പിന്‍റെ ആലത്തൂർ ഡിവിഷൻ അതിർത്തിവരെയുണ്ട് റോഡുതകർച്ച. മംഗലത്തെ ബൈക്ക്ഷോപ്പിനു മുന്നിലെ ഭീമൻകുഴികളും ഇതിനരികെ പഴയ വില്ലേജ് ഓഫീസിനടുത്തുള്ള കൾവർട്ടിലെ കുഴികളും അപകടകാരികളാണ്. വള്ളിയോട് മിനി ഇൻഡസ്ട്രിയൽ എസ്റ്റേറ്റിനുമുന്നിലും തേവർക്കാട് കൺവൻഷൻ സെന്‍ററിനു മുന്നിലുമുണ്ട് ഭീമൻ കുഴികൾ. ഇതെല്ലാം മറികടന്ന് വള്ളിയോട് സെന്‍ററിലെ വെള്ളക്കെട്ടും പിന്നിട്ട് മുടപ്പല്ലൂർ ടൗണിലെത്തിയാൽ പിന്നെ പറയുകയും വേണ്ട... പാടശേഖരങ്ങളിലെ കൊക്കർണി പോലെയാണ് റോഡ്. ഇവിടെ വെള്ളംനിറഞ്ഞുകിടക്കുമ്പോൾ ഇരുചക്ര വാഹനവുമായി മറിഞ്ഞുവീണ് പരിക്കുപറ്റുന്നവർക്ക് കണക്കില്ലെന്നു സമീപത്തെ കടക്കാർ പറയുന്നു. ഓരോ ദിവസം കഴിയുമ്പോഴും കുഴിയുടെ ആഴവുംപരപ്പും കൂടിവരികയാണ്. കഴിഞ്ഞദിവസം റോഡിൽ പലയിടത്തും ഓട്ടയടക്കൽ നടത്തിയെങ്കിലും അതിനൊന്നും ദീർഘായുസില്ലാതെ ഒലിച്ചുപോയി. മഴപെയ്യുമ്പോൾ വെള്ളംമുഴുവൻ റോഡിലൂടെയാണ് ഒഴുകുന്നത്. വശങ്ങളിലെ ഡ്രെയ്നേജുകളെല്ലാം മണ്ണും മാലിന്യങ്ങളും നിറഞ്ഞു മൂടിക്കിടക്കുകയാണ്.

മാവറ കുരുത്തിച്ചിറതോട് നവീകരണം പൂർത്തിയായി; ഉദ്ഘാടനം 20ന്

തൃത്താല: കപ്പൂർ ഗ്രാമപഞ്ചായത്തിലെ കുമരനല്ലൂർ മാവറ കുരുത്തിച്ചിറ തോടിന്‍റെ നവീകരണ പ്രവൃത്തി പൂർത്തികരിച്ച് തോടിനെ ജലസമൃദ്ധമാക്കി. തൃത്താല മണ്ഡലത്തിന്‍റെ സമഗ്ര വികസനം ലക്ഷ്യമിട്ട് മന്ത്രി എം.ബി. രാജേഷ് ആവിഷ്കരിച്ച സുസ്ഥിര തൃത്താലയുടെ ഭാഗമായി നടപ്പാക്കുന്ന സൂഷ്മ നീർത്തട വികസന പദ്ധതിയിൽ ഉൾപ്പെടുത്തിയാണ് തോട് നവീകരിച്ചത്.17.59 ലക്ഷം രൂപ വിനിയോഗിച്ചാണു നവീകരണം പൂർത്തീകരിച്ചത്. 216 മീറ്റർ പാർശ്വ സംരക്ഷണഭിത്തിയും രണ്ടു ചെക്ക്ഡാമുകളും ഉൾപ്പെട്ടതാണ് പദ്ധതി. ജില്ലാ മണ്ണുസംരക്ഷണ വകുപ്പ് മുഖേനയാണ് പദ്ധതി നടപ്പാക്കിയത്. ഉദ്ഘാടനം 20 ന് ഉച്ചയ്ക്കുശേഷം മൂന്നരയ്ക്ക് മന്ത്രി എം.ബി. രാജേഷ് നിർവഹിക്കും.

പാലക്കാടൻ തനിമ പ്രതിഫലിപ്പിക്കുന്ന പുസ്തകങ്ങളുടെ പ്രദർശനം 19 മുതൽ

പാലക്കാട്: ജില്ല ഇൻഫർമേഷൻ ഓഫീസിന്‍റെ ആഭിമുഖ്യത്തിൽ ജില്ലാ ലൈബ്രറി കൗൺസില്‍, പി.എന്‍. പണിക്കര്‍ ഫൗണ്ടേഷന്‍ എന്നിവയുടെ സഹകരണത്തോടെ സംഘടിപ്പിക്കുന്ന വായനപക്ഷാചരണത്തിന്‍റെ ജില്ലാതല ഉദ്ഘാടനം എ. പ്രഭാകരൻ എംഎൽഎ 19ന് രാവിലെ 11 ന് പുതുപ്പരിയാരത്തുള്ള ‘മധുരം ഗായതി പാലക്കാടന്‍ പുസ്തക കലവറ’യിൽ നിർവഹിക്കും. ഇതിന്‍റെ ഭാഗമായി പാലക്കാടൻ തനിമ പ്രതിഫലിപ്പിക്കുന്ന 1000 ത്തോളം പുസ്തകങ്ങളുടെ പ്രദർശനം 19, 20 തീയതികളിൽ തുടർച്ചയായും ജൂലൈ ഏഴ് വരെ തെരഞ്ഞെടുക്കപ്പെടുന്ന ദിവസങ്ങളിലും നടക്കും. രാവിലെ ഏഴ് മുതൽ വൈകുന്നേരം ഏഴ് വരെയാണ് പ്രദർശനം. പാലക്കാടിന്‍റെ വ്യത്യസ്തമായ ജീവിതപരിസരങ്ങൾ അടയാളപ്പെടുന്ന നാലുകെട്ട്, തലമുറകൾ, നങ്ങ്യേമക്കുട്ടി, അടുക്കളയിൽ നിന്ന് അരങ്ങത്തേക്ക്, ശേഷക്രിയ, ശവുണ്ടി, ഒടിയൻ, തൂമങ്ങൾ, പറയിപെറ്റ പന്തിരുകുലം, കൗണ്ടൻകളം തുടങ്ങി മുപ്പത് സർഗാത്മക പുസ്തകങ്ങളും, പ്രധാന പാലക്കാടൻ കഥാസന്ദർഭങ്ങളുള്ള പുസ്തകങ്ങളും പാലക്കാടിനെ അറിയാൻ കഴിയുന്ന ജീവചരിത്രങ്ങളും ഉൾപ്പെട്ട പുസ്തക ശേഖരണങ്ങൾ പ്രദർശനത്തിലുണ്ട്. പ്രവേശനം സൗജന്യമാണ്. മലമ്പുഴ ബ്ലോക്ക് പഞ്ചായത്ത് പ്രസിഡന്‍റ് വി. ബിജോയ് അധ്യക്ഷനാകുന്ന പരിപാടിയിൽ ജില്ലാ പഞ്ചായത്ത് പ്രസിഡന്‍റ് കെ. ബിനുമോൾ, ജില്ലാ കളക്ടർ ജി. പ്രിയങ്ക എന്നിവർ മുഖ്യാതിഥികളാകും. ഒ.വി വിജയൻ സ്മാരകസമിതി അംഗം രാജേഷ് മേനോൻ ആമുഖപ്രഭാഷണം നടത്തും.

പറന്പിക്കുളത്ത് റോഡ് തകർന്ന് അപകടഭീഷണി

പറന്പിക്കുളം: പറമ്പിക്കുളത്ത് തകർച്ചാഭീഷണിയിലുള്ള റോഡ് ശരിയാക്കണമെന്ന് ആവശ്യം. മഴവെള്ളം ഒഴുകിപോകാൻ സംവിധാനം ഇല്ലാത്തതിനാൽ പറമ്പികുളത്തുനിന്നും പൊള്ളാച്ചിയിലേക്കുള്ള റോഡിൽ ഏഴാമത്തെ കിലോമീറ്ററിൽ മുൻപ് റോഡ് ഇടിഞ്ഞതിന്‍റെ പരിസരത്തായി വീണ്ടും ഒരു ഗർത്തം രൂപപ്പെട്ടിട്ടുണ്ട്. തുടക്കത്തിൽ തന്നെ ബന്ധപ്പെട്ടവർ ഇതിന് പരിഹാരം കണ്ടില്ലെങ്കിൽ പറമ്പിക്കുളത്തുള്ളവർക്ക് പുറംലോകവുമായുള്ള ബന്ധം മാസങ്ങളോളം നിഷേധിക്കപ്പെടും. 2021 ൽ റോഡ് ഇടിഞ്ഞഭാഗം മണ്ണ് നിറച്ച ചാക്ക് വച്ച് അടച്ചുവച്ചിരുന്നു. ഇപ്പോഴും അതേസ്ഥിതി തുടരുകയാണ്. ബസ് ഉൾപ്പെടെ വാഹനങ്ങൾ അപകടഭീഷണിയിലാണ് ഈ സ്ഥലം മറികടക്കുന്നത്. 2021 ൽ മണ്ണിടിച്ചിൽ ഉണ്ടായ കാരണം ആഴ്ചകളോളം ഇതുവഴി ഗതഗതം തടസപ്പെട്ട് പറമ്പിക്കുളം കോളനിവാസികൾ ഒറ്റപ്പെട്ടിരുന്നു. പൊതുമരാമത്ത് വകുപ്പ് റോഡ് വിഭാഗം മേധാവിക്ക് പരാതി നൽകിയിട്ടുണ്ട്.

ഷോളയൂരിൽ കാട്ടാന വീടിന്‍റെ അടുക്കളയും ആട്ടിൻകൂടും തകർത്തു

അഗളി: ഷോളയൂർ മരുതൻചാളയിൽ വീടിനുനേരെ കാട്ടാനയുടെ ആക്രമണം. ചിന്ന പെരുമാൾ-ശിവകാമി ദമ്പതികളുടെ വീടിനോട് ചേർന്നുള്ള അടുക്കളയും ആട്ടിൻകൂടും കാട്ടാന തകർത്തു. ഇന്നലെ പുലർച്ചെ നാലു മണിയോടെയാണ് വൈദ്യുതിവേലി തകർത്ത് ഒറ്റയാൻ വീട്ടിലെത്തിയത്. 11 മാസം പ്രായമുള്ള കൈക്കുഞ്ഞ് അടക്കം അഞ്ചുമക്കളും വീട്ടിലുണ്ടായിരുന്നു. ആനയുടെ പരാക്രമം കേട്ട് പിൻവാതിൽ തുറന്നു അയൽപക്ക വീട്ടിൽ അഭയം തേടുകയായിരുന്നു എന്ന് ദമ്പതികൾ പറഞ്ഞു. പുലർച്ചെയോടെ ആന കാട്ടിലേക്ക് മറഞ്ഞു. സംഭവം അറിഞ്ഞു ഫോറസ്റ്റ് ഡെപ്യൂട്ടി റേഞ്ച് ഓഫീസർ സജീവിന്‍റെ നേതൃത്വത്തിൽ വനംവകുപ്പും ആർആർടി സംഘവും സ്ഥലത്തെത്തി നിരീക്ഷണം നടത്തി. ബ്ലോക്ക് പഞ്ചായത്തംഗം ജി. ഷാജു, ഗ്രാമപഞ്ചായത്തംഗം രുഗ്മിണി, റവന്യൂ ഉദ്യോഗസ്ഥർ തുടങ്ങിയവർ മരുതൻചാളയിലെത്തി ദമ്പതികളെ കണ്ട് ആവലാതികൾ കേട്ടു. നഷ്ടത്തിന് മതിയായ നഷ്ടപരിഹാരം നൽകുമെന്നും പ്രദേശത്ത് നിരീക്ഷണം ശക്തിപ്പെടുത്തുമെന്നും ഫോറസ്റ്റ് അധികൃതർ പറഞ്ഞു.

നന്ദിയോട് ചുഴലിക്കാറ്റിൽ വൻനാശം

വണ്ടിത്താവളം: നന്ദിയോട്ടിലും പരിസരപ്രദേശങ്ങളിലും ഉണ്ടായ ചുഴലിക്കാറ്റിൽ മരങ്ങൾ പൊട്ടി വീണ് വൈദ്യുതി തൂണുകൾ, കമ്പികൾ വീടിന്‍റെ മേൽക്കൂര ഉൾപ്പെടെ സർവനാശം. ഇന്നലെ വൈകുന്നേരം മൂന്നിനാണ് നാടിനെ നടുക്കിയ ചുഴലി വീശിയത്. നന്ദിയോട് സ്കൂളിന് മുന്നിലെ മരംവീണ് മൂന്നു വൈദ്യുതിതൂണുകളും കമ്പികളും പൊട്ടിവീണു. ഈ സ്ഥലത്തു നിർത്തിയിരുന്ന ഒരുബൈക്കും സ്ഥലത്തെ രാമദാസിന്‍റെ വീടിന്‍റെ പിറകിലെ ടോയ്‌ലറ്റും തകർന്നു. നന്ദിയോട് ഹൈസ്കൂൾ വിദ്യാർഥികളെല്ലാം അപകടസമയത്ത് ക്ലാസ് മുറികളിലായിരുന്നതിനാൽ വൻദുരന്തം വഴിമാറി. സ്കൂളിനു മുന്നിൽ മരം വീണതറിഞ്ഞ് രക്ഷിതാക്കൾ ഉടൻ സ്ഥലത്തെത്തി. കാതടപ്പിക്കുന്ന ശബ്ദത്തിലാണ് അതിശക്തമായ കാറ്റ് വീശിയത്. വീടിനകത്ത് മൂന്ന് മിനിറ്റ് ഭയന്നാണ് ജനം കഴിച്ചു കൂട്ടിയത്. നന്ദിയോട് പ്രധാനപാതയിൽ ഓടിയിരുന്ന വാഹനങ്ങളെല്ലാം തുറസായ സ്ഥലത്ത് നിർത്തിയിട്ടു. അപകടം നടന്ന ഉടൻ വൈദ്യുതി നിലച്ചതിനാൽ മറ്റു പ്രശ്നങ്ങൾ ഒഴിവായി. ആദ്യമായാണ് ഇത്രയും ശക്തമായ ചുഴലി വീശിയതെന്ന് നാട്ടുകാർ അറിയിച്ചു . തരകൻള്ളയിൽ അങ്കണവാടിക്കു മുന്നിൽ മരം വീണ് വൈദ്യുതി ലൈൻ പൊട്ടി. ചോഴിയങ്കാട് താപോവരിഷ്ഠാശ്രമത്തിനു മുന്നിൽ മുരിങ്ങമരം വീണ് കമ്പികൾ പൊട്ടിവീണു. നെടുമ്പള്ളത്ത് വീടിന് മീതെ തെങ്ങ് വീണ് മേൽക്കൂര തകർന്നു. സമീപപ്രദേശങ്ങളിൽ പല ഭാഗത്തും ചുഴലി നാശം വിതച്ചു. വണ്ടിത്താവളം ഇലക്ട്രിക്കൽ സെക്ഷൻ ഓഫീസ് ജീവനക്കാരെത്തി നന്ദിയോട് സ്കൂളിനു മുന്നിൽ വീണുകിടന്ന വൈദ്യുതി കന്പികൾനീക്കി ഗതാഗതം പുന:സ്ഥാപിച്ചു. വണ്ടിത്താവളത്തും പരിസരത്തും നിലച്ച വൈദ്യുതി പുനഃസ്ഥാപിക്കാൻ ജീവനക്കാർ ശ്രമം നടത്തിവരുന്നു. ഇന്നു രാവിലെയോടെയേ പൂർണതോതിൽ വൈദ്യുതി പുനഃസ്ഥാപിക്കാൻ കഴിയുകയുള്ളു എന്ന് അധികൃതർ അറിയിച്ചു.

മെഡിക്കൽ ഷോപ്പ് ഉടമയെ ആക്രമിച്ച് പരിക്കേൽപ്പിച്ചു

നെന്മാറ: മെഡിക്കൽ ഷോപ്പിൽ ഭീഷണി മുഴക്കിയെത്തിയ യുവാക്കൾ കടയുടമയെയും ഭാര്യയെയും ആക്രമിച്ച് പരിക്കേൽപ്പിച്ചു. നെന്മാറ ബസ് സ്റ്റാൻഡിനടുത്ത് മെയിൻ റോഡിൽ മെഡിക്കൽ ഷോപ്പ് നടത്തുന്ന അയിനംപാടം കെ.കെ. നഗറിൽ ശാരദാ ഭവനിൽ വിജയകുമാർ (61), ഭാര്യ ഷീബ എന്നിവർക്ക് നേരെയാണ് ആക്രമണം ഉണ്ടായത്. കടയുടെ ചില്ല്കൂട് തകർത്തതിൽ 5000 രൂപയുടെ നാശനഷ്ടം ഉണ്ടായതായി പരാതിയിൽ പറയുന്നു. വിജയകുമാറിന്‍റെ പരാതിയെ തുടർന്ന് വിനീത് കരിമ്പാറ, കണ്ടാലറിയാവുന്ന മറ്റു രണ്ടു പേർക്കുമെതിരെ നെന്മാറ പോലീസ് കേസെടുത്തു. കഴിഞ്ഞദിവസം വൈകുന്നേരം മെഡിക്കൽ ഷോപ്പിന് മുന്നിൽ ഇരുചക്ര വാഹനത്തിൽ എത്തി ഭീഷണിമുഴക്കിയ പ്രതികൾ വാഗ്വാദത്തിൽ ഏർപ്പെടുകയും, തുടർന്ന് കടയിൽ കയറി മുൻവശത്തെ ഇരുഭാഗത്തുമുള്ള ചില്ലുകൂടുകൾ തകർക്കുകയും, മരുന്നു കുപ്പി ഉപയോഗിച്ച് കടയുടമയുടെ തലയ്ക്ക് അടിച്ച് പരിക്കേൽപ്പിക്കാൻ ശ്രമിക്കുകയും ചെയ്തു. ഇത് തടഞ്ഞ വിജയകുമാറിനെ തകർന്നുവീണ ചില്ല് ഉപയോഗിച്ച് എറിഞ്ഞതിനെ തുടർന്ന് നെഞ്ചിലും കയ്യിലും ഭാര്യയുടെ കാലിലും പരിക്കുപറ്റി. തുടർന്ന് ഇരുവരും നെന്മാറ സാമൂഹിക ആരോഗ്യകേന്ദ്രത്തിൽ ചികിത്സ തേടി. ചികിത്സ കഴിഞ്ഞ് തിരികെ വന്ന ഇരുവരെയും കൊല്ലുമെന്ന് ഭീഷണിപ്പെടുത്തുകയും ചെയ്തതിന് നെന്മാറ പോലീസ് കേസെടുത്തു. ഗ്രേഡ് സബ് ഇൻസ്പെക്ടർ കെ. മണികണ്ഠൻ, പി. രവീന്ദ്രൻ, സീനിയർ സിവിൽ പോലീസ് ഓഫീസർ പ്രദീപ്കുമാർ എന്നിവരുടെ നേതൃത്വത്തിലാണ് അന്വേഷണം നടത്തി പ്രതികൾക്കെതിരെ കേസ് രജിസ്റ്റർ ചെയ്തത്.

വീടു തകർന്നുവീണ് വയോധിക മരിച്ച സംഭവം: തെങ്കര പഞ്ചായത്ത് സെക്രട്ടറിയെ യുഡിഎഫ് ഉപരോധിച്ചു

മണ്ണാർക്കാട്: തെങ്കരയിൽ വീടു തകർന്നുവീണ് വയോധിക മരിച്ച സംഭവത്തിൽ ലൈഫ് ഭവന പദ്ധതിയിൽ വീട് നൽകുന്നതിൽ വീഴ്ച വരുത്തിയ തെങ്കര പഞ്ചായത്ത് സെക്രട്ടറിയെ യുഡിഎഫ് ഉപരോധിച്ചു. യുഡിഎഫ് തെങ്കര പഞ്ചായത്ത് കമ്മിറ്റിയുടെ നേതൃത്വത്തിലാണ് പഞ്ചായത്ത് സെക്രട്ടറിയെ ഉപരോധിച്ചത്. തെങ്കര പഞ്ചായത്തിലെ ലൈഫ് ഭവന പദ്ധതിയില്‍ ഒന്നാമതായി ഇടം പിടിച്ച 80 വയസുള്ള ഫാത്തിമബീവി വീട് ഇടിഞ്ഞു വീണ് മരണപ്പെടുന്ന സാഹചര്യമുണ്ടായത് ഉദ്യോഗസ്ഥരുടെ അനാസ്ഥയാണെന്ന് ആരോപിച്ചായിരുന്നു യുഡിഎഫ് ഉപരോധം. 2019 ല്‍ ലൈഫ് ഭവന പദ്ധതി ലിസ്റ്റില്‍ ഇടം പിടിച്ചവര്‍ക്ക് പോലും ഇതു വരെയായി പണം നല്‍കിയിട്ടില്ല. പഞ്ചായത്തിലെ ലൈഫ് ഭവന പദ്ധതി ഗുണഭോക്താക്കളുടെ വീടെന്ന സ്വപ്നം എല്‍ഡിഎഫ് ഭരണ സമിതി അട്ടിമറിച്ചിരിക്കുകയാണെന്നും യുഡിഎഫ് ആരോപിച്ചു. അടിയന്തരമായി ലൈഫ് ഗുണഭോക്താക്കള്‍ക്ക് ഒന്നാം ഗഡു തുക നല്‍കണമെന്നും നേതാക്കൾ ആവശ്യപ്പെട്ടു. യുഡിഎഫ് ചെയര്‍മാന്‍ ടി.കെ. ഫൈസല്‍, കണ്‍വീനര്‍ ആറ്റക്കര ഹരിദാസ്, ബ്ലോക്ക് കോണ്‍ഗ്രസ് വൈസ് പ്രസിഡന്‍റ് കുരിക്കള്‍ സെയ്ത്, ഗിരീഷ് ഗുപ്ത, അബു കാവുങ്ങല്‍, വട്ടോടി വേണുഗോപാല്‍, കെ.പി. ജഹീഫ്, സി.പി. മുഹമ്മദ്അലി, റഷീദ് കോല്‍പ്പാടം, ടി.കെ. സീനത്ത്, രാജിമോള്‍, അന്‍വര്‍ മണലടി എന്നിവര്‍ നേതൃത്വം നല്‍കി.

കോട്ടായി പാർട്ടി ഓഫീസ് തർക്കം: ആർഡിഒ വിളിച്ച യോഗത്തിലും തീരുമാനമായില്ല

പാലക്കാട്: കോട്ടായി കോണ്‍ഗ്രസ് മണ്ഡലം കമ്മിറ്റി ഓഫീസിനെ ചൊല്ലിയുള്ള തർക്കത്തിൽ ആർഡിഒ വിളിച്ചുചേർത്ത യോഗത്തിൽ തീരുമാനമായില്ല. കോണ്‍ഗ്രസ്, സിപിഎം നേതാക്കളുടെയും കെട്ടിട ഉടമയുടെയും വാദം ആർഡിഒ കേട്ടു. തുടർപരിശോധനകൾക്ക് ശേഷം തീരുമാനം പിന്നീട് സ്വീകരിക്കുമെന്ന് ആർഡിഒ വ്യക്തമാക്കി. കോട്ടായി കോണ്‍ഗ്രസ് മണ്ഡലം കമ്മിറ്റി പ്രസിഡന്‍റായിരുന്ന കെ. മോഹൻകുമാർ പാർട്ടിവിട്ട് സിപിഎമ്മിൽ ചേർന്നതിന് പിന്നാലെ കഴിഞ്ഞദിവസമാണ് കോട്ടായിയിലെ കോണ്‍ഗ്രസിന്‍റെ മണ്ഡലം കമ്മിറ്റി ഓഫീസിൽ അവകാശവാദവുമായി സിപിഎം പ്രവർത്തകർക്കൊപ്പം എത്തിയത്. കെട്ടിട ഉടമയുമായി ചേർന്ന് തയാറാക്കിയ വാടക കരാർ കാണിച്ചായിരുന്നു കെ.മോഹൻകുമാറിന്‍റെ നീക്കം. കോണ്‍ഗ്രസ് പ്രവർത്തകർ ഇത് തടഞ്ഞതോടെ സിപിഎം, കോണ്‍ഗ്രസ് പ്രവർത്തകർ തമ്മിൽ സംഘർഷമുണ്ടായി. പോലീസ് ഇടപെട്ട് പാർട്ടി ഓഫീസ് പൂട്ടിയെങ്കിലും സിപിഎം പാർട്ടി ഓഫീസ് കൈയടക്കി കൊടി സ്ഥാപിച്ചു. ഇന്നലെ രാവിലെ ഡിസിസി അധ്യക്ഷന്‍റെ നേതൃത്വത്തിൽ കോണ്‍ഗ്രസ് പ്രവർത്തകർ പാർട്ടി ഓഫീസിൽ എത്തി കൊടിയുയർത്തി. പിന്നാലെ വിഷയത്തിൽ നിലപാട് അറിയിച്ച് സ്ഥലം ഉടമയും രംഗത്തെത്തി. മോഹൻകുമാർ കോണ്‍ഗ്രസ് മണ്ഡലം പ്രസിഡന്‍റ് ആണെന്ന് കരുതിയാണ് കെട്ടിടം നൽകിയതെന്നും രാജിവച്ച് മാറിയ കാര്യം അറിയില്ലെന്നുമായിരുന്നു കെട്ടിട ഉടമയുടെ നിലപാട്. പാർട്ടി ഓഫീസുമായി ബന്ധപ്പെട്ട തർക്കം പരിഹരിക്കാൻ ആർഡിഒ വിളിച്ചുചേർത്ത യോഗത്തിലും കെട്ടിട ഉടമ നിലപാട് അറിയിച്ചു. യോഗത്തിൽ സിപിഎം, കോണ്‍ഗ്രസ് നേതാക്കളുടെ വാദം ആർഡിഒ കേട്ടെങ്കിലും വിഷയത്തിൽ അന്തിമ തീരുമാനമായില്ല. തുടർപരിശോധനകൾ പൂർത്തീകരിച്ച് തീരുമാനം അറിയിക്കുമെന്നാണ് പാലക്കാട് ആർഡിഒ ഇരു വിഭാഗങ്ങളെയും കെട്ടിട ഉടമയെയും അറിയിച്ചത്. പ്രദേശത്തെ ക്രമസമാധാന പ്രശ്നങ്ങൾ പരിഗണിച്ചുകൊണ്ടായിരിക്കും തീരുമാനം എടുക്കുകയെന്നും ആർഡിഒ പാർട്ടി പ്രതിനിധികളെ അറിയിച്ചു. ചർച്ചയിൽ ധാരണയാവാത്തതിനാൽ വിഷയത്തിൽ നിയമനടപടിയുമായി നീങ്ങാനാണ് ഇരു പാർട്ടികളുടെയും തീരുമാനം.

വടക്കഞ്ചേരി പഞ്ചായത്തിൽ 11 പുതിയ നെല്ലിനങ്ങൾ

വടക്കഞ്ചേരി: പഞ്ചായത്തിൽ പതിനൊന്നിനം പുതിയ നെല്ലിനങ്ങളും മറ്റു നിരവധി ജീവജാലങ്ങളേയും ഒട്ടേറെ പുതിയ പക്ഷിമൃഗാദികളേയും കണ്ടെത്തി. ഒട്ടനവധി അലങ്കാര ചെടികൾ, വിദേശികളായ ചെടികൾ, വിദേശ പഴവർഗങ്ങൾ തുടങ്ങിയവയാണ് കണ്ടെത്തലുകളിലെ പ്രധാനമായത്. പെട്ടെന്ന് വ്യാപകമാകുന്ന വേനൽപച്ച എന്നറിയപ്പെടുന്ന മുടിയൻപച്ച കാർഷിക മേഖലക്ക് വലിയ ഭീഷണിയാകുമെന്ന വിലയിരുത്തലുമുണ്ട്. രണ്ടാംഘട്ട ജനകീയ ജൈവ വൈവിധ്യ രജിസ്റ്റർ തയ്യാറാക്കുന്നതിന്‍റെ ഭാഗമായി നടത്തിയ സർവേകളിലാണ് ഇത്രയേറെ ജൈവ വൈവിധ്യങ്ങളുടെ സാനിധ്യമുള്ളതായി കണ്ടെത്തിയിട്ടുള്ളത്. ഭദ്ര, സുജാത, പൂർണിമ, കാർത്തിക, ഗുജ്റാൾ, ഡാബർശാല, കല്യാണി വയലറ്റ് തുടങ്ങി നെല്ലിനങ്ങൾ തന്നെയുണ്ട് നിരവധിയെന്ന് സർവെക്ക് നേതൃത്വം നൽകിയ ബിഎംസി കൺവീനർ കെ.എം. രാജു പറഞ്ഞു. കാർഷികവിളകൾ, പഴവർഗങ്ങൾ, കാലിത്തീറ്റ ചെടികൾ, കളചെടികൾ, കീടങ്ങൾ, മണ്ണിനങ്ങൾ, ഔഷധസസ്യങ്ങൾ, അലങ്കാരസസ്യങ്ങൾ, മത്സ്യ വൈവിധ്യം തുടങ്ങി കഴിഞ്ഞ ഏതാനും വർഷങ്ങൾക്കിടെ ഗുണവും ദോഷവുമാകുന്ന സ്വദേശിയും വിദേശിയുമായ ജീവജാലങ്ങളാണ് നാട്ടിൽ കടന്നെത്തിയിട്ടുള്ളത്. കാർഷിക മേഖലക്ക് വലിയ തോതിൽ ദോഷകരമായി മാറുന്ന വേനൽപച്ച പ്പോലെയുള്ള ചെടികൾ വ്യാപകമാകുന്നത് കർഷകർപോലും ഭയപ്പാടോടെയാണ് കാണുന്നത്. തരിശിടുന്ന സ്ഥലങ്ങളിലും തോട്ടങ്ങളിലും പാതയോരത്തുമെല്ലാം വേനൽ പച്ച വ്യാപിച്ചിരിക്കുകയാണ്. നിലത്ത് വള്ളിപടർപ്പുപോലെയുള്ള ചെടിയാണിത്. മഞ്ഞനിറത്തിലുള്ള ചെറിയ പൂവാണ് ഉണ്ടാവുക. വടക്കഞ്ചേരി മേഖലയിൽ മാത്രമല്ല എല്ലാ പ്രദേശത്തും വേനൽപച്ച വ്യാപകമായിട്ടുണ്ട്. കവട്ട, പന്നൽചെടി, സിങ്കപ്പൂർ ഡെയ്സി തുടങ്ങിയ കള ചെടികളുടെ വ്യാപനവുമുണ്ട്. 27 നാടൻ നെല്ലിനങ്ങളും 17 സങ്കരയിനം നെല്ലിനങ്ങളുമാണ് 2009ൽ നടന്ന ഒന്നാംഘട്ട സർവേയിൽ കണ്ടെത്തിയിരുന്നത്. പുതിയ സർവേയിലാണ് പതിനൊന്നിനം നെല്ലുകൂടി വന്നിട്ടുള്ളത്. പഞ്ചായത്തിലെ 20 വാർഡ് പ്രദേശങ്ങളിലും സർവേ നടപടികൾ പൂർത്തിയാക്കി. സമാഹരിച്ച വിവരങ്ങളുടെയും പടങ്ങളുടെയും അവലോകനവും രജിസ്റ്റർ തയാറാക്കുന്നതിന്‍റെ അന്തിമ നടപടികളുമാണ് ഇപ്പോൾ നടക്കുന്നതെന്ന് രാജു പറഞ്ഞു. ജീവജാലങ്ങളുടെ ശാസ്ത്രീയ നാമം, പുതിയ ജന്തുക്കൾ, സസ്യങ്ങൾ, അവയുടെ ആവാസ വ്യവസ്ഥ, നെല്ലിനങ്ങൾ കൃഷി ചെയ്യുന്ന പാടങ്ങൾ, കളകൾ തുടങ്ങിയവ കൂടി ഉൾപ്പെടുത്തിയാണ് രണ്ടാംഘട്ട ജനകീയ ജൈവ വൈവിധ്യ രജിസ്റ്റർ തയ്യാറാക്കുന്നത്. കാലാവസ്ഥാവ്യതിയാനം, അമിതമായുള്ള രാസ കീടനാശിനി പ്രയോഗവും രാസവള പ്രയോഗവും ഭൂതലത്തിൽ സ്വാഭാവികജീവികൾ ഇല്ലാതാകാൻ കാരണമാകുന്നുണ്ടെന്ന കണ്ടെത്തലുകളുമുണ്ട്. അഭിജിത്തായിരുന്നു ടീം ലീഡർ. എ. സീനത്ത്, സി.ഗിരിജ എന്നിവർ വൈസ് ലീഡർമാരും. പഞ്ചായത്ത് പ്രസിഡന്‍റ് ലിസി സുരേഷ്, വൈസ് പ്രസിഡന്‍റ് ഉസൈനാർ, പഞ്ചായത്ത് സെക്രട്ടറിയായിരുന്ന കെ. രാധിക, അസിസ്റ്റന്‍റ് സെക്രട്ടറി അനീഷ് ബാബു, മെംബർമാരായ രശ്മി ഷാജി, കെ. പി. ഫൗസിയ, കെഎസ്ബിബി ജില്ലാ കോ -ഓർഡിനേറ്റർ വി. സിനിമോൾ, ബിഎംസി കൺവീനർ കെ.എം. രാജു, അംഗങ്ങളായ അപ്പുണ്ണി നായർ, അംബിക ടീച്ചർ തുടങ്ങിയവരുടെ മേൽനോട്ടത്തിലായിരുന്നു 35 അംഗ സർവേ ടീമിന്‍റെ പ്രവർത്തനം.പഞ്ചായത്തിന്‍റെ അംഗീകാരത്തോടെ പുതിയ കണ്ടെത്തലുകൾ സംബന്ധിച്ച റിപ്പോർട്ട് സംസ്ഥാന ജൈവ വൈവിധ്യ ബോർഡിന് കൈമാറും.

കാറും ബൈക്കും കൂട്ടിയിടിച്ച് വീട്ടമ്മയ്ക്കു ദാരുണാന്ത്യം

കല്ലടിക്കോട്: പാലക്കാട് - കോഴിക്കോട് ദേശീയപാതയിൽ കല്ലടിക്കോട് മേലേചുങ്കത്തു കാറും ബൈക്കും കൂട്ടിയിടിച്ച് പരിക്കേറ്റ ബൈക്ക് യാത്രക്കാരി മരിച്ചു. കല്ലടിക്കോട് ചുങ്കം കളപ്പാറ സ്വദേശി ലിസി (55)യാണ് മരിച്ചത്. ബൈക്ക് ഓടിച്ചിരുന്ന ലിസിയുടെ മകൻ ടോണി തോമസ്, അപകടത്തെതുടർന്ന് കാറിലിടിച്ചുമറിഞ്ഞ ഓട്ടോറിക്ഷയുടെ ഡ്രൈവർ കണ്ണാടി സ്വദേശി ബാബു എന്നിവർക്കു പരിക്കേറ്റു. ഇന്നലെ രാവിലെ കല്ലടിക്കോട് ചുങ്കത്തുവച്ചായിരുന്നു അപകടം. ദേശീയപാതയിലേക്കു കാറിനെ മറികടന്നു കയറിയ ബൈക്കിൽ കാർ തട്ടുകയായിരുന്നു. റോഡിലേക്കു തെറിച്ചുവീണ ലിസിയുടെ ശരീരത്തിലൂടെ എതിർദിശയിൽനിന്നു വന്ന പിക്കപ്പ് വാൻ കയറിയിറങ്ങി. അപകടത്തെതുടർന്നു നിയന്ത്രണം വിട്ട കാറിൽ ഓട്ടോയും ഇടിച്ചു. ഗുരുതരമായി പരിക്കേറ്റ ലിസിയെ പാലക്കാട് ജില്ലാ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ സാധിച്ചില്ല. ലിസിയുടെ ഭർത്താവ് കാൻസർ വന്നു രണ്ടുമാസംമുമ്പ് മരിച്ചിരുന്നു. പാലക്കാട് ജോബീസ് മാളിൽ തുന്നൽജോലി ചെയ്യുകയായിരുന്നു ഇവർ. ജോലിസ്ഥലത്തേക്കു പോകുമ്പോഴാണ് അപകടമുണ്ടായത്. മക്കൾ: ഡെന്നി, ടോണി. മൃതദേഹം പോസ്റ്റ്മോർട്ടത്തിനുശേഷം ഇന്നു രാവിലെ വീട്ടിലെത്തിക്കും. സംസ്കാരം ഇന്ന് ഉച്ചയ്ക്ക് ഒരുമണിക്ക് കല്ലടിക്കോട് സാൽവേഷൻ ആർമി സെമിത്തേരിയിൽ.

കൊച്ചി പാലം തകർന്നുവീണാലും ഇല്ലെങ്കിലും പൊളിച്ചുനീക്കും

ഷൊർണൂർ: ഈ കാലവർഷത്തെ അതിജീവിച്ചാലും ഇല്ലെങ്കിലും പഴയ കൊച്ചി പാലം ഓർമയാവും. ഒന്നേകാൽ നൂറ്റാണ്ട് പഴക്കം വരുന്ന ഈ ചരിത്ര ശേഷിപ്പിന് ഇനി ആയുസില്ല. മഴക്കാലം കഴിഞ്ഞാലുടൻ അവശേഷിക്കുന്ന പാലം ഭാഗങ്ങൾ പൊളിച്ചു നീക്കാൻ നടപടികളായി. പുഴയിലെ ശക്തമായ കുത്തൊഴുക്കിൽ പാലത്തിന്‍റെ ശിഷ്ടഭാഗങ്ങൾ കൂടി ഒലിച്ചുപോകാനുള്ള സാധ്യതയും അധികൃതർ തള്ളിക്കളയുന്നില്ല. തൃശൂർ ജില്ലയിലെ ചെറുതുരുത്തിയെയും ഷൊർണൂരിനെയെയും ബന്ധിപ്പിച്ച് നിളാ നദിക്ക് കുറുകെ നിർമിച്ച ആദ്യത്തെ പാലമായ പഴയ കൊച്ചിപാലം പൊളിച്ചു നീക്കുന്നതിന് നേരത്തെ സർക്കാർ ഉത്തരവിട്ടിരുന്നു. കേരളപ്പിറവിക്ക് മുമ്പ് പഴയ മദിരാശി മലബാറിനെയും തിരുവിതാംകൂർ കൊച്ചിയെയും ഏകോപിപ്പിച്ചാണ് പാലം നിർമിച്ചത്. ഒന്നേകാൽ നൂറ്റാണ്ടിന്‍റെ ചരിത്രം ഈ പാലത്തിന് പറയാനുണ്ട്. തൃപ്പൂണിത്തുറ ശ്രീപൂർണത്രയീശ ക്ഷേത്രത്തിലെ സ്വർണത്തിൽ തീർത്ത 14 നെറ്റിപ്പട്ടങ്ങളും പൊതുഖജനാവിലെ പണവുമായി 84 ലക്ഷം രൂപ ചെലവാക്കിയാണ് കൊച്ചി രാജാവ് ശ്രീ രാമവർമ തമ്പുരാൻ 1902 ൽ പാലം പണി കഴിപ്പിച്ചത്. 1902 ജൂൺ 2ന് ആദ്യത്തെ ചരക്ക് ട്രെയിനും ജൂലൈ 16ന് ആദ്യത്തെ യാത്രാവണ്ടിയും മലബാറിൽ നിന്ന് തിരുവിതാംകൂറിലേക്ക് ഈ പാലത്തിലൂടെ സർവീസ് നടത്തി. കാലാന്തരത്തിൽ അറ്റകുറ്റപ്പണികളുടെ അപര്യാപ്തത മൂലം പാലത്തിനു ബലക്ഷയം വന്നു തുടങ്ങി. തൊട്ടടുത്ത് പുതിയ പാലം 2003 ജനുവരി 25ന് തുറന്നു. പാലത്തിന്‍റെ രണ്ടു സ്പാനുകൾ 2011 നവംബർ 9ന് നിലംപൊത്തി. ഏറ്റവുമൊടുവിലാണ് പാലം പൊളിച്ചുമാറ്റാൻ സർക്കാർ ഉത്തരവിട്ടത്. പഴയ കൊച്ചിപ്പാലം സംരക്ഷണമാവശ്യപ്പെട്ട് നിരവധി സാമൂഹിക പ്രവർത്തകർ മുന്നോട്ട് വന്നെങ്കിലും ഫലമുണ്ടായില്ല. അതേസമയം ശക്തമായ കാലവർഷത്തിൽ ഭാരതപ്പുഴ നിറഞ്ഞൊഴുകുകയാണ്. ഇതിന്‍റെ ശക്തിയിൽ പാലത്തിന്‍റെ അവശേഷിക്കുന്ന ഭാഗങ്ങളും തകർന്നു പുഴയിൽ വീഴാനുള്ള സാധ്യതയും നിലനിൽക്കുന്നുണ്ട്.

മംഗലംഡാമിന്‍റെ ഷട്ടറുകൾ തുറന്നു

മംഗലംഡാം: വൃഷ്ടിപ്രദേശത്തെ കനത്ത മഴയിൽ ജലനിരപ്പ് ഉയർന്നതിനെ തുടർന്ന് മംഗലംഡാമിന്‍റെ ആറ് ഷട്ടറുകളും തുറന്നു. ഇന്നലെ രാവിലെ 11 നാണ് മുഴുവൻ ഷട്ടറുകളും അഞ്ച് സെന്‍റീമീറ്റർ ഉയരത്തിൽ തുറന്നത്. ഡാമിന്‍റെ ഓറഞ്ച് അലർട്ടായ 76.95 മീറ്ററിൽ ജലനിരപ്പെത്തിയപ്പോൾ മുന്നറിയിപ്പുകൾ നൽകി ഷട്ടറുകൾ തുറക്കുകയായിരുന്നു. 77.28 മീറ്ററാണ് ഡാമിന്‍റെ റെഡ് അലർട്ട് വരുന്ന ജലനിരപ്പ് . 77.88 മീറ്ററാണ് ഡാമിന്‍റെ പരമാവധി സംഭരണ ശേഷി. സെക്കൻഡിൽ 30.2 മീറ്റർക്യൂബ് വെള്ളം വൃഷ്ടി പ്രദേശങ്ങളിൽ നിന്നും ഇപ്പോൾ റിസർവോയറിലെത്തുന്നുണ്ട്. കടപ്പാറയിൽ നിന്നുള്ള വെള്ളം ഒഴുകിയെത്തുന്ന രണ്ടാം പുഴ, ഓടംതോട്, ചൂരുപ്പാറ തുടങ്ങിയ പ്രദേശങ്ങളിൽ നിന്നാണ് നീരൊഴുക്ക് കൂടുതലുള്ളത്. എന്നാൽ മഴ തുടർന്നാൽ ജലനിരപ്പ് ക്രമീകരിക്കുന്നതിന്‍റെ ഭാഗമായി ഷട്ടറുകൾ കൂടുതൽ ഉയർത്തുമെന്ന് ഇറിഗേഷൻ അസി. എക്സിക്യൂട്ടീവ് എൻജിനീയർ ടി.പി. ശുഭ, മംഗലംഡാം എഇ ലെസ്ലി വർഗീസ് എന്നിവർ പറഞ്ഞു. മംഗലം പുഴയുടെ തീരത്തു താമസിക്കുന്നവരും കൃഷിയിടങ്ങളിലുള്ളവരും ജാഗ്രത പാലിക്കണമെന്നും അധികൃതർ അറിയിച്ചു. 44 മില്ലിമീറ്റർ മഴയാണ് ഇന്നലെ രാവിലെ മംഗലംഡാമിൽ രേഖപ്പെടുത്തിയത്. വണ്ടാഴി പഞ്ചായത്ത് പ്രസിഡന്‍റ് കെ.എൽ. രമേഷ്, ഡാം പോലീസ് തുടങ്ങിയവരും ഷട്ടറുകൾ തുറക്കുമ്പോൾ സ്ഥലത്തെത്തിയിരുന്നു. വെള്ളം നിറഞ്ഞ് മംഗലംഡാമിന്‍റെ ഷട്ടറുകൾ ജൂൺ മാസം പകുതിയിൽ തുറക്കേണ്ടി വരുന്നത് ഇത് രണ്ടാം തവണയാണ്. ഒന്നാം പ്രളയവർഷമെന്ന് വിശേഷിപ്പിച്ച 2018 ലാണ് ഇതിനുമുമ്പ് വെള്ളം നിറഞ്ഞ് ജൂൺ 14ന് ഷട്ടറുകൾ തുറന്നത്. എന്നാൽ രണ്ടാം പ്രളയവർഷമായ 2019 ൽ ഓഗസ്റ്റ് എട്ടിനാണ് ഷട്ടറുകൾ തുറന്നത്. മിക്കവാറും വർഷങ്ങളിലും ജൂലൈ മാസത്തിലാണ് ഷട്ടറുകൾ തുറന്നിട്ടുള്ളത്. കഴിഞ്ഞവർഷവും ജൂലൈ 15 നാണ് മുഴുവൻ ഷട്ടറുകളും തുറന്നത്.

നെല്ലിയാമ്പതിയിൽ മരംവീണ് ഗതാഗതം തടസപ്പെട്ടു

നെന്മാറ: നെല്ലിയാമ്പതി ഗവ. ഓറഞ്ച് ഫാം വളപ്പിലെ മരം കടപുഴകി റോഡിൽ വീണു. മൂന്നു മണിക്കൂർ പുലയംപാറ- കൈകാട്ടി റൂട്ടിൽ ഗതാഗതം തടസപ്പെട്ടു. ഫാമിനോട് ചേർന്ന് വില്ലേജ് ഓഫീസ് പ്രവർത്തിക്കുന്ന കെട്ടിടത്തിന് സമീപത്തെ വളവിലാണ് മരം കടപുഴകിവീണത്. വന്യമൃഗങ്ങളിൽ നിന്ന് ഫാമിലെ കൃഷി സംരക്ഷിക്കാൻ സ്ഥാപിച്ച സൗരോർജവേലിക്ക് മുകളിലൂടെയാണ് മരം റോഡിലേക്ക് വീണത്. വീടുകൾക്ക് സമീപം നിന്നിരുന്ന മരം റോഡിലേക്ക് മറിഞ്ഞുവീണതിനാൽ വീടുകളിൽ ഉണ്ടായിരുന്നവർ അത്യാഹിതത്തിൽ നിന്ന് രക്ഷപ്പെട്ടു. ഗവ. ഓറഞ്ച് ഫാം തൊഴിലാളികളായ പി.ഒ. ജോസഫ്, മുരുകൻ, ശിവൻ, ഫാമിലെ ഉദ്യോഗസ്ഥരായ നാരായണൻകുട്ടി, വസീം എന്നിവരും പുലയംപാറയിലെ ടാക്സി ഡ്രൈവർമാർ, പ്രദേശവാസികൾ വിനോദസഞ്ചാരികൾ എന്നിവർ ചേർന്ന് മരംമുറിച്ചു വലിയ തടികൾ ഉരുട്ടി റോഡരികിലേക്ക് മാറ്റി. മരംവീണ് ഗതാഗതതടസം നേരിട്ട വിവരം അറിഞ്ഞ നെല്ലിയാമ്പതി ഫോറസ്റ്റ് സ്റ്റേഷൻ ഡെപ്യൂട്ടി റേഞ്ച് ഓഫീസർ ജയേന്ദ്രൻ, ബിഎഫ്ഒമാരായ വി. അഭിലാഷ്, എസ്. പ്രമോദ്, സിവിൽ പോലീസ് ഓഫീസറായ എസ്. സുനിൽ എന്നിവരും ഗതാഗതം നിയന്ത്രിച്ചു.

നെല്ലിയാമ്പതിയിൽ കാടുകയറ്റിയ കാട്ടാന വീണ്ടുമെത്തി

നെല്ലിയാമ്പതി: സീതാർഗുണ്ട് പോബ്സ് എസ്റ്റേറ്റിൽ പാടികൾക്ക് സമീപം വീണ്ടും കാട്ടാന എത്തി. അമ്പലപാടിക്ക് സമീപം രങ്കസാമിയുടെ വീടിനു പിന്നിൽ ഇന്നലെ രാത്രി മലമുകളിൽ നിന്ന് ഇറങ്ങി വന്ന കാട്ടുകൊമ്പൻ തൊഴിലാളികൾ താമസിക്കുന്ന പാടികൾക്ക് സമീപം എത്തി നിലയുറപ്പിച്ചു. പ്രദേശത്ത് ആനയെത്തിയതു രങ്കസ്വാമിയാണ് കണ്ടത്. തുടർന്ന് അയൽക്കാരും നായ്ക്കളും ശബ്ദം ഉണ്ടാക്കിയതിനെ തുടർന്ന് കാട്ടാന സമീപത്തെ കാപ്പിത്തോട്ടത്തിൽ കൂടി മെയിൻ റോഡിൽ ഇറങ്ങി. ഇന്നലെ രാവിലെ 6.15 ന് രാത്രിഡ്യൂട്ടി കഴിഞ്ഞ് വരുന്ന ഗേറ്റ് വാച്ചർ വിജയനും വൈദ്യുതി ഫ്യൂസ് കെട്ടാൻ പോയി വരുന്ന എസ്റ്റേറ്റ് ഇലക്ട്രീഷൻ ജോൺസൻ എന്നിവർ കുതിരപാടി വളവിൽ ആനയ്ക്ക് മുമ്പിൽപെട്ടു. ബൈക്ക് ഉപേക്ഷിച്ച് ഇരുവരും ഓടി രക്ഷപ്പെടുകയായിരുന്നു. ആന ഗേറ്റിന് സമീപംവരെ വന്നെങ്കിലും പിന്നീട് പിന്തിരിഞ്ഞ് കാപ്പിത്തോട്ടം വഴി വെട്ടിയാർ കാട്ടിലേക്ക് കയറിപ്പോയതായി തൊഴിലാളികൾ പറഞ്ഞു. കഴിഞ്ഞ കുറച്ചു ദിവസങ്ങളായി നെല്ലിയാമ്പതി മേഖലയിൽ എത്തിയ കാട്ടുകൊമ്പനെ ഉൾവനത്തിലേക്ക് കയറ്റിവിടാൻ കൊല്ലങ്കോട് റേഞ്ച് ഓഫീസറുടെ നേതൃത്വത്തിൽ ആർആർടി സംഘം ശ്രമം നടത്തിയിരുന്നു. പകൽ പടക്കംപൊട്ടിച്ചും മറ്റും ആനയെ അകറ്റിയെങ്കിലും രാത്രിയോടെ ആന വീണ്ടും വരുന്നത് എസ്റ്റേറ്റ് തൊഴിലാളികൾക്ക് ഭീഷണിയായി മാറി. കാപ്പി തോട്ടത്തിനുള്ളിലും എസ്റ്റേറ്റ് പാടികൾക്കും സമീപമുള്ള പ്ലാവുകളിലെ ചക്ക തേടിയാണ് സ്ഥിരമായി നെല്ലിയാമ്പതിയിൽ മേഖലയിൽ കാണാത്ത അക്രമാസക്തനായ കാട്ടാന എത്തുന്നതെന്ന് തൊഴിലാളികളും വനം വാച്ചർമാരും പറഞ്ഞു. തമിഴ്നാട് വനം ജീവനക്കാർ സേത്തുമട ഭാഗത്തു നിന്ന് കാടുകയറ്റിയ ആനയാണെന്ന് സംശയിക്കുന്നതായി വനം വാച്ചർമാർ പറയുന്നു. മഴക്കാലമായതിനാൽ പ്ലാവുകളിൽ കയറി ചക്ക വെട്ടിമാറ്റി കാട്ടാന ഭീഷണി ഒഴിവാക്കാനും കഴിയാത്ത സ്ഥിതിയാണ്.

കരിമ്പ പാലളം അങ്കണവാടിയിൽ പാമ്പിനെ കണ്ടെത്തി

കല്ലടിക്കോട്: കരിമ്പ പാലളം ഭാഗത്തുള്ള അങ്കണവാടിയിലെ മേൽക്കൂരയിൽ പാമ്പിനെ കണ്ടെത്തി. അങ്കണവാടി അധ്യാപികയും സഹായിയുമാണ് കണ്ടത്. നാട്ടുകാരെ അറിയിച്ചതോടെ നാട്ടുകാരെത്തി പാമ്പിനെ അങ്കണവാടിയുടെ ഓടിനു മുകളിലൂടെ പുറത്തേക്ക് തള്ളിയിട്ടു. സമീപത്തെ കാട്ടിലേക്ക് പോയതായി നാട്ടുകാർ പറഞ്ഞു. വിഷമുള്ള പാമ്പാണെന്നാണ് നാട്ടുകാർ പറയുന്നത്. അല്ലെന്നും അഭിപ്രായം ഉണ്ട്. ഇന്നലെ വൈകുന്നേരം നാലുമണിയോടെയാണ് സംഭവം. അവധിയായിരുന്നതിനാൽ കുട്ടികൾ ഉണ്ടായിരുന്നില്ല. അധ്യാപികയും സഹായിയുമാണ് ഉണ്ടായിരുന്നത്. ജോലികഴിഞ്ഞു വീട്ടിലേക്ക് മടങ്ങാനുള്ള തയ്യറെടുപ്പിനിടയിൽ കുട്ടികൾ ഇരിക്കാറുള്ള ഹാളിന്‍റെ മേൽക്കൂരയിൽ പട്ടികകൾക്കിടയിലായി പാമ്പിനെ കാണുകയായിരുന്നു. ഉടനെ അടുത്തുള്ള ആളുകളെ വിവരം അറിയിക്കുകയാണ് ഉണ്ടായത്. കുട്ടികൾ ഇല്ലാതിരുന്നത് വലിയൊരു ആശ്വാസമായി.

ഓഫീസ് പിടിക്കാനുള്ള ശ്രമം സംഘർഷത്തിൽ കലാശിച്ചു

പാലക്കാട്: കോട്ടായിയിൽ കോണ്‍ഗ്രസിന്‍റെ മണ്ഡലം പ്രസിഡന്‍റ് സിപിഎമ്മിൽ ചേർന്നതിന് പിന്നാലെ മണ്ഡലം കമ്മിറ്റി ഓഫീസ് പിടിച്ചെടുക്കാനുള്ള നീക്കം സംഘർഷത്തിൽ കലാശിച്ചു. ഇന്നലെ രാവിലെ സിപിഎം ജില്ലാ കമ്മിറ്റി ഓഫീസിൽ വെച്ചാണ് മോഹൻകുമാറും 13 അംഗങ്ങളും സിപിഎം ജില്ലാ സെക്രട്ടറി ഇ.എൻ. സുരേഷ് ബാബുവിന്‍റെ പക്കൽ നിന്ന് അംഗത്വം സ്വീകരിച്ചത്. തുടർന്ന് കോട്ടായി മണ്ഡലം ഓഫീസ് തുറന്ന് സിപിഎം കൊടി നാട്ടാൻ ശ്രമിച്ചതോടെ കോണ്‍ഗ്രസ് പ്രവർത്തകർ പ്രതിരോധിക്കാനെത്തി. ഇരുവിഭാഗവും തമ്മിലുണ്ടായ സംഘർഷം നിയന്ത്രണാധീനമായതിനെ തുടർന്ന് പോലീസ് ലാത്തി വീശിയാണ് പ്രവർത്തകരെ വിരട്ടിയോടിച്ചത്. ലാത്തി ചാർജിൽ ഒരു സിപിഎം പ്രവർത്തകന് പരിക്കേറ്റു. ഡിസിസി നേതൃത്വത്തോട് ഇടഞ്ഞ് നിൽക്കുന്ന മോഹൻകുമാർ പാർട്ടി വിടുന്നതിന് മുന്പ് ചെന്നൈയിലുള്ള കെട്ടിട ഉടമയുമായി സംസാരിക്കുകയും കോണ്‍ഗ്രസ് പാർട്ടി ഓഫീസ് സമയത്തെ കുടിശിക തീർത്ത് കെട്ടിടം തന്‍റെ പേരിൽ എഗ്രിമെന്‍റ് എഴുതി വാങ്ങുകയായിരുന്നു. ഇതിന് പിന്നാലെയാണ് സിപിഎമ്മിൽ അംഗത്വം സ്വീകരിച്ചതും പാർട്ടി ഓഫീസ് കൈയടക്കാനും ശ്രമം നടത്തിയത്. ഇരുവിഭാഗങ്ങളും ഉറച്ച നിലപാടെടുത്തതോടെ പോലീസ് തീരുമാനം ആർഡിഒ വിന് വിടുകയും പ്രവർത്തകരെ ഒഴിപ്പിച്ച് ഓഫീസ് പൂട്ടുകയും ചെയ്തു. പോലീസ് കാവലും ഓഫീസിന് മുന്നിൽ ഏർപ്പെടുത്തിയിട്ടുണ്ട്്. ഇന്നലെ രാത്രി 9.30യോടെ സിപിഎമ്മിൽ ചേർന്ന കോട്ടായി മണ്ഡലം പ്രസിഡന്‍റ് കെ. മോഹൻകുമാറിന്‍റെ നേതൃത്വത്തിൽ സിപിഎം പ്രവർത്തകർ സംഘടിച്ച് എത്തി ഓഫീസിന്‍റെ താഴ് തകർത്ത് സിപിഎം കൊടി സ്ഥാപിച്ചു. പോലീസ് കാവൽ നിൽക്കെയാണ് നൂറുകണക്കിന് പ്രവർത്തകർ ഓഫീസ് തകർത്ത് ആധിപത്യം സ്ഥാപിച്ചത്. പോലീസിന്‍റെ ഒത്താശയോടെയാണ് സിപിഎം പ്രവർത്തകർ ഓഫീസ് തകർത്ത് കയറിയതെന്ന് കോണ്‍ഗ്രസ് നേതാക്കൾ ആരോപിച്ചു. ഇതിനെതിരേ ശക്തമായി പ്രതിഷേധിക്കുമെന്ന് നേതാക്കൾ അറിയിച്ചു.

മഴ കനത്തു; ശാന്തിനഗർ നിവാസികൾക്ക് ഇനി ഉറക്കമില്ലാത്ത രാത്രികൾ

ഒറ്റപ്പാലം: കാലവർഷം ശക്തമായതോടെ ശാന്തിനഗർ കോളനിക്കാർക്ക് ഇനി ഉറക്കമില്ലാത്ത രാവുകൾ. ഒറ്റപ്പാലം നഗരത്തിനുള്ളിലാണ് വീടുകളിൽ വെള്ളം കയറുമെന്ന് ഭയന്ന് നിരവധി കുടുംബങ്ങൾ കഴിയുന്നത്. ഓരോ മഴ പെയ്യുമ്പോഴും കനത്ത ആശങ്കയിലാണിവർ. കണ്ണിയംപുറം തോട്ടിൽ ഒഴുക്കിന് തടസമായി മുറിച്ചിട്ടിരുന്ന മരങ്ങൾ നീക്കിയെങ്കിലും തോട്ടിൽ ഒഴുക്ക് സുഗമമല്ല. മഴ ശക്തമായി പെയ്താൽ തോട് കരകവിഞ്ഞ് വീടുകളിലേക്കെത്തുമെന്ന കാര്യം ഉറപ്പാണ്. ‌50-തിലേറെ കുടുംബങ്ങൾ താമസിക്കുന്ന ശാന്തിനഗറിൽ കഴിഞ്ഞ ജൂലൈയിൽ പെയ്ത ശക്തമായ മഴയിൽ വെള്ളപ്പൊക്കമുണ്ടായി കുടുംബങ്ങൾക്ക് മാറിത്താമസിക്കേണ്ട സ്ഥിതി വന്നിരുന്നു. ആറടിയിലേറെ ഉയരത്തിൽ വെള്ളം പൊങ്ങിയിരുന്ന പ്രദേശത്തുനിന്ന് അഗ്നിരക്ഷാസേനയെത്തിയാണ് പലരെയും സുരക്ഷിതകേന്ദ്രങ്ങളിലേക്ക്‌ മാറ്റിയിരുന്നത്. 2018-ലും 2019-ലും തോട്ടിൽ വെള്ളമുയർന്ന് സമാനരീതിയിലുള്ള പ്രശ്നങ്ങൾ ശാന്തിനഗറുകാർക്ക് അഭിമുഖീകരിക്കേണ്ടി വന്നിരുന്നു. ഇത്തവണയും ഇത് ആവർത്തിക്കുമോ എന്ന് ആശങ്കയിലാണ് ഇവിടെയുള്ളവർ. മഴ ശക്തമായി തുടർന്നാൽ തോട് കരകവിഞ്ഞൊഴുകും എന്ന കാര്യം ഉറപ്പാണ്. തോടിന്‍റെ ഇരുവശങ്ങളും കോൺക്രീറ്റ് ചെയ്ത് ഉയർത്തണമെന്നും മണ്ണും ചെളിയും നീക്കി ഇതിന്‍റെ ആഴം കൂട്ടണമെന്നും കാലങ്ങളായി ഈ പ്രദേശത്തുകാരുടെ ആവശ്യമാണ്. എന്നാൽ അധികൃതർ ആരും ഇത് ചെവികൊള്ളുന്നില്ലെന്ന് മാത്രം. ഇത്തവണയും സാധനങ്ങൾ മുറുക്കികെട്ടി ഒഴിഞ്ഞുപോകാനുള്ള സാഹചര്യവും നോക്കിയിരിക്കുകയാണ് ഇവിടത്തുകാർ.

ലിസ്യൂ മെട്രിക്കുലേഷൻ ഹയർ സെക്കൻഡറി സ്കൂളിൽ പഠനവർഷാരംഭവും സ്റ്റുഡന്‍റ്സ് കാബിനറ്റ് ഉദ്ഘാടനവും

കോയമ്പത്തൂർ: സായിബാബ കോളനി ലിസ്യൂ മെട്രിക്കുലേഷൻ ഹയർ സെക്കൻഡറി സ്കൂളിൽ പഠനവർഷാരംഭവും സ്റ്റുഡന്‍റ്സ് കാബിനറ്റിന്‍റെ ഉദ്ഘാടനവും നടന്നു. പ്രിൻസിപ്പൽ റവ.ഡോ. (അഡ്വ.) ജോയ് അറയ്ക്കലിന്‍റെ നേതൃത്വത്തിലായിരുന്നു പരിപാടികൾ. സ്കൂൾ കറസ്പോണ്ടന്‍റ് റവ.ഡോ. ഫിലിപ്സ് പൊന്തേക്കൻ അധ്യക്ഷത വഹിച്ചു. സിആർപിഎഫ് (റിട്ട.) പോലീസ് ഐജി ടി. ചന്ദ്രശേഖർ, ബ്യൂട്ടി പേജന്‍റ് ഡോ. ഗായത്രി നടരാജൻ, ജർമ്മനിയിൽ നിന്നുള്ള വിദ്യാർഥിനിയായ ഫ്രെഡെറിക് എന്നിവർ ചടങ്ങിൽ മുഖ്യാതിഥികളായിരുന്നു. 10, 11, 12 ക്ലാസുകളിലെ പൊതു പരീക്ഷകളിൽ വിജയിച്ചവരെ ചടങ്ങിൽ ആദരിച്ചു. പൂർവവിദ്യാർഥി സംഘടന പ്രസിഡന്‍റ് രാകേഷ് മേനോൻ, അഡ്മിനിസ്ട്രേറ്ററും സ്റ്റാഫ് സെക്രട്ടറിമാരുമായ ഫാ. ലിൻജോ ജോസഫ്, സുകന്യ, മേരി ടീന പ്രസംഗിച്ചു.

കോയന്പത്തൂരിന്‍റെ പ്രതീക്ഷകളിലേക്കു ശിരുവാണി ഡാം ജലനിരപ്പുയരുന്നു

കോയന്പത്തൂർ: ശിരുവാണി അണക്കെട്ടിലെ ജലനിരപ്പ് വീണ്ടും ഉയർന്നു. കേരള സംസ്ഥാനത്തിനകത്തു സ്ഥിതിചെയ്യുന്ന അട്ടപ്പാടി ശിരുവാണി അണക്കെട്ടാണ് കോയമ്പത്തൂർ മുനിസിപ്പൽ കോർപ്പറേഷന്‍റെ പ്രധാന കുടിവെള്ള സ്രോതസ്. ഈ അണക്കെട്ടിൽ 49.53 അടി വെള്ളം സംഭരിക്കാൻ കഴിയുമെങ്കിലും സുരക്ഷാ കാരണങ്ങളാൽ പരമാവധി 44.61 അടി മാത്രമേ സംഭരിക്കുന്നുള്ളൂ. ഇന്നലത്തെ കണക്കനുസരിച്ച് ഡാമിലെ ജലനിരപ്പ് നിലവിൽ 43.13 അടിയാണ്. ശിരുവാണി അണക്കെട്ട് പ്രദേശത്ത് 147 മില്ലിമീറ്റർ മഴ പെയ്തതായും അധികൃതർ അറിയിച്ചു. പ്രതിദിനം 100 എംഎൽഡി വെള്ളമാണ് കോർപറേഷന്‍റെ കീഴിലുള്ള പ്രദേശങ്ങളിൽ വിതരണം ചെയ്യുന്നത്.

പെരുവെമ്പിൽ ഉന്നതവിജയികളെ ആദരിച്ചു

പെരുവെമ്പ്: യൂത്ത് കോൺഗ്രസ്‌ പെരുവെമ്പ് മണ്ഡലം കമ്മിറ്റിയുടെ നേതൃത്വത്തിൽ എസ്എസ്എൽസിയിലും പ്ലസ്ടുവിലും ഫുൾ എപ്ലസ് കരസ്ഥമാക്കിയ വിദ്യാർഥികളെ ആദരിക്കുകയും പഠനോപകരണങ്ങൾ വിതരണവും ചെയ്തു. ഡിസിസി പ്രസിഡന്‍റ് എ. തങ്കപ്പൻ ഉദ്ഘാടനം ചെയ്തു. മണ്ഡലം പ്രസിഡന്‍റ് അജീഷ് അധ്യക്ഷത വഹിച്ചു. ഡിസിസി ജനറൽ ജനറൽ സെക്രട്ടറി കെ.എം. ഫെബിൻ, ബ്ലോക്ക്‌ കോൺഗ്രസ്‌ വൈസ് പ്രസിഡന്‍റ് വി. ബാബു, സർവീസ് സഹകരണ ബാങ്ക് പ്രസിഡന്‍റ് കെ. മോഹനൻ, കോൺഗ്രസ്‌ മണ്ഡലം പ്രസിഡന്‍റ് പി. സുരേഷ് ബാബു, യൂത്ത് കോൺഗ്രസ്‌ ജില്ലാ സെക്രട്ടറി പി.വി. വത്സൻ, ബ്ലോക്ക്‌ കോൺഗ്രസ്‌ സെക്രട്ടറി വി. ജയദാസ്, വാർഡ് മെംബർ കെ. ശോഭന, യൂത്ത് കോൺഗ്രസ്‌ നിയോജകമണ്ഡലം സെക്രട്ടറി ഷാഹിദ് എന്നിവർ പ്രസംഗിച്ചു .

മണ്ഡലത്തിലെ 3480 ഉന്നതവിജയികളെ അനുമോദിച്ച് വി.കെ. ശ്രീകണ്ഠൻ എംപി

പാലക്കാട്: മണ്ഡലത്തിലെ 3480 വിദ്യാർഥികളെ നേരിട്ട് അനുമോദിച്ച് വി.കെ. ശ്രീകണ്ഠൻ എംപി. തന്‍റെ മണ്ഡലത്തിൽ ഉൾപ്പെടുന്ന എല്ലാ സ്കൂളുകളിലെയും കഴിഞ്ഞ എസ്എസ്എൽസി, പ്ലസ്ടു പരീക്ഷകളിൽ ഫുൾ എപ്ലസ് കിട്ടിയ വിദ്യാർഥികളെ ആറു വിവിധ പ്രദേശങ്ങളിൽ സംഘടിപ്പിക്കുന്ന പരിപാടിയിലാണ് ആദരിച്ചത്. പട്ടാമ്പി, മണ്ണാർക്കാട്, ചെർപ്പുളശ്ശേരി, ഒറ്റപ്പാലം, കരിമ്പ, പാലക്കാട് എന്നിവിടങ്ങളിലായി നടത്തിയ അനുമോദന സദസുകളിൽ വിദ്യാർഥികളോടൊപ്പം അവരുടെ രക്ഷകർത്താക്കളും പങ്കെടുത്തു. എക്സലൻസ് അവാർഡ് സമ്മാനിക്കുന്നതിനൊപ്പം ഉപരിപഠനത്തിനാവശ്യമായ ബോധവത്കരണക്ലാസും സംഘടിപ്പിച്ചു. സൈലം ലേണിംഗ് എന്ന സ്ഥാപനവുമായി സഹകരിച്ച് മികച്ച പരിശീലകരെ എത്തിച്ചാണ് ക്ലാസുകൾ നടത്തിയത്. പാലക്കാട്, മലമ്പുഴ നിയോജകമണ്ഡലത്തിലെ വിദ്യാർഥികളെ കഴിഞ്ഞ ദിവസം കാണിക്കമാത സ്കൂൾ ഓഡിറ്റോറിയത്തിൽ നടന്ന പരിപാടിയിലാണ് അനുമോദിച്ചത്. ചടങ്ങിൽ സൈലം ലേണിംഗ് കോ- ഓർഡിനേറ്റർ ജിൻസി അധ്യക്ഷത വഹിച്ചു. സിനിമാതാരം ഷാജു ശങ്കർ, മറിമായം ഫെയിം റിയാസ്, സലിം എന്നിവർ വിശിഷ്ടാതിഥികളായി. കെപിസിസി ജനറൽ സെക്രട്ടറി കെ.എ. തുളസി, മാത്തൂർ പഞ്ചായത്ത് വൈസ് പ്രസിഡന്‍റ് പി. പ്രസാദ്, നഗരസഭാ കൗൺസിലർമാരായ മിനി ബാബു, അനുപമ പ്രശോഭ്, മൻസൂർ മണലാഞ്ചേരി, എ. കൃഷ്ണൻ, മലമ്പുഴ ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് കെ. വാസു, പാലക്കാട് മണ്ഡലം യുഡിഎഫ് കൺവീനർ സുധാകരൻ പ്ലാക്കാട്ട് എന്നിവർ പങ്കെടുത്തു.

300 ഏക്കർ നെൽകൃഷിക്കു ഞാറ്റടി ഒരുങ്ങുന്നു

പാലക്കാട്: എലപ്പുള്ളിയിലെ രാമശേരി ഗാന്ധി ആശ്രമവും പാലക്കാടൻ കർഷകമുന്നേറ്റവും ചേർന്ന് നടപ്പിലാക്കുന്ന സംഘകൃഷി പദ്ധതിയിൽ 300 ഏക്കർ നെൽകൃഷിക്കുള്ള ഞാറ്റടി തയാറാവുന്നു. പ്രാദേശികമായി കൃഷി ചെയ്തെടുത്ത ഗുണനിലവാരമുള്ള വിത്തുപാകിയാണ് ഞാറ്റടി തയാറാക്കിയിട്ടുള്ളത്. ഇതിൽ 200 ഏക്കറിൽ കൃഷി ചെയ്യുന്നതിനുള്ള കർഷകർ ബുക്കിംഗ് ചെയ്തുകഴിഞ്ഞു. ബാക്കി 100 ഏക്കറിലേക്കുള്ള കർഷകരുടെ ബുക്കിംഗ് തുടരുകയാണ്. ഞാറ്റടി ഒരുമിച്ച് തയാറാക്കിയതുപോലെ നടീൽ ചെയ്യുന്നതിനുള്ള തൊഴിലാളികളെ പദ്ധതിയുടെ ലേബർബാങ്കിൽനിന്ന് ഒരുമിച്ചു നൽകും. കരാറടിസ്ഥാനത്തിലാണ് തൊഴിലാളികൾ നടീൽ ചെയ്യുക. തുടർന്ന് നടക്കുന്ന കളവലി, വളപ്രയോഗം, പുല്ലുവെട്ടൽ, സ്പ്രേയർ ഉപയോഗം, കൊയ്ത്ത്, നെല്ലുണക്കൽ തുടങ്ങി പണികൾക്കെല്ലാം തൊഴിലാളികളെ ലേബർബാങ്കിൽനിന്ന് ഒരുമിച്ചു നൽകുന്നതിനു വേണ്ട ക്രമീകരണങ്ങൾ നടത്തുന്നുണ്ട്. കൊയ്ത്തുയന്ത്രം, ട്രാക്ടർ, റൊട്ടവേറ്റർ, ലേസർ ലെവലിംഗ് യന്ത്രം തുടങ്ങി സംവിധാനങ്ങളും ഒരുക്കുന്നുണ്ട്. നിലവിൽ ഞാറ്റടി തയാറാക്കിയ കർഷകർക്ക് ലേബർബാങ്കിൽനിന്ന് ആവശ്യമുള്ള തൊഴിലാളികളെ എത്തിച്ച് നടീൽ ചെയ്തുകൊടുക്കുന്നതിനും സംവിധാനം ഒരുക്കിയിട്ടുണ്ട്. ഏറ്റവും ചെലവു കുറഞ്ഞ രീതിയിലും ശാസ്ത്രീയമായും യന്ത്രോപകരണങ്ങൾ പ്രയോജനപ്പെടുത്തിയും കൃഷി ചെയ്യുന്നതിന് കർഷകരെ സഹായിക്കുക എന്ന ലക്ഷ്യത്തോടെയാണ് സംഘകൃഷി പദ്ധതിക്ക് രൂപം നൽകിയിട്ടുള്ളത്. കഴിഞ്ഞ 10 വർഷമായി സംഘകൃഷി പദ്ധതിക്ക് നേതൃത്വം നൽകുന്ന വിദഗ്ധരുടെ സഹായത്തോടെയാണ് പദ്ധതി നടപ്പിലാക്കുന്നതെന്ന് രാമശേരി ഗാന്ധി ആശ്രമത്തിന്‍റെയും പാലക്കാടൻ കർഷക മുന്നേറ്റത്തിന്‍റെയും ഭാരവാഹികൾ പറഞ്ഞു. ബാക്കി 100 ഏക്കറിലേക്കുള്ള ബുക്കിംഗ് ചെയ്യാൻ താത്പര്യമുള്ള കർഷകർ 9447483106 എന്ന നന്പറിൽ ബന്ധപ്പെടണമെന്നും അധികൃതർ അറിയിച്ചു.

നെൽകർഷകരുടെ ആനുകൂല്യങ്ങൾ വെട്ടിക്കുറയ്ക്കുന്നെന്ന് ആക്ഷേപം

ജോജി തോമസ് നെന്മാറ: നെൽകൃഷി പ്രോത്സാഹിപ്പിക്കുന്നെന്നു പറയുന്പോഴും സർക്കാർ കർഷകർക്കു നൽകിവന്ന ആനുകൂല്യങ്ങൾ വെട്ടിക്കുറയ്ക്കുന്നതായി പരാതി. ലാഭകരമല്ലാത്തതിനാൽ നെൽകൃഷി ഉപേക്ഷിക്കുന്നവരും തരിശിടുന്നതും വർധിച്ചതിനെതുടർന്നാണ് സർക്കാർ നെൽകർഷകർക്ക് ആനുകൂല്യങ്ങൾ നൽകിത്തുടങ്ങിയത്. ഭക്ഷ്യസ്വയംപര്യാപ്തത ഉറപ്പുവരുത്താൻ സംസ്ഥാനത്തുതന്നെ അരിയുത്പാദനം വർധിപ്പിക്കാനും ലക്ഷ്യമിട്ടിരുന്നു. ഇതിന്‍റെ ഭാഗമായാണ് പലപ്പോഴായി ആനുകൂല്യങ്ങൾ നൽകിത്തുടങ്ങിയത്. ബജറ്റ് പ്രഖ്യാപനങ്ങളിൽ വൻതുക കാർഷിക ആനുകൂല്യങ്ങളായി പ്രഖ്യാപിക്കാറുണ്ടെങ്കിലും വിതരണംചെയ്യേണ്ട സമയത്ത് ഫണ്ട് അനുവദിക്കാതെയും സാമ്പത്തിക ഞെരുക്കത്തിന്‍റെയും പേരിൽ ബജറ്റ് വിഹിതം വെട്ടിക്കുറക്കുന്നതിലൂടെയും ആനുകൂല്യങ്ങൾ കടലാസിൽ ഒതുങ്ങുന്നതായാണ് പരാതി. ഹെക്ടറിന് ആയിരംരൂപ നിരക്കിൽ നെൽകർഷകർക്ക് സംസ്ഥാന സർക്കാർ നൽകിയിരുന്ന 2019 മുതൽ 2023 വരെയുള്ള ഉത്പാദന ബോണസ് സർക്കാർ കുടിശികയാക്കി. പിന്നീട് വിതരണം ചെയ്തില്ല. എന്നാൽ 2024ൽ ഇതു ആയിരംരൂപയ്ക്കുപകരം 500 രൂപയായി വെട്ടിക്കുറച്ചു. ഇതിന്‍റെയും കുടിശികത്തുക നൽകിയില്ല. സർക്കാർ ജീവനക്കാർ, പെൻഷൻകാർ, തുടങ്ങിയ വിഭാഗക്കാർക്ക് ക്ഷാമബത്തയും പരിഷ്കരണ ആനുകൂല്യങ്ങളും ക്ഷേമപെൻഷനും കുടിശിക ഉൾപ്പെടെ നൽകുമ്പോഴാണ് കാർഷിക ആനുകൂല്യങ്ങൾ കുടിശികയാക്കുന്നതും വെട്ടിക്കുറയ്ക്കുന്നതും. സുസ്ഥിര നെൽകൃഷി വികസന പദ്ധതി പ്രകാരം ഹെക്ടറിന് 5500 രൂപ നൽകാറുള്ളത് 2024ൽ ഒന്നാംവിളയ്ക്ക് സാമ്പത്തിക ഞെരുക്കത്തിന്‍റെ പേരിൽ പകുതിയായി വെട്ടിക്കുറച്ചു. ഇത് രണ്ടാംവിളയ്ക്കു നൽകിയില്ല. നെൽകൃഷിക്ക് സബ്സിഡി നിരക്കിൽ ചുണ്ണാമ്പ് വിതരണം ചെയ്യുന്നതും നേർപകുതിയാക്കി വെട്ടിക്കുറച്ചു. 2021 മുതൽ നിലവിലുണ്ടായിരുന്ന നെല്ലിന്‍റെ താങ്ങുവില കേന്ദ്രസർക്കാർ വർധിപ്പിക്കുന്നതിന് സമാനമായ തുക സംസ്ഥാനസർക്കാർ വിഹിതത്തിൽനിന്ന് കുറയ്ക്കുന്നതോടെ സർക്കാർ താങ്ങുനില പ്രകാരമുള്ള സംഭരണ വില കഴിഞ്ഞ അഞ്ചുവർഷമായി കുറച്ചുവരികയാണ്. കേന്ദ്രസർക്കാറിന്‍റെ കാലാവസ്ഥാ വിള ഇൻഷ്വറൻസ് ആനുകൂല്യം 2023 മുതൽ വിതരണം നിലച്ചിരിക്കുകയാണ്. സംസ്ഥാന സർക്കാറിന്‍റെ വിള ഇൻഷ്വറൻസ് പദ്ധതിയും പ്രീമിയംസ്വീകരിക്കൽ പദ്ധതി മാത്രമായി ചുരുങ്ങി. കർഷകരുടെ അക്കൗണ്ടുകളിലേക്ക് ആനുകൂല്യങ്ങൾ നേരിട്ടു കൈമാറുന്ന രീതി വന്നതോടെ കർഷകർക്ക് ലഭിക്കുന്ന ആനുകൂല്യങ്ങൾ എത്രയെന്നോ, എത്ര കിട്ടിയെന്നോ, എത്ര കിട്ടാനുണ്ടെന്നോ എന്ന വിവരംപോലും ലഭ്യമല്ലാതായതോടെയാണ് ആനുകൂല്യങ്ങൾ സർക്കാർ വെട്ടിച്ചുരുക്കാൻ തുടങ്ങിയത്.

എൻസിപി-എസ് ജില്ലാ ജില്ലാ പ്രസിഡന്‍റായി മോഹൻ ഐസക് ചുമതലയേറ്റു

പാലക്കാട്: എൻസിപി-എസ് ജില്ലാ ജില്ലാ പ്രസിഡന്‍റായി മോഹൻ ഐസക് ചുമതലയേറ്റു. തുടർന്നു നടന്ന ജില്ലാ നേതൃയോഗം സംസ്ഥാന വർക്കിംഗ് പ്രസിഡന്‍റ് പി.കെ. രാജൻ മാസ്റ്റർ ഉദ്ഘാടനം ചെയ്തു. ജില്ലാ പ്രസിഡന്‍റ് മോഹൻ ഐസക് അധ്യക്ഷത വഹിച്ചു. സംസ്ഥാന ജനറൽ സെക്രട്ടറി പി.എ. റസാക്ക് മൗലവി മുഖ്യപ്രഭാഷണം നടത്തി. നേതാക്കളായ എ. രാമസ്വാമി, ഓട്ടൂർ ഉണ്ണികൃഷ്ണൻ, കാപ്പിൽ സെയ്തലവി, പി. അബ്ദുറഹിമാൻ, കെ.ഷൗക്കത്തലി, ഷെനിൻ മന്ദിരാട്, ജില്ലാ ഭാരവാഹികൾ, പോഷകസംഘടനാ ഭാരവാഹികൾ പ്രസംഗിച്ചു.

വടക്കഞ്ചേരി- മണ്ണുത്തി ദേശീയപാതയിൽ യാത്ര അതികഠിനം

വടക്കഞ്ചേരി: വെള്ളക്കെട്ടും കുഴികളും കുരുക്കുകൂട്ടാൻ മേൽപ്പാലങ്ങളുടെ നിർമാണവുമായി വടക്കഞ്ചേരി- മണ്ണുത്തി ആറുവരി ദേശീയപാതയിയിലൂടെയുള്ള യാത്ര അതികഠിനം. വാണിയംപാറ, കല്ലിടുക്ക്, മുടിക്കോട് എന്നിവിടങ്ങളിലാണ് മേൽപ്പാലം നിർമാണം നടക്കുന്നത്. ഇതിൽ കല്ലിടുക്കിലാണ് ഏതുസമയവും വലിയ കുരുക്ക് രൂപപ്പെടുന്നത്. ഇന്നലെ രാവിലെ മണിക്കൂറിലേറെ സമയമെടുത്താണ് വാഹനങ്ങൾ കടന്നുപോയിരുന്നത്. ദിവസവും ഇതാണവസ്ഥ. തൃശൂർ ഭാഗത്തേക്കുള്ള വാഹനങ്ങളാണ് കൂടുതലും കുരുക്കിൽ കുടുങ്ങിക്കിടക്കുന്നത്. ചില സമയങ്ങളിൽ രണ്ടുമൂന്നു കിലോമീറ്റർ ദൂരം വാഹനങ്ങൾ കുടുങ്ങികിടക്കും. മേൽപ്പാലങ്ങളുടെ പണികൾ നടക്കുന്നതിനാൽ സർവീസ് റോഡിലൂടെയാണ് വാഹനങ്ങൾ തിരിച്ചുവിടുന്നത്. എന്നാൽ ഈ സർവീസ് റോഡുകൾ പൊട്ടിപ്പൊളിഞ്ഞ് വലിയ കുഴികളാണ്. ഇതിനാൽ വാഹനങ്ങൾ കുഴിയിൽ ഇറങ്ങിക്കയറി പോകാൻ ഏറെ സമയമെടുക്കും. ഒറ്റവരിയായി പോകേണ്ട സർവീസ് റോഡിലെ കുഴികളെല്ലാം യഥാസമയം മൂടി വാഹനങ്ങൾക്ക് വേഗത്തിൽ കടന്നു പോകാൻ വഴിയൊരുക്കിയിരുന്നെങ്കിൽ ഇത്രയേറെ കുരുക്കുണ്ടാകില്ല. അത്യാവശ്യങ്ങൾക്ക് പോകുന്ന ആയിരക്കണക്കിനു യാത്രക്കാരാണ് അധികൃതരുടെ അനാസ്ഥയിൽ കഷ്ടപ്പെടുന്നത്. എയർപോർട്ടിലേക്കും റെയിൽവേ സ്റ്റേഷനിലേക്കും ചികിത്സകൾക്കും ജോലിക്കും മറ്റു അത്യാവശ്യങ്ങൾക്കുമായി പോകുന്ന യാത്രക്കാർക്കാണ് വഴിയിൽകിടന്ന് വിഷമിക്കേണ്ട ഗതികേടുണ്ടാകുന്നത്. പോലീസിന്‍റെ സേവനം കാര്യക്ഷമമല്ലാത്തതും കുരുക്കുകൂടാൻ കാരണമാകുന്നുണ്ട്. സ്വകാര്യ ബസുകൾ ഉൾപ്പെടെ വാഹനങ്ങൾ കുത്തിക്കയറി കുരുക്കുമുറുകും. യാതൊരു നാഥനില്ലാത്ത വിധമാണ് ദേശീയപാതയിലെ സ്ഥിതി. വാഹനക്കുരുക്കിന് പരിഹാരം കാണാൻ കളക്ടർമാർ ഇടപെട്ട് അടിയന്തര നടപടി സ്വീകരിക്കണമെന്നാണ് യാത്രക്കാർ ആവശ്യപ്പെടുന്നത്. മഴപെയ്താൽ റോഡിലുണ്ടാകുന്ന വെള്ളക്കെട്ട് മൂലമുള്ള അപകടങ്ങളും കുറവല്ല. കൊമ്പഴ ഭാഗത്ത് രണ്ടടിയോളം ഉയരത്തിലാണ് റോഡിൽ വെള്ളം കെട്ടിനിൽക്കുന്നത്. ഇതിലൂടെ വാഹനങ്ങൾ കടന്നുപോകുമ്പോൾ നിയന്ത്രണം തെറ്റി ട്രാക്കുകൾ മാറുന്നത് കൂട്ടിയിടിക്കു കാരണമാകുന്നുണ്ട്. വാഹനങ്ങൾ വേഗതയിൽ കടന്നു പോകുമ്പോൾ പത്തടിയോളം വെള്ളംപൊങ്ങി കാഴ്ച മറയുന്ന സാഹചര്യവുമുണ്ട്.

വാച്ചുകളും പണവും നഷ്ടപ്പെട്ടു; ക്ഷേത്രത്തിലും മോഷണശ്രമം

വടക്കഞ്ചേരി: ടൗണിനോടുചേർന്ന് വിനായക സ്ട്രീറ്റിലെ ഉഷാദേവിയുടെ വീട്ടിലും ഗണപതി ക്ഷേത്രത്തിലും മോഷണം. ശനിയാഴ്ച അർധരാത്രി പന്ത്രണ്ടിനും ഒരുമണിക്കും ഇടയിലാണ് മോഷണം നടന്നിട്ടുള്ളത്. മോഷ്ടാവിന്‍റേതെന്നു സംശയിക്കുന്ന ദൃശ്യം സിസി ടിവിയിൽ പതിഞ്ഞിട്ടുണ്ട്. ഉഷാദേവിയുടെ വീട്ടിൽനിന്നും രണ്ടുവാച്ചുകളും ക്ഷേത്രത്തിലേക്ക് നിക്ഷേപിക്കാനായി സൂക്ഷിച്ച ചില്ലറത്തുട്ടുകളുമാണ് മോഷണം പോയിട്ടുള്ളത്. കൊട്ടിയൂർ ക്ഷേത്രദർശനം കഴിഞ്ഞ് ഇന്നലെ രാവിലെ വീട്ടുകാർ എത്തിയപ്പോഴാണ് മോഷണവിവരം അറിഞ്ഞത്. സമീപത്തെ ഗണപതി ക്ഷേത്രത്തിലെ സിസി ടിവി കാമറ പരിശോധിച്ചതിലാണ് ഗണപതി ക്ഷേത്രത്തിലും മോഷണം നടത്താനുള്ള ശ്രമം മോഷ്ടാവ് നടത്തുന്നതായുള്ള ദൃശ്യങ്ങളും കണ്ടെത്തിയത്. പിറകുവശം വഴി ഉഷാദേവിയുടെ വീട്ടിലേക്ക് മോഷ്ടാവ് പോകുന്നതിന്‍റെ ദൃശ്യവും സിസി ടിവിയിലുണ്ട്. ഇവരുടെ വീടിന്‍റെ പൂട്ടുതകർത്താണ് മോഷ്ടാവ് അകത്തു കയറിയിരിക്കുന്നത്. അലമാരയും മറ്റും കുത്തിപ്പൊളിച്ച നിലയിലാണ്. വടക്കഞ്ചേരി സിഐ കെ.പി. ബെന്നിയുടെ നേതൃത്വത്തിലുള്ള സംഘം സ്ഥലത്തെത്തി അന്വേഷണം ആരംഭിച്ചു.

അട്ടപ്പാടിചുരം ഒന്പതാംവളവിൽ പാറക്കല്ലുവീണ് ആറുമണിക്കൂറോളം ഗതാഗതം മുടങ്ങി

മണ്ണാർക്കാട്: അട്ടപ്പാടി ചുരത്തിലെ ഒന്പതാംവളവിൽ കൂറ്റൻ പാറക്കല്ലുവീണ് ആറുമണിക്കൂറോളം ഗതാഗതം മുടങ്ങി. 20 അടി ഉയരത്തിൽനിന്നുമാണ് കൂറ്റൻ പാറക്കല്ല് റോഡിലേക്കു വീണത്. ഇന്നലെ ഉച്ചയ്ക്ക് ശേഷം മൂന്നോടെയായിരുന്നു സംഭവം. ഈസമയം റോഡിൽ വാഹനങ്ങളില്ലാത്തതിനാൽ വൻദുരന്തം ഒഴിവായി. ചുരത്തിലെ ഗതാഗതം പൂർണമായും നിലച്ചു. ഇരുഭാഗത്തുനിന്നും എത്തിയ ജനങ്ങൾ ആറുമണിക്കൂറോളം ചുരത്തിൽ കുടുങ്ങി. അപകടമുണ്ടായ സ്ഥലത്തുനിന്ന് ചുരത്തിന്‍റെ ഇരുഭാഗത്തേക്കും വാഹനങ്ങളുടെ നീണ്ടനിരയായിരുന്നു. മണ്ണാർക്കാട്ടുനിന്നും ആംബുലൻസിലാണ് വെള്ളം ഉൾപ്പെടെ ചുരത്തിൽ കുടുങ്ങിയവർക്ക് എത്തിച്ചുനൽകിയത്. വൈകുന്നേരം നാലുമണിയോടെ മണ്ണാർക്കാട് തഹസിൽദാറിന്‍റെ നേതൃത്വത്തിലുള്ള റവന്യൂസംഘവും പോലീസും അഗ്നിരക്ഷാസേനയും വിവിധ സന്നദ്ധ സംഘടനാ പ്രവർത്തകരും സ്ഥാലത്തെത്തി റോഡിലെ പാറയുംമണ്ണും ഒഴിവാക്കുന്നതിനുള്ള നടപടികൾ തുടങ്ങി. രാത്രി ഏഴിനാണ് പാറപൊട്ടിക്കുന്നതിനുള്ള മെഷീൻ അടങ്ങിയ വാഹനമെത്തിയത്. ചുരത്തിലെ കനത്ത മഴ പ്രവർത്തനങ്ങൾക്കു തടസമായി. മണ്ണാർക്കാട് ആനമൂളിയിലും അട്ടപ്പാടി മുക്കാലിയിലും വാഹനങ്ങളെ പോലീസ് തിരിച്ചുവിട്ടു. ചുരത്തിൽ കുടുങ്ങിയ ചെറിയ വാഹനങ്ങളെയും തിരിച്ചുവിട്ടു. രാത്രി എട്ടോടെയാണ് പാറ പൊട്ടിക്കൽ നടപടി പൂർത്തിയായത്. ഒന്പതിനു ഗതാഗതം പുനഃസ്ഥാപിക്കാനായി. രാത്രിയിൽ ചുരത്തിലൂടെ യാത്ര ചെയ്യുന്നവർ ജാഗ്രത പാലിക്കണമെന്നു റവന്യൂവകുപ്പ് മുന്നറിയിപ്പു നൽകിയിട്ടുണ്ട്.

ഷോളയൂർ സെന്‍റ് ആന്‍റണീസ് പള്ളി തിരുനാൾ കൊടിയിറങ്ങി

അഗളി: ഷോളയൂർ സെന്‍റ് ആന്‍റണീസ് പള്ളിയിൽ തിരുനാൾ ആഘോഷങ്ങൾക്കു കൊടിയിറങ്ങി. സമാപനത്തോടനുബന്ധിച്ച് ഇന്നലെ നടന്ന തിരുകർമങ്ങൾക്ക് പുല്ലിശ്ശേരി സെന്‍റ് മേരിസ് പള്ളി വികാരി ഫാ. കുര്യാക്കോസ് മാരിപ്പുറത്ത് മുഖ്യകാർമികത്വം വഹിച്ചു. കാരറ സെന്‍റ് ജോസഫ് പള്ളിവികാരി ഫാ. ജോഷി പുത്തൻപുരക്കൽ സന്ദേശം നൽകി. സ്വർണപ്പിരിവ് കുരിശടിയിലേക്കു വാദ്യമേള അകമ്പടിയോടെ പ്രദക്ഷിണം, സ്നേഹവിരുന്ന്, കുട്ടികളുടെ വിവിധ കലാപരിപാടികൾ എന്നിവയുണ്ടായി. ഇടവക വികാരി ഫാ. തോമസ് കുളമ്പള്ളിൽ, തിരുനാൾ കൺവീനർ ജെയിംസ് പോളക്കാടൻ, കൈക്കാരന്മാരായ ജോസഫ് പാലിതൈ, വർഗീസ് താന്നിപ്പള്ളിൽ നേതൃത്വം നൽകി.

ദേശീയപാത കൊടക്കാട്ട് വാഹനങ്ങളുടെ കൂട്ടയിടി: രണ്ടുപേർക്കു പരിക്ക്

മണ്ണാർക്കാട്: കോഴിക്കോട്- പാലക്കാട് ദേശീയപാത മേലെ കൊടക്കാട്ട് വാഹനങ്ങളുടെ കൂട്ടയിടി. രണ്ടുപേർക്കു പരിക്കേറ്റു. ഇന്നലെ വൈകുന്നേരം അഞ്ചിനായിരുന്നു സംഭവം. നിയന്ത്രണംതെറ്റിയ കാർ ഓട്ടോറിക്ഷയിൽ ഇടിക്കുകയും ഇടിയുടെ ആഘാതത്തിൽ നിയന്ത്രണം തെറ്റിയ ഓട്ടോറിക്ഷ നിർത്തിയിട്ട ചരക്കുലോറിക്കു പിന്നിൽ ഇടിച്ചുമാണ് അപകടം. ഓട്ടോ ഡ്രൈവർ റഷീദിനു പരിക്കേറ്റു. കാർ ഡ്രൈവർ നിസാരപരിക്കുകളോടെ രക്ഷപ്പെട്ടു. രണ്ടുപേരുടേയും പരിക്ക് ഗുരുതരമല്ല. ഇടിയുടെ ആഘാതത്തിൽ കാറിന്‍റെ മുൻഭാഗം പൂർണമായും തകർന്നു. ഓട്ടോറിക്ഷ റോഡിൽ മറിഞ്ഞു. ഓട്ടോറിക്ഷയിൽ നിന്നും ഇന്ധന ചോർച്ചയുണ്ടായി. അഗ്നിരക്ഷാസേനയും നാട്ടുകാരും ചേർന്നാണ് റോഡ് വൃത്തിയാക്കിയത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]