ഷുഗർലാൻഡ്: റിവർസ്റ്റോൺ മലയാളി സംഘടനയായ ഒരുമയുടെ ഈ വർഷത്തെ ഓണോഘോഷമായ ’പൊന്നോണ നക്ഷത്രരാവ്’ നാട്യ, നൃത്ത, സംഗീത പരിപാടികളോടെ വർണാഭമായി അരങ്ങേറി. റിവർസ്റ്റോൺ ബാൻഡിന്‍റെയും താലപ്പൊലിയേന്തിയ വനിതകളുടെയും അകമ്പടിയോടെയാണ് മഹാബലിയ്ക്ക് ഊഷ്മള വരവേൽപ്പ് നൽകിയത്.

മേയർ, ജഡ്ജി, പോലീസ് ക്യാപ്റ്റൻ, ആക്ഷൻ ഹീറോ ഓഫ് മോളിവുഡ് ഇൻ ഹൂസ്റ്റൺ, ഒരുമ എക്സിക്യൂട്ടിവുകൾ, ഇതര സംഘടനാ പ്രതിനിധികൾ എന്നിവർ ചേർന്ന് മഹാബലിയെ വരവേറ്റ് വേദിയിലെത്തി ഭദ്രദീപം കൊളുത്തിയാണ് പൊന്നോണ നക്ഷത്ര നിലാവിന് തുടക്കമിട്ടത്.ഒരുമ പ്രസിഡന്റ് ജിൻസ് മാത്യു കിഴക്കേതിൽ അധ്യക്ഷത വഹിച്ചു.



സ്റ്റാഫോർഡ് സിറ്റി മേയർ കെൻ മാത്യു പൊതു സമ്മേളനം ഉദ്ഘാടനം ചെയ്തു. മോളിവുഡ് ആക്ഷൻ ഹീറോ സ്റ്റാർ ബാബു ആന്‍റണി കലാമേള ഭദ്രദീപം കൊളുത്തി ഉദ്ഘാടനം ചെയ്തു. ജഡ്ജ് സുരേന്ദ്രൻ പട്ടേൽ മുഖ്യ പ്രഭാഷണം നടത്തി.

പോലീസ് ക്യാപ്റ്റൻ മനോജ് പൂപ്പാറയിൽ, മാഗ് പ്രസിഡന്‍റ് ജോസ്.കെ.ജോൺ എന്നിവർ പ്രസംഗിച്ചു. ഒരുമയിലെ ഹൈസ്കൂൾ പഠനം പൂർത്തികരിച്ച വിദ്യാർഥികൾക്ക് അവാർഡുകൾ വിതരണം ചെയ്തു. ഒരുമ സെക്രട്ടറി ജയിംസ് ചാക്കോ സ്വാഗതവും വൈസ് പ്രസിഡന്‍റ് റീനാ വർഗീസ് നന്ദിയും പറഞ്ഞു. ഡോ.ജോസ് തൈപ്പറമ്പിൽ, ഡോ. സീനാ അഷറഫ്, ഡോ. റെയ്നാ റോക്ക്, മേരി ജേക്കബ്, മെർലിൻ സാജൻ എന്നിവർ അവതാരകരായി.




ഒരുമ മന്നൻ മങ്ക, മിന്നൽ മന്നൻ മങ്ക എന്നിവരെയും തെരഞ്ഞെടുത്തു. കുട്ടികളുടേയും മുതിർന്നവരുടെയും ഉൾപ്പെടെ പതിനഞ്ചോളം മാസ്മരിക കലാപരിപാടികൾ വേദിയിൽ അരങ്ങേറി. കളരി, തിരുവാതിര, സംഘ ഗാനം എന്നിവയുടെ പശ്ചാത്തലത്തിൽ ഒരുമ ചുണ്ടന്‍റെ വരവേൽപ്പ് ഗംഭീരമായി.

ഗാന മേളയും ഓണ സദ്യയും ആഘോഷത്തിന് മാറ്റേകി.മീഡിയാ പ്രതിനിധി ജീമോൻ റാന്നി, ഫാ.ജോഷി ജോസ്, ലോയർ മാത്യു വൈരമൺ ഉൾപ്പെടെയുള്ളവർ പങ്കെടുത്തു. നവീൻ ഫ്രാൻസിസ്, ജോൺ ബാബു, ജിജി പോൾ, സെലിൻ ബാബു, റോബി ജേക്കബ്, സോണി പാപ്പച്ചൻ, മാത്യു ചെറിയാൻ തുടങ്ങിയവർ പരിപാടികൾക്ക് നേതൃത്വം നൽകി.