ADVERTISEMENT

ADVERTISEMENT

ഉന്നതവിജയികളെ ബാങ്ക് അനുമോദിച്ചു

പെരിന്തൽമണ്ണ: പെരിന്തൽമണ്ണ മുനിസിപ്പാലിറ്റിയിൽ എസ്എസ്എൽസി, പ്ലസ് ടു പരീക്ഷയിൽ ഉന്നതവിജയം നേടിയവരെയും എസ്എസ്എൽസി പരീക്ഷ എഴുതിയ 406 വിദ്യാർഥികളെയും വിജയിപ്പിച്ച് നൂറ് ശതമാനം വിജയം കൈവരിച്ച പെരിന്തൽമണ്ണ ബോയ്സ് ഹൈസ്കൂളിനെയും ടാലന്‍റ് ബുക്ക് ഓഫ് വേൾഡ് റിക്കാർഡ് ജേതാവ് സുരേഷ് തെക്കീട്ടിലിനെയും പെരിന്തൽമണ്ണ സർവീസ് സഹകരണ ബാങ്ക് അനുമോദിച്ചു. അഡ്വ.എൻ.ഷംസുദീൻ എംഎൽഎ അനുമോദന യോഗം ഉദ്ഘാടനം ചെയ്തു. ബാങ്ക് പ്രസിഡന്‍റ് പച്ചീരി ഫാറൂഖ് അധ്യക്ഷത വഹിച്ചു.

കെപിസിസി സെക്രട്ടറി വി.ബാബുരാജ്, മണ്ഡലം മുസ്ലിംലീഗ് പ്രസിഡന്‍റ് എ.കെ.നാസർ, ബ്ലോക്ക് കോണ്‍ഗ്രസ് പ്രസിഡന്‍റ് അരഞ്ഞിക്കൽ ആനന്ദൻ, മാർക്കറ്റിംഗ് സൊസൈറ്റി ചെയർമാൻ സി. ഇർഷാദ്, റജീന, സുരേഷ് തെക്കീട്ടിൽ, മണ്ഡലം കോണ്‍ഗ്രസ് പ്രസിഡന്‍റ് രാജേന്ദ്രൻ എന്ന കൊച്ചു,

ബാങ്ക് വൈസ് പ്രസിഡന്‍റ് എ.ആർ.ചന്ദ്രൻ, ഡയറക്ടർമാരായ മമ്മി ചേരിയിൽ, സി.അബ്ദുൾ നാസർ, മൊയ്തു കിഴക്കേതിൽ, മുഹമ്മദ് ഹനീഫ പടിപ്പുര, വി. മുഹമ്മദ് സമീർ, വി. അജിത് കുമാർ, ഇ.ആർ. സുരാദേവി, സുൽഫത്ത് ബീഗം, റെജീന അൻസാർ, ബാങ്ക് സെക്രട്ടറി നാസർ കാരാടൻ എന്നിവർ പ്രസംഗിച്ചു.

ADVERTISEMENT

കാറപടത്തിൽ യുവാവ് മരിച്ചു

മഞ്ചേരി : കാറുകൾ കൂട്ടിയിടിച്ച് ഗുരുതര പരിക്കേറ്റ് ചികിത്സയിലായിരുന്ന യുവാവ് മരിച്ചു. മഞ്ചേരി വെള്ളുവങ്ങാട് മുക്കട്ട വടക്കാങ്ങര അഹമ്മദ്കുട്ടി ഹാജിയുടെ മകൻ മുഹമ്മദ് സാലിഹ് എന്ന മാനു (34) ആണ് മരിച്ചത്. ഇക്കഴിഞ്ഞ ശനിയാഴ്ച രാത്രി ഒന്പതര മണിക്ക് പാണ്ടിക്കാട് തന്പാനങ്ങാടിയിലായിരുന്നു അപകടം. മുഹമ്മദ് സാലിഹിന്‍റെ ഉടമസ്ഥതയിൽ പാണ്ടിക്കാട്ടുള്ള ഇന്‍റർലോക്ക് കന്പനിയിൽ നിന്ന് കാറിൽ വീട്ടിലേക്ക് മടങ്ങവേ തന്പാനങ്ങാടിയിൽ വച്ച് എതിരേ വന്ന കാറുമായി കൂട്ടിയിടിക്കുകയായിരുന്നു. ഓടിക്കൂടിയ നാട്ടുകാർ പരിക്കേറ്റ മുഹമ്മദ് സാലിഹിനെ പെരിന്തൽമണ്ണയിലെ സ്വകാര്യാശുപത്രിയിൽ പ്രവേശിപ്പിച്ചുവെങ്കിലും ഇന്നലെ മരണം സംഭവിച്ചു. പെരിന്തൽമണ്ണ ഗവണ്‍മെന്‍റ് ആശുപത്രിയിൽ പോസ്റ്റ്മോർട്ടം നടത്തിയ മൃതദേഹം ബന്ധുക്കൾ ഏറ്റുവാങ്ങി വെള്ളുവങ്ങാട് പഴയ ജുമാമസ്ജിദിൽ കബറടക്കി. ഭാര്യ: പീച്ചമണ്ണിൽ ഷഹന ഷെറിൻ (വളരാട്). മക്കൾ: അലൈസിയ മറിയം, അലൻ അഹമ്മദ്.

കട്ട വിരിക്കൽ പ്രവൃത്തി: അങ്ങാടിപ്പുറം മേൽപ്പാലം അടച്ചു

പെരിന്തൽമണ്ണ: കോഴിക്കോട്- പാലക്കാട് ദേശീയപാതയിൽ അങ്ങാടിപ്പുറം റെയിൽവേ മേൽപ്പാലം പരിസരത്തെ തകർന്ന ഭാഗത്ത് ഇന്‍റർലോക്ക് കട്ട വിരിക്കുന്ന പ്രവൃത്തി ആരംഭിച്ചതിനാൽ മേൽപ്പാലം അടച്ചു. ഇതേത്തുടർന്ന് അത്യാസന്ന രോഗികളുമായി വരുന്ന ആംബുലൻസുകൾക്ക് മാത്രം റോഡ് തുറന്നു കൊടുത്തുള്ള ക്രമീകരണമാണ് പോലീസിന്‍റെ സാന്നിധ്യത്തിൽ നടക്കുന്നത്. ആശുപത്രി നഗരമായ പെരിന്തൽമണ്ണ ഭാഗത്തേക്ക് എത്തിക്കൊണ്ടിരുന്ന യാത്രക്കാർ അങ്ങാടിപ്പുറം തളി ജംഗ്ഷനിൽ ഇറങ്ങി അവിടെ നിന്ന് പാലത്തിലൂടെ നടന്ന് മറുഭാഗത്ത് നിർത്തിയിട്ടിരിക്കുന്ന ബസുകളിലും ഓട്ടോറിക്ഷയിലുമായി പെരിന്തൽമണ്ണ ഭാഗത്തേക്ക് എത്താം. ഈ റോഡിലൂടെയുള്ള ഗതാഗതം നിയന്ത്രണം ജൂലൈ അഞ്ച് വരെ തുടരും. തുടർന്ന് ആറ് മുതൽ 11 വരെ ചെറിയ വാഹനങ്ങൾ ഒഴികെ ഭാരവാഹനങ്ങൾക്ക് നിരോധനവും ഏർപ്പെടുത്തിയിട്ടുണ്ട്. കോഴിക്കോട്ട് നിന്ന് പാലക്കാട് ഭാഗത്തേക്ക് പോകുന്ന വാഹനങ്ങൾ വള്ളുവന്പ്രം-മഞ്ചേരി-പാണ്ടിക്കാട് വഴിയും ചെറിയ വാഹനങ്ങൾ ഓരാടംപാലം- വലന്പൂർ-പട്ടിക്കാട് റോഡ് വഴിയുമാണ് പോകുന്നത്. കോഴിക്കോട് ഭാഗത്ത് നിന്ന് അങ്ങാടിപ്പുറം റെയിൽവേ സ്റ്റേഷനിലേക്ക് പോകുന്ന വാഹനങ്ങൾ ഓരാടംപാലം-ഏറാന്തോട് - തരകൻ സ്കൂൾ റോഡ് വഴിയുമാണ് പോകുന്നത്. പാലക്കാട് നിന്ന് കോഴിക്കോട് ഭാഗത്തേക്ക് പോകുന്ന വാഹനങ്ങൾ മേൽപ്പറഞ്ഞ റോഡുകളിലൂടെ തിരിച്ചുമാണ് പോകേണ്ടത്.

മലപ്പുറം സഹോദയ സെക്കൻഡറി അധ്യാപക പരിശീലനം

പെരിന്തൽമണ്ണ: സിബിഎസ്ഇ സഹോദയ സ്കൂൾ കോംപ്ലക്സ് മലപ്പുറം റീജിയൻ നടത്തിയ സെക്കൻഡറി അധ്യാപക പരിശീലനം ഇൻസ്പയർന്ധ25 ജില്ലയിലെ വിവിധ കേന്ദ്രങ്ങളിൽ സംഘടിപ്പിച്ചു. ഓറ ഗ്ലോബൽ സ്കൂൾ പെരിന്തൽമണ്ണ, ബെഞ്ച് മാർക്ക് ഇന്‍റർനാഷണൽ സ്കൂൾ തിരൂർ, പീസ് പബ്ലിക് സ്കൂൾ കോട്ടക്കൽ, വള്ളുവനാട് വിദ്യാഭവൻ പെരിന്തൽമണ്ണ എന്നീ കേന്ദ്രങ്ങളിലായാണ് പരിശീലനം നടത്തിയത്. ജില്ലാതല ഉദ്ഘാടനം പെരിന്തൽമണ്ണ ഓറ ഗ്ലോബൽ സ്കൂളിൽ സഹോദയ മലപ്പുറം മേഖലാ പ്രസിഡന്‍റ്് എം. അബ്ദുൾ നാസർ നിർവഹിച്ചു. സിബിഎസ്ഇ സിറ്റി കോ ഓർഡിനേറ്റർ പി. ഹരിദാസ് അധ്യക്ഷത വഹിച്ചു. ജനറൽ സെക്രട്ടറി എം. ജൗഹർ, ട്രെയ്നിംഗ് കോ ഓർഡിനേറ്റർ ജോബിൻ സെബാസ്റ്റ്യൻ എന്നിവർ സർട്ടിഫിക്കറ്റുകൾ വിതരണം ചെയ്തു. ഭാരവാഹികളായ ഡോ. സ്വീറ്റി എസ്. പുലിക്കോട്ടിൽ, സി.കെ. ഹൗസത്ത്, എസ്. സ്മിത, സ്വരൂപ് കൃഷ്ണ എന്നിവർ നേതൃത്വം നൽകി. വിവിധ കേന്ദ്രങ്ങളിൽ പരിശീലകരായ ഡോ. സ്വീറ്റി എസ്. പുലിക്കോട്ടിൽ, രതിഅരുണ്‍, സിന്ധു, സി.കെ. ഹൗസത്ത്, കെ. വിഷ്ണുരാജ്, എ.കെ. മഞ്ജു, പി. ദേവരാജ്, വി. മുനവ്വർ, ആയിഷ ഫഹീമ, ദേവകി ചിതലി എന്നിവർ നേതൃത്വം നൽകി. ജില്ലയിലെ സിബിഎസ്ഇ സ്കൂളുകൾ ഹൈസ്കൂൾ വിഭാഗത്തിന് അവധി നൽകിയാണ് 600 ൽ പരം അധ്യാപകർക്ക് പരിശീലനം നൽകിയത്.

പോത്തുകൽ കുടുംബാരോഗ്യ കേന്ദ്രം ക്വാർട്ടേഴ്സുകൾ കാട് മൂടി നശിക്കുന്നു

എടക്കര: പോത്തുകൽ കുടുംബാരോഗ്യകേന്ദ്രത്തിന്‍റെ അധീനതയിലുള്ള ക്വാർട്ടേഴ്സുകൾ കാട് മൂടി നശിക്കുന്നു. കുടുംബാരോഗ്യകേന്ദ്രത്തിലെ ഡോക്ടർമാർക്ക് താമസ സൗകര്യം ഒരുക്കുന്നതിനായി വർഷങ്ങൾക്ക് മുന്പ് നിർമിച്ച രണ്ട് ക്വാർട്ടേഴ്സുകളാണ് ജീർണാവസ്ഥയിൽ കാട് മൂടി നശിക്കുന്നത്. രണ്ട് കെട്ടിടങ്ങൾ സജ്ജമായിട്ടും ഒരു ഡോക്ടർ പോലും ഇവിടെ താമസിച്ചിട്ടില്ല. കുറച്ച് കാലം ആശുപത്രിയിലെ ചില ജീവനക്കാർ മാത്രമാണിവിടെ താമസിച്ചത്. നാല് വർഷം മുന്പ് കെട്ടിടങ്ങൾ അണ്‍ഫിറ്റായതിനാൽ വാസയോഗ്യമല്ലെന്ന് പോത്തുകൽ ഗ്രാമപഞ്ചായത്ത് എൻജിനീയറിംഗ് വിഭാഗം സാക്ഷ്യപ്പെടുത്തുകയും ചെയതതോടെ ആരും ഈ ഭാഗത്തേക്ക് തിരഞ്ഞ് നേക്കാതെയായി. ഇതോടെ ഉപേക്ഷിക്കപ്പെട്ട കെട്ടിടങ്ങൾ കാട് മൂടിയും മരങ്ങൾ വളർന്നും പുറമെ നിന്ന് കാണാൻ പോലും കഴിയാത്ത അവസ്ഥയിലായിരിക്കുകയാണ്. അണ്‍ഫിറ്റ് സർട്ടിഫിക്കറ്റ് നൽകിയതിനാൽ മറ്റ് ആവശ്യങ്ങൾക്കും ഈ കെട്ടിടങ്ങൾ ഉപയോഗിക്കാൻ കഴിയാത്ത അവസ്ഥയാണ്. ലക്ഷങ്ങൾ മുടക്കി നിർമിച്ച കെട്ടിടങ്ങൾ നോക്കുകുത്തികളായപ്പോൾ നഷ്ടം സർക്കാരിന് തന്നെ.

വന്യജീവിശല്യം പരിഹരിക്കണം: കർഷക സംഘം സമ്മേളനം

പെരിന്തൽമണ്ണ: കാർഷിക മേഖല നേരിടുന്ന വന്യജീവി ശല്യം പരിഹരിക്കണമെന്നും കൃഷിനാശം വരുത്തുന്ന വന്യജീവികളെ ഇല്ലാതാക്കുന്നതിന് അടിയന്തര നടപടികൾ സ്വീകരിക്കണമെന്നും കർഷക സംഘം പെരിന്തൽമണ്ണ സൗത്ത് വില്ലേജ് സമ്മേളനം ആവശ്യപ്പെട്ടു. പെരിന്തൽമണ്ണ കെഎസ്ടിഎ ഹാളിൽ നടത്തിയ സമ്മേളനം കർഷകസംഘം സംസ്ഥാന കമ്മിറ്റി അംഗം സി.ദിവാകരൻ ഉദ്ഘാടനം ചെയ്തു. കിനാതിയിൽ സാലിഹ് അധ്യക്ഷത വഹിച്ചു. കർഷകസംഘം ഏരിയ പ്രസിഡന്‍റ് ഗോവിന്ദ പ്രസാദ്, ഏരിയ സെക്രട്ടറി അഡ്വ. സുൽഫിക്കർ അലി, സിപിഎം ഏരിയ കമ്മിറ്റി അംഗം പി.പി. സത്യനാരായണൻ, സൗത്ത് എൽസി സെക്രട്ടറി ടി.കെ. ജയൻ, ഹഫ്സ മുഹമ്മദ്, അനിയൻ പുളിങ്കീഴ്, കാരയിൽ സുന്ദരൻ, കെ. കൃഷ്ണൻകുട്ടി എന്നിവർ പ്രസംഗിച്ചു. കർഷക സംഘം സൗത്ത് വില്ലേജ് കമ്മിറ്റി ഭാരവാഹികൾ: കിനാതിയിൽ സാലിഹ് (പ്രസിഡന്‍റ്), കാരയിൽ സുന്ദരൻ (സെക്രട്ടറി), കെ. കൃഷ്ണൻകുട്ടി (ട്രഷറർ), കെ.ടി. സഫീന (വൈസ് പ്രസിഡന്‍റ്), അശ്വനികുമാർ, കെ. പ്രജിത, അഫ്സൽ കാരയിൽ (ജോയിന്‍റ് സെക്രട്ടറി). എന്നിവരെയും 21 അംഗ വില്ലേജ് കമ്മിറ്റി ഭാരവാഹികളെയും തെരഞ്ഞെടുത്തു.

സൂംബ ഡാൻസിനെ എതിർക്കുന്നതിന് പിന്നിൽ ഗൂഢലക്ഷ്യം: എകെഎസ്ടിയു

മലപ്പുറം: വിദ്യാഭ്യാസരംഗത്തെ കാലാനുസൃത പരിഷ്കാരങ്ങൾ പാരന്പര്യ, മത, മൗലികവാദങ്ങൾ കൊണ്ട് എതിർക്കുന്നത് പൊതുവിദ്യാലയങ്ങളെ ഇകഴ്ത്താനുള്ള ഗൂഢലക്ഷ്യമാണെന്ന് ഓൾ കേരള സ്കൂൾ ടീച്ചേഴ്സ് യൂണിയന്‍റെ (എകെഎസ്ടിയു) ജില്ലാ നേതൃ പഠനക്യാന്പ് ക്യാന്പ് വിലയിരുത്തി. സൂംബ ഡാൻസോടുകൂടിയാണ് ക്യാന്പ് ആരംഭിച്ചത്. സബ് ജില്ലാ സൂംബ ഡാൻസ് കോ ഓർഡിനേറ്റർ വി.ആർ. ഷൈനി സൂംബ ഡാൻസിന് നേതൃത്വം നൽകി. കോട്ടപ്പടി കെമിസ്റ്റ് ഭവനിൽ നടന്ന ക്യാന്പ് സംസ്ഥാന പ്രസിഡന്‍റ് കെ.കെ. സുധാകരൻ ഉദ്ഘാടനം ചെയ്തു. ജില്ലാ പ്രസിഡന്‍റ് വി.കെ. ശ്രീകാന്ത് അധ്യക്ഷത വഹിച്ചു. വിവിധ മത്സര പരീക്ഷകളിൽ ഉന്നത വിജയം നേടിയ കുട്ടികളെയും കാലിക്കട്ട്് യൂണിവേഴ്സിറ്റി പിജി പരീക്ഷയിൽ റാങ്ക് ജേതാവായ ഐ.പി. രാഗേഷ്, മികച്ച ചലച്ചിത്ര ആസ്വാദന ഗ്രന്ഥത്തിനുള്ള സത്യജിത്ത് റേ ഗോൾഡൻ പെൻ ബുക്സ് അവാർഡ് നേടിയ ഡോ. എം.ഡി. മനോജിനെയും സിപിഐ ജില്ലാ കമ്മിറ്റി എക്സിക്യൂട്ടീവംഗം പി.ടി. ഷറഫുദ്ദീൻ ഉപഹാരങ്ങൾ നൽകി അനുമോദിച്ചു. സെകട്ടറി അനൂപ് മാത്യു റിപ്പോർട്ടും ജില്ലാ ട്രഷറർ റാഫി തൊണ്ടിക്കൽ ഭാവിപ്രവർത്തന രൂപരേഖയും അവതരിപ്പിച്ചു. സംസ്ഥാന സെക്രട്ടറി എം. വിനോദ്, സംസ്ഥാന വൈസ് പ്രസിഡന്‍റ് ഡോ. പി.എം. ആശിഷ്, സംസ്ഥാനകമ്മിറ്റി അംഗങ്ങളായ എം.ഡി. മഹേഷ്, ഷീജ മോഹൻദാസ്, പി.എം. സുരേഷ്, ടി. സജീന, എന്നിവർ പ്രസംഗിച്ചു.

ഉപയോഗശൂന്യമായ കനാൽ കുടിവെള്ളം മുട്ടിക്കുന്നു

എടക്കര: ജലസേചന പദ്ധതിയുടെ ഉപയോഗശൂന്യമായ കനാൽ മൂത്തേടത്ത് ഏഴോളം കുടുംബങ്ങളുടെ കുടിവെള്ളം മുട്ടിക്കുന്നു. മരംവെട്ടിച്ചാൽ വടക്കൻ അഷ്റഫ്, കുറ്റിയേരി ജമാൽ, പെരുകിലാമലയിൽ റോയി ജോർജ് എന്നിവരടക്കമുള്ള കുടുംബങ്ങളാണ് ഉപയോഗശൂന്യമായ കനാൽമൂലം ദുരിതത്തിലായിരിക്കുന്നത്. മൂച്ചിപ്പരത ലിഫറ്റ് ഇറിഗേഷന്‍റെ ഭാഗമായുള്ളതാണ് ഈ പ്രധാന കനാൽ. കാലങ്ങളായി മരംവെട്ടിച്ചാൽ ഭാഗത്തേക്ക് ജലസേചനം നടക്കുന്നുമില്ല. മഴ ആരംഭിക്കുന്നതോടെ ഉപയോഗശൂന്യമായ കനാലിൽ വെള്ളം കെട്ടിക്കിടന്ന് താഴെ ഭാഗത്ത് താമസിക്കുന്ന ഈ കുടുംബങ്ങളുടെ കിണറുകൾ മലിനമാവുകയാണ്. കിണറുകളിൽ കലക്കവെള്ളം നിറയുന്നതോടെ ഈ കുടുംബങ്ങൾ മറ്റിടങ്ങളിൽ നിന്ന് കുടിവെള്ളമെത്തിച്ചാണ് ഉപയോഗിക്കുന്നത്. ചിലർ ഈ കലക്കവെള്ളം തന്നെയാണ് തിളപ്പിച്ചാറ്റിയ ശേഷം ഉപയോഗിക്കുന്നത്. കിണറുകളിൽ നിന്ന് വെള്ളമെടുക്കുന്ന പാത്രങ്ങളും വാട്ടർ ടാങ്കുകളും ചെളി നിറഞ്ഞ് ഇവർ കടുത്ത ദുരിതത്തിലാണ്. കനാൽ വൃത്തിയാക്കി വെള്ളം സുഗമമായി ഒഴുക്കിവിടുകയോ ഉപയോഗശൂന്യമയ കനാൽ മൂടുകയോ ചെയ്താൽ പ്രശനത്തിന് പരിഹാരമാകും. മലിനജലം കെട്ടിക്കിടന്ന് കൊതുകുകൾ പെരുകുന്ന സാഹചര്യവും നിലവിലുണ്ട്. ഡെങ്കിപ്പനി, മഞ്ഞപ്പിത്തം തുടങ്ങിയ ജലജന്യ രോഗങ്ങൾ പടരുന്ന സാഹചര്യത്തിൽ പ്രദേശവാസികൾ കടുത്ത ആശങ്കയിലാണ്. മൂത്തേടം ഗ്രാമപഞ്ചായത്ത് അധികൃതരോടും ആരോഗ്യവകുപ്പിനോടും നിരവധി തവണ പരാതി പറഞ്ഞിട്ടും പ്രശ്നത്തിന് പരിഹാരം ഉണ്ടായില്ലെന്ന് നാട്ടുകാർ പറയുന്നു.

കത്തോലിക്ക കോണ്‍ഗ്രസ് ഐക്യദാർഢ്യ സംഗമം

അങ്ങാടിപ്പുറം: നൈജീരിയ ഉൾപ്പെടെ ലോകത്തെന്പാടും ക്രൈസ്തവർക്കെതിരെ നിരന്തരം നടക്കുന്ന കൂട്ടക്കുരുതിരിക്കും ക്രൈസ്തവർ നേരിടുന്ന പീഡനങ്ങൾക്കുമെതിരെ പരിയാപുരം ഫാത്തിമാ മാതാ ഫൊറോന പള്ളി കത്തോലിക്ക കോണ്‍ഗ്രസിന്‍റെ നേതൃത്വത്തിൽ ഐക്യദാർഢ്യ കൂട്ടായ്മ സംഘടിപ്പിച്ചു. ഫൊറോന വികാരി ഫാ.ജോർജ് കളപ്പുരയ്ക്കൽ ഉദ്ഘാടനം ചെയ്തു. പാരിഷ് സെക്രട്ടറി മനോജ് വീട്ടുവേലിക്കൂന്നേൽ മുഖ്യപ്രഭാഷണം നടത്തി. കത്തോലിക്ക കോണ്‍ഗ്രസ് രൂപത വൈസ് പ്രസിഡന്‍റ് ഷാന്േ‍റാ തകിടിയിൽ, യൂണിറ്റ് പ്രസിഡന്‍റ് ജോയ്സി വാലോലിക്കൽ, സെക്രട്ടറി ഷാജു അറയ്ക്കൽ നെല്ലിശേരി, രൂപത പ്രതിനിധി വർഗീസ് പുതുശേരി എന്നിവർ നേതൃത്വം നൽകി. മാലാപറന്പ്: കത്തോലിക്ക കോണ്‍ഗ്രസ് താമരശേരി രൂപതയുടെ കീഴിൽ മാലാപറന്പ് യൂണിറ്റ് പ്രതിഷേധ യോഗം നടത്തി. ലോകത്ത് ഭീകരവാദത്തെ പ്രോത്സാഹിപ്പിക്കുന്ന ചില വർഗീയ സംഘടനകൾ ബോംബും തോക്കും ഉപയോഗിച്ച്് നിരപരാധികളായ ക്രൈസ്തവർക്കെതിരെ നടത്തുന്ന നിഷ്ഠൂരമായ കൊലപാതകങ്ങൾക്കെതിരെ ലോകമൊന്നാകെ പ്രതികരിക്കണമെന്നും കഷ്ടപ്പെടുന്ന നമ്മുടെ സഹോദരങ്ങൾക്ക് പ്രാർഥന സഹായങ്ങൾ ഉണ്ടാകണമെന്നും ഫാ.ജോസ് കാരക്കാട്ട് ഉദ്ഘാടന പ്രസംഗത്തിൽ ആവശ്യപ്പെട്ടു. വികാരി ഫാ.ജോസഫ് മുകളേപറന്പിൽ അനുഗ്രഹ പ്രഭാഷണം നടത്തി. പ്രസിഡന്‍റ്് ജോർജ് ചിറത്തലയാട്ട് അധ്യക്ഷത വഹിച്ചു. ബെന്നി കരിയന്പള്ളി, ലിന്‍റോ ചക്കുങ്കൽ, ജിമ്മിച്ചൻ പാറടയിൽ, കുട്ടപ്പൻ ചക്കുങ്കൽ, ജോയി കൊച്ചീത്ര, ജോമോൻ വേടംപറന്പിൽ, ഷാജി പൂവ്വത്തിങ്കൽ, സോജി കുന്പിളുവേലിൽ, സിസ്റ്റർ ജോസ്ലിൻ, റോസിലി പാറടയിൽ, സിബി പനയ്ക്കൽ, മാജോ കുന്പിളുവേലിൽ, ആന്‍റണി മാറാട്ട് എന്നിവർ പ്രസംഗിച്ചു. വാലില്ലാപ്പുഴ: നൈജീരിയ അടക്കമുള്ള രാജ്യങ്ങളിൽ ക്രൈസ്തവരെ കൂട്ടക്കുരുതി നടത്തുന്നതിൽ പ്രതിഷേധിച്ച് കത്തോലിക്ക കോണ്‍ഗ്രസ് താമരശേരി രൂപതയുടെ ആഹ്വാന പ്രകാരം കത്തോലിക്ക കോണ്‍ഗ്രസ വാലില്ലാപ്പുഴ അങ്ങാടിയിലേക്ക് പ്രതിഷേധ റാലിയും ഇരകളോടുള്ള ഐക്യദാർഢ്യ പ്രഖ്യാപന യോഗവും നടത്തി. യൂണിറ്റ് ഡയറക്ടർ ഫാ. മാത്യു കണ്ടശാംകുന്നേൽ ഉദ്ഘാടനം ചെയ്തു. യൂണിറ്റ് പ്രസിഡന്‍റ് ജയിംസ് തൊട്ടിയിൽ, ട്രഷറർ ബിനു പുല്ലുവേലിൽ തുടങ്ങിയവർ പ്രസംഗിച്ചു.

മുട്ടുമാറ്റിവയ്ക്കൽ ശസ്ത്രക്രിയ ക്യാന്പും സംഗമവും

പെരിന്തൽമണ്ണ: പാണ്ടിക്കാട് എംഇഎസ് ഹെൽത്ത് സെന്‍ററിന്‍റെ പത്താം വാർഷികത്തോടനുബന്ധിച്ച് പെരിന്തൽമണ്ണ എംഇഎസ് മെഡിക്കൽ കോളജും പാണ്ടിക്കാട് എംഇഎസ് ഹെൽത്ത് സെന്‍ററും സംയുക്തമായി മുട്ടുമാറ്റിവയ്ക്കൽ ശസ്ത്രക്രിയ ക്യാന്പും മുട്ടുമാറ്റിവച്ചവരുടെ സംഗമവും സംഘടിപ്പിക്കുന്നു. പാണ്ടിക്കാട് പ്ലസന്‍റ് ഓഡിറ്റോറിയത്തിൽ ജൂലൈ 23ന് രാവിലെ 9.30 മുതൽ ഉച്ചയ്ക്ക് 1.30 വരെയാണ് പരിപാടി. ആദ്യം രജിസ്റ്റർ ചെയ്യുന്ന നൂറു പേർക്ക് മാത്രമേ ക്യാന്പിന്‍റെ സേവനങ്ങൾ ലഭിക്കുകയുള്ളൂ. ഫോണ്‍: 9947478300, 9605716746.

താഴെക്കോട് പഞ്ചായത്ത് വാർഡ് വിഭജനത്തിൽ ഇടക്കാല ഉത്തരവ്

പെരിന്തൽമണ്ണ: താഴെക്കോട് ഗ്രാമപഞ്ചായത്തിന്‍റെ വാർഡ് വിഭജനത്തിൽ ക്രമക്കേടുകൾ ഉണ്ടെന്ന് ആരോപിച്ച് സമർപ്പിച്ച ഹരജിയിൽ ഹൈക്കോടതി ഇടക്കാല ഉത്തരവ് പുറപ്പെടുവിച്ചു. കേസിന്‍റെ അന്തിമ വിധിക്ക് വിധേയമായിട്ടായിരിക്കും പഞ്ചായത്തിന്‍റെ വാർഡ് വിഭജനം പൂർത്തിയാകൂവെന്ന് ഉത്തരവിൽ പറയുന്നു. വി.പി. അബു സബാഹ് നൽകിയ ഹരജിയിൽ ജസ്റ്റിസ് സി.എസ്. ഡൈസാണ് ഉത്തരവ് പുറപ്പെടുവിച്ചത്. വാർഡ് വിഭജനത്തിൽ അശാസ്ത്രീയവും മാനദണ്ഡങ്ങൾ പാലിക്കാതെയും പ്രകൃതിദത്തമായ അതിരുകൾ കൃത്യമായി നിർണയിക്കാതെയും ഡിലിമിറ്റേഷൻ ഉത്തരവുപ്രകാരം നിയമം പാലിക്കാതെയും ഇരുനൂറിൽപരം വീടുകൾ യഥാർഥ വാർഡിൽ വരാതെ പല വാർഡുകളിലായി കിടക്കുന്നു. ഉത്തരവിൽ പറയുന്ന വാർഡ് 10 കുന്നത്ത്‌വട്ട, വാർഡ് 13 മാടാംപാറ, വാർഡ് 14 മാന്തോണിക്കുന്ന്, വാർഡ് 18 കാപ്പുപറന്പ്, വാർഡ് 15 മാട്ടറക്കൽ എന്നീ വാർഡുകൾ മാനദണ്ഡം പാലിച്ചിട്ടില്ല. സമ്മതിദായകരുടെ ഗ്രാമസഭ, പോളിംഗ് സ്റ്റേഷൻ, വാർത്ത വിനിമയ സൗകര്യം തുടങ്ങിയവ കണക്കിലെടുക്കാതെയാണ് വാർഡ് ആറ് മലങ്കട, വാർഡ് 10 കുന്നത്തുവട്ട, മാന്തോണിക്കുന്ന് മാട്ടറക്കൽ, മരുതല വാർഡുകൾ വിഭജനം നടത്തിയിട്ടുള്ളത്. നിലവിലുള്ള എല്ലാ വാർഡുകളും പുനർനിർണയം നടത്തണമെന്നിരിക്കെ പുതുതായി രൂപം നൽകിയ വാർഡ് 23 അത്തിക്കൽ, 22 മരുതല, 21 മുതിരമണ്ണ, 4 കാപ്പ് മുഖം, 5 മാരാന്പറ്റക്കുന്ന് എന്നീ വാർഡുകൾ പഴയ വാർഡിൽ വ്യത്യാസം വരുത്താതെ നന്പർ മാത്രം മാറ്റിയതായി കാണുന്നു. രാഷ്ട്രീയമായ സമ്മർദ്ദത്തിൽ കരട് ലിസ്റ്റും അന്തിമ ലിസ്റ്റും ഒരു മാറ്റവുമില്ലാതെയാണ് പ്രസിദ്ധീകരിച്ചിട്ടുള്ളത്. ഈ സാഹചര്യത്തിലാണ് ഹൈക്കോടതിയെ സമീപിച്ചത്. ഹർജിയിലേക്കുള്ള പ്രാഥമിക വാദം കേട്ടതിനു ശേഷം കോടതി ഹരജി ഫയലിൽ സ്വീകരിക്കുകയും ബന്ധപ്പെട്ടവർക്ക് നോട്ടീസ് നൽകാൻ ഉത്തരവിട്ടു. കേസ് അടുത്തമാസം 28ന് വാദം കേൾക്കും.

ചുങ്കത്തറയിൽ കാട്ടാനകളുടെ പരാക്രമം; വ്യാപകമായി കൃഷി നശിപ്പിച്ചു

എടക്കര: ചുങ്കത്തറയിൽ വീണ്ടും കാട്ടാനക്കൂട്ടത്തിന്‍റെ പരാക്രമം. ജനവാസ കേന്ദ്രത്തിലിറങ്ങിയ കാട്ടാനക്കൂട്ടം വ്യാപകമായി നാശം വിതച്ചു. കൈപ്പിനി അന്പലപ്പൊയിൽ, മുണ്ടപ്പാടം പ്രദേശങ്ങളിലാണ് ജനങ്ങളെ ഭീതിയിലാഴ്ത്തി കാട്ടാനക്കൂട്ടത്തിന്‍റെ വിളയാട്ടം തുടരുന്നത്. മാന്തോണി ഹംസപ്പ, മാന്തോണി ജമീല, പൂളക്കൽ അഹമ്മദ്കുട്ടി, പൂളക്കൽ സൈതലവി, പൂളക്കൽ അഷ്റഫ് എന്നിവരുടെ കൃഷിയിടങ്ങളിലെ കുലച്ച് മൂപ്പെത്താറായ നിരവധി വാഴ, കമുക്, തെങ്ങിൻ തൈകൾ, കപ്പ എന്നിവയെല്ലാം കാട്ടാനകൾ നശിപ്പിച്ചിട്ടുണ്ട്. ഹംസപ്പയുടെ തോട്ടത്തിൽ ഒന്നരലക്ഷം രൂപ ചെലവഴിച്ച് നിർമിച്ച ജലസേചന സംവിധാനവും വന്യമൃഗശല്യം ചെറുക്കാൻ നിർമിച്ച തൂക്ക് ഫെൻസിംഗും നശിപ്പിച്ചു. കഴിഞ്ഞ ദിവസം ഹംസപ്പയുടെ മഞ്ചറയിലെ തോട്ടത്തിലും കാട്ടാനക്കൂട്ടം വ്യാപക നാശമാണ് വരുത്തിയത്. പൂളക്കൽ അഹമ്മദ് കുട്ടിയുടെ വീടിനോട് ചേർന്നുള്ള വാഴകളും പച്ചക്കറികളും നശിപ്പിച്ചിട്ടുണ്ട്. ആളുകൾ തിങ്ങിപ്പാർക്കുന്ന കേന്ദ്രത്തിലേക്ക് പ്രവേശിച്ച ആനകൾ ഓടയ്ക്കൽ അസൈനാറുടെ വീട്ടുമുറ്റത്തെ ജലസേചന പൈപ്പ്, നടുവക്കാട് ഭാസ്കരന്‍റെ വീട്ടുവളപ്പിലെ വാഴ, പാറേങ്ങൽ സുലൈമാന്‍റെ തെങ്ങ്, പൊറ്റയിൽ ഷൗക്കത്ത്, മുഹമ്മദലി മാന്തോണി, മാന്തോണി അബുട്ടി, തരിയക്കോടൻ മുസ്തഫ എന്നിവരുടെ വളപ്പിലെ തെങ്ങ്, വാഴ എന്നിവയും നശിപ്പിച്ചാണ് മടങ്ങിയത്. ശനിയാഴ്ച രാത്രി എട്ടോടെ അന്പലപ്പൊയിലിലെ ജനവാസകേന്ദ്രത്തിലെത്തിയ കാട്ടാനക്കൂട്ടത്തെ നാട്ടുകാരും വനം ജീവനക്കാരും പടക്കം പൊട്ടിച്ച് ഓടിച്ചിരുന്നു. ഇവ നേരെയെത്തിയത് മുണ്ടപ്പാടത്തേക്കാണ്. നാല് ദിവസം മുന്പ് ഇതേ ആനക്കൂട്ടം പ്രദേശത്ത് വ്യാപക കൃഷിനാശം വരുത്തിയിരുന്നു. കർഷകരുടെ വിളകളും ജലസേചന സംവിധാനങ്ങളും സോളാർ ഫെൻസിംഗും നശിപ്പിച്ച നാലെണ്ണം അടങ്ങുന്ന കാട്ടാനകൾ ഇന്നലെ പുലർച്ചെയാണ് കാടുകയറിയത്. കഴിഞ്ഞ ഒരു മാസത്തിലധികമായി വനാതിർത്തിയിൽ നിലയുറപ്പിച്ച കാട്ടാനകൾ മേഖലയിൽ ലക്ഷങ്ങളുടെ വിളനാശമാണ് വരുത്തിക്കൊണ്ടിരിക്കുന്നത്. വൈകുന്നേരമായാൽ വീടിന് പുറത്തിറങ്ങാൻ പറ്റാത്ത അവസ്ഥയിലാണ് പ്രദേശവാസികൾ. രൂക്ഷമായ കാട്ടാനശല്യത്തിന് ശാശ്വത പരിഹാരം കാണാൻ അധികൃതർ തയാറാകണമെന്നും അല്ലാത്തപക്ഷം കടുത്ത പ്രക്ഷോഭം സംഘടിപ്പിക്കുമെന്നും കർഷകർ മുന്നറിയിപ്പ് നൽകി. കടുവ ഭീതിയിൽ മലയോരം: ജാഗ്രത സമിതി രൂപീകരിച്ചു കരുവാരകുണ്ട്: കടുവ അടക്കമുള്ള വന്യമൃഗശല്യം മൂലം ഭീഷണി നേരിടുന്ന കരുവാരകുണ്ട് മേഖലയിലെ ജനങ്ങളുടെ ഭീതിയകറ്റാൻ നടപടി സ്വീകരിക്കണമെന്നാവശ്യപ്പെട്ട് തുടർപ്രവർത്തനങ്ങൾക്കായി പ്രദേശവാസികൾ മലയോര ജനജാഗ്രത സമിതി രൂപീകരിച്ചു. കഴിഞ്ഞ രണ്ട് മാസത്തോളമായി കാർഷിക മേഖല തകർന്ന് കിടക്കുകയാണെന്നും ഭീതി മൂലം തൊഴിലാളികൾ ജോലിക്ക് വരാത്തതിനാൽ റബർ തോട്ടങ്ങൾ കാടുമൂടി കിടക്കുകയാണെന്നും കടുവകളെ കണ്ടെത്തി വെടിവച്ച് കൊല്ലാൻ നടപടി സ്വീകരിക്കണമെന്നും മലയോര ജനത ജാഗ്രതാ സമിതി രൂപീകരണ യോഗം ആവശ്യപ്പെട്ടു. യോഗത്തിൽ മാനുവൽകുട്ടി മണിമല അധ്യക്ഷത വഹിച്ചു. കെ.കെ.ജയിംസ്, ജോസ് ഉള്ളാട്ടിൽ, ലത്തീഫ് മഠത്തിൽ, കെ. ഗോപാലകൃഷ്ണൻ, എം.കെ.മുഹമ്മദലി, വി. ആബിദലി, ഒ.പി. ഇസ്മായിൽ, അയ്യൂബ് പുലിയോടൻ, ഷൈലേഷ് പട്ടിക്കാടൻ, കെ.അബ്ദുറഹിമാൻ തുടങ്ങിയവർ പ്രസംഗിച്ചു.

"അണ്‍ എയ്ഡഡ് സ്കൂളുകളോടുള്ള വിവേചനം അവസാനിപ്പിക്കണം’

പുത്തനങ്ങാടി: കേരളത്തിലെ സിബിഎസ്ഇ, ഐസിഎസ്ഇ, കേരള സർക്കാർ അണ്‍ എയ്ഡഡ് സ്കൂളുകളുടെ കൂട്ടായ്മയായ കേരള അണ്‍ എയ്ഡഡ് സ്കൂൾ പ്രൊട്ടക്‌ഷൻ കൗണ്‍സിൽ ജില്ലാ ജനറൽ ബോഡിയോഗം പുത്തനങ്ങാടി സെന്‍റ് ജോസഫ്സ് സ്കൂളിൽ നടത്തി. കേരളത്തിൽ അണ്‍ എയ്ഡഡ് മേഖലയോടുള്ള സർക്കാർ വിവേചനം അവസാനിപ്പിക്കണമെന്ന് യോഗം ആവശ്യപ്പെട്ടു. അംഗങ്ങളായ സ്കൂളുകൾക്ക് സൗജന്യ നിയമ സഹായം ലഭ്യമാക്കും. അന്യായമായി വർധിപ്പിച്ച കെട്ടിട നികുതി, സ്കൂൾ ബസ് വാഹന നികുതി എന്നിവ പിൻവലിക്കണമെന്ന് യോഗം സർക്കാരിനോടാവശ്യപ്പെട്ടു. സംസ്ഥാന ജനറൽ സെക്രട്ടറി പി.എസ്. രാമചന്ദ്രൻപിള്ള ഉദ്ഘാടനം ചെയ്തു. ജില്ലാ പ്രസിഡന്‍റ് എം. ജൗഹർ അധ്യക്ഷത വഹിച്ചു. ഓർഗനൈസിംഗ് സെക്രട്ടറി ജേക്കബ് ജോർജ് വിഷയാവതരണം നടത്തി. മേഖലാ സെക്രട്ടറി എം. അബ്ദുൾനാസർ മുഖ്യപ്രഭാഷണം നടത്തി. ഭാരവാഹികളായ വിക്ടർ ജോർജ്, ജനറൽ സെക്രട്ടറി പ്രമോദ് തലാപ്പിൽ, ഫാ. നന്നം പ്രേംകുമാർ, സിസ്റ്റർ ആൻസില ജോർജ്, ഡോ. ഷിബിലി, സൈത് മുസ്തഫ തങ്ങൾ, കേണൽ ബി.എം. കുട്ടി, അബ്ദുൾ അക്ബർ, മൂസഹാജി എന്നിവർ പ്രസംഗിച്ചു. ജില്ലയിലെ 115 സ്കൂൾ പ്രതിനിധികൾ യോഗത്തിൽ പങ്കെടുത്തു. അണ്‍ എയ്ഡഡ് മേഖലയുടെ ഉയർച്ചക്കായി കൂട്ടായ പ്രവർത്തനങ്ങൾ നടത്താനും വിശദമായ അവകാശ പത്രിക സർക്കാരിന് സമർപ്പിക്കാനും തീരുമാനിച്ചു. അണ്‍ എയ്ഡഡ് സ്കൂളുകളുടെ ദേശീയ കണ്‍വൻഷൻ കൊച്ചിയിൽ സംഘടിപ്പിക്കാനും യോഗം തീരുമാനിച്ചു.

പുതിയ സ്വതന്ത്ര ലയണ്‍സ് സിസ്ട്രിക്ട് 318ഡി വണ്‍ ജൂലൈ ഒന്നുമുതൽ

പെരിന്തൽമണ്ണ: വിവിധ സേവന പ്രവർത്തനങ്ങളുമായി പുതിയ സ്വതന്ത്ര ലയണ്‍സ് സിസ്ട്രിക്ട് 318ഡി വണ്‍ മലപ്പുറത്തിന്‍റെ തുടക്കം ജൂലൈ ഒന്നു മുതൽ. ഇതിന്‍റെ ഭാഗമായി തിമിരരോഗ വിമുക്ത മലപ്പുറം എന്ന പദ്ധതിയുടെ ജില്ലാതല ഉദ്ഘാടനം മഞ്ചേരിയിൽ നടത്താൻ തീരുമാനിച്ചു. പ്രമേഹരോഗ നിർണയ ക്യാന്പിന്‍റെയും ബോധവത്കരണത്തിന്‍റെയും ജില്ലാതല ഉദ്ഘാടനം പെരിന്തൽമണ്ണ ലയണ്‍സ് ഹാളിൽ (ഐഎംഎ ഹാളിന് സമീപം) രാവിലെ ഒന്പതിന് നജീബ് കാന്തപുരം എംഎൽഎ നിർവഹിക്കും. റീജിയൺതല തമിരരോഗ നിർണയ ക്യാന്പ് ഉദ്ഘാടനം ( റീജീയൻ 5, സോണ്‍ 2 ) പെരിന്തൽമണ്ണ ലയണ്‍സ് ഹാളിൽ പെരിന്തൽമണ്ണ മുനിസിപ്പൽ ചെയർമാൻ പി. ഷാജി രാവിലെ ഒന്പതിന് നിർവഹിക്കും. മലപ്പുറം ജില്ലയെ തിമിരരോഗ വിമുക്തമായി പ്രഖ്യാപിക്കുന്നതിന് ജില്ലയിലെ ആറ് റീജിയണുകളിലായി 12 കേന്ദ്രങ്ങളിൽ അന്നേദിവസം അഹല്യ ഹോസ്പിറ്റലുമായി സഹകരിച്ച് ഡോക്ടർമാർ രോഗികളെ പരിശോധിച്ച് ശസ്ത്രക്രിയ ആവശ്യമുള്ളവർക്ക് സൗജന്യമായി ഹോസ്പിറ്റലിൽ കൊണ്ടുപോയി വേദനരഹിത സാങ്കേതികവിദ്യയിലൂടെ ശസ്ത്രക്രിയ നടത്തും. ജില്ലയിലെ നഗരസഭകളിലും പഞ്ചായത്തുകളിലും വരുംമാസങ്ങളിൽ അഹല്യ ഹോസ്പിറ്റലിന്‍റെ നേതൃത്വത്തിൽ ലയണ്‍സ് ക്ലബുകൾ തിമിര രോഗനിർണയ ക്യാന്പും ആവശ്യമുള്ളവർക്ക് ശസ്ത്രക്രിയയും നടത്തും. വിവരങ്ങൾക്ക് പദ്മനാഭൻ ഫോണ്‍: 9447216330, ഇസ്മായിൽ-7306745475, ജാബിർ -9633866539, ഡോ. നഈമു റഹുമാൻ(റീജിയൺ ചെയർമാൻ)- 9847986101 , ശശികുമാർ(സോണ്‍ ചെയർമാൻ)-8921499298, ഡോ. കൊച്ചു എസ്. മണി (അഡീഷണൽ കാബിനറ്റ് സെക്രട്ടറി, ഡയബറ്റിസ്)-9447843241- നന്പറിൽ ബന്ധപ്പെടണം. പരിസ്ഥിതി സംരക്ഷണത്തിന്‍റെ ഭാഗമായി ജില്ലയിലെ വിവിധ സ്ഥാപനങ്ങളിലായി ആയിരത്തോളം ഔഷധ സസ്യങ്ങൾ നട്ടുപിടിപ്പിക്കാനും തീരുമാനിച്ചു. ജൂലൈ ഒന്ന് ഡോക്ടേഴ്സ് ദിനത്തിൽ ജില്ലയിലെ ലയണ്‍സ് ക്ലബുകൾ ഡോക്ടർമാരെ ആദരിക്കും.

റിംഗ് കന്പോസ്റ്റ് പദ്ധതി

എടക്കര: ചുങ്കത്തറ ഗ്രാമപഞ്ചായത്ത് വാർഷിക പദ്ധതിയായ വ്യക്തിഗത ഗുണഭോക്താക്കൾക്ക് റിംഗ് കന്പോസ്റ്റ് എന്ന പദ്ധതിയുടെ ഉദ്ഘാടനം പ്രസിഡന്‍റ് വത്സമ്മ സെബാസ്റ്റ്യൻ നിർവഹിച്ചു. വൈസ് പ്രസിഡന്‍റ് സൈനബ മാന്പള്ളി അധ്യക്ഷത വഹിച്ചു. വിഇഒ കെ.വി. നിഷ പദ്ധതി വിശദീകരിച്ചു. പഞ്ചായത്ത് അംഗങ്ങളായ രതീഷ് മഠത്തിൽ, ഷാജഹാൻ ചേലൂർ, ചന്ദ്രൻ, നിഷിദ മുഹമ്മദാലി എന്നിവർ പ്രസംഗിച്ചു.

മൗലാന ഹോസ്പിറ്റലിൽ ഗവേഷണ ശില്പശാല നടത്തി

പെരിന്തൽമണ്ണ: മൗലാന ഹോസ്പിറ്റലിൽ ഡോക്ടർമാർക്കും വിദ്യാർഥികൾക്കുമായി ഗവേഷണ ശില്പശാല സംഘടിപ്പിച്ചു. മൗലാന ഇൻസ്റ്റിറ്റ്യൂഷണൽ എത്തിക്കൽ കമ്മിറ്റി സംഘടിപ്പിച്ച ശില്പശാല ഹോസ്പിറ്റൽ മെഡിക്കൽ സൂപ്രണ്ട് ഡോ. കെ.എ. സീതി ഉദ്ഘാടനം ചെയ്തു. ഇൻസ്റ്റിറ്റ്യൂഷണൽ എത്തിക്കൽ കമ്മിറ്റി ചെയർമാൻ ഡോ. വി. അബ്ദുൾ ജലീൽ അധ്യക്ഷത വഹിച്ചു. കോഴിക്കോട് മെഡിക്കൽ കോളജ് കമ്മ്യൂണിറ്റി മെഡിസിൻ മേധാവി ഡോ. അസ്മ റഹീം, മണിപ്പാൽ അക്കാഡമി ഓഫ് ഹയർ എഡ്യുക്കേഷൻ ചീഫ് ഇന്നവേറ്റീവ് ഓഫീസർ ഡോ. മുഹമ്മദ് സുബൈർ, സൗദി കിംഗ് ഫഹദ് യൂണിവേഴ്സിറ്റി ഓഫ് പെട്രോളിയം ആൻഡ് കെമിക്കൽസ് പ്രഫസർ ഡോ. അബ്ദുൾ മാലിക്ക് പീടികാക്കൽ, മണിപ്പാൽ കോളജ് പ്രഫ. ഡോ. കെ.ടി. മുഹമ്മദ് സാലിം, സെമി കോളൻ സിടിഒ കെ.കെ. ഇർഷാദ് എന്നിവർ വിഷയങ്ങൾ അവതരിപ്പിച്ചു. മൗലാന ഫാർമസി കോളജ് വൈസ് പ്രിൻസിപ്പലും ഇൻസ്റ്റിറ്റ്യൂഷണൽ എത്തിക്കൽ കമ്മിറ്റി മെന്പർ സെക്രട്ടറിയുമായ ഡോ. പി.പി. നസീഫ്, ഒമാൻ സുൽത്താൻ ഖാബൂസ് ഹോസ്പിറ്റൽ പ്രഫ. ഡോ. സി.എ. മൻസൂർ, മൗലാന ഹോസ്പിറ്റൽ സിഒഒ രാംദാസ്, ഡോ. വിഷ്ണു വാസുദേവൻ, ഡോ. വിനീതമേരി ജോയ്, ഡോ. ലിനു മോഹൻ, ഡോ. വി.കെ. സുമ, കെ. മൊയ്തീൻ, ഡോ.സി.കെ. മുഹമ്മദ് ഷിയ, ഡോ.പി. അബ്ദുൾ അസ്ലം, ശിഫ റഷീദ് എന്നിവർ പ്രസംഗിച്ചു.

വിദ്യാഭ്യാസത്തെ സംസ്കാരത്തിന്‍റെ ഭാഗമാക്കാൻ കേരളത്തിന് സാധിച്ചു: മന്ത്രി വി. അബ്ദുറഹിമാൻ

തിരൂർ: സംസ്ഥാന ഫിഷറീസ് വകുപ്പും കേരള മത്സ്യത്തൊഴിലാളി ക്ഷേമനിധി ബോർഡും സംയുക്തമായി മത്സ്യ തൊഴിലാളികളുടെയും അനുബന്ധ തൊഴിലാളികളുടെയും കുട്ടികൾക്ക് നൽകി വരുന്ന വിദ്യാഭ്യാസ- കായിക പ്രോത്സാഹന അവാർഡുകൾ വിതരണം ചെയ്തു. "നക്ഷത്രത്തിളക്കം 2025’ എന്ന പേരിൽ പടിഞ്ഞാറേക്കര സീ-സോണ്‍ ഓഡിറ്റോറിയത്തിൽ നടന്ന പരിപാടി മന്ത്രി വി. അബ്ദുറഹിമാൻ ഉദ്ഘാടനം ചെയ്തു. വിദ്യാഭ്യാസത്തെ സംസ്കാരത്തിന്‍റെ ഭാഗമാക്കി മാറ്റാൻ നമുക്ക് സാധിച്ചു. അതിൽ ആണ്‍കുട്ടികളേക്കാൾ ഉന്നതിയിൽ പെണ്‍കുട്ടികൾ എത്തുന്നതാണ് ഇപ്പോൾ നാം കാണുന്നത്. രാജ്യത്തിന് തന്നെ മാതൃകയായി കേരളത്തിലെ പെണ്‍കുട്ടികൾ പഠനത്തിൽ മുന്നോട്ടുവരുന്നുണ്ട്. ന്യൂനപക്ഷ വിദ്യാർഥികളുടെ ഉന്നത പഠനത്തിനായി 50,000 രൂപയുടെ സ്കോളർഷിപ്പ് നടപ്പാക്കിയിട്ടുണ്ടെന്നും മന്ത്രി പറഞ്ഞു. തവനൂർ എംഎൽഎ ഡോ. കെ.ടി. ജലീൽ അധ്യക്ഷത വഹിച്ചു. അവാർഡിന് അർഹരായ കുട്ടികളുമായി മന്ത്രി സംവദിച്ചു. കുട്ടികളുടെ ഉന്നത പഠനത്തിനായി മാർഗനിർദേശങ്ങളും നൽകി. ജില്ലയിലെ നാല് ഫിഷറീസ് ഓഫീസുകളുടെ പരിധിയിൽ ഉൾപ്പെടുന്ന പത്താം ക്ലാസിൽ മുഴുവൻ എ പ്ലസ് ലഭിച്ച 51 വിദ്യാർഥികൾക്കും പ്ലസ് ടു തലത്തിൽ മുഴുവൻ എ പ്ലസ് ലഭിച്ച 17 വിദ്യാർഥികൾക്കും കായിക മേഖലയിൽ ദേശീയതലത്തിൽ മികവ് തെളിയിച്ച നാല് കുട്ടികൾക്കുമടക്കം 134 വിദ്യാർഥികൾക്ക് ചടങ്ങിൽ കാഷ് അവാർഡുകൾ വിതരണം ചെയ്തു. കൂടാതെ 199 പേർക്ക് 25000 രൂപയുടെ വിവാഹ ധനസഹായവും നൽകി. വിദ്യാർഥികൾക്കും രക്ഷിതാക്കൾക്കുമായി വിമുക്തി ജില്ലാ ലൈസണ്‍ ഓഫീസർ പി. ബിജു നയിച്ച ലഹരി വിരുദ്ധ ബോധവത്കരണ ക്ലാസും പരിപാടിയിൽ നടന്നു. ഡയറി ഡെവലപ്മെന്‍റ് എക്സ്റ്റൻഷൻ ഓഫീസർ എച്ച്.പി. മെഹറൂഫ് കുട്ടികൾക്കായി മോട്ടിവേഷൻ ക്ലാസെടുത്തു. സെക്രട്ടറി സജി എം. രാജേഷ് റിപ്പോർട്ട് അവതരിപ്പിച്ചു. തിരൂർ ബ്ലോക്ക് പഞ്ചായത്ത് വൈസ് പ്രസിഡന്‍റ് അഡ്വ. യു. സൈനുദ്ദീൻ, പുറത്തൂർ ഗ്രാമപഞ്ചായത്ത് പ്രസിഡന്‍റ് സി.ഒ. ശ്രീനിവാസൻ, വൈസ് പ്രസിഡന്‍റ് സുഹറ ആസിഫ്, വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ കെ.ടി. പ്രശാന്ത്, മത്സ്യബോർഡ് ചെയർമാൻ കൂട്ടായി ബഷീർ തുടങ്ങിയവർ പ്രസംഗിച്ചു.

ഡെങ്കിപ്പനിക്കെതിരേ പ്രതിരോധം ഊർജിതമാക്കി

മലപ്പുറം: ജില്ലയിൽ ഡെങ്കിപ്പനിക്കെതിരേ പ്രതിരോധ പ്രവർത്തനങ്ങൾ ഊർജിതമാക്കിയതായി ജില്ലാ മെഡിക്കൽ ഓഫീസർ ഡോ. ആർ രേണുക. മഴക്കാലമായതോടെ ഡെങ്കിപ്പനി പടരുന്ന സാഹചര്യമുണ്ടെന്നും മൂന്ന് പേർ ഇതിനകം മരിച്ചതായും ജില്ലാ മെഡിക്കൽ ഓഫീസർ അറിയിച്ചു. പ്രായമായവരിലാണ് ഡെങ്കി അപകടകരമാകുന്നതായി കാണുന്നത്. ഡെങ്കിപ്പനി ചികിത്സയ്ക്ക് ആവശ്യമായ മരുന്നുകൾ സർക്കാർ ആശുപത്രികളിൽ സ്റ്റോക്കുണ്ടെന്നും ഡിഎംഒ പറഞ്ഞു. എംഎൽഎമാരായ പി. ഉബൈദുള്ള, ആബിദ് ഹുസൈൻ തങ്ങൾ, പി. അബ്ദുൾ ഹമീദ്, യു.എ. ലത്തീഫ്, കുറുക്കോളി മൊയ്തീൻ എന്നിവർ ജില്ലാ വികസന സമിതിയിൽ ഉന്നയിച്ച പകർച്ചവ്യാധികളെക്കുറിച്ചുള്ള ചോദ്യങ്ങൾക്ക് മറുപടി പറയുകയായിരുന്നു ഡിഎംഒ. ആരോഗ്യ പ്രവർത്തകർ, ജനപ്രതിനിധികൾ, മാധ്യമങ്ങൾ തുടങ്ങി എല്ലാവരും ചേർന്ന് നടത്തിയ ബോധവത്കരണത്തിന്‍റെ ഫലമായി ജില്ലയിൽ വീടുകളിലെ പ്രസവം ഏതാണ്ട് പൂർണമായും ഇല്ലാതാക്കാൻ കഴിഞ്ഞിട്ടുണ്ടെന്നും ഡിഎംഒ പറഞ്ഞു. മൂന്ന് കേസുകൾ മാത്രമാണ് കഴിഞ്ഞ മാസം റിപ്പോർട്ട് ചെയ്തത്. മഞ്ചേരി മെഡിക്കൽ കോളജിലെ രണ്ട് ഡോക്ടർമാരെ വയനാട്ടിലേക്ക് സ്ഥലം മാറ്റിയ സാഹചര്യത്തിലാണ് രാത്രികാല പോസ്റ്റ്മോർട്ടം താൽക്കാലികമായി തടസപ്പെട്ടതെന്ന് യു.എ. ലത്തീഫ് എംഎൽഎയുടെ ചോദ്യത്തിന് മറുപടിയായി മെഡിക്കൽ കോളജ് പ്രിൻസിപ്പൽ അറിയിച്ചു. രാത്രികാല പോസ്റ്റ്മോർട്ടം വൈകാതെ പുനഃസ്ഥാപിക്കാൻ കഴിയുമെന്നും അദ്ദേഹം അറിയിച്ചു. കോട്ടക്കുന്നിൽ മണ്ണിടിച്ചിൽ മൂലം സുരക്ഷിതമല്ലാത്ത വീടുകളിൽ താമസിക്കുന്നവരുടെ പുനരധിവാസ നടപടികൾ വേഗമാക്കണമെന്ന് പി. ഉബൈദുള്ള എംഎൽഎ ആവശ്യപ്പെട്ടു. തിരൂർ ജില്ലാ ആശുപത്രിയിലെ മോർച്ചറിയുടെ നവീകരണം അടിയന്തരമായി നടത്തണമെന്നും സിവിൽ സ്റ്റേഷനിലെത്തുന്ന പൊതുജനങ്ങൾക്കും ഭിന്നശേഷിക്കാർക്കും വൃത്തിയുള്ള ശുചിമുറികൾ സജ്ജമാക്കണമെന്നും പി.പി. സുനീർ എംപിയുടെ പ്രതിനിധി ആവശ്യപ്പെട്ടു. എംപിമാരുടെ പ്രതിനിധികൾ, ജില്ലാപഞ്ചായത്ത് വൈസ് പ്രസിഡന്‍റ് ഇസ്മായിൽ മൂത്തേടം, ജില്ലാ വികസന കമ്മീഷണർ അപൂർവ ത്രിപാഠി, ജില്ലാ പ്ലാനിംഗ് ഓഫീസർ പി.ഡി. ജോസഫ്, വിവിധ വകുപ്പുകളിലെ ജില്ലാതല ഉദ്യോഗസ്ഥർ തുടങ്ങിയവർ പങ്കെടുത്തു. ‘അധ്യാപക ഒഴിവുകൾ ഫിക്സേഷനുശേഷം റിപ്പോർട്ട് ചെയ്യും’ എൽപി, യുപി, ഹൈസ്കൂൾ വിഭാഗം അധ്യാപക ഒഴിവുകൾ സ്റ്റാഫ് ഫിക്സേഷൻ റിപ്പോർട്ട് ലഭ്യമാകുന്നതോടെ പിഎസ്‌സിക്ക് റിപ്പോർട്ട് ചെയ്യുമെന്ന് ജില്ലാ വിദ്യാഭ്യാസ ഉപഡയറക്ടർ അറിയിച്ചു. പിഎസ്‌സി റാങ്ക് പട്ടികയുടെ കാലാവധി കഴിയും മുന്പ് ഒഴിവുകൾ റിപ്പോർട്ട് ചെയ്ത് നിയമനത്തിനുള്ള നടപടികൾ വേഗമാക്കണമെന്ന് പി. ഉബൈദുള്ള എംഎൽഎ നിർദേശിച്ചു. പ്ലസ് വണ്‍ പ്രവേശനം സംബന്ധിച്ച് സപ്ലിമെന്‍ററി അലോട്ട്മെന്‍റ് പൂർത്തിയാകുന്നതോടെ വ്യക്തമായ ചിത്രം ലഭിക്കുമെന്ന് ഹയർ സെക്കൻഡറി ഡെപ്യൂട്ടി ഡയറക്ടർ വികസനസമിതി യോഗത്തിൽ അറിയിച്ചു. ജില്ലയിൽ നിലവിൽ അണ്‍ എയ്ഡഡ് ഉൾപ്പെടാതെ തന്നെ 9158 പ്ലസ് വണ്‍ സീറ്റുകളിൽ ഒഴിവുണ്ടെന്നും 13187 അപേക്ഷർ കാത്തിരിപ്പുണ്ടെന്നും ആർഡിഡി അറിയിച്ചു.

കൂമൻകുന്ന് നഗറിലെ 17 കുടുംബങ്ങൾക്ക് പട്ടയം നൽകി

മങ്കട:മങ്കട വില്ലേജിൽ ദശാബ്ദങ്ങളുടെ കാത്തിരിപ്പിനൊടുവിൽ കൂമൻകുന്ന് നഗറിൽ താമസിക്കുന്ന 17 കുടുംബങ്ങൾക്ക് പട്ടയം ലഭിച്ചു. പെരിന്തൽമണ്ണ തഹസിൽദാർ ടി. പ്രകാശൻ, ഭൂരേഖ തഹസിൽദാർ എ. വേണുഗോപാലൻ എന്നിവരുടെ നേതൃത്വത്തിൽ പട്ടയത്തിന്‍റെ വിധി പകർപ്പ് കൈമാറി. ചടങ്ങിൽ പെരിന്തൽമണ്ണ താലൂക്ക് ഡെപ്യൂട്ടി തഹസിൽദാർ ജയ്സന്‍റ് മാത്യു, വില്ലേജ് ഓഫീസർ വിജീന്ദ്രകുമാർ, പഞ്ചായത്ത് മെന്പർമാരായ പി.ടി. ഷറഫുദ്ദീൻ, ജംഷീർ, അലി അക്ബർ, മങ്കട വില്ലേജ് ജനകീയ സമിതി അംഗങ്ങളായ പി. അബ്ദുസമദ്, മുഹമ്മദാലി, സ്പെഷൽ വില്ലേജ് ഓഫീസർ രാജേഷ് പിള്ള, മറ്റു ജീവനക്കാർ, രാഷ്ട്രീയ പാർട്ടികളുടെ പ്രതിനിധികൾ എന്നിവർ പങ്കെടുത്തു. കൂമൻകുന്ന് നഗർ നിവാസികൾക്ക് പട്ടയം ലഭിക്കുന്നതിനായി അഹോരാത്രം പരിശ്രമിച്ച മങ്കട വില്ലേജ് ജനകീയ സമിതി അംഗം പി. അബ്ദുസമദിന് സർട്ടിഫിക്കറ്റും ഉപഹാരവും തഹസിൽദാർ നൽകി.

മങ്കടയിൽ റോഡ് തകർച്ച; ഗതാഗതക്കുരുക്ക് രൂക്ഷം

മങ്കട: മങ്കടയിൽ റോഡ് തകർച്ച കാരണം ഗതാഗതക്കുരുക്ക് രൂക്ഷം. മങ്കട മേലെ ജംഗ്ഷനിൽ നിന്ന് കൂട്ടിൽ റോഡും മലപ്പുറം റോഡും തിരിയുന്ന ഭാഗത്താണ് ഏറ്റവും കൂടുതൽ ഗതാഗതക്കുരുക്ക് അനുഭവപ്പെടുന്നത്. മലപ്പുറം റോഡിലേക്ക് തിരിയുന്ന ഭാഗം പൈപ്പ് ലൈൻ പൊട്ടുന്നതിനെത്തുടർന്ന് എത്ര അറ്റകുറ്റപ്പണി നടത്തിയാലും വീണ്ടും തകരുന്ന അവസ്ഥയാണുള്ളത്.കഴിഞ്ഞ വേനലിൽ റോഡ് തകർന്ന ഭാഗത്ത് പൈപ്പ് ലൈൻ ശരിയാക്കി കോണ്‍ക്രീറ്റിട്ട് മൂടിയെങ്കിലും ഒരു മാസത്തിനകം വീണ്ടും തകർന്നു. ഈ ഭാഗത്തിപ്പോൾ വലിയ ഗർത്തം രൂപപ്പെട്ടിട്ടുണ്ട്. ഇതിനാൽ റോഡിലേക്ക് വാഹനങ്ങൾ പ്രവേശിക്കുന്നത് അപകടകരമായി മാറിയിരിക്കുകയാണ്. മങ്കട ടൗണിൽ മേലെ അങ്ങാടിയിൽ മഞ്ചേരി ഭാഗത്തേക്കും പെരിന്തൽമണ്ണ ഭാഗത്തേക്കുമുള്ള ബസ് സ്റ്റോപ്പുകൾ വർഷങ്ങൾക്കു മുന്പ് പോലീസ് ഇടപെട്ട് മാറ്റിയെങ്കിലും ബസ് കാത്തിരിപ്പ് കേന്ദ്രങ്ങളില്ലാത്തതിനാൽ ബസുകൾ ജംഗ്ഷനിലാണ് നിർത്തുന്നത്. ഇത് ടൗണിലെ ഗതാഗതക്കുരുക്ക് രൂക്ഷമാക്കുന്നു. വ്യാപാരികളെയും ഇത് സാരമായി ബാധിക്കുന്നു. മഞ്ചേരി - പെരിന്തൽമണ്ണ റൂട്ടിൽ ആംബുലൻസുകൾ അടക്കം മിക്ക സമയങ്ങളിലും ഗതാഗതക്കുരുക്കിൽപ്പെടുന്നതിനാൽ വലിയ പ്രയാസങ്ങൾ സൃഷ്ടിക്കുന്നു. അനധികൃത വാഹന പാർക്കിംഗും ട്രാഫിക് നിയമലംഘനങ്ങളും പരിശോധിക്കാൻ മങ്കടയിൽ സ്ഥിരം സംവിധാനമില്ല. ഗതാഗതക്കുരുക്ക് രൂക്ഷമാകുന്പോൾ ബസിലെ ജീവനക്കാരോ വഴിയാത്രക്കാരോ വ്യാപാരികളോ ഇടപെട്ടാണ് പലപ്പോഴും ട്രാഫിക് നിയന്ത്രിക്കുന്നത്. മങ്കട ടൗണിൽ കുറ്റമറ്റ ട്രാഫിക് സംവിധാനം വേണമെന്നതാണ് നാട്ടുകാരുടെ ആവശ്യം.

അങ്ങാടിപ്പുറം മേൽപ്പാലം: കട്ട വിരിക്കൽ ഇന്ന് മുതൽ

യാത്രക്കാർക്കായി പാലത്തിന്‍റെ ഇരുഭാഗത്തും ബസ് സൗകര്യം പെരിന്തൽമണ്ണ: ദേശീയപാതയിൽ അങ്ങാടിപ്പുറം മേൽപ്പാലത്തിന് സമീപം ഇന്‍റർലോക്ക് കട്ട വിരിക്കുന്ന പ്രവൃത്തി ഇന്ന് മുതൽ ആരംഭിക്കുന്നതിനാൽ പാലത്തിലൂടെയുള്ള ഗതാഗത നിയന്ത്രണം ഏർപ്പെടുത്തി. എന്നാൽ യാത്രക്കാരുടെ ബുദ്ധിമുട്ടുകളും സൗകര്യവും പരിഗണിച്ച് സ്വകാര്യബസുകൾ പാലത്തിന്‍റെ ഇരുഭാഗങ്ങളിലും (പടിഞ്ഞാറുഭാഗത്തും കിഴക്കുഭാഗത്തും) നിർത്തി യാത്രക്കാരെ ഇറക്കുകയും കയറ്റുകയും ചെയ്യുമെന്ന് ബന്ധപ്പെട്ടവർ അറിയിച്ചു. പടിഞ്ഞാറ് ഭാഗങ്ങളിൽ നിന്നുവരുന്ന ബസ് യാത്രക്കാരെ പടിഞ്ഞാറുഭാഗത്തുള്ള നിശ്ചിത സ്റ്റോപ്പിൽ ഇറക്കുകയും യാത്രക്കാരെ കയറ്റി തിരിച്ചുപോവുകയും ചെയ്യും. അതുപോലെ കിഴക്കുഭാഗങ്ങളിൽ നിന്നുവരുന്ന ബസുകൾ കിഴക്ക് ഭാഗത്തുള്ള സ്റ്റോപ്പിൽ ആളുകളെ ഇറക്കികയറ്റി തിരിച്ചു പോവുകയും ചെയ്യും. പെരിന്തൽമണ്ണയിൽ നിന്ന് അങ്ങാടിപ്പുറം വഴി മറ്റു ഭാഗങ്ങളിലേക്ക് പോകേണ്ട യാത്രക്കാർക്ക് പാലത്തിന്‍റെ രണ്ടുവശങ്ങളിലുമായി ബസുകൾ നിർത്തി ആളെ ഇറക്കുകയും കയറ്റുകയും ചെയ്യുന്നതിനാൽ വലിയ പ്രയാസം നേരിടില്ല. ഇരുഭാഗങ്ങളിലും നിർത്തിയിടുന്ന ബസുകൾക്ക് അതത് സമയങ്ങളിൽ യാത്രക്കാരുമായി യാത്ര തുടരാമെന്ന് ബസ് ഓപറേറ്റേഴ്സ് അസോസിയേഷൻ സെക്രട്ടറി മുഹമ്മദാലി ഹാജി അറിയിച്ചു. ഗതാഗതക്കുരുക്കുമായി ബന്ധപ്പെട്ട മറ്റു കാര്യങ്ങൾ ആർടിഒ, പോലീസ്, ജനപ്രതിനിധികൾ എന്നിവരുടെ സാന്നിധ്യത്തിൽ സ്ഥലം പരിശോധിച്ച് തീരുമാനങ്ങളെടുക്കുമെന്നും അദ്ദേഹം പറഞ്ഞു.

മഴയിൽ കിണർ ഇടിഞ്ഞുതാഴ്ന്നു

വണ്ടൂർ: കനത്ത മഴയെ തുടർന്ന് കിണർ ഇടിഞ്ഞുതാഴ്ന്നു. പോരൂർ പൂത്രക്കോസ് കാരക്കാട് നഗറിന് സമീപമുള്ള മണിമന്ദിരത്തിൽ വിജയന്‍റെ കിണറാണ് ആൾമറയടക്കം ഇടിഞ്ഞുതാഴ്ന്നത്. വർഷങ്ങളായി ഉപയോഗിക്കുന്ന കിണറാണ് തകർന്നത്. 31 റിംഗുകളും ആൾമറയും പന്പ്സെറ്റ് അടക്കം ഇടിഞ്ഞു താഴുകയായിരുന്നു. കഴിഞ്ഞ ദിവസം വൈകുന്നേരം നാലുമണിയോടെ പെയ്ത ശക്തമായ മഴക്കിടെയായിരുന്നു അപകടം. അഞ്ച് ലക്ഷം രൂപ നഷ്ടം കണക്കാക്കുന്നു.

നിറയെ കുഴികൾ; നിലന്പൂർ മിനിബൈപാസ് റോഡിലൂടെയുള്ള യാത്ര ദുഷ്കരം

നിലന്പൂർ: നിലന്പൂർ മിനിബൈപാസ് റോഡിലൂടെയുള്ള യാത്ര ദുരിതപൂർണം. നിലന്പൂർ മിൽമ പടിയിൽ നിന്ന് മിനി ബൈപാസ് റോഡിലേക്കുള്ള ലിങ്ക് റോഡ് ഉൾപ്പെടെ ഗർത്തങ്ങൾ കൊണ്ട് നിറഞ്ഞ അവസ്ഥയിലാണ്. മഴ പെയ്തതോടെ യാത്ര തീർത്തും ദുഷ്കരമായി. നിലന്പൂർ പുതിയ ബസ് സ്റ്റാൻഡിൽ നിന്ന് വഴിക്കടവ്, കാളികാവ്, എരുമമുണ്ട, പോത്തുകൽ, കക്കാടംപൊയിൽ ഭാഗങ്ങളിലേക്കുള്ള ബസുകൾ ഉൾപ്പെടെ ഈ ലിങ്ക്റോഡ് വഴിയാണ് കെഎൻജി റോഡിലേക്ക് എത്തുന്നത്. ബസുകൾ സാഹസികമായാണ് ഗർത്തങ്ങളിൽപ്പെടാതെ കടന്നുപോകുന്നത്. ഇരുചക്ര വാഹനങ്ങളും മറ്റു വാഹനങ്ങളും ഇതിലൂടെ കടന്നു പോകാൻ നന്നേ പ്രയാസപ്പെടുന്നു. ഓരോ വർഷവും നഗരസഭ ഫണ്ട് ഉപയോഗിച്ച് റോഡിലെ ഗർത്തങ്ങൾ അടയ്ക്കാറുണ്ടെങ്കിലും മഴ പെയ്താൽ റോഡിൽ കുഴികൾ രൂപപ്പെടുകയാണ്. തണ്ണീർത്തടങ്ങൾ നികത്തി പണിത റോഡായതിനാൽ ഈ റോഡിലെ ഗർത്തങ്ങൾ ഇല്ലാതാക്കാൻ അധികൃതർക്ക് കഴിയുന്നില്ല. കൂടാതെ ഓവുചാലുകൾ ഇല്ലാത്തതിനാൽ വെള്ളം റോഡിലെ കുഴികളിൽ കെട്ടി നിൽക്കുന്നു. ഇത് കടകളെയും ബാധിച്ചിട്ടുണ്ട്. നിലന്പൂർ പുതിയ ബസ് സ്റ്റാൻഡിന്‍റെ അവസ്ഥയും പരിതാപകരമാണ്. ബസ് സ്റ്റാൻഡ് മുഴുവൻ ചെറുതും വലുതുമായ കുഴികൾ കാരണം സ്റ്റാൻഡിൽ കയറുന്പോൾ ബസുകളുടെ ലീഫ് പൊട്ടുന്നത് പതിവായിട്ടുണ്ട്.

കാട്ടുപന്നികളെ വെടിവച്ച് കൊല്ലാനുള്ള അനുമതി നടപ്പാക്കാതെ ഭരണസമിതികൾ

നിലന്പൂർ: നിലന്പൂർ മേഖലയിൽ വന്യമൃഗശല്യം രൂക്ഷമാകുന്പോഴും കാട്ടുപന്നികളെ വെടിവച്ച് കൊല്ലാനുള്ള അനുമതി കാര്യക്ഷമമായി നടപ്പാക്കാതെ പഞ്ചായത്ത് ഭരണ സമിതികൾ. ലൈസൻസുള്ള തോക്കുകൾ ഉപയോഗിച്ച് കർഷകർക്ക് ഏറെ ഉപദ്രവം ചെയ്യുന്ന കാട്ടുപന്നികളെ കൊല്ലാൻ അനുമതിയുണ്ടെങ്കിലും നിലന്പൂർ, വണ്ടൂർ, ഏറനാട് മണ്ഡലങ്ങളിലെ ഒരു ഗ്രാമപഞ്ചായത്ത് ഭരണ സമിതിയും ഇക്കാര്യത്തിൽ കാര്യക്ഷമമായ ഇടപെടലുകൾ നടത്തുന്നില്ല. കാട്ടുപന്നി ആക്രമണങ്ങളിൽ ഓരോ വർഷവും നൂറുക്കണക്കിന് പേർക്കാണ് പരിക്കേൽക്കുന്നത്. നിലന്പൂർ നോർത്ത്, സൗത്ത് ഡിവിഷൻ പരിധികളിലായി ഏഴ് പേർക്കാണ് കാട്ടുപന്നികളുടെ ആക്രമണത്തിൽ ജീവൻ നഷ്ടമായത്. ഓരോ പഞ്ചായത്ത് പരിധികളിലും നൂറുക്കണക്കിന് കാട്ടുപന്നികളാണുള്ളത്. സ്വകാര്യ എസ്റ്റേറ്റുകളുടെ കാടുപിടിച്ച് കിടക്കുന്ന ഭാഗങ്ങൾ, ചതുപ്പ് നിലങ്ങൾ എന്നിവിടങ്ങളിലെല്ലാം കാട്ടുപന്നികളുടെ ആവാസ കേന്ദ്രങ്ങളാണ്. ഗ്രാമപഞ്ചായത്തുകൾ ചെറിയൊരു വിഹിതം കൂടി കാട്ടുപന്നികളെ വെടിവച്ച് കൊല്ലാനുള്ള തുകയിൽ കൂട്ടിയാൽ കൂടുതൽ കാട്ടുപന്നികളെ വെടിവച്ച് കൊല്ലാൻ കഴിയും. രാത്രിയിലും പുലർച്ചെയും റോഡുകളിലൂടെ വ്യാപകമായി കാട്ടുപന്നികൾ മുറിച്ച് കടക്കുന്നതാണ് അപകടങ്ങൾ വർധിക്കുന്നത്. ഓരോ വർഷവും ലക്ഷക്കണക്കിന് രൂപയുടെ കൃഷിയാണ് കാട്ടുപന്നികൾ നശിപ്പിക്കുന്നത്. എംഎൽഎമാർ തങ്ങളുടെ ആസ്തിവികസന ഫണ്ടിൽ നിന്ന് ഒരു വിഹിതം കാട്ടുപന്നികളെ വെടിവച്ച് കൊല്ലാനുള്ള ഫണ്ടിലേക്ക് നൽകണമെന്ന ആവശ്യമുയരുന്നുണ്ട്. വനം വന്യജീവി സംരക്ഷണ നിയമം നിലനിൽക്കുന്പോഴും ശല്യക്കാരായ കാട്ടുപന്നികളെ വെടിവച്ച് കൊല്ലാനുള്ള അനുമതി നിലവിലുണ്ട്. തെരഞ്ഞെടുപ്പ് കാലത്ത് ജനങ്ങളുടെ കണ്ണിൽ പൊടിയിടാൻ വന്യമൃഗശല്യത്തിനെതിരേ പ്രസംഗിക്കുന്നവരുടെ പാർട്ടികൾ പോലും അവരുടെ പഞ്ചായത്തിൽ ഈ അവസരം പ്രയോജനപ്പെടുത്തുന്നില്ലെന്നാണ് കർഷകർ പറയുന്നത്.

വാഹനാപകടത്തിൽ രണ്ടുവയസുകാരൻ മരിച്ചു

കരുവാരകുണ്ട്: കരുവാരകുണ്ട് അങ്ങാടിയിൽ ഉണ്ടായ വാഹനാപകടത്തിൽ രണ്ടുവയസുകാരൻ മരിച്ചു. രണ്ടുപേർക്ക് പരിക്കേറ്റു. കേരള എസ്റ്റേറ്റ് കന്പിപാലത്തിങ്ങലിലെ പുളിക്കാതൊടിക മുജീബ് മുസ്ലിയാരുടെ മകൻ നഫ്‌ലാനാണ് മരിച്ചത്. മുജീബ് മുസ്ലിയാർക്കും ഭാര്യ സഫിയക്കും സാരമായി പരിക്കേറ്റു. ഇരുവരെയും പെരിന്തൽമണ്ണയിലെ സ്വകാര്യ ആശുപത്രിയിൽ പ്രവേശിപ്പിച്ചു. കരുവാരകുണ്ട് സർവീസ് സഹകരണ ബാങ്കിന് സമീപത്ത് ഇന്നലെ ഉച്ചയോടെയാണ് അപകടമുണ്ടായത്. ഭാര്യയെ ഡോക്ടറെ കാണിക്കാനായി ആശുപത്രിയിൽ സ്കൂട്ടറിൽ പോവുകയായിരുന്നു മുജീബ് മുസ്ലിയാർ. ഇതിനിടെ എതിർദിശയിൽ നിന്നെത്തിയ കാർ നിയന്ത്രണംവിട്ട് സ്കൂട്ടറിലിടിക്കുകയായിരുന്നു. റോഡരികിലെ മുന്നറിയിപ്പ് ബോർഡുകൾ തകർത്ത് ഫുട്പാത്തിൽ കയറിയാണ് കാർ നിന്നത്. മീറ്ററുകളോളം ദൂരത്തിലേക്ക് സ്കൂട്ടറും യാത്രക്കാരും തെറിച്ചുപോയി. സ്ഥലത്ത് ഓടിക്കൂടിയ നാട്ടുകാരും പോലീസും ചേർന്ന് പരിക്കേറ്റവരെ കരുവാരകുണ്ട് സഹകരണ ആശുപത്രിയിലെത്തിച്ചെങ്കിലും ഗുരുതരാവസ്ഥയെത്തുടർന്ന് പെരിന്തൽമണ്ണയിലെ സ്വകാര്യ ആശുപത്രിയിലേക്ക് മാറ്റുകയായിരുന്നു.

ഗതാഗത നിയന്ത്രണം

മലപ്പുറം: ജൽ ജീവൻ മിഷൻ താനാളൂർ പഞ്ചായത്തിലെ പ്രവൃത്തിയുടെ ഭാഗമായി പൈപ്പ് ലൈൻ സ്ഥാപിച്ച ഇട്ടിലാക്കൽ തെയ്യാല പിഡബ്ല്യുഡി റോഡിൽ ഇട്ടിലാക്കൽ മുതൽ വെള്ളച്ചാൽ വരെ റോഡ് പുനരുദ്ധാരണ പ്രവൃത്തി നടക്കുന്നതിനാൽ ഇന്ന് മുതൽ ഒരാഴ്ച ഗതാഗത നിയന്ത്രണം. വൈലത്തൂർ ഭാഗത്ത് നിന്ന് വെള്ളച്ചാൽ ഭാഗത്തേക്ക് പോകുന്നവരും തെയ്യാല, ഒഴൂർ ഭാഗങ്ങളിൽ നിന്ന് വൈലത്തൂർ ഭാഗത്തേക്ക് പോകുന്നവരും ഒഴൂർ- താനാളൂർ റോഡിലൂടെ തിരിഞ്ഞുപോകണം. സ്കൂൾ വാഹനങ്ങൾ കടത്തിവിടും.

കിണർ ഇടിഞ്ഞുതാഴ്ന്നു

എടക്കര: കനത്ത മഴയിൽ വീട്ടുമുറ്റത്തെ കിണർ ഇടിഞ്ഞുതാഴ്ന്നു. മരുത വേങ്ങാപാടത്തെ പരുത്തിക്കുന്നൻ മുജീബ് റഹ്മാന്‍റെ വീട്ടുമുറ്റത്തെ കിണറാണ് മഴയിൽ ആൾമറയടക്കം ഇടിഞ്ഞുതാഴ്ന്നത്. 33 റിംഗ് താഴ്ചയുള്ള കിണർ പൂർണമായും ഭൂമിക്കടിയിലായിട്ടുണ്ട്. വെള്ളം കയറ്റാനുപയോഗിക്കുന്ന മോട്ടോറും അനുബന്ധ പൈപ്പുകളും മണ്ണിനടിയിലാണ്.

ഏഴ് വയസുകാരന് പീഡനം; പ്രതിക്ക് 37 വർഷം കഠിന തടവ്

നിലന്പൂർ: ഏഴ് വയസുകാരനെ പ്രകൃതി വിരുദ്ധ ലൈംഗികാതിക്രമത്തിനിരയാക്കിയ പ്രതിക്ക് 37 വർഷം കഠിന തടവും 40000 രൂപ പിഴയും ശിക്ഷ. മേലാറ്റൂർ എടപ്പറ്റ അരിന്പ്ര സുകുമാരൻ (45) എന്ന നാണിക്കെതിരേയാണ് നിലന്പൂർ ഫാസ്റ്റ് ട്രാക്ക് സ്പെഷൽ കോടതി ജഡ്ജ് കെ.പി. ജോയ് ശിക്ഷ വിധിച്ചത്. 2020 മാർച്ച് രണ്ടിനാണ് കേസിനാസ്പദമായ സംഭവം. ഏഴ് വയസ് പ്രായമുള്ള കുട്ടിയെ പ്രതി താമസിക്കുന്ന ക്വാർട്ടേഴ്സിൽ വച്ച് മൊബൈൽ ഫോണിൽ അശ്ലീല വീഡിയോകൾ കാണിച്ച് ലൈംഗികാതിക്രമത്തിന് വിധേയമാക്കി എന്നാണ് കേസ്. എടക്കര പോലീസ് രജിസ്റ്റർ ചെയ്ത കേസിൽ ഇൻസ്പെക്ടറായിരുന്ന മനോജ് പറയട്ട, സബ് ഇൻസ്പെക്ടറായിരുന്ന അമീറലി എന്നിവരാണ് അന്വേഷണം നടത്തി പ്രതിക്കെതിരേ കുറ്റപത്രം സമർപ്പിച്ചത്. പ്രോസിക്യൂഷന് വേണ്ടി സ്പെഷൽ പബ്ലിക് പ്രോസിക്യൂട്ടർ അഡ്വ. സാം കെ. ഫ്രാൻസിസ് ഹാജരായി. പ്രോസിക്യൂഷന് വേണ്ടി 16 സാക്ഷികളെ വിസ്തരിച്ചു. 27 രേഖകൾ ഹാജരാക്കി. പ്രോസിക്യൂഷൻ ലൈസണ്‍ വിംഗിലെ സീനിയർ സിവിൽ പോലീസ് ഓഫീസർ പി.സി. ഷീബ പ്രോസിക്യൂഷനെ സഹായിച്ചു. പ്രതിയെ ശിക്ഷ അനുഭവിക്കുന്നതിനായി തവനൂർ ജയിലിലേക്ക് അയച്ചു.

യുവ കർഷകന്‍റെ സൂര്യകാന്തിത്തോട്ടം ശ്രദ്ധേയമാകുന്നു

ഏലംകുളം: തണ്ണിമത്തൻ വിപ്ലവത്തിന് ശേഷം സൂര്യകാന്തി തോട്ടമൊരുക്കി ഏലംകുളത്തെ യുവകർഷകൻ. ഏലംകുളം പാറക്കൽമുക്ക് സ്വദേശിയായ പരേതനായ ആറങ്ങോടൻ വീരാൻകുട്ടിയുടെ മകൻ അബൂബക്കർ സിദീഖാണ് രണ്ട് ഏക്കറിലധികം വരുന്ന സ്ഥലത്ത് സൂര്യകാന്തി പൂക്കൾ വിളയിച്ചത്. മരക്കച്ചവടം തൊഴിലായി കൊണ്ടുനടക്കുന്പോഴും സിദീഖിന്‍റെ മനസിൽ സൂര്യകാന്തിപ്പൂക്കളോട് താൽപ്പര്യം തോന്നിയിരുന്നു. തുടർന്ന് ഏലംകുളം കൃഷിവകുപ്പിന്‍റെ പിന്തുണയും ഉപദേശവുമായി സിദീഖ് ഏലംകുളം തോണിക്കടവ് ഭാഗത്തെ പാടത്ത് സൂര്യകാന്തി കൃഷിയിറക്കി. കൃഷിവകുപ്പ് ഉദ്യോഗസ്ഥരുടെ ഇടപെടലും ഗുണകരമായി. വരും വർഷങ്ങളിൽ കൂടുതൽ സ്ഥലം പാട്ടത്തിനെടുത്ത് തന്‍റെ കൃഷി വ്യാപിപ്പിക്കാനാണ് സിദീഖിന്‍റെ തീരുമാനം. സിദീഖിന്‍റെ സൂര്യകാന്തിത്തോട്ടം കാണാനും റീൽസ് എടുക്കാനും ഫോട്ടോക്കുമായി ഒട്ടേറെ പേരാണ് ദിവസവും ഇവിടെ എത്തുന്നത്. എത്തുന്നവരിൽ നിന്ന് ചെറിയൊരു തുക ഈടാക്കി പഞ്ചായത്തിലെ പരിരക്ഷാ ചികിത്സാ നിധിയിലേക്ക് സ്വരൂപിക്കാനും സിദീഖ് ശ്രദ്ധ കാണിക്കുന്നു. സൂര്യകാന്തി പൂക്കളുടെ മനോഹാരിത കാണാൻ എത്തുന്നവർക്കായി പയർ, വെണ്ട തുടങ്ങി മറ്റ് നാടൻ പച്ചക്കറികൾ ചെറിയ വിലയിൽ വിൽപ്പന നടത്തുകയും ചെയ്യുന്നുണ്ട് ഈ യുവ കർഷകൻ.

പുത്തൻ സാന്പത്തിക നയങ്ങൾ പൊതുമേഖല ബാങ്കുകളെ ദുർബലമാക്കുന്നു: പി.പി. സുനീർ എംപി

മലപ്പുറം: ഉദാരവത്കരണ നയങ്ങൾ പൊതുമേഖല ബാങ്കുകളെ ദുർബലപ്പെടുത്തുകയും സ്വകാര്യബാങ്കുകളെ പ്രോത്സാഹിപ്പിക്കുകയും ചെയ്യുകയാണെന്ന് പി.പി. സുനീർ എംപി. മലപ്പുറം മഹേന്ദ്രപുരി ഓഡിറ്റോറിയത്തിൽ നടന്ന ജില്ലാതല ബാങ്കിംഗ് അവലോകന സമിതി യോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. മലപ്പുറം ജില്ലയുടെ സാമൂഹിക, സാന്പത്തിക വികസനത്തിൽ ധനകാര്യ സ്ഥാപനങ്ങളുടെ പങ്ക് നിർണായകമാണെന്ന് അദ്ദേഹം പറഞ്ഞു. മലപ്പുറം ജില്ലയിൽ കഴിഞ്ഞ വർഷം കൂടുതൽ ബ്രാഞ്ചുകൾ വന്നത് സ്വകാര്യ മേഖലയിലാണ്. ഇന്ത്യയിലെ ഒരു സംസ്ഥാനത്ത് നിന്ന് കിട്ടാത്ത വരുമാനമാണ് കേരളത്തിൽ നിന്ന് പൊതുമേഖല ബാങ്കുകൾക്ക് ലഭിക്കുന്നത്. എന്നാൽ ജനങ്ങൾക്ക് അതിന്‍റെ പ്രയോജനം ലഭിക്കുന്നില്ല. ഗ്രാമീണ മേഖലകളിൽ പൊതുമേഖല ബാങ്കുകളുടെ ബ്രാഞ്ചുകൾ നിർബന്ധമായും വന്നാൽ തട്ടിപ്പുകൾ കുറയ്ക്കാനാകുമെന്നും അദ്ദേഹം പറഞ്ഞു. ചടങ്ങിൽ ഡെപ്യൂട്ടി കളക്ടർ ലത അധ്യക്ഷത വഹിച്ചു. ലീഡ് ഡിസ്ട്രിക്ട് മാനേജർ മലപ്പുറം അഞ്ജന ദേവ്, വി.എസ്. അഖിൽ, തിരുവനന്തപുരം ആർബിഐ എൽഡിഒ, എഫ്ഐഡിഡി വി.എസ്. അഖിൽ, കനറാ ബാങ്ക് അസിസ്റ്റന്‍റ് ജനറൽ മാനേജർ പുലി സായി കൃഷ്ണ, നബാർഡ് ജില്ലാ വികസന മാനേജർ മുഹമ്മദ് റിയാസ്, മലപ്പുറം ലീഡ് ബാങ്ക് മാനേജർ സി.ആർ. ബിനോയ് എന്നിവർ ബാങ്കിംഗ് പ്രവർത്തനങ്ങൾ വിശകലനം ചെയ്തു. പ്രവാസി നിക്ഷേപത്തിൽ ജില്ലയിൽ 13.72 ശതമാനത്തിന്‍റെ വളർച്ച രേഖപ്പെടുത്തിയതായി ബാങ്കിംഗ് അവലോകന സമിതി യോഗം വിലയിരുത്തി. കഴിഞ്ഞ സാന്പത്തിക വർഷം അവസാനിച്ചപ്പോൾ അഡ്വാൻസ് ഇനത്തിൽ 12,89,316 ലക്ഷം രൂപ ഉണ്ടായിരുന്നത് ഈ സാന്പത്തിക വർഷം അവസാനത്തിൽ 14,66,152 ലക്ഷം ആയി ഉയർന്നു. ആകെ നിക്ഷേപത്തിൽ 8.44 ശതമാനം വളർച്ച രേഖപ്പെടുത്തി. 2024ൽ 55,31,802 ലക്ഷം രൂപയായിരുന്നത് ഈ വർഷം അവസാനിക്കുന്പോൾ 59,98,585 ലക്ഷമായി ഉയർന്നു. ആകെ വായ്പാ നിക്ഷേപ അനുപാതത്തിൽ 10.67 ശതമാനം വളർച്ച രേഖപ്പെടുത്തി. 2024-25 സാന്പത്തിക വർഷം അവസാനിച്ചപ്പോൾ 36,91,614 ലക്ഷമായിരുന്നത് 40,85,365 ലക്ഷമായി ഉയർന്നു. കാഷ്യൽ ഡെപ്പോസിറ്റ് അനുപാതത്തിൽ 0.25 ശതമാനത്തിന്‍റെ കുറവ് രേഖപ്പെടുത്തി. കഴിഞ്ഞ സാന്പത്തിക വർഷം 68.27 ഉണ്ടായിരുന്നത് ഇത്തവണ 68.11 ലക്ഷമായി കുറഞ്ഞു. പ്രാഥമിക മേഖലയിൽ 2024-25 സാന്പത്തിക വർഷത്തിൽ 940000 ലക്ഷം രൂപയാണ് ലക്ഷ്യമിട്ടിരുന്നത്. ഇതിൽ 138 ശതമാനം നേട്ടമുണ്ടാക്കി. 12,95,463 ലക്ഷം രൂപയുടെ ലക്ഷ്യം കൈവരിക്കാൻ കഴിഞ്ഞു. ദ്വിതീയ മേഖലയിൽ 400000 ലക്ഷം രൂപ ലക്ഷ്യമിട്ടത് 4,01,222 ലക്ഷം രൂപയിലെത്തി. നൂറ് ശതമാനം നേട്ടം കൈവരിച്ചു. തൃതീയ മേഖലയിൽ 1,50000 ലക്ഷം ലക്ഷ്യമിട്ടത് 1,22,142 ലക്ഷം രൂപ കൈവരിച്ച് 81 ശതമാനം നേട്ടമുണ്ടാക്കിയെന്നും യോഗം വിലയിരുത്തി.

ജോയിന്‍റ് ആർടിഒമാരുടെ കള്ളക്കളി അവസാനിപ്പിക്കണം: ഐഎൻടിയുസി

മഞ്ചേരി: അഴിമതി നടത്തുന്ന ജോയിന്‍റ് ആർടിഒമാരെ കൈയോടെ പിടികൂടി നിയമത്തിനു മുന്നിൽ കൊണ്ടുവരുമെന്ന് ഐഎൻടിയുസി ജില്ലാ കമ്മിറ്റി. കൈമടക്കും പാരിതോഷികവും നൽകാത്ത ഡ്രൈവിംഗ് സ്കൂളുകളെ പീഡിപ്പിക്കുന്ന നയമാണ് ഇവർ സ്വീകരിക്കുന്നത്. ഡ്രൈവിംഗ് ടെസ്റ്റ് സ്ലോട്ടുകൾ മുഴുവനായും തുറക്കാതെയാണ് ഇവർ ചില ഡ്രൈവിംഗ് സ്കൂളുകളെ പീഡിപ്പിക്കുന്നത്. ലേർണിംഗ് കാലാവധി തീരുന്ന പേപ്പറുകൾക്ക് 60 ദിവസം സ്ലോട്ടുകൾ അനുവദിക്കേണ്ടതാണ്. എന്നാൽ പലപ്പോഴും ഇത് 15 ദിവസമായി ചുരുക്കുകയാണ്. എന്നാൽ ചില ഡ്രൈവിംഗ് സ്കൂളുകൾക്ക് ഡ്രൈവിംഗ് ടെസ്റ്റ് സ്ലോട്ടുകളും ലേണിംഗ് ടെസ്റ്റ് സ്ലോട്ടുകളും യഥേഷ്ടം അനുവദിക്കുന്നുമുണ്ട്. തിരൂർ ജോയിന്‍റ് ആർടിഒക്കെതിരേ ഇത്തരത്തിലുള്ള നിരവധി പരാതികളാണ് ഇതിനകം ഉയർന്നത്. വിവേചനപരമായ നടപടി തുടരുന്ന പക്ഷം ശക്തമായ പ്രതിഷേധ നടപടികൾ ആസൂത്രണം ചെയ്ത് നടപ്പാക്കാൻ യോഗം തീരുമാനിച്ചു. യോഗം ജില്ലാ പ്രസിഡന്‍റും മഞ്ചേരി നഗരസഭാ വൈസ് ചെയർമാനുമായ വി.പി. ഫിറോസ് ഉദ്ഘാടനം ചെയ്തു. മോട്ടോർ തൊഴിലാളി ഫെഡറേഷൻ ജില്ലാ പ്രസിഡന്‍റ് ജോമേഷ് തോമസ് അധ്യക്ഷത വഹിച്ചു. ജില്ലാ ഭാരവാഹികളായ ഹസൻ പുല്ലംകോട്, സുബൈർ പാച്ചേരി, അറക്കൽ കൃഷ്ണൻ, ജയൻ അറക്കൽ എന്നിവർ പ്രസംഗിച്ചു.

കെഎസ്‌യു സംഘടിപ്പിച്ച മാർച്ചിൽ സംഘർഷം

വണ്ടൂർ:ജില്ലയിലെ പ്ലസ് വണ്‍ സീറ്റ് അപര്യാപ്തതയിൽ പ്രതിഷേധിച്ച് കെഎസ്‌യു വണ്ടൂർ മണ്ഡലം കമ്മിറ്റി ഡിഇഒ ഓഫീസിലേക്ക് നടത്തിയ മാർച്ചിൽ സംഘർഷം. ഡിഇഒ ഓഫീസ് പരിസരത്തുവച്ച് പോലീസ് സമരക്കാരെ തടഞ്ഞതോടെ പ്രവർത്തകർ റോഡ് ഉപരോധിച്ചു. തുടർന്ന് സമരക്കാരെ പോലീസ് അറസ്റ്റ് ചെയ്തു നീക്കി. പ്ലസ് വണ്‍ സീറ്റ് വിഷയം അടിയന്തരമായി പരിഹരിച്ചിട്ടില്ലെങ്കിൽ ശക്തമായ പ്രതിഷേധ സമരങ്ങളുമായി മുന്നോട്ടു പോകുമെന്ന് പ്രതിഷേധക്കാർ പറഞ്ഞു. മാർച്ച് കോണ്‍ഗ്രസ് ബ്ലോക്ക് വൈസ് പ്രസിഡന്‍റ് റഹീം മൂർക്കൻ ഉദ്ഘാടനം ചെയ്തു. അൻഷിഫ് അധ്യക്ഷത വഹിച്ചു. കെഎസ്‌യു ജില്ലാ വൈസ് പ്രസിഡന്‍റ് നിയാസ് കോഡൂർ മുഖ്യപ്രഭാഷണം നടത്തി. ജില്ലാ സെക്രട്ടറിമാരായ ശ്യാം പന്താർ, അഡ്വ. ജ്യോതിസ് ജോജി, മുഹമ്മദ്ഫൻ സാബ്, പോരൂർ മണ്ഡലം കെഎസ്‌യു പ്രസിഡന്‍റ് ഷാമിൽ, അഖിൽ, ശുഹൈബ് അക്ബർ, ആദർശ് തുടങ്ങിയവർ നേതൃത്വം നൽകി.

അർധനാരീശ്വര ക്ഷേത്രത്തിൽ 1008 കുടം ജലാഭിഷേകം നാളെ

അരക്കുപറന്പ്: പെരിന്തൽമണ്ണ താലൂക്കിലെ അരക്കുപറന്പ് വെളിങ്ങോട് അർധനാരീശ്വര ക്ഷേത്രത്തിൽ നാളെ പ്രതിഷ്ഠാദിന ചടങ്ങുകളും 1008 കുടം ജലാഭിഷേക ചടങ്ങുകളും നടക്കും.രാവിലെ ഗണപതി ഹോമം, ഭഗവത്‌സേവ, മൃത്യുഞ്ജയ ഹോമം. തുടർന്നാണ് ജലാഭിഷേക ചടങ്ങുകൾ. ദേവന് വിശേഷാൽ ചതുഃശത സമർപ്പണവും തുടർന്ന് പ്രസാദ ഊട്ടും ഉണ്ടായിരിക്കും. പ്രദക്ഷിണ വഴിയും ശ്രീകോവിലും നമസ്കാര മണ്ഡപവും പൂർണമായും ജലത്തിൽ നിറഞ്ഞുനിൽക്കുന്ന ക്ഷേത്രമാണിത്. രാവിലെ ആറു മുതൽ 9.30 വരെയും വൈകുന്നേരം 5.30 മുതൽ ഏഴ് വരെയുമാണ് പൂജാസമയം. ഞായറാഴ്ചകളിൽ രാവിലെ ആറ് മുതൽ 10.30 വരെയായിരിക്കും. രണ്ടാമത്തെയും നാലാമത്തെയും ഞായറാഴ്ചകളിൽ ഉമാമഹേശ്വര പൂജ ഉണ്ടായിരിക്കും.

അയൽക്കൂട്ടം പ്രവർത്തകർക്കായി വൈദ്യുതി സുരക്ഷാബോധവത്കരണം

പെരിന്തൽമണ്ണ: ദേശീയ വൈദ്യുതി സുരക്ഷവാരാചരണത്തിന്‍റെ ഭാഗമായി കുടുംബശ്രീ അയൽക്കൂട്ടം പ്രവർത്തകർക്കായി വൈദ്യുതി സുരക്ഷ ബോധവത്കരണം നടത്തി. പെരിന്തൽമണ്ണ ബ്ലോക്ക് പഞ്ചായത്ത് കോണ്‍ഫറൻസ് ഹാളിൽ നടന്ന പരിപാടി കെഎസ്ഇബി പെരിന്തൽമണ്ണ സബ് ഡിവിഷൻ അസിസ്റ്റന്‍റ് എക്സിക്യൂട്ടീവ് എൻജിനിയർ സി. മുഹമ്മദ് റഫീഖ് ഉദ്ഘാടനം ചെയ്തു. സബ് എൻജിനിയർ സി. അബ്ദുസലീം ക്ലാസെടുത്തു. വൈദ്യുതി ലൈനിന് സമീപം ഇരുന്പുതോട്ടി ഉപയോഗിക്കാതിരിക്കുക, അനധികൃതമായ വൈദ്യുതി വേലികൾ സ്ഥാപിക്കാതിരിക്കുക, എല്ലാ വൈദ്യുതി പ്രതിഷ്ഠാപനങ്ങളിലും പ്രവർത്തനക്ഷമമായ എർത്ത് ലീക്കേജ് സർക്യൂട്ട് ബ്രേക്കർ (ഇഎൽസിബി) ഉറപ്പുവരുത്തുക തുടങ്ങിയ വിഷയങ്ങൾ വിശദീകരിച്ചു.

അങ്ങാടിപ്പുറത്തെ ഗതാഗത കുരുക്ക്; ബസ് സമരം പിൻവലിച്ചു

അങ്ങാടിപ്പുറം: അങ്ങാടിപ്പുറത്തെ ഗതാഗത കുരുക്കിന് പരിഹാരം കാണുക, അങ്ങാടിപ്പുറത്തെയും പെരിന്തൽമണ്ണ നഗരത്തിലെയും റോഡുകൾ സഞ്ചാരയോഗ്യമാക്കുക തുടങ്ങിയ ആവശ്യങ്ങളുന്നയിച്ച് ജില്ലാ ബസ് തൊഴിലാളി യൂണിയൻ (സിഐടിയു) നടത്തിയ സ്വകാര്യ ബസ് സമരം പിൻവലിച്ചു. ജില്ലാ കളക്ടറുടെ സാന്നിധ്യത്തിൽ ചേർന്ന യോഗ തീരുമാനത്തിന്‍റെ അടിസ്ഥാനത്തിലാണ് രണ്ടുദിവസമായി നടത്തിയ സമരം തൊഴിലാളികൾ പിൻവലിച്ചത്. അങ്ങാടിപ്പുറം മേൽപ്പാലത്തിന് സമീപം നാളെ മുതൽ കട്ട വിരിക്കുന്ന പ്രവൃത്തി ആരംഭിക്കും. ഗതാഗത കുരുക്കുമായി ബന്ധപ്പെട്ട മറ്റുകാര്യങ്ങൾ ആർടിഒ, പോലീസ് എന്നിവരുടെ സാന്നിധ്യത്തിൽ പരിശോധിച്ചു തീരുമാനങ്ങളെടുക്കാനും ധാരണയായി. ചർച്ചയിൽ ബസുടമസ്ഥ സംഘം താലൂക്ക് സെക്രട്ടറി മുഹമ്മദാലിഹാജി വെട്ടത്തൂർ, സഫ മുഹമ്മദാലി, സന യൂനസ്, എക്സൽ ജബ്ബാർ എന്നിവരും തൊഴിലാളി യൂണിയൻ നേതാക്കളായ അനിൽ കുറുപ്പത്ത്, മാടാല മുഹമ്മദാലി, റാഷിദ്, അനൂപ് എന്നിവരും പങ്കെടുത്തു. പെരിന്തൽമണ്ണ: ദേശീയപാതയിലെ അങ്ങാടിപ്പുറം റെയിൽവേ ഓവർ ബ്രിഡ്ജ് അപ്രോച്ച് റോഡ് ഇന്‍റർലോക്ക് കട്ട വിരിക്കുന്ന പ്രവൃത്തി ആരംഭിക്കുന്നതിനാൽ നാളെ മുതൽ ജൂലൈ അഞ്ച് വരെ ഇതിലൂടെയുള്ള വാഹനഗതാഗതത്തിൽ നിരോധനമേർപ്പെടുത്തി. ജൂലൈ ആറ് മുതൽ 11 വരെ ചെറിയ വാഹനങ്ങൾക്ക് (ലൈറ്റ് മോട്ടോർ വെഹിക്കിൾ) ഒഴികെ ഭാരവാഹനങ്ങൾക്ക് നിരോധനം ഉണ്ടായിരിക്കും. കോഴിക്കോട് നിന്ന് പാലക്കാട് ഭാഗത്തേക്ക് പോകുന്ന വാഹനങ്ങൾ വള്ളുവന്പ്രം-മഞ്ചേരി-പാണ്ടിക്കാട് വഴിയും ചെറിയ വാഹനങ്ങൾ ഓരാടംപാലം- വലന്പൂർ-പട്ടിക്കാട് റോഡ് വഴിയും കോഴിക്കോട് ഭാഗത്ത് നിന്ന് അങ്ങാടിപ്പുറം റെയിൽവേ സ്റ്റേഷനിലേക്ക് പോകുന്ന വാഹനങ്ങൾ ഓരാടംപാലം-ഏറാന്തോട് - തരകൻ സ്കൂൾ റോഡ് വഴിയും തിരിഞ്ഞുപോകണം. പാലക്കാട് നിന്ന് കോഴിക്കോട് ഭാഗത്തേക്ക് പോകുന്ന വാഹനങ്ങൾ മേൽപറഞ്ഞ റോഡുകളിലൂടെ തിരിച്ചും പോകേണ്ടതാണെന്നും പൊതുമരാമത്ത് ദേശീയപാതവിഭാഗം എക്സിക്യൂട്ടീവ് എൻജിനിയർ അറിയിച്ചു.

ലഹരിക്കെതിരേ ബോധവത്കരണം നടത്തി

അങ്ങാടിപ്പുറം: പരിയാപുരം ഫാത്തിമ യുപി സ്കൂളിൽ ലഹരിവിരുദ്ധ ദിനം വിപുലമായ പരിപാടികളോടെ ആചരിച്ചു. റിട്ട. പ്രധാനാധ്യാപകൻ ഇ.ജെ.ആന്‍റണി ലഹരിക്കെതിരേ ബോധവത്കരണ ക്ലാസ് നയിച്ചു. പ്രധാനാധ്യാപിക അന്പിളി, സിസ്റ്റർ ധന്യ എന്നിവർ പ്രസംഗിച്ചു. ലഹരിവിരുദ്ധ റാലി, പ്രതിജ്ഞ, സന്ദേശം, ഫ്ളാഷ് മോബ്, ലഹരിക്കെതിരേ കൈയൊപ്പ്, സുംബ ഡാൻസ് തുടങ്ങിയ പരിപാടികളുമുണ്ടായിരുന്നു. വിവിധ മത്സരങ്ങളിലെ വിജയികൾക്ക് സമ്മാനങ്ങൾ നൽകി. പെരിന്തൽമണ്ണ: ഐഎസ്എസ് സീനിയർ സെക്കൻഡറി സ്കൂളിൽ ലഹരിവിരുദ്ധ ബോധവത്കരണ ക്ലാസും റാലിയും സംഘടിപ്പിച്ചു. ഐഎസ്എസ് ജനറൽ സെക്രട്ടറി എ.വി. റഫീഖ് റാലി ഫ്ളാഗ് ഓഫ് ചെയ്തു. തുടർന്ന് കോളജ് സെമിനാർ ഹാളിൽ ബോധവത്കരണ ക്ലാസ് സംഘടിപ്പിച്ചു. സ്കൂൾ സോഷ്യൽ സയൻസ് ഡിപ്പാർട്ട്മെന്‍റ് കണ്‍വീനർ സി.നൗഷാദ് ലഹരി വിരുദ്ധ പ്രതിജ്ഞ ചൊല്ലിക്കൊടുത്തു. കോളജ് പ്രിൻസിപ്പൽ പി.പി. മുഹമ്മദ്, സ്കൂൾ പ്രിൻസിപ്പൽ നൗഫൽ പുത്തൻപീടിയേക്കൽ, ഐഎസ്എസ് ജോയിന്‍റ് സെക്രട്ടറി ടി.സയ്യിദ് അലി, സ്കൂൾ സെക്രട്ടറി ആലിക്കൽ റഫീഖ്, സ്കൂൾ വൈസ് പ്രിൻസിപ്പൽ ടി. നിഷാത്ത് ബാനു, കോളജ് വൈസ് പ്രിൻസിപ്പൽ ടി.കെ. ലത്തീഫ്, കോളജ് സ്റ്റാഫ് സെക്രട്ടറി കെ. അൻവർ ശെരീഫ്, വിനേഷ്, കെ.വി. ദീപ, എൻ. പ്രഭ, എം.ടി. അബൂബക്കർ സിദ്ദീഖ് ഹുദവി തുടങ്ങിയവർ സംബന്ധിച്ചു. തേഞ്ഞിപ്പലം: തേഞ്ഞിപ്പലം വൈഎംസിഎ സെന്‍റ് പോൾസ് ഹയർ സെക്കൻഡറി സ്കൂളിൽ ലഹരിവിരുദ്ധ സെമിനാർ നടത്തി. ബോധവത്കരണ സെമിനാർ തേഞ്ഞിപ്പലം സെന്‍റ് പോൾസ് ഹയർ സെക്കൻഡറി സ്കൂൾ പ്രിൻസിപ്പൽ സിസ്റ്റർ ഡീനാ ജോണ്‍ ഉദ്ഘാടനം ചെയ്തു. കുട്ടികൾ മൊബൈൽ ഫോണിന്‍റെ പിടിയിൽ നിന്ന് വിട്ടുനിൽക്കണമെന്ന് അവർ ആവശ്യപ്പെട്ടു. വൈഎംസിഎ പ്രസിഡന്‍റ് കെ.സി. ജോസഫ് അധ്യക്ഷത വഹിച്ചു. സെമിനാറിൽ പരപ്പനങ്ങാടി എക്സൈസ് റേഞ്ച് ഓഫീസിലെ അസിസ്റ്റന്‍റ് ഇൻസ്പെക്ടർ കെ. പ്രദീപ്കുമാർ ക്ലാസുകൾക്ക് നേതൃത്വം നൽകി. യോഗത്തിൽ സെക്രട്ടറി കെ.വി. അഗസ്റ്റിൻ, മലപ്പുറം സബ് റീജിയൻ കണ്‍വീനർ പി.ജെ. സണ്ണിച്ചൻ, കെ.എൽ.ആന്‍റണി, ഒ. മത്തായി, സെലീന ഡിക്രൂസ് എന്നിവർ പ്രസംഗിച്ചു. ജോയിന്‍റ് സെക്രട്ടറി അലോഷ്യസ് ആന്‍റണി കുട്ടികൾക്ക് ലഹരിവിരുദ്ധ പ്രതിജ്ഞ ചൊല്ലിക്കൊടുത്തു.

മലപ്പുറം കെഎസ്ആർടിസി ടെർമിനൽ മന്ത്രി നാടിന് സമർപ്പിച്ചു

മലപ്പുറം: മലപ്പുറത്തിന്‍റെ ചിരകാല സ്വപ്നമായ നഗരമധ്യത്തിലെ കെഎസ്ആർടിസി ബസ് ടെർമിനൽ കം ഷോപ്പിംഗ് കോംപ്ലക്സ് ഗതാഗത മന്ത്രി കെ.ബി. ഗണേഷ് കുമാർ നാടിന് സമർപ്പിച്ചു. മലപ്പുറം ടെർമിനലിന്‍റെ രണ്ടാംഘട്ട നിർമാണം മൂന്ന് മാസത്തിനകം ആരംഭിക്കുമെന്ന് മന്ത്രി പറഞ്ഞു. പി. ഉബൈദുള്ള എംഎൽഎയുടെ ആസ്തി വികസന ഫണ്ടിൽ നിന്നനുവദിച്ച 2.15 കോടി ചെലവിലാണ് ആദ്യഘട്ട നവീകരണം പൂർത്തിയാക്കിയത്. ബാക്കി പ്രവൃത്തിക്കായി സർക്കാർ അഞ്ച് കോടി അനുവദിച്ചിട്ടുണ്ട്. ഇതിന്‍റെ എസ്റ്റിമേറ്റ് തയാറാക്കി ഭരണാനുമതിക്കായി സമർപ്പിച്ചിരിക്കുകയാണ്. ചടങ്ങിൽ പി. ഉബൈദുള്ള എംഎൽഎ അധ്യക്ഷത വഹിച്ചു. ഇ.ടി. മുഹമ്മദ് ബഷീർ എംപി മുഖ്യാതിഥിയായിരുന്നു. കെഎസ്ആർടിസി ആധുനിക വത്കരണത്തിന്‍റെ പാതയിലാണെന്ന് മന്ത്രി പറഞ്ഞു. 50 ലധികം പരിഷ്കാരങ്ങൾ കെഎസ്ആർടിസിയിൽ ഇതിനകം നടപ്പാക്കിയിട്ടുണ്ട്. ആധുനിക രീതിയിലുള്ള ടെർമിനലുകളാണ് എല്ലായിടത്തും നടപ്പാക്കുന്നത്. സേവനങ്ങൾ പൂർണമായും ഡിജിറ്റലൈസ് ചെയ്തു. വീട്ടിലിരുന്ന് ബസ് സമയ വിവരങ്ങൾ അറിയാനും ബസ് ബുക്ക് ചെയ്യാനും സാധിക്കുന്ന ആപ് പുറത്തിറക്കി. പുതിയ ട്രാവൽ കാർഡുകൾക്ക് ജനങ്ങളുടെ വലിയ പിന്തുണയാണ് ലഭിച്ചത്. സ്പെയർ പാർട്സുകൾ വാങ്ങുന്നത് പൂർണമായും സോഫ്റ്റ്‌വെയർ വഴിയാക്കി. ഇത് അഴിമതി ഇല്ലാതാക്കാൻ സഹായിച്ചു. കൂടുതൽ അന്തർ സംസ്ഥാന റൂട്ടുകൾ തുടങ്ങും. ടിക്കറ്റേതര വരുമാനം വർധിപ്പിക്കാൻ കഴിഞ്ഞിട്ടുണ്ട്. പ്രവർത്തന നഷ്ടം കുറയ്ക്കാനും പുതിയ പരിഷ്കാരങ്ങൾ സഹായിച്ചിട്ടുണ്ടെന്ന് മന്ത്രി പറഞ്ഞു. നാലു നിലകളിലായി 37,445 ചതുരശ്ര അടി വിസ്തീർണമാണ് മലപ്പുറത്തെ ടെർമിനിലിനുള്ളത്. ഗ്രൗണ്ട് ഫ്ളോറിൽ യാത്രക്കാർക്ക് ബസ് കാത്ത് നിൽക്കുന്നതിനുള്ള സൗകര്യങ്ങളും ശൗചാലയങ്ങളും അത്യാധുനിക രീതിയിൽ സജ്ജീകരിച്ചിട്ടുണ്ട്. മഴയും വെയിലും ഏൽക്കാതെ യാത്രക്കാർക്ക് ബസ് കയറിയിറങ്ങാൻ പറ്റുന്ന മേൽക്കൂരയോട് കൂടിയുള്ള ബസ് ബേയും ഇന്‍റർലോക്ക് പതിച്ച യാർഡും ഇതോടൊപ്പം നിർമിച്ചു. അധിക വരുമാനം ലക്ഷ്യമാക്കി വാണിജ്യാവശ്യങ്ങൾക്കായി സ്ഥാപിച്ചിട്ടുള്ള 14 കടമുറികളും ഇതിന്‍റെ കൂടെയുണ്ട്. ഇതിൽ 13 റൂമുകളും ലേലം ചെയ്തു. പാസഞ്ചർ ലോഞ്ച്, എസി വെയിറ്റിംഗ് ഹാൾ, പൂന്തോട്ടം, പബ്ലിക് അഡ്രസിംഗ് സിസ്റ്റം എന്നീ സൗകര്യങ്ങളും സജ്ജീകരിച്ചിട്ടുണ്ട്. ചടങ്ങിൽ ജില്ലാ കളക്ടർ വി.ആർ. വിനോദ്, കെഎസ്ആർടിസിസി എംഡി പി.എസ്. പ്രമോജ് ശങ്കർ, നഗരസഭ ചെയർമാൻ മുജീബ് കാടേരി, ബ്ലോക്ക് പഞ്ചായത്ത് പ്രസിഡന്‍റ് കാരാട്ട് അബ്ദുറഹിമാൻ, പഞ്ചായത്ത് പ്രസിഡന്‍റുമാരായ പി.സി. അബ്ദുറഹിമാൻ (പുൽപ്പറ്റ), എം.ടി.അലി (പൂക്കോട്ടൂർ), റാബിയ ചോലക്കൽ (കോഡൂർ), സുനീറ പൊറ്റമ്മൽ (മൊറയൂർ), ജില്ലാ പഞ്ചായത്ത് അംഗങ്ങളായ കെ. സലീന, റൈഹാനത്ത് കുറുമാടൻ, നഗരസഭ കൗണ്‍സിലർമാരായ ഒ. സഹദേവൻ, പി.എസ്.എ. ഷബീർ, ജില്ലാ ട്രാൻസ്പോർട്ട് ഓഫീസർ ജോഷി ജോണ്‍, പ്രോജക്ട് സിവിൽ വർക് എക്സിക്യൂട്ടീവ് ഡയറക്ടർ പി.എം. ഷറഫ് മുഹമ്മദ്, പി.ഡബ്ല്യുഡി എക്സിക്യൂട്ടീവ് എൻജിനിയർ കെ. മുഹമ്മദ് ഇസ്മയിൽ എന്നിവർ പ്രസംഗിച്ചു.

സ്‌കൂട്ടറില്‍ കഞ്ചാവ് കടത്തിയ യുവാവിന് തടവും പിഴയും

മഞ്ചേരി: സ്‌കൂട്ടറില്‍ കഞ്ചാവ് കടത്തിയ യുവാവിന് മഞ്ചേരി എന്‍ഡിപിഎസ് സ്‌പെഷല്‍ കോടതി മൂന്നു വര്‍ഷം തടവിനും 30,000 രൂപ പിഴയടയ്ക്കാനും ശിക്ഷിച്ചു. പാലക്കാട് ഒറ്റപ്പാലം ഓങ്ങല്ലൂര്‍ വാടാനാംകുര്‍ശി നമ്പ്രത്ത് രതീഷി(42)നെയാണ് ജഡ്ജ് ടി.ജി. വര്‍ഗീസ് ശിക്ഷിച്ചത്. 2018 ജനുവരി ഒമ്പതിന് രാവിലെ 10.45ന് മഞ്ചേരി കോവിലകുണ്ടില്‍ നിന്നും ടൗണിലേക്ക് കഞ്ചാവ് വില്പനയ്ക്കായി കൊണ്ടുവരുമ്പോള്‍ എക്‌സൈസ് ഇന്‍സ്‌പെക്ടറായിരുന്ന ശ്യാംകുമാര്‍ പിടികൂടുകയായിരുന്നു. പ്രതിയില്‍ നിന്നും 2.1 കിലോ കഞ്ചാവ് പിടികൂടി. പ്രതിയെ ശിക്ഷയനുഭവിക്കുന്നതിനായി തവനൂര്‍ സെന്‍ട്രല്‍ ജയിലിലേക്കയച്ചു. പ്രോസിക്യൂഷനു വേണ്ടി സ്‌പെഷല്‍ പബ്ലിക് പ്രോസിക്യൂട്ടര്‍ അഡ്വ. പി.സു.രേഷ് ഹാജരായി.

ദളിത് യുവതിയെ ബലാത്സംഗം ചെയ്ത യുവാവിന് 10 വര്‍ഷം കഠിന തടവും പിഴയും

മഞ്ചേരി: ദളിത് യുവതിയെ യുവതിയെ ലോഡ്ജ് മുറിയില്‍ പൂട്ടിയിട്ട് ബലാത്സംഗം ചെയ്ത യുവാവിനെ മഞ്ചേരി എസ്‌സി-എസ്ടി സ്‌പെഷല്‍ കോടതി വിവിധ വകുപ്പുകളിലായി 10 വര്‍ഷം കഠിന തടവിനും 55,000 രൂപ പിഴയടയ്ക്കുന്നതിനും ശിക്ഷിച്ചു. വേങ്ങര നെല്ലിപ്പറമ്പ് വെട്ടുതോട് മംഗലത്തൊടി ആസിഫലി (35)യെയാണ് ജഡ്ജ് ടി.ജി. വര്‍ഗീസ് ശിക്ഷിച്ചത്. മൊബൈല്‍ ഫോണിലൂടെ പരിചയപ്പെട്ട 19കാരിയെ വിവാഹിതനും രണ്ടുകുട്ടികളുടെ പിതാവുമാണെന്ന കാര്യം മറച്ചുവച്ച് പ്രതി പ്രണയം നടിച്ച് വശീകരിക്കുകയായിരുന്നു. 2022 ഏപ്രില്‍ 28ന് വേങ്ങര ഗാന്ധിദാസ്പടിയിലെ ബസ് സ്റ്റോപ്പില്‍ നില്‍ക്കുകയായിരുന്ന യുവതിയെ ഓട്ടോറിക്ഷ ഓടിച്ചെത്തിയ പ്രതി പ്രലോഭിപ്പിച്ചും നിര്‍ബന്ധിച്ചും കോട്ടക്കലിലെ ടൂറിസ്റ്റ് ഹോമിലേക്ക് കൊണ്ടുപോകുകയായിരുന്നു. ഇവിടെവച്ച് ലൈംഗികാതിക്രമത്തിന് മുതിര്‍ന്ന പ്രതിയെ യുവതി തടഞ്ഞു. ഇതില്‍ പ്രകോപിതനായ പ്രതി യുവതിയെ മുഖത്തടിക്കുകയും മര്‍ദിക്കുകയും ലോഡ്ജ് മുറിയില്‍ പൂട്ടിയിടുകയുമായിരുന്നു. രാത്രി വീണ്ടും പ്രതി മുറിയിലെത്തിയപ്പോള്‍ യുവതി ബാത്റൂമില്‍ കയറി വാതിലടച്ചു. വീണ്ടും വാതിലടച്ച് പോയ പ്രതി പിറ്റേന്ന് രാവിലെ വീണ്ടും ലോഡ്ജ് മുറിയിലെത്തുകയും യുവതിയെ ബലാത്സംഗം ചെയ്യുകയുമായിരുന്നു. മലപ്പുറം വനിതാ പോലീസ് എസ്ഐ സന്ധ്യാദേവി രജിസ്റ്റര്‍ ചെയ്ത കേസില്‍ മലപ്പുറം ഡിവൈഎസ്പിമാരായിരുന്ന പി.എം. പ്രദീപ്, പി. അബ്ദുല്‍ ബഷീര്‍ എന്നിവരാണ് കേസന്വേഷണം നടത്തിയത്. പ്രോസിക്യൂഷനുവേണ്ടി ഹാജരായ സ്‌പെഷല്‍ പബ്ലിക് പ്രോസിക്യൂട്ടര്‍ അഡ്വ. തലാപ്പില്‍ അബ്ദുൾ സത്താര്‍ 24 സാക്ഷികളെ കോടതി മുമ്പാകെ വിസ്തരിച്ചു. 40 രേഖകളും ഏഴ് തൊണ്ടിമുതലുകളും ഹാജരാക്കി. എസ്‌സിപിഒ കെ. സാജനായിരുന്നു പ്രോസിക്യൂഷന്‍ അസിസ്റ്റ് ലൈസണ്‍ ഓഫീസര്‍. ബലാത്സംഗം ചെയ്തതിന് ഏഴ് വര്‍ഷം കഠിന തടവ്, അര ലക്ഷം രൂപ പിഴ, പിഴയടച്ചില്ലെങ്കില്‍ ആറ് മാസത്തെ അധിക തടവ് എന്നിങ്ങനെയാണ് ശിക്ഷ. യുവതിയെ തട്ടിക്കൊണ്ട് പോയതിന് രണ്ടു വര്‍ഷം കഠിന തടവും 5000 രൂപ പിഴയും പിഴയടച്ചില്ലെങ്കില്‍ ഒരു മാസത്തെ അധിക തടവും ശിക്ഷയുണ്ട്. ഇതിനു പുറമെ തടഞ്ഞുവച്ചതിനും കൈകൊണ്ടടിച്ചതിനും ആറു മാസം വീതം തടവ് അനുഭവിക്കണം. തടവുശിക്ഷ ഒരുമിച്ചനുഭവിച്ചാല്‍ മതി. പ്രതിയെ ശിക്ഷയനുഭവിക്കുന്നതിനായി തവനൂര്‍ സെന്‍ട്രല്‍ ജയിലിലേക്കയച്ചു.

വ്യാജരേഖകൾ ചമച്ച് 35 ലക്ഷം രൂപ തട്ടിയെടുത്ത പ്രതി അറസ്റ്റിൽ

പെരിന്തൽമണ്ണ: വ്യാജ രേഖകൾ ചമച്ച് 35 ലക്ഷംരൂപ തട്ടിയെടുത്ത പ്രതി അറസ്റ്റിൽ. കൺസ്യൂമർ ഫെഡറേഷൻ ലിമിറ്റഡിന്‍റെ കീഴിൽ പുലാമന്തോൾ ബസ് സ്റ്റാൻഡിൽ പ്രവർത്തിക്കുന്ന ത്രിവേണി സൂപ്പർമാർക്കറ്റിലെ യൂണിറ്റ് ഇൻ ചാര്‍ജിലുള്ള ദിവസ വേതനക്കാരനായ പട്ടിക്കാട് കരുവമ്പാറ കൊടുവായ്ക്കൽ കെ.വി. വിനീതി (36) നെയാണ് പെരിന്തൽമണ്ണ പോലീസ് ഇൻസ്പെക്ടർ സുമേഷ് സുധാകരന്‍റെ നേതൃത്വത്തിൽ സബ്ഇൻസ്പെക്ടർമാരായ ഷിജോ സി. തങ്കച്ചൻ, ടി.പി. ഉദയൻ, പെരിന്തൽമണ്ണ സ്റ്റേഷനിലെ പ്രത്യേക അന്വേഷണസംഘവും ചേർന്ന് കഴിഞ്ഞ ദിവസം സ്വവസതിയിൽവച്ച് കസ്റ്റഡിയിലെടുത്തത്. 2022 ഒക്ടോബർ ഒന്നു മുതൽ 2025 ഏപ്രിൽ 11 വരെയുള്ള കാലയളവിൽ പ്രതി ത്രിവേണി സൂപ്പർമാർക്കറ്റിൽ ജോലി ചെയ്തു വരികയായിരുന്നു. ക്രെഡിറ്റ് ബില്ല് പ്രകാരവും സ്വന്തമായി വ്യാജമായി ക്രെഡിറ്റ് ബില്ല് നിർമിച്ചും പെരിന്തൽമണ്ണ ജിഎച്ച്എസ് സ്കൂൾ, പാതായ്ക്കര ഗവൺമെന്‍റ് പിടിഎം കോളജ്, മങ്കട ഗവൺമെന്‍റ് കോളജ് എന്നീ സർക്കാർ വിദ്യാഭ്യാസ സ്ഥാപനങ്ങളിലേക്കും മറ്റു സ്വകാര്യ സ്ഥാപനങ്ങളിലേക്കും സ്കൂൾ സ്റ്റേഷനറി ഉത്പന്നങ്ങളും ഗ്രോസറി ഉത്പന്നങ്ങളും നൽകി പ്രതി ഡിജിറ്റൽ പേയ്മെന്‍റിലൂടെ നേരിട്ട് സ്വന്തം ബാങ്ക് അക്കൗണ്ടുകളിലേക്ക് പണം അയപ്പിച്ചു. ഇതിനു പുറമെ സ്ഥാപനങ്ങളിൽ പ്രതി നേരിട്ടെത്തി പണം നേരിട്ട് കൈപ്പറ്റിയ ശേഷം ആ തുകകൾ കേരള സ്റ്റേറ്റ് കോപറേറ്റീവ് കൺസ്യൂമർ ഫെഡറേഷൻ ലിമിറ്റഡിന്‍റെ അക്കൗണ്ടിലേക്ക് അടയ്ക്കാതെ സ്വന്തം സാമ്പത്തിക ആവശ്യങ്ങൾക്ക് ഉപയോഗിച്ചു വന്നിരുന്നതായും ഇപ്രകാരം കേരള സ്റ്റേറ്റ് കോപറേറ്റീവ് കൺസ്ട്രേഷൻ ലിമിറ്റഡിൽ നിന്നും പ്രതി 34,67,432 രൂപ തട്ടിയെടുത്തതായും പോലീസ് അറിയിച്ചു. പെരിന്തൽമണ്ണ ജുഡീഷൽ ഫസ്റ്റ് ക്ലാസ് കോടതിയിൽ ഹാജരാക്കിയപ്രതിയെ 14 ദിവസത്തേക്ക് കോടതി റിമാൻഡ് ചെയ്തു.

കുറ്റൂർ നോർത്ത് എംഎച്ച്എം എൽപി സ്കൂളിൽ "ഉപജീവനം’ പദ്ധതി

കുറ്റൂർ നോർത്ത്: വേങ്ങര കുറ്റൂർ നോർത്ത് എംഎച്ച്എം എൽപി സ്കൂളിൽ നിർധന കുടുബത്തിന്"ഉപജീവനം’ രണ്ടാംഘട്ടം പദ്ധതിയിൽ എച്ച്എഫ് വർഗത്തിൽപ്പെട്ട പശുക്കുട്ടിയെ വിതരണം ചെയ്തു. സ്കൂളിലെ അധ്യാപകൻ രാജുവർഗീസ് കഴിഞ്ഞ വർഷം രണ്ട് ആടുകളെ വിതരണം ചെയ്തിരുന്നു. ചടങ്ങ് സ്കൂൾ മാനേജർ കെ.പി. ഹുസൈൻഹാജി ഉദ്ഘാടനം ചെയ്തു. പിടിഎ പ്രസിഡന്‍റ് കെ.പി. നിഷാദ്, ഹെഡ്മാസ്റ്റർ കെ. ഉണ്ണികൃഷ്ണൻ, എംടിഎ പ്രസിഡന്‍റ് അഞ്ജലി, പിടിഎ വൈസ് പ്രസിഡന്‍റ് എം.കെ. അലിയു, പിടിഎ അംഗങ്ങളായ നിഷാന്ത്, നാസർ, അധ്യാപകരായ ബിന്ദു, ഗീത, ഉബൈദ്, ഷീബ, ഷിജ, ഷിന തുടങ്ങിയവർ സംബന്ധിച്ചു.

വയോജനങ്ങൾക്കായി സൗജന്യ മെഡിക്കൽ ക്യാമ്പ് സംഘടിപ്പിച്ചു

പെരിന്തൽമണ്ണ: ലോക വയോജന ചൂഷണ അവബോധ ദിനത്തോടനുബന്ധിച്ച് എംഇഎസ് മെഡിക്കൽ കോളജ് കമ്മ്യൂണിറ്റി മെഡിസിൻ വിഭാഗത്തിന്‍റെ നേതൃത്വത്തിൽ അർബൻ ഹെൽത്ത് ട്രയിനിംഗ് സെന്‍ററിൽ മുതിർന്നവർക്കായി സൗജന്യ ആരോഗ്യ പരിശോധനാ ക്യാമ്പ് സംഘടിപ്പിച്ചു. ഡോ. ഗിരീഷ് രാജ് (ഡീൻ, എംഇഎസ് മെഡിക്കൽ കോളജ്) ക്യാമ്പ് ഔദ്യോഗികമായി ഉദ്ഘാടനം ചെയ്തു. കമ്മ്യൂണിറ്റി മെഡിസിൻ വിഭാഗം പ്രഫ. ഡോ. മുബാറക് സാനി അധ്യക്ഷത വഹിച്ചു. സാമൂഹ്യ ക്ഷേമ സമിതി ചെയർമാനായ ഹനീഫ ബാപ്പുട്ടി മുഖ്യപ്രഭാഷണം നടത്തി. ഡോ. നാരായണൻ (അസിസ്റ്റന്‍റ് പ്രഫ., കമ്മ്യൂണിറ്റി മെഡിസിൻ), ഡോ. സി.വി. ജമാലുദ്ദീൻ (പ്രഫ., കമ്മ്യൂണിറ്റി മെഡിസിൻ), ഡോ. കെ.എം ഹഫ്സ (പ്രഫഫ. ആൻഡ് എച്ച്ഒഡി, ഓഫ്താൽമോളജി), ഡോ. എൻ.എം. സെബാസ്റ്റ്യൻ (പ്രഫ., കമ്മ്യൂണിറ്റി മെഡിസിൻ), ഡോ. ഹഫീസ് അബ്ദുള്ള (അസിസ്റ്റന്‍റ് പ്രഫ., ഇഎൻടി), ഡോ. ജി. നന്ദിനി (പ്രഫ., കമ്മ്യൂണിറ്റി മെഡിസിൻ) എന്നിവർ സംസാരിച്ചു. കമ്മ്യൂണിറ്റി മെഡിസിൻ വിഭാഗം ഡോക്ടർമാരായ ഡോ. ജസീല, ഡോ.ഹസീന, ഡോ.അജിത്ത് എന്നിവരാണ് ക്യാമ്പിന് നേതൃത്വം നൽകിയത്.

നിലമ്പൂർ നഗരസഭാധ്യക്ഷന്‍റെ ഔദ്യോഗിക വാഹനത്തിലെ പതാക നീക്കം ചെയ്യാൻ ഹൈക്കോടതി ഉത്തരവെന്ന്

നിലമ്പൂർ: നഗരസഭാധ്യക്ഷന്‍റെ ഔദ്യോഗിക വാഹനത്തിൽ സ്ഥാപിച്ച വിവാദ പതാക അഴിച്ചു മാറ്റാൻ ഹൈക്കോടതി ഉത്തരവിട്ടതായി പ്രതിപക്ഷ നേതാവ് പാലോളി മെഹബൂബ്, യുഡിഎഫ് മുനിസിപ്പൽ കമ്മിറ്റി ഭാരവാഹികളായ ഷെറി ജോർജ്, കെ.നാണിക്കുട്ടി എന്നിവർ പറഞ്ഞു. ഇടതു ഭരണസമിതി അധികാരമേറ്റതിന് പിന്നാലെയാണ് അധ്യക്ഷൻ മാട്ടുമ്മൽ സലീമിന്‍റെ കാറിൽ പതാക സ്ഥാപിച്ചത്. നടപടി മോട്ടർ വാഹന ചട്ടങ്ങളുടെ ലംഘനമാണെന്ന് ചൂണ്ടിക്കാട്ടി മുനിസിപ്പൽ കോൺഗ്രസ് കമ്മിറ്റി വൈസ് പ്രസിഡന്‍റ് പി.ടി.ചെറിയാൻ നിലമ്പൂർ ജോയിന്‍റ് ആർടിഒയ്ക്ക് പരാതി നൽകി. പതാക സ്ഥാപിക്കുന്നതിന് വാഹനത്തിൽ മാറ്റം വരുത്തിയത് (ആൾട്ടറിംഗ്) ചട്ടലംഘനമാണെന്ന് ജോയിന്‍റ് ആർടിഒ വിലയിരുത്തി. വാഹനങ്ങളിൽ പതാക ഉപയോഗിക്കാൻ അർഹതയുള്ളവരുടെ പട്ടികയിൽ തദ്ദേശസ്ഥാപനങ്ങളുടെ അധ്യക്ഷർ ഉൾപ്പെടുന്നില്ല. ഇക്കാര്യങ്ങൾ വ്യക്തമാക്കി പതാക നീക്കം ചെയ്ത് കാർ പരിശോധനയ്ക്ക് ഹാജരാക്കാൻ വാഹനത്തിന്‍റെ കസ്റ്റോഡിയൻ കൂടിയായ സെക്രട്ടറിക്ക് ജോയിന്‍റ് ആർടിഒ നോട്ടീസ് നൽകി. നടപടിയെടുക്കാതെ സെക്രട്ടറി ഒഴിഞ്ഞു മാറി. തുടർന്ന് പരാതിക്കാരൻ നഗരസഭാ സെക്രട്ടറി, മലപ്പുറം ആർടിഒ, ജോയിന്‍റ് ആർടിഒ എന്നിവരെ എതിർകക്ഷികളാക്കി ഹെക്കോടതിയിൽ ഹർജി നൽകി. വാഹനത്തിൽ നിന്ന് പതാക നീക്കം ചെയ്യാൻ 2022 ഒക്ടോബർ 10ന് സെക്രട്ടറിക്ക് കോടതി ഉത്തരവിട്ടു. കഴിഞ്ഞ 16ന് ഹർജി കോടതി പരിഗണിച്ചപ്പോൾ ഉത്തരവ് നടപ്പാക്കിയിട്ടില്ലെന്ന് പരാതിക്കാരന്‍റെ അഭിഭാഷൻ ബോധിപ്പിച്ചു. തുടർന്ന് പതാക നീക്കം ചെയ്ത് 10 ദിവസത്തിനകം സത്യവാങ്മൂലം സമർപ്പിക്കാൻ ജസ്റ്റിസ് സി.പി. മുഹമ്മദ് നിയാസ് സെക്രട്ടറിയോട് ഉത്തരവിട്ടു. ഹർജി കോടതിയുടെ പരിഗണനക്ക് ഇന്ന് വീണ്ടും വരുന്നുണ്ട്. അതേസമയം നഗരസഭാ ചെയർമാന്‍റെ ഔദ്യോഗിക വാഹനത്തിലെ പതാക അഴിച്ച് മാറ്റിയിട്ടുണ്ടെന്നും നഗരസഭ അഭിഭാഷകൻ മുഖേന കോടതിയിൽ സത്യവാങ്മൂലം സമർപ്പിച്ചിട്ടുണ്ടെന്നും നഗരസഭാ സെക്രട്ടറി പറഞ്ഞു.

വിദ്യാഭ്യാസത്തോടൊപ്പം ആരോഗ്യ സുരക്ഷിതത്വവും ഉറപ്പ് വരുത്തണമെന്ന്

പെരിന്തൽമണ്ണ: ഗുണമേന്മയുള്ള വിദ്യാഭ്യാസത്തോടൊപ്പം കുട്ടികളുടെ ആരോഗ്യ സുരക്ഷിതത്വവും ഉറപ്പ് വരുത്തുന്നതിൽ സ്കൂളുകൾ ശ്രദ്ധ പതിപ്പിക്കണമെന്ന് നജീബ് കാന്തപുരം എംഎൽഎ. കിംസ് അൽഷിഫ ഹോസ്പിറ്റൽ അക്കാദമിക് ഹാളിൽ ജില്ലയിലെ സിബിഎസ്ഇ കായിക അധ്യാപകർക്കായി മലപ്പുറം സെൻട്രൽ സഹോദയ സംഘടിപ്പിച്ച ഏകദിന പരിശീലന പരിപാടി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. അധ്യാപകർക്കുള്ള പ്രഥമ ശുശ്രുഷാ, ബേസിക് ലൈഫ് സപ്പോർട്ട് വിഷയത്തിലുള്ള പരിശീലന ശില്പശാലയ്ക്ക് കിംസ് അൽഷിഫ ഹോസ്പിറ്റൽ എമർജൻസി വിഭാഗത്തിൽ നിന്നുള്ള ഡോക്ടർമാരായ പി.എൻ. ഹാഫിസ് , ഡോ. റാസി, ഡോ. അഞ്ജിത, ഡോ. ആഷിക്, ഉസാമ എന്നിവർ നേതൃത്വം നൽകി. ജില്ലയിലെ 80 സിബിഎസ്ഇ സ്കൂളിലെ കായികാധ്യാപകർ ശില്പശാലയിൽ പങ്കെടുത്തു. മലപ്പുറം സെൻട്രൽ സഹോദയ പ്രസിഡന്‍റ് നൗഫൽ പുത്തൻപീടിയേക്കൽ അധ്യക്ഷത വഹിച്ച ചടങ്ങിൽ കിംസ് അൽഷിഫ വൈസ് ചെയർമാനും ഐഎസ്എസ് പ്രസിഡന്‍റുമായ ഡോ. പി. ഉണ്ണീൻ മുഖ്യാതിഥിയായി. ജില്ലയിലെ സിബിഎസ്ഇ സ്കൂളുകൾക്ക് കിംസ് അൽഷിഫ നൽകുന്ന ഫസ്റ്റ് എയ്ഡ് കിറ്റുകളുടെ വിതരണോദ്ഘാടനം ഡോ. പി. ഉണ്ണീൻ നിർവഹിച്ചു. സഹോദയ ജനറൽ സെക്രട്ടറി സി.സി. അനീഷ്കുമാർ, ഐഎസ്എസ് ജനറൽ സെക്രട്ടറി എ.വി. റഫീഖ്, കിംസ് അൽഷിഫ മെഡിക്കൽ സുപ്രണ്ട് ഡോ. മുഹമ്മദ് യഹിയ, ഡോ. ഷാഹുൽ ഹമീദ്, ഫാ. ജീവൻ ജോസഫ്, കെ. റഫീഖ് മുഹമ്മദ്, ടി. അബ്ദുസമദ്, സൈതാലിക്കുട്ടി, സഹോദയ സ്പോർട്സ് കൺവീനർ കെ.പി. ഫഹദ് എന്നിവർ സംബന്ധിച്ചു.

അപായ മുന്നറിയിപ്പ് നൽകാത്തതിൽ ശക്തമായ പ്രതിഷേധം

കരുവാരകുണ്ട്: കൽക്കുണ്ടിൽ ഒലിപ്പുഴയിലെ ഒഴുക്കിൽപ്പെട്ട് യുവാവ് മരിക്കാനിടയായ സാഹചര്യം അധികൃതരുടെ അനാസ്ഥയാണന്ന് നാട്ടുകാർ ആരോപിച്ചു. കനത്ത മഴ അനുഭവപ്പെടുമ്പോൾ ഒലിപ്പുഴയുടെ ഉത്ഭവ ഭാഗങ്ങളിൽ കുത്തൊഴുക്കിനോടൊപ്പം പുഴയിലെ നിലയില്ലാക്കയങ്ങളും വൻ അപകടങ്ങളാണ് വരുത്തിവയ്ക്കുന്നത്. ഇവിടങ്ങളിൽ സുരക്ഷാ മുന്നറിയിപ്പ് നൽകണമെന്ന നാട്ടുകാരുടെ ആവശ്യം അധികൃതർ നിരാകരിക്കുകയായിരുന്നു. പ്രദേശത്ത് നിരവധി റിസോർട്ടുകൾ പ്രവർത്തിക്കുന്നുണ്ട്. ദൂരെ സ്ഥലങ്ങളിൽ നിന്നും എത്തുന്ന സഞ്ചാരികൾ ഒലിപ്പുഴയിലാണ് കുളിക്കുന്നത്. പുഴയിലെ അപകടച്ചുഴിയിൽ നിരവധിപ്പേർ മുൻവർഷങ്ങളിലും അപകടത്തിൽപ്പെട്ടിട്ടുണ്ട്. ഈ പ്രദേശങ്ങളിൽ അപായ മുന്നറിയിപ്പ് ബോർഡുകൾ സ്ഥാപിക്കണമെന്ന ആവശ്യം ഇതുവരെ നടപ്പാക്കാത്തതിൽ ശക്തമായ പ്രതിഷേധമാണ് നാട്ടുകാരുടെടെ ഭാഗത്തുനിന്നുമുയരുന്നത്.

ലഹരി വിരുദ്ധ സന്ദേശയാത്രയ്ക്ക് തിരൂരിൽ സമാപനം

തിരൂർ: കായിക മന്ത്രി വി. അബ്ദുറഹിമാന്‍റെ നേതൃത്വത്തിൽ നടന്ന ലഹരി വിരുദ്ധ സന്ദേശയാത്രയ്ക്ക് തിരൂരിൽ സമാപനമായി. മേയ് അഞ്ചിന് ആരംഭിച്ച് 13 ജില്ലകളിൽ പര്യടനം പൂർത്തിയാക്കിയ ശേഷമാണ് സന്ദേശയാത്ര തിരൂരിൽ സമാപിച്ചത്. വിദ്യാർഥികളും കായികതാരങ്ങളും കലാപ്രവർത്തകരും ചേർന്ന് നടത്തിയ അന്പ്രല്ല റാലി തിരൂരിന് ആവേശമായി. തിരൂർ സ്റ്റേഡിയത്തിൽ നിന്ന് ആരംഭിച്ച റാലി ബോയ്സ് ഹയർ സെക്കൻഡറി സ്കൂളിൽ സമാപിച്ചു. കൗമാരക്കാരെയും യുവാക്കളെയും പിടികൂടുന്ന രാസ ലഹരിയെ പൂർണമായി ഇല്ലാതാക്കുക എന്നതായിരുന്നു ലഹരി വിരുദ്ധ സന്ദേശ യാത്രയുടെ ലക്ഷ്യമെന്നും ആവേശോജ്വലമായ സ്വീകരണമാണ് യാത്രയ്ക്ക് സംസ്ഥാനമാകെ ലഭിച്ചതെന്നും സമാപന സമ്മേളനം ഉദ്ഘാടനം ചെയ്ത് മന്ത്രി വി. അബ്ദുറഹിമാൻ പറഞ്ഞു. വിവിധ വകുപ്പുകളുടെ കൂട്ടായ പ്രവർത്തനത്തിലൂടെ മയക്കുമരുന്ന് മാഫിയയെ നിയന്ത്രിക്കാൻ സർക്കാരിന് കഴിഞ്ഞു. വ്യാപകമായ പരിശോധനയിലൂടെ രാസ ലഹരികൾ കണ്ടെടുത്ത് നശിപ്പിച്ചു. കുറ്റവാളികൾക്ക് കടുത്ത ശിക്ഷ വാങ്ങികൊടുത്തു. ലഹരിക്കെതിര് ശക്തമായ പോരാട്ടമാണ് സർക്കാർ നടത്തി വരുന്നത്. ഇതര സംസ്ഥാനങ്ങളിലടക്കം എത്തി ലഹരി മാഫിയയെ പിടികൂടാൻ നമുക്ക് കഴിഞ്ഞിട്ടുണ്ടെന്നും മന്ത്രി പറഞ്ഞു. പഠനത്തിന്‍റെ ഭാഗമായ സമ്മർദം ഒഴിവാക്കാൻ കുട്ടികളെ കളിക്കളങ്ങളിലേക്ക് നയിക്കാനാണ് സർക്കാർ ലക്ഷ്യമിടുന്നത്. ഇതിന്‍റെ ഭാഗമായി എല്ലാ പഞ്ചായത്തുകളിലും കളിക്കളങ്ങൾ ഉറപ്പാക്കുന്ന പ്രവർത്തനങ്ങളാണ് സർക്കാർ ഏറ്റെടുത്തിട്ടുള്ളതെന്നും മന്ത്രി പറഞ്ഞു. തിരൂർ എംഎൽഎ കുറുക്കോളി മൊയ്തീൻ അധ്യക്ഷത വഹിച്ചു. ജില്ലാ കളക്ടർ വി.ആർ. വിനോദ് ലഹരി വിരുദ്ധ പ്രതിജ്ഞ ചൊല്ലിക്കൊടുത്തു. ഫുട്ബോൾ താരം പത്മശ്രീ ഐ.എം. വിജയൻ, ഗാനരചയിതാവ് റഫീഖ് അഹമ്മദ്, സംഗീത സംവിധായകൻ ബിജിബാൽ, ചലച്ചിത്ര സംവിധായകൻ ലാൽ ജോസ് എന്നിവർ ചടങ്ങിൽ വിശിഷ്ടാതിഥികളായിരുന്നു. ചടങ്ങിൽ രാഷ്ട്രീയ, കലാ, സാംസ്കാരിക രംഗത്തെ നിരവധി പ്രമുഖർ സംബന്ധിച്ചു.

നിലന്പൂർ താലൂക്കിലെ സ്കൂളുകൾക്ക് ഇന്ന് അവധി

മലപ്പുറം: ശക്തമായ മഴ തുടരുന്ന സാഹചര്യത്തിൽ നിലന്പൂർ താലൂക്കിലെ ഹയർ സെക്കൻഡറി ഉൾപ്പെടെ മുഴുവൻ സ്കൂളുകൾക്കും ബഡ്സ് സ്കൂളുകൾക്കും അങ്കണവാടികൾക്കും മദ്രസകൾക്കും ഇന്ന് ജില്ലാ കളക്ടർ വി.ആർ. വിനോദ് അവധി പ്രഖ്യാപിച്ചു. പരീക്ഷകൾക്കും റസിഡൻഷ്യൽ സ്ഥാപനങ്ങൾക്കും അവധി ബാധകമല്ല.

അമരമ്പലത്തെ കരടി ശല്യത്തിന് അറുതിയില്ല

പൂക്കോട്ടുംപാടം: അമരമ്പലം പഞ്ചായത്ത് പരിധിയിൽ കരടി ശല്യം രൂക്ഷമാകുന്നു. കഴിഞ്ഞ ദിവസം രാത്രിയിൽ പുഞ്ചയിൽ രണ്ടുക്ഷേത്രങ്ങളിലാണ് കരടി കയറിയത്. പുഞ്ച കൊടമുക്ക് ദേവിക്ഷേത്രത്തിൽ വാതിൽ പൊളിച്ച് കയറിയ കരടി എണ്ണ, നെയ്യ് തുടങ്ങിയവ ഭക്ഷിച്ചു. പുലർച്ചെ വിളക്ക് വയ്ക്കുന്നതിനുവേണ്ടി ആളുവന്നപ്പോഴാണ് കരടി ക്ഷേത്രത്തിൽ കയറിയത് അറിയാൻ സാധിച്ചത്. അന്നേ ദിവസം രാത്രിയിൽ തന്നെ മങ്കലത്ത് ജാനകിയുടെ കുടുംബ ക്ഷേത്രത്തിലും കരടിയെത്തി വാതിൽ തള്ളി തുറന്ന് എണ്ണയും മറ്റും ഭക്ഷിച്ചു. രണ്ടാം തവണയാണ് കരടി ഈ ക്ഷേത്രത്തിൽ എത്തുന്നത് ക്ഷേത്രത്തിനോട് അടുത്തുള്ള ആൾതാമസം ഇല്ലാത്ത വീട്ടിലും കരടി കയറി. വീടിനകത്തുള്ള ഗ്യാസ് അടുപ്പ്, പാത്രങ്ങൾ തുടങ്ങിയവ കരടി നശിപ്പിച്ചിട്ടുണ്ട് വീടിനോട് ചേർന്നുള്ള പൂജാമുറിയിലും കരടി കയറിയിട്ടുണ്ട്. കഴിഞ്ഞ ദിവസങ്ങളിൽ ടികെ കോളനിയിൽ അയ്യപ്പ ക്ഷേത്രത്തിലും പൊട്ടിക്കല്ല് പാറക്കൽ കുടുംബ ക്ഷേത്രത്തിലും കരടി കയറിയിരുന്നു. ടികെ കോളനി ക്ഷേത്രത്തിന് സമീപം വാസുവിന്‍റെ വീട്ടിൽ വാതിൽ പൊളിക്കാനുള്ള ശ്രമവും ഉണ്ടായി.

ജില്ലയിൽ അന്താരാഷ്ട്ര ലഹരിവിരുദ്ധ ദിനാചരണം നടത്തി

മഞ്ചേരി: എക്‌സൈസ് വകുപ്പിന്‍റെ നേതൃത്വത്തില്‍ അന്താരാഷ്ട്ര ലഹരിവിരുദ്ധ ദിനാചരണ ജില്ലാതല ഉദ്ഘാടനം മഞ്ചേരി എച്ച്എംവൈഎച്ച്എസ് സ്‌കൂളില്‍ അഡ്വ. യു.എ. ലത്തീഫ് എംഎല്‍എ നിര്‍വഹിച്ചു. നഗരസഭ ചെയര്‍പേഴ്‌സൺ വി.എം. സുബൈദ അധ്യക്ഷത വഹിച്ചു. മലപ്പുറം ഡെപ്യൂട്ടി എക്‌സൈസ് കമീഷണര്‍ സി. ജിജു ജോസ് മുഖ്യാതിഥിയായി. ജില്ല വിമുക്തി മിഷന്‍ മാനേജര്‍ എ.ആര്‍. നിഗീഷ് ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. നഗരസഭ ആരോഗ്യ സ്ഥിരംസമിതി ചെയര്‍മാന്‍ റഹീം പുതുക്കൊള്ളി, പിടിഎ പ്രസിഡന്‍റ് സക്കീര്‍ വല്ലാഞ്ചിറ, ബിപിസി എം.പി. സുധീര്‍ ബാബു, ജില്ലാ വിമുക്തി കോഓർഡിനേറ്റര്‍ ഗാഥ എം. ദാസ്, കെഎസ്ഇഎസ്എ ജില്ലാ പ്രസിഡന്‍റ് ടി. പ്രജോഷ് കുമാര്‍, സ്‌കൂള്‍ പ്രിന്‍സിപ്പല്‍ സി.കെ. സാലിഹ്, പ്രധാനാധ്യാപകന്‍ എം. അന്‍വര്‍ ഷക്കീല്‍, മഞ്ചേരി എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ഇ. ജിനീഷ്, നഗരസഭ ക്ലീന്‍സിറ്റി മാനേജര്‍ ജെ.എ. നുജൂം, സീനിയര്‍ പബ്ലിക് ഹെല്‍ത്ത് ഇന്‍സ്‌പെക്ടര്‍ സി.എ. ഷംസുദ്ധീന്‍, പബ്ലിക് ഹെല്‍ത്ത് ഇന്‍സ്‌പെക്ടര്‍മാരായ റെജി തോമസ്, സി. രതീഷ് എന്നിവര്‍ സംസാരിച്ചു. വിമുക്തി കോഓർഡിനേറ്റര്‍ ഇ. ജിഷില്‍ നായര്‍ വിഷയാവതരണം നടത്തി. തുടര്‍ന്ന് സ്‌കൂള്‍ പാര്‍ലമെന്‍റ് കൂടി ലഹരിക്കെതിരേ പ്രമേയം പാസാക്കി. ലഹരിക്കെതിരേയുള്ള കലാപരിപാടികള്‍, എക്‌സൈസ് ഗായക സംഘം അവതരിപ്പിച്ച ഗാനമേള എന്നിവയും അരങ്ങേറി. പുഴക്കാട്ടിരി എഎൽപി സ്കൂൾ പുഴക്കാട്ടിരി: അന്താരാഷ്ട്ര ലഹരിവിരുദ്ധ ദിനത്തിന്‍റെ ഭാഗമായി പുഴക്കാട്ടിരി എഎൽപി സ്കൂളിൽ ജാഗ്രത സമിതിയുടെ നേതൃത്വത്തിൽ വൈവിധ്യമാർന്ന പരിപാടികൾ നടന്നു. ലഹരിവിരുദ്ധ സ്പെഷൽ അസംബ്ലി എച്ച്എം പ്രീതി ഉദ്ഘാടനം ചെയ്തു. മുഹമ്മദ് ഷാഫി, ശിവപ്രസാദ് എന്നിവർ പരിപാടികൾക്ക് നേതൃത്വം നൽകി. ലഹരിവിരുദ്ധ പ്രതിജ്ഞ പ്രസംഗം, ലഹരി വിരുദ്ധ ഗാനലാപനം സൂമ്പ ഡാൻസ് എന്നിവ അസംബ്ലിയിൽ അരങ്ങേറി. ലഹരി എന്ന വിപത്തിനെതിരേ സമൂഹത്തെ ബോധ്യപ്പെടുത്താനായി പുഴക്കാട്ടിരി ഹെൽത്ത് സെന്‍ററിലേക്ക് സന്ദേശറാലി നടത്തി. ആശുപത്രി പരിസരത്ത് ഫ്ലാഷ് മോബ്, പോസ്റ്റർ പതിക്കൽ ലഹരിക്കെതിരേ കയ്യൊപ്പ് എന്നിവയും നടന്നു. പുഴക്കാട്ടിരി ഹെൽത്ത് സെന്‍ററിലെ എച്ച്ഐ അബ്ദുൾ ജലീലിന്‍റെ നേതൃത്വത്തിൽ ബോധവത്കരണ ക്ലാസും ഉണ്ടായിരുന്നു. പറമ്പ ഗവ. യുപിസ്കൂൾ പൂക്കോട്ടുംപാടം: പറമ്പ ഗവ. യുപി സ്കൂളിൽ ലഹരിവിരുദ്ധദിനവുമായി ബന്ധപ്പെട്ട് വിവിധ പരിപാടികൾ സംഘടിപ്പിച്ചു. സ്കൂളിൽ വച്ച് നടന്ന ലഹരി വിരുദ്ധ പ്രതിജ്ഞ എടുക്കൽ മെഴുകുതിരി തെളിയിച്ച് സ്കൂൾ പ്രധാനാധ്യാപകന്‍ എൻ. പ്രദീപ് ഉദ്ഘാടനം ചെയ്തു. തുടർന്ന് പൂക്കോട്ടുംപാടം ടൗണിൽവച്ച് ലഹരിവിരുദ്ധ ഫ്ലാഷ് മോബ് സംഘടിപ്പിച്ചു. ലഹരിവിരുദ്ധ പോസ്റ്റർ നിർമാണം, പതിപ്പ് തയാറാക്കൽ തുടങ്ങിയ മത്സരങ്ങളും സ്കൂളിൽ നടന്നു. എംടിഎ പ്രസിഡന്‍റ് തസ്നിയ, പിടിഎ എക്സിക്യൂട്ടീവ് അൻസാർ, എസ്ആര്‍ജി കൺവീനർമാരായ പി. മുജീബ്, പി.കെ. ജ്യോതികൃഷ്ണ, സ്റ്റാഫ് സെക്രട്ടറി പി.ജെ. മിനിമോൾ, അധ്യാപകരായ നൂർജഹാൻ, പ്രസന്ന, രജിത, ഉണ്ണി, നജ്മുദ്ധീൻ തുടങ്ങിയവർ പരിപാടികൾക്ക് നേതൃത്വം നൽകി.‌ റഹ്മത്ത് പബ്ലിക് ഹയര്‍ സെക്കൻഡറി സ്‌കൂൾ മഞ്ചേരി: വിദ്യാര്‍ഥികള്‍ ലഹരിക്കെതിരേ പ്രതിജ്ഞയെടുത്തു. ലോക ലഹരി വിരുദ്ധദിനത്തോടനുബന്ധിച്ച് പുല്ലൂര്‍ റഹ്മത്ത് പബ്ലിക് ഹയര്‍ സെക്കൻഡറി സ്‌കൂളില്‍ നടന്ന ബോധവത്കണ ക്ലാസ് സിവില്‍ എക്‌സൈസ് ഓഫീസര്‍ എം. വിനില്‍കുമാര്‍ ഉദ്ഘാടനം ചെയ്തു. ലഹരിക്കെതിരേയുള്ള പ്രതിജ്ഞയോടൊപ്പം ഡിസ്‌പ്ലേ, കൊളാഷ് നിര്‍മാണം, തമ്പ് പ്രിന്‍റിംഗ് എന്നീ പരിപാടികളും ശാസ്ത്ര ക്ലബ് ഉദ്ഘാടനവും നടന്നു. ഡോ. അബ്ദുറഹിമാന്‍ അധ്യക്ഷത വഹിച്ചു. പ്രിന്‍സിപ്പല്‍ സി. സാജിദ, അബ്ദുള്‍ അസീസ്, അബ്ദുള്‍ റസാഖ് ഫൈസി, ഉമ്മര്‍ ഹാജി, ടി.എം. അബ്ദുല്‍ സമദ്, ഷാഹിദ് എന്നിവര്‍ സംസാരിച്ചു. വിദ്യാജ്യോതി സ്കൂൾ നെൻമേനി: നെൻമേനി വിദ്യാജ്യോതി യുപി സ്കൂളിൽ ലഹരിക്കെതിരേ അണിചേർന്ന് അധ്യാപകരും രക്ഷിതാക്കളും കുട്ടികളും പൂർവ വിദ്യാർഥികളും സ്കൂൾ ഡ്രൈവർമാരും വാർഡ് മെന്പറും ഉൾപ്പെടെ "കൈയൊപ്പ്’ പ്രവർത്തനം നടത്തി. സ്കൂൾ ഓഡിറ്റോറിയത്തിൽ നടന്ന ചടങ്ങിൽ ലഹരിവിരുദ്ധ പ്രതിജ്ഞ, സ്കൂളിലെ മുഴുവൻ കുട്ടികളും ഉൾപ്പെടുന്ന സൂന്പ ഡാൻസ് എന്നിവ സംഘടിപ്പിച്ചു. പിടിഎ പ്രസിഡന്‍റ് ശിഹാബുദ്ദീൻ, വാർഡ് മെന്പർ സഫ്ന അനസ്, പൂർവ വിദ്യാർഥി അഖിൽ ഏബ്രഹാം തുടങ്ങിയവർ പങ്കെടുത്തു. ഇതോടനുബന്ധിച്ച് സ്കൂളിൽ പ്രത്യേക അസംബ്ലിയും നടന്നു. വൈഎംസിഎ ബോധവത്കരണം മലപ്പുറം: ലഹരി വിരുദ്ധദിനത്തോടനുബന്ധിച്ച് മലപ്പുറം വൈഎംസിഎ ബോധവത്കരണ ക്ലാസ് സംഘടിപ്പിച്ചു. മേൽമുറി അധികാരതൊടി ജിഎംയുപി സ്കൂളിൽ നടത്തിയ പരിപാടി സീനിയർ അസിസ്റ്റന്‍റ് വി.എസ്. ബിന്ദു ഉദ്ഘാടനം ചെയ്തു. വൈഎംസിഎ പ്രസിഡന്‍റ് എ.ജെ. ആന്‍റണി, പി.കെ. ജാസിർ, വൈഎംസിഎ സബ് റീജിയൻ വൈസ് ചെയർമാൻ മാത്യുജോണ്‍, ജിബിൻ വർഗീസ്, രോഷനര ജാൻ, എന്നിവർ പ്രസംഗിച്ചു. വിദ്യാർഥി പ്രതിനിധി അമീന രുഷ്ദ പ്രതിജ്ഞ ചൊല്ലിക്കൊടുത്തു. സിവിൽ എക്സൈസ് ഓഫീസർ വിനിൽകുമാർ ക്ലാസുകൾക്ക് നേതൃത്വം നൽകി. തുടർന്ന് സ്കൗട്ട് ആൻഡ് ഗൈഡ്സിന്‍റെ നേതൃത്വത്തിൽ റാലി നടത്തി. വെറ്റിലപ്പാറ ഹോളിക്രോസ് കോണ്‍വെന്‍റ് സ്കൂൾ വെറ്റിലപ്പാറ: വെറ്റിലപ്പാറ ഗ്രാമപഞ്ചായത്ത്തലത്തിൽ വിദ്യാഭ്യാസ സ്ഥാപനങ്ങൾ കേന്ദ്രീകരിച്ച് നടത്തിവരുന്ന ലഹരി വിമുക്ത വിദ്യാലയ പദ്ധതിയുടെ പ്രഖ്യാപനം ഹോളിക്രോസ് കോണ്‍വെന്‍റ് ഹൈസ്കൂളിൽ ഗ്രാമപഞ്ചായത്ത് പ്രസിഡന്‍റ് സി. ജിഷ നിർവഹിച്ചു. വൈസ് പ്രസിഡന്‍റ് ഷിജോ ആന്‍റണി അധ്യക്ഷത വഹിച്ചു. ഊർങ്ങാട്ടിരി പഞ്ചായത്തിലെ ആദ്യലഹരി വിമുക്ത വിദ്യാലയമായി സ്കൂളിനെ പ്രഖ്യാപിച്ചു. വിവിധതരത്തിലുള്ള ലഹരിപദാർഥങ്ങൾ, ശാരീരിക, മാനസിക വികലതകൾ സൃഷ്ടിക്കുമെന്നും ജീവിതവും സ്നേഹവുമാകണം നമ്മുടെ ലഹരിയെന്ന് പ്രസിഡന്‍റ് ജിഷ പറഞ്ഞു. ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ ഹസ്നത്ത് കുഞ്ഞാണി, ഊർങ്ങാട്ടിരി സിഎച്ച്എസ് അസിസ്റ്റന്‍റ് സർജൻ ഡോ. ജാനിഷ്, ഹെൽത്ത് ഇൻസ്പെക്ടർ അബ്ദുൾ റഷീദ്, പബ്ലിക് ഹെൽത്ത് നഴ്സ് സുഹറ, സ്കൂൾ മാനേജർ സിസ്റ്റർ ജാൻസി ജോർജ്, വാർഡ് മെന്പർ ദീപാ രജിദാസ്, പിടിഎ പ്രസിഡന്‍റ് ജിൻസ് കുര്യൻ, സ്കൂൾ പ്രിൻസിപ്പൽ സിസ്റ്റർ സ്മിത വർഗീസ് എന്നിവർ പ്രസംഗിച്ചു. സ്കൂളിന് ലഹരി വിമുക്ത വിദ്യാലയമായി പ്രഖ്യാപിച്ചുള്ള ബഹുമതിപത്രം പഞ്ചായത്ത് പ്രസിഡന്‍റിൽ നിന്ന് സ്കൂൾ പ്രിൻസിപ്പലും മാനേജരും ഏറ്റുവാങ്ങി. ലഹരി വിരുദ്ധ സന്ദേശം നൽകുന്ന കുട്ടികളുടെ ഫ്ളാഷ് മോബ്, നൃത്തശില്പം ലഹരിവിരുദ്ധദിന പ്രതിജ്ഞ, ലഹരി വിരുദ്ധറാലി തുടങ്ങിയവയും സ്കൂളിൽ നടത്തി. ലഹരി വിരുദ്ധ ക്ലബായ വിമുക്തിയുടെ ഉദ്ഘാടനവും ഇതോടൊപ്പം നന്നു. സ്കൂൾ നോഡൽ ഓഫീസർ സിനി ദേവസ്യ നേതൃത്വം നൽകി.

കാലവർഷം കനത്തു: ഭീതിയോടെ മലയോര ജനത

കരുവാരകുണ്ട്: മലയോര മേഖലയിൽ ഇടമുറിയാത്ത കനത്ത മഴയാണ് അനുഭവപ്പെടുന്നത്. വരും ദിവസങ്ങളിൽ മഴ ശക്തി പ്രാപിക്കുമെന്ന കാലാവസ്ഥാ നിരീക്ഷകരുടെ പ്രവചനത്തെ തുടർന്ന് മലയോര ജനത ഭീതിയിലാണ്. മൂന്നു ദിവസമായി ശക്തമായ മഴയാണ് മേഖലയിൽ അനുഭവപ്പെടുന്നത്. മുൻവർഷങ്ങളിലെ ഉരുൾപൊട്ടലിൽ ഒഴുകിയെത്തിയ മണ്ണും ചെളിയും ഒലിപ്പുഴയിൽ വന്നടിഞ്ഞ് പുഴയുടെ ആഴം കുറഞ്ഞതിനെ തുടർന്ന് പുഴയോരവാസികളും വെള്ളപ്പൊക്ക ഭീഷണിയിലാണ്. പുഴയിൽ അടിഞ്ഞുകൂടിയ മണൽ അധികൃതർ നീക്കം ചെയ്യാൻ തയാറായില്ലങ്കിൽ മലവെള്ളപാച്ചിലിൽ വൻ ദുരന്തമുണ്ടാകാൻ സാധ്യതയേറെയാണന്ന് നാട്ടുകാർ പറയുന്നു. മണൽവാരലിന് നിയന്ത്രണം ഏർപ്പെടുത്തിയതോടെയാണ് ഒലിപ്പുഴയിൽ മണൽതിട്ടകൾ ഉയർന്നുവന്നത്. കഴിഞ്ഞുപോയ പ്രളയത്തിൽ നിരവധി കുടുംബങ്ങൾ വീടുവിട്ട് ദുരിതാശ്വാസ കേന്ദ്രങ്ങളിലാണ് അന്തിയുറങ്ങിയത്. വെള്ളപ്പൊക്ക ഭീഷണി മുന്നിൽ കണ്ട് പുഴയോരങ്ങളിലും മലമടക്കുകളിലും വസിക്കുന്നവരെ മാറ്റി പാർപ്പിക്കണമെന്ന ആവശ്യവും ശക്തമാണ്.

ഗൃഹനാഥന്‍ വെള്ളക്കെട്ടില്‍ വീണുമരിച്ച നിലയില്‍

മഞ്ചേരി: ഗൃഹനാഥനെ വീടിനടുത്തുള്ള വെള്ളക്കെട്ടില്‍ മരിച്ചനിലയില്‍ കണ്ടെത്തി. കുട്ടശേരി മുളച്ചീരിക്കുണ്ട് ചുള്ളിക്കുളത്ത് മുഹമ്മദിന്‍റെ മകന്‍ അബ്ദുല്ലത്തീഫ് എന്ന സലീം (42) ആണ് മരിച്ചത്. കഴിഞ്ഞ ദിവസം രാത്രിയാണ് സംഭവം. നാളികേര ചാക്കുമായി വീട്ടിലേക്ക് മടങ്ങവെ വഴിയിലെ പാടത്തിനടുത്തുള്ള വെള്ളക്കെട്ടിലേക്ക് വീണതായിരിക്കാമെന്നാണ് നിഗമനം. ഇന്നലെ രാവിലെ പരിസരവാസിയാണ് മൃതദേഹം കണ്ടത്. എസ്ഐ സത്യപ്രസാദ് ഇന്‍ക്വസ്റ്റ് ചെയ്ത മൃതദേഹം മഞ്ചേരി മെഡിക്കല്‍ കോളജില്‍ പോസ്റ്റ്‌മോര്‍ട്ടത്തിന് ശേഷം ബന്ധുക്കള്‍ക്ക് വിട്ടുനല്‍കി. മാതാവ്: ആയിശയ. ഭാര്യ: സലീന. മക്കള്‍: ബാസിത്ത്, സാബിത് (ഇരുവരും ഇന്ത്യന്‍ ആര്‍മി), റാഷിദ്. സഹോദരങ്ങള്‍: മുജീബ്, ഉസ്മാന്‍, ജഅ്ഫര്‍, സക്കീന.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]