ADVERTISEMENT

ADVERTISEMENT

ഉന്നത വിജയികളെ അനുമോദിച്ചു

തിരുവമ്പാടി: പുല്ലൂരാംപാറ സെന്‍റ് ജോസഫ്സ് ഹയർ സെക്കൻഡറി സ്കൂളിൽ നിന്ന് ഹയർസെക്കൻഡറി പരീക്ഷയിൽ ഉന്നതവിജയം നേടിയ വിദ്യാർഥികളെ അനുമോദിച്ചു. യോഗം സ്കൂൾ മാനേജർ ഫാ. കുര്യാക്കോസ് മുഖാല ഉദ്ഘാടനം ചെയ്തു. തിരുവമ്പാടി പഞ്ചായത്ത് പ്രസിഡന്‍റ് ബിന്ദു ജോൺസൺ അധ്യക്ഷത വഹിച്ചു.

യോഗത്തിൽ പഞ്ചായത്തംഗം ഷൈനി ബെന്നി, ഹൈസ്കൂൾ പ്രധാനാധ്യാപകൻ ജോളി ജോസഫ്, പ്രിൻസിപ്പൽ സുനിൽ ജോസഫ്, സ്റ്റാഫ് സെക്രട്ടറി സംഗീത റോസ്‌ലി ജോർജ്, പിടിഎ പ്രസിഡന്‍റ് വിത്സൻ ടി. മാത്യു, അധ്യാപക പ്രതിനിധി പി.സി. സീന, വിദ്യാർഥി പ്രതിനിധികളായ ധന്വി ദിനേഷ്, ആൻമരിയ ഷിജു എന്നിവർ പ്രസംഗിച്ചു.

ADVERTISEMENT

പോർച്ചിൽ നിർത്തിയിട്ട ഓട്ടോറിക്ഷക്ക് തീ പിടിച്ചു

പേരാമ്പ്ര: പാലേരി അങ്ങാടിയിലെ വീട്ടിൽ നിർത്തിയിട്ട ഓട്ടോയ്ക്ക് തീ പിടിച്ചു. പരേതനായ കിഴക്കയിൽ കുഞ്ഞിരാമൻ നായരുടെ മകൾ രമണിയുടെ വീട്ടുമുറ്റത്ത് നിർത്തിയിട്ട ഓട്ടോയ്ക്കാണ് തീ പിടിച്ചത്. ഇന്നലെ വൈകുന്നേരം നാലരയോടെയായിരുന്നു സംഭവം. തീ വീട്ടിലേക്കും പടർന്നു. ഇവിടെ ആൾ താമസം ഉണ്ടായിരുന്നില്ല. പേരാമ്പ്രയിൽ നിന്ന് ഫയർ ഫോഴ്സ് എത്തിയാണ് തീയണച്ചത്. വീട് തുറന്നു പരിശോധിച്ചാലെ നഷ്ടം കണക്കാക്കാൻ കഴിയുകയുള്ളൂ. തീപിടിത്തത്തിന്‍റെ കാരണം വ്യക്തമല്ല.

‘2 മില്യൺ പ്ലഡ്ജി’നൊപ്പം അണിചേരാൻ കോർപറേഷൻ

കോഴിക്കോട്: ജില്ലാ പഞ്ചായത്തിന്‍റെ നേതൃത്വത്തിൽ 26ന് സംഘടിപ്പിക്കുന്ന ലഹരി വിരുദ്ധ ജനകീയ പ്രതിരോധം "2 മില്യൺ പ്ലഡ്ജി'നൊപ്പം അണിചേരാൻ കോഴിക്കോട് കോർപറേഷനും. 20ന് കോർപറേഷൻ തലത്തിൽ വിപുലമായ കൺവൻഷൻ ചേരും. കോർപറേഷൻ പരിധിയിലെ ആളുകളും കോർപറേഷൻ കൗൺസിലർമാരും ജീവനക്കാരുമെല്ലാം പരിപാടിക്കൊപ്പം ചേർന്ന് ലഹരി വിരുദ്ധ പ്രതിജ്ഞയെടുക്കും. ജില്ലാ പഞ്ചായത്ത് പ്രസിഡന്‍റ് ഷീജാ ശശി, ഡെപ്യൂട്ടി മേയർ സി.പി. മുസാഫർ അഹമ്മദ് എന്നിവരുടെ നേതൃത്വത്തിൽ നടന്ന യോഗത്തിലാണ് തീരുമാനം. കോർപറേഷൻ തലത്തിൽ പരിപാടി വൻ വിജയമാക്കുന്നതിന് എല്ലാവിധ പിന്തുണയും ഉണ്ടാകുമെന്ന് മേയർ ഡോ. ബീന ഫിലിപ്പ് അറിയിച്ചു. 26ന് ശേഷം ലഹരിക്കെതിരേ വിവിധ വകുപ്പുകളെ ഏകോപിപ്പിച്ച് ആവിഷ്കരിക്കുന്ന പദ്ധതികൾ നടപ്പിലാക്കുന്നതിനുള്ള സഹായവും കോർപറേഷൻ വാഗ്ദാനം ചെയ്തു. ജില്ലയിലെ 20 ലക്ഷം മനുഷ്യരാണ് ഒരുമിച്ച് ഒരേ സമയം വിവിധ കേന്ദ്രങ്ങളിൽ വച്ച് ലഹരിക്കെതിരേ പ്രതിജ്ഞയെടുക്കുക.

നീറ്റ്‌ പരീക്ഷ ജേതാവിനെ ആദരിച്ചു

പേരാമ്പ്ര: നീറ്റ് പരീക്ഷയിൽ സംസ്ഥാനത്ത് ഒന്നാം സ്ഥാനവും അഖിലേന്ത്യാ തലത്തിൽ 109-ാം സ്ഥാനവും നേടിയ ആവളയിലെ ദീപ്നിയയെ പേരാമ്പ്ര ബ്ലോക്ക് പഞ്ചായത്ത് ആദരിച്ചു. പ്രസിഡന്‍റ് എൻ.പി. ബാബു പൊന്നാട അണിയിച്ചു. വികസന സ്റ്റാൻഡിംഗ് കമ്മിറ്റി ചെയർമാൻ കെ. സജീവൻ, ബ്ലോക്ക് അംഗം കെ. അജിത, ബിഡിഒ ഇൻ ചാർജ് പി.കെ. സുജീഷ്, വുമൺസ് വെൽഫയർ ഓഫീസർ സജീഷ് എന്നിവർ പങ്കെടുത്തു.

കൂരാച്ചുണ്ട് പ്രസ് ഫോറം ഉന്നത വിജയികളെ ആദരിച്ചു

കൂരാച്ചുണ്ട്: കൂരാച്ചുണ്ട് പ്രസ് ഫോറത്തിന്‍റെ ആഭിമുഖ്യത്തിൽ എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയ കല്ലാനോട് സെന്‍റ് മേരീസ് ഹയർ സെക്കൻഡറി സ്കൂൾ, കൂരാച്ചുണ്ട് സെന്‍റ് തോമസ് ഹയർ സെക്കൻഡറി സ്കൂൾ എന്നിവിടങ്ങളിലെ വിദ്യാർഥികളെ ഉപഹാരം നൽകി ആദരിച്ചു. കോഴിക്കോട് ക്രൈംബ്രാഞ്ച് ഡിവൈഎസ്പി വി.വി. ബെന്നി ഉദ്ഘാടനം ചെയ്തു. പ്രസ് ഫോറം പ്രസിഡന്‍റ് ജോയി കുര്യൻ മുട്ടുംമുഖത്ത് അധ്യക്ഷത വഹിച്ചു. കൂരാച്ചുണ്ട് സെന്‍റ് തോമസ് ഫൊറോന വികാരി ഫാ. വിൻസെന്‍റ് കണ്ടത്തിൽ അനുഗ്രഹ പ്രഭാഷണം നടത്തി. ഗ്രാമപഞ്ചായത്ത് പ്രസിഡന്‍റ് ഒ.കെ. അമ്മദ് മുഖ്യാതിഥിയായി. മജീഷ്യനും അധ്യാപകനുമായ ശ്രീജിത്ത് വിയ്യൂർ മുഖ്യപ്രഭാഷണം നടത്തി. ജോൺ ജ്യോതിഷ് മുട്ടുംമുഖത്ത്, പ്രസ് ഫോറം സെക്രട്ടറി ജോബി കാഞ്ഞിരത്തുംകുഴിയിൽ, വൈസ് പ്രസിഡന്‍റ് ജോൺസൺ പൂകമല എന്നിവർ പ്രസംഗിച്ചു. ചടങ്ങിൽ കാറ്റുള്ളമല മുട്ടുംമുഖത്ത് കുര്യൻ - ഏലിയാമ്മ കുര്യൻ സ്മരണാർഥം മെമന്‍റോ വിദ്യാർഥികൾക്ക് നൽകി. ജിതിൻ പതിയിൽ, അഗസ്റ്റിൻ കാരക്കട, ജോസ് വെളിയത്ത്, വി.ജെ സണ്ണി, വർഗീസ് പാലക്കാട്ട് എന്നിവർ സന്നിഹിതരായി. ബിജു കക്കയം എൻ.കെ കുഞ്ഞമ്മദ്, രാജൻ വർക്കി, നിസാം കക്കയം എന്നിവർ നേതൃത്വം നൽകി.

വല്ലത്തായ് കടവുപാലം പ്രവൃത്തി ഇഴയുന്നു; സ്കൂൾ വിദ്യാർഥികൾ ഉൾപ്പെടെ ദുരിതത്തിൽ

മുക്കം: കാരശേരി പഞ്ചായത്തിലെ കാരമല-വല്ലത്തായ്പാറ പ്രദേശങ്ങളെ ബന്ധിപ്പിച്ച് ചെറുപുഴയ്ക്ക് കുറുകെ നിർമിക്കുന്ന വല്ലത്തായ് കടവുപാലം പ്രവൃത്തി വൈകുന്നതോടെ യാത്രാ ദുരിതത്തിലായി നിരവധി പേർ. വിദ്യാർഥികൾ ഉൾപ്പടെയുള്ളവർ കിലോമീറ്ററുകൾ ചുറ്റിവേണം യാത്രചെയ്യാൻ. കഴിഞ്ഞ ഏപ്രിലിൽ പണിപൂർത്തിയാക്കുമെന്ന് അധികൃതർ പറഞ്ഞിരുന്നുവെങ്കിലും ഇതുവരെ പകുതിയോളമേ പൂർത്തിയായിട്ടുള്ളൂ.വല്ലത്തായ് കടവിൽ ഉണ്ടായിരുന്ന പഴയ വെന്‍റ് പൈപ്പ് പാലം വളരെ ഉയരം കുറഞ്ഞതായിരുന്നതിനാൽ മഴക്കാലം തുടങ്ങുമ്പോൾ മുതൽ വെള്ളത്തിനടിയിലായി ഈ റൂട്ടിൽ ഗതാഗതം മുടങ്ങുക പതിവായിരുന്നു. തൊട്ടടുത്തുള്ള സ്കൂളുകളിലേക്കും ആശുപത്രിയിലേക്കും അങ്ങാടിയിലേക്കുമൊക്കെ ആളുകൾക്ക് എത്തിച്ചേരാൻ ഏറെ ചുറ്റിക്കറങ്ങേണ്ട അവസ്ഥയുമായിരുന്നു. വീതി കുറഞ്ഞ പാലവും ഇരുവശത്തും വളവുകളുമായിരുന്നതിനാൽ ബസ് പോലുള്ള വലിയ വാഹനങ്ങൾക്ക് ഓടാൻ പറ്റാത്ത സാഹചര്യവുമുണ്ടായിരുന്നു. ഈ സാഹചര്യത്തിലാണ് ഉയരം കൂടിയ കോൺക്രീറ്റ് പാലം വേണമെന്ന് നാട്ടുകാർ ആവശ്യമുന്നയിച്ചത്. വർഷങ്ങൾ നീണ്ട കാത്തിരിപ്പിനൊടുവിൽ 2021 ഫെബ്രുവരിയിൽ കോൺക്രീറ്റ് പാലം അനുവദിച്ചെങ്കിലും പ്രവൃത്തി തുടങ്ങാനായത് രണ്ടുവർഷം കഴിഞ്ഞാണ്. ഫണ്ട് ലഭിക്കാത്ത കാരണത്താൽ ഇതിനിടെ നാലു മാസം പ്രവൃത്തി മുടങ്ങിക്കിടന്നിരുന്നു. കഴിഞ്ഞ മാസമാണ് പ്രവൃത്തി പുനരാരംഭിച്ചത്. തൂണുകളുടെയും ബീമുകളുടെയും പ്രവൃത്തി പൂർത്തിയായ പാലത്തിന് സ്ലാബ് വാർക്കാനുള്ള കമ്പികൾ ഒരു ഭാഗത്ത് കെട്ടി ഒരുക്കുന്ന പ്രവൃത്തിയാണ് നടന്നുവരുന്നത്. പത്ത് പണിക്കാരാണ് ഈ പ്രവൃത്തിയിൽ ഏർപ്പെട്ടിട്ടുള്ളത്. പാലംപണി തുടങ്ങിയത് മുതൽ വല്ലത്തായ്പാറ, കപ്പാല തുടങ്ങിയ പ്രദേശങ്ങളിലുള്ളവർ തൊട്ടടുത്ത കാരമൂല, ആനയാംകുന്ന്, മുക്കം എന്നിവിടങ്ങളിലേക്ക് ഏറെ ചുറ്റിക്കറങ്ങി യാത്ര ചെയ്യേണ്ട അവസ്ഥയാണ്. വിദ്യാർഥികളാണ് ഏറെ ദുരിതം അനുഭവിക്കുന്നത്. പാലം പ്രവൃത്തി പൂർത്തിയായാൽ തേക്കുംകുറ്റി, മരഞ്ചാട്ടി, തോട്ടക്കാട്, തോട്ടുമുക്കം, കക്കാടംപൊയിൽ തുടങ്ങിയ ഉൾനാടുകളിലേക്ക് ബസ് ഗതാഗതം ഉൾപ്പെടെയുള്ള യാത്രാസൗകര്യം എത്തും. കൂടുതൽ തൊഴിലാളിലകളെ ഉൾപ്പെടുത്തി പാലം പ്രവൃത്തി എത്രയും പെട്ടന്ന് പൂർത്തീകരിച്ച് ഗതാഗത യോഗ്യമാക്കണമെന്നാണ് നാട്ടുകാരുടെ ആവശ്യം.

കനത്തമഴയിൽ താഴ്ന്ന പ്രദേശങ്ങൾ വെള്ളത്തിൽ

കൊയിലാണ്ടി: കനത്തമഴയിൽ താഴ്ന്ന പ്രദേശങ്ങൾ വെള്ളത്തിൽ. നന്തി മുതൽ ചെങ്ങോട്ടുകാവ് വരെ ദേശീയപാത തകർന്നു. കാറ്റിൽ നിരവധി മരങ്ങൾ വീണു. കൊയിലാണ്ടി നഗരസഭയിലെ നടേലക്കണ്ടി വാർഡിലെ കുറ്റിവയൽ കോളനിയിലെ ജയൻ, ശിവദാസൻ എന്നിവരുടെ കുടുംബങ്ങളെ കോതമംഗലം ജിഎൽപി സ്കൂളിലെ ദുരിതാശ്വാസ കേന്ദ്രത്തിലേക്ക് മാറ്റി. കൗൺസിലർ എ. ലളിതയുടെ നേതൃത്വത്തിലാണ് ഇവരെ മാറ്റിയത്. പതിവുപോലെ കൊരയങ്ങാട് വാർഡിലെ അമ്പാടി റോഡും കൊരയങ്ങാട് ക്ഷേത്ര മൈതാനവും വെള്ളത്തിലായി. പന്തലായനിയിൽ ഈശ്വരൻ ചിറ കവിഞ്ഞൊഴുകി സമീപത്തെ നാല് വീടുകളിൽ വെള്ളം കയറി.

വാര്‍ഡ് തലത്തില്‍ വോട്ടര്‍ പട്ടിക പുനക്രമീകരണം: 68 ജീവനക്കാരും ഇടതു പ്രവര്‍ത്തകരെന്ന് ആക്ഷേപം

കോഴിക്കോട്: കോര്‍പറേഷന്‍ തെരഞ്ഞെടുപ്പിന് വാര്‍ഡ് തലത്തില്‍ വോട്ടര്‍ പട്ടിക പുനക്രമീകരിക്കുന്നതിന് നിയോഗിച്ച 68 ജീവനക്കാരും ഇടതു യൂണിയന്‍ പ്രവര്‍ത്തകരെന്ന് ആക്ഷേപം. പേരിനു പോലും പ്രതിപക്ഷ സംഘടനയിലെ ഒരാളെ പോലും നിയമിക്കാതെയാണ് കോഴിക്കോട് ഇലക്ടറല്‍ രജിസ്‌ട്രേഷന്‍ സെക്രട്ടറിയുടെ ഉത്തരവ് കഴിഞ്ഞദിവസം ഇറങ്ങിയതെന്ന് യുഡിഎഫ് കൗണ്‍സില്‍ പാര്‍ട്ടി ലീഡര്‍ കെ.സി. ശോഭിതയും ഡെപ്യൂട്ടി ലീഡര്‍ കെ.മൊയ്തീന്‍ കോയയും പറഞ്ഞു. ഇത് ഗുരുതരമായ പ്രത്യാഘാതം സൃഷ്ടിക്കും. സ്വതന്ത്രവും നീതിപൂര്‍വവുമായ തെരഞ്ഞെടുപ്പ് വോട്ടര്‍ പട്ടിക പുറത്തിറക്കുക എന്ന മൗലികമായ ഉത്തരവാദിത്വമാണ് കോര്‍പറേഷന്‍ സെക്രട്ടറി നിരാകരിച്ചതെന്ന് യുഡിഎഫ് നേതാക്കള്‍ കുറ്റപ്പെടുത്തി. ഭരണഘടനയുടെ 243 (കെ) അനുച്ഛേദപ്രകാരം രൂപീകരിച്ച സംസ്ഥാന തെരഞ്ഞെടുപ്പ് കമ്മീഷന്‍റെ ഉത്തരവുകളെ കാറ്റില്‍ പറത്തിയാണ് കോഴിക്കോട് കോര്‍പറേഷന്‍ സെക്രട്ടറി പക്ഷപാതപരമായ നടപടി സ്വീകരിച്ചത്. ചെറുവണ്ണൂര്‍ സോണല്‍ ഓഫീസില്‍ റവന്യു ഓഫീസര്‍ ഷാജിയെ ഒഴിവാക്കി ബേപ്പൂര്‍ സോണലിലെ റവന്യു ഓഫീസര്‍ക്കാണ് അഡിഷണല്‍ ചാര്‍ജ് നല്‍കിയിട്ടുള്ളത്. ഒരാളെ അപമാനിക്കുകയും മറ്റൊരാളോട് സ്വജനപക്ഷപാതം കാണിക്കുകയും ചെയ്യുന്ന ഉത്തരവ് നീതി നിഷേധമാണ്. മെയിന്‍ ഓഫീസിലെ നിയമനവും പക്ഷപാതപരമാണ്. യൂണിയന്‍കാരെ മാത്രം കുത്തിനിറച്ചുള്ള കോര്‍പറേഷന്‍ സെക്രട്ടറിയുടെ നടപടിക്കെതിരേ സംസ്ഥാന തെരഞ്ഞെടുപ്പ് കമ്മീഷനും ജില്ലാ ഇലക്‌ഷന്‍ഓഫീസര്‍ക്കും യുഡിഎഫ് പരാതി നല്‍കിയിട്ടുണ്ടെന്ന് അവര്‍ പറഞ്ഞു.

വര്‍ധിപ്പിച്ച ഭൂനികുതി പിന്‍വലിക്കണം: കര്‍ഷക കോണ്‍ഗ്രസ്

ബാലുശേരി: വര്‍ധിച്ചു വരുന്ന വന്യമൃഗശല്യംകൊണ്ടും പ്രതികൂല കാലാവസ്ഥ കാരണവും കഷ്ടപ്പെടുന്ന കര്‍ഷകര്‍ക്ക് ഭൂനികുതി വര്‍ധനവ് വലിയ പ്രഹരമായിത്തീര്‍ന്ന സാഹചര്യത്തില്‍ അതു പിന്‍വലിക്കണമെന്ന് കര്‍ഷക കോണ്‍ഗ്രസ് ബാലുശേരി നിയോജക മണ്ഡലം കണ്‍വന്‍ഷന്‍ ആവശ്യപ്പെട്ടു. പിണറായി സര്‍ക്കാര്‍ ജനവിരുദ്ധ നിലപാടില്‍നിന്ന് പിറകോട്ടു പോകണമെന്ന് സമ്മേളനം ആവശ്യപ്പെട്ടു.ജില്ലാ പ്രസിഡന്‍റ് അഡ്വ. ബിജു കണ്ണന്തറ ഉദ്ഘാടനം ചെയ്തു. നിയോജക മണ്ഡലം പ്രസിഡന്‍റ് സുജിത്ത് കറ്റോട് അധ്യക്ഷത വഹിച്ചു. വാളങ്ങല്‍ ബാലകൃഷ്ണന്‍, കെ.പി. സത്യന്‍, സി.പി. ബാലകൃഷ്ണന്‍, സി.കെ. സതീശന്‍, അമല്‍രാജ് കോഴിക്കോട്, അമൃതരാജ്, ഐ. രവീന്ദ്രന്‍, ശകുന്തള ബാലകൃഷ്ണന്‍ തുടങ്ങിയവര്‍ സംസാരിച്ചു.

കണ്ണവം വനത്തിൽനിന്ന് കാട്ടാനകൾ ജനവാസ മേഖലയിലേക്ക്

കുറ്റല്ലൂരിലും പറക്കാടും വ്യാപക കൃഷിനാശം നാദാപുരം: വിലങ്ങാട് മലയോര മേഖലകളിൽ കാട്ടാനകൾ നാശം വിതയ്ക്കുന്നു. കണ്ണൂർ-കോഴിക്കോട് ജില്ലകളുടെ അതിർത്തി പ്രദേശമായ കുറ്റല്ലൂർ, പറക്കാട് ഭാഗത്ത് കഴിഞ്ഞ ഒരാഴ്ചയായി രാത്രിയെന്നോ പകലെന്നോ വ്യത്യാസമില്ലാതെ ജനവാസ മേഖലയിൽ കാട്ടാനകൾ തമ്പടിച്ചിരിക്കുകയാണ്. പ്രദേശത്തെ റബർ മരങ്ങൾ, പ്ലാവ്, തെങ്ങ്, കമുക്, വാഴ തുടങ്ങി എല്ലാം പിഴുതും കുത്തിയും മറിച്ചിടുകയാണ്. കുറ്റല്ലൂരിലെ ബാബൂട്ടിയുടെ ആറ് തെങ്ങുകളാണ് ആനകൾ കുത്തിമറിച്ചിട്ട് നശിപ്പിച്ചത്. രണ്ട് ദിവസം മുമ്പ് കുറ്റല്ലൂരിലെ കുങ്കന്‍റെ 23 തെങ്ങുകൾ ആന കുത്തിമറിച്ചിട്ടു. പറമ്പിലെ മറ്റു കൃഷികളും നശിപ്പിച്ചു. ‌കഴിഞ്ഞ വർഷമുണ്ടായ ഉരുൾപൊട്ടലിൽ വൻ നാശനഷ്ടം നേരിട്ട കർഷകർക്ക് കാട്ടുമൃഗങ്ങളുടെ അക്രമം കാരണം കൃഷി നാശവും സഹിക്കേണ്ട ദുർഗതിയാണ് ഉണ്ടായിരിക്കുന്നത്. കാട്ടുമൃഗങ്ങളുടെ സംഹാര താണ്ഡവത്തിന്‍റെ തിക്ത ഫലം അനുഭവിക്കേണ്ടിവരുന്നത് ഇവിടെയുള്ള കുടിയേറ്റ കർഷകർ കൂടിയാണ്. വനവാസി വിഭാഗത്തിൽപെട്ട നിരവധി കുടുംബങ്ങൾ ഇവിടെ താമസിക്കുന്നുണ്ട്. ഇവരുടെ ഉപജീവനമാർഗം കൃഷിയാണ്. കണ്ണവം വനമേഖലയിൽ നിന്നാണ് കാട്ടാനക്കൂട്ടം എത്തുന്നത്. കാട്ടാന ശല്യം രൂക്ഷമാകുന്ന സാഹചര്യത്തിൽ വനംവകുപ്പ് ഉദ്യോഗസ്ഥർ സ്ഥലത്തെത്തി പടക്കം പൊട്ടിച്ചും മറ്റും കാട്ടാനകളെ തിരികെ കാട്ടിലേക്ക് ഓടിച്ചു വിടാറുണ്ടെങ്കിലും അധികം വൈകാതെ ഇവ തിരികെ എത്തുന്ന സ്ഥിതിയാണ്. കാട്ടാനകളെ ഭയന്ന് കൃഷിഭൂമിയിൽപോയി നോക്കാൻ പോലും കർഷകർ തയാറാകാത്ത സ്ഥിതി നിലനിൽക്കുന്നുണ്ട്. ഇവിടെ മുമ്പ് സ്ഥാപിച്ചിരുന്ന സോളാർ വേലി തകർന്നതോടെയാണ് കാട്ടുമൃഗങ്ങളുടെ ശല്യം രൂക്ഷമായത്. കഴിഞ്ഞ വർഷം കാട്ടാന ശല്യം രൂക്ഷമായതോടെ ജില്ലാ കളക്ടർ വിലങ്ങാട് സന്ദർശിച്ചിരുന്നു. സോളാർ വേലി പുനർനിർമിക്കുമെന്ന് കളക്ടർ ജനങ്ങൾക്ക് ഉറപ്പ് നൽകിയെങ്കിലും നടപ്പായില്ല. കാട്ടാനകൾക്ക് പുറമെ കാട്ടുപോത്തുകൾ, കാട്ടുപന്നികൾ, കുരങ്ങുകൾ എന്നിവയും ജനവാസ കേന്ദ്രങ്ങളിൽ എത്തി കൃഷി നശിപ്പിക്കുന്നത് സ്ഥിതി രൂക്ഷമാക്കുകയാണ്.

പി.സുരേഷ് കോഴിക്കോട് എഡിഎം

കോഴിക്കോട്: അഡീഷണല്‍ ജില്ലാ മജിസ്‌ട്രേറ്റ് (എഡിഎം) ആയി പി.സുരേഷ് ചുമതലയേറ്റു. മലപ്പുറം ജില്ലയിലെ വണ്ടൂര്‍ സ്വദേശിയാണ്.പാലക്കാട് എഡിഎം ആയിരുന്നു. തിരൂര്‍, തിരുവല്ല എന്നിവിടങ്ങളില്‍ ആര്‍ഡിഒ ആയും മലപ്പുറം സോണല്‍ ലാന്‍ഡ് ബോര്‍ഡ് ഡെപ്യൂട്ടി കളക്ടറായും കോഴിക്കോട് ഡെപ്യൂട്ടി കളക്ടര്‍ (എല്‍ആര്‍) ആയും സേവനമനുഷ്ഠിച്ചിട്ടുണ്ട്.

മാനാഞ്ചിറ -വെള്ളിമാട്കുന്ന് റോഡ് പ്രവൃത്തി പൂര്‍ത്തിയാക്കും: മന്ത്രി

കോഴിക്കോട്: മാനാഞ്ചിറ -വെള്ളിമാട്കുന്ന് റോഡ് പ്രവര്‍ത്തി ഉദ്ഘാടനം പൊതുമരാമത്ത് മന്ത്രി പി.എ. മുഹമ്മദ് റിയാസ് നിര്‍വഹിച്ചു. മലബാര്‍ ആകെ ആഗ്രഹിച്ച പദ്ധതിയാണ് യാഥാര്‍ത്ഥ്യമാകാന്‍ പോകുന്നത്. ജനങ്ങളെ ആണിനിരത്തി ഏത് പ്രതിസന്ധിയെയും മറികടന്ന് റോഡ് വികസന പ്രവൃത്തി പൂര്‍ത്തിയാക്കുമെന്ന് മന്ത്രി പറഞ്ഞു. 8.34 കി.മീ ദൂരം വരുന്ന മാനാഞ്ചിറ- വെള്ളിമാടുകുന്ന് റോഡ് നവീകരിക്കാന്‍ സര്‍ക്കാര്‍ 482 കോടി രൂപയാണ് അനുവദിച്ചതെന്ന് മന്ത്രി പറഞ്ഞു. സ്ഥലമേറ്റെടുക്കലിന് വേണ്ടി മാത്രം 344.5 കോടി രൂപയും റോഡ് നിര്‍മ്മാണത്തിന് 137. 44 കോടി രൂപയും അനുവദിച്ചു. ആദ്യഘട്ടത്തില്‍ മാനാഞ്ചിറ- മലാപ്പറമ്പ് ഭാഗത്തെ പ്രവൃത്തിയാണ് നടപ്പാക്കുന്നത്. മലാപ്പറമ്പ് നിന്ന് വെള്ളിമാടുകുന്നു വരെയുള്ള ഭാഗം ദേശീയപാത 766 ല്‍ ഉള്‍പ്പെടുന്നതാണ്. മുത്തങ്ങ വരെ നീളുന്ന ഈ റോഡിന്‍റെ നിര്‍മാണം ദേശീയപാത വിഭാഗത്തിന്‍റെ പരിധിയില്‍ വരുന്നതാണ്. അതിനാലാണ് മലാപ്പറമ്പ് മുതല്‍ വെള്ളിമാടുകുന്ന് വരെയുള്ള മൂന്നു കിലോമീറ്റര്‍ ഈ റോഡ് വികസന പദ്ധതിയില്‍ ഉള്‍പ്പെടുത്താന്‍ സാധിക്കാതെ വന്നതെന്നും മന്ത്രി പറഞ്ഞു. പ്രസ്തുത ഭാഗത്തെ പ്രവൃത്തി കേന്ദ്ര ഉപരിതല ഗതാഗത മന്ത്രാലയം അനുവദിക്കാതെ ആരംഭിക്കാന്‍ സാധിക്കില്ല.മലാപ്പറമ്പ് മുതല്‍ വെള്ളിമാട്കുന്ന് വരെയുള്ള ഭാഗത്ത് പ്രവൃത്തി നടത്താന്‍ കേന്ദ്ര ഗതാഗത മന്ത്രാലയത്തില്‍ നിന്നും അനുമതി ലഭ്യമാക്കാനുള്ള നടപടി ആരംഭിച്ചിട്ടുണ്ട്. അനുമതി ലഭിക്കുന്നപക്ഷം പ്രവൃത്തി ആരംഭിക്കുമെന്നും മന്ത്രി പറഞ്ഞു. കേരള റോഡ് ഫണ്ട് ബോര്‍ഡ്- കോഴിക്കോട് നഗര പാത വികസന പദ്ധതി പ്രകാരമാണ് റോഡിന്‍റെ നിര്‍മ്മാണം ആരംഭിക്കുന്നത്. 24 മീറ്റര്‍ വീതിയില്‍ 5.320 കിലോമീറ്റര്‍ നീളത്തില്‍ ഡി.ബി.എം/ബി.സി നിലവാരത്തിലുള്ള നാല് വരിപ്പാതയായാണ് നിര്‍മ്മാണം. ഇരുവശത്തും കോണ്‍ക്രീറ്റ് കാന, ഡക്റ്റ്, 2.00 മീറ്റര്‍ വീതിയില്‍ നടപ്പാത, കുറുകെ 22 ഡക്റ്റുകള്‍ എന്നിവയുണ്ട്. മദ്ധ്യത്തില്‍ രണ്ട് മീറ്റര്‍ വീതിയില്‍ മീഡിയന്‍, മീഡിയനില്‍ തെരുവ് വിളക്കുകള്‍ എന്നിവ നിര്‍മ്മിക്കും. 21 ബസ് കാത്തിരുപ്പ് കേന്ദ്രങ്ങള്‍, സിവില്‍ സ്റ്റേഷനു മുന്‍പില്‍ നടപ്പാലം, റോഡ് സുരക്ഷാ മാര്‍ഗ്ഗങ്ങള്‍, പ്രധാന കവലകളില്‍ ട്രാഫിക് സിഗ്‌നലുകള്‍ എന്നിവ നിര്‍മ്മിക്കും. ചടങ്ങില്‍ തോട്ടത്തില്‍ രവീന്ദ്രന്‍ എംഎല്‍എ അധ്യക്ഷത വഹിച്ചു. അഹമ്മദ് ദേവര്‍കോവില്‍ എംഎല്‍എ എന്നിവര്‍ മുഖ്യാതിഥിയായിരുന്നു.

കോണ്‍ഗ്രസ്, ബിജെപി പ്രതിഷേധം

കോഴിക്കോട്: മലാപ്പറമ്പ് -വെള്ളിമാടുകുന്ന് വരെ റോഡ് വികസനം നടത്താത്തില്‍ കോണ്‍ഗ്രസ് പ്രതിഷേധം. ചേവായൂര്‍ ബ്ളോക്ക് കോണ്‍ഗ്രസ് സംഘടിപ്പിച്ച പൊതുയോഗം ഡിസിസി പ്രസിഡന്‍റ് അഡ്വ. കെ.പ്രവീണ്‍കുമാര്‍ ഉദ്ഘാടനം ചെയ്തു. കോര്‍പറേഷന്‍ പ്രതിപക്ഷ നേതാവ് കെ.സി. ശോഭിത, കൗണ്‍സിലര്‍ വിദ്യ ബാലകൃഷ്ണന്‍, എ.സഫറി, എന്‍. ഷെറില്‍ ബാബു, പി.കെ. ശ്രീനിവാസന്‍, എം.പി. വാസുദേവന്‍ എന്നിവര്‍ പ്രസംഗിച്ചു. കോഴിക്കോട്: മാനാഞ്ചിറ വെള്ളിമാട്കുന്ന് റോഡ് നിര്‍മ്മാണം അട്ടിമറിച്ചത് ജനവികാരം മാനിക്കാത്തവരാണെന്ന് ബിജെപി കോഴിക്കോട് സിറ്റി ജില്ല പ്രസിഡന്‍റ് അഡ്വ.കെ.പി.പ്രകാശ് ബാബു പറഞ്ഞു. മലാപ്പറമ്പില്‍ ബി.ജെ.പി സംഘടിപ്പിച്ച പ്രതിഷേധ കൂട്ടായ്മ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ജില്ല വൈസ് പ്രസിഡന്‍റ് ഇ.പ്രശാന്ത് കുമാര്‍ അദ്ധ്യക്ഷത വഹിച്ചു.മുന്‍ ജില്ല പ്രസിഡന്‍റ് വി.കെ.സജീവന്‍, ജില്ല ജനറല്‍ സെക്രട്ടറിമാരായ ടി.വി.ഉണ്ണികൃഷ്ണന്‍, എം.സുരേഷ്,കൗണ്‍സിലര്‍ സരിത പറയേരി, നോര്‍ത്ത് മണ്ഡലം പ്രസിഡന്‍റ് കെ. ജിതിന്‍ എന്നിവര്‍ സംസാരിച്ചു.

ഓവുചാലിന് സ്ലാബിട്ടില്ല; തിരുവമ്പാടി - കൂടരഞ്ഞി റോഡില്‍ അപകടഭീഷണി

തിരുവമ്പാടി: തിരുവമ്പാടി - കൂടരഞ്ഞി റോഡില്‍ കക്കുണ്ട് ഭാഗത്ത് ഓവുചാലിന് സ്‌ളാബ് ഇടാത്തത് യാത്രക്കാര്‍ക്ക് ഭീഷണിയുയര്‍ത്തുന്നു. റോഡിനോടു തൊട്ടുചേര്‍ന്നാണ് മൂടിയില്ലാത്ത ഓവുചാല്‍ ഉള്ളത്. കണ്ണൊന്നു തെറ്റിയാല്‍ കാല്‍നടയാത്രക്കാര്‍ ഓവുചാലില്‍ വീഴും.ചീറീപ്പാഞ്ഞു വരുന്ന വാഹനങ്ങള്‍ കണ്ട് റോഡരികിലേക്കു മാറിയാല്‍ ഓവുചാലില്‍ വീഴും. ഓടകള്‍ക്ക് സ്‌ളാബ് ഇടാത്തതിനാല്‍ യാത്രക്കാര്‍ക്ക് നടന്നുപോകാനുള്ള സൗകര്യമാണ് ഇല്ലാതായത്. നിരവധി സ്‌കൂള്‍ കുട്ടികളും പ്രായമായവരും നടന്നുപോകുന്ന ഈ റോഡരുകിലെ ഓവുചാലിന് അടിയന്തരമായി സ്ലാബ് ഇടണമെന്ന് പ്രദേശവാസികള്‍ ആവശ്യപ്പെട്ടു. നടപടി സ്വീകരിച്ചില്ലെങ്കില്‍ പി.ഡബ്ല്യു.ഡി ഓഫീസ് മാര്‍ച്ച് അടക്കമുള്ള സമരപരിപാടികള്‍ നടത്തുമെന്ന് വാര്‍ഡ് കോണ്‍ഗ്രസ് കമ്മിറ്റി നേതാക്കള്‍ അറിയിച്ചു. ബിജു വര്‍ഗീസ് പുരയിടത്തില്‍, ലിസി മാളിയേക്കല്‍, റോബര്‍ട്ട് നെല്ലിക്കത്തെരുവില്‍, മറിയാമ്മ ബാബു,സിജോ വെട്ടിക്കാട്ട്, രാജു പൈമ്പിള്ളി എന്നിവര്‍ സംസാരിച്ചു.

മുഖ്യമന്ത്രിക്കെതിര അശ്ലീല പോസ്റ്റ്: യുവാവിനെതിരെ കേസ്

നാദാപുരം: മുഖ്യമന്ത്രിക്കെതിരെ ഫേസ്ബുക്കില്‍ അശ്ലീല പോസ്റ്റ് ഇട്ട യുവാവിനെതിരെ കേസ്. ഷാലു എന്നയാള്‍ക്കെതിരെയാണ് വടകര സൈബര്‍ പോലീസ് കേസ് എടുത്തത്. ഷാലു ഷാലു എന്ന ഐഡിയില്‍ നിന്ന് സമൂഹത്തില്‍ വിദ്വേഷം പടര്‍ത്തി കലാപം ഉണ്ടാക്കണമെന്ന ഉദ്ദേശത്തോടെ കേട്ടാല്‍ അറക്കുന്ന തരത്തില്‍ ചീത്ത വിളിച്ചും അവഹേളിച്ചും പോസ്റ്റ് ചെയ്‌തെന്നാണ് കേസ്. ഇസ്രായേല്‍ തെമ്മാടി രാഷ്ട്രമാണെന്ന പ്രസ്താവനക്കെതിരെയാണ് മ്ലേച്ഛമായ ഭാഷയില്‍ ഫേസ് ബുക്ക് പോസ്റ്റ് ഇട്ടത്. പ്രതിക്കായി അന്വേഷണം ആരംഭിച്ചതായി പോലീസ് അറിയിച്ചു. സിപിഎം പ്രവര്‍ത്തകന്‍റെ പരാതിയിലാണ് കേസ് .

എന്‍ജിഒ അസോസിയേഷന്‍ അനുമോദന സദസ്

കോഴിക്കോട്:കേരള എന്‍ജിഒ അസോസിയേഷന്‍റെ നേതൃത്വത്തില്‍എസ്എസ്എല്‍സി, പ്ലസ്ടു ഉന്നത വിജയികളെ അനുമോദിച്ചു. മുന്‍ രാഷ്ട്രപതി എ.പി.ജെ.അബ്ദുല്‍ കലാമിന്‍റെ ആത്മകഥ അഗ്‌നിച്ചിറകുകള്‍ വിദ്യാര്‍ഥികള്‍ക്ക് ഉപഹാരമായി സമ്മാനിച്ചു. മാത്തോട്ടം വനശ്രീയില്‍ സംഘടിപ്പിച്ച ചടങ്ങ് എന്‍ജിഒ അസോസിയേഷന്‍ ജില്ലാ പ്രസിഡന്‍റ് പ്രേംനാഥ് മംഗലശ്ശേരി ഉദ്ഘാടനം ചെയ്തു. ബ്രാഞ്ച് പ്രസിഡന്റ് കെ.വി. ബാലകൃഷ്ണന്‍ അധ്യക്ഷത വഹിച്ചു. ജില്ലാ ജോ. സെക്രട്ടറി കെ.പി. സുജിത, കെ. ജോതിഷ് കുമാര്‍ ,ഡോ. വി.ടി. നന്ദകുമാര്‍, കെ.കെ.അശോകന്‍, ഗണേശ് കൃഷ്ണന്‍ മൂസത് , പി.ബി പ്രവീണ, കെ. ഹസ്‌ന എന്നിവര്‍ പ്രസംഗിച്ചു.

ആശുപത്രിക്കു മുന്നില്‍ ചെളിക്കെട്ട്: നാട്ടുകാര്‍ വാഴ നട്ട് പ്രതിഷേധിച്ചു

ചക്കിട്ടപാറ: പെരുവണ്ണാമൂഴി ആശുപത്രിക്കു മുന്നിലെ റോഡിലെ ചെളിക്കെട്ടില്‍ പ്രതിേഷധിച്ച് നാട്ടുകാര്‍ റോഡില്‍ വാഴ നട്ടു. മലയോര ഹൈവേയുടെ ഭാഗമായാണ് ഈ േറാഡില്‍ പണി നടക്കുന്നത്. മഴ കനത്തതോടെ രണ്ടാഴ്ചയായി ഇവിടം ചെളി നിറഞ്ഞിരിക്കുകയാണ്. കാല്‍നട ഏറെ ദുസഹമാണ്. വാഹനങ്ങള്‍ക്ക് ചെളിക്കെട്ടില്‍ കുടുങ്ങി മുന്നോട്ടു നീങ്ങാന്‍ കഴിയുന്നില്ല. ക്വാറി വേസ്റ്റിട്ടാല്‍ പരിഹരിക്കാവുന്ന പ്രശ്നമേയുള്ളൂവെങ്കിലും കേരളാ റോഡ് ഫണ്ട് ബോര്‍ഡും കരാറുകാരും ഇതിനു തയാറാവുന്നില്ല. ജനപ്രതിനിധികള്‍ നാട്ടുകാരുടെ ക്ലേശം കാണുന്നുമില്ല. കഴിഞ്ഞ ദിവസം ചക്കിട്ടപാറയിലെ ഒരു പൊതു പ്രവര്‍ത്തകന്‍ നാഥനില്ലാത്ത ചക്കിട്ടപാറ എന്നെഴുതിയ പ്ലക്കാര്‍ഡുമായി ചെളിക്കെട്ടില്‍ ഇറങ്ങി നിന്നു പ്രതിഷേധിച്ചിരുന്നു.

മുതിര്‍ന്ന പൗരന്മാര്‍ക്കെതിരെയുള്ള ചൂഷണ വിരുദ്ധ ദിനാചരണം നടത്തി

മുക്കം: മുക്കം നഗരസഭയിലെ സാമൂഹിക സുരക്ഷാ മിഷന്‍ വയോമിത്രം പദ്ധതിയുടെയും ഡോണ്‍ബോസ്‌കോ കോളജ് സോഷ്യല്‍ സര്‍വീസ് ക്ലബിന്‍റെയും ജില്ലാ ലീഗല്‍ സര്‍വീസ് അതോറിറ്റിയുടെയും നേതൃത്വത്തില്‍ മുതിര്‍ന്ന പൗരന്മാര്‍ക്കെതിരെയുള്ള ചൂഷണ വിരുദ്ധ ദിനാചരണം നടത്തി. ഡോണ്‍ ബോസ്‌കോ കോളജില്‍ നടന്ന ചടങ്ങ് മുക്കം നഗരസഭ ചെയര്‍മാന്‍ പി.ടി.ബാബു ഉദ്ഘാടനം ചെയ്തു.ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ കുഞ്ഞന്‍ അധ്യക്ഷതവഹിച്ചു.സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ അഡ്വ.പി.വി.ചാന്ദിനി പ്രതിജ്ഞ ചൊല്ലിക്കൊടുത്തു.പ്രിന്‍സിപ്പല്‍ ഫാ. ഡോ. ജോബി എം.എബ്രഹാം ,മുനിസിപ്പല്‍ കൗണ്‍സിലര്‍മാരായ കെ.ബിന്ദു, പി.ജോഷില, വസന്തകുമാരി, വയോജന സമിതി സെക്രട്ടറി കരുണങ്ങാട്ട് ഭാസ്‌കരന്‍ , ഡോണ്‍ബോസ്‌കോ കോളജ് എന്‍എസ്എസ് പ്രോഗ്രാം ഓഫീസര്‍ ജിജി ജോര്‍ജ് ,സാമൂഹ്യ സുരക്ഷാ മിഷന്‍ ജില്ലാ കോ-ഓര്‍ഡിനേറ്റര്‍ ജിഷ ജയിംസ് എന്നിവര്‍ പ്രസംഗിച്ചു. ജില്ലാ ലീഗല്‍ സര്‍വീസ് അതോറിറ്റി മീഡിയേറ്റര്‍ അഡ്വ.വി.പി രാധാകൃഷ്ണന്‍, കേരള സാമൂഹ്യ സുരക്ഷാ മിഷന്‍ പ്രോഗ്രാം കോ-ഓര്‍ഡിനേറ്റര്‍ മുഹമ്മദ് ഫൈസല്‍ എന്നിവര്‍ ക്ലാസുകളെടുത്തു. കോളജ് പിആര്‍ഒ സന്തോഷ് അഗസ്റ്റിന്‍ പരിപാടികള്‍ക്ക് നേതൃത്വം നല്‍കി.

കുളത്തൂര്‍ ഉന്നതിയിലെ ദുരൂഹ മരണങ്ങള്‍; അന്വേഷിക്കണമെന്ന്

പേരാമ്പ്ര: ചക്കിട്ടപാറ പഞ്ചായത്തിലെ മുതുകാട് കുളത്തൂര്‍ ആദിവാസി ഉന്നതിയിലെ ദുരൂഹ മരണങ്ങള്‍ സംബന്ധിച്ച് സമഗ്ര അന്വേഷണം വേണമെന്ന് കൊയിലാണ്ടി താലൂക്ക് എസ്‌സിഎസ്ടി കോ ഓര്‍ഡിനേഷന്‍ കമ്മിറ്റി ആവശ്യപ്പെട്ടു. ഉന്നതിയിലെ മദ്യ വ്യാപനവും ഉപയോഗവും അവസാനിപ്പിക്കാന്‍ പോലീസും എക്‌സൈസും ട്രൈബല്‍ ഡിപ്പാര്‍ട്ട്‌മെന്റും സംയുക്തമായി ഇടപെടല്‍ നടത്തണം. പട്ടികജാതി -വര്‍ഗ്ഗ വിഭാഗങ്ങള്‍ക്ക് പോലീസ് സ്റ്റേഷനുകളില്‍ നീതി നിഷേധിക്കുന്നതിനെതിരേ ഡിവൈഎസ്പി ഓഫീസിലേക്ക് മാര്‍ച്ച് നടത്താനും യോഗം തീരുമാനിച്ചു. കോ ഓര്‍ഡിനേഷന്‍ കമ്മിറ്റി രക്ഷാധികാരി വി.കെ. അച്യുതന്‍ ഉദ്ഘാടനം ചെയ്തു. വാസു വെങ്ങേരി അധ്യക്ഷത വഹിച്ചു. എ. എം. ബാലന്‍, ഇ.കെ. വേലായുധന്‍, കുഞ്ഞിക്കണ്ണന്‍ പയ്യോളി, എ.എം. മോഹനന്‍, കെ.ടി. ഗംഗാധരന്‍, വി.പി. വേണു എന്നിവര്‍ പ്രസംഗിച്ചു.

വീട്ടുമുറ്റത്ത് സ്‌കൂട്ടര്‍ കത്തിനശിച്ച സംഭവം: അന്വേഷണം ഊര്‍ജിതമാക്കി പോലീസ്

പേരാമ്പ്ര: വീട്ടുമുറ്റത്ത് നിര്‍ത്തിയിട്ട സ്‌കൂട്ടര്‍ കത്തി നശിച്ച സംഭവത്തില്‍ അന്വേഷണം ഊര്‍ജിതമാക്കി പേരാമ്പ്ര പോലീസ്. പേരാമ്പ്ര ഗ്രാമ പഞ്ചായത്തിലെ ആറാം വാര്‍ഡില്‍ പെട്ട വെള്ളിയോടന്‍കണ്ടി വി.പി. സനിലിന്‍റെ വീട്ടുമുറ്റത്ത് നിര്‍ത്തിയിട്ടിരുന്ന സ്‌കൂട്ടറാണ് ഞായറാഴ്ച പുലര്‍ച്ചെ കത്തി നശിച്ചത്. മൂന്ന് മാസം മുന്‍പ് വാങ്ങിയ യമഹ കമ്പനിയുടെ ഇരുചക്ര വാഹനമാണ് പുലര്‍ച്ചെ മൂന്ന് മണിയോടെ കത്തി നശിച്ചത്. പുറത്ത് അസാധാരണമായ വെളിച്ചം കണ്ട് വീട്ടുകാര്‍ വാതില്‍ തുറന്ന് നോക്കിയപ്പോള്‍ സ്‌കൂട്ടര്‍ ആളിക്കത്തുന്നതാണ് കണ്ടത്. ഉടന്‍ പരിസരവാസികളെ വിവരം അറിയിച്ച് തീ അണക്കാന്‍ ശ്രമിച്ചെങ്കിലും വാഹനം പൂര്‍ണമായും കത്തി നശിച്ചു. പേരാമ്പ്ര പോലീസ് സ്ഥലത്തെത്തി പ്രാഥമിക പരിശോധന നടത്തി. അതിനിടെ സാമൂഹ്യ വിരുദ്ധര്‍ സ്‌കൂട്ടര്‍ കത്തിച്ചതാണെന്ന സംശയവും ഉയരുന്നുണ്ട്. വിരലടയാള വിദഗ്ധര്‍ അടക്കമുള്ള പോലീസിന്‍റെ വിവിധ അന്വേഷണ വിഭാഗങ്ങള്‍ സംഭവ സ്ഥലത്തെത്തി പരിശോധന നടത്തി.

മിന്നല്‍ ചുഴലി, കടലാക്രമണം കോഴിക്കോട്ട് വന്‍നാശം

കോഴിക്കോട്: കനത്തമഴയിലും കടലാക്രമണത്തിലും ജില്ലയില്‍ വന്‍ നാശനഷ്ടം. മഴയില്‍ പുഴകളില്‍ വെള്ളം കയറി. താഴ്ന്ന പ്രദേശങ്ങള്‍ വെള്ളത്തിലായി. നഗരത്തില്‍ മിക്ക റോഡുകളിലും വെള്ളക്കെട്ടുണ്ടായി. മടവൂരില്‍ ഇന്നലെ ഉച്ചയോടെ ഉണ്ടായ മിന്നല്‍ ചുഴലിയില്‍ വീടുകള്‍ക്ക് നാശനഷ്ടമുണ്ടായി. മടവൂര്‍, പൈമ്പാലശ്ശേരി, മുട്ടാന്‍ചേരി തുടങ്ങിയ ഇടങ്ങളിലാണ് ഉച്ചതിരിഞ്ഞ് മിന്നല്‍ ചുഴലിയുണ്ടായത്. നിരവധി മരങ്ങള്‍ കടപുഴകിവീണു. പന്ത്രണ്ടോളം വീടുകള്‍ക്കു മുകളിലേക്ക് മരങ്ങള്‍ വീണു. ഇലക്ട്രിക് പോസ്റ്റുകള്‍ വീണതിനെത്തുടര്‍ന്ന് പലയിടത്തും വൈദ്യുതി ബന്ധം തകരാറായി. കോഴിക്കോട് കടപ്പുറത്ത് ഉണ്ടായ കടലാക്രമണത്തില്‍ ഉന്തുവണ്ടി പെട്ടിക്കടകള്‍ നടത്തുന്ന കച്ചവടക്കാര്‍ക്ക് നാശനഷ്ടമുണ്ടായി. ഉച്ചയോടെ 20 മീറ്ററോളം കരയിലേക്ക് തിരമാല അടിച്ച് കയറി. അപ്രതീക്ഷതമായി ഉണ്ടായ കടലേറ്റത്തില്‍ ഉന്തുവണ്ടി കടകള്‍ മറിയുകയും ഉപ്പിലിട്ട സാധനങ്ങള്‍ ഉള്‍പ്പെടെ നിലത്ത് വീണ് നശിക്കുകയും ചെയ്തു. പിന്നീട് ഈ മേഖലയിലെ എല്ലാ കച്ചവടക്കാരും ഉന്തുവണ്ടികള്‍ ഫൂട്ട്പാത്തിലേക്ക് മാറ്റി. ശക്തമായ കാറ്റാണ് ബീച്ച് മേഖലയില്‍ നാശനഷ്ടമുണ്ടാക്കിയത്. കടലാക്രമണം രൂക്ഷമായ സാഹചര്യത്തില്‍ ബീച്ചില്‍നിന്ന് സന്ദര്‍ശകരെ േപാലീസ് ഒഴിപ്പിച്ചു. കാറ്റിന് ശക്തി കൂടിയാല്‍ കടലാക്രമണം രൂക്ഷമാകാനാണ് സാധ്യത. കനത്ത മഴയുടെ പശ്ചാത്തലത്തില്‍ ബീച്ചില്‍ ഇറങ്ങുന്നതിന് സന്ദര്‍ശകര്‍ക്ക് വിലക്കുണ്ട്. എന്നാല്‍ കടലേറ്റമുണ്ടായെന്ന് അറിഞ്ഞതോടെ വാഹനം നിര്‍ത്തി കടല്‍ കാണാന്‍ ഇറങ്ങുന്നവരുടെ എണ്ണം വര്‍ധിച്ചു. മാറാട് വെസ്റ്റ്മാഹിയില്‍ ചുഴലികാറ്റില്‍ കെട്ടിടത്തിന്റെ മേല്‍ക്കൂര പറന്നു വീണു. രാവിലെ എഴുമണിയോടെ ഉണ്ടായ കാറ്റില്‍ പ്രദേശത്തെ തെങ്ങ് ഉള്‍പ്പെടെയുള്ള മരങ്ങളും കടപുഴകി വീണു. ഇതരസംസ്ഥാന തൊഴിലാളികള്‍ താമസിച്ചിരുന്ന കെട്ടിടത്തിന്റെ മേല്‍ക്കൂരയായ ഷീറ്റാണ് കാറ്റില്‍ പറന്ന് സമീപത്തെ മാവില്‍ തങ്ങി നിന്നത്. അപകടസമയത്ത് താമസക്കാര്‍ ഇവിടെ ഇല്ലാത്തതിനാല്‍ ആളപായമുണ്ടായില്ല. പലയിടങ്ങളിലും മരം വീണും മതില്‍ ഇടിഞ്ഞും അപകടങ്ങളുണ്ടായി. ഉച്ചയ്ക്ക് രണ്ടരയോടെ ഉണ്ടായ കനത്ത കാറ്റില്‍ കോഴിക്കോട് കോര്‍പറേഷന്‍ ഓഫീസിന്‍റെ ഫ്രണ്ട് ഓഫീസിന്‍റെ ചില്ല് തകര്‍ന്നു വീണു. വാതില്‍ തകര്‍ന്ന സമയത്ത് അകത്ത് ആളുകള്‍ ഉണ്ടായിരുന്നുവെങ്കിലും ആര്‍ക്കും പരിക്കേറ്റില്ല. മഴയില്‍ ജില്ലയിലെ പുഴകളിലെല്ലാം വെള്ളം ഉയര്‍ന്നിട്ടുണ്ട്.പൂനൂര്‍ പുഴയില്‍ വെള്ളം പൊന്തിയതിനാല്‍ പരിസരവാസികളെ ബന്ധുവീടുകളിലേക്ക് മാറ്റി. കനത്ത മഴ തുടരുന്ന സാഹചര്യത്തില്‍ നദികളില്‍ പ്രളയ സാധ്യത മുന്നറിയിപ്പ് പുറപ്പെടുവിച്ചിട്ടുണ്ട്. അപകടകരമായ രീതിയില്‍ ജലനിരപ്പ് ഉയരുന്ന സാഹചര്യത്തിലാണ് സംസ്ഥാന ജലസേചന വകുപ്പും കേന്ദ്ര ജല കമ്മീഷനും നദികളില്‍ ഓറഞ്ച്, മഞ്ഞ അലര്‍ട്ടുകള്‍ പ്രഖ്യാപിച്ചത്. സ്വന്തം ലേഖകന്‍

പാല്‍വില കൂട്ടാന്‍ ക്ഷീരകര്‍ഷകര്‍ സമരത്തിലേക്ക്; ഇന്ന് ധര്‍ണ

കോഴിക്കോട്: പാലിന്‍റെ ഉത്പാദന ചെലവിനനുസരിച്ച് വില ലഭ്യമാകാത്തതില്‍ പ്രതിഷേധിച്ച് ക്ഷീര കര്‍ഷകര്‍ സമരത്തിലേക്ക്. പാലിന് സംഭരണ വില 70 രൂപയാക്കുക, വില നിശ്ചയിക്കുന്ന ചാര്‍ട്ട് പരിഷ്‌കരിക്കുക എന്നീ ആവശ്യങ്ങള്‍ ഉന്നയിച്ച് മലബാര്‍ ഡയറി ഫാര്‍മേഴ്സ് അസോസിയേഷന്‍റെ നേതൃത്വത്തില്‍ ഇന്ന് രാവിലെ 10 ന് ജില്ലാ മൃഗസംരക്ഷണ, ക്ഷീരവികസന ഓഫിസിന് മുന്‍പില്‍ ധര്‍ണ നടത്തും. കന്നുകാലികളുടെ കുറവും കാലിത്തീറ്റയുടെ ക്രമാതീതമായ വില വര്‍ധനവുമാണ് പാല്‍ വില ഉയര്‍ത്തണമെന്ന ആവശ്യത്തിലേക്ക് നയിച്ചതെന്ന് ക്ഷീര കര്‍ഷകര്‍ പറയുന്നു.എഫ്എസ്എസ്‌ഐ അംഗീകരിക്കുന്ന പാലിന്‍റെ ഗുണനിലവാരത്തില്‍ മില്‍മ സംഭരിക്കുന്ന പാലിന് കര്‍ഷകന് 41 രൂപയാണ് ലഭിക്കുന്നത്. 2022-ല്‍ ക്ഷീര വികസന വകുപ്പും മില്‍മയും ഉത്പാദന ചെലവ് കണ്ടെത്തുന്നതിന് കമ്മീഷനെ നിയോഗിച്ചിരുന്നു. അത് പ്രകാരം ഒരു ലിറ്റര്‍ പാലിന് 48.80 രൂപയാണ് ചെലവ്. മില്‍മ പാലിന് വില വര്‍ധിപ്പിച്ചിട്ട് മൂന്ന് വര്‍ഷം പിന്നിട്ടു. ഇതുമൂലം വലിയ തോതില്‍ ക്ഷീരകര്‍ഷകര്‍ ഈ മേഖലയില്‍ നിന്നു കൊഴിഞ്ഞു പോകുന്നു. ഒട്ടേറെ ക്ഷീര സംഘങ്ങള്‍ പൂട്ടി. പലതും പാല്‍ സംഭരണം കുറഞ്ഞതു മൂലം പൂട്ടേണ്ട സ്ഥിതിയിലാണ്. ഉത്പാദനച്ചെലവിന് അനുസരിച്ച് വില ലഭിക്കാത്തതിനാല്‍ പുതുതായി ആരും ഈ മേഖലയിലേക്ക് വരുന്നില്ല. ഈ സാഹചര്യത്തില്‍ മില്‍മ സംഭരിക്കുന്ന പാലിന് അടിസ്ഥാന വില 60 രൂപയാക്കി ഉയര്‍ത്തണമെന്നാണ് ക്ഷീര കര്‍ഷകര്‍ ആവശ്യപ്പെടുന്നത്. 2024-ലെ കന്നുകാലി സെന്‍സെസ് കേരളത്തിലെ കന്നികാലികളുടെ എണ്ണത്തില്‍ 37 ശതമാനം കുറവ് വന്നിരിക്കുന്നതായി കണ്ടെത്തിയിട്ടുണ്ട്. സംസ്ഥാന മൃഗസംരക്ഷണ, ക്ഷീര വികസന വകുപ്പുകള്‍ പ്രതിവര്‍ഷം 200 കോടി വകയിരുത്തിയിട്ടും ഏകദേശം ലക്ഷത്തിലധികം ഉരുക്കളുടെ എണ്ണം കുറഞ്ഞിട്ടുണ്ട്. ഈ വിഷയത്തിലും അനുകൂല നടപടി വേണമെന്ന് മലബാര്‍ ഡയറി ഫാര്‍മേഴ്സ് അസോസിയേഷന്‍ ആവശ്യപ്പെടുന്നു.

പ്ലസ്‌വണ്‍ പ്രവേശനം ലഭിക്കാതെ 16,889 അപേക്ഷകര്‍

കോഴിക്കോട്: ജില്ലയില്‍ പ്ലസ്‌വണ്‍ പ്രവേശനം ലഭിക്കാതെ 16,889 അപേക്ഷകര്‍. മൂന്നാമത്തെ അലോട്ട്മെന്‍റ് പ്രസിദ്ധീകരിച്ചിട്ടും ഇത്രയും കുട്ടികള്‍ പുറത്തുനില്‍ക്കുകയാണ്. ജില്ലയില്‍ പ്ലസ് വണ്ണിന് 48,238 അപേക്ഷകരാണുള്ളത്. മൂന്ന് അലോട്ട്മെന്‍റുകളിലായി 31,349 പേര്‍ക്കാണ് പ്രവേശനം ലഭിച്ചത്. അപേക്ഷിച്ചവരില്‍ 64.99 ശതമാനത്തിന് മാത്രമാണ് സീറ്റ് ലഭിച്ചത്. 35 ശതമാനവും പുറത്താണ്. പ്ലസ് വണ്ണിനു 31,369 സീറ്റിലേക്കാണ് അലോട്ട്മെന്‍റ് നടന്നത്. ഇതില്‍ 20 സീറ്റുകള്‍ മാത്രമാണ് ഇനി അവശേഷിക്കുന്നത്. എസ്‌സി വിഭാഗത്തില്‍ ഏഴും ഹിന്ദു ഒബിസി വിഭാഗത്തില്‍ ആറും സാമ്പത്തികമായി പിന്നോക്കം നില്‍ക്കുന്നവര്‍ക്കായി (ഇഡബ്ല്യുഎസ്) അഞ്ചും ആംഗ്ലോ ഇന്ത്യന്‍സ്, ഈഴവ തിയ്യ വിഭാഗത്തിലായി ഓരോ സീറ്റുവീതവുമാണ് അവശേഷിക്കുന്നത്. ഈവര്‍ഷം സ്പോര്‍ട്സ് ക്വാട്ടയില്‍ 782 സീറ്റുകളാണ് അനുവദിച്ചത്. ഇതില്‍ 75 സീറ്റുകള്‍ ഒഴിവുണ്ട്. അതേസമയം അണ്‍എയ്ഡഡ് സ്‌കൂളുകളിലുള്‍പ്പെടെ സര്‍ക്കാര്‍ കണക്കുകളില്‍ 43,142 സീറ്റുകളുണ്ട്. ഇത് പരിഗണിച്ചാലും നിലവിലെ അപേക്ഷിച്ചവരുടെ എണ്ണത്തേക്കാള്‍ 5096 സീറ്റുകളുടെ കുറവുണ്ടാകും. അപേക്ഷിച്ചവരില്‍ വിഎച്ച്എസ്ഇ, എന്‍ട്രന്‍സ് കോച്ചിം ഗ് സെന്‍ററുകള്‍, ഇന്‍റഗ്രേറ്റഡ് കോഴ്സുകള്‍ എന്നിവയിലെ കുട്ടികളുമുള്‍പ്പെടും. ഇവരെല്ലാം കുറയുമെന്നത് പരിഗണിച്ചാലും പലകുട്ടികളും പ്ലസ് വണ്‍ ക്ലാസിന് പുറത്താകുമെന്ന ആശങ്കയുണ്ട്. കഴിഞ്ഞ വര്‍ഷവും എസ്എസ്എല്‍സി പാസായ കുട്ടികളുടെ എണ്ണം കൂടുതലും സീറ്റുകളുടെ എണ്ണം കുറവുമായിരുന്നു. എന്നാല്‍ പലയിടത്തും സീറ്റുകള്‍ ഒഴിഞ്ഞു കിടക്കുകയായിരുന്നുവെന്നാണ് അധികൃതര്‍ പറയുന്നത്. സംവരണ സീറ്റുകള്‍ പലതും ആളില്ലാത്തതിനാല്‍ ജനറലായി മാറും. ഇതോടെ സീറ്റുകളില്ലാത്ത പ്രശ്നമുണ്ടാവില്ലെന്നാണ് അധികൃതരുടെ വാദം.

മരം കടപുഴകാറായ നിലയില്‍; താമരശേരി ചുരത്തില്‍ നിയന്ത്രണം

താമരശേരി: താമരശേരി ചുരം ഒന്‍പതാം വളവിനും എട്ടാം വളവിനുമിടയില്‍ മരം കടംപുഴകാറായ നിലയില്‍. അപകടാവസ്ഥയെ തുടര്‍ന്ന് പോലീസ് ചുരത്തില്‍ ഗതാഗതനിയന്ത്രണം ഏര്‍പ്പെടുത്തി. മരത്തിന്‍റെ അടിഭാഗത്തുനിന്നും മണ്ണ് ഇളകി വീണുകൊണ്ടിരിക്കുകയാണ്. ഏത് സമയത്തും റോഡിലേക്ക് കടപുഴകി വീഴാവുന്ന അവസ്ഥയിലാണ്. മരം മുറിച്ചു മാറ്റുന്നത് വരെ അത്യാവശ്യ വാഹനങ്ങള്‍ മാത്രമേ പോകാന്‍ അനുവദിക്കുകയുള്ളുവെന്ന് പോലീസ് അറിയിച്ചു. ഇന്ന് രാവിലെ ഒന്‍പതുമണിയോടെ മരം നീക്കാനുള്ള നടപടികള്‍ ആരംഭിക്കും. അതിനിടെ കനത്ത മഴയെത്തുടര്‍ന്ന് ചുരത്തില്‍ മരം പൊട്ടിവീണ് ഗതാഗതം തടസപ്പെട്ടു. ചുരം ഒന്നാംവളവിനും രണ്ടാം വളവിനുമിടയിലാണ് റോഡിലേക്ക് മരം പൊട്ടിവീണത്. ചുരം സംരക്ഷണ സമിതി പ്രവര്‍ത്തകര്‍ മരക്കൊമ്പുകള്‍ വെട്ടിമാറ്റി ഗതാഗത തടസം ഒഴിവാക്കി.

കോഴിക്കോട് മെഡിക്കല്‍ കോളജ് പരിസരത്ത് തലയോട്ടിയും അസ്ഥികളും

കോഴിക്കോട്: കോഴിക്കോട് മെഡിക്കല്‍ കോളജിന്‍റെ പരിസരത്ത് തലയോട്ടിയും അസ്ഥികളും കണ്ടെത്തി. മെഡിക്കല്‍ കോളജിലെ മലിന ജല വാട്ടര്‍ പ്ലാന്‍റിന്‍റെപരിസരത്തു നിന്നുമാണ് അസ്ഥികള്‍ കണ്ടെത്തിയത്. ഒരു വലിയ സഞ്ചിയിലാണ് തലയോട്ടിയും അസ്ഥികളും ഉണ്ടായിരുന്നത്. ഇന്നലെ രാവിലെ 11.30യോടെയാണ് തലയോട്ടി ശ്രദ്ധയില്‍പെട്ടത്. പോലീസ് എത്തി തലയോട്ടിയും അസ്ഥികളും ആശുപത്രിയിലേക്ക് മാറ്റി. മെഡിക്കല്‍ കോളജില്‍ പഠനവിധേയമാക്കിയ അസ്ഥികളും തലയോട്ടിയും ഉപയോഗശേഷം ഉപേക്ഷിച്ചതാണോ എന്നതടക്കമുള്ള കാര്യങ്ങള്‍ പോലീസ് അന്വേഷിച്ചുവരുകയാണ്.

പന്തയംവച്ച് വെള്ളക്കെട്ടിലിറങ്ങി കുടുങ്ങിയ വിദ്യാര്‍ഥിയെ രക്ഷപ്പെടുത്തി

മുക്കം: ഗ്രൗണ്ടിലെ വെള്ളക്കെട്ടില്‍ കുടുങ്ങിയ വിദ്യാര്‍ഥിയെ ജ്വല്ലറി ജിവനക്കാര്‍ രക്ഷപ്പെടുത്തി. മുക്കം നഗരസഭയിലെ പുല്‍പ്പറമ്പ് ഗ്രൗണ്ടിലാണ് സംഭവം. കനത്ത മഴയില്‍ ഗ്രൗണ്ടില്‍ വെള്ളം നിറഞ്ഞു നില്‍ക്കുകയായിരുന്നു. കൂട്ടുകാരോട് പന്തയംവച്ച് വെള്ളത്തില്‍ ചാടിയ വിദ്യാര്‍ഥി മസിലു കയറി വെള്ളത്തില്‍ താഴ്ന്നുതുടങ്ങിയപ്പോള്‍ സംഭവം ശ്രദ്ധയില്‍പ്പെട്ട ദിയ ഗോള്‍ഡിലെ മാര്‍ക്കറ്റിംഗ് സ്റ്റാഫുകളായ സ്വാലിഹും റാഷിദുമാണ് രക്ഷാപ്രവര്‍ത്തനം നടത്തിയത്. സ്വാലിഹ് വെള്ളത്തിലേക്ക് എടുത്തുചാടി മുങ്ങിപ്പോയ വിദ്യാര്‍ഥിയെ പൊക്കിയെടുത്ത് ഗ്രൗണ്ടിലെ ഗോള്‍ പോസ്റ്റിന്‍റെ അടുത്തേക്ക് എത്തിക്കുകയും പിന്നീട് റാഷിദ് ട്യൂബുമായി വന്നു കരയിലേക്ക് കയറ്റുകയുമായിരുന്നു.

ലഹരി വില്പനയിലൂടെ സമ്പാദിച്ച വാഹനങ്ങള്‍ കണ്ടുകെട്ടി

കോഴിക്കോട്: കോഴിക്കോട് ജില്ലയില്‍ ലഹരി വസ്തുക്കളുടെ വ്യാപനത്തിനെതിരേ ശക്തമായ നടപടി തുടരുന്നതിന്‍റെ ഭാഗമായി ലഹരി വില്പനയിലൂടെ യുവാവ് ഭാര്യയുടെ പേരില്‍ സമ്പാദിച്ച വാഹനം പോലീസ് കണ്ടുകെട്ടി. മാങ്കാവ് പൊക്കുന്ന് സ്വദേശി തോട്ടുംമാരത്ത് ഇംതിഹാസി (30)ന്‍റെ ഭാര്യയുടെ പേരില്‍ വാങ്ങിയ വാഹനമാണ് ചെന്നൈ ആസ്ഥാനമായ സ്മഗ്‌ളേഴ്‌സ് ആന്‍ഡ് ഫോറിന്‍ എക്‌സേഞ്ച് മാനിപ്പുലേറ്റേഴ്‌സ് അഥോറിറ്റിയുടെ ഉത്തരവ് പ്രകാരം കണ്ടുകെട്ടിയത്.

കോഴിക്കോട്ട് തോരാമഴ, തീരാകെടുതികള്‍

കോഴിക്കോട്: ഏതാനും ദിവസങ്ങളായി ജില്ലയില്‍ തുടരുന്ന മഴയില്‍ നാശനഷ്ടം. വീട് തകര്‍ന്നും മതില്‍ ഇടിഞ്ഞുവീണും നാശനഷ്ടങ്ങളുണ്ടായി. പുഴകള്‍ നിറഞ്ഞാണ് ഒഴുകുന്നത്. ഒട്ടേറെ സ്ഥലങ്ങളില്‍ വെള്ളം കയറി. കോഴിക്കോട് ബീച്ചില്‍ കടലാ്രകമണം രൂക്ഷമായി. റോഡിനു സമീപം വരെ തീരകള്‍ അടിച്ചുകയറിയതിനാല്‍ പോലീസ് ഇടപെട്ട് ബീച്ചില്‍ നിന്ന് സന്ദര്‍ശകരെ ഒഴിപ്പിച്ചു. കോഴിക്കോട് താലൂക്കിലെ കുമാരനല്ലൂര്‍ വില്ലേജില്‍ ചെറുപുഴയില്‍ വെള്ളം ഉയര്‍ന്നതിനെ തുടര്‍ന്ന് രണ്ട് വീടുകളില്‍ വെള്ളം കയറി. ഒരു കുടുംബത്തെ മൂട്ടോളി അങ്കണവാടിയിലും മറ്റൊരു കുടുംബത്തെ ബന്ധുവീട്ടിലേക്കും മാറ്റിപ്പാര്‍പ്പിച്ചു. ഒരു കുടുംബത്തിലെ അഞ്ച് പേരാണ് ക്യാമ്പിലുള്ളത്. പെരുവയല്‍ വില്ലേജില്‍ കൊളക്കാട്ട് മീത്തല്‍ മുഹമ്മദ് മുസ്തഫയുടെ വീടിനു മുകളില്‍ മരം വീണു. മടവൂര്‍ വില്ലേജില്‍ മുട്ടാഞ്ചേരി ഭാഗത്ത് ശക്തമായ കാറ്റില്‍ നിരവധി മരങ്ങള്‍ കടപുഴകി വീണു. ഏതാനും വീടുകള്‍ക്ക് ചെറിയ കേടുപാടുകളുണ്ടായി. അരങ്ങില്‍ത്താഴത്ത് ശക്തമായ കാറ്റില്‍ വീടുകള്‍ക്ക് മുകളില്‍ മരങ്ങള്‍ വീണു. ഇവിടെ റോഡില്‍ മരം വീണ് ഗതാഗതം തടസ്സപ്പെട്ടു. അഗ്‌നിരക്ഷാ സേനയെത്തി മരം മുറിച്ചുമാറ്റിയാണ് ഗതാഗതം പുനഃസ്ഥാപിച്ചത്. ഇന്നലെയുണ്ടായ ശക്തമായ മഴയിലും കാറ്റിലും വടകര താലൂക്കില്‍ ആറ് വീടുകള്‍ ഭാഗികമായി തകര്‍ന്നു. വടകര വില്ലേജില്‍ നാലും ആയഞ്ചേരി, കോട്ടപ്പള്ളി വില്ലേജുകളിലായി ഓരോ വീടുകളുമാണ് തകര്‍ന്നത്. ഏറാമല വില്ലേജില്‍ ആദിയൂരില്‍ കക്കാട്ടു പറമ്പത്ത് ദിലീപ് കുമാറിന്‍റെ വീട്ടു മുറ്റത്തുള്ള കിണര്‍ രണ്ട് മീറ്റര്‍ താഴ്ന്നു. കൊയിലാണ്ടി: കഴിഞ്ഞ ദിവസം വൈകീട്ടുണ്ടായ കനത്ത മഴയില്‍ കൊയിലാണ്ടി സ്റ്റേറ്റ് ബാങ്കിന് സമീപം ഹഫീഫ് ഹൗസില്‍ ബഷീറിന്‍റെ ആള്‍ താമസമില്ലാത്ത മാളിക വീട് തകര്‍ന്നു. സമീപത്തെ മറ്റ് വീടുകളും അപകട ഭീഷണിയിലാണ്. പന്തലായനി കേളുവേട്ടന്‍ മന്ദിരം പരിസരം, വിയ്യൂര്‍ റോഡ്, പൊയില്‍ക്കാവ് ക്ഷേത്രം റോഡ്, റെയില്‍വെ ഗേറ്റ് പരിസരം, കൊരയങ്ങാട് ക്ഷേത്ര മൈതാനം, അമ്പാടി തിയേറ്റര്‍ റോഡ് എന്നിവിടങ്ങളില്‍ വെള്ളം പൊങ്ങി വാഹന- കാല്‍നട യാത്ര ദുസ്സഹമായി. പൊയില്‍കാവ് ക്ഷേത്രം റോഡിലെ കടകളില്‍ വെള്ളം കയറി. അമ്പാടി റോഡില്‍ വാഹന സര്‍വ്വീസ് ഏറെ നേരം മുടങ്ങി. പൊയില്‍ക്കാവില്‍ ദേശീയപാത റോഡ് പണി നടക്കുന്ന സ്ഥലത്തൂടെ പോയ സ്വകാര്യ ബസ് ചളിയില്‍ താഴ്ന്ന് യാത്രക്കാര്‍ വലഞ്ഞു. കൊയിലാണ്ടിയില്‍ വെള്ളപ്പൊക്കം കാരണം രണ്ട് കുടുംബങ്ങളെ ദുരിതാശ്വാസ ക്യാമ്പിലേക്ക് മാറ്റി. നഗരസഭ 32-ാം വാര്‍ഡില്‍ കുറ്റിവയല്‍ കോളനിയില്‍ താമസിക്കുന്ന ജയന്‍, ശിവദാസന്‍ എന്നിവരുടെ കുടുംബങ്ങളിലെ അഞ്ചുപേരെയാണ് കോതമംഗലം ഗവ. ജി.എല്‍.പി. സ്‌കൂളിലെ ക്യാമ്പിലേക്ക് മാറ്റിയത്. ശക്തമായി തുടരുന്ന മഴയില്‍ പ്രദേശമാകെ വെള്ളക്കെട്ട് രൂക്ഷമാണ്. നഗരസഭ കൗണ്‍സിലര്‍ എ. ലളിതയും വില്ലേജ് അധികാരികളും സ്ഥലം സന്ദര്‍ശിച്ചു. ബഡ്‌സ് സ്‌കൂള്‍ കെട്ടിടത്തിനു മുകളിലേക്ക് മതില്‍ ഇടിഞ്ഞു നാദാപുരം: തൂണേരി കുടുംബാരോഗ്യ കേന്ദ്രം കോമ്പൗണ്ടില്‍ പ്രവര്‍ത്തിക്കുന്ന തൂണേരി പഞ്ചായത്ത് സാന്ത്വനം ബഡ്‌സ് സ്‌കൂള്‍ കെട്ടിടത്തിന് മുകളിലേക്ക് മതില്‍ ഇടിഞ്ഞുവീണു. ഒഴിവായത് വന്‍ ദുരന്തം. സ്വകാര്യ വ്യക്തിയുടെ ഉടമസ്ഥതയിലുള്ള പറമ്പിന്‍റെ അതിര്‍ത്തിയിലുള്ള വലിയ മതിലാണ് ഞായറാഴ്ച്ച രാത്രി കനത്ത മഴയില്‍ കെട്ടിടത്തിന് മുകളിലേക്ക് ഇടിഞ്ഞുവീണത്. സ്‌കൂള്‍ അവധി ദിവസം ആയതിനാല്‍ വലിയ ദുരന്തമാണ് ഒഴിവായത്. മതിലിന്‍റെ ബാക്കിയുള്ള ഭാഗം വീഴാറായ അവസ്ഥയിലുമാണ്. അപകടാവസ്ഥക്ക് പരിഹാരം കാണാതെ സ്‌കൂള്‍ തുറക്കാന്‍ കഴിയാത്ത സ്ഥിതിയാണ്. മിന്നല്‍ ചുഴലിയില്‍ വളയത്തും വാണിമേലിലും വ്യാപക നാശം നാദാപുരം: വളയം ചെറുമോത്ത്, വാണിമേല്‍ മേഖലകളില്‍ ആഞ്ഞടിച്ച മിന്നല്‍ ചുഴലിയില്‍ വ്യാപക നാശം. നിരവധി മരങ്ങള്‍ കടപുഴകി വീണു. വൈദ്യുതി ബന്ധം താറുമാറായി. തിങ്കളാഴ്ച്ച ഉച്ചക്ക് ശേഷം മൂന്നു മണിയോടെയാണ് വളയം 11,12,13, വാര്‍ഡുകളിലും വാണിമേല്‍ പഞ്ചായത്തിലെ വിവിധ മേഖലകളിലും കാറ്റ് വീശിയത്. ചെറുമോത്ത് തെക്കുമ്പുറം സുബൈറിന്‍റെ വീടിന്‍റെ മേല്‍ക്കൂരയുടെ ഷീറ്റ് പാറി പോയി. പുനത്തില്‍ ഉമറിന്‍റെ പറമ്പിലെ മാവ് കടപുഴകി വീണ് മതില്‍ തകര്‍ന്നു. പള്ളിക്കണ്ടി മജീദിന്‍റെ വീടിന്‍റെ മതില്‍ മരം വീണ് തകര്‍ന്നു. പള്ളിക്കണ്ടി പോക്കറുടെ വീടിന് മേല്‍ മരം വീണ് കേടുപാട് സംഭവിച്ചു. ഓണപറമ്പത്ത് തയ്യുള്ളതില്‍ സദാനന്ദന്‍റെ വീടിന്‍റെ മേല്‍ക്കൂരയിലും മരം വീണ് നാശനഷ്ടം സംഭവിച്ചു. കാറ്റില്‍ ഏണി വീണ് കുറുങ്ങോട് ബാലന് തലക്ക് പരിക്കേറ്റു. മീത്തലെ പുത്തന്‍പുരയില്‍ അബുബക്കറിന്‍റെ വീടിന് മുകളില്‍ സമീപത്തെ മരം വീണ് കേടുപാട് സംഭവിച്ചു. ഓണപ്പറമ്പത്ത് ഹമീദിന്‍റെ വീട്ടു മതില്‍ മരം വീണ് തകര്‍ന്നു. ചെറുമോത്ത് എല്‍ പി സ്‌കൂളിന് സമീപത്തെ റോഡിലേക്ക് നിരവധി മരങ്ങള്‍ പൊട്ടിവീണ് ഗതാഗതം തടസ്െപ്പട്ടു. വൈദ്യുതി തൂണുകളും തകര്‍ന്നു. ഓണപറമ്പത്ത് കൂറ്റന്‍ മരം റോഡിലേക്ക് വീണ് വൈദ്യുതി തൂണുകള്‍ തകരുകയും ഗതാഗതം തടസ്സപ്പെടുകയും ചെയ്തു. വാഴകള്‍ ഉള്‍പ്പെടെയുള്ള കൃഷികളും കാറ്റില്‍ നശിച്ചു. മാമുണ്ടേരിയില്‍ അബ്ദു റഹ്‌മാന്‍റെ ഓട് മേഞ്ഞ വീടിന് മുകളില്‍ മരം വീണ് മേല്‍ക്കൂര തകര്‍ന്നു. പഞ്ചായത്ത് അംഗങ്ങളായ വി.പി ശശിധരന്‍, എന്‍ റൈഹാനത്ത്, നസീമ നാരോന്‍റെവിട എന്നിവര്‍ പ്രദേശത്ത് സന്ദര്‍ശനം നടത്തി.

കാട്ടുപന്നികൾ കൃഷിയിടത്തിൽ കയറുന്നു

കോഴിക്കോട്: പട്ടാപ്പകൽ കാട്ടുപന്നികൾ കൃഷിയിടത്തിൽ കയറുന്നത് പതിവാകുന്നു. മാവൂര്‍ പള്ളിയോൾ ചിറയ്ക്കൽ താഴത്തെ വാഴക്കൃഷിയിലേക്കാണു കഴിഞ്ഞ ദിവസം നട്ടുച്ചനേരത്ത് കാട്ടുപന്നിക്കൂട്ടം ഇറങ്ങിയത്. വ്യാപകമായി കൃഷിയിടം കുത്തി നശിപ്പിക്കുകയും ചെയ്തു. പന്നിക്കൂട്ടം ആക്രമിക്കുന്നതിനാൽ ഇവയെ തുരത്താൻ കഴിയാതെ കർഷകരും ദുരിതത്തിലായി. കുന്നിൻ പ്രദേശത്തെ കുറ്റിക്കാട്ടിലാണു ഇവയുടെ വിഹാര കേന്ദ്രം.രാത്രി പന്നിക്കൂട്ടം ഇറങ്ങുന്നതിനാൽ വീട്ടിൽ നിന്നും പുറത്തിറങ്ങാൻ കഴിയാത്ത അവസ്ഥയാണെന്നു പരിസരവാസികൾ പറയുന്നത്.

കൈവിരലില്‍ കുടുങ്ങിയ മോതിരം മുറിച്ചുമാറ്റി അഗ്നിരക്ഷാസേന

കൊയിലാണ്ടി: കൈവിരലില്‍ കുടുങ്ങിയ സ്റ്റീല്‍ മോതിരം അഗ്നി രക്ഷാ സേന മുറിച്ചുമാറ്റിയതോടെ പത്തുവയസുകാരന് ആശ്വാസമായി. കാപ്പാട് സ്വദേശി അന്‍സില്‍ റഹ്‌മാന്‍റെ കൈവിരലിലാണ് മോതിരം കുടുങ്ങിയത്. നീര് വന്നതോടെ വീട്ടുകാരും നാട്ടുകാരും പഠിച്ചപണി മുഴുവന്‍ നോക്കിയിട്ടും മോതിരം ഊരിയെടുക്കാന്‍ കഴിഞ്ഞില്ല. ഇതോടെയാണ് കൊയിലാണ്ടി അഗ്നിരക്ഷാ നിലയത്തിലെത്തിയത്. സേനാംഗങ്ങള്‍ കട്ടര്‍ ഉപയോഗിച്ച് അതീവശ്രദ്ധയോടെ മോതിരം മുറിച്ചുമാറ്റുകയായിരുന്നു. കുട്ടികളും മുതിര്‍ന്നവരും സ്റ്റീല്‍ മോതിരവും അതുപോലെ കട്ടി കൂടിയ മോതിരങ്ങളും ഉപയോഗിക്കുന്നത് പെട്ടെന്ന് നീര് വന്ന് ഊരാന്‍ പറ്റാതാവുന്ന അവസ്ഥ സൃഷ്ടിക്കുമെന്ന് അഗ്‌നിരക്ഷാസേനാംഗങ്ങള്‍ പറഞ്ഞു.

പെരിക്കല്ലൂർ ഭൂമി വിവാദം: സർക്കാർ ഇടപെടണമെന്ന് മാനന്തവാടി രൂപത പാസ്റ്ററൽ കൗണ്‍സിൽ

മാനന്തവാടി: പെരിക്കല്ലൂർ ഭൂമി ഉടമസ്ഥാവകാശം സംബന്ധിച്ച് പുതിയതായി ഉയർന്നുവന്നിരിക്കുന്ന വിവാദം കോടതി നടപടികളിലേക്ക് നീണ്ടാൽ കേസിൽ ഉൾപ്പെടുന്ന മുഴുവൻ ഭൂവുടമകൾക്കും വേണ്ടി സർക്കാർ കക്ഷി ചേർന്ന് കേസ് നടത്തണമെന്ന് മാനന്തവാടി രൂപത പാസ്റ്ററൽ കൗണ്‍സിൽ സർക്കാരിനോട് ആവശ്യപ്പെട്ടു. ഈ കേസിൽ ഉൾപ്പെട്ട ഒരു സെന്‍റ് ഭൂമി പോലും കയ്യേറ്റ ഭൂമിയല്ല. മുഴുവൻ ഭൂമിയും സാധാരണക്കാരായ ജനങ്ങൾ കൃഷിക്കും ഉപജീവന മാർഗത്തിനുമായി വിലകൊടുത്ത് വാങ്ങിയതാണ്. ആ കാലഘട്ടത്തിൽ ഇതു സംബന്ധിച്ച് ലഭ്യമായ വില്പന കരാറുകളും നികുതി ചീട്ടുകളും ഉടമസ്ഥാവകാശം സംബന്ധിച്ച ആധികാരിക രേഖകളും സർക്കാർ പരിശോധിച്ചു ഇപ്പോഴത്തേ ഉടമകൾക്ക് ക്രയ സർട്ടിഫിക്കറ്റ് അനുവദിച്ചു നൽകിയതാണ്. ഇങ്ങനെയുള്ള ഭൂമിയുടെ മുകളിൽ അരനൂറ്റാണ്ടിനു ശേഷം ജൻമിമാരുടെ പിൻഗാമികൾ എന്ന പേരിൽ ഇപ്പോൾ ചില ആളുകൾ ഉടമസ്ഥാവകാശം സംബന്ധിച്ച കേസുമായി മുന്നോട്ടു വരുന്നതിന്‍റെ പിന്നിൽ ഗൂഢാലോചന ഉണ്ടെന്ന വാദത്തെ പറ്റി സർക്കാർ ഗൗരവതരമായി അന്വേഷിക്കണം. ഈ വിഷയത്തിൽ സർക്കാരിന്‍റെ അടിയന്തര ഇടപെടലുകൾ ഉണ്ടാകണമെന്നും സർക്കാർ സ്ഥലവാസികളുടെ യോഗം വിളിച്ച് ആശങ്കകൾ പരിഹരിക്കണമെന്നും മാനന്തവാടി രൂപത പാസ്റ്ററൽ കൗണ്‍സിൽ പ്രമേയം വഴി സർക്കാരിനോട് ആവശ്യപ്പെട്ടു. മാനന്തവാടി ബിഷപ് മാർ ജോസ് പൊരുന്നേടം ഉദ്ഘാടനം ചെയ്തു. രൂപതാ സഹായ മെത്രാൻ മാർ അലക്സ് താരാമംഗലം സ്വാഗതം പറഞ്ഞു. രൂപതയിൽ ആരംഭിച്ചിരിക്കുന്ന കുടുംബ നവീകരണ വർഷ പ്രവർത്തനങ്ങൾ, ചൂരൽമല പുനരധിവാസ പ്രവർത്തന പുരോഗതി, രൂപതയുടെ പഞ്ചാബ് മിഷൻ പ്രവർത്തനങ്ങൾ എന്നിവ യോഗം ചർച്ച ചെയ്തു. മാനന്തവാടി രൂപതയ്ക്ക് കീഴിൽ പ്രവർത്തിക്കുന്ന 162 ഇടവകകളിലെ 37,125 കുടുംബങ്ങളിൽ നിന്നുള്ള 1,73,000 ലധികം വിശ്വാസികളെ പ്രതിനിധീകരിച്ച് ഇടവക പൊതുയോഗങ്ങളിൽ നിന്നും തെരഞ്ഞെടുക്കപ്പെട്ട പ്രതിനിധികൾ ഉൾപ്പെടുന്ന 13 ഫൊറോന കൗണ്‍സിലുകൾ രൂപത അതിർത്തിക്കുള്ളിൽ വിവിധ പ്രദേശങ്ങളിലായി പ്രവർത്തിക്കുന്നുണ്ട്. ഈ ഫൊറോന കൗണ്‍സിലുകളിൽ നിന്നും തെരഞ്ഞെടുക്കപ്പെട്ട അൽമായ പ്രതിനിധികളും വൈദിക, സന്യാസ പ്രതിനിധികളും അൽമായ സംഘടനാ പ്രതിനിധികളുമടക്കം 177 അംഗങ്ങൾ ഉൾപ്പെടുന്ന ഉന്നതാധികാര സമിതിയാണ് രൂപത പാറസ്റ്റൽ കൗണ്‍സിൽ. പുതിയ പാസ്റ്ററൽ കൗണ്‍സിൽ സെക്രട്ടറിയായി ജോസ് മാത്യു പുഞ്ചയിലിനേയും പതിനേഴ് അംഗ സ്റ്റാൻഡിംഗ് കമ്മിറ്റിയേയും സമ്മേളനം തെരഞ്ഞെടുത്തു. പിആർഒ സമിതിയംഗം സാലു ഏബ്രാഹം മേച്ചേരിൽ പ്രമേയം അവതരിപ്പിച്ചു. രൂപതാ വികാരി ജനറാൾ മോണ്‍. പോൾ മുണ്ടോളിക്കൽ, സിഞ്ചെല്ലൂസ് ഫാ. ജോസഫ് മുതിരക്കാലായിൽ, ഫാ. ജിനോജ് പാലത്തടത്തിൽ, ഫാ. സജി നെടുങ്കല്ലേൽ, ജോയി ചാച്ചിറ, സിജി ഇലഞ്ഞിക്കൽ, ബിജി കേളങ്ങാട്ടിൽ, എം.സി. സെബാസ്റ്റ്യൻ, നിഖിൽ ചൂണ്ടിയാങ്കൽ തുടങ്ങിയവർ പ്രസംഗിച്ചു.

സ്വച്ച് സര്‍വേക്ഷന്‍ ഗ്രാമീണ്‍ സര്‍വേ ഇന്നു മുതല്‍

കോഴിക്കോട്: മാലിന്യ സംസ്‌കരണത്തില്‍ സംസ്ഥാനം കൈവരിച്ച നേട്ടങ്ങള്‍ വിലയിരുത്തുന്നതിനുള്ള സ്വച്ച് സര്‍വേക്ഷന്‍ ഗ്രാമീണ്‍ സര്‍വേ ഇന്ന് ആരംഭിക്കും. സ്വച്ച് ഭാരത് മിഷന്‍ ഗ്രാമീണിന്‍റെ ഭാഗമായി രാജ്യത്ത് തെരഞ്ഞെടുത്ത 21,000 വില്ലേജുകളിലാണ് സര്‍വേ. കേരളത്തില്‍ 450 വില്ലേജുകളിലാണ് പരിശോധന. ഓരോ ജില്ലയിലും കുറഞ്ഞത് 20 വില്ലേജുകളില്‍ പരിശോധന നടത്തും. ജനസംഖ്യക്ക് ആനുപാതികമായി വില്ലേജുകളുടെ എണ്ണം കൂടും. വീടുകള്‍, തദ്ദേശഭരണ സ്ഥാപന ഓഫീസുകള്‍, സ്‌കൂളുകള്‍, അങ്കണവാടികള്‍, പൊതുസ്ഥലങ്ങള്‍, മാര്‍ക്കറ്റുകള്‍, ആരാധനാലയങ്ങള്‍, പ്രാഥമികാരോഗ്യ കേന്ദ്രങ്ങള്‍ എന്നിവിടങ്ങളിലെ മാലിന്യ സംസ്‌കരണ സംവിധാനങ്ങളും ശുചിത്വ നിലവാരവും സര്‍വേയുടെ ഭാഗമായി പരിശോധിക്കും. ഓരോ പഞ്ചായത്തിലെയും നിശ്ചിത എണ്ണം വീടുകളില്‍ സംഘം നേരിട്ടെത്തിയാണ് പരിശോധന നടത്തുക. വീടുകളിലെ ശുചിമുറി സൗകര്യം, കൈകഴുകാനുള്ള സൗകര്യം, കുടിവെള്ള സൗകര്യം, ഗാര്‍ഹിക മാലിന്യ സംസ്‌കരണ ഉപാധികള്‍, മലിനജല സംസ്‌കരണ സോക്കേജ് പിറ്റ് തുടങ്ങിയവ പരിശോധിക്കും. ജനഹിതം നേരിട്ടറിയാന്‍ സിറ്റിസണ്‍ ഫീഡ്ബാക്ക് മൊബൈല്‍ ആപ്ലിക്കേഷന്‍ സ്വച്ച് സര്‍വേക്ഷന്‍ ഗ്രാമീണ്‍ 2025 ഉപയോഗപ്പെടുത്തും. വൃത്തി കുറഞ്ഞതും സൗകര്യങ്ങള്‍ ഇല്ലാത്തതുമായ സ്ഥലങ്ങളില്‍ അവ ലഭ്യമാക്കാനുള്ള പദ്ധതി തയാറാക്കുകയാണ് സര്‍വേയുടെ ലക്ഷ്യം.

ഉന്നത വിജയം ‌നേടിയവരെ ആദരിച്ചു

കോടഞ്ചേരി:തെയ്യപ്പാറ സാംസ്‌കാരിക നിലയത്തിൽ ചേർന്ന ഗ്രാമസഭയിൽ തെയ്യപ്പറയിലെ കലാസാംസ്‌കാരിക, കായിക, മേഖലയിൽ ജേതാവായവരെയും, എൽഎസ്എസ് , യുഎസ്എസ് , എസ്എസ്എൽസി പരീക്ഷകളിൽ ഉന്നത വിജയം നേടിയവരെ പഞ്ചായത്ത് പ്രസിഡന്‍റ് അലക്സ്‌ തോമസ് ചെമ്പകശ്ശേരി മൊമെന്‍റൊ നൽകി ആദരിച്ചു. വാർഡ് മെമ്പർ രാജു തേൻമല അധ്യക്ഷതവഹിച്ചു. അബൂബക്കർ മൗലവി, അബ്രഹാം വള്ളിയാം പൊയ്കയിൽ അബ്രഹാം താണേലിമലിൽ, രാജേശ്വരി വിനോദ് എന്നിവർ പ്രസംഗിച്ചു.

വിദ്യാര്‍ഥികൾക്കുള്ള അനുമോദനവും പുരസ്‌കാര വിതരണവും

കോഴിക്കോട്: വിദ്യാര്‍ഥികള്‍ നീതിക്കു വേണ്ടി നിലകൊള്ളുകയും നന്മക്കായി ശബ്ദമുയർത്തുകയും ചെയ്യണമെന്ന് മന്ത്രി പി.എ. മുഹമ്മദ് റിയാസ്. എലത്തൂര്‍ നിയോജക മണ്ഡലത്തില്‍നിന്ന് എസ്എസ്എല്‍സി, പ്ലസ് ടു പരീക്ഷകളിൽ മുഴുവന്‍ വിഷയങ്ങള്‍ക്കും എ പ്ലസ് നേടിയവരെ അനുമോദിക്കുന്ന 'ടോപ്പേഴ്‌സ് മീറ്റ് 2025' ഓൺലൈനായി ഉദ്ഘാടനം ചെയ്യുകയായിരുന്നു മന്ത്രി. പ്രതിസന്ധികളെ ആത്മവിശ്വാസത്തോടെ നേരിടാനും അതിനെ മറികടക്കാനും വിദ്യാർത്ഥികൾക്ക് സാധിക്കണമെന്നും മന്ത്രി പറഞ്ഞു. വിദ്യാര്‍ഥികൾക്കുള്ള അനുമോദനവും പുരസ്‌കാര വിതരണവും വൈദ്യുതി വകുപ്പ് മന്ത്രി കെ. കൃഷ്ണന്‍കുട്ടി നിർവഹിച്ചു. ആര്‍ട്ടിഫിഷ്യല്‍ ഇന്റലിജന്‍സിന്റെ വരവ് വിദ്യാഭ്യാസ സമ്പ്രദായത്തില്‍ വലിയ മാറ്റം കൊണ്ടുവന്നെന്നും വിദ്യാർത്ഥികൾ ഇതിന്റെ സാധ്യതകള്‍ ഉപയോഗപ്പെടുത്തണമെന്നും അദ്ദേഹം പറഞ്ഞു. കുട്ടികള്‍ ചോദ്യങ്ങള്‍ ചോദിക്കുന്നവരാവണമെന്നും വിവിധ മേഖലകളില്‍ ഉന്നതിയിലെത്തിയവരുടെ ജീവിതം പ്രചോദനമാക്കണമെന്നും മന്ത്രി കൂട്ടിച്ചേർത്തു. സമ്പൂര്‍ണ വിജയം നേടിയ വിദ്യാലയങ്ങളെ ജില്ലാ പഞ്ചായത്ത് പ്രസിഡന്‍റ് ഷീജ ശശി ആദരിച്ചു.

പ്രകൃതിസംരക്ഷണം അവഗണിക്കാനാവില്ല: ‌മന്ത്രി എ.കെ. ശശീന്ദ്രൻ

കോഴിക്കോട്: ദുരന്തങ്ങൾ ആവർത്തിക്കുന്ന സാഹചര്യത്തിൽ പ്രകൃതിസംരക്ഷണത്തെ അവഗണിക്കാൻ കഴിയില്ലെന്ന്‌ മന്ത്രി എ.കെ. ശശീന്ദ്രൻ. മനുഷ്യ-വന്യജീവി സംഘർഷ ലഘൂകരണത്തിന്‍റെ ഭാഗമായി വനം വകുപ്പ് നടപ്പാക്കിയ വിത്തുണ്ടകളുടെ പ്രചാരണ പദ്ധതിയായ വിത്തൂട്ടിന്‍റെ സംസ്‌ഥാനതല ഉദ്ഘാടനം കാക്കവയൽ വനപർവ്വം ഇക്കോടൂറിസം സെന്‍ററിൽ നിർവഹിക്കുകയായിരുന്നു മന്ത്രി. സർക്കാരിന്‍റെ പുതിയ വനവത്കരണ നയത്തിന്‍റെ ഭാഗമായി മനുഷ്യ- വന്യജീവി സംഘർഷങ്ങൾ കുറക്കുന്നതിനായി മൃഗങ്ങൾക്കാവശ്യമായ ഭക്ഷണവും ജലവും വനത്തിനുള്ളിൽ തന്നെ ലഭ്യമാക്കുക, അധിനിവേശ സസ്യങ്ങളുടെ ബാഹുല്യം കുറക്കുക, വന്യജീവി ആക്രമണങ്ങളിൽ ആശ്വാസ നടപടികൾ വേഗത്തിലാക്കുക എന്നീ നടപടികൾ സ്വീകരിക്കുമെന്നും മന്ത്രി അറിയിച്ചു.

ജെസിഐ കൂരാച്ചുണ്ടിന് അവാർഡ്

കൂരാച്ചുണ്ട്: ഇടവേളകളില്ലാതെ രക്തദാന ക്യാമ്പുകൾ സംഘടിപ്പിച്ച് മാതൃക പ്രവർത്തനങ്ങൾക്ക് നേതൃത്വം നൽകിവരുന്ന ജെസിഐ കൂരാച്ചുണ്ട് ചാപ്റ്റർ, യൂത്ത് കോൺഗ്രസ്‌ കൂരാച്ചുണ്ട് മണ്ഡലം കമ്മിറ്റി ഏർപ്പെടുത്തിയ ബ്ലഡ് യൂണിറ്റി അവാർഡിന് അർഹരായി. ആശുപത്രികളുമായി സഹകരിച്ചാണ് ജെസിഐ രക്തദാന ക്യാമ്പുകൾ സംഘടിപ്പിക്കുന്നത്. ഓരോ മൂന്ന് മാസ ഇടവേളകളിൽ ക്യാമ്പുകൾ സംഘടിപ്പിച്ചു വരുന്നുണ്ട്. ഇതുവരെ പതിനഞ്ചിലധികം ക്യാമ്പുകൾ സംഘടിപ്പിച്ചിട്ടുണ്ട്. 50 മുതൽ 100 വരെ ആളുകളാണ് ഓരോ ക്യാമ്പിലും പങ്കെടുക്കുന്നത്. ഏകദേശം ആയിരം യൂണിറ്റിലധികം രക്തം കഴിഞ്ഞ മൂന്ന് വർഷം കൊണ്ട് കൈമാറിയിട്ടുണ്ടെന്നും യൂത്ത് കോൺഗ്രസ്‌ മണ്ഡലം പ്രസിഡന്‍റ് നിസാം കക്കയം, ജോസ്ബിൻ കുര്യാക്കോസ് എന്നിവർ അറിയിച്ചു. 22നു കൂരാച്ചുണ്ടിൽ നടക്കുന്ന ചടങ്ങിൽ പുരസ്കാരം കൈമാറും.

സെൻട്രൽ മാർക്കറ്റ് എസ്ടിയു കൺവൻഷൻ

കോഴിക്കോട്: അഴിമതിയും കെടുകാര്യസ്ഥതയും കോഴിക്കോട് കോർപറേഷന്‍റെ മുഖമുദ്രയായി അധപതിച്ചിരിക്കുകയാണെന്ന് കോർപറേഷൻ കൗൺസിൽ മുസ്ലിം ലീഗ് പാർലമെന്‍ററി പാർട്ടി ലീഡർ കെ.മൊയ്തീൻ കോയ പറഞ്ഞു. ദീർഘവീക്ഷണമില്ലാതെയാണ് മിക്ക പദ്ധതികളും ആസൂത്രണം ചെയ്യുന്നത്. അത് കൊണ്ട് നാലര വർഷത്തെ ഭരണത്തിനിടെ പുതിയ പദ്ധതികളൊന്നും നടപ്പാക്കാൻകഴിയാത്തതെന്നും അദ്ദേഹം ചൂണ്ടിക്കാട്ടി. സെൻട്രൽ മാർക്കറ്റ് എസ്ടിയു കൺവൻഷൻ ഉദ്ഘാടനം ചെയ്യുകയായിരുന്നു അദ്ദേഹം. പാർക്കിംഗ്പ്ലാസ പദ്ധതികൾ തുടങ്ങാൻ കഴിയുന്നില്ല. മൊഫ്യുസിൽ ബസ് സ്റ്റാന്‍ഡ് പുനർ നിർമ്മാണവും ലയൺസ് പാർക്ക് നിർമ്മാണവും അനിശ്ചിതത്വത്തിലാണ്. സെൻ ട്രൽ മാർക്കറ്റ് നിർമ്മാണം സമയബന്ധിതമായി പ്രവൃത്തി തീർക്കാൻ നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു. പ്രസിഡന്‍റ കെ.പി. അബദുൽ കരീം= അധ്യക്ഷത വഹിച്ചു.

ബീച്ച് ഫയർ സ്‌റ്റേഷൻ പുനസ്ഥാപിക്കണമെന്ന് ഫയർ സർവീസ് അസോസിയേഷൻ

കോഴിക്കോട് : ബീച്ച് ഫയർ സ്‌റ്റേഷൻ പുനസ്ഥാപിക്കണമെന്ന് കേരള ഫയർ സർവീസ് അസോസിയേഷൻ (കെഎഫ്എസ്എ). അഗ്നിരക്ഷാ സേനയുടെ അംഗബലം വർധിപ്പിക്കണമെന്നും അഗ്നി രക്ഷാ നിലയത്തിൽ രണ്ട് അസി. സ്‌റ്റേഷൻ ഓഫിസർ തസ്തിക നടപ്പിലാക്കണമെന്നും സ്‌റ്റേഷൻ ഓഫിസർ ഇല്ലാത്ത സ്ഥലങ്ങളിൽ തസ്തിക സൃഷ്ടിക്കണമെന്നും 42 ാം സംസ്ഥാന സമ്മേളനം സർക്കാരിനോടാവശ്യപ്പെട്ടു. പൊതുസമ്മേളനം കോവൂർ പി. കൃഷ്ണപിള്ള ഹാളിൽ മന്ത്രി കടന്നപ്പള്ളി രാമചന്ദ്രൻ ഉദ്ഘാടനം ചെയ്തു. സംസ്ഥാന പ്രസിഡന്‍റ് എ. ഷജിൽ കുമാർ അധ്യക്ഷനായി. അഹമ്മദ് ദേവർകോവിൽ എംഎൽഎ രാഷ്ട്രപതിയുടെ മെഡൽ നേടിയ ജീവനക്കാരെ ആദരിച്ചു. കോഴിക്കോട് റീജ്യണൽ ഫയർ ഓഫിസർ ടി. രജീഷ്, ജനറൽ സെക്രട്ടറി വി.പ്രണവ്, സംഘാടക സമിതി ചെയർമാൻ എസ്.ബി സജിത്, ട്രഷറർ ബൈജു കോട്ടായി, ജോ. സെക്രട്ടറി എം.എസ്. ബിജോയ്, ടി. സജിത്, എം.പി ധനീഷ് കുമാർ, ഇ.കെ ആഷിഫ്, കെ. സജിത്, ടി.രമേഷ് കുമാർ, പി.എ സജാദ്, പി. സജു, എസ്.എസ് ഷൈൻ സംസാരിച്ചു. പ്ലസ് ടു പരീക്ഷയിലെ ഉന്നത വിജയിക്കുള്ള വിനോദ്കുമാർ എൻഡോവ്‌മെന്‍റിന് എസ്. ശ്രദ്ധ അർഹയായി.

വന്യമൃഗ ശല്യത്തിനെതിരേ പ്രതിരോധ സേന രൂപീകരിക്കും

കൂരാച്ചുണ്ട്: വന്യജീവികളിൽ നിന്നും കർഷകരെ രക്ഷിക്കാൻ പ്രതിരോധ സേന രൂപീകരിക്കുമെന്ന് കൂരാച്ചുണ്ട് വ്യാപാര ഹാളിൽ നടന്ന കർഷക സംഘം കൂരാച്ചുണ്ട് മേഖലാ സമ്മേളനം മുന്നറിയിപ്പ് നൽകി. ആൾ താമസമില്ലാതെ ഒഴിഞ്ഞുകിടക്കുന്ന കൃഷിയിടങ്ങളിൽ അടിക്കാടുകൾ വെട്ടിത്തെളിക്കാൻ പഞ്ചായത്ത് നടപടി സ്വീകരിക്കണം. ഇത് വന്യജീവികളുടെ താവളമായി മാറിയിരിക്കുകയാണ്. ഇക്കാര്യമുന്നയിച്ച് സമര പ്രക്ഷോഭങ്ങൾ ആരംഭിക്കാനും സമ്മേളനം തീരുമാനിച്ചു. കർഷക സംഘം സംസ്ഥാന വൈസ് പ്രസിഡന്‍റ് എം. മെഹബൂബ് ഉദ്ഘാടനം ചെയ്തു. ജോസ് ചെരിയൻ അധ്യക്ഷത വഹിച്ചു. മേഖലാ സെക്രട്ടറി എൻ.കെ. കുഞ്ഞമ്മദ് പ്രവർത്തന റിപ്പോർട്ട് അവതരിപ്പിച്ചു. ഏരിയ പ്രസിഡന്‍റ് ശശി കോലാത്ത്, ആക്ടിംഗ് സെക്രടറി ടി.എം. ദാമോദരൻ, കോട്ടൂർ പഞ്ചായത്ത് പ്രസിഡന്‍റ് സി.എച്ച് സുരേഷ് എന്നിവർ പ്രസംഗിച്ചു. ഭാരവാഹികളായി മാത്യു ആന്‍റോ (പ്രസിഡന്‍റ്), എൻ.കെ കുഞ്ഞമ്മദ് (സെക്രട്ടറി), ഷാജു കുമ്പുക്കൽ, എ.സി. രാമകൃഷ്ണൻ, എ.സി. ഷീബ, ഷാജു ചുവപ്പുങ്കൽ ( വൈസ് പ്രസിഡന്‍റുമാർ), ജോസ് ചെരിയൻ (ട്രഷറർ).

പേരാമ്പ്രയിൽ വീട്ടുമുറ്റത്ത് നിർത്തിയിട്ടിരുന്ന സ്‌കൂട്ടർ കത്തി നശിച്ച നിലയിൽ

പേരാമ്പ്ര: പേരാമ്പ്രയില്‍ വീട്ടുമുറ്റത്ത് നിര്‍ത്തിയിട്ട സ്‌കൂട്ടര്‍ കത്തി നശിച്ചു. ഗ്രാമ പഞ്ചായത്തിലെ ആറാം വാര്‍ഡില്‍ വെള്ളിയോടന്‍കണ്ടി വി.പി. സനിലിന്‍റെ വീട്ടുമുറ്റത്ത് നിര്‍ത്തിയിട്ടിരുന്ന സ്‌കൂട്ടറാണ് കത്തി നശിച്ചത്. മൂന്ന് മാസം മുന്‍പ് വാങ്ങിയ യമഹ കമ്പനയുടെ ഇരുചക്ര വാഹനമാണ് ഇന്നലെ പുലര്‍ച്ചെ മൂന്ന് മണിയോടെ കത്തി നശിച്ചത്. പുറത്ത് അസാധാരണമായ വെളിച്ചം കണ്ട് വീട്ടുകാര്‍ വാതില്‍ തുറന്ന് നോക്കിയപ്പോള്‍ സ്‌കൂട്ടര്‍ ആളിക്കത്തുന്നതാണ് കണ്ടത്. ഉടന്‍ പരിസരവാസികളെ വിവരം അറിയിച്ച് തീ അണക്കാന്‍ ശ്രമിച്ചെങ്കിലും കടുത്ത ചൂട് കാരണം അണയ്ക്കാന്‍ സാധിച്ചില്ല. സ്‌കൂട്ടര്‍ പൂര്‍ണമായും കത്തി നശിച്ചു. പേരാമ്പ്ര പോലീസ് പോലീസ് സ്ഥലത്തെത്തി പരിശോധന നടത്തി. സാമൂഹ്യ വിരുദ്ധർ കത്തിച്ചതാണെന്ന സംശയമുയരുന്നുണ്ട്. സ്കൂട്ടർ രാത്രിയിൽ കത്തിച്ച സാമൂഹിക വിരുദ്ധരെ എത്രയും പെട്ടെന്ന് നിയമത്തിന് മുന്നിൽ കൊണ്ട് വരണമെന്ന് പേരാമ്പ്ര പഞ്ചായത്ത് മെമ്പറും സിപിഐപേരാമ്പ്ര മണ്ഡലം കമ്മിറ്റി അംഗവുമായ വിനോദ് തിരുവോത്തും കിസാൻസഭ ജില്ലാ കമ്മിറ്റി മെമ്പർ ഗോപാലകൃഷ്ണൻ തണ്ടോറപ്പാറയും അധികൃതരോടാവശ്യപ്പെട്ടു.

വിലക്കിന് പുല്ലുവില;തിരികക്കയം വെള്ളച്ചാട്ടം കാണാൻ സന്ദർശക പ്രവാഹം

നാദാപുരം: ജില്ല ഭരണകൂടത്തിന്‍റെ വിലക്കിന് പുല്ല് വില. വാണിമേൽ പഞ്ചായത്തിലെ തിരികക്കയം വെള്ളച്ചാട്ടം കാണാൻ എത്തുന്നവർ നിരവധി. ജില്ലയിൽ മഴ ശക്തമായതോടെ റെഡ് അലർട്ട് പ്രഖ്യാപിക്കുന്ന ദിവസങ്ങളിൽ വെള്ളച്ചാട്ടം കാണാനും വിനോദ സഞ്ചാര കേന്ദ്രങ്ങൾ സന്ദർശിക്കുന്നതിനും പുഴയിൽ ഇറങ്ങുന്നതിനും വിലക്കുള്ളപ്പോഴാണ്അമ്പത് മീറ്ററോളം ഉയരത്തിൽ നിന്നുള്ള വെള്ളച്ചാട്ടം കാണാൻ ആളുകളെത്തുന്നത്. അവധി ദിവസമായ ഇന്നലെ ജില്ലയുടെ പല ഭാഗങ്ങളിൽ നിന്നാണ് യുവാക്കളും യുവതികളും ഇവിടെ എത്തിയത്. ശക്തമായ വെള്ളച്ചാട്ടത്തിൽ ഇറങ്ങി കുളിക്കുന്നവരും ഇതിലുണ്ട്. പ്രദേശത്തെ ഭൂമി ശാസ്ത്ര ഘടന അറിയാത്തവർ വെള്ളച്ചാട്ടത്തിലിറങ്ങി മരണപ്പെട്ട സംഭവവും തിരികക്കയത്തുണ്ട്. വനത്തിനുള്ളിൽ ശക്തമായ മഴയുണ്ടായാൽ അപ്രതീക്ഷിതമായാണ് വെള്ളച്ചാട്ടത്തിന് ശക്തി കൂടുന്നത്. ഇത് പലപ്പോഴും സന്ദർശകരെ അപകടത്തിൽപെടുത്താറുണ്ട്. എന്നാൽ സർക്കാരോ പഞ്ചായത്തോ വേണ്ട സുരക്ഷകൾ ഒന്നും തന്നെ ഇവിടെ ഒരുക്കിയിട്ടില്ല. പ്രദേശവാസികൾ വിലക്കിയാലും മുഖവിലക്കെടുക്കാതെയാണ് ജനങ്ങൾ ഇവിടെ എത്തുന്നത്. നാട്ടുകാർ പോലീസിനെ അറിയിച്ചാൽ അവർ വന്ന് സഞ്ചാരികളെ പറഞ്ഞ് വിട്ടാലും വീണ്ടും തിരികെയെത്തുമെന്നാണ് നാട്ടുകാർ പറയുന്നത്.

മഴ:യാത്രകള്‍ ഒഴിവാക്കണം

കോഴിക്കോട്: ജില്ലയിൽ കനത്തമഴ തുടരുന്നതിനാലും റെഡ് അലർട്ട് പ്രഖ്യാപിച്ച സാഹചര്യത്തിലും ക്വാറികളുടെ പ്രവർത്തനം, മണ്ണെടുക്കൽ, ഖനനം, കിണർ നിർമാണ പ്രവർത്തനങ്ങൾ, മണലെടുപ്പ് എന്നിവ താൽക്കാലികമായി നിർത്തിവയ്ക്കാൻ ജില്ലാകളക്ടറുടെ നിര്‍ദേശം. വെള്ളച്ചാട്ടങ്ങൾ, നദീ തീരങ്ങൾ, ബീച്ചുകൾ ഉൾപ്പെടെ എല്ലാ ജലാശയങ്ങളിലേക്കുമുള്ള പ്രവേശനം പൂർണമായി നിരോധിച്ചു. ഉരുൾപൊട്ടൽ ഭീഷണി നിലനിൽക്കുന്ന മലയോര പ്രദേശങ്ങൾ, ചുരം മേഖലകൾ എന്നിവിടങ്ങളിലേക്കു രാത്രി ഏഴുമുതല്‍ രാവിലെ ഏഴുവരെ അടിയന്തര യാത്രകൾ അല്ലാത്തവ ഒഴിവാക്കണമെന്നും ഉത്തരവിൽ പറഞ്ഞു.

മെഡി. കോളേജിൽ ഓൺലൈനായി ഒപി ടിക്കറ്റുകൾ

കോഴിക്കോട്: ഗവ.മെഡിക്കൽ കോളജിൽ ചികിത്സ തേടാൻ ഇ-ഹെൽത്ത് വഴി ഓൺലൈനായി ഒപി ടിക്കറ്റുകൾ ഇന്ന് മുതല്‍ ലഭിക്കും. ഇതുവരെ മെഡിക്കൽ കോളജിൽ ഇ-ഹെൽത്ത് രജിസ്ട്രേഷൻ മാത്രമായിരുന്നു നടന്നിരുന്നത്. മെഡിക്കൽ കോളജ് ആശുപത്രി ഒപിയിലാണ് ട്രയൽ റൺ നടത്തുകയെന്ന് മെഡിക്കൽ കോളജിലെ ഇ-ഹെൽത്ത് നോഡൽ ഓഫിസർ ഡോ. അബ്ദുൽ ബാസിത് അറിയിച്ചു. മൊബൈൽ ഫോണിലൂടെ സ്വന്തമായോ അക്ഷയ കൗണ്ടറുകൾ വഴിയോ ഒപി ടിക്കറ്റ് രജിസ്റ്റർ ചെയ്ത് 10 രൂപ ഫീസ് അടച്ചാൽ ക്യുആർ കോഡും നമ്പറും ലഭിക്കും. ഇതുമായി മെഡിക്കൽ കോളജ് ഒപിയിലെ പ്രത്യേകം സജ്ജീകരിച്ച കൗണ്ടറിലെത്തിയാൽ ഒപി ശീട്ട് പ്രിന്‍റ് ചെയ്ത് ലഭിക്കും. തുടർന്ന് ചികിത്സതേടാം. എന്നാൽ സാധാരണ പോലെ കൗണ്ടറുകളിൽ നേരിട്ടും ഒപി ടിക്കറ്റ് ലഭിക്കും. രജിസ്‌ട്രേഷൻ പൂർത്തിയാക്കി ആശുപത്രിയിലേക്ക് വരുന്നത് കാരണം ഒപി കൗണ്ടറിൽ കാത്തുനിൽക്കാതെ വേഗത്തിൽ ഒപി ടിക്കറ്റ് ലഭിക്കും. മെഡിസിൻ, സർജറി, എല്ലുരോഗ വിഭാഗം, ഓഫ്താൽമോളജി, ഇ.എൻ.ടി, ത്വക്ക്‌രോഗ വിഭാഗം എന്നിവിടങ്ങളിലേക്കുള്ള ഒപി ടിക്കറ്റാണ് ലഭിക്കുക. ഡോക്ടർമാർക്ക് ആവശ്യത്തിന് കമ്പ്യൂട്ടറുകൾ ഇല്ലാത്തതിനാൽ മരുന്ന് കുറിപ്പടികൾ പഴയപടി തുടരും. പരിശോധന, ഫാർമസി, ലാബ് തുടങ്ങിയവയും ഇ-ഹെൽത്തുമായി ബന്ധിപ്പിച്ചാൽ മാത്രമേ സംവിധാനത്തിന്‍റെ ഗുണം രോഗികൾക്ക് പൂർണമായും ലഭിക്കൂ. ഇതിനായുള്ള നടപടിക്രമങ്ങള്‍ ഉടന്‍ പൂര്‍ത്തിയാക്കും. നിലവിൽ സൂപ്പർ സ്‌പെഷ്യാൽറ്റി ആശുപത്രിയിലും ചെസ്റ്റ് ആശുപത്രിയിലും ഇ-ഹെൽത്ത് ആരംഭിച്ചിട്ടില്ല.

മഴ കനത്തതോടെ മലയോര ഹൈവേ നിർമാണ മേഖലയിൽ മണ്ണിടിച്ചിൽ ഭീഷണി

കൂരാച്ചുണ്ട്: രണ്ടുദിവസമായി തുടരെ പെയ്യുന്ന മഴ വീണ്ടും ശക്തമായതോടെ മലയോര ഹൈവേ നിർമാണ പ്രവർത്തി നടന്നുവരുന്ന ഇരുപത്തെട്ടാംമൈൽ - തലയാട് റോഡിലെ നിരവധിയിടങ്ങളിൽ മണ്ണിടിച്ചിൽ ഭീഷണി. റോഡിന് വീതി കൂട്ടാൻ ഇടിച്ചു നിരത്തിയ ഭാഗങ്ങളിൽ ഉയർന്നു നിൽക്കുന്ന തിണ്ട് പലയിടങ്ങളിലും ഇടിയാനുള്ള സാധ്യതയുണ്ട്. ആഴ്ചകൾക്കു മുൻപാണ് റോഡിന്‍റെ ഇരുപത്താറാംമൈൽ ഭാഗത്ത് മണ്ണിടിച്ചിൽ ഉണ്ടായത്. ഇതേ തുടർന്ന് ഒരാഴ്ചയോളം ഗതാഗതം തടസം ഉണ്ടായിരുന്നു. റോഡിലേക്ക് മണ്ണിടിഞ്ഞത് പലയിടത്തും നീക്കം ചെയ്യാതെ കിടക്കുന്നത് യാത്രാ തടസമായി മാറിയിട്ടുണ്ട്. കക്കയം, കരിയാത്തുംപാറ, കല്ലാനോട്, കൂരാച്ചുണ്ട് നിന്നും തലയാടു വഴി പോകുന്ന നിരവധി ബസുകൾ അടക്കമുള്ള വാഹനങ്ങൾ ഇതുവഴിയാണ് കടന്നു പോകുന്നത്. കനത്ത മഴ പെയ്യുന്ന സമയങ്ങളിൽ പല യാത്രക്കാരും ഇതുവഴി കടന്നുപോകാൻ ഭയപ്പെടുന്നുണ്ട്. അനുദിനം ഇതുവഴി യാത്ര ചെയ്യുന്ന ഉദ്യോഗസ്ഥരും വിദ്യാർഥികൾ അടക്കമുള്ളവർ പലരും ഏറെ ബുദ്ധിമുട്ടുന്നുണ്ട്. ഇരുപത്തേഴാം മൈലിൽ നിന്നും തലയാടിനുള്ള കാലങ്ങൾ പഴക്കമുള്ള ബൈപാസ് റോഡ് ഗതാഗത യോഗ്യമാക്കിയാൽ പ്രതിസന്ധി ഘട്ടങ്ങളിൽ യാത്രയ്ക്ക് സഹായകരമാകുമെന്നാണ് വ്യാപകമായി അഭിപ്രായം ഉയരുന്നത്.

ആദരാഞ്ജലി അർപ്പിച്ചു

കോഴിക്കോട്: ചെറുവണ്ണൂർ തിരുഹൃദയ ഇടവകയുടെ നേതൃത്വത്തിൽ അഹമ്മദാബാദ് വിമാന അപകടത്തിൽ മരണമടഞ്ഞവർക്കായി പ്രാർഥന ശുശ്രൂഷ നടത്തുകയും ആദരാഞ്ജലികൾ അർപ്പിക്കുകയും ചെയ്തു. വികാരി ഫാ. ജിജു പള്ളിപ്പറമ്പിൽ, സഹവികാരി ഫാ. ജെർലിൻ ജോർജ്, വെനറിനി പ്രൊവിൻഷ്യൽ മദർ സിസി, മഞ്ജു ഫാൻസിസ്, അലോഷ്യസ് തെക്കൻ, ജീസ് ആൽബർട്ട്, അലക്സാണ്ടർ, ട്രീസ ആൽബർട്ട് എന്നിവർ നേതൃത്വം നൽകി.

മാനാഞ്ചിറ - വെള്ളിമാടുകുന്ന് പാത പൂർത്തിയാക്കുമെന്ന്

കോഴിക്കോട്: മലാപ്പറമ്പ് മുതല്‍ മുത്തങ്ങ വരെയുള്ള റോഡ് നാലുവരിപ്പാതയായി വികസിപ്പിക്കാന്‍ ദേശീയ ഗതാഗത ഹൈവേ മന്ത്രാലയം തീരുമാനിച്ച സാഹചര്യത്തിലാണ് മാനാഞ്ചിറ-വെള്ളിമാട്കുന്ന് റോഡ് വികസനപദ്ധതി മലാപ്പറമ്പ് വരെ തല്‍ക്കാലം പരിമിതപ്പെടുത്തേണ്ടി വന്നതെന്ന് മന്ത്രി പി.എ മുഹമ്മദ് റിയാസ് പറഞ്ഞു. സീനിയര്‍ ജേണലിസ്റ്റ് ഫോറം ജില്ലാ കമ്മിറ്റിയുടെ ആഭിമുഖ്യത്തില്‍ ഡിസംബറില്‍ കോഴിക്കോട്ട് നടക്കുന്ന മലബാര്‍ എക്കണോമിക് സമ്മിറ്റിന്റെ ലോഗോ പ്രകാശനം കാലിക്കറ്റ് പ്രസ്‌ക്ലബ്ബ് ഹാളില്‍ നിര്‍വഹിക്കുകയായിരുന്നു അദ്ദേഹം.മാനാഞ്ചിറ-മലാപ്പറമ്പ് റോഡ് വികസനം മുടങ്ങാതിരിക്കാൻ പെട്ടെന്ന് തന്നെ നടപടി സ്വീകരിക്കുകയാണ്. അല്ലാത്തപക്ഷം അതിനും ദീര്‍ഘമായ കാത്തിരിപ്പ് ആവശ്യമായി വരും. മലാപ്പറമ്പ്-വെള്ളിമാട്കുന്ന് യാഥാര്‍ത്ഥ്യമാക്കണമെന്നാണ് എല്ലാവരുടെയും അഭിപ്രായം. അതിനായി കേന്ദ്ര ഗതാഗതമന്ത്രാലയവുമായി ചര്‍ച്ച നടത്തിവരികയാണെന്നും മന്ത്രി പറഞ്ഞു. ചടങ്ങില്‍ സീനിയര്‍ ജേണലിസ്റ്റ് ഫോറം ജില്ലാ പ്രസിഡന്‍റ് പി.പി അബൂബക്കര്‍ അധ്യക്ഷനായി.

ആശുപത്രിയിൽ നിർത്തിയിട്ട സ്കൂട്ടർ മോഷണം പോയി

മുക്കം: ആശുപത്രിയിൽ ബന്ധുവിനെ കാണാനെത്തിയ യുവതിയുടെ സ്കൂട്ടർ മോഷണം പോയി. കഴിഞ്ഞ വ്യാഴാഴ്ച ഉച്ചയ്ക്ക് ഒന്നരയോടെ കെഎംസിടി ആശുപത്രിയിലാണ് സംഭവം. ചാത്തമംഗലം എൻഐടി പലനിൽക്കും കണ്ടിയിൽ ജലീലിന്‍റെ ഭാര്യ ചികിൽസയിലിരിക്കുന്ന ബന്ധുവിനെ കാണാനായാണ് ആശുപത്രിയിൽ എത്തിയത്. പാർക്കിംഗ് ഏരിയായിൽ വണ്ടി നിർത്തി പോയപ്പോൾ താക്കോൽ എടുക്കാൻ മറന്നു പോയി. തിരിച്ചെത്തിയപ്പോൾ വണ്ടി കാണാതായതിനെ തുടർന്ന് നടത്തിയ അന്വേഷണത്തിനിടെ സിസിടിവി പരിശോധിച്ചതോടെയാണ് യുവാവ് വണ്ടി കൊണ്ടു പോകുന്ന ദൃശ്യം ലഭിച്ചത്. തുടർന്ന് മുക്കം പോലീസിൽ പരാതി നൽകി.

പേരാമ്പ്ര മാർക്കറ്റിന്‍റെ ശോച്യാവസ്ഥക്ക്‌ പരിഹാരം കാണണം: കേരളാ കോൺഗ്രസ്‌

പേരാമ്പ്ര : വ്യാപാര മേഖലയുടെ സുപ്രധാന കേന്ദ്രമായ പേരാമ്പ്ര മാർക്കറ്റ് കെട്ടിടവും പരിസരവും ശോച്യാവസ്ഥയിലായി വർഷങ്ങൾ കഴിഞ്ഞിട്ടും പരിഹാരം കാണാത്തത് പ്രതിഷേധാർഹമാണെന്ന് കേരളാ കോൺഗ്രസ്‌ പേരാമ്പ്ര നിയോജക മണ്ഡലം കമ്മിറ്റി കുറ്റപ്പെടുത്തി. ദിവസേന നൂറു കണക്കിനു പേർ എത്തുന്ന മാർക്കറ്റും പരിസരവും അറ്റകുറ്റപണികൾ നടത്തുകയോ മഴക്കാലപൂർവ്വ ശുചീകരണം നടത്തുകയോ ചെയ്തിട്ടില്ല. അധികൃതർ ഈ കാര്യങ്ങളിൽ അടിയന്തിര ശ്രദ്ധ പതിപ്പിച്ചില്ലെങ്കിൽ പകർച്ച വ്യാധികൾ അടക്കം പടരാനുള്ള സാധ്യത വളരെ കൂടുതലാണെന്നും യോഗം വിലയിരുത്തി. 18 ന് കോഴിക്കോട് നടക്കുന്ന ജില്ലാ പ്രതിനിധി സമ്മേളനത്തിൽ നിയോജക മണ്ഡലത്തിൽ നിന്നും 100 പ്രതിനിധികളെ പങ്കെടുപ്പിക്കാൻ തീരുമാനിച്ചു. ജില്ലാ പ്രസിഡന്‍റ് പി.എം. ജോർജ് ഉദ്ഘാടനം ചെയ്തു. നിയോജക മണ്ഡലം പ്രസിഡന്‍റ് സുരേഷ് വാളൂർ അധ്യക്ഷത വഹിച്ചു. രാജീവ്‌ തോമസ്, വിജയൻ ചാത്തോത്ത്, ടി.പി. ചന്ദ്രൻ, ജോസ് ചെറുകാവിൽ, മനോജ്‌ കുമാർ പിങ്കി, നാസർ മുളിയങ്ങൽ, ഷീന പ്രകാശ്‌, രാഘവൻ ചേയങ്ങാട്, ഹമീദ് ആയിലാണ്ടി, ചന്ദ്രൻ നാളൂർ, ബെന്നി പെരുമ്പിൽ, കെ.കെ. മണി, ജോസഫ് ചക്കാല, ടി.പി. സവാദ്, ഒ.വി. സൂപ്പി, രാജൻ നാടുവിലക്കണ്ടി, വിജേഷ് തറവട്ടത്ത് തുടങ്ങിയവർ പ്രസംഗിച്ചു.

ഉന്നത വിജയികളെ ആദരിച്ചു

കൂരാച്ചുണ്ട്: കല്ലാനോട് സെന്‍റ് മേരീസ് ഹയർ സെക്കൻഡറി സ്കൂൾ പ്ലസ് ടു പരീക്ഷയിൽ ഉന്നത വിജയം നേടിയ വിദ്യാർഥികളെ ആദരിച്ചു. സ്കൂൾ മാനേജർ ഫാ. ജിനോ ചുണ്ടയിൽ ഉദ്ഘാടനം ചെയ്തു. പിടിഎ പ്രസിഡന്‍റ് ഷാജൻ കടുക്കൻമാക്കൽ അധ്യക്ഷത വഹിച്ചു. പ്രിൻസിപ്പൽ സജി ജെ കരോട്ട്, മുൻ പ്രിൻസിപ്പൽ ബിന്ദു മേരി പോൾ, അധ്യാപകരായ സജി മാത്യു, ആൻസി വർഗീസ്, വിനോദ് തോമസ്, ജെസ്റ്റിൻ ജോസ്, വിദ്യാർഥി പ്രതിനിധികളായ ആദി ജോ ഷിബി, റോസ് റിനൂപ് എന്നിവർ പ്രസംഗിച്ചു.

ആവേശമായി പ്രിയങ്ക ഗാന്ധി; കൊടിയത്തൂരിൽ വിവിധ പദ്ധതികൾ നാടിന് സമർപ്പിച്ചു

മുക്കം: ജില്ലയുടെ കിഴക്കൻ മലയോര മേഖലയിൽ ആവേശം വിതറി വയനാട് എംപി പ്രിയങ്ക ഗാന്ധി. കൊടിയത്തൂർ ഗ്രാമപഞ്ചായത്ത് പ്രവൃത്തി പൂർത്തീകരിച്ച വിവിധ പദ്ധതികളുടെ ഉദ്ഘാടനത്തിനായാണ് പ്രിയങ്ക ഗാന്ധി എത്തിയത്. പ്രിയ എംപിയെ കാണാനായി കനത്ത മഴയെയും അവഗണിച്ച് സ്ത്രീകളും കുട്ടികളും ഉൾപ്പെടെ നിരവധി പേരാണ് എത്തിയിരുന്നത്. ഗ്രാമപഞ്ചായത്ത് 20 ലക്ഷം രൂപ ചെലവഴിച്ച് പ്രവൃത്തി പൂർത്തീകരിച്ച കൊടിയത്തൂർ ജിഎംയുപി സ്കൂൾ ഓപ്പൺ ഓഡിറ്റോറിയം, 12.5 ലക്ഷം രൂപ ചെലവിൽ നവീകരിച്ച ചാലക്കൽ കുടിവെള്ള പദ്ധതി, 20 ലക്ഷത്തോളം രൂപ ചെലവിൽ നവീകരിച്ച പുറമണ്ണിൽ കുടിവെള്ള പദ്ധതി എന്നിവയുടെ ഉദ്ഘാടനം പ്രിയങ്ക ഗാന്ധി നിർവഹിച്ചു. ഗ്രാമപഞ്ചായത്തിലെ 13, 14, 16 വാർഡുകളിലെ നൂറോളം കുടുംബങ്ങൾക്ക് ആശ്രയമാവുന്ന പദ്ധതിയാണ് ചാലക്കൽ കുടിവെള്ള പദ്ധതി. വേനൽ കാലത്ത് കുടിവെള്ള ക്ഷാമം രൂക്ഷമായ പ്രദേശത്തെ കുടിവെള്ള ക്ഷാമം പരിഹരിക്കാൻ പദ്ധതി സഹായകരമാവും. ഗ്രാമ പഞ്ചായത്തിലെ 13, 14, 16 വാർഡുകളിലെ 150 ഓളം കുടുംബങ്ങൾക്ക് ആശ്വാസമാവുന്നതാണ് പുറമണ്ണിൽ കുടിവെള്ള പദ്ധതി. കൊടിയത്തൂർ ജിഎംയുപി സ്കൂളിൽ നടന്ന ചടങ്ങിൽ ഗ്രാമപഞ്ചായത്ത് പ്രസിഡന്‍റ് ദിവ്യ ഷിബു അധ്യക്ഷയായി. എസ്എസ്എൽസി, പ്ലസ് ടു പരീക്ഷകളിൽ മികച്ച വിജയം നേടിയ ചെറുവാടി ഗവ. ഹയർ സെക്കൻഡറി, പിടിഎം ഹയർ സെക്കൻഡറി, തോട്ടുമുക്കം സെന്‍റ് തോമസ് ഹയർ സെക്കൻഡറി എന്നീ സ്കൂളുകൾക്ക് ചടങ്ങിൽ എംപി ഉപഹാരങ്ങൾ നൽകി. ടി.സിദ്ധീഖ് എംഎൻഎ, പഞ്ചായത്ത് വൈസ് പ്രസിഡന്‍റ് ഫസൽ കൊടിയത്തൂർ, സ്റ്റാൻഡിംഗ് കമ്മിറ്റി അധ്യക്ഷരായ മറിയംകുട്ടി ഹസൻ, ആയിഷ ചേലപ്പുറം, ബാബു പൊലുകുന്ന്, പഞ്ചായത്തംഗം ടി.കെ അബൂബക്കർ, പഞ്ചായത്ത് സെക്രട്ടറി ടി. ആബിദ തുടങ്ങിയവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]