ADVERTISEMENT

ADVERTISEMENT

സ്വദേശ് മെഗാ ക്വിസ് മത്സര വിജയികള്‍

തിരുവമ്പാടി: കെപിഎസ്ടിഎ അക്കാദമിക് കൗണ്‍സില്‍ നേതൃത്വത്തിലുള്ള സ്വദേശ് മെഗാ ക്വിസ് 2025 മുക്കം ഉപജില്ലയില്‍ നടത്തി.

മുക്കം നഗരസഭ കൗണ്‍സിലര്‍ മധു ഉദ്ഘാടനം ചെയ്തു ഉപജില്ലാ പ്രസിഡന്‍റ് ജോളി ജോസഫ് അധ്യക്ഷനായി. സംസ്ഥാന നിര്‍വാഹക സമിതി അംഗം സുധീര്‍കുമാര്‍, ഉപജില്ല സെക്രട്ടറി ഇ.കെ.മുഹമ്മദ് അലി, വിദ്യാഭ്യാസ ജില്ല വൈസ് പ്രസിഡന്‍റ് സിറില്‍ ജോര്‍ജ്, വിദ്യാഭ്യാസ ജില്ല കൗണ്‍സിലര്‍മാരായ ബേബി സലീന, കെ.സി.അബ്ദുറബ്ബ്, ഉപജില്ല ജോ. സെക്രട്ടറി അര്‍ച്ചന, എക്‌സ്‌ക്യൂട്ടീവ് കമ്മറ്റിയംഗങ്ങളായ ബെറ്റ്‌സി മേരി, ഹര്‍ഷല്‍, രാധാകൃഷ്ണന്‍ എന്നിവര്‍ സംസാരിച്ചു.

എല്‍.പി.വിഭാഗം ഒന്നാം സ്ഥാനം: ഹാഷിര്‍ അഹമ്മദ് (ജി.എച്ച്.എസ്.എസ്. ചെറുവാടി) രണ്ടാം സ്ഥാനം: ലയ അന്ന ജോസഫ് (സെന്‍റ് ജോസഫ്‌സ് യു.പി.എസ്. പുല്ലൂരാംപാറ), യു.പി.വിഭാഗം ഒന്നാം സ്ഥാനം: അസില്‍ മുഹമ്മദ് (എ.എം.യു.പി.എസ്. കുമാരനെല്ലൂര്‍) രണ്ടാം സ്ഥാനം: മുഹമ്മദ് അമീന്‍ ഫൈസല്‍ (എ.യു.പി.എസ്. താഴെക്കോട്). ഹൈസ്‌കൂള്‍ വിഭാഗം ഒന്നാം സ്ഥാനം: എം.നഷ്‌വ (പി.ടി.എം.എച്ച്. എസ്.എസ്. കൊടിയത്തൂര്‍). രണ്ടാം സ്ഥാനം: മുഹമ്മദ് സയാന്‍ (പി.ടി.എം.എച്ച്. എസ്.എസ്. കൊടിയത്തൂര്‍).

ADVERTISEMENT

മുന്നറിയിപ്പ് ലംഘിച്ച് സഞ്ചാരികള്‍ അപകടസാധ്യതയുള്ള പുഴയിലിറങ്ങുന്നു

കൂരാച്ചുണ്ട്: കൂരാച്ചുണ്ട് പഞ്ചായത്ത് പരിധിയിലെ കക്കയം, കരിയാത്തുംപാറ മേഖലകളിലെ പെരുവണ്ണാമൂഴി ഡാം റിസര്‍വോയറിന്‍റെ ഭാഗമായുള്ള പുഴയില്‍ സന്ദര്‍ശകര്‍ ഇറങ്ങി അപകടങ്ങളുണ്ടാകുന്നത് പതിവായിട്ടും പഞ്ചായത്തിന്‍റെ നേതൃത്വത്തില്‍ ചേര്‍ന്ന സര്‍വ്വകക്ഷി യോഗത്തിലെടുത്ത തീരുമാനങ്ങള്‍ ഇന്നും കടലാസില്‍. സഞ്ചാരികള്‍ പുഴയില്‍ മുങ്ങി മരിക്കുന്നത് പതിവായതിനെ തുടര്‍ന്ന് മേഖലയില്‍ നിയന്ത്രങ്ങള്‍ ഏര്‍പ്പെടുത്താനാണ് സര്‍വകക്ഷി യോഗത്തില്‍ തീരുമാനിച്ചിരുന്നത്. ഇത് നടപ്പിലാകാത്തതിനാല്‍ അപകടങ്ങള്‍ ആവര്‍ത്തിക്കുകയാണ്. രണ്ടു മാസം മുമ്പ് കക്കയം മുപ്പതാംമൈല്‍ മേഖലയിലെ പുഴയില്‍ സുഹൃത്തുക്കളോടൊപ്പം കുളിക്കാനിറങ്ങിയ യുവാവ് അപകടത്തില്‍പെട്ട് മരണമടഞ്ഞിരുന്നു. തുടര്‍ന്ന് ഗ്രാമപഞ്ചായത്തിന്‍റെ നേതൃത്വത്തില്‍ സന്ദര്‍ശകര്‍ക്ക് നിയന്ത്രണമേര്‍പ്പെടുത്താന്‍ യോഗം ചേര്‍ന്ന് തീരുമാനമെടുത്തിരുന്നു. അപകട സാധ്യതകള്‍ ഏറെയുള്ള പുഴയില്‍ പ്രവേശനം നിരോധിച്ചിട്ടുണ്ടെങ്കിലും സന്ദര്‍ശകര്‍ ഇവയൊന്നും വകവയ്ക്കാതെ വെള്ളത്തില്‍ ഇറങ്ങുകയും അപകടത്തില്‍ പെടുകയും ചെയ്യുന്നത് പതിവാകുകയാണ്. റിസര്‍വോയര്‍ മേഖലകളില്‍ പ്രവേശിക്കുന്നത് നിരോധിച്ചുകൊണ്ടുള്ള ബോര്‍ഡുകള്‍ കൂടുതല്‍ സ്ഥലങ്ങളില്‍ സ്ഥാപിക്കാനാണ് യോഗത്തില്‍ തീരുമാനിച്ചത്. ഇതിനായി ഒന്‍പതംഗ കമ്മിറ്റിയും രൂപീകരിച്ചിരുന്നു. ഈ വിഷയം സംബന്ധിച്ച് ഗ്രാമപഞ്ചായത്ത് ഭരണസമിതി യോഗത്തില്‍ പ്രത്യേക അജണ്ട വച്ച് തീരുമാനമെടുക്കുന്നതിനും എംഎല്‍എയുമായി ചര്‍ച്ച ചെയ്ത് കൂടുതല്‍ ഗൈഡുമാരെ നിയമിക്കുന്നതിനുള്ള നടപടികള്‍ സ്വീകരിക്കാനും തീരുമാനിച്ചിരുന്നു. എന്നാല്‍ മാസങ്ങള്‍ പിന്നിട്ടിട്ടും ഇതുമായി ബന്ധപ്പെട്ട് യാതൊരു നടപടിയും സ്വീകരിച്ചിട്ടില്ലെന്നാണ് ആക്ഷേപം. കഴിഞ്ഞ അവധി ദിവസങ്ങളില്‍ ഈ മേഖലകളില്‍ സന്ദര്‍ശകരുടെ എണ്ണം വര്‍ധിച്ചിരുന്നു. സന്ദര്‍ശകരില്‍ പലരും പുഴയില്‍ ഇപ്പോഴും ഇറങ്ങി കുളിക്കുന്നത് അപകട സാധ്യത വര്‍ധിപ്പിക്കുന്നുണ്ട് .ഇതിന് പരിഹാരം കാണാന്‍ അധികൃതര്‍ അടിയന്തര നടപടി സ്വീകരിക്കണമെന്ന ആവശ്യമാണ് ഉയരുന്നത്.

പഴയ തിരോധാന കേസുകള്‍ പൊടിതട്ടിയെടുത്ത് പോലീസ്; മൂന്നുമാസത്തിനിടെ തെളിയിച്ചത് രണ്ടുകേസുകള്‍

കോഴിക്കോട്: കാണാതായ രണ്ടാളുകളുടെ കേസുകള്‍ അടുത്തിടെ തെളിയിച്ചതിനു പിന്നാലെ വര്‍ഷങ്ങളായുള്ള തിരോധാന കേസുകള്‍ പോലീസ് പൊടിതട്ടിയെടുക്കുന്നു.കോഴിക്കോട്ടുനിന്നു കാണാതായ മാമിയുടെ കേസും ഊര്‍ജിതമായി അന്വേഷിക്കാനാണ് പോലീസിന്‍റെ തീരുമാനം. മൂന്നുമാസത്തിനിടെ രണ്ടു തിരോധാന കേസുകള്‍ കൊലപാതകമാണെന്ന് തെളിയിക്കാന്‍ കഴിഞ്ഞത് പോലീസിന് ആത്മവിശ്വാസം നല്‍കുന്നുണ്ട്. എലത്തൂര്‍ പോലീസ് രജിസ്റ്റര്‍ ചെയ്ത വിജില്‍ വിജയന്‍റെ തിരോധാന കേസാണ് പോലീസ് തെളിയിച്ച പ്രധാന കേസ്. ആറുവര്‍ഷം മുമ്പുള്ള മിസ്സിംഗ് കേസില്‍ മൂന്നുപ്രതികളെ അറസ്റ്റ് ചെയ്യാനും വിജിലിന്‍റേതാണെന്ന് കരുതുന്ന 53 അസ്ഥികളും ഷൂവും കണ്ടെടുക്കാനും പോലീസീനു കഴിഞ്ഞിരുന്നു. വിജിലിന്‍റെ ബൈക്കും കിട്ടി. സുഹൃത്തുക്കളായ മൂന്നു പ്രതികള്‍ പോലീസിന്‍റെ പിടിയിലായിട്ടുണ്ട്. അസ്ഥികള്‍ ഡിഎന്‍എ ടെസ്റ്റിനയച്ച് ഉറപ്പുവരുത്തുന്ന ജോലി മാത്രമാണ് ഇനി ബാക്കിയുള്ളത്. മെഡിക്കല്‍ കോളജ് പോലീസ് സ്‌റ്റേഷന്‍ പരിധിയില്‍നിന്നു കാണാതായ ഹേമചന്ദ്രനെ കൊന്നതാണെന്ന് തെളിയിക്കാനും പോലീസിനു കഴിഞ്ഞു. കഴിഞ്ഞ വര്‍ഷം മാര്‍ച്ച് ഇരുപതിനാണ് ബത്തേരി സ്വദേശിയായ ഹേമചന്ദ്രനെ സാമ്പത്തിക തര്‍ക്കത്തെ തുടര്‍ന്ന് പ്രതികള്‍ കോഴിക്കോട്ടെ മായനാടുനിന്ന് തട്ടിക്കൊണ്ടുപോയത്. കൊലപ്പെടുത്തിയശേഷം ചേരമ്പാടി വനത്തില്‍ കുഴിച്ചുമൂടുകയായിരുന്നു.കേസില്‍ അഞ്ചുപ്രതികെള പോലീസ് അറസ്റ്റ് ചെയ്തിട്ടുണ്ട്. വ്യത്യസ്തമായ സ്‌ക്വാഡുകള്‍ നടത്തിയ അന്വേഷണം ഏകോപിപ്പിച്ചത് സിറ്റി പോലീസ് കമ്മീഷണര്‍ ടി.നാരായണനാണ്. മേല്‍നോട്ട ചുമതല നിര്‍വഹിച്ചത് ഡെപ്യൂട്ടി പോലീസ് കമ്മീഷണര്‍ അരുണ്‍ കെ. പവിത്രനാണ്. അന്വേഷണസംഘങ്ങള്‍ തമ്മില്‍ കൃത്യമായ ഏകോപനം നടത്തിയും പ്രതിമാസം അവലോകനം നടത്തിയുമാണ് ഈ നേട്ടം കൈവരിക്കാന്‍ പോലീസിനു കഴിഞ്ഞത്. രണ്ടുകേസുകളിലും അസ്ഥി കണ്ടെടുക്കാന്‍ കഴിഞ്ഞത് പോലീസിനു നേട്ടമായി. ഈ കേസന്വേഷണങ്ങള്‍ ലക്ഷ്യം കണ്ടതിന്‍റെ ആവേശമാണ് പഴയ ഫയലുകളിലേക്ക് കടക്കാന്‍ പോലീസിന് ഈര്‍ജം നല്‍കിയത്. ക്രിമിനല്‍ ബന്ധം, മയക്കുമരുന്ന് കടത്ത്, സാമ്പത്തിക തര്‍ക്കം തുടങ്ങിയ കേസുകളില്‍പെട്ടവരെ കാണാത്ത കേസുകളാണ് തെളിയിക്കാനുള്ളത്. കോഴിക്കോട്ടെ റിയല്‍ എസ്‌റ്റേറ്റ് ബിസിനസുകാരനായ മാമിയുടെ തിരോധാന കേസും ഇതില്‍ ഉള്‍പ്പെടുന്നു. 2023 ഓഗസ്റ്റ് ഇരുപതിനാണ് മാമിയെ കാണാതായത്. ക്രൈംബ്രാഞ്ച് സ്‌പെഷല്‍ സ്‌ക്വാഡ് അന്വേഷണം നടത്തുന്നുണ്ടെങ്കിലും എവിടെയും എത്തിയിട്ടില്ല. ഈ കേസ് എത്രയും വേഗത്തില്‍ തെളിയിക്കുന്നതിനുള്ള നീക്കത്തിലാണ് പോലീസ്. തിരോധാന കേസുകളിലെല്ലാം പരമാവധി ഡിജിറ്റല്‍ തെളിവുകള്‍ ശേഖരിച്ച് മുന്നോട്ടുപോകാനാണ് തീരുമാനം. ഇതിന്‍റെ ഭാഗമായി ഫോണ്‍കോള്‍ വിവരങ്ങള്‍ ശേഖരിക്കും. സംസ്ഥാന ഹൈടെക് ക്രൈം എന്‍ക്വയറി സെല്ലിന്‍റെ സഹായം ഉപയോഗപ്പെടുത്തിയായിരിക്കും അന്വേഷണം. നേരത്തെ വിശ്വാസ്യയോഗ്യമല്ലെന്ന് കണ്ട് മാറ്റിവച്ച സാഹചര്യത്തെളിവുകള്‍ പുനഃപരിശോധിക്കാനും ആലോചനയുണ്ട്. തിരോധാന കേസുകളില്‍ ജനങ്ങള്‍ക്കുള്ള ആശങ്ക പരിഹരിക്കുന്നതിനാണ് വേഗത്തില്‍ പുനരന്വേഷണത്തിനുള്ള നീക്കം നടക്കുന്നത്. സ്വന്തം ലേഖകന്‍

അങ്കണവാടി അധ്യാപികയുടെ മാല കവര്‍ന്ന പ്രതി അറസ്റ്റില്‍

നാദാപുരം: അങ്കണവാടി അധ്യാപികയുടെ സ്വര്‍ണമാല പിടിച്ചു പറിച്ച കേസിലെ പ്രതി അറസ്റ്റില്‍. കാസര്‍കോട് കീഴൂര്‍ ചന്ദ്രഗിരി സ്വദേശി ഷംനാസ് മന്‍സിലില്‍ മുഹമ്മദ് ഷംനാസി(32)നെയാണ് നാദാപുരം എസ്‌ഐ എം.പി. വിഷ്ണു അറസ്റ്റ് ചെയ്തത്. ഇക്കഴിഞ്ഞ ജൂലൈയിലാണ് കേസിനാസ്പമായ സംഭവം. അധ്യാപിക ഇരിങ്ങണ്ണൂര്‍ അങ്കണവാടിയിലേക്ക് പോകുന്നതിനിടെ സ്‌കൂട്ടറിലെത്തിയ പ്രതി മാല പിടിച്ച് പറിക്കുകയും സ്‌കൂട്ടറില്‍ രക്ഷപ്പെടുകയുമായിരുന്നു. ഇതിന് പിന്നാലെ തലശേരി മേഖലയില്‍ വ്യാപകമായി സ്വര്‍ണാഭരണങ്ങള്‍ കവര്‍ന്ന പ്രതിയെ കാസര്‍കോട് എസ്പിയുടെ സ്‌ക്വാഡ് അംഗങ്ങള്‍ പിടികൂടുകയും തലശേരി പോലീസ് രജിസ്റ്റര്‍ ചെയ്ത കേസുകളില്‍ പ്രതി ചേര്‍ക്കുകയുമായിരുന്നു. തുടര്‍ന്ന് റിമാൻഡിലായ പ്രതിയെ നാദാപുരം പോലീസ് അറസ്റ്റ് രേഖപ്പെടുത്തി രണ്ട് ദിവസത്തേക്ക് തെളിവെടുപ്പിനും മറ്റുമായി കസ്റ്റഡിയില്‍ വാങ്ങി. കാസര്‍കോട്, കണ്ണൂര്‍ ജില്ലകളില്‍ പ്രതിക്കെതിരേ 12 കേസുകള്‍ നിലവില്‍ ഉണ്ടെന്നും കേസുകള്‍ വിവിധ കോടതികളില്‍ വിചാരണ നടക്കുകയാണെന്നും പോലീസ് പറഞ്ഞു. കസ്റ്റഡിയിലെടുത്ത പ്രതിയെ പരാതിക്കാരി തിരിച്ചറിഞ്ഞു.

വേള്‍ഡ് അത്‌ലറ്റിക്‌സ് ബ്രോണ്‍സ് ലെവല്‍ റഫറി ടെസ്റ്റ് പാസായി ഡോ. റോയ് വി. ജോണ്‍

കോഴിക്കോട്: വേള്‍ഡ് അത്‌ലറ്റിക്‌സ് നേരിട്ട് നടത്തിയ റഫറി സെലക്‌ഷനില്‍ ബ്രോണ്‍സ് ലെവല്‍ നേട്ടവുമായി ഡോ. റോയ് വി. ജോണ്‍. കോമണ്‍വെല്‍ത്ത് ഗെയിംസ്, എഷ്യന്‍ അത്‌ലറ്റിക്‌സ് ചാമ്പ്യന്‍ഷിപ്പ്, ഓള്‍സ്റ്റാര്‍ അത്‌ലറ്റിക്‌സ് ചാമ്പ്യന്‍ഷിപ്പ് തുടങ്ങി നിരവധി ദേശീയ, അന്തര്‍ദേശീയ മത്സരങ്ങള്‍ നിയന്ത്രിച്ചിട്ടുള്ള പരിചയമാണ് ഈ നേട്ടത്തിലേക്ക് റോയിയെ എത്തിച്ചത്. കഴിഞ്ഞ ദേശീയ ഗെയിംസിലും ട്രാക്കിനെ നിയന്ത്രിച്ചത് ഇദ്ദേഹമായിരുന്നു. നാഷണല്‍ ഇന്‍സ്റ്റിറ്റ്യൂട്ട് ഓഫ് സ്‌പോര്‍ട്സില്‍ നിന്ന് അത്‌ലറ്റിക്‌സ് കോച്ചിംഗില്‍ എ ഗ്രേഡ് നേടിയിട്ടുള്ള റോയ് കാലിക്കട്ട് യൂണിവേഴ്‌സിറ്റി അത്‌ലറ്റിക്‌സ് ടീം കോച്ച്, മനേജര്‍ എന്നീ നിലകളിലും പ്രവര്‍ത്തിച്ചിട്ടുണ്ട്. ഗവ. ഫിസിക്കല്‍ എഡ്യുക്കേഷന്‍ കോളജ് മുന്‍ പ്രിന്‍സിപ്പല്‍, ദേവഗിരി സെന്‍റ് ജോസഫ്സ് കോളജ് സ്‌പോര്‍ട്സ് മാനേജ്‌മെന്‍റ് വിഭാഗം മേധാവി എന്നീ നിലകളില്‍ പ്രവര്‍ത്തിച്ചിട്ടുള്ള ഇദ്ദേഹം കോഴിക്കോട് ജില്ലാ സ്‌പോര്‍ട്സ് കൗണ്‍സില്‍ വൈസ് പ്രസിഡന്‍റും സിഐസിഎസ് ബിഎഡ് കോളജിലെ കായിക വിഭാഗം വിസിറ്റിംഗ് ഫ്രഫസറുമാണ്.

ദീപിക നമ്മുടെ ഭാഷ പദ്ധതി : മരുതോങ്കര സെന്‍റ് മേരീസ് ഹയര്‍ സെക്കന്‍ഡറി സ്‌കൂൾ

മരുതോങ്കര: സെന്‍റ് മേരീസ് ഹയര്‍ സെക്കന്‍ഡറി സ്‌കൂളില്‍ ദീപിക നമ്മുടെ ഭാഷ പദ്ധതി ഉദ്ഘാടനം ചെയ്തു. സ്‌കൂള്‍ മാനേജര്‍ ഫാ. ആന്‍റോ മൂലയില്‍ സ്‌കൂള്‍ ലീഡര്‍ നിഷാല്‍ സുമേഷിന് ദീപിക പത്രം നല്‍കിയാണ് ഉദ്ഘാടനം നിർവഹിച്ചത്. ഹെഡ്മാസ്റ്റര്‍ സജി തോമസ്, അധ്യാപിക രാജി സി. ആന്‍സ്, ഡിഎഫ്‌സി മേഖല പ്രസിഡന്‍റ് ബേബി ഇയ്യാലില്‍, ദീപിക ഏരിയ മാനേജര്‍ ജോഷി എന്നിവര്‍ പ്രസംഗിച്ചു. അച്ചാമ്മ പതാപറമ്പില്‍, നിര്‍മ്മല പെരുമ്പള്ളില്‍, ജോണ്‍ പൂതക്കുഴി, നോബിന്‍ വാതല്ലൂര്‍ കാലായില്‍, അനുഷ്‌ക്ക ബേബി ഇയ്യാലില്‍, തോമസ് കൈതക്കുളം, ബിജി വെട്ടിക്കല്‍, മത്തച്ചന്‍ വടക്കേടത്ത്, മത്തായി പതാപറമ്പില്‍, സന്തോഷ് നെല്ലരികയില്‍, ജോസ് വെട്ടിക്കല്‍ എന്നിവരാണ് സെന്‍റ് മേരീസ് സ്‌ക്കൂളിലേക്ക് പത്രങ്ങള്‍ സ്‌പോണ്‍സര്‍ ചെയ്തത്.

താമരശേരി രൂപത കൈക്കാരന്‍മാരുടെ സംഗമം സംഘടിപ്പിച്ചു

താമരശേരി: താമരശേരി രൂപതയുടെ റൂബി ജൂബിലിയോടനുബന്ധിച്ച് സംഘടിപ്പിച്ച കൈക്കാരന്‍മാരുടെ സംഗമം രൂപത വികാരി ജനറാള്‍ മോണ്‍. ഏബ്രഹാം വയലില്‍ ഉദ്ഘാടനം ചെയ്തു. രൂപത പ്രൊക്കുറേറ്റര്‍ ഫാ. ജോര്‍ജ് മുണ്ടനാട്ട് സ്വാഗതം പറഞ്ഞു. എകെസിസി ഗ്ലോബല്‍ ഡയറക്ടര്‍ ഫാ. ഫിലിപ്പ് കവിയില്‍ സമുദായത്തിന്‍റെ കെട്ടുറപ്പിന്‍റെ ആവശ്യകതയെക്കുറിച്ച് ക്ലാസെടുത്തു. താമരശേരി രൂപത ബിഷപ് മാര്‍ റെമീജിയോസ് ഇഞ്ചനാനിയില്‍ മുഖ്യപ്രഭാഷണം നടത്തുകയും കൈക്കാരന്‍മാര്‍ക്ക് ജൂബിലി സമ്മാനങ്ങള്‍ നല്‍കുകയും ചെയ്തു. കൂടരഞ്ഞി ഇടവക ട്രസ്റ്റി ടോമി പ്ലാത്തോട്ടത്തില്‍, കൂമുള്ളി ഇടവക ട്രസ്റ്റി സില്‍വി, രൂപത ചാന്‍സിലര്‍ ഫാ. സെബാസ്റ്റ്യന്‍ കാവളക്കാട്ട് തുടങ്ങിയവര്‍ പ്രസംഗിച്ചു.

"കളേഴ്സ് ഓഫ് കെയര്‍' ചിത്രരചനാ മത്സരം സംഘടിപ്പിച്ചു

കോഴിക്കോട്: ലോക പ്രഥമശുശ്രൂഷാ ദിനത്തോടനുബന്ധിച്ച് ബേബി മെമ്മോറിയല്‍ ഹോസ്പിറ്റലിന്‍റെ സാമൂഹിക ഉത്തരവാദിത്വ പദ്ധതിയായ ലൈഫ് ലൈനര്‍ കുട്ടികള്‍ക്കായി സംഘടിപ്പിച്ച "കളേഴ്സ് ഓഫ് കെയര്‍' ചിത്രരചനാ മത്സരം ശ്രദ്ധേയമായി. അടിയന്തര സാഹചര്യങ്ങളില്‍ ശരിയായ പ്രഥമശുശ്രൂഷയുടെ പ്രാധാന്യം ജനങ്ങളിലേക്ക് എത്തിക്കുക എന്ന ലക്ഷ്യത്തോടെയാണ് പരിപാടി സംഘടിപ്പിച്ചത്. കണ്ണൂര്‍, വടകര, പയ്യന്നൂര്‍, കോഴിക്കോട്, തൊടുപുഴ എന്നിവിടങ്ങളിലായി മത്സരം സംഘടിപ്പിച്ചു. കോഴിക്കോട് ഹൈലൈറ്റ് മാളില്‍ നടന്ന പരിപാടിയില്‍ ചിത്രകാരന്‍ നിഷാദ് വി. അബൂബക്കര്‍ തത്സമയം ചിത്രം വരച്ചു. അടിയന്തര ഘട്ടങ്ങളില്‍ ശാസ്ത്രീയ പ്രഥമ ശുശ്രൂഷ നല്‍കുവാന്‍ പ്രാപ്തരായ പൗരന്മാരുടെ ശൃംഖല സംസ്ഥാനത്തുടനീളം വാര്‍ത്തെടുക്കുക എന്ന ലക്ഷ്യത്തിന്‍റെ ഭാഗമായി ബേബി മെമ്മോറിയല്‍ ഹോസ്പിറ്റല്‍ ആരംഭിച്ച സിഎസ്ആര്‍ സംരംഭമാണ് ലൈഫ് ലൈനര്‍.

ടാലന്‍ഷിയ 2.0 മെഗാ ക്വിസ് മത്സരം ഇന്നും നാളെയും

താമരശേരി: താമരശേരി കോര്‍പറേറ്റ് എഡ്യൂക്കേഷണല്‍ ഏജന്‍സി വിദ്യാര്‍ഥികള്‍ക്കായി നടത്തി വരുന്ന ടാലന്‍ഷിയ 2.0 മെഗാ ക്വസ് മത്സരം ഇന്നും നാളെയുമായി നടക്കും. ഇന്ന് രാവിലെ 9.30ന് തിരുവമ്പാടി അല്‍ഫോന്‍സ കോളജില്‍ മത്സരം ആരംഭിക്കുമെന്ന് കോര്‍പറേറ്റ് മാനേജര്‍ ഫാ.ജോസഫ് വര്‍ഗീസ് അറിയിച്ചു. കോളജ് മാനേജര്‍ ഫാ.സ്‌കറിയ മങ്കരയുടെ അധ്യക്ഷതയില്‍ നടക്കുന്ന പരിപാടി കോളജ് പ്രിന്‍സിപ്പല്‍ ഷൈജു ഏലിയാസ് ഉദ്ഘാടനം ചെയ്യും. നാളെ നടക്കുന്ന സമാപന സമ്മേളനം താമരശേരി രൂപത ബിഷപ് മാര്‍ റെമീജിയോസ് ഇഞ്ചനാനിയില്‍ ഉദ്ഘാടനം ചെയ്യും. കോര്‍പറേറ്റ് മാനേജര്‍ ഫാ. ജോസഫ് വര്‍ഗീസ് അധ്യക്ഷത വഹിക്കും. സംസ്ഥാന ചലച്ചിത്ര അക്കാദമി ചെയര്‍മാന്‍ പ്രേംകുമാര്‍ മുഖ്യാതിഥിയായിരിക്കും. ചലച്ചിത്ര അക്കാദമി റീജണല്‍ കോ ഓര്‍ഡിനേറ്റര്‍ നവീന വിജയന്‍ പ്രസംഗിക്കും. അല്‍ഫോന്‍സ കോളജ് അഡ്മിനിസ്‌ട്രേറ്റര്‍ ഫാ. മനോജ് കൊല്ലംപറമ്പില്‍, അധ്യാപകരായ വിപിന്‍ എം. സെബാസ്റ്റ്യന്‍, റോഷിന്‍ മാത്യു എന്നിവര്‍ നേതൃത്വം നല്‍കും.

തിക്കോടിയിൽ അടിപ്പാത നിർമ്മാണം ആരംഭിച്ചു

പയ്യോളി: രണ്ടു വർഷത്തിലേറെയായി പ്രതിഷേധവും സമരവുമായി നിലകൊണ്ട തിക്കോടി നിവാസികൾക്ക് അനുവദിച്ച അടിപ്പാതയുടെ നിർമ്മാണം ആരംഭിച്ചു. തിക്കോടി ടൗണിൽ നിന്ന് കോഴിക്കോട് ഭാഗത്തേക്ക് 350 മീറ്റർ ദൂരെയാണ് അടിപ്പാത നിർമ്മിക്കുന്നത്. ഒരുമാസം കൊണ്ട് നിർമ്മാണം പൂർത്തിയാക്കാൻ ആകും എന്നാണ് പ്രതീക്ഷ. ഇതോടെ തിക്കോടി മേഖലയിലെ ദേശീയപാത വികസനത്തിന്‍റെ അനിശ്ചിതാവസ്ഥയ്ക്ക് പൂർണ്ണവിരാമം ഉണ്ടാകും.ദേശീയപാത നിർമ്മാണത്തിന്‍റെ ആദ്യഘട്ടം മുതൽ തന്നെ അടിപ്പാത നിർമ്മിക്കണമെന്ന ആവശ്യവുമായി തിക്കോടിയിലെ ബഹുജന കൂട്ടായ്മ സമര രംഗത്തുണ്ട്. ഏറെ ജനസാന്ദ്രതയുള്ള തീരദേശവും കിഴക്കൻ ഭാഗവും തമ്മിൽ വിഭജിക്കപ്പെടുമെന്ന് ആശങ്കയായിരുന്നു ഈ നീക്കത്തിന് കാരണമായത്.എന്നാൽ ഒരു കിലോമീറ്റർ താഴെ ദൂരെയുള്ള തിക്കോടി പഞ്ചായത്ത് ബസാറിൽ അടിപ്പാത അനുവദിച്ചതോടെ തിക്കോടി ടൗണിലെ അടിപ്പാതാ സ്വപ്നങ്ങൾക്ക് മങ്ങലേൽക്കുകയായിരുന്നു. ഇതോടെയാണ് റിലേ നിരാഹാരം ഉൾപ്പെടെയുള്ള സമരപ്രക്ഷോഭ പരമ്പരങ്ങളുമായി അടിപ്പാത സമരസമിതിയുടെ നേതൃത്വത്തിൽ തിക്കോടിയിലെ ജനങ്ങൾ അണിനിരന്നത്. കേരളത്തിൽ എല്ലായിടത്തും ദേശീയപാത നിർമ്മാണം പുരോഗമിച്ചപ്പോഴും തിക്കോടി ഉൾപ്പെടുന്ന ചെറിയ മേഖലയിലെ നിർമ്മാണം സമരസമിതിയുടെ പ്രതിഷേധത്തെ തുടർന്ന് ആരംഭിക്കുക പോലും ചെയ്തിരുന്നില്ല .

വിദേശമദ്യ വില്‍പ്പനക്കാരനെ നാട്ടുകാര്‍ പിടികൂടി എക്‌സൈസിനു കൈമാറി

നാദാപുരം: വിദേശമദ്യ വില്‍പ്പനക്കാരനെ നാട്ടുകാര്‍ പിടികൂടി എക്‌സൈസിനു കൈമാറി. തിനൂര്‍ കയപ്പക്കൊല്ലിയില്‍ മദ്യവില്‍പ്പന നടത്തുന്നതിനിടെ വാണിമേല്‍ വെള്ളിയോട് സ്വദേശി നടുവിലക്കണ്ടി കുമാരനാ (59)ണ് പിടിയിലായത്. പ്രതിയില്‍ നിന്ന് 12.5 ലിറ്റര്‍ മദ്യം അധികൃതര്‍ പിടികൂടി. കയപ്പക്കൊല്ലിയില്‍ മദ്യം വിതരണം ചെയ്യുന്നതിനിടെ പ്രതിയെ നാട്ടുകാര്‍ തടഞ്ഞു വച്ച് എക്‌സൈസ് ഉദ്യോഗസ്ഥര്‍ക്ക് കൈമാറുകയായിരുന്നു. പ്രതിയെ കോടതി റിമാന്‍റ് ചെയ്തു.നാദാപുരം എക്‌സൈസ് പ്രിവന്‍റിവ് ഓഫീസര്‍ കെ.കെ. ജയനും സംഘവുമാണ് പ്രതിയെ കസ്റ്റഡിയില്‍ എടുത്തത്.

എന്‍.ജി.ഒ. അസോ. പ്രതിഷേധ മാര്‍ച്ച്

കോഴിക്കോട്: ജീവനക്കാരോടുള്ള സംസ്ഥാന സര്‍ക്കാരിന്‍റെ ദ്രോഹ നടപടികള്‍ക്കെതിരെ എന്‍ജിഒ അസോസിയേഷന്‍ ജില്ലാ കമ്മിറ്റി പുതിയറ സബ് ട്രഷറിക്കു മുമ്പില്‍ പ്രതിഷേധ മാര്‍ച്ചും ധര്‍ണയും നടത്തി. ഡിസിസി ജനറല്‍ സെക്രട്ടറി ദിനേശ് പെരുമണ്ണ ഉദ്ഘാടനം ചെയ്തു. ജില്ലാ പ്രസിഡന്‍റ് പ്രേംനാഥ് മംഗലശ്ശേരി അധ്യക്ഷനായി. കുടിശ്ശിക ക്ഷാമബത്ത അനുവദിക്കുക, പങ്കാളിത്തപെന്‍ഷന്‍ പിന്‍വലിക്കുക, അനുവദിച്ച ക്ഷാമബത്തയുടെ 154 മാസത്തെ കുടിശിക നല്‍കുക, 12ാം ശമ്പള പരിഷ്‌കരണം നടപ്പിലാക്കുക, ശമ്പള റിക്കവറിക്ക് അധിക ഫീസ് ചുമത്തുന്ന ഉത്തരവ് പിന്‍വലിക്കുക, വിലക്കയറ്റം നിയന്ത്രിക്കുക, പിന്‍വാതില്‍ നിയമനം അവസാനിപ്പിക്കുക എന്നീ ആവശ്യങ്ങള്‍ ഉന്നയിച്ചായിരുന്നു മാര്‍ച്ചും ധര്‍ണ്ണയും. സെറ്റോ ജില്ലാ ചെയര്‍മാന്‍ സിജു കെ. നായര്‍, സംസ്ഥാന കമ്മിറ്റി അംഗം മധു രാമനാട്ടുകര, കെ.വി. രവീന്ദ്രന്‍, വി.വിപീഷ്, പി. പ്രദീപ് കുമാര്‍, വി.പി. ജംഷീര്‍, കെ.പി. സുജിത എന്നിവര്‍ സംസാരിച്ചു. എം.വി. ബഷീര്‍, പി.അരുണ്‍, കെ.ടി. രമേശന്‍, കെ.വി. ബാലകൃഷ്ണന്‍, പി. നിസാര്‍, പി. ലിജിന, സി.ജെ ലിന്‍സ്, റോഷ്‌ന ഡെന്‍സില്‍ ടി. സാറാമ്മകെ. ജോതിഷ് കുമാര്‍, കെ ജയേഷ്, കെ. എന്‍ ശരത്, കെ. സന്തോഷ് കുമാര്‍ എന്നിവര്‍ നേതൃത്വം നല്‍കി.

തദ്ദേശ സ്വയംഭരണ തെരഞ്ഞെടുപ്പ് അട്ടിമറിക്കാന്‍ സിപിഎം ശ്രമം: ഡിസിസി

കോഴിക്കോട്: ഭരണ സംവിധാനം ഉപയോഗിച്ച് തദേശസ്വയംഭരണ തെരഞ്ഞെടുപ്പില്‍ കൃത്രിമ വിജയം ഉണ്ടാക്കാനുള്ള ശ്രമം സിപിഎം നടത്തുകയാണെന്ന് ഡിസിസി പ്രസിഡന്‍റ് അഡ്വ. കെ.പ്രവീണ്‍ കുമാര്‍ ആരോപിച്ചു. ജീവനക്കാര്‍ നിയമ വിരുദ്ധ നടപടിക്ക് കൂട്ടുനിന്നാല്‍ കനത്ത വില നല്‍കേണ്ടിവരുമെന്നും അദേഹം മുന്നറിയിപ്പ് നല്‍കി. തിരുവള്ളൂര്‍ ഗ്രാമഞ്ചായത്ത് ഓഫീസിലേക്ക് യുഡിഎഫ് പഞ്ചായത്ത് കമ്മറ്റി നടത്തിയ മാര്‍ച്ച് ഉദ്ഘാടനം ചെയ്യുകയായിരുന്നു അദേഹം. വാര്‍ഡു വിഭജനം മുതല്‍ വോട്ടര്‍പട്ടിക ക്രമീകരണത്തില്‍ വരെ ഒട്ടുമിക്ക പഞ്ചായത്തുകളിലും ഗുരുതരമായ ക്രമക്കേടുകള്‍ നടന്നിട്ടുണ്ട്. അതിര്‍ത്തി പാലിക്കാതെ വീടുകള്‍ ഉള്‍പ്പെടുത്തുക, വിചാരണക്ക് ഹാജരായ ഭിന്നശേഷിക്കാരുടെയും നാളിതു വരെ വിദേശത്തു പോകാത്തവരുടേയും ഉള്‍പ്പെടെ വോട്ടുകള്‍ ഒഴിവാക്കുക, ഒരു വീട്ടിലെ അംഗങ്ങളെ രണ്ടു വാര്‍ഡുകളിലായി വിന്യസിക്കുക. ഇങ്ങനെ ഒട്ടേറെ പ്രകടമായ ക്രമക്കേടുകള്‍ തിരുവള്ളൂരില്‍ തന്നെ നടന്നിട്ടുണ്ടെന്നും പ്രവീണ്‍കുമാര്‍ ആരോപിച്ചു. ചെയര്‍മാന്‍ ആര്‍. രാമകൃഷ്ണന്‍ അധ്യക്ഷത വഹിച്ചു. മുസ്ലിം ലീഗ് ജില്ലാ വൈസ് പ്രസിഡന്‍റ് കെ.ടി. അബ്ദുറഹ്‌മാന്‍ മുഖ്യപ്രഭാഷണം നടത്തി. നിയോജകമണ്ഡലം ചെയര്‍മാന്‍ അമ്മാരപ്പള്ളി കുഞ്ഞിശങ്കരന്‍, കണ്‍വീനര്‍ നൊച്ചാട്ട് കുഞ്ഞബ്ദുല്ല, പാലൂന്നി മൊയ്തു, പി.സി ഷീബ, പി.സി ഹാജറ, ഡി. പ്രജീഷ്, ബവിത്ത് മലോല്‍, സി.പി.വിശ്വന്‍, ചുണ്ടയില്‍ മൊയ്തുഹാജി, കണ്ണോത്ത് സൂപ്പിഹാജി, എഫ്.എം മുനീര്‍, പി.കെ.കൃഷ്ണന്‍, പി.അബ്ദുറഹ്‌മാന്‍ എന്നിവര്‍ പ്രസംഗിച്ചു. സബിത മണക്കുനി, കിണറുള്ളതില്‍ കുഞ്ഞമ്മദ്, ഷബീര്‍ കോട്ടപ്പള്ളി, നിഷില കോരപ്പാണ്ടി, കെ.വി ഷഹനാസ്, സി.കെ സൂപ്പി, ബവിത പഷ്ണക്കുഴി, വി.കെ. ഇസ്ഹാഖ്, അജയ് കൃഷ്ണ, കെ.സി. നബീല, ശ്രീജ തറവട്ടം, സി.വി ഹമീദ് തുടങ്ങിയവര്‍ നേതൃത്വം നല്‍കി.

പോക്സോ കേസിൽ പ്രതി അറസ്റ്റില്‍

കോഴിക്കോട്: ആണ്‍കുട്ടിയെ പീഡിപ്പിച്ച മോഷണക്കേസ് പ്രതിയെ പോക്സോ കേസില്‍ പോലീസ് അറസ്റ്റു ചെയ്തു. മലപ്പുറം തേഞ്ഞിപ്പലം സ്വദേശിയായ പാലക്കാട്ട് വീട്ടില്‍ സൈനുദ്ദീനെ(42)യാണ് കോഴിക്കോട് ടൗണ്‍ പോലീസ് അറസ്റ്റ് ചെയ്തത്. കോഴിക്കോട് ബീച്ചില്‍ വച്ച് പരിചയപ്പെട്ട പ്രായപൂര്‍ത്തിയാകാത്ത ആണ്‍കുട്ടിയെ ലോഡ്ജിലെത്തിച്ച് പീഡിപ്പിച്ചുവെന്നാണ് പരാതി. കുട്ടിയുമായി സൗഹൃദം സ്ഥാപിച്ച പ്രതി കാറില്‍ റെയില്‍വേ സ്റ്റേഷന് സമീപത്തുള്ള ലോഡ്ജിലേക്ക് കൊണ്ടുപോയി. ഇവിടെ വച്ചാണ് ലൈംഗികാതിക്രമം നടത്തിയത്. കുട്ടി പരാതി നല്‍കിയതിനെ തുടര്‍ന്നാണ് പോലീസ് നടപടി സ്വീകരിച്ചത്.

70 കുടുംബങ്ങള്‍ക്ക് സഹായവുമായി സിയസ്‌കൊയുടെ ആര്‍ദ്രം പദ്ധതി

കോഴിക്കോട് : സപ്തതി ആഘോഷിക്കുന്ന സിയസ്‌കൊ എഴുപത് കുടുംബങ്ങള്‍ക്ക് ശൗചാലയവും കുഴല്‍ കിണറും നിര്‍മിച്ചു നല്‍കുന്ന ആര്‍ദ്രംപദ്ധതിക്ക് രൂപം നല്‍കി. സിയസ്‌കൊ ജനറല്‍ ബോഡി യോഗത്തില്‍ പ്രസിഡന്‍റ് സി.ബി.വി. സിദ്ധീഖ് പദ്ധതി വിശദീകരിച്ചു. പദ്ധതിയുടെ ചെയര്‍മാനായി പി. കെ. വി. അബ്ദുല്‍ അസീസ് , കണ്‍വീനറായി ആദം കാതരിയകത്ത് എന്നിവരെ തെരഞ്ഞെടുത്തു. തെക്കേപ്പുറം പ്രദേശത്തെ ആയിരക്കണക്കിന് ആളുകളുടെ ഏക ആശ്രയമായ പരപ്പില്‍ പോസ്റ്റ് ഓഫീസ് അടച്ചു പുട്ടാനുള്ള നടപടി പിന്‍വലിക്കണമെന്ന് സിയസ്‌കൊ ജനറല്‍ ബോഡി യോഗം ആവശ്യപ്പെട്ടു.പ്രസിഡന്‍റ് സി.ബി.വി.സിദ്ധീഖ് അദ്ധ്യക്ഷത വഹിച്ചു. സെക്രട്ടറി എം.വി. ഫസല്‍ റഹ്മാന്‍ വാര്‍ഷിക റിപ്പോര്‍ട്ടും ട്രഷറര്‍ പി.പി. അബ്ദുല്ല കോയ ഓഡിറ്റ് റിപ്പോര്‍ട്ടും അവതരിപ്പിച്ചു. പ്രസിഡന്‍റ് സി.ബി.വി. സിദ്ധീഖ് പതാക ഉയര്‍ത്തി. ലൈബ്രറി ചെയര്‍മാന്‍ എസ്.എഖുദ്‌സി, സെക്രട്ടറി എം.ഹസ്സന്‍കോയ എന്നിവര്‍ നേതൃത്വം നല്‍കി.വൈസ് പ്രസിഡന്‍റുമാരായ കെ. നൗഷാദ് അലി, എസ്.എം. സാലിഹ്, സെക്രട്ടറിമാരായ സി.പി.എം സഈദ് അഹമ്മദ്, പി.വി. മുഹമ്മദ് യൂനുസ്, ആദം കാതിരിയകം, പി.കെ.വി. അബ്ദുള്‍ അസീസ്, കെ.പി. മമ്മത് കോയ, പി .എന്‍ .വലീദ് എന്നിവര്‍ സംസാരിച്ചു.

പള്ളിപ്പടി റെസിഡന്‍സ് അസോസിയേഷന്‍ രൂപവത്കരിച്ചു

തിരുവമ്പാടി: പുല്ലൂരാംപാറ പള്ളിപ്പടി കേന്ദ്രീകരിച്ചു പള്ളിപ്പടി റെസിഡന്‍സ് അസോസിയേഷന്‍ രൂപവത്ക്കരിച്ചു. ആന്‍റണി കണ്ടത്തിന്‍ തൊടികയിലിന്‍റെ വീട്ടില്‍ നടന്ന യോഗം തിരുവമ്പാടി പഞ്ചായത്ത് പ്രസിഡന്‍റ് ബിന്ദു ജോണ്‍സണ്‍ ഉദ്ഘാടനം ചെയ്തു. അസോസിയേഷന്‍ പ്രസിഡന്‍റ് ടി.ടി. കുര്യന്‍ അധ്യക്ഷത വഹിച്ചു. ജില്ലാ പഞ്ചായത്ത് മെമ്പര്‍ ബോസ് ജേക്കബ് മുഖ്യപ്രഭാഷണം നടത്തി. വാര്‍ഡ് മെമ്പര്‍ മേഴ്‌സി പുളിക്കാട്ട്, ജോസ് മാത്യു, സിറിയക്ക് മണലോടി, ജോര്‍ജ് ഓണാട്ട്, ഷിജു ചെമ്പനാനി, പി.ജെ. ലാല്‍, ഷിജി ജോബി എന്നിവര്‍ പ്രസംഗിച്ചു. ചടങ്ങില്‍ ഓണാഘോഷ പരിപാടികളും നടത്തി. മികച്ച കര്‍ഷകനായി തെരഞ്ഞെടുക്കപ്പെട്ട സിജോ കണ്ടത്തിന്‍ തൊടികയില്‍, പരമ്പരാഗത കര്‍ഷകനായ ജോസ് കണ്ടെത്തിന്‍ തൊടികയില്‍, പരീക്ഷകളില്‍ ഉന്നത വിജയം കരസ്ഥമാക്കിയ വിദ്യാര്‍ഥികള്‍ എന്നിവരെ ആദരിച്ചു. ടി.ടി.കുര്യനെ പ്രസിഡന്‍റായും ഷിജു ചെമ്പനാനിയെ ജന:സെക്രട്ടറിയായും പി.ജെ. ലാലിനെ ഖജാന്‍ജിയായും തെരഞ്ഞെടുത്തു.

അന്താരാഷ്ട്ര ജനാധിപത്യ ദിനം; വോട്ടിന്‍റെ പ്രാധാന്യം വിളിച്ചോതി കലാജാഥ സംഘടിപ്പിച്ചു

കോഴിക്കോട്: അന്താരാഷ്ട്ര ജനാധിപത്യ ദിനത്തോടനുബന്ധിച്ച് ജില്ലാ ഭരണകൂടത്തിന്‍റെയും തെരഞ്ഞെടുപ്പ് വിഭാഗത്തിന്‍റെയും നേതൃത്വത്തില്‍ വോട്ടര്‍ ബോധവത്ക്കരണ കലാജാഥ സംഘടിപ്പിച്ചു. കളക്ടറേറ്റില്‍ നിന്നും ആരംഭിച്ച കലാജാഥ ജില്ലാ കളക്ടര്‍ സ്നേഹില്‍ കുമാര്‍ സിംഗ് ഫ്‌ളാഗ് ഓഫ് ചെയ്തു. യുവജനങ്ങള്‍ക്കിടയില്‍ വോട്ടിന്‍റെ പ്രാധാന്യം വര്‍ധിപ്പിക്കുക, സമ്മതിദായകരുടെ പങ്കാളിത്തം ഉറപ്പാക്കുക എന്നീ സന്ദേശങ്ങളുമായാണ് കലാജാഥ പര്യടനം നടത്തുന്നത്. സാമൂതിരി ഗുരുവായൂരപ്പന്‍ കോളജിലെ വിദ്യാര്‍ത്ഥികളുടെ നേതൃത്വത്തില്‍ അണിനിരന്ന കലാജാഥ ജെഡിടി, ലോ കോളജ്, ദേവഗിരി കോളേജ്, മലബാര്‍ ക്രിസ്ത്യന്‍ കോളേജ്, ഐഎച്ച്ആര്‍ഡി കോളേജ്, പുതിയ ബസ് സ്റ്റാന്‍റ്, കോഴിക്കോട് ബീച്ച് എന്നിവിടങ്ങളില്‍ പര്യടനം നടത്തി. ജില്ലാ ഇലക്ഷന്‍ ഡെപ്യൂട്ടി കളക്ടര്‍ ഗോപിക ഉദയന്‍, ജില്ലാ സ്വീപ് കോഓഡിനേറ്റര്‍ ഡെപ്യൂട്ടി കളക്ടര്‍ സി. ബിജു, ജില്ലാ ഇന്‍ഫര്‍മേഷന്‍ ഓഫീസര്‍ സി.പി. അബ്ദുല്‍ കരീം, കാലിക്കട്ട് യൂണിവേഴ്സിറ്റി ജില്ലാ നാഷണല്‍ സര്‍വീസ് സ്‌കീം കോ ഓര്‍ഡിനേറ്റര്‍ ഫസീല്‍ അഹ്‌മദ്, ഡിസിഐപി കോര്‍ഡിനേറ്റര്‍ ഡോ. നിജീഷ് ആനന്ദ്, സാമൂതിരി ഗുരുവായൂരപ്പന്‍ കോളജ് എന്‍എസ്എസ് കോ ഓര്‍ഡിനേറ്റര്‍ ജിബിന്‍ ബേബി, അധ്യാപിക പി.ഐ. മീര, വിദ്യാര്‍ഥികള്‍ എന്നിവര്‍ പങ്കെടുത്തു.

യുഡിഎഫ് ധര്‍ണ നടത്തി

മേപ്പയൂര്‍: ഫെബ്രുവരിയില്‍ മേപ്പയ്യൂര്‍ പഞ്ചായത്തിന്‍റെ നേതൃത്വത്തില്‍ നടത്തിയ സാംസ്‌കാരിക പരിപാടിയായ മേപ്പയൂര്‍ ഫെസ്റ്റിന്‍റെ വരവ് ചെലവ് കണക്ക് അവതരിപ്പിക്കാത്തത് അഴിമതി മൂടിവെക്കാന്‍ വേണ്ടിയാണെന്ന് ആരോപിച്ച് യുഡിഎഫ് മേപ്പയൂര്‍ പഞ്ചായത്ത് കമ്മിറ്റി പ്രകടനവും ധര്‍ണയും സംഘടിപ്പിച്ചു. മുസ്ലിംലീഗ് മണ്ഡലം ജനറല്‍ സെക്രട്ടറി ടി.കെ.എ ലത്തീഫ് ഉദ്ഘാടനം ചെയ്തു. യു.ഡി.എഫ് ചെയര്‍മാന്‍ പറമ്പാട്ട് സുധാകരന്‍ അധ്യക്ഷത വഹിച്ചു. പി.കെ.അനീഷ്, കമ്മന അബ്ദുറഹിമാന്‍, ഇ.അശോകന്‍, കെ.പി. രാമചന്ദ്രന്‍, എം.എം അഷ്‌റഫ് , കെ.പി. വേണുഗോപാല്‍, എം.കെ അബ്ദുറഹ്‌മാന്‍, കെ.എം.എ അസീസ്, സി.പി. നാരായണന്‍ സംസാരിച്ചു. കെ.എം. ശ്യാമള, ഷര്‍മിന കോമത്ത്, റാബിയ എടത്തിക്കണ്ടി, സറീന ഒളോറ നേതൃത്വം നല്‍കി.

നവരാത്രി സര്‍ഗോത്സവം 20ന്

കോഴിക്കോട്: കേസരി ഭവനില്‍ നവരാത്രി സര്‍ഗോത്സവം 20ന് വൈകിട്ട് 5.30ന് കൊല്ലൂര്‍ മൂകാംബിക ക്ഷേത്രം മുഖ്യ അര്‍ച്ചകന്‍ സുബ്രഹ്‌മണ്യ അഡിഗകളുടെ കാര്‍മ്മികത്വത്തില്‍ നടക്കുന്ന മഹാ സാരസ്വത പൂജയോടെ ആരംഭിക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. 22 ന് വൈകിട്ട് 5.30ന് കേന്ദ്ര സാംസ്‌കാരിക മന്ത്രി ഗജേന്ദ്ര സിംഗ് ശെഖാവത്ത് ഉദ്ഘാടനം ചെയ്യും. സംഗീത സംവിധായകന്‍ ഔസേപ്പച്ചന്‍, ചലച്ചിത്രനടി വിധു ബാല, പ്രജ്ഞാ പ്രവാഹ് ദേശീയ സംയോജകന്‍ ജെ.നന്ദകുമാര്‍ തുടങ്ങിയവര്‍ പങ്കെടുക്കും. തുടര്‍ന്നുള്ള ദിവസങ്ങളില്‍ ജൂനാ അഖാഡ മഹാമണ്ഡലേശ്വര്‍ സ്വാമി ആനന്ദവനം ഭാരതി, പി.ടി.ഉഷ എം.പി, സി.സദാനന്ദന്‍ എം.പി, ആചാര്യശ്രീ എം.ആര്‍.രാജേഷ്, ശ്രേഷ്ഠാചാര സഭ ആചാര്യന്‍ എം.ടി. വിശ്വനാഥന്‍, സ്വാമി നന്ദാത്മജാനന്ദ, മുന്‍ ഗോവ ഗവര്‍ണര്‍ അഡ്വ.പി.എസ്.ശ്രീധരന്‍ പിള്ള, നടി അഖില ശശിധരന്‍, സ്വാമി നരസിംഹാനന്ദ, ഡോ.മുരളീ വല്ലഭന്‍ തുടങ്ങിയവര്‍ പങ്കെടുക്കും. പ്രമുഖ കലാകാരന്മാരായ ഏലൂര്‍ ബിജു, ഡോ.ആര്‍എല്‍വി രാമകൃഷ്ണന്‍, ഗായത്രി മധുസൂദനന്‍, മനു രാജ് തിരുവനന്തപുരം, പട്ടാഭിരാമ പണ്ഡിറ്റ്, ഡോ.പ്രശാന്ത് വര്‍മ്മ, ഭരദ്വാജ് സുബ്രഹ്‌മണ്യം, കെ.വി.എസ് ബാബു തുടങ്ങിയവര്‍ പങ്കെടുക്കും. ഈ വര്‍ഷത്തെ നവരാത്രി സര്‍ഗ പ്രതിഭാ പുരസ്‌ക്കാരം 29 വൈകിട്ട് 5.30ന് കേരള ഗവര്‍ണര്‍ രാജേന്ദ്ര വിശ്വനാഥ ആര്‍ലേക്കര്‍ പിന്നണി ഗായകന്‍ മധു ബാലകൃഷ്ണന് സമ്മാനിക്കും.

52 ഓണം ബംപര്‍ ലോട്ടറി ടിക്കറ്റുകള്‍ മോഷണം പോയി

കൊയിലാണ്ടി: കൊയിലാണ്ടിയില്‍ നിന്നും 52 ഓണം ബംപര്‍ ലോട്ടറി ടിക്കറ്റുകള്‍ മോഷണം പോയതായി പരാതി. കൊയിലാണ്ടി ബസ്സ്റ്റാന്‍ഡിലെ വി.കെ.ലോട്ടറി സ്റ്റാളില്‍ നിന്നാണ് ടിക്കറ്റുകള്‍ മോഷണം പോയത്. ഞായറാഴ്ച വൈകിട്ട് ആറുമണിയോടെയായിരുന്നു സംഭവം. ലോട്ടറി സ്റ്റാളിലെ ജീവനക്കാരന്‍ മുസ്തഫ പോലീസില്‍ പരാതി നല്‍കി. രണ്ടാഴ്ചമുന്‍പ് 22 ലോട്ടറികളും രണ്ട് ദിവസം മുന്‍പും മൂന്ന് ടിക്കറ്റുകളും കളവുപോയതായി മുസ്തഫ പരാതിയില്‍ പറയുന്നു. സിസിടിവി ദൃശ്യങ്ങളടക്കം പോലീസ് പരിശോധിക്കുന്നുണ്ട്.

പോലീസിനെതിരേ ഡിസിസി പ്രസിഡന്‍റിന്‍റെ ഉപവാസ സമരം ഇന്ന്

കോഴിക്കോട്: പോലീസ് ഗുണ്ടായിസത്തിനെതിരെയും യൂത്ത് കോണ്‍ഗ്രസ്, കെഎസ്‌യു നേതാക്കളെ കള്ളകേസില്‍ കുടുക്കി പീഡിപ്പിക്കുകയും ചെയ്യുന്നതിനെതിരേ കോഴിക്കോട് ഡിസിസി പ്രസിഡന്‍റ് അഡ്വ. കെ. പ്രവീണ്‍കുമാര്‍ ഇന്ന് ഉപവാസ സമരം നടത്തും. രാവിലെ ഒന്‍പതുമുതല്‍ വൈകീട്ട് അഞ്ചുവരെ നടക്കാവ് ഐജി ഓഫീസിന് സമീപമാണ് സമരം. കോണ്‍ഗ്രസ് പാര്‍ലമെന്‍ററി പാര്‍ട്ടി സെക്രട്ടറി എം.കെ. രാഘവന്‍ എം.പി. ഉദ്ഘാടനം ചെയ്യും. കെപിസിസി വര്‍ക്കിംഗ് പ്രസിഡന്‍റ് ഷാഫി പറമ്പില്‍ എംപി ആമുഖ പ്രഭാഷണം നടത്തും. സമാപന സമ്മേളനം വൈകീട്ട് 4.30ന് മുന്‍ കെപിസിസി പ്രസിഡന്‍റ് കെ. മുരളീധരന്‍ ഉദ്ഘാടനം ചെയ്യും. സിനിമ നടന്‍ ജോയ്മാത്യു, എഴുത്തുകാരായ കല്‍പറ്റ നാരായണന്‍, യു.കെ. കുമാരന്‍, യു.ഡി.എഫ് കക്ഷി നേതാക്കള്‍, കെപിസിസി, ഡിസിസി നേതാക്കള്‍ തുടങ്ങിയവര്‍ അഭിസംബോധന ചെയ്യാനെത്തുമെന്ന് ഡിസിസി ജനറല്‍ സെക്രട്ടറി പി.എം. അബ്ദുറഹ്‌മാന്‍ അറിയിച്ചു.

പുഴയില്‍ ചാടിയ യുവാവിന്‍റെ മൃതദേഹം കണ്ടെടുത്തു

കൊയിലാണ്ടി: മുത്താമ്പിപുഴയില്‍ ചാടിയ യുവാവിന്‍റെ മൃതദേഹം കണ്ടെടുത്തു. അരിക്കുളം മാവട്ട് മോവര്‍ വീട്ടില്‍ പ്രമോദാ (40)ണ് ഇന്നലെ പുലര്‍ച്ചെ കൊയിലാണ്ടി മുത്താമ്പി പുഴയില്‍ ചാടിയത്. നടേരി ഭാഗത്തു നിന്നാണ് മൃതദേഹം കണ്ടെത്തിയത്. കൊയിലാണ്ടി പോലീസും ഫയര്‍ഫോഴ്‌സും കോഴിക്കോട് നിന്നുള്ള സ്‌കൂബ ടീമും തെരച്ചിലിനായി എത്തിയിരുന്നു.

സ്വകാര്യബസിടിച്ച് ബൈക്ക് യാത്രികന്‍ മരിച്ചു

കോഴിക്കോട്: പൂവാട്ടുപറമ്പില്‍ സ്വകാര്യബസിടിച്ച് ബൈക്ക് യാത്രികന്‍ മരിച്ചു. കായലം സ്വദേശി സലിം ആണ് മരിച്ചത്. ഇന്നലെ വൈകിട്ട് അഞ്ചിന് പെരുവയല്‍ ഗ്രാമപഞ്ചായത്ത് ഓഫീസിനു സമീപമായിരുന്നു അപകടം. മാവൂരില്‍ നിന്ന് കോഴിക്കോട്ടേക്കു പോകുകയായിരുന്ന ബസാണ് ഇടിച്ചത്. അമിതവേഗത്തിലായിരുന്നു ബസ്. മുന്നിലെ ബസിനെ മറികടക്കാന്‍ ശ്രമിക്കവെ എതിര്‍ശദിശയില്‍ നിന്ന് മറ്റൊരു വാഹനം വന്നപ്പോള്‍ ബസ് റോഡരികിലേക്ക് ചേര്‍ത്തപ്പോഴണ് ബൈക്കില്‍ ഇടിച്ചത്. സലിം ബസിന് അടിയില്‍പെടുകയും ചക്രം കയറി തല്‍ക്ഷണം മരിക്കുകയുമായിരുന്നു.

വിദ്യാർഥിനിയെ ആദരിച്ചു

കൂടരഞ്ഞി: കഴിഞ്ഞ ദിവസം കൂടരഞ്ഞി അങ്ങാടിയിലുണ്ടായ വാഹനാപകടത്തിൽ രക്ഷാപ്രവർത്തനം നടത്തിയ വിദ്യാർഥിനി റോസ്മിനെ മൗണ്ട് ഹീറോസിന്‍റെ നേതൃത്വത്തിൽ മെമന്‍റോ നൽകി ആദരിച്ചു. അപകടം നടക്കുന്ന സമയത്ത് സ്കൂൾ വിട്ടു വരികയായിരുന്ന റോസ്മിൻ മറ്റൊന്നും ചിന്തിക്കാതെ ഓടിയെത്തുകയും തുടർന്ന് പ്രാഥമിക ശുശ്രൂഷകൾ നൽകി ഹോസ്പിറ്റലിൽ എത്തിക്കുകയുമായിരുന്നു. പഞ്ചായത്ത് പ്രസിഡന്‍റ് ആദർശ് ജോസഫ് റോസ്മിന് മെമന്‍റോ നൽകി. വാർഡ് മെമ്പർ ജെറീന റോയ്, മൗണ്ട് ഹീറോസ് അഡ്മിൻമാരായ അനീഷ് പുത്തൻപുര, ജയേഷ് സ്രാമ്പിക്കൽ തുടങ്ങിയവർ ചടങ്ങിൽ സംബന്ധിച്ചു.

സ്വദേശ് മെഗാ ക്വിസ് മത്സരം നടത്തി

കുറ്റ്യാടി: കെപിഎസ്ടിഎ കുന്നുമ്മൽ ഉപജില്ല കമ്മിറ്റിയുടെ നേതൃത്വത്തിൽ നടത്തിയ സ്വദേശ് മെഗാ ക്വിസ് മത്സരം ശ്രദ്ധേയമായി. ഉപജില്ലയിലെ വിവിധ സ്കൂളുകളിൽ നിന്നും തെരഞ്ഞെടുത്ത എൽപി, യുപി, ഹൈസ്കൂൾ, ഹയർ സെക്കൻഡറി വിഭാഗം വിദ്യാർഥികൾക്കായാണ് മത്സരം സംഘടിപ്പിച്ചത്. വിദ്യാർഥികളിൽ സ്വാതന്ത്ര്യ സമര ചരിത്രത്തെ കുറിച്ചും സമര നായകരെക്കുറിച്ചും അവബോധം സൃഷ്ടിക്കുക എന്ന ലക്ഷ്യത്തോടെയാണ് ക്വിസ് മത്സരം സംഘടിപ്പിച്ചത്. കെപിഎസ്ടിഎ സംസ്ഥാന അക്കാദമിക് സെൽ കൺവീനർ മനോജ് കൈവേലി ഉദ്ഘാടനം ചെയ്തു. ഉപജില്ല പ്രസിഡന്‍റ് ജി.കെ. വരുൺ കുമാർ അധ്യക്ഷനായി. പി.പി. ദിനേശൻ, ടി.വി. രാഹുൽ, ഇ. ഉഷ, ഹാരിസ് വടക്കയിൽ, സുധീർ അരൂർ, സി.എസ്. ആതിര, വി.കെ. അശ്വിൻ തുടങ്ങിയവർ പ്രസംഗിച്ചു.

കുടുംബശ്രീ അംഗങ്ങൾക്ക് ജെൻഡർ ബ്രിഗേഡ് പരിശീലനം നൽകി

പേരാമ്പ്ര: ജില്ലാ കുടുംബശ്രീ മിഷന്‍റെയും ചെറുവണ്ണൂർ പഞ്ചായത്ത് സിഡിഎസ് ജെൻഡർ റിസോഴ്സ് സെന്‍ററിന്‍റെയും നേതൃത്വത്തിൽ കുടുംബശ്രീ അംഗങ്ങൾക്ക് ജെൻഡർ ബ്രിഗേഡ് പരിശീലനം നൽകി. സിഡിഎസ് ചെയർപേഴ്സൺ ടി.കെ. രാധയുടെ അധ്യക്ഷതയിൽ പഞ്ചായത്ത് വൈസ് പ്രസിഡന്‍റ് ആദില നിബ്രാസ് ഉദ്ഘാടനം ചെയ്തു. പേരാമ്പ്ര അഗ്നിരക്ഷാ നിലയത്തിലെ സീനിയർ ഫയർ ആൻഡ് റെസ്ക്യൂ ഓഫീസർ റഫീഖ് കാവിൽ അഗ്നി സുരക്ഷയുമായി ബന്ധപ്പെട്ടുള്ള ബോധവത്കരണ ക്ലാസും ഫയർ എക്‌സ്റ്റിംഗ്യൂഷറുകൾ ഉപയോഗിച്ച് തീ കെടുത്തുന്നതിനുള്ള പരിശീലനവും നൽകി. ഗ്യാസ് ലീക്ക് അപകടങ്ങൾക്കുള്ള മുൻ കരുതലുകളും പ്രതിരോധ മാർഗങ്ങളും പ്രായോഗികമായി വിശദമാക്കി. ഇലക്ട്രിക് ഷോട്ട് സർക്യൂട്ട് അപകടങ്ങളെക്കുറിച്ചും മുൻകരുതലുകളും വിശദീകരിച്ചു. ആസ്റ്റർ മിംസ് ഹോസ്പിറ്റൽ എമർജൻസി മെഡിസിൻ വിഭാഗം ട്രെയിനിംഗ് കോഡിനേറ്റർ ബിജു പ്രഥമ ശുശ്രൂഷ ക്ലാസ് എടുത്തു. ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ മഞ്ജുഷ, സിഡിഎസ് സാമൂഹ്യ ഉപസമിതി കൺവീനർ റീജ, ആറാം വാർഡ് സിഡിഎസ് മെമ്പർ ഷൈനി എന്നിവർ പ്രസംഗിച്ചു.

കെഎസ്എസ്പിയു സന്നദ്ധ സേന രൂപീകരിച്ചു

തിരുവമ്പാടി: കേരള സ്റ്റേറ്റ് സർവീസ് പെൻഷനേഴ്സ് യൂണിയൻ (കെഎസ്എസ്പിയു) തിരുവമ്പാടി പഞ്ചായത്ത് കമ്മിറ്റി അംഗങ്ങളുടെ സന്നദ്ധ സേന രൂപീകരിച്ചു. സംഘടനയുടെ ജീവകാരുണ്യ പ്രവർത്തന മേഖലയിൽ വേറിട്ട ചുവടുവെപ്പെന്ന നിലയിൽ സോഷ്യൽ വെൽഫെയർ സ്കീമിന്‍റെ ഭാഗമായിട്ടാണ് 25 അംഗങ്ങളുടെ സന്നദ്ധ സേന രൂപീകരിച്ചത്. മക്കൾ വിദേശത്തേക്ക് ചേക്കേറുകയും വീടുകളിൽ വയോധികരായ പെൻഷൻ അംഗങ്ങളായ മാതാപിതാക്കൾ തനിച്ചാവുകയും ചെയ്യുന്ന ഇക്കാലത്ത് അവർക്ക് സഹായഹസ്തവുമായി എത്തുക എന്ന ലക്ഷ്യത്തോടെയാണ് വൊളന്‍റിയർ ടീം സജ്ജമായിട്ടുള്ളത്. ആശുപത്രിയിൽ പോകുക, മറ്റ് അത്യാവശ്യ സേവനങ്ങൾ വീടുകളിൽ എത്തിക്കുക എന്നിവക്കായി പ്രവർത്തിക്കുന്ന ടീമിൽ ആതുര ശുശ്രൂഷകർ, കൗൺസിലർമാർ, വാഹനമോടിക്കുന്നവർ എന്നിവരും ഉണ്ടാകും. "അരികെ' സേവന പദ്ധതിയുടെ ലോഞ്ചിംഗ് എഴുത്തുകാരനും അധ്യാപകനുമായ എ.വി. സുധാകരൻ നിർവഹിച്ചു. യൂണിറ്റ് പ്രസിഡന്‍റ് എം.വി. ജോർജ് അധ്യക്ഷത വഹിച്ചു. കേരള സർക്കാർ കാർഷിക വികസന വകുപ്പിന്‍റെ മികച്ച ക്ഷോണി സംരക്ഷണ കർഷകനുള്ള സംസ്ഥാന അവാർഡ് ജേതാവ് പുരയിടത്തിൽ പി.ജെ. തോമസിനെ സമ്മേളനത്തിൽ ആദരിച്ചു.

എംഡിഎംഎയുമായി പിടിയിൽ

കൊയിലാണ്ടി: ബുള്ളറ്റിൽ കടത്തുകയായിരുന്ന എംഡിഎംഎയുമായി യുവാവ് പിടിയിൽ. അത്തോളി മേക്കോത്ത് ഹാരിസി (28) നെ യാണ് പിടികൂടിയത്. തിരുവങ്ങൂർ കുനിയിൽ കടവ് പാലത്തിനു സമീപം കഴിഞ്ഞ ദിവസം രാത്രി നടത്തിയ വാഹന പരിശോധനയിലാണ് ഇയാൾ സഞ്ചരിച്ച ബുള്ളറ്റിൽ നിന്നും 4.41 ഗ്രാം എംഡിഎംഎ പിടികൂടിയത്. എസ്ഐമാരായ ആർ.സി. ബിജു, കെ.പി. ഗിരീഷ്, എഎസ്ഐ റെക്കീബ്, അനീഷ് മടോളി, ഗംഗേഷ്, സ്ക്വാഡ് അംഗങ്ങളായ അതുൽ, ശ്യാം എന്നിവരാണ് പരിശോധനയിൽ പങ്കെടുത്തത്.

കരോക്കെ ഗാനാലാപന മത്സരം ഉദ്ഘാടനം ചെയ്തു

കോഴിക്കോട്: ഗ്രന്ഥശാലാ ദിനത്തില്‍ ദര്‍ശനം സാംസ്‌കാരിക വേദിയുടെ മുപ്പതാം വാര്‍ഷികത്തിന്‍റെ ഭാഗമായി കരോക്കെ ഗാനാലാപന മത്സരം നടത്തി. സാഹിത്യകാരന്‍ സുഭാഷ് ചന്ദ്രന്‍ ഉദ്ഘാടനം ചെയ്തു. താലൂക്ക് ലൈബ്രറി കൗണ്‍സില്‍ ജോയിന്‍റ് സെക്രട്ടറി എം.ടി. ശിവരാജന്‍, താലൂക്ക് ലൈബ്രറി കൗണ്‍സില്‍ അംഗം പി.കെ. ശാലിനി, സംഘാടക സമിതി വര്‍ക്കിംഗ് ചെയര്‍മാന്‍മാരായ എം.എ. ജോണ്‍സണ്‍, കെ. കുഞ്ഞാലി സഹീര്‍, സാഹിത്യകാരി സല്‍മി സത്യാര്‍ത്ഥി എന്നിവര്‍ പങ്കെടുത്തു. മത്സര വിജയികള്‍ക്ക് 19ന് സമ്മാനങ്ങള്‍ നല്‍കും. അന്നേദിവസം വി.കെ. സുരേഷ് ബാബുവിന്‍റെ പ്രഭാഷണവും ഉണ്ടാകും. 20 ന് നടക്കുന്ന മെഗാ പരിപാടിയില്‍ പ്രസീത ചാലക്കുടിയും സംഘവും അവതരിപ്പിക്കുന്ന നാടന്‍പാട്ടും മറ്റു കലാരൂപങ്ങളും ഉണ്ടായിരിക്കുമെന്ന് ദര്‍ശനം പ്രസിഡന്‍റ് പി. സിദ്ധാര്‍ത്ഥന്‍ അറിയിച്ചു.

വാഗ്ഭടാനന്ദ വായനശാലയില്‍ പ്രവര്‍ത്തക സംഗമം സംഘടിപ്പിച്ചു

കോഴിക്കോട്: എരഞ്ഞിപ്പാലം ശ്രീ വാഗ്ഭടാനന്ദ ഗുരുദേവര്‍ സ്മാരക വായനശാലയുടെ ആഭിമുഖ്യത്തില്‍ ഗ്രന്ഥശാലാ ദിനാചരണത്തിന്‍റെ ഭാഗമായി പ്രവര്‍ത്തക സംഗമം സംഘടിപ്പിച്ചു. അഡ്വ. എ. വിശ്വനാഥന്‍ ഉദ്ഘാടനം ചെയ്തു. വായനശാലാ പ്രസിഡന്‍റ് പി.എസ്. വിപിന്‍, സെക്രട്ടറി കെ. ശൈലേഷ്, അഡ്വ. വിനോദ് സിംഗ് ചെറിയാന്‍, സി. സുരേന്ദ്രന്‍, ഡോ. കെ.വി. തോമസ്, പി.വി. രാധാകൃഷ്ണന്‍ നായര്‍, പി. ഭാസ്‌കരന്‍, കെ.വി. അജിത്കുമാര്‍, ബി.എസ്. ഉപേന്ദ്രന്‍, ശശി, കെ. പ്രകാശന്‍, പി. ഭാസ്‌ക്കരന്‍, സി.പി. ഷൈനി, വി.കെ. സ്വരാജ്, ഇ.എന്‍. പ്രഭാകരന്‍ എന്നിവര്‍ പ്രസംഗിച്ചു.

ടഗ് ഓഫ് വാർ ചാമ്പ്യൻഷിപ്പ് ആരംഭിച്ചു

കോഴിക്കോട്: കോഴിക്കോട് ജില്ലാ ടഗ് ഓഫ് വാർ അസോസിയേഷന്‍റെ സഹകരണത്തോടെ സംഘടിപ്പിക്കുന്ന ഇരുപതാമത് കേരള സംസ്ഥാന അണ്ടർ 17 ടഗ് ഓഫ് വാർ ചാമ്പ്യൻഷിപ്പ് എളേറ്റിൽ എംജെ ഹയർ സെക്കൻഡറി സ്കൂൾ ഗ്രൗണ്ടിൽ ആരംഭിച്ചു. മന്ത്രി എ.കെ. ശശീന്ദ്രൻ ചാമ്പ്യൻഷിപ്പ് ഉദ്ഘാടനം ചെയ്തു. കിഴക്കോത്ത് പഞ്ചായത്ത്‌ പ്രസിഡന്‍റ് സി. കെ സാജിദത്ത് അധ്യക്ഷത വഹിച്ചു. അഡ്വ. പി.ടി.എ. റഹീം എംഎൽഎ മുഖ്യാതിഥിയായിരുന്നു. ബ്ലോക്ക്‌ പഞ്ചായത്ത്‌ സ്റ്റാൻഡിംഗ് കമ്മിറ്റി ചെയർമാൻ ടി.എം. രാധാകൃഷ്ണൻ, പഞ്ചായത്ത്‌ അംഗങ്ങളായ കെ.കെ.എ. ജബാർ, റസീന പൂക്കോട്ട്, പി.പി നസ്‌റി, മാനേജ്മെന്‍റ് കമ്മിറ്റി പ്രസിഡന്‍റ് സി. പോക്കർ, ഷാജി ചെറിയാൻ, എം. മുഹമ്മദ്‌ അലി, പി.പി. മുഹമ്മദ്‌ ഇസ്മായിൽ, സിദ്ധീഖ് മലബാരി, ബി.സി. മോയിൻ, വി.കെ. തങ്കച്ചൻ, സി.ടി. ഭരതൻ എന്നിവർ പ്രസംഗിച്ചു.

ആനന്ദനിർവൃതിയിലാഴ്ത്തി മഹാശോഭായാത്ര

കൊയിലാണ്ടി: ബാലഗോകുലത്തിന്‍റെ ആഭിമുഖ്യത്തിൽ കൊയിലാണ്ടിയിൽ നടന്ന മഹാശോഭായാത്ര നഗരത്തെ ആനന്ദ നിർവൃതിയിലാഴ്ത്തി. "ഗ്രാമം തണലൊരുക്കട്ടെ; ബാല്യം സഫലമാകട്ടെ' എന്ന സന്ദേശമുയർത്തി ആബാലവൃദ്ധം ഭക്തർ അണിനിരന്ന ശോഭായാത്രയിൽ വേഷ പ്രഛന്നരായ ബാലികാ-ബാലകന്മാർ ഓടക്കുഴലേന്തി പീലിതിരുമുടി ചൂടി കണ്ണന്‍റെ ബാല്യകാല കുസൃതികളെ അനുസ്മരിപ്പിച്ചു. മുത്തുക്കുടകളും, താലപ്പൊലിയും, ഭജന സംഘങ്ങളും, കൃഷ്ണലീല നൃത്തമാടിയ കുട്ടികളും ശോഭായാത്രക്ക് മിഴിവേകി. രാധാ-കൃഷ്ണ ജീവിത സങ്കൽപങ്ങളിലെ ഭക്തിനിർഭരവും രസ പ്രധാനവുമായ മുഹൂർത്തങ്ങളെ സ്മരിക്കുന്ന പ്രൗഢവും വർണാഭവുമായ നിശ്ചല ദൃശ്യങ്ങൾ നഗരവീഥിയിലെ വിസ്മയ കാഴ്ചകളായി മാറി. വൃന്ദാവനത്തിലെ ഗോപികമാരുടെ പ്രേമ പാരവശ്യവും, ഗോപരിപാലനവും, കാളീയ മർദ്ദനവും മറ്റും ദൃശ്യചാരുത പകർന്നു. ആന്തട്ട ശ്രീരാമകൃഷ്ണ മഠം, ഏഴു കുടിക്കൽ ശ്രീകുറുംബ ഭഗവതി ക്ഷേത്ര പരിസരം, വലിയ മങ്ങാട് അറയിൽ ശ്രീകുറുംബ ഭഗവതി ക്ഷേത്ര പരിസരം, ചെറിയ മങ്ങാട് കോട്ടയിൽ ശ്രീ ദുർഗാ ഭഗവതി ക്ഷേത്ര പരിസരം, മനയടത്ത് പറമ്പിൽ ക്ഷേത്രപരിസരം, വിരുന്നു കണ്ടി ശ്രീകുറുംബാഭഗവതി ക്ഷേത്രപരിസരം, ഉപ്പാലക്കണ്ടി ശ്രീഭദ്രകാളി ക്ഷേത്ര പരിസരം, കൊരയങ്ങാട് ഭഗവതി ക്ഷേത്ര പരിസരം, കൊല്ലം വേദവ്യാസവിദ്യാലയം എന്നിവിടങ്ങളിൽ നിന്നും ആരംഭിച്ച ശോഭായാത്രകൾ കൊരയങ്ങാട് തെരുവിൽ സംഗമിച്ചു. ശേഷം സംഘാടക സമിതി ചെയർമാൻ വി.കെ. മുകുന്ദൻ വിവേകാനന്ദപ്പാറ സംരക്ഷണത്തിനായി പൊരുതിയ നാരായണന് ഗോകുല പതാക കൈമാറി. മഹാ ശോഭായാത്ര കൊയിലാണ്ടി സ്റ്റേഡിയത്തിൽ സമാപിച്ചു.

എൻഎസ്എസ് യൂണിറ്റ് ഉദ്ഘാടനം ചെയ്തു

കുന്നമംഗലം: ഓക്സിലിയം നവജ്യോതി ഹയർ സെക്കൻഡറി സ്കൂളിൽ ആരംഭിച്ച എൻഎസ്എസ് യൂണിറ്റിന്‍റെ ഉദ്ഘാടനം അഡ്വ. പി.ടി.എ റഹീം എംഎൽഎ നിർവഹിച്ചു. സ്കൂൾ മാനേജരും സുപ്പീരിയറുമായ ലിസി ജോസ് അധ്യക്ഷത വഹിച്ചു. എൻഎസ്എസ് ജില്ലാ കോർഡിനേറ്റർ എം.കെ. ഫൈസൽ, കുന്നമംഗലം ക്ലസ്റ്റർ കോർഡിനേറ്റർ പി.കെ സുധാകരൻ, സ്കൂൾ പ്രിൻസിപ്പൽ ജെ. വിൻസി, നരിക്കുനി ജിഎച്ച്എസ്എസ് അധ്യാപകൻ റെജി വർഗീസ്, ഓക്സിലിയം നവജ്യോതി എൻഎസ്എസ് പ്രോഗ്രാം ഓഫീസർ സജി മാത്യു തുടങ്ങിയവർ പ്രസംഗിച്ചു. ‌‌‌

വിലങ്ങാട് പാലത്തിന്‍റെ അപ്രോച്ച് റോഡിൽ മണ്ണിടിഞ്ഞ് കാർ താഴ്ന്നു

വിലങ്ങാട്: ടൗൺ പാലത്തിന് സമീപം അപ്രോച്ച് റോഡിൽ മണ്ണ് ഇടിഞ്ഞ് കാർ താഴ്ന്നു. കണ്ണൂർ സ്വദേശികൾ സഞ്ചരിച്ച കാറാണ്അപകടത്തിൽപെട്ടത്. ഇന്നലെ ഉച്ചയ്ക്കാണ് സംഭവം. കാർ പാലത്തിലേക്ക് കയറുന്നതിനിടെ മുൻഭാഗം റോഡരിക് ഇടിഞ്ഞ് താഴുകയായിരുന്നു. അപകടത്തിൽ ആർക്കും പരിക്കില്ല. ഉരുൾ പൊട്ടലിൽ മല വെള്ളം ഇരച്ച് കയറി റോഡ് ഒലിച്ച് പോയിരുന്നു. ഇതേ തുടർന്ന് നാട്ടുകാർ പുഴയിൽ നിന്ന് കല്ലും മണ്ണും ജെസിബി ഉപയോഗിച്ച് അറ്റകുറ്റ പ്രവൃത്തി നടത്തിയിരുന്നു. ഈ ഭാഗത്ത് കൂടെ അപകടകരമാം വിധമാണ് വാഹനങ്ങൾ കടന്ന് പോവുന്നത്.

പ്രീമിയർ ലീഗ് ഫുട്ബോൾ ടൂർണമെന്‍റ് നടത്തി

മുക്കം: ദേശീയ കായിക ദിനത്തോടനുബന്ധിച്ച് ഡോൺ ബോസ്കോ കോളജിൽ വിദ്യാർഥികൾക്ക് വേണ്ടി ബോസ്കോ പ്രീമിയർ ലീഗ് ഫുട്ബോൾ ടൂർണമെന്‍റ് നടത്തി. മൂന്നു ദിവസമായി നടന്ന മത്സരത്തിൽ ആറ് ടീമുകളാണ് പങ്കെടുത്തത്. മത്സരത്തിൽ ലിവർപൂൾ, സാന്‍റോസ് എന്നീ ടീമുകൾ ഒന്നും രണ്ടും സ്ഥാനങ്ങൾ കരസ്ഥമാക്കി, വിജയികൾക്കുള്ള ട്രോഫികൾ കോളജ് മാനേജർ ഫാ. മാർട്ടിൻ അഗസ്റ്റിൻ, പ്രിൻസിപ്പൽ ഡോ. ഫാ. ജോബി എം. ഏബ്രഹാം എന്നിവർ വിതരണം ചെയ്തു. മികച്ച കളിക്കാരൻ, മികച്ച പ്രതിരോധക്കാരൻ, മികച്ച ഗോളി, ടോപ് സ്കോറർ എന്നീ വിഭാഗങ്ങളിൽ ടി.പി. മനാഫ്, സൽമാൻ, ഷബീൽ, ആര്യൻ റൂബൻ എന്നിവർ ട്രോഫികൾ കരസ്ഥമാക്കി. ലീഗ് മത്സരങ്ങൾക്ക് സ്പോർട്സ് കോഡിനേറ്റർ സന്തോഷ് മരുതോലിൽ വിദ്യാർഥി കോഡിനേറ്റേഴ്സായ ഉമ്മർ മുക്തർ, അഹമ്മദ് സമീർ, അഭിനാഥ് എന്നിവർ നേതൃത്വം നൽകി.

എലിവേറ്റഡ് ഹൈവേക്കായി നന്തി നിവാസികൾ പ്രക്ഷോഭത്തിലേക്ക്

കൊയിലാണ്ടി: എൻഎച്ച് 66 എലിവേറ്റഡ് ഹൈവേക്കായി നന്തി നിവാസികൾ പ്രക്ഷോഭത്തിലേക്ക്. കഴിഞ്ഞ ഒരു വർഷത്തിലധികമായി എൻഎച്ച്എഐക്കും സർക്കാറുകൾക്കും ജനപ്രതിനിധികൾക്കും അദാനിക്കും നൽകിയ നിവേദനങ്ങളിൽ മറുപടി നൽകാതെ നിഷേധ സമീപനം സ്വീകരിക്കുന്നതിനെതിരേയാണ് നന്തി ബസാറിലെ ജനങ്ങൾ പ്രക്ഷോഭത്തിനിറങ്ങുന്നത്. അഴിയൂർ - വെങ്ങളം സ്ട്രെച്ചിലെ നന്തി ബസാറിലെ പുതിയതായി നിർമിച്ച ഹെവി വെഹിക്കിൾ അണ്ടർ പാസിൽ നിന്ന് ശ്രീശൈലം കുന്നുകൾ വരെയുള്ള 300 മീറ്റർ നീളം എംബാങ്ക്മെന്‍റിന് പകരം സുരക്ഷിതത്വവും സ്ഥിരതയും ഉറപ്പ് നൽകുന്ന സ്പാൻ ഉപയോഗിച്ച് എലിവേറ്റഡ് ഹൈവേ നിർമിക്കണമെന്നാണ് നാട്ടുകാരുടെ ആവശ്യം. 10 മീറ്റർ ഉയരവും 300 മീറ്റർ നീളവും 30 മീറ്റർ വീതിയും ഉള്ള എംബാങ്ക്മെന്‍റിന് 90000 ക്യൂബിക് മീറ്റർ (ഏകദേശം ഒരു ലക്ഷത്തി നാൽപ്പത്തി നാലായിരം ടൺ) മണ്ണ് ആവശ്യമാണ്. ഇതിനായി കാലാവസ്ഥ വ്യതിയാനങ്ങൾക്കും മണ്ണിടിച്ചിലുകൾക്കും കുടിവെള്ള ക്ഷാമത്തിനും ഇടയാക്കുന്ന വലിയ കുന്നുകൾ തന്നെ ഇടിച്ചു നിരത്തേണ്ടി വരും. കനത്ത മഴ ലഭിക്കുന്ന പ്രദേശമായതിനാൽ മഴവെള്ളം എംബാങ്ക്മെന്‍റിന് അകത്ത് പ്രവേശിച്ച് (water unfiltration) എംബാങ്ക്മെന്‍റ് തകരാനും നന്തി ടൗൺ വെള്ളത്തിൽ മുങ്ങാനും സാധ്യതയുണ്ട്. കുരിയാട്, ചേലക്കര, ബിമ്നോർ, കലിംഗഗെറ്റ് പുനർദാദ, ഷിരൂർ എന്നീ അപകടങ്ങളും നാട്ടുകാർ ചൂണ്ടി കാട്ടുന്നു. അഴിയൂർ - വെങ്ങളം 40.8 കിലോമീറ്റർ 1838 കോടി രൂപയ്ക്ക് സ്ട്രെച്ച് കരാറെടുത്ത അദാനി എന്‍റർപ്രൈസസ് വെറും 971 കോടി രൂപയ്ക്കാണ് വഗാഡ് ഇൻഫ്രാസ്ട്രെക്ച്ചർ കമ്പനിക്ക് ഉപകരാർ നൽകിയത്. 867 കോടി രൂപയാണ് ഈ പ്രൊജക്ടിൽ അദാനിക്ക് നോക്കു കൂലിയായി ലഭിച്ചിരിക്കുന്നത്. നന്തിയിൽ എംബാങ്ക്മെന്‍റ് ഒഴിവാക്കി എലിവേറ്റഡ് ഹൈവേ പണിയാനുള്ള അധിക പണം ഈ നോക്കുകൂലിയിൽ നിന്ന് ചെലവഴിക്കാൻ കേന്ദ്ര സർക്കാർ അദാനിയോട് ആവശ്യപ്പെടണം. നാടിന് നാശമാകുന്ന 300 മീറ്റർ എംബാങ്ക്മെന്‍റ് ഒഴിവാക്കി എലിവേറ്റഡ് ഹൈവേ നിർമിക്കാൻ എൻഎച്ച്എഐ തയാറാകുന്നില്ലെങ്കിൽ പ്രക്ഷോഭ പരിപാടികൾ സംഘടിപ്പിക്കുമെന്നും നാട്ടുകാർ പറഞ്ഞു. സമരത്തിന്‍റെ സൂചനയായി 16 ന് 24 മണിക്കൂർ ഉപവാസവും 19 ന് വൈകിട്ട് നന്തിയിലുള്ള വഗാഡ് ഓഫീസിലേക്ക് മാർച്ചും പൊതുയോഗവും നടത്തും.

കടിച്ച പട്ടിയെ വാലിൽ തൂക്കി അടിച്ചുകൊന്നു

കുറ്റ്യാടി: കടിച്ച പട്ടിയെ ഓടിച്ചിട്ട് പിടിച്ച് വാലിൽ തൂക്കി അടിച്ചുകൊന്നു. കുറ്റ്യാടി സ്വദേശി തുണ്ടി കണ്ടി ചന്ദ്രനാണ് പട്ടിയുടെ കടിയേറ്റതും തുടർന്ന് പട്ടിയെ അടിച്ചുകൊന്നതും. രണ്ടുവർഷം മുമ്പും ചന്ദ്രനെ ഇതുപോലെ പട്ടി കടിച്ചിരുന്നു. അപ്പോഴും വാലിൽ പിടിച്ച് നിലത്തടിച്ച് കൊല്ലുകയായിരുന്നു. കുറ്റ്യാടി പുതിയ ബസ് സ്റ്റാൻഡ് പരിസരത്ത് വച്ചാണ് ഇന്നലെ ചന്ദ്രനെ പട്ടി കടിച്ചത്. പട്ടിക്ക് പേ ബാധയുണ്ടന്നാണ് പറയുന്നത്. സമീപ പ്രദേശമായ ഒത്യോട്ടു പാലത്തിന് സമീപം സയിദ് ഹസനും കടിയേറ്റിരുന്നു. രണ്ടുപേരും കുറ്റ്യാടി ഗവ. ആശുപത്രിയിൽ ചികിത്സയിലാണ്.

എം.കെ. മുനീര്‍ എംഎല്‍എയുടെ ആരോഗ്യനിലയില്‍ കാര്യമായ പുരോഗതി

കോഴിക്കോട്: ശാരീരികാസ്വാസ്ഥ്യത്തെ തുടര്‍ന്ന് കോഴിക്കോട്ടെ സ്വകാര്യ ആശുപത്രിയിലെ തീവ്രപരിചരണ വിഭാഗത്തില്‍ പ്രവേശിപ്പിച്ച ഡോ. എം.കെ. മുനീര്‍ എംഎല്‍എയുടെ ആരോഗ്യനിലയില്‍ കാര്യമായ പുരോഗതിയുണ്ടെന്ന് ആശുപത്രി അധികൃതര്‍. എംആര്‍ഐ പരിശോധനയില്‍ തലയ്ക്ക് കാര്യമായ ആഘാതമൊന്നും കണ്ടെത്തിയിട്ടില്ല. ചെറിയ നിര്‍ദേശങ്ങളോടു മുനീര്‍ പ്രതികരിക്കുന്നുണ്ടെന്നും മെഡിക്കല്‍ ബുള്ളറ്റിനില്‍ പറയുന്നു. വിവിധ വിഭാഗങ്ങളിലെ ഡോക്ടര്‍മാരുടെ സംഘം അദ്ദേഹത്തിന്‍റെ ആരോഗ്യനില നിരീക്ഷിച്ചു വരികയാണ്. നിലവില്‍ ഐസിയുവിലാണ് എം.കെ. മുനീര്‍ ഉള്ളത്. ശാരീരിക അസ്വാസ്ഥ്യത്തെ തുടര്‍ന്ന് കഴിഞ്ഞയാഴ്ച ആശുപത്രിയില്‍ പ്രവേശിപ്പിച്ച എം.കെ. മുനീറിന്‍റെ രക്തത്തില്‍ പൊട്ടാസ്യത്തിന്‍റെ അളവു കുറയുകയും പിന്നാലെ ഹൃദയാഘാതമുണ്ടാവുകയും ചെയ്തിരുന്നു.

സാന്താക്രൂസ് കുരിശുപള്ളി തിരുനാള്‍ സമാപിച്ചു

കോഴിക്കോട്: കോഴിക്കോട് രൂപത സാന്താക്രൂസ് കുരിശുപള്ളിയിലെ തിരുനാള്‍ സമാപിച്ചു. ഇന്നലെ വൈകുന്നേരം കോഴിക്കോട് അതിരൂപതാ വികാരി ജനറാള്‍ മോണ്‍. ജന്‍സൻ പുത്തന്‍വീട്ടിലിന്‍റെ മുഖ്യകാര്‍മികത്വത്തില്‍ നടന്ന ആഘോഷമായ ദിവ്യബലിയോടെയാണ് തിരുനാള്‍ സമാപിച്ചത്. ദേവമാത കത്തീഡ്രല്‍ വികാരി ഫാ. ജെറോം ചിങ്ങന്തറയാണ് തിരുനാളിന് കൊടിയേറ്റിയത്. ശനിയാഴ്ച വൈകുന്നേരം കോഴിക്കോട് ആര്‍ച്ച്ബിഷപ് ഡോ. വര്‍ഗീസ് ചക്കാലയ്ക്കലിന്‍റെ മുഖ്യകാര്‍മികത്വത്തില്‍ പൊന്തിഫിക്കല്‍ കുര്‍ബാനയും നൊവേനയും ഉണ്ടായിരുന്നു.

ഡോ. ഷംഷീർ വയലിലിന് "ചാരിറ്റബിൾ ആക്ട് ഓഫ് ദി ഇയർ' പുരസ്കാരം

കോഴിക്കോട്: യുഎഇയിലെ പ്രമുഖ കമ്മ്യൂണിറ്റി മാധ്യമ പ്ലാറ്റ്‌ഫോമായ ലവിൻ ദുബായിയുടെ ഈ വർഷത്തെ "ചാരിറ്റബിൾ ആക്ട് ഓഫ് ദി ഇയർ' പുരസ്കാരം ബുർജീൽ ഹോൾഡിംഗ്സ് സ്ഥാപകനും ചെയർമാനുമായ ഡോ. ഷംഷീർ വയലിലിന്. ഇന്ത്യ കണ്ട ഏറ്റവും വിനാശകരമായ ആകാശ ദുരന്തങ്ങളിലൊന്നായ അഹമ്മദാബാദ് എയർ ഇന്ത്യ വിമാനാപകടത്തിൽ ജീവൻ പൊലിഞ്ഞ ബിജെ മെഡിക്കൽ കോളജിലെ വിദ്യാർഥികളുടെ കുടുംബാംഗങ്ങൾക്കും പരിക്കേറ്റവർക്കും ആറ് കോടി രൂപയുടെ അടിയന്തര സഹായം എത്തിച്ചതാണ് ഡോ. ഷംഷീറിനെ പുരസ്കാരത്തിനർഹനാക്കിയത്. അഹമ്മദാബാദ് വിമാന ദുരന്തത്തിൽ ജീവൻ നഷ്ടപെട്ട നാല് യുവ മെഡിക്കൽ വിദ്യാർഥികളുടെ കുടുംബങ്ങൾക്ക് ഒരുകോടി രൂപ വീതമാണ് ഡോ. ഷംഷീർ നൽകിയത്. അപകടത്തിൽ ഉറ്റവരെ നഷ്ടപ്പെട്ട കുടുംബങ്ങൾക്ക് 25 ലക്ഷം രൂപ വീതവും പരിക്കേറ്റവർക്ക് 3.5 ലക്ഷം വീതവും സഹായം ലഭ്യമാക്കി. സമൂഹത്തിലാകെ അലയൊലികൾ ഉണ്ടാക്കുന്ന മാനുഷിക ഇടപെടലാണ് ഡോ. ഷംഷീർ നടത്തിയതെന്നാണ് ലവിൻ കമ്മ്യൂണിറ്റിയുടെ വിലയിരുത്തൽ. ഇടനിലക്കാരോ കാലതാമസമോ ഇല്ലാതെ നേരിട്ട് സഹായം എത്തിച്ചത് ദുരന്തത്തിൽപ്പെട്ട മെഡിക്കൽ വിദ്യാർഥികൾക്കും കുടുംബങ്ങൾക്കും ആശ്വാസമേകി. യുഎഇ ഇയർ ഓഫ് കമ്മ്യൂണിറ്റി ആഘോഷിക്കുന്ന വേളയിൽ സമൂഹത്തിനായി പ്രവർത്തിക്കുന്നവർക്കുള്ള പുരസ്കാരം ലഭിച്ചതിൽ ഏറെ സന്തോഷമുണ്ടെന്ന് ഡോ. ഷംഷീർ പറഞ്ഞു. യുഎഇയിൽ വിവിധ മേഖലകളിൽ സേവന രംഗത്ത് പ്രവർത്തിക്കുന്ന ദി ഗിവിംഗ് ഫാമിലി, അഷ്റഫ് താമരശേരി, അഹമ്മദ് അലി, ആയിഷ ഖാൻ, കെ 9 ഫ്രണ്ട്സ് ദുബായ് എന്നിവരായിരുന്നു ചാരിറ്റബിൾ ആക്ട് ഓഫ് ദി ഇയർ പുരസ്‌കാരത്തിനായി നാമനിർദേശം ചെയ്യപ്പെട്ട മറ്റുള്ളവർ. മൂന്നാഴ്ചയോളം നീണ്ട വോട്ടെടുപ്പിൽ പൊതുജനങ്ങളിൽ നിന്ന് ഏറ്റവും കൂടുതൽ വോട്ട് നേടിയാണ് ഡോ. ഷംഷീർ പുരസ്‌കാരത്തിന് അർഹനായത്.

വയനാട് ടൗണ്‍ഷിപ്പ് പദ്ധതി : യുഎല്‍സിസിഎസിക്ക് 39.80 കോടി ധനസഹായം

കോഴിക്കോട്: വയനാട് ടൗണ്‍ഷിപ്പ് പ്രോജക്ടിന്‍റെ കരാര്‍ ഏറ്റെടുത്ത ഊരാളുങ്കല്‍ ലേബര്‍ കോണ്‍ട്രാക്ട് കോഓപറേറ്റീവ് സൊസൈറ്റി (യുഎല്‍സിസിഎസ്)ക്ക് മൊബിലൈസേഷന്‍ അഡ്വാന്‍സായി 39.80 കോടി രൂപ കൂടി അനുവദിക്കാന്‍ സര്‍ക്കാര്‍ ഉത്തരവിട്ടു. പദ്ധതിയുടെ ആകെ കരാര്‍ തുകയുടെ 20 ശതമാനമാണ് മൊബിലൈസേഷന്‍ അഡ്വാന്‍സായി അനുവദിക്കുന്നത്. ഈ തുക വയനാട് ദുരിതാശ്വാസത്തിനായി മുഖ്യമന്ത്രിയുടെ ദുരിതാശ്വാസ നിധിയില്‍ ലഭിച്ച ഫണ്ടില്‍ നിന്നും നല്‍കും. വയനാട് ടൗണ്‍ഷിപ്പ് പ്രോജക്ടിന് സര്‍ക്കാര്‍ 351 കോടി രൂപയുടെ ഭരണാനുമതി നല്‍കിയിട്ടുണ്ട്. കിഫ്‌കോണ്‍ 324കോടി രൂപയുടെ സാങ്കേതിക അനുമതി നല്‍കി. ചര്‍ച്ചകള്‍ക്ക് ശേഷം ഊരാളുങ്കല്‍ സൊസൈറ്റിയുമായി 299 കോടി രൂപയുടെ (ജിഎസ്ടി ഉള്‍പ്പെടെ) എന്‍ജിനിയറിംഗ്, പ്രൊക്യൂര്‍മെന്‍റ്, കണ്‍സ്ട്രക്‌ഷന്‍ കരാറില്‍ ഒപ്പുവച്ചു. ഈ കരാര്‍ തുകയുടെ 20 ശതമാനമായ 59.8 കോടി രൂപയാണ് മൊബിലൈസേഷന്‍ അഡ്വാന്‍സായി നല്‍കാന്‍ കഴിയുന്ന പരമാവധി തുക. നേരത്തെ, മുഖ്യമന്ത്രിയുടെ ദുരിതാശ്വാസ നിധിയില്‍ നിന്ന് 20 കോടി രൂപ അഡ്വാന്‍സായി നല്‍കിയിരുന്നു. ഇതുപ്രകാരം ബാക്കിയുള്ള തുകയായ 39.80 കോടി രൂപയാണ് ഇപ്പോള്‍ അനുവദിച്ചിരിക്കുന്നത്. കല്‍പ്പറ്റ എല്‍സ്റ്റണ്‍ എസ്റ്റേറ്റില്‍ സര്‍ക്കാര്‍ ഏറ്റെടുത്ത 64 ഹെക്ടറിലാണ് ടൗണ്‍ഷിപ്പ് നിര്‍മിക്കുന്നത്. മാര്‍ച്ച് 27ന് മുഖ്യമന്ത്രി പിണറായി വിജയനാണ് ടൗണ്‍ഷിപ്പിന് ശിലയിട്ടത്. നിര്‍മാണ പ്രവര്‍ത്തനങ്ങള്‍ പുരോഗമിക്കുകയാണ്. ആറു മാസത്തിനകം ടൗണ്‍ഷിപ്പ് പൂര്‍ത്തിയാക്കാനാണ് ലക്ഷ്യമിടുന്നത്. ഓരോ കുടുംബത്തിനും ഏഴു സെന്‍റില്‍ ആയിരം ചതുരശ്രയടി വിസ്തീര്‍ണമുളള വീടാണ് നിര്‍മിക്കുന്നത്. ആരോഗ്യ കേന്ദ്രം, അങ്കണവാടി, പൊതുമാര്‍ക്കറ്റ്, കമ്യൂണിറ്റി സെന്‍റര്‍, മള്‍ട്ടിപര്‍പ്പസ് ഹാള്‍, ലൈബ്രറി എന്നിവ ഉള്‍പ്പെടെയാണ് ടൗണ്‍ഷിപ്പ് നിര്‍മിക്കുന്നത്. അതിനിടെ മുണ്ടക്കൈ, ചൂരല്‍മല എന്നിവിടങ്ങളിലെ ഉരുള്‍പൊട്ടല്‍ ദുരന്തബാധിതരുടെ പുനരധിവാസത്തിനായി പ്രവര്‍ത്തിക്കുന്ന മൈക്രോ പ്ലാന്‍ ഇംപ്ലിമെന്‍റേഷന്‍ യൂണിറ്റിന്‍റെ (പിഐയു) നടത്തിപ്പ് ചെലവുകള്‍ക്കായി 19.20 ലക്ഷം രൂപയും സര്‍ക്കാര്‍ അനുവദിച്ചു. വയനാട് ജില്ലാ കളക്ടറേറ്റിലാണ് മൈക്രോ പ്ലാന്‍ ഇംപ്ലിമെന്‍റേഷന്‍ യൂണിറ്റ് പ്രവര്‍ത്തിക്കുന്നത്. യൂണിറ്റിന്‍റെ പ്രവര്‍ത്തനങ്ങള്‍ക്കായി സ്റ്റേറ്റ് ഡിസാസ്റ്റര്‍ റെസ്‌പോണ്‍സ് ഫണ്ടില്‍ (എസ്ഡിആര്‍എഫ്) നിന്ന് 19.20 ലക്ഷം രൂപ അനുവദിക്കുമെന്ന് നേരത്തെ സര്‍ക്കാര്‍ പ്രഖ്യാപിച്ചിരുന്നു. എന്നാല്‍ ഈ തുക ഇതുവരെ ലഭിച്ചിട്ടില്ലെന്ന് വയനാട് ജില്ലാ കളക്ടര്‍ സര്‍ക്കാരിനെ അറിയിച്ചിരുന്നു. ഇതേ തുടര്‍ന്ന് ദുരന്തബാധിതര്‍ക്കായി കോടതി വിധി പ്രകാരം അനുവദിച്ച 120 കോടി രൂപയില്‍ നിന്ന് എസ്ഡിആര്‍എഫ് മാനദണ്ഡങ്ങളില്‍ ഇളവ് വരുത്തിക്കൊണ്ട് 19.20 ലക്ഷം രൂപ അനുവദിക്കാന്‍ സര്‍ക്കാര്‍ തീരുമാനിക്കുകയായിരുന്നു.

കാറിടിച്ച് സ്കൂട്ടർ യാത്രക്കാരൻ മരിച്ചു

കോഴിക്കോട്: മദ്യലഹരിൽ അമിതവേഗതയിലെത്തിയ കാറിടിച്ച് സ്കൂട്ടർ യാത്രക്കാരൻ മരിച്ചു. കോഴിക്കോട് യൂണിറ്റിലെ ഫോട്ടോകമ്പോസിംഗ് വിഭാഗം ജീവനക്കാരൻ മെഡിക്കൽ‌ കോളജ് എടവലത്ത് പറമ്പിൽ സുകൃതത്തിൽ ഒ.ടി. പ്രശാന്ത് (42) ആണ് മരിച്ചത്. ഞായറാഴ്ച ഉച്ചയ്ക്ക് രണ്ടോടെ മകളെ ട്യൂഷന് വിട്ട് മടങ്ങുന്നതിനിടെ കോഴിക്കോട് ചേവായൂർ കാവ് സ്റ്റോപ്പിൽ വച്ച് കാർ സ്കൂട്ടറിന്‍റെ പുറകിൽ വന്നിടിക്കുകയായിരുന്നു. ഇടിയുടെ ആഘാതത്തിൽ സ്കൂട്ടറിൽ നിന്ന് ഉയരത്തിലേക്ക് തെറിച്ച പ്രശാന്ത് കാറിന്‍റെ ബോണറ്റിന് മുകളിലേക്ക് വീഴുകയായിരുന്നു. അമിത വേഗതയിലെത്തി മറ്റൊരു കാറിലിടിച്ച ശേഷമാണ് പ്രശാന്തിനെ ഇടിച്ച് വീഴ്ത്തിയത്. കൊള്ളാങ്ങോട് അയ്യപ്പക്ഷേത്ര കവാടത്തിന് എതിർ വശത്തുവച്ചാണ് അപകടമുണ്ടായത്. നാട്ടുകാരാണ് മെഡിക്കല് കോളജ് ആശുപത്രിയിലെത്തിച്ചത്. കാറോടിച്ച ചേവായൂർ കുന്നംപുറത്ത് കീർത്തനനത്തിൽ കെ. അക്ഷയെ പോലീസ് കസ്റ്റഡിയിലെടുത്തു. മൃതദേഹം മെഡിക്കൽ കോളജ് മോർച്ചറിയിൽ സൂക്ഷിച്ചിരിക്കുകയാണ്. അച്ഛൻ: എം.കെ. വിജയൻ, അമ്മ: ഒ.ടി. ജയന്തി. ഭാര്യ: സുഹാസിനി (ചെമ്മണ്ണൂർ ഗോൾഡ്), മകൾ: മീനാക്ഷി (പ്ലസ്ടു വിദ്യാർഥിനി, മാനഞ്ചിറ മോഡേൺ സ്കൂൾ).

ട്രെയിൻ ഇടിച്ച് യുവാവ് മരിച്ചു

കൊയിലാണ്ടി: ട്രെയിൻ ഇടിച്ച് യുവാവ് മരിച്ചു. മൂടാടി ഹിൽ ബസാർ മോവില്ലൂർ കുന്നുമ്മൽ അഭിലാഷ് (39) ആണ് ട്രെയിൻ ഇടിച്ച് മരിച്ചത്. മൂടാടി റെയിൽവേ ഗേറ്റിന് സമീപത്ത് വച്ചാണ് സംഭവം. പോലീസ് എത്തി മൃതദേഹം മെഡിക്കൽ കോളജിലേക്ക് മാറ്റി. പിതാവ്: പരേതനായ കുഞ്ഞിക്കണാരൻ. മാതാവ്: ശോഭ. സഹോദരങ്ങൾ: ഹരീഷ്, റിനീഷ് (കണ്ണൻ, മാതൃഭൂമി ഏജന്‍റ് മൂടാടി).

മാതൃവേദി രൂപതാ തല വടംവലി മത്സരം

കോടഞ്ചേരി: മാതൃവേദിയുടെ താമരശേരി രൂപതാതല വടംവലി മത്സരം തിരുവമ്പാടി അൽഫോൻസ കോളജിൽ നടത്തി. മത്സരത്തിൽ നൂറാംതോട് സെന്‍റ് ജോസഫ്സ് ഇടവകക്ക് ഒന്നാം സ്ഥാനവും, കോടഞ്ചേരി സെന്‍റ് മേരീസ് ഫൊറോന ഇടവകക്ക് രണ്ടാം സ്ഥാനം ലഭിച്ചു. രൂപതയിലെ വിവിധ ഇടവകകളിൽ നിന്നായി 16 ടീമുകൾ മത്സരത്തിൽ പങ്കെടുത്തു. 10001 രൂപയും എവറോളിംഗ് ട്രോഫിയുമാണ് ഒന്നാം സ്ഥാനം, 5001 രൂപയും എവറോളിംഗ് ട്രോഫിയും രണ്ടാം സ്ഥാനക്കാർക്കും ലഭിച്ചു.

കേന്ദ്രത്തിൽ പ്രവാസി മന്ത്രാലയം രൂപീകരിക്കണമെന്ന്

കോഴിക്കോട് : പ്രവാസി സമൂഹത്തിന്‍റെ ക്ഷേമ ഐശ്വര്യം ഉറപ്പ് വരുത്തുന്നതിന് കേന്ദ്ര സർക്കാരിൽ സ്വതന്ത്ര ചുമതലയുള്ള പ്രവാസി മന്ത്രാലയം രൂപീകരിക്കണമെന്ന് പ്രവാസി കേരള കോൺഗ്രസ് (എം) റിട്ടേണിസ് സംസ്ഥാന പ്രസിഡന്‍റ് ജോസഫ് ദേവസ്യാ പൊന്മാങ്കൽ ആവശ്യപ്പെട്ടു . പ്രവാസി കേരളാ കോൺഗ്രസ് (എം)ജില്ലാ കൺവെൻഷൻ കോഴിക്കോട് സിഎസ്ഐ ഹാളിൽ ഉദ്ഘാടനം ചെയ്യുകയായിരുന്നു അദ്ദേഹം .ലോക കേരള സഭ മാതൃകയിൽ ലോക ഭാരത സഭ സംഘടിക്കുവാൻ കേന്ദ്ര സർക്കാർ തയാറാകണമെന്നും അദ്ദേഹം ആവശ്യപ്പെട്ടു. ജില്ലാ പ്രസിഡന്‍റ് പ്രഥിരാജ് നാറാത്ത് അദ്ധ്യക്ഷത വഹിച്ചു. കേരള കോൺഗ്രസ് (എം) ജില്ലാ പ്രസിഡന്‍റ് ടി.എം. ജോസഫ്, സംസ്ഥാന ജനറൽ സെക്രട്ടറി രാജീവ്‌ വഞ്ചിപ്പാലം എന്നിവർ പ്രസംഗിച്ചു.പുതിയ ജില്ലാ ഭാരവാഹികളെ യോഗം തിരഞ്ഞെടുത്തു.

വന്യജീവി ബില്ല് തട്ടിപ്പ് : കർഷക കോൺഗ്രസ്

താമരശേരി: ഭീഷണിയായ വന്യജീവിയെ കൊല്ലാൻ ചീഫ് വൈൽഡ് ലൈഫ് വാർഡന് ഉത്തരവിടാമെന്നിരിക്കെ സർക്കാർ കൊണ്ടുവരുന്ന പുതിയ ബിൽ ശുദ്ധതട്ടിപ്പും തെരഞ്ഞെടുപ്പ് തന്ത്രവുമാണെന്ന് കർഷക കോൺഗ്രസ് ജില്ലാ പ്രസിഡന്‍റ് അഡ്വ.ബിജു കണ്ണന്തറ അഭിപ്രായപെട്ടു. കൊടുവള്ളി നിയോജക മണ്ഡലം നേതൃയോഗം ഉദ്ഘാടനം ചെയ്യുകയായിരുന്നു അദ്ദേഹം. കേന്ദ്ര നിയമമായ വന്യജീവി സംരക്ഷണ നിയമത്തിലെ വ്യവസ്ഥകൾക്ക് വിരുദ്ധമായി നിയമം നിർമ്മിക്കാൻ സംസ്ഥാന സർക്കാരിന് സാധിക്കില്ല. വനത്തിന് പുറത്തിറങ്ങി നാശം വിതയ്ക്കുന്ന വന്യജീവികളെ പ്രതിരോധിക്കാൻ വന്യജീവി സംരക്ഷണ നിയമത്തിലെ 11 (2) വകുപ്പ് ഫലപ്രദമായി ഉപയോഗിക്കാൻ സംസ്ഥാന സർക്കാർ തയ്യാറാകണം. ജില്ലാ കളക്ടർക്കുള്ള അധികാരമുപയോഗിച്ചും അക്രമകാരികളായ വന്യമൃഗങ്ങളെ കൊല്ലാം. വനപാലകരുടെ ജീവന് ഭീഷണി വന്നപ്പോൾ വന്യജീവിയെ അടുത്ത നിമിഷം വെടിവെച്ചു കൊന്നിട്ടുണ്ട്. അതേ വകുപ്പ് ഉപയോഗിച്ച് ജനങ്ങളെ കൂടി രക്ഷിക്കാൻ ചീഫ് വൈൽഡ് ലൈഫ് വാർഡനു നിർദ്ദേശം നൽകാൻ സർക്കാർ തയ്യാറാകണം. വന്യജീവികളെ വനത്തിനുള്ളിൽ സംരക്ഷിക്കുന്നതിനായി കോടിക്കണക്കിന് രൂപ ചെലവഴിക്കുന്നുണ്ടെങ്കിലും ഒന്നും ഫലത്തിൽ എത്തുന്നില്ലെന്നും അദ്ദേഹം പറഞ്ഞു. നിയോജക മണ്ഡലം പ്രസിഡന്‍റ് ഷരീഫ് വെളിമണ്ണ അധ്യക്ഷത വഹിച്ചു. അഹമ്മദ് കുട്ടി കട്ടിപ്പാറ, അരിയിൽ ഇസ്മായിൽ, എൻഅജിതൻ, മുഹമ്മദ് ഇഖ്ബാൽ, സി.എം. ഭാസ്കരൻ, ഷാഫി ആരാമ്പ്രം, വി.പി . അഷ്റഫ് എന്നിവർ പ്രസംഗിച്ചു.

എംഡിഎംഎ വേട്ട; ബംഗളൂരുവിലെ കഫെ ജീവനക്കാരന്‍ പിടിയില്‍

താമരശേരി: ബംഗളൂരുവില്‍നിന്നും വിൽപനയ്ക്കായി കൊണ്ടുവന്ന 81 ഗ്രാം എം ഡിഎംഎ യുമായി യുവാവിനെ പിടികൂടി. മുക്കം നീലേശ്വരം വിളഞ്ഞി പിലാക്കൽ മുഹമ്മദ് അനസി(20)നെയാണ് ഇന്നലെ ഉച്ചയ്ക്ക് താമരശേരി ചുങ്കത്തിനടുത്തുവെച്ച് പോലീസ് പിടികൂടിയത്. കെഎൽ 20 പി 9658 നമ്പർ സ്കൂട്ടറിൽ ഒളിപ്പിച്ച നിലയിലായിരുന്നു എംഡിഎം എ. ബംഗളൂരുവില്‍നിന്നും സ്കൂട്ടറിൽ നേരിട്ട് വരുന്ന വഴിയാണ് ഇയാൾ പിടിയിലായത്. മൊത്ത കച്ചവടക്കാരിൽ നിന്നും വാങ്ങി കോഴിക്കോട് ജില്ലയിൽ വിൽപന നടത്തുകയാണ് ഇയാൾ. ഒരു വർഷമായി ബംഗളൂരുവില്‍ കഫെ ഷോപ്പിൽ ജീവനക്കാരനാണ്. പിടികൂടിയ ലഹരി മരുന്നിന് കേരളത്തിൽ മൂന്നുലക്ഷം രൂപയോളം വരും. നാർക്കോട്ടിക്ക് സെൽ ഡിവൈഎസ്പി പ്രകാശൻ പടന്നയിൽ ,താമരശേരി ഡിവൈഎസ്പി കെ. സുഷീർ എന്നിവരുടെ നിർദ്ദേശപ്രകാരം സ്പെഷ്യൽ സ്ക്വാഡ് എസ്ഐ .രാജീവ്ബാബു , താമരശേരി എസ്ഐ മാരായ വി.കെ. റസാക്ക്, എം.അബ്ദു, സ്പെഷ്യൽ സ്ക്വാഡ് എഎസ്ഐ മാരായ വി.വി. ഷാജി, വി.സി.ബിനീഷ്, എസ്പി മാരായ എൻ.എം. ജയരാജൻ, പി.പി ജിനീഷ്, ഇ.കെ. അഖിലേഷ്, പി.കെ.ലിനീഷ്, കെ.രമ്യ, ടി.പി.പ്രശാന്ത് എന്നിവരടങ്ങിയ സംഘമാണ് പ്രതിയെ പിടികൂടിയത്.

ഷോക്കേറ്റ് വിദ്യാർഥികളുടെ മരണം; നഷ്ടപരിഹാരത്തുക കൈമാറി

കോടഞ്ചേരി: മെയ് 25ന് വൈദ്യുതാഘാതമേറ്റ് മരണപ്പെട്ട കോടഞ്ചേരിയിലെ വിദ്യാഥികളായ ചന്ദ്രൻകുന്നേൽ ബിജു- ഷീബ ദമ്പതികളുടെ മക്കളായ നിധിൻ (14) എബിൻ (11) എന്നിവരുടെ കുടുംബത്തിനുള്ള സംസ്ഥാന സര്‍ക്കാരിന്‍റെ നഷ്ടപരിഹാരത്തുക ലിന്‍റോ ജോസഫ് എംഎൽഎ കോടഞ്ചേരിയിലെ വീട്ടിലെത്തി കൈമാറി. പഞ്ചായത്ത് പ്രസിഡന്‍റ് അലക്സ് തോമസ്, പഞ്ചായത്ത് മെമ്പർമാരായ ജോർജുകുട്ടി, ചാൾസ് തയ്യിൽ, ചിന്ന അശോകൻ, രാഷ്ട്രീയപാർട്ടി പ്രതിനിധികളായ ഷിജി ആന്‍റണി, പി.ജി സാബു, ഷിബു പുതിയേടത്ത്, എ.എസ്‌. രാജു തുടങ്ങിയവർ ഒപ്പമുണ്ടായിരുന്നു. ആദ്യ ഘടു 10 ലക്ഷം രൂപയുടെ ചെക്കാണ് എംഎൽഎ ലിന്‍റോ ജോസഫ് കുടുംബത്തിന് കൈമാറിയത്.

പോലീസുകാരെ സര്‍വീസില്‍ നിന്ന് പിരിച്ച് വിടണമെന്ന് യുഡിഎഫ്

കോഴിക്കോട്: വളയത്ത് തിരുവോണനാളില്‍ യുവാക്കള്‍ തമ്മില്‍ ഉണ്ടായ സംഘര്‍ഷം ഹിന്ദു മുസ്ലീം വിഷയമായി ചിത്രീകരിച്ച് റിമാന്‍ഡ് റിപ്പോര്‍ട്ട് തയ്യാറാക്കിയ പോലീസുകാരെ സര്‍വീസില്‍ നിന്ന് പിരിച്ച് വിടണമെന്ന യുഡിഎഫ്. സംഭവത്തിന്‍റെ പേരില്‍ വളയത്ത് വര്‍ഗീയ ധ്രുവീകരണം നടത്താനാണ് പോലീസ് ശ്രമിച്ചതെന്നും സര്‍ക്കാരിന്‍റെ അറിവോടെയാണ് ഇതെന്ന് സംശയിക്കുന്നതായും ഡിസിസി പ്രസിഡന്‍റ് കെ. പ്രവീണ്‍കുമാറും മുസ്ലീം ലീഗ് ജില്ല പ്രസിഡന്‍റ് എം.എ റസാഖും വാര്‍ത്താസമ്മേളനത്തില്‍ ആരോപിച്ചു. വളയത്തെ സമാധാനന്തരീക്ഷം തകര്‍ക്കാനുള്ള ശ്രമത്തിന്‍റെ ഭാഗമാണിത്. തിരുവോണ നാളില്‍ ബൈക്കില്‍ അമിത വേഗതയില്‍ പോയ യുവാക്കളോട് പതുക്കെ പോകാന്‍ നിര്‍ദ്ദേശിച്ചയാളെ യുവാക്കള്‍ മര്‍ദ്ദിക്കുകയും പരിക്കേല്‍പ്പിക്കുകയുമായിരുന്നു. വര്‍ഗീയ പ്രചരണത്തിനാണ് സര്‍ക്കാര്‍ ശ്രമിച്ചിരിക്കുന്നത്. വടകരയുടെ കാഫിര്‍ പ്രയോഗത്തിന്‍റെ തുടര്‍ച്ചയാണിതെന്നും നേതാക്കള്‍ പറഞ്ഞു. റിമാന്‍ഡ് റിപ്പോര്‍ട്ട്് തയ്യാറാക്കിയ പൊലീസുകാര്‍ക്കെതിരെ നടപടിയില്ലെങ്കില്‍ യുഡിഎഫ് ശക്തമായ പ്രക്ഷോഭങ്ങളിലേക്ക് കടക്കുമെന്നും നേതാക്കള്‍ അറിയിച്ചു. വാര്‍ത്താസമ്മേളനത്തില്‍ യുഡിഎഫ് ജില്ല ചെയര്‍മാന്‍ കെ. ബാലനാരായണന്‍, മുസ്ലീംലീഗ് ജില്ല ജനറല്‍ സെക്രട്ടറി ടി.ടി ഇസ്മായില്‍ എന്നിവരും പങ്കെടുത്തു. ഐജി ഓഫീസിന് മുന്നില്‍ നിരാഹാര സമരം 16ന് കോഴിക്കോട്: കെഎസ്‌യു, യൂത്ത് കോണ്‍ഗ്രസ് നേതാക്കള്‍ക്കെതിരെയുള്ള പോലീസ് മര്‍ദ്ദനങ്ങളില്‍ പ്രതിഷേധിച്ച് 16ന് ജില്ല കോണ്‍ഗ്രസ് കമ്മിറ്റിയുടെ നേതൃത്വത്തില്‍ ഐജി ഓഫീസിന് മുന്നില്‍ നിരാഹാരസമരം നടത്തും. രാവിലെ ഒന്‍പത് മുതല്‍ വൈകീട്ട് അഞ്ച് വരെയാണ് സമരം. കെഎസ്‌യു, യൂത്ത് കോണ്‍ഗ്രസ് പ്രവര്‍ത്തകരെ ക്രൂരമായി മര്‍ദ്ദിച്ച പോലീസുകാര്‍ക്കെതിരെ നടപടി ആവശ്യപ്പെട്ടാണ് സമരമെന്നും വളയത്ത് വര്‍ഗീയ ധ്രവീകരണത്തിനെതിരെയും പ്രതിഷേധിക്കുമെന്ന് ഡിസിസി പ്രസിഡന്‍റ് വ്യക്തമാക്കി.

ഗോകുലം ഗോപാലനെ ഡോക്ടറേറ്റ് നൽകി ആദരിച്ചു

കോഴിക്കോട്: ചെന്നൈയിലെ വേൽസ് ഇൻസ്റ്റിറ്റ്യൂട്ട് ഓഫ് സയൻസ് ടെക്നോളജി ആൻഡ് അഡ്വാൻസ്ഡ് സ്റ്റഡീസ് കോൺവക്കേഷൻ കോളജ് കാമ്പസിൽ നടന്നു. വേൽസ് ഇൻസ്റ്റിറ്റ്യൂട്ട്' ചാൻസലർ ഐസരി ഗണേഷ് അധ്യക്ഷത വഹിച്ചു. കേന്ദ്ര മന്ത്രി അർജുൻ റാം മേഘ്‌വാൾ മുഖ്യാതിഥിയായി. ശ്രീഗോകുലം ഗ്രൂപ്പ്‌ ഓഫ് കമ്പനികളുടെ സ്ഥാപകനും ചെയർമാനുമായ ഗോകുലം ഗോപാലന് ഓണണറി ഡോക്ടറേറ്റ് നൽകി ആദരിച്ചു. കേന്ദ്ര മന്ത്രി അർജുൻ റാം മേഘവാളാണ് ഗോകുലം ഗോപാലന് ഡോക്ടറേറ്റ് നൽകിയത്. തമിഴ് സിനിമ സംവിധായകനും, നിർമ്മാതാവുമായ വെട്രിമാരൻ, മുൻ ഇന്ത്യൻ ക്രിക്കറ്റ് താരം രവിചന്ദ്രൻ അശ്വിൻ എന്നിവർക്കും ഓണററി ഡോക്ടറേറ്റ് നൽകി ആദരിച്ചു.

കൊടിയത്തൂരിൽ 35 ഹെക്ടർ സ്ഥലത്ത് കൂടി നെൽകൃഷി വികസിപ്പിക്കും

മുക്കം: കൊടിയത്തൂർ പഞ്ചായത്തിൽ കൂടുതൽ സ്ഥലത്ത് നെൽകൃഷി ചെയ്യുന്നതിന് പ്രോത്സാഹനവുമായി പഞ്ചായത്ത്. പുതുതായി 35 ഹെക്ടറിൽ നെൽകൃഷി ചെയ്യുന്നതിനായി നെൽവിത്ത് വിതരണത്തിന് തുടക്കമായി. നെൽകൃഷി വികസന പദ്ധതി പ്രകാരം വാർഷിക പദ്ധതിയിൽ ഉൾപ്പെടുത്തി 8.5 ലക്ഷം രൂപ ചെലവഴിച്ചാണ് പദ്ധതി നടപ്പാക്കുന്നത്. പഞ്ചായത്ത് സൗജന്യമായി വിത്ത് നൽകുമ്പോൾ ബ്ലോക്ക്‌, ജില്ലാ, പഞ്ചായത്തുകൾ സംയുക്തമായി കൂലിചെലവ് സബ്‌സിഡിയും നൽകും. നെൽവിത്ത് വിതരണം നടത്തി പ്രസിഡന്‍റ് ദിവ്യ ഷിബു പദ്ധതി ഉദ്ഘാടനം ചെയ്തു. വൈസ് പ്രസിഡന്‍റ് ഫസൽ കൊടിയത്തൂർ അധ്യക്ഷനായി. കൃഷി ഓഫീസർ രാജശ്രീ പദ്ധതി വിശദീകരിച്ചു. സ്റ്റാൻഡിംഗ് കമ്മിറ്റി ചെയർപേഴ്സൺമാരായ ആയിഷ ചേലപ്പുറത്ത്, മറിയം കുട്ടി ഹസൻ, വാർഡ് മെമ്പർമാരായ വി. ഷംലൂലത്ത് കോമളം തോണിച്ചാൽ, കൃഷി അസിസ്റ്റന്‍റ് നിഷ നെൽകർഷകർ തുടങ്ങിയവർ ചടങ്ങിൽ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]